Ba pun iya kelia, lebuh Allah Taala berengkah ngaga langit enggau dunya, dunya endang apin bisi bakal tauka gamal sereta nadai utai nguan. Semina ribut ti deras ari Allah Taala aja ti bepuput atas tasik ti agi petang. Allah Taala lalu bejaku, “Awakka penampak pegari.” Penampak lalu pegari. Allah Taala meda penampak nya manah; lalu Iya nyeraraka penampak nya ari pemetang. Iya ngumbai penampak nya “Siang” lalu pemetang nya dikumbai Iya “Malam.” Lemai abis lalu pagi pen datai. Nya hari ti keterubah. Lalu ku Allah Taala bejaku, “Awakka kebung pegari kena nyeraraka ai ti di atas ari ai ti di baruh. Nya alai Allah Taala ngaga kebung nya lalu nyeraraka ai ti di baruh kebung nya ari ai ti ari atas kebung nya. Utai nya lalu nyadi. Iya ngumbai kebung nya “Langit.” Lemai abis lalu pagi pen datai. Nya hari ti kedua. Udah nya Allah Taala bejaku, “Awakka ai ti di baruh langit begelumu ba siti endur, ngambika tanah pegari.” Utai nya lalu nyadi. Iya ngumbai tanah “Darat,” lalu ai ti begelumu dikumbai Iya “Tasik.” Lalu Allah Taala meda utai nya manah. Udah nya Iya bejaku, “Awakka tanah mansutka semua macham utai ti tumbuh: utai ti mansutka leka, enggau semua macham kayu ti mansutka buah ti bisi leka.” Utai nya lalu nyadi. Nya alai, tanah mansutka semua macham utai ti tumbuh, lalu Allah Taala meda utai nya manah. Lemai abis lalu pagi pen datai. Nya hari ti ketiga. Udah nya Allah Taala bejaku, “Awakka mayuh macham penampak pegari di langit, kena nyeraraka siang ari malam, enggau kena nunjukka maya hari, taun enggau maya gawai pengarap belabuh. Sida deka manchar di langit lalu meri penampak ngagai dunya.” Utai nya lalu nyadi. Nya alai Allah Taala ngaga dua igi penampak ti besai, iya nya mata hari ti bekuasa lebuh siang hari, enggau bulan ti bekuasa lebuh malam hari. Iya mega ngaga bintang. Iya ngengkahka semua penampak nya di langit, ngambika sida manchar ngagai dunya, bekuasa lebuh siang enggau lebuh malam hari, sereta nyeraraka penampak ari pemetang. Lalu Allah Taala meda utai nya manah. Lemai abis lalu pagi pen datai. Nya hari ti keempat. Udah nya Allah Taala bejaku, “Awakka ai penuh laban semua bansa utai ti idup, lalu awakka burung terebai di langit.” Nya alai Allah Taala ngaga jelu ti besai sereta nyelai di tasik, semua bansa utai ti idup dalam ai, enggau semua bansa burung. Lalu Allah Taala meda utai nya manah. Iya merekatka semua sida, lalu ngasuh utai ti idup dalam ai beranak betelesak, lalu ngemenuhka tasik. Iya mega ngasuh burung beranak betelesak di dunya. Lemai abis lalu pagi pen datai. Nya hari ti kelima. Udah nya Allah Taala bejaku, “Awakka dunya mansutka semua bansa jelu ti idup: jelu tupi, jelu babas, enggau jelu ti ngerayap.” Utai nya lalu nyadi. Nya alai Allah Taala ngaga semua bansa jelu, lalu Iya meda semua utai nya manah magang. Udah nya Allah Taala bejaku, “Aram Kitai ngaga mensia neladan gamal Kitai Empu, baka gamal Kitai Empu; lalu awakka sida bekuasa atas ikan, burung, enggau semua jelu di dunya tu, enggau semua utai ti ngerayap ba tanah.” Nya alai Allah Taala ngaga mensia neladan gamal Iya Empu; Iya ngaga sida lelaki enggau indu. Allah Taala merekatka sida, lalu bejaku ngagai sida, “Beranak betelesak lalu ngemenuhka dunya meh kita sereta bekuasa atas iya; perintah meh ikan, burung, enggau semua utai ti idup di dunya.” Ku Allah Taala bejaku, “Aku meri kita semua macham leka utai enggau semua macham buah nyadika pemakai kita; lalu ke semua bansa jelu babas ti di dunya, enggau ke semua bansa burung, Aku meri sida rumput enggau utai ti bisi daun nyadika pemakai sida.” Utai nya lalu nyadi. Allah Taala meda semua utai ti udah digaga Iya manah magang. Lemai abis lalu pagi pen datai. Nya hari ti keenam. Nya alai langit enggau dunya, enggau semua utai ti dalam sida tembu magang digaga. Ba hari ti ketujuh Allah Taala tembu ngereja semua pengawa Iya, lalu ngetu gawa. Iya merekatka hari ti ketujuh nya, lalu ngeletak hari nya kudus, laban ba hari nya Iya tembu ngaga semua utai ti digaga Iya, lalu Iya belelak lalu ngetu gawa. Nya meh jalai langit enggau dunya digaga. Lebuh TUHAN ngaga langit enggau dunya, nadai utai udah tumbuh di dunya, lalu nadai leka utai udah matuk, laban TUHAN Allah Taala apin ngasuh hari ujan, lalu mensia pen apin mega bisi gawa ba tanah; tang ai deka pansut ari dalam tanah, lalu ngemasahka tanah. Udah nya TUHAN Allah Taala nempa mensia ari amau tanah lalu ngesuhka seput pengidup ke dalam lubang idung iya, lalu mensia nya idup. Udah nya TUHAN Allah Taala ngaga siti kebun di menua Eden, ti muak ke timur, lalu ngengkahka orang ke udah ditempa Iya ba kebun nya. TUHAN Allah Taala ngasuh semua bansa kayu ti manah dipeda sereta manah ke pemakai tumbuh dia. Ba tengah-tengah kebun nya bisi mega sepun kayu pengidup, enggau sepun kayu ti meri penemu kena ngelala bida entara utai ti manah ari utai ti jai. Siti sungai pansut ari Eden ti mai ai ngagai kebun nya, lalu ngilah kebun nya sungai nya bepati empat. Nama pati ti terubah nya Pison. Ai sungai nya rarat nengah menua Habilah. ( Emas tulin bisi ditemu dia, lalu pia mega minyak wangi enggau batu ti berega.) Nama pati ti kedua nya Gihon. Ai sungai nya rarat nengah menua Kus. Nama pati ti ketiga nya Tigris. Ai sungai nya rarat tunga ke timur menua Asiria, lalu pati ti keempat nya Eupratis. Udah nya TUHAN Allah Taala ngengkahka orang nya ba kebun Eden, ngambika iya gawa dia lalu nyaga kebun nya. Ku TUHAN Allah Taala bejaku ngagai orang nya, “Nuan tau makai buah ari semua kayu dalam kebun tu, tang nuan enda tau makai buah ari kayu penemu ti tau ngasuh nuan nemu semua utai, laban lebuh nuan makai buah nya, nuan deka mati.” Udah nya TUHAN Allah Taala bejaku, “Enda manah orang tu diau kediri. Aku deka ngaga siku penulung ke iya, nyadika tawing kaling iya.” TUHAN Allah Taala lalu nempa ari tanah semua bansa jelu enggau semua bansa burung. Udah nya Iya lalu mai sida ngagai orang nya, ngambika iya meri sida nama. Nya meh jalai sida bulih nama. Nya alai orang nya meri nama ngagai semua bansa jelu tupi, semua bansa burung, enggau semua bansa jelu babas; tang nadai siku sida nya ditemu tau nyadika penulung enggau kaling iya. Nya alai TUHAN Allah Taala ngasuh orang nya tinduk jenak. Orang nya lalu tinduk. Udah nya TUHAN Allah Taala lalu ngambi siti tulang kerigai orang nya, lalu nampal abi nya ngena isi. TUHAN Allah Taala lalu nempa siku indu ari tulang kerigai nya, lalu mai indu nya ngagai iya. Orang nya lalu bejaku, “Tu baru sedarah, segetah enggau aku saum tulang, saum isi enggau aku. Iya dikumbai “Indu”, laban iya udah diambi ari lelaki.” Nya kebuah lelaki ninggalka apai indai iya, lalu begulai enggau bini iya, lalu seduai iya nyadi siku. Seduai iya sama telanjai, tang seduai iya enda malu. Nyadi ular nya jelu ti pintar agi ari semua jelu bukai ti udah digaga TUHAN Allah Taala. Ular nya lalu bejaku ngagai indu nya, “Kati amat Allah Taala enda nyagi seduai makai buah ari semua kayu ti dalam kebun tu?” Disaut indu nya, “Kami duai tau makai buah ari sebarang kayu dalam kebun tu, tang Allah Taala madahka kami duai enda tau makai buah ari kayu ti ba tengah-tengah kebun, tauka negu buah kayu nya, enggai ke kami duai mati.” Tang ku ular nya nyaut indu nya, “Enda seduai mati, laban Allah Taala nemu, lebuh seduai makai buah nya, seduai deka nyadi sebaka enggau Allah Taala, nemu ngelala bida entara utai ti manah enggau utai ti jai.” Lebuh indu nya meda buah kayu nya manah ke pemakai sereta manah dipeda, lalu tau ngasuh pintar, iya lalu makai buah nya. Iya mega meri sekeda buah nya ngagai laki iya, ke bisi enggau iya, lalu laki iya mega makai buah nya. Lebuh seduai iya udah makai buah nya, mata seduai iya tebuka, lalu seduai iya nemu diri telanjai. Seduai iya lalu nyait daun kayu ara, kena seduai iya mampul tubuh diri. Lemai nya seduai iya ninga TUHAN Allah Taala bejalai dalam kebun. Seduai iya lalu belalai ari TUHAN Allah Taala ba sebelah madang kayu dalam kebun nya. Tang TUHAN Allah Taala ngangauka lelaki nya, ku Iya, “Dini alai nuan?” Lelaki nya lalu nyaut, “Aku ninga Nuan bisi dalam kebun, lalu aku takut, laban aku telanjai. Nya alai aku belalai.” TUHAN Allah Taala lalu nanya iya, “Sapa madahka nuan telanjai? Kati nuan bisi udah makai buah ti enda disagi Aku empa nuan?” Lelaki nya lalu nyaut, “Indu ke diberi Nuan nyadika tawing kaling aku, ke meri buah ari kayu nya ngagai aku, lalu aku makai.” TUHAN Allah Taala lalu bejaku ngagai indu nya, “Nama kebuah nuan ngereja nya?” Indu nya lalu nyaut, “Ular nya ti nipu aku, lalu aku makai buah nya.” TUHAN Allah Taala lalu bejaku ngagai ular nya, “Laban nuan udah ngereja nya, nuan deka kena sumpah. Ari semua bansa jelu, ka semina nuan aja deka ditinggang sumpah tu. Kenyau ari diatu nuan deka ngerayap ngena perut nuan, lalu nuan deka makai amau seumur idup. Aku deka ngasuh nuan enggau indu tu begedika pangan diri. Anak iya enggau anak nuan deka seruran bemunsuh enggau pangan diri. Anak iya deka ngeredakka pala nuan, lalu nuan deka mantuk tumbit anak iya.” TUHAN Allah Taala lalu bejaku ngagai indu nya, “Aku deka nambahka pemerinsa nuan lebuh nuan ngandung, lalu nambahka pemedis nuan lebuh nuan beranak, tang taja pia, nuan deka seruran inginka laki nuan, lalu iya deka bekuasa atas nuan.” TUHAN Allah Taala lalu bejaku ngagai lelaki nya, “Laban nuan udah mendingka jaku bini nuan, lalu udah makai buah ti enda disagi Aku, nya alai tanah deka kena sumpah, lalu nuan deka bebendar gawa ngulihka pemakai ari tanah seumur nuan idup. Tanah deka tumbuh rumput enggau duri, lalu nuan deka bepakaika utai ti diambi ari babas. Nuan deka bepeluh tusur ngulihka asil ari tanah, nyentuk ngagai maya nuan pulai baru ngagai tanah, laban nuan endang ditempa ari tanah. Nuan endang digaga ari amau, nya alai ngagai amau meh nuan pulai.” Adam ngumbai bini iya Awa, laban iya indai semua mensia. TUHAN Allah Taala lalu ngaga gari ari kulit jelu ke Adam enggau bini iya, lalu ngerasukka gari nya ba seduai iya. TUHAN Allah Taala lalu bejaku, “Mensia nyau sebaka enggau Kitai, nemu bagi utai ti manah enggau utai ti jai. Sida enda tau ngambi buah ari kayu pengidup, enggai ke sida makai buah nya, lalu idup belama iya.” Nya alai TUHAN Allah Taala muai seduai iya ari kebun Eden lalu ngasuh seduai iya gawa beridup ba tanah ti udah dikena nempa seduai iya empu. Udah nya TUHAN Allah Taala ngengkahka melikat cherubim enggau pedang ti beapi-api, ti mantap kia-kia, ba tisi timur kebun nya kena nyaga jalai ngagai kayu pengidup nya. Udah nya Adam lalu besetubuh enggau bini iya. Bini iya ngandung, lalu ngadaka anak lelaki siku. Ku bini iya bejaku, “Aku ngadaka anak lelaki tu ari saup TUHAN.” Nya alai iya meri iya nama Kain. Udah nya iya ngadaka siku agi anak lelaki benama Abel. Abel nyadi pengibun bedus, lalu Kain nyadi orang bumai. Nyau kelama udah bekau nya, Kain mai sekeda utai ti diketau iya, lalu meri utai nya nyadika piring ngagai TUHAN. Udah nya Abel mai anak bungas ari raban bedus iya, nyayat jelu nya, lalu meri perengka tubuh ti pemadu manah nyadika piring. TUHAN rinduka Abel enggau piring iya, tang Iya enda rinduka Kain enggau piring iya. Kain ringat, lalu mua iya mengut-mengut. Udah nya TUHAN lalu bejaku enggau Kain, “Nama kebuah nuan ringat, lalu mengut-mengut? Enti nuan udah ngereja utai ti ngena, nuan tentu deka tuchum; tang laban nuan udah ngereja utai ti jai, dosa diatu benung ngipa nuan ba mua pintu nuan. Iya keran deka merintah nuan, tang nuan enda tau enda ngalahka iya.” Udah nya Kain bejaku enggau menyadi iya Abel, “Aram tua ke babas.” Lebuh seduai iya di babas, Kain ngamuk lalu munuh menyadi iya. TUHAN lalu nanya Kain, “Dini alai menyadi nuan Abel?” Disaut Kain, “Nadai aku nemu. Kati aku pengibun menyadi aku?” Udah nya TUHAN lalu bejaku, “Nama utai tu ti udah dikereja nuan? Darah menyadi nuan nyabak ngangauka Aku ari tanah. Lalu diatu nuan kena sumpah ari tanah ti udah merangapka nyawa nerima darah menyadi nuan ti neritik ari jari nuan. Lebuh nuan bumai ba tanah, tanah nya enda mansutka asil. Nuan deka bejalai segau-segau di dunya tu, nadai endur alai diau.” Ku Kain bejaku enggau TUHAN, “Ukum tu kelalu berat ke aku. Sehari tu Nuan muru aku ari menua tu enggau ari mua Nuan. Aku deka bejalai segau-segau di dunya tu, nadai endur alai diau, lalu barang sapa tetemuka aku, deka munuh aku.” Tang ku TUHAN nyaut, “Ukai baka nya. Enti orang munuh nuan, orang nya deka diukum tujuh kali lipat.” TUHAN lalu ngengkahka siti kelai ba Kain, enggai ke orang ke betemu enggau iya munuh iya. Kain lalu beserara ari TUHAN, lalu diau di menua ti dikumbai “Segau-segau,” muak ke timur ari menua Eden. Kain enggau bini iya bisi siku anak lelaki benama Enok. Udah nya Kain lalu nirika sebuah nengeri, lalu iya ngumbai nengeri nya Enok, ngangkatka nama anak iya. Enok bisi siku anak lelaki benama Irat. Irat nya apai Mehujael. Mehujael bisi siku anak lelaki benama Metusael. Metusael nya apai Lamek. Lamek bisi dua iku bini, Adah enggau Silah. Adah ngadaka Jabal, ke nurunka orang ke betupika jelu, lalu diau dalam langkau kain. Menyadi iya ke benama Jubal, nurunka semua orang ke nebah belikan enggau kesuling. Silah ngadaka Tubal Kain, ke begagaka semua macham pekekas kena gawa ari temaga enggau ari besi. Menyadi indu Tubal Kain nya Naamah. Ku Lamek bejaku enggau bini iya ke dua iku nya, “Adah enggau Silah, pendingka aku: Aku udah munuh siku lelaki, laban iya ngemakalka aku. Enti orang ke munuh Kain diukum tujuh kali lipat, orang ke munuh Lamek deka diukum tujuh puluh tujuh kali lipat.” Adam enggau bini iya bisi siku agi anak lelaki. Ku bini iya bejaku, “Allah Taala udah meri aku siku anak lelaki kena nganti Abel ti udah dibunuh Kain.” Nya alai Awa meri iya nama Set. Set bisi siku anak lelaki benama Enos. Nya meh maya mensia belabuh ngangauka nama TUHAN. Baka tu ku ripih peturun Adam. (Lebuh Allah Taala ngaga mensia, Iya ngaga sida baka gamal Iya Empu. Iya ngaga sida lelaki enggau indu, merekatka sida, lalu ngumbai sida “Mensia”) Lebuh umur Adam 130 taun, iya bisi siku anak lelaki ke sebaka gamal enggau iya empu, lalu iya meri iya nama Set. Udah nya Adam idup 800 taun. Iya bisi anak ti bukai lalu iya mati umur 930 taun. Lebuh Set umur 105 taun, iya bisi anak lelaki siku benama Enos, lalu Set idup 807 taun udah lepas nya. Iya bisi anak ti bukai lalu iya mati umur 912 taun. Lebuh umur Enos 90 taun, iya bisi siku anak lelaki benama Kenan, lalu Enos idup 815 taun udah lepas nya. Iya bisi anak ti bukai, lalu iya mati umur 905 taun. Lebuh Kenan umur 70 taun, iya bisi siku anak lelaki benama Mahalalel, lalu Kenan idup 840 taun udah lepas nya. Iya bisi anak ti bukai lalu iya mati umur 910. Lebuh Mahalalel umur 65 taun, iya bisi siku anak lelaki benama Jaret, lalu Mahalalel idup 830 taun udah lepas nya. Iya bisi anak ti bukai lalu iya mati umur 895 taun. Lebuh umur Jaret 162 taun, iya bisi anak lelaki siku benama Enok, lalu Jaret idup 800 taun udah lepas nya. Iya bisi anak ti bukai lalu iya mati umur 962 taun. Lebuh umur Enok 65 taun, iya bisi siku anak lelaki benama Metuselah. Udah bekau nya, Enok diau begulai sejalai enggau Allah Taala 300 taun, lalu bisi anak ti bukai. Enok idup datai ngagai umur 365 taun. Iya diau begulai sejalai enggau Allah Taala, lalu udah nya iya lesap, laban Allah Taala ngambi iya. Lebuh Metuselah umur 187 taun, iya bisi siku anak lelaki benama Lamek, lalu Metuselah idup 782 taun udah lepas nya. Iya bisi anak ti bukai lalu iya mati umur 969 taun. Lebuh Lamek umur 182 taun, iya bisi siku anak lelaki lalu ku iya, “Anak mit tu deka ngelantangka kitai ti ngereja pengawa ti mar ba tanah ti udah disumpah TUHAN ”. Nya alai iya meri iya nama Noah. Lamek idup 595 taun udah lepas nya. Iya bisi anak ti bukai lalu iya mati umur 777 taun. Lebuh Noah umur 500 taun, iya bisi tiga iku anak lelaki, Sem, Ham enggau Japet. Lebuh mensia udah diau ngachir di serata dunya, lalu ngadaka anak indu, sekeda anak Allah Taala meda sida indu nya bajik gamal. Nya alai sida lalu jadi enggau indu ke dikerinduka sida. Udah nya TUHAN lalu bejaku, “Aku enda nyagi mensia idup belama iya, laban sida endang tau mati. Belabuh ari diatu sida enda tau idup ngelui 120 taun.” Lebuh maya nya kelia, enggau udah lepas nya, orang ke besai gamal bisi diau di dunya tu. Sida nya peturun indu mensia ti jadi enggau bala anak Allah Taala. Sida nya bujang berani ti tampak nama dulu kelia. Lebuh TUHAN meda penyai semua orang di dunya tu, enggau runding sida ke seruran jai, Iya ngesal udah ngaga sida lalu ngengkahka sida di dunya tu. Iya balat amat ngesalka nya datai ke Iya nyau bejaku, “Aku deka munuh semua mensia ti udah digaga Aku, enggau jelu enggau burung, laban Aku ngesal udah ngaga sida.” Tang Noah ngelantangka ati TUHAN. tang semua orang bukai jai magang di mua Allah Taala, lalu penyai udah ngelekai ngagai semua endur. Allah Taala merening lalu meda penyai dunya, laban semua mensia bela ngereja penyai magang. Allah Taala lalu bejaku enggau Noah, “Aku deka ngeluska semua mensia. Aku deka ngerusak sida abis lengis, laban dunya tu penuh laban pengawa sida ke jai. Gaga sebuah bandung ke diri empu ngena kayu ramu ti manah. Sapat bandung nya ngagai mayuh bengkah bilik, lalu pelali iya ngena tar, ari dalam enggau ari luar. Pemanjai iya seratus tiga puluh tiga meter, buka iya dua puluh dua meter, lalu peninggi iya tiga belas meter. Gaga perabung ke bandung nya, lalu gaga lubang penyenguk empat puluh empat sentimeter peninggi entara perabung enggau gandung bandung nya. Gaga tiga tingkat dalam bandung nya, lalu gaga siti pintu ba tisi bandung nya. Aku deka ngasuh ai bah ngampuhka dunya kena ngerusak semua utai ti idup. Semua utai di dunya tu deka mati magang, tang Aku deka ngaga siti sempekat enggau nuan. Nuan, bini nuan, sida anak nuan, enggau bini sida, enda tau enda tama ngagai bandung nya. Bai semua bansa pemakai ke kita empu, enggau ke sida.” Noah lalu ngereja semua utai nitihka asuh Allah Taala. Ku TUHAN bejaku ngagai Noah, “Bai semua kita sebilik tama ngagai bandung nya. Aku nemu, ka semina nuan siku aja dalam dunya tu ti ngereja utai ti ngena. Bai enggau nuan tujuh pasang ari semua bansa jelu ti tuchi, tang semina sepasang aja ari semua jelu ti enda tuchi. Bai mega tujuh pasang ari semua bansa burung. Kereja nya, ngambika semua bansa jelu enggau burung deka mengkang idup lalu beranak betelesak baru di dunya tu. Tujuh hari da agi, Aku deka ngasuh hari ujan 40 hari, 40 malam, kena ngerusak semua utai ti idup, ti udah digaga Aku.” Noah lalu ngereja semua utai nitihka asuh TUHAN. Umur Noah 600 taun lebuh bah besai nya nyadi di dunya tu. Iya enggau bini iya, enggau anak iya, enggau bini sida, tama ngagai bandung nya, ngerarika diri ari bah besai nya. Siku lelaki enggau siku indu ari semua bansa jelu enggau burung, nemuka sida nya tuchi tauka enda, tama ngagai bandung nya sama enggau Noah, munyi ti udah diasuh Allah Taala. Tujuh hari udah bekau nya, bah besai lalu nyadi. Lebuh umur Noah 600 taun, kena hari ti ketujuh belas dalam bulan ti kedua, semua lubang ai ti di baruh tanah lalu pambus tebuka, lalu semua pintu ai ti di langit tebuka magang. Hari lalu enda ngetu-ngetu ujan 40 hari, 40 malam. Ba hari nya Noah enggau bini iya tama ngagai bandung, sama enggau anak seduai iya ke tiga iku, Sem, Ham enggau Japet, enggau bini sida. Semua bansa jelu, jelu tupi enggau jelu babas, ti besai enggau ti mit, enggau semua bansa burung sama tama enggau sida. Siku lelaki enggau siku indu ari genap bengkah bansa utai ti idup, tama ngagai bandung nya sama enggau Noah, nitihka asuh Allah Taala. Udah nya TUHAN lalu nikupka pintu bandung nya ari belakang Noah. Hari lalu enda ngetu-ngetu ujan 40 hari, datai ke ai nya nyau chukup alai bandung nya melepung. Ai mansang dalam-sedalam, lalu bandung nya melepung. Ai nya dalam amat, datai ke iya nyau ngampuhka semua bukit ti tinggi. Ai nya majak dalam-sedalam datai ke penalam iya nyau kira tujuh meter ngampuhka tuchung bukit. Semua utai ti idup di dunya tu mati magang, nyengkaum semua burung, semua jelu enggau semua mensia. Semua utai ti enseput di dunya tu, mati magang. TUHAN ngerusak semua utai ti idup di dunya tu: mensia, jelu, enggau burung. Ka semina Noah, enggau semua orang ke sama enggau iya dalam bandung nya aja agi idup. Ai nya mengkang enda surut dalam pengelama 150 hari. Tang Allah Taala ingatka Noah enggau semua jelu ti sama enggau iya dalam bandung nya. Iya lalu ngasuh ribut bepuput, lalu ai bah nya mupuk surut. Lubang ai ti di baruh tanah, enggau pintu ai ti di langit ditutup. Ujan lalu teduh, lalu ai bah nya majak surut-sesurut dalam pengelama 150 hari. Ba hari ti ketujuh belas dalam bulan ti ketujuh, bandung nya lalu tepanggai ba gerinjing bukit Ararat. Ai majak surut, lalu kena satu hari bulan dalam bulan ti kesepuluh, tuchung bukit lalu belabuh ayan. Empat puluh hari udah bekau nya, Noah muka jenila lalu ngelepaska siku burung kak. Burung nya nadai pulai, tang majak terebai datai ke bah nya nyau udah abis surut. Udah nya Noah ngelepaska siku burung achang, kena nentuka enti ai nya amat udah surut. Tang laban ai bah nya agi ngelamun semua tanah, burung achang nya nadai nemu endur alai inggap, lalu iya pulai baru ngagai bandung nya. Noah nyengkau lalu ngambi burung achang nya ke dalam. Noah nganti tujuh hari da agi udah bekau nya. Udah nya iya ngelepaska burung achang nya baru. Burung achang nya pulai baru ngagai iya lemai nya, manggum daun kana. Nya baru Noah nemu ai bah nya nyau udah abis surut. Udah nya Iya nganti tujuh hari da agi, lalu ngelepaska burung achang nya baru. Sekali tu, burung achang nya nadai pulai. Lebuh umur Noah nyau manggai 601 taun, kena satu hari bulan ti kesatu, ai bah nya nadai agi. Noah lalu muka atap bandung. Iya malik kiba kanan, lalu meda tanah nyau udah mupuk rangkai. Kena dua puluh tujuh hari bulan ti kedua, semua tanah nyau udah rangkai magang. Allah Taala lalu bejaku ngagai Noah, “Pansut nuan enggau bini nuan, anak nuan enggau bini sida ari bandung tu. Bai pansut magang semua burung enggau semua jelu, ngambika sida beranak betelesak lalu ngachir ba sebelah dunya.” Noah lalu pansut ari bandung nya sama enggau bini iya, enggau anak iya sereta enggau bini sida. Semua jelu enggau semua burung pansut magang ari bandung nya, nitihka bansa sida empu. Noah lalu ngaga siti alta ke TUHAN. Iya ngambi siku ari genap bengkah bansa jelu enggau burung ti tuchi, lalu nunu sida segala ba alta nya, nyadika piring. Bau piring nya ngerinduka ati TUHAN, lalu ku Iya bejaku dalam ati Diri, “Aku enggai agi nyumpah tanah ketegal mensia, laban Aku nemu, kenyau ari sida agi biak, runding sida endang jai. Aku enggai agi ngerusak semua utai ti idup, baka ke udah dikereja Aku sekali tu. Seagi-agi dunya tu mengkang bisi, maya betanam, enggau maya ngetau endang mengkang bisi. Maya chelap, enggau maya angat endang bisi. Musin panas, musin chelap, siang enggau malam, endang enda nemu abis.” Allah Taala lalu merekatka Noah enggau bala anak iya, ku Iya, “Beranak betelesak meh kita, lalu ngemenuhka dunya. Semua jelu, burung, enggau ikan deka takutka kita. Semua sida di baruh kuasa kita magang. Diatu kita tau makai sida, lalu kita tau mega makai utai ti tumbuh. Aku meri semua utai nya nyadika pemakai kita. Tang kita enda tau makai dagin ti agi bedarah, laban darah ngundan seput. Aku deka meri ukum bunuh ngagai sebarang sapa munuh orang. Aku deka meri ukum bunuh ngagai jelu ti munuh mensia. Barang sapa munuh orang deka dibunuh, laban mensia digaga neladan gamal Allah Taala. “Beranak betelesak meh kita, lalu ngemenuhka dunya.” Ku Allah Taala bejaku ngagai Noah enggau bala anak iya, “Aku ngaga sempekat enggau nuan sereta enggau peturun nuan ti nangkanka nuan, sereta enggau semua utai ti idup - semua burung, enggau semua jelu - semua utai ti pansut ari bandung sama enggau nuan. Ngena sempekat tu, Aku besemaya enda agi ngerusak dunya enggau semua utai ti idup di dunya, ngena ai bah. Kena Aku nanda sempekat ti meruan belama iya tu ti digaga Aku enggau nuan, sereta enggau semua utai ti idup, Aku ngengkahka anakraja ba remang nyadika kelai kena nandaka sempekat Aku enggau dunya. Genap kali Aku mungkur langit ngena mua hari, lalu anakraja pegari ba remang, Aku deka ingatka sempekat Aku enggau nuan, sereta enggau semua jelu: ai bah enda agi ngerusak semua utai ti idup di dunya tu. Lebuh anakraja nya ayan ba remang, Aku deka meda iya, lalu ingatka sempekat ti meruan belama iya tu entara Aku enggau semua utai ti idup di dunya tu. Nya meh kelai sempekat ti digaga Aku enggau semua utai ti idup di dunya tu.” Anak lelaki Noah ke pansut ari bandung nya Sem, Ham, enggau Japet. (Ham nya apai Kanaan.) Anak Noah ke tiga iku nya meh orang ke nurunka semua mensia di dunya tu. Noah nya orang bumai. Iya nya orang ke terubah-rubah numbuhka kebun anggur. Lebuh iya udah ngirup wain, iya mabuk, nelanjaika diri lalu gali dalam langkau kain iya. Lebuh Ham, iya nya apai Kanaan, meda apai iya telanjai, iya lalu pansut ke luar, lalu madahka menyadi iya ke dua iku. Udah nya Sem seduai Japet lalu ngambi baju panjai siti, lalu megai baju panjai nya ari belakang seduai iya, ba bau seduai. Seduai iya lalu bejalai surut tama ngagai langkau kain nya, lalu mungkur apai sida, nguingka mua seduai iya kebukai ngambika seduai iya enda meda apai sida telanjai. Lebuh Noah udah gerai mabuk, lalu nemu pasal utai ti udah dikereja anak bunsu iya ngagai iya, iya lalu bejaku, “Tulah Kanaan! Iya deka nyadi ulun sida menyadi iya. Puji meh TUHAN Allah Taala Sem! Kanaan deka nyadi ulun Sem! Awakka Allah Taala nambahka pemesai menua Japet! Awakka peturun iya diau begulai enggau peturun Sem! Kanaan deka nyadi ulun Japet.” Udah bekau bah besai nya, Noah idup 350 taun da agi. Iya mati umur 950 taun. Tu peturun anak lelaki Noah ke benama Sem, Ham enggau Japet. Udah bekau bah besai nya, sida tiga tu bisi anak lelaki. Bala anak lelaki Japet nya Gomer, Magok, Madai, Jaban, Tubal, Mesek, enggau Tiras. Sida tu nurunka bansa ti ngangkatka nama sida. Peturun Gomer nya orang Askenas, Ripat, enggau Togarmah. Bala peturun Jaban nya orang Elisah, Spain, Saiprus enggau Rot. Sida nya meh orang ke nurunka bansa ti diau ba sebelah tebing tasik, enggau ba sebelah pulau di tasik. Nya meh gaya bala peturun Japet ti diau nitihka raban bansa enggau menua sida empu. Genap bengkah raban bansa nya endang bisi jaku ke diri empu. Bala anak lelaki Ham, iya nya Kus, Ejip, Libia, enggau Kanaan, nurunka bansa ti ngangkatka nama sida. Peturun Kus nya orang Seba, Habilah, Sabtah, Ramah, enggau Sapteka. Peturun Ramah nya orang Sheba enggau Dedan. Kus bisi anak lelaki siku ke benama Nimrot, orang ke terubah-rubah nyadi bujang berani di dunya tu. Ari saup TUHAN, iya nyadi orang ke landik ngasu. Nya kebuah orang nyebut, “Awakka TUHAN ngaga nuan nyadi orang ke landik ngasu baka Nimrot!” Menua ti terubah diperintah iya nyengkaum Babel, Erek, enggau Akat, semua menua nya di menua Babilon magang. Ari menua nya iya mansang ngagai menua Asiria lalu nirika nengeri Nineweh, Rihobot Ir, Kalah, enggau Resen, ba entara Nineweh enggau nengeri ti besai ke benama Kalah. Peturun Ejip nya orang Lidia, Anam, Lehap, Naptuh, Patrus, Kasluh, enggau Krit. Tu orang ke nurunka orang Pilistin. Anak Kanaan nya Sidon, anak tuai iya, enggau Het. Seduai tu nurunka bansa ti ngangkatka nama seduai iya. Kanaan mega nurunka orang Jebus, orang Amor, orang Girgas, orang Ibi, orang Arka, orang Sin, orang Arbat, orang Semar, enggau orang Hamat. Raban orang Kanaan ngachir ngagai menua bukai. Menua orang Kanaan berengkah ari Sidon ngerembai tunga ke selatan nuju ngagai Gerar, nyentuk ngagai Gasa, enggau tunga ke timur nyentuk ngagai Sodom, Gomorah, Admah, enggau Seboim semak Lasa. Nya meh gaya peturun Ham. Sida diau nitihka raban bansa enggau menua sida empu, lalu siti-siti raban bansa nya endang bisi jaku ke diri empu. Sem, iya nya aka Japet, nurunka semua orang Hebrew. Bala anak lelaki Sem nya Elam, Asur, Arpaksat, Lut, enggau Aram. Sida tu nurunka bansa ti ngangkatka nama sida. Bala peturun Aram nya orang Us, Hul, Geter, enggau Mesek. Arpaksat nya apai Selah, lalu Selah nya apai Eber. Eber bisi dua iku anak lelaki. Siku benama Pelek, laban lebuh rambau iya kelia, orang di dunya tu nyau bepechah-belah; lalu siku nama Joktan. Bala peturun Joktan nya orang Almodat, Selep, Hasarmabet, Jerah, Hadoram, Usal, Diklah, Obal, Abimael, Sheba, Opir, Habilah, enggau Jobap. Semua sida tu peturun Joktan magang. Menua ti alai sida diau nya berengkah ari Mesa nyentuk ngagai Separ di menua ti bebukit di timur. Nya meh gaya bala peturun Sem, lalu sida diau nitihka raban bansa enggau menua sida empu, lalu genap bengkah raban bansa nya endang bisi jaku ke diri empu. Semua sida nya endang peturun Noah magang, nitihka genap bengkah bansa, enggau peturun sida. Udah bekau bah nya, semua bansa dalam dunya tu endang peturun bala anak lelaki Noah magang. Terubah iya kelia, orang di dunya tu bejaku ngena siti aja jaku. Lebuh sida segau-segau bejalai di Timur, sida datai ba emperan menua Babilon, lalu ngentapka diri dia. Ku sida berandau enggau pangan diri, “Aram kitai ngaga batu bata, lalu nunu batu bata nya ngambika kering.” Nya alai sida bisi batu bata ti dipejantilka sida ngena tar. Ku sida bejaku, “Aram kitai ngaga sebuah nengeri, enggau sebuah menara ti bediri nyentuk ke langit, ngambika kitai tampak nama, lalu enda pambar di serata dunya.” Udah nya TUHAN nurun, deka meda nengeri enggau menara ti udah digaga sida, lalu ku Iya bejaku, “Sida tu sama sebansa magang, lalu bejaku ngena siti aja jaku. Tu semina pun ke semua utai ti deka dikereja sida. Enda lama da agi sida ulih ngaga sebarang utai ti dikedekaka sida! Aram Kitai nurun lalu nyarutka jaku sida, ngambika sida enda meretika utai ti disebut pangan diri.” Nya alai TUHAN ngachirka sida di serata dunya, lalu sida badu agi ngaga nengeri nya. Nengeri nya dikumbai Babel, laban TUHAN udah nyarutka jaku semua mensia di nengeri nya, lalu ari nya Iya ngachirka sida di serata dunya. Baka tu ku peturun Sem. Dua taun udah bekau bah besai, lebuh umur Sem 100 taun, iya bisi siku anak lelaki ke benama Arpaksat. Udah bekau nya, iya mengkang idup 500 taun da agi, lalu bisi anak ti bukai. Lebuh Arpaksat umur 35 taun, iya bisi siku anak lelaki benama Selah. Udah bekau nya, iya mengkang idup 403 taun da agi, lalu bisi anak ti bukai. Lebuh Selah umur 30 taun, iya bisi siku anak lelaki benama Eber. Udah bekau nya, iya mengkang idup 403 taun da agi, lalu bisi anak ti bukai. Lebuh Eber umur 34 taun, iya bisi siku anak lelaki benama Pelek. Udah bekau nya, iya mengkang idup 430 taun da agi, lalu bisi anak ti bukai. Lebuh umur Pelek 30 taun, iya bisi siku anak lelaki benama Reu. Udah bekau nya iya mengkang idup 209 taun da agi, lalu bisi anak ti bukai. Lebuh umur Reu 32 taun, iya bisi siku anak lelaki benama Seruk. Udah bekau nya iya mengkang idup 207 taun da agi, lalu bisi anak ti bukai. Lebuh Seruk umur 30 taun, iya bisi siku anak lelaki benama Nahor. Udah nya iya mengkang idup 200 taun da agi, lalu bisi anak ti bukai. Lebuh Nahor umur 29 taun, iya bisi siku anak lelaki benama Terah. Udah nya iya mengkang idup 119 taun da agi, lalu bisi anak ti bukai. Lebuh umur Terah udah manggai 70 taun, iya nyadi apai Abram, Nahor, enggau Haran. Tu peturun Terah apai Abram, Nahor enggau Haran. Haran nya apai Lot, lalu Haran mati ba nengeri ada iya di Ur, dalam menua Babilon, lebuh apai iya Terah agi idup. Abram jadi enggau Sarai, lalu Nahor jadi enggau Milkah, anak indu Haran. Haran mega apai Iskah. Nyadi Sarai mandul. Terah mai anak iya Abram, uchu iya Lot, iya nya anak Haran, enggau menantu indu iya, Sarai, iya nya bini Abram, angkat ari nengeri Ur di menua Babilon lalu pindah ngagai menua Kanaan. Sida bejalai naka Haran lalu ngentapka diri dia. Dia meh endur alai Terah mati lebuh umur iya 205 taun. Ku TUHAN bejaku ngagai Abram, “Tinggalka menua nuan, kaban belayan, enggau rumah apai nuan, lalu bejalai ngagai menua ti deka ditunjukka Aku ngagai nuan. Aku deka meri nuan mayuh peturun, lalu sida deka nyadi bansa ti besai; Aku deka merekatka nuan, lalu ngaga nuan nyadi orang ke tampak nama; ngambika nuan nyadi berekat ke orang bukai. Aku deka merekatka orang ke merekatka nuan, lalu Aku deka nyumpah orang ke nyumpah nuan; lalu ngena nuan merekatka semua bansa. Lebuh umur Abram 75 taun, iya angkat ari Haran, nitihka asuh TUHAN, lalu Lot mupuk enggau iya. Abram mai bini iya Sarai, enggau anak menyadi iya Lot, enggau semua reta tengkira, enggau semua ulun ti udah ulih iya di Haran, lalu mupuk ngagai menua Kanaan. Lebuh sida datai di Kanaan, Abram lalu bejalai nengah menua nya lalu datai ba sepun kayu keramat di Moreh, di menua Sekem. (Lebuh maya nya, orang bansa Kanaan agi nguan menua nya.) TUHAN pegari di mua Abram lalu bejaku enggau iya, “Tu meh menua ti deka diberi Aku ngagai bala peturun nuan.” Abram lalu ngaga siti alta ba endur nya ke TUHAN ti udah pegari di mua iya. Udah nya iya pindah tunga ke selatan ngagai menua ti bebukit tunga ke timur ari nengeri Betel, lalu nirika kem iya ba entara nengeri Betel muak ke barat, enggau nengeri Ai muak ke timur. Dia iya mega ngaga siti alta, lalu nyembah TUHAN. Udah nya iya majakka pejalai iya, pindah ari endur siti ngagai endur siti tunga ke selatan menua Kanaan. Nyadi menua Kanaan kena laban lapar pungkang. Nya alai Abram mupuk ngagai menua Ejip, lalu diau nyadi orang kampar di menua nya, laban lapar pungkang balat amat nyadi di menua Kanaan. Lebuh iya baru deka meraka garis entara menua ngagai menua Ejip, iya bejaku enggau bini iya Sarai, “Aku nemu nuan amat bajik. Lebuh orang Ejip meda nuan, sida deka ngumbai nuan bini aku, lalu munuh aku, tang nejuka nuan idup. Padahka ngagai sida, nuan menyadi aku. Nya baru sida deka manah enggau aku, ketegal nuan, lalu nejuka aku idup.” Lebuh Abram meraka garis entara menua ngagai Ejip, orang Ejip meda pemajik bini iya. Sekeda bala pemesai ke gawa dalam istana raja meda Sarai, lalu madahka pasal pemajik iya ngagai raja. Nya alai Sarai lalu dibai ngagai istana. Ketegal Sarai, raja lalu manah enggau Abram, lalu meri Abram raban bedus, kambin, sapi, keledai, ulun enggau unta. Tang laban raja udah ngambi Sarai, TUHAN lalu ngasuh raja enggau semua orang ke bekereja dalam istana nya balat diserang penyakit. Udah nya raja lalu mesanka Abram, lalu nanya iya, “Nama utai tu ti udah dikereja nuan ngagai aku? Nama kebuah nuan enda madahka Sarai nya bini nuan? Nama kebuah nuan ngumbai iya menyadi nuan, lalu nejuka aku ngambi iya nyadika bini aku? Tu bini nuan. Bai iya, lalu angkat ari tu!” Raja lalu meri atur ngagai bala pemesai iya pasal Abram, lalu sida ngasuh Abram angkat ari menua nya, sama enggau bini iya, sereta enggau semua utai ti diempu iya. Abram angkat ari menua Ejip lalu mansang tunga ke utara, nuju ngagai selatan menua Kanaan, sama enggau bini enggau semua utai iya. Lot mega mupuk sama enggau iya. Abram tu orang ke kaya bendar. Iya bisi jelu bedus, kambin, enggau jelu sapi, sereta enggau pirak enggau emas. Udah nya iya lalu angkat ari endur nya lalu pindah ari endur siti ngagai endur siti, mansang tunga ngagai Betel. Iya datai ba siti endur entara Betel enggau Ai, ti udah alai iya nirika kem dulu suba lalu udah ngaga siti alta. Dia iya lalu nyembah TUHAN. Lot mega bisi jelu bedus, kambin, enggau jelu sapi, lalu bisi mega ruang bilik iya empu, sereta enggau bala ulun. Nya alai padang rumput dia nyau enda chukup ke seduai iya, enti seduai iya mengkang begulai enggau pangan diri, laban jelu seduai iya nyau kelalu mayuh. Nya alai orang ke ngibun jelu ke Abram, enggau orang ke ngibun jelu ke Lot, belaya. (Lebuh maya nya, orang Kanaan enggau orang Peris agi diau di menua nya.) Udah nya Abram lalu bejaku enggau Lot, “Kitai tu sama diri sekaban, lalu bala nuan enggau bala aku enda patut belaya. Nya alai, manah tua beserara. Pilih ni menua ti dikedekaka nuan. Nuan nguing nengah jalai siti, lalu aku nguing nengah jalai siti.” Lot lalu ninjau menua nya, lalu nemu semua Lebak Jordan, nyentuk ngagai Soar, sigi mayuh ai, baka kebun TUHAN, tauka baka tanah ti di menua Ejip. (Tu sebedau TUHAN ngerusak nengeri Sodom enggau Gomorah.) Nya alai Lot milih semua Lebak Jordan ke iya empu, lalu iya pindah tunga ke timur. Nya meh chara seduai iya beserara ari pangan diri. Abram mengkang diau di menua Kanaan, lalu Lot ngentapka diri ba sebelah nengeri ti ba emperan nya, lalu nirika kem iya semak nengeri Sodom, ti diuan orang ke jai, ke bedosa ngelaban TUHAN. Lebuh Lot udah mupuk, TUHAN lalu bejaku ngagai Abram, “Ari endur alai nuan ke bediri diatu, tinjau enggau manah semua menua tu. Aku deka meri ngagai nuan, enggau ngagai bala peturun nuan semua menua ti dipeda nuan, lalu menua nya deka diempu nuan belama iya. Aku deka meri ngagai nuan mayuh peturun datai ke sida enda ulih diitung agi, baka ke ngitung igi amau di dunya tu! Nya alai diatu, bejalai nuan lalu peratika semua menua tu, laban Aku deka meri semua menua tu ngagai nuan.” Nya alai Abram mindahka kem iya lalu ngentapka diri semak kayu keramat di Mamre di menua Hebron. Dia iya lalu ngaga siti alta ke TUHAN. Empat iku raja, iya nya Raja Amrapel menua Babilon, Raja Ariok ari Elasar, Raja Kedorlaomer ari Elam enggau Raja Tidal ari Goim, nyerang lima iku raja, iya nya Raja Bera di Sodom, Raja Birsa di Gomorah, Raja Sinap di Admah, Raja Semeber di Seboim, enggau raja nengeri Bela (tauka Soar). Raja ke lima iku nya beripih enggau pangan diri, lalu berakupka semua soldadu sida ba Emperan Sidim, iya nya Tasik Mati diatu. Raja ke lima iku nya udah dipegai Kedorlaomer dua belas taun, tang dalam taun ti ketiga belas, sida angkat ngelaban iya. Dalam taun ti keempat belas, Kedorlaomer enggau bala raja ke setanah enggau iya, datai enggau bala soldadu sida, lalu ngalahka orang Repaim di Asterot Karnaim, orang Susim di Ham, orang Emim ba emperan Kiriataim, enggau orang Hori ba sebelah bukit di menua Edom, begagaika sida nyentuk ngagai Elparan, ti ba tisi menua puang. Udah nya sida nikal baru ngagai Kades (ti dikumbai Enmispat lebuh maya nya). Sida ngalahka semua menua orang Amalek, lalu ngalahka orang Amor ti diau di Hasason-tamar. Udah nya raja nengeri Sodom, Gomorah, Admah, Seboim, enggau Bela lalu ngerintai bala soldadu sida, sedia deka beperang ba Emperan Sidim. Sida lalu beperang ngelaban raja menua Elam, Goim, Babilon, enggau Elasar, lima ngelaban empat. Emperan nya penuh laban lubang tar, lalu lebuh raja nengeri Sodom enggau raja nengeri Gomorah nguji ngerarika diri, seduai iya lalu labuh ngagai lubang tar, tang tiga iku raja ti bukai ulih ngerarika diri ngagai bukit. Raja ti empat iku nya ngambi semua utai di nengeri Sodom enggau Gomorah, nyengkaum pemakai, lalu angkat ari nengeri nya. Nyadi Lot, anak menyadi Abram, diau di nengeri Sodom. Nya alai raja empat iku nya nabanka iya enggau semua reta tengkira iya. Tang siku lelaki ulih ngerarika diri lalu madahka semua utai nya ngagai Abram, iya nya orang Hebrew ti diau semak kayu ti besai ti diempu Mamre orang Amor. Mamre enggau menyadi iya Eskol enggau Aner endang setanah enggau Abram. Lebuh Abram ninga anak menyadi iya udah ditangkap munsuh, iya lalu ngelumuka semua lelaki ke dalam kem, ke tau enggau beperang, 318 iku semua sida, lalu nitihka raja empat iku nya, nyentuk ngagai Dan. Dia Abram lalu magi bala iya ngagai berapa bengkah raban, nyerang munsuh lebuh malam hari, lalu ngalahka sida. Iya begagaika sida nyentuk ngagai Hobah, di utara Damaskus, lalu ngambi pulai baru semua utai ti udah ditabanka munsuh. Iya mega mai pulai baru anak menyadi iya Lot enggau semua orang bukai ti udah ditangkap munsuh. Lebuh Abram pulai, udah bekau iya ti ngalahka raja Kedorlaomer, enggau raja ti bukai, raja nengeri Sodom lalu ngambat iya ba Emperan Sabeh (emperan tu mega dikumbai Lebak Raja). Lalu Melkisedek, ke nyadi raja nengeri Salem, sereta nyadi imam Allah Taala ti Pemadu Tinggi, mai roti enggau wain ngagai Abram, lalu merekatka Abram munyi tu, “Awakka Allah Taala ti Pemadu Tinggi, ke ngaga langit enggau dunya, merekatka Abram! Pujika Allah Taala ti Pemadu Tinggi, ti udah ngasuh nuan menang ngelaban munsuh nuan!” Abram lalu meri ngagai Melkisedek sepuluh peratus ari semua perapasan ti udah dirampas iya ari munsuh. Ku raja Sodom bejaku ngagai Abram, “Simpan ulih nuan semua perapasan nya, tang beri pulai ngagai aku semua nembiak aku.” Disaut Abram, “Aku besumpah di mua TUHAN Allah Taala ti Pemadu Tinggi, ke ngaga langit enggau dunya, aku enggai nyimpan utai nuan. Selambar ubung tauka tali kasut nuan pen enggai meh aku nyimpan, ngambika nuan enda ulih nyebut, ‘Aku tu ke ngasuh Abram kaya.’ Aku enggai ngambi utai ke aku empu. Aku semina nerima utai ti udah diempa bala nembiak aku. Tang awakka orang ke setanah enggau aku, Aner, Eskol enggau Mamre, ngambi ungkup sida.” Udah bekau nya, Abram bisi genera. Dalam genera nya iya ninga TUHAN bejaku ngagai iya munyi tu, “Anang takut, Abram. Aku deka nyaga nuan, lalu meri nuan upah ti besai.” Tang ku Abram nyaut, “ TUHAN ti Pemadu Tinggi, nama guna upah ti deka diberi Nuan ngagai aku? Aku nadai purih, lalu orang ke deka bempu pesaka aku nya semina Elieser ari Damaskus. Nuan nadai udah meri aku purih, lalu siku ari bala ulun aku deka bempu pesaka aku.” Udah nya Abram lalu ninga TUHAN bejaku baru ngagai iya: “Ukai ulun nuan Elieser ti deka bempu pesaka nuan, tang anak lelaki nuan empu.” TUHAN lalu mai Abram pansut, lalu bejaku, “Uji nuan engkadah lalu ngitung bintang ti di langit. Baka nya meh pemayuh peturun nuan.” Abram arapka TUHAN, lalu ketegal nya TUHAN ngumbai iya lurus. Udah nya TUHAN lalu bejaku enggau iya, “Aku tu meh TUHAN ti udah mai nuan pansut ari Ur di menua Babilon, lalu meri ngagai nuan menua tu nyadika pesaka nuan.” Tang ku Abram nanya, “ TUHAN ti Pemadu Tinggi, baka ni ku aku tau nemu menua nya deka diempu aku?” Disaut TUHAN, “Bai ngagai Aku siku sapi ti indu, siku kambin, enggau siku bedus ti lelaki, genap iku sida nya umur tiga taun magang, enggau siku burung achang, enggau siku burung puna.” Abram mai semua jelu nya ngagai Allah Taala. Tubuh semua jelu nya lalu dibelah iya dua. Iya lalu ngengkahka bidang tubuh siku-siku jelu nya berimbai, ba dua iti baris; tang tubuh burung enda dibelah. Burung ti bepakaika bangkai lalu datai ngagai bangkai jelu enggau bangkai burung nya, tang Abram muru sida. Lebuh mata hari nyau nurun, Abram jenak amat tinduk. Iya lalu berasai balat amat takut. Ku TUHAN bejaku ngagai iya, “Nuan enda tau enda nemu tu: bala peturun nuan deka nyadi orang kampar di menua bukai. Sida deka nyadi ulun di menua nya, lalu deka kena perinsa empat ratus taun. Tang Aku deka ngukum bansa orang ke ngaga sida nyadi ulun, lalu lebuh sida ninggalka menua nya, sida deka mai mayuh pengaya. Nuan empu deka idup datai ke umur nuan nyau tuai, mati enggau selamat, lalu dikuburka. Empat serak udah bekau nya, nya baru bala peturun nuan deka pulai baru ngagai menua tu, laban Aku enggai muru orang Amor sebedau sida nyadi chukup jai, lalu patut diukum.” Lebuh mata hari nyau udah terunjam, lalu hari pen nyau petang, sigi periuk ti berasap, enggau siti sempun ti mau, pegari lalu bejalai ensaraka bidang tubuh jelu nya. Nya meh maya TUHAN ngaga siti sempekat enggau Abram. Ku TUHAN, “Aku besemaya deka meri semua menua tu ngagai bala peturun nuan, berengkah ari garis entara menua orang Ejip nyentuk ngagai Sungai Eupratis, nyengkaum menua orang Ken, orang Kenis, orang Kadmon, orang Iti, orang Peris, orang Repaim, orang Amor, orang Kanaan, orang Girgas, enggau orang Jebus.” Sarai, bini Abram, nadai anak. Tang iya bisi siku ulun, indu orang Ejip, ke benama Hagar. Ku Sarai bejaku enggau Abram, “ TUHAN udah nagang aku beranak, nya alai manah nuan tinduk enggau ulun aku. Nyangka ukur iya ulih ngadaka siku anak ke aku.” Abram besetuju enggau utai ti disebut Sarai. Nya alai Sarai nyerahka Hagar ngagai Abram nyadika indu simpan iya. (Utai tu nyadi lebuh Abram udah diau di menua Kanaan sepuluh taun.) Abram tinduk enggau Hagar, lalu Hagar ngandung. Lebuh Hagar nemu diri ngandung, iya lalu ngenyumbungka diri, lalu mechat Sarai. Udah nya Sarai lalu bejaku enggau Abram, “Nuan udah salah, nya kebuah Hagar mechat aku. Aku empu ti udah meri iya ngagai nuan, lalu sekumbang iya ke nemu diri udah ngandung, iya mechat aku. Awakka TUHAN ngakim sapa tua ke ngena, nuan tauka aku!” Disaut Abram, “Barang ku jaku. Iya ulun nuan, lalu iya di baruh kuasa nuan. Kereja aja sebarang utai ti dikedekaka nuan ba iya.” Udah nya Sarai lalu merinsaka Hagar, datai ke Hagar nyau rari. Melikat TUHAN betemu enggau Hagar ba siti mata ai di menua puang, ba jalai ngagai Sur lalu bejaku, “Hagar, ulun Sarai: datai ari ni nuan, lalu kini ke tunga pejalai nuan?” Disaut Hagar, “Aku rari ari Sarai.” Ku melikat TUHAN nya bejaku, “Nuan enda tau enda pulai baru ngagai iya lalu nyadi ulun iya.” Udah nya melikat nya bejaku ngagai iya, “Aku deka meri nuan mayuh peturun, datai ke sida nyau enda ulih diitung. Nuan deka ngadaka siku anak lelaki, lalu nuan deka meri iya nama Ismail, laban TUHAN udah ninga sabak nuan. Tang iya deka idup baka keledai kampung: iya deka ngelaban semua orang, lalu semua orang deka ngelaban iya. Iya deka diau beserekang ari semua kaban belayan iya.” Hagar lalu nanya diri empu, “Kati aku amat udah meda Allah Taala, lalu agi mengkang idup nusui pasal utai nya?” Nya alai iya ngumbai TUHAN ti udah bejaku enggau iya nya “Allah Taala Ke Meda.” Nya meh kebuah orang ngumbai telaga ti ba entara Kades enggau Beret nya “Telaga Ti Diempu Iya Ti Idup, Ke Meda Aku.” Hagar ngadaka siku anak lelaki ke Abram, lalu Abram meri iya nama Ismail. Umur Abram lapan puluh enam taun lebuh maya nya. Lebuh umur Abram manggai semilan puluh semilan taun, TUHAN pegari di mua iya, lalu bejaku, “Aku tu Allah Taala ti Pemadu Bekuasa. Nuan enda tau enda ngasika Aku, lalu ngereja utai ti ngena. Aku deka ngaga siti sempekat enggau nuan, lalu meri nuan mayuh peturun.” Abram lalu nyungkurka diri ke tanah; lalu ku Allah Taala bejaku, “Tu sempekat ti digaga Aku enggau nuan: Aku besemaya deka ngasuh nuan nyadi apai ke mayuh bengkah bansa. Nama nuan ukai Abram agi, tang Abraham, laban Aku ngaga nuan nyadika apai mayuh bengkah bansa. Aku deka meri nuan mayuh peturun, lalu sekeda sida deka nyadi raja. Peturun nuan mayuh, datai ke sida nyadi mayuh bengkah bansa. “Aku deka ngamatka semaya Aku enggau nuan, sereta enggau peturun nuan, nyadika sempekat ti meruan belama iya. Aku deka nyadi Allah Taala nuan, enggau nyadi Allah Taala ke peturun nuan. Aku deka meri ngagai nuan, enggau ngagai peturun nuan, menua tu, ti alai nuan diau nyadi orang kampar diatu. Semua menua Kanaan deka diempu peturun nuan belama iya, lalu Aku deka nyadi Allah Taala sida.” Ku Allah Taala bejaku ngagai Abraham, “Nuan mega enda tau enda besetuju deka ngasika sempekat tu, nuan enggau semua serak peturun nuan ke jemah ila. Nuan enggau peturun nuan enda tau enda semua besetuju nutus semua bala kita ke lelaki. Genap iku orang enda tau enda ditutus, lalu tu deka nyadika kelai ba tubuh kita, kena nunjukka sempekat Aku enggau nuan endang meruan belama iya. Lelaki ti enda ditutus, deka badu agi dikumbai nembiak Aku, laban iya enda nitihka sempekat Aku.” Ku Allah Taala bejaku ngagai Abraham, “Nuan enda tau agi ngumbai bini nuan Sarai. Kenyau ari diatu nama iya Sarah. Aku deka merekatka iya, lalu Aku deka meri ngagai nuan siku anak lelaki ulih iya. Aku deka merekatka iya, lalu iya deka nyadi indai ke mayuh bengkah bansa, lalu sekeda ari peturun iya deka nyadi raja.” Abraham nyungkurka diri ke tanah, tang iya ketawa lebuh iya berunding, “Baka ni ku lelaki ke umur seratus taun tau bisi anak? Baka ni ku Sarah ulih ngadaka anak lebuh umur iya nyau semilan puluh taun?” Iya lalu nanya ngagai Allah Taala, “Nama kebuah enda ngasuh Ismail nampung waris aku?” Tang ku Allah Taala bejaku, “Enda tau. Bini nuan Sarah deka ngadaka siku anak lelaki ke nuan, lalu nuan deka meri iya nama Isak. Aku deka ngingatka sempekat Aku enggau iya, sereta enggau peturun iya belama iya. Sempekat nya deka meruan belama iya. Aku udah ninga peminta nuan pasal Ismail, nya alai Aku deka merekatka iya, lalu meri ngagai iya mayuh anak, enggau mayuh peturun. Iya deka nyadi apai ke dua belas iku raja, lalu Aku deka ngaga siti bansa ti besai ari bala peturun iya. Tang Aku deka ngingatka sempekat Aku enggau anak nuan Isak, ti deka diadaka Sarah ba urung maya tu taun baru tu ila.” Lebuh Allah Taala udah tembu bejaku ngagai Abraham, Iya lalu ninggalka Abraham. Ba hari nya Abraham ngasika Allah Taala, lalu nutus anak iya Ismail, enggau semua lelaki bukai ke dalam ruang bilik iya, nyengkaum bala ulun ke ada dalam rumah iya, sereta enggau ulun ti udah dibeli iya. Umur Abraham semilan puluh semilan taun lebuh iya ditutus, lalu umur anak iya Ismail tiga belas taun. Seduai iya sama ditutus sereta hari, sama enggau semua ulun Abraham empu. TUHAN pegari di mua Abraham ngimbai kayu ti besai di Mamre. Lebuh maya nya Abraham benung duduk ba penama ngagai langkau kain iya, laban hari balat amat angat. Iya malik lalu tepedaka tiga iku lelaki bediri enda jauh ari iya. Lebuh iya meda sida, iya lalu belanda ngambat sida. Iya nyungkurka diri ke tanah, lalu bejaku, “Tuan, anang semina mansa rumah aku lalu enda ngetu. Aku sedia deka ngintu kita tiga. Awakka aku mai ai kena kita tiga masu kaki. Kita tau ngetu lalu belelak di baruh pun kayu tu. Aku deka mega mai pemakai, ngambika kita kering majakka pejalai diri. Kita udah datai ba rumah aku, nya alai awakka aku ngintu kita tiga.” Ku sida tiga nyaut iya, “Kereja aja utai ti ku nuan.” Abraham lalu beguai-guai tama ngagai langkau kain iya, lalu bejaku enggau Sarah, “Jampat! Ambi tepung nuan ti pemadu alus, lalu panggang roti.” Udah nya iya lalu belanda ngagai raban jelu sapi lalu nangkap siku anak sapi ti gemu, lalu nyerahka jelu nya ngagai ulun iya. Ulun nya lalu beguai-guai mela jelu nya. Iya ngambi lemak tusu, ai tusu, enggau dagin, lalu ngenahka pemakai nya di mua sida tiga. Di baruh pun kayu nya meh endur alai iya ke meri sida tiga makai, lalu sida tiga makai. Udah nya sida lalu nanya iya, “Dini alai bini nuan Sarah?” “Dalam langkau kain,” ku Abraham nyaut. Siku ari sida tiga lalu bejaku, “Ba urung maya tu taun baru tu ila Aku deka datai baru, lalu bini nuan Sarah deka ngadaka anak lelaki siku.” Nyadi Sarah bisi ari belakang orang nya, ba mua pintu langkau kain nya, mendingka orang nya bejaku. Abraham seduai Sarah sama udah tuai amat umur, lalu Sarah udah badu agi datai kain. Nya alai Sarah ketawa dalam ati diri, ku iya, “Aku diatu nyau tuai. Baka ni ku aku agi ulih beleman enggau laki aku? Nambahka nya, laki aku pen nyau tuai.” Udah nya TUHAN lalu nanya Abraham, “Nama kebuah Sarah ketawa lalu nyebut, ‘Baka ni ku aku ulih beranak lebuh aku nyau tuai baka tu?’ Kati TUHAN enda ulih ngereja sebarang utai? Munyi ti disebut Aku, semilan bulan ari diatu aku deka datai ditu baru, lalu Sarah deka ngadaka anak lelaki siku.” Sarah takut lalu besangkalka diri ti udah ketawa. “Nadai aku ketawa,” ku iya bejaku. TUHAN lalu nyaut. “Sigi amat, nuan udah ketawa tadi.” Udah nya sida tiga mupuk, lalu mansang ngagai siti endur alai sida ke ulih ninjau ke baruh ngagai nengeri Sodom, lalu Abraham bejalai enggau sida, deka meda sida tiga mupuk. Lalu ku TUHAN bejaku dalam ati Diri, “Aku enggai ngelalaika ari Abraham utai ti deka dikereja Aku. Peturun iya deka nyadi bansa ti besai sereta kering, lalu Aku deka merekatka semua bansa ngena iya. Aku udah milih iya, ngambika iya ngasuh bala anak iya enggau peturun iya ngasika Aku, lalu ngereja utai ti ngena sereta lurus. Enti sida ngereja nya, nya baru Aku deka ngereja ke Abraham semua utai ti udah disemaya Aku.” Udah nya TUHAN lalu bejaku, “Sodom enggau Gomorah sama udah kena dawa laban seduai iya udah ngereja utai ti amat jai, lalu dosa seduai iya amat besai. Aku enda tau enda nurun kin, deka nentuka enti jaku dawa ti didinga Aku nya amat tauka enda.” Udah nya orang dua iku nya lalu mansang ngagai Sodom, tang TUHAN ninggalka Diri enggau Abraham. Abraham mansang ngagai TUHAN, lalu nanya, “Kati Nuan amat deka munuh orang ke nadai penyalah sama enggau orang ke bepenyalah? Enti sema lima puluh iku orang ke nadai penyalah bisi dalam nengeri nya, kati nuan deka ngerusak semua nengeri nya? Kati Nuan enggai ngalau nengeri nya ngambika sida ke lima puluh iku nya enda kena bunuh? Nuan tentu enggai munuh sida ke nadai penyalah sama enggau sida ke bepenyalah. Enggai nyadi baka nya! Nuan enda tau munuh sida! Enti Nuan munuh sida, orang ke nadai penyalah deka kena ukum sama enggau sida. Enggai nyadi sekali-kali baka nya! Hakim ke ngakim semua dunya enda tau enda ngakim enggau lurus.” Ku TUHAN nyaut, “Enti sema Aku bisi tetemuka lima puluh iku orang ke nadai penyalah di nengeri Sodom, Aku enda nyadi ngerusak nengeri nya ketegal sida.” Abraham lalu bejaku baru: “ TUHAN, aku minta Nuan ngampun aku ke changka bejaku ngagai Nuan baka tu. Aku tu semina mensia aja, lalu enda patut bejaku. Tang kada enda semina empat puluh lima iku aja orang ke nadai penyalah, ukai lima puluh iku. Kati Nuan deka ngerusak semua nengeri nya, laban sida kurang lima iku?” Ku TUHAN nyaut, “Aku enggai ngerusak nengeri nya enti Aku bisi tetemuka empat puluh lima iku orang ke nadai penyalah dia.” Abraham lalu bejaku baru, “Kada enda semina empat puluh iku aja orang ke nadai penyalah bisi dia.” Disaut TUHAN, “Aku enggai ngerusak nengeri nya enti Aku bisi tetemuka empat puluh iku aja orang ke nadai penyalah dia.” Ku Abraham, “Anang ringat, TUHAN, tang aku enda tau enda bejaku baru. Kati enti semina tiga puluh iku aja orang ke nadai penyalah dia?” Ku TUHAN nyaut, “Aku enggai ngerusak nengeri nya enti Aku bisi tetemuka tiga puluh iku aja dia.” Ku Abraham, “ TUHAN, ampun aku ke changka bejaku ngagai Nuan baka tu. Kati enti semina dua puluh iku aja bisi ditemu dia?” Ku TUHAN nyaut, “Aku enggai ngerusak nengeri nya enti Aku bisi tetemuka dua puluh iku aja orang ke nadai penyalah dia.” Ku Abraham, “Anang ringat ngagai aku, TUHAN. Aku deka bejaku sekali agi. Kati enti semina sepuluh iku aja bisi ditemu dia?” Ku TUHAN nyaut, “Aku enggai ngerusak nengeri nya enti Aku bisi tetemuka sepuluh iku aja dia.” Lebuh TUHAN udah tembu bejaku enggau Abraham, Iya mupuk, lalu Abraham pulai. Lebuh melikat ke dua iku nya datai di Sodom lemai nya, Lot benung duduk dalam pintu kuta nengeri nya. Lebuh Lot tepedaka seduai iya datai, iya angkat, lalu mansang ngambat seduai iya. Iya meremi di mua seduai iya lalu bejaku, “Tuan, aku sedia deka ngintu seduai. Aram tama ngagai rumah aku. Seduai tau masu kaki seduai, lalu bemalam ditu. Seduai tau angkat tumu pagila, lalu majakka pejalai seduai.” Tang ku seduai iya nyaut, “Enda ibuh. Kami duai deka bemalam ba padang di nengeri.” Lot majak ngumbuk seduai iya. Nyau kelama, seduai iya lalu tama ngagai rumah Lot. Lot lalu ngasuh bala orang gaji iya manggang roti, lalu nyendiaka pemakai ti manah ke temuai dua iku nya. Lebuh pemakai nya udah sedia, sida lalu makai. Sebedau temuai nya nindukka diri, bala lelaki nengeri Sodom lalu datai ngelingi rumah Lot. Semua lelaki di nengeri nya, sida ke biak enggau ke tuai, bela bisi dia magang. Sida ngangauka Lot, lalu nanya ngagai iya, “Dini alai lelaki dua iku ke datai bemalam enggau nuan malam tu? Bai seduai iya pansut ngagai kami!” Bala lelaki di nengeri Sodom bisi ati deka beleman enggau seduai iya. Lot pansut, lalu nikupka pintu ari belakang iya. Ku iya bejaku ngagai sida, “Menyadi, aku minta kita, anang ngereja utai ti jai baka tu! Dinga kita, aku bisi dua iku anak indu ke agi dara bungas. Awakka aku mai seduai iya pansut ke luar kitu ngagai kita, lalu kita tau ngereja sebarang utai ti dikedekaka kita ngagai seduai iya. Tang anang ngereja utai ngagai orang dua iku tu. Seduai iya temuai aku, lalu aku enda tau enda nyaga seduai iya.” Tang ku sida bejaku, “Nuan orang kampar, anang mempang kami! Sapa nuan tu ke berani madahka utai ti patut dikereja kami? Anang mempang jalai kami, enggai ke kami ngereja nuan balat agi ari kami ke deka ngereja seduai iya.” Sida lalu ngejuka Lot surut, lalu mansang deka mechahka pintu. Tang orang dua iku ke dalam rumah nya nyapai Lot, narit iya ke dalam, lalu nikupka pintu. Udah nya seduai iya lalu ngasuh semua orang ke di luar buta magang, ngambika sida enda tetemuka pintu nya. Ku lelaki dua iku nya bejaku enggau Lot, “Enti nuan bisi orang bukai - anak lelaki, anak indu, menantu lelaki, tauka kaban belayan ti bukai dalam nengeri tu - bai sida pansut ari nengeri tu, laban kami duai deka ngerusak nengeri tu. TUHAN udah ninga dawa ti jai ngelaban orang di nengeri tu, lalu udah ngasuh kami duai ngerusak iya.” Udah nya Lot lalu mansang ngagai lelaki ti deka jadi enggau anak indu iya ke dua iku nya, lalu bejaku, “Pansut jampat ari nengeri tu, laban TUHAN deka ngerusak nengeri tu.” Tang lelaki dua iku nya ngumbai Lot semina bungah aja. Tumu pagi hari siti, melikat dua iku nya ngansak Lot, “Jampat!” ku seduai iya bejaku. “Bai bini nuan enggau dua iku anak dara nuan, lalu angkat ari nengeri tu, ngambika kita enda mati lebuh nengeri tu dirusak.” Lot kakang. Tang TUHAN kasihka iya. Nya alai temuai ke dua iku nya megai jari Lot lalu ngiring iya, bini iya, enggau dua iku anak indu iya, lalu nguluka sida pansut ari nengeri nya. Siku ari seduai nya lalu bejaku, “Alai kita belanda ngidupka nyawa diri! Anang malik kebelakang, lalu anang ngetu ba sebelah lebak. Belanda ngagai bukit, ngambika kita enda kena bunuh.” Tang ku Lot nyaut, “Tuan, anang ngasuh kami belanda ngagai bukit nya. Seduai udah kasihka aku lalu ngidupka aku. Tang bukit nya jauh amat. Penusah ti besai nya deka ngerusak aku, lalu aku deka mati sebedau aku datai din. Kati nuan bisi meda nengeri ti mit nya? Nengeri nya semak agi. Awakka aku kin. Nuan meda endur nya mit, tang aku deka diau likun dia.” Disaut orang nya, “Au. Aku besetuju. Aku enggai ngerusak nengeri nya. Jampat agi! Belanda! Aku enda ulih ngereja sebarang utai sebedau nuan datai din.” Ketegal Lot udah ngumbai nengeri nya mit, nya alai nengeri nya dikumbai Soar. Mata panas endang udah niki lebuh Lot datai di Soar. TUHAN lalu tekala nya ngujan nengeri Sodom enggau Gomorah ngena api merirang lalu ngerusak nengeri dua buah nya, enggau semua lebak nya, sereta enggau semua orang ke diau dia enggau semua utai ti tumbuh di menua nya. Tang bini Lot malik kebelakang, lalu iya nyadi tiang garam. Tumu pagi hari siti, Abraham beguai-guai mansang ngagai endur alai iya ti udah bediri enggau TUHAN. Iya merening ke baruh ngagai nengeri Sodom enggau Gomorah enggau semua lebak ti di menua nya, lalu meda asap pansut ari menua nya baka ke pansut ari serumbung api. Tang lebuh Allah Taala ngerusak nengeri ti ba lebak nya, ti udah alai Lot diau, Iya ingatka Abraham, lalu nejuka Lot ngerarika diri ngagai endur ti likun. Nyadi Lot takut diau di Soar, nya alai iya enggau anak indu iya mindah ke atas ngagai bukit, lalu diau dalam lubang gua. Anak indu Lot ke tuai agi lalu bejaku enggau adi iya, “Apai tua nyau tuai, lalu lelaki ke ulih jadi enggau tua, ke tau ngasuh tua beranak, pen nadai mega di serata dunya tu. Aram tua numi apai tua datai ke iya mabuk, ngambika tua ulih tinduk enggau iya, lalu beranak ulih iya.” Malam nya seduai iya lalu numi Lot enggau wain. Anak indu Lot ke tuai agi lalu beleman enggau apai iya. Tang Lot kelalu balat mabuk, lalu nadai nemu utai. Hari siti, anak indu Lot ke tuai agi lalu bejaku enggau adi iya, “Aku udah tinduk enggau iya dimalam. Aram tua numi iya baru malam tu datai ke iya mabuk, lalu nuan tinduk enggau iya. Nya baru tua deka sama bisi anak ulih apai tua.” Nya alai malam nya seduai iya numi Lot datai ke iya mabuk, lalu anak indu iya ke biak agi beleman enggau iya. Sekali nya Lot mega kelalu balat mabuk lalu enda nemu utai. Nya meh chara anak indu Lot ke dua iku nya ngandung ulih apai seduai iya empu. Anak indu iya ke tuai ngadaka siku anak lelaki, lalu iya meri iya nama Moap. Moap nya orang ke nurunka orang bansa Moap ke diatu. Anak indu iya ke biak agi mega ngadaka siku anak lelaki, lalu iya meri iya nama Benami. Benami nya meh orang ke nurunka orang bansa Amon ke diatu. Abraham pindah ari Mamre ngagai selatan menua Kanaan, lalu diau ba entara Kades enggau Sur. Udah nya, lebuh iya benung diau di Gerar, iya madahka bini iya nya menyadi iya. Nya alai Raja Abimelek ke merintah di nengeri Gerar ngasuh orang mai Sarah ngagai iya. Nyadi sekali, lebuh malam hari, Allah Taala pegari di mua Raja Abimelek dalam mimpi, lalu bejaku, “Nuan deka mati, laban nuan udah ngambi indu tu. Iya udah bisi laki.” Tang Abimelek nadai kala beleman enggau Sarah, lalu ku Abimelek bejaku, “ TUHAN, aku nadai penyalah! Kati Nuan deka ngerusak aku enggau bala nembiak aku? Abraham empu ke ngumbai indu nya menyadi iya, lalu indu nya empu mega madahka nya. Aku ngereja utai tu enggau ati ti beresi, lalu aku nadai udah ngereja penyalah.” Ku Allah Taala nyaut Abimelek dalam mimpi nya, “Amat. Aku nemu nuan endang ngereja utai nya enggau ati ti beresi. Nya kebuah Aku nagang nuan bedosa ngelaban Aku, lalu enda nyagi nuan negu iya. Tang diatu, beri indu nya pulai baru ngagai laki iya. Laki iya nya nabi, lalu iya deka besampika nuan, ngambika nuan enda mati. Tang enti nuan enda meri indu nya pulai baru, Aku meri nuan jaku tangkan tu: nuan enggau semua nembiak nuan deka mati.” Tumu pagi hari siti, Abimelek lalu mesanka semua pemesai iya, lalu madahka ngagai sida utai ti udah nyadi. Sida lalu takut. Udah nya Abimelek mesanka Abraham, lalu nanya iya, “Nama utai tu ti udah dikereja nuan ngagai kami? Nama penyalah ti udah dikereja aku ngagai nuan, ti ngujungka nuan ngasuh penusah ti besai tu ninggang aku enggau ninggang menua ti dipegai aku? Nadai orang patut ngereja utai baka ke udah dikereja nuan ngagai aku. Nama kebuah nuan ngereja nya?” Ku Abraham nyaut, “Aku ngumbai orang ditu enda nangika Allah Taala, lalu aku ngumbai sida deka munuh aku, lalu ngerampas bini aku. Iya endang amat menyadi aku. Iya anak apai aku, tang kami duai enda saum indai, lalu aku jadi enggau iya. Nya alai, lebuh Allah Taala ngasuh aku angkat ari rumah apai aku, lalu bejalai ngagai menua bukai, aku bejaku enggau iya, ‘Nuan tau mandangka diri amat taluk ngagai aku, enti nuan madahka ngagai semua orang, aku tu menyadi lelaki nuan.’ ” Udah nya Abimelek nyerahka Sarah pulai baru ngagai Abraham. Abimelek lalu meri Abraham jelu bedus, jelu sapi enggau ulun. Ku iya bejaku ngagai Abraham, “Semua tu endang menua aku magang. Nuan tau diau di sebarang endur ti dikedekaka nuan.” Ku Abimelek bejaku ngagai Sarah, “Aku meri ngagai menyadi nuan seribu singkap pirak kena nanda, di mua semua orang ke begulai enggau nuan, nuan nadai penyalah. Semua orang deka nemu nuan nadai udah ngereja utai ti salah.” TUHAN merekatka Sarah munyi ti udah disemaya Iya. Sarah lalu ngandung, lalu ngadaka anak lelaki siku ke Abraham, lebuh Abraham nyau udah tuai amat umur. Anak mit nya ada ba maya ti udah diletak Allah Taala. Abraham meri iya nama Isak, lalu lebuh Isak umur lapan hari, Abraham nutus iya, nitihka atur Allah Taala. Umur Abraham seratus taun lebuh Isak ada. Ku Sarah bejaku, “Allah Taala udah nyungkak aku ketawa. Semua orang ke ninga berita tu deka ketawa sama enggau aku.” Lalu ku Sarah bejaku, “Sapa berani madahka ngagai Abraham Sarah deka nusuka anak? Tang aku udah ngadaka anak ke Abraham lebuh Abraham nyau tuai.” Anak mit nya mansang besai, lalu ba hari iya badu agi nusu, Abraham nyendiaka pengerami makai besai. Nyadi sekali, Ismail, anak Abraham ke diadaka indu orang Ejip ke benama Hagar, beduan Isak, anak Sarah. Lebuh Sarah meda nya, iya lalu bejaku enggau Abraham. Ku iya, “Buru ulun nya enggau anak iya. Anak indu tu enda tau enggau bempu pengaya nuan, laban pengaya nya endang pesaka anak aku, Isak.” Jaku nya balat ngenusahka ati Abraham, laban Ismail mega anak iya. Tang ku Allah Taala bejaku ngagai Abraham, “Anang irau ati ke nembiak nya enggau ulun nuan Hagar. Kereja aja sebarang utai ti diasuh Sarah, laban semina nengah Isak aja nuan deka bulih peturun ti udah disemaya Aku. Aku deka mega meri mayuh anak ngagai anak ulun nya, ngambika sida nyadi siti bansa, laban iya mega anak nuan.” Tumu pagi hari siti Abraham meri Hagar bekal enggau sekambut ai. Iya nepanka anak mit nya ba belakang Hagar, lalu ngasuh Hagar mupuk. Hagar mupuk, lalu bejalai segau-segau di menua puang Beer-seba. Lebuh ai dalam kambut nya nyau udah abis, Hagar lalu ninggalka anak mit nya di baruh babas lalu nudukka diri kira seratus meter ari endur alai anak mit nya. Ku Hagar bejaku dalam ati diri, “Aku enda tan meda anak aku mati.” Lebuh iya benung duduk dia, iya lalu nyabak. Allah Taala ninga sabak nembiak nya, lalu melikat Allah Taala bejaku ngagai Hagar ari serega, “Nama kebuah nuan tusah ati, Hagar? Anang takut. Allah Taala udah ninga sabak nembiak nya. Angkat nuan lalu pulai baru ngagai anak nuan, berap iya, lalu perindang iya. Aku deka ngaga peturun iya nyadi siti bansa ti kering.” Udah nya Allah Taala lalu ngasuh mata Hagar tebuka, lalu iya tepedaka siti telaga. Hagar mansang ngagai telaga nya lalu ngisi kambut iya enggau ai, lalu meri anak iya ngirup. Allah Taala bisi enggau nembiak nya lebuh iya mansang besai. Iya diau di menua puang Paran, lalu iya nyadi orang ke landik ngasu. Indai iya ngambi siku indu orang Ejip nyadika bini iya. Ba urung maya nya, Abimelek seduai Pikol, ti nyadi kepala soldadu iya, mansang ngagai Abraham deka bejaku enggau iya. Ku Abimelek, “Allah Taala bisi enggau nuan lebuh nuan ngereja semua utai. Nya alai gaga siti semaya ditu di mua Allah Taala, lalu padahka diri enda nipu aku, bala anak aku, tauka peturun aku. Aku udah taluk ngagai nuan, nya alai nuan enda tau enda besemaya deka taluk ngagai aku, enggau ngagai menua tu, alai nuan ke ngampar diatu.” Ku Abraham, “Aku besemaya.” Abraham beserebana ngagai Abimelek pasal siti telaga ti udah dirampas bala orang gaji Abimelek. Ku Abimelek, “Aku enda nemu sapa ngereja nya. Nuan nadai madahka tu ngagai aku. Tu meh keterubah iya aku ninga nya.” Udah nya Abraham lalu meri jelu bedus enggau jelu sapi ngagai Abimelek, lalu seduai iya ngaga siti sempekat. Abraham lalu magi tujuh iku anak domba ari raban bedus iya, lalu Abimelek nanya iya, “Nama kebuah nuan ngereja nya?” Disaut Abraham, “Sambut meh tujuh iku anak domba tu, laban enti nuan nyambut sida, reti nya nuan ngaku aku udah numbak telaga nya.” Nya alai endur nya dikumbai Beer-seba, laban nya endur alai seduai iya udah besumpah. Lebuh seduai iya udah ngaga sempekat nya di Beer-seba, Abimelek seduai Pikol lalu pulai baru ngagai menua Pilistin. Udah nya Abraham nanam sepun kayu tamaris di Beer-seba, lalu nyembah TUHAN Allah Taala ti Meruan Belama Iya. Abraham lama diau di menua Pilistin. Nyau kelama udah bekau nya, Allah Taala nguji Abraham. Ku Iya bejaku ngagai Abraham, “Abraham!” Abraham lalu nyaut, “Tu aku!” Ku Allah Taala bejaku, “Bai anak nuan, anak tunggal nuan Isak, ke balat dikerinduka nuan, lalu mansang nuan ngagai menua Moriah, lalu serahka iya dia nyadika piring tunu ba bukit ti deka ditunjukka Aku ngagai nuan.” Nya alai Abraham angkat tumu pagi hari siti, nyendiaka keledai iya, lalu mai dua iku ari orang gaji iya, sama enggau anak iya Isak; iya lalu netak kayu kena nunu piring, lalu mupuk ngagai endur ti jauh ti udah ditunjukka Allah Taala ngagai iya. Ba hari ti ketiga, Abraham tepedaka endur nya ari jauh. Udah nya iya lalu bejaku ngagai orang gaji iya, “Seduai nganti ditu, ngemataka keledai. Aku enggau anak aku deka kin, lalu nyembah Allah Taala, lalu udah nya kami duai deka pulai baru ngagai seduai.” Abraham lalu ngasuh Isak ngesan kayu ti deka dikena nunu piring, lalu iya empu mai sebilah duku, enggau bara api. Lebuh seduai iya benung bejalai, Isak lalu bejaku, “Apai!” “Nama, anak?” ku Abraham nyaut. Isak lalu nanya, “Tua bisi bara api enggau kayu, tang dini alai anak domba nyadika piring tunu?” Disaut Abraham, “Allah Taala Empu deka meri siku anak domba nyadika piring nya.” Seduai iya majak bejalai. Lebuh seduai iya datai ba endur ti udah dipadahka Allah Taala ngagai Abraham, Abraham lalu ngaga siti alta, lalu nugungka kayu api ba alta nya. Iya lalu nanchang anak iya Isak, lalu ngengkahka iya ba atas tugung kayu nya. Udah nya Abraham lalu ngambi duku, deka ngelar anak iya. Tang melikat TUHAN ngangauka iya ari serega, ku iya, “Abraham! Abraham!” Abraham lalu nyaut, “Tu aku!” “Anang ngemediska nembiak nya, tauka ngereja sebarang utai ngagai iya,” ku melikat nya bejaku, “laban diatu Aku nemu nuan amat nangika Allah Taala, laban nuan enda sayauka anak tunggal nuan tang nyerahka iya ngagai Allah Taala.” Abraham malik, lalu tepedaka siku bedus ti lelaki tekait tanduk ba babas. Iya mansang lalu ngambi bedus nya, lalu nyerahka bedus nya nyadika piring tunu kena nyilih anak iya. Abraham lalu ngumbai endur nya “ TUHAN Nyendia.” Nyentuk ngagai sehari tu, orang agi nyebut, “ TUHAN deka nyendiaka utai ba bukit Iya.” Melikat TUHAN lalu ngangauka Abraham ari serega kedua kali, Ku Iya bejaku, “Aku ti TUHAN besumpah atas nama Aku Empu, Aku deka meri berekat ti besai ngagai nuan, laban nuan udah ngereja utai tu, lalu enda sayauka anak tunggal nuan tang nyerahka iya ngagai Aku. Aku besemaya deka meri nuan mayuh peturun, ngemayuh bintang ti di langit, tauka ngemayuh pasir ti ba tebing tasik. Peturun nuan deka ngalahka munsuh sida. Semua bansa deka minta Aku merekatka sida, baka Aku ti udah merekatka peturun nuan, ketegal nuan udah ngasika jaku Aku.” Abraham pulai ngagai orang gaji iya lalu sida sama bejalai ngagai Beer-seba, alai Abraham ke ngentapka diri. Nyau kelama udah bekau nya, Abraham bisi ninga berita pasal Milkah ti udah ngadaka lapan iku anak ke menyadi iya, Nahor, iya nya: Us, anak tuai Nahor, menyadi iya Bus, Kemuel apai Aram, Cheset, Haso, Pildas, Jitlap, enggau Bituel apai Rebekah. Milkah ngadaka lapan iku anak lelaki ke menyadi Abraham ke benama Nahor. Indu simpan Nahor ke benama Reumah ngadaka Tebah, Gaham, Tahas, enggau Maakah. Sarah idup ngagai umur 127 taun. Iya mati di Hebron, di menua Kanaan, lalu Abraham nyenggai iya lalu nyabakka iya. Abraham angkat ari endur alai iya ke ngintu bangkai bini iya, lalu mansang ngagai orang Iti. Ku iya bejaku enggau sida “Aku orang kampar ti diau begulai enggau kita. Jual tanah kita mimit ngagai aku, ngambika aku ulih nguburka bini aku.” Disaut sida, “Dingaka jaku kami, tuan. Nuan tu tuai ti kering ke begulai enggau kami. Kuburka meh bini nuan dalam kubur ti pemadu manah ti dikemisi kami. Semua kami deka gaga ati meri siti kubur ngagai nuan, ngambika nuan ulih nguburka bini nuan.” Abraham angkat lalu meremi di mua sida lalu bejaku, “Enti kita ngasuh aku nguburka bini aku ditu, aku minta kita bejaku enggau Epron anak Sohar minta iya nyual lubang gua Makpelah, ti semak tisi tanah iya. Asuh iya nyual lubang gua nya ngagai aku di mua kita empu ditu, enggau penuh rega, ngambika aku tau bempu endur nya nyadika pendam.” Nyadi Epron empu bisi enggau orang Iti ti bukai duduk ba endur alai ti baum ba pintu kuta nengeri nya. Iya lalu nyaut, didinga semua orang ke bisi dia, “Dinga nuan, tuan. Aku deka meri ngagai nuan semua tanah nya enggau lubang gua ti ba tanah nya. Nya alai di mua semua orang ke ari bansa aku empu ditu, aku meri tanah nya ngagai nuan, ngambika nuan ulih nguburka bini nuan.” Abraham lalu meremi di mua orang Iti lalu bejaku enggau Epron, didinga semua sida, “Aku minta nuan mendingka aku. Aku deka meli semua tanah nya. Sambut meh rega tanah nya ari aku, ngambika aku ulih nguburka bini aku dia.” Disaut Epron, “Tuan, rega tanah nya ka semina empat ratus singkap pirak aja. Mesa ni ga rega nya ba entara tua? Kuburka meh bini nuan dia.” Abraham besetuju enggau Epron; iya lalu nimbang pirak ti udah disebut Epron didinga orang mayuh - empat ratus singkap pirak, nitihka atur pemerat ti dikena orang ke bedagang. Nya meh chara pesaka ti udah diempu Epron di Makpilah, muak ke timur Mamre, nyadi pesaka Abraham. Pesaka nya nyengkaum tanah nya, lubang gua ti ba tanah nya, enggau semua kayu ti ba tanah nya, nyentuk ngagai tisi tanah nya. Tanah nya lalu dikumbai semua orang Iti ke bisi ba aum nya, pesaka Abraham. Udah nya Abraham lalu nguburka bini iya, Sarah, dalam lubang gua nya, di menua Kanaan. Nya alai tanah nya, ti udah diempu orang Iti, sama enggau lubang gua ti ba tanah nya, diempu Abraham nyadika tanah pendam. Abraham pen nyau tuai, lalu TUHAN udah merekatka iya dalam semua utai ti dikereja iya. Ku iya bejaku enggau ulun iya ke pemadu tuai, ke ngemataka semua utai Abraham, “Engkahka jari nuan ba selepak pah aku laban aku deka ngasuh nuan besumpah dalam nama TUHAN Allah Taala ti bekuasa di serega enggau di dunya, enda nyagi nuan milih indu orang Kanaan nyadika bini anak aku. Nuan enda tau enda mansang ngagai menua ada aku, ngagai kaban belayan aku empu, lalu ngambi siku bini ke anak aku Isak.” Tang ku ulun nya nanya, “Kati enti indu nya enggai mupuk enggau aku ngagai menua tu? Kati tau aku mai anak nuan mansang ngagai menua ada nuan?” Disaut Abraham, “Nuan enda tau mai anak aku kin! TUHAN Allah Taala ti di serega, udah mai aku ari rumah apai aku, ari menua ada aku, lalu udah besemaya enggau aku ngena sumpah, madahka Iya deka meri menua tu ngagai peturun aku. Iya deka ngasuh melikat Iya nguluka nuan, lalu nuan deka ngambi ari menua nya siku bini ke anak aku. Tang enti indu nya enggai mupuk enggau nuan, nuan dilepaska ari jaku sumpah aku tu. Tang nuan enda tau sekali-kali mai anak aku kin.” Nya alai ulun nya ngengkahka jari iya ba selepak pah tuan iya Abraham, lalu besumpah madahka diri deka ngereja utai ti diasuh Abraham. Ulun nya, ke ngemataka reta tengkira Abraham, mai sepuluh iku jelu unta tuan iya, lalu mansang ngagai nengeri ti udah alai Nahor diau, di utara menua Mesopotamia. Lebuh iya datai di menua nya, iya lalu ngetu sereta belelakka jelu unta iya semak telaga ti di luar nengeri. Hari lebuh maya nya endang udah lemai, maya bala indu pansut ari nengeri mansang nyauk. Iya lalu besampi. Ku iya, “ TUHAN Allah Taala ke tuan aku, Abraham, asuh aku mujur sehari tu, lalu kingatka semaya Nuan enggau tuan aku. Aku diatu benung bediri semak telaga ti alai bala indu ari nengeri nya deka nyauk. Aku deka bejaku enggau siku ari bala sida munyi tu, ‘Ingkaska tepayan nuan, lalu beri aku ngirup.’ Enti iya nyebut, ‘Ngirup meh, lalu aku deka mai ai ke jelu unta nuan,’ awakka iya nya meh orang ke udah dipilih Nuan ke nembiak Nuan Isak. Enti utai nya nyadi baka nya, nya baru aku deka nemu Nuan udah ngamatka semaya Nuan ngagai tuan aku.” Lebuh iya agi benung besampi, Rebekah datai ngesan tepayan ai. Iya tu anak indu Bituel. Nyadi Bituel tu anak menyadi Abraham ke benama Nahor, enggau bini iya Milkah. Indu nya bajik amat, lalu agi dara bungas. Iya mansang ngagai telaga, ngisi tepayan iya enggau ai, lalu pulai. Ulun Abraham nya lalu belanda ngagai indu nya lalu bejaku, “Beri aku ai irup ari tepayan nuan.” Ku indu nya nyaut, “Ngirup meh, tuan.” Iya lalu beguai-guai ngingkaska tepayan nya ari bau iya, lalu megai tepayan nya, lebuh ulun Abraham nya benung ngirup. Lebuh iya udah ngirup, indu nya lalu bejaku, “Aku deka nyauk ai ke jelu unta nuan, datai ke sida nyau udah puas ngirup.” Iya lalu beguai-guai nuang ai ari tepayan nya ngagai dulang ti alai jelu ngirup, lalu belanda baru ngagai telaga, nyauk mayuh agi ai, datai ke iya udah meri semua jelu unta nya ngirup magang. Lelaki nya majak nengkilaka iya, enda bemunyi, deka nemu enti TUHAN udah ngasuh pejalai iya mujur tauka enda. Lebuh indu nya udah tembu meri unta nya ngirup, lelaki nya lalu ngambi siti tinchin emas, lalu ngelekatka tinchin nya ba idung indu nya, lalu ngerasukka dua iti gelang emas ba lengan iya. Ku ulun Abraham nya bejaku, “Anak sapa nuan tu? Kati tau aku, enggau bala aku, bemalam ba rumah apai nuan malam tu?” “Apai aku Bituel, anak Nahor seduai Milkah,” ku indu nya nyaut. “Kami mayuh rumput rangkai enggau pemakai jelu, lalu kami mega bisi endur alai kita tau bemalam.” Udah nya lelaki nya meremi lalu nyembah TUHAN. Ku iya bejaku, “Pujika TUHAN Allah Taala tuan aku Abraham, laban Iya udah tetap ati ngamatka semaya Iya enggau tuan aku. TUHAN udah nguluka aku terus ngagai kaban belayan tuan aku.” Indu dara nya lalu belanda ngagai rumah indai iya, lalu madahka semua utai ti udah nyadi. Nyadi Rebekah bisi siku menyadi lelaki ke benama Laban. Laban lalu belanda ngagai ulun Abraham semak telaga nya. Laban udah meda tinchin ti ba idung, enggau gelang ti ba lengan menyadi indu iya, lalu udah ninga iya nusui utai ti udah disebut lelaki nya ngagai iya. Nya alai Laban lalu mansang ngagai ulun Abraham, ke benung bediri ngimbai jelu unta iya, semak telaga nya. Iya lalu bejaku enggau ulun Abraham, “Aram ke rumah enggau aku. Nuan tu orang ke udah diberekatka TUHAN. Nadai kebuah nuan agi bediri ditu. Aku bisi bilik ti udah disediaka aku ke nuan dalam rumah aku, lalu aku bisi mega endur ke jelu unta nuan.” Nya alai lelaki nya lalu tama ngagai rumah Laban. Laban lalu mantaika utai ari jelu unta nya, lalu meri jelu nya rumput ti rangkai enggau pemakai jelu. Udah nya iya lalu mai ai kena ulun Abraham, enggau bala iya masu kaki sida. Lebuh pemakai dibai ngagai sida, lelaki nya lalu bejaku, “Aku enda makai sebedau aku madahka pesan ti dibai aku ngagai kita.” Ku Laban bejaku, “Padahka meh pesan nya.” Lelaki nya lalu belabuh bejaku. Ku iya, “Aku tu ulun Abraham.” “ TUHAN udah merekatka tuan aku enggau mayuh macham utai, lalu ngasuh iya kaya. TUHAN udah meri iya raban bedus enggau kambin, jelu sapi, pirak, emas, ulun ti indu enggau ulun ti lelaki, jelu unta, enggau keledai. Sarah, iya nya bini tuan aku, udah ngadaka anak lelaki siku lebuh Sarah nyau tuai, lalu tuan aku udah meri semua pesaka iya ngagai anak iya nya. Tuan aku udah besumpah ngasuh aku ngasika pesan iya. Ku iya, ‘Anang milih bini ke anak aku ari indu di menua Kanaan, tang mansang nuan ngagai bala apai aku, ngagai kaban belayan aku, lalu pilih siku bini ke iya.’ Aku lalu nanya tuan aku, ‘Kati enti indu nya enggai mupuk enggau aku?’ Ku tuan aku nyaut, ‘ TUHAN, ke seruran dipetuaika aku, deka ngasuh melikat Iya bejalai enggau nuan, lalu ngasuh pejalai nuan mujur. Nuan deka bulih siku bini ke anak aku, ari bala aku empu, ari ruang bilik apai aku. Ka semina siti aja jalai nuan tau ngelepaska diri ari sumpah tu: enti nuan mansang ngagai kaban belayan aku, lalu sida enggai nyerahka indu nya ngagai nuan. Nya baru nuan dilepaska ari sumpah tu.’ “Lebuh aku datai ba telaga nya sehari tu tadi, aku besampi, ‘ TUHAN Allah Taala ke tuan aku Abraham, awakka aku mujur ba utai ti dikereja aku. Aku diatu benung bediri semak telaga tu. Lebuh siku indu datai nyauk lagi, aku deka minta iya meri aku ngirup ari tepayan iya. Enti iya besetuju, lalu deka mega meri jelu unta aku ngirup, awakka iya nya meh orang ke udah dipilih Nuan nyadika bini anak tuan aku.’ Sebedau aku sempat badu besampi dalam ati aku, Rebekah lalu datai ngesan tepayan ai, lalu nurun ngagai telaga, mansang nyauk. Aku lalu bejaku enggau iya, ‘Beri aku ngirup.’ Iya lalu beguai-guai ngingkaska tepayan ai ari bau iya, lalu ku iya, ‘Ngirup meh. Aku deka mega nyauk ai ke unta nuan.’ Nya alai aku lalu ngirup, lalu iya nyauk ai ke jelu unta aku. Aku lalu nanya iya, ‘Anak sapa nuan tu?’ lalu ku iya nyaut, ‘Apai aku Bituel, anak Nahor seduai Milkah.’ Udah nya aku lalu ngelekatka tinchin ba idung iya, lalu ngerasukka sepasang gelang ba lengan iya kedua piak. Aku lalu meremi lalu nyembah TUHAN. Aku muji TUHAN Allah Taala tuan aku Abraham, laban TUHAN udah nguluka aku terus ngagai kaban belayan tuan aku, alai aku ke tetemuka anak indu iya, ke anak tuan aku. Nya alai, enti kita taluk ngagai tuan aku, lalu manah enggau iya, padahka ngagai aku. Enti kita enggai, padahka mega ngagai aku, ngambika aku berundingka utai ti patut dikereja aku.” Laban seduai Bituel lalu nyaut, “Laban pekara tu datai ari TUHAN, kami enda tau meri pemutus penemu ba pekara tu. Tu Rebekah empu. Bai iya, lalu mupuk. Awakka iya nyadika bini anak tuan nuan, nitihka jaku TUHAN.” Lebuh ulun Abraham ninga nya, iya meremi, lalu nyembah TUHAN. Udah nya iya lalu mantaika kain enggau pirak, enggau perengka emas, lalu meri utai nya ngagai Rebekah. Iya mega meri pemeri ti berega ngagai menyadi lelaki enggau ngagai indai Rebekah. Udah nya ulun Abraham enggau orang ke nyempulang iya, makai ngirup, lalu bemalam dia. Lebuh sida dani pagi hari siti, ulun Abraham lalu bejaku, “Awakka aku pulai ngagai tuan aku.” Tang ku menyadi Rebekah, enggau indai iya bejaku, “Awakka Rebekah diau enggau kami abis kurang seminggu tauka sepuluh hari. Udah nya baru iya tau mupuk.” Tang ku ulun Abraham bejaku, “Anang ngetanka kami. TUHAN udah ngasuh pejalai aku mujur, nya alai awakka aku pulai ngagai tuan aku.” Disaut sida, “Manah kitai ngangauka Rebekah, lalu nanya iya empu.” Sida lalu ngangauka Rebekah, lalu nanya iya, “Kati nuan bisi ati deka mupuk enggau lelaki tu?” “Ka,” ku Rebekah nyaut. Nya alai sida lalu ngasuh Rebekah enggau siku ulun ari ruang bilik apai iya mupuk sama enggau ulun Abraham, sereta enggau bala iya. Sida lalu merekatka Rebekah munyi tu: “Awakka nuan, menyadi, nyadi indai ke bejuta-juta mensia! Awakka peturun nuan ngalahka nengeri munsuh sida!” Udah nya Rebekah enggau bala ulun iya ti indu angkat lalu nepan jelu unta, deka mupuk enggau ulun Abraham. Sida lalu mupuk. Nyadi Isak udah datai di menua puang ti dikumbai “Telaga Ti Diempu Iya Ti Idup, Ke Meda Aku” lalu diau di selatan menua Kanaan. Nyadi sekali, lebuh hari nyau lemai, iya pansut deka bejalai ba padang. Iya lalu tepedaka raban jelu unta datai nuju iya. Lebuh Rebekah meda Isak, iya lalu nurun ari jelu unta iya lalu nanya ulun Abraham, “Sapa lelaki nya ke bejalai ngagai kitai ba padang nya?” “Nya meh tuan aku,” ku ulun Abraham nyaut. Rebekah ngambi kain lalu mampul mua diri. Ulun Abraham lalu madahka ngagai Isak semua utai ti udah dikereja iya. Udah nya Isak lalu mai Rebekah ngagai langkau kain ti udah alai Sarah indai iya diau, lalu Rebekah nyadika bini iya. Isak rinduka Rebekah, nya alai iya enda agi tusah ati ke indai iya ti udah mati. Abraham jadi enggau siku indu bukai ke benama Keturah. Keturah ngadaka Simran, Joksan, Medan, Midian, Isbak enggau Suah. Joksan nya apai Sheba seduai Dedan, lalu peturun Dedan nya orang Asurim, bansa Letusim, enggau bansa Lumim. Anak Midian nya Epah, Eper, Hanok, Abida, enggau Eldaah. Semua sida tu peturun Keturah magang. Abraham meri semua reta tengkira iya ngagai Isak, tang lebuh iya agi idup, iya meri pemeri ngagai bala anak ke diadaka bini iya ti bukai. Udah nya iya lalu ngasuh bala anak iya ti bukai pindah ngagai menua di timur, ngejang ari anak iya Isak. Anak iya Isak enggau Ismail nguburka iya dalam lubang gua di Makpilah, ba padang ti muak ke timur Mamre, ti udah diempu Epron anak Sohar, orang bansa Iti. Padang nya udah dibeli Abraham ari orang Iti. Abraham enggau bini iya Sarah sama dikuburka dia. Udah bekau pemati Abraham, Allah Taala merekatka anak iya Isak ti diau semak “Telaga Ti Diempu Iya Ti Idup, Ke Meda Aku.” Ismail diadaka Hagar. Hagar tu indu bansa orang Ejip. Iya ulun Sarah, lalu iya ngadaka anak Abraham ke benama Ismail. Baka tu ku bala anak Ismail ditusun nitihka ripih pengada sida: Nebaiot, Kedar, Adbil, Mipsam, Misma, Dumah, Massa, Hadat, Tema, Jetur, Napis enggau Kedemah. Sida tu nurunka dua belas raban bansa, lalu sida meri nama sida empu ngagai genturung pendiau sida enggau ngagai endur alai sida ke nirika kem. Ismail mati lebuh umur 137 taun. Peturun Ismail diau di menua entara Habilah enggau Sur, tunga ke timur menua Ejip, ba jalai ti nuju ngagai menua Asiria. Sida diau beserara ari peturun Abraham ti bukai. Tu jerita pasal anak Abraham ke benama Isak. Isak umur 40 taun lebuh iya jadi enggau Rebekah anak indu Bituel (orang Aram ari menua Mesopotamia). Rebekah tu menyadi indu Laban. Nyadi ketegal Rebekah ke nadai anak, Isak besampi ngagai TUHAN ke iya. TUHAN nyaut sampi Isak, lalu Rebekah betubuh-bisi. Iya deka ngadaka anak ti besapit dua, lalu sebedau anak iya ke dua iku nya ada, seduai iya belaban enggau pangan diri dalam kandung Rebekah. Ku Rebekah bejaku, “Nama kebuah utai tu nyadi ba aku?” Nya alai iya minta saut ari TUHAN. Ku TUHAN bejaku ngagai iya, “Dalam tubuh nuan bisi dua bengkah bansa. Nuan deka ngadaka dua bengkah bansa ti deka bemunsuh ngelaban pangan diri. Siti bansa deka kering agi ari bansa ti siti, lalu iya ke tuai agi deka bekereja ke iya ke biak agi.” Maya pen chukup alai Rebekah deka beranak, lalu iya ngadaka anak lelaki ke besapit dua. Gamal iya ke dulu agi ada nya mirah, lalu kulit iya baka baju panjai ti bebulu. Nya alai iya diberi nama Esau. Anak ti pansut dudi, ngenggam tumbit Esau. Nya alai iya diberi nama Jakop. Umur Isak enam puluh taun lebuh anak iya dua iku nya ada. Nembiak dua iku nya mansang besai, lalu Esau nyadi orang ke landik ngasu, ke rindu bejalai ba sebelah babas, tang Jakop nya orang ke bependiau, ke jarang mindah ari rumah. Isak rindu agi ke Esau, laban iya rindu makai jelu ti ulih Esau ngasu, tang Rebekah rindu agi ke Jakop. Nyadi sekali, lebuh Jakop benung manduk bubur kachang, Esau datai pulai ngasu. Iya lapar lalu ku iya bejaku enggau Jakop, “Lapar amat aku tu. Beri aku mimit utai ti mirah nya.” (Nya kebuah iya diberi nama Edom.) Disaut Jakop, “Aku endang deka meri utai tu ngagai nuan, enti nuan deka meri waris nuan ke nyadi anak tuai ngagai aku.” Ku Esau bejaku, “Barang ku jaku! Aku nyau deka mati lapar. Nama guna aku enggau waris nya?” Ku Jakop nyaut, “Nuan enda tau enda dulu besumpah nyerahka waris nuan ngagai aku.” Esau besumpah, lalu nyerahka waris iya ngagai Jakop. Udah nya Jakop lalu meri iya roti, enggau bubur nya. Esau makai, ngirup, angkat lalu mupuk. Nya meh jalai Esau enda bebasaka waris iya ke nyadi anak tuai. Lapar pungkang sekali agi nyadi di menua nya, kelimpah ari lapar pungkang ti udah nyadi lebuh maya Abraham menya. Isak mansang ngagai Abimelek, raja orang Pilistin, ti diau di Gerar. Nyadi TUHAN udah pegari di mua Isak, lalu udah bejaku munyi tu: “Anang bejalai ngagai menua Ejip. Diau di menua tu nitihka asuh Aku. Diau ditu, lalu Aku deka begulai enggau nuan, lalu merekatka nuan. Aku deka meri semua menua tu ngagai nuan, enggau ngagai bala peturun nuan. Aku deka ngamatka semaya ti udah digaga Aku enggau apai nuan, Abraham. Aku deka meri ngagai nuan mayuh peturun, ngemayuh bintang ti di langit, lalu Aku deka meri ngagai sida semua menua tu. Semua bansa deka minta Aku merekatka sida, baka Aku ti udah merekatka peturun nuan. Aku deka merekatka nuan, laban Abraham udah ngasika Aku, lalu udah nitihka semua pesan, atur enggau adat Aku.” Nya alai Isak diau di Gerar. Lebuh orang lelaki ti diau dia nanyaka pasal bini iya, iya madahka bini iya nya menyadi iya. Isak enggai ngaku Rebekah nya bini iya, laban iya enggai ke orang munuh iya lalu ngambi Rebekah, laban Rebekah endang amat bajik. Lebuh Isak udah lama diau dia, Raja Abimelek nyenguk ke baruh ari jenila iya, lalu tepedaka Isak seduai Rebekah benung beberap. Abimelek lalu mesanka Isak, lalu bejaku enggau iya, “Diatu baru aku nemu iya bini nuan! Nama kebuah nuan madahka iya menyadi nuan?” Ku Isak nyaut, “Laban aku ngumbai orang deka munuh aku enti aku madahka iya bini aku.” Lalu ku Abimelek bejaku enggau Isak, “Peda nuan utai ti udah dikereja nuan ngagai kami! Enti sema siku lelaki ari bala aku bisi tekelanjur tinduk enggau bini nuan, nuan empu betanggungjawapka penyalah kami.” Abimelek lalu meri jaku tangkan ngagai semua orang mayuh, munyi tu: “Barang sapa ngachau orang tu tauka ngachau bini iya, deka diukum bunuh.” Isak lalu naburka benih di menua nya, lalu taun nya iya ngetau seratus kali lipat mayuh agi ari benih ti ditanam iya, laban TUHAN udah merekatka iya. Iya majak bulih utai, lalu nyadi kaya bendar. Raban bedus enggau sapi iya mayuh, lalu bala iya pen mayuh, datai ke orang Pilistin nyau kepapaska iya. Sida ngalitka semua telaga ti udah ditumbak bala ulun apai iya Abraham, lebuh Abraham agi idup menya. Lalu ku Abimelek bejaku enggau Isak, “Angkat nuan ari menua kami laban nuan nyau kering agi ari kami.” Nya alai Isak angkat ari menua nya, nirika kem iya ba Emperan Gerar, lalu ngentapka diri dia. Iya lalu numbak baru telaga ti udah ditumbak lebuh maya Abraham menya, tang ditambun orang Pilistin udah bekau pemati Abraham. Nama ti diberi Isak ngagai telaga nya sebaka enggau nama ti udah diberi apai iya. Bala ulun Isak numbak telaga ba lebak nya, lalu tetemuka ai. Bala pengibun bedus orang Gerar belaya enggau bala pengibun bedus Isak. Ku sida, “Ai nya enggi kami.” Nya alai Isak ngumbai telaga nya “Berebut.” Bala ulun Isak numbak siti agi telaga, lalu sida mega belayaka telaga nya, nya alai iya ngumbai telaga nya “Bemunsuh”. Iya mindah ari endur nya, lalu numbak siti agi telaga. Sida enda belayaka telaga nya, nya alai iya ngumbai telaga nya “Bisi Endur.” Ku Isak bejaku, “Diatu TUHAN udah meri kitai endur alai diau di menua tu, lalu kitai deka nyadi kaya-raja ditu.” Isak mindah ari nya ngagai Beer-seba. Malam nya TUHAN pegari lalu bejaku enggau iya, “Aku tu Allah Taala apai nuan Abraham. Anang takut. Aku bisi enggau nuan. Aku deka merekatka nuan lalu meri ngagai nuan mayuh peturun ketegal semaya aku enggau nembiak Aku Abraham.” Isak ngaga siti alta dia lalu nyembah TUHAN. Udah nya iya lalu nirika kem iya dia, lalu bala ulun iya numbak siti agi telaga. Abimelek lalu datai ari Gerar sama enggau Ahusat, ti nyadi penyanding penemu iya, enggau Pikol, ti nyadi tuai soldadu iya, deka betemu enggau Isak. Isak lalu nanya, “Nama kebuah kita datai ditu betemu enggau aku? Suba kita nadai rinduka aku, lalu muru aku ari menua kita.” Disaut sida, “Diatu kami nemu TUHAN bisi enggau nuan, lalu dalam penemu kami, kitai patut ngaga sempekat. Kami minta nuan besemaya enda ngemediska kami, baka kami ke nadai udah kala ngemediska kita. Kami udah nelap enggau kita, lalu ngasuh kita angkat enggau selamat. Diatu TUHAN terang udah merekatka nuan.” Isak lalu nyendiaka pengerami makai besai ke sida, lalu sida makai ngirup dia. Tumu pagi hari siti, genap iku sida ngaga semaya, lalu nanggam semaya nya ngena sumpah. Isak meda sida mupuk, lalu sida beserara bebaik enggau pangan diri. Sehari nya mega, bala ulun Isak datai lalu madahka ngagai iya pasal telaga ti udah ditumbak sida. Ku sida, “Kami udah tetemuka ai.” Iya lalu ngumbai telaga nya “Besumpah.” Nya kebuah nengeri nya dikumbai Beer-seba nyentuk ngagai sehari tu. Lebuh umur Esau empat puluh taun, iya jadi enggau dua iku indu orang Iti. Seduai nya Judit anak Beeri, enggau Basemat anak Elon. Seduai nya balat amat ngenusahka ati Isak seduai Rebekah. Lebuh Isak nyau tuai, lalu enda ulih meda agi, iya mesanka anak tuai iya Esau, lalu bejaku enggau iya, “Anak!” “Tu aku, apai” ku Esau nyaut. Ku Isak, “Aku nyau tuai. Aku enda nemu maya dirika mati. Nya alai bai panah enggau laja nuan, bejalai ke babas, ngulihka jelu ke aku, lalu sediaka pemakai ti nyamai ti dikerinduka aku, lalu bai pemakai nya ngagai aku, ngambika aku makai, lalu merekatka nuan sebedau aku mati.” Nyadi Rebekah bisi mending lebuh Isak bejaku enggau anak iya Esau. Nya alai lebuh Esau nurun ngasu, Rebekah lalu bejaku enggau anak iya Jakop, “Aku bisi ninga apai nuan bejaku enggau Esau, ‘Bai siku jelu ngagai aku, lalu sediaka pemakai ti nyamai ke aku, ngambika aku makai iya lalu merekatka nuan di mua TUHAN sebedau aku mati.’ Nya alai, anak, kereja utai ti diasuh aku. Alai nuan mansang ngagai raban jelu, lalu ambi dua iku kambin ti biak sereta gemu, ngambika aku manduk pemakai ti nyamai, ti balat dikerinduka apai nuan. Nuan enda tau enda mai pemakai nya ngagai apai nuan, ngambika iya makai pemakai nya, lalu merekatka nuan, sebedau iya mati.” Tang ku Jakop bejaku enggau indai iya, “Nuan nemu, Esau bebulu, tang kulit aku alus. Kada enda apai deka ngama aku, lalu aku baka ke nipu iya, lalu minta diri kena sumpah, ukai bulih berekat.” Disaut indai iya, “Awakka semua sumpah ti disebut ngagai nuan, ninggang aku magang, anak. Kereja aja utai ti diasuh aku. Alai mupuk nuan lalu ambi kambin ti agi biak ke aku.” Jakop mupuk lalu ngambi dua iku kambin ti agi biak, lalu mai kambin dua iku nya ngagai indai iya. Indai iya lalu manduk pemakai ti balat dikerinduka Isak. Udah nya indai iya lalu ngambi gari Esau ti pemadu manah, ti disimpan Rebekah di rumah, lalu ngerasukka gari nya ba Jakop. Rebekah ngengkahka kulit kambin nya ba lengan Jakop, enggau ba rekung iya ti nadai bulu. Iya lalu nyuaka ngagai Jakop pemakai ti nyamai nya sama enggau roti ti udah dipanggang iya. Udah nya Jakop lalu mansang ngagai apai iya, lalu bejaku, “Apai!” Apai iya lalu nyaut, “Tu aku. Sapa nuan nya, anak?” Jakop lalu nyaut, “Aku tu anak tuai nuan, Esau. Aku udah ngereja utai ti diasuh nuan. Uji nuan duduk, lalu makai dagin ti dibai aku ngagai nuan, ngambika nuan merekatka aku.” Tang ku Isak bejaku, “Baka ni ku nuan ngenyampat nya bulih jelu, anak?” Jakop lalu nyaut, “Laban TUHAN Allah Taala nuan udah ngasuh aku mujur.” Ku Isak bejaku enggau Jakop, “Datai semak kitu agi, ngambika aku ulih ngama nuan. Kati nuan tu amat Esau?” Jakop lalu mansang semak agi ngagai apai iya. Isak lalu ngama iya, lalu bejaku, “Nyawa nuan munyi nyawa Jakop, tang lengan nuan asai lengan Esau.” Isak enda ngelala Jakop, laban lengan iya bebulu baka lengan Esau. Lebuh iya baru deka merekatka Jakop, iya lalu nanya baru, “Kati nuan tu amat anak aku Esau?” “Aku meh tu, apai,” ku Jakop nyaut. Lalu ku Isak bejaku, “Bai dagin nya ngagai aku. Lebuh aku udah makai dagin nya lagi, nya baru aku merekatka nuan.” Jakop lalu mai dagin nya ngagai apai iya, enggau wain mimit. Udah nya apai iya lalu bejaku enggau Jakop, “Datai kitu, lalu sium aku, anak.” Lebuh Jakop mansang deka nyium apai iya, Isak lalu tesiumka bau gari ti dikena Jakop. Isak lalu merekatka Jakop. Ku iya, “Pemanah bau anak aku nyau baka bau padang ti udah diberekatka TUHAN. Awakka TUHAN meri nuan ambun ari langit, lalu ngasuh tanah nuan ami! Awakka TUHAN ngasuh nuan bulih gandum, enggau wain! Awakka orang bansa bukai bekereja ke nuan, lalu awakka orang meremi di mua nuan. Awakka nuan merintah semua kaban belayan nuan, lalu awakka peturun indai nuan meremi ngagai nuan. Awakka orang ke nyumpah nuan, tulah magang, lalu awakka orang ke merekatka nuan, diberekatka magang.” Lebuh Isak udah tembu merekatka Jakop, lalu Jakop pen baru udah angkat ari endur nya, menyadi iya Esau tama, baru pulai ngasu. Iya mega manduk pemakai ti nyamai, lalu mai pemakai nya ngagai apai iya. Ku iya, “Apai, uji nuan angkat, lalu empa dagin ti dibai aku ke nuan, ngambika nuan merekatka aku.” “Sapa nuan tu?” ku Isak nanya. “Anak tuai nuan, Esau,” ku Esau nyaut. Isak lalu belabuh getar-getar, lalu nanya, “Enti pia, sapa orang nya tadi ti udah bulih jelu, lalu mai jelu nya ngagai aku? Aku udah makai utai nya sebedau nuan datai. Aku udah meri iya berekat ti penudi, nya alai berekat nya mengkang ba iya belama iya.” Lebuh Esau ninga nya, iya lalu duie-duie nyabak sereta pedis ati. Ku iya bejaku, “Berekatka aku mega, apai!” Disaut Isak, “Menyadi nuan udah datai kitu, lalu nipu aku. Iya udah ngambi berekat nuan.” Ku Esau bejaku, “Tu kedua kali iya udah ngakal aku. Indah nama iya deh Jakop. Iya ngenchuri waris aku ti nyadi anak tuai, lalu diatu iya udah ngenchuri berekat aku. Kati nuan nadai ngalau berekatka aku, apai?” Disaut Isak, “Aku udah ngaga iya nyadi tuan nuan, lalu aku udah ngaga semua kaban belayan iya, nyadi ulun iya magang. Aku udah meri iya gandum, enggau wain. Diatu aku nadai agi ulih ngereja utai ke nuan, anak!” Esau majak minta berekat ari apai iya: “Kati nuan semina bisi siti aja berekat, apai? Berekatka aku mega, apai!” Iya lalu nyabak. Udah nya Isak lalu bejaku enggau iya, “Nadai ambun ari langit deka ninggang nuan, Nuan nadai tanah ti ami. Nuan deka beridup ngena pedang nuan, Tang nuan deka nyadi ulun menyadi nuan. Tang taja pia, lebuh nuan angkat ngelaban iya, nuan deka ngelepaska diri ari kuasa iya.” Esau lalu begedika Jakop, laban apai iya udah merekatka Jakop. Ku iya berunding, “Maya nyenggai apai nyau semak. Nya meh maya aku munuh Jakop.” Tang lebuh Rebekah ninga pasal utai ti deka dikereja Esau, iya lalu mesanka Jakop, lalu bejaku enggau iya, “Dinga nuan. Menyadi nuan, Esau, berunding deka ngiga balas lalu munuh nuan. Nya alai anak, titihka jaku aku. Alai nuan mupuk diatu ngagai Laban, menyadi aku di Haran, lalu diau enggau iya enda lama, nganti menyadi nuan udah badu agi ringat ngagai nuan lalu enda agi ingatka utai ti udah dikereja nuan ngagai iya. Udah nya baru aku deka ngasuh orang ngambi nuan pulai kitu. Nadai kebuah aku lenyau dua iku anak sereta hari.” Ku Rebekah bejaku enggau Isak, “Aku nyau leju begulai enggau indu orang bansa bukai ke jadi enggau Esau. Enti Jakop jadi enggau indu orang Iti, manah agi aku mati.” Isak lalu ngangauka Jakop, merekatka iya, lalu bejaku enggau iya munyi tu, “Anang jadi enggau indu orang Kanaan, tang mansang nuan ngagai menua Mesopotamia, ngagai rumah aki nuan Bituel, lalu ambi siku ari indu ke dia nyadika bini nuan, siku ari anak indu aya nuan Laban. Awakka Allah Taala ti Pemadu Bekuasa merekatka nuan, lalu ngasuh nuan beranak betelesak lalu nurunka mayuh bengkah bansa! Awakka Iya merekatka nuan enggau peturun nuan baka Iya ti udah merekatka Abraham, lalu awakka nuan bempu menua tu, ti udah alai nuan diau, lalu udah diberi Allah Taala ngagai Abraham!” Isak lalu ngasuh Jakop mupuk ngagai menua Mesopotamia, ngagai Laban anak Bituel, orang Aram, menyadi lelaki Rebekah indai Jakop seduai Esau. Esau nemu Isak udah merekatka Jakop, lalu udah ngasuh Jakop mupuk ngagai menua Mesopotamia, ngiga bini. Esau mega nemu, lebuh Isak merekatka Jakop, iya nagang Jakop jadi enggau indu orang Kanaan. Esau nemu Jakop udah ngasika apai enggau indai iya, lalu udah mupuk ngagai menua Mesopotamia. Ari nya Esau nemu apai iya Isak sigi enggai nyagi iya jadi enggau indu orang Kanaan. Nya alai iya mansang ngagai Ismail anak Abraham, lalu jadi enggau anak indu Ismail ke benama Mahalat, menyadi indu Nebaiot. Jakop angkat ari Beer-seba mansang ngagai menua Haran. Padam mata hari lemai nya iya datai ba siti endur ti kudus, lalu bemalam dia. Iya gali deka tinduk, lalu iya bepanggalka sigi batu. Iya bemimpi meda siti tangga berindik ari tanah nyentuk ke langit, lalu bala melikat nurun niki nengah tangga nya. Udah nya iya lalu meda TUHAN bediri ngimbai iya. Ku TUHAN bejaku ngagai iya, “Aku tu TUHAN Allah Taala ke disembah Abraham enggau Isak. Aku deka meri menua ti alai nuan gali tu ngagai nuan, enggau ngagai peturun nuan. Peturun nuan deka ngemayuh abus tanah ti di dunya. Sida deka nangkir rampa menua sida ngagai semua endur, lalu Aku deka merekatka semua bansa ngena nuan enggau peturun nuan. Ingat, Aku deka seruran enggau nuan, lalu nyaga nuan di sebarang endur nuan bejalai, lalu Aku deka mai nuan pulai baru ngagai menua tu. Aku enda ninggalka nuan sebedau Aku tembu ngereja semua utai ti udah disemaya Aku enggau nuan.” Jakop lalu tedani, lalu ku iya, “ TUHAN bisi ditu! Iya bisi ba endur tu, tang aku enda nemu nya!” Jakop berasai takut, lalu ku iya, “Takut amat aku ba endur tu! Tu tentu rumah Allah Taala. Tu tetap pintu ke serega.” Pagi hari siti Jakop angkat tumu, ngambi batu ti udah nyadika panggal iya, lalu nirika batu nya nyadika batu pengingat. Udah nya iya nuang minyak kana ngagai batu nya, kena iya nyerahka batu nya ngagai Allah Taala. Jakop lalu ngumbai endur nya Betel. (Dulu menya, nengeri ba endur nya dikumbai Lus.) Udah nya, Jakop lalu ngaga siti sumpah enggau TUHAN. Ku iya, “Enti Nuan deka meruan enggau aku, lalu nyaga aku dalam pejalai aku, sereta meri aku pemakai enggau gari, lalu enti aku pulai baru enggau likun ngagai rumah apai aku, Nuan meh nyadika Allah Taala aku. Batu pengingat ti udah didirika aku tu, deka nyadi endur alai Nuan disembah, lalu aku deka meri ngagai Nuan sepuluh peratus ari semua utai ti diberi Nuan ngagai aku.” Jakop lalu majakka pejalai iya, lalu datai ba menua orang di timur. Iya lalu tepedaka siti telaga ba padang, enggau tiga bengkah raban bedus tingkap ngelingi telaga nya, laban raban bedus nya diberi ngirup ari telaga nya. Nyadi batu ti dikena nutup mua telaga nya besai amat. Lebuh semua raban bedus udah datai magang, nya baru bala pengibun bedus maringka batu nya ke tisi, lalu meri raban bedus nya ngirup. Udah nya sida maringka batu nya pulai baru ngagai mua telaga nya. Jakop lalu nanya bala pengibun bedus nya, “Unggal, ari ni penatai kita?” “Ari Haran,” ku sida nyaut. Iya lalu nanya, “Kati kita ngelala Laban uchu Nahor?” “Ngelala,” ku sida pengibun bedus nya nyaut. “Kati iya agi gerai nyamai?” ku Jakop nanya. “Agi,” ku sida nyaut. “Nyin anak indu iya Rachel mai raban bedus apai iya kitu.” Ku Jakop, “Hari agi tinggi, apin maya alai mai jelu tu pulai. Manah meri jelu tu ngirup, lalu mai sida ngagai padang baru.” Disaut sida pengibun bedus, “Kami enda tau ngereja nya, sebedau semua raban bedus udah datai magang, lalu batu nya dibaring ke tisi. Udah nya baru kami meri jelu ngirup.” Lebuh Jakop agi benung bejaku enggau sida, Rachel pen datai mai raban bedus apai iya. Lebuh Jakop meda Rachel mai raban bedus aya iya Laban, iya mansang ngagai telaga, maringka batu nya ke tisi, lalu meri raban jelu bedus nya ngirup. Udah nya iya nyium Rachel, lalu nyabak gaga ati. Ku Jakop madahka ngagai Rachel, “Aku tu anak Rebekah, kaban apai nuan.” Rachel lalu belanda, madahka apai iya. Lebuh apai Rachel ninga Jakop nya anak menyadi iya Rebekah, iya lalu belanda ngambat Jakop, merap lalu nyium iya, lalu mai iya ke rumah. Lebuh Jakop madahka pasal semua utai ti udah nyadi, Laban lalu bejaku, “Nuan tu endang darah-getah aku empu.” Jakop lalu diau dia sebulan. Ku Laban bejaku enggau Jakop, “Nuan kaban belayan aku, tang aku enda tau ngasuh nuan bekereja ke aku enda begaji. Nya alai, ni pemesai gaji dipinta nuan?” Nyadi Laban bisi dua iku anak dara. Iya ke tuai agi benama Leah, lalu iya ke biak agi benama Rachel. Leah numbas pemajik, tang Rachel manah raras tubuh sereta bajik gamal. Jakop rinduka Rachel, nya alai ku iya, “Aku bekereja ke nuan tujuh taun kena aku ngulihka Rachel.” Ku Laban nyaut, “Manah agi aku meri iya ngagai nuan, ari ke meri iya ngagai orang bukai. Diau ditu enggau aku.” Jakop lalu bekereja tujuh taun, kena iya ngulihka Rachel, lalu ba Jakop tujuh taun nya asai ti dua tiga hari aja laban iya rinduka Rachel. Udah nya Jakop lalu bejaku enggau Laban, “Awakka aku jadi enggau Rachel laban timpuh udah chukup.” Laban lalu nyendiaka gawai tikah, lalu ngambi semua orang ngabang. Tang malam nya, iya enda mai Rachel, tang mai Leah, ngagai Jakop, lalu Jakop beleman enggau Leah. ( Laban meri ulun iya ti indu ke benama Silpah ngagai Leah nyadika ulun Leah.) Pagi hari siti nya baru Jakop nemu indu nya Leah. Iya lalu bejaku ngagai Laban, “Nama kebuah nuan ngereja utai baka tu ngagai aku? Aku udah bekereja ke nuan kena aku ngulihka Rachel. Nama kebuah nuan nipu aku?” Ku Laban nyaut, “Nitihka adat kami di menua tu, anak indu ke biak enda tau ditikah dulu agi ari anak indu ke tuai. Nganti udah tembu gawai tikah seminggu tu, nya baru aku meri Rachel ngagai nuan, enti nuan deka bekereja ke aku tujuh taun da agi.” Jakop besetuju, lalu lebuh gawai tikah seminggu nya udah tembu, Laban lalu meri anak iya Rachel nyadika bini Jakop. ( Laban lalu meri ulun iya ti indu ke benama Bilhah ngagai Rachel nyadika ulun Rachel.) Jakop mega beleman enggau Rachel, lalu iya balat agi rinduka Rachel, ari iya ti rinduka Leah. Udah nya Jakop lalu bekereja ke Laban tujuh taun da agi. Lebuh TUHAN meda Jakop rindu agi ke Rachel ari iya ti rinduka Leah, TUHAN lalu ngasuh Leah beranak mayuh, tang Rachel mengkang nadai anak. Leah ngandung, lalu ngadaka anak lelaki siku. Ku iya, “ TUHAN udah meda penusah aku. Diatu baru laki aku deka rinduka aku.” Nya alai Leah meri iya nama Reuben. Leah ngandung baru, lalu ngadaka siku agi anak lelaki. Ku iya, “ TUHAN udah meri aku siku agi anak lelaki, laban Iya udah ninga aku enda dikerinduka Jakop.” Nya alai Leah meri anak iya nya nama Simeon. Leah ngandung baru, lalu ngadaka siku agi anak lelaki. Ku iya, “Diatu laki aku tentu deka rindu agi ke aku, laban aku udah ngadaka tiga iku anak lelaki ke iya.” Nya alai Leah meri iya nama Lewi. Udah nya Leah ngandung baru, lalu ngadaka siku agi anak lelaki. Ku iya, “Sekali tu aku deka muji TUHAN.” Nya alai iya meri iya nama Judah. Udah nya iya enda agi beranak. Tang Rachel mengkang nadai anak. Nya alai iya kepapaska menyadi iya, lalu ku iya bejaku enggau Jakop, “Beri aku anak. Enti enda, manah agi aku mati.” Jakop lalu ringat ngagai Rachel. Ku iya, “Aku ukai Allah Taala, laban Iya ke nagang nuan bisi anak.” Ku Rachel, “Tu ulun aku, Bilhah. Manah agi enti nuan tinduk enggau iya, ngambika iya tau ngadaka anak ke aku, ngambika aku tau nyadi indai, ulih iya.” Rachel lalu nyerahka Bilhah ngagai laki iya Jakop, lalu Jakop beleman enggau Bilhah. Bilhah lalu ngandung, lalu ngadaka siku anak lelaki ke Jakop. Ku Rachel, “Allah Taala udah kasihka aku. Iya udah ninga sampi aku, lalu udah meri aku siku anak lelaki.” Nya alai iya meri anak nya nama Dan. Bilhah ngandung baru, lalu ngadaka anak lelaki ti kedua ke Jakop. Ku Rachel, “Aku bebendar amat bepekit mayuh anak ngelaban menyadi aku, tang aku udah menang.” Nya alai iya meri anak mit nya nama Naptali. Lebuh Leah nemu diri nyau badu agi beranak, iya lalu nyerahka ulun iya, Silpah, ngagai Jakop, nyadika bini Jakop. Udah nya Silpah lalu ngadaka siku anak lelaki ke Jakop. Ku Leah, “Aku udah bulih berekat.” Nya alai iya meri iya nama Gat. Silpah lalu ngadaka siku agi anak lelaki ke Jakop, lalu ku Leah, “Ati aku lantang amat! Diatu sida ke indu deka ngumbai aku lantang ati.” Nya alai iya meri iya nama Aser. Lebuh maya orang ngetau gandum, Reuben nurun ke umai, lalu tetemuka kayu pengerindu. Iya lalu mai kayu nya ngagai indai iya, Leah. Ku Rachel bejaku enggau Leah, “Beri aku mimit kayu pengerindu anak nuan nya.” Disaut Leah, “Nuan udah ngambi laki aku: kati nya enda chukup ke nuan, lalu diatu nuan deka mega ngambi kayu pengerindu anak aku?” Ku Rachel, “Enti nuan meri aku kayu pengerindu anak nuan nya, aku deka nejuka nuan tinduk enggau Jakop malam tu.” Lebuh Jakop pulai ari umai lemai nya, Leah lalu mansang ngambat iya, ku iya, “Nuan tinduk enggau aku malam tu, laban aku udah meli nuan ngena kayu pengerindu anak aku.” Nya alai malam nya Jakop beleman enggau Leah. Allah Taala lalu nyaut sampi Leah. Iya ngandung, lalu ngadaka anak lelaki ti kelima. Ku Leah, “Allah Taala udah meri aku upah, laban aku udah nyerahka ulun aku ngagai laki aku.” Nya alai iya meri anak iya nya nama Isakar. Leah ngandung baru, lalu ngadaka anak lelaki ti keenam. Ku Leah, “Allah Taala udah meri aku pemeri ti manah. Diatu baru laki aku deka nerima aku, laban aku udah ngadaka enam iku anak lelaki ke iya.” Nya alai iya meri anak mit nya nama Sebulun. Udah nya iya ngadaka siku anak indu ke diberi iya nama Dinah. Udah nya Allah Taala ingatka Rachel. Iya nyaut sampi Rachel, lalu ngasuh Rachel ulih beranak. Rachel ngandung, lalu ngadaka siku anak lelaki. Ku iya, “Allah Taala udah muai pemalu aku, laban iya udah meri aku siku anak lelaki. Awakka TUHAN meri aku siku agi anak lelaki.” Nya alai iya meri iya nama Josep. Udah bekau pengada Josep, Jakop bejaku enggau Laban, “Awakka aku mupuk, lalu pulai ngagai menua aku empu. Beri ngagai aku semua bini enggau anak aku, ti udah ulih aku bekereja ke nuan, ngambika aku angkat ari menua tu. Nuan nemu pemendar aku udah bekereja ke nuan.” Ku Laban bejaku enggau Jakop, “Awakka aku nyebut tu: Ari tujum aku empu, aku nemu TUHAN udah merekatka aku, ketegal nuan. Sebut aja upah nuan, ngambika aku mayar nuan.” Disaut Jakop, “Nuan nemu pemendar aku udah bekereja ke nuan, lalu raban jelu bedus nuan udah nambah-menambah sekumbang aku ke ngibun sida. Jelu nuan mimit aja sebedau aku datai, tang diatu sida udah mayuh amat, lalu TUHAN udah merekatka nuan, di sebarang endur aku bejalai. Diatu maya udah datai alai aku patut ngira pengidup diri empu.” “Nama utai ti patut dibayar aku ngagai nuan?” ku Laban nanya. Disaut Jakop, “Aku enda minta gaji. Aku deka majak ngintu raban jelu nuan, enti nuan besetuju enggau penemu aku: Awakka aku bejalai nengah semua raban jelu nuan sehari tu, lalu ngambi semua anak domba ti chelum enggau semua anak kambin ti beselat bulu, tauka perintik. Nya aja gaji ti dipinta aku. Ila nuan deka nemu enti aku manah ati enggau nuan tauka enda. Lebuh nuan datai meresa gaji aku, lalu nemu aku bisi kambin ti enda perintik tauka beselat bulu, tauka bedus ti enda chelum, nuan deka nemu utai nya udah ulih aku ngenchuri.” Disaut Laban, “Aku besetuju. Aram tua ngereja nitihka atur ti ku nuan.” Tang sehari nya, Laban mindahka semua kambin ti lelaki, ti besurik, tauka beselat bulu, enggau semua kambin ti indu ke perintik, tauka beselat bulu, tauka bisi chura burak ba sida. Iya mega mindahka semua jelu bedus ti chelum, lalu ngasuh bala anak lelaki iya ngibun raban jelu nya. Iya lalu ninggalka Jakop, mai raban jelu nya kira pejalai tiga hari ari endur nya. Jakop lalu ngibun teda raban jelu Laban ti bukai. Jakop lalu ngambi dan kayu poplar, kayu almon, enggau kayu plan ti agi idup, lalu ngelitika sekeda kulit ba dan kayu nya siti-siti, ngambika dan nya besurik burak. Iya lalu ngengkahka dan kayu nya di mua raban jelu nya, ba dulang alai sida ngirup. Iya ngengkahka dan kayu nya dia, laban jelu nya bung lebuh sida datai ngirup. Nya alai, lebuh kambin beranak di mua dan kayu nya, sida ngadaka anak ti besurik, perintik, enggau beselat bulu. Jakop nyeraraka jelu bedus ari jelu kambin, lalu ngasuh sida bediri nunga jelu ti besurik, enggau ti bechura chelum, ti ari raban jelu Laban. Nya meh chara iya nambahka pemayuh jelu ngagai raban jelu iya empu, lalu nyeraraka jelu nya ari raban jelu Laban. Lebuh jelu ti bepengerai nya bung, Jakop ngengkahka dan kayu nya di mua sida, ba dulang alai sida ngirup, ngambika sida beranak ba sebelah dan kayu nya. Tang iya enda ngengkahka dan kayu nya di mua jelu ti lemi. Enda lama udah nya, Laban semina bisi jelu ti lemi, lalu Jakop bempu semua jelu ti bepengerai. Nya meh jalai Jakop nyadi kaya amat. Raban jelu iya mayuh, ulun iya mayuh, jelu unta, enggau keledai iya pen mayuh. Jakop bisi ninga bala anak Laban bejaku, “Jakop udah ngambi semua utai apai kitai. Iya bulih pengaya ari semua utai apai kitai.” Jakop mega meda Laban nyau enda agi manah enggau iya baka suba. TUHAN lalu bejaku enggau Jakop, “Pulai nuan ngagai menua aki ini nuan, ngagai kaban belayan nuan. Aku deka meruan enggau nuan.” Jakop lalu mesanka Rachel seduai Leah, minta seduai iya betemu enggau iya ba padang ti alai raban jelu iya ngulam. Ku Jakop bejaku enggau Leah seduai Rachel, “Aku meda apai seduai nyau enda agi manah enggau aku baka suba. Tang Allah Taala apai aku bisi enggau aku. Seduai sama nemu, aku udah bekereja ke apai kita enggau pengabis pengering aku. Tang taja pia, iya udah ngakal aku, lalu udah ngubah gaji aku sepuluh kali. Tang Allah Taala enda nyagi iya ngemediska aku, nya alai genap kali Laban nyebut, ‘Kambin ti perintik deka nyadika gaji nuan,’ semua raban jelu kambin nya lalu ngadaka anak ti perintik. Lebuh iya nyebut, ‘Kambin ti besurik deka nyadika gaji nuan,’ semua raban jelu nya lalu ngadaka anak ti besurik. Allah Taala udah ngambi raban jelu ari apai seduai, lalu meri sida ngagai aku. “Lebuh maya jelu bung, aku bemimpi, lalu aku meda kambin ti lelaki, ti benung bung, semua besurik, beselat bulu enggau perintik magang. Ku melikat Allah Taala bejaku ngagai aku dalam mimpi nya, ‘Jakop!’ Aku lalu nyaut, ‘Tu aku!’ Ku melikat nya bejaku, ‘Peda nuan, kambin ti lelaki, ti bung, semua besurik, beselat bulu, enggau perintik magang. Aku ngasuh utai tu nyadi, laban Aku udah meda semua utai ti dikereja Laban ngagai nuan. Aku tu Allah Taala ti udah pegari di mua nuan di Betel, ba endur alai nuan ke nyerahka sigi batu nyadika batu pengingat, lalu nuang minyak kana ba batu nya, sereta ngaga siti semaya enggau Aku. Nya alai diatu nuan enda tau enda sedia, lalu pulai ngagai menua ada nuan.’ ” Rachel seduai Leah lalu nyaut Jakop, “Kami endang nadai agi ungkup ari pesaka apai kami. Iya ngaga kami baka orang kampar. Iya udah nyual kami duai, lalu diatu iya udah ngabiska semua duit rega kami duai ti udah dibayar ngagai iya. Semua pengaya tu, ti udah diambi Allah Taala ari apai kami, endang enggi kami enggau enggi anak kami. Kereja aja sebarang utai ti udah diasuh Allah Taala kereja nuan.” Nyadi Laban udah mupuk laban iya deka ngukur bedus. Lebuh iya benung nadai di rumah, Rachel lalu ngenchuri engkeramba ti disembah sida sebilik, ti diempu apai iya. Jakop nipu Laban, enda madahka diri deka mupuk. Jakop mai semua utai diri, lalu beguai-guai mupuk. Iya meraka Sungai Eupratis, lalu bejalai nuju ngagai menua ti bebukit di Giliat. Tiga hari udah bekau nya, orang bisi madahka ngagai Laban pasal Jakop ti udah rari. Laban lalu mai bala iya lalu ngagai Jakop. Iya bejalai tujuh hari nitihka Jakop, datai ke iya nyau ulih tetitihka Jakop ba menua ti bebukit di Giliat. Malam nya Allah Taala pegari di mua Laban dalam mimpi, lalu bejaku ngagai iya, “Bejimat, nuan. Nuan enda tau sekali-kali ngemba Jakop.” Nyadi Jakop udah nirika kem iya ba bukit sigi, lalu Laban nirika kem iya begulai enggau kaban belayan iya ba menua ti bebukit di Giliat. Ku Laban bejaku enggau Jakop, “Nama kebuah nuan nipu aku, lalu nabanka anak indu aku baka ke nabanka indu ke ditangkap lebuh beperang? Nama kebuah nuan nipu aku, lalu enda madahka diri mupuk? Enti nuan madahka diri mupuk, aku tetap deka ngerami pengangkat nuan ngena lagu, tamborin enggau belikan. Nuan nadai ngasuh aku nyium bala uchu enggau anak aku lebuh sida mupuk. Beli amat pengawa baka nya! Aku bisi kuasa ngemediska nuan, tang malam tadi Allah Taala apai nuan bisi meri jaku tangkan ngagai aku, enda nyagi aku ngemba nuan. Aku sigi nemu nuan udah mupuk, laban nuan balat amat keran deka pulai baru ngagai menua nuan empu, tang nama kebuah nuan ngenchuri engkeramba kami sebilik?” Disaut Jakop, “Aku takut, laban dalam runding aku, nuan deka ngerampas anak indu nuan ari aku. Tang enti nuan tetemuka orang ditu bisi naruh engkeramba nuan, awakka iya diukum bunuh. Awakka bala aku nyadika saksi. Giga lalu ambi aja utai nuan empu.” Nyadi Jakop enda nemu engkeramba Laban nya udah dichuri Rachel. Laban lalu mansang ngiga utai nya dalam langkau kain Jakop. Udah nya iya mansang ngagai langkau kain Leah, enggau ngagai langkau kain indu ke ulun ke dua iku, tang iya nadai tetemuka engkeramba nya. Udah nya iya lalu mansang ngagai langkau kain Rachel. Nyadi engkeramba sida sebilik nya udah diambi Rachel, lalu disimpan iya dalam kambut ba atas jelu unta, di baruh Rachel ke duduk. Laban nyerungkai langkau kain Rachel, tang nadai tetemuka engkeramba nya. Ku Rachel bejaku enggau apai iya, “Anang pedis ati ngagai aku, tuan, ketegal aku ti enda ulih angkat bediri masa nuan. Aku benung datai kain.” Laban begigaka engkeramba nya, tang nadai tetemuka iya. Jakop lalu ringat, “Nama penyalah ti udah dikereja aku?” ku iya nanya. “Adat ni ti udah dilanggar aku, ti ngasuh kita begagaika aku baka tu? Diatu nuan udah nyerungkai semua utai aku, ni utai nuan ti udah ditemu nuan? Engkahka utai nya di luar ditu ngambika bala nuan enggau bala aku meda utai nya. Awakka sida meri pemutus penemu pasal sapa tua ke ngena. Aku udah begulai enggau nuan dua puluh taun. Jelu bedus enggau jelu kambin nuan nadai kala enda beranak, lalu aku nadai kala makai bedus ti lelaki ari raban bedus nuan. Genap kali jelu bedus nuan diempa jelu babas, aku nadai kala mai bangkai jelu nya ngagai nuan, tang nganti jelu nya, laban nuan empu udah mejalka aku nganti semua utai ti dichuri orang lebuh siang tauka malam hari. Aku suah udah merinsa natka diri laban panas lebuh siang hari, lalu natka diri chelap lebuh malam hari. Aku suah enda ulih tinduk. Nya meh gaya pengidup aku dalam dua puluh taun aku ke begulai enggau nuan. Empat belas taun aku bekereja ngulihka anak indu nuan ke dua iku nya, enggau enam taun ngulihka raban jelu nuan. Tang taja pia, nuan ngubah gaji aku sepuluh kali. Enti Allah Taala aki ini aku, Allah Taala ke disembah Abraham seduai Isak, nadai enggau aku, nuan tentu udah muru aku pulai puang. Tang Allah Taala udah meda penusah aku, enggau pengawa ti udah dikereja aku, lalu malam tu tadi Iya udah meri atur.” Ku Laban nyaut Jakop, “Sida ke indu tu endang anak aku. Anak sida endang enggi aku, lalu raban jelu tu endang enggi aku. Iya ti bendar, semua utai ti dipeda nuan ditu, endang enggi aku magang. Tang laban aku enda ulih ngetanka anak indu enggau anak sida, aku sedia deka ngaga siti sempekat enggau nuan. Nya alai, aram tua ngaga siti tugung batu, kena tua ngingatka sempekat tua.” Nya alai Jakop ngambi sigi batu lalu nirika batu nya nyadika batu pengingat. Iya lalu ngasuh bala iya ngumpul batu lalu nugungka batu nya. Udah nya sida lalu makai ngimbai tugung batu nya. Laban ngumbai tugung batu nya Jegar Sahadusta, tang Jakop ngumbai tugung batu nya Galeed. Ku Laban bejaku enggau Jakop, “Tugung batu tu deka nyadika batu pengingat tua.” Nya kebuah endur nya dikumbai Galeed. Ku Laban mega bejaku, “Awakka TUHAN ngemataka tua lebuh tua beserara ari pangan diri.” Nya alai endur nya mega dikumbai Mispah. Ku Laban nampung jaku iya, “Enti nuan merinsaka anak aku, tauka jadi enggau indu bukai, taja pen aku enda nemu pasal utai nya, nuan enda tau enda ingat, Allah Taala ngemataka tua. Tu batu ti udah ditugungka aku entara tua, lalu tu batu pengingat. Tugung batu tu, enggau tiang batu pengingat tu kena nulung tua ingat. Aku enda tau mansang ngelui tugung batu tu nyerang nuan, lalu nuan enda tau sekali-kali mansang ngelui batu pengingat tu nyerang aku. Allah Taala ke disembah Abraham enggau Allah Taala ke disembah Nahor deka ngakim tua.” Udah nya, Jakop lalu besumpah dalam nama Allah Taala ti disembah apai iya, Isak, madahka diri deka ingatka semaya nya. Iya munuh siku jelu nyadika piring ba atas bukit nya, lalu iya mai bala iya makai jelu nya. Lebuh sida udah badu makai, sida lalu bemalam ba bukit nya. Tumu pagi hari siti, Laban nyium bala uchu iya, enggau anak indu iya, merekatka sida, mupuk lalu pulai ngagai menua iya empu. Lebuh Jakop benung di rantau jalai, bala melikat Allah Taala betemu enggau iya. Lebuh iya meda sida, iya lalu bejaku, “Tu kem Allah Taala.” Nya alai iya ngumbai endur nya Mahanaim. Jakop lalu ngasuh bala seruan iya bejalai dulu ari iya, ngagai menyadi iya Esau di menua Edom. Iya ngasuh sida bejaku munyi tu ngagai Esau: ‘Aku, Jakop, ti ulun nuan, madahka ngagai tuan aku, Esau, aku udah diau enggau Laban lalu apin ulih mulaika diri nyentuk ngagai ke diatu. Diatu aku bisi jelu sapi, keledai, bedus, kambin enggau ulun. Aku ngirumka pesan tu ngagai nuan, tuan, ngarapka nuan deka kasihka aku.” Lebuh bala seruan nya pulai baru ngagai Jakop, sida lalu bejaku, “Kami udah betemu enggau menyadi nuan, Esau, lalu iya diatu benung di rantau jalai deka betemu enggau nuan. Iya mai empat ratus iku orang enggau iya.” Jakop takut sereta irau ati. Iya lalu magi bala orang ke enggau iya, sereta enggau raban jelu bedus, kambin, jelu sapi enggau jelu unta iya, ngagai dua bengkah raban. Ku runding iya, “Enti Esau datai lalu nyerang raban ti keterubah, raban ti sebengkah nyangka ulih ngerarika diri.” Udah nya Jakop lalu besampi, “Allah Taala aki aku Abraham, enggau Allah Taala apai aku Isak, dingaka aku! Nuan TUHAN udah ngasuh aku pulai ngagai menua aku, ngagai kaban belayan aku, lalu Nuan deka ngasuh aku mujur dalam semua utai. Aku enda patut nerima semua pemanah enggau penetap ati ti udah ditunjukka Nuan ngagai aku ti ulun Nuan, laban dulu menya lebuh aku meraka Sungai Jordan aku semina mai siti tungkat aja, tang diatu aku pulai mai raban dua bengkah tu. Aku besampi, minta Nuan ngelepaska aku ari kuasa menyadi aku, Esau. Aku takut, enggai ke iya datai nyerang, lalu munuh semua bala kami, nyengkaum indu nembiak. Kingatka Diri ti udah besemaya deka ngasuh aku mujur dalam semua utai, lalu deka meri aku peturun ngemayuh igi pasir ti ba tebing tasik, ti enda ulih diitung.” Iya lalu magi sida ngagai berapa iti raban, lalu ngasuh bala ulun iya mai siti-siti raban. Ku iya bejaku enggau sida, “Kita bejalai dulu ari aku, lalu gaga takah entara raban ti dulu ari raban ti dudi.” Ku iya bejaku enggau ulun iya ti terubah, “Lebuh menyadi aku Esau betemu enggau nuan, lalu iya nanya, ‘Sapa nama tuan nuan? Kini ke tunga pejalai kita? Sapa bempu jelu ti di mua nuan tu?’ nuan enda tau enda nyaut, ‘Sida tu diempu ulun nuan Jakop. Iya ngirumka jelu tu nyadika pemeri ngagai tuan iya Esau. Jakop empu deka datai nunda-udi kami.’ ” Iya mega meri atur ti sebaka enggau nya ngagai ulun iya ti kedua, ketiga, enggau semua sida bukai ke mai raban jelu: “Tu utai ti enda tau enda disebut kita ngagai Esau, lebuh kita betemu enggau iya. Kita enda tau enda nyebut, ‘Ulun nuan, Jakop, deka datai dudi ari kami.’ ” Ku pikir Jakop, “Aku deka ngasuh iya rinduka aku ngena pemeri. Lebuh aku betemu enggau iya, aku ngarapka iya deka ngampun aku.” Iya ngirumka pemeri nya dulu ari iya, tang malam nya iya empu bemalam ba kem nya. Malam nya Jakop angkat, mai bini iya ke dua iku, indu simpan iya ke dua iku, enggau anak iya ke sebelas iku, lalu meraka Sungai Jabok. Lebuh iya udah nganjung sida meraka sungai nya, iya mega nganjung semua reta tengkira iya ke seberai, tang iya empu ninggalka diri ba kem nya. Udah nya siku lelaki datai, lalu bibat enggau iya, nyentuk ngagai rerak tawas pagi hari siti. Lebuh orang nya nemu diri enda ulih ngalahka Jakop, iya lalu mukut punggung Jakop. Tulang punggung Jakop lalu tebelingkah. Ku orang nya bejaku, “Anang megai aku agi. Hari nyau tawas.” “Aku enggai ngelengkaka nuan, enti nuan enda merekatka aku,” ku Jakop nyaut iya. “Sapa nama nuan?” ku orang nya nanya. “Jakop,” ku Jakop nyaut. Ku orang nya, “Nama nuan ukai Jakop agi. Nuan udah bibat ngelaban Allah Taala, enggau ngelaban mensia, lalu nuan udah menang. Nya alai, nama nuan Israel.” Ku Jakop, “Padahka nama nuan ngagai aku.” Tang ku orang nya nyaut, “Nama kebuah nuan keran deka nemu nama aku?” Udah nya iya lalu merekatka Jakop. Ku Jakop, “Aku udah betemu betunga mua enggau Allah Taala, lalu aku agi mengkang idup.” Nya alai, iya ngumbai endur nya Penil. Mata panas endang udah niki lebuh Jakop angkat ari Penil, lalu iya bejalai pinchat laban punggung iya. Nyentuk ngagai sehari tu bala peturun Israel enda makai gumpal isi ti ba punggung jelu, laban Jakop udah kena bukut ba gumpal isi nya. Jakop meda Esau datai enggau empat ratus iku bala iya. Nya alai iya lalu magi bala anak mit entara Leah, Rachel enggau dua iku indu simpan iya. Iya ngasuh indu simpan iya enggau anak sida bejalai dulu, ditangkanka Leah enggau bala anak iya, lalu ke penudi iya, Rachel enggau Josep di belakang. Jakop bejalai dulu ari sida, lalu meremi ke tanah tujuh kali lebuh iya mansang ngagai menyadi iya. Tang Esau belanda ngambat iya, merap iya, lalu nyium iya. Seduai iya sama nyabak. Lebuh Esau malik, lalu tepedaka sida ke indu enggau sida ke mit, iya lalu nanya, “Sapa orang enggau nuan tu?” “Tuan, tu bala anak ti udah diberi Allah Taala ngagai aku,” ku Jakop nyaut. Udah nya indu simpan iya ke dua iku lalu mansang ke mua, sama enggau anak seduai iya, lalu meremi. Udah nya Leah enggau bala anak iya mansang ke mua, lalu ke penudi iya bendar, Josep seduai Rachel mansang ke mua, lalu meremi. Ku Esau nanya, “Kati ku pasal raban siti nya ti udah betemu enggau aku tadi? Nama reti utai nya?” Ku Jakop nyaut, “Kena minta pengasih ari nuan.” Tang ku Esau, “Aku endang udah chukup mayuh utai, menyadi. Simpan nuan aja meh utai nuan nya.” Ku Jakop, “Anang baka nya. Enti nuan kasihka aku, terima aja meh pemeri aku tu. Lebuh aku meda mua nuan, aku asai ke meda mua Allah Taala, laban nuan udah manah enggau aku. Nya alai aku minta nuan nyambut pemeri tu, ti udah dibai aku ke nuan, laban Allah Taala udah kasihka aku, lalu udah meri aku semua utai ti dipeguna aku.” Jakop majak ngumbuk Esau, datai ke Esau nyambut pemeri nya. Ku Esau, “Aram kitai mupuk ari endur tu. Aku deka bejalai enggau nuan.” Disaut Jakop, “Nuan nemu, bala anak mit tu lemi, lalu aku enggai nyadi enda ngira raban jelu bedus, enggau raban jelu tupi enggau anak sida. Enti sida dipejalka bejalai bebendar sehari, semua sida deka mati. Mupuk dulu meh nuan. Awakka aku nitihka nuan belubah-lubah enggau naka ulih aku sama enggau raban jelu enggau bala sida ke mit, datai ke tua ulih betemu baru di Edom.” Ku Esau, “Enti pia, awakka aku ninggalka sekeda bala aku enggau nuan.” Tang ku Jakop nyaut, “Enda ibuh baka nya, asal nuan lantang ati enggau aku.” Nya alai, Esau mupuk sehari nya ngagai Edom. Tang Jakop mupuk ngagai Sukot. Dia iya lalu ngaga sebuah rumah ke diri empu, enggau bansal ke jelu tupi iya. Nya kebuah endur nya dikumbai Sukot. Lebuh Jakop pulai ari Mesopotamia, iya datai enggau selamat ba nengeri Sekem, di menua Kanaan, lalu nirika kem iya ba padang semak nengeri nya. Iya meli padang nya ari peturun Hamor, apai Sekem, ngena seratus singkap pirak. Iya lalu ngaga siti alta dia, lalu ngumbai alta nya El-Elohe-Israel. Nyadi sekali, Dinah, anak dara Jakop seduai Leah, mansang nemuai ngagai indu orang Kanaan. Lebuh Sekem, anak Hamor, orang Ibi, ti nyadi tuai di menua nya, meda Dinah, iya lalu masung iya. Iya rinduka Dinah anak indu Jakop, lalu iya bejaku manah enggau Dinah. Ku Sekem bejaku enggau apai iya, “Aku bisi amat ati deka ngambi Dinah nyadika bini aku.” Nyadi Jakop sigi nemu anak indu iya endang udah dipasung orang, tang laban bala anak lelaki iya agi di padang ngemataka jelu tupi iya, iya nadai ngereja sebarang utai sebedau sida pulai. Hamor, apai Sekem lalu mansang berandau enggau Jakop. Ba urung maya nya mega bala anak Jakop datai di rumah pulai ari umai. Lebuh sida ninga berita nya, sida ringat lalu pedis ati ngagai Sekem ti udah ngereja nya, lalu udah mechat orang Israel masung anak indu Jakop. Ku Hamor bejaku enggau Jakop, “Anak aku Sekem rinduka anak indu nuan. Aku minta nuan ngemendarka iya jadi enggau anak indu nuan. Awakka tua ngaga siti sempekat kena ngemendarka orang ari bansa kami jadi enggau orang ari bansa kita. Nya baru kita ulih diau begulai enggau kami di menua kami tu. Kita tau diau di sebarang endur kita deka, lalu bedagang enggau sepeneka ati kita, lalu ngulihka reta tengkira ke diri empu.” Udah nya Sekem empu lalu bejaku enggau apai Dinah, sereta enggau sida menyadi lelaki Dinah, “Aku minta kasih ngagai kita. Aku deka meri kita sebarang utai ti dipinta kita. Padahka ngagai aku pemeri ti dipinta kita, lalu letak derian nitihka peneka ati kita. Aku deka meri ngagai kita sebarang utai ti dipinta kita, asal ga kita deka nejuka aku jadi enggau Dinah.” Nyadi laban Sekem udah ngemaluka Dinah, menyadi indu sida, bala anak lelaki Jakop lalu nyaut Sekem enggau apai iya Hamor, ngena jalai tipu. Ku sida bejaku enggau Sekem, “Kami enda nyagi menyadi indu kami jadi enggau lelaki ti enda ditutus, laban nya ngemaluka kami. Kami semina ulih besetuju enti kita deka nyadi baka kami, nutus semua bala kita ke lelaki. Nya baru kami deka besetuju jadi enggau orang ari bansa kita. Kami deka diau mendam begulai enggau kita, lalu nyadi sebansa enggau kita. Tang enti nuan enda nerima atur kami tu, lalu ditutus, kami deka mai Dinah angkat ari tu.” Atur nya baka ke manah ba penemu Hamor enggau anak iya, Sekem, lalu orang bujang nya terus ngereja utai ti disebut sida, laban iya rinduka anak indu Jakop. Orang bujang nya endang orang ke pemadu dibasa dalam ruang bilik iya. Hamor enggau anak iya Sekem lalu mansang ngagai endur alai baum ba pintu penama nengeri nya, lalu bejaku ngagai orang nengeri nya: “Orang tu manah enggau kitai begulai. Awakka sida diau di menua tu begulai enggau kitai, lalu bejalai kia-kia sepeneka ati sida. Menua tu chukup mega besai ke sida. Awakka kitai jadi enggau anak indu sida, lalu kitai nyerahka anak indu kitai jadi enggau sida. Tang orang tu semina deka besetuju diau begulai enggau kitai, lalu nyadi sama sebansa enggau kitai, enti kitai besetuju nutus semua bala kitai ti lelaki, baka sida empu. Nya baru semua jelu tupi enggau semua utai sida, deka diempu kitai. Nya alai, awakka kitai besetujuka sida diau begulai enggau kitai.” Semua orang di nengeri nya besetuju magang enggau penemu ti dibantaika Hamor seduai Sekem, lalu semua lelaki ditutus magang. Tiga hari udah bekau nya, lebuh sida ke lelaki agi natka abi tutus sida, dua iku anak Jakop, Simeon seduai Lewi, menyadi lelaki Dinah, mai pedang lalu belalai tama ngagai nengeri nya, lalu munuh semua orang ke lelaki, nyengkaum Hamor enggau anak iya, Sekem. Udah nya seduai iya lalu ngambi Dinah ari rumah Sekem, lalu angkat ari nya. Anak lelaki Jakop ti bukai lalu ngerampas utai ari nengeri nya kena malas pemalu menyadi indu sida. Sida ngambi raban jelu bedus, sapi, keledai, enggau semua utai ti dalam nengeri nya, enggau utai ti di padang. Sida ngambi semua utai ti berega, nangkap semua orang ke indu, enggau bala anak mit, lalu nabanka semua utai ari rumah orang. Ku Jakop bejaku enggau Simeon seduai Lewi, “Seduai udah ngasuh aku ditinggang penusah, laban diatu orang Kanaan, orang Peris, enggau semua orang bukai di menua tu deka begedika aku magang. Bala kitai enda mayuh. Enti sida beserakup ngelaban kitai, lalu nyerang kitai, semua kitai sebilik deka mati magang.” Tang ku seduai iya nyaut, “Kami enggai sekali-kali nejuka menyadi kami digaga orang baka indu sundal.” Ku Allah Taala bejaku ngagai Jakop, “Alai nuan mansang ngagai Betel diatu, lalu diau dia. Gaga siti alta dia ke Allah Taala ti udah pegari di mua nuan lebuh nuan rari ari menyadi nuan, Esau.” Nya alai Jakop lalu bejaku enggau sida sebilik, sereta enggau semua orang ke enggau iya. Ku iya, “Buai semua petara orang bansa bukai ke disimpan kita. Tuchi diri empu, lalu rasukka gari ti beresi. Kitai deka angkat ari endur tu, lalu mansang ngagai Betel. Din aku deka ngaga siti alta ke Allah Taala, ti udah nyaup aku lebuh aku dituntung penusah, lalu udah enggau aku di semua endur ti udah alai aku bejalai.” Nya alai sida lalu nyerahka ngagai Jakop semua petara orang bansa bukai ke udah disimpan sida, sereta enggau semua antin ti dikena sida. Jakop lalu numbakka utai nya di baruh sepun kayu oak semak Sekem. Lebuh Jakop, enggau bala anak lelaki iya baru deka mupuk, orang ke diau dalam nengeri ti semak nya dia bela takut magang, lalu sida enda begagaika Jakop enggau bala anak iya. Jakop, enggau semua bala iya datai di Lus, ti dikumbai Betel diatu, di menua Kanaan. Iya ngaga sebuah alta dia, lalu ngumbai endur nya Allah Taala ti di Betel, laban Allah Taala udah pegari di mua iya dia lebuh iya rari ari menyadi iya Esau. Ulun Rebekah ke benama Deborah mati, lalu dikuburka di baruh sepun kayu oak ti muak ke selatan nengeri Betel. Nya alai endur nya dikumbai, “Kayu Oak Alai Nyabak.” Lebuh Jakop pulai ari Mesopotamia, Allah Taala pegari baru di mua iya, lalu merekatka iya. Ku Allah Taala bejaku ngagai iya, “Nama nuan Jakop, tang belabuh ari diatu, nama nuan Israel.” Nya alai iya diberi nama Israel. Lalu ku Allah Taala bejaku ngagai iya, “Aku tu Allah Taala ti Pemadu Bekuasa. Beranak betelesak meh nuan. Nuan deka nurunka mayuh bengkah bansa, lalu nuan deka nyadi aki ini ke bala raja. Aku deka meri ngagai nuan menua ti udah diberi Aku ngagai Abraham enggau Isak, lalu Aku deka mega meri menua nya ngagai peturun nuan, ti deka nangkanka nuan. Udah nya Allah Taala lalu ninggalka iya. Ba endur alai Allah Taala ti bejaku enggau iya, dia meh endur alai Jakop nirika siti tiang batu pengingat lalu nuang wain enggau minyak kana ba batu nya. Jakop lalu ngumbai endur nya Betel. Jakop enggau sida sebilik angkat ari Betel, lalu lebuh sida agi jauh ari Eprat, Rachel muat pedis perut deka beranak. Tang iya mar amat beranak. Lebuh iya balat amat pedis perut, indu bidan lalu bejaku enggau iya, “Anang takut, Rachel. Anak nuan lelaki.” Tang Rachel nyau deka mati, lalu lebuh iya baru deka ngapuska seput, iya meri anak iya nama Benoni, tang Jakop meri anak nya nama Benjamin. Lebuh Rachel udah mati, iya lalu dikuburka ba tisi jalai ngagai Eprat, ti dikumbai Betlehem diatu. Jakop nirika siti tiang batu pengingat ba endur nya, lalu batu nya mengkang ngelai endur alai kubur Rachel nyentuk ngagai sehari tu. Jakop mindah ari endur nya, lalu nirika kem iya sepiak menara Eder. Lebuh Jakop diau di menua nya, Reuben beleman enggau Bilhah, siku indu simpan apai iya. Lebuh Jakop ninga nya iya pedis ati. Nyadi Jakop bisi dua belas iku anak lelaki. Anak lelaki ke diadaka Leah nya Reuben (anak tuai Jakop), Simeon. Lewi, Judah, Isakar, enggau Sebulun. Anak lelaki Rachel: Josep seduai Benjamin. Anak lelaki ke diadaka ulun Rachel ke benama Bilhah: Dan enggau Naptali. Anak lelaki ke diadaka ulun Leah ke benama Silpah: Gat seduai Aser. Tu bala anak lelaki ke ada di Mesopotamia. Jakop bejalai ngagai apai iya di Mamre, semak Hebron, alai Abraham enggau Isak ti diau menya. Isak idup nyentuk ngagai umur iya seratus lapan puluh taun lalu iya mati lebuh umur iya nyau tuai amat. Anak iya Esau seduai Jakop, lalu nguburka iya. Baka tu ku peturun Esau. (Iya mega dikumbai Edom). Esau jadi enggau indu orang Kanaan. Sida nya: Adah anak Elon orang Iti; Oholibamah anak Anah, uchu Sibeon, orang Ibi; enggau Basemat anak Ismail, menyadi Nebaiot. Adah ngadaka Elipas; Basemat ngadaka Reuel; lalu Oholibamah ngadaka Jeus, Jalam, enggau Kurah. Semua anak lelaki tu ada di menua Kanaan magang. Udah nya Esau lalu mai sida bini iya, enggau bala anak lelaki iya, bala anak indu iya, enggau semua orang ke diau dalam rumah iya, sereta enggau semua raban jelu tupi iya enggau semua reta tengkira ti udah ulih iya di menua Kanaan, angkat ninggalka menyadi iya Jakop, lalu mindah jauh ngagai menua bukai. Iya angkat laban menua ti alai seduai iya Jakop diau, enda chukup alai seduai iya beridup. Jelu tupi seduai iya nyau kelalu mayuh, lalu seduai iya enda agi ulih diau begulai. Nya alai Esau diau di menua ti bebukit di Edom. Baka tu ku bala peturun Esau, ti nurunka orang Edom. Bini Esau ke benama Oholibamah anak Anah, uchu Sibeon, ngadaka tiga iku anak lelaki: Jeus, Jalam, enggau Kurah. Baka tu ku suku raban bansa ti diturunka Esau: anak lelaki Esau ke tuai, ke benama Elipas, nurunka suku raban bansa Teman, Omar, Sepo, Kenas, Kurah, Gatam, enggau Amalek. Semua sida tu peturun Esau magang ari bini iya Adah. Anak lelaki Esau ke benama Reuel nurunka suku raban bansa Nahat, Serah, Samah, enggau Misah. Sida tu diturunka bini Esau ke benama Basemat. Baka tu ku suku raban bansa ti diturunka Esau ari bini iya ke benama Oholibamah anak Anah: Jeus, Jalam enggau Kurah. Semua suku raban bansa tu diturunka Esau (iya nya Edom) magang. Lotan nurunka raban peturun Hori, enggau raban bansa Heman. (Lotan bisi menyadi indu siku ke benama Timna.) Sobal nurunka raban peturun Alban, Manahat, Ebal, Sepo, enggau Onam. Sibeon bisi dua iku anak lelaki, Aiah seduai Anah. (Anah tu orang ke tetemuka mata ai ti angat di menua puang lebuh iya ngibun raban keledai apai iya.) Eser nurunka raban peturun Bilhan, Saban, enggau Akan. Disan nurunka raban peturun Us enggau bala raban bansa Aran. Jakop mengkang diau di menua Kanaan, ti udah alai apai iya diau, lalu tu jerita pasal ruang bilik Jakop. Lebuh Josep umur tujuh belas taun, iya enggau menyadi iya ke diadaka Bilhah enggau Silpah, iya nya indu simpan apai iya, ngibun raban bedus enggau raban kambin. Josep mai berita ti enda manah ngagai apai iya, pasal utai ti dikereja bala menyadi iya. Jakop rindu agi ke Josep ari iya ke rinduka anak iya ti bukai, laban Josep udah diperanakka lebuh umur Jakop nyau tuai. Iya ngaga baju panjai, ti panjai lengan, ke Josep. Lebuh bala menyadi Josep meda apai sida rindu agi ke Josep ari iya ti rinduka sida, sida begedika Josep, datai ke sida nyau enggai bejaku manah enggau iya. Nyadi sekali, Josep bemimpi. Lebuh iya madahka mimpi diri ngagai bala menyadi iya, sida lalu balat agi begedika iya. Ku iya, “Dinga kita mimpi aku. Semua kitai bisi di umai, nanchang tangkai gandum. Tanchang tangkai gandum aku angkat lalu bediri chegit-chegit. Tanchang tangkai gandum kita lalu ngelingi tanchang tangkai gandum aku, lalu meremi ngagai iya.” “Kati nuan ngumbai dirika nyadi raja kami?” ku bala menyadi iya bejaku. Nya alai sida balat agi begedika iya ketegal mimpi nya, enggau ketegal utai ti disebut iya. Udah nya Josep lalu bemimpi baru, lalu madahka mimpi nya ngagai bala menyadi iya, “Aku udah bemimpi baru. Aku bemimpi meda mata hari, bulan, enggau sebelas igi bintang meremi ngagai aku.” Iya mega nusui mimpi nya ngagai apai iya, lalu apai iya nganu iya: “Mimpi nama utai baka nya? Kati nuan ngumbai indai nuan, bala menyadi nuan, enggau aku deka meremi ngagai nuan?” Bala menyadi Josep kepapaska iya, tang apai iya majak berundingka semua pekara nya. Nyadi sekali, lebuh bala menyadi Josep udah bejalai ngagai Sekem, ngibun raban jelu apai sida, Jakop bejaku enggau Josep, “Aku ngasuh nuan mupuk ngagai bala menyadi nuan ke ngibun raban bedus di Sekem.” Disaut Josep, “Au.” Ku apai iya, “Mupuk nuan, lalu abas bala menyadi nuan enggau raban jelu ti diibun sida. Udah nya pulai kitu baru, lalu bai berita ngagai aku.” Nya alai apai iya ngasuh iya mupuk ari Emperan Hebron. Josep lalu datai di Sekem lalu lebuh iya benung segau-segau ba sebelah menua nya, orang siku tepedaka iya, lalu nanya iya, “Nama utai digiga nuan?” “Aku ngiga bala menyadi aku, ke ngibun raban jelu sida,” ku iya nyaut. “Kati nuan ulih madahka endur alai sida?” Ku orang nya, “Sida udah angkat ari tu. Aku ninga sida madahka diri deka bejalai ngagai Dotan.” Josep lalu mupuk nitihka bala menyadi iya, lalu tetemuka sida di Dotan. Lebuh sida tepedaka iya ari jauh, sebedau iya datai, sida lalu bepekat deka munuh iya. Ku sida bejaku enggau pangan diri, “Nyin bujang ke bemimpi nya datai. Aram kitai munuh iya lalu muai bangkai iya ke dalam telaga ti rangkai. Kitai tau madahka iya udah mati laban jelu. Nya baru kitai nemu namaka penyadi mimpi iya nya.” Tang lebuh Reuben ninga nya, iya nguji nagang sida. Ku iya, “Anang munuh iya. Buai iya aja ngagai telaga di menua puang tu, tang anang ngemediska iya.” Reuben bejaku munyi nya laban iya deka ngidupka nyawa Josep, lalu mai iya pulai baru ngagai apai iya. Lebuh Josep datai ba bala menyadi iya, sida lalu nyarikka baju panjai ari tubuh iya. Udah nya sida mai iya, lalu muai iya ngagai telaga ti nadai agi ai. Lebuh sida benung makai, sida tepedaka seraban orang Ismail datai ari Giliat mansang ngagai menua Ejip. Jelu unta sida nyau sarat laban rempah enggau dambar. Ku Judah bejaku enggau bala menyadi iya, “Nama utai ti ulih kitai enti kitai munuh menyadi kitai tu, lalu bepelamka pemati iya? Aram kitai nyual iya ngagai orang Ismail nya. Nya baru kitai enda ibuh ngemediska iya, laban iya endang menyadi, endang darah-getah kitai empu.” Sida menyadi iya lalu besetuju. Lebuh bala orang dagang ari menua Midian mansa, bala menyadi Josep narit Josep pansut ari telaga nya, lalu nyual iya ngagai orang Ismail nya. Rega iya dua puluh singkap pirak. Orang bansa Ismail nya lalu mai iya ngagai menua Ejip. Lebuh Reuben pulai baru ngagai telaga nya, iya lalu nemu Josep nadai agi dia, lalu iya nyarikka gari diri laban kelalu tusah ati. Iya pulai baru ngagai sida menyadi, ku iya, “Nembiak nya nadai agi dia! Baka ni ku aku enggau nya?” Udah nya sida munuh siku kambin, lalu nyepuhka baju panjai Josep ke dalam darah kambin nya. Sida mai baju panjai nya ngagai apai sida, ku sida, “Kami bisi nemu utai tu. Kati tu gari anak nuan?” Jakop ngelala baju panjai nya, lalu ku iya, “Baju Josep meh tu! Jelu babas udah makai iya. Anak aku, Josep, udah dipecharikka jelu!” Jakop lalu nyarikka gari diri laban iya kelalu tusah ati, lalu ngerasukka kain guni. Lama amat iya ngulitka anak iya. Semua anak lelaki iya, enggau anak indu iya, datai merindang iya, tang iya enggai diperindang sida. Ku iya, “Aku deka ngulitka anak aku datai ke aku mati.” Nya alai iya majak ngulitka anak iya, Josep. Nyadi ba urung maya nya di menua Ejip, orang Midian nya udah nyual Josep ngagai Potipar, siku pemesai raja, ti nyadi kepala ke bala soldadu ke nyaga istana raja. Ba urung maya nya, Judah ninggalka sida menyadi iya lalu diau enggau lelaki siku ke benama Hirah, ke datai ari nengeri Adulam. Nya meh endur alai Judah betemu enggau indu bansa Kanaan siku ti agi biak. Nama apai indu nya Sua. Judah lalu jadi enggau indu nya, lalu indu nya ngadaka anak lelaki siku ke Judah, lalu Judah meri iya nama Er. Bini iya ngandung baru, lalu ngadaka siku agi anak lelaki, lalu bini iya meri anak mit nya nama Onan. Indu nya lalu ngadaka siku agi anak lelaki, lalu iya diberi nama Selah. Judah agi di Aksip lebuh anak mit nya ada. Judah ngambi siku bini ke anak tuai iya Er. Nama indu nya Tamar. Tang Er jai ulah, lalu nya nyungkak TUHAN ringat. Nya alai TUHAN munuh iya. Udah nya Judah lalu bejaku enggau menyadi Er ke benama Onan, “Alai nuan tinduk enggau balu menyadi nuan. Kereja tanggungjawap nuan nyadi laki ke balu menyadi nuan, ngambika menyadi nuan bisi purih.” Tang Onan nemu, enti iya enggau balu menyadi iya bisi anak, anak mit nya ila ukai dikumbai enggi iya. Nya alai lebuh iya beleman enggau balu menyadi iya, iya nejuka ai mani iya nyaya, ngambika menyadi iya nadai purih. Utai ti dikereja Onan nyungkak TUHAN ringat, lalu TUHAN mega munuh iya. Udah nya Judah lalu bejaku enggau menantu iya, Tamar, “Alai nuan pulai ngagai rumah apai nuan, lalu mengkang nyadi orang ke balu nyentuk ngagai maya anak aku, Selah, udah besai.” Iya nyebut nya laban iya enggai ke Selah kena bunuh, baka menyadi iya ke dua iku. Nya alai Tamar pulai ngagai rumah apai iya empu. Nyau kelama udah bekau nya, bini Judah mati. Lebuh Judah udah badu ngulit, iya enggau pangan iya, Hirah, orang Adulam, mansang ngagai Timnah, alai jelu bedus iya benung dikukur. Orang bisi madahka ngagai Tamar pasal mentua lelaki iya ti deka datai di Timnah, laban iya deka ngukur bedus iya. Tamar lalu nukar pekayan ulit iya, nambai mua diri ngena kain, lalu nudukka diri ba pintu penama ngagai Enaim, sebuah nengeri ti ba tisi jalai ti nuju ngagai Timnah. Tamar sigi nemu Selah, anak bunsu Judah endang udah besai, tang Selah lalu apin diasuh jadi enggau iya. Lebuh Judah tepedaka Tamar, iya ngumbai Tamar nya indu sundal, laban Tamar udah nambai mua diri. Judah mansang ngagai iya ba tisi jalai nya, lalu bejaku, “Berapa pinta nuan?” (Judah enda nemu indu nya menantu iya empu.) Ku indu nya nyaut, “Nama utai ti deka diberi nuan ngagai aku?” Ku Judah nyaut, “Aku deka ngirumka ngagai nuan siku kambin ti agi biak ari raban jelu aku.” Ku indu nya bejaku, “Barang ku jaku, enti nuan deka meri aku utai nyadika gadai, nganti nuan ke ngirumka kambin nya ngagai aku.” “Nama gadai ti patut diberi aku ngagai nuan?” ku Judah nanya. Disaut indu nya, “Tinchin ti dikena nuan ngechop, enggau tali iya, enggau tungkat ti dibai nuan nya.” Judah lalu meri utai nya ngagai iya. Udah nya seduai iya lalu beleman enggau pangan diri. Tamar lalu ngandung. Tamar pulai, muka tambai mua iya, lalu ngerasukka pekayan ulit iya. Judah lalu ngasuh pangan iya, Hirah, mai siku kambin, lalu ngambi pulai baru ari indu nya utai ti udah dikena nyadika gadai. Tang Hirah nadai tetemuka indu nya. Iya nanya sekeda lelaki di Enaim. Ku iya, “Dini alai indu sundal ke ba tisi jalai tu suba?” “Nadai indu sundal udah kala bisi ditu,” ku sida nyaut. Hirah pulai ngagai Judah, ku iya, “Aku nadai tetemuka iya. Bala lelaki ke dia madahka, nadai indu sundal udah bisi kala dia.” Ku Judah, “Awakka iya nyimpan utai nya, enggai ke orang ketawaka kitai. Aku amat nguji mayar iya, tang nuan nadai tetemuka iya.” Kira tiga bulan udah bekau nya, orang bisi madahka ngagai Judah munyi tu: “Menantu nuan, Tamar, nyau ngulah diri baka indu sundal, lalu iya diatu ngandung.” Judah lalu bejaku, “Bai iya ke luar, lalu tunu iya datai ke iya mati.” Lebuh Tamar benung dibai ke luar, iya lalu ngasuh orang madahka mentua lelaki iya, “Aku ngandung laban orang ke bempu utai tu. Peda utai tu, lalu giga sapa orang ke bempu utai tu, tinchin ti kena ngechop, enggau tali iya, enggau tungkat tu.” Judah ngelala utai nya, lalu ku iya, “Iya nadai penyalah. Aku empu ti enda ngereja tanggungjawap aku ke iya. Aku patut udah ngasuh anak lelaki aku Selah jadi enggau iya.” Judah nadai agi beleman enggau iya udah bekau nya. Lebuh Tamar nyau chukup bulan, iya ditemu bisi dua iku anak dalam kandung iya. Lebuh iya benung radai, siku ari anak mit nya mansutka siti jari. Indu bidan lalu nangkap jari nya, lalu nanchangka ubung mirah ba jari nya, ku iya, “Iya tu dulu ada.” Tang anak mit nya narit jari iya ke dalam baru, lalu menyadi iya dulu agi ada. Udah nya ku indu bidan nya bejaku, “Nya chara nuan ada!” Nya alai anak mit nya diberi nama Peres. Udah nya, menyadi iya ada, mai ubung mirah ba jari iya, lalu iya diberi nama Serah. Nyadi orang Ismail nya udah mai Josep ngagai menua Ejip, lalu nyual iya ngagai Potipar, siku pemesai raja, ti nyadi kepala orang ke nyaga istana. TUHAN bisi enggau Josep, lalu ngasuh iya mujur dalam semua utai. Iya diau dalam rumah tuan iya. Lebuh Potipar nemu TUHAN bisi enggau Josep, lalu ngasuh iya mujur dalam semua utai ti dikereja iya, Potipar gaga ati ke Josep, lalu ngasuh Josep ngemataka rumah iya, enggau semua reta tengkira iya. Belabuh ari nya, ketegal Josep, TUHAN merekatka ruang bilik orang Ejip nya, enggau semua utai ti dikemisi iya dalam rumah enggau ba umai iya. Potipar ngasuh Josep ngemataka semua utai iya. Nya alai iya enda ibuh ngiruh diri agi bekiraka utai, kelimpah ari pemakai iya empu. Nyadi Josep tu orang ke tegap sereta sigat gamal. Nyau ke lama, bini Potipar lalu bisi ati ke Josep, lalu nguji mai Josep tinduk. Tang Josep enggai. Ku iya bejaku enggau bini Potipar, “Laki nuan nadai agi ibuh ngiruh diri bekiraka sebarang utai dalam rumah tu, laban aku bisi ditu. Iya udah ngasuh aku ngemataka semua utai iya. Kuasa aku dalam rumah tu ngemesai kuasa iya empu, lalu iya nadai nagang aku ngena semua utai dalam rumah tu, kelimpah ari nuan empu. Nya alai, baka ni ku aku tau ngereja utai ti kamah tu, lalu bedosa ngelaban Allah Taala?” Nya alai, taja pen bini Potipar tiap hari ngumbuk Josep, tang Josep mengkang enggai. Tang sekali, lebuh Josep tama ngagai rumah nya deka mansang gawa, bala orang gaji nadai dia. Bini Potipar lalu narit Josep ba baju panjai iya, ku iya, “Aram tinduk enggau aku.” Tang Josep ngerarika diri, lalu belanda ke luar. Tang baju panjai iya ditarit bini Potipar ari tubuh Josep lalu tinggal ba jari indu nya. Lebuh bini Potipar meda Josep udah ninggalka baju panjai iya, lalu belanda ke luar ari rumah nya, iya lalu ngangauka bala orang gaji. Ku iya, “Peda kita! Orang Hebrew ke dibai laki aku ngagai rumah tu, udah ngeleseka kitai. Iya tama ngagai bilik aku, lalu nguji masung aku, tang aku nyerauh enggau naka penginggar nyawa aku. Lebuh iya ninga aku nyerauh, iya belanda ke luar, ninggalka baju panjai iya ngimbai aku.” Bini Potipar nyimpan baju panjai Josep, nyentuk ngagai maya Potipar datai di rumah. Udah nya iya lalu nusui cherita nya ngagai laki iya. Ku iya, “Orang Hebrew ti nyadi ulun, ke dibai nuan kitu, tama ngagai bilik aku, lalu masung aku. Tang lebuh aku nyerauh, iya belanda ke luar, ninggalka baju panjai iya ngimbai aku.” Potipar lalu pedis ati. Iya lalu ngasuh orang nangkap Josep, lalu nutup iya dalam rumah jil, ba endur alai bala orang jil ke ditutup raja. Dia meh endur alai Josep diau. Tang TUHAN bisi enggau Josep lalu merekatka iya, datai ke kepala orang ke nyaga rumah jil nya nyau rinduka iya. Orang nya ngasuh Josep nyadi tuai ke bala orang jil ti bukai, lalu ngasuh iya betanggungjawapka semua utai ti dikereja dalam rumah jil nya. Kepala rumah jil nya enda agi ibuh ngemataka pengawa Josep, laban TUHAN bisi enggau Josep, lalu ngasuh iya mujur dalam semua utai ti dikereja iya. Nyau ke lama udah bekau nya, orang ke nyaga wain raja, enggau kepala orang ke ngaga roti raja, bisi ngereja penyalah. Raja ringat ngagai seduai iya lalu nutup seduai iya dalam rumah jil. Rumah tutup nya dalam rumah kepala orang ke nyaga rumah jil, ba endur alai Josep ke ditutup. Lama amat seduai iya ditutup dalam rumah jil, lalu kepala orang ke nyaga rumah jil nya ngasuh Josep nyadi ulun seduai iya. Nyadi sekali, lebuh malam hari, orang ke nyaga wain raja, enggau kepala orang ke ngaga roti raja, sama bisi mimpi, tang mimpi seduai iya enda sebaka. Lebuh Josep datai ngagai seduai iya pagi nya, seduai iya berupai tusah ati. Iya lalu nanya seduai iya, “Nama kebuah seduai baka ke irau ati sehari tu?” Disaut seduai iya, “Kami duai sama bisi mimpi, lalu orang ditu nadai ulih nerangka reti mimpi nya.” Ku Josep, “Allah Taala aja ke meri penau kena nerangka mimpi. Padahka mimpi seduai ngagai aku.” Orang ke nyaga wain raja lalu bejaku, “Dalam mimpi aku, aku tepedaka sebatang anggur di mua aku. Batang anggur nya bisi tiga iti dan. Lebuh batang anggur nya mansutka daun, iya bebungai, lalu buah anggur nya mansau. Aku megai mangkuk raja ba jari aku. Nya alai aku ngambi lalu merah buah anggur nya dalam mangkuk. Aku lalu nyuaka mangkuk nya ngagai raja.” Ku Josep bejaku, “Tu reti mimpi nya: tiga iti dan nya tiga hari. Tiga hari da agi, raja deka ngelepaska nuan, ngampun nuan, lalu ngasuh nuan pulai baru ngagai pengawa nuan. Nuan deka nyuaka mangkuk raja ngagai raja empu, baka ke dikereja nuan suba lebuh nuan mai mangkuk wain iya. Tang lebuh nuan udah pansut ila, anang enda ingatka aku. Kenang pasal aku ngagai raja, lalu tulung aku pansut ari rumah jil tu. Laban dulu menya aku udah ditangkap lalu ditabanka orang ari menua orang Hebrew. Indah di menua Ejip ditu deh aku nadai udah ngereja penyalah ti tau ngasuh aku patut kena tutup.” Lebuh kepala orang ke ngaga roti ke raja ninga penerang pasal mimpi orang ke nyaga wain raja nya munyi ti betul, iya lalu bejaku enggau Josep, “Aku pen bisi mega mimpi. Aku bemimpi mai tiga iti bakul ba atas pala aku. Bakul ti di atas bendar ngundan semua macham pemakai ti udah dipanggang ke raja. Burung datai lalu makai utai nya.” Disaut Josep, “Tu reti mimpi nya: tiga iti bakul nya tiga hari. Tiga hari da agi, raja deka ngelepaska nuan, lalu iya deka ngasuh orang mumpung pala nuan! Udah nya iya deka ngantung bangkai nuan ari siti tiang, lalu burung deka datai lalu makai isi nuan.” Ba hari pengada raja tiga hari udah bekau nya, raja nyendiaka pengerami makai besai ke semua bala pemesai iya. Iya lalu ngelepaska orang ke nyaga wain iya, enggau kepala orang ke ngaga roti ke raja, lalu mai seduai iya ngagai mua bala pemesai iya. Raja lalu ngasuh orang ke mai mangkuk wain iya pulai baru ngagai pengawa iya ti dulu suba, tang iya munuh kepala orang ke ngaga roti ke iya. Semua utai nya nyadi munyi ti dipadahka Josep. Tang orang ke mai mangkuk wain raja nadai berundingka pasal Josep. Iya terus enda ingatka Josep. Dua taun udah bekau nya, raja menua Ejip bemimpi asai ke bediri ba tebing Sungai Nile, lalu tujuh iku sapi ti indu ke gemu sereta manah gaya, pansut ari sungai nya, lalu belabuh ngulam rumput. Udah nya tujuh iku sapi ti bukai pansut. Sida tu kurus, datai ke tulang sida nyau ayan. Sida datai lalu bediri ngimbai sapi ti bukai nya ba tebing sungai nya. Sapi ti kurus nya lalu makai sapi ti gemu. Udah nya raja lalu tedani. Iya tinduk baru, lalu bemimpi baru. Tujuh iti tangkai gandum ti perisi sereta mansau bisi ba sebatang gandum. Udah nya tujuh iti tangkai gandum ti bukai tumbuh. Sida tu upang sereta layu laban sida dipuputka ribut ti datai ari menua puang. Tangkai tujuh iti ti upang nya lalu nelan tujuh iti tangkai ti perisi. Raja lalu tedani. Nya baru iya nemu diri udah bemimpi. Pagi nya iya irau ati. Nya alai iya mesanka semua orang ke tau keramat, enggau semua orang ke bepenemu-dalam di menua Ejip. Iya madahka mimpi iya ngagai sida, tang nadai siku sida ulih nerangka reti mimpi nya ngagai iya. Udah nya orang ke mai mangkuk wain raja lalu bejaku enggau raja, “Aku enggai enda ngaku sehari tu, aku udah salah. Nuan udah ringat ngagai kepala orang ke ngaga roti, enggau ngagai aku, lalu nutup kami duai dalam rumah jil, ba rumah kepala orang ke nyaga istana. Nyadi sekali, kami duai sama bisi mimpi, lalu mimpi nya enda sebaka reti. Siku orang Hebrew, ti agi biak umur, bisi dia enggau kami. Iya tu nyadi kepala ulun ke orang ke nyaga istana. Kami duai madahka mimpi kami duai ngagai iya, lalu iya nerangka reti mimpi nya ngagai kami duai. Utai ti ku iya udah nyadi magang. Nuan udah ngasuh aku pulai baru ngagai pengawa aku, lalu kepala orang ke ngaga roti ke raja, udah dibunuh.” Raja lalu mesanka Josep. Josep lalu tekala nya dibai ari rumah jil. Lebuh iya udah ngukur ragum iya, lalu nukar gari iya, iya lalu mansang betemu enggau raja. Raja lalu bejaku enggau iya, “Aku bisi mimpi, tang nadai siku orang ulih nerangka reti mimpi nya. Orang bisi udah madahka nuan nemu nerangka reti mimpi.” Disaut Josep, “Aku enda nemu nerangka reti mimpi, Tuan Raja, tang Allah Taala deka nerangka reti mimpi nya enggau betul.” Ku raja, “Aku bemimpi asai ke bediri ba tebing Sungai Nile, lalu tujuh iku sapi ti indu ke gemu sereta manah gaya, pansut ari sungai nya, lalu belabuh ngulam rumput. Udah nya tujuh iku agi sapi ti indu pansut. Sida tu kurus datai ke sida nyau ayan tulang. Nadai aku kala meda sapi ngemalat nya kurus di menua Ejip. Sapi ti kurus nya lalu makai sapi ti gemu, tang nadai orang nemu nya udah nyadi, laban sapi ti kurus nya agi mengkang kurus baka ke sebedau nya. Udah nya aku lalu tedani. Aku mega bemimpi meda tujuh iti tangkai gandum ti perisi sereta mansau ba siti batang gandum. Udah nya tujuh iti tangkai gandum tumbuh. Tangkai tu upang sereta layu laban sida dipuputka ribut ti datai ari menua puang. Tangkai gandum ti upang nya lalu nelan tangkai gandum ti perisi. Aku udah madahka mimpi nya ngagai orang ke tau keramat, tang nadai siku sida ulih nerangka reti mimpi nya ngagai aku.” Ku Josep bejaku enggau raja, “Mimpi dua bengkah nya sama sebaka reti. Allah Taala udah madahka ngagai nuan utai ti deka dikereja Iya. Sapi tujuh iku ti gemu nya tujuh taun, lalu tujuh iti tangkai gandum ti perisi nya mega tujuh taun. Utai nya sama sebaka reti. Sapi tujuh iku ti kurus nya, ti datai dudi, enggau tujuh iti tangkai gandum ti upang nya tujuh taun lapar pungkang. Utai tu munyi ti udah dipadahka aku ngagai nuan: Allah Taala udah madahka ngagai nuan utai ti deka dikereja Iya. Dalam tujuh taun, orang deka bulih mayuh utai di serata menua Ejip. Udah nya, tujuh taun lapar pungkang deka nyadi, datai ke orang nyau nadai agi teingatka taun sida bulih utai, laban lapar pungkang nya deka ngerusak menua tu. Orang nyau enda agi teingatka maya sida udah bulih utai, laban lapar pungkang ti ngentudika nya deka balat amat ngasuh sida merinsa. Mimpi nuan ti betandu baka nya, nunjukka utai tu udah diletak Allah Taala, lalu Iya deka ngasuh utai nya nyadi enda lama da agi. “Diatu nuan patut milih orang siku ti pintar sereta bepenemu-dalam, lalu ngasuh iya nyadi tuai megai menua tu. Nuan mega enda tau enda ngeletak bala pemesai ti bukai, lalu ngambi dua puluh peratus ari semua utai ti ulih ari umai, dalam tujuh taun sida ke bulih utai. Asuh sida ngumpul semua pemakai nya dalam taun orang ke bulih utai ti deka datai tu, lalu beri sida kuasa nyimpan gandum nya dalam semua nengeri, lalu nyaga utai nya. Pemakai nya deka digalau ke menua tu, ngambika bisi diempa dalam tujuh taun lapar pungkang nya nyadi di menua Ejip, ngambika orang mayuh enda mati keberuran.” Raja enggau bala pemesai iya lalu ngemendarka pelan nya, lalu ku raja bejaku enggau sida, “Kitai nadai nemu orang bukai ke patut agi ari Josep, ke bisi roh Allah Taala.” Ku raja bejaku enggau Josep, “Allah Taala udah mandangka semua utai tu ngagai nuan. Nya alai nuan terang amat lebih agi bepenemu-dalam sereta dalam agi runding ari semua orang bukai. Aku deka ngasuh nuan nyadi kepala megai menua aku, lalu semua nembiak aku deka ngasi magang ke atur nuan. Nuan deka bekuasa nyadi lumur dua aku. Aku diatu ngeletak nuan nyadi gabenor ke semua menua Ejip.” Raja nya lalu merurutka tinchin ari tunjuk iya. Ba tinchin tu bisi dituliska chop diraja. Iya lalu ngerasukka tinchin nya ba tunjuk Josep. Iya ngerasukka kain linin ti alus ba Josep, lalu ngerasukka tenggak emas ba rekung Josep. Iya meri Josep kerita perang diraja ti lumur dua, lalu bala soldadu ke nyaga Josep bejalai dulu ari iya enggau panjung, “Anang mempang! Anang mempang!” Nya meh jalai iya ngeletak Josep nyadi gabenor ke semua menua Ejip. Ku raja bejaku enggau Josep, “Aku tu raja, lalu nadai orang dalam menua Ejip tau ngangkatka jari tauka kaki enti aku enda ngemendarka iya.” Mayuh amat asil ulih di menua nya dalam kandang tujuh taun. Semua utai nya digumpul lalu disimpan Josep dalam semua nengeri. Utai ti ulih ari umai ti ngelingi genap buah nengeri, disimpan iya dalam nengeri nya empu. Gandum ti digumpul endang amat mayuh, datai ke Josep nyau badu agi nakar utai nya. Pemayuh gandum nya nyau baka pasir ti ba tebing tasik. Sebedau lapar pungkang nyadi, Josep bisi dua iku anak lelaki diadaka Asenat. Ku Josep, “Allah Taala udah ngasuh aku badu agi ingatka pemerinsa aku, enggau pemerinsa ruang bilik apai aku.” Nya alai iya meri nama Manasi ngagai anak iya ke tuai. Ku iya mega bejaku, “Allah Taala udah meri aku anak lelaki, dalam menua ti alai aku kena perinsa.” Nya alai iya meri nama Epraim ngagai anak iya ke lumur dua. Tujuh taun alai orang di menua Ejip bulih utai pen apus, lalu tujuh taun lapar pungkang belabuh nyadi, munyi ti udah dipadahka Josep. Semua menua bukai kena magang laban lapar pungkang nya, tang menua Ejip enda suntuk pemakai. Lebuh orang Ejip belabuh natka diri lapar, sida minta pemakai ngagai raja. Iya lalu ngasuh sida mansang ngagai Josep, sereta ngasuh sida ngereja utai ti diasuh Josep. Lapar pungkang nya nyau mansang balat-sebalat, lalu ngelekai ngagai semua menua nya. Nya alai Josep muka semua tibang gandum, lalu nyual gandum nya ngagai orang Ejip. Orang ari serata dunya datai ngagai menua Ejip, mansang meli gandum ari Josep, laban lapar pungkang balat amat nyadi di semua endur. Lebuh Jakop ninga menua Ejip bisi gandum, iya lalu bejaku enggau bala anak iya. Ku iya, “Nama kebuah kita dugau-dugau ngapa nadai ngereja utai? Aku ninga menua Ejip bisi gandum. Alai kita kin, lalu beli gandum ke kitai ngambika kitai enda mati keberuran.” Menyadi tiri Josep ke sepuluh iku lalu mupuk ngagai menua Ejip deka meli gandum. Tang Jakop enda nyagi menyadi tampung pala Josep ke benama Benjamin mupuk enggau sida, enggai ke Benjamin bebadi. Bala anak Jakop lalu bejalai sama enggau orang bukai, mansang meli gandum, laban menua Kanaan kena laban lapar pungkang. Josep, ti nyadi gabenor menua Ejip, nyual gandum ngagai orang ke datai ari serata dunya. Nya alai bala menyadi Josep datai, lalu nyungkurka diri ke tanah di mua iya. Lebuh Josep meda bala menyadi iya, iya ngelala sida, tang iya ngaga diri baka ke enda ngelala sida. Iya bejaku kasar lebuh iya nanya sida. Ku iya, “Datai ari ni kita tu?” “Kami tu datai ari menua Kanaan, deka meli pemakai,” ku sida nyaut. Josep ngelala bala menyadi iya, tang sida enda ngelala iya. Iya teingatka mimpi diri pasal sida, lalu ku iya, “Kita tu pematau. Kita datai ditu laban kita keran deka nemu pengelemi menua kami.” “Ukai baka nya, tuan,” ku sida nyaut. “Kami ke ulun nuan tu datai laban kami deka meli pemakai. Semua kami tu diri menyadi magang. Kami tu ukai pematau, tuan. Kami tu manah ati.” Ku Josep bejaku enggau sida, “Kita datai laban kita keran deka nemu pengelemi menua kami.” Ku sida, “Semua kami tu dua belas iku diri menyadi, tuan. Kami tu anak orang siku di menua Kanaan. Siku menyadi kami udah mati, lalu iya ke bunsu tinggal enggau apai kami.” Josep lalu bejaku ngagai sida, “Munyi ti ku aku, semua kita tu pematau magang. Aku deka ngabas pengamat jaku kita. Aku besumpah atas nama raja, kita enda tau angkat ari tu, enti menyadi bunsu kita enda datai ditu. Siku ari bala kita enda tau enda mupuk lalu ngambi iya. Kita ti bukai deka kena tan lalu ditutup dalam rumah jil ditu, nyentuk ngagai maya utai ti ku kita nya udah ditentuka amat magang. Enti enda, seagi-agi tuan raja idup, kita tu endang amat bala pematau.” Lebuh iya udah tembu bejaku, iya lalu nutup sida tiga hari dalam rumah jil. Ba hari ti ketiga, Josep bejaku enggau sida, “Aku tu orang ke nangika Allah Taala, lalu aku enda munuh kita enti kita ngereja utai ti diasuh aku. Kena aku ngabas pemetul ati kita, siku ari bala kita deka ditutup dalam rumah jil, alai kita ke udah kena tan. Kita ti bukai tau mupuk, lalu mai gandum ti udah dibeli kita, ngagai kita sebilik ke lapar. Udah nya kita enda tau enda mai menyadi bunsu kita ngagai aku, kena nunjukka kita amat madahka utai ti bendar, ngambika aku enda munuh kita.” Sida besetujuka atur nya lalu bejaku enggau pangan diri, “Sigi amat. Diatu baru kita natka pemerinsa ketegal utai ti udah dikereja kita ngagai menyadi kitai. Kitai meda pemalat ati iya tusah lebuh iya minta kasih ari kitai, tang kitai enggai mendingka iya. Nya meh kebuah kita dituntung penusah tu diatu.” Ku Reuben, “Aku nagang kita ngemediska nembiak nya, tang kita enggai mending. Diatu kitai nerima balas ke pemati iya.” Josep meretika utai ti disebut sida, tang sida enda nemu nya, laban sida udah bejaku enggau iya ngena siku penyalin jaku. Josep ninggalka sida lalu nyabak. Lebuh iya nyau ulih bejaku baru, iya lalu pulai baru ngagai sida, ngambi Simeon, lalu ngasuh orang nanchang iya di mua sida. Josep lalu ngasuh orang ngisi ma bala menyadi iya enggau gandum, lalu mulaika duit sida ngagai guni sida siku-siku, lalu meri sida pemakai nyadika bekal sida di rantau jalai. Semua utai nya lalu dikereja magang. Bala menyadi iya lalu manggaika gandum ti udah dibeli sida, ba keledai sida, lalu mupuk. Lebuh siku ari bala sida muka guni iya, deka meri keledai iya makai, iya lalu tetemuka duit ba mua guni iya. “Duit aku udah diberi pulai baru,” ku iya ngangau ngagai bala menyadi iya.” Tu duit aku dalam guni aku!” Sida lalu tusah ati, sereta takut, lalu nanya pangan diri, “Nama utai ti udah dikereja Allah Taala ngagai kitai?” Lebuh sida datai ngagai Jakop apai sida di menua Kanaan, sida nusui ngagai iya semua utai ti udah nyadi ba sida. “Gabenor menua Ejip bejaku kasar amat enggau kami, lalu ngumbai kami matau menua iya. Kami lalu nyaut iya, ‘Kami tu ukai pematau. Kami tu manah ati. Kami dua belas iku diri menyadi, sama saum apai. Siku menyadi kami udah mati, lalu iya ke bunsu tinggal di menua Kanaan enggau apai kami.’ Ku orang nya nyaut, ‘Tu jalai aku deka nemu enti kita amat manah ati. Siku ari bala kita deka tinggal enggau aku. Kita ti bukai deka mupuk lalu mai gandum ngagai kita sebilik ke lapar. Bai menyadi bunsu kita ngagai aku. Nya baru aku deka nemu enti kita tu amat ukai pematau, tang orang ke manah ati. Aku deka meri menyadi kita pulai baru ngagai kita, lalu kita tau diau lalu bedagang di menua tu.’ ” Udah nya, lebuh sida nuang guni sida, genap iku sida lalu tetemuka kandi duit diri dalam guni sida siku-siku. Lebuh sida meda duit nya, sida enggau apai sida, Jakop, lalu takut. Ku apai sida bejaku enggau sida, “Kati kita ngasuh aku ngelenyauka semua anak aku? Josep nadai agi. Simeon nadai agi. Lalu diatu kita deka mai Benjamin. Tulah meh aku tu!” Reuben lalu bejaku enggau apai iya, “Enti aku enda mai Benjamin pulai baru ngagai nuan, nuan tau munuh anak lelaki aku ke dua iku. Awakka aku nyaga Benjamin, lalu mai iya pulai baru.” Tang ku Jakop, “Enda! Anak aku enda tau mupuk enggau kita. Menyadi iya udah mati. Ka semina siku iya aja ti agi tinggal. Kada enda iya bebadi di rantau jalai. Aku nyau tuai, lalu enti kita ngenusahka ati aku baka nya, aku deka mati.” Lapar pungkang di menua Kanaan majak balat-sebalat, lalu lebuh gandum ti udah dibeli sida Jakop sebilik ari menua Ejip nyau abis, Jakop lalu bejaku enggau bala anak iya, “Alai kita kin ke baru lalu meli pemakai ke kitai.” Ku Judah bejaku enggau iya, “Orang nya nangkan kami enggau jaku, madahka kami enda tau betemu enggau iya, enti kami enda mai menyadi kami. Enti nuan deka ngasuh Benjamin enggau kami, nya baru kami deka mupuk lalu meli pemakai ke nuan. Enti nuan enda nyagi Benjamin enggau kami, kami enggai kin, laban orang nya madahka kami enda ulih betemu enggau iya, enti menyadi kami nya enda enggau kami.” Ku Jakop, “Nama kebuah kita ngenusahka aku ngemalat tu, madahka diri bisi menyadi bukai?” Ku sida nyaut, “Orang nya majak nanyaka pasal kami enggau pasal kitai sebilik, ‘Kati apai kita agi meruan? Kati kita bisi siku agi menyadi?’ Kami nadai chara bukai, tang nyaut tanya iya. Baka ni ku kami nemu iya deka ngasuh kami mai menyadi kami ngagai iya?” Ku Judah bejaku enggau apai iya, “Awakka nembiak nya enggau aku, ngambika kami mupuk diatu. Nya baru bala kitai enda mati keberuran. Aku ngadai nyawa aku empu, lalu nuan tau ngumbai aku betanggungjawapka iya. Enti aku enda mai iya pulai baru enggau likun ngagai nuan, aku meh betanggungjawapka penyalah nya. Enti kami enda betangguh ngelama nya, ngendua kali pen ulih meh kami udah kin.” Apai sida lalu bejaku enggau sida, “Enti utai nya enda tau enda baka nya, bai meh utai ti pemadu manah ari umai kitai dalam ma kita, nyadika pemeri ke tuan gabenor nya, dambar, ai manyi, rempah, kachang, enggau buah almon. Bai mega dua kali mayuh agi duit, laban kita enda tau enda mulaika duit ti udah diberi pulai ngagai kita ba mua guni kita. Nyangka sida saru. Bai menyadi kita, lalu pulai kitu enggau naka pengelengkas. Awakka Allah Taala ti Pemadu Bekuasa ngasuh orang nya kasihka kita, ngambika iya meri Benjamin enggau menyadi kita pulai baru. Enti aku enda tau enda lenyau anak, nadai ku enggau meh.” Sida menyadi lalu mai pemeri, enggau dua kali mayuh agi duit, lalu mupuk ngagai menua Ejip, mai Benjamin. Sida lalu betemu enggau Josep. Lebuh Josep meda Benjamin datai enggau sida, iya lalu bejaku enggau kepala ulun ke ngemataka rumah iya, “Bai sida tu ngagai rumah aku. Sida deka merarau enggau aku tengah hari tu lagi. Sayat lalu bela siku jelu.” Ulun nya lalu ngereja nitihka asuh Josep, lalu mai sida menyadi ngagai rumah Josep. Lebuh sida benung dibai ngagai rumah nya, sida takut. Ku pikir sida, “Kitai dibai kitu ketegal duit ti udah dipulaika baru ngagai guni kitai lebuh kitai kitu terubah iya suba. Sida deka ngamuk kitai, ngambi keledai kitai, lalu ngaga kitai nyadi ulun iya.” Nya alai, lebuh sida datai ba mua pintu rumah nya, sida lalu bejaku enggau kepala ulun nya, “Tuan, kami sekali udah datai ditu suba, deka meli pemakai. Lebuh kami ngetu bemalam di rantau jalai lebuh kami pulai, kami muka guni kami, lalu genap iku kami tetemuka duit ba mua guni kami. Semua duit kami bisi dia magang. Kami udah mai duit nya pulai baru ngagai kita. Kami udah mega mai duit mayuh agi ari nya kena kami meli pemakai. Kami enda nemu sapa nyimpan duit nya dalam guni kami.” Disaut ulun nya, “Anang irau. Anang takut. Allah Taala kita, Allah Taala apai kita, tentu udah nyimpan duit nya dalam guni kita. Aku sigi bisi udah nerima bayar ari kita.” Udah nya iya lalu mai Simeon ngagai sida. Ulun nya lalu mai sida menyadi tama ngagai rumah Josep. Iya meri sida ai kena sida masu kaki, lalu meri keledai sida makai. Sida lalu nyendiaka pemeri ti deka diberi sida ngagai Josep lebuh iya datai tengah hari nya, laban sida udah dipadahka sida deka merarau enggau iya. Lebuh Josep datai di rumah, sida lalu mai pemeri sida ke dalam rumah, ngagai iya, lalu sida nyungkurka diri ke tanah di mua iya. Iya nanyaka pengerai sida sebuat, lalu ku iya, “Kita bisi madahka pasal apai kita ke nyau tuai. Kati ku baka iya diatu? Kati iya agi meruan gerai nyamai?” Disaut sida, “Ulun nuan, iya nya apai kami, agi meruan gerai nyamai.” Sida besugang lalu meremi di mua iya. Lebuh Josep meda menyadi iya Benjamin, iya lalu bejaku, “Kati tu menyadi bunsu kita ke dipadahka kita ngagai aku? Allah Taala merekatka nuan, anak.” Udah nya Josep lalu tekala nya ninggalka sida, laban ati iya balat rinduka menyadi iya. Iya nyau deka nyabak, nya alai iya tama ngagai bilik iya empu, lalu nyabak. Lebuh iya udah empungas mua diri, iya pansut, lalu enggau naka ulih nagang diri nyabak. Iya lalu ngasuh orang nyendiaka pemakai. Josep makai ba mija siti, lalu bala menyadi iya ba mija siti. Orang Ejip ke makai dia, makai ba mija siti, laban sida ngumbai sida ngemaruhka pangkat diri enti sida begulai makai enggau orang Hebrew. Sida menyadi lalu diasuh duduk, betunga mua enggau Josep, nitihka penuai umur sida, belabuh ari iya ke pemadu tuai ngagai iya ke bunsu. Lebuh sida meda chara sida diatur duduk, sida beperening ngagai pangan diri, alit ati. Pemakai lalu disadung ngagai sida ari mija Josep, lalu Benjamin diberi lima kali mayuh agi pemakai ari semua sida bukai. Sida makai ngirup enggau Josep datai ke sida nyau mabuk. Josep lalu bejaku enggau kepala ulun ke ngemataka rumah iya. Ku iya, “Isi guni sida enggau pemakai, naka ti ulih bai sida, lalu engkahka duit sida ba mua guni sida siku-siku. Engkahka mangkuk pirak aku ba mua guni menyadi bunsu sida, sama enggau duit ti dikena iya meli gandum.” Ulun nya lalu ngereja nitihka asuh Josep. Tumu pagi hari siti, sida menyadi lalu diasuh mupuk, mai keledai sida. Lebuh sida baru apin jauh udah ngejang ari nengeri nya, Josep lalu bejaku enggau kepala ulun ke ngemataka rumah iya, “Alai nuan nitihka sida. Lebuh nuan betemu enggau sida, tanya sida munyi tu, ‘Nama kebuah kita malas pemanah ngena penyai? Nama kebuah kita ngenchuri mangkuk pirak tuan aku? Mangkuk nya dikena iya ngirup, enggau nilit nasit. Besai amat penyalah kita tu!’ ” Lebuh ulun nya nyau udah tetitihka sida, iya lalu nyebut jaku nya ngagai sida. Ku sida nyaut iya, “Nama kebuah nuan bejaku munyi nya, tuan? Kami besumpah, kami nadai ngereja utai nya. Nuan nemu, kami udah mai pulai baru ngagai nuan, ari menua Kanaan, duit ti ditemu kami ba mua guni kami. Nya alai, nama kebuah kami ngenchuri pirak tauka emas ari rumah tuan nuan? Tuan, enti siku ari bala kami bisi ditemu nyimpan utai nya, iya deka diukum bunuh, lalu semua kami ke bukai deka nyadi ulun kita.” Ku ulun nya bejaku, “Aku besetuju. Tang semina orang ke ngenchuri mangkuk nya aja deka nyadi ulun aku. Kita ti bukai tau mupuk.” Sida lalu beguai-guai ngulurka guni sida ke tanah, lalu genap iku sida bela muka guni diri. Ulun Josep lalu begigaka mangkuk nya enggau silik, belabuh ba menyadi sida ke pemadu tuai, nyentuk ngagai menyadi bunsu sida. Mangkuk nya lalu ditemu dalam guni Benjamin. Bala sida menyadi lalu nyarikka gari diri, manggaika guni sida ba keledai sida, lalu nikal ngagai nengeri nya. Lebuh Judah enggau bala menyadi iya datai ba rumah Josep, Josep agi mengkang dia. Sida meremi di mua iya, lalu ku Josep bejaku enggau sida, “Nama utai tu ti dikereja kita? Kati kita enda nemu, orang ke bepangkat baka aku tu, tau nilit utai ti dikereja kita?” Ku Judah nyaut, “Kami nadai nemu jalai bejaku agi, tuan. Kami sigi nadai jalai bejaku. Kami enda ulih ngumbai diri nadai penyalah, laban Allah Taala udah ngayanka penyalah kami. Diatu semua kami tu nyadi ulun nuan magang, ukai semina iya ke ditemu nyimpan mangkuk nuan.” Ku Josep bejaku, “Aku enggai ngereja baka nya! Semina iya ke nyimpan mangkuk nya aja deka nyadi ulun aku. Kita ti bukai tau pulai enggau selamat ngagai apai kita.” Judah lalu mansang ngagai Josep, lalu bejaku, “Tuan, awakka aku bejaku beterus-terang enggau nuan. Anang ringat ngagai aku, laban ba aku nuan tu baka reti raja. Tuan, nuan suba bisi nanya kami munyi tu, ‘Kati kita bisi apai, tauka menyadi bukai?’ Lalu ku kami nyaut, ‘Kami bisi apai, tang iya nyau tuai. Lalu kami bisi siku agi menyadi ke diadaka lebuh apai kami nyau tuai. Menyadi nembiak nya udah mati, lalu ka semina siku iya aja ti agi idup ari anak indai iya. Lalu apai iya balat rinduka iya.’ Tuan, nuan ngasuh kami mai iya kitu, ngambika nuan ulih meda iya, lalu kami madahka nembiak nya enda ulih ninggalka apai iya. Enti iya ninggalka apai iya, apai iya deka mati. Udah nya nuan nyebut, ‘Kita enda tau agi betemu enggau aku enti menyadi bunsu kita enda datai enggau kita.’ “Lebuh kami pulai baru ngagai apai kami, kami madahka utai ti disebut nuan. Udah nya apai kami lalu ngasuh kami pulai kitu ke baru, meli pemakai. Ku kami nyaut, ‘Kami enda tau kin. Kami enda tau betemu enggau orang nya enti menyadi bunsu kami enda enggau kami. Kami semina tau kin, enti menyadi bunsu kami mupuk enggau kami.’ Ku apai kami bejaku, ‘Kita nemu, bini aku Rachel semina ngadaka dua iku anak. Siku ari seduai nya udah ninggalka aku. Iya tetap udah dipecharikka jelu babas, laban aku nadai agi kala meda iya sekumbang iya ti udah ninggalka aku. Enti kita mai anak aku tu ari aku, lalu iya bebadi, ati aku deka balat tusah, lalu aku deka mati, laban aku nyau tuai.’ Nambahka nya, aku udah ngadai nyawa diri ngagai apai aku, ke nembiak tu. Aku madahka ngagai apai aku, enti aku enda mai nembiak tu pulai baru ngagai iya, aku empu deka betanggungjawapka penyalah nya seumur idup. Nya alai, tuan, aku minta diri tinggal ditu nyadi ulun nuan, nganti nembiak tu. Awakka iya pulai enggau bala menyadi iya. Baka ni ku aku tau pulai ngagai apai aku, enti nembiak tu enda pulai sama enggau aku? Aku enda tan meda apai aku merinsa laban penusah tu.” Josep nyau enda ulih natka ati diri agi di mua bala orang gaji iya. Nya alai iya lalu ngasuh semua ulun iya pansut ari bilik nya. Nadai orang bukai bisi enggau iya dia lebuh Josep madahka diri ngagai sida menyadi iya. Iya nyabak inggar amat, datai ke orang Ejip nyau tedingaka iya, lalu berita nya dibai ngagai istana raja. Ku Josep bejaku enggau bala menyadi iya, “Aku tu Josep. Kati apai agi idup?” Tang lebuh bala menyadi iya ninga nya, sida balat amat takut, datai ke sida nyau enda ulih nyaut iya. Udah nya Josep lalu bejaku enggau sida, “Datai semak agi ngagai aku.” Sida mansang semak agi ngagai iya, lalu ku iya, “Aku tu Josep, menyadi kita ke dijual kita ngagai menua Ejip. Anang tusah ati tauka ngutuk diri ketegal kita udah nyual aku kitu. Allah Taala udah ngasuh aku datai ditu dulu ari kita ngambika ngidupka nyawa orang mayuh. Diatu lapar pungkang baru dua taun udah nyadi di menua tu. Lapar pungkang tu deka majak lima taun da agi. Dalam kandang maya nya, nadai orang ngeradu tanah umai, tauka ngetau. Allah Taala udah ngasuh aku datai ditu dulu ari kita, ngambika ngidupka nyawa kita ngena chara ti nyelai tu, kena nentuka kita enggau peturun kita idup. Nya alai, iya ti bendar, ukai kita ke ngirumka aku kitu, tang Allah Taala. Iya udah ngaga aku nyadi pemesai ti pemadu tinggi pangkat dalam perintah raja. Aku tu nyadi tuai ngemataka semua menua tu. Aku tu meh orang ke merintah semua menua Ejip. Nya alai, pulai kita enggau jampat ngagai apai, lalu padahka ngagai iya utai ti disebut anak iya Josep: ‘Allah Taala udah ngasuh aku megai perintah di menua Ejip. Datai ngagai aku kitu enggau naka pengelengkas. Nuan tau diau di menua Gosen, ngambika kita diau semak aku - nuan, bala anak nuan, bala uchu nuan, raban bedus nuan, kambin nuan, jelu sapi nuan, enggau semua utai ti dikemisi nuan. Enti nuan diau di Gosen, aku ulih ngintu nuan. Lapar pungkang tu deka majak nyadi lima taun da agi, lalu aku enggai ke nuan, kita sebilik, enggau raban jelu tupi nuan, mati keberuran.’ ” Ku Josep nampung jaku iya, “Diatu semua kita, enggau nuan empu Benjamin, udah meda aku lalu nemu aku tu endang amat Josep. Padahka ngagai apai pemesai kuasa aku di menua Ejip, lalu padahka ngagai iya semua utai ti udah dipeda kita. Udah nya bai iya kitu enggau jampat.” Iya lalu merap menyadi iya Benjamin, lalu nyabak. Benjamin mega merap iya, lalu nyabak. Udah nya, lebuh iya agi benung sikuk-sikuk nyabak, iya lalu merap genap iku bala menyadi iya, lalu nyium sida. Udah nya, bala menyadi iya lalu berandau enggau iya. Lebuh berita pasal penatai bala menyadi Josep bisi didinga orang di istana, raja enggau bala pemesai iya gaga ati. Ku raja bejaku enggau Josep, “Asuh sida menyadi nuan manggaika utai nya ba jelu sida, lalu pulai baru ngagai menua Kanaan. Asuh sida ngambi apai sida, enggau semua sida sebilik, lalu pulai kitu. Aku deka meri ngagai sida menua ti pemadu manah di menua Ejip, lalu sida deka bisi menua ti lebih ari chukup alai sida beridup. Asuh bala menyadi nuan mega mai kerita ari menua Ejip, kena ngundan bini anak, enggau apai sida. Sida enda tau irau ati ninggalka reta tengkira sida, laban sida deka bempu utai ti pemadu manah di menua Ejip.” Bala anak Jakop lalu ngereja utai ti diasuh kereja sida. Josep meri sida kerita, nitihka pesan raja, enggau bekal kena sida di rantau jalai. Iya meri sida gari kena besilih, tang meri ngagai Benjamin tiga ratus singkap pirak, enggau lima lambar gari kena besilih. Iya ngirumka barang ti pemadu manah ari menua Ejip, ti diundan ke iya ba sepuluh iku keledai. Iya mega ngundanka gandum, roti, enggau bekal ti bukai ke sida ba sepuluh iku keledai ti bukai. Iya lalu ngasuh sida menyadi iya mupuk, lalu ku iya bejaku enggau sida lebuh sida bekejang, “Anang belaya di rantau jalai.” Sida angkat ari menua Ejip, lalu pulai ngagai Jakop, apai sida di menua Kanaan. Lalu ku sida madahka ngagai Jakop, “Josep agi idup! Iya nyadi gabenor menua Ejip!” Jakop lalu temati-kutu enda arapka sida. Tang lebuh sida madahka semua utai ti udah disebut Josep ngagai sida, lalu iya mega meda semua kerita ti dikirumka Josep kena mai iya ngagai menua Ejip, nya baru iya enda agi temati-kutu tekenyit ati. “Anak aku Josep agi idup!” ku iya bejaku. “Nya aja meh utai ti dipinta aku! Aku enda tau enda betemu enggau iya sebedau aku mati.” Jakop lalu nyikap semua reta tengkira iya, lalu mansang ngagai Beer-seba. Dia iya lalu ngenjuk piring ngagai Allah Taala apai iya Isak. Lalu ku Allah Taala bejaku ngagai iya dalam genera, “Jakop! Jakop!” “Tu aku,” ku iya nyaut. Lalu ku Allah Taala bejaku, “Aku tu Allah Taala, ke disembah apai nuan. Anang takut mansang ngagai menua Ejip, laban Aku deka ngaga peturun nuan nyadi bansa ti kering di menua nya. Aku deka bejalai enggau nuan ngagai menua Ejip, lalu Aku deka mai peturun nuan pulai baru ngagai menua tu. Josep bisi enggau nuan lebuh nuan mati ila.” Jakop lalu angkat ari Beer-seba. Bala anak iya lalu nepanka iya, bala anak sida, enggau bala bini sida dalam kerita ti udah dikirumka raja menua Ejip. Sida mai jelu tupi sida, enggau reta tengkira ti udah ulih sida di menua Kanaan, lalu mupuk ngagai menua Ejip. Jakop mai semua peturun iya enggau iya, iya nya: bala anak iya, bala uchu lelaki iya, bala anak indu iya, enggau bala uchu indu iya. Baka tu ku raban sida Jakop sebilik ke mansang enggau iya ngagai menua Ejip: Reuben, anak tuai Jakop enggau bala anak Reuben: Hanok, Pallu, Hesron, enggau Karmi. Simeon enggau bala anak iya: Jemuel, Jamin, Ohat, Jachin, enggau Saul, ke diadaka siku indu orang Kanaan. Lewi enggau bala anak iya: Gerson, Kohat, enggau Merari. Judah enggau bala anak iya: Selah, Peres, enggau Serah. (Anak lelaki Judah ti bukai, Er enggau Onan, udah mati di menua Kanaan.) Anak Peres nya Hesron enggau Hamul. Isakar enggau bala anak iya: Tola, Puah, Jasup, enggau Simron. Sebulun enggau bala anak iya: Seret, Elon enggau Jahleel. Tu meh bala anak Jakop ke diadaka Leah di menua Mesopotamia, kelimpah ari anak indu iya ke benama Dinah. Semua peturun Jakop ari Leah, tiga puluh tiga iku. Gat enggau bala anak iya: Sepon, Hagi, Suni, Esbon, Eri, Arot, enggau Areli. Aser enggau bala anak iya: Imnah, Isbah, Isbi, Beriah, enggau menyadi sida ke benama Serah. Anak lelaki Beriah nya Heber seduai Malkil. Sida enam belas iku tu peturun Jakop, ari Silpah, indu ke ulun ke diberi Laban ngagai anak indu iya Leah. Bini Jakop ke benama Rachel ngadaka dua iku anak: Josep seduai Benjamin. Josep bisi dua iku anak di menua Ejip, Manasi seduai Epraim, ke diadaka Asenat anak indu Potipera. Potipera nya siku imam di Heliopolis. Bala anak Benjamin: Bela, Beker, Asbel, Gera, Naaman, Ehi, Ros, Mupim, Hupim, enggau Art. Sida empat belas iku tu peturun Jakop, ari Rachel. Dan enggau anak iya Husim. Naptali enggau bala anak iya: Jahseel, Guni, Jeser, enggau Silem. Sida tujuh iku tu peturun Jakop ari Bilah, indu ke ulun ke diberi Laban ngagai anak indu iya Rachel. Penyampau peturun Jakop ari tubuh iya empu ke pindah ngagai menua Ejip nya enam puluh enam iku, enda ngitung bini bala anak iya. Pemayuh sida Jakop sebilik di menua Ejip nya tujuh puluh iku, nyengkaum anak Josep dua iku ke diadaka di menua nya. Jakop ngasuh Judah bejalai dulu minta Josep ngambat sida di Gosen. Lebuh sida datai dia, Josep nepan kerita perang iya, lalu mansang ngagai Gosen, ngambat apai iya. Lebuh seduai iya betemu, Josep merap apai iya, lalu nyabak lama amat. Ku Jakop bejaku enggau Josep, “Aku sedia deka mati, laban aku udah meda nuan, lalu nemu nuan agi idup.” Udah nya Josep lalu bejaku enggau sida menyadi iya, sereta enggau semua sida apai iya sebilik, “Aku deka mupuk lalu madahka ngagai raja, munyi tu, ‘Bala menyadi aku, enggau sida apai sebilik, ti udah diau di menua Kanaan suba, diatu udah datai ngagai aku. Sida nya pengibun bedus, laban sida endang beridup nginang jelu tupi, lalu sida udah mai raban bedus, enggau raban jelu sapi sida, enggau semua reta tengkira sida.’ Lebuh raja mesanka kita, lalu nanyaka pengawa ti dikereja kita, kita enda tau enda madahka diri endang orang ke nginang jelu tupi seumur idup, baka aki ini kita kelia. Nya baru iya deka ngasuh kita diau di menua Gosen.” Josep nyebut nya laban orang Ejip keji begulai enggau orang ke pengibun bedus. Josep betemu enggau raja lalu madahka ngagai raja munyi tu, “Apai aku, enggau sida menyadi aku udah datai ari menua Kanaan, sama enggau raban bedus, jelu sapi enggau semua reta tengkira sida. Sida diatu di menua Gosen.” Udah nya iya lalu mai lima iku ari sida menyadi iya betemu enggau raja. Raja lalu nanya sida, “Nama pengawa ti dikereja kita?” “Tuan, kami tu orang ke nginang bedus, baka aki ini kami kelia,” ku sida nyaut. “Kami datai ditu laban kami deka diau di menua tu, laban di menua Kanaan, lapar pungkang balat amat nyadi, lalu kami nadai agi rumput din ke jelu tupi kami. Nya alai kami minta tuan raja ngemendarka kami diau di Gosen.” Raja lalu bejaku enggau Josep, “Apai nuan enggau sida menyadi nuan udah datai ngagai nuan. Menua Ejip tu nyadika menua sida. Awakka sida ngentapka diri ba menua ti pemadu manah. Awakka sida diau di menua Gosen. Lalu enti nuan bisi tetemuka orang ari bala sida ke landik gawa, asuh sida ngemataka raban jelu tupi aku.” Udah nya Josep lalu mai apai iya, Jakop, betemu enggau raja. Jakop lalu merekatka raja. Ku raja nanya Jakop, “Berapa umur nuan?” Disaut Jakop, “Aku udah idup segau-segau seratus tiga puluh taun. Umur aku enda panjai, sereta penuh laban pemerinsa, enda baka pemanjai umur sida aki ini aku ke idup segau-segau kelia.” Udah nya Jakop merekatka raja, lalu mupuk ari nya. Udah nya Josep ngentapka apai iya enggau bala menyadi iya diau di menua Ejip, meri sida tanah di menua ti pemadu manah, semak nengeri Rameses, nitihka atur raja. Josep meri pemakai ngagai apai iya, ngagai bala menyadi iya, enggau ngagai semua sida apai iya sebilik, nyengkaum sida ke pemadu biak. Lapar pungkang balat amat nyadi, datai ke pemakai nyau abis di semua endur, lalu orang di menua Kanaan enggau di menua Ejip nyau lepi laban lapar pungkang nya. Lebuh orang meli gandum, Josep ngumpul semua rega gandum nya, lalu mai duit nya ngagai istana. Lebuh duit di menua Ejip enggau di menua Kanaan nyau abis, orang Ejip datai lalu bejaku enggau Josep. Ku sida, “Beri kami pemakai! Anang nejuka kami mati. Duit kami udah abis.” Disaut Josep, “Bai jelu tupi kita kitu. Aku deka meri kita pemakai kena nyilih jelu tupi kita, enti duit kita udah abis.” Sida lalu mai jelu tupi sida ngagai Josep, lalu iya meri sida pemakai kena iya nyilih kuda, bedus, kambin, sapi enggau keledai sida. Dalam taun nya, iya meri sida pemakai kena iya nyilih jelu tupi sida. Taun siti, sida datai lalu bejaku enggau iya. Ku sida, “Tuan, kami enda ulih melamka pekara tu agi: duit kami udah abis, lalu jelu tupi kami nyau diempu nuan magang. Kami nadai agi utai diberi ngagai nuan, kelimpah ari tubuh enggau tanah kami. Anang nejuka kami mati. Kereja sebarang utai kena ngidupka kami. Anang nejuka tanah kami puang. Beli kami enggau tanah kami kena nyilih pemakai. Kami deka nyadi ulun raja, lalu iya deka bempu tanah kami. Beri kami gandum ke pemakai kami, enggau ke benih kami, ngambika kami ulih nanam utai ba tanah kami.” Josep lalu meli semua tanah di menua Ejip. Semua orang Ejip nyual tanah sida, laban lapar pungkang balat amat nyadi; lalu semua menua nya udah nyadi pesaka raja magang. Josep ngaga orang nyadi ulun di serata menua Ejip. Semina tanah ti diempu bala imam aja ti enda dibeli iya. Sida imam enda ibuh nyual tanah sida, laban raja meri sida elaun kena sida beridup. Ku Josep bejaku enggau orang mayuh, “Aku diatu udah meli kita enggau tanah kita, ke raja. Tu benih ti tau ditanam kita ba tanah kita. Lebuh maya ngetau, kita enda tau enda meri dua puluh peratus ngagai raja. Kita tau ngena teda utai nya nyadika benih, enggau ke pemakai kita.” Ku sida nyaut, “Nuan udah ngidupka nyawa kami. Nuan udah manah enggau kami, tuan, lalu kami deka nyadi ulun raja.” Nya alai Josep ngaga siti adat, ngasuh dua puluh peratus ari utai ti diketau, diempu raja. Adat tu mengkang dipejalaika nyentuk ngagai sehari tu. Semina tanah bala imam aja enda digaga nyadi pesaka raja. Orang Israel diau di Gosen, di menua Ejip, alai sida ke nyadi kaya-raja, sereta beranak betelesak. Jakop diau di menua Ejip tujuh belas taun, datai ngagai umur iya seratus empat puluh tujuh taun. Lebuh iya nyau deka ngapuska seput, iya mesanka Josep, lalu bejaku enggau iya, “Engkahka jari nuan ba selepak pah aku lalu besumpah enda nguburka aku di menua Ejip. Aku minta diri dikuburka ba endur alai bala apai aku dikuburka. Bai aku pansut ari menua Ejip, lalu kuburka aku ba pendam sida.” Disaut Josep, “Aku deka ngereja utai ti diasuh nuan.” Ku Jakop, “Besumpah nuan deka ngereja utai nya.” Josep lalu besumpah, lalu Jakop meri terima kasih lebuh iya benung gali ba peninduk iya. Nyau ke lama udah bekau nya, orang madahka ngagai Josep apai iya sakit. Iya lalu mai anak iya ke dua iku, Manasi seduai Epraim, lalu mansang ngabas Jakop. Lebuh orang madahka ngagai Jakop anak iya Josep bisi datai ngabas iya, iya lalu ngeringka diri duduk ba peninduk iya. Ku Jakop bejaku enggau Josep, “Allah Taala ti Pemadu Bekuasa udah pegari di mua aku di Lus, di menua Kanaan, lalu merekatka aku. Ku Iya bejaku enggau aku, ‘Aku deka meri ngagai nuan mayuh anak, ngambika peturun nuan nyadi mayuh bengkah bansa. Aku deka meri menua tu ngagai peturun nuan, nyadika pesaka sida belama iya.’ ” Ku Jakop nampung jaku iya, “Josep, anak nuan Epraim seduai Manasi, ke diadaka di menua Ejip sebedau aku datai ditu, diambu aku nyadika anak, baka anak aku Reuben seduai Simeon. Enti nuan bisi anak lelaki bukai nangkanka seduai iya, sida nya enda dikumbai anak aku, lalu sida deka bulih pesaka ari Epraim seduai Manasi. Aku ngereja tu ketegal indai nuan Rachel. Ati aku balat sinu lebuh iya mati di menua Kanaan, enda jauh ari Eprat, lebuh aku pulai ari Mesopotamia. Aku nguburka iya ba tisi jalai ngagai Eprat.” (Eprat nya dikumbai Betlehem diatu.) Lebuh Jakop meda anak Josep, iya lalu nanya, “Anak sapa tu?” Ku Josep nyaut, “Seduai iya anak aku, ke diberi Allah Taala ngagai aku di menua Ejip.” Ku Jakop, “Bai seduai iya kitu ngagai aku, ngambika aku merekatka seduai iya.” Mata Jakop nyau rabun, laban iya nyau tuai, lalu enda lansik agi. Josep mai nembiak dua iku nya ngagai Jakop. Jakop lalu merap sereta nyium seduai iya. Ku Jakop bejaku enggau Josep, “Aku enda ngadang diri ulih betemu enggau nuan, lalu diatu Allah Taala udah ngasuh aku meda anak nuan.” Udah nya Josep lalu ngambi seduai iya ari serungkung Jakop, lalu nyungkurka diri ke tanah di mua iya. Josep ngengkahka Epraim ari kiba Jakop, lalu Manasi ari kanan iya. Tang Jakop ngengkahka jari kanan iya ba pala Epraim, taja pen iya biak agi, lalu ngengkahka jari kiba iya ba pala Manasi, ke tuai agi. Udah nya iya lalu merekatka Josep: “Awakka Allah Taala, ke disembah apai aku Abraham enggau Isak, merekatka nembiak dua iku tu! Awakka Allah Taala, ti udah nguluka aku nyentuk ngagai sehari tu, merekatka seduai iya! Awakka melikat, ti udah ngelepaska aku ari semua utai ti tau ngemediska aku, merekatka seduai iya! Awakka nama aku, enggau nama apai aku, Abraham enggau Isak, meruan belama iya ulih nembiak dua iku tu! Awakka seduai iya beranak betelesak, mayuh peturun!” Josep enda lantang ati meda apai iya ngengkahka jari kanan iya atas pala Epraim, nya alai iya ngambi jari apai iya, lalu mindahka jari nya ari pala Epraim ngagai pala Manasi. Ku Josep bejaku enggau apai iya, “Ukai baka nya, apai. Iya tu tuai agi. Engkahka jari kanan nuan ba pala iya.” Tang apai iya enggai, ku iya, “Aku nemu, anak, aku nemu. Peturun Manasi deka mega nyadi bansa ti kering. Tang adi iya deka kering agi ari iya, lalu peturun iya deka nurunka mayuh bengkah bansa ti kering.” Nya alai sehari nya iya merekatka Epraim seduai Manasi. Ku iya, “Orang Israel deka ngena nama seduai lebuh sida merekatka orang. Sida deka nyebut munyi tu, ‘Awakka Allah Taala ngaga nuan baka Epraim seduai Manasi.’ ” Nya meh chara Jakop ngasuh Epraim dulu ari Manasi. Lalu ku Jakop bejaku enggau Josep, “Nuan nemu, aku nyau deka mati, tang Allah Taala deka meruan enggau nuan, lalu deka mai nuan pulai ngagai menua aki ini nuan. Aku meri Sekem ngagai nuan, ukai ngagai bala menyadi nuan. Menua nya ami, lalu udah dirampas aku ari orang Amor ngena pedang enggau panah aku.” Jakop mesanka bala anak iya, lalu bejaku, “Begempuru ngelingi aku laban aku deka madahka ngagai kita utai ti deka nyadi ba kita jemah ila: “Begempuru ditu, lalu pendingka aku, kita anak Jakop. Dingaka apai kita Israel. “Reuben, anak tuai aku, nuan nyadika pengering aku Anak tuai aku, Anak ke pemadu sumbung sereta pemadu kering ari semua anak aku. Nuan tu baka ai bah ti deras, Tang nuan enda tentu diguna orang, Laban nuan udah tinduk enggau indu simpan aku Lalu enda bebasaka peninduk apai nuan. “Simeon seduai Lewi endang diri menyadi. Seduai iya ngena senyata bebunuhka orang. Aku enggai bepekat enggau seduai iya, Lalu aku enggai mega baum enggau seduai iya, laban seduai iya munuh orang ketegal seduai iya ringat. Lalu seduai iya merinsaka jelu sapi ti lelaki kena seduai iya ngelantangka diri. Awakka sumpah ninggang pengeringat seduai iya, laban pengeringat nya balat amat, Lalu awakka sumpah nya ninggang pemangah seduai iya, laban pemangah seduai iya kasar amat. Aku deka naburka seduai iya ngagai serata menua Israel. Aku deka ngachirka seduai iya ngagai semua orang Israel. Judah, menyadi nuan deka muji nuan. Nuan deka nyekal rekung munsuh nuan. Bala menyadi nuan deka meremi ngagai nuan. Judah baka singa, Ti munuh utai ti deka diempa iya, lalu pulai baru ngagai lubang iya, Ngeliat lalu gali. Nadai orang berani ngachau iya. Judah deka megai tungkat ti diraja, Lalu peturun iya deka seruran merintah. Semua bansa deka mai chukai sida ngagai iya Lalu meremi di mua iya, laban sida ngasika iya. Iya nanchangka keledai iya ti agi biak ngagai batang anggur, Ngagai randau ti pemadu manah. Iya masu gari iya ngena wain ti mirah baka darah. Mata iya nyau mirah laban iya ngirup wain, Ngeli iya burak laban iya ngirup ai tusu. “Sebulun deka diau ba tebing tasik. Kapal deka sangkai ba tebing iya. Rampa menua iya nyentuk ngagai Sidon. “Isakar enda lebih ari keledai Ti gali unjur dalam kandang bedus. Tang iya meda menua nya manah alai belelak Lalu menua nya ngerinduka ati. Nya alai iya lalu ngenjingka belakang iya ngesan utai Lalu iya nyadi ulun ke dipejalka ngereja pengawa ti berat. “Dan deka merintah bansa iya empu, baka raban bansa orang Israel ti bukai. Dan nya ular ti ba tisi jalai raya, Ular ti bisa ba tisi jalai, Ti mantuk tumbit kuda, Ngambika orang ke nepan kuda nya labuh telentang kebelakang. “Aku nganti pengelepas ari Nuan, TUHAN. “Gat deka diserang bala perumpak, Tang iya deka mutar, lalu begagaika sida. “Menua Aser deka mansutka pemakai ti manah. Iya deka mansutka pemakai ke raja. “Naptali nya rusa ti belanda enda ditanchang, Ti ngadaka anak ti manah gamal. “Josep nya baka keledai kampung ti bediri ngimbai mata ai, Anak keledai kampung ti ba serimbing bukit. Munsuh iya bebendar amat nyerang iya Lalu begagaika iya ngena panah enggau laja. Tang panah iya mengkang enda beguyat, Lalu lengan iya kering Ulih kuasa Allah Taala ti Pemadu Bekuasa ke disembah Jakop, Ulih Pengibun Domba, ke nyaga orang Israel. Allah Taala ti disembah apai nuan deka nyaup nuan, Allah Taala ti Pemadu Bekuasa deka merekatka nuan Ngena ai ujan ti labuh ari langit Enggau ngena ai ti dalam ti di baruh tanah, Meri nuan mayuh jelu sapi enggau mayuh anak, Berekat ti diberi apai kita kering agi ari berekat ti datai ari bukit ti meruan belama iya ari pengaya ti datai ari munggu ti meruan belama iya Awakka semua berekat nya meruan ba atas pala Josep, ba kening iya ti udah diseraraka ari bala menyadi iya. “Benjamin nya baka ukui kampung ti mangah. Pagi lemai iya munuh lalu makai.” Tu meh dua belas raban bansa orang Israel, lalu tu meh utai ti disebut apai sida, lebuh iya bejaku meri selamat tinggal ngagai siku-siku anak iya. Udah nya Jakop lalu bejaku enggau bala anak lelaki iya munyi tu, “Aku nyau deka mati. Kuburka aku begulai enggau bala apai aku, dalam lubang gua ti ba padang ti udah diempu Epron, orang Iti, di Makpilah, tunga ke timur Mamre, di menua Kanaan. Abraham udah meli lubang gua enggau padang nya ari Epron, nyadika tanah pendam. Nya meh endur alai Abraham nguburka bini iya, Sarah. Dia meh sida nguburka Isak enggau bini iya Rebekah. Lalu nya mega endur alai aku nguburka Leah. Padang enggau lubang gua nya udah dibeli ari orang Iti. Dia meh alai kita deka nguburka aku.” Lebuh Jakop udah tembu meri semua atur ngagai bala anak iya, iya gali lalu ngapuska seput. Josep lalu ningkapka diri ba apai iya lalu merap iya, nyabak sereta nyium mua iya. Udah nya Josep lalu ngasuh orang ngintu bangkai apai iya ngambika iya enda but. Pengawa nya dikereja dalam pengelama empat puluh hari. Tu endang pengelama orang nyendiaka tubuh orang ke mati ngambika bangkai nya enda but. Orang Ejip lalu ngulitka iya tujuh puluh hari. Lebuh maya ngulit udah tembu, Josep lalu bejaku enggau bala pemesai raja, “Aku minta kita mai pesan tu ngagai raja: ‘Lebuh apai aku baru deka ngapuska seput, iya ngasuh aku besemaya nguburka iya ba lubang kubur ti udah disediaka iya di menua Kanaan. Nya alai, awakka aku mupuk lalu nguburka apai aku. Udah nya aku deka pulai kitu baru.’ ” Disaut raja, “Mupuk meh nuan, lalu kuburka apai nuan, munyi ti udah disemaya nuan enggau iya.” Nya alai Josep mupuk, deka nguburka apai iya. Semua bala pemesai raja, orang ke tinggi pangkat dalam opis raja, enggau semua bala orang ke tampak nama di menua Ejip, mupuk magang enggau Josep. Sida sebilik, bala menyadi iya, enggau bala sida ke ari ruang bilik apai iya, semua mupuk magang enggau iya. Ka semina sida ke agi mit, enggau jelu bedus, kambin, jelu sapi aja ti tinggal di menua Gosen. Orang ke nepan kerita perang, enggau orang ke nepan kuda, mega mupuk enggau iya. Mayuh amat bala sida. Lebuh sida datai ba endur alai nungku gandum di Atat, muak ke timur Sungai Jordan, sida ngulitka Jakop dia tujuh hari. Lebuh orang Kanaan meda sida ngulit di Atat, sida lalu bejaku, “Bebendar amat orang Ejip ngulit!” Nya kebuah endur nya dikumbai Abel Misraim. Nya alai bala anak Jakop ngereja utai nitihka pesan iya. Sida mai bangkai iya ngagai menua Kanaan, lalu nguburka iya dalam lubang gua di Makpilah, tunga ke timur Mamre, ba tanah ti udah dibeli Abraham ari Epron, orang Iti, nyadika tanah pendam. Lebuh Josep udah nguburka apai iya, iya pulai ngagai menua Ejip sama enggau bala menyadi iya, sereta enggau semua orang ke udah enggau iya nguburka apai iya. Udah bekau pemati apai sida, bala menyadi Josep lalu bejaku, “Kati enti Josep begedika kitai, lalu bekira deka malas kitai ti udah ngemediska iya?” Sida lalu ngirumka pesan ngagai Josep, “Sebedau apai kitai mati, iya ngasuh kami nyebut ngagai nuan munyi tu, ‘Ampun penyalah ti udah dikereja bala menyadi nuan ngagai nuan.’ Nya alai kami minta nuan ngampun penyalah ti udah dikereja kami ke nembiak Allah Taala ti disembah apai nuan.” Josep nyabak lebuh iya nerima pesan nya. Udah nya bala menyadi iya empu datai lalu meremi di mua iya, “Kami datai ditu laban kami deka nyerahka diri nyadi ulun nuan,” ku sida bejaku. Tang ku Josep bejaku enggau sida, “Anang takut. Aku enda nemu ngaga diri nyadi Allah Taala. Kita ngiga akal ti jai kena kita ngelaban aku, tang Allah Taala udah mutarka utai nya nyadi utai ti manah, ngambika ngidupka nyawa orang mayuh, lalu orang mayuh agi mengkang idup diatu, ketegal utai nya udah nyadi. Nya alai, anang takut. Aku deka ngintu kita enggau bala anak kita.” Iya bejaku siru amat enggau sida, minta sida badu agi irau ati. Jaku iya negu ati sida. Josep mengkang diau di menua Ejip begulai enggau raban ruang bilik apai iya. Umur iya seratus sepuluh taun lebuh iya mati. Iya idup meda bala anak enggau bala uchu Epraim. Iya mega agi idup lebuh bala anak Makir, iya nya uchu Manasi, ada dalam ruang bilik iya. Ku iya bejaku enggau bala menyadi iya, “Aku diatu nyau deka mati, tang Allah Taala tetap deka ngemataka kita, lalu mai kita pansut ari menua tu ngagai menua ti udah disemaya Iya ngena sumpah ngagai Abraham, Isak enggau Jakop.” Udah nya Josep lalu ngasuh bala iya besumpah. Ku iya, “Kita enda tau enda besemaya deka mai bangkai aku enggau kita, lebuh Allah Taala nguluka kita ngagai menua nya.” Josep mati umur 110 taun di menua Ejip. Sida lalu ngintu tubuh iya ngambika iya enda but, lalu nyimpan iya dalam sentubung. Bala anak lelaki Jakop ke mansang enggau iya ngagai menua Ejip, endang mai semua sida sebilik. Tu nama bala anak Jakop: Reuben, Simeon, Lewi, Judah, Isakar, Sebulun, Benjamin, Dan, Naptali, Gat, enggau Aser. Pemayuh tubuh sida, ke diturunka Jakop empu, nya tujuh puluh iku. Anak iya Josep endang udah di menua Ejip. Nyau ke lama udah bekau nya, Josep, bala menyadi iya, enggau semua orang ke dalam serak nya, mati magang, tang peturun sida, iya nya bansa orang Israel, ngadaka mayuh anak, ke ngasuh sida mayuh amat tubuh datai ke menua Ejip nyau penuh laban sida. Udah nya, siku raja ti baru, ti enda ngelala Josep, belabuh megai perintah di menua Ejip. Ku iya bejaku enggau bala nembiak iya, “Orang Israel tu nyau mayuh agi sereta kering agi ari kitai. Enti perang bisi nyadi, kada enda sida deka ngalih ari munsuh ngelaban kitai, lalu rari ari menua tu. Kitai enda tau enda ngiga jalai kena nagang sida nambah mayuh tubuh.” Nya alai orang Ejip lalu ngasuh orang nyadi mandur megai sida, ngambika bisi mejalka sida ngereja pengawa ti berat, kena merinsaka orang Israel. Orang Israel ngaga nengeri Pitom enggau nengeri Rameses nyadika pusat alai mansutka utai ti diguna raja. Tang, makin balat agi orang Ejip merinsaka orang Israel, makin mayuh agi ga tubuh sida nambah-menambah, lalu jauh agi ga sida ngachir ba sebelah menua nya. Orang Ejip nyau takutka sida Udah nya raja menua Ejip lalu bejaku ngagai Siprah seduai Puah, iya nya dua iku indu bidan ke ngintu indu orang Hebrew lebuh sida beranak. Ku raja nya bejaku, “Lebuh seduai nyaup indu orang Hebrew beranak, bunuh anak mit nya enti iya lelaki. Tang enti iya indu, anang munuh iya.” Tang bidan dua iku nya orang ke nangika Allah Taala. Nya alai seduai iya enggai nitihka jaku raja, tang nejuka anak ti lelaki idup. Nya alai raja mesanka seduai iya, lalu nanya ngagai seduai iya, “Nama kebuah seduai ngereja tu? Nama kebuah seduai nejuka anak ti lelaki idup?” Ku seduai iya nyaut, “Indu orang Hebrew enda baka indu orang Ejip. Sida mudah amat beranak, lalu anak sida ada sebedau kami duai datai.” Ke pengujung iya, raja nya lalu meri atur ngagai semua nembiak iya munyi tu: “Ambi semua anak lelaki orang Hebrew ke baru ada, lalu buai sida ngagai Sungai Nile, tang awakka semua anak ti indu idup.” Ba urung maya nya, siku lelaki ari raban bansa Lewi jadi enggau siku indu ke ari raban bansa iya empu. Indu nya ngadaka siku anak lelaki. Lebuh iya meda penyigat gamal anak mit nya, iya lalu ngelalaika iya tiga bulan. Tang lebuh anak mit nya nyau enda ulih dilalaika agi, iya lalu ngambi siti bakul ti digaga ari teberu, lalu melali bakul nya enggau tar, ngambika bakul nya enda ulih masuk ai. Iya nyimpan anak mit nya dalam bakul nya, lalu udah nya ngengkahka bakul nya ba rumput ti bauh ba tebing sungai. Menyadi indu anak mit nya bediri enda jauh ari endur nya, deka nemu namaka penyadi anak mit nya. Anak indu raja nurun mandi ngagai sungai nya. Lebuh iya mandi, bala orang gaji iya bejalai ba sebelah tebing sungai nya. Anak indu raja nya lalu tepedaka siti bakul ba madang rumput, lalu ngasuh siku ari orang gaji iya ngambi bakul nya. Lebuh anak indu raja nya ngebakka bakul nya, iya lalu meda siku anak mit ti lelaki dalam bakul nya. Anak mit nya nyabak, lalu anak raja sinu ati ke iya. Ku iya, “Iya tu anak orang Hebrew.” Udah nya menyadi indu anak mit nya lalu nanya ngagai anak indu raja, “Kati tau aku madahka siku indu orang Hebrew ngambika iya ngibun anak mit nya ke nuan?” “Au, mupuk meh nuan,” ku anak indu raja nya nyaut. Nya alai indu nya mupuk. Iya lalu datai baru, mai indai anak mit nya empu. Ku anak indu raja nya bejaku enggau indu nya, “Bai anak mit tu, lalu ibun iya ke aku. Aku deka ngaji nuan.” Nya alai indu nya lalu mai anak mit nya, lalu ngibun iya. Udah bekau nya, lebuh anak mit nya nyau besai, indu nya mai iya ngagai anak indu raja. Anak indu raja nya lalu ngiru nembiak nya nyadika anak iya empu. Ku anak indu raja nya berunding dalam ati diri, “Aku ngambi iya ari ai, nya alai aku meri iya nama Moses.” Lebuh Moses nyau udah besai tuai, iya nemuai ngagai bansa iya empu, iya nya bansa orang Hebrew, lalu iya meda jalai sida balat amat dipejalka ngereja pengawa ti berat. Iya mega tepedaka siku orang Ejip munuh siku orang Hebrew, nya bansa Moses empu. Moses malik kiba kanan, lalu lebuh iya nadai meda orang nengkilaka iya, iya lalu munuh orang Ejip nya, lalu numbakka bangkai iya dalam pasir. Hari siti, iya mansang ngagai endur nya baru, lalu tepedaka dua iku orang Hebrew berekak. Ku iya bejaku enggau iya ke salah, “Nama kebuah nuan malu orang ari bansa nuan empu?” Ku orang nya nyaut, “Sapa ngasuh nuan merintah kami lalu nyadi hakim kami? Kati nuan deka munuh aku baka nuan ti munuh orang Ejip nya kemari?” Moses lalu takut, lalu ku iya bejaku dalam ati diri, “Orang udah nemu utai ti dikereja aku.” Tang sekeda orang ke pengibun bedus muru bala anak indu Jetro. Udah nya Moses lalu mansang nulung bala anak indu Jetro, lalu meri jelu sida ngirup. Lebuh bala anak indu Jetro pulai ngagai apai sida, apai sida lalu nanya, “Nama kebuah kita tumu amat pulai sehari tu?” Ku sida nyaut, “Siku orang Ejip nulung kami lebuh kami diburu bala pengibun bedus. Iya nyauk ai ke kami, lalu meri jelu kami ngirup.” “Dini alai iya?” ku Jetro nanya sida. “Nama kebuah kita ninggalka lelaki nya din? Asuh iya datai kitu ngambika iya makai enggau kitai.” Moses lalu besetuju deka diau dia, lalu Jetro meri anak indu iya ke benama Sipora nyadika bini Moses. Sipora ngadaka siku anak lelaki, lalu ku Moses bejaku dalam ati diri, “Aku tu orang kampar di menua tu, nya alai aku meri iya nama Gersom.” Nyau berapa taun udah bekau nya, raja menua Ejip pen mati, tang orang Israel agi mengkang merinsa sereta nyabak minta tulung, lalu sabak sida didinga Allah Taala. Iya ninga sida bedemuh, lalu ingatka semaya Iya enggau Abraham, Isak enggau Jakop. Iya meda orang Israel digaga nyadi ulun, lalu Iya sinu ati ke sida. Nyadi sekali, lebuh Moses benung ngibun bedus enggau kambin mentua iya Jetro, ti nyadi imam orang Midian, iya nguluka raban jelu nya bejalai meraka menua puang, lalu datai di Sinai, iya nya bukit ti kudus. Dia siku melikat TUHAN pegari di mua iya, baka api ti pansut ari babas. Moses meda babas nya mau laban api, tang babas nya enda angus. “Nyelai amat utai nya,” ku iya bepikir. “Nama kebuah babas nya enda angus? Uji aku meda semak agi.” Lebuh TUHAN meda Moses mansang semak agi, Iya lalu ngangauka Moses ari dalam babas nya, ku Iya, “Moses! Moses!” “Tu aku,” ku Moses nyaut. Ku Allah Taala bejaku, “Anang datai semak. Buka selipar nuan, laban nuan bediri ba tanah ti kudus. Aku tu Allah Taala aki ini nuan, Allah Taala ke disembah Abraham, Isak, enggau Jakop.” Nya alai Moses lalu mampul mua diri, laban iya takut merening ngagai Allah Taala. Ku TUHAN bejaku, “Aku udah meda pemedis bala nembiak Aku diperinsaka orang di menua Ejip. Aku udah ninga sida ngangau minta diri dilepaska ari mandur ke ngemataka sida. Aku nemu pemalat sida kena perinsa, nya alai Aku nurun laban Aku deka ngelepaska sida ari jari orang Ejip, lalu mai sida pansut ari menua Ejip ngagai menua ti luas, menua ti kaya sereta ami ti diuan orang Kanaan, orang Iti, orang Amor, orang Peris, orang Ibi, enggau orang Jebus. Aku udah ninga sabak bala nembiak Aku, lalu Aku meda chara orang Ejip nekanka pengidup sida. Diatu Aku ngirumka nuan ngagai raja menua Ejip, ngambika nuan mai nembiak Aku pansut ari menua Ejip.” Tang ku Moses bejaku enggau Allah Taala, “Sapa aku tu? Baka ni ku aku ulih betemu enggau raja? Lalu baka ni ku aku ulih mai orang Israel pansut ari menua Ejip?” Ku Allah Taala nyaut, “Aku deka meruan enggau nuan, lalu lebuh nuan mai orang Israel pansut ari menua Ejip, kita deka nyembah Aku ba bukit tu. Tu nyadika tanda Aku udah ngirumka nuan.” Tang ku Moses nyaut, “Lebuh aku betemu enggau orang Israel, lalu nyebut ngagai sida, ‘Allah Taala aki ini kita udah ngasuh aku betemu enggau kita,’ sida deka nanya ngagai aku, ‘Sapa nama Iya?’ Nama utai ti patut dipadahka aku ngagai sida?” Ku Allah Taala nyaut Moses, “AKU TU MEH AKU. Nuan enda tau enda madahka ngagai orang Israel: ‘Iya ke dikumbai AKU TU MEH AKU udah ngirumka aku ngagai kita.’ Padahka ngagai orang Israel, Aku TUHAN Allah Taala aki ini sida, Allah Taala ke disembah Abraham, Isak enggau Jakop, udah ngirumka nuan ngagai sida. Tu nama Aku, lalu nama tu deka meruan belama iya. Tu meh nama ti deka dikena semua turun-menurun ngangauka Aku jemah ila. Mupuk meh nuan, lalu gempuruka bala tuai orang Israel, lalu padahka ngagai sida, Aku TUHAN Allah Taala aki ini sida, Allah Taala ke disembah Abraham, Isak enggau Jakop, udah pegari di mua nuan. Padahka ngagai sida, Aku udah datai ngagai sida, lalu udah meda utai ti benung dikereja orang Ejip ngagai sida. Aku udah mutuska runding deka mai sida pansut ari menua Ejip, alai sida ke balat kena perinsa, lalu Aku deka mai sida ngagai menua ti kaya sereta ami, menua ti diuan orang Kanaan, orang Iti, orang Amor, orang Peris, orang Ibi enggau orang Jebus. “Sida deka mendingka utai ti disebut nuan. Udah nya, nuan enda tau enda mansang enggau bala tuai orang Israel, ngagai raja menua Ejip, lalu nyebut ngagai iya, ‘ TUHAN Allah Taala orang Hebrew, udah betemu enggau kami. Nya alai awakka kami bejalai ngagai menua puang dalam pejalai kira tiga hari lalu ngenjuk piring ngagai TUHAN Allah Taala kami.’ Aku nemu, raja menua Ejip sigi enggai ngelepaska kita, enti iya enda dipejal. Tang Aku deka ngena kuasa Aku, lalu deka ngukum menua Ejip, ngena utai ti balat ngenakut. Udah nya baru iya deka ngelepaska kita. “Aku deka mejalka orang Ejip bebasaka nembiak Aku, ngambika, lebuh sida angkat ari menua nya, sida enda mupuk puang. Genap iku indu orang Israel deka mansang ngagai orang Ejip ke berimbai pendiau enggau sida, enggau ngagai indu orang Ejip ke serumah enggau sida, lalu deka minta gari, perengka emas enggau perengka pirak. Orang Israel deka ngerasukka utai nya ba anak lelaki enggau anak indu sida, lalu nabanka pengaya orang Ejip.” Lalu ku Moses nyaut TUHAN, “Tang, kati enti orang Israel enda arapka aku, lalu enggai mendingka utai ti disebut aku; nama utai ti tau dikereja aku, enti sida ngumbai Nuan nadai udah kala pegari di mua aku?” TUHAN lalu nanya Moses, “Nama utai ba jari nuan nya?” “Tungkat,” ku Moses nyaut. Ku TUHAN bejaku, “Tikauka tungkat nya ke tanah.” Lebuh Moses nikauka tungkat nya ke tanah, tungkat nya lalu bebali nyadi ular. Iya lalu surut ari ular nya. Udah nya TUHAN lalu bejaku baru enggau Moses, “Jengkau lalu ambi ular nya ari iku.” Moses nyengkau lalu nangkap ular nya, lalu ular nya bebali nyadi tungkat baru. Ku TUHAN bejaku enggau iya, “Kereja nya kena nunjukka ngagai orang Israel TUHAN Allah Taala aki ini sida, Allah Taala ke disembah Abraham, Isak enggau Jakop, sigi amat udah pegari di mua nuan.” TUHAN lalu bejaku baru ngagai Moses, “Simpan jari nuan ke dalam baju panjai nuan.” Moses lalu ngereja nya. Lebuh iya narit jari iya pansut, jari iya bisi penyakit, bepetik burak, baka seleju. Udah nya TUHAN lalu bejaku, “Simpan jari nuan baru ke dalam baju panjai nuan.” Moses lalu ngereja nya. Lebuh iya narit jari iya pansut baru, jari iya udah pulai suman baru baka perengka tubuh iya ti bukai. Ku TUHAN bejaku, “Enti sida enggai arapka nuan, tauka enda arapka kereja ajih ti terubah, utai tu deka ngasuh sida arap. Enti sida enda arapka nuan lebuh sida meda kereja ajih dua bengkah tu, lalu enti sida enggai mendingka utai ti disebut nuan, ambi ai ari Sungai Nile, lalu bubuhka ai nya ngagai tanah. Ai nya deka bebali nyadi darah.” Tang ku Moses, “Enggai aku, TUHAN. Anang ngasuh aku. Aku enda lanchar bejaku, lalu aku apin nyadi orang ke lanchar bejaku sekumbang Nuan ti udah bejaku ngagai aku. Aku enda lanchar bejaku, lubah sereta kat-kat.” Ku TUHAN bejaku ngagai iya, “Sapa meri mensia mulut? Sapa ngasuh iya bengal tauka bisu? Sapa ngasuh iya ulih meda, tauka buta? Aku ti TUHAN. Nya alai, mupuk nuan! Aku deka nulung nuan bejaku, lalu Aku deka madahka utai ti patut disebut nuan.” Tang ku Moses nyaut, “Enggai aku, TUHAN. Asuh orang bukai.” TUHAN lalu ringat ngagai Moses. Ku Iya, “Kati ku baka menyadi nuan, Aron, ke ari peturun Lewi? Aku nemu iya lanchar bejaku. Iya diatu baru deka datai betemu enggau nuan, lalu iya deka gaga ati lebuh iya meda nuan. Nuan tau bejaku enggau iya, lalu madahka ngagai iya utai ti disebut Aku. Aku deka nyaup seduai bejaku, lalu Aku deka madahka utai ti patut dikereja seduai. Iya deka bejaku ngagai orang mayuh ngarika nuan. Nya baru nuan deka nyadi baka Allah Taala, madahka ngagai Aron utai ti patut disebut iya. Bai tungkat tu, laban nuan deka ngereja kereja ajih ngena tungkat tu.” Udah nya Moses pulai ngagai mentua iya ti lelaki, Jetro, lalu ku iya bejaku enggau Jetro, “Aku minta nuan ngawakka aku pulai ngagai kaban belayan aku di menua Ejip, deka nemu enti sida agi meruan.” Jetro besetuju lalu meri selamat tinggal ngagai iya. Lebuh Moses agi di Midian, TUHAN bejaku ngagai iya, “Alai nuan pulai baru ngagai menua Ejip, laban semua orang ke deka munuh nuan suba, udah mati magang.” Moses lalu mai bini iya, enggau sida anak lelaki iya, nepanka sida ba siku keledai, lalu mupuk sama enggau sida ngagai menua Ejip, mai tungkat ti udah diasuh Allah Taala bai iya. TUHAN lalu bejaku baru ngagai Moses, “Laban nuan diatu pulai baru ngagai menua Ejip, nuan enda tau enda ngereja di mua raja, semua kereja ajih ngena kuasa ti udah diberi Aku ngagai nuan. Tang Aku deka ngasuh ati raja kieh, ngambika iya enggai nyagi orang Israel angkat ari menua nya. Udah nya, nuan enda tau enda madahka ngagai iya, pasal Aku ti TUHAN, ti udah nyebut, ‘Israel nya anak lelaki Aku ti tuai. Aku udah ngasuh nuan ngelepaska anak lelaki Aku, ngambika iya ulih nyembah Aku, tang nuan enggai. Diatu Aku deka munuh anak lelaki nuan ke tuai.’ ” Ba endur alai sida ke bemalam di rantau jalai ngagai menua Ejip, TUHAN betemu enggau Moses, deka munuh iya. Lebuh maya nya mega, TUHAN bejaku ngagai Aron, “Alai nuan mansang ngagai menua puang lalu betemu enggau Moses.” Aron lalu mupuk deka betemu enggau Moses ba bukit ti kudus. Lebuh iya betemu enggau Moses, iya nyium Moses. Udah nya Moses lalu madahka ngagai Aron semua utai ti udah disebut TUHAN, lebuh TUHAN madahka ngagai iya pasal kereja ajih ti udah diasuh TUHAN kereja iya. Moses seduai Aron lalu bejalai ngagai menua Ejip, lalu ngelumuka semua tuai bansa orang Israel. Aron lalu madahka semua utai ti udah disebut TUHAN ngagai Moses. Udah nya Moses lalu ngereja semua kereja ajih di mua orang mayuh. Sida arap, lalu lebuh sida ninga TUHAN udah datai ngagai sida, lalu udah meda pemalat sida kena perinsa, sida meremi lalu nyembah Iya. Udah nya Moses seduai Aron lalu mansang ngagai raja menua Ejip. Ku seduai iya bejaku, “ TUHAN Allah Taala ke disembah orang Israel nyebut, ‘Lepaska nembiak Aku, ngambika sida ulih begawai di menua puang kena sida ngemesaika Aku.’ ” Raja nya lalu nanya, “Sapa ke dikumbai TUHAN? Lalu nama kebuah aku enda tau enda mendingka Iya lalu ngelepaska orang Israel? Aku enda nemu TUHAN, lalu aku enggai ngelepaska orang Israel.” Disaut Moses seduai Aron, “Allah Taala orang Hebrew udah mandangka Diri ngagai kami. Nya alai awakka kami bejalai tiga hari ngagai menua puang, ngambika kami ulih ngenjuk piring ngagai TUHAN Allah Taala kami. Enti kami enda ngereja nya, Iya deka munuh kami ngena penyakit, tauka ngasuh kami mati beperang.” Ku raja bejaku enggau Moses seduai Aron, “Nama kebuah seduai ngelimpangka orang mayuh ari pengawa sida? Asuh bala ulun nya bekereja! Orang bansa kita nyau mayuh agi ari orang Ejip. Lalu diatu kita enggai agi gawa!” Ba hari nya raja lalu meri atur ngagai orang Ejip ke ngemataka pengawa ulun, enggau bala mandur ke ari bansa orang Israel empu: “Badu agi meri sida rumput ti rangkai kena ngaga batu bata. Awakka sida ngiga rumput ti rangkai ke diri empu. Tang sida enda tau enda ngaga batu bata ngemayuh ti dulu, nadai kurang siti. Sida tu nadai chukup utai dikereja, nya kebuah sida majak minta aku ngelepaska sida miring ngagai Allah Taala sida! Asuh sida bebendar agi gawa, lalu anang ngelakka sida ngetu, ngambika sida nadai peluang mendingka jaku ti bula.” Orang Ejip ke ngemataka pengawa ulun, enggau mandur ke ari bansa orang Israel empu mansang lalu bejaku enggau orang Israel, “Raja udah madahka iya enggai agi meri kita rumput ti rangkai. Ku iya, kita enda tau enda ngiga rumput ti rangkai ke diri empu, tang kita enda tau enda ngaga batu bata ngemayuh ti dulu.” Orang Israel lalu ngiga rumput ti rangkai di serata menua Ejip. Tiap hari bala mandur mejalka sida ngaga batu bata ngemayuh ti dulu suba lebuh sida agi diberi rumput ti rangkai. Orang Ejip ke ngemataka pengawa ulun malu orang Israel ti nyadi mandur. Ku sida, “Nama kebuah kita enda ngaga batu bata ngemayuh ti digaga kita suba?” Udah nya sida mandur mansang lalu mantaika serabana sida ngagai raja, “Tuan Raja, nama kebuah nuan ngereja utai baka tu ngagai kami? Kami nadai diberi rumput ti rangkai, tang kami agi dipejalka ngaga batu bata! Lalu diatu kami dipalu. Bala kita empu ke salah.” Ku raja nya nyaut, “Kita tu ngelusu lalu enggai gawa. Nya kebuah kita minta aku ngelepaska kita lalu nejuka kita miring ngagai TUHAN. Pulai kita lalu gawa! Kita enda agi diberi rumput ti rangkai, tang kita enda tau enda ngaga batu bata ngemayuh ti dulu.” Sida mandur nemu diri dituntung penusah lebuh sida diasuh ngaga batu bata tiap hari ngemayuh ti dulu. Lebuh sida angkat ari istana raja, sida lalu betemu enggau Moses seduai Aron ke benung nganti pemulai sida. Ku sida bejaku enggau Moses seduai Aron, “Awakka TUHAN meda seduai, lalu ngakim seduai laban seduai udah ngasuh raja enggau bala pemesai iya begedika kami. Seduai udah meri sida tegal kena sida munuh kami.” Udah nya Moses lalu ngadap ngagai TUHAN baru, ku iya, “ TUHAN, nama kebuah nuan merinsaka bala nembiak Nuan? Nama kebuah Nuan ngasuh aku kitu? Sekumbang aku ti udah betemu enggau raja, lalu bejaku ngarika Nuan, iya udah balat amat merinsaka bala nembiak Nuan. Lalu Nuan enda nyaup sida!” Udah nya TUHAN lalu bejaku ngagai Moses, “Diatu nuan deka meda utai ti deka dikereja Aku ngagai raja nya. Aku deka mejalka iya ngelepaska bala nembiak Aku. Aku deka mejalka iya muru sida pansut ari menua tu.” Allah Taala lalu bejaku ngagai Moses, ku Iya, “Aku tu TUHAN. Aku, Allah Taala ti Pemadu Bekuasa, udah pegari di mua Abraham, ngagai Isak, tang Aku enda ngasuh Diri ditemu sida ngena nama Aku ti kudus, iya nya TUHAN. Aku mega udah ngaga sempekat enggau sida, besemaya deka meri sida menua Kanaan, menua ti udah alai sida diau nyadi orang kampar. Diatu Aku udah ninga demuh orang Israel, laban sida udah dipejalka nyadi ulun, lalu Aku ingatka sempekat Aku. Nya alai, padahka ngagai orang Israel Aku bejaku ngagai sida munyi tu, ‘Aku tu TUHAN. Aku deka ngelepaska lalu nebus kita ari pengidup kita ke nyadi ulun orang Ejip. Aku deka ngedarka lengan Aku ti kering lalu ngukum orang Ejip, lalu Aku deka nebus kita. Aku deka ngaga kita nyadi nembiak Aku, lalu Aku deka nyadi Allah Taala kita. Kita deka nemu Aku endang TUHAN Allah Taala kita, lebuh Aku ngelepaska kita ari pengidup kita ke nyadi ulun di menua Ejip. Aku deka mai kita ngagai menua ti udah disemaya Aku ngena sumpah ngagai Abraham, Isak enggau Jakop, lalu Aku deka meri menua nya ngagai kita, nyadika pesaka kita. Aku tu TUHAN.’ ” Moses lalu madahka jaku nya ngagai orang Israel, tang sida enggai mendingka iya, laban sida nyau lemi semengat ketegal merinsa nyadi ulun. Udah nya TUHAN lalu bejaku ngagai Moses, “Alai nuan madahka ngagai raja menua Ejip, iya enda tau enda nejuka orang Israel angkat ari menua iya.” Tang ku Moses nyaut, “Indah orang Israel deh enggai mendingka aku. Nya alai nama kebuah raja menua Ejip deka mendingka orang ke enda lanchar bejaku baka aku?” TUHAN lalu bejaku ngagai Moses seduai Aron. Ku Iya, “Padahka ngagai orang Israel enggau ngagai raja menua Ejip, pasal Aku ti udah ngasuh seduai nguluka orang Israel pansut ari menua Ejip.” Reuben, iya nya anak tuai Jakop, bisi empat iku anak lelaki: Hanok, Pallu, Hesron, enggau Karmi. Sida nya nurunka raban peturun ti ngangkatka nama sida. Simeon bisi enam iku anak lelaki: Jemuel, Jamin, Ohat, Jachin, Hanok, enggau Saul. Sida tu diadaka siku indu orang Kanaan. Sida tu nurunka raban peturun ti ngangkatka nama sida. Lewi bisi tiga iku anak lelaki: Gerson, Kohat, enggau Merari. Sida nya nurunka raban peturun ti ngangkatka nama sida. Gerson bisi dua iku anak lelaki: Libni seduai Simei, lalu seduai tu mayuh peturun. Kohat bisi empat iku anak lelaki: Amram, Isar, Hebron, enggau Usil. Kohat idup ngagai umur 133 taun. Merari bisi dua iku anak lelaki: Mahli seduai Musi. Tu meh bala raban peturun orang Lewi enggau peturun sida. Amram jadi enggau menyadi indu apai iya empu, ke benama Jokibit, lalu Jokibit ngadaka Aron seduai Moses. Amram idup ngagai umur 137 taun. Isar bisi tiga iku anak lelaki: Korah, Nepek, enggau Sikri. Usil mega bisi tiga iku anak lelaki: Misael, Elsapan, enggau Sitri. Aron jadi enggau Elisheba, anak indu Aminadap, menyadi indu Nason. Elisheba ngadaka Nadap, Abihu, Eleasar, enggau Itamar. Korah bisi tiga iku anak lelaki: Asir, Elkanah, enggau Abiasap. Sida tu nurunka raban peturun Korah. Eleasar anak Aron jadi enggau siku anak indu Putiel, ke ngadaka Pinehas. Sida tu nyadi tuai bilik enggau tuai peturun ari raban bansa Lewi. Aron seduai Moses meh orang ke alai TUHAN bejaku, “Bai orang Israel pansut ari menua Ejip.” Seduai tu meh orang ke bejaku minta raja menua Ejip ngelepaska orang Israel. Ku TUHAN bejaku ngagai Moses di menua Ejip, “Aku tu TUHAN. Padahka ngagai raja menua Ejip semua utai ti dipadahka Aku ngagai nuan.” Tang ku Moses nyaut TUHAN, “Nuan nemu aku enda lanchar bejaku. Nama kebuah raja deka mendingka aku?” Ku TUHAN bejaku, “Aku deka ngaga nuan nyadi baka Allah Taala di mua raja, lalu menyadi nuan Aron deka bejaku ngagai iya, nyadi nabi nuan. Padahka ngagai Aron semua utai ti dipesanka Aku ngagai nuan, lalu iya deka bejaku ngasuh raja ngelepaska orang Israel ngambika sida angkat ari menua Ejip. Orang Ejip deka nemu Aku endang amat TUHAN, lebuh Aku ngedarka jari Aku ngelaban sida, lalu mai orang Israel pansut ari menua sida.” Moses seduai Aron lalu ngereja utai ti diasuh TUHAN. Ba maya seduai iya ke bejaku ngagai raja, umur Moses endang udah manggai lapan puluh taun, lalu umur Aron lapan puluh tiga taun. Ku TUHAN bejaku ngagai Moses seduai Aron, “Enti raja ngasuh seduai ngereja kereja ajih, asuh Aron mai tungkat iya, lalu nikauka tungkat nya ke tanah, di mua raja, lalu tungkat nya deka bebali nyadi ular.” Moses seduai Aron lalu mansang ngagai raja, lalu ngereja utai ti udah diasuh TUHAN. Aron nikauka tungkat iya ke tanah di mua raja enggau di mua bala pemesai iya, lalu tungkat nya bebali nyadi ular. Raja lalu mesanka bala nembiak iya ti bepenemu-dalam, enggau orang ke tau keramat. Sida ngena keramat sida, lalu ngereja utai baka ke dikereja Aron. Sida nikauka tungkat sida ke tanah, lalu tungkat sida bebali nyadi ular. Tang tungkat Aron nelan tungkat sida. Tang raja mengkang kieh, lalu munyi ti ku TUHAN, raja enggai mendingka Moses seduai Aron. Udah nya TUHAN lalu bejaku ngagai Moses, “Raja nya kieh amat, lalu enggai ngelepaska nembiak Aku. Nya alai seduai enda tau enda betemu enggau iya pagila, lebuh iya nurun ngagai Sungai Nile. Bai tungkat ti udah bebali nyadi ular, lalu anti iya ba tebing sungai nya. Udah nya sebut ngagai iya, ‘ TUHAN Allah Taala orang Hebrew, udah ngasuh aku madahka ngagai nuan, nuan enda tau enda ngelepaska nembiak Iya, ngambika sida ulih nyembah Iya di menua puang. Tang datai ke diatu, nuan mengkang enda mending. Nya alai, Tuan Raja, diatu TUHAN madahka nuan deka nemu sapa TUHAN, ari utai ti deka dikereja Iya. Peda nuan, aku deka malu ai sungai tu ngena tungkat tu, lalu ai tu deka bebali nyadi darah. Ikan deka mati, lalu sungai tu deka bebau but, datai ke orang Ejip enda ulih ngirup ai tu.’ ” Ku TUHAN bejaku ngagai Moses, “Asuh Aron mai tungkat iya lalu ngedarka tungkat nya atas semua sungai, parit, tali ai, enggau letung di menua Ejip. Ai nya deka bebali nyadi darah. Lalu semua menua Ejip deka dibalut darah, nyengkaum tong kayu enggau benda.” Moses seduai Aron lalu ngereja nitihka pesan TUHAN. Di mua raja enggau bala pemesai raja, Aron ngedarka tungkat iya, lalu malu ai sungai nya, lalu semua ai dalam sungai nya bebali nyadi darah magang. Ikan ti dalam sungai nya mati. Sungai nya lalu balat amat bebau but, datai ke orang Ejip enda ulih ngirup ai ari sungai nya. Semua menua Ejip dibalut darah magang. Udah nya bala orang ke tau keramat lalu ngereja utai baka ke dikereja Aron, ngena penemu keramat sida. Lalu raja mengkang kieh baka selama. Munyi ti ku TUHAN, raja enggai mendingka Moses seduai Aron. Iya nguing lalu pulai ngagai istana, lalu mengkang enggai ibuhka semua utai nya. Semua orang Ejip lalu numbak tanah ba sepemanjai tebing sungai nya begigaka ai irup, laban sida enda ulih ngirup ai sungai nya. Tu ketujuh hari udah bekau TUHAN malu sungai nya. Udah nya TUHAN lalu bejaku ngagai Moses, “Alai nuan betemu enggau raja, lalu padahka ngagai iya utai ti disebut TUHAN: ‘Lepaska nembiak Aku, ngambika sida ulih nyembah Aku. Enti nuan enda, Aku deka ngukum menua nuan, ngasuh menua nuan penuh laban engkatak. Sungai Nile deka penuh laban engkatak. Sida deka pansut ari sungai nya lalu tama ngagai istana nuan, ngagai bilik peninduk nuan, ngagai katil nuan, ngagai rumah bala pemesai nuan, enggau ngagai rumah bala nembiak nuan, ngagai dapur enggau bisin ti dikena kita ngaga roti. Sida deka engkechit ngagai nuan, ngagai bala nembiak nuan, enggau ngagai bala pemesai nuan.’ ” Ku TUHAN bejaku ngagai Moses, “Asuh Aron ngedarka tungkat iya atas sungai, parit, tali ai, enggau letung, lalu asuh engkatak pansut lalu ngelamun menua Ejip.” Nya alai Aron lalu ngedarka tungkat iya atas semua ai, lalu engkatak pansut lalu mungkur menua nya. Tang bala orang ke tau keramat ngena keramat sida, lalu sida mega ngasuh engkatak pansut lalu mungkur menua nya. Raja lalu mesanka Moses seduai Aron. Ku iya, “Besampi seduai ngagai TUHAN minta Iya muai engkatak tu, nya baru aku deka ngelepaska bala nembiak nuan, ngambika sida ulih ngenjuk piring ngagai TUHAN.” Disaut Moses, “Aku gaga ati besampika nuan. Letak aja maya aku tau besampika nuan, ke pemesai nuan enggau ke bala nembiak nuan. Nya baru engkatak enda agi ngachau kita. Sida deka abis, kelimpah ari sida ke di Sungai Nile.” Disaut raja, “Pagila nuan besampika aku.” Ku Moses, “Aku deka ngereja utai ti dipinta nuan. Nya baru nuan deka nemu, nadai petara ti baka TUHAN Allah Taala kami. Nuan, bala pemesai nuan, enggau bala nembiak nuan deka badu agi dikachau engkatak, lalu engkatak deka abis, kelimpah ari sida ke di Sungai Nile.” Udah nya Moses seduai Aron lalu pansut ari istana raja. Moses lalu besampi ngagai TUHAN, minta TUHAN muai semua engkatak ti udah diasuh TUHAN ngachau raja. TUHAN lalu ngereja utai ti dipinta Moses, lalu engkatak ti dalam rumah, ba tengah laman, enggau ba padang, mati magang. Orang Ejip nugungka bangkai engkatak nya, datai ke menua nya nyau bau but. Lebuh raja meda engkatak nya udah mati magang, ati iya lalu kieh baru, lalu munyi ti ku TUHAN, raja nya lalu enggai mendingka Moses seduai Aron. Ku TUHAN bejaku ngagai Moses, “Asuh Aron malu tanah ngena tungkat iya, ngambika di serata menua Ejip amau deka bebali nyadi kerengit.” Aron lalu malu tanah ngena tungkat iya, lalu semua abus di menua Ejip bebali nyadi kerengit magang, lalu malut mensia enggau jelu. Bala orang ke tau keramat nguji ngena penemu keramat sida ngasuh kerengit pegari, tang enda ulih. Semua mensia enggau jelu dibalut kerengit magang, lalu ku bala orang ke tau keramat bejaku enggau raja, “Allah Taala udah ngereja utai tu!” Tang ati raja kieh lalu, munyi ti ku TUHAN, iya enggai mendingka Moses seduai Aron. Ku TUHAN bejaku ngagai Moses, “Tumu pagila, nuan enda tau enda betemu enggau raja, lebuh iya mansang ngagai sungai, lalu padahka utai ti disebut TUHAN ngagai iya munyi tu: ‘Lepaska nembiak Aku, ngambika sida ulih nyembah Aku. Enti nuan enggai ngelepaska sida, Aku deka ngasuh lalat malut nuan, malut bala pemesai nuan, enggau bala nembiak nuan. Semua rumah orang Ejip deka penuh laban lalat, lalu tanah deka penuh laban lalat. Tang ba hari nya Aku enda ngasuh lalat malut menua Gosen ti alai nembiak Aku diau, ngambika menua nya nadai lalat. Nya baru nuan deka nemu Aku ti TUHAN endang bisi di menua tu. Aku deka magi nembiak Aku ari nembiak nuan. Kereja ajih tu deka nyadi pagila.’ ” TUHAN lalu ngereja utai nya. Mayuh amat lalat tama ngagai istana raja, enggau ngagai rumah bala pemesai iya. Semua menua Ejip rusak magang laban lalat nya. Udah nya raja mesanka Moses seduai Aron, lalu ku iya bejaku, “Mupuk kita, lalu beri piring ngagai Allah Taala kita dalam kandang menua tu.” Tang ku Moses, “Kami enda tau ngereja nya di menua tu, laban orang Ejip kejika jelu ti diberi kami nyadika piring ngagai TUHAN Allah Taala kami. Enti kami nyayat jelu nyadika piring kami, lalu orang Ejip kejika nya, enda ke sida deka nuku kami ngena batu? Kami enda tau enda bejalai tiga hari ngagai menua puang, lalu ngenjuk piring ngagai TUHAN Allah Taala kami, nitihka asuh Iya.” Ku raja bejaku, “Aku deka ngemendarka kita mupuk lalu ngenjuk piring ngagai TUHAN Allah Taala kita di menua puang, tang anang bejalai kelalu jauh. Besampi ke aku.” Ku Moses bejaku, “Lebuh aku angkat ari tu, aku deka besampi ngagai TUHAN minta Iya ngasuh lalat tu ninggalka nuan, bala pemesai nuan enggau orang Ejip pagila. Tang nuan enda tau agi nipu kami, lalu nagang kami mupuk lalu miring ngagai TUHAN.” Moses angkat ari istana raja, lalu besampi ngagai TUHAN. TUHAN lalu ngereja utai ti dipinta Moses, lalu muai semua lalat nya ari raja, ari bala pemesai iya enggau orang Ejip. Siku pen nadai meh lalat agi tinggal. Tang sekali tu, raja mega mengkang kieh ati, lalu enggai ngelepaska orang Israel. TUHAN lalu bejaku ngagai Moses, “Alai nuan mansang ngagai raja, lalu padahka ngagai iya, ‘Ku TUHAN Allah Taala orang Hebrew bejaku: Lepaska nembiak Aku, ngambika sida ulih nyembah Aku. Laban enti nuan enggai ngelepaska sida, lalu agi ngetanka sida, Aku deka ngasuh penyakit ti balat amat nyerang jelu tupi kita, kuda, keledai, unta, sapi, bedus enggau kambin kita. Aku deka ngaga bida entara jelu tupi orang Israel enggau jelu tupi orang Ejip, ngambika nadai siku jelu orang Israel deka mati. Aku ti TUHAN, deka ngereja utai tu pagila.’ ” Hari siti TUHAN lalu ngereja utai ti ku Iya, lalu semua jelu tupi orang Ejip mati magang, tang nadai siku jelu tupi orang Israel mati. Raja nanyaka pasal utai ti udah nyadi, lalu orang madahka ngagai iya, nadai siku jelu tupi orang Israel mati. Tang ati iya kieh, lalu iya enggai ngelepaska orang Israel. Udah nya TUHAN lalu bejaku ngagai Moses seduai Aron. “Bai dua tiga genggam amau ari dapur, lalu awakka Moses ngerabuka amau nya ngagai angin di mua raja. Amau nya deka nyadi amau ti alus lalu ngachir di serata menua Ejip. Abus nya deka ngasuh semua mensia enggau jelu diempa pisa, ti deka nyadi rumbak ti dilak-dilak ba tubuh mensia enggau jelu di serata menua Ejip.” Seduai iya lalu ngambi amau, lalu bediri di mua raja. Moses lalu ngerabuka amau nya ngagai angin, lalu amau nya ngasuh mensia enggau jelu diempa pisa, ti nyadi rumbak ti dilak-dilak ba tubuh mensia enggau jelu. Bala orang ke tau keramat enda ulih ngayanka diri di mua Moses, laban sida diempa pisa, baka semua orang Ejip ti bukai. Tang TUHAN ngasuh ati raja kieh, lalu munyi ti dipadahka TUHAN ngagai Moses, raja enggai mendingka Moses seduai Aron. Udah nya TUHAN bejaku ngagai Moses, “Tumu pagila, nuan enda tau enda betemu enggau raja, lalu sebut ngagai iya, ‘Tu jaku TUHAN Allah Taala orang Hebrew: Lepaska nembiak Aku, ngambika sida ulih nyembah Aku. Laban sekali tu, Aku deka ngasuh semua penyakit nyerang nuan, nyerang bala pemesai nuan enggau orang Ejip, ngambika nuan nemu, nadai siku ti baka Aku di serata dunya tu. Laban enti sema Aku udah ngangkatka jari Aku lalu ngasuh nuan enggau orang Ejip kena laban penyakit, semua kita tetap udah abis mati. Tang tu kebuah aku nejuka nuan idup, kena Aku ngayanka kuasa Aku ngagai nuan, ngambika nama Aku dikenang di serata dunya. Nuan agi mengkang ngeninggika diri ngelaban nembiak Aku, lalu enggai ngelepaska sida. Ba maya tu pagila, Aku deka ngasuh ujan batu balat nyadi, baka ke nadai udah kala nyadi di menua Ejip, kenyau ari menua tu digaga nyentuk ngagai diatu. Nya alai, asuh orang mai semua jelu tupi enggau semua utai bukai ti dikemisi kita di padang, ngagai endur ti likun; laban ujan batu deka ninggang mensia enggau jelu ti nadai utai ngelindung di padang, lalu semua sida deka mati.’ ” Sekeda pemesai raja takutka utai ti udah disebut TUHAN, lalu mai bala ulun enggau jelu tupi sida tama ke dalam rumah. Tang sida ti bukai, enggai mendingka jaku tangkan TUHAN, lalu nejuka bala ulun sida enggau jelu sida mengkang di padang. Udah nya TUHAN lalu bejaku ngagai Moses, “Kedarka jari nuan ke langit, ngambika ujan batu ninggang semua menua Ejip, ninggang mensia, jelu, enggau semua utai ti ditanam di serata menua Ejip.” Moses lalu ngedarka tungkat iya ke langit. TUHAN lalu ngasuh guntur, enggau ujan batu nyadi, lalu kilat mangka ngagai tanah. TUHAN ngasuh ujan batu balat amat nyadi di menua Ejip. Ujan batu balat amat nyadi, lalu kilat pen nyelar. Nadai kabut udah kala ngemalat nya nyadi di menua Ejip. Ujan batu nya ngerusak semua utai ti ba padang di serata menua Ejip, nyengkaum mensia enggau jelu. Ujan batu nya mega ngerusak semua utai ti ditanam di padang, lalu matahka semua kayu. Semina di menua Gosen, endur alai orang Israel diau, nadai ujan batu. Raja lalu mesanka Moses seduai Aron, lalu bejaku ngagai seduai iya, “Sekali tu aku udah bedosa. TUHAN endang ngena, lalu aku enggau nembiak aku amat salah. Besampi ngagai TUHAN! Kami udah chukup merinsa laban guntur enggau ujan batu tu! Aku deka ngelepaska kita. Kita enda ibuh diau ditu agi.” Ku Moses bejaku ngagai iya, “Sepengelengkas aku pansut ari nengeri tu, aku deka ngedarka jari aku lalu besampi ngagai TUHAN. Guntur enggau ujan batu deka badu, ngambika nuan nemu, dunya tu endang enggi TUHAN. Tang pasal nuan enggau bala pemesai nuan, aku nemu kita apin nangika TUHAN Allah Taala.” Daun lemba enggau barli kita udah rusak, laban barli kita nyau tuai, lalu lemba kita baru nyumbuk. Tang gandum kita enda rusak, laban iya dudi agi mansau. Moses angkat ari istana raja, pansut ari nengeri nya, ngangkatka jari iya ngagai TUHAN. Guntur, ujan batu enggau ujan lalu badu. Tang lebuh raja meda guntur, ujan batu enggau ujan udah badu, iya bedosa baru. Iya enggau bala pemesai iya lalu kieh baka selama. Nya alai ati raja kieh, lalu iya enggai ngelepaska orang Israel, munyi ti udah dipadahka TUHAN ngena Moses. Udah nya TUHAN bejaku ngagai Moses, “Alai nuan mansang ngagai raja; laban Aku udah ngasuh ati iya, enggau ati bala pemesai iya kieh, ngambika Aku ulih ngereja kereja ajih ba bala sida, sereta ngambika kita ulih madahka ngagai anak uchu kita chara Aku ngemelika orang Ejip, enggau kereja ajih ti dikereja Aku ngagai orang Ejip; ngambika kita nemu Aku tu endang TUHAN.” Moses seduai Aron lalu mansang ngagai raja, lalu bejaku enggau iya, “Tu jaku TUHAN Allah Taala orang Hebrew, ‘Ni pengelama nuan enggai nunduk ngagai Aku? Lepaska nembiak Aku, ngambika sida ulih nyembah Aku. Laban enti nuan enggai ngelepaska nembiak Aku, Aku deka ngasuh buntak nyerang menua nuan pagila. Buntak nya deka ngelamun semua tanah, datai ke orang nyau enda ulih meda tanah. Sida deka makai semua utai ti enda dirusak ujan batu, nyengkaum semua kayu ti tumbuh ba tanah kita. Sida deka ngemenuhka istana nuan, rumah bala pemesai nuan, enggau rumah semua orang Ejip, baka ke nadai udah kala dipeda apai enggau aki ini kita, kenyau ari maya sida datai di dunya tu, nyentuk ngagai sehari tu.’ ” Iya nguing lalu beserara ari raja. Bala pemesai lalu bejaku enggau raja, “Ni pengelama orang tu agi ngenusahka kitai? Lepaska orang tu, ngambika sida ulih nyembah TUHAN Allah Taala sida. Kati nuan lalu enda nemu menua Ejip udah rusak?” Nya alai Moses seduai Aron lalu dibai betemu baru enggau raja, lalu ku iya bejaku enggau seduai iya, “Mupuk kita lalu sembah TUHAN Allah Taala kita. Tang sapa ke mupuk?” Disaut Moses, “Semua kami deka mupuk magang, nyengkaum anak mit, enggau orang ke tuai. Kami deka mai anak lelaki enggau anak indu kami, jelu bedus enggau kambin kami, jelu sapi kami, laban kami enda tau enda begawai ngemesaika TUHAN.” Ku raja bejaku, “Aku besumpah di mua TUHAN, aku enggai sekali-kali nejuka kita mai orang ke indu enggau anak mit kita! Kita tu bisi tuju ati ti jai dalam ati kita. Sigi enda tau! Semina orang ke lelaki aja tau mupuk lalu nyembah TUHAN, laban nya utai ti dikedekaka kita.” Moses seduai Aron lalu diburu ari istana raja. Udah nya TUHAN lalu bejaku ngagai Moses, “Kedarka jari nuan atas menua Ejip, ngambika buntak datai lalu makai semua utai ti ditanam ti enda dirusak ujan batu.” Moses lalu ngedarka tungkat iya. TUHAN lalu ngasuh ribut muput ari timur ngagai menua Ejip, sehari-hari, semalam-malam nya. Pagi hari siti, buntak endang udah datai dibai ribut ti muput ari timur. Buntak nya datai beraban-raban, lalu inggap di serata menua Ejip. Nadai orang udah kala meda buntak ngemayuh nya kelia, tauka udah lepas nya. Sida nyau chelum ngelamun tanah, empa pemayuh sida, lalu sida makai semua utai ti enda dirusak ujan batu, nyengkaum semua buah ti ba kayu. Nadai siti utai ti tumbuh bisi tinggal ba kayu tauka ba utai ti ditanam di serata menua Ejip. Udah nya raja lalu beguai-guai mesanka Moses seduai Aron, lalu bejaku, “Aku udah bedosa ngelaban TUHAN Allah Taala kita, enggau ngelaban kita. Nya alai ampun penyalah aku sekali tu, lalu besampi ngagai TUHAN Allah Taala kita, minta Iya muai ukum ti tau munuh tu, ari aku.” Moses angkat ninggalka raja, lalu besampi ngagai TUHAN. TUHAN lalu nukar ribut ti muput ari timur nyadi ribut ti balat muput ari barat. Ribut nya lalu ngebuka buntak ngagai Tasik Mirah. Siku pen nadai meh buntak nya agi tinggal di serata menua Ejip. Tang TUHAN ngasuh ati raja kieh lalu iya enggai ngelepaska orang Israel. Udah nya TUHAN bejaku ngagai Moses, “Kedarka jari nuan ke langit, ngambika pemetang ti enda dipeda achuk mata mungkur menua Ejip.” Moses ngedarka jari iya ke langit, lalu pemetang ti enda dipeda achuk mata mungkur semua menua Ejip tiga hari. Orang Ejip enda ulih meda pangan diri, lalu nadai orang mindah ari rumah lebuh maya nya. Tang ba endur alai orang Israel diau, menua nya tampak. Raja mesanka Moses, lalu bejaku, “Mupuk kita lalu sembah TUHAN. Sida ke indu enggau anak mit kita, pen tau mega mupuk sama enggau kita. Tang jelu bedus, kambin enggau jelu sapi kita enda tau enda tinggal.” Tang ku Moses, “Nuan enda tau enda mega meri kami jelu nyadika piring enggau piring tunu ngambika bisi dienjuk kami ngagai TUHAN Allah Taala kami. Jelu sapi kami mega enda tau enda mupuk enggau kami. Siku pen nadai meh sida tau tinggal, laban kami enda tau enda milih jelu ti dikena kami nyembah TUHAN Allah Taala kami, lalu kami enda nemu nama utai ti deka dikena kami nyembah TUHAN sebedau kami datai din.” Tang TUHAN ngasuh ati raja kieh, lalu iya enggai ngelepaska sida. Ku raja bejaku enggau Moses, “Pansut nuan ari tu! Aku enggai meda nuan agi! Enti aku meda nuan ila, nuan mati!” Moses lalu nyaut, “Munyi ti ku nuan. Nuan nadai agi meda aku ila.” Udah nya TUHAN lalu bejaku ngagai Moses, “Aku deka ngasuh siti agi penusah ti besai ninggang raja enggau orang Ejip. Udah bekau nya, iya deka ngasuh kita mupuk. Lebuh iya ngasuh kita mupuk, iya deka muru kita pansut ari menua tu. Nya alai, bejaku nuan ngagai orang Israel, lalu asuh sida minta perengka emas enggau perengka pirak ari orang ke berimbai pendiau enggau sida.” TUHAN lalu ngasuh orang Ejip rinduka orang Israel. Nambahka nya, Moses endang balat dibasa orang di menua Ejip, dibasa bala pemesai raja, enggau semua orang Ejip. Udah nya Moses lalu bejaku enggau raja, “Tu jaku TUHAN, ‘Ba urung tengah malam, Aku deka bejalai nengah serata menua Ejip, lalu semua anak tuai ti lelaki dalam menua Ejip deka mati magang, belabuh ari anak tuai raja, ti deka nganti iya nyadi raja, nyentuk ngagai anak lelaki indu ke ulun ke ngisar gandum, enggau anak tuai semua jelu tupi. Orang deka beterauh nyabak di serata menua Ejip, baka ke nadai udah kala nyadi kelia, tauka ila. Tang ba orang Israel, indah ukui deh enda nyalak sida tauka nyalak jelu sida. Nya baru nuan deka nemu Aku ti TUHAN, ngaga bida entara orang Ejip enggau orang Israel.’ ” Ku Moses bejaku, “Nya baru semua bala pemesai nuan deka datai ngagai aku, lalu meremi di mua aku, lalu bejaku, ‘Pansut ari tu, enggau semua orang ke nitihka nuan.’ Udah nya baru aku mupuk.” Moses lalu ninggalka raja, mai ati ti balat ringat. Udah nya TUHAN bejaku ngagai Moses, “Raja enggai mendingka nuan, ngambika Aku ulih ngereja mayuh agi kereja ajih di menua Ejip.” Moses seduai Aron ngereja semua kereja ajih nya di mua raja, tang TUHAN ngasuh ati raja kieh, lalu iya enggai ngelakka orang Israel angkat ari menua nya. TUHAN lalu bejaku ngagai Moses seduai Aron di menua Ejip: “Bulan tu nyadi bulan ti kesatu ke kita. Padahka ngagai semua orang Israel, iya nya, kena sepuluh hari bulan tu, genap iku orang Israel enda tau enda milih siku anak domba tauka anak kambin ke sida sebilik. Enti sida sebilik nadai mayuh tubuh lalu enda ulih ngabiska siku jelu, iya enggau orang ke berimbai rumah enggau iya, tau bekunsika jelu nya, nitihka pemayuh tubuh, enggau nitihka penyampau ti ulih diempa sida siku-siku. Sida tau milih jelu bedus tauka jelu kambin. Tang jelu nya enda tau enda lelaki, umur setaun, lalu nadai penimpang. Sida patut nyimpan jelu nya nyentuk ngagai empat belas hari bulan tu, lebuh semua orang Israel deka nyayat anak bedus sida lebuh lemai hari nya. Sida enda tau enda ngambi sekeda darah jelu nya, lalu malitka darah nya ngagai tiang pintu enggau ngagai puchuk pintu rumah alai jelu nya deka diempa. Malam nya, dagin nya enda tau enda dipanggang, lalu diempa sama enggau sayur ti pait, sereta enggau roti ti enda beragi. Anang makai jelu nya mata, tauka dipanduk, tang dipanggang segala, lalu diempa, nyengkaum pala, kaki, enggau perengka dalam. Kita enda tau ninggalka utai nya beteda enda diempa nyentuk ngagai pagi. Enti utai nya bisi beteda, teda nya enda tau enda ditunu. Lebuh kita makai utai nya, kita enda tau enda udah begari dulu, sedia deka bejalai jauh. Selipar kita enda tau enda udah dirasukka ba kaki kita, lalu tungkat kita enda tau enda dipegai kita lebuh kita makai. Tu meh Gawai Paska kena kita ngemesaika Aku ti TUHAN. Laban Malam nya Aku deka bejalai nengah menua Ejip, lalu munuh semua anak tuai ti lelaki, nyengkaum anak tuai mensia enggau jelu, lalu ngukum semua petara menua Ejip. Aku tu TUHAN. Darah ti ba tiang pintu nya deka nyadika kelai kena nandaka rumah alai kita diau. Lebuh Aku meda darah nya, Aku deka ngelaungka kita, lalu enda ngemediska kita, lebuh Aku ngukum orang Ejip. “Kita enda tau enda ngintu hari tu nyadika hari gawai, kena kita ngingatka utai ti dikereja Aku ti TUHAN. Intu hari tu nyadika hari gawai belama iya. “Dalam kandang tujuh hari kita semina tau makai roti ti enda beragi. Ba hari ti keterubah, kita enda tau enda muai semua ragi ari rumah kita, laban enti orang bisi ditemu makai roti ti digaga ngena ragi dalam kandang tujuh hari nya, iya deka badu agi dikumbai nembiak Aku. Ba hari ti keterubah, enggau ba hari ti ketujuh, kita enda tau enda besembiang bebala mayuh. Kita enda tau gawa ba hari nya, tang semina tau nyendiaka pemakai ke diri empu. Intu gawai roti ti enda beragi, laban ba hari tu Aku mai raban bansa kita pansut ari menua Ejip. Nya alai kita enda tau enda ngintu hari tu nyadika hari gawai belama iya. Belabuh ari lemai hari ti keempat belas, dalam bulan ti kesatu, ngagai lemai hari ti kedua puluh satu, kita enda tau makai roti ti beragi. Moses lalu mesanka semua bala tuai orang Israel, lalu bejaku enggau sida, “Pilih anak bedus ke kita sebilik, lalu sayat anak bedus nya kena kita ngintu Gawai Paska. Ambi segempung pating isop. Sepuhka pating isop nya ngagai darah ti dalam mangkuk, lalu palitka darah nya ba tiang pintu, enggau ba alang puchuk pintu kita. Nadai orang tau pansut ari rumah nya nyentuk ngagai pagi. Laban TUHAN deka mansa lalu munuh orang Ejip; lalu lebuh Iya meda darah ba alang pintu enggau ba dua iti tiang pintu, Iya deka ngelaungka mua pintu nya, lalu enda nyagi Melikat Pemati tama ngagai rumah kita, enggai ke iya munuh kita. Kita enggau bala anak kita enda tau enda nitihka atur tu belama iya. Lalu lebuh kita datai di menua ti udah disemaya deka diberi TUHAN ngagai kita, kita enda tau enda nitihka atur tu. Lalu lebuh bala anak kita nanya ngagai kita, ‘Nama reti atur tu?’ kita enda tau enda nyaut, ‘Tu piring Gawai Paska TUHAN, laban Iya ngelaungka rumah orang Israel di menua Ejip, lebuh Iya munuh orang Ejip, tang enda munuh kitai.’ ” Orang Israel meremika pala lalu nyembah Allah Taala. Udah nya sida mupuk, lalu ngereja utai ti udah dipesanka TUHAN ngagai Moses seduai Aron. Ba urung tengah malam, TUHAN munuh semua anak tuai ti lelaki di menua Ejip, belabuh ari anak lelaki raja, ke diadang nganti iya nyadi raja, nyentuk ngagai anak lelaki orang tutup ke disimpan dalam bilik jil ti dalam tanah, enggau semua anak tuai jelu tupi. Malam nya, raja, bala pemesai, enggau semua orang Ejip ti bukai angkat magang. Balat amat munyi orang nyabak di serata menua Ejip, laban nadai ruang bilik ti nadai orang mati. Malam nya mega raja lalu mesanka Moses seduai Aron, ku iya, “Angkat kita ari tu, seduai enggau orang Israel! Angkat kita ari menua aku. Mupuk kita, lalu sembah TUHAN, munyi ti ku kita. Bai jelu bedus, kambin, enggau jelu sapi kita, lalu angkat ari tu. Besampi mega minta berekatka aku.” Orang Ejip lalu ngansak orang Israel angkat enggau jampat ari menua nya; laban ku sida, “Enggai ke semua kami abis mati.” Nya alai orang Israel lalu mai tekang tepung ti udah ditunyau enda beragi, mungkus kali ti dikena sida ngaga roti, lalu ngesan utai nya. Orang Israel udah ngereja utai ti diasuh Moses, lalu udah minta perengka emas enggau perengka pirak, enggau gari, ari orang Ejip; lalu TUHAN udah ngasuh orang Ejip rinduka orang Israel, lalu meri sida utai ti dipinta sida. Nya meh chara orang Israel nabanka pengaya orang Ejip. Orang Israel lalu mupuk bejalai ari Rameses ngagai Sukot. Pemayuh sida kira enam ratus ribu iku lelaki, enda ngitung indu nembiak. Orang bansa bukai mega bejalai enggau sida, raban bedus, kambin enggau sapi bejalai enggau sida. Lalu sida ngaga roti ti enda beragi ari tekang tepung ti ditunyau enda beragi, ti dibai sida ari menua Ejip, laban sida udah diburu angkat ngenyit ari menua nya, datai ke sida nadai peluang nyendiaka bekal, tauka ngaga roti ti beragi. Orang Israel udah diau di menua Ejip empat ratus tiga puluh taun. Lalu ba ujung empat ratus tiga puluh taun nya, ba hari nya, semua nembiak TUHAN angkat magang ari menua Ejip. Hari endang udah malam lebuh TUHAN ngemataka sida lalu mai sida pansut ari menua Ejip. Nya alai malam nya diserahka ngagai TUHAN belama lama iya nyadika malam alai orang Israel enda tau tinduk, tang bejaga. Ku TUHAN bejaku ngagai Moses seduai Aron, “Tu adat ke Gawai Paska: Orang bansa bukai enda tau makai pemakai Gawai Paska. Tang ulun ti udah dibeli kita, tau makai pemakai nya, enti iya udah ditutus. Temuai ti diau enda lama enggau kita, tauka orang gaji kita, enda tau makai pemakai nya. Semua pemakai nya enda tau enda abis diempa dalam rumah alai pemakai nya udah disediaka. Pemakai nya enda tau dibai pansut ari rumah nya. Lalu anang matahka tulang jelu nya. Semua orang Israel enda tau enda ngintu gawai nya. Enti temuai deka diau enggau kita, deka enggau kita ngintu Gawai Paska TUHAN, iya enda tau enda ditutus dulu. Udah nya baru iya tau datai enggau ngintu Gawai nya. Iya enda tau enda digaga sebaka enggau orang Israel. Nadai orang ke enda ditutus tau makai pemakai nya. Adat tu deka dititihka semua orang ke asal bansa orang Israel, enggau orang bansa bukai ke ngentapka diri diau begulai enggau kita.” Semua orang Israel ngasi magang, lalu ngereja utai ti udah dipesanka TUHAN ngagai Moses seduai Aron. Lalu ba hari nya TUHAN mai semua orang Israel pansut ari menua Ejip. Ku TUHAN bejaku ngagai Moses, “Serahka ngagai Aku semua anak tuai kita; genap iku anak tuai orang Israel ti lelaki, nyengkaum anak tuai jelu kita, endang enggi Aku magang.” Lalu ku Moses bejaku ngagai orang Israel, “Kingatka hari tu, hari kita pansut ari menua Ejip, alai kita ke udah nyadi ulun, laban TUHAN, ngena pemesai pengering Iya, udah mai kita pansut ari endur tu. Kita enda tau makai roti ti beragi. Sehari tu, dalam bulan ti kesatu, iya nya bulan Abip, kita pansut ari menua Ejip. TUHAN udah besemaya ngena sumpah ngagai sida aki ini kita, madahka Diri deka meri kita menua orang Kanaan, orang Iti, orang Amor, orang Ibi, enggau orang Jebus. Lebuh Iya mai kita ngagai menua ti kaya sereta ami nya, kita enda tau enda ngintu gawai tu dalam bulan ti kesatu genap taun. Dalam kandang tujuh hari kita makai roti ti enda beragi, lalu ba hari ti ketujuh, kita enda tau enda ngintu gawai kena ngemesaika TUHAN. Dalam kandang tujuh hari kita enda tau makai roti ti beragi. Kita enda tau naruh ragi dalam kandang menua kita. Lebuh gawai nya belabuh, terangka ngagai anak lelaki kita kebuah kita ke begawai. Kita begawai ketegal utai ti udah dikereja TUHAN ti kita, lebuh kita pansut ari menua Ejip. Gawai tu deka nyadika pengingat, baka utai ti ditanchangka ba jari, tauka ba kening kita. Gawai tu deka ngasuh kita seruran ngingat sereta belajarka Adat TUHAN, laban TUHAN udah ngena kuasa Iya ti besai mai kita pansut ari menua Ejip. Intu gawai tu genap taun ba maya ti udah diletak. “ TUHAN deka mai kita ngagai menua orang Kanaan, ti udah disemaya Iya ngena sumpah ngagai aki ini kita. Lebuh Iya meri menua nya ngagai kita, kita enda tau enda nyerahka anak tuai kita ke lelaki ngagai TUHAN. Genap iku anak tuai jelu kita endang enggi TUHAN, tang kita enda tau enda meli ari TUHAN genap iku anak tuai keledai kita ke lelaki, ngena siku anak domba, kena kita nyilih anak keledai nya. Enti kita enggai meli keledai nya pulai baru, patahka rekung iya. Kita enda tau enda meli pulai baru genap iku anak tuai kita ke lelaki. Jemah ila, lebuh anak kita nanyaka reti gawai nya, kita deka nyaut iya munyi tu: ‘ TUHAN udah ngena kuasa Iya ti besai, mai kitai pansut ari menua Ejip, alai kitai ti udah nyadi ulun. Lebuh raja menua Ejip kieh ati, lalu enggai ngelepaska kitai, TUHAN munuh semua anak tuai ti lelaki di menua Ejip, nyengkaum anak mensia enggau anak jelu. Nya kebuah kitai nyerahka genap iku anak tuai jelu ti lelaki nyadika piring ti diberi ngagai TUHAN, tang meli pulai baru anak tuai kitai empu ti lelaki. Gawai tu nyadika pengingat kitai, baka reti utai ti ditanchangka kitai ba jari, tauka ba kening kitai. Gawai tu kena kitai ngingatka TUHAN ti udah ngena kuasa Iya ti besai mai kitai pansut ari menua Ejip.’ ” Lebuh raja menua Ejip ngelepaska orang Israel, Allah Taala enda nguluka orang Israel nengah jalai ti nebing tasik ngagai menua Pilistin, taja pen jalai nya muntang, laban ku pikir Allah Taala, “Aku enggai ke orang Israel ngubah runding diri, lalu pulai baru ngagai menua Ejip, lebuh sida nemu diri enda tau enda beperang.” Nya alai, Iya nguluka sida niti jalai ti melit, nengah menua puang, nuju ngagai Tasik Mirah. Orang Israel endang udah nyendiaka diri deka beperang. Moses mai bangkai Josep, nitihka semaya ti udah digaga Josep ngena sumpah enggau orang Israel. Josep udah bejaku munyi tu, “Lebuh Allah Taala ngelepaska kita, kita enda tau enda mai bangkai aku ari endur tu.” Orang Israel angkat ari Sukot, lalu nirika kem di Etam, ba tisi menua puang. Lebuh siang hari, TUHAN bejalai dulu ari sida dalam gentilang remang, nunjukka jalai ngagai sida, lalu lebuh malam hari, Iya bejalai dulu ari sida, dalam tiang api, meri sida penampak, ngambika sida ulih bejalai siang malam. Tiang mua hari nya endang seruran bejalai dulu ari orang Israel lebuh siang hari, lalu tiang api nya seruran di mua sida lebuh malam hari. Udah nya TUHAN lalu bejaku ngagai Moses, “Asuh orang Israel nikal, lalu nirika kem sida di mua Pi-hahirot, entara Mikdol enggau Tasik Mirah, semak Baal-sepon. Raja menua Ejip deka ngumbai orang Israel bejalai segau-segau ngapa di menua nya, diempang menua puang. Aku deka ngasuh ati raja kieh, lalu iya deka begagaika kita, lalu Aku deka bulih mulia ngalahka iya enggau bala soldadu iya. Nya baru orang Ejip deka nemu Aku endang TUHAN.” Orang Israel lalu ngereja utai nitihka asuh TUHAN. Lebuh orang madahka ngagai raja menua Ejip orang Israel udah rari, iya enggau bala pemesai iya lalu ngubah runding sida. Ku sida, “Nama kebuah kitai nejuka orang Israel rari, lalu badu agi gawa ke kitai!” Raja lalu nyendiaka kerita perang iya, lalu ngasuh bala soldadu iya mega sedia. Iya lalu mupuk enggau semua kerita perang iya, nyengkaum enam ratus buah kerita perang iya ti pemadu manah, ti diuluka bala pemesai sida. TUHAN ngasuh ati raja kieh lalu begagaika orang Israel ti udah gaga ati pansut ari menua Ejip. Bala soldadu orang Ejip, enggau semua kuda, kerita perang, enggau orang ke nepan kerita perang, begagaika orang Israel lalu betemu enggau sida ba endur alai orang Israel ke nirika kem ngimbai Tasik Mirah semak Pi-hahirot enggau Baal-sepon. Lebuh orang Israel meda raja enggau bala soldadu orang Ejip mansang ngelaban sida, sida takut lalu ngangauka TUHAN, minta Iya nyaup sida. Ku sida bejaku enggau Moses, “Kati nuan mai kami ngagai menua puang ngambika kami mati laban menua Ejip nadai pendam? Peda nuan utai ti udah dikereja nuan, mai kami pansut ari menua Ejip! Ukai enda tu utai ti dipadahka kami ngagai nuan, ‘Anang ngachau kami, lalu lakka kami nyadi ulun orang Ejip’? Laban manah agi kami nyadi ulun din ari ke mati di menua puang tu.” Tang ku Moses bejaku ngagai orang mayuh, “Anang takut! Bediri tegap! Nya baru kita deka meda pengelepas ti deka dikereja TUHAN ti kita sehari tu. Nadai kita ulih meda orang Ejip nya agi. TUHAN deka beperang ngarika kita. Kita semina diau jenuh aja.” Ku TUHAN bejaku ngagai Moses, “Nama kebuah nuan nyabak minta saup? Asuh orang Israel bejalai. Angkatka tungkat nuan, lalu kedarka iya atas tasik. Ai nya deka bebagi, lalu orang Israel ulih bejalai nengah tasik nya nengah tanah ti rangkai. Aku deka ngasuh ati orang Ejip kieh, datai ke sida deka mansang ngagai tasik nya, begagaika sida, lalu Aku deka bulih mulia ketegal Aku menang ngelaban raja menua Ejip enggau bala soldadu iya, kerita perang iya, enggau orang ke nepan kerita perang iya. Lebuh Aku udah ngalahka sida, nya baru orang Ejip deka nemu Aku endang TUHAN.” Melikat TUHAN ti udah bejalai dulu ari bala soldadu orang Israel lalu mindah tunga kebelakang bala orang Israel. Tiang mua hari nya mega mindah lalu nyeraraka bala orang Ejip ari bala orang Israel. Pemetang mua hari nya mungkus orang Israel, tang lebuh malam hari iya meri sida penampak. Nya alai semalam-malam nya bala soldadu dua bengkah nya enda ulih datai semak ngagai pangan diri. Moses ngedarka jari iya atas tasik nya, lalu TUHAN muputka ai tasik nya ngena ribut ti deras ari timur. Ribut nya muput semalam-malam nya, lalu ngasuh tasik nya rangkai. Ai nya bebagi dua, lalu orang Israel bejalai nengah tasik nya nengah tanah ti rangkai. Ai nya nyau bedinding ari sepiak-sepiak sida. Orang Ejip lalu begagaika sida nengah tasik nya, mai semua kuda, kerita perang, enggau bala orang ke nepan kerita perang. Lebuh hari nyau deka tawas, TUHAN merening ke baruh ari tiang api enggau ari gentilang remang, ngagai bala soldadu orang Ejip, lalu sida begau abis ati. TUHAN ngasuh kaki kerita perang sida lekat, ngambika kaki kerita perang sida enda tentu ulih bepusin. Ku orang Ejip bejaku, “ TUHAN ti beperang ngelaban kitai ngarika orang Israel. Aram kitai rari ari tu!” TUHAN lalu bejaku ngagai Moses, “Kedarka jari nuan atas tasik nya, ngambika ai pulai baru lalu ngelamun orang Ejip enggau kerita perang enggau orang ke nepan kerita perang.” Moses lalu ngedarka jari iya atas tasik nya, lalu ba rerak tawas pagi nya, ai nya lalu pulai baru ngenalam iya ti dulu. Orang Ejip nguji ngerarika diri ari ai nya, tang TUHAN nikauka sida ngagai tasik nya. Ai tasik nya pulai baru, lalu ngelamun kerita perang, orang ke nepan kerita perang, enggau semua bala soldadu orang Ejip ti udah begagaika orang Israel ngagai tasik nya. Nadai siku sida idup. Tang orang Israel bejalai nengah tasik nya nengah tanah ti rangkai, lalu ai nyau bedinding ari sepiak-sepiak sida. Nya alai sehari nya TUHAN nyelamatka orang Israel ari orang Ejip, lalu orang Israel meda bangkai orang Ejip nyau betegaring ba sebelah tebing tasik nya. Lebuh orang Israel meda pemesai kuasa ti dikena TUHAN ngalahka orang Ejip, sida lalu nangika TUHAN. Sida arapka TUHAN, sereta arapka nembiak Iya, Moses. Udah nya Moses enggau orang Israel lalu nyanyi lagu tu kena muji TUHAN: “Aku deka belagu muji TUHAN, laban Iya udah menang. Iya udah nikauka kuda enggau orang ke nepan kuda ngagai tasik. TUHAN endang penyaga aku ti kering ti udah ngelepaska aku. Iya Allah Taala aku, lalu aku deka muji Iya ti Allah Taala apai aku, lalu aku deka belagu ngemesaika nama Iya. TUHAN endang tau serang. TUHAN meh nama Iya. “Iya udah nikauka bala soldadu orang Ejip enggau kerita perang sida ngagai tasik. Bala pemesai soldadu ti berani udah lemas dalam Tasik Mirah. Tasik ti dalam udah ngelamun sida. Sida tengelam ngagai buntut tasik baka batu. “Jari kanan Nuan, TUHAN, endang bekuasa, ti ngeredakka munsuh. Nuan ngena kuasa diraja Nuan ngalahka munsuh Nuan. Pengeringat Nuan mau baka api lalu nunu sida baka jerami. Nuan nyepu ngagai tasik, lalu ai betugung tinggi. Ai bediri baka dinding. Buntut tasik nya nyadi tanah ti rangkai. Ku munsuh bejaku, ‘Aku deka ngagai lalu nangkap sida; Aku deka magi pengaya sida, lalu ngambi semua utai ti dikedekaka aku. Aku deka nyintak pedang aku, lalu ngambi semua utai ti dikemisi sida.’ Tang Nuan semina sekali aja ngesuhka seput Nuan, TUHAN, lalu orang Ejip lemas. Sida tengelam baka bangkang ba ai ti balat begelumbang. “ TUHAN, sapa petara ti sebaka enggau Nuan? Sapa ti sebaka enggau Nuan, ti pemadu bemulia sereta kudus? Sapa ti ulih ngereja kereja ajih, enggau kereja ti nyelai baka ke dikereja Nuan? Nuan ngedarka jari kanan Nuan, lalu tanah nelan bala munsuh kami. Nuan ingatka semaya Nuan, lalu udah nguluka orang Israel ti udah dilepaska Nuan. Ngena pengering Nuan, Nuan udah ngiring sida ngagai menua Nuan ti kudus. Semua bansa udah ninga berita tu, lalu sida getar-getar takut; Orang Pilistin balat takut. Bala tuai orang Edom takut. Orang ke kering di Moap nyau getar-getar takut. Orang Kanaan nyau enda berani agi. Sida balat takut sereta buyan. Sida meda pengering Nuan, O TUHAN, lalu sida tegir-tegir bediri nadai daya, laban takut datai ke bala nembiak Nuan udah mansa, iya nya orang ke udah dilepaska Nuan ari pengidup sida ke nyadi ulun. Nuan mai sida tama, lalu nanam sida ba bukit Nuan, ba endur ti udah dipilih Nuan nyadika endur alai rumah Nuan, iya nya Langkau Kain TUHAN ti udah digaga Nuan Empu. Nuan, TUHAN, deka nyadi Raja belama lama iya.” Orang Israel bejalai nengah tasik nya nengah tanah ti rangkai. Tang lebuh kerita perang orang Ejip, enggau kuda, enggau orang ke nepan kerita perang sida bejalai nengah tasik nya, TUHAN ngasuh ai nya pulai baru, lalu ngelamun sida. Nabi Miriam, menyadi indu Aron, mai tamborin, lalu semua indu ke bukai bela nitihka iya, nebah tamborin sida lalu betanda. Ku iya belagu ke sida: “Belagu ke TUHAN, laban Iya udah menang. Iya udah nikauka kuda enggau orang ke nepan kuda ngagai tasik.” Udah nya Moses lalu nguluka orang Israel angkat ari Tasik Mirah, lalu bejalai ngagai menua puang Sur. Sida bejalai tiga hari nengah menua puang nya, tang nadai tetemuka ai. Udah nya sida lalu datai ba endur siti ti dikumbai Marah, tang ai dia pait, lalu sida enda ulih ngirup ai nya. Nya kebuah endur nya dikumbai Marah. Orang mayuh lalu mutap ngelaban Moses, lalu nanya ngagai iya, “Nama utai diirup kami?” Moses lalu bebendar besampi ngagai TUHAN. TUHAN lalu nunjukka siti repik kayu. Moses lalu nikauka repik kayu nya ngagai ai nya. Ai nya lalu ulih diirup. Nya meh endur alai TUHAN meri sida adat enggau undang-undang, lalu nya mega endur alai Iya nguji sida. Ku TUHAN bejaku, “Enti kita deka ngasika Aku enggau pengabis ati kita, ngereja utai ti ngena, sereta ngasika pesan enggau adat Aku, Aku enda ngukum kita ngena penyakit ti udah diasuh Aku ninggang orang Ejip. Aku tu TUHAN ti ngeraika kita.” Hari siti sida lalu datai di Elim. Endur nya bisi dua belas iti mata ai, enggau tujuh puluh pun kayu engkerema. Sida lalu nirika kem sida ngimbai ai nya. Semua orang Israel angkat ari Elim, lalu kena lima belas hari bulan, kedua bulan sida udah angkat ari menua Ejip, sida lalu datai di menua puang Sin, ba entara Elim enggau Sinai. Lebuh sida di menua puang nya, semua sida mutap ngelaban Moses seduai Aron. Ku sida bejaku enggau seduai iya, “Manah agi enti TUHAN udah munuh kami di menua Ejip. Din kami ulih duduk lalu makai dagin, enggau ni pemayuh pemakai bukai ti dikedekaka kami. Tang seduai udah mai kami pansut ngagai menua puang tu, ngambika semua kami mati lapar.” TUHAN lalu bejaku ngagai Moses, “Diatu Aku deka ngasuh pemakai labuh ari langit baka ujan ke semua kita. Orang mayuh enda tau enda bejalai tiap hari, lalu ngumpul pemakai chukup ke sehari nya. Nya chara Aku nguji ati sida, kena Aku nemu enti sida deka nitihka atur Aku tauka enggai. Ba hari ti keenam, sida enda tau enda mai ngagai kem dua kali mayuh agi ari ti selama, lalu mela utai nya.” Moses seduai Aron lalu bejaku enggau semua orang Israel, “Lemai tu kita deka nemu TUHAN Empu udah mai kita pansut ari menua Ejip. Pagila kita deka meda mulia TUHAN. Iya udah ninga kita mutap ngelaban Iya. Kita amat mutap ngelaban Iya, laban kami duai semina nitihka atur Iya aja.” Ku Moses, “ TUHAN Empu ti deka meri kita dagin lebuh lemai hari, enggau sepemayuh roti ti dikedekaka kita lebuh pagi hari, laban Iya udah ninga kita balat amat mutap ngelaban Iya, laban lebuh kita mutap ngelaban kami duai, iya ti bendar, kita mutap ngelaban TUHAN.” Ku Moses bejaku enggau Aron, “Asuh semua orang mayuh datai lalu bediri di mua TUHAN, laban Iya udah ninga jaku putap sida.” Lebuh Aron benung bejaku ngagai semua orang Israel, sida lalu nguing tunga ngagai menua puang. Tekala nya mulia TUHAN lalu pegari ba remang. Lalu ku TUHAN bejaku ngagai Moses, “Aku udah ninga jaku putap orang Israel. Padahka ngagai sida, lebuh lemai hari, sida deka makai dagin, lalu lebuh pagi hari, sida deka makai roti ngemayuh ti dikedekaka sida. Nya baru sida deka nemu Aku tu TUHAN Allah Taala sida.” Lebuh lemai hari, mayuh amat burung empitu terebai ngagai kem, chukup kena mungkur kem nya, lalu lebuh pagi hari, ambun nurun ngelingi kem nya. Lebuh ambun nya udah lesap, utai ti mipis baka tisik ikan sereta alus baka ais, bisi tinggal ba tanah di menua puang nya. Lebuh orang Israel meda utai nya, sida enda ngelala utai nya, lalu sida betanya ngagai pangan diri, ku sida, “Nama utai nya?” Ku Moses bejaku enggau sida, “Tu meh pemakai ti diberi TUHAN ngagai kita. TUHAN udah bejaku ngasuh genap iku kita ngumpul sepemayuh ti dipeguna kita sebilik, dua liter ke siku-siku kita.” Orang Israel lalu ngumpul utai nya. Sekeda sida ngumpul mayuh agi, sekeda mimit agi. Lebuh sida nakar utai nya, orang ke ngumpul mayuh agi, nadai bulih kelalu mayuh, lalu orang ke ngumpul mimit agi, nadai bulih kelalu mimit. Genap iku sida udah ngumpul nyampau ti dipeguna sida siku-siku. Ku Moses bejaku enggau sida, “Nadai siku kita tau ngalau utai nya ke pagila.” Tang sekeda ari bala sida enda mendingka Moses, lalu ngalau utai nya. Pagi hari siti, utai nya nyau penuh laban ulat, lalu bebau but. Moses lalu ringat ngagai sida. Genap pagi, siku-siku sida ngumpul nyampau ti dipeguna sida. Lebuh hari nyau angat, utai nya ti agi tinggal ba tanah, luluh magang. Ba hari ti keenam, sida ngumpul dua kali mayuh agi, empat liter ke genap iku sida. Semua tuai orang Israel datai lalu madahka pasal utai nya ngagai Moses, lalu ku iya bejaku enggau sida, “ TUHAN udah ngeletak pagila nyadi hari ti kudus alai kitai diau, hari ti diserahka kitai ngagai Iya. Panggang sehari tu utai ti deka dipanggang kita, lalu panduk utai ti deka dipanduk kita. Laluh utai nya patut digalau, lalu ditaruh ke pagila.” Munyi ti udah diasuh Moses, sida lalu ngalau utai ti laluh ke pagi hari siti. Utai nya enda bari, lalu enda mega diempa ulat. Ku Moses, “Empa utai nya sehari tu, laban tu Hari Sabat, hari kitai diau, ti diserahka kitai ngagai TUHAN. Nadai kita nemu pemakai nya di luar kem. Kita enda tau enda ngumpul pemakai dalam enam hari, tang ba hari ti ketujuh, iya nya hari kitai diau, utai nya nadai.” Ba hari ti ketujuh, sekeda orang pansut, deka ngumpul pemakai nya, tang sida nadai tetemuka utai nya. Udah nya TUHAN lalu bejaku ngagai Moses, “Ni pengelama kita agi mengkang enggai ngasika pesan Aku? Kita enda tau enda ingat, Aku ti TUHAN, udah meri kita hari alai kita diau. Nya kebuah ba hari ti keenam, Aku deka seruran meri kita pemakai chukup ke dua hari. Semua orang enda tau enda diau ba hari ti ketujuh, lalu enda mindah ari rumah.” Nya alai, orang Israel enda gawa ba hari ti ketujuh. Orang Israel ngumbai pemakai nya mana. Utai nya mit, baka leka telasih, sereta bechura burak. Asai iya sebaka enggau asai roti ti digaga ngena ai manyi. Ku Moses bejaku, “ TUHAN udah bejaku ngasuh kitai ngalau sekeda mana nya, ngambika bisi disimpan ke anak uchu kitai, ngambika sida ulih meda pemakai ti udah diberi TUHAN ngagai kitai di menua puang tu, lebuh Iya mai kitai pansut ari menua Ejip.” Ku Moses bejaku enggau Aron, “Ambi sigi kebuk, engkahka dua liter mana dalam kebuk nya, lalu engkahka kebuk nya di mua TUHAN, ngambika ditaruh ke peturun kitai.” Munyi ti udah dipesanka TUHAN ngagai Moses, Aron lalu ngengkahka utai nya di mua Peti Lampang Batu Adat, lalu ditaruh dia. Orang Israel makai mana empat puluh taun, nyentuk ngagai maya sida datai di menua Kanaan, alai sida ke ngentapka diri. ( Takar ti dikena lebuh maya nya, sebaka enggau dua puluh liter.) Semua orang Israel lalu angkat ari menua puang Sin, mindah ari endur siti ngagai endur siti, nitihka asuh TUHAN. Sida nirika kem sida di Repidim, tang endur nya nadai ai. Sida lalu mutap ngagai Moses, ku sida, “Beri kami ai irup.” Disaut Moses, “Nama kebuah kita mutap? Nama kebuah kita nguji TUHAN?” Tang orang Israel balat amat aus, lalu sida majak mutap ngagai Moses. Ku sida, “Nama kebuah nuan mai kami pansut ari menua Ejip? Kati nuan deka ngasuh kami, anak kami enggau jelu tupi kami mati aus?” Moses lalu bebendar besampi ngagai TUHAN. Ku iya, “Nama utai ti ulih dikereja aku ke sida tu? Sida nyau sedia deka nuku aku ngena batu.” TUHAN lalu bejaku ngagai Moses, “Bai sekeda tuai orang Israel enggau nuan, lalu bejalai dulu ari bala mayuh. Bai tungkat ti udah dikena nuan malu ai Sungai Nile. Aku deka bediri di mua nuan ba sigi batu ba Bukit Sinai. Palu batu nya, lalu ai deka pansut ari batu nya, ngambika bisi diirup orang mayuh.” Moses lalu malu batu nya di mua bala tuai orang Israel. Endur nya lalu dikumbai Masah enggau Meribah, laban orang Israel mutap sereta nguji TUHAN, lebuh sida nanya, “Kati TUHAN bisi enggau kitai, tauka nadai?” Orang bansa Amalek datai lalu nyerang orang Israel di Repidim. Moses lalu bejaku enggau Josua, “Pilih sekeda orang ke lelaki, lalu serang orang Amalek nya pagila. Aku deka bediri ba munggu, megai tungkat ti diasuh Allah Taala bai aku.” Josua lalu ngereja nitihka asuh Moses, lalu mansang nyerang orang Amalek. Moses, Aron enggau Hur lalu niki ngagai tuchung munggu sigi. Seagi-agi Moses ngedarka lengan iya, orang Israel menang, tang lebuh iya nurunka lengan iya, orang Amalek belabuh menang. Lebuh lengan Moses nyau lelak, Aron seduai Hur lalu mai sigi batu alai Moses duduk, lalu seduai iya bediri ngimbai iya, lalu nuatka lengan iya enda engkebut nyentuk ngagai padam mata panas. Nya jalai Josua ngalahka orang Amalek. Udah nya TUHAN bejaku ngagai Moses, ku Iya, “Tuliska jerita pasal pemenang tu, ngambika pemenang tu dikingatka. Padahka ngagai Josua, Aku deka ngeluska semua orang Amalek.” Moses lalu ngaga siti alta, lalu ngumbai alta nya, “ TUHAN Nyadika Menira Aku.” Ku Moses, “Tuatka tinggi menira TUHAN! TUHAN deka majak ngelaban genap serak orang Amalek!” Jetro, mentua Moses ti lelaki, ti nyadi imam orang Midian, bisi ninga pasal semua utai ti udah dikereja Allah Taala ke Moses, enggau ke orang Israel, lebuh TUHAN mai sida pansut ari menua Ejip. Nya alai Jetro nemuai ngagai Moses, mai Sipora, bini Moses ke tinggal di menua, enggau anak lelaki iya ke dua iku, Gersom seduai Elieser. (Moses udah nyebut, “Aku udah nyadi orang kampar di menua ti nyelai.” Nya kebuah iya meri anak iya nama Gersom. Iya bisi mega udah nyebut, “Allah Taala apai aku udah nyaup aku lalu ngelepaska aku ari pedang raja menua Ejip.” Nya alai iya meri nama Elieser ngagai anak lelaki iya ke siku. ) Jetro, bini Moses enggau anak Moses ke dua iku lalu nemuai ngagai Moses di menua puang ba endur alai Moses ti udah nirika kem, ba bukit ti kudus nya. Jetro udah ngirumka pesan ngagai Moses madahka sida deka nemuai ngagai iya. Moses lalu mansang ngambat Jetro, meremi di mua iya, lalu nyium iya. Sida lalu betanyaka pasal pangan diri, lalu udah nya mansang ngagai langkau kain Moses. Moses lalu madahka semua utai ti udah dikereja TUHAN ngagai raja enggau ngagai orang Ejip, kena TUHAN ngelepaska orang Israel. Moses mega madahka pasal pemerinsa pengidup orang Israel di rantau jalai, enggau chara TUHAN udah ngelepaska sida. Lebuh Jetro ninga semua berita nya, ati iya lantang lalu ku iya bejaku, “Pujika TUHAN, ti udah ngelepaska nuan ari raja orang Ejip enggau ari nembiak iya! Pujika TUHAN, ti udah ngelepaska nembiak Iya ti nyadi ulun! Diatu baru aku nemu TUHAN lebih agi bekuasa ari semua petara, laban Iya udah ngelepaska orang Israel ari kuasa orang Ejip, lebuh orang Ejip sumbung enggau orang Israel.” Udah nya Jetro lalu ngenjuk piring tunu segala, enggau piring ti bukai, ngagai Allah Taala. Aron enggau semua tuai orang Israel lalu datai sama enggau iya, deka makai pemakai ti kudus nya di mua Allah Taala. Pagi hari siti, Moses ngatur pechara orang Israel, lalu iya kiruh ngereja pengawa nya berengkah ari pagi nyentuk ngagai malam. Lebuh Jetro meda semua utai ti dikereja Moses ke orang Israel, iya lalu bejaku, “Nama utai nya ti dikereja nuan ke orang mayuh? Nama kebuah nuan ngereja nya kediri, lalu orang mayuh bediri ditu berengkah ari pagi nyentuk ngagai malam?” Disaut Moses, “Laban sida datai ngagai aku keran deka nemu peneka Allah Taala. Lebuh sida bisi laya enggau pangan diri, sida datai ngagai aku, lalu aku ngatur sapa sida ke ngena enggau ke salah, lalu aku madahka adat enggau atur Allah Taala ngagai sida.” Udah nya Jetro lalu bejaku, “Chara nuan ngereja nya enda manah. Nuan enggau orang ke datai ngagai nuan semina ngelelakka diri empu aja. Pengawa tu kelalu berat ke nuan. Nuan enda ulih ngereja pengawa tu kediri. Dingaka jaku aku; aku deka meri nuan jaku lalau, lalu Allah Taala deka meruan enggau nuan. Nuan nyadika pengari orang mayuh di mua Allah Taala, lalu mantaika laya sida di mua Iya; lalu nuan patut ngajar sida adat enggau atur Allah Taala, lalu nerangka ngagai sida chara jalai idup, enggau utai ti patut dikereja sida. Nuan patut mega milih orang ke landik ari semua orang Israel, orang ke nangika Allah Taala, orang ke tau dikarapka, ke enggai makai suap; lalu asuh sida nyadi tuai megai beribu iku, beratus iku, ngelima puluh iku enggau bepuluh iku orang. Awakka sida bekereja tetap nyadi hakim ke orang mayuh. Sida tau mai semua pekara ti mar ngagai nuan, tang sida empu patut ngatur semua pekara ti mit. Chara tu deka ngasuh pengawa nuan lempung agi, laban sida bisi nyaup nuan ngereja pengawa nya. Enti nuan ngereja nya, nitihka pesan Allah Taala, nya baru nuan deka tan ngereja pengawa, lalu semua orang tu pulai ngagai endur sida empu mai pemaik.” Moses mendingka ajar mentua iya, lalu ngereja semua utai ti diasuh iya. Moses milih orang ke landik ari semua orang Israel, lalu ngasuh sida nyadi tuai megai orang mayuh, megai beribu, seratus, lima puluh, enggau sepuluh iku orang. Sida bekereja tetap nyadi hakim ke orang mayuh; sida mai pekara ti mar ngagai Moses, tang sida ngatur pekara ti mit. Udah nya, Moses meri selamat tinggal ngagai Jetro. Jetro lalu pulai ngagai menua iya empu. Moses lalu niki ngagai bukit nya, mansang ngagai Allah Taala. TUHAN lalu ngangauka Moses ari bukit nya, ku Iya, “Sebut munyi tu ngagai peturun Jakop, lalu padahka ngagai orang Israel: Kita udah meda utai ti udah dikereja Aku ngagai orang Ejip, enggau chara Aku mai kita baka menaul ngagai Aku Empu. Nya alai, enti kita deka ngasika Aku, lalu nitihka sempekat Aku, kita deka nyadi nembiak Aku, ke dipilih Aku ari semua bansa di dunya; laban semua dunya tu endang enggi Aku. Kita deka nyadi bansa ti diserahka ngagai Aku nyadi perintah imam, bansa ti kudus. Nya meh leka jaku ti deka disebut nuan ngagai orang Israel.” Moses lalu nurun lalu ngempuruka bala tuai orang mayuh, lalu madahka ngagai sida semua utai ti udah diasuh TUHAN kereja iya. Semua orang Israel lalu nyaut sama sereta. Ku sida, “Kami deka ngereja semua utai ti udah disebut TUHAN.” Moses lalu madahka jaku sida ngagai TUHAN. Lalu ku TUHAN bejaku ngagai Moses, “Aku deka datai ngagai kita dalam mua hari ti tebal, ngambika orang mayuh ninga Aku bejaku enggau nuan, lalu arapka nuan belama iya.” Moses lalu madahka ngagai TUHAN saut orang mayuh, lalu ku TUHAN bejaku ngagai iya, “Alai nuan mansang ngagai orang mayuh, lalu asuh sida nuchi diri sehari tu enggau pagila, lalu asuh sida masu gari sida, ngambika ba hari ti ketiga sida udah chukup sedia; laban ba hari nya Aku deka nurun ngagai Bukit Sinai, dipeda semua orang mayuh. Lalu nuan deka ngaga garis ngelingi bukit nya, lalu bejaku ngagai orang mayuh munyi tu, ‘Bejimat kita, enggai ke kita niki ngagai bukit nya, tauka negu kaki bukit nya. Barang sapa negu bukit nya deka dibunuh. Nadai orang tau negu orang ke negu bukit nya, tang iya deka dituku ngena batu, tauka ditimbak ngena laja. Nemuka utai nya jelu tauka mensia, iya enda tau ditejuka idup.’ Lebuh terumpit ti penudi nya disepu, nya baru sida tau niki ngagai bukit nya.” Udah nya Moses nurun ari bukit nya mansang ngagai orang mayuh, lalu nyerahka sida ngagai Allah Taala; sida lalu masu gari sida. Lalu ku Moses bejaku ngagai sida, “Kita enda tau enda udah chukup sedia ba hari ti ketiga; lalu anang beleman enggau indu.” Pagi hari ti ketiga, guntur enggau kilat lalu mangka ba bukit nya. Mua hari ti tebal pegari ba atas bukit nya, lalu munyi terumpit ti inggar bisi didinga. Semua orang dalam kem nya nyau getar-getar takut. Moses lalu nguluka sida pansut ari kem mansang betemu enggau Allah Taala, lalu sida bediri ba kaki bukit nya. Semua Bukit Sinai abis dibalut asap, laban TUHAN udah nurun ngagai bukit nya dalam daun api. Asap nya niki ke atas baka asap ti pansut ari serumbung api, lalu semua orang balat amat getar-getar takut. Lebuh munyi terumpit nya majak inggar se-inggar, Moses bejaku, lalu Allah Taala nyaut iya ngena guntur. TUHAN lalu nurun ngagai Bukit Sinai, lalu ngangauka Moses, ngasuh iya niki ngagai tuchung bukit nya. Moses lalu niki. Lalu ku TUHAN bejaku ngagai iya, “Alai nuan nurun, lalu beri jaku tangkan ngagai orang mayuh, enggai ke sida meraka garis mansang meda Aku lalu mati. Indah bala imam ke datai semak ngagai Aku, deh enda tau enda nuchi diri empu, enggai ke TUHAN ngukum sida.” Ku Moses bejaku ngagai TUHAN, “Orang mayuh enda ulih niki ngagai Bukit Sinai, laban Nuan udah bejaku ngagai kami, ku Nuan, ‘Gaga garis ngelingi bukit nya, lalu kuduska bukit nya.’ ” Ku TUHAN nyaut Moses, “Alai nuan nurun, lalu pulai kitu baru, mai Aron; tang anang nejuka bala imam enggau orang mayuh meraka garis nya mansang ngagai TUHAN, enggai ke Iya ngukum sida.” Moses lalu nurun ngagai orang mayuh, lalu madahka utai ti udah disebut TUHAN. Allah Taala lalu bejaku munyi tu, “Aku tu TUHAN Allah Taala kita ke udah mai kita pansut ari menua Ejip, alai kita ke udah nyadi ulun. “Anang nyembah petara bukai tang semina Aku aja. “Anang ngaga engkeramba ke diri empu neladan gamal utai ti di langit, tauka utai ti ba tanah, tauka utai ti dalam ai, tauka utai ti di baruh tanah. Anang meremi ngagai engkeramba, tauka nyembah sida, laban Aku tu TUHAN Allah Taala ti chemburu. Aku ngukum tiris pantis orang ngagai ketiga enggau keempat serak ketegal penyalah aki ini sida ke nulak Aku, tang mandangka pengerindu ti meruan belama iya ngagai beribu-ribu serak ti rinduka Aku lalu ngasika pesan Aku. “Anang ngena nama TUHAN Allah Taala kita enggau jalai ti enda bebasaka iya, laban Iya deka ngukum orang ke ngena nama Iya enggau enda bebasaka iya. “Intu Hari Sabat, lalu gaga iya nyadi hari ti kudus. Kita bisi enam hari alai kita gawa, tang hari ti ketujuh nya diserahka nyadi Hari Sabat ngagai TUHAN Allah Taala kita; ba hari nya kita enda tau gawa, kita empu, anak kita, ulun kita, jelu kita, tauka orang bansa bukai ke diau di menua kita; laban dalam enam hari TUHAN udah ngaga tanah, langit, tasik, enggau semua utai ti dalam sida, lalu belelak ba hari ti ketujuh. Nya kebuah TUHAN merekatka Hari Sabat, lalu ngaga hari nya tuchi. “Bebasaka apai enggau indai kita, ngambika kita panjai umur nguan menua ti diberi TUHAN Allah Taala ngagai kita. “Anang munuh orang. “Anang butang. “Anang ngenchuri. “Anang besasksi bula ngelaban orang. “Anang inginka rumah orang, bini orang, ulun, sapi, keledai, tauka sebarang utai orang.” Lebuh orang mayuh ninga guntur enggau terumpit, lalu meda kilat, enggau bukit ti berasap, sida getar-getar takut, lalu bediri ari jauh. Ku sida bejaku ngagai Moses, “Enti nuan bejaku enggau kami, kami deka mending, tang enti Allah Taala bejaku ngagai kami, kami takut, enggai ke kami mati.” Disaut Moses, “Anang takut. Allah Taala semina datai laban Iya deka nguji kita, ngambika kita seruran nangika Iya, lalu enda agi bedosa.” Tang orang mayuh mengkang bediri ari jauh. Semina Moses siku aja mansang semak ngagai mua hari ti tebal nya, ngagai endur alai Allah Taala. Lalu ku TUHAN bejaku ngagai Moses, “Sebut ngagai orang Israel: ‘Kita empu udah meda chara Aku ti TUHAN udah bejaku ngagai kita ari serega. Anang ngaga ke diri empu petara ari pirak, tauka ari emas, lalu anang nyembah sida kelimpah ari nyembah Aku. Gaga siti alta ngena tanah ke Aku, lalu ba alta nya, beri jelu bedus kita, enggau jelu sapi kita nyadika piring tunu, sereta enggau nyadika piring pemaik. Aku deka datai ngagai kita, lalu merekatka kita, ba semua endur ti ditaga Aku alai kita deka nyembah Aku. Enti kita ngaga alta ari batu ke Aku, anang ngaga iya ari batu ti dipansap, laban lebuh kita ngaga batu nya ngena pat, kita ngamahka batu nya. Lalu anang ngaga tangga kena niki ngagai alta Aku, enggai ke kita ngayanka tubuh diri lebuh kita niki tangga nya.’ “Beri adat tu ngagai orang Israel: Enti kita meli orang Hebrew nyadi ulun kita, iya deka bekereja ke kita enam taun. Dalam taun ti ketujuh, iya enda tau enda dilepaska, lalu iya enda ibuh mayar kita. Enti iya agi bujang lebuh iya nyadi ulun kita, iya enda tau mai bini iya lebuh iya angkat ari nya. Tang enti iya endang udah bebini lebuh iya nyadi ulun kita, iya tau angkat mai bini iya. Enti tuan iya meri iya bini, lalu bini iya nya ngadaka anak lelaki tauka anak indu, bini iya nya enggau anak iya sama diempu tuan iya, lalu lelaki nya angkat ari nya kediri. Tang enti ulun nya madahka diri rinduka tuan iya, rinduka bini iya, enggau ke anak iya, lalu enggai dilepaska, tuan iya enda tau enda mai iya ngagai endur alai nyembah Allah Taala. Dia iya deka ngasuh ulun nya bediri ngimbai pintu tauka tiang pintu, lalu nanchum pending iya ngena siti pekekas, lalu iya deka nyadi ulun seumur idup. “Enti orang nyual anak indu iya nyadi ulun, indu nya enda tau dilepaska, baka ke ngelepaska ulun ti lelaki. Enti indu nya dijual ngagai orang ke deka ngambi iya nyadi bini, tang lelaki nya enda rinduka iya, indu nya tau ditebus pulai baru. Tuan iya enda tau nyual iya ngagai orang bansa bukai, laban tuan iya udah enda manah enggau iya. Enti apai meli ulun ti indu lalu meri indu nya ngagai anak lelaki iya, apai lelaki nya enda tau enda ngaga indu nya baka anak iya empu. Enti anak lelaki nya deka bebini dua, iya enda tau enda, baka selama, majak meri pemakai, gari enggau hak ngagai bini iya ti keterubah. Enti iya enda ngereja tanggungjawap nya ngagai bini iya, iya enda tau enda ngelepaska bini iya pechuma lalu nadai nerima bayar. “Barang sapa malu orang, lalu orang nya mati, orang ke malu iya nya deka dibunuh. Tang enti iya tekelanjur munuh orang nya, lalu ukai sengaja deka munuh iya, iya tau rari ngagai siti endur ti deka dipilih Aku ke kita. Dia orang nya tau diau likun. Tang lebuh orang ringat lalu sengaja munuh orang, iya deka dibunuh, taja pen iya rari ngagai alta Aku ngiga pengelikun. “Barang sapa malu apai diri, tauka indai diri, deka dibunuh. “Barang sapa nangkap lalu nabanka orang, nemuka laban iya deka nyual iya, tauka deka ngaga iya nyadi ulun, enda tau enda dibunuh. “Barang sapa nyumpah apai tauka indai diri, deka dibunuh. “Enti orang ke bempu ulun malu ulun iya ngena kayu, nemuka ulun nya lelaki tauka indu, lalu ulun nya mati terus, orang ke bempu ulun nya deka diukum. Tang enti ulun nya enda mati dalam sehari tauka dua hari, tuan ke bempu ulun nya enda kena ukum, laban pemati ulun iya, ke endang reta tengkira iya empu, chukup nyadika ukum iya. “Enti orang lelaki belaya, lalu ngemediska siku indu ke ngandung, lalu indu nya lenyau kandung, tang nadai pedis nama-nama kelimpah ari ke lenyau kandung, orang ke ngemediska iya enda tau enda diasuh mayar ukum nitihka pinta laki indu nya, sereta dikemendarka bala hakim. Tang enti indu nya bakal, ukum ti dikena nya: nyawa balas nyawa, mata balas mata, ngeli balas ngeli, jari balas jari, kaki balas kaki, betu balas betu, telih balas telih, malui balas malui. “Enti orang malu ulun ti lelaki tauka ulun ti indu ba mata, lalu mata iya buta ketegal nya, orang nya enda tau enda ngelepaska ulun nya, laban mata iya sepiak udah buta. Enti iya matahka sigi ngeli ulun iya, iya enda tau enda ngelepaska ulun iya nya, laban ulun iya udah patah ngeli. “Enti sapi ti lelaki nanduk orang, lalu orang nya mati laban sapi nya, jelu nya enda tau enda dituku ngena batu, lalu isi iya enda tau diempa, tang orang ke bempu iya enda kena ukum. Tang enti sapi nya selalu nanduk orang, lalu orang ke bempu iya udah diberi jaku tangkan, tang enda ngandang jelu nya - enti jelu nya nanduk orang, lalu orang ke ditanduk iya mati, jelu nya enda tau enda dituku ngena batu, lalu orang ke bempu jelu nya mega dibunuh. Tang enti orang ke bempu jelu nya dipinta mayar ukum kena iya nebus nyawa diri, iya enda tau enda mayar semua duit tebus ti dipinta. Enti sapi ti lelaki nya nanduk nembiak ti lelaki tauka indu, adat tu deka mega dikena. Enti sapi ti lelaki nya nanduk ulun ti lelaki tauka indu, orang ke bempu sapi nya enda tau enda mayar orang ke bempu ulun nya tiga puluh singkap duit pirak, lalu sapi nya deka dituku ngena batu datai ke iya mati. “Enti orang enda nutup mua lubang kebung, tauka enti orang numbak lubang kebung lalu enda nutup mua lubang kebung nya, lalu jelu sapi ti lelaki tauka keledai labuh ngagai lubang nya, orang ke bempu lubang kebung nya enda tau enda mayar rega jelu nya. Iya enda tau enda mayar duit nya ngagai orang ke bempu jelu nya, lalu iya tau bempu bangkai jelu nya. Enti sapi ti lelaki, ti diempu orang siku, bisi nyayat sapi ti lelaki orang bukai, seduai iya enda tau enda nyual sapi ti lelaki ti agi idup nya, lalu bedua rega sapi nya. Seduai iya tau mega bedua dagin jelu ti udah mati nya. Tang enti jelu nya endang ditemu selalu deka nanduk sapi bukai, lalu orang ke bempu iya enda ngandang iya, orang nya enda tau enda meri siku sapi ti lelaki ti idup ngagai orang ke bempu sapi ti mati nya, kena nganti pengerugi iya, lalu tau bempu bangkai jelu nya. “Enti orang ngenchuri sapi, tauka bedus, lalu munuh jelu nya, tauka nyual iya, iya enda tau enda mayar sapi nya ngena lima iku sapi, tauka empat iku bedus kena mayar siku bedus. “Enti orang nejuka jelu iya ngulam ba padang, tauka ba kebun anggur, lalu jelu nya mawa lalu ngulam utai ti ditanam ba umai orang bukai, orang ke bempu jelu nya enda tau enda mayar pengerugi orang ke bempu umai nya, ngena utai ari umai iya empu, tauka ari kebun anggur iya empu. Enti orang nyelup api ba tanah iya empu, lalu api nya nyerarai ngagai umai orang bukai, lalu nganguska gandum ti tumbuh dia, tauka gandum ti udah diketau lalu ditugungka dia, orang ke nyelup api nya enda tau enda mayar utai ti rusak nya. “Enti orang besetuju nyimpan utai ke pangan iya, nemuka utai nya duit, tauka utai ti berega, lalu utai nya kena churi ari rumah iya, penchuri nya, enti iya ditemu, enda tau enda mayar dua kali lipat. Tang enti penchuri nya enda ditemu, orang ke nyimpan utai ti berega nya enda tau enda dibai ngagai endur alai besembiang, lalu iya enda tau enda besumpah dia, madahka diri nadai ngenchuri utai pangan iya nya. “Dalam semua laya pasal pesaka, nemuka laya nya pasal jelu sapi, keledai, bedus, gari, tauka sebarang utai bukai ti lenyau, orang dua iku ke berebutka pesaka nya enda tau enda dibai ngagai endur alai besembiang. Orang ke dikumbai Allah Taala salah enda tau enda mayar dua kali lipat ngagai orang ke enggau iya berebutka pesaka nya. “Enti orang besetuju nyimpan keledai, sapi, bedus, tauka jelu bukai, ke pangan iya, lalu udah nya jelu nya mati, tauka bebadi, tauka ditabanka munsuh, lalu orang bukai pen nadai mega meda utai nya nyadi, orang ke nyimpan jelu nya enda tau enda mansang ngagai endur alai besembiang, lalu besumpah madahka diri nadai ngenchuri tauka munuh jelu nya, lalu orang ke bempu jelu nya deka betanggungjawapka pengerugi diri empu, lalu pangan iya ke nyimpan jelu nya enda ibuh mayar iya. Tang enti jelu nya udah kena churi, orang ke nyimpan jelu nya enda tau enda mayar orang ke bempu jelu nya. Enti jelu nya mati laban jelu babas, orang ke nyimpan jelu nya enda tau enda mai teda bangkai jelu nya kena nandaka jelu nya udah mati laban jelu babas, lalu iya enda ibuh bebayar ke jelu nya. “Enti orang nginjau jelu ari pangan iya, lalu jelu nya bebadi tauka mati lebuh orang ke bempu jelu nya nadai dia, orang ke nginjau jelu nya enda tau enda mayar rega jelu nya enggau penuh. Tang enti utai nya nyadi lebuh orang ke bempu jelu nya bisi dia, orang ke nginjau jelu nya enda ibuh mayar rega jelu nya. Enti jelu nya disua, semina suaka jelu nya aja ti patut dibayar. “Enti lelaki nipu indu dara bungas, ti enda betunang, lalu bulih tubuh iya, lelaki nya enda tau enda meri derian, lalu jadi enggau indu nya. Tang enti apai indu nya enda ngemendarka lelaki nya jadi enggau indu nya, lelaki nya enda tau enda meri apai indu nya duit nyampau derian ti diberi ngagai indu ke agi dara bungas. “Bunuh indu ke ngereja keramat. “Bunuh orang ke beleman enggau jelu. “Bunuh barang sapa ngenjuk piring ngagai petara bukai, kelimpah ari ke ngenjuk piring ngagai Aku ti TUHAN. “Anang merinsa tauka nekanka pengidup orang kampar. Kingatka kita empu ti udah nyadi orang kampar di menua Ejip. Anang merinsaka indu ke balu enggau orang ke nadai apai indai. Enti kita merinsa tauka nekanka pengidup sida, Aku ti TUHAN, deka nyaut kangau sida, lalu Aku deka ringat lalu munuh kita ngena pedang. Bini kita deka balu, lalu anak kita nadai agi apai. “Enti kita nyali duit ngagai bala nembiak Aku ke seranta, anang baka orang ke bejalika duit, lalu minta sida mayar bungai duit nya. “Enti kita ngambi baju panjai ari pangan kita nyadika gadai utang iya, kita enda tau enda mulaika baju nya ngagai iya baru sebedau padam mata panas, laban semina baju nya aja ti dikemisi iya kena iya bebungkur. Nama utai bukai kena iya bebungkur lebuh iya tinduk? Lalu lebuh iya nyabak ngangauka Aku, Aku deka mending, laban Aku amat kasih. “Anang bejaku jai pasal Allah Taala, lalu anang nyumpah tuai bansa kita. “Beri ngagai Aku piring gandum, wain, enggau ari minyak kana kita, ba maya ti udah diletak. “Serahka anak tuai kita ke lelaki ngagai Aku. Serahka anak tuai jelu sapi kita, enggau bedus kita ngagai Aku. Awakka anak tuai ti lelaki mengkang begulai enggau indai iya tujuh hari, lalu ba hari ti kelapan, serahka iya ngagai Aku. “Kita tu orang ke diserahka ngagai Aku, nya alai kita enda tau makai dagin jelu ti mati laban jelu babas, tang beri dagin nya ngagai ukui. “Anang nusui berita ti bula, lalu anang besaksi bula ketegal kita deka nulung orang ke salah. Anang nitihka orang mayuh ngereja penyalah, tauka meri saksi ti enda lurus. Anang berat sepiak lalu ngelaban orang ke seranta lebuh iya kena pechara. “Enti nuan tepedaka jelu sapi, tauka keledai, ti diempu munsuh nuan lepas, bai jelu nya pulai ngagai iya. Enti nuan tepedaka keledai ti diempu orang ke begedika nuan rebah laban pemerat utai ti dibai iya, saup orang nya ngangkatka keledai nya bediri baru. Anang ninggalka iya pia aja. “Anang meri atur ti enda lurus lebuh kita ngatur pechara ke orang ke seranta. Anang nuduhka orang salah enti iya nadai penyalah, lalu anang meri ukum bunuh ngagai orang ke nadai penyalah, laban Aku deka ngukum barang sapa ngereja utai ti jai baka nya. Anang makai suap, laban makai suap ngasuh orang enda ulih meda utai ti betul, lalu ngerusak orang ke nadai penyalah. “Anang nekanka pengidup orang kampar. Kita empu nemu asai nyadi orang kampar, laban kita udah nyadi orang kampar di menua Ejip. “Kita tau nanam lalu ngetau utai dalam kandang enam taun, tang dalam taun ti ketujuh, anang nanam utai ba tanah kita, lalu anang ngetau sebarang utai ti tumbuh ba tanah nya, ngambika orang ke seranta tau makai utai ti tumbuh dia, lalu jelu babas tau makai teda utai nya. Baka nya mega chara kita enggau kebun anggur tauka enggau kayu kana kita. “Bekereja enam hari dalam seminggu, tang anang bekereja ba hari ti ketujuh, ngambika ulun kita, enggau orang bansa bukai ke bekereja ke kita, enggau jelu kita, tau belelak. “Pendingka semua utai ti udah disebut Aku ti TUHAN, ngagai kita. Anang nyembah petara bukai. Indah nyebut nama sida deh kita enda tau. “Intu tiga bengkah gawai dalam setaun kena kita ngemesaika Aku. Dalam bulan Abip, iya nya bulan kita pansut ari menua Ejip, intu Gawai Roti Ti Enda Beragi, ngena jalai ti udah dipadahka Aku ngagai kita. Anang makai roti ti beragi dalam kandang tujuh hari kita ngintu Gawai nya. Anang datai nyembah Aku enti kita nadai mai piring. “Intu Gawai Ngetau lebuh kita baru deka belabuh ngetau. “Intu Gawai Belangkau lebuh maya gugur daun, lebuh maya kita ngumpul buah ari kebun anggur enggau ari kebun buah kita. Tiap taun ba gawai tiga bengkah tu, semua kita ke lelaki enda tau enda datai nyembah Aku, TUHAN, ti Allah Taala kita. “Anang meri roti ti beragi, lebuh kita meri jelu nyadika piring kita ngagai Aku. Lemak jelu ti digaga nyadika piring ti diberi ngagai Aku lebuh gawai tu, nadai tau digalau ngagai pagi hari siti. “Tiap taun, bai ngagai Rumah TUHAN Allah Taala kita buah bungas, ti pemadu manah, ti diketau kita. “Anang manduk anak domba tauka anak kambin ngena ai tusu indai iya empu. “Aku deka ngirumka siku melikat bejalai dulu ari kita, ngambika nyaga kita lebuh kita bejalai, lalu mai kita ngagai endur ti udah disediaka Aku ke kita. Pendingka iya lalu kereja utai ti diasuh iya. Anang angkat ngelaban iya, laban Aku udah ngirumka iya, lalu iya enggai ngampun kita enti kita angkat ngelaban. Tang enti kita ngasika iya, lalu kita ngereja semua utai ti diasuh Aku, Aku deka ngelaban semua munsuh kita. Melikat Aku deka bejalai dulu ari kita, lalu nguluka kita ngagai menua orang Amor, orang Iti, orang Peris, orang Kanaan, orang Ibi, enggau orang Jebus, lalu Aku deka ngerusak sida. Anang meremi ngagai, tauka nyembah petara nya, lalu anang nitihka jalai pengarap sida. Rusak petara sida, lalu tumbangka tiang batu keramat sida. Enti kita nyembah Aku ti TUHAN, ti Allah Taala kita, Aku deka merekatka kita ngena pemakai enggau ai, lalu muai semua penyakit kita. Indu enda gugur anak tauka punas di menua kita. Aku deka ngasuh kita panjai umur. “Aku deka ngasuh orang ke ngelaban kita, takutka Aku. Aku deka ngasuh orang ke dilaban kita charut runding, lalu Aku deka ngasuh semua munsuh kita nguing lalu belanda rari ari kita. Aku deka ngasuh indu gamang terebai dulu ari kita, lalu sida deka muru orang Ibi, orang Kanaan, enggau orang Iti ari mua kita. Aku enda muru sida dalam kandang setaun aja, enggai ke menua nya nadai orang nguan, lalu jelu babas deka kelalu mayuh. Aku deka muru sida mimit-mimit sekali, datai ke kita nyau chukup mayuh tubuh bempu menua nya. Aku deka ngaga garis entara menua kita belabuh ari Teluk Akaba nyentuk ngagai Tasik Tengah, enggau ari menua puang nyentuk ngagai Sungai Eupratis. Aku deka meri kita kuasa atas orang ke nguan menua nya, lalu kita deka muru sida pansut, lebuh kita nyerang. Anang ngaga sempekat enggau sida, tauka enggau petara sida. Anang nejuka orang nya diau dalam menua kita. Enti kita nejuka sida, sida deka mai kita bedosa ngelaban Aku. Enti kita nyembah petara sida, utai nya deka nyadi panjuk ti ngerusak kita.” TUHAN lalu bejaku ngagai Moses, “Niki ke atas ngagai Aku ba bukit tu, nuan enggau Aron, Nadap, Abihu, enggau tujuh puluh iku tuai orang Israel; lalu lebuh kita agi jauh, meremi lalu nyembah. Semina nuan siku aja tau datai semak ngagai Aku. Sida ke bukai enda tau datai semak ngagai Aku, lalu orang mayuh enda tau niki ngagai bukit tu.” Moses datai lalu madahka ngagai orang mayuh semua pesan TUHAN, enggau semua adat Iya. Semua orang mayuh lalu nyaut sama sereta, ku sida, “Kami deka ngereja semua utai ti udah disebut TUHAN.” Moses lalu nuliska semua pesan TUHAN. Tumu pagi hari siti, iya ngaga siti alta ba kaki bukit nya, lalu ngerintaika dua belas igi batu, sigi ke siti-siti raban bansa orang Israel ti dua belas bengkah nya. Udah nya iya ngasuh orang ke bujang datai lalu sida nunu piring ke TUHAN, lalu ngenjuk sekeda jelu sapi nyadika piring pemaik. Moses ngambi setengah ari darah jelu nya, lalu nyimpan darah nya dalam mangkuk, lalu setengah diunsaika iya ngagai alta. Udah nya iya ngambi bup sempekat TUHAN, lalu macha bup nya enggau nyawa ti inggar ngagai orang mayuh. Lalu ku orang mayuh bejaku, “Kami deka ngasika TUHAN, lalu deka ngereja semua utai ti udah diasuh Iya kereja kami.” Udah nya Moses lalu ngambi darah ti dalam mangkuk nya, lalu ngunsaika darah nya ngagai orang mayuh. Ku iya, “Tu darah kena nanggam sempekat ti udah digaga TUHAN enggau kita, lebuh Iya meri semua pesan tu.” Moses, Aron, Nadap, Abihu enggau tujuh puluh iku bala tuai orang Israel lalu niki ngagai bukit nya lalu sida meda Allah Taala ke disembah orang Israel. Di baruh kaki Allah Taala bisi utai ti baka geladak ti digaga ari batu nilam, ti biru baka langit. Allah Taala enda ngerusak bala tuai bansa orang Israel tu. Sida meda Allah Taala, lalu udah nya sida makai ngirup. Ku TUHAN bejaku ngagai Moses, “Niki ke atas ngagai Aku ba bukit tu, lalu lebuh nuan ditu, Aku deka meri ngagai nuan dua iti lampang batu ti udah alai Aku nuliska semua adat kena ngajar orang mayuh.” Moses, enggau Josua ti nyadi penulung iya, angkat lalu Moses niki ngagai bukit ti kudus nya. Ku Moses bejaku enggau bala tuai orang mayuh, “Kita diau ditu, nganti pemulai kami duai Josua. Aron enggau Hur bisi ditu enggau kita. Enti kita bisi pekara diputarka, kita tau betemu enggau seduai iya.” Moses lalu niki ngagai Bukit Sinai, ti dibalut mua hari. Mulia TUHAN lalu datai ba Bukit Sinai, lalu mua hari mungkur bukit nya enam hari; ba hari ti ketujuh TUHAN ngangauka Moses ari mua hari nya. Nyadi orang Israel meda mulia TUHAN nya baka api ti mau ba tuchung bukit nya. Moses tama ngagai mua hari nya lalu niki ngagai bukit nya, lalu diau dia empat puluh hari empat puluh malam. Ku TUHAN bejaku ngagai Moses, “Asuh orang Israel meri siti pemeri ngagai Aku. Terima aja semua pemeri ti deka diberi orang mayuh. Pemeri nya nyengkaum emas, pirak, enggau temaga, kain linin ti alus, bulu bedus ti bechura biru, ungu enggau mirah, kain ti digaga ari bulu kambin, kulit bedus ti lelaki, ti udah dichat mirah, kulit jelu ti udah dialuska, kayu akasia, minyak lampu, rempah kena ngaga minyak tata, enggau kena ngaga menyan ti bebau rengut, batu unam enggau batu berega ti bukai, ti deka diengkahka ba epod Imam Besai, enggau ba terabai dada iya. Orang Israel enda tau enda ngaga Langkau TUHAN ke Aku, ngambika Aku diau enggau sida. Gaga langkau sembiang enggau semua pekekas iya, nitihka pelan ti ditunjukka Aku ngagai nuan. “Gaga siti Peti ari kayu akasia. Pemanjai peti nya 110 sentimeter, buka iya 66 sentimeter, lalu peninggi iya 66 sentimeter. Sampak iya enggau emas ti tulin ari dalam enggau ari luar, lalu gaga lilit ari emas ti tulin ba semua tisi iya. Gaga empat iti chengkerung ari emas ti tulin kena mai Peti nya, lalu lekatka chengkerung nya ngagai empat iti kaki Peti nya, dua iti chengkerung ba tisi sepiak-sepiak. Gaga kayu kena ngesan peti nya ari kayu akasia. Sampak kayu nya enggau emas, lalu rasukka kayu nya ngagai chengkerung ti ba tisi Peti nya sepiak-sepiak. Kayu ti dikena ngesan Peti nya enda tau enda ditejuka dalam chengkerung nya, lalu nadai tau diambi ari nya. Udah nya, simpan dalam Peti nya dua iti lampang batu ti deka diberi Aku ngagai nuan, ti alai pesan ditulis. “Gaga tudung ari emas ti tulin. Pemanjai iya 110 sentimeter, lalu buka iya 66 sentimeter. Gaga ari emas ti ditempa dua iku melikat cherub ti besayap, siku ba puting setak, lalu siku ba puting setak. Tempa seduai nya selajur enggau tudung nya, ari siti tekang emas. Melikat cherub ti besayap dua iku nya betunga mua enggau pangan diri, lalu sayap seduai iya enda tau enda ngerembai mungkur tudung Peti nya. Engkahka lampang batu dua iti nya dalam Peti nya, lalu tudung iya. Aku deka betemu enggau nuan dia, lalu ari atas tudung ti ba entara dua iku melikat cherub ti besayap nya, Aku deka meri ngagai nuan semua Adat Aku, ke orang Israel. “Gaga siti mija ari kayu akasia. Pemanjai iya 88 sentimeter, buka iya 44 sentimeter, lalu peninggi iya 66 sentimeter. Sampak mija nya enggau emas ti tulin, lalu gaga lilit ngelingi tisi mija nya. Gaga bingkai 7.5 sentimeter buka ngelingi mija nya, lalu gaga lilit ngelingi bingkai nya. Gaga empat iti chengkerung emas ke mija nya, kena ngesan iya, lalu engkahka chengkerung nya ba empat iti sukut mija nya, ba kaki mija nya. Chengkerung ti alai ngerasukka kayu kena ngesan mija nya enda tau enda diengkah semak bingkai mija nya. Gaga kayu ti dikena ngesan mija nya ari kayu akasia, lalu sampak kayu nya enggau emas. Gaga chapak, mangkuk, kebuk, enggau mangkuk ti dikena ngenjuk piring wain. Semua utai tu enda tau enda digaga ari emas magang. Mija nya enda tau enda diengkah di mua Peti Lampang Batu Adat, lalu ba atas mija nya enda tau enda seruran bisi roti ti kudus ti diberi ngagai Aku. “Gaga siti penuduk lampu ari emas ti tulin. Gaga burit iya enggau batang iya ari emas ti ditempa. Bungai ti dikena ngias iya, nyengkaum kuntum bungai enggau serindak bungai, enda tau enda digaga selajur ari emas siti nya aja. Enam iti dan deka pansut ari tisi penuduk lampu nya, tiga iti ari sepiak-sepiak. Genap iti dan nya enda tau enda bisi tiga iti bungai kena ngias iya. Bungai nya digaga baka gamal bungai almon, sama enggau kuntum enggau serindak bungai. Batang penuduk lampu nya enda tau enda bisi empat iti bungai kena ngias iya, lalu bungai nya digaga baka gamal bungai almon, lalu bisi kuntum enggau serindak bungai. Di baruh siti gerempung dan, enda tau enda bisi siti kuntum bungai. Kuntum bungai, dan, enggau penuduk lampu nya enda tau enda digaga ari siti aja lampang emas ti ditempa. Gaga tujuh iti lampu ke penuduk lampu nya, lalu awakka lampu nya manchar ke mua. Gaga sepit enggau talam ke penuduk lampu nya ari emas ti tulin Ambi 34 kilogram emas ti tulin kena kita ngaga penuduk lampu enggau semua pekekas tu. Kita enda tau enda ngaga utai nya enggau bejimat nitihka pelan ti udah ditunjukka Aku ngagai nuan ba bukit nya. “Gaga langkau sembiang nya ngena sepuluh lambar kain linin ti alus, ti ditenun ari bulu bedus ti bechura biru, ungu enggau mirah. Sulam kain linin nya enggau gambar bala melikat cherub ti besayap. Genap lambar kain nya sebaka pemesai magang. Pemanjai lambar nya 14 meter, lalu buka iya 2 meter. Jait lima iti kain nya betangkir nyadi siti ladang, lalu jait lima iti kain ti bukai baka nya mega. Gaga rambing ari kain ti biru ba tisi siti-siti ladang. Gaga lima puluh iti rambing ba kain ti terubah ba ladang ti keterubah, enggau lima puluh iti rambing ti besenentang enggau rambing ba kain ti pemadu tisi ba ladang ti kedua. Gaga lima puluh iti pengait emas kena bejantilka dua iti bidang kain nya nyadi siti langkau sembiang. “Gaga tudung ke langkau sembiang nya ngena sebelas lambar kain ti digaga ari bulu kambin. Gaga semua kain nya sebaka pemesai, lima belas meter pemanjai, enggau dua meter buka. Jait lima lambar kain nya nyadi siti ladang, lalu enam lambar ti bukai nyadi ladang siti da agi. Lipatka dua lambar kain ti keenam ba atas mua Langkau Kain nya. Engkahka lima puluh iti rambing ba tisi lambar ti penudi, dalam siti-siti ladang, enggau lima puluh iti rambing ba tisi bidang ti siti. Gaga lima puluh iti pengait temaga, lalu engkahka pengait nya ba rambing nya, kena bejantilka dua iti ladang kain nya, ngambika dua iti ladang nya nyadi siti tudung. Awakka setengah lambar ti laluh, kating-kating ari belakang langkau sembiang nya. Lima puluh sentimeter ti lebih nya ditejuka kating-kating ba tisi langkau sembiang nya, kena map iya. Gaga dua iti agi tudung, siti ari kulit bedus ti lelaki, dichat mirah, lalu siti digaga ari kulit jelu, ti digaga alus, nyadika tudung ti di luar. “Gaga langkar ke langkau sembiang nya ari kayu akasia. Siti-siti langkar nya enda tau enda 4 meter pemanjai, lalu buka iya 66 sentimeter, lalu bisi dua iti cherebut, ngambika siti-siti papan nya tau dipejantilka enggau papan ti bukai. Semua papan nya enda tau enda bisi cherebut magang. Gaga dua puluh singkap papan ke langkar langkau sembiang, ke tisi ti muak ke selatan enggau empat puluh iti pelasar ti digaga ari pirak. Pelasar tu deka diengkah di baruh papan langkar nya, dua iti ke siti-siti papan, kena ngetanka cherebut ti dua iti nya. Gaga dua puluh iti papan ke langkar langkau sembiang nya, ke tisi ti muak ke utara enggau empat puluh iti pelasar ti digaga ari pirak, dua iti di baruh siti-siti papan langkar nya. Ke tisi belakang ti muak ke barat, ke langkau sembiang nya, gaga enam iti papan ke langkar iya, enggau dua iti papan ke langkar sukut iya di belakang. Papan ke langkar ti ba sukut tu enda tau enda bejantil belabuh ari kaki nyentuk ke puchuk. Papan ke langkar ti dikena ngaga sukut dua iti tu, enda tau enda digaga ngena chara nya. Nya alai, lapan iti papan diguna nyadika langkar, enggau enam belas iti pelasar ti digaga ari pirak, dua iti di baruh siti-siti papan langkar nya. “Gaga lima belas iti alang dinding ari kayu akasia, lima iti nyadi langkar ke siti-siti tisi ke langkau sembiang nya, lima iti langkar tisi ti setiban enggau nya, enggau lima iti langkar ke tisi ti muak ke barat, ke langkau sembiang nya di belakang. Alang dinding tengah, ti diengkah melintang semua papan langkar nya, deka digaga ngenyauh nya ke atas, ngenyauh nya ke baruh, lalu digaga belabuh ari ujung siti nyentuk ngagai ujung siti dalam langkau sembiang nya. Sampak semua papan langkar ke Langkau Kain nya enggau emas, lalu gaga chengkerung emas alai ngerasukka alang dinding nya. Alang dinding nya pen enda tau enda mega disampak enggau emas. Dirika langkau sembiang nya nitihka pelan ti udah ditunjukka Aku ngagai nuan ba bukit nya. “Gaga siti tirai ari kain linin ti alus, ti ditenun ari bulu bedus ti bechura biru, ungu enggau mirah. Sulamka gambar bala melikat cherub ti besayap ba kain tirai nya. Gantung tirai nya ari empat batang tiang ti digaga ari kayu akasia, ti disampak enggau emas, ti bisi pengait, lalu didudukka ba atas empat iti pelasar ti digaga ari pirak. Engkahka kain tirai nya ari baruh garis pengait ti ba perabung Langkau Kain nya, lalu engkahka Peti Lampang Batu Adat ti ngundan dua iti lampang batu nya, ari belakang tirai nya. Kain tirai nya deka nyeraraka Endur ti Kudus ari Endur ti Pemadu Kudus. Engkahka tudung ba Peti Lampang Batu Adat nya. Di luar Endur ti Pemadu Kudus, engkahka mija dalam langkau sembiang nya ngimbai tisi utara, lalu penuduk lampu nya diengkahka ngimbai tisi selatan. “Ke penama ngagai Langkau Kain nya, gaga sebidang kain tirai ti ditenun ngena ubung linin, ubung bulu bedus ti bechura biru, ungu enggau mirah, lalu dilagu ngena sulam. Kena ngantung kain tirai tu, gaga lima batang tiang, ari kayu akasia, disampak enggau emas, lalu bisi dilekatka pengait emas. Gaga lima iti pelasar temaga, ke lima batang tiang tu. “Gaga siti alta ari kayu akasia. Mija nya enda tau enda besegi empat. Pemanjai iya 2 meter, buka iya 2 meter, lalu peninggi iya 1 meter. Gaga tanduk ba empat iti sukut alta nya. Tanduk empat iti nya enda tau enda digaga selajur ari kayu ti dikena ngaga alta nya empu, lalu semua tanduk nya enda tau enda disampak enggau temaga magang. Gaga kali alai nyimpan amau ti bechampur enggau lemak, lalu gaga senduk, mangkuk, pengait, enggau talam alai engkah bara api. Semua pekekas tu enda tau enda digaga ari temaga magang. Gaga siti gelegar temaga, lalu lekatka empat iti chengkerung temaga ba sukut gelegar nya. Lekatka gelegar nya ari baruh tisi alta nya, ngenyauh nya ngagai puchuk, lalu ngenyauh nya ngagai kaki alta nya. Gaga kayu kena ngaling alta nya, ari kayu akasia, lalu sampak kayu pengaling nya enggau temaga. Rasukka kayu pengaling nya ngagai chengkerung ti ba siti-siti rusuk alta nya, kena ngesan alta nya. Gaga alta nya ari papan, lalu awakka alta nya berumbang, nitihka pelan ti udah ditunjukka Aku ngagai nuan ba bukit nya. “Ngelingi langkau sembiang nya, gaga siti dinding ngena kain tirai ti digaga ari kain linin ti alus. Ke tisi ti muak ke selatan, pemanjai kain tirai nya 50 meter, dilekatka ngagai dua puluh batang tiang temaga ti didudukka ba atas dua puluh iti pelasar temaga, ti bisi pengait enggau simpai pirak. Gaga baka nya mega ke tisi ti muak ke utara. Ke tisi ti muak ke barat, pemanjai kain tirai nya 25 meter, bisi sepuluh batang tiang, enggau sepuluh iti pelasar ke tiang nya. Ke tisi ti muak ke timur, alai pintu penama digaga, pemanjai dinding nya mega 25 meter. Mua pintu penama nya empu enda tau enda bisi kain tirai. Pemanjai iya 10 meter, ditenun ngena ubung linin ti alus, ubung ti digaga ari bulu bedus ti bechura biru, ungu enggau mirah, lalu dilagu ngena sulam. Tirai tu enda tau enda digantung ari empat batang tiang ti bediri ba atas empat iti pelasar. Semua tiang ti ngelingi tengah laman nya enda tau enda dipejantilka enggau pangan diri ngena batang pirak, lalu pengait ke tiang nya enda tau enda digaga ari pirak, lalu pelasar ke tiang nya digaga ari temaga magang. Pemanjai tengah laman nya 44 meter. Buka iya 25 meter, lalu peninggi iya 2.2 meter. Kain tirai nya enda tau enda digaga ari kain linin ti alus, lalu pelasar digaga ari temaga. Semua pekekas ti dikena dalam langkau sembiang nya, enggau semua tiang bantilka Langkau Kain nya, enggau tiang bantilka dinding ti ngelingi Langkau Kain nya empu, enda tau enda digaga ari temaga magang. “Nuan enda tau enda ngasuh orang Israel mai ngagai nuan minyak kana ti pemadu manah ke lampu, ngambika lampu nya ulih ditungkun genap lemai. “Aron enggau bala anak lelaki iya enda tau enda ngengkahka lampu nya dalam Langkau Kain TUHAN, di luar kain tirai ti ari mua Peti Lampang Batu Adat. Lampu nya enda tau enda seruran menyadi kenyau ari lemai nyentuk ngagai pagi. Atur tu enda tau enda seruran dititihka orang Israel enggau peturun sida belama iya. “Pesanka menyadi nuan Aron enggau anak iya Nadap, Abihu, Eleasar, enggau Itamar. Seraraka sida ari orang Israel, ngambika sida gawa ke Aku nyadi imam. Gaga pekayan imam ke menyadi nuan Aron, ngambika iya dibasa orang sereta sigat gaya. Pesanka semua orang ke udah diberi Aku pengelandik begagaka utai, lalu asuh sida ngaga gari ke Aron, ngambika iya ulih diserahka nyadi imam gawa ke Aku. Asuh sida ngaga siti terabai dada, siti epod, siti baju panjai, selambar baju ti disulam, siti labung, enggau siti selampai dada. Sida enda tau enda ngaga pekayan imam tu ke menyadi nuan Aron enggau ke bala anak lelaki iya, ngambika sida ulih gawa nyadi imam Aku. Orang ke landik ngaga pekayan nya enda tau enda ngaga semua utai nya ari bulu bedus ti bechura biru, ungu enggau mirah, enggau kain linin ti alus. “Sida enda tau enda ngaga epod ari bulu bedus ti bechura biru, ungu enggau mirah, ubung emas, enggau kain linin ti alus, ti dilagu enggau sulam. Dua iti papak tali bau kena ngelekatka epod, enda tau enda dilekatka ba tisi epod nya empu. Siti belulang ti ditenun ari bulu bedus, ubung emas, enggau ari ubung linin ti alus, enda tau enda dijait ngagai epod. Ambi dua igi batu akek mirah, lalu tebukka nama dua belas iku anak Jakop ba batu nya, nitihka penuai sida, enam iku ba batu sigi, lalu nama enam iku ba batu sigi. Asuh orang ke landik ngaga perengka ti berega nebukka nama bala anak lelaki Jakop ba batu nya, lalu lekatka batu nya ba bingkai emas. Lekatka batu nya ba papak tali bau epod nya, kena nunjukka dua belas raban bansa orang Israel. Nya chara Aron deka mai nama sida ba bau iya, ngambika Aku ti TUHAN, deka seruran ingatka nembiak Aku. Gaga dua iti sangkum emas enggau dua iti rantai ari emas ti tulin, ti dibelitka baka tali, lalu lekatka rantai nya ngagai sangkum nya. “Gaga siti terabai dada ke Imam Besai kena iya ngiga peneka Allah Taala. Terabai dada nya enda tau enda digaga ari utai ti dikena ngaga epod, lalu disulam baka ke nyulam epod. Terabai dada nya enda tau enda besegi empat, lalu belipat dua - pemanjai iya 22 sentimeter, lalu buka iya 22 sentimeter. Lekatka empat iti rintai batu ti berega ba terabai dada nya. Ba rintai ti keterubah lekatka sigi batu akek, sigi batu jakut kuning, enggau sigi batu berega ti bechura mirah. Ba rintai ti kedua, lekatka sigi batu samerut, sigi batu nilam, enggau sigi batu intan. Ba rintai ti ketiga, lekatka sigi batu pirus, sigi batu sejabu, enggau sigi batu kechubung. Lalu ba rintai ti keempat, lekatka sigi batu pirus, sigi batu akek mirah, enggau sigi batu asija. Semua sida tu enda tau enda dilekatka dalam sangkum emas magang. Genap igi batu ti berega nya enda tau enda ditebuk enggau nama genap iku bala anak lelaki Jakop, siti nama ke siti raban bansa orang Israel. Gaga rantai ari emas ti tulin, ti dibelitka baka tali, ke terabai dada nya. Gaga dua iti chengkerung emas, lalu lekatka chengkerung emas dua iti nya ngagai sukut terabai dada nya ba puting ti ari atas, lalu tanchangka tali emas ti dua iti nya ngagai chengkerung emas ti dua iti nya. Tanchangka ujung tali ti dua iti nya ngagai sangkum ti dua iti nya, lalu ngena chara nya, sida ditanchangka di mua, ngagai papak tali bau epod. Udah nya, gaga dua iti chengkerung emas, lalu lekatka chengkerung dua iti nya ngagai sukut terabai dada ba puting ti ari baruh, ba tisi ari dalam epod. Gaga dua iti da agi chengkerung emas, lalu lekatka chengkerung dua iti nya ngagai ujung papak tali bau epod, semak endur alai jait epod nya, ari atas belulang ti udah ditenun. Tanchangka chengkerung ti ba terabai dada nya ngagai chengkerung ti ba epod ngena tali ti biru, ngambika terabai dada nya terengkah ba atas belulang nya, lalu enda tingkil. “Lebuh Aron tama ngagai Endur ti Kudus, iya enda tau enda ngena terabai dada ti ngundan nama semua raban bansa orang Israel, ngambika Aku ti TUHAN, deka seruran ingatka nembiak Aku. Engkahka Urim enggau Tumim dalam terabai dada nya, ngambika Aron mai utai nya lebuh iya ngadap ngagai Aku. Lebuh maya nya, iya enda tau enda ngena terabai dada, ngambika iya ulih nemu peneka Aku ke orang Israel. “Baju panjai ti ari baruh epod enda tau enda semua digaga ari bulu bedus ti bechura biru. Baju panjai nya enda tau nadai lubang alai pala, lalu tisi lubang tu enda tau enda dikeringka ngena bingkai ti ditenun, ngambika lubang nya enda charik. Aron enda tau enda ngena baju panjai nya lebuh iya ngereja pengawa imam. Lebuh iya datai ngagai Aku ba Endur ti Kudus, tauka lebuh iya ninggalka Endur nya, munyi gerunung iya deka didinga, lalu iya enda kena bunuh. “Gaga utai siti ari emas lalu tebukka leka jaku ‘Diserahka Ngagai TUHAN,’ ba utai nya Tanchangka utai nya ba mua labung ngena tali ti biru. Utai nya enda tau enda seruran bisi ba kening Aron, lalu Aron empu deka betanggungjawapka penyalah ti nyadi lebuh orang Israel ngenjuk piring sida nyadi pemeri ti kudus; utai nya deka seruran bisi ba kening iya, ngambika Aku, ti TUHAN, rinduka sida. “Tenun baju ke Aron ari linin ti alus, lalu gaga labung ngena linin ti alus, sereta enggau selampai ti dilagu enggau sulam. “Gaga baju, selampai, enggau selapuk ke bala anak lelaki Aron, ngambika sida dibasa orang sereta sigat gamal. Rasukka gari tu ba menyadi nuan, Aron, enggau ba bala anak lelaki iya. Udah nya berekatka sida, lalu tata sida ngena minyak kana kena nyerahka sida, ngambika sida ulih bekereja nyadi imam ke Aku. Gaga tanchut pandak ke sida ari kain linin. Tanchut nya mungkur punggung nyentuk ngagai pah, ngambika sida enda ngayanka tubuh diri Aron enggau bala anak lelaki iya enda tau enda seruran ngena tanchut pandak nya lebuh sida tama ngagai Langkau Kain TUHAN, tauka mansang ngagai alta lalu bekereja nyadi imam dalam Endur ti Kudus, ngambika sida enda kena bunuh ketegal ngayanka tubuh diri. Tu atur ti meruan belama iya ke Aron enggau bala peturun iya. “Tu utai ti enda tau enda dikereja nuan ngagai Aron enggau bala anak lelaki iya, kena nuan nyerahka sida nyadi imam ke bekereja ke Aku. Ambi siku jelu sapi ti lelaki, enggau dua iku bedus ti lelaki, ti nadai penimpang. Ngena tepung gandum ti pemadu alus, tang enda ngena ragi, gaga roti ngena minyak kana. Gaga mega roti enda ngena minyak, lalu sekeda digaga besingkap mipau, dipalitka enggau minyak. Simpan semua roti nya dalam siti bakul, lalu beri utai nya ngagai Aku lebuh nuan meri jelu sapi ti lelaki, enggau bedus ti lelaki, nyadika piring. “Bai Aron enggau bala anak lelaki iya ngagai penama Langkau Kain TUHAN, lalu asuh sida mandi dia. Udah nya rasukka pekayan imam ba Aron: baju, baju panjai, epod, terabai dada, enggau belulang. Engkahka labung ba pala iya, lalu tanchangka ba labung nya siti kelai ti kudus, alai leka jaku ‘Diserahka Ngagai TUHAN,’ udah ditulis. Udah nya ambi minyak tata, tuang minyak nya ba pala iya, lalu tata iya. “Bai bala anak lelaki iya, lalu rasukka baju ba sida. Lekatka selampai melit punggung sida, enggau selapuk ba pala sida. Nya chara nuan nyiri Aron enggau bala anak lelaki iya. Sida enggau peturun sida deka bekereja nyadi imam ke Aku belama iya. “Bai siku sapi ti lelaki ngagai mua Langkau Kain TUHAN, lalu asuh Aron enggau bala anak lelaki iya ngengkahka jari sida ba pala sapi nya. Sayat sapi nya di mua Aku, ba penama ngagai Langkau Kain TUHAN. Ambi sekeda darah sapi nya, lalu ngena tunjuk nuan, palitka darah nya ngagai tanduk alta nya. Udah nya bubuhka teda darah nya ba kaki alta. Udah nya, ambi semua lemak ti malut perengka dalam, atau, enggau dua iti tungkul sengayuh, sama enggau lemak ti malut perengka nya, lalu tunu utai nya ba alta, nyadika piring ti diberi ngagai Aku. Tang tunu isi sapi nya, kulit, enggau perengka perut iya di luar kem. Tu nyadika piring pengampun dosa ke bala imam. “Ambi siku bedus ti lelaki, lalu asuh Aron enggau bala anak lelaki iya ngengkahka jari sida ba pala bedus nya. Sayat bedus nya, bai darah iya, lalu unsaika darah nya ngagai semua tisi alta. Tetak bedus nya. Basu semua perengka dalam, enggau kaki belakang iya, lalu engkahka utai nya ba atas pala bedus enggau lampang dagin ti bukai. Tunu semua isi bedus ti lelaki nya ba alta nyadika piring ti diberi ngena api. Bau piring tu ngerinduka ati Aku. “Ambi bedus ti lelaki ti siku - bedus ti lelaki ti dikena nyerahka imam - lalu asuh Aron enggau bala anak lelaki iya ngengkahka jari sida ba pala bedus nya. Sayat bedus nya, lalu ambi sekeda darah iya, lalu palitka darah nya ngagai rambing pending kanan Aron enggau bala anak lelaki iya, ba tunjuk indu jari kanan, enggau ba tunjuk indu kaki kanan sida. Unsaika teda darah nya ngagai semua tisi alta nya. Ambi sekeda darah ti ba alta, enggau sekeda minyak tata, lalu pechikka darah nya ngagai Aron enggau ngagai gari iya, enggau ngagai bala anak lelaki, enggau ngagai gari sida. Nya baru Aron, bala anak lelaki iya, enggau gari sida, diserahka ngagai Aku. “Tisil lemak bedus ti lelaki nya, lemak ti ba pun iku, lemak ti mungkur perengka dalam, isi atau ti pemadu manah, dua iti tungkul sengayuh, sereta enggau lemak ti lekat ba sida, enggau pah kanan. Ari roti ti dalam bakul ti udah diberi ngagai Aku, ambi siti tuku roti ari semua macham roti, iya nya, siti tuku roti ti digaga ngena minyak kana, siti ti digaga enda ngena minyak kana, enggau sesingkap roti ti mipis. Engkahka semua pemakai tu ba jari Aron, enggau bala anak iya, lalu asuh sida nyerahka utai nya ngagai Aku, nyadika pemeri. Udah nya ambi utai nya ari sida, lalu tunu utai nya ba alta, atas piring tunu, nyadika piring ti diberi ngena api ti diberi ngagai Aku. Bau piring tu deka ngerinduka ati Aku. “Ambi isi dada bedus ti lelaki nya, lalu serahka utai nya ngagai Aku, nyadika pemeri. Isi tu endang diungkupka kita. “Lebuh orang dichiri nyadi imam, isi dada enggau pah bedus ti lelaki ti dikena nyiri sida, enda tau enda diserahka ngagai Aku, nyadi pemeri ti pemadu manah, lalu digalau nyadika ungkup bala imam. Tu pemutus penemu Aku ti enda berubah: lebuh nembiak Aku ngaga piring pemaik, isi dada enggau pah jelu nya deka diempu bala imam. Tu meh pemeri ti dienjuk orang Israel ngagai Aku ti TUHAN. “Pekayan imam ti dikena Aron enda tau enda diserahka ngagai bala anak iya, udah bekau iya mati, ngambika bisi dikena sida, lebuh sida dichiri nyadi imam. Anak lelaki Aron ke nganti iya nyadi imam, ke tama ngagai Langkau Kain TUHAN, lalu gawa dalam Endur ti Kudus, enda tau enda ngena pekayan nya tujuh hari. “Ambi isi bedus ti lelaki, ti udah dikena nyiri Aron enggau bala anak lelaki iya nyadi imam, lalu panduk dagin nya ba Endur ti Kudus. Sida enda tau enda makai dagin nya, sama enggau teda roti ti dalam bakul nya, ba penama ngagai Langkau Kain TUHAN. Sida deka makai utai ti udah dikena miring minta pengampun dosa lebuh nyirika sida nyadi imam. Semina bala imam aja tau makai pemakai nya, laban pemakai nya kudus. Enti sekeda dagin nya, tauka sekeda roti nya enda abis diempa datai ke pagi hari siti, utai nya enda tau enda ditunu. Utai nya enda tau diempa, laban iya kudus. “Kereja pengawa nyiri Aron enggau bala anak lelaki iya nyadi imam dalam pengelama tujuh hari, nitihka chara ti udah dipadahka Aku ngagai nuan. Nuan enda tau enda tiap hari meri siku sapi ti lelaki nyadika piring, ngambika dosa tau diampun. Tu deka nuchi alta. Udah nya, tata alta nya ngena minyak kana, kena nguduska iya. Kereja tu tiap hari dalam kandang tujuh hari nya. Udah nya baru alta nya deka nyadi kudus, lalu barang sapa tauka barang utai negu alta nya, deka bebadi laban kuasa pengudus alta nya. “Genap hari, enggau ke belama iya, beri dua iku anak domba ti umur setaun, ba alta nya, nyadika piring. Beri siku nyadika piring lebuh pagi hari, lalu siku lebuh lemai hari. Beri sama enggau anak domba nya sekilogram tepung gandum ti alus, dichampur enggau seliter minyak kana ti tulin. Tuang seliter wain nyadika piring. Lebuh hari nyau lemai beri anak domba ti kedua nya nyadika piring, lalu beri sama enggau anak domba nya, tepung gandum, minyak kana enggau wain, ngemayuh ti diberi lebuh pagi hari. Tu nyadika piring ti diberi ngena api ngagai Aku ti TUHAN, lalu bau utai tu deka ngerinduka ati Aku. Piring ti ditunu nya enda tau enda diberi di mua Aku, ba penama ngagai Langkau Kain TUHAN belama iya. Nya meh endur alai Aku deka betemu enggau bala nembiak Aku, lalu bejaku ngagai nuan. Dia meh endur alai Aku deka betemu enggau orang Israel, lalu mulia Aku deka nguduska endur nya. Aku deka nyeraraka Langkau Kain TUHAN enggau alta nya, lalu Aku deka nyeraraka Aron enggau bala anak lelaki iya, ngambika sida bekereja nyadi imam Aku. Aku deka diau begulai enggau orang Israel, lalu Aku deka nyadi Allah Taala sida. Sida deka nemu Aku endang TUHAN ti Allah Taala sida, ti udah mai sida pansut ari menua Ejip ngambika Aku diau begulai enggau sida. Aku tu TUHAN ti Allah Taala sida. “Gaga siti alta ari kayu akasia, alai nunu menyan. Alta nya enda tau enda besegi empat. Pemanjai iya 45 sentimeter. Buka iya 45 sentimeter, lalu peninggi iya 90 sentimeter. Tanduk ti ba empat iti sukut alta nya enda tau enda digaga selajur enggau mija nya empu. Sampak puchuk, semua empat iti tisi, enggau tanduk nya ngena emas ti tulin, lalu gaga bingkai emas ngelingi mija nya. Gaga dua iti chengkerung emas kena ngaling mija nya, lalu lekatka chengkerung dua iti nya ari baruh bingkai ti ba dua iti tisi, alai ngerasukka kayu ti dikena ngaling mija nya. Gaga kayu kena ngaling mija nya ari kayu akasia, lalu sampak kayu nya enggau emas. Engkahka mija nya ari luar kain tirai ti digantung di mua Peti Lampang Batu Adat. Tu endur alai Aku deka betemu enggau nuan. Genap pagi, lebuh Aron datai ngintu lampu, iya enda tau enda nunu menyan ti bebau rengut ba mija nya. Iya enda tau enda ngereja baka nya mega lebuh iya nungkun lampu nya lebuh lemai hari. Pengawa ti meri menyan enda tau diketuka datai ke belama iya. Anang meri ba atas alta nya menyan ti enda tau diberi, tauka piring jelu, tauka piring gandum, lalu anang nuang piring wain ba alta nya. Aron enda tau enda ngereja pengawa nuchi alta nya sekali setaun ngena darah jelu ti udah diberi nyadika piring pengampun dosa, ti diengkahka iya ba empat iti tanduk alta nya. Tu enda tau enda dikereja tiap taun datai ke belama iya. Alta nya pemadu kudus, lalu diserahka ngagai Aku ti TUHAN.” Ku TUHAN bejaku ngagai Moses, “Lebuh nuan ngitung tubuh orang Israel, genap iku orang enda tau enda mayar ngagai Aku rega nyawa iya, ngambika iya enda ditinggang penusah lebuh pengawa ngitung tubuh benung dikereja. Semua orang ke kena itung enda tau enda mayar duit ti dipinta, ti ditimbang nitihka atur ti udah diletak dalam Langkau Kain TUHAN. Semua orang enda tau enda mayar tu nyadika piring ti diberi ngagai Aku. Semua orang ke kena itung, iya nya, genap iku lelaki ke umur dua puluh taun ke atas, enda tau enda mayar duit nyampau nya ngagai Aku. Orang ke kaya enda tau mayar lebih ari nya, lalu orang ke seranta pen enda mega tau mayar mimit ari nya, lebuh sida mayar duit kena meli nyawa diri. Gumpul duit nya ari orang Israel, lalu awakka duit nya dikena ngintu Langkau Kain TUHAN. Duit ti digumpul nya deka dikena mayar nyawa sida, lalu Aku deka nyaga sida.” Ku TUHAN bejaku ngagai Moses, “Gaga siti bisin temaga, ti bisi penuduk ti digaga mega ari temaga. Engkahka bisin nya ba entara Langkau Kain TUHAN enggau alta, lalu simpan ai dalam bisin nya. Aron enggau bala anak lelaki iya enda tau enda masu jari enggau kaki sida ngena ai nya sebedau sida tama ngagai Langkau Kain TUHAN, tauka mansang ngagai alta deka ngenjuk piring ti diberi ngena api. Nya baru sida enda kena bunuh. Sida enda tau enda masu jari enggau kaki sida, ngambika sida enda mati. Tu atur ti enda tau enda dititihka sida enggau raban bansa sida belama iya.” Ku TUHAN bejaku ngagai Moses, “Ambi rempah ti pemadu manah - 5.5 kilogram mur, 3.5 kilogram kulit kayu manis ti bebau rengut, 3.5 kilogram tebu ti bebau rengut, enggau 6 kilogram kayu akasia (semua ditimbang nitihka atur ti udah diletak dalam Langkau Kain TUHAN ), 4 liter minyak kana lalu gaga minyak tata ti kudus, dirakit baka minyak wangi. Tata semua utai tu ngena minyak nya: Langkau Kain TUHAN Aku, Peti Lampang Batu Adat, mija, enggau semua pekekas mija, penuduk lampu enggau semua pekekas penuduk lampu, alta alai nunu menyan, alta alai nunu piring, sereta enggau semua pekekas alta nya, enggau bisin alai bebasu, sereta enggau penuduk iya. Serahka semua utai nya ngena chara nya, ngambika semua utai nya nyadi kudus, lalu semua orang tauka semua utai ti negu sida deka bebadi laban kuasa pengudus utai nya. Udah nya, tata Aron enggau bala anak lelaki iya, lalu chiri sida nyadi imam ngambika sida gawa ke Aku. Sebut jaku tu ngagai orang Israel, “Minyak tata Aku ti kudus tu deka dikena belama iya nyiri orang ke gawa ke Aku. Minyak tu enda tau dituang ba orang ke ukai imam, lalu nuan enda tau ngena rakit nya ngaga minyak ti sebaka enggau minyak tata nya. Minyak nya kudus, lalu nuan enda tau enda ngumbai minyak nya kudus. Barang sapa ngaga minyak ti sebaka enggau nya, tauka ngena minyak nya ba orang ke ukai imam, deka badu agi nyadi nembiak Aku.’ ” Ku TUHAN bejaku ngagai Moses, “Ambi sama penyampau ari siti bagi rempah ti bebau rengut tu - getah dambar, kerubung lukan, getah rasamala, enggau menyan ti tulin. Gaga menyan ti dirakit ngena semua utai nya baka ke ngaga minyak wangi. Beri garam ngambika menyan nya tuchi sereta kudus. Tutuk sekeda menyan nya alus. Bai menyan nya ngagai Langkau Kain TUHAN, lalu kerabuka menyan nya di mua Peti Lampang Batu Adat. Menyan nya kudus. Anang ngena rakit nya ngaga menyan ke kita empu. Kita enda tau enda ngumbai menyan nya kudus, lalu udah diserahka ngagai Aku. Enti orang bisi ngaga menyan ngena rakit nya lalu dikena nyadi minyak wangi, orang nya deka badu agi dikumbai nembiak Aku.” Ku TUHAN bejaku ngagai Moses, “Aku udah milih Besalel anak Uri, uchu Hur, ari raban bansa Judah, lalu Aku udah ngemenuhka iya enggau Roh Allah Taala, penau enggau pengelandik ngereja semua macham pengawa, ngaga pelan ke utai ti deka digaga, lalu ngaga utai nya ari emas, pirak enggau temaga; netak batu ti berega ti deka disangkum; ngukir kayu; enggau ngereja genap macham pengawa begagaka utai ti dikena ngias. Aku udah mega milih Oholiap anak Ahisamak, ari raban bansa Dan, bekereja enggau iya. Aku udah mega meri pengelandik ti besai ngagai semua orang ke landik begagaka utai, ngambika sida ulih ngaga semua utai ti udah diasuh Aku gaga sida, iya nya: Langkau Kain TUHAN, Peti Lampang Batu Adat enggau tudung iya, semua perengka ti dikena dalam Langkau Kain TUHAN nya, mija enggau pekekas iya, penuduk lampu ti digaga ari emas ti tulin, enggau semua pekekas iya, alta alai nunu menyan, alta alai nunu piring, enggau semua pekekas iya, bisin kena bebasu enggau penuduk iya, pekayan imam ti manah amat, ti deka dikena Aron enggau bala anak lelaki iya lebuh sida bekereja nyadi imam, minyak tata, enggau menyan ti bebau rengut ti dikena ba Endur ti Kudus. Lebuh sida ngaga semua utai nya, sida enda tau enda ngereja pengawa nya nitihka chara ti udah dipadahka Aku ngagai nuan.” TUHAN ngasuh Moses madahka ngagai orang Israel munyi tu: “Intu Hari Sabat, hari alai Aku diau, laban nya nyadika tanda entara kita enggau Aku belama lama iya, kena nunjukka Aku ti TUHAN udah ngaga kita nyadi nembiak Aku. Kita enda tau enda ngintu hari alai kita diau nya, laban hari nya kudus. Barang sapa enda ngintu hari nya, lalu bekereja ba hari nya, enda tau enda dibunuh. Kita bisi enam hari alai kita gawa, tang hari ti ketujuh nya hari alai kita diau ti diserahka ngagai Aku. Barang sapa ngereja sebarang macham pengawa ba hari nya, deka dibunuh. Orang Israel enda tau enda ngintu hari nya nyadika tanda sempekat. Tu nyadika tanda ti meruan belama lama iya entara orang Israel enggau Aku, laban Aku ti TUHAN, udah ngaga langit enggau dunya dalam enam hari, lalu ba hari ti ketujuh Aku ngetu gawa, lalu diau.” Lebuh Allah Taala udah tembu bejaku ngagai Moses ba bukit Sinai, Iya meri ngagai Moses dua iti lampang batu ti alai Allah Taala Empu udah nuliska pesan Iya. Lebuh orang mayuh meda Moses lama enda nurun ari bukit nya, sida lalu begelumu ngelingi Aron, lalu bejaku enggau iya, “Kitai enda nemu namaka penyadi Moses ti udah nguluka kitai pansut ari menua Ejip. Nya alai gaga siku petara ke kitai, ngambika iya bisi nguluka kitai.” Ku Aron bejaku enggau sida, “Tingkilka antin emas ti dikena bini, anak lelaki, anak indu kita, lalu bai utai nya ngagai aku.” Nya alai semua orang lalu ningkilka antin emas sida, lalu mai utai nya ngagai Aron. Aron ngambi, lalu ngeluluhka antin nya, nuang emas nya ngagai siti chuan, lalu nempa siku anak sapi ti lelaki ari emas nya. Ku orang mayuh bejaku, “Orang Israel, tu petara kitai, ti udah nguluka kitai pansut ari menua Ejip!” Udah nya Aron lalu ngaga siti alta di mua anak sapi emas nya, lalu madahka ngagai orang mayuh, “Pagila kitai deka begawai ngemesaika TUHAN.” Tumu pagi hari siti, sida mai sekeda jelu nyadika piring tunu, lalu jelu ti bukai nyadika piring pemaik. Orang mayuh belatur duduk, lalu begawai. Sida balat amat ngirup lalu ngereja pengawa ti kamah. Ku TUHAN bejaku ngagai Moses, “Alai nuan nurun enggau jampat, laban bala nembiak nuan, ti udah diuluka nuan pansut ari menua Ejip, udah bedosa lalu udah nulak Aku. Sida udah limpang ari jalai Aku. Sida udah ngeluluhka emas lalu ngaga siku anak sapi ti lelaki ari emas nya, lalu udah nyembah sereta ngenjuk piring ngagai utai nya. Sida ngumbai utai nya petara ti udah nguluka sida pansut ari menua Ejip. Aku nemu pengekieh sida. Nya alai anang nguji nagang Aku. Aku ringat ngagai sida, lalu Aku deka ngerusak sida. Udah nya baru Aku ngaga nuan enggau peturun nuan nyadi bansa ti kering.” Tang Moses minta kasih ngagai TUHAN Allah Taala iya. Ku iya, “ TUHAN, nama kebuah Nuan ringat ngemalat nya ngagai bala nembiak Nuan, ti udah dilepaska Nuan ari menua Ejip ngena pemesai pengering enggau kuasa Nuan? Enti Nuan ngerusak sida, orang Ejip deka ngumbai Nuan mai nembiak Nuan pansut ari menua Ejip laban Nuan deka munuh sida abis lengis ba sebelah bukit tu. Badu agi ringat. Ubah runding Nuan, lalu anang ngasuh penusah tu ninggang nembiak Nuan. Kingatka nembiak Nuan Abraham, Isak enggau Jakop. Kingatka Nuan ti udah besemaya enggau sida ngena sumpah deka ngasuh peturun sida ngemayuh bintang ti di langit, lalu meri ngagai peturun sida semua menua ti udah disemaya Nuan nyadika pesaka sida belama iya.” TUHAN lalu ngubah runding Diri, lalu enda nyadi ngasuh penusah ti besai ninggang nembiak Iya. Moses lalu nurun ari bukit nya, mai lampang batu ti dua iti nya ti alai pesan udah ditulis ba sepiak-sepiak lampang batu nya. Lampang batu nya udah digaga Allah Taala Empu, lalu Iya udah nebukka pesan Iya ba batu nya. Lebuh Josua ninga orang mayuh manjung, iya lalu nyebut ngagai Moses, “Aku ninga munyi orang ke beperang dalam kem.” Ku Moses, “Nya ukai munyi panjung orang ke menang tauka alah. Nya munyi orang belagu.” Lebuh Moses nyau datai semak ngagai kem nya, lalu tepedaka anak sapi nya, enggau orang mayuh ke betanda, iya pedis ati, lalu ngempaska ba kaki bukit nya lampang batu ti dibai iya. Lampang batu nya lalu pechah. Iya lalu ngambi anak sapi ti udah digaga sida, ngeluluhka iya, nginsarka iya nyadi amau, lalu nyampur iya enggau ai. Udah nya iya lalu mejalka orang Israel ngirup ai nya. Ku iya bejaku enggau Aron, “Nama utai ti udah dikereja orang tu ngagai nuan, datai ke nuan nyau ngasuh sida bedosa ngemalat tu?” Disaut Aron, “Anang ringat ngagai aku. Nuan nemu pengeras orang tu deka ngereja penyai. Ku sida bejaku ngagai aku, ‘Kitai nadai nemu namaka penyadi Moses, ti udah mai kitai pansut ari menua Ejip. Nya alai gaga ke kitai siku petara ngambika iya bisi nguluka kitai.’ Aku lalu ngasuh sida mai perengka emas sida ngagai aku. Orang ke bisi perengka emas lalu ningkilka utai nya ari tubuh sida, lalu meri utai nya ngagai aku. Aku lalu nibarka perengka emas nya ngagai api. Anak sapi ti lekaki tu lalu pansut ari api nya!” Moses nemu Aron endang enda ngerara orang mayuh tang nejuka sida ngereja utai nitihka peneka sida empu lalu ngemelika diri di mua munsuh sida. Nya alai Moses lalu bediri ba mua pintu kem, lalu bejaku enggau nyawa ti inggar, “Semua orang ke setanah enggau TUHAN, mansang kitu!” Semua orang Lewi lalu begempuru ngelingi iya. Ku Moses bejaku ngagai sida, “ TUHAN Allah Taala ke disembah orang Israel ngasuh genap iku kita nangkin pedang kita, lalu bejalai nengah kem tu, belabuh ari pintu tu, nyentuk ngagai pintu nyin, lalu munuh semua menyadi kita, pangan kita, enggau orang ke berimbai pendiau enggau kita.” Orang Lewi ngasika jaku Moses, lalu munuh kira tiga ribu iku orang sehari nya. Ku Moses bejaku ngagai orang Lewi, “Sehari tu kita udah nyiri diri empu nyadi imam TUHAN, laban kita udah munuh anak lelaki kita, enggau sida menyadi lelaki kita. Nya kebuah TUHAN udah merekatka kita sehari tu.” Hari siti Moses bejaku ngagai orang mayuh, “Kita udah balat amat bedosa. Tang diatu aku deka niki ngagai bukit nya baru ngagai TUHAN, nyangka ukur aku ulih minta TUHAN ngampun dosa kita.” Moses lalu mansang baru ngagai TUHAN, lalu ku iya bejaku enggau TUHAN, “Orang tu udah balat amat bedosa. Sida udah ngaga siku petara ari emas, lalu nyembah iya. Ampun dosa sida. Tang enti Nuan enggai, awakka Nuan muai nama aku ari bup Nuan.” Ku TUHAN nyaut, “Semina orang ke udah bedosa ngelaban Aku aja ti deka dibuai Aku nama ari bup Aku. Nya alai, mupuk nuan, lalu uluka orang mayuh ngagai endur ti udah dipadahka Aku ngagai nuan. Ingat, melikat Aku deka ngiring nuan, tang maya deka datai alai Aku deka ngukum orang tu ketegal dosa sida.” Nya alai TUHAN lalu ngasuh penyakit ninggang orang mayuh, laban sida udah ngasuh Aron ngaga anak sapi emas nya. Ku TUHAN bejaku ngagai Moses, “Angkat ari endur tu, nuan enggau orang mayuh ti udah dibai nuan pansut ari menua Ejip, lalu mansang kita ngagai menua ti udah disemaya Aku ngagai Abraham, Isak, enggau Jakop, enggau ngagai peturun sida. Aku deka ngasuh siku melikat ngiring kita, lalu Aku deka muru orang Kanaan, orang Amor, orang Iti, orang Peris, orang Ibi enggau orang Jebus. Kita deka mupuk ngagai menua ti kaya sereta ami. Tang Aku Empu enda enggau kita, enggai ke Aku munuh kita di rantau jalai, laban kita tu orang ke kieh.” Lebuh orang mayuh ninga nya, sida lalu belabuh ngulit, lalu enda agi bekenaka barang ti berega; laban TUHAN udah ngasuh Moses madahka jaku tu ngagai sida: “Kita tu orang ke kieh. Enti Aku bejalai sama enggau kita sekejap aja, Aku deka munuh kita abis lengis. Nya alai buka semua perengka emas ti dikena kita. Aku deka bekiraka utai ti deka dikereja Aku ngagai kita.” Nya alai, udah bekau sida ke angkat ari Bukit Sinai, orang Israel nadai agi bekenaka perengka emas. Genap kali orang Israel nirika kem, Moses ngambi Langkau Kain TUHAN ti kudus nya, lalu nirika iya jauh mimit ari luar kem. Langkau Kain nya dikumbai Langkau Kain TUHAN, lalu barang sapa deka betanyaka utai ngagai TUHAN, enda tau enda pansut ari kem lalu mansang ngagai Langkau Kain nya. Genap kali Moses mansang ngagai Langkau Kain nya, orang mayuh bediri ba mua pintu langkau kain sida empu, lalu nengkilaka Moses mupuk, datai ke iya udah tama ngagai Langkau Kain TUHAN. Lebuh Moses udah tama, gentilang remang nurun lalu bediri ba mua pintu Langkau Kain nya, lalu TUHAN bejaku ngagai Moses. Lebuh orang mayuh meda gentilang remang nya bediri di penama ngagai Langkau Kain TUHAN, sida meremi. TUHAN bejaku betunga mua enggau Moses, baka orang ke bejaku enggau pangan. Udah nya, Moses pulai ngagai kem. Tang orang bujang ti nyadi penyaup Moses, Josua anak Nun, diau dalam Langkau Kain TUHAN. Ku Moses bejaku enggau TUHAN, “Nuan sigi amat udah ngasuh aku nguluka bala orang tu ngagai menua nya, tang Nuan enda madahka sapa ke diasuh Nuan bejalai enggau aku. Nuan udah madahka Diri amat nemu sereta rinduka aku. Nya alai enti Nuan amat rinduka aku, padahka pelan Nuan ngagai aku, ngambika aku ulih nemu Nuan enggau dalam agi lalu majak ngerinduka ati Nuan. Ingatka Diri ti udah milih bansa orang tu ke Nuan Empu.” Ku TUHAN bejaku, “Aku Empu deka bejalai enggau nuan, lalu Aku deka ngasuh nuan belelak.” Disaut Moses, “Enti Nuan enda bejalai enggau kami, anang ngasuh kami angkat ari endur tu. Baka ni ku orang tau nemu Nuan rinduka bala nembiak Nuan tu, lalu rindu mega ke aku, enti Nuan enda bejalai enggau kami? Enti Nuan bejalai enggau kami, nya deka nunjukka kami tu lain ari orang bansa bukai di dunya tu.” Ku TUHAN bejaku ngagai Moses, “Aku deka ngereja utai ti dipinta nuan, laban Aku amat nemu nuan, lalu Aku amat lantang ati ke nuan.” Udah nya Moses lalu bejaku, “Awakka aku meda mulia Nuan.” Disaut TUHAN, “Aku deka ngasuh mulia Aku mansa mua nuan, lalu di mua nuan empu, Aku deka nyebut nama Aku ti kudus. Aku tu TUHAN, lalu Aku deka ngayanka pengasih enggau penyiru Aku ke orang ke dipilih Aku. Aku enda ngasuh nuan meda mua Aku, laban nadai orang ulih idup enti iya meda mua Aku, tang ba semak Aku bisi siti endur, alai nuan tau bediri ba atas batu. Lebuh mulia Aku mansa, Aku deka nyimpan nuan dalam lubang batu nya, lalu mungkur nuan ngena jari Aku, datai ke Aku udah ngelebus. Udah nya Aku deka matak jari Aku baru, lalu nuan deka meda belakang Aku, tang enda meda mua Aku.” Ku TUHAN bejaku ngagai Moses, “Tetak dua iti lampang batu baka ke terubah. Aku deka nuliska ba lampang batu nya leka jaku baka ke udah ditulis ba dua iti lampang batu ti terubah, ti dipechahka nuan. Tumu pagi hari pagila nuan enda tau enda sedia, lalu niki ngagai Bukit Sinai lalu betemu enggau Aku ba tuchung bukit nya. Nadai orang tau datai enggau nuan, tauka bisi ba bukit nya. Indah jelu sapi enggau jelu bedus deh enda tau ditejuka ngulam ba kaki bukit nya.” Nya alai Moses lalu ningkuh dua iti lampang batu, lalu tumu pagi hari siti, iya mai lampang batu nya ngagai Bukit Sinai, nitihka asuh TUHAN. TUHAN nurun dalam mua hari, bediri dia enggau Moses, lalu madahka nama Diri ti kudus, iya nya TUHAN. Udah nya TUHAN mansa mua Moses, lalu ngangau, “Aku tu TUHAN Allah Taala ti kasih sereta siru, lubah ringat, sereta mandangka penetap ati enggau pengerindu ti besai. Aku deka tetap rinduka beribu-ribu serak lalu ngampun penyai enggau dosa, tang Aku tetap deka ngukum anak enggau uchu ngagai ketiga enggau keempat serak ketegal dosa apai indai sida.” Moses lalu beguai-guai meremi ke tanah, lalu nyembah TUHAN. Ku iya, “O TUHAN, enti Nuan amat rinduka aku, aku minta Nuan bejalai enggau kami. Orang tu kieh, tang ampun penyai enggau dosa kami, lalu terima meh kami tu nyadika nembiak Nuan.” Ku TUHAN bejaku ngagai Moses, “Diatu Aku ngaga siti sempekat enggau orang Israel. Aku deka ngereja utai ti besai di mua sida baka ke nadai udah kala dikereja ba semua orang bansa bukai di dunya tu. Semua bansa deka meda pemesai utai ti dikereja Aku ti TUHAN, laban Aku deka ngereja utai ti amat besai ke kita. Kita enda tau enda ngasika pesan ti deka diberi Aku ngagai kita sehari tu. Aku deka muru orang Amor, orang Kanaan, orang Iti, orang Peris, orang Ibi, enggau orang Jebus, lebuh kita nyerang. Anang ngaga sempekat enggau bansa orang ke nguan menua ti digagai kita, laban sempekat nya deka nyadi panjuk ti tau munuh kita. Tang kita enda tau enda ngeruntuhka alta sida, ngerusak tiang sida, lalu nebang tiang keramat sida. “Anang nyembah petara bukai, laban Aku tu TUHAN ti chemburu. Anang ngaga sempekat enggau orang ke diau di menua nya, laban lebuh sida nyembah lalu ngenjuk piring ngagai petara sida, sida deka mai kita sama enggau sida, lalu kita deka tetengukka pemakai ti diberi sida ngagai petara sida. Enti anak lelaki kita jadi enggau indu orang bansa bukai, sida deka mai anak lelaki kita ninggalka Aku, lalu nyembah petara sida. “Anang ngaga engkeramba ari besi lalu anang nyembah sida. “Intu Gawai Roti Ti Enda Beragi. Munyi ti udah dipadahka Aku ngagai kita, empa roti ti enda beragi dalam kandang tujuh hari dalam bulan Abip, laban nya bulan kita angkat ari menua Ejip. “Genap iku anak tuai kita ke lelaki, enggau genap iku anak tuai ti lelaki ari jelu tupi kita, endang enggi Aku magang, tang kita enda tau enda meli pulai baru genap iku anak tuai keledai kita ngena siku anak domba kena nyilih iya. Enti kita enda meli iya pulai baru, patahka rekung iya. Beli pulai baru semua anak tuai kita ke lelaki. “Nadai orang tau datai ngagai Aku enti iya enda mai piring. “Kita bisi enam hari alai kita gawa, tang anang gawa ba hari ti ketujuh, nemuka nya maya ngeradu tanah tauka lebuh maya ngetau. “Intu Gawai Ngetau lebuh kita baru deka belabuh ngetau, lalu intu Gawai Belangkau lebuh musin ruruh daun, lebuh kita ngumpul buah kita. “Tiga kali dalam setaun semua lelaki ari bala kita enda tau enda datai nyembah Aku TUHAN Allah Taala ke disembah orang Israel. Lebuh Aku udah muru semua bansa bukai lalu ngerembaika rampa menua kita, nadai orang deka nguji ngalahka menua kita lebuh kita ngintu gawai tiga bengkah tu. “Anang meri roti ti beragi lebuh kita meri jelu nyadika piring ngagai Aku. Anang ngalau ngagai pagi hari siti isi jelu ti udah disayat kita lebuh Gawai Paska. “Genap taun bai ngagai Rumah TUHAN utai ti terubah diketau kita. “Anang manduk anak domba tauka anak kambin ngena ai tusu indai iya empu.” Ku TUHAN bejaku ngagai Moses, “Tuliska leka jaku tu, laban Aku ngaga sempekat tu enggau nuan sereta enggau orang Israel, beduduk ba leka jaku tu.” Moses diau dia enggau TUHAN empat puluh hari empat puluh malam, nadai makai, nadai ngirup. Iya nuliska ba lampang batu nya semua leka jaku sempekat nya, iya nya Sepuluh Pesan. Lebuh Moses nurun ari Bukit Sinai, mai Sepuluh Pesan nya, mua iya beperenching laban iya udah bejaku enggau TUHAN. Tang iya enda nemu mua diri beperenching. Aron enggau semua orang mayuh bela merening ngagai Moses, lalu meda mua iya beperenching, lalu sida takut datai semak ngagai iya. Tang Moses ngangauka sida, lalu Aron enggau semua tuai bansa mansang ngagai iya. Moses lalu bejaku enggau sida. Udah bekau nya, semua orang Israel lalu begelumu ngelingi iya. Moses lalu meri ngagai sida semua pesan ti udah diberi TUHAN ngagai iya ba Bukit Sinai. Lebuh Moses udah bejaku enggau sida, iya mampul mua diri ngena kain. Genap kali Moses tama ngagai Langkau Kain TUHAN, deka bejaku ngagai TUHAN, iya muka kain ti dikena iya mampul mua iya. Lebuh iya pansut, iya madahka ngagai orang Israel semua utai ti udah diasuh TUHAN sebut iya, lalu sida meda mua iya beperenching. Udah nya iya mampul mua iya baru nyentuk ngagai maya iya bejaku baru enggau TUHAN. Moses ngempuruka semua orang Israel, lalu bejaku enggau sida, “Tu utai ti udah diasuh TUHAN kereja kita: Kita bisi enam hari alai kita gawa, tang hari ti ketujuh nya hari ti kudus, hari kita diau, hari ti diserahka kita ngagai Aku ti TUHAN. Barang sapa gawa ba hari nya, deka dibunuh. Indah nungkunka api dalam rumah kita deh kita enda tau lebuh Hari Sabat.” Ku Moses bejaku enggau semua orang Israel, “Tu utai ti udah dipesanka TUHAN: Beri pemeri ngagai TUHAN. Genap iku orang ke deka meri pemeri, enda tau enda mai pemeri emas, pirak tauka temaga; kain linin ti alus; bulu bedus ti biru, ungu enggau mirah; kain ti digaga ari bulu kambin; kulit bedus ti lelaki, ti udah dichat mirah; kulit jelu ti udah digaga alus; kayu akasia; minyak ke lampu; rempah kena ngaga minyak tata, enggau menyan ti bebau rengut; batu unam enggau batu berega ti bukai ti deka dilekatka ba epod enggau ba terabai dada Imam Besai. “Semua orang ari bala kita ke landik begagaka utai, enda tau enda datai, lalu ngaga semua utai ti udah diasuh TUHAN, nyengkaum: langkau sembiang, tudung ke Langkau sembiang nya, enggau tudung ti ari luar, pengait enggau papan ke langkar langkau nya, alang ke langkar nya, tiang, enggau pelasar ke tiang nya; Peti Lampang Batu Adat, kayu ti dikena ngaling iya, tudung iya, enggau kain tirai kena ninding iya; mija, kayu ti dikena ngaling mija nya, enggau semua pekekas ke mija nya; roti ti diberi ngagai Allah Taala; penuduk lampu, enggau pekekas iya; lampu enggau minyak ke lampu nya; alta alai nunu menyan, enggau kayu ti dikena ngaling alta nya; minyak tata; menyan ti bebau rengut; tirai kena ninding mua pintu langkau sembiang nya; alta alai nunu piring tunu, enggau gelegar ti digaga ari temaga, ti digantung ari alta nya, kayu ti dikena ngaling alta nya, enggau semua pekekas iya; bisin alai bebasu enggau penuduk iya; kain tirai kena ninding tengah laman, tiang alai ngantung tirai enggau pelasar ke tiang nya; kain tirai ke mua pintu penama ngagai tengah laman nya; tiang bantilka langkau sembiang nya, enggau tali ti dikena mantilka Langkau Kain nya, enggau kena mantilka kain tirai ti ninding tengah laman nya; enggau pekayan ti manah amat ti deka dikena bala imam lebuh sida bekereja dalam Endur ti Kudus, iya nya gari ti kuduska Imam Aron enggau bala anak lelaki iya.” Semua orang Israel lalu angkat ari endur nya, lalu semua orang ke deka meri pemeri, datai mai pemeri sida ngagai TUHAN kena begagaka Langkau Kain TUHAN. Sida mai semua utai ti diguna kena nyembah Allah Taala, enggau kena begagaka pekayan imam. Semua orang ke deka, ti lelaki enggau ti indu, mai pin tambit kain, antin, tinchin, tenggak, enggau semua macham perengka emas, lalu nyerahka semua utai nya ngagai TUHAN. Semua orang ke bisi ubung linin ti alus; bulu bedus ti bechura biru, ungu tauka mirah; kain ti digaga ari bulu kambin; kulit bedus ti lelaki ti udah dichat mirah; tauka kulit jelu ti udah dialuska, mai utai nya. Semua orang ke ulih meri pirak tauka temaga, mai pemeri sida ngagai TUHAN, lalu semua orang ke bisi kayu akasia, ti tau diguna kena begagaka utai, mai utai nya. Semua indu ke landik begagaka utai, mai ubung linin ti alus, enggau ubung bulu bedus ti bechura biru, ungu enggai mirah, ti udah digaga sida. Sida mega begagaka ubung ari bulu kambin. Bala tuai orang Israel lalu mai batu unam enggau batu berega ti bukai, ti deka dilekatka ba epod, enggau ba terabai dada, enggau rempah, enggau minyak ke lampu, minyak kena ngaga minyak tata, enggau menyan ti bebau rengut. Semua orang Israel ti deka, datai mai pemeri sida ngagai TUHAN, kena ngereja pengawa ti udah diasuh TUHAN kereja Moses. Ku Moses bejaku enggau orang Israel, “ TUHAN udah milih Besalel anak Uri, uchu Hur, ari raban bansa Judah. Allah Taala udah ngemenuhka iya enggau kuasa Iya lalu udah meri iya penau, pengelandik, enggau penemu kena iya ngereja semua pengawa begagaka utai, kena iya begagaka pelan, lalu nguna pelan nya begagaka perengka emas, pirak enggau temaga; kena iya netak batu ti berega ti deka dilekatka; ngukir kayu; enggau pengawa bukai. TUHAN udah meri ngagai iya enggau ngagai Oholiap anak Ahisamak, ke ari raban bansa Dan, pengelandik ngajar orang bukai begagaka utai. Iya udah meri seduai iya pengelandik ngereja semua macham pengawa ti dikereja orang ke betebukka utai, nengkebang, betenun ngena ubung linin ti alus; bulu bedus ti bechura biru, ungu enggau mirah; enggau ngena kain ti bukai. Seduai iya landik ngereja semua macham pengawa, lalu seduai iya landik nengkebang. “Besalel, Oholiap, enggau semua orang ke gawa, ti udah diberi TUHAN pengelandik enggau penemu ngereja semua macham pengawa begagaka Langkau Kain TUHAN, enda tau enda ngaga semua utai nya nitihka jaku TUHAN.” Moses mesanka Besalel, Oholiap, enggau semua orang bukai ke bisi pengelandik, ti udah diberi TUHAN penau sereta bisi ati deka nulung, lalu ngasuh sida berengkah gawa. Sida nerima ari Moses semua pemeri ti udah dibai orang Israel kena begagaka Langkau Kain TUHAN. Tang orang Israel majak mai pemeri sida ngagai Moses tiap pagi. Udah nya orang ke landik ngereja pengawa begagaka Langkau Kain TUHAN mansang lalu madahka ngagai Moses, “Utai ti diberi orang mayuh kena ngereja pengawa ti diasuh TUHAN, nyau lebih ari chukup.” Moses lalu ngirumka pesan ngagai serata kem nya, enda ngasuh orang meri utai agi kena begagaka Langkau Kain TUHAN. Nya alai orang mayuh lalu badu agi mai utai kia. Utai ti udah dibai kia nyau lebih ari chukup kena nembuka semua pengawa nya. Orang ke pemadu landik ari bala orang ke gawa lalu ngaga langkau sembiang nya ari sepuluh lambar kain linin ti alus, enggau ari bulu bedus ti bechura biru, ungu enggau mirah, lalu disulam enggau gambar bala melikat cherub ti besayap. Semua lambar kain nya sebaka pemesai magang. Pemanjai iya 14 meter, lalu buka iya 2 meter. Sida nyait lima lambar ari sepuluh lambar kain nya nyadika siti bidang, lalu nyait lima lambar ti bukai nyadi bidang ti kedua. Sida ngaga rambing ari kain ti biru ba tisi siti-siti bidang. Sida ngelekatka lima puluh iti rambing ba siti bidang, enggau lima puluh iti rambing ti senimbal enggau sida nya, ba tisi kain ti ba bidang ti kedua. Sida ngaga lima puluh iti pengait emas, ti dikena sida bejantilka dua iti bidang kain nya nyadi siti langkau sembiang. Udah nya, sida ngaga siti tudung ke langkau sembiang nya ari sebelas iti lambar kain ti digaga ari bulu kambin. Sida ngaga semua lambar kain nya sebaka pemesai magang: pemanjai iya 15 meter, lalu buka iya 2 meter. Sida nyait lima lambar ari kain nya nyadi siti bidang, lalu lima lambar ti bukai nyadi bidang ti kedua. Sida ngelekatka lima puluh iti rambing ba tisi lambar kain ti tisi bendar, enggau lima puluh iti rambing ba tisi bidang ti bukai. Sida ngaga lima puluh iti pengait temaga, kena bejantilka dua iti bidang kain nya, ngambika dua iti bidang nya nyadi siti tudung. Sida mega ngaga dua iti tudung kena map tudung nya, siti ari kulit jelu bedus ti lelaki, ti udah dichat mirah, enggau siti ari kulit jelu ti alus, nyadika tudung ti ari luar bendar. Sida ngaga langkar ti bediri ke langkau sembiang nya ari kayu akasia. Pemanjai siti-siti kayu langkar nya 4 meter, lalu buka iya 66 sentimeter, sereta bisi dua iti cherebut, ngambika kayu langkar nya tau dipejantilka enggau pangan diri. Semua kayu langkar ke langkau sembiang nya bisi cherebut magang. Sida ngaga dua puluh iti kayu langkar ke tisi ti muak ke selatan enggau empat puluh iti pelasar pirak ti diengkah di baruh langkar nya, dua iti pelasar di baruh siti-siti kayu langkar, endur alai ngunjamka cherebut ti dua iti ti ba kayu langkar nya. Sida ngaga dua puluh iti kayu langkar ke tisi ti muak ke utara ke langkau sembiang nya enggau empat puluh iti pelasar pirak, dua iti di baruh siti-siti kayu langkar. Ke dinding ti di belakang langkau sembiang nya, ti muak ke barat, sida ngaga enam iti kayu langkar. Dua iti ari kayu langkar digaga nyadika sukut langkau sembiang nya. Langkar ti ba sukut tu bejantil ari baruh nyentuk ke puchuk. Kayu langkar ti dua iti nya, ke dua iti sukut nya, digaga ngena chara nya. Nya alai, lapan iti kayu langkar enggau enam belas iti pelasar pirak, dua iti di baruh siti-siti kayu langkar. Sida ngaga lima belas iti alang dinding ari kayu akasia, lima iti ke langkar ti ba tisi siti-siti ke langkau sembiang nya, lima iti ke langkar ba tisi siti, enggau lima iti langkar ke tisi ti muak ke barat, ti di belakang langkau sembiang nya. Alang ti ba tengah-tengah, ti diengkah ngenyauh nya ke atas, ngenyauh nya ke baruh, diengkah sepemanjai tisi Langkau Kain nya, ari ujung siti ngagai ujung siti. Sida nyampak kayu langkar Langkau Kain nya enggau emas, lalu ngelekatka chengkerung emas ba kayu langkar nya alai ngerasukka alang dinding. Alang dinding nya mega disampak enggau emas. Sida ngaga kain tirai ari kain linin ti alus, bulu bedus ti bechura biru, ungu enggau mirah, lalu disulam enggau gambar bala melikat cherub ti besayap. Sida ngaga empat batang tiang ari kayu akasia kena nuatka kain tirai nya, nyampak tiang nya enggau emas, lalu ngelekatka pengait emas ba tiang nya. Udah nya sida lalu ngaga empat iti pelasar pirak alai nudukka tiang nya. Ke pintu penama ngagai Langkau Kain nya, sida ngaga siti kain tirai ari linin ti alus, bulu bedus ti bechura biru, ungu enggau mirah, lalu dilagu ngena sulam. Sida ngaga lima batang tiang ke kain tirai tu. Siti-siti tiang bisi dilekatka pengait. Puchuk enggau batang tiang nya disampak enggau emas, lalu sida ngaga lima iti pelasar temaga ke tiang nya. Besalel ngaga Peti Lampang Batu Adat nya ari kayu akasia. Pemanjai iya 110 sentimeter; buka iya 66 sentimeter, lalu peninggi iya 66 sentimeter. Besalel nyampak Peti Lampang Batu Adat nya enggau emas ti tulin, ari luar enggau ari dalam, lalu ngelekatka lilit emas ngelingi Peti nya. Iya ngaga empat iti chengkerung emas kena ngesan Peti nya, lalu ngelekatka chengkerung nya ngagai empat iti kaki ke Peti nya, dua iti chengkerung ba tisi siti-siti. Iya ngaga kayu kena ngesan Peti nya ari kayu akasia, ti disampak iya enggau emas, lalu dirasukka iya ngagai chengkerung ti ba siti-siti tisi Peti nya. Iya ngaga tudung ke Peti nya ari emas ti tulin. Pemanjai tudung nya 110 sentimeter, lalu buka iya 66 sentimeter. Besalel nempa dua iku melikat cherub ti besayap, ari emas, siku ke tiap iti puting tudung nya. Iya ngaga melikat dua iku nya selajur enggau emas ti dikena ngaga tudung nya empu. Melikat cherub ti besayap nya betunga mua enggau pangan diri ba atas tudung nya, lalu sayap seduai iya ngerembai mungkur tudung nya. Besalel ngaga mija nya ari kayu akasia. Pemanjai mija nya 88 sentimeter. Buka iya 44 sentimeter, lalu peninggi iya 66 sentimeter. Besalel nyampak mija nya enggau emas ti tulin, lalu ngaga lilit emas ngelingi mija nya. Iya ngaga bingkai, buka 7.5 sentimeter, ngelingi mija nya, lalu ngaga lilit ba semua tisi bingkai nya. Iya ngaga empat iti chengkerung emas kena ngaling mija nya, lalu ngelekatka chengkerung nya ba empat iti kaki ti ba sukut mija nya. Chengkerung emas ti dikena ngaling mija nya diengkah semak bingkai mija nya. Iya ngaga kayu pengaling ke mija nya ari kayu akasia, ti disampak iya enggau emas. Iya ngaga semua chapak ke mija nya ari emas ti tulin: nyengkaum pinggai, mangkuk, tepayan, enggau mangkuk ti dikena ngenjuk piring wain. Besalel ngaga penuduk lampu ari emas ti tulin, lalu ngaga penuduk enggau batang penuduk lampu nya ari emas ti ditempa. Bungai ti dikena ngias penuduk lampu nya, nyengkaum kuntum enggau serindak bungai, ditempa selajur ari emas ti dikena ngaga penuduk lampu nya empu. Enam iti dan pansut ari tisi penuduk lampu nya, tiga iti ari sepiak-sepiak. Genap iti dan nya bisi tiga iti bungai kena ngias iya, digaga baka gamal bungai almon, ti bisi kuntum enggau serindak. Batang penuduk lampu nya bisi empat iti bungai kena ngias iya. Bungai nya baka gamal bungai almon, lalu bisi kuntum enggau serindak. Siti kuntum digaga ari baruh siti gerempung dan. Kuntum bungai nya, dan iya, enggau penuduk lampu nya ditempa selajur ari siti lumpung emas. Iya ngaga tujuh iti lampu ke penuduk lampu nya, lalu iya ngaga sepit enggau talam ari emas ti tulin. Iya ngena 34 kilogram emas ti tulin begagaka penuduk lampu, enggau semua pekekas ke penuduk lampu nya. Besalel ngaga siti alta ari kayu akasia, alai nunu menyan. Mija nya besegi empat. Pemanjai iya 45 sentimeter; buka iya 45 sentimeter, lalu peninggi iya 90 sentimeter. Tanduk mija nya, ti ba empat iti sukut mija nya, digaga selajur enggau isi mija nya empu. Iya nyampak puchuk, semua empat iti tisi, enggau tanduk mija nya enggau emas ti tulin, lalu ngelekatka lilit emas ngelingi mija nya. Iya ngaga dua iti chengkerung emas kena ngaling mija nya, lalu ngelekatka chengkerung nya ari baruh lilit ti ba tisi dua iti, alai ngerasukka kayu ti dikena ngaling mija nya. Iya ngaga kayu pengaling ke mija nya ari kayu akasia, ti disampak iya enggau emas. Iya mega ngaga minyak tata ti kudus, enggau menyan ti bebau rengut, dichampur enggau minyak wangi. Besalel ngaga siti alta ari kayu akasia, alai nunu piring. Alta nya besegi empat. Pemanjai iya 2 meter, buka iya 2 meter lalu peninggi iya 1 meter. Besalel ngaga tanduk ba atas empat iti sukut alta nya, selajur enggau isi alta nya empu. Iya nyampak semua alta nya enggau temaga. Iya mega begagaka semua pekekas ke alta nya: talam alai engkah amau, pekekas kena ngauk amau, mangkuk, pengait, enggau talam alai engkah bara api. Semua pekekas nya digaga ari temaga magang. Iya ngaga gelegar ari temaga, lalu ngelekatka gelegar nya ari baruh bingkai alta nya, ngenyauh nya ke atas, ngenyauh nya ke baruh. Iya ngaga empat iti chengkerung kena ngaling alta nya. Chengkerung nya dilekatka iya ba empat iti sukut alta nya. Iya ngaga kayu pengaling ke alta nya, ari kayu akasia, ti disampak iya enggau temaga. Kayu pengaling nya dirasukka ngagai chengkerung ti ba tisi alta nya. Alta nya digaga ari papan, lalu berumbang. Iya ngaga bisin temaga enggau penuduk ke bisin nya ari cheremin temaga ti diempu bala indu ke bekereja ba penama ngagai Langkau Kain TUHAN. Iya ngaga tirai kain linin ti alus nyadika dinding ngelingi Langkau Kain TUHAN. Ba tisi ti muak ke selatan, pemanjai tirai nya 50 meter, digantung ari dua puluh batang tiang temaga, ti duduk ba dua puluh iti pelasar temaga, lalu bisi pengait enggau simpai pirak. Dinding ke tisi ti muak ke utara sebaka enggau iya ti muak ke selatan, sama panjai 50 meter. Ba tisi ti muak ke barat, pemanjai kain tirai nya 25 meter, lalu bisi sepuluh batang tiang enggau sepuluh iti pelasar ke tiang nya, sereta bisi pengait enggau simpai pirak. Ba tisi ti muak ke timur, ba endur alai pintu penama ngagai Langkau Kain nya, pemanjai dinding nya 25 meter. Semua kain tirai ti ngelingi tengah laman nya digaga ari kain linin ti alus magang. Pelasar ke tiang nya digaga ari temaga, lalu pengait, simpai, enggau tutup ke puchuk tiang nya digaga ari pirak magang. Semua tiang ti ngelingi endur nya dipejantilka enggau pangan diri ngena sengkar pirak. Kain tirai ke pintu penama ngagai tengah laman nya digaga ari kain linin, ti ditenun ari bulu bedus ti bechura biru, ungu enggau mirah, lalu disulam. Pemanjai kain tirai nya 10 meter, lalu peninggi iya 2.5 meter, baka dinding ti ngelingi tengah laman nya. Kain tirai nya digantung ari empat batang tiang, ti duduk ba atas empat iti pelasar temaga. Pengait ke tiang nya, tutup puchuk tiang nya, enggau sengkar kena bejantilka tiang nya digaga ari pirak magang. Semua tiang bantilka langkau sembiang nya, enggau ke dinding ti ngelingi tengah laman nya, digaga ari temaga magang. Tu gaya penyampau utai ti dikena ngaga Langkau Kain TUHAN, endur alai nyimpan dua iti lampang batu ti alai Sepuluh Pesan udah ditulis. Utai nya udah dipinta Moses, lalu ditulis orang Lewi ke bekereja di baruh Itamar anak Imam Aron. Besalel anak Uri, uchu Hur, ari raban bansa Judah, ngaga semua utai ti udah diasuh TUHAN. Orang ke nulung iya, Oholiap anak Ahisamak, ari raban bansa Dan, nya endang orang ke tukang ukir, tukang nengkebang, tukang tenun ngena linin ti alus, enggau ngena bulu bedus ti bechura biru, ungu enggau mirah. Semua emas ti udah diserahka ngagai TUHAN kena ngaga Langkau Kain TUHAN, berat 1,000 kilogram, ditimbang ngena atur timbang ti udah diletak dalam Langkau Kain TUHAN. Semua pirak ti ulih ari pengawa ti ngitung tubuh orang Israel, berat 3,430 kilogram, ditimbang ngena atur timbang ti udah diletak dalam Langkau Kain TUHAN. Penyampau utai tu sebaka enggau penyampau ti udah dibayar semua orang ke udah ditulis nama lebuh ngitung tubuh. Genap iku sida nya mayar penyampau ti ditetapka nitihka atur timbang ti udah diletak dalam Langkau Kain TUHAN. Pemayuh lelaki orang Israel ke umur dua puluh taun ke atas, ke ditulis nama lebuh ngitung tubuh nya 603,550 iku. Ari semua pirak nya, 3,409 kilogram dikena ngaga seratus iti pelasar ke Langkau Kain TUHAN, enggau pelasar ke kain tirai, 34 kilogram ke siti-siti pelasar. Dua puluh tiga kilogram teda pirak nya dikena Besalel ngaga simpai enggau pengait ke tiang, enggau tutup ke puchuk tiang. Penyampau temaga ti udah diserahka ngagai TUHAN nya 2,425 kilogram. Temaga nya dikena ngaga pelasar ke pintu Langkau Kain TUHAN, kena ngaga alta temaga, enggau gelegar ke alta nya, enggau semua pekekas ti dikena ba alta nya, pelasar ke dinding ti ngelingi tengah laman enggau ke pintu penama ngagai tengah laman nya, sereta enggau semua tiang bantilka langkau sembiang nya, enggau tiang bantilka dinding tengah laman nya. Sida ngaga pekayan ke sida imam ari bulu bedus ti bechura biru, ungu enggau mirah, ngambika bisi dikena sida imam lebuh sida gawa ba Endur ti Kudus. Sida ngaga pekayan imam ke Aron nitihka pesan TUHAN ngagai Moses. Sida ngaga epod ari kain linin, bulu bedus ti bechura biru, ungu enggau mirah; enggau ari ubung emas. Sida nempa keping emas ti mipis, lalu netak keping emas nya nyadi ubung emas ti alus, ngambika bisi disulamka ngagai kain linin ti alus, enggau ngagai bulu bedus ti bechura biru, ungu enggau mirah. Sida ngaga dua iti papak tali bau ke epod, lalu ngelekatka papak tali bau nya ngagai tisi epod nya kena nanchang iya. Belulang ti udah ditenun, ti digaga ari utai ti dikena ngaga epod, dijait ngagai epod nya, ngambika belulang nya selajur enggau epod nya empu, nitihka pesan TUHAN ngagai Moses. Sida nyendiaka batu unam, lalu ngengkahka batu nya dalam sangkum emas. Nama dua belas iku anak lelaki Jakop udah ditebuk ba batu nya. Sida ngengkahka batu karnelian ba papak tali bau epod, kena ngingatka dua belas raban bansa orang Israel, nitihka pesan TUHAN ngagai Moses. Sida ngaga terabai dada ari utai ti dikena sida ngaga epod, lalu disulam sebaka enggau epod nya. Terabai dada nya besegi empat, lalu dilipat dua. Pemanjai iya 22 sentimeter lalu buka iya 22 sentimeter. Sida ngengkahka empat iti rintai batu ti berega ba terabai dada nya. Rintai ti keterubah ngundan batu akek, batu sebarajat, enggau batu berega ti mirah; ba rintai ti kedua, batu samerut, batu nilam, enggau batu intan; ba rintai ti ketiga, batu pusparagan, batu sejabu, enggau batu matis; lalu ba rintai ti keempat, batu perusah, batu unam, enggau batu asija. Sigi-sigi batu nya bisi nama siku ari bala anak lelaki Jakop, ti ditebuk ba batu nya, kena ngingatka dua belas raban bansa orang Israel. Ke terabai dada, sida ngaga rantai ari emas ti tulin, ti dibelitka baka tali. Sida ngaga dua iti sangkum emas, enggau dua iti chengkerung emas, lalu ngelekatka chengkerung emas nya ngagai sukut terabai dada nya ti di atas. Sida ngelekatka tali emas ti dua iti nya ngagai dua iti chengkerung emas nya lalu ngelekatka puting tali emas ti ari setak, ngagai sangkum emas ti dua iti nya. Nya meh chara sida nanchangka tali emas di mua, ngagai papak tali bau epod. Sida ngaga dua iti chengkerung emas, lalu ngelekatka chengkerung emas ti dua iti nya ngagai dua iti sukut terabai dada di baruh, ba tisi ti ari dalam, ti semak epod. Sida ngaga dua iti da agi chengkerung emas, lalu ngelekatka chengkerung nya ngagai tisi papak tali bau ke epod, ari baruh, semak abi jait epod, ari atas belulang ti ditenun alus. Nitihka padah TUHAN ngagai Moses, sida nanchangka chengkerung ti ba terabai dada ngagai chengkerung ti ba epod, ngena tali ti biru, ngambika terabai dada nya terengkah ba atas belulang nya, lalu enda ngelechut. Baju panjai ti dibap epod, digaga ari bulu bedus aja. Lubang alai ngerasukka pala, digaga tegap ngena bingkai ti ditenun, ngambika enda charik. Sida ngaga baju ke Aron, enggau ke bala anak lelaki iya, enggau labung, selapuk, tanchut pandak ari linin, enggau selampai ari linin ti alus, enggau ari bulu bedus ti bechura biru, ungu enggau mirah, lalu disulam, nitihka pesan TUHAN ngagai Moses. Sida ngaga, ari emas ti tulin, utai ti dikena ngelagu makota ti kudus nya, lalu sida nebukka leka jaku, “Diserahka Ngagai TUHAN ”, ba makota nya. Sida nanchangka makota nya ba mua labung, ngena tali ti biru, nitihka pesan TUHAN ngagai Moses. Semua pengawa begagaka langkau sembiang dalam Langkau Kain TUHAN pen tembu. Orang Israel udah ngaga semua utai nya nitihka pesan TUHAN ngagai Moses. Sida lalu mai langkau sembiang, enggau semua pekekas iya, pengait iya, ramu langkar, alang dinding, tiang, enggau pelasar ke tiang nya; tudung Langkau Kain nya ti digaga ari kulit bedus ti lelaki, dichat mirah; tudung ke Langkau Kain nya ti digaga ari kulit jelu ti digaga alus; kain tirai; Peti Lampang Batu Adat ti ngundan lampang batu, kayu ti dikena ngesan Peti nya, enggau tudung Peti nya; mija enggau semua pekekas iya, enggau roti ti diberi ngagai Allah Taala; penuduk lampu ti digaga ari emas ti tulin, lampu, semua pekekas enggau minyak ke lampu nya; alta ti digaga ari emas, minyak tata; menyan ti bebau rengut; kain tirai ke pintu penama ngagai Langkau Kain nya; alta enggau gelegar ti digaga ari temaga, kayu ti dikena ngaling alta nya, enggau semua pekekas ke alta nya; bisin alai bebasu, enggau penuduk iya; kain tirai ti dikena ninding tengah laman, tiang iya, enggau pelasar ke tiang nya; kain tirai ke pintu penama ngagai tengah laman nya, enggau tali bantil sida; tiang bantilka langkau sembiang nya; semua pekekas ti deka dikena dalam langkau sembiang nya, enggau dalam Langkau Kain TUHAN; enggau pekayan ti manah ti deka dikena bala imam dalam Endur ti Kudus, iya nya gari ti kuduska Aron ti nyadi imam, enggau ke bala anak lelaki iya. Orang Israel udah ngereja semua pengawa nya betul-betul nitihka pesan TUHAN ngagai Moses. Moses meresa semua utai nya, lalu meda semua utai nya udah digaga nitihka asuh TUHAN. Nya alai Moses merekatka utai nya. Ku TUHAN bejaku ngagai Moses, “Kena satu hari bulan ti kesatu, dirika langkau sembiang ke Langkau Kain TUHAN. Engkahka dalam langkau sembiang nya, Peti Lampang Batu Adat ti ngundan Sepuluh Pesan, lalu gantung kain tirai di mua Peti nya. Bai mija ngagai langkau sembiang nya, lalu engkahka pekekas ba atas mija nya. Bai mega penuduk lampu ngagai langkau sembiang nya, lalu lekatka lampu ba penuduk lampu nya. Dirika mija ti digaga ari emas, ti alai nunu menyan, di mua Peti Lampang Batu Adat, lalu gantung kain tirai di mua pintu langkau sembiang nya. Dirika mija ti alai nunu piring di mua langkau sembiang ke Langkau Kain TUHAN. Engkah bisin ti dikena bebasu ba entara Langkau Kain TUHAN enggau alta nya, lalu irika ai ngagai bisin nya. Dirika tirai ngelingi tengah laman nya, lalu gantung tirai ba pintu penama ngagai tengah laman nya. “Udah nya ambi minyak tata, lalu tata langkau sembiang nya, enggau semua utai ti dalam iya ngambika nyeraraka sida. Semua utai nya nyadi kudus magang. Udah nya, tata alta enggau semua pekekas ke mija nya kena nyerahka iya, ngambika utai nya kudus magang. Ngena chara nya mega, serahka bisin ti dikena bebasu enggau penuduk iya. “Bai Aron enggau bala anak lelaki iya ngagai penama Langkau Kain TUHAN, lalu asuh sida mandi dia. Rasukka pekayan imam ngagai Aron, tata iya. Nya meh chara nuan nyeraraka iya, ngambika iya tau gawa nyadi imam ke Aku. Bai bala anak lelaki iya, lalu rasukka baju ba sida. Udah nya, tata sida, baka chara nuan ke nata apai sida, ngambika sida tau gawa nyadi imam ke Aku. Enggau minyak tata nya, sida diserahka nyadi imam belama iya.” Moses ngereja semua utai nya nitihka asuh TUHAN. Nya alai, kena satu hari bulan ti kesatu, dalam taun ti kedua sida udah angkat ari menua Ejip, langkau sembiang nya didirika. Moses nanam pelasar ke langkau sembiang nya, nirika papan langkar iya, ngelekatka alang dinding, lalu nirika tiang ke langkau sembiang nya. Iya nganchau tudung ba atas langkau sembiang nya, lalu ngengkahka tudung ti ari luar amat ba atas langkau sembiang nya, betul-betul nitihka asuh TUHAN. Udah nya iya ngambi dua iti lampang batu Adat, lalu ngengkahka lampang batu nya dalam Peti Lampang Batu Adat. Iya ngerasukka kayu pengaling Peti ngagai chengkerung Peti, lalu ngengkahka tudung ba atas Peti nya. Udah nya iya ngengkahka Peti nya dalam langkau sembiang, lalu ngantung kain tirai. Nya meh chara iya ninding Peti Lampang Batu Adat nya, nitihka asuh TUHAN. Iya ngengkahka mija dalam Langkau Kain TUHAN, ba tisi utara langkau sembiang, di luar kain tirai, lalu ngengkahka ba atas mija nya, roti ti diserahka ngagai TUHAN, nitihka asuh TUHAN. Iya ngengkahka penuduk lampu dalam Langkau Kain TUHAN, ba tisi selatan, seberai ari mija nya. Iya lalu nungkun lampu nya di mua TUHAN, nitihka asuh TUHAN. Iya ngengkahka alta emas dalam Langkau Kain TUHAN, di mua kain tirai, lalu nunu menyan ti bebau rengut dia, nitihka asuh TUHAN. Iya ngantung kain tirai ba pintu penama ngagai langkau sembiang, lalu ngengkahka alta alai nunu piring ba mua pintu langkau sembiang ke Langkau Kain TUHAN, lalu ngenjuk piring tunu enggau piring gandum ba alta nya, nitihka asuh TUHAN. Iya ngengkahka bisin ti dikena bebasu ba entara Langkau Kain TUHAN enggau alta nya, lalu ngisi bisin nya enggau ai. Moses, Aron, enggau bala anak lelaki iya masu kaki sida dia genap kali sida tama ngagai Langkau Kain TUHAN, tauka mansang ngagai alta nya, nitihka asuh TUHAN. Moses nirika dinding ngelingi langkau sembiang enggau alta nya, lalu ngantung kain tirai ba pintu penama ngagai tengah laman. Nya meh chara iya nembuka semua pengawa nya. Udah nya mua hari lalu mungkur Langkau Kain TUHAN, lalu mulia TUHAN ngisi endur nya. Lalu Moses enda ulih tama ngagai Langkau Kain TUHAN, laban mua hari nya diau ba atas Langkau Kain nya, lalu mulia TUHAN ngemenuhka langkau sembiang. Tiap kali mua hari nya angkat ari langkau sembiang nya, orang Israel mindah kem. Seagi-agi mua hari nya mengkang ari atas Langkau Kain nya, orang Israel mengkang enda mindah ari endur nya. Sekumbang sida ke mindahka kem ari endur siti ngagai endur siti, orang Israel ulih meda mua hari TUHAN ba atas langkau sembiang nya lebuh siang hari, enggau api ti menyadi ari atas langkau sembiang nya lebuh malam hari. TUHAN ngangauka Moses, lalu bejaku ngagai iya ari Langkau Kain TUHAN. Ku Iya, “Padahka ngagai orang Israel: Lebuh orang ari bala kita mai piring ngagai TUHAN, kita deka mai jelu sapi tauka bedus tauka kambin nyadika piring kita, ari raban jelu kita empu. Enti piring nya piring tunu, iya enda tau enda nyerahka siku sapi ti lelaki, ti nadai penimpang. Iya deka nyerahka jelu nya ba penama ngagai Langkau Kain TUHAN, ngambika iya diterima di mua TUHAN. Iya deka ngengkahka jari iya ba pala jelu ti diserahka nyadika piring tunu, lalu jelu nya deka diterima nyadika genselan kena muai dosa iya. Udah nya iya deka nyayat sapi nya di mua TUHAN, lalu bala anak lelaki Aron ti nyadi imam deka nyerahka darah jelu nya ngagai TUHAN, lalu ngunsaika darah nya ngagai semua empat iti tisi alta nya, ti ba penama ngagai Langkau Kain TUHAN. Lalu orang nya deka niti kulit jelu nya, lalu ngelampang isi iya, lalu bala anak lelaki Imam Aron deka ngengkahka bara api ba alta, lalu nugungka kayu ba atas bara api nya, lalu bala anak lelaki Aron ti nyadi imam deka nusun lampang jelu nya, pala enggau lemak iya ba atas kayu ti ba atas bara api ti ba alta nya. Tang orang nya deka masu semua perengka dalam, enggau kaki jelu nya. Lalu imam deka nunu semua piring nya ba alta, nyadika piring tunu, piring ti diberi ngena api, ti bebau rengut, ti ngerinduka ati TUHAN. Enti piring tunu nya ari raban jelu iya empu, nemuka nya jelu bedus tauka kambin, iya deka meri jelu ti lelaki ti nadai penimpang, lalu iya deka nyayat jelu nya ba tisi utara alta nya di mua TUHAN, lalu bala anak lelaki Aron ti nyadi imam deka ngunsaika darah jelu nya ngagai semua empat iti tisi alta nya. Lalu iya deka ngelampang jelu nya, lalu imam deka ngengkahka lampang jelu nya, sama enggau pala sereta enggau lemak iya ba atas kayu ti ba atas bara api ti ba alta nya. Tang orang nya deka masu perengka dalam enggau kaki jelu nya. Lalu imam deka nyerahka semua piring nya, lalu nunu iya retung ba alta. Nya piring tunu, piring ti diberi ngena api, ti bebau rengut, ti ngerinduka ati TUHAN. Enti iya meri burung ngagai TUHAN nyadika piring tunu, iya meri burung puna tauka burung achang. Lalu imam nya deka mai burung nya ngagai alta lalu mulas sereta mutuska rekung burung nya, lalu nunu iya retung ba alta nya. Lalu darah burung nya deka ditejuka neritik ba tisi alta nya. Lalu iya deka muai kuman enggau bulu burung nya, lalu nibarka utai nya ngimbai tisi timur alta nya, ba endur alai ngengkahka amau. Iya deka megai burung nya ba sayap, lalu nyarikka tubuh burung nya, tang enda mutuska tubuh burung nya. Lalu imam nya deka nunu burung nya retung ba alta nya, ba atas kayu ti ba atas bara api. Nya piring tunu, piring ti diberi ngena api, ti bebau rengut, ti ngerinduka ati TUHAN. Lebuh kita ngenjuk piring gandum ngagai TUHAN, kita enda tau enda ngaga piring nya ari tepung gandum ti alus. Kita enda tau enda ngengkahka minyak kana enggau menyan ba utai nya lalu mai iya ngagai bala anak lelaki Aron ti nyadi imam. Imam ke gawa dia deka ngambi segenggam tepung enggau minyak kana enggau menyan nya, lalu nunu utai nya retung ba alta, kena ngelai utai nya udah diberi ngagai TUHAN. Bau piring tunu nya deka ngerinduka ati TUHAN. Teda piring gandum nya deka diempu bala imam, lalu nya bagi ti pemadu kudus ari piring nya, laban iya diambi ari piring tunu, ti diberi ngagai TUHAN. Lebuh kita ngenjuk piring gandum ti dipanggang, piring nya enda tau enda digaga ari tepung ti alus. Kita tau meri roti ti enda beragi, ti dichampur enggau minyak kana, tauka roti ti mipis, ti enda beragi, dipalitka enggau minyak kana. Enti piring nya roti ti dipanggang ba papak besi, iya enda tau enda digaga ari tepung ti alus dichampur enggau minyak kana, tang enda dichampur enggau ragi. Peruk utai nya, lalu tuang minyak kana ngagai utai nya lebuh kita meri utai nya nyadika piring. Enti piring gandum nya dipanduk ngena kali, iya enda tau enda digaga ari tepung ti alus enggau minyak kana. Bai piring gandum nya ngagai TUHAN, lalu beri iya ngagai imam, ti deka mai iya ngagai alta. Imam deka ngambi piring gandum nya mimit nyadika tanda semua utai nya udah diberi ngagai TUHAN, lalu iya deka nunu piring nya retung ba alta. Bau piring tunu nya deka ngerinduka ati TUHAN. Teda piring gandum nya deka diempu bala imam, lalu nya bagi ti pemadu kudus ari piring nya, laban iya diambi ari piring tunu, ti diberi ngagai TUHAN. Piring gandum ti diberi kita ngagai TUHAN, enda tau dichampur enggau ragi. Kita enda tau sekali-kali nunu ragi tauka ai manyi nyadika piring ngagai TUHAN. Piring ti digaga ari gandum ti terubah diketau kita tiap taun, deka dibai ngagai TUHAN, tang utai nya enda tau ditunu ba alta. Gerami enggau garam semua piring gandum, laban garam nandaka sempekat kita enggau Allah Taala. (Kita enda tau enda ngerami semua piring kita enggau garam.) Lebuh kita mai ngagai TUHAN piring ti digaga ari gandum ti terubah diketau kita, beri gandum ti udah digirau ba kali, tauka gandum ti udah dikisar. Tuang minyak kana, lalu geramika menyan ngagai piring nya. Piring nya piring gandum. Imam deka ngambi sebagi ari gandum ti udah dikisar nya, minyak kana, enggau semua menyan nya, kena ngelai utai nya udah nyadika piring tunu, ti diberi ngagai TUHAN. Lebuh kita meri siku ari jelu sapi kita nyadika piring pemaik ngagai TUHAN, jelu nya nadai tau bisi penimpang, nemuka sapi nya lelaki, tauka indu. Kita enda tau enda ngengkahka jari kita ba pala jelu nya, lalu nyayat iya ba penama ngagai Langkau Kain TUHAN. Bala anak lelaki Aron ti nyadi imam deka ngunsaika darah jelu nya ngagai semua empat iti tisi alta. Imam nya deka nunu semua utai nya retung ba alta begulai enggau piring tunu ba kayu ba alta nya. Bau piring tunu nya, piring ti diberi ngena api, deka ngerinduka ati TUHAN. Enti jelu bedus, tauka kambin, diberi nyadika piring pemaik, jelu nya enda tau bisi penimpang, nemuka jelu nya lelaki tauka indu. Enti kita meri siku jelu bedus, kita enda tau enda mai jelu nya ngagai TUHAN, lalu ngengkahka jari kita ba pala jelu nya, lalu nyayat iya di mua Langkau Kain TUHAN. Bala imam deka ngunsaika darah jelu nya ngagai semua empat iti tisi alta nya lalu nyerahka semua perengka tubuh jelu nya nyadika piring ti diberi ngena api ngagai TUHAN, iya nya lemak, semua lemak ti ba pun iku, ti dipipil nyempil tulang belakang iya, semua lemak ti malut perengka dalam, tungkul sengayuh, enggau lemak ti lekat ba tungkul sengayuh nya, enggau bagi ti pemadu manah ari atau jelu nya. Imam ke bekereja dia deka nunu semua utai nya ba alta, nyadika piring ti diberi ngena api ngagai TUHAN. Enti kita meri siku kambin, kita enda tau enda mai jelu nya ngagai TUHAN, lalu ngengkahka jari kita ba pala jelu nya, lalu nyayat iya di mua Langkau Kain TUHAN. Bala imam deka ngunsaika darah iya ngagai semua empat iti tisi alta lalu nyerahka semua perengka tubuh jelu nya nyadika piring ti diberi ngena api ngagai TUHAN, iya nya, semua lemak ti malut perengka dalam, semua tungkul sengayuh, enggau lemak ti lekat ba sida, enggau bagi ti pemadu manah ari atau jelu nya. Imam nya deka nunu semua utai nya ba alta, nyadika piring ti diberi ngena api, ti bebau rengut. Semua lemak diempu TUHAN magang. Kita orang Israel enda tau makai lemak tauka darah. Adat tu enda tau enda dititihka semua orang Israel belama iya, di semua endur alai sida diau. TUHAN ngasuh Moses madahka ngagai orang Israel, barang sapa bedosa lalu ngelanggar pesan TUHAN, tang ukai sengaja, enda tau enda nitihka adat tu. Enti orang ke ngereja dosa nya Imam Besai, lalu mai orang mayuh ditinggang penyalah, iya enda tau enda meri siku jelu sapi ti lelaki, ti agi biak, ti nadai penimpang, lalu ngaga jelu nya nyadika piring ti diberi ngagai TUHAN, kena muai dosa iya empu. Iya enda tau enda mai jelu sapi ti lelaki nya ngagai penama Langkau Kain TUHAN, ngengkahka jari iya ba pala jelu nya, lalu nyayat jelu nya dia, di mua TUHAN. Udah nya Imam Besai nya deka ngambi sekeda ari darah jelu nya, lalu mai darah nya ngagai Langkau Kain TUHAN. Iya deka nyepuhka tunjuk iya ngagai darah nya, lalu mechikka darah nya tujuh kali, ngagai kain tirai ti di mua Endur ti Pemadu Kudus. Udah nya iya deka malitka darah nya ngagai tanduk sukut alta ti alai nunu menyan dalam Langkau Kain TUHAN. Iya deka nuang teda darah nya ngagai kaki alta ti alai nunu piring, ba penama ngagai Langkau Kain TUHAN. Iya deka ngambi ari jelu nya semua lemak, lemak ti malut perengka dalam, semua tungkul sengayuh, enggau lemak ti malut sida, enggau bagi ti pemadu manah ari atau jelu nya. Imam nya deka mai semua lemak nya, lalu nunu iya retung ba alta ti alai nunu piring tunu, baka ke dikereja iya ngagai lemak jelu ti disayat nyadika piring pemaik. Tang iya deka ngambi kulit jelu nya, semua isi iya, pala iya, kaki iya, enggau semua perengka dalam, nyengkaum sengkilung perut iya, mai utai nya ke luar ari kem nya, ngagai endur ti tuchi, alai orang muai amau, lalu nunu utai nya dia ngena api kayu. Enti semua orang Israel bedosa, lalu salah ngelanggar siti ari pesan TUHAN, tang ukai sengaja, lalu udah nya iya ditemu, semua orang Israel enda tau enda mai siku jelu sapi ti lelaki, nyadika piring pengampun dosa. Sida deka mai utai nya ngagai Langkau Kain TUHAN. Bala tuai bansa deka ngengkahka jari sida ba pala jelu nya, lalu nyayat iya dia. Imam Besai enda tau enda mai sekeda darah jelu nya ngagai Langkau Kain TUHAN, nyepuhka tunjuk iya ngagai darah nya, lalu mechikka darah nya tujuh kali di mua kain tirai nya. Iya deka malitka darah nya ngagai tanduk sukut alta ti alai nunu menyan dalam Langkau Kain TUHAN, lalu nuang teda darah nya ba kaki alta ti alai nunu piring tunu, ba penama ngagai Langkau Kain TUHAN. Udah nya, iya enda tau enda ngambi semua lemak jelu nya, lalu nunu lemak nya retung ba alta. Iya enda tau enda ngereja sapi ti lelaki siku tu baka chara iya ti ngereja sapi ti lelaki ti digaga nyadika piring pengampun dosa. Nya meh chara iya deka ngaga piring pengampun dosa ke orang mayuh, lalu sida deka diampun. Udah nya iya enda tau enda mai jelu sapi nya ke luar ari kem nya, lalu nunu iya, baka chara iya ke nunu jelu sapi ti lelaki ti diberi kena muai dosa iya empu. Tu piring pengampun dosa ke orang mayuh. Enti orang ke ngereja dosa nya orang ke megai perintah, lalu iya salah ngelanggar siti ari pesan TUHAN, tang ukai sengaja, lalu udah nya orang nunjukka dosa nya ngagai iya, iya enda tau enda mai siku kambin ti lelaki, ti nadai penimpang, nyadika piring iya. Iya deka ngengkahka jari iya ba pala kambin nya, lalu nyayat jelu nya ba tisi utara alta nya, ba endur alai ti nyayat jelu ti digaga nyadika piring tunu. Tu piring pengampun dosa. Imam nya deka nyepuhka tunjuk iya ngagai darah jelu nya, malitka darah nya ngagai tanduk sukut alta nya, lalu nuang teda darah nya ba kaki alta nya. Udah nya iya enda tau enda nunu semua lemak jelu nya retung ba alta, baka chara iya ti ngereja jelu ti disayat nyadika piring pemaik. Nya meh chara imam nya deka ngenjuk piring pengampun dosa ke orang ke megai perintah nya, lalu orang nya deka diampun. Enti orang bedosa, lalu salah laban iya ngelanggar siti ari pesan TUHAN, tang ukai sengaja, lalu udah nya, lebuh iya dipadahka pasal dosa iya, iya enda tau enda mai siku kambin ti indu ke nadai penimpang, nyadika piring iya. Iya enda tau enda ngengkahka jari iya ba pala jelu nya, lalu nyayat jelu nya ba tisi utara alta nya, ba endur alai nyayat jelu ti diberi nyadika piring tunu. Imam deka nyepuhka tunjuk iya ngagai darah jelu nya, malitka darah nya ngagai tanduk sukut alta nya, lalu nuang teda darah nya ba kaki alta nya. Udah nya iya enda tau enda ngambi semua lemak jelu nya, baka chara iya ke ngambi lemak ari jelu ti disayat nyadika piring pemaik, lalu iya deka nunu lemak nya retung ba alta, nyadika piring ti bebau rengut ke TUHAN. Nya meh chara imam nya deka ngenjuk piring pengampun dosa ke orang nya, lalu orang nya diampun. Enti nuan mai siku jelu bedus nyadika piring pengampun dosa, jelu nya enda tau enda indu, lalu nadai penimpang. Nuan deka ngengkahka jari nuan ba pala jelu nya, lalu nyayat iya ba tisi utara alta, ba endur alai nyayat jelu ti digaga nyadika piring tunu. Imam nya deka nyepuhka tunjuk iya ngagai darah jelu nya, malitka darah nya ngagai tanduk sukut alta nya, lalu nuang teda darah nya ba kaki alta nya. Udah nya, iya deka ngambi semua lemak jelu nya, baka chara iya ke ngambi semua lemak ari jelu bedus ti disayat nyadika piring pemaik, lalu iya deka nunu lemak nya ba alta, sama enggau piring ti diberi ngena api ngagai TUHAN. Nya meh chara imam deka ngenjuk piring pengampun dosa ti udah dikereja nuan, lalu nuan deka diampun. Piring kena muai dosa diguna ba semua pekara tu. Enti orang dipanggil ngagai kot nyadika saksi, lalu iya enda madahka utai ti udah dipeda tauka didinga iya, iya deka betanggungjawapka penyalah diri. Enti orang, enggau enda sengaja, teteguka utai ti enda tuchi, baka bangkai jelu, orang nya nyadi enda tuchi sereta salah lebuh iya nemu diri udah teteguka utai nya. Enti orang, enggau enda sengaja teteguka sebarang utai ti enda tuchi ti pansut ari tubuh mensia, enda milih nama utai nya, iya salah lebuh iya nemu diri udah teteguka utai nya. Enti orang ngaga semaya ti enda menuku, enda milih nama utai ti disemaya ke iya, iya salah lebuh iya nemu diri udah ngereja utai nya. Dalam semua pekara tu, orang ke salah nya enda tau enda ngaku dosa diri, lalu kena iya mayar ukum ketegal dosa nya, iya enda tau enda mai ngagai TUHAN, siku jelu bedus ti indu, tauka kambin, nyadika piring iya. Imam deka nyerahka piring nya ke dosa orang nya. Enti orang nya enda ulih meri siku jelu bedus tauka kambin, iya enda tau enda mai ngagai TUHAN, kena iya nebus diri ari dosa nya, dua iku burung achang, tauka dua iku burung puna, siku nyadika piring pengampun dosa, lalu siku nyadika piring tunu. Iya enda tau enda mai burung dua iku nya ngagai imam, lalu utai ti terubah dikereja imam nya ngenjuk burung nya nyadika piring pengampun dosa. Iya deka mulaska rekung burung nya, tang enda mutuska rekung burung nya, lalu mechikka darah burung nya ngagai tisi alta nya. Teda darah nya deka ditejuka neritik ba kaki alta nya. Tu piring pengampun dosa. Udah nya, iya deka meri burung ti kedua nyadika piring tunu nitihka adat. Nya meh chara imam ngenjuk piring ke dosa orang nya, ngambika iya diampun. Enti orang nya enda ulih meri dua iku burung achang, tauka dua iku burung puna, iya enda tau enda mai sekilogram tepung nyadika piring pengampun dosa. Iya enda tau nyampurka minyak kana tauka menyan ngagai tepung nya, laban tepung nya piring pengampun dosa. Iya enda tau enda mai utai nya ngagai imam, ti deka ngambi segenggam ari tepung nya, kena nandaka utai nya udah diserahka ngagai TUHAN, lalu imam nya deka nunu utai nya ba alta nyadika piring ti diberi ngena api. Tu piring pengampun dosa. Nya meh chara imam ngenjuk piring ke dosa orang nya, ngambika orang nya diampun. Teda tepung nya deka diempu imam, baka piring gandum. TUHAN meri adat tu ngagai Moses. Enti orang, enggau enda sengaja, bedosa laban iya enda nyuaka bayar ti kudus ngagai TUHAN, iya enda tau enda mai ngagai TUHAN siku jelu bedus ti lelaki tauka kambin ti lelaki, ti nadai penimpang, nyadika piring kena mayar ukum penyalah. Utai nya dikira ngena duit pirak nitihka atur ti udah diletak dalam Langkau Kain TUHAN. Tu piring kena mayar ukum penyalah. Iya enda tau enda mayar utai ti enda disuaka iya, ditambahka enggau dua puluh peratus da agi. Iya enda tau enda meri utai nya ngagai imam, lalu imam deka meri jelu nya nyadika piring kena muai penyalah iya, ngambika iya diampun. Enti orang, enggau enda sengaja, bedosa ngelanggar sebarang pesan TUHAN, iya salah, lalu enda tau enda mayar ukum. Iya enda tau enda mai ngagai imam, siku jelu bedus ti lelaki tauka kambin ti lelaki, ti nadai penimpang, nyadika piring kena mayar ukum penyalah. Imam nya deka ngenjuk piring nya kena muai penyalah ti udah dikereja orang nya enggau enda sengaja, ngambika iya diampun. Nya piring kena mayar ukum penyalah ti udah dikereja iya ngelaban TUHAN. TUHAN meri adat tu ngagai Moses. Piring enda tau enda diberi enti orang bedosa ngelaban TUHAN, ketegal iya ke enggai mulaika gadai ti ditinggalka siku orang Israel ba iya, tauka iya ngenchuri utai ari orang nya, tauka iya nipu orang nya tauka iya bulaka pasal utai ti udah lenyau, lalu iya besumpah madahka diri nadai tetemuka utai nya. Iya enda tau enda mai ngagai imam, siku jelu bedus ti lelaki tauka kambin ti lelaki, ti nadai penimpang, nyadika piring kena mayar ukum penyalah ngagai TUHAN. Imam deka ngenjuk piring nya kena muai penyalah orang nya, ngambika iya diampun. TUHAN ngasuh Moses meri ngagai Aron enggau ngagai bala anak lelaki iya adat kena ngenjuk piring tunu. Piring ti ditunu nya enda tau enda ditinggalka semalam-malam nya ba alta, lalu api nya enda tau enda seruran menyadi. Udah nya imam nya deka ngerasukka baju panjai linin enggau tanchut pandak linin iya, lalu ngulihka amau ti belemak ti tinggal ba alta, lalu ngengkahka amau nya ba tisi alta. Udah nya iya deka nukar pekayan iya, lalu mai amau nya ke luar ari kem, ngagai endur ti tuchi. Api ti ba alta nya enda tau enda seruran menyadi, lalu enda tau sekali-kali ditejuka padam. Tiap pagi, imam nya deka ngengkahka kayu ba api nya, nusun piring tunu ba api nya, lalu nunu lemak nya retung nyadika piring pemaik. Api nya enda tau enda seruran menyadi ba alta nya, lalu enda tau sekali-kali ditejuka padam. Tu adat pasal ngenjuk piring gandum. Siku imam ari bala anak lelaki Aron deka ngenjuk piring gandum ngagai TUHAN, di mua alta nya. Udah nya, iya deka ngambi segenggam ari tepung enggau minyak nya, enggau menyan ti ba atas utai nya, lalu nunu utai nya retung ba alta, nyadika tanda semua utai nya udah diberi ngagai TUHAN. Bau piring nya deka ngerinduka ati TUHAN. Semua lelaki ke ari peturun Aron tau makai utai nya, datai ke belama iya, laban utai nya endang ungkup sida ari piring ti diberi ngena api ngagai TUHAN. Barang sapa negu utai nya deka nyadi kudus. TUHAN meri adat tu ngagai Moses kena nyiri anak lelaki Aron nyadi imam. Ba hari iya dichiri, iya deka meri sekilogram tepung (sebaka penyampau enggau piring ti diberi tiap hari) nyadika piring ti diberi ngagai TUHAN, setengah diberi pagi, lalu setengah diberi lemai. Piring nya enda tau enda ditunyau enggau minyak, lalu dipanggang ba lantai besi, lalu udah nya diperah, lalu diserahka nyadika piring gandum, ti bebau rengut ke TUHAN. Piring tu enda tau enda digaga genap serak peturun Aron ke bekereja nyadi Imam Besai datai ke belama iya. Utai tu enda tau enda abis ditunu retung nyadika piring ti diberi ngagai TUHAN. Nadai utai ari piring gandum ti digaga imam nya tau diempa. Semua piring nya enda tau enda abis ditunu retung. TUHAN ngasuh Moses meri ngagai Aron enggau ngagai bala anak lelaki iya adat kena ngenjuk piring ti dikena muai dosa. Jelu ti nyadika piring pengampun dosa deka disayat ba tisi utara alta, ba endur alai orang nyayat jelu ti digaga nyadika piring tunu. Piring tu pemadu kudus. Imam ke meri jelu nya nyadika piring, deka makai iya ba endur ti kudus, iya nya ba tengah laman Langkau Kain TUHAN. Barang sapa tauka sebarang utai negu isi jelu nya, deka bebadi laban kuasa pengudus utai nya. Enti gari bisi kena pechik darah jelu nya, gari nya enda tau enda dibasu ba endur ti kudus. Periuk tanah ti udah dikena manduk dagin nya, enda tau enda dipechahka. Enti periuk besi dikena, periuk nya enda tau enda diberus lalu dibasu enggau ai. Genap iku lelaki dalam ruang bilik bala imam, tau makai piring nya magang. Piring nya kudus. Tang enti darah nya bisi kena bai ngagai Langkau Kain TUHAN, lalu dikena ba pengawa muai dosa, jelu nya enda tau diempa. Iya enda tau enda ditunu retung. Tu adat kena ngenjuk piring ti dikena mayar ukum penyalah. Piring nya kudus. Jelu ti diberi nyadika piring nya, enda tau enda disayat ba tisi utara alta, ba endur alai orang ke nyayat jelu ti digaga nyadika piring tunu, lalu darah jelu nya diunsaika ngagai semua empat iti tisi alta nya. Semua lemak jelu nya enda tau enda diambi, lalu diberi ngagai TUHAN ba alta nya. Lemak nya nyengkaum lemak ti ba pun iku, lemak ti malut perengka dalam, tungkul sengayuh, enggau lemak ti malut tungkul sengayuh nya empu, enggau isi ti pemadu manah ari atau jelu nya. Imam nya deka nunu semua lemak nya retung ba alta nya, nyadika piring ti diberi ngena api ngagai TUHAN. Tu piring kena mayar ukum penyalah. Genap iku lelaki dalam ruang bilik bala imam, tau makai pemakai nya, tang utai nya enda tau enda diempa ba endur ti kudus, laban piring nya pemadu kudus. Atur tu sama tau dikena ngenjuk piring ti dikena muai dosa, enggau ngenjuk piring kena mayar ukum penyalah. Dagin nya deka diempu imam ke nyerahka piring nya ngagai TUHAN. Kulit jelu ti diberi nyadika piring tunu, deka diempu imam ke nyerahka piring nya ngagai TUHAN. Genap piring gandum, ti udah dipanggang, tauka disediaka ngena kali, tauka ba atas gelegar besi, deka diempu imam ke nyerahka piring nya ngagai Allah Taala. Tang semua piring ti digaga ari tepung gandum, ti enda dipanduk, nemuka tepung nya dichampur enggau minyak, tauka enda, deka diempu bala anak lelaki Aron ti nyadi imam, lalu enda tau enda dibagi bela entara sida. Tu adat kena ngenjuk piring pemaik, ti diserahka ngagai TUHAN. Enti kita ngaga piring tu nyadika piring terima kasih ngagai Allah Taala, kita enda tau enda meri, sama enggau jelu ti deka diberi nyadika piring, siti piring roti ti enda beragi, nemuka piring nya tuku roti ti tebal, ti digaga ari tepung ti dichampur enggau minyak kana, tauka roti ti mipis ti diunsut ngena minyak kana, tauka roti ti digaga ari tepung ti dichampur enggau minyak kana. Nambahka nya, kita enda tau enda meri tuku roti ti digaga ngena ragi. Kita enda tau enda meri sebagi ari genap macham roti nya nyadika piring ngagai TUHAN. Utai nya deka diempu imam ke mai lalu ngunsaika darah jelu nya ngagai alta. Isi jelu nya enda tau enda diempa sama hari jelu nya diberi nyadika piring. Dagin nya enda tau ditejuka enda diempa datai ngagai pagi hari siti. Enti kita mai piring pemaik kena kita ngamatka semaya, tauka nyadika piring ti diberi nitihka peneka ati diri, ukai semua utai nya patut diempa abis ba hari utai nya diberi. Teda utai nya tau diempa ba hari siti. Teda dagin ti enda abis diempa datai ngagai hari ti ketiga, enda tau enda ditunu. Enti utai nya bisi diempa ba hari ti ketiga, Allah Taala enggai nyambut piring kita. Piring nya nadai pulai ke penguntung kita, tang deka dikumbai piring ti enda tuchi, lalu orang ke makai piring nya deka betanggungjawapka penyalah nya. Enti dagin nya bisi kena tegu utai ti enda tuchi, dagin nya enda tau diempa, tang enda tau enda ditunu. Nyadi pasal dagin ti bukai, orang ke tuchi tau makai dagin nya, tang enti orang ke enda tuchi makai dagin nya, iya badu agi dikumbai nembiak Allah Taala. Lalu enti orang makai dagin ari piring tu, lalu udah bekau iya negu utai ti enda tuchi, nemuka utai nya datai ari mensia tauka ari jelu, orang nya mega badu agi dikumbai nembiak Allah Taala. TUHAN meri adat tu ngagai Moses ke orang Israel. Lemak jelu sapi, jelu bedus tauka kambin enda tau diempa. Lemak jelu ti ditemu mati, tauka mati laban jelu babas, enda tau diempa, tang tau dikena ngereja utai bukai. Laban barang sapa makai lemak jelu ti patut diberi ngagai TUHAN nyadika piring ti diberi ngena api, deka badu agi dikumbai nembiak Allah Taala. Enda milih endur alai orang Israel diau, sida enda tau sekali-kali makai darah burung tauka darah jelu. Barang sapa ngelanggar adat tu, deka badu agi dikumbai nembiak Allah Taala. Ku TUHAN bejaku ngagai Moses, Imam nya deka nunu lemak nya retung ba alta, tang isi dada nya deka diempu bala imam. Lalu pah kanan ari piring pemaik deka diberi kita ngagai imam nyadika piring. Imam ke meri darah enggau lemak ari piring pemaik, deka bempu pah nya nyadika ungkup iya. Laban Aku udah ngambi isi dada ari piring ti dibiau, enggau pah ari jelu nya, ari orang Israel, ari piring pemaik sida, lalu meri utai nya ngagai bala imam nyadika ungkup sida belama iya, ari orang Israel. Tu meh ungkup ti diberi ngagai Aron enggau bala anak lelaki iya, ari piring ti diberi ngena api ngagai TUHAN, lebuh sida udah dichiri nyadi imam bekereja ke TUHAN. Ba hari nya TUHAN ngasuh orang Israel meri sebagi ari piring nya ngagai sida imam. Tu meh adat ti enda tau enda dititihka orang Israel belama iya. Tu meh adat pasal piring tunu, piring gandum, piring pengampun dosa, piring kena mayar ukum penyalah, piring kena nyiri imam, enggau piring pemaik. TUHAN meri pesan nya ngagai Moses ba Bukit Sinai di menua puang, lebuh Iya ngasuh orang Israel ngenjuk piring sida. Ku TUHAN bejaku ngagai Moses, “Bai Aron enggau bala anak lelaki iya ngagai mua pintu Langkau Kain Aku, lalu bai pekayan imam, minyak tata, siku sapi ti lelaki ti agi biak nyadika piring pengampun dosa, dua iku bedus ti lelaki, enggau bakul ti ngundan roti ti enda beragi, lalu gempuruka semua orang Israel ba penama ngagai Langkau Kain TUHAN.” Moses lalu ngereja nitihka pesan TUHAN, lalu ngempuruka semua orang Israel ba penama ngagai Langkau Kain TUHAN. Moses lalu bejaku enggau sida, “Utai ti baru deka dikereja aku diatu nya utai ti udah diasuh TUHAN kereja aku.” Moses lalu mai Aron enggau bala anak lelaki iya ke mua, lalu ngasuh sida mandi. Iya ngerasukka baju enggau baju ti panjai ba Aron, enggau belulang ba punggung iya. Iya ngengkahka epod ba Aron, lalu nanchangka epod nya erat ngena belulang ti melit punggung Aron. Iya ngengkahka terabai dada ba Aron, lalu nyimpan Urim enggau Tumim dalam terabai dada nya. Moses ngerasukka labung ba pala Aron, lalu ba mua labung nya Moses ngelekatka perengka emas nyadika tanda ti kudus kena ngelai Aron udah diserahka ngagai TUHAN nitihka pesan TUHAN ngagai Moses. Udah nya Moses ngambi minyak tata, lalu nata langkau sembiang nya, enggau ngagai semua utai ti dalam langkau sembiang nya, kena nyerahka semua utai nya ngagai TUHAN. Moses ngambi sekeda minyak tata nya, lalu mechikka minyak nya tujuh kali ngagai alta, enggau ngagai semua pekekas alta nya, sereta enggau ngagai bisin enggau penuduk iya, kena nyerahka semua utai nya ngagai TUHAN. Moses nuang sekeda minyak tata nya ba pala Aron, kena iya nyiri Aron. Udah nya, Moses mai bala anak lelaki Aron ke mua, lalu ngerasukka baju ba sida, melitka belulang ba punggung sida, lalu nanchangka selapuk ba pala sida, nitihka pesan TUHAN. Udah nya Moses lalu mai siku jelu sapi ti lelaki, ti agi biak nyadika piring pengampun dosa. Aron enggau bala anak iya ngengkahka jari sida ba pala jelu nya. Moses lalu nyayat jelu nya, lalu ngambi sekeda darah nya, lalu ngena tunjuk iya, malitka darah nya ngagai tanduk alta, kena nyerahka alta nya ngagai TUHAN. Udah nya iya nuang teda darah nya ba kaki alta nya. Nya meh chara iya nyerahka alta nya ngagai TUHAN. Moses lalu ngambi semua lemak ti malut semua perengka dalam, isi ti pemadu manah ari atau jelu nya, enggau semua tungkul sengayuh, sereta enggau semua lemak ti malut tungkul sengayuh nya empu, lalu nunu semua utai nya retung ba alta. Iya ngambi teda bangkai jelu sapi nya, nyengkaum kulit, isi, enggau sengkilung perut, lalu nunu utai nya di luar kem, nitihka pesan TUHAN. Udah nya, Moses mai siku bedus ti lelaki nyadika piring tunu. Aron enggau bala anak lelaki iya lalu ngengkahka jari sida ba pala jelu nya. Moses lalu nyayat jelu nya, lalu ngunsaika semua darah jelu nya ngagai semua empat iti tisi alta nya. Udah nya, Moses mai bedus ti lelaki ti kedua, ti udah diungkup kena nyiri orang nyadi imam, lalu Aron enggau bala anak lelaki iya ngengkahka jari sida ba pala jelu nya. Moses lalu nyayat jelu nya, ngambi sekeda darah iya, lalu malitka darah nya ngagai rambing pending kanan Aron, ngagai tunjuk indu jari kanan iya, enggau ngagai tunjuk indu kaki kanan iya. Udah nya, Moses mai bala anak lelaki Aron ke mua, lalu malitka darah nya mimit ngagai rambing pending kanan sida, ngagai tunjuk indu jari kanan, enggau tunjuk indu kaki kanan sida. Udah nya Moses ngunsaika teda darah nya ngagai semua empat iti tisi alta. Iya ngambi lemak, lemak ti ba pun iku, semua lemak ti malut semua perengka dalam, isi atau ti pemadu manah, semua tungkul sengayuh, enggau lemak ti malut sida, enggau kaki belakang ti ari kanan. Udah nya iya ngambi siti tuku roti ari bakul ti ngundan roti ti enda beragi, ti udah diserahka ngagai TUHAN, siti tuku roti ti digaga ngena minyak, enggau sesingkap roti ti mipau, lalu ngengkahka semua utai nya ba atas lemak enggau kaki belakang ti ari kanan. Iya ngengkahka semua pemakai nya ba jari Aron, enggau ba jari bala anak lelaki iya, lalu sida nyerahka semua utai nya nyadika piring ngagai TUHAN. Udah nya Moses ngambi pemakai nya ari sida, lalu nunu utai nya ba alta, atas piring tunu, nyadika piring kena nyiri sida. Tu nyadika piring ti diberi ngena api, lalu bau iya ngerinduka ati TUHAN. Udah nya Moses lalu ngambi isi dada, lalu nyerahka utai nya ngagai TUHAN nyadika pemeri ti manah. Tu ungkup ke Moses ari bedus ti dikena nyiri bala imam. Moses ngereja semua utai nya nitihka pesan TUHAN. Moses lalu ngambi minyak tata, enggau darah ari alta, lalu mechikka utai nya ngagai Aron enggau ngagai bala anak lelaki iya, enggau ngagai pekayan sida. Nya meh chara Moses nyerahka sida enggau pekayan sida ngagai TUHAN. Ku Moses bejaku enggau Aron enggau bala anak lelaki iya, “Bai isi dagin nya ngagai penama Langkau Kain TUHAN. Panduk dagin nya, lalu empa iya dia, sama enggau roti ti ari bakul piring ti dikena nyiri bala imam, nitihka pesan TUHAN. Tunu teda dagin tauka teda roti. Kita enda tau angkat ari penama ngagai Langkau Kain TUHAN dalam kandang tujuh hari, nyentuk ngagai maya pengawa nyiri imam udah tembu. TUHAN udah ngasuh kitai ngereja utai baka ke udah dikereja kitai sehari tu tadi, kena muai dosa kita. Kita enda tau enda diau ba penama ngagai Langkau Kain TUHAN, siang malam, dalam kandang tujuh hari, ngereja utai ti udah diasuh TUHAN. Enti kita enda, kita deka mati. Tu utai ti udah dipadahka TUHAN ngagai aku.” Nya alai Aron enggau bala anak lelaki iya, ngereja semua utai ti udah dipadahka TUHAN ngena Moses. Sehari udah tembu pengawa nyirika imam, Moses mesanka Aron enggau bala anak lelaki iya, enggau bala tuai orang Israel. Ku iya bejaku enggau Aron, “Bai siku sapi ti lelaki, enggau siku bedus ti lelaki, ti nadai penimpang, lalu beri sida ngagai TUHAN. Sapi ti lelaki nya nyadika piring pengampun dosa, lalu bedus ti lelaki nya nyadika piring tunu. Udah nya, asuh orang Israel mai siku kambin ti lelaki nyadika piring pengampun dosa, siku anak sapi ti umur setaun, enggau siku anak domba ti umur setaun, ti nadai penimpang, nyadika piring tunu, enggau siku sapi ti lelaki enggau siku bedus ti lelaki nyadika piring pemaik. Sida enda tau enda nyerahka piring nya ngagai TUHAN, sama enggau piring gandum ti dichampur enggau minyak. Sida enda tau enda ngereja utai tu, laban TUHAN deka pegari di mua sida sehari tu.” Sida lalu mai ngagai penama Langkau Kain TUHAN semua utai ti diasuh Moses, lalu semua orang Israel begempuru dia nyembah TUHAN. Ku Moses bejaku, “ TUHAN udah ngasuh kita ngereja semua utai tu, ngambika mulia Iya pegari di mua kita.” Udah nya, Moses bejaku enggau Aron, “Alai nuan mansang ngagai alta, lalu beri piring pengampun dosa, enggau piring tunu kena muai dosa nuan, enggau dosa orang mayuh. Beri piring nya kena muai dosa orang mayuh, nitihka pesan TUHAN.” Aron lalu mansang ngagai alta, lalu nyayat sapi ti lelaki ti agi biak nya, ti diungkup nyadika piring pengampun dosa iya empu. Bala anak lelaki iya lalu mai darah jelu nya ngagai iya. Iya lalu nyepuhka tunjuk iya ngagai darah nya, malitka darah nya ngagai tanduk sukut alta, lalu nuang teda darah nya ba kaki alta nya. Udah nya, iya lalu nunu lemak, semua tungkul sengayuh, enggau isi atau ti pemadu manah retung ba alta nya, nitihka pesan TUHAN ngagai Moses. Tang iya nunu isi, enggau kulit jelu nya, di luar kem. Iya nyayat jelu ti digaga nyadika piring tunu ke iya empu. Bala anak lelaki iya mai darah jelu nya ngagai iya, lalu iya ngunsaika semua darah nya ngagai semua empat iti tisi alta. Sida nyuaka ngagai iya pala enggau perengka bukai ari jelu nya, lalu iya nunu utai nya retung ba alta nya. Udah nya, iya masu semua perengka dalam, enggau kaki belakang, lalu nunu utai nya retung ba alta, ba atas semua piring tunu nya. Udah nya, iya nyerahka semua piring ti diberi orang mayuh. Iya ngambi siku kambin ti diungkup kena muai dosa orang mayuh, nyayat jelu nya, lalu nyerahka jelu nya, baka ke udah dikereja iya ngagai piring ti dikena muai dosa iya empu. Iya mega mai jelu kena ngaga piring tunu, nitihka adat. Iya nyerahka piring gandum, lalu ngambi segenggam tepung, lalu nunu tepung nya retung ba alta. (Tu nambahka piring tunu ti endang diberi tiap hari.) Iya nyayat sapi ti lelaki enggau bedus ti lelaki nyadika piring pemaik ke orang mayuh. Bala anak lelaki iya mai darah jelu nya ngagai iya, lalu iya ngunsaika darah nya ngagai semua empat iti tisi alta nya. Aron ngengkahka lemak sapi ti lelaki enggau ari bedus ti lelaki nya ba atas isi dada jelu nya, lalu mai utai nya ngagai alta. Iya lalu nunu lemak jelu nya retung ba alta lalu nyerahka isi dada, enggau kaki kanan belakang nyadika piring ngagai TUHAN, ngarika bala imam, nitihka pesan Moses. Lebuh Aron udah tembu ngaga semua piring nya, iya lalu ngangkatka jari iya atas orang mayuh, lalu merekatka sida, lalu udah nya nurun ari endur nya. Moses seduai Aron lalu tama ngagai Langkau Kain TUHAN, lalu lebuh seduai iya pansut ari endur nya, seduai iya merekatka orang mayuh, lalu mulia TUHAN pegari di mua orang mayuh. Tekala nya TUHAN lalu ngasuh api datai, lalu api nya nganguska semua piring tunu, enggau semua lemak ti ba alta. Lebuh orang mayuh meda nya, semua sida nyerauh magang, lalu nyungkurka diri ke tanah nyembah TUHAN. Dua iku anak lelaki Aron, ke benama Nadap enggau Abihu, lalu mai talam siti siku kena mai bara api, ngengkahka bara api ba kali nya, meri menyan ngagai bara api nya, lalu nyerahka utai nya ngagai TUHAN. Tang api nya ukai api ti kudus, laban TUHAN apin ngasuh seduai iya meri utai nya. Tekala nya TUHAN lalu ngasuh api datai, lalu api nya nganguska seduai iya dia, di mua TUHAN. Udah nya Moses lalu bejaku enggau Aron, “Tu meh utai ti udah disebut TUHAN, lebuh Iya nyebut, ‘Semua orang ke betuaika Aku, enda tau enda masa pengudus Aku. Aku deka ngayanka mulia Aku ngagai bala nembiak Aku.’ ” Tang Aron mengkang enda bemunyi. Moses lalu mesanka Misael seduai Elsapan anak Usil, aya Aron empu, lalu bejaku enggau seduai iya. “Datai kitu, lalu bai bangkai petunggal seduai tu ke luar ari Langkau Kain TUHAN, lalu engkahka seduai iya di luar kem.” Seduai nya datai, lalu megai gari bangkai orang ke dua iku nya, lalu mai bangkai nya ke luar ari kem nya, nitihka asuh Moses. Udah nya, Moses bejaku enggau Aron, sereta enggau ngagai anak lelaki iya ke benama Eleasar enggau Itamar, “Anang nejuka buk kita enda disugu, tauka nyarikka gari kita, kena ngayanka diri ngulit. Enti kita ngereja nya, kita deka mati, lalu TUHAN deka ringat ngagai semua orang Israel. Tang orang Israel ti bukai tau ngulitka seduai iya ke mati diempa api ti datai ari TUHAN. Anang pansut ari Langkau Kain TUHAN, enggai ke kita mati, laban kita udah diseraraka ngagai TUHAN ngena minyak tata TUHAN.” Sida lalu ngasika jaku Moses. Ku TUHAN bejaku ngagai Aron “Nuan, enggau bala anak lelaki nuan, enda tau tama ngagai Langkau Kain TUHAN udah bekau kita ngirup wain tauka ai ti bisa. Enti kita tama, kita deka mati. Adat tu enda tau enda dititihka semua serak peturun nuan. Kita enda tau enda ngelala utai ti diempu Allah Taala, enggau utai ti dikena mensia, utai ti tuchi, enggau utai ti enda tuchi. Kita enda tau enda ngajar orang Israel semua adat ti udah diberi Aku ngagai kita nengah Moses. Ku Moses bejaku enggau Aron enggau ngagai dua iku anak lelaki iya ti agi idup, Eleasar seduai Itamar, “Ambi piring gandum, laluh ari pemakai ti udah diserahka ngagai TUHAN. Gaga roti ti enda beragi ngena utai nya, lalu empa roti nya ngimbai alta, laban piring nya kudus. Empa utai nya ba endur ti kudus. Utai tu endang ungkup ke kita enggau bala anak lelaki kita, diambi ari pemakai ti diserahka ngagai TUHAN. Tu utai ti udah diasuh TUHAN kereja aku. Tang kita enggau ruang bilik kita tau makai isi dada enggau kaki belakang ti diserahka nyadika piring ti manah, ti diberi ngagai TUHAN ngarika bala imam. Kita tau makai utai nya ba endur ti tuchi. Piring nya udah diberi ngagai kita, enggau ngagai bala anak kita nyadika ungkup kita, ari piring pemaik ti diberi orang Israel. Sida deka mai kaki belakang, enggau isi dada, lebuh maya lemak nya diserahka nyadika piring ti diberi ngena api ngagai TUHAN. Utai nya diempu kita, enggau bala anak kita, belama iya, nitihka pesan TUHAN.” Moses lalu nanyaka pasal kambin ti nyadika piring pengampun dosa. Orang lalu madahka ngagai iya, utai nya udah ditunu. Iya lalu ringat ngagai Eleasar seduai Itamar, lalu ku iya nanya seduai iya, “Nama kebuah seduai enda makai piring ti dikena muai dosa nya ba Langkau Kain TUHAN? Utai nya pemadu kudus, lalu TUHAN udah meri utai nya ngagai seduai, kena muai dosa orang mayuh. Laban darah jelu nya enda dibai ngagai Endur ti Pemadu Kudus dalam Langkau Kain TUHAN, nya alai seduai patut udah makai piring nya din, nitihka jaku aku.” Disaut Aron, “Kati TUHAN deka lantang ati enti aku udah makai piring pengampun dosa sehari tu? Bala orang mayuh udah nyerahka piring sida kena muai dosa sehari tu, lalu sida udah mai piring tunu, tang agi ga utai ti jai tu nyadi ba aku.” Moses lalu puas ati lebuh iya ninga saut nya. TUHAN meri adat tu ngagai Moses seduai Aron ke orang Israel. Kita tau makai jelu ti idup di darat ti belah tunjing, sereta ngunyah pemakai ti udah diluaka iya baru ari perut raya iya, Anang makai babi. Sida tu enda tau dikumbai tuchi. Tunjing sida amat belah, tang sida nadai ngunyah pemakai ti diluaka baru ari perut raya sida. Anang makai jelu nya, tauka negu bangkai sida. Jelu nya enda tuchi. Kita tau makai semua ikan ti bisi pidin enggau tisik, tang semua utai ti idup dalam ai, ti nadai pidin, enggau nadai tisik, enda tau diempa. Ikan ti baka nya dikumbai enda tuchi. Kita enda tau makai sida, tauka negu bangkai sida. Kita enda tau makai utai ti idup dalam ai, ti nadai pidin enggau nadai tisik. Semua indu utai ti bisi sayap enda tuchi magang, kelimpah ari sida ke nemu engkechit. Kita tau makai buntak kaban, buntak malam, tauka buntak endar. Tang semua utai ti mit, ti bisi sayap sereta ngerayap, enda tuchi magang. Barang sapa negu sida, tauka negu bangkai sida, deka nyadi enda tuchi nyentuk ngagai lemai. Lalu enti bangkai sida labuh ninggang utai, utai nya nyadi enda tuchi. Utai nya nyengkaum utai ti digaga ari kayu, gari, kulit jelu, tauka guni, enda milih nama guna utai nya. Utai nya enda tau enda disepuhka ngagai ai, tang iya mengkang enda tuchi nyentuk ngagai lemai. Lalu enti bangkai sida labuh ngagai periuk tanah, semua utai ti dalam periuk tanah nya enda tuchi magang, lalu kita enda tau enda mechahka periuk nya. Pemakai ti endang tau diempa, tang udah kena laban ai ti dibubuhka ari periuk nya, nyadi enda tuchi, lalu sebarang utai irup dalam periuk nya, nyadi enda tuchi. Semua utai ti ditinggang bangkai, nyadi enda tuchi. Dapur tanah, tauka dapur besi, enda tau enda dipechahka, tang mata ai, tauka tangki ai, deka mengkang tuchi, taja pen semua utai bukai ti negu bangkai sida nyadi enda tuchi. Enti bangkai sida labuh ngagai leka benih ti deka ditanam, leka benih nya mengkang tuchi. Tang enti leka benih nya benung direndam dalam ai, lalu bangkai utai nya labuh ngagai leka benih nya, leka benih nya nyadi enda tuchi. Enti jelu ti tau diempa mati, orang ke negu bangkai jelu nya nyadi enda tuchi nyentuk ngagai lemai. Lalu enti kita bisi makai sebarang perengka tubuh jelu nya, kita enda tau enda masu gari kita, tang kita deka mengkang enda tuchi nyentuk ngagai lemai. Kita ti udah mai bangkai utai nya enda tau enda masu gari kita, tang kita deka mengkang enda tuchi nyentuk ngagai lemai. Kita enda tau makai jelu ti mit ti bejalai ba tanah, nemuka sida nya ngerayap, tauka bejalai ngena kaki empat, tauka mayuh kaki. Anang makai utai nya laban nya ngasuh kita enda tuchi. Aku tu TUHAN Allah Taala kita, lalu kita enda tau enda kudus, laban Aku kudus. Aku tu TUHAN ti mai kita pansut ari menua Ejip, ngambika Aku nyadi Allah Taala kita. Kita enda tau enda kudus, laban Aku kudus. Nya alai, tu meh adat pasal jelu enggau burung, pasal semua utai ti idup dalam ai, enggau semua utai ti bejalai ba tanah. Kita enda tau enda ngelala bagi utai ti tuchi enggau utai ti enda tuchi, bagi jelu ti tau diempa enggau ti enda tau diempa. TUHAN meri adat tu ngagai Moses ke orang Israel. Indu ke ngadaka anak lelaki deka mengkang enda tuchi tujuh hari, sebaka enggau lebuh iya datai kain. Ba hari ti kelapan, anak mit nya enda tau enda ditutus. Udah nya indu nya enda tau enda nganti tiga puluh tiga hari da agi baru iya deka badu agi begetah lalu nyadi tuchi. Iya enda tau negu utai ti kudus, tauka tama ngagai Langkau Kain TUHAN, sebedau iya tembu nuchi diri. Enti indu nya ngadaka anak indu, iya mengkang enda tuchi dalam kandang empat belas hari, baka ke datai kain. Enam puluh enam hari udah bekau nya, nya baru iya badu agi begetah lalu nyadi tuchi. Lebuh iya udah tembu nuchi diri, nemuka iya ngadaka anak lelaki, tauka anak indu, iya enda tau enda mai ngagai imam, ba penama ngagai Langkau Kain TUHAN, siku anak domba ti umur setaun, nyadika piring tunu, enggau siku burung puna, tauka burung achang, nyadika piring pengampun dosa. Imam nya deka nyerahka piring nya ngagai TUHAN, lalu ngereja pengawa kena muai pengutur indu nya. Nya baru indu nya nyadi tuchi. Tu meh utai ti enda tau enda dikereja indu, udah bekau iya beranak. Enti indu nya enda ulih meri siku anak domba, iya enda tau enda mai dua iku burung achang tauka dua iku burung puna, siku nyadika piring tunu, lalu siku nyadika piring pengampun dosa, lalu imam nya deka ngereja pengawa kena muai pengamah ari indu nya, lalu indu nya deka nyadi tuchi. TUHAN meri adat tu ngagai Moses seduai Aron. Enti orang bisi kuris ba kulit, tauka bisi pisa, tauka bisi isi ti kembai, ti tau nyadi siti penyakit kulit ti tau ngerampit, iya enda tau enda dibai ngagai imam ke ari peturun Aron. Imam nya deka meresa kuris nya, lalu enti bulu ba kuris nya udah bebali burak, lalu kuris nya baka ti dalam agi ari kulit ti ngelingi kuris nya, penyakit nya penyakit kulit ti tau ngerampit, lalu imam nya deka ngumbai orang nya enda tuchi. Tang enti kuris nya burak, lalu baka ke enda ngeruang dalam agi ari kulit ti ngelingi kuris nya, lalu bulu ba senentang nya pen enda mega bebali burak, imam nya deka nyeraraka iya ari orang mayuh enam hari. Imam nya deka meresa iya baru ba hari ti ketujuh, lalu enti, ba penemu imam nya, kuris nya mengkang enda berubah, lalu enda nangkir, iya deka nyeraraka iya ari orang mayuh tujuh hari da agi. Imam nya deka meresa iya baru ba hari ti ketujuh udah lepas nya, lalu enti kuris nya nyau nadai agi, lalu enda nangkir, iya deka ngumbai orang nya tuchi. Utai nya semina kuris aja. Orang nya enda tau enda masu gari diri, lalu nyadi tuchi. Tang enti kuris nya nyau nangkir udah bekau imam ke meresa iya, lalu ngumbai iya tuchi, iya enda tau enda betemu enggau imam nya baru. Imam nya deka meresa iya baru, lalu enti kuris nya udah nangkir, iya enda tau enda ngumbai orang nya enda tuchi. Penyakit nya penyakit kulit ti tau ngerampit. Enti orang bisi penyakit kulit ti tau ngerampit, iya enda tau enda dibai ngagai imam, lalu imam nya deka meresa iya. Enti kuris ti ba kulit iya nya udah ngasuh bulu ba senentang nya bebali burak, lalu penuh laban nanah, penyakit nya penyakit kulit ti enda nemu gerai. Imam nya deka ngumbai orang nya enda tuchi. Iya enda ibuh diseraraka ari orang mayuh, laban iya endang nyata enda tuchi. Enti penyakit nya nyau nyelamar ba sebelah tubuh iya, kenyau ari punjung pala nyentuk ngagai ujung kaki, imam nya deka meresa iya baru. Enti imam nya nemu penyakit nya udah nyelamar ba sebelah tubuh orang nya, iya deka ngumbai orang nya tuchi. Enti semua kulit orang nya udah bebali burak magang, iya tuchi. Tang enti iya bisi kuris ti dilak-dilak ba tubuh iya, iya enda tuchi. Imam nya deka meresa iya baru, lalu enti iya tepedaka kuris ti dilak-dilak, iya deka ngumbai orang nya enda tuchi. Kuris ti ayan dilak-dilak nunjukka penyakit kulit ti tau ngerampit, lalu orang nya enda tuchi. Tang lebuh kuris nya gerai, lalu nyadi burak baru, orang nya enda tau enda betemu enggau imam. Imam nya deka meresa iya baru. Enti kuris nya udah bebali burak, orang nya tuchi, lalu imam nya deka ngumbai iya tuchi. Enti orang bisi pisa ti udah gerai lalu enti, udah bekau nya, litan pisa nya kembai tauka bebali mirah, iya enda tau enda betemu enggau imam. Imam deka meresa iya, lalu enti endur nya baka ke ngeruang, lalu bulu ba senentang nya udah bebali burak, iya deka ngumbai orang nya enda tuchi. Penyakit nya penyakit kulit ti tau ngerampit, ti bepun ari pisa nya. Tang enti imam nya meresa utai nya, lalu nemu bulu ba senentang nya enda bebali burak, lalu endur nya enda ngeruang, tang puchat, imam nya deka nyeraraka iya ari orang mayuh tujuh hari. Enti utai nya nangkir, imam deka ngumbai orang nya enda tuchi. Orang nya bisi penyakit. Tang enti utai nya enda berubah gamal, lalu enda nangkir, utai nya semina litan pisa aja, lalu imam deka ngumbai iya tuchi. Enti orang betu laban api, lalu isi ba senentang nya bebali burak, tauka mirah, imam nya deka meresa iya. Enti bulu ba senentang nya udah bebali burak, lalu endur ba senentang nya baka ke ngeruang, nya nunjukka penyakit kulit ti tau ngerampit ti bepun ari betu nya, lalu imam deka ngumbai orang nya enda tuchi. Tang enti bulu ba endur nya enda bebali burak, lalu endur ba senentang nya enda ngeruang, tang puchat, imam deka nyeraraka iya ari orang mayuh tujuh hari. Imam deka meresa iya baru ba hari ti ketujuh, lalu enti utai nya nyau nangkir, utai nya penyakit kulit ti tau ngerampit, lalu imam deka ngumbai orang nya enda tuchi. Tang enti petik nya mengkang enda berubah, lalu enda nangkir, tang puchat, utai nya ukai penyakit kulit ti tau ngerampit. Imam deka ngumbai iya tuchi, laban utai nya semina litan betu aja. Lebuh lelaki tauka indu bisi kuris ba pala tauka ba dagu, imam deka meresa utai nya. Enti utai nya baka ke ngeruang, lalu bulu ti ba senentang nya pirang sereta alus, nya penyakit kulit ti tau ngerampit, lalu iya deka ngumbai orang nya enda tuchi. Enti lebuh imam nya meresa orang nya, kuris nya baka ke enda ngeruang, tang nadai bulu ti menyana ba endur nya, imam deka nyeraraka iya ari orang mayuh tujuh hari. Imam deka meresa kuris nya baru ba hari ti ketujuh, lalu enti kuris nya enda nangkir, sereta nadai bulu ti pirang ba endur nya, lalu endur nya baka ke enda ngeruang, orang nya enda tau enda ngukur pala diri, kelimpah ari endur ti ngelingi kuris nya. Udah nya imam deka nyeraraka iya ari orang mayuh tujuh hari da agi. Ba hari ti ketujuh udah bekau nya, imam deka meresa kuris nya baru, lalu enti kuris nya nadai udah nangkir, lalu baka ke enda ngeruang, iya deka ngumbai orang nya tuchi. Orang nya enda tau enda masu gari diri, lalu iya nyadi tuchi. Tang enti kuris nya nangkir udah bekau iya dikumbai tuchi, imam deka meresa iya baru. Enti kuris nya udah nangkir, iya enda ibuh begigaka bulu ti pirang. Orang nya endang terang enda tuchi. Tang enti, dalam penemu imam nya, kuris nya apin nangkir, lalu bulu ti menyana bisi tumbuh ba endur nya, kuris nya udah gerai, lalu imam deka ngumbai orang nya tuchi. Lebuh lelaki tauka indu bisi petik ti burak ba kulit iya, imam deka meresa iya. Enti petik nya enda tentu burak, utai nya semina raing aja. Orang nya tuchi. Tang enti kuris ti mirah bisi ayan ba endur ti nadai buk, utai nya penyakit kulit ti tau ngerampit. Imam deka meresa orang nya, lalu enti orang nya bisi kuris ti mirah, imam deka ngumbai orang nya enda tuchi, laban penyakit kulit ti tau ngerampit bisi ba pala iya. Enti orang bisi penyakit kulit ti tau ngerampit, orang nya enda tau enda ngena gari ti charik, nejuka buk diri enda disugu, mungkur mua diri di baruh, lalu ngangau, “Enda tuchi! Enda tuchi!” Orang nya deka mengkang enda tuchi seagi-agi iya bisi penyakit nya, lalu iya enda tau enda diau ari luar kem, jauh ari orang bukai. Lebuh gari bekuap nemuka gari nya digaga ari bulu bedus tauka ari linin, tauka kain linin, tauka kain ti digaga ari bulu bedus, tauka kulit jelu, tauka utai ti digaga ari kulit jelu bekuap, enti kuap nya bechura gadung tauka mirah, nya bansa kuap ti tau ngerampit, lalu enda tau enda dipadahka ngagai imam. Imam deka meresa utai nya, lalu nyimpan utai nya tujuh hari. Iya deka meresa utai nya baru ba hari ti ketujuh, lalu enti kuap nya udah nangkir, utai ti dirampit nya enda tuchi. Imam deka nunu utai nya, laban nya kuap ti tau ngerampit, lalu enda tau enda dirusak ngena api. Tang enti imam nya nemu kuap nya enda berampit, lebuh iya meresa utai nya, iya deka ngasuh orang masu utai nya, lalu nyimpan utai nya tujuh hari da agi. Udah nya iya deka meresa utai nya baru, lalu enti kuap nya nadai berubah chura, taja pen iya enda nyelamar, utai nya mengkang enda tuchi. Kita enda tau enda nunu utai nya, nemuka kuap nya makai di luar tauka di dalam. Tang enti kuap nya nyau udah kurang agi, lebuh imam meresa utai nya, iya enda tau enda nyarikka endur ti alai kuap nya bejangkit ari gari tauka kulit nya. Udah nya, enti kuap nya ayan baru, nya nunjukka kuap nya udah berampit baru. Orang ke bempu utai nya enda tau enda nunu utai nya. Enti iya masu utai nya, lalu petik nya lenyau, iya enda tau enda masu utai nya baru. Nya baru utai nya deka nyadi tuchi. Nya alai, tu meh adat pasal bekuap ti tau nyadi ba gari ti digaga ari bulu bedus, tauka ari linin, tauka ba kain linin tauka kain ti digaga ari bulu bedus, tauka ba sebarang utai ti digaga ari kulit jelu. Tu meh jalai ngaga pemutus penemu, nemuka utai nya tuchi tauka enda. TUHAN meri ngagai Moses adat pasal nuchi orang ke udah digeraika ari penyakit kulit ti tau ngerampit. Ba hari orang nya dikumbai tuchi, iya enda tau enda dibai ngagai imam, lalu imam deka mai orang nya ke luar ari kem nya, lalu meresa iya. Enti penyakit nya udah gerai, imam deka ngasuh orang nya mai dua iku burung ti tuchi, sama enggau serepik kayu sidar, siti tali ti mirah, enggau pating isop. Udah nya imam nya deka ngasuh siku ari burung nya dibunuh ba atas mangkuk ti digaga ari tanah, ti ngundan ai ti diambi ari mata ai. Iya deka ngambi burung ti kedua, lalu nyepuhka iya, sama enggau repik kayu sidar, tali ti mirah, enggau pating isop, ngagai darah burung ti dibunuh nya. Iya deka mechikka darah nya tujuh kali ngagai orang ke deka dituchi ari penyakit kulit nya, lalu udah nya, iya deka ngumbai orang nya tuchi. Iya deka ngelepaska burung ti agi idup nya terebai. Orang nya enda tau enda masu gari diri, ngukur semua buk iya, lalu mandi. Udah nya baru iya tuchi. Iya tau tama ngagai kem, tang iya enda tau enda diau ari luar langkau kain iya empu tujuh hari. Ba hari ti ketujuh, orang nya enda tau enda ngukur buk, ragum, bulu bansu, enggau semua bulu bukai ti ba tubuh iya. Iya enda tau enda masu gari diri, lalu mandi. Nya baru iya tuchi. Ba hari ti kelapan, orang nya enda tau enda mai dua iku anak domba ti lelaki, enggau siku anak domba ti indu ke umur setaun, ti nadai penimpang, dua kilogram tepung ti dichampur enggau minyak kana, enggau setengah butul minyak kana. Imam deka mai orang nya enggau semua piring nya ngagai penama Langkau Kain TUHAN. Udah nya, imam deka ngambi siku ari anak domba ti lelaki nya, lalu nyerahka jelu nya, sama enggau setengah butul minyak, nyadika piring kena mayar ukum penyalah. Iya deka meri utai nya nyadika pemeri ti manah ngagai TUHAN, ke imam nya. Iya deka nyayat anak domba nya ba endur ti kudus, ba endur alai nyayat jelu ti diberi nyadika piring pengampun dosa enggau piring tunu. Iya enda tau enda ngereja nya, laban piring ti dikena mayar ukum penyalah, baka piring ti dikena muai dosa, nya endang enggi imam, lalu piring nya kudus. Imam deka ngambi sekeda darah anak domba nya, lalu malitka darah nya ngagai rambing pending kanan, tunjuk indu jari kanan, enggau ngagai tunjuk indu kaki kanan orang ke deka dikumbai tuchi. Imam deka ngambi minyak kana mimit, lalu nuang iya ngagai tapa jari kiba iya empu, nechalka tunjuk jari kanan iya ngagai minyak nya, lalu mechikka minyak nya tujuh kali dia di mua TUHAN. Iya deka ngambi minyak ti ba tapa jari iya mimit, enggau darah anak domba nya mimit, lalu malitka utai nya ngagai rambing pending kanan, tunjuk indu jari kanan, enggau ngagai tunjuk indu kaki kanan orang ke deka dikumbai tuchi. Iya deka ngengkahka teda minyak ti ba tapa iya ngagai pala orang nya. Nya meh chara iya ngereja pengawa nuchi orang nya. Udah nya imam deka ngenjuk piring pengampun dosa, lalu ngereja pengawa nuchi orang nya. Udah lepas nya, iya deka nyayat jelu nya nyadika piring tunu lalu nyerahka piring nya sama enggau piring gandum, ba alta. Nya meh chara imam deka ngereja pengawa nuchi orang nya, lalu orang nya nyadi tuchi. Enti orang nya seranta, lalu enda ulih meri utai ti lebih ari nya, iya tau mai, kena nuchi diri, siku anak domba ti lelaki nyadika piring kena mayar ukum penyalah, pemeri ti manah ti diberi ngagai TUHAN, ke imam nya. Orang nya semina mai sekilogram tepung ti dichampur enggau minyak kana, nyadika piring gandum, enggau setengah butul minyak kana. Iya mega enda tau enda mai dua iku burung achang tauka dua iku burung puna, siku nyadika piring pengampun dosa, lalu siku nyadika piring tunu. Ba hari ti kelapan lebuh orang nya nuchi diri, iya enda tau enda mai burung nya ngagai imam, ba penama ngagai Langkau Kain TUHAN. Imam deka ngambi anak domba, enggau minyak kana, lalu meri utai nya nyadika pemeri ti manah ngagai TUHAN, nyadi ungkup ke imam nya. Iya deka nyayat anak domba nya, lalu ngambi darah iya mimit, lalu malitka darah nya ngagai rambing pending kanan, ngagai tunjuk indu jari kanan, enggau ngagai tunjuk kaki kanan orang nya. Imam deka nuang minyak nya mimit ngagai tapa jari kiba iya empu lalu ngena tunjuk ari jari kanan iya, iya deka mechikka minyak nya tujuh kali dia, di mua TUHAN. Iya deka ngengkahka minyak nya mimit ba endur alai iya ti udah malitka darah nya tadi ngagai rambing pending kanan, ngagai tunjuk indu jari kanan, enggau ngagai tunjuk indu kaki kanan orang nya. Teda minyak ti ba jari iya deka diengkahka iya ba pala orang nya. Nya meh chara imam nya ngereja pengawa nuchi orang nya. Udah nya, iya deka meri siku ari burung achang nya nyadika piring pengampun dosa, lalu siku nyadika piring tunu, sama enggau piring gandum. Nya meh chara imam deka ngereja pengawa nuchi orang nya. Tu adat ke orang ke bisi penyakit kulit ti tau ngerampit, ti enda ulih ngenjuk piring ti diberi baka selama, kena nuchi diri. TUHAN meri ngagai Moses seduai Aron Imam deka ngasuh semua utai dipindahka ari rumah nya, sebedau iya meresa kuap nya, enggai ke semua utai dalam rumah nya dikumbai enda tuchi magang. Udah nya baru iya deka mansang ngagai rumah nya lalu meresa kuap nya. Enti dinding nya baka ke bisi diempa petik ti gadung, tauka mirah, iya deka ninggalka rumah nya, lalu ngunchi rumah nya tujuh hari. Ba hari ti ketujuh, iya deka datai lalu meresa rumah nya baru. Enti kuap nya udah nyelamar, iya deka ngasuh orang muai batu ti bekuap nya ngagai endur ti enda tuchi di luar nengeri nya. Udah nya, iya enda tau enda ngasuh semua dinding dalam rumah nya dikikis magang, lalu semua semin ti udah dikikis nya ditugungka ba endur siti ti enda tuchi, di luar nengeri nya. Udah nya, batu bukai deka dikena nganti batu ti udah dibuai, lalu dinding nya disemin baru. Enti kuap nya bisi ayan baru dalam rumah nya, udah bekau batu nya dibuai, lalu rumah nya udah dikikis, lalu disemin baru, imam nya deka mansang lalu meresa utai nya baru. Enti kuap nya udah nyelamar, rumah nya enda tuchi. Rumah nya enda tau enda dirubuh, lalu batu ari rumah nya, perengka kayu ari rumah nya, enggau semua semin iya, enda tau enda dibai pansut ari nengeri nya, ngagai siti endur ti enda tuchi. Barang sapa tama ngagai rumah ti udah dikunchi, deka nyadi enda tuchi nyentuk ngagai lemai. Barang sapa gali, tauka makai dalam rumah nya, enda tau enda masu gari diri. Lebuh imam nya datai meresa rumah nya, lalu kuap nya nadai ayan baru, udah bekau rumah nya disemin baru, iya deka ngumbai rumah nya tuchi, laban kuap nya udah abis dibuai magang. Kena nuchi rumah nya, iya deka ngambi dua iku burung, kayu sidar, siti tali ti mirah, enggau sepating isop. Iya deka munuh siku ari burung nya atas mangkuk sigi ti digaga ari tanah, ti ngundan ai. Udah nya iya deka ngambi kayu sidar, pating isop, tali ti mirah, enggau siku burung ti agi idup, lalu nyepuhka semua utai nya ngagai darah burung ti udah dibunuh nya tadi, enggau ngagai ai nya. Iya deka mechik rumah nya tujuh kali. Nya meh jalai iya nuchi rumah nya ngena darah burung, ai, burung ti agi idup, kayu sidar, pating isop, enggau tali ti mirah. Udah nya, iya deka ngelepaska burung ti idup nya, ba padang di luar nengeri. Nya meh chara iya deka ngereja pengawa nuchi rumah nya, lalu rumah nya nyadi tuchi. Tu adat pasal penyakit kulit ti tau ngerampit, Tu meh adat kena nemu enti utai nya enda tuchi, tauka tuchi. TUHAN meri adat tu ngagai Moses seduai Aron ke orang Israel. Lebuh utai pansut ari perengka lelaki, utai nya enda tuchi, nemuka utai nya neritik ari perengka iya, tauka enda. Semua peninduk ti udah alai iya duduk tauka gali, enda tuchi magang. Barang sapa negu peninduk orang nya tauka duduk ba sebarang utai ti udah alai orang nya duduk, enda tau enda masu gari diri, lalu mandi, lalu iya deka mengkang enda tuchi nyentuk ngagai lemai. Barang sapa negu orang ke mansutka utai ti kamah ari tubuh, enda tau enda masu gari diri, lalu mandi, lalu iya deka mengkang enda tuchi nyentuk ngagai lemai. Enti orang ke mansutka utai ti kamah nya ngeludah orang ke tuchi, orang ke diludah iya nya enda tau enda masu gari diri, lalu mandi, lalu iya deka mengkang enda tuchi nyentuk ngagai lemai. Penuduk ti dikena orang nya nepan kuda, tauka penuduk ti udah alai iya duduk, nyadi enda tuchi. Barang sapa negu utai ti udah alai orang ke mansutka utai ti kamah nya duduk, nyadi enda tuchi nyentuk ngagai lemai. Enti orang ke mansutka utai ti kamah nya bisi negu siku ari bala kita, sebedau iya masu jari diri, orang ke ditegu iya nya enda tau enda masu gari diri, lalu mandi, lalu iya deka mengkang enda tuchi nyentuk ngagai lemai. Periuk tanah ti udah kena tegu orang nya, enda tau enda dipechahka, lalu semua mangkuk ti digaga ari kayu, enda tau enda dibasu. Lebuh orang nya udah digeraika ari penyakit nya, iya enda tau enda nganti tujuh hari. Udah nya iya masu gari diri, lalu mandi ba ai ti beresi. Nya baru iya deka nyadi tuchi. Ba hari ti kelapan, iya deka mai dua iku burung achang, tauka dua iku burung puna, ngagai penama Langkau Kain TUHAN, lalu meri utai nya ngagai imam. Imam nya deka meri siku ari burung nya nyadika piring pengampun dosa, lalu siku nyadika piring tunu. Nya meh chara imam ngereja pengawa nuchi orang nya. Lebuh ai mani pansut ari lelaki, iya enda tau enda mandi, lalu iya deka mengkang enda tuchi nyentuk ngagai lemai. Semua utai ti digaga ari kain tauka kulit jelu, ti udah alai ai mani nya nitik, enda tau enda dibasu magang, lalu utai nya mengkang enda tuchi nyentuk ngagai lemai. Lebuh lelaki enggau indu udah beleman, seduai iya enda tau enda mandi, lalu seduai iya deka mengkang enda tuchi nyentuk ngagai lemai. Lebuh indu datai kain, iya mengkang enda tuchi tujuh hari. Barang sapa negu iya, deka mengkang enda tuchi nyentuk ngagai lemai. Utai ti udah alai iya duduk, tauka alai iya gali, lebuh iya datai kain, nyadi enda tuchi. Enti lelaki beleman enggau indu nya lebuh iya datai kain, lelaki nya dirampit pengamah indu nya, lalu lelaki nya deka mengkang enda tuchi tujuh hari, lalu peninduk ti alai lelaki nya gali, nyadi enda tuchi. Enti indu bisi begetah dua tiga hari, lebuh ukai maya iya datai kain, tauka iya begetah ngelui ari pengelama iya datai kain, indu nya mengkang enda tuchi sekumbang iya ke mengkang begetah, baka lebuh iya ke datai kain. Sebarang peninduk ti udah alai indu nya gali, tauka sebarang utai ti udah alai iya duduk lebuh maya nya, deka nyadi enda tuchi. Barang sapa negu semua utai nya, deka nyadi enda tuchi, lalu enda tau enda masu gari diri, lalu mandi. Sida nya deka mengkang enda tuchi nyentuk ngagai lemai. Lebuh indu nya ngetu datai kain, iya enda tau enda nganti tujuh hari. Udah nya baru iya nyadi tuchi. Ba hari ti kelapan, iya deka mai dua iku burung achang, tauka dua iku burung puna, ngagai imam ba penama ngagai Langkau Kain TUHAN. Imam nya deka meri siku ari burung nya nyadika piring pengampun dosa, lalu siku nyadika piring tunu. Nya meh chara imam nya deka ngereja pengawa nuchi indu nya. TUHAN ngasuh Moses meri ngagai orang Israel jaku tangkan, madahka pasal pengamah sida, ngambika sida enda ngamahka langkau sembiang nya ti ba tengah-tengah kem sida. Enti sida ngamahka langkau sembiang nya, sida deka dibunuh. Tu meh adat pasal orang ke mansutka utai ti kamah ari tubuh, mansutka ai mani, indu ke datai kain, tauka lelaki ti udah beleman enggau indu ke enda tuchi. Udah bekau anak lelaki Aron ke dua iku kena bunuh lebuh seduai iya meri api ti enda kudus ngagai TUHAN, TUHAN lalu bejaku ngagai Moses. Ku Iya, “Padahka ngagai menyadi nuan, Aron, iya tau tama ngagai Langkau Kain TUHAN di belakang tirai semina ba maya ti patut aja, laban endur nya alai Aku pegari dalam mua hari ari atas tudung Peti Lampang Batu Adat. Enti iya enda ngasi, iya deka dibunuh. Iya semina tau tama ngagai Endur ti Pemadu Kudus lebuh iya udah mai siku sapi ti lelaki ti biak nyadika piring pengampun dosa, enggau siku bedus ti lelaki nyadika piring tunu. Sebedau Aron mansang ngagai Endur ti Pemadu Kudus, iya enda tau enda mandi, lalu ngerasukka pekayan imam, iya nya, baju panjai enggau tanchut pandak ti digaga ari kain linin, belulang, enggau labung. Orang Israel deka meri ngagai Aron dua iku kambin ti lelaki nyadika piring pengampun dosa, enggau siku bedus ti lelaki nyadika piring tunu. Iya deka meri siku sapi ti lelaki nyadika piring pengampun dosa ke iya empu, enggau ke sida sebilik. Udah nya iya deka mai kambin ti dua iku nya ngagai penama Langkau Kain TUHAN. Iya deka bechabut undi dia, ngena dua igi batu. Sigi dikelai ngena leka jaku “Ke TUHAN ” lalu sigi “Ke Asasel” Aron deka meri kambin ti diundi ke TUHAN, nyadika piring pengampun dosa. Kambin ti diundi ke Asasel deka diberi idup-idup ngagai TUHAN, lalu dilepaska di menua puang ngagai Asasel, ngambika iya nabanka dosa orang mayuh. Lebuh Aron meri sapi ti lelaki nyadika piring pengampun dosa ke iya empu enggau ke sida sebilik, iya deka mai siti talam ti penuh laban bara api ari alta, enggau dua genggam menyan ti alus, lalu mai semua utai nya ngagai Endur ti Pemadu Kudus. Di mua TUHAN dia, iya deka nabakka menyan nya ngagai api nya, lalu asap menyan nya deka ngelalaika tudung Peti Lampang Batu Adat, ngambika Aron enda meda tudung nya, enggai ke iya mati. Iya deka ngambi sekeda darah sapi ti lelaki nya, lalu mechikka darah nya di mua tudung nya, lalu udah nya, mechikka darah nya tujuh kali di mua Peti Lampang Batu Adat nya. Udah nya, iya deka nyayat kambin nya nyadika piring pengampun dosa ke orang mayuh, mai darah jelu nya ngagai Endur ti Pemadu Kudus, lalu mechikka darah nya ngagai tudung Peti Lampang Batu Adat, lalu udah nya, di mua Peti nya, baka chara iya ke ngena darah sapi. Nya meh chara iya nuchi Langkau Kain TUHAN ari pengamah orang Israel, enggau ari semua dosa sida. Iya enda tau enda ngereja nya ngagai Langkau Kain TUHAN, laban Langkau Kain nya bediri ba tengah-tengah kem ti enda tuchi nya. Kenyau ari maya Aron tama ngagai Langkau Kain TUHAN ngereja pengawa nuchi bansa, nyentuk ngagai maya iya pansut, orang nadai tau mengkang dalam Langkau Kain TUHAN. Lebuh iya udah ngereja pengawa nuchi diri empu, enggau sida sebilik, enggau semua orang Israel, iya enda tau enda pansut ngagai alta alai ti nunu piring, lalu nuchi alta nya. Iya enda tau enda mai sekeda darah sapi ti lelaki nya, enggau sekeda darah kambin, lalu malitka darah nya ngagai tanduk sukut alta nya. Iya enda tau enda mechikka darah nya ngena tunjuk iya tujuh kali ngagai alta nya. Nya meh chara iya nuchi alta nya ari dosa orang Israel, ngambika alta nya kudus. Lebuh Aron udah tembu ngereja pengawa nuchi Endur ti Pemadu Kudus, enggau semua endur ti bukai dalam Langkau Kain TUHAN, enggau alta nya, iya deka meri ngagai TUHAN siku kambin ti idup, ti udah diundi ke Asasel. Iya deka ngengkahka jari iya kedua piak ba pala kambin nya, lalu ngaku atas pala kambin nya semua penyai, dosa, enggau ulah orang Israel ke ngelaban TUHAN, ngambika mindahka semua utai nya ngagai pala kambin nya. Udah nya, kambin nya enda tau enda diburu ngagai menua puang, ulih orang ke udah dipaduka ngereja pengawa nya. Kambin nya deka mai semua dosa sida ngagai endur ti nadai mensia. Udah nya, Aron deka tama ngagai Langkau Kain TUHAN, muka pekayan imam ti udah dikena iya sebedau iya tama ngagai Endur ti Pemadu Kudus, lalu ninggalka pekayan nya dia. Iya enda tau enda mandi ba Endur ti Kudus, lalu ngerasukka gari iya empu. Udah nya, iya deka pansut lalu ngenjuk piring tunu, kena muai dosa iya empu, enggau dosa orang mayuh. Iya deka nunu, ba alta nya, lemak jelu ti nyadika piring pengampun dosa. Orang ke muru kambin nya ngagai Asasel di menua puang, enda tau enda masu gari diri, lalu mandi, sebedau iya tama ngagai kem. Sapi lelaki enggau kambin ti nyadika piring pengampun dosa, ti bempu darah ti udah dibai ngagai Endur ti Pemadu Kudus kena muai dosa, deka dibai ke luar ari kem nya, lalu ditunu. Kulit, isi, enggau perengka dalam jelu nya deka ditunu magang. Orang ke nunu utai nya enda tau enda masu gari diri, lalu mandi, sebedau iya pulai ngagai kem. Adat tu enda tau enda dititihka belama iya. Kena sepuluh hari bulan ti ketujuh, orang Israel enggau orang bansa bukai ke diau begulai enggau sida, enda tau enda bepasa, lalu enda tau gawa. Ba hari nya, Imam Besai deka ngereja pengawa nuchi orang mayuh ari semua dosa sida. Hari nya deka diintu nyadika hari ti amat kudus, hari sida bepasa lalu enda gawa. Adat tu enda tau enda dititihka belama iya. Imam Besai, ti udah dichiri lalu diserahka ngagai TUHAN ngambika bisi nganti apai iya, deka ngereja pengawa nuchi orang ari semua dosa sida. Iya deka ngerasukka pekayan imam lalu ngereja pengawa nuchi Endur ti Pemadu Kudus, endur bukai dalam Langkau Kain TUHAN, alta, bala imam, enggau semua orang Israel. Adat tu enda tau enda dititihka belama iya. Pengawa tu enda tau enda dikereja sekali setaun, kena nuchi orang Israel ari dosa sida.” Nya alai Moses ngereja utai ti diasuh TUHAN. TUHAN ngasuh Moses meri adat tu ngagai Aron, enggau ngagai bala anak lelaki iya, enggau ngagai semua orang Israel: Enti orang Israel nyayat sapi, tauka bedus tauka kambin ari luar kem, lalu enda mai utai nya ngagai penama Langkau Kain TUHAN, ngambika utai nya diserahka nyadi pemeri ngagai TUHAN di mua langkau sembiang, orang nya ngelanggar adat. Iya udah ngasuh darah nyaya, lalu iya enda agi dikumbai nembiak Allah Taala. Tu reti pesan tu: ngelamatu orang Israel udah nyayat jelu di padang. Tang diatu sida enda tau enda mai jelu nya ngagai TUHAN. Sida deka mai jelu nya ngagai imam ba penama ngagai Langkau Kain TUHAN, lalu nyayat jelu nya dia nyadika piring pemaik. Imam nya deka ngunsaika darah jelu nya ngagai tisi alta ti ba penama ngagai Langkau Kain TUHAN, lalu nunu lemak jelu nya ngambika iya bebau rengut lalu ngerinduka ati TUHAN. Orang Israel enda tau enda tetap ati ngagai TUHAN, lalu badu agi nyayat jelu sida di padang nyadika piring ngagai antu kambin. Orang Israel enda tau enda nitihka atur tu belama iya. Enti orang Israel tauka orang kampar ti diau begulai enggau sida ngenjuk piring tunu, tauka piring bukai nyadika piring ti diberi ngagai TUHAN ba endur bukai kelimpah ari ba penama ngagai Langkau Kain TUHAN, sida deka badu agi dikumbai nembiak Allah Taala. Enti orang Israel, tauka orang kampar ti diau begulai enggau sida, makai dagin ti agi bedarah, TUHAN deka ngelaban sida, lalu Iya deka badu agi ngumbai sida nembiak Iya. Seput semua utai ti idup endang dalam darah. Nya kebuah TUHAN udah bejaku ngasuh semua darah dituang magang ba alta, kena muai dosa orang mayuh. Darah, iya nya nyawa, muai dosa. Nya kebuah TUHAN udah madahka ngagai orang Israel, sida tauka orang kampar ti diau begulai enggau sida, enda tau makai dagin ti agi bedarah. Enti orang Israel, tauka orang kampar ke begulai enggau sida, nangkap jelu tauka burung ti enda tuchi, sida enda tau enda nejuka darah jelu nya neritik ke tanah, lalu ngelamun darah nya ngena tanah. Seput semua utai ti idup nya dalam darah sida. Nya kebuah TUHAN udah madahka ngagai orang Israel, sida enda tau makai dagin ti agi bedarah. Semua orang ke makai dagin ti agi bedarah, deka badu agi dikumbai nembiak Allah Taala. Barang sapa, nemuka iya nya orang Israel, tauka orang kampar, makai dagin ari jelu ti ditemu mati, tauka udah mati laban jelu babas, enda tau enda masu gari diri, mandi, lalu mengkang enda tuchi nyentuk ngagai lemai. Enti sida enda, sida deka betanggungjawapka penyalah nya. Ku TUHAN bejaku ngagai Moses “Sebut ngagai orang Israel, Aku tu TUHAN Allah Taala kita. Anang ngereja utai baka ke dikereja orang di menua Ejip, alai kita ke idup menya, tauka utai ti dikereja orang di menua Kanaan, ti alai Aku deka mai kita diatu. Titihka adat Aku, lalu kereja utai ti diasuh Aku. Aku tu TUHAN Allah Taala kita. Titihka atur enggau adat ti diberi Aku ngagai kita. Kita deka ngidupka nyawa diri enti kita ngereja utai nya. Aku tu TUHAN.” TUHAN meri adat tu: Anang beleman enggau kaban belayan diri empu. Anang beleman enggau indai diri empu, laban nya ngemaluka apai nuan. Nuan enda tau ngemaluka indai nuan empu. Anang beleman enggau indu simpan apai nuan, laban nya ngemaluka apai nuan. Anang beleman enggau menyadi indu nuan, tauka menyadi indu tiri nuan, nemuka iya sebilik enggau nuan kenyau ari mit, tauka enda. Anang beleman enggau uchu indu nuan, laban nya deka ngemaluka nuan. Anang beleman enggau menyadi indu ke saum apai, tang enda saum indai enggau nuan, laban iya mega menyadi nuan. Anang beleman enggau bini aya nuan, laban iya ibu nuan. Anang beleman enggau menantu indu nuan tauka enggau bini menyadi nuan. Anang beleman enggau anak indu, tauka uchu orang indu ke udah enggau nuan beleman. Kada enda sida nya kaban belayan nuan, lalu ngujungka nuan ngereja pengawa seks ti salah. Anang ngambi menyadi bini nuan nyadika bini nuan, seagi-agi bini nuan mengkang idup. Anang beleman enggau indu ke benung datai kain, laban iya enda tuchi. Anang beleman enggau bini orang bukai, laban nya deka ngasuh nuan enda tuchi. Anang nyerahka anak nuan kena nyembah petara Molek, laban nya deka ngemaluka nama Allah Taala, ti TUHAN. Orang lelaki enda tau beleman enggau orang ke sama lelaki. Allah Taala begedika pengawa nya. Lelaki tauka indu enda tau beleman enggau jelu. Pengawa ti jai nya deka ngasuh nuan enda tuchi. Anang ngamahka diri ngena semua kereja nya, laban nya chara orang bansa bukai ngaga diri enda tuchi, iya nya bansa orang ke diau di menua nya dulu ari kita, ke diburu TUHAN, ngambika kita ulih tama ngagai menua nya. Utai ti dikereja sida ngasuh menua nya enda tuchi. Nya kebuah TUHAN ngukum menua nya lalu ngasuh menua nya nulak orang ke diau dia. Nya baru menua nya enda nulak kita, baka iya ti nulak orang bansa bukai ke udah diau dia dulu ari kita. Kita nemu, barang sapa ngereja utai ti jai tu, deka badu agi dikumbai nembiak Allah Taala. Nya alai titihka semua pesan ti diberi Aku ngagai kita, lalu anang ngereja utai ti dikereja orang ke dulu agi diau di menua nya ari kita. Anang ngereja semua utai nya lalu ngaga diri enda tuchi. Aku tu TUHAN Allah Taala kita.” Lalu ku TUHAN bejaku ngagai Moses “Sebut ngagai semua orang Israel: Kita enda tau enda kudus, laban Aku ti TUHAN Allah Taala kita, kudus. Genap iku kita enda tau enda bebasaka apai indai kita, lalu enda tau enda ngintu Hari Sabat, munyi ti udah dipesanka Aku ngagai kita. Aku tu TUHAN Allah Taala kita. Anang nyembah engkeramba tauka ngaga anak patung: Aku tu TUHAN Allah Taala kita. “Lebuh kita nyayat jelu nyadika piring pemaik, titihka adat ti udah diberi Aku ngagai kita, nya baru Aku deka nerima piring nya. Dagin nya enda tau enda diempa sama hari jelu nya disayat, tauka hari siti. Dagin ti beteda ngagai hari ti ketiga, enda tau enda ditunu, laban dagin nya enda tuchi, lalu enti orang makai dagin nya, Aku enggai nerima piring nya. Barang sapa makai dagin nya deka kena tinggang penyalah, laban iya udah ngamahka utai ti kudus ti enggi TUHAN, lalu iya deka dibuai ari raban nembiak TUHAN. “Lebuh kita ngetau umai kita, anang ngetau gandum ti ba tisi umai, lalu anang pulai baru ngagai umai nya lalu ngetau semeli. Anang pulai baru ngagai kebun anggur kita lalu ngumpul buah ti enda kena ketau kita, tauka ngumpul buah anggur ti labuh. Tinggalka utai nya dia ngambika bisi digumpul orang ke seranta enggau orang kampar. Aku tu TUHAN Allah Taala kita. “Anang ngenchuri tauka nipu, tauka bula. Anang ngaga semaya dalam nama Aku, enti kita nadai ati deka ngamatka semaya nya. Utai nya ngemaluka nama Aku. Aku tu TUHAN Allah Taala kita. “Anang ngerumpak orang, tauka ngambi ulih ba orang. Anang enda mayar gaji orang ke gawa ke kita, semalam pen enda meh gaji nya tau ditejuka enda dibayar. Anang ngeleseka orang ke bengal, tauka ngasuh orang ke buta tesangkut. Kita enda tau enda ngasika Aku. Aku tu TUHAN Allah Taala kita. “Anang meri atur ti enda lurus lebuh kita ngatur pechara. Anang bepilih mata enggau orang ke seranta, tauka nangika orang ke kaya. Anang bejaku bula pasal orang, lalu anang besaksi bula pasal orang. Aku tu TUHAN. “Anang begedika menyadi nuan, tang rara iya enti iya bisi salah, enggai ke nuan empu salah ketegal nuan enda ngerara iya. Anang malas, tauka begedika pangan nuan, tang rinduka iya baka nuan ti rinduka diri empu. Aku tu TUHAN. “Ngasika adat Aku. Anang bekawinka jelu tupi ti enda sebaka bansa. Anang nanam dua macham benih ba sebidang tanah. Anang ngena gari ti ditenun ari dua macham ubung. “Enti lelaki ngumbai ulun iya ti indu nya indu simpan iya, lalu indu nya apin dibayar rega lalu apin dilepaska, lalu enti udah nya, lelaki bukai bisi beleman enggau indu nya, seduai iya enda tau enda kena ukum, tang enda diukum bunuh, laban indu nya ulun. Orang nya deka mai siku bedus ti lelaki ngagai penama Langkau Kain TUHAN nyadika piring kena mayar ukum penyalah, lalu imam deka ngena piring nya nuchi orang nya ngambika muai dosa iya, lalu dosa iya deka diampun. “Lebuh kita datai di menua Kanaan, lalu nanam sebarang macham kayu buah, kita deka ngumbai buah nya enda tuchi dalam tiga taun ti keterubah. Dalam kandang maya nya, kita enda tau makai buah nya. Dalam taun ti keempat, semua buah nya deka diserahka magang nyadika piring kena kita ngayanka pemesai terima kasih kita ngagai Aku, ti TUHAN. Tang dalam taun ti kelima, kita tau makai buah nya. Enti kita ngereja semua nya, kayu buah kita deka bebuah lebat agi. Aku tu TUHAN Allah Taala kita. “Anang makai dagin ti agi bedarah. Anang betilitka nasit tauka bemanang. Anang nguntin bulu tepisan kita, tauka mipil ragum kita. Anang ngaga ukir ba tubuh kita. Anang ngurik tubuh kita kena nandaka diri ngulitka orang ke mati. Aku tu TUHAN. “Anang ngasuh anak indu kita nyundal dalam rumah sembiang laban tu deka ngemaluka sida sereta ngamahka menua. Intu Hari Sabat, lalu bebasaka Langkau Kain TUHAN. Aku tu TUHAN. “Anang betanya ngagai orang ke bejaku enggau semengat orang ke udah mati, tauka ngagai manang. Anang begigaka sida enggai ke kita kamah laban sida. Aku tu TUHAN Allah Taala kita. “Bediri lebuh orang ke tuai umur mansa, lalu bebasaka sida. Nangika Allah Taala kita. Aku tu TUHAN. “Anang nekanka pengidup orang kampar ti diau di menua kita. Kereja utai ba sida baka ke dikereja kita ngaga orang Israel, lalu rinduka sida, baka kita ke rinduka diri empu. Kingatka diri ti udah nyadi orang kampar di menua Ejip. Aku tu TUHAN Allah Taala kita. “Anang ngakal orang lebuh kita nyukat, nimbang tauka nakar utai. Kena dachin ti betul, timbang ti betul, takar ti betul. Aku tu TUHAN ti udah mai kita pansut ari menua Ejip. Kita enda tau enda ngasika semua adat enggau pesan Aku. Aku tu TUHAN.” Ku TUHAN bejaku ngagai Moses, “Sebut ngagai orang Israel: Enti kita orang Israel, tauka orang kampar ti diau begulai enggau kita, nyerahka anak diri ngagai petara Molek, orang nya deka dituku semua orang Israel ngena batu datai ke iya mati. Enti orang nyerahka anak iya ngagai Molek, lalu ngamahka Langkau Kain Aku ti kudus, sereta mechat nama Aku ti kudus, Aku deka ngelaban iya, lalu enggai agi ngumbai iya nembiak Aku. Lalu enti orang Israel enda bedulika utai ti udah dikereja iya, lalu enda munuh iya, Aku Empu deka ngelaban iya, sereta ngelaban semua sida sebilik, enggau ngelaban semua orang ke sama enggau iya enda tetap ati ngagai Aku, lalu nyembah Molek. Aku enggai agi ngumbai sida nembiak Aku. “Enti orang betanya ngagai orang ke bejaku enggau semengat orang ke udah mati, tauka betanya ngagai manang, Aku deka ngelaban iya lalu enda agi ngumbai iya nembiak Aku. Kita enda tau enda kudus, laban Aku tu TUHAN Allah Taala kita. Kita enda tau enda ngasika adat Aku, laban Aku tu TUHAN ti nguduska kita. “Barang sapa nyumpah apai tauka indai diri, deka dibunuh. Kita empu deka betanggungjawapka pemati diri. “Enti lelaki butang enggau bini orang Israel, lelaki enggau indu nya deka sama dibunuh. Lelaki ke beleman enggau siku ari bala bini apai iya, ngemaluka apai iya, lalu iya enggau indu nya deka sama dibunuh. Seduai iya deka betanggungjawapka pemati diri. Enti lelaki beleman enggau menantu indu iya, seduai iya deka sama dibunuh. Seduai iya udah ngereja seks ti salah, lalu seduai iya deka betanggungjawapka pemati diri. Enti lelaki beleman enggau lelaki, seduai iya udah ngereja utai ti jai, lalu seduai iya deka sama dibunuh. Seduai iya deka betanggungjawapka pemati diri. Enti lelaki jadi enggau indu, lalu jadi mega enggau indai indu nya, semua sida tiga nya deka ditunu datai ke mati, ketegal utai ti balat ngemalu ti udah dikereja sida. Utai ti baka nya enda tau ditejuka nyadi ba bala kita. Enti lelaki beleman enggau jelu, iya enggau jelu nya deka sama dibunuh. Enti indu nguji beleman enggau jelu, iya enggau jelu nya deka sama dibunuh. Seduai iya deka betanggungjawapka pemati diri. Enti lelaki jadi enggau menyadi indu diri, tauka menyadi-tiri diri, seduai iya deka dipechat di mua orang mayuh, lalu dibuai ari bansa orang Israel. Lelaki nya udah beleman enggau menyadi indu diri, lalu iya deka betanggungjawapka penyalah nya. Enti lelaki beleman enggau indu ke datai kain, seduai iya deka sama dibuai ari bansa orang Israel, laban seduai iya udah ngelanggar adat pasal utai ti enda tuchi. Enti lelaki beleman enggau ibu iya empu, seduai iya deka sama betanggungjawapka penyalah nya laban seduai iya udah ngereja seks ti salah. Enti lelaki beleman enggau bini aya iya, iya ngemaluka aya iya, lalu iya enggau indu nya deka sama kena ukum. Seduai iya deka sama punas. Enti lelaki ngambi bini menyadi diri, seduai nya deka mati punas. Lelaki nya udah ngereja utai ti enda tuchi, lalu udah ngemaluka menyadi iya empu. Ku TUHAN bejaku, “Titihka semua adat enggau pesan Aku, ngambika kita enda ditulak menua Kanaan, alai Aku ti deka mai kita. Anang nitihka adat asal orang ke diau di menua nya. Aku udah muru orang bansa bukai ari menua nya, ngambika kita tau tama ngagai menua nya. Sida udah ngasuh Aku keji laban semua penyai ti udah dikereja sida. Tang Aku udah besemaya deka meri menua ti kaya sereta ami nya nyadika pesaka kita, lalu Aku deka meri menua nya ngagai kita. Aku tu TUHAN Allah Taala kita, lalu Aku udah nyeraraka kita ari semua bansa bukai. Nya alai, kita enda tau enda ngaga bida entara jelu enggau burung ti tuchi ari sida ke enda tuchi. Anang makai jelu enggau burung ti enda tuchi. Aku udah ngumbai sida enda tuchi, lalu enti kita makai sida, utai nya deka ngasuh kita enda tuchi. Kita deka nyadi kudus lalu diempu Aku siku aja, laban Aku tu TUHAN, lalu Aku tu kudus. Aku udah nyeraraka kita ari bansa bukai, ngambika kita diempu Aku siku aja. “Lelaki tauka indu ke bejaku enggau semengat orang ke udah mati, deka dituku ngena batu datai ke mati. Barang sapa ngereja utai nya, deka betanggungjawapka pemati diri.” Lalu ku TUHAN bejaku ngagai Moses, “Bejaku nuan ngagai sida imam, iya nya sida anak Aron, lalu sebut ngagai sida: Nadai siku sida tau ngaga diri enda tuchi ketegal kaban belayan diri ke mati, kelimpah ari indai, apai, anak lelaki, anak indu, menyadi lelaki, tauka menyadi indu ke apin belaki, ti diau dalam rumah iya. Iya enda tau ngaga diri enda tuchi ngena pengawa nyenggai kaban belayan ari bini iya. “Imam enda tau ngukur pala diri, tauka mipil ragum diri, tauka ngurik tubuh diri kena ngayanka diri ngulit. Iya enda tau enda kudus, lalu enda tau ngemaluka nama Aku, laban iya ngenjuk piring ti diberi ngena api ngagai Aku. Nya kebuah iya enda tau enda kudus. Imam enda tau jadi enggau indu ke udah nyundal, tauka enggau indu ke ukai dara bungas, tauka indu ke udah sarak ari laki iya, laban imam nya kudus. Orang mayuh enda tau enda ngumbai imam nya kudus, laban iya ngenjuk piring ti diberi ngena api ngagai Aku. Aku tu TUHAN. Aku tu kudus, lalu Aku nguduska bala nembiak Aku. Enti anak indu imam nyundal, iya ngemaluka apai iya. Iya enda tau enda ditunu datai ke mati. “Imam Besai udah ditata ngena minyak tata ti dituang ba pala iya, lalu udah diserahka ngagai TUHAN, ngambika iya tau ngena pekayan imam. Nya alai iya enda tau nejuka buk diri enda disugu, lalu enda tau nyarikka gari diri kena ngayanka diri ngulit. Iya enda tau tama ngagai endur ti bisi bangkai; iya enda tau ngamahka diri empu ngintu bangkai apai tauka indai iya. Iya enda tau pansut ari Langkau Kain TUHAN, enggai ke iya ngamahka Langkau Kain TUHAN Allah Taala iya; laban iya udah ditata ngena minyak Allah Taala iya: Aku tu TUHAN. Iya semina tau jadi enggau indu ke dara bungas. Iya enda tau jadi enggau indu ke balu, tauka indu ke udah sarak, tauka udah nyundal. Iya enda tau enda jadi enggau indu dara bungas ari raban peturun iya empu. Enti enda, bala anak iya ke patut kudus, deka nyadi enda tuchi. Aku tu TUHAN, lalu Aku udah nyeraraka iya nyadi Imam Besai.” Ku TUHAN bejaku ngagai Moses “Sebut ngagai Aron: peturun nuan, ke tachat, enda tau ngenjuk piring ti diberi ngena api ngagai Aku. Adat tu deka dikena belama iya. Tu gaya orang ke tachat ti enda tau datai semak ngagai Aku: orang ke buta, orang ke enda ulih engkebut, ti enda menyana gamal, tauka menawa, ke patah kaki tauka jari, tauka bungkuk, tauka pandak tasal, orang ke sakit mata tauka sakit kulit, tauka orang ke udah dipeliri. Peturun Imam Aron, ke bisi penimpang tubuh, enda tau ngenjuk piring ti diberi ngena api ngagai Aku. Laban iya bisi penimpang, iya enda tau datai semak lalu meri roti ngagai Allah Taala. Iya tau makai roti Allah Taala, nyengkaum roti ti kudus, enggau roti ti pemadu kudus, tang iya enda tau datai semak ngagai kain tirai tauka datai semak ngagai alta, laban tubuh iya bisi penimpang, enggai ke iya ngamahka Endur Aku ti Kudus, laban Aku tu TUHAN, ti nguduska utai nya.” Nya meh utai ti disebut Moses ngagai Aron, ngagai bala anak lelaki Aron, enggau ngagai semua orang Israel. Lalu ku TUHAN bejaku ngagai Moses, “Asuh Aron enggau bala anak lelaki iya bejimat enggau pemeri ti kudus ti diberi orang Israel ngagai Aku, ngambika sida enda mechat nama Aku ti kudus. Aku tu TUHAN. Sebut ngagai sida, ‘Enti siku ari peturun nuan, ba genap iti serak, datai semak ngagai pemeri ti kudus ti diserahka orang Israel ngagai Aku, lebuh iya agi mengkang enda tuchi, iya enda tau agi bekereja ba alta. Aku tu TUHAN. “Nadai siku ari peturun Aron, ke bisi penyakit kulit ti tau ngerampit, tauka bisi utai kamah pansut ari tubuh iya, tau makai pemeri ti kudus, datai ke udah nyadi tuchi baru. Imam nyadi enda tuchi enti iya negu utai ti enda tuchi, nemuka utai nya bangkai, tauka ai mani iya ti bisi pansut, tauka iya udah negu jelu ti enda tuchi, tauka negu orang ke enda tuchi. Imam ti nyadi enda tuchi, deka mengkang enda tuchi nyentuk ngagai lemai. Tang taja pen hari nyau lemai, iya enda tau makai pemeri ti kudus, enti iya apin mandi. Lebuh padam mata panas nya baru iya tuchi. Udah nya baru iya tau makai pemeri ti kudus, ti endang pemakai iya. Iya enda tau makai dagin jelu ti mati sakit tauka mati ngapa, tauka mati laban jelu babas. Utai nya deka ngasuh iya enda tuchi. Aku tu TUHAN.’ Sida enda tau enda nitihka adat ti diberi Aku, enggai ke sida salah lalu mati dalam Langkau Kain TUHAN ketegal sida enda ngasika adat ti kudus. Aku tu TUHAN, ke nguduska adat nya. “Orang bukai enda tau makai pemeri ti kudus nya. Orang ke diau enggau imam, tauka orang gaji iya pen enda meh tau makai pemeri nya. Tang ulun imam, ke dibeli ngena duit imam nya empu, tauka ada dalam rumah imam, tau makai pemakai imam. Enti anak indu imam jadi enggau orang ke ukai imam, iya enda tau makai pemeri ti kudus nya. Tang anak indu imam, ke balu, tauka udah dibuai laki lalu nadai anak, sereta udah pulai lalu diau dalam rumah apai iya baru, lalu nyadi orang tupi apai iya, tau makai pemakai apai iya ti nyadi imam. Semina sida imam sebilik aja tau makai pemakai nya. “Enti orang ke ukai sebilik enggau imam makai piring ti kudus, enggau enda sengaja, sida enda tau enda mayar semua rega piring nya ngagai imam, ditambahka enggau dua puluh peratus. Imam enda tau ngamahka pemeri ti kudus ti diberi orang Israel ngagai TUHAN, ti tau ngasuh sida betanggungjawapka penyalah ti begunaka piring kena muai penyalah, ketegal sida makai pemeri ti kudus: laban Aku tu TUHAN ti nguduska pemeri nya.” Lalu ku TUHAN bejaku ngagai Moses, “Sebut ngagai Aron, enggau ngagai bala anak lelaki iya, enggau ngagai semua orang Israel: Lebuh orang Israel, tauka orang kampar ti diau begulai enggau orang Israel, ngenjuk piring tunu, nemuka piring nya kena ngamatka semaya, tauka nyadika piring ti diberi nitihka peneka ati diri, jelu nya enda tau bisi penimpang. Jelu nya deka diterima enti iya lelaki lalu nadai penimpang. Enti kita meri jelu ti bisi penimpang, TUHAN enggai nerima jelu nya. Lebuh orang ngenjuk piring pemaik ngagai TUHAN, nemuka piring nya kena ngamatka semaya, tauka nyadika piring ti diberi nitihka peneka ati diri, jelu nya nadai tau bisi penimpang. Nya baru jelu nya deka diterima. Anang meri ngagai TUHAN jelu ti buta, tauka jelu ti enda tau bejalai, tauka bakal, tauka bisi kuris, tauka bisi kulit ti meletur, tauka kulit iya nyau penuh laban tutup kuris. Anang meri jelu ti baka nya ba alta nyadika piring ti diberi ngena api. Nyadi pasal piring ti diberi kita nitihka peneka ati diri, kita tau meri jelu ti tasal, tauka enda menyana gamal, tang piring nya enda diterima kena ngamatka semaya. Anang meri ngagai TUHAN jelu ti udah pechah pelir, tauka pelir iya bisi telih, malui, tauka udah tingkil. Utai ti baka nya enda tau dikereja di menua kita. Anang meri jelu ti diambi kita ari orang bansa bukai nyadika piring ti diberi ngena api. Jelu ti baka nya dikumbai jelu ti bisi penimpang, lalu enda diterima. Lalu ku TUHAN bejaku ngagai Moses, “Lebuh anak sapi tauka anak domba, tauka anak kambin ada, iya enda tau diambi ari indai iya dalam kandang tujuh hari. Ba hari ti kelapan nya baru iya diterima nyadika piring ti diberi ngena api ngagai TUHAN. Anang meri sapi ti indu enggau anak iya, tauka indu jelu bedus enggau anak iya, tauka jelu kambin enggau anak iya sama hari nyadika piring. Lebuh kita ngenjuk piring terima kasih ngagai TUHAN, titihka adat tu, ngambika kita diterima. Empa piring nya ba hari nya, lalu anang nejuka utai nya beteda ngagai pagi hari siti. “Nya alai kita enda tau enda ngasika, lalu ngereja pesan Aku. Aku tu TUHAN. Lalu kita enda tau mechat nama Aku ti kudus. Semua orang Israel enda tau enda ngumbai Aku kudus. Aku tu TUHAN ti nguduska kita, ti udah mai kita pansut ari menua Ejip ngambika Aku nyadi Allah Taala kita. Aku tu TUHAN.” Ku TUHAN bejaku ngagai Moses, “Sebut ngagai orang Israel: Tu gawai TUHAN ti deka dikumbai kita gawai ti kudus. Kita bisi enam hari alai kita gawa, tang hari ti ketujuh nya Hari Sabat, hari kita belelak, hari alai kita besembiang bebala mayuh. Kita enda tau gawa, laban hari nya Hari Sabat TUHAN, lalu enda tau enda diintu kita di semua endur alai kita diau. “Baka tu ku gawai TUHAN, alai kita besembiang bebala mayuh, ti deka diintu kita ba maya ti diletak. Ba bulan ti kesatu, kena empat belas hari bulan nya, ba tumbuh nyang lemai nya kita deka ngintu Gawai Paska TUHAN. Lalu kena lima belas hari bulan, kita enda tau enda ngintu Gawai Roti Ti Enda Beragi ke TUHAN. Kita deka makai roti ti enda beragi dalam kandang tujuh hari. Ba hari ti keterubah, kita deka besembiang bebala mayuh. Kita enda tau gawa. Tang kita enda tau enda ngenjuk piring ngena api ngagai TUHAN tujuh hari. Ba hari ti ketujuh, kita enda tau enda besembiang bebala mayuh. Kita enda tau gawa.” Lalu ku TUHAN bejaku ngagai Moses, “Sebut ngagai orang Israel: Lebuh kitai datai di menua ti diberi Aku ngagai kita, lalu ngetau utai di menua nya, kita enda tau enda mai gempung tangkai ti terubah diketau kita ngagai imam. Imam nya deka miauka gempung tangkai gandum nya di mua TUHAN, ngambika TUHAN nerima kita. Pagi hari siti, udah bekau Hari Sabat, imam deka miauka gempung tangkai nya. Lalu ba hari kita miauka gempung tangkai gandum nya, beri mega siku jelu bedus ti lelaki, ti umur setaun, ti nadai penimpang, nyadika piring tunu. Sama enggau nya, kita enda tau enda mega meri dua kilogram tepung ti dichampur enggau minyak kana, nyadika piring ti diberi ngena api. Bau piring nya deka ngerinduka ati TUHAN. Kita enda tau enda mega meri, sama enggau nya, dua butul wain. Anang makai gandum ti baru, nemuka gandum nya diempa mata, tauka digirau, tauka digaga nyadi roti, sebedau kita mai piring nya ngagai TUHAN. Adat tu enda tau enda dititihka semua serak peturun kita belama iya di semua endur alai sida diau. Itung tujuh minggu penuh belabuh ari sehari udah bekau Hari Sabat lebuh kita ke mai lalu meri gempung gandum kita ngagai TUHAN. Ba hari ti kelima puluh, sehari udah bekau Hari Sabat ti ketujuh, beri ngagai TUHAN siti agi piring ti digaga ari gandum ti baru diketau. Genap ruang bilik enda tau enda mai dua iti tuku roti, lalu meri utai nya ngagai TUHAN nyadika pemeri ti manah. Genap iti tuku roti nya deka digaga ari dua kilogram tepung, diberi ragi, dipanggang, lalu diserahka ngagai TUHAN nyadika piring gandum ari gandum ti terubah diketau. Orang Israel deka meri, sama enggau roti nya, tujuh iku anak domba ti umur setaun, siku sapi ti lelaki, enggau dua iku bedus ti lelaki, lalu semua sida nya nadai penimpang magang. Semua jelu nya diserahka ngagai TUHAN nyadika piring tunu, sama enggau piring gandum, enggau piring wain. Piring tu deka bebau rengut lalu ngerinduka ati TUHAN. Beri mega siku kambin ti lelaki nyadika piring pengampun dosa, enggau dua iku anak domba ti umur setaun nyadika piring pemaik. Imam deka meri roti nya enggau anak domba ti dua iku nya nyadika piring ti manah ngagai TUHAN, ke bala imam. Semua piring tu kudus magang. Ba hari nya, nadai siku kita tau gawa, tang besembiang bebala mayuh. Peturun kita enda tau enda nitihka adat tu belama-lama, di semua endur alai sida diau. Lebuh kita ngetau umai kita, anang ngetau gandum ti ba tisi umai kita, lalu anang pulai kia baru lalu ngumpul semeli. Tinggalka utai nya ke orang ke seranta enggau ke orang kampar. Aku tu TUHAN Allah Taala kita.” Lalu ku TUHAN bejaku ngagai Moses, “Sebut ngagai orang Israel: Kena satu hari bulan ti ketujuh, kita enda tau enda ngintu siti hari alai diau, lalu besembiang bebala mayuh, lebuh terumpit disepu. Kita enda tau gawa; lalu kita enda tau enda ngenjuk piring ngena api ngagai TUHAN.” Lalu ku TUHAN bejaku ngagai Moses, “Sepuluh hari bulan ti ketujuh tiap taun nya hari pengampun dosa. Ba hari nya kita enda tau enda besembiang bebala mayuh, bepasa, lalu ngenjuk piring ti diberi ngena api ngagai TUHAN. Lalu kita enda tau gawa lebuh hari nya, laban nya hari pengampun dosa, alai kita minta TUHAN Allah Taala kita ngampun dosa kita. Barang sapa enda bepasa lebuh hari nya, deka badu agi dikumbai nembiak Allah Taala. Lalu barang sapa gawa lebuh hari nya, deka Aku bunuh. Kita enda tau gawa lebuh hari nya. Adat tu deka dititihka semua peturun kita, enda milih endur alai sida diau. Belabuh ari padam mata panas ba semilan hari bulan nya, nyentuk ngagai sepuluh hari bulan, intu hari nya nyadika hari alai kita belelak, lalu sehari nya kita enda tau enda bepasa. Lalu ku TUHAN bejaku ngagai Moses, “Sebut ngagai orang Israel: Berengkah ari lima belas hari bulan ti ketujuh, dalam pengelama tujuh hari, kita enda tau enda ngintu Gawai Belangkau ke TUHAN. Ba hari ti keterubah, kita enda tau enda besembiang bebala mayuh, lalu kita enda tau gawa. Genap hari kita enda tau enda ngenjuk piring ti diberi ngena api ngagai TUHAN. Ba hari ti kelapan, kita enda tau enda besembiang bebala mayuh, lalu ngenjuk piring ti diberi ngena api ngagai TUHAN. Nya hari alai kita besembiang bebala mayuh, lalu kita enda tau gawa. ( Nya meh gawai pengarap ti dikena kita ngemesaika TUHAN, ti deka dikumbai kita maya alai kita besembiang bebala mayuh, alai kita ngenjuk piring ti diberi ngena api, piring tunu, piring gandum, piring jelu, enggau piring wain, ti diguna ba hari ti patut. Piring tu nambahka piring ti diberi lebuh Hari Sabat, sereta nambahka piring ti diberi kita ngena chara selama, piring kena kita ngamatka semaya, enggau piring ti diberi nitihka peneka ati diri, ti diberi kita ngagai TUHAN.) “Kena lima belas hari bulan ti ketujuh, lebuh kita udah tembu ngetau, kita enda tau enda ngintu gawai ke TUHAN tujuh hari. Hari ti keterubah nya hari kita belelak. Hari ti kelapan nya hari alai kita belelak. Ba hari ti keterubah, ambi sekeda buah ti pemadu manah ari kayu buah kita, ambi dan kayu engkerema, enggau dan ari kayu ti lebat daun, lalu rami gaga di mua TUHAN Allah Taala kita dalam pengelama tujuh hari. Intu gawai nya tujuh hari dalam setaun. Adat tu enda tau enda dititihka bala peturun kita datai ke belama iya. Kita ngintu gawai nya dalam bulan ti ketujuh. Kita deka diau dalam langkau kain kita tujuh hari; semua orang Israel deka diau dalam langkau kain sida tujuh hari, ngambika peturun kita nemu TUHAN udah ngasuh orang Israel diau dalam langkau kain, lebuh Aku mai sida pansut ari menua Ejip. Aku tu TUHAN Allah Taala kita.” Nya meh chara Moses meri ngagai orang Israel semua adat ti dikena sida ngintu gawai pengarap, kena sida ngemesaika TUHAN. Ku TUHAN bejaku ngagai Moses, “Asuh orang Israel mai ngagai nuan minyak kana ti tulin, ti pemadu manah, ke lampu ti di dalam Langkau Kain TUHAN, ngambika lampu nya seruran menyadi belama. Genap lemai, Aron deka nungkun lampu nya lalu nejuka lampu nya menyadi nyentuk ngagai pagi, di mua TUHAN, ari luar kain tirai ti di mua Peti Lampang Batu Adat ti di dalam Endur ti Pemadu Kudus. Adat tu deka dititihka genap serak kita belama iya. Aron deka ngintu lampu ti ba penuduk lampu ti digaga ari emas nya, lalu nentuka semua lampu nya menyadi belama di mua TUHAN. “Ambi dua belas kilogram tepung ti alus, lalu panggang dua belas iti tuku roti. Tusun tuku roti nya berintai dua, enam iti dalam siti-siti rintai, ba atas mija ti disampak enggau emas ti tulin, ti di mua TUHAN. Engkahka menyan ti tulin ba siti-siti rintai roti nya, kena nandaka piring ti diberi ngena api nya diserahka ngagai TUHAN, kena nganti roti. Genap Hari Sabat, datai ke belama iya, roti nya enda tau enda diengkah di mua TUHAN. Tu pengawa ti enda tau enda dikereja orang Israel belama iya. Roti nya diempu Aron enggau bala peturun iya, lalu sida deka makai roti nya ba endur ti kudus, laban tu bagi pemakai ti pemadu kudus ti diserahka ngagai TUHAN, ke bala imam. Moses lalu ngasuh iya kena tan dulu, nganti TUHAN udah madahka utai ti patut dikereja sida ngagai iya. TUHAN lalu bejaku ngagai Moses, “Bai orang ke nyumpah nya pansut ari kem tu. Lalu awakka semua orang ke bisi ninga iya nyumpah, ngengkahka jari sida ba pala iya, lalu awakka semua orang Israel nuku iya ngena batu. Lalu padahka ngagai orang Israel: Barang sapa nyumpah Allah Taala, deka betanggungjawapka penyalah diri. Orang ke bejaku busung ngelaban nama TUHAN, deka dibunuh. Semua orang mayuh deka nuku iya ngena batu. Orang kampar enggau orang Israel empu deka dibunuh lebuh iya bejaku busung ngelaban nama TUHAN. “Orang ke munuh orang, deka dibunuh, lalu orang ke munuh jelu orang bukai, enda tau enda nganti jelu nya, nyawa balas nyawa. Barang sapa ngemakalka orang, deka dibakalka baka orang nya: patah tulang dibalas ngena patah tulang, mata balas mata, ngeli balas ngeli; pemedis ti dikereja iya ngagai orang, deka dikereja ngagai iya empu. Barang sapa munuh jelu, enda tau enda nganti jelu nya, tang barang sapa munuh mensia, deka dibunuh. Kita semina bisi siti aja adat ke orang Israel enggau ke orang kampar, laban Aku tu TUHAN Allah Taala kita.” Lebuh Moses udah nyebut jaku nya ngagai orang Israel, sida lalu mai lelaki ke bejaku busung nya pansut ari kem nya, lalu nuku iya ngena batu. Nya meh chara orang Israel ngereja jaku ti udah dipesanka TUHAN ngagai Moses. Ku TUHAN bejaku ngagai Moses ba Bukit Sinai: “Sebut ngagai orang Israel: Lebuh kita tama ngagai menua ti diberi TUHAN ngagai kita, kita enda tau nanam utai dalam genap taun ti ketujuh, kena kita ngemesaika Iya. Kita tau nanam utai ba tanah kita, nyarau anggur ba kebun kita, lalu ngetau utai ti ditanam kita dalam kandang enam taun. Tang dalam taun ti ketujuh kita enda tau enda nejuka tanah kita enda dipumai, taun ti diserahka ngagai TUHAN. Anang nanam utai ba tanah kita, tauka nyarau anggur kita. Indah gandum ti tumbuh-diri, deh enda tau diketau, lalu anang ngumpul buah anggur ari batang anggur ti enda dijarau kita. Taun nya nyadika taun alai kita nejuka tanah kita enda dipumai. Taja pen tanah kita enda ditanam enggau utai dalam taun nya, tanah nya deka mansutka pemakai ke kita, ti ulun kita, ke orang gaji kita, ke orang kampar ti diau begulai enggau kita, ke jelu tupi kita, enggau ke jelu babas ti ba tanah kita. Semua asil ari tanah kita, tau diempa magang. “Itung tujuh kali tujuh taun, empat puluh semilan taun semua iya. Udah nya, kena sepuluh hari bulan ti ketujuh, iya nya Hari Pengampun Dosa, asuh orang nyepu terumpit di serata menua kita. Nya chara kita deka nguduska taun ti kelima puluh, lalu ngelepaska semua orang ke diau di menua kita. Dalam taun nya, semua reta tengkira ti udah dijual, deka dipulaika baru ngagai orang ke asal bempu utai nya, tauka ngagai raban bansa sida, lalu orang ke udah dijual nyadi ulun, deka pulai baru ngagai ruang bilik sida empu. Kita enda tau nanam utai ba tanah kita, tauka ngetau gandum ti tumbuh-diri, tauka ngumpul buah anggur ba kebun anggur ti enda dijarau kita. Taun Jubili nya deka nyadi kudus ke kita. Kita semina tau makai utai ti tumbuh-diri ba tanah kita. Dalam Taun Jubili nya, semua reta tengkira ti udah dijual, deka dipulaika baru ngagai orang ke asal bempu iya. Nya alai lebuh kita nyual tanah ngagai orang Israel, tauka meli tanah, anang ngelakar. Rega tanah nya enda tau enda diletak nitihka berapa taun tanah nya ulih mansutka asil sebedau Taun Jubili ti deka datai. Enti Taun Jubili nya agi jauh, rega tanah nya mar, tang enti taun nya nyau semak, rega iya murah, laban utai ti dijual nya semina asil ari tanah nya empu. Anang nipu pangan diri, tang kita patut nangika Allah Taala kita; laban Aku tu TUHAN Allah Taala kita. “Nya alai kita enda tau enda ngasika semua adat enggau pesan Aku, ngambika kita tau diau likun di menua tu. Menua tu deka mansutka asil, lalu kita deka chukup semua utai diempa, sereta diau likun. Lalu enti kita nyebut, ‘Nama utai ti deka diempa kitai enti kitai nadai nanam tauka ngetau utai?’ Aku deka merekatka menua tu dalam taun ti keenam, ngambika menua tu mansutka pemakai chukup diempa dalam tiga taun. Lebuh kita nanam utai ba tanah kita dalam taun ti kelapan, kita deka mengkang makai utai ti diketau kita dalam taun ti keenam, nyentuk ngagai taun ti kesemilan, maya utai ti ditanam kita dalam taun ti kelapan nya diketau kita. “Tanah kita enda tau dijual terus, laban tanah nya enggi Aku; laban kita tu orang kampar ti diau enggau Aku. Lalu lebuh tanah dijual, orang ke asal bempu tanah nya bisi hak meli tanah nya pulai baru. “Enti kita orang Israel bisi suntuk, lalu ketegal nya enda tau enda nyual tanah diri, kaban belayan iya ke pemadu nyempil enda tau enda meli tanah nya pulai baru. Enti iya nadai kaban belayan ke ulih meli tanah nya pulai baru, lalu iya nyangka jemah ila tau nyadi kaya-raja, lalu bisi chukup duit kena iya meli tanah nya pulai baru. Awakka iya mayar ngagai orang ke udah meli tanah nya, ngena rega ti chukup ke berapa taun ti agi tinggal sebedau Taun Jubili ti deka datai, iya nya taun alai tanah nya enda tau enda dipulaika baru ngagai iya. Tang enti iya nadai chukup duit kena meli tanah nya pulai baru, tanah nya mengkang diempu orang ke udah meli tanah nya, nyentuk ngagai Taun Jubili ti deka datai. Dalam taun nya, tanah nya deka dipulaika baru ngagai orang ke asal bempu iya. “Enti orang nyual rumah dalam nengeri ti bekuta, iya tau meli rumah nya pulai baru dalam setaun penuh udah bekau rumah nya dijual iya. Tang enti iya enda meli rumah nya pulai baru dalam setaun nya, iya nadai agi hak meli rumah nya pulai baru, lalu rumah nya deka terus nyadi pesaka orang ke meli rumah nya, enggau bala peturun iya. Rumah nya enda dipulaika baru dalam Taun Jubili. Tang rumah ba genturung pendiau ti enda bekuta, deka digaga nyadi baka tanah umai. Orang ke asal bempu rumah nya, bisi hak meli rumah nya pulai baru, lalu rumah nya deka dipulaika baru dalam Taun Jubili. Tang orang Lewi bisi hak meli pesaka sida pulai baru ba sebarang maya, dalam nengeri ti udah diungkupka ngagai sida. Enti rumah dalam nengeri ti baka nya dijual orang Lewi, lalu enda dibeli pulai baru, rumah nya enda tau enda dipulaika baru ngagai orang nya empu dalam Taun Jubili, laban rumah ti diempu orang Lewi dalam nengeri nya, endang pesaka sida dalam bansa orang Israel. Tang padang rumput ti ngelingi nengeri ti udah diungkupka ngagai orang Lewi, enda tau dijual. Padang rumput nya endang pesaka sida belama iya. “Enti orang Israel ti diau semak kita suntuk lalu enda ulih ngidupka diri agi, kita enda tau enda meri iya utai ti dipeguna sida, baka kita ke ngaga orang gaji kita, ngambika sida ulih majak diau semak kita. Anang minta anak duit ari orang Israel, tang nangika Allah Taala, ngambika sida ulih diau semak kita. Anang minta bayar anak duit ti dijali kita ngagai iya, tauka ngiga untung ari pemakai ti dijual kita ngagai iya. Aku tu TUHAN Allah Taala kita, ti udah mai kita pansut ari menua Ejip ngambika meri menua Kanaan tu ngagai kita, ngambika Aku nyadi Allah Taala kita. “Enti orang Israel ti diau semak kita suntuk, lalu iya nyual diri nyadi ulun kita, anang ngasuh sida ngereja pengawa ulun. Iya deka diau enggau kita nyadi orang gaji. Iya deka bekereja ke kita nyentuk ngagai Taun Jubili ti deka datai. Lebuh maya nya ila, iya enggau sida menyanak deka ninggalka kita, lalu pulai baru ngagai ruang bilik sida empu, ngagai pesaka aki ini sida empu. Laban orang Israel endang nembiak Aku, ti udah dibai Aku pansut ari menua Ejip. Sida enda tau dijual nyadi ulun. Anang kasar enggau sida, tang nangika Allah Taala kita. Pasal ulun ti lelaki enggau ti indu ke diau enggau kita, kita tau meli ulun ari bansa bukai ke ngelingi kita. Kita tau mega meli anak orang bansa bukai ke diau begulai enggau kita, ke ada dalam menua kita. Sida tau nyadika pesaka kita. Kita tau meri sida ngagai anak uchu kita, nyadika pesaka sida belama iya; kita tau ngaga sida nyadi ulun, tang kita enda tau merintah orang Israel, lalu enda tau kasar enggau sida. “Enti sema orang bansa bukai ke diau begulai enggau kita nyadi kaya, tang orang Israel nyadi seranta, lalu nyual diri empu nyadi ulun orang bansa bukai nya, tauka nyual diri ngagai orang ke ari ruang bilik orang bansa bukai nya, lebuh sida udah nyual diri, sida agi tau dibeli pulai baru. Menyadi lelaki sida tau meli sida pulai baru, tauka aya, tauka petunggal, tauka kaban belayan ke nyempil, tau meli sida pulai baru. Tauka, enti sida udah bulih duit, sida tau nebus diri empu. Sida enda tau enda betanya ngagai orang ke udah meli sida, lalu sida enda tau enda ngitung pengelama sida udah nyual diri, nyentuk ngagai Taun Jubili ti deka datai, lalu ngeletak ungkus tebus sida beduduk ba gaji ti diberi ngagai orang gaji. baka reti orang gaji ke digaji ari taun siti ngagai taun siti. Tuan sida enda tau kasar enggau sida. Enti sida enda dilepaska ngena atur nya, sida enggau sida menyanak, enda tau enda dilepaska dalam Taun Jubili. Orang Israel enda tau digaga nyadi ulun belama iya, laban orang Israel endang nembiak Aku, ke dibai Aku pansut ari menua Ejip: Aku tu TUHAN Allah Taala kita. “Anang ngaga engkeramba tauka ngaga anak patung, tauka tiang keramat, tauka batu ti ditebuk ngambika bisi disembah; laban Aku tu TUHAN Allah Taala kita. Intu gawai pengarap, lalu beri basa ngagai Langkau Kain TUHAN alai Aku ke disembah. Aku tu TUHAN. “Enti kita diau nitihka adat Aku, lalu ngasika pesan Aku, lalu ngereja pesan nya, nya baru Aku deka ngasuh hari ujan ba maya ti patut, ngambika menua kita mansutka asil, lalu kayu deka bebuah. Utai ti ditanam kita deka mansutka mayuh asil, datai ke kita agi ngetau gandum lebuh maya kita deka ngetau buah anggur, lalu kita agi ngetau buah anggur lebuh maya kita nyau deka nugalka gandum kita. Kita deka bulih semua utai ke diempa kita, lalu kita deka diau likun dalam menua kita. Aku deka meri kita pemaik dalam menua kita, lalu kita ulih tinduk enda takutka orang. Aku deka muai semua jelu ti mangah ari menua kita, lalu perang nadai agi nyadi di menua kita. Lalu kita deka begagaika munsuh kita, lalu sida deka mati dipantap kita. Lima iku kita deka begagaika seratus iku, lalu seratus iku kita deka begagaika sepuluh ribu iku, lalu munsuh kita deka mati dipantap kita. Aku deka merekatka kita, lalu meri kita mayuh anak. Aku deka ngingatka sempekat ti udah digaga Aku enggau kita. Utai ti diketau kita deka lebih ari chukup diempa kita setaun, tang taja pia, kita enda tau enda muai gandum ti lama, ngambika bisi endur alai kita nyimpan gandum ti baru. Aku deka diau begulai enggau kita, dalam Langkau Kain Aku ti kudus, lalu Aku enggai sekali-kali ninggalka kita Aku deka meruan enggau kita. Aku deka nyadi Allah Taala kita, lalu kita deka nyadi nembiak Aku. Aku tu TUHAN Allah Taala kita, ti udah mai kita pansut ari menua Ejip, ngambika kita badu agi nyadi ulun; lalu Aku udah matahka kuasa ti nekanka pengidup kita, lalu Aku udah ngasuh kita bejalai enggau nadai pemalu agi.” “Tang enti kita enggai mendingka Aku, lalu enggai ngereja utai ti dipesanka Aku ngagai kita, enti kita enggai ngasika adat enggau pesan Aku, enggai ngereja semua utai ti dipesanka Aku, tang ngelanggar sempekat ti udah digaga Aku enggau kita, Aku deka ngereja tu ngagai kita: Aku deka ngasuh kita ditinggang penusah ti besai, penyakit ti enda ulih diubat, enggau penyakit chelap-angat ti ngasuh mata kita buta, lalu munuh kita. Kita deka nanam utai, tang utai nya nadai mai penguntung ngagai kita, laban munsuh kita deka makai utai nya. Aku deka ngelaban kita, lalu kita deka alah laban munsuh kita; orang ke begedika kita, deka merintah kita; lalu kita deka rari, taja pen orang nadai begagaika kita. Lalu enti kita mengkang enggai mendingka Aku, udah bekau semua utai nya nyadi, Aku deka nambahka ukum kita tujuh kali lipat ketegal dosa kita, lalu Aku deka matahka kuasa penyumbung kita, lalu Aku deka ngaga langit rangkai baka besi, lalu tanah kita baka temaga; lalu semua pengawa kita nadai pulai ke penguntung, laban menua kita enda mansutka asil, lalu kayu buah kita enda bebuah. “Udah nya, enti kita majak ngelaban Aku, lalu enggai mendingka Aku, Aku deka nambahka ukum kita tujuh kali lipat nitihka pemayuh dosa kita. Lalu Aku deka ngasuh jelu babas datai ngelaban kita, lalu sida deka munuh anak kita, munuh jelu tupi kita, lalu ninggalka semina mimit aja ari bala kita idup, datai ke jalai kita nyau sunyi nadai orang nengah. “Lalu enti, udah bekau Aku ngukum kita, kita mengkang enggai mendingka Aku, tang majak ngelaban jaku Aku, Aku deka ngelaban kita, lalu Aku Empu deka ngukum kita tujuh kali balat agi ari ti dulu ketegal dosa kita. Lalu Aku deka ngasuh perang nyadi di menua kita, kena Aku ngukum kita, laban kita ngelanggar sempekat ti digaga Aku enggau kita, lalu enti kita begempuru dalam nengeri kita ngiga pengelikun, Aku deka ngasuh penyakit ti enda ulih diubat ninggang kita, lalu kita deka diserahka ngagai munsuh kita. Lebuh Aku mutuska penatai pemakai kita, sepuluh iku indu deka manggang roti ngena siti aja dapur, lalu sida deka bedua roti nya, lalu lebuh kita udah makai semua roti nya, kita agi mengkang lapar. “Lalu enti, udah bekau nya, kita agi majak enggai mendingka Aku, tang majak ngelaban Aku, Aku deka ringat lalu ngelaban kita, lalu nambahka ukum kita tujuh kali lipat ketegal dosa kita. Kita deka makai isi anak lelaki kita, lalu kita deka makai isi anak indu kita. Lalu Aku deka ngerusak endur alai kita besembiang, lalu ngeruntuhka alta ti alai kita nunu menyan, lalu nikauka bangkai kita atas engkeramba kita; lalu Aku deka begedika kita. Lalu Aku deka ngeruntuhka nengeri kita, lalu ngaga endur alai kita besembiang nyadi tembawai, lalu enda agi nyium bau piring kita. Lalu Aku deka ngerusak semua utai di menua kita, datai ke munsuh ti nguan menua kita deka tegenung meda nya. Lalu Aku deka mambarka kita ngagai mayuh bengkah menua, lalu Aku deka nyintak pedang Aku begagaika kita; lalu menua kita nadai orang nguan, lalu nengeri kita rusak magang. “Nya baru menua kita deka ngetu dipumai kita, seagi-agi iya nadai orang nguan, lebuh kita dibuai ngagai menua munsuh kita. Nya baru menua kita deka ngetu dipumai. Seagi-agi menua nya nadai orang nguan, iya mengkang enda dipumai, enda baka lebuh kita ke diau di menua nya. Nyadi pasal kita ke tinggal, Aku deka ngasuh kita takut diau di menua munsuh, datai ke kita rari ninga kerus daun ti dipuputka ribut, baka ke rari ari munsuh lebuh beperang, lalu kita deka rebah taja pen munsuh nadai begagaika kita. Kita deka tesangkut ba pangan diri, baka ke rari ari munsuh, taja pen munsuh nadai begagaika kita, lalu kita enda ulih ngelaban munsuh kita. Lalu kita deka mati di menua orang, lalu dikuburka di menua munsuh kita. Lalu kita ke agi tinggal deka tusah ati diau di menua munsuh kita ketegal dosa kita, enggau ketegal dosa apai kita. “Tang enti sida ngaku dosa sida, enggau dosa aki ini sida ke udah nulak sereta angkat ngelaban Aku, ti ngujungka Aku ngelaban sida, lalu muai sida ngagai menua munsuh sida; enti sida ngemaruhka diri lalu nerima ukum ke penyai sida; nya baru Aku deka ingatka sempekat Aku enggau Jakop, sempekat Aku enggau Isak, enggau sempekat Aku enggau Abraham, lalu deka ingatka menua tu. Tang sida deka ninggalka menua tu, ngambika menua tu enda dipumai laban nadai orang nguan; lalu sida deka nerima ukum ke penyai sida laban sida nulak adat Aku, lalu kejika adat Aku. Tang taja pia, lebuh sida agi diau di menua munsuh sida, Aku enggai ninggalka sida, tauka begedika sida lalu ngerusak sida abis lengis, lalu ngelanggar sempekat Aku enggau sida, laban Aku tu TUHAN Allah Taala sida; tang, ke penguntung sida, Aku deka ngingatka sempekat ti udah digaga Aku enggau aki ini sida, ke dibai Aku pansut ari menua Ejip, dipeda semua bansa, ngambika Aku nyadi Allah Taala sida; Aku tu TUHAN.” Tu meh semua adat enggau pesan ti diberi TUHAN ngagai Moses ba Bukit Sinai, ke orang Israel. Ku TUHAN bejaku ngagai Moses, “Sebut ngagai orang Israel: Enti kita deka ngelepaska orang ke udah diserahka ngagai Aku ngena sumpah, orang nya tau dilepaska enti iya mayar nitihka atur ti diletak dalam Langkau Kain TUHAN. Enti orang nya kelalu seranta, lalu enda tebayarka rega diri, iya deka dibai ngagai imam, lalu imam nya deka ngeletak rega ti baruh agi, ti ulih dibayar orang nya. “Enti kita besemaya deka meri jelu nyadika piring ngagai Aku, jelu nya nyadi kuduska TUHAN, lalu kita enda tau nganti jelu nya enggau jelu bukai, nemuka kita nganti jelu ti manah kena nganti jelu ti jai, tauka jelu ti jai kena nganti jelu ti manah. Enti orang nya nganti jelu nya enggau jelu bukai, jelu dua iku nya sama kuduska TUHAN. Tang enti orang nya deka meri jelu ti enda tuchi, ti enda tau diterima, nyadika piring ti diberi ngagai TUHAN, kita enda tau enda mai jelu nya ngagai imam, lalu imam nya deka ngeletak rega jelu nya, nitihka penyai tauka pemanah gaya jelu nya, lalu rega iya deka ditetapka. Tang enti kita deka meli jelu nya pulai baru, kita enda tau enda mayar rega jelu nya, ditambahka enggau dua puluh peratus ari rega ti ditetapka. “Lebuh orang nyerahka rumah diri nyadi rumah ti kudus ngagai TUHAN, imam deka ngeletak rega rumah nya nitihka pemanah tauka penyai gaya rumah nya, lalu netapka rega rumah nya. Lalu enti kita deka meli rumah nya pulai baru, kita enda tau enda mayar rega rumah nya, ditambahka enggau dua puluh peratus. “Enti kita nyerahka tanah kita ngagai TUHAN, rega tanah nya deka diletak nitihka penyampau benih ti tau ditanam ba tanah nya, ngena rega 10 singkap pirak ke genap 20 kilogram barli. Enti kita nyerahka tanah nya dalam Taun Jubili, rega ti penuh deka dikena kita. Tang enti kita nyerahka tanah nya udah lepas Taun Jubili, imam deka ngira lalu nurunka rega tanah nya, nitihka berapa taun agi sebedau Taun Jubili deka datai baru. Lalu enti kita deka meli tanah nya pulai baru, kita enda tau enda mayar rega nya, ditambahka enggau dua puluh peratus. Tang enti kita enggai nebus tanah nya, tauka udah nyual tanah nya ngagai orang bukai, tanah nya enda tau ditebus agi. Ba Taun Jubili ti deka datai, tanah nya deka nyadi tanah ti kuduska TUHAN, lalu deka diempu bala imam. Enti kita nyerahka ngagai TUHAN tanah ti baru udah dibeli kita, ti ukai pesaka asal kita, imam nya deka ngira rega ti patut, nitihka berapa taun da agi sebedau Taun Jubili deka datai, lalu kita enda tau enda mayar rega tanah nya ba hari nya, nyadi duit ti kuduska TUHAN. Dalam Taun Jubili ila, tanah nya deka dipulaika baru ngagai orang ke udah nyual tanah nya, nyadika pesaka iya. Semua rega enda tau enda diletak nitihka atur ti dikena dalam Langkau Kain TUHAN. “Tang anak bungas jelu endang enggi TUHAN. Nya alai, kita enda tau nyerahka jelu nya nyadika piring ngagai TUHAN. Nemuka jelu nya anak sapi, anak domba, tauka anak kambin, iya endang enggi TUHAN. Tang enti jelu nya enda tuchi, iya tau dibeli pulai baru ngena rega ti udah diletak, ditambahka enggau dua puluh peratus. Enti jelu nya enda dibeli pulai baru, iya tau dijual ngagai orang bukai ngena rega ti udah diletak. “Tang nadai siku kita tau nyual tauka meli pulai baru utai ti udah diserahka ngagai TUHAN, nemuka iya nya mensia, jelu, tauka tanah. Utai nya terus diempu TUHAN. Indah mensia ti udah diserahka, deh enda tau dibeli pulai baru. Mensia nya enda tau enda dibunuh. “Sepuluh peratus asil ari tanah, nemuka utai nya gandum tauka buah, endang enggi TUHAN. Utai nya kuduska TUHAN. Enti kita deka meli utai nya pulai baru, kita enda tau enda mayar rega ti udah diletak, ditambahka enggau dua puluh peratus. Lalu siku ari sepuluh iku jelu tupi, endang enggi TUHAN. Lebuh jelu diitung, genap iku jelu ti kesepuluh endang enggi TUHAN. Kita enda tau ngerintai jelu ngambika iya ti jai kena pilih, lalu kita enda tau besilihka jelu nya. Enti kita besilihka jelu, kedua-dua iku jelu nya deka sama diempu TUHAN, lalu seduai iya enda tau dibeli pulai baru. Tu meh pesan ti udah diberi TUHAN ngagai Moses ba Bukit Sinai, ke orang Israel. Kena satu hari bulan ti kedua, kedua taun udah bekau orang Israel pansut ari menua Ejip, TUHAN bejaku ngagai Moses dalam Langkau Kain TUHAN, di menua puang Sinai. Ku Iya, “Itung pemayuh tubuh orang Israel, nitihka ripih suku raban bansa enggau ruang bilik sida. Tuliska nama semua orang ke lelaki, ke umur dua puluh taun ke atas, ti tau enggau beperang. Seduai Aron enda tau enda ngitung pemayuh tubuh sida, nitihka raban peturun enggau ruang bilik sida. Bai tuai ari siti-siti raban nyaup nuan. Moses seduai Aron lalu mai orang ke udah disebut nama nya, lalu kena satu hari bulan ti kedua, seduai iya ngempuruka semua orang Israel, lalu nuliska nama semua orang nitihka ripih suku raban bansa enggau ruang bilik sida. Nama orang lelaki ke umur dua puluh taun ke atas lalu dituliska magang, lalu diitung, nitihka pesan TUHAN ngagai Moses. Nya alai Moses nuliska nama orang mayuh di menua puang Sinai. Tang orang Lewi enda dituliska nama baka raban bansa ti bukai, laban TUHAN udah nyebut ngagai Moses, “Tang anang ngitung tubuh raban bansa Lewi. Nuan enda tau ngitung sida lebuh nuan ngitung tubuh orang Israel; tang asuh sida ngemataka Langkau Kain Aku, enggau semua pekekas ke Langkau Kain nya. Sida deka ngesan langkau sembiang enggau semua pekekas iya, gawa dalam langkau sembiang nya, lalu nirika kem sida ngelingi langkau sembiang nya. Genap kali kita mindah kem, orang Lewi deka ngererak langkau sembiang nya, lalu nirika iya baru ba endur ti baru. Enti orang bukai datai semak ngagai langkau sembiang nya, orang nya deka dibunuh. Orang Israel ti bukai deka nirika kem sida beraban-raban, nitihka raban diri empu, di baruh menira sida empu. Tang orang Lewi deka nirika kem sida ngelingi Langkau Kain TUHAN, ngambika bisi nyaga iya, nagang orang datai semak, enggai ke Aku ringat ngagai orang Israel.” Nya alai orang Israel ngereja semua utai nitihka pesan TUHAN ngagai Moses. Ku TUHAN bejaku ngagai Moses seduai Aron: “Orang Israel deka nirika kem sida nitihka raban bansa sida empu, di baruh menira raban bansa sida. Kem nya enda tau enda nunga ngagai Langkau Kain TUHAN. Langkau Kain TUHAN enggau kem orang Lewi deka didirika ba tengah-tengah kem. Sida deka mupuk nitihka ripih kem sida, di baruh menira sida empu. Nya meh pemayuh tubuh orang Israel diitung nitihka raban bansa sida. Pemayuh tubuh semua sida dalam kem nya: 603,550 iku. Tang orang Lewi enda diitung tubuh sama enggau orang Israel ti bukai, nitihka pesan TUHAN ngagai Moses. Nya alai, orang Israel ngereja semua utai ti dipesanka TUHAN ngagai Moses. Genap iku sida bela nirika kem sida di baruh menira sida empu, lalu sida bejalai enggau raban bansa sida empu. Tu ruang bilik Aron enggau Moses lebuh TUHAN bejaku ngagai Moses ba Bukit Sinai. Tu nama anak lelaki Aron: Nadap anak tuai iya, Abihu, Eleasar, enggau Itamar. Sida tu udah ditata sereta dichiri nyadi imam, tang Nadap seduai Abihu dibunuh TUHAN, lebuh seduai iya meri api ti enda kudus ngagai TUHAN, di menua puang Sinai; lalu seduai iya nadai purih. Nya alai Eleasar seduai Itamar bekereja nyadi imam sepemanjai umur apai seduai iya Aron. Ku TUHAN bejaku ngagai Moses, “Bai orang Lewi ke mua, lalu letak sida bekereja ke Imam Aron. Sida deka ngereja pengawa ke iya enggau ke semua orang Israel di mua Langkau Kain TUHAN, lebuh sida gawa dalam langkau sembiang. Sida deka ngemataka semua pekekas ke Langkau Kain TUHAN, lalu ngereja pengawa ke semua orang Israel, lebuh sida gawa dalam langkau sembiang. Lalu nuan enda tau enda nyerahka orang Lewi ngagai Aron enggau ngagai anak lelaki iya. Semua orang Lewi diserahka magang ngagai iya ari orang Israel. Lalu nuan enda tau enda ngeletak Aron enggau anak lelaki iya ngereja semua pengawa imam; tang enti orang bukai datai semak ngagai Langkau Kain TUHAN, orang nya enda tau enda dibunuh.” Ku TUHAN bejaku ngagai Moses, “Dinga nuan, Aku udah ngambi orang Lewi ari orang Israel, kena nganti semua anak tuai orang Israel. Orang Lewi diempu Aku, laban semua anak tuai endang enggi Aku magang; lebuh Aku munuh anak tuai orang Ejip, Aku nyeraraka semua anak tuai orang Israel nyadika enggi Aku, nyengkaum anak tuai mensia enggau anak tuai jelu. Sida endang enggi Aku: Aku tu TUHAN.” Lalu ku TUHAN bejaku ngagai Moses di menua puang Sinai, “Itung pemayuh tubuh orang Lewi, nitihka ruang bilik, enggau suku raban bansa sida; itung magang semua anak lelaki ari umur sebulan ke atas.” Moses lalu ngitung sida nitihka jaku pesan TUHAN. Baka tu ku nama anak lelaki Lewi: Gerson, Kohat enggau Merari. Lalu nama anak lelaki Gerson: Libni seduai Simei. Anak lelaki Kohat nitihka suku raban bansa sida: Amram, Isar, Hebron, enggau Usil. Lalu anak lelaki Merari nitihka suku raban bansa sida: Mahli enggau Musi. Sida tu orang ke nurunka ruang bilik orang Lewi. Gerson nurunka suku raban bansa Libni enggau Simei. Nya meh suku raban bansa ari peturun Gerson. Pemayuh semua orang lelaki ke umur sebulan ke atas, ke dituliska nama nya 7,500 iku. Bala suku raban bansa ari peturun Gerson diasuh nirika kem sida ari belakang langkau sembiang nya, muak ke barat, lalu sida iya diuluka Eliasap anak Lael. Lalu tanggungjawap peturun Gerson dalam Langkau Kain TUHAN nya ngemataka langkau sembiang, sereta enggau semua tudung ti di dalam, tudung ti di luar, kain tirai ti ba penama ngagai Langkau Kain TUHAN, kain tirai ke tengah laman ti ngelingi langkau sembiang enggau alta, enggau kain tirai ke pintu penama ngagai tengah laman Langkau nya. Sida mega betanggungjawapka semua pengawa ti besangkut-paut enggau semua utai nya. Kohat nurunka suku raban bansa Amram, Isar, Hebron enggau Usil. Sida tu meh suku raban bansa ti diturunka Kohat. Pemayuh orang ke umur sebulan ke atas, ke dituliska nama nya 8,600 iku, lalu sida nya deka bekereja dalam Langkau Kain TUHAN. Semua suku raban bansa ti diturunka Kohat deka nirika kem sida ba tisi selatan langkau sembiang, diuluka Elisapan anak Usil. Lalu bala sida tu betanggungjawapka Peti Lampang Batu Adat, mija, penuduk lampu, alta, enggau perengka ti dikena imam dalam Langkau Kain TUHAN, enggau kain tirai ti ba penama ngagai Endur ti Pemadu Kudus. Sida betanggungjawapka semua pengawa ti besangkut-paut enggau semua utai nya. Tuai ke semua orang Lewi nya Eleasar anak Imam Aron. Iya nyadi tuai ke orang ke bekereja dalam Langkau Kain TUHAN. Peturun Merari nyengkaum suku raban bansa Mahli enggau Musi. Nya meh peturun Merari. Pemayuh orang ke lelaki ari umur sebulan ke atas, ke dituliska nama nya 6,200 iku, lalu semua suku raban bansa tu diuluka Suril anak Abihail. Sida deka nirika kem sida ba tisi utara langkau sembiang. Lalu peturun Merari deka betanggungjawapka langkar langkau sembiang, alang dinding, tiang, pelasar, enggau semua utai ti dikena nirika Langkau nya. Sida betanggungjawapka semua pengawa ti besangkut-paut enggau semua utai nya. Sida mega betanggungjawapka tiang, pelasar, tiang bantil, enggau tali ti dikena ba tengah laman. Moses seduai Aron, enggau anak lelaki Aron deka nirika kem sida di mua langkau sembiang, muak ke timur, di mua Langkau Kain TUHAN tunga ngagai mata hari tumbuh. Sida betanggungjawap ngereja pengawa dalam Langkau Kain TUHAN, ke orang Israel. Enti orang bukai datai semak ngagai Langkau Kain TUHAN, orang nya enda tau enda dibunuh. Pemayuh semua orang Lewi ti lelaki, ke umur sebulan ke atas, ti udah diitung Moses seduai Aron nitihka pesan TUHAN, nya 22,000 iku. Lalu ku TUHAN bejaku ngagai Moses, “Itung lalu tuliska nama semua anak tuai orang Israel ti lelaki, ari umur sebulan ke atas. Ambi orang Lewi ke Aku, kena nganti sida. Lalu ambi semua jelu tupi orang Lewi kena nganti anak tuai jelu tupi ti lelaki ti diempu orang Israel. Aku tu TUHAN.” Moses lalu nuliska nama semua anak tuai orang Israel ti lelaki nitihka pesan TUHAN. Lalu semua anak tuai ti lelaki ke umur sebulan ke atas dituliska nama magang, lalu pemayuh sida nya 22,273 iku. Lalu ku TUHAN bejaku ngagai Moses, “Ambi orang Lewi kena nganti semua anak tuai orang Israel ti lelaki, enggau jelu tupi orang Lewi, kena nganti anak tuai jelu tupi ti lelaki ari orang Israel, ngambika orang Lewi diempu Aku. Aku tu TUHAN. Lalu kena nebus 273 iku anak tuai orang Israel ti lelaki, ke lebih ari pemayuh tubuh orang Lewi ti lelaki, kita enda tau enda ngambi lima singkap duit pirak ke genap iku sida, nitihka rega ti udah diletak dalam Langkau Kain TUHAN, lalu beri duit nya ngagai Aron enggau ngagai bala anak lelaki iya.” Nya alai Moses ngambi duit tebus ke 273 iku orang Israel ke mayuh agi ari orang Lewi; Iya ngambi duit tebus nya ari anak tuai ti lelaki orang Israel. Penyampau duit nya 1,365 singkap pirak, nitihka rega ti udah diletak dalam Langkau Kain TUHAN; lalu meri duit tebus nya ngagai Aron enggau bala anak lelaki iya, nitihka pesan TUHAN ngagai Moses. Ku TUHAN bejaku ngagai Moses seduai Aron, “Itung semua orang Lewi ti lelaki ari raban peturun Kohat, nitihka nama ruang bilik sida, ari umur tiga puluh ngagai umur lima puluh taun, ti tau bekereja dalam Langkau Kain TUHAN, ngambika sida gawa dalam Langkau Kain TUHAN. Nya meh pengawa ke bala peturun Kohat dalam Langkau Kain TUHAN: ngemataka utai ti pemadu kudus. Lebuh kita deka mindahka kem kita, Aron enggau bala anak lelaki iya deka tama ngagai Langkau Kain TUHAN, nurunka kain tirai ti di mua Peti Lampang Batu Adat, lalu mungkur Peti nya ngena kain tirai nya. Sida enda tau enda map utai nya ngena kulit jelu ti alus, ngerembaika kain ti bechura biru ba atas nya, lalu udah nya, ngerasukka kayu pengaling. Sida deka ngerembaika kain ti biru ba atas mija ti alai meri roti ngagai TUHAN, lalu ngengkahka ba atas mija nya semua pinggai, mangkuk alai engkah menyan, mangkuk alai engkah piring, enggau tepayan alai nyimpan piring wain. Roti enda tau enda seruran bisi ba mija nya. Sida deka mungkur semua utai nya ngena kain ti mirah, ngengkahka kulit jelu ti alus ba atas utai nya, lalu udah nya ngerasukka kayu pengaling. Sida deka ngambi kain ti biru, lalu mungkur penuduk lampu sama enggau lampu, sepit, talam, enggau semua utai ti alai nyimpan minyak kana. Sida deka mungkus utai nya, enggau semua pekekas iya, ngena kulit ti alus, lalu ngengkahka utai nya ba langkar ti dikena ngesan iya. Udah nya, sida deka mungkur alta emas ngena kain ti biru, ngengkahka kulit jelu ti alus ba atas alta nya, lalu udah nya, ngerasukka kayu pengaling. Sida deka ngambi semua perengka ti dikena dalam Langkau Kain TUHAN, malut utai nya ngena kain ti biru, ngengkahka kulit jelu ti alus ba atas sida, lalu ngengkahka utai nya ba kayu pengaling. Sida deka ngambi amau ti belemak ari alta nya, lalu mungkur utai nya ngena kain ungu. Sida deka ngengkahka ba atas utai nya semua pekekas ti dikena ngereja pengawa ba alta: talam bara api, pengait, sandak mit, enggau bisin. Udah nya sida deka map utai nya ngena kulit jelu ti alus, lalu ngerasukka kayu pengaling. Lebuh sida ngererak kem sida, bala raban peturun Kohat deka datai lalu ngesan utai ti kudus, lebuh Aron enggau bala anak lelaki iya udah tembu map semua utai nya sereta enggau pekekas sida. Bala raban peturun Kohat enda tau negu utai ti kudus nya, enggai ke sida mati. Nya meh tanggungjawap bala raban peturun Kohat lebuh Langkau Kain TUHAN dipindahka. “Lalu anak lelaki Imam Aron ke benama Eleasar deka betanggungjawapka semua langkau sembiang nya, minyak lampu, menyan, piring gandum, minyak tata, enggau semua utai bukai dalam Langkau Kain nya ti udah diseraraka ngagai TUHAN.” Ku TUHAN bejaku ngagai Moses seduai Aron, “Anang nejuka suku raban bansa Kohat datai semak ngagai utai ti pemadu kudus nya, enggai ke sida mati. Kena nagang sida mati, Aron enggau bala anak lelaki iya deka tama lalu ngagihka pengawa ngagai siku-siku sida, lalu madahka utai ti deka dibai sida. Tang enti orang ari raban peturun Kohat tama ngagai Langkau Kain TUHAN, lalu tepedaka bala imam nyendiaka utai ti kudus ti deka dibai, sida deka mati.” Ku TUHAN bejaku ngagai Moses, “Itung pemayuh tubuh semua orang Lewi ti lelaki ari suku raban bansa Gerson, nitihka ruang bilik sida, lalu tuliska nama sida ke umur entara tiga puluh ngagai lima puluh taun, ke nemu ngereja pengawa dalam Langkau Kain TUHAN. Sida deka betanggungjawap mai utai tu: Sida deka mai langkau sembiang, Langkau Kain TUHAN, tudung iya ti ari dalam, tudung iya ti ari luar, tudung iya ti digaga ari kulit jelu ti alus, tirai ke penama ngagai Langkau Kain TUHAN, tirai enggau tali ti dikena ba tengah laman ti ngelingi langkau sembiang enggau alta, kain tirai ke pintu penama ngagai tengah laman nya, enggau semua perengka ti dikena nirika semua utai nya. Sida deka ngereja semua pengawa ti diguna ke semua utai nya. Moses seduai Aron deka nentuka orang ari peturun Gerson ngereja semua pengawa nya, lalu mai semua utai ti diletak Aron enggau bala anak lelaki iya. Nya meh tanggungjawap bala suku raban bansa Gerson dalam Langkau Kain TUHAN. Sida deka ngereja tanggungjawap nya dikemataka Itamar anak Imam Aron. “Nyadi pasal peturun Merari, nuan enda tau enda ngitung tubuh sida, nitihka suku raban bansa enggau ruang bilik sida, lalu tuliska nama semua lelaki ke umur entara tiga puluh ngagai lima puluh taun, ke nemu ngereja pengawa dalam Langkau Kain TUHAN. Sida deka betanggungjawap mai langkar, alang dinding, tiang, enggau pelasar ke langkau sembiang, sereta enggau tiang, pelasar, tiang bantil, enggau tali ti dikena ba tengah laman ti ngelingi Langkau Kain nya, sereta enggau semua utai ti dikena nirika utai nya. Genap iku sida deka betanggungjawap mai utai ti diletak ke sida siku-siku. Tu meh tanggungjawap bala suku raban bansa ari peturun Merari ti ngereja pengawa dalam Langkau Kain TUHAN. Sida deka bejalaika tanggungjawap nya dikemataka Itamar anak Imam Aron.” Genap iku sida nya dituliska nama magang nitihka pesan TUHAN ngagai Moses. Lalu nitihka pesan TUHAN ngagai Moses, genap iku sida nya diberi tanggungjawap bekereja, tauka mai utai. Ku TUHAN bejaku ngagai Moses, “Asuh orang Israel muai ari kem semua orang ke bisi penyakit kulit ti tau ngerampit, tauka bisi utai kamah ti pansut ari tubuh sida, enggau semua orang ke enda tuchi ketegal sida udah negu bangkai. Buru semua orang ke enda tuchi pansut, ngambika sida enda ngamahka kem ti alai Aku diau begulai enggau bala nembiak Aku.” Orang Israel lalu ngereja nya, lalu muai semua orang nya ari kem, munyi ti disebut TUHAN ngagai Moses. Lalu ku TUHAN bejaku ngagai Moses, “Sebut ngagai orang Israel: Lebuh orang enda tetap ati ngagai TUHAN, lalu ngereja penyalah ngagai orang, iya enda tau enda ngaku dosa diri, lalu mayar semua utai ti patut dibayar iya, ditambahka enggau dua puluh peratus, ngagai orang ke udah alai iya ngereja penyalah. Tang enti orang nya udah mati, lalu nadai kaban belayan ti nyempil ti tau alai nyuaka bayar nya, bayar nya tau diberi ngagai TUHAN, ke guna imam. Bayar nya nambahka bedus ti lelaki ti dikena ngereja pengawa nuchi orang ke bepenyalah nya. Semua pemeri ti kudus ti diberi orang Israel ngagai TUHAN mega diempu imam ti alai sida nyuaka utai ti diberi nya. Imam deka bempu pemeri ti kudus ti diberi ngagai iya.” Ku TUHAN bejaku ngagai Moses, “Sebut ngagai orang Israel: Enti bini nesatka diri lalu enda tetap ati ngagai laki iya; tauka iya beleman enggau lelaki bukai, lalu laki iya enda nemu nya, lalu iya enda ditemu udah ngereja nya, lalu orang pen nadai mega meda iya ngereja nya, laban iya enda kena tangkap ngereja nya; lalu enti laki iya ninding bini ti udah ngereja kereja ti kamah; tauka iya ninding bini iya, taja pen bini iya nadai udah ngereja kereja ti kamah; laki indu nya enda tau enda mai bini iya ngagai imam, sereta mai piring ti diguna ari indu, iya nya, sekilogram tepung barli, tang iya enda tau nuang minyak kana tauka meri rempah ngagai tepung nya, laban nya piring kena ngenselan iya ke ninding, kena mansutka penyalah. “Lalu imam nya deka mai indu nya ke mua, ngagai TUHAN, lalu imam nya deka ngambi ai ti kudus ngena mangkuk tanah, lalu ngambi amau ari geladak langkau sembiang, lalu nuang amau nya ngagai ai ti kudus nya. Lalu imam nya deka ngasuh indu nya bediri di mua TUHAN, lalu muka sanggul indu nya, lalu ngengkahka ba jari indu nya piring gandum nya, iya nya piring kena ngenselan laki ke ninding. Lalu imam nya deka megai mangkuk ti ngundan ai ti dikumbai ai ti pait, ti mai sumpah. Udah nya, imam nya deka ngasuh indu nya besumpah. Ku iya, ‘Enti nuan nadai udah butang, nuan enda kena tinggang sumpah ti dibai ai tu. Tang enti nuan udah butang, awakka TUHAN ngaga nama nuan nyadika leka jaku sumpah ba bansa nuan empu, lebuh TUHAN ngasuh nuan tara, lalu sarang anak nuan deka bedarah. Awakka ai sumpah tu tama ngagai perut nuan, lalu ngasuh perut nuan gentung, lalu ngasuh sarang anak nuan bedarah, lalu nuan deka tara!” Lalu indu nya deka nyebut, “Amin. Amin.” “Udah nya, imam nya deka nuliska leka jaku sumpah nya, lalu masu tulis nya ngagai ai ti dikumbai ai ti pait; lalu iya deka ngasuh indu nya ngirup ai nya, lalu ai nya deka tama ngagai tubuh indu nya, lalu ngasuh iya balat pedis. Imam nya deka ngambi piring nya ari jari indu nya, miauka piring nya di mua TUHAN, lalu mai piring nya ngagai alta; lalu imam nya deka ngambi segenggam ari piring nya, nyadika pengingat, lalu nunu piring nya ba alta, lalu udah nya ngasuh indu nya ngirup ai nya. Lebuh imam nya udah ngasuh indu nya ngirup ai nya, lalu enti indu nya udah ngereja kereja ti kamah, lalu udah enda tetap ati ngagai laki iya, ai ti mai jaku sumpah nya deka tama ngagai tubuh iya, lalu ngasuh iya balat pedis, lalu sarang anak iya deka bedarah, lalu iya deka tara, lalu nama iya deka nyadika leka jaku sumpah ba bansa iya empu. Tang enti indu nya nadai udah ngereja kereja ti kamah, lalu iya mengkang tuchi, iya enda kena tinggang sumpah nya, lalu iya ulih beranak. Laki indu nya nadai penyalah, tang enti indu nya bisi penyalah, iya deka betanggungjawapka penyalah diri empu.” Lalu ku TUHAN bejaku ngagai Moses, “Sebut ngagai orang Israel: Lebuh lelaki tauka indu besumpah deka nyadi Nasir lalu nyerahka diri ngagai TUHAN, iya enda tau ngirup wain tauka ai ti bisa. Iya enda tau ngirup ai ti digaga ari buah anggur, tauka makai buah anggur, tauka makai salai buah anggur. Seagi-agi iya nyadi Nasir, iya enda tau makai utai ti datai ari batang anggur. Indah leka tauka kulit buah anggur deh enda tau diempa iya. Seagi-agi iya mengkang ditanggam sumpah Nasir, iya enda tau beguntin, tauka bekukur. Iya kena tanggam sumpah nya sepengelama iya nyerahka diri ngagai TUHAN, lalu iya enda tau enda nejuka buk iya panjai enda diguntin. Seagi-agi iya nya orang Nasir, iya mengkang diserahka ngagai TUHAN. “Enti buk ti udah diserahka ngagai TUHAN nyadi kamah laban orang ke bempu buk nya bediri semak orang ke mati ngenyit, iya enda tau enda nganti tujuh hari, lalu udah nya ngukur buk iya. Nya baru iya nyadi tuchi. Ba hari ti kelapan, iya deka mai dua iku burung achang tauka dua iku burung puna ngagai imam ba penama ngagai Langkau Kain TUHAN. Imam nya deka nyerahka siku ari burung nya nyadika piring pengampun dosa, lalu siku nyadika piring tunu, kena iya nuchi orang nya ketegal iya udah negu bangkai. Ba hari nya mega, orang nya deka nyerahka buk diri baru ngagai TUHAN, lalu nyadi Nasir baru, lalu mai siku bedus ti umur setaun nyadika piring kena muai penyalah. Maya ti dulu nadai diguna agi, laban buk ti udah diserahka ngagai TUHAN, udah kamah. “Tu adat ke orang Nasir: lebuh orang nya udah nembuka tanggungjawap iya ti nyadi Nasir, iya deka dibai ngagai penama Langkau Kain TUHAN, lalu meri pemeri iya ngagai TUHAN, iya nya, siku anak domba ti lelaki ti umur setaun, ti nadai penimpang, nyadika piring tunu; siku anak domba ti indu ke umur setaun, ti nadai penimpang, nyadika piring pengampun dosa; enggau siku bedus ti lelaki, ti nadai penimpang, nyadika piring pemaik. Iya deka mega meri sebakul roti ti enda beragi: iya nya tuku roti ti tebal, ti digaga ari tepung ti udah dichampur enggau minyak kana, enggau singkap roti ti mipis ti udah diunsut enggau minyak kana, lalu nambahka nya, piring ti digaga ari gandum, enggau wain. Imam nya deka nyerahka semua utai nya ngagai TUHAN, lalu ngenjuk piring pengampun dosa, enggau piring tunu, lalu nyerahka bedus ti lelaki nya ngagai TUHAN nyadika piring pemaik, lalu meri utai nya enggau sebakul roti. Iya deka mega nyerahka piring gandum, enggau wain. Lalu orang Nasir nya deka ngukur buk iya ba penama ngagai Langkau Kain TUHAN, lalu nunu buk nya ba api ti alai piring pemaik benung ditunu. Udah nya, lebuh berang anak domba nya udah dipanduk, imam deka ngambi berang nya, lalu ngengkahka iya, sama enggau siti tuku roti ti tebal, enggau sesingkap roti ti mipis ari bakul nya, ngagai jari orang Nasir nya, lebuh iya udah ngukur buk iya. Udah nya, imam deka nyerahka utai nya nyadika piring ti manah ngagai TUHAN. Utai nya piring ti kuduska imam empu, nambahka isi dada enggau pah bedus, ti endang diempu imam nitihka letak adat. Udah nya baru orang Nasir nya tau ngirup wain. “Nya meh adat ke orang Nasir ke ngangkatka sumpah. Piring ti diberi ngagai TUHAN deka diberi nitihka jaku sumpah orang Nasir nya, nambahka piring bukai ti ulih diberi iya. Ku TUHAN bejaku ngagai Moses, “Sebut ngagai Aron enggau ngagai anak lelaki iya: ‘Baka tu ku jalai kita merekatka orang Israel. Sebut ngagai sida, TUHAN merekatka kita, lalu ngintu kita; TUHAN gaga ati ke kita lalu kasihka kita; TUHAN rinduka kita, lalu meri kita pemaik.’ “Nya meh jalai sida ngena nama Aku merekatka orang Israel, lalu Aku deka merekatka sida.” Lebuh Moses udah tembu nirika langkau sembiang, iya nata lalu nyerahka langkau nya ngagai TUHAN, sama enggau semua pekekas iya, nyengkaum alta enggau semua pekekas ti bukai. Udah nya, bala tuai peturun ke endang tuai raban bansa orang Israel, iya nya orang ke nyadi kepala ngitung tubuh, mai pemeri sida ngagai TUHAN: enam buah kerita enggau dua belas iku sapi ti lelaki ti udah dipeliri, sebuah kerita ke tiap-tiap dua iku tuai raban bansa, enggau siku jelu sapi ke siku-siku tuai. Sida nyerahka utai nya di mua langkau sembiang. TUHAN lalu bejaku ngagai Moses, “Terima utai nya ari sida kena ngereja pengawa dalam Langkau Kain TUHAN. Beri utai nya ngagai orang Lewi, nitihka bagi pengawa ti dikereja sida.” Nya alai Moses ngambi kerita enggau jelu sapi ti lelaki ti udah dipeliri nya, lalu meri sida ngagai orang Lewi. Iya meri dua buah kerita enggau empat iku sapi ngagai raban peturun Gerson, nitihka bagi pengawa ti dikereja sida; iya meri empat buah kerita enggau lapan iku jelu sapi ngagai raban peturun Merari, nitihka bagi pengawa ti dikereja sida, dikemataka Itamar anak Imam Aron. Tang Moses enda meri kerita tauka jelu sapi ngagai raban peturun Kohat, laban sida udah diasuh ngemataka utai ti kudus, ti deka disan sida. Bala tuai raban bansa mega ngenjuk pemeri kena ngerami pengawa nyerahka alta lebuh alta nya ditata. Bala tuai lalu meri piring sida di mua alta. Lalu ku TUHAN bejaku ngagai Moses, “Sida deka meri pemeri sida, siku tuai sehari, kena nyerahka alta.” Orang ke meri pemeri ba hari ti keterubah nya Nason anak lelaki Aminadap, ari raban bansa Judah. Pemeri ti dibai iya nya sesingkap pinggai pirak ti berat 1.5 kilogram, sesingkap jalung pirak ti berat 800 gram, nitihka atur timbang ti dikena dalam Langkau Kain TUHAN: utai dua singkap nya sama diisi penuh enggau tepung ti pemadu alus dichampur enggau minyak nyadika piring ti digaga ari gandum; sesingkap chapak emas ti berat seratus sepuluh gram, ti diisi penuh enggau menyan; siku sapi ti lelaki ti agi biak, siku bedus ti lelaki, siku anak bedus ti umur setaun, nyadika piring tunu; siku kambin ti lelaki nyadika piring kena muai dosa; lalu nyadika piring pemaik, dua iku sapi ti lelaki, lima iku bedus ti lelaki, lima iku kambin ti lelaki, enggau lima iku anak bedus ti lelaki ti umur setaun. Nya meh pemeri ti diberi Nahson anak Aminadap. Ba hari ti kedua Natanel anak Suar, tuai raban bansa Isakar, meri pemeri; iya meri sesingkap pinggai temaga ti berat 1.5 kilogram, sesingkap jalung temaga ti berat 800 gram, nitihka atur timbang ti dikena dalam Langkau Kain TUHAN; utai dua singkap nya sama diisi penuh enggau tepung ti pemadu alus, dichampur enggau minyak, nyadika piring ti digaga ari gandum; sesingkap chapak emas berat seratus sepuluh gram, ti diisi penuh enggau menyan; siku sapi ti lelaki ti agi biak, siku bedus ti lelaki, siku bedus ti lelaki ti umur setaun, nyadika piring tunu; siku kambin ti lelaki nyadika piring kena muai dosa; dua iku sapi ti lelaki, lima iku bedus ti lelaki, lima iku kambin ti lelaki, enggau lima iku anak bedus ti lelaki ti umur setaun, nyadika piring pemaik. Nya pemeri ti diberi Netanel anak Suar. Ba hari ti ketiga Eliap anak Helon, tuai raban bansa Sebulun, meri pemeri: sesingkap pinggai pirak ti berat 1.5 kilogram, sesingkap jalung pirak ti berat 800 gram, nitihka atur timbang ti dikena dalam Langkau Kain TUHAN. Utai dua singkap nya sama diisi penuh enggau tepung ti pemadu alus dichampur enggau minyak, nyadika piring ti digaga ari gandum; sesingkap chapak emas berat 110 gram, ti diisi penuh enggau menyan; siku sapi ti lelaki ti agi biak, siku bedus ti lelaki, siku anak bedus ti lelaki umur setaun, nyadika piring tunu; siku kambin ti lelaki nyadika piring kena muai dosa; enggau dua iku sapi ti lelaki, lima iku bedus ti lelaki, lima iku kambin ti lelaki, enggau lima iku anak bedus ti lelaki umur setaun, nyadika piring pemaik. Nya pemeri ti diberi Eliap anak Helon. Ba hari ti keempat Elisur anak Sedeur, tuai raban bansa Reuben, meri pemeri: iya meri sesingkap pinggai pirak berat 1.5 kilogram, sesingkap jalung pirak berat 800 gram, nitihka atur timbang ti dikena dalam Langkau Kain TUHAN; utai dua singkap nya sama diisi penuh enggau tepung ti pemadu alus dichampur enggau minyak, nyadika piring ti digaga ari gandum; sesingkap chapak emas berat seratus sepuluh gram, ti diisi penuh enggau menyan; siku sapi ti lelaki ti agi biak, siku bedus ti lelaki, siku anak bedus ti lelaki umur setaun, nyadika piring tunu; siku kambin ti lelaki nyadika piring kena muai dosa; enggau dua iku sapi ti lelaki, lima iku bedus ti lelaki, lima iku kambin ti lelaki, enggau lima iku anak bedus ti lelaki umur setaun, nyadika piring pemaik. Nya pemeri ti diberi Elisur anak Sedeur. Ba hari ti kelima Selumiel anak Surisadai, tuai raban bansa Simeon meri pemeri: iya nya sesingkap pinggai pirak ti berat 1.5 kilogram, sesingkap jalung pirak berat 800 gram, nitihka atur timbang ti dikena dalam Langkau Kain TUHAN; utai dua singkap nya sama diisi penuh enggau tepung ti pemadu alus dichampur enggau minyak, nyadika piring ti digaga ari gandum; sesingkap chapak emas ti berat 110 gram, ti diisi penuh enggau menyan; siku sapi ti lelaki ti agi biak, siku bedus ti lelaki, siku anak bedus ti lelaki umur setaun, nyadika piring tunu; siku kambin ti lelaki nyadika piring kena muai dosa; enggau dua iku sapi ti lelaki, lima iku bedus ti lelaki, lima iku kambin ti lelaki, enggau lima iku anak bedus ti lelaki umur setaun, nyadika piring pemaik. Nya meh pemeri ti diberi Selumiel anak Surisadai. Ba hari ti keenam Eliasap anak Deuel, tuai raban bansa Gat meri pemeri: iya meri sesingkap pinggai temaga ti berat 1.5 kilogram, sesingkap jalung temaga ti berat 800 gram, ditimbang nitihka atur timbang ti dikena dalam Langkau Kain TUHAN; utai dua singkap nya sama diisi penuh enggau tepung ti pemadu alus dichampur enggau minyak, nyadika piring ti digaga ari gandum; sesingap chapak pirak ti berat 110 gram, ti diisi penuh enggau menyan; siku sapi ti lelaki ti agi biak, siku bedus ti lelaki, siku anak bedus ti lelaki umur setaun, nyadika piring tunu; siku kambin ti lelaki nyadika piring kena mua dosa; enggau dua iku sapi ti lelaki, lima iku bedus ti lelaki, lima iku kambin ti lelaki, enggau lima iku anak bedus ti lelaki umur setaun, nyadika piring pemaik. Nya meh pemeri ti diberi Eliasap anak Deuel. Ba hari ti ketujuh Elisama anak Amihut, tuai raban bansa Epraim meri pemeri: iya meri sesingkap pinggai temaga ti berat 1.5 kilogram, sesingkap jalung temaga ti berat 800 gram, ditimbang nitihka atur timbang ti dikena dalam Langkau Kain TUHAN; utai dua singkap nya sama diisi penuh enggau tepung gandum ti pemadu alus, dichampur enggau minyak, nyadika piring ti digaga ari gandum; sesingkap chapak emas ti berat 110 gram, ti diisi penuh enggau menyan; siku sapi ti lelaki ti agi biak, siku bedus ti lelaki, siku anak bedus ti lelaki umur setaun, nyadika piring tunu; siku kambin ti lelaki nyadika piring kena muai dosa; enggau dua iku sapi ti lelaki, lima iku bedus ti lelaki, lima iku kambin ti lelaki, enggau lima iku anak bedus ti lelaki, ti umur setaun, nyadika piring pemaik. Nya meh pemeri ti diberi Elisama anak Amihut. Ba hari ti kelapan Gamaliel anak Pedasur, tuai raban bansa Manasi meri pemeri: iya nya sesingkap pinggai pirak ti berat 1.5 kilogram, sesingkap jalung pirak ti berat 800 gram, ditimbang nitihka atur timbang ti dikena dalam Langkau Kain TUHAN; utai dua singkap nya sama diisi penuh enggau tepung gandum ti pemadu alus, dichampur enggau minyak, nyadika piring ti digaga ari gandum; sesingkap chapak emas ti berat seratus sepuluh gram, ti diisi penuh enggau menyan; siku sapi ti lelaki ti agi biak, siku bedus ti lelaki, siku anak bedus ti lelaki umur setaun, nyadika piring tunu; siku kambin ti lelaki nyadika piring kena muai dosa; enggau dua iku sapi ti lelaki, lima iku bedus ti lelaki, lima iku kambin ti lelaki, enggau lima iku anak bedus ti lelaki umur setaun, nyadika piring pemaik. Nya meh pemeri ti diberi Gamaliel anak Pedasur. Ba hari ti kesemilan Abidan anak Gideoni, tuai raban bansa Benjamin meri pemeri: iya meri sesingkap pinggai pirak ti berat 1.5 kilogram, sesingkap jalung pirak ti berat 800 gram, ditimbang nitihka atur timbang ti dikena dalam Langkau Kain TUHAN; utai dua singkap nya sama diisi penuh enggau tepung ti pemadu alus, dichampur enggau minyak, nyadika piring ti digaga ari gandum; sesingkap chapak emas ti berat 110 gram, ti diisi penuh enggau menyan; siku sapi ti lelaki ti agi biak, siku bedus ti lelaki, siku anak bedus ti lelaki umur setaun, nyadika piring tunu; siku kambin ti lelaki nyadika piring kena muai dosa; enggau dua iku sapi ti lelaki, lima iku bedus ti lelaki, lima iku kambin ti lelaki, enggau lima iku anak bedus ti lelaki umur setaun, nyadika piring pemaik. Nya meh pemeri ti diberi Abidan anak Gideoni. Ba hari ti kesepuluh Ahieser anak Amisadai, tuai raban bansa Dan, meri pemeri: iya meri sesingkap pinggai pirak ti berat 1.5 kilogram, sesingkap jalung pirak ti berat 800 gram, ditimbang nitihka atur timbang ti dikena dalam Langkau Kain TUHAN; utai dua singkap nya sama diisi penuh enggau tepung ti pemadu alus, dichampur enggau minyak, nyadika piring ti digaga ari gandum; sesingkap chapak emas ti berat 110 gram, ti diisi penuh enggau menyan; siku sapi ti lelaki ti agi biak, siku bedus ti lelaki, siku anak bedus ti lelaki umur setaun, nyadika piring tunu; siku kambin ti lelaki nyadika piring kena muai dosa; enggau dua iku sapi ti lelaki, lima iku bedus ti lelaki, lima iku kambin ti lelaki, enggau lima iku anak bedus ti lelaki umur setaun, nyadika piring pemaik. Nya meh pemeri ti diberi Ahieser anak Amisadai. Ba hari ti kesebelas Pagiel anak Okran, tuai raban bansa Aser, meri pemeri: iya meri sesingkap pinggai pirak ti berat 1.5 kilogram, sesingkap jalung ti berat 800 gram, ditimbang nitihka atur timbang ti dikena dalam Langkau Kain TUHAN; utai dua singkap nya sama diisi penuh enggau tepung ti pemadu alus, dichampur enggau minyak, nyadika piring ti digaga ari gandum; sesingkap chapak emas berat seratus sepuluh gram, ti diisi penuh enggau menyan; siku sapi ti lelaki ti agi biak, siku bedus ti lelaki, siku anak bedus ti lelaki umur setaun, nyadika piring tunu; siku kambin ti lelaki nyadika piring kena muai dosa; enggau dua iku sapi ti lelaki, lima iku bedus ti lelaki, lima iku kambin ti lelaki, enggau lima iku anak bedus ti lelaki umur setaun, nyadika piring pemaik. Nya meh pemeri ti diberi Pagiel anak Okran. Ba hari ti kedua belas Ahira anak Enan, tuai raban bansa Naptali, meri pemeri: iya meri sesingkap pinggai temaga ti berat 1.5 kilogram, sesingkap jalung pirak ti berat 800 gram, ditimbang nitihka atur timbang ti dikena dalam Langkau Kain TUHAN; utai dua singkap nya sama diisi penuh enggau tepung ti pemadu alus, dichampur enggau minyak, nyadika piring ti digaga ari gandum; sesingkap chapak emas ti berat 110 gram, ti diisi penuh enggau menyan; siku sapi ti lelaki ti agi biak, siku bedus ti lelaki, siku anak bedus ti lelaki umur setaun, nyadika piring tunu; siku kambin ti lelaki nyadika piring kena muai dosa; enggau dua iku sapi ti lelaki, lima iku bedus ti lelaki, lima iku kambin ti lelaki, enggau lima iku anak bedus ti lelaki umur setaun, nyadika piring pemaik. Nya meh pemeri ti diberi Ahira anak Enan. Nya meh pemeri ti diberi bala tuai orang Israel kena nyerahka alta, lebuh alta nya ditata: dua belas singkap pinggai pirak, dua belas singkap jalung pirak, enggau dua belas singkap chapak emas, siti-siti pinggai pirak berat 1.5 kilogram, lalu sigi jalung berat 800 gram. Semua pemerat pirak nya dipegulaika: 27.6 kilogram, nitihka atur timbang ti dikena dalam Langkau Kain TUHAN. Lalu pemerat semua dua belas chapak emas nya: 1.32 kilogram. Genap singkap chapak nya diisi penuh enggau menyan. Pemayuh semua jelu ti nyadika piring tunu: dua belas iku sapi ti lelaki, dua belas iku bedus ti lelaki, dua belas iku anak bedus ti lelaki ti umur setaun, sama enggau piring ti digaga ari gandum; enggau dua belas iku kambin ti lelaki nyadika piring kena muai dosa; lalu semua jelu ti diberi nyadika piring pemaik: dua puluh empat iku sapi ti lelaki, enam puluh iku bedus ti lelaki, enam puluh iku kambin ti lelaki, enggau enam puluh iku anak bedus ti lelaki umur setaun. Nya meh penyampau piring ti diberi kena nyerahka alta, udah bekau iya ditata. Lebuh Moses tama ngagai Langkau Kain TUHAN deka bejaku enggau TUHAN, iya ninga munyi nyawa bejaku ngagai iya ari atas tudung Peti Lampang Batu Adat, ari entara melikat cherub ti dua iku nya. Nya meh jalai TUHAN bejaku ngagai Moses. Ku TUHAN bejaku ngagai Moses, “Padahka ngagai Aron, lebuh iya ngelekatka tujuh iti lampu ba penuduk lampu nya, iya enda tau enda ngelekatka lampu nya ngambika sida manchar ke mua.” Aron lalu ngereja baka nya, lalu ngelekatka lampu nya manchar ke mua. Tiang lampu nya digaga ari emas ti ditempa, kenyau ari atas nyentuk ke baruh, nitihka pelan ti udah dipadahka TUHAN ngagai Moses. Ku TUHAN bejaku ngagai Moses, “Seraraka orang Lewi ari orang Israel ti bukai, lalu tuchi sida ngena chara tu: pechik sida ngena ai ti dikena nuchi orang, lalu asuh sida ngukur semua tubuh sida, sereta masu gari sida. Nya baru sida tuchi. Udah nya, sida enda tau enda ngambi siku sapi ti lelaki ti agi biak, enggau piring gandum, iya nya tepung ti dichampur enggau minyak kana. Lalu nuan enda tau enda ngambi siku agi sapi ti lelaki nya nyadika piring pengampun dosa. Udah nya, gempuruka semua orang Israel, lalu asuh bala orang Lewi bediri di mua Langkau Kain TUHAN. Orang Israel deka ngengkahka jari sida ba pala orang Lewi. Udah nya, Aron deka nyerahka orang Lewi ngagai Aku nyadi pemeri ti manah ari orang Israel, ngambika sida tau bekereja ke Aku. Udah nya, orang Lewi deka ngengkahka jari sida ba pala sapi ti dua iku nya. Siku ari sapi nya deka diberi nyadika piring pengampun dosa, lalu siku nyadika piring tunu, kena nuchi orang Lewi. “Serahka orang Lewi nyadika pemeri ti manah ngagai Aku, lalu asuh Aron enggau bala anak lelaki iya nyadi tuai sida. Seraraka orang Lewi ari orang Israel ti bukai, ngambika sida diempu Aku. Lebuh nuan udah nuchi lalu nyerahka orang Lewi, nya baru sida tau gawa dalam Langkau Kain TUHAN. Aku udah ngambu sida kena nganti semua anak tuai orang Israel ti lelaki, lalu sida deka diempu Aku siku aja. Lebuh Aku munuh semua anak tuai di serata menua Ejip, Aku nyeraraka anak tuai orang Israel, enggau anak tuai semua jelu, ngambika semua sida diempu Aku. Diatu Aku ngambi orang Lewi kena nganti semua anak tuai orang Israel, lalu Aku meri orang Lewi ngagai Aron enggau bala anak lelaki iya, nyadika pemeri ari orang Israel, ngambika sida bisi gawa dalam Langkau Kain TUHAN ngarika orang Israel, lalu nyaga orang Israel ari penusah ti deka ninggang sida, enti sida datai kelalu semak ngagai Endur ti Kudus.” Nya alai Moses, Aron enggau semua orang Israel nyerahka orang Lewi, nitihka pesan TUHAN ngagai Moses. Orang Lewi nuchi diri empu, lalu masu gari diri, lalu Aron nyerahka sida nyadi pemeri ti manah ngagai TUHAN. Iya mega ngereja pengawa nuchi sida. Orang Israel ngereja semua utai nitihka pesan ti diberi TUHAN ngagai Moses, ba pasal orang Lewi. Nya alai, orang Lewi tau gawa dalam Langkau Kain TUHAN di baruh Aron enggau anak lelaki iya. Ku TUHAN bejaku ngagai Moses, “Kenyau ari umur sida dua puluh lima taun, genap iku orang Lewi deka ngereja pengawa diri dalam Langkau Kain TUHAN, lalu iya badu agi bekereja lebuh umur iya lima puluh taun. Udah lepas nya, iya tau nyaup orang Lewi ti bukai ngereja pengawa sida dalam Langkau Kain TUHAN, tang iya enda tau nengali pengawa nya kediri. Nya chara nuan ngatur pengawa ke orang Lewi.” TUHAN lalu bejaku ngagai Moses di menua puang Sinai, dalam bulan ti kesatu, kedua taun udah bekau orang Israel ke pansut ari menua Ejip. Ku Iya, Moses lalu ngasuh orang mayuh ngintu Gawai Paska, lalu kena lemai empat belas hari bulan ti kesatu, sida ngintu Gawai nya di menua puang Sinai. Orang mayuh ngereja semua utai ti udah dipesanka TUHAN ngagai Moses. Tang sekeda orang enda tuchi, laban sida udah negu bangkai, lalu sida enda ulih ngintu Gawai Paska sehari nya. Sida lalu mansang ngagai Moses seduai Aron, lalu bejaku, “Kami tu enda tuchi laban kami udah bisi negu bangkai, tang nama kebuah kami enda tau enggau orang Israel ti bukai ngenjuk piring ngagai TUHAN ba maya ti udah diletak?” Disaut Moses, “Nganti dulu. Aku deka ningaka atur ari TUHAN pasal kita.” TUHAN lalu bejaku ngagai Moses, “Sebut ngagai orang Israel: Lebuh kita, tauka peturun kita, enda tuchi laban kita udah bisi negu bangkai, tauka bejalai jauh ari menua, tang keran deka ngintu Gawai Paska, kita tau ngintu Gawai nya sebulan udah bekau Gawai nya, kena lemai empat belas hari bulan ti kedua. Intu Gawai nya ngena roti ti enda beragi, sereta enggau sayur ti pait. Anang nejuka pemakai nya beteda datai ngagai pagi hari siti, lalu anang matahka tulang jelu nya. Intu Gawai nya nitihka semua atur. Tang orang ke endang tuchi, lalu enda bejalai ngagai menua bukai, enti iya enda ngintu Gawai Paska, iya deka badu agi dikumbai nembiak Aku, laban iya enda ngenjuk piring ngagai Aku ba maya ti udah diletak. Orang nya deka betanggungjawapka dosa diri empu. “Enti orang kampar ti diau begulai enggau kita, bisi ati deka ngintu Gawai Paska, sida enda tau enda ngintu Gawai nya nitihka adat enggau atur. Adat nya deka dikena semua orang, nemuka orang nya bansa orang Israel, tauka orang kampar.” Genap kali mua hari nya angkat ari atas Langkau Kain TUHAN, orang Israel ngererak kem, lalu nirika kem sida baru ba endur alai mua hari nya nurun. Orang Israel ngererak kem sida nitihka asuh TUHAN, lalu sida nirika kem sida baru, nitihka pesan Iya. Seagi-agi mua hari nya mengkang ari atas langkau sembiang nya, sida mengkang diau ba kem nya. Seagi-agi mua hari nya mengkang ari atas langkau sembiang nya, sida ngasika jaku TUHAN, lalu enda mindah ari endur nya. Kadang-kadang mua hari nya semina mengkang ari atas langkau sembiang nya dua tiga hari aja. Tang sida mengkang dia, tauka mindah ari kem nya, nitihka asuh TUHAN. Kadang-kadang mua hari nya semina mengkang dia ari lemai nyentuk ngagai pagi aja, lalu sida mindah lebuh mua hari nya angkat. Nemuka dua hari, sebulan, setaun tauka lama agi, seagi-agi mua hari nya mengkang ari atas langkau sembiang nya, sida enda mindah. Tang lebuh mua hari nya angkat, sida mindah. Sida nirika kem, tauka ngererak kem, nitihka pesan ti diberi TUHAN ngena Moses. Ku TUHAN bejaku ngagai Moses, “Gaga dua iti terumpit ari pirak ti ditempa, kena nesau orang mayuh begempuru, enggau kena nesau sida ngererak kem. Lebuh terumpit dua iti nya disepu panjai, semua orang Israel enda tau enda begempuru ngelingi nuan ba penama ngagai Langkau Kain TUHAN. Tang lebuh semina siti aja terumpit disepu, semina tuai peturun aja begempuru ngelingi nuan. Lebuh terumpit nya disepu nerachat, raban bansa ti ba kem muak ke timur deka angkat. Lebuh terumpit nya disepu nerachat kedua kali, bala raban bansa ti diau muak ke selatan dalam kem nya deka angkat. Nya alai terumpit ti disepu nerachat nya kena ngangkatka orang ari kem, tang sepu ti panjai deka dikena nesau orang mayuh. Terumpit nya enda tau enda disepu bala anak lelaki Aron, iya nya bala imam. Adat tu enda tau enda dititihka belama iya. Lalu lebuh kita beperang dalam menua kita ngelaban munsuh ke nyerang kita, sepu terumpit tu kena megau orang beperang, ngambika Aku, TUHAN Allah Taala kita, deka ingatka kita lalu nyelamatka kita ari munsuh kita. Lebuh kita ngintu pengerami, baka Gawai Anak Bulan, enggau gawai pengarap ti bukai, kita mega enda tau enda nyepu terumpit lebuh kita ngenjuk piring tunu enggau piring pemaik. Nya baru Aku deka nyaup kita. Aku tu TUHAN Allah Taala kita.” Kena dua puluh hari bulan ti kedua, kedua taun orang Israel udah pansut ari menua Ejip, mua hari ti ba atas Langkau Kain TUHAN nya angkat. Orang Israel lalu belabuh bejalai ninggalka menua puang Sinai, lalu mua hari nya ngetu ba menua puang Paran. Sida belabuh bejalai nitihka pesan ti udah diberi TUHAN ngena Moses, lalu genap kali sida mindah, sida nitihka tusun nya. Orang ke bejalai di baruh menira bala ti diuluka raban bansa Judah, bejalai dulu, beraban-raban, diuluka Nason anak Aminadap. Orang ke nyadi tuai raban bansa Isakar, nya Netanel anak Suar, lalu orang ke nyadi tuai raban bansa Sebulun nya Eliap anak Helon. Udah nya, langkau sembiang nya direrak, lalu bala raban peturun Gerson enggau bala raban peturun Merari, ke mai langkau sembiang nya, mupuk. Sida lalu ditangkanka orang ke bejalai di baruh menira bala ke diuluka raban bansa Reuben. Sida deka mupuk, beraban-raban. Orang ke nyadi tuai sida nya Elisur anak Sedeur. Orang ke nyadi tuai ke raban bansa Simeon nya Selumil anak Jurisadai. Orang ke nyadi tuai ke raban bansa Gat nya Eliasap anak Deuel. Udah nya bala raban peturun Kohat, ari raban bansa Lewi deka mupuk, mai utai ti kudus. Lebuh sida datai ba endur alai nirika kem baru, langkau sembiang nya sigi udah tembu didirika. Udah nya, orang ke bejalai di baruh menira bala ke diuluka raban bansa Epraim, deka mupuk, beraban-raban. Tuai sida nya Elisama anak Amihut. Orang ke nyadi tuai ke raban bansa Manasi nya Gamaliel anak Pedasur. Orang ke nyadi tuai ke raban bansa Benjamin nya Abidan anak Gidioni. Ke penudi iya bendar, orang ke bejalai di baruh menira bala ke diuluka raban bansa Dan, deka mupuk beraban-raban. Sida tu orang ke nyaga semua bala mayuh, ari belakang. Tuai sida nya Ahisir anak Amisadai. Tuai raban bansa Aser nya Pagil anak Okran, lalu orang ke nyadi tuai raban bansa Naptali nya Ahira anak Enan. Nya meh gaya tusun sida bejalai, beraban-raban, genap kali orang Israel mindah ari endur siti ngagai endur siti. Ku Moses bejaku enggau ipar lelaki iya Hobap anak Jetro, orang Midian, “Kami tu baru deka mupuk ngagai endur ti udah dipadahka TUHAN, ti deka diberi Iya ngagai kami. Iya udah besemaya deka ngasuh orang Israel nyadi kaya-raja, nya alai, aram mupuk enggau kami, lalu kami deka mai kita bekunsika pengaya kami enggau kita.” Disaut Hobap, “Enda ibuh aku mupuk enggau kita. Aku deka mulaika diri ngagai menua aku empu.” Ku Moses bejaku, “Anang ninggalka kami, laban nuan nemu endur alai kami tau nirika kem di menua puang tu, lalu nuan tau nyadi malin kami. Enti nuan mupuk enggau kami, kami deka bekunsika enggau nuan semua berekat ti diberi TUHAN ngagai kami.” Lebuh orang Israel ninggalka menua Sinai, bukit ti kudus nya, sida bejalai tiga hari. Peti Lampang Batu Adat TUHAN endang seruran dibai dulu ari bala sida, ngiga endur alai sida tau nirika kem. Lebuh sida mindah ari endur siti ngagai endur siti, mua hari TUHAN mengkang ari atas sida lebuh siang hari. Genap kali Peti Lampang Batu Adat nya dibai mupuk, Moses deka nyebut, “Angkat, TUHAN. Pambarka munsuh Nuan, lalu asuh orang ke begedika Nuan, rari!” Lalu genap kali Peti Lampang Batu Adat nya ngetu, Moses nyebut, “Pulai baru, TUHAN, ngagai beribu-ribu iti ruang bilik orang Israel.” Orang Israel lalu belabuh mutap ngagai TUHAN pasal penusah sida. Lebuh TUHAN ninga sida, Iya ringat, lalu ngasuh api nurun lalu nunu bala sida, lalu nganguska puting setak kem nya. Orang mayuh lalu nyabak minta saup Moses. Iya lalu besampi ngagai TUHAN, lalu api nya padam. Nya alai endur nya dikumbai Taberah, laban api TUHAN udah menyadi ngelaban bala sida. Orang bansa bukai bisi bejalai enggau orang Israel. Sida tu balat amat tetengukka dagin. Lalu orang Israel empu pen belabuh mutap: “Naka meh penyamai diau enti kitai bisi dagin! Di menua Ejip suba kitai seruran makai ikan sepeneka kitai, lalu utai nya enda ibuh dibeli. Ingat kita ke buah entimun, buah semangka, sayur bawang, bawang telu, enggau bawang putih ti diempa kitai? Tang diatu kitai nyau lembut tulang. Kitai nadai agi utai diempa kelimpah ari mana tu tiap-tiap hari!” ( Mana nya baka igi utai ti mit, ti bechura burak-kuning. Moses ninga orang mayuh mutap lebuh sida bediri begempuru ba mua pintu langkau kain sida. TUHAN lalu balat amat ringat, lalu Moses tusah ati laban nya, lalu bejaku ngagai TUHAN, “Nama kebuah Nuan jai enggau aku? Nama kebuah Nuan enda lantang ati ngagai aku? Nama kebuah Nuan ngasuh aku betanggungjawapka semua orang tu? Ukai aku ke ngaga sida, tauka ngadaka sida! Nama kebuah Nuan ngasuh aku ngibun sida, lalu nerekun sida baka ke mai anak mit sepemanjai jalai tu nyentuk ngagai menua ti udah disemaya Nuan ngagai aki ini sida? Dini alai aku tau bulih dagin ti chukup ke semua orang tu? Sida majak datai enggau sabak ngagai aku, minta dagin. Aku kediri enda ulih betanggungjawapka semua orang tu. Utai tu kelalu berat ke aku! Enti Nuan majak ngaga aku baka tu, kasihka aku lalu bunuh aku, ngambika aku enda agi natka Nuan merinsaka aku.” Ku TUHAN bejaku ngagai Moses, “Gempuruka tujuh puluh iku tuai orang mayuh ke dibasa orang. Bai sida ngagai Aku ba Langkau Kain TUHAN, lalu asuh sida bediri dia ngimbai nuan. Aku deka nurun lalu bejaku enggau nuan dia, lalu Aku deka ngambi sekeda kuasa ti udah diberi Aku ngagai nuan, lalu meri kuasa nya ngagai sida. Nya baru sida ulih nyaup nuan betanggungjawapka orang mayuh, lalu nuan enda agi megai tanggungjawap nya kediri. Nya alai, sebut ngagai orang mayuh, ‘Tuchi diri empu ngambika kita tuchi pagila. Kita deka makai dagin. TUHAN udah ninga sabak kita, enggau jaku kita ke madahka diri tetengukka dagin lalu kita ngumbai diri nyamai agi diau di menua Ejip. Nya alai TUHAN deka meri kita dagin, lalu kita enda tau enda makai dagin nya. Kita enda tau enda makai dagin nya, ukai semina sehari tauka dua hari, tauka lima, tauka sepuluh, tauka dua puluh hari, tang sebulan-bulan, datai ke utai nya nyau pansut ari pending kita, datai ke kita nyau leju makai utai nya. Pekara tu deka nyadi laban kita udah nulak TUHAN ti bisi enggau kita ditu, lalu kita udah mutap ngelaban Iya, madahka kita enda patut pansut ari menua Ejip.’ ” Ku Moses bejaku enggau TUHAN, “Peda Nuan. Aku nguluka enam ratus ribu iku orang, lalu Nuan madahka Diri deka meri sida chukup dagin diempa sida sebulan? Kati jelu sapi enggau bedus chukup kena ngasuh sida kenyang? Kati semua ikan di tasik chukup ke sida?” Ku TUHAN nyaut, “Kati kuasa Aku bisi sekat? Enda lama da agi, nuan deka meda enti utai ti disebut Aku nya deka nyadi tauka enda!” Nya alai Moses pansut lalu madahka ngagai orang mayuh utai ti udah disebut TUHAN. Iya ngempuruka tujuh puluh iku bala tuai, lalu ngasuh sida bediri ngelingi Langkau Kain TUHAN. Udah nya TUHAN nurun dalam mua hari, lalu bejaku ngagai Moses. TUHAN lalu ngambi sekeda Roh ti udah diberi Iya ngagai Moses, lalu meri Roh nya ngagai tujuh puluh iku bala tuai orang Israel. Lebuh Roh nya datai ba sida, sida lalu belabuh benabi, tang enda lama. Dua iku ari sida ke tujuh puluh iku nya, iya nya Eldat seduai Medat, mengkang dalam kem lalu enda enggau sida ti bukai datai ngagai Langkau Kain TUHAN. Lebuh Roh nya datai ngagai seduai iya dalam kem nya, seduai iya mega belabuh benabi. Siku orang bujang lalu belanda, madahka ngagai Moses utai ti dikereja Eldat seduai Medat. Udah nya Josua anak Nun, ti nyadi penyaup Moses kenyau ari iya agi bujang, bejaku enggau Moses, “Tagang seduai iya, tuan!” Disaut Moses, “Nama kebuah nuan ngiruh diri pasal aku? Naka meh pemadas enti sema TUHAN deka meri Roh Iya ngagai semua nembiak Iya, lalu ngasuh semua sida manjung baka nabi!” Udah nya, Moses enggau tujuh puluh iku bala tuai nya lalu pulai ngagai kem. TUHAN lalu ngenyit ngasuh ribut muput lalu mai burung empitu ari tasik. Sida terebai enda bulih se-meter ari atas tanah. Sida inggap ba kem nya, enggau berapa kilometer ngelingi kem nya, datai ke sida nyau betugung penalam satu meter ba tanah nya. Nya alai sehari nya, semalam-malam nya, enggau hari siti, orang mayuh betangkapka burung empitu nya. Nadai orang ngumpul mimit ari seribu kilogram siku. Sida nganchau lalu nyembui burung nya ngelingi kem nya. Lebuh sida benung makai dagin nya, TUHAN ringat ngagai sida, lalu ngasuh penyakit nyerang sida. Endur nya lalu dikumbai Kibrot Hatabah (reti nya “Pendam Ke Orang Ke Tetenguk Deka Makai Dagin”), laban nya endur alai sida numbakka orang ke tetengukka makai dagin. Orang mayuh lalu angkat ari endur nya, lalu mindah ngagai Haserot, alai sida ke nirika kem baru. Nyadi Moses udah jadi enggau indu orang Kus, lalu Miriam seduai Aron ngutuk iya pasal nya. Ku seduai iya, “Kati TUHAN semina bejaku ngena Moses aja? Kati Iya nadai udah bejaku ngena kitai?” TUHAN ninga jaku seduai iya. (Moses nya orang ke baruh ati. Nadai orang ke baruh agi ati ari iya di dunya tu.) TUHAN lalu tekala nya bejaku ngagai Moses, Aron enggau Miriam, “Aku ngasuh kita tiga pansut lalu mansang ngagai Langkau Kain TUHAN.” Sida tiga lalu mansang ngagai Langkau Kain nya. TUHAN lalu nurun dalam gentilang remang, bediri ba penama ngagai Langkau Kain nya, lalu ngangau, “Aron! Miriam!” Seduai iya lalu mansang ke mua, lalu ku TUHAN bejaku, “Dingaka utai ti disebut Aku! Lebuh bala nabi kita bisi enggau kita, Aku mandangka Diri ngagai sida dalam genera, lalu bejaku ngagai sida dalam mimpi. Tang jalai Aku bejaku enggau Moses ke nembiak Aku, bisi lain mimit. Aku udah ngasuh iya nyadi tuai semua nembiak Aku orang Israel. Nya alai, Aku bejaku ngagai iya betunga mua, enggau terang lalu enda ngena jaku sempama. Iya udah meda gamal Aku! Nya alai nama kebuah seduai berani bejaku ngelaban nembiak Aku Moses?” TUHAN ringat ngagai seduai iya. Nya alai, lebuh Iya mupuk lalu mua hari nya ninggalka Langkau Kain TUHAN, kulit Miriam lalu tekala nya dibalut penyakit kulit ti tau ngerampit. Kulit iya bebali burak baka seleju. Lebuh Aron malik ngagai iya, lalu meda iya dibalut penyakit nya, iya lalu bejaku enggau Moses, “Tuan, anang ngasuh kami duai merinsa natka ukum tu ketegal pemeli kami duai. Anang nejuka iya nyadi baka orang ke ada mati lulus, lalu lenyau setengah ari semua isi iya.” Moses lalu nyabak ngangauka TUHAN, “O Allah Taala, geraika iya!” Disaut TUHAN, “Enti apai iya udah ngeludah mua iya, iya enda tau enda natka pemalu diri tujuh hari. Nya alai, awakka iya ditejuka diau di luar kem seminggu. Udah nya baru iya tau dibai pulai baru ngagai kem.” Miriam lalu diasuh diau ari luar kem tujuh hari, lalu orang mayuh enda mindah ari endur nya datai ngagai maya iya dibai pulai baru ngagai kem. Udah nya sida lalu angkat ari Haserot, lalu nirika kem sida di menua puang Paran. Ku TUHAN bejaku ngagai Moses, “Pilih siku tuai ari genap raban bansa orang Israel, lalu asuh sida matau menua Kanaan ti deka diberi Aku ngagai orang Israel.” Nya meh nama orang ke diasuh Moses matau menua Kanaan. Lalu Moses nukar nama Hosea anak Nun ngagai Josua. Moses ngasuh sida mupuk. Ku iya bejaku enggau sida, “Bejalai kita ari tu tunga ke utara, ngagai selatan menua Kanaan, lalu udah nya bejalai ngagai menua ti bebukit. Peratika gaya menua nya, pemayuh orang ke nguan menua nya, enggau pengering sida. Peratika enti menua nya manah tauka enda, sekalika orang dia diau dalam nengeri ti bekuta tauka dalam nengeri ti enda bekuta. Peratika enti tanah dia ami, lalu bisi utan tauka nadai. Lalu anang enda mai sekeda buah ti tumbuh di menua nya.” (Buah anggur nyau deka mansau lebuh maya nya.) Sida lalu bejalai tunga ke utara, lalu meratika menua nya, belabuh ari menua puang Sin ti di selatan, nyentuk ngagai Rehob, semak Lebo-hamat di utara. Sida bejalai ngagai selatan menua nya, lalu datai di Hebron, alai raban peturun Ahiman, Sheshai, enggau Talmai, iya nya peturun orang ke besai gamal ti dikumbai bansa Anakim, diau. (Nengeri Hebron digaga tujuh taun dulu agi ari nengeri Zoan di menua Ejip.) Sida datai ba Lebak Eskol. Dia sida netak setangkai buah anggur ti berat amat, datai ke sida nyau ngasuh dua iku orang ngaling tangkai buah nya. Sida mega mai buah delima, enggau buah ara. (Endur nya lalu dikumbai Lebak Eskol ketegal setangkai buah anggur ti dijarau orang Israel ba endur nya.) Lebuh sida udah matau menua nya empat puluh hari, sida lalu pulai ngagai Moses, Aron enggau ngagai semua orang Israel di Kades, di menua puang Paran. Sida madahka pasal utai ti udah dipeda sida, lalu mantaika buah ti dibai sida. Ku sida madahka ngagai Moses, “Kami udah datai ba menua ti diasuh nuan patau kami. Menua nya kaya sereta ami. Tu buah ari menua nya. Tang orang ke nguan menua nya kering, lalu nengeri sida besai amat, sereta bekuta. Nambahka nya, kami meda peturun orang Anakim diau dia. Orang Amalek diau di sitak selatan menua nya. Orang Iti, orang Jebus, enggau orang Amor diau di menua ti bebukit, lalu orang Kanaan diau ngimbai Tasik Tengah, enggau ngimbai Sungai Jordan.” Kalep lalu minta orang badu agi ragak, lalu ku iya bejaku, “Kitai patut nyerang sida diatu, lalu ngalahka menua nya. Kitai ulih ngalahka menua nya.” Tang orang ke udah bejalai sama enggau Kalep lalu bejaku, “Anang! Kitai enda ulih nyerang sida, laban sida kering agi ari kitai.” Nya alai sida lalu nusui berita ti bula ngagai orang Israel pasal menua ti udah dipatau sida. Ku sida, “Kitai nadai kitai ulih diau likun di menua nya. Indah orang ke bempu menua nya deh nadai pengelikun diau dia. Lalu semua orang ke dipeda kami tinggi amat tubuh. Kami bisi meda orang ke besai gamal dia. Sida tu peturun orang Anakim, lalu kami asai ke mit baka buntak. Nyangka nya gaya kami dipeda sida.” Orang Israel lalu nyabak semalam-malam nya. Sida mutap ngelaban Moses seduai Aron. Ku sida, “Manah agi kami mati di menua Ejip, tauka mati di menua puang tu! Nama kebuah TUHAN mai kami ngagai menua nya? Semina ngasuh kami mati beperang, lalu bini enggau anak kami ditangkap munsuh. Enda ka manah agi enti kami nikal ngagai menua Ejip?” Ku sida bejaku enggau diri sama diri, “Aram kitai milih siku tuai, lalu pulai baru ngagai menua Ejip!” Moses seduai Aron lalu nyungkurka diri ke tanah di mua orang mayuh. Josua anak Nun, enggau Kalep anak Jepuneh, iya nya dua iku ari bala pematau, nyarikka gari diri lalu bejaku ngagai orang mayuh, “Menua ti dipatau kami nya menua ti pemadu manah. Enti TUHAN rinduka kitai, Iya deka mai kitai kin, lalu meri menua ti kaya sereta ami nya ngagai kitai. Anang ngelaban TUHAN, lalu anang takutka orang ke nguan menua nya. Sida ulih alah laban kitai. TUHAN bisi enggau kitai, lalu Iya udah ngalahka petara ti nyaga sida. Nya alai, anang takut.” Tang semua orang Israel deka nuku seduai iya ngena batu, deka munuh seduai iya. Tekala nya orang Israel lalu tepedaka mulia TUHAN ayan ari atas Langkau Kain TUHAN. Ku TUHAN bejaku ngagai Moses, “Ni pengelama orang tu agi mechat Aku? Ni pengelama sida mengkang enggai arapka Aku, taja pen Aku udah ngereja mayuh macham kereja ajih ba bala sida? Aku deka ngerusak sida ngena penyakit, lalu Aku deka ngasuh nuan nyadi apai ke siti bansa ti besai sereta bekuasa agi ari sida tu!” Tang ku Moses bejaku enggau TUHAN, “Nuan udah mai orang tu pansut ari menua Ejip ngena kuasa Nuan. Lebuh orang Ejip ninga pasal utai ti dikereja Nuan ngagai bala nembiak Nuan, sida deka madahka utai nya ngagai orang ke diau di menua tu. Orang nya udah ninga pasal Nuan, TUHAN, ke bisi enggau kami, pasal Nuan ke ayan dipeda bala mayuh lebuh mua hari Nuan ngetu ba atas kami, enggau pasal Nuan ke bejalai dulu ari kami dalam gentilang remang lebuh siang hari, enggau dalam tiang api lebuh malam hari. Nya alai, enti nuan munuh semua nembiak Nuan, semua bansa bukai ti udah ninga pasal Nuan deka ngumbai Nuan udah munuh bala nembiak Nuan di menua puang laban Nuan enda ulih mai sida ngagai menua ti udah disemaya deka diberi Nuan ngagai sida. Nya alai, TUHAN, Aku besampi, pandangka kuasa Nuan ngagai kami, lalu kereja utai ti udah disemaya Nuan lebuh Nuan nyebut, ‘Aku tu TUHAN ti lubah ringat, lalu Aku ngayanka pengerindu enggau penetap ati ti besai, lalu ngampun dosa enggau pengawa ti ngelaban. Tang Aku deka ngukum anak, uchu orang ngagai ketiga enggau keempat serak ketegal dosa apai indai sida.’ Nya alai, TUHAN, nitihka pemesai pengerindu Nuan ti enda berubah, aku minta Nuan ngampun dosa bala orang tu, baka Nuan ti udah ngampun sida sekumbang sida ke udah pansut ari menua Ejip.” TUHAN lalu nyaut, “Aku deka ngampun sida nitihka pinta nuan. Tang laban Aku endang Allah Taala ti idup, lalu mulia Aku ngemenuhka dunya, Aku besemaya, nadai siku ari bala orang tu deka idup lalu tama ngagai menua nya. Sida udah meda mulia Aku, enggau kereja ajih ti udah dikereja Aku di menua Ejip, enggau di menua puang, tang sida udah suah nguji pengeliat ati Aku, lalu enggai ngasika Aku. Sida enda tau sekali-kali tama ngagai menua ti udah disemaya Aku ngagai aki ini sida. Nadai siku ari bala orang ke nulak Aku deka tama ngagai menua nya. Tang laban nembiak Aku, Kalep, lain agi perangai ari orang bukai, lalu mengkang taluk ngagai Aku, Aku deka mai iya ngagai menua ti udah dipatau iya, lalu bala peturun iya deka bempu menua nya, iya nya lebak ti diuan orang Amalek enggau orang Kanaan diatu. Pagila kita enda tau enda nikal, lalu bejalai ngagai menua puang, nengah jalai ti mansa Tasik Mirah.” Ku TUHAN bejaku ngagai Moses seduai Aron, “Ni pengelama orang ke jai tu agi mutap ngelaban Aku? Aku udah ninga jaku putap sida ngelaban Aku! Nya alai, sebut ngagai sida, ‘Laban Aku idup, Aku besumpah deka ngereja utai ti udah dipinta nuan. Aku ti TUHAN, udah bejaku. Kita deka mati, lalu bangkai kita deka ngachir ba sebelah menua puang tu. Laban kita udah mutap ngelaban Aku, nadai siku kita ke lebih ari dua puluh taun umur deka tama ngagai menua nya. Aku udah besemaya ngasuh kita idup di menua nya, tang nadai siku kita deka diau dia, kelimpah ari Kalep anak Jepuneh enggau Josua anak Nun. Kita udah bejaku ngumbai anak kita deka ditangkap, tang Aku deka mai sida ngagai menua ti udah ditulak kita, lalu menua nya deka nyadika menua sida. Tang kita empu deka mati di menua puang tu. Bala anak kita deka diau segau-segau di menua puang tu empat puluh taun, natka pemerinsa ketegal kita enda tetap ati ngagai Aku, nyentuk ngagai semua bala kita abis mati magang. Kita deka betanggungjawapka dosa kita empu, setaun ke genap hari kita matau menua nya. Nya baru kita deka ensepi kati ku asai ngelaban Aku! Aku besumpah deka ngereja utai tu ngagai kita ke jai, ti udah begempuru ngelaban Aku. Genap iku kita deka mati di menua puang tu. Aku ti TUHAN, udah bejaku.’ ” Ari dua belas iku bala pematau nya, semina Josua seduai Kalep aja agi mengkang idup. Lebuh Moses madahka ngagai orang Israel utai ti udah disebut TUHAN, sida lalu ngulit balat amat. Tumu pagi hari siti, sida lalu mansang nyerang menua ti bebukit nya. Ku sida, “Kami diatu sedia deka bejalai ngagai menua ti udah dipadahka TUHAN ngagai kitai. Kami ngaku diri udah bedosa.” Tang ku Moses, “Enti pia, nama kebuah kita ngelaban pesan TUHAN diatu? Kita tetap enda ulih mujur! Anang mupuk enggai ke kita alah laban munsuh, laban TUHAN nadai enggau kita. Lebuh kita beperang ngelaban orang Amalek enggau orang Kanaan, kita deka mati, laban TUHAN nadai enggau kita, ketegal kita enggai nitihka Iya.” Tang sida majak ngemeranika diri mansang ngagai menua ti bebukit nya, taja pen Peti Lampang Batu Adat TUHAN enggau Moses enda angkat ari kem. Udah nya orang Amalek enggau orang Kanaan ti diau dia nyerang lalu ngalahka sida, lalu begagaika sida nyentuk ngagai Hormah. Ku TUHAN bejaku ngagai Moses, “Sebut ngagai orang Israel: Lebuh kita datai di menua ti deka alai kita diau, ti diberi Aku ngagai kita, lalu kita meri ngagai TUHAN siku sapi ti lelaki, siku bedus ti lelaki, siku bedus, tauka siku kambin nyadika piring tunu, tauka nyadika piring kena ngamatka semaya, tauka nyadika piring ti diberi nitihka peneka ati diri, tauka nyadika piring ti selalu diberi kita ba gawai pengarap kita, ti bebau rengut ke TUHAN, kita enda tau enda meri ngagai TUHAN sama enggau genap iku jelu nya, sekilogram tepung ti udah dichampur enggau seliter minyak kana nyadika piring gandum, enggau seliter wain nyadika piring ti diirup sama enggau genap iku anak domba nya. Enti kita meri bedus ti lelaki, beri mega dua kilogram tepung ti udah dichampur enggau satu setengah liter minyak kana nyadika piring gandum, enggau satu setengah liter wain. Bau piring tu deka ngerinduka ati TUHAN. Enti kita meri siku sapi ti lelaki nyadika piring tunu ngagai TUHAN, tauka nyadika piring kena ngamatka semaya, tauka nyadika piring pemaik, kita enda tau enda meri tiga kilogram tepung ti udah dichampur enggau 2 liter minyak kana nyadika piring gandum, enggau dua liter wain. Bau piring tu deka ngerinduka ati TUHAN. Nya meh utai ti deka diberi sama enggau genap iku sapi, genap iku bedus ti lelaki, siku jelu bedus, tauka siku kambin. Enti kita meri lebih ari siku jelu, piring ti diberi sama enggau jelu nya deka ditambahka nitihka pemayuh jelu. Semua orang ke asal bansa orang Israel enda tau enda ngereja utai tu lebuh sida ngenjuk piring ti diberi ngena api. Utai nya deka bebau rengut lalu ngerinduka ati TUHAN. Lalu enti orang kampar ti diau begulai enggau kita, nemuka iya nya diau lama tauka enda lama enggau kita, ngenjuk piring ti diberi ngena api, piring ti bebau rengut di mua TUHAN, sida enda tau enda nitihka adat tu. Adat tu enda tau enda dititihka kita enggau orang kampar ti diau begulai enggau kita, datai ke belama iya. Ba mata TUHAN kita endang sebaka enggau sida. Adat tu enda tau enda dititihka kita enggau sida. Ku TUHAN bejaku ngagai Moses “Sebut ngagai orang Israel: Lebuh kita datai ba menua ti alai Aku mai kita lalu lebuh kita makai pemakai ti ulih kita di menua nya, kita enda tau enda ngenjuk piring ngagai TUHAN. Lebuh kita manggang roti, kita enda tau enda meri tuku roti ti keterubah, ti digaga ari gandum ti baru, nyadika piring ngagai TUHAN. Utai tu enda tau enda diberi ngena chara ti dikena kita ngenjuk piring gandum ti ditungku kita. Piring roti ti dipanggang kita enda tau enda diberi kita ngagai TUHAN, datai ke belama iya. “Tang enti sema orang, enggau ukai sengaja, enda ingat nitihka sekeda ari adat tu ti udah disebut TUHAN ngagai Moses, semua utai ti udah dipesanka TUHAN ngagai kita ngena Moses, kenyau ari maya TUHAN meri pesan nya enggau udah lepas nya, dalam semua serak orang ke dalam bansa kita, enti penyalah nya ukai dikereja orang Israel enggau sengaja, semua sida enda tau enda meri siku sapi ti lelaki nyadika piring tunu, ti bebau rengut, ngagai TUHAN, sama enggau piring gandum enggau ari wain sida nitihka adat, enggau siku kambin ti lelaki nyadika piring pengampun dosa. Imam deka ngereja pengawa nuchi orang Israel, lalu sida deka diampun, laban penyalah nya ukai dikereja sida enggau sengaja, lalu sida udah mai piring pengampun dosa nyadika piring ti diberi ngena api ti diberi ngagai TUHAN. Semua orang Israel, enggau semua orang kampar ti diau begulai enggau sida, deka diampun magang, laban semua sida nya udah sama enggau ngereja penyalah nya. “Enti kita bedosa, tang ukai enggau sengaja, kita enda tau enda meri siku kambin indu ke umur setaun nyadika piring pengampun dosa. Imam deka ngereja pengawa nuchi kita ari dosa kita, ba alta, ngambika kita diampun. Atur tu mega deka dititihka semua orang ke enda sengaja bedosa, nemuka sida nya asal orang Israel, tauka orang kampar ti diau begulai enggau sida. Tang barang sapa bedosa enggau sengaja, nemuka sida nya asal orang Israel, tauka orang kampar, sida nya salah laban sida enda bebasaka TUHAN, lalu sida deka dibunuh, laban sida udah nulak jaku TUHAN, lalu udah sengaja ngelanggar siti ari pesan Iya. Sida deka betanggungjawapka pemati diri empu. Nyadi sekali, lebuh orang Israel agi di menua puang, sida nemu orang siku ngumpul kayu api lebuh Hari Sabat. Iya lalu dibai ngagai Moses, Aron enggau ngagai semua orang Israel. Orang nya lalu kena tan, laban sida enda nemu utai ti patut dikereja sida ngagai iya. Udah nya TUHAN lalu nyebut ngagai Moses, “Orang nya enda tau enda dibunuh. Semua orang Israel enda tau enda nuku iya ngena batu di luar kem.” Nya alai semua orang Israel mai iya ke luar ari kem, lalu nuku iya ngena batu, datai ke mati, munyi ti udah dipesanka TUHAN ngagai Moses. Ku TUHAN bejaku ngagai Moses, “Bejaku nuan ngagai orang Israel, lalu asuh sida ngaga rambing ba sukut gari sida, lalu ngelekatka tali ti biru ba siti-siti rambing nya. Sida enda tau enda ngereja nya ba genap serak sida. Rambing nya deka dikena sida ngingatka semua pesan TUHAN, lalu ngereja pesan nya, lalu enda nitihka pengingin ati, tauka pengingin ti datai ari mata sida empu. Nya alai kita deka ingat lalu ngereja semua pesan Aku, lalu nyadi kuduska Allah Taala kita. Aku tu TUHAN Allah Taala kita, ti udah mai kita pansut ari menua Ejip, ngambika Aku nyadi Allah Taala kita. Aku tu TUHAN Allah Taala kita.” Nyadi Korah anak Isar, ari raban peturun Kohat, ke ari raban bansa Lewi, enggau Datan, enggau Abiram anak Eliap, enggau On anak Pelet, ke ari raban bansa Reuben, mai dua ratus lima puluh iku tuai orang Israel, orang ke udah dipilih sereta tebilang nama, lalu angkat ngelaban Moses. Sida begempuru di mua Moses seduai Aron, lalu bejaku ngagai seduai iya, “Seduai nyau kelalu! Semua orang tu kudus magang, lalu TUHAN bisi ba tengah-tengah sida. Nya alai, nama kebuah seduai ngeninggika diri atas bala nembiak TUHAN?” Lebuh Moses ninga jaku nya, iya lalu nyungkurka diri ke tanah, lalu ku iya bejaku ngagai Korah enggau bala iya, “Tumu pagila TUHAN deka mandangka sapa ke nembiak Iya, iya ti kudus, iya ti tau datai semak ngagai TUHAN. Barang sapa dipilih Iya, deka diasuh Iya datai semak ngagai Iya. Ku Moses bejaku ngagai Korah. “Kita orang Lewi, pendingka aku: kati kita ngumbai pekara tu mit? Kita udah diseraraka Allah Taala ke disembah orang Israel, ngambika Iya mai kita semak ngagai Iya Empu, bekereja dalam Langkau Kain TUHAN, lalu bediri di mua orang mayuh lalu bekereja ngarika sida. Kati pekara nya mit? Iya udah nejuka kita enggau orang Lewi datai semak ngagai Iya; lalu kita mega minta diri bekereja nyadi imam? Nya alai nuan enggau bala nuan udah begempuru ngelaban TUHAN. Sapa Aron alai kita mutap ngelaban iya?” Udah nya Moses lalu mesanka Datan seduai Abiram, tang ku seduai iya, “Kami duai enggai datai! Kati enda chukup nuan udah mai kami pansut ari menua ti ami di menua Ejip, lalu munuh kami di menua puang tu? Kati nuan enda tau enda mega merintah kami? Nuan ukai mai kami ngagai menua ti ami, tauka meri kami umai enggau kebun anggur nyadika pesaka kami. Indah diatu deh nuan nguji nipu kami. Kami duai enggai datai!” Moses ringat, lalu bejaku ngagai TUHAN, “Anang nyambut piring ti dibai sida. Ngambi siku keledai sida, deh aku enda kala, lalu aku nadai kala ngemediska sida.” Ku Moses bejaku enggau Korah, “Nuan enggau orang ke nitihka nuan, enggau Aron, enda tau enda datai di mua TUHAN pagila. Genap iku kita enda tau enda mai sarang menyan diri, ngisi sarang menyan nya enggau menyan, lalu mai sarang menyan nya ngagai TUHAN, dua ratus lima puluh iti sarang menyan nya. Nuan enggau Aron mega enda tau enda bisi siti siku sarang menyan.” Nya alai sida mai sarang menyan sida, ngengkahka bara api enggau menyan ba sarang menyan nya, lalu bediri ba penama ngagai Langkau Kain TUHAN sama enggau Moses seduai Aron. Udah nya Korah lalu ngempuruka semua orang Israel, lalu bediri betunga mua enggau Moses seduai Aron, ba penama ngagai Langkau Kain TUHAN. Tekala nya mulia TUHAN lalu pegari di mua semua orang Israel. TUHAN lalu bejaku ngagai Moses seduai Aron, “Seduai enda tau enda nyurutka diri ari orang tu, ngambika Aku munuh sida diatu.” Tang Moses seduai Aron nyungkurka diri ke tanah, lalu bejaku, “O Allah Taala, Nuan endang pun semua pengidup. Lebuh siku ari bala kami bedosa, kati Nuan ringat ngagai semua bansa kami?” Ku TUHAN bejaku ngagai Moses, “Asuh orang mayuh ngejangka diri jauh ari langkau kain Korah, Datan enggau Abiram.” Udah nya Moses, disempulang bala tuai orang Israel, mansang ngagai Datan seduai Abiram. Ku Moses bejaku enggau orang mayuh, “Anang datai semak ngagai langkau kain orang ke jai nya, lalu anang negu keresa sida, enggai ke semua kita dibunuh sama enggau sida ketegal semua dosa sida.” Nya alai sida lalu ngejangka diri jauh ari langkau kain Korah, Datan enggau Abiram. Datan enggau Abiram udah pansut, lalu bediri ba mua pintu langkau kain seduai iya, sama enggau bini anak seduai iya. Ku Moses bejaku enggau orang mayuh, “Tu meh jalai kita deka nemu TUHAN udah ngasuh aku ngereja semua utai tu, lalu ukai nitihka peneka ati aku empu. Enti orang tu mati baka selama, ukai laban sida diukum Allah Taala, reti nya TUHAN nadai udah ngirumka aku. Tang enti TUHAN ngereja utai ti nadai kala udah nyadi, lalu tanah merekah lalu nelan sida enggau sida sebilik, lalu sida labuh idup-idup ngagai dunya pemati, nya baru kita deka nemu orang tu udah nulak TUHAN.” Lebuh iya baru udah tembu bejaku, tanah ti alai Datan enggau Abiram bediri lalu merekah lalu nelan seduai iya sama enggau sida sebilik, enggau bala orang ke nitihka Korah, sereta enggau reta tengkira sida. Nya alai sida labuh idup-idup ngagai dunya pemati, sama enggau reta tengkira sida. Tanah nya tikup baru, lalu semua sida lesap magang. Semua orang Israel ke dia rari magang lebuh sida ninga bala sida Korah nyerauh. Ku orang mayuh manjung, “Rari! Enggai ke tanah nya nelan kitai!” Udah nya TUHAN ngirumka api ti mau lalu nganguska dua ratus lima puluh iku orang ke udah meri menyan. Udah nya, TUHAN bejaku ngagai Moses, “Asuh Eleasar anak Imam Aron, mindahka sarang menyan ari bangkai orang ke udah angus, lalu ngachirka batu arang ari sarang menyan nya ba endur bukai, laban sarang menyan nya kudus. Laban talam orang nya udah nyadi kudus laban sarang menyan nya udah dibeli ngena nyawa sida. Nya alai, awakka sarang menyan nya ditempa mipis kena ngelapis alta, laban sarang menyan nya udah diserahka di mua TUHAN. Nya alai sarang menyan nya kudus. Awakka orang Israel ingatka tu.” Nya alai Imam Eleasar ngambi sarang menyan ti digaga ari temaga nya, lalu ngasuh orang nempa iya mipis kena ngelapis alta. Utai tu nyadi kena ngajar orang Israel ke ukai ari peturun Aron, madahka sida enda tau datai semak ngagai TUHAN lalu nunu menyan di mua TUHAN, enggai ke sida mati baka Korah enggau bala iya. Semua utai tu nyadi nitihka jaku ti disebut TUHAN ngagai Eleasar ngena Moses. Hari siti, semua orang Israel mutap magang ngelaban Moses seduai Aron. Ku sida, “Seduai udah munuh bala nembiak TUHAN.” Lebuh sida udah begempuru deka ngelaban Moses seduai Aron, sida nguing tunga ngagai Langkau Kain TUHAN, lalu tepedaka mua hari bisi ba atas Langkau nya; mulia TUHAN lalu pegari. Moses seduai Aron mansang ke mua ngagai Langkau Kain TUHAN. TUHAN lalu bejaku ngagai Moses, “Seduai enda tau enda nyurutka diri ari orang mayuh tu, laban Aku deka munuh sida ba endur tu diatu!” Seduai iya lalu nyungkurka diri ke tanah, lalu ku Moses bejaku enggau Aron, “Bai sarang menyan nuan, lalu ambi bara api ari alta lalu engkahka bara api nya ba sarang menyan nya, tuang menyan ngagai bara api nya, lalu bai utai nya enggau jampat ngagai orang mayuh, minta TUHAN ngampun sida. Laban TUHAN udah ringat, lalu penyakit udah berengkah berampit.” Aron lalu ngereja nitihka asuh Moses, lalu belanda ngagai bala orang mayuh ke begempuru dia. Lalu iya tepedaka penyakit nya endang udah berengkah berampit ba orang mayuh. Iya lalu nuang menyan ngagai sarang menyan nya, lalu minta TUHAN ngampun orang mayuh. Iya lalu bediri entara orang ke mati enggau orang ke idup. Penyakit nya lalu nadai agi. Pemayuh orang ke mati ketegal penyakit nya empat belas ribu tujuh ratus iku, enda ngitung orang ke mati sama enggau Korah. Lebuh penyakit nya nyau nadai agi, Aron pulai baru ngagai Moses ba penama ngagai Langkau Kain TUHAN. Ku TUHAN bejaku ngagai Moses, “Asuh orang Israel meri ngagai nuan dua belas iti tungkat, siti ari siku-siku tuai raban bansa. Tuliska nama orang ba tungkat sida siku-siku, lalu udah nya, tuliska nama Aron ba tungkat ti ngarika peturun Lewi, siti tungkat ke siku-siku tuai raban bansa. Bai semua tungkat nya ngagai Langkau Kain TUHAN, lalu engkahka tungkat nya di mua Peti Lampang Batu Adat, ba endur alai Aku ke betemu enggau nuan. Udah nya, tungkat orang ke dipilih Aku deka bekantuk. Nya meh jalai Aku deka madamka putap orang Israel ke seruran ngelaban nuan.” Nya alai Moses bejaku ngagai orang Israel, lalu tiap iku bala tuai sida meri tungkat sida ngagai iya, siti tungkat ke genap raban bansa, dua belas iti semua iya, lalu tungkat Aron diengkahka begulai enggau tungkat sida. Udah nya Moses lalu ngengkahka semua tungkat nya dalam Langkau Kain TUHAN, di mua Peti Lampang Batu Adat TUHAN. Hari siti, lebuh Moses tama ngagai Langkau Kain TUHAN, iya meda tungkat Aron, ti ngarika raban bansa Lewi, udah bekantuk. Tungkat nya udah bekuntum, bebungai, lalu mansutka buah almon ti mansau! Moses mai semua tungkat nya, lalu mandangka semua tungkat nya ngagai orang Israel. Sida meda utai ti udah nyadi, lalu genap iku bala tuai bela ngambi tungkat diri. Ku TUHAN bejaku ngagai Moses, “Engkahka tungkat Aron baru di mua Peti Lampang Batu Adat. Tungkat tu deka disimpan kena nangkan orang Israel ke ngelaban TUHAN, sida deka mati enti sida enda badu mutap.” Moses lalu ngereja nitihka pesan TUHAN. Ku orang Israel bejaku enggau Moses, “Mati meh kami tu! Enti orang ke datai semak ngagai langkau sembiang nya enda tau enda mati, mati magang meh kami tu!” Ku TUHAN bejaku ngagai Aron, “Nuan, bala anak lelaki nuan, enggau orang Lewi deka betanggungjawapka penyalah ti besangkut-paut enggau pengawa ti dikereja dalam Langkau Kain Aku, tang semina nuan, enggau bala anak lelaki nuan aja deka betanggungjawapka penyalah ti besangkut-paut enggau pengawa imam. Bai kaban belayan nuan, iya nya orang Lewi, bekereja sama enggau nuan, ngambika sida nyaup nuan lebuh nuan enggau bala anak lelaki nuan bekereja dalam Langkau Kain TUHAN. Sida enda tau enda ngereja pengawa sida ke nuan, lalu betanggungjawapka semua pengawa dalam Langkau Kain nya, tang sida enda tau negu utai ti kudus dalam Endur ti Kudus, tauka negu alta. Enti sida negu utai nya, sida enggau nuan empu, deka dibunuh. Sida enda tau enda gawa sama enggau nuan, lalu ngereja semua pengawa dalam Langkau Kain TUHAN. Tang orang bukai enda tau bekereja enggau nuan. Semina nuan enggau bala anak lelaki nuan aja deka betanggungjawapka semua pengawa dalam Endur ti Kudus enggau ba alta, ngambika Aku enda agi ringat ngagai orang Israel. Aku tu ti udah milih kaban belayan nuan, iya nya orang Lewi, ari semua orang Israel, nyadika pemeri ti diserahka ngagai nuan. Sida udah diserahka ngagai Aku, ngambika sida ulih ngereja pengawa sida dalam Langkau Kain TUHAN. Tang semina nuan enggau bala anak lelaki nuan aja deka betanggungjawapka semua pengawa imam ti besangkut-paut enggau alta, sereta enggau semua utai ba Endur ti Pemadu Kudus. Semua utai tu nyadika tanggungjawap nuan magang, laban Aku udah meri ngagai nuan pengawa nyadi imam nyadika pemeri nuan. Orang bukai enda tau bekereja dia. Enti sida datai semak ngagai Endur ti Pemadu Kudus nya, sida deka dibunuh.” Ku TUHAN bejaku ngagai Aron, “Ingat, Aku meri ngagai nuan semua piring ti enda ditunu ti diberi ngagai Aku. Aku meri utai nya ngagai nuan, enggau ngagai peturun nuan, nyadika ungkup kita belama iya. Ari semua piring ti pemadu kudus, ti enda ditunu ba alta, tu bagi piring ti diempu nuan: piring gandum, piring pengampun dosa, enggau piring kena bebayar. Semua utai ti diberi ngagai Aku, ti nyadika piring ti kudus, diempu nuan enggau bala anak lelaki nuan. Kita enda tau enda makai utai nya ba endur ti kudus, lalu semina orang ke lelaki aja tau makai utai nya. Kita enda tau enda ngumbai utai nya kudus. “Nambahka nya, semua pemeri bukai ti diberi orang Israel ngagai Aku, endang enggi nuan magang. Aku meri utai nya ngagai nuan, ngagai anak lelaki nuan, enggau ngagai anak indu nuan, belama iya. Semua kita sebilik ke tuchi, tau makai utai nya. “Aku meri ngagai nuan semua utai ti pemadu manah ari buah bungas ti diberi orang Israel ngagai Aku genap taun, iya nya, minyak kana, wain, enggau gandum. Semua utai nya enggi nuan magang. Semua kita sebilik ke tuchi, tau makai utai nya. “Semua utai ti udah diserahka ngagai Aku, endang enggi nuan magang. “Semua anak tuai mensia tauka jelu ti diserahka orang Israel ngagai Aku, endang enggi nuan magang. Tang nuan enda tau enda nyambut bayar ti dikena nebus anak tuai mensia, lalu nyambut mega bayar ti dikena orang nebus genap iku anak tuai jelu ti tuchi. Anak mensia deka dibeli pulai baru lebuh umur iya sebulan, ngena rega ti udah ditetapka, iya nya lima singkap pirak, nitihka atur ti udah diletak dalam Langkau Kain TUHAN. Tang anak tuai jelu sapi, bedus, enggau kambin, enda tau dibeli pulai baru. Sida nya enggi Aku siku aja. Unsaika darah sida ngagai alta, lalu tunu lemak sida nyadika piring ti diberi ngagai Aku ngena api. Bau piring nya deka ngerinduka ati Aku. Tang dagin sida nya endang enggi nuan, baka isi dada, isi kaki kanan ari piring ti manah nya. “Aku meri ngagai nuan, ngagai anak lelaki nuan, enggau ngagai anak indu nuan, belama iya, semua piring ti diberi orang Israel ngagai Aku. Tu sempekat ti enda tau dilanggar, ti digaga Aku enggau nuan, sereta enggau bala peturun nuan.” Ku TUHAN bejaku ngagai Aron, “Kita nadai ungkup tanah di menua Israel, lalu kita pen nadai mega diberi pesaka. Semina Aku ti TUHAN aja nyadika pesaka nuan.” Ku TUHAN bejaku, “Aku udah meri ngagai orang Lewi semua pemeri sepuluh peratus ti diberi orang Israel ngagai Aku, laban sida gawa dalam Langkau Kain TUHAN. Orang Israel ti bukai enda agi tau datai semak ngagai Langkau Kain TUHAN, enggai ke sida diukum bunuh. Belabuh ari diatu, semina orang Lewi aja deka ngintu Langkau Kain TUHAN, lalu betanggungjawapka semua pengawa dalam Langkau Kain nya. Adat tu mega deka dikena semua peturun nuan belama iya. Orang Lewi nadai tanah di menua Israel, laban Aku udah meri ngagai sida semua pemeri sepuluh peratus ti diberi orang Israel ngagai Aku nyadika ungkup sida. Nya kebuah Aku madahka sida nadai pesaka tanah di menua Israel.” Ku TUHAN bejaku ngagai Moses, “Nambahka nya nuan enda tau enda nyebut ngagai orang Lewi munyi tu: ‘Lebuh kita nerima ari orang Israel pemeri sepuluh peratus ti diberi TUHAN ngagai kita nyadika ungkup kita, kita enda tau enda meri sepuluh peratus ari utai nya ngagai TUHAN. Pemeri nya deka dikira sebaka enggau pemeri ti diberi orang bumai ari gandum enggau ari wain ti baru. Nya meh jalai kita deka meri pemeri ngagai TUHAN, ari semua pemeri sepuluh peratus ti diterima kita ari orang Israel. Kita enda tau enda meri pemeri ti diserahka ngagai TUHAN tu, ngagai Imam Aron. Ari semua pemeri ti diberi ngagai kita, serahka pemeri ti endang enggi TUHAN; utai ti pemadu manah ari semua pemeri nya enda tau enda diberi ngagai TUHAN. Sebut ngagai sida: Lebuh kita udah nyerahka utai ti pemadu manah nya ngagai TUHAN, nya baru kita tau nyimpan laluh ari utai nya, baka orang bumai ke nyimpan utai ti laluh lebuh iya udah meri pemeri iya. Nuan enggau kita sebilik tau makai laluh ari utai nya di semua endur, laban utai nya nyadika upah kita ke gawa dalam Langkau Kain TUHAN. Kita enda salah lebuh kita makai utai nya, asal ga kita udah meri utai ti pemadu manah ari utai nya ngagai TUHAN. Tang anang makai pemeri ti kudus ti diberi orang Israel, sebedau utai ti pemadu manah ari utai nya diberi ngagai TUHAN, laban nya ngamahka piring nya. Enti kita ngamahka pemeri nya, kita deka dibunuh.” Ku TUHAN bejaku ngagai Moses seduai Aron, “Tu adat ti udah diberi TUHAN: Asuh orang Israel mai ngagai seduai siku sapi ti mirah, ti nadai penimpang, sereta nadai kala dikena ngereja pengawa. Beri jelu sapi nya ngagai Imam Eleasar. Jelu nya enda tau enda dibai ke luar ari kem nya, lalu disayat di mua imam. Udah nya, Imam Eleasar deka ngambi sekeda darah jelu nya, lalu mechikka darah nya tujuh kali ngena tunjuk iya tunga ngagai Langkau Kain TUHAN. Semua tubuh jelu nya, nyengkaum kulit, dagin, darah, perengka perut, enda tau enda ditunu di mua imam. Udah nya, imam nya enda tau enda ngambi kayu sidar, pating isop, enggau siti tali ti mirah, lalu nibarka semua utai nya ngagai api nya ti alai nunu jelu nya. Udah nya, iya enda tau enda masu gari diri, lalu mandi. Udah nya baru iya tau tama ngagai kem, tang iya mengkang enda tuchi nyentuk ngagai lemai. Orang ke nunu sapi nya mega enda tau enda masu gari diri, lalu mandi, tang iya deka mengkang enda tuchi nyentuk ngagai lemai. Udah nya, siku orang ke tuchi deka ngumpul amau sapi nya, lalu nyimpan amau nya ba endur ti tuchi, di luar kem, ba endur alai utai nya disimpan ngambika bisi dikena orang Israel nyendiaka ai kena muai penyalah. Pengawa tu dikereja kena muai dosa. Orang ke ngumpul amau nya enda tau enda masu gari diri, tang iya mengkang enda tuchi nyentuk ngagai lemai. Adat tu deka dititihka belama iya ulih orang Israel enggau ulih orang kampar ti diau begulai enggau sida. Barang sapa negu bangkai deka nyadi enda tuchi tujuh hari. Iya enda tau enda nuchi diri ngena ai ba hari ti ketiga, enggau ba hari ti ketujuh. Udah nya baru iya deka tuchi. Tang enti iya enda nuchi diri ba hari ti ketiga enggau ba hari ti ketujuh, iya enda tuchi. Orang ke negu bangkai, lalu enda nuchi diri, deka mengkang enda tuchi, laban ai ti dikena nuchi iya apin diunsaika ngagai iya. Iya ngamahka Langkau Kain TUHAN, lalu iya enda agi dikumbai nembiak Allah Taala. Ba pekara orang ke mati dalam langkau kain, barang sapa bisi dalam langkau kain nya lebuh orang nya ngapuska seput, tauka tama ngagai langkau kain nya, deka nyadi enda tuchi tujuh hari. Semua tepayan enggau periuk ti enda ditudung dalam langkau kain nya, nyadi enda tuchi. Enti orang negu orang ke udah dibunuh tauka udah mati ari luar rumah, tauka enti orang negu rangkah tulang mensia, tauka negu kubur, orang nya nyadi enda tuchi tujuh hari. Kena muai pengamah nya, ambi amau mimit ari sapi ti mirah, ti udah ditunu kena muai dosa, simpan amau nya dalam periuk, lalu tuangka ai ngagai utai nya. Ba pekara ti keterubah, siku orang ke tuchi deka ngambi pating isop, nyepuhka iya ngagai ai, lalu mechikka ai nya ngagai langkau kain nya, ngagai semua utai ti dalam langkau kain nya, enggau ngagai orang ke diau dalam langkau kain nya. Ba pekara ti kedua, siku orang ke tuchi deka mechikka ai nya ngagai orang ke udah negu rangkah tulang mensia, tauka negu bangkai, tauka udah negu kubur. Ba hari ti ketiga, enggau ba hari ti ketujuh, orang ke tuchi nya deka mechikka ai nya ngagai orang ke enda tuchi nya. Ba hari ti ketujuh, iya deka nuchi orang ke udah mandi, ngambika orang nya nyadi tuchi lebuh padam mata panas. Orang ke udah nyadi kamah, lalu enda nuchi diri, deka mengkang enda tuchi, laban ai ti dikena nuchi iya apin diunsaika ngagai iya. Iya ngamahka Langkau Kain TUHAN, lalu iya enda agi dikumbai nembiak Allah Taala. Kita enda tau enda nitihka adat tu belama iya. Orang ke mechikka ai ti dikena nuchi orang, enda tau enda mega masu gari diri. Barang sapa udah negu ai nya deka mengkang enda tuchi nyentuk ngagai lemai. Utai ti ditegu orang ke enda tuchi, nyadi enda tuchi, lalu barang sapa negu utai nya, deka mengkang enda tuchi nyentuk ngagai lemai. Dalam bulan ti kesatu, semua orang Israel datai di menua puang Sin, lalu nirika kem sida di Kades. Miriam mati dia, lalu dikuburka dia. Nyadi endur alai sida ke nirika kem nya nadai ai. Nya alai orang mayuh begempuru ngelingi Moses seduai Aron lalu ngutuk seduai iya: “Manah agi kami mati di mua Langkau Kain TUHAN sama enggau orang Israel ti bukai. Nama kebuah seduai mai kami ngagai menua puang tu? Ngambika kami mati ditu sama enggau jelu tupi kami? Nama kebuah seduai mai kami pansut ari menua Ejip ngagai endur ti enda manah tu? Endur tu enda manah alai nanam gandum, tauka kayu ara, tauka anggur, tauka buah delima. Indah ai irup deh nadai!” Moses seduai Aron lalu ngejangka diri ari orang mayuh, lalu bediri ba penama ngagai Langkau Kain TUHAN. Seduai iya nyungkurka diri ke tanah, lalu mulia TUHAN pegari di mua seduai iya. Ku TUHAN bejaku ngagai Moses, “Ambi tungkat ti di mua Peti Lampang Batu Adat. Udah nya, nuan enggau Aron deka ngempuruka semua orang Israel. Di mua semua sida, nuan deka bejaku ngagai batu nya, lalu ai deka pansut ari batu nya. Nya chara nuan deka ngasuh ai pansut ari batu nya, ke orang mayuh, ngambika bisi diirup sida enggau jelu sida.” Moses mansang lalu ngambi tungkat nitihka jaku TUHAN. Iya enggau Aron lalu ngempuruka semua orang Israel semak batu nya, lalu ku Moses bejaku ngagai sida, “Pendingka aku diatu, kita ke seruran angkat ngelaban; kati kita ngasuh kami mansutka ai ari batu tu ke kita?” Moses lalu ngedarka tungkat iya, lalu malu batu nya dua kali ngena tungkat nya. Ai lalu mayuh amat pansut ari batu nya, lalu semua orang mayuh enggau jelu sida bela ngirup magang. Tang ku TUHAN bejaku ngagai Moses seduai Aron, “Laban seduai enda manggaika diri ba Aku, lalu enda ngaku pengudus Aku di mua orang Israel, seduai enda tau nguluka sida ngagai menua ti udah diberi Aku ngagai sida.” Pekara tu nyadi di Meribah, alai orang Israel ke mutap ngelaban TUHAN, endur alai Iya ke ngayanka pengudus Iya. Moses ngasuh bala seruan bejalai ari Kades ngagai raja menua Edom, “Tu jaku ari kaban belayan nuan, orang Israel: Nuan nemu pemerinsa ti udah ditatka kami, pasal aki ini kami ke bejalai ngagai menua Ejip, alai kami ke lama diau. Orang Ejip udah merinsaka kami, enggau aki ini kami, lalu lebuh kami nyabak ngangauka TUHAN, Iya ninga sabak kami, lalu ngasuh siku melikat nguluka kami pansut ari menua Ejip. Diatu kami udah datai di Kades, sebuah nengeri ti ba garis entara menua kita. Kami minta kita ngemendarka kami bejalai nengah menua kita. Kami enda nengah umai tauka kebun anggur kita, lalu kami pen enda mega ngirup ai ari telaga kita. Kami semina deka bejalai nengah jalai raya aja. Kami enda limpang ke kanan tauka ke kiba, datai ke kami udah meraka menua kita.” Tang ku orang Edom nyaut, “Kita enda tau nengah menua kami, enggai ke kami nyerang kita.” Ku orang Israel bejaku ngagai iya, “Kami semina deka bejalai nengah jalai raya aja, lalu enti kami tauka jelu tupi kami bisi ngirup ai kita, kami deka mayar utai nya. Awakka kami bejalai kaki nengah menua kita, nadai lebih ari nya.” Tang ku orang Edom bejaku ngagai sida, “Kita enda tau nengah menua kami.” Soldadu orang Edom lalu datai nyerang orang Israel. Nya meh jalai orang Edom enggai ngelakka orang Israel bejalai nengah menua sida. Orang Israel lalu nguingka diri ari sida. Semua orang Israel lalu bejalai ari Kades lalu datai ba Bukit Hor. Lalu ku TUHAN bejaku ngagai Moses seduai Aron ba Bukit Hor, ba garis entara menua orang Edom, “Aron deka mati, laban iya enda tau tama ngagai menua ti udah diberi Aku ngagai orang Israel, laban seduai udah ngelaban pesan Aku di Meribah. Bai Aron enggau anak lelaki iya Eleasar niki ngagai Bukit Hor, lalu buka pekayan Aron ari iya ba bukit nya, lalu rasukka pekayan nya ba anak iya Eleasar. Aron deka mati ba bukit nya.” Moses lalu ngereja nitihka asuh TUHAN. Sida niki ngagai Bukit Hor, dipeda semua orang Israel. Moses lalu muka pekayan Aron, lalu ngerasukka pekayan nya ba Eleasar. Aron lalu mati ba tuchung bukit nya, lalu Moses seduai Eleasar nurun ari bukit nya. Lebuh semua orang Israel meda Aron udah mati, sida lalu ngulitka iya tiga puluh hari. Lebuh raja menua Kanaan, ke merintah di Arat, di selatan menua Kanaan, ninga orang Israel deka datai nengah Atarim, iya nyerang sida, lalu nangkap sekeda orang Israel. Orang Israel lalu besumpah enggau TUHAN, ku sida, “Enti Nuan deka nyerahka orang nya ngagai kami, kami deka ngerusak nengeri sida.” TUHAN ninga sida, lalu nyaup sida ngalahka orang Kanaan. Nya alai orang Israel ngeluska orang Kanaan, sereta ngerusak nengeri sida, lalu ngumbai endur nya Hormah. Orang Israel lalu angkat ari Bukit Hor, nengah jalai ti nuju ngagai Teluk Akaba, ngelaungka menua Edom. Tang di rantau jalai, orang mayuh nyau enda liat ati agi, lalu bejaku ngelaban Allah Taala enggau ngelaban Moses, ku sida, “Nama kebuah nuan mai kami pansut ari menua Ejip lalu nejuka kami mati di menua puang tu, ba endur ti nadai pemakai, nadai ai tu? Kami nyau leju makai pemakai ti enda nyamai tu!” Udah nya TUHAN lalu ngasuh ular ti bisa datai ngagai orang mayuh. Ular nya lalu mantuk sida, lalu mayuh amat sida mati. Orang mayuh lalu mansang ngagai Moses, lalu bejaku, “Kami udah bedosa laban kami udah bejaku ngelaban TUHAN, enggau ngelaban nuan. Besampi ngagai TUHAN minta Iya muai ular tu.” Moses lalu besampika orang mayuh. Udah nya, TUHAN lalu ngasuh Moses ngaga siku ular ari temaga, lalu nuatka ular nya ngena siti tiang; barang sapa kena pantuk ular, deka merening ngagai ular nya, lalu gerai. Nya alai Moses ngaga siku ular ari temaga, lalu nuatka ular nya ngena tiang; lalu barang sapa dipantuk ular, deka merening ngagai ular temaga nya, lalu digeraika. Orang Israel lalu mindah ari endur nya, lalu nirika kem sida di Obot. Sida angkat ari Obot, lalu nirika kem sida ba tembawai Abarim, di menua puang ti muak ke timur menua Moap. Udah nya sida nirika kem sida ba Emperan Seret. Ari Seret sida mindah baru, lalu nirika kem sida ba tebing utara Sungai Arnon, di menua puang ti nganchau ngagai menua orang Amor. (Nyadi Sungai Arnon nya nyadika garis entara menua orang Moap enggau orang Amor.) Nya kebuah Bup Pasal Perang TUHAN bisi ngenang pasal “…nengeri Wahep ti dalam kandang menua Supah, enggau lebak Arnon, enggau serimbing lebak ti nyentuk ngagai nengeri Ar, enggau ngagai garis entara menua Moap.” Ari nya sida angkat lalu bejalai ngagai endur siti ti dikumbai Beer. Dia TUHAN bejaku ngagai Moses, “Gempuruka orang mayuh, laban Aku deka meri sida ai.” Udah nya orang Israel nyanyi lagu tu: “Telaga, pansutka ai nuan; Nya baru kami deka nyambut iya ngena lagu: Telaga ti udah ditumbak bala raja Sereta ditumbak bala tuai orang mayuh, Ditumbak ngena tungkat diraja Enggau ngena tungkat sida.” Sida mindah ari menua puang nya ngagai Matanah, lalu ari Matanah sida bejalai ngagai Nahalil, lalu ari Nahalil ngagai Bamot, Ari Bamot ngagai lebak ti di menua Moap, di baruh tuchung Bukit Pisgah, ti ngadap ngagai menua puang. Udah nya orang Israel lalu ngasuh bala seruan betemu enggau Sihon, raja orang Amor. “Kami minta nuan ngemendarka kami nengah menua nuan. Kami enggau raban jelu tupi kami enda limpang ari jalai raya, lalu enda ngelunjak umai tauka kebun anggur kita, lalu kami enda mega ngirup ai ari telaga kita. Kami deka semina bejalai nengah jalai raya aja datai ke kami udah meraka garis entara menua kita.” Tang Sihon enggai ngemendarka orang Israel bejalai nengah menua iya. Iya ngempuruka bala soldadu iya, lalu mansang ngagai Jahas di menua puang, lalu nyerang orang Israel dia. Tang orang Israel munuh mayuh amat bala soldadu Raja Sihon dalam perang nya, lalu nguan menua iya belabuh ari Sungai Arnon nyentuk ngagai Jabok di utara, iya nya, ngagai menua orang Amon, laban garis entara menua orang Amon balat amat dijaga. Nya alai, orang Israel ngalahka semua nengeri orang Amor, nyengkaum Hesbon, enggau semua nengeri ti mit ti ngelingi nengeri nya, lalu sida nguan semua nengeri nya. Nyadi Hesbon nya indu nengeri Raja Sihon ti nyadi raja orang Amor, ti udah beperang ngelaban raja menua Moap dulu menya, lalu udah ngalahka semua menua raja nya nyentuk ngagai Sungai Arnon. Nya kebuah orang ke landik belagu nyanyi munyi tu, “Datai ngagai Hesbon, ngagai nengeri Raja Sihon! Kami deka meda nengeri nya digaga baru, lalu digaga baka iya ti dulu. Dulu menya, ari nengeri tu bala soldadu Sihon udah nyelar baka api. Iya ngerusak nengeri Ar di Moap lalu makai menua ti bukit ba ulu Sungai Arnon. Tulah kita orang Moap! Kita ti nyembah Kemos deka dirusak! Petara kita nejuka orang ke lelaki tasah. Lalu sida ke indu ditangkap raja orang bansa Amor. Tang diatu peturun sida nya benung dirusak, Di rantau jalai kenyau ari Hesbon nyentuk ngagai Dibon, Kenyau ari Nasim nyentuk ngagai Nopah, ti semak Medeba.” Nya alai orang Israel ngentapka diri di menua orang Amor, lalu Moses ngasuh orang ngiga jalai ti pemadu nyamai ditengah mansang nyerang nengeri Joser. Orang Israel ngalahka nengeri nya, enggau nengeri ti mit ti ngelingi nengeri nya, lalu muru orang Amor ti diau dia. Udah nya orang Israel nguing lalu bejalai nengah jalai ti nuju ngagai Basan, lalu Raja Og ti nyadi raja dia enggau bala soldadu iya angkat lalu nyerang sida di Edrei. Ku TUHAN bejaku ngagai Moses, “Anang takutka iya laban Aku udah nyerahka iya ngagai jari nuan, sama enggau semua bala nembiak iya, sereta enggau semua menua iya. Kereja ngagai iya baka ke udah dikereja nuan ngagai Sihon, raja orang Amor ke merintah di Hesbon.” Nya alai orang Israel munuh Og, bala anak lelaki iya, enggau semua nembiak iya. Nadai siku sida ditejuka idup. Udah nya orang Israel lalu nguan menua iya. Orang Israel angkat ari endur nya lalu nirika kem sida ba emperan menua Moap, tunga ke timur Sungai Jordan, di seberai Jeriko. Lebuh Balak anak Sipur, ti nyadi raja orang Moap, ninga pasal utai ti udah dikereja orang Israel ngagai orang Amor, enggau pasal pemayuh tubuh orang Israel, iya enggau semua nembiak iya lalu balat amat takut. Orang Moap lalu bejaku enggau bala tuai orang Midian, “Enda lama da agi bala orang tu deka ngerusak semua utai ti ngelingi kitai, indah-indah baka sapi ti ngulam ba padang.” Nya alai Raja Balak lalu ngasuh seruan iya madahka Balaam anak Beor, ti diau di Petor semak Sungai Eupratis di menua Amaw. Baka tu ku pesan ti dibai sida ari Balak: “Aku madahka ngagai nuan: siti bansa udah datai ari menua Ejip. Bansa orang nya nyau ngachir di semua endur, lalu nguji ngerampas menua kami. Sida iya mayuh agi tubuh ari kami. Nya alai, aku minta nuan datai, lalu nyumpah sida ke aku. Nyangka ukur kami ulih ngalahka sida lebuh sida udah kena sumpah, lalu muru sida ari menua kami. Aku nemu, lebuh nuan merekatka orang, orang nya bulih berekat, lalu lebuh nuan nyumpah orang, orang nya ditinggang sumpah.” Nya alai tuai orang Moap enggau tuai orang Midian mai upah kena meli jaku sumpah nya, mansang ngagai Balaam, lalu meri pesan Balak ngagai iya. Ku Balaam bejaku enggau sida, “Aku minta kita bemalam ditu malam tu. Pagila baru aku madahka utai ti dipadahka TUHAN ngagai aku.” Nya alai bala tuai orang Moap lalu bemalam enggau Balaam. Allah Taala datai ngagai Balaam lalu nanya iya, “Sapa orang nya ke bemalam enggau nuan?” Disaut Balaam, “Raja Balak orang Moap udah ngasuh sida madahka ngagai aku pasal siti bansa ti udah datai ari menua Ejip, lalu udah ngachir di serata menua iya. Iya minta aku nyumpah orang nya, ngambika iya ulih ngelaban sida, lalu muru sida ari menua iya.” Ku Allah Taala bejaku enggau Balaam, “Anang mupuk enggau sida, lalu anang nyumpah orang Israel, laban Aku udah merekatka sida.” Pagi hari siti Balaam dani lalu bejaku ngagai bala seruan Balak, “Pulai meh kita. TUHAN enda ngasuh aku mupuk enggau kita.” Nya alai sida pulai ngagai Balak, lalu madahka pasal Balaam ke enggai enggau sida. Udah nya Balak lalu ngasuh mayuh agi bala tuai bansa, ti tinggi agi pangkat ari sida ke dulu, betemu enggau Balaam. Sida mansang ngagai Balaam, lalu meri pesan tu ari Balak, “Anang enda datai! Aku deka meri nuan upah ti besai, lalu ngereja sebarang utai ti dipinta nuan. Datai kitu, lalu sumpah orang nya ke aku.” Tang disaut Balaam, “Enti sema Balak meri aku semua pirak enggau emas dalam istana iya, enggai meh aku ngelaban pesan TUHAN Allah Taala aku. Indah ba pekara ti pemadu mit deh aku enggai. Tang aku minta kita bemalam ditu, baka sida ke dulu, ngambika aku tau nemu enti TUHAN bisi utai bukai ti deka dipadahka Iya ngagai aku.” Malam nya Allah Taala datai ngagai Balaam, lalu bejaku, “Enti bala orang tu datai laban sida minta nuan mupuk enggau sida, sedia meh nuan, tang nuan semina ngereja utai ti diasuh Aku.” Nya alai, pagi hari siti Balaam nyendiaka keledai iya, lalu mupuk enggau bala tuai orang Moap. Tang Allah Taala ringat laban Balaam mupuk enggau sida, lalu lebuh Balaam benung mupuk ngena keledai iya, disempulang dua iku orang gaji iya, siku melikat TUHAN bediri ba tengah jalai raya nya, lalu mempang iya. Lebuh keledai Balaam meda melikat nya bediri dia megai pedang, iya limpang ari jalai raya nya, lalu nguing ngagai padang. Balaam malu keledai iya, lalu nguingka keledai nya pulai baru ngagai jalai raya. Udah nya, melikat nya lalu bediri ba jalai ti sempit, ba entara dua belah kebun anggur, ti bisi dinding batu ari sepiak-sepiak. Lebuh keledai nya meda melikat nya, iya lalu bejalai ngembing dinding batu nya, lalu ngempitka kaki Balaam ngagai dinding nya. Balaam lalu malu keledai nya baru. Udah nya, melikat nya bejalai dulu baru lalu bediri ba endur ti sempit, ti nadai alai begelih. Nyadi sekali tu, lebuh keledai nya meda melikat nya, iya gali. Balaam ringat, lalu belabuh malu keledai nya ngena tungkat iya. Udah nya TUHAN lalu meri keledai nya kuasa bejaku, lalu ku keledai nya bejaku ngagai Balaam, “Nama utai ti udah dikereja aku ba nuan, datai ke nuan nyau malu aku tiga kali?” Ku Balaam nyaut keledai nya, “Laban nuan udah ngemelika aku! Enti sema aku bisi pedang, aku tetap deka munuh nuan.” Ku keledai nya nyaut, “Kati aku tu ukai keledai ti ditepan nuan seumur idup? Kati aku bisi udah kala ngaga nuan baka tu suba?” “Nadai kala,” ku Balaam nyaut. Udah nya, TUHAN ngasuh Balaam meda melikat ke bediri dia megai pedang iya. Balaam lalu nyungkurka diri ke tanah. Melikat nya lalu nanya Balaam, “Nama kebuah nuan malu keledai nuan tiga kali baka nya? Aku datai laban aku deka mempang jalai nuan, laban nuan enda tau kin. Tang keledai nuan ulih meda aku, lalu limpang ari jalai raya tiga kali. Enti iya enda limpang, aku tetap udah munuh nuan, tang enda munuh keledai nya.” Disaut Balaam, “Aku udah bedosa. Aku enda nemu nuan bisi bediri ba jalai raya deka ngelaban aku. Tang enti nuan ngumbai aku salah ketegal aku udah mupuk, pulai meh aku.” Tang ku melikat nya bejaku, “Mupuk meh nuan enggau sida, tang nuan semina nyebut utai ti diasuh aku sebut nuan.” Nya alai Balaam mupuk enggau sida. Lebuh Balak ninga Balaam nyau deka datai, iya mansang ngambat iya di Ar, nengeri ti ba tebing Sungai Arnon, ba entara menua enggau Moap. Ku Balak bejaku enggau Balaam, “Nama kebuah nuan enda datai lebuh aku mesanka nuan terubah iya? Kati nuan ngumbai aku enda ulih ngupah nuan?” Disaut Balaam, “Diatu aku udah datai, ukai enda? Tang nama kuasa aku? Aku semina ulih nyebut utai ti diasuh Allah Taala sebut aku.” Nya alai Balaam bejalai enggau Balak ngagai nengeri Husot. Dia Balak lalu nyayat jelu sapi enggau bedus, lalu meri sekeda dagin jelu nya ngagai Balaam, enggau ngagai bala tuai ke bejalai enggau iya. Pagi hari siti, Balak mai Balaam mansang ngagai Bamot-baal. Ari endur nya Balaam ulih meda sebagi ari bala orang Israel. Ku Balaam bejaku enggau Balak, “Gaga tujuh iti alta ditu ke aku, lalu bai ngagai aku tujuh iku sapi ti lelaki, enggau tujuh iku bedus ti lelaki.” Balak lalu ngereja utai ti diasuh Balaam gaga iya. Iya enggau Balaam lalu nyerahka siku sapi ti lelaki enggau siku bedus ti lelaki ba siti-siti alta nya. Udah nya Balaam bejaku enggau Balak, “Bediri nuan ditu ngimbai piring tunu nuan tu. Aku deka bejalai kebukai, deka nemu enti TUHAN deka, tauka enggai betemu enggau aku. Aku deka madahka ngagai nuan utai ti dipandangka Iya ngagai aku.” Balaam lalu bejalai kediri ngagai tuchung bukit sigi, lalu Allah Taala betemu enggau iya. Ku Balaam bejaku enggau Allah Taala, “Aku udah ngaga tujuh iti alta, lalu udah meri siku sapi ti lelaki enggau siku bedus ti lelaki ba genap iti alta nya.” TUHAN lalu madahka ngagai Balaam utai ti patut disebut iya, lalu ngasuh Balaam pulai baru ngagai Balak, lalu meri pesan TUHAN ngagai iya. Balaam lalu pulai, lalu nemu Balak mengkang bediri ngimbai piring tunu iya, sama enggau semua tuai orang Moap. Balaam lalu nyebut jaku ti benabi tu: “Balak, raja orang Moap udah mai aku Ari Siria, ari bukit ti di timur. ‘Datai lalu bejaku enggau aku,’ ku iya bejaku. ‘Sumpah orang Israel.’ Baka ni ku aku nyumpah utai ti enda disumpah Allah Taala, Tauka bejakuka pasal ukum, enti TUHAN apin bejakuka pasal ukum? Ari tuchung bukit ti tinggi, aku ulih meda sida. Aku ulih nengkilaka sida ari munggu. Sida tu bansa orang ke diau kediri. Sida nemu diri udah lebih agi diberekatka ari semua bansa bukai. Bala peturun Israel nyau ngemayuh amau. Sida enda ulih diitung. Awakka aku ngapuska seput aku baka siku nembiak Allah Taala. Awakka aku mati mai ati ti lantang baka orang ke lurus.” Udah nya Balak lalu bejaku enggau Balaam, “Nama utai tu ti udah dikereja nuan ba aku? Aku udah mai nuan kitu, ngasuh nuan nyumpah munsuh aku, tang nuan merekatka sida.” Disaut Balaam, “Aku semina ulih nyebut utai ti diasuh TUHAN.” Udah nya Balak bejaku enggau Balaam, “Aram bejalai enggau aku ngagai siti agi endur. Nuan ulih meda orang Israel ari endur nya. Sumpah sida ke aku ari endur nya.” Balak lalu mai Balaam ngagai padang ti di Sopim, ti ba tuchung Bukit Pisgah. Balak mega ngaga tujuh iti alta dia, lalu nyerahka siku sapi ti lelaki enggau siku bedus ti lelaki ba genap iti alta nya. Ku Balaam bejaku enggau Balak, “Bediri nuan ditu ngimbai piring tunu nuan. Aku deka betemu enggau Allah Taala ba endur nyin.” TUHAN betemu enggau Balaam, madahka ngagai iya utai ti patut disebut iya, lalu ngasuh iya pulai baru ngagai Balak, lalu meri pesan TUHAN ngagai Balak. Nya alai Balaam pulai baru ngagai Balak, lalu nemu Balak mengkang bediri ngimbai piring tunu, sama enggau bala tuai orang Moap. Balak lalu nanyaka utai ti udah disebut TUHAN. Balaam lalu nyebut jaku ti benabi tu: “Datai kitu ke nuan Balak anak Sipor, Lalu pendingka utai ti deka disebut aku. Allah Taala ukai baka mensia ti bula. Iya ukai baka mensia ti ngubah runding diri. Utai ti disemaya Iya sigi deka dikereja Iya. Iya bejaku, lalu utai nya nyadi. Aku udah diasuh merekat, Lalu lebuh Allah Taala merekat, aku enda ulih narit berekat nya pulai baru. Aku meda utai ti deka nyadi, lalu nemu orang Israel enda kena laban penusah tauka pengachau jemah ila. TUHAN Allah Taala sida bisi enggau sida. Sida madahka Iya endang Raja sida. Allah Taala udah mai sida pansut ari menua Ejip. Iya belaban ngarika sida baka sapi ti lelaki ke siga. Nadai puchau, tauka pengaruh ulih ngelaban orang Israel. Orang deka nyebut tu pasal orang Israel, ‘Peda kita utai ti udah dikereja Allah Taala!’ Bansa Israel nya baka singa. Iya enda ngetu ngapa sebedau iya nyarik lalu makai, Sebedau iya ngirup darah utai ti dibunuh iya.” Udah nya Balak lalu bejaku enggau Balaam, “Enti nuan enggai nyumpah orang Israel, anang ga nuan merekatka sida!” Disaut Balaam, “Ukai enda aku udah madahka ngagai nuan, aku enda tau enda ngereja semua utai ti diasuh TUHAN?” Ku Balak bejaku, “Aram bejalai enggau aku. Aku deka mai nuan ngagai siti agi endur. Kada enda Allah Taala deka ngasuh nuan nyumpah sida ke aku ari endur nya.” Nya alai iya mai Balaam ngagai tuchung Bukit Peor di menua puang. Ku Balaam bejaku enggau Balak, “Gaga tujuh iti alta ke aku ditu, lalu bai ngagai aku tujuh iku sapi ti lelaki enggau tujuh iku bedus ti lelaki.” Balak ngereja nitihka asuh Balaam, lalu meri siku sapi ti lelaki enggau siku bedus ti lelaki ba genap iti alta nya. Diatu baru Balaam nemu TUHAN udah ngasuh iya merekatka orang Israel. Nya alai iya enda agi begigaka tanda baka ke dikereja iya dulu ari nya. Iya nguing tunga ngagai menua puang lalu tepedaka orang Israel diau ba kem sida beraban-raban. Roh Allah Taala lalu bekuasa ba iya, lalu iya benabi: “Tu pesan Balaam anak Beor, jaku orang ke lansik meda, ke ulih ninga utai ti disebut Allah Taala. Aku tegenung meda utai dalam genera, Genera ti datai ari Allah Taala ti Pemadu Bekuasa. Langkau kain orang Israel amat manah, Baka rintai batang kayu engkerema Tauka baka kebun ti ngimbai sungai, Baka kayu garu ti ditanam TUHAN Tauka baka kayu sidar ti ba tebing ai. Hari deka ujan lebat Lalu sida deka nanam benih sida ba padang ti mayuh ai. Raja sida deka kering agi ari Agak, Lalu perintah Iya deka ngerembai jauh. Allah Taala udah mai sida pansut ari menua Ejip. Iya belaban ngarika sida baka sapi ti lelaki ke siga. Sida nelan munsuh sida, Ngeredakka tulang sida, matahka panah sida. Bansa orang nya deka nyadi baka singa ti kering. Lebuh iya tinduk, nadai orang berani ngerak iya. Barang sapa merekatka orang Israel, deka nerima berekat. Lalu barang sapa nyumpah orang Israel, deka kena sumpah.” Balak ngenggamka jari iya laban iya balat ringat, lalu bejaku enggau Balaam, “Aku mesanka nuan, ngasuh nuan nyumpah munsuh aku, tang nuan udah merekatka sida tiga kali. Pulai nuan ngagai menua nuan empu! Aku udah besemaya deka ngupah nuan, tang TUHAN udah nagang nuan bulih upah nya.” Disaut Balaam, “Aku udah madahka ngagai bala seruan ti diasuh nuan betemu enggau aku, enti sema nuan meri aku semua pirak enggau emas ari istana nuan, enda meh aku ulih ngelaban pesan TUHAN lalu ngereja utai nitihka peneka ati aku empu. Aku semina deka nyebut utai ti diasuh TUHAN.” Ku Balaam bejaku enggau Balak, “Aku diatu deka mulaika diri ngagai bala aku empu, tang sebedau aku mupuk, aku deka meri nuan jaku tangkan pasal utai ti deka dikereja orang Israel ngagai bala nembiak nuan jemah ila.” Balaam lalu benabi munyi tu: “Pesan ari Balaam anak Beor, Jaku ari orang siku ke lansik meda, Ke ulih ninga utai ti disebut Allah Taala Lalu nyambut penemu ti datai ari Iya ti Pemadu Tinggi. Aku tegenung meda utai dalam genera Genera ti datai ari Allah Taala ti Pemadu Bekuasa. Aku ninjau ngagai maya ti jemah ila, Lalu aku tepedaka bansa orang Israel. Siku raja, ke baka bintang ti terang, deka angkat ari bansa orang nya. Iya deka datai ari bansa orang Israel baka bintang ti terebai. Iya deka nyerang bala tuai orang Moap Lalu ngalahka semua peturun Set. Iya deka ngalahka munsuh iya di Edom Lalu ngaga menua sida nyadika pesaka iya empu, Lebuh orang Israel majak menang. Orang Israel deka ngindik sida Lalu ngeluska sida ke agi idup.” Udah nya, dalam genera iya Balaam tepedaka orang Amalek, lalu iya benabi munyi tu: “Orang Amalek tu bansa ti pemadu kering ari semua bansa, Tang ba pengujung iya, sida deka lus belama iya.” Dalam genera iya, Balaam tepedaka bansa Ken, lalu iya benabi munyi tu: “Endur alai nuan diau endang likun, Ngelikun sarang ti digaga tinggi ba tingkah batu, Tang kita bansa Ken deka dirusak Lebuh orang Asiria ngaga kita nyadi orang tangkap sida.” Balaam lalu benabi munyi tu: “Bala sapa nya ke begempuru di utara? Bala orang ke nyerang deka belayar ari pulau Saiprus. Sida deka ngalahka menua Asiria enggau menua Eber, Tang sida, deka mega abis mati belama iya.” Udah nya Balaam besikap lalu pulai ngagai menua iya empu. Balak pen angkat lalu mulaika diri. Lebuh orang Israel agi diau ba kem sida ba Emperan Akasia, sida ke lelaki belabuh beleman enggau indu bansa Moap ti diau dia. Sida indu tu ngambi sida ngabang ngagai gawai miring, alai petara orang Moap ke disembah. Orang Israel makai pemakai sereta nyembah petara Baal di Peor. Nya alai TUHAN ringat ngagai sida lalu nyebut ngagai Moses, “Tangkap semua orang Israel ti udah nguluka orang ngereja utai tu, lalu titihka jaku Aku. Bunuh sida lebuh siang hari. Nya baru Aku enda agi ringat ngagai orang Israel.” Ku Moses bejaku enggau bala pemesai, “Genap iku kita enda tau enda munuh semua lelaki ari raban bansa kita empu ti udah nyembah Baal di Peor.” Nyadi siku lelaki orang Israel bisi mai siku indu bansa Midian ngagai langkau kain iya, dipeda Moses enggau bala orang Israel, lebuh sida benung ngulit ba penama ngagai Langkau Kain TUHAN. Lebuh Pinehas anak Eleasar, uchu Imam Aron, meda nya, iya lalu angkat ninggalka bala mayuh. Iya mai sangkuh, nitihka lelaki enggau indu nya ngagai langkau kain lelaki nya, numbuk seduai iya ngena sangkuh nya lalu ngebuska tubuh seduai iya. Nya meh jalai penyakit ditagang ngerusak orang Israel. Tang penyakit nya udah munuh dua puluh empat ribu iku orang. Ku TUHAN bejaku ngagai Moses, “Ketegal utai ti udah dikereja Pinehas, Aku enda agi ringat ngagai orang Israel. Iya enggai meda orang nyembah petara bukai tang semina Aku Siku aja. Nya kebuah Aku enda munuh sida lebuh Aku ringat. Nya alai padahka ngagai Pinehas, Aku deka ngaga siti sempekat enggau iya. Sempekat nya deka meruan belama iya. Iya enggau peturun iya deka nyadi imam belama iya, laban iya tetap ati ngagai Aku, lalu udah ngasuh dosa orang Israel diampun.” Nama lelaki orang Israel ke dibunuh sama enggau indu orang Midian nya Sisa Imri anak Salu, tuai bilik ke raban bansa Simeon. Nama indu nya Kosbi. Apai iya Sur, siku ari orang ke nyadi tuai suku raban bansa ke peturun orang Midian. Ku TUHAN bejaku ngagai Moses, “Serang orang Midian, lalu bunuh sida ketegal penyai ti udah dikereja sida ngagai nuan, lebuh sida nipu kita di Peor, enggau ketegal Kosbi, ti udah dibunuh lebuh maya penyakit nyerang di Peor.” Udah bekau sida ke diserang penyakit nya, TUHAN bejaku ngagai Moses seduai Eleasar anak Imam Aron, “Itung pemayuh tubuh semua orang Israel ti lelaki, ke umur dua puluh taun ke atas, ti tau enggau beperang, ari semua ruang bilik orang Israel.” Bala raban bansa Reuben (Reuben nya anak tuai Jakop) nyengkaum suku raban bansa Hanok, Palu, suku raban bansa Hesron, enggau suku raban bansa Karmi. Pemayuh tubuh orang ari semua suku raban bansa tu: 43,730 iku lelaki. Bala peturun Palu nya Eliap enggau bala anak lelaki Eliap: Nemuel, Datan, enggau Abiram. (Datan seduai Abiram tu orang ke udah dipilih orang Israel. Seduai iya ngelaban jaku Moses seduai Aron, lalu ngalih ari orang ke nitihka Korah, lebuh sida ngelaban TUHAN. Tanah merekah lalu nelan seduai iya, lalu seduai iya mati sama enggau Korah sereta enggau orang ke nitihka Korah lebuh maya api ti nganguska dua ratus lima puluh iku lelaki. Utai ti nyadi ba sida nya kena ngajar orang mayuh. Tang bala anak lelaki Korah enda kena bunuh.) Peturun Simeon nitihka suku raban bansa sida nyengkaum suku raban bansa Nemuel, Jamin, Jachin, Serah, enggau Saul. Pemayuh lelaki ari semua suku raban bansa tu: 22,200 iku. Peturun Gat nyengkaum suku raban bansa Sepon, Hagi, Suni, Osni, Eri, Arot, enggau Areli. Pemayuh lelaki ari semua suku raban bansa tu: 40,500 iku. Pemayuh lelaki ari semua suku raban bansa tu: 76,500 iku. Peturun Isakar nyengkaum suku raban bansa Tola, Puah, Jasup, enggau Simron. Pemayuh lelaki ari semua suku raban bansa tu: 64,300 iku. Peturun Sebulun nyengkaum suku raban bansa Seret, Elon, enggau Jahlil. Pemayuh lelaki ari semua suku raban bansa tu: 60,500 iku. Peturun Josep, nitihka suku raban bansa sida ke diturunka Manasi seduai Epraim. Peturun Manasi nya baka tu: Machir anak Manasi nyadi apai Giliat, lalu Giliat nurunka suku raban bansa Leser, Helek, Asril, Sekem, Semida, enggau Heper. Selopehat anak Heper nadai anak lelaki, tang semina bisi anak indu. Nama sida nya Malah, Noah, Hoklah, Milkah enggau Tirsah. Pemayuh lelaki ari semua suku raban bansa tu: 52,700 iku. Peturun Epraim nyengkaum suku raban bansa Sutelah, Beker, enggau Tahan. Suku raban bansa Eran diturunka Sutelah. Pemayuh lelaki ari semua suku raban tu: 32,500 iku. Nya meh semua suku raban bansa ti diturunka Josep. Peturun Benjamin nyengkaum suku raban bansa Bela, Asbel, Ahiram, Sepupam, enggau Hupam. Raban peturun Art enggau Naaman nya diturunka Bela. Pemayuh lelaki ari semua suku raban bansa tu: 45,600 iku. Peturun Dan nyengkaum suku raban bansa Suham, lalu pemayuh lelaki ari suku raban bansa tu: 64,400 iku. Peturun Aser nyengkaum suku raban bansa Imnah, Isbi, enggau Beriah. Suku raban bansa Beriah nurunka suku raban bansa Heber enggau Malkil. Aser bisi anak indu siku benama Serah. Pemayuh lelaki ari semua suku raban bansa tu: 53,400 iku. Peturun Naptali nyengkaum suku raban bansa Jahsil, Guni, Jeser, enggau Silem. Pemayuh lelaki ari semua suku raban bansa tu: 45,400 iku. Pemayuh semua lelaki orang Israel: 601,730 iku. Ku TUHAN bejaku ngagai Moses, “Bagi menua nya ngagai semua raban bansa orang Israel, nitihka pemayuh tubuh dalam siti-siti raban bansa. Raban bansa Lewi nyengkaum suku raban bansa Gerson, Kohat, enggau Merari. Peturun sida nya nyengkaum suku raban bansa ti diturunka Libni, Hebron, Mahli, Musi, enggau Korah. Kohat nya apai Amram, ke jadi enggau anak dara Lewi ke benama Jokibit, ke diadaka di menua Ejip. Iya ngadaka dua iku anak lelaki, Aron seduai Moses, enggau siku anak indu ke benama Miriam. Nyadi Aron bisi empat iku anak lelaki, Nadap, Abihu, Eleasar, enggau Itamar. Nadap seduai Abihu mati lebuh seduai iya meri api ti enda kudus ngagai TUHAN. Pemayuh orang Lewi ti lelaki, ke umur sebulan ke atas, nya 23,000 iku. Sida iya diitung kediri ari orang Israel ti bukai, laban sida nadai diberi pesaka di menua Israel. Semua raban peturun tu dituliska Moses seduai Eleasar magang, lebuh seduai ngitung tubuh orang Israel ba emperan menua Moap, di seberai nengeri Jeriko, ngimbai Sungai Jordan. Nadai siku lelaki agi idup ari orang ke udah diitung Moses seduai Aron, lebuh ngitung tubuh ti keterubah dipejalaika di menua puang Sinai. TUHAN udah madahka semua sida nya deka mati magang di menua puang. Kelimpah ari Kalep anak Jepuneh, enggau Josua anak Nun, semua orang bukai udah mati magang. Malah, Noah, Hoklah, Milkah, enggau Tirsah nya anak indu Selopehat. Selopehat nya anak Heper, anak Giliat, anak Machir, anak Manasi, anak Josep. Sida bediri di mua Moses, Imam Eleasar, bala tuai bansa, enggau semua orang Israel ba penama ngagai Langkau Kain TUHAN. Ku sida, “Apai kami mati di menua puang, lalu iya nadai anak lelaki. Iya nadai enggau orang nitihka Korah ngelaban TUHAN. Iya mati laban dosa iya empu. Tang taja pen apai kami nadai anak lelaki, tang nama iya enda patut dipadamka ari suku raban bansa iya empu. Nya alai beri ngagai kami tanah ari bala kaban belayan apai kami.” Moses lalu mantaika pekara sida nya di mua TUHAN, lalu ku TUHAN bejaku ngagai iya, “Utai ti dipinta bala anak indu Selopehat nya endang ngena. Beri sida tanah ari bala kaban belayan apai sida, ngambika pesaka iya diempu sida. Padahka ngagai orang Israel, lebuh lelaki mati nadai ninggalka anak lelaki, anak indu iya tau bempu pesaka iya. Enti iya nadai anak indu, sida menyadi lelaki iya tau bempu pesaka iya. Enti iya nadai menyadi lelaki, sida menyadi lelaki apai iya tau bempu pesaka nya. Enti iya nadai menyadi lelaki tauka aya, nya baru kaban belayan iya ti nyempil agi tau bempu utai nya, lalu tau ngumbai utai nya reta tengkira iya empu. Orang Israel enda tau enda nitihka adat tu, munyi ti udah dipadahka Aku ti TUHAN ngagai nuan.” Ku TUHAN bejaku ngagai Moses, “Alai nuan niki ngagai Bukit Abarim, lalu tinjau menua ti deka diberi Aku ngagai orang Israel. Lebuh nuan udah ninjau menua nya, nuan deka mati, baka menyadi nuan Aron, laban seduai sama udah ngelaban pesan Aku di menua puang Sin. Lebuh semua orang Israel mutap ngelaban Aku di Meribah, nuan enggai ngaku Aku endang bekuasa sereta kudus di mua sida.” (Meribah nya mata ai di Kades, ti di menua puang Sin.) Moses lalu besampi, “ TUHAN Allah Taala ti pun semua pengidup, aku besampi, minta Nuan ngeletak siku orang nguluka orang mayuh sereta ulih nyadi tuai nguluka sida beperang, ngambika bala nembiak Nuan enda baka raban bedus ti nadai orang ngibun.” Ku TUHAN bejaku ngagai Moses, “Ambi Josua anak Nun, orang ke landik ngereja pengawa, lalu engkahka jari nuan ba pala iya. Asuh iya bediri di mua Imam Eleasar, enggau di mua semua orang Israel, lalu padahka ngagai orang mayuh Josua deka nganti nuan. Beri ngagai iya sekeda kuasa nuan, ngambika semua orang Israel ngasika iya. Tang iya deka bediri di mua Imam Eleasar; lalu Imam Eleasar deka ngarika iya betanyaka ngagai Aku ngena Urim enggau Tumim, bagi utai ti diasuh Aku kereja iya; lalu semua orang Israel deka nitihka atur iya lebuh sida tama pansut.” Moses lalu ngereja utai ti diasuh TUHAN. Iya mai Josua lalu ngasuh iya bediri di mua Imam Eleasar, enggau di mua semua orang Israel; ngengkahka jari iya ba pala Josua, lalu meri Josua kuasa nganti iya, munyi ti dipesanka TUHAN. TUHAN ngasuh Moses ngajar orang Israel chara ngenjuk piring ti diberi ngena api ngagai Allah Taala, ti ngerinduka ati Iya, ba maya ti udah diletak. Tu bagi piring ti diberi ngena api ti enda tau enda diberi ngagai TUHAN. Ke piring tunu tiap hari: beri dua iku anak domba ti lelaki, ti umur setaun, ti nadai penimpang. Beri anak domba ti terubah, lebuh pagi hari, lalu iya ti kedua, lemai hari. Lalu ke genap iku jelu nya, beri piring gandum, iya nya sekilogram tepung, ti dichampur enggau seliter minyak kana ti pemadu manah. Tu piring ti diberi tiap hari, ti ditunu, ti terubah diberi ba Bukit Sinai nyadika piring ti diberi ngena api, ti bebau rengut ke TUHAN. Ke piring wain ti diberi sama enggau anak domba ti terubah, tuang seliter wain ba alta nya. Lemai nya, beri anak domba ti kedua, baka chara ti ngenjuk piring lebuh pagi nya, sama enggau piring wain. Nya mega nyadika piring ti diberi ngena api ti bebau rengut ke TUHAN. Ba Hari Sabat, beri dua iku anak domba ti lelaki, ti umur setaun, ti nadai penimpang, dua kilogram tepung ti dichampur enggau minyak kana nyadika piring gandum, sereta enggau piring wain. Piring ti ditunu tu deka diberi genap Hari Sabat, nambahka piring ti diberi tiap hari, sereta enggau piring wain. Beri piring tunu ngagai TUHAN ba genap pun bulan, iya nya dua iku sapi ti lelaki ti agi biak, siku bedus ti lelaki, tujuh iku anak domba ti lelaki, semua nadai penimpang magang. Nyadi ke piring gandum, beri tepung dichampur enggau minyak kana, baka tu: ke genap iku sapi ti lelaki, beri tiga kilogram tepung. Ke siku bedus ti lelaki, beri dua kilogram tepung. Ke siku anak domba, beri sekilogram tepung. Piring ti ditunu tu nyadika piring ti diberi ngena api, ti bebau rengut ke TUHAN. Piring wain ti patut diberi nya dua liter wain ke genap iku sapi ti lelaki, satu setengah liter wain ke siku bedus ti lelaki, enggau seliter wain ke siku anak domba. Tu adat kena ngenjuk piring kena satu hari bulan ke tiap-tiap bulan sepemanjai taun. Lalu nambahka piring tunu ti diberi tiap hari, sama enggau piring wain, beri mega siku kambin ti lelaki nyadika piring pengampun dosa. Gawai Paska ti dikena ngemesaika TUHAN, enda tau enda diintu kena empat belas hari bulan ti kesatu. Kena lima belas hari bulan ti kesatu, Gawai Roti Ti Enda Beragi deka berengkah lalu deka diintu tujuh hari. Lebuh maya nya, semina roti ti enda beragi aja tau diempa. Ba hari ti keterubah, kita enda tau enda besembiang bebala mayuh, lalu kita enda tau gawa sehari nya. Beri piring tunu nyadika piring ti diberi ngena api ngagai TUHAN, iya nya, dua iku sapi ti lelaki, siku bedus ti lelaki, enggau tujuh iku anak domba ti lelaki ti umur setaun, ti nadai penimpang. Beri piring ti menyana ti digaga ari tepung dichampur enggau minyak kana baka tu: tiga kilogram ke genap iku sapi ti lelaki, dua kilogram ke siku bedus ti lelaki, enggau sekilogram ke genap iku anak domba. Beri mega siku kambin ti lelaki nyadika piring pengampun dosa. Nya chara kita ngereja pengawa nuchi orang mayuh. Beri piring tu kena nambahka piring tunu, ti diberi tiap pagi. Baka nya mega, dalam kandang tujuh hari, beri piring ti diberi ngena api ngagai TUHAN, ti bebau rengut lalu ngelantangka Iya. Beri piring tu nambahka piring tunu enggau piring wain ti diberi tiap hari. Kita enda tau enda besembiang bebala mayuh ba hari ti ketujuh, lalu anang gawa. Ba hari ti keterubah ke Gawai Ngetau, lebuh kita meri ngagai TUHAN piring gandum ari gandum ti baru udah diketau kita, kita enda tau enda besembiang bebala mayuh, lalu kita enda tau gawa. Beri piring tunu nyadika piring ti bebau rengut ke TUHAN, iya nya, dua iku sapi ti lelaki ti agi biak, siku bedus ti lelaki, enggau tujuh iku anak domba ti lelaki, ti umur setaun. Semua sida tu nadai penimpang magang. Beri piring gandum ti digaga ari tepung ti pemadu alus dichampur enggau minyak kana, iya nya, tiga kilogram ke genap iku sapi ti lelaki, dua kilogram ke siku bedus ti lelaki, enggau sekilogram ke siku anak domba. Beri mega siku kambin ti lelaki nyadika piring pengampun dosa. Nya meh chara kita ngereja pengawa nuchi orang mayuh. Beri piring tu enggau piring wain, kena nambahka piring tunu ti diberi kita tiap hari, enggau piring gandum. “Kena satu hari bulan ti ketujuh, kita enda tau enda besembiang bebala mayuh, lalu enda gawa. Ba hari nya, terumpit deka disepu. Beri siti piring tunu, ti bebau rengut ngagai TUHAN. Piring nya nyengkaum: siku sapi ti lelaki, siku bedus ti lelaki, enggau tujuh iku anak domba ti lelaki, ti umur setaun. Semua sida nya nadai penimpang magang. Beri piring gandum kita, iya nya tepung ti pemadu alus ti udah dichampur enggau minyak kana, baka tu: tiga kilogram tepung ke siku sapi ti lelaki, dua kilogram tepung ke siku bedus ti lelaki, enggau sekilogram ke siku anak domba. Beri mega siku kambin nyadika piring pengampun dosa. Nya meh chara kita ngereja pengawa nuchi orang mayuh ari dosa sida. Beri semua piring tu nambahka piring tunu ti diberi genap satu hari bulan, sama enggau piring gandum, enggau piring wain. Piring ti diberi ngena api tu bebau rengut ke TUHAN. “Kena sepuluh hari bulan ti ketujuh, kita enda tau enda besembiang bebala mayuh lalu bepasa; kita enda tau gawa, tang meri siti piring ti bebau rengut ngagai TUHAN, iya nya, siku sapi ti lelaki ti agi biak, siku bedus ti lelaki, enggau tujuh iku anak domba ti lelaki, ti umur setaun. Semua sida tu nadai penimpang magang. Beri tepung ti udah dichampur enggau minyak kana nyadika piring gandum, iya nya, tiga kilogram tepung ke siku sapi ti lelaki, dua kilogram ke siku bedus ti lelaki, enggau sekilogram ke siku anak domba. Beri mega siku kambin ti lelaki nyadika piring pengampun dosa, nambahka kambin ti diberi ba pengawa nuchi orang mayuh ari dosa sida, enggau piring tunu sereta enggau piring gandum, enggau piring wain. “Kena lima belas hari bulan ti ketujuh, kita enda tau enda besembiang bebala mayuh; kita enda tau gawa, lalu kita enda tau enda ngintu gawai tu ke TUHAN tujuh hari. Ba hari ti keterubah, beri piring ti diberi ngena api, ti bebau rengut ngagai TUHAN, iya nya, tiga belas iku sapi ti lelaki ti agi biak, dua iku bedus ti lelaki, enggau empat belas iku anak domba ti lelaki ti umur setaun. Semua sida nya nadai penimpang magang. Beri tepung ti udah dichampur enggau minyak kana nyadika piring gandum kita, iya nya, tiga kilogram ke siku sapi ti lelaki, dua kilogram ke siku bedus ti lelaki, enggau sekilogram ke siku anak domba, sama enggau piring wain nitihka penyampau ti diguna. Beri mega siku kambin ti lelaki nyadika piring pengampun dosa. Beri semua piring tu nambahka piring tunu enggau piring gandum, enggau piring wain, ti endang diberi tiap hari. Ba hari ti kedua, beri dua belas iku sapi ti lelaki, dua iku bedus ti lelaki, enggau empat belas iku anak domba ti lelaki, ti umur setaun. Semua sida tu nadai penimpang magang. Ba hari ti ketiga, beri sebelas iku sapi ti lelaki ti agi biak, dua iku bedus ti lelaki, enggau empat belas iku anak domba ti lelaki, ti umur setaun. Semua sida tu nadai penimpang magang. Ba hari ti keempat, beri sepuluh iku sapi ti lelaki ti agi biak, dua iku bedus ti lelaki, enggau empat belas iku anak domba ti umur setaun. Semua sida tu nadai penimpang magang. Ba hari ti kelima, beri semilan iku sapi ti lelaki ti agi biak, dua iku bedus ti lelaki, enggau empat belas iku anak domba ti lelaki, ti umur setaun. Semua sida tu nadai penimpang magang. Ba hari ti keenam, beri lapan iku sapi ti lelaki ti agi biak, dua iku bedus ti lelaki, enggau empat belas iku anak domba ti lelaki, ti umur setaun. Semua sida tu nadai penimpang magang. Ba hari ti ketujuh, beri tujuh iku sapi ti lelaki ti agi biak, dua iku bedus ti lelaki, enggau empat belas iku anak domba ti lelaki ti umur setaun. Semua sida nya nadai penimpang magang. Ba hari ti kelapan, kita enda tau enda besembiang bebala mayuh, lalu anang gawa. Beri siti piring tunu nyadika piring ti diberi ngena api ngagai TUHAN, ti bebau rengut ke Iya, baka tu: siku sapi ti lelaki ti agi biak, siku bedus ti lelaki, enggau tujuh iku anak domba ti lelaki, ti umur setaun. Semua sida nya nadai penimpang magang. Tu meh adat pasal ngenjuk piring tunu, piring gandum, piring wain, enggau piring pemaik, ti enda tau enda diberi kita ngagai TUHAN, ba gawai ti udah diletak. Piring tu nambahka piring ti diberi kita lebuh kita ngamatka semaya, sereta nambahka piring ti diberi kita nitihka peneka ati diri. Moses madahka ngagai orang Israel semua utai ti udah dipesanka TUHAN ngagai iya. Moses meri atur tu ngagai bala tuai raban bansa orang Israel. “Lebuh orang besemaya deka meri utai ngagai TUHAN, tauka ngangkatka sumpah kena ngemaduka diri makai sekeda utai, orang nya enda tau mungkir ari semaya nya, tang ngereja semua utai ti disebut iya. Lebuh indu ke agi biak, ti agi diau dalam rumah apai iya, ngaga semaya deka meri utai ngagai TUHAN, tauka besemaya deka badu agi makai sekeda utai, iya enda tau enda ngereja semua utai ti disemaya iya, enti apai iya enda nagang iya lebuh iya ninga pasal semaya nya. Tang enti apai iya nagang iya ngamatka semaya iya, lebuh apai iya ninga pasal semaya nya, indu nya enda ibuh ngamatka semaya nya. TUHAN deka ngampun iya, laban apai iya nagang iya ngamatka semaya nya. Enti indu ke apin belaki ngaga siti semaya, nemuka sengaja tauka enda sengaja, tauka besemaya deka badu agi makai sekeda utai, lalu udah nya belaki, iya enda tau enda ngereja semua utai ti udah disemaya iya, enti laki iya enda nagang iya lebuh laki iya ninga pasal utai nya. Tang enti laki iya nagang iya ngamatka semaya nya lebuh iya ninga pasal utai nya, indu nya enda ibuh ngamatka semaya nya. TUHAN deka ngampun iya. Indu ke balu tauka indu ke udah sarak enda tau enda ngamatka semua semaya iya. Enti indu ke udah belaki ngaga semaya, tauka besemaya deka badu agi makai sekeda utai, iya enda tau enda ngereja semua utai ti udah disemaya iya, tauka udah dijanji iya, enti laki iya enda nagang iya lebuh laki iya ninga pasal utai nya. Tang enti laki iya nagang iya ngamatka semaya nya, lebuh laki iya ninga pasal semaya nya, indu nya enda ibuh ngamatka semaya nya. TUHAN deka ngampun iya, laban laki iya udah nagang iya ngamatka semaya nya. Laki iya bisi kuasa netapka, tauka muai, sebarang semaya tauka janji ti udah digaga bini iya. Tang enti laki enda nagang bini iya lebuh iya ninga pasal semaya bini iya, bini iya enda tau enda ngereja semua utai ti udah disemaya tauka dijanji iya. Enti laki iya enda nagang iya lebuh laki iya ninga pasal semaya nya, reti nya iya netapka semaya nya. Tang enti, udah lepas nya, laki iya ngetas semaya nya, laki iya deka betanggungjawapka penyalah bini iya. Tu meh adat ti diberi TUHAN ngagai Moses ba pasal semaya ti digaga indu ke apin belaki, ti agi diau dalam rumah apai iya, tauka semaya ti digaga indu ke udah belaki. Ku TUHAN bejaku ngagai Moses, “Ukum orang Midian ketegal utai ti udah dikereja sida ngagai orang Israel. Lebuh nuan udah ngereja nya, nuan deka mati.” Nya alai Moses lalu bejaku enggau orang mayuh, “Kita enda tau enda nyendiaka diri empu mansang beperang, ngambika kita ulih nyerang orang Midian, kena ngukum sida ketegal utai ti udah dikereja sida ngagai TUHAN. Genap raban bansa orang Israel enda tau enda ngirumka seribu iku mansang beperang.” Nya alai seribu iku lelaki dipilih ari siti-siti raban bansa, dua belas ribu iku lelaki ke sedia deka beperang. Moses ngasuh sida mansang beperang diuluka Pinehas anak Imam Eleasar, ke mai utai ti kudus enggau terumpit kena megau bala. Sida nyerang orang Midian, nitihka pesan TUHAN ngagai Moses, lalu munuh semua lelaki orang Midian, nyengkaum lima iku raja orang Midian, iya nya Raja Ebi, Rekem, Sur, Hur, enggau Reba. Sida mega munuh Balaam anak Beor. Orang Israel nangkap bala indu enggau anak mit orang Midian, ngerampas jelu sapi, enggau jelu bedus sida, ngerumpak semua pengaya sida, lalu nunu semua nengeri enggau kem sida. Sida mai semua perapasan ti dirampas sida, nyengkaum orang tangkap enggau jelu, lalu mai sida ngagai Moses seduai Eleasar, enggau ngagai bala orang Israel, ti diau ba kem sida ba emperan menua Moap, ngimbai Sungai Jordan, di seberai nengeri Jeriko. Moses, Eleasar, enggau bala tuai orang Israel ti bukai pansut ari kem sida, ngambat bala soldadu. Moses lalu ringat ngagai bala pemesai soldadu, ngagai kepala batalion, enggau kepala kampani, ke pulai beperang. Ku iya bejaku enggau sida, “Nama kebuah kita nejuka sida indu tu idup? Kita tentu ingat: orang indu ke mai orang Israel enda tetap ati ngagai TUHAN, nitihka atur Balaam di Peor. Nya meh utai ti ngasuh penyakit berampit ba bala nembiak TUHAN. Nya alai diatu, bunuh semua nembiak ti lelaki, enggau semua indu ke udah kala beleman enggau lelaki, tang galau ke kita empu semua indu dara enggau semua indu ke dara bungas. Nyadi semua kita ke udah munuh orang, tauka udah negu bangkai, enda tau enda diau di luar kem tujuh hari. Ba hari ti ketiga, enggau ba hari ti ketujuh, kita enda tau enda nuchi diri, sama enggau indu ke udah ditangkap kita. Kita enda tau enda mega nuchi semua gari enggau semua utai ti digaga ari kulit jelu, ari bulu kambin, tauka ari kayu.” Imam Eleasar lalu bejaku enggau bala orang ke baru pulai beperang, “Nya adat ti udah diberi TUHAN ngagai Moses. Ba hari ti ketujuh, kita enda tau enda masu gari kita. Udah nya baru kita tuchi, lalu tau tama ngagai kem.” Ku TUHAN bejaku ngagai Moses, “Nuan enggau Eleasar, enggau bala tuai orang Israel, enda tau enda ngitung semua utai ti udah dirampas, nyengkaum orang jil enggau jelu, lalu bagi bela perapasan nya ngagai dua bengkah bagi, sebagi ke bala soldadu, lalu sebagi ke orang Israel ti bukai. Ari bagi ti diempu bala soldadu, tan ke siku ari genap lima ratus iku orang tangkap, lalu baka nya mega jelu sapi, keledai, bedus, enggau kambin, nyadika chukai TUHAN. Beri sida nya ngagai Imam Eleasar, nyadika pemeri ti diberi ngagai TUHAN. Ari bagi ti diungkupka ngagai orang Israel ti bukai, ambi siku ari lima puluh iku orang tangkap, lalu baka nya mega jelu sapi, keledai, bedus, enggau kambin. Beri sida nya ngagai orang Lewi ke ngintu Langkau Kain TUHAN.” Moses seduai Eleasar lalu ngereja nya nitihka pesan TUHAN ngagai Moses. Nya alai Moses meri semua chukai nya ngagai Eleasar, nyadika pemeri ti diberi ngagai TUHAN, nitihka jaku TUHAN. Ari ungkup ke orang mayuh tu, Moses ngambi siku ari tiap-tiap lima puluh iku orang tangkap, enggau jelu, lalu meri sida nya ngagai orang Lewi ke ngintu Langkau Kain TUHAN, nitihka pesan TUHAN. Udah nya bala tuai soldadu mansang ngagai Moses lalu nusui berita tu ngagai iya, “Tuan, kami udah bisi ngitung bala soldadu ke diuluka kami. Nadai siku sida lenyau. Nya alai kami mai semua perengka emas, gelang lengan, gelang jari, tinchin, antin, tenggak ti udah kena rampas kami siku-siku. Kami meri utai nya ngagai TUHAN kena meli nyawa kami, ngambika Iya nyaga kami.” Moses seduai Eleasar lalu nyambut emas nya. Semua emas nya endang perengka kena orang ngias diri. Semua utai ti diberi bala soldadu nya berat 200 kilogram. Bala soldadu ke ukai pemesai, nyimpan perapasan ti ulih sida. Moses seduai Eleasar lalu mai emas nya ngagai Langkau Kain TUHAN, ngambika TUHAN nyaga orang Israel. Raban bansa Reuben enggau Gat mayuh amat jelu tupi. Lebuh sida meda pemanah menua Joser enggau menua Giliat alai nupi jelu, sida mansang ngagai Moses, Eleasar enggau bala tuai orang Israel ti bukai, lalu bejaku, Nya alai kami minta nuan meri ngagai kami menua tu nyadika pesaka kami, lalu anang mai kami meraka Sungai Jordan, lalu diau din.” Disaut Moses, “Kati kita deka diau ditu lalu nejuka bala orang Israel ti bukai mansang beperang? Nama kebuah kita berani ngasuh orang Israel lemi semengat lalu enggai meraka Sungai Jordan ngagai menua ti udah diberi TUHAN ngagai sida? Nya meh utai ti udah dikereja aki ini kita kelia, lebuh aku ngasuh sida bejalai ari Kades-barnea lalu matau menua tu. Sida bejalai naka Lebak Eskol, lalu meda menua nya, tang lebuh sida pulai, sida ngasuh orang lemi semengat ngambika sida enda mansang ngagai menua ti udah diberi TUHAN ngagai sida. Ba hari nya TUHAN ringat, lalu Iya besumpah, ku Iya, ‘Laban sida enda taluk ngagai Aku, nya alai Aku besumpah: nadai siku lelaki ke umur dua puluh taun ke atas, ke pansut ari menua Ejip, deka datai ba menua ti udah disemaya Aku ngagai Abraham, Isak enggau Jakop.’ Tu nyengkaum semua orang, kelimpah ari Kalep anak Jepuneh orang Kenas, enggau Josua anak Nun, ke mengkang taluk ngagai TUHAN. TUHAN ringat ngagai orang mayuh lalu ngasuh sida bejalai segau-segau di menua puang empat puluh taun, datai ke semua orang ari serak ke ngeringatka ati TUHAN udah abis mati. Nyadi diatu kita udah nganti aki ini kita, kita ke rebak baru, ke bedosa, ke sedia deka nyungkak TUHAN ringat baru ngagai orang Israel. Enti kita raban bansa Reuben enggau Gat enggai nitihka TUHAN diatu, Iya deka, sekali agi, ninggalka semua orang tu di menua puang, lalu kita empu deka betanggungjawapka pemati sida.” Sida mansang ngagai Moses, lalu bejaku, “Awakka kami dulu ngaga kandang batu ke jelu bedus kami, enggau nengeri ti bekuta ke bala bini anak kami. Udah nya baru kami bejalai enggau bala orang Israel ti bukai mansang beperang, lalu nguluka bala nyerang, datai ke kami udah ngentapka sida di menua ti endang ungkup sida. Lebuh maya nya ila, bala anak bini kami ulih diau dalam nengeri ti bekuta ditu, likun ari serang orang ke bempu menua tu. Kami enda pulai ngagai rumah kami empu sebedau semua orang Israel bempu menua ti diungkup ngagai sida. Kami enda ngambu menua ti diempu sida di seberai Sungai Jordan din, laban kami udah nerima ungkup kami tunga ke timur Sungai Jordan ditu.” Disaut Moses, “Enti kita ngereja nya, enti kita amat deka sedia di mua TUHAN lalu mansang beperang, lalu semua bala soldadu kita meraka Sungai Jordan, nyentuk ngagai maya TUHAN udah muru semua munsuh Iya, lalu udah ngalahka menua sida, nya baru kita tau pulai, lalu dilepaska ari semua tanggungjawap kita ngagai TUHAN, enggau ngagai orang Israel ti bukai. Nya baru TUHAN deka ngumbai menua tunga ke timur Sungai Jordan nya menua kita. Tang enti kita enda ngereja nya, kita bedosa ngelaban TUHAN. Lalu anang saru: dosa kita deka tetemuka kita. Gaga meh nengeri ke bala anak kita, enggau kandang jelu ke bedus kita, tang kereja utai ti udah disemaya kita!” Ku orang ari raban bansa Gat enggau raban bansa Reuben bejaku ngagai Moses, “Tuan, kami deka ngereja nitihka asuh nuan. Bala bini, bala anak kami enggau jelu sapi, enggau jelu bedus kami deka mengkang ditu di nengeri di menua Giliat tu; tang semua kami deka meraka Sungai Jordan, sedia deka beperang ke TUHAN, munyi ti diasuh nuan.” Moses lalu meri atur pasal sida ngagai Imam Eleasar, ngagai Josua anak Nun, enggau ngagai bala tuai orang Israel ti bukai: Ku Moses bejaku ngagai sida, “Enti raban bansa Gat enggau raban bansa Reuben meraka Sungai Jordan lalu sedia deka beperang nitihka atur TUHAN, lalu enti ari saup sida, kita ulih ngalahka menua tu, kita enda tau enda meri menua Giliat nyadika pesaka sida. Tang enti sida enda meraka Sungai Jordan, lalu enda mansang beperang enggau kita, sida enda tau enda diberi ungkup di menua Kanaan, baka kita bukai.” Bala raban bansa Gat enggau bala raban bansa Reuben lalu nyaut, “Tuan, kami deka ngereja utai nitihka jaku TUHAN. Kami deka meraka ngagai menua Kanaan lalu beperang di baruh atur TUHAN, tang kami deka mengkang bempu pesaka ditu muak ke timur Sungai Jordan tu.” Nya alai Moses meri ngagai bala raban bansa Gat, ngagai bala raban bansa Reuben, enggau ngagai setengah ari raban bansa Manasi, semua menua ti udah diempu Sihon, raja orang Amor, enggau menua ti udah diempu Og, raja ke merintah di Basan, nyengkaum nengeri enggau menua ti ngelingi menua nya. Raban bansa Gat lalu nirika baru nengeri ti bekuta ke benama Dibon, Atarot, Aroer, Atrot, Sopan, Joser, Jogbehah, Bet Nimrah, enggau Bet Haran. Raban bansa Reuben nirika baru nengeri Hesbon, Elealeh, Kiriataim, Nebo, Baal-meon (nama tu udah diubah) enggau Sibmah. Sida meri nama ti baru ngagai nengeri ti diaduka sida. Bala raban peturun Machir anak Manasi nyerang menua Giliat, ngalahka menua nya, lalu muru orang Amor ti diau dia. Nya alai Moses meri menua Giliat ngagai raban peturun Machir, lalu sida diau dia. Jair, ari raban bansa Manasi, nyerang lalu ngalahka sekeda genturung pendiau, lalu ngumbai genturung pendiau nya “Tumpuk Pendiau Jair.” Nobah nyerang lalu ngalahka Kenat enggau genturung pendiau ti ngelingi nya, lalu iya ngumbai genturung pendiau nya “Kampung Nobah”, ngangkatka nama iya empu. Jerita tu madahka nama endur alai orang Israel ke nirika kem sida, udah bekau sida ke pansut ari menua Ejip, nitihka raban bansa sida empu, diuluka Moses seduai Aron. Ari asuh TUHAN, Moses nuliska nama endur alai genap kali sida nirika kem. Orang Israel pansut ari menua Ejip kena lima belas hari bulan ti kesatu taun nya, sehari udah bekau sida ke ngintu Gawai Paska ti keterubah iya. Sida dijaga TUHAN lebuh sida angkat ninggalka nengeri Rameses dipeda semua orang Ejip, ke benung nguburka anak tuai sida ke lelaki, ti udah dibunuh TUHAN. TUHAN ngereja nya kena Iya mandangka Diri lebih agi bekuasa ari petara menua Ejip. Orang Israel ninggalka nengeri Rameses, lalu nirika kem di Sukot. Kem sida ke nangkanka nya, didirika sida di Etam, ba tisi menua puang. Ari nya sida nikal baru ngagai Pi-hahirot, muak ke timur Baal-sepon, lalu nirika kem sida semak Mikdol. Sida ninggalka Pi-hahirot, lalu bejalai nengah Tasik Mirah ngagai menua puang Sur. Lebuh sida udah bejalai tiga hari, sida lalu nirika kem di Marah. Ari nya sida bejalai ngagai Elim, alai sida ke nirika kem, laban ba endur nya bisi dua belas iti mata ai, enggau tujuh puluh pun kayu engkerema. Sida ninggalka Elim lalu nirika kem semak Teluk Suez. Nangkanka nya, sida nirika kem di menua puang Sin. Udah nya sida nirika kem di Dopkah, lalu udah bekau nya, di Alus. Udah nya sida nirika kem di Repidim, endur ti nadai ai irup. Raja ke merintah di Arat, ti di selatan menua Kanaan, ninga berita orang Israel ti deka datai. Ba emperan menua Moap ngimbai Sungai Jordan ari seberai nengeri Jeriko, TUHAN bejaku ngagai Moses, ku Iya: “Bejaku nuan ngagai orang Israel, lalu sebut ngagai sida: ‘Lebuh kita meraka Sungai Jordan, ngagai menua Kanaan, kita enda tau enda muru semua orang ke nguan menua nya. Rusak semua engkeramba sida ke digaga ari batu enggau ari besi, enggau semua endur alai sida besembiang. Ambi menua nya lalu ngentapka diri dia, laban Aku udah meri menua nya ngagai kita nyadika pesaka kita. Bagi menua nya ngagai semua suku raban bansa orang Israel ngena chara bechabut undi, lalu beri ungkup ti besai agi ngagai suku raban bansa ti mayuh agi tubuh, enggau ungkup ti mit agi ngagai suku raban bansa ti mimit agi tubuh. Tang enti kita enda muru orang ke nguan menua nya, sida ke agi tinggal deka ngachau kita baka empeleman ti ba mata kita enggau baka duri ti ngachuk rusuk kita; sida deka ngachau kita di menua ti diuan kita. Lalu Aku deka ngerusak kita, baka Aku ti udah bekira deka ngerusak sida.’ ” Ku TUHAN bejaku ngagai Moses: “Bejaku nuan ngagai orang Israel, lalu sebut ngagai sida: ‘Lebuh kita datai di menua Kanaan, menua ti diberi Aku ngagai kita, garis entara menua kita enda tau enda baka tu: Garis entara menua di selatan deka belabuh ari menua puang Sin, niti garis entara menua enggau Edom. Di timur, garis entara menua nya deka belabuh ba ujung Tasik Mati di selatan, nguing ke selatan ngagai Genting Akrabim, ngagai menua Sin, lalu terus ngagai Kades-barnea di selatan. Udah nya garis entara menua nya mutar tunga ke barat utara nuju ngagai Hasar Adar, terus ngagai Asmon, nguing ngagai lebak ti ba garis entara menua enggau Ejip, lalu tepantup ba Tasik Tengah. Garis entara menua di barat nya Tasik Tengah. Garis entara menua di utara deka niti garis ari Tasik Tengah ngagai Bukit Hor lalu ari nya terus ngagai Lebo-Hamat, nuju ngagai Sedat terus ngagai Sipon, lalu tepantup ba Hasar Enan. Garis entara menua di timur deka niti garis entara menua belabuh ari Hasar Enan nyentuk ngagai Sepam, nuju ke selatan ngagai Habel, ti adap ke timur ari Ain, lalu nuju ngagai menua ti bebukit ba tebing timur Tasik Galili, udah nya nuju ke selatan niti Sungai Jordan terus ngagai Tasik Mati. Tu meh empat iti garis entara menua kita.’ ” Nya alai Moses lalu bejaku enggau orang Israel, “Tu meh menua ti deka diterima kita ngena chara bechabut undi, menua ti udah diberi TUHAN ngagai semilan setengah raban bansa. Raban bansa Reuben enggau raban bansa Gat, enggau setengah ari raban bansa Manasi ke di timur, udah nerima pesaka sida, dibagi nitihka ruang bilik sida, ba tebing timur Sungai Jordan, di seberai nengeri Jeriko.” Ku TUHAN bejaku ngagai Moses, “Tu nama orang ke deka magi menua ngagai orang Israel nyadika pesaka sida: Imam Eleasar seduai Josua anak Nun. Bai siku tuai ari siti-siti raban bansa orang Israel, ngambika sida nyaup seduai iya magi menua nya.” Nya meh orang ke diasuh TUHAN magi menua ngagai orang Israel di menua Kanaan. Ku TUHAN bejaku ngagai Moses ba emperan Moap ngimbai tebing Sungai Jordan, di seberai nengeri Jeriko: “Padahka ngagai orang Israel, sida enda tau enda meri ari pesaka ti diterima sida, nengeri alai raban bansa Lewi diau; kita mega enda tau enda meri ngagai sida padang rumput ngelingi nengeri nya. Nengeri nya deka diempu orang Lewi, alai sida diau, lalu padang rumput nya alai sida nginang jelu sapi enggau semua jelu bukai ti diempu sida. Padang rumput ti diberi ngagai orang Lewi enda tau enda ngerembai ke luar lima ratus meter, belabuh ari dinding kuta nengeri nya, ngelingi nengeri nya, ngambika endur nya besegi empat, seribu meter panjai, enggau seribu meter buka, lalu nengeri nya ba tengah-tengah. Nengeri ti diberi kita ngagai orang Lewi enda tau enda nyengkaum enam buah nengeri alai ngerarika diri, alai orang ke tekelanjur munuh orang tau ngerarika diri; lalu nambahka nengeri nya, kita enda tau enda meri sida empat puluh dua buah nengeri ti bukai. Pemayuh semua nengeri ti diberi kita ngagai orang Lewi nya empat puluh lapan buah, lalu genap buah nengeri endang bisi padang rumput magang. Nyadi pasal pemayuh nengeri ti diberi siti-siti raban bansa ngagai orang Lewi, baka tu ku jalai ngira iya: raban bansa ti besai agi, deka meri mayuh agi nengeri, lalu raban bansa ti mit deka meri mimit agi nengeri, nitihka pemesai menua ti diempu raban bansa nya.” Ku TUHAN bejaku ngagai Moses, “Bejaku nuan ngagai orang Israel, lalu sebut ngagai sida: ‘Lebuh kita meraka Sungai Jordan, lalu datai di menua Kanaan, kita enda tau enda milih nengeri alai ngerarika diri, ti tau alai kita ngerarika diri enti kita tekelanjur munuh orang. Kita deka diau likun ba nengeri nya ari kaban belayan ke ngiga balas. Nadai orang ke dituduhka salah munuh orang, tau diukum bunuh sebedau iya kena pechara di mua orang mayuh. Nya alai pilih enam buah nengeri, tiga buah muak ke timur Sungai Jordan, lalu tiga buah di menua Kanaan. Nengeri nya deka nyadika nengeri alai ngerarika diri, diungkupka orang Israel enggau ke orang kampar ti diau lama tauka enda lama di menua kita. Barang sapa tekelanjur munuh orang, tau ngerarika diri ngagai nengeri nya. Kaban belayan ti nyempil ari orang ke mati nya, deka betanggungjawap munuh pemunuh nya. Lebuh kaban belayan nya tetemuka pemunuh nya, iya enda tau enda munuh pemunuh nya. Enti kita begedika orang, ngejuka iya, tauka nikau iya ngena utai, lalu iya mati laban nya, tauka kita mukut iya, kita salah, lalu kita enda tau enda dibunuh. Kaban belayan ti nyempil ari orang ke kena bunuh nya bisi tanggungjawap munuh pemunuh nya. Lebuh iya nemu pemunuh nya, iya enda tau enda munuh iya. Tang enti sema kita tekelanjur munuh orang ke ukai dipegedika kita, nemuka kita ngejuka iya, tauka nikau iya ngena utai, tauka kita enda meda endur alai kita nikauka batu lalu tebunuhka orang nya, tang ukai laban kita deka ngemediska iya, lalu iya ukai mega munsuh kita; ba pekara ti baka nya, orang di nengeri nya deka ngakim sereta ngarika kita enggau kaban belayan orang ke ngiga balas, lalu sida deka ngumbai kita enda salah. Kita semina tekelanjur munuh orang nya, lalu orang di nengeri nya deka ngelepaska kita ari kuasa kaban belayan orang ke mati nya, lalu orang di nengeri nya deka mulaika kita ngagai nengeri ti alai kita ngerarika diri. Kita enda tau enda mengkang diau di nengeri nya nyentuk ngagai pemati orang ke nyadi Imam Besai lebuh utai nya nyadi. Enti kita ninggalka nengeri ti udah alai kita ngerarika diri, lalu enti kaban belayan orang ke mati nya tetemuka kita, lalu munuh kita, pengawa ti malas baka nya ukai penyalah munuh orang. Barang sapa salah laban iya tekelanjur munuh orang, enda tau enda mengkang diau dalam nengeri alai iya ke ngerarika diri nyentuk ngagai maya Imam Besai mati. Udah nya baru kita tau pulai baru ngagai rumah diri empu. Atur tu deka dikena kita enggau peturun kita di sebarang endur kita diau. Orang ke dituduhka munuh orang tau dikumbai salah, lalu diukum bunuh beduduk ba saksi dua tauka tiga iku orang. Jaku ari siku saksi aja enda chukup kena nuduhka orang nya salah munuh orang. Orang ke udah munuh orang enda tau enda dibunuh. Sida enda tau meri duit kena sida nyeliahka ukum nya. Enti sida udah rari ngagai nengeri ti udah diletak alai ngerarika diri, anang ngemendarka sida nebus nyawa diri lalu pulai ngagai menua diri empu sebedau Imam Besai nya mati. Enti kita nejuka sida ngereja nya, kita deka ngamahka menua ti alai kita diau. Pengawa bebunuhka orang ngamahka menua, lalu kita nadai jalai nuchi menua ti alai orang bisi udah dibunuh, kelimpah ari pemunuh nya empu dibunuh. Anang ngamahka menua ti alai kita diau, laban Aku tu TUHAN, lalu Aku diau begulai enggau orang Israel.’ ” Bala tuai bilik ari suku raban bansa ti diturunka Giliat anak Machir, uchu Manasi, ichit Josep, mansang ngagai Moses enggau bala tuai ti bukai. Ku sida bejaku, “ TUHAN udah bejaku ngasuh kita magi menua ngagai orang Israel ngena chara bechabut undi. Iya udah mega ngasuh kita meri pesaka kaban belayan kami, Selopehat, ngagai bala anak indu iya. Tang ingat, enti sida jadi enggau lelaki ke ari raban bansa bukai, pesaka sida deka diempu raban bansa nya, lalu nya deka ngurangka penyampau pesaka ti diungkupka ngagai kami. Dalam taun jubili, alai semua pesaka ti udah dijual, dipulaika baru ngagai orang ke asal bempu iya, pesaka bala anak indu Selopehat deka terus ditambahka ngagai pesaka raban bansa ti jadi enggau sida, lalu utai nya deka lenyau ari raban bansa kami.” Nya alai Moses lalu meri jaku tu ari TUHAN ngagai orang Israel. Ku iya, “Utai ti disebut raban bansa Manasi sigi amat, nya alai TUHAN madahka, bala anak indu Selopehat tau jadi enggau barang sapa ti dikedekaka sida ari suku raban bansa apai sida. Pesaka genap iku orang Israel deka mengkang diempu raban bansa nya empu. Genap iku indu ke nerima pesaka dalam siti-siti raban bansa orang Israel, enda tau enda jadi enggau lelaki ari suku raban bansa nya empu, ngambika orang Israel deka majak bempu pesaka ari aki ini sida empu, lalu pesaka nya enda dipindahka ari raban bansa siti ngagai raban bansa siti. Genap raban bansa deka mengkang bempu pesaka diri empu. Sida jadi enggau lelaki ari suku raban bansa ari peturun Manasi anak Josep, lalu pesaka sida mengkang diempu raban bansa apai sida. Tu meh adat enggau atur ti diberi TUHAN ngagai orang Israel ngena Moses, ba emperan Moap ngimbai Sungai Jordan di seberai nengeri Jeriko. Bup tu ngundan jaku Moses ngagai semua orang Israel lebuh sida di menua puang di timur Sungai Jordan. Sida iya benung ba Lebak Jordan, semak Sup, entara nengeri Paran ti muak ari sepiak enggau nengeri Topel, Laban, Haserot enggau Disahap muak ari sepiak. ( Penyauh Bukit Sinai ari Kades-barnea nya kira pejalai sebelas hari enti nengah menua ti bebukit di Edom.) Kena satu hari bulan ti kesebelas dalam taun ti keempat puluh udah bekau sida pansut ari menua Ejip, Moses madahka ngagai orang Israel semua utai ti udah diasuh TUHAN padahka iya ngagai sida. Utai tu nyadi udah bekau TUHAN ngalahka Raja Sihon, raja orang Amor, ke merintah di nengeri Hesbon, enggau Raja Og menua Basan, ke merintah di nengeri Astarot enggau nengeri Edrei. Lebuh orang Israel benung di timur Sungai Jordan, di menua Moap, Moses belabuh nerangka adat enggau ajar Allah Taala. Ku iya, “Lebuh kitai ba Bukit Sinai, TUHAN Allah Taala kitai bejaku enggau kitai: ‘Kita udah chukup lama diau ba bukit tu. Rerak kem kita, lalu mupuk baru. Awakka kita mupuk ngagai menua ti bebukit di menua orang Amor, enggau ngagai menua ti ngelingi menua nya, iya nya, ngagai Lebak Jordan, ngagai menua ti bebukit enggau menua ti emperan, ngagai selatan menua nya, enggau ngagai tebing Tasik Tengah. Awakka kita mansang ngagai menua Kanaan, lalu bejalai terus ngilah Bukit ti di menua Lebanon, nyentuk ngagai Sungai Eupratis. Tu meh semua menua ti udah disemaya deka diberi Aku ti TUHAN ngagai aki ini kita Abraham, Isak enggau Jakop, enggau ngagai peturun sida. Mupuk meh kita lalu alahka menua nya.’ ” Ku Moses bejaku enggau orang mayuh, “Lebuh kitai agi ba Bukit Sinai, aku madahka ngagai kita, ‘Tanggungjawap nguluka kita nya kelalu berat ke aku. Aku enda ulih ngereja pengawa nya kediri. TUHAN Allah Taala kita udah ngasuh kita nambah-menambah datai ke kita nyau ngemayuh bintang ti di langit. Awakka TUHAN Allah Taala aki ini kita ngasuh kita seribu kali mayuh agi tubuh, lalu ngasuh kita nyadi kaya-raja, munyi ti udah disemaya Iya! Tang baka ni ku aku ulih mangku tanggungjawap mutarka penusah enggau laya kita, enti aku ngereja pengawa nya kediri? Pilih orang ke bepenemu-dalam, ke nemu meretika utai, ke bisi peneleba, ari genap raban bansa kita, lalu aku deka ngeletak sida nyadi tuai kita.’ Kita lalu besetuju ngumbai penemu nya manah. Nya alai aku lalu ngambi bala tuai raban bansa kita, orang ke bepenemu-dalam, ke bisi peneleba, lalu aku ngeletak sida nyadi tuai ke seribu iku orang, ke seratus iku, ke lima puluh iku, enggau ke sepuluh iku orang. Aku mega ngeletak pemesai bukai dalam semua raban bansa kita. “Lebuh maya nya suba, aku ngajar sida munyi tu: ‘Pendingka semua laya ti nyadi ba entara bala kita. Putarka semua laya enggau lurus, nemuka laya nya entara bala kita empu, tauka enggau orang kampar ti diau begulai enggau kita. Anang bepilih mata lebuh kita ngatur pechara. Semua orang enda tau enda dipendingka magang, enda milih sapa-sapa sida nya. Anang takut, laban pemutus penemu ti digaga kita endang datai ari Allah Taala. Enti pekara nya kelalu mar diputarka kita, bai pekara nya ngagai aku, lalu aku deka mutarka iya.’ Lebuh maya nya suba, aku mega ngatur semua utai ti deka dikereja kita. “Kitai lalu mupuk ari Bukit Sinai, lalu bejalai nengah menua puang ti besai rampa, menua ti ngenakutka ati, mansang ngagai menua ti bebukit di menua orang Amor. Lebuh kitai datai di Kades-bernea, “Tang kita datai ngagai aku lalu ku kita, ‘Awakka kitai ngasuh orang matau menua nya dulu, ngambika sida ulih madahka jalai ti deka ditengah kitai, enggau gaya nengeri di menua nya.’ “Utai nya baka ke manah ba penemu aku, nya alai aku lalu milih dua belas iku lelaki, siku ari siti-siti raban bansa. Sida lalu bejalai ngagai menua ti bebukit nya, lalu matau menua nya nyentuk ngagai Lebak Eskol. Lebuh sida pulai, sida mai buah ti ditemu sida dia, lalu madahka pasal pemanah menua ti diberi TUHAN Allah Taala kitai ngagai kitai. “Tang kita enggai mansang ngagai menua nya, tang angkat ngelaban jaku TUHAN Allah Taala kita; lalu kita mutap dalam langkau kain kita. Ku kita, ‘ TUHAN begedika kitai, nya kebuah Iya udah mai kitai pansut ari menua Ejip, ngambika Iya ulih nyerahka kitai ngagai orang Amor, ngambika sida munuh kitai. Nama guna kitai kin? Orang ke udah diasuh kitai matau menua nya udah ngasuh kitai lemi semengat kitai, madahka orang dia kering agi sereta tinggi agi ari kitai, lalu nengeri sida bisi kuta ti nyentuk ke langit. Sida bisi meda orang Anakim, orang ke besai gamal di menua nya!’ “Aku lalu bejaku ngagai kita, ‘Anang takutka orang nya. TUHAN Allah Taala kita deka bejalai dulu ari kita, lalu Iya deka beperang ngarika kita, baka ke udah dipeda kita kereja Iya di menua Ejip, enggau di menua puang, alai kita ke udah meda chara TUHAN Allah Taala kita mai kita, baka apai ke mai anak, sepemanjai jalai ti ditengah kita, nyentuk ngagai endur tu.’ Tang taja pen aku udah nyebut nya, kita mengkang enggai manggaika diri ba TUHAN Allah Taala kita, ti udah bejalai dulu ari kita, dalam tiang api lebuh malam hari, enggau dalam gentilang remang lebuh siang hari, ngiga endur alai kita tau nirika kem kita. “Lebuh TUHAN ninga jaku putap kita, Iya ringat lalu besumpah: Ku Iya, ‘Nadai siku orang ke ari serak tu deka datai di menua ti ami nya, ti udah disemaya deka diberi Aku ngagai aki ini kita, kelimpah ari Kalep anak Jepuneh; iya deka meda menua nya, lalu Aku deka meri ngagai iya, enggau ngagai anak uchu iya, menua ti udah diindik kaki iya, laban iya udah nitihka TUHAN enggau pengabis ati iya.’ TUHAN udah mega ringat ngagai aku, ketegal kita. Ku Iya, ‘Nuan pen enda meh tau datai ngagai menua nya; Josua anak Nun, ke penulung nuan, deka tama ngagai menua nya. Peransang iya, laban iya deka nguluka orang Israel bempu menua nya.’ Lalu bala anak kita ke dikumbai kita deka nyadi orang tangkap, anak ke apin nemu bida entara utai ti manah enggau utai ti jai, deka tama ngagai menua nya. Aku deka meri menua nya ngagai sida, lalu sida deka bempu menua nya. Tang kita enda tau enda nguing lalu bejalai ngagai menua puang tunga ngagai Tasik Mirah.’ “Udah nya kita lalu nyaut aku, “Kami udah bedosa ngelaban TUHAN. Kami deka nyerang, nitihka pesan TUHAN Allah Taala kitai.’ Genap iku kita lalu ngerasukka senyata, ngumbai pengawa nyerang menua ti bebukit nya mudah. Lalu ku TUHAN bejaku ngagai aku, ‘Sebut ngagai sida, ‘Anang kin tauka nyerang, laban Aku enda enggau kita, enggai ke kita alah laban munsuh kita.’ Nya alai aku lalu bejaku ngagai kita, tang kita enggai mending. Kita lalu ngelaban jaku TUHAN, lalu mai penyumbung kita mansang nyerang menua ti bebukit. Orang bansa Amor, ti diau di menua ti bebukit nya lalu ngelaban kita baka manyi, lalu begagaika kita kenyau ari Edom nyentuk ngagai Hormah. Kita pulai lalu nyabak di mua TUHAN, tang TUHAN enggai ibuhka kita, tauka mendingka kita. Nya alai kita lama diau di Kades. “Udah nya kitai lalu nguingka pejalai kitai ngagai menua puang tunga ngagai Tasik Mirah, nitihka pesan TUHAN ngagai aku, lalu kitai lama segau-segau ba sebelah menua ti bebukit di Edom. “Udah nya TUHAN lalu bejaku ngagai aku, ‘Kita lama udah segau-segau ba sebelah menua ti bebukit tu; bejalai tunga ke utara, lalu beri atur tu ngagai orang Israel munyi tu: Kita baru deka bejalai nengah menua ti diuan kaban belayan kita empu, iya nya bala peturun Esau. Sida deka takutka kita, nya alai bejimat kita; anang beperang ngelaban sida, laban Aku enggai meri menua sida ngagai kita, ngemesai tapa kaki pen tanah sida enggai meh Aku meri ngagai kita, laban Aku udah meri menua Edom ngagai Esau nyadika pesaka iya. Kita enda tau enda meli pemakai ari sida, ngambika kita bisi utai diempa; lalu kita enda tau enda meli ai ari sida, ngambika kita bisi ai irup. Laban TUHAN Allah Taala kita udah merekatka kita dalam semua utai ti dikereja kita. Iya udah ngintu kita lebuh kita segau-segau bejalai nengah menua puang ti besai rampa. Iya udah begulai enggau kita empat puluh taun, lalu kita nadai suntuk utai.’ “Nya alai kitai lalu majakka pejalai kitai lalu limpang ari jalai raya ti pansut ari nengeri Elat enggau ari nengeri Esion-geber ti nuju ngagai Tasik Mati. Kitai lalu nguing tunga ke utara nuju ngagai menua Moap. Ku TUHAN bejaku ngagai aku, ‘Anang ngachau orang Moap, tauka ngepunka perang ngelaban sida, laban sida peturun Lot. Aku udah meri nengeri Ar ngagai sida, lalu Aku enggai meri menua sida ngagai kita.’ ” ( Dulu menya bansa orang ke besai gamal, ke dikumbai Emim bisi udah diau di Ar. Sida nya ngeninggi orang Anakim, orang ke besai gamal. Baka orang Anakim, sida nya mega dikumbai bansa Repaim, tang orang Moap ngumbai sida orang Emim. Orang bansa Hori udah kala diau di Edom, tang bala peturun Esau muru sida ari menua nya, ngerusak bansa sida, lalu ngentapka diri di menua nya, baka chara orang Israel ti deka muru munsuh sida ari menua ti diberi TUHAN ngagai sida.) “Udah nya kitai lalu meraka Sungai Seret, nitihka pesan TUHAN. Utai tu nyadi tiga puluh lapan taun udah bekau kitai ninggalka Kades-bernea. Semua bala orang ke tau kayau ari rebak nya, udah mati magang, munyi ti ku TUHAN. TUHAN majak ngelaban sida, datai ke Iya udah munuh semua sida. “Lebuh semua sida udah mati magang, TUHAN lalu bejaku enggau kitai, ‘Sehari tu kita deka meraka garis entara menua Moap, ba Ar. Lalu kita deka datai semak ngagai menua orang Amon, ti peturun Lot. Anang ngachau sida, tauka ngepunka perang ngelaban sida, laban Aku enggai meri kita menua ti udah diberi Aku ngagai sida.’ ” ( Menua tu mega dikumbai menua orang Repaim, iya nya nama bansa orang ke diau di menua nya. Orang Amon ngumbai sida Samsumim. Orang tu tinggi gamal baka orang Anakim. Bala sida mayuh, lalu bansa sida kering. Tang TUHAN ngerusak sida, ngambika orang Amon bempu menua sida, lalu ngentapka diri dia. TUHAN udah mega ngereja baka nya ke orang Edom, ti peturun Esau, ti diau di menua ti bebukit di Edom, lebuh Iya ngerusak orang Hori, ngambika orang Edom ngerampas menua sida, lalu ngentapka diri di menua nya, alai sida ke diau diatu. Menua ti ngimbai tebing Tasik Tengah, udah diuan orang ke datai ari pulau Krit. Sida udah ngalahka orang Abim, orang ke asal diau di menua nya, lalu udah ngerampas semua menua sida nyentuk ngagai nengeri Gasa di selatan.) “Udah bekau kitai ke bejalai meraka menua Moap, TUHAN bejaku ngagai kitai, ‘Mupuk kita diatu, lalu peraka Sungai Arnon. Aku nyerahka Sihon, raja orang Amor ke merintah di Hesbon, ngagai jari kita, sama enggau menua sida. Serang iya, lalu belabuh ngalahka menua iya. Berengkah ari sehari tu, Aku deka ngasuh semua orang di semua menua, takutka kita. Semua orang deka getar-getar takut ninga nama kita disebut.’ “Aku lalu ngasuh bala seruan bejalai ari menua puang Kedemot betemu enggau Raja Sihon ke merintah di Hesbon, deka mai iya bebaik. Ku aku: ‘Awakka kami bejalai nengah menua kita. Kami deka bejalai meraka terus, lalu enda limpang ari jalai raya. Kami deka meli pemakai enggau ai irup ari kita. Awakka kami bejalai nengah menua kita, baka ke disagi bala peturun Esau ti diau di Edom, enggau baka ke disagi orang Moap ti diau di Ar, datai ke kami udah meraka Sungai Jordan ngagai menua ti diberi TUHAN Allah Taala kami ngagai kami.’ “Tang Raja Sihon enda ngemendarka kitai bejalai nengah menua iya, laban TUHAN Allah Taala kitai udah ngasuh ati iya kieh sereta keras deka ngelaban, ngambika kitai ngalahka iya, lalu ngerampas menua iya. Menua nya agi benung dialahka kitai diatu. Lalu ku TUHAN bejaku ngagai aku, ‘Peda nuan, Aku udah belabuh nyerahka Raja Sihon enggau menua iya ngagai jari nuan; berengkah ngerampas menua iya, ngambika kita nguan menua iya.’ Sihon lalu datai mai semua bala soldadu iya, lalu ngelaban kitai di Jahas. TUHAN Allah Taala kitai lalu nyerahka iya ngagai jari kitai. Kitai lalu ngalahka iya, enggau bala anak lelaki iya, enggau semua bala soldadu iya. Lalu kitai mega ngalah lalu ngerusak semua nengeri, lalu munuh semua orang ke lelaki, ti indu, enggau anak mit. Semua sida abis dibunuh kitai. Kitai ngambi jelu tupi, lalu ngerampas utai ti dalam nengeri nya. Kenyau ari Aroer ti ba tisi Lebak Arnon, enggau kenyau ari nengeri ti ba lebak nya, nyentuk ngagai Giliat, nadai nengeri ti bekuta ti enda ulih dialahka kitai; TUHAN Allah Taala kitai udah nyerahka semua nengeri nya ngagai jari kitai. Semina menua peturun Amon aja enda tau ditengah kitai, iya nya semua menua ti nebing Sungai Jabok, enggau nengeri ti ba menua ti bebukit, enggau sebarang endur bukai ti enda disagi TUHAN tengah kitai. “Udah nya kitai mindah tunga ke utara ngagai Basan, lalu Raja Og angkat enggau semua bala iya, mansang ngelaban kitai ba semak nengeri Edrei. Tang ku TUHAN bejaku ngagai aku, ‘Anang takutka iya. Aku deka nyerahka iya, bala soldadu iya, enggau menua iya, ngagai nuan. Kereja ngagai iya baka ke udah dikereja nuan ngagai Sihon raja orang Amor ke merintah di Hesbon.’ Nya alai TUHAN mega nyerahka Raja Og enggau bala nembiak iya ngagai jari kitai, lalu kitai munuh semua sida. Lebuh maya nya mega, kitai ngalahka semua nengeri iya. Nadai nengeri ti enda dialahka kitai. Enam puluh buah nengeri semua iya dialahka kitai. Semua menua Argop, ti alai Raja Og merintah, dialahka magang. Semua nengeri nya didinding ngena kuta ti tinggi, bisi pintu, enggau alang penutup pintu, lalu mayuh mega genturung pendiau ti enda bekuta. Kitai ngerusak semua nengeri, lalu munuh semua lelaki, indu enggau anak mit, baka ke udah dikereja kitai ngagai nengeri Raja Sihon ke merintah di Hesbon. Kitai ngambi semua jelu tupi, lalu ngerumpak utai ari nengeri nya. Nya alai kitai ngerampas ari raja bansa Amor ke dua iku nya, menua ti muak ke timur Sungai Jordan, berengkah ari Sungai Arnon nyentuk ngagai Bukit Hermon. (Orang Sidon ngumbai Bukit nya Sirion, lalu orang Amor ngumbai bukit nya Senir.) Kitai ngerampas semua menua Raja Og ke megai perintah di menua Basan, nyengkaum nengeri ti ba emperan atas, menua Giliat enggau menua Basan, nyentuk ngagai nengeri Salekah enggau nengeri Edrei. (Raja Og nya pengabis orang ari bansa Repaim. Sentubung iya, digaga ari batu, Buka sentubung nya 2 meter, lalu pemanjai sentubung nya 4 meter, nitihka atur penyukat ti dikena. Sentubung nya agi ulih dipeda di nengeri orang Amon di Rabah.) “Lebuh kitai ngerampas menua nya, aku ngeletak raban bansa Reuben enggau raban bansa Gat bempu menua ti muak ke utara nengeri Aroer, semak Sungai Arnon, enggau sekeda menua ti bebukit di Giliat, sama enggau nengeri ti mit di menua nya. Aku ngeletak setengah ari raban bansa Manasi bempu sebagi ari menua Giliat, enggau semua menua Basan, alai Raja Og ke merintah, reti nya, semua menua Argop. (Basan mega dikumbai menua orang Repaim. Jair, ke ari raban bansa Manasi, ngerampas semua menua Argop, reti nya, Basan, nyentuk ngagai garis entara menua Gesur enggau Maakah. Iya meri nama iya empu ngagai genturung pendiau di menua nya, lalu genturung pendiau nya agi dikumbai Tumpuk Pendiau Jair nyentuk ngagai ke diatu.) “Aku udah meri menua Giliat ngagai raban peturun Machir ke ari raban bansa Manasi. Lalu ngagai raban bansa Reuben enggau Gat, aku udah meri menua berengkah ari Giliat nyentuk ngagai Sungai Arnon. Tengah sungai nya nyadika garis entara menua sida di selatan, lalu garis entara menua sida di utara nya Sungai Jabok. Sida mega bekunsika Sungai Jabok nyadika garis entara menua enggau orang Amon. Muak ke barat, menua sida nganchau nyentuk ngagai Sungai Jordan, ari Tasik Galili di utara nyentuk ngagai Tasik Mati di selatan, enggau nyentuk ngagai kaki Bukit Pisgah di timur. “Lebuh maya nya, aku mega meri atur tu ngagai kita: ‘Taja pen TUHAN Allah Taala kitai udah meri ngagai kita menua ti di timur Sungai Jordan, ngambika kita ngalahka menua nya, semua bala soldadu kita enda tau enda meraka Sungai Jordan dulu ari raban bansa orang Israel ti bukai. Semina bini, anak enggau jelu tupi kita aja, deka tinggal dalam nengeri ti udah diberi aku ngagai kita. Aku nemu kita mayuh jelu tupi. Saup orang Israel ti bukai, datai ke sida udah ngalahka menua ti diberi TUHAN ngagai sida di barat Sungai Jordan, nyentuk ngagai maya TUHAN ngasuh sida diau dia enggau selamat, baka ke udah dikereja Iya ngagai kita. Udah nya baru kita tau pulai baru ngagai menua tu ti udah diberi aku ngagai kita.’ “Lebuh maya nya aku lalu bejaku ngagai Josua, ‘Nuan udah meda semua utai ti udah dikereja TUHAN Allah Taala nuan ngagai raja dua iku nya, Sihon seduai Og. Iya deka ngereja baka nya mega ngagai semua menua bukai ti baru deka dipasuk kita. Anang takutka sida, laban TUHAN Allah Taala kita, deka beperang ngarika kita.’ “Lebuh maya nya aku bebendar amat besampi. Ku aku, ‘O TUHAN ti Pemadu Tinggi, aku nemu Nuan udah mandangka ngagai aku semina pun aja ari utai ti besai sereta badas, ti deka dikereja Nuan. Nadai petara di langit, tauka di dunya, ulih ngereja pengawa ti besai baka ke udah dikereja Nuan! O TUHAN, Awakka aku meraka Sungai Jordan, ngambika aku meda menua ti ami ba tebing seberai nyin, menua ti bebukit sereta manah, enggau menua Lebanon.’ Tang TUHAN udah ringat ngagai aku, ketegal kita, lalu Iya enggai mendingka aku. Ku Iya bejaku ngagai aku, ‘Umbas meh nya! Anang nyebut nya agi ngagai Aku! Alai nuan niki ngagai tuchung Bukit Pisgah, lalu tinjau tunga ke utara, ke selatan, ke timur enggau ke barat. Perening enggau manah utai ti dipeda nuan, laban nuan enda tau meraka Sungai Jordan. Beri atur ngagai Josua, lalu keringka ati iya, laban iya deka nguluka orang mayuh meraka lalu ngalahka menua ti dipeda nuan.’ Nya alai kitai mengkang diau ba lebak seberai nengeri Bet-peor. Udah nya Moses lalu bejaku ngagai orang mayuh, “Kita enda tau enda ngasika semua adat ti diajar aku ngagai kita. Nya baru kita deka idup lalu ngalahka menua ti diberi TUHAN Allah Taala aki ini kita, ngagai kita. Anang nambahka utai ngagai pesan ti diberi aku ngagai kita, lalu anang muai utai ari pesan nya. Kita enda tau enda ngasika pesan TUHAN Allah Taala kita, ti diberi aku ngagai kita. Kita empu udah meda utai ti dikereja TUHAN ba Bukit Peor, munuh semua orang ke nyembah Baal ba endur nya, tang bala kita ke tetap ati ngagai TUHAN Allah Taala kita, mengkang idup datai ke sehari tu. “Aku udah ngajar kita semua adat, nitihka asuh TUHAN Allah Taala. Kita enda tau enda ngasika adat nya di menua ti baru deka dialah lalu diuan kita. Kita enda tau enda ngasika semua adat nya, kena ngayanka ngagai orang bansa bukai penalam penemu kita. Lebuh sida ninga pasal semua adat nya, sida deka nyebut, ‘Naka meh penalam penemu enggau pemereti bansa orang tu!’ Laban nadai bansa bukai bisi petara ti diau semak sida ke tau dikangauka sida, baka TUHAN Allah Taala kitai. Lalu nadai bansa bukai bisi adat ti lurus baka adat ti diajar aku ngagai kita sehari tu. “Bejaga kita, lalu kingatka utai ti udah dipeda kita ngena mata kita empu, seagi-agi kita idup. Padahka utai nya ngagai anak uchu kita, pasal kita ke bediri di mua TUHAN Allah Taala kita ba Bukit Sinai, lebuh Iya bejaku ngagai aku, ‘Gempuruka orang mayuh. Aku deka ngasuh sida ningaka utai ti disebut Aku, ngambika sida belajar ngasika Aku seumur idup, sereta ngambika sida ngajar anak sida ngereja nya mega.’ “Padahka ngagai anak kita pasal kita ke bediri ba kaki bukit nya ti dibalut asap ti tebal, enggau pasal api ti mau nyentuk ke langit. Padahka ngagai sida pasal TUHAN ti bejaku ngagai kita ari dalam api, pasal kita ke ninga Iya bejaku, tang nadai meda Iya. Iya madahka ngagai kita utai ti enda tau enda dikereja kita kena kita ngasika sempekat ti digaga Iya enggau kita, iya nya, pasal kita ke enda tau enda ngasika Sepuluh Pesan ti udah ditulis Iya ba dua iti lampang batu. Lebuh maya nya TUHAN ngasuh aku ngajar kita semua adat ti enda tau enda dititihka kita di menua ti baru deka dialah lalu diuan kita. “Lebuh TUHAN bejaku ngagai kita ari dalam api ba Bukit Sinai, kita nadai meda Iya. Nya alai, ngambika utai tu pulai ke penguntung kita, kita enda tau enda nentuka diri enda bedosa begagaka engkeramba ke diri empu neladan gamal utai, nemuka neladan gamal mensia ti lelaki tauka indu, jelu tauka burung, ular tauka ikan. Anang nejuka diri diuji lalu nyembah sereta betuaika utai ti dipeda kita di langit, baka mata hari, bulan enggau bintang. TUHAN Allah Taala kita udah meri utai tu ngagai semua bansa bukai ngambika bisi disembah sida. Tang kita tu orang ke udah dilepaska Iya ari menua Ejip, alai kita ke udah balat diperinsa. Iya udah mai kita pansut ngambika kita nyadi nembiak Iya, baka ke sehari tu. Ketegal kita TUHAN Allah Taala kita udah ringat ngagai aku, lalu udah besumpah madahka aku enda ulih meraka Sungai Jordan lalu datai ngagai menua ti ami nya, ti diberi Iya ngagai kita. Aku deka mati di menua tu, lalu enda meraka sungai nya, tang kita nyau deka meraka sungai nya, lalu ngalahka menua ti ami nya. Kita enda tau enda nentuka diri seruran ingatka sempekat ti digaga TUHAN Allah Taala kita enggau kita. Kita enda tau enda ngasika pesan Iya, lalu enda ngaga engkeramba, laban TUHAN Allah Taala kita baka api, Allah Taala ti chemburu. “Indah lebuh kita lama udah nguan menua nya, lalu udah beranak betelesak, deh kita mengkang enda tau bedosa begagaka engkeramba ke diri empu neladan sebarang gamal utai. Utai tu jai di mua TUHAN, lalu Iya deka ringat ketegal nya. Sehari tu aku ngangauka langit enggau tanah nyadika saksi ngelaban kita: enti kita enda ngasika aku, kita deka lengkas lesap ari menua nya. Kita deka pandak umur nguan menua ti di seberai Sungai Jordan ti baru deka dialahka kita. Semua kita deka abis dibunuh. TUHAN deka ngachirka kita ngagai menua bukai. Ka semina mimit aja kita deka mengkang idup. Dia meh alai kita deka nyembah petara ti digaga jari mensia, petara ti digaga ari kayu enggau batu, petara ti enda ulih meda, enda ulih ninga, enda ulih makai tauka nyium utai. Dia meh alai kita deka ngiga TUHAN Allah Taala kita, lalu enti kita ngiga Iya enggau pengabis ati, enggau pengabis semengat kita, kita deka tetemuka Iya. Lebuh kita dituntung penusah, lebuh semua utai nya udah nyadi ba kita jemah ila, nya baru kita deka nguingka diri baru ngagai TUHAN lalu ngasika Iya. Iya Allah Taala ti kasih. Iya enda ninggalka kita, tauka ngerusak kita, lalu Iya deka ngingatka sempekat ti udah digaga Iya enggau aki ini kita. “Peratika utai ti nyadi dulu kelia, sebedau kita ada, kenyau ari lebuh maya Allah Taala ngaga mensia di dunya tu. Peratika semua dunya tu. Kati utai ti ngemesai tu bisi udah kala nyadi dulu menya? Kati bisi orang udah kala ninga utai ti baka tu? Kati orang ke ninga petara bejaku ngagai sida ari dalam api, bisi kala mengkang idup udah bekau nya baka kita? Kati petara bukai udah bisi kala berani mansang lalu mai orang pansut ari menua bukai, lalu ngaga sida nyadi nembiak iya, baka ke dikereja TUHAN Allah Taala kita ke kita di menua Ejip? Kita empu udah meda Iya ngena kuasa enggau pengering Iya ti besai mai penyakit enggau perang, ngereja kereja ajih, enggau kereja ti nyelai, lalu ngasuh utai ti balat ngenakut nyadi. TUHAN udah ngayanka utai tu ngagai kita, kena nunjukka Iya siku aja ti Allah Taala kita. Kita nadai petara bukai. Iya nejuka kita ninga munyi nyawa Iya ari serega ngambika Iya ulih ngajar kita. Di dunya tu Iya nejuka kita meda api Iya ti kudus, lalu Iya bejaku ngagai kita ari dalam api nya. Laban Iya rinduka aki ini kita, nya kebuah Iya udah milih kita, lalu ngena kuasa Iya ti besai, mai kita pansut ari menua Ejip. Lebuh kita majakka pejalai kita, Iya muru bansa orang ke kering sereta bekuasa agi ari kita, ngambika Iya mai kita ngagai menua nya, lalu meri menua nya ngagai kita nyadika pesaka kita, nyentuk ngagai sehari tu. Nya alai, ingatka hari tu, lalu kingatka tu dalam ati kita: TUHAN nya Allah Taala ti di serega enggau di dunya. Kita nadai petara bukai. Kita enda tau enda ngasika semua adat Iya ti udah diberi aku ngagai kita sehari tu. Nya baru pengidup kita, enggau pengidup bala peturun kita deka mujur. Kita deka mengkang diau di menua ti diberi TUHAN Allah Taala kita ngagai kita nyadika pesaka kita belama iya.” Udah nya Moses lalu ngeletak tiga buah nengeri di timur Sungai Jordan nyadika nengeri alai orang tau ngerarika diri, lalu diau likun, enti orang nya tekelanjur tebunuhka orang ke ukai munsuh iya. Iya tau ngerarika diri ngagai nengeri nya, ngidupka nyawa diri. Nengeri ti diletak ke raban bansa Reuben nya Beser ba emperan atas, di menua puang. Iya ngeletak Ramot-giliat ke raban bansa Gat. Lalu ke raban bansa Manasi, iya ngeletak Golan, di menua Basan. Moses meri adat enggau ajar Allah Taala ngagai orang Israel. Sida nguan menua iya, enggau menua ti diempu Raja Og di Basan, siku agi raja orang Amor ti diau di timur Sungai Jordan. Menua nya berengkah ari nengeri Aroer ba tebing Sungai Arnon, nyentuk ngagai Bukit Sirion di utara reti nya, Bukit Hermon. Menua nya mega nyengkaum semua menua ti di timur Sungai Jordan nyentuk ngagai Tasik Mati di selatan, lalu terus ke timur ngagai kaki Bukit Pisgah. Moses ngempuruka semua orang Israel, lalu bejaku ngagai sida, ku iya, “O orang Israel, pendingka semua adat ti diberi aku ngagai kita sehari tu. Pelajar lalu titihka adat nya enggau ati ti tetap. TUHAN Allah Taala kitai udah ngaga siti sempekat enggau kitai ba Bukit Sinai. Iya ukai ngaga sempekat nya enggau bala aki ini kitai, tang enggau semua kitai ke idup diatu. TUHAN bejaku betunga mua enggau kita ba bukit nya, ari dalam api, lebuh aku bediri entara TUHAN enggau kita lebuh maya nya suba, lalu madahka jaku TUHAN ngagai kita; laban kita takutka api nya, lalu kita enda niki ngagai bukit nya. Ku Iya bejaku: “ ‘Aku tu TUHAN Allah Taala kita, ti udah mai kita pansut ari menua Ejip, alai kita ke udah nyadi ulun. “ ‘Anang nyembah petara bukai tang semina Aku siku aja. “ ‘Anang ngaga engkeramba ke diri empu neladan gamal utai ti di langit tauka di tanah, tauka dalam ai ti di baruh tanah. Anang meremi ngagai sida tauka nyembah sida; laban Aku tu TUHAN Allah Taala ti chemburu. Aku ngukum tiris-pantis orang ke begedika Aku datai ke ketiga enggau keempat serak peturun sida, tang ngayanka pengerindu ti enda berubah ngagai beribu serak orang ke rinduka Aku, sereta ngasika pesan Aku. “ ‘Anang empelita ngena nama TUHAN ti Allah Taala kita, laban TUHAN deka ngukum orang ke empelita ngena nama Iya. “ ‘Intu Hari Sabat, lalu intu hari nya kudus, munyi ti udah dipesanka TUHAN Allah Taala kita, ngagai kita. Kita gawa enam hari, tang hari ti ketujuh nya Hari Sabat ti diserahka ngagai TUHAN Allah Taala kita. Ba hari nya kita enda tau gawa, nemuka kita empu, tauka anak lelaki, tauka anak indu, tauka ulun kita ke lelaki, tauka ulun kita ke indu, tauka jelu sapi kita, tauka keledai, tauka jelu tupi kita, tauka orang ke diau enggau kita, ngambika ulun kita ke lelaki enggau ulun kita ke indu, sereta enggau kita empu, belelak. Kingatka diri ti udah nyadi ulun di menua Ejip, lalu TUHAN Allah Taala kita udah mai kita pansut ari menua nya ngena pemesai kuasa enggau pengering Iya. Nya kebuah TUHAN Allah Taala kita ngasuh kita ngintu Hari Sabat. “ ‘Bebasaka apai indai kita nitihka pesan TUHAN Allah Taala kita, ngambika kita panjai umur sereta mujur nguan menua ti diberi TUHAN Allah Taala kita, ngagai kita. “ ‘Anang munuh orang. “ ‘Anang butang. “ ‘Anang ngenchuri. “ ‘Anang besaksi bula ngelaban orang. “ ‘Anang inginka bini orang, tauka rumah orang, tauka tanah, ulun, jelu sapi, keledai, tauka sebarang utai orang.’ “Nya meh leka jaku ti disebut TUHAN enggau nyawa ti inggar ngagai semua kita ba bukit nya, ari dalam api, ari dalam mua hari, enggau ari dalam pemetang ti enda dipeda achuk mata. Iya nadai nyebut leka jaku bukai. Lalu Iya nuliska semua leka jaku nya ba dua iti lampang batu, lalu meri lampang batu nya ngagai aku. “Lebuh kita ninga munyi nyawa nya bejaku ari dalam petang, lebuh bukit nya diempa api, kita, semua kepala raban bansa kita, enggau bala tuai kita lalu datai semak ngagai aku; lalu ku kita bejaku, ‘ TUHAN Allah Taala kitai udah ngayanka ngagai kitai mulia enggau pemesai kuasa Iya, lalu kitai udah ninga munyi nyawa Iya bejaku ari dalam api; sehari tu kitai udah meda Allah Taala bejaku enggau mensia, lalu mensia agi mengkang idup. Nya alai, nama kebuah kitai patut mati? Laban api ti balat nya deka ngerusak kitai; enti kitai ninga munyi nyawa TUHAN Allah Taala kitai, kitai tetap mati. Laban sapa udah kala ninga munyi nyawa Allah Taala ti idup bejaku ari dalam api, baka ke didinga kitai, lalu agi mengkang idup? Alai nuan empu mansang semak kin, lalu mendingka semua utai ti disebut Allah Taala. Udah nya padahka ngagai kami utai ti disebut Iya ngagai nuan, lalu kami deka mending lalu ngasi.’ “ TUHAN ninga jaku kita, lebuh kita bejaku ngagai aku; lalu ku TUHAN bejaku ngagai aku, ‘Aku udah ninga jaku orang tu, ti disebut sida ngagai nuan; sida endang nyebut utai ti ngena. Naka meh pemanah enti sida berunding baka nya berari, nangika Aku sereta ngasika semua pesan Aku, ngambika sida enggau anak uchu sida mujur belama iya! Alai asuh sida pulai ngagai langkau kain sida. Tang nuan, Moses, Aku ngasuh nuan bediri ditu enggau Aku, laban Aku deka madahka ngagai nuan semua adat enggau pesan Aku, ti deka diajar nuan ngagai sida, ngambika sida ngasika semua adat enggau pesan nya di menua ti diberi Aku ngagai sida.’ “Nya alai kita enda tau enda ngereja semua utai ti udah dipesanka TUHAN Allah Taala kita ngagai kita. Anang limpang ke kiba tauka ke kanan. Kita enda tau enda idup nitihka jalai ti udah dipesanka TUHAN Allah Taala kita ngagai kita, ngambika kita idup, sereta mujur, lalu gayu-guru nguan menua ti diempu kita. “Nya meh adat ti diasuh TUHAN Allah Taala kita ajar aku ngagai kita. Titihka semua adat nya di menua ti deka digagai lalu dialahka kita; ngambika kita enggau anak uchu kita nangika TUHAN Allah Taala kita sepemanjai umur kita, lalu ngasika semua adat enggau pesan Iya, ti dipadahka aku ngagai kita, ngambika kita panjai umur. Nya alai, pendingka semua adat enggau pesan nya, kita orang Israel, lalu ngasi; ngambika kita mujur, lalu pemayuh tubuh kita nambah-menambah di menua ti kaya sereta ami, munyi ti udah disemaya TUHAN Allah Taala aki ini kita, ngagai kita. “Dinga, kita orang Israel! TUHAN Allah Taala kita endang siku aja; lalu kita enda tau enda rinduka TUHAN Allah Taala kita enggau pengabis ati kita, enggau pengabis semengat kita, enggau pengabis pengering kita. Kingatka pesan ti diberi aku ngagai kita sehari tu. Ajar pesan nya ngagai anak kita. Kita enda tau enda betanduka pesan nya lebuh kita di rumah, enggau lebuh kita bejalai kebukai, lebuh kita belelak, enggau lebuh kita gawa. Tuliska sida lalu tanchangka ba lengan kita. Lekatka sida ba kening kita kena kita ngingatka sida. Tuliska sida ba tiang pintu rumah kita, enggau ba pintu kuta kita. “Munyi ti udah disemaya TUHAN Allah Taala kita ngagai aki ini kita Abraham, Isak enggau Jakop, Iya deka meri ngagai kita menua ti bisi nengeri ti besai sereta kaya-raja, ti ukai digaga kita. Rumah dia deka penuh laban utai ti manah, ti ukai disimpan kita empu, lalu bisi telaga ti ukai ditumbak kita, enggau kebun anggur enggau kebun kana ti ukai ditanam kita. Lebuh TUHAN mai kita ngagai menua nya, lalu semua utai ti deka diempa kita bisi magang, anang enda ingatka TUHAN ti udah mai kita pansut ari menua Ejip, alai kita ke udah nyadi ulun. Kemesaika TUHAN Allah Taala kita. Sembah Iya siku aja, lalu gaga semaya kita atas nama Iya siku aja. Anang nyembah petara bukai, petara orang bansa bukai ke ngelingi kita. Enti kita nyembah petara bukai, TUHAN deka ringat ngagai kita baka api, lalu deka ngerusak semua kita, laban TUHAN Allah Taala, ti bisi enggau kita, nya Allah Taala ti chemburu. “Anang nguji TUHAN Allah Taala kita, baka ke udah dikereja kita di Masah. Kita enda tau enda ngasika semua adat ti udah diberi Iya ngagai kita. Kereja semua utai ti ngena sereta manah ti diasuh TUHAN. Nya baru semua utai ti dikereja kita deka mujur magang. Kita ulih ngerampas menua ti ami nya, ti udah disemaya TUHAN ngagai aki ini kita, lalu kita ulih muru munsuh kita, munyi ti udah disemaya Iya. “Jemah ila anak kita deka nanya, ‘Nama kebuah TUHAN Allah Taala kitai ngasuh kitai ngasika semua adat nya?’ Lalu kita deka madahka ngagai sida, ‘Kitai udah nyadi ulun raja menua Ejip, lalu TUHAN udah mai kitai pansut ari menua nya ngena pemesai kuasa Iya. Lalu kami udah meda Iya ngereja kereja ajih, sereta ngereja utai ti ngenakutka, ngagai orang Ejip, enggau ngagai raja sida, enggau ngagai semua bala pemesai raja. Iya udah mai kitai pansut ari menua Ejip, mai kitai kitu, lalu meri menua tu ngagai kitai, munyi ti udah disemaya Iya ngagai aki ini kitai. Udah nya, TUHAN Allah Taala kitai lalu ngasuh kitai ngasika semua adat nya, lalu nangika Iya. Enti kitai ngereja nya, Iya deka seruran ngemataka bansa kitai, lalu ngasuh bansa kitai seruran kaya-raja. Enti kitai tetap ati ngasika semua utai ti udah dipesanka Allah Taala ngagai kitai, Iya deka gaga ati ke kitai.’ “Lebuh TUHAN Allah Taala kita mai kita ngagai menua ti deka dialahka kita, lalu muru mayuh bengkah bansa ari mua kita, orang Iti, orang Girgas, orang Amor, orang Kanaan, orang Peris, orang Ibi enggau orang Jebus, tujuh bengkah bansa ti mayuh agi tubuh sereta kering agi ari kita, lalu lebuh TUHAN Allah Taala kita nyerahka sida ngagai kita, lalu kita ngalahka sida, kita enda tau enda munuh semua sida. Kita enda tau begagaka sempekat enggau sida, tauka kasihka sida. Kita enda tau jadi enggau sida, lalu enda tau nejuka anak kita jadi enggau sida, laban sida deka mai anak kita limpang ari Aku, besembahka petara bukai. TUHAN deka ringat ngagai kita, lalu Iya deka tekala nya munuh kita. Nya alai runtuhka alta sida, patahka tiang batu keramat sida. Tebang anak patung petara Aserah sida, lalu tunu semua engkeramba sida. Laban kita tu orang ke kuduska TUHAN ti Allah Taala kita. TUHAN udah milih kita ari semua bansa di dunya tu, nyadika nembiak Iya. “ TUHAN ukai rinduka kita lalu milih kita laban kita mayuh agi tubuh ari orang bansa bukai; kita tu bansa ti pemadu mit. Tang TUHAN rinduka kita, lalu deka ngamatka semaya ti udah digaga Iya enggau aki ini kita. Nya kebuah Iya mai kita pansut ngena pemesai pengering Iya, lalu nebus kita ari pengidup kita ke nyadi ulun raja menua Ejip. Ingat: TUHAN Allah Taala kita endang siku aja. Ati Iya endang tetap. Iya deka ngingatka sempekat Iya, lalu ngayanka pengerindu Iya ti meruan belama iya ngagai beribu serak orang ke rinduka Iya, sereta ngasika pesan Iya, tang Iya deka ngukum orang ke begedika Iya; Iya enda lubah ngukum orang ke begedika Iya, Iya deka ngukum sida. Nya alai, kita enda tau enda ngasika semua pesan, enggau adat enggau atur ti diasuh aku titihka kita sehari tu. “Enti kita mending lalu tetap ati ngasika pesan tu, nya baru TUHAN Allah Taala kita deka majak ingatka sempekat Iya enggau kita, lalu deka ngayanka pengerindu Iya ti enda berubah, munyi ti udah disemaya Iya ngagai aki ini kita. Iya deka rinduka kita, lalu merekatka kita, ngambika pemayuh tubuh kita nambah-menambah. Kita deka mayuh anak, lalu Iya deka merekatka umai kita, ngambika kita bulih gandum, wain, enggau minyak kana. Iya deka nambahka pemayuh jelu sapi enggau jelu bedus kita di menua ti udah disemaya Iya enggau aki ini kita, ti deka diberi Iya ngagai kita. Nadai bansa di dunya tu deka bulih mayuh agi berekat ari ti diberi Iya ngagai kita. Nadai siku kita, tauka jelu tupi kita, deka mandul. Lalu TUHAN deka muai semua penyakit kita; lalu nadai penyakit ti jai ti nyadi di menua Ejip, ti ditemu kita menya, deka nyerang kita, tang Iya deka ngasuh penyakit nya nyerang orang ke begedika kita. Lalu kita enda tau enda ngerusak semua bansa ti diserahka TUHAN Allah Taala kita ngagai jari kita, lalu anang kasihka sida. Lalu kita pen enda mega tau nyembah petara sida, laban utai nya deka manjuk kita. “Anang berunding ngumbai orang nya mayuh agi tubuh ari kita, lalu kita ngumbai diri enda ulih muru sida. Anang takutka sida. Kingatka utai ti udah dikereja TUHAN Allah Taala kita ngagai raja menua Ejip, enggau ngagai semua nembiak raja nya. Kingatka penyakit ti dipeda mata kita empu, kereja ajih enggau kereja ti nyelai, enggau pemesai kuasa enggau pengering ti dikena TUHAN Allah Taala kita mai kita pansut. Baka nya meh chara TUHAN Allah Taala kita deka ngerusak semua bansa ti diketakutka kita. Nambahka nya, TUHAN ti Allah Taala kita deka ngasuh indu gamang nyerang sida, datai ke orang ke agi idup, ke belalai ari kita, abis mati. Anang takutka sida; laban TUHAN Allah Taala kita, Allah Taala ti bekuasa, ti balat diketakutka, bisi enggau kita. Iya deka muru bansa orang nya mimit-mimit sekali, lebuh kita nyerang. Kita enda tau ngeluska semua sida sekali, enggai ke kita dikelingi kelalu mayuh jelu babas. Tang TUHAN Allah Taala kita deka nyerahka sida ngagai jari kita, lalu ngasuh sida begau abis ati, datai ke sida dibunuh. Lalu Iya deka nyerahka raja sida ngagai jari kita, lalu kita enda tau enda munuh sida. Nadai orang tan ngelaban kita. Kita deka munuh semua sida. Tunu engkeramba sida. Anang inginka pirak tauka emas ti ba tubuh engkeramba nya, lalu anang ngambi utai nya ke kita empu, enggai ke kita dipanjuk utai nya; laban TUHAN begedika utai nya. Lalu anang mai engkeramba nya ngagai rumah kita, enggai ke kita kena sumpah baka utai nya empu. Kita enda tau enda begedi sereta kejika utai nya; laban utai nya kena tinggang sumpah Allah Taala. “Kita enda tau enda tetap ati ngasika semua adat ti udah diberi aku ngagai kita sehari tu, ngambika kita ulih idup, lalu pemayuh tubuh kita nambah-menambah, lalu kita ngalahka menua ti udah disemaya TUHAN ngagai aki ini kita. Kingatka chara TUHAN Allah Taala kita udah nguluka kita bejalai nengah menua puang empat puluh taun tu ti udah, kena Iya ngemaruhka ati kita, sereta ngabas ati kita, laban Iya keran deka nemu utai ti dalam ati kita, sekalika kita deka tauka enggai ngasika pesan Iya. Iya ngasuh kita lapar kena Iya ngemaruhka ati kita, lalu udah nya Iya meri kita mana nyadika pemakai kita, pemakai ti enda kala diempa kita, tauka diempa aki ini kita. Iya ngereja nya ngambika kita nemu, mensia ukai beridup makai roti aja, tang beridup ba genap leka jaku ti pansut ari mulut TUHAN. Dalam empat puluh taun nya, gari kita enda luya, lalu kaki kita pen enda mega kembai. Nya alai, kita patut nemu, TUHAN Allah Taala disiplin kita baka apai ke disiplin anak diri. Nya alai, titihka semua pesan TUHAN Allah Taala kita; titihka jalai Iya, sereta nangika Iya. Laban TUHAN Allah Taala kita mai kita ngagai menua ti ami, menua ti mayuh mata ai enggau ai sungai ti rarat nengah lebak enggau munggu, menua ti mayuh gandum enggau barli, buah anggur, buah kayu ara, buah delima, kana enggau ai manyi, menua ti alai kita nadai kala suntuk utai, alai kita bisi semua utai ti dipeguna kita, menua ti penuh laban besi, lalu nyamai alai ngulihka engkeraju ari bukit. Lalu kita deka makai lalu kenyang, lalu kita deka muji TUHAN Allah Taala kita laban Iya udah meri menua ti manah ngagai kita. “Anang enda ingatka TUHAN Allah Taala kita; anang enda ngasika semua adat Iya ti diberi aku ngagai kita sehari tu, enggai ke, lebuh kita udah makai lalu kenyang, lalu udah nirika rumah ti manah, lalu diau dalam rumah nya, lalu jelu sapi enggau jelu bedus kita udah nambah-menambah, lalu pirak enggau emas kita udah nambah-menambah, lalu semua reta tengkira kita udah nambah-menambah, kita lalu ngeninggika diri, lalu enda agi ingatka TUHAN Allah Taala kita, ti udah mai kita pansut ari menua Ejip, ari pengidup kita ke nyadi ulun, ti udah nguluka kita bejalai nengah menua puang ti mar alai diau, menua ti mayuh ular enggau kala, menua ti nadai ai, alai Iya ke mansutka ai ari batu, ti udah nupi kita di menua puang ngena mana, pemakai ti enda kala diempa aki ini kita, kena Iya ngemaruhka sereta ngabas ati kita, ti meri penguntung ngagai kita. Nya alai, bejaga kita enggai ke kita nyebut dalam ati diri, ‘Kuasa enggau pengering aku empu ti ngasuh aku bulih pengeraja tu.’ Kita enda tau enda ingatka TUHAN Allah Taala kita, laban Iya ke meri kita kuasa kena ngulihka pengaya, lalu netapka sempekat ti udah digaga Iya enggau aki ini kita, baka ke dikereja Iya sehari tu. Enti kita enda ingatka TUHAN Allah Taala kita, lalu nitih sereta betuaika petara bukai lalu nyembah sida, aku meri kita jaku tangkan tu sehari tu: kita deka dibunuh. Baka bansa bukai ti deka dirusak TUHAN di mua kita, baka nya mega kita deka dirusak, laban kita enda ngasika jaku TUHAN Allah Taala kita. “Dingaka tu, kita orang Israel! Sehari tu kita baru deka meraka Sungai Jordan, lalu ngalahka menua ti diempu bansa orang ke kering sereta bekuasa agi ari kita. Nengeri sida besai, sereta bisi kuta ti nyentuk ke langit. Orang nya tinggi sereta kering, peturun orang Anakim. Kita nemu sapa sida nya. Sida nya orang ke udah dikenang orang munyi tu, ‘Sapa tan ngelaban orang Anakim?’ Nya alai kita enda tau enda nemu sehari tu, TUHAN Allah Taala kita deka bejalai dulu ari kita baka api ti mau. Iya deka ngalahka sida lebuh kita nyerang sida, ngambika kita muru lalu munuh sida enggau naka penyampat, munyi ti udah disemaya TUHAN. “Lebuh TUHAN Allah Taala kita udah muru sida ari mua kita, anang bejaku dalam ati diri, ‘ TUHAN udah mai aku kitu ngambika aku bempu menua tu, ketegal aku lurus’; Utai nya ukai baka nya: TUHAN muru semua bansa orang nya ari mua kita ketegal penyai sida. Kita deka ngerampas menua sida ukai ketegal pengelurus tauka pemanah ati kita, tang laban TUHAN Allah Taala kita muru sida ari mua kita ketegal penyai sida, enggau laban TUHAN deka ngamatka semaya ti digaga Iya enggau aki kita Abraham, Isak enggau Jakop. Kita enda tau enda nemu tu: TUHAN ukai meri menua ti manah tu ngagai kita ketegal pengelurus kita; laban kita tu bansa ti kieh. “Anang enda ingatka jalai kita udah nyungkak TUHAN Allah Taala kita ringat di menua puang. Kenyau ari maya kita pansut ari menua Ejip, nyentuk ngagai hari kita datai ditu, kita udah ngelaban TUHAN. Indah ba Bukit Sinai deh kita udah nyungkak TUHAN ringat, datai ke Iya nyau sedia deka munuh kita. Lebuh aku niki ngagai bukit nya deka nerima lampang batu ti udah alai TUHAN nuliska sempekat entara Iya enggau kita, aku diau ba bukit nya empat puluh hari, empat puluh malam, nadai makai, nadai ngirup. Lalu TUHAN meri ngagai aku dua iti lampang batu nya ngagai aku, alai Iya ti udah nulis ngena jari Iya Empu, jaku ti udah disebut Iya ngagai kita ari dalam api lebuh kita begempuru ba bukit nya. Ba pengujung empat puluh hari empat puluh malam nya, TUHAN meri ngagai aku lampang batu dua iti nya, iya nya lampang batu adat. “Udah nya TUHAN bejaku ngagai aku, ku Iya, ‘Angkat nuan, lalu nurun ari bukit tu enggau jampat, laban bala nembiak nuan, ti udah dibai nuan pansut ari menua Ejip, udah ngereja pengawa ti jai; sida udah limpang ari jalai Aku; sida udah ngaga engkeramba ke diri empu.’ “Nambahka nya, TUHAN mega bejaku ngagai aku, ku Iya, ‘Aku nemu orang tu bansa ti kieh. Anang nguji nagang Aku. Aku deka munuh sida, ngambika sida enda agi dikingatka. Udah nya baru Aku deka ngasuh nuan nyadi apai ke siti bansa ti kering agi sereta mayuh agi tubuh ari sida.’ “Ninga nya, aku nguing lalu nurun ari bukit nya, lebuh bukit nya mau laban api; aku mai lampang batu dua iti nya ba jari aku. Aku malik lalu tepedaka kita udah bedosa ngelaban TUHAN Allah Taala kita; kita udah ngaga engkeramba anak sapi ari emas ti diluluhka kita; kita jampat amat limpang ari jalai TUHAN. Aku lalu ngempaska dua iti lampang batu adat nya di mua kita, lalu mechahka lampang batu nya. Udah nya aku lalu ningkapka diri baru ba tanah di mua TUHAN empat puluh hari empat puluh malam baka ke dikereja aku dulu ari nya; aku nadai makai, nadai ngirup, ketegal semua dosa kita, laban kita udah ngereja utai ti jai di mua Iya, lalu udah nyungkak Iya ringat. Aku takutka pengeringat TUHAN, laban Iya udah chukup pedis ati ngagai kita, datai ke Iya nyau deka munuh kita. Tang TUHAN mendingka aku baru lebuh maya nya. TUHAN mega balat amat ringat ngagai Aron, datai ke Iya nyau deka munuh Aron. Aku lalu besampi mega ke Aron lebuh maya nya. Aku lalu ngambi utai dosa nya, anak sapi ti udah digaga kita, lalu nunu utai nya, mechahka iya, lalu nginsarka iya nyadi amau, lalu naburka amau nya ngagai ai sungai ti rarat ari bukit nya. “Kita mega nyungkak TUHAN Allah Taala kita ringat lebuh kita di Taberah, di Masah, enggau di Kibrot-hataba. Lalu lebuh Iya ngasuh kita bejalai ari Kades-barnea, lalu ngasuh kita ngerampas menua ti diberi Iya ngagai kita, kita angkat ngelaban atur ti diberi TUHAN Allah Taala kita, lalu enda arapka Iya tauka ngasika jaku Iya. Sekumbang aku ti udah nemu kita, kita endang seruran ngelaban TUHAN. “Nya alai aku ningkapka diri ba tanah di mua TUHAN empat puluh hari empat puluh malam, laban TUHAN udah madahka Diri deka munuh kita. Aku lalu besampi ngagai TUHAN, ku aku: ‘O TUHAN Allah Taala, anang munuh bala nembiak Nuan enggau pesaka Nuan tu, ti udah ditebus Nuan ngena pemesai kuasa Nuan, ti udah dibai Nuan pansut ari menua Ejip ngena pengering Nuan. Kingatka nembiak Nuan Abraham, Isak enggau Jakop, lalu anang bedulika pengekieh, tauka penyai, tauka dosa orang tu, enggai ke orang Ejip bejaku munyi tu, ‘Laban TUHAN enda ulih mai sida ngagai menua ti udah disemaya Iya ngagai sida, enggau laban Iya begedika sida, nya kebuah Iya mai sida ngagai menua puang lalu munuh sida.’ Laban orang tu endang nembiak enggau pesaka Nuan, ke dibai Nuan pansut ngena pemesai kuasa, enggau ngena jari Nuan.” “Udah nya TUHAN bejaku ngagai aku, ‘Tingkuh dua igi lampang batu baka ti keterubah, lalu gaga siti peti kayu alai nyimpan batu nya. Udah nya niki ke atas ngagai Aku ba bukit tu. Aku deka nulis ba lampang batu dua iti nya leka jaku ti udah ditulis ba lampang batu ti udah dipechahka nuan. Udah nya nuan enda tau enda nyimpan lampang batu nya dalam peti nya.’ “Nya alai aku ngaga Peti nya ari kayu akasia, lalu ningkuh dua iti lampang batu baka ke keterubah, lalu mai lampang batu nya niki ngagai bukit nya. Udah nya TUHAN lalu nulis ba lampang batu nya leka jaku baka ke ditulis Iya ba lampang batu ti keterubah, iya nya Sepuluh Pesan ti diberi Iya ngagai kita, lebuh Iya bejaku ari dalam api lebuh kita begempuru ba bukit nya. TUHAN lalu meri lampang batu nya ngagai aku. Aku nguing lalu nurun ari bukit nya. Udah nya, nitihka pesan TUHAN, aku lalu nyimpan lampang batu nya dalam Peti ti udah digaga aku, lalu lampang batu nya mengkang dia datai ke sehari tu.” ( Orang Israel lalu angkat ari telaga orang Jakan, sereta mansang ngagai Moserah. Aron mati dia lalu dikuburka. Anak iya Eleasar lalu nganti iya nyadi imam. Ari nya sida mansang ngagai Gutgodah, lalu udah nya ngagai Jotbatah, alai ti mayuh ai. Lebuh sida ba bukit nya TUHAN milih orang ke lelaki ari raban bansa Lewi ngesan Peti Lampang Batu Adat nya, bekereja nyadi imam, enggau merekatka orang dalam nama TUHAN, nyentuk ngagai diatu. Nya alai raban bansa Lewi enda diberi pesaka tanah baka raban bansa orang Israel ti bukai, laban sida deka nerima semua utai ti disemaya TUHAN Allah Taala kita, ngagai sida.) “Aku diau ba bukit nya empat puluh hari empat puluh malam, baka ke terubah. TUHAN mendingka aku baru, lalu besetuju enda nyadi munuh kita. Udah nya Iya ngasuh aku mupuk, lalu nguluka kita, ngambika kita ulih ngerampas menua ti udah disemaya deka diberi Iya ngagai aki ini kita. “Nya alai diatu, kita orang Israel, nama utai ti dipinta TUHAN Allah Taala kita, ari kita? Semina nangika TUHAN Allah Taala kita, idup nitihka jalai Iya, rinduka Iya, nyembah Iya enggau pengabis ati, enggau pengabis semengat kita, lalu ngasika semua pesan enggau adat TUHAN, ti diberi aku ngagai kita sehari tu, ke penguntung kita. Taja pen langit enggau serega, enggau dunya sereta enggau semua utai ti di dunya, diempu TUHAN Allah Taala kita, tang TUHAN balat rinduka aki ini kita, datai ke Iya milih kita, ke peturun sida, ari semua bansa, baka ke sehari tu. Nya alai, ngasi meh kita ke TUHAN, lalu badu agi kieh. Laban TUHAN Allah Taala kita endang Allah Taala ari atas semua petara, TUHAN ari atas semua tuhan, Allah Taala ti bekuasa, ti kering ti diketakutka, ti enda bepilih mata, lalu enda makai suap, ti meri atur ti lurus ngagai orang ke patu balu, ti rinduka orang kampar, lalu meri sida pemakai enggau gari. Nya alai kita mega enda tau enda rinduka orang kampar, laban kita empu udah nyadi orang kampar di menua Ejip. Kita enda tau enda nangika TUHAN Allah Taala kita; sembah Iya siku aja. Seruran bepegai teguh ba Iya, lalu sebut sumpah kita atas nama Iya. Iya aja ti dipuji kita, laban semina Iya aja ti Allah Taala kita, ti udah ngereja utai ti besai sereta nyelai, baka ke udah dipeda kita. Lebuh bala aki ini kita mansang ngagai menua Ejip, sida semina tujuh puluh iku aja. Tang diatu TUHAN Allah Taala kita udah ngasuh kita mayuh tubuh ngemayuh bintang ti di langit. “Rinduka TUHAN Allah Taala kita, lalu seruran ngasika semua adat Iya. Kingatka sehari tu utai ti udah ditemu kita pasal TUHAN ari utai ti udah diasaika kita enggau Iya. Kita empu, ukai anak kita, ke ngasaika utai nya. Kita udah meda pemesai kuasa Iya, pengering Iya, enggau kereja ajih Iya. Kita udah meda utai ti dikereja Iya ngagai raja di menua Ejip, enggau ngagai menua Ejip empu. Kita udah meda chara TUHAN munaska semua bala soldadu orang Ejip, sama enggau kuda, kerita perang, lebuh Iya ngasuh sida lemas ba Tasik Mirah, lebuh sida begagaika kita. Kita nemu utai ti udah dikereja TUHAN ti kita di menua puang sebedau kita datai ditu. Kita tentu ingatka utai ti udah dikereja Iya ngagai Datan seduai Abiram, anak Eliap ke ari peturun Reuben. Dipeda orang mayuh tanah merekah lalu nelan seduai iya, enggau sida sebilik, langkau kain sida, enggau semua kuli seduai iya, enggau jelu tupi sida. Kita nya meh orang ke meda semua utai ti besai ti udah dikereja TUHAN. “Titihka semua pesan ti dipadahka aku ngagai kita sehari tu. Nya baru kita ulih ngelayang sungai lalu nguan menua ti baru deka dipasuk kita. Lalu kita deka diau lama di menua ti kaya sereta ami ti udah disemaya deka diberi TUHAN ngagai aki ini enggau ngagai peturun sida. Menua ti baru deka dialahka kita nya enda baka menua Ejip, alai kita ke diau menya. Di menua Ejip, lebuh kita nanam benih, kita bebendar bekereja meri ai ngagai umai kita. Tang menua ti deka dipasuk kita nya menua ti bebukit enggau mayuh lebak, menua ti seruran bisi ujan. TUHAN Allah Taala kita deka ngintu sereta ngemataka menua nya sepemanjai taun. “Nya alai, titihka semua pesan ti diberi aku ngagai kita sehari tu. Rinduka TUHAN Allah Taala kita, lalu sembah Iya enggau pengabis ati kita, enggau pengabis semengat kita. Enti kita ngereja nya, Iya deka ngasuh hari ujan di menua kita, lebuh kita begunaka ujan lebuh musin ruruh daun enggau lebuh musin bungai, ngambika kita bisi gandum, wain enggau minyak kana. Iya deka meri kita rumput ke pemakai jelu tupi kita. Kita deka bisi semua pemakai ti dikedekaka kita. Anang nejuka diri dibai orang limpang ari TUHAN besembah sereta betuaika petara bukai. Enti kita ngereja, TUHAN deka ringat ngagai kita. Iya deka nagang hari ujan, lalu tanah kita deka nyadi kelalu rangkai, lalu utai ti ditanam kita enggai tumbuh. Ketegal nya kita jampat parai, taja pen menua ti diberi Iya ngagai nya ami. “Kingatka pesan tu, lalu simpan sida dalam ati kita. Tuliska sida, lalu tanchangka sida ba lengan kita. Lekatka sida ba kening kita kena ngingatka sida. Ajar sida ngagai anak kita. Kenang sida tu lebuh kita di rumah, enggau lebuh kita bejalai kebukai, lebuh kita gali, enggau lebuh kita gawa. Tuliska sida ba tiang pintu rumah kita, enggau ba pintu kuta kita. Nya baru kita enggau anak kita deka diau lama ba menua ti udah disemaya deka diberi TUHAN Allah Taala kita ngagai aki ini kita. Kita deka diau dia, seagi-agi langit map dunya. “Titihka enggau ati ti tetap semua pesan ti udah dipadahka aku ngagai kita: Rinduka TUHAN Allah Taala kita, kereja semua utai ti diasuh Iya, lalu bepegai teguh ba Iya. Nya baru Iya deka muru semua bansa ari mua kita, lalu kita deka ngalahka menua ti diempu bansa bukai ti besai agi sereta kering agi ari kita. Semua endur ti ditengah kita deka diempu kita. Rampa menua kita deka berengkah ari menua puang di selatan ngagai Bukit Lebanon di utara, enggau ari Sungai Eupratis di timur ngagai Tasik Tengah di barat. Di sebarang endur alai kita bejalai di menua nya, TUHAN Allah Taala kita deka ngasuh orang takutka kita, munyi ti udah disemaya Iya, lalu nadai orang ulih nagang kita. “Pilih sehari tu entara berekat enggau sumpah. Kita deka diberekatka enti kita ngasika pesan TUHAN Allah Taala kita ke dipadahka aku ngagai kita sehari tu. Tang kita deka kena sumpah, enti kita enda ngasika pesan TUHAN Allah Taala kita, lalu limpang ari jalai TUHAN, lalu nyembah petara bukai ti enda kala disembah kita. Lebuh TUHAN mai kita ngagai menua ti deka dialahka kita, kita enda tau enda nyada madahka berekat ari Bukit Gerisim, enggau madahka sumpah ari Bukit Ebal. ( Bukit dua igi tu ba tebing barat Sungai Jordan, di menua orang Kanaan ti diau ba Lebak Jordan. Bukit dua igi tu tunga ke barat, enda jauh ari kayu keramat di Moreh, semak nengeri Gilgal.) Kita baru deka meraka Sungai Jordan, lalu ngalahka menua ti diberi TUHAN Allah Taala kita ngagai kita. Lebuh kita ngerampas menua nya, lalu ngentapka diri dia, kita enda tau enda ngasika semua adat ti diberi aku ngagai kita sehari tu. “Tu adat ti enda tau enda dititihka kita seagi-agi kita idup di menua ti diberi TUHAN Allah Taala aki ini kita, ngagai kita. Titihka semua adat nya! Rusak semua endur alai orang bansa bukai nyembah petara sida ba sebelah bukit ti tinggi, ba munggu, enggau di baruh kayu, dalam menua ti deka dirampas kita. Runtuhka alta sida, lalu redakka tiang batu keramat sida. Tunu anak patung petara Aserah, lalu tebang engkeramba sida, ngambika sida nadai agi disembah ba endur nya. “Anang nyembah TUHAN Allah Taala kita ngena chara nya. TUHAN deka milih siti endur ari semua menua ti diempu raban bansa kita, alai orang deka datai lalu nyembah Iya. Nya meh endur alai kita deka ngenjuk piring tunu, enggau piring ti bukai, pemeri sepuluh peratus, enggau pemeri kita, pemeri ti disemaya deka diberi kita ngagai TUHAN, piring ti diberi nitihka peneka ati diri, enggau anak tuai jelu sapi enggau jelu bedus kita. Dia meh kita, enggau kita sebilik deka makai, di mua TUHAN Allah Taala kita, lalu ensepi penyamai semua utai ti manah ti udah diberekatka TUHAN ngagai kita. Kita enda tau ngereja utai baka ke dikereja kita diatu, nitihka peneka ati diri, laban kita apin datai di menua ti diberi TUHAN Allah Taala kita ngagai kita, alai kita ke deka diau likun. Lebuh kita meraka Sungai Jordan, lalu diau di menua ti diberi TUHAN Allah Taala kita ngagai kita, lalu lebuh Iya meri kita pemaik ari semua munsuh ti ngelingi kita, ngambika kita diau likun, nya baru kita deka mai semua utai ti diasuh aku bai kita ngagai endur ti deka dipilih TUHAN nyadi endur alai Iya deka diau. Utai ti deka dibai kita nya: piring tunu enggau piring ti bukai, pemeri sepuluh peratus kita, enggau pemeri kita, enggau pemeri ti udah disemaya kita enggau TUHAN. Kita, enggau anak kita, orang gaji kita enggau orang Lewi (ti nadai pesaka tanah) ti diau dalam nengeri kita di menua nya, deka gaga ati magang di mua TUHAN. Kita enda tau ngenjuk piring kita ba sebarang endur ti dipilih kita. Kita semina ngenjuk piring nya ba siti endur ti deka dipilih TUHAN, dalam menua ti diempu siti ari raban bansa kita. Semina dia aja kita tau ngenjuk piring tunu, lalu ngereja semua utai ti dipadahka aku ngagai kita. “Tang kita tau nyayat lalu makai jelu kita ba endur alai kita diau. Kita tau makai sepemayuh ti diberi TUHAN ngagai kita. Semua kita, nemuka kita nya tuchi tauka enda, tau makai jelu nya, baka ke makai dagin rusa tauka dagin kijang. Tang kita enda tau makai darah jelu nya. Kita enda tau enda nuang darah nya ngagai tanah baka ke nuang ai. Nadai utai ti diberi kita ngagai TUHAN tau diempa kita ba endur alai kita diau, nemuka utai nya pemeri sepuluh peratus ari gandum kita, ari wain kita, tauka ari minyak kana kita, tauka anak tuai jelu sapi enggau jelu bedus kita, enggau pemeri ti disemaya kita enggau TUHAN, piring ti diberi kita nitihka peneka ati diri, tauka piring ti bukai. Kita enggau anak kita, enggau orang gaji kita, sereta enggau orang Lewi ti diau di nengeri kita, enda tau enda makai piring nya semina di mua TUHAN Allah Taala kita, ba siti endur alai besembiang ti dipilih TUHAN Allah Taala kita. Kita enda tau enda gaga ati dia, di mua TUHAN Allah Taala kita, ke semua utai ti udah dikereja kita. Anang enda nemu ibuhka orang Lewi seagi-agi kita idup di menua kita. “Lebuh TUHAN Allah Taala kita ngerembaika rampa menua kita, munyi ti udah disemaya Iya, kita tau makai dagin di sebarang endur kita deka. Enti endur alai besembiang nya kelalu jauh, kita tau, ba sebarang maya kita deka, nyayat jelu sapi tauka bedus ti udah diberi TUHAN ngagai kita, lalu kita tau makai dagin jelu nya di rumah kita empu, munyi ti udah dipadahka aku ngagai kita. Genap iku orang, nemuka iya nya tuchi tauka enda tuchi, tau makai dagin nya, baka ke makai dagin rusa tauka dagin kijang. Tang kita enda tau makai dagin ti agi bedarah, laban darah ngundan seput, lalu kita enda tau makai seput sama enggau dagin. Anang makai darah, tang tuang darah nya ngagai tanah baka ke nuang ai. Enti kita ngasika pesan tu, TUHAN deka gaga ati ke kita, lalu kita, enggau peturun kita deka mujur diau. Bai pemeri ti kudus ti udah disemaya kita enggau TUHAN, ngagai siti aja endur alai nyembah TUHAN. Beri ba endur nya piring ti deka ditunu ba alta TUHAN. Beri mega piring ti bukai ti diempa kita dagin, lalu tuang darah ba alta. Enggau ati ti tetap, titihka semua utai ti udah dipadahka aku ngagai kita. Nya baru kita enggau peturun kita deka lantang senang belama iya, laban kita ngereja utai ti ngena, ti ngerinduka ati TUHAN Allah Taala kita. “ TUHAN Allah Taala kita deka ngerusak orang bansa bukai lebuh kita nyerang menua sida, lalu kita deka nguan menua nya, lalu ngentapka diri dia. Lebuh TUHAN udah ngerusak bansa orang nya, kita enda tau enda nentuka diri enda nitihka atur pengarap sida, laban nya deka munuh kita. Anang betanyaka chara sida nyembah petara sida, enggai ke kita nyembah TUHAN ngena chara nya. Anang nyembah TUHAN Allah Taala kita ngena chara sida nyembah petara sida, laban lebuh sida nyembah petara sida, sida ngereja semua utai ti jai, ti dipegedika TUHAN. Indah anak sida empu deh diserahka sida nyadika piring ba api ti ba alta sida. “Kereja semua utai ti udah dipadahka aku ngagai kita. Anang nambahka tauka muai utai ari jaku nya. “Enti nabi tauka orang ke nemu nerangka mimpi bisi ba bala kita, lalu besemaya deka ngereja kereja ajih tauka kereja ti nyelai, lalu kereja ajih tauka kereja ti nyelai nya bisi nyadi, lalu sida nyebut ngagai kita, “Aram kitai nitihka petara bukai,” (petara ti enda ditemu kita), “lalu nyembah sida,” anang bedulika jaku sida nabi nya, tauka jaku orang ke nemu nerangka mimpi; laban TUHAN Allah Taala kita deka ngabas ati kita, deka nemu enti kita amat rinduka TUHAN Allah Taala kita enggau pengabis ati, enggau pengabis semengat kita. Titihka TUHAN, lalu kemesaika Iya. Kita enda tau enda ngasika Iya, sereta nitihka pesan Iya. Sembah Iya, lalu seruran tetap ati ngagai Iya. Tang bunuh sida nabi nya, tauka orang ke nerangka mimpi, laban sida udah bejaku busung ngelaban TUHAN Allah Taala kita ke udah mai kita pansut ari menua Ejip, lalu udah nebus kita ari pengidup kita ke nyadi ulun. Orang nya jai, lalu sida nguji mai kita limpang ari jalai pengidup ti udah diasuh TUHAN titihka kita. Sida nya enda tau enda dibunuh, ngambika penyai nya dibuai ari bala kita. “Indah menyadi kita, tauka anak lelaki tauka anak indu, tauka bini ke dikesayauka kita, tauka pangan kita deh deka nguji, ngena chara belalai, meransang kita nyembah petara bukai ti enda kala disembah kita tauka disembah aki ini kita. Sekeda sida nyangka deka meransang kita nyembah petara orang ke diau semak kita, tauka petara orang ke diau jauh ari kita. Tang anang nejuka sida mujuk kita. Mendingka sida pen kita enda tau. Anang kasihka sida, tauka sinu ati ke sida, lalu anang nyaga sida. Bunuh sida! Kita patut dulu agi ari orang bukai nuku sida ngena batu. Udah nya baru kita tau nejuka orang bukai nuku sida ngena batu. Tuku sida ngena batu datai ke sida mati! Sida udah nguji mai kita limpang ari TUHAN Allah Taala kita ke udah mai kita pansut ari menua Ejip, alai kita ke udah nyadi ulun. Nya baru semua orang Israel deka ninga berita pasal utai ti nyadi. Sida deka takut, lalu nadai agi orang berani ngereja utai ti ngenyai nya. “Lebuh kita diau di nengeri ti diberi TUHAN Allah Taala kita ngagai kita, kita nyangka bisi ninga pasal sekeda orang ke nadai guna ari bansa kita empu ti udah mai orang dalam nengeri sida limpang lalu nyembah petara ti nadai kala disembah kita. Enti kita bisi ninga berita ti baka nya, pansik berita nya enggau silik, lalu enti utai ti jai nya amat udah nyadi, bunuh semua orang dalam nengeri nya, enggau semua jelu tupi sida. Rusak abis nengeri nya. Gempuruka semua reta tengkira orang ke diau dalam nengeri nya, lalu tugungka utai nya ba padang nengeri nya. Udah nya tunu nengeri nya, sama enggau utai ti dalam nengeri nya nyadika piring ti diserahka ngagai TUHAN Allah Taala kita. Nengeri nya enda tau enda ditejuka rusak belama iya, lalu enda tau digaga baru. Anang nyimpan ke diri empu utai ti udah diletak deka dirusak. Nya baru TUHAN deka badu agi ringat, tang deka ngayanka pengasih Iya ngagai kita. Iya deka kasihka kita, lalu ngaga kita nyadi bansa ti besai, munyi ti udah disemaya Iya ngagai aki ini kita, enti kita deka ngasika semua pesan Iya ti udah diberi aku ngagai kita sehari tu, lalu ngereja utai ti dikedekaka Iya. “Kita tu anak TUHAN Allah Taala kita. Kita enda tau ngurik tubuh diri tauka ngukur buk ti ba kening kita, lebuh kita ngulitka orang ke mati. Laban kita tu orang ke kuduska TUHAN Allah Taala kita. Kita tu orang ke udah dipilih Iya ari semua bansa di dunya tu, nyadika pesaka ti dikesayauka Iya. “Anang makai utai ti enda tuchi. Tu bagi jelu ti tau diempa kita: sapi, bedus, kambin, rusa, bedus utan, kambin utan, kijang, jelu ti belah tunjing, ti ngunyah pemakai ti udah diluaka iya baru ari perut raya iya. Jelu ti enda belah tunjing, lalu enda ngunyah pemakai ti udah diluaka iya baru ari perut raya iya, enda tau diempa. Kita enda tau makai jelu unta, tikus belanda, tauka badger batu. Sida nya enda tuchi. Sida amat ngunyah pemakai ti udah diluaka sida baru ari perut raya sida, tang tunjing sida enda belah. Anang makai babi. Sida nya enda tuchi. Tunjing sida amat belah, tang sida enda ngunyah pemakai ti udah diluaka sida baru ari perut raya sida. Anang makai jelu nya, tauka negu bangkai sida. “Kita tau makai semua macham ikan ti bisi pidin enggau tisik, tang utai ti idup dalam ai ti enda bepidin, ti enda betisik, enda tau diempa kita. Sida nya enda tuchi ke kita. “Kita tau makai burung ti tuchi. “Semua indu utai ti besayap enda tuchi magang. Anang makai sida. Kita tau makai sebarang indu utai ti tuchi. “Anang makai jelu ti ditemu mati. Kita tau nejuka orang bansa bukai ke diau enggau kita makai utai nya, tauka kita nyual utai nya ngagai orang bansa bukai. Laban kita udah dikuduska TUHAN Allah Taala kita. “Anang manduk anak domba tauka anak kambin ngena ai tusu indai iya empu. “Seraraka pemeri sepuluh peratus kita ari utai ti diketau kita tiap taun. Di mua TUHAN Allah Taala kita, ba endur ti deka dipilih Iya alai Iya patut disembah, empa pemeri sepuluh peratus ti diberi kita ari gandum, wain, minyak kita, sereta enggau anak tuai jelu sapi enggau jelu bedus kita, ngambika kita seruran belajar nangika TUHAN Allah Taala kita. Tang enti endur alai nyembah TUHAN nya kelalu jauh ari rumah kita, lalu kita enda ulih mai pemeri sepuluh peratus ari utai ti udah diberekatka TUHAN ngagai kita, kita tau ngereja tu: Jual utai ti ulih kita nya, lalu bai duit nya ngagai endur alai nyembah TUHAN. Kita tau ngena duit nya bebelika utai ti ku ati kita, baka dagin sapi, anak domba, wain, ai ti bisa, tauka sebarang utai bukai ti dikedekaka kita, lalu di mua TUHAN Allah Taala kita, kita enggau kita sebilik tau makai utai nya lalu rami gaga dia. Anang enda ibuhka orang Lewi ti diau dalam nengeri kita, laban sida iya nadai pesaka tanah baka kita. “Ba genap ujung taun ti ketiga, bai pemeri sepuluh peratus ari semua utai ti diketau kita, lalu taruh utai nya dalam nengeri kita. Orang Lewi, laban sida nadai tanah, orang kampar, enggau orang ke patu balu ti diau di nengeri kita, tau datai lalu makai utai nya lalu kenyang, ngambika TUHAN Allah Taala kita merekatka kita dalam semua pengawa ti dikereja kita. “Ba genap ujung taun ti ketujuh, kita enda tau enda muai semua utang orang ke berutang ba kita. Baka tu ku chara kita ngereja nya: genap iku kita ke udah nyali duit ngagai orang Israel, enda tau enda muai utang nya. Kita enda tau minta duit nya ari sida, laban TUHAN Empu udah madahka utang nya dibuai. Kita tau minta orang bansa bukai mayar utang diri, tang kita enda tau minta bayar utang ari bansa kita empu. “ TUHAN Allah Taala kita deka merekatka kita di menua ti diberi Iya ngagai kita. Nadai siku kita deka seranta enti kita ngasika TUHAN Allah Taala kita, lalu bejimat ngereja semua pesan ti diberi aku ngagai kita sehari tu. Lebuh TUHAN Allah Taala kita merekatka kita, munyi ti udah disemaya Iya, kita deka nyali duit ngagai mayuh bengkah bansa, tang kita enda nginjau duit ari orang. Kita deka merintah mayuh bengkah bansa, tang sida enda merintah kita. “Enti orang Israel bisi suntuk dalam nengeri ti diberi TUHAN Allah Taala kita ngagai kita, anang rangka lalu enggai nyaup sida. Kita patut, enggau ati ti gerah mudah, nyali sida sebarang utai ti dipeguna sida. Anang rangka, lalu berunding, “Taun ti ketujuh alai muai utang, nyau semak,” lalu kita jai enggau pangan diri, lalu enggai meri iya utai, lalu pangan nuan nya ngangauka TUHAN ngelaban kita, lalu kita deka dikumbai salah. Beri enggau ati ti gerah mudah lebuh kita meri utai ngagai sida, lalu TUHAN deka merekatka kita dalam semua pengawa kita enggau dalam semua utai ti dikereja kita. Laban orang ke suntuk endang seruran bisi di dunya tu, nya alai aku meri pesan tu ngagai kita, “Beri enggau ati ti gerah mudah ngagai pangan diri ke suntuk di menua kita.” “Enti orang Israel, nemuka lelaki tauka indu, nyual diri ngagai kita nyadi ulun, kita enda tau enda ngelepaska sida lebuh sida udah bekereja ke kita enam taun. Masuk taun ti ketujuh, kita enda tau enda ngelepaska sida. Lebuh kita ngelepaska sida, anang ngasuh sida pulai puang. Beri sida utai ti udah diberekatka TUHAN ngagai kita: jelu bedus, gandum enggau wain. Kingatka diri ti udah nyadi ulun di menua Ejip, lalu TUHAN Allah Taala kita udah ngelepaska kita. Nya kebuah aku ngasuh kita ngereja nya. “Tang ulun kita nyangka enggai ninggalka kita. Nyangka iya rinduka kita enggau ke kita sebilik, lalu keran deka diau enggau kita. Enti pia, bai iya ngagai pintu rumah kita, lalu achuk rambing pending iya dia. Nya baru iya nyadi ulun kita seumur idup. Kereja baka nya mega ngagai ulun kita ti indu. Anang pedis ati ketegal kita ngelepaska ulun kita. Sida udah bekereja ke kita enam taun, ngena setengah gaji. Lepaska sida, nya baru TUHAN Allah Taala kita deka merekatka kita dalam semua utai ti dikereja kita. “Serahka ngagai TUHAN Allah Taala kita semua anak tuai ti lelaki ari jelu sapi enggau jelu bedus kita. Anang ngena jelu nya ngereja pengawa, lalu anang ngukur bedus nya. Kita, enggau kita sebilik, enda tau enda makai jelu nya di mua TUHAN genap taun, ba endur ti deka dipilih TUHAN Allah Taala kita. Tang enti jelu nya enda tentu menyana, enti sida nya kait-kupit, tauka buta, tauka bisi penimpang bukai, kita enda tau ngaga sida nyadika piring ti diberi ngagai TUHAN Allah Taala kita. Kita tau makai jelu nya di rumah kita empu. Semua kita, nemuka kita nya tuchi tauka enda tuchi, tau makai jelu nya, baka ke makai dagin rusa tauka dagin kijang. Tang anang makai darah sida. Tuang darah sida ngagai tanah baka ke nuang ai. “Kemesaika TUHAN Allah Taala kita ngena Gawai Paska dalam bulan Abip, laban Iya udah mai kita pansut ari menua Ejip lebuh malam hari dalam bulan nya. Mansang kita ngagai siti endur alai nyembah TUHAN, lalu sayat dia siku jelu bedus kita, tauka jelu sapi kita, ke Gawai Paska, kena ngemesaika TUHAN Allah Taala kita. Lebuh kita makai pemakai nya, anang makai roti ti beragi. Tujuh hari kita deka makai roti ti enda beragi, baka ke dikereja kita lebuh kita beguai-guai angkat ari menua Ejip. Empa roti nya. Roti nya deka dikumbai roti pemerinsa, ngambika, seagi-agi kita meruan idup, kita deka ingatka hari kita pansut ari menua Ejip, alai kita ke udah kena perinsa. Dalam kandang tujuh hari, nadai orang di menua kita tau nyimpan ragi dalam rumah sida. Lalu jelu ti disayat ba lemai ti keterubah, enda tau enda abis diempa kita malam nya. Panduk dagin nya, lalu empa iya ba siti endur alai kita besembiang. Pagi hari siti baru kita pulai ngagai rumah kita empu. Dalam enam hari lepas nya kita deka makai roti ti enda beragi. Ba hari ti ketujuh kita enda tau enda besembiang bebala mayuh nyembah TUHAN Allah Taala kita, lalu enda gawa sehari nya. “Itung tujuh minggu ari maya kita belabuh ngetau gandum kita, lalu udah nya intu Gawai Ngetau kena ngemesaika TUHAN Allah Taala kita, lebuh kita mai ngagai Iya piring ti diberi nitihka peneka ati diri setipak enggau berekat ti udah diberi Iya ngagai kita. Kita, anak kita, orang gaji kita, enggau orang Lewi, orang kampar, orang ke patu balu ti diau dalam nengeri kita, enda tau enda gaga ati ngintu Gawai nya di mua TUHAN. Kereja nya ba siti endur alai kita besembiang. Kita enda tau enda ngasika pesan tu. Anang enda ingatka diri ti udah nyadi ulun di menua Ejip. “Lebuh kita udah tembu ngindik semua gandum kita, lalu udah tembu mitan semua buah anggur kita, kita enda tau enda ngintu Gawai Belangkau tujuh hari. Kita, anak kita, orang gaji kita, enggau orang Lewi, orang kampar, orang ke patu balu ti diau dalam nengeri kita, enda tau enda semua gaga ati ngerami Gawai nya. Intu Gawai nya tujuh hari ba siti endur alai besembiang kena kita ngemesaika TUHAN Allah Taala kita. Kita enda tau enda gaga ati, laban TUHAN udah merekatka utai ti diketau kita, sereta merekatka pengawa kita. “Semua lelaki dalam bansa kita enda tau enda datai nyembah TUHAN tiga kali setaun ba siti endur ti deka dipilih TUHAN, iya nya, lebuh Gawai Paska, Gawai Ngetau, enggau Gawai Belangkau. Genap iku sida enda tau enda meri pemeri naka ti ulih diberi sida, nitihka pemayuh berekat ti udah diberi TUHAN ngagai sida siku-siku. “Pilih orang nyadi hakim, enggau nyadi pemesai bukai, dalam semua nengeri ti diberi TUHAN Allah Taala kita ngagai kita. Orang tu enda tau enda ngatur pechara enggau enda bepilih mata. Sida enda tau meri atur ti enda lurus, lalu enda tau bepilih mata. Sida enda tau makai suap, laban makai suap ngasuh orang ke bepenemu-dalam enda meda utai ti betul, lalu ngasuh sida meri atur ti salah. Kita enda tau enda seruran meri atur ti lurus, ngambika kita ulih ngalahka lalu diau dalam menua ti diberi TUHAN Allah Taala kita ngagai kita. “Lebuh kita ngaga alta ke TUHAN Allah Taala kita, anang nirika alta nya ngimbai tiang petara indu Aserah. Lalu anang mega nirika tiang ti dipegedika TUHAN. “Anang meri jelu sapi tauka jelu bedus ti bisi penimpang nyadika piring ngagai TUHAN Allah Taala kita. TUHAN begedika utai nya. “Enti sema kita bisi ninga dalam nengeri kita, pasal lelaki tauka indu ke udah bedosa ngelaban TUHAN, lalu ngelanggar sempekat Iya ketegal sida nyembah lalu betuaika petara bukai, nemuka nya mata hari, tauka bulan, tauka bintang, lalu ngelanggar pesan TUHAN, lalu enti kita bisi ninga berita nya, kita enda tau enda mansik utai nya enggau silik, lebuh orang madahka utai nya ngagai kita. Enti utai ti jai nya amat udah nyadi dalam menua Israel, bai orang nya pansut ke luar ari nengeri nya, lalu tuku sida ngena batu datai ke sida mati. Tang sida semina tau dibunuh beduduk ba jaku saksi dua tauka mayuh agi orang. Sida enda tau dibunuh beduduk ba saksi siku orang aja. Orang ke nyadika saksi enda tau enda dulu nukuka batu. Udah nya baru semua orang bukai tau nuku sida ngena batu. Nya meh jalai kita muai orang ke jai nya ari bala kita. “Kadang-kadang pekara bisi kelalu mar diputarka bala hakim ke di nengeri nya, baka pekara pasal hak bempu pesaka, tauka pasal orang ke bakal, tauka pasal pekara munuh tauka tebunuhka orang. Ba pekara ti baka nya, kita enda tau enda mansang ngagai endur alai kita ke nyembah TUHAN ti udah dipilih TUHAN Allah Taala kita, lalu mantaika pekara nya ngagai bala imam Lewi, enggau hakim ke bekereja lebuh maya nya, lalu awakka sida meri pemutus penemu ba pasal pekara nya. Sida deka meri pemutus penemu sida, lalu kita enda tau enda ngereja utai nitihka atur sida. Sambut meh pemutus penemu sida, lalu titihka atur sida enggau silik. Barang sapa berani ngelaban atur hakim tauka imam ke bekereja sehari nya, deka dibunuh. Nya meh jalai kita muai orang ke jai nya ari bansa orang Israel. Nya baru semua orang deka ninga pasal pekara nya, lalu takut. Nya baru orang nadai agi berani ngereja utai ti baka nya. “Lebuh kita udah ngerampas menua ti diberi TUHAN Allah Taala kita ngagai kita, lalu udah ngentapka diri di menua nya, kita deka berunding begunaka raja baka bansa bukai ti ngelingi kita. Kita enda tau enda nentuka orang ke dipilih kita nyadi raja nya orang ke udah dipilih TUHAN. Iya enda tau enda datai ari bansa kita empu. Anang ngasuh orang kampar nyadika raja kita. Raja nya enda tau ngembuan mayuh kuda ke bala soldadu iya empu, tauka ngasuh orang nikal ngagai menua Ejip bebelika kuda, laban TUHAN udah bejaku enda nyagi bala nembiak Iya nikal ngagai menua nya. Raja nya enda tau mayuh bini, laban nya deka ngasuh iya ninggalka TUHAN; lalu iya enda tau ngaga diri kaya besimpanka pirak enggau emas. Lebuh iya nyadi raja, iya enda tau enda bisi siti Bup Adat dituliska iya di mua bala imam Lewi. Iya enda tau enda nyimpan bup nya semak iya empu, lalu macha bup nya seumur idup, ngambika iya nemu belajar nangika TUHAN, lalu tetap ati ngasika semua utai ti ditulis dalam bup nya. Tu deka nagang iya berunding ngumbai diri manah agi ari orang Israel ti bukai, sereta nagang iya ngelanggar pesan TUHAN dalam semua utai. Nya baru iya enggau peturun iya deka lama megai perintah di menua Israel. “Semua imam Lewi, semua raban bansa Lewi, enda tau nerima ungkup tanah tauka pesaka di menua Israel, tang sida deka beridup ba piring ti diberi ngagai TUHAN. Sida enda tau bempu pesaka tanah baka raban bansa ti bukai. TUHAN Empu deka nyadika pesaka sida, munyi ti udah disemaya Iya ngagai sida. “Tu ungkup ti diberi orang Israel ngagai sida imam ari piring ti diberi sida, nemuka piring nya jelu sapi tauka bedus: berang, rang enggau perut raya jelu nya. Utai ti terubah ulih kita ari gandum, wain, enggau minyak kana kita, enggau bulu bedus ti terubah ulih kita ari bedus kita, enda tau enda diberi ngagai sida, laban TUHAN Allah Taala kita udah milih raban bansa Lewi enggau peturun sida ari semua raban bansa kita, bekereja dalam nama TUHAN belama iya. “Enti orang Lewi, sebarang maya iya deka, angkat ari sebarang nengeri ti udah alai iya diau di menua Israel, lalu datai ngagai endur ti deka dipilih TUHAN, iya tau bekereja dia dalam nama TUHAN Allah Taala iya, baka orang Lewi ti bukai ke bekereja dia. Iya enda tau enda diberi pemakai ngemayuh ti diberi ngagai imam ti bukai, taja pen iya bisi penatai duit ari rega reta tengkira ti dijual sida sebilik. “Lebuh kita datai di menua ti diberi TUHAN Allah Taala kita ngagai kita, kita enda tau nunda pengawa ti jai ti dikereja orang bansa bukai ke diau di menua nya. Anang nyerahka anak kita lalu nunu sida ba alta nyadika piring. Lalu anang betilitka nasit, tauka beburung, tauka bedukun, tauka bemanang, tauka bekenaka pengaruh, tauka betanya ngagai antu, tauka betanya ngagai semengat orang ke udah mati. Laban TUHAN Allah Taala kita begedika orang ke ngereja utai ti jai baka nya. Nya kebuah Iya muru mayuh bengkah bansa ari mua kita. Kita enda tau enda, enggau pengabis ati kita, mengkang taluk ngagai TUHAN Allah Taala kita. Taja pen orang ke diau di menua ti baru deka dialahka kita, mendingka manang, mendingka orang ke betilitka nasit, tang TUHAN Allah Taala kita enda ngasuh kita ngereja nya. “Lalu TUHAN Allah Taala kita deka meri kita siku nabi ke baka aku, ari bansa kita empu, lalu kita enda tau enda ngasika iya. Laban tu utai ti dipinta kita ari TUHAN Allah Taala kita ba Bukit Sinai, alai kita ke begempuru bebala mayuh, lebuh kita nyebut, ‘Enti kami agi majak ninga munyi nyawa TUHAN Allah Taala kami, tauka meda api ti mau, kami tentu mati.’ Lalu ku TUHAN bejaku ngagai aku, ‘Jaku sida endang ngena. Aku deka meri sida siku nabi ke baka nuan, ari bansa sida empu. Aku deka nepuka leka jaku Aku ke dalam mulut iya, lalu iya deka madahka semua pesan Aku ngagai sida. Barang sapa enda mendingka jaku ti disebut nabi nya dalam nama Aku, Aku deka ngasuh orang nya betanggungjawapka diri empu. Tang enti nabi berani bejaku mai pesan dalam nama petara bukai, tauka ngumbai diri bejaku dalam nama Aku, tang ukai ari asuh Aku, iya enda tau enda mati ketegal nya.’ “Kita nyangka berunding dalam ati diri, ‘Baka ni ku jalai kitai nemu jaku nya ukai jaku TUHAN?’ Enti nabi nya bejaku dalam nama TUHAN, tang utai ti ku iya nya nadai nyadi, nya nunjukka pesan nya ukai ari TUHAN. Nabi nya bejaku ngena kuasa iya empu. Anang takutka jaku nya. “Lebuh TUHAN Allah Taala kita udah ngerusak orang ke bempu menua ti diberi Iya ngagai kita, lalu kita udah ngerampas nengeri enggau rumah sida lalu udah ngentapka diri dia, kita enda tau enda ngeletak tiga buah nengeri alai ngerarika diri di menua ti diberi TUHAN Allah Taala kita ngagai kita. Sukat penyauh nengeri nya, lalu bagi menua ti diberi TUHAN Allah Taala kita nyadika pesaka kita, ngagai tiga bagi, ngambika orang ke tekelanjur tebunuhka orang tau rari ngagai sebuah ari nengeri nya. Tu pasal orang ke tekelanjur tebunuhka orang, lalu ngerarika diri ngagai nengeri nya, deka ngidupka nyawa diri, iya nya pasal orang ke tekelanjur tebunuhka orang ke ukai munsuh iya: Ambika banding, enti dua iku orang ari bala kita bejalai ke babas deka ngambi kayu, lalu lebuh siku ari seduai nya nebang kayu, pala kapak iya ngelechut ari baur iya, lalu kena pangan iya, lalu pangan iya nya mati, iya ke tebunuhka pangan iya tau ngerarika diri ngagai sebuah ari nengeri nya, ngidupka nyawa diri. Tang enti nengeri nya semina sebuah aja, nyangka nengeri nya kelalu jauh, lalu kaban belayan ti deka bebalaska pemati nya ulih tepegaika orang nya lalu, enggau ati ti balat ringat, munuh iya taja pen iya nadai penyalah. Laban iya ti bendar, iya ukai sengaja munuh pangan iya. Nya kebuah aku ngasuh kita ngeletak tiga buah nengeri. “Enti TUHAN Allah Taala kita ngerembaika rampa menua kita, munyi ti dipadahka Iya ngagai aki ini kita ngena sumpah, lalu Iya meri ngagai kita semua menua ti udah disemaya deka diberi Iya ngagai kita, lalu kita ngasika semua pesan ti diberi aku ngagai kita sehari tu, iya nya rinduka TUHAN Allah Taala kita, sereta nitihka jalai Iya, nya baru kita tau nambahka tiga buah agi nengeri ngagai nengeri ti tiga buah nya, ngambika orang ke nadai penyalah nya enda mati dalam menua ti diberi TUHAN Allah Taala kita nyadika pesaka kita, lalu ninggang kita enggau penyalah munuh orang. “Tang enti sema kita endang sengaja munuh munsuh kita, lalu udah nya kita ngerarika diri ngagai nengeri nya, deka ngidupka nyawa diri, bala tuai nengeri kita empu deka mesanka kita, lalu nyerahka kita ngagai kaban belayan ke ngiga balas ke pemati nya, ngambika kita dibunuh. Nadai orang deka kasihka kita. Menua Israel enda tau enda muai semua orang ke munuh orang, ngambika kita diau lantang senang. “Anang mindahka pak kelai entara enggau tanah orang, ti lama udah diletak ba menua ti diberi TUHAN Allah Taala kita ngagai kita. “Saksi ari siku orang aja enda umbas kena nyalah orang. Abis kurang iya, dua iku saksi diguna, kena netapka orang nya salah. Enti orang nguji ngemediska pangan diri ngena jaku petenah, seduai iya enda tau enda sama mansang ngagai endur alai kita ke nyembah TUHAN, lalu diakim bala imam enggau bala hakim ke bekereja sehari nya. Bala hakim deka mansik pekara nya enggau silik, lalu enti orang nya amat udah betenah, iya deka diukum ngena ukum ti diletak ninggang pangan iya, enti sema pangan iya amat salah. Nya meh jalai bansa kita deka muai penyai nya. Udah nya baru semua orang bukai deka ninga pasal pekara nya lalu takut, lalu nadai agi orang berani ngereja utai ti jai baka nya ba bala kita. Anang kasihka orang nya: nyawa balas nyawa, mata balas mata, ngeli balas ngeli, jari balas jari, kaki balas kaki. “Lebuh kita mansang ngelaban munsuh, lalu kita meda kerita perang enggau kuda, enggau bala soldadu sida mayuh agi ari bala soldadu kita, anang takutka sida. Laban TUHAN Allah Taala kita, ti udah mai kita pansut ari menua Ejip, deka meruan enggau kita. Sebedau kita berengkah belaban, siku imam enda tau enda mansang ke mua, lalu nyebut ngagai bala soldadu munyi tu: ‘Kita orang Israel, pendingka tu ulih kita! Sehari tu kita deka mansang beperang. Anang takutka munsuh, tauka lemi semengat, tauka begau abis ati, laban TUHAN Allah Taala kita deka bejalai enggau kita, beperang ngarika kita, lalu meri kita pemenang.’ “Udah nya bala pemesai deka bejaku enggau bala soldadu munyi tu, ‘Kati bisi lelaki ditu ke baru udah ngaga rumah, tang apin nyerahka rumah nya? Enti iya apin, iya enda tau enda pulai, enggai ke iya mati beperang, lalu orang bukai deka nyerahka rumah iya. Kati bisi lelaki ditu ke baru udah nanam kebun anggur, tang apin bisi peluang ngetau buah ari kebun nya? Enti iya apin, iya enda tau enda pulai, enggai ke iya mati beperang, lalu orang bukai deka ensepi penyamai buah anggur nya. Kati bisi lelaki ditu ke betunang deka bebini? Enti bisi, iya enda tau enda pulai, enggai ke iya mati beperang, lalu orang bukai jadi enggau tunang iya.’ “Bala pemesai mega deka nyebut ngagai bala soldadu sida munyi tu, ‘Kati bisi lelaki ditu takut? Enti bisi, iya enda tau enda pulai, enggai ke iya marit orang bukai takut.’ Lebuh bala pemesai udah tembu bejaku ngagai bala soldadu, nya baru orang ke nyadi tuai ke siti-siti raban enda tau enda dipilih. “Lebuh kita mansang nyerang sebuah nengeri, kita enda tau enda dulu meri peluang ngasuh orang dia nunduk. Enti sida muka pintu nengeri lalu nunduk, semua sida deka nyadi ulun kita, lalu ngereja pengawa ti berat ke kita. Tang enti orang dalam nengeri nya enggai nunduk, tang keras deka ngelaban, kelulung nengeri nya ngena bala soldadu kita. Udah nya, lebuh TUHAN Allah Taala kita ngasuh kita ngalahka nengeri nya, bunuh semua lelaki ke dalam nengeri nya. Tang kita tau ngambi indu, anak mit, jelu tupi enggau semua utai bukai dalam nengeri nya ke kita empu. Kita tau ngena utai ti diempu munsuh kita laban TUHAN udah meri utai nya ngagai kita. Nya jalai kita ngereja utai ba nengeri ti jauh ari menua ti alai kita ngentapka diri. “Tang lebuh kita ngalahka nengeri dalam menua ti diberi TUHAN Allah Taala kita ngagai kita, bunuh semua utai ti enseput dalam nengeri nya. Luska semua orang Iti, orang Amor, orang Kanaan, orang Peris, orang Ibi, orang Jebus, munyi ti dipesanka TUHAN. Bunuh sida ngambika sida enda mai kita bedosa ngelaban TUHAN ngena ajar ti ngasuh kita ngereja semua utai ti jai, ti dikereja sida lebuh sida nyembah petara sida. “Lebuh kita nguji ngalahka nengeri, anang betebangka kayu buah dia, taja pen kita lama ngelulung nengeri nya. Empa buah nya, tang anang munuh kayu nya. Kayu nya ukai munsuh kita. Kita tau nebang kayu bukai kena kita begagaka kuta ti dikena kita ngelulung nengeri nya, datai ke nengeri nya alah. “Enti orang bisi ditemu kena bunuh orang ba padang di menua ti deka diberi TUHAN Allah Taala kita ngagai kita, lalu kita enda nemu sapa munuh iya, bala tuai bansa enggau bala hakim kita enda tau enda angkat lalu nyukat penyauh endur alai bangkai nya ditemu ngagai genap buah nengeri ti semak endur nya. Udah nya bala tuai ke dalam nengeri ti pemadu semak, enda tau enda milih siku sapi ti indu ti agi biak, ti enda kala dikena ngereja pengawa. Sida lalu mai sapi ti indu nya ngagai siti endur ti semak siti sungai ti nadai kala rangkai, lalu tanah dia pen nadai mega kala dichangkul tauka ditanam enggau utai. Dia sida deka matahka rekung sapi ti indu nya. Bala imam Lewi deka mansang ke mua, laban TUHAN Allah Taala kita udah milih sida bekereja ke Iya, lalu madahka berekat dalam nama TUHAN, lalu ari pemutus penemu sida, semua laya diputarka magang. Udah nya semua tuai ari nengeri ti pemadu semak ari endur alai bangkai orang nya ditemu, enda tau enda masu jari sida atas sapi ti indu ti udah dipatahka rekung nya lalu nyebut, ‘Kami nadai munuh orang tu, lalu kami enda mega nemu sapa ti munuh iya. TUHAN, ampun meh orang Israel, ti udah ditebus Nuan. Anang nejuka darah orang ke nadai penyalah ninggang nembiak Nuan orang Israel.’ Sida lalu diampun. Nya alai, laban kita ngereja utai ti diasuh TUHAN, kita enda kena tinggang penyalah ketegal pemati orang nya. “Lebuh TUHAN Allah Taala kita meri kita pemenang lebuh beperang, lalu kita bulih orang tangkap, kita nyangka bisi tepedaka, ba bala orang tangkap nya, indu ke bajik, ti deka diambi kita nyadika bini. Bai iya ngagai rumah nuan. Dia iya enda tau enda ngukur buk iya, mipil kukut iya, lalu nukar gari iya. Iya deka diau dalam rumah nuan, lalu ngulitka apai indai iya sebulan. Udah nya baru nuan tau jadi enggau iya. Lepas nya, enti nuan enggai agi jadi enggau iya, nuan enda tau enda ngelepaska iya. Nyadi laban nuan udah mejalka iya beleman enggau nuan, nuan enda tau ngaga iya baka ke ngaga ulun lalu nyual iya. “Enti sema orang bisi dua iku bini, lalu bini iya ke dua iku nya sama ngadaka anak lelaki, tang anak ke dulu agi ada nya ukai anak ari indu ke balat dikerinduka iya, lebuh iya berundingka chara iya deka magi reta tengkira iya ngagai bala anak iya, iya enda tau semina berundingka anak ari bini ke balat agi dikerinduka iya, lalu meri iya ungkup ti endang patut diempu anak tuai iya. Iya enda tau enda meri dua kali lipat mayuh agi ungkup ngagai anak tuai iya, taja pen anak tuai iya nya ukai anak ari bini ke balat agi dikerinduka iya. Apai enda tau enda ngaku anak tuai diri empu, lalu meri ngagai iya ungkup ti endang patut diempu iya ti nyadi anak tuai, nitihka adat. “Enti sema orang bisi siku anak lelaki ke kieh sereta deka ngelaban, ke enggai ngasika apai indai iya, taja pen seduai iya disiplin iya, apai indai iya enda tau enda mai iya ngagai bala tuai di nengeri ti alai sida diau, lalu ngasuh iya kena pechara. Apai indai orang nya deka nyebut ngagai bala tuai, ‘Anak kami duai tu kieh sereta deka ngelaban, lalu enggai ngasika kami duai. Iya bebasauka duit sereta pemabuk.’ Udah nya bala orang lelaki di nengeri nya lalu nuku iya ngena batu datai ke mati. Nya meh chara kita muai orang ke jai nya ari bala kita. Semua orang di menua Israel deka ninga berita pasal utai ti udah nyadi, lalu sida deka takut. “Enti orang udah kena ukum bunuh laban iya udah ngereja penyalah, lalu bangkai iya digantung ari sebatang tiang, bangkai nya enda tau ditejuka begantung dia semalam-malam nya. Bangkai nya enda tau enda dikuburka sehari nya, laban bangkai orang ke digantung ari tiang, mai sumpah Allah Taala ngagai menua. Kuburka bangkai orang nya, ngambika kita enda ngamahka menua ti diberi TUHAN Allah Taala kita, ngagai kita. “Enti kita bisi tepedaka sapi tauka bedus orang Israel lelang, anang enda ibuhka jelu nya. Bai jelu nya pulai baru ngagai orang ke bempu iya. Tang enti orang ke bempu jelu nya diau jauh ari kita, tauka kita enda nemu sapa ke bempu jelu nya, bai jelu nya ngagai rumah kita. Lebuh orang ke bempu iya datai ngiga iya, beri jelu nya ngagai iya. Kereja mega baka nya ba pasal keledai, gari, tauka utai bukai ti lenyau ari jari orang Israel. “Enti keledai tauka sapi orang Israel rebah, anang enda ibuhka jelu nya. Saup orang nya ngangkatka jelu iya bediri baru. “Indu enda tau ngena pekayan lelaki, lalu lelaki pen enda mega tau ngena pekayan indu. TUHAN Allah Taala kita begedika orang ke ngereja utai ti baka nya. “Enti kita tetemuka sarang burung ba kayu, tauka ba tanah, lalu indu burung nya meram telu tauka anak iya, anang ngambi indu burung nya. Kita tau ngambi anak burung nya, tang kita enda tau enda ngelepaska indu iya, ngambika kita gayu-guru sereta kaya-raja. “Lebuh kita ngaga rumah baru, gaga reraga ba tisi perabung rumah nya. Nya baru kita enda betanggungjawap enti orang labuh ari perabung nya lalu mati. “Anang nanam utai bukai ba kebun anggur kita. Enti kita nanam utai bukai dia, kita enda tau ngambi asil ari kebun nya, nemuka buah anggur tauka utai bukai. “Anang begandinka jelu sapi enggau keledai lebuh kita ngeradu tanah. “Anang ngena gari ti ditenun ari bulu bedus begulai enggau linin. “Jait rambing ba empat iti sukut gari kita. “Enti lelaki jadi enggau indu siku, lalu udah nya berunding enggai agi jadi enggau iya, lalu iya ngaga mayuh macham petenah ngagai indu nya, madahka iya ukai dara bungas lebuh seduai iya jadi, apai enggau indai indu nya enda tau enda nyerahka kelai ngagai bala tuai ba pintu kuta nengeri nya, kena netapka indu nya endang amat dara bungas. Apai indu nya deka nyebut ngagai sida, ‘Aku ngasuh anak indu aku jadi enggau lelaki tu, lalu diatu lelaki tu enggai agi jadi enggau iya. Iya udah betenahka iya, ngumbai iya ukai dara bungas lebuh seduai iya jadi enggau pangan diri. Tu tanda anak aku agi dara bungas lebuh seduai iya jadi enggau pangan diri. Peda kita bekau darah ba chadar tilam tu!’ Udah nya bala tuai nengeri nya deka mai laki indu nya, lalu malu iya. Sida mega deka ngukum iya seratus singkap duit pirak, lalu meri duit nya ngagai apai indu nya, laban lelaki nya udah ngemaluka indu orang Israel. Nambahka nya, indu nya deka mengkang jadi enggau lelaki nya, lalu lelaki nya enda tau muai indu nya seagi-agi lelaki nya idup. “Tang enti utai ti dipedawaka lelaki nya endang sigi amat, lalu tanda indu nya agi dara bungas pen nadai, sida enda tau enda mai indu nya pansut ngagai pintu penama rumah apai iya, alai orang lelaki ke di nengeri nya deka nuku indu nya ngena batu datai ke mati. Iya udah ngereja utai ti ngemaluka bansa kitai, laban iya udah beleman enggau lelaki sebedau iya belaki lebuh iya agi diau dalam rumah apai iya. Nya meh jalai kita muai penyai nya ari bala kita. “Enti lelaki kena tangkap beleman enggau bini orang bukai, seduai iya deka sama dibunuh. Nya meh jalai kita deka muai penyai nya ari menua Israel. “Enti lelaki kena tangkap ba sebuah nengeri lebuh iya beleman enggau indu siku ke betunang enggau orang bukai, kita enda tau enda mai seduai iya pansut ari nengeri nya, lalu nuku seduai iya ngena batu datai ke seduai iya mati. Indu nya enda tau enda dibunuh, laban iya nadai ngangau minta tulung, taja pen iya dalam nengeri, alai orang ulih ninga iya. Lalu lelaki nya enda tau enda mega dibunuh, laban iya beleman enggau orang ke betunang. Nya meh jalai kita muai penyai nya ari bala kita. Enti lelaki masung indu siku dalam babas, lebuh indu nya benung betunang enggau lelaki bukai, semina lelaki ke masung iya nya aja deka dibunuh. Kita enda tau ngereja sebarang utai ngagai indu nya, laban iya nadai ngereja dosa ti tau ngasuh iya diukum bunuh. Pekara nya sebaka enggau pekara pasal lelaki ke ngamuk lelaki siku, lalu munuh iya. Lelaki nya masung indu nya dalam babas, lalu taja pen indu nya rauh-rauh minta tulung, tang orang nadai datai nyaup iya. “Enti lelaki kena tangkap masung indu ke biak, ti enda betunang, lelaki nya enda tau enda mayar derian lima puluh singkap duit pirak ngagai apai indu nya, lalu indu nya nyadika bini iya, laban iya udah mejalka indu nya beleman enggau iya. Lalu iya enda tau muai indu nya seumur idup. “Lelaki enda tau beleman enggau bini apai iya, laban nya ngemaluka apai iya. “Orang ke udah dipeliri, tauka udah dikempat utai ti dilalaika lelaki, enda tau nyadi raban nembiak TUHAN. “Anak ampang, tauka peturun anak ampang enda tau nyadi nembiak TUHAN. Indah nyentuk ngagai serak ti kesepuluh deh sida enda tau nyadi nembiak TUHAN. “Orang bansa Amon, tauka orang Moap, tauka peturun sida, nyentuk ngagai serak ti kesepuluh, enda tau nyadi raban nembiak TUHAN, laban sida enda meri kita pemakai enggau ai irup lebuh kita di rantau jalai pansut ari menua Ejip, lalu sida ngaji Balaam anak Beor, ari nengeri Petor di Mesopotamia, nyumpah kita. Tang TUHAN Allah Taala kita enggai mendingka Balaam, lalu mutarka sumpah nya nyadika berekat, laban Iya rinduka kita. Anang nulung bansa orang nya, tauka ngasuh sida kaya-raja, sepemanjai umur kita. “Anang mechat orang Edom laban sida iya kaban belayan kita empu. Lalu anang mechat orang Ejip, laban kita udah diau nyadi orang kampar di menua sida. Berengkah ari serak ti ketiga ke atas, peturun bansa orang nya tau nyadi raban nembiak TUHAN. “Lebuh kita diau dalam kem deka mansang nyerang munsuh kita, kita enda tau enda nyeliahka utai ti tau ngasuh kita enda tuchi. Enti lelaki nyadi enda tuchi laban iya bisi mansutka ai mani lebuh iya tinduk, iya enda tau enda pansut ari kem; iya enda tau tama ngagai kem. Lebuh hari nyau lemai, iya enda tau enda masu diri ngena ai, lalu ba padam mata panas iya tau pulai baru ngagai kem. “Kita enda tau enda bisi siti endur di luar kem alai kita kemi bira. Siti ari pekekas ti dibai kita nya utai kena ngeruang tanah; lebuh kita asai ti deka kemi bira, kita tau ngeruang lubang ngena pengeruang tanah nya, lalu udah nya ngelamun tai kita. Laban TUHAN Allah Taala kita bejalai enggau kem kita, nyaga kita lalu nyerahka munsuh kita ngagai jari kita, nya alai kem kita enda tau enda diintu kudus, ngambika Iya nadai meda utai ti enda menuku ba bala kita lalu nguingka belakang iya ngagai kita. “Enti ulun rari ari tuan iya, lalu iya datai ngagai kita, anang nganjung iya pulai baru. Sida tau diau enggau kita, dalam nengeri ti dipilih sida nitihka peneka ati sida empu, lalu kita enda tau nekanka pengidup sida. “Orang Israel, nemuka lelaki tauka indu, nadai tau nyadi sundal dalam rumah sembiang. Kita enda tau mai duit ti ulih orang nyundal, tauka gaji lelaki ke nyundal, ngagai rumah TUHAN Allah Taala kita, kena kita ngamatka semaya, laban utai dua bengkah nya dipegedika TUHAN. “Kita enda tau minta anak ari utai ti dijali kita ngagai orang Israel, nemuka utai nya duit, tauka pemakai, tauka utai bukai. Kita tau minta anak ari duit ti dijali kita ngagai orang kampar, tang kita enda tau minta anak ari duit ti dijali kita ngagai orang Israel. Kita enda tau enda ngasika adat tu. Nya baru TUHAN Allah Taala kita deka merekatka semua utai ti dikereja kita di menua ti deka diempu kita. “Lebuh kita ngaga semaya enggau TUHAN Allah Taala kita, anang laun ngamatka semaya nya. TUHAN enggai meda kita enda ngamatka semaya kita. Kita bedosa enti kita enda ngamatka semaya diri. Kita enda salah enti kita enda ngaga semaya enggau TUHAN, tang enti kita ngaga semaya laban kita endang deka, kita enda tau enda ngamatka semaya nya. “Lebuh kita bejalai niti jalai ba kebun anggur orang bukai, kita tau makai buah anggur naka ti ulih empa kita, tang kita enda tau ngisi ma kita lalu mai buah nya kebukai. Lebuh kita bejalai niti jalai nengah umai orang, kita tau makai gandum naka ti ulih dirurut kita, tang kita enda tau ngetau gandum nya ngena ketap. “Enti lelaki jadi enggau siku indu, lalu udah nya berunding enggai agi jadi enggau indu nya, laban iya bisi tetemuka utai pasal bini iya ti ngasuh ati iya enda lantang, iya tau nulis surat sarak, meri surat nya ngagai bini iya, lalu ngasuh bini iya angkat ari rumah nya. Enti sema indu nya jadi enggau lelaki bukai, lalu lelaki nya mega berunding enggai agi jadi enggau iya, lelaki nya enda tau enda nulis surat sarak, meri surat nya ngagai indu nya, lalu ngasuh iya angkat ari rumah nya (tauka, enti laki ke lumur dua nya mati). Ba pekara dua bengkah tu, laki ke terubah enda tau jadi enggau indu nya baru, lebuh indu nya udah ngamahka diri; laban TUHAN begedika utai ti baka nya, lalu kita enda tau ngereja penyalah ti baka nya dalam menua ti udah diberi TUHAN Allah Taala kita nyadika pesaka kita. “Lebuh lelaki baru udah jadi enggau bini iya, iya enda tau nyadi soldadu, tauka diasuh ngereja pengawa bukai ti besangkut-paut enggau pengawa soldadu. Iya tau pulai ke rumah setaun, lalu ngelantangka diri enggau bini ke baru udah enggau iya jadi. “Lebuh kita nyali utai ngagai orang, kita enda tau minta kisar nyadika gadai utai nya, laban enti kita ngereja nya, kita ngambi utai ti dikena sida sebilik nyendiaka pemakai kena sida ngidupka diri. “Enti kita nangkap lalu nabanka orang Israel, lalu ngaga sida nyadi ulun kita, tauka nyual sida nyadi ulun, kita enda tau enda dibunuh. Nya meh jalai kita muai penyai nya ari bansa kita. “Lebuh kita ngidapka penyakit kulit ti tau ngerampit, kita enda tau enda ngereja utai munyi ti diasuh imam Lewi. Titihka atur ti udah diberi aku ngagai sida. Kingatka utai ti udah dikereja TUHAN Allah Taala kita ngagai Miriam lebuh kita di rantau jalai pansut ari menua Ejip. Lebuh kita nyali utai ngagai orang, anang tama ngagai rumah orang nya lalu ngambi tajung ti deka diberi iya nyadika gadai. Anti iya di luar, nganti iya mai utai nya ngagai kita. Enti iya seranta, anang ngasuh tajung nya bemalam ba jari kita. Pulaika utai nya ngagai iya tiap lemai, ngambika iya bisi utai kena tinduk. Nya baru iya deka beterima kasih ngagai kita, lalu TUHAN Allah Taala kita deka lantang ati ngagai kita. “Anang ngelakar orang gaji ke seranta, ke suntuk, nemuka sida nya orang Israel tauka orang kampar ti diau dalam nengeri kita. Genap hari, sebedau padam mata panas, bayar gaji sida ke sehari nya. Sida begunaka duit nya, lalu ngarapka diri nerima duit nya. Enti kita enda mayar gaji sida, sida deka ngangauka TUHAN minta Iya ngelaban kita, lalu kita bedosa. “Apai indai enda tau dibunuh ketegal penyalah anak sida, lalu anak pen enda mega tau dibunuh ketegal penyalah apai indai sida. Orang semina tau dibunuh ketegal penyalah sida empu. “Anang ngerampas hak orang kampar, tauka hak orang ke nadai apai indai, lalu anang ngambi kain ari indu ke balu nyadika gadai utai ti dijali. Kingatka diri ti udah nyadi ulun di menua Ejip, lalu TUHAN Allah Taala kita udah nebus kita ari menua nya. Nya kebuah aku meri kita pesan tu. “Lebuh kita ngetau umai kita, lalu kita ninggalka sekeda gandum ti udah diketau kita, anang nikal baru lalu ngumpul utai nya. Tinggalka utai nya ke orang kampar, enggau ke orang ke patu balu, ngambika TUHAN Allah Taala kita merekatka kita dalam semua utai ti dikereja kita. Lebuh kita udah ngetau buah kana kita sekali, anang ngulihka buah ti tinggal. Tinggalka buah nya ke orang kampar, enggau ke orang ke patu balu. Lebuh kita udah ngumpul buah anggur kita sekali, anang mutik buah ti tinggal. Buah ti tinggal nya ungkup ke orang kampar, enggau ke orang ke patu balu. Kingatka diri ti udah nyadi ulun di menua Ejip. Nya kebuah aku meri pesan tu ngagai kita. “Enti dua iku orang Israel mansang ngagai kot minta orang ngatur laya seduai iya, lalu siku ari seduai iya nya dikumbai enda salah, lalu siku dikumbai salah, lalu enti iya ke salah nya diukum sipat, hakim enda tau enda ngasuh iya tingkap ba tanah, lalu ngasuh iya disipat. Penyuah iya disipat deka bepanggai ba pemerat penyalah iya. Iya tau disipat nyentuk ngagai empat puluh kali, tang enda tau lebih ari nya. Enti lebih ari nya, utai nya deka ngemaluka iya di mua orang mayuh. “Anang mampul mulut sapi lebuh kita ngena sida nungku gandum. “Enti orang dua iku diri menyadi diau ba sebidang tanah, lalu siku ari seduai nya mati, nadai ninggalka anak, balu menyadi ke mati nya enda tau jadi enggau lelaki bukai ke ukai ari ruang bilik laki iya. Menyadi lelaki orang ke udah mati nya betanggungjawap jadi enggau indu ke balu nya. Anak tuai seduai iya deka dikumbai anak orang ke udah mati nya, ngambika iya enda putus purih di menua Israel. Tang enti menyadi orang ke mati nya enggai jadi enggau indu nya, indu nya empu enda tau enda betemu enggau bala tuai di nengeri nya, lalu nyebut ngagai sida, ‘Menyadi laki aku enggai ngereja pengawa diri. Iya enggai meri menyadi iya purih dalam bansa orang Israel.’ Udah nya bala tuai di nengeri nya enda tau enda mesanka lelaki nya lalu bejaku enggau iya. Enti iya mengkang enggai jadi enggau indu nya, balu menyadi iya enda tau enda betemu enggau iya, di mua semua bala tuai di nengeri nya, ningkilka kasut iya sepiak, ngeludah mua iya, lalu nyebut, ‘Tu utai ti nyadi ngagai orang ke enggai meri purih ngagai menyadi iya.’ Ruang bilik lelaki nya deka dikumbai ‘ruang bilik orang ke udah tingkil kasut.’ “Enti dua iku lelaki belaya, lalu bini lelaki ti siku nguji nyaup laki iya, lalu ngeremuk utai lelaki ti siku nya, anang kasihka indu nya; tetak jari iya. Kena timbang enggau penyukat ti betul, ngambika kita gayu-guru nguan menua ti diberi TUHAN Allah Taala kita ngagai kita. TUHAN begedika orang ke ngakal. “Kingatka utai ti udah dikereja orang Amalek ngagai kita, lebuh kita pansut ari menua Ejip, pasal sida ke nyerang kita di rantau jalai, lebuh kita lepi sereta lelak, lalu munuh semua bala kita ke enda tetitihka bala mayuh bejalai; orang Amalek nya enda nangika Allah Taala. Nya alai, lebuh TUHAN Allah Taala kita udah meri menua nya ngagai kita, lalu udah ngasuh kita diau likun ari semua munsuh ke ngelingi kita, kita enda tau enda munuh semua orang Amalek, ngambika sida enda agi dikingatka. Anang enda ingat ngereja nya! “Lebuh kita udah ngambi menua ti diberi TUHAN Allah Taala kita ngagai kita, lalu udah ngentapka diri dia, kita enda tau enda mai sekeda buah bungas ari utai ti ditanam kita, ti diketau kita di menua ti diberi TUHAN Allah Taala kita ngagai kita, lalu kita enda tau enda nyimpan utai nya dalam bakul, lalu mansang ngagai endur alai TUHAN Allah Taala kita disembah. Mansang kita ngagai imam ke bekereja lebuh maya nya, lalu sebut ngagai iya, ‘Sehari tu aku ngaku ngagai TUHAN Allah Taala aku, aku udah datai di menua ti udah disemaya deka diberi Iya ngagai aki ini kitai.’ “Lebuh imam nya ngambi bakul nya ari jari kita, lalu ngengkahka bakul nya di mua alta TUHAN Allah Taala kita, kita enda tau enda nyebut leka jaku tu di mua TUHAN Allah Taala kita: ‘Aki ini kami orang Aram ti diau segau-segau ba sebelah endur; iya enggau sida sebilik mansang ngagai menua Ejip, lalu diau dia nyadi orang kampar; sida nadai mayuh tubuh, tang sida nyadi bansa ti besai, ti kering sereta mayuh tubuh. Lebuh orang Ejip jai enggau kami, lalu mejalka kami nyadi ulun, kami nyabak ngangauka TUHAN Allah Taala aki ini kami; TUHAN ninga kami lalu meda pemedis, penusah enggau pemerinsa kami. TUHAN lalu mai kami pansut ari menua Ejip ngena jari Iya ti kering, enggau ngena lengan ti diunjurka Iya, ngena kuasa ti besai ti dipandangka Iya, sereta enggau ngena kereja ajih, enggau kereja ti nyelai; lalu Iya udah mai kami ngagai endur tu, lalu meri menua ti kaya sereta ami tu ngagai kami. Nya alai diatu aku mai buah bungas ari utai ti ditanam aku ba tanah ti udah diberi Nuan, O TUHAN, ngagai aku.’ Kita lalu ngengkahka bakul nya di mua TUHAN Allah Taala nuan, lalu meremi di mua Iya. Udah nya kita, sama enggau orang Lewi, sereta enggau orang kampar ti diau begulai enggau kita, deka rami gaga ngena utai ti udah diberi TUHAN Allah Taala kita, ngagai kita, enggau ngagai kita sebilik. “Lebuh kita udah tembu meri semua pemeri sepuluh peratus kita dalam taun ti ketiga (ti dikumbai taun alai meri pemeri sepuluh peratus), alai kita ke meri pemeri sepuluh peratus kita ngagai orang Lewi, ngagai orang kampar, ngagai orang ke patu balu, ngambika sida makai lalu kenyang dalam nengeri kita, kita enda tau enda nyebut di mua TUHAN Allah Taala kita: ‘Aku udah mai pemeri sepuluh peratus ti kudus nya ari rumah aku, lalu aku udah meri pemeri nya ngagai orang Lewi, ngagai orang kampar ti diau begulai enggau kami, ngagai orang ke patu balu, nitihka semua pesan ti diberi Nuan ngagai kami; aku nadai ngelanggar tauka enda ingatka pesan Nuan: Aku nadai makai utai nya lebuh aku ngulit; Aku nadai mai utai nya pansut ari rumah aku lebuh aku enda tuchi, lalu aku nadai udah meri utai nya nyadika piring ke orang ke udah mati. Aku udah ngasika TUHAN Allah Taala aku, ngereja semua utai ti udah dipesanka Nuan. Malik ke baruh kitu ari endur Nuan ti kudus di serega, lalu berekatka bala nembiak Nuan Israel, enggau menua ti udah diberi Nuan ngagai kami ngena sumpah ngagai aki ini kami, menua ti kaya sereta ami.’ “Sehari tu TUHAN Allah Taala kita bejaku ngasuh kita ngasika semua adat Iya. Nya alai, kita enda tau enda tetap ati ngasika semua adat nya enggau pengabis ati, enggau pengabis semengat kita. Sehari tu kita udah ngaku TUHAN nyadika Allah Taala kita. Kita udah besemaya deka ngasika Iya, nitihka semua adat Iya, lalu ngereja semua utai ti dipesanka Iya ngagai kita. Sehari tu TUHAN udah nyambut kita nyadika nembiak Iya, munyi ti udah disemaya Iya ngagai kita, lalu Iya ngasuh kita ngasika semua adat Iya. Iya deka ngaga kita nyadi bansa ti kering agi ari semua bansa bukai ti udah digaga Iya, lalu kita deka mai puji enggau basa ngagai nama Iya, lalu kita deka nyadi nembiak Iya, munyi ti udah disemaya Iya.” Udah nya Moses enggau bala tuai orang Israel, bejaku ngagai orang mayuh, “Kita enda tau enda ngasika semua pesan ti diberi aku ngagai kita sehari tu. Lebuh kita udah meraka Sungai Jordan, lalu datai ba menua ti diberi TUHAN Allah Taala kita ngagai kita, kita enda tau enda nirika berapa igi lampang batu ti besai, ngechat batu nya enggau kapu. Tuliska semua leka adat tu ba batu nya lebuh kita udah meraka sungai nya, deka mansang ngagai menua ti diberi TUHAN ngagai kita, menua ti kaya sereta ami, munyi ti udah disemaya TUHAN Allah Taala aki ini kita ngagai kita. Nya alai lebuh kita udah meraka Sungai Jordan, dirika lampang batu nya ba Bukit Ebal, munyi ti diasuh aku kereja kita sehari tu, lalu chat batu nya enggau kapu. Gaga siti alta ke TUHAN Allah Taala kita dia ari batu ti nadai kala dipansap ngena besi. Giga batu ti tau dikena enda ibuh dipansap. Udah nya beri piring tunu kita ngagai TUHAN Allah Taala kita ba alta nya. Beri mega piring pemaik, lalu empa piring nya dia, rami gaga di mua TUHAN Allah Taala kita. Kita enda tau enda nuliska semua leka jaku adat tu enggau terang ba semua lampang batu nya.” Udah nya Moses enggau bala imam Lewi lalu bejaku ngagai semua orang Israel, “Anang ragak, kita orang Israel, lalu pendingka aku. Sehari tu kita udah nyadi nembiak TUHAN Allah Taala kita. Nya alai kita enda tau enda ngasika Iya lalu nitihka semua pesan enggau adat Iya ti diberi aku ngagai kita sehari tu.” Sehari nya Moses mega bejaku ngagai orang Israel, “Lebuh kita udah meraka Sungai Jordan, tu bagi raban bansa ti enda tau enda bediri ba Bukit Gerisim lebuh jaku berekat disebut: Raban bansa Simeon, Lewi, Judah, Isakar, Josep, enggau Benjamin. Lalu tu bagi raban bansa ti deka bediri ba Bukit Ebal lebuh jaku sumpah disebut: Raban bansa Reuben, Gat, Aser, Sebulun, Dan enggau Naptali. Udah nya orang Lewi deka nyebut leka jaku tu enggau nyawa ti inggar ngagai semua orang Israel: “Barang sapa ngaga engkeramba, tauka ngaga anak patung, utai ti dipegedika TUHAN, lalu belalai nirika utai nya, deka tulah.” Lalu semua orang mayuh deka nyaut, “Amin!” “Barang sapa enda bebasaka apai indai diri, deka tulah.” Lalu semua orang mayuh deka nyaut, “Amin!” “Barang sapa mindahka pak kelai entara, deka tulah.” Lalu semua orang mayuh deka nyaut, “Amin!” “Barang sapa nguluka orang ke buta nengah jalai ti salah, deka tulah.” Lalu semua orang mayuh deka nyaut, “Amin!” “Barang sapa ngerampas hak orang kampar, orang ke patu balu, deka tulah.” Lalu semua orang mayuh deka nyaut, “Amin!” “Barang sapa ngemaluka apai iya, laban iya beleman enggau siku ari bini apai iya, deka tulah.” Lalu semua orang mayuh deka nyaut, “Amin!” “Barang sapa beleman enggau jelu, deka tulah.” Lalu semua orang mayuh deka nyaut, “Amin!” “Barang sapa beleman enggau menyadi indu tauka menyadi indu tiri diri, deka tulah.” Lalu semua orang deka nyaut, “Amin!” “Barang sapa beleman enggau mentua indu diri, deka tulah.” Lalu semua orang mayuh deka nyaut, “Amin!” “Barang sapa udah belalai munuh orang, deka tulah.” Lalu semua orang mayuh deka nyaut, “Amin!” “Barang sapa nerima gaji munuh orang ke nadai penyalah, deka tulah.” Lalu semua orang mayuh deka nyaut, “Amin!” “Barang sapa enda ngasika semua adat tu, deka tulah ditinggang sumpah.” Lalu semua orang mayuh deka nyaut, “Amin!” “Enti kita ngasika TUHAN Allah Taala kita, lalu tetap ati nitihka semua pesan Iya ti diberi aku ngagai kita sehari tu, TUHAN Allah Taala kita deka ngaga kita nyadi bansa ti pemadu bekuasa di dunya tu. Semua berekat tu deka diberi ngagai kita, enti kita ngasika TUHAN Allah Taala kita: “Nengeri enggau umai kita deka diberekatka. “Anak kita, utai ti ditanam kita, anak jelu tupi kita, nyengkaum anak sapi enggau anak domba kita, deka diberekatka. “Bakul roti enggau bisin ti dikena kita ngaga roti, deka diberekatka. “Kita deka diberekatka lebuh kita mupuk, enggau lebuh kita pulai. “ TUHAN deka ngasuh munsuh ke nyerang kita, alah laban kita. Sida deka datai nyerang kita nengah jalai siti, tang rari ari kita nengah tujuh bengkah jalai. “ TUHAN Allah Taala kita deka merekatka tibang kita, enggau semua pengawa ti dikereja kita; Iya deka merekatka kita di menua ti diberi TUHAN Allah Taala kita ngagai kita. TUHAN deka ngaga kita nyadi bansa ti kudus, munyi ti udah disemaya Iya ngena sumpah, enti kita ngasika pesan ti diberi TUHAN Allah Taala kita, lalu idup nitihka jalai Iya. Nya baru semua bansa di dunya tu deka nemu kita udah dipilih TUHAN nyadika nembiak Iya, lalu sida deka takutka kita. TUHAN deka meri kita mayuh anak, mayuh jelu sapi, bulih mayuh asil ari utai ti ditanam kita, di menua ti udah disemaya Iya ngagai aki ini kita, ti deka diberi Iya ngagai kita. TUHAN deka nukangka langit, alai Iya ke nyimpan ai ujan, lalu meri kita ai ujan nitihka musin, lalu merekatka semua pengawa kita. Kita deka nyali ngagai mayuh bengkah bansa, tang kita enda nginjau. TUHAN deka ngaga kita nyadi pala, ukai nyadi iku; kita deka seruran kaya-raja, nadai kala miskin, enti kita ngasika pesan TUHAN Allah Taala kita, ti diberi aku ngagai kita sehari tu, lalu enda limpang ke kiba tauka ke kanan ari sebarang jaku ti diberi aku ngagai kita sehari tu, sereta enda nitih tauka nyembah petara bukai. “Tang enti kita enda ngasika TUHAN Allah Taala kita, lalu enda tetap ati ngereja semua pesan enggau adat Iya ti diberi aku ngagai kita sehari tu, semua leka jaku sumpah tu deka ninggang kita: “Nengeri enggau umai kita deka ditinggang sumpah. “Bakul roti kita enggau bisin ti dikena kita ngaga roti, deka tulah ditinggang sumpah. “Anak kita, asil ti ulih kita ari umai kita, anak jelu sapi, enggau anak jelu bedus kita deka tulah ditinggang sumpah. Kita deka tulah ditinggang sumpah lebuh kita mupuk, enggau lebuh kita pulai. “ TUHAN deka ngasuh kita dituntung penusah lalu begau abis ati dalam semua utai ti dikereja kita, datai ke semua kita udah abis lengis enggau jampat, ketegal penyai ti dikereja kita, laban kita udah ninggalka Aku. TUHAN deka ngasuh penyakit betangkan-tangkan nyerang kita, datai ke semua kita abis mati di menua ti deka diambi kita. TUHAN deka merinsaka kita ngena sakit tibi, penyakit chelap-angat, penyakit bisul, ngena hari ti angat enggau kemarau, ngena penyakit kulat enggau penyakit bekuap. Penyakit nya deka nyerang kita, datai ke kita mati. Hari enda ujan, lalu tanah kita deka rangkai baka besi. TUHAN deka nganti ujan ngena amau lalu semina amau aja deka nurun ari langit, datai ke kita abis mati. TUHAN deka ngasuh kita alah laban munsuh kita. Kita deka nyerang sida nengah jalai siti, lalu kita deka rari ari sida nengah tujuh bengkah jalai, lalu semua orang di dunya tu deka takut lebuh sida meda utai ti nyadi ba kita. Bangkai kita deka nyadika pemakai burung enggau jelu babas, lalu nadai orang muru sida. TUHAN deka merinsaka kita enggau penyakit pisa, baka ke dikereja Iya ngagai orang Ejip. Iya deka merinsaka kita ngena penyakit rumbak, penyakit kuris enggau penyakit gatal, ti enda ulih digeraika. TUHAN deka merinsaka kita ngena penyakit gila, penyakit buta, enggau penyakit mamau. Kita deka bejalai gapa-gapa lebuh siang hari baka orang ke buta, lalu kita enda nemu tunga diri bejalai; lalu kita deka seruran dikeduan, sereta dirumpak orang, lalu nadai orang deka nulung kita. “Kita deka betunang enggau indu, tang orang bukai deka jadi enggau indu nya. Kita deka ngaga rumah, tang kita enda diau dalam rumah nya. Kita deka numbuhka kebun anggur, tang kita enda ngasaika penyamai buah anggur nya. Jelu sapi kita deka disayat orang di mua kita empu, tang kita enda makai dagin jelu nya. Keledai kita deka dichuri orang lebuh kita tegenung merening, lalu jelu nya enda dipulaika baru ngagai kita. Jelu bedus kita deka diberi ngagai munsuh kita, lalu nadai orang deka nulung kita. Anak lelaki enggau anak indu kita deka ditabanka munsuh ngagai menua bukai, lebuh kita genung-genung meda. Kita deka begigaka sida sepemanjai hari, tang nadai kuasa ngereja sebarang utai. Orang ke enda dikelala kita deka makai utai ti ditanam kita enggau utai ti ulih kita; kita deka seruran dikeduan sereta diperinsa, lalu nyadi gila meda utai ti dipeda kita. TUHAN deka malu patung kita, lalu ngasuh kaki kita abis pedis diempa rumbak ti enda ulih digeraika, kenyau ari tapa kaki nyentuk ngagai punjung pala kita. TUHAN deka mai kita, enggau raja kita ngagai menua bukai, ngagai bansa ti enda dikelala kita tauka dikelala aki ini kita, alai kita deka betuaika petara bukai ti digaga ari kayu enggau ari batu. Orang di menua ti deka alai TUHAN muai kita, deka tekenyit ati meda utai ti nyadi ba kita; sida deka merinsa sereta beduan kita. “Kita deka nanam mayuh benih, tang asil kita mimit, laban buntak deka makai utai ti ditanam kita. Kita deka nanam kebun anggur, lalu ngintu kebun nya, tang kita enda ngetau buah anggur nya, tauka ngirup wain ari anggur nya, laban ulat deka makai batang anggur kita. Kayu kana deka tumbuh di serata menua kita, tang kita nadai minyak kana kena kita ngunsut tubuh diri, laban buah kana nya deka gugur. Kita deka bisi anak lelaki, anak indu, tang sida deka lenyau ari jari kita, laban sida deka ditabanka orang nyadi orang tangkap. Semua kayu enggau utai ti ditanam kita deka diempa indu lukung. “Orang bansa bukai ti diau di menua kita deka mansang kering-sekering, lalu kita deka mansang lembut-selembut. Sida deka nyali kita duit, tang kita nadai duit dijali ngagai sida; sida deka nyadi pala, lalu kita nyadi iku. “Semua sumpah tu deka ninggang kita, ngagai kita lalu ngalahka kita, datai ke kita dirusak, laban kita enda ngasika TUHAN Allah Taala kita, enda nitihka pesan enggau adat ti diberi aku ngagai kita. Sumpah tu deka meruan enggau kita, sereta enggau peturun kita, kena nangkan kita belama iya. TUHAN ngasuh kita kaya-raja dalam semua utai, tang kita enggai nyembah Iya enggau ati ti gaga sereta beterima kasih, nya alai Iya deka ngasuh munsuh nyerang kita, lalu kita deka bekereja nyadi ulun sida. Kita deka lapar, aus, nadai gari, lalu suntuk semua utai. TUHAN deka nejuka munsuh kita merinsaka kita, datai ke kita mati. TUHAN deka ngasuh siti bansa datai ari tisi dunya nyambarka kita baka menaul, bansa ti enda ditemu kita jaku, bansa orang ke mangah, ti enda nemu bebasaka orang ke tuai, tauka kasihka orang ke biak. Sida deka ngerampas semua jelu tupi kita, enggau semua utai ti ditanam kita, ngambika kita lapar, nadai ninggalka gandum, wain, minyak kana, jelu sapi, tauka jelu bedus ke kita, datai ke kita mati. Sida deka ngelulung kita dalam semua nengeri kita, datai ke dinding kuta kita ke tinggi, ti dikarapka kita, runtuh di serata menua kita. Sida deka ngelulung kita dalam semua nengeri kita di serata menua ti udah diberi TUHAN Allah Taala kita, ngagai kita. “Laban kita kelalu balat merinsa dikelulung munsuh, kita deka bepakaika anak kita empu, ti udah diberi TUHAN Allah Taala kita ngagai kita. Kita deka makai isi anak lelaki, isi anak indu kita. Indah orang ke nelap sereta siru ari bala kita empu deh enggai magi pemakai nya ngagai menyadi iya empu, ngagai bini ke endang seruran diberap iya, enggau ngagai bala anak iya ti agi idup, enggai meri ngagai sida isi anak ti diempa iya, laban iya nadai pemakai bukai, laban iya udah kelalu balat merinsa dikelulung munsuh dalam nengeri kita. Indah indu ke nelap sereta siru ari bala kita empu, ti enda ngindikka kaki iya ngagai tanah, deh enggai meri pemakai nya ngagai laki ke endang seruran diberap iya, tauka ngagai anak lelaki iya, tauka ngagai anak indu iya. Indah entemuni anak iya empu, enggau anak ke diadaka iya empu, deh iya enggai magi ngagai sida, laban iya belalai makai utai nya, laban iya nadai utai bukai diempa, empa pemalat kita udah merinsa dikelulung munsuh. Ku Moses bejaku ngagai sida, “Enti kita enda tetap ati ngasika semua leka jaku ti ditulis dalam bup tu, lalu enda nangika pemesai mulia nama TUHAN Allah Taala kita, TUHAN deka ngukum kita enggau peturun kita ngena penyakit ti balat, ti enda ulih digeraika. Iya deka ngasuh semua penyakit ti udah nyadi di menua Ejip, ti balat diketakutka kita, lekat ba kita. Semua penyakit enggau pemerinsa bukai, taja pen sida nadai ditulis dalam Bup Adat tu, deka dikena TUHAN merinsaka kita, datai ke kita mati. Taja pen kita menya ngemayuh bintang ti di langit, tang semina mimit aja kita deka idup, laban kita enda ngasika TUHAN Allah Taala kita. Baka TUHAN ti gaga ati deka ngasuh kita kaya-raja sereta mayuh tubuh, baka nya mega TUHAN deka gaga ati ngerusak kita; kita deka dichabut ari menua ti deka diambi kita. TUHAN deka ngachirka kita ngagai semua bansa, di serata dunya, lalu dia kita deka nyembah petara bukai ti digaga ari kayu tauka ari batu, petara ti enda ditemu kita tauka ditemu aki ini kita. Lebuh kita diau di menua bukai, kita nadai pemaik, nadai endur alai kita belelak. Dia TUHAN deka ngasuh tungkul ati kita ketap-ketap, mata kita rabun, lalu kita lemi semengat. Kita nadai pengadang. Siang malam kita deka takut, nadai pengandal. Lebuh pagi hari kita deka nyebut, “Naka meh pemanah enti tu lemai hari!” lalu lebuh lemai hari, kita deka nyebut, “Naka meh pemanah enti tu pagi hari!” Kita nyebut nya laban kita takutka utai ti deka ngasuh ati kita takut, sereta takutka utai ti deka dipeda kita. TUHAN deka mai kita pulai baru ngagai menua Ejip ngena kapal, nengah menua ti dipadahka aku enda agi ditengah kita; lalu di menua nya kita deka nyual diri ngagai munsuh kita nyadika ulun lelaki tauka ulun indu sida, tang nadai siku orang deka meli kita.” Tu leka jaku sempekat ti udah diasuh TUHAN gaga Moses enggau orang Israel di menua Moap, nambahka sempekat ti udah digaga TUHAN enggau sida lebuh sida ba Bukit Sinai. Moses ngempuruka semua orang Israel, lalu bejaku ngagai sida, “Kita empu udah meda utai ti udah dikereja TUHAN ngagai raja menua Ejip, ngagai bala pemesai, enggau ngagai semua menua iya, pemalat penyakit ti dipeda kita, kereja ajih, enggau kereja ti nyelai. Tang nyentuk ngagai sehari tu TUHAN apin ngasuh kita meretika utai nya, apin ngasuh kita meda, apin ngasuh kita ninga. Ku TUHAN bejaku ngagai kita, ‘Aku udah nguluka kita empat puluh taun nengah menua puang. Baju kita enggau kasut kita enda luya; Kita nadai makai roti, lalu kita nadai ngirup wain, tauka ai ti bisa, ngambika kita nemu Aku tu TUHAN Allah Taala kita.’ Lebuh kitai datai ba endur tu, Raja Sihon di Hesbon, enggau Raja Og di Basan nyerang kitai, tang kitai ngalahka sida. Kitai ngerampas lalu magi menua sida ngagai raban bansa Reuben enggau Gat, enggau setengah ari raban bansa Manasi. Nya alai kita enda tau enda tetap ati ngasika semua leka jaku sempekat tu, ngambika kita mujur dalam semua utai ti dikereja kita. “Semua kita begempuru sehari tu, kepala raban bansa kita, bala tuai kita, bala pemesai kita, enggau semua orang Israel, bala anak kita, bala indu kita, enggau orang bansa bukai ke diau dalam kem kita, ke ngambi kayu enggau nyauk ai ke kita, ngambika kita nerima sempekat ti digaga TUHAN Allah Taala kita enggau kita, lalu netapka sempekat nya ngena sumpah sehari tu, ngambika Iya ngaga kita nyadika nembiak Iya sehari tu, lalu Iya nyadi Allah Taala kita, munyi ti udah disemaya Iya enggau kita, sereta enggau aki ini kita, Abraham, Isak enggau Jakop. Aku ngaga sempekat tu ngena jaku sumpah, ukai semina enggau kita ke bediri enggau kami ditu sehari tu di mua TUHAN Allah Taala kita, tang mega enggau semua orang ke nadai ditu enggau kitai sehari tu. Kita nemu gaya pengidup kita di menua Ejip, enggau jalai kita bejalai nengah menua orang bansa bukai. Kita udah meda engkeramba sida, ti digaga sida ari kayu, batu, pirak enggau emas. Bala kita, nemuka lelaki tauka indu, tauka ruang bilik, tauka raban bansa kita, nyangka bisi limpang ari TUHAN Allah Taala kita lalu nyembah petara orang bansa bukai. Nyangka siku ari bala kita bisi baka urat ti tumbuh nyadi kayu ti pait sereta berachun. Semua orang ke ninga jaku sumpah tu, lalu merekatka diri empu, berunding dalam ati diri, “Kitai nadai utai ngawa, taja pen kitai kieh” (lalu ketegal nya, ngasuh penusah ti besai nyadi ba tanah ti mayuh ai enggau ba tanah ti rangkai), TUHAN enggai ngampun orang ke baka nya, tang pengeringat TUHAN deka mau ngelaban iya, lalu semua jaku sumpah ti ditulis dalam bup tu deka ninggang iya magang, datai ke TUHAN udah ngerusak iya abis lengis. TUHAN deka ngaga iya nyadika teladan ke semua raban bansa orang Israel, lalu ngukum iya ngena sumpah ti disebut dalam sempekat ti ditulis dalam Bup Adat TUHAN tu. Jemah ila, peturun kita, enggau orang bansa bukai ke datai ari menua jauh, deka meda penusah ti besai enggau pemerinsa ti udah dikena TUHAN ninggang menua kita. Tanah kita nadai tumbuh utai, dilamun merirang enggau garam. Nadai utai ulih tumbuh dia. Indah rumput deh enggai tumbuh dia. Menua kita deka nyadi baka nengeri Sodom enggau Gomorah, baka nengeri Admah enggau nengeri Seboim, ti dirusak TUHAN lebuh Iya ringat. Semua dunya deka alit ati lalu nanya, ‘Nama kebuah TUHAN ngereja utai baka nya ngagai menua sida? Nama kebuah Iya ngemalat nya ringat?’ Lalu saut iya munyi tu, ‘Laban bala nembiak TUHAN udah ngelanggar sempekat ti udah digaga sida enggau Iya ti Allah Taala aki ini sida, lebuh Iya mai sida pansut ari menua Ejip. Sida udah betuaika, lalu nyembah petara bukai ti nadai kala disembah sida menya, petara ti enda diasuh TUHAN sembah sida. Nya kebuah TUHAN ringat ngagai nembiak Iya, lalu ninggang sida ngena semua sumpah ti ditulis dalam bup tu. TUHAN nyabut sida ari menua sida empu laban Iya balat ringat, lalu ngeransi, lalu Iya muai sida ngagai menua bukai, ti alai sida diau diatu.’ Utai ti resia endang enggi TUHAN Allah Taala kitai, tang utai ti dipandangka endang enggi kita, enggau ke peturun kitai, ngambika kitai nitihka semua leka jaku ti dalam Adat nya belama iya. Ku Moses bejaku, “Aku diatu udah ngasuh kita milih entara berekat enggau sumpah. Lebuh semua utai tu udah nyadi ba kita ila, lalu kita diau begulai enggau bansa bukai, alai TUHAN Allah Taala kita ke udah ngachirka kita, kita deka ingatka utai ti udah diasuh aku pilih kita. Enti kita, tauka peturun kita, deka pulai baru ngagai TUHAN, lalu enggau pengabis ati kita ngasika pesan Iya ti diberi aku ngagai kita sehari tu, nya baru TUHAN Allah Taala kita deka kasihka kita. Iya deka mai kita pulai baru ari menua ti alai Iya udah ngachirka kita, lalu Iya deka ngasuh kita kaya-raja baru. Taja pen kita diachirka jauh ngagai sukut dunya, TUHAN Allah Taala kita deka ngempuruka kita, lalu mai kita pulai baru, ngambika kita tau bempu menua ti diuan aki ini kita kelia. Lalu Iya deka ngasuh kita lebih agi kaya-raja, sereta mayuh agi tubuh ari bala aki ini kita kelia. TUHAN Allah Taala kita deka meri ati ti ngasi ngagai kita enggau ngagai peturun kita, ngambika kita deka rinduka Iya enggau pengabis ati kita, lalu kita deka mengkang diau di menua nya. Iya deka nguingka semua sumpah nya ngagai munsuh kita ke begedi sereta merinsaka kita. Lalu kita deka ngasika Iya baru, sereta nitihka semua pesan Iya ti diberi aku ngagai kita sehari tu. TUHAN deka ngasuh kita kaya-raja dalam semua utai ti dikereja kita. Kita deka mayuh anak, enggau mayuh jelu tupi, lalu tanah kita deka mansutka mayuh asil. Iya deka gaga ati ngasuh kita kaya-raja, baka Iya ti udah gaga ati ngasuh aki ini kita kaya-raja, tang kita enda tau enda ngasika Iya, lalu nitihka semua adat Iya ti ditulis dalam Bup Adat Iya tu. Kita enda tau enda nguingka diri ngagai Iya enggau pengabis ati kita. Ku Moses bejaku, “Pesan ti diberi aku ngagai kita sehari tu ukai utai ti kelalu mar dititihka kita, tauka enda ulih dijengkau kita. Iya ukai di langit din, lalu kita enda ibuh nanya, ‘Sapa deka niki ke atas lalu mai iya nurun ngagai kitai, ngambika kitai ulih ninga iya, lalu ngasika iya?’ Iya ukai mega di seberai tasik ti besai. Nya alai kita enda ibuh nanya, ‘Sapa deka ngelayang tasik ti besai tu lalu mai iya ngagai kitai, ngambika kitai ulih ninga iya, lalu ngasika iya?’ Jaku nya semak kita. Iya diau dalam nyawa enggau dalam ati kita, ngambika kita ngasika iya. Ku Moses bejaku, “Sehari tu aku ngasuh kita milih entara pemadas enggau penyai, entara pengidup enggau pemati. Enti kita ngasika pesan TUHAN Allah Taala kita, ti diberi aku ngagai kita sehari tu, enti kita rinduka Iya, ngasika Iya, lalu nitihka semua adat Iya, nya baru kita deka bulih pengaya lalu nyadi bansa ti kering. TUHAN Allah Taala kita deka merekatka kita di menua ti baru deka diempu kita. Tang enti kita enda ngasi, lalu enggai mending, lalu dibai limpang besembahka petara bukai, kita deka dirusak. Aku meri jaku tangkan tu ngagai kita diatu: kita enda panjai umur nguan menua ti di seberai Sungai Jordan din, ti baru deka diempu kita. Aku diatu ngasuh kita milih entara pengidup enggau pemati, entara berekat enggau sumpah, lalu aku ngangauka langit enggau tanah nyadika saksi utai ti dipilih kita. Pilih pengidup. Rinduka TUHAN Allah Taala kita. Titihka Iya, lalu tetap ati arapka Iya. Nya baru kita enggau peturun kita deka gayu-guru nguan menua ti udah disemaya deka diberi Iya ngagai aki ini kita, Abraham, Isak, enggau Jakop.” Lebuh Moses udah nyebut jaku nya ngagai semua orang Israel, iya lalu bejaku ngagai sida, ku iya, “Umur aku diatu nyau seratus dua puluh taun, lalu aku enda ulih nyadi tuai kita agi. Nambahka nya, TUHAN udah madahka aku enda tau meraka Sungai Jordan. TUHAN Allah Taala kita deka meraka dulu ari kita, lalu ngerusak bansa orang ke diau dia, lalu kita deka ngalahka menua sida. Lalu Josua deka nyadi tuai kita, munyi ti udah disemaya TUHAN. TUHAN deka ngerusak bansa orang nya, baka Iya ti ngalahka Sihon seduai Og, raja orang Amor, lalu ngerusak menua sida. TUHAN deka ngasuh kita menang ngelaban sida, lalu kita enda tau enda ngereja ngagai sida nitihka pesan ti diberi aku ngagai kita. Kita enda tau enda kering sereta berani. Anang takutka sida. TUHAN Allah Taala kita, deka bejalai enggau kita. Iya enda ngasuh kita lebu ngapa, tauka ninggalka kita.” Udah nya Moses ngangauka Josua, lalu bejaku enggau iya di mua semua orang Israel, “Nuan enda tau enda kering sereta berani, laban nuan deka bejalai enggau orang tu ngagai menua ti udah disemaya TUHAN ngagai aki ini sida, deka diberi Iya ngagai sida; lalu nuan deka meri menua nya ngagai sida. TUHAN Empu deka bejalai dulu ari kita. Iya deka meruan enggau kita. Iya enda ngasuh kita lebu ngapa, tauka ninggalka kita. Nya alai anang takut tauka lemi semengat.” Udah nya Moses nuliska semua Adat nya, lalu meri Adat nya ngagai bala imam Lewi ke ngesan Peti Lampang Batu Adat TUHAN, enggau ngagai bala tuai orang Israel. Ku Moses bejaku enggau sida, “Ba genap ujung taun ti ketujuh, lebuh gawai belangkau, lebuh semua orang Israel datai nyembah TUHAN Allah Taala kita ba siti endur ti deka dipilih Iya, bacha Adat tu enggau nyawa ti inggar ngagai orang Israel. Gempuruka semua lelaki, indu, nembiak, enggau orang kampar ti diau dalam nengeri kita, ngambika semua sida ulih ninga Adat nya dibacha, lalu belajar nangika TUHAN Allah Taala kita, sereta tetap ati ngasika Adat nya. Nya meh jalai peturun kita, ti enda nemu Adat nya, ulih ninga lalu belajar nangika TUHAN Allah Taala kita seumur idup di menua ti baru deka diempu kita di seberai Sungai Jordan.” Udah nya TUHAN bejaku ngagai Moses, “Nuan enda lama agi idup. Kangauka Josua, lalu bai iya ngagai Langkau Kain TUHAN, ngambika Aku meri iya pengawa.” Moses seduai Josua lalu mansang ngagai Langkau Kain TUHAN. TUHAN lalu pegari di mua seduai iya dalam gentilang remang ti bediri ngimbai pintu Langkau Kain nya. TUHAN lalu bejaku ngagai Moses, “Enda lama da agi nuan deka mati. Orang tu deka nyembah petara orang bansa bukai di menua ti deka digagai sida. Sida deka ninggalka Aku, ngelanggar sempekat ti udah digaga Aku enggau sida. Aku deka ringat ngagai sida lebuh maya nya ila. Aku deka ninggalka sida, lalu ngelalaika mua Aku ari sida; sida deka mudah dialahka munsuh, lalu mayuh macham penusah ti besai deka ninggang sida. Lebuh maya nya ila sida deka nyebut, ‘Penusah tu ninggang kitai, laban TUHAN nadai enggau kitai, ukai enda?’ Lebuh maya nya ila, Aku deka ngelalaika mua Aku ari sida ketegal semua penyai ti dikereja sida laban sida nguingka diri ngagai petara bukai. Nya alai, tuliska lagu tu, lalu ajar iya ngagai orang Israel; simpan lagu tu ngagai mulut sida, ngambika lagu tu nyadika saksi kena ngelaban sida. Laban lebuh Aku udah mai sida ngagai menua ti kaya sereta ami nya, munyi ti udah disemaya Aku ngagai aki ini sida, lalu sida udah kenyang lalu gemu, sida deka nguing lalu nyembah petara bukai, lalu ngeleseka Aku, sereta ngelanggar sempekat Aku. Lalu lebuh mayuh penusah ti besai ninggang sida, lagu tu deka nyadika saksi kena ngelaban sida, laban lagu tu deka mengkang dalam mulut peturun sida. Indah diatu deh Aku nemu utai ti deka dikereja sida, sebedau Aku mai sida ngagai menua ti udah disemaya Aku ngena sumpah, ti deka diberi Aku ngagai sida.” Sehari nya Moses lalu nuliska leka lagu nya, lalu ngajar lagu nya ngagai orang Israel. Udah nya TUHAN lalu meri Josua anak Nun pengawa, lalu bejaku, “Nuan enda tau enda kering sereta berani; laban nuan deka mai orang Israel mansang ngagai menua ti udah disemaya Aku ngagai sida; Aku deka meruan enggau nuan.” Lebuh Moses udah tembu nuliska Adat Allah Taala dalam siti bup nyentuk ke ujung, Moses lalu bejaku ngagai orang Lewi ke ngesan Peti Lampang Batu Adat TUHAN, ku iya, “Bai Bup Adat tu, lalu engkahka iya ngimbai Peti Lampang Batu Adat TUHAN Allah Taala kita; awakka bup nya meruan dia nyadika saksi kena ngelaban kita. Laban aku nemu kita seruran deka ngelaban, lalu aku nemu kita endang kieh. Enti kita seruran deka ngelaban TUHAN lebuh aku agi idup begulai enggau kita, baka ni ku gaya kita lebuh aku udah mati! Gempuruka semua tuai raban bansa kita, enggau bala pemesai kita di mua aku, ngambika aku ulih madahka jaku tu ngagai sida, lalu ngangauka langit enggau tanah nyadika saksi kena ngelaban sida. Laban aku nemu, lebuh aku udah mati, kita deka ngereja penyai, limpang ari pesan ti udah diberi aku ngagai kita. Jemah ila penusah ti besai deka ninggang kita, laban kita deka ngereja penyai di mua TUHAN, nyungkak Iya ringat ngena utai ti digaga jari kita.” Udah nya Moses lalu nyebut semua leka lagu nya, nyentuk ke ujung, lalu semua orang Israel bela mendingka iya: “Pendingka aku, langit, laban aku deka bejaku; awakka tanah ninga jaku ti disebut aku. Awakka jaku ajar aku labuh baka ujan, awakka jaku aku nurun baka ambun, baka ai ujan ti beberis ninggang rumput, baka ujan ti lebat ninggang rumput ti baru udah tumbuh. Laban aku deka muji nama TUHAN, lalu bala nembiak Iya deka madahka pemesai kuasa Iya. “ TUHAN nya meh penyaga kita ke kering, lalu semua jalai Iya endang lurus magang. Allah Taala ti tetap ati, enda nipu. Iya ngereja utai ti ngena sereta lurus. Tang bala anak Iya ti jai, udah bulaka Iya, bansa ti bedosa, ti penipu. Kati nya jalai kita malas pemanah TUHAN, O kita ke beli, ke nadai nemu utai? Kati Iya ukai Apai kita, ti udah ngaga kita, ti udah nirika kita nyadi siti bansa? “Kingatka utai ti udah nyadi kelia menya; tanyaka ngagai apai kita, lalu iya deka madahka ngagai kita; tanyaka ngagai bala tuai bansa kita, lalu sida deka nusui ngagai kita. Lebuh Iya ti Pemadu Tinggi udah meri menua ngagai genap bengkah bansa, lebuh Iya magi bansa mensia, Iya ngeletak garis entara menua ke siti-siti bansa nitihka pemayuh petara sida; Tang TUHAN milih peturun Jakop ke Iya Empu. “Iya tetemuka sida segau-segau di menua puang, menua puang ti balat dipuputka ribut. Iya ngelindung sida, ngibun sida, nyaga sida laban Iya balat rinduka sida. Baka menaul ti ngajar anak iya terebai, lalu terebai enda mindah ari atas sida; Iya ngerembaika sayap iya, lalu mai sida ke atas, lalu nyambut sida ngena belakang iya. TUHAN siku aja ke nguluka bala nembiak Iya; nadai petara orang bansa bukai nulung Iya. “Iya ngasuh sida merintah di menua ti bebukit, lalu nupi sida ngena utai ti tumbuh ba umai; Iya nupi sida ngena ai manyi ari sebelah selikap batu, ngena minyak ari kayu kana ti tumbuh galak ba tanah ti bebatu. Iya nupi sida ngena ai tusu sapi ti meku, enggau ngena ai tusu kambin, ngena lemak anak domba enggau lemak bedus ti lelaki; Iya nupi sida ngena sapi ti lelaki enggau kambin ari Basan, ngena gandum ti pemadu alus, enggau ngena wain ti pemadu manah ari kebun anggur sida. “Bala nembiak TUHAN nyadi kaya-raja, tang sida seruran deka ngelaban. Sida gemu, gentung perut, seruran kenyang. Sida ninggalka Allah Taala ti udah ngaga sida lalu nulak Penebus sida ke kering. Pengawa sida ke besembahka engkeramba, nyungkak TUHAN ninding. TUHAN ringat ketegal engkeramba sida. Sida ngenjuk piring ngagai antu, ukai ngagai Allah Taala, ngagai bala petara ti nadai kala ditemu sida, bala petara ti baru, ti nadai kala dikenangika aki ini sida. Sida enda agi ingatka Allah Taala sida, Penebus sida ke kering, ti udah meri sida pengidup. Lebuh TUHAN meda nya, Iya ringat lalu nulak bala anak lelaki enggau bala anak indu Iya. Ku Iya bejaku, ‘Aku deka ngelalaika mua Aku ari sida. Aku deka meda pengujung sida, laban orang tu jai, sereta enda tetap ati. Sida udah nyungkak Aku chemburu laban sida nyembah utai ti ukai petara, nyungkak Aku ringat ketegal engkeramba sida. Nya alai Aku deka ngasuh sida ringat ngena siti bansa. Aku deka ngasuh sida chemburu ngena siti bansa ti beli. Pengeringat Aku deka mau baka api lalu nunu semua utai di dunya tu, nyentuk ngagai dunya ti di baruh lalu nganguska pugu bukit. “ ‘Aku deka ngasuh sida betangkan-tangkan ditinggang penusah ti besai, lalu nimbakka semua panah Aku ngelaban sida. Sida deka mati lapar, sereta mati laban penyakit chelap-angat, enggau laban penyakit ti balat. Aku deka ngirumka jelu babas ngelaban sida, sereta ngasuh ular ti bisa mantuk sida. Ba sebelah jalai raya, pedang deka mantap lalu munuh sida, lalu dalam rumah, orang ke bujang enggau orang ke dara, anak mit enggau orang ke tuai deka mati laban kelalu balat takut. Aku bisi ati deka ngachirka sida, ngambika orang nadai agi ingatka sida; Tang Aku enggai ke munsuh sida temegah, enggai ke munsuh sida salah sangka lalu nyebut, ‘Kitai menang; TUHAN Empu ti ngereja semua nya.’ “Israel nya bansa ti enda nemu berunding. Sida enda mereti. Enti sida nya orang ke bepenemu-dalam, sida ulih meretika tu; sida tentu nemu namaka penyadi sida. Baka ni ku siku munsuh ulih ngalahka seribu iku, lalu dua iku munsuh ulih ngalahka sepuluh ribu iku, enti TUHAN Allah Taala sida nadai udah nyual sida ngagai munsuh, enti TUHAN nadai udah ngelengkaka sida? Petara sida enda baka Allah Taala kitai; Munsuh kitai beli. Munsuh kitai jai baka Sodom enggau Gomorah, buah anggur sida bisi rachun, tangkai anggur sida pait; wain sida digaga ari rachun ular. Ku TUHAN bejaku, “Utai ti deka dikereja Aku ngagai orang Israel enggau ngagai munsuh sida, sigi enda dipadahka Aku. Laban maya Aku malas sereta ngukum deka datai enda lama da agi; laban maya sida deka kena laban penusah ti besai nyau semak, maya sida dirusak deka datai enggau jampat. TUHAN deka sinu ati ke nembiak Iya, lalu ngumbai sida nadai penyalah, lebuh Iya meda sida nadai kuasa agi, sereta abis mati, nemuka sida nya ulun tauka ukai ulun. Udah nya TUHAN deka nanya bala nembiak Iya, ‘Kini ke tunga bala petara ti kering nya ti alai kita manggaika diri, ke makai lemak ari piring kita, lalu ngirup wain ti diberi nyadika genselan sida? Awakka sida datai nyaup kita diatu. Awakka sida datai lalu nyaga kita. “ ‘Semina Aku aja ti Allah Taala. Kita nadai petara bukai tang semina Aku aja. Aku munuh, lalu Aku mega ngidup; Aku ngemakal, lalu Aku mega nyuman; Nadai orang ulih ngelepaska orang ari jari Aku. Laban Aku tu Allah Taala ti idup belama iya, Aku ngedarka jari Aku lalu besumpah, lebuh Aku ngansah pedang Aku ti bekilap, lalu nentuka atur ti lurus tu dikena; Aku deka malas munsuh Aku, lalu ngukum orang ke begedika Aku. Panah Aku deka neritik darah, lalu pedang Aku deka munuh semua orang ke ngelaban Aku. Aku enda ngalau orang ke beperang ngelaban Aku; Indah orang ke bakal enggau orang tangkap deh deka dibunuh. Ku Moses bejaku, “Puji meh bala nembiak TUHAN, semua kita bansa bukai. Sembah meh TUHAN, semua kita petara! Laban Iya deka bebalaska nyawa bala nembiak Iya, lalu malas semua munsuh Iya; Iya deka mayar orang ke begedika Iya, lalu nuchi menua nembiak Iya ari penyai ti datai ari dosa sida. Moses seduai Josua anak Nun lalu nyebut leka lagu tu di mua semua orang Israel, ngambika sida ninga. Lebuh Moses udah tembu nyebut leka lagu nya ngagai semua orang Israel, iya lalu bejaku ngagai sida, “Kingatka semua leka lagu tu ti nyadika saksi kena ngelaban kita sehari tu; beri pesan nya ngagai anak kita, ngambika sida nitihka semua leka jaku ti dalam adat tu enggau ati ti tetap. Jaku tu ukai jaku ngapa, tang pengidup kita; enti kita nitihka jaku tu, kita deka panjai umur nguan menua di seberai Sungai Jordan ti baru deka diempu kita.” Ba hari nya mega TUHAN bejaku ngagai Moses munyi tu: “Alai nuan niki ngagai Bukit Nebo ba gerinjing Bukit Abarim di menua Moap, di seberai nengeri Jeriko, lalu tinjau menua Kanaan ti baru deka diberi Aku ngagai orang Israel. Nuan deka mati ba bukit ti ditiki nuan nya, baka menyadi nuan Aron ti mati ba Bukit Hor; laban seduai udah sama enda tetap ati ngagai Aku di mua orang Israel, lebuh kita ba ai Meribah, semak nengeri Kades, di menua puang Sin, laban seduai enda bebasaka pengudus Aku di mua orang Israel. Taja pen nuan ulih ninjau menua nya ari jauh, tang nuan enda tau tama ngagai menua nya, menua ti diberi Aku ngagai orang Israel.” Tu berekat ti disebut nabi Moses ngagai orang Israel sebedau iya mati. Ku iya bejaku: “ TUHAN datai ari Bukit Sinai mansang nulung nembiak Iya; Iya angkat baka penumbuh mata hari lalu manchar ngagai nembiak Iya ari Edom. Lalu penampak Iya manchar ari Bukit Paran. Beribu-ribu iku melikat datai enggau Iya, lalu kilat nyelar ari jari kanan Iya. TUHAN rinduka nembiak Iya, lalu nyaga orang ke diempu Iya. Nya alai kitai meremi di kaki Iya lalu ngasika pesan Iya. Awakka raban bansa Reuben enda abis, taja pen sida enda mayuh tubuh. Tu utai ti disebut iya pasal raban bansa Judah: “O TUHAN, pendingka Judah, lalu bai iya ngagai bansa iya empu; Asuh jari iya kering, lalu saup iya ngelaban munsuh iya. Lalu ku iya bejakuka pasal raban bansa Lewi: “Pandangka ngagai orang Lewi peneka Nuan TUHAN ngena Urim enggau Tumim ngagai bala nembiak Nuan ke taluk ngagai Nuan, ti udah diabas Nuan ati di Masah, ti udah ngelaban Nuan ba ai di Meribah; ke madahka diri lebih agi taluk ngagai Nuan ari sida ke taluk ngagai apai indai, menyadi, tauka anak sida. Laban sida nitihka pesan Nuan, lalu tetap ati ngagai sempekat Nuan. Sida ngajar Jakop atur Nuan, lalu ngajar orang Israel Adat Nuan, Sida ngengkahka menyan di mua Nuan, enggau piring tunu segala ba alta Nuan. O TUHAN, berekatka raban bansa tu, lalu sambut meh semua utai ti dikereja sida; Rusak semua munsuh sida, orang ke begedika sida, ngambika munsuh nya enda angkat agi. Ba pasal raban bansa Benjamin, iya nyebut: “Tu meh raban bansa ti dikerinduka sereta dijaga TUHAN. Iya nyaga sida siang malam, Lalu Iya diau begulai enggau sida. Ba pasal raban bansa Josep, iya nyebut: “Awakka TUHAN merekatka menua sida ngena ujan Enggau ngena ai ti datai ari dalam tanah; ngena buah ti pemadu manah ti mansau laban mata hari, enggau ngena buah ti pemadu manah genap musin; ngena asil ti pemadu manah ari bukit ti tuai, enggau ari asil ti pemadu mayuh ari munggu ti meruan belama iya; ngena semua pemeri ti pemadu manah ari tanah, enggau ngena pengasih Iya ti diau ba Bukit Sinai. Awakka semua berekat nya diberi ngagai Josep, ba kening iya ti udah nyadi raja ke semua bala menyadi iya. Josep kering baka sapi ti lelaki ti pengabis dulu ada, bisi tanduk baka sapi ti siga, ti dikena iya nanduk bansa bukai ngagai ujung dunya; baka nya ku utai ti dikereja bepuluh ribu iku peturun Epraim, enggau beribu iku peturun Manasi. Ba pasal raban bansa Sebulun enggau raban bansa Isakar, iya nyebut: “Awakka Sebulun kaya-raja bedagang di tasik, Lalu awakka pengaya Isakar nambah-menambah di menua. Sida mai orang bansa bukai ngagai bukit sida Lalu dia sida ngenjuk piring ti ngena. Sida bulih pengaya ari tasik Enggau ari pasir ti ba tebing tasik. Ba pasal raban bansa Gat, iya nyebut: “Pujika Allah Taala, ti udah ngerembaika rampa menua sida. Gat diau baka singa; iya nyarikka lengan tauka kulit pala. Iya ngambi menua ti pemadu manah ke iya empu, laban nya endang ungkup ke orang ke nyadi tuai; iya nguluka bala nembiak iya, iya bejalaika atur ti lurus ari TUHAN enggau adat ti diberi TUHAN ngagai orang Israel. Ba pasal raban bansa Dan, iya nyebut: “Dan tu singa ti agi biak, ti merejuk pansut ari Basan. Ba pasal raban bansa Naptali, iya nyebut: “Naptali ke dikerindu sereta diberekatka TUHAN, deka bempu menua ti tunga ke barat enggau ke selatan menua kita. Ba pasal raban bansa Aser, iya nyebut: “Aser diberi mayuh agi berekat ari sida menyadi ti bukai; Awakka iya mengkang lebih agi dikerinduka Allah Taala ari bala menyadi iya, Lalu awakka menua iya penuh laban kayu kana. Awakka nengeri iya dijaga ngena pintu besi, Lalu awakka iya diau likun sepemanjai umur iya. O kita orang Israel! Nadai petara ti baka Allah Taala kita, ke bejalai nengah langit mansang nyaup kita, ke bemulia bejalai nengah langit. Iya ngalahka petara ti lama, nganchurka semua kuasa ti lama; Iya muru munsuh kita lebuh kita majakka pejalai kita, lalu bejaku, ‘Rusak sida!’ Nya alai peturun Jakop diau likun nadai utai ngachau, di menua ti penuh laban gandum enggau wain, alai ambun ti datai ari langit ngemasahka tanah. O Israel! Naka meh pengelantang ati kita! Nadai orang ti baka kita, bansa ti diselamatka TUHAN ti nyadi terabai kena nyaup kita, ti nyadi pedang ti meri kita pemenang. Bala munsuh kita deka datai minta kasih ngagai kita, lalu kita deka ngindik belakang sida. Udah nya Moses angkat ari emperan menua Moap, lalu niki ngagai Bukit Nebo, ngagai tuchung Bukit Pisgah tunga ke timur nengeri Jeriko. Dia TUHAN lalu mandangka ngagai iya semua menua nya: menua Giliat nyentuk ngagai nengeri Dan di utara, semua menua Naptali, menua Epraim enggau menua Manasi, menua Judah nyentuk ngagai Tasik Tengah di barat, sitak selatan menua Judah, enggau emperan ti nganchau berengkah ari Soar nyentuk ngagai Jeriko, iya nya nengeri ti mayuh kayu engkerema. Ku TUHAN bejaku ngagai iya, “Tu meh menua ti udah disemaya Aku ngagai Abraham, Isak enggau Jakop, ti deka diberi Aku ngagai peturun sida. Aku udah nejuka nuan meda menua nya ngena mata nuan empu, tang nuan enda tau meraka ngagai menua nya.” Udah nya Moses, ti ulun TUHAN, mati dia di menua Moap, munyi ti udah dipadahka TUHAN. TUHAN lalu nguburka iya ba siti lebak di menua Moap, seberai nengeri Bet-peor. Tang nyentuk ngagai sehari tu, nadai orang nemu endur alai kubur iya. Umur Moses 120 taun lebuh iya mati. Iya mengkang kering baka selama, lalu mata iya agi lansik. Orang Israel ngulitka iya tiga puluh hari ba emperan menua Moap. Udah nya sida badu agi ngulitka iya. Josua anak Nun penuh laban penemu-dalam, laban Moses udah ngengkahka jari iya atas iya; nya alai orang Israel ngasika Josua, lalu ngereja utai ti udah dipesanka TUHAN ngagai Moses. Nadai nabi udah bisi kala baka Moses di menua Israel, ke bejaku betunga mua enggau TUHAN. Nadai nabi bukai bisi udah kala ngereja kereja ajih enggau kereja ti nyelai baka ke diasuh TUHAN kereja Moses kena ngelaban raja menua Ejip, ngelaban bala pemesai enggau semua menua nya. Nadai nabi bukai udah ulih ngereja utai ti besai, ti balat ngenakutka ati, baka ke dikereja Moses di mua semua orang Israel. Udah bekau pemati Moses ke nembiak TUHAN, TUHAN lalu bejaku ngagai Josua anak Nun, penulung Moses. Ku TUHAN bejaku, “Nembiak Aku Moses udah mati. Angkat nuan enggau semua orang Israel, bejalai meraka Sungai Jordan, lalu mansang ngagai menua ti diberi Aku ngagai sida. Semua endur ti deka diindik kaki kita, endang udah diberi Aku ngagai kita, munyi ti udah disemaya Aku ngagai Moses. Kenyau ari menua puang enggau menua Lebanon nyentuk ngagai sungai ti besai nya, iya nya Sungai Eupratis, semua menua orang Iti, nyentuk ngagai Tasik Tengah di barat, nyadika menua kita. Josua, nadai orang ulih ngalahka nuan sepemanjai umur nuan. Baka Aku ti udah enggau Moses, baka nya mega Aku deka enggau nuan; Aku enda ngelengkaka nuan, tauka ninggalka nuan. Nuan enda tau enda kering sereta berani, laban nuan deka nguluka orang tu ngambi menua ti udah disemaya Aku ngagai aki ini sida. Tang anang enda kering sereta berani, lalu ngasika semua Adat ti diberi nembiak Aku Moses ngagai nuan; anang limpang ari Adat nya, ngambika nuan mujur di sebarang endur nuan bejalai. Anang ngetu macha Bup Adat tu; belematika iya siang malam, ngambika nuan ngereja semua utai ti ditulis dalam Bup tu. Nya baru nuan deka nyadi kaya-raja sereta mujur di sebarang endur nuan bejalai. Kingatka jaku Aku ti ngasuh nuan kering sereta berani: anang takut tauka lemi semengat, laban Aku, TUHAN Allah Taala nuan bisi enggau nuan di sebarang endur nuan bejalai.” Udah nya Josua lalu ngasuh bala tuai bejalai nengah kem nya, lalu bejaku ngagai orang mayuh, “Sediaka bekal kita, laban tiga hari da agi, kita deka bejalai meraka Sungai Jordan, mansang ngambi menua ti diberi TUHAN Allah Taala kita ngagai kita.” Ku Josua bejaku ngagai raban bansa Reuben, Gat, enggau setengah ari raban bansa Manasi, “Kingatka jaku ti udah disebut Moses, ke nembiak TUHAN, ngagai kita, lebuh iya nyebut, ‘ TUHAN Allah Taala kita deka meri ngagai kita siti endur alai kita diau.’ Bini, anak enggau jelu tupi kita deka diau di menua ti diungkupka Moses ngagai kita ba tebing timur Sungai Jordan. Tang semua soldadu kita ke chukup disikap enggau senyata, mesti meraka Sungai Jordan lalu bejalai dulu ari bala kaban belayan kita, lalu nyaup sida. Lebuh sida udah ngentapka diri enggau selamat ba menua ti diberi TUHAN Allah Taala kita ngagai sida adap ke barat Sungai Jordan, nya baru kita tau pulai ngagai menua ti udah diungkupka nembiak Aku Moses ngagai kita ba tebing timur Sungai Jordan.” Sida lalu nyaut Josua, “Kami deka ngereja semua utai ti diasuh nuan kereja kami, lalu kami deka bejalai ngagai sebarang endur ti diasuh nuan. Baka kami ke udah ngasika Moses, baka nya meh kami deka ngasika nuan. Awakka TUHAN Allah Taala nuan meruan enggau nuan, baka Iya ti udah meruan enggau Moses! Barang sapa ngelaban nuan, tauka enda ngasika jaku nuan, deka dibunuh. Nuan mesti kering sereta berani.” Udah nya Josua anak Nun lalu ngasuh dua iku orang belalai mupuk ari Sitim nyadi pematau. Ku iya, “Mupuk seduai, lalu peratika menua nya, kelebih agi Jeriko.” Seduai iya mupuk lalu tama rumah siku indu sundal ke benama Rahap, lalu bemalam dia. Nyadi raja nengeri Jeriko bisi dipadahka munyi tu: “Sekeda orang Israel udah datai ditu malam tu deka matau menua tu.” Raja nengeri Jeriko lalu ngirumka pesan ngagai Rahap, “Bai pansut orang ke udah tama ngagai rumah nuan, laban sida nya pematau.” Tang indu nya udah ngelalaika lelaki dua iku nya. Udah nya iya lalu bejaku, “Sida amat bisi datai ngagai aku, tang aku enda nemu ari ni penatai sida. Lalu lebuh pintu nengeri nyau deka ditutup lebuh hari nyau petang, sida mupuk. Kini ke tunga sida mupuk, aku enda nemu. Mupuk kita enggau jampat, ngambika kita ulih tetitihka sida.” Tang Rahap udah mai seduai iya ngagai perabung rumah, lalu ngelalaika seduai iya dalam tugung takang linin ti dijembui iya ba perabung rumah nya. Bala soldadu raja lalu nitihka seduai iya nengah jalai ngagai Sungai Jordan, nyentuk ngagai pemeraka ba sungai nya. Lebuh bala soldadu nya udah pansut, pintu nengeri nya lalu ditutup. Sebedau pematau dua iku nya nindukka diri, Rahap niki ngagai perabung rumah nya ngagai seduai iya lalu bejaku, “Aku nemu TUHAN udah meri menua tu ngagai kita, lalu semua kami ke di menua tu bela takutka kita magang. Laban kami bisi udah ninga pasal TUHAN ti ngerangkaika Tasik Mirah, lebuh kita pansut ari menua Ejip. Kami mega bisi udah ninga pasal kita ke munuh Sihon enggau Og, dua iku raja orang Amor di timur Sungai Jordan. Lebuh kami ninga nya, kami takut, lalu kami enda berani ngelaban kita. TUHAN Allah Taala kita endang amat Allah Taala ti bekuasa di serega enggau di dunya. Nya alai, laban aku udah manah enggau seduai, aku minta seduai besumpah atas nama TUHAN, deka manah enggau kami sebilik. Beri siti tanda ngagai aku kena nunjukka kita enda munuh apai enggau indai aku, menyadi lelaki enggau menyadi indu aku, enggau semua sida sebilik! Anang munuh kami!” Ku orang dua iku nya bejaku enggau iya, “Awakka Allah Taala munuh kami enti kami enda ngereja utai nitihka semaya kami. Enti nuan enda madahka ngagai orang utai ti dikereja kami, kami deka manah enggau kita, lebuh TUHAN meri menua tu ngagai kami.” Nyadi rumah Rahap digaga dalam dinding kuta nengeri, nya alai Rahap ngulurka seduai iya ngena tali nengah jenila. Ku Rahap bejaku, “Mupuk seduai ngagai menua ti bebukit, ngambika bala soldadu enda tetemuka seduai. Belalai tiga hari dia, datai ke sida udah pulai. Nya baru seduai tau angkat ari endur nya.” Ku seduai iya bejaku enggau iya, “Kami deka ngamatka semaya ti diasuh nuan gaga kami enggau nuan. Nuan mesti ngereja tu: lebuh kami nyerang menua kita, tanchangka tali ti mirah tu ba jenila ti alai nuan ngulurka kami duai. Bai apai enggau indai nuan, bala menyadi lelaki nuan, enggau semua kita sebilik ngagai rumah tu. Sebarang sapa pansut ari rumah tu ngagai jalai raya, deka betanggungjawapka pemati iya empu; kami enda betanggungjawapka nya; tang enti orang ngenataika jari ba kita ke diau enggau nuan dalam rumah tu, kami deka betanggungjawapka pemati kita. Tang enti nuan madahka ngagai orang utai ti dikereja kami duai, kami pen enggai mega ngamatka semaya kami duai enggau nuan.” Rahap besetuju, lalu ngasuh seduai iya mupuk. Lebuh seduai iya udah mupuk, iya lalu nanchangka tali mirah ba jenila nya. Pematau nya lalu mansang ngagai menua ti bebukit lalu belalai dia tiga hari. Bala soldadu begigaka seduai iya di semua endur, tang nadai tetemuka seduai iya. Nya alai sida mulaika diri. Udah nya pematau dua iku nya nurun ari menua ti bebukit nya, meraka Sungai Jordan, betemu ngagai Josua, lalu madahka ngagai iya semua utai ti udah nyadi. Ku seduai iya bejaku, “ TUHAN sigi amat meri semua menua nya ngagai kitai. Nambahka nya, semua orang di menua nya bela takutka kitai.” Tumu pagi hari siti, Josua enggau semua orang Israel angkat, lalu mupuk ari Sitim, lalu datai ba Sungai Jordan. Dia sida lalu nirika kem sebedau sida meraka sungai nya. Tiga hari udah bekau nya bala tuai lalu bejalai nengah kem, madahka ngagai orang mayuh, “Lebuh kita meda Peti Lampang Batu Adat TUHAN Allah Taala kita, disan bala imam Lewi, kita mesti angkat ari endur kita. Titihka Peti Lampang Batu Adat nya, ngambika kita nemu jalai ti patut ditengah kita, laban kita nadai udah kala nengah jalai nya. Tang anang datai semak ngagai Peti Lampang Batu Adat. Kita bejalai kira setengah batu ngentudika Peti nya.” Josua lalu madahka ngagai orang mayuh, “Tuchi diri empu, laban pagila TUHAN deka ngereja kereja ajih ba bala kita.” Udah nya iya lalu bejaku ngagai bala imam, “San Peti Lampang Batu Adat, lalu bejalai dulu ari orang mayuh.” Sida lalu ngesan Peti Lampang Batu Adat, lalu bejalai dulu ari orang mayuh. Ku TUHAN bejaku ngagai Josua, “Sehari tu Aku deka belabuh ngemesaika nuan di mua orang Israel, ngambika sida nemu Aku bisi enggau nuan, baka Aku ti udah enggau Moses. Padahka ngagai bala imam ke ngesan Peti Lampang Batu Adat, ‘Lebuh kita datai ba ai sungai nya, kita mesti bediri dia enda engkebut.’ ” Udah nya Josua bejaku ngagai orang mayuh, “Datai kitu, lalu pendingka jaku TUHAN Allah Taala kita. Lebuh kita nyerang, Allah Taala deka muru orang Kanaan, orang Iti, orang Ibi, orang Peris, orang Girgas, orang Amor enggau orang Jebus. Nya baru kita deka nemu Allah Taala ti idup bisi ba tengah-tengah kita, lebuh Peti Lampang Batu Adat ti enggi TUHAN ti bekuasa di serata dunya, disan dulu ari kita meraka Sungai Jordan. Nya alai pilih dua belas iku orang, siku ari siti-siti raban bansa. Lebuh tapa kaki bala imam ke ngesan Peti Lampang Batu Adat ti diempu TUHAN ti bekuasa di serata dunya, ngindik ai Sungai Jordan, ai nya deka badu rarat, lalu deka nyegang ke ulu.” Lebuh orang Israel mupuk ari kem sida deka meraka Sungai Jordan, bala imam ke ngesan Peti Lampang Batu Adat bejalai dulu ari orang mayuh. Nyadi Sungai Jordan bah ampuh tebing sepemanjai musin ngetau. Nya alai lebuh orang ke ngesan Peti nya udah datai ba Sungai Jordan, lalu kaki bala imam ke ngesan Peti nya ngindik tisi ai sungai nya, ai ti rarat ari ulu lalu badu anyut, lalu nyegang ke ulu nyentuk ngagai Adam, iya nya nengeri ti semak Saretan, lalu semua ai ti rarat ngagai Tasik Mati putus. Udah nya orang Israel lalu meraka ke seberai semak nengeri Jeriko. Lebuh orang Israel meraka sungai nya nengah tanah ti rangkai, bala imam ke ngesan Peti Lampang Batu Adat TUHAN bediri ba tanah ti rangkai ba tengah-tengah sungai nya, datai ke semua orang Israel udah meraka magang ngagai tebing seberai Sungai Jordan. Lebuh semua orang Israel udah meraka Sungai Jordan, TUHAN lalu bejaku ngagai Josua, “Pilih dua belas iku lelaki, siku ari siti-siti raban bansa, lalu asuh sida mai dua belas igi batu ari tengah-tengah Sungai Jordan, ari endur alai bala imam ke bediri. Asuh sida mai lalu ngengkahka batu nya ba kem kita malam tu.” Udah nya Josua lalu mesanka dua belas iku lelaki orang Israel ti udah dipilih, siku ari genap bengkah raban bansa, lalu bejaku ngagai sida, “Alai kita bejalai dulu ari Peti Lampang Batu Adat TUHAN Allah Taala kita, ngagai tengah-tengah Sungai Jordan. Genap iku kita enda tau enda ngesan sigi batu, sigi ke genap raban bansa orang Israel. Batu nya deka nyadika tanda ke orang mayuh. Lebuh anak kita nanya ngagai kita jemah ila reti batu nya, kita enda tau enda madahka ngagai sida pasal ai Sungai Jordan ti badu agi rarat. Batu nya deka nyadika batu pengingat ke orang Israel belama iya.” Bala lelaki nya lalu ngereja nitihka asuh Josua. Sida lalu mai dua belas igi batu ari tengah-tengah Sungai Jordan, sigi ke genap raban bansa orang Israel, munyi ti udah dipadahka TUHAN ngagai Josua, lalu sida mai batu nya ngagai kem sida, lalu ngengkahka batu nya dia. (Josua lalu nusun dua belas igi batu ba tengah-tengah Sungai Jordan, ba endur alai bala imam ke ngesan Peti Lampang Batu Adat nya udah bediri; lalu batu nya mengkang dia datai ke sehari tu.) Bala imam ke ngesan Peti nya mengkang bediri ba tengah-tengah Sungai Jordan, datai ke semua utai ti udah diasuh TUHAN padahka Josua ngagai orang mayuh, nitihka jaku Moses ngagai Josua, tembu magang dikereja sida. Orang Israel lalu beguai-guai meraka sungai nya. Lebuh semua sida udah meraka magang, Peti Lampang Batu Adat TUHAN enggau bala sida imam lalu meraka, bejalai dulu ari bala mayuh. Bala lelaki ari raban bansa Reuben enggau raban bansa Gat, enggau setengah ari raban bansa Manasi, ti udah nyikap diri deka beperang, lalu meraka dulu ari orang bukai, munyi ti udah diasuh Moses. Kira empat puluh ribu iku lelaki, ke sedia deka beperang, meraka sungai nya di mua TUHAN ngagai emperan Jeriko, mansang beperang. Nya meh hari alai TUHAN ngemesaika Josua di mua semua orang Israel, lalu sida bebasaka iya sepemanjai umur iya, baka sida ke udah bebasaka Moses. Udah nya TUHAN lalu bejaku ngagai Josua, “Asuh bala imam ke ngesan Peti Lampang Batu Adat nya, angkat ari Sungai Jordan.” Josua lalu bejaku ngagai sida imam nya, “Angkat kita ari Sungai Jordan.” Lebuh bala imam ke ngesan Peti nya angkat ari tengah-tengah Sungai Jordan, lalu tapa kaki sida terengkah ba tanah ti rangkai, ai sungai nya lalu belabuh rarat baru lalu ngampuhka tebing baru. Orang Israel meraka Sungai Jordan kena sepuluh hari bulan ti kesatu, lalu sida nirika kem sida di Gilgal, tunga ke timur menua Jeriko. Dua belas igi batu ti diambi ari Sungai Jordan, lalu ditusun Josua di Gilgal. Lalu ku iya bejaku ngagai orang Israel, “Lebuh anak kita nanyaka reti batu tu ngagai kita jemah ila, kita enda tau enda madahka ngagai sida, ‘Orang Israel bejalai meraka Sungai Jordan ba senentang tu nengah tanah ti rangkai.’ Laban TUHAN Allah Taala kita udah ngerangkaika Sungai Jordan ke kita, datai ke semua kita udah meraka magang ke seberai, baka ke udah dikereja TUHAN Allah Taala kita ba Tasik Mirah ti diasuh Iya rangkai ngambika kitai ulih meraka tasik nya, ngambika semua bansa di dunya tu nemu pemesai kuasa TUHAN, sereta ngambika kita nangika TUHAN Allah Taala kita belama iya.” Lebuh semua raja orang Amor ke di barat Sungai Jordan, enggau semua raja orang Kanaan ti diau ba tebing Tasik Tengah, ninga TUHAN udah ngerangkaika Sungai Jordan ngambika semua orang Israel ulih meraka, sida takut lalu lemi semengat, laban orang Israel. Udah nya TUHAN lalu bejaku ngagai Josua, “Gaga repik batu nyadika lungga, lalu tutus orang Israel.” Josua lalu ngaga berapa iti repik batu nyadika lungga, lalu nutus orang Israel ba siti endur ti dikumbai Munggu Alai Betutus. Nya alai anak sida, ti udah ditupi TUHAN nganti apai sida empu, ke ditutus Josua; laban sida apin ditutus lebuh sida di rantau jalai. Lebuh pengawa nutus semua orang Israel nya udah tembu, semua sida diau dalam kem nganti abi tutus sida gerai. Ku TUHAN bejaku ngagai Josua, “Sehari tu Aku udah muai pemalu kita ke nyadi ulun di menua Ejip.” Nya kebuah endur nya dikumbai Gilgal, lalu nama nya mengkang dikena nyentuk ngagai sehari tu. Lebuh orang Israel agi ba kem sida di Gilgal, ba emperan semak nengeri Jeriko, sida ngintu Gawai Paska kena lemai empat belas hari bulan nya. Hari siti nya hari ti keterubah iya sida makai asil ari utai ti ditanam di menua Kanaan. Pemakai nya kemping, enggau roti ti enda beragi. Lebuh maya nya mana nadai agi labuh ari langit, lalu orang Israel nadai agi makai mana. Berengkah ari nya sida makai pemakai ti ditanam di menua Kanaan. Lebuh Josua datai semak ngagai nengeri Jeriko, iya lalu tepedaka siku lelaki bediri ari mua iya, megai pedang. Josua mansang ngagai iya, lalu nanya, “Kati nuan tu siku ari bala kami, tauka munsuh?” “Ukai bala kita, lalu ukai mega munsuh kita,” ku lelaki nya nyaut. “Aku datai ditu nyadi tuai bala soldadu TUHAN.” Josua lalu nyungkurka diri di mua iya, lalu nyembah iya. Ku Josua bejaku, “Nama utai ti diasuh nuan kereja aku ti ulun nuan tu, Tuan?” Tuai bala soldadu TUHAN lalu bejaku ngagai iya, “Buka kasut nuan, laban nuan bediri ba tanah ti kudus.” Josua lalu muka kasut iya. Nyadi pintu kuta nengeri Jeriko endang ditutup sereta dijaga, enggai ke orang Israel tama. Nadai orang tau tama tauka pansut ari nengeri nya. Ku TUHAN bejaku ngagai Josua, “Aku nyerahka Jeriko, enggau raja iya enggau semua bala soldadu iya, ngagai jari nuan. Nuan enggau bala soldadu nuan enda tau enda bejalai ngeliling nengeri nya sekali sehari. Kita ngereja nya dalam enam hari. Tujuh iku imam ke mai tujuh iti terumpit, deka bejalai dulu ari Peti Lampang Batu Adat. Ba hari ti ketujuh, kita enda tau enda bejalai ngeliling nengeri nya tujuh kali, lalu bala imam seruran nyepu terumpit sida lebuh kita bejalai. Udah nya sida enda tau enda nyepu terumpit sida ngena sepu ti panjai. Lebuh kita ninga nya, semua orang mayuh enda tau enda manjung enggau pengabis penginggar nyawa kita, lalu dinding kuta nengeri nya deka runtuh, lalu semua bala kita enda tau enda terus nyerang nengeri nya.” Josua anak Nun lalu mesanka bala imam, lalu bejaku ngagai sida, “San Peti Lampang Batu Adat, lalu asuh tujuh iku imam mai tujuh iti terumpit bejalai dulu ari Peti Lampang Batu Adat TUHAN.” Udah nya Josua lalu bejaku ngagai bala mayuh, ku iya, “Kitai deka bejalai ngeliling nengeri nya; orang ke besenyata deka bejalai dulu ari Peti Lampang Batu Adat TUHAN.” Nitihka atur ti diberi Josua ngagai orang mayuh, tujuh iku imam ke mai tujuh iti terumpit lalu bejalai dulu ari bala imam ke ngesan Peti Lampang Batu Adat TUHAN. Bala orang ke besenyata bejalai dulu ari sida imam ke nyepu terumpit; orang ke nyaga ari belakang, bejalai ngentudika Peti Lampang Batu Adat TUHAN. Lebuh sida bejalai, terumpit tujuh iti nya seruran disepu. Nyadi Josua udah bejaku enda nyagi bala manjung, tauka bejaku, sebedau iya ngasuh sida. Iya lalu ngasuh sida imam ngesan Peti Lampang Batu Adat TUHAN ngeliling nengeri nya sekali. Udah nya sida pulai ngagai kem, lalu bemalam ba kem nya. Ba hari ti kedua tu, sida bejalai ngeliling nengeri nya sekali aja, lalu udah nya sida pulai ngagai kem. Sida ngereja nya enam hari. Ba hari ti ketujuh, sida angkat ba urung rerak tawas lalu bejalai tujuh kali ngeliling nengeri nya, ngena tusun bala baka ke dulu. Tang ba hari nya sida bejalai tujuh kali ngeliling nengeri nya. Lebuh sida udah bejalai ngeliling nengeri nya ketujuh kali sehari nya, lebuh bala imam nyepu terumpit sida, Josua lalu ngasuh orang mayuh manjung. Ku iya, “ TUHAN udah nyerahka nengeri tu ngagai kita! Nengeri nya enggau semua utai ti dalam iya enda tau enda dirusak magang nyadika piring ti diberi ngagai TUHAN. Semina indu sundal ke benama Rahap, enggau sida sebilik aja enda dibunuh, laban iya udah ngelalaika pematau kitai. Kita enda tau ngambi utai ti deka dirusak. Enti kita ngambi utai nya, kita deka ngasuh penusah enggau pengerusak ti besai ninggang kem orang Israel. Semua utai ti digaga ari pirak, emas, temaga, tauka besi, deka diseraraka magang ngambika sida diempu TUHAN. Utai nya enda tau enda disimpan dalam sarang wang TUHAN.” Orang mayuh manjung, lalu terumpit disepu. Lebuh bala mayuh ninga nya, sida lalu manjung enggau naka penginggar nyawa sida. Dinding kuta nengeri nya lalu runtuh. Semua bala soldadu belanda nyerang nengeri nya, lalu ngalahka iya. Sida mantap semua orang dalam nengeri nya, nyengkaum lelaki, indu, orang ke biak enggau ke tuai. Sida mega mantap jelu sapi, jelu bedus, enggau jelu keledai. Udah nya Josua lalu bejaku enggau pematau ke dua iku nya, “Alai seduai mansang ngagai rumah indu sundal nya, lalu bai iya enggau sida sebilik pansut, munyi ti udah disemaya seduai enggau iya.” Seduai iya mansang, lalu mai Rahap pansut, sama enggau apai enggau indai iya, menyadi lelaki iya, enggau sida sebilik ti bukai. Seduai iya mai semua sida, nyengkaum semua sida Rahap sebilik enggau bala ulun sida, ngagai endur ti likun semak kem orang Israel. Udah nya sida lalu nunu nengeri nya datai ke retung, nyengkaum semua utai ti dalam nengeri nya, kelimpah ari utai ti digaga ari emas, pirak, temaga, enggau besi. Semua utai nya diambi sida magang, lalu disimpan sida dalam sarang wang rumah TUHAN. Tang Josua enda munuh indu sundal ke benama Rahap, enggau semua kaban belayan iya, laban Rahap udah ngelalaika dua iku pematau ti udah diasuh matau nengeri Jeriko. (Bala peturun Rahap mengkang idup di menua Israel nyentuk ngagai sehari tu.) Lebuh maya nya Josua meri jaku tangkan munyi tu: “Barang sapa nguji nirika nengeri Jeriko nya baru, deka tulah ditinggang sumpah TUHAN. Barang sapa nirika batu pemun, deka lenyau anak tuai. Barang sapa ngaga pintu kuta, deka lenyau anak bunsu.” Nya alai TUHAN meruan enggau Josua, lalu berita pasal iya ngelekai di serata menua nya. Tang orang Israel enda nitihka pesan TUHAN ti nagang sida ngambi utai ti deka dirusak di nengeri Jeriko. Orang siku ke benama Achan ngelanggar pesan nya. TUHAN lalu pedis ati ngagai orang Israel. (Achan nya anak Karmi, uchu Sabdi, ari raban peturun Serah, ke ari raban bansa Judah.) Nyadi Josua udah ngasuh sekeda orang bejalai ari Jeriko ngagai Ai, iya nya nengeri ti tunga ke timur Betel, semak Bet-aben, ngasuh sida matau menua nya. Lebuh sida udah matau menua nya, sida lalu madahka pasal menua nya ngagai Josua, “Enda ibuh semua kitai nyerang Ai. Asuh dua tauka tiga ribu iku aja orang. Anang ngasuh semua bala soldadu nyerang. Nengeri nya enda besai.” Nya alai kira tiga ribu iku orang Israel nyerang, tang sida nyurutka diri lebuh sida dilaban munsuh. Orang ari nengeri Ai lalu ngagai sida belabuh ari pintu kuta nengeri nya, nyentuk ngagai endur alai orang ke ngerubuh batu, lalu munuh kira tiga puluh enam iku sida di rantau jalai ti nurun munggu nya. Bala orang Israel lalu takut. Josua enggau bala tuai orang Israel lalu nyarikka gari diri, nyungkurka diri ke tanah di mua Peti Lampang Batu Adat TUHAN, lalu mengkang dia nyentuk ngagai lemai, sereta ngerabuka amau ngagai pala sida, mandangka penusah ati diri. Ku Josua bejaku, “ TUHAN ti Pemadu Tinggi! Nama kebuah Nuan mai kami meraka Sungai Jordan? Laban Nuan deka nyerahka kami ngagai orang Amor, lalu ngerusak kami? Manah agi kami ngentapka diri di tebing timur Sungai Jordan din! Baka ni ku jalai aku bejaku agi, O TUHAN? Orang Israel diatu udah nyurutka diri ari munsuh. Orang Kanaan enggau semua orang bukai di menua tu deka ninga pasal tu. Sida deka ngelulung kami, lalu munuh semua kami! Lalu nama utai ti deka dikereja Nuan kena Nuan nyaga nama Nuan?” Ku TUHAN bejaku ngagai Josua, “Angkat nuan! Nama kebuah nuan nyungkurka diri ba tanah baka nya? Orang Israel udah bedosa! Sida udah ngelanggar sempekat ti udah diasuh Aku titihka sida. Sida udah ngambi utai ti patut dirusak. Sida udah ngenchuri utai nya, bulaka pasal utai nya, lalu nyimpan utai nya begulai enggau utai sida empu. Nya kebuah orang Israel enda ulih ngelaban munsuh sida. Sida rari ari munsuh laban sida empu diatu udah diukum lalu deka dirusak! Aku enggai begulai enggau kita agi, enti kita enda ngerusak utai ti patut dirusak! Angkat nuan! Tuchi orang mayuh, lalu sebut ngagai sida, ‘Tuchi diri empu ke pagila; laban TUHAN Allah Taala ke disembah orang Israel udah bejaku, “O Israel, kita bisi nyimpan utai ti patut dirusak; kita enda ulih ngelaban munsuh kita, asal utai ti patut dirusak nya enda dibuai ari bala kita.” ’ Nya alai padahka ngagai sida, pagila sida deka mansang ke mua, nitihka raban bansa sida. Raban bansa ti dipilih Aku deka mansang ke mua, nitihka suku raban bansa sida. Suku raban bansa ti dipilih Aku deka mansang ke mua, nitihka ruang bilik sida. Orang ari ruang bilik ti dipilih Aku, deka mansang ke mua, siku-siku sekali. Orang ke kena pilih, ke ditemu bisi nyimpan utai ti patut dirusak nya, deka diukum tunu sama enggau sida sebilik, sereta enggau semua utai ti diempu iya, laban iya udah ngelanggar sempekat TUHAN, enggau laban iya udah ngereja utai ti ngemaluka orang Israel.” Tumu pagi hari siti, Josua lalu mai orang Israel mansang ke mua, siti-siti raban bansa sekali, lalu raban bansa Judah kena pilih. Iya lalu mai raban bansa Judah ke mua, nitihka ripih suku raban bansa sida, lalu suku raban bansa Serah kena pilih. Udah nya iya lalu mai bala suku raban bansa Serah ke mua, nitihka ripih ruang bilik sida, lalu ruang bilik Sabdi kena pilih. Udah nya iya lalu mai ruang bilik Sabdi ke mua, siti-siti ruang bilik sekali, lalu Achan, anak Karmi, uchu Sabdi, kena pilih. Josua lalu bejaku enggau Achan, “Anak, beri mulia ngagai TUHAN Allah Taala ke disembah orang Israel, lalu beri puji ngagai Iya. Padahka ngagai aku utai ti udah dikereja nuan; anang ngelalaika utai nya ari aku.” Achan lalu nyaut Josua, “Aku endang amat udah bedosa ngelaban TUHAN Allah Taala ke disembah orang Israel. Tu utai ti udah dikereja aku: lebuh aku tepedaka siti kelambi Babilon ti manah, enggau kira dua kilogram pirak, enggau kira setengah kilogram lumpung emas, aku lalu inginka utai nya, lalu ngambi sida. Utai nya dilalaika aku dalam tanah dalam langkau kain aku, lalu pirak nya ba buntut lubang nya.” Josua lalu ngasuh orang ngiga utai nya. Sida lalu belanda ngagai langkau kain Achan lalu nemu utai nya dilalaika iya dalam langkau kain iya, enggau pirak ba buntut lubang nya. Sida lalu ngambi utai nya ari langkau kain Achan lalu mai utai nya ngagai Josua, enggau ngagai semua orang Israel, lalu ngengkahka utai nya di mua TUHAN. Josua enggau semua soldadu orang Israel lalu nangkap Achan, bala anak lelaki enggau bala anak indu iya, ngerampas pirak, kelambi nya, lumpung emas, jelu sapi, keledai, jelu bedus, langkau kain iya, enggau semua utai bukai ti diempu iya, lalu mai semua utai nya, sama enggau sida empu, ngagai Lebak Penusah. Lalu ku Josua bejaku enggau Achan, “Nama kebuah nuan ninggang kami enggau penusah ti besai tu? Sehari tu TUHAN deka ninggang nuan enggau penusah!” Semua orang Israel lalu nuku Achan ngena batu. Orang Israel nuku, lalu nunu sida sebilik enggau reta tengkira sida. Sida lalu nirika tugung batu ti besai ba atas bangkai Achan. Tugung batu nya mengkang dia datai ke sehari tu. Nya kebuah endur nya agi dikumbai Lebak Penusah. Nya baru TUHAN badu agi ringat. Ku TUHAN bejaku ngagai Josua, “Anang takut tauka lemi semengat; bai semua bala soldadu nuan, lalu mansang ngagai nengeri Ai. Aku udah nyerahka raja nengeri Ai, bala nembiak iya, nengeri iya, enggau menua iya, ngagai nuan; lalu nuan deka ngereja ngagai Ai enggau ngagai raja iya baka ke udah dikereja nuan ngagai nengeri Jeriko enggau ngagai raja nengeri nya; tang kita tau ngambi reta tengkira, enggau jelu tupi sida ke kita empu. Kita enda tau enda ngeramka ipa ari belakang nengeri nya.” Josua enggau semua bala soldadu iya lalu mansang ngagai nengeri Ai. Josua milih tiga puluh ribu iku orang ari bala soldadu ti pemadu kering, lalu ngasuh sida bejalai malam. Ku iya bejaku ngagai sida, “Kita enda tau enda ngeramka ipa ari belakang nengeri nya, tang anang jauh ari nengeri nya, lalu sedia nyerang; aku enggau bala aku deka mansang ngagai nengeri nya. Lebuh orang ari nengeri Ai pansut deka ngelaban kami, kami deka mutar lalu rari ari sida, baka ke dikereja kitai suba. Sida deka ngagai kami, datai ke kami udah ngumpan semua sida pansut ari nengeri nya; laban sida deka ngumbai kami rari ari sida baka ke dikereja kitai suba. Baka nya ku jalai kami rari ari sida; nya baru kita pansut ari endur alai kita ke ngeramka ipa, lalu ngalahka nengeri nya; laban TUHAN Allah Taala kita deka meri nengeri nya ngagai kita. Lebuh kita udah ngalahka nengeri nya, tunu nengeri nya, nitihka asuh TUHAN. Nya meh atur ti diberi aku ngagai kita.” Josua lalu ngasuh sida mupuk. Sida lalu mansang ngagai endur alai ngeramka ipa, lalu belalai entara Betel enggau Ai, tunga ke barat ari nengeri Ai; Tang malam nya Josua bemalam ba kem sida begulai enggau bala mayuh. Tumu pagi hari siti, Josua angkat lalu ngempuruka bala soldadu, lalu bejalai sama enggau bala tuai orang Israel mansang ngagai nengeri Ai, dipeda semua orang Israel. Bala soldadu ke enggau iya lalu mansang nuju ngagai pintu besai nengeri nya, lalu nirika kem ba tisi utara nengeri nya, diseraraka siti lebak ari nengeri Ai. Josua lalu mai kira lima ribu iku lelaki, lalu ngasuh sida ngeramka ipa entara Betel enggau Ai, tunga ke barat ari nengeri Ai. Nya alai sida ngasuh bala soldadu bela ngambi endur diri, iya nya semua sida ke dalam kem ti muak ari utara nengeri nya, enggau bala sida ke ngeramka ipa, muak ke barat ari nengeri nya. Malam nya Josua bemalam ba lebak nya. Lebuh raja nengeri Ai meda nya, iya enggau semua bala iya, iya nya bala lelaki ari nengeri nya, lalu beguai-guai pansut ari nengeri nya tumu pagi hari, deka nyerang orang Israel, ba siti endur ti tunga ngagai Arabah; tang iya enda nemu diri deka diserang ari belakang. Josua enggau bala iya lalu ngaga diri baka ke deka nyurutka diri, lalu rari tunga ngagai menua puang. Nya alai semua lelaki ke dalam nengeri nya lalu diasuh begagaika orang Israel; lebuh sida begagaika orang Israel, sida makin jauh-sejauh ninggalka nengeri Ai. Nengeri Ai tauka nengeri Betel nadai agi lelaki; semua sida udah enggau begagaika orang Israel; sida ninggalka nengeri Ai nadai orang nyaga, lalu sida begagaika orang Israel. Udah nya TUHAN lalu bejaku ngagai Josua, “Kedar lalu tunjukka sangkuh nuan tunga ngagai nengeri Ai; laban Aku deka meri nengeri nya ngagai nuan.” Josua lalu ngedarka sangkuh iya tunga ngagai nengeri nya. Bala soldadu ti udah ngeramka ipa lalu angkat tekala nya ari endur sida, lalu lebuh Josua ngedarka jari iya, sida belanda lalu tama, lalu ngalahka nengeri nya. Sida lalu beguai-guai nyelup nengeri nya ngena api. Lebuh orang Ai malik kebelakang, sida lalu tepedaka balun asap pansut ari nengeri nya. Sida nadai jalai rari, laban orang Israel ti udah rari tunga ngagai menua puang, diatu nyau mutarka nyerang sida. Lebuh Josua enggau semua orang Israel meda bala sida ke ngeramka ipa udah ngalahka nengeri nya, lalu meda asap bebalun pansut ari nengeri nya, sida mutar lalu munuh bala soldadu orang Ai. Bala orang Israel ke di nengeri nya lalu nurun enggau ngelaban orang Ai. Orang ari nengeri Ai abis dikelulung orang Israel, lalu semua sida abis dibunuh. Nadai siku sida ulih ngerarika diri, tauka agi idup. Tang orang Israel nangkap raja nengeri Ai, lalu mai iya ngagai Josua. Lebuh orang Israel udah tembu bebunuhka orang Ai di menua puang, alai sida ke udah begagaika orang Ai, lalu semua orang Ai udah abis dibunuh sida, semua orang Israel lalu pulai ngagai nengeri Ai, lalu munuh semua orang ke diau dia. Pemayuh orang Ai ke dibunuh sehari nya, nyengkaum lelaki enggau indu, nya dua belas ribu iku, laban Josua enda badu ngedarka jari iya, ti dikena iya ngedarka sangkuh iya, datai ke udah munuh semua orang Ai. Semina jelu tupi enggau barang aja dirampas orang Israel nyadika perapasan sida, nitihka pesan TUHAN ngagai Josua. Nya alai Josua nunu nengeri Ai lalu ngaga nengeri nya nyadi tugung batu tembawai, nyentuk ngagai sehari tu. Iya meri ukum gantung ngagai raja nengeri Ai, lalu raja nya digantung ari kayu datai ke lemai. Ba urung padam mata panas Josua lalu ngasuh orang nurunka bangkai nya, lalu muai bangkai nya ba pintu penama ngagai nengeri nya, lalu nugungka batu atas bangkai nya. Tugung batu nya agi mengkang dia nyentuk ngagai sehari tu. Udah nya Josua ngaga siti alta ba Bukit Ebal ke TUHAN Allah Taala ke disembah orang Israel, nitihka atur ti udah diberi Moses, ke nembiak TUHAN, ngagai orang Israel, munyi ti ditulis dalam Adat Moses: “Siti alta deka digaga ari batu ti enda kala dipansap ngena pekekas besi.” Sida lalu ngenjuk piring tunu ngagai TUHAN ba alta nya, lalu sida mega ngenjuk piring pemaik. Di mua orang mayuh, Josua lalu nuliska Adat ba batu nya, neladan Adat ti udah ditulis Moses. Semua orang Israel, enggau bala tuai sida, bala pemesai, enggau bala hakim, sereta enggau bala orang kampar ti diau enggau sida, lalu bediri ari dua piak Peti Lampang Batu Adat TUHAN, betunga mua enggau bala imam Lewi ke ngesan Peti nya. Setengah ari bala orang bediri nungaka belakang sida ngagai Bukit Gerisim, lalu setengah nungaka belakang sida ngagai Bukit Ebal, munyi ti udah diasuh Moses ti nyadi ulun TUHAN, kena sida merekatka orang Israel. Udah nya, enggau nyawa ti inggar, Josua lalu macha semua Adat, nyengkaum jaku berekat enggau jaku sumpah, nitihka semua utai ti udah ditulis dalam Bup Adat. Nadai seleka ari semua pesan Moses ti enda dibacha Josua di mua semua orang Israel, di mua semua indu-nembiak, enggau di mua semua orang kampar ti diau begulai enggau sida. Lebuh semua raja di menua ti bebukit ti di barat Sungai Jordan, enggau sida raja ti diau ba emperan ti nebing Tasik Tengah tunga ngagai menua Lebanon, orang Iti, orang Amor, orang Kanaan, orang Peris, orang Ibi enggau orang Jebus, ninga nya, sida begempuru lalu berakupka ngelaban Josua enggau orang Israel. Tang lebuh orang ke diau di Gibeon ninga pasal utai ti udah dikereja Josua ngagai nengeri Jeriko enggau nengeri Ai, sida lalu nipu Josua: sida nyendiaka bekal, mai kain guni ti udah luya amat ke keledai sida, mai kambut wain ti lama, charik sereta abis ditampal, ngena kasut ti abis ditampal, enggau gari ti lama udah luya, enggau roti ti nyau rangkai sereta bekuap. Sida mansang ngagai Josua ba kem di Gilgal, lalu bejaku enggau iya sereta enggau orang Israel, “Kami tu datai ari menua jauh deka ngaga sempekat enggau kita.” Tang ku orang Israel bejaku enggau orang Ibi nya, “Kada enda kita diau semak kami; enti pia, baka ni ku kami ngaga sempekat enggau kita?” Ku sida bejaku enggau Josua, “Kami sedia deka bekereja ke kita.” Josua lalu nanya sida, “Sapa kita tu? Ari ni penatai kita?” Sida lalu madahka cherita tu ngagai iya: “Tuan, kami tu datai ari menua ti jauh, laban kami udah ninga pasal TUHAN Allah Taala kita. Kami udah ninga pasal Iya, pasal semua utai ti udah dikereja Iya di menua Ejip, enggau pasal utai ti udah dikereja Iya ngagai dua iku raja bansa Amor di timur Sungai Jordan, Raja Sihon di Hesbon enggau Raja Og menua Basan ke merintah di Astarot. Nya alai bala tuai kami enggau semua orang ke diau di menua kami, ngasuh kami nyendiaka bekal lalu mupuk kitu lalu betemu enggau nuan. Kami udah diasuh nyerahka diri bekereja ke nuan, lalu minta nuan ngaga sempekat enggau kami. Peda nuan roti kami tu. Lebuh kami bekejang ari menua, bekal tu agi angat, tang peda nuan tu! Roti tu nyau rangkai sereta bekuap; kambut wain tu endang agi baru lebuh kami ngisi iya enggau wain, tang diatu kambut tu nyau charik; lalu gari kami enggau kasut kami nyau jai magang, empa pengelama kami udah bejalai.” Orang Israel makai pemakai sida mimit, lalu sida nadai betanya ngagai TUHAN. Josua lalu ngaga sempekat pemaik enggau sida, besemaya enda munuh sida; lalu bala tuai orang Israel besumpah atas sempekat nya. Tiga hari udah bekau sempekat nya disain, orang Israel lalu nemu orang nya endang diau semak sida, begulai enggau sida. Nya alai orang Israel mupuk, lalu tiga hari udah nya, sida lalu datai ba nengeri ti alai orang nya diau, iya nya nengeri Gibeon, Chepirah, Berot enggau Kiriat-jearim. Tang orang Israel enda nyerang sida, laban bala tuai sida udah besumpah enggau bala orang nya dalam nama TUHAN Allah Taala ke disembah orang Israel. Semua orang Israel lalu mutap ngelaban bala tuai sida. Tang ku bala tuai nyaut, “Kitai udah besumpah enggau sida dalam nama TUHAN Allah Taala ke disembah orang Israel. Diatu kitai enda tau negu sida. Tu utai ti deka dikereja kitai ngagai sida: kita enda munuh sida, ngambika Allah Taala enda ringat ngagai kitai, laban kitai udah besumpah enggau sida.” Ku bala tuai bejaku ngagai sida, “Awakka sida idup.” Nya alai orang nya lalu bekereja ngambi kayu enggau nyauk ai ke orang Israel, nitihka pemutus penemu bala tuai. Josua lalu mesanka orang Gibeon datai ngagai iya, lalu ku iya bejaku ngagai sida, “Nama kebuah kita ngelakar kami, lalu madahka diri diau jauh ari kami, taja pen kita diau begulai enggau kami? Nya alai, diatu kita kena sumpah, lalu sekeda kita deka mengkang nyadi ulun, ngambi kayu api enggau nyauk ai ke rumah Allah Taala aku.” Ku sida nyaut Josua, “Kami deka ngereja nya, tuan, laban kami nemu, TUHAN Allah Taala kita endang amat udah ngasuh nembiak Iya Moses meri semua menua tu ngagai kita, lalu munuh semua orang ke diau dalam menua tu lebuh kita majakka pejalai kita. Nya alai kami takutka kita. Nya kebuah kami ngereja tu. Diatu kami dipegai kita: kereja aja meh ngagai kami utai ti patut ku ati kita.” Nya alai, tu utai ti dikereja Josua ke sida: iya nyaga sida ari orang Israel; lalu orang Israel enda munuh sida. Tang sehari nya Josua ngeletak sida bekereja nyadi ulun ngambi kayu enggau nyauk ai ke orang Israel, enggau ke alta Allah Taala. Sida mengkang ngereja pengawa nya nyentuk ngagai sehari tu ba endur ti dipilih TUHAN. Lebuh Adonisedek, raja nengeri Jerusalem, ninga Josua udah ngalah sereta ngeruntuhka nengeri Ai, lalu udah ngereja ngagai raja nengeri nya baka ke udah dikereja Josua ngagai nengeri enggau raja nengeri Jeriko, enggau pasal orang nengeri Gibeon ti udah bebaik enggau orang Israel, lalu diau begulai enggau sida, iya lalu balat amat takut, laban nengeri Gibeon nya nengeri ti besai, ngemesai sebuah ari nengeri ti diraja, lalu besai agi ari nengeri Ai, lalu semua orang di Gibeon endang orang ke tau serang magang. Nya alai Raja Adonisedek ngirumka pesan ngagai Raja Hoham di Hebron, Raja Piram di Jarmut, Raja Japia di Lakis, enggau Raja Debir di Eglon. Ku iya, “Datai kitu lalu saup aku; awakka kita nyerang Gibeon, laban nengeri nya udah bebaik enggau Josua sereta enggau orang Israel.” Raja orang Amor ke lima iku nya, iya nya raja nengeri Jerusalem, Hebron, Jarmut, Lakis, enggau Eglon, lalu ngempuruka semua bala soldadu sida, ngelulung lalu nyerang nengeri Gibeon. Orang di nengeri Gibeon lalu ngirumka pesan ngagai Josua ti diau ba kem di Gilgal: “Tuan, anang ninggalka kami! Datai jampat lalu idupka kami! Tulung kami; laban semua raja orang Amor ti diau di menua ti bebukit udah beserakup deka nyerang kami!” Josua enggau semua bala soldadu iya, nyengkaum semua soldadu ti pemadu landik beperang, lalu angkat ari Gilgal. Ku TUHAN bejaku ngagai Josua, “Anang takutka sida, laban Aku udah nyerahka sida ngagai nuan. Nadai siku sida tan ngelaban nuan.” Josua enggau bala iya lalu bejalai semalam-malam nya ari Gilgal ngagai Gibeon, lalu ngenyit nyerang orang Amor. TUHAN lalu ngasuh orang Amor begau abis ati lebuh sida meda bala soldadu orang Israel. Orang Israel lalu munuh mayuh amat sida di Gibeon, lalu begagaika sida nurun genting ba bukit di Bet-horon, lalu majak nyerang sida nyentuk ngagai Asekah enggau Makedah di selatan. Lebuh bala orang bansa Amor benung belanda nurun genting nya ngerarika diri ari bala soldadu orang Israel, TUHAN lalu ngasuh tekang ujan batu ti besai ninggang sida di rantau jalai ngagai Asekah. Mayuh agi sida mati laban ujan batu nya ari ke dibunuh orang Israel. Ba hari TUHAN nyerahka orang Amor ngagai jari orang Israel, Josua bejaku ngagai TUHAN; lalu ku iya bejaku di mua orang Israel, “Mata panas, anang nginsit ari atas Gibeon. Bulan, ngetu nuan ba atas Emperan Aijalon.” Mata panas lalu enda nginsit, lalu bulan enda mindah nyentuk ngagai maya orang Israel udah malas munsuh sida. Pekara tu bisi ditulis dalam Bup Jasar. Mata panas lalu enda nginsit ari kebung langit, lalu enda padam sehari penuh. Nadai hari udah kala baka nya, sebedau tauka udah lepas nya, alai Allah Taala ngasika jaku mensia; laban TUHAN Empu ke beperang ngarika orang Israel! Udah nya, Josua enggau bala soldadu orang Israel lalu pulai ngagai kem sida di Gilgal. Tang raja bansa Amor ke lima iku nya ulih ngerarika diri lalu belalai dalam lubang gua di Makedah. Orang lalu madahka ngagai Josua pasal raja lima iku nya ti udah ditemu belalai dalam lubang gua di Makedah. Lalu ku Josua bejaku, “Baringka batu ti besai ngagai mua lubang gua nya, lalu asuh orang nyaga sida, tang kita empu enda ibuh nyaga sida; titihka munsuh kita, lalu serang sida ari belakang. Anang nejuka sida tama ngagai nengeri sida empu, laban TUHAN Allah Taala kita udah nyerahka sida ngagai jari kita.” Lebuh Josua enggau bala iya udah munuh mayuh amat orang Amor, datai ke sida nyau deka abis lus, lalu lebuh sida ke agi idup ulih ngerarika diri ngagai nengeri sida ke bekuta, semua bala Josua lalu pulai ngagai iya ba kem sida di Makedah. Nadai orang di menua nya berani bejaku ngelaban orang Israel. Udah nya Josua lalu bejaku, “Buka mua lubang gua nya, lalu bai raja ke lima iku nya ngagai aku.” Mua lubang gua nya lalu dibuka, lalu raja nengeri Jerusalem, Hebron, Jarmut, Lakis, enggau Eglon diambi pansut ari lubang gua nya, lalu dibai ngagai Josua. Josua lalu mesanka semua lelaki orang Israel ngagai iya, lalu ngasuh bala pemesai ti udah bejalai enggau iya, ngindik rekung raja lima iku nya. Sida lalu ngereja nya. Udah nya Josua lalu bejaku ngagai bala pemesai nya, “Anang takut tauka lemi semengat; kita enda tau enda kering sereta berani, laban tu utai ti deka dikereja TUHAN ngagai semua munsuh ke dilaban kita.” Udah nya Josua munuh raja lima iku nya, lalu ngantung sida ari lima batang kayu, lalu bangkai sida mengkang digantung dia nyentuk ngagai lemai. Lebuh padam mata panas lemai nya, sida nurunka bangkai sida nya, lalu muai sida ngagai lubang gua ti udah alai sida belalai. Batu ti besai lalu diengkah ba mua lubang gua nya, lalu batu nya mengkang dia datai ke sehari tu. Sehari nya Josua nyerang lalu ngalahka Makedah, lalu munuh semua orang enggau raja sida di nengeri nya. Nadai siku sida ditejuka idup. Iya ngereja ngagai raja nengeri Makedah baka ke udah dikereja iya ngagai raja Jeriko. Udah nya Josua enggau semua soldadu orang Israel bejalai ari Makedah ngagai Libnah, lalu nyerang nengeri nya. TUHAN mega nyerahka nengeri enggau raja nengeri nya ngagai jari orang Israel, lalu Josua ngalahka nengeri nya. Semua orang di nengeri nya abis dibunuh. Nadai siku ti ditejuka idup. Josua ngereja ngagai raja nengeri nya baka ke udah dikereja iya ngagai raja nengeri Jeriko. Udah nya, Josua enggau semua soldadu orang Israel mansang ari Libnah ngagai Lakis, ngelulung lalu nyerang nengeri nya. TUHAN nyerahka Lakis ngagai jari orang Israel, lalu Josua ngalahka nengeri nya ba hari ti kedua. Iya nyerang nengeri nya, munuh semua orang ke diau dia, baka ke udah dikereja iya ngagai Libnah. Udah nya Raja Horam ke merintah di Geser datai nulung Lakis, tang Josua ngalahka iya enggau bala soldadu iya, ngeluska semua sida. Udah nya, Josua enggau semua orang Israel mansang ari Lakis ngagai Eglon, ngelulung lalu nyerang nengeri nya. Sida ngalahka nengeri nya sehari nya, lalu munuh semua orang dia, baka ke udah dikereja iya di Lakis. Udah nya, Josua enggau semua orang Israel mansang ari Eglon ngagai Hebron, nyerang lalu ngalahka nengeri nya. Sida munuh raja nengeri nya enggau semua orang ke diau di nengeri nya, enggau semua orang ke diau di nengeri ti mit ti semak nengeri nya. Nadai siku orang dia ditejuka idup, baka ke udah dikereja iya di Eglon, lalu iya ngerusak semua nengeri nya. Udah nya Josua enggau semua orang Israel nikal ngagai Debir, lalu nyerang nengeri nya. Iya ngalahka nengeri nya, sama enggau raja nengeri nya enggau semua nengeri ti mit semak dia. Sida munuh semua orang dia. Josua ngereja ngagai Debir baka ke udah dikereja iya ngagai Hebron enggau ngagai Libnah enggau ngagai raja sida. Josua ngalahka semua menua nya, iya nya, menua ti bebukit, menua ti rangkai di selatan, menua ti emperan, enggau menua ti ba tisi bukit, enggau semua raja sida; iya enda nejuka sida idup, tang munuh semua sida, nitihka asuh TUHAN Allah Taala ke disembah orang Israel. Josua ngalahka sida kenyau ari Kades-barnea nyentuk ngagai Gasa, enggau semua menua Gosen, nyentuk ngagai Gibeon. Josua ngalahka semua raja enggau menua ti diperintah sida dalam siti kayau aja, laban TUHAN Allah Taala ke disembah orang Israel beperang ngarika orang Israel. Udah nya, Josua enggau bala soldadu orang Israel pulai ngagai kem sida di Gilgal. Lebuh Raja Jabin di Hasor ninga nya, iya lalu mesanka Raja Jobap di Madon, enggau raja ke merintah di Simron, enggau raja ke merintah di Aksap, enggau bala raja ke di menua ti bebukit, di menua Arabah ti tunga ke selatan ari Chinerot, enggau raja ke ba Lebak Jordan, enggau raja ke di Napot-dor di barat. Iya mega mesanka orang Kanaan ti diau ba tebing barat enggau ba tebing timur Sungai Jordan, orang Amor, orang Iti, Peris, enggau orang Jebus ti diau di menua ti bebukit, enggau orang Ibi ti diau ba kaki Bukit Hermon di menua Mispah. Sida datai mai semua bala soldadu sida, ngemayuh pasir ti ba tebing tasik, enggau mayuh amat kuda enggau kerita perang. Semua bala raja nya berakupka semua bala soldadu sida, lalu nirika kem sida ba Sungai Merom, deka nyerang orang Israel. TUHAN lalu bejaku ngagai Josua, “Anang takutka sida, laban ba urung maya tu pagila Aku deka munuh semua sida, lalu nyerahka sida ngagai orang Israel. Kita enda tau enda mutuska rakat kuda sida, lalu nunu kerita perang sida.” Nya alai Josua enggau semua bala soldadu orang Israel lalu ngenyit nyerang sida ba Sungai Merom. TUHAN lalu nyerahka sida ngagai jari orang Israel. Orang Israel lalu munuh sida lalu begagaika sida nyentuk ngagai Misrepot-maim enggau Sidon, lalu tunga ke timur nyentuk ngagai lebak Mispah. Orang Israel munuh sida, datai ke nadai siku sida agi idup. Josua ngereja ngagai sida nitihka asuh TUHAN. Iya mutuska rakat kuda sida, lalu nunu kerita perang sida. Josua nikal lalu ngalahka Hasor sereta munuh raja nengeri nya; laban Hasor nya indu nengeri menua nya. Sida munuh semua orang ke diau dia abis lengis. Nadai orang dia ditejuka idup, lalu nengeri nya ditunu. Josua ngalahka semua nengeri nya enggau raja sida, munuh semua orang dalam semua nengeri nya, nitihka asuh Moses ke nembiak TUHAN. Tang orang Israel enda nunu nengeri ti digaga ba atas munggu, kelimpah ari Hasor, ti ditunu Josua. Orang Israel ngambi semua utai ti berega enggau semua jelu tupi ari semua nengeri nya, ke sida empu. Tang sida munuh semua orang ke diau dia. Semua orang nya abis dibunuh sida. TUHAN udah meri atur ngagai nembiak Iya Moses, nya alai Moses meri atur nya ngagai Josua, lalu Josua udah nitihka atur nya. Iya ngereja semua utai ti udah dipesanka TUHAN ngagai Moses. Nya alai Josua ngalahka semua menua nya, iya nya menua ti bebukit, enggau menua ti ba kaki bukit, ti di utara enggau di selatan, semua menua di Gosen, enggau menua ti rangkai tunga ke selatan menua nya, enggau Lebak Jordan. Ka semina Gibeon aja nengeri ti bebaik enggau orang Israel, ti alai sekeda orang Ibi diau. Semua sida ti bukai alah magang dalam perang nya. Laban TUHAN udah ngasuh sida kieh deka ngelaban orang Israel, ngambika semua sida dibunuh magang enggau nadai pengasih, munyi ti udah dipesanka TUHAN ngagai Moses. Lebuh maya nya Josua mansang lalu ngerusak orang Anakim, ke datai ari menua ti bebukit, iya nya ari Hebron, Debir, Anap, enggau ari semua menua ti bebukit di menua Judah, enggau ari menua ti bebukit di menua Israel. Josua ngerusak semua sida, enggau nengeri sida. Nadai orang Anakim agi idup di menua Israel. Semina di Gasa, di Gat, enggau di Asdot aja sekeda sida agi idup. Josua ngalahka semua menua nya, munyi ti udah dipesanka TUHAN ngagai Moses. Josua meri menua nya ngagai orang Israel nyadika menua sida empu, lalu magi menua nya ngagai raban bansa orang Israel. Orang Israel lalu ngetu beperang. Orang Israel udah ngalahka, sereta nguan menua ti tunga ke timur Sungai Jordan, berengkah ari Lebak Arnon mudik Sungai Jordan nyentuk ngagai Bukit Hermon di utara. Sida udah ngalahka dua iku raja. Siku nya Sihon, raja orang Amor ke merintah di Hesbon. Menua ti diperintah iya nyengkaum setengah ari menua Giliat: berengkah ari Aroer (ti ba tisi Lebak Arnon) enggau ari nengeri ti ba tengah lebak nya, nyentuk ngagai Sungai Jabok, ti nyadika garis entara menua Amon. Menua nya nyengkaum Lebak Jordan berengkah ari Tasik Galili terus ke selatan ngagai Bet-jesimot (ti tunga ke timur Tasik Mati) lalu nuju terus ngagai kaki Bukit Pisgah. Sida mega udah ngalahka Raja Og di Basan, ke pengabis iya ari bansa orang Repaim. Raja Og ti diau di Astarot enggau di Edrei. Menua ti diperintah iya nyengkaum Bukit Hermon, Salekah, enggau semua menua Basan nyentuk ngagai garis entara menua Gesur enggau Maka, sereta enggau setengah menua Giliat, nyentuk ngagai garis entara menua Raja Sihon di Hesbon. Raja dua iku nya udah dialahka Moses enggau orang Israel. Moses, ke nembiak TUHAN, udah meri menua nya ngagai raban bansa Reuben enggau raban bansa Gat, enggau setengah ari raban bansa Manasi, nyadika menua sida. Josua enggau orang Israel udah ngalahka semua raja di menua tunga ke barat Sungai Jordan, berengkah ari Baal-gat ba lebak Lebanon nyentuk ngagai Bukit Halak di selatan semak Edom. Josua magi lalu meri menua nya ngagai raban bansa orang Israel, nyadika menua sida. Menua ti dibagi nya nyengkaum menua ti bebukit, kaki bukit di barat, Lebak Jordan, enggau kaki bukit ti ba emperan nya, serimbing bukit ti muak ke timur sungai nya, enggau menua ti rangkai di selatan. Menua tu udah diuan orang Iti, orang Amor, orang Kanaan, orang Peris, orang Ibi enggau orang Jebus. Orang Israel udah ngalahka raja ke megai nengeri Jeriko, Ai (semak Betel), Jerusalem. Hebron, Jarmut, Lakis, Eglon, Geser, Debir, Geder, Hormah, Arat, Libnah, Adulam, Makedah, Betel, Tapuah, Heper, Apek, Lasaron, Madon, Hasor, Simron-meron, Aksap, Taanak, Megido, Kedes, Joknim (di Karmel), Dor (ba tebing tasik), Goim (di menua Galili), enggau Tirsah - tiga puluh satu iku raja semua iya. Nyadi Josua diatu nyau udah tuai. TUHAN lalu bejaku ngagai iya, “Nuan diatu nyau tuai, tang menua ti deka diambi kita agi mayuh, nyengkaum semua menua Pilistin enggau menua Gesur, enggau semua menua orang Abim ti tunga ke selatan. (Menua ti berengkah ari sungai Sihor, ba entara menua Ejip, nyentuk ngagai garis entara menua Ekron di utara, nya diempu orang Kanaan. Bala raja orang Pilistin diau di Gasa, Asdot, Askelon, Gat, enggau Ekron.) Tu mega menua ti deka dialahka orang Israel: semua menua orang Kanaan, enggau menua Mearah (ti diempu orang Sidon), nyentuk ngagai Apek, ba garis entara menua orang Amor; semua menua orang Gebal; semua menua Lebanon ti tunga ke timur, berengkah ari Baal-gat ti tunga ke selatan Bukit Hermon, ngagai Lebo-hamat. Tu nyengkaum semua menua ti diuan orang Sidon ti diau ba menua ti bebukit ba entara Bukit Lebanon enggau Misrepot-maim. Aku deka muru semua bansa orang nya lebuh orang Israel nyerang. Kita enda tau enda magi menua nya ngagai orang Israel, nitihka jaku Aku ngagai nuan. Nya alai bagi diatu menua tu ngagai semilan bengkah raban bansa orang Israel enggau setengah ari raban bansa Manasi, ngambika menua nya diempu sida.” Raban bansa Reuben enggau raban bansa Gat enggau setengah ari raban bansa Manasi udah nerima menua ti udah diberi Moses, ke nembiak TUHAN, ngagai sida. Menua nya di timur Sungai Jordan. Menua sida berengkah ari Aroer (ti ba tisi Lebak Arnon) enggau nengeri ti ba tengah-tengah Lebak nya, lalu nyengkaum semua emperan ti ba atas bukit berengkah ari Medeba nyentuk ngagai Dibon. Menua nya lalu terus ngagai garis entara menua Amon, lalu nyengkaum semua nengeri ti udah diperintah raja orang Amor ke benama Sihon, ti udah merintah di Hesbon. Menua nya nyengkaum Giliat, menua Gesur enggau menua Maka, semua Bukit Hermon, enggau semua menua Basan nyentuk ngagai Saleka. Menua nya nyengkaum menua ti udah diperintah Raja Og, pengabis orang Repaim, ti udah diau di Astarot enggau di Edrei. Moses udah ngalahka bansa orang tu lalu udah muru sida. Tang orang Israel enda muru orang ke diau di Gesur enggau di Maka. Orang nya agi diau di menua Israel. Moses enda meri menua ngagai raban bansa Lewi laban munyi ti udah dipadahka TUHAN ngagai Moses, sida nerima ungkup ari piring tunu ba alta ke TUHAN Allah Taala ke disembah orang Israel, nyadika pesaka sida. Moses udah meri sebagi ari menua nya ngagai suku raban bansa ti ari raban bansa Reuben nyadika pesaka sida. Menua sida nya berengkah ari Aroer (ti ba tisi Lebak Arnon) enggau nengeri ti ba tengah-tengah lebak nya, nyengkaum semua emperan ti ba atas bukit ti ngelingi Medeba. Menua nya nyengkaum Hesbon enggau semua nengeri ti ba emperan ti ba atas bukit, iya nya, Dibon, Bamot-baal, Bet-baal-meon, Jahas, Kedemot, Mepat, Kiriataim, Sibmah, Seret Sahar ti ba munggu ti ba lebak nya, Bet-peor, Serimbing bukit ba Bukit Pisgah, enggau Bet-jesimot, enggau semua nengeri ti ba emperan ti ba atas bukit, enggau semua menua ti udah diperintah Sihon, raja orang Amor ke merintah di Hesbon. Moses udah ngalahka iya, sereta ngalahka bala raja orang Midian, iya nya Ebi, Rekem, Sur, Hur, enggau Reba. Semua sida nya udah nyadi pemerintah ke menua ti diperintah Raja Sihon. Siku ari orang ke dibunuh orang Israel nya tukang tilit ke benama Balaam anak Beor. Sungai Jordan nyadika garis entara menua di barat ke raban bansa Reuben. Nya alai nya meh nengeri enggau nengeri ti mit ti udah diberi ngagai orang ke ari ruang bilik raban bansa Reuben, nyadika pesaka sida. Moses udah mega meri sebagi ari menua nya ngagai orang ke ari ruang bilik raban bansa Gat nyadika pesaka sida. Menua sida nyengkaum Jaser enggau semua nengeri ti di Giliat, setengah menua Amon nyentuk ngagai Aroer, ti muak ke timur Rabah. Menua sida berengkah ari Hesbon ngagai Ramat-mispeh enggau Betonim, ari Mahanaim ngagai garis entara menua Lo-debar. Ba Lebak Jordan, menua nya nyengkaum Bet-haram, Bet-nimrah, Sukot, enggau Sapon, enggau teda menua ti udah diperintah Raja Sihon di Hesbon. Sungai Jordan nyadika garis entara menua sida muak ke barat, nyentuk ngagai Tasik Galili di utara. Nya meh nengeri enggau nengeri ti mit ti udah diberi ngagai raban bansa Gat nyadika pesaka sida nitihka ripih suku raban bansa sida. Moses udah meri sebagi menua ngagai setengah ari orang ke ari ruang bilik raban bansa Manasi nyadika pesaka sida. Menua sida berengkah ari Mahanaim, lalu nyengkaum semua menua Basan, iya nya semua menua ti udah diperintah Og, raja Basan, enggau semua enam puluh buah Tumpuk Pendiau Jair di Basan. Menua nya nyengkaum setengah ari menua Giliat, enggau Astarot enggau Edrei, ti udah nyadi indu nengeri ke menua ti diperintah Og di Basan. Semua nya udah diberi ngagai setengah ari suku raban bansa ti diturunka Machir anak Manasi. Nya meh jalai Moses magi menua ti di timur nengeri Jeriko, enggau di timur Sungai Jordan, lebuh iya agi bepalan ba emperan menua Moap. Tang Moses enda meri menua ngagai raban bansa Lewi. Iya madahka pesaka sida nya ungkup ari piring ti diberi ngagai TUHAN Allah Taala ke disembah orang Israel. Utai ti deka disebut diatu nya cherita pasal jalai menua Kanaan ti tunga ke barat Sungai Jordan dibagi ngagai orang Israel. Orang ke magi menua nya ngagai orang Israel nya Imam Eleasar, Josua anak Nun, enggau bala tuai bilik ari raban bansa orang Israel. Munyi ti udah dipesanka TUHAN ngagai Moses, menua ti diungkupka ngagai semilan setengah raban bansa di barat Sungai Jordan, deka dibagi ngena chara bechabut undi. Orang Israel magi menua nya nitihka pesan TUHAN ngagai Moses. Raban bansa Judah lalu datai ngagai Josua di Gilgal. Kalep anak Jepuneh, ari raban peturun Kenas, lalu bejaku ngagai Josua, “Nuan nemu utai ti udah disebut TUHAN ngagai nabi Moses di Kades-barnea pasal tua. Umur aku empat puluh taun lebuh Moses ke nembiak TUHAN ngasuh aku bejalai ari Kades-barnea matau menua tu. Aku mai berita ti bendar ngagai iya. Tang orang ke bejalai enggau aku ngemba orang mayuh. Tang aku udah tetap ati deka ngasika TUHAN Allah Taala aku. Nyadi laban aku udah tetap ati deka ngasika TUHAN, Moses besemaya, madahka aku enggau peturun aku deka nerima menua ti udah kena indik kaki aku, nyadika pesaka kami. Tang diatu nyau deka bulih empat puluh lima taun TUHAN udah nyebut nya ngagai Moses. Iya nyebut nya lebuh orang Israel benung bejalai nengah menua puang, lalu TUHAN, nitihka semaya Iya, udah ngasuh aku meruan idup ngelamatu. Peda nuan aku diatu! Umur aku nyau lapan puluh lima taun lalu aku diatu agi kering baka aku ke menya lebuh Moses ngasuh aku bejalai. Pengering aku diatu agi baka pengering aku menya, kena aku beperang enggau ngereja utai bukai. Nya alai, beri ngagai aku diatu menua ti bebukit ti udah disemaya TUHAN lebuh aku enggau bala aku madahka berita nya ngagai nuan menya. Lebuh maya nya menya kami udah madahka ngagai nuan pasal bansa orang Anakim ti diau dalam nengeri ti besai sereta bekuta. TUHAN nyangka deka enggau aku, lalu aku ulih muru sida pansut, munyi ti dipadahka TUHAN.” Josua lalu merekatka Kalep anak Jepuneh, lalu meri nengeri Hebron ngagai iya nyadika pesaka iya. Hebron mengkang diempu peturun Kalep anak Jepuneh ke ari raban peturun Kenas, laban iya udah tetap ati ngasika TUHAN Allah Taala ke disembah orang Israel. Sebedau nya suba, Hebron dikumbai nengeri Arba. (Arba nya orang Anakim ti pemadu kering.) Menua lalu nadai agi pengachau. Ruang bilik ari raban bansa Judah nerima sebagi ari menua nya baka tu: Menua nya nganchau tunga ke pengabis ujung menua puang Sin di selatan, ba garis entara menua enggau Edom. Garis entara menua di selatan berengkah ari ujung selatan Tasik Mati, nuju ke selatan ari Genting Akrabim, terus ngagai Sin, nengah selatan Kades-barnea, mansa Hesron lalu terus ngagai Adar, nguing ngagai Karka, terus ngagai Asmon, lalu niti sungai ti ba garis entara menua enggau orang Ejip, ngagai Tasik Tengah, alai garis entara menua nya tepantup. Nya garis entara menua Judah di selatan. Di timur, garis entara menua nya ba Tasik Mati, terus ke atas ngagai endur alai Sungai Jordan betemu enggau Tasik Mati. Garis entara menua di utara berengkah ba endur nya, terus ke atas ngagai Bet-hoglah, lalu nuju ke utara gerinjing bukit ti ari atas Lebak Jordan. Ari nya garis entara menua nya lalu nuju ngagai Batu Bohan (Bohan nya anak Reuben), ari Emperan Penusah ke atas ngagai Debir, lalu nguing tunga ke utara ngagai Gilgal, ti di seberai Genting Adumim ti ba tisi selatan lebak nya. Ari nya garis entara menua nya lalu nuju ngagai mata ai ti di En-semes, terus ngagai En-rogel, lalu mudik Lebak Hinom ba tisi bukit ari selatan alai nengeri Jerusalem ti diempu orang Jebus bediri. Garis entara menua nya lalu terus ngagai tuchung bukit ti di barat Lebak Hinom, ba ujung selatan Lebak Repaim. Ari nya garis entara menua nya lalu nuju ngagai Mata Ai Neptoah, lalu terus ngagai genturung nengeri ti semak Bukit Epron. Dia garis entara menua nya lalu nguing tunga ngagai Baalah (iya nya, Kiriat-jearim), alai iya ke lalu musin mansa Baalah ari barat, nuju ngagai menua ti bebukit di menua Edom, terus mansa ari selatan Bukit Jearim (tauka Kesalon), lalu nurun ngagai Bet-semes, terus mansa Timnah. Garis entara menua nya lalu nuju ngagai bukit ti di utara Ekron, nguing tunga ngagai Sikeron, mansa Bukit Baalah, lalu terus ngagai Jabnil. Garis entara menua nya lalu tepantup ba Tasik Tengah, ti lalu nyadi garis entara menua di barat. Nya meh menua alai ruang bilik raban bansa Judah diau. Munyi ti udah dipesanka TUHAN ngagai Josua, sebagi ari menua Judah lalu diberi ngagai Kalep anak Jepuneh, ke ari raban bansa Judah. Iya nerima Hebron, iya nya nengeri ti udah diempu Arba, orang ke nurunka bansa Anakim. Kalep muru bala peturun Anak ari nengeri nya, iya nya bala raban peturun Sheshai, Ahinam enggau Talmai. Iya angkat ari nya lalu mansang nyerang orang ke diau di Debir. (Nengeri nya dulu suba dikumbai Kiriat-seper.) Ku Kalep bejaku, “Aku deka meri anak dara aku Aksah nyadika bini orang ke ulih ngalahka Kiriat-seper.” Otnil, anak lelaki menyadi Kalep ke benama Kenas lalu ngalahka nengeri nya. Nya alai Kalep meri anak dara iya Aksah nyadika bini Otnil. Ba hari Otnil seduai Kenas nikah, Otnil mujuk Kenas minta sebidang tanah ari apai iya. Kenas nurun ari keledai iya. Kalep lalu nanya iya, “Nama utai ti dikedekaka nuan?” Kenas lalu nyaut, “Aku minta dua tiga iti telaga, laban menua ti diberi nuan ngagai aku nadai ai.” Nya alai Kalep meri ngagai Kenas mata ai ti di ulu enggau di ili. Nya meh menua ti diterima ruang bilik raban bansa Judah nyadika pesaka sida. Nengeri ti pengabis iya jauh di selatan nya nengeri ti semak garis entara menua enggau Edom, iya nya Kabsel, Eder, Jagur, Kinah, Dimonah, Adahah, Kedes, Hasor, Itnan, Sip, Telem, Bealot, Hasor-hadata, Keriot-hesron (tauka Hasor), Amam, Sema, Moladah, Hasar-gadah, Hesmon, Bet-pelet, Hasar-sual, Beer-seba, Bisiotiah, Baalah, Im, Hormah, Eltolat, Chesil, Hormah, Siklak, Madmanah, Sansana, Lebaot, Silhim, Ain, enggau Rimon - dua puluh semilan buah nengeri semua iya, nyengkaum nengeri ti mit ti ngelingi nengeri nya. Nengeri ti ba kaki bukit nya Esta-ol, Sorah, Asnah, Sanoah, En-ganim, Tapuah, Enam, Jarmut, Adulam, Soko, Asekah, Saraim, Aditaim, Gederah, enggau Gederotaim - empat belas buah nengeri semua iya, nyengkaum nengeri ti mit ti ngelingi nengeri nya. Nengeri ti bukai nyengkaum Senan, Hadasah, Mikdal-gat, Dilean, Mispah, Jokte-el, Lakis, Boskat, Eglon, Kabon, Lahmam, Chitlis, Gederot, Bet-dagon, Namah, enggau Makedah - enam belas buah nengeri semua iya, nyengkaum nengeri ti mit ti ngelingi nengeri nya. Nengeri ti bukai nya Libnah, Eter, Asan, Iptah, Asnah, Nesib, Keilah, Aksip, enggau Maresah - semilan buah nengeri semua iya, nyengkaum nengeri ti mit ti ngelingi nengeri nya, Ekron enggau nengeri ti mit enggau genturung pendiau ti ngelingi Ekron, enggau semua nengeri ti besai, enggau ti mit semak Asdot, berengkah ari Ekron nyentuk ngagai Tasik Tengah. Nengeri ti bukai nya Asdot enggau Gasa, nyengkaum nengeri ti mit enggau genturung pendiau sida, nyentuk ngagai sungai ti ba garis entara menua Ejip enggau tebing Tasik Tengah. Di menua ti bebukit, nengeri nya nyengkaum Samir, Jatir, Sokoh, Danah, Kiriat-seper (tauka Debir), Anap, Estemoa, Anim, Gosen, Holon, enggau Giloh - sebelas buah nengeri semua iya, nyengkaum nengeri ti mit ti ngelingi sida. Nengeri bukai nyengkaum Arab, Dumah, Esan, Janim, Bet-tapuah, Apekah, Humtah, Hebron, enggau Sior - semilan buah nengeri semua iya, nyengkaum nengeri ti mit ti ngelingi sida; Nengeri Maon, Karmel, Sip, Jutah, Jesril, Jokdim, Sanoah, Kain, Gibe-ah enggau Timnah - sepuluh buah nengeri semua iya, nyengkaum nengeri ti mit ti ngelingi nengeri nya. Nengeri Halhul, Bet-sur, Gedor, Marat, Bet-anot enggau Eltekon - enam buah nengeri semua iya, nyengkaum nengeri ti mit ti ngelingi nengeri nya. Nengeri Kiriat-baal (tauka Kiriat-jearim) enggau Rabah - dua buah nengeri, nyengkaum nengeri ti mit ti ngelingi nengeri nya. Di menua puang: nengeri Bet Arabah, Midin, Sekakah, Nibsan, nengeri Garam, enggau En-gedi - enam buah nengeri semua iya, nyengkaum nengeri ti mit ti ngelingi nengeri nya. Tang raban bansa Judah enda ulih muru orang Jebus ti diau di Jerusalem. Orang Jebus agi mengkang diau dia begulai enggau orang Judah nyentuk ngagai sehari tu. Garis entara menua ari selatan menua ti diberi ngagai peturun Josep berengkah ari Sungai Jordan semak Jeriko, ba endur ti tunga ke timur mata ai Jeriko, lalu nuju tunga ngagai menua puang. Garis entara menua nya ngerejang ari Jeriko, niki ngagai menua ti bebukit nyentuk ngagai Betel. Ari Betel, garis entara menua nya nuju ngagai Lus, terus ngagai Atarot, ti alai orang Arki diau. Garis entara menua nya lalu nuju ke barat ngagai menua Japlet, nyentuk ngagai Bet-horon Ili. Ari nya garis entara menua nya nuju terus ngagai Geser, lalu tepantup ba Tasik Tengah. Peturun Josep, iya nya raban bansa Epraim enggau raban bansa Manasi di barat nerima menua nya nyadika pesaka sida. Tu menua ke raban peturun ari raban bansa Epraim. Garis entara menua sida berengkah ari Atarot nuju ke timur ngagai Bet-horon Ulu, lalu ari nya nuju ngagai Tasik Tengah. Mikmetat nya tunga ke utara ari menua sida. Tunga ke timur, garis entara menua nya nguing ngagai Tanah Siloh, lalu terus ari nya ngagai timur nengeri Janoah. Garis entara menua nya lalu nurun ari Janoah ngagai Atarot enggau Narah, terus ngagai Jeriko, lalu tepantup ba Sungai Jordan. Garis entara menua nya lalu ngerejang ke barat ari Tapuah ngagai Sungai Kanah, lalu tepantup ba Tasik Tengah. Nya meh menua ti udah diberi ngagai ruang bilik raban bansa Epraim nyadika pesaka sida, nyengkaum sekeda nengeri ti mit enggau genturung pendiau ti dalam kandang menua Manasi, tang diberi ngagai orang ari raban bansa Epraim. Tang sida enda muru orang Kanaan ti diau di Geser. Nya alai, orang Kanaan mengkang diau begulai enggau orang ari raban Epraim nyentuk ke sehari tu, tang orang Kanaan udah dipejalka bekereja nyadi ulun. Sebagi ari menua ti di barat Sungai Jordan udah diberi ngagai sekeda ruang bilik orang ke ari peturun anak tuai Josep ke benama Manasi. Machir apai Giliat nya anak tuai Manasi, lalu iya nya orang ke tau serang. Nya alai, menua Giliat enggau Basan, ti di timur Sungai Jordan, diberi ngagai Machir. Menua ti di barat Sungai Jordan udah diberi ngagai ruang bilik Manasi ti bukai, iya nya ngagai ruang bilik Abieser, Helek, Asril, Sekem, Heper, enggau Semida. Sida tu peturun ti lelaki ari Manasi anak Josep, lalu sida tu nyadi tuai bilik sida. Selopehat, anak Heper, anak Giliat, anak Machir, anak Manasi, nadai anak lelaki, tang semina bisi anak indu. Nama sida nya Mahlah, Noah, Hoklah, Milkah, enggau Tirsah. Sida mansang ngagai Imam Eleasar, enggau ngagai Josua anak Nun, enggau ngagai bala tuai bansa, ku sida, “ TUHAN udah ngasuh Moses meri ngagai kami sebagi ari menua tu nyadika pesaka kami, baka kaban belayan kami ke lelaki.” Nya alai, munyi ti udah diasuh TUHAN, sida diberi menua baka kaban belayan sida ke lelaki. Nya kebuah Manasi nerima sepuluh iti ungkup, nambahka Giliat enggau Basan di timur Sungai Jordan, laban peturun iya ti indu enggau peturun iya ti lelaki sama diberi menua. Menua Giliat udah diberi ngagai peturun Manasi ti bukai. Menua Manasi berengkah ari Aser ngagai Mikmetat, tunga ke timur Sekem. Garis entara menua nya lalu nuju ke selatan nyengkaum orang ke di En-tapuah. Menua ti ngelingi Tapuah diempu Manasi, tang nengeri Tapuah, ti ba garis entara menua, diempu peturun Epraim. Ari nya garis entara menua nya nurun ngagai sungai Kanah. Nengeri ti tunga ke selatan sungai nya, diempu Epraim, taja pen nengeri nya dalam menua Manasi. Garis entara menua Manasi lalu ngili tebing utara sungai nya, lalu tepantup ba Tasik Tengah. Nya alai menua Epraim nya muak ke selatan, lalu menua Manasi muak ke utara sungai nya, lalu Tasik Tengah nyadika garis entara menua di barat. Menua Aser nya tunga ke barat utara, lalu menua Isakar nya tunga ke timur utara. Tang dalam menua Isakar enggau menua Aser, Manasi bempu nengeri Bet-san enggau Iblim, nyengkaum nengeri ti mit ti ngelingi nengeri nya, enggau nengeri Dor (ti ba tebing tasik) Endor, Taanak, Megido, enggau nengeri ti ngelingi sida. Tang orang ari raban bansa Manasi enda teburuka orang ke diau dalam nengeri nya, nya alai orang Kanaan mengkang diau dia. Indah lebuh orang Israel nyau mansang kering agi, deh sida enda muru semua orang Kanaan, tang mejalka sida bekereja nyadi ulun sida. Ku bala peturun Josep bejaku enggau Josua, “Nama kebuah nuan meri kami semina sebagi aja ari menua tu nyadika pesaka kami? Tubuh kami mayuh, laban TUHAN udah merekatka kami.” Ku Josua nyaut, “Enti kita amat ngemayuh nya, lalu menua ti bebukit di Epraim kelalu sekut alai kita diau, kita patut mansang ngagai utan di menua orang Peris enggau menua orang Repaim, lalu berimba menua nya ke diri empu.” Ku sida nyaut, “Menua ti bebukit nya enda chukup ke kami, tang orang Kanaan ti diau ba emperan, ti diau di Bet-san enggau dalam nengeri ti mit ti ngelingi Bet-san, enggau sida ke diau ba Lebak Jesril, bisi kerita perang ti digaga ari besi.” Ku Josua bejaku enggau raban bansa Epraim, sereta enggau raban bansa Manasi ti di barat, “Kita endang amat mayuh tubuh, lalu kita pen kering. Kita deka diberi lebih ari siti bagi. Menua ti bebukit deka diempu kita. Taja pen menua nya agi utan, kita enda tau enda berimba menua nya, lalu bempu iya ari ujung siti ngagai ujung siti. Nyadi pasal orang Kanaan, kita enda tau enda muru sida, taja pen sida bisi kerita perang ti digaga ari besi, lalu taja pen bansa sida kering.” Lebuh sida udah ngalahka menua nya, semua orang Israel lalu begempuru di Siloh, lalu nirika Langkau Kain TUHAN dia. Semua menua nya dipegai sida magang. Tujuh bengkah raban bansa mengkang apin diberi menua. Nya alai Josua lalu bejaku enggau orang Israel. Ku iya, “Ni pengelama kita nganti diri ngalah lalu bempu menua ti udah diberi TUHAN Allah Taala aki ini kita ngagai kita? Beri aku tiga iku lelaki ari siti-siti raban bansa. Aku deka ngasuh sida bejalai nengah menua nya, lalu nuliska gaya menua ti deka nyadika pesaka kita. Udah nya sida enda tau enda pulai baru ngagai aku. Menua nya deka dibagi ngagai tujuh bengkah bagi. Judah deka diau ba menua iya empu di selatan, lalu Josep deka diau ba menua iya empu di utara. Tuliska gaya tujuh bengkah menua nya, lalu bai utai ti ditulis nya ngagai aku. Udah nya baru aku deka enchabut undi ke kita, kena betanya ngagai TUHAN Allah Taala kitai. Tang orang Lewi enda enggau kita nerima bagi ari menua nya, laban ungkup sida nya bekereja nyadi imam TUHAN. Nyadi raban bansa Gat, Reuben, enggau raban bansa Manasi ti di timur, udah nerima menua sida di timur Sungai Jordan. Menua nya udah diberi Moses, ti nembiak TUHAN, ngagai sida.” Nya alai bala sida mupuk, deka matau menua nya udah bekau sida ke nerima atur ari Josua munyi tu: “Teresa lalu tuliska gaya semua menua nya. Udah nya pulai kitu baru ngagai aku. Udah nya baru aku, deka enchabut undi ngarika kita betanya ngagai TUHAN di Siloh ditu.” Sida lalu neresa semua menua nya, lalu nuliska chara sida magi menua nya ngagai tujuh bengkah bagi, sereta nuliska nama nengeri ti di menua nya. Udah nya sida pulai baru ngagai Josua ba kem sida di Siloh. Josua lalu enchabut undi ngarika sida, kena betanya ngagai TUHAN. Iya lalu magi menua nya ngagai raban bansa orang Israel ti bukai. Benjamin nya terubah raban bansa ti diberi menua. Menua sida nya entara menua raban bansa Judah enggau Josep. Garis entara menua sida di utara berengkah ba Sungai Jordan lalu niki ngagai bukit ti tunga ke utara Jeriko, lalu ngerejang tunga ke barat nengah menua ti bebukit nyentuk ngagai menua puang Bet-aben. Garis entara menua nya lalu niki serimbing bukit ti ba tisi Lus ari selatan (Lus mega dikumbai Betel), lalu nurun ari nya ngagai Atarot Adar, ti ba bukit muak ke timur Bet-horon ti di baruh. Garis entara menua nya lalu nguing tunga ke selatan ari serimbing barat bukit nya, lalu terus ngagai Kiriat-baal (tauka Kiriat-jearim), ti diempu raban bansa Judah. Nya garis entara menua di barat. Garis entara menua di selatan berengkah ba tisi Kiriat-jearim lalu nuju ke barat ngagai mata ai ti di Neptoah. Ari nya garis entara menua nya lalu nurun ngagai kaki bukit ti ari atas Lebak Hinom, ba ujung utara Lebak Repaim. Ari nya gari entara menua nya lalu nuju ke selatan nengah Lebak Hinom, muak ari selatan gerinjing Jebus, tunga ngagai En-rogel. Garis entara menua nya lalu nguing ke utara ngagai En-semes, lalu terus ngagai Gelilot, di seberai Genting Adumim. Garis entara menua nya lalu nurun ngagai Batu Bohan (Bohan nya anak Reuben) lalu nuju ke utara mansa gerinjing tanah ba atas Lebak Jordan, lalu nurun ngagai emperan nya tunga ke utara, mansa gerinjing tanah ba Bet-hoglah, lalu tepantup ba endur alai ai Sungai Jordan tama ngagai Tasik Mati di utara. Nya meh garis entara menua ti di selatan. Sungai Jordan nyadika garis entara menua di timur. Nya meh garis entara menua ke menua ti diterima ruang bilik ari raban bansa Benjamin nyadika pesaka sida. Nengeri ti diempu ruang bilik raban bansa Benjamin nya Jeriko, Bet-hoglah, Emek-kesis, Bet Arabah, Semaraim, Betel, Abim, Parah, Oprah, Cheparamoni, Opni, enggau Geba - dua belas buah nengeri, sama enggau nengeri ti mit ti ngelingi sida. Nengeri ti bukai nyengkaum Gibeon, Ramah, Berot, Mispah, Chepirah, Mosah, Rekem, Irpil, Taralah, Sela, Halep, Jebus (tauka Jerusalem), Gibe-ah, enggau Kiriat-jearim - empat belas buah nengeri semua iya, sama enggau nengeri ti mit ti ngelingi sida. Nya meh menua ti diterima ruang bilik raban bansa Benjamin nyadika pesaka sida. Simeon nya raban bansa ti kedua diberi menua, lalu menua ti diberi ngagai sida nya berimbai enggau menua Judah. Nengeri di menua nya nyengkaum Beer-seba, Sheba, Moladah, Hasar-sual, Balah, Esem, Eltolat, Betul, Hormah, Siklak, Bet-markabot, Hasar-susah, Bet-lebaot, enggau Saruhen - tiga belas buah nengeri semua iya, sama enggau nengeri ti mit ti ngelingi nengeri nya. Nengeri dia mega nyengkaum Ain, Rimon, Eter, enggau Asan - empat buah nengeri semua iya, sama enggau nengeri ti mit ti ngelingi sida. Menua Simeon mega nyengkaum semua nengeri enggau genturung pendiau nyentuk ngagai Baalat-beer (tauka Ramah), di selatan. Nya meh menua ti diterima raban bansa Simeon nyadika menua sida. Laban Judah udah diberi menua ti besai agi ari ti diguna sida, sebagi ari menua nya lalu diberi ngagai Simeon. Sebulun nya raban bansa ti ketiga diberi menua. Menua ti diterima sida nya nganchau nyentuk ngagai Sarid. Ari Sarid, garis entara menua nya lalu nuju ke barat ngagai Marial, mansa Dabeset enggau sungai ti muak ke timur Joknim. Berengkah ari Sarid ari sepiak, garis entara menua nya nuju ke timur ngagai garis entara menua Kislot-tabor, udah nya nuju ke Daberat, lalu niki ngagai Japia. Ari nya garis entara menua nya lalu majak nuju ke timur ngagai Gat-heper enggau Et-kasin, nguing tunga ke Nih ba jalai ngagai Rimon. Di barat, garis entara menua nya nguing tunga ngagai Hanaton, lalu tepantup ba Emperan Iptah-el. Menua nya nyengkaum Katat, Nahalal, Simron, Idalah, enggau Betlehem - dua belas buah nengeri semua iya, sama enggau nengeri ti mit ti ngelingi sida. Nengeri enggau nengeri ti mit ti di menua ti diterima raban bansa Sebulun nyadika pesaka sida. Isakar nya raban bansa ti keempat ti diberi menua. Rampa menua nya nyengkaum Jesril, Chesulot, Sunem, Haparaim, Sion, Anaharat, Rabit, Kision, Ebes, Remet, En-ganim, En-hadah, enggau Bet-pasis. Garis entara menua nya mega mansa Tabor, Sahasumah enggau Bet-semes, lalu tepantup ba Sungai Jordan. Enam belas buah nengeri dalam menua nya semua iya, sama enggau nengeri ti mit ti ngelingi sida. Nya meh nengeri enggau nengeri ti mit dalam menua ti diterima raban bansa Isakar nyadika pesaka sida. Aser nya raban bansa ti kelima ti diberi menua. Rampa menua nya nyengkaum Helkat, Hali, Beten, Aksap, Alam Melek, Amad enggau Misal. Di barat, garis entara menua nya negu Karmel enggau Sihor-libnat. Garis entara menua nya nguing ke timur, lalu nuju ngagai Bet-dagon, negu Sebulun enggau Emperan Iptah-el, lalu terus ke utara ngagai Bet-emek enggau Neiel. Garis entara menua nya lalu majak ke utara ngagai Chabul, Ebron, Rehob, Hamon, enggau Kanah, nyentuk ngagai Sidon. Garis entara menua nya nguing ngagai Ramah, lalu datai ba nengeri Tire ti bekuta. Udah nya garis entara menua nya lalu nguing ngagai Hosah, lalu tepantup ba Tasik Tengah. Menua nya nyengkaum Mahalap, Aksip, Umah, Apek, enggau Rehob - dua puluh dua buah nengeri semua iya, sama enggau nengeri ti mit ti ngelingi sida. Nya meh nengeri enggau nengeri ti mit dalam menua ti diterima raban bansa Aser nyadika pesaka sida. Naptali nya raban bansa ti keenam diberi menua. Garis entara menua nya berengkah ari Helep ngagai kayu oak ti di Sananim, terus ngagai Adami-nekep, enggau ngagai Jabnil, nyentuk ngagai Lakum, lalu tepantup ba Sungai Jordan. Ari nya garis entara menua nya lalu nguing ke barat ngagai Asnot Tabor, terus ngagai Hukok, negu Sebulun di selatan, negu Aser di barat, enggau menua Judah ti di timur Sungai Jordan. Nengeri ti bekuta nyengkaum Sidim, Ser, Hamat, Rakat, Chineret, Adamah, Ramah, Hasor, Kedes, Edrei, Enhasor, Yiron, Migdalel, Horem, Bet-anat, enggau Bet-semes - semilan buah nengeri semua iya, sama enggau nengeri ti mit ti ngelingi sida. Nya meh nengeri enggau nengeri ti mit dalam menua ti diterima raban bansa Naptali nyadika pesaka sida. Dan nya raban bansa ti ketujuh diberi menua. Menua Dan nyengkaum Sorah, Esta-ol, Ir-semes, Sa-albim, Aijalon, Itlah, Elon, Timnah, Ekron, Eltekeh, Gibeton, Baalat, Jehut, Bene-berak, Gat-rimon, Me-jarkon enggau Rakon, sereta enggau menua ti ngelingi Jopa. Lebuh orang ari raban bansa Dan nyau nadai agi menua, sida lalu mansang ngagai Lais, lalu nyerang nengeri nya. Sida ngalahka nengeri nya, lalu munuh orang di nengeri nya, lalu ngambu nengeri nya nyadika nengeri sida empu. Sida lalu ngentapka diri dia, lalu ngubah nama nengeri nya ari Lais ngagai Dan, ngangkatka nama aki ini sida. Nya meh nengeri enggau nengeri ti mit ti diterima raban bansa Dan nyadika pesaka sida. Lebuh orang Israel udah tembu magi menua, sida lalu meri Josua anak Nun sebagi ari menua nya nyadika menua iya empu. Munyi ti udah dipesanka TUHAN, sida meri ngagai iya sebuah nengeri ti dipinta iya, iya nya Timnat-serah di menua ti bebukit di menua Epraim. Iya ngaga nengeri nya baru, lalu ngentapka diri dia. Imam Eleasar, Josua anak Nun, enggau bala tuai bilik ari raban bansa orang Israel udah magi menua nya ngena chara bechabut undi kena betanya ngagai TUHAN di Siloh, ba penama ngagai Langkau Kain TUHAN. Nya meh jalai sida nembuka pengawa bebagi menua. Udah nya TUHAN lalu ngasuh Josua bejaku ngagai orang Israel, “Pilih nengeri alai ngerarika diri ti udah dipadahka Aku ngagai kita nengah Moses. Enti bala kita bisi tekelanjur munuh orang, iya tau ngerarika diri ngagai nengeri nya ari orang ke ngiga balas. Orang nya tau ngerarika diri ngagai sebuah nengeri nya, mansang ngagai endur alai bechara ba pintu penama ngagai nengeri nya, lalu madahka ngagai bala tuai nengeri nya pasal utai ti udah nyadi. Udah nya baru sida deka nejuka iya tama ngagai nengeri nya, lalu meri iya endur alai diau, ngambika iya tau diau dia. Enti orang ke ngiga balas datai ngagai nengeri nya nitihka iya, orang di nengeri nya enda tau nyerahka iya ngagai orang nya. Orang di nengeri nya enda tau enda nyaga iya, laban iya tekelanjur tebunuhka orang nya, lalu ukai laban iya ringat. Orang nya enda tau enda diau di nengeri nya datai ngagai maya iya udah kena pechara di mua orang mayuh, lalu datai ngagai maya orang ke nyadi Imam Besai udah mati. Udah nya baru iya tau pulai baru ngagai nengeri iya empu, ti udah ditinggalka iya rari.” Nya alai, di barat Sungai Jordan sida milih Kedes di menua Galili, ba menua ti bebukit di menua Naptali. Sida milih Sekem, ba menua ti bebukit di menua Epraim, enggau Hebron, di menua ti bebukit di menua Judah. Di timur Sungai Jordan, di menua puang ti tunga ke timur nengeri Jeriko, sida milih Beser di menua Reuben, Ramot-giliat, dalam menua Gat, enggau Golan di Basan, dalam menua Manasi. Nya meh nengeri ti udah dipilih alai semua orang Israel tauka orang kampar ti diau enggau sida, tau ngerarika diri lalu ngidupka nyawa diri. Barang sapa tekelanjur tebunuhka orang, tau diau likun di nengeri nya, ari orang ke ngiga balas. Sida nadai tau dibunuh, sebedau sida kena pechara di mua orang mayuh. Bala tuai bilik orang Lewi mansang ngagai Imam Eleasar, Josua anak Nun, enggau ngagai tuai bilik semua raban bansa orang Israel. Ku sida bejaku enggau sida di Siloh, dalam menua Kanaan, “ TUHAN udah ngena Moses meri pesan, madahka kami deka diberi nengeri alai diau, enggau padang rumput ngelingi nengeri nya ke jelu tupi kami.” Nya alai, orang Israel lalu meri ngagai orang Lewi sekeda nengeri enggau padang rumput dalam menua sida, nitihka pesan TUHAN. Bala raban peturun Kohat nya terubah ruang bilik ti diberi nengeri. Ruang bilik ti diturunka Imam Aron, diberi tiga belas buah nengeri dalam menua Judah, Simeon, enggau Benjamin. Raban peturun Kohat ti bukai diberi sepuluh buah nengeri di menua Epraim, Dan, enggau Manasi Barat. Raban peturun Gerson diberi tiga belas buah nengeri dalam menua Isakar, Aser, Naptali, enggau Manasi Timur. Ruang bilik raban peturun Merari diberi dua belas buah nengeri dalam menua Reuben, Gat, enggau Sebulun. Nya alai orang Israel bechabut undi kena sida magi nengeri enggau padang ti ngelingi nengeri siti-siti ngagai orang Lewi, nitihka jaku ti udah dipesanka TUHAN ngena Moses. Tu nama nengeri di menua Judah enggau di menua Simeon ti diberi ngagai peturun Aron ke ari raban peturun Kohat, ke diturunka Lewi. Raban peturun Kohat nya raban bansa ti terubah iya diberi nengeri. Sida diberi nengeri Arba (Arba nya apai Anak), ti dikumbai Hebron diatu, di menua ti bebukit di menua Judah, sama enggau padang rumput ti ngelingi nengeri nya. Tang padang nengeri nya, enggau semua nengeri ti mit, udah diberi ngagai Kalep anak Jepuneh nyadika pesaka iya. Nambahka Hebron (sebuah ari nengeri alai ngerarika diri), tu nama nengeri ti diberi ngagai peturun Imam Aron: Libnah, Jatir, Estemoa, Holon, Debir, Ain, Jutah enggau Bet-semes, sama enggau padang rumput sida - semilan buah nengeri semua iya ari menua raban bansa Judah enggau Simeon. Ari menua Benjamin sida diberi empat buah nengeri: Gibeon, Geba, Anatot enggau Almon, sama enggau padang rumput sida. Tiga belas buah nengeri semua iya diberi ngagai peturun Imam Aron, sama enggau padang rumput sida. Ruang bilik ti bukai ari peturun Lewi ti ari raban peturun Kohat, diberi sekeda nengeri di menua Epraim. Sida diberi empat buah nengeri: Sekem, enggau padang rumput iya, di menua ti bebukit dalam menua Epraim (sebuah ari nengeri ti alai ngerarika diri), Geser, Kibsaim, enggau Bet-horon, sama enggau padang rumput sida. Ari menua Dan, sida diberi empat buah nengeri: Eltekeh, Gibeton, Aijalon, enggau Gat-rimon, sama enggau padang rumput sida. Ari menua Manasi Barat sida diberi dua buah nengeri: Taanah enggau Gat-rimon, sama enggau padang rumput sida. Ruang bilik raban peturun Kohat nerima sepuluh buah nengeri semua iya, sama enggau padang rumput sida. Siti agi raban bansa orang Lewi, iya nya raban peturun Gerson, nerima dua buah nengeri ari menua Manasi Timur: Golan di Basan (sebuah ari nengeri alai ngerarika diri) enggau Besterah, sama enggau padang rumput sida. Sida nerima empat buah nengeri ari menua Isakar: Kision, Daberat, Jarmut, enggau En-ganim, sama enggau padang rumput sida. Ari menua Aser sida nerima empat buah nengeri: Misal, Apdon, Helkat, enggau Rehob, sama enggau padang rumput sida. Ari menua Naptali, sida nerima tiga buah nengeri: Kedes di Galili, sama enggau padang rumput iya (sebuah ari nengeri alai ngerarika diri), Hamot-dor, enggau Kartan, sama enggau padang rumput sida. Semua ruang bilik raban peturun Gerson nerima tiga belas buah nengeri semua iya, sama enggau padang rumput sida. Peturun Lewi ti bukai, iya nya bala raban peturun Merari, nerima empat buah nengeri ari menua Sebulun: Joknim, Kartah, Dimnah, Nahalal, sama enggau padang rumput sida. Ari menua Reuben sida nerima empat buah nengeri: Beser, Jahas, Kedemot enggau Mepat, sama enggau padang rumput sida. Ari raban bansa Gat sida nerima empat buah nengeri: Ramot-giliat, sama enggau padang rumput iya (sebuah ari nengeri ti alai ngerarika diri), Mahanaim, Hesbon, enggau Jaser, sama enggau padang rumput sida. Nya alai raban peturun Merari udah diberi dua belas buah nengeri semua iya. Nya alai TUHAN meri ngagai orang Israel semua menua ti udah disemaya deka diberi Iya ngena sumpah ngagai aki ini sida. Lebuh sida udah ngalahka menua nya, sida lalu ngentapka diri dia. TUHAN meri sida pengelikun di serata menua nya, munyi ti udah disemaya Iya ngagai aki ini sida. Nadai siku ari bala munsuh sida ulih ngelaban sida, laban TUHAN udah ngasuh orang Israel menang ngelaban semua munsuh sida. TUHAN udah ngingatka genap iti semaya ti udah digaga Iya enggau orang Israel. Udah nya Josua lalu ngempuruka orang ari raban bansa Reuben, Gat, enggau Manasi Timur. Ku iya bejaku enggau sida, “Kita udah ngereja semua utai ti udah diasuh Moses ke nembiak TUHAN, lalu kita udah ngasika semua pesan aku. Kenyau ari menya nadai sekali kita udah ninggalka orang Israel ti bukai. Kita udah bejimat ngasika pesan TUHAN Allah Taala kita. Diatu, munyi ti udah disemaya Iya, TUHAN Allah Taala kita udah ngasuh orang Israel ti bukai diau dalam pemaik. Nya alai pulai meh kita ngagai menua kita empu, di timur Sungai Jordan, ti udah diberi Moses, ke nembiak TUHAN, ngagai kita. Kita enda tau enda ngasika adat ti udah diberi Moses ngagai kita, iya nya, rinduka TUHAN Allah Taala kita, ngereja utai ti dikedekaka Iya, ngasika pesan Iya, tetap ati ngagai Iya, lalu nyembah Iya enggau pengabis ati, enggau pengabis semengat kita.” Nya alai Josua merekatka sida, lalu ngasuh sida pulai ngena jaku berekat tu: “Kita pulai kaya amat, mai mayuh jelu tupi, pirak, emas, temaga, besi, enggau kain. Bagi enggau raban bansa kita empu utai ti udah dirampas kita ari munsuh kita.” Udah nya sida pulai ngagai menua diri. Nyadi Moses udah meri menua di timur Sungai Jordan ngagai setengah ari raban bansa Manasi. Setengah ari raban bansa Manasi ti bukai diberi iya menua di barat Sungai Jordan, sama enggau raban bansa orang Israel ti bukai. Lebuh Moses ngasuh sida pulai ngagai langkau kain sida, lalu merekatka sida, iya bejaku ngagai sida, “Pulai kita ngagai langkau kain kita mai mayuh pengaya, mayuh jelu tupi, mai pirak, emas, temaga, enggau besi, mayuh kain; bagi perapasan kita enggau kaban belayan kita.” Nya alai orang ari raban bansa Reuben, Gat, enggau Manasi Timur, pulai ngagai menua diri. Sida ninggalka orang Israel ti bukai di Siloh, di menua Kanaan, lalu mupuk ngagai menua sida empu, iya nya menua Giliat, ti udah dialahka sida nitihka jaku ti dipesanka TUHAN ngagai sida, ngena Moses. Lebuh raban bansa Reuben, Gat enggau Manasi Timur datai di Gelilot, lebuh sida agi ba tebing barat Sungai Jordan, sida lalu ngaga siti alta ti besai, sereta manah gaya ba tebing sungai nya. Orang lalu madahka pasal nya ngagai orang Israel ti bukai, “Pendingka tu ulih kita! Raban bansa Reuben, Gat enggau Manasi Timur udah ngaga siti alta di Gelilot, ba tebing barat Sungai Jordan!” Lebuh orang Israel ninga nya, semua sida lalu begempuru di Siloh deka nyerang raban bansa ti di timur. Udah nya orang Israel lalu ngasuh Pinehas, anak Imam Eleasar, mansang ngagai raban bansa Reuben, Gat enggau Manasi Timur di menua Giliat. Sepuluh iku tuai bejalai enggau Pinehas, siku ari siti-siti raban bansa ti di barat, genap iku sida nya endang tuai ke suku raban bansa sida empu. Sida datai di menua Giliat, ngagai raban bansa Reuben, Gat, enggau Manasi Timur, lalu bejaku ngarika semua nembiak TUHAN. Ku sida, “Nama kebuah kita ngereja utai ti jai tu lalu ngelaban Allah Taala ke disembah orang Israel? Kita udah ngelaban TUHAN, laban kita udah ngaga alta tu ke diri empu, lalu enda agi nitihka Iya! Kingatka dosa kitai di Peor, lebuh TUHAN ngukum bala nembiak Iya ngena penyakit ti balat berampit? Kitai agi natka pemerinsa ketegal nya. Kati dosa nya enda chukup ba kita? Kati kita diatu enggai agi nitihka Iya? Enti kita ngelaban TUHAN sehari tu, Iya deka ringat ngagai semua orang Israel pagila. Nya alai, enti menua kita enda chukup manah alai nyembah Iya, kita tau datai ngagai menua TUHAN, alai Langkau Kain TUHAN bediri. Ambi menua ari bala kami. Tang anang ngelaban TUHAN, tauka ngaga kami nyadi orang ke angkat ngelaban ketegal kita begagaka alta nambahka alta TUHAN Allah Taala kitai. Kingatka pasal Achan ari raban peturun Serah ti enda ngasika pesan pasal utai ti deka dirusak. Semua orang Israel udah diukum ketegal nya. Ukai semina Achan siku aja ke mati ketegal dosa iya.” Raban bansa Reuben, Gat enggau Manasi Timur lalu nyaut bala tuai bilik ari raban bansa ti di barat: “ TUHAN nya meh Allah Taala ti ari atas semua petara! TUHAN nya meh Allah Taala ari atas semua petara! Iya sigi nemu; lalu Iya ngasuh Israel nemu! Enti kami tu udah angkat ngelaban tauka enda agi tetap ati ngagai TUHAN, anang nejuka kami idup sehari tu! Enti kami udah enda ngasika TUHAN, lalu udah ngaga alta ke kami empu alai kami nunu piring pemaik, awakka TUHAN Empu ngukum kami. Kami ngereja utai tu laban kami takutka peturun kita jemah ila nyebut ngagai peturun kami, ‘Kita nadai kaul enggau TUHAN Allah Taala ke disembah orang Israel! Iya udah ngaga Sungai Jordan nyadika garis entara menua kena nyeraraka kami ari kita raban bansa Reuben enggau Gat. Kita nadai kaul enggau TUHAN.’ Udah nya, kada enda peturun kita deka nagang peturun kami nyembah TUHAN. Nya kebuah kami ngaga siti alta, ukai alai nunu piring, tauka alai ngenjuk piring, tang nyadika tanda ke bala kami enggau ke kita, enggau ke rebak ti nangkanka kitai, pasal kami ke endang amat nyembah TUHAN di mua Langkau Kain Iya ti kudus, mai piring ti deka ditunu, sereta mai pemeri enggau piring pemaik. Alta tu kena nagang peturun kita ngumbai peturun kami nadai kaul enggau TUHAN. Ku runding kami, enti utai baka nya nyadi, peturun kami ulih nyebut, ‘Peda kita! Aki ini kami udah ngaga siti alta sebaka enggau alta TUHAN. Alta nya ukai alai nunu pemeri tauka piring, tang nyadi tanda ke bala kami enggau ke bala kita.’ Kami tetap enggai ngelaban TUHAN, tauka badu agi nitihka Iya lalu begagaka alta alai nunu piring, tauka piring tepung, tauka pemeri. Kami enggai ngaga alta bukai kelimpah ari alta TUHAN Allah Taala kitai ti bediri di mua Langkau Kain Iya.” Lebuh imam Pinehas enggau bala tuai orang Israel ke bejalai enggau iya, bala tuai bilik ari raban bansa ti di barat, ninga jaku orang ari raban bansa Reuben, Gat enggau Manasi Timur, sida puas ati. Ku Pinehas anak Imam Eleasar bejaku enggau sida, “Diatu baru kami nemu TUHAN bisi enggau kitai. Kita ukai angkat ngelaban Iya, lalu ketegal nya kita udah ngelepaska orang Israel ari ukum TUHAN.” Udah nya Pinehas enggau bala tuai lalu ninggalka raban bansa Reuben enggau Gat di menua Giliat, lalu mulaika diri ngagai menua Kanaan, ngagai orang Israel, lalu madahka berita nya ngagai sida. Orang Israel puas ati, lalu muji Allah Taala. Sida nadai agi bejakuka pasal sida ke deka nyerang lalu ngerusak menua ti alai raban bansa Reuben enggau raban bansa Gat ngentapka diri. Ku raban bansa Reuben enggau Gat bejaku, “Alta tu nyadika saksi ke semua kitai, pasal TUHAN ti endang Allah Taala kitai.” Nya alai sida lalu ngumbai alta nya “Saksi.” Nyau ke lama udah bekau nya, TUHAN meri orang Israel pengelikun. Sida nadai agi dikachau munsuh. Lebuh maya nya Josua udah tuai amat umur. Josua mesanka semua orang Israel, bala tuai bansa, bala kepala, bala hakim, enggau bala pemesai, lalu bejaku, “Aku diatu nyau tuai; lalu kita udah meda semua utai ti udah dikereja TUHAN Allah Taala kita ngagai semua bansa bukai ngarika kita, laban TUHAN Allah Taala kita udah beperang ngarika kita. Aku udah meri ngagai kita menua orang bansa bukai ke bedau dialahka aku, nyengkaum semua menua bansa orang ke udah dialahka aku, nyadika pesaka raban bansa kita, berengkah ari Sungai Jordan di timur nyentuk ngagai Tasik Tengah di barat. TUHAN Allah Taala kita deka ngasuh munsuh kita nyurutka diri ari kita, lalu Iya deka muru sida lebuh kita nyerang. Kita deka bempu menua sida, munyi ti udah disemaya Allah Taala kita ngagai kita. Nya alai kita mesti ngasi lalu ngereja semua utai ti ditulis dalam Bup Adat Moses. Kita mesti ngereja semua utai ti ditulis dalam bup nya, lalu anang bekaul enggau tugau bansa bukai ti tinggal ba bala kita. Nyebut nama petara sida deh kita enda tau. Anang besumpah atas nama petara sida, tauka nyembah tauka meremi ngagai petara sida, tang kita patut bepegai teguh ba TUHAN ti Allah Taala kita, baka ti udah dikereja kita nyentuk ngagai ke diatu. Laban TUHAN udah muru bansa ti kering sereta bekuasa lebuh kita majakka pejalai kita, lalu nadai orang udah kala tan ngelaban kita nyentuk ngagai sehari tu. Siku-siku kita ulih ngasuh seribu iku munsuh rari, laban TUHAN Allah Taala kita beperang ngarika kita, munyi ti udah disemaya Iya. Nya alai, kita mesti rinduka TUHAN Allah Taala kita. Enti kita enda taluk lalu bekaul enggau tugau orang bansa bukai ke agi tinggal, lalu jadi melaki-bini enggau sida, TUHAN Allah Taala kita deka badu agi muru bansa orang nya lebuh kita nyerang. Sida deka ngerusak kita baka panjuk, tauka baka lubang kebung, lalu ngemediska kita baka penyipat ti disipatka ngagai belakang kita, tauka baka duri dalam mata kita. Utai tu deka nyadi datai ke semua kita nadai agi tinggal di menua ti manah tu, ti udah diberi TUHAN Allah Taala kita ngagai kita. “Nyadi diatu, aku nyau deka mati. Genap iku kita nemu dalam ati enggau dalam semengat kita, TUHAN Allah Taala kita udah meri ngagai kita semua utai ti manah, ti udah disemaya Iya. Genap semaya ti udah digaga Iya, udah dikamatka Iya magang. Nadai siti semaya nya ti enda dikamatka Iya. Tang baka Iya ti udah ngamatka semua semaya ti udah digaga Iya enggau kita, baka nya mega Iya deka ninggang kita enggau penusah ti besai munyi ti udah disebut Iya ngagai kita. Enti kita ngelanggar sempekat ti udah diberi TUHAN Allah Taala kita ngagai kita, lalu kita betuaika sereta nyembah petara bukai, TUHAN deka ringat lalu ngukum kita, lalu kita deka jampat abis mati di menua ti manah ti udah diberi Iya ngagai kita.” Josua ngasuh semua raban bansa orang Israel begempuru di Sekem. Iya mesanka semua tuai, bala kepala, bala hakim, enggau bala pemesai orang Israel. Semua sida lalu datai magang di mua Allah Taala. Josua lalu bejaku ngagai semua orang Israel, “Ku TUHAN Allah Taala ke disembah orang Israel bejaku: ‘Dulu kelia bala aki ini kita, nyengkaum Terah, apai Abraham seduai Nahor, diau di seberai Sungai Eupratis, lalu nyembah petara bukai. Udah nya Aku lalu ngambi aki kita Abraham, ari menua ti di seberai Sungai Eupratis, lalu mai iya nengah semua menua Kanaan. Aku meri iya mayuh peturun. Aku meri iya Isak, lalu Aku meri Jakop seduai Esau ngagai Isak. Aku meri menua ti bebukit di Edom ngagai Esau nyadika pesaka iya, tang aki kita Jakop enggau bala anak iya nurun ngagai menua Ejip. Udah nya Aku ngirumka Moses seduai Aron, lalu Aku ngasuh penusah ti besai ninggang menua Ejip. Tang Aku mai kita pansut. Aku mai aki ini kita pansut ari menua Ejip, lalu orang Ejip begagaika sida ngena kerita perang enggau bala soldadu ti nepan kuda. Tang lebuh bala aki ini kita datai ba Tasik Mirah, sida lalu ngangau minta Aku nyaup sida. Aku lalu ngengkahka pemetang entara sida enggau orang Ejip. Aku ngasuh ai tasik ngelamun lalu ngelemaska orang Ejip. Kita nemu utai ti udah dikereja Aku ngagai menua Ejip; lalu kita lama diau di menua puang. Udah nya Aku mai kita ngagai menua orang Amor, ti diau di timur Sungai Jordan. Sida nyerang kita, tang Aku nyerahka sida ngagai jari kita. Kita ngerampas menua sida, lalu Aku ngerusak sida lebuh kita majakka pejalai kita. Udah nya raja orang Moap, Balak anak Sipor beperang ngelaban kita. Iya mesanka Balaam anak Beor, minta iya nyumpah kita. Tang Aku enggai mendingka Balaam. Nya alai Aku lalu merekatka kita. Nya meh jalai Aku ngelepaska kita ari Balak. Kita meraka Sungai Jordan, lalu datai di Jeriko. Orang ari Jeriko lalu beperang ngelaban kita. Orang Amor, orang Peris, orang Kanaan, orang Iti, orang Girgas, orang Ibi enggau orang Jebus mega beperang ngelaban kita. Tang Aku nyerahka sida ngagai jari kita. Lebuh kita majakka pejalai kita, Aku ngasuh sida begau abis ati, lalu Aku muru dua iku raja orang Amor. Ukai pedang tauka panah kita ke ngereja nya. Aku udah meri ngagai kita menua ti nadai kala dipumai kita, enggau nengeri ti ukai digaga kita. Diatu kita diau dia, lalu makai buah anggur enggau buah kana ti ukai ditanam kita. Nya alai, kemesaika TUHAN lalu betuaika Iya ngena ati ti betul sereta tetap. Buai semua petara ti udah disembah aki ini kita di menua Mesopotamia, enggau di menua Ejip: sembah TUHAN siku aja. Enti kita enggai nyembah TUHAN, pilih sehari tu ni bagi petara ti deka dipetuaika kita, nemuka iya nya petara ti udah disembah aki ini kita di menua Mesopotamia, tauka petara orang Amor, ke bempu menua ti alai kita diau diatu. Tang aku enggau semua kami sebilik deka betuaika TUHAN.” Orang mayuh lalu nyaut, “Kami enggai sekali-kali ninggalka TUHAN lalu betuaika petara bukai! TUHAN Allah Taala kitai udah mai aki ini kitai enggau bala kitai pansut ari menua Ejip, alai kitai ti udah nyadi ulun, lalu kitai udah meda kereja ajih ti dikereja Iya. Iya udah nyaga kitai lebuh kitai nengah menua semua bansa ti ditengah kitai. Lebuh kitai majakka pejalai kitai tama menua tu, TUHAN muru semua orang Amor ti diau ditu. Nya alai kami deka mega betuaika TUHAN, laban Iya endang Allah Taala kitai.” Ku Josua bejaku ngagai orang Israel, “Kita enda ulih betuaika TUHAN, laban Iya Allah Taala ti kudus. Iya Allah Taala ti chemburu, lalu Iya enggai ngampun penyalah tauka dosa kita. Enti kita ninggalka TUHAN lalu betuaika petara orang bansa bukai, Iya deka mutar ngelaban kita lalu ngukum kita. Iya deka ngerusak kita, taja pen Iya udah manah enggau kita.” Orang mayuh lalu nyebut ngagai Josua, “Kami deka betuaika TUHAN.” Josua lalu bejaku ngagai sida, “Kita empu besaksika diri madahka diri deka betuaika TUHAN.” Orang mayuh lalu nyaut, “Kami sigi amat besaksika nya.” Lalu ku Josua bejaku ngagai sida, “Enti pia, buai magang semua petara orang bansa bukai ke dikembuan kita, lalu singitka pending kita ngagai TUHAN Allah Taala ke disembah orang Israel.” Lalu ku orang mayuh bejaku ngagai Josua, “Kami deka betuaika TUHAN Allah Taala kami, lalu kami deka ngasika jaku Iya.” Nya alai, sehari nya Josua lalu ngaga siti sempekat enggau orang mayuh, lalu meri sida adat enggau atur ti deka dititihka sida. Josua nuliska semua jaku nya dalam Bup Adat Allah Taala. Udah nya iya lalu ngambi sigi batu ti besai, lalu ngengkahka batu nya di baruh sepun kayu oak ba endur alai TUHAN diau. Josua lalu bejaku ngagai orang mayuh, “Batu tu deka nyadika saksi kitai; laban batu tu udah ninga semua leka jaku ti udah disebut TUHAN ngagai kitai; nya alai batu tu nyadika saksi ngelaban kita, enggai ke kita ngelaban Allah Taala kita.” Udah nya Josua ngasuh orang mayuh pulai, lalu semua sida pulai ngagai menua diri empu. Udah bekau nya, Josua anak Nun, ke nembiak TUHAN, mati lebuh umur iya seratus sepuluh taun. Sida lalu nguburka iya ba tanah iya empu di Timnat-serah, di menua ti bebukit dalam menua Epraim, tunga ke utara Bukit Gaas. Sekumbang Josua agi idup, orang Israel meruan betuaika TUHAN. Lebuh iya udah mati, orang Israel mengkang betuaika TUHAN, seagi-agi bala tuai bansa agi idup, ti udah meda semua pengawa ti dikereja TUHAN ti orang Israel. Tulang Josep, ti udah dibai orang Israel ari menua Ejip, lalu dikuburka di Sekem, ba sebidang tanah ti udah dibeli Jakop ari bala anak Hamor, ti apai Sekem, ngena rega seratus singkap duit pirak. Tanah nya nyadika pesaka bala peturun Josep. Eleasar anak Aron mati, lalu dikuburka di Gibe-ah, sebuah nengeri di menua ti bebukit dalam menua Epraim. Nengeri nya udah diberi ngagai anak iya Pinehas. Udah bekau pemati Josua, orang Israel lalu betanya ngagai TUHAN, “Sapa deka bejalai nguluka kami nyerang orang Kanaan?” Ku TUHAN nyaut, “Raban bansa Judah deka nguluka kita. Aku udah meri menua nya ngagai jari sida.” Ku raban bansa Judah bejaku enggau raban bansa Simeon, “Aram mansang sama enggau kami ngagai menua ti udah diberi ngagai kami, ngambika kitai sama nyerang orang Kanaan. Udah nya baru kami bejalai enggau kita, ngagai menua ti udah diberi ngagai kita.” Nya alai raban bansa Simeon enggau raban bansa Judah lalu sama mansang nyerang. TUHAN ngasuh sida menang ngelaban orang Kanaan enggau orang Peris, lalu sida ngalahka sepuluh ribu iku munsuh di Besek. Sida tetemuka Adonibesek di Besek, lalu nyerang iya. Adonibesek rari, tang sida ngagai iya, nangkap iya, lalu netak semua tunjuk indu jari enggau tunjuk indu kaki iya. Ku Adonibesek bejaku, “Tujuh puluh iku raja, ti udah ditetak tunjuk indu jari enggau tunjuk indu kaki, udah beputikka pemakai di baruh mija aku. Diatu Allah Taala udah ngereja ngagai aku utai ti udah dikereja aku ngagai sida.” Adonibesek lalu dibai ngagai Jerusalem, lalu iya mati dia. Raban bansa Judah nyerang Jerusalem, lalu ngalahka nengeri nya. Udah nya sida nyerang orang Kanaan ti diau di menua ti bebukit, ba kaki bukit, enggau di menua ti rangkai di selatan. Sida nyerang orang Kanaan ti diau di nengeri Hebron, ti dikumbai Kiriat-arba dulu menya. Dia sida ngalahka raban peturun Sheshai, Ahiram enggau Talmai. Raban bansa Judah angkat ari nya, lalu nyerang nengeri Debir, ti dikumbai Kiriat-seper lebuh maya nya. Siku ari bala sida ke benama Kalep lalu bejaku, “Aku deka ngasuh anak dara aku Aksah jadi enggau lelaki ke ulih ngalahka Kiriat-seper.” Otnil anak Kenas, lalu ngalahka nengeri nya. Nyadi Kenas nya adi Kalep. Kalep lalu meri anak dara iya Aksah ngagai Otnil nyadika bini Otnil. Ba hari seduai iya nikah, Otnil lalu ngasuh Aksah minta ari apai iya Kalep sebidang tanah. Aksah nurun ari keledai iya, lalu Kalep nanyaka utai ti dikedekaka iya. Ku Aksah nyaut, “Aku minta mata ai, laban tanah ti udah diberi nuan ngagai aku rangkai nadai ai.” Nya alai Kalep meri ngagai Aksah mata ai ti di ulu enggau ti di ili. Bala peturun mentua Moses, iya nya orang Ken, lalu mansang sama enggau orang Judah ari Jeriko, iya nya nengeri ti mayuh kayu engkerema, ngagai menua puang tunga ke selatan nengeri Arat di menua Judah. Sida lalu ngentapka diri dia begulai enggau orang Amalek. Raban bansa Judah mansang enggau raban bansa Simeon, lalu sida ngalahka orang Kanaan ti diau di nengeri Sepat. Sida nyumpah nengeri nya, ngerusak lalu meri nama Hormah ngagai nengeri nya. Munyi ti udah diatur Moses, Hebron diberi ngagai Kalep, lalu Kalep muru tiga bengkah raban peturun Anak ari nengeri nya. Tang raban bansa Benjamin enda muru orang Jebus ti diau di Jerusalem, lalu bansa orang nya agi mengkang diau begulai enggau orang Benjamin kenyau ari maya nya menya. Lebuh bala pematau nya meda siku orang pansut ari nengeri nya, sida lalu bejaku enggau iya, “Padahka ngagai kami chara tama ngagai nengeri tu, ngambika kami enda ngemediska nuan.” Orang nya lalu madahka ngagai sida. Raban bansa Epraim enggau raban bansa Manasi lalu munuh semua orang dalam nengeri nya, tang sida enda munuh orang nya tauka sida sebilik. Orang nya lalu mansang ngagai menua orang Iti, ngaga sebuah nengeri dia, lalu meri nama nengeri nya Lus. Nama nya mengkang nyentuk ngagai sehari tu. Raban bansa Manasi enda muru bansa orang ke diau dalam nengeri Bet-sean, Taanak, Dor, Iblim, Megido, enggau nengeri ti mit ti semak dia. Orang Kanaan agi mengkang diau di nengeri nya. Lebuh orang Israel nyau mansang kering agi, sida mejalka orang Kanaan bekereja ke sida, tang sida mengkang enda muru semua orang Kanaan ari menua nya. Raban bansa Epraim enda muru orang Kanaan ti diau di nengeri Geser. Nya alai orang Kanaan agi mengkang diau dia begulai enggau sida. Raban bansa Sebulun enda muru orang ke diau di nengeri Kitron, enggau Nahalal. Nya alai orang Kanaan agi mengkang diau dia begulai enggau sida, lalu dipejalka sida bekereja ke sida. Raban bansa Aser enda muru orang ke diau dalam nengeri Ako, Sidon, Ahlap, Aksip, Helbah, Apek enggau Rehob. Raban bansa Aser diau begulai enggau orang Kanaan ti nguan menua nya, laban sida enda muru orang Kanaan ari menua nya. Raban bansa Naptali enda muru orang ke diau dalam nengeri Bet-semes enggau Bet-anat. Sida diau begulai enggau orang Kanaan ti nguan menua nya, tang sida mejalka orang Kanaan bekereja ke sida. Orang Amor mejalka raban bansa Dan diau di menua ti bebukit, lalu enda nyagi sida nurun ngagai menua emperan. Orang Amor majak diau di Aijalon, Sa-albim, enggau di Har-heres, tang raban bansa Epraim enggau Manasi merintah sida, lalu mejalka sida bekereja ke sida. Tunga ke utara Sela, garis entara menua orang Edom ti di utara, ngerenchah Genting Akrabim. Melikat TUHAN bejalai ari Gilgal ngagai Bokim, lalu bejaku enggau orang Israel, “Aku udah mai kita pansut ari menua Ejip, lalu udah mai kita ngagai menua ti udah disemaya Aku ngagai aki ini kita. Ku Aku, ‘Aku enggai mungkir ari sempekat Aku enggau kita. Kita enda tau sekali-kali ngaga sempekat enggau orang ke diau di menua tu. Kita enda tau enda ngeruntuhka alta sida.’ Tang kita enda ngereja utai ti diasuh Aku, tang ngereja utai ti enda disagi Aku! Nya alai Aku madahka ngagai kita diatu, Aku enggai muru bansa orang tu ari mua kita lebuh kita nyerang. Sida deka nyadi munsuh kita, lalu kita deka disintak panjuk sida lalu nyembah petara sida.” Lebuh melikat nya udah nyebut nya, semua orang Israel lalu belabuh nyabak magang. Nya kebuah endur nya dikumbai Bokim. Sida lalu ngenjuk piring ngagai TUHAN ba endur nya. Josua lalu ngasuh orang Israel mupuk. Sida mupuk lalu ngambu menua ti udah diungkupka ngagai sida. Lebuh Josua agi idup, orang Israel majak nyembah TUHAN. Indah lebuh iya udah mati, deh sida agi nyembah TUHAN, seagi-agi orang ke tuai agi meruan idup, iya nya orang ke udah meda semua pengawa ti besai ti udah dikereja TUHAN ti orang Israel. Josua anak Nun, ke nembiak TUHAN, mati lebuh umur iya seratus sepuluh taun. Iya dikuburka ba tanah iya empu di Timnat-serah, di menua ti bebukit di menua Epraim, tunga ke utara Bukit Gaas. Orang ke rebak iya udah mega mati magang, lalu rebak orang ke nangkanka sida enda agi ingatka TUHAN, tauka pasal utai ti udah dikereja TUHAN ti orang Israel. Udah nya orang Israel bedosa ngelaban TUHAN, lalu belabuh nyembah Baal. Sida ninggalka TUHAN Allah Taala aki ini sida, Allah Taala ti udah mai sida pansut ari menua Ejip, lalu sida belabuh nyembah petara bukai, iya nya petara bansa orang ke diau ngelingi sida. Sida meremi ngagai petara nya, lalu TUHAN ringat. Sida ninggalka TUHAN, lalu nyembah Baal enggau Astarte. Nya alai TUHAN pedis ati ngagai orang Israel, lalu nejuka bala perumpak nyerang lalu ngerumpak sida. Iya nejuka munsuh ti ngelingi sida ngalahka sida, lalu orang Israel enda ulih nyaga diri agi. Genap kali sida mansang beperang, TUHAN ngelaban sida, munyi ti udah dipadahka Iya. Sida amat merinsa. Udah nya TUHAN meri orang Israel tuai ke ngelepaska sida ari kuasa bala perumpak. Tang orang Israel enggai mendingka bala tuai sida. Orang Israel enda tetap ati ngagai TUHAN, lalu sida nyembah petara bukai. Aki ini sida udah ngasika pesan TUHAN, tang rebak ti baru tu jampat amat badu ngasika pesan TUHAN. Lebuh TUHAN meri siku tuai ngagai orang Israel, TUHAN nyaup tuai nya, lalu ngelepaska orang Israel ari jari munsuh sida, seagi tuai nya meruan idup. TUHAN kasihka sida, laban sida bedemuh natka pemerinsa ditekanka orang. Tang lebuh tuai nya mati, orang Israel lalu pulai baru ngagai pendiau sida ke lama, lalu nyadi jai agi ari rebak ti dulu ari sida. Sida meremi lalu nyembah petara bukai, lalu majak kieh ati nitihka jalai sida ke jai. Udah nya TUHAN lalu pedis ati ngagai orang Israel. Ku Iya, “Bansa orang tu udah ngelanggar sempekat ti udah diasuh Aku titihka bala aki ini sida. Nya alai laban sida enda ngasika Aku, Aku enggai agi muru bansa ti agi diau di menua tu lebuh Josua mati. Aku deka ngena bansa orang nya ngabas sekalika orang Israel deka nitihka jalai Aku, baka aki ini sida, tauka enggai.” Nya alai TUHAN nejuka bansa orang nya mengkang diau di menua nya. TUHAN enda nyagi Josua menang ngelaban sida, lalu Iya pen enda mega muru bansa orang nya lebuh Josua udah mati. Nya alai TUHAN nejuka sekeda orang bansa bukai diau di menua nya, kena Iya nguji orang Israel ti enda teleba beperang di menua Kanaan. Iya ngereja nya ngambika genap serak orang Israel nemu beperang, kelebih agi sida ke nadai kala beperang. Orang bansa bukai ti agi diau di menua nya nyengkaum orang Pilistin ke mengkang diau dalam lima buah nengeri, semua orang Kanaan, orang Sidon, enggau orang Ibi ti diau ba Bukit Lebanon berengkah ari Bukit Baal Hermon nyentuk ngagai Lebo-hamat. Sida nya dikena nguji orang Israel, kena nemu enti sida deka tauka enggai ngasika pesan ti udah diberi TUHAN ngagai aki ini sida, ngena Moses. Nya alai orang Israel ngentapka diri diau begulai enggau orang Kanaan, orang Iti, orang Amor, orang Peris, orang Ibi, enggau orang Jebus. Sida jadi enggau bansa orang nya, lalu nyembah petara sida. Orang Israel enda agi ingatka TUHAN Allah Taala sida. Sida bedosa ngelaban Iya, lalu nyembah engkeramba Baal enggau Aserah. Nya alai TUHAN ringat ngagai orang Israel, lalu nejuka Raja Kusan-risataim ari menua Mesopotamia ngalahka sida, lalu iya merintah sida lapan taun. Udah nya orang Israel nyabak ngangauka TUHAN. Iya lalu ngasuh siku orang ngelepaska sida. Orang nya Otnil, anak adi Kalep ke benama Kenas. Roh TUHAN bekuasa ba Otnil, lalu iya nyadi tuai orang Israel. Otnil ngayau, lalu TUHAN ngasuh iya menang ngelaban raja menua Mesopotamia. Menua nya lalu nadai agi pengachau empat puluh taun. Otnil lalu mati. Orang Israel lalu bedosa baru ngelaban TUHAN. Ketegal nya, TUHAN ngasuh Eglon ti nyadi raja orang Moap kering agi ari orang Israel. Eglon lalu beserakup enggau orang Amon sereta enggau orang Amalek. Sida ngalahka orang Israel lalu ngerampas Jeriko, iya nya nengeri ti mayuh kayu engkerema. Orang Israel diperintah Eglon lapan belas taun. Udah nya orang Israel nyabak ngangauka TUHAN, lalu Iya ngasuh siku orang ngelepaska sida. Orang nya Ehut anak Gera. Orang nya chawit. Iya datai ari raban bansa Benjamin. Orang Israel lalu ngasuh Ehut betemu enggau Eglon, raja Moap, mai pemeri ngagai iya. Ehut lalu ngaga siti pedang ti bemata dua; pemanjai pedang nya kira 50 sentimeter. Iya nanchangka pedang nya ba rusuk kanan iya, dilamun pekayan iya. Udah nya iya mai pemeri ngagai Eglon. Nyadi Eglon tu orang ke gemu amat. Lebuh Ehut udah meri pemeri ngagai Eglon, Ehut lalu ngasuh orang ke udah mai pemeri nya pulai. Tang lebuh Ehut datai ba batu ti udah diukir, iya nikal baru ngagai Eglon, lalu bejaku enggau iya, “Tuan Raja, aku bisi pesan ti resia ti deka dipadahka aku ngagai nuan.” Raja nya lalu ngasuh bala orang gaji iya pansut, ninggalka seduai iya Ehut kediri. Ehut lalu datai semak ngagai raja ke benung duduk. Ehut lalu bejaku, “Aku bisi pesan ari Allah Taala ke nuan.” Raja lalu bediri. Ehut lalu nyintak pedang ari rusuk kanan iya ngena jari kiba, lalu ngerejangka pedang nya ngagai perut raja. Pedang nya ampuh, ngebuska tubuh raja, datai ke ulu pedang nya nyau ampuh ke dalam lemak raja. Ehut nejuka pedang nya mengkang ba perut raja. Ehut lalu pansut, nikupka pintu bilik raja lalu ngunchi pintu nya. Lebuh bala orang gaji datai, sida nemu pintu nya dikunchi. Tang sida ngumbai raja bisi di dalam, agi dalam bilik mandi. Sida lalu nganti, tang lebuh raja mengkang enda muka pintu, sida ngambi kunchi lalu muka pintu nya, lalu tepedaka raja sida mati garing-garing ba geladak. Sekumbang bala orang gaji benung nganti raja muka pintu, Ehut majak ngerarika diri. Iya mansa batu ti udah diukir nya, lalu rari ngagai Seirah. Lebuh iya datai di Seirah, di menua ti bebukit di menua Epraim, iya lalu nyepu terumpit kena iya megau orang Israel, deka mai sida mansang beperang. Udah nya iya lalu nguluka sida nurun ari menua ti bebukit nya. Ku iya, “Titihka aku, laban TUHAN udah nyerahka orang Moap ngagai jari kitai.” Sida lalu nitihka Ehut, lalu ngalahka orang Moap ba pemeraka Sungai Jordan. Nadai siku munsuh ditejuka sida meraka sungai nya. Sehari nya sida munuh kira sepuluh ribu iku bala soldadu orang Moap ti pemadu kering. Nadai siku sida ulih ngerarika diri. Nya meh hari sida ngalahka orang Moap. Menua lalu nadai agi pengachau lapan puluh taun. Tuai ke nangkanka Ehut nya Samgar anak Anat. Samgar mega ngelepaska orang Israel. Iya ngereja pengawa nya lebuh iya munuh enam ratus iku orang Pilistin ngena tungkat ti dikena iya ngibun sapi. Lebuh Ehut udah mati, orang Israel lalu bedosa baru ngelaban TUHAN. Nya alai TUHAN nejuka sida dialahka Jabin, siku raja orang Kanaan ke merintah di nengeri Hasor. Orang ke nyadi tuai ke bala soldadu iya nya Sisera, ti diau di Haroset-ha-goiim. Jabin bisi semilan ratus buah kerita perang ti digaga ari besi, lalu iya balat amat nekan sereta merinsaka orang Israel lebuh iya merintah sida dua puluh taun. Udah nya orang Israel nyabak ngangauka TUHAN. Nyadi Deborah, bini Lapidot, nya nabi, lalu iya bekereja nyadi hakim ke orang Israel lebuh maya nya menya. Iya selalu duduk di baruh sepun kayu engkerema, ba entara nengeri Ramah enggau nengeri Betel, di menua ti bebukit di menua Epraim, lalu orang Israel datai kia minta iya ngatur pekara sida. Nyadi sekali Deborah mesanka Barak anak Abinoam datai ngagai iya ari nengeri Kedes di menua Naptali. Ku iya bejaku enggau Barak, “ TUHAN Allah Taala ke disembah orang Israel udah meri pesan tu ngagai nuan: ‘Bai sepuluh ribu iku orang ari raban bansa Naptali enggau Sebulun, lalu uluka sida ngagai Bukit Tabor. Aku deka mai Sisera, tuai soldadu Jabin, lalu ngasuh iya beperang ngelaban nuan ba Sungai Kison. Iya deka mai kerita perang iya enggau bala soldadu iya, tang Aku deka ngasuh nuan menang.’ ” Barak lalu nyaut, “Aku sigi mupuk, enti nuan deka mupuk enggau aku, tang enti nuan enggai mupuk enggau aku, aku enda mupuk.” Disaut Deborah, “Barang ku jaku. Aku deka mupuk enggau nuan, tang nuan enda dibasa orang ketegal pemenang nya, laban TUHAN deka nyerahka Sisera ngagai indu.” Deborah lalu mupuk enggau Barak ngagai Kedes. Barak mesanka raban bansa Sebulun enggau raban bansa Naptali datai ngagai Kedes, lalu sepuluh ribu iku orang nitihka iya. Deborah lalu mupuk enggau Barak. Ba urung maya nya Heber, orang Keni udah nirika kem iya ba semak Kedes, semak kayu oak ti di Sananim. Iya udah ninggalka orang Keni ti bukai, iya nya orang ke ari peturun Hobap, ipar Moses. Lebuh Sisera nemu Barak udah niki ngagai Bukit Tabor, iya mesanka semilan ratus buah kerita perang iya ti digaga ari besi, enggau semua soldadu iya, lalu ngasuh sida angkat ari Haroset-ha-goiim lalu mansang ngagai Sungai Kison. Deborah lalu bejaku enggau Barak, “Mupuk nuan! TUHAN deka nguluka nuan! Sehari tu TUHAN deka ngasuh nuan menang ngelaban Sisera.” Barak lalu nurun ari Bukit Tabor, mai sepuluh ribu iku soldadu. Lebuh Barak enggau bala soldadu iya nyerang, TUHAN lalu ngasuh Sisera, kerita perang enggau bala soldadu iya begau abis ati. Sisera nurun ari kerita perang iya, lalu rari bejalai kaki. Barak begagaika kerita perang enggau bala soldadu Sisera nyentuk ngagai Haroset-ha-goiim, lalu semua bala soldadu Sisera abis dibunuh. Nadai siku sida ditejuka idup. Sisera rari ngagai langkau kain Jael, bini Heber orang Keni laban Jabin, ti nyadi raja di Hasor, udah bebaik enggau suku raban bansa Heber. Jael pansut lalu ngambat Sisera. Ku iya bejaku enggau Sisera, “Tama ngagai langkau kain aku, tuan. Anang takut.” Sisera lalu tama, lalu Jael ngelalaika iya ari belakang kain tirai. Ku Sisera bejaku enggau Jael, “Beri aku ngirup. Aus amat aku tu.” Jael lalu muka siti sarang ai tusu, lalu meri iya ngirup. Jael lalu ngelalaika Sisera baru. Udah nya Sisera bejaku enggau iya, “Bediri di mua pintu langkau kain. Enti orang bisi datai lalu nanyaka enti orang bisi ditu, padahka nadai.” Sisera nyau udah lelak amat, nya alai iya jenak amat tinduk. Jael lalu ngambi tukul enggau siti tiang bantil langkau kain, mansang begadai-gadai ngagai Sisera, lalu mantangka tiang bantil nya ba tepisan Sisera, kebus ke tanah. Sisera lalu mati. Lebuh Barak datai ngiga Sisera, Jael lalu pansut ngambat Barak. Ku Jael bejaku enggau Barak, “Datai kitu! Aku deka madahka ngagai nuan orang ke digiga nuan.” Barak lalu tama enggau Jael, lalu iya tepedaka Sisera garing-garing ba tanah, mati, dipantang ngena tiang bantil langkau kain ti ngebuska pala iya. Sehari nya Allah Taala ngasuh orang Israel ngalahka Jabin raja orang Kanaan. Sida lalu bebendar agi ngelaban Jabin, datai ke nyau mati dibunuh sida. Ba hari nya Deborah seduai Barak anak Abinoam bepantun ngena lagu tu: “Pujika TUHAN! Orang Israel mutus ati deka belaban. Orang Israel gaga ati nyerahka diri mansang beperang. Pendingka tu ulih kita bala raja enggau pemerintah! Aku deka belagu lalu nebah musik ke TUHAN Allah Taala ke disembah orang Israel. TUHAN, lebuh Nuan ninggalka bukit di Seir, lebuh Nuan pansut ari menua Edom, tanah berenyang, lalu hari ujan. Sigi amat, ai tebubuh ari mua hari. Bukit berenyang di mua TUHAN ti datai ari Sinai, di mua TUHAN Allah Taala ke disembah orang Israel. Lebuh maya Samgar anak Anat, lebuh maya Jael, kerita unta nadai agi bejalai nengah menua tu lalu orang nadai agi bejalai nengah jalai raya. Nengeri orang Israel nadai agi orang nguan, Deborah. Nengeri nya puang nyentuk ngagai maya nuan datai, baka indai orang Israel. Lebuh orang Israel nyembah petara bukai perang lalu nyadi di menua Israel Ari empat puluh ribu iku orang Israel, nadai siku sida mai terabai tauka sangkuh. Ati aku endang semampai ingatka bala tuai soldadu orang Israel, enggau bala orang ke gaga ati nyerahka diri mansang beperang. Puji TUHAN! “Padahka pasal utai nya kita ke nepan keledai ti burak, ke duduk ba atas penuduk ti ba belakang keledai nya, enggau kita ke bejalai kaki. Pendingka orang mayuh ke richah ba tisi telaga ke madahka pasal pemenang TUHAN pemenang orang Israel! Udah nya, bala nembiak TUHAN bebaris nurun ari nengeri sida. Deborah, uluka bala! Uluka sida! Belagu lebuh kitai bejalai! Mansang ke mua meh nuan Barak anak Abinoam. Bai orang tangkap nuan kebukai! Udah nya orang ke tetap ati deka nurun ngagai bala tuai sida. Bala nembiak TUHAN datai ngagai Iya sedia deka beperang. Sida datai ari Epraim mansang ngagai lebak, ngentudika raban bansa Benjamin enggau bala sida. Bala tuai soldadu nurun ari Machir, bala pemesai nurun ari Sebulun. Bala tuai raban bansa Isakar datai enggau Deborah. Sigi amat. Isakar datai, lalu Barak mega datai, lalu sida nitihka Barak ngagai lebak nya. Tang suku raban bansa ti diturunka Reuben beserekang penemu. Sida enda nemu mutuska runding sekalika sida datai tauka enda. Nama kebuah sida ninggalka diri enggau bedus sida? Deka mendingka bala pengibun bedus ngumbai bedus sida? Sigi amat. Suku raban bansa ti diturunka Reuben udah beserekang penemu. Sida enda nemu mutuska runding sekalika sida datai tauka enda. Raban bansa Gat diau di timur Sungai Jordan, lalu raban bansa Dan mengkang diau semak kapal sida. Raban bansa Aser diau semak tebing tasik. Sida mengkang diau ba tebing tasik. Tang raban bansa Sebulun enggau Naptali berambunka nyawa beperang. Ba Taanak, semak sungai Megido, bala raja datai lalu nyerang. Bala raja orang Kanaan nyerang, tang sida enda nabanka perengka pirak. Bintang nyerang ari langit. Lebuh sida bejalai meraka langit, sida beperang ngelaban Sisera. Sida anyut ditabanka ai bah di Kison, Sungai Kison ti deras. Aku deka bejalai, lalu majak bejalai, ngena pengering! Udah nya bala kuda datai belanda, kaki sida redup-redup ngindik tanah. “Sumpah Meros,” ku melikat TUHAN bejaku, “siti sumpah ke orang ke diau dia, laban sida nadai datai nyaup TUHAN, nyadi soldadu lalu beperang ngarika Iya. “Indu ti pemadu beberekat nya Jael, bini Heber ari raban bansa Ken, indu ke pemadu beberekat ari semua indu ke diau dalam langkau kain. Sisera minta ai irup, tang Jael meri iya ai tusu. Jael mai ngagai iya ai tusu ngena mangkuk ti manah gaya. Ba jari iya sepiak, iya mai siti tiang bantil langkau kain, lalu enggau jari iya sepiak, iya mai tukul. Iya ngembalka Sisera lalu mechahka kerubung pala iya. Iya ngebuska pala Sisera. Sisera angkat nyerugang, rebah lalu mati semak kaki Jael. Semak kaki Jael, iya angkat nyerugang lalu rebah. Iya mati lalu rebah ke tanah. Indai Sisera nyenguk ari jenila. Iya nilik ari belakang jenila. “Nama kebuah kerita perang iya lalu apin datai?” ku iya nanya. “Nama kebuah kuda iya lalu apin pulai?” Pangan iya ke pemadu pintar lalu nyaut iya, lalu ku iya betanduka runding dalam ati diri, “Sida semina begigaka utai ti deka ditangkap sereta dibagi, siku tauka dua iku indu ke genap iku soldadu, kain ti berega ke Sisera, kain ti udah disulam kena malut rekung kuin.” “Awakka semua munsuh Nuan mati baka nya, O TUHAN, tang awakka bala pangan Nuan manchar baka mata hari ti benung niki! Menua nya lalu nadai agi pengachau empat puluh taun. Orang Israel lalu bedosa baru ngelaban TUHAN. Nya alai Iya nejuka orang Midian merintah sida tujuh taun. Orang Midian kering agi ari orang Israel, lalu orang Israel belalai ari orang Media dalam lubang gua enggau ba sebelah bukit. Genap kali orang Israel nanam utai, orang Midian enggau orang Amalek, enggau raban bansa orang ke diau di menua puang datai, lalu nyerang sida. Bala orang nya nirika kem sida di menua nya, lalu ngerusak semua utai ti ditanam nyentuk ngagai Gasa di selatan. Sida nabanka semua jelu bedus, sapi enggau keledai, lalu nadai ninggalka utai kena orang Israel beridup. Bala orang nya datai mai jelu tupi enggau langkau kain sida, ngemayuh buntak. Sida enggau jelu unta sida nyau enda ulih diitung agi. Sida datai lalu ngerusak menua. Orang Israel nadai daya ngelaban sida. Orang Israel lalu nyabak ngangauka TUHAN. Lebuh orang Israel nyabak ngangauka TUHAN ketegal orang Midian, TUHAN lalu ngirumka siku nabi ngagai orang Israel, lalu ku nabi nya bejaku ngagai sida, “Munyi tu ku jaku TUHAN Allah Taala ke disembah orang Israel: Aku udah mai kita pansut ari menua Ejip, ari endur alai kita ke nyadi ulun; lalu Aku udah ngelepaska kita ari jari orang Ejip, enggau ari jari semua orang ke nekanka pengidup kita, lalu muru sida lebuh kita majakka pejalai kita, lalu meri menua sida ngagai kita; lalu ku Aku bejaku ngagai kita, ‘Aku tu TUHAN Allah Taala kita; kita enda tau nyembah petara orang Amor, ke bempu menua ti alai kita diau.’ Tang kita enda mendingka Aku.” Melikat TUHAN datai di Oprah lalu duduk di baruh sepun kayu oak ti diempu Joas, ke ari raban peturun Abieser, lebuh anak iya Gideon benung nungku gandum belalai dalam pitan anggur, ngambika orang Midian enda meda gandum nya. Melikat TUHAN pegari di mua iya lalu bejaku, “Nuan ke kering sereta berani, TUHAN bisi enggau nuan!” Gideon lalu nyaut, “Enti TUHAN bisi enggau kami, nama kebuah utai tu nyadi ba kami? Lalu dini alai semua pengawa Iya ti badas ti dipadahka aki ini kami ngagai kami, lebuh sida nyebut, ‘Ukai enda TUHAN ti mai kami pansut ari menua Ejip?’ Tang diatu TUHAN udah muai kami, lalu nyerahka kami ngagai jari orang Midian.” Udah nya TUHAN lalu bejaku enggau Gideon, “Bejalai nuan ngena semua pengering nuan, lalu lepaska orang Israel ari jari orang Midian. Aku diatu ngasuh nuan ngereja pengawa nya.” Disaut Gideon, “Tang baka ni ku aku ulih ngelepaska orang Israel, TUHAN? Suku raban bansa aku pemadu lemi dalam raban bansa Manasi, lalu aku tu orang ke pemadu enda diguna orang dalam ruang bilik aku.” Ku TUHAN nyaut, “Aku deka enggau nuan, lalu nuan deka ngalahka orang Midian, ngemudah nuan ti ngalahka siku orang.” Ku Gideon nyaut, “Enti Nuan amat rinduka aku, beri aku siti tanda kena nunjukka Nuan, TUHAN, amat bejaku enggau aku. Anang guai mupuk, nganti aku udah mai piring, lalu ngenjuk piring nya ngagai Nuan.” TUHAN lalu bejaku, “Aku deka nganti nuan.” Gideon lalu pulai ke rumah, lalu manduk siku kambin ti agi biak. Iya ngambi sepuluh kilogram tepung, lalu ngaga roti ti enda beragi. Iya ngengkahka dagin nya ba bakul, kuah dalam periuk, mai utai nya ngagai melikat TUHAN di baruh kayu oak nya, lalu meri utai nya ngagai iya. Ku melikat nya bejaku enggau iya, “Engkahka dagin enggau roti nya ba atas batu tu, lalu tuang kuah ba dagin enggau roti nya.” Gideon lalu ngereja nitihka asuh melikat nya. Udah nya melikat TUHAN ngedarka tungkat iya, lalu negu dagin enggau roti nya ngena ujung tungkat nya. Api lalu pansut ari batu nya, lalu nganguska dagin enggau roti nya. Melikat nya lalu lesap. Nya baru Gideon nemu diri amat udah meda melikat TUHAN, lalu ku iya bejaku, “Nadai penyadi meh aku tu, O TUHAN Allah Taala, laban aku diatu udah meda mua melikat Nuan!” Tang ku TUHAN bejaku enggau iya, “Anang irau; anang takut, nuan enda mati.” Gideon lalu ngaga siti alta ke TUHAN ba endur nya, lalu iya ngumbai alta nya “ TUHAN nya Pemaik.” (Alta nya agi mengkang bediri di Oprah diatu. Nengeri Oprah nya diempu raban peturun Abieser.) Malam nya melikat TUHAN bejaku ngagai Gideon, “Bai sapi lelaki apai nuan, enggau siku agi sapi ti lelaki ti umur tujuh taun, runtuhka alta ti udah digaga apai nuan ke Baal, lalu tebang tanda petara indu Aserah, ti bediri ngimbai nya. Gaga siti alta ti tegap ke TUHAN Allah Taala nuan ba atas jumpu tanah tu. Udah nya ambi sapi ti lelaki ti kedua, lalu tunu iya segala nyadika piring, ngena tiang Aserah ti deka ditebang nuan nya nyadika kayu api nuan.” Gideon lalu mai sepuluh iku orang gaji iya lalu ngereja utai ti udah diasuh TUHAN. Iya ngereja nya lebuh malam hari, laban iya kelalu takutka sida sebilik, sereta takutka orang ke di nengeri nya enti iya ngereja pengawa nya lebuh siang hari. Lebuh orang di nengeri nya dani pagi hari siti, sida nemu alta Baal enggau tiang Aserah udah ditebang, lalu sapi ti lelaki ti kedua udah ditunu ba alta ti udah digaga ba endur nya. Sida lalu betanya ngagai pangan diri, “Sapa ngereja tu?” Sida mansik, lalu nemu utai nya udah dikereja Gideon anak Joas. Udah nya sida lalu bejaku enggau Joas, “Bai anak nuan pansut kitu, ngambika kami munuh iya! Iya udah ngeruntuhka alta Baal lalu udah nebang tiang Aserah ti bediri ngimbai nya.” Tang ku Joas bejaku enggau semua sida ke betemu enggau iya, “Kati kita setanah enggau Baal? Kati kita bejaku ngarika Baal? Barang sapa setanah enggau Baal deka dibunuh sebedau pagi hari pagila. Enti Baal amat petara, awakka iya empu bejaku ngarika diri empu, laban alta ti udah dirubuh nya enggi iya.” Belabuh ari nya Gideon lalu dikumbai Jerubaal, laban ku Joas, “Awakka Baal empu bejaku ngarika diri empu, laban alta ti dirubuh nya endang enggi iya.” Udah nya bala orang Midian, orang Amalek, enggau bala raban bansa ti diau di menua puang lalu ngelumuka bala sida, meraka Sungai Jordan, lalu nirika kem sida ba Lebak Jesril. Roh TUHAN lalu bekuasa ba Gideon. Iya lalu nyepu terumpit mesanka bala raban peturun Abieser nitihka iya. Iya ngasuh bala seruan bejalai nengah serata dua bengkah menua Manasi, mai sida nitihka iya. Iya ngasuh bala seruan bejalai ngagai raban bansa Aser, Sebulun enggau Naptali. Sida lalu datai nitihka Gideon. Udah nya Gideon bejaku enggau Allah Taala, “Nuan madahka Diri udah mutuska runding deka ngena aku ngelepaska orang Israel. Enti pia, aku ngengkahka bulu bedus ba tanah ba endur alai kami ke ngindik gandum tu. Enti pagila semina bulu bedus nya aja bisi lekat ambun, tang tanah ti ngelingi nya rangkai, nya baru aku deka nemu Nuan amat deka ngena aku ngelepaska orang Israel.” Utai nya lalu nyadi. Lebuh Gideon dani tumu pagi hari siti, iya mulaska bulu bedus nya, lalu ai ti pansut ari bulu bedus nya chukup kena ngisi sigi mangkuk. Udah nya Gideon bejaku enggau Allah Taala, “Anang ringat ngagai aku, tang awakka aku bejaku sekali agi. Beri aku peluang sekali agi ngabas utai tu ngena bulu bedus. Sekali tu, awakka bulu bedus nya rangkai, tang tanah ti ngelingi nya basah.” Malam nya Allah Taala ngasuh bulu bedus nya rangkai, tang tanah nya basah laban ambun. Nyadi sekali, Gideon enggau semua bala iya angkat tumu pagi, lalu nirika kem sida ngimbai mata ai di Harot. Nyadi orang Midian nirika kem sida ba lebak ti tunga ke utara ari sida, ngimbai bukit Moreh. Ku TUHAN bejaku ngagai Gideon, “Bala nuan kelalu mayuh. Aku enggai ngasuh sida menang ngelaban orang Midian, enggai ke sida ngumbai diri menang ketegal pengering sida empu, lalu enggai muji Aku. Padahka ngagai orang mayuh munyi tu, ‘Barang sapa takut, awakka iya pulai.’ ” Baka nya ku jalai Gideon nguji sida; lalu dua puluh dua ribu iku pulai. Ka semina sepuluh ribu iku agi tinggal. Udah nya TUHAN lalu bejaku baru enggau Gideon, “Bala nuan agi kelalu mayuh. Bai sida ngagai ai. Din Aku deka nguji sida ke nuan. Enti Aku madahka ngagai nuan, ‘Orang tu deka bejalai enggau nuan,’ orang nya deka bejalai enggau nuan. Enti Aku madahka ngagai nuan, ‘Orang tu enda tau bejalai enggau nuan,’ iya enda bejalai enggau nuan.” Gideon lalu mai sida ngagai ai. TUHAN lalu bejaku ngagai Gideon, “Seraraka semua orang ke ngirup baka ukui, ari sida ke nyerugang lalu ngirup.” Tiga ratus iku sida ngauk ai ngena jari, lalu ngirup ai nya ari jari sida. Semua sida ti bukai nyerugang magang, lalu ngirup. Ku TUHAN bejaku ngagai Gideon, “Aku deka ngelepaska nuan lalu ngasuh nuan menang ngelaban orang Midian ngena tiga ratus iku sida ke nilat ai baka ukui. Asuh semua sida ti bukai pulai.” Gideon ngasuh semua orang Israel pulai, kelimpah ari sida ke tiga ratus iku nya. Semua bekal enggau terumpit sida ti bukai nya lalu diserahka sida ngagai orang ke tiga ratus iku nya. Nyadi kem orang Midian nya ba lebak ti ari baruh sida. Malam nya TUHAN bejaku ngagai Gideon, “Angkat, lalu serang kem nya; laban Aku udah nyerahka kem nya ngagai jari nuan. Tang enti nuan takut nyerang, bai nembiak nuan Purah, lalu mansang ngagai kem nya, lalu pendingka utai ti disebut sida. Lebuh nuan udah mendingka utai ti disebut sida, nuan deka berani nyerang kem nya.” Gideon enggau nembiak iya Purah lalu nurun ngagai tisi kem munsuh. Orang Midian, orang Amalek enggau orang ari raban bansa ti diau di menua puang nyau ngachir ba lebak nya, ngemayuh bala buntak, lalu jelu unta sida nyau enda ulih diitung, ngemayuh igi pasir ti ba tebing tasik. Lebuh Gideon datai ba tisi kem nya, iya ninga siku orang madahka mimpi diri ngagai pangan iya. Ku orang nya bejaku, “Aku bisi mimpi, tepedaka siti tuku roti barli bebaring ngagai kem kitai, lalu ngerenchah sebuah langkau kain, ninggang lalu ngeruntuhka iya.” Ku pangan orang nya nyaut, “Nya ukai utai bukai, tang pedang Gideon anak Joas, orang Israel! Allah Taala udah nyerahka orang Midian, enggau semua bala soldadu kitai ngagai jari iya!” Lebuh Gideon ninga orang nya nusui mimpi diri, enggau reti mimpi nya, iya lalu besugang, lalu nyembah TUHAN. Iya lalu pulai ngagai kem orang Israel, lalu ku iya bejaku, “Angkat; laban TUHAN udah nyerahka bala soldadu orang Midian ngagai jari kita!” Iya lalu magi tiga ratus iku bala iya ngagai tiga iti raban, lalu meri ngagai genap iku sida siti terumpit enggau sigi kebuk, ti ngundan siti sempun. Ku iya madahka ngagai sida, “Malik ngagai aku, lalu kereja utai nitihka aku; lebuh aku datai ba tisi kem, kereja utai nitihka aku. Lebuh aku enggau bala aku nyepu terumpit, kita mega nyepu terumpit kita ngelingi kem nya, lalu manjung, ‘Ke TUHAN enggau ke Gideon!’ ” Gideon enggau seratus iku bala iya lalu datai ba tisi kem munsuh ba urung tengah malam, lebuh bala jejaga baru udah betukar. Gideon enggau bala iya lalu nyepu terumpit sida, mechahka kebuk ti dipegai sida. Semua tiga iti raban nya nyepu terumpit lalu mechahka kebuk sida, lalu megai sempun ngena jari kiba sida, lalu megai terumpit ti disepu sida ngena jari kanan sida, lalu manjung, “Pedang ke TUHAN enggau ke Gideon!” Genap iku sida bediri enda nginsit ari endur diri ngelingi kem nya, lalu semua bala soldadu munsuh nyau beterauh rari. Lebuh bala Gideon nyepu tiga ratus iti terumpit sida, TUHAN lalu nyungkak bala soldadu munsuh bepantapka pangan diri. Bala soldadu munsuh belanda tunga ngagai Saretan nyentuk ngagai Bet-sitah, nyentuk ngagai nengeri Abel-meholah semak Tabat. Orang Israel ari raban bansa Naptali, Aser enggau ari dua bengkah raban bansa Manasi lalu dipesanka, lalu sida begagaika orang Midian. Gideon lalu ngirumka bala seruan ngagai serata menua ti bebukit. Ku sida, “Nurun lalu serang orang Midian. Kita enda tau enda nan ba Sungai Jordan, enggau ba sungai ti mit nyentuk ngagai Bet-barah, ngambika orang Midian enda meraka sungai nya.” Bala orang Epraim lalu ditesau magang, lalu sida nan ba Sungai Jordan, enggau ba sungai ti mit nyentuk ngagai Bet-barah. Sida nangkap dua iku tuai orang Midian, Orep seduai Sep. Sida munuh Orep ba Batu Orep, enggau Sep ba pitan anggur ti ba Sep. Sida majak begagaika orang Midian lalu mai pala Orep enggau pala Sep ngagai Gideon di timur Sungai Jordan. Udah nya orang Epraim lalu bejaku enggau Gideon, “Nama kebuah nuan enda mesanka kami lebuh kita mansang ngelaban orang Midian? Nama kebuah nuan ngaga kami baka nya?” Sida balat amat ngutuk iya. Ku Gideon nyaut sida, “Utai ti ulih dikereja aku nya mit amat enti dibandingka enggau utai ti udah dikereja kita. Indah utai ti mimit aja ti dikereja kita orang Epraim, deh mayuh agi ari utai ti udah dikereja semua bala raban peturun Abieser. Ulih kuasa Allah Taala, kita udah tebunuhka Orep seduai Sep, dua iku tuai orang Midian. Nama utai ti udah dikereja aku ti tau dibandingka enggau nya?” Lebuh iya nyebut nya, sida lalu badu agi ringat ngagai iya. Lebuh maya nya Gideon enggau bala iya ke tiga ratus iku udah datai ba Sungai Jordan, lalu udah meraka sungai nya. Sida nyau lelak amat, tang agi majak begagaika munsuh. Lebuh sida datai di Sukot, iya lalu bejaku enggau bala lelaki di nengeri nya, “Beri bala aku roti. Sida lelak, lalu aku benung begagaika Sebah seduai Salmuna, raja orang Midian.” Tang ku bala tuai orang Sukot bejaku, “Nama kebuah kami enda tau enda meri bala soldadu nuan pemakai? Indah Sebah seduai Salmuna deh apin ditangkap kita.” Gideon lalu bejaku, “Barang ku jaku! Lebuh TUHAN udah nyerahka Sebah enggau Salmuna ngagai jari aku, aku deka nyipat kita ngena duri enggau emperingat ti diambi ari menua puang!” Gideon lalu bejalai terus ngagai Penuel, lalu minta roti ari orang dia. Tang orang di Penuel mega nyaut munyi orang ke di Sukot. Gideon lalu bejaku enggau orang Penuel, “Lebuh aku udah menang lalu pulai kitu, aku deka ngeruntuhka menara tu!” Lebuh maya nya Sebah seduai Salmuna bisi di Karkor sama enggau bala soldadu seduai iya. Ari semua bala soldadu raban bansa ti diau di menua puang, semina 15,000 iku aja agi tinggal; 120,000 iku udah dibunuh. Gideon bejalai nengah jalai ti nisi menua puang, tunga ke timur ari Nobah enggau Jogbehah, lalu ngenyit nyerang, lebuh bala munsuh benung enda ngadang. Sebah seduai Salmuna lalu rari; Gideon lalu nitihka seduai iya, nangkap seduai iya, lalu semua bala soldadu seduai iya begau abis ati. Lebuh Gideon pulai ngayau nengah Genting Heres, iya nangkap siku orang bujang ari Sukot, lalu nanyaka utai ari orang nya. Orang bujang nya lalu nuliska nama tujuh puluh tujuh iku tuai di Sukot. Udah nya Gideon lalu mansang ngagai orang di Sukot, lalu bejaku enggau sida, “Kati kita ingatka diri ke enggai nyaup aku? Kita madahka diri enggai meri pemakai ngagai bala soldadu aku, laban kami apin tetangkapka Sebah seduai Salmuna. Peda kita, tu seduai iya!” Udah nya iya lalu ngambi duri enggau emperingat ari menua puang, lalu nyipat bala tuai orang di Sukot ngena nya. Iya mega ngeruntuhka kuta di Penuel, lalu munuh orang ke lelaki di nengeri nya. Udah nya iya lalu nanya Sebah seduai Salmuna, “Baka ni ku gaya orang ke udah dibunuh seduai di Tabor?” Ku seduai iya nyaut, “Sida baka gamal nuan - genap iku sida bela baka gamal anak raja.” Ku Gideon bejaku, “Sida nya menyadi lelaki aku, anak indai aku. Aku besumpah, enti kita enda munuh sida, aku pen enda mega munuh seduai.” Udah nya iya lalu bejaku enggau anak tuai iya ke benama Jeter, “Bunuh seduai iya!” Tang nembiak nya enda nyintak pedang iya. Iya takut, laban iya agi nembiak. Udah nya Sebah seduai Salmuna lalu bejaku enggau Gideon, “Nuan empu munuh kami duai. Semina orang ke besai tuai aja ulih ngereja pengawa orang ke besai tuai.” Nya alai Gideon lalu munuh seduai iya, lalu ngambi perengka pengias ti ba rekung jelu unta seduai iya. Udah bekau nya, orang Israel lalu bejaku enggau Gideon, “Laban nuan udah ngelepaska kami ari kuasa orang Midian, awakka nuan enggau peturun nuan merintah kami.” Ku Gideon nyaut, “Aku enggai merintah kita, lalu anak aku pen enda mega merintah kita. TUHAN Empu deka merintah kita.” Tang ku iya majakka jaku diri, “Awakka aku minta siti aja utai ari kita. Genap iku kita meri ngagai aku antin ti ulih kita.” (Orang Midian, baka orang bansa bukai ke diau di menua puang, bekenaka antin emas ba pending sida.) Ku orang mayuh nyaut, “Kami gaga ati meri utai nya ngagai nuan.” Sida lalu nganchau selambar kain, lalu genap iku sida bela ngengkahka semua antin ti udah ulih sida, ba kain nya. Antin emas ti diberi ngagai Gideon berat 18 kilogram, enda nyengkaum perengka pengias, tenggak, enggau kain ungu ti dikena raja orang Midian, tauka kungkung rekung ti ba rekung jelu unta sida. Gideon lalu ngaga siti engkeramba ari emas nya, lalu ngengkahka engkeramba nya di nengeri iya empu, iya nya Oprah. Semua orang Israel lalu ninggalka Allah Taala, mupuk ngagai nengeri nya lalu nyembah engkeramba nya. Utai nya nyadika panjuk ke Gideon enggau sida sebilik. Nya alai orang Midian alah laban orang Israel, lalu enda agi ngachau sida. Menua nya nadai agi pengachau empat puluh taun, nyentuk ngagai pemati Gideon. Gideon pulai lalu diau ba rumah iya empu. Nyadi iya bisi tujuh puluh iku anak lelaki, laban iya mayuh bini. Iya mega bisi siku indu simpan di Sekem. Indu nya ngadaka siku anak lelaki ke iya, lalu iya meri anak mit nya nama Abimelek. Gideon anak Joas mati lebuh umur iya nyau tuai, lalu iya dikuburka ba lumbung apai iya Joas, di Oprah, nengeri ti diempu raban peturun Abieser. Udah bekau pemati Gideon, orang Israel lalu enda tetap ati baru ngagai Allah Taala sida, lalu nyembah Baal. Sida ngaga Baal-berit nyadika petara sida. Sida enda ingatka TUHAN Allah Taala sida ke udah ngelepaska sida ari kuasa semua munsuh ke ngelingi sida; lalu sida enda ngayanka penaluk ngagai ruang bilik Gideon ke semua utai ti manah ti udah dikereja Gideon ke orang Israel. Anak Gideon ke benama Abimelek mansang ngagai nengeri Sekem, ngagai kaban belayan indai iya, lalu bejaku enggau sida, sereta enggau semua suku raban bansa indai iya, munyi tu, “Ni bagi ti dipilih kita? Ngasuh tujuh puluh iku anak lelaki Gideon merintah kita, tauka diperintah orang siku aja? Ingat: aku tu endang darah-getah kita empu.” Bala kaban belayan indai iya lalu bejaku ngarika iya pasal pekara nya enggau sida ke lelaki di Sekem, lalu sida mutuska runding deka nitihka Abimelek, laban iya kaban belayan sida empu. Sida meri iya tujuh puluh singkap duit pirak ari rumah sembiang Baal-berit, lalu iya ngena duit nya ngaji orang ke kurang ajar, ke nitihka iya. Iya lalu mansang ngagai rumah apai iya di Oprah, lalu munuh tujuh puluh iku bala menyadi iya empu, iya nya anak lelaki Gideon, ba atas sigi batu. Tang Jotam, iya nya anak bunsu Gideon belalai, lalu enda kena bunuh. Udah nya bala orang ari Sekem enggau ari Bet-milo begempuru, lalu mansang ngagai kayu oak keramat sepun di Sekem, lalu nyiri Abimelek nyadi raja. Lebuh Jotam ninga berita nya, iya mansang lalu bediri ba tuchung Bukit Gerisim, lalu ngangauka sida enggau nyawa ti inggar, “Pendingka aku, kita orang Sekem, ngambika Allah Taala mendingka kita! Nyadi sekali, bala kayu mansang deka milih sapa ti deka dichiri sida nyadi raja. Ku sida bejaku enggau kayu kana, ‘Nuan nyadi raja kami.’ Ku kayu kana nyaut, ‘Enti aku nyadi raja kita, aku enda tau enda badu agi mansutka minyak ti dikena ngemesaika petara enggau mensia.’ Udah nya bala kayu lalu bejaku enggau kayu ara, ‘Awakka nuan datai kitu, lalu nyadi raja kami.’ Tang ku kayu ara nyaut, ‘Enti aku nyadi raja kita, aku enda tau enda badu agi mansutka buah aku ti manis.’ Nya alai bala kayu lalu bejaku enggau batang anggur, ‘Nuan datai kitu, lalu nyadi raja kami.’ Tang ku batang anggur nyaut, ‘Enti aku nyadi raja kita, aku enda tau enda badu agi mansutka wain ti ngasuh petara enggau mensia lantang ati.’ Nya alai semua kayu lalu bejaku enggau madang duri, ‘Nuan datai kitu, lalu nyadi raja kami.’ Ku madang duri nyaut, ‘Enti kita amat ngasuh aku nyadi raja kita, datai meh kita kitu ngambika aku nyaga kita. Enti kita enda datai kitu, api ti mau deka pansut ari dan aku ti beduri, lalu nganguska kayu sidar di Lebanon.’ Ku Jotam nampung jaku iya, “Kati kita amat manah ati lebuh kita ngasuh Abimelek nyadi raja? Kati kita amat bebasaka nama Gideon, lalu masa ruang bilik iya ngena jalai ti menyana, nitihka pemanah utai ti udah dikereja Gideon? Kingatka tu ulih kita. Apai aku beperang ngarika kita. Iya berambunka nyawa diri ngelepaska kita ari kuasa orang Midian. Tang sehari tu kita mutar ngelaban ruang bilik apai aku. Kita munuh tujuh puluh iku anak lelaki iya ba atas batu sigi, lalu kita nyiri Abimelek, anak apai aku enggau siku indu ke ulun, nyadi raja di Sekem laban Abimelek kaban belayan kita empu. Nya alai, enti utai ti udah dikereja kita sehari tu ngagai Gideon enggau ngagai ruang bilik iya datai ari ati ti manah, awakka kita lantang ati enggau Abimelek, lalu Abimelek lantang ati enggau kita. Tang enti enda, awakka api ti mau pansut ari Abimelek, lalu nganguska orang Sekem enggau orang Bet-milo, lalu awakka api ti mau pansut ari orang Sekem enggau Bet-milo, lalu nganguska Abimelek.” Jotam lalu rari lalu diau di Beer laban iya takutka menyadi iya Abimelek. Abimelek megai perintah di menua Israel tiga taun. Udah nya Allah Taala ngasuh Abimelek enggau orang Sekem ringat ngagai pangan diri, lalu orang Sekem angkat ngelaban Abimelek. Utai tu nyadi ngambika Abimelek enggau orang Sekem ti udah meransang Abimelek munuh tujuh puluh iku anak lelaki Gideon, bebayarka ukum penyalah ti udah dikereja sida. Orang ke lelaki di Sekem lalu ngasuh orang ari bala sida ngipa Abimelek ba tuchung bukit, lalu sida ngerumpak semua orang ke mansa. Orang lalu madahka pekara nya ngagai Abimelek. Lebuh Gaal anak Ebet enggau sida menyadi lelaki iya datai di Sekem, lalu bala orang Sekem andal ati ke iya. Semua sida mansang ngagai kebun anggur sida, lalu ngetau buah anggur, ngaga wain, lalu begawai. Sida mansang ngagai rumah sembiang petara sida, alai sida ke makai ngirup, lalu ngeleseka Abimelek. Ku Gaal bejaku enggau sida, “Sapa kitai tu alai kitai nyau betuaika Abimelek, lalu sapa Abimelek? Ukai enda iya nya anak Gideon! Lalu iya enggau Sebul ti nyadi pemesai iya bekereja ari baruh bala Hamor apai Sekem? Nya alai, nama kebuah kitai betuaika Abimelek? Naka meh pemanah enti sema aku nyadi tuai sida! Aku tetap deka muai Abimelek! Aku tentu deka madahka ngagai iya, “Tambahka bala soldadu nuan. Pansut kitu lalu belaban!’ ” Sebul, ke merintah di nengeri nya, ringat lebuh iya ninga jaku Gaal. Iya lalu ngasuh bala seruan betemu enggau Abimelek di Arumah, lalu nyebut ngagai iya munyi tu: “Gaal anak Ebet enggau bala menyadi iya udah datai di Sekem, lalu sida enda nyagi nuan tama ngagai nengeri nya. Nya alai, nuan enggau bala nuan patut mupuk lebuh malam hari, lalu belalai di umai. Pagila, lebuh tumbuh mata panas, kita angkat lalu nyerang nengeri nya enggau ngenyit. Udah nya, lebuh Gaal enggau bala iya mansang ngelaban nuan, serang sida enggau naka ulih nuan!” Abimelek enggau bala iya lalu mupuk malam nya, dibagi ngagai empat bengkah raban, lalu sida belalai ba umai ari luar Sekem. Lebuh Abimelek enggau bala iya meda Gaal pansut ari nengeri, lalu bediri ba pintu kuta nengeri nya, sida lalu angkat ari endur alai sida ke belalai. Gaal tepedaka sida, lalu bejaku enggau Sebul, “Peda bala orang nyin nurun ari tuchung bukit!” “Nya ukai mensia,” ku Sebul nyaut. “Nya ayuk ba bukit.” Gaal lalu bejaku baru, “Peda bala orang nyin nurun ari tuchung bukit. Siti raban bejalai nengah jalai ari kayu oak keramat ti diempu orang ke nemu nilit nasit!” Udah nya Sebul lalu bejaku enggau Gaal, “Kini ke tunga mulut nuan ti temegah nya? Nuan empu ke nanyaka kebuah kitai betuaika Abimelek. Nyin bala orang ke dikeleseka nuan. Serang sida.” Gaal lalu nguluka orang Sekem pansut, lalu ngelaban Abimelek. Abimelek belanda mansang ngamuk Gaal. Gaal lalu rari. Mayuh amat orang bakal, nyentuk ngagai pintu kuta nengeri nya. Abimelek diau di Arumah lalu Sebul muru Gaal enggau bala menyadi iya ari Sekem. Nya alai sida Gaal enda tau diau di nengeri nya agi. Hari siti bala orang Sekem nurun ke umai. Lebuh orang madahka nya ngagai Abimelek, Iya lalu mai bala iya, magi sida ngagai tiga bengkah raban, lalu ngipa orang Sekem ba umai. Lebuh Abimelek meda bala orang pansut ari nengeri nya, iya angkat ari endur alai iya ke belalai, lalu munuh bala orang nya. Abimelek enggau raban iya beguai-guai mansang lalu bediri ba mua pintu nengeri nya, benung raban ti dua bengkah nyerang bala orang ke di umai, lalu munuh semua sida. Abimelek nyerang nengeri nya sehari nya. Iya ngalahka nengeri nya, munuh orang ke diau dia, ngerubuh nengeri nya, lalu naburka garam ngagai tanah di nengeri nya. Lebuh semua bala tuai orang ke dalam menara di Sekem ninga berita nya, sida lalu rari ngagai kuta rumah sembiang Baal-beret. Orang lalu madahka ngagai Abimelek pasal orang Sekem ti udah begempuru dia. Abimelek lalu niki ngagai Bukit Salmon mai bala iya. Dia iya ngambi siti kapak, netak lalu merekaska dan kayu, lalu ngesan dan kayu nya. Iya lalu bejaku enggau bala iya, “Kereja enggau jampat utai ti udah dikereja aku.” Semua sida lalu netak dan kayu. Sida lalu nitihka Abimelek, lalu nugungka dan kayu nya ngimbai kuta nya. Sida nyelup tugung kayu nya, ngambika orang ke diau dalam kuta nya mati. Semua orang dalam kuta nya mati magang, kira seribu iku lelaki enggau indu. Udah nya Abimelek mansang ngagai Tebes, ngelulung lalu ngalahka nengeri nya. Nyadi di nengeri nya bisi siti kuta ti tegap. Semua lelaki enggau indu di nengeri nya, nyengkaum bala tuai sida, belanda ngagai kuta nya. Sida lalu ngunchi diri di dalam, lalu niki ke perabung. Lebuh Abimelek datai nyerang kuta nya, iya mansang ngagai pintu, deka nunu kuta nya. Tang siku indu muai sigi batu kisar ngagai pala Abimelek, mechahka pala iya. Abimelek lalu ngangauka orang bujang ke mai senyata iya, ku iya, “Sintak pedang nuan, lalu bunuh aku, enggai ke orang ngumbai aku mati dibunuh indu.” Orang bujang nya lalu ngerejang Abimelek ngena pedang, lalu iya mati. Lebuh orang Israel meda Abimelek udah mati, sida lalu pulai ke rumah. Nya meh jalai Allah Taala malas Abimelek ketegal penyalah ti udah dikereja iya ngagai apai iya, lebuh iya munuh tujuh puluh iku sida menyadi lelaki iya. Allah Taala mega ngasuh orang Sekem natka pemerinsa ketegal penyai sida, munyi ti ku Jotam anak Gideon, lebuh iya nyumpah sida. Lebuh Abimelek udah mati, Tola anak Puah, uchu Dodo, datai ngelepaska orang Israel. Iya datai ari raban bansa Isakar, lalu iya diau di Samir, di menua ti bebukit di Epraim. Iya nyadi tuai orang Israel dua puluh tiga taun. Udah nya iya mati, lalu dikuburka di Samir. Udah bekau Tola, Jair lalu datai ari Giliat. Iya nguluka orang Israel dua puluh dua taun. Iya bisi tiga puluh iku anak lelaki, ke nepan tiga puluh iku keledai. Sida bisi tiga puluh buah nengeri di menua Giliat. Nengeri nya agi dikumbai Tumpuk Pendiau Jair. Jair mati, lalu dikuburka di Kamon. Orang Israel lalu bedosa baru ngelaban TUHAN, laban sida nyembah Baal enggau Astarte, sereta nyembah mayuh bengkah petara orang Siria, petara orang Sidon, petara orang Moap, petara orang Amon, enggau petara orang Pilistin. Sida ninggalka TUHAN, lalu badu agi nyembah Iya. Nya alai TUHAN ringat ngagai orang Israel, lalu nejuka orang Pilistin enggau orang Amon ngalahka sida. Lapan belas taun bansa orang nya nekanka pengidup sereta merinsaka semua orang Israel ti diau di menua orang Amor di timur Sungai Jordan, di menua Giliat. Orang Amon meraka Sungai Jordan nyerang raban bansa Judah, Benjamin, enggau Epraim. Israel balat amat tusah. Udah nya orang Israel nyabak ngangauka TUHAN, ku sida, “Kami udah bedosa ngelaban Nuan, laban kami udah ninggalka Nuan ti Allah Taala kami, lalu udah nyembah bala petara Baal.” TUHAN lalu nyaut sida munyi tu: “Orang Ejip, orang Amor, orang Amon, orang Pilistin, orang Sidon, orang Amalek, enggau orang Maon udah nekanka pengidup kita dulu menya, lalu kita nyabak ngangauka Aku. Kati Aku nadai udah kala ngelepaska kita ari jari sida? Tang taja pia, kita mengkang ninggalka Aku, lalu nyembah petara bukai. Nya alai, Aku enggai agi ngelepaska kita. Kangauka bala petara ti udah dipilih kita. Awakka sida ngelepaska kita ari penusah.” Tang ku orang Israel bejaku enggau TUHAN, “Kami udah bedosa. Kereja meh sebarang utai ti deka dikereja Nuan, tang lepaska kami sehari tu.” Nya alai sida muai semua petara orang bansa bukai, lalu nyembah TUHAN. TUHAN lalu ringat meda pemerinsa orang Israel. Udah nya bala soldadu orang Amon sedia deka nyerang, lalu nirika kem di Giliat. Orang Israel lalu begempuru, lalu nirika kem sida di Mispah, di menua Giliat. Dia orang Israel enggau bala tuai sida nanya pangan diri, “Sapa deka nguluka kitai ngelaban orang Amon? Barang sapa nguluka kitai, deka nyadi tuai ke semua orang di Giliat.” Jeptah, siku soldadu ti berani, ke datai ari Giliat, nya anak indu sundal. Apai iya benama Giliat lalu Giliat bisi anak lelaki bukai ari bini iya empu, lalu lebuh bala anak iya mansang besai, sida muru Jeptah ari rumah. Ku sida bejaku enggau iya, “Nuan enda tau bempu reta tengkira apai kami laban nuan tu anak indu bukai.” Jeptah lalu rari ari bala menyadi iya, lalu diau di menua Top. Dia iya ulih narit ati bala orang ke nadai guna, lalu sida belelang enggau iya. Nyau ke lama udah bekau nya, orang Amon nyerang orang Israel. Lebuh perang nya nyadi, bala tuai orang di Giliat mansang ngambi Jeptah pulai ari menua Top. Ku sida bejaku enggau iya, “Kami minta nuan nguluka kami ngelaban orang Amon.” Tang ku Jeptah nyaut, “Kita udah balat amat begedika aku, datai ke kita nyau muru aku ari rumah apai aku. Nama kebuah kita datai ngagai aku diatu, lebuh kita dituntung penusah?” Ku sida nyaut Jeptah, “Kami nguing ngagai nuan diatu laban kami deka ngasuh nuan bejalai enggau kami ngelaban orang Amon, lalu nguluka semua orang di Giliat.” Ku Jeptah nyaut sida, “Enti kita mai aku pulai, lalu ngasuh aku ngelaban orang Amon, lalu TUHAN ngasuh aku menang, aku deka merintah kita.” Ku sida nyaut, “Kami besetuju. Awakka TUHAN nyadika saksi kami.” Jeptah lalu mupuk enggau bala tuai orang Giliat. Orang Giliat lalu ngasuh iya merintah sereta nyadi tuai sida. Jeptah lalu nyebut, di Mispah, utai ti dikedekaka iya ari orang Giliat, di mua TUHAN. Udah nya Jeptah lalu ngasuh bala seruan bejalai ngagai raja menua Amon, ngasuh sida nyebut munyi tu: “Nama laya nuan enggau kami? Nama kebuah nuan nyerang menua kami?” Raja menua Amon lalu nyaut jaku ti dibai bala seruan Jeptah, “Lebuh orang Israel pansut ari menua Ejip, sida ngerampas menua aku, kenyau ari Sungai Arnon nyentuk ngagai Sungai Jabok, enggau Sungai Jordan. Diatu kita enda tau enda meri menua nya pulai baru ngagai aku ngena chara ti alus.” Jeptah lalu ngasuh bala seruan iya betemu enggau raja menua Amon baru mai saut tu, “Nuan enda tau ngumbai orang Israel udah ngerampas menua Moap tauka menua Amon. Baka tu ku gaya utai ti udah nyadi. Lebuh orang Israel pansut ari menua Ejip, sida bejalai nengah menua puang ngagai Teluk Akaba, lalu datai di Kades. Sida lalu ngasuh bala seruan betemu enggau raja menua Edom, minta pemendar bejalai meraka menua iya. Tang raja menua Edom enggai ngemendarka sida. Sida mega minta pemendar ari raja menua Moap, tang iya mega enggai ngemendarka sida nengah menua iya. Nya alai orang Israel diau di Kades. Udah nya sida lalu bejalai nengah menua puang, ngelaungka menua Edom, enggau menua Moap, datai ke sida nyau datai ba tisi menua Moap muak ari timur, di seberai Sungai Arnon. Sida lalu nirika kem sida dia, tang sida enda meraka Sungai Arnon, laban sungai nya nyadika garis entara menua orang Moap. Udah nya orang Israel lalu ngasuh bala seruan bejalai ngagai Sihon, raja orang Amor ke merintah di Hesbon, minta iya ngemendarka sida bejalai nengah menua iya. Tang Sihon enggai ngemendarka orang Israel meraka. Iya lalu ngempuruka semua bala soldadu iya, nirika kem sida di Jahas, lalu nyerang orang Israel. Tang TUHAN Allah Taala ke disembah orang Israel, nyerahka Sihon enggau bala soldadu iya ngagai jari orang Israel, lalu orang Israel ngalahka sida. Nya alai orang Israel lalu bempu semua menua orang Amor ti diau di menua nya. Sida nguan semua menua orang Amor berengkah ari Arnon di selatan nyentuk ngagai Sungai Jabok di utara, enggau ari menua puang ti di timur nyentuk ngagai Sungai Jordan di barat. Nya alai, TUHAN Allah Taala ke disembah orang Israel muru orang Amor ngarika bala nembiak Iya, iya nya orang Israel. Kati nuan nguji ngambi menua nya pulai baru? Nuan tau bempu sebarang menua ti udah diberi petara nuan Chemos ngagai nuan. Tang kami deka bempu semua menua ti udah dialahka TUHAN Allah Taala kami, ke kami. Kati nuan ngumbai diri manah agi ari Balak anak Sipor, raja orang Moap? Kati iya bisi udah kala nyakap orang Israel? Kati iya bisi udah kala beperang ngelaban kami? Orang Israel udah nguan Hesbon enggau Aroer tiga ratus taun, enggau semua nengeri ti mit ti ngelingi dua buah nengeri nya, enggau semua nengeri ti ba tebing Sungai Arnon. Nama kebuah nuan enda ngambi semua nengeri nya ngelamatu? Aku nadai udah ngereja utai ti salah ngagai nuan. Nuan empu ti ngereja utai ti salah, laban nuan ngepunka perang tu ngelaban aku. Awakka TUHAN, ti nyadi Hakim, meri pemutus penemu sehari tu entara orang Israel enggau orang Amon.” Tang raja menua Amon enggai mendingka pesan ti dikirumka Jeptah. Roh TUHAN lalu nurun ngagai Jeptah. Jeptah lalu bejalai nengah menua Giliat enggau Manasi, lalu pulai ngagai Mispah di menua Giliat, lalu mansang terus ngagai Amon. Jeptah udah besemaya enggau TUHAN: “Enti Nuan deka ngasuh aku menang ngelaban orang Amon, aku deka nyerahka orang ke terubah-rubah pansut ari rumah aku, ti deka ngambat aku lebuh aku pulai menang beperang. Aku deka meri orang nya ngagai nuan nyadika piring.” Nya alai Jeptah meraka sungai nya mansang nyerang orang Amon, lalu TUHAN ngasuh Jeptah menang. Iya nyerang sida berengkah ari Aroer nyentuk ngagai menua ti ngelingi Minit, dua puluh buah nengeri semua iya, nyentuk ngagai Abel Keramim. Mayuh amat orang dibunuh sida, lalu orang Amon alah laban orang Israel. Lebuh Jeptah pulai ngagai Mispah, anak dara iya lalu pansut ngambat iya, betanda sereta nebah tamborin. Iya anak tunggal Jeptah. Lebuh Jeptah meda iya, iya lalu nyarikka gari diri laban iya tusah ati. Ku iya, “O anak! Nuan tu ngenusahka ati aku! Nama kebuah nuan enggai enda ngenusahka ati aku? Aku udah besumpah enggau TUHAN, nya alai aku enda ulih matak semaya diri!” Ku anak dara iya bejaku enggau iya, “Enti nuan udah ngaga semaya enggau TUHAN, kereja aja meh utai ti deka dikereja nuan ngagai aku, laban TUHAN udah ngasuh nuan malas ngagai munsuh nuan orang Amon.” Tang anak dara iya minta siti utai ari apai iya, “Kereja utai siti tu ke aku: awakka aku diau kediri dua bulan, ngambika aku ulih bejalai enggau bala pangan aku ba sebelah bukit, lalu natka diri ke tusah ati deka mati agi dara bungas baka tu.” Jeptah ngemendarka iya bejalai dua bulan. Iya enggau bala iya lalu bejalai niki ngagai bukit, lalu natka diri tusah ati laban iya deka mati sebedau iya belaki, lalu nadai anak. Ba ujung dua bulan nya, iya lalu pulai baru ngagai apai iya. Apai iya lalu ngereja utai ti udah disemaya iya enggau TUHAN. Nya alai anak iya mati lebuh iya agi dara bungas. Tu meh pun adat asal di menua Israel alai sida ke indu deka bejalai empat hari dalam setaun, ngulitka anak dara Jeptah ari Giliat. Orang Epraim ditesau mansang beperang. Sida meraka Sungai Jordan ngagai Sapon, lalu ku sida bejaku enggau Jeptah, “Nama kebuah nuan meraka garis entara menua mansang ngelaban orang Amon lalu enda mai kami? Diatu kami deka nunu rumah kita!” Tang ku Jeptah bejaku enggau sida, “Bala aku enggau aku empu bisi laya ti besai enggau orang Amon. Aku bisi mesanka kita, tang kita enggai ngelepaska aku ari kuasa orang Amon. Lebuh aku nemu kita enggai, aku lalu berambunka nyawa diri, lalu meraka garis entara menua mansang ngelaban sida, lalu TUHAN udah ngasuh aku menang ngelaban sida. Nya alai, nama kebuah kita datai ngagai aku lalu ngelaban aku diatu?” Udah nya Jeptah ngempuruka semua bala orang Giliat, ngelaban orang Epraim lalu ngalahka sida. (Orang Epraim udah nyebut, “Kita orang Giliat ke di menua Epraim enggau di menua Manasi, kita tu rari ninggalka orang Epraim!”) Orang Giliat lalu nan ba pemeraka Sungai Jordan, ngambika orang Epraim enda ulih rari. Lebuh orang ari raban bansa Epraim minta pemendar meraka lalu nguji ngerarika diri, orang Giliat nanya, “Kati nuan tu orang Epraim?” Enti orang nya nyebut, “Ukai,” sida deka ngasuh iya nyebut “Shibbolet.” Tang orang nya deka nyebut “Sibolet,” laban iya enda terus nyebut leka jaku nya, lalu iya ditangkap, lalu dibunuh dia ba pemeraka di Sungai Jordan. Empat puluh dua ribu iku orang Epraim dibunuh lebuh maya nya. Jeptah nguluka orang Israel enam taun. Udah nya iya mati, lalu dikuburka di nengeri iya empu di Giliat. Udah bekau Jeptah nyadi tuai, Ipsan ari Betlehem lalu nguluka orang Israel. Iya bisi tiga puluh iku anak lelaki enggau tiga puluh iku anak indu. Iya ngasuh bala anak indu iya jadi enggau orang ke ari luar suku raban bansa sida empu, lalu iya ngambi tiga puluh iku indu ke biak ari luar suku raban bansa sida empu jadi enggau bala anak lelaki iya. Ipsan nguluka orang Israel tujuh taun. Udah nya iya mati, lalu dikuburka di Betlehem. Udah bekau Ipsan, Elon ari Sebulun nguluka orang Israel sepuluh taun. Udah nya iya mati, lalu dikuburka di Aijalon di menua Sebulun. Udah bekau Elon, Apdon anak Hilel ari Piraton nguluka orang Israel. Iya bisi empat puluh iku anak lelaki enggau tiga puluh iku uchu. Sida tu nepan tujuh puluh iku keledai. Apdon nguluka orang Israel lapan taun. Udah nya iya mati, lalu dikuburka di Piraton di menua Epraim, ba menua ti bebukit ti diempu orang Amalek. Orang Israel lalu bedosa baru ngelaban TUHAN, lalu Iya nejuka orang Pilistin merintah sida empat puluh taun. Nyadi lebuh maya nya bisi siku orang ke benama Manoah, ari nengeri Sorah. Iya datai ari raban bansa Dan. Bini iya mandul, nadai anak. Melikat TUHAN pegari di mua bini Manoah, lalu bejaku, “Nuan mandul, tang enda lama da agi nuan deka ngandung, lalu ngadaka anak lelaki siku. Nuan enda tau ngirup wain tauka ai ti bisa, tauka makai pemakai ti enda tau diempa. Lalu lebuh anak nuan ada ila, nuan enda tau nguntin buk iya, laban kenyau ari maya iya ada, iya deka diserahka ngagai Allah Taala nyadi Nasir. Iya deka ngepunka pengawa ngelepaska orang Israel ari jari orang Pilistin.” Udah nya indu nya lalu madahka utai nya ngagai laki iya. Ku iya, “Siku nabi udah datai ngagai aku, lalu gamal iya baka gamal melikat, lalu ati aku balat takut. Aku enda nanyaka penatai iya, lalu iya pen enda mega madahka nama diri ngagai aku. Tang iya bisi madahka aku deka ngandung, lalu ngadaka anak lelaki siku. Iya enda ngasuh aku ngirup wain tauka ai ti bisa, tauka makai pemakai ti enda tau diempa, laban anak mit nya deka diserahka ngagai Allah Taala nyadi Nasir seumur idup.” Udah nya Manoah besampi ngagai TUHAN. Ku iya, “ TUHAN, asuh nabi nya pulai kitu baru ngagai kami, ngambika iya madahka ngagai kami utai ti patut dikereja kami lebuh anak mit nya ada ila.” Allah Taala lalu ngereja utai ti dipinta Manoah. Melikat Allah Taala lalu datai baru ngagai indu nya lebuh iya benung duduk di umai. Nyadi laki iya nadai enggau iya, nya alai indu nya lalu belanda tekala nya, lalu madahka ngagai laki iya, “Peda nuan! Orang ke datai ngagai aku suba, bisi pegari baru ngagai aku.” Manoah angkat lalu nitihka bini iya. Iya mansang ngagai orang nya, lalu nanya, “Kati nuan tu orang ke bejaku enggau bini aku suba?” “Aku meh nya,” ku iya nyaut. Udah nya Manoah lalu bejaku, “Lebuh jaku nuan dikamatka ila, nama utai ti patut dikereja nembiak nya? Baka ni ku gaya pengidup iya ila?” Melikat Allah Taala lalu nyaut, “Bini nuan enda tau enda ngereja semua utai ti udah dipadahka aku ngagai iya. Iya enda tau makai utai ti datai ari batang anggur. Iya enda tau ngirup wain tauka ai ti bisa, tauka makai pemakai ti enda tau diempa. Iya enda tau enda ngereja semua utai ti udah dipadahka aku ngagai iya.” Ku Manoah nyaut, “Uji padahka nama nuan ngagai kami duai, ngambika kami duai ulih ngemesaika nuan lebuh jaku nuan nya dikamatka ila.” Melikat nya lalu nanya, “Nama kebuah nuan keran deka nemu nama aku? Nama nya nyelai.” Manoah lalu ngambi siku kambin ti agi biak, enggau gandum mimit, lalu meri utai nya ba atas batu alta, ngagai TUHAN ti ngereja utai ti nyelai. Ku Manoah bejaku enggau bini iya, “Tua tentu deka mati, laban tua udah meda Allah Taala!” Tang ku bini iya nyaut, “Enti TUHAN bisi ati deka munuh tua, iya tentu enggai nyambut piring tua. Iya tentu enggai nunjukka semua utai tu, tauka madahka utai ti baka nya ngagai tua diatu.” Bini Manoah lalu ngadaka anak lelaki siku, lalu iya meri iya nama Samson. Anak mit nya mansang besai, lalu TUHAN merekatka iya. Kuasa TUHAN lalu belabuh ngasuh Samson kering lebuh iya diau entara Sorah enggau Esta-ol dalam kem Dan. Nyadi sekali lebuh Samson nurun ngagai Timnah, iya tepedaka siku indu orang Pilistin. Samson pulai, lalu madahka pasal indu nya ngagai apai enggau indai iya, “Di Timnah bisi siku indu orang Pilistin. Ambi iya ke aku, ngambika aku jadi enggau iya.” Tang ku apai enggau indai iya nanya iya, “Nama kebuah nuan deka ngambi indu orang Pilistin ti kapir nyadika bini nuan? Kati nuan nadai tetemuka indu ari raban peturun nuan empu, ari semua bala kitai?” Tang ku Samson madahka ngagai apai iya, “Ambi indu nya ke aku, laban aku rinduka iya.” Apai indai iya enda nemu TUHAN udah ngasuh Samson ngereja nya, laban TUHAN ngiga tegal kena Iya ngelaban orang Pilistin. Lebuh maya nya, orang Pilistin merintah orang Israel. Nya alai Samson enggau apai indai iya lalu nurun ngagai Timnah. Lebuh sida benung bejalai nengah kebun anggur orang, Samson lalu ninga siku singa negung. Kuasa TUHAN lalu tekala nya ngasuh Samson kering. Iya nyarikka tubuh singa nya ngena jari iya, baka ke nyarikka anak kambin. Tang iya enda madahka utai nya ngagai apai indai iya. Udah nya iya mupuk, lalu bejaku enggau indu nya, lalu Samson rinduka iya. Dua tiga hari udah bekau nya, Samson mansang ngagai indu nya baru, deka jadi enggau iya. Lebuh iya benung di rantau jalai, iya limpang ari jalai raya, deka meda singa ti udah dibunuh iya. Iya tekenyit ati meda raban manyi enggau ai manyi bisi dalam bangkai singa nya. Iya lalu ngikis ai manyi nya ngagai jari iya, lalu makai ai manyi nya lebuh iya benung bejalai. Udah nya iya mansang ngagai apai enggau indai iya, lalu meri ai manyi nya mimit ngagai seduai iya. Seduai iya makai ai manyi nya, tang Samson enda madahka diri udah ngambi ai manyi nya ari bangkai singa. Apai iya lalu mansang ngagai rumah indu nya. Samson lalu nyendiaka pengerami makai besai ba rumah nya. Tu endang adat asal sida ke bujang. Lebuh orang Pilistin meda iya, sida lalu ngasuh tiga puluh iku orang ke bujang diau enggau iya. Ku Samson, “Ari utai ti makai, pansut pemakai. Ari utai ti kering, pansut utai ti manis.” Tiga hari udah bekau nya, sida mengkang enda tetemuka lalai entelah nya. Ba hari ti keempat, sida lalu bejaku enggau bini Samson, “Uji nuan nipu laki nuan ngasuh iya madahka reti entelah nya. Enti nuan enda, kami deka nunu nuan enggau rumah nuan. Seduai udah mesanka kami, ngambika seduai ulih ngerumpak kami, ukai enda?” Bini Samson lalu mansang ngagai Samson enggau ai mata. Ku iya, “Nuan enda rinduka aku! Nuan begedika aku! Nuan ngelalaika entelah ngagai pangan aku, lalu nuan enda madahka reti entelah nya ngagai aku!” Ku Samson, “Dinga nuan, indah apai indai aku deh apin dipadahka aku. Nama kebuah aku madahka reti entelah nya ngagai nuan?” Bini iya nyabakka pasal pekara nya dalam kandang tujuh hari gawai nya. Tang ba hari ti ketujuh, Samson madahka reti entelah nya ngagai bini iya, laban bini iya tatuk betanyaka reti entelah nya ngagai Samson. Udah nya bini iya lalu madahka ngagai orang Pilistin. Nya alai ba hari ti ketujuh, sebedau Samson tinduk, orang di nengeri nya nyebut ngagai iya, “Nama utai ti manis agi ari ai manyi? Nama utai ti kering agi ari singa?” Ku Samson nyaut, “Enti kita enda udah ngeradu tanah ngena sapi indu aku, nadai kita ulih tetemuka lalai entelah nya nyentuk ngagai diatu.” Kuasa TUHAN lalu tekala nya ngasuh iya kering. Iya lalu nurun ngagai Askelon, lalu munuh tiga puluh iku lelaki, ngambi gari ari tubuh sida, lalu meri gari ti manah nya ngagai bala lelaki ti udah nemu lalai entelah nya. Udah nya, iya pulai ke rumah, pedis ati ke utai ti udah nyadi. Bini iya lalu diasuh mentua iya jadi enggau lelaki ti udah nyadika saksi Samson lebuh Samson seduai bini iya nikah. Nyau kelama udah bekau nya, Samson nemuai ngagai bini iya lebuh maya ngetau gandum, mai siku anak kambin. Ku iya madahka ngagai mentua iya ti lelaki, “Aku deka ke bilik betemu enggau bini aku.” Tang apai bini iya enda nyagi Samson tama. Ku iya madahka ngagai Samson, “Aku ngumbai nuan amat begedika iya. Nya kebuah aku meri iya ngagai pangan nuan. Tang adi iya bajik agi ari iya. Manah nuan ngambi iya.” Ku Samson, “Sekali tu aku enggai betanggungjawapka utai ti deka dikereja aku ngagai orang Pilistin!” Iya mupuk lalu nangkap tiga ratus iku munsang. Iya nanchangka iku dua iku munsang sepasang, lalu nyelitka sempun ba sintal iku nya. Udah nya iya nyelup sempun nya, lalu ngelepaska munsang nya ba madang gandum. Nya meh chara iya nunu, ukai semina gandum ti udah diketau, tang mega gandum ti apin diketau. Kebun buah kana mega angus. Lebuh orang Pilistin betanyaka sapa udah ngereja utai nya, nya baru sida nemu Samson udah ngereja utai nya, laban mentua Samson di Timnah udah meri bini Samson ngagai pangan Samson. Nya alai orang Pilistin mansang lalu nunu indu nya enggau apai iya. Ku Samson bejaku enggau sida, “Enti tu utai ti dikereja kita, aku besumpah, aku enda badu ngapa datai ke aku udah malas semua penyai kita!” Iya lalu ngelaban sida enggau naka pemalat, lalu munuh mayuh amat sida. Udah nya iya mupuk, lalu diau dalam lubang gua ti ba tingkah di Etam. Orang Pilistin datai lalu nirika kem di menua Judah, lalu nyerang nengeri Lehi. Orang di menua Judah lalu nanya sida, “Nama kebuah kita nyerang kami?” Kami datai laban kami deka nangkap Samson, lalu ngereja ngagai iya utai ti udah dikereja iya ngagai kami.” Nya alai tiga ribu iku orang ari menua Judah lalu mansang ngagai lubang gua ti ba tingkah di Etam, lalu bejaku enggau Samson, “Kati nuan enda nemu kitai tu diperintah orang Pilistin? Nama kebuah nuan ngereja utai tu ngagai kami?” Disaut Samson, “Aku ngereja ngagai sida utai ti udah dikereja sida ngagai aku.” Ku sida bejaku enggau iya, “Kami datai ditu laban kami deka nanchang nuan, lalu nyerahka nuan ngagai orang Pilistin.” Ku Samson, “Aku minta kita besemaya enda munuh aku.” “Barang ku jaku,” ku sida nyaut. “Kami semina deka nanchang nuan aja, lalu nyerahka nuan ngagai sida. Kami enda munuh nuan.” Nya alai sida nanchang iya ngena dua iti tali ti baru, lalu mai iya nurun ari tingkah nya. Lebuh iya datai di Lehi, orang Pilistin lalu manjung belanda mansang ngagai iya. Tekala nya kuasa TUHAN lalu ngasuh iya kering, lalu iya mutuska tali ti nanchang lengan enggau jari iya, baka ke mutuska ubung ti udah ditunu. Udah nya iya tetemuka siti tulang rang keledai ti apin lama udah mati. Iya nyengkau lalu ngambi tulang rang nya, lalu munuh seribu iku orang ngena tulang rang nya. Samson lalu belagu, “Aku munuh seribu iku orang ngena tulang rang keledai. Aku nugungka bangkai sida ngena tulang rang keledai.” Udah nya, iya muai tulang rang nya. Endur nya lalu dikumbai Ramat-lehi. Udah nya Samson berasai balat amat aus. Iya lalu ngangauka TUHAN, ku iya, “Nuan udah ngasuh aku menang. Kati Nuan deka ngasuh aku mati aus, lalu ditangkap orang kapir tu?” Allah Taala lalu ngeruang siti lubang ba tanah di Lehi. Ai lalu pansut ari lubang nya. Samson lalu ngirup, lalu berasai nyamai. Mata ai nya lalu dikumbai En-hakori. Mata ai nya agi bisi di Lehi diatu. Samson nguluka orang Israel dua puluh taun lebuh orang Pilistin agi megai perintah di menua nya. Nyadi sekali lebuh Samson mansang ngagai nengeri Gasa, iya betemu enggau siku indu sundal, lalu iya tinduk enggau indu nya. Lebuh orang di Gasa ninga Samson bisi dia, sida ngelulung endur nya, ngipa iya semalam-malam nya ba pintu nengeri. Sida enda engkeretik semalam-malam nya. Ku sida, “Awakka kitai ngipa iya nyentuk ngagai rerak tawas. Udah nya kitai munuh iya.” Tang Samson semina tinduk dia ngagai tengah malam aja. Udah nya iya angkat, nyabut pintu nengeri nya nyengkaum tiang pintu, kunchi enggau semua utai bukai ti ba pintu nya. Iya ngesan lalu mai pintu nya ngagai tuchung bukit ti ari atas nengeri Hebron. Udah bekau nya, Samson rinduka siku indu ke benama Delilah, ti diau ba Lebak Sorek. Lima iku raja orang Pilistin mansang ngagai Delilah, lalu bejaku enggau iya, “Uji nuan nipu Samson ngambika iya madahka ngagai nuan kebuah iya kering baka nya, enggau chara kami ulih ngalahka iya, nanchang iya, lalu ngasuh iya nadai daya agi. Genap iku kami deka meri nuan seribu seratus singkap duit pirak.” Delilah lalu bejaku enggau Samson, “Padahka ngagai aku, nama utai ti ngasuh nuan kering? Enti orang deka nanchang nuan, lalu ngasuh nuan nadai daya agi, kati ku jalai iya ngereja nya?” Disaut Samson, “Enti sida nanchang aku ngena tujuh iti tali panah ti baru, ti apin rangkai, aku deka lemi baka orang bukai.” Orang Pilistin lalu mai tujuh iti tali panah ti baru, ti apin rangkai, ngagai Delilah. Delilah lalu nanchang Samson. Iya ngasuh orang nganti dalam bilik sepiak. Delilah lalu ngangau, “Samson! Orang Pilistin datai!” Tang Samson mutuska tali panah nya baka ke mutuska ubung ti diselup api. Nya alai sida mengkang enda nemu utai ti ngasuh Samson kering. Ku Delilah bejaku enggau Samson, “Nuan udah ngemelika aku, lalu enggai madahka utai ti bendar ngagai aku. Padahka ngagai aku, baka ni ku orang ulih nanchang nuan.” Ku Samson madahka ngagai iya, “Enti sida nanchang aku ngena tali ti nadai udah kala dikena orang, aku deka lemi baka orang bukai.” Delilah lalu ngambi tali ti baru, lalu nanchang Samson. Delilah lalu ngangau, “Samson! Orang Pilistin datai!”. Orang Pilistin endang nganti dalam bilik sepiak. Tang Samson mutuska tali nya ari lengan iya baka ke mutuska ubung. Ku Delilah bejaku enggau Samson, “Nuan majak ngemelika aku, lalu enggai madahka utai ti bendar ngagai aku.” Ku Samson madahka ngagai Delilah, “Enti nuan nenun buk aku ngagai tujuh iti gumpal, lalu nanchangka buk nya ngagai tendai ti dikena betenun, lalu madat iya rapit ngena belia, aku deka lemi baka orang bukai.” Udah nya Delilah nimang iya ngasuh iya tinduk, ngambi tujuh iti gumpal buk iya, lalu nenun gumpal buk nya ngagai tendai ti dikena orang betenun. Iya madat gumpal buk nya ngena belia, lalu ngangau, “Samson! Orang Pilistin datai!” Tang Samson dani lalu narit buk iya ari tendai nya. Lalu ku Delilah bejaku enggau Samson, “Baka ni ku nuan madahka diri rinduka aku, enti nuan endang amat enda? Nuan udah ngemelika aku tiga kali, lalu nuan apin madahka ngagai aku utai ti ngasuh nuan kering.” Delilah majak nanyaka nya ngagai Samson tiap hari, datai ke Samson nyau leju ninga iya ituk betanyaka utai nya ngagai iya. Samson lalu madahka utai ti bendar ngagai iya. “Buk aku nadai kala diguntin,” ku iya madahka. “Aku udah diserahka ngagai Allah Taala nyadi Nasir kenyau ari aku ada. Enti buk aku diguntin, pengering aku lenyau, lalu aku lemi baka orang bukai.” Lebuh Delilah nemu Samson udah madahka utai ti bendar ngagai iya, iya lalu mesanka bala raja orang Pilistin. Ku iya, “Datai kitu sekali da agi. Iya udah madahka utai ti bendar ngagai aku.” Sida lalu datai, mai duit. Delilah lalu nimang Samson, ngasuh iya tinduk ba atas pah iya. Udah nya iya mesanka siku lelaki. Lelaki nya lalu ngerat tujuh iti gumpal buk Samson. Udah nya Delilah lalu belabuh merinsaka Samson, laban pengering Samson nyau nadai agi. Delilah lalu ngangau, “Samson! Orang Pilistin datai!” Samson lalu dani, lalu ku pikir iya, “Aku deka ngelepaska diri baka selama.” Iya enda nemu TUHAN udah ninggalka iya. Orang Pilistin nangkap iya, lalu ngeruk leka mata iya. Sida mai iya ngagai Gasa, nanchang iya ngena rantai temaga, lalu ngasuh iya bekereja ngindik gandum ba gudang dalam rumah jil nya. Tang buk iya belabuh tumbuh baru. Bala raja orang Pilistin begempuru lalu begawai, deka ngenjuk piring ti besai ngagai petara sida ke dikumbai Dagon. Ku sida belagu, “Petara kitai udah nyerahka munsuh kitai Samson ngagai jari kitai!” Lebuh orang Pilistin meda Samson, sida muji petara sida, ku sida, “Petara kitai udah nyerahka munsuh kitai ngagai jari kitai, munsuh ke ngerusak menua kitai, ti udah munuh mayuh bala kitai,” Lebuh sida benung rami ngelantangka diri, sida lalu bejaku, “Kangauka Samson. Awakka iya merindang kitai!” Nya alai sida mai Samson pansut ari rumah jil, lalu iya merindang sida. Sida ngasuh Samson bediri entara tiang ti besai; lalu ku Samson bejaku enggau nembiak ke ngiring iya, “Awakka aku megai tiang ti besai ti nungkat rumah tu, ngambika aku ulih nyandih ba tiang nya.” Rumah nya nyau penuh laban lelaki enggau indu. Raja orang Pilistin ke lima iku bisi dia magang. Pemayuh orang dia kira tiga ribu iku ba perabung rumah nya, ngemataka Samson merindang sida. Udah nya Samson besampi, ku iya, “ TUHAN Allah Taala, kingatka aku. Aku besampi minta Nuan meri aku pengering sekali tu agi, ngambika aku ulih malas orang Pilistin ti udah ngeruk dua igi leka mata aku.” Samson lalu megai dua iti tiang ti besai ti nungkat rumah nya. Iya ngengkahka jari sepiak ba tiang siti, lalu jari sepiak ba tiang siti. Iya lalu ngejuka tiang dua iti nya sereta manjung, “Awakka aku mati enggau orang Pilistin tu!” Iya ngejuka tiang nya enggau pengabis pengering iya. Rumah nya lalu runtuh, ninggang raja ke lima iku nya, enggau semua orang bukai. Samson munuh mayuh agi orang ba pemati iya empu, ari lebuh iya ti agi idup. Bala menyadi iya, enggau sida sebilik datai lalu ngambi bangkai iya. Sida mai iya pulai, lalu nguburka iya ba entara Sorah enggau Esta-ol, dalam lumbung apai iya Manoah. Iya udah nyadi tuai orang Israel dua puluh taun. Nyadi di menua ti bebukit di menua Epraim bisi siku lelaki benama Mikah. Ku iya madahka ngagai indai iya, “Lebuh orang ngenchuri seribu seratus singkap duit pirak nya ari nuan, nuan nyumpah perumpak nya. Aku empu ninga nuan nyumpah iya. Duit nya disimpan aku. Aku empu ke ngenchuri duit nya.” Ku indai iya bejaku, “Awakka TUHAN merekatka nuan, anak!” Iya lalu meri duit nya pulai baru ngagai indai iya, lalu ku indai iya bejaku, “Aku nyerahka duit tu ngagai TUHAN, ari jari anak aku empu, kena ngaga engkeramba ari kayu lalu disampak enggau pirak; nya alai diatu aku mulaika duit pirak tu ngagai jari nuan.” Lebuh iya meri duit nya pulai baru ngagai indai iya, indai iya lalu ngambi dua ratus singkap ari duit pirak nya, lalu meri dua ratus singkap duit nya ngagai siku tukang besi, ke lalu ngaga siku engkeramba, ari kayu, lalu nyampak engkeramba nya enggau pirak nya. Engkeramba nya lalu disimpan dalam rumah Mikah. Nyadi Mikah endang bisi endur alai iya empu besembiang. Iya ngaga engkeramba enggau siti epod, lalu nyiri siku ari bala anak lelaki iya nyadi imam. Menua Israel endang nadai raja lebuh maya nya. Semua orang ngereja utai nitihka peneka ati sida empu. Nyadi lebuh maya nya mega, bisi siku orang bujang ari peturun Lewi, ti diau di nengeri Betlehem, di menua Judah. Iya ninggalka nengeri Betlehem, ngiga endur bukai alai diau. Lebuh iya benung bejalai, iya datai ba rumah Mikah di menua ti bebukit di menua Epraim. Mikah lalu nanya iya, “Ari ni penatai nuan?” Orang bujang nya lalu nyaut, “Aku tu orang Lewi ari nengeri Betlehem, di menua Judah. Aku ngiga endur alai diau.” Ku Mikah bejaku enggau iya, “Diau enggau aku, lalu nyadi penyanding penemu sereta nyadi imam aku, lalu aku deka meri ngagai nuan sepuluh singkap duit pirak setaun, gari, enggau pemakai. Orang bujang nya besetuju deka diau enggau Mikah, lalu iya nyadi baka anak Mikah empu. Mikah ngasuh iya nyadi imam, lalu iya diau dalam rumah Mikah. Ku Mikah bejaku, “Diatu aku nemu TUHAN deka ngasuh aku mujur, laban aku bisi siku orang Lewi nyadika imam aku.” Menua Israel nadai raja lebuh maya nya kelia, lalu raban bansa Dan agi benung begigaka menua ti tau diambu sida alai sida tau ngentapka diri, laban sida apin diberi menua. Nya alai orang ari raban bansa Dan milih lima iku orang ke tau dikarapka ari suku raban bansa sida empu, lalu meri atur ngasuh sida bejalai ari nengeri Sorah enggau ari nengeri Esta-ol lalu matau menua nya. Lebuh sida datai ba menua ti bebukit di menua Epraim, sida lalu diau ba rumah Mikah. Lebuh sida benung dia, sida ninga orang Lewi nya bejaku. Sida mansang lalu nanya iya, “Nama pengawa nuan ditu? Sapa mai nuan kitu?” Ku orang Lewi nya nyaut, “Aku diau ditu ari atur Mikah; iya ngaji aku nyadi imam iya.” Ku sida bejaku enggau iya, “Saup kami nanya ngagai Allah Taala enti pejalai kami tu deka mujur tauka enda.” Ku imam nya nyaut, “Kita nadai utai ngawa. TUHAN deka ngintu kita dalam pejalai kita.” Sida lima iku nya lalu mupuk, mansang ngagai nengeri Lais. Sida meda orang di nengeri nya diau likun baka orang Sidon. Orang nengeri nya diau bebaik enggau orang bukai, lalu nadai laya enggau orang bukai. Sida bisi semua utai ti dipeguna sida. Sida diau jauh ari orang Sidon, lalu nadai kaul enggau orang bansa bukai. Lebuh sida lima nya pulai ngagai Sorah enggau ngagai Esta-ol, orang mayuh lalu nanyaka utai ti ditemu sida. “Aram kitai nyerang Lais,” ku sida nyaut.” Kami udah meda menua nya. Tanah dia manah. Anang diau ditu lalu nadai ngereja apa-apa. Aram mupuk enggau jampat lalu ngambi menua nya! Lebuh kita datai din ila, kita deka nemu orang dia nadai ngadang utai bisi deka nyadi ba sida. Menua nya besai, sereta bisi semua utai ti dipeguna kita, lalu Allah Taala udah meri menua nya ngagai kita.” Enam ratus iku bala lelaki ari suku raban bansa ti diturunka Dan lalu angkat ari Sorah enggau ari Esta-ol mai senyata perang sida. Sida lalu nirika kem sida tunga ke barat ari Kiriat-jearim di menua Judah. Nya kebuah endur nya agi dikumbai Kem Dan nyentuk ngagai diatu. Sida angkat ari endur nya lalu datai ba rumah Mikah, di menua ti bebukit di menua Epraim. Udah nya orang lima iku ti udah meresa menua ngelingi Lais lalu bejaku enggau bala pangan sida, “Kati kita nemu, dalam sebuah rumah ditu bisi engkeramba ti digaga ari kayu lalu disampak enggau pirak? Engkeramba bukai pen bisi, lalu epod pen bisi. Nama utai ti patut dikereja kitai, dalam pikir kita?” Sida lalu mansang ngagai rumah Mikah, ti alai orang Lewi nya diau, lalu nanya ngagai iya pasal pengidup iya. Nyadi lebuh maya nya, enam ratus iku bala soldadu ari raban bansa Dan benung bediri ba pintu penama, sedia deka nyerang. Pematau ke lima iku nya lalu terus mansang ngagai rumah nya, lalu ngambi engkeramba ti digaga ari kayu sereta disampak enggau pirak, enggau engkeramba ti bukai, enggau epod nya. Nyadi imam nya benung bediri enggau enam ratus iku bala soldadu ba mua pintu penama. Lebuh orang lima iku nya tama ngagai rumah Mikah, lalu ngambi engkeramba nya, imam nya lalu nanya, “Nama pengawa kita tu?” Ku sida madahka ngagai iya, “Anang bemunyi. Anang bejaku. Mupuk aja enggau kami, lalu nyadi imam enggau nyadi penyanding penemu kami. Kati nuan rindu agi nyadi imam ke siti suku raban bansa, ari ti nyadi imam ke siti raban bansa orang Israel?” Imam nya lalu lantang ati ninga jaku nya. Iya lalu ngambi engkeramba nya, lalu mupuk enggau sida. Sida nguing lalu angkat ari endur nya. Bala anak sida, jelu tupi, enggau reta tengkira sida dibai dulu ari sida. Lebuh sida udah jauh ngejangka rumah nya, Mikah lalu mesanka orang ke berimbai pendiau enggau iya, mai sida mansang beperang. Lebuh sida nyau ulih tepegaika raban bansa Dan sida lalu ngangau. Orang Dan nguing lalu nanya Mikah, “Nama kebuah nuan mai ngemayuh nya orang datai ditu?” Disaut Mikah, “Kita nabanka imam aku enggau engkeramba ti udah digaga aku, lalu mupuk, datai ke aku nyau nadai utai agi, lalu kita nanya, ‘Nama kebuah’?” Orang Dan lalu madahka ngagai Mikah, “Manah nuan badu agi bejaku, enggai ke bala orang tu ringat, lalu nyerang nuan. Enti sida nyerang nuan, nuan enggau semua kita sebilik tetap mati.” Udah nya raban bansa Dan majakka pejalai sida, lalu lebuh Mikah nemu sida enda ulih dialahka iya, iya nguing, lalu pulai. Lebuh orang Dan udah ngerampas imam enggau engkeramba ti udah digaga Mikah, sida lalu nyerang Lais lalu nunu nengeri sida. Orang di nengeri nya nadai orang nulung, laban sida jauh ari nengeri Sidon, lalu sida nadai kaul enggau orang bukai. Nengeri sida nya ba lebak semak nengeri Bet-rehop. Orang Dan lalu ngaga nengeri nya baru, lalu ngentapka diri dia. Sida lalu nukar nama nengeri nya ngagai nama Dan, ngangkatka nama aki ini sida ke benama Dan anak Jakop. Orang Dan lalu nirika engkeramba nya ngambika bisi disembah sida, lalu Jonatan anak Gersom, uchu Moses, bekereja nyadi imam ke raban bansa Dan, lalu peturun iya nyadika imam sida nyentuk ngagai maya sida ditabanka ngagai menua bukai. Sida lalu nirika engkeramba ti udah digaga Mikah, seagi-agi Langkau Kain Allah Taala meruan di Siloh. Lebuh maya nya kelia, sebedau menua Israel bisi raja, siku orang Lewi diau jauh di menua ti bebukit di menua Epraim. Iya ngambi siku indu ke agi biak ari nengeri Betlehem di menua Judah, nyadika indu simpan iya. Tang indu nya ringat ngagai iya, pulai ngagai rumah apai iya di Betlehem, lalu diau dia empat bulan. Udah nya lelaki nya lalu berunding deka nitihka indu nya, nguji mujuk iya pulai baru ngagai iya. Lelaki nya mai siku orang gaji enggau iya, enggau dua iku keledai. Indu nya mai orang Lewi nya tama, lalu lebuh apai indu nya meda lelaki nya, iya gaga ati ngelaluka penatai iya. Apai indu nya mujuk lelaki nya diau dia, nya alai iya diau dia tiga hari, makai ngirup sereta tinduk enggau bini iya. Ba pagi hari ti keempat, seduai iya angkat tumu pagi besikap deka mupuk. Tang ku apai indu nya bejaku enggau orang Lewi nya, “Makai dulu meh seduai, ngambika seduai kering. Lagi baru seduai mupuk.” Nya alai orang Lewi enggau orang gaji iya duduk, lalu sama makai ngirup. Udah nya apai indu nya bejaku enggau orang Lewi nya, “Bemalam ditu lalu ngelantangka diri.” Orang Lewi nya besikap deka mupuk, tang apai indu nya mujuk iya diau dia enda lama. Nya alai iya bemalam semalam da agi. Tumu pagi hari ti kelima, iya besikap deka mupuk, tang ku apai indu nya bejaku, “Makai dulu. Lagi baru seduai mupuk.” Nya alai lelaki dua iku nya makai. Lebuh lelaki nya, enggau indu simpan iya, enggau orang gaji iya baru deka mupuk, apai indu nya lalu bejaku, “Hari nyau lemai. Manah kita bemalam ditu malam tu. Peda kita, hari nyau deka petang. Diau ditu, lalu ngelantangka diri. Kita tau angkat tumu pagila lalu mulaika diri ke menua.” Tang ku tuan iya, “Kitai enda ngetu ba nengeri orang bansa bukai, ke ukai orang Israel. Kitai majakka pejalai kitai ngagai Gibe-ah. Aram mupuk lalu bemalam di Gibe-ah tauka di Ramah.” Nya alai sida lalu majakka pejalai sida. Urung padam mata panas lemai nya sida datai semak Gibe-ah, di menua Benjamin. Sida lalu limpang ari jalai raya, deka bemalam di Gibe-ah. Sida tama ngagai nengeri nya lalu nudukka diri ba padang nengeri; laban nadai siku orang deka mai sida bemalam. Siku apai tuai orang mansa pulai ari umai. Iya tu asal ari menua ti bebukit di menua Epraim, tang diatu iya diau di Gibe-ah. (Orang dalam nengeri nya endang orang Benjamin magang.) Lebuh apai tuai orang nya tepedaka temuai ba padang nengeri nya, iya lalu nanya, “Ari ni penatai kita, lalu kini ke pejalai kita?” Disaut orang Lewi nya, “Kami datai ari Betlehem di menua Judah, lalu kami deka pulai ngagai menua ti bebukit di menua Epraim. Tang nadai orang deka mai kami bemalam, taja pen kami bisi pemakai enggau rumput ti rangkai ke keledai kami empu, enggau roti enggau wain ke indu simpan aku, ke aku empu enggau ke orang gaji aku. Kami nadai suntuk utai.” Ku apai tuai orang nya bejaku, “Kita tau bemalam dalam rumah aku! Aku empu deka ngintu kita. Anang bemalam ba padang tu.” Nya alai iya mai sida ngagai rumah iya empu, lalu meri keledai sida makai. Bala temuai iya masu kaki diri, lalu makai. Lebuh sida benung ngelantangka diri, bala orang ke jai lalu ngenyit datai ari nengeri nya, ngelulung rumah nya, lalu belabuh mandam pintu. Ku sida bejaku enggau apai tuai nya, “Bai pansut lelaki ke dibai nuan ngagai rumah nuan! Kami deka beleman enggau iya!” Apai tuai nya pansut, lalu bejaku enggau sida, “Anang baka nya, unggal! Anang ngereja utai ti jai, ti kamah baka nya! Orang tu temuai aku. Tu indu simpan iya, enggau anak dara aku ti agi dara bungas. Awakka aku mai seduai iya pansut diatu. Kita tau beleman enggau seduai iya, nitihka peneka ati kita. Tang anang ngereja utai ti jai baka nya ngagai lelaki tu!” Tang bala lelaki nya enggai mendingka iya. Nya alai orang Lewi nya lalu ngambi indu simpan orang nya, lalu ngasuh iya ke luar ngagai bala orang nya. Sida lalu ngereja iya, sereta beduan tubuh iya semalam-malam nya, enda ngetu-ngetu datai ke pagi hari siti. Tumu pagi hari siti indu nya lalu rebah ba mua pintu rumah apai tuai nya, alai laki iya ti diau. Indu nya mengkang dia nyentuk ngagai rerak tawas. Lelaki nya lalu angkat pagi nya, lalu lebuh iya muka pintu deka mupuk, iya nemu indu simpan iya garing-garing ba mua pintu rumah nya. Jari indu nya agi megai pintu. Ku lelaki nya bejaku enggau iya, “Angkat. Mupuk kitai.” Tang indu nya enda nyaut. Iya lalu manggaika indu nya ba keledai, mupuk lalu pulai ngagai menua iya empu. Lebuh iya datai di rumah, iya ngambi duku, lalu ngambi bangkai indu simpan iya nya, netak iya ngagai dua belas iti lampang, lalu ngirumka siti-siti lampang ngagai serata menua Israel. Lalu ku semua orang ke meda utai nya bejaku, “Nadai utai baka tu udah kala nyadi, tauka dipeda kenyau ari orang Israel udah pansut ari menua Ejip nyentuk ngagai sehari tu! Kitai enda tau enda bekiraka utai tu, berandau lalu bejakuka utai tu.” Semua orang Israel, kenyau ari Dan di utara, nyentuk ngagai Beer-seba di selatan, enggau orang ari menua Giliat di timur, bela begempuru di mua TUHAN di Mispah. Bala tuai semua raban bansa orang Israel bisi enggau ba gempuru bala nembiak Allah Taala nya, empat ratus ribu iku bala soldadu ke bejalai kaki, ke besenyataka pedang. Nyadi orang Benjamin bisi ninga pasal orang Israel ke begempuru di Mispah. Orang Israel lalu nanya, “Padahka ngagai kami, baka ni ku utai ti jai tu nyadi?” Orang Lewi ke bempu indu simpan nya lalu nyaut, “Aku enggau bini simpan aku datai di Gibe-ah di menua Benjamin, lalu deka bemalam dia. Bala lelaki ari Gibe-ah datai ngamuk aku, lalu ngelulung rumah ti alai kami diau malam nya. Sida deka munuh aku, tang enda nyadi. Sida lalu ngereja bini simpan aku, lalu iya mati. Aku lalu mai bangkai bini simpan aku, ngelampang tubuh iya, lalu ngirumka siti-siti lampang ngagai dua belas raban bansa orang Israel, laban bala orang nya udah ngereja utai ti jai sereta kamah di menua Israel. Semua kita orang Israel, baka ni ku penemu kita pasal pekara tu?” Semua orang lalu angkat sereta, lalu bejaku, “Nadai siku kitai tau pulai ngagai langkau kain kitai, tauka ngagai rumah diri. Tu utai ti deka dikereja kitai ngagai orang Gibe-ah: kitai deka nyerang sida ngena chara bechabut undi. Sepuluh peratus ari bala orang Israel deka meri bekal ngagai bala soldadu, lalu sida ti bukai deka mansang lalu ngukum Gibe-ah laban orang Gibe-ah udah ngereja pengawa ti kamah di menua Israel.” Nya alai semua orang lelaki di menua Israel lalu begempuru, semua seati magang deka nyerang nengeri Gibe-ah. Raban bansa orang Israel lalu ngasuh bala seruan bejalai ngagai serata menua Benjamin mai jaku tu: “Naka meh pemesai penyai ti udah dikereja kita! Nya alai, serahka orang ke jai ari nengeri Gibe-ah, ngambika kami munuh sida, lalu muai penyai tu ari menua Israel.” Tang orang Benjamin enggai mendingka jaku bala menyadi sida, iya nya orang Israel ti bukai. Orang Benjamin lalu datai ari semua nengeri sida lalu mansang ngagai nengeri Gibe-ah, deka ngelaban orang Israel. Orang Benjamin ngempuruka dua puluh enam ribu iku soldadu ari semua nengeri sida sehari nya, nambahka tujuh ratus iku orang ari nengeri Gibe-ah nya empu. Tujuh ratus iku ari semua bala orang Benjamin nya chawit, ke ulih nyelinting lambar buk ngena pangwang sida, lalu enda kala salah. Semua orang Israel ti bukai ngempuruka empat ratus ribu iku soldadu; semua sida nya endang orang ke tau serang magang. Orang Israel lalu mansang ngagai Betel, lalu betanya ngagai TUHAN, “Sapa ari bala kami deka terubah ngelabuhka jari nyerang orang Benjamin?” TUHAN lalu nyaut, “Raban bansa Judah.” Bala orang Israel lalu mupuk pagi hari siti, lalu nirika kem sida semak nengeri Gibe-ah. Sida lalu mansang nyerang bala soldadu orang Benjamin; sida ngerintai bala sida nunga nengeri nya. Bala soldadu Benjamin lalu pansut ari nengeri Gibe-ah, lalu sebedau lemai nya, sida udah ulih munuh dua puluh dua ribu iku soldadu orang Israel. Tang orang Israel mengkang berani, lalu ngerintai bala sida ba endur nya baru, ba alai sida ke udah berintai ba hari ti keterubah. Orang Israel lalu nyabak di mua TUHAN nyentuk ngagai lemai; sida lalu betanya ngagai TUHAN, “Kati tau kami mansang baru lalu nyerang bala menyadi kami orang Benjamin?” “Tau,” ku TUHAN nyaut. Nya alai, ba hari ti kedua orang Israel lalu nyerang bala soldadu orang Benjamin kedua kali. Ba hari ti kedua nya orang Benjamin pansut baru ari nengeri Gibe-ah, lalu munuh lapan belas ribu iku bala soldadu orang Israel ke endang udah chukup dilatih. Udah nya semua orang Israel mansang ngagai Betel, lalu ngulit. Sida duduk dia di mua TUHAN, lalu bepasa nyentuk ngagai lemai nya. Sida ngenjuk piring pemaik, lalu nunu piring ti segala ngagai TUHAN. Lalu orang Israel betanya ngagai TUHAN (laban Peti Lampang Batu Adat Allah Taala bisi dia lebuh maya nya, lalu Pinehas, anak Eleasar, uchu Aron, nyadi tuai ngemataka utai nya lebuh maya nya). Ku sida, “Kati tau kami mansang baru lalu nyerang bala menyadi kami orang Benjamin, tauka kami badu nyerang sida?” Lalu ku TUHAN nyaut, “Tau; laban Aku deka nyerahka sida ngagai jari kita pagila.” Nya alai orang Israel lalu ngeramka ipa ngelingi Gibe-ah. Ba hari ti ketiga, orang Israel lalu mansang nyerang orang Benjamin, lalu ngerintaika bala sida baka ke dulu ari nya. Orang Benjamin pansut lalu ngelaban orang Israel, lalu sida diumpan pansut lalu ngejangka diri ari nengeri nya, lalu baka ke dulu, sida belabuh munuh sekeda orang Israel ba jalai raya ti nuju ngagai Betel, enggau ba jalai raya ti nuju ngagai Gibe-ah, enggau di menua pesisir. Kira tiga puluh iku orang Israel mati laban sida. Ku orang Benjamin bejaku, “Kitai udah ngalahka sida baka ke dulu ari tu.” Tang ku orang Israel bejaku, “Aram kitai rari, ngambika sida nitihka kitai ngagai jalai raya.” Semua orang Israel lalu angkat ari endur sida, lalu berintai di Baal-tamar, lalu bala soldadu sida ke ngeramka ipa ari barat nengeri Gibe-ah, pansut ari endur sida. Sepuluh ribu lelaki, ke endang udah dipilih ari semua orang Israel, lalu nyerang Gibe-ah. Balat amat sida belaban. Tang bala orang Benjamin enda nemu diri deka alah. TUHAN lalu ngalahka orang Benjamin di mua orang Israel; lalu orang Israel munuh 25,100 iku orang Benjamin sehari nya; semua sida nya endang orang ke udah chukup dilatih magang. Nya baru orang Benjamin nemu diri udah alah. Bala soldadu orang Israel endang sengaja nyurutka diri ari bala soldadu orang Benjamin, laban sida ngarapka orang ke udah ngeramka ipa, ngalahka Gibe-ah. Bala orang ke ngeramka ipa lalu beguai-guai tama ngagai nengeri Gibe-ah; sida munuh semua orang dalam nengeri nya. Bala orang Israel, enggau bala soldadu ke ngeramka ipa udah besetuju ngena siti tanda, iya nya, lebuh bala soldadu ke ngeramka ipa udah nunu nengeri nya lalu asap ti tebal pansut ari nengeri nya, bala orang Israel enda tau enda mutar lalu ngelaban orang Benjamin. Lebuh maya nya orang Benjamin baru udah munuh kira tiga puluh iku orang Israel, lalu ku sida bejaku, “Sida tentu alah laban kitai, baka ke dulu.” Tang lebuh asap ti tebal belabuh bebalun pansut ari nengeri nya, orang Benjamin malik kebelakang, lalu meda semua nengeri nya diempa api. Orang Israel lalu mutar; bala orang Benjamin lalu takut, laban sida nemu diri baru deka alah. Sida lalu nyurutka diri ari orang Israel, lalu rari tunga ngagai menua puang, tang sida ulih digagai orang Israel, lalu bala soldadu orang Israel ke pansut ari nengeri, munuh sida. Orang Israel ngelulung bala orang Benjamin. Sida begagaika orang Benjamin, lalu ngalahka sida kenyau ari Nohah, nyentuk ngagai siti endur ti tunga ke timur nengeri Gibe-ah. Lapan belas ribu iku bala soldadu Benjamin mati; semua sida nya endang bujang berani magang. Sida ke bukai nguing lalu rari tunga ngagai menua puang nuju ngagai Batu Rimon. Lima ribu iku sida dibunuh di rantau jalai nya. Orang Israel majak begagaika sida ngagai Gidom, lalu munuh dua ribu iku sida. Nya alai dua puluh lima ribu iku bala soldadu Benjamin mati sehari nya. Semua sida nya endang bujang berani magang. Tang enam ratus iku orang Benjamin ngerarika diri ngagai menua puang, ngagai Batu Rimon, lalu sida diau dia empat bulan. Orang Israel nikal, lalu munuh semua orang Benjamin ti lelaki, ti indu, enggau bala anak mit, nyengkaum jelu tupi sida. Sida nunu semua nengeri ti mit di menua nya. Nyadi lelaki orang Israel udah besumpah di Mispah, ku sida, “Nadai siku kita tau ngasuh anak indu kitai jadi enggau orang Benjamin.” Nya alai sida mansang ngagai Betel, lalu duduk dia duie-duie nyabak di mua TUHAN nyentuk ngagai lemai. Ku sida: “O TUHAN Allah Taala ke disembah orang Israel, nama kebuah utai tu nyadi di menua tu, datai ke siti raban bansa kami nyau abis lus di menua tu?” Tumu pagi hari siti bala orang Israel angkat lalu ngaga siti alta ba endur nya. Sida ngenjuk piring pemaik, lalu nunu piring segala. Sida lalu nanya, “Raban bansa ni ti nadai datai ngagai gempuru besai di mua TUHAN di Mispah?” (Sida nyebut nya laban sida udah besumpah madahka orang ke nadai datai enggau begempuru di Mispah, deka diukum bunuh.) Orang Israel lalu berasai tusah ati ke menyadi sida ke ari raban Benjamin. Ku sida, “Sehari tu siti raban bansa orang Israel udah lenyau. Baka ni ku kita ngiga bini ke lelaki orang Benjamin ti agi idup? Kitai udah besumpah di mua TUHAN madahka kitai enggai nyerahka anak indu kitai ngagai sida.” Lalu ku sida bejaku, “Raban bansa ni ti nadai datai di mua TUHAN di Mispah?” Nya baru sida nemu, nadai siku orang ari Jabes ti di menua Giliat datai ngagai gempuru besai nya. Laban lebuh orang ngangauka nama bala soldadu, nadai siku orang ari Jabes nyaut. Nya alai bala orang ke begempuru nya lalu ngasuh dua belas ribu iku bala soldadu sida ke pemadu berani mansang ngagai Jabes. Ku sida, “Alai kita mansang ngagai Jabes; lalu bunuh semua orang di Jabes; bunuh mega sida ke indu enggau sida ke mit. Bunuh semua orang ke lelaki, enggau semua indu ke ukai dara bungas.” Sida lalu tetemuka empat ratus iku dara bungas ari bala orang ke diau di Jabes. Sida lalu mai sida indu dara nya ngagai kem di Siloh, di menua Kanaan. Udah nya semua orang ke begempuru dia lalu ngirumka pesan ngagai orang Benjamin ti diau ba Batu Rimon, mai sida badu agi beperang. Orang Benjamin pulai ari Batu Rimon, lalu orang Israel ti bukai meri sida bala indu ke biak ari Jabes, ti enda dibunuh sida. Tang sida indu nya enda chukup ba semua bala sida. Nya alai orang mayuh berasai sinu ati ke orang Benjamin laban TUHAN udah mechahka penyerakup entara raban bansa orang Israel. Nya alai bala tuai ke bisi ba gempuru dia lalu bejaku, “Orang Benjamin nadai agi indu. Nama utai ti deka dikereja kitai kena kitai meri bini ngagai lelaki orang Benjamin ti agi idup?” Israel enda tau ngelenyauka sebarang raban bansa ari dua belas raban bansa iya. Kitai enda tau enda ngiga jalai kena ngidupka raban bansa Benjamin, tang kitai enda tau nejuka sida jadi enggau anak indu kitai, laban kitai udah nyumpah orang ke nejuka orang Benjamin jadi enggau anak indu kitai.” Udah nya sida berunding, “Gawai ninting taun ke TUHAN di Siloh nyau deka nyadi enda lama da agi.” (Nyadi Siloh nya tunga ke utara Betel, ari selatan Lebonah, lalu tunga ke timur jalai raya ari Betel ngagai Sekem.) Sida lalu bejaku enggau orang Benjamin, “Mupuk kita lalu belalai ba kebun anggur, lalu nganti dia. Lebuh indu ari Siloh pansut deka mansang betanda, kita lalu mansutka diri ari kebun anggur. Genap iku kita lalu ngerampas siku indu ari bala sida nyadika bini kita, lalu bai sida pulai enggau kita ngagai menua Benjamin. Enti apai tauka menyadi lelaki sida datai ngagai kita lalu madahka diri enda besetujuka utai nya, kita tau bejaku enggau sida munyi tu: ‘Kami minta kita kasihka kami lalu ngawakka kami bempu sida, laban kami ukai ngerampas sida ari kita nyadika bini kami lebuh beperang. Nyadi laban kita ukai meri sida ngagai kami, kita enda salah, laban kita ukai mungkir ari semaya kita.’ ” Orang Benjamin lalu ngereja nya. Genap iku sida bela milih siku indu ke biak ke betanda di Siloh, lalu mai indu nya nyadika bini iya. Udah nya sida pulai ngagai menua diri empu, ngaduka nengeri sida, lalu diau dia. Lebuh maya nya orang Israel ti bukai lalu mupuk. Genap iku sida pulai ngagai raban bansa diri empu, ngagai ruang bilik diri empu enggau ngagai tanah diri empu. Menua Israel nadai raja lebuh maya nya, lalu genap iku orang bela ngereja utai nitihka peneka ati diri empu. Elimelek mati, lalu Naomi tinggal kediri enggau anak lelaki iya ke dua iku nya, ke jadi enggau Orpah seduai Rut, indu orang Moap. Kira sepuluh taun udah bekau nya Mahlon seduai Chilion mega mati, ninggalka Naomi kediri-diri, nadai laki, nadai anak. Nyau kelama udah bekau nya, Naomi bisi ninga pasal TUHAN ti udah merekatka bala nembiak Iya, ngasuh sida bulih asil ari utai ti ditanam sida. Nya alai iya lalu sedia deka ninggalka menua Moap sama enggau menantu indu iya ke dua iku nya. Sida tiga lalu mulaika diri ngagai menua Judah, tang lebuh sida tiga agi di rantau jalai Naomi lalu bejaku enggau seduai iya, “Manah seduai pulai ngagai rumah seduai empu, lalu diau enggau indai seduai empu. Awakka TUHAN manah enggau seduai baka seduai ti udah manah enggau aku, sereta enggau sida ke udah mati. Lalu awakka TUHAN ngasuh seduai ulih belaki lalu berumah-tangga baru.” Naomi lalu nyium seduai iya, meri selamat tinggal ngagai seduai iya. Tang seduai iya belabuh nyabak, lalu bejaku enggau iya, “Indai, kami duai enda pulai, laban kami duai deka mupuk enggau nuan ngagai bala nuan empu.” Naomi lalu nyaut, “Seduai enda tau enda pulai, anak. Seduai nadai kebuah mupuk enggau aku. Kati seduai ngumbai aku ulih ngadaka anak lelaki baru ngambika bisi jadi enggau seduai? Pulai meh seduai, anak. Aku nyau kelalu tuai belaki baru. Enti sema aku agi bisi utai diadang, lalu belaki baru malam tu lalu ngadaka anak lelaki, kati seduai sanggup nganti sida mansang besai tuai? Kati seduai ulih nagang diri jadi enggau orang bukai? Ukai baka nya, anak. Utai tu balat agi ngenusahka ati aku ari ke ngenusahka ati seduai, laban jari TUHAN udah mutar ngelaban aku. Seduai iya lalu berengkah nyabak baru. Udah nya Orpah lalu nyium mentua indu iya, meri selamat tinggal, lalu pulai, tang Rut enggai ngelengkaka Naomi. Nya alai Naomi lalu bejaku enggau iya, “Rut, ipar nuan udah pulai ngagai bala iya empu, ngagai petara iya. Pulai meh nuan enggau iya.” Tang ku Rut nyaut, “Anang ngasuh aku ninggalka nuan! Awakka aku mupuk enggau nuan. Aku deka seruran enggau nuan di sebarang endur nuan bejalai. Dini dini endur alai nuan diau, dia meh endur alai aku diau. Bala nuan deka nyadika bala aku, lalu Allah Taala nuan deka nyadika Allah Taala aku. Di sebarang endur alai nuan mati, dia meh endur alai aku mati, lalu dia meh endur alai aku dikuburka. Awakka TUHAN ngukum aku, enti aku nejuka utai nyeraraka nuan ari aku, kelimpah ari pemati!” Lebuh Naomi meda Rut keras deka mupuk enggau iya, iya lalu badu agi bejaku. Seduai iya mupuk lalu datai di Betlehem. Lebuh seduai iya datai dia, semua orang di nengeri nyau richah magang, lalu ku sida ke indu bejaku, “Kati nya amat Naomi?” Ku Naomi nyaut, “Anang ngumbai aku Naomi. Kumbai aku Marah, laban Allah Taala ti Pemadu Bekuasa udah ngasuh aku merinsa idup. Lebuh aku ninggalka menua tu, aku mayuh utai, tang TUHAN udah mai aku pulai puang. Kita nadai kebuah ngumbai aku Naomi, laban TUHAN ti Pemadu Bekuasa udah ngukum aku, lalu ngasuh aku ditinggang penusah.” Nya alai, nya meh chara Naomi pulai ari menua Moap sama enggau Rut, menantu indu iya ke orang Moap. Seduai iya datai di Betlehem lebuh orang baru deka berengkah ngetau barli. Nyadi Naomi bisi siku kaban ke benama Boas. Boas tu orang ke kaya sereta dibasa orang. Iya datai ari ruang bilik Elimelek. Nyadi sekali, Rut bejaku enggau Naomi, “Awakka aku mansang ke umai lalu ngumpul barli ti ditinggalka orang ke ngetau. Aku tentu ulih betemu enggau orang ke deka ngambi aku gawa.” Ku Naomi nyaut, “Mupuk meh nuan, anak.” Rut lalu mansang ke umai, bejalai ngentudika bala orang ke bekereja, ngumpul tangkai barli ti ditinggalka sida. Umai nya umai Boas. Enda lama udah bekau nya, Boas empu pen datai ari Betlehem, lalu meri tabi ngagai bala orang ke bekereja ke iya. “Awakka TUHAN meruan enggau kita!” ku iya bejaku. “ TUHAN enggau nuan!” ku sida nyaut. Boas lalu nanya kepala sida, “Sapa indu nya?” Ku lelaki nya nyaut, “Iya nya orang kampar ke pulai enggau Naomi ari menua Moap. Iya minta aku ngelakka iya bejalai nitihka orang ke ngetau ngambika iya ulih ngumpul barli. Iya nadai udah ngetu bekereja kenyau ari tumu pagi tadi.” Udah nya Boas lalu bejaku enggau Rut, “Dinga nuan, anak, anang ngumpul barli ba endur bukai, tang semina ba umai tu aja. Bekereja enggau sida ke indu ditu. Peda tunga sida ngetau, lalu titihka sida. Aku udah bejaku enggau sida ke lelaki, enda nyagi sida ngachau nuan. Lalu lebuh nuan aus, nuan tau ngirup ari tepayan ai ti udah diisi sida.” Rut nyungkurka diri ke tanah, lalu bejaku enggau Boas, “Nama kebuah nuan manah enggau aku lalu ibuhka aku ke orang kampar tu?” Ku Boas nyaut, “Aku udah ninga pasal semua utai ti udah dikereja nuan ke mentua indu nuan sekumbang laki nuan udah mati. Aku nemu nuan udah ninggalka apai indai nuan, enggau menua nuan, lalu datai ditu lalu diau enggau orang ke enda dikelala nuan suba. Awakka TUHAN ngupah nuan ketegal utai ti udah dikereja nuan. Awakka nuan bulih upah enggau penuh ari TUHAN Allah Taala ke disembah orang Israel, ti udah alai nuan datai ngiga pengelikun!” Disaut Rut, “Nuan nelap amat enggau aku, tuan. Nuan udah ngasuh ati aku berasai nyamai, laban nuan nelap amat bejaku enggau aku, taja pen aku tu sebaka enggau orang gaji nuan.” Lebuh sida belatur makai, Boas lalu bejaku enggau Rut, “Aram makai. Sepuhka roti ngagai kuah tu.” Rut lalu duduk sama enggau bala orang ke gawa, lalu Boas meri sekeda kemping roti ngagai iya. Iya makai datai ke kenyang, lalu pemakai iya bisi belaluh. Rut ngumpul barli ba umai nya nyentuk ngagai lemai. Lebuh iya udah ngindik barli nya, nya baru iya nemu diri udah bulih kira sepuluh kilogram. Iya mai barli nya pulai ngagai nengeri, lalu mandangka pemayuh barli ti udah digumpul iya ngagai mentua indu iya. Iya lalu meri laluh pemakai iya ngagai Naomi. Naomi lalu nanya, “Dini alai nuan ngumpul semua barli tu sehari tu tadi, anak? Ba umai sapa nuan gawa? Awakka Allah Taala merekatka orang nya laban iya nemu ibuhka nuan!” Rut lalu madahka ngagai Naomi pasal diri ti udah bekereja ba umai orang ke benama Boas. Ku Naomi bejaku enggau iya, “Awakka TUHAN merekatka Boas! TUHAN endang seruran ngamatka semaya Iya enggau orang ke agi idup sereta enggau orang ke udah mati.” Lalu ku Naomi nampung jaku diri, “Orang nya kaban belayan kitai empu, siku ari orang ke betanggungjawap ngintu tua.” Rut lalu bejaku, “Utai ti pemadu manah nya, iya ngasuh aku majak ngumpul barli begulai enggau bala orang gaji iya datai ke sida nyau tembu ngetau.” Ku Naomi bejaku enggau Rut, “Nya utai ti manah, anak. Manah agi nuan bekereja sama enggau bala indu ke bekereja ba umai Boas, enggai ke nuan dikachau lelaki enti nuan gawa ba umai orang bukai.” Nya alai Rut bekereja enggau sida, lalu ngumpul barli datai ke semua barli enggau gandum udah abis diketau. Lalu iya mengkang diau enggau mentua indu iya. Nyau kelama udah bekau nya, Naomi bejaku enggau Rut, “Aku enda tau enda ngiga laki ke nuan, ngambika nuan bisi rumah tangga ke diri empu. Nuan tentu ingatka orang ke benama Boas. Nuan udah gawa enggau bala indu ke bekereja ke iya. Iya kaban belayan kitai empu. Dinga nuan: malam tu iya deka ngindik barli. Nya alai, nuan enda tau enda mandi; kena minyak wangi nuan, lalu begari ngena gari nuan ti pemadu manah. Udah nya mansang nuan ngagai endur alai iya ke ngindik barli, tang anang ngasuh iya nemu nuan bisi dia, datai ngagai maya iya udah badu makai ngirup. Peda endur alai iya gali, lalu lebuh iya udah tinduk, mansang nuan lalu siatka pua iya, lalu gali semak kaki iya. Iya deka madahka utai ti patut dikereja nuan.” Disaut Rut, “Lagi aku ngereja semua utai ti ku nuan.” Rut lalu mansang ngagai endur alai orang ngindik barli, lalu ngereja utai ti diasuh mentua iya. Lebuh Boas udah badu makai ngirup, sereta lantang ati, iya mansang ngagai tugung barli lalu gali, deka nindukka diri. Rut lalu mansang begadai-gadai, nyiatka pua Boas, lalu gali semak kaki iya. Malam nya Boas dani, bekalih lalu tekenyit meda siku indu gali semak kaki iya. “Sapa nuan tu?” ku Boas nanya. Rut lalu nyaut, “Aku tu Rut, ulun nuan. Bungkur aku ngena kelambi nuan, laban nuan kaban belayan kami.” Ku Boas bejaku, “Awakka TUHAN merekatka nuan. Penaluk ti dipandangka nuan sekali tu manah agi ari penaluk ti dipandangka nuan dulu ari tu; nuan nadai udah ngiga lelaki, nemuka orang ke kaya tauka seranta. Nya alai anang takut, Rut. Aku deka ngereja semua utai ti dipinta nuan, laban semua orang di nengeri tu nemu nuan endang indu ke manah ulah. Tang taja pen aku tu kaban belayan nuan ti nyempil, tang bisi siku agi kaban ti nyempil agi ari aku. Nuan bemalam ditu malam tu. Pagila baru nuan nemu enti lelaki nya deka, tauka enggai betanggungjawap ngintu nuan. Enti iya deka, nya utai ti manah. Enti iya enggai, aku deka besumpah atas nama TUHAN ti idup, aku deka nerima tanggungjawap nya. Gali, lalu diau ditu nyentuk ngagai pagi.” Rut lalu gali semak kaki Boas nyentuk ngagai pagi. Tang Rut angkat sebedau rerak tawas, laban Boas enggai ke orang nemu Rut bisi udah datai ngagai endur ngindik nya. Ku Boas bejaku enggau iya, “Buka lalu kerembaika serayung nuan.” Rut lalu muka serayung iya. Boas lalu nuang nyau deka bulih sepuluh kilogram barli ngagai kain nya. Boas lalu manggaika tungkus barli nya ngagai bau Rut. Udah nya Rut lalu mulaika diri ngagai nengeri mai barli nya. Lebuh Rut datai di rumah, mentua iya lalu nanya, “Kati ku baka utai, anak?” Rut lalu madahka semua utai ti udah dikereja Boas ke iya. Lalu ku Rut nampung cherita iya, “Iya madahka ngagai aku, aku enda tau pulai puang ngagai nuan. Iya lalu meri aku semua barli tu.” Ku Naomi bejaku enggau Rut, “Rut, nuan enda tau enda liat ati nganti utai nyadi. Boas tetap enggai jenuh sehari tu datai ke udah ngatur semua pekara tu.” Boas mansang ngagai balai raya ba pintu nengeri nya, lalu nudukka diri. Udah nya kaban belayan Elimelek ti nyempil, ti udah disebut Boas nama, mansa. Boas lalu ngangauka iya. “Datai kitu, unggal. Duduk.” Orang nya mansang lalu nudukka diri. Udah nya Boas mesanka sepuluh iku bala tuai nengeri nya, lalu ngasuh sida mega duduk dia. Lebuh sida udah nudukka diri, Boas lalu bejaku enggau kaban iya nya. Ku iya, “Naomi diatu udah pulai ari menua Moap. Iya deka nyual tanah ti diempu kaban kitai Elimelek. Aku bekira deka madahka utai nya ngagai nuan. Nya alai, beli tanah nya di mua semua orang ke duduk ditu, enggau di mua bala tuai. Enti nuan deka meli tanah nya, beli aja; tang enti nuan enggai, padahka ngagai aku, ngambika aku nyamai nemu; laban nadai orang bukai ke lebih agi patut meli tanah nya ari nuan empu. Udah nya baru aku.” Ku orang nya nyaut, “Awakka aku meh meli tanah nya.” Disaut Boas, “Nya utai ti manah. Enti nuan meli tanah nya ari Naomi, nuan mega ngambi Rut, indu orang Moap ke balu nya, ngambika tanah nya mengkang diempu ruang bilik orang ke udah mati nya.” Ku lelaki nya nyaut, “Enti baka nya, aku enda nyadi meli tanah nya, laban anak aku empu enda ulih bempu tanah nya ila. Awakka nuan meh meli tanah nya. Aku enda.” Lebuh maya nya kelia, enti orang deka nyual tauka besilihka pesaka nitihka adat asal, orang nya enda tau enda muka kasut iya, lalu meri kasut nya ngagai orang ke meli pesaka nya. Nya meh jalai orang Israel meri pemutus ngagai pekara nya. Nya alai, lebuh orang nya madahka ngagai Boas, “Awakka nuan meh meli tanah nya.” Iya lalu muka kasut iya. Udah nya Boas lalu bejaku enggau bala tuai, enggau semua orang bukai ke bisi dia, “Sehari tu semua kita nyadika saksi aku udah meli ari Naomi semua utai sida Elimelek, enggau semua utai anak lelaki iya Chilion seduai Mahlon. Aku mega ngambi Rut indu orang Moap, balu Mahlon, nyadika bini aku, ngambika pesaka tu mengkang diempu ruang bilik orang ke udah mati, lalu purih iya deka majak idup begulai enggau bala sida empu, di nengeri tu. Kita meh nyadi saksi ke semua utai tu sehari tu.” Ku bala tuai enggau bala orang bukai bejaku, “Kami tu meh nyadika saksi. Awakka TUHAN ngaga bini nuan baka Rachel seduai Leah, ke ngadaka mayuh anak ke Jakop. Awakka nuan nyadi kaya dalam raban peturun Eprat, lalu nyadi orang ke tebilang di Betlehem. Awakka bala anak ti deka diberi TUHAN ngagai nuan, nengah indu ke biak tu, ngaga ruang bilik nuan baka ruang bilik Peres, anak Judah seduai Tamar.” Boas lalu mai Rut ngagai rumah iya nyadika bini iya. TUHAN merekatka Rut. Iya ngandung, lalu ngadaka anak lelaki siku. Ku sida ke indu bejaku enggau Naomi, “Puji TUHAN! Sehari tu Iya udah meri ngagai nuan siku uchu ti lelaki, ngambika bisi ngidupka nuan. Awakka nembiak nya nyadi orang ke tebilang di menua Israel! Menantu nuan rinduka nuan, lalu udah ngereja mayuh agi utai ke nuan ari ti dikereja tujuh iku anak lelaki. Lalu diatu iya udah meri nuan siku uchu ti lelaki, ti deka mai pengidup ti baru ngagai nuan, lalu ngasuh nuan diau likun lebuh nuan nyau tuai.” Naomi lalu ngambi anak mit nya, merap, lalu ngibun iya. Bala indu ke diau bekelingi dia lalu meri nama Obet ngagai anak mit nya. Ku sida madahka ngagai semua orang, “Naomi bisi anak lelaki!” Obet nyadi apai Jesi, lalu Jesi nyadi apai David. Nyadi di nengeri Ramah, di menua ti bebukit di menua Epraim, bisi siku lelaki benama Elkanah anak Jeroham, uchu Elihu, ari ruang bilik Tohu, ari raban peturun Sup. Elkanah bisi dua iku bini; nama siku Hanah, lalu nama siku Peninah. Peninah bisi anak, tang Hanah nadai anak. Elkanah bejalai tiap taun ari Ramah mansang nyembah lalu ngenjuk piring ngagai TUHAN ti Pemadu Bekuasa di Siloh, alai dua iku anak lelaki Eli, Hopni seduai Pinehas ke bekereja nyadi imam TUHAN. Genap kali Elkanah ngenjuk piring, iya meri siti ungkup ari dagin nya ngagai bini iya, Peninah, enggau siti ungkup ngagai genap iku anak lelaki enggau anak indu Peninah. Tang taja pen Elkanah rinduka bini iya Hanah, iya semina meri siti aja ungkup ngagai Hanah, laban TUHAN udah nagang Hanah bisi anak. Peninah selalu ngeleseka Hanah ngambika iya ringat, laban TUHAN nagang Hanah beranak. Utai tu nyadi ari taun siti ngagai taun siti. Genap kali Hanah mansang ngagai Rumah TUHAN, Peninah selalu ngeleseka iya, datai ke Hanah nyau nyabak, lalu enggai makai. Laki iya selalu nanya iya, “Hanah, nama kebuah nuan nyabak, enda makai, lalu selalu tusah ati? Kati aku tu kurang agi beguna ba nuan ari sepuluh iku anak lelaki?” Nyadi sekali, lebuh sida udah badu makai ngirup di Siloh, Hanah angkat. Nyadi imam Eli duduk ngimbai tiang pintu rumah TUHAN. Ati Hanah balat amat tusah, lalu iya balat amat nyabak besampi ngagai TUHAN. Hanah lalu besumpah, ku iya, “ TUHAN ti Pemadu Bekuasa, enti Nuan deka merening ngagai pemerinsa aku ke nembiak Nuan, lalu ingatka aku, lalu meri aku siku anak lelaki, aku deka nyerahka iya ngagai TUHAN sepemanjai umur iya, lalu buk iya deka digalau enda diguntin.” Hanah majak besampi ngagai TUHAN, lalu Eli beratika mulut iya. Iya besampi dalam ati diri; semina mulut iya aja ti kimut-kimut, tang iya enda bemunyi. Nya alai Eli ngumbai iya mabuk, lalu ku Eli bejaku enggau iya, “Ni pengelama nuan mandangka diri mabuk baka tu? Anang agi ngirup!” Tang ku Hanah nyaut, “Aku ukai mabuk, tuan; ati aku balat tusah; aku nadai ngirup wain tauka ai ti bisa; aku semina mantaika penusah aku ngagai TUHAN. Anang ngumbai aku jai. Aku besembiang baka tu laban ati aku balat irau sereta tusah.” Eli lalu nyaut iya, “Mupuk meh nuan enggau selamat. Awakka Allah Taala ke disembah orang Israel meri ngagai nuan utai ti dipinta nuan.” Lalu ku Hanah bejaku ngagai Eli, “Awakka nuan selalu manah runding pasal aku.” Hanah lalu mupuk, makai mimit, lalu mua iya enda agi tusah. Elkanah enggau sida sebilik dani tumu pagi hari siti, lalu nyembah TUHAN; udah nya sida mulaika diri ke Ramah. Elkanah beleman enggau bini iya Hanah, lalu TUHAN ingatka Hanah. Hanah ngandung, lalu ngadaka anak lelaki siku, lalu iya meri iya nama Samuel. Ku Hanah, “Aku udah minta iya ari TUHAN.” Maya pen datai alai Elkanah enggau sida sebilik deka mansang baru ngagai Siloh, lalu ngenjuk piring ti diberi sida ninting taun ngagai TUHAN, enggau siti piring ti pemadu manah ti udah disemaya iya. Tang sekali tu Hanah enda enggau sida. Ku iya madahka ngagai laki iya, “Lebuh anak mit tu udah badu nusu ila, aku deka mai iya ngagai rumah TUHAN, lalu iya deka diau dia seumur idup.” Disaut Elkanah, “Barang ku jaku. Kereja aja utai ti ku ati nuan, nganti nuan udah badu agi nusuka iya. Awakka TUHAN ngamatka semaya Iya.” Nya alai Hanah diau di rumah, nusuka anak iya, nyentuk ngagai maya iya badu nusu. Lebuh Hanah udah badu agi nusuka anak mit nya, iya lalu mai anak mit nya ngagai Siloh, mai siku sapi ti lelaki ti umur tiga taun, sepuluh kilogram tepung, enggau sekambut wain. Iya mai Samuel ngagai Rumah TUHAN di Siloh, taja pen Samuel agi biak. Lebuh sida udah nyayat jelu sapi nya, sida lalu mai anak mit nya ngagai Eli. Ku Hanah bejaku enggau Eli, “Tuan, aku tu meh indu ke dipeda nuan bediri ditu besampi ngagai TUHAN. Iya tu meh anak ke dipinta aku ari TUHAN, lalu TUHAN udah nyaut sampi aku. Nya alai aku diatu nyerahka iya ngagai TUHAN. Seagi-agi iya idup, iya diserahka ngagai TUHAN.” Hanah lalu ninggalka Samuel dia ke TUHAN. Hanah lalu besampi: “ TUHAN meri aku pengaga, enggau pengering; Aku ketawaka munsuh aku, laban aku gaga ati ke pengelepas aku. “Nadai orang ke kudus baka TUHAN, Nadai orang ke sebaka enggau Nuan; Nadai orang ke nyaga baka Allah Taala kami. Badu agi nuan temegah bejaku. Anang agi nuan bejaku sumbung, Laban TUHAN nya Allah Taala ti nemu semua utai, lalu Iya ngakim semua utai ti dikereja orang. Panah bala soldadu ti kering udah patah, tang orang ke lemi nyadi kering. Orang ke udah kenyang dulu suba diatu minta orang ngaji sida ngambika sida bisi utai dipakai, tang orang ke lapar, enda agi lapar. Indu ke mandul udah ngadaka tujuh iku anak, tang indai ke mayuh anak, nyau nadai agi anak. TUHAN munuh, lalu TUHAN mega ngidup. TUHAN mai orang ngagai dunya pemati lalu Iya mega ngangkatka sida. Iya ngasuh sekeda orang seranta, lalu sida ti bukai kaya. Iya ngemaruhka sekeda, lalu ngeninggika sekeda. Iya ngangkatka orang ke seranta ari amau lalu ngangkatka orang ke seranta ari pemerinsa sida, lalu ngasuh sida duduk begulai enggau bala raja, lalu ngasuh sida dibasa orang. Pugu dunya tu endang enggi TUHAN, lalu Iya udah nudukka dunya ba atas pugu nya. “Iya nyaga bala nembiak Iya ke tetap ati ngagai Iya, tang orang ke jai deka dibuai ngagai dunya pemati; laban orang enda ulih menang ngena pengering diri empu. TUHAN deka ngerusak munsuh Iya. Iya deka meletup munyi guntur ngelaban sida ari serega. TUHAN deka ngakim semua dunya. Iya deka meri pengering ngagai raja ke dipilih Iya. Iya deka meri kuasa ngagai raja ke dipilih Iya.” Udah nya Elkanah pulai ngagai rumah iya di Ramah, tang anak mit nya, Samuel, diau di Siloh, lalu bekereja ke TUHAN di baruh imam Eli. Nyadi anak lelaki Eli ke dua iku nya orang ke jai. Seduai iya enda bebasaka TUHAN, Adat asal entara sida imam enggau orang mayuh nya baka tu: lebuh orang ngenjuk piring, ulun imam datai, lebuh dagin nya benung melidih dipanduk, iya ngerejangka serampang ti bemata tiga ngagai dagin ti benung dipanduk nya, lalu sebarang utai ti ulih direjang serampang nya diempu imam. Nya alai nya adat asal ti dipejalaika sida di Siloh ngagai semua orang Israel. Nambahka nya, sebedau lemak ditunu, ulun imam datai, lalu bejaku ngagai orang ke ngenjuk piring, “Beri dagin ngambika bisi dipanggang imam; laban iya enggai nerima dagin ti udah dipanduk, tang dagin ti agi mata.” Lalu enti orang ke ngenjuk piring nya nyaut, “Awakka sida nunu lemak dulu. Udah nya baru nuan tau ngambi sepemayuh ti dikedekaka nuan,” ulun imam nya deka bejaku, “Anang baka nya; nuan enda tau enda meri dagin nya diatu; enti nuan enggai, utai nya aku rampas ari nuan lagi!” Nya alai, di mua TUHAN, dosa ti dikereja anak lelaki Eli ke dua iku nya besai amat, laban seduai iya enda bebasaka piring TUHAN. Lebuh maya nya, Samuel, ti agi benung nembiak, majak bekereja ke TUHAN. Iya ngena epod ti digaga ari kain linin. Lalu indai iya tiap taun ngaga selambar baju panjai ti mit ke Samuel, lalu mai baju nya ngagai Samuel, lebuh iya nyempulang laki iya ngenjuk piring ti diberi genap taun. Eli lalu merekatka Elkanah enggau bini iya, ku iya, “Awakka TUHAN meri ngagai nuan anak ti bukai ulih bini nuan, kena nganti siku tu ti udah diserahka bini nuan ngagai TUHAN.” Udah nya, seduai iya pulai ke rumah. TUHAN merekatka Hanah, lalu iya ngadaka tiga iku agi anak lelaki, enggau dua iku anak indu. Samuel mansang besai, sereta majak bekereja ke TUHAN. Nyadi Eli diatu nyau tuai. Iya selalu ninga pasal semua utai ti dikereja anak lelaki iya ngagai orang Israel, pasal seduai iya ke tinduk enggau sida indu ke bekereja ba penama ngagai Langkau Kain TUHAN. Lalu ku iya bejaku enggau seduai iya, “Nama kebuah seduai ngereja utai tu? Laban aku ninga semua orang bela nusui penyai ti dikereja seduai. Seduai enda tau baka nya, anak. Berita pasal seduai ngelekai ngagai semua nembiak TUHAN, lalu berita nya enda manah. Enti orang bedosa ngelaban pangan diri, Allah Taala ulih bejaku ngarika iya. Tang enti orang bedosa ngelaban TUHAN, sapa ulih bejaku ngarika orang nya?” Tang seduai iya enggai mendingka apai seduai, laban TUHAN endang deka munuh seduai iya. Samuel mansang besai, sereta dikerinduka TUHAN enggau mensia. Siku nabi lalu datai ngagai Eli mai pesan tu ari TUHAN: “Lebuh aki ini nuan Aron enggau sida sebilik agi nyadi ulun raja menua Ejip, Aku udah mandangka Diri ngagai Aron. Lalu Aku milih ruang bilik iya ari semua raban bansa orang Israel nyadika imam Aku, bekereja ba alta, nunu menyan, lalu ngena epod betanyaka utai ngagai Aku. Lalu Aku udah meri ngagai ruang bilik iya hak nyimpan sebagi ari piring tunu ba alta nya. Nya alai, nama kebuah kita amuka piring enggau pemeri ti dipinta Aku ari bala nembiak Aku? Nama kebuah nuan, Eli, lebih agi bebasaka anak lelaki nuan ari nuan ke bebasaka Aku, lalu nejuka seduai iya gemu bepakaika ungkup ti pemadu manah ari semua piring ti diberi bala nembiak Aku ngagai Aku? Aku, TUHAN Allah Taala ke disembah orang Israel, udah besemaya dulu kelia, madahka ruang nuan enggau raban peturun nuan deka bekereja ke Aku nyadi imam belama iya. Tang diatu Aku madahka ngagai nuan, Aku enda begunaka semaya nya agi; laban Aku bebasaka orang ke bebasaka Aku, lalu Aku nyumpah orang ke enda bebasaka Aku. Dinga nuan, maya deka datai alai Aku deka munuh semua orang bujang dalam ruang bilik nuan, enggau dalam raban peturun nuan, ngambika nadai siku lelaki ari ruang bilik nuan deka panjai umur. Kita deka tusah ati lalu deka ngining semua berekat ti deka diberi Aku ngagai orang Israel ti bukai, tang nadai siku kita sebilik deka panjai umur. Tang taja pia, Aku deka ngasuh siku ari peturun nuan idup, lalu iya deka bekereja ke Aku nyadi imam. Tang iya deka buta, sereta nadai pengandal, lalu semua peturun nuan deka mati dibunuh ngena pedang. Anak lelaki nuan ke dua iku, Hopni seduai Pinehas, deka mati sama hari, kena nunjuk ke nuan, semua utai ti udah disebut Aku deka dikamatka magang. Aku deka milih siku imam ti deka tetap ati ngagai Aku, ti deka ngereja semua utai ti diasuh Aku. Aku deka meri iya peturun, ke seruran deka bekereja di mua raja ke dipilih Aku. Semua bala peturun nuan ti agi idup, deka mansang ngagai imam nya lalu minta duit enggau pemakai, sereta minta pemendar nyaup bala imam, kena sida ngulihka pemakai.” Lebuh maya nya menya, lebuh Samuel agi biak, lalu bekereja ke TUHAN di baruh Eli, nadai mayuh pesan datai ari TUHAN, lalu genera pen jarang mega dipeda. Nyadi sekali, lebuh Eli, ke nyau deka buta, tinduk dalam bilik iya, lampu Allah Taala apin dipadamka, Samuel tinduk ba Endur ti Kudus, alai Peti Lampang Batu Adat Allah Taala disimpan. TUHAN ngangauka Samuel. Samuel lalu nyaut, “Au, tuan!” Iya lalu belanda ngagai Eli, ku iya, “Nuan bisi ngangauka aku: tu aku.” Tang ku Eli nyaut, “Nadai aku ngangauka nuan. Tinduk meh nuan.” Samuel lalu pulai lalu gali baru. TUHAN lalu ngangauka Samuel baru. Samuel angkat lalu mansang ngagai Eli, lalu bejaku, “Nuan bisi ngangauka aku. Tu aku.” Tang ku Eli bejaku, “Nadai aku ngangauka nuan, anak. Tinduk meh nuan.” Nyadi Samuel apin nemu TUHAN, lalu jaku TUHAN pen apin mega dipandangka ngagai iya. TUHAN lalu ngangauka Samuel ketiga kali. Samuel angkat, mansang ngagai Eli, lalu bejaku, “Nuan bisi ngangauka aku; tu aku.” Nya baru Eli nemu, TUHAN Empu ke ngangauka nembiak nya. Nya alai iya lalu bejaku enggau Samuel, “Pulai nuan ngagai peninduk nuan. Enti Iya ngangauka nuan baru, sebut, ‘Bejaku meh TUHAN. Nembiak Nuan mending.’ ” Samuel lalu pulai baru ngagai peninduk iya. TUHAN datai lalu bediri dia, lalu Iya ngangau baka ke dulu, “Samuel! Samuel!” Samuel lalu nyaut, “Bejaku meh, TUHAN. Nembiak Nuan mending.” TUHAN lalu bejaku ngagai Samuel, “Dinga nuan, Aku baru deka ngereja utai ngagai orang Israel, datai ke semua orang ke ninga pasal utai nya deka temati-kutu. Ba hari nya ila Aku deka ngukum ruang bilik Eli, munyi ti udah disemaya Aku. Aku madahka ngagai iya, Aku deka ngukum ruang bilik iya belama iya, ketegal penyai ti ditemu iya, laban anak lelaki iya bejaku busung ngelaban Allah Taala, lalu iya enda nagang seduai iya. Nya alai Aku besumpah ngelaban ruang bilik Eli, madahka penyai ti dikereja ruang bilik iya enda ulih dibuai ngena genselan tauka piring datai ke belama iya.” Samuel mengkang gali nyentuk ngagai pagi. Udah nya iya muka pintu rumah TUHAN. Iya takut madahka genera nya ngagai Eli. Tang Eli ngangauka iya, “Samuel, anak!” “Tu aku,” ku Samuel nyaut. Eli lalu bejaku, “Nama utai ti dipadahka TUHAN ngagai nuan? Anang ngelalaika utai nya ari aku. Awakka Allah Taala ngukum nuan, enti nuan ngelalaika utai ti dipadahka Iya ngagai nuan.” Samuel lalu madahka semua utai ngagai iya. Iya enda ngelalaika utai ari Eli. Ku Eli, “Iya endang TUHAN. Awakka Iya ngereja utai ti manah ba ati Iya.” Samuel mansang besai tuai, lalu TUHAN meruan enggau iya, lalu ngamatka semua utai ti disebut Samuel. Lalu semua orang Israel kenyau ari Dan nyentuk ngagai Berseba bela nemu Samuel endang amat nabi TUHAN. Lalu TUHAN mandangka Diri baru di Siloh, alai Iya ke pegari di mua Samuel ngena jaku TUHAN. Semua orang Israel bela mendingka jaku Samuel. Lebuh maya nya, orang Israel deka mansang nyerang orang Pilistin; sida nirika kem sida di Ebeneser, lalu orang Pilistin nirika kem sida di Apek. Orang Pilistin lalu nyerang orang Israel. Lebuh sida udah bebendar amat belaban, orang Israel lalu alah laban orang Pilistin; kira empat ribu iku orang Israel mati laban orang Pilistin ba endur alai sida ke betempuh nya. Lebuh orang Israel pulai ngagai kem sida, bala tuai orang Israel lalu nanya, “Nama kebuah TUHAN nejuka kitai alah laban orang Pilistin sehari tu? Aram kitai ngambi Peti Lampang Batu Adat TUHAN ari Siloh, ngambika TUHAN bejalai enggau kitai, lalu ngelepaska kitai ari kuasa munsuh kitai.” Sida lalu ngasuh bala seruan ngambi Peti Lampang Batu Adat TUHAN ari Siloh, laban kerusi diraja TUHAN ti Pemadu Bekuasa bisi ba atas Peti Lampang Batu Adat nya. Anak lelaki Eli ke dua iku, Hopni seduai Pinehas, datai sama enggau Peti Lampang Batu Adat nya. Lebuh Peti Lampang Batu Adat nya datai ba kem, orang Israel lalu manjung datai ke tanah nyau berenyang empa penginggar panjung sida. Lebuh orang Pilistin ninga orang Israel manjung, sida lalu nanya, “Nama utai ti dipanjungka orang Hebrew?” Lebuh sida ninga Peti Lampang Batu Adat TUHAN udah datai ba kem orang Hebrew, sida lalu takut. Ku sida, “Siku petara udah datai ba kem sida! Nadai meh penyadi kitai tu! Nadai utai baka tu udah kala nyadi menya! Tulah meh kitai tu! Sapa ulih ngelepaska kitai ari bala petara ti bekuasa nya? Sida nya meh petara ti munuh orang Ejip ngena semua macham penyakit di menua puang! Anang takut, kita orang Pilistin! Awakka kita beperang baka anak lelaki, enggai ke kitai nyadi ulun orang Hebrew, baka sida ke udah nyadi ulun kita. Beperang baka anak lelaki!” Nya alai orang Pilistin nyerang, lalu orang Israel alah laban sida. Orang Israel lalu rari ngagai rumah diri empu. Mayuh amat orang Israel mati. Tiga puluh ribu iku sida mati. Peti Lampang Batu Adat Allah Taala lalu ditabanka munsuh. Anak Eli, Hopni seduai Pinehas, mega mati. Siku orang Benjamin belanda ari endur ti betempuh lalu datai di Siloh sehari nya. Gari iya nyau abis charik lalu pala iya abis dibalut tanah. Lebuh iya datai, Eli benung duduk ba kerusi iya ngimbai jalai raya, ngemata, laban iya irau ati ke Peti Lampang Batu Adat Allah Taala. Lebuh orang nya datai di nengeri nya, lalu nusui berita nya, semua orang di nengeri nya lalu nyabak magang. Lebuh Eli ninga munyi orang balat amat nyabak, iya lalu nanya, “Nama kebuah orang inggar?” Orang nya lalu beguai-guai mansang ngagai Eli, lalu madahka ngagai iya. ( Umur Eli nyau semilan puluh lapan taun, lalu mata iya nyau rabun lalu enda lansik agi.) Ku orang nya madahka ngagai Eli, “Aku udah ngerarika diri ari endur alai kami ke betempuh enggau munsuh, lalu udah belanda kitu sehari tu.” Eli lalu nanya iya, “Kati ku baka perang nya, anak?” Seruan nya lalu nyaut, “Orang Israel udah rari ari orang Pilistin. Mayuh amat bala kami mati! Anak lelaki nuan, Hopni seduai Pinehas, mega mati, lalu Peti Lampang Batu Adat Allah Taala udah ditabanka munsuh!” Lebuh orang nya madahka pasal Peti Lampang Batu Adat nya, Eli lalu rebah telentang ari kerusi iya ngimbai pintu penama nya. Pegu iya patah lalu iya mati, laban iya nyau tuai sereta kelalu gemu. Iya udah nyadi pengulu orang Israel empat puluh taun. Nyadi menantu indu Eli, iya nya bini Pinehas, benung betubuh-bisi, lalu nyau deka beranak. Lebuh iya ninga Peti Lampang Batu Adat Allah Taala udah ditabanka munsuh, lalu mentua iya ti lelaki enggau laki iya pen udah mega mati, iya pedis perut, lalu beranak. Lebuh iya baru deka ngapuska seput, bala bidan ke nyaup iya lalu bejaku enggau iya, “Anang tusah ati! Nuan bisi siku anak lelaki!” Tang iya enggai mendingka utai ti disebut sida, lalu iya enda nyaut. Iya meri anak mit nya nama Ikabot. Ku iya nerangka nama nya, “Mulia Allah Taala udah ninggalka orang Israel.” Iya bejakuka pasal Peti Lampang Batu Adat ti udah ditabanka munsuh, enggau pasal pemati mentua iya ti lelaki, enggau pemati laki iya. Ku iya bejaku, “Mulia Allah Taala udah ninggalka orang Israel, laban Peti Lampang Batu Adat Allah Taala udah ditabanka munsuh.” Lebuh orang Pilistin udah nabanka Peti Lampang Batu Adat nya, sida lalu mai peti nya ari Ebeneser ngagai Asdot. Sida lalu mai Peti Lampang Batu Adat nya ngagai rumah sembiang petara sida ke benama Dagon, lalu ngengkahka Peti nya ngimbai engkeramba Dagon. Tumu pagi hari siti, orang di Asdot meda engkeramba Dagon rebah tingkap ba tanah di mua Peti Lampang Batu Adat TUHAN. Sida lalu ngangkatka engkeramba nya, lalu nirika iya baru. Tang lebuh sida dani tumu pagi hari siti, sida meda engkeramba nya udah rebah baru di mua Peti Lampang Batu Adat nya. Sekali tu pala enggau lengan dua piak engkeramba nya udah putus, lalu garing-garing ba pintu penama. Ka semina bukang tubuh engkeramba nya aja agi tinggal. ( Nya kebuah nyentuk ngagai sehari tu, bala imam Dagon enggau semua orang ke nyembah iya, enda tau ngindik semetung mua pintu rumah sembiang Dagon.) TUHAN balat amat ngukum orang Asdot, sereta ngenakutka sida. Iya ngukum sida, enggau orang ke diau di menua ti ngelingi nengeri nya, ngena penyakit bengkak. Lebuh sida meda utai nya balat amat nyadi, sida lalu bejaku, “Kitai enda tau nyimpan Peti Lampang Batu Adat tu agi; laban Allah Taala ke disembah orang Israel balat amat ngukum kitai.” Nya alai sida mesanka semua raja orang Pilistin, lalu nanya ngagai sida, “Kati ku kitai enggau Peti Lampang Batu Adat Allah Taala ke disembah orang Israel tu?” Sida raja nya lalu nyaut, “Bai Peti nya ngagai Gat.” Nya alai sida lalu mai Peti nya ngagai nengeri Gat. Tang lebuh Peti Lampang Batu Adat nya datai dia, TUHAN mega ngukum orang di nengeri nya, ti ngujungka orang dia balat amat begau abis ati. TUHAN ngukum sida ngena penyakit bengkak ti tumbuh ba semua orang ke biak enggau ke tuai di nengeri nya. Nya alai sida lalu nganjung Peti Lampang Batu Adat nya ngagai Ekron. Tang lebuh Peti nya datai di Ekron, orang dia lalu bejaku, “Sida udah mai Peti Lampang Batu Adat Allah Taala ke disembah orang Israel kitu, ngambika Peti nya munuh kitai semua!” Sida lalu mesanka semua raja orang Pilistin baru, ku sida, “Anjung Peti Lampang Batu Adat orang Israel nya pulai ngagai endur iya empu, ngambika iya enda munuh kitai enggau ruang bilik kitai.” Laban semua orang di nengeri nya begau abis ati laban Allah Taala balat amat ngukum sida. Indah orang ke enda mati deh diempa bengkak, datai ke sida nyau nyabak minta tulung petara sida. Peti Lampang Batu Adat TUHAN disimpan orang Pilistin tujuh bulan. Orang Pilistin lalu mesanka bala imam enggau bala orang ke tau keramat, lalu nanya ngagai sida, “Kati ku kitai enggau Peti Lampang Batu Adat TUHAN tu? Padahka ngagai kami, nama utai ti deka diberi kitai lebuh kitai nganjung Peti nya pulai?” Disaut sida, “Enti kita nganjung Peti Lampang Batu Adat Allah Taala ke disembah orang Israel nya pulai, kita enda tau nejuka Peti nya pulai puang, tang ngenjuk piring kena muai penyalah. Nya baru kita digeraika, lalu nemu kebuah Allah Taala ke disembah orang Israel udah ngukum kita.” “Nama piring ti deka diberi kitai ngagai Allah Taala nya?” ku orang mayuh nanya. “Lima iti anak patung bengkak ti digaga ari emas, enggau lima iku anak patung tikus ti digaga ari emas, siti ke siku raja orang Pilistin. Penyakit nya udah nyerang semua kita, nyengkaum raja empu. Kita enda tau enda ngaga anak patung ke bengkak enggau tikus ti ngerusak menua kita, lalu ngemuliaka Allah Taala ke disembah orang Israel, nyangka Iya deka badu agi ngukum kita, ngukum petara enggau menua kita. Nama kebuah kita ngekiehka diri baka orang Ejip enggau raja sida? Anang enda ingatka chara Allah Taala udah ngemelika sida, datai ke sida nyau nejuka orang Israel angkat ari menua Ejip. Nya alai sediaka kerita ti baru, enggau dua iku sapi ti indu, ti nadai kala dikungkung. Tanchangka kerita nya ngagai jelu dua iku nya, tang buru anak sapi nya pulai ngagai bansal. Ambi Peti Lampang Batu Adat TUHAN, lalu engkahka Peti nya dalam kerita nya. Simpan dalam siti peti anak patung ti dikirumka nyadika piring kena muai penyalah, lalu engkahka peti nya ngimbai Peti Lampang Batu Adat nya. Buru sapi dua iku nya ngambika seduai iya mupuk lalu narit kerita nya. Kemataka kerita nya mupuk. Enti kerita nya mansang tunga ngagai nengeri Bet-semes, nya nunjukka Allah Taala ke disembah orang Israel Empu udah ninggang kitai enggau penusah ti besai tu. Tang enti kerita nya enda mansang tunga ngagai nengeri Bet-semes, nya baru kita nemu TUHAN nadai ngukum kitai ngena penyakit tu. Utai tu endang nyadi pia aja.” Sida lalu ngereja nya, ngambi dua iku sapi ti indu, lalu nanchangka kerita ngagai sapi dua iku nya, lalu ngandang anak sapi nya dalam bansal. Sida ngengkahka Peti Lampang Batu Adat nya dalam kerita nya, sama enggau siti peti ti ngundan anak patung tikus enggau anak patung bengkak ti digaga ari emas. Sapi nya lalu mupuk nengah jalai raya nuju ngagai Bet-semes. Sapi dua iku nya enda ngetu bemunyi lebuh seduai iya bejalai. Bala raja orang Pilistin nitihka sapi dua iku nya nyentuk ngagai garis entara menua enggau Bet-semes. Nyadi orang ke diau di Bet-semes benung ngetau gandum ba lebak. Lebuh sida malik, lalu tepedaka Peti Lampang Batu Adat TUHAN, sida lalu rami gaga meda Peti Lampang Batu Adat nya. Kerita nya lalu datai ba umai Josua, ti diau di Bet-semes, lalu ngetu dia. Nyadi ba endur nya bisi sigi batu ti besai; lalu sida melah kayu ari kerita nya kena menyadika api, lalu sida ngenjuk sapi dua iku nya nyadika piring ngagai TUHAN. Orang Lewi lalu nurunka Peti Lampang Batu Adat TUHAN, enggau peti ti ngundan anak patung ti digaga ari emas, lalu ngengkahka Peti Lampang Batu Adat enggau peti ti ngundan anak patung nya ba batu ti besai nya. Udah nya orang ke diau di Bet-semes lalu ngenjuk piring tunu enggau piring bukai ngagai TUHAN. Lebuh raja orang Pilistin ke lima iku nya udah meda nya, sida lalu mulaika diri sehari nya ngagai Ekron. Nya meh lima igi engkeramba bengkak ti digaga ari emas, ti diberi orang Pilistin ngagai TUHAN nyadika piring kena muai penyalah sida, sigi ke genap nengeri Asdot, Gasa, Askelon, Gat enggau Ekron. Sida mega meri engkeramba tikus ti digaga ari emas, siku ke genap buah nengeri ti dipegai raja Pilistin ke lima iku nya, nyengkaum nengeri ti mit ti bekuta enggau genturung pendiau ti enda bekuta. Batu ti besai nya, ti ba umai Josua, ti alai sida ngengkahka Peti Lampang Batu Adat TUHAN, agi mengkang dia nyadika saksi utai ti udah nyadi. TUHAN munuh tujuh puluh iku lelaki ari Bet-semes, laban sida bisi nilik ke dalam Peti Lampang Batu Adat nya. Orang mayuh lalu ngulit, laban TUHAN udah munuh mayuh amat bala sida. Ku orang di Bet-semes bejaku, “Sapa ulih bediri di mua TUHAN Allah Taala ti kudus? Kini ke tunga Peti nya deka mupuk?” Nya alai sida lalu ngasuh bala seruan bejalai ngagai orang ke diau di Kiriat-jearim, “Orang Pilistin udah mulaika Peti Lampang Batu Adat TUHAN. Datai kitu lalu ambi Peti nya.” Orang ke di Kiriat-jearim datai lalu ngambi Peti Lampang Batu Adat TUHAN, lalu mai Peti nya ngagai rumah orang siku ke benama Abinadap, ti diau ba sigi munggu. Sida lalu ngasuh anak iya ke benama Eleasar ngibun Peti nya. Peti Lampang Batu Adat TUHAN nya lama disimpan di Kiriat-jearim, kira dua puluh taun. Sekumbang maya nya semua orang Israel nyabak ngangauka TUHAN. Samuel lalu bejaku ngagai semua orang Israel, “Enti kita pulai baru ngagai TUHAN enggau pengabis ati kita, kita enda tau enda muai semua petara orang bansa bukai, enggau engkeramba petara indu Astarte. Serahka diri enggau pengabis ati kita ngagai TUHAN, lalu sembah Iya siku aja; nya baru Iya deka ngelepaska kita ari jari orang Pilistin.” Orang Israel lalu muai semua engkeramba Baal enggau Astarte, lalu nyembah semina TUHAN siku aja. Udah nya Samuel bejaku, “Asuh semua orang Israel begempuru di Mispah; aku deka besampi ngarika kita ngagai TUHAN.” Semua orang Israel lalu begempuru di Mispah. Sida nyauk ai, lalu nuang ai nya ngagai piring ti diserahka ngagai TUHAN, lalu bepasa sehari nya. Ku sida, “Kami udah bedosa ngelaban TUHAN.” (Mispah nya meh endur alai Samuel ti nyadi tuai orang Israel.) Lebuh orang Pilistin ninga orang Israel udah begempuru di Mispah, raja orang Pilistin ke lima iku nya lalu mansang nyerang orang Israel. Lebuh orang Israel ninga nya, sida lalu takut. Orang Israel lalu bejaku enggau Samuel, “Anang ngetu besampi ngagai TUHAN Allah Taala kitai, ngarika semua kitai, ngambika Iya ngelepaska kitai ari jari orang Pilistin.” Samuel lalu nyayat siku anak domba ti agi nusu, lalu nyerahka jelu nya nyadika piring tunu ngagai TUHAN. Udah nya iya lalu besampi ngagai TUHAN ti orang Israel; TUHAN lalu nyaut sampi iya. Lebuh Samuel benung ngenjuk piring tunu ngagai TUHAN, orang Pilistin lalu nyerang. Tang TUHAN meletup munyi guntur ari langit ngelaban sida. Orang Pilistin lalu begau abis ati, lalu rari ari orang Israel. Bala orang Israel lalu mupuk ari Mispah, begagaika orang Pilistin, lalu munuh sida nyentuk ngagai semak ngagai Bet-kar. Udah nya Samuel ngambi sigi batu, ngengkahka batu nya entara Mispah enggau Sen, lalu ku iya bejaku, “ TUHAN udah nyaup kitai sepemanjai jalai tu.” Iya lalu ngumbai batu nya “Batu Penyaup.” Orang Pilistin alah, lalu sida nadai agi tama ngagai menua orang Israel. Jari TUHAN mengkang ngelaban orang Pilistin sepemanjai umur Samuel. Semua nengeri ti udah dirampas orang Pilistin ari orang Israel, dipulaika magang ngagai orang Israel, berengkah ari Ekron nyentuk ngagai Gat. Nya alai orang Israel ngerampas menua sida empu ari jari orang Pilistin. Orang Israel enggau orang Amor lalu diau bebaik enggau pangan diri. Samuel nyadi tuai menua Israel seumur idup. Iya nemuai genap taun ngagai nengeri Betel, Gilgal enggau Mispah, lalu ngatur pechara orang ba genap buah nengeri nya. Udah nya iya pulai baru ngagai rumah iya di Ramah, alai iya ke mega nyadi hakim. Iya ngaga siti alta di Ramah ke TUHAN. Lebuh Samuel nyau tuai, iya ngeletak anak lelaki iya nyadi hakim di menua Israel. Nama anak tuai iya Joel, lalu iya ke biak agi Abijah. Seduai iya nyadi hakim di Beer-seba. Tang taja pia, seduai iya enda nitihka teladan apai seduai, tang limpang begigaka pengaya; seduai iya makai suap, lalu meri atur ti enda lurus lebuh seduai iya ngatur pechara. Bala tuai orang Israel begempuru, lalu mansang ngagai Ramah deka betemu enggau Samuel. Ku sida bejaku enggau iya, “Dinga nuan, nuan nyau tuai, lalu anak nuan enda nitihka teladan nuan. Nya alai letak siku orang nyadika raja kami, ngambika kami bisi raja baka bansa bukai.” Samuel enda lantang ati ninga peminta sida, nya alai iya besampi ngagai TUHAN. TUHAN lalu bejaku enggau Samuel, “Pendingka semua utai ti disebut sida ngagai nuan; laban sida ukai nulak nuan, tang nulak Aku ke endang Raja sida. Kenyau ari Aku udah mai sida pansut ari menua Ejip, sida udah ninggalka Aku, lalu nyembah petara bukai, lalu diatu sida ngereja ngagai nuan utai ti seruran deka dikereja sida ngagai Aku. Nya alai, pendingka sida, tang nuan enda tau enda meri sida jaku tangkan ngena sumpah, lalu padahka jalai raja sida deka megai sida.” Samuel lalu madahka jaku TUHAN ngagai orang ke minta iya meri sida siku raja. Ku iya bejaku, “Baka tu ku gaya raja ti deka megai kita: iya deka ngambi anak lelaki kita lalu ngasuh sida ngemudika kerita perang iya, nyadi soldadu ti nepan kuda, lalu sida ti bukai deka belanda ari mua kerita perang iya. Iya deka ngasuh sekeda sida nyadi kepala ke beribu iku soldadu, nyadi kepala ke lima puluh iku, lalu sekeda deka diasuh iya ngeradu tanah ba umai iya, ngetau utai ti ditanam ba umai iya, enggau begagaka senyata perang enggau pekekas ke kerita perang iya. Iya deka ngambi anak indu kita ngambika sida bisi ngaga minyak wangi ke iya, berapi ke iya, ngaga roti ke iya. Iya deka ngambi tanah kita ke pemadu manah, kebun anggur kita, kebun buah kana kita, lalu meri utai nya ngagai bala pemesai iya. Iya deka ngambi sepuluh peratus ari gandum kita, ari buah anggur kita, lalu meri utai nya ngagai bala pemesai iya, enggau ngagai bala orang gaji iya. Iya deka ngambi orang gaji kita, jelu sapi ti pemadu manah enggau keledai kita, lalu ngasuh sida gawa ke iya. Iya deka ngambi sepuluh peratus ari jelu tupi kita, lalu kita empu deka nyadi ulun iya. Lebuh maya nya ila, kita deka balat mutap ketegal raja ti udah dipilih kita empu, tang TUHAN enggai mendingka putap kita.” Tang orang mayuh enggai mendingka Samuel. Ku sida, “Kami minta siku raja, ngambika kami sebaka enggau bansa bukai, bisi raja ke diri empu merintah kami, lalu nguluka kami beperang, lalu belaban ngarika kami.” Lebuh Samuel udah mendingka jaku orang mayuh, iya lalu madahka semua jaku sida ngagai TUHAN. Lalu ku TUHAN bejaku ngagai Samuel, “Pendingka jaku sida, lalu beri sida siku raja.” Udah nya Samuel lalu ngasuh semua orang pulai. Nyadi di menua nya bisi siku lelaki ke kaya, ke dibasa orang mayuh. Nama iya Kis anak Abiel, uchu Seror, uchu Bekorat, uchu Apiah, ari raban bansa Benjamin; lalu iya bisi siku anak lelaki benama Saul, ke sigat gamal, sereta agi benung orang. Nadai orang di menua Israel ke sigat agi ari iya; iya sekaki tinggi agi ari semua orang bukai di menua Israel. Nyadi sekali sekeda jelu keledai Kis bisi lelang. Nya alai iya bejaku enggau Saul, “Bai siku orang gaji enggau nuan, lalu giga keledai nya.” Saul enggau orang gaji nya lalu bejalai nengah semua menua ti bebukit di menua Epraim, enggau menua Salisah, tang nadai tetemuka jelu nya. Nya alai seduai iya lalu bejalai nengah menua Saalim, tang keledai nya nadai dia. Udah nya seduai iya bejalai nengah menua Benjamin, tang seduai iya mengkang nadai tetemuka keledai nya. Lebuh seduai iya datai di menua Sup, Saul bejaku enggau orang gaji iya, “Aram tua pulai, enggai ke apai balat agi irauka tua, ari ke irauka keledai nya.” Ku orang gaji nya nyaut, “Dinga nuan, di nengeri tu bisi siku nabi, ke balat dibasa orang, laban semua utai ti disebut iya dikamatka magang. Manah tua betemu enggau iya, nyangka iya ulih madahka endur alai tua tau nemu keledai nya.” Saul lalu nanya iya, “Enti tua deka betemu enggau iya, nama utai ti tau diberi tua ngagai iya? Laban bekal tua nyau udah abis, lalu tua pen nadai mega utai ti tau diberi tua ngagai iya. Nama utai ti dikemisi tua?” Ku orang gaji nya nyaut, “Aku bisi sesingkap duit pirak. Aku tau meri duit nya ngagai iya, ngambika iya madahka endur alai tua tau nemu keledai nya.” “Bisi,” ku sida indu nya nyaut. “Nyin iya bejalai dulu ari seduai. Laju agi seduai; iya baru datai, laban orang ditu deka miring ba endur alai besembiang sehari tu lagi. Lebuh seduai tama ngagai nengeri lagi, seduai ulih nemu iya, sebedau iya mansang makai ngagai endur alai besembiang; laban orang mayuh enggai makai sebedau iya datai, laban iya enda tau enda merekatka piring. Udah nya baru bala pengabang makai. Mupuk meh seduai, ngambika seduai ulih betemu enggau iya.” Saul enggau orang gaji iya lalu niki ngagai nengeri nya. Lebuh seduai iya tama ngagai nengeri nya, seduai iya lalu tepedaka Samuel pansut nuju seduai iya, deka mansang ngagai endur alai besembiang. Nyadi sehari sebedau nya, TUHAN endang udah madahka ngagai Samuel munyi tu, “Ba urung maya tu pagila, Aku deka ngasuh siku lelaki ari raban bansa Benjamin betemu enggau nuan. Tata iya nyadi raja ke bala nembiak Aku Israel. Iya deka ngelepaska sida ari orang Pilistin. Aku udah meda pemerinsa bala nembiak Aku, lalu Aku udah ninga sabak sida ke minta Aku nyaup sida.” Lebuh Samuel meda Saul, TUHAN lalu bejaku enggau iya, “Nya meh lelaki ke dipadahka Aku ngagai nuan. Iya deka merintah bala nembiak Aku.” Saul lalu mansang ngagai Samuel semak pintu penama nengeri nya, lalu nanya ngagai Samuel, “Padahka ngagai aku, dini alai tukang tujum diau?” Ku Samuel nyaut, “Aku tu meh tukang tujum. Alai seduai bejalai dulu ngagai endur alai kitai deka nyembah TUHAN. Seduai deka makai enggau aku sehari tu. Pagila aku deka nyaut semua tanya nuan, lalu ngasuh seduai mupuk. Nyadi pasal keledai ti lenyau tiga hari tu udah, anang irauka sida. Sida udah ditemu. Tang orang ke balat dikedekaka orang Israel, nya nuan enggau ruang bilik apai nuan.” Ku Saul nyaut, “Aku datai ari raban bansa Benjamin, raban bansa ti pemadu mit di menua Israel, lalu ruang bilik aku enda tentu dikibuhka orang dalam raban bansa kami. Nya alai, nama kebuah nuan bejaku munyi tu ngagai aku?” Samuel lalu nguluka Saul enggau orang gaji iya ngagai bilik siti ti besai, lalu ngasuh seduai iya duduk ba penuduk ba ujung mija, ti alai kira tiga puluh iku pengabang duduk. Samuel lalu bejaku enggau orang ke berapi, “Bai dagin ti udah diberi aku ngagai nuan, ti udah diasuh aku galau nuan.” Orang ke berapi nya lalu mai dagin ti endang udah dipilih, ti diambi ari isi kaki jelu, lalu ngengkahka dagin nya di mua Saul. Samuel lalu bejaku, “Tu dagin ti udah digalau aku ke nuan. Empa dagin nya. Aku udah ngalau dagin nya ke nuan ngambika bisi diempa nuan diatu begulai enggau orang ke diambi aku ngabang. Nya alai sehari nya Saul begulai makai enggau Samuel. Lebuh sida nurun ari endur alai orang Israel ti nyembah TUHAN lalu mansang ngagai nengeri, orang nyendiaka siti peninduk ke Saul ba perabung rumah. Saul lalu tinduk dia. Ba urung dini hari, Samuel ngangauka Saul ke ba perabung rumah nya, “Saul, angkat. Aku deka ngasuh nuan pulai.” Saul angkat, lalu seduai iya Samuel sama pansut ngagai jalai raya. Lebuh seduai iya datai ba tisi nengeri, Samuel lalu bejaku enggau Saul, “Asuh orang gaji nya bejalai dulu ari tua.” Orang gaji nya lalu mupuk, lalu ku Samuel nampung jaku iya, “Nganti ditu enda lama. Aku deka madahka ngagai nuan utai ti udah disebut Allah Taala.” Udah nya Samuel ngambi sebutul mit minyak kana, lalu nuang minyak nya ba pala Saul, nyium Saul, lalu ku iya, “ TUHAN nata nuan nyadi raja ke nembiak Iya orang Israel. Nuan deka merintah nembiak Iya, lalu nyaga sida ari semua munsuh sida. Tu tanda kena nunjukka nuan udah dipilih TUHAN nyadi raja ke bala nembiak Iya: Lebuh tua beserara sehari tu lagi, nuan deka betemu enggau dua iku orang semak lumbung Rachel di Selsah, di menua Benjamin. Seduai iya deka madahka keledai ti digiga nuan udah ditemu, ngambika apai nuan enda agi irau ati ke keledai nya. Tang iya irau ati ke nuan. Iya seruran nanya, ‘Baka ni ku aku enggau anak aku nya?’ Nuan deka angkat ari endur nya lalu datai ba sepun kayu oak di Tabor. Dia nuan deka betemu enggau tiga iku orang ke mansang ngenjuk piring ngagai Allah Taala di Betel. Siku ari sida nya deka mai tiga iku kambin, siku deka mai tiga iti tuku roti, lalu iya ti ketiga deka mai siti kambut ti penuh laban wain. Sida tiga nya deka nabi nuan, lalu meri ngagai nuan dua ari tiga iti tuku roti nya, lalu nuan enda tau enda nyambut roti nya. Udah nya nuan deka bejalai ngagai bukit Allah Taala di Gibe-ah, alai ti bisi kem orang Pilistin. Ba pintu kuta nengeri nya nuan deka betemu enggau bala nabi ke nurun ari alta ti ba bukit nya. Sida nabi nya deka nebah belikan, dedumbak, kesuling, enggau engkeratung. Sida deka betanda sereta benabi. Roh TUHAN deka tekala nya bekuasa ba nuan, lalu nuan deka betanda sereta manjung sama enggau sida, lalu nuan deka berubah lalu enda agi baka selama. Lebuh utai tu nyadi, kereja aja sebarang utai ti diasuh Allah Taala kereja nuan. Nuan deka bejalai dulu ari aku ngagai Gilgal. Aku deka betemu enggau nuan din, lalu ngenjuk piring tunu enggau piring pemaik. Nuan enda tau enda nganti tujuh hari din, nyentuk ngagai maya aku udah datai din, lalu madahka utai ti enda tau enda dikereja nuan.” Lebuh Saul nguing deka beserara ari Samuel, Allah Taala ngubah Saul, lalu semua utai ti udah dipadahka Samuel, nyadi magang sehari nya. Lebuh Saul enggau orang gaji iya datai di Gibe-ah, seraban bala nabi betemu enggau iya. Roh Allah Taala lalu tekala nya bekuasa ba Saul, lalu iya enggau bala nabi betanda sereta manjung. Lebuh orang ke udah nemu iya dulu ari nya, meda iya ngereja nya, sida lalu nanya ngagai pangan diri, “Nama utai ti udah nyadi ba anak Kis? Kati Saul udah nyadi nabi?” Siku orang ke diau dia lalu nanya, “Kati ku baka nabi ti bukai tu - sapa apai sida tu ku pikir kita?” Tu meh penatai jaku, “Kati Saul udah nyadi nabi?” Lebuh Saul udah badu betanda lalu badu agi manjung, iya lalu mansang ngagai alta ti ba atas bukit nya. Lebuh aya Saul meda Saul enggau orang gaji iya, iya lalu nanya, “Kini ke seduai tadi?” “Ngiga keledai,” ku Saul nyaut. “Lebuh kami duai nadai tetemuka raban keledai nya, kami duai lalu mansang ngagai Samuel.” “Nama utai ti dipadahka iya ngagai nuan?” ku aya Saul nanya. “Iya madahka jelu nya udah ditemu,” ku Saul nyaut, tang iya enda madahka ngagai aya iya utai ti udah disebut Samuel pasal iya ti deka nyadi raja. Samuel lalu mesanka orang mayuh begempuru di mua TUHAN di Mispah, lalu ku iya bejaku enggau sida, “ TUHAN Allah Taala ke disembah orang Israel bejaku munyi tu, ‘Aku udah mai kita pansut ari menua Ejip, lalu udah ngelepaska kita ari pengidup kita ke nyadi ulun orang Ejip, enggau ari semua orang ke udah nekanka pengidup kita. Aku tu Allah Taala kita ke udah ngelepaska kita ari semua penusah enggau pemerinsa kita, tang sehari tu kita udah nulak Aku, lalu udah minta Aku meri kita siku raja. Barang ku jaku! Begempuru meh kita di mua TUHAN nitihka ripih raban bansa enggau ripih suku raban bansa kita.’ ” Udah nya Samuel lalu ngasuh siti-siti raban bansa mansang ke mua, lalu TUHAN milih raban bansa Benjamin. Udah nya Samuel ngasuh ruang bilik ari raban bansa Benjamin mansang ke mua, lalu ruang bilik Matri kena pilih. Udah nya, bala lelaki ari ruang bilik Matri datai ke mua, lalu Saul anak Kis kena pilih. Sida lalu ngiga iya, tang lebuh sida nadai tetemuka iya, sida lalu nanya ngagai TUHAN, “Kati bisi agi orang bukai?” TUHAN lalu nyaut, “Saul bisi din, belalai ba tugung pekekas.” Sida lalu belanda kia, lalu mai Saul pansut betemu enggau orang mayuh, lalu sida meda iya sekaki tinggi agi ari orang bukai. Ku Samuel bejaku enggau orang mayuh, “Tu meh orang ke udah dipilih TUHAN! Nadai orang bukai baka iya ba bala kitai tu.” Semua orang lalu manjung, “Gayu-guru raja!” Samuel lalu nerangka ngagai orang mayuh pasal hak enggau pengawa raja. Udah nya iya nuliska utai nya dalam siti bup, ti diengkah iya ba endur ti kudus. Udah nya iya lalu ngasuh semua orang pulai. Saul mega pulai ngagai Gibe-ah. Sekeda orang ke kering, ti udah ditegu Allah Taala ati, mupuk sama enggau Saul. Tang ku sekeda orang ke nadai guna bejaku, “Baka ni ku orang tu tau meri penguntung ngagai kitai?” Sida mechat Saul, lalu enda mai pemeri ngagai iya. Kira sebulan udah bekau nya, Raja Nahas orang Amon lalu nguluka bala soldadu iya nyerang lalu ngelulung nengeri Jabes di menua Giliat. Orang ke lelaki di Jabes lalu bejaku enggau Nahas, “Gaga siti sempekat enggau kami, nya baru kami deka nerima nuan nyadika raja kami.” Disaut Nahas, “Aku endang deka ngaga siti sempekat enggau kita, tang nitihka atur tu: aku deka ngeruk igi mata kanan semua kita, kena ngemaluka semua orang Israel.” Lalu ku bala tuai orang di Jabes bejaku, “Beri kami timpuh tujuh hari alai kami ngasuh bala seruan bejalai ngagai serata menua Israel. Enti orang nadai deka nyaup kami, nya baru kami nyerahka diri ngagai nuan.” Bala seruan lalu datai di Gibe-ah, endur alai Saul diau; sida lalu madahka pekara nya ngagai orang mayuh; semua sida lalu bekeduie nyabak. Nyadi lebuh maya nya Saul baru udah pulai ari umai mai dua iku sapi. Iya lalu nanya, “Nama utai ti ngenusahka ati kita? Nama kebuah kita nyabak?” Sida lalu madahka ngagai iya utai ti udah dipadahka bala seruan ke datai ari Jabes. Roh Allah Taala lalu bekuasa ba iya, lalu iya pedis ati. Iya lalu ngambi dua iku sapi nya, ngelampang tubuh jelu dua iku nya, lalu ngasuh bala seruan mai lampang jelu nya, enggau jaku tangkan tu, ngagai serata menua Israel. “Barang sapa enda nitihka Saul enggau Samuel mansang beperang, sapi sida deka digaga baka tu!” Orang Israel lalu takutka utai ti deka dikereja TUHAN. Nya alai semua sida lalu nitihka Saul enggau Samuel mansang beperang. Saul lalu ngempuruka sida di Besek, tiga ratus ribu iku ari Israel, enggau tujuh puluh ribu iku ari Judah. Ku sida bejaku enggau bala seruan ke datai ari Jabes, “Padahka ngagai bala kita, sebedau tengah hari pagila, sida deka dilepaska.” Lebuh orang di Jabes nerima pesan nya, sida gaga amat ati. Lalu ku sida bejaku enggau Nahas, “Kami deka nyerahka diri ngagai nuan pagila, lalu ngelakka nuan ngereja sebarang utai ti deka dikereja nuan ngagai kami.” Malam nya Saul lalu magi bala iya ngagai tiga bengkah raban. Tumu pagi sida lalu mansang ngagai kem munsuh lalu nyerang orang Amon. Ba urung tengah hari, sida pen tembu bebunuhka bala orang Amon. Bala orang Amon ti agi idup lalu pambar, rari ngatika diri. Udah nya orang Israel bejaku enggau Samuel, “Ni orang ke madahka Saul enda tau nyadi raja kitai? Serahka sida ngagai kami, ngambika kami munuh sida!” Tang ku Saul, “Nadai orang tau dibunuh sehari tu, laban sehari tu TUHAN udah ngelepaska orang Israel.” Lalu ku Samuel bejaku enggau sida, “Aram kitai mansang ngagai Gilgal, lalu sekali agi nyiri Saul nyadi raja kitai.” Nya alai semua sida lalu mansang ngagai Gilgal. Sida lalu nyiri Saul nyadi raja ba endur ti kudus dia. Sida lalu ngenjuk piring pemaik. Saul enggau orang Israel lalu ngerami pengawa nya. Udah nya Samuel lalu bejaku enggau orang Israel, “Aku udah ngereja utai ti dipinta kita. Aku udah meri kita raja ngambika bisi merintah kita. Diatu iya bisi nguluka kita. Tang aku empu nyau tuai, nyau buban bulu pala, lalu bala anak aku bisi enggau kita. Aku udah nguluka kita kenyau ari aku agi bujang, nyentuk ngagai diatu. Diatu aku bediri di mua kita. Enti aku bisi udah ngereja penyalah ngagai kita, awakka kita bedawaka aku diatu di mua TUHAN, enggau di mua raja ti udah dipilih Iya. Kati aku bisi udah kala ngambi sapi tauka keledai kita? Kati aku bisi udah kala nipu tauka nekanka pengidup kita? Kati aku bisi udah kala makai suap? Enti aku bisi udah ngereja utai nya, aku deka mayar utai ti udah diambi aku.” Orang mayuh lalu nyaut, “Nadai kala. Nuan nadai kala nipu, tauka nekanka pengidup kami. Nuan nadai kala ngambi utai ari kami.” Samuel lalu nyaut, “ TUHAN enggau raja ti udah dipilih Iya deka nyadika saksi sehari tu ke kita ke nemu aku nadai penyalah.” “Awakka TUHAN nyadika saksi kami,” ku sida nyaut. Ku Samuel nampung jaku iya, “ TUHAN udah milih Moses seduai Aron, lalu udah mai aki ini kita pansut ari menua Ejip. Nya alai anang mindah, laban aku deka bedawaka kita di mua TUHAN. Aku deka ngasuh kita ngingat ke semua kereja ti besai ti udah dikereja TUHAN kena Iya ngidupka nyawa kita enggau nyawa aki ini kita. Lebuh Jakop enggau sida sebilik mansang ngagai menua Ejip, lalu orang Ejip nekanka pengidup sida, bala aki ini kita nyabak ngangauka TUHAN minta Iya nyaup sida. TUHAN lalu ngirumka Moses seduai Aron, lalu seduai iya mai sida pansut ari menua Ejip, lalu ngentapka sida diau di menua tu. Tang orang mayuh enda ingatka TUHAN Allah Taala sida. Nya alai Iya lalu nejuka orang Pilistin enggau raja menua Moap, enggau Sisera, tuai soldadu ke di nengeri Hasor, nyerang aki ini kita lalu ngalahka sida. Udah nya sida lalu nyabak minta saup TUHAN. Ku sida, ‘Kami udah bedosa, laban kami udah ninggalka Nuan, TUHAN, lalu udah nyembah engkeramba Baal enggau engkeramba Astarte. Lepaska kami ari munsuh kami, ngambika kami nyembah Nuan!’ TUHAN lalu ngirumka Gideon, Barak, Jeptah, lalu ke pengujung iya, Iya ngirumka aku empu. Genap iku bala kami bela udah ngelepaska kita ari jari munsuh kita, lalu kita udah diau likun. Tang lebuh kita meda Nahas, raja orang Amon baru deka nyerang kita, kita lalu nyingkirka TUHAN ti endang Raja kita, lalu ku kita bejaku enggau aku, ‘Kami minta siku raja ngambika iya bisi merintah kami.’ “Nya alai, tu raja ti udah dipilih kita. Kita udah minta iya, lalu diatu TUHAN udah meri iya ngagai kita. Pengidup kita deka mujur enti kita nangika TUHAN Allah Taala kita, betuaika Iya, mendingka Iya, lalu ngasika pesan Iya, lalu kita enggau raja kita nitihka Iya. Tang enti kita enda mendingka TUHAN, lalu enda ngasika pesan Iya, Iya deka nyerang kita enggau raja kita. Nya alai, anang beguai-guai mupuk, ngambika kita ulih meda pengawa ti besai ti deka dikereja TUHAN. Tu musin kemarau, ukai enda? Tang aku deka besampi, lalu TUHAN deka ngasuh hari beguntur sereta ujan. Lebuh utai nya nyadi, nya baru kita deka nemu pemesai penyalah diri ngelaban TUHAN lebuh kita minta Iya meri kita raja.” Samuel lalu besampi, lalu sehari nya TUHAN ngasuh hari beguntur sereta ujan. Udah nya semua orang mayuh takutka TUHAN enggau ke Samuel, lalu ku sida bejaku enggau Samuel, “Tuan, kami minta nuan besampi ngagai TUHAN Allah Taala kitai, ngarika kami, ngambika kami enda mati. Diatu baru kami nemu, kelimpah ari dosa kami ke bukai, kami udah bedosa, laban kami udah minta siku raja.” Ku Samuel nyaut, “Anang takut. Taja pen kita udah ngereja utai ti jai baka tu, anang mega kita ninggalka TUHAN, tang betuaika Iya enggau pengabis ati kita. Anang nyembah engkeramba, laban sida enda ulih nyaup tauka ngidupka kita, laban sida nya ukai utai ti bendar. TUHAN udah besumpah enggai ninggalka kita, laban Iya udah mutuska penemu deka ngaga kita nyadika nembiak Iya. Nyadi pasal aku empu, aku bedosa ngelaban TUHAN enti aku badu agi besampika kita. Lalu aku deka ngajar kita pasal utai ti manah sereta ngena, ti patut dikereja kita. Kita enda tau enda nangika TUHAN lalu tetap ati betuaika Iya enggau pengabis ati kita. Kingatka utai ti besai ti udah dikereja Iya ke kita. Tang enti kita majak bedosa, kita enggau raja kita deka dirusak.” Saul umur… …taun lebuh iya berengkah megai perintah; lalu iya merintah … dua taun, iya milih tiga ribu iku lelaki, lalu ngeletak dua ribu iku sida diau enggau iya di Mikmas, enggau di menua ti bebukit di Betel. Iya ngirumka seribu iku sida ti bukai ngagai anak lelaki iya Jonatan di Gibe-ah, di menua Benjamin. Lelaki ti bukai diasuh Saul pulai. Jonatan munuh tuai soldadu orang Pilistin di Geba, lalu semua orang Pilistin ninga berita nya. Udah nya Saul lalu ngasuh bala seruan nyepu terumpit di serata menua nya kena nesau orang Hebrew mansang beperang. Semua orang Israel udah dipadahka magang pasal Saul ti udah munuh tuai soldadu orang Pilistin, enggau pasal orang Pilistin ke begedika orang Israel. Nya alai orang mayuh bela nyaut tesau nya, lalu datai ngagai Saul di Gilgal. Orang Pilistin lalu begempuru deka nyerang orang Israel. Sida bisi tiga puluh ribu buah kerita perang, enam ribu iku bala soldadu ke nepan kuda, lalu bala soldadu sida ngemayuh igi pasir ti ba tebing tasik. Sida mansang ngagai Mikmas, tunga ke timur ari Bet-aben, lalu nirika kem sida dia. Udah nya sida bebendar amat nyerang orang Israel, ti ngasuh orang Israel nyau genting seput. Sekeda orang Israel belalai dalam gua, enggau dalam lubang, ba sebelah selikap batu, tauka dalam lubang tanah tauka telaga. Sida ke bukai meraka Sungai Jordan ngagai menua Gat enggau Giliat. Saul agi mengkang di Gilgal, lalu orang ke enggau iya nyau getar-getar takut. Iya nganti Samuel tujuh hari, nitihka atur Samuel. Tang Samuel lalu apin datai di Gilgal. Bala orang mayuh lalu belabuh ninggalka Saul. Nya alai, ku iya bejaku enggau sida, “Bai ngagai aku piring tunu, enggau piring pemaik.” Iya lalu ngenjuk piring tunu, lalu lebuh iya baru udah tembu ngereja nya, Samuel pen datai. Saul lalu mansang ngambat iya, lalu ngelaluka penatai iya. Tang ku Samuel bejaku, “Nama utai tu ti udah dikereja nuan, Raja?” Saul lalu nyaut, “Orang mayuh nyau ninggalka aku, lalu nuan pen apin mega datai, enda nitihka semaya nuan. Nambahka nya, orang Pilistin nyau betatam di Mikmas. Nya alai aku berunding, ‘Orang Pilistin deka nyerang aku di Gilgal ditu, lalu aku apin minta kasih ari TUHAN.’ Nya alai aku lalu berunding deka ngenjuk piring.” Samuel lalu nyaut, “Nya pengawa ti beli. Nuan enda ngasika pesan TUHAN Allah Taala nuan. Enti nuan udah ngasi, Iya tentu deka ngasuh nuan, enggau peturun nuan, megai perintah di menua Israel belama iya. Tang diatu, perintah nuan deka abis. Laban nuan enda ngasika TUHAN, Iya deka ngiga siku orang ke dikedekaka Iya, lalu ngasuh orang nya merintah bala nembiak TUHAN.” Samuel angkat lalu mupuk ari Gilgal. Orang Israel ti bukai nitihka Saul lebuh iya pulai baru ngagai bala soldadu iya. Sida angkat ari Gilgal ngagai Gibe-ah, di menua Benjamin. Saul lalu ngitung bala soldadu iya, kira enam ratus iku semua sida. Saul, enggau anak iya Jonatan, enggau bala sida nirika kem di Geba, di menua Benjamin. Orang Pilistin bepalan ba kem sida di Mikmas. Bala soldadu orang Pilistin mansang nyerang ari kem sida ngena tiga iti raban. Seraban mansang ngagai Oprah di menua Sual; seraban mansang ngagai Bet-horon; lalu seraban ngagai garis entara menua ti ari atas Lebak Seboim enggau menua puang. Nyadi menua Israel nadai orang tukang besi, laban orang Pilistin bebendar nagang orang Israel begagaka pedang enggau sangkuh. ( Orang Israel enda tau enda mai pengeradu tanah, changkul, kapak enggau lungga kena ngetau ngagai orang Pilistin, ngambika orang Pilistin ngansah utai nya ke sida. Upah ngansah siti kapak, enggau ngaduka tungkat ti dikena ngachuk sapi nya sesingkap duit ti mit. Upah ngansah pengeradu tanah enggau changkul nya dua singkap duit ti mit.) Nya alai lebuh sida beperang sehari nya, orang Israel nadai pedang tauka sangkuh, kelimpah ari Saul enggau anak iya Jonatan. Orang Pilistin ngirumka seraban soldadu nan ba Genting Mikmas. Nyadi sekali, Jonatan bejaku enggau siku orang bujang ke mai senyata ke iya, “Aram tua meraka ngagai kem orang Pilistin.” Tang Jonatan enda madahka pekara nya ngagai apai iya. Nyadi apai iya bepalan ba kem di baruh sekayu buah delima di Mogron, enda jauh ari Gibe-ah. Iya bisi kira enam ratus iku soldadu enggau iya. (Imam ke mai epod nya Ahijah, anak menyadi Ichabot ke benama Ahitup anak Pinehas, uchu Eli, ti udah nyadi imam TUHAN di Siloh.) Bala soldadu enda nemu Jonatan udah mupuk. Nyadi ba Genting Mikmas, ti deka ditengah Jonatan mansang ngagai kem orang Pilistin, bisi dua igi batu ti besai, sigi ari sepiak, lalu sigi ari sepiak jalai nya. Sigi dikumbai Boses, lalu sigi dikumbai Seneh. Sigi batu nya ba tisi utara jalai nya, nunga ngagai Mikmas, lalu sigi ba tisi selatan jalai nya, nunga ngagai Geba. Ku Jonatan bejaku enggau orang bujang nya, “Aram tua meraka ngagai kem orang kapir nya. Nyangka TUHAN deka nyaup tua. Enti Iya nyaup tua, nadai utai ulih nagang Iya ngasuh tua menang, enda ngira pemimit tubuh kitai.” Ku orang bujang nya nyaut, “Aku sigi enggau nuan, sebarang utai ti deka dikereja nuan.” “Barang ku jaku,” ku Jonatan nyaut. “Tua deka meraka, lalu ngayanka diri ngagai orang Pilistin. Enti sida ngasuh tua nganti sida, tua nganti. Tang enti sida ngangauka tua mansang ngagai sida, tua mansang, laban nya nunjukka TUHAN udah ngasuh tua menang ngelaban sida.” Nya alai seduai iya lalu ngayanka diri ngagai orang Pilistin, lalu ku orang Pilistin, “Peda nyin! Orang Hebrew pansut ari lubang alai sida belalai!” Udah nya sida ngangauka Jonatan enggau orang bujang nya, “Datai kitu! Kami bisi utai ti deka dipadahka ngagai seduai!” Ku Jonatan bejaku enggau orang bujang nya, “Titihka aku. TUHAN udah ngasuh orang Israel menang ngelaban sida.” Jonatan lalu pansut ari Genting nya meragau, lalu orang bujang nya nitihka iya. Jonatan lalu nyerang orang Pilistin lalu ngalahka sida. Orang bujang nya lalu munuh sida. Lebuh sida terubah bamuk, Jonatan enggau orang bujang nya munuh kira dua puluh iku orang Pilistin ba endur kira setengah ikar. Semua orang Pilistin ti diau di menua pesisir nyau takut magang. Bala orang ke ngayau enggau bala soldadu ke bepalan ba kem nya nyau getar-getar takut. Tanah berenyang, lalu sida begau abis ati. Bala Saul ke nyaga kem sida di Gibe-ah di menua Benjamin tepedaka bala orang Pilistin belanda enda temu tunga. Saul lalu bejaku enggau bala iya, “Itung bala soldadu kitai. Sapa nadai ditu?” Sida lalu ngitung tubuh lalu nemu Jonatan, enggau orang bujang ke mai senyata ke Jonatan, nadai dia. “Bai epod kitu,” ku Saul bejaku enggau Imam Ahijah. (Nyadi sehari nya Ahijah udah dipaduka bejalai mai epod nya dulu ari mua orang Israel.) Lebuh Saul agi benung bejaku enggau Imam Ahijah, bala orang di kem orang Pilistin majak balat agi begau. Lalu ku Saul bejaku, “Nadai kitai hari betanya ngagai TUHAN!” Udah nya iya enggau bala iya lalu mansang nyerang orang Pilistin, ti agi benung charut belaban enggau pangan diri. Sekeda orang Hebrew ti udah ngalih ari orang Pilistin, ti udah diau enggau orang Pilistin ba kem nya, lalu ngalih ari Saul seduai Jonatan. Bala sida bukai ti udah belalai ba sebelah bukit di menua Epraim, lebuh sida ninga pasal orang Pilistin ke rari, mega enggau belaban lalu nyerang orang Pilistin. Sida belaban di serantu jalai nyentuk ngagai ngilah Bet-aben. Sehari nya TUHAN ngelepaska orang Israel. Nyadi sehari nya orang Israel nyau lembut tulang laban lapar, laban Saul udah besumpah, “Awakka orang ke makai sehari tu sebedau aku malas munsuh aku, tulah.” Nya alai nadai siku sida makai sehari nya. Semua sida lalu datai ba siti pulau utan, lalu nemu ai manyi di serata endur nya. Babas dia nyau penuh laban ai manyi, tang nadai orang makai ai manyi nya, laban sida takut ditinggang sumpah Saul. Tang Jonatan nadai udah ninga pasal apai iya ti udah ngemba orang mayuh ngena sumpah. Nya alai iya lalu ngedarka tungkat ti dibai iya, ngachukka tungkat nya ngagai idang manyi, lalu makai ai manyi nya mimit. Iya lalu berasai kering. Tang siku ari bala sida madahka ngagai Jonatan, “Semua kitai tu lembut tulang laban lapar, tang apai nuan udah ngemba kami, ku iya, ‘Awakka orang ke makai utai sehari tu, tulah.’ ” Ku Jonatan nyaut, “Naka meh penyai utai ti dikereja apai ngagai bala kitai! Peda kita, aku berasai kering agi lebuh aku udah makai ai manyi nya mimit! Kada enda manah agi sehari tu, enti bala kitai makai bekal ti dirampas kitai ari orang Pilistin. Uji nuan ngira, tentu mayuh agi orang Pilistin ulih bunuh kitai!” Sehari nya orang Israel ngalahka orang Pilistin, ngamuk sida di serantau-rantau jalai ari Mikmas nyentuk ngagai Aijalon. Tang orang Israel nyau lembut tulang laban sida lapar. Nya alai sida lalu belanda ngagai utai ti udah dirampas sida ari munsuh, ngambi jelu bedus enggau sapi, lalu munuh jelu nya dia, lalu makai dagin ti agi bedarah. Orang lalu madahka ngagai Saul, “Peda nuan, orang mayuh bedosa ngelaban TUHAN, bepakaika dagin ti agi bedarah.” Saul lalu merak sida, “Kita tu nyual bansa! Baringka sigi batu ti besai kitu ngagai aku.” Udah nya iya lalu meri siti agi atur, “Bejalai kita ngagai orang mayuh, lalu asuh semua sida mai jelu sapi enggau jelu bedus kitu. Sida enda tau enda munuh jelu nya lalu makai jelu nya ditu. Sida enda tau bedosa ngelaban TUHAN bepakaika dagin ti agi bedarah.” Nya alai, malam nya semua sida mai jelu sapi, lalu munuh jelu nya dia. Saul ngaga siti alta ke TUHAN, alta ti keterubah iya digaga iya. Ku Saul bejaku enggau bala iya, “Aram kitai nurun lalu nyerang orang Pilistin malam tu, ngamuk sida nyentuk ngagai pagi, lalu munuh semua sida.” “Kereja aja meh utai ti pemadu manah ba runding nuan,” ku sida nyaut. Tang ku imam bejaku, “Manah kitai betanya ngagai Allah Taala dulu.” Nya alai Saul lalu betanya ngagai Allah Taala, “Kati tau aku nyerang orang Pilistin? Kati Nuan deka nyerahka sida ngagai jari kami?” Tang sehari nya Allah Taala enda nyaut iya. Udah nya Saul lalu bejaku enggau bala tuai orang mayuh, “Datai kitu lalu pansik dosa ti udah dikereja sehari tu. Aku besemaya dalam nama Allah Taala ti idup ke ngasuh orang Israel menang, barang sapa salah, enda ngira enti iya nya anak aku Jonatan, deka dibunuh. Udah nya Saul bejaku enggau sida, “Semua kita bediri din. Aku enggau Jonatan bediri ditu.” “Kereja aja utai ti manah ku ati nuan,” ku sida nyaut. Saul lalu bejaku enggau TUHAN Allah Taala ke disembah orang Israel, “ TUHAN, nama kebuah Nuan enda nyaut aku sehari tu? TUHAN Allah Taala ke disembah orang Israel, saut aku ngena batu ti kudus. Enti Jonatan udah salah, tauka aku udah salah, saut ngena Urim, tang enti penyalah nya enggi bala nembiak Nuan orang Israel, saut ngena Tumim.” Saut nya lalu nunjuk ngagai Jonatan seduai Saul. Orang mayuh nadai salah siku. Udah nya Saul lalu bejaku, “Pilih entara anak aku Jonatan enggau aku empu.” Jonatan lalu kena pilih. Udah nya Saul lalu nanya Jonatan, “Nama utai ti udah dikereja nuan?” Jonatan lalu nyaut, “Aku udah makai ai manyi mimit ngena tungkat ti dipegai aku. Aku sedia deka mati.” Ku Saul bejaku enggau iya, “Awakka Allah Taala munuh aku enti nuan enda dibunuh!” Tang ku orang mayuh bejaku enggau Saul, “Kati Jonatan ti udah menang ngarika orang Israel deka diukum bunuh? Enda patut! Kami besemaya dalam nama TUHAN ti idup, nadai selambar buk ari pala iya deka lenyau. Utai ti udah dikereja iya sehari tu udah dikereja iya ari tulung Allah Taala.” Nya meh chara orang mayuh ngelepaska Jonatan ari ukum bunuh. Udah bekau nya, Saul lalu badu agi begagaika orang Pilistin, lalu sida pulai ngagai menua sida empu. Lebuh Saul nyadi raja orang Israel, iya ngelaban semua munsuh iya di semua endur, nyengkaum orang Moap, orang Amon, orang Edom, bala raja di Sobah, enggau orang Pilistin. Iya seruran menang di semua endur alai iya beperang. Iya berani ngelaban munsuh. Indah orang Amalek deh dialahka iya. Iya nyaga orang Israel ari semua munsuh. Nama anak lelaki Saul nya Jonatan, Isbi enggau Malkisua. Anak indu iya ke tuai agi nya benama Merap, lalu anak indu iya ke biak agi nya Mikal. Bini Saul nya Ahinoam anak Ahimas. Orang ke nyadi tuai soldadu Saul nya petunggal iya empu, Abner, anak aya iya Ner. Nyadi apai Saul, Kis, enggau apai Abner, Ner, nya anak lelaki Abiel. Saul suah bamuk ngelaban orang Pilistin sepemanjai umur iya. Nya alai lebuh iya tetemuka orang lelaki ti kering tauka berani, iya ngambi orang nya nyadika soldadu iya. Ku Samuel bejaku enggau Saul, “Aku udah diasuh TUHAN nata nuan nyadi raja ke bala nembiak Iya Israel. Nya alai pendingka utai ti disebut TUHAN ti Pemadu Bekuasa. Iya deka ngukum orang Amalek, laban aki ini sida udah ngelaban orang Israel lebuh orang Israel datai ari menua Ejip. Nya alai serang meh orang Amalek, lalu rusak abis lengis semua utai ti dikemisi sida. Anang nejuka siti utai enda dirusak. Bunuh semua lelaki, indu, nembiak enggau anak mit, jelu sapi, jelu bedus, unta enggau keledai.” Saul lalu ngempuruka bala soldadu iya, lalu ngitung sida di Telem. Tubuh sida dua ratus ribu iku ari Israel enggau sepuluh ribu iku ari Judah. Udah nya iya nguluka bala iya mansang ngagai nengeri orang Amalek, lalu ngipa munsuh ba buntut sungai siti ti udah rangkai. Iya lalu ngirumka jaku tangkan ngagai orang Ken, uchu orang ke udah manah enggau orang Israel lebuh sida datai ari menua Ejip, “Angkat lalu tinggalka orang Amalek, ngambika aku enda munuh kita sama enggau sida.” Orang Ken lalu angkat. Saul lalu ngalahka orang Amalek, belaban di serantau-rantau jalai kenyau ari Habilah nyentuk ngagai Sur, tunga ke timur menua Ejip. Iya nangkap Agak, raja orang Amalek, lalu munuh semua orang Amalek. Tang Saul enggau bala iya enda munuh Agak, lalu enda mega munuh jelu bedus enggau jelu sapi, anak sapi enggau anak domba ti pemadu manah, tauka utai bukai ti manah. Sida semina ngerusak utai ti nadai guna tauka enda berega. TUHAN lalu bejaku ngagai Samuel, “Aku nesal udah ngasuh Saul nyadi raja. Iya udah ninggalka Aku, lalu enda ngasika pesan Aku.” Samuel lalu ringat. Semalam-malam nya iya bejaku minta kasih ngagai TUHAN. Tumu pagi hari siti iya lalu mupuk ngiga Saul. Iya lalu ninga Saul udah mansang ngagai nengeri Karmel, alai iya ti udah ngaga siti tiang pengingat ke diri empu, lalu udah bekau nya, mansang ngagai Gilgal. Samuel mansang ngagai Saul. Saul lalu ngambat iya, ku iya, “ TUHAN merekatka nuan, Samuel! Aku udah ngasika pesan TUHAN.” Samuel lalu nanya, “Enti pia, nama kebuah aku bisi ninga munyi sapi enggau bedus?” Disaut Saul, “Bala aku udah ngerampas sida ari orang Amalek. Sida ngambi bedus enggau sapi ti pemadu manah, ngambika bisi diberi nyadika piring ngagai TUHAN Allah Taala nuan. Sida ke bukai udah abis dibunuh kami.” Ku Samuel, “Badu agi nuan bejaku. Aku deka madahka ngagai nuan utai ti udah disebut TUHAN ngagai aku dimalam.” “Padahka meh,” ku Saul nyaut. Disaut Samuel, “Taja pen nuan ngumbai diri orang ke enda dipeguna orang, tang nuan nyadi tuai ke semua raban bansa orang Israel. TUHAN udah nata nuan nyadi raja orang Israel, lalu Iya udah ngasuh nuan ngerusak orang Amalek ti jai nya. Iya udah ngasuh nuan ngelaban sida, datai ke nuan udah munuh semua sida. Nya alai, nama kebuah nuan enda ngasika TUHAN? Nama kebuah nuan beguai-guai ngerampas perapasan, lalu ngereja utai ti jai di mua TUHAN?” “Aku udah ngasika TUHAN,” ku Saul nyaut. “Aku udah mupuk nitihka asuh TUHAN, mai Raja Agak pulai baru, lalu munuh semua orang Amalek. Tang bala soldadu aku enda munuh jelu bedus enggau jelu sapi ti pemadu manah ti ditangkap sida. Sida mai jelu nya kitu ngagai Gilgal, nyadika piring ti diberi ngagai TUHAN Allah Taala nuan.” Ku Samuel, “Ni bagi utai ti dikedekaka TUHAN? Ngasika Iya, tauka piring? Manah agi ngasika Iya ari ke meri bedus ti pemadu manah nyadika piring. Pengawa ngelaban TUHAN nya ngenyai pengawa betilitka nasit, lalu ati ti sumbung nya ngenyai dosa besembahka engkeramba. Nuan udah nulak pesan TUHAN, nya alai diatu Iya udah nulak nuan nyadi raja.” Disaut Saul, “Aku amat udah bedosa. Aku udah enda ngasika pesan TUHAN, enggau atur nuan. Aku takutka bala aku, lalu aku ngereja utai ti dipinta sida. Tang diatu aku minta kasih ngagai nuan, ampun dosa aku, lalu pulai sama enggau aku, ngambika aku ulih nyembah TUHAN.” Samuel lalu nyaut, “Aku sigi enda pulai enggau nuan; laban nuan udah nulak pesan TUHAN, lalu Iya udah nulak nuan ti nyadi raja orang Israel.” Samuel nguing lalu mupuk, tang Saul bepegai ba baju Samuel, lalu baju nya charik. Ku Samuel bejaku enggau iya, “ TUHAN udah nyarikka perintah orang Israel ari nuan sehari tu, lalu udah meri perintah nya ngagai orang ke badas agi ari nuan. Allah Taala ti bemulia, ke disembah orang Israel, enda bula; Iya enda ngubah runding Diri; Iya ukai mensia; Iya enda ngubah runding Diri.” Ku Saul nyaut, “Aku udah bedosa, tang taja pia, ayanka meh basa nuan ngagai aku di mua bala tuai soldadu aku, enggau di mua semua orang Israel. Pulai enggau aku, ngambika aku ulih nyembah TUHAN Allah Taala nuan.” Samuel lalu pulai sama enggau iya. Saul lalu nyembah TUHAN. “Bai Raja Agak ngagai aku kitu”, ku Samuel bejaku. Agak lalu datai ngagai Samuel, getar-getar takut, laban ku runding iya, “Naka meh pemedis mati!” Ku Samuel bejaku, “Laban pedang nuan udah ngasuh mayuh orang ke indu lenyau anak, nya alai indai nuan empu diatu deka mega lenyau anak.” Samuel lalu mepat Agak di mua alta di Gilgal. Udah nya Samuel lalu mupuk ngagai Ramah, lalu Raja Saul pulai ngagai Gibe-ah. Samuel nadai agi betemu enggau Saul nyentuk ngagai hari iya mati, tang iya sinu ati ke Saul. TUHAN nesal ati ke Diri ti udah ngasuh Saul nyadi raja orang Israel. Ku TUHAN bejaku ngagai Samuel, “Ni pengelama nuan agi tusah ati ke Saul? Aku udah nulak iya nyadi raja orang Israel. Diatu ambi minyak kana, lalu mansang ngagai Betlehem, ngagai orang siku ke benama Jesi, laban Aku udah milih siku ari anak lelaki iya nyadi raja.” Samuel lalu nanya, “Baka ni ku aku ulih ngereja nya? Enti Saul ninga nya, iya tentu deka munuh aku!” Disaut TUHAN, “Bai siku anak sapi, lalu padahka ngagai Saul nuan deka ngenjuk piring ngagai TUHAN din. Bai Jesi ngagai pengawa miring nya. Ila Aku deka madahka utai ti deka dikereja nuan. Nuan deka nata orang siku ti deka dipadahka Aku ngagai nuan, ngambika iya nyadi raja.” Samuel lalu ngereja utai ti diasuh TUHAN. Iya mansang ngagai Betlehem. Bala tuai nengeri nya nyau getar-getar ngambat iya. Ku sida nanya, “Kati nuan nemuai mai pemaik, tukang tujum?” Disaut Samuel, “Aku datai laban aku deka meri piring ngagai TUHAN. Tuchi diri empu lalu mupuk sama enggau aku.” Iya mega ngasuh Jesi enggau bala anak lelaki iya nuchi diri, lalu mai sida ngagai pengawa nya. Lebuh sida datai, Samuel meda anak Jesi ke benama Eliap, lalu ku iya berunding dalam ati diri, “Orang ke bediri di mua TUHAN tu tentu orang ke udah dipilih Iya.” Tang ku TUHAN bejaku enggau Samuel, “Anang ngira peninggi tauka penyigat gamal orang. Aku udah nulak iya, laban Aku enda ngira mensia ngena chara mensia. Mensia meda gamal, tang Aku meda ati.” Udah nya Jesi ngangauka anak iya ke benama Abinadap, lalu mai iya ngagai Samuel. Tang ku Samuel, “Ukai. TUHAN enda milih iya.” Udah nya Jesi lalu mai Samah. Tang ku Samuel, “Ukai. TUHAN enda milih iya.” Nya alai Jesi mai tujuh iku ari bala anak lelaki iya ngagai Samuel. Tang ku Samuel bejaku enggau Jesi, “Ukai. TUHAN enda milih bala sida tu.” Udah nya Samuel lalu nanya Jesi, “Kati nuan agi bisi anak lelaki bukai?” Disaut Jesi, “Bisi. Siku ke bunsu, tang iya benung ngibun bedus.” Ku Samuel, “Asuh iya datai kitu. Kitai enda meri piring sebedau iya datai.” Jesi lalu mesanka anak bunsu iya. Gamal iya sigat amat, bepengerai, lalu mata iya tajam. Ku TUHAN bejaku ngagai Samuel, “Nya meh iya. Tata iya!” Samuel lalu ngambi minyak kana, lalu nata David di mua bala menyadi iya. Tekala nya Roh TUHAN lalu bekuasa ba David, lalu berengkah ari nya Roh TUHAN meruan enggau iya. Udah nya Samuel pulai ngagai Ramah. Roh TUHAN ninggalka Saul, lalu roh ti jai ti dikirumka TUHAN datai, lalu merinsaka iya. Ku bala orang gaji Saul bejaku enggau Saul empu, “Roh ti jai, ti dikirumka Allah Taala, nya ti merinsaka nuan. Nya alai asuh kami, tuan, ngiga orang siku ke nemu nebah belikan. Lebuh roh ti jai nya merinsaka nuan, orang nya tau nebah belikan iya, lalu nuan deka gerai baru.” Saul lalu bejaku enggau sida, “Giga siku orang ke landik nebah belikan, lalu bai iya kitu ngagai aku.” Ku siku orang gaji bejaku, “Jesi ari nengeri Betlehem bisi siku anak lelaki, ti landik nebah musik. Iya mega orang ke berani, sereta sigat gamal, soldadu ti manah, sereta lanchar bejaku. TUHAN bisi enggau iya.” Saul lalu ngasuh bala seruan mai pesan tu ngagai Jesi, “Asuh anak lelaki nuan ke benama David, ke ngibun bedus, datai ngagai aku.” Jesi lalu ngambi siku keledai. Iya ngengkahka roti enggau sekambut wain ba belakang keledai nya, lalu ngasuh anak iya David nganjung utai nya, enggau siku anak kambin, ngagai Saul. Lebuh David datai ba istana Saul, iya lalu belabuh bekereja ke Saul. Saul balat amat rinduka David, lalu David nyadi orang ke mai senyata ke iya. Udah nya Saul lalu ngirumka pesan ngagai Jesi, “Awakka David bekereja ke aku, laban aku rinduka iya.” Lebuh roh ti jai, ti dikirumka Allah Taala, merinsaka Saul, David ngambi belikan iya, lalu nebah belikan nya. Saul lalu berasai nyamai, sereta gerai, lalu roh ti jai nya ninggalka iya. Orang Pilistin begempuru di Sokoh, sebuah nengeri di menua Judah, sedia deka beperang. Sida nirika kem sida ba endur siti ke benama Epes-damim, ba entara Sokoh enggau Asekah. Saul enggau orang Israel begempuru lalu nirika kem sida ba Lebak Elah, lalu berintai deka beperang ngelaban orang Pilistin. Bala orang Pilistin bediri berintai ba bukit sigi lalu orang Israel ba bukit sigi, diseraraka siti lebak. Siku orang ke benama Goliat, ari nengeri Gat, pansut ari kem orang Pilistin, lalu nyakap orang Israel. Peninggi iya kira tiga meter, lalu iya ngena baju kebal ti digaga ari temaga, ti berat lima puluh semilan kilogram, enggau selapuk kebal ti digaga ari temaga. Kaki iya mega disarung enggau temaga, lalu iya mai siti sangkuh ti digaga ari temaga, ti disan iya. Enteran sangkuh iya ngemesai tendai ti dikena orang betenun. Mata sangkuh iya digaga ari besi lalu pemerat mata sangkuh iya nya kira tujuh kilogram. Lalu orang ke mai senyata iya, bejalai dulu ari iya. Goliat bediri lalu ngangauka orang Israel, “Nama kebuah kita berintai deka beperang? Kati aku tu ukai orang Pilistin, lalu kita nya ulun Saul? Pilih siku ari bala kita, lalu awakka iya nurun kitu ngagai aku. Enti iya ulih ngelaban aku, lalu tebunuhka aku, awakka kami meh nyadi ulun kita. Tang enti aku menang ngelaban iya, lalu tebunuhka iya, kita meh nyadi ulun kami. Sehari tu aku nyakap kita soldadu orang Israel. Asuh siku ari bala kita ngelaban aku!” Lebuh Saul enggau bala iya ninga nya, sida tusah ati sereta balat amat takut. Nyadi David nya anak Jesi, ari raban peturun Eprat, ti diau di Betlehem, di menua Judah. Jesi bisi lapan iku anak lelaki. Lebuh Saul nyadi raja, Jesi endang udah tuai umur. Anak iya tiga iku ke tuai agi udah mupuk enggau Saul mansang beperang. Iya ke tuai nya Eliap, ditangkanka Abinadap, lalu iya ti ketiga nya Samah. David nya anak bunsu Jesi. Lebuh sida tiga ke tuai agi nya enggau Saul, David selalu kuang-kuit mansang ngagai Saul lalu pulai baru ngagai raban bedus apai iya di Betlehem. Goliat nyakap orang Israel tiap pagi lemai dalam kandang empat puluh hari. Nyadi sekali Jesi bejaku enggau David, “Bai sepuluh kilogram kemping enggau sepuluh iti tuku roti lalu anjung enggau jampat ngagai menyadi nuan di kem. Lalu bai mega sepuluh igi tuku engkiju ngagai tuai soldadu. Tanyaka gaya pendiau bala menyadi nuan, lalu bai siti utai kena nandaka sida agi gerai nyamai magang. Raja Saul, bala menyadi nuan, enggau semua orang Israel ti bukai diatu benung ba Lebak Elah, beperang ngelaban orang Pilistin.” David angkat tumu pagi hari siti, ngasuh orang bukai ngibun raban bedus, lalu nganjung pemakai nitihka asuh apai iya Jesi. Iya datai ba kem lebuh orang Israel benung manjung mansang ngagai endur alai sida ke berintai deka beperang. Orang Pilistin enggau orang Israel lalu besedia deka belaban, betunga mua enggau pangan diri. David lalu ninggalka pemakai ba orang ke ngibun bekal, belanda ngagai rintai orang ke deka belaban, mansang ngagai bala menyadi iya, lalu nanyaka gaya pendiau sida sebuat. Lebuh iya agi benung bejaku enggau sida, Goliat mansang ke mua ari bala orang Pilistin, lalu nyakap orang Israel, baka selama. Lalu David ninga iya. Lebuh orang Israel meda Goliat, sida lalu rari takut. “Peda iya nya!” ku sida bejaku enggau pangan diri. “Pendingka ulih kita jaku chakap iya! Raja Saul udah besemaya deka meri upah ti besai ngagai orang ke tebunuhka Goliat. Raja deka mega meri anak dara iya nyadika bini orang nya, lalu ruang bilik apai orang nya enda ibuh mayar chukai.” David lalu nanya bala orang ke semak iya, “Nama utai ti deka diberi ngagai orang ke tebunuhka orang Pilistin tu, lalu ngelepaska orang Israel ari pemalu tu? Berani amat orang kapir tu nyakap bala soldadu Allah Taala ti idup!” Sida lalu madahka ngagai iya utai ti deka dikereja ngagai orang ke tebunuhka Goliat. Eliap, menyadi David ke pengabis tuai, bisi ninga David bejaku enggau bala orang nya. Iya lalu pedis ati ngagai David, lalu ku iya, “Nama pengawa nuan ditu? Sapa ngibun bedus nuan di menua puang din? Nuan tu ngemintarka diri aja. Nuan datai ditu laban nuan ingin deka meda orang belaban!” “Nama penyalah aku?” ku David nanya. “Nama kebuah aku enda tau bejaku?” Iya nguing ngagai orang bukai, lalu nanya munyi ti dulu. Genap kali iya nanya, saut sida sebaka magang. Sekeda orang ke ninga jaku David, madahka ngagai Saul. Saul lalu mesanka David. Lalu ku David bejaku enggau Saul, “Tuan Raja, anang nejuka orang takutka orang Pilistin nya! Awakka aku ngelaban iya.” Saul lalu bejaku enggau David, “Nuan enda ulih ngelaban orang Pilistin nya, laban nuan agi biak, lalu iya enda udah nyadi soldadu kenyau ari iya agi bujang.” Tang ku David nyaut Saul, “Tuan Raja, aku endang selalu ngibun bedus apai aku. Genap kali jelu singa tauka beruang nabanka anak domba, aku nitihka iya, lalu munuh iya, lalu ngelepaska anak domba nya. Lalu enti jelu singa tauka beruang nya mutar ngelaban aku, aku nyekal iya, malu iya lalu munuh iya. Aku udah munuh jelu singa enggau beruang, lalu aku deka munuh orang kapir tu baka aku ti munuh jelu, laban iya udah nyakap bala soldadu Allah Taala ti idup. TUHAN ke udah nyelamatka aku ari singa enggau beruang, deka mega nyelamatka aku ari jari orang Pilistin nya.” “Barang ku jaku,” ku Saul nyaut. “Mupuk meh nuan. TUHAN deka meruan enggau nuan.” Saul lalu ngerasukka perengka perang iya empu ba David; iya ngerasukka selapuk kebal ti digaga ari temaga ba pala David, enggau baju kebal iya. David lalu nanchangka pedang Saul atas baju kebal nya, lalu nguji bejalai, tang enda ulih, laban iya enda teleba ngena utai ti baka nya. David lalu bejaku ngagai Saul, “Aku enda ulih belaban ngena semua utai tu, laban aku enda teleba ngena utai tu.” Iya lalu muka utai nya ari tubuh iya. Iya lalu mai tungkat ti dikena iya ngibun bedus, lalu milih lima igi batu ti segala ari sungai, lalu nyimpan batu nya dalam kambut iya. Iya megai pangwang iya, lalu mansang ngagai Goliat. Orang Pilistin nya lalu belabuh mansang ngagai David. Orang ke mai terabai iya bejalai dulu ari iya. Lebuh Goliat udah meratika David, iya ngeleseka David, laban David agi biak umur, agi biring sereta sigat gamal. Ku iya bejaku ngagai David, “Kati aku tu ukui alai nuan mansang ngagai aku mai tungkat?” Iya lalu nyumpah David dalam nama petara iya empu. Ku iya nyakap David, “Mansang kitu, ngambika aku nyerahka bangkai nuan ngagai burung enggau jelu.” Disaut David, “Nuan mansang ngelaban aku ngena pedang, sangkuh enggau perambut, tang aku mansang ngelaban nuan dalam nama TUHAN ti Pemadu Bekuasa, Allah Taala bala soldadu orang Israel ti udah dikeleseka nuan. Sehari tu TUHAN deka nyerahka nuan ngagai jari aku, lalu aku deka munuh nuan, lalu mumpung pala nuan. Lalu sehari tu aku deka nyerahka bangkai bala soldadu orang Pilistin ngagai burung enggau jelu ngambika semua mensia nemu orang Israel bisi Allah Taala, lalu semua orang ditu deka nemu TUHAN ukai ngelepas ngena pedang tauka sangkuh, laban perang tu perang TUHAN, lalu Iya deka nyerahka kita ngagai jari kami.” Lebuh Goliat angkat lalu mansang semak ngagai David, David lalu belanda ngagai rintai bala orang Pilistin, deka ngelaban Goliat. David nyelukka jari iya ke dalam kambut iya, lalu ngambi sigi batu, ti ditimbakka iya ngena pangwang iya ngagai Goliat. Batu nya lalu kena kening Goliat, ngebuska kening iya. Goliat lalu rebah tetingkap. Nya meh gaya David ngalahka Goliat lalu munuh iya, ukai ngena pedang, tang ngena pangwang enggau batu! David nadai mai pedang. David lalu belanda ngagai Goliat, bediri atas iya, nyintak pedang Goliat empu, mumpung pala iya, lalu munuh iya. Lebuh orang Pilistin meda bujang berani sida udah mati, sida lalu rari. Bala orang Israel enggau orang Judah lalu manjung begagaika orang Pilistin nyentuk ngagai Gat enggau nyentuk ngagai pintu penama nengeri Ekron. Orang Pilistin rebah bakal di serantau-rantau jalai ti nuju ngagai Saraim, nyentuk ngagai Gat enggau Ekron. Lebuh orang Israel pulai begagaika orang Pilistin, sida ngerumpak kem orang Pilistin. David ngambi pala Goliat, lalu mai pala nya ngagai Jerusalem, tang iya nyimpan senyata Goliat dalam langkau kain iya empu. Lebuh Saul meda David mansang ngelaban Goliat, iya lalu nanya Abner, ti nyadi tuai soldadu iya, “Abner, anak sapa nembiak nya?” “Entah, enda aku nemu, Tuan Raja,” ku Abner nyaut. “Alai nuan nanya ngagai orang,” ku Saul bejaku enggau Abner. Nya alai, lebuh David pulai ngagai kem udah bekau iya ti munuh Goliat, Abner lalu mai iya ngagai Saul. David agi minching pala Goliat. Saul lalu nanya iya, “Anak sapa nuan tu?” “Aku tu anak nembiak nuan Jesi ari Betlehem,” ku David nyaut. Lebuh Saul udah bejaku enggau David, anak Saul ke benama Jonatan balat amat tetarit ati ngagai David, lalu belabuh rinduka iya baka ke rinduka diri empu. Kenyau ari nya, Saul mai David begulai enggau iya, lalu enggai ngelakka iya pulai ngagai rumah apai iya. Jonatan ngaga siti sempekat enggau David, laban iya rinduka David baka iya ti rinduka diri empu. Jonatan lalu muka baju panjai ti dikena iya, lalu meri baju panjai nya ngagai David, sama enggau baju kebal, sereta enggau pedang, panah enggau belulang iya. David mujur belama ba semua kayau ti diasuh Saul kereja iya. Nya alai Saul ngaga iya nyadi kepala ke bala soldadu iya. Semua orang Israel enggau semua pemesai bala soldadu Saul gaga ati meda nya. Lebuh sida pulai ke rumah, udah bekau David ti munuh Goliat, orang ke indu lalu datai ari semua nengeri di menua Israel mansang ngambat Raja Saul. Sida belagu gaga ati, betanda, sereta nebah tamborin enggau engkeratung. Ku sida belagu: “Saul udah munuh beribu iku, tang David udah munuh bepuluh ribu iku.” Saul lalu enda rindu ninga nya, lalu iya balat amat ringat. Ku iya, “Sida ngumbai David udah munuh bepuluh ribu iku, tang aku semina munuh beribu iku aja. Enda lama da agi iya deka ngerampas perintah tu ari jari aku!” Nya alai berengkah ari sehari nya Saul belabuh kepapaska David. Hari siti siku roh ti jai, ti dikirumka Allah Taala ngenyit merinsaka Saul. Iya lalu mutap inggar amat dalam rumah iya, lebuh David benung nebah belikan baka ke dikereja iya tiap. Saul megai sangkuh. Ku runding Saul, “Lagi aku ngentumka iya ngagai dinding.” Saul lalu numbukka sangkuh nya ngagai David, dua kali, tang David nyilat iya belama. Saul takutka David, laban TUHAN bisi enggau David, tang udah ninggalka Saul. Nya alai Saul enggai agi meda David, lalu ngaga iya nyadi tuai ke seribu iku soldadu. David lalu nguluka bala iya beperang. David mujur dalam semua utai ti dikereja iya, laban TUHAN bisi enggau iya. Lebuh Saul meda David mujur amat, iya majak balat agi takutka David. Tang semua orang di menua Israel enggau di menua Judah rindu magang ke David, laban iya mujur nyadi tuai sida. Udah nya Saul lalu bejaku enggau David, “Tu Merap, anak indu aku ke tuai agi. Aku deka meri iya nyadika bini nuan, enti nuan deka bekereja ke aku nyadi soldadu ti berani sereta taluk, lalu beperang ngelaban munsuh TUHAN.” (Laban kenu ku runding Saul, “Aku empu enggai ngedarka jari ngelaban iya; awakka orang Pilistin munuh iya.) Disaut David, “Sapa aku tu, lalu purih sapa aku tu, alai aku tau nyadika menantu raja?” Tang lebuh maya udah chukup alai Merap patut diberi ngagai David, Merap lalu diberi ngagai lelaki siku ke benama Adril, ke datai ari Meholah. Tang anak indu Saul ke benama Mikal rinduka David; orang lalu madahka nya ngagai Saul, lalu iya gaga ati ke nya. Ku iya runding iya, “Awakka aku meri Mikal ngagai David, kena aku manjuk iya, sereta ngambika orang Pilistin munuh iya.” Nya alai tu kedua kali Saul nyebut ngagai David, “Nuan deka nyadika menantu aku.” Iya lalu bejaku enggau bala pemesai iya, “Awakka kita bejaku kediri enggau David munyi tu, ‘Raja rinduka nuan, lalu semua pemesai iya rinduka nuan. Awakka nuan nyadika menantu raja.’ ” Nya alai sida lalu nyebut jaku nya ngagai David, lalu ku David nyaut, “Kati kita ngumbai nyadika menantu raja nya pekara ti mit, laban aku tu orang ke seranta, ti enda dikelala orang.” Bala pemesai lalu madahka jaku David ngagai Saul. Saul lalu bejaku ngagai sida, “Bejaku kita enggau David munyi tu, ‘Derian ti dipinta raja nya seratus iti ujung kulup orang Pilistin, kena malas munsuh iya.’ ” (Dalam runding Saul, nya jalai ngasuh David dibunuh orang Pilistin.) Lebuh bala pemesai Saul madahka jaku Saul ngagai David, David lalu gaga ati deka nyadika menantu raja. Sebedau hari nikah, David enggau bala iya mansang lalu munuh dua ratus iku orang Pilistin. Iya mai ujung kulup orang Pilistin nya ngagai raja, lalu ngitung semua utai nya di mua raja, ngambika iya tau nyadika menantu raja. Saul lalu meri anak indu iya Mikal nyadika bini David. Nya baru Saul nyemetak nemu TUHAN bisi enggau David, lalu nemu semua orang Israel rinduka David. Saul majak balat agi takutka David, lalu kenyau ari nya iya ngaga diri nyadi munsuh David. Bala soldadu orang Pilistin selalu datai, lalu nyerang, lalu genap kali sida nyerang, David mujur agi ari bala pemesai bukai. Nya lalu ngujungka David tebilang nama. Saul lalu bejaku enggau anak iya Jonatan, sereta enggau semua pemesai iya, ngasuh sida munuh David. Tang Jonatan balat rinduka David. Jonatan lalu madahka ngagai David, “Apai aku deka munuh nuan. Bejimat nuan pagila. Belalai ba endur ti enda ditemu orang, lalu diau dia. Aku deka bediri semak apai aku ba padang ti alai nuan belalai, lalu aku deka ngenang pasal nuan ngagai iya. Enti aku bisi tetemuka utai ari randau kami duai, aku deka madahka nya ngagai nuan.” Jonatan muji David di mua Saul, lalu ku iya, “Tuan, anang besalah David, laban iya nadai kala ngereja utai ti salah ngagai nuan. Semua utai ti udah dikereja iya sigi bisi guna magang ba nuan. Iya berambunka nyawa diri lebuh iya munuh Goliat, lalu TUHAN ngasuh orang Israel menang. Lebuh nuan meda nya, ati nuan gaga. Nya alai, nama kebuah nuan deka ngereja utai ti salah ngagai orang ke nadai penyalah, lalu deka munuh David enggau nadai kebuah?” Saul ngasika jaku Jonatan, lalu besumpah dalam nama TUHAN madahka diri enggai munuh David. Jonatan lalu ngangauka David, lalu madahka semua utai nya ngagai iya. Udah nya iya lalu mai David betemu enggau Saul. David lalu begulai enggau Saul baka ke dulu. Perang lalu nyadi baru. David lalu nyerang orang Pilistin, lalu munuh mayuh amat orang Pilistin, lalu sida rari ari iya. Udah nya roh ti jai ari TUHAN bekuasa ba Saul, lebuh iya benung duduk di rumah megai sangkuh iya, lalu David benung nebah belikan iya. Saul numbukka sangkuh iya ngagai David, tang David nyilat, lalu sangkuh nya lekat ba dinding. David lalu belanda rari. Malam nya Saul ngasuh sekeda bala iya nengkilaka rumah David, laban iya deka munuh David pagi hari siti. Tang Mikal, iya nya bini David, madahka ngagai David, “Enti nuan enda rari malam tu, nuan mati pagila.” Mikal lalu ngulurka David ari jenila ke tanah. David lalu belanda rari. Udah nya Mikal ngambi engkeramba sida sebilik, ngengkahka engkeramba nya ba peninduk David, lalu ngengkahka panggal ti digaga ari bulu kambin, ba pala engkeramba nya, lalu mungkur iya. Lebuh bala nembiak Saul datai deka ngambi David, Mikal lalu bejaku, “Iya sakit.” Tang Saul ngasuh sida mansang baru, ku iya, “Bai iya kitu ngena peninduk iya empu, ngambika aku munuh iya.” Lebuh sida tama, sida lalu tepedaka engkeramba ba peninduk nya, enggau panggal ti digaga ari bulu kambin ba pala engkeramba nya. Saul lalu nanya Mikal, “Nama kebuah nuan nipu aku baka tu, lalu ngelakka munsuh aku rari?” Disaut Mikal, “Iya madahka dirika munuh aku, enti aku enda nyaup iya rari.” David rari lalu mansang ngagai Samuel di Ramah, lalu madahka ngagai Samuel semua utai ti udah dikereja Saul ngagai iya. Udah nya David seduai Samuel mupuk ngagai Naiot, lalu diau dia. Orang lalu madahka ngagai Saul David bisi di Naiot, semak Ramah. Nya alai iya lalu ngasuh orang nangkap David. Lebuh sida meda bala nabi betanda sereta benabi, diuluka Samuel, Roh Allah Taala lalu bekuasa ba bala nembiak Saul, lalu sida mega belabuh betanda sereta benabi. Lebuh orang madahka nya ngagai Saul, iya lalu ngirumka mayuh agi seruan iya. Sida nya mega belabuh betanda sereta benabi. Iya lalu ngirumka bala seruan ketiga kali. Sida nya mega betanda sereta benabi. Udah nya, Saul empu mupuk ngagai Ramah. Lebuh iya datai ba telaga ti besai di Seku, iya lalu nanya ngagai orang endur alai Samuel seduai David diau. Orang lalu madahka ngagai iya, “Seduai nya di Naiot, di Ramah.” Lebuh iya benung mansang ngagai Naiot di Ramah, Roh Allah Taala lalu bekuasa ba iya. Lalu lebuh iya benung bejalai, iya betanda sereta benabi, nyentuk ngagai iya datai di Naiot. Iya muka gari iya, lalu iya mega betanda sereta benabi di mua Samuel, garing-garing gali telanjai sehari-hari, semalam-malam nya. (Tu meh penatai jaku, “Kati Saul udah nyadi nabi?”) Udah nya David rari ari Naiot, lalu mansang ngagai Jonatan. Iya lalu nanya, “Nama utai ti udah dikereja aku? Nama penyalah aku? Nama dosa ti udah dikereja aku ngagai apai nuan, datai ke nyau keran deka munuh aku?” Jonatan lalu nyaut David, “Nuan enda mati! Dinga nuan, apai aku enda ngereja utai sebedau iya madahka ngagai aku, nemuka utai nya besai tauka mit. Lalu iya nadai kebuah ngelalaika pekara tu ari aku.” Tang ku David nyaut, “Apai nuan nemu nuan balat rinduka aku, lalu iya udah mutuska runding enggai nejuka nuan nemu utai ti deka dikereja iya, laban nya deka ngenusahka ati nuan. Aku besumpah madahka ngagai nuan dalam nama TUHAN ti idup, aku nyau deka mati!” Ku Jonatan madahka ngagai David, “Aku deka ngereja sebarang utai ti diasuh nuan.” Disaut David, “Dinga nuan, Gawai Anak Bulan deka nyadi pagila, lalu aku enda tau enda makai sama enggau raja. Enti nuan besetuju, aku deka belalai ba padang datai ngagai lemai lusa. Enti apai nuan meda aku nadai ba mija nya, padahka ngagai iya, aku udah minta pemendar ari nuan begaut pulai ngagai Betlehem, laban tu maya semua kami sebilik ngenjuk piring ti diberi genap taun. Enti iya nyebut, ‘Enda ngawa,’ aku deka likun. Tang enti iya ringat, nuan deka nemu iya endang keras deka ngemediska aku. Nya alai, aku minta nuan ngereja nya ke aku, lalu ngamatka sempekat ti kudus ti udah digaga nuan enggau aku. Tang enti aku bisi salah, awakka nuan empu munuh aku, tang anang nyerahka aku ngagai apai nuan.” “Anang irau!” ku Jonatan nyaut. “Enti aku nemu apai aku udah mutuska runding deka munuh nuan, aku deka madahka nya ngagai nuan.” David lalu nanya, “Sapa orang ke deka madahka ngagai aku enti apai nuan ringat nyaut nuan?” “Aram tua bejalai ngagai padang,” ku Jonatan nyaut. Seduai iya lalu mupuk, lalu ku Jonatan bejaku enggau David, “Awakka TUHAN Allah Taala ke disembah orang Israel nyadika saksi tua! Lebuh maya tu pagila, enggau lusa, aku deka nanya apai aku. Enti perangai iya manah ngagai nuan, aku deka mesanka nuan. Enti iya bisi ati deka ngemediska nuan, awakka TUHAN munuh aku, enti aku enda madahka nya ngagai nuan, lalu mai nuan kebukai ngagai endur ti likun. Awakka TUHAN meruan enggau nuan baka Iya ti udah enggau apai aku! Lalu enti aku agi mengkang idup, aku minta nuan ngayanka pengerindu TUHAN ngagai aku, ngambika aku enda mati. Lalu pandangka penaluk nuan ngagai kami sebilik belama iya. Lebuh TUHAN udah ngeluska semua munsuh nuan, anang enda ingatka kami sebilik. Awakka TUHAN malas semua munsuh David.” Jonatan lalu ngasuh David besumpah baru madahka diri rinduka iya, laban Jonatan rinduka David baka iya ti rinduka diri empu. Udah nya Jonatan bejaku enggau iya, “Pagila Gawai Anak Bulan, nuan deka nyata nadai dia, laban kerusi nuan puang. Lusa orang deka lebih agi nemu nuan nadai datai! Nya alai, mupuk nuan ngagai endur alai nuan ke belalai suba, lalu belalai ari belakang tugung batu dia. Aku deka nimbakka tiga iti laja ngagai batu nya, ngeluluka diri baka ke nyelinting batu nya. Udah nya aku deka ngasuh ulun aku ngiga panah nya. Enti aku madahka ngagai iya, ‘Laja nya tunga kitu. Ambi iya,’ reti nya, nuan nadai utai ngawa, lalu tau pansut ari endur alai nuan ke belalai. Aku besumpah dalam nama TUHAN ti idup, nadai utai ulih nganu nuan. Tang enti aku madahka ngagai iya, ‘Panah nya ngilah nuan kin agi,’ nuan enda tau enda mupuk, laban TUHAN ngasuh nuan mupuk. Pasal semaya ti udah digaga tua enggau pangan diri, TUHAN deka nentuka tua ingatka semaya nya belama iya.” Nya alai David lalu belalai di padang. Lebuh Gawai Anak Bulan nyadi, Raja Saul datai ngagai pengerami makai besai nya lalu duduk ba endur alai iya ke duduk selama ngimbai dinding, lalu Jonatan duduk betunga mua enggau iya ari sepiak mija nya, lalu Abner duduk ngimbai Saul, tang penuduk David puang, Tang taja pia Saul nadai nyebut utai sehari nya, laban ku pikir iya, “Utai bisi udah nyadi ba iya ti ngasuh iya enda tuchi.” Tang ba hari ti kedua, iya nya sehari udah bekau Gawai Anak Bulan, penuduk David mega puang. Saul lalu nanya Jonatan, “Nama kebuah David nadai datai makai kemari enggau sehari tu?” Disaut Jonatan, “Iya udah minta aku ngemendarka iya mupuk ngagai Betlehem; ku iya, ‘Awakka aku mupuk, laban kami sebilik deka meri piring ngagai TUHAN, lalu bala menyadi aku udah mesanka aku datai. Nya alai, enti nuan amat pangan aku, awakka aku mupuk betemu enggau kaban belayan aku.’ Nya kebuah iya nadai duduk ba endur iya ba mija Raja.” Saul lalu pedis ati ngagai Jonatan, lalu ku iya bejaku ngagai Jonatan, “Nuan tu anak ti nadai guna! Diatu baru aku nemu nuan setanah enggau David, lalu ngemaluka diri empu sereta ngemaluka indai nuan! Seagi-agi David mengkang idup, nuan enda ulih nyadi raja menua tu. Nya alai, asuh orang ngambi iya lalu bai iya ngagai aku, laban iya enda tau enda mati.” Jonatan lalu nyaut apai iya, Saul, “Nama kebuah iya enda tau enda mati? Nama utai ti udah dikereja iya?” Ninga iya bejaku munyi nya, Saul lalu numbuk Jonatan ngena sangkuh iya, deka munuh iya. Nya baru Jonatan nemu apai iya amat keran deka munuh David. Jonatan balat amat ringat, lalu angkat ari mija nya, lalu nadai makai utai sehari nya, iya nya ba hari ti kedua Gawai Anak Bulan nya. Ati iya balat tusah ke David, laban Saul udah mechat David. Pagi hari siti Jonatan lalu mansang ngagai padang nya, deka betemu enggau David nitihka semaya seduai iya. Iya mai siku nembiak enggau iya, lalu ku iya bejaku enggau nembiak nya, “Alai nuan belanda kin lalu giga laja ti deka ditimbakka aku.” Nembiak nya lalu belanda. Jonatan lalu nimbakka laja ngelui nembiak nya. Lebuh nembiak nya datai ba endur alai laja nya udah labuh, Jonatan lalu ngangauka iya, “Laja nya jauh agi ari nya! Anang bediri tegir-tegir ngapa! Jampat agi!” Nembiak nya lalu ngambi laja nya, lalu pulai baru ngagai tuan iya. Tang iya enda nemu reti semua utai nya. Semina Jonatan seduai David aja nemu. Jonatan lalu nyuaka senyata iya ngagai nembiak nya, lalu ngasuh iya mai senyata nya pulai ngagai nengeri. Lebuh nembiak nya udah mupuk, David angkat ari belakang tugung batu nya, besugang, lalu nyungkurka diri ke tanah tiga kali. Seduai iya Jonatan sama nyabak lebuh seduai iya nyium pangan diri, tang David balat agi tusah ati ari Jonatan. Jonatan lalu bejaku enggau David, “Allah Taala deka meruan enggau nuan. TUHAN deka nentuka tua, enggau peturun tua, deka ngingatka sempekat ti udah digaga tua enggau pangan diri.” David lalu mupuk, lalu Jonatan mulaika diri ngagai nengeri. David lalu mansang ngagai imam Ahimelek di Nop. Ahimelek nyau getar-getar mansang ngambat iya, lalu nanya, “Nama kebuah nuan datai ditu kediri?” “Aku datai ditu ari asuh raja,” ku David nyaut. “Iya enda ngasuh aku madahka ngagai orang utai ti diasuh iya kereja aku. Nyadi pasal bala aku, aku udah ngasuh sida betemu enggau aku ba endur siti. Kati nuan bisi bekal ke aku? Beri aku lima iti tuku roti, tauka sebarang utai bukai ti dikemisi nuan” Ku imam nya bejaku, “Aku nadai roti, semina roti ti kudus. Nuan tau ngambi roti nya, enti bala nuan nadai udah beleman enggau indu dalam dua tiga hari tu ti udah.” “Nadai sida udah ngereja nya,” ku David nyaut. “Bala aku endang semampai ngintu diri tuchi lebuh kami bejalai, anang kenang lebuh kami bejalai baka tu!” Imam nya lalu meri roti ti kudus nya ngagai David, laban iya semina bisi roti ti udah diberi ngagai Allah Taala, ti udah dipindahka ari mija ti kudus nya, lalu diganti enggau roti ti baru. ( Nyadi tuai orang ke ngibun jelu tupi Saul, ke benama Doek, ke asal ari Edom, enda mukai-mukai bisi dia sehari nya, ngereja pengawa pengarap ti enda tau enda dikereja iya.) Ku David bejaku enggau Ahimelek, “Kati nuan bisi sangkuh tauka pedang? Aku nadai mai pedang tauka senyata bukai, laban raja ngenyit ngasuh aku mupuk.” Disaut Ahimelek, “Aku bisi pedang Goliat orang Pilistin, ke dibunuh nuan ba Lebak Elah. Pedang nya ari belakang epod, dibalut ngena kain. Enti nuan begunaka pedang nya, bai aja. Ka semina nya aja senyata ti bisi ditu.” Lalu ku David bejaku, “Beri nya ngagai aku. Nadai pedang ti manah agi ari nya!” David lalu mupuk, ngerarika diri ari Saul. Iya lalu mansang ngagai Raja Akis di Gat. Bala pemesai raja Akis lalu bejaku enggau raja, “Ukai enda iya tu David, ti nyadi raja di menua iya empu? Tu meh orang ke dikenang bala indu ngena lagu lebuh sida betanda, ‘Saul udah munuh beribu iku, tang David udah munuh bepuluh ribu iku.’ ” Leka jaku nya balat ngirauka ati David, lalu iya takut amat ke Raja Akis. Nya alai di mua sida, iya ngaga diri baka ke gila. Lebuh sida deka masung iya, iya lalu jukat. Iya ngurik pintu penama nengeri nya, lalu nejuka liur iya rarat nurun ragum iya. Nya alai, ku Akis bejaku enggau bala pemesai iya, “Peda nya! Iya tu gila! Nama kebuah kita mai iya ngagai aku? Kati aku nadai chukup orang gila ditu? Nama kebuah kita mai siku agi orang gila ngagai rumah aku, lalu nejuka iya ngiruh aku ngena ulah ti tuyu?” David rari ari nengeri Gat, lalu mansang ngagai lubang gua Adulam. Lebuh bala menyadi iya enggau semua sida sebilik ninga iya bisi dia, sida lalu mansang ngagai iya. Orang ke kena tekan, tauka berutang, semua orang ke bisi utai ti ngasuh sida pedis ati, mansang ngagai iya, kira empat ratus iku semua sida, lalu iya nyadi tuai sida. Ari Gat David bejalai ngagai Mispah di menua Moap, lalu ku iya bejaku enggau raja menua Moap, “Aku minta nuan ngelakka apai enggau indai aku datai lalu diau enggau nuan, nganti aku udah nemu utai ti deka dikereja Allah Taala ke aku.” Nya alai David ninggalka apai indai iya enggau raja menua Moap. Seduai iya diau dia sekumbang David ke belalai dalam lubang gua. Udah nya, nabi Gat datai ngagai David lalu bejaku, “Anang diau ditu. Mupuk nuan diatu ngagai menua Judah.” David mupuk, lalu mansang ngagai utan Heret. Nyadi sekali lebuh Saul di Gibe-ah, iya duduk di baruh sebatang kayu tamaris ba sigi munggu, megai sangkuh, dikelingi bala pemesai iya. Orang lalu madahka ngagai iya David enggau bala iya udah ditemu. Ku iya bejaku ngagai bala pemesai iya, “Kita orang Benjamin, pendingka tu ulih kita! Kati kita ngumbai David deka meri umai enggau kebun anggur ngagai semua kita, lalu ngaga kita nyadi pemesai ke bala soldadu iya? Kati nya kebuah kita bepekat ngelaban aku? Siku pen nadai ga kita deka madahka ngagai aku pasal anak aku empu ti udah setanah enggau David. Siku pen nadai ga kita deka ibuhka aku, tauka madahka pasal David, siku ari bala soldadu aku empu ke benung ngiga peluang munuh aku, enggau pasal anak aku ke meransang iya!” Nyadi Doek bisi bediri dia begulai enggau bala pemesai Saul, lalu ku iya bejaku, “Aku bisi meda David mansang ngagai Ahimelek anak Ahitup di Nop. Ahimelek nanya ngagai TUHAN utai ti patut dikereja David. Udah nya iya lalu meri David bekal, enggau pedang Goliat orang Pilistin.” Raja Saul lalu mesanka Imam Ahimelek enggau semua kaban belayan iya ke sama nyadi imam di Nop. Sida lalu betemu enggau Saul. Ku Saul bejaku enggau Ahimelek, “Pendingka tu ulih nuan, Ahimelek!” “Tuan,” ku Ahimelek nyaut. Saul lalu nanya iya, “Nama kebuah nuan enggau David bepekat ngelaban aku? Nama kebuah nuan meri iya bekal enggau pedang, lalu betanya ngagai Allah Taala ngarika iya? Diatu iya udah nguing ngelaban aku, lalu nganti peluang alai iya munuh aku!” Ku Ahimelek nyaut, “David nya pemesai ke pemadu tetap ati ngagai nuan! Iya menantu nuan. Iya tuai soldadu ke nyaga nuan. Lalu iya endang dibasa semua orang ke bekereja di istana raja. Aku amat bisi betanya ngagai Allah Taala ngarika iya, lalu nya ukai terubah iya aku ngereja nya. Nyadi pasal bepekat ngelaban nuan, Tuan Raja enda tau nuduhka aku tauka orang bukai ari ruang bilik aku. Aku nadai nemu pasal pekara tu!” Ku raja, “Ahimelek, nuan enggau semua kita sekaban enda tau enda dibunuh magang.” Iya lalu bejaku enggau jejaga ke bediri semak iya, “Bunuh bala imam TUHAN! Sida udah bepekat enggau David, lalu sida enda madahka pasal iya ke rari, taja pen sida nemu nya kenyau ari pun.” Tang jejaga nya enggai ngangkatka jari munuh imam TUHAN. Saul lalu bejaku enggau Doek, “Bunuh sida!” Doek lalu munuh semua sida. Dalam sehari nya iya munuh lapan puluh lima iku imam. Semua sida nya tau mai epod magang. Saul mega ngasuh semua orang ke diau di Nop, iya nya nengeri ti alai imam nya diau, dibunuh magang, nyengkaum orang ke lelaki, sida ke indu, bala nembiak enggau anak mit, jelu sapi, keledai enggau jelu bedus. Semua sida dibunuh magang. Tang Abiatar, siku ari bala anak lelaki Ahimelek, rari lalu mansang ngagai David. Iya madahka ngagai David chara Saul udah munuh bala imam TUHAN. Ku David bejaku enggau iya, “Lebuh aku meda Doek bisi dia sehari nya, aku nemu iya deka madahka utai ngagai Saul. Nya alai, aku betanggungjawapka pemati semua kaban belayan nuan. Diau enggau aku. Anang takut. Saul bisi ati deka munuh tua, tang nuan deka likun enti nuan diau enggau aku. Orang lalu madahka ngagai David, “Dinga nuan, orang Pilistin nyerang nengeri Keilah, lalu ngenchuri gandum ti baru udah diketau.” David lalu betanya ngagai TUHAN, “Kati tau aku mansang lalu nyerang orang Pilistin?” “Tau,” ku TUHAN nyaut. “Serang meh sida, lalu lepaska Keilah.” Tang ku bala David bejaku enggau iya, “Dinga nuan, indah di menua Judah tu deh kitai takut. Kitai tentu deka balat agi takut enti kitai mansang ngagai Keilah lalu nyerang bala soldadu orang Pilistin din.” David lalu betanya baru ngagai TUHAN, lalu ku TUHAN bejaku ngagai iya, “Mupuk nuan lalu serang Keilah, laban Aku deka ngasuh nuan menang ngelaban orang Pilistin.” Nya alai David enggau bala iya mansang ngagai Keilah, lalu nyerang orang Pilistin. Sida munuh mayuh amat orang Pilistin, lalu ngerampas jelu tupi sida. Nya meh jalai David ngelepaska nengeri nya ari kuasa munsuh. Lebuh Abiatar anak Ahimelek rari lalu mansang ngagai bala David di Keilah, iya bisi mai epod. Orang lalu madahka ngagai Saul pasal David ti udah mansang ngagai Keilah. Ku Saul, “Allah Taala udah nyerahka iya ngagai jari aku. David udah tepekul, laban iya tama ngagai nengeri ti bekuta, ti bisi pintu ti kukuh.” Saul lalu nguluka bala soldadu iya nyerang Keilah, lalu ngelulung David enggau bala iya. Lebuh David ninga Saul bekira deka nyerang iya, iya lalu bejaku enggau Imam Abiatar, “Bai epod nya kitu.” Lalu ku iya bejaku, “ TUHAN Allah Taala ke disembah orang Israel, aku bisi ninga Saul deka datai di Keilah, lalu ngerusak nengeri tu, ketegal aku, ke nembiak Nuan. Kati orang di Keilah deka nyerahka aku ngagai Saul? Kati Saul amat deka datai, munyi ti didinga aku? TUHAN Allah Taala ke disembah orang Israel, aku minta Nuan nyaut aku!” Ku TUHAN nyaut, “Saul deka datai.” “Kati orang Keilah deka nyerahka aku enggau bala aku ngagai Saul?” ku David nanya baru. “Sida deka,” ku TUHAN nyaut. Nya alai David enggau bala iya, kira enam ratus iku semua sida, lalu tekala nya angkat ari Keilah, lalu rari ngagai sebarang endur ti deka digusung sida. Lebuh Saul ninga David udah rari ari Keilah, iya lalu badu agi nyerang David. David belalai di menua ti bebukit, di menua puang semak Sip. Saul endang seruran nguji ngiga David, tang Allah Taala enda nyerahka David ngagai jari iya. David bisi di Hores, di menua puang semak Sip, lebuh iya ninga Saul deka datai munuh iya. Jonatan anak Saul mupuk lalu betemu enggau David di Hores; iya meransang David lebuh David madahka ngagai iya pasal Allah Taala ti deka nyaga David. Ku Jonatan bejaku enggau David, “Anang takut. Apai aku Saul enda ulih ngemediska nuan. Iya sigi nemu nuan deka nyadi raja orang Israel, lalu aku deka nyadi lumur dua nuan.” Seduai iya lalu ngaga siti sempekat di mua TUHAN; David diau di Hores, lalu Jonatan pulai ke rumah. Sekeda orang ari Sip betemu enggau Saul di Gibe-ah, lalu ku sida, “David belalai di menua kami di Hores, ba Bukit Hakilah, di selatan menua puang Judea. Tuan Raja, kami nemu pemendar nuan ke nguji nangkap iya. Nya alai, manah nuan datai ngagai menua kami. Kami deka nentuka nuan ulih nangkap iya.” Disaut Saul, “Awakka TUHAN merekatka kita, laban kita udah manah enggau aku! Mupuk meh kita lalu tentuka utai nya sekali agi. Giga endur alai iya, lalu giga orang ke udah meda iya dia. Aku ninga iya pintar amat. Giga endur alai iya belalai, lalu padahka ngagai aku tekala nya. Nya baru aku deka bejalai enggau kita, lalu enti iya agi di menua nya, aku deka ngiga iya, nyengkaum di serata menua Judah. Nya alai sida angkat lalu pulai ngagai Sip, dulu ari Saul. Nyadi David enggau bala iya bisi di menua puang Maon, ba lebak siti ti nadai orang nguan, di selatan menua puang Judea. Saul enggau bala iya lalu angkat begigaka David. Tang lebuh David ninga nya, iya lalu mupuk ngagai menua ti bebukit ti bebatu di menua puang Maon, lalu diau dia. Lebuh Saul ninga nya, iya lalu nitihka David. Saul enggau bala iya diseraraka bukit sigi ari bala David. David enggau bala iya lalu beguai-guai rari ari Saul, lebuh bala Saul nyau deka ngelikupka bala David. Lebuh maya nya siku seruan datai, lalu bejaku enggau Saul, “Pulai diatu, laban orang Pilistin nyerang menua kitai!” Saul lalu enda nyadi nitihka David; iya lalu nyerang orang Pilistin. Nya kebuah endur nya dikumbai “Bukit Alai Beserara.” David angkat ari endur nya lalu belalai di menua En-gedi. Lebuh Saul pulai beperang ngelaban orang Pilistin, orang bisi madahka ngagai iya pasal David ke bisi di menua puang semak En-gedi. Saul lalu mai tiga ribu iku soldadu ke pemadu kering ari menua Israel, lalu mupuk begigaka David enggau bala iya tunga ke timur Batu Kambin Babas. Iya datai ba siti lubang gua ti semak kandang bedus, ngimbai jalai raya, lalu tama ngagai lubang gua nya, deka bira. Nyadi David enggau bala iya bisi belalai ba buntut lubang gua nya. Ku sida bejaku enggau David, “Tu peluang nuan! TUHAN udah madahka Iya deka nyerahka munsuh nuan ngagai jari nuan, lalu nuan tau ngereja sebarang utai ti dikedekaka nuan ngagai iya.” David nyubuk Saul, lalu belalai netak puting baju panjai iya. Tang David belabuh enda nyamai ati, lalu ku iya bejaku enggau bala iya, “Awakka TUHAN nagang aku ngemediska tuan aku, ti udah dipilih TUHAN nyadi raja! Mimit pen enda meh aku tau ngemediska iya, laban iya raja ti udah dipilih TUHAN!” Ngena jaku nya David ulih nguingka ati bala iya, lalu iya enda nyagi sida ngamuk Saul. Saul angkat, ninggalka lubang gua nya, lalu mupuk. Udah nya David pansut ari lubang gua nya, lalu ngangauka Saul, “Tuan Raja!” Lebuh Saul malik kebelakang, David lalu nyungkurka diri ke tanah masa Saul. David lalu bejaku ngagai Saul, ku iya, “Nama kebuah nuan mendingka orang ke ngumbai aku nguji ngemediska nuan? Dinga nuan, sehari tu nuan udah meda jalai TUHAN nyerahka nuan ngagai jari aku dalam lubang gua tu. Sekeda orang ari bala aku ngasuh aku munuh nuan, tang aku enggai munuh nuan. Aku bejaku ngagai bala aku madahka aku enda tau sekali-kali ngemediska nuan, laban nuan udah dipilih TUHAN nyadi raja. Apai, peda nuan puting baju panjai nuan tu! Aku ulih munuh nuan, tang aku semina netak puting baju panjai nuan, lalu enda munuh nuan. Nuan patut nemu aku nadai ati deka ngelaban nuan. Aku nadai bedosa ngelaban nuan, taja pen nuan begagaika aku, deka munuh aku. Awakka TUHAN ngakim entara tua! Awakka Iya malas nuan ngarika aku; tang aku sigi enggai ngelaban nuan. Munyi ti disebut Jaku-dalam, ‘Orang ke jai mansutka penyai.’ Tang aku enggai ngelaban nuan. Sapa ke digagai raja orang Israel? Begagaika bangkai ukui? Begagaika empiras? Awakka TUHAN ngakim, lalu meri atur sapa tua ke salah. Awakka Iya meratika pekara tu, nyaga aku, lalu ngelepaska aku ari jari nuan.” Lebuh David udah bejaku, Saul lalu bejaku, “Kati nya amat nuan, David, anak?” Iya lalu belabuh nyabak. Udah nya iya lalu bejaku ngagai David, “Nuan endang amat lurus agi ari aku, laban nuan udah malas penyai aku ngena pemanah, tang aku udah malas nuan ngena penyai. Sehari tu nuan udah mandangka pemanah nuan ngagai aku, laban nuan enda munuh aku, taja pen TUHAN udah nyerahka aku ngagai jari nuan. Laban lebuh orang tetemuka munsuh, iya enda nejuka munsuh nya idup. Nya alai awakka TUHAN meri upah ti manah ngagai nuan ketegal utai ti udah dikereja nuan ngagai aku sehari tu. Diatu baru aku nemu nuan deka nyadi raja, lalu menua Israel deka diserahka ngagai jari nuan. Nya alai aku minta nuan besumpah di mua TUHAN, enda munuh uchu-ambu aku, ngambika waris kami sebilik enda putus.” David lalu ngaga sumpah nya. Udah nya Saul pulai ke rumah, lalu David enggau bala iya pulai ngagai endur alai sida ke belalai. Samuel mati, lalu semua orang Israel begempuru magang ngulitka iya, lalu sida nguburka iya ba rumah iya di Ramah. David angkat lalu mupuk ngagai menua puang Paran. Lebuh David di menua puang, iya ninga pasal Nabal ke ngukur bedus iya. Nya alai David ngasuh sepuluh iku nembiak iya mansang ngagai Nabal di Karmel. Ku David bejaku enggau sida, “Mansang kita ngagai Nabal di Karmel, lalu beri tabi basa ari aku ngagai iya. Sebut ngagai iya: ‘David ngirumka pesan tabi basa ngagai nuan. Iya ngajihka nuan enggau kita sebilik, enggau semua bala nuan bela gerai nyamai magang. Iya bisi ninga pasal nuan ke ngukur jelu bedus, lalu iya madahka ngagai nuan, bala pengibun bedus nuan udah bisi begulai enggau kami, lalu kami nadai ngachau sida, lalu nadai kala ngenchuri utai sida sekumbang sida di Karmel. Tanya sida empu lalu sida deka madahka ngagai nuan. David mega minta nuan nyambut bala kami enggau manah, laban kami deka datai kitu lebuh maya gawai, laban pangan nuan David enggau kami ke nembiak nuan, minta beri nuan makai.’ ” Lebuh bala David datai, sida lalu nyebut semua pesan David ngagai Nabal. Udah nya sida lalu nganti. Ku Nabal nyaut bala David, “Sapa David? Nadai aku kala ninga nama nya! Diatu mayuh amat ulun rari ninggalka tuan sida. Kati aku patut mai roti enggau ai aku, enggau dagin jelu ti udah disayat aku ke bala orang ke ngukur bedus aku, lalu meri utai nya ngagai orang ke enda ditemu aku penatai?” Bala David lalu pulai, lalu madahka ngagai iya semua utai nya. David lalu bejaku ngagai bala iya, “Tangkin pedang kita!” Semua sida lalu nangkin pedang magang. David mega nangkin pedang iya; kira empat ratus iku orang nitihka David. Iya ninggalka dua ratus iku ngibun bekal sida. Tang siku ari bala Nabal bejaku enggau bini Nabal, Abigail, “Dinga nuan, David bisi ngirumka bala seruan ari menua puang mai pesan tabi basa ngagai tuan kami, lalu iya ngeleseka sida, taja pen bala orang tu udah manah amat enggau kami, sida nadai kala ngachau kami, lalu nadai kala ngenchuri utai kami sekumbang kami ke begulai enggau sida. Sida nyaga kami siang malam, sekumbang kami ke begulai enggau sida, lebuh kami ngibun bedus kitai. Nya alai nuan enda tau enda nemu tu, lalu bekiraka utai ti patut dikereja; laban penusah ti besai deka ninggang tuan kami enggau ruang bilik iya. Iya kelalu jai perangai datai ke nadai siku orang ulih bejaku enggau iya.” Abigail lalu beguai-guai ngambi dua ratus iti tuku roti, dua iti kambut ti penuh laban wain, lima iku bedus ti udah disediaka, tujuh belas kilogram kemping, seratus iti gupung buah anggur ti udah disalai, enggau dua ratus igi roti buah ara, lalu ngundanka semua utai nya ba berapa iku keledai. Udah nya iya bejaku enggau bala orang gaji iya, “Kita bejalai dulu. Lagi aku nitihka kita.” Tang iya enda madahka nya ngagai laki iya Nabal. Lebuh iya nepan keledai iya musin serimbing bukit, David, enggau bala iya mansang ngagai iya, lalu iya betemu enggau sida. Nyadi David udah bejaku, “Lebu ngapa aku udah nyaga utai orang tu di menua puang tu. Utai iya nadai kena churi; lalu iya malas pemanah aku ngena penyai. Awakka Allah Taala munuh aku enti aku enda munuh semua bala orang nya sebedau rerak tawas pagila!” Lebuh Abigail meda David, iya lalu beguai-guai nurun ari keledai iya, lalu nyungkurka diri ke tanah semak kaki David, lalu bejaku enggau iya, “Tuan, aku minta nuan mendingka aku! Awakka penyalah nya ninggang aku. Anang bedulika Nabal ti nadai guna nya! Reti nama iya nya beli lalu iya empu endang beli! Lebuh bala ke dikirumka nuan datai, aku nadai betemu enggau sida. TUHAN Empu ti udah nagang nuan malas lalu munuh munsuh nuan. Nya alai, diatu aku besumpah dalam nama Allah Taala ti idup, awakka munsuh nuan enggau semua orang ke deka ngemediska nuan, diukum baka Nabal. Nyadi diatu awakka pemeri ti udah dibai aku ngagai nuan, tuan, diberi ngagai bala nuan. Aku minta nuan, tuan, ngampun penyalah aku; laban TUHAN tetap deka ngaga nuan, enggau peturun nuan, nyadi raja, laban nuan beperang ngarika TUHAN. Lalu nadai penusah deka ninggang nuan sepemanjai umur nuan. Enti orang angkat ngelaban nuan, begagaika nuan, lalu nguji munuh nuan, TUHAN Allah Taala nuan deka nyaga nuan, baka ke nyaga pesaka ti berega. Tang bala munsuh nuan deka dibuai TUHAN, baka ke nikauka batu ngena pangwang. Lalu lebuh TUHAN udah ngereja semua utai ti manah ti udah disemaya Iya ngagai nuan, lalu udah ngaga nuan nyadi raja menua Israel, nuan nadai agi kebuah tusah tauka nesal ati ketegal nuan udah munuh orang enggau nadai kebuah, tauka ngiga balas. Lalu lebuh TUHAN udah merekatka nuan, tuan, anang enda ingatka aku.” David lalu bejaku enggau Abigail, “Puji TUHAN Allah Taala ke disembah orang Israel ti udah ngasuh nuan betemu enggau aku sehari tu! Awakka Allah Taala merekatka nuan, laban sehari tu nuan udah nagang aku munuh orang, sereta nagang aku malas ngena jari aku empu. TUHAN udah nagang aku ngemediska nuan. Tang aku besumpah dalam nama Allah Taala ke disembah orang Israel ti idup, enti nuan enda udah jampat betemu enggau aku, semua bala Nabal tetap mati magang tumu pagila!” Udah nya David lalu nyambut ari Abigail utai ti dibai Abigail ngagai iya. Lalu ku iya bejaku enggau Abigail, “Pulai meh nuan enggau selamat. Aku udah mendingka nuan, lalu aku udah ngereja utai ti dipinta nuan.” Abigail lalu pulai ngagai Nabal, ke benung rami makai besai baka raja. Nabal balat amat ngelantangka diri, laban iya mabuk, sereta bebuti enggau orang. Nya alai Abigail enda madahka utai ngagai iya nyentuk ngagai pagi hari siti. Pagi hari siti, lebuh Nabal udah gerai mabuk, Abigail lalu madahka semua utai nya ngagai iya. Iya lalu mati tubuh, lalu enda ulih engkebut. Kira sepuluh hari udah bekau nya, TUHAN munuh Nabal, lalu iya mati. Lebuh David ninga Nabal udah mati, iya lalu bejaku, “Puji TUHAN ti udah malas Nabal laban Nabal udah ngeleseka aku, lalu udah nagang aku ngereja utai ti salah. TUHAN udah ngukum Nabal ketegal penyai ti udah dikereja iya empu.” Udah nya David lalu ngirumka pesan minta Abigail jadi enggau iya. Lebuh bala orang gaji David betemu enggau Abigail di Karmel, sida lalu nyebut ngagai iya, “David udah ngasuh kami betemu enggau nuan, lalu mai nuan nyadika bini iya.” Abigail lalu nyungkurka diri ke tanah, lalu bejaku, “Aku tu ulun iya. Aku sedia deka masu kaki bala orang gaji iya.” Iya lalu beguai-guai angkat, lalu nepan keledai iya, disempulang lima iku orang gaji iya, mupuk enggau bala orang gaji David, lalu nyadi bini David. David udah mega jadi enggau Ahinoam ari Jesril. Diatu Abigail seduai Ahinoam sama nyadika bini iya. Laban Saul udah meri anak indu iya Mikal, ti udah nyadi bini David, ngagai Palti anak Lais, ke datai ari nengeri Galim. Sekeda orang ari Sip datai ngagai Saul di Gibe-ah, lalu madahka ngagai iya pasal David ke belalai ba Bukit Hakilah, ba tisi menua puang menua Judea. Saul lalu angkat tekala nya, lalu mansang ngagai menua puang Sip, mai tiga ribu iku bala soldadu ke pemadu kering di menua Israel, ngiga David. Iya lalu nirika kem ba tisi jalai ba Bukit Hakilah. Tang David mengkang diau di menua puang, lalu lebuh iya ninga Saul nyau deka datai ngiga iya, iya lalu ngasuh bala pematau nentuka Saul amat bisi dia. David lalu mupuk ngagai endur alai Saul udah nirika kem iya, lalu David tepedaka endur alai Saul tinduk enggau Abner anak Ner, ti nyadi tuai soldadu. Saul tinduk dalam kem nya, dikelingi bala soldadu iya. Udah nya David lalu nanya ngagai Ahimelek, orang Iti, enggau ngagai menyadi Joap, Abisai anak Seruiah, “Sapa deka enggau aku mansang ngagai kem Saul?” “Aku,” ku Abisai nyaut. Nya alai, malam nya David seduai Abisai mansang ngagai kem Saul, lalu nemu Saul tinduk dalam kem nya. Sangkuh iya diunjamka iya ba tanah semak puchuk pala iya; lalu Abner enggau bala soldadu tinduk ngelingi iya. Ku Abisai bejaku enggau David, “Allah Taala udah nyerahka munsuh nuan ngagai jari nuan malam tu. Awakka aku ngentumka sangkuh iya empu ngagai iya, sekali aja, enda ibuh ditandu.” Tang ku David bejaku ngagai Abisai, “Anang munuh iya, laban TUHAN deka ngukum orang ke ngenataika jari ba raja ti udah dipilih Iya.” Lalu ku David, “Aku besumpah dalam nama TUHAN ti idup, TUHAN Empu deka munuh iya, nemuka lebuh iya mati tuai, tauka mati beperang. TUHAN enda ngasuh aku ngenataika jari ngagai orang ke udah ditata TUHAN nyadi raja! Tang awakka tua semina ngambi sangkuh enggau tepayan ai iya, lalu mupuk ari tu.” David lalu ngambi sangkuh, enggau tepayan ai ari semak pala Saul; lalu seduai iya mupuk. Nadai orang meda tauka nemu utai nya udah nyadi, tauka tedani; laban TUHAN udah ngasuh semua sida tinduk jenak magang. David lalu meraka ke seberai, lalu bediri ba tuchung bukit, jauh ari Saul. David lalu ngangauka bala soldadu Saul, enggau Abner, ku iya, “Abner! Kati nuan ulih ninga aku?” Abner lalu nyaut, “Sapa nuan nya ke ngangauka raja?” David lalu nyaut, “Abner, kati nuan ukai anak lelaki? Sapa orang bisi baka nuan di menua Israel? Nya alai nama kebuah nuan enda nyaga raja nuan? Laban siku orang udah tama ngagai kem kita, deka munuh tuan nuan. Utai ti dikereja nuan nya enda manah. Aku besumpah dalam nama TUHAN ti idup, nuan patut diukum bunuh, laban nuan enda nyaga tuan nuan, ti udah ditata TUHAN. Uji peda nuan diatu, dini alai sangkuh raja enggau tepayan ai ti ngimbai pala iya?” Saul ngelala munyi nyawa David, lalu iya nanya, “David, kati nya nuan, anak?” “Aku meh tu, Tuan Raja,” ku David nyaut. Lalu ku David bejaku, “Tuan, nama kebuah nuan begagaika nembiak nuan? Nama utai ti udah dikereja aku ngagai nuan? Nama penyalah aku? Nya alai awakka Tuan Raja, mendingka jaku aku. Enti sema TUHAN udah nyungkak nuan ngelaban aku, awakka Iya nerima siti piring; tang enti nuan disungkak mensia, awakka orang nya kena sumpah di mua TUHAN, laban sida sehari tu udah muru aku ari menua TUHAN, lalu ngasuh aku nyembah petara orang bansa bukai. Nya alai, anang munuh aku jauh ari TUHAN; laban raja orang Israel keras deka munuh aku, baka ke ngasu burung ba sebelah bukit.” Disaut Saul, “Aku udah salah. Pulai kitu, David, anak aku, laban aku enggai agi ngemediska nuan, laban nuan sayauka nyawa aku sehari tu. Dinga nuan, aku udah beli, lalu udah ngereja utai ti balat jai!” Disaut David, “Tu sangkuh nuan, Tuan Raja. Asuh siku ari bala nuan mansang kitu, ngambi sangkuh tu. TUHAN ngupah genap iku orang ke tetap ati sereta lurus; laban sehari tu TUHAN udah nyerahka nuan ngagai jari aku, tang aku enda ngenataika jari ngagai orang ke udah ditata TUHAN. Dinga nuan, laban sehari tu aku udah sayauka nyawa nuan, awakka TUHAN mega sayauka nyawa aku, lalu awakka Iya ngelepaska aku ari semua penusah.” Lalu ku Saul bejaku enggau David, “Beberekat meh nuan, David, anak aku! Nuan deka ngereja mayuh macham utai, lalu nuan deka mujur dalam semua utai nya.” David mupuk, lalu Saul pulai ke rumah. Ku David berunding dalam ati diri, “Saul tetap deka munuh aku ila. Manah aku rari ngagai menua Pilistin. Nya baru Saul deka badu agi begigaka aku di menua Israel, lalu aku rari ari jari iya.” Nya alai David enggau enam ratus iku bala iya angkat tekala nya lalu mansang ngagai Akis anak Maok, raja nengeri Gat. David enggau bala iya sereta enggau bini anak sida lalu diau di Gat. David mai bini iya ke dua iku enggau iya, Ahinoam ke asal ari Jesril, enggau Abigail, balu niang Nabal, ke asal ari Karmel. Lebuh Saul ninga David udah rari ngagai Gat, iya lalu enggai agi begigaka iya. Ku David bejaku enggau Akis, “Enti nuan amat pangan aku, beri aku siti nengeri alai aku diau. Aku enda ibuh diau begulai enggau nuan ba indu nengeri tu, tuan.” Nya alai Akis meri iya nengeri Siklak. Nya meh kebuah Siklak diempu raja orang Judah nyentuk ngagai sehari tu. David diau di menua Pilistin setaun empat bulan. Sekumbang iya ti diau dia, David enggau bala iya selalu nyerang orang Gesur, Girsi, enggau Amalek. Orang tu endang lama udah diau di menua nya. Iya ngayau ngagai menua nya nyentuk ngagai Sur, terus ngagai menua Ejip, munuh semua orang ke lelaki, sida ke indu, lalu ngambi jelu bedus, jelu sapi, keledai enggau unta, nyengkaum kain baju. Udah nya iya pulai baru ngagai Akis. Lalu ku Akis nanya iya, “Kini ke nuan udah ngayau sekali tu?” David lalu madahka diri udah ngayau ngagai selatan menua Judah, tauka ngagai menua raban peturun Jerahmil, tauka ngagai menua orang Ken. David selalu munuh semua orang, lelaki enggau indu, ngambika sida nadai mai berita ngagai Gat, enggai ke sida madahka utai ti udah dikereja iya enggau bala iya. Nya meh utai ti dikereja David sekumbang iya ti diau di menua Pilistin. Tang Akis ngarapka David, ku iya berunding, “David balat dipegedika bansa iya empu di menua Israel. Nya kebuah iya deka bekereja ke aku seumur idup.” Nyau kelama udah bekau nya, orang Pilistin ngempuruka bala soldadu sida, deka nyerang orang Israel, lalu ku Akis bejaku enggau David, “Nuan nemu, nuan enggau bala nuan, deka enggau aku mansang beperang.” Ku David bejaku enggau Akis, “Barang ku jaku; ila baru nuan meda jamah aku.” Lalu ku Akis bejaku enggau David, “Manah nya! Aku deka ngasuh nuan nyadi jejaga aku seumur idup.” Lebuh maya nya Samuel endang udah mati. Lalu semua orang Israel udah ngulit lalu nguburka iya di nengeri iya empu di Ramah, lalu Saul endang udah muru semua orang ke tau tujum enggau semua manang ari menua Israel. Bala soldadu orang Pilistin begempuru lalu nirika kem sida di Sumen. Saul lalu ngempuruka orang Israel lalu nirika kem ba Bukit Gilboa. Lebuh Saul meda bala soldadu orang Pilistin, iya balat takut. Lalu lebuh Saul betanya ngagai TUHAN, TUHAN enda nyaut iya, nemuka dalam mimpi, tauka ngena Urim enggau Tumim, tauka ngena nabi. Udah nya Saul lalu bejaku enggau bala pemesai iya, “Giga siku indu ke tau tujum, ngambika aku betanya ngagai iya.” “Bisi siku di Endor,” ku sida nyaut iya. Saul lalu nukar gari diri, kena iya nyaru diri baka gamal orang bukai. Lebuh hari nyau petang, iya mai dua iku orang ari bala iya, lalu mansang betemu enggau indu nya. “Tanyaka ngagai semengat orang ke udah mati, lalu padahka ngagai aku utai ti deka nyadi,” ku iya bejaku enggau indu nya. “Kangauka semengat orang ke disebut aku nama.” Ku indu nya nyaut, “Nuan tentu nemu utai ti udah dikereja Saul, pasal iya ke muai semua orang ke tau tujum, enggau sida manang ari menua Israel. Nya alai, nama kebuah nuan deka manjuk aku, lalu ngasuh aku diukum bunuh?” Udah nya Saul lalu besumpah. “Aku besemaya dalam nama TUHAN ti idup, nuan enda kena ukum ketegal utai tu,” ku iya madahka ngagai indu nya. “Sapa orang ke patut dikangauka aku?” ku indu nya nanya. “Samuel,” ku Saul nyaut. Lebuh indu nya meda Samuel, iya nyerauh, lalu bejaku enggau Saul, “Nama kebuah nuan nipu aku? Nuan tu Raja Saul!” “Anang takut!” ku Saul bejaku enggau iya. “Nama utai ti dipeda nuan?” “Aku meda semengat siku orang pansut ari dalam tanah,” ku indu nya nyaut. “Baka ni ku gamal semengat orang nya?” ku Saul nanya. “Orang nya tuai,” ku indu nya nyaut. “Iya ngena siti baju ti panjai.” Nya baru Saul nemu orang nya Samuel. Iya lalu nyungkurka diri ke tanah, masa iya. Ku Samuel bejaku enggau Saul, “Nama kebuah nuan ngachau aku, lalu ngasuh aku pulai baru?” Disaut Saul, “Aku balat kena laban penusah! Orang Pilistin nyerang aku, lalu Allah Taala udah ninggalka aku. Iya nadai agi nyaut aku, nemuka ngena sida nabi tauka ngena mimpi. Nya alai aku ngangauka nuan, minta nuan madahka utai ti patut dikereja aku.” Ku Samuel bejaku, “Nama kebuah nuan ngangauka aku lebuh TUHAN udah ninggalka nuan, lalu nyadi munsuh nuan? TUHAN udah ngereja ngagai nuan, utai ti diasuh Iya padahka aku ngagai nuan. Iya udah ngambi perintah ari jari nuan, lalu udah meri perintah nya ngagai David. Nuan enda ngasika pesan TUHAN, lalu enda ngeluska orang Amalek, sama enggau semua utai ti dikembuan sida. Nya kebuah TUHAN ngereja utai tu ngagai nuan diatu. Iya deka nyerahka nuan enggau orang Israel ngagai orang Pilistin. Pagila nuan enggau bala anak nuan deka begulai enggau aku, lalu TUHAN mega deka nyerahka bala soldadu orang Israel ngagai orang Pilistin.” Saul lalu tekala nya rebah lalu garing-garing ba tanah, laban iya takutka utai ti udah disebut Samuel. Iya lembut tulang, laban iya nadai makai utai sehari nya, enggau semalam-malam nya. Indu nya lalu mansang ngagai iya, lalu lebuh iya meda Saul balat amat takut, iya lalu bejaku enggau Saul, “Tuan, aku berambunka nyawa ngereja utai ti diasuh nuan. Aku diatu minta nuan ngereja utai ti dipinta aku; awakka aku nyendiaka pemakai ke nuan. Nuan enda tau enda makai, ngambika nuan ulih bejalai.” Saul lalu madahka diri enggai makai, ku iya, “Aku enggai makai.” Tang bala pemesai iya, enggau indu nya mujuk iya makai. Nyau kelama, nya baru iya nurutka jaku sida, angkat ari tanah, lalu duduk ba katil. Indu nya lalu beguai-guai munuh siku anak sapi, ti udah digalau iya. Udah nya iya lalu ngambi tepung, nyendiaka tepung nya, lalu manggang roti ti enda beragi. Iya lalu ngenahka pemakai nya di mua Saul enggau bala pemesai iya makai. Sida lalu makai. Malam nya sida lalu mupuk. Orang Pilistin lalu ngempuruka semua bala soldadu sida di Apek, lalu orang Israel nirika kem sida ba mata ai ba Lebak Jesril. Raja orang Pilistin ke lima iku nya lalu mansang mai bala sida, beratus iku enggau beribu iku dalam siti-siti raban. David enggau bala iya bejalai di belakang, sama enggau Raja Akis. Bala kepala soldadu orang Pilistin tepedaka seduai iya, lalu nanya, “Nama pengawa orang Hebrew nya ditu?” Akis lalu nyaut, “Iya tu David, siku pemesai Raja Saul orang Israel. Iya endang lama udah enggau aku. Aku nadai kala nemu iya bisi udah ngereja penyalah kenyau ari iya datai ngagai aku.” Tang bala tuai soldadu orang Pilistin pedis ati ngagai Akis, lalu ku sida bejaku enggau iya, “Asuh orang nya pulai ngagai nengeri ti udah diberi nuan ngagai iya. Anang ngasuh iya enggau kitai beperang. Kada enda iya deka nguing ngelaban kitai lebuh kitai bamuk lagi. Tu peluang ti manah kena iya munuh bala kitai lalu minta diri dikerinduka tuan iya. Iya tu David, orang ke dipuji sida ke indu ngena lagu lebuh sida betanda, “Saul udah munuh beribu iku, tang David udah munuh bepuluh ribu iku.’ ” Akis lalu mesanka David, lalu ku iya bejaku enggau David, “Aku besumpah dalam nama Allah Taala ti idup, ke disembah orang Israel. Nuan udah taluk ngagai aku. Aku endang gaga ati deka mai nuan mansang beperang. Aku nadai kala nemu nuan bisi udah ngereja penyalah kenyau ari nuan datai kitu ngagai aku. Tang sida raja ti bukai enda ngasuh nuan. Nya alai, pulai meh nuan enggau selamat ke rumah, lalu anang ngereja utai ti tau ngasuh sida enda lantang ati.” David lalu nyaut, “Nama penyalah aku, tuan? Enti munyi ku nuan, aku endang nadai udah kala ngereja penyalah kenyau ari terubah hari aku bekereja ke nuan, nama kebuah aku enda tau enggau nuan ngelaban munsuh nuan? Nuan endang tuan enggau raja aku.” “Aku besetuju,” ku Akis nyaut. “Aku ngira nuan taluk baka melikat Allah Taala. Tang sida raja ti bukai udah bejaku madahka nuan enda tau enggau kami beperang. Nya alai, David, semua kita ke udah ninggalka Saul lalu udah datai ngagai aku, angkat tumu pagila, lalu mupuk ari tu rerak tawas pagila.” Nya alai David enggau bala iya lalu mupuk tumu pagi hari siti, deka mulaika diri ngagai menua Pilistin. Orang Pilistin lalu mupuk ngagai Jesril. Dua hari udah bekau nya, David enggau bala iya lalu datai baru di Siklak. Orang bansa Amalek udah nyerang selatan menua Judah, enggau nengeri Siklak, nunu nengeri nya lalu nangkap semua orang ke indu. Sida nadai munuh orang, tang nabanka semua orang lebuh sida ninggalka nengeri nya. Lebuh David enggau bala iya datai dia, sida nemu nengeri nya udah ditunu, lalu bini sida, anak lelaki enggau anak indu sida udah ditabanka munsuh. David enggau bala iya lalu enda ngetu-ngetu nyabak datai ke sida nyau lepi. Indah bini David ke dua iku, Ahinoam seduai Abigail, deh ditabanka munsuh. David balat tusah, laban bala iya balat amat ringat ketegal sida lenyau anak bini, lalu sida deka nuku iya ngena batu. Tang David bekering ba TUHAN Allah Taala iya. Lalu ku David bejaku enggau Imam Abiatar anak Ahimelek, “Bai epod kitu ngagai aku.” Abiatar lalu mai epod ngagai iya. David lalu betanya ngagai TUHAN, “Kati tau aku ngagai bala perumpak nya? Kati aku ulih tetitihka sida?” Ku TUHAN nyaut, “Titihka sida. Nuan ulih tetitihka sida, lalu ngelepaska bala orang ke ditangkap sida.” Nya alai David enggau enam ratus iku bala iya lalu mupuk. Lebuh sida datai ba sungai Besor, sekeda sida lalu tinggal dia. David enggau empat ratus iku bala iya lalu majakka pejalai sida. Nyadi sida ke dua ratus iku nya nyau kelalu lelak, enda ulih meraka sungai nya, lalu sida ninggalka diri. Bala David lalu tetemuka siku orang Ejip di menua nya, lalu sida mai iya ngagai David. Sida meri iya makai enggau ai irup, meri iya salai buah ara mimit, enggau dua gupung salai buah anggur. Lebuh iya udah badu makai, iya lalu berasai kering baru. Iya nadai makai, nadai ngirup tiga hari terit. David lalu nanya iya, “Sapa nama tuan nuan, lalu ari ni penatai nuan?” “Aku tu orang Ejip, ulun orang Amalek,” ku iya nyaut. “Tuan aku ninggalka aku tiga hari tu udah, laban aku sakit. Kami udah ngerumpak menua Kereti di selatan menua Judah, enggau menua raban peturun Kalep, lalu kami nunu Siklak.” “Kati nuan deka nguluka aku ngagai bala perumpak nya?” ku David nanya iya. “Ka, enti nuan besemaya dalam nama Allah Taala, enda munuh aku, tauka nyerahka aku ngagai tuan aku,” ku iya nyaut. Iya lalu nguluka David ngagai sida. Nyadi bala perumpak nya udah ngachir ba sebelah menua nya, makai, ngirup, lalu ngerami diri ti udah ngerampas mayuh amat perapasan ari menua Pilistin enggau menua Judah. Tumu pagi hari siti, David lalu nyerang sida, ngelaban sida nyentuk ngagai lemai hari nya. Kelimpah ari empat ratus iku orang ke nepan unta, ke ngerarika diri, nadai siku sida ulih rari. David lalu ngambi pulai baru semua orang enggau semua utai ti udah ditabanka orang Amalek, nyengkaum bini iya ke dua iku. Utai sida nadai lenyau siti. David lalu mai semua anak lekaki enggau anak indu bala iya pulai, enggau semua utai ti udah dirampas orang Amalek. Iya mega ngambi pulai baru semua jelu bedus, enggau semua jelu sapi. Bala iya lalu ngasuh raban jelu tupi bejalai dulu ari sida. Ku sida, “Tu enggi David magang!” Udah nya David lalu pulai ngagai dua ratus iku bala iya ke kelalu lepi bejalai enggau iya, lalu udah ninggalka diri ba sungai Besor. Sida mansang ngambat David enggau bala iya. David lalu mansang ngagai sida, lalu betabi enggau sida, gaga ati. Tang sekeda orang ke jai, ti udah bejalai enggau David lalu bejaku, “Sida nadai bejalai enggau kitai, nya alai kami enggai meri sida perapasan ti udah ulih kami, tang sida tau ngambi bini enggau anak sida, lalu angkat ari tu.” Tang ku David nyaut, “Menyadi, enggai nyadi kita baka nya enggau utai ti udah diberi TUHAN ngagai kitai! Iya udah nyaga kitai, lalu udah nyerahka bala perumpak ngagai jari kitai. Nadai orang deka mendingka kita ba pekara tu! Semua utai enda tau enda dibagi bela. Orang ke tinggal ngemataka bekal, diberi ungkup ngemayuh enggi orang ke enggau beperang.” David ngaga tu nyadika adat, lalu berengkah ari nya, adat nya mengkang dititihka orang Israel. Lebuh David pulai ngagai Siklak, iya ngirumka sekeda perapasan nya ngagai pangan iya, iya nya bala tuai orang Judah, ngena pesan tu, “Tu pemeri ke nuan, ari perapasan ti udah dirampas aku ari bala munsuh TUHAN.” Iya ngirumka utai nya ngagai orang di Betel, orang di Ramah di selatan menua Judah, enggau ngagai orang di nengeri Jatir, Aroer, Sipmot, Estemoa, enggau di Rakal, ngagai raban peturun Jerahmil, Ken, enggau ngagai orang di nengeri Hormah, Borasan, Atak, enggau Hebron. Iya ngirumka utai nya ngagai semua endur ti udah ditengah iya enggau bala iya. Nyadi orang Pilistin bamuk ngelaban orang Israel ba Bukit Gilboa. Mayuh amat orang Israel mati dia. Orang Pilistin lalu ulih tetitihka Saul enggau anak lelaki iya, lalu munuh Jonatan, Abinadap, enggau Malkisua, anak lelaki Saul ke tiga iku. Balat amat orang bamuk ngelingi Saul, lalu Saul empu kena laban laja munsuh, lalu balat amat bakal. Ku iya bejaku enggau nembiak ke mai senyata iya, “Sintak pedang nuan, lalu rejangka pedang nya ngagai aku, enggai ke orang kapir nya beduan aku.” Tang nembiak nya enggai. Nya alai Saul lalu ngambi pedang iya empu, lalu ngerejang diri ngena pedang nya. Lebuh nembiak nya meda Saul udah mati, iya mega ngerejang diri ngena pedang iya empu, lalu mati sama enggau Saul. Nya meh gaya Saul, anak lelaki iya ke tiga iku, nembiak ke mai senyata ke iya, enggau semua bala Saul mati sehari nya. Lebuh orang Israel ke ba sepiak-sepiak Lebak Jesril, enggau di timur Sungai Jordan, ninga bala soldadu orang Israel udah rari, lalu Saul enggau bala anak iya udah mati, sida lalu ninggalka nengeri sida, lalu rari. Udah nya orang Pilistin datai, lalu nguan nengeri nya. Sehari udah bekau sida ke bamuk, orang Pilistin lalu ngambi utai ari bangkai orang ke mati. Sida lalu nemu bangkai Saul enggau anak lelaki iya ke tiga iku ba Bukit Gilboa. Sida mumpung pala Saul, muka baju kebal iya, lalu ngasuh bala seruan mai utai nya ngagai semua menua Pilistin, madahka berita manah nya ngagai engkeramba enggau ngagai orang Pilistin. Udah nya sida ngengkahka senyata Saul dalam rumah sembiang petara Astarte, lalu ngelantakka bangkai iya ba dinding nengeri Bet-san ngena paku lawang. Tang lebuh orang di Jabes, di menua Giliat ninga utai ti udah dikereja orang Pilistin ngagai Saul, semua orang ke berani angkat lalu bejalai semalam-malam nya ngagai Bet-san. Sida nurunka bangkai Saul enggau anak lelaki iya ari dinding nya, mai sida pulai baru ngagai Jabes, lalu nunu bangkai sida dia. Udah nya sida ngambi tulang sida, lalu nguburka tulang nya di baruh kayu tamaris di nengeri nya, lalu bepasa tujuh hari. Udah bekau pemati Saul, lebuh David pulai ari ti ngalahka orang Amalek, iya diau di Siklak dua hari. Hari siti siku lelaki datai ari kem sida Saul. Gari iya nyau charik lalu pala iya udah dikerabuka enggau amau. Lebuh iya datai di mua David, iya nyungkurka diri ke tanah, masa David. David lalu nanya iya, “Ari ni penatai nuan?” Orang nya lalu nyaut, “Aku udah rari ari kem orang Israel.” Lalu ku David bejaku ngagai iya, “Kati ku baka utai? Padahka ngagai aku.” Orang nya lalu nyaut, “Bala soldadu kami udah rari ari endur alai kami ke bamuk ngelaban munsuh. Mayuh amat bala kami mati. Saul enggau anak iya Jonatan mega mati.” David lalu nanya iya, “Baka ni ku nuan nemu Saul enggau Jonatan udah mati?” Ku orang nya nyaut, “Nyadi aku bisi ba Bukit Gilboa, lalu aku tepedaka Saul ngenjingka diri bediri, bekering ba sangkuh iya, lalu kerita perang enggau bala soldadu munsuh ke nepan kuda ngelulung iya. Lebuh iya nguing kebelakang, iya lalu tepedaka aku. Iya ngangauka aku, lalu aku nyaut, ‘Tuan!’ Lalu ku iya bejaku ngagai aku, ‘Sapa nuan?’ Aku lalu madahka diri bansa orang Amalek. Lalu ku iya bejaku ngagai aku, ‘Datai kitu, lalu bunuh aku. Aku balat bakal, tang lalu apin mati.’ Nya alai aku lalu mansang ngagai iya, lalu munuh iya, laban aku nemu iya enda ulih idup, lebuh iya udah rebah. Udah nya aku lalu ngambi makota ari pala iya, enggau gelang ari lengan iya, lalu aku mai utai nya ngagai nuan, tuan.” David muka lalu nyarikka gari diri; lalu semua bala iya mega nunda iya; lalu sida nyabak, ngulit, sereta bepasa nyentuk ngagai lemai hari nya ke Saul enggau Jonatan, enggau ke bala soldadu TUHAN enggau ke orang Israel, laban sida udah mati beperang. David lalu nanya nembiak ti udah mai berita nya ngagai iya, “Ari ni penatai nuan?” Nembiak nya lalu nyaut, “Aku diau ditu, tang aku bansa orang Amalek.” David lalu nanya iya, “Baka ni ku nuan enda takut munuh raja ti udah dipilih TUHAN?” David lalu ngangauka siku ari bala iya, lalu ku iya bejaku, “Bunuh iya!” Orang nya lalu mantap orang Amalek nya, balat amat ngemakalka iya. Lalu ku David bejaku ngagai orang Amalek nya, “Nuan empu betanggungjawapka pemati diri; laban mulut nuan empu udah besaksi ngelaban nuan, lebuh nuan madahka diri udah munuh raja ke dipilih TUHAN.” David lalu nyabakka Saul seduai Jonatan, lalu iya ngasuh leka sabak nya diajar ngagai orang Judah. (Leka sabak nya bisi ditulis dalam Bup Jasar.) Ku iya: “Bala tuai kami udah mati ba sebelah munggu menua Israel! Soldadu kami ke pemadu berani udah rebah! Anang nusui berita nya di Gat tauka ba jalai raya di Askelon. Anang ngasuh indu orang di menua Pilistin gaga. Anang nejuka anak indu orang bansa bukai rami gaga. “Awakka bukit Gilboa enda ditinggang ujan tauka ambun. Awakka tanah di menua nya nadai tumbuh utai! Laban terabai orang ke berani mengkang dia kena pechat. Terabai Saul enda agi dipugar ngena minyak. Panah Jonatan munuh, pedang Saul enda kala mai pengasih, numbangka orang ke kering, munuh munsuh. “Saul seduai Jonatan, orang ke badas sereta dikesayauka, idup begulai, mati begulai, laju agi ari menaul, kering agi ari singa. “Indu orang Israel, ngulit meh kita ke Saul! Iya udah meri kita gari ti mirah-redam lalu ngias kita ngena batu ti berega enggau emas. “Bala soldadu ti berani, udah rebah. Sida mati beperang. Jonatan garing-garing mati ba bukit. “Aku nyabakka nuan, menyadi aku Jonatan. Naka meh pemalat aku sayauka nuan! Pengerindu nuan ke aku endang amat besai, lebih agi ari pengerindu sida ke indu. “Bala soldadu ti berani, udah rebah, lalu senyata sida ditinggalka, nadai tau diguna agi.” Udah bekau nya, David lalu betanya ngagai TUHAN, “Kati tau aku mansang ngagai sebuah nengeri di menua Judah?” “Tau,” ku TUHAN nyaut. “Nengeri ni?” ku David nanya. “Hebron,” ku TUHAN madahka. Nya alai David mupuk ngagai Hebron, mai bini iya ke dua iku: Ahinoam ke asal ari Jesril, enggau Abigail, balu Nabal, ke asal ari Karmel. Iya mega mai bala orang ke enggau iya, sereta enggau ruang bilik sida, lalu ngasuh sida diau ngentapka diri di nengeri ti mit ngelingi Hebron. Udah nya orang ari menua Judah mansang ngagai Hebron, lalu nata David nyadi raja menua Judah. Lebuh David ninga orang di Jabes ti di menua Giliat udah nguburka Saul, iya lalu ngasuh sekeda orang mansang ngagai nengeri nya mai pesan tu: “Awakka TUHAN merekatka kita, laban kita udah ngayanka diri taluk ngagai raja kita lalu nguburka iya. Nya alai, awakka TUHAN diatu nelap enggau kita sereta tetap ati ngagai kita. Aku empu deka mega manah enggau kita, ketegal utai ti udah dikereja kita. Kita enda tau enda kering sereta berani! Raja kita, Saul, udah mati lalu orang Judah udah nata aku nyadi raja sida.” Kepala soldadu Saul, Abner anak Ner enggau anak lelaki Saul ke benama Is-boset udah ngerarika diri, lalu meraka Sungai Jordan mansang ngagai Mahanaim. Dia Abner lalu nyiri Is-boset nyadi raja menua Giliat, Aser, Jesril, Epraim, enggau Benjamin, enggau semua menua Israel. Umur Is-boset empat puluh taun lebuh iya dichiri nyadi raja menua Israel, lalu iya merintah dua taun. Tang raban bansa Judah taluk ngagai David, lalu David megai perintah menua Judah di Hebron tujuh taun setengah. Abner enggau bala pemesai perintah Is-boset mansang ari Mahanaim ngagai nengeri Gibeon. Joap (indai iya Seruiah), enggau bala pemesai David ti bukai lalu betemu enggau sida ba telaga di Gibeon, alai sida ke duduk betunga mua enggau pangan diri bentaraka telaga nya. Ku Abner bejaku enggau Joap, “Awakka bala nembiak kitai ari sepiak-sepiak belaban di mua kitai.” “Barang ku jaku,” ku Joap nyaut. Nya alai dua belas iku lelaki ke ngarika Is-boset enggau raban bansa Benjamin, lalu ngelaban dua belas iku lelaki ari bala David. Siku-siku sida lalu mulaska pala pangan, lalu ngerejangka pedang ngagai rusuk pangan diri. Semua dua puluh empat iku sida rebah lalu mati magang. Nya alai endur di Gibeon nya dikumbai “Padang Mata Pedang.” Udah nya sida lalu bamuk balat amat, lalu Abner enggau orang Israel alah laban bala David. Anak Seruiah ke tiga iku bela bisi dia magang: Joap, Abisai, enggau Asahel. Asahel ke belanda laju baka rusa lalu terus belanda nitihka Abner. Abner malik kebelakang, lalu bejaku, “Kati nya nuan Asahel?” “Aku meh tu,” ku Asahel nyaut. “Badu agi ngagai aku!” ku Abner. “Alai nuan belanda ngagai siku ari bala soldadu lalu ambi utai ari iya.” Tang Asahel majak belanda ngagai Abner. Abner lalu bejaku baru ngagai Asahel, “Badu agi ngagai aku! Nama kebuah nuan mejalka aku munuh nuan? Baka ni ku aku ulih ngayanka mua diri ngagai menyadi nuan Joap?” Tang Asahel enggai badu begagaika Abner. Nya alai Abner ngerejangka sangkuh iya kebelakang ngagai perut Asahel, ngebuska tubuh Asahel. Asahel rebah lalu mati, lalu semua orang ngetu magang lebuh sida datai ba endur alai Asahel ke rebah. Tang Joap enggau Abisai lalu belabuh begagaika Abner. Ba urung padam mata panas, seduai iya datai ba Bukit Amah, tunga ke timur Giah, ba jalai ti nuju ngagai menua puang di Gibeon. Bala orang Benjamin begempuru ngelingi Abner baru, lalu nan ba tuchung bukit nya. Abner lalu ngangauka Joap, “Kati kitai enda tau enda belaban belama iya? Kati nuan enda nemu, ba pengujung iya ila, kitai nadai bulih penguntung ari pengawa tu, tang semina ati ti pedis aja? Kami tu kaban belayan nuan. Ni pengelama baru nuan ngasuh bala nuan badu agi begagaika kami?” Joap lalu nyaut, “Aku besumpah dalam nama Allah Taala ti idup, enti nuan enda bejaku tadi, bala aku tetap deka majak begagaika nuan nyentuk ngagai rerak tawas pagila.” Udah nya Joap lalu nyepu terumpit, kena iya nagang bala iya begagaika orang Israel. Sida lalu badu agi belaban. Abner enggau bala iya lalu bejalai nengah Lebak Jordan semalam-malam nya, lalu meraka Sungai Jordan, lalu lebuh sida udah bejalai sepagi hari siti, sida lalu datai baru di Mahanaim. Lebuh Joap badu agi begagaika Abner, iya ngempuruka semua bala iya, lalu nemu semilan belas iku sida udah mati nambahka Asahel. Bala David udah munuh tiga ratus enam puluh iku bala Abner ari raban bansa Benjamin. Joap enggau bala iya lalu mai bangkai Asahel, lalu nguburka iya ba lumbung sida sebilik di Betlehem. Udah nya sida bejalai semalam-malam nya, lalu datai baru di Hebron tumu pagi hari siti. Bala soldadu ke nyukung ruang bilik Saul, enggau bala soldadu ke nyukung ruang bilik David, lama amat beperang ngelaban pangan diri. Lebuh David mansang kering-sekering, bala munsuh iya mansang lembut-selembut. Tu nama anak David ke diperanakka di Hebron, nitihka ripih penuai sida: Amnon, diadaka Ahinoam ke asal ari Jesril; Chileap, diadaka Abigail, balu Nabal, ke asal ari Karmel; Absalom, diadaka Maakah, anak indu Raja Talmai ari Gesur; Adonijah, diadaka Hagit; Sepatiah, diadaka Abital; Itrim, diadaka Elgah. Semua anak iya tu diadaka di Hebron magang. Lebuh perang majak nyadi entara bala soldadu David enggau bala soldadu ke taluk ngagai ruang bilik Saul, kuasa Abner mansang besai agi ari kuasa semua orang bukai ke nitihka Saul. Nyadi sekali, Is-boset anak Saul betenah ngumbai Abner bisi udah tinduk enggau indu simpan Saul ke benama Rispah anak Aiah. Abner lalu pedis ati ninga jaku Is-boset, lalu ku Abner bejaku, “Kati nuan ngumbai aku ukui bekereja ke orang Judah? Kenyau ari pun menya, aku endang taluk ngagai apai nuan Saul, enggau ke bala kaban belayan iya, sereta enggau bala pangan iya, lalu aku udah nulung nuan, enggai ke nuan alah laban David. Tang, sehari tu nuan besalahka aku, ngumbai aku bekendak enggau indu! Is-boset balat amat takutka Abner, datai ke nyau enda berani bejaku agi. Abner lalu ngasuh bala seruan betemu enggau David, ke benung di Hebron lebuh maya nya, lalu ngasuh sida nyebut jaku tu ngaga David: “Sapa orang ke deka megai perintah di menua tu? Gaga siti sempekat enggau aku. Aku deka nulung nuan mai semua orang Israel ngalih ari nuan.” “Manah meh nya!” ku David nyaut. “Aku deka ngaga siti sempekat enggau nuan, tang nuan enda tau enda ngereja siti utai ke aku: nuan enda tau enda mai anak indu Saul, Mikal, ngagai aku lebuh nuan datai betemu enggau aku.” David mega ngasuh bala seruan iya mai pesan ti munyi tu ngagai Is-boset, “Beri pulai baru ngagai aku bini aku Mikal. Aku udah meli iya ngena seratus iti ujung kulup orang Pilistin, kena aku ngambi iya nyadika bini aku.” Is-boset lalu ngasuh orang ngambi Mikal ari laki iya Paltiel anak Lais. Paltiel nitihka Mikal enggau sabak serantu jalai ngagai nengeri Bahurim. Tang lebuh Abner bejaku, “Pulai nuan,” Paltiel lalu pulai. Abner lalu mansang ngagai bala tuai orang Israel, lalu ku iya bejaku enggau sida, “Kita lama udah inginka David nyadi raja kita. Tu meh peluang kita. Kingatka utai ti udah disebut TUHAN, ‘Aku deka ngena nembiak Aku David ngelepaska orang Israel ari orang Pilistin, enggau ari semua munsuh sida.’ ” Abner mega bejaku enggau orang Benjamin. Udah nya iya mansang ngagai Hebron, deka madahka utai ti deka dikereja orang Benjamin enggau orang Israel. Lebuh Abner enggau dua puluh iku orang datai ngagai David di Hebron, David lalu nyendiaka pengerami makai besai ke sida. Ku Abner madahka ngagai David, “Aku diatu deka mupuk lalu mai semua orang Israel ngalih ari Tuan Raja. Sida deka nerima nuan nyadi raja. Nya baru nuan deka bulih utai ti endang seruran dikinginka nuan, lalu merintah semua menua tu.” David ngasuh Abner mupuk, lalu iya mupuk. Lebuh maya nya, Joap enggau bala pemesai David ti bukai datai pulai ngayau, mai mayuh amat perapasan. Tang Abner nadai agi di Hebron enggau David, laban David udah ngasuh iya mupuk enggau selamat. Lebuh Joap enggau bala iya datai, orang lalu madahka ngagai iya pasal Abner ti udah betemu enggau Raja David, lalu udah diasuh mupuk enggau selamat. Joap lalu betemu enggau raja, lalu bejaku enggau iya, “Nama utai tu ti udah dikereja nuan, Tuan Raja? Abner datai ngagai nuan. Nama kebuah nuan nejuka iya mupuk baka nya? Iya datai ditu laban iya deka nipu nuan, deka nemu semua utai ti dikereja nuan, enggau tunga pejalai nuan. Nuan tentu nemu nya!” Lebuh iya udah mupuk ari istana David, Joap lalu ngasuh seruan iya ngambi Abner. Sida lalu mai Abner pulai baru ari Telaga Sirah. Tang David nadai nemu nya. Lebuh Abner datai di Hebron, Joap lalu mai iya ke tisi ba pintu penama nengeri nya, ngaga diri baka ke deka bejaku enggau iya kediri. Dia iya lalu ngerejang Abner ba perut. Abner dibunuh, laban iya udah munuh menyadi Joap ke benama Asahel. Lebuh David ninga berita nya, iya lalu bejaku, “ TUHAN nemu aku enggau bala nembiak aku endang nadai enggau orang munuh Abner. Awakka Joap enggau sida sebilik diukum ketegal penyalah nya! Awakka genap serak ari peturun Joap enda tau enda bisi orang ke kena laban penyakit ranas, tauka penyakit kulit ti tau ngerampit, tauka semina nemu ngereja pengawa ti dikereja orang ke indu, tauka mati beperang, tauka enda chukup pemakai!” Nya meh chara Joap enggau menyadi iya Abisai malas Abner ti udah munuh menyadi seduai iya Asahel, lebuh sida beperang di Gibeon. Udah nya David lalu ngasuh Joap enggau bala iya nyarikka gari diri, ngerasukka kain guni, lalu ngulitka Abner. Lalu lebuh sida nganjung Abner ke kubur, Raja David bejalai ngentudika sentubung Abner. Abner dikuburka di Hebron, lalu Raja David nyabak duie-duie ba kubur nya, lalu baka nya mega orang bukai. Ku David nyabakka Abner: “Nama kebuah Abner enda tau enda mati baka orang ke beli? Jari iya enda ditanchang, Lalu kaki iya enda diberekas. Iya mati baka orang ke dibunuh orang ke jai!” Orang mayuh lalu nyabakka iya baru. Sehari nya orang mujuk David makai, tang iya besumpah, “Awakka Allah Taala munuh aku enti aku bisi makai utai sebedau padam mata panas sehari tu!” Sida ngingatka jaku nya, lalu sida gaga ati. Iya ti bendar, semua utai ti dikereja raja, ngenyenangka ati orang Israel. Semua bala David enggau semua orang Israel endang nemu raja sigi nadai enggau orang munuh Abner. Ku raja bejaku enggau bala pemesai iya, “Kati kita enda nemu, sehari tu siku tuai ti tinggi pangkat di menua Israel, udah mati? Taja pen aku tu raja ti udah dipilih Allah Taala, tang aku berasai lembut tulang sehari tu. Bala anak Seruiah tu kelalu mangah. Awakka Allah Taala ngukum orang ke jai nya nitihka utai ti udah dikereja sida!” Lebuh Is-boset anak Saul ninga Abner udah dibunuh orang di Hebron, iya lalu takut, lalu semua orang Israel irau ati magang. Is-boset bisi dua iku pemesai ke nguluka orang ngayau, Banah anak Rimon enggau menyadi iya Rekap. Seduai tu datai ari Berot, ari raban bansa Benjamin. (Berot nya dikira sebagi ari menua Benjamin. Orang ke asal diau dia udah rari ngagai Gitaim, alai sida ke diau kenyau ari maya nya menya nyentuk ngagai diatu.) Siku agi peturun Saul nya Mepiboset anak Jonatan, ke umur lima taun lebuh Saul seduai Jonatan mati. Lebuh berita pasal pemati Saul seduai Jonatan didinga orang di nengeri Jesril, orang ke ngibun Mepiboset lalu rari nabanka Mepiboset. Tang Mepiboset labuh, laban orang ke ngibun iya kelalu beguai rari, lalu laban iya labuh, Mepiboset nyadi tachat enda tau bejalai. Rekap seduai Banah mansang ngagai rumah Is-boset, lalu datai dia ba urung tengah hari, lebuh Is-boset benung belelak tengah hari nya. Nyadi indu ke nyaga mua pintu rumah nya milih gandum, tang iya nyau ngantuk lalu tinduk. Rekap seduai Banah lalu begadai-gadai tama ngagai rumah nya, baka ke deka ngambi gandum, lalu ngerejang perut Is-boset. Udah nya Rekap enggau menyadi iya lalu rari. Nyadi seduai iya udah tama ngagai rumah nya lebuh Is-boset benung gali ba katil iya; seduai iya ngamuk iya lalu munuh iya, mumpung pala iya, lalu nabanka pala iya semalam-malam nya nengah Lebak Jordan. Seduai iya lalu nyerahka pala Is-boset ngagai Raja David di Hebron. Ku seduai iya bejaku enggau raja, “Tu pala Is-boset, anak munsuh nuan Saul, ti udah nguji munuh nuan. Sehari tu TUHAN udah nejuka Tuan Raja malas penyai Saul enggau peturun iya.” Ku David nyaut seduai iya, “Dalam nama TUHAN ti idup, ti udah nebus aku ari semua penusah, aku besumpah, lebuh seruan datai ngagai aku di Siklak lalu madahka Saul udah mati, iya ngumbai diri mai berita ti manah. Tang aku nangkap iya, lalu munuh iya. Nya meh upah ti diberi aku ngagai iya ke ngumbai diri mai berita ti manah nya! Tang naka meh pemalat ukum ti deka diberi aku ngagai orang ke munuh orang ke nadai penyalah, ke benung tinduk dalam rumah iya empu! Aku diatu deka malas seduai laban seduai udah munuh iya, lalu aku deka muai seduai abis lengis ari dunya tu!” David lalu ngasuh soldadu iya munuh seduai iya. Soldadu David lalu munuh Rechap seduai Banah. Sida netak jari enggau kaki seduai iya, lalu ngantung kaki jari seduai iya semak telaga di Hebron. Sida ngambi pala Is-boset, lalu nguburka pala nya ba lumbung Abner di Hebron. Udah nya semua tuai raban bansa orang Israel betemu enggau David di Hebron, lalu bejaku munyi tu: “Kami tu kaban belayan nuan. Indah lebuh Saul nyadi raja, deh nuan nguluka bansa kitai beperang. Lalu TUHAN udah besemaya madahka nuan deka megai perintah di menua Israel lalu ngibun kami baka pengibun bedus.” Nya meh maya David ngaga siti sempekat enggau bala tuai, lalu minta TUHAN nyadika saksi sida. Udah nya bala tuai nata pala David ngena minyak kana, kena nandaka iya diatu nyadi raja menua Israel. Umur David tiga puluh taun lebuh iya nyadi raja, lalu iya merintah empat puluh taun. Iya megai perintah menua Judah di Hebron tujuh taun setengah. Udah nya iya pindah ngagai Jerusalem alai iya ke megai perintah di menua Israel enggau menua Judah tiga puluh tiga taun. Maya pen nyau datai alai David enggau bala iya deka mupuk lalu nyerang Jerusalem. Orang Jebus ti diau dia, ngumbai David enda ulih ngalahka nengeri nya, lalu ku sida madahka ngagai iya, “Nuan enda ulih tama kitu. Indah orang ke buta enggau ti enda tau bejalai deh ulih nagang nuan tama.” ( Tang David ngalahka nengeri Sion ti bekuta nya, lalu nengeri nya dikumbai “Nengeri David.”) Ku David bejaku enggau bala iya, “Kati orang ditu bisi begedika orang Jebus baka aku ke begedika sida? Chukup begedi, datai ke kitai keras deka munuh sida? Enti bisi, awakka iya mansang nengah jalai lubang ai, lalu nyerang sida ke buta enggau ke kait-kupit nya.” (Nya kebuah orang nyebut, “Orang ke buta enggau ke kait-kupit enda tau tama ngagai rumah TUHAN.”) Lebuh sida udah ngalahka nengeri ti bekuta nya, David lalu diau dia, lalu ngumbai nengeri nya “Nengeri David.” Iya lalu ngaga nengeri ngelingi nya, belabuh ari endur alai tanah ti udah ditambun ba tisi timur bukit nya. Kuasa David nambah-menambah, laban TUHAN ti Pemadu Bekuasa bisi enggau iya. Raja Hiram di Tire lalu ngirumka bala seruan betemu enggau David. Iya mega ngirumka kayu sidar, bala tukang kayu enggau bala tukang batu ngagai David, ngambika sida ngaga sebuah istana ke iya. Ari nya David nemu TUHAN udah ngasuh iya tegap nyadi raja menua Israel, lalu ngasuh menua ti diperintah iya nyadi kaya, ke penguntung bala nembiak TUHAN. Lebuh iya udah pindah ari Hebron ngagai Jerusalem, David ngambi mayuh agi indu simpan, enggau bini bukai, lalu anak lelaki enggau anak indu iya mega nambah mayuh agi. Tu nama bala anak iya ke ada di Jerusalem: Shamua, Sobap, Natan, Solomon, Ibar, Elisua, Nepek, Japia, Elisama, Eliada, enggau Elipelet. Lebuh orang Pilistin ninga David udah dichiri nyadi raja orang Israel, bala soldadu sida lalu ngiga iya; tang lebuh David ninga nya, iya lalu nurun ngagai siti endur ti bekuta. Orang Pilistin datai ba Lebak Repaim, lalu nguan endur nya. David lalu betanya ngagai TUHAN, “Kati tau aku nyerang orang Pilistin? Kati Nuan deka ngasuh aku menang?” Disaut TUHAN, “Serang meh sida! Aku deka ngasuh nuan menang!” Nya alai David mansang ngagai Baal-perasim, lalu ngalahka orang Pilistin dia. Ku David, “ TUHAN udah ngelanggar bala munsuh aku baka ai bah.” Nya kebuah endur nya dikumbai Baal-perasim. Lebuh orang Pilistin rari, sida ninggalka engkeramba sida. David enggau bala iya lalu ngambi engkeramba nya. Udah nya, orang Pilistin pulai baru ngagai Lebak Repaim, lalu nguan endur nya baru. David lalu betanya baru ngagai TUHAN. Lalu ku TUHAN nyaut, “Anang nyerang sida muak ari tu, tang bejalai kita ngelaungka sida, lalu serang sida ari sepiak nyin, semak kayu balsam. Lebuh nuan ninga munyi rentak kaki bejalai ba puchuk kayu, nuan enda tau enda nyerang sida, laban Aku deka bejalai dulu ari kita lalu ngalahka bala soldadu orang Pilistin.” David lalu ngereja nitihka asuh TUHAN, lalu iya ulih muru orang Pilistin kenyau ari Geba terus ngagai Geser. Nyadi sekali David ngempuruka tiga puluh ribu iku soldadu ke pemadu kering di menua Israel, lalu nguluka sida ngagai Baalah di menua Judah, deka ngambi Peti Lampang Batu Adat Allah Taala, ti ngundan nama TUHAN ti Pemadu Bekuasa, ke bempu kerusi diraja atas dua iku melikat cherub ti besayap. Sida ngambi Peti nya ari rumah Abinadap ti ba bukit, lalu ngengkahka Peti nya ba sebuah kerita tarit ti baru. Kerita nya lalu diiring Usah seduai Ahio, anak Abinadap, Ahio bejalai di mua. David enggau semua orang Israel betanda sereta belagu enggau pengabis pengering sida ngemesaika TUHAN. Sida nebah belikan, engkeratung, dedumbak, cherakap enggau bebendai. Lebuh sida datai ba endur alai nungku gandum di Nakon, jelu sapi tesangkut. Usah nyapai lalu ngetanka Peti Lampang Batu Adat nya. Tekala nya TUHAN Allah Taala lalu ringat ngagai Usah, lalu munuh iya laban iya enda bebasaka Allah Taala. Usah lalu mati dia ngimbai Peti Lampang Batu Adat nya. Nya kebuah, kenyau ari nya, endur nya dikumbai Peres-usah David pedis ati, laban TUHAN udah ringat lalu ngukum Usah. David lalu takutka TUHAN. Ku iya, “Baka ni ku chara aku mai Peti Lampang Batu Adat tu diatu?” Nya alai, iya lalu mutuska runding enda nyadi mai Peti Lampang Batu Adat nya ngagai Jerusalem, tang limpang ari jalai raya, lalu mai Peti nya ngagai rumah Obet-edom, ke asal ari Gat. Peti Lampang Batu Adat nya mengkang dia tiga bulan, lalu TUHAN merekatka Obet-edom enggau sida sebilik. Lebuh Raja David ninga TUHAN udah merekatka ruang bilik Obet-edom enggau semua utai ti dikemisi iya, iya lalu ngambi Peti Lampang Batu Adat nya ari rumah Obet-edom, lalu mai Peti nya ngagai Jerusalem ngena pengerami ti besai. Lebuh orang ke ngesan Peti Lampang Batu Adat nya udah bejalai enam singkang, David lalu meri siku jelu sapi ti lelaki enggau siku anak sapi ti gemu nyadika piring. David, ke begari semina ngena kain linin ti dibelitka iya ba punggung iya, lalu betanda enggau pengabis pengering iya, ngemesaika TUHAN. Nya meh jalai iya, enggau semua orang Israel mai Peti Lampang Batu Adat nya ngagai Jerusalem, ngena panjung gaga ati enggau terumpit. Lebuh Peti nya benung dibai tama ngagai nengeri nya, Mikal anak Saul, nyenguk ari jenila, lalu tepedaka Raja David betanda sereta ngingkak di mua TUHAN, lalu Mikal mechat David dalam ati iya. Sida mai Peti nya, lalu ngengkahka iya ba endur asal iya dalam Langkau Kain ti udah didirika David alai engkah Peti nya. Udah nya iya lalu ngenjuk piring tunu enggau piring pemaik ngagai TUHAN. Lebuh iya udah tembu ngenjuk piring nya, iya lalu merekatka orang mayuh dalam nama TUHAN ti Pemadu Bekuasa, lalu nyadung pemakai ngagai sida. Iya meri ngagai genap iku orang ke lelaki enggau orang ke indu di menua Israel siti tuku roti, dagin ti udah dipanggang, enggau salai buah. Udah nya, semua orang pulai magang. Lebuh David pulai ngagai istana iya deka betemu enggau sida sebilik, Mikal pansut lalu ngambat iya. Ku Mikal, “Balat amat Raja orang Israel ngemesaika diri sehari tu tadi, ngayanka tubuh diri di mua bala indu ke bekereja ke bala pemesai iya!” Disaut David, “Aku ngereja nya kena aku ngemesaika TUHAN ti udah milih aku nyadi tuai orang Israel, lalu enda milih apai nuan enggau sida sebilik. Lalu aku deka majak betanda ngemesaika TUHAN, lalu deka ngemelika diri lebih agi ari nya. Nuan nyangka ngumbai aku nadai guna, tang sida ke indu deka muji aku!” Mikal anak Saul nadai kala bisi anak nyentuk ngagai iya mati. Raja David pen nyau diau ba istana iya empu, lalu TUHAN nyaga iya likun ari semua munsuh iya. Udah nya raja lalu bejaku enggau nabi Natan, “Aku diau dalam rumah ti digaga ari kayu sidar, tang Peti Lampang Batu Adat Allah Taala diau dalam langkau kain!” Disaut Natan, “Kereja aja sebarang utai ti ku ati nuan, laban TUHAN bisi enggau nuan.” Tang malam nya TUHAN bejaku ngagai Natan, “Alai nuan mansang ngagai nembiak Aku David, lalu padahka jaku Aku ngagai iya, “Ukai nuan ti deka ngaga rumah alai Aku diau. Kenyau ari maya Aku ngelepaska orang Israel ari menua Ejip, nyentuk ngagai diatu, Aku nadai kala diau dalam rumah. Aku udah bejalai kia-kia, diau dalam langkau kain. Sekumbang Aku ke bejalai enggau orang Israel, Aku nadai kala nanya ngagai bala tuai ti udah diletak Aku, kebuah sida apin ngaga rumah ke Aku ari kayu sidar.’ “Nya alai, padahka ngagai nembiak Aku David, Aku TUHAN ti Pemadu Bekuasa, nyebut ngagai iya, ‘Aku udah ngambi nuan ari pengawa nuan ke ngibun bedus, lalu ngasuh nuan merintah nembiak Aku Israel. Aku udah enggau nuan di sebarang endur nuan bejalai, lalu Aku udah ngalahka semua munsuh nuan, lebuh nuan majakka pejalai nuan. Aku deka ngasuh nuan beberita baka bala tuai ti pemadu bekuasa di dunya tu. Lebuh nuan mati, lalu dikuburka begulai enggau bala aki ini nuan, Aku deka ngasuh siku ari bala anak lelaki nuan nyadi raja, lalu ngaga perintah iya kering. Iya nya meh orang ke deka ngaga rumah ke Aku, lalu Aku deka netapka perintah iya meruan belama iya. Aku deka nyadi Apai iya, lalu iya deka nyadi anak Aku. Lebuh iya ngereja utai ti salah, Aku deka nganu iya, baka apai ke nganu anak diri. Tang Aku enda badu rinduka iya, baka ke udah dikereja Aku ngagai Saul, ti udah dibuai Aku, ngambika nuan ulih nyadi raja. Nuan endang deka meruan bisi peturun, lalu Aku deka ngasuh perintah nuan meruan belama iya. Perintah nuan enda nemu abis.’ ” Natan lalu madahka ngagai David semua utai ti udah dipandangka Allah Taala ngagai iya. Udah nya Raja David lalu tama ngagai Langkau Kain TUHAN, duduk lalu besampi, “ TUHAN ti Pemadu Tinggi, aku enda patut nerima utai ti udah dikereja Nuan ke aku. Kami sebilik pen enda mega patut. Tang diatu Nuan, TUHAN ti Pemadu Tinggi, ngereja utai ti lebih agi ari nya. Nuan udah ngaga siti semaya pasal peturun aku jemah ila. Lalu Nuan, TUHAN ti Pemadu Tinggi, ngasuh orang siku meda nya. Nama utai ti patut disebut aku ngagai Nuan! Nuan nemu aku, ke nembiak Nuan. Nuan ngereja semua utai tu nitihka peneka enggau juluk ati Nuan Empu kena Nuan ngajar aku. Nuan, TUHAN ti Pemadu Tinggi, endang amat besai! Nadai orang sebaka enggau Nuan. Kami endang semampai nemu Nuan Allah Taala ti siku aja. Nadai bansa di dunya tu ti sebaka enggau bansa orang Israel. Sida udah dilepaska Nuan ari pengidup sida ke nyadi ulun, lalu Nuan udah ngaga sida nyadika nembiak Nuan. Utai ti besai sereta badas, ti udah dikereja Nuan ke sida udah ngasuh berita pasal Nuan ngelekai di serata dunya. Nuan udah muru bansa bukai enggau petara sida, lebuh nembiak Nuan nyerang, iya nya orang ke udah dilepaska Nuan ari menua Ejip ngambika sida nyadi nembiak Nuan. Nuan udah ngaga orang Israel nyadika nembiak Nuan belama iya, lalu Nuan, TUHAN, udah nyadi Allah Taala sida. “Nya alai, TUHAN Allah Taala, kamatka belama iya, semaya ti udah digaga Nuan pasal peturun aku, lalu kereja meh utai ti deka dikereja Nuan. Nuan deka beberita, lalu mensia deka belama iya nyebut, ‘ TUHAN ti Pemadu Bekuasa nya Allah Taala ke disembah orang Israel.’ Lalu Nuan deka ngasuh perintah aku meruan belama iya. TUHAN ti Pemadu Bekuasa, ti Allah Taala ke disembah orang Israel! Aku berani nyebut sampi tu ngagai Nuan, laban Nuan udah mandangka semua utai tu ngagai aku ke nembiak Nuan, lalu udah madahka ngagai aku pasal Nuan ti deka ngaga peturun aku nyadi raja. Nya alai diatu, TUHAN ti Pemadu Tinggi, Nuan meh Allah Taala. Nuan endang seruran ngamatka semaya Nuan, lalu Nuan udah ngaga semaya ti manah tu enggau aku. Aku minta Nuan merekatka peturun aku, ngambika sida ulih majak dikerinduka Nuan. Nuan, TUHAN ti Pemadu Tinggi, udah besemayaka utai tu, lalu berekat ti diberi Nuan deka meruan ba peturun aku belama iya.” Nyau kelama udah bekau nya, Raja David nyerang orang Pilistin baru. Iya ngalahka sida, lalu ngerampas menua sida. Udah nya iya lalu ngalahka orang Moap. Iya ngasuh orang tangkap gali ba tanah, lalu munuh dua iku ari genap tiga iku sida. Nya alai orang Moap dipegai iya, lalu mayar chukai ngagai iya. Udah nya iya ngalahka Hadadeser anak Rehob, raja menua Sobah, lebuh Hadadeser baru deka ngambi pulai menua di Sungai Eupratis. David nangkap seribu tujuh ratus iku soldadu Hadadeser ke nepan kuda, enggau dua puluh ribu iku soldadu iya ke bejalai kaki. Iya ngalau kuda semina chukup ke seratus buah kerita perang, lalu mutuska rakat semua kuda ti bukai. Lebuh orang Siria di Damaskus ngasuh bala soldadu nulung Raja Hadadeser, David nyerang bala soldadu nya, lalu munuh dua puluh dua ribu iku sida. Udah nya iya lalu nirika kem ke soldadu iya di menua sida, lalu sida nyadi nembiak iya, lalu mayar chukai ngagai iya. TUHAN ngasuh David menang di semua endur. David ngerampas terabai emas ti dibai bala pemesai Hadadeser, lalu mai terabai nya ngagai Jerusalem. Iya mega ngerampas mayuh amat temaga ari Betah enggau ari Berotai, iya nya nengeri ti dipegai Hadadeser. Lebuh Raja Tou di Hamat ninga David udah ngalahka semua bala soldadu Hadadeser, iya lalu ngasuh anak iya Joram ngambat Raja David, sereta ngenataika jaku puji ngagai David laban iya udah ngalahka Hadadeser, ti udah suah dilaban Tou. Joram mai pemeri ti digaga ari emas, pirak enggau temaga ngagai David. Raja David lalu nyerahka utai nya ngagai TUHAN, sama enggau pirak enggau emas ti udah diambi iya ari mayuh bengkah bansa ti udah dialahka iya, nyengkaum Edom, Moap, Amon, Pilistin, enggau Amalek, sereta enggau sebagi ari perapasan ti udah dirampas iya ari Hadadeser. Berita pasal David balat agi ngelekai lebuh iya pulai udah bekau iya ti munuh lapan belas ribu iku orang Edom ba Lebak Garam. Iya nirika kem soldadu di serata menua Edom, lalu orang di menua nya nyadi nembiak iya. TUHAN ngasuh David menang di semua endur. David merintah semua menua Israel, lalu iya meri atur ti lurus sereta betul ngagai semua nembiak iya. Joap (indai iya Seruiah) nyadi tuai soldadu. Jehosapat anak Ahilut nyadi kerani raja. Sadok anak Ahitup, enggau Ahimelek anak Abiatar nyadi imam. Seraiah nyadi tukang tulis dalam kot. Benaiah anak Jehoiada nyadi tuai soldadu ke nyaga David. Lalu bala anak lelaki David nyadi imam. Nyadi sekali David nanya, “Kati sida Saul sebilik agi bisi idup? Enti bisi, aku deka ngayanka penelap aku ngagai iya, nitihka semaya aku enggau Jonatan.” Lebuh maya nya bisi siku orang gaji sida Saul sebilik ke benama Siba. Orang lalu ngasuh iya betemu enggau David. Ku raja nanya iya, “Kati nuan tu Siba?” Siba lalu nyaut, “Aku meh tu, Tuan Raja.” Raja lalu nanya iya, “Kati sida Saul sebilik agi bisi idup? Aku bisi ati deka ngayanka penaluk enggau penelap Allah Taala ngagai iya.” Disaut Siba, “Siku anak lelaki Jonatan, tang iya enda ulih bejalai.” “Dini alai iya?” ku raja nanya. “Ba rumah Machir anak Amil, di Lo-debar,” ku Siba nyaut. David lalu mesanka iya. Mepiboset anak Jonatan, uchu Saul lalu datai. Iya meremi meri tabi basa ngagai David. Ku David, “Mepiboset,” lalu ku iya nyaut, “Aku meh tu, Tuan Raja.” “Anang takut,” ku David nyaut. “Aku deka nelap enggau nuan, ketegal apai nuan Jonatan. Aku deka mulaika ngagai nuan semua tanah ti diempu aki nuan Saul, lalu nuan seruran tau makai enggau aku.” Mepiboset meremi baru, lalu ku iya, “Aku tu enda lebih ari bangkai ukui, Tuan Raja! Nama kebuah nuan manah enggau aku?” Udah nya raja lalu ngangauka Siba, ti udah nyadi orang gaji Saul, lalu bejaku enggau iya, “Aku meri ngagai Mepiboset semua utai sida Saul sebilik. Lalu nuan enggau bala anak lelaki nuan, enggau bala orang gaji nuan deka bumai ba tanah nya, ke uchu tuan nuan, lalu ngulihka pemakai ke sida sebilik. Tang Mepiboset empu deka seruran makai enggau aku.” (Siba bisi lima belas iku anak lelaki, enggau dua puluh iku orang gaji.) Siba lalu nyaut, “Aku deka ngereja semua utai ti diasuh Raja.” Nya alai Mepiboset makai ba mija raja, baka anak raja empu. Mepiboset bisi anak lelaki siku ti agi biak, ke benama Mika. Semua sida Siba sebilik nyadi orang gaji Mepiboset magang. Nya alai, Mepiboset, ke bajung ba kedua piak kaki, diau di Jerusalem, makai enggau raja. Nyau kelama udah bekau nya, Nahas raja orang Amon mati, lalu anak iya Hanun nyadi raja. Ku Raja David bejaku, “Aku enda tau enda ngayanka diri taluk ngagai Hanun, baka ke udah dikereja apai iya ngagai aku.” Nya alai David ngasuh bala seruan iya ngenataika penyinu ati iya. Lebuh bala seruan iya datai di Amon, bala tuai orang Amon lalu bejaku enggau raja Hanun, “Kati nuan ngumbai David ngasuh bala orang tu ngenataika penyinu ati ketegal iya bebasaka apai nuan? Iya ngasuh sida kitu nyadi pematau, meratika nengeri tu, ngambika iya ulih ngalahka kitai!” Hanun lalu nangkap bala seruan David, ngukur ragum sida ba sepiak mua aja, netak gari sida naka punggung, lalu ngasuh sida pulai. Tang bala sida nya kelalu malu pulai. Lebuh David ninga utai ti udah nyadi, iya lalu ngirumka pesan ngagai sida, ngasuh sida diau di Jeriko, lalu enda pulai, nganti ragum sida udah tumbuh baru. Lebuh orang Amon nemu diri udah ngaga David nyadi munsuh sida, sida lalu ngaji dua puluh ribu iku soldadu orang Siria ari Bet-rehop enggau ari Sobah, dua belas ribu iku orang ari Top, enggau seribu iku orang ari Maakah enggau raja sida empu. Lebuh David ninga nya, iya lalu ngasuh Joap enggau semua bala soldadu mansang ngelaban sida. Orang Amon pansut lalu nan ba pintu penama ngagai Rabah, iya nya indu nengeri sida, lalu sida ti bukai, nyengkaum orang Siria enggau orang ke ari Top enggau Maakah, nan di luar nengeri nya. Lebuh Joap meda bala munsuh deka nyerang iya ari mua enggau ari belakang, iya lalu milih soldadu orang Israel ti pemadu kering, lalu ngasuh sida belatur ngelaban orang Siria. Iya ngasuh menyadi iya Abisai nguluka bala soldadu ti bukai. Abisai lalu ngasuh sida belatur ngelaban orang Amon. Ku Joap bejaku enggau Abisai, “Enti nuan meda orang Siria nyau deka ulih ngalahka aku, nuan nulung aku. Lalu enti orang Amon nyau deka ulih ngalahka nuan, aku nyaup nuan. Kering sereta berani! Kitai enda tau enda bebendar belaban ngarika bansa kitai, enggau ngarika nengeri Allah Taala kitai. Awakka TUHAN ngereja utai ti manah ku ati Iya!” Joap enggau bala iya lalu mansang nyerang orang Siria. Orang Siria lalu rari. Lebuh orang Amon meda orang Siria rari, sida lalu rari ari Abisai, lalu pulai baru ngagai nengeri nya. Udah nya Joap nikal, enda nyadi nyerang orang Amon, lalu pulai ngagai Jerusalem. Lebuh orang Siria nemu diri udah alah laban orang Israel, sida lalu ngempuruka semua bala soldadu sida. Raja Hadadeser lalu mesanka bala orang Siria ti diau di timur Sungai Eupratis. Sida lalu datai ngagai Helam, diuluka Sobak, ti nyadi tuai soldadu Raja Hadadeser. Lebuh David ninga nya, iya lalu ngempuruka bala soldadu orang Israel, meraka Sungai Jordan, lalu mansang ngagai Helam, alai bala orang Siria ke belatur deka ngelaban iya. Sida lalu belaban, lalu bala soldadu orang Siria rari ari bala soldadu orang Israel. David enggau bala iya munuh tujuh ratus iku orang ke nepan kerita perang orang Siria, enggau empat puluh ribu iku soldadu ke nepan kuda. Sida mega ngemakalka Sobak. Sobak lalu mati ba endur alai sida ke betempuh. Lebuh bala soldadu raja Hadadeser nemu diri udah alah laban orang Israel, sida lalu bebaik enggau orang Israel lalu nyadi nembiak raja orang Israel. Orang Siria lalu enda agi berani nulung orang Amon. Lebuh musin bungai taun nya, maya bala raja endang selalu mansang ngayau, David ngasuh Joap enggau bala soldadu orang Israel ngalahka orang Amon, lalu ngelulung nengeri Rabah. Tang David empu mengkang di Jerusalem. Nyadi sekali, ba urung ngalih hari, David angkat ari endur alai iya ke tinduk, lalu niki ngagai perabung istana. Lebuh iya bejalai ba perabung rumah nya, iya lalu tepedaka siku indu mandi. Indu nya bajik amat gamal. David lalu ngasuh seruan iya betanyaka sapa indu nya. Iya lalu nemu nama indu nya Batseba anak Eliam. Batseba tu bini Uriah, orang Iti. David lalu ngasuh sida seruan iya mesanka indu nya, lalu iya datai ngagai David, lalu David beleman enggau iya. (Nyadi indu nya baru udah tembu nuchi diri.) Udah nya indu nya lalu pulai baru ngagai rumah iya empu. Indu nya lalu ngandung, lalu iya ngirumka pesan ngagai David, madahka diri ngandung. David lalu mesanka Joap, “Asuh Uriah orang Iti betemu enggau aku.” Joap lalu ngasuh Uriah betemu enggau David. Lebuh Uriah datai, David lalu nanyaka pasal pengerai Joap enggau bala soldadu iya, enggau pasal pemujur sida ke ngayau. Udah nya iya lalu bejaku enggau Uriah, “Alai nuan pulai ke rumah, lalu belelak enda lama.” Uriah mupuk, lalu David ngirumka siti pemeri ngagai iya. Tang Uriah enda pulai ke rumah, tang tinduk ba pintu penama ngagai istana, begulai enggau bala orang ke nyaga raja. Lebuh David ninga Uriah nadai udah pulai ngagai rumah iya empu, iya lalu nanya Uriah, “Nuan lama udah ninggalka menua. Nama kebuah nuan enda pulai ngagai rumah nuan empu?” Disaut Uriah, “Peti Lampang Batu Adat, bala orang Israel enggau bala orang Judah diau dalam langkau, lalu kepala aku Joap enggau bala pemesai iya agi diau ba kem. Nya alai baka ni ku aku nyamai pulai, makai ngirup, lalu tinduk enggau bini aku? Aku besumpah atas nama Tuan Raja enggau atas nama aku empu, aku enggai ngereja utai ti baka nya!” Ku David, “Enti pia, awakka nuan diau ditu sehari tu. Pagila aku deka ngasuh nuan mupuk.” Uriah lalu diau di Jerusalem sehari nya, enggau hari siti. David mai iya makai, lalu numi iya datai ke mabuk. Tang malam nya Uriah tinduk belapikka pua begulai enggau bala nembiak raja, lalu enda pulai ngagai rumah iya empu. Pagi hari siti David nulis surat ngagai Joap, lalu ngasuh Uriah empu mai surat nya. Ku jaku ti ditulis iya dalam surat nya, “Asuh Uriah berintai enggau orang di mua, alai orang ke balat agi belaban. Udah nya nuan nyurutka diri, lalu awakka iya kena bunuh munsuh.” Nya alai lebuh Joap ngelulung nengeri nya, iya ngasuh Uriah mansang ngagai endur alai bala munsuh endang ditemu kering. Bala soldadu munsuh lalu pansut ari nengeri nya, lalu ngelaban bala soldadu Joap. Sekeda bala pemesai David mati, nyengkaum Uriah. Udah nya Joap ngasuh orang mai berita nya ngagai David, madahka pasal sida ke bamuk. Ku Joap ngajar seruan iya, “Lebuh nuan udah madahka ngagai raja semua utai pasal kitai ke bamuk, raja nyangka deka ringat, lalu nanya ngagai nuan, ‘Nama kebuah kita mansang ngenyemak nya ngagai nengeri nya ngamuk munsuh? Kati kita enda nemu sida deka nimbakka laja ari dinding kuta? Kati kita enda ingatka chara Abimelek anak Gideon mati? Iya mati di Tebes, lebuh siku indu muai sigi batu kisar ari dinding kuta, lalu munuh iya. Nya alai, nama kebuah kita mansang ngenyemak nya ngagai dinding kuta nya?’ Enti raja nanya nuan munyi nya, padahka ngagai iya, ‘Pemesai nuan siku ke benama Uriah pen udah mega mati.’ ” Seruan nya lalu mansang betemu enggau David, lalu madahka utai ti udah diasuh Joap sebut iya. Ku iya, “Bala munsuh kitai kering agi ari bala kami, lalu sida pansut ari nengeri ngamuk kami di luar nengeri. Tang kami ulih ngansakka diri ngagai sida ngagai pintu penama nengeri nya baru. Udah nya sida lalu nimbakka laja ngagai kami ari dinding kuta, lalu sekeda ari bala pemesai raja mati, nyengkaum pemesai nuan siku ke benama Uriah.” Ku David bejaku enggau seruan nya, “Sebut jaku tu ngagai Joap, ‘Anang ngelakka pekara tu ngenusahka ati nuan, laban nadai orang nemu sapa ke mati lebuh maya perang. Pajakka serang nuan ngelaban nengeri nya, datai ke nengeri nya alah.’ Beri peransang ngagai iya.” Lebuh Batseba ninga laki iya udah mati, iya lalu ngulit. Lebuh iya udah badu ngulit, David lalu mesanka iya ngagai istana. Iya lalu ngambi Batseba nyadika bini iya. Batseba lalu ngadaka anak lelaki siku. Tang TUHAN enda rinduka utai ti udah dikereja David. TUHAN lalu ngasuh nabi Natan betemu enggau David. Natan lalu betemu enggau iya, lalu bejaku ngagai iya, ku Natan bejaku, “Nyadi sekali dalam sebuah nengeri bisi dua iku orang. Siku kaya, lalu siku seranta. Orang ke kaya nya mayuh jelu sapi enggau jelu bedus, tang orang ke seranta nya semina bisi siku aja anak domba, ti ulih iya meli. Orang ke seranta nya ngibun anak domba nya, lalu jelu nya mansang besai dalam rumah iya begulai enggau bala anak iya empu. Iya meri anak domba nya pemakai ari pemakai iya empu, meri iya ngirup ari mangkuk iya empu, lalu mangku iya. Anak domba nya nyau digaga iya baka anak indu iya empu. Nyadi sekali siku temuai datai ba rumah orang ke kaya nya. Orang ke kaya nya enggai munuh jelu iya empu kena iya nyendiaka pemakai ke temuai nya, tang ngambi anak domba orang ke seranta nya, lalu nyendiaka pemakai ke temuai iya.” David lalu ringat ngagai orang ke kaya nya. Ku iya, “Aku besumpah dalam nama TUHAN ti idup, orang ke ngereja nya patut dibunuh! Laban iya udah jai enggau orang nya; iya enda tau enda mayar empat kali lipat utai ti udah diambi iya.” Natan lalu bejaku ngagai David, “Orang nya nuan empu. Tu utai ti disebut TUHAN Allah Taala ke disembah orang Israel, ‘Aku udah nyiri nuan nyadi raja menua Israel, lalu udah ngelepaska nuan ari jari Saul. Aku udah meri perintah iya, enggau bala bini iya ngagai nuan. Aku udah nyiri nuan nyadi raja menua Israel enggau menua Judah. Enti nya enda chukup, Aku tetap deka meri dua kali mayuh agi ari nya ngagai nuan. Nya alai, nama kebuah nuan enda ngasika pesan Aku? Nama kebuah nuan ngereja utai ti jai baka nya? Nuan udah ngasuh Uriah mati beperang. Nuan nejuka orang Amon munuh iya, lalu udah nya nuan ngambi bini iya! Nya alai, dalam genap serak peturun nuan, siku orang deka mati dibunuh orang, laban nuan enda ngasika Aku lalu udah ngambi bini Uriah. Aku besumpah deka ngasuh siku ari kita sebilik ngenusahka nuan. Nuan empu deka meda penusah nya nyadi, lebuh Aku ngambi bala bini nuan, lalu meri sida ngagai orang bukai. Lalu iya deka beleman enggau sida lebuh siang hari. Nuan udah ngelalaika dosa diri, tang Aku deka ngasuh utai nya nyadi lebuh siang hari, ngambika semua orang Israel meda nya magang.’ ” David lalu bejaku, “Aku udah bedosa ngelaban TUHAN.” Natan lalu nyaut, “ TUHAN ngampun nuan. Nuan enda mati. Tang laban nuan enda bebasaka TUHAN ketegal nuan udah ngereja utai tu, anak nuan deka mati.” Udah nya Natan pulai. TUHAN lalu ngasuh anak ke diadaka bini Uriah ke David, sakit. David besampi ngagai Allah Taala, minta anak mit nya gerai. David enggai makai, lalu iya tama tiap malam ngagai bilik iya, lalu gali ba geladak semalam-malam nya. Bala pemesai ke gawa ke iya datai ngagai iya, nguji ngumbuk iya angkat, tang iya enggai angkat, lalu enggai makai enggau sida. Seminggu udah bekau nya, anak mit nya mati. Bala pemesai David takut madahka nya ngagai iya. Ku sida, “Lebuh anak mit nya agi idup, David enggai nyaut kitai lebuh kitai nyebut utai ngagai iya. Baka ni ku chara kitai madahka anak mit nya udah mati? Kada enda iya deka munuh diri!” Lebuh David meda sida betelai enggau pangan diri, iya lalu nemu anak mit nya udah mati. Nya alai iya lalu nanya sida, “Kati anak mit nya udah mati?” “Udah,” ku sida nyaut. David lalu angkat ari geladak nya, mandi, nata diri ngena minyak wangi, lalu nukar gari diri. Udah nya iya mansang ngagai rumah TUHAN meremi lalu besampi ngagai Allah Taala. Lebuh iya pulai ngagai istana, iya lalu minta utai diempa, lalu lebuh pemakai nya udah sedia, iya lalu makai. Ku bala pemesai iya bejaku enggau iya, “Kami enda meretika utai tu. Lebuh anak mit nya agi idup, nuan nyabakka iya, lalu nuan enggai makai. Tang lebuh iya udah mati, nuan angkat lalu makai!” Disaut David, “Aku amat bepasa sereta nyabak lebuh iya agi idup, laban aku ngumbai TUHAN deka kasihka aku, lalu enda nejuka anak mit nya mati. Tang diatu iya udah mati, nya alai aku nadai agi kebuah bepasa. Aku enda ulih ngasuh iya idup baru. Jemah ila aku deka datai ngagai iya, tang iya enda ulih pulai ngagai aku.” Udah nya David merindang bini iya Batseba. Iya tinduk enggau iya, lalu Batseba ngadaka anak lelaki siku. David lalu meri iya nama Solomon. TUHAN rinduka nembiak nya, lalu ngasuh nabi Natan meri nama Jedidiah ngagai nembiak nya laban TUHAN rinduka iya. Lebuh rambau nya, Joap majak nyerang Rabah, indu nengeri orang Amon, lalu ngalahka nengeri nya. Iya lalu ngasuh bala seruan betemu enggau David, lalu madahka ngagai iya, “Aku udah nyerang Rabah, lalu udah ngerampas penatai ai sida. Nya alai, gempuruka semua bala soldadu nuan ti bukai, serang nengeri nya, lalu alahka nengeri nya, enggai ke orang ngumbai aku ngalahka nengeri nya.” Nya alai David ngempuruka bala soldadu iya, mansang ngagai Rabah, nyerang lalu ngalahka nengeri nya. David lalu ngambi siti makota emas ti berat kira tiga puluh empat kilogram ari pala engkeramba petara Molek ti disembah orang Amon. Ba makota nya bisi sigi batu ti berega. David ngambi lalu ngengkahka batu ti berega nya ba makota iya empu. Iya mega bulih mayuh amat perapasan ari nengeri nya. Iya mejalka orang ke diau di nengeri nya gawa ngena penyayat, changkul besi, enggau kapak besi, lalu mejalka sida bekereja begagaka batu bata. Iya bejalaika atur nya di semua nengeri ti bukai di Amon. Udah nya, iya enggau bala iya pulai ngagai Jerusalem. Nyadi anak lelaki David ke benama Absalom bisi siku menyadi dara ti bajik gamal. Nama iya Tamar. Nyadi Amnon, siku agi anak lelaki David, bisi ati ke Tamar. Amnon nyau sakit laban iya balat merampauka menyadi iya Tamar. Laban Tamar agi dara bungas, iya enda disagi betemu enggau lelaki. Tang Amnon bisi siku pangan ti pintar. Nama iya Jonadap anak Samah. Nyadi Samah nya menyadi lelaki David. Ku Jonadap bejaku enggau Amnon, “O anak raja, nama kebuah nuan merampau diau tiap pagi? Uji padahka ngagai aku.” Disaut Amnon, “Aku rinduka Tamar, menyadi indu Absalom, menyadi-tiri aku.” Ku Jonadap bejaku enggau iya, “Uji nuan gali ba peninduk nuan, lalu ngeluluka diri sakit. Lebuh apai nuan datai ngabas nuan, sebut ngagai iya, ‘Asuh menyadi aku Tamar datai kitu, nyapi aku makai. Aku minta iya nyendiaka pemakai ke aku ditu di mua aku, lalu nyapi aku.’ ” Amnon lalu ngeluluka diri sakit, lalu gali ba peninduk iya. Lebuh Raja David datai ngabas iya, Amnon lalu bejaku enggau iya, “Aku minta nuan ngasuh Tamar datai lalu ngaga dua tiga igi kek ditu di mua aku, lalu nyapi aku.” David lalu mesanka Tamar, ku iya, “Alai nuan ngagai rumah Amnon, lalu nyendiaka pemakai ke iya.” Tamar mansang, lalu nemu Amnon gali ba peninduk iya. Tamar bisi mai tepung. Iya nyendiaka tepung nya, lalu ngaga kek mimit, dipeda Amnon empu, lalu manggang kek nya. Udah nya iya nuang kek nya ari kali ke Amnon. Tang Amnon enggai makai kek nya. Ku iya, “Asuh semua orang pansut.” Semua orang lalu pansut. Udah nya iya lalu bejaku enggau Tamar, “Bai kek nya kitu ngagai peninduk aku, lalu sapi aku.” Tamar lalu mai kek nya ngagai Amnon. Lebuh Tamar nyapika kek nya ngagai Amnon, Amnon lalu masung Tamar. Ku iya, “Aram gali enggau aku!” “Enggai aku,” ku Tamar. “Anang mejalka aku ngereja utai ti balat ngasuh malu baka tu! Utai tu kelalu jai! Baka ni ku aku ulih ngayanka mua diri ngagai orang mayuh? Lalu nuan empu deka dipechat semua orang Israel. Aku minta nuan bejaku enggau raja. Iya tentu deka nyerahka aku ngagai nuan.” Tang Amnon enggai mendingka Tamar. Lalu laban iya kering agi ari Tamar, iya ulih masung Tamar. Udah nya Amnon balat amat begedika Tamar. Iya begedika iya lebih agi ari iya ti udah rinduka iya sebedau nya. Ku Amnon bejaku enggau Tamar, “Pansut nuan ari tu!” Tang ku Tamar nyaut, “Aku enggai. Enti nuan ngasuh aku pansut baka tu, penyalah nya deka nyadi besai agi ari utai ti baru udah dikereja nuan!” Tang Amnon enggai mendingka Tamar. Iya lalu ngangauka orang gaji iya, lalu bejaku, “Bai indu tu pansut ari tu! Buai iya ke luar, lalu kunchi pintu!” Orang gaji nya lalu muru Tamar pansut, lalu ngunchi pintu. Nyadi Tamar ngena baju panjai, ti panjai lengan, ti endang dikena anak dara raja lebuh maya nya kelia. Tamar ngerabu pala iya enggau amau, nyarikka baju panjai iya, mampul mua diri, mupuk, nyabak duie-duie. Lebuh menyadi lelaki iya Absalom meda nya, iya lalu nanya, “Kati Amnon bisi udah ngachau nuan? Anang kelalu tusah ati. Iya pen menyadi nuan, nya alai anang besebutka utai tu ngagai orang.” Tamar lalu diau dalam rumah Absalom, tusah ati sereta seilu-ilu diau kediri. Lebuh raja ninga pasal utai ti udah nyadi, iya pedis ati. Lalu Absalom mega balat amat begedika Amnon laban iya udah masung menyadi indu iya Tamar, lalu Absalom enggai agi bejaku enggau Amnon. Dua taun udah bekau nya, Absalom ngasuh orang ngukur bedus iya di Baal-hasor, semak nengeri Epraim, lalu iya ngangauka semua anak lelaki raja ngabang ngagai pengawa nya. Iya mansang ngagai Raja David. Ku iya, “Tuan Raja, aku deka ngasuh orang ngukur bulu bedus aku. Kati nuan enggau bala pemesai nuan ulih datai ngagai pengerami nya?” Disaut raja, “Enda, anak, enggai ke nuan kiruh laban kami, enti semua kami datai magang.” Absalom lalu mujuk raja, tang raja enggai nurutka iya. Raja lalu ngasuh Absalom mupuk. Tang ku Absalom, “Enti nuan empu enda, abis kurang iya, lakka menyadi aku Amnon datai.” Raja lalu nanya, “Nama kebuah alai iya enda tau enda datai?” Tang Absalom balat amat mujuk raja, datai ke David nyau nejuka Amnon enggau bala anak lelaki iya ti bukai mupuk enggau Absalom. Absalom nyendiaka pengerami makai besai, baka ke nyendiaka pemakai raja lalu meri atur ngajar bala orang gaji iya: “Peda enggau manah. Lebuh Amnon udah mabuk, lalu lebuh aku ngasuh kita munuh iya, bunuh iya. Anang takut. Aku empu deka betanggungjawapka nya. Kita enda tau enda berani, lalu anang kakang ati!” Nya alai bala orang gaji lalu bejalaika atur Absalom, lalu munuh Amnon. Bala anak lelaki David ti bukai lalu nepan keledai sida, lalu rari. Lebuh sida benung di rantau jalai pulai ngagai rumah sida empu, orang lalu madahka ngagai David, “Absalom udah munuh semua anak lelaki nuan. Nadai siku sida agi idup!” Raja lalu bediri, nyarikka gari diri, lalu ngalika diri ba tanah. Bala orang gaji ke bisi enggau iya dia, mega nyarikka gari diri. Tang ku Jonadap bejaku, “Tuan Raja, sida enda munuh semua anak lelaki nuan. Semina Amnon aja ke mati. Enti nuan meda ulah Absalom, nya baru nuan nemu iya endang udah mutuska runding deka ngereja nya kenyau ari maya Amnon ke masung menyadi iya Tamar. Nya alai anang arapka berita ti madahka semua anak lelaki nuan udah dibunuh magang.” Lebuh maya nya Absalom endang udah rari. Siku soldadu ke jaga tepedaka bala orang nurun bukit nengah jalai raya ari Horonaim. Iya mansang ngagai raja, lalu madahka utai ti dipeda iya. Ku Jonadap bejaku enggau David, “Nyin bala anak lelaki nuan datai, munyi ti dipadahka aku ngagai nuan.” Lebuh iya baru udah nyebut nya, bala anak lelaki David pen datai. Sida, David enggau bala pemesai iya lalu belabuh nyabak duie-duie. Tang lebuh iya enda agi kelalu tusah ati ke Amnon, iya lalu lelengauka anak iya Absalom. Joap nemu Raja David endang balat lelengauka Absalom. Nya alai iya ngasuh siku seruan mansang ngagai Tekoa, ngambi siku indu ke pintar, ti diau di Tekoa. Lebuh indu nya datai, Joap lalu bejaku enggau iya, “Aku ngasuh nuan ngeluluka diri ngulit. Rasukka pekayan ulit nuan, lalu anang nyugu buk nuan. Keluluka diri baka ke lama udah ngulit. Udah nya, mansang nuan ngagai raja, lalu sebut ngagai iya utai ti diasuh aku sebut nuan.” Udah nya Joap lalu madahka utai ti patut disebut iya. Indu nya lalu betemu enggau raja, nyungkurka diri ke tanah masa raja. Lalu ku iya, “Tulung aku, Tuan Raja!” “Nama penusah nuan?” ku raja nanya iya. “Aku tu indu balu ke seranta, tuan,” ku iya nyaut. “Laki aku udah mati. Aku bisi dua iku anak lelaki. Nyadi sekali seduai iya belaya di umai. Orang nadai nyeraraka seduai iya, lalu siku ari seduai iya tebunuhka menyadi iya. Nyadi diatu, tuan, semua kaban belayan aku nyau ngelaban aku magang, lalu sida ngasuh aku nyerahka anak aku ngagai sida, ngambika sida ulih munuh iya laban iya udah munuh menyadi iya. Enti aku nyerahka iya ngagai sida, aku nadai agi anak. Anak aku nya ke dikarapka aku. Enti sida munuh iya, laki aku nadai purih.” “Pulai meh nuan,” ku raja nyaut. “Aku deka ngatur pekara nya.” “Tuan Raja,” ku indu nya bejaku, “Kami sebilik deka betanggungjawapka sebarang utai ti dikereja nuan. Nuan enggau ruang bilik raja sigi nadai penyalah.” Ku raja nyaut, “Enti orang bisi ngemba nuan, bai iya ngagai aku, ngambika iya enda ngachau nuan agi.” Ku indu nya bejaku, “Tuan Raja, aku minta nuan besampi ngagai TUHAN Allah Taala nuan, ngambika kaban belayan aku enda bebalaska pemati anak aku, ngambika anak aku ti siku nya enda dibunuh sida.” Disaut David, “Aku besemaya, dalam nama TUHAN ti idup, nadai penusah deka ninggang anak nuan.” “Tuan Raja, awakka aku nyebut siti agi utai,” ku indu nya bejaku. “Sebut meh,” ku raja nyaut. Ku indu nya bejaku enggau raja, “Enti pia, nama kebuah nuan ngereja utai ti salah baka nya ngagai bala nembiak Allah Taala? Laban lebuh nuan meri pemutus penemu nya, Raja ngukum diri empu, laban nuan enda ngambi anak nuan pulai baru. Semua kitai enda tau enda mati. Kitai tu baka ai ti tesiuh ngagai tanah, ti enda ulih digumpul agi. Indah Allah Taala deh enda ngangkatka orang ke udah mati pulai idup baru, tang Tuan Raja patut nemu jalai mai orang ke udah dibuai ngagai menua bukai, pulai baru. Nyadi aku datai laban aku deka nyebut tu ngagai Tuan Raja, laban jaku orang udah ngenakutka ati aku. Aku bejaku enggau Raja, nyangka ukur Raja deka ngereja utai ti dipinta aku. Laban Raja sigi deka mending, lalu ngelepaska aku ari jari orang ke nguji muai aku enggau anak aku ari menua ti diberi Allah Taala ngagai nembiak Iya. Dalam pikir aku, jaku semaya nuan, Tuan Raja, deka ngasuh pengidup aku likun, laban nuan, Tuan Raja baka melikat Allah Taala, ulih ngelala bida entara utai ti manah enggau utai ti jai. Awakka TUHAN Allah Taala nuan meruan enggau nuan!” Ku raja nyaut, “Aku deka nanyaka siti utai ngagai nuan, lalu nuan enda tau enda madahka utai ti bendar ngagai aku.” Indu nya lalu nyaut, “Tanyaka aja meh sebarang utai ti deka ditanyaka nuan, Tuan Raja.” Raja lalu nanya, “Kati Joap bisi udah ngasuh nuan ngereja utai tu?” Ku indu nya nyaut, “Aku besumpah atas nama semua utai ti kudus, Tuan Raja, aku nadai jalai nyeliahka tanya nuan nya. Siku pemesai nuan ke benama Joap udah ngasuh aku ngereja tu, lalu madahka utai ti patut disebut aku. Tang iya ngereja nya kena iya beluruska pekara tu. Tuan Raja empu endang bepenemu-dalam baka melikat Allah Taala, lalu nemu semua utai ti nyadi.” Udah bekau nya raja lalu bejaku enggau Joap, “Aku udah mutuska runding deka ngereja utai ti dipinta nuan. Mupuk meh nuan, lalu bai jang Absalom pulai kitu baru.” Joap lalu nyungkurka diri di mua David, meri basa ngagai iya. Ku iya, “Awakka Allah Taala merekatka nuan, Tuan Raja! Diatu baru aku nemu nuan rinduka aku, laban nuan udah besetujuka peminta aku.” Udah nya iya angkat, lalu mansang ngagai Gesur, lalu mai Absalom pulai ngagai Jerusalem. Tang raja meri atur, enda ngasuh Absalom diau dalam istana. “Aku enggai meda iya,” ku raja bejaku. Nya alai Absalom diau dalam rumah iya empu, lalu nadai betemu enggau raja. Nadai orang di menua Israel ke balat agi dipuji ari Absalom ketegal penyigat gamal iya. Iya nadai penimpang kenyau ari punjung pala nyentuk ngagai ujung kaki. Buk iya tebal, lalu iya nguntin buk iya sekali setaun lebuh buk nya kelalu panjai sereta berat. Pemerat buk iya kira dua kilogram, enti nitihka atur timbang ti dikena raja. Absalom bisi tiga iku anak lelaki, enggau siku anak indu ke benama Tamar. Tamar nya bajik amat gamal. Absalom diau dua taun di Jerusalem, tang iya nadai kala betemu enggau raja. Udah nya iya mesanka Joap laban iya deka ngasuh Joap nyadika pengari iya betemu enggau raja. Tang Joap enggai betemu enggau Absalom. Absalom mesanka iya baru, tang Joap mengkang enggai betemu enggau iya. Absalom lalu bejaku enggau bala orang gaji iya, “Tanah Joap ngimbai tanah aku, lalu iya bisi barli tumbuh dia. Alai kita nunu barli nya.” Sida mupuk, lalu nunu barli nya. Joap lalu mansang ngagai rumah Absalom, lalu nanya, “Nama kebuah bala nuan nunu umai aku?” Disaut Absalom, “Laban nuan enggai betemu enggau aku lebuh aku mesanka nuan. Aku deka ngasuh nuan betemu enggau raja ngarika aku, lalu mantaika tanya aku tu ngagai iya: ‘Nama kebuah aku ninggalka Gesur lalu datai kitu? Manah agi aku mengkang diau din.’ ” Lalu ku Absalom nampung jaku iya, “Aku minta nuan nulung aku, ngambika aku ulih betemu enggau raja. Enti aku bisi penyalah, awakka iya munuh aku.” Nya alai Joap mansang betemu enggau Raja David, lalu madahka utai ti udah disebut Absalom. Raja lalu mesanka Absalom. Absalom lalu betemu enggau raja, nyungkurka diri di mua iya. Raja lalu nyium iya. Udah bekau nya, Absalom nyendiaka sebuah kerita perang enggau kuda ke iya empu, enggau lima puluh iku orang nyaga iya lebuh iya bejalai. Iya selalu angkat tumu pagi, lalu bediri semak jalai raya, ba pintu kuta nengeri. Genap kali orang datai dia mai pekara ti diasuh sida putarka raja, Absalom ngangauka orang nya, lalu nanyaka penatai iya. Lebuh orang nya udah madahka raban bansa diri, Absalom bejaku munyi tu ngagai orang nya, “Nuan nadai ngelanggar adat, tang pengari ari raja nadai ditu mendingka pekara nuan.” Lalu ku Absalom nampung jaku iya, “Naka meh pemanah enti sema aku nyadi hakim! Nya baru orang ke deka bechara, tauka minta atur, tau datai ngagai aku, lalu aku deka meri sida atur ti lurus.” Lebuh orang nya mansang lalu nyungkurka diri di mua Absalom, Absalom ngunjurka jari iya lalu merap sereta nyium orang nya. Absalom ngereja nya ngagai semua orang Israel ke mansang minta atur raja. Nya chara iya nguingka ati sida ngambika sida taluk ngagai iya. Lepas empat nya Absalom lalu bejaku enggau Raja David, “Tuan, aku minta nuan ngemendarka aku mansang ngagai Hebron, laban aku deka ngamatka semaya aku enggau TUHAN. Lebuh aku diau di Gesur, di menua Siria suba, aku besemaya enggau TUHAN, enti Iya mai aku pulai baru ngagai Jerusalem, aku deka nyembah Iya di Hebron.” “Mupuk meh nuan enggau selamat,” ku raja bejaku. Absalom lalu mupuk ngagai Hebron. Tang iya ngasuh bala seruan bejalai ngagai semua raban bansa orang Israel, mai jaku tu, “Lebuh kita ninga munyi terumpit, kita enda tau enda manjung, ‘Absalom udah nyadi raja di Hebron!’ ” Dua ratus iku orang ari Jerusalem mupuk enggau Absalom; sida tu udah dipesanka Absalom, lalu sida tu mupuk nadai nemu ulu-ili. Lebuh iya benung ngenjuk piring, Absalom mega ngasuh orang mansang ngagai nengeri Gilo, madahka Ahitopel, siku ari orang ke nyadi penyanding penemu Raja David. Pengawa Absalom ti deka angkat ngelaban mansang kering-sekering, lalu bala Absalom mansang mayuh-semayuh. Siku seruan lalu madahka ngagai David, “Orang Israel besumpah madahka diri deka taluk ngagai Absalom.” David lalu bejaku enggau bala pemesai iya ke bisi enggau iya di Jerusalem, “Kitai enda tau enda mupuk diatu, enggai ke kitai enda ulih rari ari Absalom! Angkat jampat, enggai ke iya datai, ngalahka kitai, lalu munuh semua orang dalam nengeri tu!” “Au, Tuan Raja,” ku sida nyaut. “Kami sedia deka ngereja semua utai ti diasuh nuan.” Raja lalu mupuk, disempulang semua sida sebilik, kelimpah ari sepuluh iku indu simpan iya, ke ditinggalka iya, ngambika bisi ngintu istana. Lebuh raja enggau semua bala iya angkat ari nengeri nya, sida lalu ngetu ba rumah ti pengujung bendar. Semua bala pemesai iya bejalai mansa iya. Enam ratus iku bala soldadu ti udah nitihka iya ari Gat, mega mansa iya. Lalu ku raja bejaku enggau Itai, ti nyadi tuai sida, “Nama kebuah nuan mupuk enggau kami? Pulai nuan, lalu diau begulai enggau raja ke baru nya. Nuan orang bansa bukai, lalu nuan udah tasah ari menua diri. Nuan apin lama udah diau ditu. Nya alai, nama kebuah aku nejuka nuan belelang enggau aku? Indah aku empu deh enda nemu tunga pejalai diri. Nya alai pulai nuan, lalu bai semua bala nuan. Awakka TUHAN manah sereta tetap ati ngagai nuan.” Tang ku Itai nyaut, “Tuan Raja, aku besumpah dalam nama TUHAN, aku deka seruran bejalai enggau nuan, ngagai sebarang endur nuan bejalai, taja pen aku nemu diri deka mati.” “Manah meh nya!” ku David nyaut. “Mupuk meh nuan enggau kami!” Nya alai Itai mupuk enggau David, sama enggau bala iya, enggau semua sida sebilik. Orang mayuh nyau bekeduie nyabak lebuh bala David mupuk. Raja lalu meraka sungai Kidron, dientudika bala iya. Sida lalu bejalai tunga ngagai menua puang. Abiatar, Sadok enggau semua orang Lewi ngesan Peti Lampang Batu Adat TUHAN. Sida ngengkahka Peti nya datai ke semua orang udah mansa pansut ari nengeri nya. Udah nya raja lalu bejaku enggau Sadok, “San Peti Lampang Batu Adat nya pulai baru ngagai nengeri. Enti TUHAN rinduka aku, jemah ila ga Iya tau ngasuh aku pulai baru, ngambika aku ulih meda Peti Lampang Batu Adat nya baru enggau endur alai Peti nya diau. Tang enti TUHAN enda rinduka aku, nadai ku enggau. Awakka Iya ngereja sebarang utai ti dikedekaka Iya ngagai aku.” Lalu ku David nampung jaku iya ngagai Sadok, “Dinga nuan, bai anak nuan Ahimas enggau Abiatar anak Jonatan pulai ngagai nengeri enggau selamat. Aku deka nganti berita ari nuan ba pemeraka sungai di menua puang.” Sadok enggau Abiatar lalu mai Peti Lampang Batu Adat nya pulai baru ngagai Jerusalem, lalu diau dia. David lalu niki ngagai Bukit Kana, nyabak. Iya bejalai enda bekasut, lalu pala iya betudung. Semua orang ke bejalai enggau iya, mega betudung pala magang sereta nyabak. Lebuh orang madahka ngagai David Ahitopel udah ngalih ari Absalom, iya lalu besampi, “ TUHAN, aku minta Nuan ngasuh semua jaku lalau ari Ahitopel mapap magang!” Lebuh David datai ba tuchung bukit nya, ba siti endur alai besembiang, pangan ke dikarapka iya, Husai orang Arki, lalu betemu enggau iya. Gari iya charik, lalu pala iya dibalut amau. Ku David bejaku enggau iya, “Enti nuan mupuk enggau aku, nuan semina ngiruh aku ngapa. Tang enti nuan pulai ngagai nengeri, lalu madahka ngagai Absalom nuan deka taluk bekereja ke iya, baka nuan ti udah taluk bekereja ke Aku, nya baru nuan ulih nyakal semua jaku lalau ti diberi Ahitopel. Imam Sadok enggau Imam Abiatar deka bisi dia enggau nuan. Nya alai padahka ngagai seduai iya semua utai ti didinga nuan dalam istana raja. Anak seduai iya Ahimas enggau Jonatan bisi enggau seduai iya dia, lalu nuan tau ngasuh seduai iya mai ngagai aku semua utai ti didinga nuan.” Nya alai, Husai, pangan David, lalu pulai baru ngagai Jerusalem, senutuk enggau maya Absalom datai ba nengeri nya. Lebuh David baru udah melunggang tuchung bukit nya, iya lalu betemu enggau Siba, orang gaji Mepiboset, ke mai enggau iya dua iku keledai ti ngundan dua ratus iti tuku roti, seratus iti gupung salai buah anggur, seratus iti gupung buah ti baru diketau, enggau siti kambut ti penuh laban wain. Raja David lalu nanya iya, “Nama guna nuan enggau semua utai nya?” Siba lalu nyaut, “Keledai tu alai sida Raja sebilik nepan; roti enggau buah nya ke bala Raja; lalu wain nya tau diirup sida lebuh sida nyau lelak di menua puang.” “Dini alai Mepiboset, uchu tuan nuan Saul?” ku raja nanya iya. “Iya mengkang di Jerusalem,” ku Siba nyaut, “laban iya ngarapka orang Israel deka mulaika perintah aki iya Saul ngagai iya.” Raja lalu bejaku enggau Siba, “Awakka nuan bempu semua pesaka Mepiboset.” “Aku tu nembiak nuan, Tuan Raja,” ku Siba nyaut. “Awakka Tuan Raja selalu rinduka aku!” Lebuh Raja David datai di Bahurim, siku ari kaban belayan Saul, ke benama Simei anak Gera, datai betemu enggau Raja David, lalu nyumpah Raja David lebuh iya datai. Simei belabuh nikauka batu ngagai David enggau ngagai bala pemesai iya, taja pen David dikelingi bala iya enggau bala jejaga iya. Simei nyumpah iya, ku iya, “Angkat ari tu! Angkat nuan pemunuh! Nuan tu jai! Nuan udah ngerampas perintah Saul, lalu diatu TUHAN deka ngukum nuan, laban nuan udah munuh sida Saul sebilik. TUHAN udah meri perintah nya ngagai anak nuan Absalom, lalu nuan diatu deka dirusak, nuan pemunuh!” Abisai (indai iya Seruiah) lalu bejaku enggau raja, “Tuan Raja, nadai kebuah nejuka ukui tu nyumpah nuan. Awakka aku mansang ngagai iya lalu mumpung pala iya!” “Tu ukai pekara nuan,” ku raja bejaku enggau Abisai, sereta enggau menyadi Abisai ke benama Joap. “Enti iya nyumpah aku laban iya diasuh TUHAN, sapa bisi kuasa nanyaka kebuah iya nyumpah aku?” Lalu ku David bejaku enggau Abisai enggau ngagai semua pemesai iya, “Indah anak aku empu deh nguji munuh aku. Nama kebuah kita tekenyit ati meda orang Benjamin tu? TUHAN udah ngasuh iya nyumpah, nya alai anang ngachau iya. Awakka iya nyumpah. Nyangka ukur TUHAN deka meda pemerinsa aku lalu meri aku berekat, kena nganti sumpah iya.” David enggau bala iya lalu majak bejalai niti jalai nya. Simei mengkang bejalai nitihka sida, nengah serimbing bukit, nyumpah sereta betikauka batu enggau tanah ngagai sida lebuh iya bejalai. Raja enggau bala iya nyau lepi lebuh sida datai ba Sungai Jordan, Sida lalu belelak dia. Absalom, enggau semua orang Israel ke enggau iya, lalu tama ngagai nengeri Jerusalem, lalu Ahitopel pen bisi mega enggau sida. Lebuh Husai, pangan ke dikarapka David, betemu enggau Absalom, iya lalu ngangau, “Gayu-guru meh Raja! Gayu-guru meh Raja!” Absalom lalu nanya iya, “Kini ke tunga penaluk nuan ke pangan nuan David? Nama kebuah nuan enda enggau iya?” Disaut Husai, “Baka ni ku aku ulih enggau iya? Aku nitihka orang ke udah dipilih TUHAN, ti udah dipilih bala orang tu, sereta dipilih semua orang Israel. Aku diau enggau nuan. Laban, sapa ke patut dititihka aku, enti ukai anak tuan aku? Baka aku ti udah nitihka apai nuan, baka nya mega aku deka nitihka nuan.” Udah nya Absalom nguing ngagai Ahitopel, lalu bejaku, “Kala lebuh kitai agi ditu, nama utai ti patut dikereja kitai?” Ku Ahitopel nyaut, “Alai nuan beleman enggau bala indu simpan apai nuan, ti udah ditinggalka iya ngintu istana. Nya baru semua orang di menua Israel deka nemu apai nuan deka ngumbai nuan munsuh, lalu orang ke nitihka nuan deka berasai diperansang.” Nya alai sida lalu nirika siti langkau kain ba perabung istana, lalu di mua orang mayuh Absalom tama ngagai langkau kain nya lalu beleman enggau bala indu simpan apai iya. Semua jaku lalau ti diberi Ahitopel lebuh maya nya, diterima Absalom magang, indah-indah baka ke nerima jaku Allah Taala. David seduai Absalom sama nitihka jaku lalau ti diberi Ahitopel. Apin lama udah bekau nya, Ahitopel bejaku enggau Absalom, “Awakka aku milih dua belas ribu iku orang, ngambika aku nitihka David malam tu. Aku deka nyerang iya lebuh iya agi lelak, sereta lemi semengat. Iya deka panik, lalu semua bala iya deka rari. Aku deka munuh semina raja siku aja, lalu udah nya mai semua bala iya ngagai nuan, indah-indah baka bini ke pulai baru ngagai laki. Nuan semina deka munuh siku orang aja. Semua orang bukai deka likun magang.” Jaku lalau nya ngerinduka ati Absalom, enggau bala tuai orang Israel. Ku Absalom bejaku, “Pesanka Husai, awakka kitai ningaka penemu iya.” Lebuh Husai datai, Absalom lalu bejaku enggau iya, “Tu jaku lalau ti udah diberi Ahitopel ngagai kitai. Kati tau kitai nitihka jaku lalau nya? Enti enda, awakka nuan madahka utai ti patut dikereja kitai.” Husai lalu nyaut, “Jaku lalau ti diberi Ahitopel ngagai kita sekali tu, enda manah. Nuan empu nemu, apai nuan David, enggau semua bala iya endang orang ke tau serang magang, mangah baka indu beruang ti nyaga anak. Nambahka nya, apai nuan landik belaban, lalu iya enda tinduk begulai enggau bala soldadu. Diatu iya nyangka belalai dalam lubang gua, tauka ba endur bukai. Lebuh bala soldadu kitai rebah lebuh David terubah nyerang, barang sapa ninga nya, deka madahka bala nuan udah alah. Lebuh utai nya nyadi, indah orang ke pemadu berani baka singa, deh deka takut, laban semua orang dalam menua Israel nemu apai nuan endang soldadu ti kering, lalu bala iya endang orang ke kering belaban. Jaku lalau aku baka tu. Gempuruka semua orang Israel ari Dan nyentuk ngagai Beer-seba, ngemayuh igi pasir ti ba tebing tasik, lalu nuan empu enda tau enda nguluka sida beperang. Kitai deka nemu David, ba sebarang endur alai iya diau, lalu nyerang iya lebuh iya enda ngadang. Iya enggau bala iya sigi enda tau idup. Enti iya nyurutka diri ngagai nengeri, semua bala kitai deka mai tali, lalu narit nengeri nya ngambika nengeri nya runtuh. Sigi pen nadai meh batu tau ditejuka tinggal ba nengeri nya.” Ku Absalom enggau semua orang Israel bejaku, “Jaku lalau Husai manah agi ari enggi Ahitopel.” Laban TUHAN endang udah ngasuh sida enggai nitihka jaku lalau ti manah, ti diberi Ahitopel, ngambika TUHAN ngerusak Absalom. Udah nya Husai lalu madahka ngagai Imam Sadok seduai Abiatar jaku lalau ti udah diberi iya ngagai Absalom, enggau ngagai semua tuai orang Israel, enggau jaku lalau ti udah diberi Ahitopel. Lalu ku Husai, “Angkat jampat diatu! Bai pesan ngagai David. Iya enda tau bemalam ba pemeraka sungai di menua puang. Iya enda tau enda meraka Sungai Jordan diatu, ngambika iya enggau bala iya enda semua kena tangkap, lalu dibunuh.” Nyadi Abiatar anak Jonatan enggau Ahimas anak Sadok nganti ba mata ai di En-rogel, ba tisi nengeri Jerusalem, laban seduai iya enda berani dipeda orang tama ngagai nengeri nya. Siku indu endang selalu datai lalu madahka ngagai seduai iya utai ti nyadi. Udah nya baru seduai iya mupuk lalu madahka utai nya ngagai Raja David. Tang sekali, nembiak siku bisi meda seduai iya. Nembiak nya lalu madahka ngagai Absalom. Nya alai seduai iya lalu beguai-guai angkat ari endur nya lalu belalai dalam rumah orang siku di Bahurim. Orang nya bisi siti telaga semak rumah iya. Seduai iya lalu nurun ngagai telaga nya. Bini orang nya lalu mai tikai kena map mua telaga nya, nganchau tikai nya ba mua telaga, lalu naburka leka utai ba tikai nya, ngambika orang nadai nemu seduai iya bisi dia. Bala pemesai Absalom lalu datai ngagai rumah nya, lalu nanya ngagai indu nya, “Dini alai Ahimas seduai Jonatan?” “Seduai iya udah meraka sungai,” ku iya nyaut. Bala orang nya lalu begigaka seduai iya, tang nadai tetemuka seduai iya. Nya alai sida lalu pulai baru ngagai Jerusalem. Lebuh sida udah mupuk, Ahimas seduai Jonatan lalu mansutka diri ari telaga nya, lalu mansang madahka berita ngagai Raja David. Seduai iya madahka ngagai Raja David pasal utai ti udah diperambu Ahitopel kena ngelaban iya, lalu ku seduai iya, “Kitai enda tau enda jampat meraka sungai nya.” Nya alai David enggau bala iya lalu belabuh meraka Sungai Jordan, lalu ba urung rerak tawas, semua sida udah meraka magang. Lebuh Ahitopel nemu jaku lalau iya enda diguna, iya lalu nyendiaka keledai iya, lalu pulai ngagai nengeri iya empu. Lebuh iya udah ngaduka semua pekara iya, iya lalu ngantung diri. Iya dikuburka ba kubur sida sebilik. David endang udah datai ba nengeri Mahanaim lebuh orang Israel meraka Sungai Jordan. ( Absalom udah ngasuh Amasa nyadi tuai soldadu, nganti Joap. Amasa nya anak Jeter, orang bansa Ismail. Indai iya Abigail anak Nahas, menyadi Seruiah, indai Joap.) Absalom enggau bala iya lalu nirika kem di menua Giliat. Lebuh David datai di Mahanaim, iya lalu diambat Sobi anak Nahas, ari nengeri Rabah di menua Amon, Machir anak Amil, ari Lo-debar, enggau Barsilai, ari Rogelim, di menua Giliat. Raja David lalu ngempuruka semua bala iya, magi sida ngagai seribu iku, enggau seratus iku dalam siti-siti raban, lalu ngatur bala pemesai nguluka sida. Udah nya, iya lalu ngasuh sida bejalai dalam tiga iti raban. Joap nguluka siti raban, menyadi iya Abisai nguluka siti raban, lalu Itai ke datai ari Gat nguluka siti raban. Ku raja bejaku enggau bala iya, “Aku empu deka bejalai sama enggau kita.” “Nuan enda tau bejalai enggau kami,” ku sida nyaut. “Munsuh enda beduli enti sema kami bukai rari, tauka enti setengah ari bala kami mati. Tang nyawa nuan lebih agi berega ari nyawa sepuluh ribu iku kami. Nya alai manah agi nuan diau di nengeri tu, lalu ngirumka tulung ngagai kami.” “Ni ti manah ku kita,” ku raja nyaut. Udah nya iya lalu bediri ngimbai pintu penama, lebuh bala iya bejalai pansut, seribu enggau seratus iku dalam siti-siti raban. Iya lalu meri atur ngagai Joap, Abisai enggau Itai: “Anang ngemediska jang Absalom.” Semua bala soldadu bela ninga raja meri atur nya ngagai bala pemesai iya. Bala soldadu David lalu bejalai ari nengeri nya, lalu betempuh enggau orang Israel ba Utan Epraim. Bala orang Israel alah laban bala David. Balat amat sida alah. Dua puluh ribu iku sida dibunuh sehari nya. Sida belaban di serata menua nya, lalu mayuh agi orang mati dalam utan, ari ke mati beperang. Absalom lalu ngenyit besatup enggau sekeda bala David. Nyadi Absalom nepan siku keledai, lalu lebuh iya ensuruk dan kayu oak ti besai, pala Absalom lalu tekait ba dan kayu nya. Keledai iya majak belanda, ninggalka Absalom kating-kating begantung. Siku ari bala David meda iya, lalu madahka ngagai Joap, “Tuan, aku bisi meda Absalom kating-kating ba sekayu batang oak!” Disaut Joap, “Enti nuan bisi meda iya, nama kebuah nuan enda munuh iya? Aku deka meri ngagai nuan sepuluh singkap duit pirak, enggau siti belulang.” Tang ku orang nya nyaut, “Enti sema nuan meri aku seribu singkap duit pirak, enggai meh aku ngangkatka tunjuk ngelaban anak raja. Semua kitai bela ninga raja meri atur ngagai nuan, Abisai enggau Itai, ‘Anang ngemediska jang Absalom.’ Tang enti aku enda ngasika raja, lalu munuh Absalom, raja deka nemu pasal nya, laban semua berita didingaka iya magang, lalu nuan tetap enggai ibuhka aku.” “Nadai guna aku masau jam bejaku enggau nuan tu,” ku Joap bejaku. Joap lalu mai tiga iti sangkuh, lalu ngerejangka sangkuh nya ngagai dada Absalom, ke endang agi idup, kating-kating ba kayu oak nya. Udah nya, sepuluh iku soldadu Joap lalu mansang ngagai Absalom, mantap lalu munuh iya. Joap lalu ngasuh orang nyepu terumpit, kena nesau orang badu agi belaban, lalu bala soldadu iya badu agi begagaika orang Israel. Sida ngambi bangkai Absalom, muai bangkai iya ngagai lubang kebung dalam utan nya, lalu nugungka batu kena ngelamun bangkai nya. Semua orang Israel ngerarika diri ngagai nengeri diri empu. Sekumbang iya agi idup, Absalom bisi udah ngaga siti tiang pengingat ke diri empu ba Lebak Raja, laban iya nadai anak lelaki nampung peturun iya. Nya alai iya meri nama iya empu ngagai tiang pengingat nya, lalu nyentuk ngagai sehari tu tiang pengingat nya mengkang dikumbai Tiang Pengingat Absalom. Udah nya Ahimas anak Sadok lalu bejaku enggau Joap, “Awakka aku belanda ngagai raja mai berita manah pasal TUHAN ti udah ngelepaska raja ari kuasa bala munsuh iya.” “Anang,” ku Joap bejaku. “Sehari tu nuan enda mai berita ti manah. Hari bukai, nyangka nuan tau, tang ukai sehari tu, laban anak raja udah mati.” Udah nya Joap lalu bejaku enggau ulun iya ti bansa orang Etiopia, “Alai padahka ngagai raja utai ti udah dipeda nuan.” Ulun nya meremi, lalu belanda mupuk. Tang Ahimas mengkang majakka penemu diri, “Aku enda bedulika utai ti deka nyadi. Awakka aku mega mai berita nya.” “Nama kebuah nuan deka ngereja nya, anak,” ku Joap nanya. “Nadai orang deka ngupah nuan ketegal nya.” “Aku enda ngira nya,” ku Ahimas bejaku baru, “laban aku endang deka mupuk.” “Enti pia, mupuk meh nuan,” ku Joap bejaku. Nya alai Ahimas belanda niti jalai nengah Lebak Jordan. Enda lama udah nya, iya lalu ulih tegelihka ulun nya. Nyadi David benung duduk ba endur ti lapang ba entara pintu-dalam enggau pintu-luar nengeri nya. Orang ke jaga niki ngagai puchuk dinding kuta, lalu bediri ba perabung pintu penama nya. Iya malik ke luar, lalu tepedaka orang siku belanda kediri-diri. Iya lalu ngangau madahka ngagai raja, lalu ku raja, “Enti iya kediri, iya mai berita ti manah.” Orang ke belanda nya nyau majak datai semak. Udah nya jejaga lalu tepedaka siku agi orang belanda kediri-diri, lalu iya ngangauka orang ke nyaga pintu penama, “Peda nyin! Siku agi orang belanda!” Raja lalu nyaut, “Iya mega mai berita ti manah.” Ku jejaga nya, “Ari peda aku, orang ke belanda dulu nya baka gamal Ahimas.” “Orang nya manah,” ku raja bejaku.” Iya mai berita ti manah.” Ahimas lalu ngangau meri tabi ngagai raja, nyungkurka diri ke tanah di mua raja, lalu bejaku, “Pujika TUHAN Allah Taala nuan, ti udah ngasuh nuan menang ngalahka orang ke ngelaban Tuan Raja!” “Kati jang Absalom nadai apa-apa?” ku raja nanya. Ahimas lalu nyaut, “Tuan, lebuh pemesai nuan, Joap, ngasuh aku mupuk, aku bisi meda bala orang begau, tang aku enda nemu utai ti ngasuh sida begau.” “Alai nuan bediri din,” ku raja bejaku enggau iya. Ahimas mansang kia, lalu bediri dia. Udah nya ulun ti bansa orang Etiopia pen datai, lalu bejaku enggau raja, “Aku mai berita ti manah ngagai Tuan Raja! Sehari tu TUHAN udah ngasuh nuan menang ngelaban semua orang ke ngelaban nuan!” “Kati jang Absalom nadai apa-apa?” ku raja nanya. Ku ulun nya nyaut, “Naka meh pemanah enti sema utai ti udah nyadi ba Absalom, nyadi mega ba semua munsuh nuan, tuan, enggau ba semua orang ke angkat ngelaban nuan.” Raja enda ulih natka ati diri ti kelalu balat tusah. Iya lalu niki ngagai bilik siti ba pintu penama nya, lalu nyabak. Ku iya, “O anak aku! Anak aku Absalom! O Absalom, anak aku! Manah agi aku mati nganti nuan, anak! O Absalom anak aku!” Orang lalu madahka ngagai Joap pasal David ke nyabak sereta ngulitka Absalom. Nya alai sehari nya pengaga semua bala soldadu David ke menang lalu betukar nyadi ulit, laban sida ninga berita raja ke ngulitka anak iya. Sida bela enda bemunyi mulaika diri ngagai nengeri, baka bala soldadu ke malu ke diri rari ari munsuh. Raja mampul mua lalu nyabak duie-duie, “O anak aku! Anak aku Absalom! Absalom anak aku!” Joap lalu mansang ngagai rumah raja, lalu bejaku enggau raja, “Sehari tu nuan udah ngemaluka bala nuan ti udah ngidupka nyawa nuan, bala anak lelaki, bala anak indu nuan, bala bini nuan, enggau bala indu simpan nuan. Nuan nyakal orang ke rinduka nuan, lalu nyukung orang ke begedika nuan! Nuan udah terang ngayanka diri enda begunaka bala pemesai enggau bala soldadu nuan. Gaya peda aku, nuan gaga agi ati enti sema Absalom agi idup sehari tu, lalu semua kami bukai mati magang. Nya alai, manah nuan mansang ngagai bala nembiak nuan, ngambika sida enda irau ati. Aku besumpah dalam nama TUHAN, enti nuan enda, nadai siku sida deka mengkang enggau nuan pagila. Nya deka nyadi penusah ti pemadu besai ti kala diasaika nuan sepemanjai umur nuan.” Udah nya raja angkat, lalu duduk semak pintu kuta nengeri nya. Lebuh bala soldadu iya ninga iya bisi dia, sida lalu datai ngagai iya. Lebuh utai tu benung nyadi, orang Israel udah ngerarika diri ngagai rumah diri empu. Sida belabuh bekelikuh enggau pangan diri di serata menua nya. “Raja David udah ngelepaska kitai ari jari munsuh kitai,” ku sida madahka ngagai pangan diri. “Iya udah ngelepaska kitai ari jari orang Pilistin, tang diatu iya udah rari ari Absalom, lalu ninggalka menua tu. Kitai udah nata Absalom nyadi raja, tang iya udah mati beperang. Nya alai, nama kebuah orang nadai nguji ngambi Raja David pulai baru?” Berita pasal jaku orang Israel bisi didinga Raja David. Nya alai, iya lalu ngasuh Imam Sadok seduai Abiatar betanya ngagai bala tuai orang Judah, “Nama kebuah kita dudi ari orang bukai nulung mai raja pulai baru ngagai istana iya? Kita tu kaban belayan aku, darah-getah aku. Nama kebuah kita ngenudika diri mai aku pulai baru?” David mega ngasuh sida nyebut jaku tu ngagai Amasa, “Nuan tu kaban belayan aku. Berengkah ari diatu aku ngasuh nuan nyadi tuai soldadu aku, nganti Joap. Awakka Allah Taala munuh aku, enti aku enda ngasuh nuan!” Jaku David disukung semua orang Judah, lalu sida ngirumka pesan ngagai raja, minta iya pulai sama enggau bala pemesai iya. Lebuh Raja David benung di rantau jalai mulaika diri, iya lalu diambat bala orang Judah ba Sungai Jordan. Sida nya udah datai ari Gilgal, deka ngiring iya meraka sungai nya. Lebuh maya nya mega, Simei anak Gera, orang ari raban bansa Benjamin, lalu beguai-guai datai ari Bahurim mansang ngagai Sungai Jordan, deka ngambat Raja David. Iya mai enggau iya seribu iku orang ari raban bansa Benjamin. Lalu Siba, orang gaji ruang bilik Saul, mega datai mai lima belas iku anak lelaki iya, enggau dua puluh iku orang gaji. Sida datai ba Sungai Jordan dulu agi ari raja. Sida meraka sungai nya, deka ngiring bala raja meraka, sereta ngereja sebarang utai ti diasuh raja. Lebuh Raja David udah sedia deka meraka, Simei lalu nyungkurka diri semak kaki raja. Ku Simei, “Tuan Raja, aku minta nuan badu agi ingatka penyalah ti udah dikereja aku lebuh nuan angkat ari Jerusalem suba. Anang nyalah aku ketegal nya, tauka ingatka penyalah nya agi. Tuan, aku nemu diri udah bedosa. Nya kebuah aku terubah orang ke datai ari raban bansa ti di utara ngambat Tuan Raja sehari tu.” Abisai anak Seruiah lalu bejaku, “Simei patut dibunuh, laban iya udah nyumpah orang ke udah dipilih TUHAN nyadi raja.” Tang ku David bejaku enggau Abisai, enggau menyadi iya Joap, “Nadai orang minta penemu ari seduai. Kati seduai ngasuh aku ditinggang penusah? Aku diatu nyadi raja menua Israel, nya alai nadai orang Israel deka dibunuh sehari tu.” Lalu ku iya bejaku enggau Simei, “Aku besemaya enggau nuan, nuan enda diukum bunuh.” Udah nya Mepiboset, uchu Saul, lalu nurun betemu enggau raja. Iya apin masu kaki, apin nguntin ragum, tauka masu gari diri sekumbang raja ti udah ninggalka Jerusalem, nyentuk ngagai maya iya pulai menang. Lebuh Mepiboset datai ari Jerusalem deka ngambat raja, raja lalu bejaku enggau iya, “Mepiboset, nuan nadai enggau aku. Nama kebuah?” Ku Mepiboset nyaut, “Tuan Raja lebih nemu, aku enda ulih bejalai. Aku ngasuh orang gaji aku nyendiaka penuduk ba keledai aku, ngambika aku ulih bejalai enggau nuan, tang iya mupuk nadai mai aku, lalu udah nya iya nyebut utai ti bula pasal aku di mua Tuan Raja, tang nuan baka melikat Allah Taala. Nya alai kereja aja meh utai ti ngena ba ati nuan. Semua raban ruang bilik apai aku endang patut dibunuh magang, Tuan Raja, tang nuan udah meri aku hak makai ba mija nuan. Aku nadai hak minta utai ti lebih ari nya ngagai Tuan Raja.” Ku raja nyaut, “Nuan enda ibuh bejaku agi. Aku udah mutuska runding. Seduai Siba deka sama bempu pesaka Saul.” Tang ku Mepiboset nyaut, “Awakka Siba bempu reta tengkira nya, aku enda ibuh, laban nuan udah pulai enggau selamat. Nya aja chukup ke aku.” Barsilai, ari Giliat, udah mega datai ari Rogelim, deka ngiring raja meraka Sungai Jordan. Barsilai nyau tuai amat umur. Umur iya lapan puluh taun. Iya kaya bendar, lalu udah meri raja pemakai lebuh raja diau di Mahanaim. Ku raja bejaku enggau iya, “Aram enggau aku ngagai Jerusalem, ngambika aku ngintu nuan.” Tang ku Barsilai nyaut, “Aku nadai lama agi idup. Aku nadai kebuah bejalai enggau Tuan Raja ngagai Jerusalem? Umur aku nyau lapan puluh taun. Nadai utai ulih merindang ati aku agi. Utai ti diempa enggau diirup nyau nadai asai agi ba nyawa aku, lalu aku pen enda ulih ninga nyawa orang ke belagu. Aku semina ngiruh Tuan Raja aja. Aku enda patut bulih upah ti ngemesai nya. Nya alai aku deka bejalai enggau nuan ngilah Sungai Jordan tu mimit. Udah nya, awakka aku pulai lalu mati semak kubur apai indai aku. Tu anak aku Kimham. Iya deka bekereja ke nuan. Bai iya enggau nuan, Tuan Raja, lalu kereja utai ke iya nitihka pematut dalam runding nuan.” Raja lalu nyaut, “Aku deka mai iya enggau aku, lalu ngereja utai ti dikinginka nuan ba iya. Lalu aku deka ngereja ke nuan sebarang utai ti dipinta nuan.” Udah nya David enggau semua bala iya lalu meraka Sungai Jordan. Iya nyium kuyu Barsilai, lalu merekatka iya. Barsilai lalu pulai. Lebuh Raja David udah meraka Sungai Jordan, diiring semua orang Judah enggau setengah ari orang Israel, iya lalu mansang ngagai Gilgal, lalu Kimham mupuk sama enggau iya. Udah nya semua orang Israel lalu betemu enggau raja, lalu bejaku enggau iya, “Tuan Raja, nama kebuah bala orang Judah ke menyadi kami ngumbai diri bisi hak mai nuan, lalu ngiring nuan, kita sebilik, enggau bala nuan meraka Sungai Jordan?” Orang Judah lalu nyaut, “Kami ngereja nya laban raja nya siku ari bala kami empu. Nya alai, nama kebuah utai tu ngasuh kita ringat? Iya nadai kala mayar rega pemakai ke kami, lalu iya pen enda mega kala meri kami utai.” Ku orang Israel nyaut, “Kami tau ngambu Raja David sepuluh kali lipat lebih ari kita, taja pen iya siku ari bala kita. Nama kebuah kita ngemaruhka kami baka nya? Kita enda tau enda ingat: kami tu orang ke terubah-rubah bejaku deka mai raja pulai baru!” Tang orang Judah kasar agi jaku ari orang Israel. Nyadi di Gilgal bisi orang siku ti nadai guna, ke benama Sheba anak Bikri, ari raban bansa Benjamin. Iya nyepu terumpit, lalu ngangau, “Bunuh David! Kami enggai nitihka iya! Orang Israel, aram kitai pulai!” Nya alai orang Israel ninggalka David, lalu nitihka Sheba. Tang orang Judah mengkang taluk sereta nitihka David kenyau ari Sungai Jordan nyentuk ngagai Jerusalem. Lebuh David datai ba istana iya di Jerusalem, iya lalu ngambi sepuluh iku indu simpan iya ti udah ditinggalka iya ngintu istana, lalu ngasuh sida kena tan. Iya meri sida utai ti dipeguna sida, tang iya enda beleman enggau sida. Sida enda disagi ke luar seumur idup, tang diau baka indu ke balu. Ku raja bejaku enggau Amasa, “Tesau lelaki orang Judah, lalu bai sida ngagai aku lusa; nuan empu mega datai ditu lusa.” Amasa lalu mansang nesau sida, tang iya enda pulai nitihka maya ti udah diletak raja. Nya alai, raja lalu bejaku enggau Abisai, “Sheba deka ngenusahka kitai lebih ari Absalom. Bai bala aku, lalu titihka iya, enggai ke iya ngerampas nengeri ti bekuta, lalu rari ari kitai.” Nya alai bala Joap, bala soldadu ke nyaga istana, enggau semua bala soldadu ti bukai lalu angkat ari Jerusalem enggau Abisai, nitihka Sheba. Lebuh sida datai ba batu ti besai di Gibeon, Amasa betemu enggau sida. Nyadi Joap endang udah nangkin senyata, sedia deka bamuk. Pedang iya agi dalam sarang ba punggung iya. Lebuh iya mansang, pedang nya lalu labuh. Ku Joap bejaku enggau Amasa, “Nama berita, punggal?” Joap lalu nyapai ragum Amasa ngena jari kanan iya, deka nyium Amasa. Tang Amasa nadai meda pedang ti ba jari kiba Joap; Joap lalu ngerejang perut Amasa, lalu sengkilung perut iya merurut pansut ke tanah, lalu iya mati, enda ibuh ditandu. Udah nya Joap enggau menyadi iya Abisai lalu mupuk nitihka Sheba. Siku orang ari bala Joap bediri semak bangkai Amasa, lalu ngangau, “Semua orang ke setanah enggau Joap, titihka Joap!” Nyadi bangkai Amasa garing-garing ba tengah jalai raya nya, dibalut darah. Lebuh orang siku ari bala Joap meda semua orang ngetu magang, iya lalu ngirit bangkai Amasa ari jalai raya ngagai padang, lalu mungkur iya ngena pua. Lebuh bangkai nya udah dipindahka ari jalai raya nya, semua orang lalu nitihka Joap begagaika Sheba. Nyadi Sheba bejalai nengah menua semua raban bansa orang Israel, lalu datai di nengeri Abel di Bet-maakah. Semua raban peturun Bikri begempuru, lalu nitihka iya ngagai nengeri nya. Lebuh bala Joap ninga Sheba bisi di nengeri nya, sida mansang lalu ngelulung nengeri nya. Sida ngaga kuta tanah nyempil ngagai kuta nengeri nya. Lalu sida mega belabuh numbak tanah ari baruh dinding kuta nya, deka numbangka kuta nya. Nyadi di nengeri nya bisi indu siku ti pintar. Ku iya ngangau ari kuta nya, “Dinga! Dinga! Asuh Joap datai kitu. Aku deka bejaku enggau iya.” Joap lalu mansang. Indu nya lalu nanya, “Kati nuan nya Joap?” “Aku meh tu,” ku Joap nyaut. “Pendingka aku, tuan,” ku indu nya bejaku. “Mending meh aku,” ku Joap nyaut. Ku indu nya bejaku, “Dulu kelia, orang selalu nyebut, ‘Alai nuan mupuk, lalu giga saut di nengeri Abel.” Sida lalu ngereja nya. Nengeri kami tu nengeri ti besai, likun, sereta taluk di menua Israel. Nama kebuah nuan deka ngerusak nengeri tu? Kati nuan deka ngerusak pesaka TUHAN?” “Ukai!” ku Joap nyaut. “Aku enggai ngerusak nengeri kita! Nya ukai pelan kami. Orang ke benama Sheba anak Bikri, ke datai ari menua ti bebukit di menua Epraim, udah angkat ngelaban Raja David. Serahka iya ngagai kami, nya baru kami nyurutka diri ari nengeri tu.” Lalu ku indu nya nyaut, “Kami deka nibarka pala iya ari kuta, ngagai nuan.” Udah nya indu nya lalu mansang ngagai bala lelaki di nengeri nya, mai pelan iya. Sida lalu mumpung pala Sheba, lalu nibarka pala iya ari kuta nya, ngagai Joap. Joap lalu nyepu terumpit nesau semua bala iya mupuk ari nengeri nya. Sida lalu pulai. Joap pulai ngagai Jerusalem, ngagai raja. Joap nya orang ke nguluka bala soldadu orang Israel, lalu Benaiah anak Jehoiada nyadi tuai orang ke nyaga David. Adoniram nyadi tuai ngemataka bala orang ke dipejalka ngereja pengawa ti berat. Jehosapat anak Ahilut nyadi tukang tulis ke semua utai ti nyadi. Seba nyadi kerani raja. Sadok enggau Abiatar nyadi imam, lalu Ira, ke datai ari nengeri Jair, mega nyadi siku ari bala imam David. Lebuh maya David megai perintah, menua nya kena laban lapar pungkang tiga taun penuh. Nya alai David betanya ngagai TUHAN pasal pekara nya, lalu ku TUHAN, “Saul enggau sida sebilik udah salah bebunuhka orang. Iya udah munuh orang Gibeon.” ( Nyadi orang ke diau di Gibeon nya ukai orang Israel. Sida nya orang Amor ti enda mayuh tubuh, ti udah disemaya deka dijaga orang Israel. Tang Saul udah nguji munuh sida, ketegal pemalat ati iya ti deka ngeringka bansa orang Israel enggau orang Judah.) Nya alai David lalu mesanka orang ke diau di Gibeon, lalu ku iya bejaku enggau sida, “Nama utai ti patut dikereja aku ke kita, kena nebus penyalah ti udah dikereja ngagai kita, ngambika kita merekatka bala nembiak TUHAN?” Ku sida nyaut, “Laya entara kami enggau Saul enggau sida sebilik enda ulih diputarka ngena pirak tauka emas. Lalu kami pen nadai mega deka munuh orang Israel.” “Enti pia, nama utai ti patut dikereja aku ke kita?” ku David nanya. Disaut sida, “Saul keran deka munuh kami, ngambika nadai siku kami agi idup di menua Israel. Nya alai serahka tujuh iku lelaki ari peturun iya, ngambika kami ngantung sida di mua TUHAN di Gibe-ah, nengeri Saul, raja ti udah dipilih TUHAN.” “Awakka aku nyerahka sida,” ku David nyaut. Tang ketegal semaya ti kudus ti udah digaga iya enggau Jonatan, David enda nyerahka Mepiboset anak Jonatan. Tang iya ngambi Armoni enggau Mepiboset, anak lelaki ti diadaka Rispah anak Aiah ke Saul. Iya mega ngambi lima iku anak lelaki ti diadaka anak indu Saul ke benama Merap. Sida lima iku tu diadaka Merap ke Adril anak Barsilai, ti datai ari Meholah. David lalu nyerahka sida ngagai orang Gibeon. Sida tujuh iku nya lalu sama mati digantung orang Gibeon ba bukit, di mua TUHAN. Nyadi taun lebuh maya nya nyau deka musin panas, lebuh orang baru deka belabuh ngetau barli. Nya meh maya sida dibunuh. Udah nya indu simpan Saul, Rispah anak Aiah, lalu ngaga siti dunju ari kain guni alai iya belindung ba atas batu, ba endur alai bangkai sida nya diengkah. Iya lalu diau dia belabuh ari maya orang berengkah ngetau nyentuk ngagai maya hari ujan lebuh musin ruruh daun. Lebuh siang hari, iya muru burung ti datai ngagai bangkai nya. Lebuh malam hari, iya nyaga bangkai nya ari jelu babas. Lebuh David ninga berita pasal utai ti dikereja Rispah, iya lalu mansang ngambi tulang Saul enggau anak iya Jonatan ari orang di Jabes, di menua Giliat. (Orang ari Jabes udah ngenchuri tulang nya ari padang ti ba nengeri Bet-san, alai orang Pilistin ti udah ngantung bangkai seduai iya lebuh Saul mati ba Bukit Gilboa.) David ngambi tulang Saul enggau tulang Jonatan, lalu ngumpul mega tulang tujuh iku orang ke udah digantung nya. Udah nya sida lalu nguburka tulang Saul enggau tulang Jonatan ba kubur apai Saul, Kis, di Sela, di menua Benjamin, nitihka atur Raja David. Udah nya baru Allah Taala nyaut sampi sida. Orang Pilistin lalu beperang baru ngelaban orang Israel. David enggau bala iya mansang nyerang orang Pilistin. Sida bamuk ngelaban orang Pilistin, lalu David berasai lelak. Siku orang ke kering sereta besai gamal, ke benama Isi-benop, ke mai siti sangkuh temaga ti berat kira tiga kilogram setengah, sereta nangkin pedang, ngumbai dirika munuh David. Tang Abisai anak Seruiah datai nyaup David, ngelaban lalu munuh orang nya. Udah nya bala David lalu ngasuh David besemaya enda agi enggau sida mansang beperang. “Nuan tu orang ke dikarapka orang Israel. Nya kebuah kami enggai mai nuan mansang beperang, enggai ke nuan mati,” ku sida bejaku enggau iya. Udah lepas nya, sida lalu betempuh enggau orang Pilistin di Gop. Nya meh maya Sibichai ari Husah tebunuhka orang ke kering sereta besai gamal ke benama Sap. Udah lepas nya, sida lalu betempuh baru enggau orang Pilistin di Gop, alai Elhasan anak Jair ari Betlehem tebunuhka Goliat ari Gat, ke bempu genteran sangkuh ti ngemesai tendai kena betenun. Udah nya, sida lalu belaban baru di Gat, alai siku orang ke kering sereta besai gamal keras amat deka ngelaban sida. Iya bisi enam iti tunjuk ba siti-siti jari, enggau enam iti tunjuk ba kaki sepiak-sepiak. Iya nyakap orang Israel, lalu Jonatan, anak menyadi David ke benama Samah, munuh iya. Sida empat tu peturun orang ke kering sereta besai gamal di Gat, lalu sida dibunuh David enggau bala iya. Lebuh TUHAN udah ngelepaska David ari jari Saul, enggau ari jari bala munsuh iya ti bukai, David lalu nyanyi lagu tu ke TUHAN. Ku iya, TUHAN nya Batu Pengelepas aku, Kuta aku, Juruselamat aku. Allah Taala aku, Batu aku ti alai aku ngenduh, Terabai aku, Tanduk pengelepas aku, Kuta aku, enggau endur alai aku ngenduh, Juruselamat aku; Nuan nyelamatka aku ari utai ti tau ngemedis. Aku ngangauka TUHAN ti endang patut dipuji, lalu Iya ngelepaska aku ari jari munsuh aku. Laban gelumbang pemati nyau ngalun ngelingi aku, lalu alun pengerusak ngelamun aku. Tali pemati melit aku, lalu panjuk pemati di mua aku. Lebuh aku kena laban penusah, aku ngangauka TUHAN. Aku ngangauka Allah Taala aku. Iya ningaka munyi nyawa aku ari Rumah Iya, lalu kangau aku didinga Iya. Udah nya tanah lalu berenyang sereta begetar. Pugu langit beguyat lalu begetar laban Allah Taala ringat! Asap pansut ari lubang idung Iya, lalu api ti mau pansut ari nyawa Iya; bara api ti mau pansut ari nyawa Iya. Iya nyiatka langit, lalu nurun, mua hari ti chelum di baruh kaki Iya. Iya terebai deras nepan siku melikat cherub. Iya bejalai ngena sayap ribut. Iya malut Diri ngena pemetang. Mua hari ti tebal, ti penuh laban ai, nyerayung Iya. Bara api ti mau pansut ari penampak ti ngelingi Iya. Udah nya TUHAN lalu bejaku munyi beguntur ari langit, lalu munyi nyawa Allah Taala ti Pemadu Bekuasa bisi didinga. Iya nimbakka laja Iya, lalu mambarka bala munsuh Iya. Iya ngena selar kilat ngasuh sida belanda rari. Buntut tasik nyau pegari lalu pugu dunya ayan, lebuh TUHAN ringat lalu ngerara bala munsuh Iya, ngena kesuh seput ti pansut ari idung Iya. TUHAN ngunjurka jari Iya ari serega, lalu megai aku. Iya narit aku pansut ari ai ti dalam. Iya ngelepaska aku ari munsuh aku ti kering enggau ari semua orang ke begedika aku, laban sida iya kelalu kering dilaban aku. Lebuh aku kena laban penusah, sida nyerang aku, tang TUHAN nyaga aku. Iya nyaup aku ngerarika diri ari utai ti tau nganu. Iya ngidupka nyawa aku, laban Iya gaga ati ke aku. TUHAN ngupah aku, nitihka pengelurus aku. Iya merekatka aku, laban aku nadai penyalah Laban aku udah nitihka jalai TUHAN, lalu nadai udah ngereja penyai lalu ninggalka Allah Taala aku. Laban semua adat Iya di mua aku magang, lalu aku enda kala limpang ari adat Iya. Aku nadai ngereja penyalah, lalu aku nagang diri ngereja utai ti salah. Nya alai Iya meri aku upah, nitihka pengelurus aku, nitihka pengudus pengidup aku ba mata Iya. O TUHAN, Nuan tetap ati ngagai orang ke tetap ati ngagai Nuan, lalu manah enggau orang ti nadai penyalah. Nuan ngayanka Diri tuchi ngagai orang ke tuchi, tang ngelaban orang ke jai. Nuan ngidupka orang ke baruh ati, tang Nuan ngemaruhka orang ke sumbung. Nuan, TUHAN, nyadika lampu aku. Nuan meri penampak ngagai pemetang aku. Nuan meri aku pengering kena ngelaban munsuh aku, enggau kuasa kena ngalahka kuta sida. Naka meh pemanah pengawa Allah Taala! Jaku Iya endang tau dikarapka! Iya nyadi terabai ke semua orang ke ngenduh ba Iya. Laban sapa Allah Taala kelimpah ari TUHAN? Lalu sapa ti Batu aku, kelimpah ari Allah Taala? Allah Taala ti udah meri aku pengering nya meh endur ti tegap alai aku ngenduh. Iya udah muka jalai ti luas ke aku. Iya ngasuh kaki aku laju belanda baka kaki rusa; Iya nyaga aku ba sebelah bukit. Iya matihka aku beperang ngambika aku ulih ngena panah temaga. Nuan udah meri aku pengelepas nyadika terabai aku, lalu tulung Nuan ba aku udah ngasuh aku kering. Nuan udah ngasuh aku bejalai enda tesangkut, lalu kaki aku enda tekelinchir. Aku begagaika munsuh aku, lalu ngalahka sida. Aku enda pulai ngapa, datai ke semua sida abis dirusak. Aku ngalahka sida; aku mantap sida, lalu sida enda ulih angkat. Sida rebah di baruh kaki aku. Laban Nuan udah meri aku pengering kena bamuk, lalu ngasuh bala munsuh aku alah. Nuan ngasuh munsuh aku rari ari aku, orang ke begedika aku, lalu aku ngerusak sida. Sida ngiga orang nyaup sida, tang nadai siku orang nyelamatka sida. Sida ngangauka TUHAN, tang TUHAN enda nyaut sida. Aku ngeredakka sida alus baka amau. Aku ngerenyuk sida lalu ngindik sida baka ke ngindik tanah luchak ba jalai raya. Nuan udah ngelepaska aku ari laya ngelaban bala aku empu; Nuan ngasuh aku merintah mayuh bengkah bansa. Orang ke enda dikelala aku, betuaika aku. Orang ari menua bukai meremi di mua aku. Lebuh sida ninga aku, sida ngasika aku. Sida enda berani agi lalu sida datai getar-getar ari kuta sida. TUHAN endang idup! Puji meh Batu aku! Awakka Allah Taala ti nyadi Batu Pengelepas aku dikemesaika, Allah Taala ti udah malas munsuh aku, lalu ngasuh semua bansa nunduk ngagai aku, ti udah ngelepaska aku ari bala munsuh aku. O TUHAN, Nuan ngasuh aku menang ngelaban munsuh aku, lalu ngelepaska aku ari orang ke mangah. Nya alai, aku deka muji Nuan di mua semua bansa, lalu belagu muji nama Nuan. Allah Taala nyadi menara pengelepas ke raja Iya, lalu Iya ngayanka pengerindu Iya ti enda berubah ngagai orang ke udah dipilih Iya, ngagai David, enggau ngagai peturun iya belama iya. David anak Jesi nya orang ke udah digaga Allah Taala nyadi orang ke besai, ti udah dipilih Allah Taala Jakop nyadi raja, ti landik ngarang lagu ke orang Israel. Tu jaku David ti penudi: Roh TUHAN bejaku ngena aku. Pesan Iya bisi ba mulut aku. Allah Taala ke disembah orang Israel udah bejaku. Batu orang Israel udah nyebut ngagai aku: “Raja ke merintah ngena pengelurus, ke nangika Allah Taala, nya baka mata hari ti manchar dini hari ba langit ti nadai mua hari, mata hari ti ngasuh rumput bekebelik udah bekau ujan.” Nya meh chara Allah Taala deka merekatka peturun aku, laban Iya udah ngaga sempekat ti meruan belama iya enggau aku, sempekat ti enda dibungkar, semaya ti enda diubah. Nya aja meh utai ti dikinginka aku. Utai nya deka nyadika pemenang aku, lalu Allah Taala tetap deka ngasuh utai nya nyadi. Tang orang ke enda nangika Allah Taala nya baka duri ti dibuai, laban sida nadai ulih diputik ngena jari. Enti orang deka negu sida, orang negu sida ngena lumpung besi tauka ngena enteran sangkuh. Lalu sida ditunu tekala nya. Tu nama bala soldadu David ti tebilang: Iya ti keterubah nya Josep Basebet, ari Takemon. Iya nyadi tuai ke “Orang Ti Tiga Iku.” Iya bamuk ngena sangkuh ngelaban lapan ratus iku munsuh, lalu munuh semua sida dalam perang nya. Iya ti kedua ti tebilang nya Eleasar anak Dodo, ari raban peturun Ahoh. Nyadi sekali, iya enggau David nyakap orang Pilistin ti udah begempuru deka nyerang. Bala orang Israel lalu nyurutka diri, tang Eleasar anak Dodo nan, lalu ngelaban orang Pilistin, datai ke jari iya nyau teganggam, lalu enda ulih ngelengkaka pedang iya agi. TUHAN balat amat menang sehari nya. Lebuh orang Israel udah badu belaban enggau munsuh, sida lalu pulai ngagai endur alai Eleasar ke belaban, lalu muka semua senyata ari bangkai orang ke mati. Iya ti ketiga ti tebilang nya Samah anak Agee, ari Harar. Nyadi orang Pilistin udah begempuru di Lehi, ba endur alai orang ke nanam kachang mirah. Orang Israel lalu ngerarika diri ari orang Pilistin, tang Samah nan sereta nyaga umai nya, lalu munuh orang Pilistin. TUHAN balat amat menang sehari nya. Lebuh orang baru deka belabuh ngetau, tiga iku ari “Sida Ti Tiga Puluh” nya lalu nurun ngagai David ti diau dalam Lubang Gua di Adulam. Nyadi raban orang Pilistin nirika kem sida ba Lebak Repaim. Lebuh maya nya, David benung ba bukit sigi ti bekuta, lalu raban orang Pilistin udah ngalahka nengeri Betlehem. David berasai lelengauka nengeri nya, lalu ku iya, “Naka meh pemanah enti orang bisi mai ai irup ngagai aku ari telaga ti ba pintu nengeri Betlehem!” Soldadu tiga iku ti tebilang nya lalu bejalai ngerenchah kem orang Pilistin, nyauk ai ari telaga nya, lalu mai ai nya ngagai David. Tang David enggai ngirup ai nya. Iya nyiuhka ai nya nyadika piring ti diberi ngagai TUHAN. Ku iya, “ TUHAN, aku enggai ngirup ai tu! Enti aku ngirup ai tu, aku baka ke ngirup darah orang ke udah berambunka nyawa nyauk ai nya!” Nya alai iya enggai ngirup ai nya. Nya meh gaya pemerani soldadu tiga iku ti tebilang nya. Nyadi menyadi Joap, Abisai anak Seruiah, nyadi tuai ke “Sida Tiga Puluh Iku Ti Tebilang.” Iya ngelaban tiga ratus iku munsuh ngena sangkuh, lalu munuh sida. Nya utai ti ngasuh iya tebilang agi nama ari “Sida Ti Tiga Puluh” nya. Iya nya meh orang ke pemadu tebilang ari ‘Sida Tiga’ nya. Benaiah anak Jehoiada nya siku agi orang ke tebilang. Iya berani ngereja mayuh macham utai, nyengkaum munuh dua iku bujang berani orang Moap. Sekali iya nurun ngagai siti lubang, lebuh hari balat seleju, lalu munuh siku singa. Iya mega udah munuh siku orang Ejip. Orang tu besai amat gamal, lalu ngena siti sangkuh. Benaiah ngelaban iya ngena pemalu, ngerampas sangkuh nya ari jari orang Ejip nya, lalu munuh iya ngena sangkuh nya. Nya meh macham pengawa ti dikereja Benaiah, siku ari sida Ti Tiga Puluh. Benaiah nya orang ke lebih agi tebilang ari bala sida, tang iya kurang agi tebilang ari orang “Ti Tiga Iku” nya. David milih iya nyadi tuai ke bala orang ke nyaga iya. Nyadi sekali, TUHAN ringat ngagai orang Israel. Nya alai Iya nyungkak David mai penusah ngagai sida. Ku TUHAN bejaku ngagai David, “Alai nuan ngitung tubuh orang Israel enggau orang Judah.” David lalu meri atur ngagai Joap, ti nyadi tuai soldadu iya: “Alai nuan enggau bala pemesai nuan bejalai nengah semua menua raban bansa orang Israel, ngagai serata menua tu, lalu itung pemayuh tubuh orang. Aku keran deka nemu pemayuh sida.” Tang ku Joap nyaut raja, “Tuan Raja, awakka TUHAN Allah Taala nuan ngasuh orang Israel seratus kali mayuh agi ari sida ke diatu, lalu awakka nuan panjai umur meda Iya ngereja utai nya. Tang nama kebuah Tuan Raja deka ngereja tu?” Tang raja mejalka Joap enggau bala pemesai iya ngasika atur iya. Sida angkat, lalu mansang ngitung tubuh orang Israel. Sida meraka Sungai Jordan, lalu nirika kem tunga ke timur Aroer, sebuah nengeri ti ba lebak nya, di menua Gat. Ari nya sida lalu bejalai tunga ke utara, ngagai Jaser, lalu terus ngagai Giliat, enggau ngagai Kades, di menua orang Iti. Udah nya sida lalu mansang ngagai Dan, lalu ari Dan sida bejalai tunga ke barat, ngagai Sidon. Udah nya sida lalu bejalai ke selatan ngagai nengeri Tire ti bekuta, lalu terus ngagai semua nengeri orang Ibi, enggau orang Kanaan, lalu ke pengujung iya, ngagai Beer-seba, di selatan menua Judah. Lebuh sida udah bejalai nengah serata menua nya dalam semilan bulan dua puluh hari, sida lalu pulai ngagai Jerusalem. Sida lalu madahka ngagai raja pemayuh lelaki ti tau enggau beperang: 800,000 di menua Israel, enggau 500,000 di menua Judah. Tang lebuh David udah ngitung tubuh orang Israel, ati iya enda lantang, lalu ku iya bejaku enggau TUHAN, “Aku udah bedosa besai ngereja utai tu! Aku minta Nuan ngampun aku. Aku udah beli ngereja utai tu.” Gat mansang ngagai iya, madahka utai ti udah dipadahka TUHAN, lalu iya nanya David, “Ni bagi ti dipilih nuan? Tiga taun lapar pungkang di menua tu, tauka tiga bulan ngerarika diri ari munsuh kita, tauka tiga hari penyakit berampit di menua kita? Aku ngasuh nuan berundingka nya, lalu padahka saut ti diasuh nuan bai aku ngagai TUHAN.” Ku David nyaut, “Tusah amat ati aku! Tang aku enggai diukum orang mayuh. Awakka TUHAN Empu ngukum kitai, laban Iya nemu ngampun.” Nya alai TUHAN lalu ngasuh penyakit balat amat berampit di menua Israel, berengkah ari pagi nya nyentuk ngagai maya ti udah diletak Iya. Di serata menua nya, tujuh puluh ribu orang Israel mati. Lebuh melikat TUHAN baru deka ngerusak nengeri Jerusalem, Iya lalu ngubah runding Diri ti deka ngukum orang mayuh, lalu bejaku enggau melikat ti munuh sida, “Badu agi! Umbas meh nya!” Melikat nya udah datai ba endur alai orang ngindik gandum ti diempu Araunah, siku orang Jebus. David bisi meda melikat ti munuh orang mayuh, lalu ku David bejaku enggau TUHAN, “Aku empu ke salah. Aku empu ti ngereja utai ti salah. Orang tu nadai ngereja utai apa-apa. Nuan patut ngukum aku enggau kami sebilik.” Ba hari nya Gat mansang ngagai David, lalu bejaku enggau iya, “Alai nuan mansang ngagai endur alai nungku gandum ti diempu Araunah, lalu gaga siti alta ke TUHAN.” David ngasika pesan TUHAN, lalu mupuk munyi ti diasuh Gat. Araunah malik, lalu tepedaka raja enggau bala pemesai iya, mansang ngagai iya. Araunah lalu nyungkurka diri ke tanah di mua David, lalu nanya, “Tuan Raja, nama kebuah nuan datai ditu?” Ku David nyaut, “Deka meli endur alai nuan ke ngindik tu, lalu ngaga siti alta ke TUHAN, kena nagang penyakit tu berampit.” “Ambi aja, Tuan Raja,” ku Araunah bejaku, “lalu beri ngagai TUHAN sebarang utai ti dikedekaka nuan. Tu sapi ti lelaki ti tau ditunu nyadika piring ba alta nya. Tu kungkung sida, enggau papan alai ngindik, ti tau dikena menyadika api.” Araunah meri semua utai nya ngagai raja lalu ku Araunah bejaku enggau raja, “Awakka TUHAN Allah Taala nuan nerima piring nuan.” Tang ku raja nyaut, “Aku deka mayar rega utai tu ngagai nuan. Aku enggai meri ngagai TUHAN Allah Taala aku utai ti ukai ulih aku meli.” Iya lalu meli endur alai orang ke ngindik nya, enggau jelu sapi nya ngena rega lima puluh singkap duit pirak. Udah nya David lalu ngaga sebuah alta ke TUHAN, lalu ngenjuk piring tunu, enggau piring pemaik. TUHAN nyaut sampi iya, lalu penyakit nya enda agi berampit di menua Israel. Raja David diatu nyau tuai. Taja pen bala orang gaji iya mungkur iya ngena pua, iya seruran chelap tubuh. Nya alai bala pemesai iya bejaku enggau iya, “Tuan Raja, awakka kami ngiga indu ke biak ke nuan, lalu ngintu nuan. Iya deka gali ngimbai nuan, ngambika nuan seruran angat isi.” Sida lalu ngiga siku indu ke bajik di menua Israel. Sida lalu tetemuka siku di Sunem. Nama iya Abisak, lalu sida mai iya ngagai raja. Abisak bajik amat gamal. Iya ngibun sereta ngintu raja, tang raja enda beleman enggau iya. Iya bejaku enggau Joap (indai Joap nya Seruiah). Iya mega bejaku enggau Imam Abiatar, lalu seduai iya besetuju deka nyukung iya. Tang Imam Sadok, Benaiah anak Jehoiada, nabi Natan, Simei, Rei, enggau bala soldadu ke nyaga David, enggai nyukung Adonijah. Nyadi sekali, Adonijah ngenjuk piring jelu bedus, sapi ti lelaki, enggau anak sapi ti gemu ba Batu Ular, semak mata ai di En-rogel. Iya mai anak lelaki David ti bukai, enggau bala pemesai raja ari menua Judah ngagai pengerami nya. Tang iya enda mai menyadi-tiri iya Solomon tauka nabi Natan, tauka Benaiah, tauka bala soldadu ke nyaga raja. Udah nya Natan lalu mansang ngagai Batseba, indai Solomon, lalu nanya ngagai iya, “Kati nuan nadai udah ninga pasal anak Hagit ke benama Adonijah, ti udah nyiri diri nyadi raja, lalu Raja David enda nemu pasal pekara nya? Enti nuan deka ngidupka nyawa diri, enggau nyawa anak nuan Solomon, aku meri nuan siti jaku lalau. Mansang nuan ngagai Raja David diatu, lalu tanya ngagai iya, ‘Tuan Raja, ukai enda nuan udah besemaya ngena sumpah madahka anak aku Solomon deka nganti nuan nyadi raja? Enti nuan amat udah besemaya, nama kebuah Adonijah diatu udah nyadi raja?’ Udah nya, lebuh nuan benung bejaku enggau Raja, aku tama, lalu madahka pengamat berita ti dibai nuan.” Batseba lalu mansang betemu enggau raja dalam bilik tinduk raja. Raja udah tuai amat, lalu iya diintu Abisak, indu ke ari Sunem. Batseba nyungkurka diri di mua raja. Raja lalu nanya, “Nama utai ti dikedekaka nuan?” Batseba lalu nyaut, “Tuan Raja, nuan udah besumpah enggau aku dalam nama TUHAN Allah Taala nuan, madahka anak aku Solomon deka nganti nuan nyadi raja. Tang diatu Adonijah udah nyadi raja, lalu nuan nadai nemu pasal pekara nya. Iya udah meri sapi ti lelaki, bedus, enggau anak sapi ti gemu nyadika piring, lalu iya udah ngambi bala anak lelaki nuan, Imam Abiatar, enggau Joap ti nyadi tuai soldadu nuan, ngagai pengerami nya, tang iya enda mai anak nuan Solomon. Tuan Raja, semua orang di menua Israel nganti nuan madahka sapa ti deka nganti nuan nyadi raja. Enti nuan enda, lebuh nuan mati ila, kami duai Solomon deka digaga nyadi baka orang ke nyual bansa.” Lebuh Batseba agi benung bejaku, Natan pen datai di istana. Orang lalu madahka ngagai David, “Nabi Natan!” Natan tama, lalu nyungkurka diri di mua raja. Udah nya Natan lalu bejaku, “Tuan Raja, kati nuan bisi udah madahka Adonijah deka nganti nuan nyadi raja? Sehari tu iya udah mansang lalu ngenjuk piring jelu sapi ti lelaki, bedus enggau anak sapi ti gemu. Semua bala anak lelaki nuan, Joap ti nyadi tuai soldadu nuan, enggau Imam Abiatar udah diambi iya ngabang. Diatu sida benung ngintu pengerami makai besai enggau iya, sereta manjung ‘Gayu-guru Raja Adonijah!’ Tang, tuan, iya nadai ngambi aku, tauka Imam Sadok, tauka Benaiah, tauka Solomon ngagai pengerami nya. Kati Tuan Raja bisi udah ngemendarka pengawa nya, lalu enda madahka ngagai bala pemesai nuan sapa ti deka nganti nuan nyadi raja?” Ku Raja David bejaku, “Asuh Batseba tama kitu baru.” Batseba tama lalu bediri di mua raja. David lalu bejaku enggau Betseba, “Aku besemaya enggau nuan, dalam nama TUHAN ti idup, ti udah ngelepaska aku ari semua penusah aku, sehari tu aku deka ngamatka semaya ti udah digaga aku enggau nuan dalam nama TUHAN Allah Taala ke disembah orang Israel. Anak nuan Solomon deka nganti aku nyadi raja.” Batseba lalu nyungkurka diri, lalu ku iya, “Awakka Tuan Raja aku idup belama iya!” Udah nya raja lalu mesanka Sadok, Natan, enggau Benaiah. Lebuh sida tama, raja lalu bejaku enggau sida, “Bai bala pemesai aku enggau kita. Asuh anak aku Solomon nepan keledai aku empu, lalu iring iya nurun ngagai Mata Ai di Gihon. Dia Sadok, enggau Natan deka nata iya nyadi raja menua Israel. Udah nya sepu terumpit, lalu manjung, ‘Gayu-guru Raja Solomon!’ Titihka iya pulai kitu baru, lebuh iya datai lalu duduk ba kerusi diraja aku. Iya deka nganti aku nyadi raja, laban iya endang udah dipilih aku nyadi raja menua Israel enggau menua Judah.” “Utai nya deka dikereja,” ku Benaiah nyaut, “lalu awakka TUHAN Allah Taala nuan ngamatka utai nya! Baka TUHAN ti udah enggau Tuan Raja, awakka Iya mega enggau Solomon, lalu ngasuh perintah Solomon lebih agi kaya-raja ari perintah nuan.” Nya alai Sadok, Natan, Benaiah, enggau bala soldadu ke nyaga raja lalu ngasuh Solomon nepan keledai Raja David, lalu ngiring iya ngagai Mata Ai di Gihon. Sadok mai sarang minyak kana, ti udah dibai iya ari Langkau Kain TUHAN, lalu nata Solomon. Sida nyepu terumpit, lalu semua orang manjung magang, “Gayu-guru Raja Solomon!” Udah nya semua sida lalu nitihka iya pulai, manjung gaga ati, nyepu kesuling, sereta richah, datai ke tanah nyau berenyang. Lebuh Adonijah enggau semua pengabang iya udah tembu ngintu pengerami makai besai, sida lalu ninga utai inggar bemunyi. Lebuh Joap ninga munyi terumpit, iya lalu nanya, “Nama utai ti inggar nya di nengeri nya?” Lebuh iya agi benung bejaku, Jonatan anak Imam Abiatar lalu datai. “Tama,” ku Adonijah bejaku enggau iya. “Nuan tu orang ke badas. Nuan tentu mai berita ti manah.” “Ukai,” ku Jonatan nyaut. “Raja David udah ngaga Solomon nyadi raja. Iya udah ngasuh Sadok, Natan enggau Benaiah enggau bala soldadu ke nyaga raja, ngiring iya. Iya udah ngasuh iya nepan keledai raja, lalu Sadok enggau Natan udah nata iya nyadi raja ba Mata Ai di Gihon. Udah nya sida lalu tama ngagai nengeri, manjung gaga ati, lalu orang mayuh nyau richah magang. Nya utai ti didinga kita. Solomon diatu udah nyadi raja. Nambahka nya, bala pemesai ke bekereja dalam istana raja udah tama ngagai bilik raja, lalu meri tabi basa ngagai Raja David. Ku sida, ‘Awakka Allah Taala nuan ngasuh Solomon tebilang agi ari nuan, lalu awakka perintah Solomon lebih agi kaya-raja ari perintah nuan.’ Udah nya Raja David nyungkurka diri ba atas peninduk iya, nyembah Allah Taala. Ku David besampi, ‘Pujika TUHAN Allah Taala ke disembah orang Israel ti udah sehari tu ngasuh siku ari peturun aku nganti aku nyadi raja, lalu udah ngasuh aku idup meda utai tu nyadi!’ ” Udah nya bala pengabang Adonijah lalu takut. Semua sida angkat, lalu mupuk magang. Adonijah lalu takutka Solomon, lalu iya mansang ngagai Langkau Kain TUHAN, lalu megai sukut alta. Orang lalu madahka ngagai Raja Solomon pasal Adonijah ke takutka iya, lalu bepegai ba sukut alta, lalu udah bejaku, “Terubah, aku deka ngasuh Raja Solomon besumpah minta iya enda munuh aku.” Ku Solomon nyaut, “Enti iya taluk, selambar pen nadai meh buk iya deka ditegu. Tang enti iya enda taluk, iya deka mati.” Udah nya Raja Solomon lalu mesanka Adonijah, lalu ngasuh orang mai iya nurun ari alta nya. Adonijah mansang lalu nyungkurka diri di mua raja, lalu ku raja bejaku enggau iya, “Pulai meh nuan ke rumah.” Lebuh David baru deka ngapuska seput, iya mesanka anak iya Solomon, lalu meri jaku ajar ti penudi ngagai iya: “Aku nyau deka mati. Nuan enda tau enda kering sereta berani, lalu kereja semua utai ti diasuh TUHAN Allah Taala nuan. Nuan enda tau enda ngasika semua adat enggau pesan Iya, munyi ti ditulis dalam Adat Moses, ngambika, di sebarang endur nuan bejalai, nuan deka mujur dalam semua utai ti dikereja nuan. Enti nuan ngasika TUHAN, Iya deka ngamatka semua semaya ti udah digaga Iya, lebuh Iya madahka peturun aku deka megai perintah di menua Israel, enti sida bejimat sereta tetap ati ngasika pesan Iya enggau pengabis ati sida sereta enggau pengabis semengat sida. “Siti agi pekara. Nuan ingatka utai ti udah dikereja Joap ngagai aku, lebuh iya munuh dua iku tuai soldadu menua Israel, Abner anak Ner enggau Amasa anak Jeter. Nuan ingatka chara iya munuh seduai nya, lebuh maya nadai pengachau, kena iya bebalaska orang ke dibunuh Abner seduai Amasa lebuh maya beperang. Joap munuh orang ke nadai penyalah. Diatu aku betanggungjawapka utai ti udah dikereja iya, lalu aku kena laban penusah ketegal nya. Nuan nemu utai ti patut dikereja diri. Nuan enda tau nejuka iya mati tuai. Tang nuan enda tau enda manah enggau bala anak Barsilai ari Giliat, lalu ngibun sida, laban sida udah manah enggau aku, lebuh aku ngerarika diri ari menyadi nuan Absalom. “Baka nya mega Simei anak Gera, ari nengeri Bahurim, di menua Benjamin. Iya balat amat nyumpah aku, lebuh aku mansang ngagai Mahanaim, tang lebuh iya betemu enggau aku ba Sungai Jordan, aku besumpah enggau iya dalam nama TUHAN madahka diri enda munuh iya. Tang nuan enda tau enda ngukum iya. Nuan nemu utai ti patut dikereja diri, lalu nuan enda tau enda ngasuh orang munuh iya.” David mati lalu dikuburka di Nengeri David. Iya udah nyadi raja empat puluh taun. Iya udah merintah tujuh taun di Hebron, lalu tiga puluh tiga taun di Jerusalem. Solomon lalu nganti apai iya nyadi raja, lalu kuasa iya kukuh. Udah nya Adonijah (indai iya Hagit) lalu mansang ngagai Batseba, indai Solomon. “Kati nuan datai enggau ati ti manah?” ku Batseba nanya. “Enggau ati ti manah,” ku iya nyaut. Lalu ku iya nambahka jaku diri, “Aku bisi utai ti deka dipinta aku ari nuan.” “Nama utai nya?” ku Batseba nanya. Ku Adonijah nyaut, “Nuan nemu, aku endang patut nyadi raja. Semua orang di menua Israel endang ngadang nya magang. Tang utai ti nyadi nya lain agi ari nya, lalu menyadi aku nyadi raja, laban nya endang peneka TUHAN. Nya alai diatu aku bisi utai ti deka dipinta aku. Aku minta nuan meri utai nya ngagai aku.” “Utai nama?” ku Batseba nanya. Ku Adonijah nyaut, “Aku minta nuan nanya Raja Solomon enti aku tau bempu Abisak, indu ke datai ari Sunem, nyadika bini aku. Aku nemu Solomon enggai nyebut ‘enggai’ ngagai nuan.” “Barang ku jaku,” ku Batseba nyaut. “Ila aku bejaku enggau raja ngarika nuan.” Batseba lalu betemu enggau raja, deka bejaku enggau iya, ngarika Adonijah. Raja lalu bediri nyambut penatai indai iya, lalu nyungkurka diri di mua indai iya. Udah nya Solomon lalu duduk ba kerusi diraja iya, lalu ngasuh orang mai siti agi kerusi diraja, alai indai iya ke lalu nudukka diri ari kanan iya. Ku indai iya bejaku, “Aku bisi siti utai ti deka dipinta aku ari nuan. Anang nulak utai ti dipinta aku.” “Utai nama, indai?” ku Solomon nanya. “Nadai aku nulak utai ti dipinta nuan.” Ku indai iya nyaut, “Awakka menyadi nuan Adonijah bempu Abisak nyadika bini iya.” “Nama kebuah nuan ngasuh aku meri Abisak ngagai iya?” ku Solomon nanya. “Manah agi enti nuan ngasuh aku meri kerusi diraja tu ngagai iya. Iya menyadi tuai aku, lalu Imam Abiatar enggau Joap setanah enggau iya!” Udah nya Solomon lalu besumpah dalam nama TUHAN, “Awakka Allah Taala munuh aku enti aku enda munuh Adonijah ketegal iya minta utai tu! TUHAN udah ngasuh aku duduk ba kerusi diraja apai aku David. Iya udah ngamatka semaya Iya, lalu udah meri perintah tu ngagai aku, enggau ngagai peturun aku. Aku besumpah dalam nama TUHAN ti idup, Adonijah deka mati sehari tu!” Raja Solomon lalu meri atur ngagai Benaiah. Benaiah mansang lalu munuh Adonijah. Udah nya Raja Solomon lalu bejaku enggau Imam Abiatar, “Pulai nuan ngagai rumah nuan empu di Anatot. Nuan patut dibunuh, tang aku enggai ngasuh orang munuh nuan diatu, laban nuan ngemataka Peti Lampang Batu Adat TUHAN lebuh nuan agi enggau apai aku, lalu nuan udah sama enggau apai aku ngasaika semua penusah iya.” Udah nya Solomon lalu muai Abiatar ari pengawa iya ti nyadi imam TUHAN. Tu ngamatka utai ti udah disebut TUHAN di Siloh, pasal Imam Eli enggau peturun iya. Lebuh Joap ninga berita pasal utai ti udah nyadi, (iya udah nyukung Adonijah, tang enda nyukung Absalom.) iya lalu ngerarika diri ngagai Langkau Kain TUHAN, lalu bepegai ba sukut alta. Lebuh Raja Solomon ninga Joap udah ngerarika diri ngagai Langkau Kain TUHAN, lalu bediri ngimbai alta, Solomon lalu ngasuh siku seruan mansang ngagai Joap, nanyaka kebuah iya ngerarika diri ngagai alta nya. Ku Joap, iya udah ngerarika diri ngagai TUHAN, laban iya takutka Solomon. Nya alai Raja Solomon lalu ngasuh Benaiah munuh Joap. Benaiah lalu mansang ngagai Langkau Kain TUHAN, lalu bejaku enggau Joap, “Raja ngasuh nuan pansut.” “Enggai aku,” ku Joap nyaut. “Awakka aku mati ditu.” Benaiah pulai baru ngagai raja, lalu madahka jaku Joap ngagai iya. “Kereja aja utai ti ku Joap,” ku Solomon nyaut. “Bunuh iya, lalu kuburka iya. Nya baru aku, tauka bala peturun David ti bukai, enda agi betanggungjawapka utai ti udah dikereja Joap lebuh iya munuh orang ke nadai penyalah. TUHAN deka ngukum Joap ketegal iya udah munuh orang nya, lalu enda madahka ngagai apai aku. Joap udah munuh dua iku orang ke nadai penyalah, ke badas agi ari iya empu, Abner, tuai soldadu orang Israel, enggau Amasa, tuai soldadu orang Judah. Ukum ketegal iya ti udah munuh orang nya deka ninggang Joap, enggau peturun iya belama iya. Tang TUHAN deka ngemujurka peturun David ke duduk ba kerusi diraja iya.” Nya alai Benaiah lalu mansang ngagai Langkau Kain TUHAN, lalu munuh Joap. Joap lalu dikuburka di menua iya, ari luar nengeri. Raja lalu ngasuh Benaiah nyadi tuai soldadu, nganti Joap, lalu ngasuh Sadok nyadi imam, nganti Abiatar. Udah nya raja lalu mesanka Simei, lalu ku iya bejaku enggau Simei, “Gaga sebuah rumah ke diri empu ditu di Jerusalem. Diau dalam rumah nya, lalu anang angkat ari nengeri tu. Enti nuan angkat ari tu ngilah sungai Kidron, nuan tetap deka mati, lalu nuan empu deka betanggungjawapka pemati diri.” “Au, Tuan Raja,” ku Simei nyaut. “Aku deka ngereja utai ti ku nuan.” Nya alai iya diau lama di Jerusalem. Tang tiga taun udah bekau nya, dua iku ulun Simei rari ngagai Raja Akis anak Maakah ti nyadi raja di Gat. Lebuh Simei ninga berita seduai iya bisi di Gat, iya lalu nyendiaka keledai iya, lalu mansang ngagai Raja Akis di Gat, ngiga ulun iya. Iya lalu tetemuka seduai iya, lalu mai seduai iya pulai. Lebuh Solomon ninga berita pasal utai ti udah dikereja Simei, iya lalu mesanka Simei, lalu bejaku, “Aku udah ngasuh nuan besemaya di mua TUHAN, enda ninggalka Jerusalem. Lalu aku udah meri jaku tangkan ngagai nuan, enti nuan ninggalka Jerusalem, nuan tetap deka mati. Lalu nuan udah besetuju enggau nya, lalu madahka diri deka ngasika aku, ukai enda? Nya alai, nama kebuah nuan mungkirka semaya nya, lalu enda ngasika pesan aku? Nuan endang nemu semua utai ti salah, ti udah dikereja nuan ngagai apai aku David. Nya alai, TUHAN deka ngukum nuan ketegal utai nya. Tang Iya deka merekatka aku, lalu deka ngasuh perintah David meruan belama iya.” Udah nya raja lalu bejaku enggau Benaiah. Benaiah mansang, lalu munuh Simei. Nya alai, semua kuasa diatu ba jari Solomon magang. Solomon ngaga sempekat enggau raja menua Ejip, lalu jadi enggau anak indu iya. Iya mai indu nya diau dalam Nengeri David, nyentuk ngagai maya iya udah tembu ngaga istana, Rumah Sembiang, enggau dinding kuta ti ngelingi Jerusalem. Lebuh maya nya Rumah Sembiang apin digaga. Nya alai orang Israel agi ngenjuk piring sida ba mayuh bengkah alta. Nyadi Solomon sigi rinduka TUHAN, lalu iya nitihka atur apai iya David, tang iya mega munuh jelu lalu ngenjuk sida nyadika piring ba mayuh bengkah alta. Nyadi sekali, iya mansang ngagai Gibeon, deka ngenjuk piring dia, laban alta dia pemadu tebilang. Iya endang udah meri beratus ratus iti piring tunu ba endur nya dulu ari nya. Malam nya TUHAN pegari di mua iya dalam mimpi, lalu nanya iya, “Nama utai ti dipinta nuan ari Aku?” Solomon lalu nyaut, “Nuan endang seruran mandangka pengerindu ti besai ngagai apai aku David, ke nembiak Nuan, lalu iya orang ke badas, ke taluk, sereta tetap ati ngagai Nuan. Lalu Nuan udah majak ngayanka pengerindu Nuan ti meruan belama iya ngagai iya, lebuh Nuan meri iya siku anak lelaki, ke merintah nganti iya sehari tu. O TUHAN Allah Taala, Nuan udah ngasuh aku nganti apai aku nyadi raja, taja pen aku tu agi biak, lalu enda nemu chara merintah. Aku begulai enggau orang ke udah dipilih Nuan nyadi nembiak Nuan, bansa ti mayuh tubuh, ti enda ulih diitung. Nya alai, beri aku penemu-dalam kena aku merintah bala nembiak Nuan enggau lurus, sereta dikena aku ngelala bagi utai ti manah enggau ti jai. Enti enda baka nya, baka ni ku aku ulih merintah bala nembiak Nuan ke mayuh tu?” TUHAN gaga ati ninga Solomon minta nya. Nya alai, ku Iya bejaku enggau Solomon, “Laban nuan udah minta penemu-dalam kena nuan merintah enggau lurus, lalu enda minta diri gayu-guru, tauka minta pengaya, tauka minta munsuh nuan dibunuh, Aku deka ngereja utai ti udah dipinta nuan. Aku deka meri nuan penemu-dalam enggau pemereti ati lebih ari enggi orang bukai ke dulu tauka dudi ari nuan. Aku deka mega meri ngagai nuan utai ti enda dipinta nuan. Nuan deka bulih pengaya enggau basa seumur idup, lebih ari enggi raja bukai. Lalu enti nuan ngasika Aku, lalu nitihka adat enggau pesan Aku, baka apai nuan David, Aku deka ngasuh nuan panjai umur.” Solomon lalu tedani. Nya baru iya nemu Allah Taala udah bejaku enggau iya dalam mimpi. Udah nya iya mansang ngagai Jerusalem, bediri di mua Peti Lampang Batu Adat TUHAN, lalu ngenjuk piring tunu enggau piring pemaik, ngagai TUHAN. Udah nya iya lalu nyendiaka pengerami makai besai ke semua pemesai iya. Nyadi sekali, dua iku indu sundal datai lalu bediri di mua Raja Solomon. Ku siku bejaku, “Tuan Raja, kami duai indu tu sama begulai diau dalam sebuah rumah, lalu aku ngadaka anak lelaki siku di rumah lebuh indu nya bisi dia. Dua hari udah bekau anak aku ada, iya mega ngadaka anak lelaki siku. Semina kami duai aja bisi di rumah nya. Orang bukai sigi nadai dia. Nyadi sekali, lebuh malam hari, iya bekalih, lalu tetinggangka anak iya, lalu anak iya mati. Iya angkat malam nya, ngambi anak aku ke dikimbit aku lebuh aku tinduk, lalu mai anak aku ngagai peninduk iya empu. Udah nya iya ngengkahka anak iya ti udah mati nya ba peninduk aku. Pagi hari siti, lebuh aku dani, deka nusuka anak aku, aku meda iya udah mati. Aku lalu meresa iya enggau silik. Nya baru aku nemu iya ukai anak aku.” Tang ku indu ke siku nya bejaku, “Ukai baka nya! Anak mit ke idup nya endang anak aku. Anak mit ke mati nya anak nuan!” Ku indu ke terubah bejaku nya nyaut, “Ukai baka nya! Anak mit ke mati nya endang anak nuan. Iya ti agi idup nya endang anak aku!” Nya meh munyi seduai iya bekelikuh di mua raja. Udah nya Raja lalu bejaku, “Seduai sama ngumbai anak mit ke idup nya anak diri, lalu anak mit ke mati nya ukai anak seduai.” Raja lalu ngasuh orang ngambi pedang. Lebuh pedang nya dibai ngagai iya, raja lalu bejaku, “Belah dua anak mit ke idup nya, lalu beri setengah ngagai seduai iya siku-siku.” Laban indai anak mit nya balat sayauka anak iya, nya alai iya lalu bejaku enggau raja, “Tuan Raja, anang munuh anak mit nya! Beri iya ngagai indu nya!” Tang ku indu nya bejaku, “Anang meri iya ngagai kami duai, tang awakka iya dibelah dua.” Udah nya Solomon lalu bejaku, “Anang munuh anak mit nya! Beri iya ngagai indu ke terubah. Iya endang indai iya.” Lebuh orang Israel ninga pasal pemutus penemu Solomon, sida balat amat bebasaka iya, laban sida nemu Allah Taala udah meri iya penemu-dalam kena iya meri atur ti lurus. Raja Solomon merintah semua menua Israel, lalu tu bala pemesai iya ti tinggi pangkat: Imam: Asariah anak Sadok Kerani kot: Elihorep seduai Ahijah, ke sama anak Sisa Tukang tulis: Jehosapat anak Ahilut Tuai soldadu: Sadok anak Abiatar Kepala gabenor pelilih menua: Asariah anak Natan Penyanding penemu raja: Imam Sabut anak Natan Orang ke nyadi tuai ngemataka bala orang gaji ke bekereja dalam istana: Ahisar Orang ke nyadi tuai ngemataka orang ke dipejalka gawa ngereja pengawa ti berat: Adoniram anak Abda. Solomon ngeletak dua belas iku orang nyadi gabenor ke pelilih menua di menua Israel. Sida tu diberi tanggungjawap meri, ari pelilih menua ti dipegai sida, pemakai ngagai raja enggau sida raja sebilik. Siku-siku sida meri pemakai sebulan aja dalam setaun. Tu nama bala pemesai ke dua belas iku nya, enggau pelilih menua ti dipegai sida: Benhur: menua ti bebukit di menua Epraim Ben-deker: di Makas, Sa-albim, Bet-semes, Elon, enggau Elon-bet-hanan Ben-heset: di Arubot enggau Sokoh, enggau semua menua Heper Ben-abinadap, ke jadi enggau anak indu Solomon ke benama Tapat: semua menua Dor Bana anak Ahilut: di Taanak, Megido, enggau semua menua ti semak Bet-san, semak nengeri Saretan, tunga ke selatan nengeri Jesril, nyentuk ngagai nengeri Abel-meholah enggau nengeri Jokmim Ben-geber: nengeri Ramot-giliat, enggau genturung pendiau di menua Giliat ti diempu raban peturun Jair, siti peturun Manasi, enggau menua Argop di Basan, enam puluh buah nengeri ti besai semua iya ke bisi dinding kuta, enggau alang temaga ba pintu nengeri Ahinadap anak Ido: pelilih menua Mahanaim Ahimas, ke jadi enggau Basemat, siku ari anak indu Solomon: menua Naptali Bana anak Husai: menua Aser enggau nengeri Bealot Jehosapat anak Paruah: menua Isakar Simei anak Ela: menua Benjamin Geba anak Uri: menua Giliat, ti udah dipegai raja orang Amor, Raja Sihon, enggau Raja Og di Basan Kelimpah ari sida dua belas tu, bisi siku agi gabenor, ti nyadi gabenor ke semua menua Israel. Orang Judah enggau orang Israel nyau ngemayuh igi pasir ti ba tebing tasik. Sida makai ngirup, lalu lantang diau. Menua ti dipegai Solomon nyengkaum semua menua ari Sungai Eupratis ngagai menua Pilistin, nyentuk ngagai entara menua Ejip. Sida mayar chukai ngagai iya, lalu nunduk ngagai iya seumur iya idup. Utai ti dipeguna Solomon tiap hari nya 5,000 liter tepung ti alus enggau 10,000 liter tepung ti kasar, Sepuluh iku jelu sapi ti ditupi dalam bansal, 20 iku sapi ti ditupi di padang, enggau 100 iku bedus, nambahka rusa, kijang, pelanduk enggau manuk. Solomon merintah serata menua ti tunga ke barat Sungai Eupratis, ari Tipsah ti ba Sungai Eupratis nyentuk ngagai nengeri Gasa di barat. Semua raja tunga ke barat Sungai Eupratis nunduk magang ngagai iya, lalu iya diau bebaik enggau semua menua ti ngelingi menua ti dipegai iya. Lebuh iya agi idup, orang Israel di serata menua Judah enggau menua Israel diau likun. Genap ruang bilik sida bela bisi kebun anggur enggau kebun buah kana ke diri empu. Solomon bisi 40,000 buah bansal alai iya ngandang kuda ti dikena iya narit kerita perang iya, enggau 12,000 iku kuda kena beperang. Ba bulan ti udah diletak, siku-siku gabenor meri pemakai ngagai Raja Solomon empu enggau ngagai semua orang ke makai dalam istana. Sida gabenor tu endang seruran meri utai ti dipeguna raja. Genap iku gabenor mega meri barli enggau rumput ti rangkai, ngagai endur alai utai nya dipeguna, ke kuda ti narit kerita perang enggau ke jelu ti dikena ngereja pengawa. Allah Taala meri Solomon penemu-dalam enggau runding ti dalam, enggau pemandai ti enda ulih disagam. Solomon lebih agi bepenemu-dalam ari orang ke bepenemu-dalam di Timur, tauka ari orang ke bepenemu-dalam di menua Ejip. Iya orang ke pemadu bepenemu-dalam ari semua orang, lebih agi bepenemu-dalam ari sida Etan orang Esrahi, enggau ari Heman, Kalkol, enggau Darda, bala anak lelaki Mahol. Lalu berita pasal iya ngelekai ngagai semua menua ti ngelingi menua iya. Iya nulis tiga ribu iti jaku-dalam, enggau lebih seribu iti lagu. Iya bejakuka pasal kayu enggau utai ti tumbuh, berengkah ari kayu sidar di Lebanon, nyentuk ngagai isop ti tumbuh ba dinding. Iya bejakuka pasal jelu, burung, ular enggau ikan. Raja ari semua menua di dunya tu bela ninga berita pasal penemu-dalam ti dikembuan iya, lalu sida ngasuh orang mansang ngagai iya lalu mendingka iya. Raja Hiram ari Tire endang pangan David. Nya alai lebuh iya ninga berita Solomon udah nganti apai iya David nyadi raja, iya lalu ngasuh bala pengari iya betemu enggau Solomon. Solomon lalu ngirumka pesan tu ngagai Hiram: “Nuan nemu, apai aku David endang selalu beperang ngelaban munsuh ke nyerang ari menua ti ngelingi menua kami. Nya alai laban TUHAN apin ngasuh apai aku menang ngelaban semua munsuh iya, iya apin ulih ngaga rumah alai nyembah TUHAN Allah Taala iya. Tang diatu, TUHAN Allah Taala aku udah meri aku pemaik di serata menua ti dipegai aku. Aku nadai munsuh, lalu aku enda agi diserang orang. TUHAN udah besemaya ngagai apai aku David, ku Iya, ‘Anak nuan, ti deka diletak Aku nyadi raja nganti nuan, deka ngaga Rumah ke Aku.’ Nya meh kebuah aku diatu udah mutuska runding deka ngaga rumah alai nyembah TUHAN Allah Taala aku. Nya alai, asuh meh bala nembiak nuan mansang ngagai Lebanon lalu nebang kayu sidar ke aku. Bala nembiak aku deka gawa enggau sida, lalu aku deka mayar gaji ngagai bala nembiak nuan nitihka penyampau ti diletak nuan ke sida siku-siku. Nuan nemu, bala nembiak aku enda landik baka bala nembiak nuan nebang kayu.” Hiram gaga amat ati nerima pesan ari Solomon, lalu ku iya, “Pujika TUHAN sehari tu laban Iya udah meri ngagai David anak ti bepenemu-dalam baka nya nganti iya nyadi raja ke menua ti bekuasa baka nya!” Udah nya Hiram lalu ngirumka pesan tu ngagai Solomon: “Aku udah nerima pesan nuan, lalu aku diatu sedia deka ngereja utai ti dipinta nuan. Aku deka meri ngagai nuan kayu sidar, enggau kayu pain. Bala nembiak aku deka narit kayu nya ari menua Lebanon ngagai tasik, lalu deka ngaga sida nyadi akit lalu beraratka sida nebing tasik ngagai endur ti dipilih nuan. Dia bala nembiak aku deka muka akit nya, lalu bala nembiak nuan deka betanggungjawapka kayu nya. Lalu aku minta nuan meri pemakai ngagai bala nembiak aku.” Hiram lalu meri Solomon semua batang sidar enggau batang pain ti dipeguna iya, lalu Solomon meri ngagai Hiram 322,500 kilogram gandum enggau 400,000 liter minyak kana ti tulin genap taun, kena Hiram meri bala nembiak iya makai. TUHAN ngamatka semaya Iya, lalu meri penemu-dalam ngagai Solomon. Hiram seduai Solomon diau bebaik enggau pangan diri, lalu seduai iya ngaga sempekat enggau pangan diri. Raja Solomon ngambi 30,000 iku orang ari serata menua Israel bekereja ngena jalai pejal, lalu ngasuh Adoniram nyadi tuai sida. Adoniram lalu magi sida ngagai tiga bengkah raban, 10,000 iku dalam siti-siti raban, lalu siti-siti raban bekereja sebulan di Lebanon, enggau dua bulan di menua diri. Solomon mega ngasuh 80,000 iku orang netak batu di menua ti bebukit, enggau 70,000 iku orang mai batu nya, lalu ngasuh 3,300 iku mandur nyadi tuai ngemataka pengawa sida. Nitihka pesan Solomon, sida lalu ningkuh batu ti alus nyadika batu pemun Rumah Sembiang. Bala orang ke bekereja ke Solomon seduai Hiram, enggau bala orang ke datai ari nengeri Gebal lalu nyendiaka batu enggau ramu kena ngaga Rumah Sembiang. Empat ratus lapan puluh taun udah bekau orang Israel pansut ari menua Ejip, dalam taun ti keempat Solomon udah berengkah megai perintah di menua Israel, dalam bulan ti kedua, iya nya bulan Sib, Solomon lalu berengkah ngaga Rumah Sembiang. Pemanjai iya, disukat ari dalam, 27 meter, buka iya 9 meter, lalu peninggi iya 13.5 meter. Pemanjai bilik penama nya 4.5 meter, lalu buka iya 9 meter, ngemesai Endur ti Kudus empu. Dinding Rumah Sembiang nya ditebuk, lalu lubang nya mit ari luar, besai ari dalam. Dinding Rumah Sembiang ari luar, muak ari tisi sepiak-sepiak enggau ari belakang, digagaka tungking rumah ti tinggi tiga ringkat, peninggi seringkat 2.2 meter. Bilik ti ba tingkat ti di baruh buka 2.2 meter, bilik ti ba tingkat ti kedua 2.7 meter buka, lalu ba tingkat ti di atas 3.1 meter buka. Dinding Rumah Sembiang nya mipau agi ba tingkat ti di atas, ari ba tingkat ti di baruh, ngambika siti-siti bilik nya duduk ba dinding, enda begunaka pengerat. Batu ti dikena ngaga Rumah Sembiang udah digaga ba endur alai orang ke ngulihka batu nya empu, ngambika sida enda ibuh inggar bekenaka tukul, tauka kapak, tauka perengka besi ti bukai lebuh Rumah Sembiang nya benung digaga. Pintu penama ngagai tingkat ti di baruh endar ke tungking rumah nya, nya muak ke tisi selatan Rumah Sembiang, lalu ari nya digagaka tangga nuju ngagai tingkat ti kedua enggau ketiga. Nya meh jalai Raja Solomon nembuka pengawa begagaka Rumah Sembiang. Iya ngaga dek ke Rumah Sembiang ari papan kayu ara enggau papan kayu sidar. Tungking ti tiga tingkat, siti-siti tingkat tinggi 2.2 meter, digaga nungking ba dinding luar Rumah Sembiang, lalu dilekatka ngagai dinding luar Rumah Sembiang nya ngena sanding ti digaga ari kayu sidar. Ku TUHAN bejaku ngagai Solomon, “Enti nuan ngasika semua adat enggau pesan Aku, Aku deka ngereja ke nuan utai ti udah disemaya Aku ngagai apai nuan David. Aku deka diau enggau bala nembiak Aku dalam Rumah Sembiang ti digaga nuan tu, lalu Aku enggai sekali-kali ninggalka sida.” Nya meh chara Solomon nembuka pengawa begagaka Rumah Sembiang nya. Dinding ti muak ari dalam dilapis ngena papan kenyau ari geladak nyentuk ngagai dek, lalu geladak nya digaga ari kayu pain. Bilik ti di dalam bendar, ti dikumbai Endur ti Pemadu Kudus, digaga di belakang Rumah Sembiang. Pemanjai iya 9 meter, lalu disapat ngena papan kayu sidar kenyau ari geladak nyentuk ngagai dek. Bilik ti di mua Endur ti Pemadu Kudus nya panjai 18 meter. Papan kayu sidar ti dalam Rumah Sembiang nya diukir enggau gamal randau enggau bungai. Semua dinding dalam Rumah Sembiang nya dilapis magang ngena kayu sidar, datai ke semua batu ti dikena ngaga dinding nya nadai ayan agi. Di belakang Rumah Sembiang nya bisi digagaka sebuah bilik dalam, alai nyimpan Peti Lampang Batu Adat TUHAN. Bilik ti di dalam tu nya panjai 9 meter, buka 9 meter, enggau peninggi 9 meter, lalu semua disampak magang enggau emas ti tulin. Alta nya disampak enggau papan kayu sidar. Muak ari dalam, Rumah Sembiang nya disampak enggau emas. Rantai emas ditarikka meraka penama ngagai bilik ti di dalam. Bilik ti di dalam tu mega disampak enggau emas. Semua utai dalam Rumah Sembiang disampak enggau emas magang, nyengkaum alta ti dalam Endur ti Pemadu Kudus. Dua iku melikat cherub ti besayap, ke digaga ari kayu kana, siku-siku tinggi 4.4 meter, diengkahka dalam Endur ti Pemadu Kudus. Melikat cherub ti dua iku tu diengkah berimbai enggau pangan diri dalam Endur ti Pemadu Kudus, ngambika puting sayap seduai iya betemu ba tengah-tengah bilik nya, lalu puting sayap seduai iya ari sepiak negu dinding bilik nya. Dua iku melikat cherub ti besayap tu disampak enggau emas. Dinding bilik besai enggau bilik ti di dalam semua diukir magang enggau gambar bala melikat cherub ti besayap, gambar kayu engkerema, enggau gambar bungai. Indah geladak deh disampak enggau emas. Pintu ti berimbai dua, ti digaga ari kayu kana, diengkahka ba penama ngagai Endur ti Pemadu Kudus. Puchuk penama tu digaga juring. Pintu nya diukir enggau gambar bala melikat cherub ti besayap, gambar kayu engkerema, enggau gambar bungai. Pintu, melikat cherub ti besayap, enggau kayu engkerema nya disampak enggau emas. Langkar pintu ti ba penama ngagai bilik besai nya besegi empat, lalu digaga ari kayu kana. Pintu dia dua iti, belipat dua, digaga ari kayu pain lalu diukir enggau gambar bala melikat cherub ti besayap, gambar kayu engkerema enggau bungai lalu disampak enggau emas, sama penebal. Siti tengah laman bisi digaga di mua Rumah Sembiang, dikelingi dinding. Dinding nya digaga ari selapis kayu sidar beselat enggau tiga lapis batu. Batu pemun ke Rumah Sembiang tu ditanam dalam bulan ti kedua, iya nya bulan Sib, keempat taun Solomon udah berengkah megai menua nya. Dalam bulan ti kelapan, iya nya bulan Bul, kesebelas taun Solomon udah berengkah megai menua nya, Rumah Sembiang nya lalu tembu digaga, betul-betul nitihka pelan. Pengelama Solomon ngaga Rumah Sembiang nya tujuh taun. Solomon mega ngaga istana ke iya empu. Pengelama iya ngaga istana nya tiga belas taun. Ba dua iti dinding bisi tiga rintai jenila. Lubang pintu enggau lubang jenila bisi langkar ti besegi empat, lalu tiga iti rintai jenila ba dinding ti sepiak betapak enggau jenila ti ari sepiak. Nyadi balai ti dikumbai Balai Tiang nya panjai 22 meter, lalu buka iya 13.5 meter. Balai nya bisi siti serambi ti ditungkat ngena tiang. Bilik alai kerusi diraja, ti mega dikumbai Balai Pechara, alai Solomon ngatur pechara, didinding ngena papan kayu sidar kenyau ari geladak nyentuk ngagai perabung. Rumah Solomon empu, ti ba siti tengah laman di belakang Balai Pechara, digaga baka rumah ti bukai. Iya mega ngaga rumah ti sebaka enggau nya ke bini iya, iya nya anak indu raja menua Ejip. Semua rumah nya, enggau tengah laman ti besai digaga ari batu ti manah, berengkah ari batu pemun nyentuk ngagai kaki atap. Batu nya disediaka ba endur alai orang ke ngulihka batu, lalu ditetak ngena penyayat nitihka sukat ti diguna. Batu pemun ke rumah nya digaga ari batu ti besai ti disediaka ba endur alai orang ke ngulihka batu. Sekeda batu nya 3.5 meter panjai, sekeda 4 meter. Batu ti bukai, ti udah ditetak nitihka pemesai ti diguna, diengkahka ba atas batu ti besai nya, sama enggau sengkar ti digaga ari kayu sidar. Dinding ke tengah laman istana, enggau tengah laman dalam Rumah Sembiang, enggau dinding ke bilik penama ngagai Rumah Sembiang, digaga ari selapis papan kayu sidar beselat enggau tiga lapis batu ti udah ditetak. Raja Solomon mesanka orang siku ke benama Huram. Huram tu tukang ke diau di nengeri Tire. Iya landik begagaka utai ari temaga. Niang apai iya datai ari Tire. Lalu apai iya mega landik begagaka utai ari temaga. Indai iya datai ari raban bansa Naptali. Huram tu tukang ke pandai sereta lama udah begagaka utai nya. Nya alai iya nyambut pinta raja ke ngasuh iya nyadi tuai semua orang ke bekereja begagaka utai ari temaga. Huram ngaga dua iti tiang temaga ngena chuan. Peninggi siti-siti tiang nya 8 meter, lalu sakap iya 5.3 meter. Tiang nya didirika iya ba penama ngagai Rumah Sembiang. Iya mega ngaga dua iti tutup tiang ari temaga. Peninggi siti-siti tutup nya 2.2 meter. Tutup tu diengkahka ba puchuk tiang nya. Puchuk tiang dua iti nya diukir ngena ukir ti baka rantai enggau dua iti rintai buah delima ti digaga ari temaga. Tutup tiang nya baka gamal bungai bakung, tinggi 1.8 meter, ti dilekatka ngelingi tiang ti segala nya, ari atas ukir ti baka rantai. Dua ratus igi buah delima, berintai dua, melit siti-siti puchuk tiang nya. Huram nirika tiang temaga dua batang nya ba penama ngagai Rumah Sembiang. Tiang ti muak ke selatan nya dikumbai Jachin lalu tiang ti muak ke utara nya dikumbai Boas. Tutup pala tiang ti digaga ari temaga ti baka gamal bungai bakung nya diengkahka ba pala tiang nya. Nya alai pengawa ngaga tiang nya tembu. Huram ngaga siti tangki ti segala ari temaga. Penalam iya 2.2 meter, buka iya 4.4 meter, lalu sakap iya 13.2 meter. Ngelingi tisi tangki nya ari luar, bisi dua iti rintai buah labu ti digaga ari temaga. Buah tu digaga sama selajur enggau tangki nya empu. Tangki nya duduk ba belakang dua belas iku sapi ti lelaki ti digaga ari temaga, ti nguing tunga ke luar, tiga iku nunga ke selatan, tiga nunga ke timur, tiga nunga ke utara, lalu tiga nunga ke barat. Penebal tangki nya 75 milimeter. Lilit tisi iya baka lilit tisi mangkuk, nyerindak ke luar baka kuntum bungai bakung. Tangki nya ulih ngundan kira 40,000 liter. Huram mega ngaga sepuluh buah kerita tarit ari temaga. Genap buah kerita nya 1.8 meter panjai 1.8 meter buka, enggau 1.3 meter peninggi. Kerita nya digaga ari papan ti besegi empat, ti dilekatka ba langkar, enggau gambar singa, sapi ti lelaki, enggau melikat cherub ti besayap diukirka ba papan nya. Lalu ba langkar ti ari atas enggau ari baruh singa, enggau sapi ti lelaki, bisi ukir ti bebelit. Genap kerita nya bisi kaki temaga. Ba empat iti sukut bisi tiang alai ngengkahka bisin. Tiang nya dilagu ngena ukir ti bebelit. Ba puchuk tiang nya bisi siti langkar ti segala alai ngengkahka bisin. Peninggi langkar nya ari atas kerita nya 44 sentimeter, enggau 22 sentimeter masuk ngagai kerita nya. Peninggi kaki kerita nya 66 sentimeter. Kaki nya ari baruh dinding kerita nya, lalu utai ti alai kaki nya lekat, digaga selajur enggau kerita nya empu. Kaki kerita nya baka kaki kerita perang. Semua perengka kaki kerita nya digaga ari temaga magang. Di baruh empat iti sukut ke kerita nya bisi empat iti tungkat. Tungkat tu mega digaga selajur enggau temaga ti dikena ngaga kerita nya. Puchuk siti-siti kerita nya bisi lilit. Buka siti-siti lilit nya 22 sentimeter. Tiang tungkat, enggau dinding kerita nya digaga selajur enggau kerita nya empu. Tiang tungkat, enggau dinding ke kerita nya dilagu ngena gambar bala melikat cherub ti besayap, gambar singa, gambar kayu engkerema, ba sebarang endur ti bisi lapang alai ngengkahka sida, lalu dikelingi enggau ukir ti bebelit. Nya meh chara kerita nya digaga. Semua kerita nya sebaka magang, sama sebaka pemesai, sama sebaka gaya. Huram mega ngaga sepuluh iti bisin, siti bisin ke siti-siti kerita. Siti-siti bisin nya buka 1.8 meter, lalu ulih ngundan lapan ratus liter. Iya ngengkahka lima buah kerita nya ba rusuk selatan Rumah Sembiang, enggau lima buah ti bukai ba rusuk utara. Tangki nya diengkahka iya ba sukut selatan. Raja ngasuh semua utai nya digaga ba endur alai orang ke ngeluluhka besi, ba entara Sukut enggau Saretan, di Lebak Jordan. Solomon nadai ngasuh orang nimbang utai ti digaga ari temaga nya, laban utai nya kelalu mayuh. Nya alai semua utai nya nadai ditimbang. Solomon mega ngasuh orang ngaga pekekas ari emas ke Rumah Sembiang. Pekekas nya nyengkaum alta, mija alai engkah roti ti diberi ngagai Allah Taala, sepuluh iti penuduk lampu, ti bediri di mua Endur ti Pemadu Kudus, lima muak ke selatan, enggau lima muak ke utara, bungai, lampu, penyepit, mangkuk, utai ti dikena madamka lampu, mangkuk, pinggai alai engkah menyan, enggau talam kena mai bara api, insil pintu ke Endur ti Pemadu Kudus, enggau insil ke pintu luar ke Rumah Sembiang. Semua perengka tu digaga ari emas magang. Lebuh Raja Solomon udah nembuka semua pengawa begagaka Rumah Sembiang, iya lalu nyimpan semua utai ti udah diserahka apai iya David ngagai TUHAN, dalam bilik ti alai nyimpan semua utai. Utai nya nyengkaum pirak, emas enggau utai bukai. Udah nya Raja Solomon lalu mesanka semua tuai raban bansa enggau tuai peturun orang Israel datai ngagai iya di Jerusalem laban iya deka mai Peti Lampang Batu Adat TUHAN ari Sion, iya nya nengeri David, ngagai Rumah Sembiang. Semua sida lalu begempuru lebuh Gawai Belangkau dalam bulan ti ketujuh, iya nya bulan Etanim. Lebuh semua bala tuai udah begempuru magang, bala imam lalu ngesan Peti Lampang Batu Adat lalu mai iya ngagai Rumah Sembiang. Bala orang Lewi enggau bala sida imam mega mindahka Langkau Kain TUHAN, enggau semua pekekas Langkau Kain nya ngagai Rumah Sembiang. Raja Solomon enggau semua orang Israel begempuru di mua Peti Lampang Batu Adat nya, lalu meri mayuh jelu bedus enggau jelu sapi nyadika piring, datai ke sida nyau enda ulih diitung agi. Udah nya bala imam lalu mai Peti Lampang Batu Adat nya ngagai Rumah Sembiang, lalu ngengkahka iya ba Endur ti Pemadu Kudus, di baruh melikat cherub ti besayap. Sayap ti dikerembaika dua iku melikat cherub nya mungkur Peti enggau kayu ti dikena ngesan Peti nya. Puting kayu nya ulih dipeda orang ke bediri di mua Endur ti Pemadu Kudus, tang enda ulih dipeda ari endur bukai. (Kayu ti dikena ngaling peti nya agi mengkang dia nyentuk ngagai sehari tu.) Utai bukai nadai disimpan dalam Peti Lampang Batu Adat nya, kelimpah ari dua iti lampang batu ti udah diengkah Moses dalam Peti nya ba Bukit Sinai, lebuh TUHAN ngaga sempekat enggau orang Israel, lebuh sida pansut ari menua Ejip. Lebuh bala imam ninggalka Rumah Sembiang nya, mua hari lalu tekala nya ngemenuhka Rumah nya datai ke sida imam nyau enda ulih bekereja dalam Rumah Sembiang nya ketegal mua hari nya; laban mulia TUHAN ngemenuhka Rumah Sembiang nya. Udah nya Solomon lalu besampi: “Nuan, TUHAN, udah ngengkahka mata hari di langit, tang taja pia, Nuan milih mua hari enggau pemetang alai Nuan diau. Diatu aku udah ngaga Rumah Sembiang ti manah tu ke Nuan, alai Nuan diau belama iya.” Lebuh orang mayuh agi benung bediri dia, Raja Solomon lalu nguing ngagai sida, lalu minta Allah Taala merekatka sida. Ku iya bejaku, “Pujika TUHAN Allah Taala ke disembah orang Israel! Iya udah ngamatka semaya ti udah digaga Iya enggau apai aku David, lebuh Iya madahka ngagai David, ‘Kenyau ari lebuh Aku mai bala nembiak Aku pansut ari menua Ejip, Aku apin milih nengeri di serata menua Israel, alai Rumah Sembiang patut digaga, alai kita deka nyembah Aku. Tang Aku milih nuan, David, merintah bala nembiak Aku.’ ” Ku Solomon nampung sampi iya, “Apai aku David udah bekira deka ngaga Rumah Sembiang alai orang tau nyembah TUHAN Allah Taala ke disembah orang Israel, tang ku TUHAN bejaku ngagai iya, ‘Ngena amat nuan bisi ati deka ngaga Rumah Sembiang ke Aku, tang ukai nuan ti deka ngaga Rumah Sembiang nya. Anak nuan, anak nuan empu, ti deka ngaga Rumah Sembiang nya ke Aku.’ “Diatu TUHAN udah ngamatka semaya Iya. Aku udah nganti apai aku nyadi raja menua Israel, lalu aku udah ngaga Rumah Sembiang alai TUHAN Allah Taala ke disembah orang Israel deka disembah. Aku mega udah nyendiaka siti endur dalam Rumah Sembiang alai ngengkahka Peti Lampang Batu Adat ti ngundan lampang batu sempekat. Sempekat nya udah digaga TUHAN enggau bala aki ini kitai, lebuh Iya mai sida pansut ari menua Ejip.” Udah nya, di mua orang mayuh, Solomon lalu mansang bediri di mua alta. Iya ngangkatka jari iya lalu besampi, “ TUHAN Allah Taala ke disembah orang Israel, nadai petara bukai ti baka Nuan, nemuka di serega di atas tauka di dunya di baruh! Nuan ngamatka sempekat Nuan enggau bala nembiak Nuan, lalu ngayanka pengerindu Nuan ke sida, lebuh sida ngasika Nuan enggau pengabis ati sida. Nuan udah ngamatka semaya ti udah digaga Nuan enggau apai aku David. Sehari tu semua jaku nya udah dikamatka magang. Nya alai diatu, TUHAN Allah Taala ke disembah orang Israel, aku besampi minta Nuan mega ngamatka semaya ti udah digaga Nuan enggau apai aku David, lebuh Nuan madahka siku ari peturun iya deka merintah nyadi raja di menua Israel, asal ga sida bejimat ngasika Nuan baka iya. Nya alai, O Allah Taala ke disembah orang Israel, awakka semua utai ti udah disemaya Nuan ngagai apai aku David, dikamatka magang. “Tang kati Nuan, O Allah Taala, amat ulih diau di dunya tu? Indah semua serega deh enda chukup alai Nuan diau. Nya alai, baka ni ku Rumah Sembiang tu, ti udah digaga aku, tau chukup alai Nuan diau? TUHAN Allah Taala aku, aku tu nembiak Nuan. Pendingka sampi aku, lalu saut meh sampi ti disebut aku ngagai Nuan sehari tu. Jaga meh Rumah Sembiang tu siang malam, endur ti udah dipilih Nuan alai Nuan deka disembah. Dingaka aku, lebuh aku ngadap ngagai Rumah Sembiang tu, lalu besampi. Dingaka sampi aku, enggau sampi bala nembiak Nuan, lebuh sida ngadap ngagai endur tu, lalu besampi. Dingaka kami ari rumah Nuan di serega, lalu ampun meh kami. “Lebuh orang kena dawa laban sida ngereja utai ti salah ngagai pangan diri, lalu dibai ngagai alta Nuan dalam Rumah Sembiang tu ngambika iya besumpah madahka diri nadai penyalah, pendingka bala nembiak Nuan ari serega, O TUHAN, lalu akim meh iya. Ukum meh sapa ke salah, nitihka penyalah iya, lalu lepaska orang ke nadai penyalah. “Lebuh bala nembiak Nuan Israel alah laban munsuh ketegal sida udah bedosa ngelaban Nuan, lalu lebuh sida nguing lalu datai ngagai Rumah Sembiang tu enggau ati ti baruh lalu besampi minta pengampun, pendingka sida ari serega. Ampun dosa bala nembiak Nuan, lalu bai sida pulai baru ngagai menua ti udah diberi Nuan ngagai aki ini sida. “Lebuh Nuan nagang hari ujan, ketegal bala nembiak Nuan udah bedosa ngelaban Nuan, lalu lebuh sida nesal ati lalu ngadap ngagai Rumah Sembiang tu enggau ati ti baruh lalu besampi ngagai Nuan, pendingka sida ari serega. Ampun dosa raja enggau orang Israel, lalu ajar sida ngereja utai ti ngena. Udah nya, TUHAN, asuh hari ujan ba menua Nuan tu, ti udah diberi Nuan ngagai bala nembiak Nuan, nyadika pesaka sida belama iya. “Lebuh lapar pungkang nyadi di menua tu, tauka penyakit bisi berampit, tauka utai ti ditanam bisi rusak laban ribut ti angat, tauka diserang raban buntak, tauka bala nembiak Nuan kena serang munsuh, tauka penyakit tauka pemedis bisi nyadi ba bala sida, pendingka sampi sida. Enti orang Israel bisi ngangkatka jari besampi ngadap ngagai Rumah Sembiang tu, enggau ati ti tusah, dingaka sampi sida. Dingaka sida ari rumah Nuan di serega, ampun sida, lalu tulung sida, laban semina Nuan siku aja ke nemu utai ti dalam ati mensia. Kereja meh utai ba siku-siku kami nitihka pematut, ngambika bala nembiak Nuan seruran ngasika Nuan lebuh sida diau di menua ti udah diberi Nuan ngagai aki ini sida. pendingka sampi iya. Dingaka iya ari serega, alai Nuan ti diau, lalu kereja meh utai ti dipinta iya ari Nuan, ngambika semua orang di dunya tu nemu Nuan, lalu ngasika Nuan, baka bala nembiak Nuan orang Israel. Nya baru sida deka nemu, Rumah Sembiang ti udah digaga aku ba endur tu nya alai Nuan patut disembah. “Lebuh Nuan ngasuh bala nembiak Nuan mansang beperang ngelaban munsuh sida, lalu sida besampi ngagai Nuan, di sebarang endur sida diau lalu nguingka diri tunga ngagai nengeri tu, ti udah dipilih Nuan alai Rumah Sembiang tu udah digaga aku ke Nuan, pendingka sampi sida. Dingaka sida ari serega, lalu asuh sida menang. “Lebuh bala nembiak Nuan bedosa ngelaban Nuan, laban nadai siku mensia ti enda bedosa, lalu Nuan ringat, lalu ngasuh munsuh sida ngalahka sida lalu nabanka sida nyadi orang tangkap ngagai menua bukai, taja pen menua nya jauh, pendingka sampi bala nembiak Nuan. Enti di menua nya sida nesal ati, lalu besampi ngagai Nuan, ngaku pemesai penyalah enggau penyai sida, dingaka sampi sida, O TUHAN. Enti di menua nya sida amat bebendar nesal ati lalu besampi ngagai Nuan, lebuh sida malik tunga ngagai menua tu ti udah diberi Nuan ngagai aki ini sida, tunga ngagai nengeri tu ti udah dipilih Nuan, enggau tunga ngagai Rumah Sembiang tu ti udah digaga aku ke Nuan, pendingka sampi sida. Dingaka sida ari Rumah Nuan di serega, lalu ampun sida. Ampun semua dosa sida, enggau penyalah sida ke udah angkat ngelaban Nuan, lalu asuh munsuh sida nelap enggau sida. Sida tu bala nembiak Nuan Empu, ti udah dibai Nuan pansut ari menua Ejip, menua alai sida ke udah balat diperinsa. “ TUHAN ti Pemadu Tinggi, awakka Nuan seruran kasihka bala nembiak Nuan enggau raja sida, lalu dingaka sampi sida, lebuh sida ngangauka Nuan. Nuan udah milih sida ari semua bansa, ngambika sida nyadi nembiak Nuan, munyi ti udah dipadahka Nuan ngagai sida ngena Moses, lebuh Nuan mai bala aki ini sida pansut ari menua Ejip.” Lebuh Solomon udah badu besampi ngagai TUHAN, iya bediri di mua alta, alai iya ti udah besugang ngangkatka jari iya. Iya bejaku enggau nyawa ti inggar minta Allah Taala meri berekat ngagai semua orang ke begempuru dia. Ku iya, “Pujika TUHAN ti udah meri pemaik ngagai bala nembiak Iya, munyi ti udah disemaya Iya. Iya udah ngamatka semua semaya ti udah digaga Iya nengah nembiak Iya Moses. Awakka TUHAN Allah Taala kitai diau enggau kitai, baka Iya ti udah begulai enggau bala aki ini kitai. Awakka Iya enda ngelengkaka kitai, tauka ninggalka kitai. Awakka Iya ngasuh kitai ngasika Iya, ngambika kitai deka seruran diau nitihka gaya ti dikedekaka Iya, ngasika semua adat enggau pesan ti diberi Iya ngagai aki ini kitai. Awakka TUHAN Allah Taala kitai seruran ingatka sampi tu enggau peminta ti udah dibai aku ngagai Iya. Awakka Iya seruran ngampun bala nembiak Iya orang Israel, enggau raja sida, nitihka utai ti diguna sida tiap hari. Nya baru semua bansa deka nemu, semina TUHAN siku aja ti Allah Taala, lalu nadai petara bukai. Awakka kita ke nembiak Iya, seruran tetap ati ngagai TUHAN Allah Taala kitai, ngasika semua adat enggau pesan Iya, baka ke dikereja kita sehari tu.” Udah nya Raja Solomon enggau semua orang mayuh ke bisi dia lalu ngenjuk piring ngagai TUHAN. Raja Solomon meri 22,000 iku sapi enggau 120,000 iku jelu bedus nyadika piring pemaik. Nya meh chara raja enggau semua orang mayuh nyerahka Rumah Sembiang nya. Ba hari nya mega iya nyerahka endur ti ba tengah laman nya ngagai TUHAN, iya nya endur ti di mua Rumah Sembiang, lalu udah nya ngenjuk piring tunu segala ba endur nya, piring tepung, enggau lemak ari jelu nyadika piring pemaik. Iya ngereja nya laban alta ti digaga ari temaga nya kelalu mit, lalu enda ulih ngundan semua piring nya. Rumah Sembiang nya meh endur alai Solomon enggau semua orang Israel ngerami Gawai Belangkau tujuh hari. Mayuh amat orang datai. Sida datai ari Lebo-hamat di utara, nyentuk ngagai ari gari entara menua enggau orang Ejip di selatan. Ba hari ti kelapan, Solomon lalu ngasuh orang mayuh pulai. Semua sida bela muji Solomon, lalu pulai enggau ati ti lantang, ketegal semua berekat ti udah diberi TUHAN ngagai nembiak Iya David, enggau ngagai bala nembiak Iya orang Israel. Lebuh Raja Solomon udah tembu ngaga Rumah Sembiang, enggau istana, enggau semua utai bukai ti deka digaga iya, TUHAN lalu pegari baru ngagai iya, baka ke nyadi di Gibeon. Ku TUHAN bejaku ngagai iya, “Aku udah ninga sampi nuan. Aku udah nguduska Rumah Sembiang tu ti udah digaga nuan nyadi endur alai kita deka nyembah Aku belama iya. Aku deka ngemataka endur tu, lalu nyaga iya belama iya. Enti nuan deka betuaika Aku ngena ati ti betul sereta rentang, baka apai nuan David, lalu enti nuan ngasika adat Aku, lalu ngereja semua utai ti udah dipadahka Aku ngagai nuan, Aku deka ngamatka semaya ti udah digaga Aku enggau apai nuan David, lebuh Aku madahka orang Israel deka diperintah bala peturun iya. Tang enti nuan, tauka peturun nuan badu agi nitihka Aku, enda ngasika adat enggau jaku ti dipesanka Aku ngagai nuan, lalu nyembah petara bukai, Aku deka muai bala nembiak Aku orang Israel ari menua ti udah diberi Aku ngagai sida. Aku deka mega ninggalka Rumah Sembiang tu, ti udah dikuduska Aku alai kita deka nyembah Aku. Orang di semua endur deka ngelanyaika orang Israel, lalu enda bebasaka sida. Rumah Sembiang tu deka nyadi tembawai, lalu semua orang ke mansa deka tekenyit sereta alit ati. ‘Nama kebuah TUHAN ngereja utai tu ngagai menua tu, enggau ngagai Rumah Sembiang tu?’ ku sida deka nanya. Orang deka nyaut, ‘Laban sida udah ninggalka TUHAN Allah Taala sida ke udah mai aki ini sida pansut ari menua Ejip. Sida udah arapka lalu nyembah petara bukai. Nya kebuah TUHAN udah ngasuh penusah ti besai tu ninggang sida.’ ” Solomon ngaga Rumah Sembiang enggau istana iya empu dua puluh taun. Raja Hiram di Sidon udah meri ngagai iya semua kayu sidar enggau kayu pain enggau semua emas ti diguna iya kena iya ngereja pengawa nya. Lebuh pengawa nya udah tembu, Raja Solomon meri ngagai Hiram dua puluh buah nengeri di menua Galili. Hiram mansang meda nengeri nya, lalu iya enda rinduka nengeri nya. Nya alai ku iya bejaku enggau Solomon, “Kati tu nengeri ti diberi nuan ngagai aku, menyadi!” Nya kebuah menua nya dikumbai Kabul nyentuk ngagai diatu. Hiram udah ngirumka nyau deka bulih 5 tan emas ngagai Solomon. Raja Solomon mejalka orang ngaga Rumah Sembiang enggau istana, nambun tanah ba tisi timur nengeri nya, lalu ngaga dinding kuta ke nengeri nya. Iya mega mejalka sida ngaduka nengeri Hasor, Megido, enggau Geser. ( Raja menua Ejip endang udah nyerang lalu ngalahka nengeri Geser, munuh orang ke diau dia, lalu nunu nengeri nya. Udah nya iya lalu meri nengeri nya nyadika derian ngagai anak indu iya lebuh anak indu iya jadi enggau Solomon, lalu Solomon nirika nengeri nya baru.) Solomon mega mejalka bala orang ngaduka nengeri Bet-horon Ili, Baalat, Tamar ti di menua puang dalam menua Judah, nyadi endur alai iya nyimpan semua utai ti diguna iya, alai iya nyimpan kuda enggau kerita perang iya, enggau semua utai bukai ti diguna iya kena iya ngaga utai di Jerusalem, di Lebanon, enggau ba endur bukai dalam menua ti dipegai iya. Solomon nadai ngaga orang Israel nyadi ulun iya. Sida nyadi bala soldadu iya, nyadi bala pemesai, tuai soldadu, orang ke nyadi kepala ke orang ke nepan kerita perang iya, enggau nyadi soldadu ke nepan kuda. Lima ratus lima puluh iku pemesai nyadi kepala ngemataka bala orang ke dipejalka Solomon gawa begagaka rumah iya. Solomon nambun tanah ba tisi ti muak ke timur nengeri nya, udah bekau bini iya, iya nya anak indu raja menua Ejip, ke mindah ari Nengeri David ngagai istana ti udah digaga Solomon ke iya. Tiga kali dalam setaun Solomon ngenjuk piring tunu enggau piring pemaik, ba alta ti udah digaga iya ke TUHAN. Iya mega nunu menyan ke TUHAN. Nya meh chara iya nembuka Rumah Sembiang. Raja Solomon mega ngaga berapa buah kapal di Esion-geber, enda jauh ari Elat ba tebing Teluk Akaba, di menua Edom. Raja Hiram ngirumka bala kelasi ke bisi peneleba ari berapa buah kapal iya empu, ngambika sida bekereja enggau bala Solomon. Sida belayar ngagai menua Opir, lalu mai ngagai Solomon kira 16 tan emas. Lebuh kuin menua Sheba ninga Solomon tebilang amat nama, iya lalu mansang ngagai Jerusalem deka nguji Solomon ngena tanya ti mar disaut. Kuin nya mai mayuh bala pengiring, enggau raban jelu unta ti mai rempah, batu ti berega, enggau mayuh emas. Lebuh iya betemu enggau Solomon, iya lalu mantaika semua tanya ti dalam runding iya, ngagai Solomon. Solomon nyaut semua tanya nya. Nadai utai ti enda ulih diterangka Solomon. Kuin menua Sheba mendingka penemu-dalam ti disebut Solomon, lalu meda istana ti udah digaga iya. Kuin nya meda pemakai ti disediaka ba mija Solomon, rumah alai bala pemesai iya diau, chara bala orang ke bekereja dalam istana nya diatur, enggau pekayan ti dikena sida, bala orang gaji ke bekereja ke iya lebuh iya ngintu pengerami makai besai, enggau piring ti diberi iya ba Rumah Sembiang. Kuin nya nyau alit ati. Ku iya bejaku enggau Raja Solomon, “Utai ti udah didinga aku di menua aku empu pasal nuan enggau penemu-dalam ti dikembuan nuan, endang amat magang! Tang aku enda arapka nya, sebedau aku empu datai lalu meda semua utai nya ke diri empu. Tang utai ti udah didinga aku nya ukai setengah ari utai ti dipeda enggau didinga aku. Penemu-dalam ti dikembuan nuan enggau pengaya nuan jauh besai agi ari utai ti udah dipadahka orang ngagai aku. Naka meh penguntung bala bini nuan! Naka meh penguntung bala orang gaji nuan, ke seruran di mua nuan, lalu seruran bisi peluang mendingka penemu-dalam ti dibantaika nuan! Pujika TUHAN Allah Taala nuan! Iya udah ngayanka pemesai pengaga ati Iya ke nuan, lebuh Iya ngaga nuan nyadi raja menua Israel. Laban pengerindu Iya ke orang Israel endang meruan belama iya, Iya udah ngaga nuan nyadi raja sida, ngambika nuan bejalaika atur ti lurus sereta betul.” Kuin nya lalu meri Raja Solomon pemeri ti udah dibai iya. Pemeri nya nyengkaum nyau deka bulih lima tan emas, mayuh amat rempah, enggau batu ti berega. Pemayuh rempah ti diberi iya ngagai Solomon nya jauh mayuh agi ari ti udah kala diterima Solomon sekali. ( Kapal Raja Hiram, ti udah mai emas ari Opir, mega mai ari menua nya mayuh kayu juniper enggau batu ti berega. Solomon ngena kayu nya begagaka lalau dalam Rumah Sembiang enggau dalam istana, enggau begagaka belikan, enggau engkeratung ke bala orang ke nebah musik. Kayu juniper nya kayu juniper ti pemadu manah udah kala dibeli menua Israel ari menua bukai. Nadai kayu ti ngemanah nya agi bisi dipeda udah lepas nya.) Raja Solomon, enggau ati ti gerah mudah, lalu meri ngagai kuin menua Sheba semua utai ti dipinta kuin nya, nambahka pemeri bukai ti diberi Solomon ngagai iya. Udah nya kuin nya enggau bala pengiring iya lalu mulaika diri ngagai menua Sheba. Raja Solomon nerima lebih 25 tan emas tiap taun, nambahka chukai ti dibayar orang dagang, untung ari pengawa dagang, enggau chukai ti dibayar bala raja bansa Arab, enggau ari bala gabenor ke megai pelilih menua di menua Israel. Solomon ngaga dua ratus iti terabai ti besai. Genap iti terabai nya disampak enggau kira 7 kilogram emas. Iya mega ngaga tiga ratus iti terabai ti mit agi, nyampak genap iti terabai nya enggau kira dua kilogram emas. Semua terabai nya diengkah iya dalam Balai Utan Menua Lebanon. Iya mega ngasuh orang ngaga siti kerusi diraja ti besai. Kerusi nya disampak enggau gading, sereta enggau emas ti tulin. Semua mangkuk ti dikena Solomon ngirup digaga ari emas magang, lalu semua pekekas dalam Balai Utan Lebanon digaga ari emas ti tulin magang. Pirak endang enda dikena, laban orang ngumbai pirak enda berega lebuh maya Solomon menya. Iya mayuh kapal ti tau belayar ba tasik, lalu kapal nya belayar sama enggau kapal Hiram. Kapal iya pulai tiap tiga taun, mai emas, pirak, gading, nyumbuh enggau kera. Raja Solomon lebih agi kaya, sereta dalam agi penemu ari semua raja bukai, lalu semua dunya bisi ati deka datai lalu mendingka penemu-dalam ti udah diberi Allah Taala ngagai iya. Genap iku orang ke datai bela mai pemeri ngagai iya. Pemeri nya nyengkaum pirak, emas, baju ti panjai, senyata, rempah, kuda, enggau keledai. Utai tu nyadi tiap-tiap taun. Solomon bisi seribu empat ratus buah kerita perang, enggau dua belas ribu iku kuda kena beperang. Sekeda sida nya disimpan iya di Jerusalem, lalu sida ti bukai diasuh iya bepalan ba nengeri bukai. Lebuh maya Solomon nyadi raja, pirak nyau mayuh baka batu, lalu kayu sidar nyau ngemayuh kayu sikamur ba kaki bukit menua Judah. Orang dagang ke bekereja ke raja diberi kuasa meli kuda ari menua Musri enggau Silisia, enggau meli kuda ari menua Ejip. Sida lalu nyual kuda enggau kerita perang nya ngagai raja orang Iti enggau raja orang Siria, ngena rega 600 singkap pirak ke sebuah kerita perang, enggau 150 singkap pirak ke siku kuda. Solomon rinduka mayuh indu orang bansa bukai. Kelimpah ari anak indu raja menua Ejip, iya mega jadi enggau indu orang Iti, indu orang Moap, Amon, Edom, enggau Sidon. Iya jadi enggau sida taja pen TUHAN udah nagang orang Israel jadi enggau bansa orang nya, laban sida deka mai orang Israel taluk ngagai petara bukai. Solomon jadi enggau tujuh ratus iku anak indu raja, lalu iya bisi mega tiga ratus iku indu simpan. Sida indu nya ke nyungkak iya ninggalka Allah Taala, lalu lebuh umur iya nyau tuai, sida nguluka iya besembahka petara orang bansa bukai. Iya enda tetap ati ngagai TUHAN Allah Taala iya, enda baka apai iya David. Iya nyembah Astarte, petara indu orang Sidon, enggau Molek, petara orang Amon. Iya bedosa ngelaban TUHAN, lalu iya enda taluk ngagai TUHAN, enda baka apai iya David. Ba bukit sigi muak ke timur nengeri Jerusalem iya ngaga siti palan alai nyembah Kemos, petara orang Moap, enggau siti palan alai nyembah Molek, petara orang Amon. Iya mega ngaga mayuh bengkah endur alai semua bini iya ke ari bansa bukai ulih nunu menyan enggau ngenjuk piring ngagai petara sida. lalu bejaku enggau iya, “Laban nuan udah sengaja mungkir ari sempekat Aku enggau nuan, lalu enda ngasika pesan Aku, Aku deka ngerampas perintah orang Israel ari jari nuan, lalu meri perintah nya ngagai siku ari bala pemesai nuan. Tang, ketegal apai nuan David, Aku enda ngereja nya lebuh nuan empu agi idup, tang lebuh anak nuan megai perintah. Lalu Aku enda ngambi semua menua ti dipegai iya ari iya, tang Aku deka ninggalka siti aja raban bansa ke iya, ketegal nembiak Aku David, enggau ketegal Jerusalem, nengeri ti udah digaga Aku nyadika nengeri Aku Empu.” Nya alai TUHAN ngasuh Hadat, siku orang ari ruang bilik raja Edom, ngelaban Solomon. Tang Hadat ti agi biak lebuh maya nya, enggau sekeda orang Edom ti nyadi orang gaji apai iya, ngerarika diri ngagai menua Ejip. Sida angkat ari Midian lalu mansang ngagai Paran. Sekeda orang bukai mupuk enggau sida. Udah nya sida lalu bejalai ngagai menua Ejip, lalu betemu enggau raja menua nya. Raja nya meri tanah, sebuah rumah enggau pemakai ngagai Hadat. Hadat nyau bepangan enggau raja, lalu raja meri ipar indu iya, iya nya menyadi indu kuin Papenes, nyadika bini Hadat. Papenes ngadaka anak lelaki siku. Nama iya Genubat, lalu iya diibun kuin nya dalam istana, alai iya ti diau begulai enggau bala anak raja. Lebuh Hadat ninga David, enggau Joap ti nyadi tuai soldadu orang Israel udah mati, Hadat lalu bejaku enggau raja, “Awakka aku pulai ngagai menua aku empu.” “Lapa?” ku raja nanya. “Kati aku bisi udah enda meri nuan utai? Kati nya kebuah nuan keran deka pulai ngagai menua nuan empu?” “Awakka aku mupuk,” ku Hadat nyaut raja. Iya lalu pulai ngagai menua iya empu. Lebuh Hadat nyadi raja menua Edom, iya lalu bemunsuh enggau orang Israel. Allah Taala mega ngasuh Reson anak Eliada ngelaban Solomon. Reson udah rari ninggalka tuan iya, iya nya Raja Hadadeser ke merintah di Sobah, lalu udah nyadi tuai bala orang ke enda beradat. (Utai tu nyadi udah bekau David ngalahka Hadadeser lalu udah munuh bala orang Siria ke setanah enggau Hadadeser.) Reson enggau bala iya mansang lalu diau di Damaskus. Dia orang ke nitihka iya lalu nyiri iya nyadi raja menua Siria. Iya nyadi munsuh menua Israel sekumbang Solomon agi idup. Siku agi orang angkat ngelaban Raja Solomon. Orang nya siku ari pemesai iya empu, ke benama Jeroboam anak Nebat, ari Seredah di menua Epraim. Indai iya Seruah, lalu Seruah balu. Tu cherita pasal Jeroboam ke angkat ngelaban perintah. Nyadi Solomon agi benung nambun tanah ba tisi timur nengeri Jerusalem, sereta ngaduka dinding kuta nengeri. Jeroboam agi biak umur sereta nemu gawa, lalu lebuh Solomon meda iya rajin gawa, iya lalu ngasuh iya nyadi tuai ngemataka semua orang ke dipejalka gawa dalam menua Manasi enggau Epraim. Nyadi sekali, lebuh Jeroboam bejalai ari Jerusalem, nabi Ahijah ari Siloh betemu enggau iya kediri ba jalai raya di menua pesisir. Ahijah lalu muka baju panjai ari tubuh iya empu, nyarikka baju nya ngagai dua belas iti chebik, lalu bejaku enggau Jeroboam, “Bai sepuluh iti chebik ke nuan empu, laban tu utai ti disebut TUHAN Allah Taala ke disembah orang Israel ngagai nuan, ‘Aku deka ngerampas menua ti diperintah Solomon ari jari iya, lalu Aku deka meri sepuluh bengkah raban bansa ngagai nuan. Solomon deka merintah siti aja raban bansa ketegal nembiak Aku David, enggau ketegal Jerusalem, nengeri ti udah dipilih Aku ari semua menua Israel nyadika nengeri Aku Empu. Aku deka ngereja tu laban Solomon udah nulak Aku, lalu udah nyembah petara orang bansa bukai - petara Astarte, petara indu orang Sidon; Kemos, petara orang Moap; enggau Molek, petara orang Amon. Solomon udah enda ngasika Aku. Iya udah ngereja utai ti salah, lalu enda agi nitihka adat enggau pesan Aku, enda baka apai iya David. Tang Aku enda ngerampas semua menua ti diperintah Solomon ari jari iya, lalu Aku deka ngasuh iya megai perintah sepemanjai umur iya. Aku deka ngereja tu ketegal nembiak Aku David, ti udah dipilih Aku, lalu udah ngasika adat enggau pesan Aku. Aku deka ngerampas menua ti diperintah Solomon ari jari anak iya, lalu deka meri sepuluh bengkah raban bansa ngagai nuan, tang Aku deka nejuka anak Solomon merintah siti raban bansa, ngambika Aku deka seruran bisi siti peturun ari nembiak Aku David merintah di Jerusalem, nengeri ti udah dipilih Aku nyadika palan alai Aku disembah. Jeroboam, Aku deka ngaga nuan nyadi raja menua Israel, lalu nuan deka merintah semua menua ti dikinginka nuan. Enti nuan ngasika Aku enggau pengabis ati nuan, idup nitihka jalai Aku, lalu ngereja utai ti ngena nitihka adat enggau pesan Aku, baka nembiak Aku David, Aku deka seruran enggau nuan. Aku deka ngaga nuan nyadi raja menua Israel, lalu Aku deka netapka peturun nuan merintah ngentudika nuan, baka ke udah dikereja Aku ngagai David. Ketegal dosa Solomon, Aku deka ngukum peturun David, tang enda belama iya.’ ” Solomon lalu nguji munuh Jeroboam, tang Jeroboam ngerarika diri ngagai Raja Sisak di menua Ejip, lalu diau dia nyentuk ngagai pemati Solomon. Semua utai ti udah dikereja Solomon, jalai pengidup iya, penemu-dalam ti dikembuan iya bisi dituliska magang dalam Jerita Lama Pasal Solomon. Iya nyadi raja di Jerusalem merintah semua menua Israel empat puluh taun. Iya mati lalu dikuburka di Nengeri David, lalu anak iya Rehoboam nganti iya nyadi raja. Rehoboam mansang ngagai Sekem, alai semua orang Israel ti di utara udah begempuru deka nyiri iya nyadi raja. Lebuh Jeroboam anak Nebat, ti udah rari ari Raja Solomon ngagai menua Ejip, ninga berita nya, iya lalu mulaika diri ari menua Ejip. Orang Israel ari raban bansa ti di utara lalu mesanka Jeroboam, lalu Jeroboam enggau semua bala sida mansang deka betemu enggau Rehoboam, lalu bejaku enggau iya, “Apai nuan Solomon udah kasar bendar enggau kami, lalu ngasuh kami ngereja pengawa ti berat. Enti nuan ngasuh pengawa kami lempung agi, lalu ngasuh pengidup kami nyamai agi, kami deka taluk ngagai nuan.” “Aku minta kita datai kitu baru tiga hari da agi, nya baru aku meri saut aku ngagai kita,” ku iya nyaut. Sida lalu mupuk. Raja Rehoboam lalu betanya ngagai orang ke tuai, ti udah bekereja nyadi penyanding penemu ke apai iya Solomon. “Dalam runding kita, nama saut ti patut diberi aku ngagai orang tu?” ku iya nanya. Ku sida nyaut, “Enti nuan deka betuaika orang tu enggau manah, nuan enda tau enda meri saut ti menyana ngagai peminta sida. Nya baru sida deka seruran taluk betuaika nuan.” Tang iya enda begunaka jaku lalau bala orang ke tuai. Iya mansang ngagai bala orang ke biak, ti udah besulu enggau iya kenyau ari mit, ti nyadi penyanding penemu iya diatu. “Dalam runding kita, nama utai ti patut dikereja aku?” ku iya nanya sida. “Nama utai ti patut dikereja aku ngagai orang ke minta aku ngasuh pengawa sida lempung agi?” Disaut sida, “Tu utai ti patut dipadahka nuan ngagai sida: ‘Tunjuk aku besai agi ari punggung apai aku!’ Padahka ngagai sida, ‘Apai aku udah ngasuh kita ngereja pengawa ti berat. Aku deka ngasuh pengawa kita berat agi ari nya. Iya udah nyipat kita ngena penyipat. Aku deka nyipat kita ngena penyipat ti bedurika besi!’ ” Tiga hari udah bekau nya, Jeroboam enggau semua orang lalu datai baru ngagai Raja Rehoboam, nitihka asuh Rehoboam empu. Raja Rehoboam enda begunaka jaku lalau ti diberi orang ke tuai, lalu iya bejaku kasar enggau orang mayuh, nitihka jaku lalau ari bala orang ke biak. Ku iya, “Apai aku ngasuh kita ngereja pengawa ti berat. Aku deka ngasuh pengawa kita berat agi. Iya udah nyipat kita ngena penyipat, tang Aku deka nyipat kita ngena penyipat ti bedurika besi!” TUHAN endang deka ngamatka utai ti udah disebut Iya ngagai Jeroboam anak Nebat ngena Ahijah ke datai ari Siloh. Nya kebuah raja enggai ibuhka orang mayuh. Lebuh orang mayuh meda raja nya enggai mendingka sida, sida lalu manjung, “Tumbangka David enggau peturun iya! Sida nadai udah ngereja utai ke kitai! Orang Israel, aram kitai pulai! Awakka Rehoboam ngidupka diri empu!” Nya alai, orang Israel angkat ngelaban, lalu Rehoboam semina nyadi raja ke orang ke diau di menua Judah aja. Udah nya Raja Rehoboam lalu ngasuh Adoniram, ti nyadi tuai ngemataka orang ke dipejalka ngereja pengawa ti berat, mansang ngagai orang Israel, tang sida nuku iya ngena batu datai ke mati. Rehoboam lalu beguai-guai nepan kerita perang iya lalu rari ngagai Jerusalem. Kenyau ari nya, orang ke di utara menua Israel seruran ngelaban perintah peturun David. Lebuh orang Israel ninga Jeroboam udah pulai ari menua Ejip, sida mai iya ngagai aum besai bala mayuh, lalu nyiri iya nyadi raja menua Israel. Semina raban bansa Judah aja agi taluk ngagai peturun David. Lebuh Rehoboam anak Solomon datai di Jerusalem, iya lalu ngempuruka 180,000 iku soldadu ti pemadu kering ari raban bansa Judah enggau Benjamin, deka nyerang raban bansa ti di utara laban iya deka ngambi pulai baru kuasa iya ti nyadi raja atas raban bansa ti di utara. Tang Allah Taala ngasuh nabi Semaiah meri pesan tu ngagai Rehoboam anak Solomon, enggau ngagai semua orang ke ari raban bansa Judah enggau Benjamin: “Anang nyerang kaban belayan kita orang Israel. Pulai semua kita. Utai nya nyadi ari asuh Aku.” Semua sida ngasika pesan TUHAN, lalu pulai. Raja Jeroboam menua Israel lalu ngaga kuta ngelingi nengeri Sekem di menua ti bebukit di menua Epraim, lalu iya diau dia enda lama. Udah nya iya angkat ari Sekem lalu ngaga kuta ngelingi nengeri Penuel. Lebuh iya udah berundingka pekara nya, iya lalu ngaga dua iku anak sapi ti lelaki ari emas, lalu ku iya bejaku enggau bala nembiak iya, “Orang Israel, kita udah chukup lama nyembah Allah Taala di Jerusalem. Nya alai, tu petara kita ke udah mai kita pansut ari menua Ejip!” Iya lalu ngengkahka siku anak sapi emas di Betel, lalu siku di Dan. Nya alai orang mayuh bedosa laban sida nyembah engkeramba nya di Betel enggau di Dan. Jeroboam mega ngaga mayuh bengkah palan alai besembiang ba tuchung bukit, lalu iya milih orang ke ukai ari ruang bilik Lewi nyadi imam. Jeroboam mega numbuhka siti gawai pengarap ti diintu kena lima belas hari bulan ti kelapan, baka gawai ti di menua Judah. Iya ngenjuk piring ba alta ngagai anak sapi emas ti udah digaga iya di Betel, lalu iya mega ngasuh bala imam gawa ba palan alai besembiang ti udah digaga iya. Kena lima belas hari bulan ti kelapan, hari ti udah diletak iya empu, iya mansang ngagai Betel lalu ngenjuk piring ba alta, kena iya ngerami gawai ti udah ditumbuhka iya ke orang Israel. Ari asuh TUHAN, siku nabi lalu bejalai ari menua Judah ngagai Betel. Iya datai dia lebuh Jeroboam benung bediri ngimbai alta, deka ngenjuk piring. Ari asuh TUHAN, nabi nya lalu bejaku ngagai alta nya: “O alta, alta, tu utai ti disebut TUHAN: Siku anak mit ke benama Josiah, deka diadaka ari peturun David. Iya deka munuh ba atas nuan bala imam ke bekereja ba alta orang kapir ke ngenjuk piring ba atas nuan, lalu iya deka nunu tulang mensia ba atas nuan.” Lalu ku nabi nya nampung jaku iya, “Alta tu deka diruntuhka, lalu amau ti ba atas iya deka diachirka. Nya baru nuan deka nemu TUHAN udah bejaku ngena aku.” Lebuh Raja Jeroboam ninga nya, iya nunjuk ngagai nabi nya, lalu bejaku, “Tangkap orang nya!” Tekala nya lengan raja lalu enda ulih engkebut agi datai ke nyau enda ulih nekuka lengan iya pulai baru. Alta nya lalu tekala nya runtuh, lalu amau labuh ke tanah, munyi ti udah dipadahka nabi nya dalam nama TUHAN. Ku Raja Jeroboam bejaku enggau nabi nya, “Aku minta nuan besampika aku ngagai TUHAN, minta iya ngeraika lengan aku!” Nabi nya lalu besampi ngagai TUHAN, lalu lengan raja nya gerai. Udah nya raja lalu bejaku enggau nabi nya, “Aram makai enggau aku. Aku deka ngupah nuan ketegal utai ti udah dikereja nuan.” Disaut nabi nya, “Enti sema nuan meri aku setengah ari pengaya nuan, enggai meh aku bejalai enggau nuan, tauka makai, tauka ngirup enggau nuan, laban TUHAN udah nagang aku makai, tauka ngirup, tauka pulai nengah jalai aku mansang.” Nya alai nabi nya enda pulai nengah jalai iya mansang, tang nengah jalai bukai. Lebuh maya nya, siku nabi bisi diau di Betel. Bala anak lelaki iya datai lalu nusui ngagai iya utai ti udah dikereja nabi ke datai ari menua Judah di Betel sehari nya, enggau jaku ti disebut nabi nya ngagai Raja Jeroboam. “Ni jalai ditengah iya mupuk tadi?” ku nabi ke tuai nya nanya sida. Sida lalu nunjukka jalai nya ngagai iya. Nabi ke tuai nya lalu ngasuh sida nyendiaka keledai iya. Sida ngereja nya lalu iya mupuk nengah jalai nya, nitihka nabi ke datai ari menua Judah nya, lalu nemu iya duduk di baruh sepun kayu oak. “Kati nuan tu nabi ke datai ari menua Judah?” ku nabi ke tuai nya nanya. “Aku meh tu,” ku nabi ari menua Judah nya nyaut. “Aram pulai lalu makai enggau aku,” ku nabi ke tuai nya bejaku. Tang ku nabi ari menua Judah nya nyaut, “Aku enda tau pulai enggau nuan, tauka makai enggau nuan. Lalu aku enggai makai ngirup enggau nuan ditu, laban TUHAN udah bejaku nagang aku makai, tauka ngirup, tauka pulai nengah jalai ti ditengah aku mansang.” Ku nabi ke tuai ari Betel nya bejaku enggau iya, “Aku pen nabi baka nuan. Nitihka pesan TUHAN, siku melikat udah bejaku ngagai aku, ngasuh aku mai nuan ke rumah, lalu mai nuan makai enggau aku.” Tang nabi ke tuai nya bejaku bula. Nabi ke datai ari menua Judah nya lalu pulai enggau nabi ke tuai nya, lalu makai enggau iya. Lebuh seduai iya benung makai, jaku TUHAN lalu datai ba nabi ke tuai nya, lalu ku nabi nya bejaku enggau nyawa ti inggar ngagai nabi ke datai ari menua Judah nya, “ TUHAN madahka nuan enda ngasika Iya, lalu enda ngereja utai ti diasuh Iya. Nuan udah pulai lalu makai ba endur ti enda disagi Iya. Ketegal nya, nuan deka dibunuh, lalu bangkai nuan deka dikuburka ba kubur kita sebilik.” Lebuh seduai iya udah badu makai, nabi ke tuai nya lalu nyendiaka keledai ke nabi ke datai ari menua Judah nya. Nabi nya lalu mupuk. Di rantau jalai, siku singa nerekam lalu nyamah iya. Bangkai iya lalu garing-garing ba tengah jalai raya nya, lalu keledai enggau singa nya sama bediri semak bangkai iya. Sekeda orang bisi mansa, lalu meda bangkai nya ba jalai raya nya, enggau singa nya bediri semak bangkai nya. Sida majakka pejalai sida ngagai Betel lalu madahka pasal utai ti udah dipeda sida. Lebuh nabi ke tuai nya ninga berita nya, iya lalu bejaku, “Nya nabi ti enda ngasika pesan TUHAN! Nya kebuah TUHAN ngasuh singa nya nerekam lalu nyamah iya, munyi ti udah dipadahka TUHAN.” Udah nya iya lalu bejaku enggau bala anak lelaki iya, “Sediaka keledai aku.” Sida lalu nyendiaka keledai iya. Iya lalu nepan keledai nya, mupuk, lalu nemu bangkai nabi nya garing-garing ba tengah jalai raya, enggau keledai enggau singa nya sama bediri semak bangkai nya. Singa nya enda makai bangkai orang nya, tauka nyambarka keledai nya. Nabi ke tuai nya lalu nanggung bangkai nya, manggaika iya ba keledai iya empu, lalu mai bangkai nya pulai ngagai Betel, ngulit sereta nguburka iya. Nabi tuai nya nguburka iya dalam kubur sida sebilik. Iya enggau bala anak iya lalu ngulitka nabi nya, ku iya, “O menyadi! O menyadi!” Lebuh sida udah nguburka iya, nabi ke tuai nya lalu bejaku enggau bala anak iya, “Lebuh aku mati ila, kuburka aku ba kubur tu ngimbai bangkai iya. Jaku ti disebut iya ari asuh TUHAN kena ngelaban alta ti di Betel, enggau kena ngelaban semua palan alai besembiang di menua Samaria, tetap deka dikamatka magang.” Raja Jeroboam agi mengkang enggai ngelengkaka jalai iya ti jai, tang majak milih bala imam ari orang ke ukai ari peturun imam bekereja ba alta ti udah digaga iya. Iya nyiri sebarang orang ke bisi ati deka nyadi imam. Dosa iya empu ti ngerusak semua perintah iya. Ba urung maya nya, anak lelaki Jeroboam ke benama Abijah, sakit. Ku Jeroboam bejaku enggau bini iya, “Nuan patut ngeluluka diri nyadi orang bukai, ngambika orang enda ngelala nuan. Udah nya bejalai nuan ngagai Siloh, alai nabi Ahijah diau, nabi ti udah madahka aku deka nyadi raja menua Israel. Bai ngagai iya sepuluh iti tuku roti, kek, enggau sekebuk ai manyi, lalu bejalai nuan ngagai iya. Iya deka madahka ngagai nuan utai ti deka nyadi ba anak tua tu.” Bini Jeroboam lalu mansang ngagai rumah Ahijah di Siloh. Nyadi Ahijah buta, laban iya nyau tuai. TUHAN udah madahka ngagai iya pasal bini Jeroboam ti deka datai lalu nanya ngagai iya pasal anak Jeroboam ke sakit. TUHAN lalu madahka ngagai Ahijah utai ti patut disebut iya. Bini Jeroboam datai, ngeluluka diri nyadi orang bukai. Tang lebuh Ahijah ninga iya tama, Ahijah lalu bejaku, “Tama meh, bini Jeroboam. Nama kebuah nuan ngeluluka gamal diri baka gamal orang bukai? Aku bisi berita ti enda manah ti deka dipadahka aku ngagai nuan. Mupuk meh nuan, lalu padahka jaku TUHAN Allah Taala ke disembah orang Israel ngagai Jeroboam: ‘Aku udah milih nuan ari semua orang bukai, lalu ngasuh nuan merintah bala nembiak Aku Israel. Aku udah ngambi perintah ari jari peturun David, lalu meri perintah nya ngagai nuan. Tang nuan enda baka nembiak Aku David, ke taluk ngagai Aku enggau pengabis ati iya, lalu ngasika pesan Aku, lalu semina ngereja utai ti dikemendarka Aku. Nuan udah bedosa lebih ari orang ke dulu ari nuan nyadi raja. Nuan udah nulak Aku, lalu udah nyungkak Aku ringat, lebuh nuan ngaga engkeramba enggau anak patung ari besi ke disembah nuan. Ketegal nya, Aku deka ngasuh penusah ti besai ninggang kita sebilik, lalu deka munuh semua peturun nuan ti lelaki, ke tuai enggau ke biak. Aku deka muai ruang bilik nuan baka ke muai tai sapi. Kita sebilik ke mati di nengeri deka diempa ukui, lalu bala kita ke mati di menua pesisir, deka diempa burung ti bepakaika bangkai. Aku ti TUHAN, udah bejaku.’ ” Ku Ahijah nampung jaku iya ngagai bini Jeroboam, “Nya alai, pulai nuan diatu. Anak nuan deka mati lebuh nuan tama ngagai nengeri nya lagi. Semua orang Israel deka ngulitka iya, lalu nguburka iya. Semina iya siku aja ari ruang bilik Jeroboam ti deka dikuburka ngena chara ti menyana, laban semina iya siku aja ke dikerinduka TUHAN Allah Taala ke disembah orang Israel. TUHAN deka ngeletak siku raja megai perintah di menua Israel, ti deka madamka peturun Jeroboam nyadi raja. TUHAN deka ngukum Israel, lalu Israel deka begetar baka bemban ti diteruju ai. TUHAN deka nyabut orang Israel ari menua ti manah tu, ti udah diberi Iya ngagai aki ini sida, lalu Iya deka ngachirka sida ngagai menua ngilah Sungai Eupratis, laban sida udah nyungkak TUHAN ringat, lebuh sida begagaka engkeramba ke petara indu Aserah. TUHAN deka ninggalka orang Israel laban Jeroboam udah bedosa, lalu nguluka orang Israel bedosa.” Bini Jeroboam lalu pulai ngagai Tirsah. Lebuh iya baru datai di rumah, anak mit nya lalu mati. Orang Israel nyenggai lalu nguburka anak mit nya, munyi ti udah dipadahka TUHAN ngena nembiak Iya, nabi Ahijah. Semua utai bukai ti udah dikereja Raja Jeroboam, pasal iya ke beperang, chara iya merintah, bisi dituliska magang dalam Jerita Lama Pasal Raja Menua Israel. Jeroboam merintah nyadi raja dua puluh dua taun. Iya mati lalu dikuburka, lalu anak iya Nadap nganti iya nyadi raja. Rehoboam anak Solomon, umur empat puluh satu taun lebuh iya nyadi raja menua Judah, lalu iya merintah tujuh belas taun di Jerusalem, nengeri ti udah dipilih TUHAN ari semua menua Israel nyadika palan alai Iya disembah. Indai Rehoboam nya Naamah ari Amon. Orang Judah udah bedosa ngelaban TUHAN, lalu udah nyungkak TUHAN ringat ngena mayuh agi dosa, ari ti udah dikereja bala aki ini sida. Sida udah ngaga palan alai nyembah petara ti pelesu, lalu udah nirika tiang batu enggau tanda Aserah ngambika bisi disembah ba bukit enggau ba palan ti lindung di baruh kayu. Tang utai ti pemadu jai nya baka tu: orang ke lelaki enggau orang ke indu ke bekereja nyadi sundal ba endur alai orang kapir nyembah petara sida. Orang Judah ngereja semua utai ti ngemalu, ti dikereja orang ke diburu TUHAN ari menua nya, lebuh orang Israel nyerang. Dalam taun ti kelima Rehoboam nyadi raja, Raja Sisak ari menua Ejip nyerang Jerusalem. Raja Sisak nabanka semua utai ti berega ari Rumah Sembiang enggau ari istana, nyengkaum terabai emas ti digaga Solomon. Kena iya nganti utai nya, Raja Rehoboam ngaga terabai temaga, lalu nyerahka utai nya ngagai bala pemesai ke betanggungjawap nyaga pintu penama ngagai istana nya. Genap kali Raja Rehoboam mansang ngagai Rumah Sembiang, bala jejaga lalu mai terabai nya, lalu udah nya, mulaika terabai nya baru ngagai bilik jejaga. Semua utai bukai ti udah dikereja Raja Rehoboam bisi dituliska magang dalam Jerita Lama Pasal Raja Menua Judah. Sekumbang maya nya, Rehoboam enggau Jeroboam endang seruran beperang ngelaban pangan diri. Rehoboam mati lalu dikuburka ba lumbung raja di Nengeri David, lalu anak iya Abijah nganti iya nyadi raja. Dalam taun ti kelapan belas Jeroboam anak Nebat nyadi raja menua Israel, Abijah lalu berengkah nyadi raja menua Judah. Iya merintah tiga taun di Jerusalem. Indai iya Maakah anak Absalom. Iya bedosa baka apai iya, lalu iya enda tentu taluk ngagai TUHAN Allah Taala iya, enda baka aki ichit iya David. Tang ketegal David, TUHAN Allah Taala iya meri iya anak lelaki siku, ngambika bisi nganti iya megai perintah di Jerusalem lalu mai pengelikun ngagai Jerusalem. TUHAN ngereja nya laban David udah ngereja utai ti ngerinduka ati TUHAN, lalu enda kala enda ngasika pesan Iya, kelimpah ari pekara pasal Uriah orang Iti. Perang ti endang udah belabuh entara Rehoboam enggau Jeroboam, majak nyadi sepemanjai umur Abijah. Lalu semua utai bukai ti udah dikereja Abijah bisi dituliska magang dalam Jerita Lama Pasal Raja Menua Judah. Abijah mati, lalu dikuburka di Nengeri David, lalu anak iya Asa nganti iya nyadi raja. Dalam taun ti kedua puluh Jeroboam nyadi raja menua Israel, Asa lalu berengkah nyadi raja menua Judah. Iya merintah di Jerusalem empat puluh satu taun. Nama ini iya Maakah anak Absalom. Asa ngereja utai ti ngerinduka ati TUHAN, baka aki iya David. Iya muai ari menua nya semua lelaki enggau indu ke bekereja nyadi sundal ba palan alai orang kapir nyembah petara sida, lalu iya muai semua engkeramba ti udah digaga sida raja ke dulu agi ari iya. Iya mega muai ini iya Maakah ari pangkat iya ti nyadi indai raja, laban iya udah ngaga engkeramba ke petara ti ngasuh peridi ke benama Aserah. Asa nebang engkeramba nya, lalu nunu iya ba Lebak Kidron. Taja pen Asa enda ngerusak semua palan alai orang kapir nyembah petara sida, iya mengkang tetap ati ngagai TUHAN sepemanjai umur iya. Iya ngengkahka dalam Rumah Sembiang semua utai ti udah diserahka apai iya ngagai Allah Taala, nyengkaum perengka emas enggau perengka pirak, ti udah diserahka iya empu. Raja Asa menua Judah enggau Raja Baasa menua Israel endang seruran beperang ngelaban pangan diri sekumbang seduai iya ke megai kuasa. Raja Baasa nyerang menua Judah lalu belabuh nguta nengeri Ramah, kena nagang orang tama-pansut ari menua Judah. Nya alai Raja Asa lalu ngambi semua pirak enggau emas ti disimpan dalam Rumah Sembiang, enggau dalam istana, lalu ngirumka utai nya ngena sekeda bala pemesai iya ngagai Damaskus, ngagai raja menua Siria, Benhadat anak Tabrimom, uchu Hesion. Baka tu ku pesan Raja Asa: “Manah tua beserakup baka apai tua menya. Pirak enggau emas tu diberi aku ngagai nuan. Anang agi beserakup enggau Raja Baasa menua Israel, ngambika iya mai bala soldadu iya pulai ari menua aku.” Raja Benhadat besetuju enggau penemu Asa. Iya lalu ngasuh bala tuai soldadu iya enggau bala soldadu sida nyerang nengeri di menua Israel. Sida ngalahka Ijon, Dan, Abel Bet-maakah, menua ti semak Tasik Galili, enggau semua menua Naptali. Lebuh Raja Baasa ninga pasal utai ti udah nyadi, iya lalu badu agi nguta Ramah, lalu mansang ngagai Tirsah. Udah nya Raja Asa lalu ngirumka atur ngagai serata menua Judah ngasuh semua orang, enda milih sapa-sapa, mai ari Ramah batu enggau ramu ti udah dikena Raja Baasa nguta nengeri nya. Asa lalu ngena utai nya nguta nengeri Mispah enggau nengeri Geba, sebuah nengeri di menua Benjamin. Semua utai bukai ti udah dikereja Raja Asa, pemerani iya, enggau nengeri ti dikuta iya, bisi dituliska magang dalam Jerita Lama Pasal Raja Menua Judah. Tang lebuh iya nyau tuai, iya enda ulih bejalai laban kaki iya diempa penyakit. Asa mati lalu dikuburka ba lumbung raja di Nengeri David, lalu anak iya Jehosapat nganti iya nyadi raja. Dalam taun ti kedua Raja Asa megai menua Judah, Nadap anak Raja Jeroboam berengkah nyadi raja menua Israel. Iya merintah dua taun. Baka apai iya ke dulu ari iya, iya bedosa ngelaban TUHAN, lalu iya nguluka orang Israel bedosa. Baasa anak Ahijah, ari raban bansa Isakar, lalu begigaka akal kena ngelaban Nadap, lalu iya munuh Nadap lebuh Nadap enggau bala soldadu iya benung ngelulung nengeri Gibeton di menua Pilistin. Pekara tu nyadi dalam taun ti ketiga Raja Asa megai menua Judah. Nya alai Baasa nganti Nadap nyadi raja menua Israel. Iya lalu tekala nya belabuh bebunuhka semua sida Jeroboam sebilik. Nitihka jaku ti udah disebut TUHAN ngena nembiak Iya nabi Ahijah ari Siloh, semua sida Jeroboam sebilik dibunuh magang. Nadai siku sida idup. Pekara tu nyadi laban Jeroboam udah ngeringatka TUHAN Allah Taala ke disembah orang Israel, laban iya udah bedosa, lalu udah mai orang Israel bedosa. Semua utai bukai ti udah dikereja Nadap bisi dituliska magang dalam Jerita Lama Pasal Raja Menua Israel. Raja Asa menua Judah enggau Raja Baasa menua Israel endang seruran beperang ngelaban pangan diri lebuh seduai iya agi megai kuasa. Dalam taun ti ketiga Raja Asa megai perintah di menua Judah, Baasa anak Ahijah berengkah nyadi raja ke semua menua Israel, lalu iya merintah di Tirsah dua puluh taun. Baka Raja Jeroboam ke dulu agi ari iya, iya mega bedosa ngelaban TUHAN, lalu iya mega nguluka orang Israel bedosa. TUHAN bejaku ngagai nabi Jehu anak Hanani, ngasuh iya meri pesan tu ngagai Baasa: “Dulu suba nuan enda dikelala orang, tang Aku udah ngaga nuan nyadika tuai bansa orang Israel ti nembiak Aku. Lalu diatu nuan udah bedosa baka Jeroboam, lalu udah nguluka bala nembiak Aku bedosa. Dosa sida udah nyungkak Aku ringat. Nya alai Aku deka muai nuan enggau kita sebilik, baka ke udah dikereja Aku ngagai Jeroboam. Kita sebilik ke mati di nengeri, deka diempa ukui, lalu kita sebilik ke mati di menua pesisir, deka diempa burung.” Semua utai bukai ti udah dikereja Raja Baasa, enggau pemerani iya, bisi dituliska magang dalam Jerita Lama Pasal Raja Menua Israel. Raja Basa mati lalu dikuburka di Tirsah, lalu anak iya Elah nganti iya nyadi raja. Pesan kena TUHAN ngelaban Baasa enggau sida sebilik, udah diberi nabi Jehu laban Baasa udah bedosa ngelaban TUHAN. Iya udah nyungkak TUHAN ringat, ukai semina laban utai ti jai ti udah dikereja iya, baka ke udah dikereja Raja Jeroboam dulu ari iya, tang mega laban iya udah munuh semua sida Jeroboam sebilik. Dalam taun ti kedua puluh enam Raja Asa megai perintah di menua Judah, Elah anak Baasa berengkah nyadi raja menua Israel, lalu iya merintah di Tirsah dua taun. Simri, iya nya siku ari pemesai iya ti nyadi tuai ngemataka setengah ari kerita perang iya, lalu begigaka akal kena ngelaban iya. Nyadi sekali di Tirsah, Elah mabuk ba rumah Arsa ti nyadi tuai ngemataka istana. Simri tama ngagai rumah nya, lalu munuh Elah. Iya lalu nganti Elah nyadi raja. Pekara tu nyadi dalam taun ti kedua puluh tujuh Raja Asa megai perintah di menua Judah. Sepengelengkas Simri nyadi raja, iya lalu munuh semua sida Baasa sebilik. Semua kaban belayan enggau pangan Baasa ti lelaki dibunuh iya magang. Nya alai, nitihka jaku ti disebut TUHAN ngagai Baasa ngena nabi Jehu, Simri munuh semua sida Baasa sebilik. Laban sida besembahka engkeramba, enggau laban sida udah nguluka orang Israel bedosa, Baasa enggau anak iya Elah udah ngeringatka TUHAN Allah Taala ke disembah orang Israel. Semua utai bukai ti udah dikereja Elah bisi dituliska magang dalam Jerita Lama Pasal Raja Menua Israel. Dalam taun ti kedua puluh tujuh Raja Asa megai menua Judah, Simri lalu belabuh megai perintah di menua Israel di Tirsah. Iya megai perintah tujuh hari aja. Lebuh maya nya bala soldadu orang Israel benung ngelulung nengeri Gibeton di menua Pilistin. Lalu lebuh sida ninga Simri udah bepekat ngelaban raja, lalu udah munuh iya, sida lalu tekala nya, ba endur nya, nyiri tuai soldadu sida ke benama Omri nyadi raja menua Israel. Omri enggau bala soldadu iya lalu angkat ari Gibeton, mansang ngagai Tirsah lalu ngelulung nengeri nya. Lebuh Simri meda nengeri nya udah alah, iya lalu tama ngagai kuta ti dalam istana, nunu istana nya, lalu iya mati diempa api. Utai tu nyadi laban Simri udah bedosa ngelaban TUHAN. Baka Jeroboam ke dulu ari iya, iya udah nyungkak TUHAN ringat laban dosa iya, enggau laban iya udah nguluka orang Israel bedosa. Semua utai bukai ti udah dikereja Simri, nyengkaum cherita pasal iya ke angkat ngelaban, bisi dituliska magang dalam Jerita Lama Pasal Raja Menua Israel. Nyadi orang Israel beserekang penemu: sekeda sida deka nyiri Tibni anak Ginat nyadi raja, lalu sida ti bukai dekaka Omri. Ke pengujung iya, sida ke dekaka Omri menang. Tibni mati, lalu Omri nyadi raja. Nya alai dalam taun ti ketiga puluh satu Raja Asa megai perintah di menua Judah, Omri berengkah nyadi raja menua Israel, lalu iya merintah dua belas taun. Dalam enam taun ti keterubah, iya merintah di Tirsah. Udah nya iya lalu meli bukit Samaria ngena enam ribu singkap duit pirak ari orang siku ke benama Semer. Omri lalu ngaga kuta ngelingi bukit nya, ngaga sebuah nengeri dia, lalu iya ngumbai nengeri nya Samaria, ngangkatka Semer, ke bempu bukit nya dulu ari nya. Omri bedosa ngelaban TUHAN lebih agi ari orang ke dulu ari iya. Baka Jeroboam ke dulu agi ari iya, iya ngeringatka TUHAN Allah Taala ke disembah orang Israel laban dosa iya, enggau laban iya nguluka orang Israel bedosa enggau besembahka engkeramba. Semua utai bukai ti udah dikereja Omri, enggau semua utai ti ulih iya bisi dituliska magang dalam Jerita Lama Pasal Raja Menua Israel. Omri mati lalu dikuburka di Samaria. Iya lalu diganti anak iya Ahap nyadi raja. Dalam taun ti ketiga puluh lapan Raja Asa megai perintah di menua Judah, Ahap anak Omri berengkah nyadi raja menua Israel, lalu iya merintah di Samaria dua puluh dua taun. Iya bedosa ngelaban TUHAN lebih agi ari semua orang ke dulu agi ari iya. Iya enda puas ati bedosa baka Raja Jeroboam. Iya ngereja utai ti lebih agi jai ari ti udah dikereja Jeroboam: iya jadi enggau Jesebel, anak indu Raja Etbaal menua Sidon, lalu nyembah Baal. Iya ngaga rumah sembiang Baal di Samaria, ngaga siti alta ke Baal, lalu ngengkahka alta nya dalam rumah sembiang nya. Iya mega nirika siti engkeramba petara indu Aserah. Iya ngereja lebih mayuh agi dosa ari semua raja menua Israel ti bukai ke dulu agi ari iya. Ketegal nya TUHAN Allah Taala ke disembah orang Israel ringat. Lebuh Ahap megai perintah, Hil ari Betel lalu nirika nengeri Jeriko baru. Munyi ti udah dipadahka TUHAN dulu ari nya ngena Josua anak Nun, anak tuai Hil ke benama Abiram mati lebuh iya nudukka batu pemun nengeri Jeriko, lalu anak bunsu iya ke benama Segup mega mati, lebuh iya ngaga pintu nengeri nya. Siku nabi ke benama Elijah, ke datai ari Tisbe di menua Giliat, bejaku ngagai Raja Ahap. Ku iya, “Dalam nama TUHAN Allah Taala ti idup, ke disembah orang Israel sereta dipetuaika aku, aku madahka ngagai nuan, menua Israel nadai ambun tauka ujan dalam dua tauka tiga taun ti deka datai tu, nyentuk ngagai maya aku ngasuh hari ujan.” Udah nya TUHAN lalu bejaku ngagai Elijah, “Angkat ari tu, lalu bejalai tunga ke timur, lalu belalai semak sungai Cherit, tunga ke timur ari Sungai Jordan. Nuan deka ngirup ari sungai nya, lalu Aku udah ngasuh burung kak mai pemakai ngagai nuan dia.” Elijah ngasika pesan TUHAN, mansang ngagai sungai Cherit, lalu diau dia. Iya ngirup ari sungai nya, lalu burung kak mai roti enggau dagin tiap pagi enggau tiap lemai ngagai iya. Nyau kelama, sungai nya pen rangkai, laban hari nadai ujan. Udah nya TUHAN lalu bejaku ngagai Elijah, “Alai nuan mansang diatu ngagai nengeri Sarepat, semak Sidon, lalu diau dia. Aku udah ngasuh siku indu balu, ti diau dia, nupi nuan.” Nya alai Elijah mansang ngagai nengeri Sarepat. Lebuh iya datai ba mua pintu nengeri nya, iya tepedaka siku indu ke balu ngumpul kayu api. “Endu, uji bai ai irup ngagai aku,” ku Elijah bejaku enggau iya. Lebuh indu nya baru deka mansang ngambi ai, Elijah lalu ngangau, “Lalu bai mega roti ke aku.” Ku indu nya nyaut, “Aku besumpah dalam nama TUHAN Allah Taala nuan ti idup, aku nadai roti. Utai ti dikemisi aku nya semina segenggam aja tepung dalam sigi mangkuk, enggau minyak kana mimit dalam kebuk. Aku datai ditu deka ngumpul kayu api, lalu aku baru deka pulai ke rumah lalu nyendiaka utai ti mimit nya ke anak aku enggau ke aku empu. Nya meh naka kami duai ulih makai. Udah nya kami duai deka mati keberuran.” “Anang irau, Endu,” ku Elijah bejaku enggau iya. “Mupuk meh nuan lalu sediaka pemakai nuan. Tang gaga dulu siti tuku roti ti mit ari utai ti dikemisi nuan, lalu bai utai nya ngagai aku. Udah nya baru nuan nyendiaka teda utai nya ke seduai menyanak. Laban tu utai ti disebut TUHAN Allah Taala ke disembah orang Israel, ‘Mangkuk nya deka seruran bisi tepung, lalu kebuk nya deka seruran bisi minyak, sebedau Aku, ti TUHAN, ngasuh hari ujan.’ ” Indu balu nya mupuk lalu ngereja utai ti diasuh Elijah, lalu semua sida nadai kala suntuk pemakai. Munyi jaku ti udah disebut TUHAN ngena Elijah, mangkuk nya enda kala nadai tepung, lalu kebuk nya enda kala nadai minyak. Nyau kelama udah bekau nya, anak indu balu nya sakit. Iya majak balat-sebalat, lalu mati. Ku indu nya bejaku enggau Elijah, “Nabi, nama kebuah nuan ngereja utai tu ngagai aku? Kati nuan datai ditu deka ngasuh Allah Taala ngingatka dosa aku, lalu ngasuh anak aku mati?” “Beri nembiak nya ngagai aku,” ku Elijah bejaku. Iya lalu ngambi nembiak nya ari jari indu nya, mai iya ke sadau ngagai bilik ti alai Elijah diau, lalu ngalika nembiak nya ba katil. Udah nya iya lalu besampi enggau nyawa ti inggar, “O TUHAN Allah Taala aku, nama kebuah Nuan udah ngereja utai ti ngenyai tu ngagai indu ke balu tu? Iya udah manah enggau aku lalu ngintu aku, lalu diatu Nuan udah munuh anak iya!” Udah nya Elijah lalu nyuntaika diri atas nembiak nya tiga kali, lalu besampi, “O TUHAN Allah Taala aku, asuh nembiak tu idup baru!” TUHAN nyaut sampi Elijah. Nembiak nya belabuh enseput baru, lalu idup. Elijah lalu mai nembiak nya nurun ke baruh ngagai indai iya. Lalu ku Elijah bejaku enggau indai nembiak nya, “Tu anak nuan. Iya idup!” Disaut indu nya, “Diatu baru aku nemu nuan tu amat nabi, lalu TUHAN sigi amat bejaku ngena nuan!” Nyau kelama udah bekau nya, dalam taun ti ketiga menua nya udah kena laban kemarau, TUHAN bejaku ngagai Elijah, “Alai nuan betemu enggau Raja Ahap. Aku deka ngasuh hari ujan.” Elijah lalu mupuk. Lapar pungkang di menua Samaria endang balat amat nyadi. Nya alai Ahap ngangauka Obadiah, ti nyadi tuai ngemataka istana. (Obadiah nya orang ke angkunka TUHAN, lalu lebuh Jesebel benung bebunuhka bala nabi TUHAN, Obadiah mai seratus iku bala nabi TUHAN, magi sida ngagai dua iti raban, lima puluh iku dalam siti-siti raban, ngelalaika sida dalam lubang gua, lalu meri sida pemakai enggau ai.) Ku Ahap bejaku enggau Obadiah, “Aram kitai mupuk ngagai semua mata ai, enggau semua sungai di menua tu, nyangka ukur kitai bisi tetemuka rumput ke kuda enggau keledai, ngambika kitai enda ibuh munuh jelu kitai.” Sida lalu magi menua ti deka dipatau sida siku-siku. Ahap mupuk kediri nuju ngagai endur siti, lalu Obadiah mupuk kediri nuju endur bukai. Lebuh Obadiah benung di rantau jalai, Elijah betemu enggau iya. Obadiah ngelala Elijah, meremi di mua Elijah, lalu nanya, “Kati tu amat nuan, Elijah?” “Aku meh tu,” ku Elijah nyaut. “Mupuk nuan, lalu padahka ngagai tuan nuan, ‘Elijah bisi ditu.’ ” Ku Obadiah nyaut, “Nama utai ti udah dikereja aku alai nuan ngasuh aku minta diri dibunuh Raja Ahap? Dalam nama TUHAN ti idup, ti Allah Taala nuan, aku besumpah madahka ngagai nuan, raja nya udah begigaka nuan di semua menua di dunya tu. Lebuh orang ke merintah nengeri siti-siti madahka nuan nadai di nengeri nya, Ahap lalu ngasuh orang nya besumpah madahka nuan nadai ulih digiga di menua nya. Lalu diatu nuan ngasuh aku mupuk lalu madahka nuan bisi ditu? Kati enti Roh TUHAN nabanka nuan ngagai endur ti enda ditemu orang lebuh aku mupuk ari endur tu? Udah nya, lebuh aku madahka ngagai Ahap nuan bisi ditu, lalu iya nadai tetemuka nuan, iya deka munuh aku. Nuan ingat, aku tu orang ke angkun nyembah TUHAN kenyau ari aku agi biak. Kati nuan nadai udah kala ninga pasal Jesebel ti munuh bala nabi TUHAN, lalu aku ngelalaika seratus iku sida dalam lubang gua, dalam dua iti raban, lima puluh iku dalam siti-siti raban, lalu meri sida pemakai enggau ai? Nya alai, baka ni ku nuan tau ngasuh aku mupuk lalu madahka ngagai raja pasal nuan ke bisi ditu? Iya tentu deka munuh aku!” Disaut Elijah, “Dalam nama TUHAN ti Pemadu Bekuasa, ke dipetuaika aku, aku besemaya deka betemu enggau raja sehari tu.” Nya alai, Obadiah mansang ngagai Raja Ahap, lalu madahka ngagai Ahap. Ahap lalu mupuk, mansang betemu enggau Elijah. Lebuh Ahap meda Elijah, Ahap lalu bejaku, “Nya orang ke ngaga pengachau di menua Israel!” “Ukai aku ke ngaga pengachau,” ku Elijah nyaut. “Nuan empu ke ngaga pengachau - nuan enggau apai nuan. Nuan enda ngasika pesan TUHAN, lalu nyembah engkeramba Baal. Nya alai, asuh semua orang Israel betemu enggau aku ba Bukit Karmel. Bai 450 iku bala nabi Baal, enggau 400 iku bala nabi petara Aserah ke sama begulai makai enggau Kuin Jesebel.” Ahap lalu mesanka semua orang Israel enggau bala nabi Baal, ngasuh sida begempuru ba Bukit Karmel. Elijah lalu mansang ngagai orang mayuh, lalu bejaku, “Ni pengelama baru kita deka ngaga pemutus penemu kita? Enti TUHAN nya Allah Taala, sembah meh Iya. Tang enti Baal nya Allah Taala, sembah meh iya!” Tang orang mayuh enda nyaut. Udah nya Elijah bejaku, “Semina aku aja nabi TUHAN ti agi tinggal, tang Baal bisi 450 iku nabi. Bai dua iku sapi ti lelaki. Awakka bala nabi Baal ngambi siku sapi, munuh iya, netak iya, lalu manggaika iya ba atas kayu, tang anang nyelup kayu nya. Aku deka ngereja baka nya ke sapi siku. Udah nya awakka bala nabi Baal besampi ngagai petara sida, lalu aku deka besampi ngagai TUHAN. Iya ke nyaut ngena api, nya meh Allah Taala.” Orang mayuh manjung madahka sida besetuju. Udah nya Elijah bejaku enggau bala nabi Baal, “Laban kita mayuh tubuh, awakka kita meh dulu ngambi siku sapi ti lelaki, lalu nyendiaka iya. Awakka kita besampi ngagai petara kita, tang anang nyelup kayu nya ngena api.” Sida lalu ngambi sapi ti lelaki ti udah dibai ngagai sida, nyendiaka sapi nya, lalu besampi ngagai Baal nyentuk ngagai tengah hari. Ku sida ngangau enggau nyawa ti inggar, “Saut kami, Baal!” Sida majak betanda ngelingi alta ti udah digaga sida. Tang Baal nadai nyaut sida. Ba urung tengah hari, Elijah lalu belabuh ngeleseka sida. “Besampi inggar agi! Iya petara, ukai enda? Kada enda iya benung bemimpi, tauka bira, tauka udah bejalai ngagai menua bukai! Enti iya tinduk, gerak iya!” Bala nabi Baal lalu besampi inggar agi, lalu ngurik tubuh diri ngena duku enggau lungga, nitihka adat sida besembah, datai ke darah nyau nelusur tubuh sida. Sida majak rauh-rauh besampi nyentuk ngagai ngalih hari. Tang nadai ga Baal nyaut sida. Siti pen nadai meh saut didinga. Udah nya Elijah lalu bejaku ngagai orang mayuh, “Datai semak kitu ke agi ngagai aku.” Semua sida lalu begempuru ngelingi iya. Iya lalu belabuh ngaduka alta TUHAN ti udah runtuh. Iya ngambi dua belas igi batu, sigi ke genap raban bansa orang Israel ti ngangkatka nama bala anak lelaki Jakop. Jakop udah diberi TUHAN nama Israel. Iya lalu ngena batu nya ngaduka alta alai nyembah TUHAN. Iya ngeruang parit ngelingi alta nya. Parit nya ulih ngundan kira 15 liter ai. Udah nya iya nusun kayu ba alta nya, netak sapi ti lelaki nya, lalu manggaika lampang sapi nya ba atas kayu nya. Ku iya, “Isi penuhka empat igi tepayan enggau ai, lalu tuang ai nya ba piring enggau ba kayu tu.” Sida lalu ngereja nitihka asuh iya, lalu ku Elijah, “Beri mayuh agi ai.” Sida lalu nurutka jaku iya. “Kereja nya sekali agi,” ku iya bejaku. Sida lalu nurutka jaku iya baru. Ai nya nyau lilih ari alta nya, lalu ngemenuhka parit ti ngelingi alta nya. Ba urung ngalih hari, endang maya ngenjuk piring, nabi Elijah mansang ngagai alta, lalu besampi. Ku iya, “O TUHAN Allah Taala ke disembah Abraham, Isak enggau Jakop, beri tanda kena mandangka Nuan endang amat Allah Taala ke disembah orang Israel, lalu aku tu endang amat nembiak Nuan, ti udah ngereja semua utai tu nitihka pesan Nuan. Saut aku, TUHAN, saut aku, ngambika orang tu nemu Nuan endang TUHAN Allah Taala, lalu Nuan deka mai sida pulai baru ngagai Nuan.” TUHAN lalu ngasuh api nurun ari langit. Api nya lalu nganguska piring, kayu, enggau batu nya, ngasuh tanah dia angat, lalu ngerangkaika ai ti dalam parit nya. Lebuh orang mayuh meda nya, sida lalu nyungkurka diri ke tanah, lalu bejaku enggau nyawa ti inggar, “ TUHAN meh Allah Taala. Semina TUHAN siku aja ti Allah Taala!” Elijah lalu bejaku ngagai sida, “Tangkap bala nabi Baal. Anang nejuka sida rari!” Orang mayuh lalu nangkap semua nabi Baal. Elijah lalu mai sida ngagai anak sungai Kison, lalu munuh sida dia. Udah nya Elijah lalu bejaku ngagai Raja Ahap, “Alai nuan makai. Aku bisi ninga munyi auh ujan datai.” Lebuh Ahap mansang makai, Elijah niki ngagai tuchung Bukit Karmel. Dia iya lalu meremika diri ke tanah. Pala iya ba entara patung iya. Ku iya bejaku ngagai orang gaji iya, “Uji perening tunga ke tasik.” Orang gaji iya mupuk, lalu pulai baru. Ku iya, “Nadai aku meda utai.” Elijah ngasuh iya ninjau tujuh kali. Chukup ketujuh kali, orang gaji nya pulai, lalu ku iya, “Aku bisi meda siti mua hari mesai tapa jari, datai ari tasik.” Elijah lalu bejaku ngagai orang gaji iya, “Alai nuan mansang ngagai Raja Ahap, lalu asuh iya nepan kerita perang iya, lalu pulai, enggai ke iya tepagang laban ujan.” Enda lama udah nya langit nyau chelum laban mua hari. Ribut belabuh muput, lalu hari bangat amat ujan. Ahap nepan kerita perang iya, lalu mupuk pulai ngagai Jesril. Kuasa TUHAN lalu datai ngagai Elijah. Iya nyintalka gari iya erat ba punggung iya, lalu belanda dulu ari Ahap nyentuk ngagai Jesril. Raja Ahap lalu madahka ngagai bini iya Jesebel pasal semua utai ti udah dikereja Elijah, enggau chara iya munuh semua nabi Baal. Jesebel lalu ngirumka pesan ngagai Elijah, “Awakka bala petara munuh aku enti aku, lebuh maya tu pagila, enda ngereja ngagai nuan utai ti udah dikereja nuan ngagai bala nabi Baal.” Elijah takut, lalu rari. Iya mai orang gaji iya, lalu mansang ngagai Beer-seba di menua Judah. Iya lalu ninggalka orang gaji iya dia. Elijah bejalai sehari nya ngagai menua puang. Iya ngetu lalu duduk belindung di baruh sepun kayu, ngajihka diri mati. “Utai tu kelalu balat, TUHAN,” ku iya besampi. “Ambi nyawa aku. Manah agi aku mati!” Iya gali di baruh kayu nya, lalu tinduk. Tekala nya siku melikat lalu negu iya, lalu ku melikat nya bejaku, “Dani, lalu makai.” Elijah malik lalu tepedaka siti tuku roti enggau sigi kebuk ai semak pala iya. Iya makai, ngirup, lalu gali baru. Melikat TUHAN datai baru, lalu ngerak iya kedua kali. Ku melikat nya bejaku, “Angkat lalu makai, enggai ke nuan enda ulih bejalai.” Elijah angkat, makai, ngirup, lalu pemakai nya chukup ngasuh iya kering bejalai empat puluh hari ngagai Sinai, bukit ti kudus. Iya lalu tama ngagai siti lubang gua, lalu bemalam dia. Tekala nya TUHAN lalu bejaku ngagai iya, “Elijah, nama pengawa nuan ditu?” Ku Elijah nyaut, “ TUHAN ti Pemadu Bekuasa, aku endang seruran betuaika Nuan siku aja. Tang orang Israel udah ngelanggar sempekat sida enggau Nuan, udah ngeruntuhka alta Nuan, lalu udah munuh semua bala nabi Nuan. Ka semina aku aja ti agi idup, lalu sida nguji munuh aku!” “Pansut nuan, lalu bediri di mua Aku ba atas bukit,” ku TUHAN bejaku ngagai iya. Udah nya TUHAN mansa, lalu ngasuh ribut ti deras datai, ti mechahka bukit, lalu mambarka batu, tang TUHAN nadai dalam ribut nya. Ribut nya ngetu muput. Udah nya tanah lalu berenyang, tang TUHAN nadai dalam tanah ti berenyang nya. Udah bekau tanah berenyang, api lalu datai, tang TUHAN nadai dalam api nya. Lebuh api udah datai, nyawa lalu bisi betelai. Lebuh Elijah ninga nya, iya mampul mua diri ngena kelambi iya, lalu pansut, lalu bediri ba mua lubang gua nya. Nyawa siti lalu bejaku enggau iya, “Elijah, nama pengawa nuan ditu?” Ku Elijah nyaut, “ TUHAN ti Pemadu Bekuasa, aku endang seruran betuaika Nuan siku aja. Tang orang Israel udah ngelanggar sempekat sida enggau Nuan, udah ngeruntuhka alta Nuan, lalu munuh semua bala nabi Nuan. Ka semina siku aku aja agi tinggal, lalu sida nguji munuh aku.” Ku TUHAN bejaku, “Alai nuan pulai ngagai menua puang semak Damaskus, udah nya tama ngagai nengeri nya, lalu tata Hasael nyadi raja menua Siria. Tata mega Jehu anak Nimsi nyadi raja menua Israel, lalu tata mega Elisa anak Sapat ari Abel-meholah nganti nuan nyadi nabi. Barang sapa enda kena bunuh Hasael, deka dibunuh Jehu, lalu barang sapa enda kena bunuh Jehu, deka dibunuh Elisa. Tang Aku deka ngasuh tujuh ribu iku orang idup di menua Israel, iya nya semua orang ke taluk ngagai Aku, orang ke enda meremi ngagai Baal, tauka nyium engkeramba iya.” Elijah angkat lalu nemu Elisa benung ngeradu tanah ngena sepasang jelu sapi ti lelaki. Sebelas pasang jelu sapi bejalai dulu ari iya. Pasang ti dikena iya ngeradu tanah nya pasang ti penudi. Elijah muka kelambi iya, lalu ngerasukka kelambi nya ba Elisa. Elisa lalu ninggalka jelu sapi iya, belanda nitihka Elijah. Ku iya, “Awakka aku meri selamat tinggal ngagai apai enggau indai aku. Udah nya baru aku bejalai enggau nuan.” Disaut Elijah, “Pulai meh nuan dulu. Enda aku nagang nuan!” Udah nya Elisa mansang ngagai sapi iya, munuh sapi dua iku nya, lalu manduk dagin jelu nya, ngena kungkung sapi nya empu nyadika kayu api. Iya meri dagin nya ngagai orang mayuh, lalu sida makai. Udah nya iya mupuk, lalu nitihka Elijah, lalu nyadi penulung iya. Raja Benhadat menua Siria lalu ngempuruka semua bala soldadu iya. Iya disukung tiga puluh dua iku raja ti bukai enggau kuda enggau kerita kuda sida. Iya datai, ngelulung lalu nyerang nengeri Samaria. Iya ngasuh bala seruan tama ngagai nengeri nya betemu enggau Raja Ahap menua Israel, mai pesan tu, “Raja Benhadat minta nuan nyerahka ngagai iya pirak enggau emas nuan, bala indu kita, enggau bala anak kita ke pemadu kering.” Raja Ahap lalu nyaut, “Padahka ngagai tuan aku, Raja Benhadat, aku besetuju. Iya tau bempu aku enggau semua utai aku.” Udah nya bala seruan datai baru ngagai Ahap, mai siti agi peminta ari Benhadat, “Aku udah ngirumka pesan ngagai nuan, ngasuh nuan nyerahka ngagai aku pirak enggau emas nuan, bala indu ke diempu nuan, enggau bala anak nuan. Tang diatu aku deka ngasuh bala pemesai aku nyerungkai istana nuan enggau rumah bala pemesai nuan, lalu ngambi semua utai ti dikira sida berega. Sida deka datai dia ba urung maya tu pagila.” Raja Ahap lalu mesanka semua bala tuai dalam menua nya, lalu ku iya bejaku, “Kita nemu, orang tu deka ngerusak kitai. Iya udah ngirumka pesan ngagai aku, minta aku meri bala bini enggau bala anak aku, perengka pirak enggau perengka emas aku, lalu aku udah besetuju.” Bala tuai enggau orang mayuh lalu nyaut, “Anang mendingka iya. Anang ngalahka diri.” Nya alai Ahap lalu nyaut bala seruan Benhadat, “Padahka ngagai tuan raja aku, aku besetuju enggau peminta iya ti keterubah, tang aku enda besetuju enggau peminta iya ti kedua.” Bala seruan nya mupuk, lalu udah nya datai baru mai siti agi pesan ari Benhadat: “Awakka bala petara munuh aku enti aku enda ngaga nengeri Samaria nyadi amau chukup kena ngisi tapa jari semua soldadu aku!” Disaut Raja Ahap, “Padahka ngagai Raja Benhadat, orang ke amat nyadi soldadu semina temegah udah lepas perang, ukai sebedau beperang.” Benhadat nerima saut ari Ahap lebuh iya, enggau sida raja ti bukai ke setanah enggau iya, agi benung ngirup dalam langkau kain sida. Iya lalu ngasuh bala soldadu iya sedia nyerang nengeri nya. Sida lalu belatur. Lebuh maya nya, siku nabi betemu enggau Raja Ahap, lalu bejaku, “ TUHAN bisi nyebut, ‘Anang takutka soldadu ti mayuh nya! Aku deka ngasuh nuan menang ngelaban bala soldadu nya sehari tu, ngambika nuan nemu, Aku tu endang TUHAN.’ ” “Sapa nguluka bala nyerang?” ku Ahap nanya. Disaut nabi nya, “ TUHAN madahka, bala soldadu ti agi biak, ke dipegai tuan gabenor pelilih menua deka nguluka bala.” Lalu ku Ahap nanya, “Sapa deka dulu ngelabuhka jari?” “Nuan,” ku nabi nya nyaut. Raja lalu mesanka bala soldadu ti agi biak, ke diuluka bala gabenor pelilih menua, dua ratus tiga puluh dua iku semua sida. Udah nya iya lalu mesanka bala soldadu orang Israel, tujuh ribu iku semua sida. Sida lalu nyerang munsuh ba urung tengah hari, lebuh Benhadat enggau tiga puluh dua iku raja bukai ke setanah enggau iya benung mabuk dalam langkau kain sida. Bala soldadu ti agi biak bejalai dulu. Bala pematau ke diasuh Benhadat bejalai, madahka siti raban soldadu bisi pansut ari nengeri Samaria. Benhadat lalu meri atur, “Tangkap sida idup-idup, nemuka sida nya datai deka nyerang, tauka mai kitai bebaik.” Bala soldadu ti agi biak nya lalu nguluka orang nyerang, dientudika bala soldadu orang Israel, lalu genap iku sida munuh orang ke dilaban sida. Orang Siria rari, digagai bala orang Israel, tang Benhadat rari nepan kuda, disempulang sekeda soldadu iya ke nepan kuda. Raja Ahap lalu enggau orang betempuh, ngerampas kuda enggau kerita perang, lalu balat amat ngalahka orang Siria. Udah nya nabi nya lalu mansang ngagai Raja Ahap, lalu bejaku, “Pulai nuan, tambahka bala soldadu nuan, lalu bejimat begagaka pelan, laban raja menua Siria deka nyerang baru lebuh musin bungai ti deka datai tu ila.” Ku bala pemesai Raja Benhadat bejaku enggau iya, “Bala petara orang Israel nya bekuasa di menua ti bebukit. Nya kebuah orang Israel ngalahka kitai. Tang kitai tetap deka ngalahka sida, enti kitai belaban enggau sida ba emperan. Nya alai, anang agi ngasuh tiga puluh dua iku raja nyadi tuai bala. Ganti sida enggau bala tuai soldadu. Udah nya pesanka bala soldadu ngemayuh sida ke udah rari ninggalka nuan, sereta enggau ngemayuh nya mega kuda enggau kerita perang. Kitai deka ngelaban orang Israel ba menua ti emperan. Sekali tu kitai deka ngalahka sida.” Raja Benhadat besetuju lalu nitihka jaku lalau sida. Lebuh musin panas taun siti udah bekau nya, iya lalu mesanka bala iya, lalu bejalai enggau sida ngagai nengeri Apek, deka nyerang orang Israel. Bala orang Israel lalu ditesau, lalu diberi senyata. Sida bejalai, dibagi ngagai dua iti raban, lalu nirika kem sida, betunga enggau bala soldadu orang Siria. Bala orang Israel baka dua raban kambin, enti dibandingka enggau bala orang Siria, ke ngachir ba sebelah endur ari luar nengeri nya. Siku nabi lalu mansang ngagai Raja Ahap, lalu bejaku enggau iya, “Tu utai ti disebut TUHAN: ‘Laban orang Siria ngumbai Aku tu petara ti bekuasa di menua ti bebukit, lalu enda bekuasa ba menua ti emperan, Aku deka ngasuh kita menang, lalu ngalahka bala soldadu sida ke mayuh tu. Nya baru nuan enggau bala nuan deka nemu Aku endang TUHAN.” Bala soldadu orang Siria enggau bala soldadu orang Israel diau dalam kem tujuh hari, betunga enggau pangan diri. Ba hari ti ketujuh sida lalu belabuh belaban, lalu bala orang Israel munuh seratus ribu iku orang Siria. Bala orang Siria ti agi idup lalu rari ngagai nengeri Apek, alai dua puluh tujuh ribu iku sida ditinggang dinding kuta ti runtuh. Benhadat mega rari ngagai nengeri nya, lalu belalai dalam bilik di belakang sebuah rumah. Bala pemesai iya betemu enggau iya, lalu ku sida bejaku, “Kami bisi udah ninga raja orang Israel nemu ngampun orang. Beri kami pemendar betemu enggau raja orang Israel, melitka kain guni ba punggung kami, enggau nanchangka tali ba rekung kami, nyangka ukur iya deka ngelakka nuan idup.” Nya alai sida lalu melitka kain guni ba punggung sida, lalu nanchangka tali ba rekung sida, mansang ngagai Ahap, lalu bejaku, “Ulun nuan Benhadat minta nuan kasihka iya, lalu enda munuh iya.” Disaut Ahap, “Kati iya agi idup? Manah meh nya! Kami duai endang baka diri menyadi enggau pangan diri!” Bala pemesai Benhadat endang nganti tanda ti manah. Nya alai, lebuh Ahap nyebut “menyadi,” sida lalu bepegai ba leka jaku nya, lalu ku sida, “Munyi ti ku nuan, Benhadat endang menyadi nuan!” “Bai iya ngagai aku,” ku Ahap bejaku enggau sida. Lebuh Benhadat datai, Ahap lalu mai iya nepan kerita perang iya. Ku Benhadat bejaku enggau iya, “Aku deka mulaika ngagai nuan nengeri ti udah dirampas apai aku ari apai nuan, lalu nuan tau nirika siti endur alai bedagang di Damaskus, baka ke dikereja apai aku di Samaria.” Disaut Ahap, “Laban nuan deka ngereja utai nya, nya alai aku ngelepaska nuan.” Iya lalu ngaga siti sempekat enggau Benhadat, lalu ngelepaska iya. Ari asuh TUHAN, siku ari bala sida nabi bejaku enggau pangan iya, ku iya, “Palu aku!” Tang orang nya enggai malu iya. Lalu ku nabi nya bejaku enggau orang nya, “Laban nuan enda ngasika pesan TUHAN, siku jelu singa deka munuh nuan, lebuh nuan angkat ari tu.” Lebuh nabi nya mupuk, siku singa datai, lalu nerekam iya. Lalu iya mati. Udah nya nabi ti udah ngasuh orang nya malu iya, mansang ngagai siku agi orang bukai, lalu bejaku, “Palu aku!” Orang nya lalu malu iya. Balat amat orang nya malu iya, lalu ngemediska iya. Nabi nya lalu malut mua diri ngena kain, ngambika orang enda ngelala iya. Udah nya iya mupuk lalu bediri ba tisi jalai, nganti raja menua Israel mansa. Lebuh raja mansa, nabi nya lalu ngangauka raja, ku iya, “Tuan Raja, aku udah enggau orang beperang. Siku soldadu udah mai ngagai aku siku munsuh ti udah kena tangkap, lalu ku soldadu nya bejaku enggau aku, ‘Jaga orang tu. Enti iya rari, nuan deka bebayarka nyawa iya ngena nyawa nuan empu, tauka diukum tiga ribu singkap duit pirak.’ Tang lebuh aku benung kiruh ngereja utai bukai, orang nya rari.” Disaut Raja Ahap, “Nuan udah ngukum diri empu. Nya alai nuan enda tau enda mayar ukum nya.” Nabi nya lalu muka balut mua iya, lalu tekala nya Raja Ahap ngelala iya nya siku ari sida nabi. Udah nya nabi nya lalu bejaku enggau raja, “Tu jaku TUHAN: ‘Laban nuan udah ngelepaska orang ke udah diasuh Aku bunuh nuan, nyawa nuan empu deka dikena nganti nyawa orang nya, lalu nyawa bala soldadu nuan deka dikena nganti nyawa bala soldadu orang nya.’ ” Raja Ahap lalu pulai ngagai nengeri Samaria, ringat pedis ati. Semak istana Raja Ahap di Jesril bisi sebidang kebun anggur ti diempu orang siku ke benama Nabot. Nyadi sekali Ahap bejaku enggau Nabot, “Beri kebun anggur nuan ngagai aku, laban kebun nuan semak istana aku, lalu aku deka ngena tanah nya alai aku nanam sayur. Aku deka meri nuan kebun anggur ti manah agi ari nya kena aku nyilih kebun nuan nya. Tauka, enti nuan deka, aku meli kebun nya enggau rega ti patut.” “Kebun anggur nya pesaka ari aki ini aku,” ku Nabot nyaut. “Aku enda tau meri kebun nya ngagai Raja!” Ahap lalu pulai, tusah ati sereta ringat ketegal jaku Nabot. Iya gali ba peninduk iya, nunga ngagai dinding, lalu enggai makai. Bini iya Jesebel mansang ngagai iya, lalu nanya, “Nama kebuah nuan tusah ati, lalu enggai makai?” Disaut Ahap, “Laban jaku Nabot enggau aku. Aku madahka diri deka meli kebun anggur iya, tauka, enti iya deka, aku meri iya sebidang kebun anggur ti bukai, kena aku nyilih kebun nya, tang iya madahka diri enggai!” Disaut Jesebel, “Kati nuan tu raja tauka ukai? Angkat ari katil nya, lalu makai. Anang tusah ati. Ila aku ngulihka kebun anggur Nabot nya ke nuan!” Udah nya Jesebel lalu nulis surat, nyain semua surat nya ngena nama Ahap, lalu ditanggam iya ngena chop Ahap. Udah nya iya lalu ngirumka surat nya ngagai bala pemesai enggau orang ke tinggi pangkat di Jesril. Tu utai ti disebut dalam surat nya, “Letak hari alai bepasa. Kangauka orang mayuh begempuru, lalu asuh Nabot duduk ba penuduk orang ke tinggi pangkat. Giga dua iku orang ke jai, lalu asuh seduai nya bedawaka iya mua mata madahka iya udah nyumpah Allah Taala sereta nyumpah raja. Udah nya, bai Nabot ke luar ari nengeri, lalu tuku iya ngena batu datai ke mati.” Bala pemesai enggau orang ke tinggi pangkat di Jesril lalu ngereja utai ti diasuh Jesebel. Sida ngeletak hari alai bepasa, ngangauka orang mayuh begempuru, lalu ngasuh Nabot duduk ba penuduk orang ke tinggi pangkat. Orang dua iku ti jai nya lalu bedawaka Nabot di mua orang mayuh, madahka iya udah nyumpah Allah Taala sereta nyumpah raja. Nya alai Nabot dibai ke luar ari nengeri, dituku ngena batu, datai ke mati. Pesan lalu dikirumka ngagai Jesebel, “Nabot udah dibunuh.” Lebuh Jesebel nerima pesan nya, iya lalu bejaku enggau Ahap, “Nabot udah mati. Alai ambi kebun anggur iya.” Ahap lalu tekala nya mansang ngagai kebun anggur nya lalu ngambu kebun nya ke iya empu. Udah nya TUHAN lalu bejaku ngagai Elijah, siku nabi ari Tisbe, “Alai nuan mansang ngagai Raja Ahap di Samaria. Nuan deka nemu iya ba kebun anggur Nabot, lebuh iya baru deka ngambu kebun nya. Sebut ngagai iya munyi tu, ‘Ku TUHAN bejaku: Kati nuan udah munuh orang lalu ngerampas pesaka iya?’ Udah nya sebut ngagai iya, ‘Ku TUHAN bejaku: Ba endur alai ukui ti nilat darah Nabot, dia mega ukui deka nilat darah nuan!’ ” Lebuh Ahap meda Elijah, iya lalu bejaku, “O munsuh! Diatu baru nuan tetemuka aku.” “Amat,” ku Elijah nyaut. “Nuan udah, enggau pengabis ati nuan, angkun ngereja utai ti salah di mua TUHAN. Nya alai TUHAN nyebut ngagai nuan, ‘Aku deka ngasuh penusah ti besai ninggang nuan. Aku deka muai nuan, lalu muai semua orang ke lelaki, ke tuai enggau ke biak ari ruang bilik nuan. Ruang bilik nuan deka nyadi baka ruang bilik Raja Jeroboam anak Nebat, enggau baka ruang bilik Raja Baasa anak Ahijah, laban nuan udah ngeringatka ati Aku ketegal nuan udah nguluka orang Israel bedosa.’ Nyadi pasal Jesebel, TUHAN madahka ukui deka makai bangkai iya di nengeri Jesril. Barang sapa ari bala kaban belayan nuan mati di nengeri Jesril, sida deka diempa ukui, lalu sida ke mati ari luar nengeri, deka diempa burung.” ( Nadai orang bukai udah kala ngemendar Ahap angkun ngereja utai ti salah di mua TUHAN - semua utai nya nyadi magang ari ansak bini iya Jesebel. Iya ngereja dosa ti pemadu ngasuh malu, laban iya besembahka engkeramba, baka orang Amor ti udah diburu TUHAN ari menua nya, lebuh orang Israel nyerang.) Lebuh Elijah udah tembu bejaku, Ahap lalu nyarikka gari diri, lalu ngerasukka kain guni. Iya enggai makai. Iya tinduk ngena kain guni. Mua iya berupai tusah. Ku TUHAN bejaku ngagai nabi Elijah, “Kati nuan bisi meda chara Ahap ngemaruhka diri di mua Aku? Laban iya udah ngemaruhka diri di mua Aku, Aku enggai ngasuh penusah ti besai ninggang iya lebuh iya agi idup. Penusah ti besai nya deka ninggang ruang bilik iya lebuh maya anak iya ila.” Dalam kandang dua taun udah bekau nya, menua Israel enggau menua Siria nadai beperang ngelaban pangan diri agi, tang dalam taun ti ketiga Raja Jehosapat menua Judah betemu enggau Raja Ahap menua Israel. Ahap lalu nanya ngagai bala pemesai iya, “Nama kebuah kitai lalu enda ngerampas pulai baru nengeri Ramot-giliat ari raja menua Siria? Nengeri nya endang enggi kitai!” Ahap lalu nanya Jehosapat, “Kati nuan deka enggau aku nyerang Ramot?” “Aku sedia, enti nuan sedia,” ku Jehosapat nyaut. “Bala soldadu enggau bala soldadu ke nepan kuda mega sedia. Tang manah kitai betanya dulu ngagai TUHAN.” Ahap lalu mesanka bala nabi, kira empat ratus iku bala sida. Iya lalu nanya sida, “Kati patut tauka enda aku nyerang Ramot?” “Serang,” ku sida nyaut, “laban TUHAN deka ngasuh nuan menang.” Tang ku Jehosapat nanya, “Ukai enda bisi siku agi nabi ti tau diasuh kitai betanya ngagai TUHAN?” Ahap lalu nyaut, “Bisi. Mikaiah anak Imlah. Tang aku begedika iya, laban iya nadai kala benabika utai ti manah ke aku. Iya selalu nyebut utai ti jai.” “Nuan enda tau bejaku munyi nya!” ku Jehosapat nyaut. Udah nya Ahap lalu mesanka siku pemesai ke bekereja dalam istana lalu ngasuh iya mesanka Mikaiah tekala nya. Raja dua iku nya, ke ngena pekayan raja, duduk ba kerusi diraja seduai iya ba endur alai orang ke ngindik gandum, di luar pintu nengeri Samaria. Semua nabi lalu benabi di mua seduai iya. Siku ari bala sida, Sedekiah anak Chenaana, ngaga berapa iti tanduk besi, lalu bejaku enggau Ahap, ku iya, “Tu utai ti disebut TUHAN: ‘Nuan deka ngena tanduk besi tu nyerang lalu ngalahka semua orang Siria.’ ” Semua nabi ti bukai bela nyebut nya magang. Ku sida, “Serang meh Ramot. Nuan deka menang. TUHAN deka ngasuh nuan menang.” Lebuh maya nya mega, pemesai ti udah bejalai ngambi Mikaiah, benung bejaku enggau iya, “Semua nabi bukai udah benabi magang madahka raja deka mujur, nya alai manah nuan mega benabi baka sida.” Tang ku Mikaiah nyaut, “Aku besumpah dalam nama TUHAN ti idup, aku besemaya deka nyebut semina utai ti diasuh TUHAN!” Lebuh iya bediri di mua Raja Ahap, raja nya lalu nanya iya, “Mikaiah, kati kami duai Raja Jehosapat patut nyerang Ramot, tauka enda?” “Serang aja!” ku Mikaiah nyaut. “Seduai endang tetap deka menang. TUHAN deka ngasuh seduai menang.” Tang ku Ahap nyaut, “Lebuh nuan bejaku ngagai aku dalam nama TUHAN, sebut utai ti bendar! Berapa kali aku enda tau enda madahka nya ngagai nuan?” Mikaiah lalu nyaut, “Aku bisi meda bala soldadu orang Israel ngachir ba sebelah bukit baka raban jelu bedus ti nadai orang ngibun. Lalu ku TUHAN bejaku, ‘Orang tu nadai kepala. Asuh sida pulai enggau selamat.’ ” Ku Ahap bejaku enggau Jehosapat, “Nya utai ti ku aku tadi. Iya nadai kala benabika utai ti manah ke aku. Iya seruran nyebut utai ti jai!” Lalu ku Mikaiah nampung jaku iya, “Diatu pendingka utai ti disebut TUHAN! Aku meda TUHAN duduk ba kerusi diraja Iya di serega, lalu semua melikat Iya bediri ngimbai Iya. Ku TUHAN nanya, ‘Sapa deka nipu Ahap ngambika iya mupuk lalu dibunuh di Ramot?’ Sekeda bala melikat nyebut tu, sekeda sida ti bukai nyebut nya. Udah nya siku roh mansang ke mua ngagai TUHAN, lalu bejaku, ‘Awakka aku nipu Ahap.’ ‘Baka ni ku chara nuan deka nipu iya?’ ku TUHAN nanya. Ku roh nya nyaut, ‘Aku deka mupuk lalu ngasuh semua bala nabi ke bekereja ke Ahap madahka utai ti bula.’ Lalu ku TUHAN bejaku, ‘Mupuk meh nuan. Tipu meh iya. Nuan deka mujur.’ ” Ku Mikaiah ngujungka jaku iya, “Tu meh utai ti udah nyadi. TUHAN udah ngasuh bala nabi nuan ngemulaka nuan. Tang TUHAN Empu udah ngeletak nuan deka dituntung penusah!” Udah nya Sedekiah lalu mansang ngagai Mikaiah, nampar mua iya, lalu nanya, “Kemaya Roh TUHAN udah kala ninggalka aku, lalu bejaku enggau nuan?” Disaut Mikaiah, “Nuan deka nemu nya lebuh nuan tama ngagai bilik di belakang rumah, deka belalai.” Udah nya Raja Ahap lalu bejaku enggau siku ari bala pemesai iya. Ku iya, “Tangkap Mikaiah, lalu bai iya ngagai Amon, tuan gabenor nengeri nya, enggau ngagai Anak Raja Joas. Asuh sida nutup iya dalam rumah jil, lalu asuh sida meri iya semina roti enggau ai aja, nyentuk ngagai maya aku udah pulai beperang enggau selamat.” Ku Mikaiah, “Enti nuan ulih pulai baru enggau selamat, reti nya, TUHAN nadai udah bejaku ngena aku!” Lalu ku iya nambahka jaku iya, “Pendingka ulih semua kita, utai ti udah disebut aku!” Udah nya Raja Ahap menua Israel enggau Raja Jehosapat menua Judah mansang nyerang nengeri Ramot-giliat. Ku Ahap bejaku enggau Jehosapat, “Lebuh kitai nyerang, aku deka ngeluluka diri baka orang bukai, tang nuan ngena pekayan diraja nuan empu.” Nya alai raja menua Israel mansang beperang ngaga diri baka gamal orang bukai. Nyadi raja menua Siria udah meri atur ngagai tiga puluh dua iku orang ke nyadi tuai bala ke nepan kerita perang, enda ngasuh sida nyerang orang bukai, tang semina raja menua Israel aja. Nya alai, lebuh sida meda Raja Jehosapat, semua sida ngumbai iya raja menua Israel. Sida lalu nyerang iya. Tang lebuh iya nyerauh, sida lalu nemu iya ukai raja menua Israel, lalu sida enda nyadi nyerang iya. Tang seninjik amat, siku soldadu orang Siria nimbakka laja. Laja nya lalu kena ba sambung baju kebal Raja Ahap. “Bakal aku!” ku Ahap ngangau ngagai orang ke ngemudika kerita perang iya. “Nikal tua. Anang agi nyerang munsuh!” Lebuh bala soldadu agi benung bamuk, Raja Ahap agi nyandih duduk dalam kerita perang iya, nunga ngagai bala orang Siria. Darah ari bakal iya pansut nelusur tubuh iya, lalu ngachir ba sebelah geladak kerita perang nya. Lemai nya iya mati. Lebuh padam mata panas, atur lalu diberi ngagai semua soldadu orang Israel, “Pulai semua kita ngagai menua enggau nengeri kita empu!” Nya meh gaya pemati Raja Ahap. Bangkai iya dibai ngagai Samaria, lalu dikuburka. Kerita perang iya lalu dituchi ba siti telaga di Samaria. Ukui lalu bedilatka darah iya, ba endur alai bala indu sundal mandi, munyi ti udah disebut TUHAN. Semua utai bukai ti udah dikereja Raja Ahap, nyengkaum cherita pasal istana iya ke dilagu iya ngena gading, enggau pasal semua nengeri ti udah digaga iya, bisi dituliska magang dalam Jerita Lama Pasal Raja Menua Israel. Lebuh iya mati, anak iya Ahasiah nganti iya nyadi raja. Dalam taun ti keempat Raja Ahap megai perintah di menua Israel, Jehosapat anak Asa nyadi raja menua Judah, lebuh umur iya tiga puluh lima taun. Lalu iya merintah di Jerusalem dua puluh lima taun. Indai iya Asubah anak Silhi. Baka apai iya Asa ke dulu ari iya, iya mega ngereja utai ti ngena di mua TUHAN. Tang semua palan alai besembiang enda dirusak, lalu orang mayuh majak ngenjuk piring lalu nunu menyan ba endur nya. Jehosapat bebaik enggau raja menua Israel. Semua utai bukai ti udah dikereja Jehosapat, enggau pasal pemerani iya beperang, bisi dituliska magang dalam Jerita Lama Pasal Raja Menua Judah. Iya muai semua lelaki enggau indu ke bekereja nyadi sundal ba alta petara orang kapir ti agi tinggal ari maya apai iya Raja Asa. Menua Edom nadai raja. Menua nya diperintah siku penulung raja ke diletak raja menua Judah. Raja Jehosapat ngasuh orang ngaga kapal, ngambika bisi belayar ngagai menua Opir ngambi emas. Tang kapal nya karam di Esion-geber, lalu nadai kala belayar. Udah nya Raja Ahasiah menua Israel madahka diri deka ngasuh bala kelasi iya nulung bala nembiak Jehosapat belayar. Tang Jehosapat enda nerima tulung nya. Jehosapat mati lalu dikuburka ba lumbung bala raja di Nengeri David, lalu anak iya Jehoram nganti iya nyadi raja. Dalam taun ti ketujuh belas Raja Jehosapat megai perintah di menua Judah, Ahasiah anak Ahap berengkah nyadi raja menua Israel, lalu iya merintah di Samaria dua taun. Iya bedosa ngelaban TUHAN, nitihka teladan ti jai ari apai iya, ari indai iya Jesebel, enggau Raja Jeroboam, ti udah nguluka orang Israel bedosa. Iya nyembah sereta betuaika Baal, lalu baka apai iya ke dulu ari iya, iya ngeringatka ati TUHAN Allah Taala ke disembah orang Israel. Udah bekau pemati Raja Ahap, orang menua Moap lalu angkat ngelaban Israel. Raja Ahasiah udah labuh ari tanju perabung istana iya di Samaria, lalu iya balat amat bebadi. Nya alai iya ngasuh bala seruan iya betanya ngagai Baal-sebup, iya nya petara orang Pilistin di nengeri Ekron, laban iya keran deka nemu enti iya ulih gerai tauka enda. Tang siku melikat TUHAN bejaku ngagai Elijah, iya nya nabi ke datai ari Tisbe, ngasuh iya betemu enggau bala seruan Raja Ahasiah, lalu nanya sida, “Nama kebuah kita deka betanya ngagai Baal-sebup, petara orang di Ekron? Kati kita ngumbai kitai nadai petara di menua Israel? Padahka ngagai raja utai ti disebut TUHAN, ‘Nuan enda ulih gerai ari pemedis nuan. Nuan deka mati!’ ” Elijah bejaku munyi nya ari asuh TUHAN. Bala seruan lalu pulai ngagai raja, lalu raja nanya, “Nama kebuah kita nikal?” Disaut sida, “Kami bisi betemu enggau orang siku. Iya ngasuh kami nikal lalu madahka ngagai nuan utai ti disebut TUHAN ngagai nuan, ‘Ku TUHAN bejaku: Nama kebuah nuan ngasuh bala seruan betanya ngagai Baal-sebup, petara orang di Ekron? Kati nuan ngumbai kitai nadai petara di menua Israel? Nuan enda ulih gerai ari pemedis nuan. Nuan deka mati!’ ” “Baka ni ku gamal orang nya?” ku raja nanya. “Baju enggau belulang iya digaga ari kulit jelu,” ku sida nyaut. “Orang nya Elijah!” ku raja bejaku. Iya lalu ngasuh siku pemesai, enggau lima puluh iku soldadu ngambi Elijah. Pemesai nya betemu enggau Elijah ke benung duduk ba bukit sigi, lalu ku pemesai nya bejaku enggau Elijah, “Nabi, raja mesanka nuan nurun.” “Enti aku tu nabi,” ku Elijah nyaut, “awakka api nurun ari langit lalu munuh nuan enggau bala nuan!” Tekala nya api nurun lalu munuh pemesai nya enggau bala iya. Raja lalu ngirumka siku agi pemesai enggau lima puluh iku soldadu. Sida mansang lalu bejaku enggau Elijah, “Nabi, raja mesanka nuan nurun diatu!” “Enti aku tu nabi,” ku Elijah nyaut, “awakka api nurun ari langit lalu munuh nuan enggau bala nuan!” Tekala nya api ari Allah Taala nurun lalu munuh pemesai nya enggau bala iya. Raja lalu sekali agi ngirumka siku pemesai enggau lima puluh iku soldadu. Pemesai nya niki ngagai bukit nya, besugang di mua Elijah, lalu minta kasih ari iya, “Nabi, kasihka aku enggau bala aku tu. Anang munuh kami! Pemesai ke dua iku nya, enggau bala seduai iya udah mati laban api ti nurun ari langit. Tang aku minta nuan kasihka aku!” Melikat TUHAN lalu bejaku ngagai Elijah, “Alai nuan nurun enggau iya. Anang takut.” Elijah lalu mupuk enggau pemesai nya mansang betemu enggau raja. Ku Elijah bejaku enggau raja, “Tu utai ti disebut TUHAN: ‘Laban nuan udah ngirumka bala seruan nuan betanya ngagai Baal-sebup, petara nengeri Ekron, lalu ngumbai menua Israel baka ke nadai Allah Taala alai betanya, nuan enda ulih gerai. Nuan deka mati!’ ” Nya alai Ahasiah mati, munyi ti udah dipadahka TUHAN ngena Elijah. Ahasiah nadai anak lelaki, nya alai menyadi lelaki iya ke benama Jehoram nganti iya nyadi raja, dalam taun ti kedua Jehoram anak Jehosapat udah berengkah nyadi raja menua Judah. Semua utai bukai ti udah dikereja Ahasiah bisi dituliska magang dalam Jerita Lama Pasal Raja Menua Israel. Maya pen nyau datai alai TUHAN deka ngambi Elijah niki ke serega ngena ribut pulas uchung. Elijah seduai Elisa mupuk ari Gilgal, lalu di rantau jalai, Elijah bejaku enggau Elisa, “Nuan tinggal ditu. TUHAN udah ngasuh aku mansang ngagai Betel.” Tang ku Elisa nyaut, “Aku besumpah atas nama TUHAN ti idup, enggau penaluk aku ke nuan, aku enggai ninggalka nuan.” Nya alai seduai iya lalu majakka pejalai ngagai Betel. Seraban bala nabi ti diau di nengeri nya mansang ngagai Elisa, lalu nanya iya, “Kati nuan nemu TUHAN deka ngambi tuan nuan sehari tu?” “Nemu,” ku Elisa nyaut, “tang kitai enda ibuh berandauka nya diatu.” Udah nya Elijah lalu bejaku enggau Elisa, “Nuan tinggal ditu. TUHAN udah ngasuh aku mansang ngagai Jeriko.” Tang ku Elisa nyaut, “Aku besumpah nama TUHAN ti idup, enggau penaluk aku ke nuan, aku enggai ninggalka nuan.” Nya alai seduai iya lalu majakka pejalai ngagai Jeriko. Seraban bala nabi ti diau di nengeri nya mansang ngagai Elisa, lalu nanya iya, “Kati nuan nemu TUHAN deka ngambi tuan nuan sehari tu?” “Nemu,” ku Elisa nyaut. “Tang kitai enda ibuh berandauka nya.” Udah nya Elijah lalu bejaku enggau Elisa, “Nuan tinggal ditu. TUHAN udah ngasuh aku mansang ngagai Sungai Jordan.” Tang ku Elisa nyaut, “Aku besumpah atas nama TUHAN ti idup, enggau penaluk aku ke nuan, aku enggai ninggalka nuan.” Nya alai seduai iya majak bejalai, dititihka lima puluh iku nabi, ngagai Sungai Jordan. Elijah seduai Elisa lalu ngetu ba tebing sungai nya, lalu bala nabi nya bediri enda jauh ari seduai iya. Elijah lalu muka kelambi iya, ngulungka kelambi nya lalu maluka kelambi nya ngagai ai Sungai Jordan. Ai nya lalu bebagi dua, lalu seduai iya meraka ke seberai nengah tanah ti rangkai. Dia Elijah lalu bejaku enggau Elisa, “Padahka ngagai aku utai ti diasuh nuan kereja aku ke nuan, sebedau aku dibai ari tu.” “Beri ngagai aku dua kali lipat kuasa nuan ngambika aku ulih nganti nuan,” ku Elisa nyaut. “Utai ti dipinta nuan nya mar diberi aku,” ku Elijah nyaut. “Tang nuan deka nerima utai nya, enti nuan meda aku diambi ari nuan. Enti nuan nadai meda aku, nuan enda nerima utai nya.” Lebuh seduai iya benung bejalai, seduai iya majak berandau. Tekala nya kerita api ti ditarit kuda api datai, ensaraka seduai iya, lalu Elijah ditabanka idup-idup ke serega ulih ribut pulas uchung. Elisa meda utai nya nyadi, lalu ngangauka Elijah, “Apai! Apai! Penyaga orang Israel ti bekuasa! Nadai meh nuan agi enggau aku!” Lalu iya nadai agi meda Elijah. Elisa tusah amat ati, lalu nyarikka kelambi iya belah dua. Iya ngambi kelambi Elijah ti udah labuh ari tubuh Elijah. Elisa pulai, lalu bediri ba tebing Sungai Jordan. Iya malu ai sungai nya ngena kelambi Elijah, lalu ku iya bejaku, “Dini alai TUHAN Allah Taala Elijah?” Udah nya iya lalu malu ai nya baru. Ai nya lalu bebagi dua, lalu iya bejalai ke seberai meraka sungai nya. Lebuh bala nabi ke lima puluh iku ari nengeri Jeriko meda nya, sida lalu bejaku, “Kuasa Elijah udah diberi ngagai Elisa!” Sida lalu mansang ngagai Elisa, meremi di mua iya, lalu bejaku, “Kami tu lima puluh iku, lalu semua kami tu kering magang. Aram kitai mupuk ngiga tuan nuan. Nyangka ukur Roh TUHAN udah nabanka iya ngagai bukit, tauka ngagai lebak.” “Anang,” ku Elisa nyaut. Tang sida majak ngumbuk iya, datai ke nyau nurutka jaku sida, lalu ngelakka sida mupuk begigaka Elijah tiga hari, tang sida nadai tetemuka iya. Udah nya sida pulai baru ngagai Elisa ti udah nganti sida di Jeriko, lalu ku iya bejaku enggau sida, “Nya kebuah aku nagang kita.” Sekeda orang ari Jeriko mansang ngagai Elisa, lalu bejaku, “Tuan, nuan nemu, nengeri tu nengeri ti manah, tang ai ditu enda manah, lalu ngasuh indu gugur anak.” “Engkah garam mimit dalam mangkuk ti baru, lalu bai utai nya ngagai aku,” ku iya madahka ngagai sida. Sida lalu mai utai nya ngagai iya. Iya mansang lalu naburka garam nya ngagai mata ai nya, lalu bejaku, “Tu utai ti disebut TUHAN: ‘Aku nuchi ai tu, lalu iya enda agi ngasuh orang mati tauka gugur anak.’ ” Kenyau ari nya, ai nya nyadi tuchi, munyi ti udah disebut Elisa. Elisa angkat ari Jeriko, lalu mansang ngagai Betel. Di rantau jalai, sekeda bala nembiak pansut ari sebuah nengeri, lalu beduan iya. “Angkat ari tu, pala lasu!” ku sida ngangauka iya. Elisa nguing, melutka mata ngagai sida, lalu nyumpah sida dalam nama TUHAN. Dua iku indu beruang lalu pansut ari babas, lalu nyarikka tubuh empat puluh dua iku nembiak nya. Elisa lalu majakka pejalai iya ngagai Bukit Karmel, lalu udah nya pulai ngagai Samaria. Dalam taun ti kelapan belas Raja Jehosapat merintah menua Judah, Joram anak Ahap berengkah nyadi raja menua Israel, lalu iya merintah di Samaria dua belas taun. Iya bedosa ngelaban TUHAN, tang iya kurang agi jai ari apai iya, tauka indai iya Jesebel, laban iya muai tiang Baal ti udah digaga apai iya. Tang taja pia, baka Raja Jeroboam anak Nebat ke dulu ari iya, iya enggai badu nguluka orang Israel bedosa. Raja Mesa menua Moap bisi nupi jelu bedus, lalu tiap taun iya meri seratus ribu iku anak domba, enggau bulu bedus, kena iya mayar chukai ngagai raja menua Israel. Tang lebuh Raja Ahap menua Israel mati, Mesa angkat ngelaban Israel. Raja Joram lalu tekala nya angkat ari Samaria, lalu ngempuruka semua soldadu iya. Iya ngirumka pesan ngagai Raja Jehosapat menua Judah, munyi tu: “Raja menua Moap udah angkat ngelaban aku. Kati nuan deka enggau aku beperang ngelaban iya?” “Ka,” ku Raja Jehosapat nyaut. “Aku, bala aku enggau kuda aku deka mansang enggau nuan. Ni jalai ti deka ditengah kitai mansang nyerang iya?” “Kitai deka bejalai nengah jalai ti melit, nengah menua puang Edom,” ku Joram nyaut. Nya alai raja menua Israel, raja menua Judah enggau raja menua Edom lalu mupuk. Lebuh sida udah bejalai tujuh hari, sida suntuk ai. Sida nadai agi ai ke bala sida empu enggau ke jelu ti mai keresa sida. “Mati kitai tu!” ku Raja Joram bejaku enggau nyawa ti inggar. “ TUHAN udah nyerahka kitai tiga ngagai raja menua Moap!” Raja Jehosapat lalu nanya, “Kati bisi nabi ti tau diasuh kitai betanya ngagai TUHAN ditu?” Siku pemesai ari bala soldadu Raja Joram lalu nyaut, “Elisa anak Sapat bisi ditu. Iya udah bekereja nyadi penulung Elijah.” “Iya endang amat nabi,” ku Raja Jehosapat bejaku. Nya alai raja tiga iku nya lalu mansang ngagai Elisa. “Nama kebuah aku enda tau enda nyaup nuan?” ku Elisa bejaku enggau raja menua Israel. “Alai nuan betanya ngagai bala nabi ti udah alai apai enggau indai nuan betanya menya.” “Ukai baka nya!” ku Joram nyaut. “ TUHAN udah nyerahka kami tiga ngagai Raja menua Moap.” Elisa lalu nyaut, “Dalam nama TUHAN ti idup, ke dipetuaika aku, aku besumpah enggai nyaup nuan, enti enda ketegal aku bebasaka Raja Jehosapat menua Judah ke setanah enggau nuan. Ambi diatu siku orang ke nemu nebah musik.” Lebuh orang nya benung nebah belikan iya, kuasa TUHAN lalu datai ba Elisa, lalu ku iya bejaku, “Tu utai ti disebut TUHAN: ‘Keruang parit di serata buntut sungai ti rangkai tu. Taja pen kita nadai meda ujan tauka ribut, buntut sungai tu deka penuh laban ai, lalu kita, enggau jelu tupi kita, enggau jelu ti dikena kita mai keresa kita, deka mayuh ai irup.’ ” Lalu ku Elisa nampung jaku iya, “Utai tu mudah dikereja TUHAN, lalu Iya deka mega ngasuh kita menang ngelaban orang Moap. Kita deka ngalahka semua nengeri sida ke manah, ti bekuta. Kita deka nebang semua kayu buah sida, nutup semua mata ai sida, lalu ngelamun semua tanah umai sida ke ami ngena batu, kena ngerusak tanah umai nya.” Pagi hari siti, lebuh maya ngenjuk piring, ai lalu rarat datai ari Edom, lalu ngampuhka tanah. Lebuh orang Moap ninga raja tiga iku nya udah datai deka nyerang sida, semua orang lelaki ke ulih ngena senyata, kenyau ari orang ke pemadu tuai ngagai orang ke pemadu biak, dikangauka magang, lalu diasuh nyaga garis entara menua. Lebuh sida dani pagi hari siti, sida meda mata hari manchar ngagai ai nya, lalu ngasuh ai nya mirah baka darah. Orang Moap lalu manjung, “Darah! Bala munsuh tentu udah belaban lalu bebunuhka pangan diri! Aram kitai ngerampas utai ari kem sida!” Tang lebuh orang Moap datai ba kem orang Israel, orang Israel angkat lalu nyerang sida. Orang Moap lalu nyurutka diri. Orang Israel majak begagai lalu bebunuhka sida, sereta ngerusak nengeri sida. Lebuh orang Israel mansa tanah umai ti ami, genap iku sida bela nikauka sigi batu ngagai tanah umai nya, datai ke semua tanah umai nya nyau abis dilamun batu. Orang Israel mega ngalitka semua mata ai, lalu nebang kayu buah. Ba pengujung iya, semina indu nengeri Kir-heseret aja agi tinggal. Orang ke landik nimbakka batu ngena pangwang ngelulung lalu nyerang nengeri nya. Lebuh raja menua Moap nemu diri alah, iya lalu mai tujuh ratus iku soldadu ti landik belaban ngena pedang, nguji ngerarika diri ngerenchah bala soldadu orang Edom, tang iya enda ulih. Iya lalu mai anak tuai iya ke dipaduka nganti iya nyadi raja, lalu nyerahka iya ba atas dinding kuta nengeri nya, nyadika piring ngagai petara orang Moap. Orang Israel balat amat takut, lalu nyurutka diri ari nengeri nya, lalu pulai ngagai menua sida empu. Nyadi sekali balu niang siku nabi datai ngagai Elisa, lalu bejaku, “Tuan, laki aku udah mati! Nuan nemu, iya endang orang ke nangika Allah Taala, tang diatu siku orang ke udah alai iya berutang, bisi datai deka ngambi dua iku anak lelaki aku nyadi ulun iya, kena mayar utang laki aku.” “Baka ni ku aku nulung nuan?” ku Elisa nanya. “Padahka ngagai aku utai ti dikemisi nuan di rumah.” “Nadai utai, kelimpah ari sekebuk mit minyak kana,” ku indu nya nyaut. Ku Elisa bejaku ngagai indu nya, “Alai nuan mansang ngagai orang ke berimbai pendiau enggau nuan, lalu injau sepemayuh benda ti ulih diinjau nuan ari iya. Udah nya, nuan enggau anak lelaki nuan pulai ke rumah, nutup pintu, lalu belabuh nuang minyak nya ngagai semua benda nya. Kebuk ti udah penuh, engkah ke tisi.” Indu nya lalu pulai ke rumah, sama enggau anak lelaki iya ke dua iku nya, nikupka pintu, ngambi kebuk minyak kana nya, lalu nuang minyak nya ngagai benda ti dibai anak lelaki iya ngagai iya. Lebuh sida udah ngisi semua benda nya, indu nya lalu nanya enti agi bisi benda. “Nya meh pengabis iya,” ku anak iya nyaut. Minyak kana nya lalu badu agi lilih ari kebuk nya. Indu balu nya lalu mansang baru ngagai nabi Elisa. Lalu ku Elisa bejaku enggau iya, “Jual minyak kana nya, lalu bayar semua utang nuan. Laluh duit nya chukup kena kita menyanak beridup.” Nyadi sekali Elisa mansang ngagai Sunem, alai siku indu ke kaya diau. Indu nya mai iya makai. Berengkah ari nya, genap kali Elisa datai di Sunem, iya makai ba rumah indu nya. Ku indu nya bejaku enggau laki iya, “Aku nemu, orang ke selalu datai kitu nya nabi. Manah kitai ngaga siti bilik di perabung, engkahka siti katil, siti kerusi enggau siti lampu dia, ngambika iya tau diau dia genap kali iya nemuai ngagai kitai.” Nyadi sekali, lebuh Elisa pulai ngagai Sunem, lalu mansang ngagai bilik iya, deka belelak, iya ngasuh orang gaji iya ke benama Gehasi mesanka indu nya. Lebuh indu nya datai, Elisa lalu bejaku enggau Gehasi, “Tanyaka ngagai iya utai ti tau dikereja aku ke iya, kena malas pengiruh iya ti udah nyendiaka semua utai ke tua. Kada enda iya deka ngasuh aku betemu enggau raja, tauka betemu enggau tuai soldadu, ngambika aku bejaku ngarika ngagai sida.” “Aku diau begulai enggau bala aku empu, lalu aku nadai suntuk utai diguna,” ku indu nya nyaut. Elisa lalu nanya Gehasi, “Enti pia, nama utai ti patut dikereja aku ke iya?” Disaut Gehasi, “Iya nadai anak lelaki, lalu laki iya nyau tuai.” “Kangauka iya kitu,” ku Elisa bejaku. Indu nya lalu datai, lalu bediri ba mua pintu. Lalu ku Elisa bejaku enggau iya, “Ba urung maya tu taun baru tu ila, nuan deka ngerendut siku anak lelaki.” Ku indu nya bejaku, “Anang ngemulaka aku, tuan. Nuan nabi!” Tang, munyi ti udah dipadahka Elisa, ba urung maya nya taun siti, indu nya lalu ngadaka anak lelaki siku. Nyau berapa taun udah bekau nya, lebuh maya ngetau, nembiak nya mansang ngagai apai iya lebuh pagi hari. Nyadi apai iya agi di umai enggau bala orang ke ngetau. Nembiak nya lalu ngangauka apai iya, “Pedis pala aku, apai! Pala aku pedis!” Apai iya lalu bejaku enggau siku orang gaji, “Bai nembiak nya ngagai indai iya.” Orang gaji nya lalu mai nembiak nya pulai ngagai indai iya. Indai iya lalu mangku iya nyentuk ngagai tengah hari. Nembiak nya lalu mati. Indai iya mai iya ngagai bilik Elisa, ngengkahka iya ba katil, lalu nikupka pintu ari. Udah nya iya lalu ngangauka laki iya, ku iya, “Asuh siku orang gaji mai siku keledai kitu. Aku enda tau enda betemu enggau nabi Elisa, lalu pulai kitu baru enggau naka pengelengkas.” “Nama kebuah nuan enda tau enda kin sehari tu?” ku laki iya nanya. “Hari tu ukai Hari Sabat, ukai hari Gawai Anak Bulan.” “Nadai ngawa,” ku indu nya nyaut. Udah nya indu nya lalu nyendiaka keledai, lalu bejaku enggau orang gaji nya, “Asuh keledai nya bejalai enggau naka pengelaju, lalu anang bejalai lubah enti aku nadai ngasuh nuan lubah.” Indu nya lalu mupuk, mansang ngagai Bukit Karmel ti alai nabi Elisa diau. Elisa meda indu nya datai lebuh iya agi jauh, lalu ku iya bejaku enggau orang gaji iya Gehasi, “Peda nuan, nyin indu ari Sunem datai! Alai nuan belanda ngagai iya, lalu tanyaka berita pasal sida menyanak.” Indu nya lalu madahka semua utai nadai nama-nama. Tang lebuh iya datai, iya meremi di mua Elisa, lalu megai kaki Elisa. Gehasi baru deka ngejuka iya, tang ku Elisa, “Anang ngachau iya. Kati nuan enda nemu iya balat tusah ati? Lalu TUHAN nadai udah madahka pasal nya ngagai aku.” Ku indu nya bejaku enggau Elisa, “Tuan, aku nadai minta anak lelaki ari nuan, enggai ke aku semina asa ngapa.” Elisa nguing ngagai Gehasi, lalu bejaku, “Alai, jampat nuan, ambi tungkat aku, lalu mupuk. Anang ngetu meri tabi ngagai orang ke betemu enggau nuan. Lalu enti orang bisi nanya nuan, anang nyaut. Mansang terus ngagai rumah nya, lalu pegai tungkat aku ba atas nembiak nya.” Ku indu nya bejaku enggau Elisa, “Aku besumpah atas nama TUHAN ti idup, enggau atas penaluk aku ke nuan, aku enda ninggalka nuan!” Nya alai Elisa enggau indu nya lalu sama mupuk. Gehasi bejalai dulu, lalu megai tungkat Elisa ba atas nembiak nya, tang nembiak nya enda enseput, enda engkebut. Nya alai iya nikal ngagai Elisa lalu bejaku enggau iya, “Nembiak nya lalu enda ngeleda.” Lebuh Elisa datai, iya tama kediri ngagai bilik nya, lalu meda bangkai nembiak nya garing-garing ba atas katil. Iya nikupka pintu, lalu besampi ngagai TUHAN. Udah nya iya lalu ningkapka diri atas bangkai nembiak nya, ngasuh mulut, mata enggau jari iya nyatup mulut, mata, enggau jari nembiak nya. Lebuh iya tingkap ba atas nembiak nya, tubuh nembiak nya lalu belabuh berasai angat. Elisa angkat, bejalai ba sebelah bilik nya. Udah nya iya ningkapka diri baru ba atas nembiak nya. Nembiak nya lalu engkasi tujuh kali, lalu menchelakka mata. Elisa ngangauka Gehasi, lalu ngasuh iya ngangauka indai nembiak nya. Lebuh indai nembiak nya tama, Elisa lalu bejaku, “Tu anak nuan.” Indu nya lalu nyungkurka diri semak kaki Elisa. Udah nya iya ngambi anak iya, lalu angkat ari nya. Nyadi sekali, lebuh lapar pungkang nyadi di serata menua nya, Elisa pulai ngagai Gilgal. Lebuh iya benung ngajar seraban bala nabi, iya ngasuh orang gaji iya nanggarka sigi periuk ti besai, lalu manduk pemakai ke sida nabi. Siku ari sida nabi lalu mansang ke umai ngiga sayur. Iya tetemuka semacham buah labu. Iya lalu ngumpul buah labu nya naka ti ulih dibai iya. Iya mai utai nya pulai, nyirap lalu nabakka buah labu nya ke dalam periuk nya. Tang iya enda ngelala utai nya. Lauk nya lalu dituang ke bala sida. Tang lebuh sida ensepi utai nya, sida lalu ngangauka Elisa, “Utai tu bisi rachun!” Lalu sida enggai makai lauk nya. Elisa lalu minta tepung; iya lalu nabakka tepung nya ke dalam periuk nya, lalu ku iya, “Tuang nya ke sida.” Pemakai nya lalu nadai ngawa agi. Nyadi sekali, siku orang datai ari Baal-salisah, mai ngagai Elisa dua puluh iti tuku roti ti digaga ari barli ti terubah diketau taun nya, enggau tangkai gandum mimit ti baru udah diketau. Elisa lalu ngasuh orang gaji iya nyendiaka utai nya ke pemakai sida nabi. Tang ku orang gaji iya nyaut, “Utai tu enda chukup ke seratus iku orang.” Disaut Elisa, “Beri aja ngagai sida, ngambika sida makai, laban TUHAN madahka utai nya deka belaluh lebuh sida udah makai.” Orang gaji nya lalu ngenahka pemakai nya ngagai sida nabi, lalu munyi ti udah disebut TUHAN, semua sida bela makai magang, lalu pemakai nya bisi belaluh. Nyadi Naaman nya kepala soldadu orang Siria. Iya balat dibasa sereta dipuji raja menua Siria, laban TUHAN udah ngasuh bala soldadu orang Siria ke diuluka Naaman menang. Naaman nya orang ke berani, tang iya ngidapka penyakit kulit ti balat diketakutka. Nyadi sekali, lebuh sida nyerang menua Israel, bala soldadu orang Siria bisi nabanka siku indu dara orang Israel, ke lalu nyadi ulun bini Naaman. Nyadi sekali indu nya nyebut ngagai bini Naaman, “Naka meh pemanah enti sema tuan aku betemu enggau siku nabi ti diau di Samaria! Iya tentu deka ngeraika tuan ari penyakit iya.” Lebuh Naaman ninga nya, iya lalu betemu enggau raja, lalu madahka pasal utai ti udah disebut indu dara nya. Ku raja nya bejaku, “Mupuk meh nuan ngagai raja orang Israel, lalu bai surat tu ngagai iya.” Naaman lalu mupuk, mai tiga puluh ribu singkap duit pirak, enam ribu singkap duit emas, enggau sepuluh lambar gari ti manah. Baka tu ku utai ti disebut dalam surat ti dibai iya, “Nama orang ke mai surat tu nya Naaman. Iya tu pemesai aku. Aku minta nuan ngeraika iya ari penyakit iya.” Lebuh raja menua Israel macha surat nya, iya lalu nyarikka gari diri lalu bejaku, ku iya, “Kati iya ngumbai aku Allah Taala ti bekuasa atas seput enggau pemati, alai iya ngasuh aku ngeraika orang tu? Iya tu nguji mai aku belaya!” Lebuh nabi Elisa ninga pasal nya, iya lalu ngirumka pesan ngagai raja, “Nama kebuah nuan tusah ati? Asuh orang nya betemu enggau aku, ngambika iya nemu menua Israel bisi nabi!” Naaman mansang ngena kuda enggau kerita perang iya, lalu ngetu ba mua pintu Elisa. Elisa lalu ngasuh orang gaji iya ngasuh Naaman masu diri tujuh kali di Sungai Jordan, lalu iya deka gerai ari penyakit iya. Tang Naaman angkat ari nya ringat. Ku iya, “Aku ngumbai iya deka pansut lalu betemu enggau aku, besampi ngagai TUHAN Allah Taala iya, ngepaika jari iya atas endur ti kena laban penyakit, lalu ngeraika aku! Sungai Abana enggau Sungai Parpar di Damaskus lebih manah agi ari sungai di menua Israel. Nama kebuah aku enda tau masu diri dalam sungai nya, lalu gerai?” Bala orang gaji Naaman mansang ngagai iya, lalu bejaku, “Tuan, enti nabi nya ngasuh nuan ngereja utai ti mar, nuan tentu deka ngereja utai nya. Nya alai, nama kebuah nuan enda masu diri, munyi ti diasuh iya, ngambika nuan gerai?” Naaman lalu nurun ngagai Sungai Jordan, nyelam ba sungai nya tujuh kali, nitihka asuh Elisa. Iya lalu gerai. Isi iya nyau sentar sereta bepengerai, baka isi anak mit. Iya enggau semua bala iya lalu pulai ngagai Elisa, lalu ku iya bejaku enggau Elisa, “Diatu baru aku nemu, kitai nadai petara bukai tang semina Allah Taala ke disembah orang Israel siku aja. Nya alai aku minta nuan, tuan, nyambut pemeri tu ari aku.” Disaut Elisa, “Aku besumpah dalam nama TUHAN ti idup, ke dipetuaika aku, aku enggai nyambut pemeri.” Naaman majak ngasuh Elisa nyambut pemeri nya, tang Elisa enggai. Nya alai, ku Naaman bejaku, “Enti nuan enggai nyambut pemeri tu, awakka aku ga mai tanah ari tu ngagai menua aku ngena dua iku keledai aku, laban belabuh ari diatu, aku enggai agi ngenjuk piring tauka piring tunu ngagai petara bukai, tang semina ngagai TUHAN siku aja. Nya alai, aku ngarapka TUHAN deka ngampun aku, lebuh aku nyempulang raja aku ngagai rumah sembiang Rimon, petara menua Siria, lalu nyembah TUHAN dia. TUHAN tentu deka ngampun aku!” Lalu ku Elisa bejaku, “Mupuk meh nuan enggau selamat.” Naaman lalu mupuk. Lebuh iya baru apin lama udah ngejangka endur nya, orang gaji Elisa, Gehasi, lalu berunding, “Tuan aku udah nejuka Naaman mupuk nadai mayar utai! Iya patut nyambut utai ti diberi orang Siria nya. Dalam nama TUHAN ti idup, aku deka belanda nitihka orang nya, lalu ngambi utai ari iya.” Gehasi lalu nitihka Naaman. Lebuh Naaman meda siku orang belanda nitihka iya, iya lalu nurun ari kerita perang iya, deka betemu enggau orang nya. Iya lalu nanya, “Bisi utai salah?” “Nadai,” ku Gehasi nyaut. “Tang tuan aku udah ngasuh aku madahka ngagai nuan, baru apin lama tu tadi, dua iku nabi ari menua ti bebukit di menua Epraim, bisi datai. Iya minta nuan meri ngagai seduai nya tiga ribu singkap duit pirak, enggau dua lambar gari.” “Bai aja enam ribu singkap duit pirak,” ku Naaman nyaut. Iya majak ngasuh Gehasi nerima utai nya. Iya lalu nyimpan duit pirak nya dalam dua iti kambut, nanchang kambut nya, meri kambut nya enggau dua lambar gari ti manah nya ngagai dua iku ari bala orang gaji iya, lalu ngasuh seduai nya bejalai dulu ari Gehasi. Lebuh sida datai ba bukit ti alai Elisa diau, Gehasi lalu ngambi dua iti kambut nya lalu tama ngagai rumah. Udah nya iya lalu ngasuh orang gaji Naaman ke dua iku nya pulai. Iya lalu tama baru. Elisa lalu nanya iya, “Kini ke nuan tadi?” “Nadai aku mindah tadi, tuan,” ku iya nyaut. Tang ku Elisa, “Kati aku nadai dia dalam roh, lebuh orang nya nurun ari kerita perang iya lalu betemu enggau nuan? Tu ukai maya nyambut duit tauka gari, kebun buah kana, tauka kebun anggur, jelu bedus tauka jelu sapi, tauka orang gaji! Diatu penyakit Naaman nya deka lekat ba nuan, lalu nuan enggau peturun nuan deka diempa penyakit nya belama iya!” Lebuh Gehasi mupuk, penyakit nya endang udah lekat ba iya. Kulit iya burak baka seleju. Nyadi sekali bala nabi ke diajar Elisa, mutap ngagai iya, “Endur alai kami diau tu kelalu sekut. Kami minta nuan ngemendarka kami mupuk ngagai Sungai Jordan lalu beramu, ngambika kami ulih ngaga endur alai kami diau.” “Mupuk meh kita,” ku Elisa nyaut. Siku ari bala sida lalu minta Elisa bejalai enggau sida. Elisa besetuju, lalu sida sama mupuk. Lebuh sida datai ba Sungai Jordan, sida lalu belabuh gawa. Lebuh siku ari bala sida benung nebang kayu, mata kapak iya ngelechut lalu labuh ke dalam ai. “Kati ku aku enggau nya, tuan?” ku iya ngangau ngagai Elisa. “Kapak nya ulih aku nginjau ari orang!” “Ba ni alai mata kapak nya labuh?” ku Elisa nanya. Orang nya lalu nunjukka endur nya ngagai iya. Elisa lalu netak kayu siti, lalu nikauka kayu nya ngagai ai nya. Mata kapak nya lalu melepung. “Ambi mata kapak nya,” ku Elisa bejaku ngagai orang nya. Orang nya nyapai, lalu ngambi mata kapak nya. Lebuh raja menua Siria benung beperang ngelaban menua Israel, iya betanya ngagai bala pemesai iya, lalu milih siti endur alai iya deka nirika kem. Tang Elisa ngirumka pesan ngagai raja menua Israel, meri jaku tangkan ngagai iya, enda nyagi iya mansang semak ngagai endur nya, laban bala soldadu orang Siria udah ngeramka ipa ba endur nya. Raja menua Israel lalu meri jaku tangkan ngagai orang ke diau ba endur nya. Bala orang nya lalu bejaga. Utai tu nyadi dua tiga kali. Raja menua Siria tusah amat ati laban nya. Iya lalu ngangauka bala pemesai iya, lalu nanya sida, “Sapa ari bala kita setanah enggau raja menua Israel?” Siku ari bala sida lalu nyaut, “Nadai, Tuan Raja. Nabi Elisa ke madahka ngagai raja menua Israel pasal utai ti disebut nuan dalam bilik nuan empu.” “Giga dini alai iya,” ku raja nya bejaku enggau sida, “ngambika aku nangkap iya.” Lebuh orang madahka Elisa bisi di Dotan, raja menua Siria nya lalu ngasuh bala soldadu mansang ngagai nengeri nya ngena kuda enggau kerita perang. Sida datai dia lebuh malam hari, lalu ngelulung nengeri nya. Tumu pagi hari siti, orang gaji Elisa dani, pansut ari rumah, lalu tepedaka bala soldadu orang Siria nepan kuda enggau kerita perang ngelulung nengeri nya. Iya lalu pulai ke rumah ngagai Elisa, lalu ku iya bejaku enggau Elisa, “Nadai penyadi kitai tu, tuan! Nama utai ti patut dikereja kitai?” “Anang takut,” ku Elisa nyaut. “Bala kitai mayuh agi ari bala sida.” Udah nya iya lalu besampi, “O TUHAN, buka mata iya, lalu asuh iya meda!” TUHAN lalu nyaut sampi iya. Orang gaji Elisa engkadah, lalu meda tisi bukit nya nyau penuh laban kuda enggau kerita perang ti beapi-api, ngelingi Elisa. Lebuh bala soldadu orang Siria nyerang, Elisa lalu besampi, “O TUHAN, asuh bala orang nya buta!” TUHAN lalu nyaut sampi iya, lalu ngasuh bala soldadu orang Siria buta. Udah nya Elisa lalu mansang ngagai sida, lalu ku iya bejaku enggau sida, “Salah jalai kita tu. Tu ukai nengeri ti digagai kita. Titihka aku. Awakka aku nguluka kita ngagai orang ke digiga kita.” Iya lalu nguluka sida ngagai nengeri Samaria. Lebuh bala soldadu orang Siria udah tama ngagai nengeri Samaria, Elisa lalu besampi, “Buka mata sida, TUHAN, lalu awakka sida ulih meda.” TUHAN lalu nyaut sampi iya, lalu ngasuh sida ulih meda baru. Nya baru sida nemu diri di nengeri Samaria. Lebuh raja menua Israel meda bala soldadu orang Siria, iya lalu nanya Elisa, “Kati tau aku munuh sida, tuan? Tau aku munuh sida?” “Anang,” ku Elisa nyaut. “Soldadu ti udah ditangkap nuan lebuh kita betempuh pen enda meh tau dibunuh nuan. Beri sida makai ngirup, lalu asuh sida pulai ngagai raja sida empu.” Raja menua Israel lalu nyendiaka pengerami makai besai ke sida. Lebuh sida udah makai, lalu udah mabuk, iya ngasuh sida pulai ngagai raja menua Siria. Kenyau ari nya, bala soldadu orang Siria badu agi nyerang menua Israel. Nyau kelama udah bekau nya, Raja Benhadat menua Siria nguluka bala iya ngelaban menua Israel, lalu ngelulung nengeri Samaria. Nengeri nya lalu balat amat suntuk pemakai, datai ke pala keledai sigi nyau dijual ngena rega lapan puluh singkap duit pirak, lalu rega sesuku kilogram tai burung achang nyau bulih lima singkap duit pirak. Lebuh raja menua Israel benung bejalai ba puchuk dinding kuta nengeri nya, siku indu lalu ngangau, “Tulung aku, Tuan Raja!” Raja lalu nyaut, “Enti TUHAN enggai nyaup nuan, baka ni ku aku ulih nyaup nuan? Aku nadai gandum, nadai wain. Nama penusah nuan?” Indu nya lalu nyaut, “Suba indu tu mai aku makai anak aku, lalu hari siti makai anak iya. Kami duai lalu manduk anak aku, lalu makai iya. Hari siti, aku mai iya makai anak iya, tang iya udah ngelalaika anak iya nya!” Lebuh raja ninga nya, iya lalu nyarikka gari diri, lalu orang ke diau semak kuta nya meda iya ngena kain guni, dibap gari iya empu. Ku raja nya bejaku, “Awakka Allah Taala munuh aku enti Elisa enda dipumpung pala sebedau malam tu!” Iya lalu ngasuh siku seruan ngambi Elisa. Ba urung maya nya Elisa bisi di rumah, sama enggau bala tuai ke datai nemuai ngagai iya. Sebedau seruan raja nya datai, Elisa endang udah bejaku enggau bala tuai nya, ku iya, “Pemunuh nya ngasuh siku orang datai munuh aku! Lebuh iya datai ditu lagi, tutup pintu, lalu anang nyagi iya tama. Raja empu deka datai ari belakang iya.” Lebuh Elisa agi benung nyebut jaku nya, raja pen datai, lalu bejaku, “ TUHAN Empu ti udah ngasuh penusah tu ninggang kitai! Nya alai nama kebuah aku nganti Iya nulung kitai.” Tang ku Elisa nyaut, “Pendingka utai ti disebut TUHAN! Ba urung maya tu pagila, kita di Samaria ulih meli empat kilogram setengah gandum ti pemadu alus tauka semilan kilogram barli, ngena sesingkap pirak aja.” Ku pemesai ke ngiring raja nya bejaku enggau Elisa, “Nadai utai baka nya ulih nyadi. Enti sema TUHAN Empu meri gandum nya diatu, enda meh utai nya ulih nyadi!” Disaut Elisa, “Nuan empu deka meda utai nya nyadi, tang nuan enda makai pemakai nya.” Nyadi di luar pintu nengeri Samaria bisi empat iku orang ke ngidapka penyakit kulit ti tau ngerampit. Ku sida empat nya bejaku enggau pangan diri, “Nama kebuah kitai diau ditu nganti diri mati? Nadai guna kitai tama ngagai nengeri, laban din kitai deka mati keberuran. Tang enti kitai diau ditu, kita deka mega mati. Aram kitai bejalai ngagai kem orang Siria. Pengabis jai utai ti deka dikereja sida ngagai kitai nya munuh kitai. Tang nyangka ukur sida enggai munuh kitai.” Nya alai, lebuh hari nyau deka malam, sida empat lalu mansang ngagai kem orang Siria. Tang lebuh sida datai ba kem nya, sida nadai nemu orang dia, laban TUHAN udah ngasuh bala orang Siria ninga munyi auh bala soldadu ti ngena kuda enggau kerita perang datai, lalu sida ngumbai raja menua Israel udah ngaji raja orang Iti enggau orang Ejip, enggau bala soldadu sida, nyerang sida. Nya alai lemai nya bala soldadu orang Siria rari, ninggalka langkau kain, kuda, enggau keledai sida. Lebuh orang empat iku nya datai ba tisi kem nya, sida lalu tama ngagai langkau kain siti, makai sereta ngirup utai dia, ngambi pirak, emas, enggau gari ti ditemu sida, angkat ari endur nya lalu ngelalaika utai nya. Udah nya sida pulai kia baru, tama ngagai sebuah langkau kain ti bukai, lalu ngereja baka nya baru. Tang udah nya sida lalu bejaku, “Kitai enda patut ngereja tu! Kitai bisi berita ti manah, lalu kitai patut madahka berita tu ngagai orang bukai. Enti kitai nganti ngagai pagila baru madahka berita tu, kitai tetap deka kena ukum. Aram kitai madahka ngagai bala pemesai raja!” Sida lalu ninggalka kem orang Siria nya, pulai ngagai nengeri Samaria, lalu ngangauka jejaga ke ba pintu nengeri nya, “Kami udah ngagai kem orang Siria, tang kami nadai meda tauka ninga orang dia. Kuda enggau keledai sida agi mengkang ditanchang, lalu langkau kain ditinggalka sida pia aja.” Bala jejaga lalu madahka berita nya, lalu berita nya dipadahka ngagai istana. Lebuh maya nya, hari endang agi malam, tang raja angkat ari peninduk iya, lalu bejaku enggau bala pemesai iya, “Dinga kita! Tu endang pelan orang Siria! Sida nemu kitai keberuran, nya alai sida diatu udah ninggalka kem sida, lalu belalai di menua pesisir. Sida ngumbai kitai deka pansut ari nengeri tu begigaka pemakai. Udah nya baru sida nangkap kitai idup-idup, lalu ngalahka nengeri tu.” Siku ari bala pemesai iya lalu bejaku, “Orang di nengeri tu endang nadai penyadi agi, baka sida ke udah mati nya. Nya alai manah kitai ngasuh sekeda orang mupuk ngena lima iku kuda ti agi ba jari kitai, ngambika sida mansik pekara nya.” Sida lalu milih orang, lalu raja ngasuh sida mupuk ngena dua buah kerita perang ngambika sida mansik utai ti udah nyadi ba bala soldadu orang Siria. Sida bejalai nyentuk ngagai Sungai Jordan. Di rantau jalai sida tepedaka gari enggau pekekas ti becherayan ditinggalka orang Siria lebuh sida rari. Udah nya sida pulai, lalu madahka ngagai raja. Orang Samaria lalu beterudus pansut ari nengeri, lalu ngambi perapasan ari kem orang Siria. Lalu munyi ti udah disebut TUHAN, empat kilogram setengah gandum ti pemadu alus, tauka semilan kilogram barli dijual ngena rega sesingkap duit pirak aja. Nyadi raja orang Israel udah ngasuh pengiring iya empu nyaga pintu nengeri nya. Pemesai nya mati ba mua pintu nengeri nya, kena indik bala mayuh, munyi ti udah dipadahka Elisa lebuh raja datai betemu enggau iya. Nyadi Elisa udah madahka ngagai raja, ba urung maya nya, empat kilogram setengah gandum ti pemadu alus, tauka semilan kilogram barli, deka dijual di Samaria ngena rega sesingkap duit pirak, lalu pemesai nya udah nyaut, “Utai nya enda ulih nyadi. Enti sema TUHAN Empu meri gandum nya diatu, enda meh utai nya ulih nyadi!” Lalu Elisa udah nyaut, “Nuan empu deka meda utai nya nyadi, tang nuan enda makai pemakai nya.” Nya alai nya meh utai ti nyadi ba pemesai nya. Iya mati kena indik bala mayuh ba mua pintu nengeri nya. Nyadi Elisa udah bejaku enggau indu ke diau di Sunem, indu ke bempu anak ti udah diangkatka Elisa ari mati, madahka TUHAN deka ngasuh lapar pungkang nyadi di menua nya dalam pengelama tujuh taun. Iya udah ngasuh indu nya enggau sida sebilik angkat ari nengeri nya, lalu diau di menua bukai. Indu nya udah ngereja utai ti diasuh Elisa, lalu iya enggau sida sebilik udah angkat ari nengeri nya lalu diau tujuh taun di menua Pilistin. Ba ujung taun ti ketujuh, indu nya pulai baru ngagai menua Israel, lalu betemu enggau raja, minta rumah enggau tanah iya dipulaika ngagai iya. Iya datai lebuh raja benung berandau enggau Gehasi, iya nya orang gaji Elisa, laban raja keran deka nemu pasal kereja ajih ti dikereja Elisa. Lebuh Gehasi agi benung madahka chara Elisa ngangkatka orang ari mati, indu nya lalu mantaika peminta iya ngagai raja. Gehasi lalu bejaku enggau raja, “Tuan Raja, tu meh indu ke ku aku, lalu tu meh anak lelaki iya ke diangkatka Elisa idup baru ari mati!” Raja nanya, lalu indu nya madahka pengamat utai ti dipadahka Gehasi. Raja lalu mesanka siku pemesai, lalu ngasuh iya mulaika semua reta tengkira indu nya, nyengkaum rega semua asil ari tanah indu nya dalam tujuh taun iya nadai di menua. Nyadi Elisa bisi nemuai ngagai nengeri Damaskus lebuh Raja Benhadat sakit. Lebuh orang madahka ngagai Raja Benhadat pasal Elisa ke bisi dia, iya lalu bejaku enggau Hasael, siku ari bala pemesai iya, “Bai pemeri ngagai nabi nya, lalu asuh iya betanya ngagai TUHAN, enti aku ulih gerai tauka enda.” Hasael lalu ngundan utai ti pemadu manah ti digaga di nengeri Damaskus ba empat puluh iku jelu unta, lalu mansang ngagai Elisa. Lebuh Hasael betemu enggau Elisa, Hasael lalu bejaku, “Nembiak nuan, Raja Benhadat, udah ngasuh aku nanya ngagai nuan, enti iya ulih gerai tauka enda.” Disaut Elisa, “ TUHAN udah madahka ngagai aku, iya deka mati. Tang mansang nuan ngagai iya lalu padahka iya deka gerai.” Udah nya mua Elisa berupai balat amat takut lebuh iya merening ngagai Hasael, datai ke Hasael nyau enda nyamai asai. Elisa lalu tekala nya meliar ai mata. “Nama kebuah nuan nyabak, tuan?” ku Hasael nanya. Elisa lalu nyaut, “Laban aku nemu kita deka ngereja utai ti jai ngagai orang Israel. Kita deka nunu kuta sida, munuh bala orang bujang ti kering, malu anak sida datai ke sida mati, lalu meruti perut indu ke ngandung.” Hasael lalu nyaut, “Nadai aku ulih nyadi orang ke bekuasa baka nya. Aku ukai orang ke tinggi pangkat!” Disaut Elisa, “ TUHAN udah madahka ngagai aku, nuan deka nyadi raja menua Siria.” Hasael lalu pulai ngagai Benhadat. Benhadat lalu nanya iya, “Nama utai ti dipadahka Elisa?” “Iya madahka nuan tetap deka gerai,” ku Hasael nyaut. Tang hari siti Hasael ngambi pua, nyepuhka pua nya ngagai ai, lalu mampul mua raja ngena pua nya, datai ke mati. Hasael lalu nganti Benhadat nyadi raja menua Siria. Dalam taun ti kelima Joram anak Ahap nyadi raja menua Israel, Jehoram anak Jehosapat berengkah nyadi raja menua Judah lebuh umur iya tiga puluh dua taun, lalu iya merintah di Jerusalem lapan taun. Bini iya anak Raja Ahap, lalu baka sida Ahap sebilik, iya nitihka penyai ti udah dikereja sida raja orang Israel. Iya bedosa ngelaban TUHAN, tang TUHAN enggai ngerusak menua Judah, laban Iya udah besemaya enggau nembiak Iya David, madahka peturun iya deka seruran megai perintah. Lebuh Jehoram nyadi raja, Edom angkat ngelaban menua Judah, lalu merintah diri. Nya alai Joram mai semua kerita perang iya ngagai Sair. Dia bala soldadu Edom lalu ngelulung bala iya. Malam nya, iya enggau bala orang ke nepan kerita perang mujur mansutka diri ari kelulung munsuh, lalu rari. Bala soldadu iya pambar, lalu pulai ngagai rumah diri empu. Kenyau ari nya menua Edom nadai agi diperintah menua Judah. Lebuh maya nya, nengeri Libnah mega angkat ngelaban perintah. Semua utai bukai ti udah dikereja Joram bisi dituliska magang dalam Jerita Lama Pasal Raja Menua Judah. Joram mati, lalu dikuburka ba lumbung bala raja di Nengeri David, lalu anak iya Ahasiah nganti iya nyadi raja. Dalam taun ti kedua belas Joram anak Ahap nyadi raja menua Israel, Ahasiah anak Jehoram berengkah nyadi raja menua Judah lebuh umur iya dua puluh dua taun, lalu iya merintah di Jerusalem setaun. Indai iya Ataliah anak Raja Ahap, uchu Raja Omri menua Israel. Nyadi laban Ahasiah nya kaban belayan Raja Ahap ari tampil, iya mega bedosa ngelaban TUHAN, baka sida Ahap sebilik. Raja Ahasiah lalu beserakup enggau Raja Joram menua Israel beperang ngelaban Raja Hasael menua Siria. Sida lalu betempuh di Ramot, di menua Giliat, lalu Joram bakal lebuh perang nya. Iya pulai ngagai nengeri Jesril, nganti bakal iya gerai, lalu Ahasiah datai ngabas iya. Nyadi sekali nabi Elisa mesanka siku ari bala nabi ti agi biak, lalu bejaku enggau iya, “Besikap nuan, lalu mupuk ngagai Ramot-giliat. Bai kebuk minyak kana tu, lalu lebuh nuan datai din, giga Jehu anak Jehosapat, uchu Nimsi. Bai iya kediri ngagai bilik siti, tuang minyak kana tu ba pala iya, lalu sebut, ‘ TUHAN madahka Diri nata nuan nyadi raja menua Israel.’ Udah nya, angkat nuan ari endur nya enggau naka penyampat.” Nabi ke biak nya lalu mupuk ngagai Ramot, alai iya ke tetemuka bala pemesai soldadu benung baum. Ku iya, “Tuan, aku bisi pesan ke nuan.” Jehu lalu nanya, “Nuan deka bejaku enggau sapa?” “Enggau nuan, tuan,” ku nabi nya nyaut. Seduai iya lalu tama ngagai bilik siti. Nabi ke biak nya lalu nuang minyak kana ba pala Jehu, lalu ku iya, “ TUHAN Allah Taala ke disembah orang Israel nyebut tu ngagai nuan, ‘Aku nata nuan nyadi raja nembiak Aku Israel. Nuan enda tau enda munuh raja nuan, iya nya anak Ahap, ngambika Aku ulih ngukum Jesebel laban iya udah munuh bala nabi Aku, enggau bala nembiak Aku ti bukai. Semua sida Ahap sebilik, enggau semua peturun iya enda tau enda dibunuh magang. Aku deka muai semua lelaki ke tuai enggau ke biak ari ruang bilik Ahap. Aku deka ngereja ruang bilik iya, baka Aku ti udah ngereja ruang bilik Raja Jeroboam menua Israel, enggau Raja Baasa menua Israel. Jesebel enda dikuburka. Bangkai iya deka diempa ukui di menua Jesril.’ ” Lebuh nabi ti biak nya udah nyebut nya, iya angkat ari bilik nya, lalu rari. Jehu lalu pulai ngagai bala pemesai soldadu ti bukai. Sida lalu nanya iya, “Semua utai nadai nama-nama? Nama utai ti dipinta orang ke gila nya tadi ari nuan?” “Kita nemu gaya orang ke baka nya, kutap-kutap ngapa,” ku Jehu nyaut. “Nadai kami nemu!” ku sida nyaut. “Padahka ngagai kami utai ti disebut iya!” “Iya madahka ngagai aku, TUHAN nyebut: ‘Aku nata nuan nyadi raja menua Israel.’ ” Bala pemesai ti bukai nya lalu tekala nya nganchau kelambi sida ba pala tangga alai Jehu ke bediri. Sida lalu nyepu terumpit, lalu manjung, “Jehu meh raja!” Udah nya iya lalu nepan kerita perang iya, lalu mansang ngagai Jesril. Nyadi bakal Joram apin suman, lalu Raja Ahasiah bisi dia ngabas iya. Siku jejaga ke nyaga ba menara lalu tepedaka Jehu enggau bala iya datai. “Bisi orang datai nepan kuda mansang kitu!” ku iya ngangau. Disaut Joram, “Asuh siku orang nepan kuda mansang lalu nanya enti orang nya pangan tauka munsuh.” Seruan nya lalu nepan kuda iya lalu mansang ngagai Jehu. Ku iya, “Raja keran deka nemu enti nuan tu pangan tauka ukai.” “Nya ukai pekara nuan!” ku Jehu nyaut. “Titihka aku.” Jejaga ke nyaga ba menara nya lalu madahka seruan nya udah datai ba tekang bala orang nya, tang enda pulai. Siku agi seruan lalu diasuh mansang. Iya mega nanya Jehu munyi ti dulu. Jehu lalu nyaut baru, “Nya ukai pekara nuan. Titihka aku.” Jejaga nya madahka seruan nya mega udah datai ba tekang bala orang nya, tang enda pulai. Lalu ku iya nampung jaku iya, “Kepala bala orang nya ngemudika kerita perang; baka gamal Jehu, laban iya ngemudika kerita perang nya baka orang ke gila!” Raja Joram lalu bejaku, “Sediaka kerita perang aku.” Orang lalu nyendiaka kerita perang iya. Iya enggau Raja Ahasiah lalu bela nepan kerita perang diri empu, deka betemu enggau Jehu. Seduai iya betemu enggau Jehu ba tanah Nabot. “Kati nuan datai mai pemaik?” ku Joram nanya Jehu. Jehu lalu nyaut, “Baka ni ku kitai bisi pemaik, enti kitai agi nyimpan semua penemu manang lalu agi nyembah engkeramba ti dipunka indai nuan Jesebel?” Joram nguingka kerita perang iya, deka rari, lalu ku iya manjung, “Orang tu ngelaban perintah, Ahasiah!” Jehu lalu ngambi panah, lalu enggau pengabis pengering iya nimbakka laja iya. Laja nya lalu kena belakang Joram, lalu ngebuska tungkul ati iya. Joram rebah lalu mati dalam kerita perang iya, lalu ku Jehu bejaku enggau Bidkar ti nyadi penyaup iya, “Ambi bangkai iya, lalu buai iya ba tanah Nabot. Nuan enda tau enda ingat, lebuh tua sama nepan kuda ari belakang Ahap, apai Raja Joram, TUHAN bisi nyebut leka jaku tu ngelaban Ahap, ‘Aku bisi meda orang munuh Nabot enggau bala anak lelaki iya kemari, lalu Aku besemaya deka ngukum nuan ditu ba tanah tu.’ Nya alai, ambi bangkai Joram,” ku Jehu bejaku enggau orang ke nyadi penyaup iya, “lalu buai bangkai iya ba tanah Nabot, kena ngamatka semaya TUHAN.” Lebuh Raja Ahasiah meda utai nya nyadi, iya lalu rari nepan kerita perang iya ngagai nengeri Bet-hagan, digagai Jehu. “Timbak iya,” ku Jehu bejaku enggau bala iya. Sida lalu nimbak iya lebuh iya benung nepan kerita perang iya di rantau jalai ngagai Gur, semak nengeri Iblim. Tang iya agi ulih ngerarika diri, nyentuk nengeri Megido, alai iya ke lalu mati. Bala pemesai iya mai bangkai iya pulai ngagai Jerusalem ngena sebuah kerita perang, lalu nguburka iya ba lumbung bala raja di Nengeri David. Ahasiah berengkah nyadi raja menua Judah dalam taun ti kesebelas Joram anak Ahap nyadi raja menua Israel. Jehu lalu datai di Jesril. Lebuh Jesebel ninga pasal utai ti udah nyadi, iya lalu ngechat lilit mata diri, ngaduka buk iya, lalu nyenguk ke baruh ari jenila istana. Lebuh Jehu tama nengah pintu penama, Jesebel lalu ngangau, “Simri! Nuan tu pemunuh! Nama kebuah nuan datai kitu?” Jehu engkadah, lalu ngangau, “Sapa setanah enggau aku?” Dua tauka tiga iku pemesai ke gawa di istana nyenguk ari jenila ngagai iya ke baruh. Ku Jehu bejaku enggau sida, “Buai indu nya ke baruh kitu!” Sida lalu muai Jesebel, lalu darah iya bekelimbur teperanchit ngagai dinding enggau ngagai kuda. Jehu lalu mai kuda enggau kerita perang iya ngelanggar bangkai Jesebel. Iya tama ngagai istana, lalu makai. Udah nya iya bejaku, “Bai indu ke udah kena sumpah nya ari tu, lalu kuburka iya, laban iya anak raja.” Tang orang ke mansang deka nguburka iya nadai tetemuka iya, kelimpah ari keruntuk pala, enggau tulang jari enggau tulang kaki iya. Lebuh sida madahka pekara nya ngagai Jehu, Jehu lalu bejaku, “Tu meh utai ti dipadahka TUHAN, lebuh Iya bejaku ngena nembiak Iya nabi Elijah: ‘Ukui deka makai bangkai Jesebel di nengeri Jesril. Rangkah tulang iya deka ngachir ba endur nya baka tai jelu, datai ke orang nyau enda nemu sapa ke bempu bangkai nya.’ ” Tujuh puluh iku peturun Raja Ahap bisi diau di nengeri Samaria. Jehu nulis surat, lalu ngirumka salin surat nya ngagai bala orang ke merintah di nengeri nya, ngagai bala tuai, enggau ngagai bala orang ke ngibun bala peturun Ahap. Baka tu ku jaku dalam surat nya: “Kita tu orang ke ngibun bala peturun raja, lalu kita bisi kerita perang, kuda, senyata, enggau nengeri ti bekuta. Nya alai, lebuh kita nerima surat tu, pilih peturun raja ke pemadu patut, chiri iya nyadi raja, lalu kita enda tau enda beperang ngarika iya.” Tang sida balat amat takut. Ku sida, “Baka ni ku kitai ulih ngelaban Jehu? Indah Raja Joram enggau Raja Ahasiah deh enda ulih ngelaban iya.” Nya alai, tuai ke ngintu istana, enggau tuan gabenor nengeri nya, enggau bala tuai, enggau orang ke ngibun peturun raja, lalu ngirumka pesan ngagai Jehu, “Kami tu nembiak nuan, lalu kami sedia deka ngereja utai ti diasuh nuan. Tang kami enggai nyiri orang nyadi raja. Kereja aja meh utai ti patut ku ati nuan.” Jehu lalu nulis siti agi surat ngagai sida, “Enti kita setanah enggau aku, lalu sedia deka nitihka atur aku, bai pala bala peturun Raja Ahap ngagai aku di Jesril ba urung maya tu pagila.” Nyadi tujuh puluh iku peturun Raja Ahap nya diibun bala orang ke tampak nama di nengeri Samaria, ti udah ngibun sida datai ke sida nyau besai tuai. Lebuh surat Jehu diterima, bala tuai orang Samaria lalu munuh semua tujuh puluh iku bala peturun Ahap, ngengkahka pala sida ba bakul, lalu ngirumka pala nya ngagai Jehu di Jesril. Lebuh orang madahka ngagai Jehu pala bala peturun Ahap udah dibai kia, iya lalu meri atur ngasuh pala nya ditugungka ngagai dua iti tugung ba mua pintu nengeri nya, lalu nejuka pala nya dia datai ngagai pagi hari siti. Pagi hari siti iya lalu pansut ngagai mua pintu nya, lalu bejaku enggau orang ke bisi dia, “Aku tu meh orang ke udah bepekat ngelaban Raja Joram, lalu munuh iya. Ukai kita ke betanggungjawapka pekara nya. Tang sapa munuh semua sida tu? Tu nunjukka semua utai ti udah disebut TUHAN pasal peturun Ahap, deka dikamatka magang. TUHAN udah ngereja utai ti udah disemaya Iya ngena nabi Elijah.” Udah nya Jehu lalu munuh semua kaban belayan Ahap ti bukai ti diau di Jesril, enggau semua pemesai iya, pangan iya ti nyempil, enggau bala imam. Nadai siku sida ditejuka idup. Jehu angkat ari Jesril, lalu mansang ngagai Samaria. Di rantau jalai, ba endur ti dikumbai “Kem Orang Ke Pengibun Bedus,” iya betemu enggau sekeda kaban belayan niang Raja Ahasiah menua Judah, lalu nanya sida, “Sapa kita tu?” “Kaban belayan Ahasiah,” ku sida nyaut. “Kami tu deka mansang ngagai Jesril, deka meri tabi basa ngagai bala anak Kuin Jesebel, enggau sida raja sebilik ti bukai.” Jehu lalu bejaku enggau bala iya, “Tangkap sida idup-idup!” Sida lalu nangkap bala kaban belayan Ahasiah. Jehu lalu munuh sida semak siti lubang kebung ti ba endur nya. Pemayuh sida nya empat puluh dua iku. Nadai siku sida ditejuka idup. Jehu lalu mupuk baru, lalu di rantau jalai, iya betemu enggau Jonadap anak Rekap. Jehu betabi enggau iya, lalu ku Jehu, “Tua sama sepenemu. Kati nuan deka nyukung aku?” “Ka,” ku Jonadap nyaut. “Enti munyi nya, betabi meh tua,” ku Jehu nyaut. Seduai iya lalu betabi, lalu Jehu nyaup Jonadap niki ngagai kerita perang iya. Ku Jehu, “Aram mupuk enggau aku, ngambika nuan meda pengangkun aku ke TUHAN.” Seduai iya lalu sama nepan kerita perang nya ngagai Samaria. Lebuh seduai iya datai di Samaria, Jehu lalu munuh semua kaban belayan Ahap. Siku pen nadai ga sida ditejuka idup. Nya utai ti udah dipadahka TUHAN ngagai Elijah. Jehu lalu ngempuruka semua orang Samaria, lalu ku iya bejaku, “Raja Ahap enda tentu bebendar betuaika petara Baal, tang aku deka bebendar agi betuaika iya. Nya alai gempuruka semua bala nabi Baal, semua orang ke nyembah Baal, enggau semua bala imam. Semua orang enda tau enda enggau begempuru magang. Aku deka ngenjuk piring ti besai ngagai Baal, lalu barang sapa enda enggau begempuru, deka dibunuh.” (Tu chara Jehu nipu, ngambika iya ulih munuh semua orang ke nyembah Baal.) Udah nya Jehu lalu meri siti atur, “Letak hari alai ngemesaika Baal!” Hari lalu diletak. Jehu lalu ngirumka pesan ngagai serata menua Israel. Semua orang ke nyembah Baal bela datai magang. Nadai siku sida ke enda datai. Semua sida lalu tama ngagai rumah sembiang Baal, lalu rumah nya penuh laban sida. Udah nya Jehu lalu bejaku enggau imam ti nyadi tuai ngemataka baju panjai ti kudus, ngasuh iya mai baju panjai nya pansut, lalu meri baju nya ngagai bala orang ke nyembah Baal. Udah nya Jehu empu lalu tama ngagai rumah sembiang Baal, sama enggau Jonadap anak Rekap, lalu ku iya bejaku enggau orang mayuh dia, “Kita enda tau enda nentuka semina orang ke nyembah Baal aja bisi ditu, lalu nentuka nadai orang ke nyembah TUHAN bisi udah tama.” Udah nya, iya enggau Jonadap lalu tama, deka ngenjuk piring enggau piring tunu ngagai Baal. Nyadi iya endang udah ngasuh lapan puluh iku orang bediri di luar rumah sembiang nya, lalu udah meri atur tu ngagai sida, “Kita enda tau enda munuh semua orang tu. Barang sapa nejuka sida rari, deka dibunuh!” Lebuh Jehu udah ngenjuk piring, iya lalu bejaku enggau bala jejaga sereta enggau bala pemesai, “Tama, lalu bunuh semua sida. Anang nejuka sida rari!” Sida lalu tama, kinding-kinding megai pedang, lalu munuh semua sida. Sida lalu ngirit bangkai semua orang nya ke luar. Udah nya sida lalu tama ngagai bilik alai Baal disembah dalam rumah sembiang nya. Sida mai lalu nunu tiang keramat ti bisi dia. Nya alai sida ngerusak tiang keramat, enggau rumah sembiang nya, lalu ngaga rumah sembiang nya nyadika agu, nyentuk ngagai sehari tu. Nya meh chara Jehu munaska pengawa orang ke besembahka Baal di menua Israel. Tang iya neladan dosa Raja Jeroboam ke nguluka orang Israel bedosa nyembah anak sapi ti lelaki ti digaga ari emas, ti udah didirika iya di Betel enggau di Dan. Ku TUHAN bejaku ngagai Jehu, “Nuan udah ngereja ngagai bala peturun Ahap semua utai ti udah diasuh Aku kereja nuan. Nya alai, Aku besemaya, peturun nuan nyentuk ngagai serak ti keempat deka nyadi raja menua Israel.” Tang Jehu enda ngasika Adat TUHAN Allah Taala ke disembah orang Israel enggau pengabis ati iya. Iya neladan Jeroboam, ti udah nguluka orang Israel bedosa. Ba urung maya nya TUHAN lalu belabuh ngurangka pemesai rampa menua Israel. Raja Hasael menua Siria ngalahka semua sitak menua Israel ti di timur Sungai Jordan, nyentuk ngagai nengeri Aroer di selatan, ba Sungai Arnon, nyengkaum menua Giliat enggau menua Basan, ti alai raban bansa Gat, Reuben, enggau Manasi Timur diau. Semua utai bukai ti udah dikereja Jehu, nyengkaum pasal pemerani iya, bisi dituliska magang dalam Jerita Lama Pasal Raja Menua Israel. Iya mati, lalu dikuburka di Samaria, lalu anak iya Jehoahas nganti iya nyadi raja. Jehu merintah di Samaria nyadi raja menua Israel dua puluh lapan taun. Lebuh Ataliah, indai Raja Ahasiah, ninga anak iya udah dibunuh, iya lalu meri atur ngasuh bala sida raja sebilik dibunuh magang. Ka semina Joas anak Ahasiah aja ke ulih ngerarika diri. Lebuh orang baru deka munuh iya sama enggau sida ti bukai, ibu iya Jehoseba anak Raja Joram, menyadi-tiri Ahasiah, nyelamatka iya. Ibu iya mai iya, sama enggau indu ke ngibun iya, ngagai bilik tinduk dalam Rumah Sembiang, lalu ngelalaika iya ari Ataliah, enggai ke iya dibunuh. Jehoseba ngibun nembiak nya enam taun, ngelalaika iya dalam Rumah Sembiang, sekumbang Ataliah ke merintah nyadi kuin. Tang dalam taun ti ketujuh, imam Jehoiada mesanka bala pemesai ti nyadi tuai nyaga raja, enggau orang ke nyaga istana, ngasuh sida datai ngagai Rumah Sembiang, lalu ngasuh sida besumpah besetujuka utai ti deka dikereja iya. Iya lalu ngasuh sida betemu enggau Joas anak Raja Ahasiah. Iya meri atur tu ngagai sida: “Lebuh kita mansang gawa kena Hari Sabat, seraban ari tiga bengkah raban kita deka nyaga istana. Seraban ti bukai deka nyaga ba Pintu Sur, lalu seraban ti bukai deka nyaga ba pintu ti di belakang bala jejaga ti bukai. Raban dua iti ti ngetu gawa ba Hari Sabat, deka nyaga raja dalam Rumah Sembiang TUHAN. Pedang kita enda tau enda disintak lebuh kita nyaga Raja Joas, lalu kita enda tau enda bejalai sama enggau iya lebuh iya bejalai ngagai sebarang endur. Barang sapa datai semak ngagai kita, enda tau enda dibunuh.” Bala pemesai nya ngasika atur Jehoiada, lalu mai ngagai Jehoiada bala nembiak sida ke ngetu jaga, enggau ke baru deka mansang jaga lebuh Hari Sabat. Jehoiada meri ngagai bala pemesai nya sangkuh enggau terabai Raja David, ti udah ditaruh dalam Rumah Sembiang, lalu iya ngasuh bala soldadu nyintak pedang sida lalu bediri ngelingi semua mua Rumah Sembiang, nyaga raja. Udah nya, Jehoiada lalu mai Joas pansut, ngengkahka makota ba pala iya, lalu meri ngagai iya adat pasal jalai nyadi raja. Udah nya Joas ditata, lalu dichiri nyadi raja. Bala orang mayuh lalu nempapka jari, sereta manjung, “Gayu-guru meh raja!” Lebuh Kuin Ataliah ninga munyi panjung bala jejaga enggau orang mayuh, iya lalu beguai-guai mansang ngagai Rumah Sembiang alai orang mayuh ti udah begempuru. Iya lalu tepedaka raja ti baru, bediri ngimbai tiang ti besai ba penama ngagai Rumah Sembiang, laban nya endang adat asal sida. Raja nya dikelingi bala pemesai, enggau bala orang ke nyepu terumpit, lalu semua orang mayuh manjung magang gaga ati, sereta nyepu terumpit. Ataliah lalu nyarikka gari diri lalu manjung, “Penipu! Penipu!” Jehoiada enda nyagi Ataliah dibunuh dalam kandang Rumah Sembiang, nya alai iya lalu bejaku enggau bala pemesai soldadu, “Bai iya pansut ensaraka rintai bala jejaga, lalu bunuh barang sapa deka nguji nyelamatka iya.” Sida lalu nangkap iya, lalu mai iya ngagai istana. Sida lalu munuh iya ba Pintu Kuda. Imam Jehoiada lalu ngasuh Raja Joas enggau orang mayuh ngaga siti sempekat enggau TUHAN, ngambika sida nyadi nembiak TUHAN. Iya mega ngaga siti sempekat entara raja enggau orang mayuh. Udah nya, orang mayuh mansang ngagai rumah sembiang Baal lalu ngeruntuhka rumah nya. Sida mechahka alta enggau engkeramba Baal, lalu munuh Matan, ti nyadi imam Baal, di mua alta nya. Jehoiada lalu ngasuh bala jejaga nyaga Rumah Sembiang. Udah nya, iya enggau bala pemesai, bala orang ke nyaga raja, enggau bala orang ke nyaga istana lalu ngiring raja ari Rumah Sembiang ngagai istana, dititihka semua orang mayuh. Joas tama nengah Pintu Jejaga, lalu nudukka diri ba kerusi diraja. Semua orang mayuh bela gaga ati magang, lalu nengeri nya nadai pengachau agi, laban Ataliah udah dibunuh dalam istana. Joas nyadi raja menua Judah lebuh umur iya tujuh taun. Dalam taun ti ketujuh Raja Jehu merintah menua Israel, Joas berengkah nyadi raja menua Judah, lalu iya merintah di Jerusalem empat puluh taun. Indai iya benama Sibiah, ari nengeri Beer-seba. Joas ngereja utai ti ngerinduka ati TUHAN sepemanjai umur iya, laban iya diajar Imam Jehoiada. Tang palan alai orang kapir nyembah petara sida, enda dirusak, lalu orang mayuh majak ngenjuk piring sereta nunu menyan ba endur nya. Ku Joas bejaku ngagai bala imam, “Semua duit ti diberi nyadi pemeri ti kudus ti dibai ngagai Rumah TUHAN, nya duit chukai, enggau duit ti dienjuk nitihka peneka ati diri, ti dibai ngagai Rumah TUHAN, awakka imam nerima duit nya ari genap iku orang ke meri pemeri nya, lalu awakka sida imam nyeruri Rumah TUHAN nya genap kali utai ti patut diseruri ditemu sida imam. Tang nyentuk ngagai taun ti ketiga puluh Joas megai perintah, bala imam lalu apin nyeruri Rumah Sembiang. Nya alai, Raja Joas lalu mesanka Jehoiada enggau bala imam ti bukai, lalu nanya ngagai sida, “Nama kebuah kita enda nyeruri Rumah Sembiang? Belabuh ari diatu, kita enda tau nyimpan duit ti diterima kita. Kita enda tau enda nyerahka duit nya, ngambika Rumah Sembiang diseruri.” Bala imam besetuju enggau penemu nya, lalu besetuju mega enda nyeruri Rumah Sembiang nya. Imam Jehoiada lalu ngambi siti peti, ngaga siti lubang ba tudung peti nya, lalu ngengkahka peti nya ba atas alta, muak ari kanan penama ngagai Rumah Sembiang. Bala imam ke bekereja ba penama nya, nyimpan dalam peti nya semua duit ti diberi bala orang ke datai besembiang. Lebuh duit nyau udah mayuh dalam peti nya, kerani raja enggau Imam Besai lalu datai, ngeluluhka pirak nya, lalu nimbang iya. Lebuh penyampau duit nya udah dituliska, sida lalu nyerahka pirak nya ngagai orang ke nyadi tuai megai pengawa dalam Rumah Sembiang, kena sida mayar bala tukang kayu, enggau bala tukang ke ngaga rumah, tukang batu, orang ke betetakka batu, ke bebelika ramu enggau batu ti dikena nyeruri, sereta mayar semua ungkus utai bukai ti dikena. Tang duit nya enda dikena begagaka mangkuk pirak, mangkuk, terumpit, tauka pekekas kena ngintu lampu, tauka sebarang utai bukai ti digaga ari pirak tauka emas. Semua duit nya dikena mayar bala orang ke gawa, enggau dikena meli semua utai ti dikena nyeruri Rumah Sembiang aja. Orang ke nyadi tuai ngatur pengawa nya endang orang ke tau dikarapka, nya alai sida enda dipinta madahka jalai duit nya dikena. Duit ti diberi nyadika piring kena bebayarka ukum penyalah, enggau piring pengampun dosa, enda disimpan dalam peti nya, laban duit nya diberi ngagai bala imam. Lebuh maya nya Raja Hasael menua Siria nyerang lalu ngalahka nengeri Gat. Udah nya iya berunding deka nyerang Jerusalem. Raja Joas menua Judah lalu ngambi semua pemeri ti udah diserahka bala raja ke dulu agi ari iya, iya nya sida Jehosapat, Jehoram, enggau Ahasiah, ngagai TUHAN. Iya lalu nambahka pemeri ti diberi iya empu, enggau semua emas ti dalam sarang reta Rumah Sembiang, enggau di istana, lalu ngirumka semua duit nya nyadika pemeri ngagai Raja Hasael. Raja Hasael lalu mai bala soldadu iya angkat ari Jerusalem. Semua utai bukai ti udah dikereja Raja Joas bisi dituliska magang dalam Jerita Lama Bala Raja Menua Judah. Dalam taun ti kedua puluh tiga Joas anak Ahasiah nyadi raja menua Judah, Jehoahas anak Jehu berengkah nyadi raja menua Israel, lalu iya merintah di Samaria tujuh belas taun. Baka Raja Jeroboam ke dulu ari iya, iya bedosa ngelaban TUHAN, lalu nguluka orang Israel bedosa. Iya nadai kala ngelengkaka ulah iya ti jai; nya alai TUHAN ringat ngagai orang Israel, lalu Iya nejuka Raja Hasael menua Siria, enggau anak iya Benhadat betangkan-tangkan ngalahka menua Israel. Udah nya Jehoahas besampi ngagai TUHAN, lalu lebuh TUHAN meda pemalat raja menua Siria nekanka pengidup orang Israel, Iya nyaut sampi Raja Jehoahas. TUHAN meri siku tuai ngagai orang Israel, ke ngelepaska sida ari orang Siria, lalu orang Israel diau likun baka ke dulu. Tang sida mengkang enggai nesal ati ke dosa ti udah dibai Raja Jeroboam kereja sida, tang majak ngereja dosa nya, lalu nejuka engkeramba petara indu Aserah mengkang di Samaria. Jehoahas nadai agi bala soldadu, kelimpah ari lima puluh iku bala soldadu ke nepan kuda, sepuluh buah kerita perang, enggau sepuluh ribu iku soldadu ke bejalai kaki, laban raja menua Siria udah munuh sida ti bukai, ngelunjak sida baka ke ngelunjak amau. Semua utai bukai ti udah dikereja Jehoahas, enggau cherita pasal pemerani iya bisi dituliska magang dalam Jerita Lama Pasal Raja Menua Israel. Iya mati lalu dikuburka di Samaria, lalu anak iya Jehoas nganti iya nyadi raja. Dalam taun ti ketiga puluh tujuh Raja Joas merintah di menua Judah, Jehoas anak Jehoahas berengkah nyadi raja menua Israel, lalu iya merintah di Samaria enam belas taun. Iya mega bedosa ngelaban TUHAN, lalu ngereja utai ti jai neladan Raja Jeroboam, ti udah nguluka orang Israel bedosa. Semua utai bukai ti udah dikereja Jehoas, nyengkaum pemerani iya beperang ngelaban Raja Amasiah menua Judah, bisi dituliska magang dalam Jerita Lama Pasal Raja Menua Israel. Jehoas mati lalu dikuburka ba lumbung bala raja di Samaria, lalu anak iya, Jeroboam Ti Kedua, nganti iya nyadi raja. Nyadi Elisa udu amat sakit, lalu lebuh iya benung garing-garing natka diri ke nyau deka mati, Raja Jehoas menua Israel datai ngabas iya. Ku Raja Jehoas nyabak, “Apai, apai! Nuan tu orang ke kering nyaga menua Israel!” Lalu ku Elisa bejaku enggau iya, “Ambi panah enggau laja.” Jehoas lalu ngambi panah enggau laja; Elisa lalu ngasuh iya sedia nimbakka laja nya. Raja lalu sedia, lalu Elisa ngengkahka jari ba atas jari raja. Udah nya, nitihka asuh Elisa, raja lalu muka jenila ti nunga ngagai Sira. “Timbakka laja nya!” ku Elisa bejaku enggau Raja Jehoas. Lebuh raja udah nimbakka laja nya, Elisa lalu bejaku, “Nuan tu nyadika laja TUHAN, kena Iya ngalahka orang Siria. Nuan deka ngelaban orang Siria di Apek, datai ke nuan udah ngalahka sida.” Udah nya Elisa lalu ngasuh raja ngambi laja ti bukai, lalu maluka laja nya ngagai tanah. Raja lalu maluka laja nya tiga kali ngagai tanah, lalu badu. Elisa lalu ringat. Ku iya bejaku enggau raja, “Nuan patut malu tanah lima tauka enam kali, nya baru nuan ulih ngeluska orang Siria. Tang diatu nuan deka ngalahka sida semina tiga kali aja.” Elisa mati lalu dikuburka. Nyadi orang Moap endang selalu nyerang menua Israel tiap taun. Nyadi sekali, lebuh orang Israel nguburka orang ke mati, sida bisi tepedaka seraban orang Moap datai. Orang Israel lalu nibarka bangkai orang nya ngagai kubur Elisa, lalu rari. Lebuh bangkai orang nya negu rangkah tulang Elisa, orang nya lalu idup baru, lalu bediri. Raja Hasael menua Siria balat amat nekanka pengidup orang Israel sekumbang Jehoahas ti nyadi raja, tang TUHAN nelap enggau orang Israel sereta kasihka sida. Iya enda nyagi sida dirusak, tang nyaup sida ketegal sempekat Iya enggau Abraham, Isak, enggau Jakop. Iya nadai kala enda ingatka bala nembiak Iya. Lebuh Raja Hasael mati, anak iya Benhadat nganti iya nyadi raja. Udah nya Raja Jehoas menua Israel ngalahka Benhadat tiga kali, lalu ngambi pulai baru nengeri ti udah dialahka Benhadat lebuh maya apai iya Jehoahas nyadi raja. Dalam taun ti kedua Jehoas anak Jehoahas nyadi raja menua Israel, Amasiah anak Joas berengkah nyadi raja menua Judah lebuh umur iya dua puluh lima taun, lalu iya merintah di Jerusalem dua puluh semilan taun. Indai iya benama Jeho-adin, ari Jerusalem. Iya ngereja utai ti ngerinduka ati TUHAN, tang iya enda baka aki iya Raja David, tang ngereja utai baka ke udah dikereja apai iya Joas. Iya enda ngeruntuhka endur alai orang kapir nyembah petara sida, lalu orang mayuh majak ngenjuk piring sereta nunu menyan ba endur nya. Lebuh Amasiah nyau udah tegap megai perintah, iya lalu munuh bala pemesai ti udah munuh apai iya. Tang iya enda munuh bala anak sida laban iya ngasika jaku TUHAN ti ditulis dalam Adat Moses: “Apai indai enda tau dibunuh ketegal penyalah anak sida, lalu anak enda tau dibunuh ketegal penyalah apai indai sida. Orang semina tau dibunuh ketegal penyalah sida empu.” Amasiah munuh sepuluh ribu iku soldadu orang Edom ba Lebak Garam. Iya ngalahka nengeri Sela, lalu iya ngumbai nengeri nya Jokte-el. Nama nya agi mengkang nyentuk ngagai diatu. Udah nya Amasiah lalu ngasuh bala seruan mansang ngagai Raja Jehoas menua Israel, mai iya belaban. Tang Raja Jehoas ngirumka pesan tu kena iya nyaut Amasiah: “Nyadi sekali, madang duri ba Bukit Lebanon ngirumka pesan ngagai kayu sidar: ‘Asuh anak indu nuan jadi enggau anak lelaki aku.’ Siku jelu babas mansa, lalu ngindik madang duri nya. Nyadi nuan Amasiah udah ngalahka orang Edom, lalu nuan diatu nyau penuh laban penyumbung. Anang enda nemu puas ati ke diri ti tampak nama. Diau aja di rumah. Nama kebuah nuan deka ngaga pengachau lalu ngasuh nuan enggau bala nuan ditinggang penusah?” Tang Amasiah enggai mendingka jaku Raja Jehoas. Nya alai Raja Jehoas mansang enggau bala iya, lalu ngelaban Amasiah ba Bet-semes, di menua Judah. Bala soldadu Amasiah alah, lalu semua bala soldadu iya rari ngagai rumah diri. Jehoas lalu nangkap Amasiah, nyerang Jerusalem, lalu ngeruntuhka dinding kuta nengeri nya berengkah ari Pintu Epraim nyentuk ngagai Pintu Sukut, kira panjai dua ratus meter. Iya ngambi semua pirak enggau emas ti ditemu iya, semua pekekas Rumah Sembiang, lalu mai utai nya ngagai Samaria. Iya mega nabanka orang tebus. Semua utai bukai ti udah dikereja Jehoas, nyengkaum pemerani iya beperang ngelaban Raja Amasiah menua Judah, bisi dituliska magang dalam Jerita Lama Pasal Raja Menua Israel. Jehoas mati, lalu dikuburka ba lumbung bala raja di Samaria, lalu anak lelaki iya, Jeroboam Ti Kedua, nganti iya nyadi raja. Raja Amasiah menua Judah agi mengkang idup lima belas taun udah bekau pemati Raja Jehoas menua Israel. Semua utai bukai ti udah dikereja Amasiah bisi dituliska magang dalam Jerita Lama Pasal Raja Menua Judah. Nyadi orang di Jerusalem bepekat deka munuh Amasiah. Nya alai Amasiah ngerarika diri ngagai nengeri Lakis, tang bala munsuh iya nitihka iya ngagai nengeri nya, lalu munuh iya. Bangkai iya lalu dibai pulai ngagai Jerusalem, ditepanka ba siku kuda, lalu dikuburka ba lumbung bala raja di Nengeri David. Udah nya orang Judah lalu nyiri anak iya Usiah, ke umur enam belas taun, nyadi raja. Udah bekau pemati apai iya, Usiah ngalahka nengeri Elat, lalu ngaduka nengeri nya baru. Dalam taun ti kelima Amasiah anak Joas nyadi raja menua Judah, Jeroboam anak Jehoas lalu berengkah nyadi raja menua Israel, lalu iya merintah di Samaria empat puluh satu taun. Iya bedosa ngelaban TUHAN, laban iya neladan penyai Jeroboam anak Nebat ti udah nguluka orang Israel bedosa. Iya ngerampas baru semua sitak menua ti endang diempu orang Israel, berengkah ari Lebo-hamat di utara, nyentuk ngagai Tasik Mati di selatan. Tu meh utai ti udah disemaya TUHAN, ti Allah Taala ke disembah orang Israel, ngagai nembiak Iya nabi Jonah anak Amitai ke datai ari Gat-heper. TUHAN udah meda pemerinsa orang Israel, lalu siku pen nadai ga orang nyaup sida. Tang juluk ati TUHAN ukai deka ngerusak orang Israel abis lengis enggau ke belama iya. Nya alai iya ngelepaska sida ngena Raja Jeroboam Ti Kedua. Semua utai bukai ti udah dikereja Jeroboam Ti Kedua, pemerani iya beperang, enggau chara iya mulaika nengeri Damaskus enggau nengeri Hamat ngagai orang Israel baru, bisi dituliska magang dalam Jerita Lama Pasal Raja Menua Israel. Jeroboam mati, lalu dikuburka ba lumbung bala raja, lalu anak iya Sekariah nganti iya nyadi raja. Dalam taun ti kedua puluh tujuh Raja Jeroboam Ti Kedua merintah menua Israel, Usiah anak Amasiah berengkah nyadi raja menua Judah, lebuh umur iya enam belas taun, lalu iya merintah lima puluh dua taun. Indai iya Jekoliah, datai ari Jerusalem. Raja Usiah ngereja utai ti ngerinduka ati TUHAN, neladan apai iya Amasiah. Tang iya enda ngerusak endur alai orang kapir nyembah petara sida, lalu orang mayuh majak ngenjuk piring sereta nunu menyan ba endur nya. TUHAN lalu ngasuh Usiah diserang penyakit kulit ti tau ngerampit, ti mengkang ba iya seumur idup. Iya diau kediri dalam rumah iya empu. Semua pengawa iya diambi magang ari iya, lalu anak iya Jotam merintah menua ngarika iya. Semua utai bukai ti udah dikereja Usiah bisi dituliska magang dalam Jerita Lama Pasal Raja Menua Judah. Usiah mati lalu dikuburka ba lumbung bala raja di Nengeri David, lalu anak iya Jotam nganti iya nyadi raja. Dalam taun ti ketiga puluh lapan Raja Usiah merintah menua Judah, Sekariah anak Jeroboam Ti Kedua berengkah nyadi raja menua Israel, lalu iya merintah di Samaria enam bulan. Iya bedosa ngelaban TUHAN baka bala raja ke dulu ari iya. Iya ngereja utai ti jai neladan Raja Jeroboam anak Nebat, ti udah nguluka orang Israel bedosa. Salum anak Jabes lalu bepekat ngelaban Raja Sekariah. Iya munuh Raja Sekariah di Iblim, lalu nganti iya nyadi raja. Semua utai bukai ti udah dikereja Sekariah bisi dituliska magang dalam Jerita Lama Pasal Raja Menua Israel. Nya alai semaya ti udah digaga TUHAN enggau Raja Jehu dikamatka. Semaya nya munyi tu, “Peturun nuan, nyentuk ngagai serak ti keempat deka nyadi raja menua Israel.” Dalam taun ti ketiga belas Raja Usiah merintah menua Judah, Salum anak Jabes berengkah nyadi raja menua Israel, lalu iya merintah di Samaria sebulan. Menahem anak Gadi datai ari Tirsah ngagai Samaria, munuh Salum, lalu nganti iya nyadi raja. Semua utai bukai ti udah dikereja Salum, nyengkaum cherita pasal iya ke bepekat ngelaban raja, bisi dituliska magang dalam Jerita Lama Pasal Raja Menua Israel. Lebuh maya nya Menahem ngerusak Tipsah, munuh semua orang ke diau di nengeri nya, enggau di menua ti ngelingi nengeri nya berengkah ari Tirsah. Iya ngereja nya laban orang dia enggai nunduk ngagai iya. Indah perut sida indu ke ngandung deh diperuti iya. Dalam taun ti ketiga puluh semilan Raja Usiah merintah menua Judah, Menahem anak Gadi berengkah nyadi raja menua Israel, lalu iya merintah di Samaria sepuluh taun. Iya bedosa ngelaban TUHAN, laban nyentuk ngagai pemati iya, iya ngereja utai ti jai neladan Raja Jeroboam anak Nebat, ti udah nguluka orang Israel bedosa. Tiglat Pileser, raja menua Asiria, lalu nyerang menua Israel, lalu Menahem meri iya 34,000 kilogram pirak kena iya minta raja menua Asiria nyaup iya negapka kuasa iya di menua Israel. Menahem bulih duit nya ari orang ke kaya di menua Israel. Iya mejalka sida meri lima puluh singkap duit siku-siku. Nya alai Tiglat pulai ngagai menua iya empu. Semua utai bukai ti udah dikereja Menahem bisi dituliska magang dalam Jerita Lama Pasal Raja Menua Israel. Iya mati lalu dikuburka, lalu anak iya Pekahiah nganti iya nyadi raja. Dalam taun ti kelima belas Raja Usiah merintah menua Judah, Pekahiah anak Menahem berengkah nyadi raja menua Israel, lalu iya merintah di Samaria dua taun. Iya bedosa ngelaban TUHAN, neladan penyai Raja Jeroboam anak Nebat, ti udah nguluka orang Israel bedosa. Siku pemesai ari bala soldadu Pekahiah, ke benama Pekah anak Remaliah, bepekat enggau lima puluh iku orang ari Giliat, deka munuh Pekahiah dalam kuta ti dalam istana, di Samaria, lalu nganti iya nyadi raja. Semua utai bukai ti udah dikereja Pekahiah bisi dituliska magang dalam Jerita Lama Pasal Raja Menua Israel. Dalam taun ti kelima puluh dua Raja Usiah merintah menua Judah, Pekah anak Remaliah berengkah nyadi raja menua Israel, lalu iya merintah di Samaria dua puluh taun. Iya bedosa ngelaban TUHAN laban iya ngereja utai ti jai neladan Raja Jeroboam anak Nebat, ti udah nguluka orang Israel bedosa. Lebuh Pekah nyadi raja, Tiglat Pileser, raja menua Asiria, ngalahka nengeri Ijon, Abel Bet-maakah, Janoah, Kedes enggau nengeri Hasor, menua Giliat, menua Galili, enggau menua Naptali, lalu nabanka orang mayuh nyadi orang tangkap ngagai menua Asiria. Dalam taun ti kedua puluh Jotam anak Usiah merintah nyadi raja menua Judah, Hosea anak Elah bepekat ngelaban Raja Pekah, munuh iya, lalu nganti iya nyadi raja. Semua utai bukai ti udah dikereja Pekah bisi dituliska magang dalam Jerita Lama Pasal Raja Menua Israel. Dalam taun ti kedua Pekah anak Remaliah nyadi raja menua Israel, Jotam anak Usiah berengkah nyadi raja menua Judah lebuh umur iya dua puluh lima taun, lalu iya merintah enam belas taun. Indai iya Jerusa anak Sadok. Jotam ngereja utai ti ngerinduka ati TUHAN, neladan apai iya Usiah. Tang iya enda ngerusak endur alai orang kapir nyembah petara sida, lalu orang mayuh majak ngenjuk piring sereta nunu menyan ba endur nya. Jotam nya meh orang ke ngaga Pintu Utara ke Rumah Sembiang. Semua utai bukai ti udah dikereja Jotam bisi dituliska magang dalam Jerita Lama Pasal Raja Menua Judah. Lebuh Jotam nyadi raja, nya mega maya TUHAN terubah ngasuh Raja Resin menua Siria enggau Raja Pekah menua Israel nyerang menua Judah. Jotam mati lalu dikuburka ba lumbung bala raja di Nengeri David, lalu anak iya Ahas nganti iya nyadi raja. Dalam taun ti ketujuh belas Pekah anak Remaliah nyadi raja menua Israel, Ahas anak Jotam berengkah nyadi raja menua Judah lebuh umur iya dua puluh taun, lalu iya merintah di Jerusalem enam belas taun. Iya enda nitihka teladan ti manah ari aki iya Raja David, tang ngereja utai ti enda dikerinduka TUHAN Allah Taala, lalu neladan sida raja menua Israel. Indah anak lelaki iya empu deh diserahka iya ngagai engkeramba nyadika piring tunu, nunda pengawa ti jai ti udah dikereja orang ke udah diburu TUHAN ari menua nya, lebuh orang Israel nyerang. Ahas ngenjuk piring, sereta nunu menyan ba endur alai orang kapir nyembah petara sida ba sebelah bukit, enggau di baruh kayu. Raja Resin menua Siria enggau Raja Pekah menua Israel nyerang lalu ngelulung Jerusalem, tang seduai iya enda ulih ngalahka Ahas. ( Lebuh maya nya mega raja menua Edom merintah nengeri Elat baru, lalu muru orang Judah ti diau di nengeri nya. Orang Edom lalu ngentapka diri di nengeri nya, lalu sida agi diau dia nyentuk ngagai diatu.) Ahas lalu ngasuh orang mansang betemu enggau Tiglat Pileser, raja menua Asiria, mai pesan tu, “Aku tu ulun ke angkunka nuan. Aku minta nuan datai lalu ngelepaska aku ari jari raja menua Siria enggau raja menua Israel. Sida benung nyerang aku diatu.” Ahas ngambi pirak enggau emas ari sarang reta Rumah Sembiang, enggau ari sarang wang ti di istana, lalu ngirumka utai nya ngagai raja. Lebuh Tiglat Pileser nerima pesan nya ari Ahas, iya enggau bala soldadu iya lalu mansang nyerang nengeri Damaskus, ngalahka nengeri nya, munuh Raja Resin, lalu nabanka orang ari nengeri nya ngagai Kir nyadi orang tangkap. Lebuh Raja Ahas mansang ngagai nengeri Damaskus deka betemu enggau Raja Besai Tiglat Pileser, iya tepedaka siti alta ba endur nya. Iya lalu ngirumka siti chunto ti chukup silik ngagai Imam Uriah. Uriah lalu ngaga siti alta sebaka enggau alta nya, lalu alta nya tembu digaga iya sebedau Ahas pulai. Lebuh Ahas pulai ari Damaskus, iya meda alta nya udah tembu. Nya alai iya lalu nunu jelu nyadika piring, enggau piring tepung ba alta nya, lalu nuang piring wain, enggau darah ari jelu nya nyadika piring pemaik ba alta nya. Nyadi alta temaga ti udah diserahka ngagai TUHAN bisi ba entara alta ti baru nya enggau Rumah Sembiang. Nya alai iya mindahka alta temaga nya ngagai endur muak ke utara alta ti baru nya. Udah nya iya lalu bejaku enggau Uriah, “Kena meh alta ti besai tu alai ngenjuk piring tunu tiap pagi, enggau alai ngenjuk piring tepung tiap lemai, alai ngenjuk piring tunu enggau piring tepung ti diberi raja enggau orang mayuh, enggau alai ngenjuk piring wain ari orang mayuh. Tuang ba alta tu darah semua jelu ti diberi nyadika piring. Tang galau alta temaga nya kena aku nujum.” Uriah lalu ngereja nitihka jaku raja. Raja Ahas lalu ngererak kerita temaga ti dikena dalam Rumah Sembiang, lalu ngambi bisin ti ba kerita nya. Iya mega ngambi tangki temaga ari belakang dua belas iku sapi temaga, lalu ngengkahka tangki temaga nya ba sigi batu pemun. Lalu kena iya ngenyamaika ati raja menua Asiria, Ahas mega ngambi ari Rumah Sembiang panggau ti alai ngengkahka kerusi diraja, lalu nikupka pintu ti ditengah raja tama ngagai Rumah Sembiang. Semua utai bukai ti udah dikereja Raja Ahas bisi dituliska magang dalam Jerita Lama Pasal Raja Menua Judah. Ahas mati lalu dikuburka ba lumbung bala raja di Nengeri David, lalu anak iya Hesekiah nganti iya nyadi raja. Dalam taun ti kedua belas Raja Ahas merintah menua Judah, Hosea anak Elah berengkah nyadi raja menua Israel, lalu iya merintah di Samaria semilan taun. Iya bedosa ngelaban TUHAN, tang enda ngemalat bala raja ke merintah menua Israel dulu agi ari nya. Raja Besai Salmaneser menua Asiria nyerang iya. Hosea lalu nunduk ngagai Salmaneser, lalu mayar chukai tiap taun ngagai iya. Tang sekali Hosea ngirumka bala seruan iya betemu enggau Raja So menua Ejip, minta tulung ari iya. Hosea lalu badu agi mayar chukai ninting taun ngagai Asiria. Lebuh Salmaneser ninga pasal pekara nya, iya lalu ngasuh orang nangkap lalu nutup Hosea dalam rumah jil. Udah nya Salmaneser nyerang menua Israel, lalu ngelulung nengeri Samaria. Dalam taun ti ketiga sida ngelulung nengeri nya, iya nya taun ti kesemilan Hosea merintah, raja menua Asiria ngalahka nengeri Samaria, nabanka orang Israel nyadi orang tangkap ngagai menua Asiria, lalu ngasuh sekeda ari bala sida ngentapka diri di nengeri Halah, sekeda semak Sungai Habor, di pelilih menua Gosan, lalu sekeda ba mayuh bengkah nengeri di menua Media. Samaria alah laban orang Israel udah bedosa ngelaban TUHAN Allah Taala ti udah ngelepaska sida ari raja menua Ejip, lalu udah nguluka sida pansut ari menua Ejip. Sida udah nyembah petara bukai, niru adat asal orang ke udah diburu TUHAN lebuh bala nembiak Iya nyerang, lalu udah niru adat ti udah ditumbuhka bala raja orang Israel. Orang Israel udah ngereja utai ti enda disagi TUHAN Allah Taala sida. Sida begagaka endur alai orang kapir nyembah petara sida dalam semua nengeri sida, berengkah ari nengeri ti pemadu mit nyentuk ngagai nengeri ti pemadu besai. Ba sebelah munggu enggau di baruh semua kayu ti ngayung, sida nirika tiang batu, enggau engkeramba ke petara indu Aserah, lalu sida betunuka menyan ba semua alta petara orang kapir, orang ke udah diburu TUHAN ari menua nya. Sida nyungkak TUHAN ringat ketegal semua penyai pengawa sida, lalu enda ngasika pesan TUHAN ti nagang sida nyembah engkeramba. TUHAN udah ngasuh bala seruan enggau bala nabi Iya meri jaku tangkan ngagai orang Israel enggau ngagai orang Judah: “Lengkaka jalai kita ke jai, lalu diau ngasika pesan Aku, ti disimpan dalam Adat ti udah diberi Aku ngagai aki ini kita, lalu udah diserahka Aku ngagai kita ngena sida nabi ke nembiak Aku.” Tang sida enda ngasi. Sida kieh baka aki ini sida ke enggai manggaika pengarap sida ba TUHAN Allah Taala sida. Sida enda ngasika atur Iya. Sida enda nitihka sempekat ti udah digaga Iya enggau aki ini sida, lalu sida enda mendingka jaku tangkan Iya. Sida nyembah engkeramba ti nadai guna, lalu sida empu nyadi orang ke nadai guna. Sida nitihka adat asal orang bansa bukai ke ngelingi sida, lalu enda ngasika pesan TUHAN ti udah nagang sida betundaka orang bukai. Sida ngelanggar semua adat TUHAN Allah Taala sida, lalu ngaga dua iku anak sapi ti lelaki ari besi ngambika bisi disembah sida. Sida mega ngaga engkeramba petara indu Aserah, nyembah bintang, lalu betuaika petara Baal. Sida nyerahka anak lelaki enggau anak indu sida nyadika piring tunu. Sida betilitka nasit enggau beburung, lalu sida nyerahka diri ngereja penyai di mua TUHAN, lalu nyungkak Iya ringat. Nya alai, TUHAN balat amat ringat ngagai orang Israel, lalu muai sida ari menua nya, ngalau semina perintah menua Judah aja. Tang indah orang Judah deh enda ngasika adat TUHAN Allah Taala sida. Sida betundaka adat asal ti ditiru orang Israel. TUHAN udah nulak semua orang Israel, ngukum sida lalu nyerahka sida ngagai munsuh ti jai enggau sida, datai ke Iya muai sida ari mua Iya. Lebuh TUHAN udah nyeraraka orang Israel ari orang Judah, orang Israel lalu nyiri Jeroboam anak Nebat nyadi raja sida. Jeroboam mai sida ninggalka TUHAN, lalu nguluka sida ngagai dosa ti besai. Sida neladan Jeroboam, lalu majak ngereja semua dosa ti udah dikereja iya, datai ke ba pengujung iya, TUHAN muai sida ari menua nya, munyi ti udah disebut Iya dalam jaku tangkan ti udah diberi Iya ngena bala nembiak Iya, iya nya sida nabi. Nya alai orang Israel dibuai ngagai menua Asiria, alai sida ke agi diau nyentuk ngagai diatu. Raja menua Asiria mai orang ari nengeri Babilon, Kut, Iwah, Hamat, enggau nengeri Separbaim, lalu ngasuh sida ngentapka diri di nengeri dalam menua Samaria ngambi endur ari bala orang Israel ti udah dibuai ari menua nya lalu ditabanka ngagai menua bukai. Orang Asiria bempu nengeri nya, lalu diau dia. Lebuh sida terubah ngentapka diri dia, sida enda nyembah TUHAN. Nya alai Iya lalu ngasuh jelu singa datai lalu munuh sekeda bala sida. Raja menua Asiria lalu dipadahka pasal orang ke udah ngentapka diri di nengeri menua Samaria, ti enda nemu adat petara menua nya, ti ngasuh petara menua nya ngasuh jelu singa datai lalu munuh sida. Nya alai Raja lalu meri atur, “Bai pulai baru siku ari bala sida imam ti udah ditabanka kitu nyadi orang tangkap. Asuh iya pulai kin ke baru, lalu diau din, ngambika iya ngajar orang pasal adat petara menua nya.” Nya alai siku imam orang Israel ti udah dibuai ari menua Samaria ngagai menua Asiria, pulai lalu diau di Betel, alai iya ke ngajar orang mayuh jalai nyembah TUHAN. Tang orang ke ngentapka diri di menua Samaria majak begagaka engkeramba, lalu sida ngengkahka engkeramba nya dalam rumah sembiang ti udah digaga orang Israel. Genap bengkah raban sida nya bela begagaka engkeramba dalam nengeri ti alai sida diau: orang Babilon begagaka engkeramba petara Sukot-benot, orang Kut begagaka engkeramba Nergal, orang Hamat begagaka engkeramba Asima, orang Iwah begagaka engkeramba Nibhas enggau engkeramba Tatak, lalu orang Separbaim nyerahka anak sida nyadika piring tunu ngagai petara sida ke benama Adramelek enggau Anamelek. Bala orang tu mega nyembah TUHAN, lalu milih ari bala sida empu mayuh macham orang bekereja nyadi imam ba endur alai orang kapir nyembah petara sida, ngambika bisi ngenjuk piring ke sida ba endur nya. Nya alai sida nyembah TUHAN, tang sida mega nyembah petara sida empu, nitihka adat asal ari menua sida empu. Sida agi nitihka adat asal sida empu nyentuk ngagai sehari tu. Sida enda nyembah TUHAN, lalu sida pen enda mega ngasika adat enggau pesan ti diberi TUHAN ngagai peturun Jakop, ti udah diberi Iya nama Israel. TUHAN udah ngaga sempekat enggau orang Israel munyi tu, “Anang nyembah petara bukai. Anang meremi ngagai sida, tauka betuaika sida, tauka ngenjuk piring ngagai sida. Kita enda tau enda ngasika Aku ti TUHAN, ti udah mai kita pansut ari menua Ejip, ngena kuasa enggau pengering ti besai. Kita enda tau enda meremi, lalu ngenjuk piring ngagai Aku. Kita enda tau enda seruran ngasika adat enggau pesan ti udah ditulis Aku ke kita. Kita enda tau sekali-kali ngasika petara bukai, lalu kita enda tau enda ingatka sempekat ti udah digaga Aku enggau kita. Kita enda tau enda ngasika Aku ti TUHAN Allah Taala kita, nya baru Aku deka ngelepaska kita ari munsuh kita.” Tang bala orang ke ngentapka diri di menua Samaria enggai mending, lalu sida majak nitihka adat asal sida empu. Nya alai sida nyembah TUHAN, enggau nyembah engkeramba, lalu bala peturun sida nya agi mengkang ngereja nya nyentuk ngagai sehari tu. Dalam taun ti ketiga Hosea anak Elah nyadi raja menua Israel, Hesekiah anak Ahas berengkah nyadi raja menua Judah, lebuh umur iya dua puluh semilan taun. Indai iya Abijah anak Sekariah. Iya ngereja utai ti ngerinduka ati TUHAN, neladan aki iya Raja David. Iya ngerusak endur alai orang kapir nyembah petara sida, ngeredakka tiang batu, lalu nebang engkeramba petara indu Aserah. Iya mega ngeredakka ular temaga ti udah digaga Moses, ti dikumbai Nehustan. Nyentuk ngagai maya nya, orang Israel agi majak betunuka menyan kena sida masa ular temaga nya. Hesekiah manggaika pengarap iya ba TUHAN Allah Taala ke disembah orang Israel. Menua Judah nadai kala bisi raja ti baka iya, nemuka sebedau tauka udah lepas iya. Iya tetap ati ngagai TUHAN, lalu nadai kala enda ngasika Iya, tang bejimat ngereja semua pesan ti udah diberi TUHAN ngagai Moses. Nya alai TUHAN bisi enggau iya, lalu iya mujur dalam semua utai ti dikereja iya. Iya angkat ngelaban raja menua Asiria, lalu enggai nunduk ngagai raja nya. Iya ngalahka orang Pilistin, lalu nyerang palan alai sida diau, berengkah ari genturung pendiau ti pemadu mit nyentuk ngagai nengeri ti pemadu besai, nyengkaum Gasa enggau menua ti ngelingi nengeri nya. Dalam taun ti keempat Hesekiah merintah, iya nya taun ti ketujuh Raja Hosea merintah menua Israel, Raja Besai Salmaneser menua Asiria nyerang menua Israel, lalu ngelulung nengeri Samaria. Ketiga taun sida udah ngelulung Samaria, nengeri nya lalu alah. Tu taun ti keenam Hesekiah megai perintah, enggau taun ti kesemilan Hosea merintah. Raja besai menua Asiria nabanka orang Israel nyadi orang tangkap lalu ngasuh sekeda sida ngentapka diri di nengeri Halah, sekeda semak Sungai Habor di pelilih menua Gosan, lalu sekeda ba mayuh bengkah nengeri di menua Media. Samaria alah laban orang Israel enda ngasika TUHAN Allah Taala sida, tang ngelanggar sempekat ti udah digaga Iya enggau sida, lalu ngelanggar semua adat ti udah diberi Moses, ti nembiak TUHAN. Sida enggai mending, lalu sida enggai ngasi. Dalam taun ti keempat belas Raja Hesekiah megai perintah, Senakerip, raja menua Asiria, nyerang lalu ngalahka mayuh bengkah nengeri ti bekuta di menua Judah. Hesekiah lalu ngirumka pesan ngagai Senakerip, ke bisi di Lakis lebuh maya nya. Ku iya, “Aku udah ngereja utai ti salah. Aku minta nuan badu agi nyerang. Aku deka meri sebarang utai ti dipinta nuan.” Raja lalu nyaut, madahka Hesekiah patut ngirumka ngagai iya 10,000 kilogram pirak, enggau 1,000 kilogram emas. Hesekiah lalu ngirumka ngagai iya semua pirak ti dalam sarang reta Rumah Sembiang enggau dalam sarang wang ti di istana. Iya mega ngerebakka emas ari pintu Rumah Sembiang, enggau emas ti udah dikena iya empu nyampak tiang pintu. Iya lalu ngirumka semua utai nya ngagai Senakerip. Raja menua Asiria lalu ngasuh mayuh amat bala soldadu angkat ari Lakis mansang nyerang Hesekiah di Jerusalem. Bala soldadu nya diuluka tiga iku pemesai iya ke pemadu tinggi pangkat. Lebuh sida datai di Jerusalem, sida lalu diau ba jalai raya ba palan alai tukang kain bekereja ngimbai parit ti mai ai ari letung ti di atas. Udah nya sida mesanka Raja Hesekiah, lalu tiga iku pemesai Hesekiah pansut betemu enggau sida. Nama pemesai tiga iku nya, Eliakim anak Hilkiah, ti nyadi tuai ngemataka istana, Sebna, ti nyadi kerani raja, enggau Joah anak Asap, ti nyadi kerani menua. Siku ari pemesai orang Asiria lalu madahka ngagai sida pasal raja ke keran deka nemu utai ti ngasuh Hesekiah kempang ati baka nya. Ku iya, “Kati kita ngumbai leka jaku ulih nganti pengelandik beperang enggau pengering? Sapa dalam runding kita ulih nyaup kita angkat ngelaban Asiria? Kita ngarapka Ejip deka nyaup kita, tang nya baka orang ke betungkat ngena buluh ti patah, ti deka ngachuk jari iya. Nya meh gaya raja menua Ejip lebuh orang ngarapka iya.” Ku pemesai orang Asiria nya nampung jaku iya, “Kati kita madahka diri deka ngarapka TUHAN Allah Taala kita? Indah Hesekiah empu deh udah ngerusak rumah sembiang enggau alta TUHAN lebuh iya ngasuh orang Judah enggau orang ke diau di Jerusalem nyembah Allah Taala semina ba alta di Jerusalem aja. Aku deka betawar enggau kita dalam nama raja. Aku deka meri kita dua ribu iku kuda, enti kita bisi tetemuka orang ngemayuh nya nepan kuda nya! Indah pemesai orang Asiria ke pemadu baruh pangkat deh enda ulih dilaban kita, tang agi ga kita ngarapka orang Ejip ngirumka kerita perang enggau bala soldadu ke nepan kuda ngagai kita! Kati kita ngumbai TUHAN nadai udah nyaup aku nyerang lalu ngerusak menua kita? TUHAN Empu ti udah ngasuh aku nyerang lalu ngerusak menua kita.” Udah nya Eliakim, Sebna, enggau Joah lalu bejaku ngagai pemesai nya, “Tuan, kami minta nuan bejaku ngena jaku bansa Aram enggau kami, laban kami meretika jaku nya. Anang bejaku ngena jaku Hebrew, laban semua orang ke ba atas dinding kuta nya mending magang.” Ku pemesai nya nyaut, “Kati kita ngumbai raja semina ngasuh aku nyebut semua utai tu ngagai kita enggau ngagai raja aja? Ukai, aku mega bejaku ngagai bala orang ke duduk ba atas dinding kuta, ti deka makai tai lalu ngirup ai kemi diri baka kita empu.” Udah nya pemesai nya lalu bediri, lalu bejaku enggau nyawa ti inggar ngena jaku Hebrew, “Pendingka utai ti dipadahka raja menua Asiria ngagai kita! Iya meri jaku tangkan ngagai kita, enda ngasuh kita nejuka Hesekiah nipu kita, laban iya enda ulih ngelepaska kita ari jari aku. Lalu anang nejuka iya mujuk kita ngarapka TUHAN. Anang ngumbai TUHAN deka ngelepaska kita ari jari aku, lalu nagang bala soldadu kami orang Asiria ngalahka nengeri kita. Anang mendingka Hesekiah. Raja menua Asiria ngasuh kita pansut ari nengeri nya lalu nyerahka diri. Semua kita deka dikemendarka makai buah anggur ari batang anggur, enggau buah ara ari kayu ara kita empu, lalu ngirup ai ari telaga kita empu, nyentuk ngagai maya raja ngasuh kita ngentapka diri di menua ti sebaka enggau menua kita empu, ti bisi kebun anggur ti meri kita wain, enggau gandum kena kita ngaga roti. Menua nya mayuh minyak kana, enggau ai manyi. Enti kita ngereja utai ti diasuh iya, kita enda mati, tang idup. Anang nejuka Hesekiah nipu kita ngumbai TUHAN deka ngelepaska kita ari jari aku. Kati petara orang menua bukai udah bisi kala ngelepaska menua sida ari kuasa raja menua Asiria? Dini alai petara nengeri Hamat enggau petara nengeri Arpat diatu? Dini alai petara nengeri Separbaim, Hena enggau Iwah? Kati orang bisi udah ngelepaska Samaria? Kemaya petara semua menua nya bisi udah kala ngelepaska menua sida ari kuasa raja kami? Nya alai nama utai ti ngasuh kita ngumbai TUHAN ulih ngelepaska Jerusalem ari jari aku?” Bala orang mayuh enda bemunyi, nitihka asuh Raja Hesekiah. Sida nadai nyaut seleka. Udah nya, Eliakim, Sebna enggau Joah lalu nyarikka gari diri, lalu mansang madahka utai ti udah disebut pemesai orang Asiria ngagai sida. Lebuh Raja Hesekiah ninga utai ti dipadahka sida, iya lalu nyarikka gari diri, ngerasukka kain guni, lalu mansang ngagai Rumah Sembiang. Iya ngasuh Eliakim, pemesai ke ngemataka istana, Sebna ti nyadi kerani raja, enggau sida imam ti tinggi pangkat, betemu enggau nabi Isaiah anak Amos. Sida nya mega begari ngena kain guni. Tu pesan ti diasuh Raja Hesekiah bai sida ngagai Isaiah, “Tu hari pemerinsa. Kitai tu benung diukum lalu dipechat. Kitai nyau baka indu ke radai deka beranak, tang kelalu lemi tulang ngadaka anak. Raja besai menua Asiria udah ngasuh kepala pemesai iya mechat Allah Taala ti idup. Awakka TUHAN Allah Taala nuan ninga jaku pechat nya, lalu ngukum orang ke mechat nya. Nya alai, nuan enda tau enda besampika bala kitai ti agi idup.” Lebuh Isaiah nerima pesan nya ari Raja Hesekiah, iya lalu ngirumka saut tu, “ TUHAN madahka ngagai nuan, nuan enda tau nejuka orang Asiria ngemba kita ngena jaku ti ngumbai TUHAN enda ulih ngelepaska kita. TUHAN deka ngasuh raja nya ninga berita ngapa ti deka ngasuh iya pulai ngagai menua iya empu, lalu TUHAN deka ngasuh orang munuh iya din.” Pemesai orang Asiria nya pulai, lalu nemu raja udah angkat ari Lakis lalu benung nyerang nengeri Libnah ti enda jauh ari nya. Nya alai, iya mansang ngagai Libnah, deka betanya ngagai raja. Lebuh raja ninga berita pasal bala soldadu orang Ejip ke diuluka Raja Tirhakah menua Etiopia, benung mansang deka nyerang sida, iya lalu ngirumka bala seruan baru ngagai Raja Hesekiah madahka ngagai Hesekiah munyi tu: “Anang nejuka Allah Taala nuan nipu nuan madahka Jerusalem enda ulih dialahka raja menua Asiria. Nuan udah ninga pasal raja menua Asiria ti udah ngerusak semua menua. Kati nuan ngumbai diri deka dilepaska ari jari iya? Aki ini aku udah ngerusak nengeri Gosan, Haran, Resep, lalu munuh orang Beteden ti diau di Telesar, lalu nadai siku petara sida udah ulih ngelepaska sida. Dini alai raja nengeri Hamat, Arpat, Separbaim, Hena enggau Iwah?” Raja Hesekiah lalu nerima surat nya ari bala seruan, lalu macha iya. Udah nya iya lalu mansang ngagai Rumah Sembiang, ngerembaika surat nya di mua TUHAN, lalu besampi, “O TUHAN Allah Taala ke disembah orang Israel, ke duduk ba kerusi diraja Nuan atas melikat cherub ti besayap, Nuan aja ti Allah Taala, ke merintah semua perintah di dunya tu. Nuan udah ngaga dunya, enggau langit. Nya alai, TUHAN, peda Nuan utai ti nyadi ba kami. Dingaka semua jaku Senakerip ke mechat Nuan, Allah Taala ti idup. TUHAN, semua kami nemu, bala raja menua Asiria udah ngerusak mayuh bengkah bansa, ngasuh menua nya nadai agi diuan mensia, lalu nunu petara sida ke endang ukai petara, tang semina engkeramba ti digaga jari mensia ari kayu enggau ari batu. Nya alai, TUHAN Allah Taala kami, selamatka kami diatu ari orang Asiria, ngambika semua bansa di dunya tu nemu Nuan siku aja, O TUHAN, endang Allah Taala.” Udah nya Isaiah lalu ngirumka pesan ngagai Raja Hesekiah, madahka saut TUHAN ngagai sampi iya, munyi tu, “Nengeri Jerusalem ketawa sereta ngeleseka nuan, Senakerip. Sapa orang ke udah dipechat sereta dikeleseka nuan? Nuan enda bebasaka Aku ti kudus, Allah Taala ke disembah orang Israel. Nuan udah ngasuh bala seruan nuan temegah di mua Aku, madahka nuan udah ngalahka bukit ti pemadu tinggi di menua Lebanon ngena semua kerita perang nuan. Nuan udah temegah madahka diri udah nebang kayu sidar ti pemadu tinggi, enggau kayu saipris ti pemadu manah, lalu madahka diri udah datai ba puak utan. Nuan udah temegah madahka diri udah numbak telaga, lalu udah ngirup ai di menua bukai, lalu madahka kaki bala soldadu nuan udah ngindik Sungai Nile datai ke Sungai nya nyau rangkai. “Kati nuan nadai udah kala ninga pasal Aku ke lama udah ngelanggur semua utai nya? Diatu Aku udah ngereja nya. Aku udah meri ngagai nuan kuasa kena ngeruntuhka mayuh bengkah nengeri ti bekuta nyadi tugung batu. Orang ke diau di nengeri nya nadai pengering agi. Sida takut lalu temati-kutu. Sida baka rumput ti ba padang, tauka rumput ti tumbuh ba perabung rumah ti dipuputka ribut angat ti muput ari timur. “Tang Aku nemu semua utai pasal nuan, utai ti dikereja nuan, enggau tunga nuan bejalai. Aku nemu pemalat nuan ringat ngagai Aku. Aku udah dipadahka pasal pengeringat enggau pasal penyumbung nuan. Nya alai diatu Aku deka ngaitka mata ginti ba idung nuan, enggau batang besi dalam nyawa nuan, lalu mai nuan pulai baru nengah jalai ti udah ditengah nuan mansang.” Udah nya Isaiah lalu bejaku enggau Raja Hesekiah, “Tu tanda ti deka nyadi. Taun tu, enggau taun baru tu ila, kita deka makai semina gandum ti ulih kita ari babas, tang dalam taun ti ngentudika nya, kita deka nanam lalu ngetau gandum, nanam anggur lalu makai buah anggur. Orang ke agi idup di menua Judah deka nyadi baka utai ti ditanam, ti ngunjamka urat ke dalam tanah, lalu bebuah. Tang orang di Jerusalem enggau di Bukit Sion agi bisi idup, laban TUHAN endang udah mutuska runding Diri deka ngasuh utai nya nyadi. “Tu utai ti disebut TUHAN pasal raja menua Asiria: ‘Iya enda tama ngagai nengeri tu, tauka nimbakka laja ngagai nengeri tu. Nadai siku soldadu ke mai terabai deka datai semak nengeri tu, lalu nadai kuta tanah deka digaga ngelingi nengeri tu. Iya deka pulai niti jalai ti ditengah iya mansang, tang iya enda tama ngagai nengeri tu. Aku ti TUHAN udah bejaku. Aku deka nyaga lalu nyelamatka nengeri tu, ketegal nama Aku, enggau ketegal semaya ti udah digaga Aku enggau nembiak Aku David.’ ” Malam nya siku melikat TUHAN mansang ngagai kem orang Asiria, lalu munuh 185,000 iku soldadu. Tumu pagi hari siti, sida nyau betegaring mati! Udah nya raja Senakrip menua Asiria nyurutka diri, lalu pulai ngagai Nineweh. Nyadi sekali lebuh iya benung besembiang dalam rumah sembiang petara iya ke benama Nisrok, dua iku ari bala anak lelaki iya, Adramelek seduai Sareser, munuh iya ngena pedang seduai iya empu, lalu ngerarika diri ngagai menua Ararat. Siku ari bala anak lelaki iya ti bukai lalu nganti iya nyadi raja. Ba urung maya nya, Raja Hesekiah sakit, lalu nyau deka mati. Nabi Isaiah anak Amos datai ngabas iya, lalu ku iya bejaku enggau Raja Hesekiah, “ TUHAN ngasuh nuan ngemas semua pekara nuan, laban nuan deka mati, enda ulih gerai.” Hesekiah lalu nguingka mua diri ngagai dinding, lalu besampi, “ TUHAN, aku minta Nuan ingatka aku ti udah tetap ati sereta taluk betuaika Nuan, lalu aku endang seruran nguji ngereja utai ti diasuh Nuan.” Iya lalu nyabak balat amat. Isaiah lalu mupuk ari istana raja, tang sebedau iya meraka tengah laman ti ba tengah-tengah istana nya, TUHAN ngasuh iya pulai baru ngagai Hesekiah, ti nyadi raja ke bala nembiak TUHAN, lalu nyebut ngagai iya, “Aku, TUHAN Allah Taala aki nuan David, udah ninga sampi nuan, lalu udah meda ai mata nuan. Aku deka ngeraika nuan, lalu tiga hari da agi, nuan deka mansang ngagai Rumah Sembiang. Aku deka nejuka nuan idup lima belas taun da agi. Aku deka ngelepaska nuan enggau nengeri Jerusalem ari kuasa raja menua Asiria. Aku deka nyaga nengeri tu, ketegal nama Aku, enggau ketegal semaya ti udah digaga Aku enggau nembiak Aku David.” Udah nya Isaiah lalu ngasuh bala orang ke bekereja ke raja nampal pisa nya ngena buah ara ti udah ditutuk, ngambika iya gerai. Raja Hesekiah lalu nanya, “Nama tanda ti nunjukka TUHAN deka ngeraika aku, lalu aku ulih mansang ngagai Rumah Sembiang tiga hari da agi?” Disaut Isaiah, “ TUHAN deka meri nuan siti tanda kena nunjukka Iya deka ngamatka semaya Iya. Kati nuan dekaka ayuk ba tangga nya niki sepuluh iti tangkal, tauka surut sepuluh iti tangkal?” Ku Hesekiah nyaut, “Ngasuh ayuk nya mansang sepuluh iti tangkal ke mua nya nyamai dikereja! Asuh iya nyurutka ayuk nya sepuluh iti tangkal.” Isaiah lalu besampi ngagai TUHAN. TUHAN lalu ngasuh ayuk nya surut sepuluh iti tangkal ba tangga nya. Tangga nya digaga Raja Ahas. Ba urung maya nya, raja menua Babilon, ke benama Merodak Baladan, anak Baladan, bisi ninga berita pasal Raja Hesekiah ke sakit. Nya alai iya lalu ngirumka siti surat enggau pemeri ngagai Raja Hesekiah. Hesekiah ngelaluka bala seruan nya, lalu ngayanka pengaya iya ngagai sida: pirak enggau emas, rempah enggau minyak wangi, enggau semua senyata perang iya. Nadai utai ti dalam bilik setor iya, tauka ba endur bukai dalam menua ti diperintah iya, ti enda diayanka iya ngagai sida. Udah nya nabi Isaiah mansang ngagai Raja Hesekiah, lalu nanya, “Ari ni penatai bala orang tu, lalu nama utai ti disebut sida ngagai nuan?” Disaut Hesekiah, “Sida tu datai ari menua ti jauh, ari menua Babilon.” “Nama utai ti dipeda sida dalam istana?” “Sida meda semua utai. Nadai utai ti dalam bilik setor ti enda diayanka aku ngagai sida.” Udah nya Isaiah lalu madahka ngagai raja, “ TUHAN bisi bejaku madahka maya deka datai alai semua utai ti dalam istana nuan, semua utai ti udah ditaruh bala aki ini nuan nyentuk ngagai sehari tu, deka ditabanka magang ngagai menua Babilon. Nadai utai agi tinggal. Sekeda peturun ari tubuh nuan empu deka ditabanka, lalu diperiri ngambika sida ulih bekereja dalam istana raja menua Babilon.” Raja Hesekiah ngumbai utai tu nunjukka menua deka bisi pemaik enggau pengelikun lebuh iya agi idup. Nya alai ku iya nyaut, “Manah amat pesan TUHAN ti udah diberi nuan ngagai aku.” Semua utai bukai ti udah dikereja Raja Hesekiah, pemerani iya, enggau cherita pasal iya ke ngaga letung, sereta numbak lubang kena mai ai ngagai nengeri nya, bisi dituliska magang dalam Jerita Lama Raja Menua Judah. Hesekiah mati, lalu anak iya Manasi nganti iya nyadi raja. Manasi umur dua belas taun lebuh iya nyadi raja menua Judah, lalu iya merintah di Jerusalem lima puluh lima taun. Indai iya Hepsibah. Manasi bedosa ngelaban TUHAN laban iya nunda penyai pengawa ti udah dikereja bansa orang ke udah diburu TUHAN ari menua nya lebuh bala nembiak TUHAN nyerang. Iya ngaduka palan alai orang kapir nyembah petara sida, palan ti udah dirusak apai iya Hesekiah. Iya ngaduka alta alai orang nyembah Baal, lalu ngaga engkeramba petara indu Aserah, baka ke udah dikereja Raja Ahap menua Israel. Manasi mega nyembah bintang. Iya ngaga endur alai orang kapir nyembah petara sida dalam Rumah Sembiang, palan ti udah diletak TUHAN alai Iya patut disembah. Iya ngaga mayuh bengkah alta kena nyembah bintang ba dua iti tengah laman Rumah Sembiang. Iya nyerahka anak lelaki iya nyadika piring tunu; iya beburung; betanya ngagai orang ke ngumbai diri nemu bejaku enggau semengat orang ke udah mati, enggau betanya ngagai manang. Iya balat amat bedosa ngelaban TUHAN, lalu nya nyungkak TUHAN ringat. Iya ngengkahka tanda petara indu Aserah dalam Rumah Sembiang, palan ti udah dikenang TUHAN ngagai David enggau ngagai anak iya Solomon, munyi tu, “Di Jerusalem ditu, dalam Rumah Sembiang tu, meh endur ti udah dipilih Aku ari semua menua ti diempu dua belas raban bansa orang Israel, alai Aku disembah. Lalu enti orang Israel deka ngasika semua pesan Aku, lalu nitihka semua Adat ti udah diberi nembiak Aku Moses ngagai sida, nya baru Aku enda ngasuh sida diburu ari menua ti udah diberi Aku ngagai aki ini sida.” Tang orang Judah enda ngasika TUHAN, lalu Manasi nguluka sida ngereja dosa ti lebih besai agi ari ti udah dikereja bansa orang ke udah diburu TUHAN ari menua nya, lebuh bala nembiak Iya nyerang. Ku TUHAN bejaku ngena bala nabi Iya, “Raja Manasi udah ngereja utai ti jai, utai ti lebih agi jai ari utai ti udah dikereja orang Kanaan, lalu iya udah nguluka orang mayuh bedosa ngena engkeramba ti udah digaga iya. Nya alai, Aku, TUHAN Allah Taala ke disembah orang Israel, deka ngasuh penusah ti besai ninggang nengeri Jerusalem enggau menua Judah, datai ke semua orang ke ninga berita nya deka temati-kutu. Aku deka ngukum Jerusalem baka Aku ti udah ngukum Samaria, baka Aku ti udah ngukum Raja Ahap menua Israel, enggau bala peturun iya. Aku deka muai semua orang ari Jerusalem, ngambika nengeri tu nadai agi pengamah, baka chapak ti udah dikendas, lalu ditungkupka. Aku deka muai orang ke agi idup, lalu nyerahka sida ngagai munsuh ti deka ngalah sereta ngerampas utai ari menua sida. Aku deka ngereja nya ngagai bala nembiak Aku, laban sida udah bedosa ngelaban Aku, lalu udah nyungkak Aku ringat kenyau ari maya aki ini sida pansut ari menua Ejip kelia, nyentuk ngagai sehari tu.” Manasi udah munuh mayuh amat orang ke nadai penyalah, datai ke darah sida nyau rarat ba jalai raya nengeri Jerusalem. Iya ngereja nya kena nambahka pengawa iya ke nguluka orang Judah besembahka engkeramba, ti ngasuh sida bedosa ngelaban TUHAN. Semua utai bukai ti udah dikereja Manasi, nyengkaum dosa ti udah dikereja iya, bisi dituliska magang dalam Jerita Lama Pasal Raja Menua Judah. Manasi mati lalu dikuburka ba kebun istana, iya nya kebun Usa, lalu anak iya Amon nganti iya nyadi raja. Umur Amon dua puluh dua taun lebuh iya nyadi raja menua Judah, lalu iya merintah di Jerusalem dua taun. Indai iya Mesulemet anak Harus, ari nengeri Jotbah. Raja Amon mega bedosa ngelaban TUHAN baka apai iya. Iya neladan pengawa apai iya, lalu iya nyembah engkeramba ti udah disembah apai iya. Iya nulak TUHAN Allah Taala aki ini iya, lalu enda ngasika pesan TUHAN. Bala pemesai Amon bepekat ngelaban iya, lalu sida munuh iya dalam istana. Orang Judah lalu munuh orang ke munuh Amon, lalu ngasuh anak iya Josiah nyadi raja. Semua utai bukai ti udah dikereja Amon, bisi dituliska magang dalam Jerita Lama Pasal Raja Menua Judah. Amon dikuburka ba kubur ti dalam kebun Usa, lalu anak iya Josiah nganti iya nyadi raja. Umur Josiah lapan taun lebuh iya nyadi raja menua Judah, lalu iya merintah di Jerusalem tiga puluh satu taun. Indai iya Jedidah anak Adaiah ari nengeri Boskat. Josiah ngereja utai ti dikerinduka TUHAN. Iya nunda utai ti udah dikereja aki iya Raja David, terit ngasika semua adat Allah Taala. Dalam taun ti kelapan belas iya megai perintah, Raja Josiah ngasuh kerani raja, Sapan anak Asaliah, uchu Mesulam, mansang ngagai Rumah Sembiang. Ku iya, “Alai nuan mansang ngagai Imam Besai Hilkiah, lalu tanyaka penyampau duit ti udah dipupu bala imam ke bekereja ba mua pintu Rumah Sembiang, ari orang mayuh. Asuh iya meri duit nya ngagai orang ke nyadi tuai ngaduka Rumah Sembiang. Sida enda tau enda ngaji bala tukang kayu, orang ke ngaga rumah, enggau bala tukang batu, sereta meli ramu enggau batu kena ngaduka Rumah Sembiang. Orang ke nyadi tuai ngereja pengawa nya enda tau enda orang ke tau dikarapka, ngambika sida enda ibuh madahka chara sida ngena duit nya.” Sapan lalu mai atur raja ngagai Hilkiah. Hilkiah lalu madahka diri udah tetemuka Bup Adat dalam Rumah Sembiang, lalu meri bup nya ngagai Sapan. Sapan lalu macha bup nya. Udah nya iya lalu pulai ngagai raja, lalu madahka ngagai raja, “Bala orang gaji nuan udah ngambi duit ti dalam Rumah Sembiang, lalu udah nyuaka duit nya ngagai orang ke nyadi tuai ngaduka Rumah Sembiang.” Lalu ku iya bejaku, “Aku bisi siti bup ditu ti udah diberi Hilkiah ngagai aku.” Iya lalu macha bup nya enggau nyawa ti inggar di mua raja. Lebuh raja ninga bup nya dibacha, ati iya tusah, lalu iya nyarikka gari diri. Iya lalu meri atur ngagai Imam Hilkiah, Ahikam anak Sapan, Akbor anak Mikaiah, Sapan ti nyadi kerani raja, enggau ngagai Asaiah, ti nyadi penyaup raja, “Alai kita mupuk lalu betanya ngagai TUHAN ngarika aku, enggau ngarika semua orang Judah pasal ajar ti dalam bup tu. TUHAN ringat ngagai kitai laban aki ini kitai nadai udah ngereja utai ti patut dikereja nitihka bup tu.” Hilkiah, Ahikam, Akbor, Sapan enggau Asaiah lalu mansang betanya ngagai indu siku ke benama Huldah, iya nya siku nabi ti diau ba kandang nengeri Jerusalem ti baru apin lama udah tembu. (Laki iya Salum anak Tikbah, uchu Haras. Lalu iya tu nyadi tuai ngemataka baju panjai dalam Rumah Sembiang.) Sida madahka ngagai iya gaya utai ti udah nyadi. Huldah lalu ngasuh sida pulai ngagai raja, lalu meri ngagai iya pesan TUHAN, munyi tu, “Aku deka ngukum Jerusalem, enggau semua orang ke diau di nengeri nya, munyi ti udah ditulis dalam bup ti udah dibacha raja. Sida udah nulak Aku, lalu udah ngenjuk piring ngagai petara bukai, lalu semua utai ti udah dikereja sida udah ngeringatka ati Aku. Aku ringat ngagai Jerusalem, lalu pengeringat aku enda nemu padam. Nyadi pasal raja nya empu, tu utai ti disebut Aku, TUHAN Allah Taala ke disembah orang Israel: Nuan udah mendingka utai ti ditulis dalam bup nya, lalu nuan udah nesal ati, lalu udah ngemaruhka diri di mua Aku, nyarikka gari nuan, sereta nyabak, lebuh nuan udah ninga aku madahka Diri deka ngukum Jerusalem enggau orang ke diau dalam nengeri nya. Aku deka balat ngukum nengeri nya, lalu nama nengeri nya deka nyadika leka jaku sumpah. Tang Aku udah ninga sampi nuan, lalu ukum ti deka diasuh Aku ninggang Jerusalem enda nyadi sebedau nuan mati. Aku deka ngasuh nuan mati enggau selamat.” Bala sida lalu pulai mai pesan nya ngagai Raja Josiah. Raja Josiah lalu mesanka semua bala tuai orang Judah enggau bala tuai orang ke diau di Jerusalem. Sida lalu mansang ngagai Rumah Sembiang, disempulang bala imam enggau bala nabi, enggau semua orang mayuh ke kaya enggau ke seranta. Raja lalu macha, di mua semua sida, bup sempekat ti udah ditemu dalam Rumah Sembiang. Iya bediri ngimbai tiang ti besai ti diraja, lalu ngaga siti sempekat enggau TUHAN, madahka diri deka ngasika TUHAN, deka nitihka adat enggau pesan TUHAN enggau pengabis ati enggau semengat iya, lalu ngereja semua atur sempekat nya, munyi ti ditulis dalam bup nya. Semua orang mayuh lalu besemaya deka nitihka sempekat nya. Udah nya Josiah lalu ngasuh Imam Besai Hilkiah, bala imam ti nyadi penulung Hilkiah, enggau bala jejaga ke bekereja sehari nya ba mua pintu Rumah Sembiang, ngasuh sida mai ari Rumah Sembiang nya semua utai ti dikena nyembah Baal, petara indu Aserah, enggau kena nyembah bintang. Raja lalu nunu semua utai nya di luar nengeri, ba Lebak Kidron, lalu udah nya, ngasuh orang mai amau utai nya ngagai Betel. Iya lalu muai semua bala imam ti udah dichiri raja menua Judah ngenjuk piring ba alta orang kapir dalam menua Judah, enggau ba endur semak nengeri Jerusalem. Sida imam tu nyengkaum semua bala imam ti udah ngenjuk piring ngagai Baal, ngagai mata hari, ngagai bulan, enggau ngagai bintang. Iya muai tanda petara indu Aserah ari Rumah Sembiang, mai utai nya pansut ari nengeri nya, ngagai Lebak Kidron, nunu iya, nutuk iya nyadi amau, lalu naburka amau nya ba kubur orang mayuh. Iya ngerusak endur alai bala sundal diau dalam Rumah Sembiang TUHAN. (Rumah Sembiang tu endur alai bala indu ke nenun baju panjai ti dikena orang nyembah petara Aserah.) Iya mai ngagai Jerusalem bala imam ari mayuh bengkah nengeri di menua Judah, lalu ngamahka semua alta alai sida ke udah ngenjuk piring di serata menua Judah. Iya mega ngeruntuhka alta ti udah diserahka ngagai bala antu kambin semak pintu ti digaga Josua ti udah nyadi tuan gabenor ke nengeri nya. Alta nya muak ke kiba pintu ngagai nengeri nya. Bala imam nya enda tau bekereja dalam Rumah Sembiang, tang sida tau makai roti ti enda beragi, ti diberi ngagai orang bukai ti nyadi imam baka sida. Raja Josiah mega ngamahka Topet, iya nya endur alai orang kapir nyembah petara Molek ba Lebak Hinom, ngambika orang nadai ulih nyerahka anak lelaki tauka anak indu sida nyadika piring tunu ngagai petara nya. Iya mega muai kuda ti udah dikena bala raja menua Judah nyembah mata hari, lalu iya nunu kerita perang ti udah dikena nyembah mata hari. (Kerita perang nya ditaruh ba tengah laman Rumah Sembiang, semak pintu penama, enda jauh ari bilik ti alai Natan Melek, siku pemesai ti tinggi pangkat, diau.) Raja Josiah ngeruntuhka semua alta ti udah digaga raja orang Judah ba perabung istana, ari atas endur alai Raja Ahas diau, sama enggau alta ti udah digaga Raja Manasi ba dua iti tengah laman Rumah Sembiang. Iya ngeredakka semua alta nya, lalu nikauka sida ngagai Lebak Kidron. Josiah ngamahka semua alta ti di timur nengeri Jerusalem, ari selatan Bukit Pengerusak, ti udah digaga Raja Solomon alai nyembah petara indu Astarte orang Sidon, petara Kemos orang Moap, enggau petara Molek orang Amon. Raja Josiah ngeredakka tiang batu, nebang tanda petara indu Aserah, lalu ngelamun tanah ti udah alai tiang nya bediri, ngena tulang mensia. Josiah mega ngeruntuhka endur alai besembiang ti udah digaga Raja Jeroboam anak Nebat di Betel. Raja nya udah nguluka orang Israel bedosa. Josiah ngeruntuhka alta nya, ngeredakka batu alta nya, lalu nutuk batu nya nyadi amau. Iya mega nunu engkeramba Aserah. Udah nya Josiah malik, lalu tepedaka kubur ba bukit. Iya lalu ngasuh orang ngambi tulang ari kubur nya, lalu nunu tulang nya ba alta nya. Nya meh chara iya ngamahka alta nya. Iya ngereja utai ti udah disebut siku nabi lama dulu ari nya, ba maya gawai, lebuh Raja Jeroboam bediri ngimbai alta. Raja Josiah malik lalu tepedaka kubur nabi ti udah bejaku madahka utai nya deka nyadi. “Lumbung sapa nya?” ku iya nanya. Orang Betel lalu nyaut, “Nya lumbung siku nabi ari menua Judah ti udah madahka pasal utai ti dikereja nuan ngagai alta tu.” “Anang negu kubur nya,” ku Josiah bejaku. “Tulang iya enda tau dipindahka.” Nya alai tulang nabi nya enda dipindahka, lalu pia mega tulang nabi ti udah datai ari Samaria. Raja Josiah ngeruntuhka semua endur alai orang kapir nyembah petara sida. Palan nya udah digaga bala raja orang Israel ba genap bengkah nengeri di menua Israel, lalu utai nya udah nyungkak TUHAN ringat. Raja Josiah ngeruntuhka semua alta nya baka ke udah dikereja iya di Betel. Iya munuh semua bala imam orang kapir ba alta alai sida ke bekereja, lalu nunu tulang mensia ba semua alta nya. Udah nya iya pulai ngagai Jerusalem. Raja Josiah lalu ngasuh orang mayuh ngintu Gawai Paska kena ngemesaika TUHAN Allah Taala sida, munyi ti ditulis dalam bup sempekat. Nadai Gawai Paska ti baka nya udah kala diintu sida raja menua Israel tauka sida raja menua Judah, kenyau ari maya menua nya diperintah bala pengulu dulu kelia. Nya alai diatu, dalam taun ti kelapan belas Josiah megai perintah, Gawai Paska tu diintu di Jerusalem. Kena iya neritka adat ti ditulis dalam bup ti udah ditemu Imam Besai Hilkiah dalam Rumah Sembiang, Raja Josiah lalu muru ari Jerusalem enggau ari semua menua Judah, semua orang ke bejaku enggau semengat orang ke udah mati, enggau semua orang ke betilitka nasit, semua petara ruang bilik, engkeramba, enggau semua utai ti disembah orang kapir. Nadai raja ti dulu menya bisi udah kala betuaika TUHAN enggau pengabis ati, pengabis runding, enggau pengabis pengering iya, ngasika semua Adat Moses, baka Raja Josiah. Udah lepas iya pen nadai ga raja ti sebaka enggau iya. Tang TUHAN udah balat ringat ngagai orang Judah ketegal utai ti udah dikereja Raja Manasi. Indah diatu deh pengeringat TUHAN apin padam. Ku TUHAN bejaku, “Aku deka ngereja menua Judah baka ke udah dikereja Aku ngagai menua Israel. Aku deka muai orang Judah ari mua Aku, lalu Aku deka nulak Jerusalem, nengeri ti udah dipilih Aku, enggau Rumah Sembiang, endur ti udah diletak Aku alai Aku patut disembah.” Semua utai bukai ti udah dikereja Raja Josiah bisi dituliska magang dalam Jerita Lama Bala Raja Menua Judah. Lebuh Josiah agi nyadi raja, Raja Neko menua Ejip nguluka bala soldadu iya mansang ngagai Sungai Eupratis, deka nulung raja menua Asiria. Raja Josiah nguji nagang bala soldadu orang Ejip di Megido, lalu iya mati ba perang nya. Bala pemesai iya lalu ngengkahka bangkai iya dalam sebuah kerita perang, lalu mai bangkai nya ngagai Jerusalem, alai iya ke lalu dikuburka ba lumbung bala raja. Orang Judah lalu milih anak Josiah ke benama Joahas nyadi raja, lalu sida nata iya. Umur Joahas dua puluh tiga taun lebuh iya nyadi raja menua Judah, lalu iya merintah di Jerusalem tiga bulan. Indai iya Hamutal anak Jeremiah, ari nengeri Libnah. Iya bedosa ngelaban TUHAN baka bala aki ini iya. Iya badu agi merintah lebuh Raja Neko menua Ejip nangkap iya di Riblah, di menua Hamat, lalu mejalka orang Judah mayar 3,409 kilogram pirak enggau 34 kilogram emas nyadika chukai. Raja Neko ngasuh Eliakim anak Josiah empu nyadi raja nganti Josiah, lalu ngubah nama iya ngagai Jehoiakim. Joahas dibai Raja Neko ngagai menua Ejip, lalu iya mati di menua nya. Raja Jehoiakim ngumpul chukai ari orang mayuh nitihka pengaya sida, kena iya ngulihka duit kena mayar chukai ti dipinta raja menua Ejip. Umur Jehoiakim dua puluh lima taun lebuh iya nyadi raja menua Judah, lalu iya merintah di Jerusalem sebelas taun. Indai iya Sebidah anak Pedaiah ari nengeri Rumah. Jehoiakim bedosa ngelaban TUHAN baka aki ini iya. Lebuh Jehoiakim nyadi raja, Raja Nebukadnesar menua Babilon nyerang menua Judah. Jehoiakim nunduk ngagai Raja Nebukadnesar tiga taun. Udah nya iya angkat ngelaban Nebukadnesar. TUHAN ngasuh bala soldadu orang Babilon, orang Siria, orang Moap enggau orang Amon ngelaban Jehoiakim ngambika sida ngerusak menua Judah, munyi ti udah disebut TUHAN ngena bala nabi Iya. Utai tu nyadi nitihka pesan TUHAN, kena Iya muai orang Judah ari menua nya, ketegal semua dosa ti udah dikereja Raja Manasi, kelebih agi laban iya udah munuh mayuh amat orang ke nadai penyalah. TUHAN enggai ngampun iya ketegal penyalah nya. Semua utai ti udah dikereja Jehoiakim bisi dituliska magang dalam Jerita Lama Pasal Raja Menua Judah. Jehoiakim mati, lalu anak iya Jehoiakin nganti iya nyadi raja. Raja menua Ejip enggau bala soldadu iya nadai agi nyerang, laban raja menua Babilon diatu merintah semua menua ti udah dipegai menua Ejip, berengkah ari Sungai Eupratis nyentuk ngagai garis entara menua di utara menua Ejip. Umur Jehoiakin lapan belas taun lebuh iya nyadi raja menua Judah, lalu iya merintah di Jerusalem tiga bulan. Indai iya Nehusta anak Elnatan ari Jerusalem. Jehoiakin bedosa ngelaban TUHAN baka apai iya empu. Lebuh iya megai perintah, bala soldadu orang Babilon, diuluka bala pemesai Raja Nebukadnesar, datai nyerang Jerusalem lalu ngelulung nengeri nya. Lebuh bala soldadu nya ngelulung nengeri nya, Nebukadnesar empu datai di Jerusalem. Raja Jehoiakin, enggau indai iya, anak iya, bala pemesai iya, enggau bala pemesai ke ngemataka istana, nunduk magang ngagai bala soldadu orang Babilon. Nebukadnesar nangkap Jehoiakin dalam taun ti kelapan Nebukadnesar nyadi raja. Iya lalu nabanka semua pengaya ari Rumah Sembiang, enggau ari istana, ngagai menua Babilon. Munyi ti udah dipadahka TUHAN sebedau utai nya nyadi, Nebukadnesar mechahka semua pekekas ti digaga ari emas ti udah digaga Raja Solomon ke Rumah Sembiang. Nebukadnesar nabanka sepuluh ribu iku orang ari Jerusalem, nyengkaum semua orang ke tinggi pangkat, nyadi orang tangkap. Iya mega muai ari menua nya semua orang ke landik bekereja, nyengkaum tukang besi. Semina orang ke pemadu seranta aja ditinggalka iya di menua Judah. Nebukadnesar mai Jehoiakin nyadi orang tangkap ngagai menua Babilon, sama enggau indai Jehoiakin, bala bini iya, bala pemesai iya, enggau orang ke tinggi pangkat di menua Judah. Nebukadnesar muai ari menua nya ngagai menua Babilon tujuh ribu iku orang ke tinggi pangkat, seribu iku orang ke landik bekereja, nyengkaum semua tukang besi. Semua sida nya orang ke bepengerai lalu tau nyadi soldadu magang. Nebukadnesar ngasuh aya Jehoiakin ke benama Mataniah nyadi raja menua Judah, lalu iya mindahka nama Mataniah ngagai Sedekiah. Umur Sedekiah dua puluh satu taun lebuh iya nyadi raja menua Judah, lalu iya merintah di Jerusalem sebelas taun. Indai iya Hamutal anak Jeremiah ari nengeri Libnah. Raja Sedekiah bedosa ngelaban TUHAN, baka Raja Jehoiakin. TUHAN balat amat ringat ngagai orang di Jerusalem enggau ngagai orang di menua Judah, datai ke Iya nyau muai sida ari menua nya. Sedekiah angkat ngelaban Raja Nebukadnesar menua Babilon. Nebukadnesar lalu datai enggau bala soldadu iya, lalu nyerang Jerusalem kena sepuluh hari bulan ti kesepuluh dalam taun ti kesemilan Sedekiah megai perintah. Orang Babilon nirika kem sida ari luar nengeri nya, ngaga kuta kena ngelulung nengeri nya, lalu ngelulung nengeri nya datai ke taun ti kesebelas Sedekiah nyadi raja. Kena semilan hari bulan ti keempat taun nya, lebuh orang balat amat keberuran laban sida nyau nadai agi utai diempa, dinding kuta nengeri nya lalu ulih kebus laban munsuh. Tang taja pen orang Babilon ngelulung nengeri nya, semua bala soldadu orang Judah ulih ngerarika diri magang malam nya. Sida rari nengah kebun raja, bejalai nengah pintu ti ba entara dua iti dinding kuta, lalu rari tunga ngagai Lebak Jordan. Tang bala soldadu orang Babilon begagaika Raja Sedekiah, lalu nangkap iya ba emperan semak Jeriko. Semua bala soldadu iya lalu ninggalka iya. Sedekiah lalu dibai ngagai Raja Nebukadnesar ba nengeri Riblah. Dia Nebukadnesar lalu ngeletak iya diukum. Bala anak lelaki Sedekiah lalu dibunuh di mua Sedekiah empu. Udah nya Nebukadnesar lalu ngasuh orang ngeruk leka mata Sedekiah, nanchang iya ngena rantai, lalu mai iya ngagai menua Babilon. Kena tujuh hari bulan ti kelima dalam taun ti kesemilan belas Raja Nebukadnesar udah merintah menua Babilon, Nebusaradan, ti nyadi penyanding penemu raja sereta nyadi tuai soldadu, tama ngagai nengeri Jerusalem. Iya nunu Rumah Sembiang, istana enggau rumah semua orang ke tinggi pangkat di Jerusalem lalu bala soldadu iya ngeruntuhka dinding kuta nengeri nya. Udah nya Nebukadnesar lalu nabanka orang ke agi tinggal di nengeri nya ngagai menua Babilon. Iya mega nabanka bala orang ke landik gawa, ti agi tinggal, enggau orang ke udah ngerarika diri lalu ngalih ari bala soldadu orang Babilon. Tang iya ninggalka orang ke pemadu seranta di menua Judah, orang ke nadai reta tengkira, lalu ngasuh sida bekereja dalam kebun anggur, enggau ba umai. Orang Babilon lalu mechahka tiang temaga, enggau kerita surung ti dalam Rumah Sembiang, sama enggau tangki temaga siti ti besai, lalu nabanka semua temaga nya ngagai menua Babilon. Sida mega nabanka pengauk enggau sarang amau ti dikena nuchi alta, pekekas ti dikena nungkun lampu, mangkuk ti dikena nimbun darah ari piring, mangkuk alai nunu menyan, enggau semua pekekas bukai ti digaga ari temaga ti dikena ngereja pengawa dalam Rumah Sembiang. Sida nabanka semua utai ti digaga ari emas tauka pirak, nyengkaum mangkuk ti mit enggau talam kena mai bara api. Utai ti digaga Solomon ari temaga ke Rumah Sembiang, iya nya dua batang tiang, kerita surung, enggau tangki ti besai, nya kelalu besai ditimbang. Tiang ti dua batang nya sebaka tukuh. Peninggi siti-siti tiang nya 8 meter, lalu puchuk iya disangkum ngena temaga. Peninggi siti-siti sangkum nya 1.3 meter. Siti-siti sangkum nya dibelit ngena ukir buah delima ti digaga ari temaga. Nambahka nya, Nebusaradan, pemesai ti nyadi tuai soldadu, mai Imam Besai Seraiah, imam ke lumur dua nangkanka Sepaniah, enggau tiga iku agi pemesai ari Rumah Sembiang. Iya ngambi ari nengeri nya siku pemesai soldadu ti udah nyadi tuai soldadu, lima iku penyanding penemu raja ti agi di nengeri nya, penulung tuai soldadu ke nyimpan cherita pasal pengawa soldadu, enggau enam puluh iku orang bukai ti tinggi pangkat. Nebusaradan mai sida ngagai raja menua Babilon ti agi benung di Riblah di menua Hamat. Raja nya lalu ngasuh sida dipalu lalu dibunuh. Nya alai orang Judah dibuai ari menua sida lalu ditabanka ngagai menua Babilon. Raja Nebukadnesar menua Babilon ngeletak Gedaliah anak Ahikam, uchu Sapan, nyadi tuan gabenor menua Judah, lalu ngasuh iya nyadi tuai ke semua orang ke enda ditabanka ngagai menua Babilon. Lebuh bala pemesai soldadu, enggau soldadu orang Judah ti enda nunduk ninga pasal nya, sida lalu mansang ngagai Gedaliah di Mispah. Bala pemesai nya nyengkaum Ismail anak Netaniah, Johanan anak Kareah, Seraiah anak Tanhumet ari nengeri Netopah, enggau Jesaniah ari Maakah. Ku Gedaliah bejaku enggau sida, “Aku madahka ngagai kita, kita enda tau takutka bala pemesai orang Babilon. Diau mendam di menua tu, bekereja ke raja menua Babilon. Nya baru kita enda kena laban penusah.” Tang dalam bulan ti kesebelas taun nya, Ismail anak Netaniah, uchu Elisama, siku raban ari ruang bilik raja, mai sepuluh iku orang mansang ngagai Mispah, ngamuk Gedaliah, lalu munuh iya. Iya mega munuh orang Israel enggau orang Babilon ke bisi dia enggau Gedaliah. Udah nya semua orang Israel, ke kaya enggau ke seranta, enggau bala pemesai soldadu, angkat lalu mansang ngagai menua Ejip, laban sida takutka orang Babilon. Dalam taun Ebilmerodak nyadi raja menua Babilon, iya ngelepaska Raja Jehoiakin menua Judah ari rumah jil, kena iya ngayanka penelap iya ngagai raja Jehoiakin. Utai tu nyadi kena dua puluh tujuh hari bulan ti kedua belas, tiga puluh tujuh taun udah bekau Jehoiakin ditabanka nyadi orang tangkap. Ebilmerodak nelap enggau iya, lalu masa iya lebih agi ari iya ke masa raja bukai ti udah dibuai enggau iya ngagai menua Babilon. Nya alai Jehoiakin dikemendarka nukar gari ti dikena iya dalam rumah jil ngagai gari iya empu, lalu makai enggau raja sepemanjai umur iya. Genap hari, sekumbang iya ti agi idup, iya diberi elaun kena iya meli utai ti dipeguna iya. Adam, Set, Enos, Kenan, Mahalalel, Jaret, Enok, Metuselah, Lamek, Noah, Sem, Ham, enggau Japet. Bala peturun Japet: Gomer, Magok, Madai, Jaban, Tubal, Mesek, enggau Tiras. Bala peturun Gomer: Askenas, Ripat, enggau Togarmah. Bala peturun Jaban: Elisah, Spain, Saiprus, enggau Rod. Bala peturun Ham: Kus, Ejip, Libia, enggau Kanaan. Bala peturun Kus: Seba, Habilah, Sabtah, Ramah, enggau Sabteka. Bala peturun Ramah: Sheba enggau Dedan. ( Kus bisi anak lelaki siku benama Nimrot. Nimrot tu orang ke terubah-rubah ngalahka menua di dunya tu.) Bala peturun Ejip nya orang Lidia, Anam, Lehap, Naptuh, Patrus, Kasluh enggau Krit (ke nurunka orang Pilistin). Dua iku anak lelaki Kanaan - Sidon, anak tuai iya, enggau Het - nyadi aki ini bansa orang ke ngangkatka nama sida. Kanaan mega nyadi aki ini orang Jebus, orang Amor, orang Girgas, orang Ibi, orang Arkit, orang Sin, orang Arbat, Semar, enggau orang Hamat. Bala peturun Sem: Elam, Asur, Arpaksat, Lut, Aram, Us, Hul, Geter, enggau Mesek. Arpaksat nya apai Selah, lalu Selah nya apai Eber. Eber bisi dua iku anak lelaki. Siku benama Pelek, laban lebuh maya nya orang di dunya tu udah bepechah-belah, lalu nama siku nya Joktan. Bala peturun Joktan nya orang Almodat, orang Selep, Hasarmabet, Jerah, Hadoram, Usal, Diklah, Ebal, Abimail, Sheba, Opir, Habilah, enggau Jobap. Purih ari Sem ngagai Abram nya baka tu: Sem, Arpaksat, Selah, Eber, Pelek, Reu, Seruk, Nahor, Terah, enggau Abram (mega dikumbai Abraham). Abraham bisi dua iku anak lelaki, Isak seduai Ismail. Bala anak Ismail nyadi tuai ke dua belas raban bansa: Nebaiot (ngangkatka nama anak tuai Ismail), Kedar, Adbil, Mipsam, Misma, Dumah, Masa, Hadat, Tema, Jetur, Napis, enggau Kedemah. Nyadi Abraham bisi siku indu simpan benama Keturah, ke ngadaka enam iku anak lelaki ke Abraham: Simram, Joksan, Medan, Midian, Isbak, enggau Suah. Joktan bisi dua iku anak lelaki: Sheba seduai Dedan. Midian bisi lima iku anak lelaki: Epah, Eper, Hanok, Abida enggau Eldaah. Anak Abraham ke benama Isak bisi dua iku anak lelaki: Esau seduai Jakop. Anak lelaki Esau nya Elipas, Reuel, Jeus, Jalam enggau Korah. Elipas nurunka raban bansa Teman, Omar, Sepi, Gatam, Kenas, Timna, enggau Amalek. Lalu Reuel nurunka raban bansa Nahat, Serah, Samah, enggau Misah. Orang bansa Edom dibagi ngagai suku raban bansa Timna, Albah, Jetet, Oholibamah, Elah, Pinon, Kenas, Teman, Mipsar, Magdil, enggau Iram. Jakop bisi dua belas iku anak lelaki: Reuben, Simeon, Lewi, Judah, Isakar, Sebulun, Dan, Josep, Benjamin, Naptali, Gat, enggau Aser. Judah bisi lima iku anak lelaki. Bini iya ke benama Batsua, indu orang Kanaan, ngadaka tiga iku anak lelaki ke Judah: Er, Onan, enggau Selah. Anak tuai iya ke benama Er, jai amat ulah, datai ke TUHAN nyau munuh iya. Menantu iya Tamar ngadaka dua iku anak lelaki ke Judah: Peres seduai Serah. Peres bisi dua iku anak lelaki: Hesron seduai Hamul. Menyadi iya Serah bisi lima iku anak lelaki: Simri, Etan, Heman, Kalkol, enggau Darda. Achan anak Karmi, siku ari peturun Serah, udah ngasuh penusah ti besai ninggang orang Israel, laban iya bisi nyimpan utai ti udah diserahka ngagai Allah Taala. Etan bisi siku anak lelaki. Nama iya Asariah. Hesron bisi tiga iku anak lelaki: Jerahmil, Ram, enggau Kalep. Tusun purih ari Ram nyentuk ngagai Jesi nya baka tu: Ram, Aminadap, Nason (orang ke tebilang ari raban bansa Judah), Salmon, Boas, Obet, enggau Jesi. Jesi bisi tujuh iku anak lelaki. Baka tu ku nama sida belabuh ari sida ke tuai ngagai sida ke biak: Eliap, Abinadap, Samah, Netanel, Radai, Osem, enggau David. Iya mega bisi dua iku anak indu: Seruiah seduai Abigail. Anak indu Jesi ke benama Seruiah bisi tiga iku anak lelaki: Abisai, Joap, enggau Asahel. Anak indu iya ke benama Abigail jadi enggau Jeter, siku orang ari peturun Ismail, lalu seduai iya bisi anak lelaki siku benama Amasa. Anak lelaki Kalep ke benama Hesron jadi enggau Asubah, lalu bisi anak indu siku benama Jeriot. Iya bisi tiga iku anak lelaki: Jeser, Sobap, enggau Ardon. Udah bekau pemati Asubah, Kalep lalu jadi enggau Eprat, lalu seduai iya bisi siku anak lelaki benama Hur. Nama anak Hur nya Uri, lalu nama uchu iya Besalel. Lebuh Hesron umur enam puluh taun, iya jadi enggau anak indu Machir, menyadi indu Giliat. Seduai iya bisi siku anak lelaki benama Segup, lalu Segup bisi siku anak lelaki benama Jair. Jair merintah dua puluh tiga buah nengeri di menua Giliat. Tang perintah menua Gesur enggau Aram ngalahka enam puluh buah nengeri di menua nya, nyengkaum Tumpuk Pendiau Jair enggau genturung pendiau ti ngelingi Kenat, enggau nengeri ti ngelingi nya dia. Semua orang ke diau dia endang peturun Machir apai Giliat magang. Lebuh Hesron mati, anak iya Kalep jadi enggau Eprat, balu niang apai iya. Seduai iya bisi siku anak lelaki benama Asur. Asur tu orang ke nirika nengeri Tekoa. Jerahmil, anak tuai Hesron, bisi lima iku anak lelaki: Ram, anak tuai iya, Bunah, Oren, Osem, enggau Ahijah. Onam bisi dua iku anak lelaki: Samai seduai Jada. Samai mega bisi dua iku anak lelaki: Nadap seduai Abisur. Abisur jadi enggau siku indu ke benama Abihail, lalu seduai iya bisi dua iku anak lelaki: Aban seduai Molit. Menyadi Abisur ke benama Nadap bisi dua iku anak lelaki: Selet seduai Apaim, tang Selet mati nadai anak lelaki. Apaim nya apai Ihsi, Ishi nya apai Sesan, lalu Sesan nya apai Ahlai. Jada, menyadi lelaki Samai, bisi dua iku anak lelaki: Jeter seduai Jonatan, tang Jeter mati nadai anak lelaki. Jonatan bisi dua iku anak lelaki: Pelet seduai Sasa. Semua sida nya peturun Jerahmil magang. Sesan nadai anak lelaki, semina anak indu aja. Iya bisi siku orang Ejip nyadika orang gaji iya, nama orang nya Jara. Iya lalu ngasuh Jara jadi enggau siku ari bala anak indu iya. Seduai nya lalu bisi siku anak lelaki benama Atai. Tusun purih ari Atai nyentuk ngagai Elisama nya baka tu: Atai, Natan, Sabat, Epal, Obet, Jehu, Asariah, Heles, Eleasah, Sismai, Salum, Jekamiah, enggau Elisama. Anak tuai Kalep, iya nya menyadi Jerahmil, benama Mesa. Mesa nya apai Sip. Sip nya apai Maresah, lalu Maresah nya apai Hebron. Hebron bisi empat iku anak lelaki: Korah, Tapuah, Rekem, enggau Sema. Sema nya apai Raham, aki Jorkeam. Menyadi lelaki Sema ke benama Rekem, nya apai Samai. Samai nya apai Maon, lalu Maon nya apai Bet-sur. Kalep bisi siku indu simpan benama Epah. Epah ngadaka tiga iku agi anak lelaki ke Kalep: Haran, Mosa, enggau Gases. Haran mega bisi siku anak lelaki benama Gases. ( Siku lelaki ke benama Jadai bisi enam iku anak lelaki: Regem, Jotam, Gesan, Pelet, Epah, enggau Sap.) Kalep bisi siku agi indu simpan benama Maakah. Maakah ngadaka dua iku anak lelaki ke Kalep. Nama seduai nya Seber enggau Tiranah. Udah nya Maakah ngadaka dua iku agi anak lelaki: Sap, ke nirika nengeri Matmanah, enggau Sebah ke nirika nengeri Makbenah enggau nengeri Gibea. Nambahka nya, Kalep bisi siku anak indu benama Aksah. Sida tu mega peturun Kalep: Hur, anak tuai Kalep enggau bini iya Eprat. Anak Hur ke benama Sobal nirika nengeri Kiriat-jearim. Anak lelaki iya ke lumur dua nirika nengeri Betlehem, lalu anak iya ke lumur tiga nirika nengeri Bet-gader. Sobal, orang ke nirika nengeri Kiriat-jearim, nurunka orang Haroeh, setengah ari orang ke nguan Menuhot, sereta nurunka raban peturun ti diau di Kiriat-jearim, iya nya orang Itri, Put, Sumat, enggau Misra. (Orang ke diau di nengeri Sorah enggau nengeri Esta-ol nya ari raban bansa tu magang.) Salma, orang ke nirika nengeri Betlehem, nurunka orang Netopat, orang Atrot, Bet Joap, enggau orang Sori, sebengkah ari dua bengkah raban peturun ti diau di Manahat. ( Raban peturun ti landik nulis enggau landik nyalinka surat diau di nengeri Jabes. Sida nya orang Tirat, orang Simiat, enggau orang Sukat. Sida tu orang Ken ti udah jadi enggau bansa orang Rekap.) Semua sida enam iku tu diadaka di Hebron magang lebuh David merintah dia tujuh taun setengah. Iya merintah nyadi raja di Jerusalem tiga puluh tiga taun lalu mayuh anak lelaki diadaka dia. Bini iya Batseba anak Amil, ngadaka empat iku anak lelaki: Simea, Sobap, Natan, enggau Solomon. Iya bisi semilan iku anak lelaki ti bukai: Ibar, Elisua, Elpelet, Nogah, Nepek, Japia, Elisama, Eliada, enggau Elipelet. Nambahka bala sida nya, David mega bisi anak lelaki ke diadaka bala indu simpan iya. Iya mega bisi siku anak indu benama Tamar. Tu ripih peturun Raja Solomon, ari apai ngagai anak: Solomon, Rehoboam, Abijah, Asa, Jehosapat, Jehoram, Ahasiah, Joas, Amasiah, Usiah, Jotam, Ahas, Hesekiah, Manasi, Amon, enggau Josiah. Josiah bisi empat iku anak lelaki: Johanan, Jehoiakim, Sedekiah, enggau Joahas. Jehoiakim bisi dua iku anak lelaki: Jehoiakin, enggau Sedekiah. Tu peturun Raja Jehoiakin, iya nya raja ti udah ditabanka orang Babilon nyadi orang tangkap. Jehoiakin bisi tujuh iku anak lelaki: Sealtiel, Malkiram, Pedaiah, Senesar, Jekamiah, Hosama, enggau Nedabiah. Pedaiah bisi dua iku anak lelaki: Serubabel enggau Simei. Serubabel bisi dua iku anak lelaki, Mesulam enggau Hananiah, enggau siku anak indu ke benama Selomit. Iya bisi lima iku agi anak lelaki: Hasubah, Ohel, Berekiah, Hasadiah, enggau Jusap Heset. Hananiah bisi dua iku anak lelaki: Lepatiah seduai Jesaiah. Jesaiah nya apai Repahai. Repaiah nya apai Arnan, Arnan apai Obadiah, Obadiah apai Sekaniah. Sekaniah bisi siku anak lelaki benama Semaiah, enggau lima iku uchu lelaki: Hatus, Igal, Bariah, Niriah, enggau Sapat. Niriah bisi tiga iku anak lelaki: Elioenai, Hiskiah, enggau Asrikam. Elioenai bisi tujuh iku anak lelaki: Hodabiah, Eliasip, Pelaiah, Akup, Johanan, Delaiah, enggau Anani. Tu nama sekeda peturun Judah: Peres, Hesron, Karmi, Hur, enggau Sobal. Sobal nya apai Reaiah, ti nyadi apai Jahat, Jahat nyadi apai Ahumai seduai Lahat, iya nyadi aki ini orang ke diau di Sorah. Asur, orang ke nirika nengeri Tekoa, bisi dua iku bini: Helah seduai Narah. Asur seduai Narah bisi empat iku anak lelaki: Ahusam, Heper, Temeni, enggau Hahastari. Asur seduai Helah bisi tiga iku anak lelaki: Seret, Isar, enggau Etnan. Kos nya apai Anup seduai Sobebah, lalu iya nyadi aki ini ke raban peturun ti diturunka Aharhel anak Harum. Bisi orang siku benama Jabes, ke balat dibasa orang. Indai iya udah meri iya nama Jabes, laban iya mar ada. Tang Jabes besampi ngagai Allah Taala ke disembah orang Israel. Ku iya, “Berekatka aku, Allah Taala, lalu beri aku mayuh tanah. Diau enggau aku, lalu jaga aku ari semua utai ti jai, ti tau ngemediska aku.” Lalu Allah Taala meri iya utai ti dipinta iya. Kalep, menyadi Suhah, bisi siku anak lelaki. Nama iya Mehir. Mehir nya apai Eston. Eston bisi tiga iku anak lelaki: Betrapa, Pasih, enggau Tehinah. Tehinah nya orang ke nirika nengeri Nahas. Bala peturun orang tiga iku tu diau di Rekah. Kenas bisi dua iku anak lelaki: Otnil enggau Seraiah. Otnil mega bisi dua iku anak lelaki: Hatat enggau Meonotai. Meonotai nya apai Oprah. Seraiah nya apai Joap, lalu Joap nya apai Geharasim alai semua orang ke landik begagaka utai diau. Kalep anak Jepuneh bisi tiga iku anak lelaki: Iru, Elah, enggau Naam. Elah nya apai Kenas. Jehalelel bisi empat iku anak lelaki: Sip, Sipah, Tiria, enggau Asarel. Hodiah jadi enggau menyadi indu Naham. Peturun seduai nya nurunka raban peturun Gam, ti diau di nengeri Keilah, enggau raban bansa Makat ti diau di nengeri Estemoa. Simon bisi empat iku anak lelaki: Amnon, Rinah, Benhanan, enggau Tilon. Ishi bisi dua iku anak lelaki: Sohet enggau Bensohet. Selah nya siku ari bala anak lelaki Judah. Peturun iya nyengkaum Er, ke nirika nengeri Lekah, Ladah ke nirika nengeri Maresah, raban peturun orang ke diau di nengeri Bet Asbea, ti landik nenun kain linin; Jokim enggau orang ke diau di nengeri Koseba, enggau Joas seduai Sarap ke jadi enggau indu orang Moap, lalu udah nya ngentapka diri di Betlehem. (Tu endang jerita lama.) Sida nya tukang periuk ke bekereja ke raja, lalu diau di nengeri Netaim enggau nengeri Gederah. Simeon bisi lima iku anak lelaki: Nemuel, Jamin, Jarip, Serah, enggau Saul. Nama anak lelaki Saul nya Salum. Nama uchu iya Mibsam, lalu nama ichit iya Misma. Misma nurunka Hamuel, Sakur, enggau Simei. Simei bisi enam belas iku anak lelaki enggau enam iku anak indu, tang kaban belayan iya nadai mayuh anak, lalu raban bansa Simeon enda mayuh tubuh baka raban bansa Judah. Bala peturun Simeon, nyentuk ngagai maya Raja David, diau di nengeri Beer-seba, Moladah, Hasar-sual, Bilhah, Esem, Tolat, Betuel, Hormah, Siklak, Bet-markabot, Hasasusim, Betbiri, enggau Saraim. Sida mega diau ba lima bengkah endur bukai: Etam, Ain, Rimon, Token, enggau Asan, enggau genturung pendiau ti ngelingi nya dia, nyentuk ngagai nengeri Baalat ti tunga ke selatan-barat. Tu meh cherita ti udah disimpan sida pasal ruang bilik sida, enggau nama menua ti nyadi endur alai sida diau. sida lalu ngelekai tunga ke barat, nyau deka nyentuk ngagai Gerar lalu nginang jelu bedus ba tebing timur lebak nya, alai nengeri nya ti bediri. Sida bisi tetemuka tanah ti ami dia, ba menua ti nadai orang nguan, ti nadai pengachau. Orang ke nguan menua nya dulu ari sida nya orang peturun Ham. Lebuh maya Raja Hesekiah megai perintah di menua Judah, orang ke udah disebut nama di atas dia tadi mansang ngagai Gerar lalu ngerusak langkau kain enggau langkau orang ke diau dia. Sida muru orang ari endur nya, lalu sida ngentapka diri dia, laban menua nya mayuh rumput ke jelu bedus sida. Lima ratus agi bala ari raban bansa Simeon mansang tunga ke timur ngagai menua Edom. Sida iya diuluka bala anak Ishi: Pelatiah, Neariah, Repaiah, enggau Usil. Dia sida lalu munuh bala orang Amalek ti agi idup, lalu sida diau dia nyentuk ngagai diatu. Tu nama bala peturun Reuben anak tuai Jakop. (Laban iya udah beleman enggau siku ari indu simpan apai iya, iya udah ngelenyauka hak nyadi anak tuai, lalu hak nya diberi ngagai Josep. Tang raban bansa Judah nyadi raban bansa ti pemadu kering, lalu orang ke nyadi pemerintah ke semua orang Israel datai ari raban bansa Judah.) Reuben, anak tuai Jakop, bisi empat iku anak lelaki: Hanok, Palu, Hesron, enggau Karmi. Cherita pasal ruang bilik bisi nyebut bala tuai peturun ari raban bansa Reuben baka tu: Jeil, Sekariah, enggau Bela, anak Asas, uchu Sema, ari raban peturun Joel. Bala raban bansa tu diau di Aroer, enggau di menua ti berengkah ari endur nya nyentuk ngagai Nebo enggau Baal-meon di utara. Raban jelu sida nyau mayuh amat di menua Giliat. Nya alai sida nguan menua tunga ke timur nyentuk ngagai menua puang, ti mungkur nyentuk ngagai Sungai Eupratis. Lebuh maya Raja Saul, orang ari raban bansa Reuben nyerang orang Hagri, munuh sida, lalu nguan menua orang nya di timur menua Giliat. Raban bansa Gat diau tunga ke utara raban bansa Reuben, di menua Basan, nyentuk ngagai Salekah di timur. Orang ke nyadi tuai ke raban peturun tu nya Joel, lalu tuai ke raban peturun ke lumur dua nya Sapam. Janai enggau Sapat nyadi tuai ke raban peturun ti bukai di Basan. Orang bukai dalam raban bansa Gat nya orang ari suku raban bansa Mikael, Mesulam, Sheba, Jorai, Jakan, Sia, enggau Eber. Sida tu peturun Abihail anak Huri. Baka tu ku ripih orang ke nurunka Abihail: Abihail, Huri, Jaroah, Giliat, Mikael, Jeshisai, Jahdo, Bus. Ahi anak Abdil, uchu Guni, nyadi tuai ke suku raban bansa tu. Sida diau dalam nengeri di menua Basan enggau di menua Giliat, enggau ba sebelah padang rumput di Saron. ( Cherita tu ditulis lebuh maya Raja Jotam megai perintah di menua Judah, enggau maya Jeroboam Ti Kedua megai perintah di menua Israel.) Pemayuh soldadu dalam raban bansa Reuben, Gat enggau Manasi Timur nya 44,760 iku. Semua sida tu udah chukup dilatih magang ba chara ngena terabai, pedang, enggau panah. Sida mansang nyerang raban bansa Hagri di Jetur, Napis, enggau Nodap. Sida manggaika pengarap sida ba Allah Taala, lalu besampi ngagai Iya minta Iya nulung sida. Allah Taala lalu nyaut sampi sida, lalu ari saup Iya sida ulih ngalahka orang Hagri enggau orang ke setanah enggau orang Hagri. Sida ngerampas ari munsuh 50,000 iku jelu unta, 250,000 iku jelu bedus, enggau 2,000 iku keledai, sereta nangkap 100,000 iku soldadu munsuh. Sida munuh bala munsuh, laban perang nya endang ari peneka Allah Taala. Lalu sida majak diau di menua nya nyentuk ngagai maya sida dibuai ngagai menua bukai. Raban bansa Manasi Timur ngentapka diri di menua Basan nyentuk ngagai Baal Hermon, Senir, Bukit Hermon di utara. Lalu bala sida jampat mayuh tubuh. Tu nama tuai suku raban bansa sida: Eper, Ishi, Elil, Asril, Jeremiah, Hadobiah, enggau Jahdil. Semua sida tu soldadu ti tebilang nama magang, sereta nyadi tuai suku raban bansa ti dikelala orang. Tang orang Israel enda tetap ati ngagai Allah Taala aki ini sida, lalu sida ninggalka Iya, lalu nyembah petara bansa orang ke udah diburu Allah Taala ari menua nya. Nya alai, Allah Taala lalu ngasuh Raja Besai Pul ari menua Asiria (mega dikumbai Tiglat Pileser) nyerang menua sida. Iya muai raban bansa Reuben, Gat, enggau Manasi Timur ari menua sida, lalu ngasuh sida ngentapka diri belama iya di Halah, Habor, enggau di Hara, enggau semak Sungai Gosan. Lewi bisi tiga iku anak lelaki: Gerson, Kohat, enggau Merari. Kohat bisi empat iku anak lelaki: Amram, Isar, Hebron, enggau Usil. Amram bisi dua iku anak lelaki: Aron seduai Moses, enggau anak indu siku ke benama Miriam. Aron bisi empat iku anak lelaki: Nadap, Abihu, Eleasar, enggau Itamar. Peturun Eleasar nya baka tu: Pinehas, Abisua, Buki, Usi, Serahiah, Meraiot, Amariah, Ahitup, Sadok, Ahimas, Asariah, Johanan, Asariah (orang ke bekereja dalam Rumah Sembiang ti udah digaga Raja Solomon di Jerusalem), Amariah, Ahitup, Sadok, Salum, Hilkiah, Asariah, Seraiah, Jehosadak. Nyadi Raja Nebukadnesar muai Jehosadak ari menua nya ngagai menua bukai, sama enggau orang bukai di menua Judah, enggau di Jerusalem, ti udah diasuh TUHAN kena buai ngagai menua bukai. Lewi bisi tiga iku anak lelaki: Gerson, Kohat, enggau Merari. Genap iku sida nya bisi anak lelaki magang. Gerson nya apai Libni seduai Simei. Kohat nya apai Amram, Isar, Hebron, enggau Usil. Lalu Merari nya apai Mahli seduai Musi. Peturun Gerson nya suku raban bansa: Libni, Jahat, Simah, Joah, Ido, Serah, Jiterai. Peturun Kohat nya: Aminadap, Korah, Asir, Elkanah, Ebiasap, Asir, Tahat, Uril, Usiah, Saul. Elkanah bisi dua iku anak lelaki: Amasai seduai Ahimot. Peturun Ahimot nya: Elkanah, Sopai, Nahat, Eliap, Jehoram, Elkanah. Samuel bisi dua iku anak lelaki: Joel, ke tuai agi, enggau adi iya Abijah. Peturun Merari nya: Mali, Libni, Simei, Usah, Simea, Hagiah, Asaiah. Tu nama orang ke udah diletak Raja David nyadi tuai nebah musik ba endur alai besembiang di Jerusalem, udah bekau Peti Lampang Batu Adat nya dipindahka ngagai endur nya. Sida begintir-gintir bekereja dalam Langkau Kain TUHAN lebuh Raja Solomon apin ngaga Rumah Sembiang. Tu bagi peturun orang ke megai pengawa nya: Raban peturun Kohat: Heman anak Joel, ti nyadi kepala koir ti terubah. Purih sida endang beduduk ari Jakop, baka tu: Heman, Joel, Samuel, Elkanah, Jeroham, Elil, Toah, Sup, Elkanah, Mahat, Amasai, Elkanah, Joel, Asariah, Sepaniah, Tahat, Asir, Ebiasap, Korah, Isar, Kohat, Lewi, Jakop. Asap nyadi kepala koir ti kedua. Purih iya beduduk ari Lewi, baka tu: Asap, Berekiah, Simea, Mikael, Baseiah, Malkijah, Etni, Serah, Adaiah, Etan, Simah, Simei, Jahat, Gerson, Lewi. Etan ari raban peturun Merari nyadi kepala koir ti ketiga. Iya peturun ari Lewi, baka tu: Etan, Kishi, Abdi, Maluk, Hasabiah, Amasiah, Hilkiah, Amsi, Bani, Semer, Mahli, Musi, Merari, Lewi. Orang peturun Lewi ti bukai udah diberi semua pengawa ti bukai ba endur alai besembiang nya. Aron enggau peturun iya ngenjuk piring menyan enggau ngenjuk piring tunu ba alta. Sida betanggungjawapka semua pengawa besembah dalam Endur ti Pemadu Kudus, enggau betanggungjawapka piring pengampun dosa orang Israel. Sida ngereja semua pengawa nya nitihka atur ti udah diberi Moses, ke nembiak Allah Taala. Tu tusun peturun Aron: Eleasar, Pinehas, Abisua, Buki, Usi, Serahiah, Meraiot, Amariah, Ahitup, Sadok, Ahimas. Tu menua ti udah diberi ngagai raban peturun Kohat ke ari peturun Aron. Sida udah nerima ungkup ti terubah ari menua ti diberi ngagai orang Lewi. Menua nya nyengkaum Hebron di menua Judah, enggau padang rumput ti ngelingi nengeri nya. Tang tanah umai enggau genturung pendiau ti diempu nengeri nya udah diberi ngagai Kalep anak Jepuneh. Tu nama nengeri, sama enggau padang rumput, ti udah diberi ngagai sida dalam menua Benjamin: Geba, Alemet, enggau Anatot. Reti nya, sida bisi tiga belas buah nengeri alai semua ruang bilik sida tau diau. Di menua Manasi Barat, semua ruang bilik raban peturun Kohat ti bukai, udah diberi sepuluh buah nengeri, ngena chara bechabut undi. Ruang bilik raban peturun Gerson udah diberi tiga belas buah nengeri di menua Isakar, Aser, Naptali, enggau Manasi Timur di menua Basan. Baka nya mega, dua belas buah nengeri di menua Reuben, Gat, enggau Sebulun udah diberi ngagai ruang bilik raban peturun Merari. Nya meh chara orang Israel meri nengeri alai orang Lewi diau, sama enggau padang rumput ti ngelingi nengeri nya. ( Nengeri ti dalam menua Judah, Simeon, enggau Benjamin ti udah disebut di atas dia tadi, diberi ngagai sida ngena chara bechabut undi.) Sekeda ruang bilik raban peturun Kohat ti udah diberi nengeri enggau padang rumput di menua Epraim nya baka tu: Sekem, iya nya sebuah nengeri alai ngerarika diri di menua ti bebukit di menua Epraim, Geser, Jokmin, Bet-horon, Aijalon, enggau Gat-rimon. Di menua Manasi Barat, sida udah diberi nengeri Aner enggau Bilim, sama enggau padang rumput ti ngelingi nengeri nya. Tu nama nengeri, enggau padang rumput sida ke udah diberi ngagai ruang bilik raban peturun Gerson: Di menua Manasi Timur: Golan di menua Basan, enggau Astarot. Di menua Isakar: Kedes, Daberat, Ramot, enggau Anem. Di menua Aser: Masal, Apdon, Hukok, enggau Rehob. Di menua Naptali: Kedes di Galili, Hamon, enggau Kiriataim. Tu nama nengeri, sama enggau padang rumput sida ke udah diberi ngagai ruang bilik ti bukai ari raban peturun Merari: Di menua Sebulun: Rimono enggau Tabor. Di menua Reuben, ti di timur Sungai Jordan, ngilah Jeriko: Beser ba emperan ti ba atas bukit, Jasah, Kedemot, enggau Mepat. Di menua Gat: Ramot-giliat, Mahanaim, Hesbon, enggau Jaser. Isakar bisi empat iku anak lelaki: Tola, Puah, Jasup, enggau Simron. Tola bisi enam iku anak lelaki: Usi, Repaiah, Jeril, Jamai, Ipsam, enggau Shemuel. Sida tu tuai bilik ke raban peturun Tola, lalu sida nya soldadu ti tebilang nama. Lebuh maya Raja David menya, pemayuh peturun sida bisi 22,600 iku. Usi bisi siku anak lelaki ke benama Israiah. Israiah enggau empat iku anak lelaki iya, Mikael, Obadiah, Joel, enggau Issiah, nyadi tuai bilik magang. Sida mayuh amat bini enggau anak, datai ke peturun sida ulih nyerahka 36,000 iku orang nyadi soldadu. Nitihka nama ti udah ditulis, ruang bilik ari raban bansa Isakar bisi 87,000 iku lelaki ti tau enggau beperang. Benjamin bisi tiga iku anak lelaki: Bela, Beker, enggau Jediael. Bela bisi lima iku anak lelaki: Esbon, Usi, Usil, Jerimot, enggau Iri. Sida nya nyadi tuai bilik dalam raban peturun nya, lalu sida nya soldadu ti tebilang nama magang. Peturun sida nyengkaum 22,034 iku lelaki ti tau enggau beperang. Beker bisi semilan iku anak lelaki: Semirah, Joas, Elieser, Elioenai, Omri, Jerimot, Abijah, Anatot, enggau Alemet. Nitihka ripih nama orang ke dalam ruang bilik peturun sida, sida bisi 20,200 iku lelaki ti tau enggau beperang. Jediael bisi siku anak lelaki ke benama Bilhan. Bilhan bisi tujuh iku anak lelaki: Jeus, Benjamin, Ehut, Kenanah, Setan, Tarsis, enggau Ahisahar. Sida tu nyadi tuai bilik dalam raban peturun nya, lalu sida tu orang ke tebilang nama nyadi soldadu. Peturun sida nyengkaum 17,200 iku lelaki ti tau enggau beperang. Supim enggau Hupim nya anak Ir; lalu Husim nya anak Aher. Naptali bisi empat iku anak lelaki: Jahsil, Guni, Jeser, enggau Salum. Sida tu peturun Bilhah. Manasi bisi dua iku anak lelaki ari indu simpan iya ti bansa orang Aram. Nama anak lelaki iya: Asril enggau Makir. Makir nya apai Giliat. Makir lalu ngiga bini ke Hupim, enggau siku ke Supim. Nama menyadi indu Makir nya Maakah. Anak lelaki Makir ke lumur dua nya Selopehat, lalu Selopehat semina bisi anak indu. Maakah, iya nya bini Makir, ngadaka dua iku anak lelaki, ke diberi seduai iya nama Peres enggau Seres. Peres bisi dua iku anak lelaki benama Ulam enggau Takem. Ulam bisi siku anak lelaki benama Bedan. Nya meh peturun Giliat anak Makir, uchu Manasi. Menyadi indu Giliat ke benama Hamoleket bisi tiga iku anak lelaki: Isot, Abieser, enggau Mahlah. ( Semida bisi empat iku anak lelaki: Ahian, Sekem, Liki, enggau Aniam.) Baka tu ku peturun Epraim ari serak siti ngagai serak siti: Sutelah, Beret, Tahat, Eleadah, Tahat, Sabat, Sutelah. Epraim bisi anak lelaki ti bukai kelimpah ari Sutelah: Eser enggau Eleat, ke kena bunuh lebuh seduai iya nguji ngenchuri jelu tupi orang asal ti diau di Gat. Apai seduai iya Epraim ngulitka seduai iya lama amat, lalu bala kaban belayan iya datai merindang iya. Udah nya iya beleman enggau bini iya baru. Bini iya ngandung lalu ngadaka anak lelaki siku. Seduai iya meri iya nama Beriah, ketegal penusah ti udah ninggang ruang bilik seduai iya. Epraim bisi siku anak indu benama Serah. Anak indu iya tu nirika nengeri Bet-horon Ulu enggau Bet-horon Ili, enggau Usen Serah. Epraim mega bisi siku anak lelaki benama Repah, ke nurunka Resep, Telah, Tahan Ladan, Amihut, Elisama, Nun, Josua. Menua ti udah dialahka sida, lalu diuan sida nyengkaum Betel enggau nengeri ti mit ti ngelingi Betel, nyentuk ngagai Naran di timur, enggau ngagai Geser di barat enggau nengeri ti mit ngelingi Geser. Menua ti udah dialahka sida mega nyengkaum nengeri Sekem enggau Ayah, enggau nengeri ti mit ti ngelingi semua nengeri nya. Peturun Manasi megai nengeri Bet-san, Taanak, Megido, enggau Dor, enggau nengeri ti mit ti ngelingi semua nengeri nya. Semua nengeri tu nyadi endur alai bala peturun Josep anak Jakop diau. Tu bala peturun Aser. Iya bisi empat iku anak lelaki: Imnah, Isbah, Isbi, enggau Beriah, enggau siku anak indu benama Serah. Beriah bisi dua iku anak lelaki: Heber enggau Malkil. (Malkil nirika nengeri Birsait.) Heber bisi tiga iku anak lelaki: Japlet, Somer, enggau Hotam, enggau siku anak indu benama Sua. Japlet mega bisi tiga iku anak lelaki: Pasak, Bimhal, enggau Asbat. Menyadi lelaki iya ke benama Somer bisi tiga iku anak lelaki: Rohgah, Jehubah, enggau Aram. Menyadi lelaki iya ke benama Hotam bisi empat iku anak lelaki: Sopah, Imna, Seles, enggau Amal. Peturun Sopah nya Suah, Harneper, Sual, Beri, Imrah, Beser, Hot, Sama, Silsah, Itran, enggau Bera. Peturun Jeter nya Jepuneh, Pispa, enggau Ara, lalu peturun Ula nya Arah, Hanil, enggau Risia. Semua sida tu peturun Aser magang. Sida nya tuai bilik, orang ke tebilang nama nyadi soldadu, landik nyadi tuai. Peturun Aser bisi 26,000 iku lelaki ti tau enggau beperang. Benjamin bisi lima iku anak lelaki: Bela, ke anak tuai iya, ditangkanka Asbel, Aharah, Nohah, enggau Rapa. Peturun Bela nya Adar, Gera, Abihut, Abisua, Naaman, Ahoah, Gera, Sepupan, enggau Huram. Jeus, Sakia, enggau Mirmah. Semua anak lelaki iya nyadi tuai bilik magang. Iya mega bisi dua iku anak lelaki ke diadaka Husim. Nama seduai nya Ahitup enggau Elpal. Elpal bisi tiga iku anak lelaki: Eber, Misam, enggau Semet. Semet nya meh orang ke nirika nengeri Ono enggau Lod, enggau genturung pendiau ti ngelingi nya dia. Beriah enggau Sema nya tuai bilik ke ngentapka diri di nengeri Aijalon, lalu muru orang ke diau di nengeri Gat. Peturun Beriah nyengkaum Ahio, Sasak, Jerimot, Sebadiah, Arat, Eder, Mikael, Ispah, enggau Joha. Peturun Elpal nyengkaum Sebadiah, Mesulam, Hiski, Heber, Ismerai, Isliah, enggau Jobap. Peturun Simei nyengkaum Jakim, Sikri, Sapdi, Elienai, Siletai, Eliel, Adaiah, Beraiah, enggau Simrat. Peturun Sasak nyengkaum Ispan, Eber, Elil, Apdon, Sikri, Hanan, Hananiah. Elam, Antotijah, Ipdiah, enggau Penuel. Peturun Jehoram nyengkaum: Samserai, Sehariah, Ataliah, Jarasiah, Elijah, enggau Sikri. Tu meh bala orang ke nyadi tuai bilik, enggau bala peturun sida ke diau di Jerusalem. Jeil nirika nengeri Gibeon, lalu ngentapka diri dia. Bini iya benama Maakah, lalu anak lelaki iya ke tuai nya Abdon. Bala anak lelaki iya ti bukai nya Sur, Kis, Baal, Ner, Nadap, Gedor, Ahio, Sekariah, enggau Miklot, apai Simeah. Peturun sida di Jerusalem diau semak ruang bilik orang bukai ke ari raban peturun sida. Ner nya apai Kis, lalu Kis nya apai Raja Saul. Saul bisi empat iku anak lelaki: Jonatan, Malkisua, Abinadap, enggau Esbaal. Jonatan nya apai Meribaal, lalu Meribaal nya apai Mikah. Mikah bisi empat iku anak lelaki: Piton, Melek, Tarea, enggau Ahas. Ahas nya apai Jehoadah. Jehoadah bisi tiga iku anak lelaki: Alemet, Asmabet, enggau Simri. Simri nya apai Mosa, Mosa nya apai Binea, Binea apai Rapah, Rapah apai Eleasah, lalu Eleasah nya apai Asel. Asel bisi enam iku anak lelaki: Asrikam, Bokeru, Ismail, Seariah, Obadiah, enggau Hanan. Menyadi lelaki Asel ke benama Esek bisi tiga iku anak lelaki: Ulam, Jeus, enggau Elipelet. Bala anak lelaki Ulam nyadi soldadu lalu tebilang nama, sereta landik nimbakka panah. Pemayuh bala anak lelaki enggau uchu Ulam nya seratus lima puluh iku. Semua orang ke disebut nama di atas dia tadi nya datai ari raban bansa Benjamin magang. Nama semua orang Israel dituliska magang nitihka ruang bilik sida, lalu nama sida tu bisi ditulis dalam Bup Raja Menua Israel. Orang Judah udah dibuai ngagai menua Babilon kena ngukum sida, ketegal sida udah bedosa. Orang ke terubah pulai ngagai tanah sida empu dalam mayuh bengkah nengeri nyengkaum bala orang Israel, bala imam, bala orang Lewi, enggau bala orang ke bekereja dalam Rumah Sembiang. Raban bansa Judah, Benjamin, Epraim, enggau Manasi lalu diau di Jerusalem. Pemayuh ruang bilik ari raban tu ti diau di Jerusalem nya 956. Semua lelaki ti udah disebut nama di atas dia tadi nyadi tuai ruang bilik magang. Pemayuh bala imam ti nyadi tuai bilik nya seribu tujuh ratus enam puluh iku. Sida tu orang ke landik ngereja semua pengawa dalam Rumah Sembiang. Tu nama orang ke nyaga Rumah Sembiang lalu diau di Jerusalem: Salum, Akup, Talmon, enggau Ahiman. Orang ke nyadi tuai sida nya Salum. Nyentuk ngagai maya nya, raban peturun sida udah diasuh nyaga ba Pintu Raja ti muak ke timur. Dulu ari nya, sida udah diasuh jaga ba penama ngagai kem orang Lewi. Salum anak Kore, uchu Ebiasap, enggau sida bukai ke sama datai ari raban peturun Korah, betanggungjawap nyaga penama ngagai Langkau Kain TUHAN, baka aki ini sida kelia lebuh sida agi ngintu kem TUHAN. Pinehas anak Eleasar - awakka TUHAN nyaga iya! udah kala nyadi tuai sida suba. Sekariah anak Meselemiah udah mega kala nyadi jejaga ba penama ngagai Langkau Kain TUHAN. Pemayuh semua orang ke udah dipilih nyaga penama enggau pintu kuta nya 212 iku. Nama sida udah dituliska magang nitihka nama genturung pendiau ti alai sida diau. Aki ini sida udah diletak Raja David enggau nabi Samuel mangku pengawa nya. Sida enggau peturun sida mengkang nyaga pintu Rumah Sembiang. Siti ari pintu nya nunga ngagai utara, siti nunga ngagai selatan, siti ngagai timur lalu siti nunga ngagai barat, lalu tiap-tiap iti pintu nya endang bisi siku tuai jejaga. Bala jejaga tu disaup kaban belayan sida ke diau ba sebelah genturung pendiau sida empu, lalu ngambi gintir diri nyaga pintu nya, tujuh hari sekali. Orang ke nyadi tuai bala jejaga nya endang orang Lewi. Sida nya orang ke betanggungjawapka pengawa nya. Sida mega betanggungjawapka semua bilik dalam Rumah Sembiang, enggau ke semua utai ti ditaruh dia. Sida diau semak Rumah Sembiang, laban sida betanggungjawap nyaga Rumah nya, sereta muka pintu nya tiap pagi. Orang Lewi ti bukai betanggungjawapka pekekas ti dikena besembah. Genap kali utai nya dikena, iya enda tau enda ditulis lebuh iya dibai ke luar, lalu dituliska mega lebuh iya dipulaika baru. Sida ke bukai ngemataka pekekas kudus ti bukai, tepung, wain, minyak kana, menyan, enggau rempah. Tang orang ke betanggungjawap ngerakit rempah nya bala imam. Siku orang Lewi ke benama Matitiah, anak tuai Salum, ari raban peturun Korah, betanggungjawap nyendiaka pemeri ti dipanggang. Raban raban peturun Kohat betanggungjawap nyendiaka roti ti kudus. Sekeda ruang bilik orang Lewi betanggungjawapka musik dalam Rumah Sembiang. Bala tuai bilik tu diau dalam sekeda rumah dalam Rumah Sembiang, lalu sida iya nadai diasuh ngereja pengawa bukai, laban sida enda tau enda seruran nganti diri dikangauka siang malam. Orang ke disebut nama di atas dia tadi nya tuai bilik orang Lewi, nitihka peturun sida. Sida nya meh orang ke nyadi tuai ke orang ke diau di Jerusalem. Jeiel nirika nengeri Gibeon lalu iya ngentapka diri dia. Nama bini iya Maakah. Anak lelaki iya ke tuai benama Abdon, lalu anak lelaki iya ti bukai nya Sur, Kis, Baal, Ner, Nadap, Gedor, Ahio, Sekariah, enggau Miklot apai Simeah. Peturun sida nya diau di Jerusalem semak ruang bilik ti bukai ke ari raban peturun sida. Ner nya apai Kis, lalu Kis nya apai Saul. Saul bisi empat iku anak lelaki: Jonatan, Malkisua, Abinadap, enggau Esbaal. Jonatan nya apai Meribaal, lalu Meribaal nya apai Mikah. Mikah bisi empat iku anak lelaki: Piton, Melek, Tarea, enggau Ahas. Ahas nya apai Jarah, ti nyadi apai Alemet, Asmabet, enggau Simri. Simri nya apai Mosa, Mosa apai Binea, Binea apai Repaiah, Repaiah apai Eleasah, lalu Eleasah nya apai Asel. Asel bisi enam iku anak lelaki: Asrikam, Bokeru, Ismail, Seariah, Obadiah, enggau Hanan. Orang Pilistin beperang ngelaban orang Israel ba Bukit Gilboa. Mayuh orang Israel mati ba endur nya, lalu sida ti bukai, nyengkaum Raja Saul enggau bala anak lelaki iya, rari. Tang orang Pilistin ulih ngagai sida, lalu munuh anak lelaki Saul ke tiga iku, iya nya Jonatan, Abinadap, enggau Malkisua. Balat amat orang belaban ngelingi Saul. Iya lalu kena laban laja munsuh, lalu balat amat bakal. Ku iya bejaku enggau orang bujang siku ke mai senyata ke iya, “Sintak pedang nuan, lalu bunuh aku, ngambika orang Pilistin ke kapir nya enda ngayahka aku.” Tang orang bujang nya enda berani munuh Saul. Nya alai Saul nyintak pedang iya empu, lalu ngerejang diri ngena pedang nya. Lebuh orang bujang nya meda Saul udah mati, iya lalu ngerejang diri ngena pedang iya empu, lalu mati. Nya alai Saul enggau tiga iku anak lelaki iya sama mati, lalu nadai siku ari peturun iya bisi kala megai perintah udah lepas nya. Lebuh orang Israel ti diau ba Lebak Jesril ninga berita bala soldadu udah rari, lalu Saul enggau bala anak lelaki iya udah mati, sida lalu ninggalka nengeri sida, lalu rari. Udah nya orang Pilistin datai lalu nguan nengeri nya. Sehari udah bekau perang nya, orang Pilistin lalu ngerampas utai ari bangkai, lalu tetemuka bangkai Saul enggau bangkai anak lelaki iya garing-garing ba Bukit Gilboa. Sida mumpung pala Saul, muka semua senyata ari tubuh iya, lalu ngasuh bala seruan mai utai nya ngagai serata menua Pilistin, madahka berita manah nya ngagai engkeramba enggau ngagai bansa sida empu. Sida nyimpan senyata Saul dalam sebuah rumah sembiang sida, lalu ngantung pala iya dalam rumah sembiang petara Dagon. Lebuh orang Jabes di Giliat ninga pasal utai ti udah dikereja orang Pilistin ngagai Saul, lelaki ke pemadu berani mansang lalu ngambi bangkai Saul enggau bangkai sida anak lelaki iya, lalu mai sida ngagai Jabes, lalu nguburka sida dia di baruh sebatang kayu oak, lalu bepasa tujuh hari. Saul mati laban iya enda tetap ati ngagai TUHAN. Iya enda ngasika pesan TUHAN. Iya nguji minta jaku lalau ari semengat orang ke udah mati, ukai betanya ngagai TUHAN. Nya alai TUHAN munuh iya, lalu nyerahka perintah iya ngagai David anak Jesi. Semua orang Israel mansang ngagai David di Hebron, lalu bejaku enggau iya, “Kami tu kaban belayan nuan. Dulu menya, lebuh Saul agi nyadi raja kitai, nuan endang udah nguluka orang Israel beperang, lalu TUHAN Allah Taala nuan udah besemaya enggau nuan, madahka nuan deka nguluka bala nembiak Iya, lalu nyadi raja sida.” Nya alai semua tuai bansa orang Israel mansang ngagai Raja David di Hebron. David ngaga siti sempekat ti kudus enggau sida. Sida nyiri iya nyadi raja menua Israel, nitihka jaku ti disebut TUHAN ngena Samuel. Raja David enggau semua orang Israel mupuk lalu nyerang nengeri Jerusalem. Lebuh maya nya menya nengeri nya dikumbai Jebus. Nyadi orang Jebus, iya nya orang asal menua nya agi diau dia. Orang Jebus madahka ngagai David, iya enda ulih tama ngagai nengeri nya. Tang David ngalahka kuta Sion sida, lalu kenyau ari nya nengeri nya dikumbai “Nengeri David.” Ku David, “Orang ke terubah munuh orang Jebus deka nyadi kepala soldadu!” Joap - indai iya Seruiah - nguluka bala nyerang, lalu iya nyadi tuai soldadu. Laban David diau dalam kuta nya, nya alai kuta nya dikumbai “Nengeri David.” Iya ngaga nengeri nya baru, berengkah ba tanah tambun ti ba tisi bukit muak ke timur. Udah nya Joap lalu ngaduka endur bukai ba nengeri nya. David mansang kering-sekering, laban TUHAN ti Pemadu Bekuasa bisi enggau iya. Tu nama bala soldadu David ti tebilang nama. Bala sida tu, sama enggau orang Israel ti bukai, nyiri iya nyadi raja, munyi ti udah disemaya TUHAN, lalu ngasuh perintah iya kering. Iya ti keterubah nya Jasobim ari raban peturun Hakmon. Iya tu nyadi tuai ke Orang Ti Tiga Iku. Iya ngelaban tiga ratus iku munsuh ngena sangkuh, lalu munuh semua sida dalam sekali betempuh. Orang ke nangkanka iya ari sida tiga ti tebilang nama nya Eleasar anak Dodo, ari raban peturun Ahoh. Iya enggau David ngelaban orang Pilistin lebuh sida betempuh ba Pas-damim. Iya agi benung ba umai barli lebuh orang Israel belabuh rari. Nya alai iya enggau bala iya lalu nan ba umai nya, lalu ngelaban orang Pilistin. TUHAN ngasuh iya balat amat menang. Nyadi sekali, tiga iku ari tiga puluh iku soldadu ti tebilang nama nya mansang ngagai batu alai David ti diau semak gua Adulam. Lebuh maya nya seraban soldadu orang Pilistin bepalan ba Lebak Repaim. Lebuh maya nya David diau ba bukit ti bekuta, lalu seraban orang Pilistin udah ngalahka nengeri Betlehem. David nyau lelengauka menua iya empu, lalu ku iya bejaku, “Naka meh pemanah enti sema orang bisi mai ai irup ngagai aku ari telaga ti semak pintu kuta di Betlehem!” Tiga iku soldadu ti tebilang nya lalu angkat ngerenchah kem orang Pilistin, nyauk ai ari telaga nya, lalu mai ai nya ngagai David. Tang iya enggai ngirup ai nya, lalu iya nuang ai nya nyadika piring ti diberi ngagai TUHAN. Ku iya, “Enggai nyadi aku ngirup ai tu, laban nya baka ke ngirup darah orang ke udah berambunka nyawa!” Nya alai iya enggai ngirup ai nya. Nya meh utai ti udah dikereja orang tiga iku ti tebilang nya tadi, ti udah ngayanka pemerani diri. Menyadi Joap ke benama Abisai nya orang ke nyadi tuai ke Tiga Puluh Iku. Iya bamuk ngena sangkuh ngelaban tiga ratus iku munsuh, lalu munuh sida, lalu iya nyadi orang ke tebilang agi ari sida ke Tiga Puluh Iku. Abisai nya orang ke pemadu tebilang ke semua sida ke Tiga Puluh Iku lalu iya nyadi tuai sida, tang iya kurang agi tebilang ari sida ke tiga iku. Benaiah anak Jehoiada ari Kabsil nya soldadu ti tebilang. Iya suah ngereja utai ti ngayanka pemerani iya, nyengkaum munuh dua iku raja berani orang Moap. Nyadi sekali iya tama ngagai lubang kebung lebuh hari balat amat seleju, lalu munuh siku singa. Iya mega munuh siku orang Ejip ke besai amat gamal, ti tinggi tujuh kaki setengah, ke besenyataka siti sangkuh ti besai bendar. Benaiah ngelaban iya ngena pemalu, ngerampas sangkuh nya ari jari orang Ejip nya, lalu munuh iya ngena sangkuh nya. Nya meh utai ti dikereja Benaiah ti ngayanka pemerani iya. Iya tu siku ari sida ke Tiga Puluh Iku. Iya tebilang agi ari sida ke “Tiga Puluh,” tang kurang agi tebilang ari sida ke “Tiga Iku.” David milih iya nyadi jejaga iya empu. Nyadi David diau di Siklak, udah bekau iya ke ngerarika diri ari Raja Saul. Mayuh bala soldadu ke teleba beperang, sereta tau dikarapka, datai nyukung iya dia. Sida tu orang ari raban bansa Benjamin, iya nya raban bansa Saul empu. Sida landik nimbakka laja enggau nimbakka batu ngena pangwang ngena jari kanan tauka ngena jari kiba. Tu nama bala soldadu ti tebilang, sereta teleba beperang, ari raban bansa Gat ke enggau raban bala soldadu David, lebuh iya ba kuta di menua puang. Sida tu landik ngena terabai enggau sangkuh, lalu mangah baka singa, sereta sikar baka rusa bukit. Sekeda ari bala soldadu ke datai ari raban bansa Gat, nya pemesai ti tinggi pangkat ke nguluka seribu iku orang, lalu sida ti bukai nya baruh agi pangkat, nguluka seratus iku orang. Dalam bulan ti kesatu, lebuh Sungai Jordan nyau bah ampuh tebing, sida meraka sungai nya. Orang ke diau ba sebelah emperan ti ba tebing timur enggau tebing barat Jordan lalu rari. Nyadi sekali seraban bala orang ari raban bansa Benjamin enggau ari raban bansa Judah mansang ngagai kuta ti alai David diau. David mansang ngambat sida, lalu ku iya, “Enti kita datai mai ati ti manah laban kita deka nulung aku, kami ngelaluka penatai kita. Awakka kita enggau kami. Tang enti kita bisi ati deka nyual aku ngagai munsuh, taja pen aku nadai ati deka ngemediska kita, Allah Taala aki ini kitai deka nemu nya, lalu ngukum kita.” Roh Allah Taala lalu bekuasa ba siku ari bala sida ke benama Amasai, ti deka nyadi tuai sida ke “Tiga Puluh”. Ku Amasai ngangau, “David anak Jesi, kami tu nembiak nuan! Awakka nuan enggau orang ke nyukung nuan mujur magang! Allah Taala setanah enggau nuan.” David lalu ngelaluka sida, lalu ngeletak sida nyadi pemesai bala soldadu iya. Sekeda soldadu ari raban bansa Manasi udah ninggalka Saul lalu ngalih ari David lebuh David mansang enggau orang Pilistin nyerang Raja Saul. Iya ti bendar, iya ukai nulung orang Pilistin, tang laban bala raja orang Pilistin takutka iya nyual sida ngagai tuan iya Raja Saul. Nya alai sida ngasuh David pulai baru ngagai Siklak Tu nama bala soldadu ari Manasi ke ngalih ari David lebuh iya pulai: Adnah, Josabat, Jediael, Mikael, Josabat, Elihu enggau Siletai. Semua sida tu endang tuai ke seribu iku orang di menua Manasi. Sida bekereja ke David nyadi pemesai soldadu iya, laban semua sida nya endang soldadu ti tebilang magang. Udah bekau nya sida lalu nyadi pemesai soldadu orang Israel. Orang masuk nyadi soldadu David nyau deka tiap hari. Nya kebuah pemayuh bala soldadu iya jampat betambah. Semua bala soldadu nya sedia deka beperang magang. Lalu sida mansang ngagai Hebron, mutus ati deka nyiri David nyadi raja ke semua menua Israel. Semua orang ke bukai bela begempung ati magang deka ngulihka juluk ati nya. Sida diau enggau David dia tiga hari, ngintu pengerami makai besai, bepakaika pemakai ti udah disediaka kaban belayan sida. Raban bansa ti di utara, iya nya raban bansa Isakar, Sebulun enggau Naptali, datai mai keledai, unta, enggau sapi ti mai pemakai - tepung, buah ara, salai buah anggur, wain, enggau minyak kana. Sida mega mai jelu sapi enggau jelu bedus ngambika bisi dibunuh lalu diempa. Semua utai tu dikena sida ngayanka pengaga ati semua orang di serata menua nya. Raja David lalu betanya ngagai semua pemesai ti nyadi tuai ke seribu iku, enggau ke seratus iku soldadu. Udah nya iya lalu madahka ngagai semua orang Israel, “Enti kita ngemendar, lalu enti tu peneka TUHAN Allah Taala kitai, awakka kitai ngasuh orang mai pesan ngagai semua bansa kitai, enggau ngagai bala imam, enggau ngagai orang Lewi ti diau di nengeri kita, mai sida begempuru ditu enggau kitai. Udah nya kitai deka ngambi Peti Lampang Batu Adat Allah Taala, ti enda kala dikibuhka Saul lebuh iya nyadi raja.” Orang mayuh gaga ati ninga penemu nya, lalu sida besetuju. Nya alai David ngempuruka orang Israel ari serata menua nya, kenyau ari garis entara menua enggau orang Ejip di selatan, nyentuk ngagai Genting Hamas di utara, laban sida deka mai Peti Lampang Batu Adat nya ari Kiriat-jearim ngagai Jerusalem. David enggau orang mayuh lalu mansang ngagai nengeri Baalah, iya nya Kiriat-jearim, di menua Judah, deka ngambi Peti Lampang Batu Adat Allah Taala ti TUHAN, ke duduk ba kerusi diraja Iya atas melikat cherub ti besayap, ti dikumbai ngena nama TUHAN. Sida lalu ngambi Peti Lampang Batu Adat nya ari rumah Abinadap, lalu mai Peti nya ngena kerita tarit ti agi baru. Usah seduai Ahio lalu ngiring kerita tarit nya, lalu David enggau semua orang mayuh betanda enggau pengabis ati sida ngemesaika Allah Taala. Sida belagu, sereta nebah belikan, dedumbak, bebendai, enggau terumpit. Lebuh sida datai ba endur alai orang ngindik gandum di Chidon, jelu sapi ti narit kerita tarit nya tesangkut. Usah nyapai lalu ngetanka Peti Lampang Batu Adat nya. TUHAN lalu tekala nya ringat ngagai Usah, lalu munuh iya laban iya udah negu Peti nya. Usah lalu mati dia di mua Allah Taala. Nya kebuah endur nya dikumbai Peres-usah nyentuk ngagai diatu. David pedis ati laban TUHAN udah ringat lalu ngukum Usah. Udah nya David takutka Allah Taala, lalu ku iya, “Baka ni ku aku ulih mai Peti Lampang Batu Adat nya diatu?” Nya alai David enda nyadi mai Peti Lampang Batu Adat nya ngagai Jerusalem, tang ninggalka iya ba rumah orang siku ke benama Obet-edom, ke datai ari nengeri Gat. Peti nya mengkang dia tiga bulan, lalu TUHAN merekatka sida Obet-edom sebilik, sereta merekatka semua utai ti diempu iya. Raja Hiram di Tire lalu ngasuh seraban orang dagang nemuai ngagai David. Iya ngirumka ngagai David batang kayu sidar, tukang batu, tukang kayu, ngambika sida ngaga sebuah istana ke David. Ari nya David nemu TUHAN udah ngasuh iya tegap nyadi raja menua Israel, lalu udah ngasuh menua ti diperintah iya kaya-raja, ke penguntung bala nembiak iya. Jerusalem nya meh endur alai David ke ngambi mayuh agi bini, lalu mayuh agi anak lelaki enggau anak indu. Tu nama bala anak iya ke ada di Jerusalem: Shamua, Sobap, Natan, Solomon, Ibhar, Elisua, Elpelet, Nogah, Nepek, Japia, Elisama, Biliada, enggau Elipelet. Lebuh orang Pilistin ninga David udah dichiri nyadi raja ke semua menua Israel, bala soldadu sida lalu mansang deka nangkap iya. Lebuh David ninga nya, iya lalu mansang ngelaban sida. Orang Pilistin datai ba Lebak Repaim, lalu belabuh ngerumpak utai ari menua nya. David lalu betanya ngagai Allah Taala, “Kati tau aku nyerang orang Pilistin? Kati Nuan deka ngasuh aku menang?” TUHAN lalu nyaut, “Serang meh sida! Aku deka ngasuh nuan menang!” Nya alai David nyerang sida di Baal-perasim, lalu ngalahka sida. Ku iya, “Allah Taala udah ngena aku ngalahka bala soldadu munsuh baka ai bah.” Nya alai endur nya dikumbai Baal-perasim. Orang Pilistin rari, lalu ninggalka engkeramba sida. David lalu meri atur ngasuh engkeramba nya ditunu. Enda lama udah bekau nya orang Pilistin pulai baru ngagai emperan nya, lalu belabuh ngerumpak utai dia baru. David lalu betanya ngagai Allah Taala baru. Allah Taala lalu nyaut, “Anang nyerang sida ari tu, tang kelulung sida, lalu serang sida ari sepiak nyin, semak kayu balsam. Lebuh nuan ninga munyi redup kaki orang bejalai ba puchuk kayu, nya baru nuan tau belabuh nyerang, laban Aku deka bejalai dulu ari nuan lalu ngalahka bala soldadu orang Pilistin.” David lalu ngereja nitihka jaku Allah Taala. Nya alai David muru orang Pilistin ari Gibeon nyentuk ngagai Geser. Berita pasal David ngelekai ngagai semua endur, lalu TUHAN ngasuh semua bansa takut magang ke iya. David ngaga berapa buah rumah di Nengeri iya empu, ke guna iya empu. Iya mega nyendiaka siti endur alai nyimpan Peti Lampang Batu Adat Allah Taala, lalu nirika sebuah langkau kain ke Peti nya. Udah nya iya bejaku, “Semina orang Lewi aja tau ngesan Peti Lampang Batu Adat nya, laban sida udah dipilih TUHAN ngesan Peti nya, sereta bekereja ke Iya belama iya.” Nya alai David mesanka semua orang Israel datai ngagai Jerusalem, deka mai Peti Lampang Batu Adat nya ngagai endur ti udah disediaka iya. Udah nya iya mesanka bala peturun Aron, enggau bala orang Lewi. Uril, ari raban peturun Kohat, ari peturun Lewi, lalu datai nguluka seratus dua puluh iku kaban belayan iya. Asaiah ari raban peturun Merari, nguluka dua ratus dua puluh iku orang. Joel ari raban peturun Gerson, nguluka seratus tiga puluh iku orang. Semaiah, ari raban peturun Elisapan, nguluka dua ratus iku orang. Elil, ari raban peturun Hebron datai, nguluka lapan puluh iku orang. Lalu Aminadap, ari raban peturun Usil mega datai, nguluka seratus dua belas iku orang. David lalu mesanka Imam Sadok, Imam Abiatar enggau enam iku orang Lewi, iya nya Uril, Asaiah, Joel, Semaiah, Elil enggau Aminadap. Ku iya bejaku enggau orang Lewi, “Kita tu tuai ke raban peturun orang Lewi. Tuchi diri empu, enggau orang Lewi ti bukai, ngambika kita tau mai Peti Lampang Batu Adat TUHAN Allah Taala ke disembah orang Israel ngagai endur ti udah disediaka aku ke iya. Laban kita nadai enggau orang ngesan Peti Lampang Batu Adat nya keterubah iya menya, nya alai TUHAN Allah Taala kitai udah ngukum kitai laban kitai enda nyembah Iya ngena chara ti menyana.” Udah nya bala imam enggau bala orang Lewi lalu nuchi diri empu, ngambika sida tau mai Peti Lampang Batu Adat TUHAN Allah Taala ke disembah orang Israel. Orang Lewi lalu ngesan Peti Lampang Batu Adat nya ngena kayu pengaling, nitihka jaku ti udah disebut TUHAN ngena Moses. David ngasuh bala tuai orang Lewi milih orang ari raban bansa sida empu belagu, lalu nebah musik ngena belikan enggau bebendai. Laban Chenaniah landik nebah musik nya alai iya dipilih nyadi tuai ke orang Lewi ke nebah musik. Nya alai Raja David, bala tuai orang Israel, enggau bala tuai soldadu, ngena pengerami ti besai, tama ngagai rumah Obet-edom lalu ngambi Peti Lampang Batu Adat. Sida munuh tujuh iku sapi ti lelaki enggau tujuh iku bedus nyadika piring, kena nentuka Allah Taala deka nulung orang Lewi ke ngesan Peti Lampang Batu Adat nya. David ngena baju panjai ti digaga ari linin ti pemadu alus, lalu baka nya mega bala orang ke nebah musik, Chenaniah ti nyadi tuai sida, enggau orang Lewi ke ngesan Peti Lampang Batu Adat nya. David mega ngena siti epod ti digaga ari linin. Semua orang Israel nyempulang Peti Lampang Batu Adat nya ngagai Jerusalem enggau panjung, nebah terumpit, tanduk, bebendai, enggau belikan. Lebuh Peti Lampang Batu Adat nya benung dibai tama ngagai nengeri nya, Mikael, anak indu Saul, nilik ari jenila, lalu tepedaka Raja David betanda sereta ngingkak gaga ati. Mikael lalu mechat iya dalam ati iya. Sida lalu mai Peti Lampang Batu Adat nya ngagai langkau kain ti udah disediaka David ke Peti nya, lalu ngengkahka Peti nya dalam langkau kain nya. Udah nya sida lalu ngenjuk piring tunu enggau piring pemaik, ngagai Allah Taala. Lebuh David udah tembu ngenjuk piring, iya merekatka orang mayuh dalam nama TUHAN, lalu nyadung pemakai ngagai semua sida. Iya meri ngagai siku-siku lelaki enggau indu di menua Israel setuku roti, siti lampang dagin ti udah dipanggang, enggau salai buah anggur. David ngeletak sekeda orang Lewi nguluka orang nyembah TUHAN Allah Taala ke disembah orang Israel, di mua Peti Lampang Batu Adat nya, belagu sereta muji TUHAN. Asap diletak nyadi tuai sida, lalu Sekariah nyadika penulung iya. Jeil, Semiramot, Jehiel, Matitiah, Eliap, Benaiah, Obet-edom, enggau Jeil nebah belikan. Asap nebah bebendai, lalu imam ke dua iku, iya nya Benaiah seduai Jahasil tiap hari nyepu terumpit di mua Peti Lampang Batu Adat nya. Nya meh terubah iya David meri Asap enggau orang Lewi ti bukai tanggungjawap belagu muji TUHAN. Beri terima kasih ngagai TUHAN, padahka pemesai kuasa Iya. Tusui ngagai semua bansa utai ti udah dikereja Iya. Belagu muji TUHAN. Tusui pasal pengawa ti badas ti udah dikereja Iya. Gaga ati meh kita ke enggi Iya. Awakka semua orang ke nyembah Iya rami gaga magang! Mansang ngagai TUHAN minta saup, lalu seruran nyembah Iya. TUHAN endang Allah Taala kitai. Pesan Iya endang diberi ngagai semua dunya. Anang enda ingatka sempekat Allah Taala, ti udah digaga Iya meruan belama iya, sempekat ti udah digaga Iya enggau Abraham, semaya ti udah digaga Iya enggau Isak. TUHAN ngaga sempekat enggau Jakop, sempekat ti meruan belama iya. “Aku deka meri menua Kanaan ngagai nuan,” ku Iya bejaku. “Menua nya deka nyadika pesaka nuan.” Nembiak Allah Taala endang enda mayuh, nyadi orang kampar di menua Kanaan. Sida segau-segau bejalai ari menua siti ngagai menua siti, ari perintah siti ngagai perintah siti. Tang Allah Taala enda nejuka orang nekanka pengidup sida. Kena Iya nyaga sida, Iya meri jaku tangkan ngagai bala raja. “Anang ngemediska bala nembiak ti udah dipilih Aku. Anang negu bala nabi Aku.” Belagu ke TUHAN, semua dunya! Padahka tiap hari berita manah pasal Iya ti udah meri kitai pengelepas. Padahka pasal mulia Iya ngagai semua menua, enggau pasal pemesai pengawa ti udah dikereja Iya, ngagai semua bansa. TUHAN endang besai lalu endang patut dipuji. Iya endang patut lebih agi dikenangika ari semua petara. Petara semua bansa nya semina engkeramba aja, tang TUHAN udah ngaga langit. Iya endang bemulia sereta bekuasa. Kuasa enggau pengaga ngemenuhka Rumah Sembiang Iya. Puji meh TUHAN, semua kita ke diau di dunya. Puji meh mulia enggau pengering Iya. Puji meh nama TUHAN ti bemulia. Bai meh piring lalu datai ngagai Rumah Sembiang Iya. Meremi meh kita di mua Iya ti Kudus lebuh Iya pegari. Begetar meh kita di mua Iya, semua dunya! Dunya udah diengkahka ba endur iya, lalu enda ulih dikinsitka agi. Gaga ati meh kita, tanah enggau langit! Padahka ngagai semua bansa TUHAN nya Raja. Begelumbang meh nuan tasik, lalu inggar meh utai ti dalam nuan. Gaga ati meh kita umai, enggau semua utai ti dalam kita! Kayu ti dalam utan deka manjung gaga ati lebuh TUHAN datai lalu merintah dunya. Beri terima kasih ngagai TUHAN, laban Iya endang manah. Pengerindu Iya meruan belama iya. Sebut ngagai Iya, “Selamatka kami, O Allah Taala ti Juruselamat kami. Gempuruka kami. Lepaska kami ari menua bukai, ngambika kami nemu meri terima kasih lalu muji nama Nuan ti kudus.” Pujika TUHAN Allah Taala ke disembah orang Israel! Puji Iya diatu enggau ke belama iya! Udah nya semua orang mayuh nyebut, “Amin,” lalu muji TUHAN. Raja David ngeletak Asap enggau orang Lewi ti bukai bekereja tetap nguluka orang besembiang ba endur alai Peti Lampang Batu Adat disimpan. Sida ngereja pengawa sida dia tiap hari. Sida ditulung Obet-edom anak Jedutun enggau enam puluh lapan iku orang ari raban peturun iya empu. Hosah seduai Obet-edom nyadi tuai nyaga pintu. Tang Imam Sadok enggau bala sida ke sama nyadi imam baka iya, nguluka orang nyembah TUHAN ba endur alai besembiang di Gibeon. Genap pagi enggau genap lemai sida enda tau enda nunu piring segala ba alta nitihka jaku ti udah ditulis dalam Adat ti udah diberi TUHAN ngagai orang Israel. Orang ke enggau sida dia nya Heman seduai Jedutun, enggau sida ti bukai ke endang udah dipilih belagu muji TUHAN ketegal pengerindu Iya ti meruan belama iya. Heman seduai Jedutun mega ngemataka terumpit enggau bebendai, enggau pekekas musik ti bukai ti ditebah lebuh orang muji TUHAN. Raban raban peturun Jedutun nyadi kepala nyaga pintu. Udah nya semua orang pulai magang, lalu David pulai ke rumah ngagai sida sebilik. Raja David diatu nyau diau dalam istana iya empu. Nyadi sekali iya mesanka nabi Natan, lalu bejaku enggau iya, “Aku diatu diau dalam rumah ti digaga ari kayu sidar, tang Peti Lampang Batu Adat TUHAN disimpan dalam langkau kain!” Disaut Natan, “Kereja aja utai ti ku ati nuan, laban Allah Taala bisi enggau nuan.” Tang malam nya Allah Taala bejaku ngagai Natan, “Alai nuan madahka jaku Aku tu ngagai nembiak Aku David, ‘Nuan ukai orang ke diasuh Aku ngaga Rumah alai Aku diau. Kenyau ari maya Aku ngelepaska orang Israel ari menua Ejip, nyentuk ngagai diatu, Aku nadai kala diau dalam rumah. Aku endang semampai diau dalam langkau kain, lalu mindah ari endur siti ngagai endur siti. Sekumbang Aku ke bejalai enggau orang Israel, Aku nadai kala nanya ngagai bala tuai ti udah diletak Aku, kebuah alai sida enda ngaga rumah ari kayu sidar ke Aku.” “Nya alai padahka ngagai nembiak Aku David, Aku TUHAN ti Pemadu Bekuasa nyebut tu ngagai iya, ‘Aku udah ngambi nuan ari pengawa nuan ke ngibun bedus, lalu ngaga nuan nyadi raja ke bala nembiak Aku Israel. Aku endang seruran enggau nuan di sebarang endur nuan bejalai, lalu Aku udah ngalahka semua munsuh nuan, lebuh nuan majakka pejalai nuan. Aku deka ngaga nuan beberita baka bala tuai ti beberita di dunya tu. Lebuh nuan mati, lalu dikuburka begulai enggau bala aki ini nuan, Aku deka ngasuh siku ari bala anak lelaki nuan nyadi raja, lalu Aku deka ngasuh perintah iya kering. Iya nya meh orang ke deka ngaga rumah Aku, lalu Aku deka nentuka perintah iya meruan belama iya. Aku deka nyadi Apai iya, lalu Iya deka nyadi anak lelaki Aku. Aku enggai badu rinduka iya, enda baka Aku enggau Saul, ti udah dibuai Aku ngambika nuan ulih nyadi raja. Aku deka ngasuh iya nyadi tuai ke bala nembiak Aku, enggau nyadi tuai ke perintah Aku belama iya. Perintah iya enda nemu abis.’ ” Natan lalu madahka ngagai David semua utai ti udah dipandangka Allah Taala ngagai iya. Udah nya David lalu tama ngagai Langkau Kain TUHAN, duduk lalu besampi, “Aku tauka ruang bilik aku enda patut nerima semua utai ti udah dikereja Nuan ke aku, TUHAN Allah Taala. Tang taja pia, Nuan diatu ngereja lebih agi ari nya. Nuan udah ngaga semaya pasal peturun aku jemah ila, lalu Nuan, TUHAN Allah Taala, udah ngaga aku nyadi orang ke besai. Nama utai bukai ti tau disebut aku ngagai Nuan? Nuan amat nemu aku, tang taja pia, Nuan masa aku, ke nembiak Nuan. Nuan ngereja nya ke aku laban nya endang peneka enggau juluk ati Nuan, kena Nuan nunjukka aku deka nyadi orang ke besai jemah ila. TUHAN, nadai orang baka Nuan. Kami endang nemu, semina Nuan siku aja ti Allah Taala. Nadai bansa bukai di dunya tu baka bansa orang Israel, ti udah dilepaska Nuan ari pengidup sida ke nyadi ulun, ngambika sida nyadi nembiak Nuan. Nuan udah ngereja pengawa ti besai sereta badas ke sida, lalu berita pasal Nuan ngelekai di serata dunya. Nuan udah ngelepaska bala nembiak Nuan ari menua Ejip, lalu udah muru semua bansa bukai lebuh bala nembiak Nuan nyerang. Nuan udah ngaga Israel nyadi nembiak Nuan belama iya, lalu Nuan, TUHAN, nyadi Allah Taala sida. “Nya alai, diatu O TUHAN, kamatka belama iya semaya ti udah digaga Nuan pasal aku enggau pasal peturun aku, lalu kereja meh utai ti ku Nuan. Nama Nuan deka tebilang, lalu orang deka nyebut belama iya, ‘ TUHAN ti Pemadu Bekuasa nya Allah Taala ke disembah orang Israel.’ Lalu Nuan deka ngasuh perintah aku meruan belama iya. Aku berani nyebut sampi tu ngagai Nuan, Allah Taala aku, laban Nuan udah mandangka semua utai tu ngagai aku, ke nembiak Nuan, lalu udah madahka ngagai aku pasal Nuan ti deka ngasuh peturun aku nyadi raja. Nuan, TUHAN, endang Allah Taala, lalu Nuan udah ngaga semaya ti manah tu ngagai aku. Aku minta Nuan merekatka peturun aku, ngambika sida deka seruran gaga ati dikerinduka Nuan. Nuan, TUHAN, udah merekatka sida, lalu berekat Nuan deka meruan ba sida belama iya.” Nyau kelama udah bekau nya, Raja David nyerang orang Pilistin baru, lalu ngalahka sida. Iya ngerampas nengeri Gat enggau genturung pendiau ti ngelingi nengeri nya ari jari sida. Iya mega ngalahka orang Moap, ke lalu nyadi nembiak iya, sereta mayar chukai ngagai iya. Udah nya, David nyerang Raja Hadadeser sitak menua Sobah di menua Siria, semak menua Hamat, laban Hadadeser udah nguji ngerampas perintah di menua ti ngimbai ulu Sungai Eupratis. David lalu ngerampas seribu buah kerita perang Hadadeser, tujuh ribu iku soldadu ke nepan kuda, enggau dua puluh ribu iku soldadu ke bejalai kaki. David ninggalka kuda semina chukup dikena seratus buah kerita perang, tang mutuska rakat semua kuda ti bukai. Lebuh orang Siria ari Damaskus ngasuh bala soldadu datai nulung Raja Hadadeser, David nyerang sida lalu munuh dua puluh dua ribu iku ari bala sida. Udah nya iya lalu nirika kem soldadu di menua sida, lalu orang Siria nyadi nembiak iya, lalu mayar chukai ngagai iya. TUHAN ngasuh David menang di semua endur. David ngerampas terabai emas ti dibai bala pemesai Hadadeser, lalu mai terabai nya ngagai Jerusalem. Iya mega ngambi mayuh amat perengka temaga ari Tibhat enggau ari Kun, iya nya dua buah nengeri ti dipegai Hadadeser. (Udah bekau nya, Solomon ngena temaga nya begagaka tangki, berapa iti batang tiang ti besai, enggau perengka temaga ti bukai ke Rumah Sembiang.) Lebuh Raja Tou di Hamat ninga David udah ngalahka semua bala soldadu Hadadeser, iya lalu ngasuh anak iya Joram meri tabi basa enggau jaku puji ngagai David ketegal iya udah ngalahka Hadadeser, ke suah udah dilaban Tou. Joram mai ngagai David pemeri ti digaga ari emas, pirak enggau temaga. Raja David lalu nyerahka semua utai nya ngagai TUHAN, sama enggau pirak enggau emas ti udah diambi iya ari semua bansa ti udah dialahka iya, iya nya bansa Edom, Moap, Amon, Pilistin, enggau bansa Amalek. Abisai - indai iya Seruiah - udah ngalahka orang Edom ba Lebak Garam, lalu munuh lapan belas ribu iku bala munsuh. Iya lalu nirika kem soldadu di serata menua Edom, lalu orang Edom nyadi nembiak Raja David magang. TUHAN ngasuh David menang di semua endur. David merintah semua menua Israel, lalu iya bejalaika atur ti lurus sereta betul ngagai semua nembiak iya. Menyadi Abisai ke benama Joap nya tuai soldadu. Jehosapat anak Ahilut nyadi tukang tulis ke semua utai ti nyadi. Sadok anak Ahitup enggau Ahimelek anak Abiatar nyadi imam. Seraiah nyadi kerani kot. Benaiah anak Jehoiada nyadi tuai orang ke nyaga David, lalu bala anak Raja David megai pangkat ti tinggi dalam perintah iya. Nyau kelama udah bekau nya, Nahas ti nyadi raja di Amon mati, lalu anak iya Hanun nganti iya nyadi raja. Ku Raja David bejaku, “Aku enda tau enda taluk ngagai Hanun, baka ke udah dikereja apai iya Nahas ngagai aku.” Nya alai David ngasuh bala seruan iya mansang mai pesan penyinu ati ngagai Hanun. Lebuh bala sida datai di Amon, lalu meri pesan penyinu ati ngagai Raja Hanun, bala tuai orang Amon lalu bejaku enggau raja, “Kati nuan ngumbai David ngasuh bala orang tu datai ditu mai pesan penyinu ati ngagai nuan, ketegal iya bebasaka apai nuan? Ukai! Iya ngasuh sida datai ditu ngambika sida matau lalu meresa lalu ngalahka menua tu!” Hanun lalu nangkap bala seruan David, ngukur ragum sida, netak gari sida naka punggung, lalu ngasuh sida pulai. Nyadi sida nya kelalu malu pulai. Lebuh David ninga berita pasal utai ti udah nyadi, iya lalu ngirumka pesan, ngasuh sida diau di Jeriko, lalu enda tau pulai sebedau ragum sida tumbuh baru. Nya baru Raja Hanun enggau orang Amon nemu diri udah ngaga David nyadi munsuh sida. Nya alai sida lalu ngirumka nyau deka bulih 40,000 kilogram pirak ngagai menua Mesopotamia enggau ngagai menua Maakah enggau menua Sobah di menua Siria, kena sida ngaji orang ke nepan kerita perang enggau nyua kerita perang sida. Tiga puluh dua ribu buah kerita perang ti disua sida, enggau bala soldadu raja Maakah datai lalu nirika kem semak Medeba. Orang Amon mega datai ari semua nengeri sida, lalu nyendiaka diri beperang. Lebuh David ninga nya, iya lalu mesanka Joap enggau semua bala soldadu. Orang Amon angkat, lalu belatur ba penama ngagai Rabah, iya nya indu nengeri sida, lalu bala raja ti udah datai deka nulung, belatur ba luar nengeri. Joap nemu bala munsuh deka nyerang iya ari mua enggau ari belakang. Nya alai iya lalu milih bala soldadu orang Israel ke pemadu kering, lalu ngasuh sida belatur nyatup orang Siria. Iya ngasuh menyadi iya Abisai nguluka bala soldadu ti bukai. Abisai lalu ngatur sida nyatup orang Amon. Ku Joap bejaku enggau Abisai, “Enti nuan meda orang Siria nyau deka ulih ngalahka aku, tulung aku, lalu enti aku meda orang Amon nyau deka ulih ngalahka nuan, aku deka nulung nuan. Kering sereta berani! Awakka kitai bebendar belaban ngarika bansa kitai, enggau ke nengeri Allah Taala. Awakka peneka TUHAN nyadi.” Joap enggau bala iya lalu mansang nyerang. Orang Siria lalu rari. Lebuh orang Amon meda orang Siria rari, sida lalu rari ari Abisai, lalu nyurutka diri ngagai nengeri. Udah nya Joap pulai ngagai Jerusalem. Lebuh orang Siria nemu diri udah alah laban orang Israel, sida lalu mai bala soldadu ari menua Siria ti tunga ke timur Sungai Eupratis, lalu ngasuh sida diuluka Sobak, ti nyadi tuai soldadu Raja Hadadeser di Sobah. Lebuh David ninga nya, iya lalu ngempuruka bala soldadu orang Israel, lalu ngasuh sida belatur nyatup orang Siria. Sida lalu bamuk. Orang Siria lalu rari. David enggau bala iya munuh tujuh ribu iku orang ke nepan kerita perang enggau empat puluh ribu iku soldadu ke bejalai kaki. Sida mega munuh Sobak ti nyadi tuai soldadu orang Siria. Lebuh bala raja ke nitihka Hadadeser nemu diri udah alah laban orang Israel, sida lalu bebaik enggau David, lalu nyadi nembiak iya. Kenyau ari nya, orang Siria enggai agi nulung orang Amon. Dalam musin bungai, iya nya maya bala raja selalu mansang ngayau, Joap nguluka bala soldadu nyerang menua Amon. Tang Raja David tinggal di Jerusalem. Sida ngelulung nengeri Rabah, nyerang, lalu ngerusak nengeri nya. Engkeramba Molek orang Amon bisi siti makota emas ti berat kira tiga puluh empat kilogram. Dalam makota nya bisi sigi batu ti berega. Batu berega nya diambi David, lalu diengkahka iya ba makota iya empu. Iya mega ngambi mayuh amat perapasan ari nengeri nya. Iya nabanka orang ari nengeri nya lalu mejalka sida bekereja ngena penyayat, changkul besi, enggau kapak. Iya mega ngereja baka nya ngagai orang di semua nengeri bukai di Amon. Udah nya, iya enggau bala iya lalu pulai ngagai Jerusalem. Udah bekau nya, perang lalu nyadi baru enggau orang Pilistin di Geser. Tu meh maya Sibichai ari Husah munuh siku orang ke besai gamal ke benama Sipai, lalu orang Pilistin alah. Siti agi perang nyadi enggau orang Pilistin. Nya meh maya Elhanan anak Jair munuh Lahmi, menyadi Goliat ke datai ari Gat, ke bempu sangkuh ti ngemesai tendai ti dikena orang betenun. Siti agi perang nyadi di Gat, alai siku orang ke besai gamal ke bisi enam iti tunjuk ba siti-siti jari, enggau kaki. Iya tu peturun bala orang besai gamal ke dulu kelia. Iya nyakap orang Israel, lalu Jonatan, anak lelaki menyadi David ke benama Samah, munuh iya. Sida tiga iku tu, ke dibunuh David enggau bala iya, endang peturun orang ke besai gamal di Gat. Nyadi Sitan deka ngasuh penusah ninggang orang Israel. Nya alai iya nyungkak David ngitung tubuh. David lalu bejaku enggau Joap enggau bala pemesai ti bukai, ku iya, “Bejalai kita ngagai semua menua Israel, berengkah ari ujung siti ngagai ujung siti menua tu, lalu itung semua orang. Aku keran deka nemu pemayuh sida.” Ku Joap nyaut, “Awakka TUHAN ngasuh orang Israel seratus kali mayuh agi ari sida ke diatu! Tuan Raja, semua sida tu nembiak nuan magang. Nama kebuah nuan deka ngereja nya, lalu ngasuh semua orang Israel salah magang?” Tang Raja mejalka Joap ngasika atur nya. Joap lalu mupuk, bejalai nengah serata menua Israel, lalu udah nya pulai baru ngagai Jerusalem. Iya lalu madahka ngagai Raja David pemayuh lelaki ti tau enggau beperang: 1,100,000 iku di menua Israel, enggau 470,000 di menua Judah. Tang laban Joap enda besetuju enggau atur raja, iya enda ngitung tubuh orang Lewi enggau orang ari raban bansa Benjamin. Allah Taala enda lantang ati ngagai pengawa nya, nya alai Iya ngukum orang Israel. Ku David bejaku enggau Allah Taala, “Aku udah bedosa besai, laban aku udah ngereja utai tu! Aku minta nuan ngampun aku. Aku udah beli ngereja utai tu.” Udah nya TUHAN lalu bejaku ngagai Gat, nabi ke bekereja ke David, “Padahka ngagai David, Aku deka ngasuh iya milih siti ari tiga iti utai. Aku deka ngereja sebarang utai ti dipilih iya.” Gat lalu mansang ngagai David, madahka utai ti udah disebut TUHAN, lalu nanya, “Ni pilih nuan? Sekalika nuan milih tiga taun lapar pungkang? tauka tiga bulan ngerarika diri ari bala munsuh? tauka tiga hari alai TUHAN nyerang nuan ngena pedang Iya, lalu ngasuh penyakit berampit dalam menua nuan, lalu ngena melikat iya munuh orang di serata menua Israel? Nama saut ti patut diberi aku ngagai TUHAN?” Ku David nyaut Gat, “Tusah amat aku laban tu! Tang aku enggai diukum mensia. Awakka TUHAN Empu ngukum aku, laban Iya endang ngembuan pengasih.” Nya alai TUHAN ngasuh penyakit balat berampit ba bala orang Israel, lalu tujuh puluh ribu iku sida mati. Udah nya Iya ngasuh siku melikat ngerusak Jerusalem, tang TUHAN ngubah runding Diri, lalu bejaku ngagai melikat nya, “Badu agi! Umbas meh nya!” Nyadi melikat nya benung bediri ngimbai endur alai orang ngindik gandum ti diempu Araunah, orang Jebus. David bisi meda melikat nya bediri entara dunya enggau langit, megai pedang, sedia deka ngerusak Jerusalem. Udah nya David enggau bala tuai orang mayuh ke sama ngena kain guni, lalu nyungkurka diri ke tanah. David lalu besampi, “O Allah Taala, aku empu ti udah ngereja penyalah tu. Aku tu ti udah bedosa lalu ngasuh orang ngitung tubuh. Tang nama utai ti udah dikereja sida tu? O TUHAN Allah Taala aku, ukum meh aku enggau kami sebilik, tang anang ngukum orang mayuh tu.” Melikat TUHAN lalu ngasuh Gat bejaku enggau David ngasuh iya mupuk lalu ngaga siti alta ke TUHAN ba endur alai ngindik gandum ti diempu Araunah. David ngasika pesan TUHAN lalu mupuk, munyi ti dipadahka Gat ngagai iya. Nyadi Araunah enggau empat iku anak lelaki iya benung ngindik gandum ba endur nya, lalu lebuh sida meda melikat nya, bala anak iya rari lalu belalai. Lebuh Araunah meda Raja David datai, iya ngambat raja, lalu nyungkurka diri ke tanah. Ku David bejaku enggau iya, “Jual ngagai aku endur alai ngindik tu, ngambika aku ulih ngaga siti alta ke TUHAN, kena nagang penyakit tu berampit. Aku deka mayar semua rega utai nya.” “Ambi aja, Tuan Raja,” ku Araunah bejaku, “lalu kereja aja utai ti deka dikereja nuan. Tu jelu sapi ti tau ditunu nyadika piring ba alta, lalu tu papan pelangka kena menyadika api, enggau gandum nyadika piring. Aku meri semua utai tu ngagai nuan.” Tang ku raja nyaut, “Enda tau baka nya. Aku enda tau enda mayar semua rega utai nya ngagai nuan. Aku enggai meri utai nuan nyadika piring ngagai TUHAN, enti utai nya ukai utai ti dibeli aku empu.” Iya lalu mayar Araunah enam ratus singkap duit emas kena meli endur ti alai ngindik gandum nya. Iya lalu ngaga siti alta dia ke TUHAN, lalu ngenjuk piring tunu enggau piring pemaik. Iya besampi, lalu TUHAN nyaut iya, ngena api ti datai ari serega, ti nganguska piring ti ba alta nya. TUHAN lalu ngasuh melikat nya nyelitka pedang iya. Lebuh David meda TUHAN udah nyaut sampi iya, iya lalu ngenjuk piring ba alta ba endur ti ngindik gandum nya. Langkau Kain TUHAN ti udah digaga Moses di menua puang, enggau alta ti alai nunu piring, agi bisi ba endur alai besembiang di Gibeon lebuh maya nya menya. Tang David enda ulih bejalai kia nyembah Allah Taala, laban iya takutka pedang melikat TUHAN. Nya alai ku David bejaku, “Tu meh endur alai Rumah Sembiang deka didirika. Tu alta alai orang Israel deka ngenjuk piring tunu.” Raja David lalu ngasuh semua orang kampar ti diau di menua Israel begempuru, lalu ngasuh sida gawa. Sekeda sida nyendiaka lampang batu kena ngaga Rumah Sembiang. Iya meri mayuh amat besi kena ngaga paku lawang, enggau pengepit ke pintu kuta ti digaga ari kayu, enggau mayuh amat temaga, datai ke orang nyau enda ulih nimbang utai nya agi. Iya ngasuh orang Tire enggau orang Sidon mai ngagai iya mayuh amat batang kayu sidar. Ku pikir David, “Rumah Sembiang ti deka digaga anak aku Solomon enda tau enda chukup manah sereta beberita dalam dunya. Tang iya agi biak, lalu nadai peneleba. Nya alai aku enda tau enda dulu nyendiaka utai nya.” Nya alai David nyendiaka mayuh amat ramu sebedau iya mati. Iya lalu mesanka anak iya Solomon, lalu ngasuh iya ngaga sebuah rumah ke TUHAN Allah Taala ke disembah orang Israel. Ku David bejaku enggau iya, “Anak, aku amat bisi amat ati deka ngaga Rumah Sembiang kena ngemesaika TUHAN Allah Taala aku. Tang TUHAN udah madahka ngagai aku, aku udah munuh kelalu mayuh orang, lalu kelalu suah udah beperang. Nya alai ketegal nya, Iya enda nyagi aku ngaga Rumah Sembiang nya ke Iya. Tang Iya udah ngaga siti semaya enggau aku. Ku Iya, ‘Nuan deka bisi siku anak lelaki, ti deka merintah dalam pemaik, laban Aku deka meri iya pemaik, ngambika iya enda diserang munsuh. Nama anak nuan nya Solomon, laban lebuh iya merintah ila, Aku deka meri pemaik enggau pengelikun ngagai menua Israel. Iya deka ngaga Rumah Sembiang nya ke Aku. Iya deka nyadi anak Aku, lalu Aku deka nyadi Apai iya. Peturun iya deka megai perintah di menua Israel belama iya.’ ” Ku David nampung jaku iya, “Nya alai, anak, awakka TUHAN Allah Taala nuan meruan enggau nuan, lalu awakka Iya ngamatka semaya Iya ti deka ngasuh nuan mujur ngaga sebuah Rumah Sembiang nya ke Iya. Lalu awakka TUHAN Allah Taala nuan meri nuan runding ti dalam, enggau penemu-dalam, ngambika nuan ulih megai perintah di menua Israel nitihka Adat Iya. Enti nuan ngasika semua adat ti udah diberi TUHAN ngagai Moses ke orang Israel, nuan deka mujur. Nuan enda tau enda kering sereta berani. Anang takut tauka irau ati. Nyadi pasal Rumah Sembiang nya, aku udah, enggau naka ulih, ngempuruka nyau deka bulih 4,000 tan emas, enggau nyau deka bulih 40,000 tan pirak kena ngaga Rumah Sembiang nya. Nambahka nya, temaga enggau besi endang enda diletak pemayuh. Aku mega udah ngasuh orang nyendiaka ramu enggau batu, tang nuan enda tau enda nambahka nya. Nuan mayuh orang gawa: orang ke betingkuhka batu, tukang batu, tukang kayu, enggau mayuh orang ke landik begagaka semua macham utai ngena emas, pirak, temaga, enggau besi. Nya alai, awakka nuan berengkah ngereja pengawa nya, lalu awakka TUHAN meruan enggau nuan.” David mega ngasuh semua bala tuai orang Israel nulung Solomon. Ku iya bejaku, “ TUHAN Allah Taala kita, udah seruran enggau kita, lalu udah meri kita pemaik. Iya udah ngasuh aku ngalahka semua orang ke nguan menua tu, lalu sida nya diatu udah nyadi ulun kita, enggau nyadi nembiak TUHAN. Nya alai, awakka kita betuaika TUHAN Allah Taala kita enggau pengabis ati enggau pengabis semengat kita. Awakka kita berengkah ngaga Rumah Sembiang, ngambika kita ulih nyimpan dalam Rumah nya Peti Lampang Batu Adat TUHAN, enggau semua utai ti kudus ti dikena nyembah Iya.” Lebuh David nyau tuai amat umur, iya lalu nyiri anak iya Solomon nyadi raja menua Israel. Raja David ngempuruka semua bala tuai orang Israel, enggau semua bala imam, enggau orang Lewi. Iya ngitung tubuh semua orang Lewi ti lelaki, ari umur tiga puluh taun ke atas. Pemayuh sida nya 38,000 iku. Raja lalu ngeletak 24,000 iku ari bala sida nya bekereja dalam Rumah Sembiang, 6,000 iku nyadi kerani, enggau nyadi hakim, 4,000 iku bekereja nyadi jejaga, lalu 4,000 iku muji TUHAN ngena pekekas musik ti diberi raja kena sida ngereja pengawa nya. David magi orang Lewi ngagai tiga bengkah raban, nitihka raban peturun sida, iya nya raban peturun Gerson, Kohat, enggau Merari. Gerson bisi dua iku anak lelaki: Ladan seduai Simei. Ladan bisi tiga iku anak lelaki: Jehiel, Setam, enggau Joel, ti nyadi tuai ke raban peturun ti diturunka Ladan. (Simei bisi tiga iku anak lelaki: Selomot, Hasiel, enggau Haran.) Kohat bisi empat iku anak lelaki: Amram, Isar, Hebron, enggau Usil. Anak lelaki iya ke tuai nya Amran. Amran nya apai Aron seduai Moses. (Aron enggau peturun iya udah diseraraka ngambika sida ngibun utai ti kudus belama iya, nunu menyan lebuh nyembah TUHAN, bekereja ke TUHAN, lalu merekatka orang mayuh dalam nama Iya. Tang anak lelaki nabi Moses disengkaumka dalam raban orang Lewi.) Moses bisi dua iku anak lelaki, Gersom seduai Elieser. Orang ke nyadi tuai ke bala anak Gersom nya Sebuel. Elieser semina bisi siku aja anak lelaki, Rehabiah, tang Rehabiah mayuh peturun. Anak lelaki Kohat ke lumur dua, Isar, bisi siku anak lelaki, benama Selomit, ti nyadi tuai ke raban peturun nya. Anak lelaki Kohat ke lumur tiga, Hebron, bisi empat iku anak lelaki: Jeriah, Amariah, Jahasiel, enggau Jekamim. Anak lelaki Kohat ke lumur empat, Usil, bisi dua iku anak lelaki: Mikah seduai Isiah. Merari bisi dua iku anak lelaki: Mahli seduai Musi. Mahli mega bisi dua iku anak lelaki, Eleasar seduai Kis, tang Eleasar mati nadai anak lelaki, semina anak indu aja. Bala anak indu iya jadi enggau bala petunggal sida empu, iya nya bala anak lelaki Kis. Musi anak lelaki Merari ke lumur dua, bisi tiga iku anak lelaki: Mahli, Eder, enggau Jerimot. Tu meh bala peturun Lewi, nitihka raban peturun enggau ruang bilik sida. Semua nama sida dituliska magang. Genap iku peturun iya ke umur dua puluh taun ke atas, bisi pengawa magang dalam Rumah Sembiang. Ku David, “ TUHAN Allah Taala ke disembah orang Israel udah meri pemaik ngagai bala nembiak Iya, lalu Iya Empu deka diau di Jerusalem belama iya. Nya alai bala orang Lewi enda ibuh agi ngesan langkau sembiang nya, enggau semua pekekas ti dikena nyembah Allah Taala.” Nitihka atur ti penudi diberi David, semua orang Lewi dituliska nama magang ngambika sida diberi pengawa lebuh umur sida manggai dua puluh taun. Tu macham pengawa ti diberi ngagai sida: nulung bala imam ke ari peturun Aron ngereja pengawa nyembah Allah Taala dalam Rumah Sembiang, ngintu tengah laman enggau bilik dalam Rumah Sembiang, lalu nyaga utai ti kudus ngambika enda kamah, betanggungjawapka roti ti diberi ngagai Allah Taala, tepung ti dikena ngaga piring, singkap roti ti enda beragi, piring ti dipanggang, enggau tepung ti dichampur enggau minyak kana, nimbang enggau nakar piring ti diberi ngagai Rumah Sembiang, enggau muji sereta ngemuliaka TUHAN pagi lemai enggau genap kali piring ditunu ke TUHAN lebuh Hari Sabat, lebuh Gawai Anak Bulan, enggau lebuh gawai bukai. Atur mega digaga kena ngeletak pemayuh tubuh orang Lewi bekereja sekali-sekali. Orang Lewi nadai diberi pengawa bukai tang semina nyembah TUHAN siku aja. Sida diberi tanggungjawap ngintu Langkau Kain TUHAN enggau Rumah Sembiang, enggau pengawa nulung kaban belayan sida, iya nya bala imam ke ari peturun Aron, nyembah Allah Taala dalam Rumah Sembiang. Tu raban bala peturun Aron. Aron bisi empat iku anak lelaki: Nadap, Abihu, Eleasar, enggau Itamar. Nadap seduai Abihu mati dulu ari apai sida, lalu nadai ninggalka purih, nya alai menyadi seduai iya Eleasar enggau Itamar nyadi imam. Raja David ngatur bala peturun Aron ngagai mayuh bengkah raban nitihka pengawa ti dikereja sida. Iya ngereja nya ditulung Sadok, siku peturun Eleasar, sereta ditulung Ahimelek, siku peturun Itamar. Bala peturun Eleasar dibagi ngagai enam belas bengkah raban, lalu bala peturun Itamar dibagi ngagai lapan bengkah raban. Utai nya digaga baka nya laban lelaki ti nyadi tuai bilik mayuh agi datai ari peturun Eleasar. Nyadi laban orang ari peturun Eleasar enggau Itamar nyadi pemesai dalam Rumah Sembiang, enggau nyadi tuai pengarap, nya alai sida iya diberi pengawa ngena chara bechabut undi. Bala peturun Eleasar enggau bala peturun Itamar begintir-gintir enchabut undi. Udah nya nama sida lalu dituliska Semaiah anak Netanel, siku orang Lewi ti nyadi kerani. Raja, bala pemesai iya, Imam Sadok, Ahimelek anak Abiatar, enggau bala tuai bilik, nyadika saksi magang. Nama orang tu ditulis nitihka pengawa ti dikereja sida ke datai ngagai Rumah Sembiang lalu ngereja pengawa ti udah diletak aki sida Aron, nitihka pesan TUHAN Allah Taala ke disembah orang Israel. Tu nama tuai bilik ti bukai ke datai ari peturun Lewi: Jehdeiah, peturun Amran nengah Sebuel; Isiah, peturun Rehabiah; Jahat, peturun Isar nengah Selomit; Jeriah, Amariah, Jehazil, enggau Jekamim, anak Hebron, nitihka umur sida; Samir, peturun Usil nengah Mikah; Sekariah, peturun Usil nengah Isiah, menyadi Mikah; Mahli, Musi, enggau Jasiah, peturun Merari. Jasiah bisi tiga iku anak lelaki: Soham, Sakur, enggau Ibri. Musi bisi tiga iku anak lelaki: Mahli, Eder, enggau Jerimot. Nya meh ruang bilik orang Lewi. Tuai ke siti-siti ruang bilik enggau siku menyadi iya ke biak agi enchabut undi ke pengawa sida, baka ke udah dikereja kaban belayan sida ti bukai, iya nya bala imam ke diturunka Aron. Raja David, Sadok, Ahimelek, enggau bala tuai bilik orang imam, enggau tuai bilik orang Lewi nyadika saksi magang. Raja David enggau bala tuai orang Lewi lalu milih raban peturun orang Lewi nguluka pengawa besembiang: Asap, Heman, enggau Jedutun. Pengawa sida nya madahka pesan Allah Taala, diumba enggau musik ari belikan enggau bebendai. Tu ripih nama orang ke udah dipilih nguluka pengawa besembiang, enggau bagi pengawa ti dikereja siti-siti raban: Empat iku anak lelaki Asap: Sakur, Josep, Netaniah, enggau Asarelah. Sida tu diuluka Asap, ke madahka pesan Allah Taala, genap kali raja ngasuh iya. Enam iku anak lelaki Jedutun: Gedaliah, Seri, Jesaiah, Simei, Hasabiah, enggau Matitiah. Sida tu diuluka apai sida, madahka pesan Allah Taala, diumba enggau musik ari belikan, enggau lagu puji, enggau lagu terima kasih ngagai TUHAN. Empat belas iku anak lelaki Heman: Bukiah, Mataniah, Usil, Sebuel, Jerimot, Hananiah, Hanani, Eliatah, Gidalti, Romanti-eser, Josbekasah, Maloti, Hotir, enggau Mahasiot. Allah Taala udah meri ngagai Heman, ti nyadi nabi ke raja, empat belas iku anak lelaki tu, enggau tiga iku anak indu, munyi ti udah disemaya Iya, ngambika meri kuasa ngagai Heman. Semua anak lelaki iya tu nebah bebendai enggau belikan, diuluka apai sida, kena ngumba pengawa nyembah Allah Taala dalam Rumah Sembiang. Semua dua puluh empat iku lelaki tu orang ke landik magang. Orang Lewi ti bukai endang orang ke udah dilatih nebah musik. Pemayuh sida 288 iku. Kena nentuka bagi pengawa sida, sida bechabut undi, nemuka sida nya agi biak tauka udah tuai, endang udah bisi pengelandik tauka semina baru deka ngujika diri. Tu bagi pengawa ke orang Lewi ke bekereja nyadi jejaga ba Rumah Sembiang. Ari raban peturun Korah nya Meselemiah anak Kore, ari ruang bilik Asap. Iya bisi tujuh iku anak lelaki, diripih nitihka penuai sida: Sekariah, Jediael, Sebadiah, Jatnil, Elam, Jehohanan, enggau Eliehoenai. Obet-edom udah diberekatka Allah Taala enggau lapan iku anak lelaki, diripih nitihka penuai sida: Semaiah, Jehosabat, Joah, Sakar, Netanel, Amil, Isakar, enggau Peuletai. Ruang bilik Obet-edom mansutka enam puluh dua iku orang ke landik ngereja pengawa tu. Ruang bilik Meselemiah mansutka lapan belas iku orang ke landik. Hosah, ari raban peturun Merari, bisi empat iku anak lelaki: Simri (apai iya ngasuh iya nyadi tuai, taja pen iya ukai anak tuai), Hilkiah, Tebaliah, enggau Sekariah. Semua orang ari ruang bilik Hosah ti nyadi jejaga dalam Rumah Sembiang nya tiga belas iku. Bala orang ke nyaga Rumah Sembiang nya dibagi ngagai raban nitihka ruang bilik, lalu sida iya diberi pengawa dalam Rumah Sembiang, baka orang Lewi ti bukai. Genap ruang bilik, enda milih pemayuh orang dalam ruang bilik nya, bechabut undi kena nentuka pintu ti dijaga sida. Selemiah enchabut undi ke pintu ti muak ke timur, lalu anak iya Sekariah, orang ke selalu meri jaku lalau ti manah, enchabut undi ke pintu ti muak ke utara. Obet-edom udah diberi pintu ti muak ke selatan, lalu bala anak lelaki iya diletak nyaga bilik setor. Supim seduai Hosah diasuh nyaga pintu ti muak ke barat, enggau pintu Saleket ba jalai ti muak ke atas. Orang ke jaga endang meruan diberi jam maya sida jaga, begintir-gintir. Muak ke timur, enam iku jejaga bekereja sehari; muak ke utara, empat; enggau muak ke selatan, empat. Empat iku jejaga nyaga bilik setor tiap hari, dua iku ba siti-siti bilik setor. Semak balai ti besai ti muak ke barat, empat iku orang jaga ngimbai jalai raya, enggau dua iku ba balai nya empu. Nya meh bagi pengawa jejaga ti diberi ngagai raban peturun Korah enggau ngagai raban peturun Merari. Orang Lewi ti bukai diasuh ngemataka sarang reta Rumah Sembiang, enggau nyaga bilik setor alai nyimpan pemeri ti diserahka ngagai Allah Taala. Ladan, siku ari bala anak lelaki Gerson, nya nurunka dua tiga ruang bilik, nyengkaum ruang bilik anak iya Jehiel. Anak Ladan ti lelaki dua iku, Setam seduai Joel, nyadi tuai ngemataka sarang reta Rumah Sembiang enggau bilik setor. Pengawa mega diletak ngagai peturun Amram, Isar, Hebron enggau Usil. Sebuel, siti raban bansa ari anak Moses ke benama Gersom, nyadi tuai pemesai ke betanggungjawapka sarang reta Rumah Sembiang. Iya bekaban enggau Selomit ari menyadi Gersom ke benama Elieser. Elieser nya apai Rehabiah, ti nyadi apai Jesaiah, apai Joram, apai Sikri, apai Selomit. Selomit enggau sida sebilik ngemataka semua pemeri ti diserahka Raja David, bala tuai bilik, bala tuai peturun, enggau bala pemesai soldadu, ngagai Allah Taala. Sida ngambi sekeda perapasan ti udah ulih sida lebuh sida beperang, lalu nyerahka utai nya ngambika bisi dikena dalam Rumah Sembiang. Selomit enggau sida sebilik nyadi tuai ngemataka semua utai ti udah diserahka ngagai Allah Taala ngambika bisi dikena dalam Rumah Sembiang, nyengkaum pemeri ti dibai nabi Samuel, dibai Raja Saul, dibai Abner anak Ner, enggau dibai Joap anak Seruiah. Chenaniah enggau bala anak lelaki iya, ari peturun Isar, diasuh ngereja pengawa opis: nyadi pemesai dalam opis, enggau nyadi hakim. Hasabiah enggau 1,700 iku bala kaban belayan iya ti tebilang magang, ke datai ari peturun Hebron, diasuh ngatur semua pekara pengarap enggau semua pekara bukai di menua Israel di barat Sungai Jordan. Jeriah nya orang ke nyadi tuai ke bala peturun Hebron. Dalam taun ti keempat puluh David nyadi raja, purih ari peturun Hebron bisi kena pansik, lalu bala soldadu ti tebilang nama ari ruang bilik nya bisi ditemu diau di Jaser, di menua Giliat. Raja David milih 2,700 iku tuai bilik ti tebilang ari kaban belayan Jeriah, lalu ngasuh sida ngemataka semua pekara pengarap enggau pekara bukai di menua Israel ti di timur Sungai Jordan, iya nya di menua Reuben, Gat, enggau Manasi Timur. Tu list nama tuai bilik orang Israel, enggau tuai peturun, enggau bala pemesai ke bejalaika pengawa perintah. Genap bulan dalam taun siti-siti, 24,000 iku orang bekereja ari baruh tuai ke bulan nya. Raja David enda ngitung orang ke baruh ari umur dua puluh taun, laban TUHAN udah besemaya deka ngasuh orang Israel ngemayuh bintang ti di langit. Joap anak Seruiah, belabuh ngitung tubuh, tang iya enda nembuka pengawa nya, laban Allah Taala ngukum orang Israel ketegal pengawa nya. Nya alai pemayuh tubuh ti diitung nadai dituliska dalam cherita pasal Raja David. Aya Raja David ke benama Jonatan nya orang ke landik meri jaku lalau, sereta bepelajar. Iya enggau Jehiel anak Hakmoni ngemataka pelajar bala anak lelaki raja. Ahitopel nya orang ke nyadi penyanding penemu raja, lalu Husai ari bansa Arki nyadi pangan ke alai raja betanya. Lebuh Ahitopel mati, Abiatar enggau Jehoiada anak Benaiah nyadi penyanding penemu. Joap nyadi tuai soldadu. Raja David mesanka semua pemesai di menua Israel begempuru di Jerusalem. Nya alai semua bala pemesai ari semua raban bansa, bala pemesai ke bejalaika pengawa perintah, bala tuai peturun, orang ke ngemataka reta tengkira enggau jelu tupi ti diempu raja enggau bala anak iya, semua bala pemesai ke bekereja dalam istana, bala tuai soldadu, enggau orang ke bepangkat, begempuru di Jerusalem. David bediri di mua sida, lalu bejaku enggau sida, “Menyadi, unggal, pendingka aku. Aku udah bisi amat ati deka ngaga rumah ti tetap ke Peti Lampang Batu Adat, ti nyadika pelasar kaki TUHAN Allah Taala kitai. Aku udah nyendiaka utai kena ngaga sebuah Rumah Sembiang nya kena ngemesaika Iya, tang Iya enda nyagi aku ngaga rumah nya, laban aku tu soldadu, lalu udah munuh mayuh orang. TUHAN Allah Taala ke disembah orang Israel, udah milih aku enggau bala peturun aku megai perintah di menua Israel belama iya. Iya udah milih raban bansa Judah mansutka tuai, lalu ari Judah iya udah milih ruang bilik apai aku. Ari semua ruang bilik nya, Iya udah gaga ati ngambi aku, lalu ngasuh aku nyadi raja ke semua menua Israel. Iya udah meri aku mayuh anak lelaki, lalu ari semua sida nya, Iya udah milih Solomon megai perintah di menua Israel, menua ti endang diperintah TUHAN. “Ku TUHAN bejaku ngagai aku, ‘Anak nuan Solomon deka ngaga Rumah Aku. Aku udah milih iya nyadi anak Aku, lalu Aku deka nyadi Apai iya. Aku deka ngasuh perintah iya meruan belama iya, enti iya bejimat ngasika semua adat enggau pesan Aku, baka ke dikereja iya diatu.’ “Nya alai, di mua Allah Taala, enggau di mua semua bala orang Israel tu, ke endang nembiak TUHAN, aku ngasuh kita nitihka lalu ngiga semua pesan TUHAN Allah Taala kita, ngambika kita deka majak bempu menua ti manah tu, lalu nyerahka menua tu ngagai serak ti nangkanka kita belama iya.” Ngagai Solomon iya nyebut jaku tu, “Anak, aku ngasuh nuan ngaku Allah Taala ti disembah apai nuan, nyadika Allah Taala nuan, lalu betuaika Iya enggau enda bebagi ati, sereta enggau runding ti seruran ransing. Iya nemu semua runding enggau pengingin kitai. Enti nuan mansang ngagai Iya, Iya deka nyambut nuan, tang enti nuan ninggalka Iya, Iya deka ngelengkaka nuan belama iya. Nuan enda tau enda nemu, TUHAN udah milih nuan ngaga Rumah Sembiang Iya ti kudus. Gaga Rumah Sembiang nya; nuan enda tau enda kering, lalu ngereja pengawa nya.” David lalu meri ngagai Solomon semua pelan ke rumah dalam Rumah Sembiang nya, pelan ke bilik setor, enggau pelan ke semua bilik bukai, enggau pelan ke Endur ti Pemadu Kudus, alai dosa diampun. Iya mega meri ngagai Solomon pelan ke semua utai ti udah dikira iya ke tengah laman enggau ke bilik ti ngelingi tengah laman nya, pelan ke bilik setor alai nyimpan pekekas Rumah Sembiang, enggau alai nyimpan pemeri ti diserahka ngagai TUHAN. David mega meri ngagai iya pelan kena ngatur bala imam enggau orang Lewi ngereja pengawa sida, ngereja pengawa dalam Rumah Sembiang, sereta ngintu semua pekekas dalam Rumah Sembiang. Iya meri atur pasal pemayuh pirak enggau emas kena begagaka pekekas nya, kena begagaka siti-siti lampu enggau penuduk lampu, kena begagaka mija pirak, enggau siti-siti mija emas alai engkah tuku roti ti diberi ngagai Allah Taala. Iya mega meri atur pasal pemayuh emas ti tulin ti tau dikena begagaka serampang, mangkuk, enggau tepayan, pemayuh pirak enggau emas kena begagaka pinggai, enggau pemayuh emas ti tulin kena begagaka alta alai nunu menyan, enggau kena begagaka kerita perang ke melikat cherub ti besayap, ti ngerembaika sayap seduai iya ari atas Peti Lampang Batu Adat TUHAN. Ku Raja David, “Semua utai nya bisi dalam pelan ti ditulis nitihka atur ti udah diberi TUHAN Empu ngagai aku, ngambika dikereja.” Ku Raja David bejaku ngagai anak iya Solomon, “Nuan enda tau enda kering sereta berani, lalu kereja pengawa nya. Anang takut tauka irau ati; laban TUHAN Allah Taala, ti nyadi Allah Taala aku, bisi enggau nuan. Iya enda ngelebuka nuan, tauka ninggalka nuan, nyentuk ngagai maya semua pengawa begagaka Rumah Sembiang TUHAN udah tembu magang. Bala imam enggau bala orang Lewi udah diberi pengawa ti deka dikereja sida dalam Rumah Sembiang. Orang ke bekereja, ke bisi semua macham pengelandik gagit ati deka nulung nuan, lalu semua orang mayuh enggau bala tuai sida endang nganti atur ari nuan.” Ku Raja David madahka ngagai semua orang ke begempuru dia, “Anak aku Solomon udah dipilih Allah Taala, tang iya agi biak lalu kurang peneleba. Utai ti deka dikereja nya pengawa ti besai, laban tu ukai istana alai mensia diau, tang Rumah Sembiang TUHAN Allah Taala. Aku udah, enggau naka ulih nyendiaka utai kena ngaga Rumah Sembiang nya - emas, pirak, temaga, besi, ramu, batu ti berega enggau batu gem, batu kena begagaka geladak, enggau mayuh batu ti alus. Nambahka semua utai ti udah disediaka aku, aku udah meri pirak enggau emas ari reta tengkira aku empu, ketegal pemesai pengerindu aku ke Rumah Sembiang Allah Taala. Aku udah meri 115 tan emas ti pemadu alus enggau 265 tan pirak ti tulin kena ngelagu dinding Rumah Sembiang enggau kena ngaga semua utai ti deka digaga orang ke landik. Kati orang bukai bisi deka meri utai ngagai TUHAN?” Udah nya bala tuai peturun, bala pemesai ari raban bansa, bala tuai soldadu, enggau bala orang ke ngemataka reta tengkira raja lalu madahka diri deka meri utai kena begagaka Rumah Sembiang: 190 tan emas, 380 tan pirak, 675 tan temaga, enggau 3,750 tan besi. Orang ke bisi batu ti berega meri utai nya ngagai sarang reta Rumah Sembiang. Nyadi sarang wang tu dikemataka Jehiel, ke datai ari raban bansa Gersom ari peturun Lewi. Orang mayuh udah meri enggau ati ti gerah mudah ngagai TUHAN, lalu sida gaga ati ke pemayuh utai ti diberi. Raja David mega balat amat gaga ati. David lalu muji Allah Taala di mua semua orang mayuh. Ku iya, “ TUHAN Allah Taala aki kami Jakop, awakka Nuan dipuji belama lama iya! Nuan endang besai sereta bekuasa, bemulia, pemadu manah, lalu endang Raja. Semua utai di serega enggau di dunya endang enggi Nuan magang, lalu Nuan endang Raja, Raja ari atas semua. Semua pengaya enggau basa endang datai ari Nuan. Nuan merintah semua utai ngena pengering enggau kuasa Nuan, lalu Nuan ulih ngaga orang nyadi besai sereta kering. Diatu, Allah Taala kami, kami meri terima kasih ngagai Nuan, lalu kami muji nama Nuan ti bemulia. “Tang taja pia, aku enggau nembiak aku enda tentu ulih meri Nuan utai, laban semua utai endang pemeri ari Nuan, lalu kami semina meri pulai baru utai ti endang enggi Nuan. Nuan nemu, O TUHAN, kami idup ditu baka orang ke udah kena buai ngagai menua bukai, baka orang kampar, baka aki ini kami menya. Seput kami semina tan sekejap aja baka ayuk, lalu kami enda ulih ngerarika diri ari pemati. O TUHAN Allah Taala kami, kami udah ngempuruka semua pengaya tu kena ngaga Rumah Sembiang Nuan, kena ngemesaika nama Nuan ti kudus, tang semua utai tu datai ari Nuan magang, lalu semua utai tu endang enggi Nuan. Aku nemu Nuan ngabas ati genap iku orang, lalu gaga ati ke orang ke rentang ati. Ngena ati ti bendar sereta lurus aku udah abis ati meri semua utai tu ngagai Nuan, lalu aku udah meda bala nembiak Nuan ti begempuru ditu udah lantang ati mai pemeri tu ngagai Nuan. TUHAN Allah Taala aki ini kami Abraham, Isak enggau Jakop, awakka Nuan ngasuh pengangkun ti baka tu seruran kering belama-lama dalam ati bala nembiak Nuan, lalu awakka Nuan ngasuh sida seruran tetap ati ngagai Nuan. Beri meh ngagai anak aku Solomon pengingin ti enda belampung ati ngasika semua pesan, adat, enggau atur Nuan, lalu ngaga Rumah Sembiang ngena utai tu ti udah disediaka aku.” Udah nya David lalu bejaku enggau orang mayuh, “Beri puji ngagai TUHAN Allah Taala kita!” Semua orang ke begempuru lalu muji TUHAN Allah Taala aki ini sida, lalu sida nyungkurka diri ngemesaika TUHAN enggau raja. Hari siti sida munuh jelu nyadika piring, nyerahka jelu nya ngagai TUHAN, lalu udah nya, meri utai nya ke diempa orang mayuh. Nambahka nya, sida mega meri seribu iku sapi ti lelaki, seribu iku bedus ti lelaki, enggau seribu iku anak domba nyadika piring tunu segala ba alta. Sida mega mai piring wain. Nya alai sida gaga ati sehari nya lebuh sida makai ngirup di mua TUHAN. Sida lalu nyiri Solomon nyadi raja kedua kali. Dalam nama TUHAN sida nata iya nyadi raja, lalu Sadok nyadi imam. Nya alai Solomon nganti apai iya nyadi raja ba kerusi diraja ti udah ditumbuhka TUHAN. Iya mujur nyadi raja, lalu semua orang Israel ngasi magang ke iya. Semua bala pemesai enggau bala soldadu, nyengkaum bala anak lelaki David ti bukai, besemaya deka taluk ngagai Raja Solomon. TUHAN ngasuh semua orang Israel bebasaka Solomon, lalu Iya ngaga Solomon bemulia agi ari semua raja bukai ti udah kala megai perintah di menua Israel. David anak Jesi merintah semua menua Israel empat puluh taun. Iya merintah di Hebron tujuh taun, lalu di Jerusalem tiga puluh tiga taun. Iya mati lebuh umur iya nyau tuai, bulih pengaya sereta dibasa orang, lalu anak iya Solomon nganti iya nyadi raja. Cherita lama pasal Raja David, ari pun nyentuk ke ujung, bisi dituliska magang dalam cherita pasal tiga iku nabi, Samuel, Natan, enggau Gat. Cherita nya nusui pasal chara iya merintah, pemesai kuasa iya, enggau pasal semua utai ti udah nyadi ba iya, ba orang Israel, enggau ba perintah menua bukai ti bekelingi dia. Solomon anak Raja David negapka diri megai perintah, lalu TUHAN Allah Taala merekatka iya, lalu ngasuh iya balat bekuasa. Raja Solomon meri pesan ngagai semua pemesai ti nyadi tuai ke seribu iku soldadu, nyadi tuai ke seratus iku, semua pemesai perintah, semua tuai bilik, enggau semua orang mayuh ti bukai, ngasuh sida bejalai enggau iya ngagai endur alai besembiang di Gibeon. Sida mansang ngagai Gibeon laban Langkau Kain TUHAN, ti udah digaga Moses di menua puang, bisi dia. ( Tang Peti Lampang Batu Adat di Jerusalem, disimpan dalam langkau kain ti udah didirika Raja David lebuh iya mai Peti nya ari Kiriat-jearim.) Alta temaga ti udah digaga Besalel anak Uri, uchu Hur, bisi mega di Gibeon di mua Langkau Kain TUHAN ti Pemadu Tinggi. Solomon enggau semua orang mayuh lalu nyembah TUHAN dia. Raja ngenjuk piring ba alta temaga ti ba Langkau Kain TUHAN kena iya nyembah TUHAN. Iya ngasuh orang munuh seribu iku jelu lalu nunu jelu nya segala ba alta nya. Malam nya Allah Taala pegari di mua Solomon, lalu bejaku ngagai iya, “Pinta ari Aku sebarang utai ti dikedekaka nuan.” Ku Solomon nyaut, “Nuan seruran ngayanka pengerindu ti besai ngagai apai aku David, lalu diatu Nuan udah ngasuh aku nganti iya nyadi raja. O TUHAN Allah Taala, awakka Nuan ngamatka semaya ti udah digaga Nuan enggau apai aku. Nuan udah ngasuh aku nyadi raja megai orang ke ngemayuh tu datai ke sida nyau enda ulih diitung agi. Nya alai, beri aku penemu-dalam enggau pemandai kena aku merintah sida. Enti enda, baka ni ku aku ulih merintah bala nembiak Nuan ti kering tu?” Ku Allah Taala nyaut Solomon, “Nuan udah milih utai ti ngena. Nuan nadai minta pengaya tauka reta tengkira, tauka nama ti tebilang, tauka minta munsuh nuan dibunuh, tauka minta umur diri panjai, tang nuan udah minta penemu-dalam enggau pemandai ngambika nuan ulih merintah bala nembiak Aku ti udah diasuh Aku ibun nuan. Aku deka meri ngagai nuan penemu-dalam enggau pemandai. Lalu nambahka nya, Aku deka meri nuan mayuh agi pengaya, reta tengkira, lalu ngasuh nuan lebih agi tebilang ari semua raja bukai ke dulu tauka dudi agi ari nuan.” Solomon lalu ninggalka endur alai besembiang di Gibeon, alai Langkau Kain TUHAN ti bediri, lalu pulai ngagai Jerusalem. Iya megai perintah di menua Israel ari Jerusalem. Iya ngempuruka 1,400 buah kerita perang, enggau 12,000 iku kuda perang. Sekeda sida nya diengkah iya di Jerusalem, lalu sida ti bukai diengkah iya ba mayuh bengkah nengeri bukai. Lebuh iya megai perintah, pirak enggau emas mayuh amat di Jerusalem, datai ke sida nyau baka utai ngapa, lalu kayu sidar nyau ngemayuh kayu sikamur ba kaki bukit di menua Judah. Kuda Raja Solomon dibeli iya ari menua Ejip enggau ari Kue; orang ke bedagang ngarika raja meli kuda nya ari Kue ngena rega ti dikena lebuh maya nya. Sida meli kerita perang ari menua Ejip, lalu udah nya nyual kerita perang nya ngagai raja orang Iti enggau raja bansa Aram ngena rega 600 singkap duit pirak ke sebuah kerita. Sida nyual siku kuda ngena rega 150 singkap duit pirak. Raja Solomon lalu mutuska runding deka ngaga Rumah Sembiang, enggau ngaga sebuah istana ke iya empu. Iya ngasuh 70,000 iku orang ngangkut barang kena ngaga rumah nya, enggau 80,000 iku ningkuh batu ba menua ti bebukit, dikemataka 3,600 iku mandur. Solomon ngirumka pesan tu ngagai Raja Hiram di Tire: “Dulu menya nuan bekaul enggau apai aku David, lalu nuan ngirumka kayu sidar ngagai iya kena iya ngaga rumah iya empu. Aku diatu baru deka ngaga sebuah Rumah Sembiang kena ngemesaika TUHAN Allah Taala aku. Rumah nya deka nyadi endur ti kudus alai bala nembiak aku enggau aku empu nyembah TUHAN, betunuka menyan ti digaga ari rempah ti bebau rengut, endur alai kami deka seruran meri roti ti kudus nyadika piring kami, ngenjuk piring tunu genap pagi lemai, enggau lebuh Hari Sabat, lebuh Gawai Anak Bulan, enggau ba mayuh bengkah hari ti kudus kena kami ngemesaika TUHAN Allah Taala kami, munyi ti udah diasuh TUHAN kereja orang Israel belama iya. Aku deka ngaga Rumah Sembiang ti besai, laban Allah Taala kami besai agi kuasa ari petara bukai. Tang iya ti bendar, nadai orang ulih ngaga rumah ke Allah Taala. Indah semua langit luar deh enda ulih ngundan Iya. Nya alai, Rumah Sembiang ti deka digaga aku nya semina nyadi endur alai betunuka menyan ke Allah Taala. Nya alai kirumka ngagai aku siku orang ke landik ngukir, landik bekereja ngena emas, pirak, temaga, enggau besi, landik begagaka kain ti biru, ungu enggau mirah. Iya deka bekereja sama enggau bala tukang tempa ti udah dipilih apai aku ari menua Judah enggau ari Jerusalem. Aku nemu bala nuan endang landik beramu. Nya alai, kirumka lumpung kayu sidar, saipris, enggau juniper ari Lebanon. Aku sedia deka ngirumka bala aku nulung bala nuan nyendiaka kayu ramu enggau naka pemayuh, laban Rumah Sembiang ti deka digaga aku nya besai sereta manah tukuh. Aku deka ngirumka bekal ke bala nuan: 2,000 tan gandum, 2,000 tan barli, 400,000 liter wain, enggau 400,000 liter minyak kana.” Raja Hiram lalu ngirumka saut iya ngagai Solomon. Ku iya nulis, “Laban TUHAN rinduka bala nembiak Iya, Iya udah ngasuh nuan nyadi raja sida. Pujika TUHAN Allah Taala ke disembah orang Israel ti udah ngaga langit enggau dunya! Iya udah meri ngagai Raja David anak ti bepenemu-dalam, ke penuh laban pemereti ati enggau pengelandik, ke bekira deka ngaga sebuah Rumah Sembiang TUHAN, enggau sebuah istana ke iya empu. Aku ngirumka ngagai nuan siku tukang besi ke pandai sereta landik. Nama iya Huram. Indai iya ari raban bansa Dan, lalu apai iya endang asal ari nengeri Tire. Iya nemu begagaka utai ari emas, pirak, temaga, ari besi, batu enggau ari kayu. Iya nemu begagaka utai ari kain ti biru, ungu enggau kain ti mirah, enggau ari linin. Iya nemu ngaga sebarang macham ukir, lalu ulih nitihka sebarang pelan ti diasuh titihka iya. Awakka iya sama bekereja enggau bala nuan ti landik, sereta enggau bala orang ke udah bekereja ke apai nuan, Raja David. Nya alai, kirumka kitu gandum, barli, wain, enggau minyak kana ti udah disemaya nuan. Kami deka nebang ba Bukit Lebanon semua kayu sidar ti dipeguna nuan, ngaga kayu nya nyadi akit, lalu beraratka akit nya nengah tasik nyentuk ngagai Jopa. Ari nya nuan tau mai kayu nya ngagai Jerusalem.” Raja Solomon ngitung tubuh semua orang bansa bukai ke diau di menua Israel, baka ke udah dikereja apai iya David. Pemayuh orang bansa bukai ke diau di menua nya: 153,000 iku. Tujuh puluh ribu iku ari bala sida nya diasuh iya ngangkut barang kena begagaka Rumah Sembiang, 80,000 iku ningkuh batu ba bukit, lalu ngasuh 3,600 nyadi mandur ngambika pengawa nya mujur dikereja. Nyadi Raja David, apai Solomon, udah nyendiaka endur alai Rumah Sembiang nya deka didirika. Endur nya di Jerusalem, ba Bukit Moriah, alai TUHAN ti udah pegari di mua David, ba endur ti udah alai Araunah, orang Jebus, ngindik gandum. Raja Solomon belabuh ngaga Rumah Sembiang nya ba bulan ti kedua dalam taun ti keempat iya udah nyadi raja. Pemanjai Rumah Sembiang ti digaga Raja Solomon nya 27 meter, lalu buka iya 9 meter. Bilik penama nya sebaka enggau pemesai buka Rumah Sembiang nya empu, 9 meter, lalu peninggi iya 54 meter. Dinding bilik nya disampak enggau emas ti tulin. Dinding bilik besai dilapis ngena kayu sidar, lalu disampak enggau emas ti alus, ti udah diukir neladan kayu engkerema enggau rantai. Raja Solomon ngelagu Rumah Sembiang nya ngena batu ti berega, enggau ngena emas ti dibeli ari menua Parbaim. Emas nya dikena iya nyampak dinding Rumah Sembiang, kasau, pintu penama, enggau pintu. Tukang ukir ngukir ba dinding nya gambar bala melikat cherub ti besayap. Bilik ti di dalam, ti dikumbai Endur ti Pemadu Kudus, nya panjai 9 meter lalu buka iya 9 meter, iya nya sebaka enggau pemesai buka Rumah Sembiang empu. Dua puluh lima tan emas dikena nyampak dinding Endur ti Pemadu Kudus; enggau 570 gram emas dikena ngaga paku lawang. Dinding sadau mega disampak enggau emas. Raja mega ngasuh bala orang ke gawa ke iya ngaga ari besi dua iku melikat cherub ti besayap, nyampak seduai nya enggau emas, lalu ngengkahka seduai iya dalam Endur ti Pemadu Kudus, Tirai ke Endur ti Pemadu Kudus digaga ari kain linin enggau ari utai bukai, ti udah disamak ngena samak ti biru, ungu, enggau mirah, lalu gambar bala melikat cherub ti besayap disulamka ba tirai nya. Raja Solomon ngasuh orang ngaga dua iti tiang ti besai. Peninggi siti-siti tiang nya 15.5 meter, lalu didirika di mua Rumah Sembiang. Siti-siti tiang nya bisi tutup, lalu peninggi tutup nya 2.2 meter. Tutup tiang ti besai dua iti nya dilagu ngena ukir gamal rantai ti dianyam, enggau seratus igi buah delima ti digaga ari temaga. Tiang besai dua iti nya didirika ba tisi penama ngagai Rumah Sembiang. Tiang besai ti ba tisi ari selatan nya diberi nama Jachin lalu tiang ti besai ti ba tisi utara nya diberi nama Boas. Raja Solomon ngasuh orang ngaga siti alta temaga, 9 meter besegi, lalu peninggi iya 4.5 meter. Iya mega ngaga, ari temaga, sigi tangki ti segala, penalam 2.2 meter, buka 4.4 meter, lalu sakap iya 13.2 meter. Ngelingi tisi tangki nya ari luar bisi dua iti rintai ukir ti beranggung dua. Ukir nya digaga neladan gamal sapi ti lelaki, lalu digaga ari temaga ti dikena ngaga tangki nya empu. Tangki nya diengkah ba atas belakang dua belas iku sapi ti lelaki ti digaga ari temaga, ti nunga ke luar, tiga nunga ke utara, tiga nunga ke barat, tiga nunga ke selatan lalu tiga nunga ke timur. Penebal dinding tangki nya 75 milimeter. Lilit tisi tangki nya baka lilit tisi mangkuk, melebir ke luar baka kuntum bungai. Tangki nya ulih ngundan kira 60,000 liter. Sida mega ngaga sepuluh iti bisin, lima deka diengkah ba tisi selatan Rumah Sembiang, lalu lima ba tisi ti muak ke utara. Bisin nya dikena masu perengka tubuh jelu ti deka ditunu nyadika piring. Ai ti dalam tangki nya dikena bala imam masu diri. Sida ngaga siti tengah laman ti di dalam ke bala imam, enggau tengah laman ti di luar. Pintu ti ba lubang pintu ti nyeraraka tengah laman dua iti nya disampak enggau temaga. Tangki nya diengkah semak sukut ti muak ke timur selatan. Raja ngasuh semua utai nya digaga ba endur alai orang ke ngeluluhka besi ba entara Sukot enggau Seredah ba Lebak Jordan. Mayuh amat utai digaga, datai ke orang nyau enggai agi kiruh ngira pemayuh temaga ti dikena. Raja Solomon mega ngasuh pekekas emas digagaka Rumah Sembiang: alta enggau mija alai engkah roti ti diberi ngagai Allah Taala; penuduk lampu, enggau lampu, ari emas ti alus. Lampu nya deka menyadi di mua Endur ti Pemadu Kudus nitihka atur; ukir bungai, lampu, enggau penyepit; pekekas kena madamka api, mangkuk, pinggai alai engkah menyan, enggau talam kena mai bara api. Semua utai tu digaga ari emas ti tulin magang. Pintu luar ke Rumah Sembiang, enggau pintu ngagai Endur ti Pemadu Kudus disampak enggau emas magang. Lebuh Raja Solomon udah nembuka semua pengawa begagaka Rumah Sembiang, iya lalu nyimpan dalam bilik setor Rumah Sembiang semua utai ti udah diserahka apai iya David ngagai TUHAN, iya nya pirak, emas enggau utai bukai. Udah nya Raja Solomon mesanka semua tuai raban bansa enggau tuai peturun orang Israel ngasuh sida begempuru di Jerusalem, deka mindahka Peti Lampang Batu Adat TUHAN ari Sion, Nengeri David, ngagai Rumah Sembiang. Semua sida begempuru lebuh maya Gawai Belangkau. Lebuh semua bala tuai udah sampal datai, bala orang Lewi lalu nanggung Peti Lampang Batu Adat TUHAN lalu ngesan iya ngagai Rumah Sembiang. Bala imam enggau orang Lewi mega mindahka Langkau Kain TUHAN, enggau semua pekekas dia ngagai Rumah Sembiang. Raja Solomon enggau semua orang Israel begempuru di mua Peti Lampang Batu Adat nya, lalu meri mayuh amat jelu bedus enggau jelu sapi nyadika piring, datai ke jelu nya nyau enda ulih diitung agi. Udah nya bala imam lalu ngesan Peti Lampang Batu Adat nya ngagai Rumah Sembiang, lalu ngengkahka iya dalam Endur ti Pemadu Kudus, di baruh dua iku melikat cherub ti besayap. Sayap melikat cherub dua iku nya dikerembaika mungkur Peti nya, enggau kayu ti dikena ngaling iya. Puting kayu nya ulih dipeda orang ke bediri di mua Endur ti Pemadu Kudus, tang enda ulih dipeda ari endur bukai. (Kayu ti dikena ngesan Peti nya agi bisi dia datai ke sehari tu.) Peti Lampang Batu Adat nya nadai ngundan utai bukai tang semina dua iti lampang batu ti udah diengkah Moses dalam Peti nya ba Bukit Sinai, lebuh TUHAN ngaga sempekat enggau bala nembiak Iya orang Israel, lebuh sida pansut ari menua Ejip. Udah nya Raja Solomon besampi, “ TUHAN, Nuan rindu diau dalam mua hari enggau pemetang. Diatu aku udah ngaga sebuah rumah ti manah ke Nuan, alai Nuan diau belama iya.” Semua orang bela bediri dia. Raja nguing ngagai sida, lalu minta Allah Taala merekatka sida. Ku iya bejaku, “Pujika TUHAN Allah Taala ke disembah orang Israel! Iya udah ngamatka semaya ti udah digaga Iya enggau apai aku David lebuh Iya bejaku munyi tu, ‘Kenyau ari maya Aku udah mai bala nembiak Aku pansut ari menua Ejip nyentuk ngagai diatu, Aku apin milih nengeri di menua Israel nyadi endur alai sebuah rumah deka digaga, alai kita deka nyembah Aku, lalu Aku apin milih sapa orang ke deka nguluka nembiak Aku Israel. Tang diatu Aku udah milih Jerusalem nyadi endur alai kita deka nyembah Aku, lalu nuan, David, deka merintah bala nembiak Aku.’ ” Lalu ku Solomon nampung jaku iya, “Apai aku David udah bekira deka ngaga sebuah rumah alai nyembah TUHAN Allah Taala ke disembah orang Israel, tang ku TUHAN bejaku ngagai iya, ‘Ati nuan ti deka ngaga rumah ke Aku endang ngena, tang ukai nuan ti deka ngaga rumah nya. Anak nuan, anak nuan empu, deka ngaga rumah Aku.’ “Diatu TUHAN udah ngamatka semaya Iya. Aku udah nganti apai aku nyadi raja menua Israel, lalu aku udah ngaga sebuah rumah alai nyembah TUHAN Allah Taala ke disembah orang Israel. Aku udah ngengkahka dalam Rumah Sembiang Peti Lampang Batu Adat ti ngundan lampang batu sempekat ti udah digaga TUHAN enggau orang Israel.” Udah nya, di mua orang mayuh, Solomon mansang lalu bediri di mua alta, ngangkatka jari iya lalu besampi. ( Solomon udah ngaga siti panggau temaga, lalu udah ngengkahka panggau nya ba tengah laman. Panggau nya 2.2 meter besegi, enggau 1.3 meter peninggi. Iya niki ngagai panggau nya, besugang di mua semua orang mayuh, lalu ngangkatka jari iya tunga ke langit.) Ku iya besampi, “ TUHAN Allah Taala ke disembah orang Israel, nadai petara ti baka Nuan di langit enggau di dunya. Nuan ngamatka semaya Nuan enggau bala nembiak Nuan, lalu ngayanka pengerindu Nuan ke sida, lebuh sida diau ngasika Nuan enggau pengabis ati sida. Nuan udah ngamatka semaya ti udah digaga Nuan enggau apai aku David. Sehari tu semua leka jaku semaya nya udah dikamatka magang. Nya alai, TUHAN Allah Taala ke disembah orang Israel, kamatka meh semaya ti udah digaga Nuan enggau apai aku lebuh Nuan madahka siku ari peturun iya deka seruran merintah nyadi raja orang Israel, enti iya bejimat ngasika Adat Nuan, baka David empu. Nya alai diatu, TUHAN Allah Taala ke disembah orang Israel, awakka semua utai ti udah disemaya Nuan enggau nembiak Nuan David, dikamatka magang. “Tang kati Nuan, O TUHAN, amat ulih diau di dunya tu begulai enggau orang lelaki enggau indu? Indah semua langit deh enda ulih ngundan Nuan, nya alai baka ni ku Rumah Sembiang tu ulih ngundan Nuan? TUHAN Allah Taala aku, aku tu nembiak Nuan. Pendingka sampi aku, lalu beri utai ti dipinta aku ari Nuan. Ibun Rumah Sembiang tu siang malam. Nuan udah besemaya madahka Diri deka disembah ba endur tu, nya alai dingaka aku lebuh aku ngadap ngagai Rumah Sembiang tu lalu besampi. Dingaka sampi aku enggau sampi bala nembiak Nuan orang Israel, lebuh sida ngadap ngagai endur tu lalu besampi. Dingaka kami ari rumah Nuan ti di serega, lalu ampun kami. “Lebuh orang kena dawa ngereja penyalah, lalu dibai ngagai alta Nuan dalam Rumah Sembiang tu, alai sida deka besumpah madahka diri nadai penyalah, pendingka sida ari serega, O TUHAN, lalu akim meh bala nembiak Nuan. Ukum meh orang ke salah, nitihka pematut, lalu lepaska orang ke nadai penyalah. “Lebuh bala nembiak Nuan orang Israel alah laban munsuh, laban sida udah bedosa ngelaban Nuan, lalu udah nya, lebuh sida nguingka diri ngagai Nuan, lalu datai ngagai Rumah Sembiang tu, sereta ngemaruhka diri besampi minta nuan ngampun sida, pendingka sida ari serega. Ampun dosa sida, lalu bai sida pulai baru ngagai menua ti udah diberi Nuan ngagai aki ini sida. “Lebuh Nuan nagang hari ujan laban bala nembiak Nuan udah bedosa ngelaban Nuan, lalu udah nya, lebuh sida nesal ati lalu ngadap ngagai Rumah Sembiang tu, sereta ngemaruhka diri besampi ngagai Nuan, pendingka sida ari serega, O TUHAN, lalu ampun dosa sida orang Israel, lalu ajar sida ngereja utai ti ngena. Udah nya, O TUHAN, asuh hari ujan di menua Nuan tu, ti udah diberi Nuan ngagai bala nembiak Nuan nyadika pesaka sida belama iya. “Lebuh lapar pungkang nyadi di menua tu, tauka penyakit, tauka utai ti ditanam rusak laban ribut ti angat, tauka rusak laban raban buntak, tauka lebuh bala nembiak Nuan diserang munsuh, tauka lebuh penyakit tauka pemedis bisi nyadi ba bala sida, pendingka sampi sida. Enti bala nembiak Nuan Israel, ari ati ti balat tusah, ngangkatka jari sida besampi ngadap ngagai Rumah Sembiang tu, dingaka sampi sida. Dingaka sida ari rumah Nuan di serega, lalu ampun sida. Semina Nuan siku aja ke nemu runding enggau ati mensia. Kereja utai ba kami nitihka pematut, ngambika bala nembiak Nuan deka seruran nangi sereta ngasika Nuan lebuh sida diau di menua ti udah diberi Nuan ngagai aki ini sida. “Lebuh orang bansa bukai ke diau di menua ti jauh, ninga pasal pemesai kuasa Nuan, enggau pasal Nuan ke seruran sedia deka nulung, lalu udah nya sida datai ngagai Rumah Sembiang tu lalu besampi, pendingka sampi sida. Dingaka sida ari serega, alai Nuan ti diau, lalu kereja utai ti dipinta sida, ngambika semua orang di dunya tu nemu Nuan lalu ngasika Nuan, baka bala nembiak Nuan Israel. Nya baru sida deka nemu Rumah Sembiang ti udah digaga aku tu endang endur alai Nuan patut disembah. “Lebuh Nuan ngasuh bala nembiak Nuan mansang beperang ngelaban munsuh sida, lalu sida besampi ngagai Nuan, enda milih endur alai sida, lalu sida nguing tunga ngagai nengeri ti udah dipilih Nuan tu, enggau ngagai Rumah Sembiang tu ti udah digaga aku ke Nuan, pendingka sampi sida. Dingaka sida ari serega, lalu beri sida pemenang. “Lebuh bala nembiak Nuan bedosa ngelaban Nuan, laban nadai siku mensia ti enda bedosa, lalu Nuan ringat lalu nejuka munsuh sida ngalahka sida, lalu nabanka sida nyadi orang tangkap ngagai menua bukai, taja pen menua nya jauh, pendingka sampi sida. Enti sida nesal ati lebuh sida di menua nya, lalu besampi ngagai Nuan, ngaku dosa enggau penyai sida, dingaka sampi sida, O TUHAN. Enti sida amat nesal ati lebuh sida di menua nya, lalu besampi ngagai Nuan, lalu sida nguingka mua sida tunga ngagai menua tu ti udah diberi Nuan ngagai aki ini sida, nengeri tu ti udah dipilih Nuan, enggau Rumah Sembiang tu ti udah digaga aku ke Nuan, pendingka sampi sida. Dingaka sida ari rumah Nuan di serega. Kasihka sida lalu ampun semua dosa sida. “Peda meh kami tu diatu, O Allah Taala aku, lalu pendingka sampi ti diberi ba endur tu. Angkat meh Nuan, TUHAN Allah Taala, lalu tama ngagai Rumah Nuan, sama enggau Peti Lampang Batu Adat, lalu diau dia belama iya. Berekatka bala imam Nuan dalam semua utai ti dikereja sida, lalu awakka semua nembiak Nuan lantang laban pemadas Nuan enggau sida. TUHAN Allah Taala, anang nulak raja ti udah dipilih Nuan. Kingatka pengerindu Nuan ke nembiak Nuan David.” Lebuh Raja Solomon udah badu besampi, api lalu nurun ari langit, lalu nganguska piring ti udah diberi, lalu mulia TUHAN ngemenuhka Rumah Sembiang nya. Laban Rumah Sembiang nya nyau penuh laban mulia TUHAN, bala imam enda ulih tama kia. Lebuh orang Israel meda api nya nurun ari langit, lalu Rumah Sembiang nya penuh laban penampak mulia TUHAN, sida lalu nyungkurka diri ba geladak nya, nyembah Allah Taala sereta muji Iya ketegal pemanah enggau pengerindu Iya ti meruan belama iya. Udah nya Solomon enggau semua orang mayuh lalu ngenjuk piring ngagai TUHAN. Iya meri 22,000 iku jelu sapi enggau 120,000 iku jelu bedus nyadika piring pemaik. Nya meh chara Raja Solomon enggau semua orang mayuh nyerahka Rumah Sembiang ngagai Allah Taala. Bala imam bediri ba endur ti udah diletak ke sida, betunga mua enggau bala orang Lewi, muji TUHAN ngena perengka musik ti udah diberi Raja David, lalu nyanyi siti pantun, “Pengerindu Iya meruan belama iya!” munyi ti udah diatur Raja David. Lebuh semua orang bediri, bala imam lalu nyepu terumpit. Solomon lalu nyerah ngagai TUHAN puak tengah laman ti di mua Rumah Sembiang, lalu udah nya, ngenjuk piring tunu segala, piring tepung, enggau lemak ari piring pemaik, ba endur nya laban alta temaga ti udah digaga nya kelalu mit alai ngengkahka semua piring nya. Solomon enggau semua orang Israel lalu ngintu Gawai Belangkau tujuh hari. Mayuh amat orang datai kenyau ari Genting Hamas di utara enggau ari garis entara menua enggau menua Ejip di selatan. Sida begempuru tujuh hari nyerahka alta nya, lalu udah nya, tujuh hari da agi kena ngintu gawai. Ba hari ti pengujung sida lalu muka pengerami kena nutup gawai nya. Hari siti, iya nya kena dua puluh tiga hari bulan ti ketujuh, Solomon lalu ngasuh orang mayuh pulai. Sida lantang ati ke semua berekat ti udah diberi TUHAN ngagai bala nembiak Iya orang Israel, ngagai David, enggau ngagai Solomon. Lebuh Raja Solomon udah tembu ngaga Rumah Sembiang enggau ngaga istana, enggau semua utai ti udah diperambu iya, TUHAN lalu pegari di mua iya lebuh malam hari, lalu bejaku ngagai iya, “Aku udah ninga sampi nuan, lalu Aku nerima Rumah tu nyadi endur alai orang ngenjuk piring ngagai Aku. Genap kali aku nagang hari ujan, tauka ngasuh buntak makai utai ti ditanam, tauka ngasuh penyakit nyerang bala nembiak Aku, enti nembiak Aku ngemaruhka diri, besampi ngagai Aku, lalu ngelengkaka jalai sida ke jai, nya baru Aku deka ninga sida ari serega, lalu ngampun dosa sida, sereta ngeraika menua sida. Mata Aku deka tebuka lalu pending Aku deka mendingka sampi ti diberi ba endur tu. Laban Aku udah milih sereta nguduska Rumah tu ngambika nama Aku meruan dia belama iya. Aku deka ngemataka Rumah tu lalu nyaga iya belama iya. Ba pasal nuan empu, enti nuan tetap ati betuaika Aku baka apai nuan David, ngasika Adat Aku, lalu ngereja semua utai ti diasuh Aku kereja nuan, nya baru Aku deka ngamatka semaya ti udah digaga Aku enggau apai nuan David, lebuh Aku madahka orang Israel ti deka seruran diperintah peturun iya. Tang enti nuan enggau bala nembiak nuan enda ngasika adat enggau pesan ti udah diberi Aku ngagai nuan, lalu nuan nyembah petara bukai, Aku deka muai nuan ari menua ti udah diberi Aku ngagai nuan, lalu Aku deka ninggalka Rumah tu ti udah dikuduska Aku nyadi endur alai Aku disembah. Semua orang di semua endur deka mechat Rumah tu, lalu enda bebasaka iya. “Diatu Rumah Sembiang tu balat dibasa, tang lebuh maya nya ila, semua orang ke mansa deka alit ati lalu nanya, ‘Nama kebuah TUHAN ngereja utai baka tu ngagai menua tu, enggau ngagai Rumah Sembiang tu?’ Orang mayuh deka nyaut, ‘Laban sida udah ninggalka TUHAN Allah Taala sida, ti udah mai sida pansut ari menua Ejip. Sida udah taluk ngagai, nyembah, sereta betuaika petara bukai. Nya kebuah TUHAN udah ngasuh penusah tu ninggang sida.’ ” Solomon ngaga Rumah Sembiang enggau istana dalam pengelama dua puluh taun. Iya mega nirika baru nengeri ti udah diberi Raja Hiram ngagai iya, lalu ngasuh orang Israel ngentapka diri di nengeri nya. Iya ngalahka menua Hamat enggau Sobah, lalu nirika kuta ke nengeri Palmira di menua puang. Iya nirika baru semua nengeri di menua Hamat alai nyimpan barang. Solomon mega nirika baru semua nengeri Bet-horon Ulu enggau Bet-horon Ili (nengeri ti bekuta, ti bisi pintu kuta ti ulih dikalang), nengeri Baalat, semua nengeri alai iya nyimpan barang, enggau nengeri alai raban kuda enggau kerita perang iya disimpan. Iya udah bejalaika semua pelan iya ti deka ngaga rumah di Jerusalem, di Lebanon, enggau di serata menua ti diperintah iya. Orang Israel nadai dipejalka ngereja pengawa ti berat, tang sida bekereja nyadi soldadu, nyadi pemesai, nyadi tuai ke orang ke nepan kerita perang, enggau nyadi soldadu ke nepan kuda. Dua ratus lima puluh iku pemesai ngemataka bala ulun ke bekereja begagaka mayuh bengkah rumah nya. Solomon mai bini iya, anak raja menua Ejip, pindah ari Nengeri David ngagai sebuah rumah ti digaga David ke bini iya. Ku Solomon, “Bini aku enda tau diau dalam istana David raja orang Israel, laban semua endur ti udah alai Peti Lampang Batu Adat diengkah, nyadi kudus magang.” Solomon ngenjuk piring ngagai TUHAN ba alta ti udah digaga di mua Rumah Sembiang. Iya ngenjuk piring tunu nitihka Adat Moses ba genap hari ti kudus, iya nya, Hari Sabat, Gawai Anak Bulan, enggau tiga bengkah gawai genap taun, iya nya Gawai Roti Ti Enda Beragi, Gawai Ngetau, enggau Gawai Belangkau. Nitihka atur ti udah diletak apai iya David, iya lalu ngatur pengawa ti dikereja bala imam tiap hari, enggau pengawa orang Lewi ke nulung bala imam belagu ngena pantun, enggau ngereja pengawa sida. Iya mega ngatur raban orang ke nyaga Rumah Sembiang ngambika sida bisi ngereja pengawa nyaga pintu siti-siti, nitihka jaku David, ke nembiak Allah Taala. Atur ti udah diberi David ngagai bala imam enggau ngagai orang Lewi ba pasal bilik setor enggau pasal pekara bukai, udah dikereja enggau silik. Lebuh maya nya, semua projek Solomon udah tembu magang. Semua pengawa udah mujur magang dikereja, kenyau ari nudukka batu pemun nyentuk ngagai penembu Rumah Sembiang nya. Udah nya Solomon lalu mansang ngagai Esion-geber enggau Elat, iya nya dua bengkah penyangkai kapal ti ba Teluk Akaba, di menua Edom. Raja Hiram ngirumka ngagai Raja Solomon berapa buah kapal, dipejalaika bala pemesai enggau kelasi iya empu ke endang chukup peneleba. Sida belayar enggau bala pemesai Raja Solomon ngagai menua Opir, lalu mai ngagai Raja Solomon kira enam belas tan emas. Lebuh kuin menua Sheba ninga Raja Solomon tebilang bendar nama, iya lalu mansang ngagai Jerusalem deka ngabas penalam penemu Raja Solomon ngena tanya ti mar. Iya datai mai mayuh bala pengiring, enggau mayuh jelu unta ti ngundan mayuh amat rempah, batu ti berega, enggau emas. Lebuh kuin nya betemu enggau Solomon, iya lalu nanyaka semua tanya ti ba ati iya. Solomon nyaut semua tanya iya. Nadai utai ti enda ulih diterangka Solomon. Kuin menua Sheba ninga penemu-dalam ti disebut Solomon, sereta meda istana ti udah digaga iya. Iya meda gaya pemakai Solomon, rumah alai bala pemesai iya diau, gaya atur pengawa ke bala orang ke bekereja dalam istana, enggau pekayan ti dikena sida, gaya gari ti dikena bala orang gaji ke ngintu Solomon lebuh pengerami makai besai, enggau piring ti diberi iya dalam Rumah Sembiang. Lebuh kuin nya meda semua utai nya, iya nyau enda tesintakka seput laban iya balat alit ati. Ku iya bejaku enggau Raja Solomon, “Utai ti didinga aku di menua aku pasal nuan enggau pasal penalam penemu nuan, endang amat magang! Aku enda arapka berita ti dipadahka sida ngagai aku, sebedau aku empu meda utai nya ke diri empu. Utai ti didinga aku nya enda bulih setengah ari penemu-dalam ti dikembuan nuan. Nuan lebih agi bepenemu-dalam ari ti ditusui orang. Naka meh penguntung orang ke betuaika nuan, ke seruran begulai enggau nuan, lalu ninga penemu-dalam ti disebut nuan! Pujika TUHAN Allah Taala nuan! Iya udah ngayanka pengaga ati Iya ke nuan, lalu ngaga nuan nyadi raja, ngambika nuan merintah dalam nama Iya. Laban Iya rinduka bala nembiak Iya Israel, lalu deka ngasuh sida meruan belama iya, Iya udah ngaga nuan nyadi raja, ngambika nuan bejalaika atur ti lurus sereta betul.” Iya lalu meri ngagai Raja Solomon pemeri ti udah dibai iya, iya nya 5,000 kilogram emas, mayuh rempah enggau batu ti berega. Nadai rempah bukai ti lebih alus agi ari rempah ti diberi kuin menua Sheba ngagai Raja Solomon. ( Bala kelasi Raja Hiram enggau bala kelasi Raja Solomon ke mai emas ari Opir, mega mai kayu juniper enggau batu ti berega. Solomon ngena kayu nya begagaka tangga Rumah Sembiang, istana iya, belikan enggau engkeratung ke bala orang ke nebah musik. Nadai utai baka nya bisi udah kala dipeda di menua Judah.) Raja Solomon lalu meri ngagai kuin menua Sheba semua utai ti dipinta iya, nambahka utai ti udah diberi Solomon lebuh iya besilihka pemeri enggau kuin nya. Udah nya kuin nya enggau bala pengiring iya lalu mulaika diri ngagai menua Sheba. Raja Solomon nerima lebih 25,000 kilogram emas tiap taun, nambahka chukai ti dibayar orang ke bedagang enggau orang sedagar. Bala raja menua Arabia enggau bala tuan gabenor ke megai pelilih menua di menua Israel, mega mai pirak enggau emas ngagai iya. Solomon ngaga 200 iti terabai ti besai. Genap iti terabai nya disampak enggau 7 kilogram emas ti ditempa, enggau 300 iti terabai ti mit agi, ti disampak enggau kira 3.6 kilogram emas ti ditempa. Iya ngasuh semua terabai nya disimpan dalam Balai Utan Lebanon. Raja mega ngasuh orang ngaga siti kerusi diraja ti besai. Sebagi ari kerusi nya disampak enggau gading, lalu sebagi ti bukai disampak enggau emas ti tulin. Tangga niki ngagai kerusi diraja nya bisi enam iti tangkal, sereta bisi pelasar ti lekat ngagai kerusi nya, lalu disampak enggau emas. Kerusi nya bisi lengan, enggau anak patung singa bediri ba tisi sepiak-sepiak. Tangga nya bisi dua belas iku anak patung singa, siku ba puting siti-siti tangkal tangga nya. Nadai kerusi diraja bisi baka nya di menua bukai. Semua mangkuk ti dikena Raja Solomon ngirup digaga ari emas magang, lalu semua pekekas dalam Balai Utan Lebanon digaga ari emas ti tulin magang. Pirak dikira nadai rega lebuh maya Solomon menya. Raja Solomon mayuh kapal ti besai, ti belayar sama enggau kapal Raja Hiram. Kapal iya pulai tiap-tiap tiga taun, mai emas, pirak, gading, nyumbuh, enggau kera. Raja Solomon lebih agi kaya, sereta dalam agi penemu ari semua raja bukai di dunya tu. Semua raja bukai betanya ngagai iya magang, laban sida ingin deka ningaka penemu-dalam ti udah diberi Allah Taala ngagai iya. Genap iku sida bela mai pemeri ngagai Solomon. Pemeri nya nyengkaum utai ti digaga ari pirak enggau emas, baju panjai, senyata, rempah, kuda enggau keledai. Utai tu nyadi ari taun siti ngagai taun siti. Raja Solomon mega bisi 4,000 bansal alai nyimpan kerita perang enggau kuda iya, lalu iya bisi 12,000 iku kuda kena beperang. Sekeda kuda nya disimpan iya di Jerusalem, lalu sida ti bukai disimpan iya ba nengeri bukai. Iya bekuasa atas semua raja dalam menua nya, kenyau ari Sungai Eupratis nyentuk ngagai menua Pilistin enggau ngagai garis entara menua Ejip. Lebuh iya megai perintah, pirak nyau baka utai ngapa di Jerusalem, lalu kayu sidar nyau ngemayuh kayu sikamur ti ba kaki bukit menua Judah. Solomon meli kuda ari Musri enggau ari semua menua bukai. Cherita lama ti bukai pasal Solomon, kenyau ari pun datai ke ujung, bisi dituliska magang dalam Jerita Lama Pasal Nabi Natan, dalam Jaku Ti Benabi ti Disebut Ahijah ke datai ari Siloh, enggau dalam Genera Nabi Ido, ti bisi mega ngenang pasal perintah Raja Jeroboam menua Israel. Solomon merintah semua menua Israel ari Jerusalem empat puluh taun. Iya mati lalu dikuburka di Nengeri David, lalu anak iya Rehoboam nganti iya nyadi raja. Rehoboam mansang ngagai Sekem, alai semua orang ke di utara menua Israel udah begempuru, deka nyiri iya nyadi raja. Lebuh Jeroboam anak Nebat, ti udah rari ari Raja Solomon ngagai menua Ejip, ninga berita pasal Rehoboam, iya lalu pulai baru ngagai menua Israel. Raban bansa ti di utara lalu mesanka Jeroboam, lalu semua sida mansang betemu enggau Rehoboam, lalu bejaku enggau iya, “Apai nuan udah balat amat ngasuh kami gawa. Enti nuan ngasuh pengawa kami lempung agi, nya baru kami deka taluk ngagai nuan.” Ku Rehoboam nyaut, “Beri aku tiga hari alai aku berundingka utai tu. Udah nya kita datai ditu baru.” Bala sida lalu mupuk. Raja Rehoboam lalu betanya ngagai orang ke tuai, ti udah bekereja nyadi penyanding penemu ke apai iya Solomon. “Nama saut asuh kita beri aku ngagai bala orang tu?” ku iya nanya sida. Disaut sida, “Enti nuan nelap enggau orang tu lalu nguji meri sida saut ti siru, sida deka lantang ati, lalu sida deka seruran taluk ati betuaika nuan.” Tang iya enggai mendingka jaku lalau ari orang ke tuai. Iya lalu mansang ngagai orang bala orang ke sama serambau enggau iya, ke digaga iya nyadika penyanding penemu iya diatu. “Ba runding kita, nama utai ti patut dikereja aku?” ku iya nanya sida. “Nama utai ti patut disebut aku ngagai orang tu ke minta aku ngasuh pengawa sida lempung agi?” Ku sida nyaut, “Tu utai ti patut dipadahka nuan ngagai sida: ‘Tunjuk anak aku tu besai agi ari punggung apai aku.’ Padahka ngagai sida, ‘Apai aku udah ngasuh pengawa kita berat. Aku deka ngasuh pengawa kita lebih berat agi ari nya. Iya udah nyipat kita ngena penyipat. Aku deka nyipat kita ngena penyipat ti bedurika besi!” Tiga hari udah bekau nya Jeroboam enggau semua orang mayuh lalu mansang baru ngagai Raja Rehoboam, munyi ti udah diasuh iya. Raja Rehoboam enggai mendingka jaku lalau ari orang ke tuai, lalu iya bejaku kasar enggau orang mayuh, nitihka jaku lalau ari penyanding penemu ti agi biak. Ku iya, “Apai aku udah ngasuh kita ngereja pengawa ti berat. Aku deka ngasuh pengawa kita lebih berat agi ari nya. Iya udah nyipat kita ngena penyipat. Aku deka nyipat kita ngena penyipat ti bedurika besi!” Utai tu nyadi kena TUHAN Allah Taala ngamatka jaku ti udah disebut Iya ngagai Jeroboam anak Nebat ngena nabi Ahijah ari Siloh. Nya kebuah raja enggai mendingka orang mayuh. Lebuh orang mayuh meda Raja Rehoboam enggai mendingka sida, sida lalu manjung, “Anang taluk ngagai David enggau ruang bilik iya! Nama utai ti bisi udah dikereja sida ke kitai? O Orang Israel! Aram kitai pulai! Awakka Rehoboam ngaduka diri empu!” Orang Israel lalu angkat ngelaban perintah, ninggalka Rehoboam nyadi raja semina ke orang ke diau di menua Judah aja. Udah nya Raja Rehoboam lalu ngasuh Adoniram, ti nyadi tuai ngemataka pengawa bala ulun, mansang ngagai orang Israel. Tang sida nuku iya ngena batu datai ke mati. Lebuh Rehoboam ninga nya, iya lalu beguai-guai nepan kerita perang iya lalu rari ngagai Jerusalem. Berengkah ari nya orang ke diau di utara menua Israel semampai ngelaban raja ke datai ari peturun David. Lebuh Raja Rehoboam datai di Jerusalem, iya lalu ngempuruka 180,000 iku soldadu ke pemadu kering ari raban bansa Benjamin enggau Judah. Iya deka mansang beperang ngelaban raban bansa orang Israel ke di utara kena iya mulaika sida ngagai perintah iya empu baru. Tang TUHAN ngasuh nabi Semaiah meri pesan tu ngagai Raja Rehoboam, enggau ngagai semua orang ke ari raban bansa Judah enggau Benjamin: “Anang nyerang kaban belayan kita empu. Pulai semua kita. Utai ti udah nyadi nya endang ari peneka Aku.” Sida ngasika pesan TUHAN, lalu enda nyadi nyerang Jeroboam. Rehoboam mengkang diau di Jerusalem, lalu ngasuh orang nguta mayuh bengkah nengeri di menua Judah enggau di menua Benjamin, iya nya nengeri Betlehem, Etam, Tekoa, Bet-sur, Soko, Adulam, Gat, Maresah, Sip, Adoraim, Lakis, Asekah, Sorah, Aijalon, enggau Hebron. Iya ngasuh orang ngaga kuta ti tegap ke semua nengeri nya, lalu ngeletak siku orang nyadi tuai ke tiap buah nengeri nya, lalu dalam genap buah nengeri nya iya nyimpan pemakai, minyak kana, enggau wain, terabai, enggau sangkuh. Nya meh chara Raja Rehoboam ngetanka kuasa iya di menua Benjamin enggau di menua Judah. Bala imam enggau bala orang Lewi datai ari serata menua Israel ngagai menua Judah di selatan. Orang Lewi ninggalka padang rumput enggau tanah sida, lalu pindah ngagai menua Judah enggau Jerusalem, laban Raja Jeroboam menua Israel enggau orang ke nganti iya nyadi raja, enggai ngelakka sida bekereja nyadi imam TUHAN. Jeroboam lalu ngeletak bala imam iya empu, ngambika sida bisi bekereja ba endur alai orang kapir nyembah petara sida, lalu nyembah antu, enggau nyembah engkeramba ti udah digaga iya baka gamal anak sapi ti lelaki. Orang ke endang amat deka nyembah TUHAN Allah Taala ke disembah orang Israel lalu datai ari semua raban bansa orang Israel, lalu nitihka orang Lewi mansang ngagai Jerusalem, ngambika sida ulih ngenjuk piring ngagai TUHAN Allah Taala aki ini sida. Utai tu ngukuhka perintah menua Judah. Sida nyukung Rehoboam anak Solomon tiga taun, lalu diau dia baka lebuh sida ke dipegai Raja David enggau Raja Solomon menya. Rehoboam jadi enggau Mahalat anak Jerimot. Jerimot nya anak David. Indai Mahalat nya Abihail, anak indu Eliap, uchu Jesi. Rehoboam enggau bini iya bisi tiga iku anak lelaki: Jeus, Semariah, enggau Saham. Udah nya Rehoboam jadi enggau Maakah anak Absalom, lalu seduai iya bisi empat iku anak lelaki: Abijah, Atai, Sisa enggau Selomit. Rehoboam bisi lapan belas iku bini, enggau enam puluh iku indu simpan. Anak lelaki iya dua puluh lapan iku, lalu anak indu iya enam puluh iku. Bini ke balat dikerinduka iya ari semua bini iya, enggau indu simpan iya, nya Maakah. Lalu iya rinduka anak Maakah ke benama Abijah lebih agi ari semua anak iya ti bukai, lalu milih iya nganti iya nyadi raja. Rehoboam landik meri tanggungjawap ngagai bala anak lelaki iya, lalu ngengkahka sida di serata menua Judah enggau menua Benjamin dalam nengeri ti bekuta. Enggau ati ti gerah mudah, iya meri sida utai ti dipeguna sida, lalu iya ngiga bini ke sida. Lebuh Rehoboam udah negapka diri nyadi raja, iya enggau semua nembiak iya lalu ngelengkaka Adat TUHAN. Dalam taun ti kelima Rehoboam nyadi raja, TUHAN ngukum sida laban sida enda taluk ngagai TUHAN. Raja Sisak menua Ejip nyerang Jerusalem ngena 1,200 buah kerita perang, 60,000 iku bala soldadu ke nepan kuda, enggau mayuh soldadu bukai ti enda ulih diitung, nyengkaum soldadu orang Libia, Suki-im, enggau Etiopia. Iya ngalahka nengeri ti bekuta di menua Judah, lalu nyerang nyentuk ngagai Jerusalem. Imam Semaiah lalu mansang ngagai Raja Rehoboam enggau ngagai bala tuai orang Judah ti udah begempuru di Jerusalem laban sida ngerarika diri ari Sisak. Ku iya bejaku enggau sida, “Tu pesan TUHAN ngagai kita: ‘Kita udah ninggalka Aku, nya alai diatu Aku ninggalka kita. Awakka Sisak ngalahka kita.’ ” Raja enggau bala tuai ngaku diri udah bedosa, lalu ku sida, “Utai ti dikereja TUHAN endang lurus.” Lebuh TUHAN meda nya, Iya bejaku baru enggau Semaiah. Ku Iya, “Laban sida ngaku dosa diri, Aku enggai ngerusak sida. Tang lebuh Sisak nyerang, sida semina ulih ngidupka nyawa diri aja. Jerusalem enda dirusak, tang Sisak deka ngalahka sida, lalu sida deka nemu bida entara betuaika Aku enggau betuaika raja mensia.” Raja Sisak nyerang Jerusalem, lalu ngerampas utai ti berega ari Rumah Sembiang, enggau ari istana. Iya ngerampas semua utai, nyengkaum terabai emas ti udah digaga Raja Solomon. Kena iya nganti terabai nya, Rehoboam ngaga terabai temaga, lalu nyerahka utai nya ngagai pemesai ti nyadi tuai nyaga pintu istana. Genap kali raja mansang ngagai Rumah Sembiang, bala jejaga mai terabai nya, lalu udah nya mulaika terabai nya baru ngagai bilik jejaga. Laban iya nunduk ngagai TUHAN, TUHAN enda ngerusak iya abis lengis, lalu utai di menua Judah nyadi menyana baru. Rehoboam merintah di Jerusalem lalu kuasa iya ti nyadi raja nambah-menambah. Umur iya empat puluh satu taun lebuh iya nyadi raja, lalu iya merintah tujuh belas taun di Jerusalem, nengeri ti udah dipilih TUHAN ari semua menua Israel nyadi endur alai TUHAN patut disembah. Indai Rehoboam nya Namah, ari menua Amon. Rehoboam ngereja utai ti jai, laban iya enggai nguji ngiga peneka TUHAN. Utai ti dikereja Rehoboam ari pun datai ke ujung, enggau cherita pasal ruang bilik iya tau ditemu dalam Jerita Lama Pasal Nabi Semaiah enggau Jerita Lama Pasal Nabi Ido. Rehoboam enggau Jeroboam endang seruran beperang ngelaban pangan diri. Rehoboam mati lalu dikuburka ba lumbung bala raja di Nengeri David, lalu anak iya Abijah nganti iya nyadi raja. Dalam taun ti kelapan belas Raja Jeroboam udah nyadi raja menua Israel, Abijah nyadi raja menua Judah, lalu iya merintah tiga taun di Jerusalem. Indai iya Mikaiah anak Uriel, ari nengeri Gibe-ah. Perang nyadi entara Abijah enggau Jeroboam. Abijah ngempuruka 400,000 iku bala soldadu, lalu Jeroboam nyatup iya ngena 800,000 iku soldadu. Soldadu dua bengkah nya lalu besatup ba menua ti bebukit di menua Epraim. Raja Abijah niki ngagai Bukit Semaraim lalu ngangauka Jeroboam enggau orang Israel: “Pendingka aku!” ku iya bejaku. “Kati kita enda nemu, TUHAN Allah Taala ke disembah orang Israel udah ngaga sempekat ti enda tau dilanggar enggau David, kena Iya meri David enggau peturun iya kuasa nyadi raja menua Israel belama iya? Jeroboam anak Nebat udah angkat ngelaban Solomon, raja iya empu. Udah nya iya ngempuruka seraban orang ke nadai guna, lalu sida ngalahka Rehoboam ti agi kelalu biak sereta nadai peneleba, lalu iya enda ulih ngelaban sida. Diatu kita nguji beperang ngelaban kuasa diraja ti udah diberi TUHAN ngagai peturun David. Bala soldadu kita amat mayuh, lalu kita mai mayuh anak sapi ti lelaki ti udah digaga Jeroboam ari emas nyadika petara kita. Kita udah muru bala imam TUHAN, bala peturun Aron, lalu kita udah muru orang Lewi. Kita udah nganti sida ngena bala imam ke diletak kita ngena chara orang bansa bukai. Barang sapa datai mai sapi ti lelaki tauka tujuh iku jelu bedus, tau nuchi diri empu nyadi imam ke utai ti dikumbai kita petara. “Tang kami mengkang betuaika TUHAN Allah Taala kami, lalu enda ninggalka Iya. Imam ke datai ari peturun Aron ngereja pengawa sida, ditulung orang Lewi. Genap pagi enggau genap lemai sida meri TUHAN menyan enggau piring jelu ti ditunu segala. Sida ngenjuk piring ba mija ti tuchi, lalu genap lemai sida nungkun lampu ba penuduk lampu ti digaga ari emas. Kami ngereja utai ti udah diasuh TUHAN kereja kami, tang kita udah ninggalka Iya. Allah Taala Empu nyadi tuai kami, lalu bala imam Iya bisi ditu mai terumpit sida, sedia deka nyepu terumpit sida nesau kami mansang beperang ngelaban kita. Kita orang Israel! Anang ngelaban TUHAN Allah Taala aki ini kita! Kita enda ulih menang!” Lebuh maya nya Jeroboam udah ngasuh sekeda bala soldadu iya ngeramka ipa laban sida deka nyerang bala soldadu orang Judah ari belakang, lalu bala soldadu sida ti bukai nyatup sida ari mua. Orang Judah malik lalu meda diri nyau dikelulung munsuh. Sida lalu nyabak ngangauka TUHAN minta saup Iya, lalu bala imam nyepu terumpit sida. Orang Judah, diuluka Abijah manjung lalu nyerang. Allah Taala ngalahka Jeroboam enggau bala soldadu orang Israel. Orang Israel rari, lalu Allah Taala nejuka orang Judah ngalahka sida. Abijah enggau bala soldadu iya balat amat ngalahka orang Israel. Setengah juta bala soldadu Israel ti kering dibunuh. Nya alai orang Judah menang ngelaban orang Israel, laban sida manggaika pengarap sida ba TUHAN Allah Taala aki ini sida. Abijah lalu begagaika bala soldadu Jeroboam, lalu nguan sekeda nengeri iya, iya nya, Betel, Jesanah, enggau Epron, enggau genturung pendiau ti semak nengeri nya. Jeroboam nadai ulih bekuasa agi lebuh Abijah nyadi raja. Ke pengujung iya, TUHAN munuh iya, lalu iya mati. Tang Abijah, mansang kering-sekering. Iya bisi empat belas iku bini, lalu iya bisi dua puluh dua iku anak lelaki, enggau enam belas iku anak indu. Cherita lama pasal Abijah, utai ti disebut iya, enggau utai ti dikereja iya, bisi dituliska magang dalam Jerita Lama Pasal Nabi Ido. Raja Abijah mati lalu dikuburka ba lumbung bala raja di Nengeri David. Anak iya Asa nganti iya nyadi raja. Lebuh Asa megai perintah, menua nadai pengachau sepuluh taun Asa ngerinduka ati TUHAN Allah Taala iya, laban iya ngereja utai ti ngena sereta manah. Iya muai semua alta orang kapir enggau endur alai orang bansa bukai besembah, mechahka tiang batu keramat, lalu nebang semua engkeramba petara indu Aserah. Iya ngasuh orang Judah ngereja utai ti dikedekaka TUHAN Allah Taala aki ini sida, lalu ngasika ajar enggau pesan Iya. Laban iya muai endur alai orang kapir nyembah petara sida, enggau alta alai nunu menyan ari semua nengeri di menua Judah, menua nya bisi pemaik lebuh iya megai perintah. Iya nguta nengeri di menua Judah lebuh iya megai perintah. Perang nadai kala nyadi dalam dua tiga taun, laban TUHAN meri iya pemaik. Ku iya madahka ngagai orang Judah, “Aram kitai nguta nengeri ngena dinding enggau kuta, enggau pintu ti tau ditikupka sereta dikalang. Kitai ulih megai menua tu laban kitai udah ngereja peneka TUHAN Allah Taala kitai. Iya udah nyaga kitai, lalu ngasuh kitai likun ari semua munsuh kitai.” Nya alai sida ngaga kuta, lalu bulih utai. Raja Asa bisi 300,000 iku soldadu ari menua Judah. Sida besenyataka terabai enggau sangkuh. Iya mega bisi 280,000 soldadu ari menua Benjamin. Sida tu besenyataka terabai enggau panah. Semua sida nya berani magang, sereta chukup dilatih. Siku orang Etiopia ke benama Serah nyerang menua Judah ngena sejuta iku soldadu enggau tiga ratus buah kerita perang. Iya nyerang naka Maresah. Asa mansang ngelaban iya. Bala soldadu dua bengkah nya sama belatur ba Emperan Sepatah semak Maresah. Asa besampi ngagai TUHAN Allah Taala iya, ku iya, “O TUHAN, Nuan ulih nyaup bala soldadu ti lemi baka Nuan ke nyaup bala soldadu ti kering, Tulung kami diatu, O TUHAN Allah Taala kami, laban kami manggaika diri ba Nuan, lalu kami udah datai dalam nama Nuan, deka ngelaban bala soldadu ti mayuh tu. TUHAN, Nuan endang Allah Taala kami. Nadai orang tau ngarapka diri ulih ngalahka Nuan.” TUHAN ngalahka bala soldadu orang Etiopia lebuh Asa enggau bala soldadu orang Judah ngelaban sida. Orang Etiopia rari, lalu Asa enggau bala soldadu iya begagaika sida nyentuk ngagai Gerar. Mayuh amat orang Etiopia dibunuh, datai ke sida nyau enda ulih ngempuruka bala lalu ngelaban. Sida alah dilaban TUHAN enggau bala soldadu Iya. Sida bulih mayuh amat perapasan. Udah nya sida lalu ulih ngalahka nengeri ti besai di menua ngelingi Gerar, laban orang dia balat amat takutka TUHAN. Bala soldadu orang Judah ngerampas reta tengkira ari nengeri nya, lalu bulih mayuh amat perapasan. Sida mega nyerang kem sekeda orang ke ngibun bedus, ngerampas mayuh amat jelu bedus enggau jelu unta. Udah nya sida pulai ngagai Jerusalem. Roh Allah Taala bekuasa ba Asariah anak Odet. Asariah lalu mansang ngagai Raja Asa. Ku iya ngangau, “Pendingka aku ulih kita, Raja Asa, enggau semua orang Judah enggau orang Benjamin! TUHAN bisi enggau kita, seagi-agi kita meruan enggau Iya. Enti kita ngiga Iya, Iya deka ngasuh kita nemu Iya, tang enti kita ninggalka Iya, Iya deka ngelengkaka kita. Orang Israel lama udah nadai nyembah Allah Taala ti bendar, nadai imam ngajar, nadai adat. Tang lebuh sida dituntung penusah, sida nguingka diri ngagai TUHAN Allah Taala ke disembah orang Israel. Sida ngiga Iya lalu nemu Iya. Lebuh maya nya menya, orang nadai likun lebuh sida tama-pansut, laban menua balat dituntung pengachau enggau penyarut. Bansa siti nekanka pengidup bansa siti, lalu nengeri siti nekanka pengidup orang di nengeri siti, laban Allah Taala ngasuh penusah enggau pemerinsa ninggang sida. Tang kita enda tau enda kering, lalu anang lemi semengat. Kita deka nerima upah ke pengawa ti dikereja kita.” Lebuh Asa ninga jaku ti benabi nya, jaku ti dipansutka Asariah anak Odet, iya berasai diperansang. Iya lalu muai semua engkeramba di menua Judah enggau Benjamin, enggau semua engkeramba dalam nengeri ti udah dialahka iya di menua ti bebukit di menua Epraim. Iya mega ngaduka alta TUHAN ti bediri ba tengah laman Rumah Sembiang. Mayuh orang ari Epraim, Manasi, enggau Simeon udah ngalih ari Asa, lalu diau di menua ti diperintah iya, laban sida meda TUHAN bisi enggau iya. Asa mesanka semua sida, enggau orang ari menua Judah enggau Benjamin. Sida begempuru di Jerusalem dalam bulan ti ketiga, dalam taun ti kelima belas Asa nyadi raja. Ba hari nya sida ngenjuk piring ngagai TUHAN ari perapasan ti udah dibai sida pulai, iya nya, tujuh ratus iku sapi, enggau tujuh ribu iku bedus. Sida ngaga siti sempekat madahka diri besetuju deka nyembah TUHAN Allah Taala aki ini sida, enggau pengabis ati enggau semengat sida. Barang sapa enda nyembah TUHAN, nemuka orang nya biak tauka tuai, lelaki tauka indu, deka bunuh. Sida lalu besumpah dalam nama TUHAN enggau nyawa ti inggar madahka diri deka nitihka sempekat nya. Udah nya sida manjung lalu nyepu terumpit. Semua orang di menua Judah lantang ati magang laban sida udah ngaga sempekat nya enggau pengabis ati sida. Sida gaga ati nyembah TUHAN, lalu Iya nerima sida, lalu ngasuh serata menua nya likun. Raja Asa lalu muai ini iya Maakah ari pangkat iya ti nyadi indai kuin, laban ini iya udah ngaga engkeramba ke petara indu Aserah. Asa nebang engkeramba nya, mepat iya, lalu nunu repik iya ba Lebak Kidron. Taja pen Asa enda ngerusak semua endur alai orang kapir nyembah petara sida, iya mengkang tetap ati ngagai TUHAN sepemanjai umur iya. Iya ngengkahka dalam Rumah Sembiang semua utai ti udah diserahka apai iya Abijah ngagai Allah Taala, sereta enggau utai ti digaga ari emas enggau ari pirak ti udah diserahka iya empu. Perang nadai agi nyadi nyentuk ngagai ketiga puluh lima taun iya nyadi raja. Dalam taun ti ketiga puluh enam Raja Asa megai perintah di menua Judah, Raja Baasa menua Israel nyerang menua Judah lalu belabuh nguta nengeri Ramah kena mempang jalai semua orang ke tama-pansut ari menua Judah. Nya alai Asa lalu ngambi pirak enggau emas ari sarang reta Rumah Sembiang, enggau ari istana, lalu ngirumka utai nya ngagai Damaskus, ngagai Raja Benhadat menua Siria, sama enggau pesan tu: “Awakka kitai beserakup baka apai kitai suba. Pirak enggau emas tu diberi ngagai nuan. Nya alai, putuska kaul nuan enggau Raja Baasa menua Israel, ngambika iya nyurutka diri ari menua aku.” Benhadat besetuju enggau penemu Asa, lalu iya ngasuh bala pemesai enggau bala soldadu iya nyerang nengeri di menua Israel. Sida ngalahka Ijon, Dan, Abel Bet-maakah, enggau semua nengeri di menua Naptali alai pemakai disimpan. Lebuh Raja Baasa ninga utai ti nyadi, iya lalu badu agi nguta Ramah, lalu ngelengkaka pengawa nya. Udah nya Raja Asa ngempuruka bala iya ari serata menua Judah, lalu ngasuh sida mai batu enggau ramu ti udah dikena Baasa nguta nengeri Ramah, lalu nguta nengeri Geba enggau Mispah ngena batu nya. Lebuh maya nya, nabi Hanani mansang ngagai Raja Asa. Ku iya, “Laban nuan ngarapka Raja menua Siria, lalu enda ngarapka TUHAN Allah Taala nuan, bala soldadu raja menua Israel udah ulih ngerarika diri ari nuan. Ukai enda orang Etiopia enggau orang Libia mayuh agi soldadu, enggau mayuh kerita perang enggau soldadu ke nepan kuda? Tang laban nuan udah manggaika pengarap nuan ba TUHAN, Iya udah ngasuh nuan menang ngelaban sida. TUHAN ngemataka semua dunya, lalu meri pengering ngagai orang ke taluk ngagai Iya. Tang nuan udah ngereja utai ti beli. Nya alai, kenyau ari diatu nuan deka seruran beperang.” Jaku nya ngasuh Asa balat amat ringat ngagai nabi Hanani lalu iya nanchang nabi Hanani ngena rantai dalam rumah jil. Tu meh maya Asa belabuh merinsaka sekeda nembiak iya. Semua utai ti nyadi lebuh Asa megai perintah, kenyau ari pun datai ke ujung, bisi dituliska magang dalam Jerita Lama Pasal Raja Menua Judah Enggau Raja Menua Israel. Dalam taun ti ketiga puluh semilan Asa nyadi raja, iya enda ulih bejalai laban kaki iya balat diempa penyakit. Tang iya enda minta saup ari TUHAN, tang minta saup ari lutur. Dua taun udah bekau nya, iya mati lalu dikuburka dalam kubur batu ti udah ditebuk iya ke iya empu di nengeri David. Sida nyendiaka bangkai iya ngena rempah enggau minyak wangi sebedau iya dikuburka, lalu sida ngidupka api ti mau kena sida ngulitka iya. Jehosapat lalu nganti apai iya Asa nyadi raja, lalu iya ngeringka diri ngelaban Israel. Iya ngasuh bala soldadu nyaga nengeri ti bekuta di menua Judah, di menua pesisir, enggau nengeri ti udah dialahka Asa di menua Epraim. TUHAN merekatka Jehosapat laban iya neladan apai iya, lalu enda nyembah Baal. Iya betuaika Allah Taala ti disembah apai iya, ngasika pesan Allah Taala, lalu enda ngereja utai ti dikereja sida raja menua Israel. TUHAN negapka perintah Jehosapat di menua Judah, lalu semua orang mai pemeri ngagai iya, nya alai iya nyadi kaya sereta balat dibasa orang. Iya gaga ati betuaika TUHAN lalu ngerusak semua endur alai orang kapir nyembah petara sida di menua Judah, enggau tanda petara indu Aserah di menua nya. Dalam taun ti ketiga iya nyadi raja, iya ngasuh bala pemesai, iya nya Benhail, Obadiah, Sekariah, Netanel, enggau Mikaiah, ngajar ba sebelah nengeri di menua Judah. Sida nya disempulang semilan iku orang Lewi ke benama Semaiah, Netaniah, Sebadiah, Asahel, Semiramot, Jehonatan, Adonijah, Tobijah, enggau Tobadonijah. Lalu imam ke enggau sida nya Elisama seduai Jehoram. Sida mai Bup Adat TUHAN, lalu bejalai nengah semua nengeri di menua Judah, ngajar Adat TUHAN ngagai orang mayuh. TUHAN ngasuh semua perintah ti ngelingi Raja Jehosapat takut nyerang iya. Sekeda orang Pilistin mai mayuh pirak enggau pemeri bukai ngagai Jehosapat, lalu sekeda orang Arab mai 7,700 iku bedus enggau 7,700 iku kambin ngagai iya. Nya alai kuasa Jehosapat nambah-menambah. Iya begagaka kuta enggau nengeri di serata menua Judah, alai nyimpan pemakai. Iya ngasuh pemesai ti tebilang nama nyaga Jerusalem, nitihka ripih raban peturun sida. Orang ke nyadi tuai soldadu ari raban peturun Judah nya Adnah. Iya bisi 300,000 iku soldadu dipegai iya. Pemesai ke lumur dua nya Jehohanan. Iya bisi 280,000 iku soldadu, lalu tuai soldadu ke lumur tiga nya Amasiah anak Sikri. Iya bisi 200,000 iku soldadu. (Amasiah udah nyerahka diri bekereja ke TUHAN.) Tuai soldadu ari raban peturun ti diturunka Benjamin nya Eliada. Iya tu orang ke tebilang nama. Iya nguluka 200,000 iku soldadu ke besenyataka terabai enggau panah. Tuai soldadu ke lumur dua iya nya Jehosabat. Bala iya 180,000 iku. Semua sida nya udah chukup disikap enggau senyata kena beperang. Bala soldadu tu bekereja ke raja di Jerusalem. Nambahka nya, raja mega ngasuh soldadu ti bukai nyaga nengeri ti bukai ti bekuta di menua Judah. Lebuh Raja Jehosapat menua Judah nyau nyadi kaya sereta tebilang nama, iya ngatur siku orang ari ruang bilik iya jadi enggau siku orang ari ruang bilik Raja Ahap menua Israel. Berapa taun udah bekau nya, Jehosapat nemuai ngagai Raja Ahap di nengeri Samaria. Kena Ahap masa Jehosapat enggau orang ke datai enggau iya, Ahap ngasuh orang munuh berapa iku jelu bedus enggau sapi kena nyendiaka pengerami makai besai. Iya nguji ngumbuk Jehosapat enggau iya nyerang nengeri Ramot-giliat. Ku Raja Ahap nanya, “Kati nuan deka enggau aku nyerang Ramot?” Ku Jehosapat nyaut, “Aku sedia, enti nuan sedia. Bala soldadu aku mega sedia. Kami sigi deka enggau nuan.” Lalu ku Raja Jehosapat nampung jaku iya, “Tang manah kitai betanya ngagai TUHAN dulu.” Nya alai Ahap mesanka bala nabi, kira empat ratus iku semua sida, lalu ku iya nanya sida, “Kati patut tauka enda aku nyerang Ramot?” “Serang aja meh nengeri nya,” ku sida nabi nyaut. “Allah Taala deka ngasuh nuan menang.” Tang ku Jehosapat nanya Ahap, “Kati nuan nadai agi nabi bukai ti tau dikena kitai betanya ngagai TUHAN?” Ku Ahap nyaut, “Bisi, Mikaiah ari Imlah. Tang aku begedika iya laban iya nadai kala benabika utai ti manah ke aku, seruran utai ti jai.” “Nuan enda tau bejaku munyi nya!” ku Jehosapat nyaut. Ahap lalu mesanka siku pemesai, lalu ngasuh iya ngambi nabi Mikaiah enggau jampat. Raja dua iku nya duduk ba kerusi diraja seduai iya, ngena pekayan raja, ba endur alai orang ngindik gandum ari luar pintu nengeri Samaria, lalu semua nabi benabi di mua seduai iya. Siku ari bala nabi nya, Sedekiah anak Chenaana, ngaga tanduk besi, lalu bejaku enggau Ahap, “Tu utai ti disebut TUHAN, ‘Nuan deka ngena utai tu ngelaban orang Siria, lalu nuan deka ngalahka semua sida.’ ” Semua nabi ti bukai bela nyebut nya magang. “Serang meh Ramot-giliat. Nuan deka menang,” ku sida. “ TUHAN deka ngasuh nuan menang.” Nyadi ba urung maya nya, pemesai ti udah mansang ngambi Mikaiah, benung madahka ngagai Mikaiah, “Semua bala nabi ti bukai udah benabi madahka raja deka mujur. Nya alai manah nuan benabi baka nya mega.” Tang ku Mikaiah nyaut, “Dalam nama Allah Taala ti idup, aku semina nyebut utai ti diasuh Allah Taala sebut aku!” Lebuh iya bediri di mua Raja Ahap, raja lalu nanya iya, “Mikaiah, kati patut tauka enda kami duai Raja Jehosapat nyerang Ramot-giliat?” “Patut” ku Mikaiah nyaut. “Nuan endang tetap deka menang. TUHAN deka ngasuh nuan menang.” Tang ku Ahap nyaut, “Berapa kali aku enda tau enda ngasuh nuan nyebut utai ti bendar dalam nama TUHAN?” Mikaiah lalu bejaku, “Aku meda bala soldadu orang Israel ngachir ba sebelah bukit, baka bedus ti nadai orang ngibun. Lalu ku TUHAN bejaku, ‘Bala orang tu nadai orang ngulu. Awakka sida pulai enggau selamat.’ ” Ahap lalu bejaku enggau Jehosapat, “Nya utai ti dipadahka aku ngagai nuan. Iya endang nadai kala benabika utai ti manah pasal aku, seruran utai ti jai!” Mikaiah lalu bejaku, “Diatu pendingka utai ti disebut TUHAN! Aku udah meda TUHAN duduk ba kerusi diraja Iya di serega, lalu bala melikat Iya bediri ari kanan enggau ari kiba Iya. Lalu ku TUHAN bejaku, ‘Sapa deka nipu Ahap ngambika iya nyerang lalu alah di Ramot-giliat?’ Sekeda melikat lalu nyebut tu, sekeda nyebut nya. Udah nya siku roh mansang ngagai TUHAN, lalu bejaku, ‘Awakka aku nipu iya.’ TUHAN lalu nanya iya, ‘Baka ni?’ Ku roh nya nyaut, ‘Aku deka mupuk lalu ngasuh semua bala nabi ke bekereja ke Ahap madahka utai ti bula.’ TUHAN lalu bejaku, ‘Mupuk meh nuan lalu tipu iya. Nuan deka mujur.’ Nya alai TUHAN udah ngengkahka siku roh pemula dalam nyawa bala nabi nuan; TUHAN udah ngeletak nuan deka dituntung penusah!” Nabi Sedekiah anak Chenaana lalu niki ngagai Mikaiah, nampar mua iya, lalu nanya, “Kemaya Roh TUHAN udah kala ninggalka aku lalu bejaku enggau nuan?” Disaut Mikaiah, “Nuan deka nemu nya lebuh nuan tama ngaga bilik belakang mansang ngelalaika diri.” Raja Ahap lalu bejaku, “Tangkap Mikaiah, lalu asuh iya pulai ngagai Amon, tuan gabenor nengeri, enggau ngagai Joas. Asuh sida nutup iya dalam rumah jil, lalu meri iya semina roti enggau ai aja, nyentuk ngagai maya aku pulai kitu baru enggau selamat.” Ku Mikaiah bejaku, “Enti nuan pulai enggau selamat, nya deka nunjukka TUHAN nadai bejaku ngena aku!” Lalu ku Mikaiah nambahka jaku iya, “Dinga nya, semua kita!” Udah nya Raja Ahap menua Israel enggau Raja Jehosapat menua Judah lalu mansang nyerang nengeri Ramot-giliat. Ku Ahap bejaku enggau Jehosapat, “Lebuh kitai nyerang, aku deka ngeluluka diri baka orang bukai, tang nuan ngena pekayan raja.” Nya alai raja menua Israel mansang beperang enda ngena pekayan raja. Nyadi raja menua Siria udah bejaku enggau bala tuai soldadu ke nepan kerita perang, enda ngasuh sida nyerang orang bukai, tang semina raja orang Israel aja. Nya alai, lebuh orang Siria meda Raja Jehosapat, semua sida ngumbai iya raja orang Israel. Sida lalu nyerang iya. Tang Jehosapat nyerauh, lalu TUHAN Allah Taala nulung iya. Allah Taala lalu nguingka orang Siria ari iya. Bala tuai kerita perang lalu nemu iya ukai raja orang Israel. Nya alai sida lalu badu agi ngagai iya. Tang lebuh siku soldadu orang Siria nimbakka laja, laja nya kena ba sambung baju kebal Raja Ahap. “Bakal aku!” ku iya ngangau ngagai orang ke ngemudika kerita perang iya. “Putarka kerita tu ditu, anang agi enggau orang belaban!” Lebuh bala orang agi benung belaban, Raja Ahap nyandih dalam kerita perang iya, merening tunga ngagai orang Siria. Lalu iya mati lebuh padam mata panas lemai nya. Lebuh Raja Jehosapat menua Judah pulai enggau selamat ngagai istana iya di Jerusalem, siku nabi ke benama Jehu anak Hanani, mansang betemu enggau raja, lalu ku iya bejaku enggau raja, “Kati nuan ngumbai diri ngereja utai ti ngena nulung orang ke jai, lalu setanah enggau orang ke begedika TUHAN? Utai ti dikereja nuan udah nyungkak TUHAN ringat. Tang taja pia, nuan bisi pemadas ba nuan empu. Nuan udah muai semua tanda petara indu Aserah ti disembah orang mayuh, lalu nuan udah nguji nitihka peneka Allah Taala.” Taja pen Raja Jehosapat diau di Jerusalem, tang iya selalu bejalai nemuai ngagai orang mayuh, kenyau ari Beer-seba di selatan nyentuk ngagai tisi menua ti bebukit di menua Epraim di utara, laban iya deka mai orang mayuh pulai baru ngagai TUHAN Allah Taala aki ini sida. Iya ngeletak orang nyadi pengulu dalam siti-siti nengeri ti bekuta di menua Judah, lalu meri jaku ajar ngagai sida munyi tu, “Bejimat kita lebuh kita ngatur pechara. Kita ukai ngakim ngena kuasa mensia, tang ngena kuasa TUHAN, lalu Iya bisi enggau kita lebuh kita meri ukum. Nangika TUHAN, lalu bejimat lebuh kita ngakim, laban TUHAN Allah Taala kitai enggai meda orang meri atur ti enda lurus, tauka bepilih mata, tauka makai suap.” Jehosapat mega ngeletak di Jerusalem sekeda orang Lewi, imam enggau tuai ruang bilik orang Israel, ngasuh sida ngakim ngarika TUHAN, lalu mutarka laya entara orang Israel. Opis sida di Jerusalem. Ku iya bejaku ngagai sida, “Kita enda tau enda nangika TUHAN, tetap ati ngagai Iya enggau pengabis ati kita; Genap kali orang ari bansa kita empu datai ari nengeri bukai mai ngagai kita pekara pasal orang ke udah munuh orang, tauka pasal adat, tauka pesan, atur tauka adat, kita enda tau enda ngajar sida, ngambika sida enda ngereja penyalah enggai ke TUHAN ringat ngagai kita enggau ngagai kaban belayan kita. Kereja nya ulih kita, nya baru kita enda ngereja utai ti salah. Imam Besai Amariah udah diberi aku kuasa nyadi tuai kita ngatur semua pekara TUHAN, lalu Sebadiah anak Ismail, ti nyadi tuan gabenor menua Judah, deka ngatur semua pekara raja, lalu orang Lewi deka bekereja ke kita nyadi pemesai kita. Kereja pengawa kita enggau ati ti berani. Awakka TUHAN setanah enggau orang ke ngereja utai ti ngena!” Nyau kelama udah bekau nya, bala soldadu orang Moap enggau Amon, enggau bansa bukai ke setanah enggau sida, iya nya orang bansa Meun, nyerang menua Judah. Sekeda bala seruan datai lalu madah ngagai Raja Jehosapat: “Mayuh amat bala soldadu ari Edom udah datai ari tebing seberai Tasik Mati deka nyerang nuan. Sida udah ngalahka Hasason-tamar.” (Tu siti agi nama ke nengeri En-gedi.) Jehosapat lalu takut, lalu iya besampi ngagai TUHAN minta TUHAN ngiring Iya. Udah nya iya lalu meri atur ngasuh semua orang di menua nya bepasa magang. Orang datai ari semua nengeri dalam menua Judah ngagai Jerusalem minta TUHAN ngiring sida, lalu semua sida, enggau semua orang Jerusalem begempuru ba tengah laman ti baru ba Rumah Sembiang. Raja Jehosapat mansang lalu bediri di mua sida lalu besampi, “O TUHAN Allah Taala aki ini kami, Nuan merintah di serega, atas semua bansa ti di dunya tu. Nuan bekuasa sereta kering, lalu nadai orang ulih ngelaban Nuan. Nuan endang Allah Taala kami. Lebuh bala nembiak Nuan Israel pindah ngagai menua tu, Nuan muru orang ke diau di menua tu, lalu meri menua tu ngagai bala peturun pangan Nuan Abraham, nyadika pesaka sida belama iya. Sida udah diau ditu, lalu udah ngaga Rumah Sembiang kena sida ngemesaika Nuan, laban sida nemu, enti penusah ti besai bisi ninggang sida kena Nuan ngukum sida, baka perang, penyakit ti berampit, tauka lapar pungkang, sida tau datai lalu bediri di mua Rumah Sembiang tu alai Nuan ke disembah. Sida tau besampi ngagai Nuan lebuh sida kena laban penusah, lalu Nuan deka ningaka sida, lalu ngidupka sida. “Diatu, orang Amon, Moap enggau Edom udah datai deka nyerang kami. Lebuh bala aki ini kami pansut ari menua Ejip, Nuan enda nyagi sida tama ngagai menua bansa orang nya. Nya alai bala aki ini kami bejalai ngelaungka sida, lalu enda ngerusak sida. Diatu peda Nuan jalai sida malas pemanah kami. Sida datai deka muru kami ari menua ti udah diberi Nuan ngagai kami. O Allah Taala kami! Ukum meh sida, laban kami tu nadai daya ngelaban bala soldadu ti ngemayuh nya nyerang kami. Kami enda nemu utai ti patut dikereja kami, tang kami minta Nuan nulung kami.” Semua orang Judah, sama enggau bini enggau anak sida, bediri magang dia di mua Rumah Sembiang. Roh TUHAN lalu datai ngagai siku orang Lewi ke bisi dalam tekang bala. Nama orang nya Jahasil anak Sekariah. Iya datai ari raban peturun Asap, nengah Mataniah, Jeiel, enggau Benaiah. Ku Jahasil bejaku, “Tuan Raja, enggau semua kitai orang Judah ke di Jerusalem! TUHAN madahka kita enda tau lemi semengat, tauka takut nyatup bala soldadu ti mayuh nya. Perang tu perang Allah Taala, ukai perang kita. Serang sida pagila lebuh sida niki genting tanah ba Sis. Kita deka besatup enggau sida ba ujung lebak ti nuju ngagai menua puang semak Jeruel. Perang tu ukai perang kita. Belatur aja, lalu diau jenuh nengkilaka TUHAN menang beperang ngarika kita orang Judah enggau ngarika Jerusalem. Anang takut tauka tusah ati. Mansang ngelaban sida pagila; TUHAN deka enggau kita.” Udah nya Raja Jehosapat nyungkurka diri ke tanah, lalu semua orang Judah enggau orang ke diau di Jerusalem bela nyungkurka diri nyembah TUHAN. Orang Lewi ke ari raban peturun Kohat enggau Korah bediri, lalu manjung muji TUHAN Allah Taala ke disembah orang Israel. Tumu pagi hari siti, sida mansang ngagai menua puang semak Tekoa. Lebuh sida mupuk, Jehosapat bejaku enggau sida, “Orang Judah enggau orang Jerusalem! Arapka TUHAN Allah Taala kita, nya baru kita tan ngelaban munsuh. Arapka utai ti disebut sida nabi Iya.” Lebuh raja udah betanya ngagai orang mayuh, iya lalu ngasuh sekeda orang ke nebah musik ngerasukka baju panjai ti dikena sida ngereja pengawa ti kudus, lalu bejalai dulu ari bala soldadu, sereta belagu: “Pujika TUHAN. Pengerindu Iya meruan belama iya!” Lebuh sida belabuh belagu, TUHAN lalu ngeramka ipa lalu nyerang orang Amon, orang Moap enggau orang Edom ke datai nyerang orang Judah, lalu bala munsuh nya rari. Laban orang Amon enggau orang Moap nyerang orang Edom, ngeluska semua sida. Lebuh sida udah ngeluska orang Edom, sida lalu bebunuh diri sama diri. Lebuh bala orang Judah datai ba siti menara jejaga di menua puang, sida malik ngagai bala munsuh lalu meda bangkai munsuh betegaring ba sebelah tanah. Nadai siku sida ulih ngerarika diri. Lebuh Jehosapat enggau bala soldadu iya mansang ngambi perapasan, sida tetemuka mayuh amat jelu sapi pemakai, gari, enggau barang ti berega. Sida begumpulka perapasan nya tiga hari. Tang utai nya kelalu mayuh, datai ke sida nyau enda ulih mai semua utai nya. Ba hari ti keempat, sida lalu begempuru ba Lebak Berakah, lalu muji TUHAN ketegal semua utai ti udah dikereja Iya. Nya kebuah lebak nya dikumbai “Lebak Barakah.” Jehosapat nguluka bala soldadu iya pulai menang ngagai Jerusalem, laban TUHAN udah ngalahka munsuh sida. Lebuh sida datai di Jerusalem, sida mansang ngagai Rumah Sembiang, diumba ngena munyi belikan enggau terumpit. Semua bansa ti ninga chara TUHAN udah ngalahka bala munsuh orang Israel, takut magang. Nya alai menua nadai agi pengachau lebuh Jehosapat megai perintah, lalu Allah Taala ngasuh semua menua nya likun. Jehosapat berengkah nyadi raja menua Judah lebuh umur iya tiga puluh lima taun, lalu iya merintah di Jerusalem dua puluh lima taun. Indai iya Asubah anak Silhi. Baka apai iya ke dulu ari iya, iya ngereja utai ti ngena di mua TUHAN; Tang endur alai orang kapir nyembah petara sida, enda dirusak. Orang Judah enda nyembah Allah Taala aki ini sida enggau pengabis ati sida. Semua utai bukai ti udah dikereja Jehosapat, kenyau ari pun nyentuk ngagai pengujung perintah iya, bisi dituliska magang dalam Jerita Lama Pasal Jehu Anak Hanani, siti ari Jerita Lama Pasal Raja Menua Israel. Raja Jehosapat udah sekali beserakup enggau Raja Ahasiah menua Israel, ti udah ngereja mayuh macham penyai. Ba penyangkai kapal di Esion-geber sida bisi udah ngaga kapal ti ulih belayar di tasik. Tang Elieser anak Dodabahu, ari nengeri Meresah, bisi meri jaku tangkan ngagai Jehosapat, “ TUHAN deka ngerusak utai ti udah digaga nuan, laban nuan udah setanah enggau Ahasiah.” Semua kapal iya pechah magang lalu nadai kala belayar. Jehosapat mati lalu dikuburka ba lumbung bala raja di Nengeri David, lalu anak iya Jehoram nganti iya nyadi raja. Jehoram anak Jehosapat menua Judah bisi enam iku menyadi lelaki: Asariah, Jehiel, Sekariah, Asariahu, Mikael, enggau Sepatiah. Apai sida udah meri sida mayuh emas, pirak enggau utai ti berega nyadika pesaka sida, sama enggau nengeri ti bekuta di menua Judah. Tang iya nyerahka perintah ngagai Jehoram, laban Jehoram nya anak tuai iya. Lebuh Jehoram udah negapka diri nyadi raja, iya lalu ngasuh orang munuh sida menyadi lelaki iya, enggau sekeda bala pemesai orang Israel. Jehoram berengkah nyadi raja lebuh umur iya tiga puluh dua taun, lalu iya merintah di Jerusalem lapan taun. Iya neladan penyai ulah Raja Ahap, enggau sida raja menua Israel ti bukai, laban iya jadi enggau siku ari anak indu Ahap. Iya bedosa ngelaban TUHAN, tang TUHAN enggai ngerusak perintah David, laban Iya udah ngaga sempekat enggau David, lalu besemaya deka ngasuh peturun iya nampung perintah iya. Lebuh Jehoram megai perintah, Edom angkat ngelaban perintah orang Judah, lalu merintah diri empu. Jehoram enggau bala pemesai iya mai kerita perang sida lalu nyerang Edom. Bala soldadu Edom lalu ngelulung sida, tang malam nya sida ulih ngebuska kelulung munsuh lalu rari. Kenyau ari nya Edom mengkang merintah diri lalu enda agi diperintah menua Judah. Lebuh maya nya, nengeri Libnah mega angkat ngelaban perintah orang Judah, laban Jehoram udah ninggalka TUHAN Allah Taala aki ini iya. Iya begagaka endur alai orang kapir nyembah petara sida ba menua ti bebukit di menua Judah, lalu iya nguluka orang Judah enggau orang Jerusalem bedosa ngelaban TUHAN. Nabi Elijah ngirumka siti surat ngagai Jehoram munyi tu: “ TUHAN Allah Taala aki nuan David, ngukum nuan, laban nuan enda neladan apai nuan, Raja Jehosapat, tauka neladan aki nuan Raja Asa. Nuan udah nunda sida raja menua Israel ti bukai, lalu udah nguluka orang Judah enggau orang ke diau di Jerusalem enda tetap ati ngagai Allah Taala, baka Ahap enggau orang ke nganti iya, nguluka orang Israel enda tetap ati ngagai Allah Taala. Laban nuan udah munuh sida menyadi nuan, enggau bala ruang bilik apai nuan, ti manah agi ari nuan empu, TUHAN deka balat ngukum bala nembiak nuan, bala anak nuan enggau bala bini nuan, lalu deka ngerusak pesaka nuan, lalu nuan empu deka ngidapka penyakit pedis perut, ti deka majak balat-sebalat ari hari siti ngagai hari siti.” TUHAN lalu nyungkak orang Pilistin enggau orang Arab ti diau semak orang Etiopia ti udah ngentapka diri ba tebing tasik, angkat ngelaban Jehoram. Sida mansang ngelaban menua Judah, nyerang menua nya, lalu ngerampas semua utai ari istana, lalu nabanka semua bala bini enggau bala anak raja nyadi orang tangkap, kelimpah ari anak bunsu iya ke benama Ahasiah. Udah nya TUHAN lalu ngasuh Raja Jehoram sakit pedis perut ti enda nemu gerai. Penyakit nya majak balat-sebalat nyau deka bulih dua taun, ti ngujungka iya balat amat pedis datai ke mati. Bala nembiak ke diperintah iya nadai nungkunka api kena ngulitka iya, enda baka lebuh aki ini iya mati menya. Jehoram berengkah nyadi raja lebuh umur iya tiga puluh dua taun, lalu iya merintah di Jerusalem lapan taun. Nadai orang ngulitka iya lebuh iya mati. Sida nguburka iya di Nengeri David, tang ukai ba lumbung bala raja. Orang ke diau di Jerusalem lalu nyiri anak bunsu Jehoram ke benama Ahasiah nyadi raja; laban bala soldadu ke datai ngagai kem sama enggau orang Arab udah munuh semua anak iya ke tuai agi. Nya alai Ahasiah anak Jehoram dichiri nyadi raja menua Judah. Ahasiah umur dua puluh dua taun lebuh iya berengkah nyadi raja; iya merintah setaun di Jerusalem. Indai iya Ataliah uchu Omri. Ahasiah mega neladan ruang bilik Raja Ahap, laban indai iya Ataliah, ke nyadika penyanding iya, nguluka iya ngereja penyai. Iya bedosa ngelaban TUHAN baka Raja Ahap, laban udah bekau pemati apai iya, orang ari ruang bilik Raja Ahap nyadika penyanding penemu iya, ke ngujungka iya dirusak. Iya nitihka jaku lalau sida, lalu beserakup enggau Raja Jehoram anak Raja Ahap orang Israel, nyerang Raja Hasael menua Aram, betempuh enggau bala raja nya ba Ramot-giliat, lalu Joram bakal laban orang Aram lebuh perang nya. Iya lalu pulai ngagai nengeri Jesril nganti bakal diri suman, lalu Ahasiah nemuai ngabas iya. Tang Allah Taala udah ngeletak Ahasiah dibuai ngena penemuai iya ngagai Joram. Lebuh Ahasiah nemuai ngagai Joram, seduai iya betemu enggau Jehu anak Nimsi, ti udah dipilih TUHAN ngerusak ruang bilik Raja Ahap. Lebuh Jehu benung bejalaika ukum Allah Taala ngagai peturun Ahap, iya betemu enggau seraban bala tuai orang Judah enggau bala anak menyadi Ahasiah ti udah sama nemuai enggau Ahasiah. Jehu munuh semua sida. Jehu lalu begigaka Ahasiah, lalu nemu iya belalai di Samaria. Ahasiah lalu dibai ngagai Jehu lalu dibunuh. Tang sida nguburka bangkai iya, laban sida bebasaka aki iya Raja Jehosapat, ke udah enggau naka ulih betuaika TUHAN. Nadai siku sida Ahasiah sebilik agi tinggal megai perintah di menua nya. Lebuh Ataliah, indai Raja Ahasiah ninga anak iya udah mati, iya lalu ngasuh semua sida raja orang Judah sebilik dibunuh magang. Ahasiah bisi siku menyadi-tiri ti indu ke benama Jehoseba, ke jadi enggau siku imam ke benama Jehoiada. Indu nya, enggau chara belalai, ngidupka siku anak Ahasiah, ke benama Joas, nabanka iya ari bala menyadi iya ke baru deka dibunuh, lalu ngelalaika iya enggau siku orang ke ngibun iya ba bilik tinduk dalam Rumah Sembiang. Iya majak ngelalaika Joas, lalu Ataliah enda ulih munuh iya. Joas dilalaika dia enam bulan, sekumbang Ataliah ke merintah nyadi kuin. Lebuh Imam Jehoiada udah nganti enam taun, iya bepekat enggau lima iku pemesai soldadu, iya nya Asariah anak Jeroham, Ismail anak Jehohanan, Asariah anak Obet, Maseiah anak Adaiah, enggau Elisapat anak Sikri. Sida bejalai ngagai semua nengeri di menua Judah, lalu mai enggau sida pulai ngagai Jerusalem orang Lewi enggau semua tuai peturun. Semua sida lalu begempuru dalam Rumah Sembiang, lalu dia sida ngaga siti sempekat enggau Joas, anak lelaki raja. Ku Jehoiada bejaku enggau sida, “Tu anak lelaki raja. Iya diatu enda tau enda nyadi raja, laban TUHAN udah besemaya deka ngasuh peturun David nyadi raja. Tu utai ti deka dikereja kitai. Lebuh bala imam enggau orang Lewi datai ngereja pengawa sida ba Hari Sabat, sida deka dibagi ngagai tiga bagi. Sebagi deka nyaga mua pintu Rumah Sembiang, sebagi deka nyaga istana, lalu sebagi ti bukai deka nyaga ba mua Pintu Pemun. Lalu semua orang mayuh deka begempuru magang ba tengah laman Rumah Sembiang. Nadai orang tau tama ngagai rumah ti dalam Rumah Sembiang, kelimpah ari bala imam enggau orang Lewi ke endang bekereja dia. Sida tau tama, laban sida udah dikuduska, tang orang bukai enda tau enda ngasika atur TUHAN, lalu diau di luar. Orang Lewi enda tau enda bekelingika raja lalu nyandang pedang nyaga iya, sereta bejalai enggau raja ngagai sebarang endur iya bejalai. Barang sapa nguji tama ngagai Rumah Sembiang enda tau enda dibunuh.” Orang Lewi enggau orang Judah lalu bejalaika atur Jehoiada. Orang ke ngetu gawa ba Hari Sabat, enda dikemendarka pulai ngagai rumah diri, ngambika bala tuai selalu bisi orang ke tau diasuh sida, iya nya sida ke datai mansang gawa enggau sida ke udah ngetu gawa. Jehoiada meri ngagai bala pemesai soldadu sangkuh enggau terabai Raja David, ti udah disimpan dalam Rumah Sembiang. Iya ngasuh orang ke bediri ngelingi mua Rumah Sembiang nyintak lalu nyandang pedang sida nyaga raja. Udah nya Jehoiada nguluka Joas pansut, ngengkahka makota ba pala iya, lalu meri iya siti Bup Adat pasal tanggungjawap raja. Nya alai Joas dichiri nyadi raja. Imam Jehoiada enggau bala anak lelaki iya nata Joas, lalu semua orang manjung, “Gayu-guru meh raja!” Lebuh Ataliah ninga orang mayuh manjung gaga ati ke raja, iya lalu beguai-guai mansang ngagai Rumah Sembiang, alai orang mayuh ke begempuru. Dia iya lalu tepedaka raja ti baru nya ba penama ngagai Rumah Sembiang, bediri ngimbai tiang ti besai ti endang diungkupka bala raja, dikelingi bala pemesai soldadu enggau orang ke nyepu terumpit. Semua orang manjung magang gaga ati, sereta nyepu terumpit, diuluka orang ke nebah musik dalam Rumah Sembiang ngena pekekas musik sida. Ataliah lalu nyarikka gari diri lalu iya manjung, “Penipu! Penipu!” Jehoiada enda nyagi Ataliah dibunuh ba kandang Rumah Sembiang, nya alai iya mesanka bala pemesai soldadu, lalu ku iya bejaku enggau sida, “Bai Ataliah pansut ensaraka rintai bala jejaga, lalu bunuh barang sapa nguji ngelepaska iya.” Sida nangkap Ataliah, mai iya ngagai istana, lalu sida munuh iya dia ba Pintu Kuda. Imam Jehoiada lalu ngasuh Raja Joas enggau orang mayuh enggau iya ngaga siti sempekat madahka diri deka nyadi nembiak TUHAN. Udah nya semua sida lalu mansang ngagai rumah sembiang Baal, lalu ngeruntuhka rumah nya. Sida mechahka alta enggau engkeramba ti ba endur nya, lalu munuh Matan ti nyadi imam Baal, di mua alta. Jehoiada lalu ngeletak bala imam enggau orang Lewi ngereja pengawa dalam Rumah Sembiang. Sida deka ngereja pengawa ti udah diletak Raja David, lalu nunu piring ti diberi ngagai TUHAN nitihka Adat Moses. Sida mega betanggungjawapka musik enggau ngatur pengerami. Jehoiada mega ngasuh bala jejaga nyaga ba pintu Rumah Sembiang, kena nagang orang ke enda tuchi tama. Bala pemesai soldadu, bala tuai bansa, bala pemesai perintah, enggau semua orang mayuh lalu sama bejalai enggau Jehoiada ngiring raja ari Rumah Sembiang ngagai istana. Sida tama nengah pintu besai, lalu raja nudukka diri ba kerusi diraja. Semua orang mayuh gaga ati magang, lalu nengeri nya nadai agi pengachau, laban Ataliah udah dibunuh. Joas berengkah nyadi raja menua Judah lebuh umur iya tujuh taun, lalu iya merintah di Jerusalem empat puluh taun. Indai iya Sibiah, ari nengeri Beer-seba. Iya ngereja utai ti ngerinduka ati TUHAN, seagi-agi Imam Jehoiada mengkang idup. Jehoiada milih dua iku indu nyadika bini Raja Joas, lalu bini Joas ke dua iku nya ngadaka anak lelaki enggau anak indu. Lebuh Joas udah lama nyadi raja, iya bekira deka ngaduka Rumah Sembiang. Iya bejaku enggau bala imam enggau orang Lewi ngasuh sida mansang ngagai semua nengeri di menua Judah, mupu duit ari semua orang mayuh chukup kena ngaduka Rumah Sembiang. Iya ngasuh sida berengkah gawa tekala nya. Tang orang Lewi ngerindang diri. Nya alai iya mesanka Jehoiada ti nyadi tuai sida, lalu nanya, “Nama kebuah nuan nadai udah ngasuh orang Lewi mupu duit ari menua Judah enggau ari Jerusalem ti patut dibayar orang mayuh kena melanja Langkau Kain TUHAN nitihka atur Moses, ke nembiak TUHAN?” ( Bala orang ke nitihka Ataliah, indu ke jai nya, udah ngerusak Rumah Sembiang, lalu udah nyembah Baal ngena mayuh utai ti kudus dia.) Raja lalu ngasuh orang Lewi ngaga siti peti alai nyimpan duit pupu, lalu ngengkahka peti nya ba mua pintu Rumah Sembiang. Sida lalu ngirumka jaku gerah ngagai serata nengeri Jerusalem enggau menua Judah, ngasuh semua orang mai ngagai TUHAN duit pupu baka ke udah terubah digumpul Moses, ti nembiak TUHAN, di menua puang. Orang mayuh enggau bala tuai sida gaga ati ninga jaku gerah nya, lalu sida mai duit pupu sida lalu ngisi peti nya. Tiap hari orang Lewi mai peti nya ngagai pemesai raja ke betanggungjawapka utai nya. Lebuh peti nya penuh, kerani raja enggau pengari Imam Besai ngambi duit nya ari peti nya, lalu mulaika peti nya ngagai endur peti nya diengkah. Nya alai sida mupu mayuh amat duit. Raja enggau Jehoiada meri duit nya ngagai orang ke nyadi tuai ngaduka Rumah Sembiang, lalu sida ngaji orang ke landik begagaka utai ari batu, tukang kayu, tukang tempa, ngambika sida ngaduka Rumah Sembiang. Semua sida nya bebendar amat gawa, lalu sida ulih ngaduka Rumah Sembiang nya sebaka enggau gamal asal iya, sereta tegap. Lebuh pengawa nya udah tembu, emas enggau pirak ti laluh lalu diberi ngagai raja enggau ngagai Imam Jehoiada. Seduai iya lalu ngasuh orang ngena emas enggau pirak ti laluh nya begagaka mangkuk enggau pekekas bukai ke Rumah Sembiang. Lebuh Jehoiada agi idup, piring endang seruran diberi ba Rumah Sembiang. Lebuh umur iya manggai seratus tiga puluh taun, iya mati. Sida nguburka iya ba lumbung bala raja di Nengeri David kena sida ngingatka pemanah pengawa ti udah dikereja iya ke orang Israel, ke Allah Taala, enggau ke Rumah Sembiang. Tang lebuh Jehoiada udah mati, bala tuai orang Judah mujuk Raja Joas mendingka sida. Nya alai orang mayuh badu agi nyembah dalam Rumah TUHAN Allah Taala aki ini sida, lalu sida belabuh nyembah engkeramba, enggau anak patung petara indu Aserah. TUHAN lalu ringat ngagai menua Judah enggau Jerusalem. TUHAN ngasuh bala nabi meri jaku tangkan ngagai sida, ngasuh sida pulai baru ngagai Iya, tang orang mayuh enggai mending. Udah nya Roh Allah Taala lalu bekuasa ba Sekariah anak Imam Jehoiada. Iya bediri ba endur alai iya ulih dipeda orang mayuh, lalu bejaku enggau nyawa ti inggar, “ TUHAN Allah Taala nanyaka kebuah kita enda agi ngasika pesan Iya, lalu ngasuh diri ditinggang penusah ti besai tu! Laban kita udah ninggalka Iya, nya alai Iya ninggalka kita!” Orang mayuh lalu bepekat ngelaban Sekariah ari asuh raja. Sida nuku iya ngena batu ba tengah laman Rumah Sembiang. Raja Joas enda ingatka pemanah Jehoiada, apai Sekariah, enggau iya, lalu iya ngasuh orang munuh Sekariah. Lebuh Sekariah nyau deka ngapuska seput, iya ngangau, “Awakka TUHAN meda lalu malas!” Ba pun musin chelap taun nya, bala soldadu orang Siria nyerang menua Judah enggau Jerusalem, munuh semua tuai bansa, lalu nabanka mayuh amat perapasan ngagai Damaskus. Bala soldadu orang Siria enda mayuh, tang TUHAN nejuka sida ngalahka bala soldadu orang Judah ke mayuh agi ari sida, laban orang Judah udah ninggalka TUHAN Allah Taala aki ini sida. Nya meh chara Raja Joas diukum. Iya balat amat bakal, lalu lebuh bala munsuh pulai, dua iku pemesai iya bepekat ngelaban iya, lalu munuh iya lebuh iya gali ba katil, laban iya udah munuh anak Imam Jehoiada. Joas dikuburka di nengeri David, tang ukai ba lumbung bala raja. ( Orang ke bepekat ngelaban Joas nya Sabat anak Sime-at, orang Amon, enggau Jehosabat anak Simrit orang bansa Moap.) Cherita pasal bala anak lelaki Joas, jaku ti benabi ti disebut ngelaban iya, enggau cherita pasal chara iya ke ngaduka Rumah Sembiang, bisi dituliska magang dalam Jaku Kenang Pasal Bup Raja. Anak iya ke benama Amasiah nganti iya nyadi raja. Amasiah berengkah nyadi raja lebuh umur iya dua puluh lima taun, lalu iya merintah di Jerusalem dua puluh semilan taun. Indai iya Jeho-adin datai ari Jerusalem. Iya ngereja utai ti ngerinduka ati TUHAN, tang enggau ati ti lembau. Lebuh iya udah negapka perintah iya, iya lalu munuh bala pemesai ti udah munuh apai iya. Tang iya enda munuh bala anak orang nya, laban iya nitihka pesan TUHAN dalam Adat Moses: “Apai indai enda tau dibunuh ketegal penyalah anak sida, lalu anak enda tau dibunuh ketegal penyalah apai indai sida. Orang semina tau dibunuh ketegal penyalah sida empu.” Udah nya Raja Amasiah ngempuruka semua lelaki ari raban bansa Judah enggau Benjamin nyadi soldadu nitihka raban peturun sida, lalu ngeletak pemesai nyadi tuai ke raban seribu iku enggau raban seratus iku sida. Iya ngempuruka 300,000 iku lelaki ke umur dua puluh taun ke atas, orang ke tau enggau beperang, ke sikar bekenaka sangkuh enggau terabai. Nambahka nya, iya mega ngaji 100,000 soldadu ari menua Israel, ngena ungkus kira empat tan pirak. Tang siku nabi mansang ngagai Raja Amasiah, lalu bejaku enggau iya, “Anang mai bala soldadu orang Israel tu enggau nuan, laban TUHAN nadai enggau orang ke datai ari perintah ti di utara. Enti nuan ngumbai diri kering beperang ngena chara tu, Allah Taala deka ngasuh nuan alah laban munsuh; laban Allah Taala bisi kuasa nulung tauka ngalah.” Amasiah lalu nanya ngagai nabi nya, “Tang kati ku semua pirak ti udah dibayar kena aku ngaji sida?” Ku nabi nya nyaut, “ TUHAN ulih meri nuan mayuh agi pirak ari nya!” Amasiah lalu ngasuh bala soldadu ke digaji nya pulai ngagai menua sida empu. Bala soldadu nya lalu pulai, balat amat ringat ngagai orang Judah. Enggau ati ti berani Amasiah nguluka bala soldadu iya ngagai Lebak Garam. Dia sida ngelaban lalu munuh sepuluh ribu iku soldadu orang Edom. Orang Judah nangkap sepuluh ribu iku ti bukai, lalu mai orang tangkap nya ngagai pala tingkah batu di nengeri Sela, lalu muai sida ke baruh. Semua sida redak magang. Tang bala soldadu orang Israel ti enda disagi Amasiah mansang enggau iya beperang, lalu nyerang nengeri orang Judah entara Samaria enggau Bet-horon, munuh tiga ribu iku lelaki dalam nengeri nya, lalu ngerampas mayuh amat perapasan. Lebuh Amasiah pulai udah bekau iya ti ngalahka orang Edom, iya mai engkeramba sida, nirika engkeramba nya, nyembah lalu meri piring ngagai engkeramba nya. Nya alai TUHAN ringat ngagai Amasiah, lalu ngasuh siku nabi mansang ngagai Amasiah. Nabi nya lalu nanya, “Nama kebuah nuan nyembah petara orang bansa bukai ke enda ulih ngelepaska sida empu ari kuasa nuan?” Tang lebuh nabi nya agi benung bejaku, Amasiah lalu ngelampat jaku iya, ku iya, “Kemaya nuan udah diasuh nyadi penyanding penemu ke raja? Badu agi nuan bejaku, enggai ke aku ngasuh orang munuh nuan!” Nabi nya lalu badu agi bejaku. Tang sebedau iya badu bejaku, iya sempat nyebut, “Aku nemu Allah Taala udah mutuska runding deka ngerusak nuan laban nuan udah ngereja semua utai tu, lalu enda mendingka jaku lalau aku.” Udah nya Raja Amasiah enggau bala pemesai iya baum lalu ngirumka pesan ngagai Raja Jehoas anak Jehoahas, uchu Jehu menua Israel, nyakap iya lalu mai iya belaban. Jehoas ngirumka saut ngagai Amasiah raja menua Judah: “Nyadi sekali madang duri di Bukit Lebanon ngirumka pesan ngagai kayu sidar: ‘Awakka anak indu nuan jadi enggau anak lelaki aku.’ Siku jelu babas mansa, lalu ngindik madang duri nya. Nuan Amasiah temegah madahka diri udah ngalahka orang Edom, tang aku ngelalau nuan, anang mindah ari rumah. Nama kebuah ngaga pengachau ti semina deka ngenusahka nuan enggau bala nembiak nuan?” Tang Amasiah enggai mending ari asuh Allah Taala, ngambika sida alah laban munsuh sida, laban sida udah nyembah engkeramba orang Edom. Nya alai Jehoas, raja menua Israel nyerang Amasiah, raja menua Judah. Sida besatup ba Bet-semes di menua Judah. Soldadu orang Judah alah laban bala orang Israel, lalu bala soldadu sida rari ngagai rumah diri empu. Jehoas raja menua Israel nangkap Amasiah raja menua Judah, lalu mai iya ngagai Jerusalem. Dia Raja Jehoas lalu ngeruntuhka kuta nengeri nya sepemanjai 200 meter, berengkah ari Pintu Epraim nyentuk ngagai Pintu Sukut. Iya mai ngagai Samaria nyadika perapasan iya semua emas enggau pirak ti dalam Rumah Sembiang, pekekas ti dikena dalam Rumah Sembiang ti dijaga bala peturun Obet-edom, enggau reta tengkira ti dalam istana. Iya mega mai orang tangkap. Raja Amasiah mengkang idup lima belas taun udah bekau pemati Raja Jehoas menua Israel. Semua utai bukai ti udah dikereja Amasiah ari pun ngagai pengujung perintah iya bisi dituliska magang dalam Jerita Lama Pasal Raja Menua Judah Enggau Raja Menua Israel. Kenyau ari maya iya ninggalka TUHAN, orang udah bepekat ngelaban iya di Jerusalem. Iya lalu rari ngagai nengeri Lakis, tang sida nitihka iya ngagai nengeri nya, lalu munuh iya dia. Bangkai iya ditepanka ba kuda lalu dibai ngagai Jerusalem, lalu iya dikuburka ba lumbung bala raja di Nengeri David. Semua orang Judah milih anak lelaki Amasiah ke benama Usiah, ke umur enam belas taun, nganti apai iya nyadi raja. ( Udah bekau pemati Amasiah, Usiah ngalah lalu nirika nengeri Elat lalu mulaika nengeri nya ngagai Judah.) Usiah nyadi raja lebuh umur iya enam belas taun, lalu iya merintah di Jerusalem lima puluh dua taun. Indai iya Jekoliah, ari Jerusalem. Iya ngereja utai ti ngerinduka ati TUHAN, neladan apai iya. Sekumbang Sekariah, ti nyadi penyanding penemu iya, agi idup, Usiah betuaika TUHAN enggau ati ti tetap, lalu Allah Taala merekatka iya. Usiah nyerang orang Pilistin. Iya ngeruntuhka kuta nengeri Gat, Jabnil, enggau Asdot, lalu iya nirika nengeri ti bekuta semak Asdot, enggau ba endur bukai di menua Pilistin. Allah Taala nulung iya ngalahka orang Pilistin, orang Arab ti diau di Gurbaal, enggau orang Meun. Orang Amon mayar chukai ngagai Usiah, lalu kuasa iya amat besai datai ke berita pasal iya nyau ngelekai nyentuk ngagai menua Ejip. Kena negapka kuta nengeri Jerusalem, Usiah ngaga menara ba Pintu Sukut, Pintu Lebak, enggau ba sukut kuta nya. Iya mega ngaga menara ti bekuta di menua pesisir, lalu numbak berapa buah telaga, laban iya nupi mayuh amat jelu ba kaki bukit di barat enggau ba emperan. Iya rinduka pengawa umai, nya alai iya meransang orang Judah bekebun anggur ba menua ti bebukit, lalu bumai tanah ti ami. Bala soldadu iya mayuh, lalu sida endang seruran sedia deka beperang. Cherita pasal utai ti dikereja bala soldadu iya dituliska magang ulih kerani iya Jeiel seduai Maseiah ari baruh Hananiah, siku ari orang ke bekereja ke raja. Bala soldadu raja diuluka 2,600 iku bala pemesai. Sida pemesai tu nguluka 307,500 iku soldadu ke ulih ngelaban munsuh ngarika raja. Usiah meri ngagai bala soldadu iya terabai, sangkuh, selapuk kebal, baju kebal, panah enggau laja, enggau batu ti deka ditimbakka ngena pangwang. Orang ke diasuh iya begagaka utai di Jerusalem, ngaga semacham pekekas kena nimbakka laja, enggau kena nimbakka batu ari menara enggau ari sukut kuta nengeri. Berita pasal iya ngelekai ngagai semua endur, lalu iya nyadi orang ke besai kuasa ari tulung Allah Taala. Tang lebuh Usiah nyau udah kering, iya sumbung. Penyumbung iya ngujungka iya dibuai. Iya enda ngasika TUHAN Allah Taala iya laban iya mansang ngagai Rumah Sembiang lalu nunu menyan ba alta ti alai nunu menyan. Imam Asariah, disempulang lapan puluh iku imam ke kering sereta berani, lalu nitihka raja deka nagang iya. Ku sida, “Usiah! Nuan nadai hak nunu menyan ke TUHAN. Semina imam ke ari peturun Aron aja, ti udah dikuduska, tau ngereja pengawa nya. Angkat nuan ari tu. TUHAN Allah Taala udah ringat ngagai nuan, lalu Iya enggai agi merekatka nuan.” Usiah lalu ringat, bediri tegir-tegir dia dalam Rumah Sembiang, ngimbai alta ti alai nunu menyan, megai utai ti dikena nunu menyan. Iya lalu ringat ngagai bala imam. Tekala nya penyakit kulit ti tau ngerampit lalu pegari ba kening iya. Asariah enggau sida imam ti bukai lalu genung-genung merening meda kening raja. Udah nya sida lalu mejalka iya angkat ari Rumah Sembiang. Iya lalu beguai-guai pansut, laban TUHAN udah ngukum iya. Kenyau ari nya, nyentuk ngagai pemati iya, iya nyadi orang ke enda tuchi ketegal penyakit nya. Iya nadai agi tau tama ngagai Rumah Sembiang. Iya diau dalam rumah iya empu. Semua kuasa iya dirampas ari iya, lalu iya diganti anak iya ke benama Jotam megai perintah di menua nya. Nabi Isaiah anak Amos bisi nuliska semua utai bukai ti udah dikereja Raja Usiah lebuh maya Usiah megai perintah. Usiah mati lalu dikuburka ba tanah kubur bala raja, tang laban iya ngidapka penyakit kulit, iya enda dikuburka ba lumbung bala raja empu. Anak iya Jotam nganti iya nyadi raja. Jotam nyadi raja lebuh umur iya dua puluh lima taun, lalu iya merintah di Jerusalem enam belas taun. Indai iya Jerusah anak Sadok. Iya ngereja utai ti ngerinduka ati TUHAN, baka apai iya. Tang iya enda bedosa betunuka menyan dalam Rumah Sembiang baka apai iya. Tang orang mayuh majak bedosa. Jotam nya meh orang ke ngaga Pintu Utara ke Rumah Sembiang, lalu iya mega ngaduka kuta di Jerusalem ba endur ti dikumbai Opel. Iya ngaga mayuh bengkah nengeri di menua ti bebukit di menua Judah. Lalu iya begagaka kuta enggau menara. Iya ngelaban raja menua Amon enggau bala soldadu raja nya, lalu ngalahka sida. Udah nya iya mejalka orang Amon mayar chukai genap taun dalam tiga taun, ngagai iya baka tu: 3,400 kilogram pirak, 1,000 tan gandum, enggau 1,000 tan barli. Jotam bekuasa laban iya tetap ati ngasika TUHAN Allah Taala iya. Utai bukai ti nyadi lebuh Jotam megai perintah, perang enggau polisi iya, bisi dituliska magang dalam Jerita Lama Pasal Raja Menua Israel enggau Menua Judah. Umur Jotam dua puluh lima taun lebuh iya berengkah nyadi raja, lalu iya merintah di Jerusalem enam belas taun. Iya mati lalu dikuburka di nengeri David, lalu anak lelaki iya Ahas nganti iya nyadi raja. Ahas nyadi raja lebuh umur iya dua puluh taun, lalu iya merintah di Jerusalem enam belas taun. Iya enda neladan pemanah pengawa aki iya Raja David, tang ngereja utai ti enda ngerinduka ati TUHAN lalu neladan sida raja menua Israel. Iya ngasuh orang ngaga engkeramba Baal ari besi, betunuka menyan ba Lebak Hinom. Indah anak lelaki iya empu deh diserahka iya nyadika piring tunu ngagai engkeramba nya, nunda utai ti jai ti udah dikereja orang ke udah diburu TUHAN ari menua nya lebuh orang Israel nyerang. Ahas ngenjuk piring sereta nunu menyan ba genap iti endur alai orang kapir nyembah petara sida, ba sebelah bukit enggau ba endur ti lindung di baruh kayu. Siku soldadu orang Israel ke benama Sikri munuh anak lelaki Raja Ahas ke benama Maseiah, ke ngemataka pekara dalam istana, enggau Elkanah, ti nyadi lumur dua raja. Taja pen orang Judah nya raban bansa sida empu, orang Israel nangkap 200,000 iku indu enggau bala nembiak nyadi orang tangkap, enggau mayuh amat perapasan lalu mai semua utai nya ngagai Samaria. Siku nabi TUHAN ke benama Odet bisi diau di nengeri Samaria. Iya betemu enggau bala soldadu orang Israel ke baru pulai beperang lalu baru deka tama ngagai nengeri, mai orang Judah ke ditangkap sida. Ku nabi nya bejaku, “ TUHAN Allah Taala aki ini kita ringat ngagai orang Judah, lalu nejuka kita ngalahka sida, tang diatu Iya udah ninga pasal pemalat kita udah bebunuhka sida. Nyadi diatu kita deka ngaga bala lelaki enggau indu orang Jerusalem enggau Judah nyadi ulun kita. Kati kita enda nemu diri udah mega bedosa ngelaban TUHAN Allah Taala kita? Pendingka aku! Orang tangkap tu sida menyadi lelaki enggau menyadi indu kita. Lepaska sida, enggai ke TUHAN ringat lalu ngukum kita.” Empat iku tuai ari perintah ti di utara, Asariah anak Jehohanan, Berekiah anak Mesilemot, Jehiskiah anak Salum, enggau Amasa anak Hadlai, mega enda besetuju enggau utai ti udah dikereja bala soldadu. Ku sida, “Anang mai orang tangkap tu kitu! Kitai udah bedosa ngelaban TUHAN, lalu udah ngasuh Iya udah chukup ringat, datai ke Iya nyau deka ngukum kitai. Lalu diatu kita deka ngereja utai kena nambahka penyalah kitai.” Nya alai bala soldadu lalu nyerahka orang tangkap enggau perapasan sida ngagai orang mayuh enggau ngagai tuai sida, lalu orang ke empat iku nya diletak meri gari ari perapasan nya ngagai orang tangkap nya. Sida lalu meri sida gari enggau kasut, pemakai ti chukup, lalu ngunsut abi telih sida ngena minyak kana. Sida ke kelalu lembut tulang, sereta enda ulih bejalai, lalu ditepanka sida ba keledai, lalu semua orang tangkap nya dianjung pulai ngagai Jeriko di menua Judah, alai ti mayuh kayu engkerema. Udah nya orang Israel lalu pulai ngagai Samaria. Lebuh maya nya orang Pilistin benung nyerang nengeri di menua ti ba kaki bukit di barat enggau di selatan menua Judah. Sida ngalahka nengeri Bet-semes, Aijalon, enggau Gederot, enggau nengeri Soko, Timnah, enggau Gimso, enggau genturung pendiau ti ngelingi nengeri nya, lalu ngentapka diri dia. Laban Raja Ahas menua Judah enda bebasaka hak bala nembiak iya, lalu enda ngasika TUHAN, TUHAN ngasuh penusah ninggang menua Judah. Raja besai menua Asiria enda nulung iya, tang ngelaban iya, lalu ngenusahka iya. Nya alai Ahas ngambi emas ari Rumah Sembiang, ari istana, enggau ari rumah bala tuai bansa, lalu meri emas nya ngagai raja menua Asiria. Tang raja nya mengkang enggai nulung iya. Makin balat agi penusah ninggang iya, makin balat agi ga iya bedosa ngelaban TUHAN. Iya ngenjuk piring ngagai petara orang Siria ti udah ngalahka iya. Ku iya, “Bala petara orang Siria udah nulung raja menua Siria. Nya alai, enti aku ngenjuk piring ngagai bala petara nya, kada enda sida deka mega nulung aku.” Utai tu ngasuh penusah ti besai ninggang iya enggau bansa iya empu. Nambahka nya, iya ngambi semua pekekas dalam Rumah Sembiang, lalu mechahka utai nya. Iya nutup Rumah Sembiang, lalu ngaga alta ba genap bengkah endur di Jerusalem. Iya ngaga endur alai orang kapir nyembah petara sida, alai sida betunuka menyan ke petara sida dalam semua nengeri ti besai enggau nengeri ti mit. Nya meh jalai iya ngasuh TUHAN Allah Taala aki ini iya, ringat ngagai iya. Semua utai ti udah nyadi lebuh iya megai perintah, kenyau ari pun nyentuk ke ujung, bisi dituliska magang dalam Jerita Lama Pasal Raja Menua Judah Enggau Menua Israel. Raja Ahas mati lalu dikuburka di Jerusalem, tang ukai ba lumbung bala raja. Iya lalu diganti anak lelaki iya Hesekiah nyadi raja. Hesekiah nyadi raja menua Judah lebuh umur iya dua puluh lima taun, lalu iya merintah di Jerusalem dua puluh semilan taun. Indai iya Abijah anak Sekariah. Iya ngereja utai ti ngerinduka ati TUHAN, neladan aki iya Raja David. Dalam bulan ti kesatu taun Hesekiah berengkah nyadi raja, iya muka semua pintu Rumah Sembiang, lalu ngasuh pintu nya diaduka baru. Iya ngempuruka bala imam enggau orang Lewi ba tengah laman timur Rumah Sembiang lalu bejaku ngagai sida dia. Ku iya, “Kita orang Lewi enda tau enda nguduska diri, lalu nuchi Rumah Sembiang TUHAN Allah Taala aki ini kita. Buai ari Rumah Sembiang nya semua utai ti ngamahka iya. Sida aki ini kitai udah enda tetap ati ngagai TUHAN Allah Taala kitai, lalu udah ngereja utai ti nyungkak TUHAN ringat. Sida udah ninggalka Iya, lalu nguingka belakang sida ngagai endur alai Iya diau. Sida udah nikupka pintu Rumah Sembiang, nejuka lampu padam, lalu enda nunu menyan tauka ngenjuk piring tunu dalam Rumah Sembiang Allah Taala ke disembah orang Israel. Nya kebuah TUHAN ringat ngagai menua Judah enggau Jerusalem, lalu utai ti udah dikereja Iya ngagai sida udah ngasuh semua orang tekenyit ati sereta takut. Kita empu nemu nya. Bala apai kitai udah mati beperang, lalu bala bini enggau bala anak kitai udah ditabanka munsuh nyadi orang tangkap. “Diatu aku udah mutuska runding deka ngaga siti sempekat enggau TUHAN Allah Taala ke disembah orang Israel, ngambika Iya enda agi ringat ngagai kitai. Anak, anang masau jam. Kita tu orang ke udah dipilih TUHAN nunu menyan ke Iya, sereta nguluka orang mayuh nyembah Iya.” Bala sida tu lalu ngempuruka bala orang Lewi ti bukai, lalu semua sida bela nuchi diri magang. Udah nya, nitihka atur ti diberi Raja Hesekiah ngagai sida, sida lalu belabuh nuchi Rumah Sembiang, nitihka Adat TUHAN. Bala imam tama ngagai Rumah Sembiang, deka nuchi rumah nya, lalu sida muai semua utai ti enda tuchi ngagai tengah laman Rumah Sembiang. Ari nya bala orang Lewi lalu mai semua utai nya pansut ari nengeri ngagai Lebak Kidron. Pengawa nuchi Rumah Sembiang berengkah kena satu hari bulan ti kesatu, lalu kena lapan hari bulan nya, semua pengawa nya tembu magang dikereja, nyentuk ngagai bilik penama ti nuju ngagai Rumah Sembiang. Udah nya sida bekereja lapan hari da agi, nyentuk ngagai enam belas hari bulan nya, nyendiaka Rumah Sembiang alai besembiang. Orang Lewi lalu madahka ngagai Raja Hesekiah: “Kami udah tembu nuchi Rumah Sembiang, nyengkaum alta alai nunu piring, mija alai engkah roti ti kudus, enggau semua pekekas utai nya. Kami udah mega mai pulai baru semua pekekas ti udah diambi Raja Ahas sekumbang iya ti enda tetap ati ngagai Allah Taala, lalu kami udah nyerahka utai nya baru ngagai TUHAN. Semua utai nya bisi di mua alta TUHAN magang.” Raja Hesekiah lalu beguai-guai ngempuruka bala tuai nengeri, lalu semua sida sama mansang ngagai Rumah Sembiang. Sida mai tujuh iku sapi ti lelaki, tujuh iku jelu bedus, tujuh iku anak domba, enggau tujuh iku kambin nyadika piring pengampun dosa sida raja sebilik, enggau dosa orang Judah, enggau kena nuchi Rumah Sembiang. Raja lalu ngasuh bala imam, ke ari peturun Aron, meri jelu nya nyadika piring ba alta. Bala imam munuh sapi ti lelaki dulu, udah nya bedus, lalu udah nya anak domba, lalu sida ngunsaika darah siku-siku jelu nya ba alta nya. Ke pengujung iya sida lalu mai kambin ngagai raja, enggau ngagai orang bukai ke besembiang dia, lalu semua sida bela ngengkahka jari sida ba kambin nya. Udah nya bala imam lalu munuh kambin nya, lalu nuang darah jelu nya ba alta nyadika genselan kena muai dosa semua orang mayuh, laban raja udah ngasuh piring tunu enggau piring pengampun dosa, digagaka semua orang Israel. Raja nitihka atur ti udah diberi TUHAN ngagai Raja David ngena Gat, ti nyadi nabi raja, enggau ngena nabi Natan. Iya ngasuh orang Lewi bepalan ba Rumah Sembiang, mai belikan enggau bebendai, iya nya pekekas baka ke udah dikena Raja David. Bala imam mega bediri dia mai terumpit. Hesekiah lalu ngasuh piring tunu nya dienjuk ba alta. Lalu lebuh pengawa nya berengkah, orang mayuh lalu belagu muji TUHAN, lalu bala orang ke nebah musik belabuh nebah terumpit enggau semua perengka musik ti bukai. Semua orang ke bisi dia bela enggau nyembah TUHAN magang, lalu pengawa belagu enggau nebah musik dikereja enda ngetu-ngetu datai ke semua piring nya udah ditunu magang. Udah nya Raja Hesekiah enggau semua orang mayuh besugang, lalu nyembah Allah Taala. Raja enggau bala tuai bansa lalu ngasuh orang Lewi belagu ke TUHAN ngena lagu puji ti udah ditulis David enggau lagu ti udah ditulis nabi Asap. Semua orang lalu belagu magang enggau ati ti gaga, lebuh sida besugang nyembah Allah Taala. Hesekiah lalu bejaku enggau orang mayuh, “Kita diatu udah nyerahka diri ngagai TUHAN, nya alai bai piring terima kasih kita ngagai TUHAN.” Sida lalu ngereja nya. Sekeda sida mega ngatika diri mai jelu nyadika piring tunu. Sida mai tujuh puluh iku sapi ti lelaki, seratus iku jelu bedus, enggau dua ratus iku anak domba nyadika piring tunu ngagai TUHAN. Sida mega mai enam ratus iku sapi ti lelaki, enggau tiga ribu iku jelu bedus nyadi piring ke diempa bala mayuh. Tang bala imam ti munuh jelu nya enda chukup tubuh niti kulit semua jelu nya, nya alai orang Lewi nulung sida, datai ke pengawa nya tembu. Laban ba urung maya nya mayuh agi bala imam udah nuchi diri. (Orang Lewi lebih agi tetap ati ngintu diri tuchi ari bala sida imam.) Nambahka piring tunu segala, bala sida imam mega betanggungjawap betunuka lemak ti udah diberi ari piring ti diempa orang mayuh, sereta betanggungjawap nuang wain ti diberi sama enggau piring tunu. Nya meh jalai pengawa nyembah TUHAN dalam Rumah Sembiang nyau dikereja baru. Raja Hesekiah enggau orang mayuh bela gaga ati magang, laban Allah Taala udah nulung sida ngereja semua utai nya enggau jampat. Raja enggau orang mayuh gaga ati ke pelan nya, nya alai sida mesanka semua orang Israel, kenyau ari Dan di utara nyentuk ngagai Beer-seba di selatan, minta sida begempuru di Jerusalem mayuh agi ari ti udah, lalu ngintu Gawai Paska nitihka Adat. Bala orang ke mai pesan mupuk, nitihka jaku raja enggau bala pemesai iya, lalu bejalai ngagai serata menua Judah enggau menua Israel, mai pesan tu: “Orang Israel, kita udah mujur nan di menua tu lebuh orang Asiria nyerang. Nya alai pulai meh kita baru diatu ngagai TUHAN Allah Taala ke disembah Abraham, Isak, enggau Jakop, ngambika TUHAN pulai baru ngagai kita. Anang baka aki ini kita enggau baka kaban belayan kita orang Israel ti enda tetap ati ngagai TUHAN Allah Taala sida. Kita empu nemu, TUHAN udah balat amat ngukum sida. Anang kieh ati baka sida, tang ngasika TUHAN. Datai ngagai Rumah Sembiang di Jerusalem, ti udah dituchi TUHAN Allah Taala kita belama iya, lalu sembah TUHAN ngambika Iya enda agi ringat ngagai kita. Enti kita pulai baru ngagai TUHAN, nya baru orang ke udah nabanka kaban belayan kita nyadi orang tangkap deka sinu ati ke sida, lalu nejuka sida pulai baru ngagai menua diri. TUHAN Allah Taala kita siru sereta kasih, lalu enti kita pulai baru ngagai Iya, Iya deka nerima kita.” Bala orang ke mai pesan nya bejalai ngagai semua nengeri di menua Epraim enggau Manasi, enggau ngagai menua ti di utara nyentuk ngagai raban bansa Sebulun, tang orang mayuh ketawa sereta beduan sida. Tang taja pia, sekeda orang ari raban bansa Aser, Manasi, enggau Sebulun bisi ati deka datai ngagai Jerusalem. Allah Taala mega bekereja di menua Judah, lalu ngempung orang mayuh lalu ngasuh sida mutus ati ngasika peneka Iya, lebuh sida nitihka atur raja enggau bala pemesai iya. Dalam bulan ti kedua mayuh amat orang begempuru di Jerusalem ngerami Gawai Roti Ti Enda Beragi. Sida ngeruntuhka semua alta di Jerusalem ti udah alai orang ngenjuk piring enggau betunuka menyan, lalu muai utai nya ngagai Lebak Kidron. Lalu kena empat belas hari bulan nya, sida nyayat anak domba nyadika piring Gawai Paska. Bala imam enggau orang Lewi ti enda tuchi, nyau berasai malu ke diri empu, datai ke sida nyau nyerahka diri ngagai TUHAN lalu ulih ngenjuk piring tunu dalam Rumah Sembiang. Sida ngambi endur diri dalam Rumah Sembiang nitihka atur dalam Adat nabi Moses. Orang Lewi meri darah ari piring ngagai bala imam, ke lalu ngunsaika darah nya ngagai alta. Nyadi laban orang agi mayuh apin nuchi diri, sida enda tau nyayat anak domba ke Gawai Paska nya. Nya alai bala orang Lewi ngereja pengawa nya ke sida, lalu nyerahka anak domba nya ngagai TUHAN. Nambahka nya, mayuh orang ke udah datai ari raban bansa Epraim, Manasi, Isakar, enggau Sebulun apin nuchi diri, lalu sida ngintu Gawai nya enggau chara ti enda menyana. Raja Hesekiah besampika sida munyi tu: “O TUHAN Allah Taala aki ini kami, enggau pemanah ati Nuan ampun meh orang ke nyembah Nuan enggau pengabis ati sida, taja pen sida enda tuchi.” TUHAN nyaut sampi Hesekiah. Iya ngampun sida, lalu enda ngukum sida. Bala orang mayuh begempuru di Jerusalem ngintu pengerami Gawai Roti Ti Enda Beragi dalam pengelama tujuh hari enggau ati ti gaga, lalu orang Lewi enggau bala imam muji TUHAN tiap hari enggau pengabis pengering sida. Hesekiah muji orang Lewi ketegal pengelandik sida nguluka orang nyembah TUHAN. Lebuh sida udah ngenjuk piring tujuh hari kena muji TUHAN Allah Taala aki ini sida, semua sida lalu mutuska runding deka nampung pengerami nya tujuh hari da agi. Nya alai sida ngintu pengerami nya tujuh hari da agi enggau ati ti gaga. Raja Hesekiah meri seribu iku sapi ti lelaki enggau tujuh ribu iku bedus ngambika bisi dibunuh sereta diempa orang mayuh, lalu bala pemesai meri sida seribu iku sapi ti lelaki, enggau sepuluh ribu iku bedus. Lalu mayuh amat bala imam ngereja pengawa nuchi diri empu. Semua orang Judah, bala imam, orang Lewi, orang ke datai ari utara, orang kampar ti udah ngentapka diri di menua Israel enggau menua Judah, bela rami gaga magang. Nya alai semua orang di nengeri Jerusalem gaga ati magang, laban nadai utai ti baka nya udah kala nyadi kenyau ari rambau Raja Solomon, anak Raja David. Bala imam enggau orang Lewi minta TUHAN merekatka orang mayuh. Allah Taala ninga sampi sida ari rumah Iya di serega, lalu iya nerima sampi sida. Lebuh Gawai nya udah tembu, semua orang Israel lalu mansang ngagai semua nengeri di serata menua Judah, lalu mechahka tiang batu, nebang tanda petara indu Aserah, lalu ngerusak alta enggau endur alai orang kapir nyembah petara sida. Sida ngereja baka nya mega di serata menua Judah, di menua Benjamin, Epraim, enggau Manasi. Udah nya semua sida pulai ngagai menua diri empu. Raja Hesekiah lalu numbuhka baru atur pengawa bala imam enggau orang Lewi, lalu genap iku sida meruan diberi pengawa. Pengawa nya nyengkaum ngenjuk piring tunu, enggau piring pemaik, enggau nyembah Allah Taala dalam Rumah Sembiang, meri puji enggau meri terima kasih ba mayuh bengkah endur dalam Rumah Sembiang. Ari raban jelu bedus enggau raban jelu sapi iya empu, Raja Hesekiah meri jelu nyadika piring tunu genap pagi enggau lemai, enggau jelu ti diberi lebuh Hari Sabat, lebuh Gawai Anak Bulan, enggau lebuh gawai bukai ti diletak Adat TUHAN. Nambahka nya, raja ngasuh orang Jerusalem mai pemeri ti endang diberi ngagai bala imam enggau orang Lewi, ngambika sida enda ibuh ngereja pengawa bukai tang semina ngereja pengawa ti diletak Adat TUHAN. Lebuh atur nya udah dipadahka, orang Israel lalu mai pemeri ari gandum ti terubah diketau sida, wain, minyak kana, ai manyi, enggau asil bukai ari umai. Sida mega mai pemeri sepuluh peratus ari semua utai ti dikemisi sida. Semua orang ke diau di nengeri dalam menua Judah bela mai pemeri sepuluh peratus ari jelu sapi enggau jelu bedus sida, lalu sida mega mai mayuh pemeri bukai ti udah diserahka sida ngagai TUHAN Allah Taala sida. Pemeri nya belabuh datai dalam bulan ti ketiga, lalu majak betugung dia empat bulan. Lebuh Raja Hesekiah enggau bala pemesai iya meda pemayuh pemeri nya, sida muji TUHAN, lalu muji orang Israel. Raja bejaku ngagai bala imam sereta enggau orang Lewi pasal pemeri nya, lalu ku Imam Besai Asariah, ke ari peturun Sadok, bejaku enggau iya, “Sekumbang orang mayuh udah berengkah mai pemeri ngagai Rumah Sembiang, utai diempa chukup magang, sereta mayuh belaluh. Kitai bisi semua utai tu laban TUHAN udah merekatka bala nembiak Iya.” Nitihka atur raja, sida lalu nyendiaka siti bilik setor dalam kandang Rumah Sembiang lalu sida nyimpan semua pemeri enggau pemeri sepuluh peratus dalam bilik setor nya, ngambika utai nya disimpan enggau likun. Sida ngasuh siku orang Lewi ke benama Konaniah nyadi tuai ngemataka utai nya, lalu ngasuh menyadi iya Simei nyadi penulung iya. Sepuluh iku orang Lewi diasuh gawa di baruh seduai iya: Jehiel, Asasiah, Nahat, Asahel, Jerimot, Josabat, Eliel, Ismakiah, Mahat, enggau Benaiah. Semua utai tu dikereja atas kuasa nama Raja Hesekiah seduai Imam Besai Asariah. Kore anak Imnah, siku orang Lewi ti nyadi tuai bala jejaga ba Pintu Timur Rumah Sembiang, nyadi tuai nerima pemeri ti diserahka ngagai TUHAN, sereta nyadung utai nya. Ba nengeri bukai ti alai bala imam diau, iya ditulung bala orang Lewi ti bukai ke tetap ati. Tu nama sida nya: Eden, Miniamin, Jesua, Semaiah, Amariah, enggau Sekaniah. Sida nyadung pemakai ngagai sida ke sama orang Lewi, nitihka bagi pengawa sida, lalu ukai nitihka ripih raban peturun. Sida meri siti ungkup ngagai semua lelaki ke umur tiga puluh taun ke atas, ke betanggungjawap bekereja tiap hari dalam Rumah Sembiang nitihka pengawa sida. Bala imam diberi tanggungjawap nitihka raban peturun sida, lalu orang Lewi ke umur dua puluh taun ke atas diberi pengawa nitihka raban. Semua sida nya dituliska nama magang sama enggau nama bala bini, anak, enggau orang ke ditupi sida, laban sida endang enda tau enda seruran sedia ngereja pengawa ti kudus ba sebarang maya. Nyadi dalam nengeri ti udah diungkup alai peturun Aron diau, tauka ba padang rumput ti ngelingi nengeri nya, orang bisi diberi tanggungjawap nyadung pemakai ngagai semua lelaki dalam ruang bilik bala imam, enggau ngagai semua orang ke bisi nama ditulis dalam list nama orang ke ari raban peturun orang Lewi. Raja Hesekiah ngereja utai ti ngena di serata menua Judah lalu ngerinduka ati TUHAN Allah Taala iya. Iya mujur, laban semua utai ti dikereja iya ke Rumah Sembiang tauka pengawa iya ke nitihka Adat, udah dikereja iya enggau ati ti pemadu taluk sereta angkunka Allah Taala iya. Lebuh Raja Hesekiah udah ngereja semua utai nya lalu nunjukka diri mengkang tetap ati betuaika TUHAN, Senakerip, raja menua Asiria, nyerang menua Judah. Iya ngelulung mayuh bengkah nengeri ti bekuta, lalu ngasuh bala soldadu iya ngeruntuhka kuta lalu tama ngagai nengeri nya. Lebuh Hesekiah meda Senakerip deka nyerang Jerusalem, iya enggau bala pemesai iya mutuska runding deka nutup semua penatai ai di luar nengeri; sida lalu nulung iya. Mayuh amat sida begempuru, lalu sida nutup semua penatai ai ti rarat nengah menua nya. Ku sida bejaku, “Awakka raja menua Asiria nadai tetemuka ai, lebuh iya datai.” Raja Hesekiah lalu bebendar amat gawa ngaduka kuta ti udah runtuh, lalu nirika menara ba kuta nya, lalu ngaga dinding ari luar dinding kuta nya. Nambahka nya, iya mega ngukuhka kuta ti udah digaga ba tanah tambun ba timur nengeri Jerusalem. Iya mega ngasuh orang begagaka sangkuh enggau terabai. Iya ngeletak pemesai soldadu nguluka semua orang ke lelaki di nengeri nya, lalu ngempuruka sida ba tengah padang di mua pintu kuta nengeri, lalu bejaku ngagai sida. Ku iya, “Kita enda tau enda kering sereta berani. Anang takutka raja orang Asiria, tauka bala soldadu ti diuluka iya, laban kuasa ti setanah enggau kitai besai agi ari kuasa ti setanah enggau iya. Iya semina bisi kuasa mensia, tang kitai bisi TUHAN Allah Taala kitai nulung kitai, lalu beperang ngarika kitai.” Orang mayuh berasai diperansang ninga jaku raja sida. Apin tentu lama udah bekau nya, lebuh Senakerip enggau bala soldadu iya agi di Lakis, iya ngirumka pesan tu ngagai Hesekiah enggau ngagai orang Judah ti diau enggau Hesekiah di Jerusalem: “Aku, Senakerip, Raja Besai menua Asiria nanyaka utai ti ngasuh kita kempang ati mengkang di Jerusalem dikelulung kami baka tu. Hesekiah madahka ngagai kita, TUHAN Allah Taala kita deka ngelepaska kita ari jari kami, tang Hesekiah nipu kita, lalu iya deka nejuka kita mati keberuran enggau aus. Iya empu ti udah ngerusak semua endur alai nyembah TUHAN, enggau semua alta, lalu udah nya ngasuh orang Judah enggau orang Jerusalem nyembah sereta nunu menyan ba siti aja alta. Kati kita enda nemu utai ti udah dikereja aki ini aku, enggau utai ti udah dikereja aku empu ngagai orang bansa bukai? Kati petara orang bansa bukai udah kala ngelepaska bansa sida ari raja menua Asiria? Kemaya bala petara orang menua bukai bisi udah kala ngelepaska menua sida ari jari aku? Nya alai, nama utai ti ngasuh kita ngumbai petara kita deka ngelepaska kita ari jari aku? Nya alai anang nejuka Hesekiah nipu kita, tauka nesatka runding kita baka nya, lalu anang arapka iya, laban nadai petara orang bansa bukai udah ulih ngelepaska nembiak iya ari jari raja menua Asiria. Nya alai, petara kita tetap enda ulih ngelepaska kita ari jari aku!” Bala pemesai orang Asiria mega nyebut utai ti jai agi ari nya pasal TUHAN Allah Taala enggau pasal Hesekiah ti nyadi nembiak TUHAN. Raja besai menua Asiria mega nulis surat kena iya ngeleseka TUHAN Allah Taala ke disembah orang Israel, lalu bejaku ngelaban Iya. Ku iya, “Baka bala petara orang bansa bukai ke nadai udah kala ngelepaska bala nembiak sida ari jari aku, baka nya meh Allah Taala ti dikarapka Hesekiah, enda ulih ngelepaska bala nembiak Iya ari jari aku.” Bala pemesai orang Asiria lalu rauh-rauh nyebut utai nya dalam Hebrew kena sida ngemba sereta ngelemika semengat orang Jerusalem ke ba kuta nengeri, ngambika nengeri nya mudah agi alah. Sida bejakuka pasal Allah Taala nengeri Jerusalem baka ke bejakuka pasal petara orang bansa bukai, engkeramba ti digaga jari mensia. Udah nya Raja Hesekiah enggau nabi Isaiah anak Amos lalu besampi ngagai Allah Taala, lalu nyabak minta tulung Iya. TUHAN lalu ngirumka siku melikat. Melikat nya lalu munuh bala soldadu enggau pemesai soldadu orang Asiria. Raja besai orang Asiria lalu pulai ngagai menua iya empu mai ati ti malu. Lebuh iya tama ngagai rumah sembiang petara iya, sekeda bala anak lelaki iya munuh iya ngena pedang. Nya meh jalai TUHAN ngelepaska Raja Hesekiah enggau orang Jerusalem ari jari Senakerip, raja menua Asiria, enggau ari jari semua munsuh iya. TUHAN lalu ngibun sida likun. Mayuh orang datai ngagai Jerusalem mai pemeri ngagai TUHAN, enggau pemeri ngagai Hesekiah. Kenyau ari nya semua bansa bebasaka Hesekiah magang. Ba urung maya nya, Raja Hesekiah sakit, lalu nyau deka mati. Iya besampi ngagai TUHAN, lalu TUHAN nyaut iya lalu meri iya siti tanda. Tang Hesekiah kelalu sumbung lalu enda meri terima kasihka utai ti udah dikereja TUHAN ba iya. Ketegal nya menua Judah enggau nengeri Jerusalem kena ukum. Tang Hesekiah enggau orang Jerusalem ngemaruhka diri, lalu TUHAN enda nyadi ngukum orang mayuh nyentuk ngagai pemati Hesekiah. Raja Hesekiah nyadi kaya bendar, lalu semua orang bebasaka iya. Iya ngasuh orang ngaga bilik setor alai iya nyimpan emas, pirak, batu ti berega, rempah, terabai, enggau utai bukai ti berega ti diempu iya. Nambahka nya, iya mega ngasuh orang ngaga bilik setor alai iya nyimpan gandum, wain, enggau minyak kana, bansal ke jelu sapi iya, enggau kandang ke jelu bedus iya. Kelimpah ari semua utai nya, Allah Taala mega meri iya jelu bedus enggau jelu sapi, enggau pengaya ti amat mayuh, datai ke nyau ulih nirika mayuh bengkah nengeri. Raja Hesekiah nya meh orang ke mempal jalai ai ba Mata Ai Gihon, lalu ngasuh ai nya rarat nengah lubang jalai ai dalam kuta nengeri Jerusalem. Hesekiah mujur magang dalam semua utai ti dikereja iya, lalu lebuh bala pengari perintah menua Babilon datai betanyaka utai ti nyelai ti udah nyadi di menua nya, Allah Taala nejuka Hesekiah ngereja utai nitihka peneka ati iya empu, kena Allah Taala ngabas ati Hesekiah. Semua utai bukai ti udah dikereja Raja Hesekiah, enggau pengangkun iya ke TUHAN bisi dituliska magang dalam Genera Nabi Isaiah anak Amos enggau dalam Jerita Lama Pasal Raja Menua Judah Enggau Menua Israel Hesekiah mati lalu dikuburka ba sadau lumbung bala raja. Semua orang Judah enggau orang ke diau di Jerusalem balat amat masa iya lebuh pemati iya. Anak iya ke benama Manasi lalu nganti iya nyadi raja. Umur Manasi dua belas taun lebuh iya nyadi raja menua Judah, lalu iya merintah di Jerusalem lima puluh lima taun. Manasi bedosa ngelaban TUHAN laban iya nunda pengawa ti jai ti dikereja bansa orang ke udah diburu TUHAN ari menua nya lebuh bala nembiak TUHAN nyerang. Iya ngaduka endur alai orang kapir nyembah petara sida, ti udah dirusak apai iya Hesekiah. Iya ngaga alta alai nyembah Baal, ngaga engkeramba ke petara Aserah, sereta nyembah bintang. Iya ngaga alta alai orang kapir nyembah petara sida dalam Rumah Sembiang, iya nya endur ti udah diletak TUHAN alai TUHAN Empu patut disembah belama iya. Iya ngaga alta kena nyembah bintang ba dua iti tengah laman Rumah Sembiang. Iya nyerahka bala anak lelaki iya nyadika piring tunu ba Lebak Hinom. Iya beburung, bedukun, bemanang, betanya ngagai orang ke tau tujum, enggau ngagai manang. Iya balat bedosa ngelaban TUHAN, lalu nyungkak TUHAN ringat. Iya ngengkahka siti engkeramba dalam Rumah Sembiang, endur ti udah dipadahka Allah Taala ngagai David enggau ngagai anak iya Solomon munyi tu: “Di Jerusalem ditu, dalam Rumah Sembiang tu meh endur ti udah dipilih Aku, ari semua dua belas bengkah sitak menua ti diempu raban bansa orang Israel, nyadi endur alai Aku patut disembah. Lalu enti orang Israel deka ngasika semua pesan Aku, lalu nitihka semua Adat ti udah diberi nembiak Aku Moses ngagai sida, nya baru Aku enggai nejuka sida dibuai ari menua ti udah diberi Aku ngagai aki ini sida.” Manasi nguluka orang Judah lebih agi bedosa ari bansa orang ke udah diburu TUHAN ari menua nya lebuh bala nembiak TUHAN nyerang. Taja pen TUHAN meri jaku tangkan ngagai Manasi, enggau ngagai bala nembiak iya, tang sida enggai mending. Nya alai TUHAN nejuka bala tuai soldadu menua Asiria nyerang menua Judah. Sida nangkap Manasi, ngaitka pengait ba iya, nanchang iya ngena rantai, lalu nabanka iya ngagai menua Babilon. Lebuh iya kena perinsa, iya ngemaruhka diri, nguing ngagai TUHAN Allah Taala iya, lalu minta tulung ari Iya. Allah Taala nerima lalu nyaut sampi Manasi, lalu ngasuh iya pulai baru ngagai Jerusalem lalu merintah baru. Tu meh utai ti ngasuh Manasi arapka TUHAN endang Allah Taala. Udah bekau nya, Manasi ngaga kuta ti di luar ba tisi timur Nengeri David tinggi agi, berengkah ari siti endur ba lebak semak Mata Ai Gihon, nuju ke utara ngagai Pintu Ikan, enggau ngagai endur ti dikumbai Opel dalam nengeri nya. Iya mega ngeletak siku pemesai soldadu nyadi tuai soldadu dalam genap buah nengeri ti bekuta dalam menua Judah. Iya muai semua petara orang bansa bukai enggau engkeramba ari Rumah Sembiang, enggau alta alai orang bansa bukai besembah ba bukit ti alai Rumah Sembiang bediri, enggau ari endur bukai di Jerusalem. Iya mai semua utai nya ke luar ari nengeri nya, lalu muai sida. Iya mega ngaduka alta alai TUHAN ti udah disembah, lalu iya ngenjuk piring pemaik, enggau piring terima kasih ba alta nya. Iya ngasuh semua orang Judah nyembah TUHAN Allah Taala ke disembah orang Israel. Taja pen orang mayuh majak ngenjuk piring ba endur bukai, tang sida semina ngenjuk piring nya ngagai TUHAN siku aja. Semua utai bukai ti udah dikereja Manasi, sampi ti disebut iya ngagai Allah Taala, enggau pesan ari bala nabi ke bejaku ngagai iya dalam nama TUHAN Allah Taala ke disembah orang Israel, bisi dituliska magang dalam Jerita Lama Pasal Raja Menua Judah Enggau Raja Menua Israel. Sampi raja, enggau saut Allah Taala ngagai sampi iya, enggau cherita pasal dosa iya sebedau iya nesal ati - penyai ti udah dikereja iya, endur alai orang kapir nyembah petara sida, enggau tanda petara indu Aserah ti udah digaga iya, enggau engkeramba ti udah disembah iya - bisi dituliska magang dalam Jerita Lama Pasal Bala Nabi. Manasi mati lalu dikuburka dalam istana, lalu anak lelaki iya ke benama Amon nganti iya nyadi raja. Umur Amon dua puluh dua taun lebuh iya nyadi raja menua Judah, lalu iya merintah di Jerusalem dua taun. Iya bedosa ngelaban TUHAN baka apai iya Manasi, sereta besembahka engkeramba ti udah disembah apai iya. Tang iya enda ngemaruhka diri, lalu nguing ngagai TUHAN baka apai iya. Iya balat agi bedosa ari apai iya. Bala pemesai Amon bepekat ngelaban iya, lalu sida munuh iya dalam istana. Orang Judah lalu munuh bala orang ke munuh Amon, lalu ngasuh anak iya ke benama Josiah nyadi raja. Umur Joasih lapan taun lebuh iya nyadi raja menua Judah, lalu iya merintah di Jerusalem tiga puluh satu taun. Iya ngereja utai ti ngerinduka ati TUHAN. Iya neladan aki iya Raja David, terit amat ngasika semua adat Allah Taala. Dalam taun ti kelapan Josiah udah nyadi raja, lebuh iya agi biak, iya belabuh nyembah Allah Taala aki iya Raja David. Empat taun udah bekau nya, iya belabuh ngerusak endur alai orang kapir nyembah petara sida, ngerusak tanda petara indu Aserah, enggau semua engkeramba ti bukai. Nitihka atur ti diberi iya, alta alai nyembah Baal dipechahka, lalu alta ti alai nunu menyan semak alta nya dirubuh. Sida nutuk semua engkeramba Aserah, enggau semua engkeramba bukai, nyadi amau lalu udah nya naburka amau nya ba kubur orang ke udah ngenjuk piring ngagai engkeramba nya. Iya nunu tulang bala imam orang kapir ba alta alai sida ke nyembah engkeramba sida. Nya meh jalai iya nuchi menua Judah enggau nengeri Jerusalem. Iya mega ngereja baka nya ngagai nengeri enggau endur ti udah dirusak di menua Manasi, Epraim, enggau Simeon, nyentuk ngagai Naptali di utara. Di serata menua ti dipegai iya di utara, iya mechahka alta enggau engkeramba Aserah, nutuk engkeramba sida nyadi amau, lalu mechahka alta ti alai sida nunu menyan. Udah nya iya pulai ngagai Jerusalem. Dalam taun ti kelapan belas iya udah megai perintah, lebuh iya udah nuchi menua nya enggau Rumah Sembiang lalu nutup semua pengawa orang kapir ke besembahka engkeramba, Raja Josiah lalu ngasuh tiga iku orang ngaduka Rumah Sembiang Allah Taala. Sida tiga nya Sapan anak Asaliah, Maseiah ti nyadi tuan gabenor nengeri Jerusalem, enggau Joah anak Joahas, siku pemesai ti tinggi pangkat. Duit ti udah digumpul orang Lewi ke nyaga Rumah Sembiang lalu diserahka ngagai Imam Besai Hilkiah. (Duit nya udah digumpul ari orang Epraim enggau orang Manasi, enggau ari orang bukai ti diau di menua ti di utara, enggau ari orang ke diau di menua Judah, Benjamin enggau Jerusalem.) Udah nya duit nya lalu diserahka ngagai tiga iku orang ke nyadi tuai ngaduka Rumah Sembiang, ke meri duit nya ngagai bala tukang kayu, enggau tukang rumah kena sida bebelika batu enggau ramu kena ngaduka semua rumah ti udah ditejuka bala raja menua Judah buruk lalu enda diaduka baru ngelamatu. Orang ke ngereja pengawa nya endang tetap tau dikarapka. Sida iya dikemataka empat iku orang Lewi: Jahat seduai Obadiah ari raban peturun Merari, enggau Sekariah seduai Mesulam ari raban peturun Kohat. (Semua orang Lewi landik magang nebah musik.) Orang Lewi ti bukai megai pengawa berangkutka barang kena ngaga rumah nya, sereta ngemataka bala orang ke gawa ngereja mayuh bengkah pengawa. Lalu sida ti bukai bekereja nyadi kerani, tauka nyadi jejaga. Lebuh duit nya benung dipansutka ari bilik setor, Hilkiah bisi tetemuka Bup Adat TUHAN, iya nya Adat ti udah diberi Allah Taala ngagai Moses. Ku iya bejaku enggau Sapan, “Aku bisi tetemuka Bup Adat dalam Rumah Sembiang.” Iya lalu meri bup nya ngagai Sapan. Sapan lalu mai bup nya ngagai raja. Ku Sapan madahka ngagai raja, “Kami udah ngereja semua utai ti diasuh nuan. Kami udah ngambi duit ti disimpan dalam Rumah Sembiang, lalu udah nyerahka duit nya ngagai bala orang ke gawa enggau orang ke ngemataka sida.” Lalu ku Sapan nambahka jaku iya, “Imam Hilkiah udah meri siti bup ngagai aku.” Sapan lalu macha bup nya di mua raja. Lebuh raja ninga bup nya dibacha, iya lalu nyarikka gari diri. Udah nya raja meri atur ngagai Hilkiah, Ahikam anak Sapan, Abdon anak Mikaiah, Sapan ti nyadi kerani kot, enggau ngagai Asaiah, ti nyadi penyaup raja: “Mupuk kita lalu betanya ngagai TUHAN ngarika aku enggau ngarika orang mayuh ti agi tinggal di menua Israel enggau menua Judah. Pansik semua utai pasal ajar dalam bup tu. TUHAN balat ringat ngagai kitai laban aki ini kitai enda ngasika jaku TUHAN, lalu enda ngereja utai ti patut dikereja nitihka bup tu.” Raja lalu ngasuh Hilkiah enggau sida ti bukai mansang betanya ngagai nabi indu siku ke benama Huldah, ti diau ba Jerusalem ti baru. Indu nya bini Salum anak Tokhat, uchu Haras ti nyadi tuai ngintu baju panjai ti dikena dalam Rumah Sembiang. Sida lalu madahka ngagai indu nya utai ti udah nyadi. Iya lalu ngasuh sida pulai ngagai raja lalu meri pesan TUHAN tu ngagai iya: “Aku deka ngukum Jerusalem enggau semua orang ke diau di nengeri tu ngena sumpah ti ditulis dalam bup ti udah dibacha di mua raja. Sida udah nulak Aku, lalu udah ngenjuk piring ngagai petara bukai. Nya alai sida udah nyungkak Aku ringat ketegal semua utai ti udah dikereja sida. Aku ringat ngagai Jerusalem, lalu pengeringat Aku enda nemu padam. Nyadi pasal raja empu, tu utai ti disebut Aku, TUHAN Allah Taala ke disembah orang Israel: Nuan udah mendingka utai ti ditulis dalam bup nya, lalu nuan udah nesal ati sereta ngemaruhka diri di mua Aku, nyarikka gari diri sereta nyabak lebuh nuan ninga Aku deka ngukum Jerusalem enggau orang ke diau dalam nengeri tu. Aku udah ninga sampi nuan, lalu ukum ti deka diasuh Aku ninggang Jerusalem enda nyadi sebedau nuan mati. Aku deka nejuka nuan mati enggau selamat.” Bala orang nya lalu pulai baru ngagai Raja Josiah, mai pesan nya. Raja Josiah lalu mesanka semua tuai orang Judah enggau tuai di Jerusalem. Sida lalu mansang ngagai Rumah Sembiang, disempulang bala imam enggau orang Lewi, enggau semua orang mayuh, ke kaya enggau ke seranta. Raja lalu macha enggau nyawa ti inggar semua bup sempekat ti udah ditemu dalam Rumah Sembiang. Iya bediri ngimbai tiang diraja lalu ngaga siti sempekat enggau TUHAN, madahka iya deka ngasika TUHAN, deka nitihka adat enggau pesan TUHAN enggau pengabis ati enggau pengabis semengat iya, lalu ngereja semua atur ti diletak dalam sempekat nya, munyi ti ditulis dalam bup nya. Iya ngasuh semua orang Benjamin enggau semua orang ke bisi di Jerusalem, besemaya deka nitihka sempekat nya. Nya alai orang di Jerusalem ngasika atur sempekat ti udah digaga sida enggau Allah Taala aki ini sida. Raja Josiah ngerusak semua engkeramba di menua ti diempu orang Israel. Seagi-agi iya idup, sida semampai nitihka TUHAN Allah Taala aki ini sida. Raja Josiah ngintu pengerami Gawai Paska di Jerusalem kena ngemesaika TUHAN. Kena empat belas hari bulan ti kesatu, sida lalu nyayat jelu kena ngintu Gawai nya. Iya magi ngagai bala imam pengawa ti deka dikereja sida dalam Rumah Sembiang, lalu meransang sida ngereja pengawa nya. Iya mega meri atur tu ngagai orang Lewi ti nyadi pengajar orang Israel ti udah diserahka ngagai TUHAN: “Simpan Peti Lampang Batu Adat ti kudus nya dalam Rumah Sembiang ti udah digaga Raja Solomon anak David. Kita enda ibuh mai Peti nya ari endur siti ngagai endur siti, tang kita deka bekereja ke TUHAN Allah Taala kita enggau ke nembiak Iya orang Israel. Ambi endur diri dalam Rumah Sembiang, nitihka ripih raban peturun kita, nitihka tanggungjawap ti udah diberi Raja David enggau anak iya Raja Solomon, ngagai kita, lalu belatur, ngambika kita seruran bisi nulung genap ruang bilik orang Israel. Kita deka nyayat anak domba enggau kambin Gawai Paska. Nya alai kita enda tau enda nuchi diri diatu, lalu nyendiaka piring ngambika orang Israel ti bukai ulih nitihka atur ti udah diberi TUHAN ngagai Moses.” Raja Josiah meri tiga puluh ribu iku bedus, anak domba, enggau kambin ti agi biak, enggau tiga ribu iku sapi ti lelaki, ari raban jelu tupi iya empu ngagai orang mayuh ngambika bisi dikena sida ngintu Gawai Paska. Bala pemesai iya mega meri ngagai orang mayuh, ngagai bala imam, enggau ngagai orang Lewi ngambika bisi dikena sida. Lalu bala pemesai ti nyadi tuai ngemataka Rumah Sembiang - Imam Besai Hilkiah, Sekariah, enggau Jehiel - meri ngagai bala imam dua ribu enam ratus iku anak domba enggau kambin ti biak, enggau tiga ratus iku sapi ti lelaki nyadika piring lebuh Gawai nya. Bala tuai orang Lewi - Konaniah, Semaiah enggau menyadi iya Netanel, Hasabiah, Jeiel, enggau Josabat - meri lima ribu iku anak domba enggau kambin ti biak, enggau lima ratus iku sapi ti lelaki nyadika piring orang Lewi. Lebuh semua utai ti dikena ngintu Gawai nya udah diatur magang, bala imam enggau orang Lewi lalu bediri ba endur diri nitihka asuh raja. Sida lalu nyayat anak domba ti dikena ngintu Gawai Paska nya. Sida niti kulit jelu nya, lalu bala imam mechikka darah jelu nya ngagai alta. Udah nya sida lalu bedua jelu nya ngagai orang mayuh, nitihka gempuru ruang bilik, nyadika piring tunu, ngambika sida tau ngenjuk piring nya nitihka atur ti disebut dalam Adat Moses. Orang Lewi lalu manggang piring Gawai Paska nya ba api nitihka atur adat, lalu manduk piring ti kudus dalam periuk, kitil, enggau kali, lalu beguai-guai nyadung dagin nya ngagai orang mayuh. Lebuh pengawa nya udah dikereja, nya baru orang Lewi meri diri empu enggau bala imam ke ari peturun Aron, dagin laban sida imam nya udah kiruh nyentuk ngagai malam betunuka jelu ti ditunu segala, enggau betunuka lemak ari piring nya. Tu nama orang Lewi ari raban peturun Asap ke nebah musik, ti udah ngambi endur diri nitihka atur ti udah diberi Raja David: Asap, Heman, enggau Jedutun ti nyadi imam raja. Orang ke nyaga pintu Rumah Sembiang enda ibuh ninggalka endur alai sida ke jaga, laban orang Lewi ti bukai nyendiaka Gawai Paska ke sida. Nya alai, nitihka atur Raja Josiah, semua utai tembu magang dikereja sehari nya kena nyembah TUHAN, iya nya ngintu Gawai Paska, enggau pengawa beberika piring tunu ba alta. Semua orang Israel ke bisi dia ngerami Gawai Paska enggau Gawai Roti Ti Enda Beragi nya dalam pengelama tujuh hari. Kenyau ari maya nabi Samuel menya, nadai Gawai Paska udah kala diintu enggau pengerami ti baka nya. Nadai siku ari bala raja ke dulu menya udah bisi kala ngerami Gawai Paska baka ke dikereja Raja Josiah, bala imam, orang Lewi, orang Judah, orang Israel enggau orang Jerusalem dalam taun ti kelapan belas Josiah megai perintah. Lebuh Raja Josiah udah ngereja semua utai nya ke Rumah Sembiang, Raja Neko menua Ejip nguluka bala soldadu iya nyerang Karkemis di Sungai Eupratis. Josiah nguji nagang iya, tang Neko ngirumka pesan tu ngagai Josiah: “Aku ke mansang beperang tu nadai patut ngiruh nuan, Raja menua Judah. Aku ukai datai deka ngelaban nuan, tang deka ngelaban munsuh aku, lalu Allah Taala udah ngasuh aku beguai ngereja nya. Allah Taala bisi enggau aku, nya alai, anang ngelaban aku, enggai ke Iya ngerusak nuan.” Tang Josiah keras deka ngelaban. Iya enggai mendingka jaku ti disebut Allah Taala ngena Raja Neko. Nya alai Josiah ngeluluka diri baka gamal orang bukai, lalu nyerang Raja Neko ba emperan Megido. Dalam perang nya Raja Josiah kena laban laja orang Ejip. Ku iya bejaku enggau bala orang gaji iya, “Bai aku ari tu. Balat amat aku bakal!” Sida lalu ngangkatka iya ari kerita perang iya, ngengkahka iya ba kerita perang sebuah ti bisi dibai iya, lalu sida mai iya ngagai Jerusalem. Iya mati dia, lalu dikuburka ba lumbung bala raja. Semua orang Judah enggau orang Jerusalem ngulit magang ke iya. Nabi Jeremiah lalu nulis siti sabak kenang ke Raja Josiah. Kenyau ari nya sabak kenang tu digaga nyadika siti adat asal ti dikena orang, nemuka lelaki tauka indu, lebuh sida nyenggai orang ke mati. Pantun tu bisi ditulis dalam bup sabak kenang. Semua utai ti udah dikereja Josiah, pengangkun iya ke TUHAN, pasal iya ke ngasika Adat, enggau jerita lama pasal iya empu kenyau ari pun nyentuk ke ujung, bisi dituliska magang dalam Jerita Lama Pasal Raja Menua Israel Enggau Menua Judah. Orang Israel milih Joahas anak Josiah nyadi raja di Jerusalem, lalu nata iya. Umur Joahas dua puluh tiga taun lebuh iya berengkah nyadi raja menua Judah, lalu iya merintah di Jerusalem tiga bulan. Raja Neko menua Ejip nabanka iya nyadi orang tangkap, lalu mejalka menua Judah mayar 3,400 kilogram pirak enggau 34 kilogram emas nyadika chukai. Neko ngasuh menyadi lelaki Joahas ke benama Eliakim nyadi raja menua Judah, lalu nukar nama Eliakim ngagai Jehoiakim. Joahas udah ditabanka Neko ngagai menua Ejip. Umur Jehoiakim dua puluh lima taun lebuh iya berengkah nyadi raja menua Judah, lalu iya merintah di Jerusalem sebelas taun. Iya bedosa ngelaban TUHAN Allah Taala iya. Raja Nebukadnesar menua Babilon nyerang menua Judah, nangkap Jehoiakim, lalu nabanka iya ngagai menua Babilon ditanchang ngena rantai. Nebukadnesar nabanka sekeda utai ti berega ari Rumah Sembiang, lalu nyimpan utai nya dalam istana iya empu di Babilon. Semua utai ti udah dikereja Jehoiakim, nyengkaum utai ti jai ti dikereja iya, bisi dituliska magang dalam Jerita Lama Pasal Raja Menua Israel enggau Menua Judah. Anak lelaki iya Jehoiakin nganti iya nyadi raja. Umur Jehoiakin lapan belas taun lebuh iya berengkah nyadi raja menua Judah, lalu iya merintah di Jerusalem tiga bulan sepuluh hari. Jehoiakin mega bedosa ngelaban TUHAN. Ba pun musin panas, Raja Nebukadnesar nabanka Jehoiakin ngagai menua Babilon nyadi orang tangkap, lalu nabanka utai ti berega ari Rumah Sembiang. Udah nya Nebukadnesar ngasuh aya Jehoiakin ke benama Sedekiah nyadi raja menua Judah enggau Jerusalem. Umur Sedekiah dua puluh satu taun lebuh iya berengkah nyadi raja menua Judah, lalu iya merintah di Jerusalem sebelas taun. Iya bedosa ngelaban TUHAN, lalu enda ngemaruhka diri mendingka nabi Jeremiah, ke madahka jaku TUHAN. Sedekiah angkat ngelaban Raja Nebukadnesar, ti udah mejalka iya besumpah dalam nama Allah Taala madahka diri deka taluk. Iya kieh amat, enggai nesal ati lalu enggai pulai baru ngagai TUHAN Allah Taala ke disembah orang Israel. Nambahka nya, bala tuai orang Judah, bala imam, enggau orang mayuh nunda teladan ti jai ari bansa orang ke ngelingi sida, besembahka engkeramba, lalu ari nya ngamahka Rumah Sembiang, ti udah dikuduska TUHAN Empu. TUHAN Allah Taala aki ini sida udah majak ngasuh bala nabi Iya meri jaku tangkan ngagai bala nembiak Iya, laban Iya enggai ke sida enggau Rumah Sembiang nya dirusak. Tang sida beduan bala orang ke mai pesan Allah Taala, enda mendingka jaku TUHAN, lalu ketawaka bala nabi Iya. Ke pengujung iya, TUHAN balat amat ringat ngagai bala nembiak Iya, datai ke sida nyau enda ulih ngerarika diri ari ukum Iya. Nya alai TUHAN ngasuh raja menua Babilon nyerang sida. Raja nya munuh bala orang Judah ke bujang, nyengkaum sida ke dalam Rumah Sembiang. Iya nadai kasih mimit ke sida, nemuka sida nya orang ke biak tauka tuai, lelaki tauka indu, sakit tauka bepengerai. Allah Taala nyerahka semua sida ngagai raja menua Babilon. Raja menua Babilon ngerampas utai ari Rumah Sembiang, ari sarang reta Rumah Sembiang, enggau pengaya raja enggau bala pemesai iya, lalu nabanka semua utai nya ngagai menua Babilon. Iya nunu Rumah Sembiang, enggau nengeri Jerusalem, nyengkaum semua istana enggau pengaya nengeri nya, lalu ngeruntuhka kuta nengeri. Iya nabanka semua orang ke enda dibunuh, ngagai menua Babilon. Din sida nyadi ulun bekereja ke iya, enggau ke peturun iya, nyentuk ngagai maya perintah menua Persia ditumbuhka. Nya meh jalai utai ti udah dipadahka TUHAN ngena nabi Jeremiah dikamatka: “Menua nya nadai orang nguan tujuh puluh taun, kena malas pengawa sida ke enda ngintu Hari Sabat.” Dalam taun ti kesatu Sairus nyadi raja besai menua Persia, TUHAN ngamatka jaku ti udah disebut Iya ngena nabi Jeremiah. Iya nyungkak Sairus meri atur, lalu ngirumka atur nya ngena surat, ngambika bisi dibacha enggau nyawa ti inggar di serata menua ti diperintah iya: “Tu atur ari Sairus, Raja Besai menua Persia. TUHAN Allah Taala serega, udah ngasuh aku merintah semua dunya, lalu udah meri ngagai aku tanggungjawap ngaga sebuah Rumah Sembiang ke Iya di Jerusalem, di menua Judah. Nya alai semua kita ke nembiak Allah Taala, enda tau enda kin; awakka TUHAN Allah Taala kita meruan enggau kita.” Dalam taun ti kesatu Sairus nyadi raja besai menua Persia, TUHAN ngamatka jaku ti udah disebut Iya ngena nabi Jeremiah. Iya nyungkak Sairus mansutka siti atur, lalu ngirumka atur nya ngena surat ngambika dibacha enggau nyawa ti inggar di semua endur dalam menua ti diperintah iya: “Tu atur ari Sairus, Raja Besai menua Persia. TUHAN Allah Taala serega, udah ngasuh aku merintah semua dunya, lalu udah meri ngagai aku tanggungjawap ngaga Rumah Sembiang ke Iya di Jerusalem, di menua Judah. Awakka Allah Taala meruan enggau semua kita ke nembiak Iya. Kita enda tau enda mansang ngagai Jerusalem, lalu nirika baru Rumah TUHAN Allah Taala ke disembah orang Israel, Allah Taala ti disembah di Jerusalem. Enti bala nembiak Iya ti udah dibuai ngagai menua bukai bisi begunaka tulung kena sida pulai, orang ke berimbai pendiau enggau sida enda tau enda nulung sida, meri sida pirak enggau emas, pemakai enggau jelu kena mai barang, sereta enggau piring ngambika bisi diserahka dalam Rumah Sembiang Allah Taala di Jerusalem.” Udah nya bala tuai peturun ari raban bansa Judah enggau Benjamin, bala imam enggau orang Lewi, enggau semua orang bukai ti udah ditegu Allah Taala ati, sedia mupuk lalu nirika Rumah TUHAN baru di Jerusalem. Semua orang ke berimbai pendiau enggau sida meri sida pirak, emas, pemakai, jelu kena mai barang, utai berega ti bukai, enggau piring ke Rumah Sembiang. Raja Besai Sairus meri pulai baru ngagai sida mangkuk ti udah ditabanka Raja Nebukadnesar ari Rumah Sembiang di Jerusalem, lalu udah naruh utai nya dalam rumah sembiang bala petara iya. Raja Besai nyerahka utai nya ngagai Mitredat, tuai ngemataka sarang reta raja. Mitredat lalu nuliska semua utai nya ke Sesbasar, gabenor menua Judah. Pemayuh semua bisin emas enggau pirak sereta enggau perengka bukai ti dibai Sesbasar enggau orang bukai ke sama udah dibuai ngagai menua Babilon, lebuh sida mulaika diri ngagai Jerusalem nya 5,400 iti. Mayuh orang ke udah dibuai ngagai menua Babilon angkat ari menua nya, lalu pulai baru ngagai Jerusalem enggau menua Judah, semua sida bela napatka nengeri diri empu. Sida udah dibuai ngagai menua Babilon lalu diau di menua nya kenyau ari maya Raja Nebukadnesar udah nabanka sida nyadi orang tangkap ngagai menua nya. Tuai sida nya Serubabel, Josua, Nehemiah, Seraiah, Rilaiah, Mordikai, Bilsan, Mispar, Bikbai, Rehum, enggau Banah. Tu nama raban peturun orang Israel, enggau pemayuh tubuh sida ari siti-siti raban peturun ti udah dibuai ngagai menua Babilon, ke pulai baru ngagai menua diri: Pemayuh semua raban peturun orang ke gawa dalam Rumah Sembiang enggau bala peturun ulun Solomon ke pulai baru ari menua bukai: 392 iku. Tuan gabenor menua Judah madahka sida enda tau makai pemakai ti diberi ngagai Allah Taala, seagi-agi sida nadai imam ti tau ngena Urim enggau Tumim. Lebuh orang ke udah dibuai ngagai menua Babilon datai ba Rumah Sembiang di Jerusalem, sekeda tuai peturun meri pemeri nitihka peneka ati diri kena nulung begagaka Rumah Sembiang nya baru, ba endur asal iya. Sida meri utai naka ti ulih diberi sida kena ngereja pengawa nya, lalu penyampau utai nya bulih 500 kilogram emas, 2,800 kilogram pirak, enggau 100 lambar baju panjai imam. Bala imam, bala orang Lewi, enggau sekeda orang mayuh lalu ngentapka diri di Jerusalem, tauka semak Jerusalem. Bala orang ke tukang nebah musik, bala orang ke nyaga Rumah Sembiang, enggau orang ke bekereja dalam Rumah Sembiang ngentapka diri ba nengeri semak Jerusalem. Lalu orang Israel ti bukai ngentapka diri ba nengeri ti udah diuan aki ini sida kelia. Dalam bulan ti ketujuh, semua orang Israel bela udah ngentapka diri magang ba nengeri diri empu. Udah nya semua sida lalu begempuru di Jerusalem, lalu Jesua anak Josadak, enggau sida imam ti bukai, enggau Serubabel anak Sealtiel, enggau kaban belayan iya, lalu ngaga alta Allah Taala baru, ngambika sida ulih nunu piring ba alta nya nitihka atur ti ditulis dalam Adat Moses. Taja pen orang ke pulai nya takutka orang ke diau di menua nya, sida ngaga alta nya ba endur asal iya. Udah nya sida belabuh baru nunu piring tiap pagi, lemai ba alta nya. Sida ngintu Gawai Belangkau nitihka atur. Genap hari sida ngenjuk piring ti diguna ke sehari nya. Nambahka nya, sida ngenjuk piring tunu segala baka selama, enggau piring ti diberi lebuh Gawai Anak Bulan, enggau ba semua gempuru besai alai TUHAN disembah, sereta enggau semua piring ti diserahka ngagai TUHAN nitihka peneka ati diri. Taja pen sida apin belabuh ngaga Rumah Sembiang nya baru, sida belabuh ngenjuk piring tunu ngagai TUHAN berengkah ba hari ti keterubah dalam bulan ti ketujuh. Orang mayuh lalu meri duit kena ngaji tukang batu enggau tukang kayu, sereta meri pemakai, utai ti diirup, enggau minyak kana ti deka dikirumka ngagai nengeri Tire enggau Sidon kena nyilih kayu sidar ari menua Lebanon. Kayu nya deka dibai nengah tasik ngagai Jopa. Semua utai tu dikereja nitihka pemendar ari Raja Besai Sairus menua Persia. Nya alai dalam bulan ti kedua, kedua taun sida udah pulai ngagai endur asal Rumah Sembiang di Jerusalem, sida lalu belabuh gawa. Serubabel, Jesua, enggau semua orang mayuh ti bukai, bala imam, enggau orang Lewi, iya ti bendar, semua orang ke udah kena buai ngagai menua Babilon, lalu udah pulai baru ngagai Jerusalem, bela enggau gawa magang. Semua orang Lewi ke umur dua puluh taun ke atas bela diasuh nyadi tuai ngereja pengawa begagaka Rumah Sembiang nya baru. Orang Lewi ke benama Jesua enggau bala anak lelaki iya, sereta enggau kaban belayan iya, enggau Kadmi-el enggau bala anak lelaki iya (raban peturun Hodabiah) sama nguluka orang mayuh begagaka Rumah Sembiang nya baru. (Sida ditulung orang Lewi ari raban peturun Henadat.) Lebuh bala tukang belabuh nudukka batu pemun Rumah Sembiang, bala imam ke ngena baju panjai, mai terumpit lalu ngambi endur diri, lalu orang Lewi ari raban peturun Asap bediri dia mai bebendai sida. Sida muji TUHAN nitihka atur ti udah diberi ngagai sida kenyau ari maya Raja David menya. Sida belagu muji TUHAN, ngelembungka pangan diri ngena genteran tu: “ TUHAN endang manah, lalu pengerindu iya ke Israel endang meruan belama iya.” Semua orang manjung enggau pengabis penginggar nyawa sida muji TUHAN, laban pengawa nudukka batu pemun Rumah Sembiang nya udah berengkah. Imam ke tuai agi umur, orang Lewi, enggau tuai peturun endang udah meda Rumah Sembiang ti dulu menya, lalu lebuh sida meda batu pemun Rumah Sembiang didudukka, sida lalu bekeduie sereta beterauh nyabak. Tang orang bukai ke dia manjung gaga ati. Nadai orang nemu bagi munyi panjung gaga ati enggau munyi sabak, laban sida inggar amat, datai ke sida nyau ulih didinga berapa batu ari endur nya. Lebuh munsuh orang Judah enggau Benjamin ninga berita orang ke udah dibuai nya udah pulai baru lalu begagaka Rumah TUHAN Allah Taala ke disembah orang Israel, sida lalu betemu enggau Serubabel enggau bala tuai peturun, lalu bejaku, “Awakka kami enggau kita ngaga Rumah Sembiang tu. Kami pen nyembah Allah Taala ti disembah kita, lalu kami udah ngenjuk piring ngagai Iya sekumbang Raja Besai Esar-hadon menua Asiria udah ngasuh kami kitu lalu diau ditu.” Serubabel, Josua, enggau bala tuai peturun lalu madahka ngagai sida, “Kami enda begunaka tulung ari kita begagaka Rumah Sembiang ke TUHAN Allah Taala kami. Kami empu deka ngaga Rumah Sembiang nya, nitihka asuh Raja Besai Sairus menua Persia.” Udah nya orang ke nguan menua nya lalu nguji nagang sereta ngemba orang Judah ngambika sida enda berani ngaga Rumah Sembiang nya. Sida mega nyuap bala pemesai orang Persia ngambika sida nagang pengawa orang Judah nya, lalu sida majak ngereja nya sekumbang Raja Besai Sairus megai perintah, nyentuk ngagai maya perintah Raja Besai Darius. Lebuh Raja Besai Serses baru berengkah megai perintah, bala munsuh orang ke diau di menua Judah enggau di Jerusalem lalu nulis surat bedawaka sida. Lebuh Raja Besai Artaserses menua Persia megai perintah, Bislam, Mitredat, Tabeel, enggau pangan sida mega nulis surat ngagai raja besai. Surat nya ditulis ngena jaku orang bansa Aram lalu enda tau enda disalin lebuh surat nya dibacha. Rehum ti nyadi gabenor, enggau Simsai, ti nyadi kerani ke sitak menua Judah, mega nulis surat tu ngagai Raja Besai Artaserses pasal Jerusalem: “Ari Gabenor Rehum, ari Simsai, kerani ke sitak menua Judah, ari pangan seduai iya, ari bala hakim, enggau ari semua bala pemesai ti bukai, ke asal ari Erek, Babilon, enggau Susa di menua Elam, sereta enggau orang bukai ti udah dipindahka Asurbanipal ke besai sereta bekuasa ari menua sida, lalu diasuh ngentapka diri di nengeri Samaria enggau ba endur bukai di Barat Eupratis.” Surat nya munyi tu: “Ngagai Raja Besai Artaserses, ari bala nembiak iya ti diau di sitak di Barat Eupratis. Kami deka madahka ngagai nuan Tuan Raja pasal orang Judah ke datai ari menua bukai ti dipegai nuan. Sida udah ngentapka diri di Jerusalem, lalu benung nirika baru nengeri ti jai sereta angkat ngelaban nya. Sida udah belabuh ngaga dinding kuta ke nengeri nya baru, lalu deka nembuka pengawa nya enda lama da agi. Tuan Raja, enti nengeri tu digaga baru, lalu dinding kuta tembu digaga, orang tu deka badu agi mayar chukai, lalu penatai belanja nuan deka kurang. Nya alai, laban kami ngasaika diri berutang-budi ketegal pemanah nuan enggau kami, Tuan Raja, kami enggai meda utai tu nyadi, nya alai kami madahka pekara tu ngagai Tuan Raja, ngambika nuan meri atur ngasuh orang mansik semua utai ti udah ditulis bala aki ini nuan. Enti nuan mansik utai nya, nuan deka nemu nengeri tu endang seruran ngelaban, lalu kenyau ari kelia menya nengeri tu endang mai pengachau ngagai bala raja enggau ngagai orang ke merintah ba mayuh bengkah sitak menua. Orang ke diau di nengeri tu endang seruran mar diperintah. Nya kebuah nengeri tu dirusak. Kami madahka ngagai Tuan Raja, enti nengeri tu digaga baru, lalu dinding kuta tembu, nuan Tuan Raja enda ulih agi merintah di Barat Eupratis tu.” Raja besai lalu ngirumka saut tu: “Ngagai Gabenor Rehum, Simsai, kerani ke sitak menua, enggau ngagai bala pangan seduai iya ti diau di Samaria enggau ba endur bukai di Barat Eupratis, tabi. “Surat ti dikirumka kita udah disalin lalu udah dibacha di mua aku. Aku udah ngasuh utai nya dipansik, lalu utai nya endang amat. Kenyau ari kelia menya, Jerusalem endang seruran angkat ngelaban kuasa raja, lalu nengeri nya endang penuh laban orang ke seruran angkat ngelaban, sereta ngaga pengachau. Raja ke bekuasa udah merintah di nengeri nya, lalu udah merintah di serata sitak di Barat Eupratis, begumpulka chukai enggau duit pupu. Nya alai kita enda tau enda meri atur nagang orang nya begagaka nengeri nya baru, nyentuk ngagai maya aku meri atur baru. Kereja utai tu enggau naka penyampat, enggai ke perintah aku dituntung penusah.” Lebuh surat ari Raja Besai Artaserses nya dibacha di mua Rehum, Simsai, enggau bala pangan seduai iya, sida lalu beguai-guai mansang ngagai Jerusalem, lalu mejalka orang Judah badu agi ngaga nengeri nya baru. Pengawa begagaka Rumah Sembiang udah diketuka, lalu enda dipajakka agi nyentuk ngagai taun ti kedua Raja Besai Darius megai perintah di menua Persia. Ba urung maya nya dua iku nabi, Hagai, enggau Sekariah anak Ido, belabuh bejaku dalam nama Allah Taala ke disembah orang Israel, ngagai orang Judah ti diau di menua Judah enggau di Jerusalem. Lebuh Serubabel anak Sealtiel enggau Jesua anak Josadak ninga jaku nabi dua iku nya, sida lalu belabuh nirika Rumah Sembiang baru di Jerusalem, disaup nabi ke dua iku nya. Tatenai ti nyadi gabenor di Barat Eupratis, Setar Bosenai, enggau pemesai ti bukai mansang ngagai Jerusalem, lalu kemaya nya nanya, “Sapa ngemendarka kita ngaga Rumah Sembiang tu lalu ngaga perengka ke Rumah tu?” Sida mega minta nama semua orang ke nulung ngaga Rumah Sembiang nya. Tang Allah Taala ngemataka bala tuai orang Judah, lalu bala pemesai orang Persia mutuska penemu enda ngereja utai ngagai bala tuai orang Judah nya, sebedau sida nulis surat ngagai Raja Besai Darius lalu nerima saut ari iya. Baka tu ku munyi utai ti ditulis sida ngagai raja besai: “Ngagai Raja Besai Darius, awakka nuan merintah dalam pemaik. Kami deka madahka ngagai Tuan Raja, pasal kami ke udah bejalai ngagai sitak menua Judah, lalu nemu Rumah Sembiang ke Allah Taala ti Besai benung digaga ari batu, enggau ngena batang pengerat ti ditebuk ngagai dinding. Pengawa nya benung dikereja enggau bejimat, lalu mansang belama. Udah nya kami nanya ngagai bala tuai orang mayuh, minta sida madahka ngagai kami, sapa ke meri sida kuasa ngaga Rumah Sembiang nya baru, sereta ngaga pekekas ke Rumah nya. Kami mega minta sida madahka nama sida, ngambika kami ulih madahka ngagai nuan sapa ti nyadi tuai ngereja pengawa nya. Ku sida nyaut, ‘Kami tu nembiak Allah Taala ti merintah di serega enggau di dunya, lalu kami ngaga Rumah Sembiang tu baru laban Rumah tu udah digaga sereta disikap dulu menya ulih siku raja ti bekuasa ke megai perintah di menua Israel. Tang laban aki ini kami udah ngeringatka ati Allah Taala ti di serega, nya alai Iya nejuka sida dialahka Raja Nebukadnesar menua Babilon, siku raja ke datai ari peturun raja menua Kaldea. Rumah Sembiang nya dirusak, lalu orang ari bansa kami dibuai ngagai menua Babilon. Udah nya, dalam taun ti keterubah Raja Sairus merintah nyadi raja besai di menua Babilon, Sairus meri atur ngasuh Rumah Sembiang tu digaga baru. Iya mulaika pekekas emas enggau pekekas pirak ti dikena dalam Rumah Sembiang nya, ti udah ditabanka Nebukadnesar ari Rumah Sembiang nya di Jerusalem, lalu udah diengkah iya dalam rumah sembiang di Babilon. Raja Besai Sairus udah nyerahka pekekas nya ngagai siku orang ke benama Sesbasar, ti udah diletak iya nyadi gabenor menua Judah. Raja Besai ngasuh Sesbasar mai utai nya lalu mulaika utai nya ngagai Rumah Sembiang di Jerusalem, lalu ngaga Rumah Sembiang nya baru ba endur asal iya. Nya alai Sesbasar datai lalu nudukka batu pemun ke Rumah Sembiang nya. Pengawa begagaka Rumah Sembiang nya lalu majak dikereja nyentuk ngagai diatu, tang pengawa nya apin tembu. Nya alai, enti Tuan Raja besetuju, awakka orang diasuh mansik utai ti udah ditulis bala raja di menua Babilon, ngambika nemu enti Raja Besai Sairus amat udah ngasuh Rumah Sembiang tu digaga baru. Udah nya, padahka ngagai kami utai ti diasuh nuan kereja kami ba pasal pekara tu.” Raja Besai Darius lalu ngasuh orang mansik utai ti udah ditulis dalam cherita bala raja ti disimpan di menua Babilon. Tang utai ti udah ditulis nya ditemu di nengeri Ekbatana di sitak menua Media. Utai nya ditulis dalam siti gulung surat. Baka tu ku munyi utai nya ditulis: “Dalam taun ti keterubah Raja Besai Sairus megai perintah, iya ngasuh Rumah Sembiang digaga baru di Jerusalem nyadika endur alai ngenjuk piring enggau nunu piring. Peninggi Rumah Sembiang nya enda tau enda 20 meter, lalu buka iya 27 meter. Dinding iya enda tau enda digaga ari selapis kayu enggau tiga lapis batu. Semua ungkus deka dibayar ari sarang reta raja. Perengka emas enggau pirak ti udah dibai Raja Nebukadnesar ngagai menua Babilon ari Rumah Sembiang di Jerusalem enda tau enda dipulaika baru ngagai endur asal iya dalam Rumah Sembiang di Jerusalem.” Udah nya Raja Besai Darius nyaut munyi tu: “Ngagai Tatenai gabenor di Barat Eupratis, Setar Bosenai, enggau bala pemesai bukai di Barat Eupratis; Anang semak Rumah Sembiang nya, lalu anang ngachau pengawa begagaka Rumah Sembiang nya. Awakka gabenor menua Judah enggau bala tuai orang Judah ngaga Rumah Sembiang Allah Taala nya baru, ba endur asal iya. Ngena surat tu aku ngasuh kita nulung sida ngaga Rumah Sembiang nya baru. Ungkus ti dikena sida enda tau enda lengkas dibayar ngena duit perintah, ti diterima ari chukai di Barat Eupratis, ngambika pengawa nya enda tejanggal ngapa. Tiap hari kita enda tau enda meri bala imam di Jerusalem sebarang utai ti dipeguna sida: anak sapi ti lelaki, bedus, tauka anak domba ti deka ditunu nyadika piring ngagai Allah Taala ti di serega, tauka gandum, garam, wain, tauka minyak kana. Utai tu enda tau enda dikereja ngambika sida ulih ngenjuk piring ti ngerinduka ati Allah Taala ti di serega, lalu besampi minta berekat ari Iya ke aku, enggau ke bala anak aku. Aku mega madahka ngagai kita, enti orang ngelanggar atur tu, sebatang kayu pengerat deka dichabut ari rumah sida, dilancham, lalu ditumbukka ngagai tubuh sida. Lalu rumah sida deka digaga nyadi tugung uras. Awakka Allah Taala ti udah milih Jerusalem nyadika endur alai Iya disembah, muai sebarang raja tauka bansa ti ngelaban atur tu, lalu nguji ngerusak Rumah Sembiang nya. Aku, Darius, udah meri atur tu. Atur aku tu enda tau enda dititihka magang.” Udah nya gabenor Tatenai, Setar Bosenai, enggau bala pemesai ti bukai lalu nitihka jaku raja besai. Bala tuai orang Judah jampat amat ngaga Rumah Sembiang nya. Sida diperansang nabi Hagai enggau nabi Sekariah. Sida tembu ngaga Rumah Sembiang nya nitihka jaku Allah Taala ke disembah orang Israel enggau atur Sairus, Darius, enggau Artaserses, bala raja besai menua Persia. Sida tembu ngaga Rumah Sembiang nya kena tiga hari bulan Adar dalam taun ti keenam Raja Besai Darius megai perintah. Udah nya orang Israel, iya nya bala imam, bala orang Lewi, enggau semua orang ke udah dibuai ngagai menua Babilon, lalu diatu udah pulai baru ngagai menua sida empu, nyerahka Rumah Sembiang nya ngagai Allah Taala enggau ati ti gaga. Kena sida nyerahka Rumah Sembiang nya, sida meri 100 iku sapi ti lelaki, 200 iku bedus, enggau 400 iku anak domba nyadika piring, enggau 12 iku kambin nyadika piring pengampun dosa, siku ke siti-siti raban bansa orang Israel. Sida mega ngatur bala imam enggau orang Lewi ngereja pengawa dalam Rumah Sembiang di Jerusalem, nitihka atur dalam bup Moses. Orang ke udah pulai baru ari menua Babilon ngintu Gawai Paska kena empat belas hari bulan ti kesatu dalam taun ti nangkanka nya. Semua bala imam enggau orang Lewi bela nuchi diri magang, lalu semua sida nyadi tuchi. Orang Lewi nyayat jelu nyadika piring Gawai Paska ke semua orang ke udah pulai ari menua Babilon, ke bala imam, enggau ke sida empu. Piring nya diempa semua orang Israel ti udah pulai ari menua Babilon, enggau semua orang ke udah ngelengkaka jalai orang kapir ti nguan menua nya lalu datai nyembah TUHAN Allah Taala ke disembah orang Israel. Tujuh hari sida ngerami Gawai Roti Ti Enda Beragi enggau ati ti gaga. Sida balat gaga ati laban TUHAN udah ngasuh raja besai menua Asiria kasihka sida, datai ke nyau nyukung pengawa sida ke begagaka Rumah Sembiang Allah Taala ke disembah orang Israel. Nyau betaun-taun udah bekau nya, lebuh Artaserses nyadi raja besai menua Persia, bisi orang siku benama Esra anak Seraiah, anak Asariah, anak Hilkiah, anak Salum, anak Sadok, anak Ahitup, anak Amariah, anak Asariah, anak Meraiot, anak Serahiah, anak Usi, anak Buki, anak Abisua, anak Pinehas, anak Eleasar, anak Aron. Esra udah nyerahka diri belajarka Adat TUHAN, nitihka Adat nya dalam pengidup iya, sereta ngajar semua adat enggau atur ari Adat nya ngagai orang Israel. Raja Besai Artaserses meri surat tu ngagai Esra, ti nyadi imam sereta bepelajar ba pasal Adat enggau pesan ti udah diberi TUHAN ngagai orang Israel: “Ari Raja Besai Artaserses ngagai imam Esra, ti landik pasal Adat Allah Taala ti di serega. Aku meri atur ngagai semua orang Israel, ngagai sida imam, enggau orang Lewi ti diau di serata menua ti dipegai aku, ngasuh sida mupuk sama enggau nuan mansang ngagai Jerusalem, enti sida deka. Aku enggau tujuh iku penyanding penemu aku, ngasuh nuan mansik gaya utai di Jerusalem, enggau di menua Judah, ngambika aku nyamai nemu enti Adat Allah Taala nuan, ti udah diserahka ngagai nuan, dititihka. Nuan enda tau enda mai emas enggau pirak nyadika pemeri ti deka diberi aku enggau bala penyanding penemu aku, ngagai Allah Taala ke disembah orang Israel, ke bempu Rumah Sembiang di Jerusalem. Nuan enda tau enda mega mai semua pirak enggau emas ti udah digumpul nuan di serata sitak menua Babilon, enggau pemeri ti diberi orang Israel enggau bala imam sida ke Rumah Sembiang Allah Taala sida di Jerusalem. Nuan enda tau enda ngena duit tu enggau bejimat, lalu meli sapi ti lelaki, bedus ti lelaki, anak domba, gandum, enggau wain lalu meri utai nya ba alta dalam Rumah Sembiang di Jerusalem. Nuan tau nguna pirak enggau emas ti laluh kena begagaka sebarang utai ti dikedekaka nuan enggau bala nembiak nuan, nitihka peneka Allah Taala nuan. Nuan enda tau enda nyerahka ngagai Allah Taala di Jerusalem semua pekekas ti udah diberi ngagai nuan ngambika bisi dikena ngereja pengawa dalam Rumah Sembiang. Enti nuan agi begunaka utai bukai kena ngereja pengawa dalam Rumah Sembiang nya, nuan tau ngambi utai nya ari sarang reta raja. Aku ngasuh semua pemesai ke bekereja ngemataka sarang reta raja di Barat Eupratis, meri enggau jampat ngagai Imam Esra ti landik pasal Adat Allah Taala ti di serega, semua utai ti dipinta iya, tang enda tau lebih ari 3,400 kilogram pirak, 10,000 kilogram gandum, 2,000 liter wain, 2,000 liter minyak kana, enggau ni penyampau garam ti diguna. Kita enda tau enda bejimat meri semua utai ti diguna Allah Taala ti di serega ke Rumah Sembiang Iya. Kita enda tau enda nentuka Iya enda ringat ngagai aku tauka ringat ngagai orang ke merintah nangkanka aku. Kita enda tau ngumpul chukai ari bala imam, orang Lewi, orang ke nebah musik, jejaga, orang ke gawa, tauka sebarang orang bukai ke bekereja dalam Rumah Sembiang. Nuan, Esra, ngena penemu-dalam ti udah diberi Allah Taala ngagai nuan, enda tau enda ngeletak orang ke bejalaika pengawa perintah enggau nyadi hakim ngambika sida bisi merintah semua orang ke diau di Barat Eupratis, ti diau nitihka Adat Allah Taala nuan. Nuan enda tau enda ngajar Adat nya ngagai sebarang orang ke enda nemu Adat nya. Enti orang enda ngasika Adat Allah Taala nuan, tauka adat perintah menua, sida enda tau enda diukum tekala nya: ngena ukum bunuh, tauka dibuai ngagai menua bukai, tauka reta tengkira sida dirampas, tauka sida ditutup dalam rumah jil.” Ku Esra bejaku, “Puji TUHAN Allah Taala aki ini kitai! Iya udah ngasuh raja besai meri basa ngagai Rumah Sembiang di Jerusalem. Ulih pengasih Allah Taala, raja besai, bala penyanding penemu iya, enggau semua bala pemesai iya ke bekuasa, udah bebasaka aku. TUHAN Allah Taala aku udah meri aku pemerani, lalu aku ulih mujuk mayuh bala tuai peturun orang Israel pulai enggau aku.” Tu nama bala tuai peturun ti udah dibuai ngagai menua Babilon, lalu pulai baru enggau Esra ngagai Jerusalem lebuh maya Artaserses nyadi raja besai: Aku lalu ngempuruka semua bala sida ba tebing sungai ti rarat mansa nengeri Ahaba, lalu kami diau ba kem dia tiga hari. Aku bisi tetemuka bala imam dalam raban nya, tang nadai tetemuka orang Lewi. Aku lalu mesanka semilan iku bala tuai, iya nya Elieser, Ariel, Semaiah, Elnatan, Jarip, Elnatan, Natan, Sekariah, enggau Mesulam, enggau dua iku pengajar, Joiarip seduai Elnatan. Aku ngasuh sida betemu enggau Ido, ti nyadi tuai di Kasipia, minta iya enggau bala iya, iya nya orang ke bekereja dalam Rumah Sembiang, ngirumka orang ngambika bisi bekereja ke Allah Taala dalam Rumah Sembiang. Ulih pengasih Allah Taala, sida ngirumka Serebiah ngagai kami. Serebiah tu orang ke landik ngereja utai, orang Lewi ari raban peturun Mahli. Lapan belas iku bala anak lelaki enggau sida menyadi lelaki iya datai enggau iya. Sida mega ngirumka Hasabiah seduai Jesaiah ari raban peturun Merari, enggau 20 iku kaban belayan seduai iya. Nambahka nya, 220 iku peturun orang ke udah bekereja dalam Rumah Sembiang bisi mega datai. Aki ini sida tu udah diletak Raja David enggau bala pemesai iya dulu menya nulung orang Lewi. Nama sida nya bisi dituliska magang. Ba tebing Sungai Ahaba aku lalu ngasuh semua bala kami bepasa sereta ngemaruhka diri di mua Allah Taala kitai lalu besampi minta Iya nguluka kami bejalai, sereta nyaga kami, nyaga anak kami enggau semua reta tengkira kami. Aku malu minta raja besai meri kami bala soldadu ke nepan kuda nyaga kami ari munsuh lebuh kami di rantau jalai, laban aku udah madahka ngagai iya Allah Taala kitai deka merekatka semua orang ke manggaika pengarap sida ba Iya, tang enda rindu sereta deka ngukum orang ke ninggalka Iya. Nya alai kami bepasa sereta besampi ngagai Allah Taala minta iya nyaga kami, lalu Iya nyaut sampi kami. Aku lalu milih Serebiah, Hasabiah, enggau sepuluh iku imam ti bukai ari bala imam ke dibasa orang mayuh. Udah nya aku nimbang pirak, emas enggau pekekas ti udah diberi raja besai, bala penyanding penemu iya, enggau bala pemesai, enggau diberi orang Israel ngambika bisi dikena dalam Rumah Sembiang. Aku lalu meri utai nya ngagai bala imam. Ku aku bejaku ngagai sida, “Kita tu orang ke kudus di mua TUHAN Allah Taala aki ini kita, lalu baka nya mega semua pekekas pirak enggau pekekas emas ti udah dibai ngagai Iya nyadika pemeri ti diberi nitihka peneka ati diri. Jaga utai tu enggau manah nyentuk ngagai maya kita datai ba Rumah Sembiang. Timbang utai nya dalam bilik imam, lalu serahka semua utai nya ngagai bala tuai imam, enggau ngagai bala tuai orang Lewi, enggau ngagai bala tuai orang Israel di Jerusalem.” Bala imam enggau orang Lewi lalu nerima pekekas pirak enggau pekekas emas, lalu mai utai nya ngagai Rumah Sembiang di Jerusalem. Kami angkat ari Sungai Ahaba kena dua belas hari bulan ti kesatu, lalu mansang ngagai Jerusalem. Allah Taala kitai bisi enggau kami, lalu nyaga kami ari munsuh, enggau ari ipa orang di rantau jalai. Lebuh kami datai di Jerusalem, kami lalu belelak tiga hari. Udah nya ba hari ti keempat, kami lalu mansang ngagai Rumah Sembiang, nimbang pirak, emas, enggau pekekas, lalu nyerahka utai nya ngagai imam Meremot anak Uriah. Orang ke sama enggau iya nya Eleasar anak Pinehas, enggau dua iku orang Lewi ke benama Josabat anak Jesua enggau Noadiah anak Binui. Semua utai diitung, ditimbang, lalu dituliska tekala nya. Semua orang ke udah pulai ari menua Babilon, mai piring ti deka ditunu nyadika piring ti diberi ngagai Allah Taala ke disembah orang Israel. Sida meri 12 iku sapi ti lelaki ke semua orang Israel, 96 iku bedus ti lelaki, enggau 77 iku anak domba. Sida mega meri 12 iku kambin kena muai dosa ari sida empu. Semua jelu tu ditunu magang nyadika piring ti diberi ngagai TUHAN. Sida mega ngambi surat ti diberi raja besai, lalu meri surat nya ngagai bala tuan gabenor enggau bala pemesai di Barat Eupratis, ke lalu nyukung orang mayuh sereta nyukung pengawa besembahka Allah Taala dalam Rumah Sembiang. Lebuh semua utai nya udah tembu dikereja, sekeda bala tuai orang Israel datai lalu madahka ngagai aku pasal orang mayuh, bala imam, enggau orang Lewi ti enda nyeraraka diri ari orang di menua ti ngelingi sida, iya nya orang ari menua Amon, Moap, enggau menua Ejip, tauka orang Kanaan, orang Iti, orang Peris, orang Jebus, enggau orang Amor. Sida ngereja penyai baka ke dikereja orang bansa bukai. Lelaki orang Judah jadi enggau indu orang bansa bukai. Nya ngamahka nembiak Allah Taala ti kudus. Orang ke balat ngereja pengawa nya, iya nya bala tuai enggau bala pemesai. Lebuh aku ninga nya, aku lalu nyarikka baju aku, ngugut buk enggau ragum aku, lalu nudukka diri laban ati aku balat tusah. Aku duduk dia tusah ati nyentuk ngagai maya ngenjuk piring lemai hari. Orang lalu belabuh bekelingika aku, iya nya semua orang ke nyau takut ketegal utai ti udah disebut Allah Taala ke disembah orang Israel pasal dosa orang ke udah pulai ari menua Babilon. Lebuh maya ngenjuk piring lemai nya, aku lalu angkat ari endur alai aku ti udah balat tusah ati, agi mengkang ngena gari ti udah dicharikka aku, besugang besampi, lalu ngangkatka jari aku ngagai TUHAN Allah Taala aku. Ku aku, “O Allah Taala, aku kelalu malu ngangkatka pala aku di mua Nuan. Dosa kami nyau betugung tinggi agi ari pala kami. Dosa kami nyau bedunjung nyentuk ke langit. Kenyau ari maya aki ini kami kelia nyentuk ngagai diatu, kami ke nembiak Nuan, udah balat bedosa. Ketegal dosa nya, kami empu, bala raja kami, enggau bala imam kami udah alah laban raja menua bukai, lalu kami udah dibunuh, dirumpak, lalu ditabanka nyadi orang tangkap. Kami udah balat amat dipechat nyentuk ngagai sehari tu. Tang diatu, O TUHAN Allah Taala kami, Nuan udah kasihka kami, taja pen enda lama, lalu Nuan udah ngasuh sekeda bala kami rari ari ti nyadi ulun, lalu ngasuh kami diau likun ba endur ti kudus tu. Nuan udah nejuka kami rari ari pengidup kami ke nyadi ulun, lalu udah meri kami pengidup ti baru. Suba kami endang ulun, tang taja pia, Nuan enda ninggalka kami. Nuan udah ngasuh raja besai menua Persia rinduka kami lalu ngemendarka kami majak idup lalu ngaga Rumah Sembiang Nuan baru, ti udah nyadi tembawai, lalu ngasuh kami diau likun di menua Judah enggau di Jerusalem. “Tang diatu, O Allah Taala, baka ni ku kami ulih bejakuka utai ti udah nyadi? Kami enda ngasi baru ke pesan ti udah diberi Nuan ngagai kami nengah bala nembiak Nuan, iya nya sida nabi. Sida udah madahka menua ti deka diempu kami nya menua ti enda tuchi, laban orang ke diau di menua nya udah ngisi serata menua nya enggau kereja ti jai sereta kamah. Sida nabi udah madahka kami enda tau jadi melaki-bini enggau bansa orang nya, lalu enda tau sekali-kali nulung sida ngulihka pengaya tauka ngasuh sida mujur, enti kami deka diau lantang di menua tu, lalu nyerahka menua tu ngagai peturun kami belama iya. Indah lebuh kami udah diukum ketegal dosa enggau penyalah kami, deh kami nemu Nuan, ti Allah Taala kami, udah ngukum kami kurang agi ari ti patut, lalu udah ngemendarka kami idup. Nya alai, baka ni ku kami enggai mendingka pesan Nuan baru, ke nagang kami jadi melaki-bini enggau bansa orang ke jai tu? Enti kami ngereja nya, Nuan tetap deka balat ringat lalu munuh semua kami, datai ke nadai siku kami agi idup. TUHAN Allah Taala ke disembah orang Israel, Nuan endang lurus, tang Nuan udah nejuka kami idup. Kami ngaku penyalah kami ngagai Nuan. Kami enda patut datai di mua Nuan.” Lebuh Esra benung meremi besampi di mua Rumah Sembiang, nyabak sereta ngaku dosa, mayuh orang Israel - ti lelaki, indu, enggau bala anak mit - begempuru ngelingi iya, balat amat nyabak. Udah nya Sekaniah anak Jehiel, ari raban peturun Elam, bejaku enggau Esra, “Kami udah enda ngasika Allah Taala laban kami udah jadi enggau indu bansa bukai. Tang taja pia, orang Israel agi bisi pengadang. Diatu kitai enda tau enda besumpah ngaga semaya enggau Allah Taala kitai, madahka kitai deka muai sida indu tu enggau bala anak sida. Kami deka nitihka ajar nuan, enggau ajar orang bukai ke bebasaka jaku Allah Taala. Kami deka nitihka Adat Allah Taala. Nuan endang betanggungjawap ngereja utai tu. Kami nyukung nuan. Nya alai, pajak lalu tembuka pengawa nuan.” Esra lalu berengkah ngasuh bala tuai imam, tuai orang Lewi, enggau semua orang Israel ti bukai besumpah deka ngereja utai ti disebut Sekaniah. Udah nya Esra angkat ari mua Rumah Sembiang lalu tama ngagai rumah Jehohanan anak Eliasip, lalu bemalam dia tusah ati ngira orang ke pulai ari menua bukai udah enda tetap ati ngagai TUHAN. Iya nadai makai, nadai ngirup. Pesan lalu dikirumka ngagai serata nengeri Jerusalem enggau serata menua Judah, minta semua orang ke udah pulai ari menua bukai, begempuru di Jerusalem nitihka atur bala tuai orang mayuh. Enti orang bisi enda datai dia dalam kandang tiga hari, semua reta tengkira sida deka dirampas, lalu sida nadai agi hak nyadi raban orang Israel. Berengkah ari dua puluh hari bulan ti kesemilan, dalam kandang tiga hari, semua lelaki ti diau di menua Judah enggau menua Benjamin datai di Jerusalem, lalu begempuru ba padang ti di mua Rumah Sembiang. Hari bangat amat ujan, lalu ketegal nya, enggau ketegal pemesai guna gempuru nya, semua orang nyau digak-digak magang laban chelap. Imam Esra bediri, lalu bejaku ngagai sida. Ku iya, “Kita udah enda tetap ati ngagai TUHAN, lalu udah ngasuh penyalah ninggang orang Israel, laban kita udah jadi enggau indu bansa bukai. Nya alai, diatu kita enda tau enda ngaku dosa kita ngagai TUHAN Allah Taala aki ini kita, lalu ngereja utai ti ngerinduka ati Iya. Kita enda tau enda nyeraraka diri ari orang bansa bukai ke diau di menua kitai, lalu muai bini kita ke orang bansa bukai.” Orang mayuh lalu nyaut enggau nyawa ti inggar, “Kami deka ngereja sebarang utai ti diasuh nuan.” Tang ku sida nambahka jaku sida, “Bala kitai tu kelalu mayuh, lalu ujan tu kelalu bangat. Kami enda ulih bediri ditu. Pekara tu ukai utai ti ulih ditembuka kitai dalam sehari dua, laban kami mayuh amat udah kena laban dosa tu. Awakka bala pemesai ti diau di Jerusalem mutarka pekara tu. Udah nya awakka semua orang ke jadi enggau indu bansa bukai, betemu enggau bala tuai enggau bala hakim ari nengeri sida empu, ba maya ti diletak. Nya jalai kitai nyeliahka pengeringat Allah Taala ba pekara tu.” Nadai orang nyakal penemu nya, kelimpah ari Jonatan anak Asahel enggau Jahseiah anak Tikbah ke disukung Mesulam enggau siku orang Lewi ke benama Sabetai. Orang ke udah pulai ari menua bukai, nerima atur nya. Nya alai imam Esra lalu milih lelaki ari bala tuai peturun, nuliska nama sida. Kena satu hari bulan ti kesepuluh, sida lalu belabuh mansik pekara nya, lalu dalam kandang tiga bulan udah bekau nya, sida mansik semua lelaki ke jadi enggau indu bansa bukai. Tu nama lelaki ke jadi enggau indu bansa bukai: Imam, ditusun nitihka raban peturun: Ari raban peturun Josua enggau sida menyadi lelaki iya ke anak lelaki Jehosadak: Maseiah, Elieser, Jarip, enggau Gedaliah. Sida besemaya deka muai bini sida, lalu sida meri siku bedus ti lelaki nyadika piring pengampun dosa sida. Ari raban peturun Imer: Hanani seduai Sebadiah. Ari raban peturun Harim: Maseiah, Elijah, Semaiah, Jehiel, enggau Usiah. Ari raban peturun Pasur: Elioenai, Maseiah, Ismail, Netanel, Josabat, enggau Elasah. Orang Lewi: Josabat, Simei, Kelaiah (kedua bali nama Kelita), Petahiah, Judah, enggau Elieser. Orang ke tukang nebah musik: Eliasip. Orang ke nyaga Rumah Sembiang: Salum, Telem, enggau Uri. Sida ke bukai: Raban peturun Paros: Ramiah, Isiah, Malkijah, Mijamin, Eleasar, Malkijah, enggau Benaiah. Ari raban peturun Elam: Mataniah, Sekariah, Jehiel, Apdi, Jerimot, enggau Elijah. Ari raban peturun Satu: Elioenai, Eliasip, Mataniah, Jerimot, Sabat, enggau Asisa. Ari raban peturun Bebai: Jehohanan, Hananiah, Sabai, enggau Atlai. Ari raban peturun Bani: Mesulam, Maluk, Adaiah, Jasup, Sil, enggau Jerimot. Ari raban peturun Pahat Moap: Adna, Chelal, Benaiah, Maseiah, Mataniah, Besalel, Binui, enggau Manasi. Ari raban peturun Hasum: Matenai, Matatah, Sabat, Elipelet, Jeremai, Manasi, enggau Simei. Ari raban peturun Nebo: Jeiel, Matitiah, Sabat, Sebina, Jadai, Joel, enggau Benaiah. Semua orang lelaki tu udah bela jadi enggau indu orang bansa bukai. Sida muai bini sida, lalu muru sida sama enggau bala anak sida. Tu cherita pasal utai ti udah dikereja Nehemiah anak Hakaliah. Dalam bulan Kislep kedua puluh taun Artaserses nyadi raja besai menua Persia, Aku, Nehemiah, bisi di Susa, iya nya indu nengeri menua nya. Siku ari sida menyadi aku, ke benama Hanani, bisi datai ari menua Judah enggau siti raban. Aku lalu nanya ngagai sida pasal Jerusalem, enggau pasal orang Judah ti bukai, ti udah pulai ari menua Babilon. Sida madahka ngagai aku, orang ke agi idup lalu udah pulai ke menua balat amat tusah pendiau, sereta dipechat orang bansa bukai ke diau semak sida. Sida mega madahka ngagai aku pasal dinding kuta Jerusalem ti udah runtuh, lalu pintu nengeri apin digaga baru sekumbang pintu nya udah ditunu. Lebuh aku ninga berita nya, aku nudukka diri lalu nyabak. Aku ngulit lalu enda makai dua tiga hari. Ku aku besampi ngagai Allah Taala, “ TUHAN Allah Taala ti di serega! Nuan endang besai, lalu kami nangika Nuan. Nuan tetap ati ingatka sempekat Nuan enggau orang ke rinduka Nuan, ti ngereja utai ti diasuh Nuan. Peda meh aku tu, TUHAN, lalu dingaka sampi aku lebuh aku besampi siang malam ke bala nembiak Nuan, orang Israel. Aku ngaku kami orang Israel endang udah bedosa. Aki ini aku enggau aku empu udah bedosa. Kami udah ngereja utai ti jai ngelaban Nuan, lalu kami enda ngereja utai ti diasuh Nuan kereja kami. Kami enda nitihka adat ti udah diberi Nuan ngena nembiak Nuan, Moses. Kingatka diatu utai ti udah dipadahka Nuan ngagai Moses. Ku Nuan, ‘Enti kita orang Israel enda tetap ati ngagai Aku, Aku deka ngachirka kita ngagai semua bansa bukai. Tang enti kita pulai baru ngagai Aku, lalu ngereja utai ti diasuh Aku, Aku deka ngambi kita pulai baru ngagai endur ti udah dipilih Aku alai kita deka nyembah Aku, taja pen kita ngachir nyentuk ngagai tisi dunya.’ ” “ TUHAN, sida tu bala ulun Nuan, bala nembiak Nuan. Nuan udah ngelepaska sida ngena kuasa Nuan ti besai enggau ngena pengering Nuan. Pendingka sampi aku diatu, enggau sampi semua nembiak Nuan ti bukai, ti deka ngemesaika nama Nuan. Awakka aku mujur sehari tu, lalu asuh raja besai kasihka aku.” Lebuh maya nya menya, aku bekereja nyuaka wain ngagai raja besai. Nyadi sekali, empat bulan udah bekau nya, lebuh Raja Besai Artaserses benung makai, aku mai wain ngagai iya. Iya enda kala meda mua aku ngemalat nya tusah. Nya alai iya nanya, “Nama kebuah nuan tusah ati baka nya? Nuan ukai sakit. Kada enda laban nuan enda lantang ati.” Aku lalu takut. Ku aku nyaut raja, “Awakka Tuan Raja idup belama iya! Baka ni ku aku ulih nagang mua diri tusah enti nengeri ti alai aki ini aku dikuburka nyau nyadi tembawai, lalu pintu nengeri nya nyau udah retung diempa api?” Raja besai lalu nanya, “Nama utai ti dikedekaka nuan?” Aku lalu besampi ngagai Allah Taala ti di serega, lalu nyebut ngagai raja besai, “Enti Tuan Raja lantang ati enggau aku, lalu deka meri utai ti dipinta aku, awakka aku mansang ngagai menua Judah, ngagai nengeri alai aki ini aku dikuburka, ngambika aku ulih ngaga nengeri nya baru.” Raja besai, ke duduk berimbai enggau kuin, ngemendarka peminta aku. Iya nanyaka pengelama aku di Jerusalem, enggau kemaya aku deka pulai ari nyin, lalu aku madahka ngagai iya. Udah nya aku lalu minta kasih ngagai iya, minta iya meri aku surat ngambika bisi dibai aku ngagai bala tuan gabenor di Menua Ti Di Barat Eupratis, ngasuh sida ngemendarka aku bejalai ngagai menua Judah. Aku mega minta siti surat ditujuka ngagai Asap, ke nyaga utan perintah, ngasuh iya meri aku kayu ramu kena ngaga pintu kuta ti dikena nyaga Rumah Sembiang, kena ngaga dinding kuta nengeri, enggau kena ngaga rumah alai aku diau. Raja besai meri semua utai ti dipinta aku, laban Allah Taala bisi enggau aku. Raja besai lalu ngasuh bala pemesai soldadu enggau bala soldadu ke nepan kuda, bejalai enggau aku. Aku lalu mansang ngagai Menua Ti Di Barat Eupratis. Dia aku meri surat raja besai ngagai bala tuan gabenor. Tang lebuh Sanbalat ke ari nengeri Bet-horon, enggau Tobiah, siku pemesai di sitak menua Amon, ninga orang siku bisi udah datai deka nulung orang Israel, seduai iya balat amat pedis ati. Aku lalu datai di Jerusalem, lalu dalam kandang tiga hari sekumbang aku ti udah datai aku nadai madahka ngagai orang utai ti udah diasuh Allah Taala kereja aku ke nengeri Jerusalem. Udah nya, ba urung tengah malam, aku angkat, lalu pansut, mai dua tiga iku pangan enggau aku. Kami mai semina siku aja keledai ti ditepan aku. Hari endang udah malam lebuh aku pansut ari nengeri nengah Pintu Lebak ti di barat, lalu bejalai nuju ke selatan mansa Ai Engkeching Naga, ngagai Pintu Uras. Lebuh aku bejalai, aku meresa dinding nengeri ti udah pechah, enggau pintu nengeri ti udah rusak ditunu. Udah nya, ba tisi timur nengeri nya, aku lalu bejalai nuju ke utara ngagai Pintu Ai Engkeching, enggau Letung Raja. Keledai ti ditepan aku nadai tetemuka jalai nengah tugung batu ari rumah ti udah runtuh. Nya alai aku lalu nurun ngagai Lebak Kidron, lalu majakka pejalai aku, meresa dinding nya. Udah nya aku pulai baru ngagai nengeri nengah jalai aku mansang, nengah Pintu Lebak. Nadai siku pemesai di nengeri nya nemu tunga pejalai aku, tauka utai ti udah dikereja aku. Nyentuk ngagai maya nya, aku endang apin nyebut sebarang utai ngagai orang Judah ti bukai, iya nya bala imam, bala tuai bansa, bala pemesai, tauka orang bukai ti deka sama enggau ngereja pengawa nya. Tang udah nya aku bejaku enggau sida, “Peda kita pemalat penusah kitai tu, laban Jerusalem tu nyau nyadi tembawai, lalu pintu iya rusak! Nya alai aku mai bala kitai ngaga dinding kuta nengeri tu baru, kena muai pemalu kitai.” Aku lalu madahka ngagai sida pasal Allah Taala ti udah enggau aku, lalu nulung aku, enggau pasal utai ti udah disebut raja besai ngagai aku. Sida lalu nyaut, “Awakka kitai berengkah ngaga dinding kuta nya baru!” Sida lalu sedia deka berengkah ngereja pengawa nya. Lebuh Sanbalat, Tobiah enggau siku orang Arab ke benama Gesem ninga pasal utai ti deka dikereja kami, sida ketawaka kami, lalu ku sida, “Nama utai ti dikereja kita? Kati kita deka angkat ngelaban raja besai?” Aku lalu nyaut, “Allah Taala ti di serega deka ngasuh kami mujur. Kami tu nembiak Iya, lalu kami deka berengkah ngaga dinding kuta tu baru. Tang kita nadai hak bempu sebarang reta tengkira di Jerusalem, lalu nama kita sigi enda dikingatka orang jemah ila.” Baka tu ku jalai kuta nengeri nya digaga baru. Imam Besai Eliasip enggau bala imam ti bukai ngaga Pintu Bedus, nyerahka Pintu nya ngagai TUHAN, lalu nirika Pintu nya ba endur asal iya. Sida nyerahka dinding kuta nyentuk ngagai Menara Seratus enggau Menara Hananel ngagai TUHAN. Orang ari Jeriko ngaga lumpar ti nangkanka nya. Sakur anak Imri ngaga lumpar ti nangkanka nya. Bala raban peturun Hasenah ngaga Pintu Ikan. Sida nirika tiang enggau pintu kuta, lalu ngelekatka pasak enggau alang kena nambit pintu nya. Meremot anak Uriah, iya nya uchu Hakos, ngaga lumpar ti nangkanka nya. Mesulam anak Berekiah, iya nya uchu Mesesabel, ngaga lumpar ti nangkanka nya. Sadok anak Bana ngaga lumpar ti nangkanka nya. Orang ari Tekoa ngaga lumpar ti nangkanka nya, tang bala tuai nengeri nya empu enggai ngereja ungkup ti udah diasuh kereja sida nitihka atur orang ke ngemataka pengawa. Joiada anak Paseah, enggau Mesulam anak Besodeiah ngaga Pintu Jesanah. Seduai iya nirika tiang enggau pintu, lalu ngelekatka pasak enggau alang kena nambit pintu nya. Melatiah ari Gibeon, Jadon ari Meronot, enggau bala orang ari Gibeon enggau ari Mispah ngaga lumpar ti nangkanka nya, nyentuk ngagai rumah tuan gabenor ke Menua Ti Di Barat Eupratis. Usil anak Haraiah, ti nyadi tukang emas, ngaga lumpar ti nangkanka nya. Hananiah ke idup begagaka minyak wangi, ngaga lumpar ti nangkanka nya, nyentuk ngagai Dinding Ti Besai Buka. Repaiah anak Hur, ke megai setengah pelilih menua di Jerusalem, ngaga lumpar ti nangkanka nya. Jedaiah anak Herumap ngaga lumpar ti nangkanka nya, semak rumah iya empu. Hatus anak Hasapniah ngaga lumpar ti nangkanka nya. Malkijah anak Harim enggau Hasup anak Pahat Moap ngaga dua iti lumpar ti nangkanka nya, enggau Menara Oben. Salum anak Halohes, orang ke megai setengah pelilih menua Jerusalem, ngaga lumpar ti nangkanka nya. (Bala anak indu iya nulung iya.) Hanun enggau orang ari nengeri Sanoah ngaga Pintu Lebak. Sida nirika Pintu nya, masang pasak, enggau alang kena nambit pintu, lalu ngaduka 400 meter dinding kuta naka Pintu Uras. Malkijah anak Rekap, ke merintah di pelilih menua Bet Hakerem, ngaga Pintu Uras. Iya nirika pintu nya, lalu ngelekatka pasak, enggau alang kena nambit pintu nya. Salum anak Kolhoseh, ke merintah pelilih menua Mispah, ngaga Pintu Ai Ti Engkeching. Iya ngaga atap ke pintu penama, nirika pintu, lalu ngelekatka pasak enggau alang pintu. Ba letung Selah iya ngaga dinding kuta ti ngimbai kebun istana, nyentuk ngagai tangga ti nurun ngagai Nengeri David. Nehemiah anak Asbuk, ke megai setengah pelilih menua Bet-sur, ngaga lumpar ti nangkanka nya, nyentuk ngagai lumbung David, letung enggau rumah soldadu. Tu nama bala orang Lewi ke ngaga dua tiga iti lumpar dinding kuta: Rehum anak Bani ngaga lumpar ti nangkanka nya. Hasabiah, ke megai setengah pelilih menua Keilah, ngaga lumpar ti nangkanka nya ngarika pelilih menua iya. Bawai anak Henadat, ke megai setengah pelilih menua Keilah, ngaga lumpar ti nangkanka nya. Eser anak Jesua, ke megai Mispah, ngaga lumpar ti nangkanka nya, di mua setor alai nyimpan senyata, nyentuk ngagai endur alai dinding kuta nya betiku. Baruk anak Sabai ngaga lumpar ti nangkanka nya, nyentuk ngagai penama ngagai rumah Imam Besai Eliasip. Meremot anak Uriah, uchu Hakos, ngaga lumpar ti nangkanka nya, nyentuk ngagai ujung rumah Eliasip. Tu nama bala imam ke ngaga dua tiga iti lumpar dinding kuta: Bala imam ari ngelingi Jerusalem, ngaga lumpar ti nangkanka nya. Benjamin enggau Hasup ngaga lumpar ti nangkanka nya, di mua rumah seduai iya empu. Asariah anak Maseiah, uchu Ananiah, ngaga lumpar ti nangkanka nya, di mua rumah iya empu. Binui anak Henadat ngaga lumpar ti nangkanka nya, berengkah ari rumah Asariah ngagai sukut dinding kuta. Orang ari Tekoa ngaga lumpar ti nangkanka nya. Tu ungkup sida ke kedua. Lumpar nya berengkah ba endur ti besenentang enggau menara ti besai ti nyaga Rumah Sembiang, nyentuk ngagai dinding kuta ti semak Opel. Seraban bala imam ngaga lumpar ti nangkanka nya, nuju ke utara ari Pintu Kuda. Genap iku sida bela ngaga dinding kuta di mua rumah diri empu. Sadok anak Imer ngaga lumpar ti nangkanka nya, di mua rumah iya empu. Semaiah anak Sekaniah, ke nyaga Pintu Timur, ngaga lumpar ti nangkanka nya. Hananiah anak Selemiah enggau Hanun, anak lelaki Salapan ke lumur enam, ngaga lumpar ti nangkanka nya. Tu ungkup seduai iya ti kedua. Mesulam anak Berekiah ngaga lumpar ti nangkanka nya, di mua rumah iya empu. Siku tukang emas ke benama Malkijah, ngaga lumpar ti nangkanka nya, nyentuk ngagai rumah ti dikena bala orang ke bekereja dalam Rumah Sembiang, semak Pintu Mipkad Rumah Sembiang, semak bilik ti ba atas sukut timur utara ke dinding kuta nya. Bala tukang emas enggau bala orang dagang ngaga lumpar ti penudi, berengkah ari bilik ti ba sukut, nyentuk ngagai Pintu Bedus. Lebuh Sanbalat ninga kami orang Judah udah berengkah ngaga dinding kuta nya baru, iya pedis ati lalu berengkah ngeleseka kami. Ku iya bejaku di mua bala pangan iya enggau di mua bala soldadu orang Samaria, “Nama utai ti dikereja bala orang Judah ke lemi tu? Kati sida deka nirika nengeri nya baru? Kati sida ngumbai diri ulih nembuka pengawa nya dalam sehari ketegal sida ngenjuk piring? Kati sida ngumbai diri ulih ngaga utai ngena tugung batu ti udah ditunu?” Nyadi Tobiah bisi bediri dia ngimbai sida, lalu ku iya bejaku, “Ni gaya kuta ti deka digaga sida? Indah munsang deh ulih ngeruntuhka kuta nya!” Aku lalu besampi, “Dinga Nuan jalai sida ngeleseka kami, O Allah Taala! Awakka jaku kelese sida ninggang sida empu. Awakka semua utai ti dikemisi sida dirampas magang ari sida, lalu awakka sida nyadi orang tangkap lalu ditabanka ngagai menua bukai. Anang ngampun penyai sida, lalu anang enda ingatka dosa sida, laban sida udah mechat kami ke ngaga dinding kuta tu.” Nya alai kami majak ngaga dinding kuta nya. Enda lama udah nya dinding kuta nyau bulih setengah peninggi ari ti dijuluk ati kami, laban orang mayuh ransing gawa. Sanbalat, Tobiah, enggau orang Arab, orang Amon, enggau orang Asdot balat amat pedis ati lebuh sida ninga pasal pemansang pengawa kami ke begagaka dinding kuta Jerusalem, sereta ngalitka semua endur ti sawang ba dinding kuta nya. Nya alai semua sida bepekat deka nyerang Jerusalem, lalu ngaga pengachau. Tang kami besampi ngagai Allah Taala kami, lalu ngasuh orang nyaga kami ari sida siang malam. Orang Judah bisi siti lagu ti dinyanyi sida: “Kami nyau lembut tulang mai utai ti berat. Mayuh amat batu ti udah runtuh enda tau enda dibai kebukai. Baka ni ku kami ulih nirika dinding kuta tu sehari tu?” Bala munsuh kami ngumbai kami enda meda sida, tauka enda nemu utai ti nyadi, sebedau sida nyerang kami, munuh kami lalu ngemuntanka pengawa kami. Tang orang Judah ti diau begulai enggau bala munsuh seruran datai madahka pelan munsuh ti deka ngelaban kami. Nya alai aku lalu meri pedang, sangkuh, enggau panah ngagai orang mayuh, lalu ngasuh sida jaga di belakang dinding kuta nitihka ripih raban peturun sida empu, ba endur alai dinding kuta ti apin tembu digaga. Aku meda orang mayuh irau ati. Nya alai aku bejaku enggau sida, enggau ngagai bala tuai enggau bala pemesai, “Anang takutka munsuh kitai. Kingatka pemesai enggau pengering TUHAN kitai, lalu laban meh munsuh kitai, kena nyaga kaban belayan kita, bala anak, bala bini, enggau rumah kita.” Lebuh munsuh kami ninga kami udah nemu pekat sida, nya baru sida nemu Allah Taala udah ngemuntanka pelan sida. Udah nya semua kami lalu pulai baru ngagai pengawa begagaka dinding kuta nya. Berengkah ari nya, setengah ari bala aku bekereja, lalu setengah jaga, ngena baju kebal, mai sangkuh, terabai, enggau panah. Lalu bala tuai kami nyukung orang mayuh ke begagaka dinding kuta nya. Indah orang ke mai utai ti dikena begagaka dinding kuta, deh bekereja ngena jari sepiak, lalu jari sepiak megai senyata. Semua orang ke gawa bela nangkin pedang magang. Orang ke nyepu terumpit kena megau orang mayuh endang seruran enggau aku. Ku aku madahka ngagai orang mayuh enggau ngagai bala pemesai sida, enggau ngagai bala tuai, “Pengawa tu nyau ngachir jauh-sejauh, lalu bala kitai nyau jauh-sejauh ari pangan diri ba dinding kuta tu. Enti kita ninga munyi terumpit, kita enda tau enda begempuru ngelingi aku. Allah Taala kitai deka beperang ngarika kitai.” Nya alai tiap hari, kenyau ari dini hari nyentuk ngagai bintang nyau pegari malam hari, setengah ari bala kami gawa ngaga dinding kuta nya, lalu setengah jaga bepegaika sangkuh. Lebuh maya nya aku bisi madahka ngagai orang ke nyadi tuai, sida enggau bala penulung sida enda tau enda diau di Jerusalem lebuh malam hari, ngambika kami ulih nyaga nengeri lebuh malam hari, lalu gawa lebuh siang hari. Lebuh malam hari aku, bala pangan aku, bala orang gaji, enggau orang ke jaga mengkang ngena gari ti dikena kami bekereja. Senyata kami endang seruran ba jari kami. Nyau kelama udah bekau nya, mayuh lelaki enggau indu, belabuh mutap ngelaban orang Judah ti bukai. Ku sekeda sida, “Bala kami sebilik mayuh. Kami begunaka gandum kena kami idup.” Kenu ku sida ti bukai bejaku, “Kami nyau begadaika tanah kami, enggau kebun anggur enggau rumah kami kena meli gandum lebuh lapar pungkang tu.” Sida ke bukai mega nyebut, “Kami nyau nginjau duit kena mayar chukai tanah enggau kebun ngagai perintah. Kitai tu orang Judah magang. Kati bala anak kami enda ngemanah anak sida? Tang kami nyau mejalka anak kami nyadi ulun. Sekeda bala anak indu kami udah dijual nyadi ulun. Kami tu nadai daya, laban tanah enggau kebun anggur kami udah dirampas ari kami.” Lebuh aku ninga jaku putap sida, aku pedis ati lalu mutuska runding deka mutarka pekara nya. Aku besalah semua bala tuai enggau bala pemesai orang mayuh. Ku aku bejaku ngagai sida, “Kita tu nekanka pengidup kaban belayan kita empu!” Aku lalu mesanka semua orang datai begempuru ngambika mutarka penusah nya. Ku aku bejaku, “Kitai udah, enggau naka ulih nebus bala kaban belayan kitai ke bansa orang Judah ke udah nyual diri ngagai orang bansa bukai. Tang diatu kita mejalka kaban belayan kita nyual diri ngagai kita ke orang Judah baka sida empu!” Bala tuai enda bemunyi, sereta enda nemu utai ti patut disebut. Udah nya aku lalu bejaku enggau sida, “Utai ti dikereja kita tu enda manah. Kita patut ngasika Allah Taala, nya baru bansa bukai ti nyadi munsuh kitai enda ngeleseka kitai. Nambahka nya, aku enggau bala menyadi aku, enggau bala orang gaji aku, udah nyali duit enggau gandum. Aram kitai badu agi minta sida mayar anak duit nya. Beri pulai baru ngagai sida sehari tu tanah sida, kebun anggur sida, kebun buah kana sida, rumah sida, enggau anak ari duit ti dijali ngagai sida, gandum, wain, enggau minyak ti udah diambi kita ari sida!” Bala tuai lalu nyaut, “Kami deka ngereja utai ti disebut nuan. Kami deka mulaika pesaka sida ngagai sida empu, lalu enda minta sida mayar utang sida.” Aku lalu mesanka bala imam, lalu mejalka bala tuai besumpah di mua sida, ngasuh sida ngamatka semaya ti baru udah digaga sida. Udah nya aku lalu muka belulang ari punggung aku, lalu nesai belulang nya, lalu bejaku, “Baka tu ku Allah Taala deka nesai barang sapa kita ke enda ngamatka semaya diri. Allah Taala deka ngerampas rumah enggau semua utai kita, ngambika kita nadai agi utai.” Semua orang ke bisi dia bela nyebut, “Amin!” lalu muji TUHAN. Bala tuai lalu ngamatka semaya sida. Dalam kandang dua belas taun aku ti nyadi gabenor menua Judah, berengkah ari taun ti kedua belas nyentuk ngagai taun ti ketiga puluh dua Artaserses nyadi raja besai, kaban belayan aku enggau aku empu nadai kala makai pemakai gabenor. Semua gabenor ti udah megai orang dulu agi ari aku, udah nating orang mayuh, lalu udah minta sida mayar empat puluh singkap duit pirak sehari kena meli pemakai enggau wain. Indah bala orang gaji sida deh udah nekanka pengidup orang mayuh. Tang aku enda baka nya, laban aku nangika Allah Taala. Aku ngaga dinding kuta enggau pengabis pengering aku, lalu aku nadai ngulihka reta tengkira ke diri empu. Semua orang ke bekereja ke aku, bela ngaga dinding kuta nya magang. Aku endang semampai nupi seratus lima puluh iku orang Judah enggau bala tuai sida, enda ngira semua orang bansa bukai ke betemu enggau aku. Aku mela ke sida siku sapi, enam iku jelu bedus ti gemu, enggau berapa iku manuk tiap hari, lalu genap sepuluh hari aku meri sida wain. Tang aku nemu pemerinsa orang mayuh. Nya kebuah aku enda minta gaji nyadi gabenor. Aku besampi ngagai Nuan, O Allah Taala. Kingatka semua utai ti udah dikereja aku ke orang mayuh tu. Lebuh Sanbalat, Tobiah, Gesam, enggau bala munsuh kami ke bukai ninga kami udah nembuka dinding kuta, lalu dinding nya nyau nadai agi pesuk, taja pen kami apin nirika pintu ba ruang pintu, Sanbalat enggau Gesam ngirumka pesan ngagai aku, minta aku betemu enggau sida ba siti genturung pendiau ti ba Emperan Ono. Tang aku nemu, sida deka ngemediska aku. Aku lalu ngasuh orang mai pesan tu ngagai sida: “Aku enda ulih nurun kin laban aku benung ngereja pengawa ti besai amat guna, lalu aku enggai ngasuh pengawa tu tejanggal ngapa ketegal betemu enggau kita.” Empat kali sida mesanka aku. Genap kali sida mesanka aku, baka nya ga saut aku. Udah nya Sanbalat lalu ngasuh siku ari bala nembiak iya betemu enggau aku, mai pesan ti kelima, ngena siti surat ti enda ditutup. Munyi tu ku surat nya: “Gesam madahka ngagai aku, berita bisi udah selebubu ngapa ba sebelah orang ke bekelingi ditu, madahka nuan enggau orang Judah ngaga dinding kuta tu laban kita deka angkat ngelaban perintah. Berita nya mega madahka nuan deka nyiri diri empu nyadi raja lalu nuan udah meri atur ngasuh bala imam madahka, di Jerusalem, nuan raja orang Judah. Tuan Raja tetap deka ninga pasal utai tu, nya alai aku minta tua betemu lalu berandauka pekara tu.” Aku lalu ngirumka saut ngagai iya: “Semua utai ti disebut nuan bula magang. Semua utai tu dikeluluka nuan magang.” Sida nguji ngemba kami ngambika kami badu agi gawa. Aku lalu besampi, “ TUHAN Allah Taala, asuh aku kering!” Kira ba urung maya nya aku nemuai ngagai Semaiah anak Delaiah, uchu Mehetabel, ti enda ulih mindah ari rumah. Ku iya bejaku enggau aku, “Tua enda tau enda mupuk lalu belalai ba Endur ti Kudus dalam Rumah Sembiang, lalu ngunchi diri dia, laban sida deka datai lalu munuh nuan. Kada enda malam tu sida deka datai lalu munuh nuan.” Ku aku nyaut, “Aku tu ukai orang ke rari lalu belalai. Kati nuan ngumbai aku deka belalai dalam Rumah Sembiang lalu ngidupka nyawa diri? Aku enda.” Lebuh aku berundingka utai nya, nya baru aku nemu Allah Taala nadai bejaku ngena Semaiah. Semaiah meri aku jaku tangkan nya laban Sanbalat seduai Tobiah udah nyuap iya nyebut jaku nya. Sida ngaji iya bejaku ngemba aku, ngambika aku bedosa, lalu ari nya ngenyaika nama aku lalu ngemaluka aku. Aku lalu besampi, “Allah Taala, kingatka utai ti udah dikereja Tobiah enggau Sanbalat, lalu ukum seduai iya. Kingatka indu ke benama Noadiah enggau semua bala nabi ti bukai ti udah nguji ngemba aku.” Lebuh kami udah bekereja 52 hari, semua kuta nya tembu magang digaga kena dua puluh lima hari bulan Elul. Lebuh bala munsuh kami di menua ti ngelingi kami, ninga berita nya, sida takut, laban semua orang nemu pengawa nya tembu ari tulung Allah Taala. Sekumbang maya nya, bala tuai orang Judah endang selalu ngirumka surat ngagai Tobiah, lalu Tobiah mega selalu ngirumka surat ngagai sida, laban orang Judah mayuh setanah enggau iya laban mentua iya ti lelaki, Sekaniah anak Arah, nya orang Judah. Nambahka nya, anak lelaki iya ke benama Jehohanan jadi enggau anak indu Mesulam anak Berekiah. Orang selalu bejaku di mua aku madahka semua utai ti manah ti udah dikereja Tobiah, lalu sida madahka ngagai iya semua utai ti disebut aku. Lalu iya majak ngirumka surat ngagai aku kena iya ngemba aku. Diatu dinding kuta udah digaga. Semua pintu udah didirika magang, lalu orang ke nyaga Rumah Sembiang, raban orang ke belagu ke TUHAN, enggau orang Lewi ti bukai udah diberi pengawa magang. Aku lalu ngeletak dua iku orang merintah nengeri Jerusalem: menyadi aku Hanani, enggau Hananiah ti nyadi kepala nyaga kuta. Hananiah lain ari orang bukai laban iya orang ke tau dikarapka, sereta nangika Allah Taala. Aku madahka ngagai seduai iya, pintu nengeri Jerusalem enda tau dibuka sebedau tinggi mata hari, lalu enda tau enda ditutup lalu dikalang sebedau bala jejaga pulai lebuh padam mata panas. Aku mega ngasuh seduai iya ngeletak orang nyadi jejaga ari orang ke diau di Jerusalem, lalu ngeletak sekeda sida nyaga ba siti-siti endur, lalu sida ti bukai bejalai nyaga ngelingi rumah diri empu. Nengeri Jerusalem nya besai, tang orang ke diau dia enda mayuh, lalu rumah pen apin mega mayuh udah digaga. Allah Taala ngasuh aku ngempuruka semua orang mayuh, bala tuai sida, enggau bala pemesai, ngambika ngitung tubuh nitihka ruang bilik. Aku lalu tetemuka bup ti ngundan nama orang ke terubah-rubah iya pulai ari menua Babilon. Baka tu ku utai ti ditemu aku: Mayuh orang ke udah kena buai ngagai sitak menua Babilon, udah angkat ari menua nya, lalu pulai ngagai Jerusalem enggau ngagai menua Judah, napatka nengeri diri empu. Raban ruang bilik sida tu udah dibuai ngagai menua Babilon lalu diau din kenyau ari maya Raja Nebukadnesar udah nabanka sida nyadi orang tangkap. Orang ke nyadi tuai sida nya Serubabel, Josua, Nehemiah, Asariah, Ramiah, Nahamani, Mordikai, Bilsan, Misperet, Bikbai, Nehum, enggau Banah. Pemayuh semua peturun orang ke bekereja dalam Rumah Sembiang enggau bala ulun Solomon, ke pulai ari menua Babilon nya 392 iku. Tuan gabenor orang Judah nagang sida makai pemakai ti diberi ngagai Allah Taala enti sida nadai imam ke nemu ngena Urim enggau Tumim. Bala imam, orang Lewi, bala orang ke nyaga Rumah Sembiang, bala orang ke nebah musik, mayuh orang Israel ti bukai, bala orang ke bekereja dalam Rumah Sembiang, iya nya semua orang Israel, ngentapka diri di nengeri ti mit enggau nengeri ti besai di menua Judah. Dalam bulan ti ketujuh semua orang Israel bela udah ngentapka diri magang dalam nengeri diri empu. Kena satu hari bulan nya, semua sida begempuru magang di Jerusalem, ba padang semak Pintu Ai. Sida ngasuh Esra ngambi Bup Adat Moses ti udah diberi TUHAN ngagai orang Israel. Esra lalu mai bup nya ngagai endur alai semua orang ke lelaki, sida ke indu, enggau bala anak mit ti udah nemu meretika utai, begempuru. Iya lalu macha Adat nya ngagai sida ba padang semak pintu nya, kenyau ari dini hari nyentuk ngagai tengah hari, lalu semua sida nyinuk mending. Esra bediri ba panggau, ti endang udah disediaka alai ngereja pengawa nya. Tu nama orang ke bediri ari kanan Esra: Matitiah, Sema, Anaiah, Uriah, Hilkiah, enggau Maseiah. Orang ke bediri ari kiba iya: Pedaiah, Misael, Malkijah, Hasum, Hasbadanah, Sekariah, enggau Mesulam. Esra bediri ba panggau nya ari atas orang mayuh, lalu semua sida bela merening ngagai iya magang. Lebuh iya ngebakka bup nya, semua sida bediri magang. Ku Esra, “Pujika TUHAN Allah Taala ti pemadu besai!” Semua orang mayuh lalu ngangkatka jari sida, lalu nyaut, “Amin! Amin!” Sida besugang lalu nyungkurka diri ke tanah nyembah Allah Taala. Udah nya sida angkat lalu bediri, lalu bala orang Lewi nerangka Adat nya ngagai sida. Tu nama orang Lewi nya: Jesua, Bani, Serebiah, Jamin, Akup, Sabetai, Hodiah, Maseiah, Kelita, Asariah, Josabat, Hanan, enggau Pelaiah. Sida lalu nyalinka Bup Adat Allah Taala nya, sereta nerangka iya ngambika orang mayuh meretika iya. Lebuh orang mayuh ninga utai ti diguna Adat, ati sida balat kena tegu datai ke sida belabuh nyabak. Nya alai Nehemiah, ti nyadi tuan gabenor, Esra ti nyadi imam sereta landik pasal Adat, enggau bala orang Lewi nerangka Adat lalu madahka ngagai orang mayuh, “Tu hari ti kuduska TUHAN Allah Taala kita. Nya alai kita enda tau ngulit tauka nyabak. Pulai ke rumah, lalu intu pengerami makai besai. Bagi pemakai enggau wain kita enggau orang ke nadai chukup utai diempa. Tu hari ti kuduska TUHAN. Nya alai, anang ngasuh ati kita tusah. Pengaga ti diberi TUHAN ngagai kita, deka ngasuh kita kering.” Bala orang Lewi bejalai ngagai orang mayuh minta sida diau jenuh, lalu enda tusah ati ba hari ti kudus nya. Nya alai semua orang mayuh pulai, lalu makai ngirup enggau ati ti gaga, sereta magi utai ti dikemisi sida enggau orang bukai, laban sida meretika utai ti udah dibacha ngagai sida. Hari siti bala tuai peturun, enggau bala imam enggau orang Lewi, mansang ngagai Esra, deka belajarka ajar ari Adat. Nya baru sida nemu, Adat ti udah diberi TUHAN ngena Moses, ngasuh orang Israel diau ba dunju lebuh Gawai Belangkau. Nya alai sida madahka atur tu ngagai serata nengeri Jerusalem, enggau ngagai nengeri bukai enggau nengeri ti mit: “Kita enda tau enda mansang ngagai bukit, lalu ngambi dan kayu pain, kana, mertil, engkerema enggau kayu bukai, kena ngaga dunju nitihka atur ti ditulis dalam Adat.” Orang mayuh lalu ngambi dan kayu, lalu ngaga dunju ba perabung rumah sida, ba tengah laman, ba tengah laman Rumah Sembiang, enggau ba padang nengeri ti semak Pintu Ai, enggau ngimbai Pintu Epraim. Semua orang ke udah pulai ari menua Babilon bela ngaga dunju magang lalu diau dia. Tu keterubah iya utai tu dikereja kenyau ari maya Josua anak Nun. Semua orang mayuh gagit sereta lantang ati magang. Kenyau ari hari ti keterubah ba Gawai nya nyentuk ngagai hari ti penudi, sida macha sebagi ari Adat Allah Taala tiap hari. Sida ngintu Gawai nya tujuh hari, lalu ba hari ti kelapan, sida besembiang bebala mayuh nitihka atur Adat. Kena dua puluh empat hari bulan nya, orang Israel begempuru. Sida bepasa, ngerasukka kain guni sereta ngerabu pala sida enggau amau. Sida lalu nyeraraka diri ari semua orang bansa bukai, lalu bediri lalu belabuh ngaku dosa sida enggau dosa aki ini sida. Sida bediri ba endur sida tiga jam mendingka Adat TUHAN Allah Taala sida dibacha ngagai sida, lalu dalam tiga jam nangkanka nya, sida ngaku dosa sida, lalu nyembah TUHAN Allah Taala sida. Udah nya Jesua, Bani, Kadmi-el, Sebaniah, Buni, Serebiah, Bani, enggau Chenani lalu bediri ba panggau ti endang diungkupka orang Lewi, lalu besampi enggau nyawa ti inggar ngagai TUHAN Allah Taala sida. Udah nya orang Lewi, iya nya, Jesua, Kadmi-el, Bani, Hasapneiah, Serebiah, Hodiah, Sebaniah, enggau Petahiah, lalu bejaku: “Bediri lalu puji TUHAN Allah Taala kita. Puji Iya belama lama iya! Puji meh nama Nuan ti bemulia, taja pen Nuan tinggi agi ari ke ulih dipuji mensia. Semina Nuan siku aja ti TUHAN; Nuan udah ngaga semua langit enggau bintang; Nuan ngaga tanah enggau tasik, enggau semua utai ti dalam sida. Nuan udah meri sida seput, lalu semua utai ti di langit nyembah Nuan. Nuan endang TUHAN Allah Taala ti udah milih Abram lalu mai iya pansut ari Ur di menua Babilon, lalu meri iya nama Abraham; lalu Nuan nemu iya endang tetap ati ngagai Nuan, lalu Nuan ngaga siti sempekat enggau iya, madahka Nuan deka meri ngagai peturun iya menua orang Kanaan, menua orang Iti enggau menua orang Amor, menua orang Peris, menua orang Jebus, enggau menua orang Girgas; lalu Nuan udah ngamatka semaya Nuan, laban Nuan endang lurus. “Lalu Nuan udah meda pemerinsa aki ini kami di menua Ejip, lalu ninga sabak sida ba Tasik Mirah. Nuan udah ngereja kereja ajih ngelaban raja, enggau ngelaban bala pemesai iya, enggau ngelaban orang ke di menua iya, laban Nuan nemu pemalat sida udah nekanka pengidup bala nembiak Nuan. Nama Nuan tampak nyentuk ngagai sehari tu. Lalu Nuan nyeraraka ai tasik ke sida ngambika sida ulih bejalai nengah tasik nya nengah tanah ti rangkai, tang Nuan nikauka orang ke begagaika sida ngagai ai ti dalam, baka ke nikauka batu ngagai tasik ti begelumbang. Nambahka nya, Nuan nguluka sida ngena mua hari lebuh siang hari lalu lebuh malam hari Nuan nenggau jalai sida ngena api. Nuan mega nurun ngagai Bukit Sinai, lalu bejaku ngagai bala nembiak Nuan ari serega, lalu meri sida adat ti bendar enggau pesan ti menyana, lalu Nuan ngajar sida ngintu Hari Sabat ti kudus, lalu meri sida pesan enggau adat beseruanka nembiak Nuan Moses. “Lebuh sida lapar, Nuan meri sida roti ari serega, lalu lebuh sida aus, Nuan meri sida ai ari batu; lalu Nuan ngasuh sida ngambi menua ti udah disemaya Nuan ngagai sida. Tang bala aki ini kami sumbung sereta kieh lalu enda ngasika pesan Nuan. Sida enggai ngasi, lalu sida enda ingatka semua kereja ti nyelai ti udah dikereja Nuan, tang kieh lalu ingin deka pulai baru ngagai menua Ejip lalu nyadi ulun baru. Tang Nuan endang Allah Taala ti seruran sedia deka ngampun, ke kasih, lubah ringat, sereta penuh laban pengerindu ti meruan belama iya, lalu Nuan enda ninggalka sida. Indah lebuh sida ngaga siku engkeramba anak sapi lalu ngumbai nya petara ti udah nguluka sida pansut ari menua Ejip, lalu bejaku busung ngelaban Nuan, deh Nuan enda ninggalka sida di menua puang, laban pengasih Nuan endang amat besai. Tiang remang ti nguluka sida lebuh siang hari, enggau tiang api ti nguluka sida lebuh malam hari nadai kala ninggalka sida. Ngena kuasa Nuan, Nuan ngajar sida, lalu Nuan meri sida mana nyadika pemakai sida, lalu meri sida ai irup. Nuan nupi sida di menua puang empat puluh taun; lalu sida nadai suntuk utai; gari sida enda luya, lalu kaki sida enda kembai. “Nuan meri sida menua enggau bansa, lalu meri ngagai sida semua menua Raja Sihon ke merintah di Hesbon enggau menua Raja Og ke merintah di Basan. Nuan ngasuh peturun sida nambah-menambah ngemayuh bintang ti di langit; lalu ngasuh sida ngalahka lalu diau di menua ti udah disemaya deka diberi Nuan ngagai aki ini sida. Nya alai sida tama lalu ngalahka menua Kanaan, lalu Nuan ngalahka orang ke diau di menua nya, iya nya orang Kanaan, lalu nyerahka orang Kanaan ngagai jari sida, sama enggau raja enggau semua orang di menua nya, ngambika sida ngereja utai ngagai orang nya sepeneka ati sida. Lalu sida ngalahka nengeri ti bekuta, menua ti ami, rumah ti penuh laban pengaya, telaga ti udah digaga, kebun anggur, kebun buah kana, mayuh kayu buah; Nya alai sida makai utai, kenyang lalu gemu, lalu ngelantangka diri ngena semua utai ti manah ti udah diberi Nuan ngagai sida. Tang bala nembiak Nuan enda ngasi lalu sida angkat ngelaban Nuan; Sida ngelengkaka Adat Nuan, lalu munuh bala nabi ti meri sida jaku tangkan ti ngasuh sida pulai baru ngagai Nuan, lalu sida bejaku busung ngelaban Nuan. Nya alai Nuan nyerahka sida ngagai jari munsuh ke merinsaka sida. Udah nya, lebuh sida merinsa, sida nyabak ngagai Nuan, lalu Nuan ninga sida ari serega, lalu laban Nuan enda penuh pengasih, Nuan meri sida bala tuai ke ngelepaska sida ari jari munsuh sida. Tang lebuh menua nyau nadai agi pengachau, sida lalu bedosa baru, lalu Nuan nyerahka sida ngagai jari munsuh sida, ngambika munsuh sida merintah sida; tang lebuh sida nesal ati, lalu nyabak ngagai Nuan, Nuan ninga sida ari serega, lalu Nuan suah ngelepaska sida laban Nuan kasihka sida. Nuan meri sida jaku tangkan ngasuh sida pulai baru ngagai Adat Nuan, tang sida sumbung lalu enda ngasika pesan Nuan, tang bedosa ngelaban Adat Nuan, Adat ti ulih nyelamatka sida. Sida kieh lalu enggai ngasi. Berapa taun Nuan udah liat ati enggau sida, lalu ulih Roh Nuan meri jaku tangkan ngena bala sida nabi Nuan; tang sida enggai mending. Nya alai Nuan nyerahka sida ngagai jari orang ke di menua nya. Tang laban pengasih Nuan endang besai, Nuan enda ngerusak sida tauka ninggalka sida, laban Nuan endang Allah Taala ti siru sereta kasih! “Nya alai diatu, O Allah Taala kami, Allah Taala ti besai kuasa, ke diketakutka kami, ke ngingatka sempekat sereta meruan rinduka kami, anang enda merening ngagai semua pemerinsa ti udah ninggang kami ninggang raja kami, bala pemesai, imam, nabi enggau aki ini kami enggau semua nembiak Nuan kenyau ari maya bala raja menua Asiria udah nekanka pengidup kami, nyentuk ngagai diatu. Nuan endang ngereja utai ti ngena lebuh Nuan ngukum kami, laban Nuan udah tetap ati lalu ngereja utai ti ngena, lalu kami pen udah mega bedosa. Bala aki ini kami, raja kami, bala tuai enggau bala imam kami enda nitihka Adat Nuan. Sida enda mendingka pesan enggau jaku tangkan Nuan. Sida ke nyadi raja ngasuh bala nembiak Nuan ngena berekat ti diberi Nuan, lebuh sida diau di menua ti luas, ti udah diberi Nuan ngagai sida. Tang sida enda nesal ati ke dosa sida lalu enda betuaika Nuan. Nyadi diatu kami tu nyadi ulun di menua ti udah diberi Nuan ngagai kami, menua ti ami tu, ti meri kami pemakai. Asil ti ulih kami ari tanah, pulai ngagai raja ti udah diasuh Nuan merintah kami, laban kami udah bedosa. Sida sepeneka ati ngayahka kami, sereta ngayahka jelu tupi kami, lalu kami tu balat tusah!” Ketegal semua utai ti udah nyadi, kami orang Israel diatu ngaga sempekat ti tetap, lalu bala tuai, bala orang Lewi enggau bala imam kami nanggam sempekat nya ngena chop tambit sida. Orang ke terubah nyain nya Tuan Gabenor Nehemiah anak Hakaliah, ditangkanka Sedekiah. Bala orang tu mega nyain: Kami, orang Israel, bala imam, orang Lewi, bala orang ke nyaga Rumah Sembiang, bala orang ke nebah musik dalam Rumah Sembiang, orang ke bekereja dalam Rumah Sembiang, enggau semua orang bukai ke ngasika Adat Allah Taala, iya nya kami empu, enggau bini kami, sereta enggau semua anak kami ke udah chukup tuai lalu nemu reti utai, udah nyeraraka diri ari orang bansa bukai ke diau di menua kami. Diatu kami, enggau bala tuai bansa kami besumpah deka diau nitihka Adat ti udah diberi Allah Taala nengah nembiak Iya Moses. Kami besumpah deka ngasika semua jaku ti disebut TUHAN ngagai kami, lalu kami deka nitihka semua adat enggau atur Adat Iya. Awakka kami tulah enti kami ngelanggar jaku sumpah tu. Kami enggai jadi enggau orang bansa bukai ke diau di menua kami. Enti orang bansa bukai mai gandum tauka sebarang utai bukai lalu nyual utai nya ngagai kami lebuh Hari Sabat, tauka lebuh hari kudus ti bukai, kami enggai meli utai nya ari sida. Genap taun ti ketujuh, kami deka ngetu bumai tanah kami, lalu deka muai semua utang orang ba kami. Genap taun kami deka meri 5 gram pirak kena nulung mayar ungkus ngintu Rumah Sembiang. Kami deka meri utai ti disebut di baruh tu lagi ngambika utai nya bisi dikena nyembah Allah Taala dalam Rumah Sembiang: Roti ti kudus, gandum nyadika piring ti diberi tiap hari, jelu ti ditunu nyadika piring tiap hari, piring ti kuduska Hari Sabat, ke Gawai Anak Bulan, enggau ke gawai bukai, pemeri ti kudus, piring pengampun dosa orang Israel, enggau sebarang utai bukai ti diguna dalam Rumah Sembiang. Bala kami tu, bala imam, enggau orang Lewi, deka bechabut undi genap taun kena nentuka raban peturun ti deka meri kayu api kena nunu piring ti diberi ngagai TUHAN Allah Taala kami, nitihka atur Adat. Kami deka mai ngagai Rumah Sembiang tiap taun piring ari buah bungas, gandum ti terubah diketau kami, enggau buah bungas ti terubah mansau ba puchuk kayu kami. Genap iku kami deka mai ngagai bala imam dalam Rumah Sembiang, anak tuai kami, lalu nyerahka iya dia ngagai Allah Taala nitihka atur Adat. Kami deka mega nyerahka anak ti terubah diadaka jelu sapi kami, enggau anak domba ti terubah diadaka bedus kami enggau anak kambin ti terubah diadaka kambin kami. Kami deka mai ngagai imam dalam Rumah Sembiang, tuku roti ti digaga ari gandum ti terubah diketau kami genap taun, enggau piring wain, minyak kana, enggau semua macham buah. Kami deka mai ngagai orang Lewi ke ngumpul pemeri sepuluh peratus dalam genturung pendiau kami, pemeri sepuluh peratus ari utai ti ditanam ba tanah kami. Imam ari peturun Aron deka bejalai enggau orang Lewi lebuh pemeri sepuluh peratus nya digumpul. Orang Lewi deka nyimpan sepuluh peratus ari semua pemeri sepuluh peratus nya dalam setor Rumah Sembiang ngambika bisi dikena dalam Rumah Sembiang nya. Orang Israel enggau orang Lewi enda tau enda mai gandum, wain, enggau minyak kana ti diberi orang mayuh, ngagai bilik setor alai pekekas rumah TUHAN ditaruh. Dia mega endur alai imam ke bekereja, orang ke nyaga Rumah Sembiang, enggau raban orang ke belagu dalam Rumah Sembiang, diau. Kami enggai nejuka Rumah Sembiang Allah Taala kami enda diintu. Bala tuai bansa ngentapka diri di Jerusalem, lalu semua orang bukai enda tau enda bechabut undi kena milih siti ruang bilik ari genap sepuluh buah, ti deka diau di nengeri Jerusalem ti kudus. Orang ke bukai deka diau di nengeri ti bukai, enggau ba nengeri ti mit. Orang mayuh balat amat muji orang ke sanggup diau di Jerusalem. Di nengeri Jerusalem enggau di nengeri ti bukai, orang Israel, bala imam, orang Lewi, bala orang ke bekereja dalam Rumah Sembiang, enggau bala peturun orang gaji Solomon, bela diau ba tanah diri empu di nengeri diri empu. Tu nama orang ke tinggi pangkat di sitak menua Judah ti diau di Jerusalem: Raban bansa Judah: Ataiah anak Usiah, uchu Sekariah. Aki ini iya ti bukai nyengkaum Amariah, Sepatiah, enggau Mahalalel, peturun anak lelaki Judah ke benama Peres. Maseiah anak Baruk, uchu Kolhoseh. Aki ini iya ti bukai nyengkaum Hasaiah, Adaiah, Joiarip, enggau Sekariah, diturunka anak lelaki Judah ke benama Selah. Ari peturun Peres, 468 iku diau di Jerusalem. Semua sida tu soldadu ti tebilang nama: Raban bansa Benjamin Salu anak Mesulam, uchu Joet. Aki ini iya ti bukai nyengkaum Pedaiah, Kolaiah, Maseiah, Itiel, enggau Jesaiah. Gabai seduai Salai nya kaban nyempil Salu. Pemayuh semua orang Benjamin ti diau di Jerusalem nya 928 iku. Orang ke nyadi tuai sida nya Joel anak Sikri, lalu Judah anak Hasenuah nyadi pemesai ti lumur dua di nengeri nya. Bala Imam Jedaiah anak Joiarip, enggau Jachin. Seraiah anak Hilkiah, uchu Mesulam. Aki ini iya nyengkaum Sadok, Maraiot, enggau Imam Besai Ahitup. Pemayuh semua orang ari raban peturun tu ke bekereja dalam Rumah Sembiang nya 822 iku. Adaiah anak Jeroham, uchu Pelaiah. Aki ini iya nyengkaum Amsi, Sekariah, Pasur, enggau Malkijah. Pemayuh semua tuai bilik ari raban peturun tu nya 242 iku. Amasai anak Asarel, uchu Ahsai. Aki ini iya nyengkaum Mesilemot enggau Imer. Seratus dua puluh lapan iku orang ari raban peturun tu nya endang soldadu ti tebilang. Tuai sida nya Sapdiel, ari ruang bilik orang ke tinggi pangkat. Orang Lewi Semaiah anak Hasup, uchu Asrikam. Aki ini iya nyengkaum Hasabiah enggau Buni. Sabetai enggau Josabat, orang Lewi ti tebilang, ti nyadi tuai ngatur pengawa ari luar Rumah Sembiang. Mataniah anak Mika, uchu Sapdi, peturun Asap. Iya nguluka raban orang belagu meri sampi terima kasih dalam Rumah Sembiang. Bakbukiah, ti nyadi penulung Mataniah. Apda anak Shamua, uchu Galal, peturun Jedutun. Pemayuh semua orang Lewi ti diau di Jerusalem nya 284 iku. Orang Ke Nyaga Rumah Sembiang Akup, Talmon, enggau kaban belayan seduai iya. Pemayuh semua sida: 172 iku. Orang Israel ti bukai, bala imam enggau bala orang Lewi ti bukai diau ba tanah diri empu di nengeri bukai ti besai enggau ti mit di menua Judah. Orang ke bekereja dalam Rumah Sembiang, diau ba endur ti dikumbai Opel di Jerusalem, lalu sida bekereja di baruh Siha seduai Gispa. Orang ke nyadi tuai ke bala orang Lewi ti diau di Jerusalem nya Usi anak Bani, uchu Hasabiah. Aki ini iya nyengkaum Matniah enggau Mika, lalu iya datai ari raban peturun Asap, iya nya raban peturun ke betanggungjawap nebah musik lebuh orang besembiang dalam Rumah Sembiang. Atur ti diberi raja netapka semua raban peturun nya begintir-gintir nebah musik tiap hari dalam Rumah Sembiang. Petahiah anak Mesesabel, ari raban peturun Serah ke ari raban bansa Judah, nyadika pengari bansa orang Israel di istana raja besai menua Persia. Mayuh orang Israel diau ba nengeri semak umai sida empu. Raban bansa Judah diau di Kiriat-arba, Dibon, enggau Jekapseel, enggau ba genturung pendiau semak nengeri nya. Sida mega diau di nengeri Jesua, Moladah, Bet-pelet, Hasar-sual, enggau Beer-seba enggau ba sebelah genturung pendiau ti ngelingi nengeri nya. Sida diau di nengeri Siklak, Mekonah enggau genturung pendiau ti ngelingi nengeri nya, di En-rimon, Sorah, Jarmut, Sanoah, Adulam, enggau ba genturung pendiau ti semak semua nengeri nya. Sida diau di Lakis, enggau ba umai semak nya, enggau di Asekah enggau ba genturung pendiau ti semak nengeri nya. Reti nya, orang Judah diau di menua entara Beer-seba di selatan enggau Lebak Hinom di utara. Raban bansa Benjamin diau di Geba, Mikmas, Ai, Betel, enggau ba genturung pendiau semak nya, Anatot, Nop, Ananiah, Hasor, Ramah, Gitaim, Hadit, Seboim, Nebalat, Lod, enggau Ono, enggau ba Emperan Tukang. Sekeda raban orang Lewi ti diau di menua Judah, diasuh pindah lalu diau begulai enggau raban bansa Benjamin. Tu nama bala imam enggau orang Lewi ke sama pulai enggau Serubabel anak Sealtiel, enggau Imam Besai Jesua, ari menua Babilon: Orang Lewi: Tu nama orang ke nguluka orang belagu meri terima kasih: Jesua, Binui, Kadmi-el, Serebiah, Judah, enggau Mataniah. Tu nama orang ke ngelembungka sida: Bakbukiah, Uno, enggau orang Lewi ti bukai. Jesua nya apai Joiakim. Joiakim nya apai Eliasip. Eliasip nya apai Joiada. Joiada nya apai Jonatan, lalu Jonatan nya apai Jadua. Nama tuai bilik orang Lewi enggau tuai bilik bala imam bisi ditulis sekumbang sida Imam Besai Eliasip, Joiada, Jonatan, enggau Jadua agi idup. Semua nama nya tembu dituliska magang lebuh Darius nyadi raja besai menua Persia. Tang nama tuai bilik orang Lewi ditulis semina nyentuk ngagai maya Jonatan, uchu Eliasip aja. Nitihka atur Hasabiah, Serebiah, Jesua anak Kadmi-el, orang Lewi dibagi ngagai mayuh bengkah raban. Dua bengkah raban sekali-sekali muji Allah Taala. Raban dua bengkah nya besaut-saut muji sereta meri terima kasih ngagai Allah Taala nitihka atur ti udah diberi Raja David, ke nembiak Allah Taala. Tu nama jejaga Rumah Sembiang ti nyadi tuai nyaga bilik setor semak pintu Rumah Sembiang: Mataniah, Bakbukiah, Obadiah, Mesulam, Talmon, enggau Akup. Orang tu idup lebuh maya Joiakim anak Jesua, uchu Jehosadak, enggau lebuh maya Nehemiah nyadi gabenor, enggau lebuh maya Esra, iya nya imam ti landik pasal Adat. Lebuh dinding kuta nengeri Jerusalem diserahka, orang Lewi lalu dibai ngagai nengeri nya ari sebarang endur sida diau, ngambika sida ulih enggau ngerami pengawa nyerahka dinding kuta nya ngena lagu terima kasih, ngena bebendai enggau belikan. Ruang bilik orang Lewi ti landik belagu lalu datai ari endur alai sida ke udah ngentapka diri ngelingi Jerusalem, enggau ari nengeri ti mit ngelingi Netopah, enggau ari Betgilgal, Geba, enggau Asmabet. Bala imam enggau orang Lewi lalu nuchi diri, nuchi orang mayuh, nuchi pintu, enggau dinding kuta nengeri. Aku ngempuruka bala tuai orang Judah ba atas dinding kuta nengeri, lalu ngasuh sida nguluka dua bengkah raban ti besai bejalai ngelingi nengeri, meri terima kasih ngagai Allah Taala. Raban ti keterubah bejalai musin ke kanan ba atas dinding kuta nya tunga ngagai Pintu Uras. Hosaiah bejalai ngentudika sida, dititihka setengah ari bala tuai orang Judah. Sekariah lalu dititihka bala ari raban peturun iya empu, iya nya sida Semaiah, Asarel, Milalai, Gilalai, Mai, Netanel, Judah, enggau Hanani. Semua sida nya mai pekekas musik magang sebaka enggau pekekas ti ditebah Raja David, ke nembiak Allah Taala. Esra, ti landik pasal Adat, nguluka raban iya ba pejalai nya. Lebuh sida datai ba Pintu Ai Ti Engkeching sida lalu niki tangga ti nuju ngagai Nengeri David, mansa istana David, lalu pulai baru ngagai dinding kuta ba Pintu Ai, ti ba tisi timur nengeri nya. Raban sebengkah ke meri terima kasih, bejalai musin ke kiba nengah puchuk dinding kuta, lalu aku nitihka sida disempulang setengah ari bala mayuh. Kami bejalai mansa Menara Dapur ngagai Dinding Kuta Ti Besai Buka, lalu ari nya kami bejalai mansa Pintu Epraim, Pintu Jesanah, Pintu Ikan, Menara Hananel, enggau Menara Seratus, ngagai Pintu Bedus. Kami nembuka pejalai kami semak pintu Rumah Sembiang. Nya alai raban ti dua bengkah ti meri terima kasih ngagai Allah Taala, sama datai ba kandang Rumah Sembiang. Nambahka bala tuai ke bejalai enggau aku, raban aku nyengkaum bala imam ke nyepu terumpit. Sida nya: Eliakim, Maseiah, Miniamin, Mikaiah, Elioenai, Sekariah, enggau Hananiah. Sida dititihka Maseiah, Semaiah, Eleasar, Usi, Jehohanan, Malkijah, Elam, enggau Eser. Bala orang ke belagu, ke diuluka Jesrahiah, belagu enggau naka penginggar nyawa sida. Mayuh amat piring diberi sehari nya, lalu orang mayuh gaga ati magang, laban Allah Taala udah ngasuh ati sida lantang. Sida ke indu enggau bala anak mit sama enggau rami, lalu nyawa orang ke rami ulih didinga berapa batu ari endur nya. Lebuh maya nya, orang bisi udah diletak ngemataka bilik setor alai naruh semua utai ti diberi ngagai Rumah Sembiang. Utai ti diberi nya nyengkaum pemeri sepuluh peratus, enggau gandum ti terubah diketau, buah ti mansau ti terubah diketau genap taun. Orang tu betanggungjawap ngumpul pemeri ari umai ti semak semua nengeri, enggau ari bala imam enggau ari orang Lewi nitihka atur Adat. Semua orang Judah gaga ati ke bala imam enggau ke orang Lewi, laban sida udah ngereja pengawa nuchi orang mayuh enggau pengawa bukai ti udah dipesanka Allah Taala. Bala orang ke nebah musik dalam Rumah Sembiang enggau bala orang ke nyaga Rumah Sembiang, mega ngereja pengawa sida nitihka atur ti digaga Raja David enggau anak iya Solomon. Kenyau ari maya Raja David, enggau maya Asap nyadi tukang nebah musik dulu menya, bala orang ke nebah musik endang udah seruran nguluka orang mai lagu puji enggau lagu terima kasih ngagai Allah Taala. Lebuh maya Serubabel, enggau lebuh maya Nehemiah, semua orang Israel tiap hari meri pemeri kena nulung bala orang ke nebah musik, enggau bala jejaga Rumah Sembiang. Orang Israel ngenjuk piring ti kudus ngagai orang Lewi, lalu orang Lewi, nitihka penyampau ti udah diletak, meri sebagi ari piring ti kudus nya ngagai bala imam. Lebuh Adat Moses benung dibacha enggau nyawa ti inggar ngagai orang mayuh, sida lalu datai ba genteran ti madahka orang Amon enggau orang Moap enda tau sekali-kali ditejuka begulai enggau bala nembiak Allah Taala. Atur tu diberi laban orang Amon enggau orang Moap enggai meri pemakai enggau ai irup ngagai orang Israel lebuh sida di rantau jalai pansut ari menua Ejip. Lalu orang Moap udah mega ngaji Balaam nyumpah orang Israel. Tang Allah Taala kitai udah ngalihka sumpah nya nyadi berekat. Lebuh orang Israel ninga adat nya dibacha, sida lalu nyeraraka diri ari semua orang bansa bukai. Imam Eliasip, ti nyadi tuai ngemataka bilik setor Rumah Sembiang, endang lama udah bepangan enggau Tobiah. Iya ngemendarka Tobiah ngena siti bilik ti besai ti udah alai sida naruh pemeri gandum enggau menyan, pekekas ti dikena dalam Rumah Sembiang, pemeri ke bala imam, enggau pemeri sepuluh peratus ari gandum, wain, enggau minyak kana ti diberi ngagai orang Lewi, ngagai bala orang ke nebah musik, enggau ngagai bala jejaga Rumah Sembiang. Lebuh Imam Eliasip ngemendarka Tobiah ngena bilik nya, aku nadai di Jerusalem, laban dalam taun ti ketiga puluh dua Artaserses nyadi raja besai menua Babilon, aku udah pulai ngagai menua Babilon madahka berita ngagai raja besai. Nyau kelama udah bekau nya, nya baru aku bulih pemendar pulai baru ngagai Jerusalem. Lebuh aku datai di Jerusalem, aku tekenyit ati lebuh aku nemu Eliasip udah ngemendarka Tobiah ngena siti bilik dalam Rumah Sembiang. Aku pedis ati lalu muai semua utai Tobiah ari bilik nya. Aku meri atur ngasuh bilik nya dituchi, lalu semua pekekas Rumah Sembiang, pemeri ari gandum, enggau menyan dipulaika baru ngagai bilik nya. Aku mega ninga berita madahka ungkup ti patut diberi ngagai orang Lewi, enda diberi ngagai sida. Nya alai sida enggau bala orang ke nebah musik, ke bekereja dalam Rumah Sembiang, udah pulai ngagai umai diri. Nya alai aku nganu bala pemesai laban sida nadai ibuhka Rumah Sembiang. Lalu aku mai bala orang Lewi enggau bala orang ke nebah musik pulai baru ngagai Rumah Sembiang, lalu ngasuh sida gawa baru. Udah nya semua orang Israel lalu belabuh baru mai pemeri sepuluh peratus ari gandum, wain, enggau minyak kana sida ngagai bilik setor Rumah Sembiang. Aku ngeletak orang nyadi tukang wang ngemataka bilik setor. Tu nama sida: Imam Selemiah; Sadok, ti landik pasal Adat; enggau siku orang Lewi ke benama Pedaiah. Hanan anak Sakur, uchu Mataniah, nyadika penulung sida. Aku nemu diri tau ngarapka sida deka nyadung pemakai enggau ati ti lurus ngagai orang bukai ke sama bekereja enggau sida. O Allah Taala aku, kingatka semua utai ti udah dikereja aku ke Rumah Sembiang Nuan, enggau pengawa ti besembah dalam Rumah Sembiang nya. Lebuh maya nya aku bisi meda orang Judah mitan buah anggur lebuh Hari Sabat. Sida ke bukai mai gandum, wain, buah anggur, buah ara, enggau mayuh utai bukai ngena keledai sida ngagai Jerusalem. Aku meri sida jaku tangkan nagang sida bejualka utai lebuh Hari Sabat. Sekeda orang ari nengeri Tire bisi diau di Jerusalem, lalu sida mai ikan enggau semua macham barang ngagai nengeri Jerusalem, deka nyual utai nya lebuh Hari Sabat. Aku nganu bala tuai orang Judah, lalu madahka ngagai sida, “Peda penyai utai ti dikereja kita! Kita udah ngamahka Hari Sabat. Tu meh kebuah Allah Taala udah ngukum aki ini kita, lebuh Iya ngerusak nengeri tu. Tang agi ga kita deka majak ngamahka Hari Sabat lalu nyungkak Allah Taala ringat ngagai orang Israel.” Nya alai aku lalu meri atur ngasuh pintu nengeri ditutup ba pun tiap-tiap Hari Sabat, lebuh padam mata panas, lalu pintu nya enda tau dibuka datai ke lepas Hari Sabat. Aku ngasuh sekeda orang ari bala aku jaga ba pintu nengeri, kena nagang utai dibai tama ngagai nengeri lebuh Hari Sabat. Nyadi sekali dua iku orang dagang ke bejualka semua macham utai, tinduk di luar dinding kuta nengeri malam hari Lima. Ku jaku tangkan aku enggau seduai iya, “Nadai guna seduai diau di luar nganti hari siang. Enti seduai agi ngereja tu, aku deka muru seduai.” Belabuh ari nya, seduai iya nadai agi datai lebuh Hari Sabat. Aku ngasuh orang Lewi nuchi diri empu, lalu ngasuh sida mansang nyaga pintu nengeri, kena nentuka Hari Sabat meruan kudus. Kingatka aku, O Allah Taala, ketegal utai tu mega, lalu kasihka aku laban pengerindu Nuan endang besai. Lebuh maya nya mega aku bisi nemu mayuh lelaki orang Judah jadi enggau indu ari Asdot, Amon, enggau Moap. Setengah ari bala anak sida nya bejaku ngena jaku orang Asdot, tauka jaku orang bansa bukai, lalu enda nemu jaku kami empu. Aku nganu sida ke lelaki, minta sida ditinggang sumpah, malu sida, lalu ngeruntun buk sida. Udah nya aku ngasuh sida besumpah dalam nama Allah Taala, madahka diri enggau anak sida enda agi jadi enggau orang bansa bukai. Ku aku bejaku enggau sida, “Raja Solomon bedosa ketegal indu orang bansa bukai. Solomon besai agi ari raja menua bukai. Allah Taala udah rinduka iya, lalu ngasuh iya nyadi raja ke semua menua Israel, tang taja pia, iya bedosa laban iya jadi enggau indu orang bansa bukai. Kati kita mai kami nitihka teladan kita, enda ngasika Allah Taala kitai, lalu jadi enggau indu bansa bukai?” Joiada nya anak lelaki Imam Besai Eliasip, tang siku ari bala anak lelaki iya jadi enggau anak indu Sanbalat, ari nengeri Bet-horon. Nya alai aku ngasuh Joiada angkat ari Jerusalem. Allah Taala, kingatka chara orang tu udah ngamahka pengawa imam enggau sempekat ti udah digaga Nuan enggau bala imam enggau bala orang Lewi. Nya alai aku lalu nuchi orang mayuh ari semua utai ti ukai enggi orang Judah. Aku nyendiaka atur ke bala imam, enggau ke orang Lewi, ngambika semua sida nemu pengawa diri. Aku meri atur, minta kayu ti dikena nunu piring dibai ba maya ti patut, lalu orang mayuh mai piring sida ke digaga ari gandum enggau buah sida ke terubah mansau. Kingatka semua utai tu, O Allah Taala, lalu berekatka aku ketegal utai nya. Dalam taun ti ketiga iya megai perintah, iya nyendiaka siti pengerami makai besai ke bala pemesai enggau ke orang ke bejalaika pengawa perintah. Bala soldadu menua Persia enggau Media bela bisi datai, lalu pia mega tuan gabenor enggau orang ke tinggi pangkat ari mayuh bengkah sitak menua. Sekumbang enam bulan pengerami nya diintu, Raja Serses ngayanka pengaya, pemanah enggau pemesai istana raja. Udah bekau nya, raja lalu ngaga siti pengerami makai besai ke semua orang ke kaya enggau ke seranta di Susa, indu nengeri menua nya. Pengelama pengerami nya seminggu, lalu dibuka ba kebun istana raja. Tengah laman ba endur nya dilagu enggau kain tirai ti bechura biru enggau burak. Kain tirai nya ditanchang ngena tali linin ti alus sereta bechura ungu, ngagai chengkerung pirak ti lekat ba tiang batu burak. Kerusi ti digaga ari emas enggau pirak bisi diatur ba tengah laman nya. Nyadi geladak tengah laman nya disampak enggau batu burak, batu mirah ti berega, batu mutiara ti beperenching, enggau batu berega ti biru. Utai ti diirup diengkah dalam changkir emas. Nadai siti changkir nya sebaka enggau changkir ti bukai, lalu raja nya nadai sayau mimit ke wain iya. Utai ti diirup endang enda disekat. Raja udah meri atur ngagai bala orang ke bekereja dalam istana ngasuh sida meri semua orang ngirup enggau nadai betagang, tang nitihka peneka sida empu. Lebuh maya nya, Kuin Basti mega nyamu sida ke indu dalam istana. Ba hari ti ketujuh, raja ngirup sereta gaga ati, lalu iya mesanka tujuh iku orang gaji iya, ti udah dipeliri. Nama sida nya Mehuman, Bista, Harbona, Bikta, Abakta, Setar, enggau Charkas. Iya ngasuh sida mai Kuin Basti ngagai iya, bengepan ngena makota. Kuin nya bajik amat gamal, lalu raja deka ngasuh bala pemesai enggau semua bala pengabang iya meda pemajik kuin. Tang lebuh bala orang gaji nya madahka utai ti dipinta raja ngagai Kuin Basti, iya enggai datai. Raja lalu pedis ati. Nyadi raja endang selalu betanyaka pasal adat ngagai orang ke pandai pasal adat. Nya alai iya lalu mesanka bala penyanding penemu iya laban sida patut nemu utai ti patut dikereja. Orang ke suah alai iya betanya nya Karsena, Setar, Admata, Tarsis, Meres, Marsena, enggau Memukan, iya nya tujuh iku pemesai menua Persia enggau Media ke pemadu tinggi pangkat dalam perintah menua nya. Ku iya bejaku enggau sida, “Aku, Raja Serses, udah ngasuh bala orang gaji aku mai siti pesan ngagai Kuin Basti, tang iya enda ngasika pesan nya! Nama utai ti disebut adat, ti patut dikereja ngagai iya?” Memukan lalu bejaku enggau raja sereta enggau bala pemesai iya: “Kuin Basti udah enda bebasaka raja, enggau bala pemesai raja. Iya ti bendar, iya udah ngeleseka semua lelaki dalam menua ti diperintah raja! Semua indu dalam menua tu deka belabuh enggai bebasaka laki sida, lebuh sida ninga pasal utai ti udah dikereja kuin. Sida deka nyebut, ‘Indah kuin Basti deh enggai datai lebuh Raja Serses mesanka iya.’ Lebuh bini bala pemesai raja di menua Persia enggau Media ninga pasal ulah Kuin Basti, sida deka madahka pekara nya ngagai laki sida sebedau padam mata panas lemai tu. Semua bini di semua endur deka badu agi bebasaka laki diri, lalu laki sida deka ringat ngagai sida. Enti Tuan Raja besetuju, nuan tau madahka ngagai orang mayuh pasal Basti ti enda agi tau betemu enggau raja. Asuh atur nya ditulis nyadika adat menua Persia enggau Media, ngambika atur nya enda diubah agi. Udah nya beri pangkat kuin ngagai indu ke manah agi ari iya. Lebuh semua orang dalam menua ti besai ti diperintah nuan tu nemu atur nya, semua indu deka bebasaka laki sida, nemuka laki sida kaya tauka seranta.” Raja enggau bala pemesai iya rindu ninga penemu nya, lalu raja ngereja nitihka penemu Memukan. Iya ngirumka pesan ngagai genap sitak menua ti dipegai iya, ngena jaku enggau chara ti dikena orang nulis surat dalam sitak menua siti-siti, madahka semua laki enda tau enda nyadi tuai ke ruang bilik sida empu. Udah bekau nya, lebuh Raja Serses nyau enda agi ringat, iya ingatka Basti, enggau utai ti udah dikereja Basti enggau adat ti udah digaga kena ngelaban iya. Udah nya sekeda bala penyanding penemu raja bejaku enggau raja, “Awakka orang ngiga indu ke dara bungas ke Raja. Lalu awakka nuan ngasuh bala pemesai dalam genap sitak menua ti dipegai nuan, mai semua indu ke bajik, ti agi dara bungas, ngagai rumah alai nuan ke nyimpan semua indu simpan nuan di Susa. Asuh Hegai, lelaki ti udah dipeliri, ke ngemataka semua indu nuan, ngintu sida ngambika gamal sida bajik. Lalu awakka indu ke pemadu ngerinduka ati nuan nganti Basti nyadi kuin.” Raja rinduka penemu nya, lalu iya nitihka penemu nya. Nyadi di Sisa bisi siku orang Judah ke benama Mordikai anak Jair, uchu Semei, uchu Kis ari raban bansa Benjamin. Nyadi Kis udah ditabanka Raja Nebukadnesar menua Babilon nyadi orang tangkap ari nengeri Jerusalem sama enggau Raja Jehoiakin menua Judah ari Jerusalem, sama enggau orang tangkap ti bukai. Mordikai bisi siku petunggal, ke benama Ester. Nama Hebrew Ester nya Hadasah. Iya indu ke bajik, sereta manah raras tubuh. Lebuh apai indai Ester mati, Mordikai ngiru iya nyadika anak. Lebuh raja udah meri atur tu, lalu mayuh indu ke agi biak dibai ngagai Susa, Ester bisi enggau sida. Iya mega diasuh diau di istana, diintu Hegai, ke ngintu semua indu simpan raja. Hegai gaga ati meda Ester, lalu beguai belabuh ngereja pengawa ngemajikka Ester ngena pengawa urut enggau pemakai. Iya meri Ester endur ti pemadu manah alai diau dalam rumah indu simpan raja, lalu ngeletak tujuh iku indu ke biak ke endang dipilih ari istana raja, ngintu Ester. Ester enda madahka bansa diri, laban Mordikai udah bejaku nagang iya madahka bansa diri ngagai orang. Tiap hari Mordikai bejalai ba tengah laman rumah alai indu simpan raja diau, keran deka nemu pasal Ester enggau namaka penyadi iya. Pengawa ngemajikka indu dikereja setaun: 6 bulan diurut ngena minyak mur, lalu 6 bulan udah bekau nya diurut ngena minyak balsam. Udah nya, siku-siku indu nya dibai ngagai Raja Serses. Lebuh Ester bejalai ari rumah alai indu simpan raja diau, mansang ngagai istana, iya diberi sebarang gari ti dikedekaka iya. Iya selalu kin lebuh lemai hari, lalu pagi hari siti iya dibai ngagai sebuah rumah bukai ti alai bala indu simpan raja diau, lalu diintu Sasgas, orang siku ti udah dipeliri lalu diasuh ngintu indu simpan raja. Ester enda betemu enggau raja baru, enti raja enda chukup rinduka iya lalu minta iya datai. Nyadi maya pen nyau datai alai Ester patut betemu enggau raja. Ester tu anak indu Abihail, lalu iya mega petunggal Mordikai, ti udah ngiru iya nyadika anak. Ester dipuji semua orang ke meda iya. Lebuh gintir iya datai, iya ngena gari ti diletak Hegai ke ngintu bala indu simpan raja. Nya alai, dalam bulan ti kesepuluh, iya nya bulan Tebet, dalam taun ti ketujuh Serses nyadi raja, Ester lalu dibai betemu enggau Raja Serses di istana. Raja rindu sereta sayauka Ester lebih ari semua indu bukai. Raja lalu ngengkahka makota diraja ba pala Ester, lalu nyiri iya nyadi Kuin nganti Basti. Udah nya raja nyendiaka pengerami makai besai kena iya masa Ester, lalu ngambi semua bala pemesai iya enggau orang ke bekereja perintah ngabang ngagai pengerami nya. Iya ngeletak hari nya nyadika hari besai ke semua menua ti dipegai raja, lalu nyadung mayuh pemeri ti manah ngagai orang mayuh. Sekumbang utai tu benung nyadi, Mordikai udah diberi raja pangkat nyadi pemesai perintah. Nyadi Ester apin madahka diri indu orang Judah laban Mordikai enda ngasuh iya madahka nya ngagai orang, lalu Ester ngasika iya baka iya ti udah ngasika Mordikai lebuh iya agi mit. Lebuh Mordikai bekereja di istana, Biktana seduai Teres, dua iku lelaki ti udah dipeliri, ke nyaga pintu bilik raja, begedika Raja Serses, lalu bepekat deka munuh iya. Mordikai nemu pasal pekara nya, lalu iya madahka ngagai Kuin Ester. Ester lalu madahka ngagai raja utai ti udah ditemu Mordikai. Pekara nya lalu dipansik, lalu ditemu amat. Nya alai orang dua iku nya diukum gantung. Raja ngasuh cherita pasal pekara tu ditulis dalam cherita pasal perintah menua. Apin tentu lama udah bekau nya, Raja Serses nikika pangkat orang siku ke benama Haman, ngasuh iya nyadi perdana menteri. Haman nya anak Hamedata, ari peturun Agak. Raja lalu meri atur ngasuh semua bala pemesai ke bekereja ke iya, besugang lalu meremi di mua Haman, kena sida mandangka diri bebasaka Haman. Semua sida besugang sereta meremi magang, kelimpah ari Mordikai. Bala pemesai ti bukai, ke bekereja ke raja, nanyaka kebuah iya enda ngasika atur raja. Tiap hari sida ngasuh Mordikai nitihka atur nya, tang iya enggai mendingka sida. Ku iya nerangka diri, “Aku tu orang Judah. Aku enda tau meremi ngagai mensia.” Sida lalu madahka pekara nya ngagai Haman laban sida keran deka nemu utai ti deka dikereja Haman ngagai Mordikai. Haman pedis ati lebuh iya nemu Mordikai enggai besugang lalu meremi di mua iya. Lebuh iya nemu Mordikai nya orang Judah, iya lalu mutuska runding deka ngereja lebih ari semina ngukum Mordikai siku aja. Iya bekira deka munuh semua orang Judah di serata menua ti dipegai raja besai menua Persia. Dalam bulan ti kesatu, iya nya bulan Nisan, kedua belas taun Raja Serses megai perintah, Haman meri atur ngasuh undi dichabut (dikumbai “purim”) kena nemu hari enggau bulan ti ngena alai iya bejalaika akal iya. Hari ti dipilih iya nya tiga belas hari bulan ti kedua belas, iya nya bulan Adar. Haman lalu madahka ngagai raja, “Tuan Raja, di menua ti dipegai nuan tu bisi siti bansa ti diau ngachir ba semua sitak menua. Sida tu nitihka adat asal ti enda sebaka enggau adat asal orang bansa bukai. Nambahka nya, sida enda ngasika adat menua ti dipegai nuan. Nya alai nuan enda tau nejuka sida tu enda diukum. Enti Tuan Raja besetuju, awakka Tuan Raja ngaga siti adat ngasuh sida dibunuh. Enti nuan meri adat nya, aku tetap ulih nyimpan 375 tan pirak ngagai sarang reta raja kena bejalaika pengawa perintah di menua tu.” Raja lalu merurutka tinchin ti dikena ngechop surat atur perintah, lalu meri tinchin nya ngagai munsuh besai orang Judah, iya nya Haman anak Hamedata, ke peturun Agak. Ku raja bejaku enggau iya, “Sida nya, sereta enggau duit sida, endang enggi nuan. Kereja aja sebarang utai ti deka dikereja nuan ba sida.” Nya alai, kena tiga belas hari bulan ti kesatu Haman mesanka bala kerani raja, lalu ngasuh sida nulis surat, ti enda tau enda disalin ngagai semua jaku bansa ti dikena dalam menua siti-siti, lalu ngirumka surat nya ngagai semua pemerintah, tuan gabenor, enggau bala pemesai perintah. Surat nya ditulis dalam nama Raja Serses, lalu dichop ngena tinchin raja empu. Orang lalu nganjung surat nya ngagai semua sitak menua ti dipegai raja. Surat nya meri atur, dalam sehari aja, iya nya kena tiga belas hari bulan Adar, semua orang Judah ke biak enggau ke tuai, indu enggau anak mit, enda tau enda dibunuh. Sida enda tau dikesinuka, tang dibunuh, lalu semua reta tengkira sida dirampas magang. Utai ti disebut dalam surat nya enda tau enda dipadahka ngagai orang mayuh di semua sitak menua, ngambika semua orang sedia magang lebuh hari nya. Nitihka atur raja, adat nya lalu dipadahka ngagai orang mayuh ba indu nengeri Susa, lalu orang mai berita nya ngagai semua sitak menua. Raja enggau Haman duduk lalu ngirup, tang orang di nengeri Susa begau lebuh sida ninga berita nya. Lebuh Mordikai ninga pasal semua utai ti udah dikereja, iya nyarikka gari diri, lalu ngerasukka kain guni, sereta ngerabu pala iya enggau amau, lalu bejalai duie-duie nyabak nengah nengeri nya, nyentuk ngagai penama ngagai istana. Tang iya enda tama, laban orang ke ngena kain guni sigi enda dikemendarka tama. Di serata semua sitak menua nya, lebuh atur raja nya dibacha, orang Judah nyau bekeduie nyabak. Sida bepasa, duie-duie nyabak, lalu mayuh ari bala sida begari ngena kain guni, lalu gali malai amau. Lebuh bala indu ke digaji Ester, enggau bala lelaki ti udah dipeliri, madahka ngagai Ester utai ti udah dikereja Mordikai, iya balat amat irau ati. Iya ngirumka gari ngagai Mordikai, kena Mordikai nganti kain guni iya, tang Mordikai enggai nerima gari nya. Udah nya iya ngangauka Hatak, siku ari sida lelaki ti udah dipeliri, ti udah diletak raja nyadi orang gaji Ester. Iya ngasuh Hatak mansang ngagai Mordikai lalu nanyaka utai ti udah nyadi, enggau kebuah utai nya nyadi. Hatak mansang ngagai Mordikai ba padang nengeri, ba penama ngagai istana. Mordikai madahka ngagai Hatak semua utai ti udah nyadi ba iya, enggau penyampau duit ti udah disemaya deka disimpan Haman ngagai sarang reta raja, enti semua orang Judah dibunuh magang. Iya meri siti salin surat raja ti udah dikeluarka di Susa kena meri atur ngasuh orang Judah dibunuh. Mordikai lalu ngasuh Hatak mai surat nya ngagai Ester, nerangka pekara nya ngagai Ester, lalu minta Ester bejaku enggau raja, minta raja kasihka orang ke ari bansa Ester empu. Hatak lalu ngereja nya lalu Ester ngasuh Hatak mai pesan tu ngagai Mordikai: “Enti lelaki tauka indu bisi tama ngagai tengah laman istana, deka betemu enggau raja, tang ukai ari panggil raja, orang nya enda tau enda dibunuh. Tu endang adat, lalu semua orang, kenyau ari penyanding penemu raja nyentuk ngagai orang mayuh ti diau di semua sitak menua tu, bela nemu adat nya magang. Semina siti aja jalai adat nya ulih diseliahka: iya nya, enti raja ngedarka tungkat emas iya ngagai orang nya. Enti raja ngereja nya, orang nya enda dibunuh. Tang dalam sebulan tu raja nadai udah mesanka aku.” Lebuh Mordikai nerima pesan Ester, iya lalu ngirumka jaku tangkan tu ngagai Ester: “Anang ngumbai diri lebih agi likun ari orang Judah ti bukai, ketegal nuan diau di istana raja. Enti nuan enda bemunyi lebuh maya ti baka tu, penyaup deka datai ari serega ngagai orang Judah, lalu sida deka diselamatka, tang nuan deka mati, lalu ruang bilik apai nuan deka lus. Tang kitai enda nemu, nyangka tu meh kebuah nuan udah dichiri nyadi kuin!” Ester ngirumka saut tu ngagai Mordikai: “Mupuk meh nuan lalu gempuruka semua orang Judah ti diau di Susa, bepasa lalu besampika aku. Anang makai tauka ngirup utai tiga hari tiga malam. Bala indu ke digaji aku enggau aku empu deka mega bepasa. Udah bekau nya, aku deka betemu enggau raja, taja pen nya ngelanggar adat. Enti aku mati ketegal ngereja nya, awakka aku mati.” Udah nya Mordikai mupuk lalu ngereja semua utai ti diasuh Ester. Ba hari ti ketiga iya bepasa, Ester ngerasukka gari diraja iya, mansang lalu bediri ba tengah laman istana, nunga ngagai bilik kerusi diraja. Raja bisi di dalam, duduk ba kerusi diraja, nunga ngagai mua pintu. Lebuh raja meda Kuin Ester bediri di luar, iya gaga meda iya, lalu iya ngedarka tungkat emas ngagai Ester. Udah nya Ester niki, lalu negu puting tungkat nya. “Nama utai, Kuin Ester?” ku raja nanya. “Padahka ngagai aku utai ti dipinta nuan, lalu nuan deka nerima utai nya. Indah setengah ari menua ti dipegai aku deh deka aku meri ngagai nuan.” Ku Ester nyaut, “Enti Tuan Raja deka, aku minta nuan enggau Haman ngabang ngagai pengerami makai besai ti disediaka aku ke nuan.” Udah nya raja lalu mesanka Haman datai enggau jampat, ngambika seduai iya tau ngabang ngagai Ester. Nya alai raja seduai Haman datai ngagai pengerami makai besai ti disediaka Ester. Lebuh sida benung ngirup wain, raja lalu nanya Ester, “Padahka ngagai aku utai ti dipinta nuan, lalu nuan deka nerima utai nya. Aku deka meri ngagai nuan utai ti dipinta nuan. Enti sema nuan minta setengah ari menua ti dipegai aku, nya pen deka meh aku meri ngagai nuan.” Ku Ester nyaut, “Enti Tuan Raja lantang ati enggau aku lalu deka meri utai ti dipinta aku, aku minta nuan enggau Haman nyadi pengabang aku baru ba siti agi pengerami makai besai ti deka disediaka aku ke nuan pagila. Dia ila baru aku madahka utai ti dipinta aku.” Lebuh Haman pulai ari pengerami nya, iya berupai lantang sereta gaga. Tang lebuh iya tepedaka Mordikai ba pintu penama ngagai istana, lalu meda Mordikai enda bediri, tauka ngayanka diri masa Haman lebuh Haman mansa, Haman lalu pedis ati ngagai Mordikai. Tang iya nagang ati diri ti pedis lalu pulai ke rumah. Udah nya iya mesanka pangan iya ngagai rumah iya, lalu minta bini iya Seres begempuru enggau sida. Haman lalu temegah madahka diri kaya, madahka pemayuh anak lelaki iya, madahka raja udah nikika pangkat iya, sereta madahka raja begunaka iya lebih ari pemesai bukai. “Nambahka nya,” ku Haman nampung jaku iya, “Kuin Ester udah nyendiaka pengerami makai besai, ukai ke orang bukai, tang ke kami duai raja, lalu kami duai ngabang baru pagila. Tang semua utai tu nadai reti ba aku seagi-agi aku meda orang Judah ke benama Mordikai nya duduk ba mua pintu istana.” Bini iya enggau semua pangan iya lalu meri iya penemu, “Nama kebuah nuan enda ngasuh orang ngaga siti palan alai ngantung orang, peninggi dua puluh dua meter? Tumu pagila nuan tau minta raja ngemendarka Mordikai diukum gantung ba endur nya. Nya baru nuan deka gaga ati mansang ngagai pengerami makai besai nya. Haman gaga ninga penemu nya, nya alai iya lalu ngasuh orang ngaga palan nya. Malam nya raja enda ulih tinduk, lalu iya ngasuh orang mai sereta macha ngagai iya cherita pasal perintah menua nya. Bagi ti dibacha sida nya madahka pasal Mordikai ke tetemuka orang ke bepekat deka munuh raja, iya nya Biktana seduai Tares, dua iku lelaki ti udah dipeliri, ke bekereja nyaga bilik raja. Raja lalu nanya, “Kati Mordikai bisi udah diberi basa ketegal utai tu?” Ku orang gaji iya nyaut, “Nadai.” “Kati bala pemesai bisi dalam istana diatu?” ku raja nanya. Nyadi Haman baru udah tama ngagai tengah laman. Iya datai laban iya deka minta raja ngemendarka Mordikai diukum gantung ba endur ti udah disediaka. Bala orang gaji lalu nyaut, “Haman bisi ditu. Iya deka betemu enggau nuan.” “Asuh iya tama,” ku raja bejaku. Haman lalu tama, lalu ku raja bejaku enggau iya, “Aku deka meri basa ngagai orang siku. Nama utai ti patut dikereja aku ke orang nya?” Haman lalu berunding dalam ati diri, “Sapa orang ke deka dibasa raja? Nadai patut orang bukai kelimpah ari aku.” Udah nya asuh siku orang ke ari peturun orang ke tinggi pangkat ngerasukka pekayan nya ba orang nya, ngasuh iya nepan kuda, lalu nguluka iya nengah padang nengeri. Asuh orang ke tinggi pangkat nya nyada, lebuh sida bejalai, “Peda jalai raja bebasaka orang ke dibasa iya!” Udah nya raja lalu bejaku enggau Haman, “Jampat ambi baju panjai enggau kuda, lalu beri basa ngagai orang Judah ke benama Mordikai. Kereja ngagai iya semua utai ti udah disebut nuan. Nuan deka nemu iya duduk ba mua pintu istana.” Haman lalu ngambi baju panjai enggau kuda, lalu ngerasukka baju panjai nya ba Mordikai. Mordikai lalu nepan kuda nya. Haman lalu nguluka iya nengah padang nengeri, nyada ngagai orang mayuh lebuh seduai iya bejalai, “Peda jalai raja bebasaka orang ke dibasa iya!” Udah nya Mordikai pulai baru ngagai mua pintu istana, lalu Haman beguai-guai pulai, ngelalaika mua diri ke malu. Iya lalu madahka ngagai bini iya enggau ngagai semua pangan iya pasal semua utai ti udah nyadi ba iya. Udah nya bini iya enggau pangan iya ti bepenemu-dalam nya lalu madahka ngagai iya, “Mordikai diatu baru deka ngerampas kuasa ari nuan. Iya orang Judah, lalu nuan enda ulih ngalahka iya. Iya tetap deka ngalahka nuan.” Lebuh sida agi benung bejaku, lelaki ti udah dipeliri lalu beguai-guai datai ari istana, ngambi Haman ngabang ngagai pengerami makai besai ti udah disediaka Ester. Raja enggau Haman lalu mansang makai enggau Ester kedua kali. Lebuh sida benung ngirup wain, raja lalu nanya Ester baru, “Kuin Ester, nama utai ti dipinta nuan? Padahka ngagai aku, lalu nuan deka nerima utai nya. Indah setengah ari menua ti dipegai aku deh deka aku beri ngagai nuan.” Ku Kuin Ester nyaut, “Enti Tuan Raja deka meri utai ti dipinta aku, aku minta aku empu enggau orang ari bansa aku meruan idup. Aku enggau bansa aku udah dijual ngambika kami dibunuh. Enti pekara tu semina pasal kami ke dijual nyadi ulun, aku tentu enda bemunyi lalu enda ngiruh nuan, tang kami tu baru deka dibunuh abis lengis!” Raja Serses lalu nanya Kuin Ester, “Sapa orang ke berani ngereja utai baka nya? Dini alai orang nya?” Ester lalu nyaut, “Munsuh kami, ke merinsaka kami nya orang ke jai. Nama iya Haman!” Haman lalu merening ngagai raja enggau ngagai kuin, enggau mua ti pemadu takut. Raja lalu angkat, balat amat ringat, pansut ari bilik nya ngagai kebun istana. Haman nemu raja endang keras deka munuh iya. Nya alai iya mengkang di istana, minta Ester nulung iya ngambika iya enda dibunuh. Lebuh raja pulai ari kebun ngagai bilik nya baru, Haman baru udah nyungkurka diri ba kerusi Ester, minta kasih ari iya. Lebuh raja meda nya, iya lalu merak bejaku, “Kati orang tu masung kuin di mua aku empu, dalam istana aku empu?” Lebuh raja baru udah nyebut jaku nya, bala lelaki ti udah dipeliri ke gawa dalam istana nya lalu mampul mua Haman. Udah nya siku ari bala sida ke benama Harborah lalu bejaku, “Haman udah ngaga endur alai ngantung orang, alai iya deka ngantung Mordikai ti udah ngidupka nyawa raja. Peninggi palan gantung nya dua puluh dua meter!” Raja lalu bejaku enggau sida, “Gantung Haman ba endur nya!” Nya alai Haman digantung ba endur ti udah digaga iya empu ke Mordikai. Nya baru raja badu agi ringat. Sehari nya Raja Serses meri semua reta tengkira Haman, ti udah nyadi munsuh orang Judah, ngagai Kuin Ester. Ester bejaku enggau raja madahka diri kaban belayan Mordikai. Belabuh ari nya Mordikai dikemendarka betemu enggau raja. Raja lalu merurutka tinchin chop iya (ti udah diambi iya pulai baru ari Haman) lalu meri tinchin nya ngagai Mordikai. Ester lalu ngasuh Mordikai ngemataka reta tengkira Haman. Udah nya Ester bejaku baru ngagai raja, nyungkurka diri semak kaki raja, nyabak. Iya minta raja madamka akal ti jai ti udah digaga Haman, ke ari peturun Agak kena Haman ngelaban orang Judah. Raja lalu ngedarka tungkat emas ngagai Ester. Ester bediri, lalu bejaku, “Enti Tuan Raja deka, lalu enti nuan sayauka aku, lalu enti utai tu ngena ba ati nuan, aku minta nuan meri atur nagang orang bejalaika atur ti udah diberi Haman anak Hamedata, ke peturun Agak, ti udah ngeletak semua orang Judah di menua tu dibunuh magang. Baka ni ku aku ulih natka ati diri enti penusah ti besai tu ninggang bansa aku, lalu kaban belayan aku empu kena bunuh?” Raja Serses lalu bejaku enggau Kuin Ester seduai Mordikai, ti bansa orang Judah, “Aku udah ngantung Haman ketegal pekat iya ngelaban orang Judah, lalu aku udah meri ngagai Ester semua reta tengkira Haman. Tang atur ti dikeluarka dalam nama raja, lalu dichop ngena chop diraja, enda ulih diubah. Tang seduai tau nulis ngagai orang Judah sebarang utai ti dikedekaka seduai, lalu seduai tau nulis surat nya dalam nama aku, lalu nambit surat nya ngena chop diraja.” Utai tu nyadi kena dua puluh tiga hari bulan ti ketiga, iya nya bulan Siban. Mordikai mesanka bala kerani raja, lalu ngasuh sida nulis surat ngena leka jaku ti disebut iya ngagai orang Judah enggau ngagai bala tuan gabenor, bala orang ke bekereja perintah, enggau bala pemesai dalam semua 127 sitak menua kenyau ari India nyentuk ngagai Etiopia. Surat nya ditulis ngagai siti-siti sitak menua ngena jaku enggau chara tulis ti dikena dalam sitak menua nya empu, enggau ngagai orang Judah ngena jaku enggau chara orang Judah nulis surat. Mordikai ngasuh surat nya ditulis dalam nama Raja Serses, lalu nambit surat nya ngena chop diraja. Surat nya lalu dianjung bala orang ke nepan kuda, ngena kuda ti laju, ti diambi ari raban kuda raja. Surat nya nerangka pasal raja ke ngemendarka orang Judah dalam semua nengeri, begempuru lalu nyaga nyawa diri. Enti orang ke besenyata datai ari sebarang macham bansa, dalam sebarang sitak menua, lalu nyerang orang Judah ti lelaki, bala anak sida, tauka bala indu sida, orang Judah tau ngelaban, lalu munuh orang nya. Sida tau munuh orang nya abis lengis, lalu ngerampas reta tengkira sida. Atur tu dipejalaika di serata menua ti dipegai raja besai menua Persia, ba hari ti udah diletak alai orang Judah deka dibunuh, iya nya kena tiga belas hari bulan Adar, iya nya bulan ti kedua Belas. Atur tu deka digaga nyadika adat, lalu deka dipadahka ngagai semua mensia dalam semua sitak menua, ngambika orang Judah sedia ngelaban munsuh sida lebuh hari nya. Nitihka atur raja, bala orang ke nepan kuda lalu mupuk enggau naka pengelaju. Atur nya mega dipadahka ngagai orang mayuh di Susa, indu nengeri menua nya. Mordikai ninggalka istana, ngena baju panjai diraja, ti bechura biru enggau burak, baju luar ti digaga ari kain linin ti alus, ti bechura ungu, enggau siti makota emas ti manah. Udah nya orang di sebelah jalai raya nengeri Susa lalu manjung gaga ati. Orang Judah gaga ati, nadai agi pengirau, lantang sereta nemu diri deka menang. Ba genap buah nengeri dalam semua sitak menua, lebuh atur raja nya dibacha, orang Judah lalu ngaga hari nya nyadika hari besai alai sida ngaga pengerami makai besai enggau ati ti lantang. Mayuh orang ari bansa bukai masuk nyadi bansa orang Judah, laban sida diatu nyau takutka orang Judah. Kena tiga belas hari bulan Adar, atur ti diberi raja lalu dipejalaika, iya nya hari alai munsuh orang Judah ngarapka diri ulih ngalahka orang Judah. Tang enda mukai-mukai, orang Judah empu ti ngalahka sida. Ba genturung pendiau orang Judah dalam genap buah nengeri di menua nya, orang Judah begempuru deka ngelaban orang ke nguji munuh sida. Semua orang di semua endur takut magang ke sida, lalu nadai orang tan ngelaban sida. Iya ti bendar, bala pemesai perintah ke bekereja di semua sitak menua, iya nya bala tuan gabenor, orang ke bekereja perintah, enggau pengari raja, bela nulung orang Judah, laban semua sida takut magang ke Mordikai. Semua orang di serata menua nya bela nemu Mordikai nya orang ke bekuasa dalam istana raja, lalu kuasa iya majak nambah-menambah. Nya alai orang Judah ulih ngereja sebarang utai ti deka dikereja sida ngagai munsuh sida. Sida mantap munsuh sida ngena pedang, lalu munuh sida. Di Susa, iya nya indu nengeri menua nya, orang Judah munuh lima ratus iku orang. Ba hari nya mega, pemayuh orang ke dibunuh di Susa bisi dipadahka ngagai raja. Udah nya raja lalu bejaku enggau Kuin Ester, “Orang Judah di Susa udah munuh lima ratus iku orang, nyengkaum sepuluh iku anak lelaki Haman. Kada enda mayuh agi ari nya orang udah dibunuh sida ba sebelah sitak menua! Kati nuan agi bisi utai dipinta? Padahka ngagai aku utai bukai ti dipinta nuan, ngambika aku ngereja nya ke nuan.” Ku Ester nyaut, “Enti Tuan Raja besetuju, awakka orang Judah di Susa ngereja baru pagila utai ti udah dikereja sida sehari tu. Lalu awakka bangkai sepuluh iku anak lelaki Haman digantung ari palan gantung.” Raja lalu ngemendarka nya, lalu atur nya dikeluarka di Susa. Bangkai sepuluh iku anak lelaki Haman lalu digantung. Kena empat belas hari bulan Adar, orang Judah di Susa lalu begempuru baru, lalu munuh tiga ratus iku agi orang di nengeri nya. Sekali tu sida enda mega ngerumpak utai orang nya. Bala orang Judah di sebelah sitak menua mega begempuru nyaga nyawa diri. Sida ngalahka bala munsuh sida, lebuh sida munuh tujuh puluh lima ribu iku orang ke begedika sida. Tang sida enda ngerumpak utai munsuh. Utai tu nyadi kena tiga belas hari bulan Adar. Hari siti, iya nya kena empat belas hari bulan nya, orang nadai agi dibunuh, lalu sida ngaga hari nya nyadika hari alai sida ngintu pengerami makai besai. Tang orang Judah di Susa ngaga lima belas hari bulan Adar nyadika hari besai, laban sida udah munuh munsuh sida kena tiga belas enggau empat belas hari bulan nya, lalu udah nya, badu bebunuhka orang kena lima belas hari bulan nya. Nya kebuah bala orang Judah ti diau di nengeri ti mit ngintu empat belas hari bulan Adar nyadika hari besai, alai sida ngintu pengerami makai besai, enggau beberika pemakai ngagai pangan diri. Mordikai ngasuh orang nuliska semua utai ti nyadi, lalu ngirumka surat nya ngagai semua orang Judah ke semak enggau ke jauh, di serata menua ti dipegai raja besai menua Persia, ngasuh sida ngintu empat belas enggau lima belas hari bulan Adar nyadika hari besai ninting taun. Nya meh hari alai orang Judah udah ngalahka munsuh sida. Tu meh bulan alai penusah enggau pengirau udah bebali nyadi pengaga enggau pengelantang. Sida diasuh ngintu hari nya ngena pengerami makai besai, enggau pengerami bukai, beberika pemakai ngagai pangan diri enggau ngagai orang ke seranta. Orang Judah lalu nitihka atur Mordikai, lalu pengerami nya digaga nyadika adat asal ti diintu ninting taun. Nyadi Haman anak Hamedata, ke datai ari peturun Agak, ti nyadi munsuh besai orang Judah, udah enchabut undi (ti dikumbai “purim,”) kena nentuka hari alai sida deka munuh orang Judah. Iya udah bekira deka ngeluska orang Judah. Tang Ester betemu enggau raja, lalu raja nulis surat meri atur ti ngujungka Haman empu dibunuh baka ke udah diperambu iya ke orang Judah. Iya enggau bala anak lelaki iya digantung ba palan gantung. Nya kebuah hari besai nya dikumbai Purim. Ketegal surat Mordikai, enggau ketegal semua utai ti udah nyadi ba orang Judah, sida ngaga siti atur ke sida empu, ke peturun sida, enggau ke barang sapa ti deka nyadi orang Judah, ngeletak dua hari nya diintu ninting taun, nitihka atur Mordikai. Sida ngaga siti atur ngeletak genap ruang bilik orang Judah dalam genap iti serak, di semua sitak menua, enggau dalam genap buah nengeri, bela ngingatka, sereta ngintu hari Purim belama iya. Udah nya Kuin Ester anak Abihail, enggau Mordikai, mega nulis siti surat kena nyukung surat pasal Purim, ti udah ditulis Mordikai dulu agi ari nya. Surat nya ditujuka ngagai semua orang Judah, lalu salin surat nya dikirumka ngagai semua 127 sitak menua dalam menua ti dipegai raja besai menua Persia. Surat nya ngajihka orang Judah diau dalam pemaik enggau pengelikun lalu ngasuh sida enggau peturun sida ngintu hari Purim nya ba maya ti udah diletak, baka sida ke udah nerima atur kena bepasa, enggau maya ngulit. Atur tu udah diberi Mordikai seduai Kuin Ester. Atur ti dikeluarka Ester, ti netapka adat pasal Purim, bisi ditulis dalam siti surat. Raja Serses mejalka orang ke diau ba sebelah tebing tasik di menua ti dipegai iya, enggau orang ke diau di menua ulu, bekereja nyadi ulun. Semua utai ti besai sereta badas ti udah dikereja iya, enggau semua cherita pasal iya ke ngasuh Mordikai bekereja ba opis ti tinggi, bisi dituliska magang dalam cherita pasal raja besai menua Persia enggau Media. Mordikai, ti bansa orang Judah, lalu nyadi lumur satu pemesai ari belakang Raja Serses empu. Iya dibasa sereta dikerinduka orang Judah ti bukai. Iya bekereja ke penguntung bansa iya empu, enggau ke pengelikun semua peturun sida. Dulu menya bisi orang siku benama Jop. Iya diau di menua Us, Iya tu orang ke badas sereta lurus, nangika Allah Taala sereta enggai ngereja penyai. Iya bisi tujuh iku anak lelaki, enggau tiga iku anak indu. Iya bisi tujuh ribu iku jelu bedus, tiga ribu iku unta, seribu iku sapi, enggau lima ratus iku keledai. Orang gaji iya mega mayuh, lalu iya orang ke pemadu kaya di Timur. Bala anak lelaki Jop selalu begintir-gintir nyendiaka pengerami makai besai, lalu semua sida menyadi ti lelaki datai magang. Sida selalu mai menyadi indu sida ngagai pengerami nya. Lebuh pengerami makai besai nya udah tembu, Jop mesanka sida lalu nuchi sida. Iya angkat tumu pagi lalu ngenjuk piring tunu ke genap iku bala anak iya, laban ku iya berunding, “Nyangka anak aku bisi udah bedosa lalu nyumpah Allah Taala dalam ati sida.” Nya meh utai ti selalu dikereja Jop. Nyadi sekali lebuh bala orang serega datai ngadap TUHAN, Sitan bisi mega datai enggau sida. TUHAN lalu nanya Sitan, “Datai ari ni nuan?” Sitan lalu nyaut, “Aku udah bejalai kia-kia, segau-segau nengah dunya tu.” TUHAN lalu nanya Sitan, “Kati nuan bisi udah berundingka nembiak Aku Jop? Nadai orang di dunya ke badas sereta lurus baka iya, ke nangika Allah Taala sereta nyeliahka penyai.” Sitan lalu nyaut, “Kati Jop deka nyembah Nuan enti iya nadai bulih utai ari nya? Ukai enda Nuan ke seruran nyaga iya, nyaga ruang bilik enggau semua utai ti diempu iya? Nuan udah merekatka semua utai ti dikereja iya, lalu jelu bedus enggau jelu sapi iya udah nambah-menambah di menua tu. Tang enti Nuan ngunjurka jari Nuan, lalu ngambi semua utai ti dikemisi iya, iya tetap deka nyumpah Nuan mua mata!” “Barang ku jaku,” ku TUHAN bejaku enggau Sitan, “semua utai ti dikemisi iya sigi ba jari nuan magang, tang nuan enda tau ngemediska Jop.” Sitan lalu mupuk. Nyadi sekali, lebuh bala anak Jop benung ngintu pengerami makai besai ba rumah aka tuai sida, siku seruan datai belanda ngagai Jop. Ku iya, “Kami benung ngeradu tanah ngena sapi, lalu raban keledai meruan ba padang rumput semak endur nya. Orang Sabean lalu ngenyit nyerang kami lalu ngerampas semua jelu nya. Sida munuh semua bala orang gaji nuan. Semina aku aja ulih ngerarika diri lalu madahka tu ngagai nuan.” Lebuh orang gaji nya agi benung bejaku, siku agi orang gaji datai, lalu bejaku, “Jelu bedus enggau bala pengibun bedus udah dipangkaka ngitar, lalu semua sida mati magang. Ka semina aku aja agi idup lalu madahka utai tu ngagai nuan.” Lebuh orang gaji nya agi benung bejaku, siku agi orang gaji datai lalu bejaku, “Tiga bengkah raban soldadu penyelawai orang Kaldea udah nyerang kami, ngerampas jelu unta, lalu munuh semua bala orang gaji nuan. Ka semina aku aja ulih ngerarika diri lalu madahka utai tu ngagai nuan.” Lebuh orang gaji nya agi benung bejaku, siku agi orang gaji datai, lalu bejaku, “Lebuh bala anak lelaki enggau anak indu nuan agi benung ngintu pengerami makai besai ba rumah anak tuai nuan, kabut ti besai datai lalu ngenyit mangka ari menua puang, numbangka rumah. Semua sida mati magang ditinggang rumah nya. Ka semina aku aja agi idup lalu madahka utai tu ngagai nuan.” Jop lalu angkat, nyarikka gari diri, ngukur pala iya, lalu nyungkurka diri ke tanah nyembah Allah Taala. Ku iya bejaku, “Aku ada telanjai, lalu aku deka mati telanjai. TUHAN udah meri, lalu TUHAN udah ngambi. Pujika nama TUHAN!” Dalam semua utai nya, Jop enda bedosa, laban iya enda besalah Allah Taala. Lebuh bala orang serega datai baru ngadap TUHAN, Sitan bisi mega datai enggau sida. TUHAN lalu nanya Sitan, “Datai ari ni nuan?” Sitan lalu nyaut, “Aku udah bejalai kia-kia, segau-segau nengah dunya.” TUHAN lalu nanya Sitan, “Kati nuan bisi udah berundingka nembiak Aku Jop? Nadai orang dalam dunya tu badas sereta lurus baka iya, ke nangika Allah Taala sereta enggai ngereja penyai. Iya agi majak diau lurus, taja pen nuan udah nyungkak Aku ngelaban iya, lalu ngerusak iya enggau nadai kebuah.” Ku Sitan nyaut TUHAN, “Mensia deka ngelengkaka semua utai, asal nyawa iya idup. Tang enti nuan ngemediska iya, lalu negu tulang enggau isi iya, iya tentu deka nyumpah Nuan mua mata!” TUHAN lalu bejaku, “Barang ku jaku, iya ba jari nuan, tang nuan enda tau munuh iya.” Udah nya Sitan lalu ninggalka TUHAN, lalu ngasuh penyakit rumbak nyelamar ba sebelah tubuh Jop. Jop mupuk lalu duduk ba endur alai orang ke muai uras, lalu ngambi kerimpak periuk kena iya ngikis tubuh diri. Ku bini iya bejaku enggau iya, “Kati nuan agi mengkang tetap ati? Nama kebuah nuan enda nyumpah Allah Taala, lalu mati?” Disaut Jop, “Nuan bejaku munyi indu ke beli! Kati kitai semina nerima utai ti manah ari jari Allah Taala, lalu enggai nerima utai ti jai?” Dalam semua utai nya Jop nadai bedosa ngena mulut iya. Jop bisi tiga iku pangan. Sida nya Elipas, ari nengeri Teman, Bildat, ari menua Suah, enggau Sopar, ari menua Naamah. Lebuh sida ninga Jop balat merinsa, sida berunding deka nemuai lalu merindang iya. Lebuh sida tepedaka Jop ari jauh, sida nyau enda ngelala iya agi. Lebuh sida nyau ngelala iya, sida lalu bekeduie nyabak, nyarikka gari diri, lalu ngerabuka amau ngagai pala sida, laban sida balat tusah ati. Udah nya sida lalu duduk enggau iya tujuh hari tujuh malam, nadai bejaku seleka, laban sida meda iya kelalu balat merinsa. Nyau kelama udah nya, nya baru Jop bejaku, lalu nyumpah hari iya ada. Asuh hari nya nyadi petang, Allah Taala. Anang agi ngingatka hari nya. Anang agi nejuka penampak manchar ngagai iya. Asuh hari nya nyadi piam sereta petang enda dipeda achuk mata. Bungkur iya ngena mua hari, lalu lindung iya ari mata hari. Buai malam nya ari taun, Lalu anang ngitung iya agi. Asuh malam nya kusung, nadai pengaga. Asuh ti tau tepang nyumpah hari nya, Sida ke nemu merintah naga. Anang ngasuh bintang bendang-bendang tumbuh pagi hari. Anang ngasuh malam meda penampak dini hari. Sumpah meh malam nya, laban iya udah nejuka aku ada, Udah ngasuh aku natka pemerinsa enggau penusah. Manah agi enti aku mati dalam kandung indai aku Tauka mati lebuh aku baru ada. Nama kebuah indai aku mangku aku? Nama kebuah iya nusuka aku? Enti aku mati lebuh maya nya suba, aku tentu ulih diau jenuh belelak diatu, Tinduk baka raja enggau bala pemerintah Ke udah nirika baru istana ti lama. Nya baru aku ulih tinduk baka anak raja Ke ngisi rumah diri enggau perengka emas enggau pirak, Tauka tinduk baka anak mit ke mati lulus. Dalam kubur, orang ke jai badu agi ngereja pengawa ti jai, Lalu orang ke bekereja ulih belelak. Indah orang tutup deh nemu gaga ati diau dalam pemaik, Nadai agi ninga jaku perak tauka jaku pejal ti kasar. Semua orang bisi dia magang, orang ke tebilang nama enggau orang ke enda dikelala orang, Lalu ulun dilepaska ari tuan sida. Nama kebuah nejuka orang majak idup merinsa? Nama kebuah meri penampak ngagai orang ke tusah ati? Sida nganti pemati, tang pemati nadai datai. Sida rindu agi ke kubur ari ti rinduka pengaya. Sida lantang ati enti sida mati, lalu dikuburka. Allah Taala ngelalaika penunga sida ke jemah ila Lalu mempang sida. Aku enda makai, tang ngulit, Lalu aku enda badu bedemuh. Semua utai ti diketakutka aku, nyadi magang ba aku. Aku nadai pemaik, nadai ulih belelak, Lalu penusah aku enda nemu abis. Mayuh orang udah diajar nuan Lalu nuan udah ngeringka jari ti lemi. Lebuh orang tesangkut, lembut tulang sereta lelak, Jaku nuan meransang orang nya bediri. Diatu tu meh maya nuan empu deka ditinggang penusah, Lalu nuan deka temati-kutu napi penusah nya. Nuan udah nyembah Allah Taala, lalu pengidup nuan nadai jalai mantah. Nya alai nuan patut kempang ati sereta andal. Uji kingatka utai ti udah, lalu sebut siti pekara Alai orang ke lurus udah dituntung penusah. Aku bisi udah meda orang ngeradu tanah penyai Lalu nanam penyai baka ke nanam leka utai. Diatu sida ngetau penyai enggau penyalah. Allah Taala ringat lalu ngerusak sida baka kabut. Orang ke jai bejaku munyi singa ti negung, Tang Allah Taala ngasuh sida badu agi bemunyi lalu matahka ngeli sida. Sida mati baka singa ti nadai utai dipakai, Lalu semua anak sida pambar pendiau magang. Nyadi sekali siti pesan datai enda inggar, Datai ke aku nyau deka enda ulih ninga iya. Iya ngachau aku tinduk lalu ngasuh aku ngigau. Aku getar-getar sereta digak-digak. Semua tubuh aku getar-getar takut. Ribut ti enda deras muput ngagai mua aku, Bulu aku lalu nyeregu laban aku takut. Aku bisi meda utai bediri dia. Aku bebendar amat merening, tang aku enda ngelala utai nya. Udah nya aku lalu ninga munyi nyawa bejaku ari utai ti sunyi nya: “Kati mensia ulih diau lurus di mua Allah Taala Tauka diau tuchi di mua Allah Taala ti ngaga iya? Allah Taala enda arapka bala nembiak Iya ke di serega. Indah bala melikat Iya deh dikumbai Iya bisi penyalah. Kati nuan ngumbai Iya deka arapka utai ti ditempa ari tanah liat, Utai ti datai ari amau ti ulih dipichit baka indu buyah? Kitai nyangka idup lebuh pagi hari, Tang kitai mati enda ditemu orang sebedau lemai hari. Semua utai ti dikemisi kitai dirampas magang. Kitai mati, mengkang enda bepenemu-dalam.” Jop, uji nuan ngangau; kati orang bisi nyaut? Kati melikat bisi alai nuan ngadap? Munuh diri ngena pengeringat nya utai ti beli, ti nadai reti. Aku bisi udah kala meda orang ke beli, ti baka ke likun pendiau, Tang tekala nya aku nyumpah rumah ti alai sida diau. Bala anak sida nadai agi pengelikun. Nadai orang deka angkat bejaku ngarika sida dalam kot. Orang ke lapar deka bepakaika utai ti ditanam orang ke beli nya Nyengkaum gandum ti tumbuh ba madang duri Lalu orang ke aus deka ngining pengaya orang ke beli nya. Penyai ukai tumbuh ba tanah, Lalu penusah pen ukai mega pansut ari tanah. Ukai! Kitai empu ke ngasuh diri ditinggang penusah, Baka murun api ti terebai ke langit. Enti aku baka nuan, aku tentu deka nguing ngagai Allah Taala Lalu mantaika pekara aku di mua Iya. Kitai enda ulih meretika pemesai pengawa Allah Taala, Lalu kereja ajih Iya endang enda nemu abis. Iya ngasuh hari ujan Lalu manjah tanah. Sigi amat! Allah Taala ngangkatka orang ke baruh ati Lalu ngelantangka ati semua orang ke ngulit. Indah lebuh tengah hari deh sida besagam dalam petang. Tang Allah Taala ngelepaska orang ke seranta ari kuasa pemati. Iya ngelepaska orang ke seranta ari kena tekan. Iya meri pengandal ngagai orang ke seranta lalu ngasuh orang ke jai badu agi bemunyi. Beberekat meh orang ke diajar Allah Taala! Anang ngenggai lebuh TUHAN ti Pemadu Bekuasa disiplin nuan. Allah Taala ngemakal, lalu Iya mega malut bakal nya. Jari Iya ngemedis, lalu jari Iya mega ngerai. Iya deka seruran ngelepaska nuan ari utai ti tau ngemedis. Lebuh maya lapar pungkang, Iya deka nebus nuan ari pemati, Lalu lebuh maya perang, Iya deka nebus nuan ari kuasa pedang. Allah Taala deka ngelepaska nuan ari jaku petenah orang. Iya deka ngidupka nuan lebuh pengerusak nuntung. Nuan deka ketawaka pengerusak enggau lapar pungkang Lalu enda takutka jelu babas. Tanah umai ti dichangkul nuan, enda bebatu. Jelu babas enda nerekam nuan. Nuan deka diau likun dalam langkau kain nuan. Lebuh nuan meresa raban bedus nuan, nuan deka nemu sida likun. Bala anak nuan Deka mayuh baka daun rumput ti ba padang. Baka gandum ti mansau nyentuk ngagai maya iya patut diketau, Baka nya meh nuan deka gayu-guru gerai nyamai. Jop, kami udah nemu utai tu laban kami lama udah belajarka iya. Utai tu amat, nya alai terima iya. Sida deka berat agi ari pasir ti di tasik. Nya alai, jaku aku ti kasar enda patut ngasuh ati nuan tekenyit. Allah Taala ti Pemadu Bekuasa udah nimbak aku ngena laja Lalu ipuh laja nya nyerangkap ba sebelah tubuh aku. Allah Taala udah ngerintaika utai ti balat ngenakut kena Iya ngelaban aku. Keledai puas ati lebuh iya ngulam rumput, Lalu sapi enda bemunyi lebuh iya ngulam rumput ti rangkai. Tang sapa ulih makai pemakai ti nadai asai, ti enda begaram? Baka ni ku asai telu burak? Aku enda tetengukka pemakai ti baka nya, Lalu semua utai ti diempa aku ngasuh aku mutah. Nama kebuah Allah Taala enggai meri utai ti dipinta aku? Nama kebuah Iya enggai nyaut sampi aku? Manah agi enti Iya terus munuh aku! Enti aku nemu Iya deka munuh aku, aku deka ngingkak gaga ati, Enda ngira pemalat pemedis ti ditatka aku. Aku nemu Allah Taala endang kudus. Aku nadai kala ngelaban pesan Iya. Nama pengering kena aku idup? Nama guna aku majak idup enti aku nadai pengadang? Kati aku digaga ari batu? Kati tubuh aku digaga ari temaga? Aku nadai agi pengering kena aku ngidupka diri. Aku nadai nemu orang ke ulih nulung aku. Lebuh aku dituntung penusah baka tu, aku begunaka penelap ari pangan, Nemuka aku udah ninggalka Allah Taala tauka enda. Tang kita ke pangan aku nipu aku baka sungai Ti rangkai lebuh hari nadai ujan. Sungai nya nyau sebat laban seleju enggau ais, Tang lebuh hari nyau angat, sida lesap Lalu buntut sungai nya rangkai. Jelu unta ti narit kerita tesat begigaka ai. Sida segau-segau ngapa lalu mati di menua puang. Jelu unta ti narit kerita ari Sheba enggau Tema datai begigaka ai Tang sida asa ngapa ba tebing sungai ti rangkai. Ba peda aku, kita tu baka sungai nya. Kita meda penusah aku, lalu kita takut. Kati aku bisi udah kala minta pemeri ari kita Tauka nyuap orang ngarika aku, Tauka minta kita ngelepaska aku ari jari munsuh tauka ari jari raja ti nadai pengasih? Barang ku jaku, ajar meh aku. Padahka penyalah aku. Aku enggai bemunyi tang mendingka kita. Aku nyangka deka mendingka jaku ti menuku, Tang jaku kita mapap. Kita ngumbai aku bejaku ngapa. Enti baka nya, nama kebuah kita nimbal jaku serebana aku? Kita sedia deka bechabut undi berebutka anak mit ti patu nyadi ulun kita Lalu ngulihka pengaya pangan kita! Peda kita mua aku. Aku enggai bula. Penemu kita udah kelalu lunggar. Anang bingkuk penemu. Anang besalahka aku. Aku enda salah. Tang kita ngumbai aku bula. Kita ngumbai aku enda nemu bida entara utai ti ngena enggau utai ti salah. Pengidup mensia endang baka pengidup soldadu, Baka pengidup orang ke dipejalka ngereja pengawa ti berat, Baka ulun ke bisi ati deka belelak ba endur ti lindung, Baka orang gaji ke nganti diri terima gaji. Tiap bulan aku nadai kebuah idup. Tiap malam aku semina nemu pemerinsa. Lebuh aku gali deka tinduk, jam asai ti panjai. Aku gali kasak-kasak semalam-malam nganti hari tawas. Tubuh aku penuh laban ulat. Tubuh aku dibalut kerutup. Nanah nyau melilih pansut ari rumbak aku. Aku mansang tuai-setuai, nadai pengadang agi, Laju agi ari ripang ti dikena orang betenun. Ingat, O Allah Taala, pengidup aku semina kesuh seput aja. Pengelantang ati aku nyau udah abis. Diatu Nuan meda aku, tang jemah ila Nuan nadai agi meda aku. Enti Nuan ngiga aku, aku nadai agi. Aku enda ulih nagang diri bejaku! Aku ringat sereta pedis ati. Aku enda tau enda bejaku. Nama kebuah Nuan ngasuh aku dijaga orang? Kati Nuan ngumbai aku naga tasik? Aku gali nguji belelak, Ngarapka diri badu agi pedis. Tang Nuan ngemba aku ngena mimpi. Nuan ngasuh aku begenera sereta ngigau, Datai ke aku nyau minta diri dichekal lalu mati Ari ke idup dalam tubuh ti merinsa tu. Aku enggai agi idup. Aku nyau lelak idup. Awakka aku diau kediri. Pengidup aku nadai reti agi. Nama kebuah mensia beguna ba Nuan? Nama kebuah Nuan ibuhka utai ti dikereja sida? Nuan meresa sida tiap pagi Lalu nguji sida tiap minit. Kati Nuan enggai malik kebukai enda lama Chukup peluang alai aku nelan liur? Kati dosa aku bisi ngemediska Nuan ke ngejil aku? Nama kebuah Nuan belatih nimbakka laja ngagai aku? Kati aku kelalu ngenusahka Nuan? Kati Nuan enda ulih ngampun dosa aku? Kati Nuan enda ulih ngampun penyalah aku? Enda lama da agi aku deka diau dalam kubur Lalu lebuh Nuan ngiga aku, Nuan enda tetemuka aku. Allah Taala enda kala meri atur ti enda lurus. Iya nadai kala enda ulih ngereja utai ti ngena. Bala anak nuan tentu udah bedosa ngelaban Allah Taala. Nya alai Iya ngukum sida enggau pematut. Tang diatu nuan enda tau enda ngadap ngagai Allah Taala ti Pemadu Bekuasa, lalu minta Iya kasihka nuan. Enti nuan amat tau dikarapka sereta tuchi, Nya baru Allah Taala deka datai nulung nuan Lalu ngaduka ruang bilik nuan pulai baka selama, nyadika upah nuan. Semua pengaya nuan ti udah lenyau, sigi nadai reti Enti dibandingka enggau utai ti deka diberi Allah Taala ngagai nuan ila. Uji peratika enda lama penemu-dalam ti disebut orang ke dulu kelia. Uji peratika utai ti bendar ti udah dipelajarka aki ini kitai kelia. Kitai enda gayu lalu kitai nadai nemu utai. Kitai tu baka ayuk ti ngelansa meraka dunya. Tang awakka orang ke bepenemu-dalam ke dulu kelia, ngajar nuan. Pendingka utai ti disebut sida: “Temesing enda ulih tumbuh ba endur ti nadai ai. Sida nadai kala ditemu ba endur ti ukai paya. Enti ai nyau nadai agi, buluh nya dulu agi layu ari babas bukai, Lebuh sida agi kelalu mit dipantap lalu apin tau dikena. Orang kapir sebaka enggau buluh nya. Pengadang sida lenyau lebuh sida enda agi ingatka Allah Taala. Sida andal ati ke ubung, iya nya pukat empelawa. Enti sida nyandih ba pukat empelawa, pukat empelawa nya enda tan alai sida nyandih. Enti sida nyapai ubung, ubung nya enda ulih dikena sida ngangkatka diri bediri.” Orang ke jai matuk baka rumput ti dipanchar mata hari, Baka rumput ti nyerangkap ba sebelah kebun. Urat sida malut batu Lalu empakap ba genap igi batu. Tang enti sida dichabut, Nadai orang nemu sida udah bisi dia. Semina nya aja meh pengaga orang ke jai. Diatu orang bukai nyau datai lalu nganti endur sida. Tang Allah Taala enda sekali-kali ninggalka orang ke tetap ati ngagai Iya, Tauka meri tulung ngagai orang ke jai. Iya deka ngasuh nuan ketawa sereta manjung baru, Tang Iya deka mechat orang ke begedika nuan, Lalu rumah orang ke jai nya deka lesap. Kati mensia ulih bekelikuh enggau Iya? Iya tau nanyaka seribu macham tanya Ti enda ulih disaut. Allah Taala endang bepenemu-dalam sereta besai kuasa. Nadai orang tan ngelaban Iya. Iya enda madahka Diri lebuh Iya nginsitka bukit Lalu ngeruntuhka sida lebuh Iya ringat. Allah Taala ngasuh tanah berenyang, lalu ngasuh tanah belinggang. Iya nguyat tiang ti nungkat dunya. Iya ulih nagang mata hari tumbuh, Ulih nagang bintang manchar lebuh malam hari. Nadai orang nulung Allah Taala mintarka langit Tauka ngelunjak belakang naga tasik. Allah Taala ngantung Bintang Tiga di langit, Bintang Banyak, Bintang Tujuh, enggau Bintang Selatan. Kitai enda meretika utai ti dikereja Iya, Lalu kereja ajih Iya endang enda nemu abis. Allah Taala mansa, tang aku enda ulih meda Iya. Iya ngambi utai ti dikedekaka Iya, lalu nadai orang ulih nagang Iya. Nadai orang berani nanya Iya, “Nama utai ti dikereja Nuan?” Pengeringat Allah Taala endang enda berubah. Iya ngalahka bala munsuh Ke udah nulung Rahap, iya nya naga tasik ti ngelaban Iya. Nya alai, nama leka jaku kena aku nyaut Allah Taala? Taja pen aku nadai penyalah, aku semina ulih Minta kasih ari Allah Taala ti Hakim aku. Tang taja pia, enti sema Iya ngasuh aku bejaku, Enda meh aku arapka Iya deka mendingka aku. Iya ngasuh kabut mangka lalu ngerajaika tubuh aku Enggau nadai kebuah. Iya nadai meri awak alai aku nyintak seput. Iya udah ngasuh aku balat pedis ati. Enti utai tu pasal belaban ngena pengering, Iya endang kering. Enti utai tu pasal atur ti lurus, sapa ulih ngasuh Iya mansang ngagai kot? Taja pen aku nadai penyalah sereta tetap ati, tang jaku aku munyi ti madahka aku bisi penyalah, Lalu semua utai ti disebut aku, besalah aku magang. Lebuh orang ke nadai penyalah mati ngenyit, Allah Taala ketawa. Allah Taala nyerahka dunya tu ngagai orang ke jai. Iya ngasuh semua hakim buta. Lalu enti Allah Taala nadai udah ngereja nya, sapa deh? Aku jampat belinsur tuai, tang sehari pen nadai ga aku kala lantang. Penyampat aku belinsur tuai, baka perau ti pemadu laju, Ngelaju menaul ti nyambarka tikus. Laban aku dikumbai udah ngereja penyalah, kapa aku deka ibuhka nya? Nadai sabun ulih muai dosa aku. Allah Taala muai aku ngagai lubang ti penuh laban utai ti kamah, Datai ke gari aku nyau malu ke aku. Enti sema Allah Taala nya mensia, aku ulih nyaut Iya. Kami duai tau mutuska laya dalam kot. Tang nadai orang ulih ngatur kami duai, Nadai orang ulih ngakim Allah Taala enggau aku. Badu agi ngukum aku, O Allah Taala! Anang agi ngemba aku! Aku enda takut. Aku endang deka bejaku Laban aku nemu runding ati diri. Aku nyau leju idup. Pendingka pemalat putap aku. Anang ngukum aku, O Allah Taala. Padahka penyalah aku ti dikena Nuan bedawaka aku? Kati Nuan patut ngemalat nya merinsaka aku? Lalu mechat utai ti udah digaga Nuan Empu? Lalu udah nya tuchum meda pelan orang ke jai? Kati Nuan meda utai baka chara kami? Kati umur Nuan pandak baka umur kami? Nama kebuah Nuan mansik dosa aku Lalu begigaka semua penyalah aku? Nuan nemu aku endang nadai penyalah. Nuan nemu orang sigi nadai ulih ngelepaska aku ari jari Nuan. Jari Nuan Empu ti ngaga nempa aku, Lalu diatu jari nya mega ngerusak aku. Kingatka Diri ti udah ngaga aku ari tanah liat. Kati Nuan deka nginsarka aku nyadi amau baru? Nuan udah meri pengering ngagai apai aku, ngambika aku dikandungka. Nuan udah ngasuh aku mansang besai dalam kandung indai aku. Nuan udah ngaga tubuh aku ngena tulang enggau rakat Lalu malut tulang nya ngena gumpal isi enggau kulit. Nuan udah meri aku pengidup enggau pengerindu ti enda berubah Lalu aku idup laban Nuan ngibun aku. Tang diatu aku nyau nemu, Nuan endang lama udah berunding deka ngemediska aku. Nuan nengkilaka meda enti aku deka bedosa, Ngambika Nuan enggai ngampun aku. Lebuh aku bedosa, aku lalu kena laban penusah ketegal Nuan, Tang lebuh aku ngereja utai ti ngena, aku enda ulih ngangkatka pala diri Laban aku malu, Sereta balat merinsa. Lalu enti aku ulih ngangkatka pala diri Nuan lalu baka singa, ngasu aku. Indah kereja ajih deh dikena Nuan ngelaban aku. Nuan endang seruran bisi saksi ngelaban aku. Pengeringat Nuan ngagai aku mansang balat-sebalat. Nuan endang seruran bekiraka chara kena Nuan nyerang aku. O Allah Taala, nama kebuah Nuan ngelakka aku ada? Aku patut udah mati sebedau orang meda aku, Lalu pansut ari kandung terus ngagai pendam Baka ti nadai kala idup. Umur aku nyau deka abis. Anang ngachau aku! Awakka aku ngelantangka diri kala lebuh aku agi idup. Aku deka mupuk enda lama da agi, lalu enda pulai agi, Mansang ngagai menua ti piam sereta petang, Menua pemetang, alai ayuk enggau penyarut nyadi Alai penampak empu nyadi pemetang. Jop, kati nuan ngumbai kami enda ulih nyaut nuan? Lalu ngumbai jaku kelese nuan deka ngasuh kami enda tepansutka jaku? Nuan ngumbai diri nyebut utai ti amat. Nuan ngumbai diri tuchi di mua Allah Taala. Manah amat enti Allah Taala nyaut nuan! Iya tetap deka madahka ngagai nuan mayuh macham penemu-dalam. Pekara ti kelalu dalam lalu enda ulih disagam mensia pen bisi. Ukum ti dikena Allah Taala ngukum nuan lempung agi ari ti patut. Kati nuan nemu sekat Pemesai enggau kuasa Allah Taala? Allah Taala tinggi agi ari langit, Tang nuan enda ulih nyengkau langit. Allah Taala nemu dunya pemati, Tang nuan enda nemu dunya nya. Pemesai Allah Taala lebih agi ari pemesai dunya, Besai agi ari tasik. Enti Allah Taala nangkap nuan, lalu mai nuan ngagai kot, Sapa ulih nagang Iya? Allah Taala nemu sapa orang ke nadai guna. Iya meda semua penyai ti dikereja sida. Orang ke beli belabuh nyadi orang ke bepenemu-dalam Lebuh keledai ti siga ada jinak. Gaga betul ke ati nuan, Jop. Besampi ngagai Allah Taala. Buai penyai enggau penyalah ari rumah nuan. Udah nya baru nuan ulih ngeringka diri baru, tegap sereta berani. Nya baru nuan enda agi ingatka semua penusah nuan, Baka ai ti udah bah, lalu nadai dikingatka agi. Pengidup nuan deka nyadi terang agi ari panchar mata hari lebuh tengah hari, Lalu pemetang ti enda dipeda achuk mata ba pengidup nuan deka manchar baka rerak tawas. Nuan deka diau likun sereta penuh enggau pengadang. Allah Taala deka nyaga nuan, lalu ngasuh nuan belelak. Nuan enda takutka bala munsuh nuan. Mayuh orang deka minta nuan nulung sida. Tang orang ke jai deka malik kia-kia tusah ati Lalu nadai nemu jalai rari. Sida semina ngarapka diri deka mati. Tang aku nemu berunding baka nuan. Aku enda kurang agi ari nuan. Semua utai ti disebut nuan endang udah ditemu semua orang. Indah bala pangan aku deh ketawaka aku diatu. Sida ketawa taja pen aku lurus sereta nadai penyalah. Tang suba Allah Taala nyaut sampi aku. Nuan nadai penusah, tang taja pia nuan beduan aku. Nuan mukut orang ke baru deka rebah. Tang bala perumpak enggau orang ke enda nangika Allah Taala diau nadai utai ngachau, Taja pen sida manggaika diri ba pengering sida empu. Indah burung enggau jelu deh ulih ngajar nuan mayuh macham utai. Uji tanyaka penemu-dalam ari utai ti idup di darat, enggau di tasik. Semua sida nemu diri udah digaga TUHAN. Allah Taala Empu ke ngatur pengidup utai ti digaga Iya. Allah Taala endang bekuasa atas seput semua mensia. Tang baka dilah nuan ti ngasaika penyamai utai ti diempa, Baka nya meh pending nuan deka lantang ninga leka jaku. Lebuh Allah Taala ngeruntuh, sapa ulih nirika utai nya baru, Lalu sapa ulih ngelepaska orang ke ditutup Allah Taala dalam rumah jil? Kemarau nyadi lebuh Allah Taala nagang hari ujan. Bah nyadi lebuh Allah Taala ngasuh hari ujan. Allah Taala endang kering sereta seruran menang. Orang ke ditipu enggau orang ke nipu endang di baruh kuasa Iya. Iya muai penemu-dalam ari bala pemerintah Lalu ngasuh bala tuai nyadi baka orang ke beli. Iya muai raja ari kerusi diraja sida, lalu ngejil sida. Iya ngemaruhka bala imam enggau orang ke bekuasa. Iya ngasuh orang ke tau dikarapka, badu agi bejaku, Lalu muai penemu-dalam ari orang ke tuai. Iya mechat orang ke megai kuasa Lalu muai pengering bala pemerintah. Iya ngasuh penampak manchar ba endur ti pemadu petang. Iya ngasuh mayuh bengkah bansa kering sereta bekuasa, Tang udah nya Iya ngalahka sida lalu ngerusak sida. Iya ngasuh bala tuai sida beli Lalu nejuka sida segau-segau, charut runding sereta tesat. Sida bejalai gama-gama dalam petang, Guir-guir baka orang ke mabuk. Mata aku udah meda semua utai tu. Pending aku udah ninga lalu meretika utai nya. Utai ti ditemu nuan mega ditemu aku. Aku enda kurang ari nuan. Tang aku deka bejaku enggau Allah Taala, ukai enggau nuan. Aku deka bejaku enggau Iya pasal pekara aku. Nuan ngena pemula ngelalaika diri enda nemu utai. Nuan tu baka lutur ti enda nemu ngeraika orang. Anang bejaku, nya baru orang ngumbai nuan bepenemu-dalam! Pendingka aku lebuh aku madahka pekara aku. Nama kebuah nuan bula? Kati nuan ngumbai pemula nuan ulih mai penguntung ngagai Allah Taala? Kati nuan nguji bejaku ngarika Allah Taala? Kati nuan deka bejaku ngarika Iya dalam kot? Enti Allah Taala meresa nuan, bisi enda ke Iya tetemuka utai ti manah ba nuan? Kati nuan ngumbai diri ulih ngemelika Allah Taala, baka nuan ke ngemelika mensia? Taja pen nuan belalai bepilih mata, Iya deka nganu nuan, lalu kuasa Iya deka ngenakutka nuan. Jaku-dalam ti disebut nuan nadai guna baka amau. Jaku kelakar nuan lemi baka tanah liat. Anang bemunyi, lalu beri aku peluang bejaku. Awakka utai nyadi ari jaku nya. Aku sedia deka berambunka nyawa aku. Aku nadai utai diadang agi, nya alai enda ngawa enti Allah Taala munuh aku. Aku deka bejaku ngarika diri empu di mua Iya. Kada enda pemerani aku ulih ngelepaska aku, laban nadai orang ke jai berani bediri di mua Allah Taala. Diatu pendingka jaku penerang ari aku. Aku sedia deka mantaika pekara aku, laban aku nemu diri endang ngena. Allah Taala, kati Nuan datai deka nyalah aku? Enti pia, aku sedia enggai bejaku lalu mati. Awakka aku minta dua bengkah utai. Enti Nuan besetujuka utai nya, nya baru aku enda belalai ari Nuan. Badu agi ngukum aku, lalu badu agi ngemba aku. Bejaku dulu, O Allah Taala, ngambika aku nyaut. Tauka, awakka aku bejaku, lalu Nuan nyaut. Nama dosa aku? Nama penyalah aku? Nama penyalah aku ti dikena Nuan bedawaka aku? Nama kebuah Nuan ngelalaika mua Nuan ari aku? Nama kebuah Nuan ngaga aku baka munsuh? Kati Nuan nguji ngemba aku? Aku tu orang ke nadai guna, semina daun ti dikebuka ribut. Nuan nyerang sebatang rumput ti rangkai. Nuan balat amat nyalah aku. Indah penyalah ti dikereja aku lebuh aku agi biak, deh dikingatka Nuan semua. Nuan nanchang kaki aku ngena rantai. Nuan nengkilaka genap singkang aku. Indah bekau kaki aku deh abis diperesa Nuan. Ketegal nya, aku nyau repuk baka kayu ti buruk, baka baju ti abis diempa gegat. Semua kitai tu endang ada lemi sereta nadai daya magang. Semua kitai endang enda panjai umur sereta ditinggang penusah seumur idup. Kitai mansang besai tuai lalu jampat layu baka bungai. Kitai lesap baka ayuk. Kati Nuan deka malik ngagai aku, Allah Taala? Tauka, nyara lalu ngakim aku? Nadai utai ti tuchi ulih pansut ari utai ti enda tuchi baka mensia. Umur mensia endang udah diletak Nuan. Penyampau bulan alai mensia idup endang udah ditetapka Nuan. Nuan endang udah ngeletak utai nya, lalu utai nya enda ulih diubah. Anang malik ngagai kami, lalu anang ngachau kami. Awakka kami ngelantangka diri idup merinsa, enti kami ulih. Kayu ti udah ditebang, agi bisi pengadang. Iya tau nelesak lalu tumbuh baru. Taja pen urat iya nyau tuai, lalu pugu iya mati, tang enti iya dipanjah, iya deka nelesak baru baka kayu ti muda. Tang kami mati, lalu nya meh pengujung kami. Lebuh kami mati, dini alai kami? Baka sungai ti badu agi rarat, enggau danau ti rangkai, baka nya meh mensia mati, lalu enda angkat agi. Sida enda dani, seagi-agi langit meruan bisi. Sida enda ulih dani. Naka meh pemanah enti Nuan ngelalaika aku di dunya pemati. Awakka aku dilalaika nyentuk ngagai maya Nuan badu agi ringat. Udah nya, letak meh maya alai Nuan ngingatka aku. Enti orang mati, kati iya ulih angkat idup baru? Tang aku deka nganti maya ti manah agi, nganti maya penusah tu abis. Nya baru Nuan deka ngangau, lalu aku deka nyaut, lalu Nuan deka gaga ati ke aku, ti udah digaga Nuan. Udah nya baru Nuan deka nengkilaka genap singkang aku, tang enda nyidi dosa aku. Nuan deka ngampun lalu muai dosa aku. Nuan deka muai semua penyalah aku. Maya deka datai alai bukit deka runtuh lalu tingkah deka dibuai. Ai deka numpurka batu, lalu ujan ti bangat deka nusurka tanah. Nya meh jalai Nuan ngerusak pengadang dalam pengidup kami. Nuan ngalahka kami, lalu muai kami belama iya. Mua kami ngerecham lebuh kami mati. Bala anak kami bulih basa, tang kami enda nemu nya, lalu orang pen nadai mega madahka ngagai kami, lebuh sida kena pechat. Kami semina natka tubuh diri ti pedis enggau ati ti tusah. Nadai orang ke bepenemu-dalam deka bejaku munyi nuan tauka bejaku ngarika diri empu ngena leka jaku ti nadai reti. Enti nitihka peneka ati nuan, nadai orang deka nangika Allah Taala, lalu nadai mega orang deka besampi ngagai Iya. Penyai nuan nyata ari utai ti disebut nuan. Nuan nguji ngelalaika penyai diri ngena pemintar nuan bejaku. Aku enda ibuh ngukum nuan. Nuan diukum genap leka jaku ti disebut nuan empu. Kati nuan ngumbai diri orang ke terubah ada? Kati nuan bisi dia lebuh Allah Taala ngaga bukit? Kati nuan bisi ninga pelan ti digaga Allah Taala? Kati penemu-dalam semina bisi ba nuan siku aja? Nadai utai ti ditemu nuan, ti enda ditemu kami. Kami belajarka penemu-dalam ari orang ke buban bulu pala, orang ke dulu agi ada ari apai nuan. Allah Taala deka ngelantangka ati nuan. Nama kebuah nuan agi nulak nya? Kami udah bejaku ngarika Iya ngena jaku ti alus. Tang nuan isin, lalu melutka mata merening ngagai kami. Nuan ringat ngagai Allah Taala, lalu ngelaban Iya. Kati mensia ulih nyadi chukup tuchi? Kati orang ulih nyadi lurus di mua Allah Taala? Indah bala melikat Iya deh enda dipechayaka Iya. Indah sida nya deh enda tuchi ba mata Iya. Kitai ngirup penyai baka ke ngirup ai. Sigi amat. Kitai tu jai. Kitai tu nadai guna. Jop, diatu pendingka utai ti ditemu aku. Orang ke bepenemu-dalam udah ngajar utai ti bendar ngagai aku utai ti udah dipelajarka sida ari aki ini sida, lalu sida enda ngelalaika utai ti resia. Menua sida nadai orang kampar. Orang nadai mai sida ninggalka Allah Taala. Orang ke jai, ke nekanka pengidup orang bukai deka natka pemerinsa seumur idup. Nyawa ti ngemba deka merak ba pending sida, lalu bala penyamun deka nyerang sida lebuh sida ngumbai diri likun. Sida nadai jalai ngarapka diri ulih rari ari pemetang, laban siti pedang benung nganti, deka munuh sida, lalu bala burung benung nganti, deka makai bangkai sida. Sida endang nemu diri deka merinsa. Penusah ti besai, baka raja ti bekuasa, benung nganti deka nyerang sida. Nya meh pengujung orang ke ngenggam lalu ngedarka jari ngelaban Allah Taala lalu nyakap Iya ti Pemadu Bekuasa. Sida nya meh orang ke ngalahka nengeri ti besai lalu ngerampas rumah ti udah ditinggalka orang rari. Tang semua nengeri enggau rumah nya deka dirusak lebuh maya perang. Sida enda ulih lama kaya. Nadai utai ti dikembuan sida ulih tan lama. Indah ayuk sida deh deka lesap, lalu sida enda ulih ngerarika diri ari pemetang. Sida deka nyadi baka dan kayu ti ditunu api, enggau bungai ti dikebuka ribut. Enti sida chukup beli lalu arapka penyai, penyai meh deka nyadika upah sida. Sebedau sida mati, sida deka layu, layu baka dan, lalu enda ulih idup baru. Sida deka nyadi baka batang anggur ti gugur buah puda, baka kayu kana ti gugur bungai. Orang ke enda arapka Allah Taala, nadai peturun, lalu api deka ngerusak rumah ti digaga ngena chara makai suap. Sida bekira deka ngaga pengachau, enggau ngereja penyai. Ati sida seruran deka nipu. Kati kita enda nemu ngetu bejaku? Kati kita enda tau enda nyadi orang ke pengabis dudi badu bejaku? Enti sema kita baka aku, lalu aku baka kita, aku pen ulih meh mansutka jaku munyi kita, nemu ngilikka pala baka orang ke bepenemu-dalam lalu ngujan kita ngena leka jaku. Aku ulih ngeringka kita ngena jaku ajar lalu enda ngetu bejaku merindang kita. Tang utai ti disebut aku nadai ulih nyaup aku, lalu enti aku enda engkeretik, nadai ga nya ulih ngasuh aku badu agi pedis. Allah Taala, diatu Nuan udah ngasuh aku lelak. Nuan udah nejuka kami sebilik dibunuh. Nuan udah nangkap aku. Nuan tu munsuh aku. Aku tu semina tinggal kulit enggau tulang aja, lalu orang ngumbai nya nunjukka penyalah aku. Allah Taala ringat, lalu nyarikka tubuh aku. Iya begedika aku lalu melutka mata merening ngagai aku. Orang enchebirka mulut ngeleseka aku. Sida besedul bekelingika aku, lalu nampar mua aku. Allah Taala udah nyerahka aku ngagai jari orang ke jai. Sebedau nya, aku udah diau nadai utai ngachau, tang Allah Taala nyekal rekung aku, mangkaka aku, lalu ngeredakka aku. Allah Taala ngaga aku nyadika alai Iya belajar nimbakka laja, lalu Iya nimbakka laja ngagai aku ari semua endur, laja ti ngebuska isi lalu ngemakalka aku, tang taja pia Iya mengkang enda sinu ati ke aku. Iya enda ngetu-ngetu ngemakalka aku. Iya nyerang aku baka soldadu ti gila laban pemenchi. Aku ngulit lalu begari ngena kain guni, lalu duduk ditu malai amau laban aku alah. Aku nyabak datai ke mua aku nyau mirah, lalu mata aku nyau bangkung, tang aku nadai ngaga ulah ti kasar lalu sampi aku ngagai Allah Taala endang amat. O dunya! Anang ngelalaika utai ti salah ti udah dikereja orang ngagai aku! Anang mampul kangau aku ke minta atur ti lurus! Di serega bisi siku orang ti deka bejaku ngarika aku, lalu setanah enggau aku. Bala pangan aku ngelanyaika aku. Aku nyabak minta tulung Allah Taala. Aku begunaka orang bejaku ngarika aku ngagai Allah Taala, baka ke bejaku ngarika pangan. Umur aku nyau deka abis, lalu aku enda pulai agi. Aku nyau deka mati. Aku enda tentu ulih enseput agi. Aku nadai utai dianti agi, semina nganti kubur aja. Aku meda pemalat orang ngelanyaika aku. Aku endang betul ati, Allah Taala. Terima meh leka jaku aku. Nadai orang bukai deka nyukung utai ti disebut aku. Nuan udah nutup ati sida ngambika sida enda mereti. Anang nejuka sida ngalahka aku diatu. Jaku-dalam ti dulu kelia madahka siku orang nyual pangan iya kena ngulihka duit, lalu bala anak iya merinsa ketegal nya. Diatu orang ngena jaku-dalam tu ngelaban aku. Sida datai lalu ngeludah mua aku. Ati aku balat tusah datai ke mata aku nyau rapa. Semua tubuh aku balat amat kurus. Orang ke ngumbai diri nadai penyalah tekenyit ati, lalu semua sida nuduhka aku enda arapka Allah Taala. Orang ke ngumbai diri lurus majak ngumbai diri ngena. Tang enti sema semua sida datai magang lalu bediri di mua aku, aku tetap nadai tetemuka sida nya bisi penemu-dalam. Umur aku nyau deka abis. Perambu aku udah puntan magang. Aku nadai pengadang agi. Tang bala pangan aku ngumbai malam siang hari. Sida ngumbai penampak nyau semak, tang aku nemu diri agi mengkang dalam pemetang. Semina dunya pemati aja ti diadang aku, alai aku deka gali lalu tinduk dalam pemetang. Aku deka ngumbai kubur nyadika apai aku, lalu ulat ti makai aku deka dikumbai aku indai enggau menyadi indu aku. Nya alai dini alai pengadang aku? Sapa bisi meda pengadang aku? Pengadang enda mupuk enggau aku lebuh aku nurun ngagai dunya pemati. Nama kebuah nuan ngumbai kami tu beli baka sapi? Nuan semina ngemediska diri empu aja ringat baka nya. Kati dunya tu deka nadai orang nguan laban nuan ringat? Kati Allah Taala deka nginsitka bukit kena ngemuaska ati nuan? Penampak orang ke jai ulih dipadamka. Api iya enda ulih menyadi agi. Lampu ti dalam langkau kain sida deka piam. Sida amat kering bejalai, tang diatu sida tesangkut. Sida rebah, dipanjuk jaku lalau sida empu. Sida bejalai nempuh jarin, lalu kaki sida kena sintak. Panjuk nyintak tumbit sida, lalu nanchang sida. Amba dilalaika ba tanah. Panjuk udah ditan ba jalai ti ditengah sida. Sida dikelingi utai ti balat ngenakut. Utai nya betitihka sida genap kali sida nyingkang. Dulu menya sida udah kaya, tang diatu sida lapar. Penusah ti besai bediri, lalu nganti ngimbai sida. Penyakit ti tau munuh nyelamar ba sebelah tubuh sida lalu ngasuh jari enggau kaki sida buruk. Sida ditarit ari langkau kain ti alai sida diau likun, lalu sida diirit ngagai Raja Pemati. Diatu langkau kain sida nadai utai agi, merirang lalu ditaburka dalam langkau kain sida. Urat enggau dan sida layu lalu rangkai. Sida nadai agi didinga rita di menua tu enggau di menua bukai. Orang nadai agi ingatka sida. Sida deka diburu ari menua orang ke idup, diburu ari penampak ngagai pemetang. Sida nadai peturun, nadai telesak. Ari timur nyentuk ke barat, semua orang ninga penusah sida lalu getar-getar takut. Nya meh pengujung orang ke jai, pengujung orang ke enda nangika Allah Taala. Nuan seruran mechat aku, lalu enda nemu malu ke jalai nuan ngayahka aku. Enti sema aku bisi udah ngereja penyalah baka ni ku nya tau ngawa nuan? Nuan ngumbai diri manah agi ari aku, lalu ngumbai penusah aku tu nunjukka aku udah ngereja penyalah. Kati nuan enda nemu, semua utai tu udah dikereja Allah Taala? Iya udah nan panjuk kena Iya nyintak aku. Aku nyakal ulah Iya ti kasar, tang nadai orang mendingka aku. Nadai orang ninga aku minta atur ti lurus. Allah Taala udah mempang jalai aku, lalu aku enda ulih nengah jalai nya. Iya udah ngelalaika jalai aku dalam pemetang. Iya udah ngambi semua pengaya aku lalu ngerusak pemanah nama aku. Iya malu aku ba sebelah tubuh. Iya nyabut pengadang aku baka ke nyabut kayu lalu ninggalka aku layu lalu mati. Allah Taala ringat lalu ngeransi ngelaban aku. Iya ngaga aku baka munsuh ti pemadu jai. Iya ngasuh bala soldadu Iya nyerang aku. Sida ngaga parit ngelulung langkau kain aku. Allah Taala udah nyungkak bala kami sebilik ninggalka aku. Aku nyau nyadi orang kampar ba orang ke ngelala aku. Kaban belayan enggau bala pangan aku nyau nadai agi. Orang ke nyadi temuai dalam rumah aku nyau nadai agi ingatka aku. Bala orang gaji aku ti indu ngaga aku baka orang kampar enggau baka orang bansa bukai. Lebuh aku ngangauka orang gaji aku, iya enda nyaut taja pen aku minta iya nulung aku. Bini aku enda tan nyium bau kesuh seput aku, lalu sida menyadi lelaki aku enggai datai semak ngagai aku. Bala anak mit enda bebasaka aku, lalu ketawa lebuh sida meda aku. Pangan rapat aku kejika aku. Orang ke pemadu dikerinduka aku, udah nguing ngelaban aku. Aku tu semina tinggal kulit enggau tulang aja. Aku nyau deka enda ulih ngidupka nyawa diri. Kita tu pangan aku! Kasihka aku! Jari Allah Taala udah nyamah aku. Nama kebuah kita merinsaka aku baka chara Allah Taala? Kati kita enda udah chukup merinsaka aku? Naka meh pemanah enti orang bisi ngingatka jaku aku lalu nuliska jaku nya dalam bup! Tauka nebukka leka jaku nya ba batu ngena pat ngambika tan belama iya. Laban aku nemu, aku bisi siku pengari ti idup ti deka bejaku ngarika aku ba pengujung dunya ila. Lalu lebuh kulit aku udah abis diempa penyakit, ngena tubuh tu aku deka meda Allah Taala ngimbai aku, lalu mata aku empu deka meda Iya ukai meda orang kampar. Ati enda sabar nganti! Enti kita nyebut, “Baka ni ku jalai kitai deka merinsaka iya?” Lalu nyebut, “Semua pekara tu bepun ba iya magang”; kita patut takutka pedang, laban pedang mai pengeringat Allah Taala, ngambika kita nemu, Allah Taala Empu ke ngakim mensia. Utai ti udah disebut nuan nya mechat aku, tang aku nemu jalai nyaut nuan. Nuan tentu nemu, kenyau ari dulu kelia, lebuh mensia terubah diengkah ba dunya, orang ke jai enda ulih lantang lama. Sida nyangka ulih nyadi besai, bediri tinggi, datai ke pala sida nyau nyaruk remang, tang sida deka dikebuka baka amau. Orang ke udah ngelala sida deka alit ati ke penunga sida lenyau. Sida deka lesap baka mimpi, baka genera lebuh malam hari, lalu nadai dipeda agi. Orang ke jai deka lesap ari endur alai sida diau, lalu bala anak sida deka mulaika utai ti udah dichuri sida ari orang ke seranta. Dulu suba tubuh sida biak sereta kering, tang enda lama da agi, sida deka nyadi amau. Tang pemakai nya bebali nyadi pait dalam perut sida, pait baka rachun. Orang ke jai ngemutahka pengaya ti dichuri sida. Allah Taala deka ngambi utai nya pulai baru, nyengkaum utai ti dalam perut sida. Utai ti ditelan orang ke jai nya baka rachun. Utai nya munuh sida baka pantuk ular ti bisa. Sida enda ulih idup lalu meda sungai minyak kana tauka sungai ti rarat ai tusu enggau ai manyi. Sida enda tau enda ngelengkaka semua utai ti udah ulih sida. Sida nadai peluang ngelantangka diri ngena pengaya sida, laban sida udah nekanka pengidup, sereta enda ngintu orang ke seranta lalu ngerampas rumah ti udah digaga orang bukai. Sida enda nemu badu amu. Lebuh sida makai, sida nadai ninggalka teda, tang diatu pengaya sida nyau abis. Lebuh sida mujur semua pemerinsa deka ninggang sida. Awakka sida ngemuaska diri bepakaika utai! Allah Taala deka ringat lalu ngukum sida. Lebuh sida nguji ngerarika diri ari pedang besi, panah temaga deka nimbak sida. Laja ngebuska tubuh sida. Darah sida beteritik ari ujung laja ti bekilap, lalu sida balat takut. Semua utai ti udah ditaruh sida, dirusak magang. Api ti ukai ditungkun jari mensia nunu sida enggau semua sida sebilik. Serega mandangka dosa sida, lalu dunya besaksi ngelaban sida. Semua pengaya sida deka dirusak ulih pemalat pengeringat Allah Taala. Nya meh pengujung orang ke jai ti udah diletak Allah Taala ke sida. Beri aku peluang bejaku, lalu udah nya, lebuh aku udah bejaku, nya baru kita tau enchebirka mulut ngeleseka aku. Aku ukai belaya enggau mensia. Aku bisi kebuah enda liat ati. Peda aku tu, ngambika kita temati-kutu lalu enda bemunyi. Lebuh aku berundingka utai ti udah nyadi ba aku, aku temati-kutu, lalu getar-getar. Nama kebuah Allah Taala nejuka orang ke jai idup, nejuka sida panjai umur sereta kaya? Sida ulih meda uchu ichit, lalu idup meda semua sida mansang besai tuai. Allah Taala nadai ngasuh penusah nuntung rumah sida. Sida nadai kala takut. Semua jelu sapi sida peridi magang lalu mudah beranak. Bala anak sida belanda sereta bemain baka raban anak domba lalu betanda nitihka rentak munyi belikan enggau kesuling. Sida diau nadai utai ngachau lalu mati enda bemunyi, nadai merinsa. Orang ke jai enda ngasuh Allah Taala ibuhka sida. Sida enggai nemu peneka Allah Taala dalam pengidup sida. Dalam runding sida, nadai guna sida betuaika Allah Taala lalu nadai mega penguntung besampi ngagai Iya. Sida ngumbai pengering sida ulih ngasuh sida mujur, tang Aku kejika pelan orang ke jai. Kati penampak orang ke jai bisi kala dipadamka? Kati sida bisi udah kala dituntung penusah? Kati Allah Taala bisi udah kala ringat ngagai orang ke jai lalu ngukum sida? Berapa penyuah sida udah baka rumput ti rangkai ti dikebuka ribut, baka ampa ti ditabanka kabut? Kita ngumbai Allah Taala ngukum anak mit ketegal dosa apai iya. Tang ku aku, “Awakka Allah Taala ngukum orang ke bempu dosa. Awakka Allah Taala ngukum orang ke salah. Awakka orang ke bedosa diukum ketegal dosa sida empu. Awakka sida ngasaika pengeringat Allah Taala ti Pemadu Bekuasa. Lebuh kitai mati, kati kitai amat ibuhka pengelantang bala anak kitai tauka enda? Kati mensia ulih ngajar Allah Taala? Indah melikat di serega deh diakim Iya. Tang orang bukai nadai pengelantang. Sida idup lalu mati nabanka dendam. Tang semua orang sebaka magang, mati lalu dikuburka. Semua sida dibalut ulat magang. Aku nemu penyai runding kita. Ku kita nanya, “Namaka penyadi rumah orang ke tinggi pangkat nya diatu, orang ke ngereja penyai?” Kati kita nadai udah kala berandau enggau orang ke seruran bejalai ngagai menua bukai? Kati kita enda nemu utai ti ditusui sida? Lebuh Allah Taala ringat lalu ngukum, orang ke jai enda diukum Iya. Nadai orang bedawaka orang ke jai tauka malas sida ketegal utai ti udah dikereja sida. Lebuh sida dianjung ngagai pendam, ngagai lumbung sida ke chukup dijaga, beribu-ribu iku orang enggau nganjung sida. Indah tanah deh nemu begadai-gadai ngelamun bangkai sida. Tang kita nguji merindang aku ngena jaku ti mapap! Semua saut kita bula magang! Kati Allah Taala bisi penguntung enti nuan ngereja utai ti lurus? Kati pemadas pendiau nuan ulih mai penguntung ngagai Allah Taala? Nuan dianu lalu diakim Allah Taala ukai laban nuan nangika Allah Taala tang laban nuan udah balat bedosa ketegal semua penyai ti dikereja nuan. Kena nuan mejalka menyadi nuan mayar utang iya, nuan ngambi gari iya, lalu nejuka iya nadai gari dikena. Nuan enggai meri ai ngagai orang ke aus, lalu enggai meri orang ke lapar makai. Nuan ngerampas semua menua ngena kuasa enggau pangkat nuan. Nuan ukai semina enggai nulung indu ke balu, tang nuan mega ngerumpak sereta merinsaka orang ke nadai apai indai. Nya alai, diatu nuan dikelingi panjuk, lalu nuan ngenyit takut. Hari nyau balat amat petang datai ke nuan nyau enda ulih meda utai, lalu bah besai ngelamun nuan. Kati Allah Taala enda diau di serega ti pemadu tinggi lalu nilik ke baruh ngagai bintang, taja pen sida nya ba endur ti tinggi? Lalu ku nuan nanya, “Nama utai ti ditemu Allah Taala? Iya dilindung mua hari, nya alai baka ni ku iya ulih ngakim kitai?” Nuan ngumbai mua hari ti tebal ulih ngasuh Iya enda ulih meda, lebuh Iya bejalai ba kebung langit. Kati nuan mutus ati deka bejalai nengah jalai ti seruran ditengah orang ke jai? Indah sebedau timpuh datai deh sida anyut ditabanka ai bah. Ku sida bejaku ngagai Allah Taala, ‘Anang ngachau kami,’ lalu ku sida bejaku, ‘Nama utai ti ulih dikereja Allah Taala ti Pemadu Bekuasa ngagai kitai?’ Tang iya ti bendar, Allah Taala Empu ke ngasuh sida nyadi kaya-raja. Aku sigi kejika pelan orang ke jai. Orang ke badas, gaga ati, lalu orang ke nadai penyalah, ketawa lebuh sida meda orang ke jai diukum. Semua utai ti dikemisi orang ke jai, dirusak magang, lalu api nganguska utai bukai ti tinggal. Jop, manah nuan bebaik enggau Allah Taala, lalu badu agi ngaga Iya nyadi munsuh, nya baru Iya deka merekatka nuan. Terima meh ajar ti diberi Iya. Simpan leka jaku Iya dalam ati nuan. Sigi amat. Nuan enda tau enda ngemaruhka diri lalu pulai baru ngagai Allah Taala lalu badu agi ngereja penyai ti dikereja dalam rumah nuan. Buai semua emas nuan. Buai emas nuan ti pemadu tulin ngagai buntut sungai ti rangkai. Awakka Allah Taala ti Pemadu Bekuasa nyadika emas nuan, lalu awakka Iya nyadika pirak nuan. Nya baru nuan deka seruran manggaika pengarap nuan ba Allah Taala lalu nemu Iya endang penatai pengaga nuan. Lebuh nuan besampi, Iya deka nyaut nuan, lalu nuan deka ngamatka sumpah ti udah digaga nuan. Nuan deka mujur dalam semua utai ti dikereja nuan, lalu penampak deka manchar ba jalai ti ditengah nuan. Allah Taala ngemaruhka orang ke sumbung lalu ngidupka orang ke baruh ati. Iya deka ngelepaska nuan, enti nuan nadai penyalah, enti nuan ngereja utai ti ngena. Naka meh pemanah enti aku tetemuka endur alai aku ulih nemu Allah Taala, lalu nemu chara datai ngagai endur alai Iya. Aku deka mantaika pekara aku di mua Iya lalu mantaika semua penemu kena aku bejaku ngarika diri empu. Aku keran deka nemu utai ti deka disebut Iya enggau chara Iya nyaut aku. Kati Allah Taala deka ngelaban aku enggau pengabis pengering Iya? Enda. Iya deka mending lebuh aku bejaku. Aku endang betul ati, lalu aku ulih berandau enggau Allah Taala. Iya deka ngumbai aku nadai penyalah sekali aja enggau ke belama iya. Aku udah begigaka Allah Taala di timur, tang Iya nadai dia. Aku nadai tetemuka Iya lebuh aku ngiga Iya di barat. Allah Taala udah bekereja di utara enggau di selatan, tang aku mengkang nadai meda Iya. Tang taja pia, Allah Taala nemu genap singkang aku. Enti Iya ngabas ati aku, Iya deka nemu ati aku tuchi. Enggau ati ti tetap aku nengah jalai ti dipilih Iya lalu aku enda sekali-kali limpang ari jalai nya. Aku seruran ngereja utai ti diasuh Allah Taala. Aku nitihka peneka Iya. Allah Taala endang enda berubah. Nadai orang ulih nyakal penemu Iya tauka nagang Iya ngereja utai ti deka dikereja Iya. Iya deka ngamatka utai ti udah diperambu Iya ke aku. Perambu nya siti ari pemayuh pelan Iya. Aku getar-getar takut di mua Iya. Nama kebuah Allah Taala enda ngeletak maya ngakim, hari alai Iya ngayanka atur ti lurus ngagai orang ke betuaika Iya? Orang nginsitka kelai entara ngambika tanah sida besai agi. Sida ngenchuri jelu bedus, lalu nyimpan jelu nya ba raban jelu sida empu. Sida ngambi keledai orang ke nadai apai indai, lalu nyimpan jelu sapi ti diempu indu ke balu nyentuk ngagai maya indu nya ulih mayar utang iya. Sida nagang orang ke seranta nerima hak diri lalu mejalka orang ke seranta rari lalu belalai. Nya alai orang ke seranta nyau baka jelu keledai begigaka pemakai di menua puang. Sida nadai endur bukai alai sida begigaka pemakai ke bala anak sida. Sida dipejalka ngetau ba umai orang bukai, lalu begumpulka buah anggur ari kebun anggur orang ke jai. Lebuh malam hari sida tinduk enda bepua, sereta nadai utai kena ngangatka tubuh. Sida basah laban ujan ti labuh ba bukit, lalu sida engketut belindung ngimbai batu. Orang ke jai beulunka anak mit ti nadai apai indai, lalu ngambi bala anak orang ke seranta nyadika bayar utang sida. Tang orang ke seranta gawa nadai diberi gari. Sida enda diberi makai lebuh sida ngetau gandum. Sida diasuh mitan buah kana ngulihka minyak, lalu mitan buah anggur ngulihka wain, tang sida empu aus. Dalam mayuh bengkah nengeri orang ke bakal enggau orang ke nyau deka mati ngangau enggau sabak, tang Allah Taala enggai ibuhka sampi sida. Orang nulak penampak. Sida enda meretika penampak, lalu enda nitihka iya. Orang ke pemunuh angkat dini hari lalu bebunuhka orang ke seranta, lalu lebuh malam hari, iya ngenchuri. Orang ke butang nganti hari petang. Iya ngelalaika mua diri ngambika orang enda ngelala iya. Penchuri tama ngagai rumah orang lebuh malam hari, tang lebuh siang hari sida belalai, ngerarika diri ari penampak. Sida takutka penampak siang hari, tang sida enda takutka pemetang. Orang ke jai anyut ditabanka ai bah, lalu tanah sida disumpah Allah Taala. Sida nadai agi bekereja dalam kebun anggur sida empu. Sida lela baka seleju ti dipanchar mata hari, enggau laban kemarau. Baka nya meh orang ke bedosa lesap ari dunya orang ke idup. Indah indai sida empu deh enda agi ingatka sida diatu. Sida diempa ulat, lalu dirusak baka kayu ti udah rebah. Utai nya nyadi laban sida merinsaka indu ke balu lalu enda ngayanka penelap ngagai sida indu ke nadai anak. Ngena pengering Iya, Allah Taala ngerusak orang ke kering. Allah Taala bekereja, lalu orang ke jai mati. Allah Taala tau nejuka sida idup likun, tang Iya seruran nengkilaka ulah sida. Orang ke jai kaya enda lama, tang udah nya sida layu baka rumput, baka tangkai gandum ti udah ditetak. Kati orang ulih ngumbai utai tu nadai udah nyadi? Kati orang ulih ngumbai aku bejaku bula? Kati orang ulih ngitung bala melikat ke bekereja ke Iya? Kati bisi endur ti enda kena panchar penampak Allah Taala? Baka ni ku orang ulih nyadi lurus di mua Allah Taala? Baka ni ku mensia tau nyadi tuchi? Enti di mata Iya, bulan enda terang, lalu bintang enda tuchi, baka ni ku anak mensia, ke semina ulat aja, enggau mensia ti semina belut aja!” Nuan meri jaku lalau ti manah lalu nuan magi penemu nuan ngagai orang ke beli baka aku tu! Dalam pikir nuan, sapa deka ningaka semua jaku nuan? Sapa ngasuh nuan bejaku baka tu? Roh orang ke mati begetar di dunya pemati. Ba mata Allah Taala, dunya pemati endang tebuka. Nadai utai ngelindung dunya nya ari mata Iya. Allah Taala mintarka langit utara lalu ngitang dunya ba langit ti puang. Allah Taala ngisi mua hari enggau ai lalu nagang mua hari pambus laban pemerat ai nya. Iya ngelalaika bulan peranama di belakang mua hari. Iya nyeraraka penampak ari pemetang ngena siti chengkerung ti digaga ba atas ai. Lebuh Iya ngemba tiang ti nungkat langit, tiang nya takut lalu berenyang sereta begetar. Pengering Allah Taala ti ngalahka tasik. Iya ngena pemintar Iya ngerusak naga ke benama Rahap Kesuh seput Allah Taala ti ngasuh langit terang, lalu jari Iya ti munuh naga ti rari nya. Tang tu semina nunjukka mimit aja pemesai kuasa Iya, semina jaku telai ti udah didinga kitai. Sapa nemu pemesai kuasa Allah Taala? seagi-agi Allah Taala meri aku seput, mulut aku enggai sekali-kali nyebut utai ti jai, dilah aku enggai sekali-kali madahka utai ti bula. Aku enggai sekali-kali ngumbai kita ngena. Aku deka majak ngumbai diri nadai penyalah nyentuk ngagai maya aku mati. Aku enggai sekali-kali badu ngumbai diri ngena. Aku endang nemu diri nadai udah ngereja utai ti salah. Awakka semua orang ke nyakal sereta ngelaban aku diukum baka orang ke jai enggau orang ke enda lurus. Nama utai ti diadang orang ke enda nangika Allah Taala, lebuh Allah Taala ngambi seput sida? Lebuh penusah datai, kati Allah Taala deka ningaka sabak sida? Sida patut udah keran deka bempu pengaga ti diberi Iya. Sida patut udah seruran besampi ngagai Iya. Awakka aku ngajar kita pasal pemesai kuasa Allah Taala, lalu nerangka utai ti udah diperambu Allah Taala ti Pemadu Bekuasa. Tang enda ibuh, laban kita empu udah meda utai nya. Nya alai nama kebuah kita bejaku mapap munyi nya? Tu jalai Allah Taala ti Pemadu Bekuasa ngukum orang ke jai, orang ke mangah. Sida nyangka mayuh anak lelaki, tang semua sida nya deka mati beperang. Bala anak sida seruran suntuk pemakai. Sida ke agi idup, deka mati laban penyakit. Indah balu sida deh enggai ngulitka pemati sida. Orang ke jai nyangka bisi pirak ti enda ulih itung sereta mayuh agi gari ari ti dipeguna orang, tang sekeda orang ke badas deka ngena gari nya lalu orang ke lurus ati, deka bulih pirak nya. Orang ke jai ngaga rumah baka pukat empelawa tauka baka langkau ulun ke nyaga umai. Ba pengujung iya sida deka gali natka pengaya diri, lalu lebuh sida dani, sida deka nemu pengaya sida nyau nadai agi. Utai ti balat ngenakut deka nuntung sida baka bah. Ribut ti muput malam hari deka ngebuka sida. Ribut ari timur deka ngebuka sida ari rumah sida. Ribut nya deka ngebuka sida balat amat lebuh sida enggau naka ulih ngerarika diri. Kabut nya nyau guntam-guntam mangkaka sida lebuh sida belanda, ngenakutka sida ngena kuasa iya ti tau ngerusak. Pirak endang diulihka ari lumbung pirak. Bisi mega endur alai nuchi emas. Besi dikali ari tanah lalu engkeraju dilelaka orang ari batu. Orang ngiga utai dalam lumbung ti pemadu petang. Sida ngiga di buntut dunya, lalu ngali batu dalam petang. Sida numbak lumbung jauh ari endur alai orang diau, jauh ari endur ti udah kala ditengah mensia. Dia meh endur alai sida gawa kediri-diri, betayun ngena tali dalam lumbung nya. Pemakai tumbuh ba tanah, tang di baruh tanah nya semua utai rumuh magang baka ke diempa api. Batu ti dalam tanah ngundan batu nilam, lalu amau batu nya ngundan emas. Menaul nadai nemu jalai tama ngagai lumbung nya, indah burung ti pemadu lansik deh enda kala meda lumbung nya. Nadai singa tauka jelu bukai ti mangah kala nengah jalai ti sunyi nya. Orang ngali batu ti pemadu kering, Ngali nyentuk ngagai buntut bukit. Lebuh sida nebuk lubang nengah batu, sida tetemuka batu ti berega. Sida ngali tanah nyentuk ngagai entigis ulu sungai lalu tetemuka utai ti enda kala dipeda. Tang dini alai kitai ulih tetemuka penemu-dalam? Dini alai kitai tau belajar ngambika kitai mereti? Nadai mensia nemu jalai ngagai penemu-dalam, lalu iya nadai ditemu di menua mensia. Tasik ti dalam enggau tasik ti mit Madahka penemu-dalam nadai dalam sida. Penemu-dalam enda ulih dibeli ngena pirak tauka emas. Emas ti pemadu tulin enggau batu ti pemadu berega enda ulih dibandingka enggau iya. Iya berega agi ari emas, lalu enda ulih disilih enggau emas ti tulin. Penemu-dalam lebih agi berega ari batu karang tauka batu kristal, tauka batu rubi. Batu jakut kuning ti pemadu manah, enggau emas ti pemadu tulin Enda ulih dibandingka enggau penemu-dalam. Nya alai, ari ni penatai penemu-dalam? Dini alai kitai belajar ngambika kitai mereti? Nadai utai ti idup ulih meda iya. Indah burung ti terebai deh enda ulih meda iya. Indah pemati enggau pengerusak deh madahka diri semina bisi udah ninga berita ngapa pasal iya. Semina Allah Taala aja nemu jalai ngagai endur penemu-dalam, Laban Iya meda pengujung dunya, Meda semua utai di bap langit. Lebuh Allah Taala meri kuasa ngagai ribut lalu ngeletak pemesai tasik, lebuh Allah Taala ngeletak endur alai ai ujan labuh, enggau arus ti deka ditengah kilat enggau mua hari, nya baru Allah Taala meda penemu-dalam, nguji iya, lalu ngemendarka iya. Ku Allah Taala bejaku ngagai mensia, “Enti kita deka bepenemu-dalam, kita enda tau enda nangika TUHAN. Enti kita deka nemu reti utai, kita enda tau enda ngelengkaka penyai.” Jop lalu belabuh bejaku baru. Naka meh pemanah enti pengidup aku ulih diulang baru baka lebuh maya Allah Taala ti ngibun aku. Lebuh maya nya suba Allah Taala endang seruran enggau aku lalu meri aku penampak lebuh aku bejalai nengah petang. Nya meh maya aku kaya-raja, lalu kaul aku enggau Allah Taala nyaga rumah aku. Allah Taala ti Pemadu Bekuasa bisi enggau aku lebuh maya nya suba, lalu aku dikelingi semua anak aku. Bala jelu sapi enggau kambin aku mansutka mayuh ai tusu, lalu aku bulih mayuh minyak kana ari pitan aku. Genap kali bala tuai nengeri baum lalu aku duduk enggau sida, bala orang ke biak meri awak jalai aku mansa lebuh sida meda aku, lalu orang ke tuai bediri masa aku. Bala tuai orang mayuh lalu ngetu bejaku. Indah orang ke pemadu tinggi pangkat, deh enda engkeretik. Semua orang ke meda aku, tauka ninga pasal aku bela bejakuka pemanah utai ti udah dikereja aku. Lebuh orang ke seranta ngangau, aku nulung sida. Aku nulung orang ke nadai apai indai, ti nadai orang nulung. Orang ke pengabis merinsa idup, muji aku lalu aku nulung indu ke balu diau likun. Aku endang seruran ngereja utai ti lurus, sereta enda bepilih mata. Aku nyadi mata ke orang ke buta lalu nyadi kaki ke orang ke enda ulih bejalai. Aku udah nyadi apai ke orang ke seranta lalu setanah enggau orang kampar ke kena laban penusah. Aku ngerusak kuasa orang ke jai lalu ngelepaska orang ke diperinsaka sida. Aku endang seruran ngadang diri panjai umur lalu mati di rumah diri enggau nyamai. Aku tu baka kayu ti galak urat ti seruran chukup ai lalu dan seruran basah laban ambun. Semua orang seruran muji aku, lalu pengering aku nadai kala ngelebuka aku. Lebuh aku meri jaku lalau, orang enda engkeretik lalu diau jenuh mendingka jaku aku, lalu lebuh aku udah badu bejaku, sida nadai ibuh nambahka jaku ngagai utai ti disebut aku. Leka jaku aku ngenyamaika ati sida baka leka ujan. Genap iku sida bela gaga ati nerima jaku aku, baka orang bumai ke gaga ati ke ai ujan lebuh musin bungai. Aku tuchum ngagai sida, lebuh sida enda kempang. Mua aku ti lantang, meransang sida. Aku nyadi tuai sida, lalu meri pemutus penemu. Aku nguluka sida baka raja ke nguluka bala soldadu iya, lalu ngelantangka sida, lebuh ati sida tusah. Tang diatu, lelaki ke biak agi ari aku, beduan aku! Apai sida endang nadai guna, datai ke aku enggai ngasuh sida nulung ukui aku ngibun bedus. Sida nya orang ke nadai pengering agi, ke kelalu lembut tulang lalu enda ulih bekereja ke aku. Sida iya kelalu seranta sereta keberuran datai ke sida nyau bekunyahka urat ti rangkai ba tanah lebuh malam hari, di menua ti nadai orang nguan. Sida nyabut lalu makai sebarang utai ti tumbuh di menua puang. Indah urat utai ti enda nyamai, deh abis diempa sida! Semua orang manjung muru sida, baka ke muru penchuri. Sida diau dalam lubang gua, dalam lubang ti ba tingkah. Lebuh sida dalam utan, sida meraung munyi jelu lalu bekempit duduk di baruh pun kayu. Sida nya orang ke nadai guna! Sida udah dibuai ari menua tu. Diatu sida datai lalu ketawaka aku. Ba sida, aku tu nadai reti tang semina orang ke diketawaka sida. Sida nyau kejika aku. Sida ngumbai diri kelalu manah lalu enda patut begulai enggau aku, lalu ngeludah mua aku. Laban Allah Taala udah ngasuh aku lemi sereta nadai daya agi, sida lalu ngelaban aku enggau naka pemalat. Bala orang ke jai tu lalu nyerang aku ari mua. Sida muru aku. Sida sedia deka nyerang aku lalu ngerusak aku. Sida mempang jalai aku rari, lalu ngerusak aku, lalu nadai orang nagang sida. Sida beterudus tama nengah lubang ba dinding kuta aku lalu ninggang aku. Aku balat amat takut. Pangkat aku lenyau, baka ke dikesuhka ribut, lalu pengandal aku ke diri deka menang, lesap baka mua hari. Diatu aku nyau deka mati. Nadai utai ulih muai pemerinsa aku. Lebuh malam hari, semua tulang aku pedis magang. Tubuh aku enda badu pedis. Allah Taala ngeruntun rekung baju aku lalu mulaska gari aku nadai temu tunga. Iya ngempaska aku ngagai luchak, datai ke aku nyau baka tanah. Aku ngangauka Nuan, O Allah Taala, tang Nuan nadai kala nyaut, lalu lebuh aku besampi, nuan enda mending. Nuan balat amat jai enggau aku. Nuan merinsaka aku ngena semua kuasa Nuan. Nuan nejuka ribut ngebuka aku. Nuan ngelambungka aku ngena ribut biaubalai. Aku nemu Nuan deka ngasuh aku mati, lalu muai aku ngagai endur ti endang udah digalau Nuan ke semua mensia. Nama kebuah Nuan nyerang orang ke udah rusak, orang ke nadai daya agi, ke ngangau minta saup? Kati aku enda kala nyabak enggau orang ke ditinggang penusah lalu berasai sinu ati ke orang ke suntuk? Aku ngadang diri tau bulih pengelantang enggau penampak, tang penusah enggau pemetang datai. Ati aku balat tusah laban pengirau enggau pemedis. Aku merinsa tiap hari. Aku bejalai dalam petang, nadai dipanchar mata hari. Aku bediri di mua orang mayuh, minta saup orang. Aku nyabak seilu-ilu tusah ati munyi nyawa pasun tauka burung unta. Kulit aku nyau bebali chelum. Tubuh aku nyau angat laban penyakit. Dulu menya aku ninga munyi musik ti ngasuh ati gaga, tang diatu aku semina ninga munyi orang ke ngulit enggau nyabak. Aku udah besumpah madahka diri enggai merening ngagai indu enggau ati ti kanji. Nama utai ti dikereja Allah Taala ti Pemadu Bekuasa ngagai kitai? Baka ni ku jalai Iya malas utai ti dikereja mensia? Iya ngasuh penusah ti besai enggau pengerusak ninggang orang ke ngereja penyalah. Allah Taala nemu semua utai ti dikereja aku. Iya meda semua singkang aku. Aku besumpah madahka diri nadai kala ngereja penyai lalu nadai kala nipu orang. Awakka Allah Taala nimbang aku ngena dachin ti betul, nya baru Iya deka nemu aku endang nadai penyalah. Enti aku udah limpang ari jalai ti ngena tauka nejuka diri tetengukka penyai, enti jari aku udah kamah laban dosa, awakka utai ti ditanam aku dirusak magang, tauka awakka orang bukai makai pemakai ti ditanam aku. Enti aku udah kala inginka bini orang, lalu ngipa iya ba mua pintu iya, awakka bini aku manduk pemakai ke lelaki bukai lalu tinduk ba peninduk lelaki bukai. Penyai ti baka nya patut diukum ngena pemati. Utai nya baka api ti ngerusak, ti datai ari neraka, ti nganguska semua utai ti dikemisi aku. Lebuh orang gaji aku mutap ngelaban aku, aku mending lalu aku manah enggau sida. Enti aku enda, baka ni ku aku ulih bediri di mua Allah Taala ila? Nama utai ti deka disebut aku lebuh Allah Taala datai ngakim aku? Allah Taala ngaga aku lalu Iya mega ngaga orang gaji aku. Aku nadai kala enggai nyaup orang ke seranta. Nadai aku kala nejuka indu ke balu diau tusah ati tauka nejuka anak mit ti nadai apai indai lapar, lebuh aku makai. Seumur idup, aku udah ngibun sida. Lebuh aku tetemuka orang ke suntuk, ke kelalu seranta lalu enda ulih meli gari ke diri empu, aku meri iya gari ti digaga ari bulu bedus ari raban bedus aku empu. Nya baru iya deka muji aku enggau pengabis ati iya. Enti aku udah nipu anak mit ti nadai apai indai, ketegal aku nemu diri deka menang enti aku bechara dalam kot, awakka lengan aku dipatahka. Awakka lengan aku diputuska ari bau aku. Aku nangika ukum Allah Taala, nya kebuah aku enda ulih ngereja utai ti baka nya. Aku nadai kala manggaika diri ba pengaya tauka temegahka pengaya aku. Aku nadai kala nyembah mata hari ti manchar terang tauka bulan ti manah gaya. Aku nadai kala dibai tesat lalu ngemesaika sida besiumka jari diri ketegal bebasaka sida. Dosa ti baka nya patut diukum ngena pemati, laban iya besangkalka Allah Taala ti Pemadu Bekuasa. Aku nadai kala gaga ati lebuh munsuh aku merinsa, tauka lantang ati lebuh sida dituntung penusah. Aku nadai kala bedosa besampi minta sida mati. Semua orang ke bekereja ke aku nemu aku endang seruran ngelaluka temuai ngagai rumah aku. Aku ngelaluka temuai tama ngagai rumah aku lalu aku enda kala nejuka sida tinduk ba jalai raya. Orang bukai nguji ngelalaika dosa diri, tang aku nadai kala ngelalaika dosa aku. Aku nadai kala nangika jaku orang. Aku nadai kala enda bemunyi, tauka diau di rumah, ketegal takutka diri dikeleseka sida. Kati orang nadai deka mendingka utai ti disebut aku? Aku besumpah, semua utai ti disebut aku endang amat magang. Awakka Allah Taala ti Pemadu Bekuasa nyaut aku. Enti dawa ti dikena munsuh aku besalahka aku dituliska magang ngambika aku ulih meda dawa nya, aku deka ngelekatka dawa nya ba bau aku lalu ngengkahka dawa nya nyadika makota ba pala aku. Aku deka madahka ngagai Allah Taala semua utai ti udah dikereja aku lalu enda malu bediri di mua Iya. Enti aku udah ngenchuri tanah ti dipumai aku lalu udah ngerampas tanah nya ari orang, lalu enti aku udah bisi makai utai ti tumbuh ba tanah nya tang nejuka orang ke nanam utai nya, lapar awakka umai aku tumbuh rumput enggau lalang lalu enda tumbuh gandum enggau barli. Baka nya ku pengujung jaku Jop. Sida tiga lalu badu agi nyaut Jop, laban iya majak madahka diri nadai ngereja penyalah. Tang siku orang ke bediri semak dia, ke benama Elihu, nyau enda ulih natka diri agi pedis ati, laban Jop beluruska diri empu lalu besalah Allah Taala. (Elihu nya anak Barakel, peturun Bus, ari raban peturun Ram.) Iya mega pedis ati ngagai pangan Jop ke tiga iku nya, laban sida nadai nemu jalai nyaut Jop, ti ngujungka Allah Taala baka ke salah. Elihu nya orang ke pengabis biak ke semua sida. Nya alai iya nejuka semua sida ke tuai bejaku dulu. Lebuh iya meda sida tiga nya enda ulih nyaut Jop, iya pedis ati lalu belabuh bejaku. Aku tu biak, lalu kita tuai. Nya kebuah aku enda berani mantaika runding diri ngagai kita, laban dalam runding aku, kita patut bejaku dulu, lalu kita ke tuai patut bekunsika penemu-dalam ti dikembuan kita. Tang iya ti bendar, Roh Allah Taala ti Pemadu Bekuasa ke meri penemu-dalam ngagai kitai. Ukai penuai umur kitai ti ngasuh kitai bepenemu-dalam tauka nemu utai ti ngena. Nya alai aku diatu minta kita mendingka aku madahka runding diri ngagai kita. Aku udah liat ati mendingka kita bejaku lalu nganti kita begigaka jaku ti menyana agi. Aku udah diau diri mendingka kita, lalu ninga kita alah penemu. Nadai siku kita ulih madahka jaku Jop salah. Baka ni ku kita tau ngumbai diri udah tetemuka penemu-dalam? Allah Taala enda tau enda nyaut Jop, laban kita enda tesautka iya. Jop bejaku ngagai kita, ukai ngagai aku, tang aku sigi enggai sekali-kali nyaut ngena chara kita. Jop, sida udah alah jaku laban nuan, enda tesautka nuan. Kati aku patut majak nganti baru aku tau bejaku? Sida enda bemunyi, bediri tegir-tegir, enda nemu utai ti patut disebut diri agi. Aku deka nyaut nuan diatu lalu madahka runding aku ngagai nuan. Aku enda ulih natka diri enda bejaku. Aku enda ulih nagang diri bejaku. Enti aku nadai peluang bejaku, aku deka meletup baka kambut wain ti penuh laban wain ti baru. Aku enda ulih natka diri agi. Aku enda tau enda bejaku. Aku ukai ngarika sapa-sapa dalam randau tu, lalu aku pen enda mega muji sapa-sapa, laban aku enda nemu chara muji orang, lalu Allah Taala deka ngukum aku enggau ngenyit, enti aku muji sapa-sapa. Nya alai, Jop, pendingka enggau manah semua utai ti deka disebut aku. Aku diatu udah sediaka mantaika runding diri. Semua jaku aku tu endang datai ari ati aku empu, lalu aku nyebut utai ti bendar. Roh Allah Taala udah ngaga aku lalu ngasuh aku idup. Saut aku, enti nuan ulih. Sediaka penemu nuan. Ba mata Allah Taala, tua tu sebaka. Tua tu sama ditempa ari tanah. Nya alai nuan nadai kebuah takutka aku. Aku ukai deka ngalahka nuan. Tu jaku nuan ti udah didinga aku: “Aku enda salah. Aku nadai udah ngereja penyalah. Aku nadai penyalah, lalu aku enda bedosa. Tang Allah Taala begigaka tegal kena Iya ngelaban aku lalu ngaga aku baka munsuh. Iya nanchang kaki aku ngena rantai. Iya nengkilaka semua utai ti dikereja aku.” Tang, aku madahka ngagai nuan, Jop, nuan salah. Allah Taala bekuasa agi ari mensia. Nama kebuah nuan besalah Allah Taala ngumbai Iya nadai kala nyaut jaku putap kitai? Taja pen Allah Taala enda ngetu bejaku, nadai orang mendingka utai ti disebut Iya. Lebuh orang tinduk malam hari, Allah Taala bejaku dalam mimpi enggau genera. Iya ngasuh sida mendingka utai ti disebut Iya, lalu sida takut ninga jaku tangkan Iya. Allah Taala bejaku ngasuh sida badu agi bedosa lalu nagang sida ngenyumbungka diri. Iya enggai nejuka sida dirusak. Iya ngelepaska sida ari kuasa pemati. Allah Taala nganu kitai ngena penyakit lalu ngisi tubuh kitai enggau pemedis. Orang ke sakit enggai makai. Indah pemakai ti pemadu manah deh ngasuh sida mutah. Tubuh sida mansang kurus-sekurus. Semua tulang sida ayan magang. Sida baru deka mansang ngagai dunya pemati. Nyangka ukur melikat bisi deka datai nyaup sida, siku ari beribu-ribu iku melikat Allah Taala, ke ngasuh kitai ingatka pengawa kitai. Enggau ati ti kasih melikat nya bejaku, “Lepaska sida! Sida enda tau nurun ngagai dunya pemati. Tu tebus kena ngelepaska sida.” Tubuh sida deka mansang biak sereta kering baru. Lebuh sida besampi, Allah Taala deka nyaut. Sida deka nyembah Allah Taala enggau ati ti gaga. Allah Taala deka ngaga utai ngena baru ke sida. Genap iku sida deka bejaku di mua orang mayuh, “Aku udah bedosa. Aku nadai ngereja utai ti ngena, tang Allah Taala udah ngampun aku. Iya udah nagang aku mansang ngagai dunya pemati, lalu aku mengkang idup.” Allah Taala endang seruran ngereja semua utai nya, lalu ngidupka nyawa orang lalu ngasuh orang nya gaga idup. Jop, diatu pendingka utai ti disebut aku. Anang bemunyi, lalu awakka aku bejaku. Tang enti nuan bisi utai ti deka disebut nuan, awakka aku ningaka utai nya. Aku deka gaga ati ngumbai nuan ngena. Tang enti nuan nadai utai disebut, anang bemunyi, lalu pendingka aku, ngambika aku ngajar nuan jalai nyadi orang ke bepenemu-dalam. Udah nya Elihu lalu bejaku: “Dingaka jaku aku, kita ke bepenemu-dalam, lalu singitka pending kita ngagai aku, kita ke nemu utai. Peratika jaku aku baka nyawa ke meratika penyamai utai ti dipakai. Awakka kitai milih utai ti ngena. Awakka kitai meri pemutus penemu pasal bagi utai ti manah. Jop ngumbai diri nadai penyalah, lalu ngumbai Allah Taala enggai meri iya atur ti lurus. Ku Jop nanya, ‘Baka ni ku aku ulih bula lalu ngumbai diri salah? Aku nyau deka mati laban bakal, tang aku enda bedosa.’ “Kati kita udah kala meda orang ke baka Jop ti nadai kala nangika Allah Taala. Iya rindu begulai enggau orang ke jai lalu segau-segau bejalai enggau orang ke bedosa. Ku Jop, ‘nadai guna kitai nguji nitihka peneka Allah Taala.’ ” “Pendingka aku, kita ke mereti! Kati Allah Taala ti Pemadu Bekuasa deka ngereja utai ti salah? Iya ngupah orang nitihka utai ti dikereja sida lalu ngukum sida enggau pematut. Allah Taala ti Pemadu Bekuasa enda ngereja penyai, lalu Iya enda kala meri atur ti enda lurus. Sapa meri Allah Taala kuasa merintah dunya? Sapa ngengkahka dunya tu ba jari Iya? Enti Allah Taala ngambi seput pengidup ari kitai, lalu ngambi seput nya pulai baru ngagai Iya Empu, semua mensia deka mati magang lalu pulai nyadi amau baru. “Pendingka aku diatu, enti kita amat bepenemu-dalam. Kati orang ke begedika atur ti lurus, ulih megai perintah? Kati kita besalah Allah Taala ti lurus sereta bekuasa, ke bejaku ngagai raja, ‘Nuan tu nadai guna,’ lalu bejaku ngagai orang ke tinggi pangkat, ‘Nuan tu orang ke jai’; lalu enda ngemesaika orang ke kaya lebih agi ari orang ke seranta? Laban semua sida iya digaga Iya magang. Enda lama da agi sida deka mati; Ba urung tengah malam sida digusak lalu mati, lalu orang ke bekuasa ukai dibunuh mensia. “Laban Allah Taala nengkilaka semua ulah kitai, lalu meda semua singkang kitai. Nadai pemetang ulih ngelalaika orang ke bedosa ari Allah Taala. Laban Allah Taala enda ibuh ngeletak maya kitai mupuk lalu diakim ulih Iya. Iya enda ibuh mansik orang ke bekuasa sebedau Iya nganchurka sida, lalu ngeletak orang bukai nganti sida Laban Iya nemu utai ti dikereja sida, nya alai Iya muai lalu ngeredakka sida lebuh malam hari. Iya nyamah sida di mua orang mayuh ketegal penyai ti dikereja sida, laban sida enggai agi nitihka Iya lalu enda bedulika pesan Iya. Ketegal sida, orang ke seranta nyabak ngangauka Allah Taala, lalu Iya ningaka kangau sida ke kena perinsa. Lebuh Allah Taala enda ngereja utai, sapa ulih mantah Iya? Lebuh Iya ngelalaika mua Iya, sapa ulih meda Iya, nemuka nya bansa tauka orang? Ngambika orang ke enda nangika Allah Taala, tauka orang ke nipu orang mayuh enda megai perintah. “Jop, kati nuan udah ngaku dosa nuan di mua Allah Taala lalu besemaya enda agi bedosa? Kati nuan bisi udah minta Allah Taala ngayanka penyalah nuan, lalu nuan besemaya enggai agi ngereja penyai? Laban nuan nulak utai ti dikereja Allah Taala, kati nuan patut ngarapka Iya deka ngereja utai ti dikinginka nuan? Laban nuan empu ke patut milih, ukai aku; nya alai sebut utai ti ditemu nuan. Orang ke mereti deka nyebut ngagai aku, lalu orang ke bepenemu-dalam ke ninga aku deka nyebut, ‘Jop bejaku laban iya enda nemu utai lalu semua utai ti disebut iya sigi nadai reti magang.’ Manah amat enti Jop diuji enggau penuh, laban iya nyaut munyi orang ke jai. Laban iya angkat ngelaban Allah Taala kena iya nambahka dosa diri. Iya betempap jari di mua semua kitai, lalu ngeleseka Allah Taala.” Enti nuan nanya, ‘Baka ni ku dosa aku tau ngawa Nuan? Nama untung aku, enti aku enda bedosa?’ Aku deka nyaut nuan, enggau bala pangan nuan. Peda nuan langit! Peda nuan mua hari ti tinggi agi ari nuan! Enti nuan bedosa ngelaban Iya, nama utai ulih nuan ari nya? Enti nuan ngereja mayuh macham penyalah, nama utai ti dikereja nuan ngagai Iya? Enti nuan lurus, nama utai ti diberi nuan ngagai Iya? Nama utai ti diterima Iya ari jari nuan? Orang bukai nyau merinsa laban dosa nuan, lalu pengelurus nuan ulih mai penguntung ngagai orang bukai. Lebuh orang kena tekan, sida bedemuh. Sida nyabak minta orang ngelepaska sida. Tang sida enda nguing ngagai Allah Taala, ke ngaga sida, ke meri sida pengering lebuh malam hari, ke ngajar sida lebih agi ari ke ngajar jelu di dunya tu, lalu ngasuh sida lebih agi pintar ari burung. Sida nyabak minta tulung, tang Allah Taala enda nyaut, laban sida sumbung sereta jai. Nadai guna sida ngangau. Allah Taala ti Pemadu Bekuasa enda meda tauka ninga sida. Jop, nuan madahka diri enda ulih meda Allah Taala. Tang nuan patut nganti enggau ati ti liat. Pekara nuan bisi di mua Iya. Nuan ngumbai Allah Taala enda ngukum, ngumbai Iya enda tentu ibuhka dosa. Nadai guna nuan majak bejaku. Nuan endang nyata enda nemu utai ti disebut diri. Penemu aku luas. Ngena utai ti ditemu aku, aku deka mandangka pengelurus Allah Taala ti udah ngaga aku. Utai ti disebut aku ngagai nuan nadai bula siti. Orang ke di mua nuan nya orang ke amat bepenemu-dalam. Allah Taala endang amat bekuasa, lalu Iya enda ngeleseka orang; Iya nemu semua utai. Iya enda nejuka orang ke bedosa majak idup, lalu Iya meri atur ti lurus ngagai orang ke kena perinsa. Iya nyaga orang ke lurus. Iya ngemendarka sida merintah baka raja lalu nejuka sida dibasa belama iya. Lalu enti sida ditanchang ngena rantai, lalu kena perinsa ketegal utai ti udah dikereja sida, Allah Taala deka madahka ngagai sida utai ti udah dikereja sida enggau penyalah sida, ti nunjukka sida udah ngenyumbungka diri. Iya ngasuh sida mendingka jaku ajar Iya, lalu ngasuh sida ngelengkaka penyai. Enti sida mending lalu betuaika Iya, sida deka bulih pengaya seumur idup, sereta nyamai diau. Tang enti sida enda mendingka Iya, sida deka dipantap ngena pedang, lalu mati mengkang nadai nemu utai. Orang ke enda arapka Allah Taala majak ringat; sida enda besampi minta tulung lebuh Iya nanchang sida. Sida mati biak, nabanka ati ti malu. Tang Allah Taala ngajar orang ngena pemerinsa lalu muka mata sida ngena penusah. Allah Taala udah mai nuan pansut ari penusah ngagai endur ti luas ti nadai utai nekul, lalu pemakai ti pemadu manah ditugungka ba mija nuan. Tang diatu nuan benung diukum nitihka pematut. Bejimat nuan, enggai ke nuan kena tipu lalu makai suap, tauka pengaya nuan mai nuan limpang. Nadai guna nuan ngangau minta tulung. Semua pengering nuan enda ulih nulung nuan diatu. Anang ngajihka malam datai alai semua bansa deka mati. Bejimat nuan, enggai ke nuan nguingka diri ngagai penyai. Pemerinsa nuan endang diasuh datai kena nagang nuan ari penyai. Kingatka pemesai kuasa Allah Taala. Iya pengajar ti pemadu besai. Nadai orang ulih madahka ngagai Allah Taala utai ti patut dikereja Iya tauka ngumbai Iya udah ngereja penyai. Iya endang seruran dipuji ketegal utai ti dikereja Iya. Nuan empu pen enda tau enda mega muji Iya. Semua mensia udah meda utai ti udah dikereja Iya, tang kitai semina ulih ninjau ari jauh. Kitai enda ulih nemu enggau silik pasal pemesai kuasa Iya tauka ngitung umur Iya. Allah Taala ngambi ai ari dalam tanah lalu ngaga ai nya nyadi leka ujan. Iya ngasuh ujan labuh ari mua hari ti bekeberai ninggang semua mensia. Nadai orang nemu jalai mua hari mindah tauka jalai guntur meletup di langit, ti alai Allah Taala diau. Iya ngasuh kilat nyelar di langit, tang buntut tasik mengkang petang. Nya meh chara Iya nupi mensia lalu meri pemakai ti mayuh. Iya nangkap kilat ngena jari Iya lalu ngasuh kilat nya mangka ba endur ti udah diletak. Guntur madahka hari deka kabut lalu jelu sapi nemu kabut nya deka datai. Kabut ngasuh tungkul ati aku ketap-ketap. Pendingka ulih semua kita, munyi nyawa Allah Taala, munyi guntur ti pansut ari nyawa Iya. Iya ngasuh kilat nyelar di langit, ari ujung dunya siti ngagai ujung siti. Nya baru auh nyawa Iya didinga, munyi guru guntur ti manah didinga, sekumbang kilat ti nyelar. Lebuh Allah Taala bejaku, utai lalu nyadi, utai ti badas, ti enda ditemu kitai reti. Iya ngasuh seleju labuh ke tanah, lalu ngasuh ujan bangat. Iya ngasuh kitai badu gawa. Iya mandangka ngagai kitai utai ti ulih dikereja Iya. Jelu babas pulai ngagai lubang sida. Ribut biaubalai datai ari selatan, lalu ribut ti udu chelap datai ari utara. Kesuh seput Allah Taala ngasuh ai meku, lalu ngasuh sida bebali nyadi ais. Kilat nyelar ari mua hari, nitihka peneka Allah Taala. Sida ngereja semua utai ti diasuh Allah Taala, di semua endur, di serata dunya. Allah Taala ngasuh ujan ngemasahka tanah. Nyangka Iya ngukum kitai ngena ai ujan, tauka mandangka pengerindu Iya ke kitai. Ngetu enda lama, Jop, lalu pendingka aku. Peratika utai ti badas ti dikereja Allah Taala. Kati nuan nemu jalai Allah Taala meri pesan Iya lalu ngasuh kilat nyelar ari mua hari? Kati nuan nemu jalai mua hari ulih melepung di langit, pengawa ti dikereja Allah Taala ngena pengelandik Iya? Nuan enda nemu. Nuan semina merinsa natka pengangat lebuh ribut muput ari selatan. Kati nuan ulih nulung Allah Taala mintarka langit lalu ngasuh langit nya kering baka besi ti dipugar? Ajar kami utai ti patut disebut kami ngagai Allah Taala. Kami nadai penemu, nadai utai disebut. Aku enggai minta diri bejaku enggau Allah Taala. Nama kebuah aku meri Iya peluang ngerusak aku? Diatu penampak di langit nyau manchar terang, kelalu tampak lalu enda ulih diperening kitai, lalu langit udah beresi laban iya dipuputka ribut. Panchar ti be-emas emas bisi dipeda di utara, lalu mulia Allah Taala ngasuh kitai nangi. Kuasa Allah Taala endang besai, datai ke kitai enda ulih datai semak ngagai Iya. Iya endang lurus sereta betul dalam semua pengawa Iya enggau kitai. Nya alai, semua orang endang patut nangika Iya. Iya enggai ibuhka orang ke ngumbai diri bepenemu-dalam. Udah nya TUHAN lalu bejaku ngagai Jop ari biaubalai nya. “Sapa nuan nya ti berani betanyaka penemu-dalam ari Aku, ngena jaku ti beli sereta kusung? Bediri terit lalu saut tanya Aku. Kati nuan bisi dia lebuh Aku ngaga dunya? Enti nuan amat mayuh penemu, padahka nya ngagai Aku. Sapa ngeletak pemesai dunya? Sapa nerantingka tali kena nyukat pemesai dunya? Kati nuan nemu semua saut ke semua tanya nya? Nama utai ti ngasuh tungkat dunya bediri? Sapa nudukka batu pemun dunya? Pagi nya, semua bintang belagu sama sereta, lalu bala orang serega manjung gaga ati. Sapa nikupka pintu kena nagang ai tasik masuk lebuh ai nya pansut ari pusat dunya? Aku tu ke mungkur tasik ngena mua hari lalu mungkus iya ngena pemetang. Aku tu ke ngeletak garis entara darat enggau tasik lalu nagang ai tasik tama nengah pintu ti bekalang. Ku Aku bejaku enggau ai tasik, ‘Naka tu aja! Anang ngelui tu! Gelumbang nuan ti balat enda tau ngalun ngelui tu.’ Jop, kati nuan, dalam sepemanjai umur nuan, bisi udah kala ngasuh hari siang? Kati nuan udah kala ngasuh merekah pajar merintah dunya lalu ngusak orang ke jai pansut ari endur alai sida ke belalai? Penampak mata hari ngasuh bukit enggau lebak ayan nyata baka lepi kain, nyengala baka chop ti ditekanka ba tanah liat. Penampak siang hari kelalu terang ke orang ke jai lalu nagang sida ngayanka pemangah sida. Kati nuan bisi udah kala bejalai ngagai mata ai ti ba buntut tasik? Kati nuan udah kala bejalai nengah buntut tasik? Kati orang bisi udah kala mandangka ngagai nuan pintu ti nyaga dunya pemati ti petang? Kati nuan nemu pemesai dunya? Padahka ngagai Aku, enti nuan nemu semua utai nya. Kati nuan nemu asal penatai penampak tauka asal penatai pemetang? Kati nuan ulih madahka ikas entara pemetang enggau penampak, tauka ngasuh seduai iya pulai baru lebuh seduai iya udah datai? Aku nemu nuan ulih ngereja nya, laban nuan tuai amat umur lalu nuan endang bisi dia lebuh dunya digaga! Kati nuan udah kala tama ngagai bilik setor, endur alai Aku ke naruh seleju enggau ujan batu? Aku naruh sida nyendiaka maya penusah nyadi maya orang beperang. Kati nuan udah kala bejalai ngagai endur alai mata hari pansut, tauka ngagai endur alai penatai ribut ti muput ari timur? Sapa ke numbak parit ke ujan ti lebat lalu ngelasi jalai keguntur enggau kilat? Sapa ngasuh ai ujan labuh ba endur ti nadai mensia? Sapa meri ai ngagai menua ti rangkai, sereta aus, lalu ngasuh rumput tumbuh? Kati ujan tauka ambun bisi apai? Sapa indai ais enggau batu seleju, ti ngasuh ai bebali nyadi batu lalu ngasuh ai tasik meku? Kati nuan ulih ngerempungka bintang tujuh tauka muka tanchang bintang banyak? Kati nuan ulih ngatur pejalai bintang ari musin siti ngagai musin siti lalu ngatur pejalai bintang tiga enggau bintang tujuh? Kati nuan nemu adat ti merintah langit. Kati nuan ulih neritka adat nya ngagai dunya? Kati nuan ulih manjung merintah mua hari lalu ngasuh sida manjah nuan ngena ujan? Lalu enti nuan ngasuh kilat nyelar, kati iya deka datai ngagai nuan, lalu bejaku, ‘Tu aku, tuan’? Sapa madahka ngagai burung ibis tauka madahka ngagai manuk sabung hari deka ujan? Sapa chukup bepenemu-dalam lalu ulih ngitung mua hari? Sapa ulih nyingitka mua hari ngambika sida mansutka ujan, ujan ti ngasuh amau betekang? Kati nuan ngiga pemakai ke singa, ngambika anak singa kenyang lebuh sida belalai dalam lubang sida tauka gali ngipa ba alai sida ke belalai? Sapa nupi burung kak lebuh sida terebai segau-segau lapar, lebuh anak sida nyabak minta pemakai ngagai Aku? Kati nuan nemu maya kambin bukit ada? Kati nuan kala nengkilaka rusa beranak? Kati nuan nemu pengelama sida ngandung? Kati nuan nemu maya anak sida patut ada? Kati nuan nemu maya sida deka ningkap lalu beranak? Anak sida mansang kering-sekering dalam babas. Sida angkat, lalu enda pulai agi. Sapa udah ngelepaska keledai kampung? Sapa muka tanchang sida lalu ngasuh sida mawa? Aku meri sida menua puang alai sida diau, lalu nejuka sida diau ba emperan garam. Sida diau jauh ari nengeri ti inggar, lalu nadai orang ulih bejinakka sida, lalu ngena sida ngereja pengawa. Padang rumput ba bukit nyadi endur alai sida ngulam, alai sida ngiga rumput. Kati sapi ti siga deka bekereja ke nuan? Kati iya deka bemalam ba bansal jelu tupi nuan? Kati nuan ulih nanchang sapi nya ngena tali, lalu mejalka iya ngeradu tanah? Tauka mejalka iya narit pengeradu tanah ba umai nuan? Kati nuan ulih ngarapka pengering iya, lalu ngarapka iya ngereja pengawa ti berat ke nuan? Kati nuan ngarapka iya ngetau umai nuan lalu mai gandum nuan ngagai endur alai nungku? Naka meh penyampat kebap sayap burung unta! Tang burung unta enda ulih terebai baka burung bangau. Burung unta ninggalka telu iya ba tanah ngambika telu nya angat laban pengangat tanah. Iya enda nemu telu nya tau kena indik lalu redak tauka jelu babas mechahka sida. Burung unta nya baka ke ngumbai telu nya ukai telu iya lalu enda irauka diri deka lebu ngapa betelu. Aku Empu ti udah ngasuh iya beli lalu enda meri iya penemu-dalam. Tang lebuh iya belabuh belanda, iya laju agi ari kuda enggau orang ke nepan kuda nya. Kati nuan, Jop, bisi udah ngasuh kuda kering lalu meri sida bulu ti panjai melulur rekung sida? Kati nuan bisi udah ngasuh sida merejuk baka buntak lalu ngasuh orang takut ninga munyi kesuh idung sida? Sida ransing ngerumbak tanah ba lebak. Sida belanda mansang beperang enggau pengabis pengering sida. Sida enda nemu reti takut, lalu pedang enda ulih ngasuh sida nikal. Senyata ti dibai orang ke nepan sida begetar inggar sereta bekilap dipanchar mata hari. Kuda betegitik isi ransing, lalu belanda mansang ke mua. Lebuh terumpit disepu, sida enda ulih diau jenuh. Genap kali terumpit nya disepu, sida inggar ngesuhka seput. Sida nemu ngembau perang sebedau sida datai semak lalu sida ninga bala pemesai merakka nyawa meri atur. Kati burung menaul bisi belajar ari nuan chara terebai lebuh iya ngerembaika sayap iya lalu nuju ke selatan? Kati burung menaul nganti atur ari nuan sebedau iya ngaga tansang ba tuchung bukit? Iya ngaga tansang ba tuchung bukit ti bebatu lalu ngaga tuchung ti tajam nya nyadika kuta iya. Ari nya iya ninjau utai ti semak enggau ti jauh ngintaika utai ti tau dibunuh lalu diempa iya. Menaul begempuru ngelingi bangkai lalu anak menaul ngirup darah. Aku udah nyebut lebih ari ti patut.” Udah nya TUHAN lalu bejaku baru ngagai Jop ari kabut biaubalai. “Bediri rurus lalu saut tanya Aku. Kati nuan nguji ngumbai Aku enda lurus? Kati nuan deka besalah Aku, lalu ngumbai nuan empu ngena? Kati nuan kering baka Aku? Kati nyawa nuan inggar munyi guntur baka nyawa Aku? Enti pia, begari nuan lalu bediri ngena pangkat, basa, enggau mulia nuan. Bantaika pengeringat nuan, lalu peda enti nuan ulih ngasuh orang ke sumbung nya baruh ati. Peda sida ke sumbung nya, lalu alahka sida; Redakka sida ke jai nya ba endur alai sida ke bediri. Tumbakka sida dalam tanah. Tanchang sida di dunya pemati. Nya baru Aku deka ngumbai nuan menang ngena pengering nuan empu. Peda nuan Behemot. Aku udah ngaga iya, lalu Aku udah mega ngaga nuan. Iya makai rumput baka sapi, tang peda nuan pengering dalam tubuh iya, enggau kuasa dalam gumpal isi iya! Iku iya bediri chegit-chegit baka kayu sidar, lalu gumpal isi dalam kaki iya amat kering. Tulang iya kering baka temaga, lalu kaki iya baka lumpung besi. Iya tu utai ti pemadu ngasuh ati iran ari semua utai ti idup ti digaga Aku! Semina Aku ti ngaga iya ulih ngalahka iya. Rumput ti dikena nupi iya tumbuh ba bukit alai jelu babas bemain. Iya gali di baruh madang duri, lalu belalai ba madang purun ti tumbuh ba paya. Lalu iya belindung di baruh madang duri enggau madang kayu willow ti tumbuh ba tebing sungai. Iya enda takutka ai sungai ti deras. Iya enda irau ati lebuh ai Sungai Jordan mangka mua iya. Sapa ulih ngasuh iya buta, lalu nangkap iya? Tauka, sapa ulih nyintak junggur iya ngena panjuk? “Kati nuan ulih ngulihka naga ngena ginti tauka nanchang dilah iya ngena tali? Kati nuan ulih nanchangka tali ba junggur iya tauka ngaitka ginti ba rang iya? Kati iya deka minta nuan ngelepaska iya? Kati iya deka minta nuan kasihka iya? Kati iya deka ngaga sempekat enggau nuan lalu besemaya deka betuaika nuan belama iya? Kati nuan deka nambat iya baka ke nambat burung ayam kena ngelantangka ati sida indu ke digaji nuan? Kati orang berikan deka betawarka rega iya? Kati orang dagang deka ngelampang lalu nyual iya? Kati nuan ulih ngebuska kulit iya ngena berayang tauka ngebuska pala iya ngena pendawan? Tegu iya sekali, lalu nuan enggai agi negu iya. Nuan deka seruran ingatka diri ti udah belaban enggau iya! Barang sapa meda naga deka takut lalu rebah. Lebuh iya dikachau, iya mangah. Nadai orang berani bediri di mua iya. Sapa ulih nyerang iya lalu enda bebadi? Nadai orang di serata dunya tu ulih ngereja nya. Awakka aku nusui ngagai nuan pasal kaki naga nya lalu madahka pemesai enggau pengering iya. Nadai orang ulih nyarikka baju iya tauka ngebuska baju kebal iya. Sapa ulih mejalka iya nukangka rang ti penuh laban ngeli ti balat ngenakut? Belakang iya digaga ari rintai terabai ti bejantil enggau pangan diri, lalu kering baka batu. Terabai nya bejantil rapit enggau pangan diri datai ke angin enda ulih tama. Semua terabai nya bejantil rapit amat datai ke nadai utai ulih ningkilka sida ari pangan diri. Lebuh iya engkasi, penampak lalu bekilat, lalu mata iya mirah chinang-chinang baka mata hari ti tumbuh pagi hari. Daun api nyelar ari nyawa iya lalu perechi api pansut. Ari idung iya pansut asap, baka asap ti pansut ari rumput ti diempa api di baruh periuk. Kesuh seput iya ngasuh api menyadi. Daun api nyelar ari nyawa iya. Rekung iya kering datai ke semua orang ke betemu enggau iya bela takut magang. Indah perengka tubuh iya ti pemadu lemi deh kering baka besi. Ati iya baka batu, enda nemu takut, enda lembut tang kering baka batu kisar. Lebuh iya angkat, indah utai ti pemadu kering deh takut. Sida nadai daya laban takut. Nadai pedang ulih nelihka iya nadai sangkuh, tauka laja tauka lunju, ulih ngemediska iya. Ba iya, besi lemi baka rumput ti rangkai, lalu temaga, baka kayu ti repuk. Nadai panah ulih ngasuh iya rari. Batu ti ditikau ngagai iya baka rumput ti rangkai. Ba iya, pemalu baka rumput ti rangkai, lalu iya ketawa lebuh orang numbukka sangkuh ngagai iya. Tisik perut iya tajam baka kerimpak periuk. Tisik nya ngeraus tanah ti luchak baka pengeradu tanah. Lebuh iya nyelam ke dalam tasik ai melidih baka minyak ti melidih dalam periuk, lalu ai ti udah ditengah iya nyau begenyeling bepupu burak. Nadai utai di dunya tu sebaka enggau iya. Iya enda nemu takut. Iya nyadi raja ke semua jelu ti sumbung lalu iya ngira jelu bukai nadai guna magang. Udah nya Jop lalu nyaut TUHAN. “ TUHAN, Aku nemu Nuan endang bekuasa ari atas semua, lalu Nuan ulih ngereja semua utai ti dikedekaka Nuan. Nuan nanyaka kebuah aku kakang ati ke penemu-dalam Nuan taja pen aku nadai nemu utai. Aku bejakuka pasal utai ti enda ditemu aku, pasal utai ti nyelai ti enda ulih ditemu aku. Nuan udah ngasuh aku mendingka Nuan lebuh Nuan bejaku lalu ngasuh aku nguji nyaut tanya Nuan. Dulu menya, aku semina nemu utai ti dipadahka orang ngagai aku, tang diatu aku udah meda Nuan ngena mata aku empu. Nya alai aku malu ke semua utai ti udah disebut aku lalu aku nesal ati lalu ngerabu diri enggau amau enggau abus. Lebuh TUHAN udah tembu bejaku ngagai Jop, Iya lalu bejaku ngagai Elipas, “Aku ringat ngagai nuan, enggau ngagai pangan seduai ke dua iku nya, laban nuan enda nyebut utai ti bendar pasal Aku, baka nembiak Aku Jop. Nya alai bai diatu tujuh iku sapi ti lelaki, enggau tujuh iku bedus ti lelaki, ngagai Jop, lalu beri utai nya nyadika piring ke nuan empu. Jop deka besampika nuan, lalu Aku deka nyaut sampi iya, lalu enda ngukum nuan nitihka pemeli nuan. Nuan enda baka iya laban Nuan enda nyebut utai ti bendar pasal Aku.” Elipas, Bildat, enggau Sopar lalu ngereja utai ti diasuh TUHAN, lalu TUHAN nyaut sampi Jop. Udah nya, lebuh Jop udah besampika pangan iya ke tiga iku nya, TUHAN lalu merekatka iya nyadi kaya-raja baru, lalu meri iya dua kali lipat mayuh agi utai ari ti dikemisi iya sebedau nya. Semua sida menyadi lelaki enggau menyadi indu Jop, enggau semua pangan iya ke dulu suba, bela datai nemuai ngagai iya, lalu ngintu pengerami makai besai enggau iya ba rumah iya. Sida madahka penyinu ati sida ngagai iya, lalu merindang iya, ketegal semua penusah ti udah diasuh TUHAN ninggang iya. Genap iku sida bela meri iya sesingkap duit, enggau siti tinchin emas. TUHAN merekatka pengidup Jop lebuh iya nyau tuai, lebih agi ari ti terubah. Jop bisi empat belas ribu iku jelu bedus, enam ribu iku unta, dua ribu iku jelu sapi, enggau seribu iku keledai. Iya bisi tujuh iku anak lelaki enggau tiga iku anak indu. Iya meri nama Jemimah ngagai anak indu iya ke tuai, iya ti kedua Kesiah, lalu iya ke pemadu biak Keren-hapuk. Nadai indu di serata dunya tu ti bajik agi ari anak indu Jop. Apai sida meri sida ungkup ari pesaka iya, sebaka enggau ungkup ti diberi iya ngagai sida menyadi lelaki sida. Udah bekau nya, Jop idup seratus empat puluh taun, lalu meda bala uchu enggau bala ichit diri. Iya mati lebuh umur iya nyau tuai amat. Beberekat meh orang ti enda nitihka penemu orang ke jai, lalu enda nitihka teladan orang ke bedosa ti enda begulai enggau orang ke ngeleseka Allah Taala, tang gaga ati ke Adat TUHAN, lalu belematika Adat nya siang malam. Orang nya baka kayu ti ditanam ba tebing sungai, ti bebuah ninting musin lalu daun iya nadai kala layu. Iya mujur dalam semua utai ti dikereja iya. Tang orang ke jai enda baka nya. Iya baka rumput ti rangkai ti dikebuka ribut. Nya alai orang ke jai deka diukum Allah Taala lebuh sida diakim, lalu orang ke bedosa deka diseraraka ari orang ke lurus; laban TUHAN deka ngintu orang ke lurus, tang jalai pengidup orang ke jai deka dirusak. Nama kebuah orang bansa bukai bepekat lalu bekira deka ngereja utai ti nadai guna? Bala raja sida angkat ngelaban, lalu bala pemerintah sida sama bepekat ngelaban TUHAN enggau ngelaban raja ti udah dipilih Iya. Ku sida, “Aram kitai nganchurka kuasa sida. Aram kitai muai perintah sida.” TUHAN ti duduk di serega ketawa; Iya ngeleseka sida. Udah nya Iya deka bejaku ngagai sida enggau pengeringat, sereta ngenakutka sida ngena pengeringat Iya. “Aku udah nyiri raja Aku, ba bukit Aku ti kudus di Sion,” ku TUHAN bejaku. Ku raja nya bejaku, “Aku deka madahka adat ti udah diberi TUHAN. Ku TUHAN bejaku ngagai aku: ‘Nuan tu anak Aku. Sehari tu Aku udah nyadi Apai nuan. Pinta ari Aku, lalu Aku deka ngaga mayuh bengkah bansa nyadika pesaka nuan, lalu semua dunya deka diempu nuan. Nuan deka mechahka sida ngena tungkat besi, lalu ngeredakka sida baka ke ngeredakka periuk tanah.’ ” Nya alai diatu, O kita ke raja, kita enda tau enda pintar; Bejaga kita, O kita ke pemerintah dunya. Betuaika TUHAN enggau ati ti nangi. Getar-getar nyium kaki Iya, enggai ke Iya ringat lalu kita mati enggau ngenyit; laban Iya jampat ringat. O TUHAN, naka meh pemayuh munsuh aku! Naka meh pemayuh orang ke angkat ngelaban aku! Sida bejakuka aku. Ku sida, “Allah Taala enggai nulung iya.” Tang Nuan, O TUHAN, baka terabai ti ngelingi aku, Nuan ngasuh aku menang lalu ngasuh aku berani baru. Aku ngangauka TUHAN, lalu Iya nyaut aku ari bukit Iya ti kudus. Aku gali lalu tinduk, lalu aku dani baru, laban TUHAN nyaga aku. Aku enda takutka beribu-ribu iku munsuh ke ngelingi aku. Angkat meh Nuan, O TUHAN! Selamatka aku, O Allah Taala aku! Laban Nuan nampar kuyu semua munsuh aku, Nuan matahka ngeli semua orang ke jai. Pengelepas endang enggi TUHAN. Berekatka bala nembiak Nuan! O Allah Taala ti penyaga aku, saut aku lebuh aku besampi! Nuan udah nulung aku lebuh aku tusah. Kasihka aku diatu, lalu dingaka sampi aku. O mensia, ni pengelama kita deka mechat aku? Ni pengelama kita deka mengkang rindu ngena jaku ti nadai reti, lalu begigaka utai ti bula? Tang kita enda tau enda nemu, TUHAN udah milih orang ke lurus nyadika enggi Iya; TUHAN ninga lebuh aku ngangauka Iya. Kita tau ringat, tang anang bedosa; Berandau enggau ati kita empu ba peninduk kita, lalu anang engkeretik. Beri piring ti ngena, lalu panggaika pengarap kita ba TUHAN. Mayuh orang deka nyebut: “Naka meh pengerindu meda utai ti manah! Peda meh kami enggau penelap Nuan, O TUHAN!” Nuan udah nyimpan mayuh agi pengaga ke dalam ati aku ari pengaga ti dikembuan sida lebuh sida mayuh gandum enggau wain. Aku deka gali lalu tinduk dalam pemaik, laban semina Nuan siku aja, O TUHAN, ke ulih ngasuh aku diau likun. Pendingka jaku aku, O TUHAN, lalu dingaka demuh aku. Dingaka sabak aku, O Allah Taala enggau Raja aku, laban aku besampi ngagai Nuan. O TUHAN, lebuh pagi hari Nuan mendingka munyi nyawa aku; Lebuh pagi hari aku nyendiaka piring ke Nuan, lalu nengkila. Laban Nuan ukai Allah Taala ti rinduka penyai; Penyai sigi enda begulai enggau Nuan. Nuan enggai meda orang ke sumbung; Nuan begedika semua orang ke ngereja penyai. Nuan ngerusak semua orang ke bejaku bula; TUHAN begedika orang ke mangah, ke nipu orang. Tang ketegal pengerindu Nuan ti besai aku deka tama ngagai rumah Nuan. Aku deka nyembah Nuan dalam Rumah Sembiang Nuan ti kudus enggau ati ti nangika Nuan. Iring meh aku O TUHAN ngena pengelurus Nuan laban aku bisi munsuh; Gaga jalai Nuan lurus di mua aku. Laban jaku sida bula magang; Ati sida semina deka ngerusak. Batang rekung sida nya kubur ti telenga, lalu dilah sida semina ngelangkung aja. Ukum meh sida, O Allah Taala. Awakka akal sida ngerusak sida empu. Buai sida laban sida udah ngereja mayuh macham penyalah, laban sida udah angkat ngelaban Nuan. Tang awakka semua orang ke ngiga pengelikun dalam Nuan, gaga ati; lalu awakka sida belagu gaga ati; lalu jaga meh sida, ngambika orang ke rinduka nama Nuan deka gaga ati ke Nuan. Laban Nuan merekatka orang ke lurus, O TUHAN; Nuan mungkur iya ngena pengerindu baka ke mungkur iya ngena terabai. TUHAN, anang nganu aku lebuh Nuan ringat! Anang ngukum aku lebuh Nuan ringat! Kasihka aku, O TUHAN, laban aku lelak; O TUHAN, geraika aku, laban aku nyau lembut tulang. Ati aku balat tusah. Ni pengelama baru Nuan deka nulung aku, O TUHAN? Nguing meh Nuan ngagai aku, O TUHAN lalu selamatka aku. Lepaska aku ketegal pengerindu Nuan ti meruan belama iya. Laban orang ke mati nadai agi ingatka Nuan; Di dunya pemati, nadai orang muji Nuan. Aku nyau lelak bedemuh. Genap malam peninduk aku basah laban ai mata. Panggal aku nyau basah laban ai mata aku. Mata aku nyau bangkung laban ati aku balat tusah. Mata aku nyau rapa laban semua munsuh aku. Rari ari aku, semua kita ke ngereja penyai; laban TUHAN udah ninga sabak aku. TUHAN udah ninga pinta aku; TUHAN nerima sampi aku. Semua munsuh aku deka malu sereta takut; sida deka nikal lalu dikeleseka enda lama da agi. O TUHAN Allah Taala aku, aku ngenduh ngagai Nuan; Selamat lalu lepaska aku ari semua orang ke begagaika aku, enggai ke sida nyarikka aku baka singa, narit aku, lalu nadai orang ngelepaska aku. O TUHAN Allah Taala aku, enti aku udah ngereja tu, enti jari aku udah ngereja penyalah, enti aku udah malas pangan aku ngena penyai tauka ngenchuri utai ari munsuh aku enggau nadai kebuah, awakka munsuh aku begagaika aku lalu ulih nitihka aku, lalu awakka iya ngelunjak aku ba tanah, lalu nejuka semengat aku begulai enggau amau. Angkat meh Nuan O TUHAN, mai pengeringat Nuan! Bediri meh Nuan TUHAN ngelaban pengeringat bala munsuh aku. Dani meh Nuan, O Allah Taala aku; Nuan deka ngakim. Gempuruka semua bansa ngelingi Nuan, lalu perintah sida ari serega. Nuan endang ngakim semua mensia. Akim meh aku, O TUHAN, nitihka pengelurus aku nitihka pemetul ati aku. Awakka penyai orang ke jai abis magang, tang awakka Nuan ke lurus, Nuan ke meresa semua runding enggau ati, nyadi Allah Taala ti lurus. Allah Taala endang terabai aku. Iya nyelamatka orang ke lurus. Allah Taala endang Hakim ti lurus, Allah Taala seruran ngukum orang ke jai. Enti sida enda ngubah ulah diri, Allah Taala deka ngansah pedang Iya. Iya udah narit lalu nyendiaka panah Iya. Iya udah nyendiaka senyata Iya ti bisa lalu ngichingka laja Iya ti beapi-api. Peda chara orang ke jai berundingka jalai ngereja penyai. Iya berunding deka ngaga pengachau, lalu ngemulaka orang. Iya numbak lubang kebung, lalu iya empu labuh ngagai lubang kebung nya. Penyai iya empu ninggang pala iya empu lalu pemangah iya empu ninggang puchuk pala iya empu. Aku deka meri terima kasih ngagai TUHAN ketegal pengelurus Iya, lalu aku deka belagu muji nama TUHAN ti Pemadu Tinggi. O TUHAN, ti TUHAN kami. Naka meh pemesai kuasa nama Nuan di serata dunya! Nuan ke bempu mulia ti tinggi ngilah langit, ke dipuji bala nembiak enggau bala anak mit. Nuan udah ngaga kuta kena Nuan ngelaban munsuh Nuan, kena Nuan nagang munsuh enggau orang ke ngiga balas. Lebuh aku engkadah ke langit ti udah digaga Nuan, engkadah ngagai bulan enggau bintang ti udah di atur Nuan, aku lalu nanya: ‘Sapa mensia, alai Nuan deka bedulika sida? Sapa anak mensia, alai Nuan deka ibuhka sida?’ Tang taja pia, Nuan udah ngaga iya semina baruh mimit ari Nuan Empu, lalu Nuan udah meri iya mulia enggau basa nyadika makota iya. Nuan udah ngasuh iya merintah semua utai ti digaga Nuan; Nuan udah ngengkahka semua utai di baruh kaki iya, semua jelu bedus enggau sapi, enggau jelu babas, semua burung enggau ikan enggau semua utai ti idup dalam tasik. O TUHAN, ti TUHAN kami, naka meh pemesai kuasa nama Nuan di serata dunya! Aku deka meri terima kasih ngagai TUHAN enggau pengabis ati aku. Aku deka nusui pasal semua utai ti badas ti udah dikereja Nuan. Aku deka gaga ati belagu ngemesaika Nuan. Aku deka belagu muji Nuan, Allah Taala ti Pemadu Bekuasa. Lebuh Nuan pegari, bala munsuh aku nikal, rebah lalu mati. Nuan endang lurus sereta betul ati lebuh Nuan ngakim, lalu pemutus penemu Nuan ngelantangka ati aku. Nuan udah ngukum semua bansa orang kapir lalu ngerusak orang ke jai. Sida nadai agi dikingatka. Munsuh kami abis lengis belama iya. Nuan udah ngerusak nengeri sida, lalu sida nadai agi dikingatka. Tang TUHAN endang Raja belama iya. Iya udah nudukka kerusi diraja Iya ba endur alai Iya ke ngakim. Iya merintah dunya ngena pengelurus. Iya ngakim semua bansa enggau lurus. TUHAN nyadi kuta alai orang ngenduh lebuh sida kena perinsa, nyadi kuta alai sida diau lebuh maya tusah. Orang ke nemu Nuan, TUHAN, deka manggaika pengarap sida ba Nuan. Nuan enda ninggalka orang ke datai ngagai Nuan. Belagu pantun puji ke TUHAN ti diau di Sion! Tusui ngagai semua bansa utai ti udah dikereja Iya! Allah Taala ingatka orang ke merinsa. Iya nadai kala enda ingatka sabak sida, lalu Iya ngukum orang ke udah ngereja utai ti salah ngagai sida. Kasihka aku, O TUHAN! Peda Nuan chara munsuh aku merinsaka aku! Selamatka aku ari pemati, O TUHAN, ngambika aku ulih bediri di mua orang di Jerusalem lalu madahka ngagai sida semua utai ti ngasuh aku muji Nuan, Aku deka rami gaga laban Nuan udah nyelamatka aku. Orang kapir udah labuh ngagai lubang kebung ti udah ditumbak sida empu; lalu kaki sida udah disintak jarin ti udah ditan sida empu. TUHAN udah mandangka Diri ngena pengelurus pemutus penemu Iya, lalu orang ke jai udah disintak pengawa ti dikereja jari sida empu. Orang ke jai, semua bansa ti enda ingatka Allah Taala, deka dibuai ngagai dunya pemati. Laban orang ke suntuk deka seruran dikingatka, lalu pengadang orang ke seranta enda lenyau belama iya. Datai meh Nuan TUHAN! Anang nejuka orang ngelaban Nuan! Awakka semua bansa orang kapir diakim Nuan. Asuh sida takut, O TUHAN. Awakka sida nemu diri semina mensia aja. Nama kebuah Nuan kelalu jauh, O TUHAN? Nama kebuah Nuan belalai lebuh kami kena laban penusah? Orang ke jai sumbung, lalu merinsaka orang ke seranta. Tangkap meh sida ngena panjuk ti udah digaga sida empu. Laban orang ke jai temegahka pengingin ati sida, lalu orang ke amu nyumpah sereta nulak TUHAN. Orang ke jai enda ibuhka TUHAN. Ngena penyumbung sida empu, sida ngumbai Allah Taala nadai guna. Orang ke jai mujur dalam semua utai. Sida enda meretika atur Allah Taala. Sida enchebirka mulut ngeleseka bala munsuh sida. Ku sida berunding dalam ati diri, “Kitai tetap enda lebu. Kitai enda dituntung penusah.” Sida nyumpah orang, bejaku bula, lalu ngemba orang. Sida jampat nyebut jaku ti jai, ti mandangka pemenchi. Sida belalai ba genturung pendiau orang, deka munuh orang ke nadai penyalah. Sida nengkilunka orang ke nadai daya. Sida ngipa baka singa. Sida ngipa orang ke seranta. Sida nangkap orang ke seranta ngena jarin. Orang ke nadai daya alah. Pengering tulang ti ngalahka sida. Ku orang ke jai berunding dalam ati diri, “Allah Taala enggai ibuh! Iya udah mejamka mata Iya, lalu enda ulih meda aku!” O TUHAN, ukum meh orang ke jai nya! Kingatka orang ke kena perinsa! Nama kebuah orang ke jai ngeleseka Allah Taala lalu berunding dalam ati diri, “Iya enggai ngukum aku”? Tang Nuan meda. Nuan endang seruran meda penusah enggau pemerinsa lalu seruran sedia deka nulung. Orang ke nadai daya, nyerahka diri ngagai Nuan. Nuan endang seruran nulung orang ke suntuk. Rusak meh kuasa orang ke jai. Ukum meh sida ketegal penyalah ti udah dikereja sida datai ke sida badu agi ngereja utai nya. TUHAN endang nyadi Raja belama lama iya. Orang ke nyembah petara bukai deka lesap ari menua tu. O TUHAN, Nuan endang deka mendingka sampi orang ke baruh ati. Nuan meri sida pemerani. Nuan endang deka ningaka sabak orang ke kena tekan, enggau orang ke nadai apai indai. Nuan deka meri atur ti manah ngagai sida, ngambika orang badu agi ngemba sida. Aku ngarapka TUHAN deka ngintu aku likun. Naka meh pemeli nuan lebuh nuan nyebut ngagai aku, ‘Terebai meh nuan kebukai baka burung ti terebai ngagai bukit, laban orang ke jai udah narit panah lalu nyelintingka laja sida ari endur ti petang, ngagai orang ke badas. Nadai utai ulih dikereja orang ke badas lebuh semua utai udah rusak magang.’ TUHAN bisi dalam Rumah Sembiang Iya ti kudus. Kerusi diraja Iya endang di serega. Iya ngemataka mensia di semua endur lalu nemu utai ti dikereja sida. Iya meresa orang ke badas enggau orang ke jai. Iya begedika orang ke mangah. Iya mubuhka bara api enggau api merirang ngagai orang ke jai. Iya ngukum sida ngena ribut ti angat. TUHAN endang lurus sereta rinduka pengawa ti manah. Orang ke ngereja pengawa ti manah deka diau begulai enggau TUHAN. Tulung kami, O TUHAN! Orang ke badas nadai agi tinggal. Orang ke lurus nadai agi ditemu. Semua sida ngemulaka pangan diri. Sida nipu pangan diri ngena jaku ti ngelangkung. Tagang dilah ti ngelangkung nya, O TUHAN! Tutup nyawa ti temegah, ti nyebut, ‘Kami bulih utai ti dikedekaka kami ngena jaku kami empu. Kami deka nyebut utai enggau sepeneka kami empu, lalu nadai orang ulih nagang kami.’ “Tang diatu Aku deka datai,” ku TUHAN bejaku, “laban orang ke suntuk ditekanka orang lalu orang ke kena perinsa, bedemuh natka diri pedis. Aku deka meri sida pengelikun ti dikedekaka sida.” Semaya TUHAN endang tau dikarapka. Semaya Iya baka pirak ti tulin, ti dituchi tujuh kali dalam serumbung api. Ni pengelama Nuan agi mengkang enda ingatka aku, O TUHAN? Belama lama iya? Ni pengelama Nuan agi mengkang belalai ari aku? Ni pengelama aku enda tau enda natka penusah? Ni pengelama ati aku enda tau enda sinu siang malam? Ni pengelama munsuh aku bekuasa atas aku? Malik ngagai aku, O TUHAN Allah Taala aku, lalu saut aku. Pulaika pengering aku ngagai aku baru. Anang nejuka aku mati. Anang nejuka munsuh aku nyebut, ‘Kitai udah ngalahka iya.’ Anang nejuka sida ngalah lalu ketawaka aku. Aku manggaika diri ba pengerindu Nuan ti meruan belama iya. Aku deka gaga ati laban Nuan deka ngidupka aku. Aku deka belagu ke Nuan, O TUHAN, laban Nuan udah manah enggau aku. Ku orang ke beli bejaku dalam ati diri, ‘Allah Taala endang sigi nadai!’ Semua sida nya jai magang, lalu sida udah ngereja utai ti balat jai. Nadai siku sida ngereja utai ti ngena. TUHAN nilik ke baruh ari serega ngagai kitai mensia deka meda enti kitai ti nyembah Iya bisi bepenemu-dalam. Tang semua sida udah salah magang. Semua sida bela jai magang. Nadai siku sida ngereja utai ti ngena, siku pen nadai. Ku TUHAN nanya, ‘Kati sida enda nemu? Kati semua orang ke jai nya nadai nemu utai? Sida ngerumpak bala nembiak Aku, lalu sida nadai kala besampi ngagai Aku.’ Tang ila sida deka balat takut laban Allah Taala deka setanah enggau orang ke ngasika Iya. Orang ke jai nguji ngemuntanka pelan orang ke baruh ati, tang TUHAN nyaga orang ke baruh ati. Aku bebendar besampi minta pengelepas datai ari Sion ngagai orang Israel. Naka meh pengelantang ati orang Israel lebuh TUHAN ngasuh sida kaya-raja baru! TUHAN, sapa tau tama ngagai Rumah Sembiang Nuan? Sapa tau nyembah Nuan di Sion, bukit Nuan ti kudus? Semina orang ke ngasika Allah Taala dalam semua utai lalu seruran ngereja utai ti ngena, ke nyebut utai ti amat sereta tau dikarapka, lalu enda betenahka orang. Sida nadai ngereja penyalah ngagai pangan diri lalu sida enda mega nusui berita ngapa pasal pangan diri. Sida begedika orang ke ditulak Allah Taala, tang masa orang ke nangika TUHAN. Sida seruran ngamatka semaya sida, enda ngira pemesai ungkus nya. Sida nyali orang duit, lalu enda minta anak duit nya, lalu sida enda ulih diumpan makai suap nyadika saksi ngelaban orang ke nadai penyalah. Barang sapa ngereja utai tu, deka diau likun berari. Jaga aku, O Allah Taala. Aku ngarapka Nuan meri aku pengelikun. Aku nyebut ngagai TUHAN, “Nuan TUHAN aku. Semua utai ti manah ti dikemisi aku, datai ari Nuan magang.” Naka meh pemanah bala nembiak TUHAN ti tetap ati ngagai Iya! Aku bisi amat ati deka begulai enggau sida. Orang ke nyembah petara bukai, deka ditinggang mayuh macham penusah. Aku enggai enggau sida ngenjuk piring. Aku enggai nyembah petara sida. Semina Nuan aja, TUHAN, ke dikemisi aku lalu Nuan meri aku semua utai ti dipeguna aku. Pengidup aku ba jari Nuan. Naka meh pemanah pemeri ti diberi Nuan ngagai aku. Naka meh pemanah sida! Aku muji TUHAN, laban Iya ngiring aku, lalu lebuh malam hari ati aku empu ngajar aku. Aku seruran nemu TUHAN bisi enggau aku. Iya semak aku, lalu nadai utai ulih ngelebuka aku. Nya alai aku meri terima kasih sereta gaga ati, lalu aku berasai likun, laban Nuan nyaga aku ari kuasa pemati. Aku udah betuaika Nuan enggau ati ti tetap, lalu Nuan enda ninggalka aku di dunya pemati. Nuan nunjukka ngagai aku jalai ti nuju ngagai pengidup. Ati aku gaga laban Nuan bisi enggau aku lalu ati aku lantang belama iya. O TUHAN, pendingka aku ke minta atur ti lurus. Pendingka sabak aku ke minta tulung! Dingaka sampi aku, laban sampi aku endang amat. Nuan deka kasihka aku lebuh Nuan ngakim aku, laban Nuan nemu utai ti ngena. Nuan nemu ati aku. Nuan udah datai ngagai aku lebuh malam hari. Nuan udah meresa semua ati aku lalu nadai tetemuka pengingin ti jai dalam aku. Aku nadai bejaku jai baka orang bukai. Aku udah ngasika pesan Nuan lalu enda kasar enggau orang. Aku endang seruran bejalai niti jalai Nuan lalu nadai kala limpang ari jalai nya. Aku besampi ngagai Nuan, O Allah Taala, laban Nuan nyaut aku. Nya alai singitka pending Nuan ngagai aku, lalu pendingka jaku aku. Pandangka pengerindu Nuan ti manah, lalu selamatka aku. Lebuh aku ngimbai Nuan, aku likun ari munsuh. Lindung aku baka Nuan ke nyaga mata Nuan Empu. Lalaika aku di baruh sayap Nuan ari serang orang ke jai. Munsuh seruran bekelingika aku. Sida nadai penyiru, lalu bejaku sumbung. Sida ngelingi aku diatu, di sebarang endur aku bejalai, ngiga peluang kena ngalahka aku. Sida ngipa aku baka singa, laban sida deka encharikka aku. Datai meh Nuan TUHAN! Serang meh munsuh aku lalu alahka sida! Selamatka aku ngena pedang Nuan ari jari orang ke jai. Selamatka aku ari orang ke bisi semua utai ti dikedekaka sida. Ukum meh sida ngena pemerinsa ti udah ditaga Nuan ke sida. Awakka ukum nya chukup ke bala anak sida enggau ke bala uchu-ambu sida! Tang aku deka meda Nuan, laban aku nadai ngereja penyalah. Lalu lebuh aku dani, aku deka gaga ati laban Nuan bisi enggau aku. Aku rinduka Nuan, TUHAN ke penyaga aku. TUHAN nyadika penyaga aku. Iya nyadi kuta aku ti tegap. Allah Taala aku nyadika penyaga aku, lalu aku likun begulai enggau Iya. Iya ngelindung aku baka terabai. Iya nyaga aku ngambika aku likun. Aku ngangauka TUHAN, lalu Iya ngelepaska aku ari jari munsuh aku. Puji TUHAN! Kuasa pemati bekelingika aku. Kuasa pengerusak ngelamun aku baka umbak. Kuasa pemati bekelingika aku, lalu pendam nan panjuk kena nyintak aku. Lebuh aku dituntung penusah, aku ngangauka TUHAN. Aku ngangauka Allah Taala aku. Iya ninga aku dalam rumah Iya. Iya ninga kangau aku. Udah nya tanah begetar sereta berenyang. Pugu bukit beguyat sereta berenyang, laban Allah Taala ringat. Asap lalu pansut ari lubang idung Iya, lalu daun api ti nyelar, enggau bara api pansut ari nyawa Iya. Iya ensiatka langit lalu nurun ngena mua hari ti petang di baruh kaki Iya. Iya laju terebai nepan ba sayap melikat cherub Iya. Iya bejalai ngena sayap ribut. Iya nyerayung Diri ngena pemetang. Mua hari ti tebal, ti penuh laban ai, bekelingika Iya. Ujan batu enggau api ti nyelar pansut ari kilat di mua Iya lalu ngebuska mua hari ti chelum. Udah nya TUHAN lalu bejaku ari langit munyi guntur, lalu munyi nyawa Iya ti Pemadu Tinggi bisi didinga. Iya nimbakka laja Iya lalu mambarka bala munsuh Iya. Ngena selar kilat, Iya ngasuh sida rari. Buntut tasik ayan, lalu pugu dunya pegari, lebuh Nuan ngerara munsuh Nuan, O TUHAN, lalu merakka nyawa Nuan ngagai sida laban Nuan ringat. TUHAN lalu nyengkau aku ari atas, lalu megai aku. Iya narit aku ari ai ti dalam. Iya ngelepaska aku ari bala munsuh aku ti bekuasa enggau ari semua orang ke begedika aku, laban sida kelalu kering. Lebuh aku dituntung penusah, sida nyerang aku, tang TUHAN nyaga aku. Iya nyaup aku ngerarika diri ari utai ti tau nganu. Iya ngidupka aku laban Iya gaga ati ke aku. TUHAN ngupah aku laban aku ngereja utai ti ngena. Iya merekatka aku laban aku nadai penyalah. Aku udah ngasika adat TUHAN. Aku nadai kala ninggalka Allah Taala aku. Aku udah nitihka semua adat Iya. Aku nadai kala enda ngasika pesan Iya. Iya nemu aku nadai penyalah, nemu aku udah nagang diri ngereja utai ti salah. Nya alai Iya ngupah aku, laban aku ngereja utai ti ngena, laban Iya nemu aku nadai penyalah. O TUHAN, Nuan endang tetap ati ngagai orang ke tetap ati ngagai Nuan. Nuan badas enggau orang ke pemadu badas. Nuan mandangka Diri tuchi ngagai orang ke tuchi, tang Nuan bemunsuh enggau orang ke jai. Nuan ngelepaska orang ke baruh ati, tang ngemaruhka orang ke sumbung. O TUHAN, Nuan meri aku penampak. Nuan muai pemetang ari aku. Nuan meri aku pengering kena aku nyerang munsuh aku enggau kuasa kena aku ngalahka kuta sida. Naka meh pemanah utai dikereja Allah Taala! Jaku Iya endang tau dikarapka! Iya baka terabai ke semua orang ke minta diri dijaga Iya. TUHAN siku aja ti Allah Taala. Allah Taala siku aja ti nyadika kuta kitai. Iya nya meh Allah Taala ti ngasuh aku kering, ke ngasuh jalai aku likun. Iya ngeringka kaki aku. Iya ngasuh aku likun ba sebelah bukit. Iya matihka aku beperang, ngambika aku ulih ngena panah temaga. O TUHAN, Nuan nyaga aku lalu ngelepaska aku. Nuan udah ngibun aku, lalu ngaga aku nyadi orang ke tinggi pangkat, lalu kuasa Nuan udah ngasuh aku likun. Nuan udah nagang aku kena tangkap, lalu aku nadai kala rebah. Aku begagaika munsuh aku, lalu nangkap sida. Aku enda badu ngapa datai ke aku udah ngerusak sida. Aku mantap sida, lalu sida enda angkat agi. Sida garing-garing alah di mua aku. Nuan ngasuh aku kering beperang lalu ngasuh aku menang ngelaban munsuh aku. Nuan ngasuh munsuh aku rari ari aku. Aku ngerusak sida ke begedika aku. Sida nyabak minta tulung, tang nadai orang deka ngidupka sida. Sida ngangauka TUHAN, tang Iya enda nyaut. Aku nginsarka sida baka amau ti dikebuka ribut. Aku ngindik sida baka luchak ti ba jalai raya. Nuan udah ngelepaska aku ari orang ke seruran angkat ngelaban lalu ngasuh aku merintah mayuh bengkah bansa. Orang ke enda dikelala aku diatu udah nyadi nembiak aku. Orang ari bansa bukai meremi di mua aku. Lebuh sida ninga aku, sida ngasi. Sida enda berani agi lalu datai getar-getar ari kuta sida. TUHAN endang idup! Puji meh Iya ke nyaga aku! Tusui pasal pemesai Allah Taala ti ngelepaska aku. Iya ngasuh aku menang ngelaban munsuh aku. Iya ngalahka semua bansa ti dipegai aku lalu ngelepaska aku ari bala munsuh aku. O TUHAN, Nuan udah ngasuh aku menang ngelaban munsuh aku lalu nyaga aku ari orang ke mangah. Nya alai aku muji Nuan di mua semua bansa. Aku belagu muji Nuan. Allah Taala ngasuh raja Iya menang. Iya seruran ngayanka pengerindu ti meruan belama iya ngagai orang ke udah dipilih Iya, ngagai David enggau peturun iya belama iya. Langit mandangka mulia Allah Taala. Langit ngayanka enggau nyata utai ti udah dikereja Iya. Hari siti nusui berita nya ngagai hari siti. Malam siti nusui berita nya ngagai malam siti, ukai ngena jaku tauka leka jaku tauka ngena munyi utai ti didinga. Tang taja pia, pesan sida ngelekai di serata dunya lalu didinga nyentuk ngagai ujung dunya. Allah Taala udah ngaga rumah di langit ke mata hari. Mata hari nya pansut pagi hari baka lelaki ke gaga ditikah, baka pelumba ke gagit ati deka belumba belanda. Mata hari nya belabuh ba ujung langit puting setak lalu meraka ngagai puting setak. Nadai utai ulih ngelalaika diri ari pengangat iya. Adat TUHAN endang pemadu badas. Iya meri pengering ti baru. Pesan TUHAN endang tau dikarapka meri penemu-dalam ngagai orang ke nadai penemu-dalam. Adat TUHAN endang ngena, lalu ngelantangka ati. Pesan TUHAN endang terang lalu iya ngasuh orang meretika utai. Bebasaka TUHAN nya utai ti manah, lalu basa nya deka majak belama iya. Atur ti diberi TUHAN endang lurus. Atur nya endang nadai kala berat sepiak. Utai nya lebih agi dikinginka ari emas ti pemadu manah, manis agi ari ai manyi ti pemadu tulin. Utai nya meri penemu ngagai aku, ke nembiak Nuan. Aku diupah ketegal ngasika utai nya. Nadai siku kitai ulih meda penyalah diri. Selamatka aku, TUHAN, ari penyalah ti enda dipeda! Intu aku likun mega ari dosa ti dikereja enggau sengaja. Anang nejuka dosa nya merintah aku. Nya baru aku deka nyadi pemadu badas sereta dilepaska ari penyai dosa. Awakka jaku enggau runding aku manah dipeda Nuan, O TUHAN! Laban Nuan Empu ke alai aku ngenduh, sereta nyadi penebus aku! Awakka TUHAN nyaut nuan lebuh nuan dituntung penusah! Awakka Allah Taala Jakop nyaga nuan! Awakka Iya ngirumka tulung ari Rumah Sembiang Iya lalu nyaup nuan ari Bukit Sion. Awakka Iya nerima semua piring nuan lalu gaga ati ke semua piring tunu nuan. Awakka Iya meri ngagai nuan utai ti dikinginka nuan lalu ngasuh semua pelan nuan mujur magang. Nya baru kami deka manjung gaga ati ke pemenang nuan lalu muji Allah Taala kitai kena ngerami pemenang nuan. Awakka TUHAN nyaut semua peminta nuan. Diatu baru aku nemu TUHAN meri pemenang ngagai raja ti udah dipilih Iya. Iya nyaut raja nya ari serega Iya ti kudus lalu ulih kuasa Iya, Iya meri raja nya pemenang ti besai. Sekeda orang manggaika pengandal sida ba kerita perang sida lalu sida ti bukai manggaika pengandal sida ba kuda sida, tang kami manggaika pengandal kami ba kuasa TUHAN Allah Taala kami. Sida deka tesangkut lalu tetingkap, tang kami deka angkat lalu bediri tegap. O TUHAN, beri meh pemenang ngagai raja. Saut meh kami lebuh kami ngangau. Raja gaga ati, O TUHAN, laban Nuan udah meri iya pengering. Iya gaga ati laban Nuan udah ngasuh iya menang. Nuan udah meri iya utai ti dikinginka iya. Nuan udah nyaut peminta iya. Nuan udah datai ngagai iya mai berekat ti besai lalu ngerasukka makota emas ba pala iya. Iya minta diri idup, lalu Nuan meri iya pengidup, enggau umur ti panjai. Mulia iya besai laban tulung ari Nuan. Nuan udah ngasuh iya tebilang nama sereta bemulia. Berekat Nuan meruan enggau iya belama iya, lalu iya gaga ati begulai enggau Nuan. Raja manggaika pengandal iya ba TUHAN ti Pemadu Bekuasa. Lalu iya deka seruran diau likun laban pengerindu TUHAN endang meruan. Raja deka nangkap semua munsuh iya. Iya deka nangkap semua orang ke begedika iya. Lebuh iya pegari, iya deka ngerusak sida baka api. TUHAN deka ringat lalu makai sida, lalu api deka makai sida. Nadai siku ari peturun sida deka idup. Raja deka munuh semua sida. Sida ngaga pelan, lalu bepekat ngelaban iya, tang sida deka puntan. Iya deka nimbakka laja iya ngagai sida lalu ngasuh sida nguing lalu rari. Kami muji Nuan, O TUHAN, laban pengering Nuan endang amat besai! Kami deka belagu lalu muji kuasa Nuan. Allah Taala aku, O Allah Taala aku, nama kebuah Nuan ninggalka aku? Nama kebuah Nuan jauh ari aku lalu enda nulung aku, enda ninga demuh aku? O Allah Taala aku, aku ngangauka Nuan lebuh siang hari, tang Nuan enda nyaut. Aku ngangau lebuh malam hari, tang aku enda ulih belelak. Tang Nuan kudus duduk ba kerusi diraja Nuan dipuji orang Israel. Aki ini kami udah manggaika pengarap sida ba Nuan. Sida udah ngarapka Nuan, lalu Nuan udah ngelepaska sida. Sida ngangauka Nuan, lalu sida diselamatka. Sida manggaika pengandal sida ba Nuan, lalu sida enda asa ngapa. Tang aku tu ulat, ukai mensia; dikeleseka orang, dikelanyaika semua orang! Semua orang ke meda aku, ketawaka aku magang. Sida enchebirka mulut ngagai aku, lalu ngilikka pala sida. Ku sida bejaku, “Panggaika pengarap nuan ba TUHAN; awakka Iya ngelepaska nuan. Awakka Iya nyelamatka nuan ke dikerinduka Iya!” Nuan ngasuh aku ada enggau likun, lalu lebuh aku agi mit, Nuan ngibun aku likun. Aku udah manggaika diri ba Nuan kenyau ari ada, lalu Nuan endang Allah Taala aku. Anang jauh ari aku, laban penusah nyau semak, lalu aku nadai orang nulung. Bala munsuh ke ngelingi aku nyau baka raban sapi ti lelaki. Semua sida ngelingi aku magang, baka sapi ti lelaki ti mangah di Basan. Sida nukangka nyawa sida ngagai aku, baka singa ti lapar sereta negung. Pengering aku nyau abis, lenyau baka ai ti siuh ba tanah. Semua tulang aku nyau enda betampung agi. Ati aku baka lilin; iya lela dalam dada aku. Batang rekung aku nyau rangkai baka amau, lalu dilah aku nyau lekat ba kelakanit aku. Nuan ngalika aku malai amau pemati. Bala orang ke jai bekelingika aku. Orang ke ngereja penyai ngelulung aku. Sida nguyaska jari enggau kaki aku. Semua tulang aku nyau ayan magang. Bala munsuh ketawa meda aku. Sida bedua gari aku entara bala sida, lalu bechabut undi ke serayung aku. O TUHAN, anang jauh ari aku! Datai jampat lalu lepaska aku! Selamatka aku ari pedang. Selamatka aku ari raban ukui tu. Selamatka aku ari raban singa tu. Aku nadai daya agi di mua raban sapi ti siga tu. Aku deka madahka ngagai bala aku utai ti udah dikereja Nuan. Aku deka muji Nuan ba gempuru sida, munyi tu: ‘Puji meh TUHAN, kita ke nangika Iya! Kemesaika Iya, kita ke peturun Jakop! Sembah meh Iya, kita orang Israel! Iya nadai kala enda ibuhka orang ke seranta tauka nejuka sida kena perinsa. Iya enda ninggalka sida, tang nyaut sida lebuh sida ngangauka Iya.” Lebuh orang begempuru, aku deka muji Nuan ketegal utai ti udah dikereja Nuan. Di mua orang ke nyembah Nuan aku deka ngenjuk piring ti udah disemaya aku. Orang ke seranta deka makai datai ke kenyang. Orang ke datai ngagai TUHAN, deka muji Iya. Awakka sida nyamai diau belama iya! Semua bansa deka ingatka TUHAN. Sida deka nguing ngagai Iya ari serata dunya. Semua bansa deka nyembah Iya. TUHAN endang Raja, lalu Iya merintah semua bansa. Semua orang ke sumbung di dunya tu deka meremi di mua Iya; semua mensia deka meremi di mua Iya. Serak ti dudi deka betuaika Iya. Sida deka bejakuka pasal TUHAN ngagai serak ke nangkanka sida. Orang ke apin ada, deka dipadahka: ‘ TUHAN udah ngelepaska bala nembiak Iya.’ TUHAN pengibun aku. Aku nadai suntuk utai. Iya ngasuh aku belelak ba padang rumput ti galak lalu nguluka aku ngagai ai ti tenang. Iya ngasuh aku kering baru. Iya ngiring aku nengah jalai ti ngena, ketegal nama Iya. Taja pen aku bejalai nengah darung kelemayang pemati, aku enda takut, laban Nuan bisi enggau aku. Pemalu enggau tungkat Nuan ngasuh aku likun. Nuan nyendiaka pengerami makai besai ke aku di mua munsuh aku. Nuan nata pala aku ngena minyak lalu ngisi jalung aku penuh. Aku nemu, pemanah enggau pengerindu Nuan deka meruan enggau aku sepemanjai umur aku. Lalu aku deka diau dalam rumah TUHAN belama lama iya. Dunya enggau semua utai ti dalam dunya endang enggi TUHAN. Dunya enggau semua orang ke diau di dunya endang enggi TUHAN; laban Iya udah nudukka dunya ba tasik enggau ba sungai. Sapa tau niki ngagai bukit TUHAN? Sapa tau bediri dalam Rumah Sembiang Iya ti kudus? Orang ke tuchi jari, tuchi ati, ti enda nyembah engkeramba lalu enda ngaga semaya ti bula. TUHAN deka merekat lalu ngidupka sida. Allah Taala ke meri sida pengelepas, deka ngumbai sida nadai penyalah. Nya meh orang ke ngiga Iya, ke ngiga Allah Taala Jakop. Tukangka pintu kuta kita. Buka pintu ti lama, ngambika Raja ke bemulia ulih tama. Sapa Raja ke bemulia nya? Iya nya TUHAN, ke kering sereta bekuasa, TUHAN ti menang beperang. Tukangka pintu kuta kita. Buka pintu ti lama, ngambika Raja ke bemulia ulih tama. Sapa Raja ke bemulia nya? TUHAN ti Pemadu Bekuasa, Iya nya meh Raja ke bemulia! O TUHAN, aku besampi ngagai Nuan. Aku manggaika pengarap aku ba Nuan, O Allah Taala aku. Anang nejuka aku alah enggai ke aku malu. Anang nejuka munsuh aku ketawaka aku! Orang ke manggaika pengarap diri ba Nuan, enda alah, tang orang ke angkat ngelaban Nuan enggau nadai kebuah, deka alah. Ajar aku jalai Nuan, O TUHAN. Awakka aku nemu jalai Nuan. Ajar meh aku diau nitihka pemendar Nuan, laban Nuan endang Allah Taala aku, ke ngelepaska aku. Aku endang seruran arapka Nuan. O TUHAN, kingatka penelap enggau pengerindu Nuan ti meruan belama iya, ti udah diayanka Nuan kenyau ari dulu kelia. Ampun meh dosa enggau penyalah ti udah dikereja aku lebuh aku agi biak. Kingatka aku, O TUHAN, ulih pengerindu Nuan ti meruan belama iya, enggau ulih pemadas Nuan! Laban TUHAN endang lurus sereta badas, Iya ngajar orang ke bedosa jalai ti patut ditengah sida. Iya nguluka orang ke baruh ati nengah jalai ti ngena lalu ngajar sida peneka Iya. Enggau ati ti tetap sereta enggau pengerindu, Iya nguluka semua orang ke nitihka sempekat Iya, sereta ngasika adat Iya. Kingatka semaya Nuan, O TUHAN, lalu ampun dosa aku, laban dosa aku mayuh. Orang ke nangika TUHAN deka belajar ari Iya jalai ti patut ditengah sida. Sida deka seruran kaya-raja, lalu bala anak sida deka bempu menua tu. TUHAN nyadika pangan orang ke ngasika Iya lalu Iya netapka sempekat Iya baru enggau sida. Aku endang seruran merening ngagai TUHAN, laban Iya deka ngelepaska aku ari panjuk. Malik ngagai aku, O TUHAN, lalu kasihka aku, laban aku seilu-ilu sereta kena perinsa. Buai pengirau ari ati aku lalu bai aku pansut ari semua penusah aku. Peda pemerinsa enggau penusah aku, lalu ampun semua dosa aku. Peda Nuan pemayuh munsuh aku. Peda Nuan pemalat sida begedika aku. Jaga aku lalu selamatka aku. Anang ngasuh aku malu laban aku ngenduh ngagai Nuan. Awakka pemanah enggau pemetul ati aku nyaga aku, laban aku manggaika pengarap aku ba Nuan. Lepaska Israel, O Allah Taala, ari semua penusah sida. Padahka aku tu nadai penyalah, O TUHAN, laban aku udah ngereja utai ti ngena lalu udah manggaika pengarap aku ba Nuan enggau pengabis ati aku. Peresa lalu abas meh ati aku, TUHAN. Peresa meh pengingin enggau runding aku. Laban pengerindu Nuan ti meruan belama iya ngiring aku, lalu aku nitihka Nuan enggau ati ti tetap. Tauka idup taluk ngagai Nuan. Aku enda begulai enggau orang ke bula, lalu aku enggai begulai enggau orang ke pura-pura ngapa. Aku begedi begulai enggau orang ke ngereja penyai lalu aku enggai duduk enggau orang ke jai. TUHAN, aku masu jari aku laban aku nadai penyalah lalu nyembah ba alta Nuan, belagu ngena pantun terima kasih lalu nusui pasal semua kereja ti nyelai ti udah dikereja Nuan. Aku rinduka rumah alai Nuan diau, O TUHAN, endur alai mulia Nuan. Anang muai aku baka Nuan ke muai orang ke bedosa. Anang nejuka aku diukum baka Nuan ke ngukum orang ke udah munuh orang, orang ke seruran ngereja penyai lalu selalu sedia deka makai suap. Tang aku ngereja utai ti ngena. Kasihka aku, lalu selamatka aku! Aku likun ari semua penusah. Aku muji TUHAN lebuh aku begempuru enggau bala nembiak Iya. TUHAN meh penampak enggau pengelepas aku. Aku enda takut. TUHAN nyadika kuta nyawa aku; nya alai aku enda takut. Lebuh orang ke jai ngamuk aku, deka makai aku, iya nya bala munsuh aku, sida deka tesangkut lalu rebah. Taja pen semua bala soldadu ngelulung aku, aku enda takut. Taja pen munsuh nyerang aku, aku deka mengkang berani. Aku udah minta siti utai ari TUHAN, utai ti digiga aku; iya nya, aku minta diri diau dalam rumah TUHAN seumur idup, ngambika aku ulih belematika pemadas TUHAN, lalu betanya ngagai Iya dalam Rumah Sembiang Iya. Laban Iya deka ngelindung aku lebuh maya tusah. Iya deka ngelalaika aku dalam Rumah Sembiang Iya lalu ngengkahka aku ba bukit batu. Nya alai aku deka ngalahka munsuh ke ngelulung aku. Enggau panjung gaga ati aku deka ngenjuk piring dalam Rumah Sembiang Iya. Aku deka belagu muji TUHAN. Dingaka aku, TUHAN, lebuh aku ngangauka Nuan! Kasihka aku, lalu saut meh aku! Lebuh Nuan nyebut, ‘Datai kitu lalu sembah Aku,’ aku nyaut, ‘Aku deka datai, TUHAN.’ Anang ngelalaika Diri ari aku! Anang ringat ngagai aku. Anang nulak nembiak Nuan. Nuan udah nulung aku. Anang ninggalka aku. Anang ngelengkaka aku, O Allah Taala ti Penebus aku. Apai enggau indai aku nyangka deka ninggalka aku, tang TUHAN deka ngibun aku. Ajar meh aku, TUHAN, jalai Nuan, lalu uluka aku nengah jalai ti rata, laban aku mayuh munsuh. Anang nyerahka aku ngagai munsuh ke nyerang aku ngena pemula enggau jaku emba. Aku nemu diri deka idup lalu meda pemadas TUHAN dalam pengidup tu. Panggaika pengarap ba TUHAN. Kering sereta berani; Panggaika pengarap ba TUHAN. O TUHAN, ke penyaga aku, aku ngangauka Nuan. Pendingka sabak aku! Enti Nuan enda nyaut aku, aku deka nurun enggau orang ngagai dunya pemati. Dingaka aku lebuh aku nyabak ngagai Nuan minta tulung, lebuh aku ngangkatka jari aku ngagai Rumah Sembiang Nuan ti kudus. Anang ngukum aku baka Nuan ke ngukum orang ke jai, enggau orang ke ngereja penyai, ke bejaku manis ngagai pangan diri tang bisi pemenchi dalam ati sida. Ukum meh sida ketegal utai ti udah dikereja sida, ketegal penyai ti udah dikereja sida. Ukum meh sida ketegal semua pengawa sida. Beri ngagai sida ukum ti patut diterima sida! Sida nadai beratika utai ti udah dikereja TUHAN tauka utai ti udah digaga TUHAN. Nya alai TUHAN deka ngukum sida lalu ngerusak sida belama iya. Beri puji ngagai TUHAN laban Iya udah ningaka aku ke nyabak minta tulung. TUHAN ngelindung sereta nyaga aku. Aku manggaika pengarap aku ba Iya. Iya nulung aku, lalu ngasuh ati aku gaga. Aku belagu muji Iya ngena lagu gaga ati. TUHAN ngelindung bala nembiak Iya. Iya nyaga sereta ngidupka raja ti udah dipilih Iya. Lepaska bala nembiak Nuan, TUHAN, lalu berekatka sida ke enggi Nuan. Awakka Nuan nyadi pengibun sida, lalu ngibun sida belama iya. Puji meh TUHAN, kita orang serega. Puji meh mulia enggau kuasa Iya. Puji meh nama TUHAN ti bemulia. Meremi di mua Iya ti kudus lebuh Iya pegari. Nyawa TUHAN bisi didinga di tasik. Allah Taala ti bemulia bejaku munyi guntur, lalu munyi nyawa Iya belauh ba tasik. Nyawa TUHAN ti bekuasa sereta bemulia bisi didinga. Munyi nyawa TUHAN matahka kayu sidar, nyengkaum kayu sidar di Lebanon. Iya ngasuh semua bukit di menua Lebanon merejuk baka anak sapi lalu ngasuh Bukit Hermon engkechit baka sapi ti lelaki. Munyi nyawa TUHAN ngasuh kilat nyelar. Munyi nyawa Iya ngasuh menua puang berenyang. Iya ngusak menua puang Kades. Munyi nyawa TUHAN ngusak kayu oak lalu ngugurka daun kayu lebuh semua orang dalam Rumah TUHAN manjung nyebut, “Muliaka Allah Taala!” TUHAN merintah ai ti dalam. Iya nyadi Raja belama iya. TUHAN meri pengering ngagai bala nembiak Iya lalu meri sida pemaik. Aku muji Nuan, O TUHAN, laban Nuan udah ngidupka aku lalu enda nyagi munsuh aku ketawaka aku. Aku nyabak minta tulung Nuan, O TUHAN Allah Taala aku, lalu Nuan ngeraika aku. Nuan nagang aku mati; lebuh aku mansang ngagai dunya pemati, Nuan ngidupka aku baru. Belagu muji TUHAN semua kita ke nembiak Iya! Kingatka utai ti udah dikereja Iya ti Kudus, lalu beri terima kasih ngagai Iya! Iya ringat enda lama, tang pemadas Iya tan seumur idup. Ai mata nyangka lilih lebuh malam hari, tang pengaga datai lebuh pagi hari. Aku berasai likun, lalu bejaku dalam ati diri, ‘Aku sigi enda ulih dialahka munsuh.’ Nuan udah manah enggau aku, TUHAN. Nuan udah nyaga aku baka kuta ti ba bukit. Tang Nuan ngelalaika Diri ari aku, lalu aku takut. Aku ngangauka Nuan, O TUHAN. Aku minta Nuan nulung aku, Nama penguntung Nuan enti aku mati? Nama penguntung Nuan enti aku dibuai ngagai kubur? Kati orang ke mati ulih muji Nuan? Kati sida ulih nusui pasal penetap ati Nuan? Dingaka aku, TUHAN, lalu kasihka aku! Tulung aku, TUHAN! Nuan udah ngubah ati aku ti tusah lalu ngasuh aku betanda gaga ati. Nuan udah muai ati aku ti tusah lalu malut aku ngena pengaga. Nya alai aku enda tau enda bemunyi. Aku deka belagu muji Nuan. O TUHAN, Nuan meh Allah Taala aku. Aku deka meri terima kasih ngagai Nuan belama iya. Aku datai ngagai Nuan, O TUHAN, minta Nuan nyaga aku. Anang nejuka aku alah. Nuan endang Allah Taala ti lurus. Aku besampi minta Nuan ngelepaska aku! Dingaka aku, lalu selamatka sida diatu! Awakka aku ngenduh ba Nuan lalu Nuan ngelindung aku, penyaga ke ngelepaska aku. Nuan nyadi endur alai aku ngenduh, nyadika penyaga aku. Iring lalu uluka aku, munyi ti udah disemaya Nuan. Jaga meh aku likun ari panjuk ti udah ditan orang kena sida nyintak aku, laban aku ngenduh ba Nuan. Aku nyerahka diri ngagai jari Nuan. Nuan udah nebus aku, O TUHAN, laban Nuan endang Allah Taala ti tetap ati. Nuan begedika orang ke nyembah engkeramba, tang aku manggaika pengarap aku ba TUHAN. Aku deka lantang sereta rami gaga ketegal pengerindu Nuan ti meruan belama iya, laban Nuan udah meda pemerinsa aku. Nuan nemu penusah aku. Nuan nadai kala nyerahka aku ngagai jari munsuh aku. Nuan udah ngemendarka aku bejalai ngagai sebarang endur aku deka. Kasihka aku, O TUHAN, laban aku dituntung penusah. Mata aku nyau bangkung laban ati aku balat tusah. Aku tu lelak amat. Aku lelak laban ati aku balat tusah, lalu umur aku nyau pandak laban aku udu nyabak. Aku lembut tulang laban semua penusah aku. Indah tulang aku deh nyau lupis. Semua munsuh aku, lebih agi orang ke berimbai pendiau enggau aku, kejika aku. Orang ke ngelala aku, takutka aku. Lebuh sida meda aku ba jalai raya, sida rari. Aku nyau baka orang ke udah mati, ti enda dikingatka orang agi. Aku tu baka periuk ti udah pechah. Aku ninga mayuh munsuh betelai. Aku dikelingi utai ti balat ngenakut. Sida ngiga chara kena ngelaban aku, bepekat deka munuh aku. Tang aku manggaika pengarap aku ba Nuan, O TUHAN, laban Nuan endang Allah Taala aku. Aku endang seruran diibun Nuan. Selamatka aku ari bala munsuh aku, ari orang ke merinsaka aku. Perening ngagai nembiak Nuan enggau penelap. Selamatka aku laban pengerindu Nuan endang meruan. Aku ngangauka Nuan, O TUHAN. Anang nejuka aku dipechat. Awakka orang ke jai, dipechat. Awakka sida enda bemunyi mansang ngagai dunya pemati. Padamka jaku orang ke bula, semua orang ke sumbung, enggau tinggi ati, ke bejaku enda bebasaka orang ke lurus. Naka meh pemanah utai ti badas ti disimpan Nuan ke orang ke ngemesaika Nuan! Semua orang nemu pemadas Nuan, pasal Nuan ke nyaga enggau likun orang ke manggaika pengarap sida ba Nuan. Nuan ngelalaika sida ba endur Nuan Empu lalu ngibun sida likun ari akal orang bukai. Nuan ngelalaika sida ngambika sida likun ari jaku pechat munsuh. Puji TUHAN! Naka meh pemanah Iya ngayanka pengerindu Iya ke aku lebuh aku dikelulung sereta diserang munsuh! Aku takut, lalu berunding ngumbai Iya udah muai aku ari Iya. Tang Iya ninga sabak aku, lebuh aku ngangauka Iya, minta tulung. Rindu meh kita ke TUHAN, semua kita ke nembiak Iya. TUHAN nyaga orang ke tetap ati, tang ngukum orang ke sumbung nitihka penyumbung sida. Seruran kering, seruran berani, semua kita ke andal ati ke TUHAN. Beberekat meh orang lebuh dosa enggau penyalah sida diampun. Beberekat meh orang ke enda dikumbai TUHAN bisi penyalah lalu enda nipu orang. Lebuh aku enda ngaku dosa aku, aku lelak nyabak sepemanjai hari. Siang malam Nuan ngukum aku, TUHAN. Aku nyau nadai pengering agi, baka ai ti rangkai laban panas. Udah nya aku ngaku dosa aku ngagai Nuan, lalu aku enda ngelalaika penyalah diri. Aku ngaku utai nya ngagai Nuan, lalu Nuan ngampun semua dosa aku. Nya alai semua nembiak Nuan ke taluk ngagai Nuan patut besampi ngagai Nuan lebuh sida dituntung penusah ngambika penusah nya enda datai ba sida. Nuan nyadi endur alai aku belalai. Nuan deka ngelepaska aku ari penusah. Aku belagu enggau nyawa ti inggar muji pengelepas ti datai ari Nuan, laban Nuan nyaga aku. Ku TUHAN bejaku, “Aku deka nunjukka jalai ti patut ditengah nuan. Aku deka ngajar sereta meri nuan jaku lalau. Anang beli baka kuda tauka baka keledai, ti enda tau enda ditarit ngena repik besi enggau tali ba mulut iya ngambika iya deka nurut. Orang ke jai sigi enda tau enda natka pemerinsa, tang orang ke arapka TUHAN deka dijaga ulih pengerindu Iya ti meruan belama iya. Lantang sereta rami gaga meh kita ke lurus ketegal utai ti udah dikereja TUHAN. Manjung gaga ati meh kita ke ngasika Iya! Rami gaga ati meh kita ke lurus. Puji meh Iya, semua kita ke ngasika Iya. Beri terima kasih ngagai TUHAN ngena belikan. Belagu ke Iya ngena sape. Nyanyi lagu ti baru ke Iya. Tebah belikan enggau pengabis pengelandik kita, sereta enggau panjung kita! Laban jaku TUHAN endang amat, lalu semua pengawa Iya endang dikereja Iya enggau ati ti tetap. TUHAN rinduka atur ti lurus sereta betul. Dunya penuh laban pengerindu Iya ti meruan belama iya. TUHAN bejaku, langit lalu nyadi, mata hari, bulan enggau bintang nyadi laban jaku Iya. Iya ngelumuka semua ai tasik ba siti endur, lalu nyimpan tasik ti besai ba endur ti dalam. Nangika TUHAN meh semua kita dunya! Awakka semua bansa di dunya nangika Iya! Lebuh Iya bejaku, dunya nyadi. Lebuh Iya bejaku, semua utai pegari. TUHAN ngemuntanka juluk ati semua bansa. Iya nagang sida bejalaika pelan sida. Tang pelan Iya Empu tan belama iya. Juluk ati Iya meruan belama iya. Lantang meh bansa ti ngaku TUHAN nyadika Allah Taala sida. Beberekat meh orang ke udah dipilih TUHAN nyadika nembiak Iya! TUHAN nilik ke baruh ari serega lalu meda semua kitai mensia. Ari endur alai Iya ke merintah, Iya nilik ke baruh ngagai semua mensia ti diau di dunya. Iya nempa semua runding sida lalu nemu semua utai ti dikereja sida. Raja ukai menang laban pemayuh bala soldadu iya. Soldadu ukai menang ulih pengering sida. Kuda ti dikena beperang enda ulih ngasuh menang. Pengering sida enda ulih ngidupka sida. TUHAN ngemataka semua orang ke ngasika Iya, ke manggaika diri ba pengerindu Iya ti meruan belama iya. Iya ngelepaska sida ari pemati. Iya ngidupka sida lebuh maya lapar pungkang. Kitai andal ati ke TUHAN. Iya nyaga sereta nyaup kitai. Kitai gaga ati ketegal Iya. Kitai manggaika pengarap kitai ba nama Iya ti kudus. Awakka pengerindu Nuan meruan enggau kami, O TUHAN, lebuh kami manggaika pengandal ati kami ba Nuan. Aku deka seruran meri terima kasih ngagai TUHAN. Aku enggai badu muji Iya. Aku deka muji Iya ketegal utai ti udah dikereja Iya. Awakka semua orang ke kena tekan, mending lalu gaga ati! Aram kitai nusui pemesai kuasa TUHAN. Aram kitai sama sereta muji nama Iya! Aku besampi ngagai TUHAN, lalu Iya nyaut aku. Iya ngelepaska aku ari semua penakut aku. Orang ke kena tekan engkadah ngagai Iya, lalu gaga ati. Sida enda asa ngapa. Orang ke seranta ngangauka Iya, lalu Iya nyaut. Iya ngelepaska sida ari semua penusah sida. Melikat TUHAN nyaga orang ke ngemesaika TUHAN lalu ngelepaska sida ari utai ti tau nganu sida. Awakka kita empu ngasaika pemadas TUHAN. Beberekat meh orang ke nemu pengelikun lebuh sida begulai enggau Iya. Nangika TUHAN, semua kita ke nembiak Iya, laban orang ke ngasika Iya, nadai kala suntuk utai. Indah singa deh bejalai lapar laban sida nadai pemakai, tang orang ke ngasika TUHAN, nadai suntuk utai. Datai kitu, bala kita anak, lalu pendingka aku. Aku deka ngajar kita jalai ngemesaika TUHAN. Kati kita minta diri nyamai idup? Kati kita minta diri panjai umur lalu lantang diau? Enti kita dekaka nya, anang bejaku jai lalu anang bula. Lengkaka penyai, lalu kereja utai ti badas. Giga pemaik enggau pengabis ati kita. TUHAN ngemataka orang ke lurus lalu mendingka sabak sida. Tang Iya ngelaban orang ke ngereja penyai, ngambika lebuh sida mati, sida enda dikingatka agi. Orang ke lurus ngangauka TUHAN, lalu TUHAN ninga, lalu Iya ngelepaska sida ari semua penusah sida. TUHAN diau semak orang ke tusah ati lalu ngidupka sida ke nadai agi pengadang. Orang ke badas natka mayuh macham penusah, tang TUHAN ngelepaska sida ari semua penusah nya. TUHAN nyaga sida. Siti pen nadai meh tulang sida patah. Penyai deka munuh orang ke jai. Orang ke begedika orang ke lurus, deka diukum. TUHAN deka nebus bala nembiak Iya. Nadai siku orang ke ngenduh ngagai TUHAN deka diukum. Laban meh orang ke ngelaban aku, O TUHAN; serang meh orang ke nyerang aku! Bai terabai enggau senyata Nuan, lalu tulung aku. Kedarka sangkuh enggau kapak perang Nuan ngelaban orang ke begagaika aku. Aku minta Nuan besemaya ngidupka aku. Awakka orang ke nguji munuh aku alah lalu dipechat! Awakka orang ke bepekat ngelaban aku, nikal sereta charut runding! Awakka sida baka rumput ti rangkai ti dikebuka ribut, lebuh melikat TUHAN muru sida! Awakka jalai ti ditengah sida petang sereta lichin, lebuh melikat TUHAN begagaika sida! Laban sida manjuk aku enggau nadai kebuah, lalu numbak lubang ti dalam kena sida nangkap aku. Awakka pengerusak ninggang sida lebuh sida enda ngadang. Lalu awakka sida disintak panjuk sida empu lalu dirusak! Nya baru aku deka gaga ati ke TUHAN, gaga ati laban Iya udah ngelepaska aku. Enggau pengabis ati aku, aku deka nyebut ngagai TUHAN, “Nadai orang ke sebaka enggau Nuan, O TUHAN. Nuan nyaga orang ke lemi, ari orang ke kering, orang ke seranta, ari orang ke nekanka pengidup sida.” Orang ke jai besaksi ngelaban aku lalu bedawa ngumbai aku ngereja penyalah ti enda ditemu aku. Sida malas pemanah aku ngena penyai, lalu ati aku balat tusah. Tang lebuh sida sakit, aku ngerasukka pekayan ulit. Aku bepasa. Aku besampi ngendukka pala, baka ke besampika pangan tauka menyadi. Aku bejalai nensam laban aku ngulit, baka orang ke ngulitka indai diri. Tang lebuh aku kena laban penusah, semua sida gaga ati, lalu begempuru ngelingi aku, lalu beduan aku. Orang kampar bepaluka aku, lalu majak bepaluka aku. Sida ngeleseka aku enda ngetu-ngetu, lalu sida begerit ngeli meda aku. Ni pengelama Nuan semina merening aja, O TUHAN? Selamatka aku ari serang sida. Selamatka aku ari bala singa tu! Nya baru aku deka meri terima kasih ngagai Nuan lebuh bala nembiak Nuan begempuru. Aku deka muji Nuan di mua semua sida. Anang nejuka bala munsuh aku, orang ke bula nya, ketawa meda aku alah. Anang nejuka orang ke begedika aku enggau nadai kebuah, tuchum gaga ati meda aku balat tusah. Sida nadai nyebut utai ti manah, tang nempaka berita ti bula pasal orang ke rinduka pemaik. Ku sida manjung bedawaka aku, “Kami bisi meda utai ti udah dikereja nuan!” Tang Nuan, O TUHAN, udah meda nya. Nya alai, anang enda bemunyi, TUHAN. Anang jauh ari aku! Angkat meh Nuan, O TUHAN, lalu jaga aku. Angkat meh Nuan, O Allah Taala aku, lalu bejaku ngarika aku. Nuan endang lurus, O TUHAN, nya alai bejaku meh Nuan madahka aku tu nadai penyalah. Anang nejuka munsuh aku ketawaka aku. Anang nejuka sida bejaku enggau pangan diri, “Kitai udah muai iya! Nya aja utai ti dikedekaka kitai!” Awakka orang ke ketawaka pemerinsa aku alah sereta charut runding. Awakka orang ke ngumbai diri badas agi ari aku, malu sereta dipechat. Awakka orang ke ingin deka meda aku dikumbai nadai penyalah, manjung gaga ati, lalu enda ngetu nyebut, “Naka meh pemesai kuasa TUHAN! Iya gaga ati meda nembiak Iya mujur.” Nya baru aku deka nusui pasal pengelurus Nuan, lalu muji Nuan sepemanjai hari. Dosa bejaku terus ngagai buntut ati orang ke jai. Sida nulak Allah Taala, lalu enda nangika Iya. Laban sida balat muji diri, lalu ngumbai Allah Taala enda nemu lalu begedika dosa sida. Mulut sida penuh laban akal ti jai enggau jaku ti nipu. Sida enggai agi bekira ngereja utai ti manah. Lebuh sida gali ba peninduk sida, sida berundingka pelan kena ngereja penyai; Utai ti dikereja sida nadai manah siti, lalu sida nadai kala nulak penyai. O TUHAN, pengerindu Nuan ti meruan belama iya endang tinggi agi ari langit. Penetap ati Nuan tinggi agi ari remang. Pengelurus Nuan tinggi baka bukit ti pemadu tinggi. Pengelurus atur Nuan baka penalam tasik. Mensia enggau jelu diibun Nuan magang. Naka meh pemadas pengerindu Nuan ti meruan belama iya, O Allah Taala! Kami belindung di baruh sayap Nuan. Kami makai mayuh macham pemakai ti disediaka Nuan ke kami. Nuan meri kami ai irup ari sungai Nuan ti manah. Nuan endang pun pengidup, lalu kami ulih meda penampak laban penampak Nuan. Awakka Nuan seruran rinduka orang ke nemu Nuan, lalu ngereja utai ti manah ngagai orang ke lurus. Anang nejuka orang ke sumbung ngamuk aku, tauka nejuka orang ke jai muru aku. Peda endur alai orang ke jai udah rebah. Dia meh endur alai sida garing-garing, enda ulih angkat agi. Anang tusah ati ketegal orang ke jai. Anang ngining orang ke ngereja penyalah. Enda lama da agi sida deka lesap baka rumput, layu baka babas. Panggaika pengarap kita ba TUHAN, lalu kereja utai ti badas; nya baru kita deka diau di menua tu, lantang sereta likun. Gaga ati ke TUHAN, lalu Iya deka meri nuan utai ti dikinginka nuan. Serahka pengidup nuan ngagai TUHAN. Panggaika pengarap nuan ba Iya, lalu Iya deka nulung nuan. Iya deka ngasuh pemadas nuan manchar baka penampak, lalu ngasuh pengelurus nuan manchar terang baka penampak tengah hari. Diau jenuh di mua TUHAN, lalu anti Iya enggau ati ti liat. Anang irau ketegal orang bukai mujur, tauka ketegal orang bejalaika pelan sida ke jai. Anang ringat, lalu badu agi pedis ati! Anang irau, laban pengirau semina ngujung ngagai penyai. Laban orang ke jai deka diburu; tang orang ke nganti TUHAN, deka bempu menua tu. Enda lama da agi orang ke jai deka abis; taja pen kita bebendar begigaka sida, tang kita nadai tetemuka sida. Tang orang ke baruh ati deka bempu menua tu lalu diau lantang ngena pengaya sida. Orang ke jai kerik-kerik ngeli bepekat ngelaban orang ke lurus; tang TUHAN ketawaka orang ke jai, laban Iya nemu timpuh sida nyau semak. Orang ke jai nyintak pedang, lalu narit panah sida deka munuh orang ke seranta enggau orang ke suntuk, deka munuh orang ke lurus; tang pedang sida deka ngerejang ati sida empu, lalu panah sida deka dipatahka. Manah agi diau lurus lalu bempu utai ti mimit aja, ari ke bempu mayuh pengaya tang nyadi orang ke jai; laban TUHAN deka muai kuasa orang ke jai, tang nyaga orang ke lurus. TUHAN nyaga orang ke nadai penyalah, lalu sida deka bempu menua tu belama iya. Sida enda merinsa lebuh maya ti jai, lalu lebuh lapar pungkang nyadi, sida deka mayuh pemakai. Tang orang ke jai deka mati, lalu bala munsuh TUHAN deka nyadi baka bungai babas; Sida deka lesap baka asap. Orang ke jai nginjau utai, lalu enda mayar utai nya pulai baru, tang orang ke lurus meri enggau ati ti gerah mudah lalu majak meri; laban orang ke diberekatka TUHAN, deka bempu menua tu, tang orang ke disumpah TUHAN, deka diburu ari menua tu. Singkang kitai diiring TUHAN, lebuh Iya gaga ati ke ulah kitai; taja pen kitai tesangkut, tang kitai enda rebah, laban TUHAN deka megai jari kitai. Lebuh aku agi biak, enggau lebuh aku nyau tuai, aku nadai kala meda orang ke lurus ditinggalka TUHAN, tauka meda bala anak sida nyanda pemakai. Sida endang seruran meri orang utai enggau ati ti gerah mudah, lalu nyali utai ngagai orang, lalu bala anak sida nyadika berekat. Lengkaka penyai, lalu kereja pemadas; ngambika kita diau di menua tu belama iya, laban TUHAN rinduka atur ti lurus; Iya enda ninggalka bala nembiak Iya ke tetap ati ngagai Iya. Orang ke lurus deka dijaga Iya belama iya, tang peturun orang ke jai, deka diburu. Orang ke lurus deka bempu menua tu lalu diau ditu belama iya. Mulut orang ke lurus mansutka penemu-dalam, lalu dilah sida seruran bejakuka atur ti lurus. Adat Allah Taala endang meruan dalam ati sida lalu sida enda limpang ari adat nya. Orang ke jai nengkilunka orang ke lurus deka nguji munuh sida, tang TUHAN enggai nyerahka orang ke lurus ngagai jari munsuh sida, tauka nejuka sida diukum lebuh sida kena pechara. Anti meh TUHAN, lalu titihka jalai Iya, lalu Iya deka ngangkatka kita, ngambika kita bempu menua tu; kita deka meda orang ke jai nya dirusak. Aku bisi udah kala meda orang ke jai nekanka pengidup orang, ngeninggika diri baka kayu sidar ti di menua Lebanon. Tang lebuh aku mansa udah lepas nya, sida nadai agi dia; taja pen aku begigaka sida, tang aku nadai tetemuka sida. Peratika orang ke nadai penyalah. Peratika orang ke lurus, laban orang ke diau bebaik enggau orang bukai, deka bisi peturun. Tang orang ke ngereja penyalah, deka dirusak magang, lalu peturun sida deka diburu. TUHAN ngelepaska orang ke lurus lalu nyaga sida lebuh penusah nyadi. TUHAN nulung sida, lalu ngelepaska sida. Iya ngelepaska sida ari orang ke jai, lalu nyelamatka sida, laban sida belindung ba Iya. O TUHAN, anang ringat lalu anang nganu aku! Nuan udah ngemakalka aku ngena laja Nuan. Nuan udah ngerebahka aku. Aku pedis laban Nuan ringat ngagai aku. Tubuh aku abis diempa penyakit laban dosa aku. Aku lemas dilamun bah dosa aku. Dosa aku kelalu berat. Laban aku udah beli, rumbak aku nyau bau but. Aku nyau bungkuk, lalu kunduk-kunduk. Aku ngulit sepemanjai hari. Aku sakit chelap-angat lalu aku nyau deka mati. Aku balat lelak, sereta nadai daya agi. Ati aku tusah, lalu aku bedemuh laban pedis. O TUHAN, Nuan nemu utai ti dikinginka aku. Nuan ninga semua demuh aku. Tungkul ati aku ketap-ketap. Aku nadai agi pengering, lalu mata aku nyau kabur. Bala pangan aku, enggau orang ke berimbai pendiau enggau aku, enggai datai semak ngagai aku, ketegal rumbak aku. Indah kami sebilik deh enggai datai semak aku. Orang ke deka munuh aku, nan panjuk kena sida nyintak aku, lalu orang ke deka ngemediska aku, ngemba madahka diri deka ngerusak aku. Sida nadai nemu badu bepekat ngelaban aku. Aku tu baka orang ke bengal lalu enda ulih ninga, baka orang ke bisu lalu enda ulih bejaku. Aku tu baka orang ke enda nyaut, laban sida enda ulih ninga. Tang aku manggaika pengarap aku ba Nuan, O TUHAN, lalu Nuan, O TUHAN Allah Taala aku, deka nyaut aku. Anang nejuka munsuh aku ketawaka penusah aku. Anang nejuka sida temegah ketegal aku alah! Aku nyau deka rebah lalu tubuh aku seruran pedis. Aku ngaku dosa aku. Dosa aku ngasuh ati aku irau. Bala munsuh aku bepengerai sereta kering. Mayuh orang begedika aku enggau nadai kebuah. Orang ke malas pemanah ngena penyai, ngelaban aku ketegal aku nguji ngereja utai ti ngena. Anang ninggalka aku, O TUHAN. O Allah Taala aku, anang jauh ari aku! Tulung meh aku diatu, O TUHAN ti Penebus aku! Ku aku bejaku, “Aku deka bejimat nyaga ulah diri enggai ke dilah aku mai aku bedosa. Aku enggai nyebut utai lebuh orang ke jai bisi semak aku.” Aku enda bemunyi, enda bejaku. Nyebut pasal utai ti manah pen enda. Tang pemerinsa aku semina mansang balat-sebalat, lalu ati aku kelalu balat irau. Makin balat agi aku berunding, makin balat agi ga ati aku tusah. Aku nyau enda ulih nagang diri nanya: “ TUHAN, ni pengelama aku agi idup? Kemaya aku mati? Padahka maya seput aku deka abis.” Naka meh pemandak umur aku diberi Nuan! Ba Nuan, umur aku endang amat pandak. Iya ti bendar, semua utai ti idup nadai lebih ari kesuh ribut, baka ayuk. Semua utai ti dikereja kami, nadai guna magang. Kami nugungka pengaya, tang enda nemu sapa ti deka bempu utai nya. Enti pia, nama utai ti patut diadang aku, O TUHAN? Aku manggaika pengandal aku ba Nuan. Selamatka aku ari semua dosa aku, lalu anang nejuka orang ke beli beduan aku. Aku enggai agi bemunyi. Aku enggai agi mansutka jaku, laban Nuan Empu ke ngasuh aku merinsa baka tu. Anang agi nganu aku! Aku nyau deka mati dipalu Nuan. Nuan ngukum dosa kami ngena jaku anu Nuan, lalu Nuan baka indu gegat, ngerusak utai ti dikerinduka kami. Iya ti bendar, kami tu nadai lebih ari kesuh ribut! Dingaka sampi aku, O TUHAN, lalu pendingka sabak aku. Datai lalu tulung aku lebuh aku nyabak. Baka semua aki ini aku, Aku tu semina nyadi temuai Nuan enda lama aja. Awakka aku diau kediri, ngambika aku tau lantang mimit sebedau aku mupuk, lalu nadai agi. Aku nganti TUHAN enggau ati ti liat. Iya nyingitka pending Iya, lalu ninga sabak aku. Iya narit aku pansut ari lubang pemati, ari tanah pasir ti tau nginsap lalu munuh. Iya ngengkahka aku ba atas batu lalu nyaga aku. Iya ngajar aku nyanyi lagu ti baru, lagu ti dikena muji Allah Taala kitai. Mayuh orang ke meda utai tu deka takut lalu deka manggaika pengarap sida ba TUHAN. Beberekat meh orang ke manggaika pengarap ba TUHAN, ti enda nyembah engkeramba tauka enggau orang besembahka petara ti pelesu. Nuan udah ngereja mayuh macham utai ke kami, O TUHAN Allah Taala kami. Nadai orang sebaka enggau Nuan! Nuan udah ngaga mayuh bengkah pelan ti manah ke kami. Aku enda ulih ngenang semua pelan nya, laban pelan nya kelalu mayuh! Nuan enda begunaka piring enggau pemeri. Nuan nadai minta jelu ti ditunu segala ba alta tauka minta piring pengampun dosa. Tang Nuan udah meri aku pending kena aku ningaka Nuan nya alai aku nyaut, “Tu aku. Atur ti diberi Nuan ngagai aku bisi dalam Bup Adat. Naka meh pengerindu ati aku ngereja peneka Nuan, O Allah Taala aku! Aku nyimpan ajar Nuan dalam ati aku.” Lebuh semua nembiak Nuan begempuru, O TUHAN, aku madahka berita manah pasal Nuan ke ngelepaska kami. Nuan nemu, aku sigi enggai badu nusui berita nya. Aku nadai kala ngelalaika berita pasal pengelepas dalam ati aku. Aku endang seruran bejakuka pasal penetap ati enggau pengelepas Nuan. Lebuh semua nembiak Nuan begempuru, aku nadai kala enda bejakuka pasal penaluk enggau pengerindu Nuan ti meruan belama iya. O TUHAN, aku nemu Nuan enggai badu kasihka aku. Pengerindu enggau penaluk Nuan deka seruran nyaga aku. Aku dikelulung mayuh macham penusah ti enda ulih diitung! Dosa aku udah tetitihka aku, lalu aku enda ulih meda agi. Sida mayuh agi ari lambar buk ti ba pala aku, lalu aku nyau nadai pemerani agi. Selamatka aku, O TUHAN! Tulung meh aku enggau naka penyampat! Awakka orang ke nguji munuh aku alah sereta charut runding. Awakka sida ke lantang ati ketegal penusah aku nikal lalu dipechat. Awakka orang ke beduan aku tusah ati alah. Awakka semua orang ke datai ngagai Nuan lantang sereta gaga ati. Awakka semua orang ke meri terima kasih ketegal pengelepas ti diberi Nuan seruran nyebut, “Naka meh pemesai mulia TUHAN!” Aku lemi sereta seranta, O TUHAN, tang Nuan nadai kala enda ingatka aku. Nuan meh nyadi Penebus enggau Allah Taala aku. Datai jampat lalu tulung aku! Beberekat meh orang ke nemu siru enggau orang ke seranta, laban TUHAN deka nulung sida lebuh sida dituntung penusah. TUHAN deka nyaga sida lalu ngidupka sida. Iya deka ngasuh sida diau lantang senang di menua Israel. Iya enggai nejuka sida pedis laban munsuh. TUHAN deka nulung sida lebuh sida sakit lalu deka ngeraika sida. Ku aku bejaku, “Aku udah bedosa ngelaban Nuan, O TUHAN. Kasihka aku, lalu geraika aku.” Bala munsuh aku nyebut utai ti jai pasal aku. Sida keran deka meda aku mati lalu enda dikingatka agi. Orang ke datai ngabas aku, ukai datai mai ati ti lurus. Sida ngeluluka berita ti jai pasal aku, lalu udah nya bejalai lalu besiburka berita nya di semua endur. Semua orang ke begedika aku, betelai enggau pangan diri pasal aku, berundingka utai ti pemadu jai pasal aku. Ku sida, “Iya sakit lalu nyau deka mati. Iya enda ulih angkat agi.” Indah pangan rapat aku, iya ke pemadu dikarapka aku, ke saum empa saum suap enggau aku, deh udah nguing ngelaban aku. Kasihka aku, O TUHAN, lalu asuh aku gerai baru, lalu aku deka malas munsuh aku. Sida enda ulih menang ngelaban aku, lalu aku deka nemu Nuan gaga ati ke aku. Nuan deka nulung aku, laban aku ngereja utai ti ngena. Nuan deka mai aku seruran begulai enggau Nuan belama iya. Puji meh TUHAN Allah Taala ke disembah orang Israel! Puji meh Iya diatu enggau belama iya! Amin! Amin! Baka rusa ti tetengukka ai sungai ti chelap, baka nya meh aku lelengauka Nuan, O Allah Taala. Aku aus ke Nuan, O Allah Taala ti idup. Kemaya aku ulih besembah di mua Nuan? Siang malam aku nyabak, lalu semina ai mata aja nyadika pemakai aku. Bala munsuh aku seruran nanya, “Dini alai Allah Taala nuan?” Ati aku balat tusah lebuh aku ngingatka utai ti udah, lebuh aku bejalai enggau orang ngagai rumah Allah Taala lalu nguluka sida lebuh sida bejalai, bala orang ke lantang ati, ke belagu sereta manjung muji Allah Taala. Nama kebuah ati aku tusah? Nama kebuah ati aku enda lantang? Aku deka manggaika pengandal aku ba Allah Taala, lalu aku deka sekali agi muji Iya ke Penebus enggau Allah Taala aku. Awakka TUHAN mandangka pengerindu Iya ti enda berubah, lebuh siang hari, ngambika aku bisi pantun malam hari, sampi ti diberi ngagai Allah Taala ti ngidupka aku. Ngagai Allah Taala ti nyaga aku, aku nyebut, “Nama kebuah Nuan enda ingatka aku? Nama kebuah aku enda tau enda mengkang natka pemerinsa ba jari munsuh ke merinsaka aku?” Ati aku anchur laban jaku pechat sida, lebuh sida majak nanya aku, “Dini alai Allah Taala nuan?” Nama kebuah ati aku balat tusah? Nama kebuah ati aku balat enda lantang? Aku manggaika pengandal aku ba Allah Taala, lalu aku deka sekali agi muji Iya ke Penebus enggau Allah Taala aku. O Allah Taala, awakka Nuan madahka aku nadai penyalah, lalu bejaku ngarika aku ngelaban orang ke jai. Selamatka aku ari orang ke bula sereta jai! Nuan nyadika pengelindung aku. Nama kebuah nuan ninggalka aku? Nama kebuah aku enda tau enda mengkang natka pemerinsa ba jari munsuh ti merinsaka aku? Asuh penampak enggau pemendar Nuan nguluka aku lalu mai aku pulai baru ngagai Sion, bukit Nuan ti kudus, enggau ngagai Rumah Sembiang Nuan, ti alai Nuan diau. Nya baru aku deka mansang ngagai alta Nuan, O Allah Taala, ngagai Allah Taala ti penatai pengelantang ati aku. Aku deka nebah belikan aku, lalu belagu muji Nuan, O Allah Taala, Allah Taala aku. Nama kebuah ati aku balat tusah? Nama kebuah ati aku enda lantang? Aku deka manggaika pengandal aku ba Allah Taala, lalu aku deka sekali agi muji Iya ke Penebus enggau Allah Taala aku. O Allah Taala, kami udah ninga ngena pending kami empu, lalu bala sida aki ini kami udah nusui ngagai kami, pasal pengawa ti besai ti udah dikereja Nuan lebuh maya sida dulu kelia, pasal Nuan ke muru mayuh bengkah bansa orang kapir lalu ngentapka bala nembiak Nuan diau di menua orang nya; pasal Nuan ke ngukum bansa bukai lalu ngasuh bala nembiak Nuan Empu nyadi kaya-raja. Bala nembiak Nuan ukai ngalahka menua tu ngena pedang sida. Sida menang ukai laban kuasa sida empu tang laban kuasa enggau pengering Nuan, laban Nuan bisi enggau sida, ti nunjukka Nuan rinduka sida. Nuan endang Raja enggau Allah Taala aku Nuan ngasuh bala nembiak Nuan menang, lalu ulih kuasa nama Nuan, kami ngalahka munsuh kami. Aku enda ngarapka panah aku tauka pedang aku ulih ngidupka aku, laban Nuan Empu udah ngelepaska kami ari bala munsuh kami lalu ngalahka orang ke begedika kami. Kami deka seruran muji Nuan lalu meri terima kasih ngagai Nuan belama iya. Tang diatu Nuan udah nulak kami, lalu nejuka kami alah. Nuan nadai agi bejalai enggau bala soldadu kami. Nuan ngasuh kami rari ari munsuh kami, lalu sida ngerampas reta tengkira kami. Nuan nejuka kami dibunuh baka jelu bedus. Nuan ngachirka kami ngagai menua bukai. Nuan nyual bala nembiak Nuan Empu ngena rega ti murah baka ke nadai rega. Orang ke berimbai pendiau enggau kami, meda utai ti dikereja Nuan ngagai kami, lalu sida ngelese sereta ketawaka kami. Nuan udah ngaga kami nyadika leka jaku sema ba bansa bukai. Sida ngilikka pala sida ngelanyaika kami. Aku endang seruran dipechat. Aku nyau malu ninga jaku kelese enggau jaku pechat ti disebut munsuh enggau orang ke begedika aku. Semua utai tu udah nyadi ba kami, taja pen kami nadai kala enda ingatka Nuan tauka ngelanggar sempekat ti udah digaga Nuan enggau kami. Kami nadai udah kala enda taluk ngagai Nuan. Kami nadai udah kala enda ngasika pesan Nuan. Tang taja pia, Nuan udah ninggalka kami nadai daya begulai enggau jelu ti siga. Nuan udah ninggalka kami dalam pemetang. Enti kami udah badu agi nyembah Allah Taala kami, lalu besampi ngagai petara orang bansa bukai, Nuan tetap nemu nya, laban Nuan nemu resia runding kami. Tang ketegal Nuan kami seruran dibunuh baka bedus ti deka disayat. Angkat, TUHAN! Nama kebuah Nuan tinduk? Angkat! Anang nulak kami belama iya! Nama kebuah Nuan belalai ari kami? Anang enda ingatka pemerinsa enggau penusah kami! Kami rebah redak ke tanah. Kami alah lalu gali malai amau. Datai lalu tulung kami! Selamatka kami ketegal pengerindu Nuan ti meruan belama iya! Jaku ti manah datai ba ati aku, lebuh aku ngarang pantun tu ke raja. Dilah aku baka pinsil orang ke landik nulis, sedia deka bepantun. Nuan tu lelaki ke pemadu sigat, ke seruran nelap bejaku. Allah Taala endang seruran merekatka nuan. Tangkin meh pedang nuan, raja ke bekuasa. Nuan bemulia sereta kering. Tepan meh kuda nuan Raja ketegal pemenang nuan ngambika nyaga pemendar enggau atur ti lurus! Pengering nuan deka ngasuh nuan menang! Laja nuan tajam, ngebuska tungkul ati bala munsuh nuan. Semua bansa rebah semak kaki nuan. Perintah ti udah diberi Allah Taala ngagai nuan deka tan belama lama iya. Nuan merintah nembiak nuan enggau lurus. Nuan rinduka utai ti ngena, lalu begedika utai ti jai. Nya kebuah Allah Taala, ti Allah Taala nuan, udah milih nuan lalu udah nuang mayuh agi pengelantang ngagai nuan ari ti dituang ngagai raja bukai. Bau rengut mur, enggau garu mengkang lekat ba gari nuan. Bala orang ke nebah musik merindang nuan di istana ti dilagu enggau gading. Bala anak indu raja bukai sama begulai enggau bala anak indu nuan; kuin ke bengepan ngena emas ti pemadu manah bediri ari kanan kerusi diraja nuan. Nuan ti deka nyadi bini raja, pendingka utai ti disebut aku: anang agi ingatka bala nembiak nuan enggau kaban belayan nuan. Pemajik nuan deka ngasuh raja ingin rinduka nuan. Iya tuan nuan, nya alai nuan enda tau enda ngasika iya. Orang ari Tire deka mai pemeri ngagai nuan. Orang ke kaya deka nguji ngulihka ati nuan. Anak indu raja bisi di istana - naka meh pemajik gamal iya! Baju iya digaga ari ubung emas. Bengepan ngena baju ti mayuh chura, iya dibai ngagai raja, dititihka bala indu ke ngiring iya, lalu sida nya mega dibai ngagai raja. Enggau ati ti lantang sereta gaga sida datai lalu tama ngagai istana raja. Nuan, raja aku, deka mayuh anak lelaki ti deka nganti bala aki ini nuan nyadi raja, lalu nuan deka ngasuh sida merintah semua dunya. Pantun aku deka ngasuh Nuan tampak nama belama iya, lalu semua orang deka muji nuan belama lama iya. Allah Taala endang pengelindung enggau pengering kitai, seruran sedia deka nulung lebuh maya penusah. Nya alai kitai enda takut, enti sema tanah berenyang lalu bukit labuh ngagai buntut tasik, enti sema tasik begelumbang lalu bukit berenyang. Bisi siti sungai ti mai pengaga ngagai nengeri Allah Taala, ngagai rumah kudus Allah Taala ti Pemadu Tinggi. Allah Taala diau dalam nengeri nya, lalu nengeri nya enda rusak. Tumu pagi hari Iya nulung nengeri nya. Semua bansa bukai deka takut, perintah beguyat. Allah Taala deka bejaku munyi guntur, lalu dunya deka lela. TUHAN ti Pemadu Bekuasa bisi enggau kitai. Allah Taala Jakop ngelindung kitai. Datai lalu peda utai ti dikereja TUHAN. Peda pemanah utai ti dikereja Iya di dunya. Iya ngasuh perang badu agi nyadi di serata dunya. Iya matahka panah, ngeredakka sangkuh, lalu nunu terabai. Ku Iya bejaku, “Badu agi beperang; Aku dekaka kita nemu, Aku tu Allah Taala. Aku ditinggika ulih semua bansa, ditinggika di serata dunya!” TUHAN ti Pemadu Bekuasa bisi enggau kitai. Allah Taala Jakop ngelindung kitai. Tempapka jari kita enggau ati ti gaga, kita semua bansa! Puji meh Allah Taala ngena lagu ti inggar! Nangi meh kita ke TUHAN ti Pemadu Bekuasa. Iya Raja ke besai, ke merintah semua dunya. Iya ngalahka semua mensia ke kitai, lalu ngengkahka semua bansa di baruh kaki kitai. Iya milih menua alai kitai diau, nyadi pesaka bala nembiak Iya, ke dikerinduka Iya. Allah Taala niki ngagai kerusi diraja Iya. Munyi panjung gaga ati, enggau munyi terumpit bisi didinga, lebuh TUHAN niki. Belagu muji Allah Taala. Belagu muji Raja kitai! Allah Taala nya Raja ke semua dunya. Puji Iya ngena lagu! Allah Taala duduk ba kerusi diraja Iya ti kudus. Iya merintah semua bansa. Bala orang ke merintah semua bansa begempuru enggau bala nembiak Allah Taala ke disembah Abraham. Laban Allah Taala bekuasa agi ari semua bala soldadu, nya alai Iya merintah semua. TUHAN endang besai lalu patut dipuji dalam nengeri Allah Taala kitai, ba bukit Iya ti kudus. Sion, bukit Allah Taala, endang tinggi sereta manah. Nengeri Raja Ti Besai mai pengaga ngagai semua dunya. Allah Taala udah nunjukka pengelikun endang bisi ba Iya dalam kuta nengeri nya. Bala raja begempuru lalu datai nyerang Bukit Sion. Tang lebuh sida meda nengeri nya, sida tekejut. Sida panik, lalu rari. Sida takut, sereta tusah ati, baka indu ke radai deka beranak, baka kapal ti dipangkaka biaubalai. Kami bisi ninga pasal utai ti udah dikereja Allah Taala, lalu diatu kami udah meda utai nya ba nengeri Allah Taala, TUHAN ti Pemadu Bekuasa. Iya deka ngibun nengeri nya enggau likun belama iya. Dalam Rumah Sembiang Nuan, O Allah Taala, kami belematika pengerindu Nuan ti meruan belama iya. Nuan dipuji orang di semua endur, lalu penampak nama Nuan ngelekai di serata dunya. Nuan merintah enggau lurus. Awakka orang Sion gaga! Awakka orang dalam nengeri di menua Judah rami gaga laban Nuan meri atur ti lurus. Bejalai meh kita ngelingi Sion lalu itung semua menara iya. Peratika dinding, lalu peresa kuta, ngambika kita ulih nusui ngagai serak ti nangkanka kita: “Tu meh Allah Taala ti Allah Taala kitai belama lama iya. Iya deka ngiring kitai belama iya.” Dingaka tu, semua kita! Pendingka tu, semua kita di semua endur, kita ke besai, enggau ke mit, ke kaya enggau ke seranta. Runding aku deka terang. Aku deka nyebut penemu-dalam. Aku deka mendingka jaku-dalam lalu nerangka reti iya lebuh aku nebah belikan. Aku enda takut lebuh aku dituntung penusah, lebuh aku dikelulung bala munsuh, dikelulung orang ke jai, ke bekering ba pengaya lalu temegahka pemayuh pemisi sida. Kitai sigi enda ulih nebus diri empu. Kitai enda ulih mayar rega nyawa kitai ngagai Allah Taala, laban bayar nyawa mensia kelalu besai. Utai ti dibayar kitai, sigi nadai kala chukup kena nagang kitai tama ngagai kubur lalu ngasuh kitai idup belama iya. Semua orang nemu, orang ke bepenemu-dalam endang mati magang, baka orang ke lap sereta beli. Semua sida bela ninggalka pengaya sida ke peturun sida. Kubur sida nyadika rumah sida belama iya. Dia meh endur alai sida deka diau belama iya, taja pen sida suba udah bisi tanah ke diri empu. Peninggi pangkat kitai enda ulih nagang kitai mati. Kitai deka mati baka jelu. Peda utai ti nyadi ba orang ke bekering ba diri empu, pengujung orang ti udah puas ati ke pengaya diri, sida diletak mati baka bedus, lalu pemati deka nyadi pengibun sida. Orang ke lurus deka menang ngelaban sida, lebuh tubuh sida deka buruk dalam dunya pemati, jauh ari menua diri empu. Tang Allah Taala deka ngelepaska aku. Iya deka ngelepaska aku ari kuasa pemati. Anang tusah ati lebuh orang nyadi kaya, lebuh pengaya iya nambah-menambah. Iya enda ulih mai utai nya lebuh iya mati. Pengaya iya enda mupuk enggau iya ngagai kubur. Enti sema orang puas ati ke pengidup diri lalu dipuji ketegal iya mujur, iya deka nitihka aki ini iya lebuh iya mati, ngagai pemetang ti meruan belama iya. Peninggi pangkat kitai enda ulih nagang kitai mati. Kitai deka mati baka jelu. TUHAN Allah Taala ti Pemadu Bekuasa bejaku. Iya ngangauka semua mensia di dunya ari timur nyentuk ke barat. Allah Taala manchar ari Sion, nengeri ti pemadu manah gaya. Allah Taala kitai datai, tang ukai enda bemunyi. Api ti mau bisi di mua Iya, ribut biaubalai ngelingi Iya. Iya ngasuh serega enggau dunya nyadika saksi ngemataka Iya ngakim bala nembiak Iya. Ku Iya bejaku, “Gempuru ngagai Aku bala nembiak Aku ke tetap ati, orang ke udah ngaga sempekat enggau Aku ngena piring.” Langit madahka Allah Taala endang lurus, madahka Iya endang Hakim. Pendingka Aku, kita ke nembiak Aku. Aku deka bejaku. Aku deka besaksi ngelaban kita, Israel. Aku tu Allah Taala, ti Allah Taala kita. Aku ukai nganu kita ketegal piring kita tauka ketegal piring tunu ti selalu dibai kita ngagai Aku. Aku enda begunaka sapi ti lelaki ari umai kita tauka kambin ari raban jelu kita. Semua jelu di babas endang enggi Aku magang, sama enggau sapi ti ba beribu igi munggu. Semua burung di babas, endang enggi Aku magang, sama enggau semua utai ti idup di padang. “Enti sema Aku lapar, enda meh Aku minta pemakai ari kita, laban dunya, enggau semua utai ti dalam iya, endang enggi Aku magang. Kati Aku makai isi sapi tauka ngirup darah kambin? Beri sampi terima kasih kita nyadika piring ngagai Allah Taala. Lalu beri ngagai Iya ti Pemadu Bekuasa semua utai ti udah disemaya kita. Kangauka Aku lebuh kita kena laban penusah. Aku deka ngelepaska kita, lalu kita deka muji Aku.” Tang ku Allah Taala bejaku ngagai orang ke jai, “Nama kebuah kita besebutka pesan Aku? Nama kebuah kita berandauka sempekat Aku? Kita enggai ngelakka Aku ngajar kita. Kita nulak pesan Aku. Kita bepangan enggau semua penchuri ke dipeda kita, lalu kita begulai enggau orang ke butang. “Kita endang seruran sedia deka bejaku jai. Kita enda kakang bula. Kita sedia deka bedawaka kaban belayan kita empu lalu begigaka penyalah sida. Kita udah ngereja semua utai nya, lalu Aku enda bejaku seleka, nya alai kita ngumbai Aku baka kita. Tang diatu Aku nganu kita lalu nerangka pekara tu ngagai kita. Pendingka tu, kita ke enggai ibuhka Aku, enggai ke Aku ngerusak kita, lalu nadai orang deka ngidupka kita. Meri terima kasih nya piring ti ngemesaika Aku, lalu Aku tetap deka ngelepaska semua orang ke ngasika Aku.” Kasihka aku, O Allah Taala, laban pengerindu Nuan endang meruan. Laban pengasih Nuan endang besai, buai meh dosa aku! Buai abis semua penyai aku lalu tuchi aku ari dosa aku! Aku ngelala penyalah diri. Aku endang seruran nemu dosa diri. Aku udah bedosa ngelaban Nuan - ngelaban Nuan siku aja, lalu udah ngereja utai ti dikumbai Nuan jai. Nya alai Nuan endang sigi ngereja utai ti ngena lebuh Nuan ngakim aku. Nuan endang patut ngukum aku. Aku endang jai kenyau ari ada. Kenyau ari maya aku dikandungka, aku endang bedosa. Nuan begunaka pemendar enggau ati ti lurus, nya alai isi meh runding aku enggau penemu-dalam ti datai ari Nuan. Buai dosa aku, lalu aku deka nyadi tuchi. Basu aku, lalu aku deka nyadi burak agi ari seleju. Asuh aku ninga munyi pengaga enggau pengelantang, lalu taja pen Nuan udah ngalah lalu ngeredakka aku, aku deka nyadi lantang baru. Ampun meh dosa aku lalu buai abis semua penyai aku. Gaga ati aku tuchi, O Allah Taala, lalu simpan roh ti baru sereta taluk, dalam aku. Anang muai aku ari mua Nuan. Anang ngambi Roh Kudus Nuan ari aku. Pulaika aku baru ngagai pengaga ti datai ari pengelepas Nuan, lalu asuh aku rajin ngasika Nuan. Nya baru aku deka ngajar pasal pesan Nuan ngagai orang ke bedosa, lalu sida deka pulai baru ngagai Nuan. Anang munuh aku, O Allah Taala, lalu selamatka aku, lalu aku deka gaga ati madahka pengelepas ti diberi Nuan. Tulung aku bejaku, O TUHAN, lalu aku deka muji Nuan. Nuan enda rinduka piring, nya kebuah aku enda ngenjuk sida ngagai Nuan. Nuan enda rinduka piring tunu. Piring aku nya ati ti baruh, O Allah Taala. Nuan enggai nulak ati ti baruh, ati ti nesal. O Allah Taala, kasihka Sion, lalu tulung iya. Gaga baru meh dinding kuta Jerusalem. Nya baru Nuan deka gaga ati ke piring ti menyana enggau piring tunu. Lalu sapi ti lelaki deka diberi nyadika piring ba alta Nuan. Nama kebuah nuan temegah bejakuka penyai diri, nuan ke kering? Penetap ati Allah Taala endang meruan belama iya. Nuan ngaga pelan kena ngerusak orang bukai. Dilah nuan tajam baka lungga. Nuan endang seruran nempa pemula. Nuan rinduka penyai lebih agi ari pemanah, lalu rinduka pemula lebih agi ari pemendar. Nuan rindu ngemediska orang ngena jaku nuan, nuan ke pemula! Nya alai Allah Taala deka ngerusak nuan belama iya. Iya deka nangkap nuan, lalu nabanka nuan ari rumah nuan. Iya deka muai nuan ari dunya orang ke idup. Orang ke lurus deka meda nya, lalu takut. Udah nya sida deka ketawaka nuan, lalu bejaku, “Peda: tu siku orang ke enda minta diri dilindung Allah Taala, tang bekering ba pengaya lalu belindung ba pemayuh pemisi iya.” Tang aku tu baka kayu kana ti tumbuh dalam rumah Allah Taala. Aku manggaika diri ba pengerindu Iya ti meruan belama iya. Aku deka seruran meri terima kasih ngagai Nuan, O Allah Taala, ketegal utai ti udah dikereja Nuan. Di mua bala nembiak Nuan, aku deka madahka pemadas Nuan. Ku orang ke beli berunding dalam ati diri, “Allah Taala endang nadai.” Semua sida endang jai magang, lalu sida udah ngereja utai ti udu jai. Nadai siku ti ngereja utai ti ngena. Allah Taala nilik ke baruh ari serega ngagai mensia deka nemu enti sida bisi pintar, ti nyembah Iya. Tang semua sida udah limpang. Semua sida bela jai magang. Nadai siku sida ngereja utai ti ngena, siku pen nadai. “Kati nuan enda nemu?” ku Allah Taala nanya. “Kati orang ke ngereja penyai nya nadai nemu utai? Sida beridup ngerumpak bala nembiak Aku, lalu sida nadai kala besampi ngagai Aku.” Tang udah nya sida deka balat takut. Nadai sida udah kala takut ngemalat nya, laban Allah Taala deka mambarka tulang bala orang ke jai. Allah Taala udah nulak sida, nya alai orang Israel deka ngalahka sida abis lengis. Aku bebendar besampi minta pemenang datai ari Sion ngagai orang Israel. Naka meh pengelantang ati orang Israel lebuh Allah Taala ngasuh sida nyadi kaya-raja baru! Selamatka aku ngena kuasa Nuan, O Allah Taala. Selamatka aku ngena pengering Nuan! Dingaka sampi aku, O Allah Taala. Pendingka jaku aku! Orang ke sumbung deka datai lalu nyerang aku. Orang ke jai nguji munuh aku, Orang nya enda begunaka Allah Taala. Tang Allah Taala endang penyaup aku. TUHAN endang penyaga aku. Awakka Allah Taala ngukum bala munsuh aku ngena penyai sida empu. Iya deka ngerusak sida laban Iya endang tetap ati. Aku deka gaga ati ngenjuk piring ngagai Nuan, O TUHAN. Aku deka meri terima kasih ngagai Nuan laban Nuan endang badas. Nuan udah ngelepaska aku ari semua penusah aku, lalu aku udah meda bala munsuh aku alah. Dingaka sampi aku, O Allah Taala. Anang nulak peminta aku! Pendingka aku, lalu saut aku. Aku nyau lelak laban ati ti irau. Aku balat takut diemba bala munsuh aku, alah ditekanka orang ke jai. Sida ngasuh penusah ninggang aku. Sida pedis ati sereta begedika aku. Aku balat takut, lalu penakut aku ke pemati nyau kelalu berat ba ati aku. Aku takut, lalu getar-getar. Aku alah laban penakut. Naka meh pemanah enti aku bisi sayap baka burung achang. Aku tetap deka terebai kebukai lalu belelak. Aku deka terebai jauh lalu diau di menua puang. Aku deka beguai-guai ngiga endur alai belindung ari ribut ti deras enggau ari kabut. Anang nyagi munsuh aku meretika jaku pangan diri, O TUHAN! Aku meda pengachau nyadi dalam nengeri nya, ngelingi iya siang malam, ngisi iya enggau pengawa ti salah sereta enggau penusah. Pengerusak nyadi di semua endur. Jalai raya nyau penuh laban orang ke nekanka pengidup orang bukai, sereta nipu pangan diri. Enti sema munsuh beduan aku, aku ulih natka nya. Enti sema munsuh temegah madahka diri udah ngalahka aku, aku ulih belalai ari iya. Tang nuan tu pangan aku, sulu aku, pangan rapat aku. Tua udah suah berandau enggau pangan diri lalu sama nyembah Allah Taala dalam Rumah Sembiang. Awakka bala munsuh aku mati pandak umur. Awakka sida nurun idup-idup ngagai dunya pemati! Penyai endang bisi dalam rumah sida enggau dalam ati sida. Tang aku ngangauka TUHAN Allah Taala minta tulung, lalu Iya deka ngidupka aku. Lebuh pagi hari, tengah hari, enggau malam jaku putap enggau demuh aku niki ngagai Iya, lalu Iya deka ninga nyawa aku. Iya deka mai aku pulai baru enggau likun ari endur alai aku ke beperang ngelaban munsuh ke udu mayuh. Allah Taala, ke endang seruran merintah, deka ninga aku, lalu ngalahka sida, laban sida enggai berubah, lalu sida enda nangika Iya. Pangan aku ke dulu menya ngamuk bala pangan iya. Iya bulaka semaya diri. Jaku iya manis, tang ati iya penuh laban pemenchi. Jaku iya alus, tang nyayat baka pedang ti tajam. Serahka penusah nuan ngagai TUHAN, lalu Iya deka nyaga nuan. Iya nadai kala nejuka orang ke lurus alah. Tang Nuan, O Allah Taala, deka muai orang ke pemunuh, enggau orang ke bula ngagai kubur sebedau sida datai setengan umur. Tang aku deka manggaika pengarap aku ba Nuan. Kasihka aku, O Allah Taala, laban aku kena serang. Bala munsuh aku seruran merinsaka aku. Bala munsuh aku nyerang aku sepemanjai hari. Mayuh amat sida ngelaban aku. Lebuh aku takut, O TUHAN ti Pemadu Bekuasa, aku manggaika pengarap aku ba Nuan. Aku manggaika pengarap aku ba Allah Taala, lalu aku enda takut. Aku muji semaya Iya. Nama utai ti ulih dikereja mensia ngagai aku? Bala munsuh aku ngachau aku sepemanjai hari. Sida seruran berundingka chara kena ngemediska aku! Sida begempuru ba endur alai sida belalai lalu nengkilaka semua utai ti dikereja aku, ngarapka diri ulih munuh aku. Ukum meh sida nya, O Allah Taala, ketegal penyai ti dikereja sida. Awakka Nuan ringat lalu ngalahka bala orang nya. Nuan nemu pemalat ati aku tusah. Nuan nemu pemayuh ai mata aku labuh. Ukai enda semua ai mata aku nya udah dituliska Nuan magang dalam bup Nuan? Lebuh aku ngangauka Nuan, bala munsuh aku deka nyurutka diri. Aku nemu nya laban Allah Taala setanah enggau aku, iya nya TUHAN ti bempu semaya ti dipuji aku. Aku manggaika pengarap aku ba TUHAN, lalu aku enda takut. Nama utai ti ulih dikereja mensia ngagai aku? O Allah Taala, aku deka meri Nuan utai ti udah disemaya aku. Aku deka meri Nuan piring terima kasih aku, laban Nuan udah ngelepaska semengat aku ari pemati, lalu udah nagang aku alah. Nya alai aku bejalai di mua Allah Taala, dalam penampak ti manchar ngagai orang ke idup. Kasihka aku, O Allah Taala, kasihka aku, laban aku belindung ba Nuan. Aku diau likun di baruh sayap Nuan nyentuk ngagai maya biaubalai nyau teduh. Aku ngangauka Allah Taala ti Pemadu Tinggi, Allah Taala ti meri semua utai ti dipeguna aku. Iya deka nyaut aku ari serega lalu ngelepaska aku. Iya deka ngalahka orang ke nekanka pengidup aku. Allah Taala deka ngayanka pengerindu Iya ti meruan belama iya, enggau penetap ati Iya. Aku dikelulung munsuh ke baka jelu singa ti lapar deka makai mensia. Ngeli sida baka sangkuh enggau laja. Dilah sida baka pedang ti tajam. Ayanka pemesai kuasa Nuan di langit, O Allah Taala, lalu ayanka mulia Nuan di serata dunya. Bala munsuh aku udah mintarka pukat kena sida nangkap aku. Ati aku balat tusah. Sida udah numbak lubang kebung ba jalai ti ditengah aku, tang sida empu udah labuh ngagai lubang kebung nya. Aku nadai irau mimit, O Allah Taala. Aku deka belagu muji Nuan! Dani meh nuan, O semengat aku! Dani meh kita belikan enggau engkeratung aku! Aku deka ngerak mata hari. Aku deka meri terima kasih ngagai Nuan, O TUHAN, di mua semua bansa bukai. Aku deka muji Nuan di mua semua bansa. Pengerindu Nuan ti meruan belama iya tinggi nyentuk ke langit. Penetap ati Nuan ngeninggi remang. Ayanka pemesai kuasa Nuan di langit, O Allah Taala, lalu ayanka mulia Nuan di serata dunya. Kati kita petara bisi udah kala meri pemutus penemu ti lurus? Kati kita udah kala ngakim enggau enda bepilih mata? Nadai kala! Kita semina ngira penyai ti ulih dikereja kita, lalu ngereja penyai enggau pengawa ti kasar enggau orang di menua tu. Orang ke jai endang ngereja penyalah seumur idup. Sida nusui utai ti bula kenyau ari ada. Sida penuh laban rachun baka ular. Sida nensang pending sida baka ular belalang ti bengal ti enda ninga nyawa orang ke bemain ular, tauka pelian manang. Patahka taring singa ti mangah nya, O Allah Taala. Awakka sida lesap baka ai ti rarat. Awakka sida anchur baka rumput ti dilunjak ba tengah jalai raya. Awakka sida nyadi baka tekuyung ti luluh nyadi lendir. Awakka sida nyadi baka anak mit ke mati lulus sebedau sida meda penampak. Sebedau sida nemu diri, sida ditebas baka rumput. Ulih pengeringat Iya, Allah Taala deka ngebuka sida idup-idup. Orang ke lurus deka gaga ati lebuh sida meda orang ke bedosa diukum. Sida deka bejalai ngelunjak darah orang ke jai. Orang deka nyebut, “Orang ke lurus endang amat diupah. Allah Taala ti ngakim dunya, endang amat bisi.” Selamatka aku ari bala munsuh aku, O Allah Taala aku. Jaga aku ari orang ke nyerang aku! Selamatka aku ari bala orang ke jai nya. Selamatka aku ari bala pemunuh nya! Peda sida ngipa deka munuh aku. Orang ke jai nya begempuru deka ngelaban aku. Sida beguai-guai mansang ngambi endur diri ukai ketegal dosa tauka penyalah aku, O TUHAN. Angkat meh Nuan, TUHAN Allah Taala ti Pemadu Bekuasa, lalu tulung aku. O Allah Taala ke disembah orang Israel, awakka Nuan Empu meda! Angkat, lalu ukum meh semua bansa orang kapir nya. Anang kasihka orang ke jai, ke nyual bansa diri! Lebuh hari nyau lemai sida datai baru, ngengar baka ukui lebuh sida segau-segau bejalai ba sebelah nengeri. Pendingka jaku pechat enggau jaku emba sida. Dilah sida baka pedang dalam nyawa sida, tang sida ngumbai orang nadai ninga sida. Tang Nuan ketawaka sida, O TUHAN. Nuan ngeleseka semua bansa orang kapir. Aku andal ati ke pengering Nuan. Nuan meh nyadika kuta aku, O Allah Taala. Allah Taala rinduka aku, lalu Iya deka datai ngagai aku. Iya deka ngasuh aku meda bala munsuh aku alah. Anang munuh sida, O Allah Taala, enggai ke bala nembiak aku enda ingat. Pambarka sida ngena pengering Nuan, lalu alahka sida, O TUHAN, ti nyadi terabai kami. Dosa mengkang ba ujung mulut sida. Semua utai ti disebut sida endang dosa magang. Awakka sida ditangkap ketegal penyumbung sida! Laban sida nyumpah sereta bula, rusak meh sida ngena pengeringat Nuan. Rusak meh sida abis lengis. Nya baru semua orang deka nemu Allah Taala endang amat merintah Israel, lalu perintah Iya ngerembai di serata dunya. Lebuh hari nyau lemai sida datai baru, ngengar baka ukui lebuh sida segau-segau bejalai ba sebelah nengeri, baka ukui ti segau-segau ngiga pemakai lalu ngengar enti sida nadai tetemuka pemakai ti chukup. Tang aku deka belagu ngenang pengering Nuan. Tiap pagi aku deka belagu enggau nyawa ti inggar ngenang pengerindu Nuan ti meruan belama iya. Laban Nuan nyadika kuta aku, alai aku belindung lebuh penusah nuntung. Aku deka muji Nuan ke penyaga aku. Aku belindung ba Allah Taala ti rinduka aku. Nuan udah nulak lalu ngalahka kami, O Allah Taala. Nuan udah ringat ngagai kami, tang pulai meh Nuan baru ngagai kami. Nuan udah ngasuh tanah berenyang, lalu Nuan udah merekahka tanah. Geraika tanah nya diatu, laban iya nyau deka tebererak. Nuan udah ngasuh bala nembiak Nuan balat amat merinsa. Kami nyau guir-guir bejalai baka ke mabuk. Nuan udah meri jaku tangkan ngagai orang ke nangika Nuan, ngambika sida ulih ngerarika diri ari pengerusak. Lepaska kami ngena pengering Nuan. Saut sampi kami, ngambika orang ke dikerinduka Nuan dilepaska. Ari Endur Iya ti Kudus Allah Taala udah besemaya, “Aku deka menang lalu bedua menua Sekem lalu meri Lebak Sukot ngagai bala nembiak Aku. Giliat endang enggi Aku, Manasi mega enggi Aku. Epraim nya selapuk kebal Aku lalu Judah nya tungkat diraja Aku. Tang Aku deka ngena Moap nyadika dulang alai Aku bebasu, lalu Aku deka nikauka kasut Aku ngagai Edom, nyadika kelai Aku bempu menua nya. Kati orang Pilistin ngumbai diri deka manjung menang ngelaban Aku?” O Allah Taala, sapa deka mai aku ngagai nengeri ti bekuta nya? Sapa deka nguluka aku ngagai Edom? Kati Nuan amat udah nulak kami? Kati Nuan enggai bejalai enggau bala soldadu kami? Tulung meh kami ngelaban munsuh. Tulung ari mensia endang nadai reti. Enti Allah Taala setanah enggau kitai, kitai deka menang. Iya deka ngalahka bala munsuh kitai. Dingaka sabak aku, O Allah Taala. Pendingka sampi aku! Enggau ati ti balat tusah, sereta jauh ari rumah, aku ngangauka Nuan! Bai aku ngagai endur alai ngenduh ti likun, laban Nuan penyaga aku, ti kering nyaga aku ari munsuh. Awakka aku diau ba Endur Kudus Nuan seumur idup. Awakka aku diau likun di baruh sayap Nuan. Nuan udah ninga semaya aku, O Allah Taala, lalu Nuan udah meri aku utai ti diempu orang ke ngemesaika Nuan. Asuh raja gayu. Asuh iya idup belama iya! Awakka iya merintah belama iya di mua Nuan, O Allah Taala. Jaga iya ngena pengerindu Nuan ti meruan belama iya, enggau ngena penetap ati Nuan. Nya baru aku deka selalu belagu muji Nuan, lebuh aku meri ngagai Nuan tiap hari, utai ti udah disemaya aku. Aku deka liat ati nganti Allah Taala; laban pengelepas aku datai ari Iya. Semina Iya siku aja ke nyaga sereta ngelepaska aku. Iya kuta aku, lalu aku enda alah. Ni pengelama semua kita agi nyerang orang ke lemi baka pagar ti udah runtuh? Kita semina deka ngasuh iya labuh ari endur iya ti tinggi. Kita rindu bula. Kita merekatka iya ngena mulut kita, tang kita nyumpah iya dalam ati kita. Aku manggaika diri semina ba Allah Taala siku aja, laban pengadang aku datai ari Iya. Ka semina Iya siku aja ke nyaga sereta ngelepaska aku. Iya kuta aku, lalu aku enda alah. Pengelepas enggau basa aku dipanggaika ba Allah Taala. Iya kuta aku ti tegap. Aku belindung ba Allah Taala. Panggaika pengarap kita berari ba Allah Taala, kita ke nembiak aku. Padahka ngagai Iya semua penusah kita, laban kitai belindung ba Iya. Semua mensia sigi baka kesuh seput. Tinggi tauka baruh pangkat, semua sida endang nadai guna magang. Enti sida ditimbang, sida nadai pemerat. Sida lempung agi ari kesuh seput. Anang manggaika diri ba pemangah. Anang ngarapka diri deka bulih utai ari pengawa ngerumpak. Enti sema pengaya kita nambah-menambah, anang meh kita bekering ba pengaya nya. Aku suah udah ninga Allah Taala madahka kuasa endang enggi Iya lalu pengerindu Iya meruan belama. Nuan Empu, O TUHAN, ngupah genap iku orang nitihka utai ti dikereja iya. O Allah Taala, Nuan endang Allah Taala aku, lalu aku lelengauka Nuan. Aku aus ke Nuan. Semengat aku aus ke Nuan baka menua ti rangkai, kusi, ransi nadai ai. Awakka aku meda Nuan dalam Endur Nuan Ti Kudus. Awakka aku meda kuasa enggau mulia Nuan. Pengerindu Nuan ti meruan belama iya, endang manah agi ari pengidup. Nya alai aku deka muji Nuan. Aku deka muji Nuan seagi aku idup. Aku deka ngangkatka jari besampi ngagai Nuan. Semengat aku deka diberi makai besai lalu kenyang, lalu aku deka belagu pantun gaga ati muji Nuan. Lebuh aku gali, aku ngingatka Nuan. Semalam-malam aku berundingka Nuan, laban Nuan endang seruran nulung aku. Aku belagu gaga ati belindung di baruh sayap Nuan. Aku empakap ba Nuan, lalu jari nuan meri aku pengelikun. Orang ke nguji munuh aku deka nurun ngagai dunya pemati. Sida deka mati beperang, lalu bangkai sida deka diempa ukui kampung. Raja deka rami gaga laban Allah Taala meri iya pemenang. Orang ke ngaga semaya dalam nama Allah Taala, deka muji Iya, tang mulut orang ke bula, deka ditutup. Aku kena laban penusah, O Allah Taala, pendingka sampi aku! Aku takutka bala munsuh aku, selamatka aku! Jaga aku ari akal orang ke jai, ari bala orang ke jai. Sida ngansah dilah sida baka pedang lalu ngesuhka jaku ti jai baka laja. Enggau nadai pemalu mimit sida jampat ngelekaika pemula sida lalu ngerusak orang ke manah ngena jaku petenah sida. Sida meransang pangan diri lebuh sida bepekat deka ngereja penyai. Sida berandauka endur alai sida deka nan panjuk sida. Ku sida bejaku, “Nadai orang ulih meda panjuk nya.” Sida ngaga pelan ti jai, lalu ku sida, “Kitai udah ngaga pelan kena ngereja penyalah ti enda ulih dipansik.” Ati enggau runding mensia endang enda ulih disagam. Tang Allah Taala nimbakka laja Iya ngagai sida, lalu tekala nya sida bakal. Iya deka ngerusak sida ketegal jaku nya. Semua orang ke meda sida, bela ngilikka pala. Semua sida deka takut magang. Sida deka berundingka utai ti udah dikereja Allah Taala lalu nusui utai ti udah dikereja Iya. Semua orang ke lurus deka rami gaga ketegal utai ti udah dikereja TUHAN. Sida deka diau likun dalam Iya. Semua orang ke badas deka muji Iya. O Allah Taala, kami endang patut muji Nuan di Sion lalu ngamatka semaya kami enggau Nuan, laban Nuan nyaut sampi. Semua mensia deka datai ngagai Nuan. Lebuh kami alah laban penyai ti dikereja kami, Nuan ngampun penyalah kami. Beberekat meh orang ke dipilih Nuan, orang ke dibai Nuan diau dalam Endur Nuan Ti kudus. Kami deka puas ati ke utai ti manah dalam rumah Nuan, berekat dalam Rumah Nuan ti kudus. Nuan meri kami pemenang kena Nuan nyaut kami, lalu Nuan ngereja pengawa ti badas kena Nuan ngelepaska kami. Mensia di serata dunya enggau di seberai tasik ti jauh, manggaika pengarap sida ba Nuan. Nuan nudukka bukit ba endur sida ngena pengering Nuan, ngayanka kuasa Nuan ti besai. Nuan ngasuh tasik teduh nagang gelumbang besegum mangka. Nuan ngasuh semua bansa badu agi begau. Semua dunya nangi sereta takut meda pengawa ti besai ti dikereja Nuan. Pengawa ti dikereja Nuan ngasuh orang manjung gaga ati di serata dunya. Nuan ngayanka diri sinu ati ke menua lebuh Nuan ngasuh hari ujan. Nuan ngasuh menua ami. Nuan ngisi sungai enggau ai. Nuan ngasuh utai tumbuh. Baka tu ku jalai Nuan ngereja nya: Nuan ngasuh ai ujan manjah tanah ti udah dichangkul lalu ngasuh tanah serap diisi ai. Nuan ngasuh tanah lembut ngena ujan ti mesi-mesi lalu ngasuh utai ti ditanam tumbuh. Naka meh pemayuh utai ti diasuh Nuan ketau kami! Nuan meri kami mayuh utai di sebarang endur Nuan bejalai. Padang rumput nyau penuh laban jelu tupi. Serimbing bukit nyau penuh laban pengaga. Padang nyau penuh laban jelu bedus. Emperan nyau penuh laban gandum. Semua utai manjung magang, lalu belagu gaga ati. Puji meh Allah Taala ngena panjung gaga ati, semua mensia! Belagu ngemuliaka nama Iya Muliaka Iya ngena pantun puji! Sebut ngagai Allah Taala, “Naka meh pemadas utai ti dikereja Nuan! Kuasa Nuan endang besai datai ke bala munsuh Nuan nyau nangi lalu meremi di mua Nuan. Semua orang di dunya tu nyembah Nuan magang. Sida belagu muji Nuan. Sida belagu muji nama Nuan.” Datai kitu lalu peda utai ti udah dikereja Allah Taala, pengawa ti badas ti dikereja Iya ba orang mayuh. Iya ngubah tasik nyadi tanah rangkai. Aki ini kami bejalai meraka sungai. Dia meh endur alai kami ke rami gaga ketegal utai ti udah dikereja Iya. Iya merintah belama iya ngena kuasa Iya lalu ngemataka semua bansa. Awakka orang nadai angkat ngelaban Iya. Puji meh Allah Taala kami, kita semua bansa. Awakka puji kita didinga. Iya udah ngasuh kami mengkang idup lalu enggai nejuka kami alah. Nuan udah ngabas ati kami, O Allah Taala. Nuan udah nguji ati kami baka ke nuchi pirak ngena api. Nuan nejuka kami disintak panjuk lalu ngengkahka utai ti berat ba belakang kami. Nuan nejuka bala munsuh kami ngindik kami. Kami bejalai ngerenchah api enggau ai bah, tang diatu Nuan udah mai kami ngagai endur ti luas. Aku deka mai piring tunu ngagai rumah Nuan. Aku deka meri ngagai Nuan utai ti udah disemaya aku. Aku deka meri ngagai Nuan utai ti udah dipadahka aku ngagai Nuan lebuh aku kena tuntung penusah. Aku deka meri bedus ti deka ditunu ba alta. Aku deka meri sapi ti lelaki enggau kambin nyadika piring, lalu asap deka niki ke langit. Datai lalu mending, semua kita ke nangika Allah Taala, aku deka nusui ngagai kita utai ti udah dikereja Iya ke aku. Aku udah nyabak ngangauka Iya, lalu aku udah muji Iya ngena lagu. Enti aku udah sayauka dosa diri, TUHAN tentu enggai mendingka aku. Tang Allah Taala endang amat udah ningaka aku. Iya udah mendingka sampi aku. Pujika Allah Taala, laban Iya enda nulak sampi aku tauka nagang Diri seruran rinduka aku. Allah Taala, kasihka kami lalu berekatka kami. Peda meh kami enggau penelap Nuan, ngambika semua dunya nemu peneka Nuan, lalu semua bansa nemu pengelepas Nuan. Awakka semua bansa muji Nuan, O Allah Taala, awakka semua bansa muji Nuan! Awakka semua bansa lantang lalu belagu gaga ati, laban Nuan ngakim semua bansa enggau pengelurus lalu ngiring genap bengkah bansa di dunya tu. Awakka semua bansa muji Nuan, O Allah Taala. Awakka semua bansa muji Nuan! Tanah udah mansutka utai ti diketau. Allah Taala ti Allah Taala kami, udah merekatka kami. Allah Taala udah merekatka kami. Awakka semua bansa di semua endur ngemesaika Iya. Allah Taala angkat lalu ngachirka bala munsuh Iya. Orang ke begedika Iya, rari alah. Sida diburu Iya baka asap ti dikebuka ribut. Baka lilin ti lela dipandang api, baka nya meh orang ke jai mati di mua Allah Taala. Tang orang ke lurus deka lantang sereta rami gaga di mua Iya. Sida lantang sereta manjung gaga ati. Belagu meh kita ke Allah Taala, belagu meh kita muji nama Iya. Sediaka jalai ke Iya ti nepan ba atas mua hari. Nama Iya TUHAN. Awakka kita gaga di mua Iya! Allah Taala, ti diau dalam Rumah kudus Iya, ngibun orang ke nadai apai indai, lalu nyaga sida indu ke balu. Iya meri rumah ngagai orang ke seilu-ilu diau kediri lalu nguluka orang jil pansut lantang ati ngagai pengelepas, tang orang ke angkat ngelaban deka diau di menua ti nadai orang nguan. O Allah Taala, lebuh Nuan nguluka bala nembiak Nuan, lebuh Nuan bejalai nengah menua puang, tanah berenyang, lalu hari ujan, laban Allah Taala Bukit Sinai datai, laban Allah Taala ke disembah orang Israel datai. Nuan ngasuh hari ujan lalu ngasuh menua Nuan ti kusi nyadi manah baru. Bala nembiak Nuan berumah dia. Ulih pemadas Nuan, Nuan meri utai ngagai orang ke seranta. TUHAN meri pesan, lalu mayuh bala indu mai berita tu: “Bala raja enggau bala soldadu sida rari!” Sida indu ke di rumah bedua utai ti udah dirampas, iya nya: anak patung burung achang ti disampak enggau pirak, ti bisi sayap ti bekebelik laban emas ti alus. (Nama kebuah sekeda kita diau dalam kandang bedus lebuh maya perang?) Lebuh Allah Taala ti Pemadu Bekuasa ngachirka bala raja ba Bukit Salmon, Iya ngasuh seleju labuh ba bukit nya. Naka meh pemesai bukit Basan, bukit ti mayuh tuchung! Nama kebuah nuan, O bukit ti mayuh tuchung, merening ke baruh enggau ati ti kepapas, ngagai bukit ti udah dipilih Allah Taala alai Iya diau? TUHAN deka diau dia belama iya! TUHAN datai ari Sinai enggau beribu-ribu buah kerita perang Iya ngagai endur ti kudus. Iya niki ngagai endur ti tinggi, mai mayuh orang tangkap enggau Iya. Iya nerima pemeri ari orang ke udah angkat ngelaban. TUHAN Allah Taala deka diau dia. Puji meh TUHAN, ke mai ma kitai tiap hari. Iya nya meh Allah Taala ti ngelepaska kitai. Allah Taala kitai nya Allah Taala ti meri kita pengelepas. Iya nya meh Allah Taala, ti TUHAN kitai, ke ngelepaska kitai ari pemati. Allah Taala tetap deka mechahka pala bala munsuh Iya, pala orang ke majak bedosa. TUHAN udah madahka, “Aku deka mai bala munsuh nuan pulai ari Basan. Aku deka mai sida pulai ari buntut tasik, ngambika kita ulih bejalai ngelunjak darah sida, lalu ukui kita nilat darah sida enggau naka peneka sida.” Pemenang Nuan, O Allah Taala, dipeda semua orang, lebuh Allah Taala, ti Raja aku, mansang ngagai endur Iya ti kudus. Bala orang ke belagu bejalai di mua, bala orang ke nebah musik bejalai di belakang, lalu ba entara sida nya bala indu ke biak, ke nebah tamborin. “Puji meh Allah Taala lebuh bala nembiak Iya begempuru. Puji meh TUHAN, semua kita ke peturun Jakop!” Sida ke terubah datai nya bala Benjamin, raban bansa ti pemadu mit, ditangkanka bala tuai bansa Judah enggau raban sida, dientudika bala tuai Sebulun enggau Naptali. Ayanka kuasa Nuan, O Allah Taala, kuasa ti udah dikena Nuan ngarika kami ari Rumah Nuan di Jerusalem, alai bala raja ke mai pemeri ngagai Nuan. Rara meh Ejip, jelu ti siga dalam madang buluh. Rara meh semua bansa, raban sapi ti lelaki enggau anak sida, datai ke semua sida nyau meremi lalu meri pirak sida ngagai Nuan. Achirka bala orang ke rindu beperang! Bala pengari perintah deka datai ari Ejip; orang Etiopia deka ngangkatka jari sida besampi ngagai Allah Taala. Belagu muji Allah Taala, semua kita perintah dunya, belagu muji TUHAN, ke Iya ti bejalai nengah langit, langit ti dulu kelia. Pendingka panjung Iya enggau penginggar nyawa Iya. Padahka kuasa Allah Taala. Iya nyadi Raja merintah Israel. Langit ngayanka kuasa Iya. Naka meh pemesai kuasa Allah Taala ke disembah orang Israel lebuh Iya datai ari endur Iya ti kudus, Iya ti Allah Taala ke disembah orang Israel! Iya meri pengering enggau kuasa ngagai nembiak Iya. Pujika Allah Taala! Selamatka aku, O Allah Taala! Ai nyau naka rekung aku. Aku tengelam ba tanah rebuh ti dalam, lalu nadai tanah ti kering. Aku nyau datai ba ai ti dalam, lalu aku nyau deka lemas laban gelumbang. Aku nyau lelak ngangau minta tulung, lalu batang rekung aku nyau pedis. Mata aku nyau pedis, beperening ngiga tulung ari Nuan. Orang ke begedika aku enggau nadai kebuah nyau mayuh agi ari lambar buk ti ba pala aku. Bala munsuh aku nusui utai ti bula ngelaban aku. Sida kering, lalu deka munuh aku. Sida mejalka aku mulaika utai ti ukai dichuri aku. O Allah Taala, aku enda ngelalaika dosa aku ari Nuan. Nuan nemu pemeli aku ngelamatu. O TUHAN ti Pemadu Bekuasa, anang nejuka aku mai pemalu ngagai orang ke manggaika pengarap sida ba Nuan! O Allah Taala ke disembah orang Israel, anang nejuka aku mai pemalu ngagai orang ke nyembah Nuan! Aku udah dipechat lalu dibalut pemalu ketegal Nuan. Ba kaban belayan aku, aku tu baka orang kampar. Ba kami sebilik, aku tu baka orang bansa bukai. Pengangkun aku ke Rumah Nuan mau baka api. Jaku orang ke mechat Nuan, ninggang aku. Aku ngemaruhka diri bepasa, lalu orang mechat aku. Aku ngerasukka pekayan ulit, lalu sida ketawaka aku. Sida berandauka aku ba sebelah jalai raya, lalu orang ke pemabuk nyindir aku ngena pantun. Tang aku deka besampi ngagai Nuan, O TUHAN. Saut meh aku, O Allah Taala, ba maya ti ku ati Nuan. Saut meh aku laban pengerindu Nuan endang besai, laban Nuan ngamatka semaya Nuan ti deka ngelepas. Selamatka aku ngambika aku enda tengelam ba tanah ti rebuh. Ibun aku likun ari bala munsuh aku, likun ari ai ti dalam. Anang nejuka ai bah ngampuhka aku. Anang nejuka aku lemas dalam tasik tauka tengelam ba kubur. Saut aku, O TUHAN, laban pengerindu Nuan endang meruan. Ulih pengasih Nuan, malik meh Nuan ngagai aku! Anang belalai ari nembiak Nuan, laban aku balat dituntung penusah. Saut meh aku diatu! Datai ngagai aku, lalu selamatka aku. Selamatka aku ari bala munsuh aku. Nuan nemu pemalat aku dipechat, pemalat aku malu, lalu enda dibasa. Nuan meda semua munsuh aku. Jaku pechat orang udah ngeruntuhka ati aku, lalu ati aku balat tusah. Aku udah ngadang orang deka sinu ati ke aku, tang nadai orang sinu ati ke aku. Aku andalka pengelantang, tang aku nadai nemu pengelantang. Lebuh aku lapar, sida meri aku rachun. Lebuh aku aus, sida meri aku ai chuka. Awakka pengerami makai besai sida, ngerusak sida. Awakka gawai sida ngasuh sida alah. Asuh sida buta! Asuh tulang belakang sida lemi! Bubuhka pengeringat Nuan ba sida. Awakka pengeringat Nuan ngalahka sida. Awakka kem sida nadai orang nguan. Awakka nadai orang agi idup dalam langkau kain sida. Laban sida merinsaka orang ke udah diukum Nuan, berandauka pemerinsa orang ke udah bakal laban Nuan. Tuliska magang semua dosa sida. Anang meri sida bagi dalam pengelepas Nuan. Awakka nama sida dibuai ari bup pengidup. Awakka nama sida enda ditulis dalam list nama bala nembiak Nuan. Tang aku pedis sereta tusah ati. Angkatka aku, O Allah Taala, lalu selamatka aku! Aku deka bepantun muji Allah Taala. Aku deka meri terima kasih ngagai Iya kena aku madahka pemesai kuasa Iya. Tu deka ngerinduka ati TUHAN lebih agi ari jelu sapi ti diberi nyadika piring, lebih agi ari sapi ti lelaki, ti diberi nyadika piring. Lebuh orang ke kena tekan meda nya, sida deka gaga. Orang ke nyembah Allah Taala, deka diperansang. TUHAN mendingka orang ke suntuk lalu ingatka bala nembiak Iya ke dalam rumah jil. Pujika Allah Taala, O serega enggau dunya, tasik enggau semua utai ti idup dalam sida. Iya deka ngelepaska Jerusalem lalu nirika baru nengeri di menua Judah. Bala nembiak Iya deka diau dia, lalu bempu menua nya. Peturun bala nembiak Iya deka bempu menua nya nyadika pesaka sida, lalu orang ke rinduka Iya, deka diau dia. Selamatka aku, O Allah Taala! TUHAN, tulung meh aku diatu! Awakka orang ke nguji munuh aku alah sereta charut runding. Awakka orang ke rindu meda penusah aku nikal lalu dipechat. Awakka orang ke beduan aku tusah ati ke diri ke alah. Awakka semua orang ke datai ngagai Nuan lantang sereta gaga ati. Awakka semua orang ke meri terima kasihka pengelepas Nuan seruran nyebut, “Naka meh pemesai Allah Taala kitai!” Aku lemi sereta seranta. Datai ngagai aku enggau jampat, O Allah Taala. Nuan endang Juruselamat enggau TUHAN aku. Datai enggau jampat lalu tulung aku! TUHAN, aku datai ngagai Nuan minta Nuan nyaga aku. Anang nejuka aku alah! Laban Nuan lurus, nya alai tulung meh aku lalu lepaska aku. Pendingka aku, lalu selamatka aku! Awakka Nuan nyadi pengelindung aku sereta nyadi kuta ti tegap nyaga aku, laban Nuan nyadika batu enggau kuta aku. O Allah Taala aku, lepaska aku ari orang ke jai, ari kuasa orang ke merinsaka orang, enggau ari orang ke jai ati. TUHAN ti Pemadu Tinggi, aku manggaika pengandal ati aku ba Nuan. Aku endang udah manggaika diri ba Nuan kenyau ari aku agi biak. Aku udah ngarapka Nuan seumur idup. Nuan udah nyaga aku kenyau ari aku ada. Aku deka seruran muji Nuan. Pengidup aku udah nyadika teladan orang mayuh, laban Nuan udah kering nyaga aku. Aku muji Nuan sepemanjai hari, lalu madahka mulia Nuan. Anang nulak aku ketegal aku nyau tuai. Anang ninggalka aku ketegal aku nyau lemi. Bala munsuh aku deka munuh aku. Sida berandau lalu bepekat deka ngelaban aku. Ku sida, “Allah Taala udah ninggalka iya. Aram kitai nitihka iya, lalu nangkap iya. Nadai orang deka ngelepaska iya.” O Allah Taala, anang jauh ari aku; O Allah Taala aku, datai enggau jampat lalu tulung aku! Awakka orang ke nyerang aku alah lalu dirusak. Awakka orang ke nguji ngemediska aku malu lalu dipechat. Aku deka seruran manggaika pengandal ati aku ba Nuan. Aku deka bebendar agi muji Nuan. Aku deka nusui pasal pemadas Nuan. Aku deka bejakuka pasal pengelepas Nuan sepemanjai hari, taja pen aku enda nemu semua utai nya. Aku deka bejalai ngena pengering TUHAN Allah Taala. Aku deka madahka pemadas Nuan siku aja. Nuan udah ngajar aku kenyau ari aku agi biak, lalu aku mengkang madahka pemadas pengawa Nuan. Taja pen aku nyau tuai, lalu buk aku nyau buban, anang meh Nuan ninggalka aku, O Allah Taala! Awakka Nuan seruran enggau aku lebuh aku madahka pasal kuasa enggau pengering Nuan ngagai semua turun-menurun jemah ila. O Allah Taala, pengelurus Nuan nyau ngeninggi langit. Nuan udah ngereja pengawa ti besai. Nadai orang sebaka enggau Nuan. Nuan udah ngasuh penusah enggau pemerinsa ninggang aku, tang Nuan deka ngasuh aku kering baru. Nuan deka nagang aku tama ngagai kubur. Nuan deka ngaga aku besai agi ari ti udah. Nuan deka merindang aku baru. Aku endang amat deka muji Nuan ngena belikan. Aku deka muji penetap ati Nuan, O Allah Taala aku. Aku deka nebah belikan lalu belagu ke Nuan Allah Taala ti Kudus ke disembah orang Israel. Aku deka manjung gaga ati lebuh aku nebah musik ke Nuan. Aku deka belagu enggau pengabis pengering, semengat enggau roh aku laban Nuan udah ngelepaska aku. Aku deka bejakuka pasal pengelurus Nuan sepemanjai hari, laban orang ke nguji ngemediska aku udah alah lalu dipechat. Ajar raja ngambika iya ngakim ngena pengelurus Nuan, O Allah Taala. Bagi ngagai iya atur Nuan ti lurus, ngambika iya megai bala nembiak Nuan enggau pengelurus lalu merintah orang ke seranta ngena atur ti lurus. Awakka menua kami nyadi kaya-raja. Awakka menua kami ngasaika pengelurus. Awakka raja ngakim orang ke seranta ngena ati ti betul. Awakka iya nulung orang ke suntuk lalu ngalahka orang ke nekanka pengidup sida. Awakka bala nembiak Nuan nyembah Nuan seagi mata hari manchar, seagi bulan meri penampak belama iya. Awakka raja nyadi baka ujan ti labuh ninggang umai, baka ujan ti beberis ninggang tanah. Awakka pengelurus ngerembai ngagai semua endur seumur raja, lalu awakka pengaya tan, seagi bulan meri penampak. Perintah iya deka ngerembai ari tasik siti ngagai tasik siti, ari Eupratis di serata dunya. Semua bansa ti nguan menua puang deka meremi di mua iya. Bala munsuh iya deka nyungkurka diri ke tanah. Bala raja menua Spain enggau raja mayuh bengkah pulau deka meri iya pemeri. Raja menua Sheba enggau Seba deka mai pemeri ngagai iya. Semua raja deka meremi di mua iya. Semua bansa deka bekereja ke iya. Iya ngelepaska orang ke seranta, ke ngangauka iya, enggau sida ke suntuk sereta enda dikibuhka orang. Iya sinu ati ke orang ke lemi sereta seranta. Iya ngidupka nyawa sida ke suntuk. Iya ngelepaska sida ari orang ke nekanka pengidup sida, enggau ari orang ke mangah. Iya amat balat sayauka sida. Gayu-guru meh raja! Awakka iya diberi emas ari Sheba. Awakka orang besampika iya belama. Awakka Allah Taala seruran merekatka iya! Awakka gandum seruran mayuh di menua. Awakka bukit penuh laban utai ti ditanam, ngelebat sida ke di menua Lebanon. Awakka nengeri penuh laban mensia, baka padang ti penuh laban rumput. Awakka nama raja seruran dikingatka. Awakka penampak nama iya meruan baka mata hari. Awakka semua bansa minta Allah Taala merekatka sida baka Iya ti udah merekatka raja. Pujika TUHAN Allah Taala ke disembah orang Israel! Semina Iya siku aja ti ngereja utai ti badas nya. Pujika nama Iya ti bemulia belama iya! Awakka mulia Iya ngemenuhka dunya. Amin! Amin! Nya meh naka sampi David anak Jesi. Allah Taala endang manah enggau orang Israel, enggau orang ke tuchi ati. Tang aku nyau deka enda agi kempang ati. Pengarap aku nyau deka abis laban aku ngining orang ke sumbung lebuh aku meda orang ke jai nyamai diau. Sida nadai natka diri pedis. Sida kering sereta bepengerai. Sida enda merinsa baka orang bukai. Sida enda ditinggang penusah baka orang bukai. Nya alai sida betenggakka penyumbung lalu nyerayung diri enggau pemangah. Ati sida nuang penyai, lalu sida kiruh bekiraka akal ti jai. Sida ketawaka orang bukai, lalu bejakuka utai ti jai. Sida sumbung lalu begagaka pelan kena nekanka pengidup orang bukai. Sida bejaku jai pasal Allah Taala ti di serega lalu ngeninggika diri meri atur ngagai semua orang di dunya, datai ke bala nembiak Allah Taala Empu nyau nguingka diri ngagai sida lalu gagit ati arapka sebarang utai ti disebut sida. Ku sida, “Allah Taala enda nemu. Allah Taala ti Pemadu Tinggi enda nemu.” Nya meh gaya orang ke jai. Sida endang mayuh utai, lalu selalu bulih mayuh agi utai. Enti pia, nama guna aku diau tuchi lalu enda bedosa? O Allah Taala, Nuan udah ngasuh aku natka pemerinsa sepemanjai hari. Genap pagi Nuan udah nganu aku. Enti aku bisi udah nyebut utai munyi nya, aku tentu enda ngaga diri baka nembiak Nuan. Aku udah nguji berundingka pasal penusah tu, tang utai tu kelalu mar ke aku datai ke aku nyau mansang ngagai Rumah Nuan. Nya baru aku nemu utai ti deka nyadi ba orang ke jai. Nuan ngengkahka sida ba endur ti lichin lalu ngasuh sida labuh ngagai pengerusak! Sida dirusak tekala nya, lalu pengujung sida amat jai. Sida baka mimpi ti lenyau pagi hari. Lebuh Nuan dani, O TUHAN, sida lesap. Lebuh runding aku jai lalu ati aku pedis, aku beli baka jelu. Aku enda meretika Nuan. Tang aku seruran semak Nuan, lalu Nuan megai jari aku. Nuan ngiring aku ngena ajar Nuan lalu ba pengujung iya, Nuan deka nerima aku ngena basa. Nama utai bukai ti dikemisi aku di serega kelimpah ari Nuan Empu? Laban aku bisi Nuan, nama utai bukai agi dikedekaka aku di dunya tu? Runding enggau tubuh aku nyangka tau nyadi lemi, tang Allah Taala nyadika pengering aku. Semina Iya siku aja diguna aku. Orang ke ninggalka Nuan tentu deka mati. Nuan deka ngerusak sida ke enda tetap ati ngagai Nuan. Tang aku empu, naka meh pengelantang aku diau semak Allah Taala, dijaga TUHAN ti Pemadu Tinggi, lalu madahka pasal semua utai ti udah dikereja Iya! Nama kebuah Nuan ninggalka kami baka tu, O Allah Taala? Kati Nuan deka ringat belama iya ngagai bala nembiak Nuan? Kingatka bala nembiak Nuan, ti udah dipilih Nuan Empu dulu kelia, ti udah dibai Nuan pansut ari pengidup sida ke nyadi ulun, lalu nyadi raban bansa Nuan Empu. Kingatka Bukit Sion, ti udah alai Nuan diau dulu kelia. Bejalai meh Nuan nengah semua tembawai tu. Bala munsuh kami udah ngerusak semua utai dalam Rumah Sembiang. Bala munsuh Nuan udah manjung dalam Rumah Nuan madahka pemenang diri. Sida udah nuatka menira kena sida nandaka diri menang. Gamal sida baka orang ke kereja batang ke betebangka kayu ngena kapak. Sida mechahka semua papan ukir ngena kapak enggau tukul sida. Sida ngerusak lalu nunu Rumah Nuan. Sida ngamahka endur alai Nuan disembah. Sida endang deka ngalahka kami abis. Sida nunu semua endur ti kudus di menua tu. Semua tanda ti kudus udah abis magang. Bala nabi nadai agi tinggal, lalu nadai orang nemu pengelama utai tu deka nyadi. Ni pengelama bala munsuh kami deka ketawaka Nuan, O Allah Taala? Kati sida deka mechat nama Nuan belama iya? Nama kebuah Nuan enggai nulung kami? Nama kebuah Nuan diau jenuh lalu melawikka jari? Tang Nuan endang Raja kami kenyau ari pun, O Allah Taala. Nuan suah udah ngelepaska kami. Ngena pengering kuasa Nuan, Nuan udah melah tasik lalu mechahka pala naga tasik. Nuan udah ngeredakka pala naga tasik lalu ngasuh bangkai iya diempa jelu di menua puang. Nuan ngasuh ai pansut ari mata ai, lalu ngasuh ai engkeching. Nuan udah ngerangkaika sungai ti besai. Nuan udah ngaga siang enggau malam. Nuan udah ngengkahka mata hari enggau bulan ba endur sida. Nuan ngeletak pemesai dunya. Nuan ngeletak musin panas enggau musin chelap. Tang ingat, O TUHAN, bala munsuh Nuan ketawaka Nuan. Sida nya orang ke enda arapka Nuan, sereta ngeleseka Nuan. Anang ninggalka bala nembiak Nuan ti nadai daya tu ba jari munsuh sida ke jai. Anang enda ingatka bala nembiak Nuan ke diperinsaka orang! Kingatka sempekat ti udah digaga Nuan enggau kami. Utai ti kasar bisi ba semua teluk ti petang di menua tu. Anang nejuka orang ngemaluka sida ke kena tekan. Awakka orang ke seranta enggau suntuk muji Nuan. Angkat meh Nuan, Allah Taala, lalu bejaku ngarika Nuan Empu! Kingatka orang bansa bukai ke ketawaka Nuan sepemanjai hari. Anang enda ingatka panjung munsuh Nuan, penginggar bala munsuh Nuan ti enda nemu badu. Kami meri terima kasih ngagai Nuan, O Allah Taala. Kami meri terima kasih ngagai Nuan! Kami madahka pemesai kuasa Nuan lalu nusui pasal utai ti badas ti udah dikereja Nuan. Ku Allah Taala bejaku, “Aku udah ngeletak maya alai ngakim, lalu Aku deka ngakim enggau lurus. Taja pen semua utai ti idup nyau begetar magang lalu tanah pen berenyang, tang Aku deka ngasuh pugu dunya meruan tegap. Aku ngasuh orang ke jai badu agi ngenyumbungka diri. Aku ngasuh sida badu agi temegah bejaku.” Laban pemutus pechara ukai datai ari timur tauka ari barat, tauka ari utara, tauka ari selatan, tang Allah Taala Empu ke ngakim, ke ngukum sekeda lalu ngelepaska sida ti bukai. TUHAN megai mangkuk ba jari Iya, ti penuh laban wain pengeringat Iya ti bisa. Iya nuang wain nya, lalu semua orang ke jai bela ngirup wain nya datai ke nadai setitik agi tinggal. Tang aku enggai badu bejaku ngenang pasal Allah Taala Jakop tauka belagu muji Iya. Iya deka ngerusak kuasa orang ke jai, tang kuasa orang ke lurus deka ditambahka. Orang di menua Judah endang nemu Allah Taala. Nama Iya endang dikemesaika orang di menua Israel. Iya bisi rumah di Jerusalem. Iya diau ba Bukit Sion. Dia meh endur alai Iya ke matahka panah munsuh, terabai, enggau pedang, enggau semua senyata sida. Naka meh pemesai mulia Nuan, O Allah Taala! Naka meh pemesai kuasa Nuan lebuh Nuan pulai ari bukit alai Nuan ti udah ngalahka bala munsuh Nuan. Semua utai bala soldadu sida ke berani udah abis dirampas lalu sida diatu tinduk baka orang ke mati. Semua pengering enggau pengelandik sida nadai guna agi. Lebuh Nuan ngemba sida, O Allah Taala Jakop, kuda enggau orang ke nepan kuda mati. Nuan, O TUHAN, endang diketakutka semua mensia. Nadai orang tan bediri di mua Nuan lebuh Nuan ringat. Nuan meri pemutus pechara ari serega. Dunya takut lalu enda engkeretik, lebuh Nuan angkat lalu madahka pemutus pechara, kena Nuan ngelepaska semua orang ke kena tekan di dunya tu. Pengeringat mensia semina ngasuh Nuan balat agi dipuji. Orang ke enda mati beperang deka ngintu gawai Nuan. Beri ngagai TUHAN Allah Taala kita utai ti udah disemaya kita. Bai meh pemeri ngagai Iya, semua kita bansa ti semak. Allah Taala ngenakutka semua mensia. Iya ngemaruhka raja ti sumbung lalu ngemba raja ti besai. Aku nyabak duie-duie ngagai Allah Taala. Aku nyabak duie-duie, lalu Iya ninga aku. Lebuh maya tusah, aku besampi ngagai TUHAN. Semalam-malam aku ngangkatka jari besampi, tang aku nadai nemu utai ti ulih merindang aku. Lebuh aku berundingka Allah Taala, aku bedemuh. Lebuh aku belematika Iya, semengat aku alah. Iya nagang aku tinduk semalam-malam. Ati aku balat irau, datai ke aku nyau enda ulih bejaku. Aku berundingka utai ti udah nyadi lalu ngingatka taun ti dulu kelia. Semalam-malam nya aku bebendar amat berunding. Aku belemati, lalu tu utai ti ditanyaka aku dalam ati aku: “Kati Allah Taala deka seruran nulak kitai? Kati Iya enggai agi gaga ati ke kitai? Kati Iya udah badu rinduka kitai? Kati semaya Iya nadai diguna agi? Kati Allah Taala enda ingat kasihka kitai? Kati pengeringat Iya udah dibali Iya nyadi penyiru?” Udah nya aku bejaku, “Utai ti balat ngenusahka ati aku nya: Allah Taala nadai bekuasa agi.” Aku deka ngingatka pemesai kereja Nuan, O TUHAN. Aku deka ngingatka utai ti nyelai ti udah dikereja Nuan dulu kelia. Aku deka berundingka semua utai ti udah dikereja Nuan. Aku deka belematika semua pengawa Nuan ti besai. Semua utai ti dikereja Nuan, O Allah Taala, endang kudus magang. Nadai petara bukai ke bekuasa baka Nuan. Nuan tu meh Allah Taala ti ngereja kereja ajih. Nuan udah ngayanka kuasa Nuan ngagai semua bansa. Ngena kuasa Nuan, Nuan udah nebus bala nembiak Nuan, iya nya peturun Jakop enggau Josep. Lebuh tasik meda Nuan, O Allah Taala, sida takut, lalu buntut tasik begetar. Mua hari mubuhka ai ujan. Guntur meletup di langit lalu kilat nyelar. Guntur Nuan inggar deram-deram, lalu kilat ti nyelar meri penampak ngagai dunya. Dunya begetar sereta berenyang. Nuan bejalai ngerenchah gelumbang. Nuan meraka tasik ti dalam, tang bekau kaki Nuan enda ulih dipeda. Nuan nguluka bala nembiak Nuan baka pengibun bedus lalu Moses seduai Aron nyadi tuai sida. Pendingka ajar aku, kita ke nembiak aku, lalu peratika utai ti disebut aku. Aku deka bejaku ngena jaku sempama lalu nerangka utai ti nyelai ti nyadi dulu kelia, utai ti udah didinga sereta ditemu kitai, utai ti udah dipadahka aki ini kitai ngagai kitai. Kitai enda tau ngelalaika utai nya ari bala anak kitai. Kitai deka madahka utai nya ngagai serak ti nangkanka kitai pasal kuasa TUHAN, enggau pasal pemesai pengawa Iya enggau utai ti badas ti udah dikereja Iya. Iya meri adat ngagai orang Israel enggau pesan ngagai peturun Jakop. Iya meri atur ngagai bala aki ini kitai ngasuh sida ngajar Adat Iya ngagai bala anak sida, ngambika serak ke nangkanka sida ulih belajarka adat nya lalu madahka adat nya ngagai bala anak sida ke nangkanka sida. Nya meh jalai sida deka manggaika pengarap sida ba Allah Taala lalu seruran ingatka utai ti udah dikereja Iya, sereta seruran ngasika pesan Iya. Sida enda baka aki ini sida ke seruran angkat ngelaban sereta enda ngasi, ti nadai kala manggaika pengarap sida tegap ba Allah Taala lalu enda tetap ati ngagai Iya. Orang Epraim, ke besenyataka panah enggau laja, rari lebuh beperang. Sida enda ngingatka sempekat sida enggau Allah Taala. Sida enggai ngasika Adat Iya. Sida enda ingatka utai ti udah dikereja Iya, iya nya kereja ajih ti udah dipeda sida kereja Iya. Lebuh bala aki ini sida ngemata, Allah Taala ngereja kereja ajih ba emperan Zoan, di menua Ejip. Iya melah tasik, lalu mai sida bejalai nengah tasik nya. Iya ngasuh ai bediri baka dinding. Lebuh siang hari, Iya nguluka sida ngena mua hari lalu lebuh malam hari Iya nguluka sida ngena penampak daun api. Iya melah batu di menua puang lalu meri sida mayuh ai. Iya ngasuh ai pansut ari batu lalu ngasuh ai nya rarat baka sungai. Tang sida majak bedosa ngelaban Allah Taala, lalu di menua puang nya sida angkat ngelaban Iya ti Pemadu Tinggi. Sida endang sengaja nguji Allah Taala lebuh sida minta pemakai ti dikedekaka sida. Sida bejaku ngelaban Allah Taala, lalu ku sida, “Kati Allah Taala ulih meri pemakai di menua puang tu? Iya amat udah malu batu, lalu ai rarat ari batu nya baka ai bah. Tang kati Iya ulih mega meri kitai roti lalu meri dagin ngagai bala nembiak Iya?” Nya alai TUHAN ringat lebuh Iya ninga sida. Iya nyerang bala nembiak Iya ngena api, lalu Iya majak ringat ngagai sida, laban sida enda arapka Iya lalu enda arapka Iya deka ngidupka sida. Tang Iya bejaku ngagai langit di atas ngasuh pintu langit tebuka. Iya meri sida gandum ari serega, lebuh Iya meri sida mana nyadika pemakai sida. Nya alai sida makai pemakai melikat, lalu Allah Taala meri sida sepemayuh ti dikedekaka sida. Iya mega ngasuh ribut timur muput, lalu ngena kuasa Iya, Iya nyungkak ribut muput ari selatan. Lalu ngagai bala nembiak Iya, Iya nganjung burung ngemayuh igi pasir ti ba tebing tasik. Burung nya labuh ba tengah-tengah kem ngelingi semua langkau kain. Nya alai orang mayuh makai, lalu kenyang magang. Allah Taala meri sida utai ti dikedekaka sida. Tang sebedau sida puas ati makai utai nya, lebuh pemakai nya agi dalam nyawa sida, Allah Taala lalu ringat ngagai sida lalu munuh bala lelaki sida ke kering, orang ke pemadu kering di menua Israel. Tang taja pia, orang mayuh majak bedosa. Taja pen Iya ngereja kereja ajih, sida mengkang enggai manggaika pengarap sida ba Iya. Nya alai Iya ngabiska umur sida baka kesuh seput lalu ngapuska nyawa sida ngena penusah ti datai enggau ngenyit. Genap kali Iya munuh sekeda bala sida, sida ti bukai nguingka diri ngagai Iya. Sida nesal ati, lalu bebendar besampi ngagai Iya. Sida ingatka Allah Taala endang penyaga sida, ingatka Iya ti Pemadu Bekuasa udah datai nulung sida. Tang jaku sida bula semua. Utai ti disebut sida ukai datai ari ati. Sida enda taluk ngagai Iya. Sida enda tetap ati ngagai sempekat sida enggau Iya. Tang Allah Taala kasihka nembiak Iya. Iya ngampun dosa sida lalu enda ngerusak sida. Iya suah nagang Diri ringat lalu nagang Diri ngeransi. Iya ingatka sida endang semina mensia aja, baka ribut ti mansa lalu nadai datai agi. Sida suah amat angkat ngelaban Iya di menua puang. Sida suah ngasuh ati Iya tusah! Sida enda nemu badu nguji Allah Taala lalu ngenusahka ati Allah Taala ke disembah orang Israel ti kudus. Sida enda ingatka pemesai kuasa Iya enggau hari Iya ngelepaska sida ari bala munsuh sida sereta ngereja pengawa ti besai enggau kereja ajih ba emperan Zoan di menua Ejip. Iya ngasuh sungai bebali nyadi darah, lalu orang Ejip nadai ai irup. Iya ngasuh lalat datai kena merinsaka sida, enggau engkatak kena ngerusak menua sida. Iya ngasuh buntak makai utai ti ditanam sida lalu ngerusak umai sida. Iya ngerusak batang anggur sida ngena ujan batu enggau kayu ara sida ngena ambun ti meku. Iya munuh jelu sapi sida ngena ujan batu enggau jelu tupi sida ngena kilat. Iya ngasuh sida balat tusah lebuh Iya mubuhka pengeringat enggau ransi Iya, ti datai mai pemati. Iya enda nagang diri ringat tauka ngalau nyawa sida, tang munuh sida ngena penyakit ti balat. Iya munuh anak tuai ari semua ruang bilik orang Ejip. Udah nya, Iya lalu nguluka bala nembiak Iya, baka pengibun bedus lalu ngiring sida nengah menua puang. Iya nguluka sida enggau likun, lalu sida enda takut. Tang tasik ngelamun bala munsuh sida. Iya mai sida ngagai menua Iya ti kudus, ngagai bukit ti udah dialahka Iya Empu. Iya muru orang ke nguan menua nya, lebuh bala nembiak Iya nyerang. Iya magi menua sida ngagai raban bansa orang Israel lalu meri rumah orang nya ngagai bala nembiak Iya. Tang sida angkat ngelaban Allah Taala ti Pemadu Bekuasa lalu nguji Iya. Sida enda ngasika adat Iya, tang ngelaban sereta enda taluk baka aki ini sida, enda tau dikarapka, baka laja ti bingkuk. Sida nyungkak TUHAN ringat ngena endur alai orang kapir nyembah petara sida, lalu nyungkak Iya pedis ati ngena engkeramba sida. Allah Taala ringat lebuh Iya meda utai nya, nya alai Iya nulak semua nembiak Iya. Iya ninggalka langkau kain Iya di Siloh, rumah ti udah alai Iya diau begulai enggau kitai. TUHAN nejuka bala munsuh kitai ngerampas Peti Lampang Batu Adat, ti nyadika tanda kuasa enggau mulia Iya. Iya ringat ngagai bala nembiak Iya Empu lalu nejuka sida dibunuh munsuh. Orang ke bujang mati beperang, lalu sida ke dara nadai orang enggau jadi. Bala imam mati dibunuh ngena pedang, lalu balu sida enda tau ngulit. Udah nya TUHAN angkat baka ke dani tinduk, baka orang ke baru gerai mabuk. Iya muru bala munsuh Iya lalu sida rari lalu Iya ngemaluka sida belama iya. Tang Iya nulak peturun Josep. Iya enda milih raban bansa Epraim, tang milih raban bansa Judah enggau Bukit Sion, ti balat dikerinduka Iya. Dia Iya ngaga Rumah Sembiang Iya baka rumah Iya ti di serega. Iya ngaga Rumah Sembiang nya tegap baka dunya empu, kukuh belama iya. TUHAN milih nembiak Iya David. Iya ngambi David ari padang rumput, alai David ke ngibun raban bedus iya, lalu ngasuh iya nyadi raja menua Israel, nyadi pengibun ke bala nembiak Allah Taala. David ngibun sida enggau pengabis pengangkun ati iya lalu nguluka sida enggau pengelandik. O Allah Taala, orang bansa bukai udah nyerang menua Nuan. Sida udah ngamahka Rumah Nuan ti kudus lalu ngaga Jerusalem nyadi tembawai. Sida ninggalka bangkai bala nembiak Nuan diempa burung, ninggalka bangkai bala ulun Nuan diempa jelu babas. Sida ngasuh darah bala nembiak Nuan nyaya baka ai di serata nengeri Jerusalem, lalu nadai orang nguburka sida. Semua bansa ti ngelingi kami, mechat kami. Sida ketawaka kami, lalu ngeleseka kami. TUHAN, kati Nuan deka ringat ngagai kami belama iya? Kati pengeringat Nuan deka majak mau baka api? Kuingka pengeringat Nuan ngagai bansa ti enda nyembah Nuan, ngagai orang ke enda besampi ngagai Nuan. Laban sida udah munuh bala nembiak Nuan. Sida udah ngerusak menua Nuan. Anang ngukum kami ketegal dosa aki ini kami. Kasihka kami diatu. Kami nadai pengadang agi. Tulung kami, O Allah Taala, lalu selamatka kami. Lepaska kami, lalu ampun dosa kami ketegal nama Nuan. Anang nejuka orang bansa bukai nanya ngagai kami, “Dini alai Allah Taala kita?” Awakka kami meda Nuan ngukum bansa bukai laban sida udah munuh bala nembiak Nuan. Pendingka orang jil bedemuh, lalu enggau kuasa Nuan ti besai, lepaska orang ke diukum bunuh. TUHAN, balas tujuh kali lipat jaku pechat ti udah dikena orang bansa bukai mechat Nuan. Nya baru kami ke nembiak Nuan, ke ari raban bedus Nuan, deka meri terima kasih ngagai Nuan belama iya lalu muji Nuan belama iya jemah ila. Pendingka kami, O Pengibun orang Israel. Dingaka kami, Nuan ke nguluka raban bedus Nuan. Nuan ke duduk ba kerusi diraja Nuan ari atas melikat cherub ti besayap, pandangka Diri ngagai raban bansa Epraim, Benjamin enggau Manasi, pandangka pengering Nuan ngagai kami. Datai lalu selamatka kami! Bai kami pulai baru, O Allah Taala! Ayanka pengasih Nuan ke kami, ngambika kami diidupka! O TUHAN ti Pemadu Bekuasa, ni pengelama Nuan deka mengkang ringat ke sampi bala nembiak Nuan? Nuan udah ngasuh penyinu ati kami nyadika pemakai kami, enggau sejalung ai mata nyadika ai irup kami. Nuan nejuka bansa ti ngelingi kami berebutka menua kami. Bala munsuh kami mechat kami. Bai kami pulai baru, O Allah Taala ti Pemadu Bekuasa! Ayanka pengasih Nuan ke kami, ngambika kami diidupka! Nuan mai batang anggur pansut ari menua Ejip. Nuan muru semua bansa bukai, lalu nanam batang anggur nya ba menua sida. Nuan ngupas endur alai iya tumbuh. Urat iya ngunjam, lalu nyerangkap di serata menua nya. Batang anggur nya ngayung semua bukit. Dan iya ngayung kayu sidar ti besai. Iya nyuntaika dan iya ngagai Tasik Tengah nyentuk ngagai Sungai Eupratis. Nama kebuah Nuan ngeruntuhka pagar ti ngelingi iya? Diatu semua orang ke mansa ulih ngenchuri buah iya. Babi utan ngelunjak iya, lalu jelu babas makai buah iya. Kuingka Diri ngagai kami, O Allah Taala ti Pemadu Bekuasa! Tilik ari serega ngagai kami di baruh ditu. Datai lalu selamatka bala nembiak Nuan! Datai lalu selamatka batang anggur ti udah ditanam Nuan, batang anggur ti muda tu, ti udah diasuh Nuan kering! Bala munsuh kami udah nunu iya, lalu nebang iya. Perening ngagai sida enggau pengeringat, lalu rusak sida! Ibun sereta jaga bala orang ke udah dipilih Nuan, bansa ti udah diasuh Nuan kering. Kami enggai agi ninggalka Nuan. Idupka kami, lalu kami deka muji Nuan. Bai kami pulai baru, O TUHAN Allah Taala ti Pemadu Bekuasa. Ayanka pengasih Nuan ke kami, ngambika kami diidupka. Manjung gaga ati ke Allah Taala ti nyaga kitai. Belagu muji Allah Taala Jakop! Tebah musik enggau tamborin. Tebah musik ti manah didinga ngena belikan enggau engkeratung. Sepu terumpit lebuh kita begawai, lebuh maya anak bulan, enggau lebuh bulan peranama. Tu adat menua Israel, atur ti diletak Allah Taala Jakop. Iya meri adat nya ngagai orang Israel lebuh Iya nyerang menua Ejip. Aku ninga munyi nyawa ti enda dikelala bejaku, “Aku ngingkaska ma ti berat ari belakang kita. Aku ngasuh kita ngelengkaka batu bata ari jari kita. Lebuh kita kena laban penusah, kita ngangauka Aku, lalu Aku ngelepaska kita. Ari endur alai Aku ke belalai dalam biaubalai, Aku nyaut kita. Aku nguji kita ba mata ai di Meribah. Pendingka jaku tangkan Aku, kita ke nembiak Aku. Israel, naka meh pemanah enti kita deka mendingka Aku! Kita enda tau sekali-kali nyembah petara bukai. Aku tu TUHAN Allah Taala kita, ti udah mai kita pansut ari menua Ejip. Perangapka nyawa kita, ngambika Aku nyapi kita. “Tang bala nembiak Aku enggai mendingka Aku. Israel enggai ngasika Aku. Nya alai Aku nejuka sida nitihka pengekieh sida lalu ngereja sebarang utai ti dikedekaka sida. Naka meh pemanah enti bala nembiak Aku deka mendingka Aku. Naka meh pemanah enti sida deka ngasika Aku! Aku deka ngalahka munsuh sida enggau jampat lalu ngalahka semua munsuh sida. Orang ke begedika Aku deka meremi enggau ati ti nangi di mua Aku. Ukum sida deka mengkang belama iya. Tang aku deka nupi kita ngena gandum ti pemadu manah lalu ngasuh kita kenyang ngena ai manyi.” Allah Taala nguluka orang serega baum. Iya meri pemutus penemu ngagai bala petara: “Kita enda tau enda badu agi ngakim ngena chara ti enda lurus. Kita enda tau agi ngeringka orang ke jai! Beri atur ti lurus ngagai orang ke seranta enggau orang ke nadai apai indai; jaga hak orang ke seranta, enggau ke merinsa. Lepaska sida ari kuasa orang ke jai. “Naka meh penadai penemu kita! Naka meh pemeli kita! Kita tu amat jai, lalu atur ti lurus udah lesap ari dunya tu. Ku Aku bejaku, ‘Kita tu petara. Semua kita tu anak Allah Taala ti Pemadu Tinggi.’ Tang kita deka mati baka mensia. Umur kita deka abis baka umur anak raja.” Datai meh Nuan, O Allah Taala, lalu perintah meh dunya tu. Semua bansa endang enggi Nuan magang. O Allah Taala, anang enda bemunyi. Anang enda engkebut, anang diau jenuh! Peda bala munsuh Nuan angkat ngelaban, lalu orang ke begedika Nuan angkat ngelaban. Sida begagaka pelan ti resia kena sida ngelaban bala nembiak Nuan. Sida bepekat ngelaban orang ke dijaga Nuan. Ku sida bejaku, “Aram kitai ngerusak bansa sida, ngambika bansa orang Israel nadai agi dikingatka belama iya.” Sida lalu besetujuka pelan nya, lalu beserakup ngelaban Nuan: orang Edom enggau orang Ismail, orang Moap enggau orang Hagri, orang Gebal, Amon, enggau orang Amalek, orang Pilistin, enggau orang Tire. Asiria mega setanah enggau sida nyadi raban ti kering ke orang Amon enggau orang Moap, ti peturun Lot. Laban meh sida baka Nuan ti udah ngelaban orang Midian, baka Nuan ti udah ngelaban Sisera seduai Jabin ba Sungai Kison. Nuan udah ngalahka sida di En-dor, lalu bangkai sida but ba tanah. Serang meh bala tuai sida baka Nuan ti udah nyerang Orep seduai Sip. Alahka semua orang ke merintah sida, baka Nuan ti udah ngalahka Sebah seduai Salmuna, ke nyebut, “Kitai deka ngerampas menua Allah Taala nyadika menua kitai empu.” Taburka sida baka amau, O Allah Taala, baka rumput ti rangkai ti dikebuka ribut, baka api ti nganguska utan, baka daun api ti nyelar nganguska munggu, baka nya meh Nuan muru sida ngena biaubalai Nuan lalu ngenakutka sida ngena ribut Nuan ti balat. Asuh sida berasai malu, O TUHAN, ngambika sida ngiga nama Nuan. Awakka sida alah lalu takut belama iya. Awakka sida mati sereta abis dipechat. Awakka sida nemu Nuan siku aja ti TUHAN, Raja ti Pemadu Tinggi ke serata dunya. Naka meh pemanah Rumah Nuan, O TUHAN ti Pemadu Bekuasa! Naka meh pengelengau ati aku ke Rumah TUHAN. Lalu enggau pengabis semengat, roh enggau tubuh aku, aku belagu muji Allah Taala ti idup. Indah pipit deh bisi endur alai diau, lalu lelayang bisi sarang ke diri empu, alai iya nyimpan anak iya, ba alta Nuan, O TUHAN ti Pemadu Bekuasa, Raja enggau Allah Taala aku. Beberekat meh orang ke diau dalam Rumah Nuan, ke seruran belagu muji Nuan. Beberekat meh orang ke manggaika diri ba pengering Nuan, ke gagit ati deka nangga Bukit Sion. Lebuh sida bejalai nengah lebak ti rangkai, sida ngaga endur nya nyadi endur ti mayuh mata ai. Ujan lebuh musin ruruh daun ngasuh endur nya penuh laban letung. Sida mansang kering-sekering lebuh sida bejalai. Sida deka meda Allah Taala ti ari atas semua petara, di Sion. O TUHAN Allah Taala ti Pemadu Bekuasa, dingaka sampi aku. Pendingka aku, O Allah Taala Jakop! Nuan meh terabai kami, O Allah Taala, Ayanka pengerindu Nuan ngagai iya ti udah dipilih Nuan. Sehari dalam Rumah Nuan manah agi ari seribu hari ba endur bukai. Manah agi aku jaga ba mua pintu Rumah Allah Taala aku ari ti diau dalam langkau kain orang ke jai. Laban TUHAN Allah Taala baka mata hari enggau baka terabai; Iya nelap sereta meri basa. Iya nadai kala enggai meri utai ti manah ngagai orang ke ngereja utai ti ngena. TUHAN ti Pemadu Bekuasa, beberekat meh orang ke arapka Nuan! TUHAN, Nuan udah kasihka menua Nuan. Nuan udah ngasuh Israel nyadi kaya-raja baru. Nuan udah ngampun dosa nembiak Nuan lalu ngampun penyalah sida. Nuan enda agi ringat ngagai sida lalu nagang Diri ringat pedis ati ke sida. Bai kami pulai baru, O Allah Taala ti Juruselamat kami lalu badu agi enda lantang ati ngagai kami! Kati Nuan deka ringat ngagai kami belama iya? Kati pengeringat Nuan enda nemu badu? Asuh kami kering baru, ngambika kami ke nembiak Nuan muji Nuan. O TUHAN, ayanka ngagai kami pengerindu Nuan ti meruan belama iya, lalu tulung kami, selamatka kami. Aku mendingka utai ti disebut TUHAN Allah Taala. Iya besemaya deka meri pemaik ngagai kitai ke nembiak Iya, enti kitai enda pulai baru ngagai ulah kitai ti beli. Iya tentu sedia deka ngelepaska orang ke ngemesaika Iya, lalu mulia Iya deka diau di menua kitai. Pengerindu enggau penetap ati deka betemu. Pengelurus enggau pemaik deka beberap. Penaluk mensia deka niki ari dunya, lalu pengelurus Allah Taala deka nilik ke baruh ari serega. TUHAN deka ngasuh kitai nyadi kaya-raja, lalu kitai deka bulih ngetau. Pengelurus deka bejalai dulu ari TUHAN lalu nyendiaka jalai Iya. Pendingka aku, O TUHAN, lalu saut aku, laban aku nadai daya agi sereta lemi. Selamatka aku ari pemati, laban aku taluk ngagai Nuan. Selamatka aku, laban aku tu nembiak Nuan lalu aku manggaika pengarap aku ba Nuan. Nuan endang Allah Taala aku, nya alai kasihka aku. Aku besampi ngagai Nuan sepemanjai hari. Asuh ati nembiak Nuan gaga, O TUHAN, laban aku besampi ngagai Nuan. Nuan endang manah enggau kami, sereta ngampun. Nuan penuh laban pengerindu ke semua orang ke besampi ngagai Nuan. Pendingka sampi aku, O TUHAN. Dingaka aku ke nyabak minta tulung. Aku ngangauka Nuan lebuh maya tusah, laban Nuan nyaut sampi aku. Nadai petara bukai ke baka Nuan, O TUHAN. Nadai siku ti udah ngereja utai baka ke udah dikereja Nuan. Semua bansa ti udah digaga Nuan deka datai lalu meremi ngagai Nuan. Sida deka muji pemesai kuasa Nuan. Nuan endang bekuasa, sereta ngereja utai ti badas. Semina Nuan siku aja ti Allah Taala. Ajar aku, O TUHAN, utai ti diasuh Nuan kereja aku, ngambika aku tetap ati ngasika Nuan. Ajar aku betuaika Nuan enggau pengabis pengangkun ati aku. Aku deka muji Nuan enggau pengabis ati aku, O TUHAN Allah Taala aku. Aku deka ngemesaika Nuan belama iya. Naka meh pemesai pengerindu Nuan ti meruan belama iya. Nuan udah ngelepaska aku ari kubur. O Allah Taala, orang ke sumbung datai ngelaban aku, bala orang ke jai nguji munuh aku, orang ke enggai mendingka Nuan. Tang Nuan, O TUHAN, endang Allah Taala ti kasih sereta rindu, seruran liat ati, seruran nelap sereta tetap ati. Nguing ngagai aku, lalu kasihka aku. Keringka aku, lalu selamatka aku, laban aku betuaika Nuan baka indai aku suba. Ayanka ngagai aku tanda pemadas Nuan, TUHAN, ngambika orang ke begedika aku nemu malu lebuh sida meda Nuan udah merindang sereta nulung aku. TUHAN ngaga nengeri Iya ba bukit ti kudus. Iya rinduka nengeri Jerusalem lebih ari Iya ti rinduka endur bukai di menua Israel. Nengeri Allah Taala, pendingka utai ti manah ti disebut Iya pasal nuan. Ngagai orang ke nemu aku, aku madahka pasal Ejip enggau Babilon. Pilistin, Tire, enggau Etiopia mega. Lalu sida deka nyebut, “Iya tu udah diadaka din.” Ba pasal Sion, orang deka nyebut, “Iya tu enggau iya nya endang ada ditu”, laban Allah Taala ti Pemadu Bekuasa deka ngeringka iya. TUHAN deka nuliska nama semua bansa lalu nyengkaum semua sida nyadi peranak nengeri Jerusalem magang. Sida betanda sereta belagu, “Penatai semua berekat kitai endang ari Sion.” TUHAN Allah Taala ti Juruselamat aku, aku nyabak sepemanjai hari, lalu lebuh malam hari, aku datai ngadap ngagai Nuan. Dingaka sampi aku. Pendingka kangau aku ke minta tulung! Mayuh amat penusah udah ninggang aku datai ke aku nyau deka mati. Aku tu baka semua orang bukai ke nyau deka mati. Aku nadai pengering agi. Aku ditinggalka begulai enggau orang ke mati. Aku tu baka orang ke udah dibunuh, ke garing-garing dalam kubur, ti enda dikingatka Nuan agi, ti enda ulih ditulung agi. Nuan udah muai aku ngagai buntut lubang kubur, ngagai lubang kebung ti pemadu petang sereta dalam. Pengeringat Nuan berat amat ninggang aku, lalu aku nyau redak dilamun umbak iya. Nuan udah ngasuh bala pangan aku ninggalka aku. Nuan udah ngasuh sida keji meda aku. Aku dikelulung, lalu enda ulih rari. Mata aku nyau kabur laban merinsa. O TUHAN, tiap hari aku ngangauka Nuan lalu ngangkatka jari aku besampi. Kati Nuan ngereja kereja ajih ke orang ke mati? Kati sida ke mati angkat lalu muji Nuan? Kati pengerindu Nuan ti meruan belama iya bisi dikenang dalam kubur? Kati penetap ati Nuan dikenang ba endur alai pengerusak? Kati kereja ajih Nuan bisi dipeda ba endur ti petang nya? Kati pemadas Nuan bisi ditemu di dunya pemati? O TUHAN, aku ngangauka Nuan minta tulung. Tiap pagi aku besampi ngagai Nuan. Nama kebuah Nuan nulak aku, O TUHAN? Nama kebuah Nuan ninggalka aku? Kenyau ari aku agi biak, aku udah merinsa lalu nyau deka mati. Aku nyau lelak natka pemerat ukum ari Nuan. Pemalat pengeringat Nuan ngelamun aku. Serang Nuan ngerusak aku. Sida ngelulung aku baka ai bah sepemanjai hari. Sida datai semak ngagai aku ari semua endur. Nuan udah ngasuh pangan aku ninggalka aku. Ka semina pemetang aja nyadika sulu aku. O TUHAN, aku deka seruran belagu ngenang pengerindu Nuan ti meruan belama iya. Aku deka madahka penetap ati Nuan belama iya. Aku nemu pengerindu Nuan deka meruan belama iya, lalu penetap ati Nuan deka meruan baka langit. Ku Nuan, “Aku udah ngaga sempekat enggau siku orang ke udah dipilih Aku. Aku udah besemaya enggau nembiak Aku David, ‘Peturun nuan deka betampung nyadi raja. Aku deka ngasuh perintah nuan tan belama iya.’ ” Serega belagu muji pemanah utai ti dikereja Nuan. Sida ke kudus belagu muji penetap ati Nuan, O TUHAN. Nadai orang di langit sebaka enggau Nuan, O TUHAN. Nadai orang di serega sebaka enggau Nuan. Raban kunsil ti kudus nangi magang ke Nuan. Semua sida bela takutka Nuan. O TUHAN Allah Taala ti Pemadu Bekuasa, nadai orang bekuasa baka Nuan. O TUHAN, Nuan endang tetap ati dalam semua utai. Nuan merintah tasik ti begelumbang, lalu Nuan ngasuh gelumbang badu agi mangka. Nuan ngalahka Rahap lalu munuh iya. Nuan ngalahka bala munsuh Nuan ngena pengering Nuan. Serega endang enggi Nuan, lalu baka nya mega dunya. Nuan udah ngaga dunya enggau semua utai ti dalam iya. Nuan udah ngaga utara enggau selatan. Bukit Tabor enggau Bukit Hermon belagu gaga ati ke Nuan. Naka meh pemesai kuasa Nuan! Naka meh pengering Nuan! Perintah Nuan beduduk ba pengelurus enggau atur ti manah. Pengerindu enggau penetap ati Nuan nyata ba semua utai ti dikereja Nuan. Beberekat meh orang ke nyembah Nuan ngena lagu, orang ke diau dalam penampak penelap Nuan! Sida rami gaga sepemanjai hari ketegal Nuan, lalu sida muji Nuan ketegal pemadas Nuan. Nuan udah ngasuh kami menang. Ulih pengerindu Nuan, Nuan udah ngasuh kami menang. Nuan, O TUHAN, udah milih orang nyaga kami laban Nuan, O Allah Taala ti Kudus orang Israel, udah meri kami raja. Dalam genera dulu kelia, Nuan udah nyebut ngagai bala nembiak Nuan ke tetap ati, “Aku udah meri tulung ngagai siku soldadu ti tebilang nama. Aku udah meri kerusi diraja ngagai iya ti udah dipilih Aku ari orang mayuh. Aku udah nyiri nembiak Aku David nyadi raja lebuh Aku nata iya ngena minyak ti kudus. Pengering Aku deka seruran enggau iya. Kuasa Aku deka ngasuh iya kering. Bala munsuh iya enda ulih ngelaban iya. Orang ke jai enda ulih ngalahka iya. Aku deka nginsarka bala munsuh iya, lalu munuh semua orang ke begedika iya. Aku deka rinduka iya sereta tetap ati ngagai iya. Aku deka ngasuh iya seruran menang. Aku deka ngerembaika perintah iya kenyau ari Tasik Tengah nyentuk ngagai Sungai Eupratis. Iya deka nyebut ngagai aku, ‘Nuan Apai enggau Allah Taala aku. Nuan Penyaga enggau Juruselamat aku.’ Aku deka ngaga iya nyadi anak tuai Aku, ke bekuasa agi ari semua raja. Aku deka seruran ngamatka semaya Aku enggau iya, lalu sempekat Aku enggau iya deka meruan belama iya. Perintah iya deka meruan tan baka langit. Peturun iya deka betampung nyadi raja. Tang enti peturun iya ngelanggar Adat Aku, lalu enda nitihka pesan Aku, enti sida enda ngasika atur Aku lalu enda nitihka pesan Aku, Aku deka ngukum sida ketegal dosa sida. Aku deka ngasuh sida merinsa ketegal penyalah sida. Tang Aku enda badu rinduka David lalu ngamatka semaya Aku enggau iya. Aku enggai ngelanggar sempekat Aku enggau iya tauka matak sebarang semaya ti udah digaga Aku enggau iya. Aku udah besemaya sekali aja dalam nama Aku ti kudus: Aku enggai sekali-kali bulaka David. Iya deka meruan bisi peturun, lalu Aku deka ngemataka perintah iya seagi-agi mata hari manchar. Perintah iya deka meruan tan belama iya baka bulan, ti nyadika saksi ti tetap ati di langit.” Tang Nuan ringat ngagai raja ti udah dipilih Nuan. Nuan udah ninggalka iya lalu nulak iya. Nuan udah mungkir ari sempekat Nuan enggau nembiak Nuan lalu nikauka makota iya ke tanah. Nuan udah ngeruntuhka dinding kuta nengeri iya lalu ninggalka kuta iya nyadi tembawai. Semua orang ke mansa, ngenchuri utai iya. Semua orang ke berimbai pendiau enggau iya, ketawaka iya. Nuan udah ngasuh bala munsuh iya menang. Nuan udah ngasuh sida lantang ati magang. Nuan udah ngasuh senyata iya nadai tau diguna, lalu nejuka iya alah beperang. Nuan udah ngerampas tungkat diraja ari jari iya lalu nikauka kerusi diraja iya ke tanah. Nuan udah ngasuh iya jampat tuai lalu ngemaluka iya. TUHAN, kati Nuan deka ngelalaika Diri belama iya? Ni pengelama pengeringat Nuan agi mau baka api? Kingatka pemandak umur aku. Kingatka Diri ti udah ngaga semua kami mensia! Sapa ulih idup lalu enda mati? Baka ni ku kami mensia ulih nagang diri tama ngagai kubur? TUHAN, dini alai tanda pengerindu Nuan? Dini alai semaya ti udah digaga Nuan enggau David? Anang enda ingatka aku, ke nembiak Nuan, ke dipechat orang, ke natka diri disumpah semua orang kapir. Bala munsuh Nuan mechat raja ti udah dipilih Nuan, O TUHAN! Sida mechat iya di sebarang endur iya bejalai. Puji meh TUHAN belama iya! Amin! Amin! O TUHAN, Nuan endang seruran nyadika rumah kami. Sebedau Nuan nempa bukit tauka nempa dunya, Nuan endang Allah Taala ti meruan belama iya, nadai pun nadai ujung, lalu Nuan deka nyadi Allah Taala belama iya. Nuan udah ngasuh kami pulai ngagai gaya asal kami. Nuan ngubah kami nyadi amau baru. Ba Nuan, seribu taun baka sehari. Sida iya baka kemari ti nadai agi, baka ke sejam lebuh malam hari. Nuan nabanka kami baka ai bah. Kami tu baka mimpi, enda tan lama. Kami tu baka rumput ti matuk pagi hari, tumbuh lalu bebungai lebuh pagi hari, lalu udah nya, rangkai lalu mati lemai nya. Kami rusak laban pengeringat Nuan. Nuan ngeransi, lalu kami takut. Nuan ngengkahka dosa kami di mua Nuan; indah dosa ti dikereja kami belalai, deh ditemu Nuan. Umur kami nyau pandak laban pengeringat Nuan; umur kami nyau abis baka kesuh seput. Umur kami semina 70 taun aja, lapan puluh taun, enti kami regas; tang umur kami semina mai pemerinsa enggau ati ti tusah. Umur jampat abis, lalu kami nadai agi. Sapa udah kala ngasaika diri ditempuh kuasa pengeringat Nuan? Sapa nemu pemalat kami takutka diri diransi Nuan? Ajar kami pasal pemandak umur kami, ngambika kami tau nyadi orang ke pintar. Ni pengelama Nuan agi ringat? Kasihka kami ke nembiak Nuan, O TUHAN! Isi kami genap pagi enggau pengerindu Nuan ti meruan belama iya, ngambika kami ulih belagu lalu gaga ati sepemanjai umur kami. Beri kami diatu pengelantang ngenyampau penusah ti udah diberi Nuan ngagai ati kami dalam berapa taun kami ke natka diri merinsa. Awakka kami ke nembiak Nuan, meda pengawa Nuan ti besai. Awakka peturun kami meda pemesai kuasa mulia Nuan. O TUHAN Allah Taala kami, awakka berekat Nuan seruran enggau kami. Asuh kami mujur dalam semua utai ti dikereja kami! Barang sapa ke datai ngagai TUHAN ngiga pengelikun, barang sapa ke dijaga Iya ti Pemadu Bekuasa, tau nyebut ngagai Iya, “Nuan endang penyaga enggau pengelindung aku. Nuan endang Allah Taala aku. Aku manggaika pengarap aku ba Nuan.” Iya deka ngibun nuan likun ari semua penusah ti enda dipeda, enggau ari semua penyakit ti tau munuh. Iya deka mungkur nuan ngena sayap Iya. Nuan deka likun diibun Iya. Penetap ati Iya deka ngelindung sereta nyaga nuan. Anang nuan takutka utai ti tau ngemedis lebuh malam hari tauka diserang enggau ngenyit lebuh siang hari tauka penyakit ti nyerang dalam petang tauka utai ti jai ti munuh lebuh siang hari. Seribu iku deka rebah ngimbai nuan, sepuluh ribu iku ngelingi nuan, tang nuan enda bebadi. Nuan deka malik, lalu tepedaka chara orang ke jai diukum. Nuan udah ngasuh TUHAN nyaga nuan lalu Allah Taala ti Pemadu Tinggi ngelindung nuan. Nya alai nuan enda ditinggang penusah, lalu pengachau pen nadai mega datai semak rumah nuan. Allah Taala deka ngasuh bala melikat Iya ngibun nuan lalu nyaga nuan di sebarang endur nuan bejalai. Sida deka nyambut nuan ngena jari sida ngambika kaki nuan enda terempas ba batu. Nuan deka ngelunjak singa enggau ular, singa ti mangah enggau ular ti bisa. Ku Allah Taala bejaku, “Aku deka ngelepaska orang ke rinduka Aku lalu nyaga orang ke ngaku Aku nyadika TUHAN sida. Lebuh sida ngangauka Aku, Aku deka nyaut sida. Lebuh sida kena laban penusah, Aku deka enggau sida. Aku deka ngelepaska sida lalu masa sida. Aku deka ngupah sida ngena umur ti panjai. Aku deka ngelepaska sida.” Naka meh pemanah meri terima kasih ngagai Nuan, O TUHAN, belagu ngemesaika Nuan, O Allah Taala ti Pemadu Tinggi, genap pagi madahka pengerindu Nuan ti meruan belama iya enggau genap malam madahka penetap ati Nuan, ngena musik ari engkeratung enggau belikan. Pengawa Nuan ti besai, O TUHAN, ngasuh ati aku gaga. Ketegal utai ti udah dikereja Nuan, aku belagu gaga ati. Naka meh pemesai kereja Nuan, O TUHAN! Naka meh penalam runding Nuan! Nya utai ti enda ulih ditemu orang ke beli, ti enda ulih disagam orang ke lap. Orang ke jai nyangka ulih tumbuh baka rumput, orang ke ngereja penyalah nyangka tau nyadi kaya-raja, tang sida deka dirusak abis lengis, laban Nuan, TUHAN, endang bekuasa atas semua belama iya. Kami nemu munsuh Nuan deka mati, lalu semua orang ke jai deka alah magang. Nuan udah ngasuh aku kering baka sapi ti siga. Nuan udah merekatka aku enggau pengelantang. Aku udah meda bala munsuh aku alah lalu ninga sabak orang ke jai. Orang ke lurus deka galak baka kayu engkerema. Sida deka tumbuh baka kayu sidar di menua Lebanon. Sida baka kayu ti ditanam dalam rumah TUHAN, ti galak dalam Rumah Sembiang Allah Taala kami, ti agi bebuah lebuh sida nyau tuai lalu seruran gadung sereta kering. Tu nunjukka TUHAN endang lurus ati, lalu nadai utai ti enda lurus ba penyaga aku. TUHAN endang Raja! Iya begari ngena mulia enggau pengering. Dunya diatur tegap lalu enda ulih dikinsitka. Kerusi diraja Nuan, O TUHAN, endang udah tegap kenyau ari pun lalu Nuan endang udah bisi sebedau dunya nyadi. O TUHAN, tasik ti dalam nyau berauh. Sida inggar amat begelumbang. TUHAN merintah ari atas semua di serega, besai agi ari munyi pangka gelumbang, bekuasa agi ari gelumbang ti di tasik. Adat Nuan endang meruan belama iya, O TUHAN, lalu Rumah Nuan endang amat kudus, belama lama iya. O TUHAN, Nuan Allah Taala ti ngukum, pandangka pengeringat Nuan! Nuan nyadi Hakim ke kami semua. Angkat meh Nuan lalu ukum orang ke sumbung ketegal utai ti udah dikereja sida! Ni pengelama orang ke jai agi majak gaga ati? Ni pengelama agi, TUHAN? Ni pengelama orang ke ngereja penyalah agi majak sumbung lalu temegah bejakuka penyai ti dikereja sida? Sida nginsarka bala nembiak Nuan, O TUHAN. Sida nekanka pengidup orang ke diempu Nuan. Sida munuh indu ke balu enggau anak ti nadai apai indai, lalu munuh orang kampar ti diau di menua kami. Ku sida, “Nadai TUHAN ulih meda kitai. Allah Taala ke disembah orang Israel enda ulih meda kitai.” Nembiak aku, nama kebuah kita beli baka nya? Kemaya kita ulih mereti? Indah pending kitai deh digaga Allah Taala - kati Iya enda ulih ninga? Lalu mata kitai ditempa Iya - kati Iya enda ulih meda? Semua bansa diukum Iya magang - kati Iya enggai ngukum sida? Iya nyadi pengajar ke semua kitai - kati Iya nadai penemu? TUHAN nemu runding kitai. Iya nemu pemeli runding kitai. O TUHAN, beberekat meh orang ke diajar Nuan, orang ke diajar Nuan adat Nuan! Nuan ngasuh sida belelak ari hari ti penuh laban penusah nyentuk ngagai maya lubang kebung ditumbak ke orang ke jai. TUHAN enggai ninggalka bala nembiak Iya. Iya enggai ngelengkaka sida ke endang pesaka Iya. Atur ti lurus deka ditemu baru dalam kot, lalu semua orang ke lurus deka nyukung nya. Sapa orang ke udah ngarika aku ngelaban orang ke jai? Sapa orang ke udah setanah enggau aku ngelaban orang ke ngereja penyai? Enti TUHAN enda nulung aku, aku tentu udah jampat lenyau ngagai dunya pemati. Ku aku, “Aku labuh!” Tang pengerindu Nuan ti meruan belama iya, O TUHAN, ngasuh aku ulih bediri tegap. Lebuh ati aku mayuh pengirau, Nuan merindang aku, lalu ngasuh ati aku gaga. Nuan nadai kaul enggau bala hakim ti jai, ke ngaga atur ti jai lalu ngumbai atur nya betul, ke bepekat ngelaban orang ke lurus lalu meri ukum bunuh ngagai orang ke nadai penyalah. Tang TUHAN ngeringka aku. Allah Taala aku nyaga aku. Iya deka ngukum sida ketegal penyai sida lalu ngerusak sida ketegal dosa sida. TUHAN Allah Taala kitai deka ngerusak sida. Aram kitai muji TUHAN! Aram kitai belagu gaga ati ke Allah Taala ti nyaga kitai! Aram kitai datai ngagai Iya mai lagu terima kasih lalu nyanyi pantun puji enggau ati ti gaga. Laban TUHAN endang Allah Taala ti bekuasa Raja ke bekuasa ari atas semua petara. Iya merintah semua dunya, kenyau ari lubang gua ti pemadu dalam nyentuk ngagai bukit ti pemadu tinggi. Iya merintah tasik ti udah digaga Iya Empu enggau tanah ti udah ditempa jari Iya Empu. Aram kitai meremi lalu nyembah Iya. Aram kitai besugang di mua TUHAN ti udah ngaga kitai! Iya endang Allah Taala kitai. Kitai tu orang ke diibun Iya, raban ke ditupi Iya. Sehari tu dingaka utai ti disebut Iya: “Anang kieh, baka aki ini kita di Meribah, baka sida sehari nya di menua puang di Masah. Dia meh alai sida ke ngabas ati Aku sereta nguji Aku, taja pen sida udah meda utai ti udah dikereja Aku. Empat puluh taun Aku udah kejika orang nya. Ku Aku, ‘Naka meh pemalat sida tu enda taluk! Sida enggai ngasika pesan Aku.’ Aku ringat, lalu besemaya ngena sumpah. ‘Kita enda ulih tama ngagai menua ti alai Aku deka ngasuh kita belelak.’ ” Nyanyi lagu ti baru ke TUHAN! Belagu ke TUHAN, semua dunya! Belagu ke TUHAN, lalu puji Iya! Padahka tiap hari berita manah pasal Iya ti udah ngelepaska kitai. Padahka mulia Iya ngagai semua bansa; padahka ngagai semua mensia pasal kereja Iya ti besai. TUHAN endang besai kuasa, lalu patut dipuji. Iya endang patut dikemesaika lebih ari semua petara. Petara semua orang bansa bukai endang semina engkeramba aja, tang TUHAN udah ngaga langit. Iya dikelingi pemadas enggau mulia. Kuasa enggau mulia ngemenuhka Rumah Sembiang Iya. Puji meh TUHAN, semua mensia di dunya. Puji meh mulia enggau kuasa Iya. Puji meh nama TUHAN ti bemulia. Bai meh piring lalu datai ngagai Rumah Sembiang Iya. Sembah meh TUHAN ngena pekayan ti dikena kita besembiang; Awakka semua dunya begetar di mua Iya! Sebut ngagai semua bansa, “ TUHAN endang Raja! Dunya udah diletak tegap, lalu enda ulih dikinsitka. Iya deka ngakim semua bansa ngena atur ti lurus.” Gaga ati meh kita, dunya enggau langit! Inggar meh kita, tasik, enggau semua utai ti idup dalam kita. Gaga ati meh kita, umai, enggau semua utai ti dalam kita! Kayu ti di utan deka manjung gaga ati lebuh TUHAN datai lalu merintah dunya. Iya deka merintah semua bansa di dunya ngena atur ti lurus sereta betul. TUHAN endang Raja! Dunya, awakka ati nuan gaga! Rami gaga ati meh kita menua ti ba tebing tasik! Iya dikelingi mua hari enggau pemetang. Iya merintah ngena pengelurus enggau atur ti betul. Api bejalai di mua Iya lalu nganguska munsuh ti ngelingi Iya. Kilat Iya ngenampakka dunya. Dunya meda kilat nya, lalu begetar. Bukit luluh baka lilin, di mua TUHAN, di mua TUHAN ti bekuasa atas semua dunya. Serega madahka pasal pengelurus Iya, lalu semua bansa meda mulia Iya. Semua orang ke nyembah engkeramba dipechat magang. Semua petara meremi di mua TUHAN. Orang di Sion gaga ati, lalu semua nengeri di menua Judah rami gaga ke atur Nuan, O TUHAN. TUHAN ti Pemadu Bekuasa, Nuan endang Raja ke semua dunya. Nuan endang besai agi ari semua petara. TUHAN rinduka orang ke begedika penyai. Iya nyaga seput bala nembiak Iya. Iya ngelepaska sida ari kuasa orang ke jai. Penampak manchar ngagai orang ke lurus, enggau pengaga ngagai orang ke manah. Gaga ati meh semua kita ke lurus ketegal utai ti udah dikereja TUHAN! Kingatka utai ti udah dikereja Allah Taala ti kudus, lalu beri terima kasih ngagai Iya. Nyanyi pantun ti baru ke TUHAN. Iya udah ngereja utai ti badas! Ngena kuasa Iya enggau pengering Iya ti kudus Iya udah bulih pemenang. TUHAN madahka pemenang Iya. Iya ngasuh semua bansa nemu kuasa Iya ti ngelepas. Iya ngamatka semaya Iya ngagai orang Israel ngena ati ti tetap enggau pengerindu ti meruan belama iya. Semua bansa di semua endur udah meda pemenang Allah Taala kami. Belagu gaga ati ke TUHAN, semua kita dunya. Puji Iya ngena pantun enggau panjung gaga ati! Belagu muji TUHAN! Tebah musik ngena belikan! Sepu terumpit enggau tanduk lalu manjung gaga ati ke TUHAN ti Raja kitai. Inggar meh nuan tasik, enggau semua utai ti idup dalam nuan. Belagu meh nuan dunya, enggau semua ke idup ba nuan! Tempapka jari kita, sungai. Kita bukit, belagu sama sereta enggau ati ti gaga di mua TUHAN, laban Iya datai deka merintah dunya. Iya deka merintah semua bansa di dunya ngena atur ti lurus sereta betul. TUHAN endang Raja lalu orang mayuh begetar magang. Iya duduk ba kerusi diraja Iya ari atas melikat cherub ti besayap, lalu tanah berenyang. TUHAN bekuasa di Sion. Iya bekuasa atas semua bansa. Semua orang deka muji pemesai mulia nama Iya. Kudus meh Iya! Raja Ti Bekuasa, Nuan rinduka utai ti ngena. Nuan udah numbuhka atur ti lurus di menua Israel. Nuan udah mai pengelurus enggau atur ti betul. Puji meh TUHAN Allah Taala kitai. Sembah meh Iya di mua kerusi diraja Iya! Kudus meh Iya! Moses seduai Aron udah nyadi imam Iya, lalu Samuel udah besampi ngagai Iya. Sida ngangauka TUHAN, lalu Iya nyaut sida. Iya bejaku ngagai sida ari gentilang remang. Sida ngasika adat enggau jaku ti diberi Iya ngagai sida. O TUHAN Allah Taala kami, Nuan udah nyaut bala nembiak Nuan. Nuan udah nunjukka Diri Allah Taala ti ngampun, taja pen Nuan ngukum sida ketegal dosa sida. Puji meh TUHAN Allah Taala kitai, lalu sembah meh Iya ba bukit Iya ti kudus! TUHAN Allah Taala kitai endang kudus! Nyanyi gaga ati ke TUHAN meh semua kita dunya! Sembah meh TUHAN enggau ati ti gaga, Datai ngagai Iya enggau lagu lantang ati! Anang enda ngaku TUHAN nya Allah Taala! Iya ngaga kitai, lalu kitai endang enggi Iya. Kitai tu nembiak Iya, kitai tu raban domba Iya. Tama nengah pintu Rumah Sembiang mai sampi terima kasih. Mansang ngagai endur ti kudus enggau pantun puji. Beri terima kasih ngagai Iya, lalu puji Iya. TUHAN endang badas. Pengerindu Iya meruan belama iya, lalu penetap ati Iya meruan belama iya. Lagu aku ngenang pasal penaluk enggau atur ti lurus, lalu aku nyanyi nya ke Nuan, O TUHAN. Aku nadai jai ulah. Kemaya Nuan deka datai ngagai aku? Aku deka idup tuchi dalam rumah aku lalu aku enggai meda penyai. Aku begedika utai ti dikereja orang ke ninggalka Allah Taala. Aku enggai bekaul enggau sida. Aku enggai enda betul ati lalu aku enggai bekaul enggau penyai. Aku deka muru sebarang orang ke betelai bejaku jai pasal orang bukai. Aku enggai meda orang ti sumbung enggau ti tinggi ati. Aku deka rinduka orang ke tetap ati ngagai Allah Taala lalu deka ngemendarka sida diau dalam istana aku. Orang ke endang amat betul ati deka dikemendarka bekereja ke aku. Orang ke bula enda tau diau dalam istana aku. Orang ke pura-pura ngapa enda tau diau di mua aku. Tiap hari aku deka ngerusak orang ke jai di menua kitai. Aku deka muai semua orang ke jai ari nengeri TUHAN. Pendingka sampi aku, O TUHAN, lalu dingaka sabak aku ke minta tulung! Lebuh aku dituntung penusah, anang ninggalka aku! Pendingka aku, lalu saut aku enggau jampat, lebuh aku ngangau! Aku mati lalu lesap baka asap. Tubuh aku angat asai api. Aku layu baka rumput ti rangkai. Aku nadai agi tetengukka pemakai. Aku bedemuh inggar. Aku semina tinggal kulit enggau tulang. Aku nyau baka burung ti di menua puang, baka burung puk ti diau ba tembawai. Aku gali tang enda ulih tinduk. Aku baka burung ti seilu-ilu ba perabung rumah. Bala munsuh aku mechat aku sepemanjai hari. Sida ke ngeleseka aku, ngena nama aku nyadika jaku sema. Pengidup aku nyau baka ayuk ti nyadi lebuh lemai hari. Aku tu nyau baka rumput ti rangkai. Tang Nuan, O TUHAN, endang Raja belama iya. Semua turun-menurun deka ingatka Nuan. Nuan deka angkat lalu sinuka Sion. Maya udah datai alai Nuan patut kasihka iya. Tu meh maya ti ngena. Bala nembiak Nuan rinduka iya, taja pen iya udah rusak. Sida sinu ati ke iya, taja pen iya nyau nyadi tembawai. Semua bansa deka nangika TUHAN. Semua raja di dunya deka nangika kuasa Iya. Lebuh TUHAN ngaga Sion baru, Iya deka mandangka pemesai kuasa Iya. Iya deka ningaka bala nembiak Iya ti udah ditinggalka Iya, lalu mendingka sampi sida. Tuliska utai ti udah dikereja TUHAN ke rebak ti dudi, ngambika orang ke apin ada diatu, deka muji Iya. TUHAN nilik ke baruh ari endur Iya ti kudus ba endur ti tinggi, Iya nilik ke baruh ari serega ngagai dunya. Iya ninga demuh orang jil lalu ngelepaska orang ke kena ukum bunuh. Nya alai nama Iya deka disebut di Sion, lalu Iya deka dipuji di Jerusalem lebuh semua bansa enggau perintah begempuru lalu nyembah TUHAN. TUHAN udah ngasuh aku lemi lebuh aku agi biak. Iya udah ngasuh umur aku pandak. O Allah Taala, anang ngambi aku diatu sebedau aku tuai umur. O TUHAN, Nuan idup belama iya. Dulu kelia Nuan ngaga dunya, lalu Nuan ngaga langit ngena jari Nuan. Sida deka lesap, tang Nuan deka meruan belama iya. Sida deka luya baka kain. Nuan deka muai sida baka kain, lalu sida deka lesap. Tang Nuan endang meruan enda berubah belama iya lalu umur Nuan enda nemu abis. Bala anak kami deka diau likun, lalu ari jaga Nuan peturun sida deka diau likun. Puji meh TUHAN, O semengat aku! Semua semengat, roh enggau tubuh aku, puji meh nama Iya ti kudus! Semengat aku, puji meh TUHAN, lalu anang enda ingatka penelap Iya. Iya ngampun semua dosa aku lalu ngeraika semua penyakit aku. Iya ngelepaska aku ari kubur lalu merekatka aku ngena pengerindu enggau pengasih. Iya ngemuaska ati aku enggau utai ti manah, ngambika aku seruran biak sereta kering baka menaul. TUHAN ngeringka orang ke kena tekan lebuh Iya ngakim lalu meri sida atur ti lurus. Iya mandangka pelan Iya ngagai Moses lalu ngasuh orang Israel meda pengawa ti besai ti dikereja Iya. TUHAN endang kasih sereta rindu, lubah ringat, sereta penuh laban pengerindu ti meruan belama iya. Iya enda majak nganu. Iya enda ringat belama iya. Iya enda ngukum kitai nitihka dosa kitai tauka malas kitai nitihka penyai kitai. Baka langit ti tinggi ari atas dunya, baka nya meh pemesai pengerindu Iya ke orang ke nangika Iya. Baka timur ti jauh ari barat, baka nya meh penyauh Iya muai dosa kitai. Baka apai ke nelap enggau anak diri, baka nya meh TUHAN nelap enggau orang ke nangika Iya. Iya nemu utai ti udah dikena ngaga kitai. Iya ingatka kitai tu endang amau. Ba pasal kitai empu, kitai tu baka rumput. Kitai tumbuh lalu idup baka bungai babas. Udah nya ribut muputka iya, lalu iya nadai agi, nadai agi dipeda orang. Tang pengerindu TUHAN deka meruan belama iya ba orang ke nangika Iya, lalu pengelurus Iya deka meruan ari serak siti ngagai serak siti, orang ke nitihka sempekat TUHAN sereta tetap ati ngasika pesan Iya. TUHAN udah ngengkahka kerusi diraja Iya di serega. Iya endang Raja ari atas semua. Puji meh TUHAN, kita melikat ti kering sereta bekuasa, ke ngasika pesan Iya, ke mendingka utai ti disebut Iya. Puji meh TUHAN, semua kita kuasa ti di serega, kita ke nembiak Iya, ti ngereja peneka Iya! Puji meh TUHAN, semua utai ti idup ti udah digaga Iya di semua endur ti diperintah Iya. Puji meh TUHAN, O semengat aku! Puji meh TUHAN, O semengat aku! O TUHAN Allah Taala aku, naka meh pemesai kuasa Nuan! Nuan ngerasukka mulia raja. Nuan nyerayung Diri ngena penampak. Nuan udah mintarka langit baka langkau kain lalu ngaga rumah Nuan ba atas ai ti di langit Nuan ngaga mua hari nyadika kerita perang Nuan lalu nepan ba sayap ribut. Nuan mai pesan Nuan ngena ribut lalu kilat ti nyelar nyadi ulun Nuan. Nuan udah ngengkahka dunya tegap ba pugu iya, lalu iya enda dikinsitka. Nuan udah ngengkahka tasik ba atas pugu dunya baka baju panjai, lalu ai ngelamun bukit. Lebuh Nuan ngerara ai, sida rari. Sida beterudus rari, lebuh Nuan merakka nyawa Nuan ngagai sida. Sida rarat nurun bukit ngagai lebak, ngagai endur ti udah disediaka Nuan ke sida. Nuan udah ngeletak garis ti enda tau dilanggar sida, ngambika sida enda ngelamun semua dunya baru. Nuan ngasuh mata ai mansutka ai ba lebak, lalu sungai rarat ba entara bukit. Jelu babas ngirup ai ari sida. Dia meh endur alai keledai kampung ngirup lalu enda agi aus. Ba kayu ti semak nya, burung ngaga sarang lalu belagu. Ari langit Nuan ngasuh ai ujan labuh ninggang bukit, lalu dunya penuh laban berekat Nuan. Nuan ngasuh rumput tumbuh ngambika bisi diempa jelu sapi, lalu meri kami utai ngambika bisi ditanam kami, ngambika kami bulih asil ari tanah, enggau wain kena kami ngelantangka diri, minyak kana kena kami ngasuh mua kami beperenching, enggau roti ti meri kami pengering. Kayu sidar di Lebanon ditinggang ujan ti bangat, kayu ti ditanam TUHAN Empu. Dia meh endur alai burung ngaga sarang sida. Burung undan ngaga sarang ba puchuk kayu ru. Kambin babas diau ba bukit ti tinggi, lalu jelu dumbang belalai ba sebelah tingkah. Nuan udah ngaga bulan kena ngelai musin. Mata panas nemu maya diri padam. Nuan udah ngaga malam, lalu lebuh hari nyau petang semua jelu babas pansut magang. Singa ti agi biak negung lebuh sida ngiga pemakai, begigaka pemakai ti diberi Allah Taala. Lebuh mata hari tumbuh, sida pulai baru lalu gali dalam lubang sida. Nya baru mensia nurun gawa lalu majak gawa datai ke lemai. TUHAN, Nuan udah ngaga mayuh macham utai! Naka meh pemintar Nuan ngaga semua utai nya! Dunya nyau penuh laban utai ti idup ti digaga Nuan. Tasik ti luas sereta besai pen bisi, endur alai utai ti idup diau, ti besai enggau ti mit, ti enda ulih diitung. Kapal belayar ba tasik, lalu jelu ti besai bemain dalam iya, iya nya naga tasik ti udah ditempa Nuan, Semua sida ngarapka Nuan meri sida pemakai nitihka musin. Nuan meri pemakai ngagai sida, lalu sida makai. Nuan meri sida pemakai, lalu sida kenyang. Lebuh Nuan nguing kebukai, sida tusah ati. Lebuh Nuan ngambi seput ti meri pengidup, sida mati lalu pulai nyadi amau baru. Tang lebuh Nuan meri sida seput, sida idup. Nuan meri pengidup ti baru ngagai dunya. Awakka mulia TUHAN meruan belama iya! Awakka TUHAN gaga ati ke utai ti udah digaga Iya! Iya merening ngagai dunya, lalu dunya begetar. Iya negu bukit, lalu bukit berasap. Aku deka belagu ke TUHAN seumur idup. Seagi-agi aku idup, aku deka belagu muji Allah Taala aku. Awakka Iya gaga ati ke lagu aku, laban Iya ngasuh ati aku gaga. Awakka orang ke bedosa dibuai ari dunya. Awakka orang ke jai abis lengis. Puji meh TUHAN, O semengat aku! Puji meh TUHAN! Beri terima kasih ngagai TUHAN. Padahka pemesai kuasa Iya. Tusui ngagai semua bansa utai ti udah dikereja Iya. Belagu muji TUHAN. Tusui pasal utai ti badas ti udah dikereja Iya. Gaga ati meh kitai ke enggi Iya. Awakka semua orang ke nyembah Iya rami gaga magang. Mansang meh kitai ngagai TUHAN minta Iya nulung, lalu sembah Iya berari. TUHAN endang Allah Taala kitai. Pesan Iya endang ke semua dunya. Iya deka ingatka sempekat Iya belama iya, semaya ti diberi Iya ngagai seribu serak. Iya deka ingatka sempekat ti udah digaga Iya enggau Abraham enggau semaya ti digaga Iya enggau Isak. TUHAN ngaga sempekat enggau Jakop, sempekat ti deka meruan belama iya. Ku Iya bejaku, “Aku deka meri menua Kanaan ngagai nuan. Menua nya deka nyadika pesaka nuan.” Lebuh sida agi mimit tubuh, nadai dipedulika orang, lalu diau nyadi orang kampar, bejalai segau-segau ari menua siti ngagai menua siti, ari perintah siti ngagai perintah siti, Iya enggai nejuka orang nekanka sida. Kena Iya nyaga sida, Iya meri jaku tangkan ngagai bala raja: “Anang negu bala nembiak ti udah dipilih Aku. Anang ngemediska bala nabi Aku” Lebuh TUHAN ngasuh lapar pungkang nyadi di menua nya lalu ngerampas semua pemakai sida, Iya ngirumka siku orang bejalai dulu ari sida, orang ke benama Josep, ti udah dijual nyadi ulun. Kaki iya ditanchang ngena rantai, lalu rekung iya dikungkung ngena besi, nyentuk ngagai maya utai ti udah ditujum iya, dikamatka, nyentuk ngagai maya Jaku Allah Taala madahka Josep endang madahka utai ti bendar. Udah nya raja menua Ejip ke merintah mayuh bengkah bansa ngasuh orang ngelepaska iya. Iya ngeletak Josep nyadi tuai megai perintah lalu ngasuh iya merintah semua menua nya, bekuasa atas bala pemesai raja lalu diberi kuasa meri atur ngagai bala penyanding penemu raja. Udah nya Jakop mansang ngagai menua Ejip lalu ngentapka diri di menua nya. TUHAN meri mayuh anak ngagai bala nembiak Iya lalu ngasuh sida kering agi ari bala munsuh sida. Iya ngasuh orang Ejip begedika bala nembiak Iya lalu nipu bala nembiak Iya. Udah nya Iya ngirumka nembiak Iya Moses, enggau Aron, ti udah dipilih Iya. Sida ngereja kereja ti nyelai enggau kereja ajih Allah Taala di menua Ejip. Allah Taala ngasuh menua Ejip dibalut pemetang, tang orang Ejip ngelaban jaku Iya. Iya ngasuh sungai sida bebali nyadi darah lalu munuh semua ikan. Menua sida penuh laban engkatak. Indah istana raja deh penuh laban engkatak. Allah Taala bejaku, lalu lalat enggau kerengit malut semua menua nya. Iya ngasuh ujan batu enggau kilat nyadi di menua nya kena nganti ujan. Iya ngerusak batang anggur enggau kayu ara sida lalu matahka semua kayu. Iya bejaku, lalu bejuta-juta iku buntak datai. Bala buntak nya makai semua utai ti tumbuh di menua nya, makai semua utai ti ditanam. Iya munuh anak tuai ti lelaki ari semua ruang bilik orang Ejip. Udah nya Iya nguluka orang Israel pansut. Sida mai pirak enggau emas, lalu semua sida bela bepengerai sereta regas magang. Orang Ejip takutka sida lalu gaga ati lebuh sida angkat. Allah Taala ngengkahka siti mua hari atas bala nembiak Iya enggau daun api ti meri sida penampak lebuh malam hari. Sida minta, lalu Iya ngirumka burung empitu. Iya meri sida pemakai ari serega kena ngenyangka sida. Iya malu batu, ai lalu pansut, lalu rarat nengah menua puang baka sungai. Iya ingatka semaya Iya ti kudus, ti udah digaga Iya enggau nembiak Iya Abraham. Nya alai Iya nguluka bala nembiak Iya pansut, lalu sida belagu sereta manjung gaga ati. Iya meri sida menua orang bansa bukai lalu ngasuh sida ngerampas umai orang nya, ngambika bala nembiak Iya ngasika Adat Iya lalu nitihka semua pesan Iya. Puji TUHAN! Puji TUHAN! Beri terima kasih ngagai TUHAN, laban Iya endang manah. Pengerindu Iya meruan belama iya. Sapa ulih madahka pasal semua pengawa ti besai ti udah dikereja Iya? Sapa ulih muji Iya enggau chukup? Beberekat meh orang ke ngasika pesan Iya, ke seruran ngereja utai ti ngena. Kingatka aku, O TUHAN, lebuh Nuan nulung bala nembiak Nuan. Tulung aku lebuh Nuan ngelepaska sida. Awakka aku meda pengaya bala nembiak Nuan, lalu sama enggau ngasaika pengelantang bansa Nuan, gaga ati temegah enggau sida ke diempu Nuan. Kami udah bedosa baka aki ini kami. Kami udah bepenyalah sereta jai. Aki ini kami di menua Ejip enda meretika pemadas pengawa Allah Taala. Sida enda ingatka penyuah Iya udah mandangka pengerindu Iya, lalu sida angkat ngelaban Allah Taala ti Pemadu Bekuasa ba tasik. Tang Iya nyelamatka sida, munyi ti udah disemaya Iya, kena Iya ngayanka pemesai kuasa Iya. Iya bejaku ngagai Tasik Mirah, lalu tasik nya rangkai. Iya nguluka bala nembiak Iya meraka nengah tanah ti rangkai. Iya ngelepaska sida ari jari orang ke begedika sida. Iya ngelepaska sida ari kuasa bala munsuh sida. Tang ai ngelamun bala munsuh sida. Nadai siku sida agi idup. Nya baru bala nembiak Iya arapka semaya Iya, lalu belagu muji Iya. Tang sida jampat enda ingatka utai ti udah dikereja Iya lalu ngereja utai enda nganti jaku lalau ari Iya. Sida balat tetengukka makai utai lebuh sida di menua puang lalu sida nguji Allah Taala. Nya alai Iya meri sida utai ti dipinta sida, tang Iya mega ngirumka penyakit ti balat ngagai sida. Menua puang nya meh endur alai sida ke kepapaska Moses seduai Aron, nembiak TUHAN ti kudus. Udah nya tanah merangap lalu nelan Datan lalu ngelamun Abiram enggau sida sebilik. Api nurun ngagai orang ke nitihka sida, lalu nganguska orang ke jai nya. Sida ngaga siku anak sapi ari emas di Sinai lalu nyembah engkeramba nya. Sida besilihka mulia Allah Taala enggau engkeramba jelu ti makai rumput. Sida enda ingatka Allah Taala ti udah ngelepaska sida ngena pengawa Iya ti besai di menua Ejip. Naka meh pemadas utai ti dikereja Iya dia! Naka meh penyelai utai ti nyadi ba Tasik Mirah! Lebuh Allah Taala madahka Diri deka ngerusak bala nembiak Iya, Moses, ulun ke dipilih Iya bediri nyakal Allah Taala lalu nagang pengeringat Iya ngerusak sida. Udah nya sida nulak menua ti manah nya, laban sida enda arapka semaya Allah Taala. Sida diau dalam langkau kain lalu mutap, lalu enggai mendingka TUHAN. Nya alai Iya lalu nangkan sida enggau jaku madahka Diri deka ngasuh sida mati di menua puang lalu ngachirka peturun sida ba sebelah bansa orang kapir, lalu nejuka sida mati di menua bukai. Udah nya, di Peor bala nembiak Allah Taala lalu enggau orang besembahka Baal lalu makai piring ti udah diberi ngagai petara ti ukai petara ti idup. Sida nyungkak TUHAN ringat ketegal utai ti dikereja sida. Penyakit ti balat lalu nyadi ba bala sida. Tang Pinehas angkat lalu ngukum orang ke udah salah, lalu penyakit nya enda agi ngerampit. Lalu ketegal nya Iya dikumbai lurus ari serak siti ngagai serak siti belama iya. Ba mata ai di Meribah, orang mayuh nyungkak TUHAN ringat, lalu ngenusahka Moses. Sida nyungkak Moses balat amat ringat datai ke nyau bejaku enda berunding. Sida enda ngasika jaku TUHAN ti ngasuh sida munuh orang kapir, tang jadi enggau orang bansa bukai lalu idup nitihka jalai orang kapir. Bala nembiak Allah Taala nyembah engkeramba, lalu tu ngujungka sida dirusak. Sida nyerahka anak lelaki enggau anak indu sida nyadika piring ngagai engkeramba orang Kanaan. Sida munuh anak mit ti nadai penyalah, lalu ngamahka menua laban sida bebunuhka anak mit nya. Sida ngaga diri enda tuchi ketegal utai ti dikereja sida sereta enda tetap ati ngagai Allah Taala. Nya alai TUHAN ringat ngagai bala nembiak Iya. Iya nyau kejika sida. Iya nyerahka sida ngagai jari orang kapir, lalu munsuh sida merintah sida. Sida ditekanka bala munsuh sida, lalu sida nunduk ngagai munsuh sida. TUHAN suah udah ngelepaska bala nembiak Iya, tang sida rindu agi angkat ngelaban Iya lalu dosa sida nambah-menambah. Tang taja pia, TUHAN ninga sida lebuh sida nyabak, lalu Iya ibuhka penusah sida. Ketegal sida, Iya ingatka sempekat Iya, lalu ketegal pemesai pengerindu Iya, Iya kasihka sida. Iya ngasuh semua orang ke nekanka sida sinu ati ke sida. Lepaska kami, O TUHAN Allah Taala kami, lalu bai kami pulai ari semua bansa, ngambika kami meri terima kasih lalu muji nama Nuan ti kudus. Puji meh TUHAN Allah Taala ke disembah orang Israel. Puji meh Iya diatu enggau ke belama iya! Awakka semua orang nyebut, “Amin!” Puji TUHAN! “Beri terima kasih ngagai TUHAN, laban Iya endang badas. Pengerindu Iya meruan belama iya!” Sebut semua leka jaku tu betandu-tandu kena muji TUHAN, semua kita ke udah dilepaska Iya ari penusah kita. Lalu udah mai kita pulai baru ari menua bukai, ari timur enggau ari barat, ari utara enggau ari selatan. Sekeda bejalai segau-segau ba sebelah menua puang nadai tetemuka batang jalai ngagai nengeri ti deka alai sida diau. Sida lapar sereta aus lalu nadai ngadang diri ulih idup. Udah nya lebuh sida kena laban penusah lalu ngangauka TUHAN, Iya ngelepaska sida ari penusah sida. Iya nguluka sida nengah jalai ti rurus ngagai nengeri ti deka alai sida diau. Awakka sida meri terima kasih ngagai TUHAN ketegal pengerindu Iya ti meruan belama iya, ketegal utai ti badas ti udah dikereja Iya ke sida. Sida ke aus diberi Iya ai lalu sida ke lapar dikenyangka Iya ngena utai ti manah. Sekeda sida diau dalam pemetang, orang jil ke merinsa ditanchang ngena rantai, laban sida udah angkat ngelaban pesan Allah Taala ti Pemadu Bekuasa lalu udah nulak ajar Iya. Sida nyau lembut tulang laban bebendar gawa. Sida rebah, lalu nadai orang nulung. Udah nya lebuh sida kena laban penusah, sida ngangauka TUHAN, lalu Iya ngelepaska sida ari penusah sida. Iya mai sida pansut ari pemetang nya lalu mutuska rantai ti nanchang sida. Sida enda tau enda meri terima kasih ngagai TUHAN ketegal pengerindu Iya ti meruan belama iya, ketegal utai ti badas ti udah dikereja Iya ke sida. Iya ngeruntuhka pintu ti digaga ari temaga lalu matahka alang besi. Sekeda sida beli, natka pemerinsa ketegal dosa sida enggau ketegal penyai sida. Sida nyau deka mutah meda pemakai lalu nyau deka mati. Udah nya lebuh sida kena laban penusah, sida ngangauka TUHAN, lalu Iya ngelepaska sida ari penusah sida. Iya ngeraika sida ngena jaku Iya lalu ngelepaska sida ari kubur. Awakka sida meri terima kasih ngagai TUHAN ketegal pengerindu Iya ti meruan belama iya, ketegal utai ti badas ti udah dikereja Iya ke sida. Awakka sida meri piring terima kasih ngagai Iya, lalu enggau lagu gaga ati, nusui semua utai ti udah dikereja Iya. Sekeda sida belayar ngena kapal ba Tasik Tengah, ngulihka pengidup di tasik. Sida meda utai ti ulih dikereja TUHAN, meda kereja badas ti dikereja Iya di tasik. Iya bejaku, lalu ribut biaubalai muput lalu ngasuh gelumbang nyadi. Kapal terangkat tinggi disaguka gelumbang lalu terensam ke dalam ai; bala kelasi lalu takut ditempuh utai ti baka nya. Sida tesangkut sereta guir-guir baka orang ke mabuk, lalu nadai daya agi. Udah nya lebuh sida kena laban penusah, sida ngangauka TUHAN, lalu Iya ngelepaska sida ari penusah sida. Iya ngasuh biaubalai teduh lalu gelumbang pen badu agi besegum. Sida gaga ati laban biaubalai nyau nadai agi, lalu Iya mai sida enggau likun ngagai pengkalan ti digusung sida. Awakka sida meri terima kasih ngagai TUHAN ketegal pengerindu Iya ti meruan belama iya, ketegal utai ti badas ti udah dikereja Iya ke sida. Awakka sida ngemesaika Iya lebuh orang mayuh begempuru lalu muji Iya di mua bala tuai. TUHAN udah ngasuh sungai rangkai lalu ngasuh mata ai badu agi mansutka ai. Iya ngasuh tanah ti ami nyadi tanah ti masin sereta kusi ketegal penyai orang ke diau dia. Iya ngubah menua puang nyadi letung, lalu tanah ti rangkai nyadi mata ai. Iya ngasuh orang ke lapar diau dia, lalu sida ngaga sebuah nengeri alai diau. Sida nanam utai ba umai, lalu nanam anggur lalu bulih amat ngetau. Iya merekatka bala nembiak Iya, lalu sida mayuh anak, lalu Iya ngasuh jelu sida mayuh anak. Lebuh bala nembiak Allah Taala alah, lalu dikemaruhka ketegal sida ditekan sereta diperinsa, lalu tusah ati, Iya ngeleseka orang ke nekanka sida lalu ngasuh sida bejalai segau-segau ba sebelah menua puang ti nadai meruan batang jalai. Tang Iya ngelepaska orang ke suntuk ari pemerinsa sida lalu ngasuh ruang bilik sida nambah-menambah baka raban jelu bedus. Orang ke lurus meda nya, lalu sida gaga ati, tang semua orang ke jai nadai agi bemunyi. Awakka orang ke bepenemu-dalam berundingka utai tu. Awakka sida berundingka pengerindu TUHAN ti meruan belama iya. Ati aku endang tetap, O Allah Taala! Ati aku endang amat tetap! Aku deka belagu muji Nuan! Dani meh nuan, O semengat aku! Dani meh kita, O belikan enggau engkeratung aku! Aku deka ngerak mata hari. Aku deka meri terima kasih ngagai Nuan, O TUHAN, di mua semua bansa. Aku deka muji Nuan di mua semua mensia. Pengerindu Nuan ti meruan belama iya endang ngelui serega. Penetap ati Nuan nyentuk ke langit. Pandangka pemesai kuasa Nuan di langit, O Allah Taala, enggau mulia Nuan di serata dunya. Selamatka kami ngena pengering Nuan. Saut meh sampi aku, ngambika orang ke dikerinduka Nuan, dilepaska. Ku Allah Taala bejaku ari endur Iya ti kudus, “Enggau ati ti gaga, Aku deka magi menua Sekem lalu meri Lebak Sukot ngagai bala nembiak Aku. Menua Giliat endang enggi Aku. Manasi mega enggi Aku. Epraim nya selapuk kebal Aku lalu Judah nya tungkat diraja Aku. Tang Aku deka ngena Moap nyadika dulang alai Aku bebasu, lalu Aku deka nikauka kasut Aku ngagai Edom, nyadika tanda Aku bempu menua nya. Aku deka manjung gaga ati menang ngelaban orang Pilistin.” O Allah Taala, sapa deka mai aku ngagai nengeri ti bekuta nya? Sapa deka nguluka aku ngagai Edom? Kati Nuan amat udah nulak kami? Kati Nuan enggai bejalai enggau bala soldadu kami? Tulung meh kami ngelaban munsuh. Tulung ari mensia sigi nadai guna. Enti Allah Taala setanah enggau kitai, kitai deka menang. Iya deka ngalahka bala munsuh kitai. Aku muji Nuan, O Allah Taala. Anang Nuan enda bemunyi! Orang ke jai enggau orang ke bula, nyerang aku. Sida betenahka aku, bejaku jai pasal aku, lalu nyerang aku enggau nadai kebuah. Sida ngelaban aku, taja pen aku rinduka sida lalu udah besampika sida. Sida malas pemanah aku ngena penyai, lalu malas pengerindu aku ngena pemenchi. Pilih sekeda hakim ti jai ngelaban iya, lalu awakka siku orang bedawaka iya. Lebuh iya kena pechara, awakka iya ditemu udah ngereja penyalah, datai ke sampi iya dikumbai dosa! Awakka iya pandak umur; awakka orang bukai ngambi pengawa iya! Awakka bala anak iya nadai apai, lalu bini iya balu! Awakka bala anak iya bejalai segau-segau bepintaka utai; Awakka sida diburu ari tembawai ti alai sida diau! Awakka orang ke udah nyali iya utai, ngerampas semua reta tengkira iya; lalu awakka orang kampar ngenchuri semua utai ti udah ulih iya bekereja. Awakka nadai orang deka nelap enggau iya tauka kasihka bala anak iya ke tinggal nadai apai. Awakka semua peturun iya mati magang, lalu awakka nama iya enda dikingatka agi ba peturun ti nangkanka iya. Awakka TUHAN ngingatka penyai aki ini iya, lalu awakka dosa indai iya enda diampun. Awakka TUHAN seruran ingatka dosa sida, lalu awakka sida enda dikingatka agi! Laban iya nadai kala berunding siru enggau orang, tang merinsaka orang ke seranta enggau ke suntuk utai lalu merinsaka orang ke tusah datai ke sida mati. Iya rindu nyumpah; awakka iya empu ditinggang sumpah! Iya enggai merekatka orang; awakka iya empu nadai bulih berekat! Iya ngerasukka tebiat nyumpah; awakka sumpah iya tama ke dalam tubuh iya empu baka ai, baka minyak, ti dalam tulang iya! Awakka sumpah nya nyerayung iya baka kain baka belulang ti melit punggung iya! Awakka tu nyadika upah ti diberi TUHAN ngagai orang ke bedawaka aku, orang ke bejaku jai ngelaban aku! Tang Nuan, O Allah Taala ti TUHAN aku, tulung meh aku ketegal nama Nuan; laban pengerindu Nuan ti meruan belama iya endang amat manah, lepaska meh aku tu. Laban aku tu seranta sereta suntuk, lalu ati aku amat tusah. Aku nyau deka lesap baka ayuk lebuh lemai hari. Aku dikebuka baka buntak. Patung aku lemi ketegal aku bepasa; lalu tubuh aku nyau kurus. Aku tu diketawaka orang ke bedawaka aku; lebuh sida meda aku sida ngilikka pala. Tulung meh aku, O TUHAN Allah Taala aku. Selamatka aku ketegal pengerindu Nuan ti meruan belama iya! Asuh bala munsuh aku nemu Nuan udah ngelepaska aku. Sida nyangka deka nyumpah aku, tang Nuan deka merekatka aku. Awakka sida malu, lalu awakka aku ke nembiak Nuan, gaga ati. Awakka bala orang ke bedawaka aku malu. Awakka sida nyerayung diri ngena pemalu nyadika baju panjai sida. Aku deka meri terima kasih ngagai TUHAN enggau nyawa ti inggar. Aku deka muji Iya lebuh orang begempuru bebala mayuh, laban Iya ngeringka orang ke seranta lalu ngelepaska sida ari orang ke ngeletak sida diukum dibunuh. Ku TUHAN bejaku ngagai tuan aku, “Duduk ditu muak ari kanan Aku datai ke Aku udah ngaga munsuh nuan nyadika pelasar kaki nuan.” TUHAN deka ngerembaika kuasa diraja nuan ari Sion. Ku Iya bejaku, “Perintah bala munsuh nuan!” Bala nembiak nuan deka datai mantu nuan ba hari nuan deka nguluka bala nuan ba bukit ti kudus. Bala nembiak nuan deka datai ngagai nuan baka ambun pagi hari. TUHAN udah besemaya ngena sumpah lalu Iya enda matak semaya Diri: “Nuan tu imam belama iya murihka Imam Melkisedek.” TUHAN bisi ari kanan nuan. Lebuh Iya ringat, Iya deka ngalahka semua raja. Iya deka ngakim semua bansa lalu ngisi semua bansa nya enggau bangkai; Iya deka ngalahka semua raja di serata dunya. Iya deka ngirup ari sungai ti ngimbai jalai raya, lalu lebuh iya udah berasai kering agi, iya deka menang. Puji TUHAN! Aku deka meri terima kasih ngagai TUHAN enggau pengabis ati aku lebuh nembiak Iya begempuru bebala mayuh. Naka meh pemadas pengawa TUHAN, ti deka dipelajarka semua orang ke gagit ati ke utai nya. Semua utai ti dikereja Iya penuh laban basa enggau puji, lalu pengelurus Iya meruan belama iya. Iya udah ngasuh pengawa Iya ti badas dikingatka; TUHAN endang nelap sereta kasih. Iya meri pemakai ngagai orang ke nangika Iya. Iya endang seruran ingatka sempekat Iya. Iya udah mandangka kuasa pengawa Iya ngagai bala nembiak Iya lebuh Iya meri menua orang bansa bukai ngagai sida. Dalam semua utai ti dikereja Iya, Iya endang tetap ati sereta lurus. Semua pesan Iya endang tau dikarapka magang. Pesan Iya meruan belama iya; Iya ngeletak pesan nya enggau ati ti tetap sereta enggau pengelurus. Iya udah nebus bala nembiak Iya lalu udah ngaga siti sempekat ti meruan belama iya enggau sida. Iya endang kudus sereta bekuasa! Nangika TUHAN nya pun penemu-dalam. Semua orang ke ngena penemu-dalam sigi amat nemu meretika utai. Awakka TUHAN dipuji belama iya. Puji TUHAN! Beberekat meh orang ke nangika TUHAN, ke gaga ati ngasika pesan Iya. Bala peturun iya deka nyadi orang ke bekuasa dalam menua tu. Peturun iya deka bulih berekat. Ruang bilik iya deka bulih pengaya, lalu pengelurus iya deka meruan belama iya. Penampak manchar ba endur ti petang ke orang ke badas, ke orang ke nemu kasih, nelap, sereta lurus ati. Lantang meh orang ke gerah ati nyali utai ngagai orang, ke bejalaika pengawa iya enggau atur ti lurus. Laban orang ke lurus nadai kala lebu. Iya deka dikingatka belama iya. Iya enda takut nerima berita ti enda manah. Ati iya tegap, lalu iya manggaika pengarap iya ba TUHAN. Iya enda irau ati tauka takut, datai ke meda munsuh iya alah. Iya meri utai enggau ati ti gerah mudah ngagai orang ke suntuk, lalu penelap iya nadai kala puntan. Iya deka nyadi orang ke bekuasa sereta dibasa orang. Orang ke jai meda nya, lalu ringat. Ngeli sida kerik-kerik, lalu sida lesap. Pengadang sida lenyau belama iya. Puji TUHAN! Kita ke nembiak TUHAN, puji meh nama Iya! Puji meh nama TUHAN kenyau ari diatu datai ke belama iya. Ari timur nyentuk ke barat puji meh nama TUHAN! TUHAN merintah semua bansa, mulia Iya tinggi agi ari langit. Nadai orang sebaka enggau TUHAN Allah Taala kitai. Iya diau ba endur ti tinggi di atas, tang Iya nilik ke baruh deka meda langit enggau dunya. Iya ngasuh orang ke seranta diau lantang. Iya ngelepaska orang ke suntuk ari pemerinsa sida lalu ngasuh sida duduk begulai enggau bala raja, bala raja ke megai nembiak Iya. Iya meri rumah ngagai indu ke balu, lalu ngasuh iya gaga ati mayuh anak. Puji TUHAN! Lebuh orang Israel pansut ari menua Ejip, lebuh bala peturun Jakop angkat ari menua nya, Judah nyadi nembiak TUHAN ti kudus, lalu Israel nyadi pesaka Iya. Tasik Mirah malik lalu rari. Sungai Jordan lalu ngetu rarat. Bukit engkejuk baka kambin. Munggu merejuk baka anak bedus. Nama kebuah nuan rari, Tasik? Lalu nuan, Jordan, nama kebuah nuan ngetu rarat? Bukit, nama kebuah kita engkejuk baka kambin? Munggu, nama kebuah kita merejuk baka anak bedus? Begetar meh nuan dunya, lebuh TUHAN datai, di mua Allah Taala Jakop, ke ngubah batu galang nyadi letung lalu ngubah tingkah batu nyadi mata ai. Ukai kami, O TUHAN, ukai kami, tang Nuan siku aja ke patut dipuji, laban pengerindu enggau penetap ati Nuan endang meruan belama iya! Nama kebuah semua bansa nanya, “Dini alai Allah Taala sida?” Allah Taala kami di serega. Iya ngereja sebarang utai ti dikedekaka Iya. Engkeramba sida digaga ari pirak enggau emas, ditempa jari mensia. Sida bisi lubang nyawa, tang enda nemu bejaku, bisi mata, tang enda ulih meda. Sida bisi pending, tang enda ulih ninga, bisi idung, tang enda ulih nyium utai. Sida bisi jari, tang enda ulih ngama utai, bisi kaki, tang enda ulih bejalai. Sida enda ulih bemunyi. Awakka semua orang ke nempa sereta manggaika pengarap sida ba engkeramba nya nyadi baka engkeramba ti udah ditempa sida. Panggaika pengarap kita ba TUHAN, kita orang Israel. Iya nulung sereta nyaga kita. Panggaika pengarap kita ba TUHAN, kita imam Allah Taala. Iya nulung sereta nyaga kita. Panggaika pengarap kita ba TUHAN, semua kita ke nangika Iya. Iya nulung sereta nyaga kita. TUHAN ingatka kitai, lalu deka merekatka kitai. Iya deka merekatka orang Israel enggau semua imam Allah Taala. Iya deka merekatka genap iku orang ke nangika Iya, ke besai enggau ke mit. Awakka TUHAN meri mayuh anak ngagai kita enggau ngagai peturun kita! Awakka kita diberekatka TUHAN ti udah ngaga langit enggau dunya! Serega endang enggi TUHAN siku aja, tang Iya meri dunya ngagai kitai mensia. Orang ke mati enda muji TUHAN, lalu orang ke udah nurun ngagai dunya ti sunyi, enda mega muji TUHAN. Tang kitai ke idup, deka muji TUHAN kenyau ari diatu datai ke belama iya. Puji TUHAN! Aku rinduka TUHAN, laban Iya udah ninga aku, enggau sampi aku. Laban Iya nyingitka pending Iya ngagai aku nya alai aku deka ngangau seagi aku idup. Kuasa pemati bekelingika aku. Penakut aku ke pendam nyau malut aku. Aku takut sereta irau. Aku lalu ngangauka nama TUHAN, “O TUHAN, aku minta Nuan ngidupka nyawa aku!” TUHAN kasih sereta badas. Allah Taala kitai endang kasih. TUHAN nyaga orang ke nadai daya. Lebuh aku dituntung penusah, Iya nyelamatka aku. Pulai meh nuan, O semengat aku, ngagai endur alai nuan belelak; laban TUHAN udah manah enggau nuan. Laban TUHAN udah ngelepaska aku ari pemati, nagang ai mata aku pansut nagang aku teterap. Nya alai aku bejalai di mua TUHAN di dunya orang ke idup. Aku majak arap, taja pen aku nyebut, “Aku balat kena perinsa.” Ati aku iran, lalu aku nyebut, “Nadai siku orang tau dikarapka.” Nama utai ti tau diberi aku ngagai TUHAN kena malas semua pemanah Iya enggau aku? Aku deka mai piring wain lalu ngangauka nama TUHAN; Aku deka mayar semaya aku ngagai TUHAN di mua semua bala nembiak Iya. Naka meh penyayau TUHAN ke nembiak Iya ke mati! O TUHAN, aku tu nembiak Nuan; Aku tu nembiak Nuan; anak ulun Nuan. Nuan udah muka tali ti dikena nanchang aku. Aku deka meri ngagai Nuan piring terima kasih lalu ngangauka nama TUHAN. Aku deka mayar semaya aku ngagai TUHAN di mua semua nembiak Iya, dalam kot ti dalam Rumah Sembiang TUHAN, ba tengah-tengah nuan, O Jerusalem. Puji TUHAN! Puji meh TUHAN, O kita semua bansa! Puji meh Iya, semua kita mensia! Laban pengerindu Iya ke kitai endang besai sereta meruan belama iya, lalu penetap ati TUHAN endang meruan belama iya. Puji TUHAN! Beri meh terima kasih ngagai TUHAN, laban Iya endang badas; pengerindu Iya meruan belama iya. Awakka orang Israel nyebut, “Pengerindu Iya endang meruan belama iya.” Awakka ruang bilik imam Aron nyebut, “Pengerindu Iya endang meruan belama iya.” Awakka semua orang ke nangika TUHAN nyebut, “Pengerindu Iya endang meruan belama iya.” Lebuh aku tusah, aku ngangauka TUHAN; TUHAN nyaut aku lalu ngelepaska aku. Aku enda takut laban TUHAN bisi ngimbai aku. Nama utai ti ulih dikereja orang ngagai aku? TUHAN ngimbai aku lalu nulung aku; aku deka menang lalu malik ngagai bala munsuh ke begedika aku. Manah agi belindung ba TUHAN ari ke manggaika diri ba mensia. Manah agi belindung ba TUHAN ari ke manggaika diri ba bala tuai mensia. Semua bansa bekelingika aku; tang aku ngerusak sida laban TUHAN nulung aku! Sida ngelulung aku; tang aku ngerusak sida laban TUHAN nulung aku! Sida betatam ngelingi aku baka indu manyi, tang sida angus, ngenyampat babas ti diempa api. Aku ngerusak sida laban TUHAN nulung aku! Aku balat amat diserang sida lalu aku nyau deka alah tang TUHAN nulung aku. TUHAN nyadika pengering enggau lagu aku; Iya udah nyelamatka aku. Pendingka bala nembiak Allah Taala manjung gaga ati dalam langkau kain sida laban sida udah menang: “Jari kanan TUHAN ti udah menang! Jari kanan TUHAN ti patut dipuji, Jari kanan TUHAN udah menang!” Aku enda mati, tang deka idup lalu nusui pasal utai ti udah dikereja TUHAN. TUHAN udah balat amat ngukum aku, tang Iya enda nejuka aku mati. Buka meh pintu Rumah Sembiang ke aku, ngambika aku ulih tama nengah pintu nya lalu meri terima kasih ngagai TUHAN! Tu pintu TUHAN. Orang ke lurus deka tama nengah pintu nya. Aku meri terima kasih ngagai Nuan, O TUHAN, laban Nuan udah nyaut aku, lalu nyelamatka aku. Batu ti enda diguna tukang rumah udah nyadi batu ti pemadu beguna. Utai tu udah dikereja TUHAN; Utai nya manah gaya dipeda kitai! Tu meh hari ti udah digaga TUHAN; aram kitai rami gaga lalu ngelantangka diri ba hari tu. Lepaska kami, O TUHAN, Lepaska kami! Asuh kami mujur, O TUHAN! Beberekat meh iya ke datai dalam nama TUHAN! Kami muji nuan ari Rumah TUHAN. TUHAN endang Allah Taala, lalu Iya udah meri kitai penampak. Bai dan kayu ba jari kita, lalu belabuh begawai bejalai ngelingi alta. Nuan endang Allah Taala aku, lalu aku deka meri terima kasih ngagai Nuan. Nuan endang Allah Taala aku, Aku deka ngemesaika Nuan. Beri terima kasih ngagai TUHAN, laban Iya endang badas, laban pengerindu Iya endang meruan belama iya. Beberekat meh orang ke nadai ngereja penyalah, ke ngasika adat TUHAN. Beberekat meh orang ke nitihka adat TUHAN, ke ngiga Iya enggau pengabis ati sida. Sida nadai kala ngereja penyalah, tang nitihka TUHAN. Nuan, O TUHAN, udah meri ngagai kami adat Nuan lalu udah ngasuh kami tetap ati ngasika adat nya. Aku ngarapka diri ulih tetap ati nitihka semua atur Nuan! Nya baru aku enda malu, laban aku meratika semua pesan Nuan. Aku deka muji Nuan enggau ati ti tuchi, lebuh aku belajarka adat Nuan ti lurus. Aku deka ngasika adat Nuan. Anang ninggalka aku! Baka ni ku orang ke biak ulih ngintu pendiau diri tuchi? Ari sida ke ngasika pesan Nuan. Aku deka ngiga Nuan enggau pengabis ati aku; anang nejuka aku limpang ari pesan Nuan. Aku udah nyimpan adat Nuan dalam ati aku, ngambika aku enda bedosa ngelaban Nuan. Aku muji Nuan, O TUHAN. Ajar meh aku jalai Nuan. Aku deka madahka semua adat ti udah diberi Nuan. Aku gaga ati nitihka adat Nuan, lebih agi ari ke gaga ati ngembuan mayuh reta. Aku belematika atur Nuan, lalu meratika ajar Nuan. Aku gaga ati ke adat Nuan. Aku deka seruran ingatka pesan Nuan. Awakka Nuan meri aku ke nembiak Nuan mayuh utai, ngambika aku ulih idup lalu ngasika ajar Nuan. Buka meh mata aku, ngambika aku ulih meda utai ti badas dalam adat Nuan. Aku enda diau lama di dunya tu; anang ngelalaika pesan Nuan ari aku. Ati aku balat lelengau ke atur Nuan berari. Nuan nganu orang ke sumbung, ke kena sumpah, ke limpang ari pesan Nuan. Buai ari aku jaku pechat enggau jaku kelese sida, laban aku udah ngasika adat Nuan. Taja pen bala raja bepekat ngelaban aku, tang aku deka belematika ajar Nuan. Adat Nuan ngasuh ati aku gaga. Adat Nuan nyadika penyanding penemu aku. Aku alah lalu garing-garing malai amau. Idupka aku baru, munyi ti udah disemaya Nuan. Lebuh aku madahka semua utai ti udah dikereja aku, Nuan udah nyaut aku. Ajar meh aku jalai Nuan. Asuh aku meretika adat Nuan, lalu aku deka belematika pengawa Nuan ti badas. Aku enda ulih natka ati diri ti tusah. Keringka aku, munyi ti udah disemaya Nuan. Kejangka aku jauh ari pendiau ti salah, lalu ulih pengasih Nuan, ajar aku adat Nuan. Aku udah mutuska runding deka tetap ati ngagai Nuan. Aku udah mendingka atur Nuan. Aku bepegai ba adat Nuan, O TUHAN. Anang nejuka orang ngemaluka aku. Aku deka nitihka pesan Nuan lebuh Nuan ngasuh aku lebih agi mereti. Ajar meh aku, O TUHAN, reti adat Nuan, lalu aku deka ngasika adat nya datai ke ujung. Asuh aku mereti, ngambika aku ngasika adat Nuan lalu nitihka iya enggau pengabis ati aku. Iring aku nitihka pesan Nuan, laban aku rinduka iya. Asuh ati aku inginka adat Nuan, ukai inginka pengaya. Anang ngasuh mata aku merening ngagai utai ti ngasuh aku sumbung; lalu awakka aku idup nitihka jalai Nuan. Kingatka semaya Nuan enggau aku ke nembiak Nuan, semaya ti digaga Nuan enggau orang ke ngasika Nuan. Kejangka aku jauh ari jaku anu ti diketakutka aku; laban adat Nuan endang manah. Aku lelengauka pesan Nuan; laban pengelurus Nuan meri aku pengidup. pandangka pemesai pengerindu Nuan ke aku, O TUHAN, lalu selamatka aku, munyi ti udah disemaya Nuan; nya baru aku ulih nyaut orang ke ngeleseka aku laban aku manggaika diri ba jaku Nuan. Lalu anang nagang aku nyebut jaku ti bendar, laban aku andal ati ke adat Nuan. Aku deka seruran ngasika adat Nuan, belama lama iya; lalu aku deka dilepaska laban aku udah ngiga ajar Nuan. Aku deka mega bejakuka pasal adat Nuan ngagai bala raja lalu aku enda malu; laban aku gaga ati ke pesan Nuan ti dikerinduka aku. Aku bebasaka pesan Nuan ti dikerinduka aku, lalu aku deka belematika ajar Nuan. Kingatka semaya Nuan enggau aku ke nembiak Nuan, ti ngasuh ati aku andal. Tu meh utai ti ngenyamaika ati aku lebuh aku natka diri merinsa, iya nya, semaya Nuan deka meri aku pengidup. Orang ke enda nangika Allah Taala ngeleseka aku, tang aku enggai limpang ari adat Nuan. Lebuh aku berundingka adat ti diberi Nuan dulu kelia, ati aku lantang, O TUHAN. Aku balat pedis ati lebuh aku meda orang ke jai ngelengkaka adat Nuan. Adat Nuan nyadika lagu aku sekumbang aku ke idup enda lama di dunya tu. Lebuh malam hari aku ngingatka nama Nuan, O TUHAN, lalu ngasika adat Nuan. Berekat tu udah datai ba aku, ngambika aku ngasika ajar Nuan. Semina Nuan siku aja ke dikinginka aku, O TUHAN. Aku besemaya deka ngasika jaku Nuan. Enggau pengabis ati aku, aku minta Nuan kasihka aku munyi ti udah disemaya Nuan! Aku udah berundingka pasal perangai aku, lalu aku besemaya deka nitihka adat Nuan. Aku enda betangguh tang beguai-guai ngasika pesan Nuan. Orang ke jai udah nan panjuk kena nyintak aku, tang aku seruran ingatka adat Nuan. Aku dani tengah malam lalu muji Nuan ketegal pengelurus atur Nuan. Aku tu pangan semua orang ke nangika Nuan, semua orang ke ngasika adat Nuan. TUHAN, dunya tu penuh laban pengerindu Nuan ti meruan belama iya. Ajar aku pesan Nuan. Nuan udah ngamatka semaya Nuan, TUHAN, lalu Nuan udah manah enggau aku ke nembiak Nuan. Beri aku penemu enggau runding ti tajam laban aku arapka pesan Nuan. Sebedau Nuan ngukum aku suba, aku suah udah salah, tang diatu aku ngasika jaku Nuan. Nuan endang badas lalu ngereja utai ti badas; Ajar aku adat Nuan. Orang ke enda nangika Allah Taala bejaku bula pasal aku, tang aku ngasika atur Nuan enggau pengabis ati aku. Sida enda mereti, tang aku gaga ati ke adat Nuan. Aku untung natka diri kena perinsa, ngambika aku nemu belajarka adat Nuan. Adat ti udah diberi Nuan besai agi reti ba aku ari semua duit emas enggau semua duit pirak di dunya tu. Nuan udah ngaga enggau nempa aku; Asuh aku mereti, ngambika aku ulih belajarka adat Nuan. Orang ke nangika Nuan deka meda aku lalu rami gaga, laban aku andal ati ke semaya Nuan. Aku nemu atur Nuan endang lurus, O TUHAN, lalu Nuan udah ngukum aku laban Nuan endang tetap ati. Awakka pengerindu Nuan ti meruan belama iya, merindang ati aku, munyi ti udah disemaya Nuan ngagai aku ke nembiak Nuan. Kasihka aku, ngambika aku idup laban aku gaga ati ke adat Nuan. Awakka orang ke enda nangika Allah Taala malu, laban sida udah nguji nipu aku; tang aku deka belematika atur Nuan. Awakka orang ke nangika Nuan datai ngagai aku, ngambika sida nemu adat Nuan. Awakka aku bebasaka adat Nuan ngambika aku enda malu. TUHAN, aku nyau lelak nganti Nuan ngelepaska aku. Aku manggaika diri ba jaku Nuan. Mata aku nyau lelak nganti utai ti disemaya Nuan, lalu aku nanya, “Kemaya Nuan deka merindang aku?” Laban aku tu nadai guna baka kambut wain ti udah dibuai, tang aku nadai kala enda ingatka adat Nuan. Ni pengelama aku agi nganti? Kemaya Nuan deka ngakim orang ke merinsaka aku? Orang ke enda nangika Allah Taala, ti enda ngasika adat Nuan, udah numbak lubang kena sida nangkap aku. Semua pesan Nuan endang tau dikarapka magang. Orang merinsaka aku ngena pemula - tulung aku! Sida nyau deka ulih munuh aku, tang aku nadai kala ngelengkaka pesan Nuan. Ulih pengerindu Nuan ti meruan belama iya, anang munuh aku, ngambika aku ulih ngasika adat Nuan. Jaku Nuan, O TUHAN, deka meruan belama iya. Iya meruan belama iya di serega. Penetap ati Nuan endang meruan belama iya; Nuan udah ngengkahka dunya ba endur iya, lalu iya enda nginsit. Semua utai mengkang meruan magang nyentuk ngagai sehari tu laban pesan Nuan, laban semua sida nya endang nembiak Nuan magang. Enti aku enda udah gaga ati ke adat Nuan, aku tentu udah mati laban pemerinsa aku. Aku enggai sekali-kali ngelengkaka atur Nuan, laban Nuan udah ngidupka nyawa aku ngena atur nya. Aku endang enggi Nuan - selamatka aku; laban aku udah ngiga ajar Nuan. Orang ke jai ngipa aku, deka munuh aku, tang aku deka belematika adat Nuan. Aku nemu, semua utai endang bisi sekat magang, tang pesan Nuan amat luas. Aku rinduka adat Nuan! Aku belematika iya sepemanjai hari. Pesan Nuan ngasuh aku pintar agi ari bala munsuh aku, laban pesan Nuan endang seruran enggau aku. Aku mereti agi ke utai ari semua pengajar aku, laban aku belematika ajar Nuan. Aku meretika mayuh agi utai ari sida ke tuai umur, laban aku ngasika ajar Nuan. Aku udah nyeliahka semua ulah ti jai, ngambika aku ulih ngasika jaku Nuan. Aku nadai kala limpang ari adat Nuan laban Nuan Empu udah ngajar aku. Naka meh pemanis ajar Nuan, manis agi ari ai manyi dalam mulut aku! Aku bulih penemu-dalam ari ajar Nuan, nya alai aku begedika semua perangai ti jai. Leka jaku Nuan nyadika lampu tenggau aku nyadika tenggau jalai aku. Aku udah besumpah lalu udah ngamatka sumpah deka ngasika adat Nuan ti lurus. Aku balat merinsa; beri aku pengidup, O TUHAN, nitihka semaya nuan. Sambut meh sampi puji aku, O TUHAN, lalu ajar aku adat Nuan. Aku berambunka nyawa diri, tang aku nadai kala enda ingatka adat Nuan. Orang ke jai deka manjuk aku, tang aku nadai kala limpang ari ajar Nuan. Adat Nuan endang nyadika pesaka aku belama iya; sigi amat, sida nyungkak ati aku gaga. Aku mutuska runding deka ngasika adat Nuan belama iya datai ke ujung. Aku begedika orang ke aum-juak, tang aku rinduka adat Nuan. Nuan meh penyaga enggau pengelindung aku. Aku manggaika pengandal ati aku ba semaya Nuan. Rari ari aku, kita ke ngereja penyai, ngambika aku ngereja utai ti dipesanka Allah Taala aku. Beri aku pengering, munyi ti udah disemaya Nuan, ngambika aku idup, lalu anang nejuka aku asa ngapa ke pengadang aku! Pegai aku, ngambika aku likun lalu seruran meratika adat Nuan. Nuan nulak semua orang ke limpang ari adat Nuan; sigi amat, kelakar sida endang nadai guna. Nuan nulak semua orang ke jai baka uras; Nya kebuah aku rinduka adat Nuan. Tubuh aku getar-getar laban aku nangika Nuan, lalu aku takutka ukum Nuan. Aku udah ngereja utai ti lurus sereta ngena; anang ninggalka aku ba jari orang ke nekanka aku! Aku minta Nuan besemayaka nulung nembiak Nuan tu. Anang nejuka orang ke enda nangika Allah Taala nekanka aku! Mata aku nyau rapa nganti pengelepas ari Nuan, nganti Nuan ngamatka semaya Nuan. Ibun meh aku nitihka pengerindu Nuan ti meruan belama iya, lalu ajar aku adat Nuan. Aku tu nembiak Nuan; asuh aku mereti, ngambika aku nemu adat Nuan. TUHAN, tu meh maya Nuan patut ngereja utai, laban mensia udah ngelanggar adat Nuan. Aku rinduka pesan Nuan, lebih agi ari emas, lebih agi ari emas ti pemadu tulin. Nya alai aku nitihka semua ajar Nuan. Aku begedika semua jalai ti salah. Adat Nuan endang manah; nya alai aku deka ngasika adat Nuan. Lebuh jaku Nuan diterangka, iya meri penerang; iya meri penemu ngagai orang ke enda nemu utai. Mulut aku rangap-rangap lalu aku sengah-sengah lelengauka pesan Nuan. Kuingka Diri ngagai aku, lalu kasihka aku baka Nuan ke kasihka semua orang ke rinduka Nuan. Tegapka singkang aku munyi ti udah disemaya Nuan, lalu anang nejuka penyai ngalahka aku. Tebus aku ari orang ke nekanka pengidup aku, ngambika aku ulih ngasika ajar Nuan. Awakka penampak mua Nuan manchar ngagai aku ke nembiak Nuan, lalu ajar aku adat Nuan. Ai mata aku nyau bekerenjui, laban mensia enda ngasika adat Nuan. Nuan endang lurus, TUHAN, lalu ukum ti diberi Nuan endang ngena. Adat ti udah diberi Nuan endang betul sereta ngena. Aku pedis ati, laban bala munsuh aku enda ingatka ajar Nuan. Semaya Nuan endang tau dikarapka lalu aku rinduka iya! Aku tu orang ke nadai guna sereta dikeleseka orang, tang aku enda ngelengkaka ajar Nuan. Pengelurus Nuan deka tan belama iya lalu adat Nuan endang amat. Ati aku balat tusah sereta irau, tang pesan Nuan ngasuh ati aku gaga. Adat Nuan endang lurus belama iya. Asuh aku mereti ngambika aku ulih idup. Aku ngangauka Nuan enggau pengabis ati aku; saut aku, O TUHAN! aku besemaya deka ngasika adat Nuan! Aku ngangauka Nuan; selamatka aku, ngambika aku ngasika adat Nuan. Sebedau tumbuh mata panas, aku ngangauka Nuan minta tulung. Aku manggaika pengandal ati aku ba semaya Nuan. Semalam-malam aku enda tinduk, belematika semaya Nuan. Nuan endang rinduka aku belama, nya alai dingaka aku, O TUHAN. Kasihka aku, lalu selamatka aku! Orang ke jai ti deka merinsaka aku, nyau deka datai semak ngagai aku. Sida nya orang ke ngelanggar adat Nuan. Tang Nuan endang semak aku, O TUHAN, lalu semua pesan Nuan endang amat magang. Aku lama udah nemu adat Nuan lalu Nuan ngaga adat Nuan meruan belama iya. Peda Nuan pemerinsa aku, lalu lepaska aku, laban aku nadai kala limpang ari adat Nuan. Bejaku meh Nuan ngarika aku, lalu tebus aku; Selamatka aku, nitihka semaya Nuan. Orang ke jai enda dilepaska, laban sida enda ngasika adat Nuan. Naka meh pemesai pengasih Nuan, O TUHAN; selamatka aku nitihka pengelurus atur Nuan. Aku mayuh munsuh lalu orang ke nekanka pengidup aku mega mayuh, tang aku nadai kala limpang ari adat Nuan. Lebuh aku merening ngagai orang ke aum-juak, ati aku pedis, laban sida enda nitihka pesan Nuan. Peda Nuan pemalat aku rinduka ajar Nuan. Selamatka aku, laban pengerindu Nuan endang meruan belama iya! Semua adat Nuan endang amat magang, lalu semua adat Nuan endang lurus sereta meruan belama iya. Orang ke bekuasa merinsaka aku enggau nadai kebuah, tang aku nangika jaku Nuan. Aku gaga ati ke semaya Nuan, baka ke tetemuka pengaya. Aku begedi sereta kejika semua pemula, tang aku rinduka adat Nuan. Tujuh kali aku muji Nuan dalam sehari ketegal pengelurus adat Nuan. Orang ke rinduka adat Nuan diau likun belama; nadai utai ulih ngasuh sida tesangkut. Aku nganti Nuan ngelepaska aku, O TUHAN, lalu aku ngereja utai ti dipesanka Nuan. Aku ngasika adat Nuan. Aku rinduka sida enggau pengabis ati aku. Aku ngasika ajar enggau adat Nuan, laban Nuan meda semua utai ti dikereja aku. Awakka sabak aku datai ba Nuan, O TUHAN; asuh aku mereti, munyi ti udah disemaya Nuan. Pendingka sampi aku, lalu selamatka aku, munyi ti udah disemaya Nuan! Aku deka muji Nuan berari, ngambika Nuan ngajar aku adat Nuan. Aku deka belagu muji jaku Nuan, laban semua pesan Nuan endang lurus magang. Awakka Nuan seruran sedia nulung aku, laban aku nitihka pesan Nuan. Aku lelengauka pengelepas ari Nuan, O TUHAN, lalu aku gaga ati ke adat Nuan. Awakka aku idup ngambika aku ulih muji Nuan, lalu awakka adat Nuan nulung aku. Aku udah limpang baka bedus ti tesat; giga meh nembiak Nuan, laban aku nadai kala enda ingatka adat Nuan. Lebuh aku dituntung penusah, aku ngangauka TUHAN, lalu Iya nyaut aku. Selamatka aku, O TUHAN, ari orang ke bula enggau ari orang ke nipu. Nama utai ti deka diberi ngagai kita? Lalu nama utai bukai ti deka dikereja Allah Taala ngagai kita, kita orang pengelakar? Panah ti tajam ti ditimbakka soldadu, enggau bara api ti chinang-chinang! Tulah meh aku tu, diau di Mesek, begulai enggau orang Kedar. Aku udah kelalu lama diau begulai enggau orang ke begedika pemaik! Aku rinduka pemaik; tang lebuh aku bejakuka pasal pemaik, sida bejakuka pasal deka beperang. Aku engkadah ngagai bukit - Ari ni penyaup aku deka datai? Penyaup aku deka datai ari TUHAN, ti udah ngaga langit enggau dunya. Iya enggai nejuka nuan rebah. Penyaga nuan deka seruran nyaga nuan. Iya ke nyaga orang Israel enda ngantuk tauka tinduk. TUHAN endang nyaga nuan berari; Iya ngimbai nuan lalu nyaga nuan. Mata panas enda ngemediska nuan lebuh siang hari, lalu bulan enda ngemediska nuan lebuh malam hari. TUHAN deka nyaga nuan ari semua utai ti jai; Iya deka ngibun nuan likun. TUHAN deka nyaga nuan lebuh nuan bejalai enggau pulai kenyau ari diatu nyentuk ngagai belama lama iya. Aku gaga ati lebuh sida bejaku enggau aku, “Aram kitai mansang ngagai rumah TUHAN.” Lalu diatu kitai bisi ditu, bediri ba mua pintu nengeri Jerusalem! Jerusalem udah digaga nyadi nengeri ti manah gaya sereta betul atur. Tu meh endur alai raban bansa datai, raban bansa orang Israel, meri terima kasih ngagai TUHAN. Tu meh endur alai sida raja orang Israel duduk ngakim bala nembiak sida. Besampi minta pemaik ke nengeri Jerusalem: “Awakka orang ke rinduka nuan, nyadi kaya-raja. Awakka pemaik seruran meruan dalam kandang dinding kuta nuan enggau pengelikun dalam menara nuan.” Aku deka bejaku ngarika kaban belayan enggau pangan aku munyi tu ngagai Jerusalem, “Awakka pemaik meruan dalam nuan!” Ketegal rumah TUHAN Allah Taala kami aku deka besampi minta nuan nyadi kaya-raja. TUHAN, aku engkadah ngagai Nuan, engkadah ngagai serega ti alai Nuan merintah. Baka ulun ke manggaika diri ba tuan iya, baka orang gaji ti indu, ke manggaika diri ba indu ke ngaji iya, baka nya meh aku deka majak merening ngagai Nuan, O TUHAN Allah Taala kami, datai ke Nuan nyau kasihka kami. Kasihka kami, O TUHAN, kasihka kami, laban kami udah kelalu balat dipechat. Kami udah kelalu lama diketawaka orang ke kaya lalu dipechat orang ke sumbung. Kati enti TUHAN enda udah setanah enggau kitai? Awakka orang Israel nyebut: “Enti TUHAN enda udah setanah enggau kitai lebuh orang nyerang kitai, sida tentu udah nelan kitai idup-idup lebuh sida ringat pedis ati ngagai kitai; nya baru ai bah nabanka kitai, lalu ngelamun kitai; lalu kitai lemas. Puji meh TUHAN ti udah nagang munsuh kitai ngerusak kitai. Kitai udah rari baka burung ti lepas ari panjuk; panjuk putus, lalu kitai rari! Penyaup kitai datai ari TUHAN ke ngaga langit enggau dunya. Orang ke manggaika pengarap sida ba TUHAN nya baka Bukit Sion, ti enda ulih dikinsitka, tang meruan dia belama iya. Baka bukit ti ngelingi Jerusalem, baka nya meh TUHAN ngelingi bala nembiak Iya, ke diatu enggau ke belama iya. Laban orang ke jai enda merintah menua orang ke lurus, enggai ke orang ke lurus ngereja penyalah. TUHAN, kereja utai ti manah ngagai orang ke manah, ngagai orang ke lurus. Tang orang ke limpang lalu niti jalai sida ke jai deka diukum TUHAN sama enggau orang ke ngereja penyai! Awakka pemaik meruan di menua Israel! Lebuh TUHAN mai kitai pulai baru ngagai Jerusalem, utai nya asai ti diambi mimpi! Bebendar amat kitai ketawa, bebendar amat kita manjung gaga ati! Udah nya bansa bukai lalu bejaku, “ TUHAN udah ngereja utai ti besai ke sida.” TUHAN endang udah ngereja utai ti besai ke kitai. Nya kebuah kitai gaga! TUHAN, asuh kami nyadi kaya-raja baru, O TUHAN, baka sungai ti rangkai nyau penuh laban ai baru lebuh musin pengujan. Awakka orang ke nyabak lebuh sida nanam utai manjung gaga ati lebuh sida ngetau! Orang ke nyabak lebuh sida mai benih deka manjung gaga ati lebuh sida pulai ke rumah mai utai ti diketau sida. Enti TUHAN enda ngaga rumah, orang ke ngaga rumah deka lebu ngapa gawa. Enti TUHAN enda nyaga nengeri, orang ke jaga nengeri nya deka lebu ngapa enda tinduk nyaga nengeri nya. Nadai guna bekereja bebendar ngiga pengidup, angkat tumu pagi, lalu laun tinduk, laban TUHAN meri utai ngagai orang ke dikerinduka Iya, lebuh sida tinduk. Anak mit endang pesaka ti datai ari TUHAN. Sida endang berekat ti bendar. Anak lelaki ke ada lebuh apai sida agi biak nya baka laja ti dipegai soldadu. Lantang meh orang ke mayuh panah. Iya enda malu lebuh iya bejaku enggau munsuh ba endur alai ngatur pechara. Beberekat meh orang ke nangika TUHAN, ke ngasika adat Iya. Nuan deka makai utai ti ulih jari nuan empu; Nuan deka gaga sereta nyadi kaya-raja. Bini nuan baka pun anggur ti bebuah lebat, dalam rumah nuan, lalu bala anak nuan baka anak kayu kana, ngelingi mija nuan. Baka nya meh orang ke ngasika TUHAN deka diberi berekat. TUHAN deka merekatka nuan ari Sion! Awakka nuan meda Jerusalem nyadi kaya-raja sepemanjai umur nuan! Awakka nuan idup tepedaka bala uchu! Awakka Israel seruran diau dalam pemaik! Israel, awakka nuan nyebut: “Sida udah balat merinsaka aku kenyau ari aku agi biak.” “Sida udah balat merinsaka aku kenyau ari aku agi biak, tang sida enda ulih ngalahka aku. Sida ngurik belakang aku; panjai amat abi urik sida.” TUHAN endang lurus; Iya udah ngelepaska aku ari jari orang ke jai.” Awakka genap iku orang ke begedika Sion malu magang, lalu diburu nyurutka diri. Awakka sida baka rumput ti ba perabung rumah, ti layu sebedau iya tumbuh. Orang nadai ngumpul iya tauka merekaska iya lalu muai iya. Lalu orang ke mansa nadai nyebut, “Awakka TUHAN merekatka nuan! Kami merekatka nuan dalam nama TUHAN.” Aku ngangauka Nuan, O TUHAN, laban aku balat tusah. Dingaka sabak aku, O TUHAN. Pendingka kangau aku ke minta tulung! Enti Nuan, O TUHAN nuliska dosa kami, sapa tan? Tang Nuan ngampun, ngambika kami nangika Nuan. Aku nganti tulung ari TUHAN, lalu aku manggaika pengadang aku ba semaya Iya. Aku nganti TUHAN lebih ari jejaga ke nganti hari tawas, lebih ari jejaga ke nganti hari tawas. Israel, panggaika pengadang kita ba TUHAN, laban pengerindu Iya endang meruan belama iya lalu Iya seruran nebus. Lalu Iya deka nebus Israel ari semua penyai sida. O TUHAN, aku enda sumbung; aku enda tinggi ati; Aku enda ngiruh diri enggau utai ti kelalu besai tauka kelalu manah ke aku. Tang aku bejaku ngagai ati aku, “Duduk, lalu diau jenuh baka anak mit ti enda bemunyi tingkap ba dada indai iya lebuh iya udah kenyang nusu.” Baka nya meh ati aku diau jenuh. O Israel, panggaika pengadang kita ba TUHAN kenyau ari diatu enggau ke belama iya! O TUHAN, anang enda ingatka David, semua pemerinsa ti ditatka iya. O TUHAN, kingatka utai ti udah disemaya iya, semaya ti udah digaga iya enggau Nuan, Allah Taala ti Pemadu Bekuasa, ke disembah Jakop: “Aku enggai pulai ke rumah, tauka tama ngagai bilik tinduk. Aku enggai tinduk tauka belelak, sebedau aku nyendiaka endur alai TUHAN, rumah alai Allah Taala ti Pemadu Bekuasa, ke disembah Jakop, diau.” Kami ninga pasal Peti Lampang Batu Adat di Betlehem, lalu kami nemu Peti nya ba padang Jearim. Ku kami bejaku, “Aram kitai mansang ngagai rumah TUHAN. Aram kitai nyembah Iya di mua kerusi diraja Iya.” Angkat meh Nuan O TUHAN, lalu mansang ngagai rumah Nuan, sama enggau Peti Lampang Batu Adat, ti ngelambangka kuasa Nuan. Awakka bala imam Nuan seruran ngerasukka pengelurus, lalu awakka bala nembiak Nuan manjung gaga ati! Ketegal nembiak Nuan David, anang nulak raja ti udah dipilih Nuan. Nuan udah besemaya ngena sumpah enggau David, semaya ti enda tau dibatak Nuan pulai: “Aku deka ngasuh siku ari peturun nuan ti lelaki duduk ba kerusi diraja nuan.” Enti bala peturun nuan ti lelaki ngasika sempekat enggau adat ti deka diajar Aku ngagai sida, peturun sida ke lelaki deka mega duduk ba kerusi diraja nuan belama iya.” Laban TUHAN udah milih Sion; Iya deka ngaga Sion nyadi endur alai Iya diau. “Tu meh endur alai Aku deka diau belama iya. Tu meh endur alai Aku diau, laban Aku deka merintah ba endur tu. Aku deka meri semua utai ti dipeguna Sion. Aku deka meri pemakai ti chukup ngagai nembiak iya ke seranta. Bala imam iya deka ngayanka pengelepas ari Aku, lalu bala nembiak iya deka belagu sereta manjung gaga ati. Ditu Aku deka ngasuh peturun David nyadi raja ti besai kuasa, baka lampu ti menyadi belama iya. Aku deka ngasuh bala munsuh iya malu, tang perintah iya deka nyadi kaya-raja sereta mansang.” Naka meh pemanah, naka meh penyamai lebuh nembiak Allah Taala diau seati enggau pangan diri! Iya baka minyak ti berega ti dituang ba pala Aron lalu lilih nelusur ragum iya ngagai rekung baju panjai iya. Iya baka ambun Bukit Hermon ti labuh ba bukit di Sion. Nya meh endur alai TUHAN udah besemaya deka meri berekat Iya, iya nya pengidup ti meruan belama iya. Aram muji TUHAN, semua kita ke nembiak Iya, semua kita ke bekereja lebuh malam hari dalam Rumah Sembiang Iya. Angkatka jari kita lebuh kita besampi dalam Rumah Sembiang, lalu puji TUHAN! Awakka TUHAN, ke ngaga langit enggau dunya, merekatka kita ari Sion! Puji TUHAN! Puji meh nama Iya, puji TUHAN, kita ke nembiak Iya, ke bediri dalam Rumah TUHAN, dalam Rumah Sembiang Allah Taala kitai. Puji meh TUHAN, laban Iya endang badas. Belagu pantun puji ke nama Iya, laban Iya endang nelap. Iya milih Jakop ke Iya Empu, lalu orang Israel nyadika pesaka Iya. Laban aku nemu TUHAN endang besai, ari atas semua petara. Iya ngereja sebarang utai ti dikedekaka Iya di langit enggau di dunya, di tasik enggau di tasik ti dalam. Iya ngasuh kabut betiup ari tisi langit. Iya ngaga kilat lebuh hari ujan, lalu Iya mansutka ribut ari bilik setor Iya. Iya udah munuh semua anak tuai di menua Ejip, anak tuai mensia enggau jelu. Di menua Ejip Iya ngereja kereja ajih enggau kereja ti nyelai kena Iya ngukum raja enggau semua pemesai iya. Iya ngerusak mayuh bengkah bansa lalu munuh mayuh raja ke bekuasa. Sihon, raja orang Amor, enggau Og, raja menua Basan, enggau semua raja menua Kanaan. Iya meri menua sida nyadika pesaka nembiak Iya Israel. Nama Nuan, O TUHAN, deka meruan belama iya, Semua serak deka ingatka Nuan. Laban TUHAN deka nyaga nembiak Iya, lalu siru enggau sida. Petara orang bansa bukai digaga ari pirak enggau emas, ditempa jari mensia. Sida bisi lubang nyawa, tang enda ulih bejaku, bisi mata, tang enda ulih meda, bisi pending, tang enda ulih ninga, lalu sida pen enda mega nemu enseput. Awakka semua orang ke ngaga lalu arapka engkeramba nya nyadi baka engkeramba nya empu! Puji meh TUHAN, kita orang Israel. Puji meh Iya, kita peturun Aron! Puji meh TUHAN, kita orang Lewi. Puji meh TUHAN, semua kita ke nangika Iya! Puji meh TUHAN di Sion, Iya ti diau di Jerusalem! Puji TUHAN! Beri terima kasih ngagai TUHAN, laban Iya endang badas, laban pengerindu Iya meruan belama iya. Beri terima kasih ngagai Allah Taala ti Pemadu Tinggi, laban pengerindu Iya meruan belama iya. Beri terima kasih ngagai TUHAN ti besai agi ari semua tuhan, laban pengerindu Iya meruan belama iya. Semina Iya siku aja ti ngereja kereja ajih. Pengerindu Iya meruan belama iya. Ngena penemu Iya, Iya ngaga langit, laban pengerindu Iya meruan belama iya. Iya ngaga dunya atas ai ti dalam, laban pengerindu Iya meruan belama iya. Iya ngaga mata hari enggau bulan, laban pengerindu Iya meruan belama iya. Iya ngaga mata hari ti manchar lebuh siang hari, laban pengerindu Iya meruan belama iya. Iya ngaga bulan enggau bintang ti manchar lebuh malam hari, laban pengerindu Iya meruan belama iya. Iya udah munuh anak tuai ti lelaki orang Ejip, laban pengerindu Iya meruan belama iya. Iya udah nguluka orang Israel pansut ari menua Ejip, laban pengerindu Iya meruan belama iya. Ngena jari Iya ti kering, lengan Iya ti bekuasa, laban pengerindu Iya meruan belama iya. Iya ngasuh ai bebagi ba Tasik Mirah, laban pengerindu Iya meruan belama iya. Iya mai bala nembiak Iya bejalai nengah tasik nya, laban pengerindu Iya meruan belama iya. Tang Iya ngelemaska raja enggau bala soldadu menua Ejip, laban pengerindu Iya meruan belama iya. Iya nguluka bala nembiak Iya bejalai nengah menua puang, laban pengerindu Iya meruan belama iya. Iya munuh bala raja ti bekuasa, laban pengerindu Iya meruan belama iya. Iya munuh bala raja ti tebilang nama, laban pengerindu Iya meruan belama iya. Iya munuh Sihon, raja orang Amor, laban pengerindu Iya meruan belama iya, enggau Og, raja nengeri Basan, laban pengerindu Iya meruan belama iya. Iya meri menua sida ngagai nembiak Iya, laban pengerindu Iya meruan belama iya. Iya meri menua nya ngagai orang Israel, ti nembiak Iya, laban pengerindu Iya meruan belama iya. Iya nadai kala enda ingatka kitai lebuh kitai alah, laban pengerindu Iya meruan belama iya. Iya ngelepaska kitai ari munsuh kitai, laban pengerindu Iya meruan belama iya. Iya meri pemakai ngagai semua utai ti idup, laban pengerindu Iya meruan belama iya. Beri terima kasih ngagai Allah Taala di serega, laban pengerindu Iya meruan belama iya. Kami duduk ba tebing sungai di menua Babilon. Dia kami nyabak, lebuh kami ingatka Sion. Ba kayu willow dia kami ngantung belikan kami. Laban orang ke nangkap kami ngasuh kami belagu, lalu orang ke merinsaka kami ngasuh kami merindang sida, ku sida, “Nyanyi ke kami lagu nengeri Sion.” Baka ni ku kami ulih nyanyi lagu TUHAN di menua orang? Enti aku enda ingatka nuan, O Jerusalem, awakka jari kanan aku lupis! Awakka aku enda ulih belagu agi enti aku enda ingatka nuan, enti aku enda ngumbai nuan nengeri ti pemadu dikegagaka aku! O TUHAN, kingatka utai ti udah dikereja orang Edom lebuh Jerusalem alah. Kingatka sida ke majak nyebut, “Runtuhka nengeri nya!” Babilon, nuan deka dirusak. Beberekat meh orang ke malas nuan ketegal utai ti udah dikereja nuan ngagai kami, ngambi anak nuan, lalu mangkaka sida ngagai batu. Aku meri terima kasih ngagai Nuan, O TUHAN, enggau pengabis ati aku. Aku belagu muji Nuan di mua bala petara. Aku meremi ngadap ngagai Rumah Nuan ti kudus, lalu meri terima kasih ngagai nama Nuan ketegal pengerindu enggau penetap ati Nuan ti meruan belama iya, laban Nuan udah mandangka Diri enggau pesan Nuan endang tinggi ari semua. Nuan nyaut aku, lebuh aku ngangauka Nuan. Ngena pengering Nuan, Nuan ngeringka aku. Semua raja di dunya deka muji Nuan, O TUHAN, laban sida udah ninga semaya Nuan, lalu sida deka belagu ngenang utai ti dikereja Nuan, laban mulia Nuan amat besai. Laban taja pen Nuan diau tinggi di atas, tang Nuan ngintu orang ke baruh pendiau, lalu orang ke sumbung enda ulih belalai ari Nuan. Taja pen aku dikelingi penusah, Nuan nyaga nyawa aku; Nuan ngunjurka jari Nuan ngelaban bala munsuh aku lalu jari kanan Nuan ngelepaska aku. Nuan deka ngamatka semua utai ti udah disemaya Nuan ngagai aku; Pengerindu Nuan endang meruan belama iya, O TUHAN. Anang ninggalka nembiak Nuan Israel. O TUHAN, Nuan udah meresa lalu nemu aku. Nuan nemu semua utai ti dikereja aku; Ari jauh Nuan meda semua runding aku. Nuan meda aku lebuh aku gawa tauka belelak, lalu Nuan nemu semua utai ti dikereja aku. Indah sebedau aku bejaku deh Nuan endang udah nemu semua utai ti deka disebut aku. Nuan endang ngelingi aku, lalu Nuan nyaga aku ngena kuasa Nuan. Penemu Nuan endang amat dalam, ngelui ari ti ulih diperagam aku. Kini ke tunga aku ulih ngerarika diri ari Nuan? Ngagai ni aku ulih ngerarika diri ari Nuan? Enti aku niki ke serega, Nuan ga bisi dia. Enti aku gali di dunya pemati, Nuan ga bisi dia. Enti aku terebai lalu diau ba endur ti pemadu jauh, Nuan ga bisi dia nguluka aku, lalu jari kanan Nuan nulung aku. Enti aku nyebut, “Awakka pemetang ngelamun aku, lalu awakka penampak ti ngelingi aku bebali nyadi malam,” indah pemetang nya deh enda chukup petang ke Nuan, lalu malam terang baka penampak siang hari; laban ba Nuan pemetang enggau penampak sigi nadai bida. Laban Nuan udah nempa semua perengka tubuh aku; lalu bejantilka aku dalam kandung indai aku. Aku muji Nuan laban Nuan endang patut dikenangika, laban semua utai ti dikereja Nuan endang nyelai sereta manah magang. Nuan sigi nemu aku. Lebuh tulang aku benung ditempa, dipejantilka bejimat jimat dalam kandung indai aku, lebuh aku benung mansang besai dalam kandung enda dipeda mensia, Nuan nemu aku endang bisi dia. Nuan endang udah meda aku sebedau aku ada. Umur ti diungkup Nuan ke aku endang udah ditulis dalam bup Nuan, sebedau utai nya nyadi. O Allah Taala, naka meh pemayuh runding Nuan datai ke aku nyau enda teperagamka sida. Enti aku ngitung sida, sida mayuh agi ari igi pasir. Lebuh aku dani, aku agi mengkang enggau Nuan. O Allah Taala, naka meh pemanah enti Nuan munuh orang ke jai! Naka meh pemanah enti orang ke mangah nya jauh ari aku! Sida nyakap Nuan. Sida bejaku jai ngelaban nama Nuan. Naka meh pemalat aku begedika orang ke begedika Nuan, O TUHAN! Naka meh pemalat aku pedis ati ke orang ke angkat ngelaban Nuan! Aku begedika sida enggau pengabis ati aku. Aku ngumbai sida munsuh aku. Peresa meh aku, O Allah Taala, ngambika Nuan nemu ati aku. Uji meh ati aku, ngambika Nuan nemu runding aku. Giga meh ulah ti jai dalam aku lalu iring aku niti jalai ti meruan belama iya. Selamatka aku ari orang ke ngereja penyai, O TUHAN. Jaga aku ari orang ke mangah, ke seruran bekira deka ngereja penyai, lalu enda ngetu-ngetu mai orang belaya. Dilah sida baka ular ti bisa. Leka jaku sida baka rachun ular tedung. Jaga meh aku, TUHAN, ari kuasa orang ke jai. Jaga aku ari orang ke mangah ke bekira deka numbangka aku. Orang ke sumbung udah nan panjuk deka nyintak aku. Sida udah nan jarin, lalu ba sebelah tisi jalai, sida udah nan panjuk deka nangkap aku. Ku aku bejaku enggau TUHAN, “Nuan endang Allah Taala aku.” Dingaka aku ke ngangau minta tulung Nuan, O TUHAN! TUHAN ti Pemadu Tinggi, penyaga aku ti kering, Nuan udah nyaga aku lebuh aku beperang. TUHAN, anang meri ngagai orang ke jai utai ti dikinginka sida. Anang nejuka akal sida mujur. Anang nejuka bala munsuh aku menang. Asuh jaku emba sida, pulai ngagai sida empu. Awakka bara api ninggang sida. Awakka sida dibuai ngagai lubang kebung, lalu enda pansut agi. Awakka orang enda mujur betenahka pangan diri. Awakka penyai nitihka orang ke mangah lalu ngerusak sida. TUHAN, aku nemu Nuan endang nyaga orang ke seranta enggau nyaga hak orang ke suntuk. Orang ke lurus deka muji Nuan. Sida deka diau begulai enggau Nuan. Aku ngangauka Nuan, O TUHAN. Tulung meh aku diatu! Pendingka aku, lebuh aku ngangauka Nuan. Sambut meh sampi aku nyadika menyan, jari ti diangkatka aku, nyadika piring lemai hari. O TUHAN, jaga mulut aku, lebuh aku bejaku. Anang nejuka aku ingin ngereja utai ti salah enggau ingin deka nyereta orang ke jai ngereja pengawa sida ke jai. Awakka aku enda enggau sida ngintu pengerami makai besai. Orang ke badas nyangka bisi nganu sereta ngerara aku enggau ati ti nelap, tang aku enggai sekali-kali nerima basa ari orang ke jai, laban aku endang seruran besampi ngelaban pengawa sida ke jai. Lebuh orang ke merintah sida ditikauka ari pala tingkah, nya baru sida deka ngaku jaku aku endang amat. Baka kayu ti dibelah lalu dipepat, baka nya meh tulang sida deka ngachir ba mua kubur. Tang aku majak arapka Nuan, O TUHAN Allah Taala aku. Aku minta Nuan nyaga aku. Anang nejuka aku mati! Jaga aku ari panjuk ti udah ditan kena sida nyintak aku, ari jarin orang ke jai. Awakka orang ke jai disintak panjuk sida empu, lalu awakka aku enda bebadi. Aku ngangauka TUHAN minta tulung. Aku minta Iya nulung aku. Aku mantaika semua serebana aku ngagai Iya. Aku madahka semua penusah aku ngagai Iya. Lebuh aku nyau lemi semengat, Iya nemu utai ti patut dikereja aku. Ba jalai ti ditengah aku, bala munsuh aku udah nan panjuk kena sida nyintak aku. Lebuh aku malik kiba kanan aku nadai meda orang deka nulung aku, nadai orang deka nyaga aku, nadai orang deka ibuhka aku. O TUHAN, aku nyabak minta Nuan nulung aku. Nuan, O TUHAN, endang penyaga aku. Semina Nuan siku aja ke dikinginka aku dalam pengidup tu. Pendingka sabak aku ke minta tulung, laban ati aku balat tusah. Selamatka aku ari bala munsuh aku, laban sida kelalu kering ke aku. Selamatka aku ari penusah tu, nya baru aku deka meri terima kasih ngagai Nuan! Orang ke lurus deka begempuru ngelingi aku, laban pemadas Nuan enggau aku. O TUHAN, dingaka sampi aku! Laban Nuan endang lurus, nya alai pendingka kangau aku. Ulih penetap ati Nuan, saut meh aku! Anang nyara aku ke nembiak Nuan; laban nadai orang ke enda bepenyalah di mua Nuan. Bala munsuh aku udah begagaika aku lalu ngalahka aku. Munsuh aku udah nutup aku dalam rumah jil ti petang, lalu aku nyau baka orang ke udah mati dulu kelia. Nya alai aku lemi semengat. Ati aku balat tusah. Aku ingatka maya dulu kelia. Aku berundingka semua utai ti udah dikereja Nuan, aku ngingatka semua pengawa Nuan. Aku ngangkatka jari besampi ngagai Nuan. Baka tanah ti rangkai, baka nya meh semengat aku aus ke Nuan. Saut meh aku diatu, O TUHAN! Aku nadai pengadang agi. Anang belalai ari aku, enggai ke aku enggau orang nurun ngagai dunya pemati. Asuh aku genap pagi ngingatka pengerindu Nuan ti meruan belama iya, laban aku manggaika pengarap aku ba Nuan. Aku besampi ngagai Nuan. Tunjukka jalai ti patut ditengah aku. O TUHAN, aku datai ngagai Nuan, minta Nuan nyaga aku. Selamatka aku ari bala munsuh aku. Nuan endang Allah Taala aku. Ajar aku ngereja utai ti dikedekaka Nuan. Aku minta Nuan manah enggau aku, lalu ngiring aku nengah jalai ti likun. Selamatka aku, O TUHAN, munyi ti udah disemaya Nuan. Ulih pemadas Nuan, selamatka aku ari penusah aku! Ketegal pengerindu Nuan ke aku, bunuh meh bala munsuh aku lalu rusak meh semua orang ke nekanka pengidup aku, laban aku tu nembiak Nuan. Pujika TUHAN ti nyaga aku! Iya matihka aku ngelaban munsuh lalu nyendiaka aku beperang. Iya nyadi penyaga enggau pengelepas aku, ti dikarapka aku meri aku pengelikun. Iya ngalahka semua bansa lalu ngasuh aku merintah sida. O TUHAN, sapa mensia alai Nuan deka ibuhka sida? Sapa anak mensia, alai Nuan deka ibuhka sida? Kami tu baka kesuh seput. Umur kami semina sekejap aja, baka ayuk. O TUHAN, buka meh langit, lalu nurun. Tegu meh bukit, lalu sida deka berasap. Asuh kilat nyelar lalu mambarka bala munsuh Nuan. Timbakka laja Nuan, lalu asuh munsuh Nuan rari. Ulurka jari Nuan ari serega, tarit aku ari ai ti dalam, lalu selamatka aku. Selamatka aku ari kuasa orang bansa bukai, ti nadai kala madahka utai ti bendar tang bula, lalu ngelanggar sumpah diri. Aku deka nyanyi lagu ti baru ke Nuan, O Allah Taala. Aku deka nebah belikan, lalu belagu ke Nuan. Nuan ngasuh bala raja menang lalu ngelepaska nembiak Nuan David. Selamatka aku ari bala munsuh ke mangah. Selamatka aku ari kuasa orang bansa bukai, ti nadai kala madahka utai ti bendar tang bula lalu ngelanggar sumpah diri. Awakka bala anak lelaki kami, lebuh sida agi biak nyadi baka utai ti ditanam, ti mansang besai lalu nyadi kering. Awakka bala anak indu kami nyadi baka tiang ti manah gaya ti dikena ngias sukut istana. Awakka rumah setor kami penuh laban genap macham utai ti udah diketau. Awakka jelu bedus ba tanah kami beranak beribu iku. Awakka sapi kami mayuh anak nadai gugur anak, tauka lenyau. Awakka nadai sabak tusah ati didinga ba sebelah jalai raya kami. Lantang meh bansa ke nerima berekat nya. Lantang meh mensia ti ngaku Allah Taala nyadika TUHAN sida! Aku deka ngemesaika Nuan, O Allah Taala enggau Raja aku. Aku deka meri terima kasih ngagai Nuan belama lama iya. Tiap hari aku deka meri terima kasih ngagai Nuan, lalu muji nama Nuan belama lama iya. TUHAN endang besai lalu endang patut dipuji. Pemesai kuasa Iya enda ulih diperagam mensia. Utai ti udah dikereja Nuan deka dipuji genap turun-menurun. Sida deka madahka pasal pemesai pengawa Nuan. Sida deka bejakuka pasal mulia enggau pemesai kuasa Nuan, lalu aku deka belematika pemadas pengawa Nuan. Orang deka ngenang pasal pemesai pengawa Nuan, lalu aku deka ngemesaika Nuan. Sida deka nusui pasal semua pemadas Nuan lalu belaguka pasal penelap Nuan. TUHAN endang rindu sereta kasih, lubah ringat sereta penuh laban pengerindu ti meruan belama iya. Iya manah enggau semua orang lalu siru enggau semua utai ti udah digaga Iya. Semua utai ti idup ti udah digaga Nuan, O TUHAN, deka meri terima kasih ngagai Nuan, lalu semua nembiak Nuan deka muji Nuan. Sida deka bejakuka pasal mulia diraja Nuan lalu madahka pasal kuasa Nuan, ngambika semua orang nemu pemesai pengawa Nuan enggau pemesai mulia perintah Nuan. Perintah Nuan endang meruan belama iya, lalu Nuan nyadi Raja belama iya. TUHAN endang deka ngamatka semaya Iya. Iya endang ngayanka pengasih dalam semua pengawa Iya. Iya nulung orang ke dituntung penusah. Iya ngangkatka orang ke udah rebah. Semua utai ti idup aja manggaika pengadang sida ba Nuan, lalu Nuan meri sida pemakai ba maya ti patut. Nuan meri sida chukup utai datai ke semua utai ti idup nadai suntuk utai. TUHAN endang lurus dalam semua utai ti dikereja Iya, ngayanka pengasih dalam semua pengawa Iya. Iya diau semak sida ke ngangauka Iya, ke ngangauka Iya enggau ati ti bendar. Iya meri utai ti dipeguna orang ke ngemesaika Iya. Iya ninga sabak sida, lalu nyelamatka sida. Iya nyaga semua orang ke rinduka Iya, tang Iya deka ngerusak orang ke jai. Aku deka seruran muji TUHAN. Awakka semua utai ti idup ti udah digaga Iya muji nama Iya ti kudus belama lama iya. Puji TUHAN! Puji meh TUHAN, O semengat aku! Aku deka muji Iya seumur idup. Aku deka belagu muji Allah Taala aku sepemanjai umur aku. Anang ngarapka tuai mensia. Nadai mensia ulih nulung kita. Lebuh sida mati, sida pulai baru ngagai tanah. Nya meh maya semua pelan sida lesap. Beberekat meh orang ke ditulung Allah Taala Jakop ke manggaika diri ba TUHAN Allah Taala sida, ke ngaga langit, tanah enggau tasik enggau semua utai ti dalam sida. Iya endang seruran ngamatka semaya Iya. Lebuh Iya ngakim Iya ngeringka orang ke kena tekan, lalu meri pemakai ngagai orang ke lapar. TUHAN ngelepaska orang ke kena jil lalu ngasuh orang ke buta meda. Iya ngangkatka orang ke udah rebah. Iya rinduka bala nembiak Iya ke lurus. Iya nyaga orang kampar ti diau di menua kitai. Iya nulung indu ke balu enggau orang ke nadai apai indai, tang ngerusak orang ke jai. TUHAN endang Raja belama iya. O Sion, Allah Taala nuan deka merintah belama iya. Puji TUHAN! Puji TUHAN! Laban kitai endang patut belagu muji Allah Taala kitai; laban Iya endang kasih, lalu kitai endang patut belagu muji Iya. TUHAN nirika Jerusalem baru. Iya mai orang ke udah dibuai pulai baru ari menua bukai. Iya ngeraika orang ke tusah ati lalu malut telih sida. Iya ngeletak pemayuh bintang, lalu meri nama ngagai tiap igi bintang nya. TUHAN kitai endang besai sereta bekuasa. Penalam penemu Iya endang enda ulih disukat. Iya ngangkatka orang ke baruh ati, tang ngempaska orang ke jai ngagai tanah. Belagu muji TUHAN. Tebah meh belikan ke Allah Taala kitai. Iya nganchau mua hari di langit. Iya meri ai ujan ngagai tanah lalu ngasuh rumput tumbuh ba sebelah bukit. Iya meri pemakai ngagai jelu lalu nupi burung kak ti agi mit lebuh sida ngangau. TUHAN ukai gaga ati ke kuda ti kering, tauka rinduka soldadu ti berani, tang rinduka orang ke ngemesaika Iya, orang ke manggaika diri ba pengerindu Iya ti meruan belama iya. Puji meh TUHAN, O Jerusalem! Puji meh Allah Taala kitai, O Sion! Iya ngasuh semua pintu nuan tegap. Iya merekatka bala nembiak Nuan. Iya nyaga garis entara menua nuan enggau likun lalu ngasuh kita kenyang makai gandum ti pemadu manah. Iya bejaku ngagai tanah, lalu utai ti disebut Iya nyadi enggau jampat. Iya nganchau seleju baka pua lalu naburka ais baka amau. Iya ngasuh ujan batu labuh baka batu kerangan. Nadai orang ulih natka penyelap ti dikirumka Iya! Udah nya Iya bejaku, lalu batu ais nya lela nyadi ai. Iya lalu ngasuh ribut datai, lalu ai nya rarat. Iya meri pesan ngagai bala nembiak Iya, atur enggau Adat Iya ngagai orang Israel. Iya nadai kala ngereja utai nya ke semua bansa bukai. Sida enda nemu Adat Iya. Puji TUHAN! Puji TUHAN! Puji meh TUHAN ti datai ari serega, puji meh Iya ba endur ti pemadu tinggi. Puji meh Iya, semua kita ke melikat Iya, semua kita ke bala soldadu serega. Puji meh Iya, O kita mata hari enggau bulan. Puji meh Iya, O kita bintang ti manchar. Puji meh Iya, O langit ti pemadu tinggi, enggau kita ai ti ari atas langit. Awakka semua sida muji nama TUHAN! Laban lebuh Iya bejaku, sida lalu digaga. Lalu Iya ngengkahka sida ba endur alai sida ke meruan belama iya; Iya ngengkahka sida ba endur sida ngambika sida meruan dia belama iya. Puji meh TUHAN O kita ke diau di dunya, bala kita naga tasik, enggau semua tasik, kilat enggau ujan batu, seleju enggau mua hari, ribut ti deras ti ngasika pesan Iya. Puji meh Iya, O kita munggu enggau bukit, kayu buah enggau utan, semua jelu ti jinak enggau jelu babas, kita ular enggau burung. Puji meh Iya, O kita bala raja enggau semua mensia, bala anak raja enggau semua pemerintah ti bukai, indu ke biak, enggau orang bujang, orang ke tuai enggau bala anak mit. Awakka semua sida muji nama TUHAN, laban semina nama Iya aja dikemesaika; laban mulia Iya ari atas dunya enggau serega. Iya meri pengering ngagai nembiak Iya, ngambika sida muji Iya, iya nya orang Israel ke balat dikesayauka Iya. Puji TUHAN! Puji TUHAN! Belagu ngena lagu ti baru ke TUHAN. Puji Iya lebuh bala nembiak Iya begempuru! Awakka ati kita gaga, Israel, laban Iya udah ngaga kita. Rami gaga ati meh kita orang Sion, ke Raja kita! Betanda muji nama Iya meh kita, belagu muji Iya ngena dedumbak enggau belikan. Laban TUHAN gaga ati ke nembiak Iya; Iya meri pemenang ngagai orang ke baruh ati. Awakka bala nembiak Allah Taala rami gaga ke pemenang sida, lalu belagu gaga ati lebuh sida gali ba kerusi-panjai sida. Awakka sida manjung muji Allah Taala, nyandang pedang ti bemata dua, kena sida ngalahka semua bansa lalu ngukum semua mensia, nanchang bala raja sida ngena rantai, nanchang bala tuai sida ngena rantai besi, kena ngukum semua bansa nitihka jaku Allah Taala. Tu meh pemenang ti diberi Allah Taala ngagai bala nembiak Iya. Puji TUHAN! Puji TUHAN! Puji meh Allah Taala dalam Rumah Sembiang Iya! Puji meh pengering Iya di langit! Puji meh Iya ketegal pemesai pengawa ti udah dikereja Iya. Puji meh kuasa Iya ti pemadu besai. Puji meh Iya ngena terumpit. Puji meh Iya ngena belikan enggau engkeratung. Puji meh Iya ngena dedumbak enggau ajat; puji meh Iya ngena belikan enggau kesuling. Puji meh Iya ngena bebendai. Puji meh Iya ngena bebendai ti inggar. Awakka semua utai ti idup muji TUHAN! Puji TUHAN! Jaku-dalam Solomon, anak David, raja menua Israel. Tu jaku-dalam ti ulih nulung kita ngelala penemu-dalam enggau jaku lalau ti manah, sereta meretika ‘jaku tuai’ ti ngundan reti ti dalam. Jaku-dalam tu ulih ngajar kita pemintar idup, enggau jalai idup ngena ati ti betul, lurus sereta patut. Jaku-dalam tu ulih ngasuh orang ke kurang peneleba, bulih pemintar, sereta ngajar orang ke biak chakah ngereja pengawa. Jaku-dalam tu tau nambahka penemu orang ke endang bepenemu-dalam, lalu ngelalau orang ke bepelajar, ngambika sida ulih nemu reti utai ti dilalaika jaku-dalam, enggau pekara ti dibantaika orang ke bepenemu-dalam. Nangika TUHAN nya pun penemu; orang ke beli ngeleseka penemu-dalam lalu enggai belajar. Anak, dingaka utai ti dipadahka apai indai nuan. Ajar ti diberi sida deka ngasuh perangai nuan manah agi, baka labung ti manah, tauka baka tenggak ti ngasuh gamal nuan sigat. Anak, lebuh orang ke bedosa nipu nuan, anang nurutka sida. Enti sema sida bejaku munyi tu, “Aram kitai ngiga orang ngambika bisi dibunuh kitai! Aram kitai ngamuk orang ke nadai penyalah, kena kitai ngelantangka diri! Sida nyangka idup sereta bepengerai, lebuh kitai tetemuka sida, tang sida deka mati lebuh kitai udah ngamuk sida! Kitai deka tetemuka mayuh macham pengaya, lalu ngisi rumah kitai enggau perapasan! Aram mupuk enggau kami lalu bebagika utai ti ulih kitai enchuri.” Anak, anang nitihka orang ke baka nya. Anang begulai enggau sida. Sida enda tan nganti diri ti ngereja penyai. Sida endang seruran sedia deka munuh orang. Nadai guna nuan nan pukat lebuh burung ti deka ditangkap nuan nengkilaka nuan, tang orang ke baka nya semina nan panjuk kena nyintak diri empu, panjuk ti deka munuh sida. Pengawa ngerumpak endang selalu ngambi nyawa perumpak nya empu. Nya meh utai ti nyadi ba orang ke idup ngena chara ti kasar. Dinga! Penemu-dalam benung ngangau ba sebelah jalai raya enggau ba sebelah pasar, ngangau ngena nyawa ti inggar ari pintu nengeri, enggau ari sebarang endur alai orang begempuru. “Kita tu beli! Ni pengelama kita agi beli? Ni pengelama kita agi majak ngelese lalu begedika penemu? Pendingka aku, lebuh aku nganu kita. Aku deka meri kita jaku lalau ti manah, lalu bekunsika penemu aku enggau kita. Aku udah bebendar ngangauka kita, minta kita datai, tang kita enggai mending. Kita enggai mendingka aku. Kita enggai mendingka semua jaku lalau aku, lalu enda kala ngelakka aku nunjukka jalai ti ngena ngagai kita. Nya alai, lebuh kita dituntung penusah, aku deka ketawaka kita. Aku deka ngeleseka kita lebuh kita dituntung utai ti balat ngenakutka kita, lebuh iya datai baka biaubalai, lalu kita natka diri pedis sereta merinsa. Nya baru kita deka ngangauka penemu-dalam, tang aku enggai nyaut. Kita nyangka begigaka aku di semua endur, tang kita enda tetemuka aku. Kita nadai kala begunaka penemu, lalu kita seruran enggai ngasika TUHAN. Kita nadai kala begunaka jaku lalau aku, tauka mendingka aku lebuh aku madahka penyalah kita. Nya alai, kita deka nerima utai ti endang patut diterima kita, lalu utai ti dikereja kita empu deka ngasuh kita sakit. Orang ke nadai peneleba, mati, laban sida nulak penemu-dalam. Orang ke beli dirusak, laban sida enggai kiruh. Tang barang sapa mendingka aku, deka bulih pengelikun. Iya deka diau likun, lalu nadai kebuah takut.” Anak, pelajarka utai ti diajar aku ngagai nuan, lalu anang enda ingatka utai ti diasuh aku kereja nuan. Pendingka penemu-dalam lalu uji meratika utai nya. Pinta meh penemu. Pinta meh runding ti dalam. Giga iya enggau naka ulih nuan baka ke ngiga pirak tauka pengaya ti dilalaika. Nya baru nuan deka nemu reti nangika TUHAN, lalu nuan deka mujur belajarka pasal Allah Taala. Penemu-dalam nya utai ti diberi TUHAN. Penemu enggau pemereti ati endang datai ari Iya. Iya nulung sereta nyaga orang ke lurus sereta betul ati. Iya nyaga orang ke manah enggau orang bukai, lalu nyaga orang ke angkunka Iya. Enti nuan mendingka aku, nuan deka nemu utai ti ngena, lurus sereta betul. Nuan deka nemu utai ti patut dikereja nuan. Nuan deka nyadi orang ke bepenemu-dalam, lalu penemu nuan deka ngasuh ati nuan gaga. Pemintar runding enggau pemereti ati nuan deka nyaga nuan, nagang nuan ngereja utai ti salah. Sida deka ngejangka nuan jauh ari orang ke numbuhka pengachau ngena utai ti disebut sida, iya nya, sida ke udah ngelengkaka pengidup ti lurus, lalu diau dalam pemetang, ke ngelantangka diri ngereja utai ti salah, lalu gaga ati ngereja penyai, orang ke enda tetap ati sereta enda tau dikarapka. Nuan ulih nulak indu ke kamah ulah, ke nguji ngulihka nuan ngena jaku ti manis, indu ke enda tetap ati ngagai laki diri, sereta enda ingatka semaya ti kudus ti udah digaga iya. Enti nuan mansang ngagai rumah indu nya, nuan niti jalai ti nuju ngagai pemati. Enti nuan mansang kia, nuan mansang ngagai dunya pemati. Orang ke nemuai ngagai iya enda ulih pulai agi. Orang nya enda ulih pulai agi ngagai jalai ti nuju ngagai pengidup. Nya alai nuan enda tau enda beteladan ba orang ke menyana, lalu diau lurus. Orang ke lurus, orang ke rentang ati, deka diau di menua kitai. Tang Allah Taala deka muai orang ke jai ari menua tu, lalu nyabut orang ke bedosa ari menua tu baka ke nyabut rumput ari tanah. Anak, anang enda ingatka utai ti diajar aku ngagai nuan. Seruran kingatka utai ti diasuh aku kereja nuan. Jaku ajar ti diberi aku deka ngasuh nuan gayu-guru sereta nyadi kaya-raja. Anang ngelengkaka penaluk enggau penetap ati nuan. Tanchangka sida ba rekung nuan. Tuliska sida ba ati nuan. Nya baru Allah Taala enggau mensia deka rinduka nuan. Panggaika diri ba TUHAN enggau pengabis ati nuan. Anang manggaika diri ba penemu diri empu. Awakka TUHAN seruran ngiring nuan, nya baru Iya deka nunjukka jalai ti ngena ngagai nuan. Anang ngumbai diri pintar. Nangika TUHAN, lalu anang ngereja penyai. Nya baru Iya deka nyadi baka ubat ti manah, ti ngeraika telih nuan, lalu ngasuh nuan kurang agi pedis. Kemesaika TUHAN ngena piring ti pemadu manah ari asil umai nuan, nya baru bilik setor nuan deka penuh laban gandum, lalu nuan deka bulih wain lebih ari ti ulih disimpan nuan. Anak, lebuh TUHAN madahka penyalah nuan, dingaka Iya enggau manah, lalu ambi jaku Iya nyadika jaku tangkan. Allah Taala madahka penyalah orang ke dikerinduka Iya, baka apai indai ke madahka penyalah anak ke dikemegahka sida. Beberekat meh orang ke nyadi orang ke bepenemu-dalam, ke nemu meretika utai. Penguntung ari nya besai agi ari penguntung bulih pirak. Utai nya berega agi ari emas. Penemu-dalam berega agi ari batu ti berega. Nadai utai ti dikinginka nuan ulih dibandingka enggau nya. Penemu-dalam meri nuan umur ti panjai, pengaya enggau basa. Penemu-dalam tau ngasuh pendiau nuan lantang sereta likun seumur idup. Orang ke bepegai erat ba penemu-dalam deka diau lantang senang. Penemu-dalam deka meri sida pengidup. TUHAN ngaga dunya ngena penemu-dalam. Ngena penemu Iya, Iya ngengkahka langit ba endur iya. Penemu-dalam ti dikembuan TUHAN ngasuh ai sungai rarat lalu ngasuh mua hari meri ai ujan ngagai tanah. Anak, bepegai erat ba penemu-dalam enggau ba penalam runding nuan. Anang nejuka sida ninggalka nuan. Sida deka meri nuan pengidup, pengidup ti nyamai sereta lantang. Nuan ulih bejalai enggau likun lalu enda tesangkut. Nuan enda takut lebuh nuan deka tinduk, lalu nuan deka tinduk jenak sepemanjai malam. Nuan enda ibuh irau ati ke penusah besai ti datai enggau ngenyit baka kabut ti nuntung orang ke jai. TUHAN deka nyaga nuan likun. Iya enggai nejuka nuan disintak panjuk. Enggau naka ulih kereja utai ti manah ngagai orang ke begunaka utai nya. Anang sekali-kali ngasuh orang ke berimbai pendiau enggau nuan, nganti ngagai pagila, enti nuan ulih nulung sida tekala nya. Anang bekira deka ngereja utai ti tau ngemediska orang ke berimbai pendiau enggau nuan. Sida diau berimbai enggau nuan, laban sida arapka nuan. Anang bekelikuh enggau nadai kebuah, enti orang nya nadai udah ngemediska nuan. Anang ngining pemangah orang, lalu anang diau nitihka jalai iya, laban TUHAN begedika orang ke ngereja penyai, tang Iya ngaga orang ke lurus nyadika pangan Iya. TUHAN nyumpah ruang bilik orang ke jai, tang merekatka ruang bilik orang ke lurus. Iya enda begunaka orang ke sumbung, tang Iya rinduka orang ke baruh ati. Orang ke bepenemu-dalam deka dibasa orang, tang orang ke beli deka semina nambahka pemalu diri. Anak, pendingka jaku ajar apai nuan. Pendingka ajar nya, nya baru nuan deka nyadi orang ke mereti. Utai ti diajar aku ngagai nuan endang utai ti manah. Nya alai kingatka semua utai nya. Lebuh aku agi mit, lalu aku anak tunggal apai aku, iya selalu ngajar aku. Ku iya, “Kingatka utai ti disebut aku, lalu anang enda ingatka utai nya. Kereja utai ti diasuh aku, ngambika nuan idup. Giga penemu-dalam enggau runding ti dalam! Anang enda ingat tauka enda mendingka utai ti disebut aku. Anang ngelengkaka penemu-dalam. Nya baru iya deka nyaga nuan. Rinduka iya, nya baru iya deka ngintu nuan enggau likun. Begigaka penemu-dalam nya utai ti pemadu beguna ti tau dikereja nuan. Enti nuan ngiga utai, giga runding ti dalam. Rinduka penemu-dalam, nya baru iya deka ngemesaika nuan. Berap iya, nya baru orang deka masa nuan. Iya deka nyadi makota ti bemulia ke nuan.” Pendingka aku, anak. Peratika enggau manah utai ti dipadahka aku ngagai nuan, nya baru nuan deka panjai umur. Aku udah ngajar nuan penemu-dalam, enggau jalai ti ngena, kena nuan idup. Nadai utai deka mempang nuan, enti nuan belalau ba penemu-dalam, lalu nuan enda tesangkut lebuh nuan belanda. Seruran kingatka utai ti udah dipelajarka nuan. Pelajar nuan nyadika pengidup nuan - jaga iya enggau manah. Anang nitihka orang ke jai. Anang beteladan ba orang ke jai. Anang ngereja nya! Kejangka diri jauh ari penyai! Tulak iya, lalu angkat ari nya. Orang ke jai enda ulih tinduk enti sida enda dulu ngereja penyalah. Sida gali tang enda ulih tinduk, enti sida enda dulu ngemediska orang. Ba sida, penyai enggau pemangah nya baka pemakai enggau utai ti diirup. Jalai ti ditengah orang ke lurus nya baka penumbuh mata hari. Iya majak terang-seterang datai ke hari nyau siang. Tang jalai ti ditengah orang ke jai nya petang baka malam. Sida teterap, tang enda nemu utai ti ngasuh sida tesangkut. Anak, pendingka utai ti disebut aku. Pendingka leka jaku aku. Anang nejuka sida lenyau ari nuan. Kingatka sida, lalu simpan sida dalam ati nuan. Sida deka meri pengidup enggau pengerai ngagai barang sapa meretika sida. Bejimat lebuh nuan berunding, laban gaya pengidup nuan ditempa runding nuan. Anang sekali-kali nyebut utai ti bula. Anang bekaul enggau pemula, tauka enggau jaku ti nipu. Perening terus ke mua enggau ati ti kempang sereta betul, lalu anang malu lalu kunduk-kunduk ngapa. Perambu enggau silik utai ti deka dikereja nuan, nya baru utai ti dikereja nuan deka mujur. Seliahka penyai, lalu bejalai lurus nuju ke mua. Anang sekali-kali limpang ari jalai ti ngena. Anak, perati sereta pendingka penemu-dalam enggau runding ti dalam ti diberi aku. Nya baru nuan deka nemu chara ngatur ulah diri enggau menyana, lalu jaku nuan deka mandangka nuan bisi penemu. Mulut bini orang bukai nyangka manis baka ai manyi, lalu sium iya nyangka lichin baka minyak kana, tang lebuh utai nya udah lepas, iya nadai ninggalka utai bukai tang semina ati ti begedi enggau pemerinsa. Iya deka mai nuan nurun ngagai dunya pemati. Jalai ti ditengah iya nuju ngagai pemati. Iya enda niti jalai pengidup, tang limpang, lalu iya enda nemu utai ti nyadi. Nya alai pendingka aku, kita ke anak lelaki, lalu anang enda ingatka utai ti disebut aku. Kejangka diri jauh ari indu ke baka nya! Datai semak ngagai mua pintu iya deh kita enda tau! Enti kita datai semak ngagai indu ke baka nya, kita enda dibasa orang agi lalu kita deka mati biak dibunuh orang ke nadai pengasih. Orang kampar deka ngerampas semua pengaya kita, lalu utai ti udah ulih kita deka diempu orang bukai. Kita deka gali bedemuh nganti diri ke mati. Isi enggau gumpal isi kita deka lupis, lalu kita deka bejaku munyi tu, “Nama kebuah aku enggai diajar? Nama kebuah aku enggai nejuka orang madahka aku salah? Aku enggai mendingka bala pengajar aku. Aku enggai mendingka sida. Lalu aku tekala nya nemu diri kena pechat di mua orang mayuh.” Irup ai ari telaga nuan empu, ai ti rarat ari letung nuan empu. Kati mata ai nuan patut diachirka ngagai menua bukai, lalu ai sungai nuan rarat ba sebelah jalai raya? Awakka sida diempu nuan siku aja, lalu ukai dipekunsika nuan enggau orang kampar. Nya alai nuan patut lantang ati diau enggau bini ke enggau nuan jadi, ti bajik sereta imun baka rusa. Awakka pemajik iya ngasuh nuan lantang. Awakka iya nyerayung nuan ngena pengerindu. Anak, nama kebuah nuan rinduka indu bukai? Nama kebuah nuan inginka pemajik bini orang bukai? TUHAN meda semua utai ti dikereja nuan. Iya meda nuan di sebarang endur nuan bejalai. Dosa orang ke jai nyadi panjuk. Sida disintak jarin dosa sida empu. Sida mati laban sida enda nemu nagang diri. Pemeli sida empu ti munuh sida. Anak, kati nuan bisi udah besemaya deka betanggungjawapka utang orang bukai? Kati nuan bisi udah kala kena sintak jaku nuan empu, tauka disintak semaya nuan empu? Anak, enti nuan udah kala, nuan dipanjuk kuasa orang nya, tang tu jalai nuan mansutka diri ari nya: mansang nuan enggau jampat ngagai orang nya lalu minta iya ngelepaska nuan. Anang tinduk, tauka ngetu lalu belelak. Lepaska diri ari panjuk nya, baka burung tauka rusa ti rari ari orang ke ngasu. Orang ke ngelusu patut beratika chara semut idup. Sida nadai kepala, nadai pengulu, nadai raja, tang sida besimpanka pemakai lebuh musin panas, nyendiaka bekal nyadika penabat musin chelap. Ni pengelama orang ke ngelusu deka majak gali? Kemaya iya deka angkat? Ku iya bejaku, “Aku deka tinduk enda lama. Aku deka bekerendut dada lalu belelak enda lama.” Tang lebuh iya tinduk, penyeranta datai nyerang iya, baka perumpak ke besenyata. Orang ke nadai guna, orang ke jai, bejalai segau-segau nusui pemula. Sida ngichekka mata, lalu ngaga tanda ngagai pangan diri deka nipu nuan. Sekumbang sida ke ngereja nya, sida berunding deka ngereja penyai, nyungkak pengachau nyadi di semua endur. Ketegal nya, penusah ti besai deka nuntung sida lebuh sida enda ngadang, lalu sida deka bakal lalu mati. Anak, kereja utai ti diasuh apai nuan, lalu anang enda ingatka utai ti udah diajar indai nuan. Kingatka jaku seduai iya dalam ati nuan. Jaku ajar seduai iya deka nguluka nuan lebuh nuan bejalai, nyaga nuan lebuh malam hari, lalu meri nuan jaku lalau lebuh siang hari. Atur ti diberi seduai iya nya penampak ti manchar. Jaku rara seduai iya ulih ngajar nuan jalai pengidup. Jaku nya ulih nyaga nuan ari indu ke jai, ari jaku ti manis ti disebut bini orang bukai. Anang alah diuji pemajik sida. Anang alah dipanjuk jeling mata sida. Lelaki ulih meli indu sundal ngena setuku roti, tang pengawa butang deka ngabiska semua reta iya. Kati nuan ulih merap bara api, lalu gari nuan enda angus? Kati nuan ulih bejalai ngindik bara api, lalu kaki nuan enda betu? Baka nya meh pemesai penusah enti nuan tinduk enggau bini orang. Barang sapa ngereja nya, deka dituntung penusah. Orang enda mechat penchuri ke lapar enti iya ngenchuri pemakai. Tang enti iya kena tangkap, iya enda tau enda mayar tujuh kali lipat utai ti dichuri iya, lalu iya enda tau enda nyerahka semua reta tengkira iya. Tang lelaki ke butang endang sigi enda nemu berunding. Iya semina ngerusak diri empu. Iya enda dibasa agi, lalu iya deka dipalu, lalu dipechat belama iya. Laki pengabis udu ringat lebuh iya ninding, lalu iya malas enggau nadai besekat. Iya enggai nerima bayar. Ngemayuh ni pen utai diberi ngagai iya, enggai meh iya badu ringat. Anak, kingatka utai ti disebut aku, lalu anang enda ingatka utai ti diasuh aku kereja nuan. Kereja utai ti diasuh aku, nya baru nuan deka idup. Titihka ajar aku enggau naka penyimat, baka nuan ke bejimat nyaga mata nuan. Seruran kingatka ajar aku. Tuliska iya dalam ati nuan. Gaga penemu-dalam nyadika menyadi indu nuan, lalu gaga runding ti dalam nyadika pangan nuan ti pemadu nyempil. Penemu-dalam enggau runding ti dalam deka ngejangka nuan jauh ari bini orang, ari indu ke nguji ngulihka nuan ngena jaku ti manis. Nyadi sekali lebuh aku nilik ari mua jenila rumah aku, aku tepedaka bala orang bujang ke apin bisi peneleba, lalu aku meda siku ari bala sida nya beli. Iya bejalai ba jalai raya semak sukut ti alai siku indu diau. Iya bejalai mansa rumah indu nya lebuh lemai hari, lebuh hari nyau udah petang. Indu nya lalu betemu enggau iya. Indu nya ngena pekayan baka indu sundal ke nganta. Indu nya berani sereta enda nemu malu, lalu iya endang seruran bejalai nengah jalai raya tauka bediri nganti ba sukut jalai, kadang-kadang ba jalai raya, kadang-kadang di pasar. Indu nya lalu engkauk orang bujang nya, nyium iya. Seduai iya merening ngagai mua pangan diri, lalu ku iya bejaku, “Aku udah ngenjuk piring sehari tu tadi, lalu aku bisi dagin ari piring nya. Nya kebuah aku pansut ngiga nuan. Aku endang keran deka ngiga nuan, lalu diatu nuan bisi ditu! Aku udah mungkur peninduk aku ngena kain linin ti bechura, ti dibeli ari menua Ejip. Aku udah ngerabu peninduk aku enggau mur, garu, enggau kulit kayu manis. Aram tua beleman semalam-malam tu. Tua deka gaga ati ngimbit pangan diri. Laki aku nadai di rumah, laban iya udah bejalai. Iya mai mayuh duit lebuh iya mupuk, lalu iya enda pulai dalam kandang dua minggu tu.” Nya alai indu nya nguji ngulihka lelaki nya ngena pemajik iya, lalu lelaki nya alah laban pemanis jaku indu nya. Lelaki nya lalu tekala nya nyadi baka sapi ti lelaki ti deka disayat, baka rusa ti nempuh jarin. Laja deka ngebuska tungkul ati iya. Iya baka burung ti terebai nuju jarin - iya enda nemu diri deka tetempuhka utai ti tau nganu nyawa. Nya alai, kita ke anak, pendingka aku. Pendingka utai ti disebut aku. Anang nejuka indu ke baka nya ngulihka kita. Anang segau-segau begigaka iya. Mayuh lelaki udah rusak laban iya, lalu iya udah ngasuh mayuh lelaki mati, datai ke pemayuh sida nyau enda ulih diitung agi. Enti kita mansang ngagai rumah iya, kita niti jalai ti nuju ngagai dunya pemati. Nya meh jalai ti muntang ngagai pemati. Pendingka ulih kita! Penemu-dalam benung ngangauka kita. Sara-penemu minta diri didinga kita. Iya bediri ba tuchung bukit semak jalai raya enggau ba simpang jalai raya. Iya ngangau ari penama ngagai nengeri, ngimbai pintu ti besai. Ku iya, “Aku ngangauka semua kita. Aku ngangauka semua orang di dunya. Kati kita agi muda penemu? Awakka kita belajar ngansah penemu diri. Enti kita beli, awakka kita ngiga penemu. Pendingka jaku aku ti pemadu manah tu. Semua utai ti dipadahka aku ngagai kita, endang ngena magang. Utai ti disebut aku, endang utai ti bendar. Aku begedika pemula. Semua utai ti disebut aku, endang amat magang. Utai nya nadai bula siti, tauka nipu. Ba orang ke bisi runding ti dalam, semua utai nya terang magang. Ba orang ke nemu mayuh leman utai, semua utai nya endang nyata magang. Pilih atur ti diberi aku, ukai milih pirak. Pilih penemu, ukai milih emas ti pemadu manah. “Aku tu Penemu-dalam. Aku tu manah agi ari batu ti berega. Nadai utai ti dikinginka nuan ulih dibandingka enggau aku. Aku tu Penemu-dalam, lalu aku bisi runding ti dalam. Aku bisi penemu, lalu aku meri atur ti menyana. Reti nangika TUHAN nya begedika penyai. Aku begedika penyumbung, ati ti tinggi, ulah ti jai enggau jaku ti bula. Aku ngaga pelan lalu bejalaika pelan nya. Aku meretika utai, lalu aku kering. Aku tu ke nulung bala raja merintah, lalu nulung bala pemerintah ngaga adat ti manah. Genap iku pemerintah di dunya tu endang merintah ari tulung aku, lalu baka nya mega bala pemesai enggau orang ke tinggi pangkat. Aku rinduka orang ke rinduka aku. Barang sapa begigaka aku, deka tetemuka aku. Aku bisi pengaya enggau basa pengaya enggau pemujur ti deka diberi. Utai ti ulih kita ari aku manah agi ari emas ti pemadu manah, manah agi ari pirak ti pemadu tulin. Aku bejalai nengah pengelurus. Aku nitihka atur ti lurus, meri pengaya ngagai orang ke rinduka aku, ngemenuhka rumah sida enggau pengaya. “Aku tu ti pengabis dulu digaga TUHAN, ke terubah pengawa ti dikereja Iya dulu kelia. Aku endang digaga ba pun kelia, ke terubah iya digaga, sebedau dunya nyadi. Aku endang udah ada sebedau tasik bisi, sebedau mata ai bisi. Aku endang udah ada sebedau bukit digaga, sebedau munggu diengkahka ba endur sida, sebedau Allah Taala ngaga dunya enggau padang iya, sebedau tanah bisi. Aku endang udah bisi dia lebuh Iya ngengkahka langit ba endur iya, lebuh Iya mintarka langit atas tasik, lebuh Iya ngengkahka mua hari di langit, lebuh Iya muka mata ai di tasik lalu ngasuh ai tasik niki enda ngelui ikas ti diletak Iya. Aku endang udah bisi dia lebuh Iya nanam pugu dunya. Aku bisi ngimbai Iya baka orang ke landik ngaga pelan rumah, aku tu ke ngasuh ati Iya gaga tiap hari, lalu aku seruran lantang ati begulai enggau Iya, lantang ati ke dunya sereta gaga ati ke mensia. “Nya alai, kita ke agi biak, pendingka aku. Kereja utai ti diasuh aku, nya baru kita deka lantang diau. Pendingka utai ti diajar ngagai kita. Diau ngena pemintar. Anang enggai begunaka iya. Orang ke mendingka aku, deka idup lantang, orang ke diau ba mua pintu aku tiap hari, ke nganti ba penama ngagai rumah aku. Orang ke tetemuka aku, tetemuka pengidup, lalu TUHAN deka gaga ati ke sida. Orang ke enda tetemuka aku, ngemediska diri empu. Semua orang ke begedika aku, rinduka pemati.” Penemu-dalam udah ngaga rumah iya, lalu ngaga tujuh batang tiang ti besai dalam rumah nya. Iya udah ngasuh orang munuh siku jelu kena ngintu pengerami makai besai, nyampurka rempah dalam wain, lalu ngatur pemakai ba mija. Iya udah ngasuh bala orang gaji ti indu ngangau ari endur ti pemadu tinggi dalam nengeri nya: “Tama meh kita ke nadai nemu utai!” Lalu ngagai sida ke beli, iya nyebut, “Datai kitu, empa pemakai aku, lalu irup wain ti udah dichampur aku. Lengkaka pemeli nuan, lalu idup. Titi jalai penemu.” Enti nuan ngajar orang ke ngemesaika diri, nuan semina minta diri dipechat. Enti nuan nganu orang ke jai, nuan semina ngemediska diri. Anang sekali-kali ngajar orang ke ngemesaika diri. Sida deka begedika nuan ketegal nya. Tang enti nuan ngajar orang ke bepenemu-dalam, sida deka masa nuan. Enti nuan ngajar orang ke bepenemu-dalam, iya deka lebih agi bepenemu-dalam. Enti nuan ngajar orang ke lurus, penemu iya deka nambah. Nangika TUHAN nya pun penemu-dalam. Enti nuan nemu Iya ti Kudus, nuan ulih meretika utai. Penemu-dalam deka ngasuh nuan panjai umur. Nuan empu deka untung enti nuan bepenemu-dalam, lalu enti nuan nulak iya, nuan deka merinsa. Pemeli endang baka indu ke ragak, ke nadai nemu utai, sereta enda nemu malu. Iya duduk ba mua pintu rumah iya, tauka ba penuduk ba endur ti pemadu tinggi dalam nengeri nya, lalu ngangauka orang ke mansa, ke benung ngereja pengawa sida: “Tama meh kita ke nadai nemu utai!” Ku iya ngangauka sida ke beli, “Ai ti dichuri berasai manis agi. Roti ti dichuri berasai nyamai agi.” Orang ke ditipu iya enda nemu diri mati lebuh sida tama ngagai rumah iya, lalu orang ke udah tama ngagai rumah nya, diatu diau dalam dunya pemati. Tu jaku-dalam ti disebut Solomon: Anak ti bepenemu-dalam ngelantangka apai iya. Tang anak ti beli ngenusahka indai iya. Pengaya ti ulih nuan ngena chara ti jai, nadai mai penguntung ngagai nuan, tang ati ti betul ulih ngelepaska nuan ari pemati. TUHAN enggai nejuka orang ke lurus lapar, tang Iya deka nagang orang ke jai bulih utai ti dikinginka sida. Orang ke ngelusu deka diau seranta, tang orang ke bagas, deka nyadi kaya. Anak ti pintar ngetau lebuh musin panas, tang anak ke tinduk lebuh maya ngetau, mai pemalu. Orang ke lurus deka nerima berekat, tang mulut orang ke jai ngelalaika pemangah sida. Orang ke lurus deka dikingatka nyadi berekat, tang nama orang ke jai enda dikingatka agi. Orang ke mereti deka ngasika pesan, tang orang ke beli ke kutap-kutap ngapa, deka rusak. Orang ke lurus ati, diau likun, tang orang ke enda betul ati deka ditemu. Orang ke ngichekka mata, nyungkak pengachau nyadi, tang orang ke berani ngerara penyalah, mai pemaik. Jaku orang ke lurus nyadika pun pengidup, tang jaku orang ke jai ngelalaika pemangah sida. Ati ti begedi nyungkak pengachau nyadi, tang pengerindu ngelamun semua penyalah. Penemu ti dalam ditemu ba mulut orang ke mereti, tang orang ke beli deka disipat. Orang ke bepenemu-dalam nugungka penemu, tang orang ke beli, ke bejaku kutap-kutap mai pengerusak datai semak. Pengaya nyaga orang ke kaya, tang penyeranta ngerusak orang ke miskin. Upah orang ke lurus nya pengidup, tang upah orang ke jai nya dosa. Orang ke mendingka ajar, nuju ngagai pengidup, tang orang ke enggai dirara, tesat. Orang ke ngelalaika ati diri ti begedi, nya orang ke bula, lalu orang ke bejaku jai pasal orang bukai, nya orang ke beli. Mayuh agi jaku disebut, mayuh agi penyalah, tang orang ke enda pejaku, nya orang ke pintar. Jaku ti disebut orang ke lurus nya baka pirak ti tulin, tang runding orang ke jai, sigi nadai guna. Jaku ti disebut orang ke lurus, mai penguntung ngagai mayuh orang, tang orang ke beli mati laban pemeli diri. Berekat ti diberi TUHAN, ngasuh kaya, lalu TUHAN nadai nambahka ati ti tusah enggau pengaya nya. Orang ke beli rindu ngereja penyalah, baka ke bemain, tang orang ke mereti lantang ati ke ulah ti manah. Utai ti diketakutka orang ke beli, deka nuntung iya, tang utai ti dikinginka orang ke lurus, deka diberi ngagai iya. Lebuh biaubalai mansa, orang ke jai nadai agi, tang orang ke lurus deka tan belama iya. Baka asai chuka ti ba ngeli, enggau asap ba mata, baka nya mega orang ke ngelusu, ba orang ke ngasuh iya gawa. Nangika TUHAN, ngasuh umur panjai, tang orang ke jai deka pandak umur. Pengadang orang ke lurus, mai ngagai pengaga, tang utai ti diadang orang ke jai, deka puntan. TUHAN nyadika kuta ke orang ke lurus, tang ngerusak orang ke ngereja penyai. Orang ke lurus deka diau tegap, tang orang ke jai enda diau di menua tu. Jaku orang ke lurus mai penemu-dalam, tang dilah ti nyebut utai ti jai, deka ditetak. Orang ke lurus nemu utai ti patut disebut, tang orang ke jai nyebut utai ti jai. TUHAN begedika orang ke ngena dachin ti enda betul, tang Iya lantang ati ke timbang ti betul. Orang ke sumbung deka jampat dipechat. Enti nuan nemu ngemaruhka diri, nuan bepenemu-dalam. Enti nuan orang ke menyana, nuan diiring ati ti betul. Orang ke enda tau dikarapka, dirusak ati sida ti enda betul. Pengaya nadai pulai ke penguntung nuan lebuh nuan nyau deka mati, tang ati ti betul ulih ngelepaska nuan ari pemati. Ati ti betul ngasuh orang ke menyana nyamai agi diau, tang orang ke jai deka ngasuh diri empu alah. Pengelurus ngelepaska orang ke lurus ati, tang sida ke enda tau dikarapka, dipanjuk pengamu sida empu. Lebuh orang ke jai mati, pengadang sida sama mati enggau sida. Pengadang ti dipanggaika ba pengaya, sigi nadai mai penguntung. Orang ke lurus dilindung ari penusah, tang penusah nya deka ninggang orang ke jai. Jaku orang ke enda nangika Allah Taala, tau ngerusak nuan, tang penemu-dalam ari orang ke lurus, ulih ngelepaska nuan. Nengeri nyadi lantang lebuh orang ke lurus ati mujur ngereja pengawa, lalu orang manjung gaga ati lebuh orang ke jai mati. Nengeri deka tampak nama lebuh orang ke lurus merekatka iya, tang jaku orang ke jai deka ngerusak nengeri nya. Bejaku mechat orang nya pengawa ti beli. Enti nuan amat pintar, nuan enda bemunyi. Orang ke chabul mulut enda tau dikarapka nyimpan resia, tang nuan tau ngarapka orang ke amat tau dikarapka. Bansa deka alah enti iya nadai orang ngiring. Enti mayuh penyanding penemu, bansa deka diau likun. Enti nuan besemaya deka mayar utang orang ke enda dikelala nuan, nuan deka ngesal ila. Manah agi nuan enda malut diri enggau pekara nya. Indu ke nemu kasihka orang, patut dibasa, tang indu ke jai ulah, mai pemalu. Orang ke ngelusu enda tulihka duit, tang orang ke bagas deka nyadi kaya. Nuan nyamai diau enti nuan nelap. Enti nuan jai enggau orang, nuan semina ngemediska diri empu. Orang ke jai nadai bulih utai, tang enti nuan ngereja utai ti ngena, nuan tetap deka diberi upah. Barang sapa keras deka ngereja utai ti ngena, deka idup, tang barang sapa majak ngereja utai ti salah, deka mati. TUHAN begedika orang ke jai runding, tang rinduka orang ke ngereja utai ti ngena. Orang ke jai tetap deka diukum, tang orang ke lurus enda diukum. Ba indu ke enda nemu berunding, pemajik nya baka tinchin emas ti ba junggur babi. Utai ti dikinginka orang ke menyana, seruran mai penguntung. Lebuh orang ke jai bulih utai ti dikinginka sida, semua orang pedis ati magang. Orang siku meri enggau ati ti gerah mudah, tang iya nyadi lebih agi kaya. Siku ti bukai rangka, tang seruran suntuk. Orang ke meri enggau ati ti gerah mudah, deka nyadi kaya-raja. Orang ke nulung orang bukai, deka bulih tulung ari orang. Orang nyumpah orang ke besimpanka gandum nganti rega gandum niki, tang orang muji orang ke nyual gandum. Enti juluk ati nuan manah, nuan deka dibasa orang, tang enti nuan ngiga pengachau, nuan deka bulih pengachau. Orang ke manggaika diri ba pengaya, deka labuh baka daun lebuh musin ruruh, tang orang ke lurus deka galak baka daun lebuh musin panas. Orang ke ngenusahka diri sebilik, deka abis semua utai. Orang ke beli deka seruran nyadi kuli orang ke pintar. Pengelurus deka meri pengidup, tang pemangah deka muai pengidup. Orang ke menyana deka bulih upah di dunya tu. Nya alai kita patut nemu, orang ke jai sereta bedosa deka diukum. Orang ke rinduka penemu, minta orang ngajar sida. Kitai beli enti kitai pedis ati diajar. TUHAN gaga ati ke orang ke menyana, tang Iya ngukum orang ke bekira deka ngereja penyai. Penyai nadai meri pengelikun, tang orang ke lurus deka bediri tegap. Bini ke menyana deka ngasuh laki iya temegah sereta gaga, tang bini ke ngasuh laki iya malu nya baka penyakit riman ti makai tulang. Orang ke lurus ati deka manah enggau nuan, tang orang ke jai semina deka nipu nuan. Jaku orang ke jai, tau munuh, tang jaku orang ke lurus, deka ngelepaska orang ke diemba orang. Orang ke jai deka alah, lalu nadai ninggalka purih, tang orang ke lurus deka seruran bisi peturun. Enti nuan nemu berunding, nuan deka kena puji, tang enti nuan beli, orang deka mechat nuan. Manah agi nyadi orang ke sengapa-dia, ngulihka pengidup ke diri empu, ari ke ngaga diri tinggi pangkat, tang nadai utai diempa. Orang ke menyana nemu ngintu jelu tupi sida, tang orang ke jai, merinsaka jelu tupi sida. Orang bumai ke bagas, mayuh utai diempa, tang kitai beli enti kitai masau jam ngereja pengawa ti enda menuku. Orang ke jai semina deka ngiga utai ti jai ti deka dikereja sida, tang orang ke lurus deka bediri tegap. Orang ke jai dipanjuk jaku sida empu, tang orang ke lurus ati ulih ngelepaska diri ari penusah. Upah nuan bepanggai ba utai ti disebut nuan, enggau ba utai ti dikereja nuan. Nuan deka bulih utai ti patut diberi ngagai nuan. Orang ke beli seruran ngumbai diri ngena, tang orang ke pintar, mendingka jaku lalau. Lebuh orang ke beli ringat, iya lalu tekala nya mandangka pengeringat iya, tang orang ke pintar, nadai ibuhka diri dipechat. Lebuh nuan madahka utai ti amat, nuan ngereja pengelurus, tang pemula nadai mai nuan ngagai pengelurus. Leka jaku ti disebut enggau enda berunding, ngasuh ati balat telih baka pedang, tang jaku ti disebut enggau bejimat, ulih nyuman. Pemula enda ulih tan lama, tang utai ti bendar deka meruan belama iya. Orang ke bekira deka ngereja penyai, deka tekenyit ati ke penyai diri, tang orang ke bekereja ngulihka pemanah, deka bulih pengelantang. Orang ke lurus enda kena tinggang penusah, tang orang ke jai nadai bulih utai bukai, tang semina penusah aja. TUHAN begedika orang ke bula, tang Iya gaga ati ke orang ke ngamatka semaya diri. Orang ke pintar nadai kerah-kerah madahka penemu diri, tang orang ke beli ngayanka diri enda nemu utai. Enti nuan bebendar bekereja, nuan deka bulih kuasa, tang enti nuan ngelusu, nuan nyadi ulun. Pengirau ati nuan ulih muai pengelantang, tang jaku ti siru deka ngelantangka ati nuan. Orang ke lurus ulih ngiring pangan iya, tang jalai orang ke jai deka mai sida limpang. Enti nuan ngelusu, nuan nadai tulihka utai, tang enti nuan bebendar gawa, nuan deka bulih pengaya. Pengelurus nya jalai ti nuju ngagai pengidup, tang penyai nya jalai ti nuju ngagai pemati. Anak mit ti pintar, nemu mending lebuh apai indai sida ngerara lalu ngajar sida, tang orang ke tinggi ati nadai kala ngaku diri salah. Orang ke menyana, deka diupah ketegal utai ti disebut sida, tang orang ke penipu endang seruran ati deka mangah. Bejimat nyebut utai, kena nyaga seput diri. Orang ke bejaku enggau enda berunding, ngerusak diri empu. Baka ni pen pemalat orang ke ngelusu inginka utai, iya sigi enda tulihka utai nya, tang orang ke bagas deka bulih semua utai ti dikinginka iya. Orang ke lurus ati, begedika pemula, tang jaku ti disebut orang ke jai, ngemaluka iya empu, lalu iya dipechat. Pengelurus nyaga orang ke nadai penyalah, tang penyai ngasuh orang ke bedosa alah. Sekeda orang pura-pura ngumbai diri kaya, tang nadai utai. Orang bukai pura-pura ngaga diri baka ke seranta, tang kaya. Orang ke kaya enda tau enda ngena duit sida ngidupka nyawa diri, tang nadai orang ngemba orang ke seranta. Orang ke lurus baka penampak ti manchar terang, tang orang ke jai baka api kelita ti kelap-kelap deka padam. Ati ti tinggi semina mai ngagai penusah. Nuan amat pintar enti nuan nemu minta jaku lalau. Enti nuan mudah bulih pengaya, jampat agi ga nuan deka ngelenyauka iya. Enti nuan mar ngulihka pengaya, mayuh agi ga pengaya deka ulih nuan. Lebuh nuan nadai agi pengadang, ati nuan tusah, tang ati nuan gaga lebuh nuan bulih utai ti dikinginka nuan. Enti nuan nulak jaku lalau ti manah, nuan minta penusah. Tang enti nuan nitihka jaku lalau nya, nuan likun. Jaku ajar ari orang ke bepenemu-dalam, nya pun pengidup. Jaku ajar nya deka nulung nuan ngerarika diri lebuh nuan ditempuh utai ti tau nganu nyawa. Orang ke pandai berunding deka bulih basa, tang orang ke enda tau dikarapka deka nuju terus ngagai pengerusak. Orang ke nemu berunding endang selalu berunding dulu sebedau sida ngereja pengawa, tang orang ke beli ngayanka diri nadai nemu utai. Seruan ti enda tau dikarapka, endang ngasuh penusah nyadi, tang orang ke tau dikarapka, mai pemaik. Orang ke enggai diajar, deka diau seranta sereta dipechat, tang barang sapa mendingka jaku ajar, deka bulih basa. Naka meh pemanah enti nuan bulih utai ti dikinginka nuan! Orang ke beli enggai ngelengkaka penyai. Enti nuan begulai enggau orang ke bepenemu-dalam, nuan deka nyadi orang ke bepenemu-dalam baka sida. Enti nuan bepangan enggau orang ke beli, nuan deka rusak. Penusah endang nitihka orang ke bedosa ngagai semua endur, tang orang ke lurus deka diupah ngena utai ti manah. Orang ke menyana deka ninggalka pengaya ke uchu-ambu sida, tang pengaya orang ke bedosa deka diempu orang ke lurus. Tanah ti enda dipumai, tau mansutka mayuh pemakai ke orang ke seranta, tang orang ke enda lurus ati nagang tanah nya dipumai. Enti nuan enda nyipat anak nuan, reti nya nuan enda rinduka sida. Enti nuan amat rinduka sida, nuan enda tau enda disiplin sida. Orang ke lurus chukup utai diempa, tang orang ke jai endang seruran lapar. Ruang bilik didirika ulih penemu-dalam sida ke indu, tang diruntuhka ulih pemeli. Orang ke betul ati ngayanka diri nangika TUHAN, tang orang ke enda betul ati, ngeleseka TUHAN. Orang ke beli sereta sumbung kelalu deka bejaku. Jaku orang ke bepenemu-dalam nyaga sida empu. Enti nuan nadai sapi ti lelaki kena narit pengeradu tanah, bilik setor nuan puang, tang enti nuan ngena sapi ti lelaki ngeradu tanah, bilik setor nuan deka penuh laban gandum. Saksi ti tau dikarapka, endang selalu madahka utai ti bendar, tang saksi ti enda tau dikarapka, nadai nyebut utai bukai, tang semina nyebut utai ti bula aja. Orang ke ngenyumbungka diri, enda ulih nyadi orang ke bepenemu-dalam, tang orang ke nemu berunding, nyamai belajarka utai. Anang bepangan enggau orang ke beli, laban sida nadai utai ti tau diajar sida ngagai nuan. Nama kebuah orang ke pandai pintar? Laban iya nemu utai ti dikereja diri. Nama kebuah orang ke beli lap? Laban iya ngumbai diri nemu utai. Orang ke beli nadai bedulika diri bedosa, tang orang ke menyana minta diri diampun. Pengaga ati nuan endang enggi nuan empu. Dendam nuan endang enggi nuan empu. Nadai orang ulih bempu utai nya enggau nuan. Rumah orang ke menyana deka mengkang bediri, tang rumah orang ke ngereja penyai dirusak. Jalai ti dikumbai nuan jalai ti ngena, tau nuju ngagai pemati. Ketawa tau ngelalaika ati ti tusah. Lebuh ati ti lantang nyau nadai agi, ati ti tusah deka seruran bisi. Orang ke jai deka bulih utai ti setipak enggau penyai iya. Orang ke menyana deka diupah ketegal utai ti dikereja sida. Orang ke beli deka arapka sebarang utai, tang orang ke pintar deka nyingkang enggau bejimat. Orang ke mereti endang bejimat, ngambika sida enda kena laban penusah. Orang ke beli kelalu beguai-guai sereta enda berunding ngereja utai. Orang ke lengkar ngereja utai ti beli. Orang ke bepenemu-dalam mengkang enda ringat. Orang ke nadai nemu utai, bulih utai ti setipak enggau pemeli sida, tang orang ke pandai diupah enggau penemu. Orang ke jai deka meremi ngagai orang ke lurus, lalu ngemaruhka diri minta kasih ari sida. Nadai orang deka rinduka orang ke seranta. Indah orang ke berimbai pendiau enggau sida deh enda rinduka sida, tang orang ke kaya mayuh pangan. Enti nuan deka lantang ati, nuan enda tau enda nelap enggau orang ke seranta. Nuan bedosa enti nuan ngeleseka orang. Nuan deka dikarapka sereta dibasa orang, enti nuan ngereja utai ti manah. Enti nuan bekereja ngulihka penyai, nuan ngereja utai ti salah. Enti nuan gawa, nuan deka bulih pengidup. Enti nuan duduk berandau ngapa, nuan deka idup seranta. Orang ke bepenemu-dalam diupah ngena pengaya, tang orang ke beli deka dikelala ari pemeli sida. Orang ke nyadika saksi ngidupka nyawa lebuh iya madahka utai ti bendar. Lebuh iya madahka utai ti bula, iya nyual orang. Nangika TUHAN meri ati ti kempang enggau pengelikun ngagai orang enggau sida sebilik. Kati nuan deka nyeliahka pemati? Ati ti nangika TUHAN nya pun pengidup. Pemesai nama raja bepanggai ba pemayuh orang ke diperintah iya. Enti iya nadai orang diperintah, iya nadai guna. Enti nuan enda jampat ringat, reti nya nuan orang ke bepenemu-dalam, tang enti nuan jampat ringat, nuan semina mandangka pemeli diri. Ati ti lantang, ngasuh tubuh nuan bepengerai, tang ati ti kepapas baka penyakit riman. Enti nuan nekanka pengidup orang ke seranta, nuan ngeleseka Allah Taala ti ngaga sida. Tang enti nuan nelap enggau orang ke seranta, reti nya nuan nyembah Allah Taala. Orang ke jai ngasuh sida empu labuh ngena penyai ti dikereja sida, tang orang ke menyana dijaga ati sida ke rentang. Penemu-dalam endang bisi dalam semua runding orang ke nemu berunding, tang orang ke beli nadai penemu-dalam. Pengelurus ngemesaika nama bansa. Dosa mai pemalu ngagai bansa. Raja gaga ati ke bala pemesai ti landik gawa, tang iya ngukum sida ke enda ngereja utai ti diasuh iya. Saut ti nelap ngasuh orang badu agi ringat, tang jaku ti kasar ngasuh orang ringat. Lebuh orang ke bepenemu-dalam bejaku, sida ngaga penemu manah didinga, tang orang ke beli mantaika penemu ti nadai reti. TUHAN meda utai ti nyadi di semua endur. Iya nengkilaka kitai, nemuka kitai ngereja utai ti manah tauka ngereja utai ti jai. Jaku ti siru mai pengidup, tang jaku ti jai ngelemika semengat. Nuan beli enti nuan enggai mendingka ajar apai indai nuan, tang nuan bepenemu-dalam enti nuan nerima jaku rara enggau ajar ari sida. Orang ke lurus nemu nyimpan pengaya sida, tang orang ke jai ngelenyauka pengaya sida lebuh maya suntuk. Penemu disiburka orang ke bepenemu-dalam, ukai disiburka orang ke beli. TUHAN gaga ati lebuh orang ke menyana besampi, tang Iya begedika piring ti dibai orang ke jai. TUHAN begedika ulah orang ke jai, tang rinduka orang ke ngereja utai ti ngena. Enti nuan ngereja penyalah, nuan deka balat diukum. Nuan deka mati, enti nuan enggai diajar. Indah dunya pemati deh enda ulih nagang TUHAN nemu utai ti dalam iya. Nya alai, baka ni ku kitai ulih ngelalaika runding kitai ari Allah Taala? Orang ke sumbung enggai ditunjukka orang penyalah. Sida nadai kala minta jaku lalau ari orang ke dalam agi penemu ari sida. Lebuh orang lantang ati, sida tuchum, tang lebuh ati sida enda lantang, mua sida berupai tusah. Orang ke mereti, begigaka penemu, tang mulut orang ke beli beridup ba pemeli. Orang ke seranta endang seruran merinsa diau, tang orang ke lantang ati endang seruran nyamai diau. Manah agi diau seranta lalu nangika TUHAN, ari ti nyadi kaya tang bisi penusah. Manah agi makai sayur begulai enggau orang ke dikerinduka nuan, ari ke makai dagin ti pemadu nyamai tang ati seruran begedi. Ati ti lengkar ngasuh bekelikuh, tang ati ti liat mai pemaik. Enti nuan ngelusu, nuan deka tusah idup di semua endur, tang enti ati nuan betul, nuan nadai utai ngenusah. Anak ti bepenemu-dalam ngelantangka apai. Tang orang ke beli nadai basa enggau indai diri. Orang ke beli gaga ke pemeli, tang orang ke bepenemu-dalam deka ngereja utai ti ngena. Enggau naka ulih giga semua jaku lalau, nya baru nuan deka mujur. Enti nuan nadai bulih jaku lalau, pengawa nuan deka puntan. Naka meh pengaga tetemuka leka jaku ba maya ti ngena. Orang ke bepenemu-dalam niti jalai ti nuju ke atas ngagai pengidup, ukai niti jalai ti nuju ke baruh ngagai pemati. TUHAN deka ngerusak rumah orang ke sumbung, tang Iya deka nyaga reta tengkira indu ke balu. TUHAN begedika runding ti jai, tang Iya rinduka jaku ti siru. Enti nuan nguji ngulihka penguntung ngena jalai tipu, ruang bilik nuan empu deka rusak. Anang makai suap, nya baru umur nuan deka panjai agi. Orang ke menyana berunding dulu sebedau sida nyaut. Orang ke jai jampat nyaut, tang saut sida mai penusah. Lebuh orang ke menyana besampi, TUHAN mendingka sida, tang TUHAN enda mendingka orang ke jai. Mua ti tuchum ngasuh nuan lantang ati, lalu berita ti manah ngasuh ati nuan berasai nyamai agi. Enti nuan mending lebuh orang ngajar nuan, reti nya nuan bepenemu-dalam. Enti nuan enggai diajar, nuan ngemediska diri empu. Enti nuan nerima jaku ti nunjukka penyalah nuan, nuan deka lebih agi bepenemu-dalam. Bebasaka TUHAN nya pelajar ti manah. Nuan enda tau enda baruh ati, sebedau nuan bulih basa. Mensia nyangka begagaka pelan, tang TUHAN ti meri pemutus penemu. Nuan nyangka ngumbai semua utai ti dikereja nuan ngena magang, tang TUHAN Empu ke meresa juluk ati nuan. Serahka utai ti dikereja nuan ngagai TUHAN, nya baru pelan nuan deka mujur. Semua utai ti udah digaga TUHAN endang bisi tuju magang, lalu tuju orang ke jai nya pengerusak. TUHAN begedika semua orang ke sumbung. Iya enggai sekali-kali nejuka sida enda diukum. Taluk sereta tetap ati, nya baru dosa nuan diampun. Ngasika TUHAN, nya baru nuan enda dituntung utai ti jai. Lebuh nuan ngerinduka ati TUHAN, nuan ulih ngaga munsuh nuan nyadi pangan. Manah agi bulih duit mimit ngena chara ti lurus, ari ke bulih mayuh duit ngena chara ti enda lurus. Nuan nyangka ngaga pelan, tang TUHAN ti ngatur utai ti dikereja nuan. Raja bejaku ngena kuasa ti diberi Allah Taala. Pemutus penemu iya endang seruran ngena. TUHAN ngasuh nuan ngena dachin enggau takar ti betul, lalu anang ngelakar lebuh nuan bejual. Raja enggai meda penyai, laban utai ti ngasuh perintah kering nya pengelurus. Raja keran deka ningaka utai ti ngena, lalu deka rinduka orang ke nyebut utai ti ngena. Orang ke bepenemu-dalam deka nguji ngelantangka ati raja. Enti raja ringat, orang bisi deka kena bunuh. Pengasih raja nya baka mua hari ti mai ujan lebuh musin bungai: iya meri pengidup. Manah agi bisi penemu-dalam enggau penemu, ari ke bisi emas enggau pirak. Orang ke menyana, ngelaungka penyai. Nya alai bejimat - laban nya nyangka ulih ngidupka nyawa nuan. Penyumbung nuju ngagai pengerusak, lalu ati ti tinggi ngasuh nuan rebah. Manah agi ngembuan ati ti baruh lalu diau seranta, ari ti sumbung lalu enggau orang bekunsika perapasan. Peratika utai ti diajar ngagai nuan, nya baru nuan deka mujur. Arapka TUHAN, nya baru nuan deka lantang. Orang ke bepenemu-dalam sereta tuai runding, deka tampak nama laban iya nemu meretika utai. Manah agi jalai jaku iya, rindu agi ga orang nitihka iya. Ba orang ke pintar, penemu-dalam nya pun pengidup, tang nuan semina masau jam ngapa ngajar orang ke beli. Orang ke bepenemu-dalam, berunding dulu sebedau sida bejaku. Utai ti disebut sida dipendingka orang magang. Jaku ti siru nya baka ai manyi - manis sereta manah ke pengerai nuan. Jalai ti dikumbai nuan ngena, tau nuju ngagai pemati. Perut ti lapar ngasuh orang bebendar agi gawa, laban iya keran deka bisi utai diempa. Orang ke jai begigaka jalai ngemediska orang. Indah leka jaku ti disebut iya deh jai magang. Orang ke jai bejakuka orang. Sida nyungkak pengachau nyadi lalu mechahka kaul entara pangan. Orang ke mangah nipu pangan, lalu mai sida ngagai penusah. Bejaga ari orang ke tuchum sereta ngichekka mata ngagai nuan; sida udah berundingka utai ti jai. Upah orang ke lurus nya umur ti panjai; bulu pala ti buban nya makota ti bemulia. Manah agi ngembuan ati ti liat, ari ke ngembuan kuasa, lalu manah agi enti nuan ulih merintah ati diri, ari nuan ti ngalahka nengeri. Orang bechabut undi kena ngiga peneka Allah Taala, tang Allah Taala empu ke meri pemutus penemu. Manah agi makai kerak roti tang bisi pemaik dalam ati, ari ke rami makai besai dalam rumah ti penuh laban pengachau. Orang gaji ti pintar deka bekuasa atas anak tuan iya ti nadai guna, lalu nerima sebagi ari pesaka tuan iya. Emas enggau pirak diuji ngena api, lalu ati orang diuji TUHAN. Orang ke jai mendingka penemu ti jai, lalu orang ke bula mendingka pemula. Enti nuan beduan orang ke seranta, nuan ngeleseka Allah Taala ti ngaga sida. Nuan deka diukum, enti nuan gaga meda orang kena laban penusah. Aki temegahka uchu diri, baka anak ke temegahka apai indai sida. Orang ke dibasa orang, enda nusui utai ti bula, lalu orang ke beli nadai nyebut utai ti menyana. Sekeda orang ngumbai makai suap nya baka kereja ajih. Sida ngarapka diri ulih ngereja semua utai. Enti nuan deka ngasuh orang rinduka nuan, ampun sida lebuh sida ngereja utai ti salah ngagai nuan. Enti nuan seruran ingatka penyalah sida, kaul entara kita deka rusak. Orang ke pintar bulih agi pelajar ari jaku anu, ari orang ke beli, ke disipat seratus kali. Pemati deka datai baka seruan ti jai, ngagai orang ke jai, ke semampai nyungkak pengachau nyadi. Manah agi betemu enggau indu beruang ti udah lenyau anak, ari ke betemu enggau orang ke beli, ke ngiruh diri ngereja pengawa ti nadai reti. Enti nuan malas pemanah ngena penyai, nuan enda ulih muai penyai ari rumah nuan. Pun kelikuh nya baka tekat ai ti baru deka runtuh. Padamka kelikuh nya enggau jampat. Ngukum orang ke nadai penyalah, tauka ngelepaska orang ke jai, nya pengawa ti sama dipegedika TUHAN. Nadai guna orang ke beli bekenaka duit ngulihka pelajar, laban iya enda nemu berunding. Pangan endang seruran ngayanka pengerindu sida. Nama guna bisi kaban belayan enti sida enda enggau natka penusah? Semina orang ke enda nemu berunding aja ti deka besemaya betanggungjawapka utang orang bukai. Reti rinduka dosa nya rindu ngaga pengachau. Enti nuan seruran temegah, reti nya nuan minta penusah. Barang sapa berundingka utai ti jai, lalu bejakuka pasal penyai, nadai ulih ngarapka diri ulih tetemuka utai ti manah, tang semina penusah aja. Apai indai ke bisi anak ti ngereja utai ti beli, nadai utai bukai tang semina ati ti tusah sereta sinu. Ati ti selalu lantang ngasuh nuan bepengerai. Ati ti selalu tusah deka ngasuh nuan mupuk mati. Hakim ti jai belalai makai suap, lalu atur ti lurus enda dipejalaika. Tuju orang ke pintar nya ngulihka penemu-dalam, tang orang ke beli nadai meruan tuju. Anak ke beli ngenusahka ati apai, sereta ngemaluka indai. Kitai enda patut ngukum orang ke nadai penyalah, tauka orang ke ngereja utai ti ngena. Orang ke mereti, enda seruran kutap-kutap. Orang ke enda bemunyi nya orang ke bepenemu-dalam. Indah orang ke beli deh kadang-kadang dikumbai bepenemu-dalam sereta nemu berunding, enti sida enda bejaku. Orang ke enda nemu begulai enggau orang bukai, semina berundingka diri empu aja. Sida enda besetuju enggau semua utai ti dikumbai orang bukai ngena. Orang ke beli enda beduli sekalika iya mereti tauka enda. Iya semina keran deka ngayanka pemintar diri aja. Dosa enggau pemalu endang begulai. Enti orang enda agi bebasaka nuan, sida ngeleseka nuan. Jaku orang tau meri penemu, ti dalam baka tasik, sereta chiru baka ai sungai. Kitai salah enti kitai ngeringka orang ke salah, lalu nagang orang ke nadai penyalah nerima atur ti lurus. Lebuh orang ke beli ngepunka kelikuh, iya minta diri dipalu orang. Lebuh orang ke beli mansutka jaku, iya ngerusak diri empu. Iya dipanjuk jaku diri empu. Pengawa ti bejakuka orang asai ti nyamai. Naka meh pemalat ati kitai tetenguk deka nelan iya! Orang ke ngelusu endang jai. Iya baka orang ke rindu ngerusak utai. TUHAN baka menara ti tegap, endur alai orang ke lurus tau datai lalu diau enggau likun. Tang orang ke kaya ngumbai pengaya sida ulih nyaga sida, baka dinding kuta ti tinggi sereta tegap, ti ngelingi nengeri. Nadai orang tau bulih basa enti iya enda ngemaruhka diri. Orang ke sumbung endang bejalai ngagai pengerusak. Mending dulu sebedau nuan nyaut. Enti nuan enda mending dulu, nuan beli sereta enda nemu bebasaka orang. Pengeras nuan deka idup ulih ngasuh nuan tan lebuh nuan sakit, tang enti nuan ngelengkaka pengeras ati nuan nya, nuan nadai utai diadang agi. Orang ke nemu berunding endang seruran gagit ati sereta sedia deka belajar. Kati nuan deka betemu enggau orang ke tinggi pangkat? Bai pemeri, nya baru nuan nyamai betemu enggau iya. Orang ke terubah mansutka jaku dalam kot endang munyi ti ngena belama, sebedau orang ke ngelaban iya belabuh nanya iya. Enti dua iku orang ke sama bekuasa belaban dalam kot, seduai iya tau bechabut undi kena seduai iya mutuska pekara nya. Tulung kaban belayan nuan, nya baru sida deka nyaga nuan baka dinding kuta nengeri ti tegap, tang enti nuan belaya enggau sida, sida deka nikupka pintu sida lalu enggai ngemendarka nuan tama. Nuan deka betanggungjawapka utai ti deka nyadi ketegal semua jaku ti disebut nuan. Utai ti disebut nuan tau ngidup tauka ngerusak nyawa. Nya alai nuan enda tau enda betanggungjawapka utai ti deka nyadi ba nuan ketegal jaku nuan empu. Enti nuan bulih bini, nuan bulih utai ti manah. Nya ngayanka TUHAN manah enggau nuan. Lebuh orang ke seranta bejaku, sida enda tau enda bejaku enggau penuh basa, tang lebuh orang ke kaya nyaut, sida bejaku sumbung. Sekeda orang bepangan enda lama aja, tang sekeda pangan taluk agi ari menyadi diri. Manah agi seranta tang ngembuan ati ti betul, ari ti beli sereta bula. Semina ransing aja enda chukup enti kita nadai penemu. Enti kita enda liat ati, kita deka kena laban penusah. Sekeda orang ngerusak diri empu ngereja pengawa ti beli, lalu udah nya besalah TUHAN. Orang ke kaya endang selalu bulih pangan ti baru, tang orang ke seranta dilengkaka pangan sida empu. Enti nuan nusui utai ti bula dalam kot, nuan deka diukum - nuan enda ulih nyeliahka ukum nya. Semua orang nguji ngulihka ati orang ke tinggi pangkat. Semua orang deka bepangan enggau orang ke meri sida utai. Indah kaban belayan orang ke seranta deh enda nemu begunaka iya. Nya alai patut ga iya nadai pangan. Bebendar ni pen iya ngiga pangan, nadai ga iya tetemuka orang ke deka nyadi pangan iya. Kasihka diri empu lalu belajar enggau naka ulih. Udah nya kingatka utai ti dipelajarka nuan. Nya baru nuan deka nyadi kaya-raja. Nadai orang ke bula dalam kot ulih nyeliahka ukum. Iya nadai penyadi agi. Orang ke beli enda patut diau nyamai, lalu ulun enda patut merintah orang ke peturun raja. Enti nuan orang ke mereti, nuan deka nagang diri lengkar. Lebuh orang ngereja utai ti salah ngagai nuan, nuan deka dipuji orang enti nuan enda bedulika penyalah nya. Pengeringat raja sebaka enggau penginggar singa ti negung, tang pengasih iya baka ujan. Anak ke beli ngerusak apai indai sida. Bini ke ituk sebaka munyi enggau ai ti enda ngetu nitik. Orang tau bulih rumah enggau duit ari apai indai, tang semina TUHAN siku aja ke ulih meri bini ti mereti. Awakka nuan majak ngelusu. Tinduk meh nuan, tang nuan deka lapar. Titihka adat Allah Taala lalu nuan deka panjai agi umur. Enti nuan enda ngasika adat nya, nuan deka mati. Lebuh nuan meri utai ngagai orang ke seranta, nuan baka ke nyali utai ngagai TUHAN, lalu TUHAN deka mayar nuan. Disiplin anak nuan lebuh sida agi biak lalu udah nemu meretika utai. Enti nuan enda, nuan nulung sida ngerusak diri empu. Enti orang lengkar, awakka iya betanggungjawapka utai ti nyadi ketegal pengelengkar iya empu. Enti nuan ngelepaska iya ari penusah iya sekali, nuan deka ngelepaska iya baru. Pendingka jaku lalau, lalu terima jaku ajar, ngambika nuan bulih penemu-dalam kena nuan idup jemah ila. Mensia nyangka bekiraka mayuh macham pelan, tang semina peneka TUHAN aja deka nyadi. Kitai patut nemu malu ke pengamu diri. Orang ke seranta lantang agi diau ari orang ke bula. Enti nuan nangika TUHAN, nuan deka panjai umur, idup puas ati sereta nadai kena laban utai ti tau ngemedis. Sekeda orang kelalu ngelusu datai ke sida nyau enda tesuapka pemakai. Penyumbung patut diukum, ngambika orang ke nadai nemu utai, ulih belajar ari nya. Enti nuan bepenemu-dalam, nuan deka mereti lebuh nuan diajar. Semina orang ke enda nemu malu sereta enda nemu bebasa, deka merinsaka apai diri, tauka muru indai iya ari rumah. Anak, lebuh nuan badu belajar, nuan deka jampat enda ingatka utai ti udah ditemu nuan. Enti orang ke nyadika saksi keran deka ngemediska orang, atur ti lurus enda ulih dipejalaika. Orang ke jai endang rinduka penyai. Orang ke sumbung sereta beli, tetap deka dipalu. Enti nuan kelalu ngirup, nuan deka ragak sereta beli. Kitai beli enti kitai nejuka diri mabuk. Takutka raja ke ringat nya baka ke takutka singa ti negung. Enti kitai nyungkak iya ringat, kitai semina munuh diri. Orang ke beli nemu ngepunka kelikuh, tang utai ti manah dikereja nya ngejangka diri jauh ari kelikuh nya. Orang bumai ke ngelusu lalu enda ngeradu tanah umai diri ba maya ti patut, nadai utai diketau. Runding mensia baka ai ti ba telaga ti dalam, tang orang ke ngembuan runding ti dalam, ulih ngauk ai nya. Semua orang bela madahka penaluk enggau penetap ati diri, tang uji giga orang ke endang amat taluk sereta tetap ati! Bala anak amat diberekatka enti sida bisi apai ke lurus ati, sereta ngereja utai ti ngena. Raja duduk ngakim, lalu iya ngelala penyai lebuh iya meda penyai. Kati orang ulih ngumbai diri nadai udah ngereja penyalah, lalu ngumbai semua dosa iya udah dibuai magang? TUHAN begedika orang ke ngena timbang enggau takar ti enda betul. Indah anak mit deh nemu ngayanka pendiau diri ari utai ti dikereja sida. Kita nemu enti sida nya betul ati sereta manah. TUHAN udah meri kitai mata kena meda, enggau pending kena mending. Enti nuan selalu tinduk, nuan deka nyadi orang ke seranta. Enti nuan seruran bekereja, nya baru nuan deka mayuh utai diempa. Orang ke meli utai endang selalu mutap madahka rega utai nya kelalu mar, tang udah nya iya mupuk lalu temegahka diri nemu betawar. Enti nuan nemu utai ti dikejakuka nuan, nuan bisi utai ti lebih agi berega ari emas tauka batu ti berega. Barang sapa besemaya deka betanggungjawapka utang orang kampar, patut nyerahka reta tengkira diri kena nyamin utang nya. Utai ti ulih nuan ngena jalai tipu, tau ngasuh nuan gaga ati baka ke makai pemakai ti pemadu nyamai, tang lama laun utai nya deka baka asai pasir dalam nyawa nuan. Giga jaku lalau ti manah, nya baru nuan deka mujur. Anang mansang beperang enti nuan apin ngaga pelan dulu. Orang ke chabul mulut enda ulih nyimpan resia. Nya alai anang begulai enggau orang ke kelalu deka bejaku. Enti nuan nyumpah apai indai nuan, seput nuan deka padam baka lampu ti padam dalam petang. Makin mudah agi nuan bulih pengaya, makin kurang agi ga guna pengaya nya ba nuan. Anang malas penyai ngena penyai. Panggaika pengarap nuan ba TUHAN, nya baru Iya deka nulung nuan. TUHAN begedika orang ke ngena dachin enggau timbang ti enda betul. TUHAN udah nentuka jalai ti deka ditengah kitai. Nya alai, kati ku orang ulih meretika tuju pengidup diri? Berunding enggau manah sebedau nuan besamaya deka ngenjuk piring ngagai Allah Taala, enggai ke nuan ngesal ila. Raja ti bepenemu-dalam deka nemu sapa ti ngereja penyalah, lalu iya deka ngukum orang nya enggau nadai pengasih. TUHAN udah meri kitai runding enggau ati ti nemu ngelala utai ti manah enggau utai ti jai. Kitai enda ulih ngelalaika diri ari kitai empu. Raja deka mengkang megai perintah seagi-agi iya merintah enggau ati ti betul, lurus sereta manah. Kitai muji pengering sida ke agi biak, lalu kitai masa orang ke buban bulu pala. Kadang-kadang kitai semina ngubah ulah diri lebuh kitai udah ngasaika pemedis. TUHAN ngatur runding raja, ngemudah Iya ke ngatur arus sungai. Nuan nyangka ngumbai semua utai ti dikereja nuan ngena magang, tang ingat: TUHAN meresa juluk ati nuan. Kereja aja utai ti ngena sereta manah. Utai nya ngerinduka ati TUHAN, lebih agi ari piring ti dibai ngagai Iya. Orang ke jai diperintah ati ti sumbung sereta tinggi. Nya dikumbai bedosa. Bejimat lebuh nuan ngaga pelan, nya baru nuan deka bulih mayuh utai. Enti nuan kelalu beguai-guai ngereja utai, nuan nadai kala chukup utai. Pengaya ti ulih nuan ngena jalai tipu, deka jampat lesap, tang semina lebuh iya udah mai nuan ngagai pemati. Orang ke jai deka diukum ketegal pemangah sida, laban sida enggai ngereja utai ti ngena. Orang ke ngereja penyalah endang bula magang, tang orang ke nadai penyalah, ngereja utai ti ngena. Manah agi diau ba perabung rumah ari ti diau enggau bini ke ituk. Orang ke jai endang seruran inginka penyai. Sida nadai nemu kasihka orang. Lebuh orang ke sumbung diukum, orang ke enda nemu berunding bulih pelajar ari nya. Orang ke bepenemu-dalam deka bulih pelajar ari utai ti diajar ngagai iya. Allah Taala ti Lurus, nemu utai ti nyadi dalam rumah orang ke jai, lalu Iya deka ngerusak orang ke jai nya. Enti nuan enggai mendingka sabak orang ke seranta, sabak nuan empu ti minta tulung enda mega didingaka. Enti orang ringat ngagai nuan, pemeri ti diberi nuan ngena jalai belalai deka ngasuh iya badu agi ringat. Lebuh atur ti lurus udah dipejalaika, orang ke menyana deka gaga ati, tang orang ke jai deka tusah ati. Pemati endang meruan nganti orang ke limpang ari runding ti manah. Ngelantangka diri ngena pengaya, ngena wain, enggau pemakai ti manah, enda ngasuh nuan kaya. Orang ke jai ngasuh diri ditinggang pemerinsa ti deka dikena sida merinsaka orang ke menyana. Manah agi diau di menua puang ari ti diau begulai enggau bini ke ituk sereta selalu mutap. Orang ke bepenemu-dalam diau kaya sereta nyamai, tang orang ke beli ngerua duit sida ngenyampat sida bulih duit nya. Anang enda nelap sereta betul ati, nya baru nuan deka panjai umur. Orang bukai deka bebasaka nuan, lalu manah enggau nuan. Orang ke pintar ulih ngalahka nengeri ti dijaga bala orang ke kering, lalu ngerusak kuta ti dikena sida ngetanka diri. Enti nuan enggai ke diri kena laban penusah, nuan enda tau enda bejimat nyebut utai. Tunjukka ngagai aku orang ke sumbung, lalu aku deka nunjuk ke nuan orang ke tinggi ati, ti sumbung, ti enda nemu berundingka orang bukai. Orang ke ngelusu, ke enggai gawa, semina munuh diri empu. Sida semina berundingka utai ti dikinginka sida. Tang orang ke lurus, ulih meri utai enggau ati ti gerah mudah. TUHAN begedi lebuh orang ke jai meri Iya piring, lebih agi lebuh sida ngenjuk piring nya ngena juluk ati ti jai. Saksi orang ke bula enda tau dikarapka, tang jaku orang ke berundingka pekara enggau silik, tau diterima. Orang ke lurus andal ati ke diri empu, tang orang ke jai naka ulih pura-pura ngaga diri baka orang ke lurus. Penemu-dalam, pemandai, penalam runding mensia enda ulih nulung nuan, enti TUHAN ngelaban nuan. Nuan tau nyendiaka kuda kena beperang, tang TUHAN ti ngasuh nuan menang. Pilih pemanah nama, ukai milih pengaya, lalu pilih pengasih, ukai milih pirak enggau emas. Orang ke kaya enggau orang ke seranta endang sebaka: seduai iya sama digaga TUHAN. Orang ke nemu berunding deka meda penusah datai, lalu belalai; tang orang ke enda berunding deka terus bejalai lalu tetempuhka penusah nya, lalu merinsa ketegal nya. Upah orang ke baruh ati sereta nangika TUHAN nya pengaya, basa enggau umur ti panjai. Enti nuan sayauka nyawa diri, seliahka panjuk ti tau nyintak orang ke jai ba jalai raya. Ajar anak mit jalai idup, nya baru sida deka ingatka ajar nya seumur idup. Orang ke seranta nyadi ulun orang ke kaya. Enti nuan nginjau duit, nuan nyadi ulun orang ke nyali nuan duit nya. Enti orang nanam atur ti enda lurus, iya deka ngetau penusah, lalu iya deka badu agi nekanka pengidup orang bukai. Orang ke gerah mudah magi pemakai sida enggau orang ke seranta, deka bulih berekat. Buru orang ke sumbung, nya baru penyarut, laya, enggau bejai pangan diri nadai agi. Enti nuan rinduka ati ti tuchi, enggau jaku ti siru, nuan deka nyadi pangan raja. TUHAN deka nyaga penemu, tang Iya ngalahka jaku orang ke bula. Orang ke ngelusu diau di rumah, laban kenu ku sida, singa deka munuh sida enti sida pansut ke luar. Pengawa butang nya panjuk. Pengawa butang nyintak orang ke dikeringatka TUHAN. Anak mit endang selalu ngereja utai ti beli, sereta enda berunding, tang enti sida disipat, nya baru sida nemu ngubah ulah diri. Enti nuan meri pemeri ngagai orang ke kaya, tauka nekanka pengidup orang ke seranta kena nuan ngulihka pengaya, nuan empu deka suntuk. Pendingka aku, laban aku deka ngajar nuan utai ti udah disebut orang ke bepenemu-dalam. Peratika ajar sida, nya baru nuan deka gaga ati lebuh nuan ingatka ajar nya, lalu ulih nyebut ajar nya baru ngagai orang bukai. Aku ngasuh nuan manggaika pengarap nuan ba TUHAN. Nya kebuah aku ngajar utai nya ngagai nuan diatu. Aku udah nuliska tiga puluh iti jaku ke nuan, ti ngundan penemu enggau jaku lalau ti manah, ti deka ngajar nuan utai ti dikumbai pemendar. Udah nya lebuh nuan diasuh ngiga pemendar nya, nuan deka pulai baru mai saut ti ngena. Anang ngambi ulih ba orang ke seranta, ketegal iya seranta, tauka ngambi ulih ba orang ke nadai daya dalam kot, laban TUHAN deka bejaku ngarika sida, lalu deka ngambi nyawa orang ke nguji ngambi nyawa sida. Anang bepangan enggau orang ke lengkar sereta mangah, enggai ke nuan dirampit ulah sida, lalu disintak panjuk. Anang besemaya deka betanggungjawapka utang orang bukai, enggai ke nuan enda ulih mayar utang nya, lalu sida deka ngambi peninduk nuan. Anang nginsitka entara tanah ti udah diletak aki ini nuan. Kati nuan bisi meda orang ke landik gawa? Iya deka bekereja ke raja; iya enda bekereja ke orang ke sengapa-dia. Lebuh nuan duduk makai enggau orang ke tinggi pangkat, peratika sapa orang nya. Enti nuan bam makai, tagang diri. Anang tetengukka pemakai ti dienahka iya ngagai nuan, nyangka iya nguji nipu nuan. Anang ngelelakka diri ngiga pengaya, lalu patut nemu nagang diri. Duit nuan tau abis dalam sekejap mata aja, baka ke bisi sayap, lalu terebai baka burung menaul. Anang makai ba mija orang ke rangka, lalu anang tetengukka pemakai ti dienahka iya ngagai nuan. Ku orang nya bejaku, “Anang nagang diri. Nyengkau baru.” Tang nya ukai jaku ti bendar. Nuan deka mutahka semua utai ti udah diempa nuan, lalu semua jaku puji nuan deka tebasau ngapa. Anang bejaku ngagai orang ke beli, laban iya deka semina ngeleseka penemu nuan. Anang sekali-kali mindahka kelai entara tanah orang, tauka ngambi tanah orang ke nadai apai, laban TUHAN ti bekuasa nyaga sida, lalu Iya deka bejaku ngarika sida ngelaban nuan. Pendingka pengajar nuan, lalu pelajarka utai enggau naka ulih nuan. Anang enda disiplin anak. Enti nuan nyipat iya, nya enda munuh iya. Enti nuan nyipat iya, nya tau nyelamatka iya ari neraka. Anak, enti nuan orang ke bepenemu-dalam, ati aku deka gaga amat. Aku deka temegah ati lebuh aku ninga nuan mansutka penemu-dalam. Anang ngining orang ke bedosa, tang awakka nuan seruran nangika TUHAN, nya baru nuan deka diau lantang jemah ila, lalu utai ti diadang nuan, enda lenyau. Pendingka jaku aku, anak. Anang enda bepenemu-dalam lalu berunding enggau manah ke jalai nuan idup. Anang begulai enggau orang ke pengirup, ti bam, laban orang ke pemabuk enggau orang ke bam deka nyadi seranta. Enti nuan semina makai tinduk, enda lama da agi nuan deka begari ngena gari ti charik. Pendingka apai nuan ke meri nuan pengidup, lalu anang ngeleseka indai nuan lebuh iya nyau tuai. Beli pemendar, penemu-dalam, jaku ajar, enggau ati ti mereti, lalu anang nyual sida. Apai orang ke lurus deka gaga ati; orang ke bisi anak ti pintar, deka gaga ati ke iya. Awakka apai enggau indai nuan gaga ati ke nuan; asuh ati indai nuan lantang. Anak, peratika enggau manah pengidup aku ngambika iya nyadika teladan nuan. Indu sundal enggau indu ke ngereja kereja ti kamah nya lubang kebung ti dalam sereta sempit. Sida ngipa nuan baka perumpak, lalu ngasuh mayuh lelaki enda tetap ati ngagai bini sida. Anang nejuka wain nguji nuan, taja pen chura iya mirah-redam, lalu iya nyau beperenching dalam mangkuk, lalu nyamai diirup. Pagi hari siti nuan asai ti udah dipantuk ular. Mata nuan deka meda utai ti nyelai, lalu nuan enda ulih berunding tauka bejaku enggau terang. Nuan deka asai ke ba tasik, asai ke betayun ngena tali layar. Lalu ku nuan bejaku, “Nyangka aku udah dipalu orang. Aku tetap udah dipalu orang, tang aku enda ingat. Nama kebuah aku enda ulih dani? Aku deka ngirup baru.” Anang ngining orang ke jai, lalu anang bepangan enggau sida, laban sida semina berunding deka ngaga pengachau, lalu semua jaku sida ngenusahka orang. Ulih penemu-dalam, rumah digaga, lalu ulih pemereti ati, rumah didirika. Ulih penemu, bilik diisi enggau utai ti manah sereta berega. Orang ke bepenemu-dalam bekuasa agi ari orang ke kering, lalu orang ke bisi penemu bekuasa agi ari orang ke bisi pengering; laban ari iring penemu-dalam, kita ulih beperang, lalu ari iring bala penyanding penemu, kita deka menang. Jaku-dalam enda ulih diperatika orang ke beli. Sida nadai utai disebut lebuh orang berandauka pekara ti besai. Orang ke bekira deka ngereja penyai, deka dikumbai orang ke ngaga pengachau. Utai ti diperundingka orang ke beli, endang dosa magang, lalu orang ke sumbung dipegedika orang. Enti nuan lemi lebuh nuan dituntung penusah, reti nya nuan endang sigi amat lemi. Anang kakang ati ngelepaska orang ke baru deka diukum bunuh, enti iya diakim ngena atur ti enda lurus. Nuan nyangka ngumbai utai nya ukai pekara nuan, tang Allah Taala nemu sereta ngakim ati nuan. Iya nengkilaka nuan, nya alai Iya nemu, lalu Iya deka ngupah nuan nitihka utai ti dikereja nuan. Anak, empa ai manyi, laban iya manah ke nuan. Ai manyi ti pansut ari idang manis ba dilah nuan. Baka nya mega, penemu-dalam manah ke semengat nuan. Giga penemu-dalam, nya baru pengidup nuan deka lantang senang jemah ila. Anang baka orang ke jai, ke bekira deka ngerumpak orang ke lurus ati, tauka ngerampas rumah sida. Orang ke lurus ati nyangka rebah tujuh kali, lalu sida angkat baru; tang orang ke jai deka alah laban penusah. Anang gaga ati lebuh munsuh kita rebah, lalu anang gaga ati lebuh sida tesangkut; enggai ke TUHAN meda nya, lalu Iya enda lantang ati ke nya, lalu enda nyadi ngukum sida. Anang irau ati ketegal orang ke jai, lalu anang ngining sida; laban orang ke jai nadai penyadi, nadai utai diadang. Anak, anang enda nangika TUHAN sereta bebasaka raja. Anang bekaul enggau orang ke angkat ngelaban sida, laban orang ke baka nya deka dirusak enggau ngenyit, lalu nadai orang nemu gaya pengerusak ti deka datai ari TUHAN enggau ari raja. Tu jaku ari orang ke bepenemu-dalam: Anang bepilih mata lebuh ngakim orang. Enti sida ngumbai orang ke bepenyalah nya nadai udah ngereja utai ti salah, sida deka kena sumpah, sereta dipegedika semua orang. Tang hakim ke ngukum orang ke salah, deka diau lantang sereta nerima berekat. Saut ti betul nandaka orang nya endang amat pangan ti bendar. Sediaka pengawa nuan di luar, sediaka umai nuan; udah nya baru nuan nirika rumah. Anang besaksi ngelaban pangan diri enggau nadai kebuah, lalu anang nipu orang. Anang nyebut, “Aku deka ngereja ngagai orang utai ti udah dikereja sida ngagai aku! Aku deka malas!” Aku bejalai nengah umai orang ke ngelusu, lalu nengah kebun anggur orang ke beli. Aku tepedaka umai enggau kebun nya penuh laban madang duri enggau babas. Dinding batu ti ngelingi umai enggau kebun nya udah runtuh. Aku tepedaka utai nya, lalu berundingka iya; aku malik, lalu aku bulih pelajar ari nya. Enti nuan tinduk bekerendut dada enda lama, lalu belelak, penyeranta deka nyerang nuan baka perumpak ke besenyata. Tu sekeda agi jaku-dalam ti disebut Solomon, ti ditulis bala pemesai raja Hesekiah di menua Judah. Kitai ngemesaika Allah Taala ketegal utai ti dilalaika Iya. Kitai bebasaka raja ketegal utai ti diterangka sida. Nuan nadai nemu utai ti diperundingka raja. Runding iya enda ulih diperagam kitai, baka peninggi langit tauka penalam tasik. Buai utai ti kamah ari pirak, nya baru tukang pirak ulih ngaga utai ti manah ari nya. Buai penyanding penemu raja ti jai, nya baru perintah iya deka bejalaika pengawa enggau lurus. Lebuh nuan bediri di mua raja nuan patut ngemaruhka diri, lalu anang nguji ngaga diri baka orang ke tinggi pangkat. Manah agi diasuh orang niki ngagai endur ti tinggi, ari ke diasuh orang angkat ari endur nya awakka endur nya diberi ngagai orang ke tinggi agi pangkat. Anang kelalu jampat mai pekara ti dipeda nuan ngagai kot. Enti orang bukai nemu saksi nuan nya salah, nama utai ti deka dikereja nuan? Enti nuan beserekang penemu enggau orang ke berimbai pendiau enggau nuan, atur pekara nya enggau iya, lalu anang madahka resia nya ngagai orang bukai, enggai ke semua orang nemu nuan enda nemu nyimpan resia, lalu nuan deka malu seumur idup. Penemu ti terang disebut sebaka enggau emas ti disangkumka enggau pirak. Jaku tangkan ti diberi orang ke bisi peneleba ngagai orang ke deka mending, berega agi ari tinchin emas tauka ari utai ti berega ti digaga ari emas ti pemadu tulin. Seruan ti tau dikarapka, ngerinduka ati orang ke ngasuh iya mai pesan, baka ai ti chelap lebuh hari angat lebuh maya ngetau. Orang ke besemaya deka meri utai, tang enda, nya baka mua hari enggau ribut ti nadai ngasuh hari ujan. Ati ti liat ulih nguingka ati penyakal ti pemadu kieh, lalu ulih nguingka ati bala orang ke merintah. Anang sekali-kali makai ai manyi lebih ari ti patut, laban enti nuan makai kelalu mayuh, ai manyi nya tau ngasuh nuan mutah. Anang kelalu suah nemuai ngagai orang ke berimbai pendiau enggau nuan, enggai ke sida leju meda nuan, lalu begedika nuan. Jaku dawa ti bula nya baka pedang, baka pemalu, tauka baka laja ti tajam. Ngarapka orang ke enda tau dikarapka lebuh maya penusah, nya baka orang ke nguji ngunyah utai ngena ngeli ti gerah, tauka bejalai ngena kaki ti enda ulih engkebut. Enti nuan belagu di mua orang ke tusah ati nuan baka ke muka baju ari tubuh orang lebuh hari chelap, tauka baka ke nuang chuka ngagai telih iya. Enti munsuh nuan lapar, beri sida makai. Enti sida aus, beri sida ai. Nuan deka ngasuh sida malu, lalu TUHAN deka ngupah nuan. Mulut ti chabul deka ngasuh orang ringat, baka ribut utara ti mai ujan. Manah agi diau ba perabung rumah, ari ti diau dalam rumah begulai enggau bini ke ituk. Nerima berita ari menua ti jauh nya baka ke ngirup ai chelap lebuh nuan rangkai aus. Orang ke menyana, ti ngalahka diri lalu nurutka orang ke jai, nya baka mata ai ti kamah, tauka baka telaga ti udah diberi rachun. Enti nuan makai kelalu mayuh ai manyi utai nya enda manah ke nuan, lalu baka nya mega enti nuan kelalu balat minta puji orang. Enti nuan enda ulih nagang diri ringat, nuan nadai daya, baka nengeri ti nadai kuta, ti mudah diserang munsuh. Jaku puji enggai nyadi disebut ba orang ke beli, baka seleju ti nadai kala labuh lebuh musin panas, tauka baka hari ujan lebuh maya ngetau. Jaku sumpah enda ulih ngemediska nuan, enti nuan endang enda patut disumpah. Jaku sumpah nya baka burung ti mansa terebai lalu nadai kala inggap. Nuan enda tau enda nyipat kuda. Nuan enda tau enda ngelekatka tali ba mulut keledai, lalu nuan enda tau enda malu orang ke beli. Enti nuan nyaut tanya ti beli, nuan sama beli baka orang ke mantaika tanya nya. Beri saut ti beli ngagai tanya ti beli. Nya baru orang ke mantaika tanya nya deka nemu diri enda pintar munyi ti disangka iya empu. Enti nuan ngasuh orang ke beli mai pesan, manah agi nuan netak kaki nuan empu, laban nuan minta penusah. Orang ke beli enda ulih ngena jaku ti dalam. Iya sebaka enggau orang ke kait-kupit ti enda ulih ngena kaki diri. Muji orang ke beli sigi nadai reti, baka ke nanchangka batu ba pangwang. Orang ke beli, ke besebutka jaku ti dalam reti, nya baka orang ke mabuk, ke nguji ngulihka duri ari jari diri. Orang ke ngupah orang ke beli lalu ngasuh iya bekereja lebuh iya mansa, semina ngemediska semua orang. Orang ke beli ti ngereja utai ti enda menuku kedua kali, nya baka ukui ti pulai ngagai mutah diri empu. Orang ke pemadu beli nya manah agi ari orang ke ngumbai diri bepenemu-dalam, tang iya ti bendar iya ukai orang ke bepenemu-dalam. Nama kebuah orang ke ngelusu enda pansut ari rumah? Nama utai ti tau ngerampit sida? Kati sida takutka singa? Orang ke ngelusu singit ke kiba, singit ke kanan ba peninduk diri, baka pintu ti telenga tikup. Sekeda orang kelalu ngelusu, datai ke sida nyau enda tesuapka pemakai ke diri empu. Orang ke ngelusu deka ngumbai diri pintar agi ari tujuh iku orang ke nemu nerangka penemu diri. Enti nuan bekelikuh enggau orang pasal pekara orang bukai, nuan baka orang ke bejalai nengah jalai raya lalu musil pending ukui. Api padam enti nadai kayu. Enti orang nadai bejakuka pangan diri ari belakang, orang badu agi belaya. Arang ngasuh bara api majak menyadi. Kayu ngasuh api majak menyadi, lalu orang ke ngaga pengachau ngasuh kelikuh nadai nemu abis. Chabul mulut nyamai amat asai! Naka meh pengingin kitai nelan iya! Jaku ti manis ti dikena nuan ngelalaika runding diri nya baka chat ti alus ti dikena ngechat periuk tanah ti murah. Orang ke pura-pura ngapa, ngelalaika ati diri ti begedi ngena jaku ti manis. Jaku iya munyi ti manah, tang anang arapka iya, laban ati iya penuh laban pemenchi. Iya nyangka nguji ngelalaika ati diri ti begedi, tang semua orang deka meda utai ti jai ti dikereja iya. Orang ke nan panjuk kena nyintak orang bukai, deka kena sintak panjuk diri empu. Orang ke ngasuh tanah tusur, deka ditinggang tanah nya. Mulut ti bula begedika orang ke dikemulaka iya, lalu jaku ti manis semina mai pengerusak. Anang temegah bejakuka pasal pagila, laban nuan enda nemu utai ti deka nyadi entara diatu enggau pagila. Awakka orang bukai muji nuan. Orang kampar pen tau meh muji nuan. Anang sekali-kali muji diri. Batu enggau pasir kurang agi berat enti dibandingka enggau penusah ti tau nyadi ketegal orang ke beli. Pengeringat nya utai ti jai sereta ngerusak, tang iya enda ulih dibandingka enggau ati ti kepapas. Manah agi ngerara orang enggau chara ti terang, ari ke nejuka iya ngumbai nuan enda ibuhka iya. Pangan nganu enggau ati ti manah, taja pen nuan pedis dianu sida. Tang bejaga nuan lebuh munsuh engkauk nuan! Lebuh nuan kenyang, nuan enggai nerima ai manyi, tang lebuh nuan lapar, indah pemakai ti pait deh asai ti manis. Orang ke jauh ari menua diri nya baka burung ti ninggalka sarang. Minyak wangi enggau minyak ti bebau rengut ngasuh ati nuan lantang agi, tang pengachau ngasuh ati nuan irau. Anang enda ingatka pangan nuan, tauka pangan apai nuan. Enti nuan bisi penusah, anang minta tulung ari kaban belayan nuan. Orang ke berimbai pendiau enggau nuan ulih nulung nuan lebih agi ari kaban belayan nuan ti diau jauh ari nuan. Nuan enda tau enda bepenemu-dalam, anak, nya baru aku deka lantang ati, lalu ulih nyaut semua orang ke nganu aku. Orang ke mereti deka meda penusah datai, lalu nyeliahka penusah nya, tang orang ke enda berunding deka tetempuhka penusah nya, lalu ngesalka nya. Barang sapa chukup beli lalu besemayaka betanggungjawapka utang orang bukai, patut nejuka reta tengkira sida ditan nyadika gadai. Ngerak pangan diri enggau nyawa ti inggar lebuh pagi hari nya baka ke nyumpah iya. Bini ke ituk nya munyi teritik ai ujan. Baka ni ku nuan ulih nagang iya bejaku? Kati nuan bisi udah kala nagang ribut, tauka nguji ngenggam minyak? Orang belajar ari pangan diri nya baka besi ti ngansah besi. Enti nuan ngintu kayu ara, nya baru nuan bisi buah ara diempa. Orang gaji ke ngintu tuan sida, deka dibasa. Baka nuan ke meda kelemayang mua diri ba ai, baka nya meh nuan meda diri empu dalam ati nuan. Pengingin mensia nya baka dunya pemati, endang nadai sekat. Pemanah emas enggau pirak diabas ngena api. Pemanah orang pen ulih mega diabas. Taja pen nuan malu orang ke beli setengah mati, enda meh nuan ulih ngasuh sida badu agi beli. Intu raban bedus enggau raban jelu sapi nuan enggau naka ulih nuan, laban pengaya enda ulih tan belama iya. Indah bansa deh enda ulih tan belama iya. Rumput ba umai enggau ba munggu ditebas lalu digumpul nyadika pemakai jelu tupi lalu rumput dia ditejuka tumbuh baru. Nuan tau ngaga kain ari bulu bedus nuan empu, lalu meli tanah ngena duit ari rega kambin nuan. Kambin ti bukai deka meri ai tusu ngagai nuan enggau ngagai kita sebilik, enggau ngagai bala orang gaji nuan ti indu. Orang ke jai rari taja pen orang nadai begagaika sida, tang orang ke lurus ati, berani baka singa. Lebuh siti bansa bedosa, orang ke merintah sida deka seruran betukar. Tang bansa deka nyadi kering sereta tan, lebuh bansa nya diperintah bala tuai ti landik berunding sereta mereti. Orang ke megai kuasa, ke nekanka pengidup orang ke seranta nya baka ujan ti ngerusak utai ti ditanam. Enti nuan enda bebasaka adat, nuan setanah enggau orang ke jai. Tang enti nuan ngasika adat, nuan ngelaban orang ke jai. Orang ke jai enda meretika utai ti dikumbai atur ti lurus, tang orang ke nyembah TUHAN nemu reti atur nya. Manah agi nyadi orang ke seranta sereta betul ati, ari ke nyadi orang ke kaya tang ngembuan ati ti enda betul. Orang ke biak ke ngasika adat nya orang ke nemu berunding. Orang ke bepangan enggau orang ke nadai guna, ngemaluka apai indai sida. Enti nuan kaya ari nuan ke bepintaka duit ba utai ti dijual nuan, lalu ngambi ulih ba orang, pengaya nuan deka pulai baru ngagai orang bukai ke nemu siru enggau orang ke seranta. Enti nuan enda ngasika adat, Allah Taala deka ringat lalu enggai mendingka sampi nuan. Enti nuan nipu orang ke lurus ati, lalu mai iya ngereja penyai, nuan deka kena sintak panjuk nuan empu, tang orang ke nadai penyalah deka diberi upah ti besai. Orang ke kaya ngumbai diri bepenemu-dalam, tang orang ke seranta, ti mereti, deka nemu sapa orang nya ke bendar. Lebuh orang ke lurus megai kuasa, semua orang lantang diau, tang lebuh orang ke jai merintah, orang belalai. Nuan enda ulih mujur dalam pengidup nuan, enti nuan nguji ngelalaika dosa diri. Tang enti nuan ngaku dosa diri lalu badu agi bedosa, nya baru Allah Taala deka kasihka nuan. Anang enda seruran ngasika TUHAN, nya baru nuan deka lantang diau, tang enti nuan kieh, nuan deka rusak. Orang ke seranta nadai daya ngelaban raja ti jai, laban raja nya mangah baka singa ti negung, tauka baka beruang ti segau-segau. Raja ti enda nemu berunding, jai enggau orang, tang raja ke begedika ati ti enda betul, deka lama merintah. Orang ke munuh orang endang numbak kubur ke diri empu enggau naka penyampat. Anang nguji nagang iya. Awakka ati nuan betul, nya baru nuan deka diau likun, tang enti ati nuan enda betul, nuan deka rebah enggau ngenyit. Orang bumai ke bagas, deka mayuh utai diempa, tang orang ke masau jam, deka seruran seranta. Orang ke lurus ati, deka idup lantang senang, tang enti nuan deka jampat kaya, nuan deka kena ukum. Bepilih mata nya utai ti salah; tang sekeda hakim deka ngereja utai ti salah, kena sida makai suap ti pemadu mit. Orang ke semina berundingka diri empu aja beguai-guai deka nyadi kaya datai ke sida nyau enda nemu diri deka ditinggang penyeranta. Rara lalu ajar orang, lalu udah nya baru iya nemu begunaka jaku nya lebih agi ari jaku kelangkung. Orang ke ngumbai diri enda salah ngenchuri utai ari apai indai diri, nya jai agi ari penchuri. Semina berundingka diri empu aja deka nyungkak pengachau nyadi. Manah agi nuan manggaika pengarap nuan ba TUHAN. Nuan beli enti nuan nitihka penemu diri, tang enti nuan nitihka ajar orang ke dalam agi penemu, nuan deka diau likun. Beri utai ngagai orang ke seranta, nya baru nuan enda nemu suntuk, tang enti nuan nutup mata nuan ngagai orang ke seranta, mayuh orang deka nyumpah nuan. Orang belalai lebuh orang ke jai angkat megai kuasa, tang lebuh sida dibuai ari kuasa, orang ke lurus deka merintah baru. Enti nuan majak kieh genap kali orang ngajar nuan, jemah ila nuan deka rusak lalu enda ulih angkat agi. Tunjukka siku pemerintah ke lurus, lalu aku deka nunjukka orang ke lantang diau. Tunjukka pemerintah ti jai, lalu aku deka nunjukka orang ke merinsa diau. Enti nuan nemu begunaka penemu-dalam, apai indai nuan deka temegahka nuan. Nuan beli enti nuan masau duit ba indu sundal. Lebuh raja keran deka ngeringka atur ti lurus, bansa deka kering, tang lebuh iya semina berundingka duit aja, iya deka ngerusak menua. Enti nuan pura-pura ngapa bejaku manis enggau pangan nuan, nuan semina nan panjuk kena nuan nyintak diri empu. Orang ke jai disintak dosa sida empu, tang orang ke lurus ati diau lantang senang sereta nadai utai ngawa. Orang ke menyana nemu hak orang ke seranta, tang orang ke jai enda meretika utai nya. Orang ke enda berundingka orang bukai, tau ngasuh nengeri kachau, tang orang ke bepenemu-dalam ulih nagang pengachau nyadi. Lebuh orang ke pintar bechara ngelaban orang ke beli, orang ke beli nya semina ketawa aja, inggar sereta ngelese. Orang ke selalu deka bebunuhka orang begedika orang ke lurus ati, tang orang ke lurus deka nyaga pengidup orang ke lurus ati. Orang ke beli ngayanka pengeringat diri di mua orang mayuh, tang orang ke mereti, nemu liat ati lalu nagang diri ringat. Enti raja mendingka berita ti bula, semua bala pemesai iya deka nyadi orang ke bula. Orang ke seranta, enggau orang ke nekanka pengidup sida, sama diberi TUHAN mata. Enti raja nyaga hak orang ke seranta, iya deka lama nyadi raja. Sipat enggau jaku anu meri penemu-dalam. Indai deka malu laban anak, enti indai nejuka anak enda disipat, enda dirara. Lebuh orang ke jai megai kuasa, pengawa ti jai deka betambah. Tang orang ke lurus deka meda orang ke jai rebah. Disiplin anak kita, nya baru kita seruran tau temegahka sida. Sida nadai kebuah ngasuh kita malu. Enti enda diiring Allah Taala, mensia deka charut, tang beberekat meh orang ke nitihka adat Allah Taala! Nuan enda ulih ngerara orang gaji nuan semina ngena jaku aja. Sida nyangka meretika utai ti ku nuan, tang sida enggai mending. Orang ke beli bisi agi pengadang ari orang ke bejaku enggau enda berunding. Enti nuan meri semua utai ti dipinta ulun nuan kenyau ari sida agi mit, jemah ila sida deka ngerampas semua utai nuan. Orang ke lengkar nyungkak orang balat belaya, sereta ngaga pengachau. Ati ti sumbung deka ngasuh nuan rebah, tang enti nuan baruh ati, nuan deka dibasa orang. Orang ke bekereja enggau penchuri, begedika diri empu. Iya deka diukum enti iya madahka utai ti bendar dalam kot, lalu enti iya enda, iya deka disumpah Allah Taala. Enti nuan irauka jaku orang, nuan tusah diau, tang enti nuan manggaika pengarap nuan ba TUHAN, nuan deka likun. Semua orang bela ingin minta diri nyadi pangan orang ke merintah, tang nuan semina tau bulih atur ti lurus ari TUHAN. Orang ke lurus begedika orang ke jai, lalu orang ke jai begedika orang ke lurus. Tu jaku Agur anak Jakeh: “Allah Taala nadai enggau aku, Allah Taala nadai enggau aku, lalu aku nadai daya agi. Aku tu baka jelu, ukai baka mensia lalu aku enda nemu reti utai. Aku nadai kala belajarka penemu-dalam, lalu aku nadai nemu pasal Allah Taala. Kati orang bisi udah ulih meretika penemu ti datai ari serega? Kati orang bisi udah kala ngenggam ribut ngena jari sida? Tauka mungkus ai ngena kain? Tauka ngeletak pemesai dunya? Sapa orang nya, enti kita nemu? Sapa bala anak sida? “Allah Taala ngamatka semua semaya ti digaga Iya. Iya baka terabai ke semua orang ke minta diri dijaga Iya. Enti nuan ngumbai Iya bisi udah nyebut utai ti enda kala disebut Iya, Iya deka nganu nuan, lalu mandangka nuan nya orang ke bula.” Aku minta Nuan, Allah Taala, meri aku dua iti utai sebedau aku mati: tagang aku bula, lalu awakka aku ukai kaya tauka seranta. Nya alai, beri ngagai aku pemakai umbas ke guna aku. Enti aku diberi lebih ari nya, enggai ke aku ngumbai diri enda begunaka Nuan. Tang enti aku seranta, aku enggai ke diri ngenchuri, lalu ngemaluka Allah Taala aku. Anang sekali-kali mantah bala orang gaji di mua tuan sida. Nuan deka kena sumpah lalu merinsa ketegal nya. Orang bisi nyumpah apai diri, lalu enda nemu gaga ati ke indai sida. Orang bisi ngumbai diri tuchi, taja pen sida iya pemadu kamah. Orang bisi ngumbai diri manah. Balat amat sida ngumbai diri manah! Orang jai amat ngambi ulih ba orang ke seranta enggau ke suntuk. Nya endang jalai sida beridup. Siku lintah bisi dua iku anak indu, lalu seduai iya sama benama “Beri aku!” Tu empat iti utai ti enda nemu puas: dunya pemati, indu ke nadai anak, tanah rangkai ti begunaka ai ujan, enggau api ti enda ulih dipadamka. Enti nuan beduan apai nuan, tauka enda bebasaka indai nuan lebuh iya nyau tuai umur, nuan patut diempa burung ti bepakaika bangkai, tauka leka mata nuan dipantuk burung kak. Tu empat bengkah utai ti nyelai lalu enda ditemu aku reti: Siku menaul ti terebai di langit, siku ular ti ngerayap ba atas batu, sebuah kapal ti belayar di tasik, enggau siku lelaki enggau siku indu ke rinduka pangan diri. Baka tu ku gaya ulah bini ti enda tetap ati: iya butang, mandi, lalu bejaku, “Aku nadai udah ngereja penyalah!” Tu empat bengkah utai ti enda ulih ditatka dunya: ulun ti nyadi raja, orang ke beli ke bisi semua utai dipakai iya, indu ke dipegedika, ke bulih laki, enggau orang gaji ti indu, ke ngambi laki indu ke ngaji iya gawa. Tu empat bengkah jelu di dunya tu ti mit, tang pintar amat: Semut: sida lemi, tang sida besimpanka pemakai lebuh musin panas. Tikus tanah: sida tu pen enda mega kering, tang sida berumah ba sebelah batu. Buntak: sida nadai raja, tang sida nemu mindah kia-kia begulai enggau pangan. Tichak: nuan enda ulih nangkap sida ngena jari, tang nuan tau tetemuka sida dalam istana. Tu empat bengkah utai ti manah gaya dipeda lebuh sida bejalai: singa, jelu ti pemadu kering sereta enda nemu takut; kambin enggau manuk sabung, enggau raja di mua bala nembiak iya. Enti nuan udah beli ngeninggika diri, lalu udah bekira deka ngereja penyai, ngetu nuan dulu, lalu berunding! Enti nuan nunyau ai tusu, nuan deka bulih tusu ti meku. Enti nuan malu idung orang, idung iya deka bedarah. Enti nuan nyungkak orang ringat, nuan deka bulih penusah. Tu jaku ti disebut indai Raja Lemuel ngagai iya: “Nuan tu anak ke dikesayauka aku. Nuan tu meh saut ke sampi aku. Nama utai ti deka dipadahka aku ngagai nuan? Anang ngabiska tulang beleman, lalu anang ngabiska duit nuan ba indu. Sida udah ngerusak bala raja. Pendingka tu, Lemuel. Raja enda patut ngirup wain, tauka tetengukka ai ti bisa. Lebuh sida ngirup, sida enda ingatka adat, lalu enda ibuhka hak orang ke suntuk. Ai arak nya ungkup ke orang ke mati, ke orang ke merinsa diau. Awakka sida ngirup, lalu enda agi ingatka penyeranta enggau ati ti enda lantang idup. “Anang enda bejaku ngarika orang ke enda ulih ngarika diri empu. Jaga hak semua orang ke nadai daya. Bejaku ngarika sida, lalu nyadi hakim ke lurus. Jaga hak orang ke seranta, enggau ke suntuk.” Naka meh pemar ngiga bini ke nemu ngereja utai! Iya berega agi ari semua batu ti berega! Laki iya ngarapka iya, lalu laki iya enda sekali-kali seranta diau. Seagi-agi iya idup, iya ngereja utai ti manah ke laki iya, lalu enda kala ngemediska iya. Iya seruran bekereja begagaka kain ari bulu bedus enggau ari linin. Iya mai pemakai ke rumah ari endur ti jauh, baka kapal ti dikena orang bedagang. Iya angkat sebedau rerak tawas, nyendiaka pemakai ke sida sebilik, lalu madahka bagi pengawa ngagai sida indu ke orang gaji iya. Iya meresa tanah, lalu meli tanah nya, lalu ngena duit ti ulih iya, iya numbuhka kebun anggur. Iya indu ke bagas, kering sereta rajin. Iya nemu rega semua utai ti digaga iya, lalu iya gawa jauh malam. Iya ngaga ubung ke diri empu, lalu nenun kain ke diri empu. Iya gerah ati meri utai ngagai orang ke seranta enggau orang ke suntuk. Iya enda irau ati lebuh seleju nyadi, laban sida sebilik bisi gari kena ngintu tubuh diri angat. Iya ngaga chadar tilam, lalu ngerasukka kain linin ti alus ti mirah-redam. Laki iya endang dikelala orang, siku ari orang ke tinggi pangkat. Iya ngaga gari enggau belulang, lalu nyual utai nya ngagai orang ke bedagang. Iya regas, sereta dibasa orang, lalu iya enda takutka utai ti nyadi jemah ila. Iya bejimat sereta pintar mansutka jaku. Iya endang enda jenuh lalu seruran meratika utai ti dipeguna sida sebilik. Bala anak iya beterima kasihka utai ti dikereja iya, lalu laki iya muji iya. Ku laki iya, “Bini ti manah amat mayuh, tang nuan tu bini ke pemadu manah.” Pemajik tau nipu, lalu pemanah gamal tau lenyau, tang indu ke nangika TUHAN patut dipuji. Puji meh iya ketegal semua utai ti dikereja iya. Iya endang patut dibasa semua orang. Tu jaku orang siku ti bepenemu-dalam, anak lelaki David ti nyadi raja di Jerusalem. Pengidup nadai guna, sigi nadai guna, ku orang ke bepenemu-dalam nya bejaku. Pengidup endang nadai guna, nadai guna semua. Nuan bekereja seumur idup, tang nama utai ulih nuan ari nya? Serak siti diganti serak siti, tang dunya mengkang enda berubah. Mata panas semampai tumbuh semampai padam, pulai belubah-lubah ngagai endur alai iya ti deka berengkah baru. Ribut muput ke selatan, muput ke utara, bepusin-pusin lalu pulai baru. Semua ai sungai rarat ngagai tasik, tang tasik enda nemu penuh. Ai pulai baru ngagai endur alai sungai belabuh, lalu rarat baru. Semua utai ngujung ngagai pengelelak magang, pengelelak ti enda ulih ditelah. Mata kitai enda nemu puas meda utai. Pending kitai enda nemu puas ninga utai. Utai ti udah nyadi suba, deka nyadi baru. Utai ti udah dikereja suba, deka dikereja baru. Nadai utai ti nyengala baru di serata dunya tu. Ku orang, “Peda kita, tu utai ti baru!” Tang utai nya ukai utai ti baru, laban utai nya endang udah nyadi kelia, lama sebedau kitai ada. Nadai orang ingatka utai ti nyadi dulu kelia, lalu nadai orang jemah ila deka ingatka utai ti deka nyadi ari kenyau diatu nyentuk ngagai jemah ila. Aku ti bepenemu-dalam tu, udah nyadi raja menua Israel di Jerusalem. Aku udah mutuska runding deka meresa lalu belajarka semua utai ti dikereja di bap langit. Allah Taala udah ngeletak kitai ditinggang pemerinsa ti berat. Aku udah meda semua utai ti dikereja di dunya tu, lalu aku madahka ngagai kita semua utai nya endang nadai guna magang baka ke begagaika ribut. Nuan enda ulih beruruska utai ti bingkuk. Nuan enda ulih ngitung utai, enti utai nya nadai. Ku aku madahka ngagai diri empu, “Aku udah nyadi orang ke tinggi pangkat, ke dalam agi penemu ari sebarang orang bukai ti udah merintah Jerusalem dulu agi ari aku. Aku nemu utai ti dikumbai penemu-dalam enggau penemu.” Aku mutus ati deka nemu bida entara utai ti dikumbai penemu enggau utai ti dikumbai pemeli, entara penemu-dalam enggau penemu orang ke gila. Tang aku nemu, pengawa nya baka ke begagaika ribut. Dalam agi penemu nuan, mayuh agi ga pengirau nuan. Mayuh agi utai ditemu nuan, balat agi ga iya ngemediska nuan. Aku lalu bekira deka ngelantangka diri, laban aku keran deka nemu utai ti dikumbai pengelantang. Tang aku nemu utai nya pen nadai mega guna. Aku nemu, ketawa nya utai ti beli, lalu ngelantangka diri endang nadai mai penguntung. Ketegal aku keras deka ngembuan penemu-dalam, aku lalu bekira deka merindang lalu ngelantangka diri ngena wain. Ba penemu aku, tu jalai ti pemadu manah kena kitai idup sekumbang kitai ti diau sementara aja di bap langit. Aku udah ngereja pengawa ti besai. Aku udah ngaga berapa buah rumah enggau kebun anggur ke diri empu. Aku udah numbuhka mayuh macham kebun enggau kebun buah, lalu nanam semua macham kayu buah dalam kebun nya. Aku udah numbak pegung alai aku ngambi ai kena aku manjah kebun nya. Aku udah meli mayuh ulun, lalu aku mega bisi ulun ke endang ada dalam ruang bilik aku. Aku bempu mayuh agi jelu tupi ari semua orang bukai ti udah kala diau di Jerusalem. Aku mega nugungka pirak enggau emas ari pesaka bala raja dalam menua ti dipegai aku. Lelaki enggau indu belagu merindang aku, lalu aku bisi semua indu ke dikedekaka aku. Aku endang amat tinggi agi pangkat ari orang bukai ti udah kala diau di Jerusalem, lalu penemu-dalam ti dikembuan aku nadai kala ngelebuka aku. Utai ti dikinginka aku, sigi ulih aku magang. Aku endang enda betagang ngelantangka diri. Aku temegahka semua utai ti udah ulih aku, lalu semua utai nya endang upah aku magang. Udah nya aku lalu berundingka semua utai ti udah dikereja aku, enggau pemendar aku gawa ngereja utai nya. Nya baru aku nemu, utai nya nadai reti sekali-kali, baka ke begagaika ribut, sigi nadai guna sekali-kali. Laban tiap iku raja semina ulih ngereja utai ti udah dikereja raja ke dulu agi ari iya. Nya alai aku lalu belabuh berundingka reti utai ti dikumbai bepenemu-dalam, tauka diau baka orang ke gila, tauka beli. Aku nemu, “Penemu-dalam endang manah agi ari pemeli, baka penampak ti manah agi ari pemetang. Orang ke bepenemu-dalam nemu tunga pejalai diri, tang orang ke beli enda.” Tang aku mega nemu, pengujung kitai endang sebaka magang. Ku aku berunding dalam ati diri, “Utai ti deka nyadi ba orang ke beli, deka mega nyadi ba aku. Nya alai, nama penguntung aku nyadi orang ke bepenemu-dalam?” Aku lalu nyaut, “Nadai.” Nadai orang ingatka orang ke bepenemu-dalam, lalu nadai mega orang deka ingatka orang ke beli. Jemah ila, semua kitai tu nadai agi dikingatka magang. Semua kitai tu, orang ke beli enggau orang ke bepenemu-dalam, deka mati magang. Nya alai ba aku siku, pengidup nya nadai reti, laban semua utai dalam pengidup tu nadai meri aku utai bukai, tang semina penusah aja. Utai nya sigi nadai guna sekali-kali, baka ke begagaika ribut. Utai ti udah digaga, enggau utai ti udah ulih aku, sigi nadai reti ba aku, laban aku nemu, aku deka ninggalka utai nya ke orang ke ngentudika aku, lalu iya nyangka bepenemu-dalam, tauka beli. Nadai kitai nemu. Tang taja pia, iya deka bempu semua utai ti udah ulih aku, semua utai ti udah ulih aku di dunya tu ngena penemu-dalam aku. Semua utai nya nadai guna magang. Nya alai aku ngesal ati ke diri ti udah bebendar gawa. Nuan ngulihka utai ngena semua penemu-dalam, ngena penemu, enggau ngena pengelandik nuan, lalu udah nya nuan ninggalka semua utai nya ke orang ke nadai kala ngulihka utai nya. Sigi nadai guna sekali-kali. Enda betul sekali-kali! Nuan bekereja lalu nuan ngembuan pengirau seumur idup, lalu nama utai ti ulih nuan ari nya? Seagi-agi nuan mengkang idup, semua utai ti dikereja nuan nadai mai penguntung, tang semina pengirau enggau ati ti tusah. Indah lebuh malam hari deh nuan enda badu berunding. Semua utai nya nadai guna magang. Utai ti pemadu manah ti tau dikereja kitai nya makai, ngirup lalu ngelantangka diri ngena utai ti udah ulih kitai. Tang aku nemu, utai nya mega diberi Allah Taala. Baka ni ku kitai tau bisi utai diempa, tauka ulih ngelantangka diri enti nadai Allah Taala? Allah Taala meri penemu-dalam, penemu, enggau pengelantang ngagai orang ke ngerinduka ati Iya, tang Iya ngasuh orang ke bedosa bekereja ngulihka utai, besimpanka utai, ngambika sida bisi utai diberi ngagai orang ke ngerinduka ati Allah Taala. Semua utai nya sigi nadai guna magang, baka ke begagaika ribut. Semua utai ti nyadi di dunya ti endang nyadi ba maya ti diletak Allah Taala. Iya ngeletak maya ada, enggau maya mati, maya betanam, enggau maya ngetau, maya bebunuh, enggau maya nyuman, maya ngeruntuh, enggau maya niri enggau negi. Iya ngeletak maya sinu, enggau maya gaga, maya ngulit, enggau maya betanda, maya beleman, enggau maya enda beleman, maya besium, enggau maya enda besium. Iya ngeletak maya tetemuka utai, enggau maya ngelenyauka utai, maya besimpanka utai, enggau maya bebuaika utai, maya nyarik, enggau maya nyait, maya enda bemunyi enggau maya bejaku. Iya ngeletak maya rinduka orang, enggau maya begedi, maya beperang, enggau maya bebaik. Nama penguntung ulih kitai ari semua pengawa kitai? Aku nemu pemerat utai ti udah ditepanka Allah Taala ba kitai. Iya udah ngeletak maya ti ngena ke semua utai. Iya udah meri kitai ati ti keran deka nemu utai ti deka nyadi jemah ila, tang Iya nadai kala ngasuh kitai puas ati nemu utai ti dikereja Iya. Nya kebuah aku nemu, kitai semina ulih ngelantangka diri aja, lalu ngasaika penyamai idup sepemanjai umur kitai. Semua kitai patut makai, ngirup lalu ngelantangka diri ngena utai ti udah ulih kitai, laban semua utai nya endang pemeri ari Allah Taala magang. Aku nemu, semua utai ti dikereja Allah Taala deka meruan belama iya. Nuan enda ulih nambah tauka ngurangka utai nya. Lalu siti utai ti dikereja Allah Taala nya ngasuh kitai nangika Iya. Semua utai ti nyadi, enggau ti ulih nyadi, endang udah nyadi magang suba. Utai ti nyadi diulang Allah Taala belama. Nambahka nya, aku bisi mega udah meda, di dunya tu, penyai udah nganti pengelurus. Ku aku berunding dalam ati diri, “Allah Taala deka ngakim orang ke lurus enggau orang ke jai, laban semua utai, semua pengawa, deka nyadi magang ba maya ti endang udah diletak Allah Taala ke siti-siti utai.” Aku lalu berunding: Allah Taala nguji kitai, kena Iya madahka ngagai kitai, kitai tu nadai lebih ari jelu, laban pengujung kitai mensia enggau pengujung jelu, endang sebaka. Siku mati baka siku. Sida endang sebaka magang. Mensia nadai lebih agi ari jelu, laban pengidup bela nadai reti ba sida. Sida sama pulai ngagai siti endur, iya nya amau. Sida sama datai ari nya, lalu sida sama deka pulai ngagai utai nya. Baka ni ku orang nemu semengat mensia deka niki ke atas, lalu semengat jelu nurun ngagai tanah? Nya alai, aku nemu, utai ti pemadu manah ti patut dikereja kitai nya, kitai patut ngelantangka diri ngena utai ti udah ulih kitai. Nadai utai bukai ulih dikereja kitai. Kitai enda nemu utai ti deka nyadi ila, lebuh kitai udah mati. Udah nya aku lalu merening baru ngagai semua atur ti enda lurus ti nyadi di dunya tu. Orang ke kena tekan, nyabak lalu nadai orang deka nulung sida. Orang nadai nulung sida, laban orang ke nekanka pengidup sida bisi kuasa. Aku ngining orang ke udah mati lalu nadai agi, laban sida lantang agi ari orang ke agi idup. Tang orang ke enda kala ada, ti nadai kala meda pemingkuk atur ti nyadi di dunya tu, lantang agi ari orang ke agi idup enggau ari orang ke udah mati. Aku nemu, orang bebendar sereta landik gawa, laban sida ngining pangan diri. Utai nya mega nadai guna, baka ke begagaika ribut. Kenu ku sida, kitai beli enti kitai enda gawa lalu nejuka diri mati keberuran. Utai nya nyangka amat, tang manah agi ngembuan mimit aja utai tang enda irau ati, ari ke seruran bebendar gawa ngena jari dua piak, nguji nangkap ribut. Aku bisi mega meda utai bukai ti nadai guna dalam pengidup tu, iya nya siku mensia ti diau kediri-diri. Iya nadai anak, nadai menyadi, tang iya seruran gawa, enda nemu puas ati ke pengaya ti dikemisi iya. Sapa orang ke disangkung iya alai iya bebendar amat gawa baka nya, datai ke nyau enda nemu ngelantangka diri? Tu pen nadai mega guna, semina merinsaka diri idup. Dua iku manah agi ari siku, laban enti seduai iya begulai, seduai iya bulih agi gawa. Enti sema siku ari seduai iya teterap, siku ga bisi ngangkatka iya. Tang enti orang diau kediri-diri, lalu iya teterap, nya amat tusah, laban orang nadai nulung iya. Lebuh chelap, dua iku tau bekimbit tinduk, lalu ngangatka isi pangan diri, tang baka ni ku kitai ulih ngangatka diri enti kitai tinduk kediri-diri? Dua iku ulih ngelaban orang ke nyerang, tang enti iya ngelaban kediri-diri, iya alah. Tali begembar tiga, mar diputuska. Aku berundingka semua orang ke diau di dunya, lalu aku nemu, ari bala sida nya bisi siku orang bujang ti deka ngambi penuduk raja. Pemayuh orang ke dipegai raja nyangka nadai sekat, tang lebuh iya nyau nadai agi, nadai orang deka meri terima kasihka utai ti udah dikereja iya. Nya alai, utai nya nadai guna, baka ke begagaika ribut. Bejimat lebuh nuan mansang ngagai Rumah Sembiang. Manah agi nuan kin mai ati ti keran deka belajar, ari ti keran deka ngenjuk piring baka orang ke beli, ti enda nemu bida entara utai ti ngena enggau utai ti salah. Berunding dulu sebedau nuan mansutka jaku, lalu anang enda berunding enggau manah sebedau nuan ngaga semaya enggau Allah Taala. Iya di serega din, lalu nuan di dunya ditu. Nya alai, anang nyebut utai lebih ari ti patut. Balat agi nuan irau ati, balat agi ga nuan deka jai mimpi. Mayuh agi jaku nuan, besai agi ga peluang nuan nyebut utai ti beli. Nya alai, lebuh nuan ngaga semaya enggau Allah Taala, nuan enda tau enda enggau naka pengelengkas ngamatka semaya nya. Allah Taala enda begunaka orang ke beli. Kereja aja utai ti disemaya nuan. Manah agi enda ngaga semaya, ari ke ngaga semaya, lalu udah nya enda ngamatka semaya nya. Anang nejuka jaku nuan empu ngasuh nuan bedosa ngambika nuan enda ibuh madahka ngagai imam Allah Taala, nuan ukai sengaja nyebut utai nya. Nama kebuah nuan nyungkak Allah Taala ringat ngagai nuan? Nama kebuah nuan nyungkak Iya ngerusak utai ti udah ulih nuan? Nuan nyangka suah bemimpi, nyangka ngereja mayuh bengkah pengawa ti nadai guna, tauka kutap-kutap bejaku, tang nuan enda tau enda mengkang nangika Allah Taala. Anang tekenyit ati lebuh nuan meda perintah nekanka pengidup orang ke seranta, lalu enggai meri sida atur ti lurus, sereta enggai meri sida hak ti endang enggi sida. Genap iku pemesai endang dijaga siku orang ke tinggi agi pangkat ari iya, lalu seduai iya pen sama mega dijaga pemesai ti tinggi agi pangkat ari seduai iya. Indah pengidup raja deh bepanggai ba utai ti diketau. Enti nuan angkunka duit, nuan enda nemu puas ati. Enti nuan ingin deka kaya, nuan enda ulih ngulihka semua utai ti dikinginka nuan. Utai nya nadai guna. Makin kaya agi nuan, makin mayuh agi ga orang ditupi nuan. Semina utai ti ulih nuan, nuan nemu diri kaya. Bala orang ke gawa nyangka chukup tauka enda chukup utai diempa, tang sida tentu ulih tinduk jenak lebuh malam hari. Tang orang ke kaya sigi amat mayuh reta, datai ke sida nyau enda ulih tinduk laban sida irau ati. Tu utai ti jai ti udah dipeda aku dalam dunya tu: orang besimpanka duit nyadika penabat lebuh maya sida begunaka duit nya, lalu udah nya ngelenyauka semua duit nya ngereja pengawa ti enda menuku, lalu sida nadai agi utai ditinggalka bala anak sida. Kitai ninggalka dunya tu baka kitai ke datai - telanjai. Taja pen kitai bebendar gawa, tang nadai meh utai ulih dibai kitai. Utai tu enda betul! Kitai mupuk baka kitai ke datai. Kitai bekereja, nguji nangkap ribut, tang nama utai ti ulih kitai? Kitai semina idup dalam pemetang enggau penusah, irau ati, ringat, sereta sakit. Tu utai ti udah ditemu aku: utai ti pemadu manah, ti tau dikereja kitai nya makai, ngirup lalu ngelantangka diri ngena utai ti udah ulih kitai dalam umur ti pandak tu, ti diberi Allah Taala ngagai kitai. Tu endang ungkup kitai. Enti Allah Taala meri kitai pengaya enggau reta tengkira, lalu nejuka kitai ngelantangka diri, kitai patut beterima kasih, lalu ngelantangka diri ngena utai ti udah ulih kitai, laban utai nya endang pemeri ari Allah Taala. Nya alai laban Allah Taala udah ngasuh kitai diau lantang, kitai enggai kelalu irau ati ke pemandak umur kitai. Aku udah meda atur ti enda lurus dipejalaika orang di dunya tu. Allah Taala deka meri kitai pengaya, basa, enggau reta tengkira, nyengkaum semua utai ti dikinginka kitai, tang Iya enggai nejuka kitai ngelantangka diri ngena utai nya. Tang sekeda orang kampar deka ngelantangka diri ngena utai nya. Tu nadai guna, sereta enda patut. Kitai nyangka bisi seratus iku anak, lalu panjai umur, tang panjai naka ni pen umur kitai, nadai meh kitai ulih ngelantangka diri, lalu bangkai kitai pen enda mega dikuburka enggau menyana. Aku madahka ngagai nuan, indah anak mit ke mati lulus deh diintu orang manah agi ari nya. Nadai guna anak mit nya ada, laban iya lesap ke dalam pemetang, alai iya ke lalu enda dikingatka orang agi. Iya nadai kala meda penampak siang hari, tauka nemu utai ti dikumbai pengidup, tang iya udah tetemuka endur alai belelak, lebih agi ari orang ke nadai kala ngelantangka diri, taja pen iya nyangka idup dua ribu taun, laban seduai iya sama mansang ngagai endur siti nya aja. Kitai ngereja pengawa semina kena ngulihka utai diempa, tang kitai nadai kala bulih pemakai ti chukup. Baka ni ku orang ke bepenemu-dalam tau nyamai agi diau ari orang ke beli? Nama penguntung ulih orang ke seranta enti iya nemu ngatur ulah diri di dunya tu? Utai nya nadai guna, baka ke begagaika ribut. Manah agi enti kitai nemu puas ati ke utai ti dikemisi diri, ari ke seruran inginka utai bukai. Semua utai ti nyadi endang udah diletak dulu kelia, lalu semua kitai bela nemu, nuan enda tau bekelikuh enggau orang ke kering agi ari nuan. Lama agi seduai bekelikuh enggau pangan diri, balat agi ga kelikuh nya nadai guna, lalu seduai pen nadai mega bulih penguntung ari nya. Baka ni ku orang ulih nemu utai ti tau mai penguntung dalam pengidup ti pandak sereta nadai guna tu, pengidup ti ngelansa baka ayuk? Baka ni ku kitai ulih nemu utai ti deka nyadi di dunya tu, lebuh kitai udah mati? Tampak nama nya manah agi ari minyak wangi ti berega, lalu hari nuan mati nya manah agi ari hari nuan ada. Manah agi mansang ngagai rumah orang ke ngulit, ari ke mansang ngagai rumah alai orang ke rami, laban orang ke idup seruran ingatka pemati endang nganti semua kitai. Sinu ati manah agi ari ke ketawa, taja pen iya mandangka mua nuan tusah, tang iya ngansah nuan ngambika nuan tajam agi meretika utai. Orang ke selalu berundingka pasal pengelantang nya orang ke beli. Orang ke bepenemu-dalam berundingka pasal pemati. Manah agi enti nuan dianu orang ke bepenemu-dalam, ari ke dipuji orang ke beli ngena lagu. Lebuh orang ke beli ketawa, iya munyi duri ti meretih diempa api. Ketawa sigi nadai reti. Nuan nyangka bepenemu-dalam, tang enti nuan ngakal orang, nuan baka orang ke beli. Enti nuan makai suap, nuan ngerusak diri empu. Pengujung utai endang manah agi ari pun iya. Ati ti liat manah agi ari penyumbung. Anang lengkar. Nuan beli enti nuan bedendam. Anang sekali-kali nanya, “Nama kebuah utai menya manah agi ari utai ti diatu?” Nya ukai tanya ti dipansutka orang ke nemu berunding. Semua orang ke idup patut bepenemu-dalam, laban penemu-dalam nya baka pesaka, lalu iya deka meri kitai pengelikun baka duit. Penemu-dalam deka ngasuh nuan likun. Nya meh penguntung bisi penemu. Peratika utai ti udah digaga Allah Taala. Enti Iya ngaga utai bingkuk, baka ni ku mensia ulih beruruska utai nya? Lebuh nuan mujur, nuan patut gaga ati, lalu lebuh penusah nuntung, ingatka tu: Allah Taala empu ke ngasuh pengelantang enggau penusah nyadi. Nadai nuan nemu utai ti deka nyadi. Dulu suba pengidup aku nadai guna, tang dalam pengidup nya, aku udah meda semua utai. Sekeda orang ke manah nyangka mati, tang sekeda sida deka majak idup taja pen sida nya orang ke jai. Nya alai, anang kelalu manah tauka kelalu bepenemu-dalam; anang munuh diri tang anang mega kelalu jai tauka kelalu beli. Nama kebuah mati tumu? Seliahka pekara dua iti nya tadi. Enti nuan nangika Allah Taala, nuan tetap deka mujur dalam pekara nya. Penemu-dalam mai pengering ngagai orang ke pintar, lebih ari pengering ti dibai sepuluh iku raja ngagai sebuah nengeri. Nadai orang di dunya tu ti nadai kala ngereja utai ti salah. Anang ibuhka semua utai ti disebut orang, enggai ke nuan ninga orang gaji nuan mechat nuan. Nuan empu endang nemu diri udah suah mechat orang. Semua utai tu udah diuji aku magang ngena penemu-dalam. Ku aku, “Aku mutus ati deka nyadi orang ke bepenemu-dalam,” tang aku enda tulihka nya. Baka ni ku orang ulih tetemuka reti pengidup? Pekara tu kelalu dalam ke kitai, kelalu mar diperatika kitai. Tang aku angkun deka belajar ngiga penemu. Aku mutus ati deka ngiga penemu-dalam, enggau saut ngagai semua tanya aku, lalu nguji nemu pemeli utai ti jai sereta mapap. Aku udah tetemuka utai ti lebih agi tau ngerusak ari pemati, iya nya indu ke baka panjuk. Pengerindu iya ke nuan nyadi baka reti jala kena iya nangkap nuan, lalu lengan iya ti engkauk nuan, deka nanchang nuan baka rantai. Orang ke ngereja utai ti ngerinduka ati Allah Taala, ulih ngerarika diri ari indu nya, tang indu nya deka nyintak orang ke bedosa. Tu endang amat, ku pengajar nya bejaku, aku udah tetemuka utai tu mimit-mimit lebuh aku begigaka saut. Aku udah begigaka saut bukai, tang aku nadai tetemuka iya. Aku bisi tetemuka siku ari seribu iku lelaki ke ulih dibasa aku, tang siku indu pen nadai. Tu meh semua utai ti udah dipelajarka aku: Allah Taala ngaga kitai lurus, tang kitai udah ngaga ulah diri mayuh macham. Semina orang ke bepenemu-dalam aja ke nemu reti utai. Penemu-dalam ngasuh sida tuchum, lalu ngasuh mua sida terang. Kereja utai ti diasuh raja, lalu anang ngaga semaya enggau Allah Taala enggau enda berunding. Raja tau ngereja sebarang utai ti dikedekaka iya, nya alai kejangka diri jauh ari iya. Anang diau ba endur ti tau meri penusah baka nya. Raja ngereja utai laban iya bisi kuasa, lalu nadai orang tau mantah utai ti dikereja iya. Seagi-agi nuan ngasika jaku iya, nuan likun, lalu orang ke bepenemu-dalam endang nemu jalai enggau maya sida patut ngasika jaku raja. Kitai endang bisi maya ti ngena, enggau chara ti ngena kena kitai ngereja utai, tang kitai semina nemu mimit aja! Nadai siku kitai nemu utai ti deka nyadi, lalu orang pen nadai mega madahka nya ngagai kitai. Nadai orang ulih nagang diri mati, tauka betangguhka pemati diri. Nya meh perang ti enda ulih diseliahka kitai. Ngena jalai akal pen enda meh ulih. Aku meda semua utai tu lebuh aku berundingka utai ti dikereja di dunya tu, dunya alai sekeda orang ke bisi kuasa diau, alai orang bukai ke natka diri merinsa dipegai sida. Endang amat, aku bisi udah meda orang ke jai disimpan dalam kubur sida, tang lebuh orang pulai ari pendam, orang muji sida dalam nengeri ti udah nyadi endur alai sida ngereja penyai. Utai tu nadai guna. Nama kebuah orang kelalu ingin deka ngereja penyalah? Laban penyalah enda diukum enggau chukup penyampat. Orang ke bedosa nyangka ngereja seratus bengkah penyalah, lalu agi mengkang idup. Aku nemu utai ti disebut sida: “Enti nuan ngasika Allah Taala, semua utai nadai nama-nama, tang sida ke jai enda ulih mujur. Pengidup sida baka ayuk, lalu sida deka mati biak, laban sida enda ngasika Allah Taala.” Tang nya jaku mapap. Peda nuan utai ti nyadi di dunya tu: kadang-kadang orang ke lurus bulih ukum ti patut diterima orang ke jai, lalu orang ke jai bulih upah ti patut diterima orang ke lurus. Aku madahka ngagai nuan, utai tu sigi nadai guna. Nya alai, dalam penemu aku, kitai patut ngelantangka diri, laban dalam pengidup kitai tu, kitai semina ulih ngelantangka diri ngena pengawa bepakai enggau beirupka utai. Abis kurang iya, kitai ulih ngereja utai nya lebuh kitai bebendar gawa dalam pengidup ti udah diberi Allah Taala ngagai kitai di dunya tu. Genap kali aku nguji nyadi orang ke bepenemu-dalam, lalu meratika utai ti nyadi di dunya tu, aku nemu kitai ulih natka diri enda tinduk siang malam tang kitai enda ulih meretika utai ti dikereja Allah Taala. Taja pen kitai bebendar nguji, tang enda meh kitai ulih meretika utai nya. Orang ke bepenemu-dalam nyangka ngumbai diri nemu, tang sida enda. Aku lama udah belematika semua utai tu, lalu aku nemu, Allah Taala empu ke ngatur semua utai ti dikereja orang ke bepenemu-dalam, enggau orang ke lurus, nyengkaum pengerindu enggau pemenchi sida. Nadai orang nemu utai ti deka nyadi jemah ila, tang nya nadai ngawa. Orang ke lurus enggau orang ke bepenyalah, orang ke badas enggau orang ke jai, orang ke arap enggau orang ke enda arap, orang ke ngenjuk piring enggau orang ke enda ngenjuk piring, endang saum pengujung magang. Orang ke badas enda lebih badas agi ari orang ke bedosa. Lalu orang ke nyumpah enda lebih badas agi ari orang ke enda nyumpah. Pengujung siti nya aja nuntung semua mensia. Tu meh utai ti pengabis jai nyadi di dunya tu. Seagi-agi mensia idup, runding sida penuh laban penyai enggau penemu ti enda menuku, lalu udah nya sida mati ngenyit. Tang barang sapa idup dalam dunya orang ke idup tu, bisi pengadang. Indah ukui ti idup deh nyamai agi diau, ari singa ti mati. Sigi amat, orang ke idup nemu diri deka mati, tang orang ke mati nadai nemu utai. Sida nadai agi upah dianti. Sida enda dikingatka agi. Pengerindu sida, pemenchi sida, pengingin sida, semua dibai sida mati. Sida nadai agi enggau orang ngereja utai di dunya tu. Empa meh pemakai nuan, lalu ngelantangka diri. Irup meh wain nuan, lalu gaga ati. Utai nya nadai ngawa Allah Taala. Seruran pandangka mua ti lantang sereta gaga. Diau lantang ati enggau orang ke dikerinduka nuan seagi nuan idup dalam pengidup ti nadai guna tu, ti udah diberi Allah Taala ngagai nuan di dunya tu. Awakka nuan ngelantangka diri tiap hari ba hari ti nadai guna tu, laban semina nya aja utai ti ulih nuan ari pengiruh nuan. Kereja enggau bebendar sebarang pengawa ti dikereja nuan, laban di dunya pemati ila endang nadai pengawa, nadai runding, nadai penemu, nadai penemu-dalam. Kia ke meh nuan deka mupuk. Aku bisi udah tetemuka siti agi utai, iya nya, orang ke laju belanda di dunya tu enda selalu menang belumba, lalu orang ke berani enda selalu menang beperang. Orang ke bepenemu-dalam enda selalu bulih pengidup, orang ke nemu berunding enda selalu nyadi kaya, lalu orang ke nemu ngereja utai enda selalu niki pangkat, laban utai ti jai endang tau nyadi ba genap iku orang. Nadai nuan nemu maya diri deka ditinggang penusah. Baka burung ti ngenyit disintak panjuk, baka ikan ti dibalut pukat, baka nya meh kitai mensia deka ditinggang penusah lebuh kitai enda ngadang. Aku bisi mega udah meda utai bukai, iya nya teladan ti manah pasal jalai mensia berundingka penemu-dalam di dunya tu. Bisi sebuah nengeri ti mit, ti nadai mayuh orang. Siku raja ti kering nyerang nengeri nya. Iya ngelulung nengeri nya, lalu sedia deka mumbuska dinding kuta nengeri nya. Di nengeri nya bisi siku orang ke seranta, tang pintar, ke ulih nyelamatka nengeri nya. Tang nadai orang ingatka iya. Aku endang selalu ngumbai penemu-dalam nya manah agi ari pengering, tang orang nadai kala ngumbai orang ke seranta nya orang ke bepenemu-dalam, tauka mendingka utai ti disebut iya. Manah agi mendingka siku orang ke bepenemu-dalam bejaku enggau nyawa ti enda inggar, ari ke mendingka siku orang perintah bejaku enggau nyawa ti inggar ba aum bala orang ke beli. Penemu-dalam beguna agi ari senyata, tang siku orang ke bedosa ulih ngerusak utai ti manah. Bangkai lalat tau ngasuh sebutul minyak wangi bau but, lalu pemeli ti mit ngelamun penemu-dalam. Orang ke bepenemu-dalam endang seruran ngereja utai ti ngena, lalu orang ke beli endang seruran ngereja utai ti salah. Pemeli sida nyata dipeda orang kampar ke enggau sida betemu ba sebelah jalai. Sida endang ngayanka diri amat beli. Enti orang ke merintah kita ringat ngagai kita, anang muai pengawa kita, laban penyalah ti besai ulih diampun, enti kita enda bemunyi. Tu atur ti enda lurus ti udah dipeda aku di dunya tu, ti dikereja bala orang ke megai perintah. Orang ke beli diberi pangkat megai kuasa, tang orang ke kaya enda dikibuhka. Aku bisi udah tepedaka ulun nepan kuda, tang orang ke tinggi pangkat bejalai kaki baka ulun. Enti nuan numbak lubang kebung, nuan empu deka labuh ngagai lubang kebung nya. Enti nuan mumbuska dinding, ular deka mantuk nuan. Enti nuan bekereja ba endur alai orang ke ngulihka batu, nuan deka bebadi laban batu. Enti nuan melah kayu, nuan deka bebadi ngereja pengawa nya. Enti kapak nuan tumpul lalu nuan enda ngansah iya, nuan deka bebendar agi mantapka iya. Nuan pintar enti nuan dulu ngaga pelan. Nadai guna nuan nemu chara bemain enggau ular, enti nuan nejuka ular mantuk nuan dulu. Utai ti disebut orang ke bepenemu-dalam, mai basa ngagai sida, tang orang ke beli dirusak jaku sida empu. Sida berengkah ngena jaku ti beli, lalu ngujungka jaku diri munyi orang ke gila. Orang ke beli enda nemu ngetu bejaku. Nadai orang nemu bagi utai ti deka nyadi udah bekau nya, lalu nadai orang ulih madahka ngagai kitai utai ti deka nyadi lebuh kitai udah mati. Semina orang ke kelalu beli lalu enda nemu jalai pulai ke rumah, ke ngelelakka diri gawa. Tulah meh nuan, o menua, lebuh raja agi biak umur, lalu bala tuai rami makai besai sepemanjai malam. Tang menua deka bulih berekat enti iya bisi raja ke nemu mutuska penemu ke diri empu, lalu bala tuai makai ba maya ti patut, lalu nemu nagang pengingin diri lalu enda mabuk. Lebuh nuan kelalu ngelusu lalu enggai nyeruri atap rumah diri, atap nya deka tuduh, lalu rumah nya deka runtuh. Pengerami makai besai ngasuh nuan gaga, lalu wain ngelantangka nuan, tang nuan enda ulih meli utai dua bengkah nya enti nuan nadai duit. Anang nyumpah raja. Nyumpah dalam ati pen enda meh tau, lalu anang nyumpah orang ke kaya. Nyumpah sida ari bilik peninduk nuan empu pen enda meh tau, enggai ke burung mai pesan lalu madahka ngagai sida utai ti disebut nuan. Kena meh duit nuan bejalaika pengawa dagang di menua orang, ngambika jemah ila nuan bulih untung. Simpan duit nuan ba mayuh bengkah endur - mayuh agi endur, manah agi - laban nuan enda nemu bagi utai ti jai ti deka nuntung nuan di dunya tu. Enda milih tunga kayu deka rebah, iya deka mengkang ba endur alai iya ti rebah. Lebuh mua hari nyau sarat, hari lalu ujan. Enti nuan nganti hari enggau ribut ti ngena, nuan enda tetanamka utai, lalu nuan nadai utai diketau. Allah Taala ngaga semua utai, lalu nuan enda ulih meretika utai ti dikereja Iya, baka nuan ti enda meretika chara mensia nyadi dalam kandung indai iya. Taburka benih nuan lebuh pagi hari enggau lebuh lemai hari. Nadai nuan nemu bagi iya ti deka tumbuh, iya ti ditanam pagi tauka iya ti ditanam lebuh lemai hari. Manah amat enti kitai ulih ngelantangka diri ngasaika penampak siang hari. Kita patut beterima kasihka genap taun kita idup. Gayu pen kitai nguan menua, kitai patut ingatka diri lama agi mati ari kitai ke idup. Kitai nadai utai bukai dianti. Kita ke biak, awakka kita ngelantangka diri kala lebuh kita agi biak. Awakka kita gaga kala lebuh kita agi biak. Kereja aja utai ti dikedekaka kita, lalu turutka pengingin ati kita. Tang ingat: Allah Taala deka ngakim kita ketegal semua utai ti dikereja kita. Anang nejuka sebarang utai ngasuh ati kita irau, tauka ngemediska kita. Kita enda lama mengkang biak. Nya alai, kingatka Allah Taala ti udah ngaga nuan kala lebuh nuan agi biak, sebedau nuan merampau diau dalam hari enggau taun ti deka datai, lalu nuan nyebut, “Aku nadai kala lantang diau.” Nya meh maya penampak mata hari, bulan enggau bintang deka majak silam ba mata nuan, lalu mua hari nadai kala lesap. Nya baru lengan nuan, ti udah nyaga nuan, deka getar-getar, lalu kaki nuan ti kering diatu, deka nyadi lemi. Ngeli nuan nyau nadai mayuh agi kena ngunyah pemakai, lalu mata nuan nyau rabun lalu enda lansik agi. Pending nuan nyau enda ulih ningaka munyi utai ti ba jalai raya. Nuan nyau deka enda ulih ninga munyi injin padi, tauka ninga munyi musik ti ditebah orang. Tang munyi burung chukup kena ngerak nuan ke tinduk. Nuan deka rawan bediri ba endur ti tinggi, lalu bejalai pen tau ngasuh nuan bebadi. Buk nuan buban. Nuan nyau deka enda ulih bejalai, lalu semua pengingin nuan nyau nadai agi. Kitai deka mansang ngagai dunya pemati, lalu orang deka ngulit ba sebelah jalai raya. Rantai pirak deka putus, lalu lampu emas deka labuh lalu pechah. Tali ba telaga deka putus, lalu tepayan ai deka pechah. Tubuh kitai deka pulai baru ngagai amau, lalu seput pengidup ti diberi Allah Taala ngagai kitai deka pulai baru ngagai Iya. Nadai guna, nadai guna, ku orang ke bepenemu-dalam nya bejaku. Semua utai nya nadai guna magang. Tang laban orang ke bepenemu-dalam nya endang pintar, iya majak ngajar orang utai ti ditemu iya. Iya belajarka jaku-dalam, lalu mansik pengamat jaku nya. Orang ke bepenemu-dalam nya nguji ngiga jaku ti tau ngenyamaika ati, tang leka jaku ti ditulis iya endang jaku ti datai ari ati. Jaku ti disebut orang ke bepenemu-dalam nya baka tungkat ti tajam ti dikena pengibun bedus nguluka bedus sida, lalu jaku-dalam ti udah dikarang tan baka paku lawang ti dipantang. Semua jaku-dalam nya udah diberi Allah Taala ti Pengibun kitai semua. Anak, bejaga nuan ari siti agi utai. Pengawa betuliska bup endang enda nemu abis, lalu enti nuan kelalu bebendar belajar, nuan deka lelak. Semua utai nya udah disebut magang, tang siti agi utai deka disebut: Nangika Allah Taala, lalu ngasika pesan Iya, laban nya endang kebuah kitai mensia digaga. Allah Taala deka ngakim semua utai ti dikereja kitai, nemuka utai nya manah tauka jai, nyengkaum utai ti dikereja kitai enggau chara belalai. Pelandai ti pemadu manah, ulih Solomon. Mulut nuan nyium aku. Pengerindu nuan manah agi ari wain. Nuan ngaba bau rengut. Nama nuan madahka nya. Nadai indu ulih nagang diri rinduka nuan. Bai aku enggau nuan, lalu tua deka rari. Awakka nuan meh nyadi raja aku, lalu mai aku ngagai bilik nuan. Tua deka lantang begulai bebendar ngirup, lalu rinduka pangan diri. Diatu baru aku nemu kebuah semua indu rinduka nuan! Indu Jerusalem, aku amat chelum tang bajik, chelum baka langkau kain Kedar, tang bajik baka kain tirai ti di istana Solomon. Anang ngemaruhka aku ketegal chura kulit aku, laban mata hari udah ngasuh kulit aku chelum. Bala menyadi lelaki aku ringat ngagai aku lalu mejalka aku gawa dalam kebun anggur, datai ke aku nyau nadai hari ngintu tubuh diri empu. Padahka ngagai aku, O ambai, ngagai ni nuan deka nguluka raban bedus nuan ngulam? Ngagai ni alai sida deka ngerarika diri ari panchar mata panas lebuh tengah hari? Nama kebuah aku enda tau enda begigaka nuan ba raban bedus orang bukai? Kati nuan enda nemu endur alai nya, nuan indu ke pemadu bajik? Mupuk meh nuan, lalu titihka raban bedus nya. Giga padang rumput ke raban kambin nuan semak langkau kain bala pengibun bedus. Nuan, ambai, nyau ngasuh lelaki gila laban pengingin baka kuda ti indu ke ngasuh kuda ti lelaki ti narit kerita raja Ejip nyau gila laban pengingin. Buk nuan manah gaya mungkur kuyu nuan lalu merundai ba rekung nuan baka batu ti berega. Tang kami deka ngaga ke nuan rantai emas ti diias enggau pirak. Lebuh raja aku benung gali ba kerusi-panjai iya, lalu minyak wangi aku ngaba bau rengut. Ambai aku bebau mur lebuh iya ningkapka diri ba tusu aku. Ambai aku baka bungai babas ti bebungai dalam kebun anggur di En-gedi. Naka meh pemajik nuan, O ambai. Mata nuan jelik-jelik laban pengerindu! Naka meh penyigat gamal nuan, O sulu aku. Nuan ngasuh ati aku udu gaga! Rumput ti gadung tu meh nyadika peninduk tua. Kayu sidar deka nyadika tiang rumah tua, lalu kayu saipris deka nyadika atap rumah tua. Aku tu bungai ros di Saron, bungai bakung ti ba lebak. Baka bungai bakung ti tumbuh ba madang duri, baka nya meh ambai aku begulai enggau indu bukai. Baka kayu epal ti tumbuh dalam babas, baka nya meh ambai aku dibandingka enggau lelaki bukai. Aku rindu duduk belindung ba iya, lalu buah iya manis diempa. Iya mai aku ngagai balai pengerami makai besai lalu nuatka menira pengerindu atas aku. Keringka aku baru ngena salai buah anggur lalu asuh aku badu agi aus ngena buah epal! Aku nyau lembut tulang laban aku balat tetengukka iya. Jari kiba iya di baruh pala aku, lalu jari kanan iya murus aku. Besemaya ngagai aku, kita indu Jerusalem. Besumpah meh kita atas rusa ti laju, enggau kijang madahka diri enda ngachau kami duai lebuh kami duai benung rinduka pangan. Aku bisi ninga nyawa ambai aku. Iya datai belanda nengah bukit, belanda nengah munggu mansang ngagai aku. Ambai aku baka kijang, baka anak rusa ti lelaki. Nyin iya bediri ngimbai dinding. Iya nilik ke dalam ari jenila lalu nyeling ngerampas ari seling dinding. Ambai aku bejaku enggau aku. Datai kitu, ambai aku. O sulu, aram mupuk enggau aku. Musin chelap nyau abis. Ujan udah badu. Di menua pesisir, bungai nyau ngerembai. Tu meh maya belagu. Lalu munyi burung achang bisi didinga di padang. Buah ara nyau deka mansau. Angin nyau bebau rengut laban bau bungai anggur. Nya alai, datai meh nuan ambai. Sulu, aram mupuk enggau aku. Nuan baka burung achang ti belalai ba selikap batu. Awakka aku meda pemajik mua nuan lalu ninga munyi pemanah nyawa nuan. Tangkap jelu munsang, enggau anak sida sebedau sida ngerusak kebun anggur kitai ti benung bebungai. Ambai aku endang enggi aku, lalu aku endang enggi iya. Iya ngasuh raban bedus iya ngulam ba madang bungai bakung datai ke ribut muput pagi hari lalu hari enda agi petang. Pulai kitu, sulu, baka kijang, baka anak rusa ti lelaki ba bukit Beter. Lebuh aku tinduk ba peninduk aku tiap malam, aku bemimpika ambai aku. Aku ngiga iya, tang nadai tetemuka iya. Aku bejalai segau-segau nengah nengeri, nengah jalai raya nengeri nya, enggau nengah jalai ti sempit. Aku ngiga ambai aku. Aku ngiga iya, tang nadai tetemuka iya. Bala orang ke jaga ba jalai raya di nengeri bisi tepedaka aku. Aku lalu nanya sida, “Kati kita bisi tetemuka ambai aku?” Lebuh aku ninggalka sida, aku lalu tetemuka iya. Aku merap iya, lalu enggai ngelengkaka iya datai ke aku nyau mai iya ngagai rumah indai aku, ngagai bilik ti alai aku ada. Besemaya enggau aku, kita indu Jerusalem. Besumpah kita atas nama rusa enggau kijang ti laju belanda madahka diri enda ngachau kami duai lebuh kami duai benung rinduka pangan diri. Nama utai nya ti datai ari menua puang baka tiang asap, ti bebau rengut laban menyan enggau mur, menyan ti dijual orang ke bedagang? Solomon bisi datai, dibai atas kerusi diraja iya, dijaga enam puluh iku soldadu, soldadu ke pemadu kering di menua Israel. Semua sida endang landik magang ngena pedang, ke suah udah beperang. Genap iku sida besenyataka pedang, nyaga ari orang ke nyerang lebuh malam hari. Raja Solomon dibai ngena kerusi diraja ti digaga ari kayu ti pemadu manah. Tiang kerusi nya disampak enggau pirak, lalu dibalut enggau kain ti disulam enggau emas. Selap penuduk kerusi nya dibap ngena kain ti bechura mirah-redam, ti disulam indu orang Jerusalem enggau abis pengerindu ati. Kita indu Sion, datai kitu lalu peda Raja Solomon. Iya ngena makota ti udah diengkah indai iya ba pala iya lebuh iya ditikah, lebuh maya iya lantang sereta gaga. Naka meh pemajik nuan, O ambai aku! Mata nuan nyau beperenching laban pengerindu merening ari belakang tambai mua nuan. Buk nuan kepai-kepai baka raban kambin ti belanda nurun bukit Giliat. Ngeli nuan burak baka jelu bedus ti baru udah dikukur sereta diberi mandi. Sigi pen nadai ga ngeli nuan rabang. Semua ngeli nuan nadai timpang. Mulut nuan baka kain ti mirah-redam. Naka meh pemanah mulut nuan lebuh nuan bejaku. Kuyu nuan nyau pelu-pelu dibap tambai mua nuan. Rekung nuan baka menara David, segala sereta alus, lalu tenggak baka seribu iti terabai ba rekung nuan. Tusu nuan baka kijang, rusa ti besapit ti ngulam ba madang bungai bakung. Aku deka majak diau ba bukit mur, ba bukit menyan, datai ngagai maya ribut muput pagi hari lalu hari enda agi petang. Naka meh pemajik nuan, O ambai aku! Naka meh pemajik nuan! Aram mupuk enggau aku ari Bukit Lebanon, O bini. Mupuk enggau aku ari menua Lebanon. Nurun ari tuchung Bukit Amana, ari Bukit Senir enggau Bukit Hermon, alai singa enggau engkuli diau. Jelik mata nuan, O ambai enggau bini aku, enggau tenggak ti dikena nuan udah ngasuh ati aku balat berai. Pengerindu nuan ngasuh ati aku gaga, O ambai enggau bini aku. Pengerindu nuan manah agi ari wain. Minyak wangi nuan lebih agi bebau rengut ari rempah. Mulut nuan manis asai ai manyi, O sulu aku. Dilah nuan asai ai tusu enggau ai manyi. Gari nuan bebau rengut baka Bukit Lebanon. Ambai aku, bini aku, nya kebun ti resia, kebun ti dipagar, mata ai ti diempu aku siku aja. Dia meh endur alai utai ti ditanam tumbuh enggau galak. Sida tumbuh baka kebun buah delima lalu mansutka buah ti pemadu manah. Bungai inai enggau kayu rempah, kunyit, tebu, kayu manis, enggau semua macham menyan bisi dia magang. Kayu mur enggau garu bisi tumbuh dia sama enggau semua kayu rempah ti pemadu bebau rengut. Ai ti engkeching sungai ti rarat, anak sungai ti pansut ari Bukit Lebanon mai ai ngagai kebun nya. Dani meh nuan, Ribut Utara. Ribut Selatan, puputka kebun aku. Awakka angin ngaba bau rengut. Awakka ambai aku datai ngagai kebun tu lalu makai buah ti pemadu manah ari kebun tu. Aku udah tama ngagai kebun aku, O ambai enggau bini aku. Aku benung ngumpul rempah enggau mur aku. Aku benung makai ai manyi enggau idang manyi. Aku benung ngirup wain enggau ai tusu. Makai meh kita, O bala ambai, lalu ngirup datai ke kita nyau mabuk laban pengerindu! Lebuh aku tinduk, ati aku mengkang dani. Aku bemimpi ninga ambai aku nekung pintu. Awakka aku tama, O wai sulu ambai aku, burung achang aku. Pala aku nyau basah laban ambun, lalu buk aku nyau basah laban bias ujan. Aku baru udah muka gari aku, nya alai nama kebuah aku enda tau enda begari baru? Aku udah masu kaki aku, nya alai nama kebuah aku enda tau enda ngamahka kaki aku baru? Ambai aku megai pintu, lalu ati aku gaga laban iya nyau semak. Aku sedia deka ngasuh iya tama. Jari aku dibalut mur tunjuk aku dibalut ai mur, lebuh aku megai gagang pintu. Aku muka pintu ke ambai aku, tang iya udah nadai agi dia. Naka meh pengingin aku deka ninga nyawa iya! Aku ngiga iya, tang nadai tetemuka iya. Aku ngangauka iya, tang nadai ninga iya nyaut. Orang ke nyaga nengeri tetemuka aku. Sida malu aku, lalu tubuh aku rajai. Bala jejaga ke ba kuta nengeri ngerampas tungguk pala aku. Besemaya meh kita enggau aku, kita indu Jerusalem, enti kita tetemuka ambai aku, padahka ngagai iya, aku nyau lembut tulang inginka iya. Nuan indu ke pemadu bajik, kati ambai nuan lain agi ari semua orang bukai? Nama utai ti manah ba iya ti ngasuh kami patut besemaya enggau nuan? Ambai aku sigat sereta kering. Ari sepuluh ribu iku lelaki, ka semina siku aja ti baka iya. Mua iya baka emas tulin, lalu buk iya ngelegetang, chelum baka bulu burung kak. Mata iya manah baka burung achang ti ba tebing sungai, burung achang ti dibasu ngena ai tusu, ti bediri ba tebing sungai. Kuyu iya manah baka kebun ti penuh laban sayur enggau rempah. Mulut iya baka bungai bakung, basah laban ai mur. Jari iya manah raras, lalu iya ngena tinchin ti nyangkum batu ti berega. Tubuh iya baka gading ti alus, ti nyangkum batu nilam. Pah iya baka tiang batu marmar ti burak ti diengkah dalam sangkum emas. Iya baka raja, baka Bukit Lebanon ti ngundan kayu sidar ti tinggi. Mulut iya manis disium. Semua utai ba iya narit ati aku magang. Nya meh gaya ambai aku, indu Jerusalem. Indu ke pemadu bajik, kini ke tunga ambai nuan bejalai? Padahka ngagai kami kini ke ambai nuan bejalai, ngambika kami ulih nulung nuan ngiga iya. Ambai aku udah bejalai ngagai kebun iya, alai kayu balsam ti tumbuh. Iya meri raban jelu tupi iya makai ba kebun nya lalu ngumpul bungai bakung. Ambai aku endang enggi aku, lalu aku endang enggi iya. Iya ngasuh raban bedus iya ngulam ba madang bungai bakung. Ambai aku, nuan bajik baka Jerusalem, manah baka nengeri Tirsah, manah baka nengeri ti besai. Anang malik ngagai aku, laban perening nuan ngasuh aku lemi. Buk nuan kepai-kepai baka raban kambin ti belanda nurun bukit di Giliat. Ngeli nuan burak baka raban bedus ti udah diberi mandi. Sigi pen nadai ga ngeli nuan rabang. Semua ngeli nuan nadai timpang. Kuyu nuan pelu-pelu di belakang tambai mua nuan. Awakka raja bisi enam puluh iku kuin, lapan puluh iku indu simpan, indu ke biak ti enda ulih diitung! Tang aku rinduka siku indu aja, lalu iya bajik baka burung achang. Iya anak tunggal indai iya, anak ke dikerinduka indai iya. Semua indu bela merening ngagai iya magang, lalu muji iya. Kuin enggau indu simpan belagu muji iya. Sapa orang tu ke nyeling baka merekah pajar? Iya bajik sereta terang mua, beperenching baka mata hari tauka baka bulan. Aku udah datai ba madang kayu almon deka meda anak kayu ba lebak nya, deka meda daun ti muda ba batang anggur enggau bungai ba kayu delima. Aku getar-getar laban nuan udah ngasuh aku balat gagit ati deka rindu baka orang ke nepan kerita perang ke ransing deka beperang. Betanda, betanda, meh nuan indu dara orang Sulam. Awakka kami meda nuan betanda. Nama kebuah kita keran deka meda aku betanda ba entara rintai orang ke ngemata? Naka meh pemanah gaya kaki nuan bekasut, O indu ke udu bajik! Pah nuan baka batu ti berega ti ditempa orang ke landik engkebang. Pusat nuan baka mangkuk ti nadai kala enda ngundan wain ti udah dichampur. Perut nuan baka tugung gandum ti dikelingi bungai bakung. Tusu nuan baka dua iku anak rusa, baka dua iku kijang. Rekung nuan baka menara ti digaga ari gading. Mata nuan baka letung ti di nengeri Hesbon, semak pintu Batrabim. Idung nuan baka menara Lebanon ti ngayung nengeri Damaskus. Pala nuan baka Bukit Karmel lalu buk nuan kepai-kepai baka kain ungu ti narit ati raja. Naka meh pemanah enggau pemajik gamal nuan O ambai ke pemadu bajik! Raras tubuh nuan manah baka batang kayu engkerema, lalu tusu nuan baka tangkai buah iya. Aku deka niki kayu engkerema nya lalu ngambi buah iya. Dipeda aku tusu nuan baka tangkai buah anggur, lalu kesuh seput nuan bebau rengut baka buah epal, lalu mulut nuan baka wain ti pemadu manah. Enti pia awakka wain nya rarat terus ngagai ambai aku, rarat ngagai mulut enggau ngeli iya. Aku endang enggi ambai aku, lalu iya endang inginka aku. Datai kitu meh nuan O sulu aku. Aram tua mupuk ngagai menua pesisir lalu bemalam ba sebelah genturung pendiau. Tua deka dani tumu pagi lalu meresa batang anggur, deka meda enti sida udah belabuh bekantuk deka meda enti bungai anggur udah ngerembai lalu kayu delima udah bebungai. Dia ila baru aku deka ngayanka pengerindu aku ke nuan. Nuan ulih ensium bau jayau, lalu semua buah ti manah bisi semak mua pintu tua. O wai sulu, aku udah nyimpan ke nuan pengerindu ti lama enggau pengerindu ti baru. Naka meh pemanah enti sema nuan tak menyadi lelaki aku, ti udah ditusuka indai aku. Nya baru, enti aku betemu enggau nuan ba jalai raya, aku ulih nyium nuan, lalu nadai orang deka ibuhka nya. Aku deka mai nuan ngagai rumah indai aku, alai nuan tau ngajar aku pasal pengerindu. Aku deka meri ngagai nuan wain ti udah dirempah, wain ti digaga ari buah delima, ngambika bisi diirup nuan. Jari kiba nuan di baruh pala aku, lalu jari kanan nuan murus aku. Besemaya meh kita enggau aku, kita indu Jerusalem, madahka diri enggai ngachau lebuh kami duai benung rinduka pangan diri. Sapa orang nya ke datai ari menua puang, bepegai jari enggau ambai iya? Aku ngerak nuan di baruh pun kayu epal, ba endur alai nuan ke ada. Anang rinduka orang bukai tang semina siku aku aja. Anang merap orang bukai, tang semina aku siku aja. Pengerindu endang bekuasa baka pemati. Pengingin bekuasa baka pemati. Iya mau lalu ngangus baka daun api. Ai enda ulih madamka iya. Ai bah enda ulih ngelamun iya. Tang enti orang nguji meli pengerindu ngena pengaya sida, sida deka dikeleseka orang. Kami bisi siku menyadi indu ke agi biak, ti agi mit tusu. Kati ku kami enggau iya lebuh orang ke bujang datai ngagai iya? Enti sema iya nya dinding kami deka ngaga ke iya siti menara ari pirak. Tang enti sema iya nya pintu ti besai, kami deka nyaga iya ngena papan kayu sidar. Aku tu dinding, lalu tusu aku menara iya. Ambai aku nemu, lebuh aku begulai enggau iya aku puas ati sereta bisi pemaik. Solomon bisi sebidang kebun anggur ba endur siti ti dikumbai Baal Hamon. Bala orang bumai nyua kebun nya ari iya. Genap iku sida mayar seribu singkap duit pirak. Solomon nerima seribu singkap duit iya, lalu bala orang bumai bulih dua ratus singkap nyadika ungkup sida. Aku endang bisi kebun anggur aku empu! Awakka aku ninga munyi nyawa nuan ari kebun nya, O ambai. Bala pangan aku nganti, keran deka ninga nuan bejaku. Datai ngagai aku, O ambai, baka kijang, baka anak rusa lelaki ba bukit ti endur alai kayu rempah tumbuh. Bup tu ngundan pesan pasal menua Judah enggau nengeri Jerusalem, ti dipandangka Allah Taala ngagai Isaiah anak Amos, lebuh Usiah, Jotam, Ahas, enggau Hesekiah nyadi raja menua Judah. Ku TUHAN bejaku, “Tanah enggau langit, pendingka utai ti disebut Aku! Bala anak ke diibun Aku, udah angkat ngelaban Aku. Jelu sapi nemu sapa ke bempu sida, lalu jelu keledai nemu endur alai tuan sida meri sida makai. Tang nembiak Aku orang Israel enda nemu sapa tuan sida. Sida endang enda mereti.” Kita deka diukum, kita bansa ti jai! Dosa kita ngasuh kita labuh! Kita udah nulak TUHAN Allah Taala ke disembah orang Israel ti kudus, lalu kita udah nguingka belakang kita ngagai Iya. Nama kebuah kita majak angkat ngelaban Iya? Kati kita minta diri diukum balat agi? Israel, pala kita nyau abis bakal, lalu ati enggau runding kita sakit. Kenyau ari punjung pala nyentuk ngagai ujung kaki, tubuh kita abis sakit. Tubuh kita rajai, kuris sereta telih. Bakal kita apin diberesi tauka dibalut. Nadai ubat udah kala diunsut ngagai telih kita nya. Menua kita udah dirusak, lalu nengeri kita udah abis retung diempa api. Mata kita peli-peli ngapa meda orang bansa bukai ngerampas lalu ngerusak menua kita. Ka semina Jerusalem aja ti agi tinggal, nengeri ti dikelulung munsuh, nengeri ti nadai daya nyaga diri baka langkau jejaga ti ba kebun anggur, tauka bansal ba kebun entimun. Enti TUHAN ti Pemadu Bekuasa enda nejuka sekeda orang idup, Jerusalem tetap udah abis dirusak, baka Sodom enggau Gomorah. Jerusalem, bala pemerintah nuan, enggau bala nembiak nuan sebaka enggau orang Sodom enggau orang Gomorah. Pendingka utai ti disebut TUHAN ngagai kita. Peratika utai ti diajar Allah Taala kitai ngagai kita. Ku Iya bejaku, “Kati kita ngumbai Aku rinduka semua piring ti seruran diberi kita ngagai Aku? Aku leju meda jelu bedus ti ditunu kita nyadika piring, enggau lemak ari jelu kita. Aku leju diberi kita darah sapi, enggau darah bedus enggau darah kambin. Sapa ngasuh kita mai utai nya lebuh kita datai nyembah Aku? Sapa ngasuh kita ngelunjak Rumah Aku? Nadai guna kita mai piring. Aku nyau deka mutah ensium menyan ti ditunu kita. Aku enda tan natka Gawai Anak Bulan kita, Hari Sabat kita, enggau gawai pengarap kita. Semua utai nya udah kamah magang laban dosa kita. Aku begedika Gawai Anak Bulan kita, enggau hari kudus kita. Utai nya semina ngasuh ma aku berat, lalu Aku lelak mai utai nya. “Lebuh kita ngangkatka jari kita besampi, Aku enggai malik ngagai kita. Taja pen kita bebendar besampi, tang enggai meh Aku mending, laban jari kita dibalut darah. Basu diri empu datai ke kita tuchi. Badu agi ngereja penyai ti dipeda Aku kereja kita. Anang agi ngereja penyai lalu belajar ngereja utai ti ngena. Pejalaika atur ti lurus - tulung orang ke kena tekan, jaga hak orang ke nadai apai indai, lalu jaga indu ke balu.” Ku TUHAN bejaku, “Aram kitai ngatur pekara tu. Kita nyau mirah dibalut dosa, tang Aku deka masu kita tuchi baka seleju. Taja pen kita nyau mirah-redam, kita deka nyadi burak baka bulu bedus. Enti kita deka ngasika Aku, kita deka makai utai ti manah di menua tu. Tang enti kita ngelaban aku, kita deka diukum mati. Aku ti TUHAN, udah bejaku.” Nengeri ti tetap ati dulu menya, diatu diau baka indu sundal! Dulu menya nengeri nya udah penuh laban orang ke lurus, tang diatu semina bala pemunuh aja ti agi tinggal. Jerusalem, dulu menya nuan baka pirak, tang diatu nuan nadai agi rega. Nuan menya baka wain ti manah, tang diatu nuan semina ai amat aja. Bala tuai kita nya orang ke angkat ngelaban, pangan orang ke penchuri. Sida endang selalu nerima pemeri enggau makai suap. Sida nadai kala bejaku dalam kot ngeringka orang ke nadai apai indai, tauka mending lebuh bala indu ke balu bejaku ngarika diri empu. Nya alai, diatu pendingka utai ti disebut TUHAN ti Pemadu Bekuasa, Allah Taala ti bekuasa ti disembah orang Israel: “Aku deka malas kita ke munsuh Aku, ngambika kita enda agi ngenusahka Aku. Aku deka ngelaban kita. Aku deka nuchi kita baka ke nuchi besi, lalu deka muai semua pengamah kita. Aku deka meri kita pemerintah enggau penyanding penemu, baka sida ke dulu kelia. Nya baru Jerusalem deka dikumbai lurus, nengeri ti tetap ati.” Laban TUHAN endang lurus, Iya deka nyelamatka Jerusalem enggau semua orang dia ke nesal ati. Tang Iya deka ngeredakka semua orang ke bedosa, ke angkat ngelaban Iya. Iya deka munuh semua orang ke ninggalka Iya. Kita deka nesal ati ke diri ti udah nyembah kayu, lalu udah ngaga kebun ke petara kita. Kita deka layu baka kayu oak ti mati, baka kebun ti nadai kala diberi ai. Baka rumput ti rangkai ti diselup perechi api, baka nya meh orang ke bekuasa deka dirusak ulih pengawa sida empu, lalu nadai orang ulih nagang pengerusak nya nyadi. Tu pesan ti udah diberi Allah Taala ngagai Isaiah anak Amos pasal menua Judah enggau Jerusalem: Jemah ila bukit ti alai Rumah Sembiang bediri deka nyadi bukit ti pemadu tinggi lalu ngayung semua bukit ti bukai. Semua bansa deka beterudus datai ngagai iya, lalu sida deka bejaku, “Aram kitai niki ngagai bukit TUHAN, ngagai Rumah Sembiang Allah Taala ke disembah orang Israel. Ngambika Iya ngajar kitai pasal utai ti deka dikereja kitai. Kitai deka bejalai nengah jalai ti udah dipilih Iya, laban ajar ti diberi TUHAN datai ari Jerusalem. Iya bejaku ari Sion ngagai bala nembiak Iya.” Iya deka mutarka laya entara mayuh bengkah bansa ti besai. Sida deka nempa pedang sida nyadi pengeradu tanah lalu sangkuh sida nyadi duku kena nyarau kayu. Semua bansa deka badu agi beperang, nadai agi nyendiaka diri beperang. O peturun Jakop, aram kitai bejalai dalam penampak ti udah diberi TUHAN ngagai kitai! O Allah Taala, Nuan udah ninggalka bala nembiak Nuan, iya nya bala peturun Jakop! Menua tu nyau penuh laban pengawa keramat ti datai ari Timur enggau ari menua Pilistin. Bala nembiak Aku nyau nitihka adat asal orang bansa bukai. Menua sida nyau penuh laban pirak enggau emas, lalu pengaya sida nadai besekat. Menua sida penuh laban kuda, lalu pemayuh kerita perang sida nyau nadai besekat. Menua sida penuh laban engkeramba, lalu sida besembahka utai ti udah digaga jari sida empu. Genap iku orang deka dikemaruhka sereta dipechat. Anang ngampun sida, TUHAN! Sida deka belalai dalam lubang gua ba bukit ti bebatu, tauka numbak lubang ba tanah nguji ngerarika diri ari pengeringat TUHAN, lalu belalai ari kuasa enggau mulia Iya! Maya deka datai alai penyumbung mensia deka abis, lalu ati sida ke tinggi deka dirusak. Nya baru semina TUHAN siku aja deka ditinggika. Ba hari nya TUHAN ti Pemadu Bekuasa deka ngemaruhka genap iku mensia ti bekuasa, semua orang ke sumbung, enggau orang ke ngemesaika diri. Iya deka ngerusak kayu sidar ti tinggi di menua Lebanon, enggau semua kayu oak di menua Basan. Iya deka ngeruntuhka bukit ti tinggi enggau munggu, semua menara ti tinggi, enggau dinding semua kuta. Iya deka ngaramka kapal ti pemadu besai sereta pemadu manah. Orang deka belalai dalam lubang gua ba sebelah bukit ti bebatu, tauka numbak lubang ba tanah, nguji ngerarika diri ari pengeringat TUHAN, lalu ngelalaika diri ari kuasa enggau mulia Iya, lebuh Iya datai ngusak dunya. Lebuh hari nya datai, sida deka muai emas enggau pirak ti dikembuan sida, enggau engkeramba ti udah digaga sida, lalu ninggalka utai nya ke jelu chuik enggau kusing. Lebuh TUHAN datai ngusak dunya, orang deka belalai dalam lubang, enggau dalam gua ba sebelah bukit ti bebatu, nguji ngerarika diri ari pengeringat Iya, lalu belalai ari kuasa enggau mulia Iya. Anang agi ngarapka mensia. Sida nadai rega. Diatu TUHAN ti Pemadu Bekuasa baru deka ngerampas ari Jerusalem enggau ari menua Judah semua utai, enggau semua orang ke dikarapka orang mayuh. Iya deka ngerampas pemakai enggau ai sida, bujang berani sida, enggau bala soldadu sida, bala hakim enggau nabi sida, orang ke betilitka nasit, enggau bala tuai sida, bala tuai soldadu, enggau orang ke tinggi pangkat, orang politik, enggau semua orang ke tau keramat. TUHAN deka nejuka orang mayuh diperintah bala nembiak ti muda penemu. Semua orang deka ngambi ulih ba orang bukai. Orang ke biak enda masa sida ke tuai, lalu orang ke nadai guna, enda masa tuai sida. Maya deka datai alai bala ari genap raban peturun deka milih siku ari bala sida, lalu bejaku munyi tu, “Nuan bisi gari, nya alai nuan meh nyadi tuai kitai lebuh maya penusah tu diatu.” Tang iya deka nyaut, “Aku enggai! Aku enda ulih nulung kita. Aku pen nadai mega pemakai tauka gari. Anang ngasuh aku nyadi tuai kita!” Jerusalem deka diukum! Judah deka alah! Semua utai ti disebut tauka dikereja sida endang ngelaban TUHAN magang. Sida endang enda belalai mechat Allah Taala. Ati sida ke bingkuk deka dikena ngelaban sida empu. Sida bedosa di mua orang mayuh baka orang Sodom. Tulah meh sida, laban sida endang minta diri ditinggang penusah tu. Padahka ngagai orang ke lurus sida deka gaga ati laban sida deka nerima upah ketegal utai ti dikereja sida. Tulah meh orang ke jai! Utai ti udah dikereja sida ngagai orang bukai, deka dikereja ngagai sida empu. Orang ke nyali duit ngagai bala nembiak Aku nekanka pengidup sida, lalu orang ke alai sida berutang, ngakal sida. O nembiak Aku, bala tuai kita nesatka kita, ngambika kita enda nemu kini ke tunga kita patut nguing. TUHAN sedia deka bejakuka pekara Iya. Iya sedia deka ngakim bala nembiak Iya. TUHAN ngakim bala tuai bansa enggau bala tuai nembiak Iya. Ku Iya besalah sida: “Kita udah ngerampas buah ari kebun anggur, lalu rumah kita nyau penuh laban utai ti udah dirampas kita ari orang ke seranta. Kita nadai patut ngenusahka bala nembiak Aku, lalu ngambi ulih ba orang ke seranta. Aku TUHAN ti Pemadu Bekuasa, udah bejaku.” Ku TUHAN bejaku, “Peda kita penyumbung indu orang Jerusalem! Idung sida nungas ke langit lebuh sida bejalai. Sida seruran nundi lelaki. Singkang sida pandak, lalu gelang ti ba kaki sida nyau sering-sering. Tang Aku deka ngukum sida. Aku deka ngukur pala sida, lalu nejuka sida lasu.” Maya deka datai alai TUHAN deka ngerampas ari indu orang Jerusalem semua utai ti ngasuh sida sumbung - perengka emas ti dikena sida ba buku-ali, ba pala, ba rekung, enggau ba jari sida. Iya deka muai tambai mua sida enggau selapuk, jimat ba lengan, enggau ba punggung sida, tinchin ti ba tunjuk, enggau ba idung sida, semua gari sida ke manah, baju panjai, baju luar, enggau sarang duit sida, baju panjai ti senayau, perecha linin, kain ti dikena sida malut rekung, enggau kain ti dikena sida nudung pala. Diatu sida ngena minyak wangi, tang ila sida deka bebau but. Diatu sida ngena belulang ti manah, tang ila sida deka ngena tali ti kasar nyadika belulang sida. Diatu buk sida manah, tang ila pala sida deka lasu. Diatu sida begari ngena kain ti manah, tang ila sida deka ngena kain ti charik. Diatu sida bajik, tang ila sida deka jai gamal! Bala lelaki ke di nengeri nya, orang ke pemadu kering, deka mati beperang. Pintu nengeri deka ngulit sereta nyabak, lalu nengeri nya empu deka nyadi baka indu ke telanjai duduk malai tanah. Lebuh maya nya ila, tujuh iku indu deka megai siku lelaki, lalu bejaku, “Kami ulih nupi sereta ngari diri empu, tang awakka kami ngumbai nuan laki kami, ngambika kami enda malu ke diri nadai laki.” Maya deka datai alai TUHAN deka ngasuh semua utai ti tumbuh enggau semua kayu, tumbuh nyadi besai sereta manah dipeda. Semua orang Israel ti agi idup, deka gaga ati sereta temegah deka ngulihka asil ari utai ti tumbuh di menua tu. Semua orang ke tinggal di Jerusalem, ke ditejuka Allah Taala idup, deka dikumbai kudus. Ulih kuasa Iya, TUHAN deka ngakim lalu nuchi bansa orang Israel, lalu muai penyalah Jerusalem enggau darah orang ke udah mati dibunuh dia. Udah nya TUHAN deka mungkur Bukit Sion enggau semua orang ke begempuru dia ngena remang lebuh siang hari, lalu ngena asap enggau daun api lebuh malam hari. Mulia Allah Taala deka mungkur lalu nyaga nengeri nya. Mulia Iya deka ngelindung nengeri nya ari pengangat siang hari, lalu ngaga nengeri nya nyadi endur ti likun, dilindung ari ujan enggau kabut. Pendingka aku lebuh aku bepantun ngena lagu tu, lagu pasal pangan aku enggau kebun anggur iya. Pangan aku bisi sebidang kebun anggur ba munggu ti udu ami. Iya nyangkul tanah lalu muai semua batu ari tanah nya. Iya nanam anggur ti pemadu manah. Iya ngaga siti menara kena nyaga kebun nya, numbak siti lubang alai mitan buah anggur. Iya nganti buah anggur nya mansau, tang semua buah anggur nya masam magang. Nya alai pangan aku nya lalu bejaku, “Awakka kita ke diau di Jerusalem enggau di menua Judah, ngakim entara aku enggau kebun anggur aku. Kati aku nadai udah ngereja sekeda utai ba kebun tu? Nama kebuah kebun tu mansutka buah anggur ti masam, lalu enda mansutka buah ti manah, ti diadang aku? “Tu utai ti deka dikereja aku ngagai kebun anggur aku tu: aku deka muai pagar ti ngelingi kebun tu, lalu ngeruntuhka dinding ti dikena nyaga iya, lalu nejuka jelu babas ngulam lalu ngelunjak iya. Aku deka nejuka kebun tu tumbuh rumput. Aku enggai nyarau batang anggur, tauka nyangkul tanah, tang aku deka nejuka iya dilamun madang duri. Aku deka nagang mua hari mai ai ujan ngagai iya.” Israel nya meh kebun anggur TUHAN ti Pemadu Bekuasa. Orang Judah nya meh batang anggur ti ditanam Iya. Iya ngadang sida deka ngereja utai ti manah, tang sida bebunuhka orang. Iya ngadang sida deka ngereja utai ti ngena, tang sida merinsaka orang lalu orang nya nyabak minta atur ti lurus. Tulah meh kita ke meli mayuh agi rumah enggau umai kena nambahka rumah enggau umai ti udah dikemisi kita. Enda lama da agi, menua tu nadai agi endur alai orang bukai diau, lalu semina kita empu aja deka diau di menua tu. Aku udah ninga TUHAN ti Pemadu Bekuasa bejaku, “Semua rumah ti besai, ti manah tu deka nyadi tembawai magang lalu nadai orang nguan. Batang anggur ti tumbuh ba lima ikar tanah deka mansutka semina dua puluh liter wain. Seratus lapan puluh liter benih, deka mansutka semina lapan belas liter gandum.” Tulah meh kita ke angkat tumu pagi lalu belabuh ngirup ai bisa, lalu tiap lemai kita ngemabukka diri. Ba pengerami makai besai, kita bisi belikan, tamborin enggau kesuling, enggau wain. Tang kita enda meretika utai ti dikereja TUHAN, nya alai kita deka ditabanka nyadi orang tangkap. Bala tuai kita deka mati keberuran, lalu orang mayuh deka mati aus. Dunya pemati nyau lapar nganti sida, lalu iya merangapka nyawa iya. Iya nelan bala orang Jerusalem ti tinggi pangkat, sama enggau orang mayuh ke ragak. Genap iku orang deka dipechat, lalu semua orang ke sumbung deka dikemaruhka. Tang TUHAN ti Pemadu Bekuasa deka ngayanka pemesai kuasa Iya lebuh Iya ngereja utai ti ngena, lalu Iya mandangka pengudus Iya lebuh Iya ngakim bala nembiak Iya. Anak domba deka ngulam rumput ba tembawai nengeri, lalu anak kambin deka tetemuka rumput dia. Tulah meh kita ke enda ulih ngelepaska diri ari dosa kita. Ku kita bejaku, “Awakka TUHAN datai enggau jampat, lalu ngereja utai munyi ti ku Iya, ngambika kitai ulih meda utai nya. Awakka Allah Taala ke disembah orang Israel ti kudus bejalaika pelan Iya. Awakka kitai meda utai ti ku ati Iya.” Tulah meh kita ke ngumbai utai ti jai manah, lalu utai ti manah jai. Kita ngaga pemetang nyadi penampak, lalu penampak nyadi pemetang. Kita ngaga utai ti pait nyadi manis, lalu utai ti manis nyadi pait. Tulah meh kita ke ngumbai diri bepenemu-dalam, ngumbai diri pintar. Tulah meh kita ke nakal ngirup wain, ke berani sereta nadai takut bechampurka ai ti bisa! Tang kita makai suap lalu ngelepaska orang ke bepenyalah, lalu kita enggai meri atur ti lurus ngagai orang ke nadai penyalah. Nya alai diatu, kita baka rumput ti rangkai. Kita ngeriut lalu angus diempa api, lalu urat kita deka buruk lalu bungai kita deka rangkai lalu dikebuka ribut, laban kita udah nulak ajar TUHAN ti Pemadu Bekuasa, Allah Taala ke disembah orang Israel ti kudus. TUHAN ringat ngagai bala nembiak Iya, lalu udah ngangkatka jari Iya deka ngukum sida. Bukit deka berenyang, lalu bangkai orang ke mati deka ditinggalka ba jalai raya baka uras. Tang taja pia, pengeringat TUHAN enda badu, lalu jari Iya mengkang dikedarka deka ngukum. TUHAN meri siti tanda kena Iya ngangauka bansa di menua ti jauh. Iya ngensung kena Iya manggil sida datai ari ujung dunya. Lalu sida datai, laju sereta jampat! Nadai siku sida lelak. Nadai siku sida tesangkut. Sida enda ngantuk tauka tinduk. Belulang sida enda gerah. Tali kasut sida enda putus. Laja sida tajam, lalu panah sida sedia deka ditimbakka. Tunjing kuda sida kering baka batu, lalu kaki kerita perang sida bepusin baka ribut puting beliung. Bala soldadu sida rauh-rauh baka raban singa ti negung udah bekau sida munuh jelu lalu nabanka jelu nya ngagai endur alai orang enda ulih ngerampas jelu nya ari sida. Lebuh sida nyerang menua Israel, sida deka manjung nginggar pangka gelumbang. Peda menua tu dibalut pemetang sereta tusah! Penampak nyau bebali nyadi petang. Taun Raja Usiah mati, aku bisi meda TUHAN duduk ba kerusi diraja Iya, tinggi sereta bemulia, lalu baju panjai Iya ngemenuhka Rumah Sembiang. Melikat serapim bediri ari atas Iya. Genap iku melikat nya bisi enam iti sayap: dua iti sayap dikena iya mungkur mua iya, lalu dua iti dikena iya mungkur kaki iya, lalu dua iti dikena iya terebai. Sida ngangauka pangan diri, ku sida: “Kudus, kudus, kudus! meh TUHAN ti Pemadu Bekuasa! Semua dunya penuh laban mulia Iya.” Tiang pemun Rumah Sembiang berenyang laban penginggar nyawa iya ke ngangau, lalu Rumah Sembiang nya penuh laban asap. Ku aku bejaku, “Tulah meh aku tu! Nadai penyadi meh aku tu; laban mulut aku nyebut utai ti kamah, lalu aku diau enggau orang ke besebutka jaku ti kamah; tang taja pia, mata aku udah meda Raja, TUHAN ti Pemadu Bekuasa!” Udah nya siku melikat serapim terebai ngagai aku, mai bara api ti udah diambi iya ngena sepit ari alta. Iya negu mulut aku ngena bara api nya, lalu ku iya bejaku, “Bara api tu udah negu mulut nuan. Diatu penyalah nuan udah dibuai, lalu dosa nuan udah diampun.” Aku lalu ninga TUHAN bejaku, “Sapa orang ke patut dikirumka Aku? Sapa orang ke deka nyadi seruan kitai?” Aku lalu nyaut, “Aku, TUHAN! Kirumka aku!” Iya lalu ngasuh aku mupuk lalu meri pesan tu ngagai orang mayuh: “Taja pen kita bebendar mending, tang nadai meh kita ulih mereti. Taja pen kita bebendar merening, tang nadai meh kita ulih meda.” Udah nya Iya lalu bejaku ngagai aku, “Awakka untak sida enda nemu berunding, bengal, sereta buta, ngambika sida enda ulih meda, ninga, tauka mereti enggai ke sida nguingka diri ngagai Aku, lalu digeraika.” Aku lalu nanya, “Ni pengelama utai tu deka nyadi baka tu, TUHAN?” Lalu ku TUHAN nyaut, “Nyentuk ngagai maya nengeri dirusak lalu nadai orang nguan, nyentuk ngagai maya rumah nadai agi mensia, nyentuk ngagai maya menua tu nyadi menua ti kusi sereta nadai orang nguan. Aku deka ngirumka bala sida tu ngagai menua ti jauh, lalu ngasuh menua tu nadai orang nguan. Enti siku ari sepuluh iku orang agi tinggal di menua tu, orang nya pen deka mega dirusak. Iya deka nyadi baka tuga kayu oak.” (Tuga nya ngambarka pun pengidup ti baru ke bala nembiak Allah Taala.) Lebuh Raja Ahas anak Jotam, uchu Usiah, merintah di menua Judah, perang bisi nyadi. Raja Resin menua Siria, enggau Raja Pekah anak Remaliah ari menua Israel, nyerang Jerusalem, tang seduai iya enda ulih ngalahka nengeri nya. Lebuh raja menua Judah ninga berita bala soldadu menua Siria bisi di menua Israel, iya enggau semua nembiak iya balat amat takut. Sida getar-getar baka kayu ti beguyat laban ribut. Ku TUHAN bejaku ngagai Isaiah, “Bai anak nuan Sear Jasup, lalu mansang ngagai Raja Ahas. Nuan deka nemu iya ba jalai raya ba endur alai tukang kain gawa, ba ujung parit ti mai ai ari telaga ti di atas. Asuh iya bejaga, sereta enda irau ati, enda takut tauka teguran. Pengeringat Raja Resin enggau bala orang Siria, enggau bala Raja Pekah enda ulih ngasuh bebadi baka asap ti pansut ari dua iti rangkang ti diempa api. Menua Siria, enggau menua Israel enggau raja menua Israel, udah bepekat deka nyerang menua Judah, ngemba orang Judah ngambika sida ngalih ari sida, lalu udah nya nyiri anak lelaki Tabeel nyadi raja. “Tang Aku ti TUHAN madahka utai tu enda ulih nyadi. Nama kebuah? Laban Siria enda kering agi ari Damaskus, indu nengeri iya empu, lalu Damaskus enda kering agi ari Raja Resin. Nyadi pasal Israel, dalam kandang enam puluh lima taun, iya deka balat rusak, lalu enda ulih nyadi siti bansa. Israel enda kering agi ari Samaria, indu nengeri iya empu, lalu Samaria enda kering agi ari Raja Pekah. “Enti pengarap kita enda tan, kita empu enda ulih tan.” TUHAN ngirumka siti agi pesan ngagai Ahas: “Pinta siti tanda ari TUHAN Allah Taala nuan. Nuan tau minta tanda nya datai ari buntut dunya pemati, tauka ari endur ti tinggi di serega.” Disaut Ahas, “Aku enggai minta tanda, laban aku enggai nguji TUHAN.” Isaiah lalu nyaut, “Pendingka diatu, kita ke peturun Raja David. Kita udah ngabas pengeliat ati mensia. Kati kita deka mega ngabas pengeliat ati Allah Taala? Diatu TUHAN Empu deka meri kita siti tanda: siku indu dara deka ngandung lalu ngadaka anak lelaki siku, lalu iya deka meri anak mit nya nama ‘Imanuel.’ Iya deka beridup ba ai tusu enggau ai manyi lebuh iya nyau nemu nyeliahka utai ti jai lalu milih utai ti manah. Laban sebedau anak mit nya nemu nyeliahka utai ti jai lalu milih utai ti manah, menua ti diperintah dua iku raja ti balat diketakutka kita deka puang nadai orang nguan. “ TUHAN deka ngasuh raja menua Asiria datai, lalu nuan, bala nembiak nuan, enggau semua bala sida raja sebilik, deka natka penusah ti lebih besai agi ari penusah ti udah kala nyadi kenyau ari maya perintah Israel enggau perintah Judah pechah. “Lebuh maya nya ila, TUHAN deka ngensung kena Iya manggil orang Ejip datai baka lalat ari pati Sungai Nile ti pemadu jauh, enggau kena manggil orang Asiria datai ari menua sida baka manyi. Sida deka datai lalu inggap ba sebelah lebak, enggau dalam lubang batu, lalu sida deka inggap ba semua madang duri, enggau semua padang rumput. “Lebuh maya nya ila, TUHAN deka ngaji siku tukang guntin ari seberai Sungai Eupratis, iya nya raja menua Asiria! Lalu raja nya deka ngukur ragum kita, enggau buk ti ba pala enggau ba tubuh kita. “Lebuh maya nya ila, enti orang bumai ulih ngalau siku sapi ti indu enggau dua iku kambin, jelu nya deka meri iya ai tusu lebih ari ti chukup ke iya. Genap iku orang ke agi idup di menua tu deka beridup ba ai tusu enggau ai manyi. “Lebuh maya nya ila, kebun anggur ti manah, ti ngundan seribu pun anggur dalam sebidang, ti berega seribu singkap pirak, deka alah laban madang duri enggau randau. Orang deka ngasu ba endur nya ngena panah enggau laja. Semua menua tu deka penuh laban randau enggau madang duri. Semua munggu ti udah alai betanamka utai, deka alah laban madang duri, datai ke orang enggai agi kia. Menua tu deka nyadi endur alai jelu sapi enggau bedus ngulam.” Ku TUHAN bejaku ngagai aku, “Ambi sesingkap batu-tulis ti besai, lalu tulis ngena urup ti besai ba batu-tulis nya: ‘Jampat Dichuri, Jampat Dirampas.’ Pesanka dua iku orang ke tau dikarapka, Imam Uriah enggau Sekariah anak Jeberekiah, nyadika saksi.” Enda tentu lama udah bekau nya, bini aku ngandung. Lebuh anak lelaki kami duai ada, TUHAN bejaku ngagai aku, “Beri iya nama ‘Jampat Dichuri Jampat Dirampas.’ Sebedau anak mit nya nemu nyebut ‘Indai’ enggau ‘Apai,’ semua pengaya Damaskus enggau semua perapasan ari Samaria deka ditabanka raja menua Asiria.” TUHAN bejaku ngagai aku baru. Ku Iya, “Laban orang tu udah nulak ai ti enda beriak di Sungai Siloah lalu getar-getar di mua Raja Resin enggau Raja Pekah, Aku, TUHAN, deka mai raja menua Asiria enggau semua bala soldadu iya nyerang menua Judah. Sida deka nyerang baka ai bah ti ngampuhka tebing Sungai Eupratis. Sida deka ngelanggar menua Judah baka bah ti datai ba tandan bau lalu ngampuhka semua utai.” Allah Taala bisi enggau kitai! Sayap Iya ngerembai nyaga menua tu. Begempuru enggau ati ti nangi kita semua bansa! Anang enda mending, kita menua ti jauh. Sediaka diri belaban, tang kita mesti takut! Sigi amat, sedia, tang kita mesti takut! Gaga meh pelan kita! Tang pelan nya enda ulih mujur. Bejaku meh kita enggau sepeneka ati kita! Tang jaku kita nya nadai guna, laban Allah Taala bisi enggau kami. Ngena kuasa Iya ti besai TUHAN meri aku jaku tangkan, enda nyagi aku niti jalai ti ditengah orang mayuh. Ku Iya, “Anang bepekat enggau orang mayuh, lalu anang nangika utai ti dikenangika sida. Ingat: Aku TUHAN ti Pemadu Bekuasa endang kudus. Nuan enda tau enda nangika Aku. Laban Aku endang amat kudus, Aku nyadi baka batu ti ngasuh orang tesangkut. Aku baka panjuk ti deka nyintak orang ari menua Judah enggau menua Israel, enggau orang Jerusalem. Mayuh orang deka tesangkut. Sida deka rebah, lalu alah. Sida deka disintak panjuk.” Kita ke murid aku enda tau enda nyaga sereta nyimpan semua pesan ti udah diberi Allah Taala ngagai aku. TUHAN udah ngelalaika Diri ari bala nembiak Iya, tang aku arapka Iya, lalu manggaika pengadang aku ba Iya. Tu aku enggau bala anak ke diberi TUHAN ngagai aku. TUHAN ti Pemadu Bekuasa, ti diau ba Bukit Sion, udah ngirumka kami nyadi pesan ti idup ngagai orang Israel. Tang orang deka ngasuh kita minta pesan ari orang ke tau tujum, enggau ari manang ke enchiap sereta muchau. Sida deka nyebut, “Orang patut betanyaka pesan ari bala antu, enggau ari orang ke udah mati, ngarika orang ke agi idup.” Kita enda tau enda nyaut sida munyi tu, “Pendingka utai ti diajar TUHAN ngagai kita. Anang mendingka orang ke tau tujum; laban utai ti dipadahka sida ngagai kita enda ulih nyeliahka penusah ari kita.” Orang mayuh deka bejalai segau-segau nengah menua tu, lemi semengat sereta lapar. Lebuh sida lapar sereta ringat, sida deka nyumpah raja sida, enggau Allah Taala sida. Sida nyangka engkadah ke langit tauka genung-genung merening ngagai tanah, tang sida nadai meda utai bukai kelimpah ari penusah enggau pemetang ti balat ngenakutka, endur alai sida deka dibuai. Sida nadai jalai ngerarika diri ari maya penusah tu. Menua raban bansa Sebulun enggau Naptali udah sekali kena pechat, tang jemah ila menua nya deka dibasa, berengkah ari Tasik Tengah nyentuk ngagai menua ti di timur Sungai Jordan, enggau ngagai menua Galili empu, ti alai orang kampar diau. Orang ke bejalai dalam petang udah meda penampak ti besai. Sida diau di menua pemetang, tang diatu penampak manchar ngagai sida. Nuan udah ngasuh sida balat gaga, TUHAN. Nuan udah ngasuh sida lantang ati. Sida rami gaga ke utai ti udah dikereja Nuan, baka orang ke rami gaga lebuh sida ngetau gandum tauka lebuh sida bedua perapasan. Laban Nuan udah matahka kungkung ti nating sida enggau tungkat ti malu bau sida. Nuan udah ngalahka bansa ti nekanka pengidup sereta ngambi ulih ba nembiak Nuan, baka Nuan ti ngalahka bala soldadu orang Midian dulu kelia. Kasut bala soldadu ti datai nyerang enggau semua gari sida ke dibalut darah deka dirusak ngena api. Siku anak mit udah ada ke kitai! Siku anak lelaki udah diberi ngagai kitai! Lalu iya deka nyadi raja kitai. Iya deka dikumbai “Penyaup ti Badas,” “Allah Taala ti Bekuasa,” “Apai ti Meruan belama iya,” “Raja Pemaik.” Kuasa diraja iya deka majak mansang. Perintah iya deka seruran bisi pemaik. Iya deka megai perintah nganti Raja David, nudukka kuasa iya ba atur ti ngena sereta lurus, kenyau ari diatu nyentuk ngagai pengujung dunya. TUHAN ti Pemadu Bekuasa endang mutus ati deka ngereja semua utai tu. TUHAN udah ngeletak ukum ke perintah menua Israel, iya nya peturun Jakop. Semua orang Israel, genap iku orang ke diau di nengeri Samaria, deka nemu TUHAN udah ngereja utai tu. Diatu sida iya sumbung sereta tinggi ati. Ku sida, “Rumah ti digaga ari batu bata, udah runtuh, tang kami deka nganti rumah nya ngena rumah ti digaga ari batu. Tiang ti digaga ari kayu sikamur udah ditebang, tang kami deka nganti tiang nya ngena kayu sidar ti pemadu manah.” TUHAN udah nyungkak munsuh nyerang sida. Siria di timur enggau Pilistin di barat udah merangapka nyawa deka nelan Israel. Tang TUHAN mengkang ringat. Jari Iya agi mengkang dikedarka Iya laban Iya deka ngukum. Orang Israel apin nesal ati. Taja pen TUHAN ti Pemadu Bekuasa udah ngukum sida, sida mengkang enggai pulai baru ngagai Iya. Dalam sehari aja TUHAN deka ngukum bala tuai bansa enggau orang Israel empu. Iya deka mumpung pala lalu netak iku sida. Bala orang ke tuai umur sereta dibasa orang, nya meh pala, lalu bala nabi ke meri ajar ti bula nya meh iku! Orang ke nguluka sida udah mai sida tesat, lalu nyarutka runding sida. Nya alai TUHAN enggai ngemendarka sida ke bujang ngerarika diri, lalu Iya enggai sinu ati ke indu ke balu, enggau orang ke nadai apai indai, laban semua orang bela enda arapka Allah Taala sereta jai, lalu semua utai ti disebut sida endang jai magang. Tang pengeringat TUHAN enda abis naka nya aja. Jari Iya mengkang dikedarka Iya laban Iya deka ngukum. Penyai orang mayuh nyelar baka api ti nganguska madang duri enggau madang emperingat. Iya menyadi baka api ti berasap makai rimba. Laban TUHAN ti Pemadu Bekuasa ringat, ukum Iya mau baka api ti nganguska semua menua tu, lalu munuh mensia, lalu genap iku kitai enda tau enda ngidupka nyawa diri. Di semua endur dalam menua tu, orang ngerampas lalu makai sebarang sedak pemakai ti ditemu sida, tang sida mengkang lapar. Indah anak sida empu deh diempa sida! Orang ari menua Manasi enggau orang ari menua Epraim nyerang pangan diri, lalu sida sama nyerang Judah. Tang taja pia, TUHAN mengkang enda badu ringat. Jari Iya mengkang dikedarka deka ngukum. Tulah meh kita ke ngaga adat ti enda lurus, ke nekanka pengidup bala nembiak Aku. Nya meh jalai kita nagang orang ke seranta bulih hak enggau atur ti lurus. Nya meh jalai kita ngerampas pesaka indu ke balu enggau orang ke nadai apai indai. Nama utai ti deka dikereja kita, lebuh Allah Taala ngukum kita? Nama utai ti deka dikereja kita, lebuh Iya ngasuh penusah ti besai datai nuntung kita ari menua ti jauh? Kini ke tunga kita deka rari ngiga tulung? Dini alai kita deka ngelalaika pengaya kita? Kita deka mati beperang, tauka diirit nyadi orang tangkap. Tang taja pia, TUHAN mengkang enda badu ringat. Jari Iya deka mengkang dikedarka deka ngukum. Ku TUHAN bejaku, “Tulah meh kita orang Asiria, ti dikena Aku nyadi pemalu, ti dikena Aku ngukum sida ke alai Aku ringat. Aku ngasuh Asiria nyerang bansa ti enda arapka Allah Taala, bansa ti udah nyungkak Aku ringat. Aku ngasuh orang Asiria ngerumpak sereta ngenchuri, lalu ngelunjak bansa orang nya baka ke ngelunjak tanah luchak ba jalai raya.” Tang raja menua Asiria bisi pelan ti jai dalam ati iya. Iya udah mutuska runding deka ngerusak mayuh bengkah bansa. Ku iya temegah bejaku, “Genap iku bala tuai soldadu aku endang raja magang! Aku udah ngalahka nengeri Kalno enggau nengeri Karkemis, nengeri Hamat enggau nengeri Arpat. Aku udah ngalahka Samaria enggau Damaskus. Aku udah ngedarka jari aku ngukum perintah ti nyembah engkeramba, ti mayuh agi ari engkeramba di Jerusalem enggau di Samaria. Aku udah ngerusak Samaria enggau semua engkeramba iya, lalu aku deka ngereja baka nya mega ngagai Jerusalem, enggau ngagai anak patung ti disembah orang dia.” Tang ku TUHAN bejaku, “Lebuh Aku tembu ngereja utai ba Bukit Sion enggau di Jerusalem, Aku deka ngukum raja menua Asiria laban iya udah temegah sereta sumbung.” Ku raja menua Asiria temegah bejaku, “Aku udah ngereja semua utai nya kediri aku aja. Aku kering, bepenemu-dalam sereta pintar. Aku udah muai semua garis entara menua mayuh bengkah bansa, lalu ngambi bekal ti udah ditaruh sida. Baka sapi ti lelaki, aku udah ngelunjak orang ke diau dia. Bansa dalam dunya tu baka sarang burung, lalu aku udah ngumpul pengaya sida ngemudah orang ke ngumpul telu. Siti pen nadai ga sayap engkebap muru aku. Mulut sida enda dibuka merak aku!” Tang ku TUHAN bejaku, “Kati kapak ulih ngumbai diri besai agi ari orang ke ngena iya? Kati penyayat beguna agi ari orang ke ngena iya? Pemalu bait enda ngedarka orang, tang orang ke ngedarka pemalu bait.” TUHAN ti Pemadu Bekuasa deka ngirumka penyakit kena ngukum sida ke diau makai nyamai. Api ti enda nemu padam deka seruran menyadi dalam tubuh sida. Allah Taala ti penampak orang Israel, deka nyadi api. Allah Taala ke disembah orang Israel ti kudus deka nyadi daun api, ti deka, dalam sehari aja nganguska semua utai, nyengkaum duri enggau tekurak. Utan ti tebal enggau tanah umai deka dirusak magang, baka penyakit ti ngasuh orang mati. Semina mimit aja kayu agi tinggal datai ke anak mit ulih ngitung sida. Maya deka datai alai orang Israel ti agi idup, deka badu agi nyandih ba bansa ti nyau deka ulih ngerusak semua sida. Sida deka manggaika pengarap sida ba TUHAN Allah Taala ke disembah orang Israel ti kudus. Ka semina mimit aja orang Israel deka pulai baru ngagai Allah Taala sida ke bekuasa. Taja pen diatu orang Israel nyau ngemayuh pasir ti ba tebing tasik, ka semina mimit aja sida deka pulai baru. Pengerusak endang digalau ke orang mayuh, lalu nya endang patut. Sigi amat, TUHAN ti Pemadu Bekuasa deka ngasuh pengerusak nyadi di serata menua tu, munyi ti udah dipadahka Iya. Ku TUHAN ti Pemadu Bekuasa bejaku ngagai bala nembiak Iya ti diau di Sion, “Anang takutka orang Asiria, taja pen sida nekanka pengidup kita baka ke udah dikereja orang Ejip menya. Enda lama da agi, Aku deka tembu ngukum kita. Udah nya baru Aku ngerusak sida. Aku TUHAN ti Pemadu Bekuasa, deka nyipat sida ngena penyipat Aku, baka Aku ke nyipat orang Midian ba Batu Orep. Aku deka ngukum menua Asiria baka Aku ti udah ngukum menua Ejip. Lebuh maya nya ila, Aku deka ngelepaska kita ari kuasa orang Asiria, lalu kungkung sida enda agi nating bau kita.” Bala soldadu munsuh udah ngalahka nengeri Ai! Sida datai nengah Migron! Sida ninggalka bekal sida di Mikmas! Sida melunggang genting, lalu bemalam di Geba! Orang di nengeri Ramah balat amat takut, lalu orang mayuh udah rari ari Gibe-ah, iya nya nengeri ada Raja Saul. Manjung meh kita orang Galim! Awakka kita orang Laisah mending! Nyaut meh kita, orang Anatot! Orang di Matmenah enggau di Gebim rari ngidupka nyawa diri. Sehari tu bala munsuh bisi di nengeri Nop, lalu sida ngedarka jari sida dia nyakap Bukit Sion, ti ba nengeri Jerusalem. TUHAN Allah Taala deka ngasuh sida merentum labuh baka dan ti ditetak ari kayu. Orang ke pemadu sumbung, ke pemadu tinggi pangkat ari bala sida, deka ditebang lalu dipechat. TUHAN deka nebang sida baka ke nebang kayu ngena kapak ba tengah utan, lalu kayu menua Lebanon ti pemadu manah deka rebah! Peturun Raja David nya baka kayu ti udah ditebang. Tang baka dan ti nelesak ari tuga, baka nya meh raja ke baru nya deka angkat ari peturun David. Roh TUHAN deka meri iya penemu-dalam, penemu enggau pengelandik kena merintah bala nembiak iya. Iya deka nemu peneka TUHAN, lalu deka ngemesaika TUHAN, sereta deka lantang ati nangika Iya. Iya enda ngakim beduduk ba utai ti dipeda iya, tauka ba utai ti ditusui orang ngagai iya. Iya deka ngakim orang ke seranta ngena atur ti lurus, lalu nyaga hak orang ke nadai daya. Lebuh iya bejaku, orang deka diukum, lalu orang ke jai deka mati. Iya deka merintah bala nembiak iya ngena atur ti lurus enggau ati ti rentang. Ukui kampung enggau bedus deka diau begulai enggau pangan diri, lalu engkuli deka gali begulai enggau bala anak kambin. Anak sapi enggau anak singa deka begulai makai lalu bala anak mit deka ngibun sida. Indu sapi enggau beruang deka begulai makai, lalu anak sapi enggau anak beruang deka gali begulai. Singa deka ngulam rumput baka sapi. Indah anak mit deh enda bebadi enti iya bemain semak ular ti bisa. Ba Sion, Bukit Allah Taala ti kudus, nadai utai ti jai dia, lalu nadai utai ti tau ngasuh bebadi. Dunya deka penuh laban penemu TUHAN baka ai ti ngemenuhka tasik. Hari deka datai alai raja ti baru ari peturun Raja David, deka nyadi menira ke mayuh bengkah bansa. Sida deka begempuru ba nengeri diraja, lalu meri basa ngagai raja nya. Ba hari nya ila, TUHAN deka sekali agi ngena kuasa Iya, lalu mai bala nembiak Iya pulai baru ari Asiria enggau ari menua Ejip, ari menua Patros, Etiopia, Elam, Babilon, enggau Hamat, enggau ari menua ti ba tebing tasik, enggau ari mayuh bengkah menua ti ba tebing tasik. TUHAN deka nuatka siti menira kena Iya madahka ngagai semua bansa pasal Iya ti deka ngempuruka orang Israel enggau orang Judah ti udah diau ngachir ba sebelah empat iti sukut dunya, lalu mai sida pulai baru. Perintah menua Israel enda agi kepapaska perintah menua Judah, lalu menua Judah enda agi bemunsuh enggau menua Israel. Tang sida deka nyerang Pilistin di barat, lalu beserakup ngerumpak orang ke diau di timur. Sida deka ngalahka orang Edom enggau Moap, lalu orang Amon deka ngasika sida. TUHAN deka ngerangkaika Teluk Suez, lalu Iya deka ngasuh ribut ti angat ngerangkaika Sungai Eupratis, tang ninggalka semina tujuh iti sungai ti mit, ngambika orang mayuh ulih bejalai meraka ke seberai. Jalai raya deka digaga ari Asiria ke orang Israel ti agi idup di menua nya, baka jalai raya ti ditengah bala aki ini sida lebuh sida angkat ari menua Ejip. Hari deka datai alai orang mayuh deka belagu, “Aku muji Nuan, O TUHAN! Nuan udah ringat ngagai aku, tang diatu Nuan ngaum aku lalu enda agi ringat. Allah Taala endang Juruselamat aku; Aku deka manggaika pengarap aku ba Iya lalu enda takut. TUHAN meri aku kuasa enggau pengering. Iya endang Juruselamat aku. Baka ai ti ngasuh orang ke aus gaga, baka nya meh bala nembiak Allah Taala deka rami gaga lebuh Iya ngelepaska sida.” Maya deka datai alai orang mayuh deka belagu, “Beri terima kasih ngagai TUHAN! Kangauka Iya minta Iya nulung kita! Padahka ngagai semua bansa utai ti udah dikereja Iya! Padahka ngagai sida pasal pemesai kuasa Iya! Belagu muji TUHAN, ketegal utai ti besai ti udah dikereja Iya. Awakka semua dunya ninga berita nya. Awakka semua orang ke diau di Sion manjung lalu belagu! Allah Taala ke disembah orang Israel ti kudus endang besai kuasa, lalu Iya diau enggau bala nembiak Iya.” Tu pesan pasal Babilon ti udah diterima Isaiah anak Amos ari Allah Taala. Tuatka menira perang ba tuchung bukit ti ngalan nadai babas! Kangauka bala soldadu, lalu kedarka lengan nuan nyadika tanda kena ngasuh sida nyerang pintu nengeri ti sumbung nya. TUHAN udah ngangauka bala soldadu ti udah dipilih Iya, ke temegah sereta kempang ati, ngasuh sida nyerang lalu ngukum orang ke dikeringatka Iya. Pendingka utai ti inggar rachuh ba bukit - munyi bala orang, munyi mayuh bengkah bansa enggau mayuh bengkah perintah begempuru. TUHAN benung nyendiaka bala soldadu Iya beperang. Sida datai ari menua ti jauh ba tisi langit. TUHAN ringat lalu deka ngerusak semua menua tu. Awakka kita mengkakai natka diri pedis, laban hari TUHAN nyau semak, alai Iya ti Pemadu Bekuasa deka ngerusak. Semua orang deka lembut tulang, lalu semua orang nadai agi berani. Semua sida deka balat takut, lalu enda ulih natka diri ke pedis, baka indu ke radai deka beranak. Sida deka takut lalu beperening ngagai pangan diri, lalu mua sida deka mirah laban malu. Hari TUHAN deka datai - hari ti jai nya, alai Iya ti deka balat ringat pedis ati. Dunya deka nyadi menua puang, lalu semua orang ke bedosa deka dirusak magang. Genap igi bintang, enggau genap iti genturung bintang deka badu agi manchar, mata hari deka petang lebuh iya niki, lalu bulan nadai meri penampak. Ku TUHAN bejaku, “Aku deka ngasuh penusah ti besai datai ngagai dunya, lalu ngukum semua orang ke jai ketegal dosa sida. Aku deka ngemaruhka semua orang ke sumbung, lalu ngukum genap iku orang ke tinggi ati sereta jai enggau orang. Sida ke agi idup deka jarang agi ari emas. Aku deka ngasuh langit begetar, lalu dunya deka digusak lalu dikinsitka ari endur iya lebuh Aku, TUHAN ti Pemadu Bekuasa, ngayanka pengeringat Aku. “Orang bansa bukai ti diau di Babilon deka rari ngagai menua diri, pambar baka raban rusa ti ngerarika diri ari orang ke ngasu, baka bedus ti nadai orang ngibun. Barang sapa kena tangkap, deka direjang datai ke mati. Lebuh sida benung genung-genung nadai daya agi, anak mit sida deka dipalu datai ke mati. Rumah sida deka dirumpak, lalu bini sida deka dipasung.” Ku TUHAN bejaku, “Aku benung nyungkak orang Mede nyerang Babilon. Sida enda ulih diumpan makai suap ngena pirak lalu enda ulih diuji ngena emas. Sida deka munuh orang ke bujang ngena panah enggau laja sida. Sida nadai ngayanka pengasih ngagai anak mit, lalu enda sinu ati ke bala sida ke nembiak. Menua Babilon nya menua ti pemadu manah, lalu orang dia bela temegahka iya. Tang Aku, ti TUHAN, deka ngalahka Babilon, baka Aku ti ngalahka Sodom enggau Gomorah! Nadai orang deka diau dia agi. Nadai orang Arab ke bejalai segau-segau, deka nirika langkau kain sida dia, lalu nadai pengibun bedus deka ngasuh raban bedus sida ngulam dia. Nengeri nya deka nyadi endur alai jelu diau, alai burung puk ngaga tansang. Burung unta deka diau dia, lalu kambin babas deka jengkak-jengkak bejalai nengah tembawai nya. Menara enggau istana deka ninga munyi auh nyawa jelu ti nyengkubang enggau jelu pasun. Maya Babilon udah datai! Timpuh iya nyau deka abis.” TUHAN deka sekali agi kasihka bala nembiak Iya Israel, lalu milih sida ke Iya Empu. Iya deka ngasuh sida idup di menua sida empu baru, lalu orang bansa bukai deka datai lalu diau dia enggau sida. Mayuh bengkah bansa deka nulung orang Israel pulai ngagai menua ti udah diberi TUHAN, lalu sida deka bekereja nyadi ulun orang Israel. Sida ke udah nangkap orang Israel dulu menya, diatu deka ditangkap orang Israel, lalu orang Israel deka merintah orang ke udah nekanka pengidup sida dulu menya. TUHAN deka muai pemedis enggau pemerinsa ari orang Israel, lalu ngasuh sida badu agi dipejalka ngereja pengawa ti berat. Lebuh TUHAN ngereja nya, orang Israel enda tau enda ngeleseka raja menua Babilon munyi tu: “Raja ti jai udah alah! Iya enda agi ulih nekanka pengidup orang! TUHAN udah muai kuasa raja ti jai ke ringat lalu nekanka pengidup mayuh bengkah bansa, lalu enda nemu badu merinsaka bansa ti udah dialahka sida. Diatu semua dunya diau jenuh nadai utai ngachau, lalu semua orang belagu gaga ati. Kayu saipris, enggau kayu sidar di menua Lebanon rami gaga ke raja nya ti udah alah, laban orang nadai agi nebang sida, laban raja nya nyau nadai agi! “Dunya pemati sedia deka ngelaluka penatai raja menua Babilon. Semengat sida ke udah bekuasa di dunya tu, nyau begau. Semengat sida raja nyau angkat ari kerusi diraja sida. Semua sida ngangauka raja menua Babilon, ‘Diatu nuan nyau lemi baka kami! Nuan diatu nyadi raban kami! Nuan udah selalu dikemesaika ngena belikan, tang diatu nuan diau di dunya pemati. Nuan gali malai tekang ulat, lalu belut nyadika pua nuan.’ ” Raja menua Babilon, nuan bintang pagi ti terang, naka meh pemalat nuan udah labuh ari langit! Dulu menya nuan udah ngalahka semua bansa bukai, tang diatu nuan udah dibuai ke tanah. Nuan keran deka niki ke langit, lalu nudukka kerusi diraja nuan ari atas bintang ti pemadu tinggi. Nuan ngumbai diri deka duduk baka raja ba bukit ti di utara ba endur alai bala petara begempuru. Nuan madahka diri deka niki ngagai punchak mua hari lalu nyadi sebaka enggau Allah Taala ti Pemadu Bekuasa. Tang nuan udah dibuai ngagai endur ti pemadu dalam di dunya pemati. Orang ke udah mati deka betegenung sereta rangap-rangap meda nuan. Sida deka nanya, “Ukai enda tu orang ke udah ngusak dunya, lalu ngasuh semua perintah begetar? Ukai enda tu orang ke udah ngerusak semua nengeri, lalu ngaga dunya nyadi menua puang? Ukai enda tu orang ke nadai kala ngelepaska orang tangkap iya, lalu nadai kala ngasuh sida pulai ngagai menua sida empu?” Semua raja dunya tu bela gali dalam lumbung sida ke manah gaya, tang nuan nadai lumbung, lalu bangkai nuan dibuai ke luar lalu ditejuka but. Bangkai nuan dilamun bangkai bala soldadu ti udah mati beperang, dibuai sama enggau sida ngagai lubang batu, lalu dilunjak. Laban nuan udah ngerusak menua nuan empu, lalu udah munuh orang ari bansa nuan empu, nuan enda dikuburka baka raja bukai. Nadai siku ari kita sebilik deka mengkang idup. Awakka pengawa bebunuh belabuh! Bala anak lelaki raja tu deka mati ketegal dosa aki ini sida. Nadai siku sida deka merintah dunya, tauka begagaka nengeri di serata dunya. Ku TUHAN ti Pemadu Bekuasa bejaku, “Aku deka nyerang Babilon, lalu ngerusak iya. Aku deka munaska semua utai dia. Indah anak mit deh abis Aku bunuh. Aku ti TUHAN, udah bejaku. Aku deka ngaga Babilon nyadi paya, lalu burung puk deka diau dia. Aku deka nyapu Babilon ngena penyapu, lalu muai semua utai dia. Aku TUHAN ti Pemadu Bekuasa, udah bejaku.” TUHAN ti Pemadu Bekuasa udah besumpah munyi tu: “Utai ti udah diperambu Aku, deka nyadi. Utai ti deka dikereja Aku, deka dikereja. Aku deka ngerusak orang Asiria di menua Aku Israel, lalu ngelunjak sida ba bukit Aku. Aku deka ngelepaska bala nembiak Aku ari kungkung orang Asiria, enggau ari ma ti berat ti dibai sida. Tu meh pelan Aku deka dunya, lalu lengan Aku dikedarka Aku kena ngukum mayuh bengkah bansa.” TUHAN ti Pemadu Bekuasa endang mutus ati deka ngereja utai tu. Iya udah ngedarka lengan Iya sedia deka ngukum, lalu nadai orang ulih nagang Iya. Tu pesan ti udah dipadahka dalam taun pemati Raja Ahas. Kita orang Pilistin, tungkat ti dikena malu kita udah patah, tang kita nadai kebuah gaga ati, laban lebuh siku ular mati, siku ti jai agi deka datai nganti iya, lalu sigi telu ular deka mechah lalu mansutka siku naga ti terebai. TUHAN deka nyadi pengibun ke bala nembiak Iya ke seranta, lalu Iya deka ngasuh sida diau likun. Tang Iya deka ngasuh lapar pungkang ninggang kita orang Pilistin, lalu nadai siku kita deka idup. Nyabak lalu ngangau minta tulung meh semua kita nengeri orang Pilistin! Awakka semua kita takut magang! Laban sebun abus datai ari utara, iya nya bala soldadu ti nadai takut siku. Baka ni ku jalai kitai nyaut bala orang ke mai pesan ngagai kitai ari Pilistin? Kitai deka madahka ngagai sida, TUHAN udah nudukka Sion, lalu bala nembiak Iya ke merinsa, deka tetemuka pengelikun dia. Tu pesan pasal Moap. Nengeri Ar enggau nengeri Kir dirusak dalam semalam aja, lalu menua Moap sunyi. Orang di Dibon deka niki ngagai bukit lalu nyabak ba endur alai nyembah engkeramba. Orang Moap nyau bekeduie nyabak, tusah ati ke nengeri Nebo enggau nengeri Medeba. Sida udah ngukur pala enggau ragum sida, laban tusah ati. Orang ke ba jalai raya begari ngena kain guni. Orang ngulit sereta nyabak ba padang nengeri enggau ba perabung rumah. Orang di Hesbon enggau di Elealeh nyabak, lalu sabak sida ulih didinga ari Jahas. Indah bala soldadu deh nyau getar-getar. Sida nyau nadai pemerani agi. Aku nyabakka Moap! Bala orang mayuh udah rari ngagai nengeri Soar, enggau ngagai Eglat Selisiah. Sekeda sida niti jalai ngagai Luhit, nyabak lebuh sida bejalai. Sekeda rari ngagai Horonaim, nyabak enggau naka penginggar. Sungai Nimrim nyau rangkai. Rumput ba tebing sungai nya udah layu, lalu nadai utai ti gadung agi tinggal. Orang meraka Emperan Willow, nguji rari mai semua reta tengkira sida. Di semua endur ba garis entara menua Moap, sabak nyau belauh didinga. Sabak nya didinga ba nengeri Eglaim enggau nengeri Berelim. Di nengeri Dibon, sungai nyau mirah laban darah, lalu Allah Taala bisi utai ti jai agi ari nya digalau ke orang ke diau di nengeri nya. Sigi amat, semua orang ke agi tinggal di Moap deka dibunuh magang. Ari nengeri Sela ti di menua puang, orang Moap ngirumka siku anak bedus nyadika pemeri ngagai orang siku ke merintah di Jerusalem. Sida nganti ba tebing Sungai Arnon, lalu bejalai kia-kia enggau nadai meruan tuju, baka burung ti diburu ari tansang. Ku sida bejaku enggau orang Judah, “Padahka ngagai kami utai ti patut dikereja kami. Lindung kami baka kayu ti ngelindung mensia ari mata hari lebuh tengah hari, lalu awakka kami belelak dilindung nuan. Kami tu orang ke tasah. Lalaika kami ngambika orang nadai nemu kami. Awakka kami diau di menua kita. Jaga kami ari orang ke deka ngerusak kami.” (Pemerinsa enggau pengerusak deka badu agi nyadi, lalu orang ke ngerusak menua tu deka abis. Udah nya siku ari peturun David deka nyadi raja, lalu iya deka merintah bala nembiak iya ngena ati ti tetap enggau pengerindu. Iya deka jampat ngereja utai ti ngena, lalu iya deka meri atur ti lurus.) Ku orang Judah bejaku, “Kami udah ninga pasal penyumbung orang Moap. Kami nemu sida endang tinggi ati sereta sumbung, tang sida semina temegah ngapa.” Orang Moap deka nyabak laban penusah ti deka ditatka sida. Semua sida deka nyabak lebuh sida ingatka pemakai ti manah ti udah diempa sida di nengeri Kir-heseret. Ati sida deka tusah. Umai semak Hesbon enggau kebun anggur di Sibmah deka dirusak - kebun anggur ti mansutka wain ti dikena ngasuh bala pemerintah ke mayuh bengkah bansa mabuk. Dulu menya batang anggur nya udah nyerangkap nyentuk ngagai nengeri Jaser, enggau ke timur ngagai menua puang, ke barat ngagai tebing seberai Tasik Mati. Diatu aku nyabakka pun anggur Sibmah lebuh aku nyabakka Jaser. Ai mata aku bekeberai ke Hesbon enggau Elealeh, laban nadai utai ulih diketau kena ngelantangka ati orang mayuh. Nadai orang lantang ati diatu ba umai ti ami. Orang pen nadai mega manjung tauka belagu ba kebun anggur, lalu orang pen nadai mega mitan buah anggur lalu ngaga wain. Panjung gaga ati nyau nadai agi. Aku bedemuh tusah ati ke Moap, tusah ati ke Kir-heseret. Orang Moap ngelelakka diri ngapa mansang ngagai bukit alai sida ke nyembah engkeramba, enggau mansang besampi ba rumah sembiang sida, tang pengawa nya nadai mai penguntung ngagai sida. Nya meh pesan ti udah diberi TUHAN dulu ari nya pasal Moap. Nya alai diatu TUHAN bejaku, “Tiga taun ari diatu, pengaya menua Moap deka lesap. Ari pemayuh orang ke diau dia, ka semina dua tiga iku aja agi idup, lalu sida nya orang ke lemi.” Ku TUHAN bejaku, “Damaskus deka badu agi nyadi nengeri. Iya semina deka nyadi tembawai. Semua nengeri di menua Siria nadai agi orang nguan belama iya. Semua nengeri nya deka nyadi padang rumput alai jelu bedus enggau jelu sapi ngulam, lalu nadai orang deka muru sida. Israel enda ulih nyaga diri, lalu Damaskus nadai agi kuasa merintah diri. Orang Siria ti agi idup deka dipechat baka orang Israel. Aku TUHAN ti Pemadu Bekuasa udah bejaku.” Ku TUHAN bejaku, “Maya deka datai alai Israel nadai agi dikemesaika, lalu pengaya iya deka diganti enggau penyeranta. Israel deka nyadi baka tanah umai alai gandum ti udah abis diketau, puang nadai utai nguan baka tanah ti ba Lebak Repaim, lebuh utai dia udah abis digumpul. Ka semina dua tiga iku aja orang agi idup, lalu menua Israel deka nyadi baka kayu kana ti udah abis diambi buah, kelimpah ari dua tiga igi ti ba puchuk, tauka dua tiga igi ti tinggal ba dan ti baruh. Aku ti TUHAN Allah Taala ke disembah orang Israel, udah bejaku.” Lebuh maya nya ila, orang deka nguing ngagai Allah Taala ke udah ngaga sida, Allah Taala ke disembah orang Israel ti kudus. Sida enda agi manggaika pengarap sida ba alta ti digaga jari sida empu, tauka manggaika pengarap sida ba engkeramba petara indu Aserah enggau alta alai nunu menyan. Lebuh maya nya ila, nengeri ti chukup dijaga deka ditinggalka mensia, baka nengeri ti ditinggalka orang Ibi enggau orang Amor lebuh sida rari ari orang Israel. Israel, kita enda ingatka Allah Taala ti udah ngelepaska kita, sereta nyaga kita baka batu ti besai. Tang kita numbuhka kebun ke petara kita alai kita nyembah petara orang bansa bukai. Tang enti sema sida bekantuk lalu bebungai sama pagi kita ke nanam sida, kita deka mengkang nadai utai diketau. Kita semina bisi penusah lalu tubuh kita pedis sereta enda ulih gerai. Bansa ti kering begau munyi auh tasik, munyi segum pangka gelumbang. Semua bansa nyerang baka alun gelumbang, tang Allah Taala ngerara sida, lalu sida nyurutka diri, dikebuka baka amau ti ba tisi bukit, baka rumput ti rangkai ti ditabanka ribut puting beliung. Lebuh lemai hari, sida ngasuh orang balat takut, tang lebuh pagi hari sida nadai agi. Nya meh gaya pengujung genap iku orang ke ngerumpak menua kitai. Ngilah mayuh bengkah sungai di menua Etiopia bisi siti menua alai munyi kebap sayap didinga. Ari menua nya datai bala pengari bansa. Sida undur ngilika Sungai Nile ngena perau ti digaga ari papairus. Pulai ke rumah, kita seruan ti deras! Bai pesan ngagai menua kita ke mayuh sungai, ngagai bansa kita ke kering sereta bekuasa, ngagai bala kita ke tinggi sereta alus kulit, ke diketakutka orang di serata dunya. Anang enda mending, genap iku kita ke diau di dunya! Giga siti menira ti deka dituatka ba tuchung bukit! Pendingka munyi terumpit! Ku TUHAN bejaku ngagai aku, “Aku deka nilik ari serega enda bemunyi baka ambun ti datai lebuh malam ti angat, lebuh maya ngetau, terang baka panchar mata panas lebuh siang hari. Sebedau buah anggur diketau, lebuh semua bungai udah labuh magang, lalu buah anggur benung mansau, munsuh deka ngerusak orang Etiopia ngemudah duku ti nyarau dan anggur. Bangkai bala soldadu sida enda dikuburka ngambika sida diempa burung enggau jelu babas. Lebuh musin panas, burung deka makai sida, lalu lebuh musin chelap, jelu babas deka makai sida.” Maya deka datai alai TUHAN ti Pemadu Bekuasa deka nerima piring ari menua ti mayuh sungai, menua ti kering sereta bekuasa, bansa orang ke tinggi sereta alus kulit, ke diketakutka orang di serata dunya. Sida deka datai ngagai Bukit Sion, alai TUHAN ti Pemadu Bekuasa disembah. Tu pesan pasal Ejip. TUHAN deka datai ngagai menua Ejip, nepan mua hari ti deras. Engkeramba orang Ejip getar-getar di mua Iya, lalu orang Ejip nadai berani agi. Ku TUHAN bejaku, “Aku deka nyungkak orang Ejip beperang ngelaban diri sebansa, menyadi ngelaban menyadi, pangan ngelaban pangan, nengeri ngelaban nengeri, lalu bala raja deka berebutka kuasa. Aku deka ngemuntanka pelan orang Ejip, lalu ngasuh sida lemi semengat. Sida deka minta tulung ari engkeramba sida, lalu sida deka betanya ngagai orang ke tau tujum enggau ngagai semengat orang ke udah mati. Aku deka nyerahka orang Ejip ngagai raja ti jai, ti deka merintah sida. Aku TUHAN ti Pemadu Bekuasa udah bejaku.” Ai Sungai Nile deka surut, lalu sungai nya deka mupuk rangkai. Semua arus sungai deka bebau but lebuh sungai nya majak rangkai. Temesing enggau bundung deka layu, lalu semua utai ti ditanam nisi tebing Sungai Nile, deka rangkai, lalu dikebuka ribut. Genap iku orang ke berikan ba Sungai Nile deka bedemuh lalu nyabak. Ginti enggau jala sida nadai guna agi. Sida ke ngaga kain linin deka tusah ati. Orang ke betenun enggau orang ke landik gawa deka tusah ati lalu merampau diau. Bala tuai nengeri Zoan endang beli! Orang Ejip ke pemadu bepenemu-dalam meri jaku lalau ti beli! Baka ni ku sida berani bejaku enggau raja madahka diri ngambi endur ari orang ke bepelajar enggau bala raja ti dulu kelia? Raja menua Ejip, dini alai bala penyanding penemu nuan ti pandai? Kada enda sida ulih madahka ngagai nuan pelan ti diungkupka TUHAN ti Pemadu Bekuasa ke menua Ejip. Bala tuai Zoan enggau Mempis endang beli. Sida dikarapka nguluka bansa, tang sida udah nesatka bansa. TUHAN udah nyungkak sida meri jaku lalau ti nyarutka runding. Ketegal nya, semua utai ti dikereja menua Ejip salah magang, lalu iya bejalai guir-guir baka orang ke mabuk, ke tekelinchir ba mutah diri empu. Nadai orang di menua Ejip, kaya tauka seranta, tinggi pangkat tauka enda ditemu orang, ulih nulung. Maya deka datai alai orang Ejip deka takut baka orang ke indu. Sida deka getar-getar takut lebuh sida meda TUHAN ti Pemadu Bekuasa ngedarka jari Iya, deka ngukum sida. Orang menua Ejip deka balat takutka menua Judah genap kali sida ingatka ukum ti udah disediaka TUHAN ti Pemadu Bekuasa ke sida. Lebuh maya nya ila, jaku orang Hebrew deka dikena dalam lima buah nengeri menua Ejip. Orang dia deka besumpah dalam nama TUHAN ti Pemadu Bekuasa. Sebuah ari nengeri nya deka dikumbai, “Nengeri Mata Hari.” Lebuh maya nya ila, sebuah alta deka digagaka TUHAN di menua Ejip, enggau siti tiang batu ti besai ti diserahka ngagai Iya ba garis entara menua Ejip. Utai nya deka nandaka TUHAN ti Pemadu Bekuasa bisi di menua Ejip. Lebuh pengidup orang mayuh dia ditekanka, lalu sida ngangauka TUHAN minta Iya nulung sida, Iya deka ngasuh siku orang ngelepaska sida. TUHAN deka mandangka Diri Empu ngagai orang Ejip. Udah nya baru sida deka ngaku sereta nyembah Iya, lalu mai piring enggau genselan ngagai Iya. Sida deka besemaya enggau Iya ngena sumpah, lalu deka ngereja utai ti disemaya sida. TUHAN deka ngukum orang Ejip, tang udah nya Iya deka ngeraika sida. Sida deka nguingka diri ngagai Iya, lalu Iya deka ninga sampi sida, lalu ngeraika sida. Lebuh maya nya ila, jalai raya deka digaga ari Ejip ngagai Asiria. Orang ari menua dua bengkah nya deka bejalai kundang-kasang entara dua buah menua nya, lalu bansa dua bengkah nya deka nyembah begulai. Lebuh maya nya ila, menua Israel deka sebaka enggau menua Ejip enggau menua Asiria, lalu bansa tiga bengkah nya deka mai berekat ngagai semua dunya. TUHAN ti Pemadu Bekuasa deka merekatka sida, lalu bejaku, “Aku deka merekatka nuan, Ejip, ti nembiak Aku. Nuan Asiria, ti udah digaga Aku, lalu nuan Israel, bansa ti dipilih Aku.” Nitihka atur Raja Besai Sargon menua Asiria, tuai soldadu orang Asiria nyerang nengeri orang Pilistin ti dikumbai Asdot. Tiga taun dulu ari nya, TUHAN udah ngasuh Isaiah anak Amos muka kasut iya enggau kain guni ti dikena iya begari. Isaiah ngasika TUHAN lalu bejalai telanjai, sereta enda bekasut. Lebuh Asdot udah alah, TUHAN lalu bejaku, “Nembiak Aku Isaiah udah bejalai telanjai sereta enda bekasut tiga taun. Tu nyadika tanda ke utai ti deka nyadi ngagai menua Ejip enggau menua Etiopia. Raja besai menua Asiria deka nabanka bala orang tangkap ari menua dua bengkah nya, lalu sida deka ditabanka telanjai. Sida ke tuai, enggau sida ke biak deka bejalai enda bekasut sereta telanjai, ayan jumbal burit kena ngemaluka menua Ejip. Sida ke udah ngarapka Etiopia nyaga sida, lalu udah temegah bejakuka pasal menua Ejip, deka asa ngapa, lalu nadai agi pengadang. Lebuh maya nya ila, orang ke diau ba tebing tasik di menua Pilistin deka nyebut, ‘Peda utai ti udah nyadi ba orang ke dikarapka kitai nyaga kitai ari raja menua Asiria! Baka ni ku kitai ulih idup?’ ” Tu pesan pasal menua Babilon. Baka ribut puting beliung ti mangka ari menua puang, baka nya meh penusah ti besai deka datai ari menua ti balat ngenakut. Aku bisi meda siti genera pasal utai ti nyadi, ti balat ngenakutka ati, genera pasal pengawa ti bejualka bansa enggau pasal pengerusak. Kita bala soldadu Elam, serang meh bala sida nya! Bala soldadu Media, kelulung meh semua nengeri! Allah Taala deka ngemuntanka semua pengawa Babilon ti merinsaka orang. Utai ti dipeda enggau didinga aku dalam genera nya udah balat ngasuh aku takut sereta pedis, pedis baka indu ke radai deka beranak. Ati aku balat amat rawan, lalu aku getar-getar takut. Aku lama udah nganti hari lemai, tang lebuh hari nyau lemai, balat agi ga aku takut. Dalam genera nya, siti pengerami makai besai bisi disediaka. Tikai udah dianchau alai bala pengabang duduk. Sida makai ngirup. Tekala nya jaku ti inggar bisi didinga: “Kita ke tuai soldadu! Sediaka terabai kita!” Udah nya TUHAN lalu bejaku ngagai aku, “Alai nuan ngasuh orang siku bediri nyadi jejaga, lalu asuh iya madahka utai ti dipeda iya. Enti iya bisi tepedaka bala orang ke nepan kuda datai begandin dua, enggau orang ke nepan keledai enggau jelu unta, iya enda tau enda nengkilaka sida.” Orang jejaga nya lalu ngangau, “Tuan, aku udah bediri jaga ditu siang malam.” Bala orang ke nepan kuda begandin dua lalu datai enggau ngenyit. Jejaga nya lalu madahka berita nya, “Babilon udah alah! Semua engkeramba ti disembah sida nyau abis redak ba tanah.” Nembiak Aku Israel, kita udah ditungku baka gandum, tang diatu aku udah madahka ngagai kita berita manah ti udah didinga aku ari TUHAN ti Pemadu Bekuasa, ti Allah Taala ke disembah orang Israel. Tu pesan pasal Edom. Siku orang ari Edom bisi ngangauka aku, “Jejaga, ni pengelama baru malam tu apus? Padahka ngagai aku, kemaya malam tu apus.” Ku aku nyaut, “Hari nyau deka tawas, tang hari deka malam baru. Enti nuan deka nanya baru, pulai kitu baru, lalu tanya.” Tu pesan pasal menua Arabia. Kita orang di Dedan ke bepalan ba menua puang di Arabia, beri ai ngagai orang ke aus, ke datai ngagai kita. Kita orang ari menua Tema, beri pemakai ngagai orang ke tasah. Orang ngerarika diri ari pedang ti sedia deka munuh sida, ari panah ti sedia deka nimbak sida, ari semua penusah ti nuntung lebuh maya beperang. Udah nya TUHAN lalu bejaku ngagai aku, “Dalam setaun da agi, kuasa raban bansa Kedar deka abis. Orang ke besenyataka panah nya soldadu ti pemadu berani ari raban bansa Kedar, tang ka mimit aja bala sida deka mengkang idup. Aku ti TUHAN Allah Taala ke disembah orang Israel, udah bejaku.” Tu pesan pasal Jerusalem. Nama utai ti nyadi dia? Nama kebuah semua orang dalam nengeri nya ngintu pengerami ba perabung rumah? Semua orang di nengeri nya nyau richah magang, inggar sereta gagit ati. Kita ke mati ba perang tu, kita ukai mati betempuh enggau munsuh. Semua tuai kita rari, lalu ditangkap, sebedau sida sempat nimbakka laja sida. Nya alai, diatu awakka aku nyabak kediri ke semua bala aku ti udah mati. Anang nguji ngaum aku. Tu meh maya orang begau abis ati, maya alah, maya charut ba Emperan Genera, lalu TUHAN ti Pemadu Bekuasa udah ngasuh utai nya nuntung kitai. Dinding kuta nengeri kitai udah runtuh, lalu orang ke minta tulung nyau bekerauh nyabak ba sebelah bukit. Bala soldadu ari menua Elam datai nepan kuda, besenyataka panah enggau laja. Bala soldadu ari menua Kir udah nyendiaka terabai sida. Emperan ti ami di menua Judah nyau penuh laban kerita perang. Bala soldadu ke nepan kuda bediri di mua pintu nengeri Jerusalem. Semua menua Judah nadai ulih dijaga agi. Lebuh utai nya nyadi menya, kita lalu mansutka senyata ari sarang senyata kita. kita ngaga siti letung dalam nengeri nya, alai nyimpan ai ti rarat ari letung ti lama. Tang kita enggai mendingka Allah Taala, ke lama udah ngaga pelan ke semua utai tu, lalu udah ngasuh utai tu nyadi. Lebuh maya nya suba TUHAN ti Pemadu Bekuasa ngangauka kita, ngasuh kita nyabak sereta ngulit, ngukur pala kita, lalu begari ngena kain guni. Tang kita ketawa lalu rami. Kita munuh lalu makai jelu bedus enggau jelu sapi, lalu kita ngirup wain. Ku kita, “Manah agi kitai makai ngirup, laban pagila kitai mati!” TUHAN ti Pemadu Bekuasa Empu udah bejaku ngagai aku, ku Iya, “Pengawa sida ke jai tu enda diampun, seagi-agi sida idup. Aku TUHAN ti Pemadu Bekuasa, udah bejaku.” TUHAN ti Pemadu Bekuasa udah ngasuh aku mansang ngagai Sebna, siku orang ke ngemataka ruang bilik raja, lalu nyebut ngagai iya, “Sapa nuan tu ku pikir nuan? Nama kuasa kena nuan numbak lumbung ke diri empu ba tisi bukit ti bebatu tu? Nuan nyangka tinggi pangkat, tang TUHAN deka nyapai nuan lalu muai nuan. Iya deka nyapai nuan baka buah bol, lalu nikauka nuan ngagai menua ti besai agi. Nuan deka mati dia, ngimbai kerita perang ti dikemegahka nuan. Nuan tu ngemaluka ruang bilik tuan nuan. TUHAN deka muai nuan ari pengawa nuan, lalu nurunka pangkat nuan.” Ku TUHAN bejaku ngagai Sebna, “Lebuh utai nya nyadi, Aku deka mesanka nembiak Aku Eliakim anak Hilkiah. Aku deka ngerasukka baju panjai enggau belulang nuan ba iya, lalu meri ngagai iya semua kuasa nuan. Iya deka nyadi baka apai ke orang Jerusalem enggau orang Judah. Aku deka meri ngagai iya semua kuasa di baruh raja ke ari peturun David. Iya deka megai kunchi opis perintah. Sebarang utai ti dibuka iya, nadai orang deka nikup, lalu sebarang utai ti ditikupka iya, nadai orang deka muka. Aku deka ngentapka iya ba pengawa iya baka tiang bantil, lalu iya deka mai basa ngagai semua sida sebilik. “Tang semua kaban belayan iya, enggau orang ke ditupi iya, deka nating iya magang. Sida deka begantung ba iya baka periuk enggau mangkuk ti begantung ari tiang bantil! Lebuh utai nya nyadi, tiang bantil ti udah dipantang teguh, deka techabut lalu rebah. Nya meh pengujung semua utai ti udah digantung ba iya.” TUHAN udah bejaku. Tu pesan pasal Tire. Nyabak enggau ati ti tusah meh kita kelasi ti di tasik luar! Pengkalan kita di Tire udah dirusak. Rumah enggau pengkalan dalam nengeri nya udah nyadi tembawai. Lebuh kapal kita pulai ari Saiprus, kita deka ninga berita nya. Nyabak meh kita, orang dagang ari Sidon! Kita udah ngirumka pengari ngelayang tasik bebeli enggau bejualka gandum ti tumbuh di menua Ejip, lalu bedagang enggau semua bansa. Nuan patut nemu malu, Nengeri Sidon! Tasik enggau tasik ti dalam enggai agi bempu nuan. Ku sida, “Aku nadai kala bisi anak. Aku nadai kala nupi anak lelaki tauka anak indu.” Indah orang Ejip deh deka tekenyit sereta tusah ati lebuh sida ninga berita pasal Tire ti udah dirusak. Nyabak enggau ati ti tusah meh kita orang Ponisia! Uji kita ngerarika diri ngagai menua Spain! Kati nengeri tu amat nengeri Tire ti seruran ngelantangka diri, ti digaga dulu kelia? Kati tu nengeri ti udah ngirumka orang belayar ngelayang tasik ngambika sida netapka diri din? Sapa udah ngaga pelan deka ngasuh semua utai tu ninggang Tire, nengeri diraja, ti bempu bala orang dagang ti balat dibasa orang di dunya tu? TUHAN ti Pemadu Bekuasa udah ngaga pelan ke semua utai nya, kena Iya ngemuntanka semua penyumbung sida dalam semua utai ti udah dikereja sida, lalu kena ngemaruhka sida ke dibasa orang. Bumai meh kita, kita ke diau di menua Spain! Nadai orang agi bisi nyaga kita. TUHAN udah ngedarka jari Iya atas tasik, lalu udah ngalahka mayuh bengkah perintah. Iya udah ngasuh endur alai orang Ponisia bedagang dirusak. Nengeri Sidon, pengelantang nuan nadai agi, lalu bala nembiak nuan kena tekan. Enti sema sida rari ngagai Saiprus, enda meh sida ulih diau likun. ( Orang Babilon, ukai orang Asiria, ti udah nejuka jelu babas ngelunjak Tire. Orang Babilon ti udah nirika menara kena ngelulung sereta ngeruntuhka kuta Tire, lalu ninggalka nengeri nya nyadi tembawai. ) Nyabak enggau ati ti tusah meh kita kelasi ke belayar ba tasik luar! Nengeri ti dikarapka kita, udah dirusak. Maya deka datai alai Tire enda dikingatka agi dalam pengelama tujuh puluh taun, iya nya dalam kandang umur raja. Ba pengujung tujuh puluh taun nya, Tire deka nyadi baka indu sundal ke disebut dalam pantun: Bai meh belikan kita, lalu bejalai nengah nengeri nya, kita indu sundal ti enda dikingatka orang agi! Tebah meh musik kita lalu belagu baru ngambika kita dikingatka baru. Ba ujung tujuh puluh taun nya, TUHAN deka nejuka Tire pulai baru ngagai pengawa dagang iya ti lama, lalu iya deka nyundalka diri ngagai semua perintah di dunya tu. Duit ti ulih iya bedagang deka diserahka iya ngagai TUHAN. Iya enda nyimpan duit nya, tang orang ke nyembah TUHAN deka ngena duit nya bebelika pemakai enggau gari ti dipeguna sida. TUHAN deka ngerusak dunya, lalu ngasuh iya puang nadai orang nguan. Iya deka musil mua dunya, lalu ngachirka semua bansa ti diau dalam iya. Pengujung semua orang endang sebaka magang - bala imam, enggau orang mayuh, bala ulun enggau tuan sida, orang ke bebeli enggau orang ke bejual, orang ke nyali duit enggau orang ke nginjau duit, orang ke kaya enggau ke seranta. Dunya deka rusak lalu redak. TUHAN udah bejaku, lalu utai nya deka nyadi. Dunya deka rangkai lalu layu. Semua dunya deka lemi. Dunya enggau langit deka buruk. Orang mayuh udah ngamahka dunya laban sida udah ngelanggar adat Allah Taala, sereta mungkir ari sempekat ti meruan belama iya. Nya alai Allah Taala udah nyumpah dunya. Orang dunya tu deka merinsa ketegal utai ti udah dikereja sida. Orang ke agi idup deka majak mimit se-mimit. Pun anggur deka layu, lalu wain nyau nadai mayuh agi. Semua orang ke udah lantang suba, diatu nyau tusah ati, lalu belikan enggau dedumbak ti dikena ngelantangka ati, nyau nadai agi ditebah. Orang nadai agi gaga ati belagu ngirup wain. Orang nadai agi ngasaika penyamai wain. Di nengeri nya, semua utai nyau charut magang, lalu orang mayuh ngunchi diri dalam rumah diri empu ngiga pengelikun. Orang mayuh manjung ba sebelah jalai raya, laban wain nyau udah abis. Pengelantang udah abis belama iya, laban iya udah dibuai ari dunya. Nengeri nya nyau tembawai, lalu pintu iya udah runtuh. Tu meh utai ti deka nyadi ba genap bengkah bansa di serata dunya. Utai nya deka nyadi baka lebuh maya badu ngetau, lebuh semua buah kana udah disipat ari puchuk iya, lalu buah anggur ti pemadu dudi udah abis diketau. Orang ke agi idup deka belagu gaga ati. Sida ke di Barat deka nusui pasal pemesai kuasa TUHAN, lalu sida ke di Timur deka muji Iya. Orang ke diau ba sebelah menua ti ba tebing tasik deka muji TUHAN Allah Taala ke disembah orang Israel. Ari endur ti pemadu jauh di dunya tu, kitai deka ninga lagu kena muji Israel, bansa ti lurus. Tulah meh aku tu! Aku nyau majak kurus-sekurus! Orang ke nyual bansa majak bejualka bansa, lalu pengawa sida ke aum juak majak jai-sejai. Pendingka aku, semua kita! Utai ti balat ngenakut, lubang kebung, enggau panjuk mengkang ngipa kita. Barang sapa nguji ngerarika diri ari utai ti balat ngenakut, deka labuh ngagai lubang kebung, lalu barang sapa ulih ngerarika diri ari lubang kebung, deka disintak panjuk. Ujan ti bangat deka labuh ari langit, lalu pugu dunya deka beguyat. Tanah deka merekah belah lalu pechah. Dunya empu deka guir-guir baka orang ke mabuk, giau-giau baka langkau ti dipangkaka kabut. Dunya nyau berat laban dosa, lalu iya deka rebah lalu enda angkat agi. Maya deka datai alai TUHAN deka ngukum kuasa ti di atas, enggau bala pemerintah ti di dunya. Allah Taala deka ngempuruka bala raja baka orang jil dalam lubang kebung. Iya deka nutup sida dalam rumah jil nyentuk ngagai maya sida diukum. Bulan deka nyadi petang, lalu mata hari enda manchar agi, laban TUHAN ti Pemadu Bekuasa deka nyadi raja. Iya deka merintah di Jerusalem ba Bukit Sion, lalu bala tuai orang mayuh deka meda mulia Iya. TUHAN, Nuan endang Allah Taala aku. Aku deka ngemesaika Nuan lalu muji nama Nuan. Nuan udah ngereja utai ti amat nyelai. Nuan udah tetap ati bejalaika pelan ti digaga Nuan kelia. Nuan udah ngaga semua nengeri nyadi tembawai lalu udah ngerusak dinding kuta sida. Istana ti udah digaga bala munsuh kami nyau nadai agi belama iya. Orang ari bansa ti bekuasa deka muji Nuan. Orang ke diau dalam nengeri bansa orang ke jai deka nangika Nuan. Orang ke seranta enggau ti nadai daya, udah rari ngenduh ngagai Nuan lalu udah diau likun lebuh maya penusah nyadi. Nuan ngelindung sida ari kabut lalu ngelindung sida ari pengangat ti tau ngangus. Munsuh ti jai nyerang baka kabut lebuh musin chelap, baka kemarau di menua ti rangkai. Tang Nuan, TUHAN, udah ngasuh munsuh kami sunyi. Nuan madamka panjung orang ke mangah, baka mua hari ti ngasuh panas ti bisa nyadi chelap. Ba Bukit Sion TUHAN ti Pemadu Bekuasa deka nyendiaka pengerami makai besai ke semua bansa ti di dunya tu - pengerami makai besai alai pemakai ti pemadu berega enggau wain ti pemadu manah deka disediaka. Ditu TUHAN deka ngenyit muai ati ti tusah ari semua bansa. TUHAN ti Pemadu Tinggi deka ngerusak pemati belama iya! Iya deka ngendas ai mata ari mata semua orang, lalu muai pemalu ti udah ditatka bala nembiak Iya di serata dunya. TUHAN udah bejaku. Lebuh utai nya nyadi, genap iku orang deka nyebut, “Iya endang Allah Taala kitai! Kitai udah manggaika pengarap kitai ba Iya, lalu Iya udah nyelamatka kitai. Iya nya meh TUHAN! Kitai udah manggaika pengarap kitai ba Iya, lalu diatu kitai lantang sereta rami gaga, laban Iya udah nyelamatka kitai.” TUHAN deka nyaga Bukit Sion, tang orang Moap deka dilunjak, baka ke ngelunjak rumput ti rangkai ke dalam tai sapi. Sida deka ngunjurka jari sida baka ke nguji deka nyemerai, tang Allah Taala deka ngemaruhka sida, lalu jari sida deka lemi nadai daya agi. Iya deka ngerusak mayuh bengkah kuta di menua Moap enggau dinding sida ke tinggi, lalu ngeruntuhka sida nyadi amau. Hari deka datai alai orang mayuh deka nyanyi lagu tu di menua Judah: Nengeri kitai kering! Allah Taala empu ke nyaga dinding kuta iya! Tukangka pintu nengeri ngambika bansa ti tetap ati, tama, iya nya bansa ti ngereja utai ti ngena. Nuan, TUHAN, meri pemaik ti pemadu menyana ngagai orang ke ngembuan juluk ati ti tegap, sereta manggaika pengarap sida ba Nuan. Panggaika pengarap kitai ba TUHAN belama iya. Iya deka seruran nyaga kitai. Iya udah ngemaruhka orang ke sumbung. Iya udah ngerusak nengeri ti tegap ti alai sida diau, lalu ngeruntuhka dinding kuta iya nyadi amau. Orang ke kena tekan, bejalai ba atas nengeri nya diatu lalu ngelunjak iya. TUHAN, Nuan ngaluska jalai ti ditengah orang ke menyana. Jalai ti ditengah sida nya rata. Kami nitihka peneka Nuan, lalu manggaika pengadang kami ba Nuan. Semina Nuan siku aja ti dikinginka kami. Lebuh malam hari aku lelengauka Nuan enggau pengabis ati aku. Lebuh Nuan ngakim dunya enggau orang ke diau dalam iya ila, semua sida deka nemu utai ti dikumbai atur ti lurus. Taja pen Nuan nelap enggau orang ke jai, tang sida nadai kala belajar ngereja utai ti ngena. Indah di menua ti diuan orang ke lurus tu deh sida mengkang ngereja utai ti salah. Sida enggai ngaku pemesai kuasa Nuan. Bala munsuh Nuan enda nemu Nuan deka ngukum sida. TUHAN, asuh sida malu, lalu awakka sida merinsa. Awakka sida natka ukum ti udah disediaka Nuan ke sida, pandangka ngagai sida pemesai pengerindu Nuan ke nembiak Nuan. Nuan deka ngasuh kami nyadi kaya-raja, TUHAN. Semua utai ti ulih kami endang utai ti dikereja Nuan ke kami. TUHAN Allah Taala kami, kami udah diperintah orang bukai, tang semina Nuan siku aja ti TUHAN kami. Diatu sida udah mati, lalu enda idup agi. Semengat sida enda angkat agi, laban Nuan udah ngukum lalu ngerusak sida. Nadai orang agi ingatka sida. TUHAN, Nuan udah ngasuh bansa kami mansang, ngerembaika menua kami kia-kia, lalu utai tu udah mai basa ngagai Nuan. Nuan udah ngukum bala nembiak Nuan, TUHAN, lalu enggau ati ti tusah sida besampi ngagai Nuan. Nuan, TUHAN, udah ngasuh kami duie-duie nyabak, baka indu ke radai deka beranak. Kami ngeliat natka diri pedis, tang kami nadai ngadaka utai. Kami nadai bulih pemenang ke menua kami. Kami nadai bulih utai. Bala kami ke udah mati, deka idup baru! Bangkai sida deka idup baru. Semua sida ke tinduk dalam kubur deka dani lalu belagu gaga ati. Baka ambun ti bekebelik ngemasahka tanah, baka nya meh TUHAN deka ngidupka baru sida ke lama udah mati. Pulai ngagai rumah kita empu, kita ke nembiak aku, lalu tutup pintu kita. Belalai enda lama, nganti pengeringat Allah Taala badu. TUHAN benung datai ari endur Iya ti di serega, deka ngukum orang di dunya tu ketegal dosa sida. Pengawa ti belalai bebunuhka orang deka dipandangka, lalu tanah enda agi ngelalaika bangkai orang ke udah dibunuh. Ba hari nya TUHAN deka ngena pedang Iya ti tajam sereta bisa, munuh ikan ti besai, iya nya naga ti ngelingkang sereta ngelingkung, lalu munuh naga ti diau di tasik. Ba hari nya, TUHAN deka bejaku ngenang pasal pemanah kebun anggur Iya, “Aku ngintu iya lalu selalu manjah iya enggau ai. Aku nyaga iya siang malam, ngambika orang nadai ngerusak iya. Aku enda agi ringat ngagai kebun anggur nya. Enti sema duri enggau randau bisi dilaban, Aku deka nunu sida datai ke sida abis retung. Tang enti bala munsuh nembiak Aku minta aku ngelindung sida, awakka sida meh bebaik enggau Aku. Sigi amat, awakka sida bebaik enggau Aku.” Jemah ila orang Israel, bala peturun Jakop, deka beurat baka kayu, lalu sida deka bebungai lalu bekantuk. Dunya deka penuh laban buah sida. TUHAN nadai kala ngukum Israel ngemalat Iya ke ngukum bala munsuh sida, tauka munuh sida ngemayuh munsuh ti dibunuh Iya. TUHAN muai bala nembiak Iya ngagai menua bukai kena Iya ngukum sida. Iya nabanka sida ngena ribut ti jai ari timur. Tang dosa orang Israel deka diampun semina lebuh batu alta orang kapir udah diinsarka baka kapu, lalu alta alai nunu menyan, tauka tanda petara indu Aserah udah abis dirusak. Nengeri ti bekuta nyau nyadi tembawai. Nengeri nya nadai mensia baka menua puang. Iya udah nyadi padang rumput ke jelu sapi, endur alai sida belelak enggau ngulam. Dan kayu layu sereta patah, lalu sida ke indu ngumpul dan kayu nya nyadika kayu api. Laban bala nembiak TUHAN enda mereti, nya alai Iya ti udah nempa sida, enggai sinu ati ke sida, tauka kasihka sida. Ba hari nya, TUHAN deka ngempuruka bala nembiak Iya, siku-siku sekali, ari Eupratis nyentuk ngagai garis entara menua enggau menua Ejip, baka ke magi gandum ari ampa. Ba hari nya ila, siti terumpit deka disepu kena ngangauka semua orang Israel ti udah dibuai ngagai menua Asiria enggau menua Ejip ngambika sida pulai baru. Sida deka datai lalu nyembah TUHAN di Jerusalem, ba bukit Iya ti kudus. Tulah meh perintah menua Israel! Mulia ti dikemegahka iya nyau layu baka sengkilung bunga ti ba pala bala tuai ke mabuk. Pala sida bebau rengut laban minyak wangi, tang sida garing-garing mabuk. TUHAN udah ngasuh siku orang ke kering sereta bekuasa nyerang sida, orang ke deka datai baka ujan batu, baka ujan ti bangat, baka bah ti deras, ti deka ngampuhka menua. Penyumbung bala tuai bansa ke mabuk deka dilunjak. Mulia bala tuai ti sumbung nya, deka majak kurang-sekurang lalu lesap baka buah kana ti terubah, ti diambi lalu diempa lebuh sida mansau. Maya deka datai alai TUHAN ti Pemadu Bekuasa deka nyadi baka makota bungai ti bemulia, ke bala nembiak Iya ti agi idup. Iya deka meri ati ti lurus ngagai sida ke bekereja nyadi hakim, enggau pemerani ngagai sida ke nyaga pintu nengeri ari serang munsuh. Indah bala nabi enggau bala imam deh mabuk, datai ke sida nyau guir-guir bejalai. Sida udah bebendar ngirup wain enggau ai ti bisa, datai ke sida nyau charut runding sereta tesangkut. Sida nabi nya kelalu mabuk datai ke sida nyau enda nemu reti genera ti dikirumka Allah Taala, lalu bala imam kelalu mabuk datai ke sida nyau enda nemu ngatur pechara. Mija ti alai sida duduk nyau abis dibalut mutah. Nadai siti endur ba mija nya ti beresi. Sida mutap pasal aku. Ku sida, “Ngajar sapa iya nya ku iya? Sapa begunaka pesan iya? Pesan nya semina manah ke anak mit ke baru badu nusu! Iya nguji ngajar kitai urup beganti urup, ayat beganti ayat, pelajar beganti pelajar.” Enti kita enggai mendingka aku, Allah Taala deka ngena orang bansa bukai, ke bejaku ngena jaku ti nyelai, ngajar kita. TUHAN udah meri ngagai semua kita peluang belelak, enggau pengelantang diau, tang kita enggai mendingka Iya. Nya kebuah TUHAN deka ngajar kita urup beganti urup, ayat beganti ayat, pelajar beganti pelajar. Udah nya baru kita deka tesangkut tiap kali kita nyingkang. Kita deka bakal, disintak panjuk, lalu nyadi orang tangkap. Diatu kita tuai bansa ke merintah di Jerusalem ditu, pendingka utai ti disebut TUHAN. Kita temegah madahka diri udah ngaga sempekat enggau pemati, lalu udah besetuju enggau dunya pemati. Kita ngarapka penusah ti deka datai enda nuntung kita, laban kita ngarapka pemula enggau jaku tipu kita ulih nyaga kita likun. Nya alai tu utai ti disebut TUHAN ti Pemadu Tinggi, “Aku ngengkahka sigi batu pemun ti tetap sereta tegap di Sion. Dalam pemun nya Aku deka ngengkahka siti batu pemun ti tegap, ti udah ditulis enggau leka jaku tu, ‘Pengarap ti tegap sereta liat.’ Pengelurus deka nyadika tali penyukat ke batu pemun nya, lalu pemetul ati deka nyadika tali kena ngabas penalam pengarap nya.” Ujan batu deka muai semua pemula ti dikarapka kita, lalu ai bah deka ngerusak pengelikun kita. Sempekat ti udah digaga kita enggau pemati deka dibuai, lalu utai ti udah dipesetujuka kita enggau dunya pemati, deka dibuai. Lebuh penusah ti besai datai, kita deka alah. Penusah nya deka nyerang kita enda ngetu-ngetu, pagi beganti pagi. Kita deka natka iya siang malam. Genap iti pesan ti baru ari Allah Taala, deka ngasuh kita takut baru! Kita nyadi baka orang ke dikenang dalam Jaku-dalam, ke nguji nindukka diri ba katil ti enda chukup alai ngunjurka diri, ngena pua ti enda chukup kena mungkur diri. TUHAN deka belaban baka ke dikereja Iya ba Bukit Perasim, enggau ba Emperan Gibeon, ngambika Iya ulih ngereja utai ti dikedekaka Iya, taja pen pengawa Iya nya baka ke nyelai. Iya deka nembuka pengawa Iya ti nyelai nya. Anang ngeleseka jaku tangkan ti diberi aku ngagai kita! Enti kita ketawa, mar agi ga kita deka ngerarika diri. Aku udah ninga pemutus penemu TUHAN ti Pemadu Bekuasa ti deka ngerusak semua menua tu. Pendingka utai ti disebut aku. Peratika utai ti dipadahka aku ngagai kita. Orang bumai enda seruran ngeradu tanah, lalu enda seruran nyendiaka tanah alai nanam utai. Lebuh sida udah nyendiaka tanah, sida nanam benih sayur baka dill enggau kumin. Sida nanam gandum enggau barli, lalu ba tisi umai, sida nanam utai bukai. Sida nemu jalai ngereja pengawa diri, laban Allah Taala udah ngajar sida. Sida nadai kala ngena pemalu ti berat ngulihka leka dill tauka leka kumin, tang sida ngena kayu ti lempung ti numbas pemesai. Lebuh sida nungku gandum, sida enda nungku gandum nya datai ke redak, lalu sida nemu chara nungku ngena kerita tarit ti dipejalaika sida ba atas gandum nya, tang enda ngeredakka leka gandum. Semua penemu-dalam datai ari TUHAN ti Pemadu Bekuasa. Pelan ti digaga Allah Taala endang ngena, lalu semua pelan nya endang mujur belama. Alta Allah Taala, nengeri Jerusalem empu, deka dirusak! Nengeri ti alai David nirika kem, deka dirusak! Awakka pengerami makai besai enggau gawai semina diintu setaun-dua da agi. Udah nya Allah Taala deka ngasuh penusah ti besai ninggang nengeri ti dikumbai “Alta Allah Taala.” Nyawa orang ke bekeduie nyabak deka didinga, lalu semua nengeri nya deka nyadi baka alta ti dibalut darah. Allah Taala deka nyerang nengeri nya, ngelikup sereta ngelulung iya. Jerusalem deka nyadi baka antu ti bebendar deka bejaku ari dalam tanah, ngena nyawa ti enda terang pansut ari amau. Jerusalem, semua orang kampar ke nyerang nuan, deka dikebuka baka amau, lalu bala soldadu sida ke balat ngenakut, deka dikebuka baka ampa. Ngenyit sereta enda diadang TUHAN ti Pemadu Bekuasa deka ngelepaska kita ngena kabut enggau tanah berenyang. Iya deka ngirumka kabut biaubalai enggau api ti mau. Udah nya semua bala soldadu ari semua bansa bukai ke nyerang nengeri alta Allah Taala, semua senyata enggau pekekas sida - semua utai - deka lesap baka mimpi, baka utai ti diperagam lebuh malam hari. Semua bansa ti begempuru deka nyerang Jerusalem, nyau baka orang ke lapar, ke bemimpi makai, tang dani lapar, tauka baka orang ke nyau deka mati aus, bemimpi ngirup, tang dani rangkai batang rekung. Pajakka pemeli kita! Awakka kita buta! Mabuk meh kita, taja pen kita nadai ngirup wain! Guir-guir meh kita, taja pen kita nadai ngirup setitik! TUHAN udah ngasuh kita ngantuk sedia deka tinduk jenak. Nabi patut nyadika mata orang mayuh, tang Allah Taala udah mampul mata sida. Reti semua genera ti benabi deka dilalaika ari kita. Genera nya deka nyadi baka gulung surat ti ditanggam ngena chop tambit. Enti kita mai utai nya ngagai orang ke nemu macha, lalu ngasuh iya macha utai nya ngagai kita, iya deka madahka diri enda ulih macha laban utai nya ditanggam ngena chop tambit. Enti kita meri utai nya ngagai orang ke enda nemu macha, lalu ngasuh iya macha utai nya ngagai kita, iya deka nyaut madahka diri enda nemu macha. Ku TUHAN bejaku, “Orang tu ngumbai diri nyembah Aku, tang jaku sida nadai reti, lalu ati sida jauh ari Aku. Agama sida semina atur enggau adat asal ti digaga mensia ti udah dikingatka sida dalam ati sida. Nya alai Aku deka ngasuh sida tegepang ngena penusah ti enda diadang, ti nyadi betangkan-tangkan. Sida ke bepenemu-dalam deka nyadi orang ke beli, lalu semua pemandai sida nadai guna magang.” Tulah meh orang ke nguji ngelalaika pelan diri ari TUHAN, ke ngereja pengawa sida ngena chara belalai, lalu ngumbai orang nadai ulih meda sida tauka nemu utai ti dikereja sida. Sida nunsangka semua utai. Ni ti beguna agi, orang ke ngaga periuk, tauka tanah liat? Kati utai ti udah ditempa kita ulih nyebut, “Ukai nuan ke nempa aku”? Tauka, kati iya ulih nyebut, “Nuan enda nemu utai ti dikereja diri”? Munyi ti disebut dalam jaku sempama: enda lama da agi utan tuai tu deka nyadi tanah umai, lalu tanah umai deka nyadi utan tuai baru. Ba hari nya, orang ke bengal ulih ninga bup dibacha enggau nyawa ti inggar, lalu orang ke buta, ti udah diau dalam petang, deka menchelakka mata sida, lalu meda. Orang ke seranta, ke baruh ati, deka sekali agi nemu pengelantang ti diberi TUHAN Allah Taala ke disembah orang Israel ti kudus. Nya meh pengujung orang ke nekanka pengidup orang bukai, sereta enda bebasaka Allah Taala. Genap iku orang ke bedosa deka dirusak. Allah Taala deka ngerusak sida ke bejaku jai pasal orang bukai, sida ke nagang orang ke jai diukum, enggau sida ke madahka utai ti bula kena sida nagang orang ke lurus bulih atur ti lurus. Nya alai diatu TUHAN Allah Taala ke disembah orang Israel ti udah ngelepaska Abraham ari penusah, nyebut, “Nembiak Aku, kita enda agi dipechat, lalu mua kita enda agi puchat laban pemalu. Lebuh kita meda bala anak mit ti deka diberi Aku ngagai kita, nya baru kita deka ngaku Aku tu Allah Taala ke disembah orang Israel ti kudus. Kita deka ngemesaika Aku, lalu nangika Aku. Orang ke beli deka belajar meretika utai, lalu sida ke selalu mut-mut, deka gaga ati diajar.” TUHAN udah bejaku munyi tu: “Tulah meh orang ke megai perintah di menua Judah, laban sida angkat ngelaban Aku. Sida nitihka pelan ti ukai digaga Aku, lalu begagaka sempekat ti ngelaban peneka Aku, lalu nugungka dosa sida. Sida mansang ngagai menua Ejip minta tulung, lalu enda minta jaku lalau ari Aku. Sida ngasuh Ejip nyaga sida, nya alai sida manggaika pengarap sida ba raja menua Ejip. Tang raja nya nadai kuasa nulung sida, lalu pengawa orang Ejip ti nyaga sida deka mai penusah ti besai. Taja pen bala pengari bansa udah datai ba nengeri orang Ejip ke benama Zoan enggau Hanis, orang Judah deka nesal ati ke diri ti udah ngarapka bansa ti enda tau dikarapka, bansa ti udah ngelebuka sida, lebuh sida ngarapka diri bisi orang nulung.” Tu pesan Allah Taala pasal jelu ti diau di menua puang di selatan: “Bala pengari bansa bejalai nengah menua ti tau ngasuh bebadi, ti alai singa diau, sereta bisi ular ti bisa enggau naga ti terebai. Sida mai pemeri ti berega ngena keledai enggau jelu unta, ngagai bansa ti enda ulih nulung sida. Tulung ti diberi orang Ejip sigi nadai guna. Nya alai Aku udah ngumbai Ejip, ‘Naga Ti Enda Tau Nganu.’ ” Allah Taala ngasuh aku nuliska dalam siti bup gaya orang tu, kena ngingatka penyai sida belama iya. Sida seruran angkat ngelaban Allah Taala, seruran bula, seruran enggai mendingka ajar TUHAN. Sida nagang bala nabi bejaku. Ku sida, “Anang bejaku ngagai kami pasal utai ti ngena. Padahka ngagai kami utai ti deka didinga kami. Awakka kami majak nipu diri empu. Anang nekul kami; anang mempang jalai kami. Kami enggai ninga pasal Allah Taala kita ke kudus, ke disembah orang Israel.” Tang tu utai ti disebut Allah Taala ke disembah orang Israel ti kudus: “Kita nulak utai ti dipadahka Aku ngagai kita, lalu kita manggaika pengarap kita ba pengawa kita ke nekanka pengidup enggau nipu orang. Nya alai kita salah. Kita baka dinding ti tinggi, ti merekah ari atas ke baruh. Kita deka runtuh enggau ngenyit. Kita deka redak baka periuk tanah datai ke kerimpak iya nadai chukup besai kena ngumpul bara api, tauka kena ngauk ai ari tepayan.” Laban TUHAN ti Pemadu Tinggi, Allah Taala ke disembah orang Israel ti kudus udah bejaku: “Pulai baru ngagai Aku, lalu panggaika pengarap kita ba Aku. Nya baru kita deka kering sereta likun.” Tang kita enggai. Lalu kita bekira ngerarika diri ari munsuh kita ngena kuda ti laju. Kita endang patut rari! Kita ngumbai kuda kita chukup laju, tang munsuh ke begagaika kita laju agi ari nya! Seribu iku kita deka rari lebuh kita tepedaka siku munsuh, lalu lima iku munsuh chukup ngasuh semua kita rari. Nadai utai agi tinggal ari bala soldadu kita, kelimpah ari siti tiang menira ti ba tuchung bukit. Tang taja pia, TUHAN nganti maya Iya deka kasihka kita. Iya sedia deka kasihka kita, laban Iya endang seruran ngereja utai ti ngena. Beberekat meh orang ke manggaika pengarap sida ba TUHAN. Kita ti diau di Jerusalem enda agi nyabak ila. TUHAN endang kasih, lalu lebuh kita nyabak minta Iya nulung kita, Iya deka nyaut kita. TUHAN deka ngasuh kita ngasaika pemerinsa, tang Iya Empu deka bisi dia ngajar kita, lalu kita enda ibuh begigaka Iya agi. Enti kita limpang ke kanan tauka ke kiba, kita deka ninga munyi nyawa Iya bejaku ari belakang kita, “Tu jalai. Titi jalai tu.” Kita deka mai engkeramba kita ke disampak enggau pirak, enggau engkeramba kita ke disampak enggau emas, lalu kita deka muai sida baka ke muai utai ti kamah, lalu manjung, “Rari kita ari aku!” Genap kali kita nanam utai, TUHAN deka ngasuh hari ujan ngambika utai nya tumbuh, lalu Iya deka ngasuh kita bulih ngetau, lalu kita deka mayuh rumput ke jelu tupi kita. Jelu sapi ti lelaki, enggau keledai ti ngeradu tanah umai kita, deka makai pemakai ti pemadu manah. Ba hari nya, lebuh kuta munsuh kita alah, lalu bala sida dibunuh, ai deka rarat ari genap igi bukit enggau munggu baka sungai. Bulan deka manchar terang baka mata hari, lalu mata hari deka tujuh kali terang agi ari selama, baka penerang tujuh hari dipegulaika. Semua utai tu deka nyadi lebuh TUHAN malut lalu ngeraika telih ti udah dikena Iya ngemakalka bala nembiak Iya. Kuasa enggau mulia TUHAN ulih dipeda ari jauh. Api enggau asap mandangka pengeringat TUHAN. TUHAN bejaku, lalu leka jaku Iya ngangus baka api. Iya ngasuh ribut muput di mua Iya baka ai bah ti nabanka semua utai. Ribut nya ngerusak semua bansa, lalu ngemuntanka semua pelan sida ke jai. Tang kita ke nembiak Allah Taala, deka lantang ati sereta belagu baka ke dikereja kita lebuh malam gawai ti kudus. Kita deka gaga ati baka orang ke bejalai nitihka rentak munyi kesuling, lebuh kita mansang ngagai Rumah TUHAN ti penyaga orang Israel. TUHAN deka ngasuh genap iku orang ninga munyi nyawa Iya, sereta ngasaika pengeringat Iya. Api, kabut, ujan batu, enggau ujan ti bangat deka nyadi. Orang Asiria deka balat takut lebuh sida ninga munyi nyawa TUHAN, lalu ngasaika kuasa ukum Iya. Lebuh TUHAN enda ngetu-ngetu malu sida, bala nembiak Iya deka nitihka munyi rentak palu nya ngena dedumbak enggau belikan. Allah Taala empu deka ngelaban orang Asiria. Dulu kelia siti endur udah disediaka, alai api ti mau deka nunu raja menua Asiria. Endur nya amat dalam sereta besai, penuh laban kayu api. TUHAN deka ngesuhka entali api kena Iya nyelup tugung kayu nya. Tulah meh orang ke minta diri ditulung orang Ejip! Sida manggaika diri ba kuasa bala soldadu orang Ejip - kuda, kerita perang, enggau bala soldadu. Tang sida enda manggaika diri ba TUHAN Allah Taala ti kudus ke disembah orang Israel, tauka minta Iya nulung sida. TUHAN nemu utai ti dikereja Diri! Iya ngasuh penusah ti besai nyadi. Iya ngamatka jaku emba Iya ti deka ngukum orang ke jai, sama enggau orang ke nyaga sida. Orang Ejip ukai petara. Sida semina mensia aja. Kuda sida lemi. Lebuh TUHAN gawa, bansa ti kering deka alah, lalu bansa ti lemi ti ditulung sida, deka alah. Sida deka sama dirusak. Ku TUHAN bejaku ngagai aku, “Baka ni pen pemendar pengibun bedus merakka nyawa sereta manjung, enda meh sida ulih muru singa ari jelu ti udah dibunuh iya. Baka nya meh Aku. Nadai utai ulih nagang Aku, TUHAN ti Pemadu Bekuasa, nyaga Bukit Sion. Baka burung ti terebai ari atas tansang nyaga anak iya, baka nya meh Aku TUHAN ti Pemadu Bekuasa, deka ngelindung Jerusalem, lalu nyaga iya.” Ku Allah Taala bejaku, “Orang Israel, kita udah bedosa ngelaban Aku, lalu nyakal Aku. Tang diatu, pulai meh kita baru ngagai Aku! Maya deka datai alai semua kita deka muai engkeramba ti digaga kita ari pirak enggau emas. Asiria deka dirusak lebuh maya beperang, tang ukai laban kuasa mensia. Orang Asiria deka rari ari perang nya, lalu sida ke bujang deka digaga nyadi ulun. Raja sida deka rari laban balat takut, lalu bala pemesai deka panik lalu ninggalka menira perang sida.” TUHAN udah bejaku - TUHAN ti disembah di Jerusalem sereta bempu api ti menyadi kena nunu piring dia. Jemah ila siku raja deka merintah enggau ati ti rentang, lalu bala tuai bansa deka megai perintah ngena atur ti lurus. Genap iku sida deka baka dunju ti alai orang ngenduhka diri ari ribut, enggau endur alai belalai ari kabut. Sida deka baka sungai ti rarat di menua puang, baka ayuk batu ti besai di menua ti ngalan nadai kayu. Mata enggau pending sida deka tebuka lalu sida deka nemu utai ti dipeguna orang mayuh. Sida ke enda liat ati, deka liat ati, lalu sida ke bejaku kat-kat deka bejaku enggau terang. Nadai orang deka ngumbai orang ke beli patut dibasa, tauka ngumbai orang ke jai ngembuan ati ti betul. Orang ke beli bejaku mapap, lalu iya berundingka penyai ti deka dikereja iya. Utai ti dikereja iya, enggau utai ti disebut iya, endang mechat TUHAN, lalu iya nadai kala meri pemakai ngagai orang ke lapar, tauka meri utai diirup ngagai orang ke aus. Orang ke beli endang jai, lalu iya ngereja penyai. Iya bepekat deka ngerusak orang ke seranta ngena pemula, lalu nagang sida bulih hak sida. Tang orang ke tau dibasa, ngereja utai enggau ati ti betul, lalu bediri tegap ngeringka utai ti ngena. Kita indu ke diau lantang, ti nadai pengirau, pendingka utai ti disebut aku. Kita nyangka puas ati diatu, tang ba urung maya tu taun baru tu ila, kita deka tusah ati laban kita nadai buah anggur digumpul. Kita udah nyamai diau, nadai pengirau, tang diatu kita deka getar-getar takut! Buka gari kita, lalu tanchangka gari kain ba punggung kita. Pandam dada kita kena ngayanka kita tusah ati, laban tanah umai kita ke ami, enggau kebun anggur kita udah dirusak, lalu madang duri enggau unak tumbuh ba tanah bala nembiak Aku. Nyabak meh kita ke semua rumah ti udah alai orang lantang diau, enggau nengeri ti udah richah. Indah istana deh deka ditinggalka, lalu indu nengeri nadai orang nguan. Rumah enggau kuta ti nyaga sida deka nyadi tembawai belama iya. Keledai kampung deka bejalai segau-segau dia, lalu jelu bedus deka ngulam dia. Tang Allah Taala deka sekali agi ngirumka Roh Iya ngagai kitai. Menua ti kusi deka nyadi ami baru, lalu umai deka mansutka mayuh asil. Di semua endur dalam menua nya, pengelurus enggau atur ti lurus deka dipejalaika. Menua deka ngasaika pemaik enggau pengelikun belama iya laban genap iku orang deka ngereja utai ti ngena. Bala nembiak TUHAN nadai agi pengirau, lalu rumah sida bisi pemaik enggau pengelikun. ( Tang ujan batu deka labuh ninggang utan, lalu nengeri deka runtuh.) Naka meh pengelantang semua orang ke mayuh ai kena manjah utai ti ditanam, enggau padang rumput alai keledai enggau sapi tau diau likun. Tulah meh bala munsuh kitai! Sida udah ngerumpak lalu nipu bansa diri, taja pen orang nadai udah ngerumpak tauka nipu sida. Tang peluang alai sida ngerumpak enggau nipu deka abis, lalu sida empu deka ditipu sereta dirumpak. TUHAN, kasihka kami. Kami udah manggaika pengandal ati kami ba Nuan. Jaga meh kami siang malam, lalu selamatka kami lebuh maya tusah. Lebuh Nuan beperang ngarika kami, semua bansa deka rari ninga munyi perang nyadi. Reta tengkira sida dirampas lalu ditabanka nyadi perapasan. Naka meh pemesai kuasa TUHAN! Iya merintah semua utai. Iya deka nirika atur ti lurus enggau ati ti rentang di Jerusalem lalu meri pemaik ngagai orang Israel. Iya endang seruran nyaga nembiak Iya, lalu meri sida pemintar, enggau penemu. Pesaka sida ke pemadu besai nya ati ti nangika TUHAN. Orang ke berani, ngangau minta tulung. Bala pengari bansa ke nguji ngiga pemaik, nyau bekeduie nyabak. Jalai raya balat mai penusah, datai ke orang nyau nadai agi berani nengah sida. Orang mungkir ari sempekat enggau semaya. Orang nyau nadai bebasaka pangan diri agi. Menua nadai dipumai agi sereta nadai orang nguan. Utan di menua Lebanon udah layu. Emperan Saron ti ami, nyau baka menua puang, lalu daun kayu ruruh di Basan enggau ba Bukit Karmel. Ku TUHAN bejaku ngagai mayuh bengkah bansa, “Diatu Aku deka ngereja utai siti. Aku deka ngayanka pemesai kuasa Aku. Kita ngaga pelan ti nadai guna, lalu semua utai ti dikereja kita nadai guna magang. Roh Aku deka mau baka api lalu ngerusak kita. Kita deka nyadi baka batu ti ditunu nyadi kapu, baka duri ti ditunu nyadi amau. Awakka semua orang ke semak enggau ke jauh, ninga pasal utai ti udah dikereja Aku, lalu ngaku pemesai kuasa Aku.” Orang ke bedosa ke diau di Sion getar-getar takut. Ku sida, “Ukum ti diletak TUHAN nya baka api ti menyadi belama iya. Kati kitai ulih idup natka api ti baka nya?” Kita ulih idup enti kita nyebut lalu ngereja utai ti ngena. Anang ngelakar orang ke seranta ngena kuasa kita, lalu anang makai suap. Anang begulai enggau orang ke bekira deka bebunuhka orang, tauka ngereja penyai ti bukai. Nya baru kita deka diau likun. Kita deka diau likun baka ke diau dalam kuta ti tegap. Kita deka bisi pemakai, enggau utai diirup. Kita deka, sekali agi, meda siku raja ti temegah merintah siti menua ti ngerembai kia-kia. Penakut kita ke orang pengumpul chukai ke datai ari menua bukai, enggau orang ke pematau suba, semina disimpan dalam pengingat kita aja. Kita enda agi meda orang bansa bukai sumbung, ke bejaku ngena jaku ti enda ditemu kita. Peda nengeri Sion, nengeri ti alai kitai ngintu gawai pengarap kitai. Peda nengeri Jerusalem! Iya deka nyadi endur ti likun alai diau! Iya deka nyadi baka langkau kain ti enda kala dipindahka, ti bisi tiang bantil ti nadai kala dichabut, lalu tali bantil ti nadai kala putus. TUHAN deka ngayanka mulia Iya ngagai kitai. Kitai deka diau ba tebing sungai ti besai, enggau sungai ti mit, tang kapal munsuh enda ulih belayar ba sungai nya. Nadai orang ke diau dalam menua kitai deka mutap madahka diri sakit, lalu semua dosa deka diampun magang. Datai kitu meh semua bansa! Begempuru lalu mending. Awakka dunya, enggau semua orang ke diau di dunya, datai kitu lalu mending. TUHAN ringat ngagai semua bansa, enggau ngagai semua bala soldadu sida. Iya udah ngukum lalu ngerusak sida. Bangkai sida enda dikuburka tang deka garing-garing bebau but, lalu bukit deka mirah laban darah. Mata hari, bulan enggau bintang deka pechah nyadi amau. Langit deka lesap baka surat ti digulung, lalu bintang deka labuh baka daun anggur tauka daun kana ti ruruh. TUHAN udah nyendiaka pedang Iya di serega, lalu diatu pedang nya deka mantap Edom, orang ke udah diukum ngambika sida dirusak. Pedang TUHAN deka dibalut darah enggau lemak, baka darah enggau lemak anak bedus enggau kambin ti diberi nyadika piring. TUHAN deka ngenjuk piring tu ba nengeri Bosrah. Iya deka ngasuh mayuh orang dibunuh di menua Edom. Orang mayuh deka mati baka sapi kampung, enggau sapi ti lelaki ti agi biak, lalu dunya deka mirah laban darah, sereta dibalut lemak. Tu meh maya TUHAN deka ngelepaska Sion lalu malas bala munsuh iya. Sungai di menua Edom deka bebali nyadi tar, lalu tanah dia deka bebali nyadi merirang. Semua menua nya deka diempa api baka tar. Iya deka diempa api siang malam, lalu asap deka pansut ari iya belama iya. Menua nya deka nyadi kusi belama iya, lalu nadai agi orang deka bejalai nengah menua nya. Burung puk enggau burung kak deka nguan menua nya. TUHAN deka sekali agi ngaga menua nya nyadi menua ti ngalan nadai utai tumbuh, baka lebuh maya Iya ke apin ngaga dunya kelia. Raja nadai megai perintah di menua nya, lalu bala tuai pen nadai mega agi. Duri enggau tekurak deka tumbuh ba semua istana enggau semua nengeri ti bekuta, lalu jelu pasun enggau burung puk deka nguan endur nya. Jelu babas deka bekesegau bejalai ba menua nya, lalu bala antu deka bekangauka pangan diri. Antu malam deka datai kia ngiga endur alai belelak. Burung puk deka ngaga tansang sida dia, betelu, meram telu, lalu ngintu anak sida dia. Burung ti bepakaika bangkai, deka begelumu dia betangkan-tangkan. Giga dalam bup TUHAN nama semua utai ti idup ti udah ditulis, lalu bacha utai ti disebut dia. Nadai siku utai ti idup nya deka lenyau tauka nadai sulu, laban TUHAN Empu udah ngasuh utai nya nyadi baka nya. TUHAN Empu deka ngasuh sida diau begulai. TUHAN deka magi menua nya ngagai sida, lalu meri ungkup ngagai sida siku-siku. Sida deka diau di menua nya belama iya, lalu menua nya deka diempu sida belama iya. Menua puang deka rami gaga, lalu bungai deka tumbuh di menua ti kusi. Menua puang deka belagu lalu manjung gaga ati. Menua puang nya deka manah dipeda baka Bukit Lebanon lalu deka nyadi ami baka padang ti di Karmel enggau di Saron. Genap iku orang deka meda mulia TUHAN, meda pemesai enggau kuasa Iya. Keringka jari ti lelak enggau patung ti lemi sereta begetar. Sebut ngagai semua orang ke lemi semengat, “Kita enda tau enda kering, lalu enda tau takut! Allah Taala deka datai ngelepaska kita, lalu ngukum bala munsuh kita.” Orang ke buta ulih meda, lalu orang ke bengal ulih ninga. Orang ke enda ulih bejalai, deka merejuk lalu betanda, lalu orang ke bisu, deka manjung gaga ati. Ai sungai deka rarat nengah menua puang. Pasir ti angat deka nyadi danau, lalu tanah ti rangkai deka penuh laban mata ai. Ba endur ti udah alai jelu pasun diau, purun enggau papairus deka tumbuh. Jalai raya ti dikumbai “Jalai Raya Ngagai Pengudus,” deka digaga dia. Nadai orang ke bedosa deka bejalai nengah jalai nya. Nadai orang ke beli deka nesatka orang ke niti jalai nya. Singa nadai ba endur nya. Nadai siku jelu ti mangah deka nengah jalai nya. Orang ke udah dilepaska TUHAN deka pulai baru ngagai rumah diri nengah jalai nya. Sida deka datai di Jerusalem enggau ati ti gaga belagu sereta manjung gaga ati. Sida deka lantang belama iya, lepas belama iya ari ati ti sinu enggau ati ti tusah. Dalam taun ti keempat belas Hesekiah nyadi raja menua Judah, Senakerip, raja menua Asiria, nyerang lalu ngalahka mayuh bengkah nengeri ti bekuta di menua Judah. Udah nya iya ngasuh tuai pemesai iya mansang ari Lakis ngagai Jerusalem, mai bala soldadu, mejalka Raja Hesekiah nunduk. Pemesai nya bediri ba endur alai orang ke ngaga kain, ba tebing parit ti mai ai ari letung ti di atas. Tiga iku orang Judah pansut betemu enggau iya. Sida tiga nya pemesai ke ngemataka istana, Eliakim anak Hilkiah; kerani kot, Sebna; enggau Joah anak Asap ti nyadi tukang tulis raja. Pemesai orang Asiria nya madahka raja nya keran deka nemu kebuah Raja Hesekiah kempang ati baka nya. Ku pemesai orang Asiria nya bejaku, “Kati kita ngumbai leka jaku ulih nganti pengelandik enggau pengering beperang? Dalam runding kita, sapa deka nulung kita angkat ngelaban Asiria? Kita ngarapka Ejip nulung kita, baka orang ke betungkat ngena buluh ti patah, ti deka ngachuk jari iya. Nya meh gaya raja menua Ejip lebuh orang ngarapka iya.” Ku pemesai orang Asiria nya nampung jaku iya, “Tauka, kita madahka diri deka ngarapka TUHAN Allah Taala kita? Indah Hesekiah empu deh udah ngerusak berapa buah rumah sembiang TUHAN enggau alta lebuh iya ngasuh orang Judah enggau orang di Jerusalem nyembah TUHAN ba siti alta aja. Aku deka betawar enggau kita dalam nama raja. Aku deka meri kita dua ribu iku kuda, enti kita bisi tetemuka orang ke ngemayuh nya nepan sida. Indah pemesai Asiria ke pemadu baruh pangkat deh enda ulih dilaban kita. Nya alai nama kebuah kita ngarapka orang Ejip deka ngirumka kerita perang enggau bala soldadu ti nepan kuda ngagai kita? Kati kita ngumbai TUHAN nadai nulung aku nyerang lalu ngerusak menua kita? TUHAN Empu ke ngasuh aku nyerang lalu ngerusak menua kita.” Udah nya Eliakim, Sebna, enggau Joah lalu bejaku enggau pemesai nya, “Bejaku ngena jaku bansa Aram enggau kami. Kami meretika jaku nya. Anang bejaku ngena jaku Hebrew. Semua orang ke ba dinding kuta mending magang.” Ku pemesai nya nyaut, “Kati kita ngumbai raja ngasuh aku bejaku semina enggau kita sereta enggau raja kita aja? Ukai, aku mega bejaku enggau orang mayuh ke duduk ba atas dinding kuta, ti deka makai tai lalu ngirup ai kemi diri, baka kita empu ila.” Udah nya pemesai nya bediri, lalu bejaku enggau nyawa ti inggar ngena jaku Hebrew, “Pendingka utai ti dipadahka raja menua Asiria ngagai kita. Iya meri kita jaku tangkan, enda ngasuh kita nejuka Hesekiah ngelakar kita. Hesekiah enda ulih ngelepaska kita. Lalu anang nejuka iya mujuk kita ngarapka TUHAN. Anang ngumbai TUHAN deka ngelepaska kita, lalu nagang soldadu orang Asiria ngalahka nengeri kita. Anang mendingka Hesekiah! Raja besai menua Asiria ngasuh kita pansut ari nengeri, lalu nunduk. Semua kita deka dikemendarka makai buah anggur enggau buah ara kita empu, lalu ngirup ai ari telaga kita empu, nyentuk ngagai maya raja ngentapka kita ba siti menua ti sebaka enggau menua kita empu, ti bisi kebun anggur alai kita bulih wain, lalu bisi gandum kena kita begagaka roti. Anang nejuka Hesekiah ngelakar kita ngasuh kita ngumbai TUHAN deka ngelepaska kita. Kati petara orang bansa bukai bisi udah kala ngelepaska bansa sida ari jari raja menua Asiria? Dini alai bala petara nya diatu, petara orang Hamat enggau Arpat? Dini alai bala petara orang Sepabaim? Kati orang bisi udah ngelepaska Samaria? Kemaya bala petara semua menua nya udah bisi kala ngelepaska menua sida ari jari raja? Nya alai nama kebuah kita ngumbai TUHAN ulih ngelepaska Jerusalem?” Nitihka atur Raja Hesekiah, orang mayuh lalu enda bemunyi. Sida nadai bejaku seleka. Udah nya Eliakim, Sebna, enggau Joah lalu nyarikka gari diri, lalu mansang madahka ngagai raja utai ti udah disebut pemesai orang Asiria nya. Lebuh Raja Hesekiah ninga utai ti dipadahka sida tiga, iya lalu nyarikka gari diri, ngerasukka kain guni, lalu mansang ngagai Rumah Sembiang. Iya lalu ngasuh Eliakim, pemesai ke ngemataka istana, Sebna, ti nyadi kerani kot, enggau bala imam ke tuai agi umur betemu enggau Isaiah anak Amos. Sida tu mega begari ngena kain guni. Tu pesan ti diasuh Raja Hesekiah padahka sida ngagai Isaiah: “Sehari tu kitai merinsa. Kitai benung diukum lalu dipechat. Kitai tu baka indu ke radai deka beranak, tang kelalu lemi beranak. Raja besai menua Asiria udah ngirumka tuai pemesai iya ngasuh iya mechat Allah Taala ti idup. Awakka TUHAN Allah Taala nuan ninga jaku pechat nya, lalu ngukum sida ke mechat Iya. Nya alai, besampi ngagai Allah Taala ke bala kitai ti agi idup.” Lebuh Isaiah nerima pesan nya ari Raja Hesekiah, iya lalu ngirumka saut iya: “ TUHAN enda ngasuh nuan nejuka orang Asiria ngemba nuan ngumbai TUHAN enda ulih ngelepaska nuan. TUHAN deka ngasuh raja menua Asiria nya ninga berita ngapa, ti deka ngujungka iya pulai ngagai menua iya empu, lalu TUHAN deka ngasuh orang munuh iya dia.” Lebuh pemesai orang Asiria nya ninga raja udah angkat ari Lakis, benung nyerang nengeri Libnah ti enda jauh ari Lakis, iya lalu mansang ngagai nengeri Libnah, deka betanya ngagai raja. Berita lalu bisi diterima bala orang Asiria ti madahka soldadu orang Ejip, diuluka Raja Tirhakah menua Etiopia, benung mansang nyerang sida. Lebuh raja menua Asiria ninga nya, iya lalu ngirumka siti surat ngagai Raja Hesekiah menua Judah, munyi tu: “Petara ti dikarapka nuan udah madahka nuan enda alah laban aku. Tang anang nejuka diri ditipu nya. Nuan udah ninga pasal utai ti dikereja raja menua Asiria ngagai semua menua ti deka dirusak iya. Kati nuan ngumbai diri ulih nyeliahka nya? Aki ini aku udah ngerusak nengeri Gosan, Haran, enggau Resep, lalu munuh orang Beteden ti diau di Telasar, lalu nadai siku ari bala petara sida udah ulih ngelepaska sida. Dini alai raja nengeri Hamat, Arpat, Sepabaim, Hena enggau Iwah diatu?” Raja Hesekiah nyengkau surat nya ari bala seruan nya, lalu macha. Udah nya iya lalu mansang ngagai Rumah Sembiang, ngengkahka surat nya dia di mua TUHAN, lalu besampi “ TUHAN ti Pemadu Bekuasa, ti Allah Taala ke disembah orang Israel, ke duduk ari atas melikat cherub ti besayap, semina Nuan siku aja ti Allah Taala, ke merintah semua bansa di dunya tu. Nuan udah ngaga dunya enggau langit. Nya alai, TUHAN, dingaka kami lalu peda utai ti nyadi ba kami. Dingaka Senakerip mechat Nuan, Allah Taala ti idup. Semua kami nemu, TUHAN, mayuh raja menua Asiria udah ngerusak mayuh bengkah bansa datai ke semua menua sida nya nyau nadai agi orang nguan. Sida udah nunu bala petara bansa bukai nya - ti sigi ukai petara, tang semina engkeramba aja ti digaga ari kayu enggau ari batu, ulih jari mensia. Nya alai, TUHAN Allah Taala kami, lepaska kami ari orang Asiria, ngambika semua bansa di dunya tu nemu Nuan siku aja ti Allah Taala.” Udah nya Isaiah ngirumka pesan ngagai Raja Hesekiah, madahka saut TUHAN ngagai sampi iya. Ku TUHAN, “Nengeri Jerusalem ketawaka nuan, Senakerip, lalu ngeleseka nuan. Dalam penemu nuan, sapa ti udah dipechat sereta dikeleseka nuan? Nuan udah enda bebasaka Aku, Allah Taala ke disembah orang Israel ti kudus. Nuan udah ngasuh bala seruan nuan temegah bejaku ngagai Aku, madahka nuan udah ngalahka bukit ti pemadu tinggi di Lebanon ngena semua kerita perang nuan. Nuan udah temegah madahka diri udah nebang kayu sidar ti pemadu tinggi, enggau kayu saipris ti pemadu manah, lalu udah datai ba endur ti pemadu jauh dalam utan. Nuan udah temegah madahka diri udah numbak telaga lalu ngirup ai di menua orang, lalu kaki bala soldadu nuan udah ngelunjak Sungai Nile datai ke sungai nya rangkai. “Kati nuan nadai kala ninga Aku endang lama udah merambu semua utai tu? Diatu Aku udah bejalaika pelan nya. Aku udah meri ngagai nuan kuasa kena nuan ngeruntuhka nengeri ti bekuta lalu ngaga sida nyadi tugung batu. Orang ke diau dia endang nadai daya agi. Sida takut sereta temati-kutu. Sida baka rumput ti ba padang, tauka baka rumput ti tumbuh ba perabung rumah, ti dipuputka ribut ti angat ari timur. “Tang Aku nemu semua utai pasal nuan, utai ti dikereja nuan, enggau tunga pejalai nuan. Aku nemu pemalat nuan ringat ngagai Aku. Aku udah nerima berita pasal pemalat nuan ringat, enggau pasal penyumbung nuan, nya alai diatu Aku deka ngaitka ginti ba idung nuan, enggau repik besi ba nyawa nuan, lalu mai nuan pulai nengah jalai ti ditengah nuan mansang.” Udah nya Isaiah lalu bejaku enggau Raja Hesekiah, “Tu tanda utai ti deka nyadi. Taun tu, enggau taun baru tu ila, kita semina deka makai gandum ti tumbuh-diri, tang dalam taun ti nangkanka nya, kita ulih nanam gandum, lalu ngetau iya, enggau nanam anggur, lalu makai buah iya. Sida ke agi idup di menua Judah deka diau lantang senang baka utai ti ditanam, ti ngunjamka urat ke dalam tanah, lalu bebuah. Orang agi bisi idup di Jerusalem enggau ba Bukit Sion, laban TUHAN ti Pemadu Bekuasa udah mutuska runding deka ngasuh utai nya nyadi. “Tu utai ti udah disebut TUHAN pasal raja menua Asiria: ‘Iya enda ulih tama ngagai nengeri tu, tauka nimbakka laja ngelaban nengeri tu. Nadai siku soldadu ke mai terabai, deka datai semak nengeri tu. Lalu nadai kuta tanah deka digaga kena ngelulung nengeri tu. Iya deka pulai nengah jalai ti ditengah iya mansang, tang iya enda ulih tama ngagai nengeri tu. Aku ti TUHAN, udah bejaku. Aku deka nyaga nengeri tu, ketegal nama Aku, enggau ketegal semaya ti udah digaga Aku ngagai nembiak Aku David.’ ” Siku melikat TUHAN mansang ngagai kem orang Asiria, lalu munuh 185,000 bala soldadu sida. Tumu pagi hari siti, semua sida nyau betegaring mati! Udah nya Senakerip raja menua Asiria nyurutka diri, lalu pulai ngagai Nineweh. Nyadi sekali, lebuh iya benung besembiang dalam rumah sembiang petara iya ke benama Nisrok, dua iku anak iya, Adramelek seduai Sareser, munuh iya ngena pedang seduai iya empu, lalu ngerarika diri ngagai menua Ararat. Siku ari anak lelaki iya ti bukai, ke benama Esar-hadon, lalu nganti iya nyadi raja. Ba urung maya nya, Raja Hesekiah sakit lalu nyau deka mati. Nabi Isaiah anak Amos mansang ngabas iya, lalu madahka ngagai iya, “ TUHAN bepesan ngasuh nuan ngemas semua pekara nuan, laban nuan enda ulih gerai. Nuan deka mati.” Hesekiah nguingka mua diri ngagai dinding lalu besampi: “ TUHAN, ingatka aku ti udah tetap ati sereta taluk betuaika Nuan, lalu seruran nguji ngereja utai ti dikedekaka Nuan.” Iya lalu belabuh nyabak balat amat. Udah nya TUHAN ngasuh Isaiah pulai baru ngagai Hesekiah, lalu nyebut ngagai iya jaku TUHAN munyi tu, “Aku, TUHAN Allah Taala aki nuan David, udah ninga sampi nuan, lalu udah meda ai mata nuan. Aku deka ngelakka nuan idup lima belas taun da agi. Aku deka ngelepaska nuan, enggau nengeri Jerusalem ari jari raja orang Asiria, lalu Aku deka majak nyaga nengeri tu.” Ku Isaiah nyaut, “ TUHAN deka meri ngagai nuan siti tanda ti nunjukka Iya deka ngamatka semaya Iya. Ba tangga ti digaga Raja Ahas, TUHAN deka ngasuh ayuk nikal sepuluh iti tangkal.” Ayuk nya lalu nikal sepuluh iti tangkal. Lebuh Hesekiah udah gerai ari penyakit iya, iya lalu nuliska lagu puji tu: “Aku ngumbai diri deka mansang ngagai dunya pemati, lalu enda ulih idup agi, lebuh aku agi benung orang. Ku aku bepikir, dalam dunya orang ke idup tu aku enda agi meda TUHAN tauka meda orang ke idup. Nyawa aku udah ditetak lalu abis, baka langkau kain ti direrak, baka kain ti ditetak ari tendai. Aku ngumbai Allah Taala deka ngabiska nyawa aku. Aku nyabak semalam-malam laban pedis, Tulang aku asai ti dipatahka singa. Aku ngumbai Allah Taala ngabiska nyawa aku. Nyawa aku nyau mit sereta rapas, lalu aku bedemuh munyi burung achang. Mata aku nyau lelak engkadah ke langit. TUHAN, lepaska aku ari semua penusah tu. Baka ni ku jalai aku bejaku agi? TUHAN Empu ti udah ngereja utai tu. Ati aku balat amat pedis, lalu aku enda ulih tinduk. TUHAN, aku deka idupka Nuan, ke Nuan siku aja. Geraika aku, lalu awakka aku idup. Ati aku ti balat pedis deka bebali nyadi pemaik. Nuan ngelepaska aku ari semua utai ti tau nganu nyawa. Nuan ngampun semua dosa aku. Nadai orang di dunya pemati ulih muji Nuan. Orang ke mati enda ulih manggaika diri ba penetap ati Nuan. Semina orang ke idup aja ulih muji Nuan, baka aku ke muji Nuan diatu. Apai indai madahka ngagai anak sida pasal penetap ati Nuan. TUHAN, Nuan udah ngeraika aku. Kami deka nebah belikan, lalu belagu muji Nuan, Belagu muji Nuan dalam Rumah Sembiang seumur idup. Nyadi Isaiah udah bejaku, “Awakka sida nutuk buah ara, lalu nampalka nya ba pisa nya, ngambika iya gerai.” Hesekiah udah mega nyebut, “Nama tanda ti nunjukka aku enda tau enda mansang ngagai rumah TUHAN?” Ba urung maya nya raja menua Babilon, Merodak Baladan, anak Beladan, bisi ninga berita pasal Raja Hesekiah ke sakit. Nya alai iya ngirumka sepuchuk surat enggau siti pemeri ngagai Hesekiah. Hesekiah ngelaluka penatai bala seruan nya, lalu mandangka pengaya iya ngagai sida - pirak enggau emas iya, rempah enggau minyak wangi, enggau semua pekekas ti dikena iya beperang. Nadai utai dalam bilik setor iya tauka di semua endur dalam menua ti diperintah iya ti enda dipandangka iya ngagai sida. Udah nya nabi Isaiah mansang ngagai Raja Hesekiah, lalu nanya, “Ari ni penatai bala seruan tu, lalu nama utai ti disebut sida ngagai nuan?” Ku Hesekiah nyaut, “Sida datai ari menua ti jauh, ari menua Babilon.” “Nama utai ti dipeda sida dalam istana?” “Sida meda semua utai. Nadai utai ti dalam bilik setor ti enda dipandangka aku ngagai sida.” Ku Isaiah bejaku enggau Hesekiah, “ TUHAN ti Pemadu Bekuasa madah, maya deka datai alai semua utai dalam istana nuan, semua utai ti udah disimpan bala aki ini nuan nyentuk ngagai sehari tu, deka ditabanka ngagai menua Babilon. Nadai utai agi tinggal. Sekeda orang ari peturun nuan empu deka ditabanka, lalu dipeliri, lalu deka diasuh bekereja dalam istana raja menua Babilon.” Raja Hesekiah lalu ngumbai jaku nya nunjukka pemaik enggau pengelikun deka meruan sepemanjai umur iya, nya alai iya nyaut, “Manah amat pesan TUHAN ti ditusui nuan ngagai aku.” “Perindang bala nembiak Aku,” ku Allah Taala kitai bejaku. “Perindang sida! Peransang orang Jerusalem. Padahka ngagai sida, sida udah chukup lama natka diri merinsa, lalu penyalah sida diatu udah diampun. Aku udah ngukum sida enggau chukup ketegal semua dosa sida.” Ku munyi nyawa ngangau, “Sediaka jalai di menua puang ke TUHAN! Gaga jalai di menua puang ke Allah Taala kitai! Tambun semua lebak. Tumpurka semua munggu enggau bukit. Rataka semua menua ti belenggak-lenggung. Nya baru mulia TUHAN deka dipandangka, lalu semua mensia deka meda mulia nya, laban TUHAN udah bejaku.” Ku munyi nyawa ngangau, “Padahka!” Aku lalu nanya, “Nama utai ti deka dipadahka aku deh?” “Padahka semua mensia baka rumput. Sida nadai lebih tan agi ari bungai babas. Rumput rangkai lalu bungai layu lebuh TUHAN ngasuh ribut muput ngagai sida. Mensia nadai lebih tan agi ari rumput. Sigi amat, rumput rangkai, lalu bungai layu, tang jaku Allah Taala kitai, tan belama iya.” Jerusalem, alai nuan niki ngagai sigi bukit ti tinggi lalu padahka berita manah! Sion, alai nuan ngangau enggau nyawa ti inggar. Padahka berita manah! Anang takut bejaku. Padahka ngagai semua nengeri di menua Judah pasal Allah Taala ti deka datai! TUHAN Allah Taala deka datai lalu merintah ngena kuasa, mai upah ke bala nembiak Iya. Iya deka ngibun nembiak Iya baka pengibun bedus. Iya deka ngempuruka sida lalu ngerendut sida, lalu mai sida, lalu begadai-gadai nguluka indai sida. Kati orang ulih nyukat pemayuh ai dalam tasik ngena tapa jari sida? Tauka nyengkal pemesai rampa langit? Kati orang ulih nyimpan semua tanah di dunya tu dalam mangkuk tauka nimbang bukit enggau munggu ngena dachin? Kati ulih orang madahka ngagai TUHAN utai ti patut dikereja Iya? Sapa ulih ngajar Iya tauka meri Iya jaku lalau? Ngagai sapa Allah Taala patut betanya enti Iya deka nemu lalu mereti sereta belajarka utai ti patut dikereja Iya? Ba TUHAN, semua bansa baka setitik ai ti dalam beledi, baka igi amau ti ditimbang ngena dachin; lalu pulau ngelempung igi amau ti alus. Semua jelu ti dalam utan di Lebanon enda chukup kena ngaga piring tunu, lalu kayu dalam utan nya kelalu mimit kena nungkunka api. Semua bansa endang nadai reti ba TUHAN. Ngagai sapa kita mandingka Allah Taala? Tauka, baka ni ku kita madahka gaya gamal Iya? Iya ukai baka engkeramba ti digaga bala tukang, ti disampak sida enggau emas lalu didudukka ba atas penuduk ti digaga ari pirak. Orang ke enda tebelika pirak tauka emas, milih kayu ti enda nemu buruk. Iya ngiga tukang ke landik ngaga anak patung ti enda nemu engkebut. Kati kita enda nemu? Kati orang nadai udah madahka ngagai kita dulu kelia? Kati kita nadai kala ninga pasal penumbuh dunya? Iya duduk atas kumbang dunya, lalu orang ke diau di dunya nyau baka buntak; Iya mintarka langit baka kain tirai, lalu nganchau langit baka langkau kain ti alai diau; Iya ngalahka bala raja, lalu muai kuasa sida. Sida baka utai ti tumbuh, ti baru udah ditanam, lalu apin tentu bisi urat. Lebuh TUHAN nyepu sida, sida layu, lalu ribut biaubalai ngebuka sida baka rumput ti rangkai. Ku TUHAN ti kudus bejaku: ngagai sapa kita deka mandingka Aku? Sapa sebaka enggau Aku? Engkadah ke langit, lalu peda! Sapa ngaga bintang ti dipeda nuan nya? Iya ke mai sida pansut baka bala soldadu, Iya nemu pemayuh sida lalu Iya ngangauka nama sida siku-siku, lalu laban kuasa Iya amat besai, nadai sigi ari sida nya lenyau! Nya alai, nama kebuah kita mutap, Israel ngumbai TUHAN enda nemu penusah kita tauka enda ibuhka kita ke merinsa natka atur ti enda lurus? Kati kita enda nemu? Kati kita nadai kala ninga? TUHAN nya meh Allah Taala ti meruan belama iya, ke ngaga semua dunya, ti enda nemu lembut tulang tauka lelak. Nadai orang ulih meretika runding Iya. Iya meri pengering ngagai orang ke lemi lalu ngeringka sida ke nadai daya agi. Indah sida ke biak deh nemu lemi, lalu orang ke biak nemu lelak lalu rebah. Tang orang ke ngarapka penyaup ari TUHAN, deka dikeringka baru. Sida deka ngindang tinggi baka menaul. Sida deka belanda lalu enda nemu lelak. Sida deka bejalai lalu enda nemu lembut tulang. Ku Allah Taala bejaku, “Anang ragak, lalu pendingka Aku, kita menua ti ba tebing tasik! Awakka kita sedia mantaika pekara kita dalam kot. Kita deka diberi peluang bejaku. Aram kitai begempuru lalu ngatur sapa ke ngena. “Sapa orang nya ti udah mai siku pemenang ari timur lalu ngasuh iya menang di sebarang endur iya bejalai? Sapa ngasuh iya ngalahka bala raja enggau mayuh bengkah bansa? Pedang iya mantap sida baka ke mantap amau. Laja iya mambarka sida baka rumput ti rangkai ti dikebuka ribut. Iya begagaika sida, lalu majakka pejalai diri enggau likun, bejalai laju datai ke kaki iya nyau deka enda terengkah ba tanah! Sapa ke ngasuh utai tu nyadi? Sapa ke ngatur utai nyadi dulu kelia? Aku ti TUHAN endang bisi dia kenyau ari pun, lalu Aku ti TUHAN, deka meruan dia ba pengujung dunya ila. “Orang ke diau di menua ti ba tebing tasik udah meda utai ti udah dikereja Aku. Sida getar-getar takut. Nya alai semua sida begempuru lalu datai. Orang ke landik bekereja, nulung sereta meransang pangan diri. Ku tukang kayu bejaku muji tukang emas, ‘Manah amat pengawa nuan!’ Orang ke nempa emas ngena tukul meransang iya ke bejantilka emas ti ditempa nyadi engkeramba. Ku sida, ‘Manah amat jantil tu. Sida lalu mantangka engkeramba nya ngena paku lawang ba endur alai sida ke patut ngengkahka iya. “Tang kita orang Israel ti nembiak Aku, udah dipilih Aku. Kita tu peturun Abraham, ti pangan Aku. Aku udah mai kita ari tisi dunya. Aku udah ngangauka kita ari tisi ti pemadu jauh lalu ku Aku bejaku enggau kita, ‘Kita tu nembiak Aku.’ Aku enda nulak kita, tang udah milih kita. Anang takut, Aku bisi enggau kita! Aku tu Allah Taala kita. Anang nejuka utai ngenakutka kita! Aku deka ngasuh kita kering lalu nulung kita. Aku deka nyaga kita lalu ngelepaska kita. “Orang ke ringat ngagai kita deka malu alah. Orang ke ngelaban kita deka mati, lalu deka lesap ari dunya tu. Aku tu TUHAN Allah Taala kita. Aku ngasuh kita kering lalu madahka ngagai kita, ‘Anang takut. Aku deka nulung kita.’ ” Ku TUHAN bejaku, “Israel, taja pen kita bansa ti mit sereta lemi, tang kita enda tau takut. Aku deka nulung kita. Aku, Allah Taala ke disembah orang Israel ti kudus, deka nebus kita. Aku deka ngaga kita baka papan alai ngindik gandum, bisi gigi ti agi baru sereta tajam. Kita deka ngindik bukit lalu ngerusak sida. Munggu deka pechah nyadi amau. Kita deka ngebuka sida ngagai angin. Ribut deka nabanka sida, lalu sida deka ngachir laban kabut. Nya baru kita deka lantang, laban Aku tu Allah Taala kita. Kita deka muji Aku, Allah Taala ke disembah orang Israel ti kudus. “Lebuh bala nembiak Aku beguna lalu begigaka ai, lebuh batang rekung sida nyau rangkai laban aus, nya baru Aku, ti TUHAN, deka nyaut sampi sida. Aku, ti Allah Taala ke disembah orang Israel, enda sekali-kali ninggalka sida. Aku deka ngasuh ai sungai rarat ba bukit ti nadai tumbuh kayu lalu mata ai rarat ba lebak. Aku deka ngubah menua puang nyadi letung lalu tanah ti rangkai nyadi mata ai. Aku deka ngasuh kayu sidar, kayu akasia, kayu matil enggau kayu kana tumbuh di menua puang. Utan pain, Juniper enggau saipris deka tumbuh di menua puang. Orang deka meda nya, lalu sida deka nemu Aku ti TUHAN, udah ngereja utai nya. Sida deka nemu Allah Taala ke disembah orang Israel ti kudus udah ngasuh utai nya nyadi.” TUHAN ti Raja orang Israel, nyebut tu: “Kita ti petara mayuh bengkah bansa, bantaika pekara kita. Pansutka penemu ti pemadu dalam ari runding kita! Datai kitu lalu padahka utai ti deka nyadi, ngambika kami ngelala utai nya lebuh iya nyadi. Terangka dalam kot utai ti udah nyadi dulu menya, lalu padahka ngagai kami, reti utai nya. Padahka ngagai kami nama utai ti deka nyadi jemah ila, nya baru kami deka nemu kita tu endang petara! Kereja utai ti manah, tauka asuh penusah ti besai nyadi. Iri kami enggau ati ti takut sereta nangi! Kita, enggau semua utai ti dikereja kita, sigi nadai reti magang. Orang ke nyembah kita endang jai! “Aku udah milih siku lelaki ti diau di timur. Aku deka mai iya nyerang ari utara. Iya ngindik bala pemerintah baka ke ngelunjak tanah luchak, baka tukang periuk ti ngelunjak tanah liat. Ni bagi kita ke udah madahka pasal utai tu deka nyadi, ngambika kami ulih ngumbai kita ngena? Nadai siku kita nyebut seleka jaku pasal utai nya. Nadai orang ninga kita bejaku! Aku ti TUHAN nya ti terubah madahka berita tu ngagai Sion. Aku ngasuh siku seruan mansang lalu nyebut ngagai Jerusalem, ‘Bala kita deka datai, pulai ngagai menua diri empu!’ Lebuh Aku merening ngagai bala petara, nadai siku sida bejaku. Nadai siku sida ulih nyaut tanya ti dibantaika Aku. Semua petara nya endang nadai guna magang. Sida endang enda ulih ngereja utai. Bala petara tu lemi sereta nadai kuasa.” Ku TUHAN bejaku, “Tu nembiak Aku, ke diberi Aku pengering, ti udah dipilih Aku, sereta dikerinduka Aku. Aku udah ngisi iya enggau Roh Aku, lalu iya deka mai atur ti lurus ngagai genap bengkah bansa. Iya enda manjung tauka merakka nyawa iya tauka bejaku enggau nyawa ti inggar ba sebelah jalai raya. Iya enggai matahka buluh ti melepi tauka madamka lampu ti kelap-kelap. Iya tetap deka mai atur ti lurus ngagai semua mensia. Iya deka mengkang andal ati sereta enda lemi semengat. Iya deka numbuhka atur ti lurus di dunya tu. Menua ti ba tebing tasik deka gagit ati nganti ajar ari iya.” TUHAN Allah Taala ngaga lalu mintarka langit. Iya nempa dunya, enggau semua utai ti idup dia. Iya meri pengidup enggau seput ngagai semua mensia di dunya tu. Lalu diatu TUHAN Allah Taala bejaku ngagai nembiak Iya, “Aku ti TUHAN udah ngangauka nuan lalu meri nuan kuasa nentuka atur ti lurus dipejalaika di dunya. Ulih nuan, Aku deka ngaga siti sempekat enggau semua mensia. Ulih nuan, Aku deka mai penampak ngagai semua bansa. Nuan deka menchelakka mata orang ke buta lalu ngelepaska orang ari rumah jil. “Semina Aku aja ti TUHAN Allah Taala nuan. Nadai petara bukai tau enggau bempu mulia Aku. Aku enggai nejuka engkeramba bempu puji ti patut diberi ngagai Aku. Utai ti udah dipadahka Aku suba, diatu udah dikamatka. Diatu Aku deka madahka utai ti baru ngagai kita sebedau utai nya nyadi.” Nyanyi lagu ti baru ke TUHAN. Belagu muji Iya, semua dunya! Puji meh Iya, kita ke belayar di tasik. Puji meh Iya, semua utai ti idup di tasik! Belagu meh kita menua ti ba tebing tasik, enggau semua orang ke diau dia! Awakka menua puang enggau nengeri ti dalam menua puang, muji Allah Taala. Awakka orang di Kedar muji Iya! Awakka sida ke diau di nengeri Sela manjung enggau ati ti gaga ari tuchung bukit! Awakka orang ke diau di menua ti ba tebing tasik meri puji enggau mulia ngagai TUHAN! TUHAN mansang beperang baka soldadu. Iya udah sedia, lalu gagit ati deka beperang. Iya manjung panjung perang. Iya ngayanka kuasa Iya ngelaban munsuh Iya. Ku Allah Taala bejaku, “Aku lama udah enda bemunyi. Aku nadai nyaut bala nembiak Aku. Tang diatu maya udah datai alai Aku deka ngereja utai. Aku rauh-rauh munyi indu ke radai deka beranak. Aku deka ngerusak munggu enggau bukit lalu ngerangkaika rumput enggau kayu. Aku deka ngubah lebak sungai nyadi menua puang lalu ngerangkaika letung. “Aku deka nguluka bala nembiak Aku ke buta bejalai nengah jalai raya ti nadai kala ditengah sida. Aku deka ngubah pemetang sida nyadi penampak lalu ngerataka menua ti belenggak-lenggung di mua sida. Tu meh semaya Aku, lalu Aku deka ngamatka semua semaya nya. Semua orang ke arapka engkeramba, ke ngumbai anak patung petara sida, deka dikemaruhka sereta dipechat.” Ku TUHAN bejaku, “Anang enda mending, kita orang ke bengal! Peda enggau manah, kita ke buta! Kati orang bisi lebih agi buta ari nembiak Aku, bengal agi ari seruan ti udah dikirumka Aku? Israel, kita udah meda mayuh macham utai, tang nama reti utai nya ba kita? Kita bisi pending kena ninga, tang nama utai ti udah didinga kita?” TUHAN gaga ati deka ngemesaika adat Iya lalu ngemuliaka adat nya ketegal pengelurus Iya. Tang diatu bala nembiak Iya udah kena rumpak. Sida iya ditutup dalam bilik ti nadai jenila lalu dilalaika dalam rumah jil. Reta tengkira sida udah dichuri sereta dirumpak, lalu nadai orang datai ngelepaska sida. Kati kita deka mendingka tu? Belabuh ari diatu, kati kita amat deka mending enggau bendar? Sapa ti udah nyerahka orang Israel ngagai bala perumpak? TUHAN Empu! Laban kitai udah bedosa ngelaban Iya! Kitai enggai idup nitihka jalai Iya tauka ngasika ajar ti diberi Iya ngagai kitai. Nya alai Iya ngasuh kitai ngasaika pengeringat Iya lalu natka pemerinsa laban perang. Pengeringat Iya baka api ti nunu semua menua Israel, tang kitai nadai nemu utai ti nyadi. Kitai nadai belajar ari utai nya. Israel, TUHAN udah nempa kita, lalu ku Iya bejaku, “Anang takut. Aku deka ngelepaska kita. Aku udah ngangauka nama kita siku-siku laban kita endang enggi Aku. Lebuh kita bejalai nengah ai ti dalam, Aku deka meruan enggau kita. Penusah ti nuntung kita enda ulih ngalahka kita. Lebuh kita bejalai ngerenchah api, kita enda betu. Penguji ti besai ti deka datai, enda ulih ngemediska kita, laban Aku tu TUHAN Allah Taala kita, Allah Taala ke disembah orang Israel ti kudus, ke ngelepaska kita. Aku deka meri Ejip, Etiopia enggau Seba kena Aku nebus kita. Aku deka ngelengkaka mayuh bansa bukai laban Aku deka ngelepaska kita, laban Aku sayauka kita enggau laban Aku rinduka kita lalu meri kita basa. Anang takut. Aku bisi enggau kita! “Ari timur, enggau ari barat ti pemadu jauh Aku deka mai bala nembiak nuan pulai ngagai menua sida empu. Aku deka ngasuh utara ngelakka sida mupuk lalu nagang selatan ngetanka sida. Awakka bala nembiak Aku pulai ari menua ti jauh, ari semua endur di serata dunya. Sida endang nembiak Aku, lalu Aku udah ngaga nempa sida kena ngemuliaka Aku.” Ku Allah Taala bejaku, “Saman bala nembiak Aku ngagai kot. Sida bisi mata, tang sida buta. Sida bisi pending, tang sida bengal! Saman semua bansa datai ngagai pechara nya. Ni bagi petara sida ke ulih madahka utai ti deka nyadi jemah ila? Ni bagi petara nya ti udah madahka utai ti benung nyadi diatu? Awakka bala petara nya mai saksi sida kena sida mandangka diri ngereja utai ti ngena, kena sida besaksika pemendar jaku sida. “Orang Israel, kita tu meh saksi Aku. Aku milih kita nyadika nembiak Aku, ngambika kita ngelala Aku, lalu arapka Aku sereta nemu Aku endang Allah Taala ti siku aja. Kita nadai petara bukai tang semina Aku aja, nemuka menya tauka jemah ila. “Semina Aku siku aja ti TUHAN ke ulih ngelepaska kita. Aku udah madahka utai ti deka nyadi, lalu udah nya Aku datai nulung kita. Nadai petara orang bansa bukai bisi udah kala ngereja utai baka nya. Kita nyadika saksi Aku. Aku endang Allah Taala belama iya. Nadai orang ulih ngerarika diri ari kuasa Aku. Nadai orang ulih ngubah utai ti dikereja Aku.” Ku Allah Taala ke disembah orang Israel ti kudus, TUHAN ti nebus kita bejaku, “Kena Aku ngelepaska kita, Aku deka ngasuh bala soldadu nyerang Babilon. Aku deka ngeruntuhka pintu nengeri, lalu panjung orang di nengeri nya deka bebali nyadi sabak. Aku tu TUHAN Allah Taala kita ke kudus. Aku udah ngaga kita, Israel, lalu Aku tu Raja kita.” Dulu kelia TUHAN ngaga jalai raya nengah tasik, jalai nengah ai ti bebuli. Iya ngerusak bala soldadu ti kering, bala soldadu ke nepan kerita perang enggau kuda. Sida rebah, lalu enda angkat agi, dipadamka baka api kelita! Tang ku TUHAN bejaku, “Anang ingatka utai ti udah nyadi menya tauka berundingka utai ti udah nyadi dulu kelia. Peratika utai ti baru, ti deka dikereja Aku. Utai nya benung nyadi, lalu kita ulih meda utai nya diatu! Aku deka ngaga jalai raya nengah menua puang lalu meri kita ai sungai di menua puang nya. Indah jelu babas deh deka ngemesaika Aku. Jelu pasun enggau burung unta deka muji Aku lebuh Aku deka ngasuh sungai rarat di menua puang kena meri ai ngagai bala nembiak ke dipilih Aku. Sida nya orang ke ditempa Aku ke Aku Empu, lalu sida deka belagu muji Aku!” Ku TUHAN bejaku, “Tang kita nyau leju begulai enggau Aku, Israel. Kita enda nyembah Aku. Kita nadai mai bedus nyadika piring tunu ngagai Aku. Kita enda ngemesaika Aku ngena piring kita. Aku nadai nating kita bepintaka piring tauka bepintaka menyan lalu ngasuh kita leju. Kita nadai meli menyan ke Aku tauka ngemuaska ati Aku ngena lemak jelu kita. Tang kita nating Aku ngena dosa kita. Kita ngasuh Aku leju meda penyalah kita. Tang taja pia, Aku tu Allah Taala ti ngampun dosa kita, lalu Aku ngereja nya laban nya endang gaya Aku. Aku enggai nyalah kita ketegal dosa kita. “Aram kitai mansang ngagai kot. Bai dawa kita! Bantaika pekara kita kena kita nunjukka diri endang ngereja utai ti ngena! Aki ini kita dulu kelia nya orang ke terubah bedosa ngelaban Aku. Bala tuai kita udah bedosa ngelaban Aku, lalu bala pemerintah kita udah ngamahka endur Aku ti kudus. Nya alai Aku ngerusak Israel. Aku nejuka bala nembiak Aku dipechat.” Ku TUHAN bejaku, “Anang enda mending, Israel, kita ke nembiak Aku, ke dipilih Aku, kita ke peturun Jakop. Aku tu TUHAN ti udah ngaga kita. Kenyau ari maya kita ada, Aku udah nulung kita. Anang takut. Kita tu nembiak Aku, ke dipilih sereta dikerinduka Aku. Aku deka meri ai ngagai menua ti aus lalu ngasuh sungai rarat nengah tanah ti rangkai. Aku deka nuang Roh Aku ngagai bala anak kita, enggau berekat Aku ngagai bala peturun kita. Sida deka galak baka rumput ti chukup dipanjah enggau ai, baka kayu willow ba tebing sungai. Siku-siku orang deka nyebut, ‘Aku endang enggi TUHAN.’ Sida deka datai lalu begulai enggau orang Israel. Genap iku sida deka nuliska nama TUHAN ba lengan sida lalu ngumbai diri nembiak Allah Taala.” Ku TUHAN ti merintah sereta nyaga Israel, TUHAN ti Pemadu Bekuasa, bejaku: “Aku tu Allah Taala ti terubah, ti penudi, ti endang siku aja. Kita nadai Allah Taala bukai tang semina Aku aja. Kati orang bisi ulih ngereja utai baka ke udah dikereja Aku? Sapa ulih madahka semua utai ti deka nyadi kenyau ari penumbuh nyentuk ngagai pengujung dunya? Anang takut, nembiak Aku! Kita nemu, kenyau ari dulu kelia nyentuk ngagai diatu Aku udah madahka semua utai ti deka nyadi, lalu kita nyadika saksi Aku. Kati kita bisi petara bukai? Kati kita bisi petara ti bekuasa ti enda dikelala Aku?” Semua orang ke begagaka engkeramba endang nadai guna magang, lalu petara ti balat dipuji sida endang nadai guna. Sida ke nyembah petara nya, endang buta sereta nadai nemu utai, lalu sida deka dipechat. Nadai guna ngaga anak patung ari besi lalu nyembah iya nyadika petara! Genap iku orang ke nyembah utai nya deka dipechat. Orang ke ngaga engkeramba nya semina mensia aja, nadai lebih ari nya. Awakka sida datai lalu kena pechara. Sida deka balat takut lalu dipechat. Tukang besi ngambi repik besi lalu nempa iya ba atas api. Lengan iya ti kering ngedarka tukul lalu nempa besi nya. Lebuh iya gawa, iya lapar, aus sereta lelak. Tukang kayu nyukat kayu. Iya ngukir gamal mensia ngena kapu, ngaga gamal nya ngena pekekas iya, lalu ngaga utai nya baka gamal mensia, gamal ti sigat, ti deka diengkahka iya dalam rumah iya. Nyangka iya nebang kayu sidar kena iya ngaga utai nya, tauka milih kayu oak tauka kayu saipris ari utan. Tauka, nyangka iya nanam kayu laurel, lalu nganti hari ujan ngasuh utai nya tumbuh. Sebagi ari kayu nya diguna nyadika kayu api, lalu sebagi dikena ngaga engkeramba. Sebagi dikena iya menyadika api kena bekindu enggau manggang roti. Sebagi dikena iya ngaga petara, lalu disembah iya. Sebagi ari kayu nya dikena iya menyadika api. Iya manggang dagin, makai dagin nya, lalu kenyang. Iya bekindu lalu ku iya, “Tu baru iya! Manah amat api tu!” Teda kayu nya digaga iya nyadika engkeramba. Udah nya iya meremi lalu nyembah engkeramba nya, lalu besampi ngagai engkeramba nya, ku iya, “Selamatka aku, laban nuan petara aku!” Orang ke baka nya amat kelalu beli, datai ke sida nyau enda nemu utai ti dikereja diri agi. Sida nutup mata enggau runding sida ari utai ti bendar. Tukang ke ngaga engkeramba nadai nemu bepikir tauka nyebut, “Sebagi ari kayu nya ditunu aku. Api nya dikena aku manggang roti, enggau manggang dagin, lalu aku makai utai nya. Teda kayu nya digaga aku nyadi engkeramba. Diatu aku nyembah lumpung kayu!” Pengawa nya baka orang ke makai amau. Pemeli runding iya balat nesatka iya, datai ke iya nyau enda ulih ditulung agi. Iya enggai ngaku engkeramba ti ba jari iya nya ukai petara. Ku TUHAN bejaku, “Israel, kingatka tu. Kingatka diri ke nembiak Aku. Aku udah nempa kita nyadika nembiak Aku, lalu Aku deka seruran ingatka kita. Aku udah muai penyalah kita baka ke muai mua hari. Pulai baru ngagai Aku, laban Aku udah nebus kita.” Manjung gaga ati meh kita langit! Manjung meh kita endur ti dalam di dunya! Manjung gaga ati meh kita bukit, enggau semua kayu ti dalam utan! TUHAN udah mandangka pemesai kuasa Iya lebuh Iya nebus nembiak Iya Israel. “Aku tu TUHAN ti Juruselamat kita. Aku tu ke nempa kita dalam kandung. Aku tu TUHAN, ke ngaga semua utai. Aku siku aja ke mintarka langit. Lebuh Aku ngaga dunya, nadai orang nulung Aku. Aku ngemelika orang ke betilitka nasit lalu ngemuntanka tujum orang ke bepenemu pasal bintang. Aku nulak jaku orang ke bepenemu-dalam lalu mandangka pemeli penemu sida. Tang lebuh nembiak Aku madahka utai ti deka nyadi, lebuh Aku ngasuh siku seruan mandangka pelan Aku, Aku ngasuh pelan enggau utai ti dipadahka Aku nyadi magang. Aku madahka mensia deka diau di Jerusalem baru, lalu semua nengeri di menua Judah deka digaga baru. Semua nengeri nya deka digaga baru ba tembawai nengeri ti dulu. Aku bejaku, lalu tasik rangkai. Ku Aku nyebut ngagai Sairus, ‘Nuan deka merintah ngarika Aku. Nuan deka ngereja utai ti diasuh Aku kereja nuan: nuan deka bejaku ngasuh Jerusalem digaga baru lalu ngasuh batu pemun Rumah Sembiang ditanam.’ ” TUHAN udah milih Sairus nyadi raja. Iya udah ngasuh Sairus ngalahka mayuh bengkah bansa. Iya ngasuh Sairus muai kuasa ari bala raja. TUHAN deka muka pintu mayuh bengkah nengeri ke iya. Ku TUHAN bejaku ngagai Sairus, “Aku Empu deka nyendiaka jalai ke nuan, ngerataka bukit enggau munggu. Aku deka ngeruntuhka semua pintu temaga lalu matahka alang besi sida. Aku deka meri ngagai nuan reta tengkira ari endur ti petang sereta resia. Nya baru nuan deka nemu Aku endang TUHAN lalu nemu Allah Taala ke disembah orang Israel udah ngangauka nama nuan. Aku ngeletak nuan nulung nembiak Aku Israel, bansa ti udah dipilih Aku. Aku udah meri ngagai nuan basa ti besai, taja pen nuan enda nemu Aku. “Aku tu TUHAN. Kita nadai TUHAN bukai. Aku deka meri nuan pengering ti dipeguna nuan, taja pen nuan enda nemu Aku. Aku ngereja nya ngambika semua orang ari timur nyentuk ke barat nemu Aku endang TUHAN lalu kita nadai petara bukai. Aku tu ke ngaga penampak enggau pemetang. Aku tu ke mai berekat enggau pengerusak. Aku ti TUHAN tu ti ngereja semua utai nya. Aku deka ngasuh pemenang nurun ari langit baka ujan. Tanah deka merangap lalu nyambut iya lalu iya deka ngasuh pengelepas enggau pengelurus tumbuh baka bungai. Aku ti TUHAN, deka ngasuh utai nya nyadi.” Kati periuk tanah berani bekelikuh ngelaban orang ke ngaga iya, periuk tanah ti sebaka enggau periuk tanah ti bukai? Kati tanah liat nanya tukang periuk munyi tu, “Nama utai ti digaga nuan?” Kati periuk tanah mutap madahka orang ke ngaga iya nya nadai pengelandik? Kati kitai berani bejaku munyi tu ngagai apai indai kitai, “Nama kebuah seduai ngasuh aku ada baka tu?” Ku TUHAN Allah Taala ke disembah orang Israel ti kudus, bejaku: “Nuan enda tau betanyaka pasal bala anak Aku ngagai Aku tauka madahka utai ti patut dikereja Aku! Aku tu ke ngaga dunya lalu ngaga mensia sereta ngasuh sida diau dia. Ngena kuasa Aku, Aku mintarka langit. Aku merintah mata hari, bulan enggau bintang. Aku Empu ke nyungkak Sairus ngereja utai kena ngamatka juluk ati Aku, lalu ngaga utai nyadi lurus. Aku deka beruruska semua jalai raya ti ditengah iya. Iya deka nirika nengeri Jerusalem baru, lalu ngelepaska bala nembiak Aku ti udah kena tangkap. Nadai orang udah ngupah tauka nyuap iya ngereja utai nya.” TUHAN ti Pemadu Bekuasa udah bejaku. Ku TUHAN bejaku ngagai orang Israel, “Pengaya menua Ejip enggau Etiopia deka diempu kita, lalu bala lelaki orang Seba ti tinggi gamal deka nyadi ulun kita. Sida deka ditanchang ngena rantai lalu nitihka kita. Sida deka meremi di mua kita, lalu bejaku, ‘Allah Taala bisi enggau kita. Semina Iya siku aja ti Allah Taala. Allah Taala ke disembah orang Israel ke ngelepaska bala nembiak Iya, endang Allah Taala ti ngelalaika Diri. Semua orang ke begagaka engkeramba deka malu. Semua sida deka dipechat magang. Tang Israel diselamatka TUHAN, ngena pengelepas ti tan belama iya, lalu sida enda dipechat.’ ” TUHAN udah ngaga langit. Iya nya meh Allah Taala! Iya nempa lalu ngaga dunya. Iya ngaga dunya tegap sereta tan. Iya nadai ngaga dunya nyadi endur ti sunyi nadai mensia, tang nyadi endur alai mensia diau. Nya meh Allah Taala ti nyebut, “Aku tu TUHAN, lalu kita nadai petara bukai. Aku enda bejaku enggau chara belalai tauka ngelalaika juluk ati Aku. Aku nadai ngasuh orang Israel lebu ngapa begigaka Aku. Aku tu TUHAN, lalu Aku nyebut utai ti bendar. Aku madahka utai ti ngena.” Ku TUHAN bejaku, “Begempuru meh kita, mensia ari semua bansa, semua kita ke agi idup lebuh perintah nya alah. Awakka kita datai bechara! Orang ke bejalai bebala mayuh mai engkeramba ti digaga ari kayu, lalu besampi ngagai petara ti enda ulih nyelamatka sida, sida nya orang ke nadai nemu utai! Datai, lalu bantaika pekara kita dalam kot. Awakka orang ke kena dawa betanya ngagai pangan diri. Sapa orang dulu kelia ke madahka utai ti deka nyadi? Kati orang nya ukai Aku ti TUHAN Allah Taala ti ngelepaska bala nembiak Iya? Kita nadai petara bukai kelimpah ari Aku, Allah Taala ke lurus, ti nyadi Juruselamat. “Pulai ngagai Aku diatu ngambika kita diselamatka, semua kita mensia ti di serata dunya! Semina Aku siku aja ti Allah Taala. Semaya Aku endang amat, lalu semaya nya enda diubah. Aku besumpah atas nama Aku Empu: Semua orang deka datai lalu besugang di mua Aku lalu besumpah madahka diri deka taluk ngagai Aku. “Sida deka bejaku madahka pemenang enggau pengering semina datai ari Aku siku aja. Tang semua orang ke begedika Aku, deka dipechat. Aku ti TUHAN deka ngelepaska semua peturun Jakop, lalu sida deka muji Aku. “Nya meh pengujung bala petara menua Babilon! Dulu suba Bel enggau Nebo disembah, tang diatu seduai iya diundan ngena keledai, nating belakang jelu ti lelak. Sida engkeramba nya enda ulih nyelamatka diri empu. Sida ditangkap lalu ditabanka ngagai endur bukai. Nya meh pengujung petara menua Babilon! “Pendingka Aku, kita ke peturun Jakop, semua kita nembiak Aku ti agi tinggal. Aku udah ngibun kita kenyau ari kita ada. Aku tu Allah Taala kita, lalu Aku deka ngibun kita datai ke kita nyau tuai, lalu buk kita buban. Aku udah nempa kita, lalu Aku deka ngibun kita. Aku deka nyaup kita lalu ngelepaska kita. “Ngagai sapa kita deka mandingka Aku?” ku TUHAN bejaku. “Kati orang bisi sebaka enggau Aku? Orang muka kandi duit sida lalu nuang emas. Sida nimbang pirak ngena dachin. Sida ngaji tukang emas ngaga siku petara. Udah nya sida meremi lalu nyembah petara nya. Sida ngangkatka iya ngagai bau sida, lalu ngesan iya. Sida ngengkahka iya ba siti endur, lalu iya bediri dia, enda ulih nginsit ari endur nya. Enti orang besampi ngagai iya, iya enda nemu nyaut lalu enda ulih ngelepaska sida ari penusah. “Kingatka tu, kita orang ke bedosa. Perundingka utai ti udah dikereja Aku. Kingatka utai ti udah nyadi dulu kelia. Kita enda tau enda ngaku Aku siku aja nyadika Allah Taala kita lalu nadai orang sebaka enggau Aku. Kenyau ari pun kelia, Aku udah madahka utai ti deka nyadi. Dulu kelia Aku udah madahka utai ti deka nyadi. Aku madahka pelan Aku endang enda nemu lebu, lalu madahka Diri deka ngereja semua utai ti deka dikereja Aku. Aku ngangauka siku lelaki datai ari timur. Iya deka nyambar baka menaul lalu ngereja utai ti udah diperambu Aku. Aku udah bejaku, lalu utai nya deka dikereja. “Pendingka Aku, kita ke kieh, ke ngumbai pengelepas agi jauh. Aku deka mai hari pemenang datai semak, laban iya endang enda jauh. Pengelepas Aku enda betangguh. Aku deka nyelamatka Sion, lalu mai basa ngagai Israel dia.” Ku TUHAN bejaku, “Babilon, nurun nuan ari kerusi diraja nuan, lalu duduk malai abus. Dulu menya nuan udah baka indu dara bungas, nengeri ti enda kala alah, tang nuan enda agi lembut sereta bajik gamal! Nuan diatu udah nyadi ulun! Pusinka batu kisar! Kisar meh tepung! Buka tambai mua nuan! Buka pekayan nuan ti manah! Siatka kain nuan lebuh nuan meraka sungai! Orang deka meda nuan telanjai. Sida deka meda nuan dikemaruhka sereta dipechat. Aku deka malas nuan, lalu nadai orang deka nagang Aku.” Allah Taala ke disembah orang Israel ti kudus nebus kitai. Nama Iya TUHAN ti Pemadu Bekuasa. Ku TUHAN bejaku ngagai Babilon, “Awakka nuan duduk enda bemunyi dalam petang. Nadai sida agi deka ngumbai nuan kuin ke semua bansa! Aku udah ringat ngagai bala nembiak Aku. Aku udah ngaga sida baka ke ukai nembiak Aku agi. Aku udah nyerahka sida ngagai jari nuan, lalu nuan nadai nemu kasihka sida. Indah sida ke tuai deh diperinsaka nuan. Nuan ngumbai diri deka seruran nyadi kuin, lalu nuan enda irauka utai ti digaga diri tauka berundingka pengujung utai nya. “Pendingka tu, nuan ke rindu ngelantangka diri, ke ngumbai diri likun sereta nadai utai ngawa. Nuan ngumbai diri besai baka Allah Taala, lalu ngumbai orang nadai baka nuan. Nuan ngumbai diri enda tau nyadi indu ke balu tauka mati anak. Tang dalam sekejap aja, dalam sehari aja, utai dua bengkah nya deka nyadi. Taja pen nuan ngena mayuh macham keramat, tang nuan deka lenyau laki, lenyau anak. “Nuan berasai likun ngereja penyai. Nuan ngumbai orang enda ulih meda nuan. Penemu-dalam enggau penemu nuan udah mai nuan tesat, lalu ku nuan bejaku dalam ati diri, ‘Aku tu Allah Taala. Nadai orang sebaka enggau aku.’ Penusah ti besai deka ninggang nuan, lalu nadai siti pengawa keramat nuan ulih nagang nya. Pengerusak deka ninggang nuan enggau ngenyit, pengerusak ti nadai kala dipikir nuan! Simpan aja meh puchau enggau pengaruh nuan. Nuan udah ngena sida kenyau ari nuan agi biak. Nyangka ukur sida ulih nulung nuan. Nyangka ukur nuan ulih ngenakutka bala munsuh nuan. Nuan nadai daya, taja pen nuan diberi jaku lalau. Awakka bala orang ke bepenemu pasal bintang datai lalu nyelamatka nuan, bala orang ke belajarka pasal bintang, ke begagaka kar langit lalu madahka ngagai nuan genap bulan, utai ti deka nyadi ba nuan. “Sida nya baka rumput ti rangkai lalu api deka nganguska sida! Indah sida empu deh enda ulih nyelamatka diri. Api nya kelalu angat ke sida, laban api nya ukai api ti nyamai kena bekindu. Semina nya aja meh guna nuan enggau sida, sida ke bepenemu pasal bintang, ti udah alai nuan betanya seumur idup. Semua sida nya deka ninggalka nuan lalu mupuk, lalu nadai siku sida agi tinggal nyelamatka nuan.” Pendingka tu, kita orang Israel, kita ke ari peturun Judah: Kita besumpah dalam nama TUHAN lalu ngumbai diri nyembah Allah Taala ke disembah orang Israel, tang kita semina bejaku ngapa. Kita temegah madahka diri peranak nengeri ti kudus lalu madahka diri bekering ba Allah Taala ke disembah orang Israel, ke benama TUHAN ti Pemadu Bekuasa. Ku TUHAN bejaku ngagai orang Israel, “Dulu kelia Aku endang udah madahka gaya utai ti deka nyadi, udah nya Aku lalu ngasuh utai nya nyadi enggau ngenyit. Aku nemu kita endang amat kieh, kering baka besi, enggai nurut baka temaga. Nya alai dulu kelia Aku udah madahka gaya pengidup kita jemah ila, madahka gaya utai ti deka nyadi, sebedau sida nyadi, ngambika kita enda ngumbai utai nya digaga engkeramba enggau anak patung kita. “Semua utai ti dipadahka Aku, udah nyadi magang diatu. Kita patut ngaku semua utai ti udah dipadahka Aku nya endang amat magang. Diatu Aku deka madahka ngagai kita utai ti baru, ti deka datai, utai ti deka nyadi, ti nadai kala dipandangka Aku dulu menya. Semina diatu aja Aku ngasuh utai nya nyadi. Nadai utai ti baka nya udah kala nyadi dulu kelia. Enti sema iya udah nyadi, kita tentu ngumbai diri nemu semua utai pasal iya. Aku nemu kita endang enda tau dikarapka, lalu kita endang ditemu selalu angkat ngelaban. Nya kebuah kita nadai kala ninga pasal utai nya. Nya kebuah berita pasal utai nya nadai kala didinga kita. “Ngambika orang mayuh deka muji nama Aku, Aku nagang Diri ringat. Aku nagang Diri ringat lalu enda ngerusak kita. Aku udah nguji kita ngena api pemerinsa, baka pirak ti dituchi dalam serumbung api. Tang Aku nemu kita endang nadai guna. Utai ti dikereja Aku endang dikereja Aku ke Aku Empu. Aku enggai nejuka nama Aku dikeleseka tauka bekunsika mulia Aku enggau orang laban mulia nya endang enggi Aku siku aja.” Ku TUHAN bejaku, “Pendingka Aku, Israel. Aku udah ngangauka kita. Aku tu Allah Taala ti terubah, ti penudi, ti Allah Taala siku aja! Jari Aku udah ngaga pugu dunya lalu mintarka langit. Lebuh Aku ngangauka dunya enggau langit, seduai iya datai tekala nya, lalu bediri di mua Aku. “Begempuru lalu pendingka Aku, semua kita! Nadai siku ari bala petara nya ulih madahka orang ke udah dipilih Aku deka nyerang Babilon. Iya deka ngereja utai ti diasuh Aku. Aku tu ke bejaku lalu ngangauka iya. Aku nguluka iya lalu ngasuh iya mujur. “Datai semak ngagai Aku diatu, lalu dingaka utai ti disebut Aku. Kenyau ari pun, Aku endang udah bejaku enggau terang lalu udah seruran ngamatka jaku Aku.” (Diatu TUHAN ti Pemadu Tinggi udah meri aku kuasa Iya, lalu ngirumka aku.) Ku Allah Taala ke disembah orang Israel ti kudus, TUHAN ti nebus kita, bejaku: “Aku tu TUHAN Allah Taala kita, ti deka ngajar kita utai ke penguntung kita lalu nunjukka jalai ti patut ditengah kita. “Enti sema kita udah mendingka jaku Aku nya baru berekat tentu udah rarat ngagai kita baka sungai ti enda nemu langkang. Pemenang tentu udah datai ngagai kita baka gelumbang ti ngalun ngagai tebing. Peturun kita tentu udah mayuh baka igi pasir, lalu Aku tetap udah nentuka sida enda dirusak.” Pansut meh kita ari Babilon. Kita udah dilepaska. Padahka berita nya enggau panjung gaga ati. Padahka berita nya di semua endur: “ TUHAN udah nebus nembiak Iya Israel!” Lebuh TUHAN nguluka bala nembiak Iya bejalai nengah menua puang ti angat sereta rangkai, sida enda aus. Iya ngasuh ai pansut ari batu ke sida. Iya melah batu, lalu ai rarat pansut. “Orang ke bedosa sigi nadai pengelikun,” ku TUHAN bejaku. Pendingka aku, kita menua ti ba tebing tasik, kita ke diau jauh! Sebedau aku ada, TUHAN endang udah milih aku lalu ngeletak aku nyadika nembiak Iya. Iya ngasuh leka jaku aku tajam baka pedang. Iya nyaga aku ngena jari Iya Empu. Iya ngaga aku baka laja, tajam sereta sedia deka dikena. Ku TUHAN bejaku ngagai aku, “Israel, nuan tu nembiak Aku. Ketegal nuan, orang deka muji Aku.” Ku aku bejaku, “Aku udah gawa, tang pengawa nya nadai reti! Aku udah ngansingka pengering aku, tang nadai bulih utai.” Tang taja pia, aku arapka TUHAN deka bejaku ngarika aku. Iya deka ngupah aku ketegal pengawa ti dikereja aku. Sebedau aku ada, TUHAN endang udah ngeletak aku mai bala nembiak Iya pulai baru, mai orang Israel ti udah pambar pendiau pulai baru. TUHAN meri aku basa. Iya meh nyadika pun pengering aku. Ku TUHAN bejaku ngagai aku, “Nembiak Aku, Aku bisi pengawa ti besai agi ti diasuh Aku kereja nuan. Nuan ukai semina deka mulaika kuasa ngagai orang Israel ti agi idup, tang Aku deka mega ngaga nuan nyadika penampak ke semua bansa, ngambika semua dunya diselamatka.” Ku Allah Taala ke disembah orang Israel ti kudus enggau Juruselamat bejaku ngagai siku orang ke balat dipechat, ke dipegedika semua bansa lalu nyadi ulun bala raja: “Bala raja deka meda nuan dilepaska lalu sida deka bediri ngayanka basa sida ngagai nuan. Bala anak raja deka mega meda nuan dilepaska, lalu sida deka meremi baruh masa nuan.” Utai tu deka nyadi laban TUHAN udah milih ulun Iya. Allah Taala ke disembah orang Israel ti kudus ngamatka semaya Iya. Ku TUHAN bejaku ngagai bala nembiak Iya, “Lebuh maya Aku deka nyelamatka kita, Aku deka kasihka kita lalu nyaut sabak kita ke minta tulung. Aku deka nyaga sereta ngelindung kita lalu nengah kita Aku deka ngaga siti sempekat enggau semua bansa. Aku deka ngasuh kita ngentapka diri, sekali agi, di menua kita empu ti nadai orang nguan diatu. Aku deka nyebut ngagai orang tangkap, ‘Kita diatu dilepaska!’ lalu ngagai sida ke diau dalam petang, ‘Pansut ngagai penampak!’ Sida deka nyadi baka jelu bedus ti ngulam ba munggu. Sida nadai agi lapar tauka aus. Pengangat panchar mata hari enggau pengangat menua puang enda agi ngemediska sida, laban sida deka diuluka siku ti rinduka sida. Iya deka nguluka sida ngagai mata ai. “Lalu Aku deka ngaga jalai raya ngerenchah bukit lalu nyendiaka jalai ti deka ditengah bala nembiak Aku. Bala nembiak Aku deka datai ari jauh, ari utara enggau ari barat, enggau ari Aswan di selatan.” Belagu meh nuan langit! Manjung gaga ati meh nuan dunya! Awakka bukit belagu! TUHAN deka merindang bala nembiak Iya. Iya deka sinu ati ke bala nembiak Iya ke merinsa. Tang ku orang Jerusalem bejaku, “ TUHAN udah ninggalka kitai! Iya enda agi ingatka kitai.” Nya alai TUHAN nyaut, “Kati indu enda ingatka anak diri lalu enda rinduka anak ke diadaka iya empu? Enti sema indai enda ingatka anak diri, Aku deka seruran ingatka kita. Jerusalem, Aku deka seruran ingatka nuan! Aku udah nuliska nama nuan ba tapa jari Aku. “Sida ke deka nirika nuan baru, deka datai enda lama da agi, lalu sida ke udah ngerusak nuan, deka mupuk. Malik kiba-kanan lalu peda utai ti benung nyadi ngelingi nuan! Bala nembiak nuan benung begempuru. Sida iya pulai ngagai nuan! Nya alai laban Aku tu Allah Taala ti idup, kita deka temegahka bala kita empu, baka indu ke ditikah ke temegahka batu berega ti dikena iya. “Menua kita udah nyadi tembawai lalu nadai orang nguan, tang diatu menua kita nya kelalu mit lalu enda ulih ngundan sida ke datai lalu deka diau dia. Lalu sida ke udah ngaga nuan nyadi tembawai deka dibuai jauh ari nuan. Bala nembiak nuan ti udah diadaka di menua bukai deka jemah ila nyebut ngagai nuan, ‘Menua tu kelalu mit, kami begunaka menua ti luas agi alai diau!’ Udah nya nuan deka bejaku dalam ati diri, ‘Sapa udah beranakka bala nembiak tu ke aku? Bala anak aku udah lenyau, lalu aku enda ulih beranak agi. Aku udah dibuai lalu diburu ngagai menua bukai. Sapa udah nupi bala nembiak tu? Aku tinggal kediri-diri, nya alai, ari ni penatai bala nembiak tu?’ ” Ku TUHAN ti Pemadu Tinggi bejaku ngagai bala nembiak Iya: “Aku deka meri tanda ngagai semua bansa, lalu sida deka mai bala nembiak nuan pulai baru ngagai menua sida empu. Bala raja deka nyadi baka apai nuan. Bala kuin deka nyadi baka indai nuan. Sida deka meremi baruh di mua nuan, lalu ngemesaika nuan. Enggau ati ti baruh sida deka masa nuan. Nya baru nuan deka nemu Aku endang TUHAN. Nadai orang ke nganti tulung ari Aku, deka asa ngapa.” Kati nuan ulih ngerampas perapasan ari jari soldadu? Kati nuan ulih ngelepaska orang tangkap ari jari orang ke jai? Ku TUHAN nyaut, “Nya meh utai ti deka nyadi. Orang ke udah ditangkap soldadu, deka ditabanka, lalu perapasan ti udah ulih orang ke jai, deka dirampas. Aku deka ngelaban barang sapa ke ngelaban nuan, lalu Aku deka ngelepaska bala anak nuan. Aku deka ngasuh orang ke nekanka pengidup nuan, bebunuhka pangan diri. Sida deka mabuk laban ati ti seruran deka bebunuh pedis ati. Nya baru semua bansa deka nemu Aku endang TUHAN, ke nyelamat sereta ngelepaska nuan. Sida deka nemu Aku tu Allah Taala ti bekuasa orang Israel.” Ku TUHAN bejaku, “Kati nuan ngumbai Aku muru bala nembiak Aku baka laki ke muai bini? Enti pia, dini alai surat sarak? Kati nuan ngumbai Aku nyual nuan nyadi orang tangkap baka lelaki ke nyual bala anak diri nyadi ulun? Ukai pia. Kita ditangkap lalu dibuai ngagai menua bukai laban dosa kita. Kita dibuai ngagai menua bukai laban penyalah kita. “Nama kebuah bala nembiak Aku enda nyaut lebuh Aku datai ngagai sida deka nebus sida? Nama kebuah sida enda nyaut, lebuh Aku ngangau? Kati Aku tu kelalu lemi nebus sida? Aku ulih ngerangkaika tasik ngena seleka jaku lalu ngubah sungai nyadi menua puang, datai ke semua ikan dalam sungai nya mati laban nadai agi ai. Aku ulih ngasuh langit bebali petang, baka ke ngulitka orang ke mati.” TUHAN ti Pemadu Tinggi udah ngajar Aku utai ti patut disebut, ngambika aku ulih ngeringka orang ke lelak. Genap pagi Iya ngasuh aku gagit ati deka ningaka utai ti deka diajar Iya ngagai aku. TUHAN udah ngasuh aku mereti, lalu aku enda angkat ngelaban Iya tauka ninggalka Iya. Aku ngayanka belakang aku ngagai orang ke malu aku. Aku enda nagang sida, lebuh sida mechat aku, lebuh sida ngentun ragum aku lalu ngeludah mua aku. Tang jaku pechat sida enda ulih ngemediska aku laban TUHAN ti Pemadu Tinggi nulung aku. Aku ngeringka diri natka pechat sida. Aku nemu diri enda ulih dipechat sida, laban Allah Taala semak aku, lalu Iya deka ngumbai aku nadai penyalah. Kati orang bisi berani bedawaka aku? Aram kitai sama mansang ngagai kot! Awakka iya bedawaka aku! TUHAN ti Pemadu Tinggi deka bejaku ngarika aku. Nya alai, sapa ulih ngumbai aku udah ngereja penyalah? Semua orang ke bedawaka aku, deka lesap magang. Sida deka lesap baka kain ti diempa indu gegat. Semua kita ke nangika TUHAN sereta ngasika jaku ulun Iya, jalai ti ditengah kita nyangka udu petang, tang panggaika pengarap kita ba TUHAN. Panggaika diri ba Allah Taala kita. Semua kita ke bepekat deka ngerusak orang bukai, kita empu deka dirusak akal kita empu. TUHAN Empu deka ngasuh utai tu nyadi. Kita deka merinsa. Ku TUHAN bejaku, “Pendingka Aku, kita ke minta diri diselamatka, kita ke datai ngagai Aku minta tulung. Kingatka batu ti penatai kita, lumbung batu alai kita ke udah digaga. Kingatka aki kita, Abraham, enggau Sarah, ke nurunka kita. Lebuh Aku ngangauka Abraham, iya nadai anak, tang Aku merekatka iya, lalu meri iya mayuh anak. Aku meri iya mayuh peturun. “Aku deka ngayanka penyiru Aku ngagai Jerusalem, ngagai semua orang ke diau dalam tembawai iya. Taja pen menua iya udah nyadi menua puang, Aku deka ngaga iya nyadi kebun, baka kebun ti digaga Aku di Eden. Orang deka gaga sereta lantang ati diau dia, sereta nyanyi pantun puji enggau belagu meri terima kasih ngagai Aku. “Pendingka Aku, kita ke nembiak Aku. Pendingka utai ti disebut Aku: Aku meri jaku ajar Aku ngagai semua bansa. Adat Aku deka meri sida penampak. Aku deka lengkas datai lalu ngelepaska sida. Maya pemenang Aku nyau semak. Aku Empu deka merintah semua bansa. Menua ti ba tebing tasik nganti penatai Aku. Sida nganti enggau ati ti andal ngadang Aku deka ngelepaska sida. Engkadah ke langit, perening ngagai dunya! Langit deka lesap baka asap. Dunya deka luya baka kain ti lama, lalu semua orang ke diau dalam dunya, deka mati baka lalat. Tang pengelepas ti dibai Aku, deka meruan belama iya. Pemenang Aku deka meruan belama iya. “Pendingka Aku, kita ke nemu pengelurus, ti udah ngelekatka ajar Aku dalam ati kita. Anang takut lebuh orang ngelese sereta mechat kita. Sida deka lesap baka gari ti diempa indu gegat! Tang pengelepas ti dibai Aku deka meruan belama iya. Pemenang Aku deka tan belama iya.” Dani, O TUHAN, lalu tulung kami! Kena meh kuasa Nuan, lalu selamatka kami. Kena meh kuasa nya baka ke dikereja Nuan dulu kelia. Nuan Empu ke mepat antu tasik ke benama Rahap. Nuan Empu ke ngerangkaika tasik lalu ngaga jalai raya nengah ai, ngambika sida ke diselamatka Nuan, ulih meraka ke seberai. Sida ke udah dilepaska Nuan deka datai di Jerusalem enggau ati ti gaga, belagu sereta manjung gaga ati. Sida deka lantang ati belama iya, dilepaska belama iya ari ati ti sinu sereta tusah. Ku TUHAN bejaku, “Aku tu ke meri kita pengering. Nama kebuah kita takutka mensia, ti nadai lebih agi tan ari rumput? Kati kita enda ingatka TUHAN ti udah ngaga kita, ke mintarka langit lalu nudukka pugu dunya? Nama kebuah kita seruran takutka pengeringat orang ke nekanka pengidup kita, orang ke sedia deka ngerusak kita? Pengeringat sida enda ulih negu kita agi. Orang ke kena jil, deka dilepaska enda lama da agi. Sida deka panjai umur lalu nadai suntuk pemakai. “Aku tu TUHAN Allah Taala kita. Aku ngirau tasik lalu ngasuh gelumbang besegum. Nama Aku TUHAN ti Pemadu Bekuasa! Aku mintarka langit lalu nudukka pugu dunya. Ku Aku bejaku ngagai Jerusalem, ‘Kita tu nembiak Aku! Aku udah meri jaku ajar Aku ngagai kita, lalu Aku nyaga kita ngena jari Aku.’ ” O Jerusalem, dani nuan! Dani lalu angkat! Nuan udah ngirup mangkuk ukum ti udah diasuh TUHAN irup nuan lebuh Iya ringat. Nuan udah ngirup ari mangkuk nya, lalu iya ngasuh nuan guir-guir. Nadai orang ngiring nuan. Nadai siku ari bala nembiak nuan deka megai jari nuan. Dua bengkah penusah ti besai udah ninggang nuan. Menua nuan udah rusak laban perang, lalu bala nembiak nuan udah keberuran. Nadai orang mandangka penyiru ngagai nuan. Ba genap sukut jalai raya bala nembiak nuan rebah lembut tulang. Sida iya baka rusa ti disintak jarin. Sida udah ngasaika pengeringat Allah Taala. Kita orang Jerusalem ke merinsa, kita ke guir-guir baka orang ke mabuk, TUHAN Allah Taala kita bejaku ngarika kita, ku Iya, “Aku ngambi mangkuk ti udah diberi Aku ngagai kita lebuh Aku ringat. Kita enda agi ibuh ngirup wain ti ngasuh kita guir-guir. Aku deka meri wain nya ngagai orang ke nekanka pengidup kita, ngagai sida ke ngasuh kita gali ba jalai raya lalu ngelunjak kita, baka ke ngelunjak tanah.” Jerusalem, awakka nuan kering lalu beberita baru! Nengeri Allah Taala ti kudus, rasukka gari nuan ti manah! Orang kapir enda agi tama nengah pintu nuan. Lepaska diri empu, Jerusalem! Angkat ari amau, lalu duduk ba kerusi diraja nuan! Buka rantai ti nanchang kita, kita orang Sion ti kena jil! Ku TUHAN ti Pemadu Tinggi bejaku ngagai bala nembiak Iya, “Lebuh kita nyadi ulun, kita ukai dibeli. Baka nya mega, kita ukai dilepaska ngena duit. Lebuh kita mansang ngagai menua Ejip nyadi orang kampar, kita kin nitihka peneka ati kita empu. Tang Asiria nabanka kita lalu nadai nyuaka rega. Nyadi diatu, utai ti baka nya udah nyadi di menua Babilon: kita nyadi orang tangkap, lalu kita ukai dibeli. Orang ke merintah kita temegah sereta jegak-jegak, lalu seruran mechat Aku. Jemah ila, kita deka ngaku Aku Allah Taala, lalu ngaku Aku udah bejaku ngagai kita.” Naka meh pengerindu meda siku seruan ke datai ngelangkah bukit, mai berita ti manah, berita pasal pemaik! Iya madahka pasal pemenang, lalu nyebut ngagai Sion, “Allah Taala nuan endang Raja!” Sida ke nyaga nengeri manjung, sama sereta manjung gaga ati. Sida ulih meda ngena mata sida empu pemulai TUHAN ngagai Sion. Manjung gaga ati meh kita tembawai Jerusalem. TUHAN deka ngelepaska nengeri Iya Empu lalu merindang bala nembiak Iya. TUHAN deka ngena kuasa Iya ti kudus. Iya deka ngelepaska bala nembiak Iya, lalu semua dunya deka meda nya. Kita enda tau enda angkat ari menua Babilon, semua kita ke mai pekekas Rumah Sembiang. Anang negu utai ti enda tuchi. Intu diri kudus lalu mupuk. Sekali tu kita enda ibuh berumban mupuk laban kita ukai rari. TUHAN Allah Taala kita deka nguluka kita lalu nyaga kita. Ku TUHAN bejaku, “Nembiak Aku deka mujur ngereja pengawa iya. Iya deka nerima basa ti besai. Mayuh orang tekenyit ati meda iya. Gamal iya balat amat rusak datai ke nyau ukai gamal mensia agi. Tang diatu mayuh bengkah bansa deka alit ati meda iya, lalu bala raja enda tepansutka jaku laban alit ati. Sida deka meda lalu meretika utai ti nadai udah kala ditemu sida.” Orang mayuh lalu nyaut, “Sapa arapka utai ti udah didinga kami? Lalu ngagai sapa TUHAN udah ngayanka kuasa Iya? Peneka TUHAN Empu ti ngasuh nembiak Iya tumbuh baka kayu ti beurat ba tanah ti rangkai. Iya ukai tinggi pangkat tauka sigat ti tau ngasuh kitai tekait ati. Nadai utai ti manah gaya ba iya, ti tau ngasuh kitai tetarit ati ngagai iya. Kitai udah mechat sereta nulak iya. Iya udah natka diri merinsa sereta pedis. Nadai orang deka malik ngagai iya, kitai enggai ibuhka iya lalu ngaga iya baka orang ke nadai guna. “Tang iya nanggung pemedis kitai, lalu muai penyakit kitai. Sekumbang utai nya ti nyadi, kitai ngumbai pemerinsa iya nya ukum ari Allah Taala. Tang iya bakal ketegal dosa kitai, lalu iya dipalu ketegal penyai kitai. Kitai digeraika ulih ukum ti ditatka iya, lalu ulih bakal iya, kitai digeraika. Semua kitai tu baka jelu bedus ti tesat, bela bejalai ngatika diri; lalu TUHAN udah manggaika penyai semua kitai ba iya. “Orang balat amat kasar enggau iya, tang iya natka nya enggau ati ti baruh. Iya nadai bejaku seleka. Baka anak domba ti baru deka disayat, baka bedus ti baru deka dikukur, iya nadai bejaku seleka. Iya ditangkap, diukum, dibai kebukai lalu dibunuh, lalu nadai orang deka ibuhka utai ti nyadi ba iya. Iya dibunuh ketegal dosa kitai. Iya dikuburka begulai enggau orang ke jai, dikuburka begulai enggau orang ke kaya, taja pen iya nadai udah ngereja penyalah tauka bejaku bula.” Ku TUHAN bejaku, “Ari peneka Aku, iya natka pemerinsa; pemati iya nyadika genselan ti mai pengampun. Nya alai iya deka meda peturun diri. Iya deka panjai umur lalu ulih iya, juluk ati Aku deka mujur. Lebuh iya udah natka pemerinsa, iya deka gaga ati baru. Iya deka nemu diri enda lebu merinsa. Nembiak Aku ke angkun tu, ke dikerinduka Aku, deka nanggung ukum orang mayuh lalu ketegal iya, Aku deka ngampun sida. Nya alai Aku deka meri iya pangkat ti tinggi, begulai enggau orang ke tinggi pangkat sereta bekuasa. Enggau ati ti penuh, iya nyerahka nyawa diri lalu natka pemerinsa sama enggau orang ke jai. Iya nanggung dosa orang mayuh, lalu besampika orang ke bedosa.” Jerusalem, nuan udah baka indu ke nadai anak, tang diatu nuan tau belagu sereta manjung gaga ati. Diatu nuan deka lebih mayuh agi anak ari indu ke nadai kala ditinggalka laki. Gaga langkau kain nuan besai agi. Gaga panjai agi tali iya, lalu gaga tegap agi tiang bantil iya! Nuan deka nangkir pemesai rampa menua nuan ari tisi sepiak ngagai tisi sepiak. Bala nembiak nuan deka ngambi pulai baru menua ti diuan bansa bukai diatu. Nengeri ti enda diuan orang diatu, deka penuh laban mensia. Anang takut, laban nuan enda dikemaluka. Nuan enda dipechat. Nuan deka badu agi ingatka diri ti udah enda tetap ati lebuh nuan agi biak, enggau pasal diri ke balu lalu diau seilu-ilu. Allah Taala ti ngaga nuan deka nyadika laki nuan. Nama Iya TUHAN ti Pemadu Bekuasa. Allah Taala ke disembah orang Israel ti kudus deka nebus nuan. Iya nya ke merintah semua dunya. Israel, nuan baka bini ke agi biak, ke ditinggalka laki, lalu balat tusah ati. Tang TUHAN ngangauka nuan pulai baru ngagai Iya. Ku iya: “Aku ninggalka nuan sekejap aja. Aku deka ngambi nuan pulai baru enggau ati ti balat rindu. Aku nguingka Diri ari nuan enda lama, laban Aku ringat, tang Aku deka ngayanka pengerindu Aku ngagai nuan belama iya.” Pia ku TUHAN ti nebus nuan bejaku. “Lebuh maya Noah menya, Aku besemaya enda agi ngampuhka dunya ngena ai bah. Diatu Aku besemaya enda agi ringat ngagai nuan. Aku enda nganu tauka ngukum nuan. Bukit enggau munggu nyangka tau tumpur, tang pengerindu Aku ke nuan enda nemu abis. Aku deka ngingatka sempekat pemaik Aku belama iya.” Pia ku TUHAN ti rinduka nuan bejaku. Ku TUHAN bejaku, “O Jerusalem, nuan nengeri ti merinsa, ti nadai daya, ti nadai orang merindang. Aku deka ngaga pugu nuan baru ngena batu ti berega. Aku deka ngaga menara nuan ngena batu sejabu pintu kuta nuan ngena batu ti beperenching baka api, enggau dinding ti ngelingi nuan ngena batu ti berega. “Aku Empu deka ngajar bala nembiak nuan lalu meri sida pengaya enggau pemaik. Atur ti betul enggau pengelurus deka ngasuh nuan kering. Nuan deka diau likun ari orang ke nekanka pengidup enggau ari utai ti balat ngenakut. Barang sapa nyerang nuan, ngereja nya ukai ari asuh Aku. Barang sapa ngelaban nuan, deka alah. “Aku tu ke ngaga tukang kambuh, ke nungkunka api lalu ngambuh senyata. Aku mega ngaga soldadu ke bekenaka senyata bebunuhka munsuh. Tang nadai senyata ti digaga ulih ngemediska nuan lalu nuan deka nyaut semua orang ke besalah nuan. Aku deka bejaku ngarika bala nembiak Aku lalu meri sida pemenang.” TUHAN udah bejaku. Ku TUHAN bejaku, “Datai kitu, semua kita ke aus, tu ai amat! Datai kitu, kita ke nadai duit, terima meh gandum enggau enda bebayar, lalu empa! Datai kitu! Irup wain enggau ai tusu, enggau enda bebayar! Nama kebuah bebelika utai ti enda ngasuh kita kenyang? Nama kebuah ngena duit ari gaji kita, tang agi lapar? Pendingka Aku, lalu kereja utai ti diasuh Aku, nya baru kita deka makai pemakai ti pemadu manah. “Anang enda mending diatu, kita ke nembiak Aku, lalu datai ngagai Aku. Datai ngagai Aku, lalu kita deka bulih pengidup! Aku deka ngaga siti sempekat ti meruan belama iya enggau kita lalu meri kita berekat ti udah disemaya Aku ngagai David. Aku udah ngaga David nyadi tuai, enggau nyadika kepala ke mayuh bengkah bansa, lalu ulih iya, Aku udah ngayanka kuasa Aku ngagai sida. Diatu kita deka mesanka semua bansa ti enda ditemu kita. Dulu suba sida enda nemu kita, tang diatu sida deka belanda datai lalu begulai enggau kita! Aku TUHAN Allah Taala kita, Allah Taala ke disembah orang Israel ti kudus, deka ngasuh semua utai tu nyadi. Aku deka meri kita basa enggau mulia.” Kuingka diri ngagai TUHAN, lalu besampi ngagai Iya, laban Iya diatu nyau semak. Awakka orang ke jai, ninggalka jalai pengidup sida lalu ngubah chara sida berunding. Awakka sida nguingka diri ngagai TUHAN Allah Taala kitai. Iya endang kasih, lalu jampat ngampun. Ku TUHAN bejaku, “Runding Aku enda baka runding kita, lalu jalai Aku enda baka jalai kita. Baka langit ti tinggi ari atas tanah, baka nya meh jalai enggau runding Aku tinggi agi ari jalai enggau runding kita. “Leka jaku Aku baka seleju enggau ujan ti labuh ari langit lalu meri ai ngagai dunya. Sida ngasuh utai ti ditanam tumbuh lalu mansutka benih ngambika bisi ditanam, enggau pemakai ngambika bisi diempa. Baka nya meh jaku ti pansut ari mulut Aku. Iya tetap deka mujur ngereja utai ti udah diperambu Aku ke iya. Iya deka ngereja utai ti diasuh Aku kereja iya. “Kita deka ninggalka menua Babilon enggau ati ti gaga. Kita deka diiring pansut ari nengeri nya dalam pemaik. Bukit enggau munggu deka inggar belagu, lalu kayu deka manjung gaga ati. Kayu saipris deka tumbuh ba endur alai madang emperingat ti tumbuh diatu. Kayu maitel deka tumbuh nganti madang duri. Tu deka nyadika tanda ti tan belama iya, kena ngingatka utai ti udah dikereja Aku ti TUHAN.” Ku TUHAN bejaku ngagai bala nembiak Iya, “Kereja utai ti lurus sereta ngena, laban Aku deka ngelepaska kita enda lama da agi. Aku deka merekatka orang ke seruran ngintu Hari Sabat, lalu enda ngamahka hari nya. Aku deka merekatka orang ke enda ngereja penyai.” Orang ari menua bukai ti diau begulai enggau nembiak TUHAN, enda patut nyebut, “ TUHAN enggai ngemendarka aku besembiang enggau bala nembiak Iya.” Orang ke udah dipeliri, enda tau berunding ngumbai diri enda tau nyadi raban nembiak Allah Taala, ketegal iya enda ulih bisi anak. Ku TUHAN bejaku ngagai orang ke baka nya, “Enti nuan ngintu Hari Sabat kena nuan ngemesaika Aku, lalu enti nuan ngereja utai ti ngerinduka ati Aku, lalu tetap ati ngasika sempekat Aku, nya baru nama nuan deka dikingatka dalam Rumah Aku, enggau ba bala nembiak Aku, lama agi ari enti nuan bisi anak lelaki enggau anak indu. Nuan deka dikingatka belama iya.” Lalu ku TUHAN bejaku enggau bala orang kampar ti udah nyadi raban nembiak TUHAN, ti rinduka Iya, lalu betuaika Iya, ke ngintu Hari Sabat sereta ngasika sempekat Iya enggau ati ti tetap: “Aku deka mai kita ngagai Sion, bukit Aku ti kudus, meri kita ati ti gaga dalam rumah sembiang Aku, lalu nerima piring ti diberi kita ba alta Aku. Rumah Aku deka dikumbai rumah sembiang ke orang ari semua bansa.” TUHAN ti Pemadu Tinggi, ti udah mai bala nembiak Iya Israel pulai ari menua alai sida ke udah dibuai, udah besemaya madahka Diri deka mai orang bukai nyadika raban sida. TUHAN udah ngasuh bansa bukai datai baka jelu babas, lalu makai bala nembiak Iya. Ku Iya, “Semua bala tuai, ke dikarapka Aku meri jaku tangkan ngagai bala nembiak Aku, buta magang! Sida nadai nemu utai. Sida baka ukui ti dikarapka jaga tang enda nemu nyalak. Sida semina gali lalu bemimpi. Naka meh peneka sida tinduk! Sida nya baka ukui ti bam, ti nadai nemu kenyang. Bala tuai tu nadai nemu reti utai. Genap iku sida ngereja utai nitihka peneka ati diri, lalu ngambi ulih ke diri empu. Ku bala pemabuk tu bejaku, ‘Aram ngambi wain lalu ngirup enggau naka ulih! Pagila deka manah agi ari sehari tu!’ ” Orang ke manah mati, lalu nadai orang mereti tauka ibuhka sida. Tang lebuh sida mati, penusah nadai agi ulih ngemediska sida. Orang ke idup menyana, deka tetemuka pemaik lalu belelak lebuh sida mati. Datai kitu kita orang ke bedosa, ngambika kita diakim! Kita tu nadai lebih ari manang, tauka orang ke butang, tauka indu sundal. Sapa ke dikeduan kita? Kita orang ke bula, sapa ke dikeleseka kita? Kita beleman di baruh kayu keramat kita, kena kita nyembah petara ti ngasuh peridi. Kita nyerahka bala anak kita nyadika piring dalam lubang gua ti semak sungai. Kita ngambi batu ti alus ari endur nya, lalu nyembah batu nya nyadika petara. Kita nuang wain nyadika piring ti diberi kita ngagai sida, lalu mai ngagai sida piring tepung. Kati kita ngumbai Aku rinduka semua utai nya? Kita niki ngagai bukit ti tinggi ngenjuk piring lalu beleman enggau pangan diri. Kita nirika engkeramba kita ke kamah ngimbai mua pintu kita ari dalam. Kita ninggalka Aku. Kita muka gari kita, lalu niki ngagai katil kita ke besai, ngagai ambai kita ke digaji kita tinduk enggau kita. Dia meh alai kita ngemuaska ati diri ti kanji. Kita ngena minyak wangi enggau minyak unsut, lalu mansang nyembah petara Molek. Kita ngirumka bala seruan ngagai mayuh bengkah menua, nyentuk ke ngagai dunya pemati, begigaka petara ti deka disembah kita. Kita nyau lelak begigaka petara bukai, tang kita enda nemu badu. Kita ngumbai engkeramba kita ke kamah nya ulih meri kita pengering ngambika kita enda lembut tulang. Ku TUHAN bejaku, “Sapa petara nya ti ngasuh kita takut, datai ke kita nyau madahka utai ti bula ngagai Aku, lalu enda agi ingatka Aku? Kati kita badu ngemesaika Aku laban Aku lama udah enda bemunyi? Kita ngumbai utai ti dikereja kita nya utai ti ngena, tang Aku deka mandangka semua ulah kita, lalu engkeramba kita enda ulih nulung kita. Lebuh kita nyabak minta tulung, awakka bala engkeramba kita ngelepaska kita! Kesuh ribut aja ulih ngebuka sida! Tang orang ke manggaika diri ba Aku, deka idup di menua tu lalu deka nyembah Aku dalam Rumah Aku.” Ku TUHAN bejaku, “Awakka bala nembiak Aku pulai ngagai Aku baru. Buai semua utai ti nekul jalai sida! Gaga lalu sediaka jalai raya! “Aku tu Allah Taala ti tinggi, ti kudus, ti idup belama iya. Aku diau ba endur ti tinggi sereta kudus, tang Aku mega diau begulai enggau bala nembiak Aku ke baruh ati sereta udah nesal ati ke dosa sida, ngambika Aku ulih mulaika ati ti kempang enggau pengadang ngagai sida baru. Aku udah meri nembiak Aku pengidup, lalu Aku enda agi majak besalah sida, tauka ringat ngagai sida belama iya. Suba Aku udah ringat ngagai sida ketegal dosa enggau pengamu sida. Nya alai Aku ngukum sida lalu ngelengkaka sida. Tang sida kieh, lalu majak nitihka jalai sida empu. “Aku udah meda jalai sida ngereja utai, tang Aku deka ngeraika sida. Aku deka nguluka sida, lalu nulung sida, lalu Aku deka merindang sida ke ngulit. Aku meri pemaik ngagai semua orang ke semak enggau ke jauh! Aku deka ngeraika nembiak Aku. Tang orang ke jai deka nyadi baka tasik ti enda ngetu begelumbang, ti enda nemu badu ngalun ngagai tebing, mai pengamah enggau tanah luchak. Orang ke bedosa sigi nadai pengelikun,” ku TUHAN bejaku. Ku TUHAN bejaku, “Peradakka nyawa nuan enggau naka penginggar! Padahka ngagai nembiak Aku penyalah sida, padahka ngagai orang Israel dosa sida! Sida nyembah Aku tiap hari, madahka diri keran deka nemu jalai Aku sereta ngasika adat Aku. Sida madahka diri minta Aku meri sida adat ti lurus, lalu madahka diri gaga ati nyembah Aku.” Ku sida nanya, “Nama kebuah kami bepasa, enti Nuan enda meda kami? Nama kebuah kami ngemaruhka diri, enti Nuan enda bedulika kami?” Ku TUHAN bejaku ngagai sida, “Iya ti bendar, lebuh kita bepasa, kita ngereja utai kena kita ngulihka penguntung ke diri empu lalu kita nekanka pengidup orang ke gawa ke kita. Kita mangah lebuh kita bepasa, lalu kita belaya lalu berekak. Kati kita ngumbai bepasa ti baka nya ulih nyungkak Aku mendingka sampi kita? Lebuh kita bepasa, kita endang sengaja ngemediska diri empu; kita kunduk-kunduk baka daun rumput, lalu gali malai kain guni enggau amau. Kati nya gaya utai ti dikumbai kita bepasa? Kati kita ngumbai Aku rinduka utai ti baka nya? “Baka tu ku gaya bepasa ti dikedekaka Aku: muai rantai ti nekanka pengidup orang, muka tali tangkun ti merinsaka sida, ngelepaska orang ke kena perinsa, lalu matahka semua kungkung; magi pemakai kita enggau orang ke lapar; ngelaluka orang ke seranta, ke nadai endur alai diau ke dalam rumah kita; meri gari ngagai orang ke nadai gari; lalu nulung kaban belayan kita empu. Nya baru penampak kita deka manchar baka mata hari ti tumbuh pagi hari, lalu telih kita deka lengkas suman. Pengelurus kita deka bejalai dulu ari kita, lalu mulia TUHAN deka nyaga kita ari belakang. Udah nya, lebuh kita ngangauka TUHAN, Iya deka nyaut. Lebuh kita ngangauka Iya, Iya deka nyebut, “Tu Aku”. “Enti kita badu agi nekanka pengidup orang, badu agi mechat orang, lalu badu agi bejaku jai; enti kita meri pemakai kita ngagai orang ke lapar, lalu ngemuaska ati orang ke suntuk, nya baru penampak kita deka manchar dalam pemetang, lalu pemetang ti ngelingi kita deka nyadi baka penampak tengah hari. Lalu TUHAN deka seruran ngiring kita lalu ngemuaska kita enggau utai ti manah, lalu ngasuh kita kering; lalu kita deka nyadi baka kebun ti selalu dipanjah enggau ai, baka mata ai ti nadai nemu langkang. Nengeri kita ke udah runtuh, deka didirika baru; Kita deka nirika iya baru ba endur asal iya; Orang deka ngumbai kita orang ke nirika dinding kuta ti udah rusak, ke ngaduka rumah ti udah rusak ngambika bisi alai diau.” Enti kita bebasaka Hari Sabat lalu enda ngereja utai ti dikedekaka kita empu ba hari Aku ti kudus nya, tang gaga ati ke hari nya, lalu ngumbai hari nya hari ti patut dibasa; enti kita bebasaka hari nya lalu enda gawa, enda ngelantangka diri, lalu berandau ngapa ba hari nya, nya baru kita deka gaga ati ke TUHAN, lalu Aku deka ngasuh kita dibasa semua orang di serata dunya. Aku deka nupi kita ngena pesaka aki kita Jakop. TUHAN udah bejaku.” Anang ngumbai TUHAN lemi lalu enda ulih ngelepaska kita, tauka bengal lalu enda ulih ningaka kangau kita. Penyai kita empu ti udah nyeraraka kita ari Allah Taala kita; dosa kita empu ti udah ngelalaika mua Iya ari kita, ngambika Iya enda ninga. Laban jari kita udah kamah laban darah, lalu tunjuk kita udah kamah laban penyai. Mulut kita udah bula, lalu dilah kita nyebut utai ti jai. Kita mansang ngagai kot, tang ukai laban kita deka meri atur ti lurus. Kita ngarapka pemula ngasuh kita menang. Kita bejalaika pelan kita ke deka ngemediska orang. Kita seruran berunding deka ngereja penyai, lalu kita nyau enda teantika diri ngereja utai nya. Kita nadai kakang ati munuh orang ke nadai penyalah. Kita ngerusak lalu ngaga utai nyadi tembawai di sebarang endur kita bejalai. Nadai orang ulih diau likun lebuh kita bisi. Semua utai ti dikereja kita endang nadai lurus siti. Jalai kita bingkuk, lalu nadai orang ke niti jalai nya ulih diau likun. Ku orang mayuh bejaku, “Diatu baru kami nemu kebuah Allah Taala enda ngelepaska kami ari orang ke nekanka pengidup kami. Kami ngarapka penampak deka nenggau jalai kami lebuh kami bejalai, tang semina pemetang aja ti bisi, lalu kami bejalai gapa-gapa baka orang ke buta. Kami tesangkut lebuh tengah hari, baka ke bejalai lebuh malam hari, baka ke bejalai dalam pemetang dunya pemati. Kami takut sereta tusah ati. Kami inginka Allah Taala ngelepaska kami ari pengidup ti ditekanka orang enggau ari utai ti salah, tang nadai ga Iya nulung kami. “ TUHAN, kami endang mayuh penyalah ngelaban Nuan. Dosa kami bedawaka kami, lalu kami nemu semua nya. Kami udah angkat ngelaban Nuan, nulak Nuan, lalu enggai nitihka Nuan. Kami udah nekanka pengidup orang bukai, lalu udah limpang ari Nuan. Kami berundingka utai ti bula, lalu semua leka jaku kami bula magang. Atur ti lurus dibuai, lalu atur ti ngena enda ulih datai semak. Pemendar tesangkut ba padang di puak nengeri, lalu ati ti betul sigi nadai tempat ba endur nya. Ati ti betul endang semina mimit aja, datai ke orang ke badu ngereja penyai nyau nemu diri diperinsaka orang ke ngereja penyalah.” TUHAN udah meda utai nya, lalu Iya enda lantang ati laban Iya nadai meda atur ti lurus. Iya alit ati meda orang nadai nulung orang ke kena tekan. Nya alai Iya deka ngena kuasa Iya Empu ngelepaska sida, lalu bulih pemenang. Iya deka ngena atur ti lurus baka ke ngena baju kebal, enggau kuasa pengelepas, baka ke ngena selapuk kebal. Iya deka ngembuan ati ti keran deka ngaduka utai ti salah nyadi utai ti ngena, lalu ngukum sereta malas atur ti enda lurus, ti ditatka orang mayuh. Iya deka ngukum bala munsuh Iya nitihka utai ti udah dikereja sida, nyengkaum orang ke diau di menua ti ba tebing tasik. Semua orang di timur enggau di barat, deka nangika Iya, sereta nangika kuasa Iya ti besai. Iya deka datai baka ai sungai ti deras, baka ribut ti balat. Ku TUHAN bejaku ngagai bala nembiak Iya, “Aku deka datai ngagai Jerusalem laban Aku deka bejaku ngarika kita, lalu nyelamatka semua kita ke nesal ati ke dosa kita. Lalu Aku ngaga siti sempekat enggau kita: Aku udah meri kita kuasa, enggau jaku ajar nyadika pesaka kita belama iya, lalu kenyau ari diatu kita enda tau enda ngasika Aku, lalu ngajar bala anak enggau peturun kita ngasika Aku belama iya.” Angkat, Jerusalem, lalu manchar baka mata hari. Mulia TUHAN manchar ngagai nuan! Semua bansa bukai deka dibap pemetang, Tang penampak TUHAN deka manchar ngagai nuan. Penampak mulia Iya deka meruan enggau nuan. Semua bansa deka datai ngagai penampak nuan, lalu bala raja deka datai ngagai penampak hari nuan ti baru. Perening ngagai utai ti ngelingi nuan, lalu peda utai ti nyadi: Bala nembiak nuan begempuru laban sida deka pulai baru ngagai menua sida empu! Bala anak lelaki nuan deka datai ari menua ti jauh. Bala anak indu nuan deka dibai baka ke mai anak mit. Nuan deka meda nya, lalu ati nuan deka penuh laban pengaga. Nuan deka getar-getar gagit ati. Pengaya semua bansa deka dibai ngagai nuan. Pengaya sida deka datai ari tasik luar. Rintai bala unta deka datai ari Midian enggau ari Epah. Sida deka datai ari Sheba, mai emas enggau menyan. Orang mayuh deka madahka berita ti manah pasal utai ti udah dikereja TUHAN! Semua jelu bedus di Kedar enggau di Nebaiot Deka dibai ngagai nuan nyadika piring Lalu diserahka ba alta kena ngerinduka ati TUHAN. TUHAN deka ngaga Rumah Sembiang Iya bemulia agi ari ti udah. Sapa orang nya ke ngelayang baka remang, Baka burung achang ti pulai ngagai tansang? Sida nya kapal ti datai ari menua ti ba tebing tasik, Mai bala nembiak Allah Taala pulai ngagai menua sida empu. Sida mai pirak enggau emas Kena ngemesaika nama TUHAN, Allah Taala ke disembah orang Israel ti kudus, Ke udah ngasuh semua bansa masa bala nembiak Iya. Ku TUHAN bejaku ngagai Jerusalem, “Orang bansa bukai deka nirika dinding kuta nuan baru, Lalu bala raja sida deka betuaika nuan. Lebuh Aku ringat suba, Aku ngukum nuan, Tang diatu Aku deka ngayanka pengerindu enggau pengasih Aku ke nuan. Pintu kuta nuan deka tebuka siang malam, Ngambika raja ari mayuh bengkah bansa Mai pengaya sida ngagai nuan. Tang bansa ti enda betuaika nuan Deka abis dirusak. “Ramu ti digaga ari kayu pain, juniper, enggau ari saipris, Kayu ti pemadu manah ari utan menua Lebanon, Deka dibai kena nirika nuan baru, Jerusalem, Kena ngemanahka gaya Rumah Aku, Kena ngemuliaka nengeri Aku. Peturun orang ke udah nekanka pengidup kita, deka datai lalu meremi masa nuan. Semua orang ke udah mechat nuan, deka nyembah di kaki nuan. Sida deka ngumbai nuan ‘Nengeri TUHAN,’ ‘Sion, Nengeri Allah Taala ke disembah orang Israel ti kudus.’ “Nuan enda agi ditinggal lalu dipegedika, Nengeri ti ditinggalka sereta nadai orang nguan. Aku deka ngaga nuan besai sereta manah gaya, Nyadika endur alai pengaga deka meruan belama lama iya. Semua bansa enggau raja deka ngintu nuan Baka indai ke nusuka anak diri. Nuan deka nemu, Aku ti TUHAN udah nebus nuan, nemu Allah Taala ke disembah orang Israel ti bekuasa udah nebus nuan. “Aku deka mai emas ngagai nuan, ukai mai temaga, Pirak enggau temaga, ukai besi enggau kayu, Mai besi, ukai mai batu. Orang ke merintah nuan enda agi nekanka pengidup nuan. Aku deka ngasuh sida merintah enggau lurus sereta enggau pemaik. Orang ke bamuk nadai agi didinga. Pengerusak nadai agi ngerusak menua nuan. Aku deka ngelindung sereta nyaga nuan baka dinding kuta. Nuan deka muji Aku, laban Aku udah nyelamatka nuan. “Nuan enda agi begunaka penampak mata hari lebuh siang hari Tauka penampak bulan lebuh malam hari, Laban Aku ti TUHAN deka nyadika penampak nuan belama iya. Penampak mulia Aku deka manchar ngagai nuan. Nuan enda agi tusah ati Laban Aku ti TUHAN deka nyadika penampak nuan belama iya, Ti tan lama agi ari mata hari enggau bulan. Semua bala nembiak nuan deka ngereja utai ti ngena, Lalu deka bempu menua tu belama iya. Aku udah nanam sida, Aku udah ngaga sida, Kena mandangka pemesai kuasa Aku ngagai semua mensia. Indah suku raban bansa ti pemadu mit, ti pemadu baruh pendiau Deh deka besai kuasa, baka bansa ti besai kuasa. Lebuh maya ti ngena datai, Aku deka ngasuh utai tu lengkas nyadi. Aku tu TUHAN!” TUHAN ti Pemadu Tinggi udah ngiri aku enggau Roh Kudus Iya. Iya udah milih aku, lalu ngasuh aku Mai berita manah ngagai orang ke seranta, Nyumanka ati orang ke tusah, Madahka pengelepas ke orang ke kena tangkap Enggau pengelepas ke orang ke dalam rumah jil. Iya udah ngasuh aku madahka Maya udah datai Alai TUHAN deka nyelamatka nembiak Iya Lalu ngalahka bala munsuh sida. Iya udah ngasuh aku merindang semua orang ke ngulit, Meri ngagai sida ke ngulit di Sion Pengaga enggau pengelantang, kena nganti ati ti tusah, Pantun puji, kena nganti ati ti sinu. Sida deka nyadi baka kayu Ti ditanam TUHAN. Semua sida deka ngereja utai ti ngena, Lalu Allah Taala deka dipuji ketegal semua utai ti udah dikereja Iya. Sida deka ngaga nengeri ti tembawai nyadi nengeri ti baru. Nembiak Aku, orang bansa bukai deka betuaika kita. Sida deka ngintu raban jelu tupi kita Lalu bumai ke kita, lalu ngintu kebun anggur kita. Lalu kita deka dikumbai bala imam TUHAN, Bala nembiak Allah Taala kitai. Kita deka ngelantangka diri ngena pengaya ari mayuh bengkah bansa Lalu temegahka utai ti diempu kita. Pemalu enggau penyai kita udah abis. Kita deka diau di menua kita empu, Lalu pengaya kita deka betambah dua kali lipat. Pengaga kita deka meruan belama iya. Ku TUHAN bejaku, “Aku rinduka atur ti lurus, lalu Aku begedika pengawa ti nekanka pengidup orang, enggau kereja ti salah. Aku tetap deka ngupah bala nembiak Aku Lalu ngaga sempekat ti meruan belama iya enggau sida. Sida deka tebilang nama ba semua bansa. Genap iku orang ke meda sida deka nemu Sida nya endang orang ke udah diberekatka Aku.” Jerusalem rami gaga ketegal utai ti udah dikereja TUHAN. Jerusalem nyau baka indu ke udah begari sedia deka ditikah. Allah Taala udah ngerasukka pengelepas enggau pemenang ngagai iya. Baka leka benih ti tetap deka matuk lalu tumbuh, Baka nya meh TUHAN ti Pemadu Tinggi deka nyelamatka bala nembiak Iya, Lalu semua bansa deka muji TUHAN. Aku deka bejaku meransang Jerusalem. Aku enggai badu bejaku datai ke udah diselamatka, Lalu pemenang iya manchar terang baka lampu lebuh malam hari. Jerusalem, semua bansa deka meda nuan menang! Semua raja sida deka meda mulia nuan. Nuan deka dikumbai ngena nama ti baru, Nama ti diberi TUHAN Empu. Nuan deka nyadi baka makota ti manah gaya ke TUHAN. Nuan enda agi dikumbai “Ditinggalka” Lalu menua nuan enda agi dikumbai “Bini ke Ditinggalka.” Nama baru nuan nya “Allah Taala Gaga Ati Ke Iya.” Menua nuan deka dikumbai, “Lantang Ati Belaki,” Laban TUHAN gaga ati ke nuan Lalu Iya deka nyadi baka laki ke menua nuan. Baka orang bujang ke ngambi siku dara bungas nyadika bini iya, Baka nya meh Iya ti udah ngaga nuan, deka jadi enggau nuan. Baka laki ke gaga ati ke bini iya, Baka nya meh Allah Taala deka gaga ati ke nuan. Aku udah ngengkahka bala jejaga ba atas dinding kuta nuan, Jerusalem. Sida enda tau enda bemunyi siang malam. Sida enda tau enda ngasuh TUHAN ngamatka semaya Iya Lalu enda tau sekali-kali nejuka Iya enda ingatka semaya Diri. Sida enda tau nejuka Iya belelak, datai ke Iya udah nirika nengeri Jerusalem baru Lalu ngaga nengeri nya nyadika nengeri ti dipuji orang di serata dunya. TUHAN udah besemaya ngena sumpah Lalu ulih kuasa Iya, Iya deka ngamatka semaya nya: “Gandum nuan enda agi nyadika pemakai munsuh, Lalu orang bansa bukai enda agi ngirup wain nuan. Tang kita ke nanam enggau ngetau gandum Deka makai roti nya lalu muji TUHAN. Kita ke ngintu kebun lalu ngetau buah anggur Deka ngirup wain nya ba tengah laman Rumah Aku.” Orang Jerusalem, pansut kita ari nengeri tu Lalu gaga sebatang jalai raya ke bala kita ke deka pulai ari menua bukai! Sediaka jalai raya ti besai. Buai batu ari jalai raya nya! Dirika siti tanda ngambika semua bansa nemu TUHAN madahka ngagai semua dunya: “Padahka ngagai orang Jerusalem Pasal TUHAN ti deka datai lalu nyelamatka kita, Ke deka mai sama enggau Iya orang ke udah diselamatka Iya.” Kita deka dikumbai “Nembiak Allah Taala ti kudus,” “Orang Ke Udah Diselamatka TUHAN.” Jerusalem deka dikumbai, “Nengeri Ti Dikerinduka Allah Taala,” “Nengeri Ti Enda Ditinggalka Allah Taala.” “Sapa orang nya ke datai ari nengeri Bosrah di menua Edom? Sapa orang nya ke ngena pekayan ti mirah, ke bejalai ngena kuasa enggau pengering?” Iya nya TUHAN ti bekuasa, ke kering nyelamat, ke datai madahka pemenang Diri. “Nama kebuah pekayan iya ngemalat nya mirah, baka gari orang ke udah ngindik buah anggur kena ngaga wain?” Ku TUHAN nyaut, “Aku udah ngindik semua bansa baka buah anggur, lalu nadai orang datai nulung Aku. Aku ngindik semua bansa laban Aku ringat, lalu darah sida udah ngamahka pekayan Aku. Aku udah mutuska runding, maya udah datai alai Aku patut nebus bala nembiak Aku, lalu ngukum munsuh sida. Aku tekenyit ati lebuh Aku malik lalu nadai meda orang nulung Aku. Tang pengeringat Aku ngasuh Aku kering, lalu Aku menang. Aku ringat lalu ngindik semua bansa lalu ngalahka sida, lalu Aku mubuhka darah sida ba tanah.” Aku deka madahka pasal pengerindu TUHAN ti meruan belama iya. Aku muji Iya ketegal semua utai ti udah dikereja Iya ke kitai. Iya udah meri mayuh berekat ngagai orang Israel, ketegal pengasih enggau pengerindu Iya ti meruan. Ku TUHAN bejaku, “Sida nya nembiak Aku. Sida enggai nipu Aku.” Nya alai Iya ngelepaska sida ari semua pemerinsa sida. Ukai melikat tang TUHAN Empu ke nebus sida. Iya nebus sida ketegal pengerindu enggau penyiru Iya ke sida. Dulu kelia Iya endang seruran ngibun sida, tang sida angkat ngelaban Iya, lalu ngenusahka ati Iya. Nya alai TUHAN nyadika munsuh sida, lalu beperang ngelaban sida. Tang sida ingatka utai ti udah nyadi dulu kelia lebuh rambau nembiak TUHAN ke benama Moses, sida lalu nanya, “Dini alai TUHAN diatu, TUHAN ke udah nyelamatka bala tuai nembiak Iya ari tasik? Dini alai TUHAN ke udah meri Roh Kudus Iya ngagai Moses? Baka raban sapi ti diuluka ngagai lebak ti ami, baka nya meh TUHAN ngasuh bala nembiak Iya belelak. Iya nguluka bala nembiak Iya lalu mai basa ngagai nama Iya. TUHAN, malik ngagai kami ari serega, alai Nuan ti diau dalam pengudus enggau mulia. Kini ke tunga penyiru Nuan ke kami? Kini ke tunga kuasa Nuan? Kini ke tunga pengerindu enggau penyiru Nuan? Anang enda ibuhka kami, laban Nuan endang Apai kami. Aki kami Abraham enggau Jakop enda ngelala kami, tang Nuan, TUHAN, endang Apai kami, ke nebus kami. Nama kebuah Nuan nejuka kami limpang ari jalai Nuan? Nama kebuah Nuan ngasuh kami balat kieh, datai ke kami nyau ninggalka Nuan? Pulai ngagai kami baru, ketegal sida ke betuaika Nuan, ketegal orang ke endang seruran enggi Nuan. Kami, bala nembiak Nuan ti kudus tu, udah diburu bala munsuh kami enda lama. Sida udah ngelunjak endur Nuan ti kudus. Nuan ngaga kami baka orang ke nadai udah kala diperintah Nuan, baka ke nadai udah kala nyadi nembiak Nuan. Nama kebuah Nuan enda nyarikka langit lalu nurun? Bukit deka meda Nuan lalu getar-getar takut. Sida deka begetar baka ai ti melidih dipanduk. Datai meh Nuan kitu lalu pandangka kuasa Nuan ngagai bala munsuh Nuan, ngambika semua bansa begetar di mua Nuan! Nuan menya udah kala datai lalu ngereja utai ti balat ngenakut, ti enda disangka kami. Bukit tepedaka Nuan, lalu sida getar-getar takut. Nadai orang udah kala meda tauka ninga Allah Taala bukai ti baka Nuan, ti ngereja pengawa ti baka nya ke orang ke manggaika pengadang sida ba iya. Nuan nerima orang ke gaga ati ngereja utai ti ngena, ke ingatka gaya pendiau ti dikedekaka Nuan. Nuan udah ringat ngagai kami, tang kami majak bedosa. Taja pen Nuan udah balat ringat, kami majak ngereja utai ti salah kenyau ari dulu kelia. Semua kami tu udah bedosa magang. Indah pengawa ti pemadu manah deh nyadi kamah. Ketegal dosa kami, kami tu nyau baka daun ti layu lalu dikebuka ribut. Nadai siku orang besampi ngagai Nuan. Nadai siku orang mansang ngagai Nuan minta tulung. Nuan udah ngelalaika Diri ari kami, lalu udah ninggalka kami ketegal dosa kami. Tang Nuan, TUHAN, endang Apai kami. Kami tu baka tanah liat, lalu Nuan baka tukang periuk. Nuan udah nempa kami, nya alai anang kelalu ringat ngagai kami, tauka besalah kami belama iya ketegal dosa kami. Kami tu nembiak Nuan. Kasihka kami. Nengeri Nuan ti kudus nyau baka menua puang. Jerusalem udah nyadi tembawai ti nadai orang nguan, lalu Rumah Sembiang kami, endur ti kudus sereta manah gaya nya, alai bala aki ini kami muji Nuan, udah dirusak ngena api. Semua endur ti dikerinduka kami, udah nyadi tembawai magang. TUHAN, kati Nuan enda sinu ati ke semua utai tu? Kati Nuan enggai ngereja utai tang nejuka kami merinsa lebih ari ti ulih ditatka kami? Ku TUHAN bejaku, “Aku sedia deka nyaut sampi bala nembiak Aku, tang sida enda besampi. Aku sedia minta Diri ditemu sida, tang sida enda ngiga Aku. Orang Israel enda besampi ngagai Aku, taja pen Aku endang seruran sedia deka nyaut, ‘Tu Aku ditu. Tu Aku ditu.’ Aku endang seruran sedia deka nerima bala nembiak Aku, ti seruran kieh deka ngereja utai ti salah, lalu nitihka jalai sida empu. Sida enda nemu malu ke diri ke seruran nyungkak Aku ringat. Sida ngenjuk piring ba kebun petara orang kapir lalu nunu menyan ba alta petara nya. Lebuh malam hari sida mansang ngagai lubang gua enggau ngagai lumbung, deka betanyaka utai ngagai roh orang ke udah mati. Sida makai dagin babi lalu ngirup kuah ti digaga ari dagin ti udah diberi nyadika piring ngagai petara orang kapir. Udah nya sida lalu nyebut ngagai orang bukai, ‘Anang semak kami. Kami tu kudus lalu enda tau ditegu kita!’ Aku enda tan meda orang ke baka nya. Aku ringat ngagai sida baka api ti enda nemu padam. “Aku endang udah ngeletak ukum ke sida, lalu ukum sida udah ditulis. Aku enda tau enda ibuhka utai ti udah dikereja sida, lalu deka malas sida ketegal dosa sida enggau ketegal dosa aki ini sida. Sida udah nunu menyan ba rumah sembiang orang kapir ba atas munggu, lalu udah bejaku jai pasal Aku. Nya alai Aku deka ngukum sida nitihka utai ti udah dikereja sida.” Ku TUHAN bejaku, “Orang enda ngerusak buah anggur ti manah, tang sida ngena buah nya begagaka wain. Aku pen enda mega ngerusak semua nembiak Aku - Aku deka nyelamatka sida ke betuaika Aku. Aku deka merekatka orang Israel ke ari raban bansa Judah, lalu peturun sida deka bempu menua Aku ti bebukit. Bala nembiak ke dipilih Aku, ke betuaika Aku, deka diau dia. Sida deka nyembah Aku lalu deka nguluka jelu bedus enggau jelu sapi sida ngagai padang rumput ba Emperan Saron di barat enggau ba Emperan Penusah di timur. “Tang utai ti lain agi ari nya deka nyadi ba kita ke udah ninggalka Aku, ke nulak Sion, bukit Aku ti kudus, lalu nyembah Gat seduai Meni, iya nya petara penguntung enggau nasit. Kita deka mati dibunuh orang, laban kita enda nyaut lebuh Aku ngangauka kita, lalu kita enda mending lebuh Aku bejaku. Kita endang sengaja enggai ngasika Aku lalu kita ngereja penyai. Nya alai Aku madahka ngagai kita, orang ke nyembah sereta ngasika Aku deka mayuh utai diempa enggau utai diirup, tang kita deka lapar sereta aus. Sida deka diau lantang, tang kita deka dipechat. Sida deka belagu gaga ati, tang kita deka nyabak tusah ati. Nembiak ti udah dipilih Aku deka ngena nama kita nyadika leka jaku sumpah. Aku TUHAN ti Pemadu Tinggi, deka munuh kita. Tang Aku deka meri nama ti baru ngagai orang ke ngasika Aku. Barang sapa minta berekat di menua tu, deka minta diri diberekatka Allah Taala ti tetap ati. Barang sapa besumpah, deka besumpah atas nama Allah Taala ti tetap ati. Penusah ti dulu kelia nadai agi nyadi, lalu enda agi dikingatka. Ku TUHAN bejaku, “Aku ngaga langit ti baru enggau dunya ti baru. Semua utai ti lama, enda agi dikingatka. Lantang lalu rami gaga belama iya meh kita, ke utai ti digaga Aku. Jerusalem ti baru, ti digaga Aku deka gaga ati, lalu orang ke diau dalam iya deka lantang. Aku Empu deka gaga ati ketegal Jerusalem enggau nembiak iya. Orang dia nadai nyabak agi, tauka kaung-kaung ngangau minta tulung. Anak mit enda mati lebuh sida agi mit, lalu semua orang deka gayu-guru magang. Sida ke manggai seratus taun, deka dikumbai agi biak. Enti sida mati sebedau nya, nya tanda Aku udah ngukum sida. Pengawa sida deka mujur, lalu bala anak sida enda dituntung penusah. Aku deka merekatka sida, enggau peturun sida belama iya. Indah sebedau sida badu besampi ngagai Aku, deh Aku deka nyaut sampi sida. Ukui kampung enggau anak domba deka begulai makai. Jelu singa deka makai rumput baka sapi, lalu ular enda agi mantuk. Nadai utai ti tau ngemedis tauka jai bisi di Sion, bukit Aku ti kudus. Ku TUHAN bejaku, “Serega nya kerusi diraja Aku, lalu dunya nyadika pelasar kaki Aku. Nya alai baka ni ku gaya rumah ti deka digaga kita ke Aku? Baka ni ku gaya endur alai Aku deka diau? Aku Empu ke ngaga langit enggau dunya! Aku rinduka orang ke baruh ati sereta nesal ati ke dosa sida, ke nangi sereta ngasika Aku. “Orang mayuh ngereja utai ti dikedekaka sida. Ba sida, pengawa bebunuhka sapi ti lelaki nyadika piring, tauka munuh mensia nyadika piring, nyayat anak domba tauka matahka rekung ukui, ngenjuk piring tepung tauka piring ari darah babi, meri menyan tauka besampi ngagai engkeramba, semua pengawa nya sebaka magang. Sida rindu besembah ngena jalai ti jai. Nya alai Aku deka ninggang sida ngena penusah ti besai, iya nya utai ti endang diketakutka sida, laban nadai siku sida nyaut lebuh Aku ngangau, tauka mending lebuh Aku bejaku. Sida endang sengaja enggai ngasika Aku, tang ingin deka ngereja penyai.” Pendingka utai ti disebut TUHAN, kita ke nangi sereta ngasika Iya. “Laban kita tetap ati ngagai Aku, sekeda bala kita empu deka begedika kita, lalu enggai begulai enggau kita. Sida ngeleseka kita lalu nyebut, ‘Awakka TUHAN ngayanka pemesai kuasa Iya lalu nyelamatka kita, ngambika kami meda lalu rami gaga.’ Tang sida empu deka dipechat! Pendingka ulih kita! Utai ti inggar bemunyi di nengeri, utai ti bemunyi dalam Rumah Sembiang, nya munyi TUHAN ngukum bala munsuh Iya! “Nengeri Aku ti kudus nyau baka indu ke ngenyit beranak tang enda radai. Kati bisi orang udah kala meda, tauka ninga utai ti baka nya? Kati bansa bisi udah kala didirika dalam sehari? Sion enda ibuh lama merinsa nganti bansa orang Israel ada. Anang ngumbai Aku deka ngadaka nembiak Aku, lalu enda nyadi ngadaka sida.” TUHAN udah bejaku. Rami gaga ati meh kita enggau Jerusalem. Awakka kita gaga ati ke iya semua kita ke rinduka nengeri tu! Rami gaga ati enggau iya diatu, semua kita ke udah ngulitka iya! Kita deka ngelantangka diri ngena pengaya iya, baka anak mit ke nusu ba indai iya. Ku TUHAN bejaku, “Aku deka ngasuh kita kaya-raja belama iya. Pengaya ari semua bansa deka diberi Aku ngagai kita baka sungai ti enda nemu langkang. Kita deka nyadi baka anak mit ke ditusuka indai iya, dikerendut indai iya, lalu diibun enggau pengerindu. Aku deka merindang kita ke diau di Jerusalem, baka indai ke merindang anak diri. Lebuh kita meda utai tu nyadi, kita deka gaga ati, lalu utai nya deka ngasuh kita kering sereta bepengerai. Nya baru kita deka nemu Aku ti TUHAN nulung orang ke ngasika Aku, lalu Aku ngayanka pengeringat Aku ngagai bala munsuh Aku.” TUHAN deka datai dalam api. Iya deka nepan sayap kabut, deka ngukum sida ke dikeringatka Iya. Iya deka ngukum ngena api enggau pedang semua mensia ti ditemu Iya salah di dunya tu, lalu mayuh sida deka dibunuh. Ku TUHAN bejaku, “Semua orang ke ngudus lalu nuchi diri deka nyembah engkeramba, ke bejalai bebala mayuh ngagai kebun petara sida, enggau orang ke bepakaika dagin babi enggau tikus enggau pemakai bukai ti kamah, deka lesap magang. Aku nemu runding enggau utai ti dikereja sida, lalu Aku deka datai lalu ngempuruka mensia ari semua bansa. Lebuh sida begempuru, sida deka meda utai ti dikereja kuasa Aku. Nya baru sida deka nemu Aku tu ke ngukum sida. “Tang Aku deka ngalau sekeda sida lalu ngirumka sida ngagai mayuh bengkah bansa enggau menua ti ba tebing tasik, ti nadai kala ninga pasal Aku, tauka meda pemesai kuasa Aku; menua nya nyengkaum Spain, Libia, enggau Lidia enggau bala nembiak iya ti landik nimbakka laja, enggau ngagai Tubal enggau ngagai menua Gerika. Sida deka madahka pemesai kuasa Aku ba semua bansa nya. Sida deka mai semua nembiak nuan pulai baru ari semua bansa, nyadika pemeri ti diberi ngagai Aku. Sida deka mai nembiak Aku ngagai bukit Aku ti kudus di Jerusalem ngena kuda, keledai, enggau unta, enggau ngena kerita perang enggau kerita kuda, baka orang Israel ke mai piring tepung ngena sarang ti tuchi ngagai Rumah TUHAN. Aku deka milih sekeda sida nyadi imam enggau nyadi orang Lewi. “Baka dunya ti baru enggau langit ti baru deka tan belama iya ulih kuasa Aku, baka nya meh peturun enggau nama nuan deka meruan belama iya. Ba genap Gawai Anak Bulan enggau genap Hari Sabat, mensia ari semua bansa deka datai nyembah Aku ditu di Jerusalem,” ku TUHAN bejaku. “Lebuh sida angkat ari endur nya, sida deka tepedaka bangkai orang ke udah angkat ngelaban Aku. Ulat ti makai bangkai sida, enda nemu mati, lalu api ti nunu bangkai sida enda nemu padam. Semua orang deka geli meda bangkai sida.” Bup tu nusui jaku Jeremiah anak Hilkiah, siku imam ari nengeri Anatot di menua Benjamin. TUHAN bejaku ngagai Jeremiah dalam taun ti ketiga belas Josiah anak Amon nyadi raja menua Judah, lalu TUHAN bejaku baru ngagai Jeremiah lebuh anak Josiah ke benama Jehoiakim nyadi raja. Udah bekau nya, TUHAN suah mega bejaku ngagai iya, nyentuk ngagai taun ti kesebelas Sedekiah anak Josiah nyadi raja. Dalam bulan ti kelima taun nya, orang Jerusalem dibuai ngagai menua bukai. Ku TUHAN bejaku ngagai aku, “Sebedau Aku nempa nuan dalam kandung indai nuan, Aku endang udah ngelala nuan, lalu sebedau nuan ada, Aku endang udah milih nuan; Aku endang udah ngeletak nuan nyadi nabi ke semua bansa.” Aku lalu nyaut, “ TUHAN ti Pemadu Tinggi, aku enda lanchar bejaku, laban aku agi nembiak.” Tang ku TUHAN bejaku ngagai aku, “Anang ngumbai diri agi nembiak, tang mansang nuan ngagai orang ke diasuh Aku gusung nuan, lalu padahka ngagai sida semua utai ti diasuh Aku sebut nuan. Anang takutka sida, laban Aku bisi enggau nuan lalu nyaga nuan. Aku ti TUHAN, udah bejaku!” Udah nya TUHAN ngunjurka jari Iya, negu mulut aku, lalu bejaku ngagai aku, “Dinga nuan, Aku diatu udah nyimpan leka jaku Aku dalam nyawa nuan. Sehari tu Aku meri nuan kuasa atas semua bansa enggau perintah, kuasa kena nebang enggau numbang, kena ngeruntuh enggau ngerubuh, kena niri enggau negi.” Ku TUHAN nanya aku, “Jeremiah, nama utai dipeda nuan?” Aku lalu nyaut, “Siti dan kayu almond.” Lalu ku TUHAN bejaku ngagai aku, “Betul, laban Aku ngemataka leka jaku Aku, deka nentuka jaku nya dikamatka.” Udah nya TUHAN bejaku baru enggau aku, “Nama utai bukai dipeda nuan?” ku Iya nanya. Lalu ku aku nyaut, “Aku meda sigi periuk melidih, ti singit ari utara.” Ku TUHAN bejaku ngagai aku, “Pengerusak deka mangka ari utara ngagai semua orang ke diau di menua tu, laban Aku mesanka semua bansa ti di utara datai kitu. Bala raja sida deka nudukka kerusi diraja sida ba mua pintu kuta Jerusalem, enggau ngelingi kuta nengeri tu, enggau ngelingi nengeri bukai di menua Judah. Aku deka ngukum nembiak Aku laban sida udah bedosa. Sida udah ninggalka Aku, udah ngenjuk piring ngagai petara bukai, lalu udah nyembah engkeramba ti digaga sida. Besedia nuan, Jeremiah. Mupuk nuan lalu padahka ngagai sida semua utai ti diasuh Aku sebut nuan. Anang takutka sida, enggai ke Aku ngasuh nuan lebih balat agi takut lebuh nuan begulai enggau sida. Dinga nuan, Jeremiah! Sehari tu Aku ngaga nuan nyadi nengeri ti bekuta, nyadi tiang besi, nyadi dinding temaga, ngelaban semua menua tu, ngelaban bala raja menua Judah, bala anak raja iya, bala imam iya, enggau ngelaban orang di menua tu. Sida deka ngelaban nuan; tang sida enda ulih ngalahka nuan, laban Aku bisi enggau nuan, lalu ngelepaska nuan, ku TUHAN bejaku.” TUHAN ngasuh aku madahka pesan tu ngagai semua orang di Jerusalem. “Aku ingatka penetap ati nuan, Israel, lebuh nuan agi biak, pemendar nuan rinduka Aku, lebuh tua terubah jadi enggau pangan diri. Nuan nitihka Aku nengah menua puang, nengah menua ti nadai kala ditanam enggau utai. Israel, nuan endang enggi Aku siku aja. Nuan endang pesaka Aku ti kudus. Aku ngasuh pemerinsa enggau penusah ti besai ninggang semua orang ke ngemediska nuan. Aku ti TUHAN, udah bejaku.” Pendingka pesan TUHAN, kita ke peturun Jakop, kita ke raban bansa orang Israel. Ku TUHAN bejaku: “Nama dawa ti dibantaika bala aki ini kita kena sida ngelaban Aku? Nama utai ti ngasuh sida ninggalka Aku? Sida besembahka engkeramba ti nadai guna lalu sida empu nyadi orang ke nadai guna. Sida enggai ibuhka Aku, taja pen Aku udah mai sida pansut ari menua Ejip lalu nguluka sida nengah menua puang: menua ti nadai utai tumbuh, ti penuh laban lubang pasir, menua ti rangkai sereta tau ngasuh bebadi, ti enda diuan mensia lalu enda ditengah mensia. Aku mai sida ngagai menua ti ami, ngambika sida ngelantangka diri ngena utai ti diketau enggau utai bukai ti manah di menua nya. Tang sida ngerusak menua Aku. Sida ngamahka menua ti udah diberi Aku ngagai sida. Sida imam nadai nanya, ‘Dini alai TUHAN?’ Bala imam Aku Empu enda ngelala Aku. Bala raja angkat ngelaban Aku. Bala nabi bejaku dalam nama Baal lalu nyembah engkeramba ti nadai guna. “Nya alai Aku ti TUHAN, deka bedawaka nembiak Aku baru. Aku deka bedawaka peturun sida. Mupuk ke barat ngagai pulau Saiprus, lalu asuh orang mupuk ke timur ngagai menua Kedar. Nya baru nuan deka nemu, nadai utai ti baka tu udah kala nyadi menya. Nadai bansa bukai udah kala nukar petara sida, taja pen petara sida nya ukai petara ti bendar. Tang bala nembiak Aku udah nyilih Aku, Allah Taala ti udah mai basa ngagai sida, enggau petara ti nadai ulih ngereja utai ke sida. Nya alai Aku ngasuh langit berenyang laban takut, tenganga alit ati, laban bala nembiak Aku udah ngereja dua bengkah dosa, iya nya, sida udah ninggalka Aku ti nyadi mata ai ti idup, lalu sida udah numbak telaga telaga ti merekah ti enda ulih ngundan ai. “Israel ukai ulun. Iya ukai ada nyadi ulun. Nya alai, nama kebuah munsuh iya begigaka iya? Munsuh iya udah merakka nyawa ngagai iya munyi singa ti negung. Sida udah ngaga menua iya nyadi menua puang, lalu semua nengeri iya nyau nyadi tembawai sereta nadai orang nguan. Lalu orang Mempis enggau orang Tapanes udah mechahka kerubung pala iya. Israel, nuan empu ti udah minta diri ditinggang utai tu laban nuan udah ninggalka Aku ti TUHAN Allah Taala nuan, lebuh Aku benung nguluka nuan di rantau jalai. Nama penguntung nuan mansang ngagai menua Ejip, ngambika nuan ulih ngirup ai ari Sungai Nile? Nama penguntung nuan mansang ngagai menua Asiria ngambika nuan ulih ngirup ai ari Sungai Eupratis? Penyai nuan empu deka ngukum nuan, lalu pengawa nuan ke ninggalka Aku deka ngukum nuan. Nuan deka ngasaika pemait enggau pemedis ninggalka Aku, ti TUHAN Allah Taala nuan, lalu enda agi tetap ati ngagai Aku. Aku TUHAN ti Pemadu Tinggi, udah bejaku.” Ku TUHAN ti Pemadu Tinggi bejaku, “Israel, dulu kelia nuan enggai betuaika Aku. Nuan enggai ngasi lalu enda nyembah Aku. Ba genap igi munggu enggau di baruh genap pun kayu nuan nyembah petara ti ngasuh peridi. Aku udah nanam nuan baka batang anggur ti sengaja dipilih ari paung ti pemadu manah. Tang peda gaya nuan diatu! Nuan tu baka batang anggur ti buruk sereta nadai guna. Enti sema nuan mandi lalu berunsut ngena sabun ti pemadu bisa, agi meh Aku ulih meda bekau penyalah nuan. Baka ni ku nuan ulih madahka diri nadai udah ngamahka diri empu, madahka diri nadai udah kala nyembah Baal? Peda nuan gaya nuan udah bedosa ba lebak. Peda nuan gaya utai ti udah dikereja nuan. Nuan tu baka jelu unta lebuh musin bung, belanda kia-kia belanda ngagai menua puang. Lebuh iya bung, sapa ulih ngandang iya? Lelaki ke inginka iya enda ibuh ngiruh diri begigaka iya laban iya endang seruran sedia lebuh musin bung. Israel, anang ngelelakka diri bejalai, tauka nejuka rekung nuan rangkai begigaka petara bukai. Tang ku nuan, ‘Enggai nyadi enda! Aku enda ulih nikal agi. Aku udah rinduka petara orang bansa bukai lalu aku deka nitihka bala petara nya.’ ” Ku TUHAN bejaku, “Baka penchuri ke dipechat lebuh iya ditangkap, baka nya meh semua kita orang Israel deka dipechat - bala raja enggau bala pemesai kita, bala imam enggau bala nabi kita. Semua kita deka dipechat magang - kita ke beapaika kayu, ke beindaika batu. Utai tu deka nyadi laban kita udah ninggalka Aku, ukai ngagai Aku. Tang lebuh kita dituntung penusah, kita minta Aku datai ngelepaska kita. “Kini ke tunga bala petara ti udah digaga kita ke kita empu? Lebuh kita dituntung penusah, awakka sida meh ngelepaska kita - enti sida ulih! Judah, petara kita nyau ngemayuh nengeri kita empu. Nama utai ti diputapka kita? Nama kebuah kita angkat ngelaban Aku? Aku udah ngukum kita, tang utai nya nadai pulai ke penguntung kita. Kita enggai nejuka Aku ngajar kita. Kita baka singa ti mangah, bebunuhka bala nabi kita. Orang Israel, pendingka utai ti disebut Aku. Ba penemu kita, kati Aku tu baka menua puang, baka menua ti petang ti tau ngasuh bebadi? Nya alai nama kebuah kita madahka diri deka ngereja utai nitihka peneka ati kita empu, lalu madahka diri enggai pulai ngagai Aku baru? Kati indu ke biak bisi enda kala ingat ngena perengka emas iya, tauka indu ke ditikah enda ingat ngena pekayan tikah iya? Tang bala nembiak Aku udah kelalu lama enda ingatka Aku. Kita amat nemu chara begigaka ambai. Indah indu ke pemadu jai deh tau belajar ari kita. Gari kita nyau kamah laban bekau darah orang ke seranta enggau orang ke nadai penyalah, ukai laban darah penchuri. “Tang taja pia, kita nyebut, ‘Aku nadai penyalah. TUHAN tentu enda agi ringat ngagai aku.’ Tang Aku ti TUHAN, deka ngukum kita laban kita madahka diri nadai udah bedosa. Kita udah empelitaka diri laban kita udah nguingka diri ngagai bala petara orang bansa bukai. Kita deka asa ngapa ngarapka Ejip, baka kita ke udah asa ngapa ngarapka Asiria. Kita deka nguingka diri ari Ejip, kunduk-kunduk malu. Aku ti TUHAN, udah nulak sida ke dikarapka kita. Kita nadai bulih utai ari sida.” Ku TUHAN bejaku, “Enti laki muai bini, lalu bini iya ninggalka iya lalu jadi enggau lelaki bukai, laki iya enda tau ngambi bini iya pulai baru. Utai tu deka ngamahka menua tu. Tang, Israel, nuan mayuh ambai, lalu diatu nuan deka mulaika diri ngagai Aku baru! Uji nuan engkadah ngagai tuchung bukit. Kati nuan bisi tetemuka endur alai nuan ti nadai udah ngulah diri baka indu sundal? Nuan nganti ambai nuan ba sebelah tisi jalai, baka orang Arab ke ngipa orang ke deka diamuk iya di menua puang. Nuan udah ngamahka menua ngena pengawa nuan ti nyundal. Nya kebuah hari enda diasuh ujan, lalu hari enda ujan lebuh musin bungai. Indah gamal nuan deh baka gamal indu sundal. Nuan tu nadai nemu malu. “Lalu diatu nuan nyebut ngagai Aku, ‘Nuan Apai aku, lalu Nuan udah rinduka aku kenyau ari aku agi mit. Nuan enggai seruran ringat. Nuan enggai pedis ati ngagai aku belama iya.’ Israel, baka nya ku jaku nuan, tang nuan majak ngereja semua penyai enggau naka ulih nuan.” Lebuh Josiah nyadi raja, TUHAN bejaku ngagai aku, “Kati nuan bisi udah meda utai ti dikereja Israel, indu ke enda tetap ati nya? Iya udah ninggalka Aku, lalu ba genap igi munggu enggau di baruh genap pun kayu, iya udah ngulah diri baka indu sundal. Aku ngumbai iya deka tetap ati lalu pulai baru ngagai Aku lebuh iya udah ngereja semua utai nya. Tang iya enda pulai baru ngagai Aku, lalu menyadi indu iya, Judah ti enda tetap ati, meda semua utai nya. Judah mega meda Aku nyarakka Diri ari Israel, lalu muai iya, laban iya udah ninggalka Aku, lalu udah nyadi indu sundal. Tang Judah, menyadi indu Israel ti enda tetap ati nya, enda nemu takut, lalu iya mega nyundal lalu enda nemu malu ke ulah diri. Iya ngamahka menua, lalu iya butang laban iya nyembah batu enggau kayu. Lalu udah bekau semua utai tu, Judah, menyadi Israel ke butang, semina ngeluluka diri pulai baru ngagai Aku. Ati iya endang enda betul. Aku ti TUHAN, udah bejaku.” Udah nya TUHAN lalu madahka ngagai aku, taja pen Israel udah ninggalka Iya, Israel udah ngayanka diri manah agi ari Judah ke butang. Iya ngasuh aku mansang lalu madahka ngagai Israel, “Israel ti enda tetap ati, pulai nuan baru ngagai Aku. Aku penuh laban pengasih, lalu Aku enda ringat. Aku enda ringat ngagai nuan belama iya. Semina ngaku diri udah salah, lalu udah ngelaban TUHAN Allah Taala nuan. Nuan enda tau enda ngaku diri udah nyerahka pengerindu diri ngagai petara orang bansa bukai di baruh semua pun kayu, lalu enda ngasika pesan Aku. Aku ti TUHAN, udah bejaku. “Kita ti enda tetap ati, pulai meh kita baru ngagai Aku. Kita endang enggi Aku. Aku deka ngambi siku ari bala kita ari genap buah nengeri, enggau dua iku ari siti-siti raban peturun, lalu Aku deka mai kita pulai baru ngagai Bukit Sion. Aku deka meri kita raja ke ngasika Aku, lalu sida deka merintah kita ngena penemu-dalam enggau pemereti ati. Udah nya, lebuh kita nyau mayuh tubuh di menua nya, orang enda agi bejakuka pasal Peti Lampang Batu Adat Aku. Sida enda agi berunding tauka ingatka Peti Lampang Batu Adat nya. Sida enda begunaka iya, lalu sida pen enda mega ngaga peti sempekat bukai. Lebuh maya nya ila, Jerusalem deka dikumbai ‘Kerusi diraja TUHAN,’ lalu semua bansa deka begempuru dia nyembah Aku. Sida enda agi ngereja utai nitihka pengekieh tauka penyai ati sida. Israel deka begulai enggau Judah, lalu seduai iya deka sama pulai ari menua di utara ti udah alai seduai iya dibuai, lalu pulai baru ngagai menua ti udah diberi Aku nyadika pesaka aki ini kita.” Ku TUHAN bejaku, “Israel, Aku endang deka nerima nuan nyadika anak Aku lalu meri nuan menua ti ngerinduka ati, menua ti pemadu manah di dunya tu. Aku deka ngasuh nuan ngumbai Aku Apai lalu enda agi ninggalka Aku. Tang nuan baka bini ti enda tetap ati. Nuan enda tetap ati ngagai Aku. Aku ti TUHAN, udah bejaku.” Munyi utai bisi didinga ba tuchung bukit: munyi orang Israel ke nyabak minta kasih laban sida udah bedosa lalu enda agi ingatka TUHAN Allah Taala sida. Pulai baru meh kita, semua kita ke udah ninggalka TUHAN. Iya deka ngeraika kita, lalu ngasuh kita tetap ati. Ku kita, “Au, kami deka pulai baru ngagai TUHAN laban Iya endang Allah Taala kami. Kami nadai bulih tulung ari engkeramba ti disembah kami ba tuchung bukit. Tulung ti diterima orang Israel semina datai ari TUHAN Allah Taala kami aja. Tang pengawa besembahka Baal, petara ti ngemalu, udah ngasuh raban bedus enggau raban sapi, anak lelaki enggau anak indu kami lenyau - semua utai ti udah ulih aki ini kami kenyau ari kelia. Kami patut gali mai pemalu, lalu nejuka pemalu kami ngelamun kami. Kami enggau bala aki ini kami endang udah seruran bedosa ngelaban TUHAN Allah Taala kami. Kami nadai kala ngasika pesan Iya.” Ku TUHAN bejaku, “Orang Israel, enti kita deka nguingka diri, kuingka diri ngagai Aku baru. Enti kita tetap ati ngagai Aku, lalu muai semua engkeramba ti dipegedika Aku, kita tau besumpah atas nama Aku. Nya baru semua bansa deka minta Aku merekatka sida, lalu sida deka muji Aku.” Ku TUHAN bejaku ngagai orang Judah enggau ngagai orang Jerusalem, “Changkul meh tanah umai ti apin dichangkul. Anang nanam benih kita ba madang duri. Titihka sempekat kita enggau Aku ti TUHAN, lalu serahka diri empu ngagai Aku, kita orang Judah enggau kita orang Jerusalem. Enti kita enda, pengeringat Aku deka mau baka api, ketegal utai ti jai ti udah dikereja kita. Api nya deka mau, lalu nadai orang ulih madamka iya.” Sepu terumpit di serata menua! Manjung enggau nyawa ti inggar sereta terang! Asuh orang Judah enggau orang di Jerusalem rari ngagai nengeri ti bekuta. Tunjukka jalai ngagai Sion! Rari ngidupka nyawa diri! Anang betangguh! TUHAN benung mai penusah enggau pengerusak ti besai ari utara. Baka singa ti mansutka diri ari endur alai iya ti belalai, baka nya meh iya ke ngerusak semua bansa udah belabuh mansang. Iya deka datai lalu ngerusak menua Judah. Nengeri di menua Judah deka nyadi tembawai, lalu nadai orang nguan. Nya alai, rasukka kain guni, lalu nyabak duie-duie laban TUHAN agi majak ringat ngagai orang Judah. Ku TUHAN bejaku, “Ba hari nya, bala raja enggau bala pemesai deka takut. Sida imam deka temati-kutu, lalu sida nabi deka alit ati.” Udah nya aku lalu bejaku, “ TUHAN ti Pemadu Tinggi, Nuan udah nipu orang Jerusalem! Nuan udah madahka sida deka diau likun, tang diatu pedang baru deka mumpung pala sida.” Maya deka datai alai orang Jerusalem deka dipadahka pasal ribut ti angat ti deka muput ngagai sida ari menua puang. Ribut nya ukai ribut ti enda deras ti semina ulih ngebuka ampa aja. Ribut ti datai ari asuh TUHAN deka deras agi ari nya! TUHAN Empu ke bejaku ngukum nembiak Iya. Peda bala munsuh datai baka mua hari. Kerita perang sida baka ribut puting beliung, lalu kuda sida laju agi ari menaul. Tulah meh kitai tu! Mati meh kitai tu! Jerusalem, basu penyai ari ati nuan, ngambika nuan dilepaska. Ni pengelama nuan majak berunding deka bedosa? Bala seruan ari nengeri Dan enggau ari menua ti bebukit di menua Epraim, madahka berita ti enda manah. Sida datai laban sida deka meri jaku tangkan ngagai mayuh bengkah bansa, sereta madahka ngagai Jerusalem pasal bala munsuh ke datai ari menua ti jauh. Bala munsuh nya deka manjung ngelaban mayuh bengkah nengeri di menua Judah lalu ngelulung Jerusalem baka bala lelaki ke nyaga umai, laban orang di Jerusalem udah angkat ngelaban TUHAN. TUHAN udah bejaku. Judah, nuan empu ke ngasuh pemerinsa tu ninggang nuan, ketegal chara nuan idup enggau ketegal utai ti udah dikereja nuan. Dosa nuan empu ti udah ngasuh pemerinsa tu nyadi. Pemerinsa tu udah ngerejang tungkul ati nuan. Akai! Enda aku ulih natka diri pedis baka tu! Tungkul ati aku nyau ketap-ketap! Aku enda ulih enda bemunyi. Aku ninga munyi terumpit enggau panjung orang ke beperang. Penusah ti besai nyau betangkan-tangkan nyadi. Semua menua tu nyau nyadi tembawai magang. Tekala nya langkau kain kami dirusak. Tirai langkau kain kami abis charik. Ni pengelama aku enda tau enda meda perang tu nyadi lalu ninga terumpit ti inggar bemunyi? Ku TUHAN bejaku, “Nembiak Aku endang beli. Sida enda nemu Aku. Sida baka anak mit ti beli. Sida enda meretika utai. Sida landik ngereja utai ti jai, tang enda nemu ngereja utai ti manah.” Aku malik ngagai dunya, lalu meda dunya nya nadai tumbuh utai. Aku engkadah ke langit, tang nadai meda penampak. Aku malik ngagai bukit, lalu meda bukit berenyang, lalu munggu beguyat. Aku nadai meda mensia. Indah burung deh udah abis terebai kebukai. Menua ti ami udah nyadi menua puang. Nengeri di menua nya nyau nyadi tembawai magang laban pemalat pengeringat TUHAN. ( TUHAN endang udah madahka semua dunya deka kusi, tang Iya enda ngerusak dunya datai ke abis.) Ketegal nya, dunya deka ngulit. Langit deka petang. TUHAN udah bejaku lalu enggai ngubah runding Diri. Iya udah mutuska runding Diri lalu enggai nyurutka Diri. Lebuh orang ninga munyi nyawa bala soldadu ti nepan kuda, enggau bala soldadu ti besenyataka panah, semua orang deka rari. Sekeda deka rari ngagai utan. Sida ke bukai deka niki ba sebelah batu. Genap buah nengeri nadai agi mensia, lalu nadai orang deka diau dia agi. Jerusalem, nuan deka diukum! Nama kebuah nuan begari ngena kain ungu? Nama kebuah nuan ngena batu ti berega, lalu ngechat mata diri? Nadai guna nuan ngias gamal diri. Ambai nuan udah nulak nuan lalu deka munuh nuan. Aku ninga munyi orang nyabak, munyi indu ke radai deka beranak, nyawa ti rauh-rauh munyi indu ke terubah iya beranak. Nya sabak Jerusalem lebuh iya rangap-rangap nyintak seput, entepaka jari iya, lalu bejaku, “Nadai penyadi meh aku tu! Sida deka datai munuh aku!” Kita orang Jerusalem, belanda meh kita nengah jalai raya kita! Palik ke kiba, palik ke kanan! Awakka kita empu meda! Giga ba sebelah pasar! Kati kita bisi tetemuka orang ti ngereja utai ti ngena sereta nguji tetap ati ngagai Allah Taala? Enti kita bisi tetemuka orang ke baka nya, TUHAN deka ngampun Jerusalem. Taja pen kita ngumbai diri nyembah TUHAN, tang kita enda ngereja utai nitihka jaku kita. TUHAN endang ngiga ati ti tetap. Iya malu kita, tang kita enda bedulika Iya. Iya ngeredakka kita, tang kita enggai diajar. Kita kieh, lalu enggai nesal ati ke dosa kita. Udah nya aku berunding, “Sida tu orang ke nadai nemu utai. Sida beli. Sida enda nemu utai ti dipinta Allah Taala, utai ti diasuh TUHAN kereja sida. Aku deka mansang ngagai orang ke nyadi tuai lalu bejaku enggau sida. Enda patut sida enda nemu utai ti dipinta Allah Taala, utai ti diasuh TUHAN kereja sida.” Tang semua sida enggai diperintah TUHAN lalu enggai ngasika Iya. Nya kebuah singa deka datai ari utan lalu munuh sida. Ukui kampung ari menua puang deka nyarikka sida, lalu engkuli deka nyubuk utai ti deka diempa sida ba sebelah nengeri. Enti orang dia pansut ke luar, sida deka dipecharikka jelu laban sida mayuh dosa sereta udah suah ninggalka Allah Taala. Ku TUHAN nanya, “Nama kebuah Aku patut ngampun dosa nembiak Aku? Sida udah ninggalka Aku lalu udah nyembah engkeramba. Aku nupi nembiak Aku datai ke sida kenyang, tang sida butang lalu bekendak enggau indu sundal. Sida nyau baka kuda lelaki ti kenyang sereta kanji. Genap iku sida inginka bini pangan diri. Kati Aku enda patut ngukum sida ketegal semua utai nya? Ku TUHAN bejaku. Kati Aku enda patut malas ngagai bansa orang nya? Aku deka ngasuh munsuh mampat kebun anggur nembiak Aku tang ukai ngerusak sida abis lengis. Aku deka ngasuh sida nyarau dan, laban dan nya ukai enggi Aku. Orang Israel enggau orang Judah enda tetap ati ngagai Aku. Aku ti TUHAN, udah bejaku.” Nembiak TUHAN udah besangkalka Iya, lalu udah nyebut, “Nadai Iya deka ngereja utai. Nadai penusah deka ninggang kitai, lalu kitai enda diserang munsuh tauka laban lapar pungkang.” Orang Israel, TUHAN deka mai siti bansa ari menua ti jauh nyerang kita. Bansa nya kering sereta lama udah nguan dunya tu, bansa ti enda ditemu kita jaku. Bala soldadu sida besenyataka panah, kering, lalu munuh enggau nadai pengasih. Sida deka makai utai ti ditanam kita enggau pemakai kita. Sida deka munuh anak lelaki enggau anak indu kita. Sida deka munuh raban jelu bedus enggau raban jelu sapi kita, lalu ngerusak batang anggur enggau kayu ara kita. Nengeri ti bekuta, ti dikarapka kita, deka dirusak bala soldadu sida. Ku TUHAN bejaku, “Tang taja pia, lebuh maya nya ila Aku enda ngerusak semua nembiak Aku abis lengis. Lebuh sida nanyaka kebuah Aku ngereja semua utai tu, padahka ngagai sida, Jeremiah, baka sida ke udah ninggalka Aku lalu betuaika petara orang bansa bukai di menua sida empu, baka nya meh sida deka betuaika orang bansa bukai di menua orang.” Ku TUHAN bejaku, “Padahka ngagai bala peturun Jakop, padahka ngagai orang ke di menua Judah: “Anang enda mending, kita orang ke beli sereta lap, ke bisi mata, tang enda ulih meda, ke bisi pending, tang enda ulih ninga. Aku tu TUHAN. Nama kebuah kita enda nangika Aku? Nama kebuah kita enda getar-getar di mua Aku? Aku ngengkahka pasir nyadika garis entara darat enggau tasik, entara ti tan, lalu enda ulih dilangkah tasik. Tasik nyangka begelumbang, tang iya enda ulih ngelangkah garis entara nya. Gelumbang nyangka besegum, tang iya enda ulih ngelanggar garis entara nya. Tang kita tu kieh sereta ngelaban. Kita udah limpang, lalu ninggalka Aku. Kita nadai kala berunding deka nangika Aku, taja pen Aku meri kita ujan lebuh musin ruruh daun, enggau lebuh musin bungai, lalu meri kita musin alai kita ngetau genap taun. Tang dosa kita udah nagang kita bulih utai ti manah. “Orang ke jai diau enggau bala nembiak Aku. Sida nan pukat baka ke deka nangkap burung, tang sida udah nan panjuk kena nangkap mensia. Baka orang ke ngasu ke ngisi sangkar sida enggau burung, baka nya meh sida udah ngisi rumah diri enggau utai ti dichuri sida. Nya kebuah sida bekuasa sereta kaya, gemu sereta chukup utai diempa. Penyai pengawa sida endang nadai sekat. Sida nadai ngayanka pengelurus lebuh sida ngakim orang ke nadai apai indai, lalu sida enda nyaga hak orang ke seranta. Kati Aku enda patut ngukum sida ketegal utai nya? Ku TUHAN bejaku. Kati Aku enda patut malas ngagai bansa tu? Utai ti udu jai udah nyadi di menua tu: sida nabi benabi ngena jaku ti bula, lalu sida imam merintah nitihka asuh sida nabi; nembiak Aku rindu diperintah baka nya, tang nama utai ti deka dikereja sida lebuh pengujung dunya ila?” Orang Benjamin, rari meh kita ngagai endur ti likun! Rari ari Jerusalem! Sepu terumpit di Tekoa lalu tungkun api di Bet Hakerem kena megau orang mayuh. Penusah ti besai enggau pengerusak nyau deka datai ari utara. Nengeri Sion endang manah gaya, tang iya deka dirusak. Bala raja enggau bala soldadu sida deka nirika kem sida dia. Sida deka nirika langkau kain ngelingi nengeri nya, lalu genap iku sida deka nirika kem sida ba sebarang endur sida deka. Sida deka bejaku munyi tu, “Kita mesti besedia nyerang Jerusalem! Angkat! Kita deka nyerang ba urung tengah hari!” Tang udah nya sida deka nyebut, “Kelalu laun. Hari nyau deka lemai. Kitai deka nyerang lebuh malam hari, lalu ngerusak kuta nengeri nya.” TUHAN ti Pemadu Bekuasa udah ngasuh sida raja nya nebang kayu, lalu nugungka tanah kena ngelulung nengeri Jerusalem, laban ku TUHAN bejaku, “Aku deka ngukum nengeri tu, laban iya penuh laban pengawa ti nekanka pengidup orang. Baka telaga ti seruran mansutka ai ti beresi, baka nya meh Jerusalem seruran mansutka penyai. Aku ninga munyi pengachau enggau pengerusak di nengeri nya. Semina penyakit enggau telih aja ti dipeda Aku. Kita orang Jerusalem, awakka penusah nya nyadika jaku tangkan ke kita, laban enti enda pia Aku deka ngelengkaka kita. Aku deka ngaga nengeri kita nyadi menua puang, ti enda diuan mensia.” Ku TUHAN ti Pemadu Bekuasa bejaku ngagai aku, “Orang Israel deka diruruhka abis lengis ari menua tu, baka ke ngeruruhka buah anggur. Nya alai nuan enda tau enda ngidupka semua orang enggau naka ulih nuan, kala peluang agi bisi.” Ku aku nyaut, “Sapa deka mendingka aku enti aku bejaku ngagai sida lalu meri jaku tangkan ngagai sida? Sida tu kieh lalu enggai mendingka pesan Nuan. Sida ketawaka utai ti diasuh Nuan sebut aku. Nuan ringat ngagai sida, lalu aku pen ringat mega ngagai sida, TUHAN, lalu aku enda ulih nagang diri ringat.” Udah nya TUHAN lalu bejaku ngagai aku, “Bubuhka pengeringat Aku ngagai bala anak mit ti ba jalai raya, enggau ba gempuru bala orang ke biak. Laki enggau bini deka ditabanka. Indah sida ke tuai deh deka ditabanka. Rumah sida deka diberi ngagai orang bukai, lalu baka nya mega umai enggau bini sida. Aku deka ngukum orang di menua tu. Semua orang ke besai enggau ke mit bela nipu ngulihka duit. Indah sida nabi enggau sida imam deh nipu orang mayuh. Sida ngumbai bakal nembiak Aku nya semina rajai aja. Ku sida, ‘Nya nadai ngawa,’ tang utai nya tau ngawa. Kati sida nemu malu ke diri ti udah ngereja utai ti jai nya? Enda, laban sida endang enda nemu malu. Indah mua sida deh enda nemu bebali mirah. Nya alai sida deka rebah baka orang bukai. Lebuh Aku ngukum sida, sida deka mati. Aku ti TUHAN, udah bejaku.” Ku TUHAN bejaku ngagai bala nembiak Iya, “Alai kita bediri ba simpang jalai raya, lalu peratika utai dia. Tanyaka dini alai jalai raya ti dulu kelia, enggau endur alai jalai raya ti pemadu manah. Bejalai nengah jalai raya nya, nya baru kita deka diau nadai utai ngachau.” Tang ku sida, “Kami enggai!” Udah nya TUHAN ngasuh bala jejaga mendingka munyi terumpit. Tang ku sida, “Kami enggai mending.” Nya alai TUHAN bejaku, “Anang enda mending, kita semua bansa, ngambika kita nemu utai ti deka nyadi ba bala nembiak Aku. Anang enda mending, dunya! Aku deka ngerusak bala orang tu nyadika ukum sida ketegal semua penyai ti udah dikereja sida, laban sida udah nulak ajar Aku lalu enda ngasika jaku Aku. Aku enda begunaka menyan ti dibai sida ari Sheba, tauka rempah ti dibai ari menua ti jauh. Aku enggai nerima pemeri sida, tauka rinduka piring sida. Nya alai Aku deka ngasuh orang tu tesangkut lalu tetingkap. Apai indai enggau bala anak sida deka mati, lalu baka nya mega bala pangan enggau orang ke berimbai pendiau enggau sida.” Ku TUHAN bejaku, “Bala orang bisi datai ari sebuah menua ti di utara. Siti bansa ti kering di menua ti jauh, nyendiaka diri mansang beperang. Sida besenyataka panah enggau pedang. Sida tu jai enggau orang, sereta nadai pengasih. Sida munyi segum pangka gelumbang lebuh sida nepan kuda. Sida sedia deka nyerang Jerusalem.” Ku orang Jerusalem bejaku, “Kami udah ninga berita nya, lalu kami nyau lembut tulang. Ati kami balat irau lalu kami berasai pedis baka indu ke radai deka beranak. Kami enda berani pansut ngagai menua pesisir, tauka bejalai nengah jalai raya, laban bala munsuh kami mai senyata, lalu kami dikelingi utai ti balat ngenakut.” Ku TUHAN bejaku ngagai bala nembiak Iya, “Rasukka kain guni, lalu baringka diri malai amau. Ngulit meh kita enggau ai mata, baka ke ngulitka anak tunggal kita, laban iya ti deka ngerusak kita, deka nyerang kita enggau ngenyit. Jeremiah, abas ati bala nembiak Aku, baka nuan ke ngabas pengering besi, lalu peratika gaya sida. Semua sida nya seruran deka angkat ngelaban sereta kieh magang, kering baka temaga enggau besi. Semua sida nya jai magang, bejalai kia-kia bejakuka orang. Api menyadi mau amat, tang tai besi nya enda luluh lalu enda mega lilih. Nadai guna majak nuchi bala nembiak Aku, laban sida ke jai enda dibuai. Sida deka dikumbai tai besi ti nadai rega, laban Aku ti TUHAN udah nulak sida.” Badu agi arapka jaku ti nipu tu, ‘Kami likun! Tu Rumah TUHAN, tu Rumah TUHAN, tu Rumah TUHAN!’ “Ubah jalai kita idup, lalu badu agi ngereja utai baka ke dikereja kita diatu. Anang enda lurus ati enggau pangan diri. Badu agi ngambi ulih ba orang bukai, orang ke patu balu. Badu agi munuh orang ke nadai penyalah di menua tu. Badu agi nyembah petara bukai laban pengawa nya deka ngerusak kita. Enti kita berubah, nya baru Aku deka meruan diau enggau kita di menua ti udah diberi Aku ngagai aki ini kita nyadika pesaka sida belama iya. “Peda kita, kita bekering ba jaku tipu. Kita ngenchuri, munuh orang, butang, besaksi bula lalu ngelanggar sumpah diri empu, ngenjuk piring ngagai Baal, lalu nyembah petara ti nadai kala ditemu kita. Kita ngereja utai ti dipegedika Aku, lalu udah nya kita datai lalu bediri di mua Aku, dalam Rumah Aku Empu, lalu nyebut, ‘Kami likun!’ Kati kita ngumbai Rumah Aku endur alai perumpak belalai? Aku udah meda utai ti dikereja kita. Alai kita mansang ngagai Siloh, ti terubah endur alai Aku patut disembah, lalu peda kita utai ti udah dikereja Aku ngagai nengeri nya ketegal dosa nembiak Aku orang Israel. Kita udah ngereja semua dosa nya, lalu taja pen Aku udah suah bejaku ngagai kita, kita enggai mending. Kita enggai nyaut lebuh Aku ngangauka kita. Nya alai, Aku deka ngereja ngagai Rumah Aku, Rumah Sembiang ti dikarapka kita, baka ke udah dikereja Aku ngagai Siloh. Ba endur tu, ti udah diberi Aku ngagai aki ini kita enggau ngagai kita empu, Aku deka ngereja utai baka ke udah dikereja Aku ngagai Siloh. Aku deka muru kita ari mua Aku, baka Aku ti udah muru bala kaban belayan kita, iya nya orang Israel. Aku ti TUHAN, udah bejaku.” Ku TUHAN bejaku, “Jeremiah, anang besampika bala orang tu. Anang nyabak tauka besampi ngarika sida. Anang minta kasih ngagai Aku, laban Aku enggai mendingka nuan. Kati nuan nadai meda utai ti dikereja sida dalam berapa bengkah nengeri di menua Judah, enggau ba sebelah jalai raya di Jerusalem? Bala anak mit begumpulka kayu api, sida ke lelaki betungkunka api, lalu sida ke indu betunyauka tepung kena ngaga roti ke petara indu ke dikumbai sida Kuin Menua Serega. Sida mega nuang piring wain ke petara bukai, kena sida ngemediska ati Aku. Tang kati sida amat ngemediska ati Aku? Ukai. Sida semina ngemedis sereta ngemaluka diri empu. Nya alai Aku, TUHAN ti Pemadu Tinggi, deka mubuhka pengeringat Aku ngagai Rumah Sembiang tu. Aku deka mubuhka pengeringat Aku ngagai mensia, ngagai jelu, ngagai kayu enggau ngagai utai ti ditanam. Pengeringat Aku deka mau baka api ti enda nemu padam. “Nembiak Aku, kita nunu sekeda piring retung ba alta, lalu sekeda piring nya tau diempa kita. Tang utai ti disebut Aku ti TUHAN nya, manah agi enti kita terus makai semua piring nya. Laban Aku nadai meri pesan pasal piring tunu tauka pasal piring bukai ngagai aki ini kita lebuh Aku mai sida pansut ari menua Ejip. Tang Aku amat ngasuh sida ngasika Aku, ngambika Aku nyadika Allah Taala sida, lalu sida nyadi nembiak Aku. Lalu Aku ngasuh sida diau nitihka jaku Aku, ngambika sida mujur. Tang sida enda ngasi tauka mending, tang ngereja sebarang utai nitihka pengekieh enggau penyai ati sida, lalu sida majak jai-sejai, ukai majak manah-semanah. Kenyau ari maya lebuh bala aki ini kita pansut ari menua Ejip nyentuk ngagai sehari tu, Aku udah majak ngirumka nembiak Aku, iya nya sida nabi, ngagai kita. Tang nadai siku kita deka ninga tauka mending, tang kita mansang lebih agi kieh, sereta lebih agi deka angkat ngelaban ari aki ini kita kelia. Nya alai, Jeremiah, nuan deka nyebut semua leka jaku tu ngagai bala nembiak Aku, tang sida enggai mendingka nuan. Nuan deka ngangauka sida, tang sida enggai nyaut. Nuan deka madahka ngagai sida pasal bansa sida ke enda ngasika Aku, TUHAN ti Allah Taala sida, tauka belajar ari ukum sida. Penetap ati udah mati. Penetap ati nya nadai agi dikenang. “Ngulit meh kita orang Jerusalem. Guntin lalu buai buk kita. Nyabak meh kita ngena leka sabak kenang ba tuchung bukit, laban Aku ti TUHAN, ringat lalu udah nulak bala nembiak Aku. “Orang Judah udah ngereja utai ti jai. Sida udah ngengkahka engkeramba sida ke dipegedika Aku dalam Rumah Sembiang Aku, lalu udah ngamahka Rumah nya. Sida udah ngaga siti alta ti dikumbai Topet, ba Lebak Hinom ngambika sida ulih nyerahka anak lelaki enggau anak indu sida nyadika piring tunu. Aku nadai ngasuh sida ngereja utai tu. Indah berundingka utai nya deh Aku enda. Nya alai, maya deka datai alai endur nya enda agi dikumbai Topet tauka Lebak Hinom, tang Emperan Alai Bebunuh. Sida deka nguburka orang dia, laban sida nadai endur bukai alai nguburka bangkai. Bangkai sida deka nyadika pemakai ke burung, enggau jelu babas, lalu burung tauka jelu nya nadai orang muru. Menua tu deka nyadi menua puang. Aku deka ngasuh semua munyi mensia ti rami gaga, enggau munyi mensia ti lantang ati nikah, lesap magang ari semua nengeri di menua Judah, enggau ari semua jalai raya di Jerusalem. “Lebuh maya nya ila, rangkah tulang sida raja enggau rangkah tulang bala pemesai orang Judah, sereta enggau rangkah tulang sida imam, sida nabi, enggau rangkah tulang orang bukai ti udah diau di Jerusalem, deka diambi pansut ari kubur sida. Rangkah tulang sida nya enda digempuru lalu dikuburka, tang deka digaga nyadi baka baja, betegaring ba sebelah tanah. Rangkah tulang nya deka diachirka lalu dipanchar mata hari, bulan, enggau bintang, ti udah dikerinduka bala orang tu, lalu dipetuaika sida, sereta udah alai sida betanya enggau disembah sida. Lalu orang ke agi idup ari bansa ti jai tu, ti diau ba endur alai Aku udah ngachirka sida, deka minta diri mati ari ke idup. Aku TUHAN ti Pemadu Bekuasa, udah bejaku.” TUHAN ngasuh aku nyebut utai tu ngagai bala nembiak Iya, “Lebuh orang rebah, kati iya enda angkat baru? Enti orang enda tetemuka jalai raya, kati iya enda nikal? Nya alai, nama kebuah kita ke nembiak Aku, ninggalka Aku, lalu enda pulai baru ngagai Aku? Kita bepegai teguh ba engkeramba kita, lalu enggai pulai baru ngagai Aku. Aku mending enggau bebendar, tang kita enda nyebut utai ti bendar. Nadai siku kita udah nesal ati ke penyai diri. Nadai siku kita udah kala nanya, ‘Nama penyalah ti udah dikereja aku?’ Genap iku kita bela nitihka jalai diri empu magang, baka kuda ti belanda ngagai endur alai beperang. Indah burung undan deh nemu maya diri pulai. Burung achang, lelayang, enggau engkerasak nemu maya sida patut mindah ngagai menua bukai. Tang kita ke nembiak Aku enda nemu adat ti dikena Aku merintah kita. Baka ni ku kita tau ngumbai diri bepenemu-dalam, lalu madahka diri nemu Adat Aku? Peda kita, adat tu udah diubah bala tukang tulis ti enda betul ati. Bala kita ke bepenemu-dalam deka dipechat. Runding sida nyau charut, lalu sida nadai nemu berunding agi. Sida udah nulak jaku Aku, nya alai nama penemu-dalam ti dikembuan sida diatu? Nya alai Aku deka meri tanah umai sida ngagai orang bukai, lalu meri bini sida ngagai lelaki bukai. Genap iku sida, ke besai enggau ke mit, bela nguji nipu ngulihka duit. Indah sida nabi enggau sida imam empu deh nipu orang mayuh. Sida ngumbai bakal bala nembiak Aku nya semina rajai aja. Ku sida, ‘Nya nadai ngawa,’ ku sida bejaku. Tang utai nya tau ngawa. Kita ke nembiak Aku, kati kita nemu malu ngereja utai ti jai nya? Enda. Kita nadai nemu malu. Indah mua kita deh enda bebali mirah! Nya alai kita deka dirusak baka orang bukai. Lebuh Aku ngukum kita, nya meh pengujung kita. Aku ti TUHAN, udah bejaku. “Aku ingin deka ngempuruka bala nembiak Aku, baka orang bumai ke ngetau, tang bala nembiak Aku baka batang anggur ti nadai buah, baka kayu ara ti rumbau. Indah daun sida deh abis layu. Nya alai Aku udah ngemendarka orang bansa bukai bempu menua sida.” “Nama kebuah kitai duduk ngapa?” ku bala nembiak Allah Taala nanya. “Aram kitai mansang ngagai nengeri ti bekuta, lalu mati dia. TUHAN Allah Taala kitai udah ngukum kitai mati. Iya udah ngasuh kitai ngirup ai ti berachun laban kitai udah bedosa ngelaban Iya. Kitai ngarapka diri bisi maya pemaik enggau maya suman, tang nya nadai guna, laban utai ti balat ngenakut datai. Bala munsuh kitai udah datai di nengeri Dan. Kitai ninga munyi kesuh idung kuda sida. Semua menua tu begetar magang lebuh kuda sida bemunyi. Bala munsuh kitai udah datai deka ngerusak menua kitai, enggau semua utai di menua tu, nengeri kitai enggau semua orang ke diau di menua tu.” Ku TUHAN bejaku, “Bejaga kita! Aku deka ngirumka ular ngagai kita, ular ti bisa ti enda ulih dipejinakka, lalu sida deka mantuk kita.” Ati aku enda nemu badu sinu. Ati aku balat tusah. Pendingka ulih kita! Di serata menua tu bala nembiak Aku nyabak, “Kati TUHAN nadai agi di Sion? Kati raja nengeri Sion nadai agi dia?” Ku TUHAN ti Raja sida nyaut, “Nama kebuah kita nyungkak Aku ringat? Kita besembahka engkeramba, lalu meremi ngagai petara orang bansa bukai ke nadai reti.” Ku orang mayuh ngangau, “Musin panas nyau udah lepas, maya ngetau nyau udah abis, tang apin ga kami tu dilepaska.” Ati aku asai ti runtuh laban bala nembiak aku udah kelalu tusah ati. Aku ngulit. Ati aku balat sinu. Kati menua Giliat nadai ubat? Kati menua Giliat nadai lutur? Enti bisi, nama kebuah bala nembiak aku lalu apin digeraika? Naka meh pemanah enti sema pala aku baka telaga ti penuh laban ai, lalu mata aku penuh laban ai mata, ngambika aku ulih nyabak siang malam ke orang ari bansa aku ti udah dibunuh. Naka meh pemanah enti sema aku bisi endur alai diau di menua puang alai aku ulih nyeraraka diri ari bansa aku empu. Semua sida bela enda tetap ati, orang ke bejualka bansa diri. Sida semampai deka nusui utai ti bula. Ati ti bingkuk, ukai pengelurus, ti merintah menua tu. Ku TUHAN bejaku, “Bala nembiak Aku enda ngetu-ngetu ngereja penyai, sida enda ngelala Aku.” Awakka genap iku orang bejaga ari pangan diri, lalu enda ngarapka diri menyadi, laban genap iku menyadi bela nipu magang, lalu semua orang bela bejai pangan diri. Genap iku sida bela nipu pangan diri, lalu nadai siku sida nusui utai ti bendar; Sida udah ngajar dilah sida bejaku bula; Sida ngereja penyai datai ke sida nyau kelalu lelak lalu enda ulih nesal ati ke dosa sida. Sida enda ngetu-ngetu nekanka orang, enda ngetu-ngetu nipu orang, lalu enggai ngelala Aku, ku TUHAN bejaku. Nya alai ku TUHAN ti Pemadu Bekuasa bejaku, “Aku deka nuchi lalu nguji sida, laban nama utai bukai ulih dikereja Aku ke bala nembiak Aku? Dilah sida baka laja ti bisa. Sida bejaku nipu orang; Genap iku sida bejaku manah enggau pangan diri, tang iya ti bendar, sida manjuk pangan diri. Kati Aku enda patut ngukum sida ketegal utai nya? Ku TUHAN bejaku; Kati Aku enda patut malas bansa orang nya? Ku aku bejaku, “Aku deka ngulitka bukit lalu nyabakka padang rumput, laban sida udah rangkai, lalu nadai orang bejalai nengah sida. Munyi nyawa jelu tupi nadai agi didinga. Burung enggau jelu babas udah rari lalu nadai agi.” Ku TUHAN bejaku, “Aku deka ngeruntuhka Jerusalem nyadi tembawai, nyadi endur alai jelu pasun diau. Semua nengeri di menua Judah nadai orang nguan, nadai orang diau dia.” Aku lalu nanya, “ TUHAN, nama kebuah menua rusak lalu rangkai baka menua puang, datai ke orang nyau nadai agi bejalai nengah iya? Sapa orang ke chukup bepenemu-dalam ke ulih meretika utai tu? Ngagai sapa Nuan udah nerangka utai tu, ngambika sida ulih madahka ngagai orang bukai?” Ku TUHAN nyaut, “Utai tu nyadi laban bala nembiak Aku udah ngelengkaka Adat ti diberi Aku ngagai sida, lalu sida enda ngasika jaku Aku, sereta enda nitihka Adat Aku, tang udah kieh, lalu udah nyembah Baal, nitihka ajar aki ini sida. Nya alai, baka tu ku jaku TUHAN ti Pemadu Bekuasa, ti Allah Taala ke disembah orang Israel: Aku deka meri ngagai bala nembiak Aku utai ti pait nyadika pemakai sida, enggau ai ti berachun nyadika ai irup sida. Aku deka ngachirka sida ngagai semua menua ti nadai kala didinga aki ini sida tauka didinga sida empu, lalu Aku deka ngasuh bala soldadu ngelaban sida datai ke Aku udah ngerusak semua sida abis lengis.” Ku TUHAN ti Pemadu Bekuasa bejaku, “Uji perundingka utai ti nyadi! Kangauka tukang sabak, sida indu ke nyabakka orang ke mati.” Ku orang mayuh bejaku, “Asuh sida datai enggau jampat lalu nyabakka kitai, datai ke ai mata kitai nyau meili-ili, lalu kulit mata kitai nyau basah laban ai mata.” Pendingka munyi sabak orang di Sion: “Kami tu rusak! Kami udu malu laban kami udah ninggalka menua, laban sida udah ngerubuh rumah kami.” Ku aku bejaku, “Pendingka TUHAN, kita ke indu, lalu peratika leka jaku Iya. Ajar anak indu kita chara ngulit, enggau bala pangan kita chara nyabakka orang ke mati, laban pemati udah tama nengah lubang jenila kitai lalu udah tama ngagai istana kitai. Iya udah munuh bala anak mit ba sebelah jalai raya enggau sida ke bujang di pasar. Bangkai mensia nyau ngachir di semua endur, baka tugung tai jelu ti di padang, baka gandum ti udah dikempat, ti enda digumpul orang. Tu meh utai ti udah diasuh TUHAN sebut aku.” Ku TUHAN bejaku, “Orang ke bepenemu-dalam enda patut temegahka penemu-dalam sida, lalu orang ke kering enda patut temegahka pengering sida, lalu orang ke kaya, enda patut temegahka pengaya sida. Enti orang deka temegah, sida patut temegahka diri ti bepenemu-dalam, lalu nemu Aku rindu ngayanka pengerindu enggau pengelurus di dunya tu, laban nya meh utai ti ngasuh ati Aku gaga. Aku ti TUHAN, udah bejaku.” Orang Israel, pendingka pesan ti diberi TUHAN ngagai kita. Ku TUHAN bejaku, “Anang nitihka ulah orang bansa bukai. Anang irau ati ke tanda ti nyelai ti dipeda kita di langit, taja pen bansa bukai balat takut, laban agama orang bansa bukai nya agama ti nadai reti. Kayu ditebang dalam utan. Kayu nya dipansap orang ke landik begagaka utai, lalu diias ngena pirak enggau emas. Sida mantangka iya ngena paku lawang ngambika iya enda rebah. Engkeramba nya baka engkeramba ti dikena muru burung ba kebun semangka. Sida enda nemu bejaku. Sida enda tau enda disan laban sida enda nemu bejalai. Anang takutka sida, laban sida enda ulih ngemediska kita lalu sida pen enda mega ulih nulung kita.” TUHAN, nadai orang ke sebaka enggau Nuan. Nuan kering, lalu nama Nuan besai sereta bekuasa. Sapa enggai ngemesaika Nuan ti Raja ke semua bansa? Laban Nuan endang patut dikemesaika. Nadai orang ke baka Nuan ari bala orang ke bepenemu-dalam ari semua bansa, tauka ari bala raja sida. Sida nya beli sereta lap magang. Nama utai ti ulih dipelajarka sida ari engkeramba ti digaga ari kayu? Engkeramba sida disampak enggau pirak ari menua Spain enggau ngena emas ari Upas, semua digaga jari orang ke landik. Sida diberi gari ti digaga ari kain ti mirah puda enggau kain ungu ti ditenun orang ke landik betenun. Tang Nuan, TUHAN, endang Allah Taala ti bendar, Nuan endang Allah Taala ti idup Raja ti meruan belama iya. Lebuh Nuan ringat, dunya begetar. Semua bansa enda ulih natka pengeringat Nuan. ( Kita enda tau enda madahka ngagai sida, petara ti enda ngaga langit enggau dunya deka dirusak. Sida deka dibuai ari semua endur di dunya tu.) TUHAN ngaga dunya ngena kuasa Iya Empu. Ulih penemu-dalam Iya, Iya ngaga dunya sereta mintarka langit. Lebuh Iya bejaku, ai ti ari atas langit lalu beguru. Iya mai mua hari ari tisi dunya. Iya ngasuh kilat nyelar lebuh hari ujan lalu ngirumka ribut ari bilik setor Iya. Lebuh orang meda utai nya, sida berasai beli sereta nadai nemu utai. Sida ke begagaka engkeramba, deka asa ngapa, laban petara ti digaga sida nya petara ti pelesu sereta enda nemu enseput. Petara nya nadai guna, lalu patut dipechat. Sida deka dirusak lebuh TUHAN datai lalu nyamah sida. Allah Taala Jakop enda baka bala petara nya, laban Iya nempa semua utai, lalu Iya udah milih Israel nyadika nembiak Iya. Nama Iya TUHAN ti Pemadu Bekuasa. Orang Jerusalem, kita dikelulung munsuh! Gumpul utai kita. TUHAN deka muai kita ari menua tu. Iya deka ngeredakka kita, datai ke nadai siku kita agi tinggal. TUHAN udah bejaku. Ku orang Jerusalem nyabak, “Naka meh pemalat kami telih! Abi telih kami nyau enda ulih suman. Kami udah ngumbai diri ulih natka utai tu! Langkau kain kami nyau rusak. Tali bantil langkau kain kami udah putus. Bala anak kami udah bejalai ngagai endur bukai. Nadai agi orang tinggal nirika langkau kain ke kami baru, nadai agi orang ngantung kain tirai sida.” Ku aku nyaut, “Bala tuai kitai endang beli. Sida nadai minta iring ari TUHAN. Nya meh kebuah sida puntan, lalu bansa kitai pambar pendiau. Dinga! Berita bisi udah diterima! Utai bemunyi inggar amat di menua ti di utara. Bala soldadu iya deka ngasuh mayuh nengeri di menua Judah nyadi menua puang ti alai pasun diau.” TUHAN, aku nemu, nadai siku kami bisi kuasa ngatur pengidup diri. Nadai siku kami bisi kuasa atas seput diri empu. Ajar nembiak Nuan, TUHAN, tang anang kelalu kasar enggau kami tauka ngukum kami lebuh Nuan ringat, enggai ke kami mati. Kuingka pengeringat Nuan ngagai semua bansa ti enda nyembah Nuan enggau ngagai orang ke nulak Nuan, laban sida udah munuh bala nembiak Nuan. Sida udah ngerusak kami abis lengis lalu ngaga menua kami nyadi tembawai. Ku TUHAN bejaku ngagai aku, “Pendingka jaku ti disebut dalam sempekat tu. Padahka ngagai orang Judah enggau ngagai orang di Jerusalem, Aku ti TUHAN Allah Taala ke disembah orang Israel udah nyumpah semua orang ke enda ngasika jaku ti disebut dalam sempekat tu. Tu meh sempekat ti udah digaga Aku enggau bala aki ini sida lebuh Aku mai sida pansut ari menua Ejip, menua ti baka serumbung api ke sida. Aku udah ngasuh sida ngasika Aku, lalu ngereja semua utai ti udah diasuh Aku. Aku udah madahka ngagai sida, enti sida ngasi, sida deka nyadi nembiak Aku, lalu Aku deka nyadi Allah Taala sida. Nya baru Aku deka ngamatka semaya ti udah digaga Aku enggau bala aki ini sida, semaya Aku ti deka meri sida menua ti kaya sereta ami, ti dikembuan sida diatu.” Ku aku, “Au, TUHAN.” Udah nya TUHAN bejaku ngagai aku, “Alai nuan mupuk ngagai semua nengeri di menua Judah, enggau ngagai semua jalai raya di Jerusalem. Padahka pesan Aku dia, lalu asuh orang mayuh mending sereta ngasika jaku ti disebut dalam sempekat nya. Lebuh Aku mai bala aki ini sida pansut ari menua Ejip, Aku nangkan sida enggau jaku ngena sumpah ngasuh sida ngasika Aku, lalu Aku majak meri jaku tangkan nya ngagai orang mayuh nyentuk ngagai sehari tu. Tang sida enda mending tauka ngasi. Semua sida majak kieh sereta jai baka selama. Aku udah ngasuh sida nitihka sempekat nya, tang sida enggai. Nya alai Aku ngasuh sida ditinggang semua ukum ti disebut dalam sempekat nya.” Udah nya TUHAN lalu bejaku ngagai aku, “Orang Judah enggau orang Jerusalem benung bepekat ngelaban Aku. Sida udah pulai baru ngagai dosa aki ini sida ke enggai ngereja utai nitihka jaku Aku. Sida udah nyembah petara bukai. Israel enggau Judah udah sama ngelanggar sempekat ti udah digaga Aku enggau aki ini sida. Nya alai diatu Aku ti TUHAN, meri sida jaku tangkan tu: Aku deka ngasuh pengerusak ninggang sida, lalu sida enda ulih ngerarika diri. Lalu lebuh sida ngangauka Aku minta Aku nulung sida, Aku enggai mendingka sida. Udah nya orang Judah enggau orang di Jerusalem deka mansang ngagai bala petara ti diberi sida piring, lalu ngangau minta bala petara nya nulung sida. Tang bala petara nya enda ulih nyelamatka sida lebuh pengerusak nya datai. Petara orang Judah nyau ngemayuh nengeri sida empu, lalu pemayuh alta ti udah didirika orang ke diau di Jerusalem alai sida ngenjuk piring ngagai petara Baal ti jai nya, nyau ngemayuh jalai raya di nengeri nya empu. Jeremiah, anang besampi ngagai Aku tauka minta kasih ari Aku ngarika bala orang nya, laban lebuh sida ditinggang penusah, lalu ngangau minta Aku nulung sida, Aku enggai mendingka sida.” Ku TUHAN bejaku, “Orang ke dikerinduka Aku majak ngereja utai ti jai. Baka ni ku sida tau bisi hak tama ngagai Rumah Aku? Kati sida ngumbai semaya enggau jelu ti dienjuk sida nyadika piring ulih nagang penusah ti besai ninggang sida? Lalu udah nya sida rami gaga? Dulu suba Aku ngumbai sida nya kayu kana ti lebat daun, penuh laban buah ti manah, tang diatu, ngena nyawa ti meletup munyi guntur, Aku deka nyelup daun kayu kana nya ngena api, lalu matahka dan iya. “Aku, TUHAN ti Pemadu Bekuasa, udah nanam Israel enggau Judah, tang diatu Aku deka ngasuh seduai iya ditinggang penusah ti besai, ketegal penyai ti udah dikereja seduai iya, lalu nyungkak Aku ringat lebuh seduai iya ngenjuk piring ngagai Baal.” TUHAN madahka ngagai aku pasal bala munsuh aku ke bepekat ngelaban aku. Aku nyau baka anak domba ti jinak ti dibai pansut lalu disayat, lalu aku enda nemu sida ngaga pelan ti jai kena sida ngelaban aku. Ku sida, “Aram kitai nebang kayu nya kala lebuh iya agi galak. Aram kitai munuh iya, ngambika orang nadai agi ingatka iya.” Aku lalu besampi, “ TUHAN ti Pemadu Bekuasa, Nuan endang Hakim ti lurus. Nuan ngabas runding enggau ati mensia. Aku udah ngengkahka pekara aku ba jari Nuan. Nya alai, awakka aku meda Nuan malas penyai bala orang tu.” Orang di Anatot deka munuh aku, lalu sida madahka ngagai aku, sida deka munuh aku enti aku majak madahka pesan TUHAN. Udah nya TUHAN ti Pemadu Bekuasa bejaku, “Aku deka ngukum sida! Sida ke agi bujang deka mati beperang. Bala anak sida deka mati keberuran. Aku udah ngeletak maya alai Aku deka ngasuh penusah ti besai ninggang orang di Anatot, lalu lebuh maya nya ila, nadai siku sida agi idup.” “ TUHAN, enti aku betalatka pekara aku enggau Nuan, Nuan tentu deka ditemu ngena. Tang taja pia, aku enda tau enda nanya ngagai Nuan pasal pengelurus: Nama kebuah orang ke jai kaya-raja? Nama kebuah orang ke enda betul ati, mujur? Nuan nanam sida, lalu sida beurat. Sida tumbuh lalu bebuah. Sida selalu bejaku muji Nuan, tang ati sida jauh ari Nuan. Tang Nuan, TUHAN, nemu aku. Nuan meda utai ti dikereja aku enggau pengerindu aku ke Nuan. Irit bala orang ke jai tu kebukai baka ke ngirit bedus ti deka disayat. Seraraka sida nyentuk ngagai maya sida disayat. Ni pengelama menua kami tu mengkang rangkai, lalu rumput ba semua padang layu magang? Jelu enggau burung mati laban penyai bansa kami ke nyebut, ‘Allah Taala enda meda utai ti dikereja kitai.’ ” Ku TUHAN bejaku, “Jeremiah, enti nuan lelak belumba ngelaban mensia, baka ni ku nuan ulih belumba ngelaban kuda? Enti nuan enda ulih bediri ba menua ti nadai utai nekul, baka ni ku nuan ulih bediri dalam utan ti ngimbai Sungai Jordan? Indah kaban belayan nuan, kita sebilik, deh udah nipu nuan. Sida sama enggau orang ngelaban nuan. Anang ngarapka sida, taja pen sida bejaku manah enggau nuan.” Ku TUHAN bejaku, “Aku udah ninggalka Israel. Aku udah nulak bansa ti dipilih Aku. Aku udah nyerahka bansa ti dikerinduka Aku ngagai jari munsuh sida. Bansa ti dipilih Aku, udah mutar ngelaban Aku. Sida tu baka singa ti dalam utan merakka nyawa sida ngelaban Aku. Nya alai Aku begedika sida. Bala nembiak ke dipilih Aku sebaka enggau burung ti disambarka burung lang. Kangauka jelu babas ngambika sida datai ngagai pengerami makai besai! Mayuh raja menua bukai udah ngerusak kebun anggur Aku. Sida udah ngelunjak umai Aku. Sida udah ngaga menua Aku ti manah nyadi menua puang. Sida udah ngaga iya nyadi menua ti kusi. Menua tu nadai orang nguan. Semua menua tu udah nyadi menua puang magang, lalu nadai orang ibuhka iya. Orang udah datai ngerumpak ba sebelah emperan ti ba atas bukit di menua puang tu. Aku udah ngasuh orang nyerang lalu ngerusak semua menua tu. Nadai orang ulih diau dalam pemaik. Bala nembiak Aku nanam gandum, tang sida ngetau rumput. Sida udah bebendar gawa, tang nadai bulih utai. Laban Aku balat ringat nya alai utai ti ditanam sida nadai mansutka asil.” Ku TUHAN bejaku, “Aku bisi utai ti deka disebut Aku pasal bansa bukai ti udah ngerusak menua ti udah diberi Aku ngagai nembiak Aku orang Israel. Aku deka muai orang ke jai nya ari menua sida, baka rumput ti dichabut, lalu Aku deka ngelepaska Judah ari sida. Tang lebuh Aku udah muai sida, Aku deka kasihka sida. Aku deka mai siti-siti bansa nya pulai baru ngagai tanah enggau ngagai menua sida empu. Enti sida deka nerima agama bala nembiak Aku enggau pengabis ati sida, lalu deka besumpah, ‘Dalam nama TUHAN ’ - baka sida ke udah ngajar bala nembiak Aku besumpah dalam nama Baal - nya baru sida deka mega nyadi raban nembiak Aku lalu deka nyadi kaya-raja. Tang enti bansa nya enda ngasi, nya baru Aku deka nyabut lalu ngerusak iya abis lengis. Aku ti TUHAN, udah bejaku.” TUHAN ngasuh aku mupuk lalu meli tanchut pandak ti digaga ari linin, lalu ngerasukka tanchut nya. Tang TUHAN enda ngasuh aku masu tanchut nya. Aku meli lalu ngerasukka tanchut pandak nya. Udah nya TUHAN lalu bejaku baru ngagai aku, ku Iya, “Alai nuan mansang ngagai Sungai Eupratis, lalu lalaika tanchut pandak nya dalam lubang selikap batu.” Aku mupuk, lalu ngelalaika tanchut nya semak Sungai Eupratis. Nyau kelama udah bekau nya, TUHAN ngasuh aku mansang baru ngagai Sungai Eupratis ngambi tanchut pandak nya. Nya alai aku mansang baru ngagai Sungai Eupratis, lalu lebuh aku tetemuka endur alai aku ti udah ngelalaika tanchut pandak nya, aku meda iya udah rusak, lalu nadai tau diguna agi. Udah nya TUHAN bejaku baru ngagai aku. Ku Iya, “Tu meh chara Aku deka ngerusak penyumbung menua Judah, enggau penyumbung Jerusalem. Bala orang ke jai tu enggai ngasika Aku. Sida udah kieh sereta jai baka selama, lalu udah nyembah sereta betuaika petara bukai. Nya alai, sida deka nyadi baka tanchut pandak tu ti nadai tau diguna agi. Baka tanchut pandak ti lekat erat ba punggung, baka nya meh Aku ngasuh semua orang Israel enggau orang Judah bepegai erat ba Aku, ngambika sida nyadi nembiak Aku, lalu meri puji enggau basa ngagai nama Aku. Tang sida enggai ngasika Aku.” Ku TUHAN Allah Taala bejaku ngagai aku, “Jeremiah, padahka ngagai orang Israel, genap igi benda wain patut diisi penuh enggau wain. Sida deka nyaut, madahka diri nemu semua benda wain endang patut diisi penuh enggau wain. Udah nya padahka ngagai sida, Aku ti TUHAN deka numi sida raja ke ari peturun David, sida imam, sida nabi, enggau semua orang ke diau di Jerusalem, enggau wain datai ke sida mabuk. Udah nya Aku deka mangkaka sida baka ke mangkaka benda ngagai pangan diri, sida ke tuai enggau ke biak. Aku deka munuh sida abis lengis enggau nadai penyinu, penyiru tauka pengasih.” Orang Israel, TUHAN udah bejaku! Diau enggau ati ti baruh, lalu pendingka Iya. Kemesaika TUHAN Allah Taala kita sebedau Iya mai pemetang lalu kita tesangkut ba sebelah bukit, sebedau Iya ngubah penampak ti diadang kita nyadi pemetang ti enda dipeda achuk mata. Enti kita enggai mending, aku deka nyabak belalai ketegal penyumbung kita. Aku deka balat nyabak lalu lilih ai mata laban bala nembiak TUHAN udah ditabanka nyadi orang tangkap ngagai menua bukai. Ku TUHAN bejaku ngagai aku, “Asuh raja enggau indai iya nurun ari kerusi diraja seduai iya, laban makota seduai iya ti manah gaya udah labuh ari pala seduai iya. Nengeri ti di selatan menua Judah benung dikelulung munsuh. Nadai orang ulih tama ngagai nengeri nya. Semua orang di menua Judah udah ditabanka magang ngagai menua bukai.” Jerusalem, peda nuan bala munsuh nuan benung nurun ari utara! Dini alai orang ke udah diasuh ibun nuan, bala nembiak ke balat dikemegahka nuan? Nama jaku nuan lebuh orang ke dikumbai nuan pangan, ngalahka nuan, lalu merintah nuan? Kita deka pedis baka indu ke radai deka beranak. Enti kita nanyaka kebuah semua utai tu nyadi ba kita - kebuah gari kita udah diruntun ari tubuh kita, lalu kita dipasung orang - utai nya nyadi laban kita balat bedosa. Kati mensia ulih ngubah chura kulit diri? Kati engkuli ulih muai petik kulit diri? Enti sida ulih, kita ke nadai ngereja utai bukai tang semina ngereja penyai, pen ulih mega ngereja utai ti ngena. TUHAN deka ngachirka kita baka rumput ti rangkai ti dikebuka ribut ti muput ari menua puang. TUHAN udah bejaku madahka nya endang pengujung kita. Nya meh utai ti deka dikereja Iya ba kita, laban kita enda ingatka Iya, lalu udah arapka petara ti pelesu. TUHAN Empu deka ngeruntun gari kita ari tubuh kita ngambika kita malu ke diri telanjai. Iya udah meda kita ngereja utai ti dipegedika Iya. Iya udah meda kita nitihka petara orang kapir ba sebelah munggu enggau ba sebelah padang, baka lelaki ke inginka bini pangan diri, tauka baka kuda lelaki ti tetengukka kuda ti indu. Tulah meh kita orang Jerusalem! Ni maya kita deka belabuh diau tuchi? Ku TUHAN bejaku ngagai aku pasal kemarau panjai nya, “Menua Judah diatu benung ngulit. Semua nengeri di menua nya mati magang. Orang di nengeri nya gali ba tanah laban sida balat tusah ati, lalu Jerusalem nyabak minta tulung. Orang ke kaya ngasuh bala orang gaji sida ngambi ai. Bala orang gaji nya mansang ngagai telaga, tang nadai tetemuka ai. Sida pulai tang tepayan sida puang. Sida tusah ati sereta asa ngapa, lalu ngelalaika mua diri. Laban hari nadai ujan lalu tanah nyau rangkai, orang bumai tusah ati, lalu sida ngelalaika mua diri. Indu rusa di babas ninggalka anak diri ke baru ada laban nadai rumput. Raban keledai babas bediri ba tuchung bukit sengah-sengah nyintak seput baka pasun. Mata sida nyau kelabur laban sida nadai pemakai. Bala nembiak Aku ngangauka Aku, ‘Taja pen dosa kami besalah kami, tulung meh kami, TUHAN, munyi ti udah disemaya Nuan. Kami udah suah ninggalka Nuan. Kami udah bedosa ngelaban Nuan. Semina Nuan siku aja ke dikarapka orang Israel. Nuan siku aja ke ngelepaska kami ari penusah. Nama kebuah Nuan baka orang ke ngampar di menua kami, baka orang kampar ke bemalam semina semalam aja? Nama kebuah Nuan temati-kutu, baka soldadu ti nadai kuasa nulung? Nuan tentu bisi enggau kami, TUHAN! Kami tu nembiak Nuan. Anang ninggalka kami.’ ” Ku TUHAN bejaku ngenang pasal orang nya, “Sida rindu rari ari Aku, lalu sida enggai nagang pengingin diri. Nya alai Aku enda lantang ati ngagai sida. Aku deka ngingatka penyalah ti udah dikereja sida lalu ngukum sida ketegal dosa nya.” Ku TUHAN bejaku ngagai aku, “Anang minta Aku nulung orang nya. Enti sema sida bepasa, enggai meh Aku mendingka sida ke nyabak minta tulung. Lalu enti sema sida ngenjuk piring tunu enggau piring tepung, enggai meh Aku nerima sida. Aku deka munuh sida ngena perang, lapar pungkang, enggau penyakit.” Udah nya aku lalu bejaku, “ TUHAN ti Pemadu Tinggi, Nuan nemu, sida nabi diatu benung madahka ngagai orang mayuh menua tu enda kena laban perang tauka lapar pungkang, laban kenu ku sida, Nuan udah besemaya deka ngasuh orang di menua tu seruran diau dalam pemaik.” Tang ku TUHAN nyaut, “Bala sida nabi nya madahka utai ti bula dalam nama Aku. Aku nadai ngirumka sida, lalu Aku pen nadai mega meri atur ngagai sida, tauka bejaku ngagai sida. Genera ti dipadahka sida nya ukai datai ari Aku. Jaku tujum ti disebut sida nya nadai guna, semina jaku ti ditempaka sida ngapa. Aku ti TUHAN madahka ngagai nuan utai ti deka dikereja Aku ngagai bala sida nabi ke ukai dikirumka Aku, tang bejaku dalam nama Aku madahka menua tu enda kena laban perang tauka lapar pungkang. Aku deka munuh sida ngena perang enggau lapar pungkang. Orang ke udah alai sida madahka utai tu, deka mega dibunuh baka nya. Bangkai sida deka dibuai ba sebelah jalai raya di Jerusalem, lalu sida nadai orang ngubur. Utai tu deka nyadi ba semua sida, nyengkaum bini, anak lelaki, enggau anak indu sida. Aku deka malas penyai sida.” TUHAN ngasuh aku madahka ngagai orang mayuh pasal penyinu ati aku, lalu ngasuh aku bejaku: “Awakka ai mata aku bekeberai siang malam, awakka aku enda ngetu nyabak laban bansa aku balat bakal sereta balat pedis. Lebuh aku bejalai ba sebelah padang, dia aku tepedaka bangkai orang ke mati beperang. Lebuh aku tama ngagai nengeri, dia aku tepedaka orang mati keberuran. Sida nabi enggau sida imam majak ngereja pengawa sida, tang sida enda nemu utai ti dikereja diri.” TUHAN, kati Nuan udah nulak menua Judah? Kati Nuan begedika orang Sion? Nama kebuah Nuan balat ngemediska kami datai ke kami nyau enda ulih suman? Kami begigaka pemaik, tang nadai utai ti manah nyadi. Kami ngarapka diri suman, tang utai ti balat ngenakut datai. Kami udah bedosa ngelaban Nuan, TUHAN. Kami ngaku dosa kami empu enggau dosa aki ini kami. Kingatka semaya Nuan, lalu anang mechat kami. Anang ngemaluka Jerusalem endur alai kerusi diraja Nuan ti bemulia. Anang mungkir ari sempekat ti udah digaga Nuan enggau kami. Nadai siku engkeramba orang bansa bukai ulih ngasuh hari ujan. Langit enda ulih ngasuh hari ujan. Kami andal ati ke Nuan, O TUHAN Allah Taala kami, laban Nuan siku aja ti ngereja utai nya. Udah nya TUHAN bejaku ngagai aku, “Enti sema Moses seduai Samuel bediri ditu minta kasih ari Aku, enggai meh Aku ngayanka pengasih ngagai orang nya. Buru sida. Asuh sida rari ari mua Aku. Lebuh sida nanya ngagai nuan kini ke sida patut mupuk, padahka ngagai sida Aku udah nyebut tu: Sekeda sida deka diukum mati laban penyakit. Nya meh tunga sida deka mupuk! Sekeda sida deka diukum mati beperang. Nya meh tunga sida deka mupuk! Sekeda sida deka diukum mati keberuran. Nya meh tunga sida deka mupuk! Sekeda sida deka ditabanka nyadi orang tangkap. Nya meh tunga sida deka mupuk! Aku ti TUHAN udah ngeletak empat bengkah utai ti jai deka nyadi ba sida: sida deka mati beperang. Bangkai sida deka diperibitka ukui. Burung deka bepakaika sida, lalu jelu babas deka makai teda bangkai sida. Aku deka ngasuh semua bansa di dunya tu geli meda sida. Aku ngereja nya ketegal utai ti udah dikereja Manasi anak Hesekiah di Jerusalem, lebuh iya nyadi raja menua Judah.” Ku TUHAN Bejaku, “Sapa deka kasihka kita, kita orang Jerusalem, lalu sapa deka sinu ati ke kita? Sapa deka ngetu lalu nanyaka pasal pengerai kita? Kita udah nulak Aku. Kita udah ninggalka Aku. Nya alai Aku nyengkau kita lalu ngeredakka kita laban Aku nyau lelak nagang Diri ringat. Dalam semua nengeri di menua tu Aku naburka kita ngagai angin baka rumput ti rangkai. Aku ngerusak kita, O nembiak Aku, Aku munuh anak kita laban kita enda badu ngaga ulah ti jai. Di menua kita mayuh agi indu ke balu ari igi pasir ti ba tebing tasik. Aku munuh sida ke bujang lebuh sida agi benung orang lalu Aku ngasuh indai sida merinsa. Enggau ngenyit Aku ngasuh sida dituntung ati ti tusah enggau penakut. Indai ke lenyau tujuh iku anak, udah luput jengap-jengap nyintak seput. Ba iya, hari ti siang udah bebali nyadi petang. Iya dipechat sereta tusah ati. Aku deka nejuka bala munsuh kita munuh bala kita ke agi idup. Aku ti TUHAN, udah bejaku.” Naka meh pemerinsa aku tu! Nama kebuah indai aku ngadaka aku? Aku enda tau enda belaya sereta bekelikuh enggau semua orang di menua tu. Aku nadai kala nyali duit, tauka nginjau duit. Tang semua orang bela nyumpah aku. TUHAN, awakka semua sumpah sida dikamatka magang, enti aku nadai udah kala bebendar betuaika Nuan, enti aku nadai udah kala minta kasih ari Nuan ngarika bala munsuh aku lebuh sida dituntung penusah enggau pemerinsa. ( Nadai orang ulih matahka besi, kelebih agi besi ari utara ti dichampur enggau temaga.) Ku TUHAN bejaku ngagai aku, “Aku deka ngasuh bala munsuh nabanka pengaya enggau pesaka bala nembiak Aku, kena ngukum sida ketegal dosa ti udah dikereja sida di serata menua tu. Aku deka ngasuh sida bekereja ke bala munsuh sida di menua ti enda ditemu sida, laban pengeringat Aku mau baka api, lalu deka mau belama iya.” Udah nya aku bejaku, “ TUHAN, Nuan Empu nemu semua utai. Kingatka aku, lalu tulung aku. Awakka aku malas orang ke merinsaka aku. Anang kelalu liat ati enggau sida datai ke sida nyau ulih munuh aku. Ingat, aku dipechat ketegal Nuan. Nuan udah bejaku ngagai aku, lalu aku mendingka semua leka jaku Nuan. Aku endang enggi Nuan, TUHAN Allah Taala ti Pemadu Bekuasa, lalu leka jaku Nuan ngasuh ati aku gaga sereta lantang. Aku enda enggau orang ketawa ngelantangka diri. Aku ngasika jaku Nuan lalu diau kediri, lalu ringat. Nama kebuah aku seruran merinsa? Nama kebuah bakal aku enda ulih disumanka? Nama kebuah sida enggai gerai? Kati Nuan bisi ati deka ngasuh aku asa ngapa, baka sungai ti rangkai lebuh musin panas?” TUHAN lalu nyaut, “Enti nuan pulai baru ngagai Aku, Aku deka nerima nuan, lalu nuan deka nyadi nembiak Aku baru. Enti nuan enda bejaku mapap, tang madahka pesan ti beguna, nuan deka nyadi nabi Aku baru. Orang mayuh deka pulai baru ngagai nuan, lalu nuan enda ibuh mansang ngagai sida. Aku deka ngaga nuan nyadi baka dinding temaga ti tegap di mua sida. Sida deka ngelaban nuan, tang sida enda ulih ngalahka nuan. Aku deka meruan enggau nuan lalu nyaga nuan, ngambika nuan likun. Aku deka ngelepaska nuan ari kuasa orang ke jai sereta mangah. Aku ti TUHAN, udah bejaku.” TUHAN lalu bejaku baru ngagai aku. Ku Iya, “Anang bebini tauka beranak ba endur ti baka tu. Aku deka madahka ngagai nuan utai ti deka nyadi ba bala anak mit ke ada ditu, enggau ba apai indai sida. Sida deka mati laban penyakit, lalu nadai orang deka ngulitka sida, tauka nguburka sida. Bangkai sida deka betegaring ba tanah baka tugung tai. Sida deka mati beperang tauka mati keberuran, lalu bangkai sida deka nyadika pemakai burung enggau jelu babas. “Nuan enda tau tama ngagai rumah orang ke ngulit. Anang sinu ati ke barang sapa orang. Aku enggai agi merekatka bala nembiak Aku ngena pemaik, tauka ngayanka pengerindu enggau pengasih ngagai sida. Orang ke kaya enggau ke seranta deka mati di menua tu, tang nadai orang deka nguburka sida, tauka ngulitka sida. Kita enda tau ngurik tubuh, tauka ngukur pala kita kena ngayanka penusah ati diri. Nadai orang deka merindang, lalu makai ngirup enggau orang ke ditinggalka kaban belayan mati. Nadai orang deka ngayanka penyinu ati diri ngagai orang ke mati apai tauka mati indai. “Anang tama ngagai rumah ti alai orang ngintu pengerami makai besai. Anang duduk makai ngirup enggau sida. Pendingka utai ti disebut Aku, TUHAN ti Pemadu Bekuasa, ti Allah Taala ke disembah orang Israel. Aku deka madamka munyi nyawa orang ke lantang sereta gaga ati, enggau munyi nyawa orang ke rami ngintu gawai tikah. Orang ditu deka meda utai tu nyadi. “Lebuh nuan madahka semua utai tu ngagai sida, sida deka nanya ngagai nuan kebuah Aku udah mutuska runding deka ngukum sida ngemalat nya. Sida deka nanyaka penyalah diri, enggau dosa ti udah dikereja sida ngelaban TUHAN Allah Taala sida. Udah nya, padahka ngagai sida jaku ti udah disebut TUHAN, ‘Sida aki ini kita udah ninggalka Aku lalu nyembah sereta betuaika bala petara bukai. Sida udah ninggalka Aku lalu enda ngasika ajar Aku. Tang kita udah ngereja utai ti jai agi ari ti udah dikereja aki ini kita. Semua kita kieh magang sereta jai, lalu kita enda ngasika Aku. Nya alai Aku deka muai kita ari menua tu ngagai menua ti enda kala ditemu kita tauka ditemu aki ini kita, lalu dia kita deka betuaika bala petara bukai siang malam, lalu Aku enggai ngayanka pengasih Aku ke kita.’ ” Ku TUHAN bejaku, “Nya alai, dinga nuan, maya deka datai alai orang badu agi besumpah ngena nama Aku TUHAN ti idup, ti udah mai orang Israel pansut ari menua Ejip, tang sida deka besumpah ngena nama Aku TUHAN ti idup, ti udah mai sida pansut ari menua ti di utara, enggau ari semua menua bukai ti udah alai Aku ngachirka sida. Aku deka mai sida pulai baru ngagai menua sida empu, ngagai menua ti udah diberi Aku ngagai aki ini sida. Aku ti TUHAN, udah bejaku.” Ku TUHAN bejaku, “Aku ngangauka mayuh orang berikan ngasuh sida datai lalu nangkap orang tu. Udah nya Aku deka ngangauka orang ke ngasu datai lalu ngasuh sida ngasu orang tu ba sebelah bukit enggau munggu, enggau dalam lubang gua. Aku meda semua utai ti dikereja sida. Nadai utai ulih dilalaika ari Aku. Semua dosa sida dipeda Aku magang. Aku deka ngasuh sida mayar dua kali lipat ke dosa enggau penyai sida, laban sida udah ngamahka menua Aku ngena engkeramba ti enda nemu enseput baka bangkai, lalu udah ngisi menua tu enggau engkeramba sida.” TUHAN, Nuan ke nyaga aku, lalu meri aku pengering. Nuan nulung aku lebuh maya penusah. Mayuh bengkah bansa deka datai ngagai Nuan ari tisi dunya, lalu nyebut, “Aki ini kami nadai utai bukai, tang semina petara ti pelesu, engkeramba ti nadai guna. Kati mensia ulih ngaga petara ke diri empu? Enda, laban enti sida ulih, petara nya ukai petara ti bendar.” Ku TUHAN bejaku, “Nya alai Aku deka, sekali tu aja, ngasuh semua bansa nemu kuasa enggau pengering Aku. Sida deka nemu Aku endang TUHAN.” Ku TUHAN bejaku, “Orang Judah, dosa kita ditulis ngena pen besi. Dosa nya ditebuk ke dalam ati kita ngena pin intan, lalu diukirka ba sukut alta kita. Bala kita nyembah ba alta enggau ba tiang engkeramba ti udah didirika kita ke petara indu Aserah ngimbai genap iti batang kayu ti agi idup ba sebelah tuchung bukit enggau ba sebelah bukit di menua pesisir. Aku deka ngasuh munsuh kita nabanka pengaya enggau pesaka kita ketegal semua dosa ti udah dikereja kita di serata menua kita. Kita enda tau enda nyerahka menua ti udah diberi Aku ngagai kita, lalu Aku deka ngasuh kita betuaika bala munsuh kita di menua ti enda ditemu kita, laban pengeringat Aku mau baka api, lalu deka mau belama iya.” Ku TUHAN bejaku, “Tulah meh orang ke ninggalka Aku lalu manggaika pengarap sida ba mensia, ba pengering mensia. Orang nya baka babas di menua puang, ti tumbuh ba tanah ti rangkai sereta kusi, ba tanah ti masin ti nadai tumbuh utai. Nadai utai ti manah bisi kala nyadi ba orang nya. “Tang Aku deka merekatka orang ke manggaika pengarap sida ba Aku. Orang nya baka kayu ti tumbuh ba tebing sungai lalu nyerangkapka urat iya ngagai sungai. Iya enda takutka musin kemarau, lalu daun iya mengkang gadung. Iya enda irauka hari ti nadai ujan, lalu iya majak bebuah. “Sapa nemu ati mensia? Nadai utai ti nemu agi ngakal ari ati mensia. Iya kelalu balat sakit lalu enda ulih digeraika. Aku ti TUHAN, meresa runding sereta nguji ati mensia. Aku meri sida utai nitihka jalai sida idup, nitihka utai ti dikereja sida.” Orang ke bulih duit ngena jalai ngelakar nya baka burung ti meram telu burung bukai. Lebuh iya agi benung orang, semua pengaya iya deka lenyau magang, lalu ba pengujung iya, iya nadai penunga, tang semina beli aja. Rumah Sembiang kitai baka kerusi diraja ti bemulia, ti bediri ba bukit ti tinggi kenyau ai pun kelia. TUHAN, Nuan siku aja ke dikandalka orang Israel. Semua orang ke ninggalka Nuan, deka dipechat. Sida deka lesap baka nama ti ditulis ba amau, laban sida udah ninggalka Nuan ti TUHAN, mata ai ti beresi. TUHAN, geraika aku, ngambika aku amat suman. Selamatka aku, ngambika aku amat likun. Semina Nuan siku aja ke dipuji aku! Ku orang mayuh nyebut ngagai aku, “Ni jaku TUHAN? Awakka Iya ngamatka jaku nya diatu!” Tang, TUHAN, aku nadai kala minta Nuan ngasuh penusah ti besai ninggang sida. Aku nadai ati deka ngasuh sida ditinggang penusah. TUHAN, Nuan nemu nya. Nuan nemu utai ti udah disebut aku. Anang ngenakutka aku. Nuan Empu ke alai aku belindung lebuh penusah datai. Pechat sida ke merinsaka aku, tang anang mechat aku, TUHAN. Emba sida, tang anang ngemba aku. Asuh penusah ti besai ninggang sida lalu redakka sida. Ku TUHAN bejaku ngagai aku, “Jeremiah, alai nuan mupuk lalu padahka pesan Aku ba mua Pintu Orang Mayuh, ti ditengah raja menua Judah tama-pansut ari nengeri nya. Udah nya mansang nuan ngagai semua mua pintu ti bukai di Jerusalem. Asuh sida ke raja, enggau semua orang ke di menua Judah, enggau genap iku orang ke diau di Jerusalem ke tama nengah pintu nya, mendingka utai ti disebut Aku. Padahka ngagai sida, enti sida sayauka seput diri, sida enda tau berangkutka utai lebuh Hari Sabat. Sida enda tau mai utai nengah pintu nengeri Jerusalem, tauka ngangkut utai pansut ari rumah sida lebuh Hari Sabat. Sida enda tau bekereja lebuh Hari Sabat. Sida enda tau enda ngintu hari nya nyadi hari ti kudus, munyi ti udah dipadahka Aku ngagai aki ini sida. Aki ini sida enda mendingka Aku tauka ibuhka Aku, tang kieh. Sida enggai ngasika Aku tauka belajar ari Aku. Padahka ngagai sida, sida enda tau enda ngasika semua jaku Aku. Sida enda tau ngangkut utai nengah pintu nengeri nya lebuh Hari Sabat. Sida enda tau enda ngintu Hari Sabat kudus, lalu enda tau sekali-kali gawa. Nya baru bala raja enggau bala anak raja sida deka tama nengah pintu Jerusalem, lalu bempu kuasa diraja baka ke dikembuan David. Sida enggau bala orang Judah enggau orang Jerusalem, deka nepan kerita perang, enggau nepan kuda, lalu nengeri Jerusalem deka seruran penuh laban mensia. Orang deka datai ari mayuh bengkah nengeri di serata menua Judah, enggau ari genturung pendiau ti ngelingi Jerusalem. Sida deka datai ari menua Benjamin, ari kaki bukit, ari bukit, enggau ari selatan menua Judah. Sida deka mai ngagai Rumah Aku piring tunu enggau piring, pemeri ti digaga ari gandum enggau menyan, sama enggau pemeri terima kasih. Tang sida enda tau enda ngasika Aku, lalu ngintu Hari Sabat kudus. Sida enda tau ngangkut utai nengah pintu Jerusalem lebuh hari nya, laban enti sida bisi ngangkut utai baka nya, Aku deka nunu semua pintu Jerusalem. Api deka ngeretungka istana di Jerusalem, lalu nadai orang ulih madamka api nya.” Ku TUHAN bejaku ngagai aku, “Mansang nuan ngagai rumah tukang periuk. Aku deka meri pesan ngagai nuan dia.” Nya alai aku mupuk, lalu tetemuka tukang periuk ke benung gawa. Lebuh periuk ti digaga iya nya enda tentu manah dipeda, iya ngambi tanah liat nya lalu ngaga utai bukai. Udah nya TUHAN bejaku ngagai aku, “Kati Aku nadai hak ngaga kita orang Israel baka tukang periuk ti ngena tanah liat nya? Kita ba jari Aku, baka tanah liat ti ba jari tukang periuk. Enti Aku madahka Diri deka mabut, ngerubuh, tauka ngerusak bansa tauka perintah, tang udah nya bansa nya ngelengkaka penyai iya, Aku enda nyadi ngereja utai ti ku Aku. Tang enti Aku madahka Diri deka niri tauka negika siti bansa tauka perintah, tang udah nya bansa nya enda ngasika Aku, lalu ngereja penyai, Aku enda nyadi ngereja utai ti ku Aku. Nya alai, padahka ngagai orang Judah, enggau ngagai orang ke diau di Jerusalem, Aku diatu benung bekira deka ngelaban sida, lalu Aku sedia deka ngukum sida. Asuh sida badu agi bedosa. Asuh sida ngubah ulah enggau utai ti dikereja sida. Sida deka nyaut, ‘Kami enggai. Nama kebuah kami enda tau enda berubah? Semua kami deka majak kieh sereta jai nitihka peneka ati kami.’ ” Ku TUHAN bejaku, “Tanyaka ngagai genap bengkah bansa enti utai ti baka nya bisi udah kala nyadi suba. Orang Israel udah ngereja utai ti udu jai! Kati bukit Lebanon nadai kala dibalut seleju? Kati ai sungai ti rarat ari bukit bisi kala rangkai? Tang bala nembiak Aku enda agi ingatka Aku. Sida nunu menyan ke engkeramba. Sida udah tesangkut ba jalai ti ditengah sida. Sida enda agi niti jalai ti lama. Sida bejalai nengah jalai ti nadai meruan arus. Sida udah ngaga menua tu nyadi menua ti balat ngasuh takut, ti dipechat belama iya. Semua orang ke mansa deka tekenyit ati laban utai ti dipeda sida, lalu sida ngilikka pala alit ati. Aku deka ngachirka bala nembiak Aku di mua munsuh sida, baka amau ti dikebuka ribut ti muput ari timur. Aku deka nguingka belakang Aku ngagai sida. Aku enggai nulung sida lebuh sida dituntung penusah.” Udah nya orang mayuh lalu bejaku, “Aram kitai ngelaban Jeremiah. Kitai endang seruran bisi sida imam ti tau ngajar kitai, orang ke bepenemu-dalam ti tau ngiring kitai, enggau sida nabi ti tau madahka pesan Allah Taala. Aram kitai bedawaka iya, lalu badu agi mendingka utai ti disebut iya.” Aku lalu besampi, “ TUHAN, dingaka utai ti disebut aku, lalu pendingka utai ti disebut munsuh aku pasal aku. Kati pemadas patut dibalas enggau penyai? Tang taja pia, sida udah numbak lubang kena sida ngulihka aku. Kingatka aku ti udah ngadap ngagai Nuan, lalu bejaku ngarika sida, ngambika Nuan enda nyamah sida lebuh Nuan ringat. Tang diatu TUHAN, awakka bala anak sida mati keberuran. Awakka sida mati beperang. Awakka sida ke indu mati laki, mati anak. Awakka sida ke lelaki mati laban penyakit, lalu bala lelaki ke agi biak mati beperang. Asuh bala perumpak datai enggau ngenyit lalu ngerumpak rumah sida. Asuh sida nyerauh takut. Sida udah numbak lubang kebung kena sida ngulihka aku, lalu udah nan panjuk kena sida nyintak aku. Tang Nuan, O TUHAN, nemu semua aum sida ke deka munuh aku. Anang ngampun penyai sida tauka ngampun dosa sida. Asuh sida alah, lalu jamah sida lebuh Nuan ringat.” TUHAN ngasuh aku mupuk lalu meli sigi benda ti digaga ari tanah liat. Iya mega ngasuh aku mai sekeda bala tuai bansa, enggau sekeda bala imam ke tuai agi umur, lalu bejalai nengah Pintu Kerimpak Periuk pansut ngagai Lebak Hinom. Dia aku deka madahka pesan ti deka diberi TUHAN ngagai aku. TUHAN ngasuh aku nyebut, “Raja menua Judah enggau kita orang Jerusalem, pendingka jaku Aku, TUHAN ti Pemadu Bekuasa, ti Allah Taala ke disembah orang Israel. Aku deka ngasuh penusah ti besai ninggang endur tu, datai ke semua orang ke ninga pasal penusah nya, deka temati-kutu magang. Aku deka ngereja nya laban orang Israel udah ninggalka Aku, lalu udah ngamahka endur tu beberika piring ngagai petara bukai, petara ti enda ditemu sida tauka ditemu aki ini sida, tauka ditemu bala raja menua Judah. Sida udah ngisi endur tu enggau darah orang ke nadai penyalah, lalu sida udah ngaga alta ke Baal, lalu nunu bala anak sida nyadika piring ba alta nya. Aku nadai kala ngasuh sida ngereja nya. Indah berundingka utai nya deh Aku enda. Nya alai, maya deka datai alai endur tu deka badu agi dikumbai Topet tauka Lebak Hinom, tang deka dikumbai Lebak Alai Bebunuh. Tu meh endur alai Aku deka ngemuntanka pelan orang Judah enggau orang Jerusalem. Aku deka ngasuh bala munsuh sida ngalahka sida lalu munuh sida lebuh beperang. Aku deka nyerahka bangkai sida nyadika pemakai burung enggau jelu babas. Aku deka ngasuh pengerusak ti besai ninggang nengeri tu ngambika semua orang ke mansa deka tekenyit ati sereta temati-kutu meda pengerusak nya. Munsuh deka ngelulung nengeri tu, lalu nguji munuh orang ke diau ditu. Bala munsuh deka balat ngelulung nengeri tu datai ke orang ke diau dalam nengeri tu deka bepakaika pangan diri, nyengkaum bepakaika bala anak sida empu.” Udah nya TUHAN lalu ngasuh aku mechahka benda nya di mua bala sida ke udah bejalai sama enggau aku lalu madahka ngagai sida jaku ti udah disebut TUHAN ti Pemadu Bekuasa, “Aku deka ngeredakka bala orang tu, enggau nengeri tu, lalu nengeri tu deka nyadi baka benda ti pechah tu ti enda ulih dipejantilka baru. Orang mayuh deka nguburka bala sida ke mati di Topet, datai ke sida nyau nadai agi endur alai nguburka sida. Aku besemaya deka ngaga nengeri tu enggau orang ke diau dalam nengeri tu baka Topet. Semua rumah di Jerusalem, rumah bala raja menua Judah, enggau semua rumah ti bisi perabung ti udah alai nunu menyan kena besembahka bintang, lalu udah nyadi endur alai nuang wain nyadika piring ti diberi ngagai petara bukai, deka kamah magang baka Topet.” Udah nya aku angkat ari Topet, endur alai aku ti udah diasuh TUHAN madahka pesan Iya. Aku mupuk lalu bediri ba tengah laman Rumah Sembiang, lalu madahka ngagai semua orang mayuh pasal TUHAN ti Pemadu Bekuasa, ti Allah Taala ke disembah orang Israel ti udah nyebut, “Aku deka ngukum nengeri tu enggau genap buah nengeri ti mit semak nengeri tu, munyi ti udah dipadahka Aku, laban kita kieh lalu enggai mendingka jaku Aku.” Lebuh Imam Pasur anak Imer, ti nyadi tuai pemesai dalam Rumah Sembiang, ninga aku madahka utai nya, iya ngasuh orang nyipat aku, lalu nanchang aku ngena rantai ba semak Pintu Benjamin dalam Rumah Sembiang. Pagi hari siti, lebuh Pasur udah muka rantai aku, aku lalu nyebut ngagai iya, “ TUHAN nadai meri nuan nama Pasur. Nama ti diberi Iya ngagai nuan nya ‘Penakut ti Besai di Semua Endur.’ TUHAN Empu udah nyebut, ‘Aku deka ngaga nuan nyadi orang ke balat diketakutka nuan empu, enggau bala pangan nuan, lalu nuan deka meda semua sida dibunuh pedang munsuh. Aku deka ngasuh semua orang Judah dipegai raja menua Babilon. Iya deka nabanka sekeda sida nyadi orang tangkap ngagai menua iya empu, lalu munuh sida ti bukai. Aku deka mega nejuka bala munsuh sida ngerumpak semua pengaya nengeri tu, lalu ngerampas semua reta tengkira enggau pesaka iya, lalu nabanka semua utai nya ngagai menua Babilon. Tang pasal nuan empu, Pasur, nuan enggau semua kita sebilik deka ditangkap magang lalu ditabanka ngagai menua Babilon. Nuan deka mati di menua nya lalu dikuburka, sama enggau bala pangan nuan ti udah alai nuan nusui mayuh macham pemula.’ ” TUHAN, Nuan udah nipu aku, lalu aku udah kena tipu. Nuan kering agi ari aku, lalu Nuan udah ngalahka aku. Semua orang beduan aku. Sida ketawaka aku sepamanjai hari. Genap kali aku bejaku, aku enda tau enda merakka nyawa sereta manjung, “Penusah! Pengerusak!” TUHAN, aku seruran dikemelika orang sereta dipechat ketegal aku madahka pesan Nuan. Tang lebuh aku nyebut, “Aku deka badu agi ingatka TUHAN, lalu badu agi bejaku dalam nama Iya,” nya baru pesan Nuan mau baka api dalam ati aku. Enggau naka ulih aku nguji nagang pesan nya pansut, tang enda ulih. Aku ninga genap iku orang betelai, “Utai ti balat ngenakutka bisi di semua endur. Nya alai, aram kitai madahka pasal Jeremiah ngagai perintah.” Indah pangan ke rapat enggau aku deh nganti aku alah. Ku sida, “Nyangka ukur iya ulih ditipu. Nya baru kitai ulih ngalahka iya lalu malas.” Tang Nuan, TUHAN, ti kering sereta bekuasa, setanah enggau aku lalu sida ke merinsaka aku deka asa ngapa. Sida deka dipechat belama iya, laban sida enda ulih mujur. Pemalu sida deka dikingatka belama iya. Tang TUHAN ti Pemadu Bekuasa, Nuan endang ngabas ati enggau runding orang ngena pengelurus. Nuan nemu utai ti di dalam ati enggau runding sida. Nya alai awakka aku meda Nuan malas penyai bala munsuh aku, laban aku udah manggaika pekara aku ba jari Nuan. Belagu ke TUHAN! Puji TUHAN! Iya ngelepaska orang ke kena tekan ari kuasa orang ke jai. Sumpah enggau hari aku ada! Anang ngingatka hari indai aku ngadaka aku! Tulah meh orang ke mai berita “Anak nuan lelaki! Nuan bisi anak lelaki!” lalu ngasuh ati apai aku gaga. Awakka orang nya baka nengeri ti udah dirusak TUHAN enggau nadai pengasih. Awakka orang nya ninga munyi sabak orang ke natka pemedis lebuh pagi hari lalu ningaka munyi terantang begau lebuh tengah hari, laban iya enda munuh aku lebuh aku ada lalu enda ngaga kandung indai aku nyadika kubur aku. Nama kebuah aku ada? Kati aku ada ngambika aku semina ditinggang penusah enggau pemerinsa aja, lalu dipechat lebuh aku mati? Raja Sedekiah menua Judah ngasuh Pasur anak Malkiah seduai Imam Sepaniah anak Maseiah mai peminta tu ngagai aku: “Kami minta nuan bejaku ngagai TUHAN ngarika kami, laban Raja Nebukadnesar menua Babilon enggau bala soldadu iya benung ngelulung nengeri tu. Nyangka ukur TUHAN deka ngereja kereja ajih ke kitai, lalu mejalka Nebukadnesar nyurutka diri.” Udah nya TUHAN lalu bejaku ngagai aku. Aku lalu ngasuh sida ke udah diasuh betemu enggau aku madahka ngagai Sedekiah jaku ti disebut TUHAN Allah Taala ke disembah orang Israel, “Sedekiah, Aku deka ngalahka bala soldadu nuan ke benung beperang ngelaban raja menua Babilon enggau bala soldadu iya. Aku deka nugungka senyata bala soldadu nuan ba puak nengeri. Aku deka beperang ngelaban nuan enggau pengabis kuasa, pengeringat, pemedis ati enggau pengeransi aku. Aku deka munuh semua orang ke diau dalam nengeri tu. Mensia enggau jelu deka sama mati laban penyakit. Tang ba pasal nuan empu, bala pemesai nuan, enggau orang ke enda mati dalam perang tu, ti enda mati keberuran, enda mati laban penyakit, Aku deka nejuka semua kita ditangkap Raja Nebukadnesar enggau bala munsuh kita, lalu sida deka munuh kita. Nebukadnesar deka munuh kita. Iya enda ngalau kita, tauka kasih, tauka sinu ati ke kita. Aku ti TUHAN, udah bejaku.” Udah nya TUHAN lalu ngasuh aku nyebut ngagai orang mayuh, “Pendingka tu ulih kita! Aku ti TUHAN, ngasuh kita milih jalai ti nuju ngagai pengidup tauka jalai ti nuju ngagai pemati. Barang sapa agi mengkang dalam nengeri tu deka dibunuh lebuh maya perang, tauka mati keberuran, tauka mati laban penyakit. Tang orang ke pansut lalu nyerahka diri ngagai orang Babilon ke benung nyerang nengeri tu diatu, enda dibunuh, tang ulih ngidupka nyawa diri. Aku udah mutuska runding enggai ngalau tang deka ngerusak nengeri tu. Nengeri tu deka diserahka ngagai raja menua Babilon, lalu raja nya deka nunu nengeri tu. Aku ti TUHAN, udah bejaku.” Jerusalem, nuan duduk tinggi ari atas semua lebak, baka batu ti bediri ari atas emperan. Tang Aku deka ngelaban nuan. Nuan madahka nadai orang ulih nyerang nuan, tauka ngelanggar kuta nuan. Tang Aku deka ngukum nuan ketegal utai ti udah dikereja nuan. Aku deka nunu istana nuan, lalu api nya deka ngeretungka semua utai ti ngelingi istana nya. Aku ti TUHAN, udah bejaku.” “Aku ti TUHAN ngasuh kita ngereja utai ti lurus sereta ngena. Jaga orang ke kena tipu ari orang ke nipu iya. Anang merinsa tauka nekanka pengidup orang kampar, orang ke nadai apai indai, tauka indu ke balu, lalu anang munuh orang ke nadai penyalah ba endur ti kudus tu. Enti kita amat ngereja utai ti udah diasuh Aku kereja kita, nya baru bala peturun David deka nampung-menampung nyadi raja. Lalu sida, enggau bala pemesai sida, enggau bala sida empu, deka majak bejalai nengah pintu istana tu ngena kerita perang enggau kuda. Tang enti kita enda ngasika jaku Aku, Aku besumpah madahka istana tu deka nyadi tembawai. Aku ti TUHAN, udah bejaku. “Ba peda Aku, istana raja menua Judah sebaka pemanah enggau menua Giliat, sebaka pemanah enggau Bukit menua Lebanon. Tang Aku deka ngaga istana nya nyadi endur ti sunyi ti enda diuan mensia. Aku deka ngasuh orang ngerusak iya. Semua sida deka mai kapak, nebang tiang kayu sidar ti manah gaya, lalu nibarka sida ngagai api. “Udah lepas nya, mayuh orang kampar deka mansa lalu bejaku enggau pangan diri betanyaka kebuah TUHAN udah ngereja utai ti baka nya ngagai nengeri ti besai tu. Udah nya sida deka nyaut madahka utai nya nyadi laban kita udah ngelengkaka sempekat kita enggau Aku, ti Allah Taala kita, lalu udah nyembah sereta betuaika petara bukai.” Orang Judah, anang nyabakka Raja Josiah. Anang ngulitka pemati iya. Tang nyabak kita ke anak iya Joahas laban sida nabanka iya, lalu iya enda pulai agi. Iya nadai meda menua ada iya agi. Ku TUHAN bejaku ngenang pasal Raja Joahas anak Josiah, ke nganti apai iya nyadi raja menua Judah, “Iya udah angkat ari tu, lalu enda pulai agi. Iya deka mati di menua ti alai sida udah nabanka iya, lalu iya nadai meda menua tu agi.” Tulah meh orang ke ngaga rumah beduduk ba atur ti enda lurus lalu nangkir rumah nya ngena jalai ngelakar, ke ngasuh bala nembiak iya gawa enggau nadai upah lalu enda mayar gaji sida. Awakka orang diukum enti iya nyebut, “Aku deka ngaga ke aku empu sebuah rumah limas ti mayuh bilik ti besai di sadau.” Iya lalu ngaga jenila ba rumah nya, ngelapis rumah nya ngena kayu sidar, lalu ngechat iya mirah. Kati nuan ulih ngaga diri nyadi raja ke menyana agi ketegal nuan begagaka rumah ngena kayu sidar, rumah ti manah agi gaya ari rumah orang bukai? Apai nuan lantang diau seumur idup. Iya endang seruran lurus sereta meri atur ti betul, lalu iya mujur dalam semua utai ti dikereja iya. Iya meri atur ti betul lebuh iya ngatur pechara orang ke seranta, lalu semua utai ti dikereja iya mujur magang. Nya meh reti nemu TUHAN. Tang nuan semina berundingka diri empu aja. Nuan munuh orang ke nadai penyalah lalu nuan nekanka pengidup bala nembiak nuan sereta kasar enggau sida. TUHAN udah bejaku. Nya alai ku TUHAN bejaku ngenang pasal Raja Jehoiakim anak Josiah, raja menua Judah, “Nadai orang deka ngulitka pemati iya tauka nyebut munyi tu, ‘O menyadi, naka meh penusah! Naka meh penusah!’ Nadai orang deka meliar ai mata tauka nyabakka iya, ‘Tuan aku! Raja aku!’ Baka orang ke muai bangkai keledai, baka nya meh iya deka diirit kebukai lalu dibuai ke luar ari nengeri Jerusalem.” Orang Jerusalem, alai kita mansang ngagai menua Lebanon lalu manjung. Alai kita mansang ngagai menua Basan lalu nyabak. Manjung ari bukit menua Moap, laban semua orang ke setanah enggau nuan udah alah magang. TUHAN udah bejaku ngagai kita lebuh kita kaya-raja, tang kita enggai mending. Nya meh utai ti udah dikereja kita seumur idup. Kita endang enggai sekali-kali ngasika TUHAN. Bala tuai kita deka dikebuka ribut, bala orang ke setanah enggau kita deka ditabanka nyadi orang tangkap, nengeri kita deka dipechat lalu nyadi malu ketegal semua penyai ti udah dikereja kita. Kita belelak likun dikelingi kayu sidar ti dibai ari Lebanon. Tang naka meh pengasih kita lebuh pemedis nuntung kita, pemedis baka ke ditatka indu ke radai deka beranak. Ku TUHAN bejaku ngagai Raja Jehoiakin anak Raja Jehoiakim menua Judah, “Laban Aku tu Allah Taala ti idup, enti sema nuan nya tinchin pengechop ti dikena Aku ba jari kanan Aku, agi meh Aku deka merurutka nuan lalu nyerahka nuan ngagai orang ke diketakutka nuan, orang ke deka munuh nuan. Aku deka nyerahka nuan ngagai Raja Nebukadnesar menua Babilon, enggau bala soldadu iya. Aku deka muai nuan enggau indai nuan ngagai menua bukai. Seduai deka mansang ngagai siti menua ti ukai menua ada seduai, lalu seduai deka mati dia. Seduai deka lelengauka menua tu, tang seduai enda agi pulai kitu.” Ku aku bejaku, “Kati Raja Jehoiakin udah nyadi baka benda ti belah, ti dibuai, lalu enda diguna orang agi? Kati nya kebuah iya enggau bala anak iya udah dibuai ngagai menua ti enda ditemu sida?” O menua aku, menua aku, menua aku! Pendingka utai ti udah disebut TUHAN: “Orang tu diukum lenyau anak, nyadi orang ke nadai kala mujur. Iya nadai peturun merintah menua Judah kena nganti David. Aku ti TUHAN, udah bejaku.” “Tulah meh sida pengibun ke ngerusak lalu ngachirka bala nembiak Aku,” ku TUHAN bejaku. Nya alai tu meh munyi jaku TUHAN Allah Taala ke disembah orang Israel pasal orang ke dikarapka ngibun nembiak Aku: “Kita enda ngibun nembiak Aku. Kita udah ngachirka sida, lalu muru sida ngagai menua bukai. Diatu Aku deka ngukum kita ketegal penyai ti udah dikereja kita. Aku deka ngempuruka nembiak Aku ti bukai ari semua menua ti udah alai Aku ngachirka sida, lalu Aku deka mai sida pulai baru ngagai menua sida empu. Sida deka beranak betelesak lalu mansang mayuh tubuh. Aku deka ngasuh bala pengibun ngintu sida. Sida nembiak Aku nadai agi nangi tauka takut, lalu nadai siku sida deka lenyau. Aku ti TUHAN, udah bejaku.” Ku TUHAN bejaku, “Dinga nuan, maya deka datai alai Aku deka milih siku orang ke lurus ari peturun David, lalu iya deka merintah nyadi raja ti bepenemu-dalam lalu ngereja utai ti ngena sereta lurus di menua tu. Lebuh iya nyadi raja, Judah deka likun, lalu Israel deka diau dalam pemaik. Iya deka dikumbai ‘ TUHAN ti pengelurus kitai.’ Ku TUHAN bejaku, “Nya alai, dinga nuan, maya deka datai alai orang badu agi besumpah ngena nama Aku TUHAN ti idup, ti udah mai orang Israel pansut ari menua Ejip, tang sida deka besumpah ngena nama Aku TUHAN ti idup, ti udah mai orang Israel pansut ari menua ti di utara, enggau ari semua menua bukai ti udah alai Aku ngachirka sida. Udah nya baru sida deka diau di menua sida empu.” Ati aku balat tusah, lalu aku nyau getar-getar. Laban TUHAN, laban jaku Iya ti kudus, aku nyau baka orang ke mabuk, ke kelalu ngirup wain. Menua tu penuh laban orang ke enda tetap ati ngagai TUHAN. Pendiau sida jai, lalu sida ngena kuasa enggau jalai ti enda menyana. Ketegal sumpah TUHAN, menua tu ngulit lalu padang rumput nyau rangkai. Ku TUHAN bejaku, “Sida nabi enggau sida imam endang enda nangika Allah Taala. Aku udah tepedaka sida ngereja penyai dalam Rumah Sembiang. Jalai ti ditengah sida deka lichin sereta petang. Aku deka ngasuh sida tesangkut lalu tetingkap. Aku deka ngasuh penusah ti besai ninggang sida. Maya sida diukum endang deka datai. Aku ti TUHAN udah bejaku. Aku bisi udah meda dosa bala nabi Samaria. Sida udah bejaku ngena nama Baal lalu udah mai nembiak Aku tesat. Tang Aku udah meda sida nabi ke di Jerusalem ngereja utai ti jai agi ari nya: sida butang sereta nusui utai ti bula. Sida nulung orang ngereja penyalah, datai ke nadai siku orang nemu badu ngereja utai ti jai. Ba penemu Aku, semua sida nya jai magang baka orang Sodom enggau Gomorah. “Nya alai, tu meh utai ti disebut Aku TUHAN ti Pemadu Bekuasa, pasal sida nabi ke di Jerusalem: Aku deka meri sida utai ti pait nyadika pemakai sida enggau ai ti berachun nyadika ai irup sida, laban sida udah mai orang di serata menua tu enda nangika Allah Taala.” Ku TUHAN ti Pemadu Bekuasa bejaku ngagai orang Jerusalem, “Anang mendingka utai ti disebut sida nabi. Sida ngisi kita enggau pengadang ti bula. Sida madahka ngagai kita utai ti dikeluluka sida, ukai utai ti udah disebut Aku. Sida majak bejaku ngagai orang ke enggai mendingka utai ti disebut Aku, madahka sida deka mujur magang. Lalu sida bejaku ngagai genap iku orang ke kieh, madahka penusah ti besai nya enda negu sida.” Ku Aku bejaku, “Nadai siku ari bala nabi nya udah kala nemu resia runding TUHAN. Nadai siku sida bisi kala ninga tauka meretika pesan Iya, tauka mendingka, tauka ibuhka utai ti disebut Iya. Pengeringat TUHAN nya kabut besai, ribut biaubalai, ti deka mangka ba atas puchuk pala orang ke jai, lalu ribut nya enda badu ngapa, datai ke udah ngereja semua utai ti deka dikereja Iya. Jemah ila baru nembiak TUHAN deka meretika utai nya enggau terang.” Ku TUHAN bejaku, “Aku nadai ngirumka bala nabi tu, tang taja pia, sida mupuk. Aku nadai meri sida pesan, tang sida majak bejaku dalam nama Aku. Enti sida udah nemu resia ti dalam runding Aku, nya baru sida ulih madahka pesan Aku ngagai nembiak Aku, lalu ulih ngasuh sida ngelengkaka pengidup ti jai, enggau penyai ti dikereja sida. “Aku tu Allah Taala ti bisi di semua endur, lalu ukai semina ba siti endur aja. Nadai orang ulih ngelalaika diri ari Aku. Kati kita enda nemu, Aku bisi di semua endur, di serega enggau di dunya? Aku nemu utai ti udah disebut sida nabi ke bejaku bula dalam nama Aku, lalu ngumbai Aku udah meri sida pesan dalam mimpi. Ni pengelama sida nabi tu deka nesatka bala nembiak Aku ngena pemula ti dikeluluka sida? Sida ngumbai mimpi ti ditusui sida nya ulih ngasuh nembiak Aku enda ingatka Aku, baka aki ini sida ke enda ingatka Aku, lalu nitihka Baal. Nabi ti udah bemimpi patut madahka utai nya semina mimpi aja, tang nabi ti udah ninga pesan Aku patut madahka pesan nya enggau ati ti tetap. Jerami enggau gandum endang enda sebaka. Jaku Aku baka api, enggau baka tukul ti ngeredakka batu. Aku ngelaban sida nabi ke ngambi jaku ari pangan diri, lalu madahka jaku nya pesan Aku. Aku mega ngelaban sida nabi ke nyebut jaku diri empu, lalu ngumbai jaku nya datai ari Aku. Pendingka utai ti disebut Aku ti TUHAN! Aku ngelaban sida nabi ke madahka mimpi ti bula. Sida madahka mimpi nya, lalu nesatka nembiak Aku ngena pemula enggau jaku sida ke temegah ngapa. Aku nadai ngirumka sida, tauka ngasuh sida bejalai, lalu sida enda ulih sekali-kali nulung nembiak Aku. Aku ti TUHAN, udah bejaku.” Ku TUHAN bejaku ngagai aku, “Jeremiah, lebuh siku ari bala nembiak Aku, tauka siku nabi, tauka siku imam nanya ngagai nuan, ‘Nama pesan TUHAN?’ nuan enda tau enda nyebut, ‘Nuan tu ma ti berat ke TUHAN, lalu Iya deka muai nuan.’ Enti bala nembiak Aku, tauka siku nabi, tauka siku imam bisi ngena leka jaku ‘Ma berat TUHAN,’ Aku deka ngukum sida enggau sida sebilik. Tang genap iku sida patut nanya ngagai pangan diri, enggau ngagai kaban belayan sida munyi tu, ‘Nama saut ti udah diberi TUHAN? Nama utai ti udah disebut TUHAN?’ Nya alai sida enda tau agi ngena leka jaku ‘Ma berat TUHAN,’ laban enti orang ari bala sida nya bisi ngena leka jaku nya, Aku deka ngasuh pesan Aku nyadi ma ti amat berat ba sida. Orang mayuh udah nyarutka jaku Allah Taala sida, Allah Taala ti idup, TUHAN ti Pemadu Bekuasa. Jeremiah, tanyaka ngagai sida nabi, ‘Nama saut ti udah diberi TUHAN ngagai kita? Nama utai ti udah disebut TUHAN?’ Lalu enti sida enda ngasika jaku Aku, lalu ngena leka jaku ‘Ma berat TUHAN,’ padahka ngagai sida, Aku tetap deka nyengkau sida, lalu nikauka sida jauh ari Aku, enggau ari nengeri ti udah diberi Aku ngagai sida enggau ngagai aki ini sida. Aku deka ngasuh sida ditinggang pemalu sereta dipechat ti deka dikingatka belama iya.” TUHAN ngayanka ngagai aku dua iti bakul buah ara ti diengkah di mua Rumah Sembiang. (Utai tu nyadi udah bekau Raja Nebukadnesar nabanka Raja Jehoiakin anak Raja Jehoiakim menua Judah nyadi orang tangkap ari Jerusalem ngagai menua Babilon, sama enggau bala tuai orang Judah, bala tukang tempa, enggau orang ke landik gawa.) Bakul ti keterubah ngundan buah ara ti manah, buah ti dulu mansau. Bakul ti siti ngundan buah ara ti jai, ti enda ulih diempa agi. Udah nya TUHAN lalu bejaku ngagai aku, “Jeremiah, nama utai ti dipeda nuan?” Aku lalu nyaut, “Buah ara. Buah ti manah nya amat manah, lalu buah ti jai nya amat jai, enda ulih diempa agi.” Nya alai TUHAN lalu bejaku ngagai aku, “Aku TUHAN, ti Allah Taala ke disembah orang Israel, ngira orang ke udah ditabanka ngagai menua Babilon nya sebaka enggau buah ara ti manah tu, lalu Aku deka nelap enggau sida. Aku deka ngibun sida, lalu mai sida pulai baru ngagai menua tu. Aku deka nirika sida, lalu enda ngerubuh sida. Aku deka nanam sida, lalu enda enchabut sida. Aku deka meri sida ati ti keran deka nemu Aku ti TUHAN. Nya baru sida deka nyadi nembiak Aku, lalu Aku deka nyadi Allah Taala sida, laban sida deka pulai baru ngagai Aku enggau pengabis ati sida. “Nyadi pasal Raja Sedekiah menua Judah, bala orang politik ke ngelingi iya, enggau semua orang Jerusalem ti bukai, ti udah diau di menua tu tauka udah pindah ngagai menua Ejip, Aku ti TUHAN, deka ngaga semua sida nya nyadi baka buah ara ti enda ulih diempa agi. Aku deka ngasuh penusah ti besai ninggang sida, datai ke semua bansa di dunya tu deka takut. Orang deka beduan sida, ketawaka sida, ngeleseka sida, lalu ngaga nama sida nyadika leka jaku sumpah di semua endur alai Aku ngachirka sida. Aku deka ngasuh perang, keberuran, enggau penyakit ninggang sida, datai ke nadai siku sida deka tinggal di menua ti udah diberi Aku ngagai sida enggau ngagai aki ini sida.” Dalam taun ti keempat Jehoiakim anak Josiah nyadi raja menua Judah, aku bisi nerima siti pesan ari TUHAN pasal semua orang Judah. (Tu taun ti keterubah Nebukadnesar nyadi raja menua Babilon.) Ku aku bejaku ngagai semua orang Judah enggau orang ke diau di Jerusalem, “Dalam pengelama dua puluh tiga taun, berengkah ari taun ti ketiga belas Josiah anak Amon nyadi raja menua Judah nyentuk ngagai sehari tu, TUHAN udah bejaku ngagai aku, lalu aku nadai kala enda madahka utai ti disebut Iya. Tang kita enda bedulika nya. Kita enggai mending tauka ibuh, taja pen TUHAN udah majak ngirumka bala nembiak Iya, iya nya sida nabi, ngagai kita. Sida nabi ngasuh kita nguingka diri ari jalai pengidup ti jai, enggau ari penyai ti dikereja kita, ngambika kita ulih mengkang idup di menua ti udah diberi TUHAN ngagai kita enggau ngagai aki ini kita nyadika pesaka kita. Sida nagang kita besembah enggau betuaika petara bukai, sereta nagang kita nyungkak pengeringat TUHAN besembahka engkeramba ti udah digaga kita. Enti kita udah ngasika TUHAN, Iya tentu enda ngukum kita. Tang TUHAN Empu madahka kita enggai mendingka Iya, tang nyungkak Iya ringat ngena pengawa kita ke besembahka engkeramba, lalu minta diri diukum Iya. “Nya alai, laban kita enggai mendingka Iya, TUHAN ti Pemadu Bekuasa bejaku, ‘Aku deka mesanka semua bansa ari utara enggau nembiak Aku, Raja Nebukadnesar menua Babilon. Aku deka ngasuh sida nyerang menua Judah enggau semua orang ke diau di menua nya, sereta nyerang semua bansa ti berimbai enggau menua Judah. Aku deka ngerusak bansa tu, enggau bansa ti semak iya, lalu ngaga menua sida nyadi tembawai belama iya, ngambika sida jai dipeda, sereta ngasuh ati geli. Aku ti TUHAN, udah bejaku. Aku deka madamka panjung gaga ati sida, enggau munyi orang ke rami ngintu gawai tikah. Minyak ke lampu sida deka abis, lalu gandum sida pen deka mega abis. Semua menua tu deka nyadi tembawai magang, lalu jai dipeda, lalu semua bansa ti ngelingi menua tu deka betuaika raja menua Babilon dalam pengelama tujuh puluh taun. Udah bekau nya, Aku deka ngukum Babilon enggau raja iya, ketegal dosa sida. Aku deka ngerusak menua nya, lalu ngaga iya nyadi tembawai belama iya. Aku deka ngukum Babilon ngena semua penusah besai ti diasuh Aku ninggang semua bansa lebuh Aku bejaku ngena Jeremiah - semua penusah ti ditulis dalam bup tu. Aku deka malas orang Babilon ketegal utai ti udah dikereja sida, lalu mayuh bansa enggau raja ti bekuasa deka ngaga sida nyadi ulun.’ ” Ku TUHAN Allah Taala ke disembah orang Israel bejaku ngagai aku, “Tu mangkuk wain ti penuh laban pengeringat Aku. Bai mangkuk tu ngagai semua bansa ti diasuh Aku gusung nuan, lalu asuh sida ngirup ari mangkuk tu. Lebuh sida ngirup ari mangkuk tu, sida deka bejalai guir-guir, lalu nyadi gila laban perang ti diasuh Aku nuntung sida.” Nya alai aku lalu ngambi mangkuk nya ari jari TUHAN, meri mangkuk nya ngagai semua bansa ti diasuh TUHAN gusung aku, lalu ngasuh sida ngirup ari mangkuk nya. Jerusalem enggau semua nengeri di menua Judah, sereta enggau bala raja enggau bala tuai menua nya, bela diasuh ngirup ari mangkuk nya magang, ngambika semua nengeri di menua nya nyadi menua puang, lalu jai gaya dipeda, sereta ngambika orang ngena nama sida nyadika leka jaku sumpah, baka ke dikereja sida diatu. Udah nya TUHAN bejaku ngagai aku, “Padahka ngagai orang mayuh, Aku TUHAN ti Pemadu Bekuasa, ti Allah Taala ke disembah orang Israel, deka ngasuh sida ngirup datai ke sida mabuk lalu mutah, datai ke sida rebah, lalu enda ulih angkat agi, laban perang ti diasuh Aku ninggang sida. Lalu enti sida enggai ngambi mangkuk nya ari jari nuan, lalu enggai ngirup ari nya, nuan enda tau enda madahka ngagai sida, TUHAN ti Pemadu Bekuasa udah bejaku madahka sida enda tau enda ngirup ari mangkuk nya. Aku deka belabuh ngerusak berengkah ari nengeri Aku Empu. Kati sida ngumbai diri enda kena ukum? Sida endang deka diukum, laban Aku deka ngasuh munsuh nyerang semua orang di dunya tu. Aku TUHAN ti Pemadu Bekuasa, udah bejaku. “Nuan Jeremiah, enda tau enda madahka semua utai ti udah disebut Aku. Nuan enda tau enda madahka ngagai bala orang nya, ‘ TUHAN deka merakka nyawa Iya ari serega lalu meletup munyi guntur ari serega. Iya deka merakka nyawa Iya ngelaban bala nembiak Iya. Iya deka manjung munyi orang ke ngindik buah anggur. Semua orang di dunya tu deka ninga Iya, lalu munyi nyawa Iya deka belauh ngagai tisi dunya. TUHAN deka bedawaka semua bansa. Iya deka nyara semua bansa lalu munuh orang ke jai. TUHAN udah bejaku.’ ” TUHAN ti Pemadu Bekuasa madahka penusah ti besai deka nuntung siti-siti bansa betangkan-tangkan, lalu kabut besai nyau betatam ba tisi dunya. Lebuh maya nya ila, bangkai sida ke udah dibunuh TUHAN deka ngachir di serata dunya. Orang nadai ngulitka sida, lalu nadai mega orang ngangkut lalu nguburka sida. Bangkai sida deka betegaring ba tanah baka tugung tai. Kita ke tuai bansa, ti nyadi pengibun nembiak Aku, nyabak meh kita. Nyabak enggau nyawa ti inggar duie-duie! Ngulit lalu baringka diri malai amau. Maya udah datai alai kita deka dibunuh, lalu kita deka disayat baka jelu bedus. Kita enda ulih ngerarika diri. TUHAN udah ninggalka nembiak Iya baka singa ti ninggalka lubang iya. Perang enggau pengeringat TUHAN udah ngubah menua tu nyadi menua puang. Enda lama udah bekau Jehoiakim anak Josiah nyadi raja menua Judah, TUHAN bejaku ngagai aku, “Alai nuan bediri ba tengah laman Rumah Sembiang, lalu padahka semua utai ti diasuh Aku sebut nuan ngagai orang ke datai besembiang dia ari semua nengeri menua Judah. Anang enda nyebut semua utai nya, nyangka orang mayuh deka mending lalu ngelengkaka ulah sida ke jai. Enti sida ngelengkaka ulah sida ke jai, nya baru Aku deka ngubah runding Aku lalu enda nyadi ngerusak sida ketegal semua pengawa sida ke jai.” Tu jaku ti diasuh TUHAN sebut aku ngagai orang mayuh, “Aku ti TUHAN, udah madahka kita enda tau enda ngasika Aku, nitihka ajar ti udah diberi Aku ngagai kita, sereta mendingka jaku bala nembiak Aku, iya nya sida nabi, ke seruran dikirumka Aku ngagai kita. Kita nadai udah kala ngasika jaku ti disebut sida. Enti kita majak enda ngasi, Aku deka ngereja ngagai Rumah Sembiang tu baka ke udah dikereja Aku ngagai Siloh, lalu semua bansa di dunya tu deka ngena nama nengeri tu nyadika leka jaku sumpah.” Sida imam, sida nabi enggau semua orang mayuh bela ninga aku nyebut jaku nya dalam Rumah Sembiang, lalu lebuh aku baru udah tembu nyebut semua utai ti diasuh TUHAN sebut aku, sida lalu nangkap aku lalu manjung, “Nuan patut dibunuh ketegal utai tu! Nama kebuah nuan nyebut dalam nama TUHAN, madahka Rumah Sembiang tu deka nyadi baka Siloh, lalu madahka nengeri tu deka dirusak, lalu enda agi diuan mensia?” Udah nya orang mayuh lalu ngelingi aku. Lebuh bala tuai orang Judah ninga pasal utai ti udah nyadi, sida lalu beguai-guai mansang ari istana ngagai Rumah Sembiang, lalu nudukka diri ba Pintu Ti Baru. Udah nya sida imam enggau sida nabi lalu bejaku ngagai bala tuai bansa, enggau ngagai orang mayuh, “Orang tu patut diukum bunuh, laban iya udah bejaku ngelaban nengeri kitai. Kita empu udah ninga iya bejaku.” Udah nya aku lalu bejaku, “ TUHAN Empu udah ngirumka aku, ngasuh aku bejaku ngelaban Rumah Sembiang, enggau ngelaban nengeri tu, munyi ti didinga kita. Nya alai ubah pendiau enggau ulah kita, lalu ngasika TUHAN Allah Taala kita. Enti kita ngereja nya, nya baru Iya deka ngubah runding Iya lalu enda nyadi ngerusak kita. Nyadi pasal aku empu, aku tu ba jari kita! Kereja aja meh utai ti patut ku ati kita. Tang kita enda tau enda nemu: enti kita munuh aku, kita enggau orang di nengeri tu deka salah munuh orang ke nadai penyalah, laban TUHAN Empu ti udah ngasuh aku meri jaku tangkan tu ngagai kita.” Udah nya bala tuai enggau orang mayuh lalu bejaku ngagai bala imam sereta enggau ngagai bala nabi, “Orang tu bejaku ngagai kitai dalam nama TUHAN Allah Taala kitai. Iya enda patut dibunuh.” Udah nya, sekeda tuai bansa bediri lalu bejaku ngagai orang mayuh ke begelumu dia, “Lebuh Hesekiah nyadi raja menua Judah, nabi Mikah ari Moreset madahka ngagai semua orang mayuh utai ti udah disebut TUHAN ti Pemadu Bekuasa, ‘Sion deka dichangkul baka padang. Jerusalem deka nyadi tembawai, lalu bukit ti alai Rumah Sembiang bediri deka nyadi utan.’ Raja Hesekiah enggau orang Judah lalu enda nyadi munuh Mikah. Hesekiah nangika TUHAN, lalu nguji minta diri dikerinduka Iya. Lalu TUHAN ngubah runding Diri pasal penusah ti besai ti diasuh Iya ninggang sida. Tang diatu kitai nyau deka ngasuh siti penusah ti besai ninggang kitai empu.” ( Siku agi orang bejaku, iya nya Uriah anak Semaiah ari Kiriat-jearim. Iya bejaku dalam nama TUHAN ngelaban nengeri tu, enggau ngelaban bansa kitai baka ke dikereja Jeremiah. Lebuh Raja Jehoiakim enggau bala soldadu iya, enggau bala pemesai ninga jaku Uriah, raja lalu nguji ngasuh orang munuh Uriah. Tang Uriah ninga pasal nya, lalu rari abis ati ngagai menua Ejip. Tang Raja Jehoiakim ngasuh Elnatan anak Akbor enggau sekeda orang bukai mansang ngagai menua Ejip ngambi Uriah pulai. Sida mai iya pulai ngagai Raja Jehoiakim, lalu Raja Jehoiakim ngasuh orang munuh iya, lalu ngasuh sida nguburka iya ba kubur orang mayuh.) Tang laban aku disukung Ahikam anak Sapan, aku enda diserahka ngagai orang mayuh, lalu aku enda kena bunuh. Apin lama udah bekau Sedekiah anak Josiah nyadi raja menua Judah, TUHAN ngasuh aku ngaga siti kungkung ke aku empu ari tali ti digaga ari kulit jelu enggau sengkar kayu, lalu ngasuh aku ngengkahka utai nya ba rekung aku empu. Udah nya TUHAN ngasuh aku ngirumka siti pesan ngagai raja menua Edom, menua Moap, Amon, Tire enggau Sidon nengah bala pengari perintah sida ke udah datai di Jerusalem deka betemu enggau Raja Sedekiah. TUHAN ti Pemadu Bekuasa, ti Allah Taala ke disembah orang Israel ngasuh aku bejaku ngagai sida, ngasuh sida madahka ngagai raja sida empu utai ti udah disebut TUHAN: “Ngena kuasa Aku ti besai enggau pengering Aku, Aku udah ngaga dunya, mensia, enggau semua macham jelu ti diau di dunya, lalu Aku meri utai nya ngagai barang sapa orang ke dipilih Aku. Aku tu ti udah ngengkahka semua bansa tu di baruh kuasa nembiak Aku, Raja Nebukadnesar menua Babilon. Indah jelu babas deh diasuh Aku betuaika iya. Semua bansa deka betuaika iya, lalu sida deka betuaika anak iya, enggau uchu iya nyentuk ngagai maya bansa iya empu alah. Udah nya baru bansa nya deka betuaika mayuh bengkah bansa ti bekuasa, enggau bala raja ti besai. “Tang enti bansa tauka perintah enggai betuaika iya, Aku deka ngukum bansa nya ngena perang, keberuran, enggau penyakit datai ke Aku udah nejuka Nebukadnesar ngerusak bansa nya abis lengis. Anang mendingka bala nabi kita, tauka sida ke ngumbai diri nemu madahka utai ti deka nyadi jemah ila, nemuka ngena mimpi, tauka ngangauka roh orang ke udah mati, tauka ngena pengawa keramat. Semua sida nya nagang kita betuaika raja menua Babilon. Sida nipu kita, lalu deka ngasuh kita ditabanka ngagai menua ti jauh ari menua kita empu. Aku deka muru kita, lalu kita deka dirusak. Tang enti bansa nunduk ngagai raja menua Babilon, lalu betuaika iya, nya baru Aku deka nejuka bansa nya diau di menua sida empu, ngambika sida bumai lalu diau dia. Aku ti TUHAN udah bejaku.” Aku udah mega nyebut utai nya ngagai Raja Sedekiah menua Judah, “Nunduk ngagai raja menua Babilon, betuaika iya enggau bala nembiak iya, ngambika nuan idup. Nama guna nuan enggau bala nembiak nuan mati beperang, tauka mati keberuran, tauka mati laban penyakit? Nya meh utai ti dipadahka TUHAN deka nyadi ba bansa ti enggai betuaika raja menua Babilon. Anang mendingka sida nabi ke nagang nuan nyerahka diri ngagai raja nya. Sida nabi nya nipu kita. TUHAN Empu udah madahka Iya nadai ngirumka sida, sereta madahka sida ngemulaka nuan dalam nama Iya. Nya alai Iya deka muru nuan, lalu nuan enggau bala nabi ke ngemulaka nuan deka dibunuh.” Udah nya aku madahka ngagai sida imam enggau orang mayuh utai ti udah disebut TUHAN: “Anang mendingka sida nabi ke madahka, enda lama da agi pesaka Rumah Sembiang deka dibai pulai baru ari Babilon. Sida nya ngemulaka kita. Anang mendingka sida! Nunduk ngagai raja menua Babilon, nya baru kita deka idup! Nama kebuah ngasuh nengeri tu nyadi tembawai? Enti sida nya endang amat nabi, lalu enti sida bisi pesan ari Aku, awakka sida minta Aku TUHAN ti Pemadu Bekuasa, nagang pesaka ti agi bisi dalam Rumah Sembiang enggau di istana raja ditabanka ngagai menua Babilon.” ( “Pendingka utai ti disebut Aku TUHAN ti Pemadu Bekuasa, ti Allah Taala ke disembah orang Israel, pasal reta tengkira ti ditinggalka dalam Rumah Sembiang, enggau di istana raja di Jerusalem. Utai nya deka ditabanka ngagai menua Babilon, lalu deka mengkang din nyentuk ngagai maya Aku deka ibuhka sida. Udah nya baru Aku deka mai utai nya pulai baru, lalu mulaika sida ngagai endur tu. Aku ti TUHAN udah bejaku.” Dalam taun nya mega, iya nya taun ti keempat Sedekiah nyadi raja, dalam bulan ti kelima, Hananiah anak Asur, siku nabi ari nengeri Gibeon, bejaku ngagai aku dalam Rumah Sembiang. Di mua bala imam, enggau di mua orang mayuh, iya madahka ngagai aku pasal TUHAN ti Pemadu Bekuasa, ti Allah Taala ke disembah orang Israel ti udah nyebut, “Aku udah ngerusak kuasa raja menua Babilon. Dalam kandang dua taun Aku deka mai pulai baru ngagai endur tu semua reta tengkira Rumah Sembiang ti udah ditabanka Raja Nebukadnesar ngagai menua Babilon. Aku deka mega mai pulai baru Raja Jehoiakin anak Jehoiakim menua Judah, sama enggau semua orang Judah ke kena buai ngagai menua Babilon. Sigi amat, Aku endang deka ngerusak kuasa raja menua Babilon. Aku ti TUHAN, udah bejaku.” Udah nya, di mua bala imam enggau di mua semua orang mayuh ke bediri dalam Rumah Sembiang, aku lalu nyebut ngagai Hananiah: “Manah amat nya! Aku ngarapka TUHAN deka ngereja nya! Aku endang amat ngarapka Iya deka ngamatka jaku ti benabi ti disebut nuan nya, lalu mai pulai kitu ke baru ari menua Babilon semua reta tengkira Rumah Sembiang, enggau semua orang ke udah ditangkap lalu ditabanka munsuh. Tang pendingka utai ti disebut aku ngagai nuan, enggau ngagai orang mayuh. Sida nabi ke bejaku kelia, sebedau rambau tua, madahka perang, keberuran enggau penyakit deka ninggang mayuh bengkah bansa, enggau perintah ti bekuasa. Tang nabi ke madahka pemaik deka nyadi, semina deka dikumbai nabi ke amat udah dikirumka TUHAN, lebuh utai ti ditujum iya dikamatka.” Hananiah lalu ngambi kungkung nya ari rekung aku lalu matahka iya lalu nyebut di mua semua orang mayuh, “ TUHAN udah bejaku madahka tu meh gaya Iya deka matahka kungkung ti udah diengkahka Raja Nebukadnesar ba rekung semua bansa, lalu TUHAN deka ngereja nya dalam kandang dua taun.” Aku lalu mupuk. Apin tentu lama udah bekau nya, TUHAN ngasuh aku mansang ngagai Hananiah lalu madahka ngagai iya, “ TUHAN udah bejaku, madahka nuan nyangka ulih matahka kungkung ti digaga ari kayu, tang Iya deka nganti kungkung kayu nya enggau kungkung besi. TUHAN ti Pemadu Bekuasa, ti Allah Taala ke disembah orang Israel, udah madahka Iya deka ngengkahka kungkung besi ba semua bansa, lalu sida deka betuaika Raja Nebukadnesar menua Babilon. Indah jelu babas deh deka diasuh TUHAN betuaika Nebukadnesar.” Aku lalu madahka jaku nya ngagai Hananiah, “Pendingka tu ulih nuan Hananiah! TUHAN nadai ngirumka nuan, lalu nuan udah ngasuh orang mayuh tu arapka utai ti bula. Nya alai TUHAN Empu madahka Diri deka muai nuan. Sebedau ujung taun tu, nuan deka mati laban nuan udah mai orang mayuh angkat ngelaban TUHAN.” Dalam bulan ti ketujuh taun nya, Hananiah lalu mati. Aku nulis sepuchuk surat ngagai bala imam, bala nabi, bala tuai orang mayuh, enggau ngagai semua sida ti bukai ti udah ditabanka Nebukadnesar nyadi orang tangkap ari Jerusalem ngagai menua Babilon. Aku nulis surat nya udah bekau Raja Jehoiakin, indai iya, bala pemesai istana, bala tuai orang Judah enggau bala tuai orang ke diau di Jerusalem, orang ke landik ngukir, enggau orang ke landik gawa, dibuai ngagai menua Babilon. Aku nyuaka surat nya ngagai Elasah anak Sapan enggau ngagai Gemariah anak Hilkiah, ke diasuh Raja Sedekiah menua Judah betemu enggau Raja Nebukadnesar menua Babilon. Baka tu ku jaku ti dalam surat nya: “ TUHAN ti Pemadu Bekuasa, ti Allah Taala ke disembah orang Israel bejaku ngagai semua orang ke dikemendarka Iya ditabanka Nebukadnesar nyadi orang tangkap ari Jerusalem ngagai Babilon: ‘Dirika rumah lalu ngentapka diri. Tumbuhka kebun lalu empa utai ti ditanam kita dalam kebun nya. Bebini belaki lalu beranak. Udah nya, awakka bala anak kita bebini belaki, ngambika sida mega bisi anak. Pemayuh tubuh kita enda tau enda nambah-menambah, ukai kurang. Bekereja kita ke penguntung nengeri ti udah alai Aku muai kita. Besampi ngagai Aku ngarika sida, laban enti sida nyadi kaya-raja, kita empu deka mega nyadi kaya-raja. Aku ti TUHAN Allah Taala ke disembah orang Israel meri kita jaku tangkan: anang nejuka bala nabi enggau orang ke betilitka nasit ke begulai enggau kita, nipu kita, lalu anang mendingka mimpi sida. Sida madahka utai ti bula ngagai kita dalam nama Aku. Aku nadai ngirumka sida. Aku TUHAN ti Pemadu Bekuasa udah bejaku.’ “Ku TUHAN bejaku, ‘Udah lepas tujuh puluh taun nya ila, Aku deka nemuai ngagai kita, lalu ngamatka semaya Aku enggau kita, lalu mai kita pulai baru ngagai menua tu. Laban Aku nemu pelan Aku ke kita, pelan kena meri kita pemaik ukai kena ngemediska kita, pelan kena meri kita pengidup enggau pengadang ke jemah ila. Nya baru kita deka ngangauka Aku, datai lalu besampi ngagai Aku, lalu Aku deka ninga kita. Lebuh kita ngiga Aku, kita deka tetemuka Aku. Enti kita ngiga Aku enggau pengabis ati kita, kita deka tetemuka Aku, lalu Aku deka mai kita pulai baru ngagai menua kita empu. Aku deka ngempuruka kita ari semua menua, enggau ari semua endur ti udah alai Aku muru kita, lalu Aku deka mai kita pulai baru ngagai menua ti udah ditinggalka kita lebuh Aku muai kita ngagai menua bukai. Aku ti TUHAN udah bejaku.’ “Kita madahka TUHAN udah meri kita nabi di menua Babilon. Pendingka utai ti disebut TUHAN pasal raja ke megai perintah di menua ti udah diperintah David, enggau pasal orang di nengeri tu, iya nya, bala kaban belayan kita empu ti enda ditabanka nyadi orang tangkap sama enggau kita. Ku TUHAN ti Pemadu Bekuasa bejaku, ‘Aku ngasuh perang, keberuran, enggau penyakit ninggang sida, lalu Aku deka ngaga sida nyadi baka buah ara ti kelalu buruk lalu enda ulih diempa. Aku deka begagaika sida ngena perang, keberuran, enggau penyakit, lalu semua bansa di dunya tu deka gelika utai ti dipeda sida. Ba genap iti endur alai Aku ke ngachirka sida, orang deka geli sereta takut meda utai ti udah nyadi ba sida. Orang deka beduan sida, lalu ngena nama sida nyadika leka jaku sumpah. Utai tu deka nyadi ba sida laban sida enda ngasika pesan ti seruran dikirumka Aku ngagai sida nengah bala nembiak Aku, iya nya sida nabi. Sida enggai mending. Semua kita ke udah dibuai Aku ngagai menua Babilon, pendingka utai ti disebut Aku ti TUHAN.’ “ TUHAN ti Pemadu Bekuasa, ti Allah Taala ke disembah orang Israel, udah bejakuka pasal Ahap anak Kolaiah enggau Sedekiah anak Maseiah, ke madahka utai ti bula ngagai kita dalam nama TUHAN. TUHAN udah madahka Diri deka nyerahka sida ngagai jari Raja Nebukadnesar menua Babilon, ti deka munuh sida di mua kita. Lebuh orang ke ditabanka nyadi orang tangkap ari Jerusalem ngagai Babilon deka nyumpah orang, sida deka nyebut, ‘Awakka TUHAN ngereja nuan baka Iya ti ngereja Sedekiah seduai Ahap, ke dipanggang raja Babilon idup-idup!’ Nya meh pengujung sida laban sida udah salah ngereja dosa ti besai - sida udah butang enggau bini pangan diri, lalu udah nusui utai ti bula dalam nama TUHAN. Utai tu ngelaban peneka TUHAN. Iya nemu utai ti udah dikereja sida, lalu Iya deka besaksi ngelaban sida. TUHAN udah bejaku.” “ TUHAN ngasuh nuan nyadi imam nganti Jehoiada, lalu diatu nuan nyadi tuai pemesai dalam Rumah Sembiang. Pengawa nuan nya nentuka genap iku orang ke gila, ke ngaga diri nyadi nabi, ditanchang ngena rantai, sereta dikungkung ngena kungkung besi. Nama kebuah nuan enda ngereja nya ngagai Jeremiah ke datai ari Anatot, ti udah bejaku nyadi nabi ngagai orang mayuh? Iya enda tau enda ditagang, laban iya madahka ngagai orang di Babilon, sida deka lama nyadi orang tangkap dia, lalu patut nirika rumah tangga, ngentapka diri, bekebun, lalu makai utai ti ditanam sida.” Sepaniah macha surat nya ngagai aku. TUHAN lalu ngasuh aku Ku TUHAN Allah Taala ke disembah orang Israel bejaku ngagai aku, “Tuliska dalam siti bup semua utai ti udah dipadahka Aku ngagai nuan, laban maya deka datai alai Aku deka mai bala nembiak Aku, Israel enggau Judah pulai baru. Aku deka mai sida pulai baru ngagai menua ti udah diberi Aku ngagai aki ini sida, lalu sida deka bempu menua nya baru. Aku ti TUHAN, udah bejaku.” Ku TUHAN bejaku ngagai orang Israel enggau ngagai orang Judah, “Aku bisi ninga orang nyabak laban sida balat takut, sabak orang ke begau, ukai sabak ketegal pemaik. Ngetu dulu lalu berunding! Kati lelaki ulih ngadaka anak? Enti enda, nama kebuah Aku meda genap iku lelaki murus perut diri baka indu ke radai deka beranak? Nama kebuah mua sida puchat? Hari ti jai deka datai. Nadai hari bukai ulih dibandingka enggau hari nya, maya bala nembiak Aku deka balat tusah, tang sida deka mengkang idup.” Ku TUHAN ti Pemadu Bekuasa bejaku, “Lebuh hari nya datai, Aku deka matahka kungkung ti ba rekung sida, lalu muka rantai sida, lalu sida enda agi nyadi ulun orang menua bukai. Sida deka betuaika Aku, TUHAN Allah Taala sida, sereta betuaika siku peturun David ti deka diasuh Aku nyadi raja. “Nembiak Aku, anang takut. Orang Israel, anang takut. Aku deka ngelepaska kita ari menua ti jauh nya, ari menua alai kita ke nyadi orang tangkap. Kita deka pulai baru ngagai menua kita empu, lalu diau nadai utai ngachau. Kita deka diau likun, lalu nadai orang deka ngemba kita. Aku deka datai lalu ngidupka kita. Aku deka ngerusak semua bansa ti udah alai Aku ngachirka kita, tang Aku enda ngerusak kita. Aku enggai nejuka kita enda diukum, tang lebuh Aku ngukum kita, Aku deka ngukum kita enggau ati ti lurus. Aku ti TUHAN udah bejaku.” Ku TUHAN bejaku ngagai bala nembiak Iya, “Bakal kita enda ulih gerai. Telih kita enda ulih gerai. Kita nadai orang ngibun, nadai ubat kena ngubat rumbak kita, nadai ulih ngarapka diri digeraika. Semua ambai kita nadai agi ingatka kita. Sida nadai agi ibuhka kita. Aku udah nyerang kita baka munsuh. Ukum kita amat berat laban dosa kita mayuh lalu penyai kita besai. Anang agi mutapka telih kita. Kita nadai ulih gerai. Aku ngukum kita baka tu laban dosa kita mayuh lalu penyai kita besai. Tang diatu, semua orang ke nelan kita, deka ditelan, lalu semua bala munsuh kita deka ditabanka nyadi orang tangkap. Semua orang ke nekanka pengidup kita, deka ditekanka, lalu semua orang ke ngerumpak kita, deka dirumpak. Aku deka ngasuh kita suman baru. Aku deka ngeraika telih kita, taja pen bala munsuh kita nyebut, ‘Sion nadai diguna orang agi. Nadai orang ibuhka iya agi.’ Aku ti TUHAN, udah bejaku.” Ku TUHAN bejaku, “Aku deka mai bala nembiak Aku pulai baru ngagai menua sida empu lalu kasihka genap ruang bilik sida. Jerusalem deka digaga baru, lalu istana di nengeri nya deka digaga baru. Orang ke diau dia deka belagu pantun puji. Sida deka manjung gaga ati. Ulih berekat ari Aku, pemayuh tubuh sida deka nambah-menambah. Berekat ari Aku deka ngasuh sida dibasa orang. Aku deka mulaika kuasa sida ke lama menya ngagai bansa sida tu baru lalu nudukka sida tegap di mua Aku. Aku deka ngukum semua orang ke nekanka pengidup sida. Ku TUHAN bejaku, “Maya deka datai alai Aku deka nyadi Allah Taala ke semua raban bansa orang Israel, lalu sida deka nyadi nembiak Aku. Orang ke enda mati laban pedang, ngasaika penelap Aku lebuh sida di menua puang. Lebuh orang Israel tetenguk deka belelak, Aku pegari di mua sida ari jauh. Kita orang Israel, Aku endang seruran rinduka kita. Nya kebuah Aku seruran ngayanka pengerindu Aku ti meruan belama iya ngagai kita. Aku deka nirika kita baru. Kita deka sekali agi mai tamborin kita lalu betanda enggau ati ti gaga. Kita deka bekebun anggur baru ba sebelah bukit menua Samaria, lalu orang ke bekebun nya deka makai asil ari kebun nya empu. Sigi amat, maya deka datai alai orang ke nyaga menua deka ngangau ba sebelah bukit menua Epraim, ‘Aram kitai niki ngagai Sion, ngagai TUHAN Allah Taala kitai.’ ” Ku TUHAN bejaku, “Belagu enggau ati ti gaga ke Israel, bansa ti pemadu besai. Nyanyi pantun puji, ‘ TUHAN udah ngidupka nembiak Iya. Iya udah ngidupka nembiak Iya, iya nya orang Israel.’ Aku deka mai sida ari utara lalu ngempuruka sida ari semua tisi dunya. Sida ke buta enggau ti enda ulih bejalai, indu ke ngandung, enggau sida ke nyau deka beranak, deka datai enggau sida. Sida deka pulai baru lalu nyadi bansa ti kering. Bala nembiak Aku deka pulai baru enggau sabak, sereta besampi lebuh Aku nguluka sida pulai. Aku deka ngiring sida bejalai ngimbai sungai ti mayuh ai, nengah jalai ti rata ngambika sida enda tesangkut, laban Aku tu Apai orang Israel, lalu Epraim nya anak tuai Aku.” Ku TUHAN bejaku, “Pendingka Aku, semua kita bansa bukai, lalu padahka jaku Aku di seberai tasik. Aku udah ngachirka bala nembiak Aku, tang Aku deka ngempuruka sida baru lalu nyaga sida baka pengibun bedus ke nyaga raban bedus iya. Aku udah nebus orang Israel lalu udah nebus sida ari siti bansa ti kering. Sida deka datai lalu belagu gaga ati ba Bukit Sion lalu deka gaga ke pemeri Aku, iya nya gandum, enggau wain, enggau minyak kana, bedus enggau sapi. Sida deka nyadi baka kebun ti seruran dipanjah enggau ai, lalu sida deka bisi semua utai ti dipeguna sida. Udah nya sida indu ke agi biak, deka betanda sereta lantang ati lalu sida ke lelaki, ke biak enggau ke tuai, deka rami gaga. Aku deka merindang sida, lalu nukar ulit sida nyadi pengaga, ngubah ati sida ke balat tusah nyadi lantang. Aku deka nupi bala imam ngena pemakai ti pemadu manah lalu meri semua utai ti dipeguna nembiak Aku. Aku ti TUHAN udah bejaku.” Ku TUHAN bejaku, “Nyawa bisi didinga di Ramah, munyi orang ke bekeduie nyabak. Rachel nyabakka bala anak iya, laban sida nyau nadai agi, lalu iya enggai diperindang. Anang agi nyabak lalu kendas ai mata nuan. Nuan deka diberi upah ketegal semua utai ti udah dikereja nuan ke bala anak nuan. Sida deka pulai baru ari menua munsuh. Nuan bisi utai diadang jemah ila. Bala anak nuan deka pulai baru ngagai menua sida. Aku ti TUHAN, udah bejaku. “Aku ninga orang Israel nyebut enggau ati ti tusah, ‘ TUHAN, kami tu baka jelu ti enda kala dipejinakka, tang Nuan udah ngajar kami ngasi. Bai kami pulai baru. Kami sedia deka pulai baru ngagai Nuan, TUHAN Allah Taala kami. Kami udah ninggalka Nuan, tang enda lama udah nya, kami keran deka pulai baru. Lebuh Nuan udah ngukum kami, kami kunduk-kunduk tusah ati. Kami malu sereta dipechat laban kami udah bedosa lebuh kami agi biak.’ “Israel, nuan endang anak ke balat dikesayauka Aku ke balat dikerinduka Aku. Genap kali Aku nyebut nama nuan, Aku ingatka nuan enggau pengerindu. Ati Aku lelengauka nuan. Aku deka kasihka nuan. Dirika tanda, lalu kelai jalai raya. Giga baru jalai ti udah ditengah kita mupuk. Pulai baru, O orang Israel, pulai baru ngagai nengeri ti udah ditinggalka kita. Ni pengelama kita deka kakang ati, kita ke enda arap? Aku udah ngaga utai ti baru sereta nyelai, nyelai baka indu ke nyaga lelaki.” Ku TUHAN ti Pemadu Bekuasa, Allah Taala ke disembah orang Israel bejaku, “Lebuh Aku mai orang Israel pulai baru ngagai menua sida empu, sida deka sekali agi nyebut di menua Judah, enggau dalam nengeri di menua nya, ‘Awakka TUHAN merekatka bukit ti kudus di Jerusalem, endur ti kudus ti alai Iya diau.’ Orang deka diau di menua Judah enggau dalam semua nengeri di menua nya, lalu orang bumai deka bisi dia, sama enggau bala pengibun bedus enggau raban bedus sida. Aku deka ngeringka sida ke lelak, lalu ngenyangka sida ke lapar lembut tulang. Udah nya orang deka bejaku, ‘Aku tinduk, lalu dani berasai regas baru.’ “Aku ti TUHAN bejaku, madahka maya deka datai alai Aku deka ngisi menua Israel enggau menua Judah enggau mensia sereta enggau jelu. Lalu baka Aku ti udah nyabut, numbang, nebang, ngerusak, enggau ngeluska sida, baka nya mega Aku deka nanam lalu niri negika sida baru. Lebuh maya nya ila, orang nadai agi nyebut, ‘Apai indai makai buah anggur ti masam, tang bala anak ke ngasaika nyawa diri masam.’ Tang orang ke makai buah anggur ti masam deka ngasaika ngeli diri nyilu, lalu semua orang deka mati ketegal dosa sida empu.” Ku TUHAN bejaku, “Maya deka datai alai Aku deka ngaga siti sempekat ti baru enggau orang Israel, sereta enggau orang Judah. Sempekat nya enda baka sempekat lama ti udah digaga Aku enggau bala aki ini sida lebuh Aku megai jari sida, lalu nguluka sida pansut ari menua Ejip. Taja pen Aku udah nyadi laki sida, sida ngelanggar sempekat nya. Tang tu sempekat ti baru ti deka digaga Aku enggau orang Israel: Aku deka nyimpan Adat Aku dalam sida, lalu nuliska Adat nya dalam ati sida. Aku deka nyadi Allah Taala sida, lalu sida deka nyadi nembiak Aku. Nadai siku sida agi ibuh ngiruh diri ngajar pangan diri ngambika sida nemu TUHAN, laban semua sida deka nemu Aku, kenyau ari sida ke pemadu mit nyentuk ngagai sida ke pemadu besai. Aku deka ngampun dosa sida, lalu Aku enda agi ingatka penyalah sida. Aku ti TUHAN udah bejaku.” TUHAN meri mata hari nyadika penampak lebuh siang hari, bulan enggau bintang manchar lebuh malam hari. Iya ngirau tasik, lalu ngasuh iya besegum. Nama Iya TUHAN ti Pemadu Bekuasa. Iya besemaya, seagi-agi utai ti asal meruan bisi, Israel deka seruran mengkang nyadi siti bansa. Enti langit ulih disukat lalu pugu dunya ulih dipansik, nya baru Iya deka nulak orang Israel ketegal semua utai ti udah dikereja sida. TUHAN udah bejaku.” Ku TUHAN bejaku, “Maya deka datai alai semua nengeri Jerusalem deka digaga baru nyadika nengeri Aku, kenyau ari Menara Hananel tunga ke barat nyentuk ngagai Pintu Sukut. Lalu garis entara menua deka nuju ari endur nya terus ke barat, ngagai bukit Garip, lalu musin ngagai Goah. Semua lebak alai nguburka orang ke mati enggau alai muai uras, enggau semua padang ti ari atas Sungai Kidron, nyentuk ngagai Pintu Kuda ti tunga ke timur, deka nyadi kudus ke Aku. Nengeri tu enda agi dirubuh tauka dirusak.” TUHAN bejaku ngagai aku dalam taun ti kesepuluh Sedekiah nyadi raja menua Judah. Taun nya mega taun ti kelapan belas Nebukadnesar nyadi raja menua Babilon. Lebuh maya nya bala soldadu raja menua Babilon benung nyerang Jerusalem, lalu aku udah kena jil ba tengah laman istana raja. Raja Sedekiah udah ngejil aku dia, lalu udah besalah aku ngumbai aku udah madahka TUHAN bisi udah nyebut, “Aku deka ngasuh raja menua Babilon ngalahka nengeri tu, lalu Raja Sedekiah enda ulih ngerarika diri. Iya deka diserahka ngagai raja menua Babilon. Iya deka betemu betunga mua enggau raja menua Babilon, lalu iya deka bejaku ngagai raja nya empu. Sedekiah deka ditabanka ngagai menua Babilon, lalu iya deka mengkang di menua nya nyentuk ngagai maya Aku deka ngukum iya. Enti sema iya ngelaban orang Babilon, enda meh iya ulih menang. Aku ti TUHAN, udah bejaku,” TUHAN madahka ngagai aku pasal Hanamel, anak aya aku Salum, ti deka datai ngagai aku mai peminta iya ti deka meli tanah iya di Anatot di menua Benjamin, laban aku kaban belayan iya ke pemadu nyempil, lalu bisi hak meli tanah nya ke aku empu. Udah nya, munyi ti udah dipadahka TUHAN, Hanamel datai ngagai aku ba tengah laman nya, lalu ngasuh aku meli tanah nya. Nya kebuah aku nemu TUHAN amat udah bejaku enggau aku. Aku meli tanah nya ari Hanamel lalu nimbang duit ke iya. Rega tanah nya tujuh belas singkap duit pirak. Aku nyain lalu nanggam surat tanah nya, ngasuh orang besaksika nya, lalu nimbang duit nya ngena dachin. Udah nya aku ngambi dua iti salin surat nya, iya nya salin ti ditanggam, ti ngundan kontrak enggau semua atur dalam kontrak nya, enggau salin ti enda ditanggam. Aku lalu meri surat dua iti nya ngagai Baruk anak Neriah, uchu Mahseiah. Aku meri surat dua iti nya ngagai Baruk di mua Hanamel, enggau di mua bala saksi ti udah nyain surat nya, enggau di mua orang mayuh ke duduk ba tengah laman nya. Ku aku bejaku enggau Baruk di mua semua sida, “ TUHAN ti Pemadu Bekuasa, ti Allah Taala ke disembah orang Israel, udah ngasuh nuan ngambi surat tu, salin ti ditanggam enggau salin ti enda ditanggam, lalu nyimpan surat dua iti tu dalam benda ti digaga ari tanah liat, ngambika surat nya tan disimpan betaun-taun ti deka datai. TUHAN ti Pemadu Bekuasa, ti Allah Taala ke disembah orang Israel udah madahka rumah, tanah, enggau kebun anggur deka dibeli baru dalam menua tu.” Lebuh aku udah meri surat tanah nya ngagai Baruk, aku lalu besampi, “ TUHAN ti Pemadu Tinggi, Nuan udah ngaga langit enggau dunya ngena kuasa enggau pengering Nuan ti besai. Nadai utai enda ulih dikereja Nuan. Nuan udah ngayanka pengerindu ti meruan ngagai beribu iku mensia, tang Nuan mega ngukum orang ketegal dosa apai indai sida. Nuan endang Allah Taala ti besai sereta bekuasa. Nuan endang TUHAN ti Pemadu Bekuasa. Nuan ngaga pelan ti manah, lalu Nuan ngereja kereja ti besai. Nuan meda semua utai ti dikereja mensia, lalu Nuan ngupah sida nitihka utai ti dikereja sida. Dulu kelia Nuan udah ngereja kereja ajih enggau kereja ti nyelai di menua Ejip, lalu Nuan agi majak ngereja kereja nya nyentuk ngagai sehari tu di menua Israel enggau di menua bukai, ngambika Nuan ditemu orang di semua endur. Ulih kereja ajih enggau kereja ti nyelai ti balat ngenakutka munsuh kami, Nuan udah ngena kuasa enggau pengering Nuan mai bala nembiak Nuan pansut ari menua Ejip. Nuan udah meri ngagai sida menua ti kaya sereta ami, munyi ti udah disemaya Nuan ngagai aki ini sida. Tang lebuh sida datai lalu ngerampas menua tu, sida enda ngasika atur Nuan, tauka idup nitihka ajar Nuan. Sida nadai ngereja utai ti udah diasuh Nuan kereja sida. Nya alai Nuan ngasuh semua pengerusak tu ninggang sida. “Orang Babilon udah ngaga kuta tanah kena sida ngelulung lalu ngalahka nengeri tu, lalu sida diatu benung nyerang. Perang, keberuran, enggau penyakit deka ngasuh nengeri tu alah. Nuan Empu ulih meda, semua utai ti udah disebut Nuan dikamatka magang. Tang taja pia, TUHAN ti Pemadu Tinggi, Nuan Empu udah ngasuh aku meli tanah nya, dikemataka bala saksi, taja pen nengeri tu baru deka alah laban orang Babilon.” Udah nya TUHAN bejaku ngagai aku, “Aku tu TUHAN Allah Taala ke semua mensia. Nadai utai enda ulih dikereja Aku. Aku deka nyerahka nengeri tu ngagai Raja Nebukadnesar menua Babilon enggau bala soldadu iya. Sida deka ngalahka nengeri tu lalu nunu iya. Sida deka nunu iya retung sama enggau rumah alai orang ke udah nyungkak Aku ringat ketegal sida nunu menyan ke Baal ba perabung rumah, enggau ketegal sida nuang wain nyadika piring ke petara bukai. Kenyau ari pun dulu kelia orang Israel enggau orang Judah endang udah nyungkak Aku enda lantang ati sereta ringat laban utai ti udah dikereja sida. Orang di nengeri tu udah nyungkak Aku ringat pedis ati kenyau ari maya nengeri tu didirika. Aku udah mutuska runding deka ngerusak nengeri tu ketegal semua penyai ti udah dikereja orang Judah enggau orang Jerusalem, sama enggau bala raja enggau bala tuai sida, bala imam enggau bala nabi sida. Sida udah nguingka belakang sida ngagai Aku, lalu taja pen Aku majak ngajar sida, sida majak enggai mending lalu belajar. Indah engkeramba ti disembah sida deh diengkah sida dalam Rumah Sembiang ti alai Aku disembah, lalu sida udah ngamahka Rumah nya. Sida udah ngaga mayuh bengkah alta ke Baal ba Lebak Hinom, alai sida nyerahka anak lelaki enggau anak indu sida nyadika piring ngagai petara Molek. Aku nadai ngasuh sida ngereja utai nya, lalu Aku pen nadai mega udah ngira sida deka ngereja utai nya, lalu ngasuh orang Judah bedosa.” Ku TUHAN Allah Taala ke disembah orang Israel nyebut ngagai aku, “Jeremiah, orang ngumbai perang, keberuran enggau penyakit deka ngasuh nengeri tu alah laban raja menua Babilon. Diatu pendingka utai bukai ti deka disebut Aku. Aku deka ngempuruka orang ari semua menua ti udah alai Aku ngachirka sida lebuh Aku ringat pedis ati, lalu Aku deka mai sida pulai baru ngagai endur tu, lalu nejuka sida diau likun ditu. Nya baru sida deka nyadi nembiak Aku, lalu Aku deka nyadi Allah Taala sida. Aku deka meri sida siti aja tuju dalam pengidup sida, iya nya, ngemesaika Aku belama iya, ke penguntung sida empu, enggau ke penguntung bala peturun sida. Aku deka ngaga siti sempekat ti meruan belama iya enggau sida. Aku enggai sekali-kali badu ngereja utai ti manah ke sida, lalu Aku deka ngasuh sida nangika Aku enggau pengabis ati sida, ngambika sida enda ninggalka Aku. Aku deka gaga ati ngereja utai ti manah ke sida, lalu Aku deka ngentapka sida di menua tu. “Baka Aku ti udah ngasuh orang tu ditinggang penusah ti besai tu, baka nya mega Aku deka meri ngagai sida semua utai ti manah ti udah disemaya Aku. Orang bisi bejaku ngumbai menua tu deka nyadi baka menua puang, ti enda diuan mensia tauka jelu, lalu madahka menua tu deka diserahka ngagai orang Babilon. Tang tanah umai deka dibeli baru di menua tu. Orang deka meli tanah, lalu surat tanah deka disain, lalu ditanggam di mua bala saksi. Utai tu deka nyadi di menua Benjamin, dalam genturung pendiau ti ngelingi Jerusalem, dalam nengeri di menua Judah, enggau dalam nengeri di menua ti bebukit, ba sebelah kaki bukit, enggau di selatan menua Judah. Aku deka mulaika orang mayuh ngagai menua sida empu baru. Aku ti TUHAN, udah bejaku.” Lebuh aku agi benung kena jil ba tengah laman nya, pesan TUHAN datai ngagai aku baru. TUHAN ti ngaga, nempa lalu ngengkahka dunya ba endur iya, bejaku ngagai aku. Ku Iya ke benama TUHAN bejaku, “Kangauka Aku, lalu Aku deka nyaut nuan. Aku deka madahka ngagai nuan utai ti manah, ti nadai kala ditemu nuan, ti deka ngasuh nuan alit ati. Aku ti TUHAN Allah Taala ke disembah orang Israel madahka semua rumah di Jerusalem, enggau istana raja deka dirubuh laban sida dikelulung sereta diserang munsuh. Sekeda orang deka bamuk ngelaban orang Babilon, lalu orang Babilon deka ngisi rumah enggau bangkai orang Israel ti deka dibunuh Aku, laban Aku ringat pedis ati ngagai sida. Aku udah nguingka Diri ari nengeri tu ketegal utai ti jai ti udah dikereja orang ke diau ditu. Tang Aku deka ngeraika nengeri tu enggau orang ke diau ditu, lalu ngasuh sida suman baru. Aku deka meri sida pemaik enggau pengelikun. Aku deka ngasuh Judah enggau Israel kaya-raja baru, lalu Aku deka niri negika sida baru baka sida ke suba. Aku deka nuchi sida ari dosa ti udah digaga sida ngelaban Aku, lalu Aku deka ngampun dosa sida, enggau penyalah sida ke udah angkat ngelaban Aku. Jerusalem deka mai pengaga, basa enggau mulia ngagai Aku, lalu genap bengkah bansa di dunya tu deka nangi sereta getar-getar lebuh sida ninga pasal utai ti manah ti deka dikereja Aku ke orang Jerusalem, enggau pasal pengaya ti deka dibai Aku ngagai nengeri tu.” Ku TUHAN bejaku, “Orang bisi bejaku madahka endur tu baka menua puang, madahka endur tu enda diuan mensia tauka jelu. Utai ti disebut sida nya endang amat. Nengeri di menua Judah enggau jalai raya di Jerusalem endang amat puang, nadai orang nguan tauka jelu. Tang ba endur tu kita deka ninga baru munyi panjung orang ke gaga ati, enggau munyi orang ke lantang ati ngintu gawai tikah. Kita deka ninga orang belagu lebuh sida mai piring terima kasih ngagai Rumah Aku. Ku sida, ‘Beri terima kasih ngagai TUHAN ti Pemadu Bekuasa, laban Iya endang manah lalu pengerindu Iya endang meruan belama iya.’ Aku deka ngasuh menua tu nyadi kaya-raja baru baka iya ti dulu suba. Aku ti TUHAN, udah bejaku.” Ku TUHAN ti Pemadu Bekuasa bejaku, “Menua tu, ti baka menua puang, ti enda diuan mensia tauka jelu, deka bisi padang rumput baru alai bala pengibun bedus tau mai bedus sida. Di nengeri ti di menua ti bebukit, ba sebelah kaki bukit, enggau di selatan menua Judah, di menua Benjamin, ba genturung pendiau ti ngelingi Jerusalem, enggau di nengeri menua Judah, bala pengibun bedus deka, sekali agi, ngitung bedus sida. Aku ti TUHAN, udah bejaku.” Ku TUHAN bejaku, “Maya deka datai alai Aku deka ngamatka semaya ti udah digaga Aku enggau orang Israel sereta enggau orang Judah. Lebuh maya nya ila, Aku deka milih siku orang ke lurus ari peturun David, nyadi raja. Raja nya deka ngereja utai ti ngena sereta lurus di serata menua tu. Lebuh maya nya ila Judah deka likun, lalu orang Jerusalem deka diau dalam pemaik, lalu nengeri Jerusalem deka dikumbai ‘ TUHAN ti pun pengelurus kitai.’ Aku ti TUHAN, besemaya: siku peturun David deka seruran nyadi raja orang Israel, lalu imam ari peturun Lewi deka seruran bekereja ke Aku, sereta ngenjuk piring tunu, piring tepung, enggau mayuh macham piring ti bukai.” Ku TUHAN bejaku ngagai aku, “Aku udah ngaga siti sempekat enggau siang sereta enggau malam, ngambika seduai iya seruran pegari ba maya ti patut, lalu sempekat nya enda tau dilanggar. Baka nya mega Aku udah ngaga siti sempekat enggau nembiak Aku David madahka siku ari peturun iya deka seruran nyadi raja, lalu Aku udah ngaga siti sempekat enggau bala imam ari raban bansa Lewi, ngasuh sida seruran bekereja ke Aku. Semua sempekat tu enda tau sekali-kali dilanggar. Aku deka nambahka pemayuh peturun nembiak Aku David, enggau pemayuh bala imam ari raban bansa Lewi, datai ke sida nyau enda ulih diitung agi, baka bintang ti di langit tauka baka pasir ti ba tebing tasik.” Ku TUHAN bejaku ngagai aku, “Kati nuan bisi meda orang bejaku madahka Aku udah nulak Israel enggau Judah, dua bengkah ruang bilik ti udah dipilih Aku, enggau jalai sida ngayanka diri enda bebasaka bala nembiak Aku, lalu enda agi ngumbai sida iya siti bansa? Tang Aku ti TUHAN udah ngaga siti semaya enggau siang, sereta enggau malam, lalu Aku udah ngaga adat kena merintah dunya enggau langit. Baka Aku ti udah ngereja utai nya, baka nya mega Aku deka numbuhka semaya Aku enggau peturun Jakop sereta enggau nembiak Aku David. Aku deka milih siku ari peturun David merintah bala peturun Abraham, Isak enggau Jakop. Aku deka kasihka bala nembiak Aku, lalu ngasuh sida nyadi kaya-raja baru.” TUHAN bejaku ngagai aku lebuh Raja Nebukadnesar enggau bala soldadu iya, disukung bala soldadu ari semua bansa, enggau menua ti kena pegai iya, benung nyerang Jerusalem enggau nengeri ti semak nya dia. TUHAN Allah Taala ke disembah orang Israel ngasuh aku mansang lalu nyebut ngagai Raja Sedekiah menua Judah munyi tu, “Aku ti TUHAN, deka nyerahka nengeri tu ngagai raja menua Babilon, lalu iya deka nunu nengeri tu. Nuan enda ulih rari. Nuan deka kena tangkap, lalu diserahka ngagai iya. Nuan deka betunga mua enggau iya, lalu bejaku enggau iya empu. Udah nya baru nuan deka mupuk ngagai menua Babilon. Sedekiah, pendingka utai ti disebut aku pasal nuan. Nuan enda mati beperang. Nuan deka mati dalam pemaik, lalu baka orang ke nunu menyan lebuh sida nguburka bala aki ini nuan ti udah nyadi raja dulu agi ari nuan, baka nya mega sida deka nunu menyan ke nuan. Sida deka ngulitka nuan, lalu nyebut, ‘Raja kitai udah mati!’ Aku ti TUHAN, udah bejaku.” Udah nya aku lalu meri pesan nya ngagai Raja Sedekiah di Jerusalem lebuh bala soldadu raja menua Babilon benung nyerang nengeri nya. Bala soldadu nya mega nyerang Lakis enggau Asekah, dua buah nengeri ti bekuta ti apin diserang di menua Judah. Raja Sedekiah enggau semua orang Jerusalem udah ngaga siti sempekat kena ngelepaska orang Hebrew ti nyadi ulun, ti lelaki enggau ti indu, ngambika orang Israel nadai ngembuan ulun ari bansa sida empu. Semua orang Israel enggau bala tuai sida besetuju deka ngelepaska ulun sida, lalu enda agi ngaga sida nyadi ulun. Sida amat ngelepaska ulun sida, tang udah nya, sida lalu ngubah runding diri, ngambi ulun nya pulai baru, lalu mejalka sida nyadi ulun baru. Udah nya TUHAN, ti Allah Taala ke disembah orang Israel, ngasuh aku nyebut ngagai orang mayuh: “Aku udah ngaga siti sempekat enggau bala aki ini kita, lebuh Aku mai sida pansut ari menua Ejip, pansut ari pengidup sida ke nyadi ulun. Aku madahka ngagai sida, ba genap taun ti ketujuh, sida enda tau enda ngelepaska sebarang orang Hebrew ti nyadi ulun, ti udah bekereja enam taun ke sida. Tang bala aki ini kita enda bedulika nya, lalu enggai mendingka Aku. Dalam dua tiga hari tu ti udah, kita udah ngubah runding diri, lalu ngereja utai ti ngerinduka ati Aku. Semua kita besetuju deka ngelepaska semua orang Israel, lalu kita ngaga siti sempekat di mua Aku, dalam Rumah Sembiang alai Aku ke disembah. Tang udah nya kita ngubah runding kita baru, lalu enda bebasaka Aku. Semua kita ngambi ulun kita pulai baru, ulun ti udah dilepaska kita nitihka pengingin ulun nya empu, lalu kita mejalka sida nyadi ulun baru. Nya alai, diatu Aku ti TUHAN madahka kita udah enda ngasika Aku. Kita nadai udah ngelepaska semua orang Israel. Nya alai Aku deka ngelengkaka kita ari jari Aku ngambika kita mati beperang, mati laban penyakit enggau mati keberuran. Aku deka ngasuh semua bansa di dunya tu geli meda utai ti dikereja Aku ngagai kita. Aku deka nyerahka sida ngagai bala munsuh sida ke deka munuh sida, lalu bangkai sida deka diempa burung enggau jelu babas. Aku deka mega nyerahka Raja Sedekiah menua Judah enggau bala pemesai iya ngagai orang ke deka munuh sida. Aku deka nyerahka sida ngagai bala soldadu orang Babilon, ti udah ngetu nyerang kita. Aku deka meri atur, lalu sida deka pulai baru ngagai nengeri tu. Sida deka nyerang, ngalah, lalu nunu nengeri tu. Aku deka ngaga nengeri di menua Judah nyadi baka menua puang, ti enda diuan mensia. Aku ti TUHAN, udah bejaku.” Lebuh Jehoiakim anak Josiah nyadi raja menua Judah, TUHAN bejaku ngagai aku, ku Iya, “Alai nuan mansang ngagai raban peturun Rekap, lalu bejaku enggau sida. Udah nya bai sida ngagai bilik siti dalam Rumah Sembiang, lalu beri sida ngirup wain.” Nya alai aku lalu mai semua raban peturun Rekap - Jasaniah (anak orang siku ke benama Jeremiah anak Habasiniah) enggau semua menyadi lelaki enggau anak lelaki sida, lalu mai sida ngagai Rumah Sembiang. Aku mai sida ngagai bilik bala murid nabi Hanan anak Igdaliah. Bilik tu ari atas bilik Maseiah anak Salum, siku pemesai dalam Rumah Sembiang, semak bilik bala pemesai ti bukai. Aku lalu ngengkahka mangkuk ti penuh laban wain di mua raban bansa Rekap, lalu bejaku ngagai sida, “Irup wain tu.” Tang ku sida nyaut, “Kami enda ngirup wain. Aki kami Jonadap anak Rekap madahka kami enggau bala peturun kami enda tau sekali-kali ngirup wain. Iya mega madahka kami enda tau nirika rumah tauka bumai, lalu enda tau bekebun anggur, tauka meli kebun anggur. Iya meri atur ngasuh kami seruran diau dalam langkau kain, ngambika kami lama idup di menua ti alai kami ngampar. Kami udah ngasika semua atur ti udah diberi Jonadap ngagai kami. Kami empu nadai kala ngirup wain, lalu bini kami, bala anak lelaki kami enggau bala anak indu kami pen enda mega kala. Tang lebuh Raja Nebukadnesar nyerang menua tu, kami berunding deka mansang ngagai Jerusalem, ngerarika diri ari bala soldadu orang Babilon enggau bala soldadu orang Siria. Nya kebuah kami diau di Jerusalem.” Bala peturun Jonadap udah ngasika atur Jonadap empu, lalu enda ngirup wain, lalu nyentuk ngagai sehari tu nadai siku sida ngirup wain. Tang Aku udah majak bejaku ngagai kita, tang kita nadai udah ngasika Aku. Aku udah majak ngirumka ngagai kita semua nembiak Aku, iya nya sida nabi, lalu sida udah ngasuh kita ngelengkaka ulah kita ke jai, lalu ngereja utai ti ngena. Sida udah meri kita jaku tangkan, nagang kita nyembah tauka betuaika petara bukai, ngambika kita mengkang diau di menua ti udah diberi Aku ngagai kita enggau ngagai aki ini kita. Tang kita enggai mending tauka ibuhka jaku Aku. Peturun Jonadap udah ngasika atur ti diberi aki ini sida ngagai sida, tang kita nadai udah ngasika Aku. Nya alai diatu Aku, TUHAN ti Pemadu Bekuasa, ti Allah Taala ke disembah orang Israel, deka ngasuh pengerusak ninggang kita orang Judah enggau orang Jerusalem nitihka semaya Aku. Aku deka ngereja nya laban kita enggai mendingka Aku lebuh Aku bejaku ngagai kita, lalu kita enggai nyaut, lebuh Aku ngangauka kita.” Udah nya aku lalu madahka ngagai raban peturun Rekap utai ti udah disebut TUHAN ti Pemadu Bekuasa: “Kita udah ngasika atur ti diberi aki ini kita Jonadap, lalu kita udah ngereja semua utai ti diasuh iya kereja kita. Nya alai Aku, TUHAN ti Pemadu Bekuasa, ti Allah Taala ke disembah orang Israel besemaya: Jonadap anak Rekap deka seruran bisi peturun ti lelaki bekereja ke Aku.” Dalam taun ti keempat Jehoiakim anak Josiah nyadi raja menua Judah, TUHAN bejaku ngagai aku, “Ambi gulung surat, lalu tuliska ba surat nya semua utai ti udah dipadahka Aku ngagai nuan pasal orang Israel enggau orang Judah, enggau pasal semua bansa. Tuliska semua utai ti udah dipadahka Aku ngagai nuan kenyau ari Aku terubah bejaku ngagai nuan, lebuh Josiah nyadi raja, nyentuk ngagai diatu. Nyangka ukur lebuh orang Judah ninga pasal semua pengerusak ti deka diasuh Aku ninggang sida, sida deka ngelengkaka ulah sida ke jai. Nya baru Aku deka ngampun penyai enggau dosa sida.” Nya alai aku lalu mesanka Baruk anak Neriah, lalu nyebut ngagai iya semua utai ti udah disebut TUHAN ngagai aku. Baruk lalu nuliska semua utai nya dalam gulung surat nya. Udah nya aku lalu meri atur tu ngagai Baruk: “Aku enda tau tama ngagai Rumah Sembiang. Tang aku ngasuh nuan mansang kia lebuh orang mayuh bepasa ila. Nuan enda tau enda macha gulung surat tu enggau nyawa ti inggar, ngambika sida ninga semua utai ti udah disebut TUHAN ngagai aku, ti udah diasuh aku tulis nuan. Kereja nya ba endur alai semua orang ulih ninga nuan, nyengkaum orang Judah ke datai ari nengeri sida empu. Nyangka ukur sida deka besampi ngagai TUHAN lalu ngelengkaka ulah sida ke jai, laban TUHAN udah madahka Diri deka balat ringat sereta pedis ati ngagai bala nembiak Iya.” Nya alai Baruk lalu macha jaku TUHAN dalam Rumah Sembiang nitihka asuh aku. Dalam bulan ti kesemilan, kelima taun Jehoiakim nyadi raja menua Judah, orang mayuh lalu bepasa minta pengasih ari TUHAN. Semua orang ke diau di Jerusalem, enggau semua orang ke datai ari mayuh bengkah nengeri di menua Judah, bela bepasa magang. Udah nya, lebuh semua orang mayuh mending, Baruk lalu macha gulung surat nya, madahka semua utai ti udah disebut aku. Iya macha gulung surat nya dalam Rumah Sembiang, ari bilik Gemariah anak Sapan, ti nyadi kerani kot. Bilik nya ba sadau kot, semak penama ngagai Pintu Ti Baru ba Rumah Sembiang. Lebuh Mikaiah anak Gemariah, uchu Sapan, ninga Baruk macha jaku TUHAN ari gulung surat nya, iya lalu mansang ngagai istana raja, ngagai bilik kerani kot, alai semua pemesai benung baum. Elisama, ti nyadi kerani kot, Delaiah anak Semaiah, Elnatan anak Akbor, Gemariah anak Sapan, Sedekiah anak Hananiah, enggau semua pemesai ti bukai bela bisi dia magang. Mikaiah lalu madahka ngagai sida semua utai ti udah didinga iya bacha Baruk ngagai orang mayuh. Udah nya bala pemesai ngasuh Jehudi (anak Netaniah, uchu Selemiah, ichit Kusi) mesanka Baruk mai ngagai sida gulung surat ti udah dibacha iya ngagai orang mayuh. Baruk lalu mai gulung surat nya ngagai sida. Ku sida bejaku, “Duduk, lalu bacha gulung surat nya ngagai kami.” Baruk lalu macha. Lebuh iya udah macha gulung surat nya, sida lalu beperening ngagai pangan diri, irau ati, lalu bejaku enggau Baruk, “Kami enda tau enda madahka utai tu ngagai raja.” Sida lalu nanya Baruk, “Padahka ngagai kami diatu, baka ni ku nuan nuliska semua utai tu? Kati Jeremiah bisi udah nyebut utai tu ngagai nuan?” Disaut Baruk, “Jeremiah nyebut semua leka jaku nya ngagai aku, lalu aku nuliska semua utai nya dalam gulung surat tu.” Lalu ku sida bejaku ngagai iya, “Seduai Jeremiah enda tau enda angkat ari tu lalu belalai. Anang madahka ngagai orang endur alai seduai belalai.” Bala pemesai lalu naruh gulung surat nya dalam bilik Elisama, ti nyadi kerani kot, lalu mansang ngagai istana raja, alai sida ke lalu madahka semua utai ngagai raja. Udah nya raja lalu ngasuh Jehudi ngambi gulung surat nya. Jehudi ngambi gulung surat nya ari bilik Elisama, lalu macha iya ngagai raja enggau semua bala pemesai ke bediri ngelingi iya. Hari lebuh maya nya endang udah musin chelap, lalu raja duduk bekindu dalam istana ti endur alai iya belelak lebuh musin chelap. Lebuh Jehudi udah tembu macha tiga tauka empat genteran, raja ngambi lungga lalu netak dua tiga genteran ari gulung surat nya, lalu nibarka utai nya ngagai api. Iya majak ngereja nya datai ke semua gulung surat nya udah abis ditunu. Tang raja, enggau bala pemesai iya ke ninga pasal utai nya, nadai berasai takut tauka ngayanka diri bisi tusah ati. Taja pen Elnatan, Delaiah, enggau Gemariah nguji minta raja badu nunu gulung surat nya, iya enda bedulika jaku sida. Udah iya ngasuh anak iya ke benama Jerahmil, sama enggau Seraiah anak Asriel, enggau Selemiah anak Abdil, nangkap aku enggau kerani aku, Baruk. Tang TUHAN udah ngelalaika kami duai. Lebuh Raja Jehoiakim udah nunu gulung surat ti udah diasuh aku tulis Baruk, TUHAN lalu bejaku ngagai aku ngasuh aku ngambi siti agi gulung surat, lalu nuliska ba gulung surat nya semua utai ti udah ditulis ba gulung surat ti keterubah. TUHAN ngasuh aku nyebut ngagai raja, “Nuan udah nunu gulung surat nya, lalu nuan udah nanyaka ngagai Jeremiah kebuah iya udah nulis lalu madahka raja menua Babilon deka datai lalu ngerusak menua tu, lalu munuh orang enggau jelu di menua tu. Nya alai, diatu Aku ti TUHAN, madahka ngagai nuan Raja Jehoiakim, nadai siku peturun nuan deka merintah menua ti udah diperintah David. Bangkai nuan deka dibuai ngagai endur alai nuan deka dipanchar panas lebuh siang hari, lalu dibalut ais lebuh malam hari. Aku deka ngukum nuan, bala peturun nuan, enggau bala pemesai nuan ketegal dosa ti udah dikereja semua kita. Nuan, tauka orang di Jerusalem, tauka orang Judah nadai kala deka mendingka jaku tangkan ti diberi Aku, nya alai Aku deka ngasuh penusah ti besai ninggang semua kita, munyi ti udah dipadahka Aku ngagai kita.” Udah nya aku lalu ngambi siti agi gulung surat, lalu meri gulung surat nya ngagai kerani aku, Baruk, lalu iya nuliska semua utai ti diasuh aku tulis iya. Iya lalu nuliska semua utai enggau pesan munyi ti udah ditulis dalam gulung surat ti terubah. Raja Nebukadnesar menua Babilon nyiri Sedekiah anak Josiah nyadi raja menua Judah, nganti Jehoiakin anak Jehoiakim. Tang Sedekiah, bala pemesai iya, enggau orang mayuh enda ngasika pesan ti udah diberi TUHAN ngagai aku. Raja Sedekiah ngasuh Jehukal anak Selemiah, enggau Imam Sepaniah anak Maseiah minta aku besampi ngagai TUHAN Allah Taala kitai, ngarika bansa kitai. Lebuh maya nya aku apin ditutup dalam rumah jil, lalu agi bejalai kia-kia enggau nadai besekat ba bansa kitai. Bala soldadu orang Babilon endang udah ngelulung Jerusalem, tang lebuh sida ninga bala soldadu orang Ejip udah meraka garis entara menua Ejip, sida lalu nyurutka diri. Udah nya TUHAN Allah Taala ke disembah orang Israel, ngasuh aku nyebut ngagai Sedekiah, “Bala soldadu orang Ejip diatu benung di rantau jalai mansang nulung nuan, tang sida deka pulai. Udah nya orang Babilon deka datai baru, nyerang, ngalahka lalu nunu nengeri tu. Aku ti TUHAN, meri jaku tangkan ngagai nuan, enda ngasuh nuan nipu diri ngarapka orang Babilon enda datai baru, laban sida endang deka datai baru. Enti sema nuan ngalahka semua bala soldadu orang Babilon, datai ke semina sida ke bakal aja agi tinggal garing-garing dalam langkau kain sida, sida deka angkat baru lalu nunu nengeri tu datai ke retung.” Bala soldadu orang Babilon nyurutka diri ari Jerusalem laban bala soldadu orang Ejip nyau deka datai. Nya alai aku lalu angkat ari Jerusalem, lalu mansang ngagai menua Benjamin, deka ngambi ungkup aku ari reta tengkira kami sebilik. Tang lebuh aku datai ba Pintu Benjamin, pemesai ti nyadi tuai soldadu ke nyaga dia, ke benama Irijah anak Selemiah, uchu Hananiah, ngetanka aku. Ku iya, “Nuan deka rari lalu ngalih ari orang Babilon!” Ku aku nyaut, “Ukai baka nya! Aku ukai deka ngalih ari orang Babilon.” Tang Irijah enggai mendingka aku. Iya nangkap aku, lalu mai aku ngagai bala pemesai. Sida pedis ati ngagai aku, lalu ngasuh orang malu sereta ngejil aku dalam rumah Jonatan, ti nyadi kerani kot. Rumah nya udah digaga nyadi rumah jil. Aku ditutup dalam rumah jil ti dalam tanah. Lama amat aku ditutup dia. Udah nya Raja Sedekiah mesanka aku, lalu dalam istana nya iya nanya aku, “Kati nuan bisi pesan ari TUHAN?” “Bisi,” ku aku nyaut, lalu ku aku nambahka jaku aku, “Nuan deka diserahka ngagai raja menua Babilon.” Udah nya aku lalu nanya, “Nama penyalah ti udah dikereja aku ngagai nuan tauka ngagai bala pemesai nuan, tauka ngagai orang mayuh, ti ngasuh nuan nutup aku dalam rumah jil? Dini alai bala nabi nuan ti udah madahka raja menua Babilon enda nyerang nuan, tauka nyerang menua tu? Nya alai diatu, Tuan Raja, aku minta nuan mendingka aku, lalu ngereja utai ti diasuh aku. Anang ngasuh aku pulai baru ngagai rumah jil ti dalam rumah Jonatan. Enti nuan nutup aku baru, aku tetap mati.” Raja Sedekiah lalu ngasuh aku ditutup ba tengah laman istana. Aku diau dia, lalu genap hari aku diberi setuku roti ari dapur ti alai orang begagaka roti, nyentuk ngagai maya semua roti di nengeri nya nyau abis. Sepatiah anak Matan, Gedaliah anak Pasur, Jehukal anak Selemiah, enggau Pasur anak Malkiah ninga aku madahka ngagai orang mayuh pasal TUHAN ti udah nyebut, “Barang sapa mengkang diau dalam nengeri tu deka mati beperang, tauka mati keberuran tauka mati laban penyakit. Tang orang ke pansut lalu nyerahka diri ngagai orang Babilon, enda kena bunuh. Sida deka mengkang idup.” Aku udah mega madahka TUHAN udah nyebut, “Aku deka nyerahka nengeri tu ngagai bala soldadu orang Babilon, lalu sida deka ngalahka iya.” Udah nya bala pemesai betemu enggau raja, lalu bejaku, “Orang tu enda tau enda dibunuh. Jaku iya ngasuh bala soldadu takut, lalu iya mega ngenakutka semua orang bukai ti agi tinggal di nengeri tu. Iya ukai deka nulung orang mayuh tang semina deka ngemediska sida.” Ku Raja Sedekiah nyaut, “Sebarang ku kita enggau iya. Aku enda ulih nagang kita.” Nya alai sida mai aku, lalu ngulurka aku ngena tali ke dalam telaga anak raja ke benama Malkiah, ti ba tengah laman istana nya. Telaga nya nadai ai, semina tanah luchak aja, lalu aku terunjam ba tanah luchak nya. Tang Ebetmelek orang Etiopia, ti udah dipeliri lalu bekereja dalam istana raja, bisi ninga pasal sida ke udah muai aku ke dalam telaga. Lebuh maya nya raja benung ngatur pechara ba Pintu Benjamin. Ebetmelek lalu mansang ngagai Pintu Benjamin lalu bejaku enggau raja, “Tuan Raja, sida tu udah ngereja utai ti salah. Sida udah muai Jeremiah ngagai telaga. Iya tetap deka mati keberuran dia, laban nadai agi pemakai dalam nengeri tu.” Raja lalu ngasuh Ebetmelek mai tiga iku lelaki lalu narit aku pansut ari telaga nya sebedau aku mati. Ebetmelek lalu mansang enggau lelaki tiga iku nya ngagai bilik setor istana lalu ngambi gari kain, ti diulurka iya ngagai aku ngena tali. Iya ngasuh aku ngengkahka gari kain nya ba kechiak aku, ngambika tali nya enda ngemediska aku. Aku lalu ngengkahka kain nya ba kechiak aku lalu sida narit aku pansut ari telaga nya. Udah nya aku lalu ditanka ba tengah laman nya. Nyadi sekali Raja Sedekiah ngasuh orang mai aku ngagai iya ba penama ti ketiga ngagai Rumah Sembiang, lalu ku iya bejaku, “Aku deka nanya nuan, lalu aku ngasuh nuan madahka utai ti bendar ngagai aku.” Ku aku nyaut, “Enti aku madahka utai ti bendar ngagai nuan, nuan deka munuh aku, lalu enti aku meri nuan jaku lalau, nuan enggai mending.” Nya alai Raja Sedekiah besemaya enggau aku ngena chara belalai, ku iya, “Aku besumpah dalam nama Allah Taala ti idup, Allah Taala ti meri kitai seput, aku enda munuh nuan tauka nyerahka nuan ngagai orang ke deka munuh nuan.” Udah nya aku lalu madahka ngagai Sedekiah utai ti udah disebut TUHAN ti Pemadu Bekuasa, ti Allah Taala ke disembah orang Israel, “Enti nuan nyerahka diri ngagai bala pemesai raja menua Babilon, nuan enda dibunuh, lalu nengeri tu enda ditunu. Nuan enggau kita sebilik enda bunuh. Tang enti nuan enda nyerahka diri, nengeri tu deka diserahka ngagai orang Babilon, lalu sida deka nunu nengeri tu, lalu nuan enda ulih ngerarika diri ari sida.” Tang ku raja nyaut, “Aku takutka bala kitai empu ti udah ngalih ari orang Babilon, enggai ke aku diserahka ngagai sida, lalu diperinsa.” Ku aku bejaku, “Nuan enda diserahka ngagai sida. Aku minta nuan ngasika pesan TUHAN. Nya baru nuan nadai utai ngawa, lalu enda kena bunuh. Tang enti nuan majak enggai nyerahka diri, tu utai ti udah dipandangka TUHAN ngagai aku dalam genera: semua indu ke agi tinggal dalam istana raja menua Judah deka dibai pansut magang ngagai bala pemesai raja menua Babilon. Sida indu nya deka nyebut ngagai nuan: ‘Bala pangan rapat nuan udah nesatka nuan lalu enda begunaka penemu nuan. Lalu diatu lebuh kaki nuan udah lekat ba tanah luchak, bala pangan nuan ninggalka nuan.’ Ku aku nampung jaku aku, “Semua bini kita enggau bala anak kita deka dibai pansut magang ngagai orang Babilon, lalu nuan empu enda ulih ngerarika diri ari orang Babilon tang deka ditangkap raja menua Babilon lalu nengeri tu deka ditunu retung.” Ku Sedekiah nyaut, “Anang nusui randau tua tu ngagai orang bukai, nya baru nuan nadai utai ngawa. Enti bala pemesai nemu aku udah berandau enggau nuan, sida deka datai lalu nanyaka ngagai nuan utai ti disebut tua. Sida deka besemaya enda munuh nuan, enti nuan madahka semua utai ngagai sida. Semina padahka ngagai sida nuan udah minta aku kasihka nuan lalu enda nutup nuan baru dalam rumah jil nya, lalu enda nejuka nuan mati dia.” Semua bala pemesai datai lalu nanya aku, lalu aku madahka ngagai sida semina utai ti diasuh raja sebut aku. Sida nadai ulih ngereja lebih agi ari nya, laban orang nadai udah ninga randau kami duai raja. Aku lalu ditanka ba tengah laman istana nyentuk ngagai hari Jerusalem alah. Dalam bulan ti kesepuluh, taun ti kesemilan Sedekiah nyadi raja menua Judah, Raja Nebukadnesar menua Babilon datai enggau semua bala soldadu iya, lalu nyerang Jerusalem. Kena semilan hari bulan ti keempat, dalam taun ti kesebelas Sedekiah nyadi raja, dinding nengeri Jerusalem bumbus laban munsuh. ( Lebuh Jerusalem alah, semua bala pemesai raja menua Babilon datai lalu nudukka diri ba Pintu Tengah. Bala sida nya nyengkaum Nergal Sareser, Samgar Nebo, Sarsekim, enggau siku agi orang ke benama Nergal Sareser. ) Lebuh Raja Sedekiah enggau bala soldadu iya meda utai nya nyadi, sida nguji ngerarika diri ari nengeri nya lebuh malam hari. Sida rari nengah kebun istana, bejalai nengah pintu ti besabungka dinding kuta dua lapis nya, lalu rari tunga ngagai Lebak Jordan. Tang bala soldadu orang Babilon begagaika sida, lalu nangkap Sedekiah ba emperan semak Jeriko. Udah nya sida mai iya ngagai Raja Nebukadnesar, ke bisi di nengeri Riplah di menua Hamat lebuh maya nya. Dia Nebukadnesar lalu ngeletak ukum ke Sedekiah. Iya munuh bala anak Sedekiah di Riplah, di mua Sedekiah empu, lalu iya mega ngasuh bala pemesai orang Judah dibunuh. Udah nya, iya ngasuh orang ngeruk leka mata Sedekiah, lalu ngasuh iya ditanchang ngena rantai, lalu dibai ngagai menua Babilon. Lebuh utai nya benung nyadi, orang Babilon nunu istana raja, enggau rumah orang mayuh, lalu ngeruntuhka dinding kuta nengeri Jerusalem. Ke penudi iya, Nebusaradan, ti nyadi tuai soldadu, nabanka orang ke agi idup ari nengeri nya, sereta enggau sida ke udah ngalih ari iya, nyadi orang tangkap ngagai menua Babilon. Tang iya ninggalka orang ke pemadu seranta, orang ke nadai reta tengkira, di menua Judah lalu iya meri sida kebun anggur enggau tanah umai. Tang Raja Nebukadnesar ngasuh Nebusaradan, ti nyadi tuai soldadu, meri atur tu: “Giga Jeremiah, lalu intu iya enggau manah. Anang ngemediska iya, tang kereja sebarang utai ti dipinta iya.” Nya alai Nebusaradan, enggau bala pemesai ti tinggi pangkat, iya nya Nebusasban enggau Nergal Sareser, enggau semua bala pemesai Babilon ti bukai, ngasuh orang mai aku ari tengah laman istana. Sida lalu nyerahka aku ngagai Gedaliah anak Ahikam, uchu Sapan, ke diasuh nentuka aku pulai ngagai rumah aku empu enggau likun. Nya alai aku diau dia begulai enggau orang mayuh. Lebuh aku agi kena tutup ba tengah laman istana, TUHAN ngasuh aku madahka ngagai siku orang Etiopia ke benama Ebetmelek pasal TUHAN ti Pemadu Bekuasa, ti Allah Taala ke disembah orang Israel ti udah nyebut jaku tu: “Munyi ti ku Aku, Aku deka ngerusak nengeri tu, ukai deka ngasuh iya kaya-raja. Lalu nuan empu deka meda utai nya nyadi. Tang Aku ti TUHAN, deka nyaga nuan lebuh hari nya, lalu nuan enda diserahka ngagai orang ke diketakutka nuan. Aku deka nyaga nuan likun, lalu nuan enda kena bunuh. Nuan enda dibunuh laban nuan udah manggaika pengarap nuan ba Aku. Aku ti TUHAN, udah bejaku.” TUHAN bejaku ngagai aku udah bekau Nebusaradan, ti nyadi tuai soldadu, udah ngelepaska aku di Ramah. Aku udah dibai ngagai Ramah ditanchang ngena rantai, sama enggau semua orang bukai ari Jerusalem enggau ari menua Judah ke ditabanka nyadi orang tangkap ngagai menua Babilon. Tuai soldadu mai aku ke tisi, lalu bejaku, “ TUHAN Allah Taala nuan udah madahka Diri deka ngerusak menua tu, lalu diatu Iya udah ngereja nya munyi ti ku Iya. Semua utai tu nyadi laban bansa kita udah bedosa ngelaban TUHAN, lalu enda ngasika Iya. Diatu aku muka rantai ari jari nuan, lalu ngelepaska nuan. Nuan tau mansang ngagai menua Babilon sama enggau aku, enti nuan deka, lalu aku deka ngintu nuan. Tang enti nuan enggai, nya nadai ngawa. Nuan tau milih sebarang endur di menua tu alai nuan diau, lalu nuan tau bejalai ngagai sebarang endur nuan deka.” Lebuh iya meda aku enda nyaut, iya lalu bejaku, “Pulai meh nuan baru ngagai Gedaliah anak Ahikam, uchu Sapan, ti udah diasuh raja menua Babilon nyadi tuan gabenor ke nengeri di menua Judah. Nuan tau diau enggau iya, lalu diau begulai enggau orang mayuh, tauka bejalai ngagai sebarang endur ti manah ku ati nuan.” Udah nya iya lalu meri aku siti pemeri, enggau bekal, lalu ngasuh aku mupuk. Aku lalu mupuk lalu diau enggau Gedaliah di Mispah, lalu begulai enggau orang mayuh ke tinggal di menua tu. Lebuh bala pemesai enggau bala soldadu orang Judah ke apin nyerahka diri ninga raja menua Babilon udah ngasuh Gedaliah anak Ahikam nyadi tuan gabenor menua Judah megai semua lelaki, indu enggau bala nembiak, iya nya orang ke pemadu seranta di menua Judah, ti enda ditabanka ngagai menua Babilon, sida, enggau bala sida mansang ngagai Gedaliah di Mispah. Bala sida nya nyengkaum Ismail anak Netaniah, Johanan anak Kareah, Seraiah anak Tanhumet, bala anak lelaki Epai ari Netopah, enggau Jesaniah ari Maakah. Ku Gedaliah bejaku ngagai sida, “Anang takut betuaika orang Babilon. Ngentapka diri di menua tu, lalu betuaika raja menua Babilon, ngambika kita nyamai diau. Aku empu deka diau di Mispah lalu nyadi pengari kita lebuh orang Babilon datai ditu. Tang kita tau ngumpul lalu nyimpan wain, minyak kana enggau buah, lalu diau ba genturung pendiau ti dikedekaka kita.” Lebuh semua orang Israel ti diau di Moap, Amon, Edom, enggau menua bukai, ninga raja menua Babilon udah ngemendarka sekeda orang Israel diau di menua Judah, lalu udah ngasuh Gedaliah anak Ahikam nyadi gabenor sida, semua sida bela mulaika diri ngagai menua Judah, ngagai Gedaliah di Mispah, ari endur alai sida ke udah ngachir pendiau. Sida lalu besimpanka mayuh wain enggau buah. Udah bekau nya, Johanan enggau bala tuai soldadu ti enda nyerahka diri, datai ngagai Gedaliah di Mispah lalu bejaku enggau iya, “Kati nuan enda nemu Raja Baalis menua Amon udah ngasuh Ismail munuh nuan?” Tang Gedaliah enda arapka nya. Udah nya Johanan bejaku kediri enggau iya, “Awakka aku mupuk lalu munuh Ismail. Nadai orang nemu sapa ti munuh iya. Nama kebuah kitai nejuka iya munuh nuan? Laban nya deka mambarka pendiau semua orang Judah ti udah begelumu ngelingi nuan, lalu ngasuh penusah ti besai ninggang semua orang ke agi tinggal di menua Judah.” Tang ku Gedaliah nyaut, “Anang! Utai ti disebut nuan pasal Ismail nya ukai utai ti amat!” Dalam bulan ti ketujuh ba taun nya, Ismail anak Netaniah, uchu Elisama, siku orang ari ruang bilik raja ke mega nyadi tuai pemesai raja, mansang ngagai Mispah, mai sepuluh iku orang, deka betemu enggau Tuan Gabenor Gedaliah. Lebuh semua sida agi benung beserumpu makai, Ismail enggau sepuluh iku bala iya nyintak pedang sida, lalu munuh Gedaliah. Ismail mega munuh semua orang Israel ke enggau Gedaliah di Mispah, enggau bala soldadu orang Babilon ke bisi dia. Hari siti, sebedau orang nemu Gedaliah udah dibunuh, lapan puluh iku orang datai ari Sekem, Siloh enggau Samaria. Sida udah ngukur ragum sida, nyarikka gari sida, lalu ngurik tubuh diri. Sida mai gandum enggau menyan ti deka diberi ba Rumah Sembiang. Ismail anak Netaniah lalu pansut ari Mispah ngambat sida, enggau sabak. Lebuh iya betemu enggau sida, iya lalu bejaku, “Aram betemu enggau Gedaliah.” Lebuh sida udah tama ngagai nengeri nya, Ismail enggau bala iya lalu munuh sida, lalu muai bangkai sida ngagai siti telaga. Tang dalam raban sida nya bisi sepuluh iku orang ke bejaku enggau Ismail munyi tu, “Anang munuh kami! Kami bisi gandum, barli, minyak kana, enggau ai manyi ti udah dilalaika kami di padang.” Nya alai iya enda nyadi munuh sida. Telaga ti udah alai Ismail muai bangkai bala orang ke udah dibunuh iya nya telaga ti besai ti udah ditumbak Raja Asa lebuh iya benung diserang Raja Baasa menua Israel. Ismail ngisi telaga nya enggau bangkai sida. Udah nya iya nangkap bala anak indu raja, enggau semua orang bukai di Mispah, ti udah diserahka tuai soldadu, Nebusaradan, ngagai Gedaliah. Ismail nabanka sida nyadi orang tangkap ngagai menua Amon. Tang lebuh Johanan anak Kareah enggau semua bala tuai soldadu ke sama enggau iya ninga penyalah ti udah dikereja Ismail, sida lalu mai semua bala sida nyerang Ismail. Sida tetemuka iya ba semak letung ti besai di Gibeon. Lebuh bala orang ke udah ditangkap Ismail tepedaka Johanan enggau bala tuai soldadu ke enggau iya datai, sida gaga ati, nguing lalu belanda ngagai sida. Tang Ismail enggau lapan iku orang ari bala iya, ulih ngerarika diri ari Johanan, ngagai menua Amon. Johanan enggau bala tuai soldadu ke enggau iya lalu ngempuruka orang ke udah ditangkap lalu ditabanka Ismail ari Mispah udah bekau iya ti munuh Gedaliah. Bala orang ke digempuruka sida nya nyengkaum soldadu, sida ke indu, bala anak mit, enggau lelaki ti udah dipeliri. Udah nya semua tuai soldadu, nyengkaum Johanan anak Kareah enggau Asariah anak Hosaiah, datai sama enggau orang ke tinggi enggau ke baruh pangkat lalu bejaku enggau aku. “Kami minta nuan ngereja utai ti dipinta kami! Kami minta nuan besampi ngagai TUHAN Allah Taala kita, ke kami. Besampi ke semua kami ke agi idup. Dulu suba kami mayuh tubuh, tang diatu, baka ke dipeda nuan, ka semina mimit aja kami tu agi idup. Besampi minta TUHAN Allah Taala kita nunjukka jalai ti patut ditengah kami, enggau utai ti patut dikereja kami.” Aku lalu nyaut, “Au. Aku deka besampi ngagai TUHAN Allah Taala kitai, nitihka pinta kita, lalu madahka ngagai kita semua utai ti disebut Iya. Siti pen nadai meh utai nya deka dilalaika aku ari kita.” Lalu ku sida bejaku enggau aku, “Awakka TUHAN besaksi ngelaban kami, enti kami enda ngasika semua jaku ti diberi TUHAN Allah Taala kita ngagai nuan. Nemuka kami lantang ati, tauka enda, kami sigi deka ngasika TUHAN Allah Taala kitai. Kami minta nuan besampi ngagai Iya ngarika kami. Kami nadai utai ngawa enti kami ngasika Iya.” Sepuluh hari udah bekau nya, TUHAN bejaku ngagai aku. Aku lalu mesanka Johanan, semua bala tuai soldadu ke bisi enggau iya, enggau semua orang bukai. Ku aku bejaku ngagai sida, “Kita udah ngasuh aku ngenataika peminta kita ngagai TUHAN Allah Taala ke disembah orang Israel. Tu utai ti disebut Iya, ‘Enti kita deka diau mendam di menua tu, nya baru Aku deka niri negika kita, ukai ngeruntuhka kita. Aku deka nanam kita, ukai numbangka kita. Pengerusak ti udah diasuh Aku ninggang kita udah ngasuh ati Aku balat tusah. Anang takutka raja menua Babilon laban Aku bisi enggau kita, lalu Aku deka ngelepaska kita ari kuasa iya. Laban Aku kasihka kita, nya alai Aku deka ngasuh iya kasihka kita, lalu iya deka ngasuh kita pulai ngagai menua kita empu. Aku ti TUHAN udah bejaku.’ perang ti tau ngerampit ngagai kita, deka nuntung kita, lalu lapar pungkang ti tau ngerampit ngagai kita deka nitihka kita, lalu kita deka mati di menua Ejip. Semua orang ke keras deka mupuk lalu diau di menua Ejip, deka mati beperang, tauka mati keberuran, tauka mati laban penyakit. Nadai siku sida deka idup. Nadai siku sida ulih ngerarika diri ari penusah ti besai ti deka diasuh Aku ninggang sida.’ “Ku TUHAN Allah Taala ke disembah orang Israel bejaku, ‘Baka pengeringat enggau pemedis ati Aku ti udah dibubuhka Aku ngagai orang Jerusalem, baka nya meh pemedis ati Aku deka dibubuhka Aku ngagai kita, enti kita mupuk ngagai menua Ejip. Orang deka geli meda kita. Sida deka beduan kita, lalu ngaga nama kita nyadika leka jaku sumpah. Kita nadai meda menua tu agi.’ ” Lalu ku aku nampung jaku aku, “Nyadi ke kita ke agi tinggal di menua Judah, TUHAN enda ngasuh kita mupuk ngagai menua Ejip. Nya alai diatu aku meri kita jaku tangkan: kita diatu ngereja penyalah ti tau ngambi nyawa. Kita udah minta aku besampika kita ngagai TUHAN Allah Taala kitai, lalu kita udah besemaya deka ngereja semua utai ti diasuh Iya. Aku diatu udah madahka jaku TUHAN Allah Taala kita, tang kita enda ngasika semua utai ti udah diasuh Iya sebut aku ngagai kita. Nya alai, kingatka tu: kita deka mati beperang, tauka mati keberuran, tauka mati laban penyakit, di menua ti deka digagai lalu diuan kita.” Lebuh aku udah tembu madahka semua utai ti diasuh TUHAN Allah Taala sebut aku ngagai orang mayuh, Asariah anak Hosaiah enggau Johanan anak Kareah, enggau semua orang bukai ti sumbung, lalu bejaku enggau aku, “Nuan bula. Nadai TUHAN Allah Taala kitai udah ngasuh nuan nagang kami mupuk lalu diau di menua Ejip. Nuan bejaku ngelaban kami ari sungkak Baruk anak Neriah, ngambika orang Babilon bekuasa atas kami, lalu ulih munuh kami tauka nabanka kami ngagai menua Babilon.” Nya alai, Johanan tauka bala pemesai soldadu, tauka orang mayuh, enggai ngasika jaku TUHAN ti ngasuh sida mengkang diau di menua Judah. Udah nya Johanan enggau semua pemesai soldadu mai semua orang ke agi tinggal di menua Judah, mupuk ngagai menua Ejip, sama enggau semua orang ke udah pulai ari mayuh bengkah menua ti udah alai sida ngachir diau. Bala sida nya nyengkaum sida ke lelaki, enggau indu nembiak, enggau bala anak indu raja. Sida mai semua orang ke udah diserahka tuai soldadu Nebusaradan ngagai Gedaliah, nyengkaum kami duai Baruk. Sida enda ngasika jaku TUHAN, lalu mupuk ngagai menua Ejip nyentuk ngagai nengeri Tapanes. Di Tapanes TUHAN bejaku ngagai aku, “Ambi berapa igi batu ti besai, lalu tumbakka batu nya ba jalai raya di mua penama ngagai rumah perintah di nengeri tu, lalu awakka orang Israel meda nuan ngereja pengawa nya. Udah nya padahka ngagai sida, Aku TUHAN ti Pemadu Bekuasa, ti Allah Taala ke disembah orang Israel, deka mai nembiak Aku Raja Nebukadnesar ari menua Babilon ngagai endur tu, lalu iya deka nudukka kerusi diraja iya ba atas batu tu ti udah dilamun Aku enggau tanah, lalu deka nirika langkau kain diraja iya ba atas batu enggau tanah tu. Nebukadnesar deka datai lalu ngalahka menua Ejip. Orang ke udah diukum mati laban penyakit, deka mati laban penyakit. Orang ke udah diukum nyadi orang tangkap lalu ditabanka, deka ditabanka nyadi orang tangkap, lalu orang ke endang udah diukum mati beperang, deka mati beperang. Aku deka nunu rumah sembiang bala petara orang Ejip, lalu raja menua Babilon deka nunu tauka nabanka bala petara orang Ejip. Baka pengibun bedus ke nesai kutu ari gari sida, baka nya meh raja menua Babilon deka ngerepas semua utai ari menua Ejip, lalu udah nya iya deka pulai menang ngagai menua iya empu. Iya deka ngerusak batu keramat ti di Heliopolis, di menua Ejip, lalu iya deka nunu rumah sembiang bala petara orang Ejip.” TUHAN bejaku ngagai aku pasal semua orang Israel ti diau di menua Ejip, dalam nengeri Mikdol, Tapanes, enggau Mempis, enggau di selatan menua Ejip. Ku TUHAN ti Pemadu Bekuasa, ti Allah Taala ke disembah orang Israel bejaku, “Kita empu udah meda pengerusak ti udah diasuh Aku ninggang Jerusalem enggau semua nengeri bukai di menua Judah. Indah nyentuk ngagai diatu deh semua nengeri nya agi tembawai, lalu nadai orang nguan laban orang Judah udah ngereja penyai lalu nyungkak Aku ringat. Sida udah ngenjuk piring ngagai petara bukai, lalu betuaika petara ti enda kala disembah sida tauka disembah kita, tauka disembah aki ini kita. Aku majak ngirumka bala nembiak Aku, iya nya sida nabi, ngagai kita kena nagang kita ngereja utai ti jai, ti dipegedika Aku. Tang kita enggai mending tauka enggai ibuh. Kita enggai ngelengkaka pengawa kita ke jai beberika piring ngagai petara bukai. Nya alai Aku mubuhka pengeringat enggau pemedis ati Aku ngagai semua nengeri di menua Judah, enggau ba semua jalai raya di Jerusalem, lalu Aku nunu sida. Semua nengeri nya nyadi tembawai magang, lalu orang geli meda sida, nyentuk ngagai sehari tu. “Nya alai Aku TUHAN ti Pemadu Bekuasa, ti Allah Taala ke disembah orang Israel, diatu nanyaka kebuah kita ngereja utai ti jai nya ba diri empu. Kati kita keran deka ngasuh pengerusak ninggang lelaki enggau indu, bala nembiak enggau bala anak mit datai ke sida nadai agi idup siku? Nama kebuah kita besembahka engkeramba, enggau ngenjuk piring ngagai petara bukai di menua Ejip ti alai kita ke diau, lalu nyungkak Aku ringat? Kati kita ngereja utai nya laban kita keran deka ngerusak diri empu, ngambika semua bansa di dunya tu beduan kita, lalu ngena nama kita nyadika leka jaku sumpah? Kati kita enda ingatka semua utai ti jai ti udah dikereja bala aki ini kita, bala raja orang Judah, enggau bini sida, enggau utai ti udah dikereja kita empu sereta enggau bini kita, dalam nengeri menua Judah, enggau ba sebelah jalai raya di Jerusalem? Tang nyentuk ngagai sehari tu kita apin ngemaruhka diri. Kita apin masa Aku tauka diau nitihka semua adat ti udah diberi Aku ngagai kita enggau ngagai aki ini kita. “Nya alai, Aku TUHAN ti Pemadu Bekuasa, ti Allah Taala ke disembah orang Israel, deka ngelaban kita lalu ngerusak semua menua Judah. Nyadi pasal orang Judah ti agi idup, ke keran deka mansang ngagai menua Ejip lalu diau di menua nya, Aku deka nentuka semua sida dirusak magang. Semua sida, nyengkaum sida ke besai enggau ke mit, deka mati di menua Ejip, nemuka mati beperang tauka mati keberuran. Orang deka geli meda sida. Orang deka beduan sida, lalu ngena nama sida nyadika leka jaku sumpah. Aku deka ngukum sida ke diau di menua Ejip, baka Aku ke ngukum Jerusalem ngena perang, keberuran enggau penyakit. Nadai siku orang Judah ti agi idup, ti udah mupuk lalu diau di menua Ejip, ulih ngerarika diri tauka ulih idup. Nadai siku sida deka pulai baru ngagai menua Judah, menua ti dikelengauka sida. Nadai siku sida deka pulai baru ngagai menua Judah, kelimpah ari dua tiga iku orang ke tasah.” Udah nya semua lelaki ke nemu bini diri udah ngenjuk piring ngagai petara bukai, enggau semua indu ke bediri dia, nyengkaum orang Israel ti diau di selatan menua Ejip - mayuh amat bala sida - lalu nyaut aku, “Kami enggai mendingka utai ti dipadahka nuan ngagai kami dalam nama TUHAN. Kami deka ngereja semua utai ti deka dikereja kami. Kami deka ngenjuk piring ngagai petara indu kami, iya nya Kuin Serega, lalu kami deka nuang wain nyadika piring ti diberi ngagai iya, baka ke udah dikereja kami, bala aki ini kami, raja enggau bala tuai kami, di nengeri menua Judah enggau ba sebelah jalai raya di Jerusalem. Lebuh maya nya menya kami mayuh pemakai, kaya-raja, lalu nadai penusah. Tang sekumbang kami ke udah badu agi ngenjuk piring ngagai Kuin Serega, lalu badu agi nuang wain nyadika piring ti diberi ngagai iya, kami nadai utai dikemisi, lalu bala kami udah mati beperang enggau mati keberuran.” Lalu ku sida ke indu nampung jaku sida, “Lebuh kami manggang roti ti digaga neladan gamal Kuin Serega, ngenjuk piring ngagai iya, lalu nuang wain nyadika piring ngagai iya, laki kami ngemendarka utai ti dikereja kami.” Udah nya aku bejaku ngagai semua sida ke lelaki enggau sida ke indu ke udah nyaut aku munyi nya tadi, “Nyadi pasal piring ti udah diberi kita, diberi bala aki ini kita, bala raja enggau bala tuai kita, enggau ti diberi orang ke di menua tu, ba nengeri di menua Judah enggau ba sebelah jalai raya di Jerusalem - kati kita ngumbai TUHAN enda nemu, tauka enda ingatka utai nya? Diatu menua kita udah nyadi tembawai, lalu enda diuan mensia. Orang geli meda menua kita, lalu orang ngena nama menua kita nyadika leka jaku sumpah laban TUHAN enda tan natka penyai ulah kita agi. Penusah ti besai tu ninggang kita diatu laban kita udah ngenjuk piring ngagai petara bukai, lalu bedosa ngelaban TUHAN, laban kita enda ngasika semua jaku Iya.” Tang diatu pendingka sumpah ti udah digaga Aku ti TUHAN dalam nama Aku ti bekuasa ngagai semua kita orang Israel ti diau di menua Ejip: Aku enggai sekali-kali ngemendarka kita besumpah ngena nama Aku munyi tu, ‘Aku besumpah dalam nama TUHAN ti Pemadu Tinggi ti idup!’ Aku deka nentuka kita enda kaya-raja, tang deka dirusak. Semua kita deka mati magang, nemuka mati beperang, tauka mati laban penyakit, datai ke nadai siku kita agi idup. Tang sekeda kita enda mati lalu mulaika diri ari menua Ejip ngagai menua Judah. Nya baru sida ke agi idup nya deka nemu jaku sapa ke amat, enggi Aku tauka enggi sida. Aku ti TUHAN deka meri kita siti tanda kena nunjukka Aku deka ngukum kita ba endur tu, kena ngamatka semaya Aku ti deka ngerusak kita. Aku deka nyerahka Raja Hopra menua Ejip ngagai bala munsuh iya ke keran deka munuh iya, baka Aku ti udah nyerahka Raja Sedekiah menua Judah ngagai Raja Nebukadnesar menua Babilon, ti udah nyadi munsuh iya lalu keran deka munuh iya.” Dalam taun ti keempat Jehoiakim anak Josiah nyadi raja menua Judah, dia Baruk nuliska utai ti udah disebut aku ngagai iya. Udah nya aku madahka ngagai iya pasal TUHAN Allah Taala ke disembah orang Israel ti udah nyebut, “Baruk nuan bisi nyebut, ‘Tusah amat meh aku tu! Udah ga aku pedis, agi ga TUHAN nambahka penusah ati aku. Aku nyau lembut tulang bedemuh lalu enda ulih belelak!’ “Tang Aku ti TUHAN, deka ngeruntuhka utai ti udah digaga Aku, lalu nyabut utai ti udah ditanam Aku. Aku deka ngereja nya di serata dunya. Kati nuan minta diri dikemesaika orang? Anang. Aku deka ngasuh penusah ti besai ninggang semua mensia, tang nuan semina ulih ngidupka nyawa diri aja di sebarang endur nuan bejalai. Aku ti TUHAN, udah bejaku.” TUHAN bejaku ngagai aku pasal semua bansa bukai, berengkah enggau Ejip. Tu utai ti disebut Iya pasal bala soldadu Raja Neko menua Ejip, ti udah dialahka Raja Nebukadnesar menua Babilon di Karkemis semak Sungai Eupratis dalam taun ti keempat Jehoiakim nyadi raja menua Judah: “Ku bala pemesai orang Ejip manjung, ‘Sediaka terabai kita lalu mansang beperang! Sediaka lalu tepan kuda kita! Berintai meh kita, lalu rasukka selapuk kebal kita! Ansah sangkuh kita! Rasukka baju kebal kita!’ “Tang nama utai ti dipeda aku?” ku TUHAN nanya. “Sida nikal laban takut. Bala soldadu sida alah lalu nyurutka diri. Sida takut lalu belanda enggau naka ulih lalu enda malik kebelakang. Sida ke laju belanda enda ulih ngerarika diri. Bala soldadu enda ulih ngerarika diri. Sida tesangkut lalu tetingkap di utara, ba tebing Sungai Eupratis. Sapa orang nya ke angkat baka ai pasang ba Sungai Nile, baka sungai ti bah ampuh tebing? Iya nya Ejip, ti angkat baka ai pasang ba Sungai Nile, baka sungai ti bah ampuh tebing. Ku Ejip bejaku, ‘Aku deka angkat lalu ngampuhka dunya. Aku deka ngerusak semua nengeri enggau orang ke diau dia. Asuh kuda bejalai lalu asuh kerita perang bejalai! Asuh bala soldadu mupuk, orang ari Etiopia, ari Libia, enggau orang ke landik bekenaka panah ari Lidia.’ ” Tu meh hari TUHAN Allah Taala ti Pemadu Bekuasa. Sehari tu Iya deka malas. Sehari tu Iya deka ngukum bala munsuh Iya. Pedang Iya deka makai sida datai ke kenyang, lalu ngirup darah sida datai ke puas. Sehari tu TUHAN ti Pemadu Bekuasa deka ngaga orang ke dialahka Iya di utara nyadika piring ba tebing Sungai Eupratis. Orang Ejip, mansang meh kita ngagai menua Giliat ngiga ubat! Semua ubat kita nadai guna magang. Nadai utai ulih ngeraika kita. Semua bansa udah ninga pasal pemalu kita. Semua orang udah ninga sabak kita. Soldadu tesangkut ba kaki pangan diri, lalu sida sama rebah. Lebuh Raja Nebukadnesar menua Babilon datai nyerang menua Ejip, TUHAN bejaku ngagai aku. Ku Iya, “Padahka berita tu dalam semua nengeri di menua Ejip, di Mikdol, Mempis, enggau Tapanes: ‘Besedia ngetanka diri. Semua utai ti dikemisi kita deka dirusak magang lebuh maya perang! Nama kebuah petara Apis ti bekuasa, ti disembah kita, alah? Laban TUHAN udah mantap iya!’ Bala soldadu kita udah tesangkut lalu teterap. Siku nyebut ngagai siku, ‘Jampat! Aram pulai ngagai menua ngagai bala kitai empu ngerarika diri ari pedang munsuh!’ “Beri ngagai raja menua Ejip nama ti baru tu ‘Orang Ke Ragak Ngapa Ke Selalu Muai Peluang.’ Aku TUHAN ti Pemadu Bekuasa, endang Raja. Aku tu Allah Taala ti idup. Baka Bukit Tabor ti tinggi agi ari semua bukit ti bukai enggau baka Bukit Karmel ti bediri tinggi atas tasik, baka nya meh gaya pengering orang ke nyerang kita. Sediaka diri nyadi orang tangkap, kita orang Ejip! Mempis deka nyadi menua puang, nyadi tembawai ti enda diuan mensia. Ejip baka sapi ti indu ke gemu, diserang penyengat ari utara. Indah bala soldadu ke digaji iya deh nadai daya baka anak sapi. Sida enda nan, enda ngelaban. Semua sida nguing lalu rari. Hari sida diukum udah datai, maya sida dirusak. Ejip rari, meresih munyi ular lebuh bala soldadu munsuh mansang nyerang sida. Sida nyerang iya ngena kapak, baka orang ke nebang kayu lalu ngerusak utan tebal. Bala soldadu munsuh kelalu mayuh datai ke sida nyau enda ulih diitung agi. Sida mayuh agi ari buntak. Orang menua Ejip deka dipechat. Sida alah diserang orang ke datai ari utara. Aku ti TUHAN, udah bejaku.” Ku TUHAN ti Pemadu Bekuasa, ti Allah Taala ke disembah orang Israel bejaku, “Aku deka ngukum Amon, petara orang Tebes, sama enggau Ejip enggau bala petara iya sereta enggau bala raja iya. Aku deka ngambi raja menua Ejip enggau semua orang ke manggaika pengarap sida ba iya, lalu nyerahka sida ngagai orang ke keran deka munuh sida, ngagai Raja Nebukadnesar menua Babilon enggau bala soldadu iya. Tang udah bekau nya ila, orang deka diau di menua Ejip baru, baka ke dulu kelia. Aku ti TUHAN, udah bejaku.” “Nembiak Aku, anang kita takut. Kita orang Israel, anang takut. Aku deka ngelepaska kita ari menua ti jauh, ari menua ti alai kita diau nyadi orang tangkap. Kita deka pulai baru ngagai menua diri empu lalu diau dalam pemaik. Kita deka diau likun, lalu nadai orang ulih ngenakutka kita. Aku deka datai ngagai kita lalu ngelepaska kita. Aku deka ngerusak semua bansa ti udah alai Aku ngachirka kita, tang Aku enda ngerusak kita. Aku enggai nejuka kita enda diukum, tang lebuh Aku ngukum kita, Aku deka ngukum kita ngena atur ti lurus. Aku ti TUHAN, udah bejaku.” Sebedau raja menua Ejip nyerang Gasa, TUHAN bejaku ngagai aku pasal menua Pilistin. Ku Iya: “Peda nuan! Ai mansang di utara lalu deka rarat baka bah sungai. Ai nya deka ngampuhka menua enggau semua utai di menua tu, nengeri enggau orang ke diau ditu. Mensia deka nyabak minta tulung. Semua orang di dunya tu deka bekeduie nyabak. Sida deka ninga munyi redup kaki kuda, munyi kerita perang, munyi guru kaki kerita. Apai indai enggai nikal ngambi anak sida, laban sida nyau lembut tulang. Maya udah datai alai ngerusak menua Pilistin, lalu mempang semua tulung ti agi tinggal datai ari Tire enggau Sidon. Aku ti TUHAN deka ngerusak orang Pilistin semua ke datai ari tebing pulau Krit. Orang di Gasa balat tusah ati, lalu orang Eskelon enda bemunyi. Ni pengelama orang Pilistin ti bukai deka ngulit? Ku kita ngangau, ‘Pedang TUHAN! Ni pengelama baru nuan deka badu agi bemunyi? Pulai meh nuan baru ngagai sarang nuan, belelak lalu diau jenuh!’ Tang pedang nya enda ulih belelak, laban Aku udah meri iya pengawa. Aku udah ngasuh iya nyerang Askelon lalu nyerang orang ke diau ba tebing tasik.” Tu utai ti disebut TUHAN pasal Moap: “Tulah meh orang Nebo laban nengeri sida udah dirusak! Nengeri Kiriataim udah alah, kuta iya ti kukuh udah runtuh, lalu orang ke diau dia dipechat. Mulia Moap nyau abis. Munsuh udah ngalahka Hesbon lalu bekira deka ngerusak bansa Moap. Nengeri Madmen deka badu agi bemunyi. Mayuh bengkah bala soldadu deka datai nyerang iya. Orang di Horonaim ngangau, ‘Penusah! Pengerusak!’ “Moap udah dirusak. Pendingka sida ke mit nyabak. Dinga munyi sida bekeduie nyabak sepemanjai jalai niki ngagai Luhit, munyi sabak orang ke tusah ati di rantau jalai nurun ngagai Horonaim. ‘Rari kita ngidupka nyawa diri!’ ku sida bejaku. ‘Belanda meh kita baka keledai kampung di menua puang!’ “Moap, nuan udah ngarapka pengering enggau pengaya nuan, tang diatu indah nuan empu deh deka alah. Petara nuan Kemos deka dibuai ngagai menua bukai, sama enggau bala anak iya enggau bala imam iya. Nadai nengeri ti enda dirusak. Lebak enggau emperan deka dirusak. Aku ti TUHAN udah bejaku. Dirika batu kena ngelai kubur Moap, laban Moap deka dirusak enda lama da agi. Semua nengeri iya deka nyadi tembawai magang, lalu nadai orang nguan.” ( Tulah meh orang ke enda ngereja pengawa TUHAN enggau pengabis ati sida! Tulah meh orang ke enda mantap, enda munuh!) Ku TUHAN bejaku, “Moap endang seruran diau dalam pemaik, lalu iya nadai kala dibuai ngagai menua bukai. Moap nyau baka wain ti ditejuka ngereman enda dikeruga, lalu nadai kala dituang ari benda sigi ngagai benda sigi. Iya endang enda kala kabau, lalu iya endang nyamai asai baka selama. “Nya alai diatu, maya deka datai alai Aku deka ngasuh orang nuang Moap baka wain. Sida deka nuang semua wain ari benda, lalu mechahka benda nya. Udah nya orang Moap deka asa ngapa arapka petara Kemos ti disembah sida, baka orang Israel ke asa ngapa arapka Betel, petara ti dikarapka sida. “Kita ti lelaki di menua Moap, nama kebuah kita ngumbai diri bujang berani, soldadu ti berani, ti udah diuji lebuh beperang? Menua Moap enggau semua nengeri di menua nya deka dirusak. Sida lelaki ke agi biak sereta tegap gamal, udah dibunuh. Aku tu meh Raja, TUHAN ti Pemadu Bekuasa, lalu Aku udah bejaku. Menua Moap deka diukum. Iya deka dirusak enda lama da agi. “Ngulitka bansa Moap meh kita ke pangan iya, semua kita ke nemu penampak nama iya. Sebut, ‘Iya nadai agi bekuasa. Mulia enggau kuasa iya udah abis.’ Kita ti diau di Dibon, nurun meh kita ari penuduk kita ke tinggi lalu duduk ba tanah ti rangkai. Iya ke ngerusak Moap bisi ditu lalu udah ngaga kuta di Moap nyadi tembawai. Kita ti diau di Aroer, bediri meh kita ba tisi jalai, lalu nganti. Tanya bala sida ke rari, tanyaka ngagai sida utai ti udah nyadi. Lalu sida deka nyaut, ‘Moap udah alah. Nyabak meh kita ke iya. Iya udah dipechat. Padahka di sepemanjai Sungai Arnon pasal Moap ti udah dirusak!’ “Semua nengeri ba emperan ti tinggi ba atas bukit udah diukum magang: Holon, Jasah, Mepat, Dibon, Nebo, Bet Diplataim, Kiriataim, Betgamul, Betmeon, Keriot, enggau Bosrah. Semua nengeri menua Moap, ti jauh enggau ti semak, udah diukum magang. Pengering Moap udah abis. Kuasa iya udah dirusak. Aku ti TUHAN udah bejaku.” Ku TUHAN bejaku, “Tumi Moap datai ke mabuk, laban iya udah angkat ngelaban Aku. Moap deka maringka diri ba mutah iya empu, lalu orang deka ketawa. Moap, kati nuan ingatka diri ti udah ngeleseka orang Israel? Nuan udah ngaga sida baka orang ke udah kena tangkap sama enggau bala penchuri. “Kita ti diau di Moap, tinggalka nengeri kita! Mupuk meh kita lalu diau ba tingkah batu! Awakka kita baka burung achang ti begagaka sarang ba tebiang tisi darung. Moap sumbung amat! Aku udah ninga pasal penyumbung, enggau peninggi ati sida, pasal sida ke balat muji diri. Aku ti TUHAN nemu penyumbung sida. Sida temegah ngapa, lalu utai ti dikereja sida enda ulih tan lama. Nya alai Aku deka nyabakka semua orang ke diau di Moap, enggau ke orang ke diau di Kir-heseret. Aku deka nyabakka orang ke diau di Sipmah, lebih balat agi ari Aku ke nyabakka orang ke diau di Jaser. Nengeri Sipmah, nuan tu baka dan anggur ti nyuntai meraka Tasik Mati nyentuk ngagai Jaser. Tang diatu buah nuan, enggau buah anggur nuan udah dirusak. Pengelantang enggau pengaga udah dirampas ari menua Moap ti ami. Aku udah ngasuh wain badu agi pansut ari pitan anggur. Nadai agi orang ngaga wain lalu manjung gaga ati. “Orang di Hesbon enggau Elealeh ngangau, lalu kangau sida ulih didinga di Jahas. Kangau sida ulih didinga orang di Soar, lalu kangau nya mega ulih didinga di Horonaim enggau Eklat Selisiyah. Indah Sungai Nimrin deh udah rangkai. Aku deka nagang orang Moap ngaga piring tunu ba endur alai sida ke besembah, sereta nagang sida ngenjuk piring ngagai bala petara sida. Aku ti TUHAN udah bejaku. “Nya alai Aku ngulitka Moap, enggau ke orang ke diau di Kir-heseret, baka orang ke nyepu kesuling lebuh nganjung orang mati, laban semua reta tengkira sida udah abis magang. Semua sida udah ngukur pala lalu ngempat ragum sida. Semua sida udah ngurik jari sida, lalu begari ngena kain guni. Ba semua perabung rumah di Moap, enggau ba semua padang ti ba nengeri, nyau nadai utai bukai tang bala orang ke ngulit, laban Aku udah mechahka Moap baka benda ti enda diguna. Moap udah pechah! Nyabak meh kita! Moap udah dipechat. Iya udah nyadi tembawai, lalu semua bansa ti ngelingi iya, ngeleseka iya magang. Aku ti TUHAN udah bejaku.” TUHAN udah madahka siti bansa deka nyambarka Moap baka menaul ti terebai, lalu nengeri enggau kuta di menua Moap deka alah. Lebuh maya nya ila bala soldadu Moap deka takut baka indu ke radai deka beranak. Moap deka dirusak, lalu bansa nya abis, laban iya udah angkat ngelaban Aku. Utai ti balat ngenakut, lubang kebung, enggau panjuk deka ngipa orang Moap. TUHAN udah bejaku. Barang sapa nguji ngerarika diri ari utai ti balat ngenakut, deka labuh ngagai lubang kebung, lalu barang sapa mansutka diri ari lubang kebung, deka kena sintak panjuk, laban TUHAN udah netapka maya Moap deka dirusak. Orang ke tasah, ti nadai daya agi, nguji ngiga pengelikun di Hesbon, nengeri ti udah diperintah Raja Sihon dulu menya, tang nengeri nya retung diempa api. Api udah nganguska garis entara menua, enggau tuchung bukit di Moap, menua orang ke rindu beperang. Tulah meh nuan Moap! Orang ke nyembah Kemos, udah dirusak, lalu bala anak lelaki enggau anak indu sida udah ditabanka nyadi orang tangkap. Tang jemah ila, TUHAN deka ngasuh Moap nyadi kaya-raja baru. Nya meh utai ti deka dikereja TUHAN ngagai Moap. Tu utai ti disebut TUHAN pasal Amon: “Dini alai bala lelaki orang Israel? Kati orang nadai ngetanka menua sida? Nama kebuah sida nejuka orang ke nyembah Molek ngerampas menua raban bansa Gat lalu ngentapka diri dia? Tang maya deka datai alai Aku deka ngasuh orang ke diau dalam indu nengeri menua Rabah ninga munyi orang ke beperang, lalu nengeri nya deka nyadi tembawai, lalu genturung pendiau di menua nya ditunu retung. Nya baru Israel deka ngambi menua sida pulai baru ari jari orang ke udah ngerampas menua sida. Kita orang Hesbon, nyabak meh kita! Nengeri Ai udah dirusak! Kita indu ke di Rabah, ngulit meh kita! Rasukka kain guni lalu ngulit. Belanda meh kita kia-kia charut runding. Petara kita ke benama Molek deka ditabanka ngagai menua bukai, sama enggau bala imam enggau bala anak raja iya. Kita ti enda tetap ati! Nama kebuah kita temegah ngapa? Kita nadai pengering agi. Nama kebuah kita manggaika pengarap kita ba kuasa kita empu, lalu madahka orang nadai berani nyerang kita? Aku deka ngasuh kita dituntung utai ti balat ngenakut. Semua kita deka rari. Genap iku kita deka rari ngidupka nyawa diri, lalu nadai orang ngempung bala soldadu kita baru. “Tang jemah ila Aku deka ngasuh Amon nyadi kaya-raja baru. Aku ti TUHAN udah bejaku.” Tu utai ti disebut TUHAN ti Pemadu Bekuasa pasal Edom: “Kati orang Edom enda nemu berunding agi? Kati bala penyanding penemu sida enda agi nemu madahka utai ti patut dikereja sida? Kati sida nadai agi penemu-dalam? Kita orang Dedan, nguing lalu rari meh kita! Belalai meh kita! Aku deka ngerusak peturun Esau laban maya udah datai alai Aku patut ngukum sida. Lebuh orang ngumpul buah anggur, sida ninggalka dua tiga leka ba batang anggur, lalu lebuh bala perumpak datai malam hari, sida mai semina utai ti dikedekaka sida. Tang Aku udah ngambi semua utai ari peturun Esau, lalu ngebakka endur alai sida belalai, ngambika sida enda ulih belalai agi. Semua orang Edom dirusak magang. Nadai siku sida agi idup. Tinggalka anak patu kita ba Aku, laban Aku deka ngidupka sida; lalu lakka sida indu ke balu manggaika pengarap sida ba Aku. Laban ku TUHAN bejaku: “Enti sema orang ke enda patut ngirup ari mangkuk ukum nya, diasuh ngirup ari mangkuk nya, kati kita ngumbai diri enda diukum? Enda. Kita enda tau enda diukum, lalu ngirup ari mangkuk nya! Aku Empu udah besumpah madahka nengeri Bosrah deka ngasuh orang geli, lalu nyadi menua puang. Orang deka beduan iya, lalu ngena nama iya nyadika leka jaku sumpah. Semua genturung pendiau ti semak nya deka nyadi tembawai belama iya. Aku ti TUHAN udah bejaku.” Ku aku bejaku, “Edom, aku bisi udah nerima pesan ari TUHAN. Iya udah ngirumka siku seruan ngasuh semua bansa ngempuruka bala soldadu sida, lalu besedia nyerang nuan. TUHAN deka ngasuh nuan lemi, lalu nadai orang deka bebasaka nuan. Penyumbung nuan udah nipu nuan empu. Nadai orang takutka nuan munyi ti disangka nuan. Nuan diau ba tingkah batu, ba tuchung bukit ti tinggi. Tang taja pen nuan diau ba endur ti tinggi baka burung menaul, TUHAN deka narit nuan ke baruh. TUHAN udah bejaku.” Ku TUHAN bejaku, “Pengerusak ti deka ninggang Edom amat balat, datai ke semua orang ke mansa deka temati-kutu sereta takut. Utai ti deka nyadi ba Edom nya sebaka enggau utai ti udah nyadi ba Sodom, enggau Gomorah lebuh nengeri dua buah nya enggau semua nengeri ti mit semak nya dia, dirusak. Nadai orang deka diau dia agi. Aku ti TUHAN udah bejaku. Baka singa ti pansut ari babas ti repa ngimbai Sungai Jordan lalu mansang ngagai padang rumput ti galak, baka nya meh Aku deka datai lalu ngasuh orang Edom rari tekala nya ari menua sida. Nya baru tuai bansa ke dipilih Aku deka megai perintah di menua nya. Sapa ulih dibandingka enggau Aku? Sapa berani nyakap Aku? Ni raja ke ulih ngelaban Aku? Nya alai pendingka pelan ti udah digaga Aku kena Aku ngelaban orang Edom, enggau utai ti deka dikereja Aku ngagai orang ke diau di nengeri Teman. Indah bala anak mit sida deh deka diirit kebukai, lalu semua orang deka geli meda nya. Lebuh Edom alah, utai deka bemunyi inggar, datai ke semua dunya berenyang, lalu munyi sabak orang ke takut ulih didinga ari Teluk Akaba. Munsuh deka nyerang Bosrah baka menaul ti nyambar. Lebuh maya nya ila bala soldadu menua Edom deka takut baka indu ke radai deka beranak.” Tu jaku TUHAN pasal Damaskus: “Orang di nengeri Hamat enggau Arpat irau sereta tusah ati laban sida udah ninga berita ti enda manah. Ati ti balat irau nyau ngalun baka gelumbang ti di tasik. Orang Damaskus nyau lemi, nguing deka rari, lalu begau abis ati. Sida natka pemedis enggau pemerinsa baka indu ke radai deka beranak. Nengeri ti tebilang sereta selalu lantang nya nadai agi diuan mensia. Ba hari nya sida ke bujang di nengeri nya deka dibunuh ba jalai raya di nengeri nya empu, lalu semua bala soldadu nengeri nya deka dibunuh magang. Aku deka nyelup dinding kuta Damaskus, lalu nunu istana Raja Benhadat. Aku TUHAN ti Pemadu Bekuasa udah bejaku.” Tu utai ti disebut TUHAN pasal raban bansa Kedar enggau pasal semua pelilih menua ti dipegai Hasor, ti udah alah laban Raja Nebukadnesar menua Babilon: “Serang orang ke diau di Kedar, lalu rusak raban bansa orang ke diau di timur! Rampas langkau kain, jelu tupi, tirai langkau kain, enggau semua utai dalam langkau kain sida. Ambi jelu unta sida, lalu padahka ngagai orang mayuh, ‘Utai ti balat ngenakut bisi ngelingi kita!’ “Kita orang Hasor, Aku ti TUHAN meri kita jaku tangkan ngasuh kita rari lalu belalai, laban Raja Nebukadnesar menua Babilon udah bepekat deka ngelaban kita, lalu tu utai ti disebut iya, ‘Aram kitai nyerang orang nya ke ngumbai diri likun nadai utai ngawa! Nengeri sida nadai pintu tauka kunchi, sereta nadai orang nyaga.’ “Rampas jelu unta sida enggau semua jelu tupi sida! Aku deka ngachirka semua orang ke netak buk diri pandak, ngagai semua endur, lalu Aku deka ngasuh penusah ti besai ninggang sida. Hasor deka nyadi menua puang belama iya, nyadi endur alai semina pasun aja diau. Nadai orang deka diau dia agi. Aku ti TUHAN udah bejaku.” Lebuh Sedekiah baru belabuh nyadi raja menua Judah, TUHAN ti Pemadu Bekuasa bejaku ngagai aku pasal menua Elam. Ku Iya, “Aku deka munuh semua orang ke landik ngena panah, ti udah ngasuh menua Elam kering. Aku deka ngasuh ribut muput ari semua endur lalu mangka ngagai Elam, lalu Aku deka ngachirka orang ari nengeri nya ngagai semua endur, ngambika sida tasah ngagai semua menua. Aku deka ngasuh orang Elam takutka munsuh ti deka munuh sida. Ulih pengeringat Aku, Aku deka ngerusak orang Elam, lalu ngasuh mayuh bala soldadu ngelaban sida, datai ke Aku udah ngeluska sida. Aku deka ngerusak bala raja enggau bala tuai sida, lalu nudukka kerusi diraja Aku dia. Tang udah bekau nya ila Aku deka ngasuh Elam nyadi kaya-raja baru. Aku ti TUHAN udah bejaku.” Tu pesan ti diberi TUHAN ngagai aku pasal nengeri Babilon, enggau pasal orang ke diau dalam nengeri nya: “Tusui berita tu ngagai semua bansa! Padahka berita tu! Tuatka menira, lalu padahka berita tu! Anang ngelalaika berita tu! Babilon udah alah! Petara iya ke benama Maduk udah pechah! Bala engkeramba Babilon udah dipechat. Anak patung iya ti jai, udah redak! “Siti bansa ari utara udah datai nyerang menua Babilon, lalu ngaga menua nya nyadi menua puang. Mensia enggau jelu deka rari, lalu nadai orang deka diau dia agi.” Ku TUHAN bejaku, “Lebuh maya nya ila, orang Israel enggau orang Judah deka datai enggau sabak, ngiga Aku ti Allah Taala sida. Sida deka nanyaka jalai ngagai Sion, lalu mupuk ngagai endur nya. Sida deka ngaga siti sempekat ti meruan belama iya enggau Aku, lalu sida enda ngelanggar sempekat nya. “Bala nembiak Aku baka bedus ti udah ditejuka pengibun tesat ba sebelah bukit. Sida udah bejalai segau-segau ari bukit sigi ngagai bukit sigi, lalu sida enda ingatka endur alai rumah diri. Sida diserang semua orang ke tetemuka sida. Ku bala munsuh sida bejaku, ‘Sida udah bedosa ngelaban TUHAN, nya alai utai ti udah dikereja kitai enda salah. Aki ini sida udah manggaika pengarap sida ba TUHAN, lalu sida empu patut mengkang tetap ati ngagai Iya.’ “Orang Israel, rari meh kita ari orang Babilon! Angkat meh kita ari menua nya! Awakka kita nyadi orang ke terubah-rubah angkat ari nya. Aku deka nyungkak berapa buah bansa ti kering di utara nyerang menua Babilon. Sida deka berintai nyerang lalu ngalahka menua nya. Sida nya orang ke landik ngasu, nimbakka laja ti nadai kala salah. Utai di menua Babilon deka dirampas, lalu semua orang ke ngerampas utai ari menua nya deka puas ati. Aku ti TUHAN udah bejaku.” Ku TUHAN bejaku, “Orang Babilon, kita udah ngerumpak bansa Aku. Kita lantang ati sereta gaga, bejalai kia-kia baka sapi ti ngindik gandum, baka kuda ti inggar bemunyi, tang nengeri nuan empu ti besai tu deka dikemaruhka lalu dipechat. Babilon deka nyadi bansa ti pemadu mit. Iya deka nyadi menua puang ti rangkai nadai ai. Ketegal pengeringat Aku, nadai orang deka diau di Babilon. Nengeri nya deka nyadi tembawai, lalu semua orang ke mansa deka temati-kutu sereta alit ati. “Kita ti landik ngena panah, berintai meh kita ngelaban Babilon lalu kelulung iya. Timbakka semua laja kita ngagai Babilon, laban iya udah bedosa ngelaban Aku ti TUHAN. Manjung meh kita ngelingi nengeri nya! Diatu Babilon udah nyerahka diri. Dinding kuta iya udah kebus lalu runtuh. Aku diatu malas orang Babilon. Nya alai balas meh sida, lalu kereja ngagai sida baka ke udah dikereja sida ngagai orang bukai. Anang nejuka benih ditanam di menua nya, lalu anang nejuka utai diketau. Semua orang kampar ti diau dia deka takutka bala soldadu ti nyerang, lalu deka pulai baru ngagai menua sida empu.” Ku TUHAN bejaku, “Orang Israel baka bedus, digagai raban singa lalu pambar pendiau. Keterubah iya, sida diserang raja menua Asiria, lalu udah nya Raja Nebukadnesar ari menua Babilon ngerit tulang sida. Ketegal nya, Aku TUHAN ti Pemadu Bekuasa, ti Allah Taala ke disembah orang Israel, deka ngukum Raja Nebukadnesar enggau menua iya, baka Aku ti udah ngukum raja menua Asiria. Aku deka mai orang Israel pulai baru ngagai menua sida empu. Sida deka makai asil ari Bukit Karmel, enggau ari kandang menua Basan, lalu sida deka makai enggau sepeneka ati sida utai tanam ti tumbuh di menua Epraim enggau di menua Giliat. Lebuh maya nya ila, dosa nadai ditemu di menua Israel, lalu penyai nadai ditemu di menua Judah, laban Aku deka ngampun orang ke diasuh Aku idup. Aku ti TUHAN udah bejaku.” Ku TUHAN bejaku, “Serang orang ke diau di Merataim enggau orang ke diau di Pekot. Bunuh lalu rusak sida. Kereja semua utai ti diasuh Aku. Aku ti TUHAN udah bejaku. Munyi orang ke beperang bisi didinga di menua nya, lalu pengerusak balat amat nyadi. Babilon udah ngeredakka semua dunya ngena tukul, tang diatu tukul nya udah patah! Semua bansa tekenyit ati magang meda gaya utai ti udah nyadi di menua nya. Babilon, nuan udah ngelaban Aku, tang nuan udah disintak panjuk ti ditan Aku kena Aku nangkap nuan, taja pen nuan enda nemu nya. Aku udah muka endur alai Aku ke nyimpan senyata Aku, lalu enggau ati ti pedis Aku ngambi senyata nya pansut, laban Aku TUHAN ti Pemadu Bekuasa, bisi pengawa ti deka dikereja Aku di menua Babilon. Kelulung lalu serang menua nya, lalu pechahka tibang gandum iya! Tugungka perapasan baka ke nugungka gandum! Rusak menua nya! Rusak magang semua utai di menua nya! Bunuh semua soldadu sida! Kelar sida! Orang Babilon nadai penyadi agi! Tulah meh sida, laban maya udah datai alai sida deka diukum!” ( Orang ke tasah ngerarika diri ari menua Babilon lalu datai di Jerusalem, lalu sida nusui pasal jalai TUHAN Allah Taala kitai malas orang Babilon ketegal utai ti udah dikereja sida ngagai Rumah Sembiang.) “Asuh bala orang ke nemu ngena panah nyerang Babilon. Asuh semua orang ke nemu ngena panah enggau laja nyerang. Kelulung nengeri nya lalu anang nejuka orang ngerarika diri ari nengeri nya. Balas nengeri nya ngena penyai ti udah dikereja iya ngagai orang, lalu kereja ngagai iya baka ke udah dikereja iya ngagai orang, laban Babilon udah sumbung ngelaban Aku ti Kudus, ti Allah Taala ke disembah orang Israel. Nya alai sida ke bujang di nengeri Babilon deka dibunuh ba sebelah jalai raya di nengeri nya, lalu semua soldadu iya deka dibunuh ba hari nya. Aku ti TUHAN udah bejaku. “Babilon, nuan sumbung. Nya kebuah Aku, TUHAN ti Pemadu Bekuasa, ngelaban nuan! Maya udah datai alai Aku ngukum nuan. Bansa nuan ti sumbung deka tesangkut lalu tetingkap, lalu nadai orang deka ngangkatka nuan. Aku deka nunu semua nengeri nuan, lalu semua utai ti ngelingi nengeri nya deka dirusak magang.” Ku TUHAN ti Pemadu Bekuasa bejaku, “Orang Israel enggau orang Judah ditekanka munsuh. Semua orang ke nangkap sida, nyaga sida lalu enggai ngelepaska sida. Tang Iya ti deka ngelepaska sida nya kering. Nama Iya TUHAN ti Pemadu Bekuasa. Iya Empu deka nyaga sida, lalu mai pemaik ngagai dunya, tang deka mai penusah ngagai orang Babilon.” Ku TUHAN bejaku, “Bunuh Babilon! Bunuh orang ke diau dalam iya, bala pemerintah iya enggau orang ke bepenemu-dalam. Bunuh bala nabi iya ti bula! Sida nya endang amat beli! Bunuh bala soldadu iya! Naka meh pemalat sida takut! Rusak semua kuda enggau kerita perang iya! Bunuh semua soldadu ke digaji iya! Naka meh pengelemi sida nya! Rusak semua reta tengkira iya. Rumpak lalu rampas. Awakka kemarau nyadi di menua nya lalu ngerangkaika semua sungai. Babilon nya menua ti mayuh engkeramba, ti udah ngemelika orang mayuh. “Nya alai Babilon deka diuan bala antu enggau roh ti jai, enggau burung ti enda tuchi. Menua nya enda agi diuan mensia, datai ke belama iya. Utai ti deka nyadi di Babilon nya sebaka enggau utai ti udah nyadi di Sodom enggau Gomorah, lebuh Aku ngerusak nengeri dua buah nya enggau semua nengeri ti mit semak nya dia. Nadai orang deka diau dia agi. Aku ti TUHAN udah bejaku. “Orang datai ari sebuah menua ti di utara, bansa ti kering di menua ti jauh. Mayuh raja sedia deka beperang. Sida udah ngambi panah enggau pedang. Sida nya mangah lalu nadai nemu kasihka orang. Sida munyi segum pangka gelumbang, lebuh sida nepan kuda sida. Sida sedia deka beperang ngelaban Babilon. Raja menua Babilon ninga berita nya lalu lembut tulang. Ati iya balat tusah, lalu ngasaika diri pedis baka indu ke radai deka beranak. “Baka singa ti pansut ari babas ti repa ba tebing Sungai Jordan lalu mansang ngagai padang rumput ti galak, baka nya meh Aku ti TUHAN deka datai, lalu orang Babilon deka rari tekala nya ari nengeri sida. Nya baru tuai bansa ke dipilih Aku deka megai perintah di menua nya. Sapa ulih dibandingka enggau Aku? Sapa berani nyakap Aku? Ni raja ke ulih ngelaban Aku? Nya alai pendingka pelan ti udah digaga Aku kena Aku ngelaban nengeri Babilon, enggau utai ti deka dikereja Aku ngagai orang ke diau di nengeri nya. Indah bala anak sida deh deka diirit, lalu semua orang deka takut. Penginggar munyi Babilon alah deka ngasuh tanah berenyang di serata dunya, lalu munyi orang ke nyabak takut deka didinga bansa bukai.” Ku TUHAN bejaku, “Aku deka ngasuh ribut pengerusak datai ngelaban menua Babilon enggau orang ke diau dia. Aku deka ngasuh orang kampar ngerusak menua Babilon baka ribut ti ngebuka rumput ti rangkai. Lebuh hari pengerusak nya datai, sida deka ngelulung lalu nyerang, lalu ngabiska semua utai di menua nya. Anang meri bala soldadu iya peluang nimbakka panah tauka ngerasukka baju kebal sida. Anang ngalau sida ke bujang! Bunuh semua bala soldadu sida! Sida deka bakal lalu mati ba sebelah jalai raya di semua nengeri sida. Aku TUHAN ti Pemadu Bekuasa, sigi enda ninggalka Israel enggau Judah, taja pen sida udah bedosa ngelaban Aku Allah Taala ke disembah orang Israel ti kudus. Rari meh kita ari menua Babilon! Rari ngidupka nyawa diri! Anang nejuka diri dibunuh ketegal dosa menua Babilon. Aku diatu malas lalu ngukum menua Babilon laban iya endang patut diukum. Menua Babilon nya baka mangkuk emas ba jari Aku, ti ngasuh semua dunya mabuk. Semua bansa bela ngirup wain iya, lalu gila. Menua Babilon udah ngenyit alah, lalu dirusak! Ngulit meh kita ke iya! Ambi meh ubat kena ngubat bakal iya, nyangka iya ulih digeraika. Ku orang kampar ti diau dia bejaku, ‘Kami udah nguji nulung menua Babilon, tang udah kelalu laun. Aram kitai angkat ari tu lalu pulai ngagai menua kitai empu. Enggau pengabis pengering Iya, Allah Taala udah ngukum menua Babilon, lalu udah ngerusak iya.’ ” Ku TUHAN bejaku, “Bala nembiak Aku manjung, ‘ TUHAN udah nunjukka kitai tu endang amat ngena. Aram kitai mansang lalu madahka ngagai orang di Jerusalem pasal utai ti udah dikereja TUHAN Allah Taala kitai.’ ” TUHAN udah nyungkak bala raja di menua Media, laban Iya deka ngerusak menua Babilon. Nya meh jalai Iya deka bebalaska Rumah Sembiang ti udah dirusak. Ku bala pemesai soldadu bejaku, “Ansah laja kita! Sediaka terabai kita! Tuatka menira kena ngepunka serang ngelaban dinding kuta nengeri Babilon. Tambahka pemayuh tubuh jejaga! Asuh orang nyaga nengeri! Asuh bala soldadu ngeramka ipa!” TUHAN udah ngereja utai munyi ti deka dikereja Iya ngagai orang Babilon. Menua nya mayuh sungai, sereta kaya reta tengkira, tang timpuh iya udah abis, lalu tali seput iya udah putus. TUHAN ti Pemadu Bekuasa udah besumpah atas nama Iya Empu, madahka Diri deka ngasuh mayuh orang nyerang menua Babilon baka bala buntak, lalu sida deka manjung menang. TUHAN ngaga dunya ngena kuasa Iya. Ulih penemu-dalam Iya, Iya ngaga dunya lalu mintarka langit. Lebuh TUHAN bejaku, ai ti di langit besegum. TUHAN mai mua hari ari tisi dunya. Iya ngasuh kilat nyelar lebuh hari ujan lalu ngirumka ribut ari bilik setor Iya. Lebuh orang meda nya, nya baru sida nemu diri beli sereta enda nemu utai. Sida ke begagaka engkeramba deka asa ngapa laban bala petara ti digaga sida nya utai ti pelesu sereta enda nemu enseput. Petara sida nya nadai guna, lalu patut dipechat. Sida deka dirusak lebuh TUHAN datai ngukum sida. Tang Allah Taala Jakop enda baka sida petara nya, laban Iya Empu ke nempa semua utai, lalu Iya udah milih Israel nyadika nembiak Iya. Nama Iya TUHAN ti Pemadu Bekuasa. Ku TUHAN bejaku, “Menua Babilon, nuan tu tukul Aku, senyata ti dikena Aku beperang. Aku udah ngena nuan ngeredakka mayuh bengkah bansa enggau perintah, ngeredakka kuda enggau orang ke nepan sida, ngeredakka kerita perang enggau orang ke ngemudika sida, munuh lelaki enggau indu, munuh sida ke tuai enggau ke biak, munuh nembiak ti lelaki enggau ti indu, munuh pengibun bedus enggau raban bedus sida, munuh orang bumai enggau kuda ti dikena sida ngeradu tanah, ngalahka bala pemerintah enggau pemesai ti tinggi pangkat.” Ku TUHAN bejaku, “Kita deka meda Aku malas menua Babilon enggau malas orang ke diau dalam iya ketegal semua penyai ti udah dikereja sida ngagai Jerusalem. Menua Babilon, nuan tu baka bukit ti ngerusak semua dunya, tang Aku ti TUHAN tu munsuh nuan. Aku deka nangkap nuan, ngeruntuhka nuan, lalu nunu nuan nyadi amau. Batu ari tembawai nuan nadai agi dikena baru begagaka rumah. Nuan deka nyadi menua puang belama iya. Aku ti TUHAN udah bejaku. “Tuatka menira kena nesau orang mansang beperang! Sepu terumpit ngambika semua bansa ulih ninga! Sediaka semua bansa nyerang menua Babilon! Asuh perintah menua Ararat, Mini, enggau Askenas nyerang. Pilih siku pemesai nguluka bala nyerang. Bai kuda datai ke sida nyau ngemayuh bala buntak. Sediaka semua bansa nyerang menua Babilon. Pesanka bala raja ari Media, bala tuai enggau bala pemesai sida, enggau bala soldadu ari semua menua ti dipegai sida. Tanah begetar sereta berenyang laban TUHAN agi benung bejalaika pelan Iya ti deka ngaga menua Babilon nyadi menua puang, lalu enda agi diuan mensia. Bala soldadu menua Babilon udah badu ngelaban, lalu mengkang dalam kuta sida. Sida nyau takut sereta nadai daya agi. Pintu nengeri udah runtuh, lalu rumah di nengeri nya nyau diempa api. Bala seruan nyau betangkan-tangkan belanda ngagai raja menua Babilon madahka nengeri iya udah dipasuk munsuh. Munsuh udah ngalahka pemeraka ba sungai, lalu udah nyelup kuta ngena api. Bala soldadu menua Babilon udah begau abis ati. Enda lama da agi, munsuh deka mantap lalu ngindik sida baka ke nungku gandum. Aku TUHAN ti Pemadu Bekuasa, ti Allah Taala ke disembah orang Israel, udah bejaku.” Raja menua Babilon udah mepat Jerusalem lalu makai iya. Iya udah ngambi semua utai ari nengeri nya baka ke nuang benda. Baka jelu ti besai, iya nelan nengeri nya. Iya udah nabanka utai ti dikedekaka iya lalu muai semua utai bukai. Awakka orang Sion nyebut: “Awakka menua Babilon betanggungjawapka pemalat sida udah kasar enggau kitai!” Awakka orang Jerusalem nyebut, “Awakka menua Babilon betanggungjawapka semua pemerinsa ti udah ditatka kitai!” Nya alai ku TUHAN bejaku ngagai orang Jerusalem, “Aku deka nyaga kita, lalu deka mejalka bala munsuh kita mayar utai ti udah dikereja sida ngagai kita. Aku deka ngerangkaika penatai ai di menua Babilon, lalu ngasuh sungai dia rangkai. Menua nya deka nyadi tembawai alai jelu babas diau. Orang deka geli meda iya. Nadai orang deka diau dia, lalu semua orang ke meda iya deka takut magang. Bansa orang Babilon bemunyi nginggar singa ti negung, lalu ngengar munyi anak singa. Kati sida bam? Aku deka nyendiaka pengerami makai besai ke sida, lalu numi sida mabuk sereta rami. Sida deka tinduk lalu enda dani agi. Aku deka mai sida ngagai endur alai sida deka disayat, baka anak domba, kambin, enggau bedus ti lelaki. Aku ti TUHAN udah bejaku.” Ku TUHAN bejakuka pasal Babilon: “Nengeri ti dipuji semua dunya, diatu udah alah! Naka meh penyai gaya Babilon ba mata bansa bukai! Tasik udah ngampuhka Babilon lalu ngelamun iya ngena gelumbang ti besegum. Semua nengeri nya jai amat dipeda, baka menua puang ti nadai ai, ti enda diuan tauka ditengah mensia. Aku deka ngukum Bel, petara menua Babilon, lalu ngasuh iya nyerahka semua barang ti udah dichuri iya. Semua bansa enggai agi nyembah iya. “Dinding nengeri Babilon udah runtuh. Orang Israel! Rari meh kita ari nengeri nya! Rari ngidupka nyawa diri ari pengeringat Aku ti balat. Anang lemi semengat tauka takut ketegal berita ti selebubu ngapa. Tiap taun orang nusui mayuh bengkah berita ti selebubu ngapa, pasal pengachau ti nyadi di menua nya, enggau pasal raja ke nyerang pangan diri. Nya alai maya deka datai alai Aku deka ngukum bala engkeramba menua Babilon. Semua menua nya deka dipechat, lalu semua orang ke diau di menua nya deka dibunuh magang. Semua utai di dunya enggau di langit deka manjung gaga ati lebuh Babilon alah laban orang ke datai ari utara deka ngerusak iya. Menua Babilon udah ngasuh orang mayuh dibunuh di serata dunya, lalu diatu menua Babilon empu deka alah laban iya udah ngasuh mayuh amat orang Israel dibunuh. Aku ti TUHAN udah bejaku.” Ku TUHAN bejaku ngagai nembiak Iya di Babilon: “Kita udah ulih ngidupka nyawa diri! Nya alai mupuk meh kita diatu! Anang ngerindang diri agi! Taja pen kita jauh ari menua kita empu, kingatka Aku ti TUHAN kita, lalu kingatka Jerusalem. Ku kita, “Kami udah dipechat lalu kami malu. Kami ngasaika diri nadai daya agi laban orang kampar udah tama ngagai endur ti kudus dalam Rumah Sembiang.’ Nya alai, Aku madahka ngagai kita, maya deka datai alai Aku deka ngukum engkeramba menua Babilon, lalu orang ke bakal deka bedemuh di serata menua nya. Enti sema Babilon ulih niki ke langit lalu ngaga kuta ti tegap din, agi meh Aku deka ngirumka orang ngerusak iya. Aku ti TUHAN udah bejaku.” Ku TUHAN bejaku, “Dinga munyi sabak orang di Babilon, munyi orang ke ngulit ketegal rusak menua. Aku ngerusak Babilon ngambika iya enda bemunyi agi. Bala soldadu belanda tama baka gelumbang lalu manjung nyerang. Sida udah datai deka ngerusak Babilon. Bala soldadu Babilon ditangkap, lalu panah sida dipatahka. Aku tu Allah Taala ti ngukum penyai, lalu Aku deka ngukum Babilon laban iya endang patut diukum. Aku deka numi bala pemerintah iya mabuk, iya nya orang ke bepenemu-dalam, bala tuai, enggau bala soldadu. Sida deka tinduk lalu enda dani agi. Aku ti Raja udah bejaku. Aku tu TUHAN ti Pemadu Bekuasa. Dinding kuta nengeri Babilon ti tegap deka diruntuhka, lalu pintu iya ti tinggi ditunu retung. Pengawa ti dikereja semua bansa sigi nadai guna. Utai ti digaga sida diempa api ti mau. Aku TUHAN ti Pemadu Bekuasa udah bejaku.” Orang ke nyempulang Raja Sedekiah nya Seraiah anak Neriah, uchu Mahseiah. Dalam taun ti keempat Sedekiah nyadi raja menua Judah, Seraiah nyempulang raja ngagai Babilon, lalu aku meri ajar ngagai Seraiah. Aku nulis dalam siti bup jerita pasal semua pengerusak ti deka ninggang menua Babilon, sereta enggau semua utai bukai pasal menua nya. Ku aku madahka ngagai Seraiah, “Lebuh nuan datai di Babilon, nuan enda tau enda macha enggau nyawa ti inggar ngagai orang mayuh semua utai ti ditulis ditu. Udah nya besampi, ‘ TUHAN, Nuan udah madahka Diri deka ngerusak endur tu, ngambika utai nadai agi idup ditu, nemuka nya mensia tauka jelu, lalu endur tu deka nyadi baka menua puang belama iya.’ Seraiah, lebuh nuan udah tembu macha bup tu ngagai orang mayuh, tanchangka sigi batu ngagai bup tu, lalu tikauka iya ngagai Sungai Eupratis lalu sebut, ‘Tu meh gaya utai ti deka nyadi ngagai menua Babilon: iya deka tengelam lalu enda pansut agi laban TUHAN deka ngerusak iya.’ ” Jaku Jeremiah abis naka tu. Umur Sedekiah dua puluh satu taun lebuh iya nyadi raja menua Judah, lalu iya merintah di Jerusalem sebelas taun. Nama indai iya Hamutal, anak Jeremiah ti diau di nengeri Libnah. Raja Sedekiah bedosa ngelaban TUHAN, baka Raja Jehoiakim. TUHAN balat amat ringat ngagai orang Jerusalem enggau ngagai orang Judah datai ke Iya nyau muai sida ari menua nya lalu enda ibuhka sida agi. Sedekiah angkat ngelaban Raja Nebukadnesar menua Babilon, nya alai Nebukadnesar datai mai semua bala soldadu iya lalu nyerang Jerusalem kena sepuluh hari bulan ti kesepuluh dalam taun ti kesemilan Sedekiah megai perintah. Orang Babilon nirika kem ari luar nengeri Jerusalem, ngaga kuta tanah kena sida ngelulung nengeri nya, lalu majak ngelulung nengeri nya nyentuk ngagai taun ti kesebelas Sedekiah nyadi raja. Kena semilan hari bulan ti keempat taun nya, lebuh lapar pungkang udah balat amat nyadi, datai ke orang mayuh nyau nadai agi utai diempa, dinding kuta nengeri nya bumbus laban munsuh. Tang taja pen orang menua Babilon ngelulung nengeri nya, semua bala soldadu ulih ngerarika diri malam nya. Sida rari nengah kebun diraja, bejalai nengah tempuan ti besabungka dua iti lapis dinding kuta nya, lalu rari tunga ngagai Lebak Jordan. Tang bala soldadu orang menua Babilon nitihka Raja Sedekiah, nangkap iya ba emperan semak Jeriko, lalu semua soldadu iya bela ninggalka iya magang. Sedekiah lalu dibai ngagai Raja Nebukadnesar, ke benung di nengeri Riblah di menua Hamat lebuh maya nya, lalu Nebukadnesar ngukum iya. Nebukadnesar munuh bala anak lelaki Sedekiah di Riplah, di mua Sedekiah empu, lalu Nebukadnesar mega ngasuh bala pemesai orang Judah dibunuh. Udah lepas nya, iya ngasuh orang ngeruk leka mata Sedekiah, lalu ngasuh iya ditanchang ngena rantai, lalu dibai ngagai menua Babilon. Sedekiah mengkang kena tutup di menua Babilon datai ke mati. Kena sepuluh hari bulan ti kelima dalam taun ti kesemilan belas Nebukadnesar nyadi raja menua Babilon, Nebusaradan, ti nyadi penyanding penemu raja, sereta nyadi tuai soldadu, tama ngagai nengeri Jerusalem. Iya nunu Rumah Sembiang, istana, enggau semua rumah orang ke tinggi pangkat di Jerusalem, lalu bala soldadu iya ngeruntuhka dinding kuta nengeri nya. Udah nya Nebusaradan mai ngagai menua Babilon sekeda orang ke pemadu seranta, enggau semua orang bukai ti udah ditinggalka di Jerusalem, orang ke udah ngalih ari orang Babilon enggau orang ke landik begagaka utai. Tang iya ninggalka sekeda orang ke pemadu seranta, ti nadai reta tengkira, di menua Judah, lalu iya ngasuh sida gawa ba kebun anggur enggau ba umai. Orang Babilon mechahka tiang temaga enggau kerita ti dalam Rumah Sembiang, sama enggau tangki temaga ti besai, lalu sida nabanka semua temaga nya ngagai menua Babilon. Sida mega nabanka sandak enggau sarang amau ti dikena nuchi alta, pekekas ti dikena ngintu lampu, mangkuk ti dikena nerima darah ari jelu ti disayat nyadika piring, mangkuk ti dikena nunu menyan, enggau semua perengka temaga ti bukai ti dikena ngereja pengawa dalam Rumah Sembiang. Sida nabanka semua utai ti digaga ari emas tauka ari pirak, iya nya, mangkuk ti mit, talam kena mai bara api, mangkuk kena nerima darah ari jelu ti disayat nyadika piring, sarang amau, penuduk lampu, mangkuk kena nunu menyan, enggau mangkuk kena nuang pemeri wain. Perengka temaga ti udah digaga Raja Solomon ke Rumah Sembiang, iya nya, dua iti tiang, kerita, tangki ti besai, enggau dua belas iku sapi ti lelaki ti dikena nungkat iya - kelalu berat lalu enda ulih ditimbang. Ukir ba siti-siti tiang nya bisi seratus igi buah delima semua iya, lalu semilan puluh enam igi buah nya ulih dipeda ari tanah. Nambahka nya, Nebusaradan, ti nyadi tuai soldadu, mega nabanka Imam Besai Seraiah, Imam Sepaniah ke lumur dua nangkanka iya, enggau tiga iku agi pemesai ti tinggi pangkat dalam Rumah Sembiang. Ari nengeri nya Nebusaradan nabanka siku tuai soldadu, tujuh iku penyanding penemu raja ke ditemu dalam nengeri nya, penulung tuai soldadu nya ke ngemataka pengawa betuliska cherita perang, enggau enam puluh iku orang bukai ti tinggi pangkat. Nebusaradan mai sida ngagai raja menua Babilon, ke benung di nengeri Riblah di menua Hamat. Dia raja nya lalu ngasuh sida dipalu lalu dibunuh. Nya alai orang Judah ditabanka ari menua sida lalu dibuai ngagai menua Babilon. Tu pemayuh tubuh orang ke ditabanka Nebukadnesar nyadi orang tangkap: dalam taun ti ketujuh iya nyadi raja, iya nabanka 3,023 iku, dalam taun ti kelapan belas, 832 iku ari Jerusalem, lalu dalam taun ti kedua puluh tiga, 745 iku ditabanka Nebusaradan. Pemayuh semua sida ke ditabanka: 4,600 iku. Dalam taun Ebilmerodak berengkah nyadi raja menua Babilon, iya ngayanka penelap ati diri ngagai Raja Jehoiakin menua Judah, lalu ngelepaska iya ari rumah jil. Utai tu nyadi kena dua puluh lima hari bulan ti kedua Belas dalam taun ti ketiga puluh tujuh udah bekau Jehoiakin ditabanka nyadi orang tangkap. Ebilmerodak nelap enggau iya, lalu meri iya pangkat ti tinggi agi ari ti diberi Ebilmerodak ngagai semua raja bukai ke sama kena buai ngagai menua Babilon baka Jehoiakin empu. Nya alai Jehoiakin dikemendarka nukar gari ti udah dikena iya dalam rumah jil, lalu begulai makai enggau raja sekumbang iya agi idup. Tiap hari, sekumbang iya ti agi idup, iya diberi duit kena iya meli utai ti dipeguna iya. Sunyi amat meh nengeri Jerusalem diatu. Dulu menya iya penuh laban mensia! Dulu menya iya dibasa semua bansa, tang diatu iya nyau baka indu ke balu. Nengeri ti pemadu manah tu udah nyadi ulun. Iya nyabak semalam-malam. Ai mata iya nyau nelusur kuyu iya. Ari semua bala pangan iya, nadai siku agi tinggal ngaum iya. Orang ke setanah enggau iya udah nipu iya, lalu semua sida ngelaban iya diatu. Orang Judah nyau nyadi ulun ti nadai daya agi lalu dipejalka ninggalka menua diri. Sida diau di menua bukai, nadai agi menua ti tau dikumbai sida menua diri, dikelingi munsuh, lalu nadai jalai ngerarika diri. Nadai agi orang datai ngagai Rumah Sembiang diatu lalu nyembah Allah Taala lebuh hari kudus. Bala indu ke biak ke belagu dia, natka pemerinsa, lalu bala imam semina ulih bedemuh aja. Pintu nengeri nadai orang nengah, lalu Sion natka diri pedis. Bala munsuh iya udah menang, lalu merintah iya. TUHAN udah ngasuh iya merinsa ketegal semua dosa iya. Bala anak iya udah ditangkap lalu ditabanka ngagai menua bukai. Pemanah gaya nengeri Jerusalem nyau nadai agi. Bala tuai iya nyau baka rusa ti lemi ketegal lapar, Ke nyau deka abis pengering lebuh sida ngerarika diri ari orang ke ngasu. Jerusalem diatu nyau nyadi tembawai, lalu iya ngingatka pemanah gaya diri ti dulu menya. Lebuh iya alah laban munsuh, nadai orang nulung iya. Orang ke ngalahka iya ketawaka iya lebuh iya alah. Iya enda agi dibasa orang. Iya telanjai lalu dikeleseka orang. Iya bedemuh lalu mampul mua diri laban malu. Jerusalem udah ngamahka diri ngena dosa ti udu jai. Pengamah iya nyata dipeda, tang iya enda irau mimit ke utai ti deka nyadi ba iya jemah ila. Iya balat amat alah. Nadai orang ulih ngaum iya. Bala munsuh iya udah menang, lalu iya nyabak minta TUHAN kasihka iya. Bala munsuh udah ngerampas semua reta tengkira iya. Iya tepedaka sida tama ngagai Rumah Sembiang, Ti enda disagi TUHAN pasuk orang bansa bukai. Bala nembiak iya bedemuh lebuh sida begigaka utai diempa. Sida nyilih reta tengkira sida enggau pemakai kena sida beridup. “Peda aku tu, TUHAN,” ku nengeri nya nyabak. “Peda pemerinsa aku tu.” “Malik ngagai aku!” ku iya nyabak nunga ngagai semua orang ke mansa. “Nadai orang udah kala pedis baka aku tu, Pemedis ti udah diasuh TUHAN ninggang aku lebuh Iya ringat. “Iya ngirumka api ari langit, api ti mau dalam aku. Iya nan panjuk kena nyintak aku, lalu ngerebahka aku ke tanah. Udah nya Iya ninggalka aku, lalu nejuka aku seruran pedis. “Iya meda semua dosa aku, lalu merekaska sida nyadi siti berekas. Iya nanchangka berekas dosa nya ba rekung aku, lalu aku nyau lembut tulang ditating dosa nya. TUHAN nyerahka aku ngagai bala munsuh aku, lalu aku nadai daya ngelaban sida. “ TUHAN ketawaka semua soldadu aku ke pemadu kering. Iya ngirumka bala soldadu ngerusak bala soldadu aku ke agi biak. Iya ngeredakka bala aku baka ke mitan buah anggur. “Nya kebuah ai mata aku nyau lilih. Nadai orang ulih ngaum aku, lalu nadai orang ngangkatka semengat aku. Bala munsuh udah ngalahka aku. Bala nembiak aku nyau nadai utai agi. “Aku ngangkatka jari, tang nadai orang deka nulung aku. TUHAN udah mesanka bala munsuh ari sepiak-sepiak ngelaban aku. Sida ngaga aku baka utai ti kamah. “Tang TUHAN endang lurus, laban aku udah enda ngasika Iya. Pendingka aku, kita di semua endur. Peda kita pemedis aku tu. Bala nembiak lelaki enggau bala nembiak indu aku ke biak, udah ditabanka nyadi orang tangkap. “Aku ngangauka orang ke setanah enggau aku, tang sida enggai nulung aku. Bala imam enggau bala tuai bansa mati ba sebelah jalai raya di nengeri, begigaka pemakai kena beridup. “Peda, O TUHAN, penusah ati aku, penusah semengat aku! Ati aku runtuh tusah ke dosa aku. Orang bebunuh ba sebelah jalai raya, lalu dalam rumah pen bisi mega pemati. “Pendingka aku ke bedemuh. Nadai orang deka ngaum aku. Bala munsuh aku gaga ati meda Nuan ngasuh penusah ti besai tu ninggang aku. Asuh datai meh hari ti udah disemaya Nuan. Awakka bala munsuh aku merinsa baka aku. “Peda Nuan semua penyai sida, lalu ukum meh sida baka Nuan ti udah ngukum aku ketegal dosa aku. Aku bedemuh ketegal merinsa, lalu ati aku balat tusah.” TUHAN ringat lalu mungkur Sion ngena pemetang. Nengeri ti manah gaya nya udah diubah Iya nyadi tembawai. Indah Rumah Sembiang deh ditinggalka TUHAN lebuh Iya ringat. TUHAN nadai pengasih mimit ngerusak semua genturung pendiau di menua Judah Lalu ngeruntuhka kuta ti dikena nyaga menua nya. Iya mechat perintah enggau bala orang ke megai perintah di menua nya. TUHAN ngeransi lalu nganchurka pengering Israel. Iya enggai nulung kitai lebuh munsuh datai. Iya balat amat ngelaban kitai baka api, lalu ngerusak semua utai. Iya nyelintingka laja Iya ngagai kitai baka munsuh. Iya munuh semua orang ke dikegagaka sereta dikerinduka kitai. Di Jerusalem ditu kitai ngasaika pengeringat Iya. TUHAN udah nyadi baka munsuh. Iya udah ngerusak Israel. Iya udah ngaga semua kuta enggau istana di menua Israel nyadi tembawai. Iya udah ngasuh orang Judah enda ngetu-ngetu ditinggang penusah. Iya udah ngerusak Rumah Sembiang alai kitai ti udah nyembah Iya. Iya enda ngasuh orang ngintu hari ti kudus enggau Hari Sabat. Raja enggau imam udah sama ngasaika pengeringat Iya. TUHAN enggai agi begunaka alta Iya, lalu Iya ninggalka Rumah Sembiang Iya ti kudus. Iya nejuka munsuh ngeruntuhka dinding Rumah Sembiang. Sida manjung ke diri ke menang ba endur alai kitai, enggau ati ti gaga, udah besembah. TUHAN udah mutuska runding deka ngeruntuhka dinding kuta Sion. Iya nyukat dinding kuta nya, kena nentuka semua dinding nya dirusak magang. Diatu menara enggau dinding kuta nya udah nyadi tembawai magang. Pintu nengeri dilamun rapuh, lalu alang pintu redak magang. Raja enggau bala pemesai diatu udah dibuai ngagai menua bukai. Adat nadai agi diajar, lalu sida nabi nadai nerima genera ari TUHAN. Orang ke tuai umur di Jerusalem duduk ba tanah, enda engkeretik. Pala sida dikerabuka enggau amau lalu sida begari ngena kain guni. Indu ke agi biak ngendukka pala sida ke tanah. Mata aku nyau bangkung laban aku enda ngetu nyabak. Ati aku balat tusah. Ati aku balat tusah laban bala aku udah dirusak, laban sida ke nembiak enggau anak mit luput ba sebelah jalai raya. Lapar sereta aus, sida nyabak minta pemakai enggau utai diirup ari indai sida. Sida rebah ba sebelah jalai raya baka ke bakal, dipangku indai sida, lalu mati. O Jerusalem, Jerusalem ti dikesayauka aku, baka ni ku jalai aku bejaku? Baka ni ku jalai aku merindang nuan? Nadai orang patut merinsa baka tu. Penusah nuan nadai sekat baka tasik, nadai pengandal agi. Bala nabi nuan nadai madahka utai bukai ngagai nuan, semina pemula aja. Jaku ajar sida semina nipu nuan, laban ajar nya enda kala madahka dosa nuan. Sida nyungkak nuan berunding ngumbai diri enda ibuh nesal ati ke dosa nuan. Orang ke mansa nuan merening lalu ngeleseka nuan. Sida ngilikka pala, lalu ketawaka Jerusalem ke nyau nyadi tembawai: “Kati tu amat nengeri ti manah nya suba? Kati tu nengeri ti dikemegahka dunya?” Semua bala munsuh nuan ngeleseka nuan, lalu melut mata begedika nuan. Sida enchebirka mulut lalu ngelese, “Kami udah ngerusak nengeri nya! Tu meh hari ti dianti kami ngelamatu!” Diatu TUHAN udah ngereja utai ti deka dikereja Iya: Iya udah ngerusak kitai enggau nadai pengasih, nitihka jaku tangkan ti disebut Iya ngagai kitai dulu kelia. Iya ngasuh bala munsuh kitai menang, ngasuh sida gaga ati meda kitai alah. O Jerusalem, asuh dinding kuta nuan nyabak ngangauka TUHAN! Awakka ai mata nuan lilih baka ai sungai ti rarat siang malam. Awakka nuan lelak nyabak tusah ati! Awakka nuan semalam-malam enda ngetu angkat ngangauka TUHAN. Bantaika semua utai ari ati nuan ngagai TUHAN, minta Iya kasihka bala anak nuan, anak ke mati keberuran ba genap sukut jalai raya! TUHAN, peda Nuan! Nama kebuah Nuan ngukum kami baka tu? Sida ke indu nyau bepakaika anak ke dikesayauka sida! Bala imam enggau bala nabi dibunuh dalam Rumah Sembiang! Orang ke biak enggau ke tuai nyau betegaring mati ba sebelah jalai raya, Lelaki enggau indu ke biak, dibunuh munsuh ngena pedang. Nuan munuh sida enggau nadai pengasih lebuh Nuan ringat. Nuan ngasuh bala munsuh aku begawai ngelingi aku lalu ngemba aku, Lalu nadai orang ulih ngerarika diri ba hari Nuan ringat. Bala munsuh munuh bala anak aku, ti udah ditupi sereta dikerinduka aku. Aku tu orang ke udah ngasaika ukum Allah Taala. Iya muru aku jauh-sejauh ke dalam pemetang; lalu enda ngetu-ngetu malu aku. Iya udah ngemakalka aku, lalu matahka tulang aku. Iya udah nutup aku dalam rumah jil, lalu merinsa sereta ngenusah. Iya udah mejalka aku diau dalam pemetang baka orang ke udah mati dulu kelia. Iya udah nanchang aku ngena rantai. Aku tu orang tutup ti enda ulih ngerarika diri. Aku nyabak rauh-rauh minta tulung, tang Allah Taala enggai mending. Iya udah mempang jalai aku ngena lampang batu ti udah dipansap, Iya udah ngaga jalai aku bingkuk. Iya ngipa aku baka beruang, baka singa ti deka nerekam aku. Iya muru aku ari jalai raya, nyarikka tubuh aku, lalu ninggalka aku. Iya ngambi panah, lalu nyelintingka laja Iya ngagai aku. Iya nimbakka laja Iya dalam bendar masuk ngagai tubuh aku. Orang ketawaka aku sepemanjai hari. Aku tu orang ke dikeleseka semua sida. Iya udah balat merinsaka aku, baka orang ke dipejalka ngirup ai ti pemadu pait. Iya nginsarka mua aku ngagai batu, lalu matahka ngeli aku. Aku nyau nadai pengelantang agi; aku nyau enda ingatka utai ti dikumbai pemaik. Aku enda lama agi idup, lalu aku nadai agi utai diadang ari TUHAN. Lebuh aku berundingka pemerinsa diri, enggau pasal aku ti nadai rumah alai diau, utai nya pait baka rachun. Aku seruran berundingka utai nya, lalu ati aku tusah. Tang taja pia, pengadang datai baru lebuh aku ngingatka utai siti tu: Pengerindu enggau pengasih TUHAN enda nemu abis, nyadi baru belama tiap pagi, naka meh penetap ati Nuan. Semina TUHAN aja ke dikemisi aku, nya alai aku manggaika pengadang aku ba Iya. TUHAN endang manah enggau orang ke arapka Iya, enggau orang ke ngiga Iya. Nya alai manah kitai nganti Iya enggau ati ti liat, nganti Iya ngidupka kitai. Manah kitai belajar liat ati lebuh kitai agi biak. Lebuh TUHAN ninggang kitai enggau pemerinsa, kitai patut duduk kediri enda bemunyi sereta liat ati. Kitai patut meremika pala nunduk ngagai Iya, nyangka kitai agi bisi pengadang. Taja pen kitai ditampar sereta dikeleseka orang, kitai patut nerima semua utai nya. TUHAN endang kasihka kitai, lalu Iya enggai nulak kitai belama iya. Iya nyangka ngasuh ati kitai tusah, tang pengerindu Iya ke kitai endang meruan sereta kering; laban Iya ukai deka ngemerinsa tauka ngenusahka kitai. TUHAN nemu lebuh kitai dalam rumah jil, ati kitai tusah. Iya nemu lebuh orang ngerampas hak ti udah diberi Iya ngagai kitai. Iya nemu lebuh orang meri atur ti enda lurus dalam kot. Peneka TUHAN aja ti seruran dipejalaika. Utai ti manah enggau utai ti jai dikereja nitihka jaku Iya. Nama kebuah kitai mutap lebuh kitai diukum ketegal dosa kitai empu? Aram kita meresa ulah diri, lalu pulai baru ngagai TUHAN. Aram kitai muka ati kitai ngagai Allah Taala ti di serega, lalu besampi, “Kami udah bedosa lalu udah angkat ngelaban Nuan, TUHAN, lalu Nuan apin ngampun kami. “Nuan udah begagaika kami lalu munuh kami. Pengasih Nuan dilamun Nuan ngena pengeringat. Ati Nuan dilamun Nuan ngena ransi, baka mua hari ti tebal, datai ke sampi kami enda ulih datai ba Nuan. Nuan udah ngaga kami nyadi baka tugung uras, di mua semua orang. “Kami dipechat sereta diketawaka semua munsuh kami. Kami udah ditinggang pemedis enggau pemerinsa; kami diau tusah sereta takut. Mata aku semampai basah laban ai mata, laban bansa aku dirusak. “Ai mata aku deka lilih enda ngetu-ngetu, datai ke TUHAN nilik ke baruh ari serega, lalu meda kami. Ati aku balat tusah meda utai ti nyadi ba orang ke diau di nengeri nya. “Aku tu baka burung, dipanjuk bala munsuh ke begedika aku enggau nadai kebuah. Sida nikauka aku idup-idup ngagai lubang kebung, lalu nutup mua lubang kebung nya ngena batu. Ai lalu belabuh ngampuhka aku, lalu aku ngumbai diri nyau deka mati. “Ari buntut lubang kebung, aku nyabak ngangauka Nuan, O TUHAN! Lalu lebuh aku minta Nuan mendingka sabak aku, Nuan ningaka aku. Nuan nyaut aku, lalu Nuan enda ngasuh aku takut. “Nuan datai lalu ngelepaska aku, TUHAN, lalu nebus aku. Beri atur ti lurus lebuh Nuan ngakim aku. Nuan nemu utai ti salah ti udah dikereja orang ngagai aku. Nuan nemu pemalat bala munsuh aku begedika aku, enggau jalai sida bepekat ngelaban aku. “Nuan udah ninga sida mechat aku, O TUHAN. Nuan nemu semua akal sida. Sida bejaku jai pasal aku sepemanjai hari, lalu bepekat. Kenyau ari pagi nyentuk ngagai malam, sida beduan aku. “O TUHAN, ukum sida ketegal utai ti udah dikereja sida. Sumpah sida, lalu asuh sida tusah ati! Buru sida, lalu rusak sida abis lengis ari dunya tu!” Emas ti beperenching nyau enda beperenching agi. Batu ti udah dikena ngaga Rumah Sembiang nyau ngachir ba sebelah jalai raya. Orang ke biak di Sion endang dikesayauka kami baka emas, tang diatu sida nyau digaga nyadi baka periuk tanah. Indah indu ukui kampung deh nemu nusuka anak, tang bala nembiak aku baka burung unta, jai enggau anak diri. Sida nejuka anak sida mati laban lapar enggau aus. Bala anak mit minta pemakai, tang nadai orang deka meri sida pemakai. Orang ke udah teleba makai pemakai ti pemadu nyamai, diatu mati lapar ba sebelah jalai raya. Sida ke udah nyamai diau, diatu ngair ba tugung uras ngiga pemakai. Bala nembiak aku udah balat agi diukum ari orang ke diau di Sodom, ke ngenyit dialahka Allah Taala. Bala anak raja kami enda kamah, tang tuchi baka seleju, regas, kering, sereta bepengerai. Diatu sida nyau betegaring ba sebelah jalai raya enda dikelala orang. Mua sida chelum agi ari aruk. Kulit sida rangkai baka kayu, ngeriut malut tulang sida. Lantang agi orang ke mati beperang ari orang ke mati udah lepas nya, ke mati keberuran, laban sida nadai pemakai kena idup. Penusah ti ninggang bala aku amat ngasuh geli. Sida ke indai manduk anak ke dikesayauka sida nyadika pemakai. TUHAN mubuhka pengeringat Iya. Iya nunu Sion, lalu ngeretungka nengeri nya nyentuk ke tanah. Nadai siku orang di semua endur, nyengkaum bala raja menua bukai, arapka orang ke nyerang ulih tama mua pintu nengeri Jerusalem. Tang utai nya udah nyadi, laban bala nabi nengeri Jerusalem udah bedosa, lalu bala imam udah salah bebunuhka orang ke nadai penyalah. Bala tuai nengeri nya bejalai segau-segau ba sebelah jalai raya baka ke buta, abis dibalut darah datai ke orang nyau enggai negu sida. “Rari kita ari tu,” ku orang merak sida. “Kita tu kamah! Anang negu aku!” Nya alai sida segau-segau bejalai ari menua siti ngagai menua siti, enda diterima orang. TUHAN enggai agi ibuhka sida. TUHAN Empu ke ngachirka sida. Iya enggai agi bebasaka bala imam enggau tuai kitai. Kami gining-gining ngiga orang nyaup, tang nadai ga orang datai. Kami majak nganti tulung ari siti bansa, tang iya nadai ulih nulung kami. Munsuh nengkilaka kami, datai ke kami nyau enda berani bejalai nengah jalai raya. Kami nyau deka mati. Seput kami nyau abis. Bala munsuh begagaika kami laju agi ari menaul ti nyambar ari langit. Sida nyidi kami ba sebelah bukit. Sida negah kami di menua puang. Sida ngalahka pun pengidup kami, raja ti udah dipilih TUHAN, ke dikarapka kami nyaga kami ari semua orang ke nyerang. Ketawa meh kita, orang Edom enggau orang Us. Gaga ati meh kita kala lebuh kita agi ulih. Penusah ti besai deka mega ninggang kita. Kita deka mega bejalai guir-guir telanjai sereta malu. Sion udah diukum ketegal dosa iya. TUHAN enggai agi nejuka kami diau di menua bukai. Tang nuan Edom, TUHAN deka ngukum nuan. Iya deka mandangka penyalah ti udah dikereja nuan. TUHAN, kingatka utai ti udah nyadi ba kami. Malik ngagai kami, lalu peda pemalu kami. Reta tengkira kami ba jari orang kampar. Orang ari menua bukai diatu diau dalam rumah kami. Bala apai kami udah dibunuh munsuh, lalu diatu bala indai kami nyau balu. Kami enda tau enda mayar rega ai ti diirup kami. Kami enda tau enda meli kayu api. Kami dipejalka gawa baka keledai tauka unta, nya alai kami lelak, tang enda tau belelak. Kami minta pemakai ari menua Ejip enggau ari menua Asiria ngambika kami ulih idup. Aki ini kami bedosa, tang diatu sida iya nadai agi, lalu kami diatu merinsa ketegal dosa sida. Kami diatu diperintah bala ulun, lalu nadai orang ulih ngelepaska kami ari jari sida. Orang ke pemunuh nyau bekesegau bejalai ba sebelah menua pesisir. Kami berambunka nyawa lebuh kami begigaka pemakai. Kami merinsa laban lapar datai ke kulit kami nyau angat baka dapur. Bala bini kami udah dipasung orang ba Bukit Sion. Bala anak indu kami udah dipejalka nunduk ba genap buah genturung pendiau di menua Judah. Bala tuai bansa kami udah ditabanka lalu digantung. Bala tuai kami enda dibasa orang. Sida ke bujang dipejalka ngisar gandum baka ulun. Sida nembiak ti lelaki nyau guir-guir ngesan kayu. Orang ke tuai umur nadai agi duduk ba mua pintu nengeri, lalu orang ke biak enda agi nebah musik. Kami nyau nadai pengelantang agi. Kami nadai agi betanda, laban ati kami balat tusah. Semua utai ti dikemegahka kami udah abis magang. Tulah meh kami tu, laban kami udah bedosa. Ati kami balat tusah lalu mata kami nyau rapa laban ai mata kami, laban Bukit Sion nadai agi diuan mensia, tang nyadi endur alai raban pasun bejalai. Tang Nuan, O TUHAN, endang Raja belama iya lalu deka merintah nyentuk ngagai pengujung dunya. Nama kebuah Nuan lama amat ngelengkaka kami? Kati Nuan deka ingatka kami baru? Bai meh kami pulai ngagai Nuan baru, O TUHAN! Bai kami pulai baru! Pulaika baru mulia kami ke suba. Kati Nuan deka nulak kami belama iya? Kati pengeringat Nuan nadai sekat? Kena lima hari bulan ti keempat dalam taun ti ketiga puluh, aku, Imam Esekiel anak Busi, diau begulai enggau orang Judah ti udah kena buai ngagai tebing Sungai Kebar di menua Babilon. Langit tebuka, lalu aku begenera meda Allah Taala. ( Tu taun ti kelima Raja Jehoiakin udah dibuai ngagai menua Babilon.) Aku ninga TUHAN bejaku ngagai aku ba tebing Sungai Kebar di menua Babilon, lalu aku ngasaika kuasa Iya. Aku engkadah lalu tepedaka biaubalai datai ari utara: siti mua hari ti besai ti beperenching, enggau api ti enda nemu ngetu nyelar, lalu ba tengah-tengah api nya, bisi siti utai ti beperenching baka temaga ti udah dipugar. Lalu aku mega tepedaka empat iku utai ti idup, ti baka gamal mensia, ba tengah-tengah biaubalai nya, lalu genap iku sida nya bisi empat iti mua enggau empat iti sayap. Kaki sida lurus, lalu bisi tunjing baka tunjing sapi. Kaki sida beperenching baka temaga ti udah dipugar. Ari baruh genap iti sayap sida, bisi jari. Lalu sayap sida siku-siku negu puting sayap pangan diri, datai ke sida empat iku nya dipeda besegi empat. Lebuh sida mindah, sida sama-sama mindah, enda ibuh nguingka tubuh diri. Genap iku utai ti idup nya bisi empat iti mua: mua mensia muak ari mua, mua singa muak ari kanan, mua sapi muak ari kiba, enggau mua menaul muak ari belakang. Sayap sida ke di atas dikerembaika sida, negu puting sayap pangan diri. Lalu sayap dua iti ti bukai dikena iya nyerayung tubuh diri. Genap iku sida bela mindah ke mua. Kini-kini ke tunga roh sida mindah, kia ke meh sida mindah, lalu sida enda ibuh nguingka tubuh diri. Lalu gamal utai ti idup nya baka bara api, baka sempun ti mau; api nya terang, lalu ari api nya pansut kilat ti nyelar. Utai ti idup nya terebai kin kitu laju baka kilat. Lebuh aku benung merening ngagai empat iku utai ti idup nya, aku tepedaka empat iti kaki kerita ba tanah, lalu siti kaki kerita nya ngimbai siku-siku utai ti idup nya. Kaki kerita empat iti nya sebaka gaya magang. Siti-siti beperenching baka batu ti berega, lalu ba tiap iti kaki kerita nya bisi siti kaki kerita ti bukai ti melintang dalam kaki kerita nya, ngambika kaki kerita nya tau bejalai ngagai sebarang tunga iya deka. Bingkai kaki kerita nya tinggi sereta ngenakut, lalu penuh laban mata. Genap kali utai ti idup nya mindah, kaki kerita nya mindah sama enggau sida, lalu lebuh utai ti idup nya angkat ari tanah, kaki kerita nya mega angkat. Kini-kini ke tunga roh nya mindah, utai ti idup nya mega mindah, lalu kaki kerita nya mindah sama enggau sida; laban roh utai ti idup nya dalam kaki kerita nya. Nya alai genap kali utai ti idup nya mindah, tauka ngetu, tauka angkat ke atas, kaki kerita nya nitih belama. Pala utai ti idup nya dirungkup ngena utai ti baka kebung langit, ti beperenching baka batu kristal. Di baruh kebung nya, sayap utai ti idup nya dikerembaika iya ngagai siku ti nangkanka iya, lalu iya nyerayung tubuh diri ngena sayap dua iti ti bukai. Aku bisi ninga munyi sayap sida lebuh sida terebai, munyi segum pangka gelumbang, munyi nyawa bala soldadu, munyi nyawa Allah Taala ti Pemadu Bekuasa. Lebuh sida ngetu terebai, sida nyimpul sayap sida. Tang munyi utai agi bisi didinga datai ari atas kebung ti ngerungkup pala sida. Ba atas kebung ti ngerungkup pala sida nya bisi siti utai ti baka kerusi diraja ti baka batu nilam; lalu duduk ba atas utai ti baka kerusi diraja nya, bisi siti utai ti baka gamal mensia. Lalu ari atas utai ti baka punggung, aku meda utai ti beperenching baka temaga ti dikelingi api; lalu ari baruh utai ti baka punggung, aku bisi meda utai ti baka api, ti dikelingi penampak. Penampak nya baka gaya anakraja ti ba mua hari lebuh hari ujan. Nya meh gaya mulia TUHAN. Lebuh aku meda utai nya, aku lalu nyungkurka diri ke tanah, lalu ninga munyi nyawa bejaku. Ku nyawa nya bejaku, “Esekiel, anak mensia, bediri nuan. Aku deka bejaku enggau nuan.” Lebuh nyawa nya benung bejaku, Roh Allah Taala lalu tama ngagai aku, lalu ngangkatka aku bediri, lalu aku ninga munyi nyawa nya majak bejaku. Ku Iya, “Anak mensia, Aku ngasuh nuan mansang ngagai orang Israel. Sida udah angkat ngelaban Aku, lalu agi mengkang nyadi orang ke ngelaban, baka aki ini sida menya. Sida kieh, lalu enda bebasaka Aku, nya alai Aku ngasuh nuan madahka utai ti disebut Aku, TUHAN Allah Taala ngagai sida. Nemuka bala orang ke ngelaban nya mendingka nuan tauka enda, sida deka nemu siku nabi bisi udah begulai enggau sida. “Tang nuan, mensia, enda tau takutka sida, tauka takutka utai ti disebut sida. Sida deka nyakap nuan lalu ngeleseka nuan, lalu nuan deka asai ke idup begulai enggau kala. Tang nuan enda tau takutka orang ke angkat ngelaban nya, tauka takutka utai ti disebut sida. Nuan deka madahka ngagai sida sebarang utai ti diasuh Aku sebut nuan, nemuka sida mending tauka enda. Ingat, semua sida nya orang ke angkat ngelaban magang. “Anak mensia, pendingka utai ti dipadahka Aku ngagai nuan. Anang angkat ngelaban baka sida nya. Buka nyawa nuan lalu empa utai ti deka diberi Aku ngagai nuan.” Aku lalu tepedaka siti jari nyuaka siti gulung surat ngagai aku. Jari nya lalu muka gulung surat nya, lalu aku meda gulung surat nya udah ditulis ari sepiak-sepiak, tulis ti ngundan sabak tusah ati enggau munyi rauh orang ke nyabak sereta bedemuh. Ku Allah Taala bejaku, “Anak mensia, empa gulung surat nya. Udah nya mupuk nuan lalu bejaku ngagai orang Israel.” Aku lalu merangapka nyawa aku, lalu Iya meri gulung surat nya ngagai aku ngambika aku makai iya. Ku Allah Taala bejaku, “Anak mensia, empa gulung surat ti diberi Aku ngagai nuan, ngambika perut nuan kenyang.” Aku lalu makai gulung surat nya, lalu iya manis asai ai manyi. Udah nya Allah Taala bejaku, “Anak mensia, alai nuan mansang ngagai orang Israel, lalu sebut ngagai sida sebarang utai ti diasuh Aku sebut nuan. Aku ukai ngasuh nuan mansang ngagai bansa orang ke enda ditemu nuan jaku, tang ngagai orang Israel. Enti Aku ngasuh nuan mansang ngagai bansa ti besai, ti enda ditemu nuan jaku, sida deka mendingka nuan. Tang orang Israel enggai mendingka nuan. Indah Aku Empu deh enda dipendingka sida. Semua sida nya endang kieh sereta deka ngelaban magang. Diatu Aku deka ngasuh nuan kieh sereta kering ati baka sida. Aku deka ngasuh nuan teguh baka batu, kering baka intan. Anang takutka sida ke angkat ngelaban nya.” Ku Allah Taala nampung jaku Iya, “Anak mensia, dingaka enggau manah, lalu kingatka semua utai ti dipadahka Aku ngagai nuan. Udah nya mansang nuan ngagai orang ke ari bansa nuan empu, ti agi mengkang di menua ti alai sida udah dibuai, lalu padahka utai ti disebut Aku TUHAN Allah Taala ngagai sida, nemuka sida mending tauka enda.” Udah nya Roh Allah Taala lalu ngangkatka aku, lalu aku ninga munyi nyawa ti inggar bejaku ari belakang aku, “Pujika mulia TUHAN ti di serega di atas!” Aku ninga munyi kebap sayap utai ti idup di langit, enggau munyi kaki kerita, ti inggar munyi tanah ti berenyang. Kuasa TUHAN lalu balat amat nurun atas aku, lalu lebuh Roh TUHAN mai aku, aku berasai pedis ati sereta ringat. Aku lalu datai di Tel Abip ba tebing Sungai Kebar, alai bala orang ke udah kena buai diau, lalu aku diau dia tujuh hari, tusah ati laban utai ti dipeda enggau didinga aku. Udah lepas tujuh hari nya, TUHAN bejaku ngagai aku. Ku Iya, “Anak mensia, Aku udah ngaga nuan nyadika jejaga orang Israel. Nuan enda tau enda madahka ngagai sida jaku tangkan ari Aku. Enti Aku madahka orang ke jai nya deka mati, tang nuan enda meri jaku tangkan nya ngagai iya lalu ngasuh iya ngubah ulah diri ngambika iya ulih ngidupka nyawa diri, orang ke jai nya deka mati ketegal dosa iya empu, tang Aku deka nekanka nuan betanggungjawapka pemati iya. Enti nuan meri jaku tangkan nya ngagai orang ke jai, lalu iya enda badu bedosa, iya deka mati ketegal dosa iya empu, tang nuan empu deka nyelamatka nyawa diri. “Enti orang ke manah belabuh ngereja penyai, lalu Aku ngengkahka iya ba endur ti tau ngasuh bebadi, iya deka mati, enti nuan enda meri jaku tangkan ngagai iya. Iya deka mati ketegal dosa iya empu, lalu Aku enggai ngingatka utai ti manah ti udah dikereja iya, tang Aku deka nekanka nuan betanggungjawapka pemati iya. Enti nuan meri jaku tangkan ngagai orang ke manah ngambika iya enda bedosa, lalu iya mendingka nuan lalu enda bedosa, iya deka mengkang idup, lalu nuan empu deka mega idup. Aku ngasaika kuasa TUHAN bisi ba aku, lalu aku ninga Iya nyebut ngagai aku, “Angkat nuan lalu mansang ngagai lebak. Aku deka bejaku enggau nuan dia.” Nya alai aku lalu mansang ngagai lebak nya, lalu dia aku meda mulia TUHAN, baka ke udah dipeda aku ba tebing Sungai Kebar. Aku lalu nyungkurka diri ke tanah, tang Roh Allah Taala tama ngagai aku lalu ngangkatka aku bediri. Ku TUHAN bejaku ngagai aku, “Pulai nuan ke rumah, lalu tutup diri empu dalam rumah nya. Anak mensia, nuan deka ditanchang ngena tali, lalu nuan enda ulih pansut betemu enggau orang. Aku deka nagang dilah nuan engkebut, ngambika nuan enda ulih meri jaku tangkan ngagai orang ke angkat ngelaban tu. Udah nya, lebuh Aku bejaku ngagai nuan baru, lalu ngasuh nuan ulih bejaku baru, nuan deka madahka ngagai sida utai ti disebut Aku TUHAN Allah Taala. Sekeda sida deka mending, tang sekeda enggai ibuhka nuan, laban sida tu endang bansa orang ke angkat ngelaban.” Ku Allah Taala bejaku, “Anak mensia, ambi sigi batu bata, engkahka iya di mua nuan, lalu gaga kar nengeri Jerusalem ba batu bata nya. Udah nya, kena ngambarka nengeri nya dikelulung, gaga parit ti dalam, kuta tanah, kem, enggau kayu ti dikena ngentung pintu kuta, ngelingi nengeri nya. Ambi siti kali besi, lalu engkahka iya baka kuta, kena nyeraraka nuan ari nengeri nya. Kuingka mua nuan tunga ngagai nengeri nya. Nengeri nya dikelulung, lalu nuan empu ke ngelulung nengeri nya. Tu deka nyadi siti tanda ke orang Israel. Lebuh nuan udah tembu ngereja nya, nuan bekalih ke kanan, lalu natka pemerinsa empat puluh hari ketegal penyalah orang Judah, sehari ke genap taun sida merinsa natka diri diukum. “Perening enggau bendar ngagai Jerusalem ti dikelulung munsuh. Kedarka jari nuan tunga ngagai nengeri nya, lalu benabi ngelaban nengeri nya. Aku deka nanchang nuan ngambika nuan enda ulih bekalih, datai ke nengeri nya udah tembu dikelulung. “Diatu ambi gandum, barli, kachang, retak, jawa enggau tepung gandum ti alus. Champurka semua utai nya, lalu gaga iya nyadi roti. Nya meh utai ti deka diempa nuan dalam kandang tiga ratus semilan puluh hari nuan ti gali singit ke kiba. Nuan tau makai dua ratus tiga puluh gram roti sehari, lalu roti nya enda tau enda mega chukup ke hari siti. Nuan deka mega bisi mimit ai irup, dua changkir sehari. Nuan deka menyadika api ngena tai mensia ti udah rangkai, manggang roti ba api nya, lalu makai roti nya di mua semua orang mayuh.” Ku TUHAN bejaku, “Tu ngambarka chara orang Israel deka makai pemakai ti enda disagi Adat, lebuh Aku ngachirka sida ngagai menua bukai.” Tang ku aku nyaut, “Anang baka nya, TUHAN Allah Taala! Aku nadai udah kala ngamahka diri. Kenyau ari aku agi mit, aku nadai udah kala makai dagin ari bangkai jelu ti enda temu pemati, tauka dagin ari jelu ti mati laban jelu babas. Aku nadai udah kala makai pemakai ti dikumbai enda tuchi.” Nya alai Allah Taala lalu bejaku, “Barang ku jaku. Aku deka nejuka nuan menyadika api ngena tai sapi, ukai ngena tai mensia, lalu nuan tau manggang roti nuan ba atas nya.” Lalu ku Allah Taala nambahka jaku Iya, “Anak mensia, Aku deka nagang orang mai pemakai ngagai Jerusalem. Orang dia deka balat tusah, sereta irau ati lebuh sida nakar pemakai ti diempa sida, enggau nakar ai irup sida. Roti enggau ai sida deka abis. Sida deka tusah ati, lalu sida deka mati laban dosa sida.” Ku TUHAN bejaku, “Anak mensia, ambi pedang ti tajam, lalu kukur ragum enggau semua buk nuan. Udah nya timbang buk nya, lalu bagi buk nya ngagai tiga bagi. Tunu sebagi ari buk nya dalam nengeri lebuh pengawa ngelulung nya udah tembu. Ambi sebagi ti bukai, lalu pepat iya ngena pedang nuan lebuh nuan bejalai di luar nengeri nya. Taburka sebagi ti bukai ngagai angin, lalu Aku deka begagaika lalu mantap sida ngena pedang. Taruh dua tiga lambar buk, lalu bungkus sida dalam lepi gari nuan. Udah nya pansutka dua tiga lambar baru, lalu buai ngagai api ngambika angus. Api ari nya deka nyerarai ngagai semua bansa orang Israel.” Ku TUHAN Allah Taala bejaku, “Perening ngagai Jerusalem. Aku ngengkahka iya ba tengah-tengah dunya, dikelingi semua bansa bukai. Tang Jerusalem angkat ngelaban jaku Aku, lalu ngayanka diri lebih jai agi ari bansa bukai, lebih agi enda ngasi ari menua bukai ti ngelingi iya. Jerusalem udah nulak jaku Aku lalu enggai nitihka Adat Aku. Nya alai, Jerusalem, diatu pendingka utai ti disebut Aku TUHAN Allah Taala. Nuan udah balat agi ngenusahka Aku ari bansa ti ngelingi nuan, laban nuan enda ngasika Adat Aku, enda nitihka pesan Aku. Nuan udah nitihka adat asal bansa bukai. Nya alai Aku TUHAN Allah Taala, madahka ngagai nuan, Aku tu munsuh nuan. Aku deka ngukum nuan di mua semua bansa. Ketegal nuan udah ngereja utai ti dipegedika Aku, Aku deka ngukum Jerusalem baka ke nadai udah kala dikereja Aku suba tauka jemah ila. Ketegal nya, bala apai indai di Jerusalem deka bepakaika anak sida, lalu bala anak deka bepakaika apai indai sida. Aku deka ngukum nuan, lalu ngachirka sebarang orang bukai ti agi idup ngagai semua endur. “Nya alai, laban Aku endang Allah Taala ti idup - tu jaku TUHAN Allah Taala - laban nuan udah ngamahka Rumah Aku ngena semua utai ti jai sereta dipegedika Aku, Aku deka munuh nuan enggau nadai pengasih. Sebagi ari tiga bagi bala nembiak nuan deka mati laban penyakit enggau laban lapar pungkang dalam nengeri tu. Sebagi ari tiga bagi deka dibunuh ngena pedang di luar nengeri tu, lalu Aku deka ngerabuka sebagi ari tiga bagi ti tinggal ngagai angin, lalu Aku deka begagaika sida lalu mantap sida ngena pedang. “Nuan deka ngasaika semua kuasa pengeringat enggau pemedis ati Aku, datai ke Aku nyau puas ati. Lebuh semua utai tu nyadi, nya baru nuan deka arapka Aku ti TUHAN udah bejaku enggau nuan ketegal Aku ringat ngagai nuan laban nuan udah enda tetap ati ngagai Aku. Semua orang ari mayuh bengkah bansa ti ngelingi nuan, ti mansa nuan, deka enchebirka mulut ngeleseka nuan, lalu enggai datai semak nuan. “Lebuh Aku ringat pedis ati ngagai nuan lalu ngukum nuan, semua bansa ti ngelingi nuan deka takut. Sida deka kejika nuan, lalu beduan nuan. Aku deka nutup penatai pemakai nuan, lalu nejuka nuan keberuran. Nuan deka ngasaika pemedis lapar baka laja ti tajam ti ditimbakka kena munuh nuan. Aku deka ngasuh lapar pungkang enggau jelu babas munuh bala anak nuan, lalu ngasuh penyakit, pengachau, enggau perang munuh nuan. Aku ti TUHAN udah bejaku.” Ku TUHAN bejaku ngagai aku, “Anak mensia, perening tunga ngagai bukit ti di menua Israel, lalu beri pesan Aku ngagai sida. Asuh bukit ti di menua Israel ningaka jaku TUHAN Allah Taala, ningaka utai ti disebut Aku TUHAN Allah Taala ngagai bukit, munggu, darung, enggau lebak: Aku deka ngasuh pedang ngerusak endur alai orang mayuh besembahka engkeramba. Semua alta deka diruntuhka lalu alta ti alai nunu menyan deka dirubuh. Semua orang ke diau dia deka dibunuh magang di mua engkeramba sida. Aku deka ngachirka bangkai orang Israel. Aku deka ngachirka tulang sida ngelingi alta nya. Semua nengeri di menua Israel deka dirusak magang, ngambika semua alta enggau engkeramba sida dipalu redak. Alta alai sida ke nunu menyan deka dipechahka, lalu semua utai ti udah digaga sida deka lesap magang. Orang deka dibunuh di semua endur, lalu sida ke agi idup deka ngaku Aku tu TUHAN. “Aku deka nejuka sekeda sida enda dibunuh, lalu diachirka ngagai mayuh bengkah bansa, alai sida deka dibuai. Dia sida deka ingatka Aku lalu nemu Aku udah ngukum sida, lalu ngemaluka sida, laban sida enda tetap ati lalu udah ninggalka Aku, lalu sida rindu agi ke engkeramba ari ti rinduka Aku. Lalu sida deka begedika diri empu ketegal penyai enggau utai ti kamah ti udah dikereja sida. Sida deka nemu Aku endang TUHAN, lalu jaku tangkan ti diberi Aku nya ukai jaku ngapa.” Ku TUHAN Allah Taala bejaku, “Pulaska jari! Enditka kaki nuan! Nyabak sinu ati ketegal semua penyai, semua utai ti dipegedika, ti udah dikereja orang Israel. Sida deka mati beperang, tauka mati keberuran, tauka mati laban penyakit. Sida ke jauh deka sakit lalu mati. Sida ke semak, deka mati beperang. Sida ke agi idup deka mati keberuran. Sida deka ngasaika semua kuasa pengeringat Aku. Bangkai sida deka ngachir begulai enggau bala engkeramba, enggau ngelingi alta, ngachir ba sebelah munggu ti tinggi, ba tuchung semua bukit, di baruh semua pun kayu enggau semua pun kayu oak ti besai, ba semua endur ti udah alai sida nunu piring ke engkeramba sida. Udah nya baru semua orang deka nemu Aku endang TUHAN. Sigi amat, Aku deka ngunjurka jari Aku lalu ngerusak menua sida. Aku deka ngaga menua nya nyadi menua ti kusi, berengkah ari menua puang ti di selatan nyentuk ngagai nengeri Riplah di utara. Nadai siti menua ti alai orang Israel diau dikelaungka. Nya baru semua orang deka nemu Aku endang TUHAN.” Ku TUHAN bejaku ngagai aku, “Anak mensia, tu utai ti disebut Aku TUHAN Allah Taala ngagai menua Israel: Tu meh pengujung ke semua menua Israel! “Israel, pengujung nuan udah datai. Nuan deka ngasaika pengeringat Aku, laban Aku ngakim nuan ketegal utai ti udah dikereja nuan. Aku deka malas semua ulah nuan ti jai. Aku enda ngalau nuan, tauka kasihka nuan. Aku deka ngukum nuan ketegal utai ti jai ti udah dikereja nuan, ngambika nuan nemu Aku endang TUHAN.” Tu utai ti disebut TUHAN Allah Taala: “Penusah ti besai deka betangkan-tangkan ninggang nuan. Semua utai udah abis magang. Tu meh pengujung iya. Nuan tu abis. Kita ti diau di menua tu deka abis magang. Maya nyau semak alai nadai agi pengerami ba endur alai besembiang ba sebelah bukit, tang semina penyarut aja. Enda lama da agi kita deka ngasaika semua kuasa pengeringat Aku. Aku ngakim kita ketegal utai ti udah dikereja kita, lalu Aku deka malas semua ulah kita ke jai. Aku enggai ngalau kita, tauka kasihka kita. Aku deka ngukum kita ketegal utai ti jai ti udah dikereja kita, ngambika kita nemu Aku endang TUHAN, lalu Aku tu meh Iya ti ngukum kita.” Hari penusah ti besai nyau deka datai. Pengachau balat amat nyadi. Penyumbung balat amat nyadinyau nyadi. Pengachau ngasuh penyai balat agi nyadi. Nadai siti utai sida agi tinggal, nemuka nya pengaya, pemanah gaya, tauka mulia. Maya nyau deka datai. Hari nyau semak alai pengawa ti bebeli enggau bejual nadai reti agi, laban ukum Allah Taala deka ninggang semua mensia. Nadai orang dagang sempat mulaika ungkus diri, laban Allah Taala ringat ngagai semua mensia. Sida ke jai enda ulih idup. Terumpit disepu, lalu semua mensia sedia magang. Tang nadai orang mansang beperang, laban Allah Taala ringat ngagai semua mensia. Orang bamuk ba sebelah jalai raya, lalu orang ke diau di rumah keberuran lalu kena laban penyakit. Barang sapa pansut ari nengeri deka mati beperang, lalu semua orang ke diau di nengeri deka kena laban penyakit sereta keberuran. Sekeda orang ulih ngerarika diri ngagai bukit baka burung achang ti terebai ari lebak. Semua orang nya deka bedemuh ketegal dosa sida. Semua orang nya lembut tulang, lalu patung sida getar-getar. Sida deka ngerasukka kain guni, lalu sida deka getar-getar. Pala sida deka dikukur, lalu semua sida deka dipechat magang. Sida deka nikauka emas enggau pirak sida ngagai jalai raya baka ke muai uras, laban pirak enggau emas sida enda ulih ngelepaska sida lebuh TUHAN mubuhka pengeringat Iya. Sida enda ulih ngena utai nya ngemuaska pengingin sida, tauka ngasuh perut diri kenyang. Emas enggau pirak nya ti udah mai sida bedosa. Dulu menya sida temegahka batu ti berega, tang sida udah ngena utai nya begagaka engkeramba. Nya kebuah TUHAN udah ngasuh sida begedika pengaya diri. Ku TUHAN bejaku, “Aku deka ngasuh orang kampar ngerumpak sida, lalu orang ke ngelanggar adat deka ngerampas semua pengaya sida, lalu ngamahka utai nya. Aku enggai ibuh lebuh sida ngamahka Rumah Sembiang ti dikesayauka Aku, lebuh bala perumpak tama lalu ngamahka iya. “Semua utai nyau charut. Orang di menua nya mayuh amat bebunuhka pangan diri, lalu nengeri penuh laban pengachau. Aku deka mai mayuh bengkah bansa ti pemadu jai kitu, lalu ngemendarka sida bempu rumah kita. Bala kita ke lelaki ke pemadu kering deka lemi semengat lebuh Aku ngasuh mayuh bengkah bansa ngamahka endur ti alai kita besembah. Kita deka tusah ati. Kita deka ngiga pemaik tang nadai tetemuka iya. Penusah ti besai deka datai betangkan-tangkan, lalu berita ti jai deka datai enda putus-putus. Kita deka minta bala nabi mandangka utai ti deka nyadi. Bala imam nadai utai diajar ngagai orang mayuh, lalu bala tuai nadai jaku lalau diberi. Raja deka ngulit; anak raja deka nadai agi utai diadang, lalu orang mayuh deka getar-getar takut. Aku deka ngukum kita ketegal semua utai ti udah dikereja kita, lalu Aku deka ngakim kita baka kita ke udah ngakim orang bukai. Tu deka nunjukka Aku tu TUHAN.” Kena lima hari bulan ti keenam, dalam taun ti keenam bala kami udah dibuai ngagai menua Babilon, dia bala tuai orang ke dibuai ari menua Judah bisi duduk enggau aku dalam rumah aku. Kuasa TUHAN Allah Taala lalu ngenyit nurun atas aku. Aku engkadah lalu meda utai ti baka gamal mensia ti beapi-api. Ari punggung ke baruh, tubuh iya baka api, lalu ari punggung ke atas iya beperenching baka temaga ti udah dipugar. Iya ngulurka utai ti baka jari, lalu nangkap aku ba buk, lalu dalam genera nya, Roh Allah Taala ngangkatka aku ke langit, lalu mai aku ngagai Jerusalem. Iya mai aku ngagai pintu utara Rumah Sembiang, alai orang udah ngengkahka siku engkeramba ti dipegedika Allah Taala. Dia aku tepedaka siti penampak ti beperenching, ti nunjukka Allah Taala ke disembah orang Israel bisi dia, baka ke udah dipeda aku lebuh aku ba tebing Sungai Kebar. Ku Allah Taala bejaku ngagai aku, “Anak mensia, palik tunga ke utara.” Aku malik, lalu dia ba semak alta ti ngimbai penama ngagai pintu besai nya aku tepedaka engkeramba ti balat ngeringatka Allah Taala. Ku Allah Taala bejaku ngagai aku, “Anak mensia, kati nuan bisi meda utai ti nyadi? Peda nuan utai ti jai ti dikereja orang Israel ditu, ti ngasuh Aku jauh-sejauh ngejangka Diri ari endur Aku ti kudus. Nuan deka meda utai ti lebih agi ngemaluka, ari ti dipeda nuan ditu.” Iya mai aku ngagai penama ti nuju ngagai tengah laman ti di luar, lalu nunjukka siti lubang ba dinding. Ku Iya bejaku, “Anak mensia, bumbuska dinding kuta tu ba senentang tu.” Aku lalu mumbuska kuta nya, lalu tetemuka siti pintu. Ku Iya bejaku enggau aku, “Alai nuan tama ke dalam lalu peda nuan penyai utai ti dikereja sida dia.” Aku tama, lalu bepedaka utai dia. Dinding ba endur nya nyau penuh laban gambar ular enggau jelu bukai ti enda tuchi, enggau utai bukai ti disembah orang Israel. Tujuh puluh iku tuai orang Israel bisi dia, nyengkaum Jasaniah anak Sapan. Genap iku sida bela megai pekekas ti dikena nunu menyan, lalu asap pansut ari menyan nya. Allah Taala lalu nanya aku, “Anak mensia, kati nuan bisi meda utai ti dikereja bala tuai orang Israel ti dipelamka sida? Semua sida nya besembah dalam bilik ti penuh laban engkeramba, laban kenu ku sida, ‘ TUHAN enda meda kitai! Iya udah ninggalka menua tu.’ ” Udah nya TUHAN lalu bejaku ngagai aku, “Nuan deka meda sida ngereja utai ti lebih jai agi ari nya.” Nya alai TUHAN lalu mai aku ngagai pintu utara Rumah Sembiang, lalu nunjukka ngagai aku bala indu ke nyabakka pemati petara Tamus. Ku TUHAN nanya, “Anak mensia, kati nuan bisi meda utai nya? Nuan deka meda utai ti lebih agi jai ari nya.” Iya lalu mai aku ngagai tengah laman ti dalam Rumah Sembiang. Dia ba semak mua pintu endur ti kudus, ba entara alta enggau serambi, bisi kira dua puluh lima iku lelaki. Sida udah nguingka belakang sida ngagai endur ti kudus, lalu meremi tunga ke timur, nyembah mata hari tumbuh. Ku TUHAN bejaku ngagai aku, “Anak mensia, kati nuan bisi meda nya? Orang Judah tu enda puas ati semina ngereja semua utai ti jai, ti udah dipeda nuan ditu, enggau pengawa ti ngerembaika pengachau ngagai serata menua tu. Sida mega enda tau enda datai lalu ngereja semua utai nya dalam Rumah Sembiang tu, lalu nyungkak Aku balat agi ringat. Peda nuan jalai sida ngeleseka Aku ngena jalai ti pemadu jai! Sida deka ngasaika semua kuasa pengeringat Aku. Aku enggai ngalau sida, tauka kasihka sida. Sida deka manjung besampi ngagai Aku enggau pengabis penginggar nyawa sida, tang Aku enggai mendingka sida.” Udah nya aku ninga Allah Taala ngangau enggau nyawa ti inggar, “Datai kitu, bala kita ke deka ngukum nengeri tu. Bai senyata kita.” Tekala nya enam iku orang lalu datai ari pintu utara Rumah Sembiang, mai senyata siti siku. Sama datai enggau sida bisi siku orang ke ngena kain linin, mai utai dikena nulis. Semua sida datai lalu bediri ngimbai alta temaga. Udah nya penampak mulia Allah Taala ke disembah orang Israel lalu angkat ari melikat cherub ti besayap, lalu mindah ngagai mua pintu Rumah Sembiang. TUHAN lalu ngangauka orang ke ngena kain linin, “Alai nuan bejalai nengah serata nengeri Jerusalem, lalu lekatka tanda ba kening semua orang ke tusah ketegal semua utai ti jai ti benung dikereja dalam nengeri tu.” Aku lalu ninga Allah Taala bejaku ngagai sida lelaki ti bukai, “Titihka iya bejalai nengah serata nengeri tu, lalu bunuh orang. Anang kasihka sida. Bunuh sida lelaki ke tuai umur, lelaki ke agi biak, indu ke agi biak, sida ke indu, enggau bala anak mit. Tang anang negu orang ke bisi tanda ba kening sida. Kita berengkah ari Rumah Aku tu.” Nya alai sida lalu berengkah ba bala tuai ke bediri dalam Rumah TUHAN. Ku Allah Taala bejaku ngagai sida, “Kamahka Rumah Sembiang. Isi tengah laman Rumah Sembiang enggau bangkai mensia. Kereja nya diatu!” Nya alai sida lalu belabuh bebunuhka orang dalam nengeri nya. Lebuh pengawa bebunuh nya benung nyadi, aku diau kediri-diri dia. Aku lalu nyungkurka diri ke tanah, lalu ngangau enggau nyawa ti inggar, “ TUHAN Allah Taala, nama kebuah Nuan ngemalat nya ringat ngagai Jerusalem datai ke Nuan nyau munuh semua orang ke agi tinggal di menua Israel?” Allah Taala lalu nyaut, “Orang Israel enggau orang Judah udah bedosa. Sida udah munuh orang di serata menua tu, lalu udah ngisi Jerusalem enggau pengawa ti jai. Sida ngumbai Aku ti TUHAN udah ninggalka menua sida, lalu ngumbai Aku enda meda sida. Tang Aku enggai sinuka sida. Aku deka ngereja utai ngagai sida baka ke udah dikereja sida ngagai orang bukai.” Udah nya orang ke ngena kain linin pulai lalu madahka ngagai TUHAN, “Aku udah bejalaika atur Nuan.” Aku malik ngagai kebung ti ari atas pala sida melikat cherub, lalu ari atas sida nya bisi utai ti baka kerusi diraja, ti baka batu nilam. Ku Allah Taala bejaku ngagai orang ke ngena kain linin, “Alai nuan bejalai nengah entara kaki kerita ti di baruh melikat cherub nya, lalu ambi segenggam bara api. Udah nya taburka bara api nya ngagai nengeri tu.” Aku lalu ngemataka iya mupuk. Nyadi bala melikat cherub nya benung bediri muak ari selatan Rumah Sembiang lebuh orang nya tama. Siti mua hari lalu ngisi tengah laman ti muak ari dalam. Penampak mulia TUHAN angkat ari sida melikat cherub, lalu mindah ngagai mua pintu Rumah Sembiang. Udah nya mua hari lalu ngemenuhka Rumah Sembiang, lalu tengah laman nya terang laban mulia TUHAN. Munyi kebap sayap sida melikat cherub ulih didinga ari tengah laman ti di luar, munyi nyawa Allah Taala ti Pemadu Bekuasa lebuh Iya bejaku. Lebuh TUHAN ngasuh orang ke ngena kain linin nya mai api ari entara kaki kerita ti di baruh sida melikat cherub nya, orang nya mansang lalu bediri ngimbai siti kaki kerita nya. Melikat cherub nya lalu ngunjurka jari iya ke dalam api ti ba tengah-tengah sida, ngambi bara api, lalu ngengkahka bara api nya ba jari orang ke ngena kain linin nya. Orang nya lalu ngambi bara api nya, lalu mupuk. Aku meda sida melikat cherub nya baka ke bisi utai ti baka jari mensia di baruh sayap sida. Lebuh sida mindah, sida ulih mindah ngagai sebarang tunga, enda ibuh bekuing. Semua sida mindah ngagai tunga ti dikedekaka sida, lalu enda ibuh bekuing. Tubuh, belakang, jari, sayap sida, enggau kaki kerita nya penuh laban mata. Aku ninga munyi nyawa ngangau, “Kaki kerita ti bepusin.” Tiap iku melikat cherub nya bisi empat iti mua. Mua ti terubah nya mua melikat cherub, ti kedua mua mensia, ti ketiga mua singa, lalu ti keempat mua menaul. (Bala melikat cherub nya meh sida ke udah dipeda aku ba tebing Sungai Kebar.) Lebuh sida melikat cherub nya angkat terebai lalu mindah, kaki kerita nya mindah sama enggau sida. Genap kali sida ngerembaika sayap sida deka terebai, kaki kerita nya mupuk enggau sida, tang enda bekuing. Lebuh sida melikat cherub nya ngetu, kaki kerita nya mega ngetu. Lalu lebuh sida melikat cherub nya terebai, kaki kerita nya mupuk sama enggau sida, laban roh utai ti idup nya bisi dalam kaki kerita nya. Udah nya penampak mulia TUHAN ti terang lalu angkat ari mua pintu Rumah Sembiang, lalu mindah ngagai endur ba atas sida melikat cherub nya. Sida melikat cherub nya ngerembaika sayap sida, lalu terebai ke atas ari dunya tu lebuh aku benung ngemata, lalu kaki kerita nya sama mupuk enggau sida. Sida ngetu enda lama ba pintu timur Rumah Sembiang, lalu mulia Allah Taala ke disembah orang Israel bisi ba atas sida. Sida nya utai ti idup ti udah dipeda aku di baruh Allah Taala ke disembah orang Israel ba tebing Sungai Kebar. Diatu baru aku nemu sida nya bala melikat cherub. Genap iku sida bisi empat iti mua, empat iti sayap, enggau utai ti baka jari mensia di baruh sayap sida. Mua sida nya betul-betul mua ti udah dipeda aku ba tebing Sungai Kebar. Genap iku sida nya mindah nuju ke mua. Roh Allah Taala ngangkatka aku lalu mai aku ngagai pintu timur Rumah Sembiang. Ba semak pintu nya aku tepedaka dua puluh lima iku orang, nyengkaum Jasaniah anak Asur enggau Pelatiah anak Benaiah, dua iku tuai bansa. Allah Taala lalu bejaku enggau aku, “Mensia, bala orang tu ngaga pelan ti jai, sereta meri jaku lalau ti jai dalam nengeri tu. Ku sida, ‘Enda lama da agi kitai deka berumah baru. Nengeri tu baka periuk ti dikena berapi, lalu kitai tu baka dagin dalam periuk nya, tang periuk nya nyaga kitai ari api.’ Nya alai, mensia, bejaku meh nuan ngelaban sida diatu.” Roh TUHAN lalu bekuasa ba aku, lalu TUHAN ngasuh aku meri pesan tu ngagai orang mayuh: “Kita orang Israel, Aku nemu utai ti disebut kita, enggau utai ti diperambu kita. Kita udah munuh mayuh orang di nengeri tu, datai ke jalai raya nyau penuh laban bangkai sida. “Nya alai tu utai ti disebut Aku TUHAN Allah Taala, ngagai kita. Nengeri tu endang amat periuk kena berapi, tang dagin nama nya? Dagin nya bangkai orang ke udah dibunuh kita! Tang Aku deka muai kita ari nengeri tu! Kati kita takutka pedang? Tang Aku deka ngasuh bala soldadu nyerang kita ngena pedang. Aku deka muai kita ari nengeri tu, lalu nyerahka kita ngagai orang menua bukai. Aku udah ngeletak kita diukum bunuh, lalu kita deka mati beperang dalam menua kita empu. Nya baru semua orang deka nemu Aku endang TUHAN. Nengeri tu enggai nyaga kita, enda baka periuk ti nyaga dagin ti di dalam iya. Aku deka ngukum kita di sebarang endur kita diau dalam menua Israel. Kita deka nemu aku tu endang TUHAN, lalu lebuh kita nitihka adat orang bansa bukai ke berimbai menua enggau kita, kita ngelanggar adat Aku sereta enda ngasika pesan Aku.” Lebuh aku agi benung benabi, Pelatiah rebah lalu mati. Aku lalu nyungkurka diri ke tanah, lalu ngangau enggau nyawa ti inggar, “Anang, TUHAN Allah Taala! Kati Nuan deka munuh semua orang ke agi tinggal di menua Israel?” Ku TUHAN bejaku ngagai aku, “Anak mensia, orang ke diau di Jerusalem berandauka pasal nuan, enggau pasal bansa nuan ti udah kena buai ngagai menua bukai. Ku sida bejaku, ‘Orang ke udah kena buai kelalu jauh alai diau lalu enda ulih nyembah TUHAN. TUHAN udah meri menua tu nyadika pesaka kitai.’ “Nya alai padahka ngagai orang ke sama kena buai baka nuan empu, utai ti disebut Aku. Aku tu ti udah ngasuh sida diau di menua ti jauh, lalu ngachirka sida ngagai menua bukai. Tang taja pia, ba maya ti diatu Aku deka begulai enggau sida di menua ti udah digagai sida. “Nya alai padahka ngagai sida utai ti disebut Aku TUHAN Allah Taala. Aku deka ngempuruka sida ari mayuh bengkah menua ti udah alai Aku ngachirka sida, lalu Aku deka meri menua Israel tu pulai baru ngagai sida. Lebuh sida pulai baru ngagai menua tu, sida enda tau enda muai semua engkeramba ti kamah, ti jai, ti ditemu sida. Aku deka meri sida ati ti baru, enggau runding ti baru. Aku deka muai ati sida ke keras baka batu, lalu meri sida ati ti ngasi. Nya baru sida deka nitihka Adat Aku lalu ngasika jaku Aku enggau ati ti tetap. Sida deka nyadi nembiak Aku, lalu Aku deka nyadi Allah Taala sida. Tang Aku deka ngukum orang ke rindu nyembah engkeramba ti kamah sereta jai. Aku deka ngukum sida ketegal utai ti udah dikereja sida.” TUHAN Allah Taala udah bejaku. Sida melikat cherub lalu belabuh terebai, lalu kaki kerita nya mupuk sama enggau sida. Penampak mulia Allah Taala ke disembah orang Israel beperenching ba atas sida. Udah nya perenching mulia Allah Taala nya angkat ari nengeri nya, lalu mindah ngagai bukit ti di timur nengeri nya. Dalam genera nya, Roh Allah Taala ngangkatka aku, lalu mai aku pulai baru ngagai orang ke udah dibuai ngagai menua Babilon. Udah nya genera nya lalu ayas-seayas lalu lesap, lalu aku madahka ngagai semua orang ke udah kena buai ngagai menua bukai, semua utai ti udah diayanka TUHAN ngagai aku. Ku TUHAN bejaku ngagai aku, “Anak mensia, nuan diau begulai enggau orang ke seruran angkat ngelaban, ke bisi mata kena meda, tang enda meda, ke bisi pending, tang enda ninga, laban sida nya orang ke seruran angkat ngelaban. “Nya alai, anak mensia, sikap gari nuan baka orang ke tasah, lalu mupuk sebedau hari malam. Awakka semua orang meda nuan mupuk lalu mansang ngagai endur bukai. Nyangka ukur orang ke angkat ngelaban nya ulih meda nuan. Lebuh hari agi siang, sikap gari ti deka dibai nuan, ngambika sida ulih meda nuan, lalu udah nya awakka sida ngemataka nuan mupuk lebuh lemai hari, indah-indah baka orang ke dibuai ngagai menua Babilon. Lebuh sida benung ngemataka nuan, bumbuska dinding rumah nuan, lalu bai tungkus gari nuan nengah lubang nya. Awakka sida meda nuan manggaika tungkus gari nuan nya ba bau nuan, lalu meda nuan bejalai nengah petang bepampul mata, ngambika nuan enda ulih meda tunga nuan bejalai. Utai ti dikereja nuan nya deka nyadika jaku tangkan ke orang Israel.” Aku lalu ngereja utai ti diasuh TUHAN. Ba hari nya aku nungkus gari aku baka orang ke tasah, lalu lemai nya, lebuh hari nyau deka petang, aku lalu ngerumbak lubang ba dinding ngena jari aku, lalu pansut. Lebuh semua orang benung ngemataka aku, aku manggaika tungkus gari aku ba bau aku, lalu mupuk. Pagi hari siti TUHAN bejaku ngagai aku. Ku Iya, “Anak mensia, lebuh orang Israel ke angkat ngelaban nya nanyaka utai ti dikereja nuan, padahka ngagai sida utai ti disebut Aku TUHAN Allah Taala ngagai sida. Pesan tu diungkupka anak raja ke megai perintah di Jerusalem, enggau ke semua orang ke diau dia. Padahka ngagai sida, utai ti udah dikereja nuan nya nandaka utai ti deka nyadi ba sida - sida deka tasah sereta nyadi orang tangkap. Anak raja ke megai sida deka ngesan tungkus gari iya empu dalam petang, lalu rari nengah lubang ti dikerumbak sida ke iya ba dinding kuta. Iya deka mampul mata diri, lalu enda ulih meda tunga iya bejalai. Tang Aku deka nan pukat kena ngipa iya. Udah nya Aku deka mai iya ngagai nengeri Babilon, alai iya deka mati, tang iya enda meda nengeri nya. Aku deka ngachirka ngagai semua endur semua bala orang ke gawa dalam istana iya, bala penyanding penemu iya, enggau bala orang ke nyaga iya, lalu orang deka ngiga sida lalu munuh sida. “Lebuh Aku ngachirka sida ba sebelah bansa bukai, enggau ngagai menua bukai, nya baru sida deka nemu Aku endang TUHAN. Aku deka nejuka sekeda sida idup lalu enda mati beperang, enda mati keberuran, enda mati sakit, ngambika lebuh sida di menua bukai, sida deka nemu penyai ti udah dikereja sida, lalu ngaku Aku tu TUHAN sida.” Ku TUHAN bejaku ngagai aku, “Anak mensia, awakka nuan getar-getar takut lebuh nuan makai, lalu getar-getar takut lebuh nuan ngirup. Padahka ngagai semua orang Israel, tu pesan TUHAN Allah Taala ke orang Jerusalem ti agi mengkang diau di menua sida: Sida deka getar-getar takut lebuh sida makai, lalu getar-getar takut lebuh sida ngirup. Semua utai deka dirampas magang ari menua sida, laban semua orang ke diau dia endang nadai beradat magang. Nengeri ti penuh laban mensia diatu deka dirusak, lalu menua tu deka nyadi menua puang. Nya baru sida deka nemu Aku endang TUHAN.” Ku TUHAN bejaku ngagai aku, “Anak mensia, nama kebuah orang Israel besebutka jaku-dalam ti munyi tu: ‘Timpuh udah ngelebus, tang utai ti dipadahka deka nyadi, nadai nyadi siti’? Padahka ngagai sida diatu utai ti disebut Aku TUHAN Allah Taala pasal pekara nya. Aku deka madamka jaku-dalam nya. Jaku-dalam nya enda agi disebut orang di menua Israel. Maya endang udah datai, lalu utai ti dipadahka deka nyadi, deka dikamatka! “Genera ti ditempaka ngapa enggau jaku benabi ti nesatka mensia, nadai agi ba orang Israel. Aku ti TUHAN deka bejaku ngagai sida, lalu utai ti disebut Aku deka dikamatka. Aku enda betangguh agi. Lebuh kita ke angkat ngelaban tu agi mengkang idup, Aku deka ngereja utai ti udah dipadahka Aku ngagai kita. Aku udah bejaku,” ku TUHAN Allah Taala bejaku. Ku TUHAN bejaku ngagai aku, “Anak mensia, orang Israel ngumbai genera enggau jaku ti benabi ti disebut nuan nya pasal utai ti deka nyadi jauh jemah ila. Nya alai padahka ngagai sida, utai ti disebut Aku TUHAN Allah Taala: Aku enda betangguh agi. Utai ti udah disebut Aku, deka dikamatka. Aku TUHAN Allah Taala udah bejaku!” Ku TUHAN bejaku ngagai aku, “Anak mensia, nuan enda tau enda bejaku ngelaban bala nabi menua Israel ke benabi ngena penemu sida empu. Asuh sida mendingka jaku TUHAN.” Tu utai ti disebut TUHAN Allah Taala: “Tulah meh sida nabi ke beli! Sida bulih penemu ari runding sida empu, lalu ngaga genera ke diri empu. Orang Israel, bala nabi kita nadai guna, baka bala munsang ti diau ba sebelah tembawai nengeri. Sida enda nyaga endur alai kuta ti udah runtuh, lalu sida enda mega ngaga kuta nya baru. Nya alai menua Israel enda ulih dijaga lebuh perang nyadi ba Hari TUHAN. Genera sida bula, lalu jaku tujum sida mega bula. Sida ngumbai diri madahka pesan Aku, tang Aku nadai ngirumka sida. Tang taja pia, sida ngarapka jaku diri dikamatka! Aku madahka ngagai sida: genera ti dipeda kita nya pelesu magang, lalu jaku tujum kita nya jaku ti bula. Kita madahka jaku ti disebut kita nya jaku Aku, tang Aku nadai udah kala bejaku ngagai kita!” Nya alai TUHAN Allah Taala nyebut ngagai sida, “Jaku kita bula, lalu genera kita pelesu. Aku ngelaban kita. Aku deka ngukum kita nabi ke nusui genera ti pelesu, lalu bejaku nesatka orang. Kita tentu nadai dia lebuh bala nembiak Aku begempuru mutuska penemu ila. Nama kita enda dituliska dalam list nama orang Israel ti bukai. Kita enda agi pulai ngagai menua kita empu. Nya baru kita deka nemu Aku endang TUHAN Allah Taala. “Sida nabi nya nesatka bala nembiak Aku lebuh sida madahka semua utai deka nyadi menyana magang. Tang nadai utai nyadi menyana! Bala nembiak Aku udah nirika kuta ngena batu. Udah nya bala nabi datai lalu ngechat kuta nya ngena kapu. Padahka ngagai sida nabi, kuta sida deka runtuh. Aku deka ngasuh hari balat ujan. Ujan batu deka ninggang kuta nya, lalu ribut ti balat deka mangka ngagai iya. Kuta nya deka runtuh, lalu semua orang deka nanya ngagai nuan nama guna kapu ti dikena ngechat dinding kuta nya.” Nya alai tu utai ti disebut TUHAN Allah Taala: “Aku ringat, lalu Aku deka ngasuh ribut biaubalai, ujan ti lebat, enggau ujan batu ngerusak dinding kuta nya. Aku deka ngeruntuh lalu ngeredakka dinding kuta ti udah dichat burak, datai ke batu pemun iya ayan. Kita deka mati ditinggang dinding kuta nya rebah. Nya baru semua orang deka nemu Aku endang TUHAN. “Dinding kuta nya enggau sida ke udah ngechat iya deka ngasaika pengeringat Aku. Udah nya baru Aku deka madahka ngagai kita dinding kuta nya enggau orang ke ngechat iya, sama nadai agi, iya nya sida nabi ke madahka semua utai di Jerusalem deka nyadi menyana magang, taja pen utai dia enda nyadi menyana!” TUHAN Allah Taala udah bejaku. Ku TUHAN bejaku, “Anak mensia, perening ngagai sida indu ke begulai enggau kita, ti ngeluluka diri nemu benabika pasal utai ti deka nyadi jemah ila. Bejaku nuan ngelaban sida lalu padahka jaku ti disebut TUHAN Allah Taala ngagai sida: “Tulah meh kita ti indu ke begagaka gelang keramat ke semua orang, lalu kita ngaga tungguk keramat kena orang nudung pala ngambika sida bekuasa atas pengidup orang bukai. Kita keran deka bekuasa atas pengidup enggau pemati bala nembiak Aku, lalu kita ngena kuasa nya ngiga penguntung ke kita empu. Kita enda bebasaka Aku di mua bala nembiak Aku laban kita keran deka ngulihka segenggam barli enggau roti. Kita munuh orang ke enda patut diukum bunuh, lalu ngidupka orang ke enda patut diidupka. Kita madahka utai ti bula ngagai bala nembiak Aku, lalu sida arapka kita.” Nya alai tu utai ti disebut TUHAN Allah Taala: “Aku begedika gelang keramat kita ke dikena kita ngulihka kuasa atas pengidup enggau pemati. Aku deka ngeruntun gelang keramat nya ari lengan kita, lalu ngelepaska orang ke dikuasa kita. Aku deka ngeruntun tudung pala kita, lalu ngelepaska bala nembiak Aku ari kuasa kita belama iya. Nya baru kita deka nemu Aku endang TUHAN. “Ngena pemula kita, kita ngelemika semengat orang ke badas, orang ke enda diasuh Aku pedis. Kita nagang orang ke jai ngelengkaka penyai lalu ngidupka nyawa diri. Nya alai, kita diatu nadai agi meda genera ti pelesu, nadai agi nyebut jaku tujum ti pelesu. Aku deka ngelepaska bala nembiak Aku ari jari kita. Nya baru kita deka nemu Aku endang TUHAN.” Sekeda bala tuai orang Israel datai ngagai aku lalu nanyaka pasal peneka TUHAN: Udah nya TUHAN lalu bejaku ngagai aku. Ku Iya, “Anak mensia, orang tu udah nyerahka ati sida ngagai engkeramba, lalu nejuka engkeramba mai sida ngagai dosa. Kati nuan ngumbai Aku deka nyaut sida? “Bejaku ngagai sida diatu, lalu padahka ngagai sida utai ti disebut Aku TUHAN Allah Taala: Genap iku kita orang Israel ti udah nyerahka ati diri ngagai engkeramba, lalu nejuka sida mai kita ngagai dosa, lalu udah nya betanya ngagai nabi, deka disaut Aku magang - saut ti endang patut diberi ngagai bala engkeramba kita! Semua engkeramba nya udah ngelimpangka orang Israel ari Aku, tang ngena saut ari Aku, Aku ngarapka Diri ulih ngasuh sida taluk ngagai Aku baru. “Nya alai padahka ngagai orang Israel utai ti disebut Aku TUHAN Allah Taala: Kita enda tau enda nesal ati, lalu ninggalka engkeramba kita ke jai nya. “Genap kali kita orang Israel tauka orang bukai ti diau begulai enggau orang Israel, ngelengkaka Aku, lalu nyembah engkeramba, lalu udah nya betanya ngagai nabi, Aku ti TUHAN, deka nyaut kita! Aku deka ngelaban kita. Aku deka ngaga kita nyadika teladan kena ngajar orang bukai. Aku deka muai kita ari bala nembiak Aku, ngambika semua kita deka nemu Aku endang TUHAN. “Enti nabi kena tipu lalu meri saut ti bula, sida ngereja nya laban Aku ti TUHAN udah nipu sida, lalu Aku deka muai sida ari bansa orang Israel. Nabi enggau orang ke betanyaka utai ngagai sida, deka sebaka ukum. Aku deka ngereja tu kena nagang orang Israel ninggalka Aku, lalu ngamahka diri ngena dosa. Sida deka nyadi nembiak Aku, lalu Aku deka nyadi Allah Taala sida.” TUHAN Allah Taala udah bejaku. Ku TUHAN bejaku ngagai aku, “Anak mensia, enti menua bedosa, lalu enda tetap ati ngagai Aku, Aku deka ngunjurka jari Aku lalu ngerusak penatai pemakai sida. Aku deka ngasuh lapar pungkang nyadi, lalu munuh mensia enggau jelu. Enti sema Noah, Danel, enggau Jop bisi dia, pengelurus sida semina ulih ngidupka nyawa sida empu aja.” TUHAN Allah Taala udah bejaku. “Enti sema Aku ngasuh jelu babas munuh orang di nengeri nya, lalu ngasuh menua nya enda ulih ditengah mensia, lalu enti sema orang tiga iku nya diau dia - seagi-agi Aku tu TUHAN Allah Taala, Allah Taala ti idup - indah sida nya deh enda ulih ngidupka nyawa anak sida empu. Sida semina ulih ngidupka nyawa diri empu aja, lalu menua nya deka nyadi menua puang. “Enti sema Aku ngasuh perang nyadi di menua nya, lalu ngasuh senyata ti bisa ngeluska semua mensia enggau jelu, lalu enti sema orang tiga iku nya diau dia - seagi-agi Aku tu TUHAN Allah Taala, Allah Taala ti idup - sida tentu enda mega ulih ngidupka nyawa bala anak sida, tang semina ulih ngidupka nyawa sida empu aja. “Enti sema Aku ngasuh penyakit berampit di menua nya, lalu Aku ringat lalu ngambi mayuh nyawa, bebunuhka mensia enggau jelu, lalu enti sema Noah, Danel, enggau Jop bisi dia - seagi-agi Aku tu TUHAN Allah Taala, Allah Taala ti idup - sida tentu enda ulih ngidupka nyawa anak sida empu. Pengelurus sida semina ulih ngidupka nyawa sida empu aja.” Tu utai ti disebut TUHAN Allah Taala: “Aku deka ngasuh empat bengkah ukum ti pemadu jai, iya nya perang, lapar pungkang, jelu babas, enggau penyakit ngerusak mensia enggau jelu. Enti sida agi idup lalu ulih ngidupka nyawa bala anak sida, peda gamal sida lebuh sida datai ngagai nuan. Peda nuan gaya penyai sida, ngambika nuan nemu, ukum ti diasuh Aku ninggang Jerusalem nya ukum ti endang patut diberi. Nya baru nuan deka nemu Aku endang bisi kebuah ngereja semua utai nya.” TUHAN Allah Taala udah bejaku. Ku TUHAN bejaku ngagai aku, “Anak mensia, baka ni ku batang anggur tau dibandingka enggau batang kayu? Nama pemanah dan anggur enti dibandingka enggau kayu ti dalam utan? Kati nuan ulih ngena dan anggur begagaka sebarang utai? Kati nuan ulih ngaga pengait ari iya kena ngantung utai? Kati utai nya semina manah kena menyadika api? Lalu lebuh puting iya udah diempa api, lalu batang ba tengah angus, kati nuan ulih ngaga utai ari nya? Sebedau iya ditunu, iya endang nadai guna. Lebuh iya udah diempa api lalu angus, iya lebih agi nadai guna.” Nya alai, tu utai ti disebut TUHAN Allah Taala: “Baka batang anggur ti diambi ari babas nyadika kayu api, baka nya meh Aku deka ngambi orang ke diau di Jerusalem lalu ngukum sida. Sida udah ulih ngerarika diri ari api, tang diatu api deka nganguska sida. Lebuh Aku ngukum sida, nya baru nuan deka nemu Aku endang TUHAN. Sida udah enda tetap ati ngagai Aku, nya kebuah Aku deka ngasuh menua tu nyadi menua puang.” TUHAN Allah Taala udah bejaku. Ku TUHAN bejaku baru ngagai aku, “Anak mensia, padahka ngagai Jerusalem penyai iya, lalu padahka ngagai iya utai ti disebut TUHAN Allah Taala ngagai iya: “Nuan diadaka di menua Kanaan. Apai nuan orang Amor, lalu indai nuan orang Iti. Lebuh nuan ada, nadai orang ngetas tali entemuni nuan, tauka meri nuan mandi, tauka ngunsut nuan ngena garam, tauka medung nuan. Nadai orang kasihka nuan lalu ngereja utai nya ke nuan. Lebuh nuan ada, nadai orang rinduka nuan. Nuan dibuai ba padang. “Udah nya aku mansa, lalu meda nuan kual-kual malai darah nuan empu. Nuan dibalut darah, tang Aku enggai nejuka nuan mati. Aku ngasuh nuan mansang besai baka kayu ti galak. Nuan nyadi kering sereta tinggi, lalu nyadi indu ke biak. Tusu nuan manah gaya, lalu buk nuan udah tumbuh, tang nuan telanjai nadai utai mungkur. “Lebuh Aku mansa baru, Aku nemu nuan nyau deka bisi ambai. Aku nyerayung tubuh nuan ti telanjai ngena baju luar Aku, lalu besemaya deka rinduka nuan. Endang sigi amat, Aku ngaga sempekat deka jadi enggau nuan, lalu nuan deka diempu Aku,” ku TUHAN Allah Taala bejaku. “Udah nya Aku ngambi ai lalu masu darah nya ari nuan. Aku ngunsut nuan ngena minyak kana. Aku ngerasukka ba nuan baju panjai ti udah disulam, lalu meri nuan kasut ti digaga ari kulit ti pemadu manah, meri nuan tanchang buk ti digaga ari kain linin, enggau baju luar ti digaga ari sutera. Aku ngelekatka batu ti berega gelang enggau tenggak ba nuan. Aku meri nuan tinchin idung, enggau antin, enggau siti makota ti manah gaya. Nuan bisi perengka emas enggau pirak, lalu gari nuan digaga ari kain linin enggau kain sutera ti udah disulam. Roti ti digaga ari tepung ti pemadu alus, ai manyi enggau minyak kana nyadika pemakai nuan. Pemajik nuan nyau beperenching, baka ke tau nyadi kuin. Nama nuan tebilang ba semua bansa ketegal pemajik nuan, laban Aku udah ngaga nuan ngemajik nya,” ku TUHAN Allah Taala bejaku. “Tang nuan ngambi ulih ba pemajik nuan, enggau ba nama nuan ti tebilang, lalu nuan tinduk enggau semua orang ke datai ngagai nuan. Nuan ngena sekeda gari nuan ngias endur alai nuan besembah, lalu baka indu sundal, nuan meri tubuh diri ngagai semua orang. Nuan ngambi perengka pirak enggau perengka emas ti udah diberi Aku ngagai nuan, lalu nuan ngena utai nya begagaka anak patung ti lelaki, lalu nuan butang enggau sida. Nuan ngambi kain ti udah disulam ti udah diberi Aku ngagai nuan, lalu nuan ngengkahka iya ba anak patung, lalu nuan meri ngagai anak patung nya minyak kana enggau menyan ti udah diberi Aku ngagai nuan. Aku meri nuan pemakai - tepung ti pemadu alus, minyak kana, enggau ai manyi - tang nuan meri utai nya nyadika piring kena nuan minta diri dikerinduka bala engkeramba,” ku TUHAN Allah Taala bejaku. “Udah nya nuan ngambi bala anak lelaki enggau bala anak indu ke diadaka nuan ke Aku, lalu nuan nyerahka sida nyadika piring ngagai engkeramba. Kita enda tetap ati ngagai Aku. Kati nya enda chukup? Nama kebuah kita enda tau enda ngambi bala anak Aku, lalu ngaga sida nyadika piring engkeramba? Lebuh nuan nyadi indu sundal, nuan nadai sekali ingatka pengidup diri lebuh nuan agi mit menya - telanjai, kual-kual malai darah nuan empu.” Ku TUHAN Allah Taala bejaku, “Tulah! Tulah meh nuan! Nuan udah ngereja semua penyai nya, lalu udah nya ba sebelah tisi jalai raya nuan begagaka endur alai besembahka engkeramba, enggau endur alai nyundal. Nuan ngamahka pemajik gamal diri nyundal. Nuan nyerahka tubuh diri ngagai semua orang ke mansa, lalu nuan majak nyundal tiap hari. Nuan nejuka orang ke kanji ti berimbai pendiau enggau nuan, iya nya orang Ejip, tinduk enggau nuan, lalu nuan nyungkak Aku ringat ngena pengawa nuan ti nyundal. “Diatu Aku udah ngedarka jari Aku deka ngukum nuan, lalu ngambi pulai baru berekat ti udah diberi Aku ngagai nuan. Aku udah nyerahka nuan ngagai orang Pilistin ti begedika nuan, lalu kejika ulah nuan ti kamah. “Laban nuan enda puas ati enggau orang bukai, nuan lalu belanda nitihka orang Asiria. Nuan nyadi indu sundal sida, tang sida pen enda mega ulih ngemuaska ati nuan. Nuan mega nyadi indu sundal ke orang Babilon, bansa orang ke bedagang, tang sida pen enda mega ulih ngemuaska nuan.” Tu utai ti disebut TUHAN Allah Taala: “Nuan udah ngereja semua utai tu baka sundal ti enda nemu malu. Ba genap jalai raya nuan udah ngaga endur alai besembah, lalu nuan nyundal. Tang nuan ukai ngulihka duit baka indu sundal ti bukai. Nuan tu baka indu ke butang enggau orang ke enda dikelala, lalu nuan enda rinduka laki nuan. Indu sundal diberi duit, tang nuan meri pemeri ngagai semua ambai nuan. Nuan ngupah sida datai ari semua endur lalu tinduk enggau nuan. Nuan tu ukai indu sundal ke selama. Nadai orang mejalka nuan nyundal. Nuan enda dibayar orang, tang nuan ke mayar sida! Nuan tu lain ari indu sundal ti bukai.” Jerusalem, nuan tu ke sundal! Nya alai dingaka utai ti disebut TUHAN. Tu utai ti disebut TUHAN Allah Taala: “Nuan muka gari ari tubuh nuan, lalu baka indu sundal, nuan nyerahka diri ngagai bala ambai nuan, enggau ngagai semua engkeramba, lalu nuan munuh bala anak nuan nyadika piring engkeramba nya. Ketegal nya, Aku deka ngempuruka semua bala ambai nuan ti dulu suba, sida ke dikerinduka nuan, enggau sida ke dipegedika nuan. Aku deka ngasuh sida bekelingika nuan. Udah nya Aku deka ngeruntun gari ari tubuh nuan, lalu ngasuh sida meda nuan telanjai. Aku deka ngukum nuan laban nuan butang sereta munuh orang, lalu laban Aku ringat pedis ati ke nuan, Aku deka ngukum nuan ngena pemati. Aku deka ngasuh sida bekuasa atas nuan, lalu sida deka ngeruntuhka semua endur alai nuan nyundal, enggau alai nuan nyembah engkeramba. Sida deka ngerampas gari enggau batu ti berega ari nuan, lalu ninggalka nuan telanjai. “Sida deka ngasuh orang mayuh nuku nuan ngena batu, lalu sida deka mepat nuan ngena pedang. Sida deka nunu rumah nuan, lalu nejuka sida ke indu meda nuan diukum. Aku deka ngasuh nuan badu agi nyadi indu sundal, lalu ngasuh nuan badu agi meri pemeri ngagai bala ambai nuan. Nya baru Aku deka badu agi ringat, lalu enda agi bemunyi, enda agi ringat tauka ninding. Nuan enda ingatka chara Aku ngintu nuan lebuh nuan agi biak, lalu nuan udah nyungkak Aku ringat ketegal semua utai ti udah dikereja nuan. Nya kebuah Aku udah ngasuh nuan mayar semua utai nya. Nama kebuah nuan nambahka kereja ti kamah ngagai semua penyai bukai ti udah dikereja nuan?” TUHAN Allah Taala udah bejaku. Ku TUHAN bejaku, “Jerusalem, semua orang deka bejaku ngena jaku-dalam tu pasal nuan: ‘Labang indai, labang anak.’ Nuan tu amat anak indai nuan. Indai nuan begedika laki enggau anak diri. Nuan tu sebaka enggau menyadi indu nuan, ke begedika laki enggau anak sida. Nuan enggau nengeri bukai ti menyadi indu nuan endang saum indai. Indai kita indu orang Iti, lalu apai kita orang Amor. “Menyadi indu nuan ke tuai nya Samaria sama enggau genturung pendiau ti di utara. Menyadi indu nuan ke biak nya Sodom sama enggau genturung pendiau ti di selatan. Kati nuan, Jerusalem, puas ati nitihka abi-kaki seduai iya, lalu nunda seduai iya ti jai? Enda, laban enda lama da agi nuan deka ngereja utai ti lebih jai agi ari ti dikereja seduai iya. Ku TUHAN Allah Taala bejaku, “Laban Aku tu Allah Taala ti idup Aku madahka ngagai nuan, menyadi indu nuan Sodom enggau genturung pendiau iya nadai kala udah ngereja penyai baka ke udah dikereja nuan enggau genturung pendiau nuan. Sodom enggau bala anak indu iya sumbung laban sida mayuh utai diempa, lalu diau dalam pemaik sereta nadai utai ngawa, tang iya enggau bala anak iya enda ngintu orang ke seranta enggau orang ke merinsa pendiau. Sida sumbung sereta kieh ati lalu ngereja utai ti dipegedika Aku, nya alai Aku ngerusak sida lebuh Aku meda nya. “Dosa Samaria enda bulih setengah dosa nuan. Utai ti udah dikereja nuan lebih agi jai ari penyai ti udah dikereja Samaria. Enti penyai nuan dibandingka enggau penyai menyadi indu nuan, seduai iya baka ke nadai penyalah. Diatu nuan enda tau enda ngasaika pemalu diri. Dosa nuan lebih agi jai ari dosa menyadi indu nuan, datai ke seduai iya baka ke nadai penyalah enti dibandingka enggau nuan. Nuan diatu patut nemu mirah mua laban malu, laban menyadi nuan baka ke tuchi enti dibandingka enggau nuan.” Ku TUHAN bejaku ngagai Jerusalem, “Aku deka ngasuh Sodom enggau genturung pendiau iya, Samaria enggau genturung pendiau iya kaya-raja baru. Aku deka mega ngasuh nuan nyadi kaya-raja. Nuan deka malu ke diri empu, lalu pemalu nuan nya deka ngasuh menyadi indu nuan ngelala pemesai pengaya seduai iya. Seduai iya deka nyadi kaya-raja baru, lalu nuan enggau genturung pendiau nuan deka mega nyadi kaya-raja baru. Ukai enda nuan tu ti ketawaka Sodom lebuh maya nuan ti sumbung suba, sebedau penyai ti dikereja nuan ditemu orang? Diatu nuan nyau sebaka enggau iya - diketawaka orang Edom, orang Pilistin, enggau orang bansa bukai ke berimbai pendiau enggau nuan, ke begedika nuan. Nuan enda tau enda natka pemerinsa ketegal utai ti kamah, ti jai ti udah dikereja nuan.” TUHAN Udah bejaku. Ku TUHAN Allah Taala bejaku, “Aku deka ngukum nuan nitihka utai ti udah dikereja nuan, laban nuan udah enda bebasaka semaya diri, lalu mungkir ari sempekat. Tang Aku deka ngamatka sempekat ti udah digaga Aku enggau nuan lebuh nuan agi biak suba, lalu Aku deka ngaga siti sempekat ti deka meruan belama iya enggau nuan. Nya baru nuan deka ingatka ulah nuan suba, lalu malu ke ulah nya lebuh Aku ngambi menyadi indu nuan ke tuai enggau ke biak lalu meri seduai iya ngagai nuan baru nyadika anak indu nuan, taja ukai ketegal sempekat Aku enggau nuan. Aku deka ngaga sempekat enggau nuan. Nya baru nuan deka nemu Aku endang TUHAN. Aku deka ngampun semua penyalah ti udah dikereja nuan, tang nuan deka ingatka sida, lalu malu bejaku.” TUHAN Allah Taala udah bejaku. Ku TUHAN bejaku ngagai aku. “Anak mensia, padahka siti sempama ngagai orang Israel ngambika sida nemu utai ti disebut Aku TUHAN Allah Taala: Nyadi sekali bisi siku burung menaul ti besai bendar. Bulu iya manah amat, lalu sayap iya besai sereta ngerembai. Iya terebai ngagai Bukit Lebanon, lalu matahka puchuk kayu sidar siti. Puchuk kayu sidar nya lalu dibai iya ngagai menua ti alai orang bedagang, lalu diengkahka iya ba nengeri alai bala orang ke bedagang diau. Udah nya iya lalu ngambi anak kayu siti ari menua Israel, lalu nanam anak kayu nya ba tanah ti ami, alai ti seruran bisi ai kena iya tumbuh. Kayu nya tumbuh lalu nyadi batang anggur ti baruh sereta ngelekar ngagai semua endur. Dan iya tumbuh ke atas ngagai menaul nya, lalu urat iya ngunjam ke dalam tanah. Batang anggur nya penuh laban dan enggau daun. “Bisi siku agi menaul ti besai. Sayap iya besai, lalu bulu iya tebal. Batang anggur nya lalu ngasuh urat enggau daun iya tumbuh ngagai menaul nya, ngarapka menaul nya deka meri batang anggur nya mayuh agi ai ari ti bisi ba kebun nya. Tang batang anggur nya udah ditanam ba tanah ti ami, ti mayuh ai kena iya mansutka daun lalu bebuah, sereta nyadi batang anggur ti menyana. “Nya alai Aku TUHAN Allah Taala, nanya: Kati batang anggur nya deka idup lalu mansang? Kada enda menaul ti keterubah nya deka mabut batang anggur nya enggau semua urat iya, ngugurka buah iya, matahka dan iya, lalu nejuka dan nya layu. Aku enda ibuh begunaka pengering, tauka bansa ti kering, nyabut batang anggur nya. Lebuh iya ditanam, kati iya deka idup lalu tumbuh? Lebuh iya dipuputka ribut ari timur, kati iya enda layu ba endur alai iya ti tumbuh? Ku TUHAN bejaku ngagai aku, “Tanya orang ke angkat ngelaban nya, enti sida nemu reti jaku sempama nya. Padahka ngagai sida, raja menua Babilon dulu menya udah datai di Jerusalem, lalu nabanka raja enggau bala pemesai iya ngagai menua Babilon. Iya nabanka siku orang ari ruang bilik raja, ngaga siti sempekat enggau orang nya, lalu mejalka iya besumpah deka taluk ngagai perintah Babilon. Iya nabanka orang ke tinggi pangkat nyadika gadai kena nagang bansa Judah angkat baru, enggau kena nentuka sempekat nya dititihka. Tang raja menua Judah angkat ngelaban, lalu ngasuh pengari mansang ngagai menua Ejip ngambi mayuh kuda enggau bala soldadu. Kati iya deka mujur? Kati iya enda kena ukum ketegal pengawa nya? Iya tetap diukum enti iya ngelanggar sempekat nya! Ku TUHAN Allah Taala bejaku, “Laban Aku tu Allah Taala ti idup, raja tu deka mati di menua Babilon, laban iya ngelanggar sumpah diri empu, enggau sempekat ti udah digaga iya enggau raja menua Babilon, ti udah nyiri iya nyadi raja. Indah bala soldadu raja menua Ejip ti kering deh enda ulih nulung iya ngelaban orang Babilon lebuh orang Babilon ngaga kuta tanah, lalu numbak parit ti dalam lalu munuh mayuh orang Judah. Iya ngelanggar sumpah diri enggau sempekat ti udah digaga iya empu. Iya ngereja semua utai nya, lalu enda ulih ngerarika diri.” Ku TUHAN Allah Taala bejaku, “Laban Aku tu Allah Taala ti idup, Aku deka ngukum iya laban iya ngelanggar sempekat ti disemaya deka dititihka iya ngena sumpah dalam nama Aku. Aku deka nan jarin ti dikena orang ngasu, lalu nangkap iya. Aku deka nabanka iya ngagai menua Babilon, lalu ngukum iya dia, laban iya udah enda tetap ati ngagai Aku. Bala soldadu iya ke pemadu kering, deka mati beperang, lalu sida ke agi idup deka diachirka ngagai semua endur. Nya baru kita deka nemu Aku ti TUHAN, udah bejaku.” Tu utai ti disebut TUHAN Allah Taala: “Aku deka ngambi puchuk kayu sidar ti tinggi lalu matahka kantuk iya. Aku deka nanam iya ba sigi bukit ti tinggi, ba bukit ti di menua Israel ti pemadu tinggi. Iya deka mansutka dan, lalu mansutka leka lalu nyadi kayu sidar ti manah. Semua macham burung deka diau dia lalu belindung ba iya. Semua kayu di menua nya deka nemu Aku tu endang TUHAN. Aku nebang kayu ti tinggi lalu ngasuh kayu ti mit mansang tinggi. Aku ngasuh kayu layu lalu ngasuh kayu ti layu nyadi gadung. Aku ti TUHAN udah bejaku. Aku deka ngereja utai ti udah disebut Aku.” Ku TUHAN bejaku ngagai aku, “Nama reti jaku-dalam tu ti selalu disebut orang di menua Israel? ‘Apai indai makai buah anggur ti masam, tang bala anak ke ngasaika nyawa diri masam.’ Ku TUHAN Allah Taala bejaku, “Laban Aku tu Allah Taala ti idup, kita enda tau agi besebutka jaku-dalam nya di menua Israel. Seput semua orang, seput apai indai enggau seput anak endang enggi Aku. Semina orang ke bedosa aja ti deka mati. “Enti sema orang siku lurus lalu ngereja utai ti beradat sereta ngena. Iya enda nyembah engkeramba orang Israel tauka makai piring ti diberi ba rumah alai nyembah engkeramba. Iya enda nguji ngulihka bini orang, tauka beleman enggau indu ke benung datai kain. Iya enda nekanka pengidup orang, tang mulaika gadai orang ke nginjau duit ari iya, enda ngerumpak utai orang, meri roti ngagai orang ke lapar, lalu meri gari ngagai orang ke telanjai. Iya ukai ngiga untung lebuh iya nyali orang duit. Iya enggai ngereja penyai, lalu iya meri pemutus penemu ti betul lebuh iya ngatur laya orang. Iya ngasika pesan Aku, lalu bejimat nitihka Adat Aku. Nya meh orang ke lurus, lalu iya deka idup,” ku TUHAN Allah Taala bejaku. “Enti sema orang nya bisi anak lelaki ke mangah sereta munuh orang lalu ngereja utai ti jai nya (taja pen apai iya nadai ngereja utai nya), makai piring ti udah diberi ba endur alai nyembah engkeramba, nguji ngulihka bini orang, nekanka pengidup orang ke seranta, ngerumpak orang, enggai mulaika gadai ti dikena orang nginjau duit ari iya, nyembah engkeramba, ngereja penyai, ngiga untung lebuh iya nyali duit ngagai orang: kati orang nya deka idup? Enda. Iya enda ulih idup. Iya udah ngereja semua utai ti jai nya. Nya alai iya tetap deka mati. Iya empu deka betanggungjawapka pemati diri. “Tang enti orang nya bisi anak lelaki ke meda semua dosa ti dikereja apai iya, lalu iya berunding lalu enda nunda penyalah apai iya, enda nyembah engkeramba ti disembah orang Israel, tauka makai piring ti diberi ba endur alai nyembah engkeramba, enda nguji ngulihka bini orang, enda nekanka pengidup orang, enda ngerumpak orang, enda minta gadai ari orang ke nginjau duit, enda ngerumpak orang, tang meri roti ngagai orang ke lapar, lalu meri gari ngagai orang ke telanjai, enggai ngereja penyai, enda ngiga untung lebuh iya nyali duit ngagai orang, nitihka Adat Aku, lalu ngasika pesan Aku, iya enda mati ketegal dosa apai iya. Iya tetap deka idup. Tang pasal apai iya empu, laban iya nipu sereta ngerumpak, lalu ngereja penyai ngagai orang, iya deka mati ketegal penyai iya. “Tang kita nanya, ‘Nama kebuah anak enda kena perinsa ketegal penyai ti dikereja apai iya?’ Saut iya baka tu: Lebuh anak ngereja utai ti ngena sereta manah, lalu bejimat ngasi sereta nitihka Adat Aku, iya tetap deka idup. Orang ke bedosa deka mati. Anak enda tau kena perinsa ketegal penyai ti dikereja apai iya, lalu apai pen enda mega tau kena perinsa ketegal penyai ti dikereja anak iya. Orang ke manah deka diberi upah ketegal sida ngereja utai ti manah, lalu orang ke jai deka kena perinsa ketegal penyai ti dikereja sida. “Enti orang ke jai badu agi bedosa, lalu ngasika Adat Aku, enti iya ngereja utai ti ngena sereta manah, iya enda mati. Iya tetap deka idup. Semua dosa iya deka diampun magang, lalu iya deka idup, laban iya ngereja utai ti ngena. Kati nuan ngumbai Aku gaga meda orang ke jai mati?’ ku TUHAN Allah Taala nanya. “Enda! Aku rindu agi meda sida nesal ati lalu idup. “Tang enti orang ke lurus badu agi ngereja utai ti manah, lalu belabuh ngereja semua utai ti jai, baka ke dikereja orang ke jai, kati iya deka majak idup? Enda! Nadai siti utai ti manah ti udah dikereja iya deka dikingatka. Iya deka mati laban iya enda tetap ati ngagai Aku, enggau laban dosa iya. “Tang ku nuan, ‘Utai ti dikereja TUHAN nya salah.’ Pendingka Aku, kita orang Israel. Kati kita ngumbai Aku ngereja utai ngena jalai ti salah? Jalai kita ke salah. Lebuh orang ke lurus badu agi ngereja utai ti manah, lalu belabuh ngereja penyai, lalu udah nya iya mati, iya mati laban penyai ti udah dikereja iya. Lebuh orang badu agi bedosa, lalu ngereja utai ti ngena sereta manah, iya ngidupka nyawa diri. Iya nemu utai ti dikereja diri, lalu badu agi bedosa. Nya alai iya tetap enda mati, tang deka idup. Lalu ku kita orang Israel, ‘Utai ti dikereja TUHAN nya salah.’ Kati kita ngumbai jalai Aku salah? Jalai kita ke salah. “Diatu Aku TUHAN Allah Taala, madahka ngagai kita orang Israel, Aku deka ngakim genap iku kita nitihka utai ti udah dikereja kita. Lengkaka semua penyai ti benung dikereja kita diatu, lalu anang nejuka dosa ngerusak kita. Lengkaka semua penyai ti benung dikereja kita, lalu awakka runding enggau ati kita digaga nyadi baru. Nama kebuah kita orang Israel deka mati? Aku enggai meda orang mati,” ku TUHAN Allah Taala bejaku. “Nesal ati ke dosa kita, lalu idup.” TUHAN ngasuh aku nyanyi lagu tusah ati tu ke dua iku anak raja menua Israel: Indai nuan baka indu singa! Iya nginang anak iya ba raban singa lelaki ti mangah. Indu singa nya nginang anak iya, lalu anak iya mansang besai, belajar ngulihka pemakai, lalu bepakaika mensia. Semua bansa ninga pasal iya lalu ngaga lubang kebung kena ngulihka iya. Sida ngirit iya ngagai menua Ejip ngena pengait. Indu singa nya nganti nyentuk ngagai maya iya nadai utai dikarapka agi. Udah nya iya nginang siku agi anak iya, lalu anak iya nya mansang besai lalu nyadi singa ti mangah. Lebuh iya nyau udah besai tuai, iya ngasu enggau bala singa ti bukai, belajar ngasu lalu bepakaika mensia. Iya ngeruntuhka kuta, lalu ngaga nengeri nyadi tembawai. Orang di menua nya balat takut genap kali iya negung. Semua bansa ngelaban iya ari semua menua ti ngelingi iya. Sida mintarka jarin sida atas iya; iya udah labuh ngagai lubang kebung sida. Sida ngena pengait nyimpan iya dalam sangkar lalu mai iya ngagai raja menua Babilon. Sida nutup iya, ngambika nyawa iya nadai agi didinga ba sebelah bukit ti di menua Israel. Indai nuan baka batang anggur ti ditanam semak sungai. Laban ai dia mayuh, anggur nya lebat laban daun enggau buah. Dan iya kering lalu tumbuh nyadi tungkat diraja. Batang anggur nya tumbuh tinggi nyentuk ngagai remang, lalu semua orang meda pemayuh daun enggau peninggi iya. Tang jari orang ke ringat nyabut iya kenyau ari urat lalu ngempaska iya ke tanah. Ribut ari timur ngerangkaika buah iya. Dan iya patah. Dan iya rangkai lalu ditunu. Diatu anggur nya ditanam di menua puang, di menua ti rangkai nadai ai. Batang anggur nya diempa api. Api nganguska dan enggau buah iya. Dan iya enda ulih nyadi kering baru, enda agi nyadi tungkat diraja. Tu lagu tusah ati. Lagu tu udah selalu dinyanyi. Kena sepuluh hari bulan ti kelima dalam taun ti ketujuh kami udah dibuai ngagai menua Babilon, sekeda bala tuai orang Israel datai betanyaka peneka TUHAN ngagai aku, lalu sida nudukka diri di mua aku. TUHAN lalu bejaku ngagai aku. Ku Iya, “Anak mensia, bejaku nuan ngagai bala tuai tu lalu padahka ngagai sida utai ti disebut TUHAN Allah Taala: ‘Kita datai ditu laban kita deka betanyaka pasal peneka Aku, ukai enda? Laban Aku tu Allah Taala ti idup, Aku enggai nyagi kita betanyaka utai ngagai Aku. Aku TUHAN Allah Taala udah bejaku.’ “Mensia, kati nuan udah sedia deka ngukum sida? Enti nuan udah sedia, kereja meh nya. Padahka ngagai sida utai ti jai ti udah dikereja bala aki ini sida, lalu sebut ngagai sida: Ku TUHAN Allah Taala bejaku: Lebuh Aku milih Israel, Aku ngaga siti semaya enggau sida. Aku mandangka Diri ngagai sida di menua Ejip, lalu madahka ngagai sida: Aku tu TUHAN Allah Taala kita. Nya meh maya Aku besemaya deka mai sida pansut ari menua Ejip, lalu nguluka sida ngagai menua ti udah dipilih Aku ke sida, menua ti kaya sereta ami, menua ti pemadu manah ari semua menua bukai. Aku ngasuh sida muai engkeramba ti dikerinduka sida, ngambika sida enda ngamahka diri besembahka petara ti pelesu ti disembah orang Ejip, laban Aku tu TUHAN Allah Taala sida. Tang sida angkat ngelaban Aku, lalu enggai mending. Sida enda muai engkeramba, lalu enggai badu besembahka petara orang Ejip. Aku lalu berunding deka ringat ngagai sida ngambika sida ngasaika pemalat pengeringat Aku di menua Ejip. Tang Aku enda nyadi ngereja nya, laban nya tau ngenyaika nama Aku, laban Aku udah madahka ngagai sida, di mua bala orang ke enggau sida begulai, Aku deka mai sida pansut ari menua Ejip. “Nya alai Aku nguluka sida pansut ari menua Ejip lalu mai sida ngagai menua puang. Aku meri sida pesan Aku, lalu ngajar sida Adat Aku, adat ti meri pengidup ngagai sebarang sapa ke ngasika adat nya. Aku ngasuh sida ngintu Hari Sabat kena nandaka sempekat entara Aku enggau sida, kena Aku ngasuh sida ngingatka Aku ti TUHAN, ti udah nguduska sida. Tang indah di menua puang deh sida angkat ngelaban Aku. Sida ngelanggar Adat Aku, lalu nulak pesan Aku, pesan ti meri pengidup ngagai sebarang sapa ke ngasika pesan nya. Sida ngamahka Hari Sabat. Aku endang sedia deka ngasuh sida ngasaika pemalat pengeringat Aku di menua puang, lalu ngerusak sida. Tang Aku enda ngerusak sida, laban pengawa nya deka ngasuh orang enda bebasaka nama Aku ba semua bansa ti udah meda Aku nguluka orang Israel pansut ari menua Ejip. Nya alai Aku besumpah di menua puang, madahka Diri enggai mai sida ngagai menua ti udah diberi Aku ngagai sida, menua ti kaya sereta ami, menua ti manah agi ari semua menua bukai. Aku ngaga sumpah nya laban sida udah nulak pesan Aku, ngelanggar Adat Aku, lalu ngamahka Hari Sabat - sida rindu agi nyembah engkeramba. “Tang Aku sinu ati ke sida. Aku lalu mutuska penemu enggai munuh sida di menua puang, tang meri jaku tangkan ngagai sida ke biak munyi tu: ‘Anang nitihka adat ti digaga aki ini kita. Anang nitihka adat asal tauka ngamahka diri enggau engkeramba sida. Aku tu TUHAN ti Allah Taala kita. Titihka adat enggau pesan Aku. Gaga Hari Sabat nyadika hari ti kudus, kena nandaka sempekat ti udah digaga Aku enggau kita, lalu tanda nya deka ngasuh kita ingatka Aku tu TUHAN ti Allah Taala kita.’ “Tang orang ke ari rebak nya angkat ngelaban Aku. Sida ngelanggar adat Aku, lalu enda ngasika pesan Aku ti meri pengidup ngagai orang ke ngasi. Sida ngamahka Hari Sabat. Aku endang sedia deka ngasuh sida ngasaika pemalat pengeringat Aku di menua puang, lalu munuh semua sida. Tang Aku enda nyadi ngereja nya, laban utai nya deka ngasuh Aku enda dibasa orang ba semua bansa ti udah meda Aku mai orang Israel pansut ari menua Ejip. Nya alai Aku besumpah baru di menua puang madahka Diri deka ngachirka sida di serata dunya. Aku ngereja nya laban sida udah nulak pesan Aku, ngelanggar adat Aku, ngamahka Hari Sabat, lalu besembahka engkeramba ti udah dipetuaika bala aki ini sida. “Udah nya Aku meri sida adat ti enda manah, enggau pesan ti enda meri sida pengidup. Aku nejuka sida ngamahka diri ngena piring ti diberi sida, lalu Aku nejuka sida ngaga anak tuai sida ke lelaki nyadika piring. Aku nejuka utai nya nyadi kena Aku ngukum sida, lalu mandangka ngagai sida Aku tu endang TUHAN. “Nya alai diatu, mensia, padahka ngagai orang Israel utai ti disebut Aku TUHAN Allah Taala ngagai sida. Tu siti agi jalai bala aki ini sida udah enda tetap ati ngagai Aku sereta mechat Aku. Aku mai sida ngagai menua ti udah disemaya Aku ngagai sida, lalu lebuh sida meda bukit ti tinggi enggau kayu, sida lalu ngenjuk piring ba semua endur nya. Sida nyungkak Aku ringat laban piring tunu sida enggau laban wain ti dibai sida nyadika piring. Aku nanya ngagai sida: Nama endur ti tinggi nya ti digagai kita? Nya alai, kenyau ari nya, endur nya dikumbai ‘Endur ti Tinggi.’ Nya alai padahka ngagai orang Israel diatu utai ti disebut Aku, ‘Ku TUHAN Allah Taala bejaku: Nama kebuah kita bedosa baka aki ini kita, lalu besembahka engkeramba ti disembah sida? Indah sehari tu deh kita ngenjuk piring baka ti diberi sida, lalu kita ngamahka diri besembahka engkeramba ti disembah sida, lebuh kita nyerahka anak kita nyadika piring tunu ke engkeramba nya. Lalu udah nya kita orang Israel datai ngagai Aku betanyaka utai ti dikedekaka Aku! Dalam nama Aku TUHAN Allah Taala, Allah Taala ti idup, Aku enda nyagi kita betanyaka sebarang utai ngagai Aku. Kita udah mutuska runding deka nyadi baka orang bansa bukai, baka orang ke idup di menua bukai, lalu nyembah kayu enggau batu.’ ” “Dalam nama Aku TUHAN Allah Taala, Allah Taala ti idup, Aku ringat lalu meri kita jaku tangkan, madahka Aku deka merintah kita enggau terit, ngena semua kuasa Aku. Aku deka ngayanka kuasa enggau pengeringat Aku ngagai kita, lebuh Aku ngempuruka kita, lalu mai kita pulai ari semua menua ti udah alai Aku ngachirka kita. Aku deka mai kita ngagai ‘Menua Puang Mayuh Bengkah Bansa,’ lalu dia Aku deka betunga mua enggau kita lalu ngeletak ukum kita. Aku diatu deka ngukum kita baka Aku ti udah ngukum aki ini kita di menua Puang Sinai,” ku TUHAN Allah Taala bejaku. “Aku deka megai kita enggau terit lalu mejalka kita ngasika sempekat Aku. Aku deka muai ari bala kita orang ke angkat ngelaban sereta bedosa. Aku deka muai sida ari menua ti alai sida diau diatu, tang Aku enggai ngemendarka sida pulai baru ngagai menua Israel. Nya baru kita deka nemu Aku endang TUHAN.” Ku TUHAN Allah Taala bejaku, “Nya alai semua kita orang Israel, titihka aja peneka kita empu! Awakka kita betuaika engkeramba kita! Tang Aku meri kita siti jaku tangkan: udah bekau nya ila, kita enda tau enda ngasika Aku, lalu badu agi beberika piring ngagai engkeramba lalu ngeleseka nama Aku ti kudus. Di menua Israel, ba bukit Aku ti kudus, bukit ti tinggi di menua Israel, semua kita orang Israel deka nyembah Aku. Aku deka rinduka kita, lalu ngarapka kita deka mai piring kita ngagai Aku, piring ti pemadu manah, enggau pemeri kita ke kudus. Lebuh Aku udah mai kita pansut ari menua ti udah alai Aku udah ngachirka kita, lalu udah ngempuruka kita, Aku deka nerima piring tunu kita, lalu semua bansa deka nemu Aku endang kudus. Lebuh Aku mai kita pulai baru ngagai menua Israel, menua ti udah disemaya deka diberi Aku ngagai aki ini kita, nya baru kita deka nemu Aku endang TUHAN. Nya baru kita deka ingatka semua utai ti jai ti udah dikereja kita, sereta ingatka chara kita udah ngamahka diri empu. Kita deka kejika diri empu ketegal semua penyai ti udah dikereja kita. Lebuh Aku nyaga nama Aku, kita orang Israel deka nemu Aku endang TUHAN, laban Aku enda ngukum kita nitihka penyai kita.” TUHAN Allah Taala udah bejaku. Ku TUHAN bejaku ngagai aku, “Anak mensia, palik tunga ke selatan. Bejaku nuan ngelaban selatan, lalu benabi ngelaban utan ti di selatan. Asuh utan ti di selatan ningaka utai ti disebut TUHAN Allah Taala: Peda kita, Aku benung nungkunka api, lalu api nya deka nganguska genap iti batang kayu ti di dalam nuan, nemuka kayu nya idup tauka mati. Nadai utai ulih madamka api nya. Iya deka nyerarai ari selatan ngagai utara, lalu genap iku orang deka ngasaika pengangat api nya. Semua sida deka nemu Aku ti TUHAN udah nungkunka api nya, lalu nadai orang ulih madamka iya.” Tang aku nyakal jaku TUHAN, “ TUHAN Allah Taala, anang mejalka aku ngereja utai nya! Indah diatu deh semua orang mutap madahka aku selalu bejaku ngena entelah.” Ku TUHAN bejaku ngagai aku, “Anak mensia, alai nuan bejaku ngelaban Jerusalem enggau ngelaban endur alai orang mayuh besembah. Benabi nuan ngelaban menua Israel lalu sebut ngagai menua nya: ‘Ku TUHAN bejaku: Aku deka ngelaban kita. Aku deka nyintak pedang Aku lalu munuh ari semua kita, nemuka kita manah tauka jai. Aku deka ngena pedang Aku ngelaban semua orang kenyau ari selatan nyentuk ke utara. Semua orang deka nemu Aku ti TUHAN udah nyintak pedang Aku, lalu Aku enggai nyelitka pedang nya baru.’ “Anak mensia, bedemuh meh nuan, baka ke tusah ati. Bedemuh tusah ati ba endur alai semua orang ulih meda nuan. Lebuh sida nanyaka kebuah nuan bedemuh, padahka ngagai sida, nuan bedemuh laban berita ti deka datai. Lebuh sida nerima berita nya, sida deka takut, lembut tulang, enda berani agi, lalu patung sida deka getar-getar. Maya udah datai. Tu meh maya iya.” TUHAN Allah Taala udah bejaku. Ku TUHAN bejaku ngagai aku, “Anak mensia, benabi nuan. Padahka ngagai orang mayuh utai ti disebut Aku ti TUHAN munyi tu: ‘Siti pedang, pedang ti udah diansah sereta dipugar. Pedang nya diansah kena munuh mensia, dipugar ngambika iya bekilap baka kilat. Orang mayuh enda tau rami gaga, laban bala nembiak Aku enggai ibuhka semua jaku tangkan enggau ukum. Pedang nya benung dipugar, ngambika iya sedia tau dikena. Iya diansah sereta dipugar, lalu disuaka ngagai jari orang ke pemunuh. Nyabak duie-duie meh nuan, anak mensia, laban pedang nya ngelaban bala nembiak Aku, ngelaban semua bala tuai orang Israel. Sida deka ditikauka ngagai pedang sama enggau bala nembiak Aku. Pandam meh dada kita laban kita tusah ati! Aku nguji bala nembiak Aku, lalu enti sida enggai nesal ati, semua utai tu deka nyadi ba sida.’ “Nya alai, anak mensia benabi meh nuan diatu. Tempapka jari nuan, lalu pedang nya deka mantap enda ngetu-ngetu. Iya nya pedang ti munuh, pedang ti ngenakut, enggau pedang ti nyayat. Iya ngasuh bala nembiak Aku lemi semengat lalu rebah. Aku ngemba nengeri sida ngena pedang ti bekilap ti sedia deka munuh. Pantap ke kanan enggau ke kiba, nuan pedang ti tajam! Pantap genap kali nuan bepusin. Aku deka mega nempapka jari Aku, lalu badu agi ringat. Aku ti TUHAN udah bejaku.” Ku TUHAN bejaku ngagai aku, “Anak mensia, dirika papan tanda ba dua iti jalai raya ti deka ditengah raja menua Babilon datai mai pedang iya. Jalai dua iti nya berengkah ba siti menua aja. Dirika papan tanda ba simpang jalai dua iti nya. Siti papan tanda nunjukka jalai ngagai nengeri Rabah di menua orang Amon, lalu siti nunjukka jalai ngagai menua Judah, ngagai nengeri Jerusalem ti bekuta. Raja menua Babilon deka bediri ngimbai papan tanda ba simpang jalai raya nya, lalu ngusak laja kena iya nujum bagi jalai ti deka ditengah iya. Iya betanya ngagai bala engkeramba iya. Iya betilitka nasit ba atau jelu ti diberi nyadika piring. Jari kanan iya megai laja ti udah ditulis enggau nama ‘Jerusalem’! Laja nya madahka iya patut mupuk lalu ngaga utai kena ngentung pintu kuta, ngasuh iya nyerang enggau panjung, ngengkahka utai ti dikena ngentung pintu kuta nya di mua pintu kuta, ngaga kuta tanah, sereta numbak parit ti dalam. Tang orang Jerusalem enda arapka diri deka diserang laban sida udah ngaga sempekat enggau orang Babilon. Tang tujum nya ngasuh sida ingatka dosa sida, sereta nangkan sida madahka sida deka ditangkap. Nya alai, tu meh utai ti disebut Aku TUHAN Allah Taala: Dosa kita ayan. Semua orang nemu pemesai penyalah kita. Kita ngayanka dosa kita ba semua utai ti dikereja kita. Kita deka diukum, lalu Aku deka nyerahka kita ngagai bala munsuh kita. “Nuan ti nadai guna, ti jai, ke merintah menua Israel, maya nuan udah datai, maya nuan nerima ukum ti penudi. Ku TUHAN Allah Taala bejaku: Buai labung, ingkaska makota; Semua utai enda tau enda diubah magang. Angkatka orang ke seranta, turunka pangkat orang ke tinggi pangkat! Tembawai! Tembawai! Tembawai! Aku deka ngaga nengeri nya nyadi tembawai. Tang utai tu apin nyadi sebedau orang siku ke diasuh Aku ngukum nengeri nya datai. Aku deka nyerahka nengeri nya ngagai iya. “Anak mensia, benabi meh nuan, lalu sebut: Ku TUHAN Allah Taala bejakuka pasal orang Amon ke mechat orang Israel: Siti pedang sedia deka ngerusak, udah diansah lalu bekilat, sedia deka munuh. Kita orang Amon meda genera ti pelesu, lalu jaku tujum kita bula magang. Kita tu orang ke jai, lalu timpuh kita nyau deka datai, maya kita deka diukum ke penudi iya. Pedang nya deka mumpung pala kita. Selitka pedang! Aku deka ngakim kita ba endur alai kita digaga, di menua alai kita ada. Kita deka ngasaika pengeringat Aku lebuh Aku mubuhka pengeringat Aku ngagai kita baka api ti mau. Lalu Aku deka nyerahka kita ngagai orang ke mangah, ti landik ngerusak. Kita deka dirusak ngena api. Darah kita deka tepambur di menua kita empu, lalu nadai orang deka ingatka kita agi.’ ” TUHAN udah bejaku. Ku TUHAN bejaku ngagai aku, “Anak mensia, kati nuan sedia deka ngakim nengeri ti penuh laban pemunuh tu? Padahka ngagai nengeri nya semua penyai ti udah dikereja iya. Sebut munyi tu: Ku TUHAN Allah Taala bejaku: O nengeri, nuan udah munuh mayuh amat nembiak nuan empu. Nuan udah ngamahka diri begaga lalu besembahka engkeramba. Maya nuan udah datai. Nuan udah salah laban nuan munuh orang, lalu nuan kamah laban engkeramba ti udah digaga nuan. Nya alai nuan empu udah ngasuh timpuh datai semak. Timpuh nuan udah datai! Nya alai Aku udah ngemaluka nuan di mua semua bansa ngambika nuan dikeleseka semua menua. Menua ti semak enggau ti jauh ngeleseka nuan, nuan ti jai, ke penuh laban pengachau. Semua bala tuai orang Israel ti diau dalam nuan, genap iku orang ke bekuasa, sigi keran deka munuh orang. Apai indai ti diau dalam nuan, nadai dibasa siku; orang kampar ti diau dalam nuan, abis kena tipu; orang ke patu balu ti diau dalam nuan, abis diperinsa. Nuan udah ngeleseka utai Aku ti kudus, lalu ngamahka Hari Sabat Aku. Sekeda orang ke diau dalam nuan bejaku bula pasal orang bukai, ngambika sida dibunuh. Sekeda sida makai piring ti diberi ngagai engkeramba. Sekeda endang seruran nurutka pengingin tubuh diri. Sekeda tinduk enggau bini apai sida. Sekeda mejalka indu ke benung datai kain beleman enggau sida. Sekeda butang, lalu sekeda nguji ngulihka tubuh menantu indu tauka menyadi-tiri sida empu. Sekeda sida makai gaji bebunuhka orang. Sekeda minta bungai duit ti dijali ngagai diri sama diri ke sama bansa orang Israel, lalu bulih pengaya ketegal ngambi ulih ba sida. Sida enda ingatka Aku.” TUHAN Allah Taala udah bejaku. Aku deka ngerusak pengawa nuan ti ngerumpak, enggau bebunuhka orang. Kati nuan ngumbai diri agi berani tauka agi bisi pengering ngedarka jari diri lebuh Aku udah tembu ngukum nuan? Aku ti TUHAN udah bejaku, lalu Aku deka ngamatka jaku Aku. Aku deka ngachirka bala nembiak nuan ngagai semua menua enggau bansa, lalu Aku deka muai semua pengamah ari nuan. Lalu ketegal penyai kita semua bansa deka ngeleseka Aku. Nya baru kita deka nemu Aku endang TUHAN.’ ” Ku TUHAN bejaku ngagai aku, “Anak mensia, Aku enda begunaka orang Israel. Sida tu baka tai besi - engkeraju, tin, besi, enggau bangkang - utai ti tinggal lebuh pirak udah dituchi ngena api. Nya alai, ku TUHAN ti Allah Taala bejaku: Laban semua kita udah nyadi tai besi magang, Aku deka ngempuruka semua kita di Jerusalem baka ke ngempuruka batu ti ngundan pirak, engkeraju, besi, bangkang enggau tin lalu ngeluluhka sida dalam api. Baka nya meh Aku deka ngempuru lalu ngeluluhka kita ngena api laban Aku ringat pedis ati ngagai kita. Aku deka ngempuruka kita lalu ngesuhka api pengeringat Aku ngagai kita, lalu ngeluluhka kita dalam api nya. Baka ti ngeluluhka pirak, baka nya meh kita deka luluh dalam api pengeringat Aku. Nya baru kita deka nemu Aku ti TUHAN udah mubuhka pengeringat Aku ngagai kita.” Ku TUHAN bejaku ngagai aku baru, “Anak mensia, padahka ngagai orang Israel, menua sida enda kudus, lalu Aku deka ngukum menua tu laban Aku ringat. Bala tuai menua tu baka singa ti nerekam jelu lalu negung. Bala tuai tu munuh orang, ngerampas semua duit enggau reta tengkira orang, lalu ngaga mayuh sida ke nyadi balu. Bala imam ngelanggar Adat Aku, lalu enda bebasaka utai Aku ti kudus. Sida enda ngaga bida entara utai ti kudus enggau utai ti enda kudus. Sida enda ngajar orang pasal bida entara utai ti tuchi enggau ti enda tuchi, lalu sida enda bebasaka Hari Sabat Aku. Sida enda bebasaka Aku. Bala pemesai perintah nyau baka ukui kampung ti becharikka jelu. Sida bebunuhka orang laban sida deka nyadi kaya. Bala nabi udah ngelalaika dosa tu baka orang ke ngechat dinding. Sida meda genera ti pelesu, lalu madahka utai ti bula. Ku sida, “ TUHAN Allah Taala udah bejaku munyi tu,” tang iya ti bendar, TUHAN nadai udah bejaku. Orang di menua tu udah nipu sereta ngerumpak pangan diri lalu butang. Sida udah nekanka pengidup orang ke seranta, enggau orang ke suntuk, lalu udah ngambi ulih ba orang bansa bukai. Aku begigaka orang ke nemu ngaga dinding kuta, ke ulih bediri ba endur alai kuta udah runtuh, lalu nyaga menua, ngambika Aku enda ngerusak nengeri tu lebuh Aku ringat, tang Aku nadai tetemuka orang ke baka nya. Nya alai Aku udah ringat ngagai sida. Aku udah ngerusak sida ngena api pengeringat Aku, ketegal penyalah sida.” TUHAN Allah Taala udah bejaku. Ku TUHAN bejaku ngagai aku, “Anak mensia, nyadi sekali bisi dua iku indu diri menyadi ke sama saum indai. Lebuh seduai iya agi biak, diau di menua Ejip, seduai iya tetemuka lelaki lalu nyadi indu sundal. Iya ke tuai agi benama Oholah (Iya ngelambangka menua Samaria), lalu iya ke biak agi benama Oholibah (Iya ngelambangka Jerusalem). Aku jadi enggau seduai iya, lalu seduai iya beranak. Taja pen Oholiah endang enggi Aku, tang iya majak nyadi indu sundal, lalu seruran inginka bala ambai iya ari menua Asiria. Sida nya bala soldadu ke ngena pekayan ti ungu, bala orang ke tampak nama, enggau bala pemesai soldadu ti tinggi pangkat. Semua sida nya pemesai soldadu ke nepan kuda magang lalu sida sigat gamal. Oholiah nyundalka diri ngagai semua pemesai orang Asiria, lalu pengingin iya ti deka beleman ngujungka iya ngamahka diri besembahka engkeramba orang Asiria. Oholiah majak nyundal baka ke udah dikereja iya di menua Ejip, alai iya ke terubah meri tubuh diri ngagai lelaki. Kenyau ari maya iya agi biak, lelaki tinduk enggau iya, lalu ngaga iya baka indu sundal. Nya alai Aku nyerahka iya ngagai bala ambai iya ari menua Asiria, ke balat dikerinduka iya. Sida nelanjaika iya, nangkap bala anak lelaki enggau anak indu iya, lalu munuh iya ngena pedang. Sida ke indu di semua endur berandauka pasal pemati iya. “Menyadi indu iya Oholibah meda utai nya, tang iya lebih balat agi nyundal ari Oholah. Oholibah mega balat keran deka beleman enggau orang Asiria ti tinggi pangkat enggau bala pemesai soldadu - soldadu ke ngena senyata perang - enggau bala pemesai ke nepan kuda, semua sida ke agi biak sereta sigat gamal. Aku meda Oholibah endang ngereja pengawa ti kamah baka aka iya Oholah. Lebuh Oholibah meda sida, iya balat keran deka beleman enggau sida, lalu iya ngasuh bala seruan betemu enggau sida di menua Babilon. Orang Babilon datai lalu beleman enggau iya. Sida ngayahka tubuh iya, lalu balat amat ngamahka iya datai ke nyau kejika sida. Iya ngayanka tubuh diri di mua orang mayuh, lalu ngasuh orang nemu iya endang sundal. Aku kejika iya baka Aku ke kejika menyadi iya Oholah. Oholibah majak balat agi nyundal ari ti udah, ngereja pengawa baka ke dikereja iya lebuh iya agi biak, lebuh iya nyadi indu sundal di menua Ejip. Iya balat amat keran deka beleman enggau lelaki ke kanji baka keledai, tauka baka kuda ti lelaki.” ( Oholibah, nuan bisi ati deka nandu kereja kamah ti udah dikereja nuan lebuh nuan agi biak di menua Ejip, alai orang lelaki ke bemain enggau tusu nuan, lalu nuan nyerahka tubuh nuan keterubah iya ngagai sida.) “Nya alai, Oholibah, tu utai ti disebut Aku TUHAN Allah Taala ngagai nuan. Nuan nyau leju begulai enggau bala ambai nuan, tang Aku deka ngasuh sida ringat ngagai nuan, lalu ngasuh sida ngelulung nuan. Aku deka mai semua orang Babilon enggau orang Kaldea, bala lelaki ari Pekot, Soa, enggau ari Koa, enggau semua orang Asiria datai. Aku deka ngempuruka semua orang ke tinggi pangkat, bala pemesai soldadu ke sigat gamal, semua bala tuai bukai, enggau bala pemesai soldadu ke nepan kuda. Sida deka nyerang nuan ari utara, mai mayuh soldadu, kerita perang, enggau kerita ti dikena mai bekal. Belindung ngena terabai enggau selapuk kebal, sida deka ngelulung nuan. Aku deka nyerahka nuan ngagai sida, lalu sida deka ngakim nuan nitihka adat sida empu. Laban Aku ringat ngagai nuan, Aku deka nejuka sida ringat lalu munuh nuan. Sida deka netak idung enggau pending nuan, lalu munuh bala anak nuan. Sida deka nabanka bala anak lelaki enggau bala anak indu nuan, lalu nunu sida idup-idup. Sida deka ngeruntun gari ari tubuh nuan, lalu ngerampas perengka batu berega nuan. Aku deka madamka pengingin nuan ke seruran deka beleman, enggau semua penyai ti udah dikereja nuan kenyau ari maya nuan di menua Ejip. Nuan enggai agi malik ngagai engkeramba, tauka berundingka menua Ejip.” Tu utai ti disebut TUHAN Allah Taala: “Aku deka nyerahka nuan ngagai orang ke dipegedika sereta dikenggaika nuan. Lalu laban sida begedika nuan, sida deka nabanka semua utai ti udah ulih nuan, lalu ninggalka nuan telanjai baka indu sundal. Pengingin nuan ti deka beleman, enggau pengawa nuan ke nyundal udah nyungkak utai tu nyadi ba nuan. Nuan udah nyadi indu sundal ke semua bansa lalu udah ngamahka diri besembahka engkeramba sida. Nuan nitihka abi kaki menyadi nuan, nya alai, ketegal nya Aku deka meri mangkuk ukum ngagai nuan baka ke diberi Aku ngagai menyadi nuan.” Ku TUHAN Allah Taala bejaku, “Nuan deka ngirup ari mangkuk menyadi nuan. Mangkuk nya besai sereta jebung. Semua orang deka ngelanyai sereta ketawaka nuan. Mangkuk nya penuh. Mangkuk nya deka ngasuh nuan merinsa sereta mabuk, mangkuk penakut enggau pengerusak, mangkuk menyadi nuan Samaria. Nuan deka ngirup ari mangkuk nya datai ke mangkuk nya rangkai, lalu ngena kerimpak mangkuk nya nuan deka ngurik tusu diri. Aku TUHAN Allah Taala, udah bejaku.” Tu utai ti disebut TUHAN Allah Taala: “Laban nuan enda ingatka Aku, lalu ngemelakangka Aku, nuan deka merinsa ketegal pengingin nuan ti deka beleman, enggau ketegal nuan ke nyundal.” Ku TUHAN bejaku ngagai aku, “Anak mensia, kati nuan sedia deka ngakim Oholiah seduai Oholibah? Padahka ngagai seduai iya empu penyai seduai iya. Seduai iya udah butang sereta bebunuhka orang - butang enggau engkeramba sereta munuh bala anak mit ke diadaka seduai iya ke Aku. Seduai iya ngenjuk bala anak Aku nyadika piring ti diberi sida ngagai engkeramba sida. Tang seduai iya ukai semina ngereja nya aja. Seduai iya udah mega ngamahka Rumah Aku, lalu ngelanggar Hari Sabat ti udah ditumbuhka Aku. Ba hari seduai iya munuh bala anak Aku nyadika piring ti diberi sida ngagai engkeramba, nya mega hari seduai iya ngamahka Rumah Aku! “Seduai iya enda ngetu-ngetu ngasuh bala seruan ngambi orang ke lelaki ari menua jauh datai, lalu sida datai. Seduai iya mandi, ngechat mata diri ngena linsu, lalu ngias diri ngena batu ti berega. Seduai iya duduk ba kerusi-panjai ti manah gaya, lalu di mua seduai iya diengkahka seduai iya siti mija ti penuh laban utai ti manah, nyengkaum menyan enggau minyak kana ti udah diberi Aku ngagai seduai iya. Munyi nyawa orang ke ngelantangka diri bisi didinga, iya nya bala lelaki ke dibai ari menua puang. Sida lelaki nya ngerasukka gelang ba lengan indu dua iku nya, enggau makota ti manah gaya ba pala seduai iya. Lalu ku Aku berunding dalam ati Diri: sida tu ngaga indu tu nyadi indu sundal, taja pen iya udah luya laban pengawa butang. Sida seruran datai ngagai indu sundal dua iku nya, iya nya Oholah seduai Oholibah, indu ke kamah nya. Orang ke lurus deka ngukum seduai iya, bedawaka seduai iya butang sereta bebunuhka orang, laban seduai iya endang butang lalu jari seduai iya dibalut darah.” Tu utai ti disebut TUHAN Allah Taala: “Asuh bala orang ke enda beradat datai lalu ngemba sereta ngerumpak seduai iya. Awakka bala orang nya nuku seduai iya ngena batu, lalu nyerang seduai iya ngena pedang, munuh bala anak seduai iya, lalu nunu rumah seduai iya. Aku deka madamka semua pengawa ti kamah di serata menua tu, kena ngajar semua orang ke indu ngambika sida enda butang baka seduai iya. Lalu Aku deka ngukum seduai menyadi, ketegal kereja kamah ti udah dikereja seduai iya, enggau ketegal dosa ti dikereja seduai iya ke besembahka engkeramba. Nya baru seduai iya deka nemu Aku endang TUHAN Allah Taala.” Kena sepuluh hari bulan ti kesepuluh dalam taun ti kesemilan kami udah dibuai ngagai menua Babilon, TUHAN bejaku ngagai aku. Ku Iya, “Anak mensia, tuliska hari bulan sehari tu, laban sehari tu raja menua Babilon deka berengkah ngelulung nengeri Jerusalem. Padahka ngagai bala nembiak Aku ke angkat ngelaban tu siti sempama ti diberi Aku TUHAN Allah Taala ngagai sida: Tanggarka periuk lalu tuang ai ngagai periuk nya. Tabakka dagin ti pemadu manah, iya nya isi berang enggau kaki, lalu tabakka mega tulang ti manah. Pilih isi dagin bedus ti pemadu manah. Tugungka kayu api di baruh periuk nya. Awakka ai nya melidih. Panduk tulang enggau dagin nya.” Tu utai ti disebut TUHAN Allah Taala: “Tulah meh nengeri ti penuh laban bala pemunuh nya! Nengeri nya baka periuk ti betegar, ti seruran kamah. Ambi kerat dagin nya siti-siti sekali ari periuk nya, datai ke nadai agi kerat dagin tinggal. Orang bisi bebunuhka orang di nengeri nya, tang darah nadai tepambur ke tanah lalu dilamun amau. Darah nya tepambur ba batu. Aku udah nejuka darah nya mengkang ba atas batu nya enda dilamun, ngambika iya ngangau minta Aku malas.” Tu utai ti disebut TUHAN Allah Taala: “Tulah meh nengeri ti penuh laban bala pemunuh nya! Aku Empu deka nugungka kayu api. Bai mayuh agi kayu! Tiup api nya! Panduk dagin nya! Panduk iya datai ke kuah iya langkang! Tunu tulang nya! Tanggarka periuk temaga ti puang nya, lalu awakka iya nyau mirah chinang-chinang. Nya baru periuk nya deka nyadi tuchi baru, lebuh tegar iya udah angus, taja pen semua tegar nya enda ulih dibuai abis ngena api. Jerusalem, pengawa nuan ti kanji, udah ngamahka nuan. Taja pen Aku nguji nuchi nuan, tang nuan agi mengkang kamah. Nuan enda ulih nyadi tuchi baru sebedau nuan ngasaika pengeringat Aku. Aku ti TUHAN udah bejaku. Maya deka datai alai Aku deka bekereja. Aku tetap deka ingatka dosa nuan, lalu enda sinu tauka kasihka nuan. Nuan deka diukum ketegal utai ti udah dikereja nuan.” TUHAN Allah Taala udah bejaku. Ku TUHAN bejaku ngagai aku, “Anak mensia, Aku deka nabanka siku orang ke balat dikerinduka nuan. Nuan enda tau mutap tauka nyabak, tauka bekeberai ai mata. Anang nyabak didinga orang. Anang ngelai diri ngulit lalu bejalai enda belabung tauka enda bekasut. Anang nambai mua nuan, tauka makai pemakai ti diempa orang ke ngulit.” Tumu pagi nya aku bejaku enggau orang. Lemai nya bini aku mati, lalu hari siti aku ngereja utai ti diasuh TUHAN. Orang lalu nanya aku, “Nama kebuah nuan baka tu?” Aku lalu nyaut sida, “ TUHAN udah bejaku ngagai aku, ngasuh aku madahka pesan tu ngagai kita orang Israel: Kita temegahka penegap Rumah Sembiang. Kita rindu meda pemanah gaya rumah nya, lalu kita rindu nemuai ngagai rumah nya, tang TUHAN deka ngamahka endur nya, lalu bala anak kita ke tinggal deka mati dibunuh ngena pedang. Nya baru kita deka ngereja utai ti udah dikereja aku. Kita enda nambai mua diri, lalu enda mega makai pemakai ti diempa tukang sabak. Pala kita dibalut labung, lalu kita bejalai bekasut. Kita enda mega ngulit tauka nyabak, tang kita deka tusah ati ke penyai kita lalu bedemuh mantaika serebana kita ngagai pangan diri. Nya baru aku, Esekiel, deka nyadi tanda ke kita. Kita deka ngereja semua utai baka ke udah dikereja aku. Ku TUHAN bejaku, lebuh utai nya nyadi, nya baru kita deka nemu Aku endang TUHAN Allah Taala.” Ku TUHAN bejaku, “Anak mensia, diatu Aku deka ngambi Rumah Sembiang ti dikemegahka, dikegagaka, dikerinduka sereta digusung sida. Lalu Aku deka nabanka bala anak lelaki enggau bala anak indu sida. Ba hari Aku ngereja nya, sekeda sida ke ulih ngerarika diri ari pengerusak nya, deka datai lalu madahka ngagai nuan pasal utai nya. Ba hari nya mega, nuan ulih bejaku baru, lalu nuan deka bejaku enggau sida. Nya meh jalai nuan deka nyadi teladan ke orang mayuh, lalu sida deka nemu Aku endang TUHAN.” Ku TUHAN bejaku ngagai aku, “Anak mensia, kuingka mua nuan tunga ngagai menua Amon, lalu benabi ngelaban sida. Asuh sida mendingka utai ti disebut Aku TUHAN Allah Taala: Kita gaga ati meda Rumah Aku kamah, meda menua Israel dirusak, meda orang Judah dibuai ngagai menua Babilon. Nya alai Aku deka ngasuh bansa ti datai ari menua puang ti di timur ngalahka kita. Sida deka nirika kem sida di menua kita. Sida deka makai buah kita lalu ngirup ai tusu kita. Aku deka ngubah nengeri Rabah nyadi padang rumput alai nginang jelu unta, lalu semua menua Amon deka nyadi endur alai nginang jelu bedus. Nya baru kita nemu Aku endang TUHAN. Ku TUHAN Allah Taala bejaku: Laban kita nempapka jari lalu ngentakka kaki kita laban kita gaga pedis ati ngagai menua Israel, nya alai Aku deka ngunjurka jari Aku ngelaban kita, lalu deka nyerahka kita ngagai bansa bukai ngambika sida ngerumpak kita. Aku deka ngerusak bansa kita abis lengis, ngambika kita nadai agi bansa, nadai agi menua. Aku deka ngerusak kita. Nya baru kita deka nemu Aku endang TUHAN.” Ku TUHAN Allah Taala bejaku, “Laban Moap udah bejaku ngumbai Judah sebaka enggau semua bansa bukai, Aku deka nejuka semua nengeri ti nyaga garis entara menua Moap diserang, nyengkaum nengeri ti pemadu manah, iya nya Bet-jesimot, Baal-meon, enggau Kiriataim. Aku deka ngasuh bansa ari menua puang ti di timur ngalahka Moap enggau Amon, ngambika Moap nadai agi nyadi siti bansa. Aku deka ngukum Moap. Nya baru sida deka nemu Aku endang TUHAN.” Ku TUHAN Allah Taala bejaku: Laban orang Edom balat amat malas orang Judah, ti ngujungka Edom ditinggang penyalah ti besai, nya alai ku TUHAN Allah Taala bejaku: Aku deka ngunjurka jari Aku ngelaban Edom, lalu munuh semua mensia enggau jelu di menua nya, lalu ngaga menua nya nyadi menua ti nadai orang nguan. Kenyau ari Teman nyentuk ngagai Dedan, semua mensia ti diau dia deka mati beperang. Aku deka malas Edom ngena jari nembiak Aku Israel, lalu sida deka ngereja utai di Edom nitihka pengeringat enggau pemedis ati Aku. Nya baru Edom deka nemu Aku udah malas iya, ku TUHAN Allah Taala bejaku. Ku TUHAN Allah Taala bejaku: Laban orang Pilistin udah balat amat malas ngelaban munsuh lama sida, lalu ngerusak sida laban sida udu begedi, nya alai ku TUHAN Allah Taala bejaku, Aku deka ngunjurka jari Aku ngelaban orang Pilistin, ngeluska orang Keretit, lalu ngerusak semua mensia ti agi idup ba sebelah tebing tasik. Aku deka malas sida ngena ukum ti balat laban Aku pedis ati ngagai sida. Nya baru sida deka nemu Aku endang TUHAN.” Kena satu hari bulan dalam taun ti kesebelas kami udah dibuai ngagai menua Babilon, TUHAN bejaku ngagai aku. Ku Iya, “Anak mensia, tu utai ti ngasuh orang ke diau di Tire rami gaga. Ku sida manjung, ‘Jerusalem udah anchur! Iya nadai agi kuasa bedagang! Iya enda agi ulih bepekit ngelaban kitai!’ Nya alai ku TUHAN Allah Taala bejaku: Nengeri Tire, Aku ngelaban nuan. Aku deka ngasuh mayuh bengkah bansa nyerang nuan, lalu sida deka datai baka gelumbang. Sida deka ngerusak kuta nengeri nuan, lalu ngeruntuhka menara nuan. Aku deka ngikis lalu muai semua tanah ari nuan, lalu ninggalka semina batu aja. Batu nya, ti ba puak tasik nya, deka nyadi endur alai orang berikan nyembui pukat sida. Aku TUHAN Allah Taala udah bejaku. Semua bansa deka ngerumpak Tire, lalu ngena pedang sida, sida deka munuh orang ke diau di nengeri ti di menua nya. Nya baru sida deka nemu Aku endang TUHAN.” Laban ku TUHAN Allah Taala bejaku: Aku deka ngasuh raja ti pemadu kering ari utara, iya nya Raja Nebukadnesar menua Babilon, nyerang Tire. Iya deka datai mai mayuh bala soldadu, kuda, kerita perang enggau soldadu ke nepan kuda. Orang ke diau di nengeri ti mit di menua nya deka dibunuh iya ngena pedang. Iya deka numbak parit ti dalam, ngaga kuta tanah, lalu nusun terabai nyadika atap kena ngelaban nuan. Iya deka ngentung kuta kita ngena batang kayu lalu ngeruntuhka menara kita ngena kapak. Kuda iya amat mayuh datai ke abus ti tekebu laban kuda sida, deka malut kita. Munyi kuda ti narit kerita, enggau kerita perang deka ngasuh kuta kita berenyang, lebuh iya tama nengah pintu kuta nengeri ti udah bumbus. Bala soldadu iya ke nepan kuda deka nyerang nengah jalai raya kita, munuh bala kita ngena pedang. Tiang besai kita deka rebah ke tanah. Sida deka ngerampas pengaya enggau barang kita. Sida deka ngeruntuhka dinding kita, lalu ngerubuh rumah kita ke manah. Sida deka ngambi batu, kayu ramu enggau semua rapuh rumah kita lalu muai utai nya ngagai tasik. Aku deka madamka semua musik lagu nuan, lalu munyi belikan nuan nadai agi didinga. Aku deka ngaga nuan nyadi batu ti ngalan nadai utai mungkur, nyadika endur alai orang berikan nyembui pukat sida. Nuan enda digaga baru laban Aku TUHAN Allah Taala udah bejaku.” Ku TUHAN Allah Taala bejaku ngagai nengeri Tire: “Lebuh nuan alah, orang ke diau nisi tebing tasik deka takut ninga orang ke benung dibunuh nyerauh. Semua raja ke merintah menua ti ba tebing tasik deka nurun ari kerusi diraja sida. Sida deka muka pekayan diraja enggau gari sida ke disulam, lalu getar-getar duduk ba tanah. Sida deka balat takut meda utai ti nyadi ba nuan, datai ke sida enda nemu badu begetar. Sida deka bepantun ngena leka sabak tu ke nuan: ‘Nengeri ti tebilang nya udah dirusak! Kapal iya udah karam di tasik. Orang ari nengeri nya udah bekuasa di tasik lalu udah ngenakutka semua orang ke diau ba tebing tasik. Tang diatu, lebuh iya alah, semua pulau begetar magang, lalu orang ba pulau nya tusah ati meda iya dirusak.’ Laban ku TUHAN Allah Taala bejaku: “Aku deka ngaga nuan nyadi tembawai nengeri, lalu enda diuan mensia. Aku deka ngelamun nuan ngena ai tasik. Udah nya Aku deka ngasurka nuan ngagai dunya pemati, ngagai orang ke udah idup dulu kelia, lalu Aku deka mejalka nuan diau ba dunya ti di baruh, ba tembawai ti mengkang belama iya, begulai enggau orang di dunya pemati, ngambika nuan enda diuan mensia, tauka bisi endur ba dunya orang ke idup. Aku deka munuh nuan, lalu nuan deka abis lengis. Taja pen orang begigaka nuan, tang sida nadai agi tetemuka nuan, ku TUHAN Allah Taala bejaku. Ku TUHAN bejaku ngagai aku, “Anak mensia, nyabak meh nuan ngena leka sabak kenang tu ke nengeri Tire, nengeri ti bediri ba tebing tasik, ti bedagang enggau orang ke diau ba semua tebing tasik. Padahka ngagai iya utai ti disebut TUHAN Allah Taala: “Tire, nuan temegahka pemajik gamal diri. Tasik nyadika rumah nuan. Tukang ngaga nuan baka kapal ti manah gaya. Sida ngaga nuan ari kayu saipris ti diambi ari Bukit Hermon Lalu ngaga tiang layar nuan ari kayu sidar ti diambi ari menua Lebanon. Sida ngambi kayu oak kena ngaga sengayuh. Sida ngaga geladak nuan ari kayu pain ti diambi ari pulau Saiprus lalu nyampak geladak nuan ngena gading. Layar nuan digaga ari linin, kain linin ti disulam di menua Ejip, ti nyamai dikelala ari jauh. Kajang nuan digaga ari kain ti pemadu manah, ari kain ungu ti dibeli ari pulau Saiprus. Orang ke bedayung ke nuan datai ari nengeri Sidon enggau Arbat. Orang ke nyadi kelasi nuan nya bala nuan empu ti landik belayar. Bala tukang ke ngaga kapal endang orang ke udah dilatih, ke datai ari Gebal. Bala kelasi ari semua kapal ti belayar di tasik bedagang dalam kedai nuan. “Bala soldadu ari menua Persia, Lidia, enggau ari Libia gawa nyadi soldadu nuan. Sida ngantung terabai enggau selapuk kebal sida dalam rumah soldadu nuan. Sida nya meh orang ke ngemuliaka nuan. Soldadu ari Arbat nyaga kuta nuan, lalu bala soldadu ari Gamat nyaga menara nuan. Sida ngantung terabai sida ba dinding kuta nuan. Sida nya meh orang ke ngasuh nuan manah gaya. “Nuan bedagang di menua Spain lalu orang di menua nya meli barang nuan ngena pirak, besi, tin, enggau bangkang. Nuan bedagang di menua Gerika, Tubal, enggau Mesek, lalu nuan meli ulun, enggau perengka temaga ngena barang nuan. Nuan ngena barang nuan bebelika kuda kena gawa, kuda kena beperang, enggau keledai ari Bet Togarmah. Orang di Rot bedagang enggau nuan. Orang ari mayuh bengkah menua ti ba tebing tasik meli barang nuan ngena gading, enggau kayu arang. Orang menua Siria meli barang enggau mayuh macham utai ti dikeluarka nuan. Sida meli barang nuan ngena batu samerut, kain ungu, kain ti disulam, kain linin ti alus, batu karang enggau batu delima. Judah enggau Israel meli barang nuan ngena gandum, ai manyi, minyak kana, enggau rempah. Orang di Dedan meli barang nuan ngena kain ti dikena nyelap belakang kuda. Orang Arab enggau bala orang ke merintah di menua Kedar meli barang nuan ngena anak domba, bedus, enggau kambin. Orang dagang ari Sheba enggau ari Ramah meli barang nuan ngena batu ti berega, emas enggau rempah ti pemadu manah. Nengeri Haran, Kaneh, enggau Eden, bala orang dagang ari Sheba, ari nengeri Asur enggau Kilmat semua bedagang enggau nuan magang. Sida nyual ngagai nuan kain ti manah, kain ungu, kain ti disulam, tikai perdani ti bechura mayuh macham, enggau tali ti chukup manah digaga. Barang nuan dibai ngena kapal ti besai. “Nuan baka kapal ti di tasik ti sarat laban barang ti berat. Lebuh bala orang ke bedayung mai nuan ke tasik, ribut ari timur ngaramka nuan jauh ari tebing. Semua barang ti dikena nuan bedagang, semua bala kelasi nuan, bala tukang kapal nuan enggau bala orang ke bedagang, genap iku soldadu ke nepan kapal nuan, mati magang di tasik lebuh kapal nuan karam. Panjung bala kelasi ke nyau deka lemas ulih didinga ari tebing. “Semua kapal diatu nyau ditinggalka orang, lalu semua kelasi udah niki ke tebing. Semua sida balat amat ngulitka nuan, ngerabuka amau ngagai pala sida, lalu maringka diri ba amau. Sida ngukur pala sida ketegal nuan lalu begari ngena kain guni. Ati sida balat tusah lebuh sida nyabak. Sida nyabakka nuan ngena leka sabak kenang tu: ‘Sapa ulih dibandingka enggau Tire, enggau Tire ti nadai bemunyi dalam tasik? Lebuh barang nuan dibai ngagai menua tasik, nuan nyual semua utai ti dipeguna semua bansa. Bala raja nyadi kaya laban barang nuan ti berega. Diatu nuan udah karam di tasik. Nuan udah tengelam ngagai buntut tasik. Barang nuan enggau semua orang ke bekereja ke nuan udah lesap sama enggau nuan ke dalam tasik.’ “Genap iku orang ke diau ba tebing tasik tekenyit ati magang ninga utai ti udah nyadi ba nuan. Indah bala raja sida deh takut, lalu mua sida tepuchat-kelat. Nuan nyau nadai agi, lesap belama iya, lalu bala orang dagang di serata dunya bela takut magang enggai ke diri dituntung penusah baka nuan.” Ku TUHAN bejaku ngagai aku, “Anak mensia, padahka ngagai raja menua Tire utai ti disebut Aku TUHAN Allah Taala ngagai iya: Nuan ngerigangka diri ngena penyumbung, lalu ngumbai diri petara. Kenu ku nuan, nuan duduk ba kerusi diraja baka petara, dikelingi tasik. Nuan nyangka ngaga diri nyadi petara, tang nuan ukai petara. Nuan semina mensia aja, ukai petara. Nuan ngumbai diri pintar agi ari Danel, lalu ngumbai nadai utai ulih dilalaika ari nuan. Penemu-dalam nuan, enggau pengelandik nuan udah ngasuh nuan kaya laban reta emas enggau pirak. Nuan landik bedagang, lalu selalu bulih untung. Nuan temegahka pengaya diri! Nyadi diatu, tu utai ti disebut Aku TUHAN Allah Taala: Laban nuan ngumbai diri bepenemu-dalam baka petara, Aku deka ngasuh bala munsuh ti nadai pengasih, nyerang nuan. Sida deka ngerusak semua utai ti manah ti udah ulih nuan ngena pengelandik enggau penemu-dalam nuan. Sida deka munuh nuan, lalu muai bangkai nuan ngagai tasik Lebuh sida datai lalu munuh nuan, kati nuan agi deka majak ngumbai diri petara? Lebuh nuan betunga mua enggau orang ke deka munuh nuan, nya baru nuan deka nemu diri endang semina mensia aja, ukai petara. Nuan deka mati baka ukui ba jari orang bansa bukai ke enda arapka Allah Taala. Aku TUHAN Allah Taala udah bejaku.” Ku TUHAN bejaku ngagai aku baru, “Esekiel, anak mensia, awakka nuan tusah ati ke utai ti deka nyadi ba raja menua Tire. Padahka ngagai iya munyi tu: Ku TUHAN Allah Taala bejaku: Nuan suba udah nyadi teladan ke utai ti pemadu manah. Nuan suba endang bepenemu-dalam sereta sigat! Nuan udah diau di menua Eden, kebun Allah Taala, lalu nuan udah ngias diri ngena semua macham batu ti berega: batu akek, batu intan, batu sebarajat, batu perusah, batu unam, batu asija, batu nilam, batu samerut, enggau batu berega ti mirah. Nuan bisi perengka emas, ti digagaka nuan lebuh nuan empu digaga. Aku udah ngengkahka siku melikat ba endur nya ngambika iya nyaga nuan. Nuan udah diau ba bukit Allah Taala ti kudus, lalu udah bejalai nujah kapar batu berega ti beperenching. Ulah nuan suba nadai jalai mantah kenyau ari maya nuan ditempa nyentuk ngagai maya nuan belabuh ngereja penyai. Lebuh nuan suba kiruh bejual-bebeli, nuan mangah, lalu nuan bedosa. Nya alai Aku muai nuan ari bukit Allah Taala ti kudus, lalu melikat ke nyaga nuan, muru nuan ari batu berega ti beperenching nya. Nuan udah temegahka penyigat gamal diri, lalu nama nuan ti tebilang ngasuh nuan ngulah diri baka orang ke beli. Ketegal nya Aku udah ngempaska nuan ke tanah, lalu nejuka nuan dia kena ngajar raja ti bukai. Nuan udah ngereja mayuh bengkah penyai lebuh nuan bejual-bebeli; nuan udah ngamahka endur alai nuan besembah. Nya alai Aku nyelup nuan ngena api lalu nunu nuan datai ke nuan retung nyadi amau, dipeda semua orang ke merening ngagai nuan. Semua orang ke nemu nuan balat geli meda nuan. Nuan nadai agi lalu deka lesap belama iya.” Ku TUHAN bejaku ngagai aku, “Anak mensia, perening tunga ngagai Sidon, lalu benabi ngelaban iya, munyi tu: Ku TUHAN Allah Taala bejaku, ‘Aku ngelaban nuan, Sidon, lalu Aku deka bulih mulia ba tengah-tengah nuan. Orang ke dalam nuan deka nemu Aku endang TUHAN lebuh Aku ngukum nuan lalu mandangka pengudus Aku dalam nuan, laban Aku deka ngasuh penyakit ninggang nuan, lalu ngasuh orang bebunuh ba jalai raya nuan, lalu orang deka rebah mati dibunuh ngena pedang munsuh ti nyerang lalu ngelulungka nuan. Nya baru nuan deka nemu Aku endang TUHAN. Orang Israel enda agi diachuk duri orang bansa bukai ke ngelingi iya, ti udah ngeleseka iya. Nya baru sida deka nemu Aku endang TUHAN Allah Taala.” Ku TUHAN Allah Taala bejaku: Lebuh Aku ngempuruka orang Israel ari semua menua ti udah alai Aku ngachirka sida, lalu ngayanka mulia Aku dalam sida, dipeda semua bansa, nya baru sida deka diau ngentapka diri di menua sida empu, menua ti udah diberi Aku ngagai nembiak Aku Jakop. Sida deka diau likun dia, lalu deka nirika rumah, lalu numbuhka kebun anggur. Sida deka diau likun lebuh Aku ngukum semua orang ke berimbai pendiau enggau sida ke udah ngeleseka sida. Nya baru sida deka nemu Aku endang TUHAN Allah Taala sida.” Kena dua belas hari bulan ti kesepuluh dalam taun ti kesepuluh kami udah dibuai ngagai menua Babilon, TUHAN bejaku ngagai aku. Ku Iya, “Anak mensia, perening ngagai raja menua Ejip, lalu benabi ngelaban iya enggau ngelaban semua menua Ejip. Bejaku lalu sebut: Ku TUHAN Allah Taala bejaku: Aku ngelaban nuan, raja menua Ejip, naga ti besai ti meradai ba arus ai, ti ngumbai Sungai Nile nya enggi nuan, lalu ngumbai diri udah ngaga sungai nya. Aku deka ngaitka ginti ba rang nuan, lalu ngasuh ikan ti dalam Sungai Nile lekat ba tisik nuan, lalu Aku deka narit nuan pansut ari sungai nya, sama enggau semua ikan ari sungai nuan ti lekat ba tisik nuan. Lalu Aku deka nikauka nuan ngagai menua puang, nuan enggau semua ikan nya ari sungai nuan. Nuan deka labuh ba menua puang lalu enda dikuburka, lalu bangkai nuan deka nyadika pemakai burung enggau jelu. Nya baru semua orang ke diau di menua Ejip deka nemu Aku endang TUHAN. Laban nuan endang tungkat buluh orang Israel, lebuh sida megai nuan ngena jari sida, nuan patah, lalu ngachuk kechiak sida, lalu lebuh sida bekering ba nuan, nuan patah, lalu ngasuh punggung sida begetar. Nya alai ku TUHAN Allah Taala bejaku: Aku deka ngasuh pedang mantap nuan, lalu deka ngetas ari nuan mensia enggau jelu, lalu menua Ejip deka nyadi menua ti nadai orang nguan sereta kusi. Nya baru sida deka nemu Aku endang TUHAN. Laban nuan udah ngumbai Nile nya sungai nuan, lalu nuan ngumbai diri udah ngaga iya, nya alai Aku deka ngelaban nuan sereta ngelaban sungai nuan, lalu Aku deka ngaga menua Ejip kusi sereta nadai orang nguan, kenyau ari Mikdol nyentuk ngagai Syene, terus ngagai garis entara menua enggau menua Etiopia. Nadai mensia tauka jelu deka bejalai nengah menua nya. Menua nya nadai orang nguan dalam kandang empat puluh taun. Lalu Aku deka ngaga Ejip nyadi menua ti pemadu puang di dunya tu, lalu nengeri iya nyadi nengeri ti nadai orang nguan dalam kandang empat puluh taun, ti lebih agi dirusak ari semua nengeri bukai. Aku deka ngachirka orang Ejip ngagai semua menua bukai, lalu mambarka sida ba semua menua bukai. Laban ku TUHAN Allah Taala bejaku: Ba pengujung empat puluh taun nya ila, Aku deka ngempuruka orang Ejip ari semua menua ti udah alai Aku ngachirka sida, lalu Aku deka ngasuh sida diau di selatan menua Ejip, ti endang menua asal sida, lalu sida deka nyadi perintah ti lemi, perintah ti pemadu lemi ari semua perintah ti bukai, lalu sida enda agi ngeninggika diri ari atas bansa bukai. Aku deka ngaga sida nyadi bansa ti pemadu mit, datai ke sida enda agi ulih merintah bansa bukai. Orang Ejip nadai agi dikarapka menua Israel nulung sida. Sida deka ingatka penyai orang Ejip, lebuh sida nguing ngagai orang Ejip minta tulung. Nya baru sida deka nemu Aku endang TUHAN Allah Taala. Kena satu hari bulan ti kesatu dalam taun ti kedua puluh tujuh kami udah dibuai ngagai menua Babilon, TUHAN bejaku ngagai aku. Ku Iya, “Anak mensia, Raja Nebukadnesar menua Babilon udah nyerang nengeri Tire. Iya udah mejalka bala soldadu iya mai ma ti kelalu berat datai ke pala sida nyau abis lasu, lalu kulit bau sida nyau ngeliti. Tang raja tauka bala soldadu iya nadai bulih utai ari nengeri nya setipak enggau pengiruh sida. Nya alai tu utai ti disebut Aku TUHAN Allah Taala: Aku deka nyerahka menua Ejip ngagai Raja Nebukadnesar menua Babilon. Iya deka ngerumpak menua nya, lalu nabanka semua pengaya menua Ejip kena iya mayar gaji bala soldadu iya. Aku udah meri menua Ejip ngagai iya kena Aku ngaji iya ti udah gawa, laban bala soldadu iya udah gawa ke Aku. Aku TUHAN Allah Taala udah bejaku. Lebuh utai nya nyadi, Aku deka ngasuh orang Israel kering lalu ngasuh nuan, Esekiel, bejaku ngagai semua sida. Nya baru sida deka nemu Aku endang TUHAN.” TUHAN bejaku baru ngagai aku. Ku Iya, “Anak mensia, benabi lalu sebut: Ku TUHAN Allah Taala bejaku: Sebut enggau nyawa ti inggar: Naka meh pemalat hari nya! Laban hari nyau semak, hari TUHAN nyau semak. Hari nya deka petang laban mua hari, maya semua bansa deka diukum. Perang deka nyadi di menua Ejip lalu orang Etiopia deka irau ati lebuh orang Ejip dibunuh, lalu utai sida ditabanka munsuh lalu pugu menua Ejip diruntuhka. Etiopia, enggau Put, Lut, enggau semua Arabia, enggau Libia, enggau semua orang ke setanah enggau sida deka mati dibunuh ngena pedang. Ku TUHAN bejaku: Orang ke nyukung Ejip deka alah, lalu bala soldadu menua Ejip ti sumbung deka dirusak magang. Berengkah ari Migdol nyentuk ngagai Syene, sida deka mati dibunuh ngena pedang, ku TUHAN Allah Taala bejaku. Menua Ejip deka nyadi menua ti pemadu puang di dunya tu, lalu semua nengeri iya deka nyadi tembawai magang. Nya baru sida deka nemu Aku endang TUHAN, lebuh Aku nyelup menua Ejip ngena api, lalu semua orang ke nulung iya dibunuh magang. Ba hari nya, Aku deka ngirumka bala seruan ngena kapal kena ngemba orang menua Etiopia ti enda ngadang, lalu sida deka irau ati lebuh Ejip diukum, laban hari nya deka datai!” Ku TUHAN Allah Taala bejaku: Aku deka ngena Raja Nebukadnesar menua Babilon madamka pengaya menua Ejip. Iya enggau bala soldadu iya deka datai lalu ngerusak menua nya. Sida deka nyerang menua Ejip ngena pedang, lalu menua nya deka penuh laban bangkai mensia. Aku deka ngerangkaika Sungai Nile, lalu nyual menua Ejip ngagai orang ke jai. Aku deka ngerusak menua nya enggau semua utai ti dalam iya ngena jari orang ke datai ari menua bukai. Aku ti TUHAN udah bejaku.” Ku TUHAN Allah Taala bejaku: Aku deka ngerusak semua engkeramba enggau petara ti pelesu di Mempis. Menua Ejip nadai agi raja lalu Aku deka ngemba semua orang di menua nya. Aku deka ngaga Patros nyadi menua puang, lalu nunu nengeri Zoan ti di utara lalu Aku deka ngukum nengeri Tebes. Aku deka mubuhka pengeringat Aku ngagai nengeri Pelusium, nengeri ti bekuta di menua Ejip lalu Aku deka ngerusak pengaya nengeri Tebes. Aku deka nunu menua Ejip. Nengeri Pelusium deka merinsa. Kuta nengeri Tebes deka bumbus, lalu nengeri Mempis deka diserang lebuh siang hari. Bala lelaki ke agi biak ari nengeri Heliopolis enggau nengeri Bubastis, deka mati dibunuh ngena pedang, lalu orang bukai di nengeri deka ditabanka nyadi orang tangkap. Di Tapanes siang hari deka piam lebuh Aku ngalahka kuasa menua Ejip, lalu madamka pengering ti dikemegahka sida. Nengeri nya deka dibap mua hari, lalu semua nengeri di menua nya deka ditabanka nyadi orang tangkap magang. Nya meh jalai Aku deka ngukum menua Ejip. Nya baru sida deka nemu Aku endang TUHAN. Kena tujuh hari bulan ti kesatu dalam taun ti kesebelas kami udah dibuai ngagai menua Babilon, TUHAN bejaku ngagai aku. Ku Iya, “Anak mensia, Aku udah matahka lengan raja menua Ejip. Lengan nya apin dibalut ngambika gerai, lalu kering baru megai pedang. Nya alai, ku TUHAN Allah Taala bejaku: Aku deka ngelaban raja menua Ejip, lalu matahka lengan iya kedua piak - lengan ti agi meruan, enggau lengan ti udah patah - lalu Aku deka ngasuh pedang tebelengka ari jari iya. Aku deka ngachirka orang Ejip ngagai semua menua, lalu mambarka sida di serata dunya. Aku deka ngeringka lengan raja menua Babilon, lalu meri pedang Aku ngagai jari iya, tang Aku deka matahka lengan raja menua Ejip, lalu iya deka bedemuh lalu mati di mua munsuh. Sigi amat, Aku deka ngeringka lengan raja menua Babilon, tang Aku deka matahka lengan raja menua Ejip. Nya baru sida deka nemu Aku endang TUHAN lebuh Aku meri pedang Aku ngagai jari raja menua Babilon. Iya deka ngedarka lalu nunjukka pedang nya tunga ngagai menua Ejip, lalu Aku deka ngachirka orang Ejip ngagai semua bansa lalu mambarka sida di serata dunya. Nya baru sida deka nemu Aku endang TUHAN.” Kena satu hari bulan ti ketiga dalam taun ti kesebelas kami udah dibuai ngagai menua Babilon, TUHAN bejaku ngagai aku. Ku Iya, “Anak mensia, sebut ngagai raja menua Ejip enggau ngagai semua nembiak iya: Nadai orang besai agi kuasa ari nuan! Nuan tu baka kayu sidar ti di menua Lebanon, ti manah dan sereta lebat daun, ti tumbuh nyaruk remang. Ai dia chukup kena iya idup, lalu ai ti di dalam tanah ngasuh iya tumbuh tinggi, lalu ai nya rarat ngelingi endur alai iya udah ditanam, sereta rarat ngagai semua kayu ti ba tanah nya. Laban kayu nya chukup ai, nya alai iya galak agi ari kayu bukai. Dan iya besai sereta jurai. Semua macham burung begagaka tansang ba dan iya. Jelu babas beranak belindung di baruh dan iya. Semua bansa dalam dunya tu belelak di baruh iya. Kayu nya manah amat gaya, laban dan iya jurai, laban urat iya ngunjam ke dalam ngagai endur ti mayuh ai. Nadai kayu sidar ti ba kebun Allah Taala ulih dibandingka enggau kayu nya. Nadai kayu pain kala bisi dan ti baka nya, Kayu plan pen nadai dan ti baka nya. Nadai kayu dalam kebun Allah Taala ti ngemanah nya. Aku tu ke ngaga iya manah gaya sereta mayuh dan. Semua kayu di Eden, iya nya kebun Allah Taala, bela ngining iya magang. Nya alai ku TUHAN Allah Taala bejaku: Laban iya tinggi lalu puchuk iya nyaruk remang, lalu iya temegahka peninggi diri, Aku deka nyerahka iya ngagai raja menua bukai. Raja nya deka ngereja ngagai iya setipak enggau penyai ti udah dikereja iya. Aku udah muai iya. Orang ari menua bukai ti nadai pengasih deka nebang iya, lalu ninggalka iya. Dan enggau pating iya ti patah deka labuh ninggang semua bukit enggau lebak di menua nya. Semua bansa ti udah belindung di baruh iya, deka angkat ari endur nya. Burung deka datai lalu inggap ba kayu ti udah rebah nya, lalu jelu babas deka ngelunjak dan iya. Utai tu nyadi ngambika nadai kayu ti ba tebing sungai tau tumbuh tinggi, tauka nyaruk remang, sereta ngambika nadai kayu bukai tinggi baka sida, laban semua sida deka diukum mati baka mensia ti dibuai ngagai dunya pemati.” Ku TUHAN Allah Taala bejaku: Lebuh kayu nya nurun ngagai dunya pemati, Aku nutup semua ai enggau sungai nyadika tanda ngulitka iya. Aku nagang semua mata ai enggau sungai rarat. Aku mungkur Bukit Lebanon ngena pemetang nyadika tanda sida ngulit, lalu semua kayu dalam utan nya layu magang. Aku ngasuh semua bansa getar-getar lebuh sida ninga munyi kayu nya rebah, lebuh Aku numbangka iya lalu nurunka iya ngagai dunya pemati. Semua kayu di Eden, enggau semua kayu ti manah di Lebanon, semua kayu ti chukup ai, deka gaga ati meda kayu nya rebah. Sida mega mansang ngagai dunya pemati sama enggau kayu nya, ngagai orang ke udah dibunuh ngena pedang, enggau ngagai orang ke setanah enggau sida, ke belindung di baruh iya dalam mayuh bengkah bansa. Raja menua Ejip, semua utai nya deka nyadi ba nuan enggau ba bala nembiak nuan! Dulu suba nuan udah baka kayu nya, tinggi agi sereta tegap agi ari semua orang bukai di dunya tu. Tang diatu nuan deka ditebang, lalu enda tau enda mati baka kayu ti dalam kebun Eden. Nuan deka dibuai ngagai dunya pemati, lalu nuan deka diau begulai enggau orang ke enda arapka Allah Taala, begulai enggau orang ke mati dibunuh ngena pedang. Aku TUHAN Allah Taala udah bejaku.” Kena satu hari bulan ti kedua belas dalam taun ti kedua belas kami udah dibuai ngagai menua Babilon, TUHAN bejaku ngagai aku. Ku Iya, “Anak mensia, beri jaku tangkan ngagai raja menua Ejip. Beri pesan tu ngagai iya ari Aku: Nuan ngaga diri baka singa di mua mayuh bengkah bansa, tang nuan baka baya ti enchapak nengah sungai. Nuan ngeruh ai ngena kaki nuan lalu ngamahka mayuh bengkah sungai. Lebuh mayuh bengkah bansa begempuru, Aku deka nangkap nuan ngena pukat Aku, lalu nejuka sida narit pukat nya ke tebing. Aku deka ngempaska nuan ke tanah, lalu ngasuh semua burung enggau jelu di dunya tu makai nuan. Aku deka ngelamun semua bukit enggau semua lebak ngena but bangkai nuan. Aku deka mubuhka darah nuan datai ke mungkur semua bukit lalu ngemenuhka semua sungai. Lebuh Aku ngerusak nuan, Aku deka mungkur langit lalu ngelamun bintang. Mata hari deka belalai ari belakang remang, lalu bulan enda meri penampak. Aku deka madamka semua penampak di langit lalu ngasuh menua nuan petang. Aku TUHAN Allah Taala udah bejaku.” “Semua bansa deka tusah ati lebuh Aku nusui berita pasal pengerusak nuan di menua ti enda kala didinga nuan. Utai ti dikereja Aku ngagai nuan deka ngasuh mayuh bengkah bansa tekenyit ati. Lebuh Aku miauka pedang Aku, bala raja deka getar-getar takut. Lebuh nuan alah, semua sida deka getar-getar takut enggai ke diri mati.” Ku TUHAN Allah Taala bejaku enggau raja menua Ejip, “Nuan deka diserang pedang raja menua Babilon. Aku deka nejuka bala soldadu ari mayuh bengkah bansa ti mangah, nyintak pedang sida lalu munuh semua nembiak nuan, lalu semua sida enggau semua utai ti dikemegahka nuan deka dirusak magang. Aku deka munuh jelu sapi nuan ba sebelah tebing sungai, ngambika mensia tauka jelu sapi nadai agi ngeruh ai. Aku deka ngasuh sungai nuan chiru lalu rarat enda beriak. Aku TUHAN Allah Taala udah bejaku. Lebuh Aku ngaga menua Ejip nyadi menua ti nadai orang nguan sereta kusi, lalu ngerusak semua orang ke diau dia, nya baru sida deka nemu Aku endang TUHAN. Jaku tangkan tu deka nyadika leka sabak kena nyenggai orang ke mati. Sida ke indu ari semua bansa deka ngena leka sabak tu ngulitka menua Ejip enggau semua nembiak iya. Aku TUHAN Allah Taala udah bejaku.” Kena lima belas hari bulan ti kesatu dalam taun ti kedua belas kami udah dibuai ngagai menua Babilon, TUHAN bejaku ngagai aku. Ku Iya, “Anak mensia, ngulit meh nuan ke orang Ejip. Kirumka sida ngagai dunya pemati sama enggau bansa bukai ti bekuasa. Sebut ngagai sida: “Kati kita ngumbai diri bajik agi ari semua orang bukai? Kita deka nurun ngagai dunya pemati lalu gali dia begulai enggau orang ke enda nangika Allah Taala. “Orang Ejip deka mati sama enggau sida ke mati beperang. Siti pedang sedia deka munuh semua sida. Bala bujang berani enggau orang ke beperang setanah enggau orang Ejip, ngelaluka penatai orang Ejip ngagai dunya pemati. Ku sida manjung: “Orang ke enda arapka Allah Taala, ke mati beperang, udah datai ditu, lalu ditu meh endur alai sida gali!’ “Asiria bisi dia, dikelingi kubur bala soldadu iya. Semua sida nya udah mati beperang magang, lalu kubur sida nya ba buntut dunya pemati. Semua soldadu iya udah mati beperang, lalu kubur sida ngelingi lumbung iya. Tang dulu menya sida balat ngenakutka dunya orang ke idup. “Elam bisi dia, dikelingi kubur bala soldadu iya. Semua sida nya udah mati beperang, lalu sida nurun, enda ditutus, ngagai dunya pemati. Lebuh sida agi idup, sida balat ngenakutka orang, tang diatu sida garing-garing mati sereta dipechat. Elam gali begulai enggau sida ke udah mati beperang, lalu kubur bala soldadu iya ngelingi iya magang. Semua sida nya enda ditutus, semua mati beperang. Lebuh sida agi idup suba, sida balat ngenakutka orang, tang diatu sida garing-garing mati sereta dipechat, sama enggau orang ke udah mati beperang. “Mesek enggau Tubal bisi dia, dikelingi kubur bala soldadu seduai iya. Semua sida nya enda ditutus magang, lalu semua sida mati beperang. Tang taja pia, sida udah balat ngenakutka orang ke idup. Sida iya enda dikuburka enggau basa baka ke nguburka sida bujang berani ti dulu kelia, ke nurun mai semua senyata sida ngagai dunya pemati, lalu pedang sida diengkahka di baruh pala sida, lalu terabai sida diengkahka ba atas tubuh sida. Dulu suba sida ke bujang berani tu udah chukup bekuasa ngenakutka orang ke idup. “Nya meh gaya orang Ejip deka betagaring mati begulai enggau orang ke enda ditutus, ke mati beperang. Edom bisi dia sama enggau bala raja enggau bala pemerintah iya. Sida nya soldadu ti bekuasa dulu suba, tang diatu sida garing-garing di dunya pemati, begulai enggau orang ke enda ditutus, ke mati beperang. “Semua anak raja ke datai ari utara bisi dia magang, lalu pia mega orang Sidon. Dulu menya kuasa sida balat amat ngenakutka orang, tang diatu sida udah dipechat lalu nurun begulai enggau sida ke mati beperang, lalu dikuburka enda ditutus. Sida dipechat sama enggau sida ke nurun ngagai dunya pemati. “Lebuh raja menua Ejip meda orang ke mati beperang, iya enggau bala soldadu iya deka lantang ati meda sida,” ku TUHAN Allah Taala bejaku. “Aku Empu ti udah ngasuh raja menua Ejip ngenakutka orang ke idup, tang iya enggau bala soldadu iya deka kena bunuh, lalu dikuburka begulai enggau semua orang ke enda ditutus, ke mati beperang.” TUHAN Allah Taala udah bejaku. Ku TUHAN bejaku ngagai aku, “Anak mensia, padahka ngagai bala nembiak nuan utai ti deka nyadi lebuh Aku ngasuh perang nyadi ba siti menua. Orang di menua nya milih siku ari bala sida nyadi jejaga. Lebuh jejaga nya meda bala munsuh datai, iya lalu megau semua orang. Enti orang ninga iya megau orang, tang enda ibuhka utai ti dipadahka iya, lalu bala munsuh datai lalu munuh orang nya, orang nya empu deka betanggungjawapka pemati diri. Pemati orang nya datai ari penyalah iya empu, laban iya enggai ibuhka kangau jejaga ke megau orang mayuh. Enti orang nya ibuhka kangau jejaga, iya tentu ulih ngerarika diri. Tang enti jejaga nya meda munsuh datai, lalu enda megau orang mayuh, munsuh nya deka datai lalu munuh orang ke bedosa nya, Aku deka nekanka jejaga nya betanggungjawapka pemati sida. “Anak mensia, diatu Aku ngaga nuan nyadika jejaga orang Israel. Nuan enda tau enda madahka ngagai sida jaku tangkan ti diberi Aku ngagai nuan. Enti Aku madahka orang ke jai nya deka mati, tang nuan enda madahka jaku tangkan nya ngagai iya ngasuh iya ngubah ulah diri, ngambika iya ulih ngidupka nyawa diri, iya deka mati, mengkang nyadi orang ke bedosa, lalu Aku deka nekanka nuan betanggungjawapka pemati iya. Tang enti nuan meri jaku tangkan nya ngagai orang ke jai, lalu iya enggai badu bedosa, iya deka mati, mengkang nyadi orang ke bedosa, tang nuan empu deka nyelamatka nyawa diri.” Ku TUHAN bejaku ngagai aku, “Anak mensia, sebut ngagai orang Israel utai ti udah disebut sida empu: ‘Kami ditinggang dosa enggau penyalah ti udah dikereja kami. Kami nyau deka mati. Baka ni ku jalai kami tau idup?’ Padahka ngagai sida, dalam nama Aku TUHAN Allah Taala Allah Taala ti idup, Aku enda rindu meda orang ke bedosa mati. Aku rindu agi meda sida badu agi bedosa, lalu idup. Israel, badu agi ngereja penyai. Nama kebuah kita keran deka mati? “Anak mensia, padahka ngagai orang Israel diatu, lebuh orang ke badas bedosa, pengawa ti manah ti udah dikereja iya enda ulih ngidupka nyawa iya. Enti orang ke jai badu agi ngereja penyai, iya enda diukum, lalu enti orang ke manah berengkah bedosa, iya deka dibunuh. Taja pen Aku madahka orang ke lurus deka idup, tang enti iya ngumbai pemanah pengawa iya chukup alai iya bekering, lalu iya ngereja penyai, Aku enggai ngingatka pengawa ti badas ti udah dikereja iya. Iya deka mati ketegal penyai ti dikereja iya. Taja pen Aku meri jaku tangkan ngagai orang ke jai, madahka iya deka mati, tang enti iya badu agi bedosa lalu ngereja utai ti ngena sereta manah, ambi ke banding, enti iya mulaika gadai ti udah diambi iya ari orang lebuh iya nyali duit ngagai orang, tauka mulaika utai ti udah dichuri iya - enti iya badu agi bedosa, lalu nitihka adat ti meri pengidup, iya enda mati, tang deka idup. Aku deka ngampun dosa ti udah dikereja iya, lalu iya deka idup laban iya udah ngereja utai ti ngena sereta lurus. “Tang bala kita ngumbai utai ti dikereja Aku tu enda lurus! Ukai baka nya. Jalai kita ke enda lurus. Lebuh orang ke lurus badu agi ngereja pemadas, lalu belabuh ngereja penyai, iya deka mati ketegal nya. Lebuh orang ke jai badu agi bedosa lalu ngereja utai ti ngena sereta lurus, iya ngidupka nyawa diri. Tang kita orang Israel ngumbai utai ti dikereja Aku nya enda lurus. Aku deka ngakim kita nitihka utai ti dikereja kita.” Kena lima hari bulan ti kesepuluh dalam taun ti kedua belas kami udah dibuai ngagai menua Babilon, siku orang ke udah ngerarika diri ari Jerusalem datai lalu madahka ngagai aku nengeri nya udah alah. Lemai sebedau orang nya datai, aku endang udah balat amat ngasaika kuasa TUHAN bisi enggau aku. Lebuh orang nya datai pagi hari siti, TUHAN lalu ngasuh aku ulih bejaku baru. Ku TUHAN bejaku ngagai aku, “Anak mensia, orang ke diau dalam tembawai nengeri di menua Israel bisi nyebut: ‘Abraham ke siku aja, tang iya udah diberi semua menua tu. Diatu kitai nyau mayuh, nya alai menua tu patut diempu kitai.’ “Padahka ngagai sida utai ti disebut Aku TUHAN Allah Taala: Kita makai dagin ti agi bedarah. Kita nyembah engkeramba. Kita munuh orang. Nama utai ti ngasuh kita ngumbai diri deka bempu menua tu? Kita ngarapka pedang kita. Ulah kita amat jai. Genap iku kita butang. Nama utai ti ngasuh kita ngumbai diri deka bempu menua tu? “Padahka ngagai sida, Aku TUHAN Allah Taala, meri sida jaku tangkan dalam nama Aku, Allah Taala ti idup: orang ke diau dalam mayuh bengkah nengeri ti tembawai, deka dibunuh. Sida ke diau di menua pesisir, deka diempa jelu babas. Sida ke belalai ba sebelah bukit enggau dalam lubang gua, deka mati laban penyakit. Aku deka ngaga menua tu nyadi menua ti nadai orang nguan sereta kusi, lalu kuasa ti dikemegahka sida deka abis. Bukit menua Israel deka mayuh utai nganu, datai ke nadai orang ulih bejalai nengah menua nya. Lebuh Aku ngukum orang mayuh ketegal dosa sida, lalu ngaga menua tu nyadi menua ti kusi, nya baru sida deka nemu Aku endang TUHAN.” Ku TUHAN bejaku, “Anak mensia, bala kita bejakuka pasal nuan lebuh sida betemu enggau pangan diri ngimbai kuta nengeri, tauka ba mua pintu rumah sida. Ku sida bejaku enggau pangan diri, ‘Aram kitai mendingka jaku ti datai ari TUHAN diatu.’ Nya alai bala nembiak Aku lalu besedul mansang ke mua deka ningaka utai ti disebut nuan, tang sida enda ngereja utai ti diasuh nuan. Jaku sida manis, tang sida majakka pengamu diri. Ba penemu sida, nuan tu nadai lebih ari orang ke belagu merindang sida ngena lagu pengerindu, tauka nebah belikan. Sida mendingka semua leka jaku nuan, tang nadai ngasika jaku ti disebut nuan. Tang lebuh semua leka jaku nuan dikamatka - lalu semua leka jaku nya deka dikamatka magang - nya baru sida deka nemu siku nabi bisi udah begulai enggau sida.” Ku TUHAN bejaku ngagai aku, “Anak mensia, alai nuan benabi ngelaban bala orang ke megai perintah di menua Israel. Benabi ngelaban sida, lalu padahka ngagai sida utai ti disebut Aku TUHAN Allah Taala: Tulah mmeh kita ke pengibun orang Israel ke udah nupi diri empu! Nama kebuah kita enda ngibun raban bedus? Kita makai lemak tusu. Kita bekenaka gari ti digaga ari bulu bedus, nyayat lalu makai jelu bedus ti pemadu gemu. Tang kita enda ngibun bedus. Kita enda ngintu bedus ti lemi ngambika sida kering; kita enda ngubat sida ke sakit; kita enda malut telih sida ke enda ulih bejalai; kita enda mai sida ke tesat pulai baru; kita enda ngiga sida ke lenyau, lalu kita ngena chara pejal enggau chara ti kasar lebuh kita merintah sida. Sida pambar pendiau, laban sida nadai pengibun; lalu sida diempa semua jelu babas. Raban bedus Aku lelang ba sebelah munggu ti tinggi enggau ba sebelah bukit. Sida ngachir di serata dunya, lalu nadai orang ngiga sida tauka nguji nemu endur alai sida. “Kita ke pengibun bedus, pendingka utai ti dipadahka Aku ti TUHAN ngagai kita diatu. Laban Aku tu Allah Taala ti idup, kita enda tau enda mendingka Aku. Raban bedus Aku udah diterekam, lalu diempa jelu babas, laban sida nadai orang ngibun. Bala pengibun bedus Aku nadai nguji begigaka bedus Aku ti lenyau. Sida semina ngintu diri empu aja, ukai ngintu bedus Aku. Nya alai pendingka Aku, kita ke pengibun bedus. Aku TUHAN Allah Taala madahka Diri ngelaban kita. Aku deka ngerampas bedus Aku ari jari kita, lalu enggai agi ngasuh kita nyadika pengibun sida. Aku enggai agi nejuka kita semina ngintu diri empu aja. Aku deka ngelepaska bedus Aku ari jari kita, lalu enggai nejuka kita makai sida. “Aku TUHAN Allah Taala madahka Aku deka ngiga bedus Aku, lalu ngibun sida. Baka pengibun bedus ke ngiga bedus iya ti lenyau, baka nya meh Aku deka ngiga bedus Aku. Bedus Aku pambar lebuh mua hari ti petang pegari. Lalu Aku deka mai sida pulai baru ari semua endur ti udah alai sida ngachir. Lalu Aku deka mai sida pansut ari semua bansa, lalu ngempuruka sida ari semua menua, lalu mai sida ngagai menua sida empu. Aku deka nupi sida ba sebelah bukit di menua Israel, semak mata ai, enggau ba semua endur ti bisi mensia. Aku deka nupi sida ba padang rumput ti galak; sida deka gali ba padang rumput ti galak, lalu ngulam rumput ti galak ti tumbuh ba bukit menua Israel. Aku Empu deka nyadika Pengibun raban bedus Aku, lalu Aku deka ngiga endur alai sida ulih belelak. Aku TUHAN Allah Taala udah bejaku. “Aku deka ngiga sida ke tesat, mai sida ke lelang pulai baru, malut telih sida, lalu ngeraika sida ke sakit. Tang Aku deka ngerusak sida ke gemu sereta kering, laban Aku tu Pengibun Bedus ti ngereja utai ti ngena. “Nya alai, kita ke bedus Aku, Aku TUHAN Allah Taala, madahka ngagai kita: Aku deka ngakim genap iku kita lalu nyeraraka kita ke manah ari kita ke jai, nyeraraka bedus ari kambin. Sekeda kita enda puas ati ngulam rumput ti galak; indah rumput ti enda diulam kita deh abis dilunjak kita. Kita ngirup ai ti chiru lalu ngeruh ai ti enda diirup kita! Bedus Aku ti bukai nadai chara bukai, tang makai rumput ti udah dilunjak kita, lalu ngirup ai ti udah keruh laban kita. “Nya alai diatu Aku TUHAN Allah Taala, madahka ngagai kita: Aku deka ngakim entara kita bedus ke gemu enggau kita bedus ke kurus. Kita nyeging sida ke sakit, lalu nanduk sida datai ke sida pansut ari raban kita. Tang Aku deka ngelepaska bedus Aku lalu enda agi nejuka sida kena perinsa. Aku deka ngakim genap iku bedus Aku, lalu nyeraraka sida ke manah ari sida ke jai. Aku deka meri ngagai sida siku raja ke sebaka enggau nembiak Aku David, ngambika iya nyadi pengibun sida, lalu ngintu sida. Aku ti TUHAN deka nyadi Allah Taala sida, lalu siku raja ti sebaka enggau nembiak Aku David deka nyadi raja sida. Aku ti TUHAN udah bejaku. Aku deka ngaga siti sempekat enggau sida, kena netapka pengelikun sida. Aku deka muai semua jelu ti mangah ari menua tu, ngambika bedus Aku tau diau likun di padang lalu tinduk ba sebelah utan. “Aku deka merekatka sida, lalu nejuka sida diau ngelingi bukit Aku ti kudus. Dia meh endur alai Aku deka merekatka sida enggau ujan nitihka musin. Kayu deka bebuah, umai deka mansutka asil, lalu semua orang deka diau likun ba tanah diri empu. Lebuh Aku mutuska rantai ti nanchang nembiak Aku, lalu ngelepaska sida ari orang ke udah ngaga sida nyadi ulun, nya baru sida deka nemu Aku endang TUHAN. Orang bansa bukai nadai agi ngerumpak sida, lalu jelu babas nadai agi munuh tauka makai sida. Sida deka diau likun, lalu nadai orang agi ngemba sida. Aku deka ngasuh menua sida mansutka mayuh macham asil, ngambika sida enda agi lapar, lalu enda agi dikeleseka orang bansa bukai. Semua orang deka nemu Aku endang TUHAN ti Allah Taala sida, lalu sida endang nembiak Aku. Aku TUHAN Allah Taala udah bejaku. “Kita tu bedus Aku, raban ke ditupi Aku, kita endang nembiak Aku, lalu Aku endang Allah Taala kita,” ku TUHAN Allah Taala bejaku. Ku TUHAN bejaku ngagai Aku, “Anak mensia, kuingka mua nuan tunga ngagai menua Edom, lalu benabi ngelaban iya. Padahka ngagai orang mayuh utai ti disebut Aku, TUHAN Allah Taala: “Bukit menua Edom, Aku ngelaban kita! Aku deka ngaga kita nyadi menua ti kusi sereta nadai orang nguan. Aku deka ngasuh semua nengeri kita nyadi tembawai lalu menua kita nadai orang nguan. Nya baru kita deka nemu Aku endang TUHAN. “Kita endang seruran nyadi munsuh menua Israel, lalu ngasuh bala nembiak iya kena bunuh lebuh sida dituntung penusah, lebuh menua nya diukum ke penudi iya ketegal dosa iya. Nya alai, dalam nama Aku, TUHAN Allah Taala ti Pemadu Tinggi, pemati meh nyadika ungkup kita, lalu kita enda ulih ngerarika diri ari nya. Kita udah salah bebunuhka orang, lalu pengawa bebunuhka orang nya deka nitihka kita. Aku deka ngasuh menua ti bebukit di menua Edom nyadi menua ti kusi, lalu munuh semua orang ke bejalai nengah menua nya. Aku deka ngelamun semua bukit ngena bangkai mensia, lalu bukit enggau lebak deka dilamun enggau bangkai sida ke mati beperang. Aku deka ngaga nuan nyadi menua ti nadai orang nguan belama iya, lalu nadai agi orang deka diau dalam nengeri nuan. Nya baru nuan deka nemu Aku endang TUHAN. “Nuan udah bejaku madahka dua bengkah bansa nya, Judah enggau Israel, enggau tanah sida, enggi nuan, lalu nuan madahka diri deka bempu sida, taja pen Aku tu TUHAN Allah Taala sida. Nya alai, laban Aku tu TUHAN Allah Taala, Allah Taala ti idup, Aku deka malas ngelaban kita laban kita udah ringat, udah kepapas, udah begedika nembiak Aku. Sida deka nemu Aku ngukum kita ketegal utai ti udah dikereja kita ngagai sida. Nya baru kita deka nemu Aku ti TUHAN udah ninga kita mechat Aku lebuh kita madahka bukit di menua Israel nadai orang nguan, lalu kita deka makai sida. Aku udah ninga kita temegah ngapa bejaku ngelaban Aku.” Ku TUHAN Allah Taala bejaku, “Aku deka ngaga menua kita nyadi menua puang, datai ke semua dunya tu deka rami gaga lebuh kita alah, baka kita ke rami gaga lebuh pesaka Aku Israel dirusak. Bukit menua Seir, semua menua Edom deka nyadi menua puang magang. Nya baru semua orang deka nemu Aku endang TUHAN.” Ku TUHAN bejaku, “Anak mensia, alai nuan benabi ngagai bukit ti di menua Israel, lalu asuh sida mendingka pesan ti diberi Aku, TUHAN Allah Taala ngagai sida: Munsuh orang Israel gaga ati lalu nyebut, ‘Diatu bukit ti tuai tu diempu kitai!’ “Nya alai benabi meh nuan, lalu padahka utai ti disebut Aku, TUHAN Allah Taala. Lebuh bansa ti berimbai enggau Israel ngalah lalu ngerumpak bukit ti di menua Israel, semua orang beduan Israel. Nya alai diatu pendingka utai ti disebut Aku TUHAN Allah Taala ngagai kita bukit enggau munggu, ngagai kita sungai enggau lebak, ngagai kita endur ti udah nyadi tembawai, enggau ngagai kita nengeri ti udah ditinggalka orang ke udah dirumpak sereta diketawaka semua bansa ti ngelingi kita. “Aku TUHAN Allah Taala, udah bejaku lebuh Aku balat ringat ngagai bansa ti ngelingi kita, kelebih agi ngagai Edom. Sida gaga ati sereta enggau nadai basa ngalahka menua Aku, lalu bempu padang rumput di menua nya. “Nya alai, benabi meh nuan ngagai menua Israel. Padahka ngagai semua bukit, munggu, sungai enggau lebak, utai ti disebut Aku TUHAN Allah Taala, ke ninding sereta ringat ketegal semua bansa udah ngelese sereta ngemaruhka sida. Aku TUHAN Allah Taala besemaya: bansa ti ngelingi menua tu deka dikemaruhka. Tang ba bukit ti di menua Israel kayu deka bedaun baru lalu mansutka buah ke kita ke nembiak Aku. Kita deka pulai baru ngagai menua kita empu enda lama da agi. Aku setanah enggau kita, lalu Aku deka nentuka menua kita dipumai baru, lalu utai ditanam dia baru. Aku deka ngasuh pemayuh tubuh kita nambah-menambah. Kita deka diau di nengeri lalu nirika baru semua utai ti udah nyadi tembawai. Aku deka ngasuh mensia enggau jelu nambah-menambah. Kita deka mayuh agi tubuh ari dulu menya, lalu kita deka mayuh anak. Aku deka ngasuh kita diau dia baka ke dulu menya, lalu Aku deka ngasuh kita nyadi kaya-raja agi ari ti menya. Nya baru kita deka nemu Aku endang TUHAN. Aku deka mai kita orang Israel ke nembiak Aku pulai baru lalu ngasuh kita diau di menua tu. Menua tu deka diempu kita, lalu menua tu enda agi nejuka bala anak kita keberuran. “Aku TUHAN Allah Taala nyebut: orang endang amat bisi madahka menua tu makai mensia, lalu ngerampas bala anak mit ari bansa nya empu. Tang kenyau ari diatu, menua tu enda agi makai mensia, tauka ngerampas bala anak mit kita. Aku TUHAN Allah Taala udah bejaku. Menua tu enda ibuh agi mendingka bansa bukai beduan iya, tauka meda orang enchebirka mulut ngeleseka iya. Menua tu enda agi ngerampas bala anak mit ari bansa tu empu. Aku TUHAN Allah Taala udah bejaku.” Ku TUHAN bejaku ngagai aku, “Anak mensia, lebuh orang Israel diau di menua sida empu, sida ngamahka menua nya ngena chara sida idup enggau ngereja utai. Aku ngumbai ulah sida enda tuchi, baka pengamah indu ke datai kain. Aku nejuka sida ngasaika pengeringat Aku ketegal pengawa sida ke udah bebunuhka orang di menua tu, enggau ketegal engkeramba ti udah dikena sida ngamah menua tu. Aku ngukum sida ketegal jalai sida idup, enggau ulah sida, lalu Aku mambarka sida ngagai menua bukai. Enda milih kini ke tunga sida bejalai, sida mai pemalu ngagai nama Aku ti kudus, laban orang deka nyebut, ‘Tu bala nembiak TUHAN, tang sida dipejalka ninggalka menua diri.’ Utai tu ngasuh ati Aku irauka nama Aku ti kudus, laban orang Israel udah mai pemalu ngagai nama Aku di sebarang endur sida bejalai. “Nya alai, beri pesan Aku TUHAN Allah Taala ngagai orang Israel: Utai ti deka dikereja Aku nya ukai ke penguntung kita orang Israel, tang ketegal nama Aku ti kudus, ti udah kamah laban kita di semua menua ti udah digagai kita. Lebuh Aku mandangka pengudus nama Aku ti besai, nama ti udah kamah laban kita di semua menua nya, nya baru sida deka nemu Aku endang TUHAN. Aku TUHAN Allah Taala udah bejaku. Aku deka ngena kita nunjukka pengudus Aku ngagai semua bansa. Aku deka ngambi kita ari semua bansa enggau menua, lalu mai kita pulai baru ngagai menua kita empu. Aku deka mechikka ai ti beresi ngagai kita, lalu nuchi kita ari semua engkeramba, enggau ari semua utai bukai ti udah ngamahka kita. Aku deka meri kita ati ti baru, enggau runding ti baru. Aku deka muai ati kita ti kieh ti digaga ari batu, lalu meri kita ati ti ngasi. Aku deka nyimpan Roh Aku dalam kita, lalu Aku deka ngasuh kita nitihka Adat Aku, lalu bejimat ngasika semua pesan ti udah diberi Aku ngagai kita. Nya baru kita deka diau di menua ti udah diberi Aku ngagai aki ini kita. Kita deka nyadi nembiak Aku, lalu Aku deka nyadi Allah Taala kita. Aku deka ngelepaska kita ari semua utai ti ngamahka kita. Aku deka ngasuh gandum kita mansutka mayuh asil, ngambika kita enda agi kena laban lapar pungkang. Aku deka nambahka pemayuh buah ari kayu buah kita, enggau asil ari umai kita, ngambika lapar pungkang nadai agi nyadi ti tau ngemaluka kita di mua bansa bukai. Kita deka ingatka ulah kita ke jai, enggau penyalah ti udah dikereja kita, lalu kita deka kejika diri empu ketegal dosa enggau penyai kita. Israel, Aku ngasuh kita nemu, Aku ukai ngereja semua utai tu ke penguntung kita. Aku ngasuh kita ngasaika pemalu ketegal utai ti dikereja kita. Aku TUHAN Allah Taala udah bejaku.” Ku TUHAN Allah Taala bejaku, “Lebuh Aku nuchi kita ari semua dosa kita, Aku deka nejuka kita diau dalam nengeri kita baru, lalu ngelakka kita nirika baru nengeri kita ke udah nyadi tembawai. Semua orang ke udah kala bejalai mansa umai kita, bela meda umai kita nyau repa, tang Aku deka nejuka kita bumai tanah nya baru. Semua orang deka berandauka chara menua tu ti udah nyadi menua puang, udah nyadi baka Kebun Eden, enggau chara nengeri ti udah runtuh, dirumpak lalu nyadi tembawai, diatu diuan mensia, sereta bisi kuta. Nya baru semua bansa ti agi mengkang idup ngelingi kita, deka nemu Aku ti TUHAN ngaga tembawai nyadi nengeri baru, lalu nanam utai ba tanah ti nadai tumbuh utai. Aku ti TUHAN udah besemaya deka ngereja utai tu, lalu Aku endang amat deka ngereja iya.” Ku TUHAN Allah Taala bejaku, “Aku deka sekali agi ngelakka orang Israel minta tulung ari Aku, lalu Aku deka nejuka sida nambah-menambah, baka raban bedus. Nengeri ti tembawai diatu deka penuh laban mensia baka Jerusalem ti udah penuh laban jelu bedus ti diberi nyadika piring lebuh maya gawai. Nya baru kita deka nemu Aku endang TUHAN.” Aku ngasaika kuasa TUHAN bisi enggau aku, lalu Roh Iya mai aku, lalu ngengkahka aku ba siti lebak ti penuh laban rangkah tulang. Iya lalu nguluka aku bejalai ngerenchah rangkah tulang nya, lalu aku meda mayuh amat rangkah tulang. Tulang nya rangkai amat. Ku TUHAN bejaku ngagai aku, “Anak mensia, kati tulang nya ulih idup baru?” Ku Aku nyaut, “ TUHAN Allah Taala, semina Nuan aja nemu nya!” Ku TUHAN bejaku, “Benabi nuan ngagai rangkah tulang tu. Asuh rangkah tulang tu mendingka jaku TUHAN. Padahka ngagai sida, Aku TUHAN Allah Taala nyebut tu ngagai sida: Aku deka meri kita seput, lalu kita deka idup baru. Aku deka meri kita urat enggau isi, lalu malut kita ngena kulit. Aku deka meri kita seput, lalu ngasuh kita idup baru. Nya baru kita deka nemu Aku endang TUHAN.” Nya alai aku lalu benabi nitihka asuh TUHAN. Lebuh aku benung benabi, aku ninga munyi utai bekeretak, lalu rangkah tulang nya belabuh bejantil enggau pangan diri. Lebuh aku benung merening, tulang nya lalu dibalut urat enggau isi, lalu udah nya, kulit. Tang tubuh nya nadai seput. Allah Taala lalu bejaku ngagai aku, “Anak mensia, benabi nuan ngagai ribut. Padahka ngagai ribut, TUHAN Allah Taala ngasuh iya datai ari semua endur, lalu ngesuhka seput ngagai semua bangkai nya, ngambika sida idup baru.” Nya alai aku lalu benabi nitihka asuh TUHAN. Seput lalu tama ngagai semua tubuh nya. Sida idup, lalu bediri. Pemayuh tubuh sida chukup kena numbuhka siti raban soldadu ti besai. Ku Allah Taala bejaku ngagai aku, “Anak mensia, orang Israel baka tulang nya. Sida ngumbai diri rangkai, nadai pengadang agi. Nya alai benabi nuan ngagai nembiak Aku Israel, lalu padahka ngagai sida, Aku TUHAN Allah Taala deka muka kubur sida. Aku deka ngambi sida pansut, lalu mai sida pulai baru ngagai menua Israel. Lebuh Aku muka kubur alai bala nembiak Aku udah dikuburka, lalu mai sida pansut, nya baru sida deka nemu Aku endang TUHAN. Aku deka ngesuhka seput Aku ke dalam sida, ngambika sida idup baru, lalu nejuka sida diau di menua sida empu. Nya baru sida deka nemu Aku endang TUHAN. Aku udah besemaya deka ngereja utai tu, lalu Aku endang deka ngereja iya. Aku ti TUHAN udah bejaku.” Ku TUHAN bejaku ngagai aku baru, “Anak mensia, ambi siti kayu, lalu tuliska ba kayu nya leka jaku tu, ‘Perintah menua Judah.’ Udah nya ambi siti agi kayu, lalu tuliska ba kayu nya leka jaku tu, ‘Perintah menua Israel.’ Udah nya pegai kayu dua iti nya betampung ujung, ngambika kayu dua iti nya nyadi baka siti kayu. Lebuh bala kita minta nuan madahka reti utai nya, padahka ngagai sida, Aku TUHAN Allah Taala, deka ngambi kayu ti ngambarka menua Israel lalu nampungka kayu nya enggau kayu ti ngambarka menua Judah, lalu Aku deka ngaga kayu dua iti nya nyadi siti, lalu megai iya. “Pegai kayu dua iti nya, lalu awakka orang meda. Udah nya padahka ngagai sida, Aku TUHAN Allah Taala deka ngambi semua nembiak Aku ari semua menua ti udah alai sida pambar, ngempuruka sida, lalu mai sida pulai baru ngagai menua sida empu. Aku deka ngempung sida nyadi siti bansa di menua tu, ba bukit ti di menua Israel. Sida deka bisi siku aja raja merintah sida, lalu sida enda agi dibagi ngagai dua bengkah bansa, tauka belah dua nyadi dua bengkah perintah. Sida enda agi ngamahka diri ngena engkeramba, tauka ngamahka diri ngena dosa. Aku deka ngelepaska sida ari semua jalai ti dikena sida bedosa, ti nyual Aku. Aku deka nuchi sida. Sida deka nyadi nembiak Aku, lalu Aku deka nyadi Allah Taala sida. Siku raja ke sebaka enggau nembiak Aku David deka nyadika raja sida. Semua sida deka begempung di baruh siku raja nya lalu sida deka, enggau ati ti tetap, ngasika Adat Aku. Sida deka diau di menua ti udah diberi Aku ngagai nembiak Aku Jakop, menua ti udah endur alai bala aki ini sida diau menya. Sida deka diau dia belama iya, lalu baka nya mega bala anak enggau peturun sida. Siku raja ke sebaka enggau nembiak Aku David deka merintah sida belama iya. Aku deka ngaga siti sempekat enggau sida kena nyamin pengelikun sida belama iya. Aku deka ngentapka sida diau dia, lalu nambahka pemayuh tubuh sida, lalu netapka Rumah Aku bediri belama iya di menua sida. Aku deka diau dia begulai enggau sida. Aku deka nyadi Allah Taala sida, lalu sida deka nyadi nembiak Aku. Lebuh Aku nirika Rumah Aku dia ba tengah-tengah sida belama iya, nya baru semua bansa deka nemu Aku ti TUHAN udah milih orang Israel nyadika nembiak Aku.” Ku TUHAN bejaku ngagai aku, “Anak mensia, kuingka mua nuan tunga ngagai menua Gok lalu benabi ngelaban iya, orang ke nyadi tuai megai bansa Mesek enggau Tubal di menua Magok. Bejaku nuan ngelaban iya lalu padahka ngagai iya, Aku TUHAN Allah Taala ngelaban iya. Aku deka musinka iya, ngaitka ginti ba rang iya, lalu ngirit iya enggau semua bala soldadu iya ngagai endur bukai. Bala soldadu iya, enggau kuda sida, enggau orang ke bepekayan sereta nepan kuda nya mayuh bendar, lalu genap iku soldadu bela mai terabai lalu besenyataka pedang. Bala soldadu ari Persia, Etiopia, enggau ari Libia bisi enggau iya, lalu semua sida nya bisi terabai enggau selapuk kebal magang. Semua bala soldadu ari menua Gomer enggau ari Bet Togarmah di utara bisi enggau iya, lalu baka nya mega orang ari mayuh bengkah bansa ti bukai. Asuh iya empu sedia, lalu semua bala soldadu ke dipegai iya mega sedia magang. Berapa taun udah bekau nya ila, Aku deka ngasuh iya nyerang sebengkah menua ti diuan orang ke udah dibai pulai baru ari mayuh bengkah menua. Iya deka nyerang bukit ti di menua Israel, ti lama udah nadai orang nguan sereta puang, tang diatu diuan mayuh mensia enggau likun. Iya enggau bala soldadu iya, sereta enggau mayuh bengkah bansa ti setanah enggau iya, deka nyerang baka kabut, lalu ngelamun menua nya baka mua hari.” Tu utai ti disebut TUHAN Allah Taala ngagai Gok: “Lebuh maya nya ila, nuan deka berengkah berunding begagaka pelan ti jai. Nuan deka mutuska runding deka nyerang sebengkah menua ti nadai daya, endur alai orang ke diau dalam pemaik enggau pengelikun dalam nengeri ti enda bekuta, lalu nadai utai nyaga. Nuan deka ngerumpak lalu ngerampas utai ari orang ke diau dalam nengeri ti udah dirusak nyadi tembawai dulu agi ari nya. Sida udah digempuruka ari mayuh bengkah menua, lalu diatu sida bisi jelu tupi enggau reta tengkira, lalu diau ba endur alai orang ke ari mayuh bengkah bansa betemu. Orang ari Sheba enggau ari Dedan, enggau orang dagang ari nengeri ti di menua Spain deka nanya nuan, ‘Kati nuan udah ngempuruka bala soldadu nuan, lalu nyerang, ngerumpak enggau ngerampas? Kati nuan bisi ati deka ngambi pirak enggau emas, jelu tupi enggau reta tengkira, lalu nabanka semua perapasan nya?’ ” Nya alai TUHAN Allah Taala lalu ngasuh aku madahka ngagai Gok utai ti disebut Iya ngagai Gok: “Diatu, kala lebuh bala nembiak Aku Israel benung diau likun, angkat meh nuan ari menua nuan ti di utara, lalu uluka bala soldadu ti besai sereta kering, ti datai ari mayuh bengkah bansa, semua sida nepan kuda magang. Nuan deka nyerang bala nembiak Aku orang Israel baka kabut ti mangka ba menua nya. Lebuh maya nya ila, Aku deka ngasuh nuan nyerang menua Aku, kena ngayanka ngagai semua bansa sapa Aku tu, kena ngayanka pengudus Aku ngena utai ti dikereja Aku nengah nuan. Nuan tu meh orang ke udah dikenang Aku dulu kelia lebuh Aku madahka nengah bala nembiak Aku, iya nya bala nabi menua Israel, pasal Aku ti deka ngasuh siku orang nyerang menua Israel jemah ila.” TUHAN Allah Taala udah bejaku. Ku TUHAN Allah Taala bejaku, “Ba hari Gok nyerang menua Israel, Aku deka pedis ati. Ba hari nya ila, Aku deka balat ringat, lalu madahka tanah deka balat amat berenyang di menua Israel. Semua ikan enggau burung, semua jelu ti besai enggau ti mit, enggau semua mensia di dunya tu, deka getar-getar nangika Aku. Bukit deka runtuh, tingkah deka tusur, lalu semua kuta deka runtuh magang. Aku deka ngenakutka Gok ngena semua macham penusah. Aku TUHAN Allah Taala udah bejaku. Bala iya deka bepantapka pangan diri ngena pedang. Aku deka ngukum iya ngena penyakit enggau perang. Ujan ti lebat enggau ujan batu, sama enggau api sereta enggau merirang, deka ninggang iya enggau bala soldadu iya, sereta ninggang mayuh bengkah bansa ti setanah enggau iya. Nya meh jalai Aku deka ngayanka ngagai semua bansa Aku endang kering sereta kudus. Nya baru sida deka nemu Aku endang TUHAN.” Ku TUHAN Allah Taala bejaku, “Anak mensia, benabi nuan ngelaban Gok, iya ti nyadi tuai merintah bansa Mesek enggau Tubal, lalu padahka ngagai iya Aku ngelaban iya. Aku deka nguingka iya kebukai, lalu nguluka iya ari endur ti jauh di utara, datai ke nyau datai ba bukit di menua Israel. Udah nya Aku deka malu panah iya ari jari kiba iya, sereta malu laja ari jari kanan iya. Gok enggau bala soldadu iya, enggau orang ke setanah enggau iya deka rebah lalu mati ba bukit di menua Israel, lalu Aku deka ngelakka bangkai sida nyadika pemakai semua burung enggau jelu babas. Sida deka rebah mati ba padang. Aku TUHAN Allah Taala udah bejaku. Aku deka nyelup api di menua Magok, enggau di serata tebing tasik alai orang ke diau nadai utai ngachau. Nya baru semua orang deka nemu Aku endang TUHAN. Aku deka nentuka nembiak Aku Israel nemu nama Aku ti kudus, lalu Aku enggai agi ngelakka nama Aku dipechat. Nya baru semua bansa deka nemu Aku endang TUHAN Allah Taala ke disembah orang Israel ti kudus.” Ku TUHAN Allah Taala bejaku, “Hari ti dikenang Aku tu endang tetap deka datai. Orang ke diau dalam nengeri di menua Israel deka pansut lalu ngumpul senyata ti ditinggalka munsuh, nyadika kayu api. Sida deka menyadika api ngena terabai, panah, laja, sangkuh, enggau pemalu. Semua utai nya chukup dikena sida dalam pengelama tujuh taun. Sida enda ibuh begumpulka kayu api ba sebelah umai, tauka nebang kayu dalam utan, laban sida bisi senyata ti udah ditinggalka munsuh nyadika kayu api sida. Sida deka ngerumpak lalu ngerampas utai ari orang ke udah ngerumpak sereta ngerampas utai ari sida empu.” TUHAN Allah Taala udah bejaku. Ku TUHAN bejaku, “Lebuh semua utai tu nyadi, Aku deka meri ngagai Gok siti kubur di menua Israel, ba Emperan Orang Kampar, tunga ke timur Tasik Mati. Gok enggau bala soldadu iya deka dikuburka dia, lalu emperan nya deka dikumbai ‘Emperan Bala Soldadu Gok.’ Orang Israel deka nguburka semua bangkai, lalu meresi menua nya baru, dalam pengelama tujuh bulan. Semua orang di menua nya deka nulung nguburka bangkai sida, lalu orang ke nguburka bangkai sida nya deka diberi basa lebuh hari pemenang Aku. Aku TUHAN Allah Taala udah bejaku. Lebuh tujuh bulan nya udah lepas, orang ke lelaki deka dipilih bejalai nengah serata menua begiga lalu nguburka bangkai ti agi tinggal ba sebelah tanah, ngambika menua nya beresi. Lebuh sida bejalai ke atas ke baruh nengah menua nya, genap kali sida tetemuka tulang mensia, sida deka nirika kelai ngimbai tulang nya, ngambika orang ke numbak kubur ulih datai lalu nguburka iya ba Emperan Bala Soldadu Gok. (Sebuah nengeri ti semak nya dia deka diberi nama ngangkatka bala soldadu nya.) Nya meh jalai menua nya digaga nyadi beresi baru.” Ku TUHAN Allah Taala bejaku ngagai aku, “Anak mensia, kangauka semua burung enggau jelu datai ari semua endur, ngambika sida makai piring ti disediaka Aku ke sida. Pengerami makai besai nya deka disediaka ba sebelah bukit di menua Israel, alai sida deka bepakaika dagin lalu ngirup darah. Sida deka bepakaika semua bangkai soldadu, lalu ngirup darah orang ke merintah di dunya tu, ti deka dibunuh baka bedus ti lelaki tauka anak domba, tauka kambin, tauka sapi ti lelaki ti gemu. Lebuh Aku munuh orang tu baka ke munuh jelu ti deka diberi nyadika piring, sida burung enggau jelu enda tau enda makai lemak naka ti ulih diempa sida, lalu ngirup darah datai ke sida nyau mabuk. Ba mija Aku sida deka makai kuda enggau orang ke nepan kuda, enggau bala soldadu, enggau semua orang ke tau serang, naka ti ulih diempa sida. Aku TUHAN Allah Taala udah bejaku.” Ku TUHAN bejaku, “Aku deka ngasuh semua bansa meda mulia Aku, lalu ngayanka ngagai sida jalai Aku ngena kuasa Aku bejalaika pemutus penemu Aku ti lurus. Kenyau ari nya orang Israel deka nemu Aku endang TUHAN Allah Taala sida. Lalu semua bansa deka nemu orang Israel udah dibuai ngagai menua Babilon ketegal dosa ti udah dikereja sida ngelaban Aku. Aku ngelengkaka sida lalu ngelakka munsuh sida ngalahka sida, lalu munuh sida lebuh beperang. Aku udah meri sida utai ti patut ketegal sida enda tuchi, enggau ketegal penyai sida, lalu Aku ninggalka sida.” Ku TUHAN Allah Taala bejaku, “Tang diatu Aku deka kasihka peturun Jakop, orang Israel, lalu ngasuh sida nyadi kaya-raja baru. Aku deka nyaga nama Aku ti kudus. Lebuh sida diau likun baru di menua sida empu, lalu enda agi diemba orang, nya baru sida deka badu agi ingatka chara sida udah dipechat ketegal sida udah nipu Aku. Kena Aku mandangka Diri endang kudus ngagai mayuh bengkah bansa, Aku deka mai bala nembiak Aku pulai baru ari semua menua munsuh sida. Nya baru bala nembiak Aku deka nemu Aku endang TUHAN Allah Taala sida. Sida deka nemu nya laban Aku udah ngasuh sida kena tangkap, lalu diatu Aku ngempuruka sida lalu mai sida pulai baru ngagai menua sida empu. Siku pen nadai meh sida deka ditinggalka. Aku deka nuang Roh Aku atas orang Israel, lalu enda agi ngelengkaka sida. Aku TUHAN Allah Taala udah bejaku.” Kena sepuluh hari bulan satu dalam taun ti kedua puluh lima kami udah dibuai ngagai menua Babilon, keempat belas taun nengeri Jerusalem udah alah, aku ngasaika kuasa TUHAN bisi enggau aku, lalu dalam siti genera Iya mai aku ngagai menua Israel, lalu ngengkahka aku ba sigi bukit ti tinggi amat, ti bisi utai ti baka gamal nengeri tunga ke mua aku. Allah Taala lalu mai aku mansang semak agi, lalu aku tepedaka siku orang ke beperenching baka temaga. Iya megai siti tali penyukat ti digaga ari linin, enggau siti batang penyukat, lalu iya bediri ngimbai siti pintu ti besai. Ku orang nya bejaku ngagai aku, “Anak mensia, peda, dinga lalu peratika semua utai ti deka diayanka Aku ngagai nuan, laban nuan udah dibai kitu ngambika Aku ulih ngayanka utai nya ngagai nuan. Padahka ngagai orang Israel semua utai ti dipeda nuan.” Utai ti dipeda aku nya Rumah Sembiang, ti dikelingi siti kuta. Orang nya ngambi batang penyukat iya. Pemanjai penyukat nya 3 meter, lalu iya nyukat kuta nya. Peninggi kuta nya 3 meter, lalu penebal iya 3 meter. Udah nya iya lalu mansang ngagai pintu besai ti nunga ke timur. Iya niki tangga, lalu ba pala tangga nya iya lalu nyukat penama nya. Pemanjai iya 3 meter. Ngilah penama nya bisi siti tempuan, ti bisi tiga iti bilik jejaga ba tisi sepiak-sepiak. Tiap iti bilik nya besegi empat, 3 meter ba tisi siti-siti, lalu penebal dinding entara bilik nya 2.5 meter. Ngilah bilik jejaga nya bisi siti tempuan ti panjai 3 meter, ti nuju ngagai bilik penama ti ngadap ngagai Rumah Sembiang. Bilik jejaga ti ba tisi tempuan nya sama sebaka pemesai, lalu dinding entara sida nya sebaka penebal.) Udah nya orang nya lalu nyukat buka tempuan ba pintu besai nya. Buka iya enam meter setengah, lalu buka pintu penama nya lima meter. Di mua siti-siti bilik jejaga nya bisi siti dinding ti baruh. Peninggi dinding nya setengah meter, lalu penebal iya mega setengah meter. (Semua bilik nya tiga meter besegi.) Udah nya iya nyukat penyauh ari dinding belakang ke bilik siti ngagai dinding belakang ke bilik ti di seberai tempuan nya, lalu penyauh iya 12.5 meter. Bilik ti ba ujung ti jauh nya nuju ngagai siti tengah laman. Iya nyukat bilik nya lalu nemu buka iya 10 meter. Semua pemanjai pintu besai nya, kenyau ari luar pintu kuta terus ngagai tisi bilik ti ngadap ngagai Rumah Sembiang, nya 25 meter. Ba dinding ti ngadap ke luar, enggau dinding ti nyeraraka bilik siti-siti, bisi lubang penyenguk ti mit. Ba dinding ti ari dalam, ti ngadap ngagai tempuan, bisi ukir gambar kayu engkerema. Orang nya mai aku nengah pintu besai nya ngagai tengah laman ti di luar. Ba dinding ti ari luar, bisi tiga puluh iti bilik, lalu di mua semua bilik nya bisi siti endur ti dianchauka enggau batu, ti ngelingi tengah laman ti di luar nya. Tengah laman ti di luar tu baruh agi ari tengah laman ti di dalam. Ba endur ti tinggi agi bisi digagaka siti pintu besai, ti nuju ngagai tengah laman ti di dalam. Orang nya nyukat penyauh pintu besai dua iti nya ari pangan diri, lalu penyauh iya 50 meter. Udah nya orang nya lalu nyukat pintu besai ti ba rusuk utara, ti nuju ngagai tengah laman ti di luar. Bilik jejaga ti tiga buah ari sepiak-sepiak tempuan nya, dinding ba entara bilik nya, enggau bilik penama, sama sebaka pemesai enggau bilik ti ba pintu besai ti muak ke timur. Pemanjai pintu besai nya 25 meter, lalu buka iya 12.5 meter. Bilik penama, jenila, enggau gambar kayu engkerema ti diukir, endang sebaka magang enggau sida ke ba pintu ti muak ke timur. Ba endur tu, tujuh iti tangkal tangga nuju ke atas ngagai pintu tu, lalu bilik penama nya ba ujung ti nunga ngagai tengah laman. Betunga enggau pintu besai ti muak ke utara, di seberai tengah laman nya, bisi siti agi pintu besai ti nuju ngagai tengah laman ti di dalam, sebaka enggau iya ti ba tisi muak ke timur. Orang nya nyukat penyauh entara pintu besai dua iti tu, lalu penyauh iya 50 meter. Udah nya orang nya lalu mai aku ngagai tisi selatan. Dia aku lalu tepedaka siti agi pintu besai. Iya nyukat dinding pintu besai nya ari dalam, enggau bilik penama, lalu semua sukat nya sebaka enggau sida ti bukai. Bilik ditu bisi mega jenila, baka ke ba bilik bukai. Pemanjai pintu besai tu 25 meter, lalu buka iya 12.5 meter. Tangga ti nuju ngagai pintu besai nya bisi tujuh iti tangkal, lalu penama ngagai pintu besai nya mega ba ujung ti nunga ngagai tengah laman. Dinding ti nunga ngagai tempuan diukir enggau gambar kayu engkerema. Ba endur nya mega bisi pintu besai ti nuju ngagai tengah laman ti di dalam. Orang nya nyukat penyauh ngagai pintu besai ti kedua nya, lalu penyauh iya 50 meter. Orang nya mai aku nengah pintu besai ti muak ke selatan ngagai tengah laman ti di dalam, lalu pemesai pintu besai nya sebaka enggau pemesai pintu besai ti ba dinding ti di luar. Bilik penama ke pintu besai tu nunga ngagai tengah laman siti, lalu gambar kayu engkerema bisi diukirka ba dinding tempuan nya. Tangga ti nuju ngagai pintu besai nya bisi lapan iti tangkal. Orang nya mai aku nengah pintu besai ti muak ke timur, ngagai tengah laman ti di dalam. Iya nyukat pintu besai nya, lalu pemesai iya sama enggau pemesai pintu besai ti bukai. Bilik jejaga ke pintu besai tu, bilik penama, enggau dinding iya ke di dalam endang sebaka pemesai enggau sida ke ba pintu besai ti bukai. Jenila bisi magang ba bilik nya, enggau ba bilik penama. Semua pemanjai pintu besai tu 25 meter, lalu buka iya 12.5 meter. Bilik penama nunga ngagai tengah laman ti di luar. Gambar kayu engkerema bisi diukirka ba sepemanjai dinding tempuan nya. Lapan iti tangkal tangga nuju ke atas ngagai pintu besai tu. Udah nya orang nya lalu mai aku ngagai pintu besai utara. Iya nyukat pintu besai nya, lalu pemesai pintu besai nya sama sebaka enggau pintu besai ti bukai. Baka pintu besai ti bukai, iya mega bisi bilik jejaga, dinding ari dalam ti diukir, siti bilik penama, enggau jenila ba semua dinding iya. Semua pemanjai iya 25 meter, lalu buka iya 12.5 meter. Bilik penama nya nunga ngagai tengah laman ti di luar. Gambar kayu engkerema bisi diukirka ba sepemanjai dinding tempuan nya. Tangga ti ari baruh ti nuju ngagai pintu besai nya bisi lapan iti tangkal. Ba tengah laman ti di luar bisi siti bilik ti nungking ba pintu besai ti di dalam, ba tisi utara. Bilik tungking nya tebuka ngagai bilik penama ti ngadap ngagai tengah laman nya. Tengah laman nya meh endur alai sida masu jelu ti udah disayat, ti deka ditunu segala nyadika piring. Dalam bilik penama nya bisi empat iti mija, dua iti ba tisi siti-siti. Mija nya meh endur alai sida nyayat jelu ti deka diberi nyadika piring, nemuka jelu nya ditunu segala tauka diberi nyadika piring pengampun dosa, tauka nyadika piring kena bebayar. Ari luar bilik nya bisi empat iti mija ti sebaka gaya, dua iti ba sepiak-sepiak penama ngagai pintu utara. Nya alai semua mija nya lapan iti. Mija nya endur alai nyayat jelu ti deka dienjuk nyadika piring: empat iti dalam bilik, lalu empat iti di luar ba tengah laman. Mija empat iti ti dalam bilik tungking, ti dikena nyendiaka piring ti deka ditunu segala, digaga ari batu ti udah dipansap. Peninggi mija nya 50 sentimeter, lalu puchuk mija nya 75 sentimeter besegi. Semua perengka ti dikena munuh jelu ti diberi nyadika piring, endang diengkah ba mija tu magang. Ibal dinding bisi digaga ngelingi tisi mija nya. Buka ibal dinding nya 75 milimeter. Semua dagin ti deka diberi nyadika piring, enda tau enda diengkahka ba mija nya. Udah nya iya mai aku ngagai tengah laman ti di dalam. Dia bisi dua iti bilik. Sebuah bilik nya ngimbai pintu besai utara, lalu tebuka ngagai tengah laman ti di dalam muak ari selatan, lalu siti bilik nya nunga ke utara ngimbai pintu besai selatan. Orang nya madahka ngagai aku, bilik ti nunga ke selatan nya enggi bala imam ke bekereja dalam Rumah Sembiang, lalu bilik ti nunga ke utara nya enggi bala imam ke bekereja ba alta. Semua imam endang datai ari peturun Sadok magang. Semina sida nya aja ari raban bansa Lewi ke dikemendarka datai ngagai TUHAN lalu bekereja ke Iya. Orang nya nyukat tengah laman ti di dalam, lalu pemesai iya 50 meter besegi. Rumah Sembiang bediri ba tisi barat, lalu di mua Rumah Sembiang nya bisi siti alta. Udah nya iya mai aku nengah bilik mua pintu Rumah Sembiang. Iya nyukat jalai penama nya. Pemanjai iya 2.5 meter, buka iya 7 meter, lalu penebal dinding iya 1.5 meter ba sepiak-sepiak. Tangga bisi digaga nuju ngagai bilik penama nya. Buka bilik penama nya 10 meter, lalu pemanjai iya 6 meter. Ba endur nya bisi dua iti tiang ti besai, siti-siti ba tisi penama nya. Udah nya orang nya mai aku ngagai bilik tengah, iya nya Endur ti Kudus. Iya nyukat tempuan ti nuju ngagai endur nya. Pemanjai tempuan nya 3 meter lalu buka iya lima meter. Penebal dinding nya dua meter setengah ari sepiak-sepiak. Iya nyukat bilik nya: pemanjai bilik nya dua puluh meter, lalu buka iya sepuluh meter. Udah nya iya lalu tama ngagai bilik ti di dalam bendar. Iya nyukat tempuan ti nuju ngagai bilik nya. Pemanjai iya satu meter, lalu buka iya tiga meter, dikelingi dinding ti tiga setengah meter penebal. Iya nyukat bilik nya. Bilik nya sepuluh meter besegi. Bilik nya ngilah bilik tengah. Udah nya iya madahka ngagai aku, “Tu Endur ti Pemadu Kudus.” Orang nya nyukat penebal dinding ti di dalam ke Rumah Sembiang. Penebal iya tiga meter. Nungking ba dinding ngelingi Rumah Sembiang nya mayuh bilik ti mit, buka dua meter. Bilik tu beringkat tiga, tiga puluh iti bilik ba siti-siti ringkat. Dinding luar Rumah Sembiang ba siti-siti ringkat mipau agi ari dinding ba ringkat ti di baruh, ngambika bilik nya ulih duduk ba atas dinding Rumah Sembiang nya, lalu enda ibuh dibantilka ngagai dinding nya. Nya alai, dipeda ari luar, dinding Rumah Sembiang nya baka ke sama penebal ari baruh ke atas. Ngempit ngagai dinding Rumah Sembiang, ari luar, bisi digagaka dua iti tangga ti besai buka, ngambika bisi dikena bejalai ari ringkat ti di baruh ngagai ringkat tengah, enggau ngagai ringkat atas. Ba ujung endur ti lapang nya, muak ari tisi barat Rumah Sembiang, bisi siti rumah ti panjai empat puluh lima meter enggau buka tiga puluh lima meter. Penebal dinding iya dua meter setengah. Orang nya lalu nyukat Rumah Sembiang nya ari luar. Pemanjai iya 50 meter. Lalu buka tengah laman enggau Rumah Sembiang nya 50 meter. Pemesai buka netak mua Rumah Sembiang nya, nyengkaum tengah laman ti ba sepiak-sepiak Rumah Sembiang nya, mega 50 meter. Iya nyukat pemanjai rumah nya nuju ke barat, nyengkaum tempuan ari sepiak-sepiak rumah nya, lalu pemanjai iya 50 meter. Bilik penama ngagai Rumah Sembiang, Endur ti Kudus, enggau Endur ti Pemadu Kudus semua di lapis ngena kayu kenyau ari geladak nyentuk ngagai jenila. Jenila nya ulih ditutup. Dinding Rumah Sembiang muak ari dalam, kenyau ari baruh nyentuk ngagai ari atas pintu, abis diukir magang ngena gambar kayu engkerema enggau gambar bala melikat cherub ti besayap, ti betunda-udi, meling bilik nya. Genap iku melikat cherub nya bisi dua iti mua: mua mensia ti nguing tunga ngagai sekayu engkerema ti ba tisi sepiak, enggau mua singa ti nguing tunga ngagai sekayu engkerema ba tisi sepiak. Nya meh gaya utai nya ngelingi bilik nya, kenyau ari geladak nyentuk ngagai endur ba ari atas pintu. Tiang ke Endur ti Kudus besegi empat. Di mua penama ngagai Endur ti Pemadu Kudus bisi siti utai ti baka alta ti digaga ari kayu. Peninggi iya 1.5 meter lalu buka iya 1 meter. Tiang sukut iya, penuduk enggau tisi iya digaga ari kayu magang. Ku orang nya madahka ngagai aku, “Tu mija ti di mua TUHAN.” Ba ujung tempuan nya ti nuju ngagai Endur ti Kudus bisi siti pintu. Lalu pintu pen bisi mega ba ujung tempuan ti nuju ngagai Endur ti Pemadu Kudus. Tiap tiap pintu nya dua iti berimbai, lalu tebuka ba tengah-tengah. Gambar kayu engkerema enggau melikat cherub ti besayap bisi diukirka ba pintu ti nuju ngagai Endur ti Kudus, baka ke ba dinding. Luar pintu ngagai bilik penama dilapis enggau kayu. Ba tisi bilik tu bisi jenila, lalu dinding bilik tu dilagu ngena ukir gambar kayu engkerema. Udah nya orang nya lalu mai aku ngagai tengah laman ti di luar, lalu nguluka aku ngagai sebuah rumah ti ba tisi utara Rumah Sembiang, enda jauh ari rumah ti ba ujung barat Rumah Sembiang nya. Rumah nya panjai 50 meter, lalu buka iya 25 meter. Tisi sepiak nunga ngagai endur siti ti lapang, ti buka 10 meter, ti ngimbai Rumah Sembiang, lalu tisi sepiak nunga ngagai siti jalai ti ba tengah laman ti di luar. Rumah nya tiga ringkat, iya ke di atas disuika jauh mimit ari ringkat ti di baruh. Ba tisi utara rumah nya bisi siti tempuan. Buka iya 5 meter, lalu pemanjai iya 50 meter, lalu bisi penama ba tisi nya. Bilik ti ba ringkat atas rumah nya, sempit agi ari bilik ti ba ringkat tengah enggau ringkat ti di baruh, laban bilik nya udah disuika jauh agi. Semua bilik ti ba ringkat tiga iti nya digaga ba atas teres, lalu enda didudukka ba atas tiang baka rumah ti bukai ba tengah laman nya. Di mua rintai bilik nya bisi siti tempuan, baka ke ba tisi utara. Pemesai tempuan nya sebaka gaya enggau tempuan di tisi utara. Ari baruh bilik ti ba tisi selatan, bisi siti bilik, ba ujung timur alai dinding nya berengkah. Ku orang nya bejaku enggau aku, “Rumah dua buah tu kudus. Nya meh endur alai sida imam tama betemu enggau TUHAN, makai piring ti pemadu kudus. Laban bilik nya kudus, imam deka nyimpan piring ti pemadu kudus dia, iya nya, piring tepung, enggau piring ti diberi kena muai dosa, tauka kena bebayar. Lebuh sida imam udah tama ngagai Rumah Sembiang, lalu deka bejalai ngagai tengah laman, sida enda tau enda ninggalka, dalam bilik nya, gari ti kudus ti dikena sida lebuh sida gawa ke TUHAN. Sida enda tau enda ngerasukka gari bukai sebedau sida pansut ngagai endur alai orang mayuh begempuru.” Lebuh orang nya udah tembu nyukat Rumah Sembiang nya muak ari dalam, iya lalu mai aku pansut nengah pintu timur, lalu udah nya nyukat endur ti muak ari luar. Iya mai batang penyukat lalu nyukat tisi timur, lalu pemanjai iya 250 meter. Kandang endur alai Rumah Sembiang nya besegi empat, lalu dikelingi enggau dinding. Pemanjai dinding ba tisi sepiak-sepiak nya 250 meter. Dinding nya nyeraraka utai ti kudus ari utai ti enda kudus. Orang nya mai aku ngagai pintu ti adap ke timur, lalu dia aku tepedaka penampak mulia Allah Taala ke disembah orang Israel datai ari timur. Nyawa Allah Taala munyi segum pangka gelumbang, lalu tanah beperenching laban penampak mulia Iya. Genera nya sebaka enggau genera ti udah dipeda aku lebuh Allah Taala datai ngerusak Jerusalem, enggau genera ti dipeda aku ba tebing Sungai Kebar. Udah nya aku lalu nyungkurka diri ke tanah. Penampak ti beperenching nya bejalai nengah pintu timur, lalu tama ngagai Rumah Sembiang. Roh TUHAN ngangkatka aku lalu mai aku ngagai tengah laman ti di dalam, lalu aku meda Rumah Sembiang nya penuh laban mulia TUHAN. Orang nya bediri ngimbai aku dia, lalu aku ninga TUHAN bejaku ngagai aku ari dalam Rumah Sembiang nya. “Anak mensia, tu endur alai kerusi diraja Aku. Aku deka diau ditu begulai enggau orang Israel, lalu merintah sida belama iya. Orang Israel enggau raja sida deka badu agi ngamahka nama Aku ti kudus enggau pengawa besembahka petara bukai, tauka nguburka bangkai raja sida ke mati. Sida raja ngaga semetung enggau tiang pintu ke istana sida ngimbai semetung enggau tiang pintu Rumah Aku, datai ke semina dinding aja nyeraraka sida ari Aku. Sida udah ngereja penyai lalu ngamahka nama Aku ti kudus. Nya alai, Aku ringat lalu ngerusak sida. Diatu sida enda agi tau nyembah petara bukai, lalu badu agi mindahka bangkai raja sida. Enti sida enda agi ngereja utai nya, nya baru Aku deka diau enggau sida belama iya. Lalu ku TUHAN nampung jaku Iya, “Anak mensia, padahka ngagai orang Israel pasal Rumah Sembiang nya, lalu asuh sida beratika pelan Rumah nya, ngambika sida nemu malu ke penyai diri. Udah nya, enti sida nemu maluka utai ti udah dikereja sida, padahka pelan Rumah Sembiang nya ngagai sida: tukuh iya, pintu ti ditengah tama-pansut, gaya iya, jalai semua utai diatur dalam Rumah Sembiang nya, enggau semua adat ti dikena dalam Rumah Sembiang nya. Tuliska semua utai nya ke sida ngambika sida ulih meda chara semua utai dia diatur, lalu ulih bejalaika semua atur nya. Tu adat Rumah Sembiang: Semua kandang ti ngelingi Rumah Sembiang ba tuchung bukit nya, tuchi sereta kudus magang.” Baka tu ku gaya alta ti disukat ngena penyukat ti dikena nyukat Rumah Sembiang. Ngelingi penuduk alta nya bisi siti parit. Penalam parit nya 50 sentimeter lalu buka iya 50 sentimeter, lalu lilit tisi parit nya ari luar 25 sentimeter peninggi. Peninggi ringkat ti pemadu baruh nya 1 meter. Ringkat ti kedua berengkah 50 sentimeter ngejang ari tisi ringkat ti keterubah, ngeliling alta nya, lalu peninggi iya 2 meter. Ringkat ti ketiga mega berengkah 50 sentimeter ngejang ari tisi ringkat ti kedua, ngeliling alta nya. Ringkat ti ketiga tu endur alai nunu piring. Peninggi iya mega 2 meter. Tanduk ba empat iti sukut alta nya tinggi agi ari puchuk alta nya empu. Geladak alta nya besegi empat, 6 meter pemanjai ba tisi sepiak-sepiak. Ringkat ti kedua mega besegi empat, 7 meter pemanjai ba tisi sepiak-sepiak, lalu bisi lilit ti tinggi 25 sentimeter ba tisi luar ke ringkat nya. (Buka parit iya 50 sentimeter.) Tangga kena niki ngagai alta nya ba tisi ti muak ke timur. Ku TUHAN Allah Taala bejaku enggau aku, “Anak mensia, pendingka utai ti dipadahka Aku ngagai nuan. Lebuh alta nya digaga, nuan enda tau enda nunu piring ba iya lalu mechik iya ngena darah jelu ti diberi nyadika piring. Semina imam ari raban bansa Lewi, ke datai ari peturun Sadok aja tau tama ngagai endur Aku lalu gawa ke Aku. Aku TUHAN Allah Taala ngasuh utai tu dikereja baka tu. Nuan deka meri ngagai sida siku sapi ti lelaki ti agi biak nyadika piring pengampun dosa. Nuan enda tau enda ngambi sekeda darah jelu nya, lalu malitka iya ngagai tanduk sukut alta nya, ba sukut ringkat ti kedua, enggau ngelingi semua tisi iya. Nya meh jalai nuan nuchi lalu nyeraraka alta nya. Nuan enda tau enda ngambi sapi ti lelaki ti diberi nyadika piring pengampun dosa, lalu nunu iya ba endur ti udah diletak ari luar kandang Rumah Sembiang. Hari siti nuan enda tau enda ngambi siku kambin ti lelaki, ti nadai penimpang, lalu meri iya nyadika piring pengampun dosa. Tuchi alta nya ngena darah kambin nya, baka nuan ke nuchi iya ngena sapi ti lelaki nya. Lebuh nuan udah tembu ngereja utai nya, ambi siku sapi ti lelaki ti agi biak, enggau siku bedus ti lelaki ti agi biak, ti sama nadai penimpang, lalu bai jelu dua iku nya ngagai Aku. Sida imam deka ngerabuka garam ba jelu dua iku nya, lalu nunu jelu nya nyadika piring. Tiap hari, dalam kandang tujuh hari, nuan enda tau enda meri siku kambin, siku sapi ti lelaki, enggau siku bedus ti lelaki nyadika piring pengampun dosa. Semua jelu nya enda tau enda jelu ti nadai penimpang magang. Dalam kandang tujuh hari bala imam enda tau enda nyeraraka alta nya, lalu nyendiaka iya dikena. Lepas seminggu nya, bala imam enda tau enda belabuh meri ba alta nya piring tunu, enggau piring pemaik ke orang mayuh. Nya baru Aku deka gaga ati ke semua kita. Aku TUHAN Allah Taala, udah bejaku.” Orang nya lalu nguluka aku ngagai pintu luar ti ba tisi timur kandang Rumah Sembiang. Pintu nya ditutup, lalu ku TUHAN bejaku ngagai aku, “Pintu tu deka mengkang ditutup, lalu enda tau dibuka. Nadai mensia tau tama nengah pintu tu, laban Aku TUHAN Allah Taala ke disembah orang Israel, udah tama nengah pintu tu. Nya alai pintu tu deka mengkang ditutup. Semina raja aja tau tama kia lalu makai pemakai ti kudus, di mua Aku. Iya enda tau enda tama enggau pansut ari pintu besai nengah bilik penama ti ba ujung ti muak ari dalam.” Udah nya orang nya mai aku nengah pintu utara ngagai mua Rumah Sembiang. Aku malik lalu tepedaka Rumah Sembiang penuh laban mulia TUHAN. Aku lalu nyungkurka diri ke tanah. TUHAN lalu bejaku ngagai aku, “Anak mensia, peratika semua utai ti dipeda enggau didinga nuan. Aku deka madahka ngagai nuan atur enggau adat ke Rumah Sembiang. Peratika enggau manah sapa ti tau tama-pansut ari Rumah Sembiang, lalu sapa ti enda tau. “Padahka ngagai orang Israel ke selalu deka angkat ngelaban, Aku TUHAN Allah Taala enggai agi meda utai ti jai ti dikereja sida. Sida udah ngamahka Rumah Aku laban sida udah nejuka orang ari bansa bukai ti enda ditutus, orang ke enda ngasika Aku, tama ngagai Rumah Aku lebuh lemak enggau darah ari piring benung diberi ngagai Aku. Nya alai bala nembiak Aku udah ngelanggar sempekat Aku ngena semua utai ti jai ti udah dikereja sida. Sida enda ngereja pengawa ti kudus dalam Rumah Aku, tang udah ngasuh orang bansa bukai ngereja pengawa nya. “Aku TUHAN Allah Taala madahka, nadai orang kampar ti enda ditutus, nadai orang ke enda ngasika Aku, tau tama ngagai Rumah Aku. Orang ari menua bukai ti diau begulai enggau orang Israel, pen enda mega tau.” Ku TUHAN bejaku ngagai aku, “Aku deka ngukum orang Lewi ti udah enggau orang Israel ti bukai ninggalka Aku lalu nyembah engkeramba. Sida tau gawa ke Aku dalam Rumah Sembiang nyaga pintu, enggau ngereja pengawa dalam Rumah Aku. Sida tau munuh jelu ti diberi orang mayuh nyadika piring tunu, enggau nyadika piring, lalu sida enda tau enda gawa bekereja ke orang mayuh. Tang laban sida ngereja pengawa besembahka engkeramba ngarika orang Israel, lalu nguluka orang Israel bedosa, Aku TUHAN Allah Taala besumpah, sida enda tau enda diukum. Sida enda tau gawa ke Aku nyadi imam, tauka datai semak ngagai sebarang utai ti kudus, tauka tama ngagai Endur ti Pemadu Kudus. Tu meh ukum ketegal utai ti jai ti udah dikereja sida. Aku diatu meri ngagai sida pengawa ti kasar ti enda tau enda dikereja dalam Rumah Sembiang.” Ku TUHAN Allah Taala bejaku, “Sida imam ari raban bansa Lewi, ke datai ari peturun Sadok, mengkang gawa ke Aku enggau ati ti tetap dalam Rumah Sembiang, lebuh semua orang Israel ti bukai udah ninggalka Aku. Nya alai diatu, sida nya meh orang ke gawa ke Aku lalu datai di mua Aku, meri lemak enggau darah ari piring, ngagai Aku. Semina sida aja tau tama ngagai Rumah Aku, gawa ba alta Aku, lalu nguluka orang besembiang dalam Rumah Aku. Lebuh sida tama pintu besai ngagai tengah laman ti di dalam Rumah Sembiang, sida enda tau enda ngerasukka pekayan ti digaga ari kain linin. Sida enda tau ngena utai ti digaga ari bulu bedus lebuh sida gawa dalam tengah laman ti di dalam, tauka dalam Rumah Sembiang. Ngambika sida enda peluh, sida enda tau enda ngena labung ti digaga ari kain linin, enggau tanchut panjai ti digaga ari kain linin, tang sida enda tau ngena belulang. Sebedau sida mansang ngagai tengah laman ti di luar, alai orang mayuh ke begempuru, sida enda tau enda dulu muka gari ti dikena sida bekereja dalam Rumah Sembiang, lalu ninggalka gari nya dalam bilik ti kudus. Sida enda tau enda ngerasukka gari bukai, ngambika gari ti kudus nya enda ngemediska orang mayuh. “Sida imam enda tau ngukur pala sida, tauka nejuka buk sida panjai. Sida semina tau nguntin buk sida penumbas iya pemanjai. Imam enda tau ngirup wain sebedau sida tama ngagai tengah laman ti di dalam. Imam enda tau jadi enggau indu ke udah belaki. Iya semina tau jadi enggau indu orang Israel ti agi dara bungas, tauka balu imam ti bukai. “Sida imam enda tau enda ngajar bala nembiak Aku ngelala bagi utai ti kudus enggau utai ti enda kudus, enggau entara utai ti tuchi enggau ti enda tuchi. Lebuh orang bechara, sida imam enda tau enda ngatur pechara nya nitihka Adat Aku. Sida enda tau enda ngintu gawai pengarap nitihka atur enggau Adat Aku, lalu sida enda tau enda ngintu Hari Sabat kudus. “Imam enda tau ngamahka diri beteguka bangkai mensia, kelimpah ari bangkai apai indai iya empu, anak iya, tauka menyadi lelaki tauka menyadi indu iya ke apin belaki. Lebuh iya udah nyadi tuchi baru, iya enda tau enda nganti tujuh hari lalu udah nya tama ngagai tengah laman ti dalam Rumah Sembiang, lalu ngenjuk piring kena nuchi diri, ngambika iya tau gawa dalam Rumah Sembiang baru. Aku TUHAN Allah Taala, udah bejaku.” “Sida imam nadai diberi pesaka. Aku tu meh pesaka sida, lalu kita enda tau meri sida pesaka di menua Israel. Aku tu meh pesaka sida. Sida deka makai pemeri ti digaga ari gandum, piring pengampun dosa, enggau piring kena mayar penyalah. Lalu semua utai ti diserahka ngagai TUHAN dalam menua Israel, deka diempu sida magang. Sida imam enda tau enda diberi utai ti pemadu manah ari utai ti terubah iya diketau, enggau ari semua utai bukai ti diberi ngagai Aku. Genap kali orang mayuh manggang roti, sida enda tau enda meri ngagai sida imam tuku roti ti terubah, nyadika piring. Nya baru Aku deka merekatka ruang bilik sida. Sida imam enda tau makai burung tauka jelu ti enda ditemu pemati, tauka dibunuh jelu bukai.” Lebuh menua nya dibagi ngagai siti-siti raban bansa, sebagi enda tau enda diserahka ngagai TUHAN. Pemanjai iya enda tau enda 12.5 kilometer, lalu buka iya 10 kilometer. Semua tanah nya kudus magang. Dalam kandang endur nya enda tau enda bisi siti kandang ti besegi empat, endur alai Rumah Sembiang bediri. Pemanjai tisi sepiak-sepiak 250 meter, dikelingi endur ti lapang buka 25 meter. Setengah ari endur nya, ti panjai 12.5 kilometer enggau buka 5 kilometer, enda tau enda disukat, nyadika endur alai nirika Rumah Sembiang, endur ti pemadu kudus. Endur nya deka nyadi endur ti kudus dalam menua nya, ti diagihka ngagai bala imam ke gawa ke TUHAN dalam Rumah Sembiang. Setengah ti bukai dalam kandang nya diagihka nyadika pesaka orang Lewi ke bekereja dalam Rumah Sembiang. Endur nya deka bisi nengeri alai sida diau. Ngimbai endur ti kudus nya bisi siti sitak, ti panjai 12.5 kilometer enggau buka 2.5 kilometer, ti enda tau enda diagihka nyadika endur alai ngaga sebuah nengeri, alai sebarang orang Israel tau diau. Tanah enda tau enda mega diagihka ngagai raja. Ari garis entara menua ti muak ke barat ari endur ti kudus nya, kandang menua nya deka nganchau ke barat nyentuk ngagai Tasik Tengah. Lalu ari garis entara menua ti muak ke timur, menua nya deka nganchau nyentuk ngagai garis entara menua Israel di timur, ngambika menua nya deka sama pemanjai enggau menua ti diberi ngagai siti raban bansa orang Israel. Tu meh kandang menua ti deka diberi ngagai raja menua Israel, ngambika iya enda agi nekanka pengidup orang mayuh, tang deka nejuka endur bukai di menua nya diempu raban bansa orang Israel. Ku TUHAN Allah Taala bejaku, “Kita ke merintah menua Israel kelalu lama udah bedosa! Badu agi kasar enggau orang, lalu badu agi nekanka pengidup orang. Kereja utai ti ngena sereta lurus. Badu agi muru bala nembiak Aku ari tanah sida, ku TUHAN Allah Taala bejaku. “Semua orang enda tau enda ngena timbang enggau takar ti betul: “Satu epah ti dikena nakar utai ti rangkai enda tau enda sebaka enggau satu bat takar ti dikena nakar utai ti basah. Sukat ti diguna nya homer baka tu ku takar: 1 homer = 10 epah = 10 bat Atur kena nimbang nya baka tu: 20 gerah = 1 sekel 60 sekel = 1 mina “Semua orang di menua tu enda tau enda mai piring tu ngagai raja menua Israel. Raja nya deka betanggungjawap meri jelu ti deka ditunu segala, piring tepung, enggau piring wain ke semua orang Israel lebuh Gawai Anak Bulan, Hari Sabat, enggau gawai ti bukai. Iya enda tau enda ngenjuk piring pengampun dosa, piring tepung, piring tunu segala, enggau piring pemaik, kena muai dosa orang Israel.” Ku TUHAN Allah Taala bejaku, “Kena satu hari bulan ti kesatu, kita enda tau enda meri siku sapi ti lelaki ti nadai penimpang nyadika piring kena nuchi Rumah Sembiang. Imam deka ngambi sekeda darah ari piring ti dikena muai dosa nya, lalu malitka darah nya ngagai tiang pintu Rumah Sembiang, ba empat iti sukut alta, enggau ba tiang pintu besai ti nuju ngagai tengah laman ti di dalam. Kena tujuh hari bulan nya, kita enda tau enda mega ngereja utai nya baru, ngarika sebarang sapa ti udah bedosa enggau enda sengaja, tauka laban sida enda nemu diri udah bedosa. Nya meh jalai kita nguduska Rumah Sembiang. “Kena empat belas hari bulan ti kesatu, kita enda tau enda belabuh ngerami Gawai Paska. Dalam kandang tujuh hari semua orang deka makai roti ti enda beragi. Ba hari ti keterubah ke Gawai nya, raja enda tau enda meri siku sapi ti lelaki nyadika piring pengampun dosa iya empu, enggau dosa semua orang mayuh. Genap hari dalam kandang tujuh hari Gawai nya diintu, raja enda tau enda meri tujuh iku sapi ti lelaki enggau tujuh iku bedus ti lelaki, ti nadai penimpang nyadika piring lalu nunu jelu nya segala. Iya enda tau enda mega meri siku kambin ti lelaki tiap hari nyadika piring pengampun dosa. Ke genap iku sapi ti lelaki, enggau ke genap iku bedus ti lelaki ti digaga nyadika piring, 17.5 liter gandum, enggau 3 liter minyak kana enda tau enda diberi. “Kena ngintu Gawai Belangkau ti berengkah kena lima belas hari bulan ti ketujuh, raja deka meri, genap hari dalam tujuh hari nya, piring baka ke dikena muai dosa, piring ti deka ditunu segala, enggau piring tepung enggau minyak kana.” Ku TUHAN Allah Taala bejaku, “Pintu besai timur ti nunga ngagai tengah laman ti di dalam, enda tau enda selalu ditutup dalam kandang enam hari, tang enda tau enda dibuka ba Hari Sabat, enggau lebuh Gawai Anak Bulan. Raja deka bejalai ari tengah laman ti di luar, tama ngagai bilik penama ba pintu besai, lalu bediri ngimbai tiang pintu nya lebuh bala imam nunu piring raja nya segala, lalu ngenjuk piring pemaik ke raja nya empu. Raja enda tau enda besembiang dulu ba mua pintu nya sebedau iya pansut. Pintu nya enda tau ditutup nyentuk ngagai lemai. Genap Hari Sabat, enggau genap Gawai Anak Bulan, semua orang mayuh mega enda tau enda meremi lalu nyembah TUHAN ba mua pintu nya. Lebuh Hari Sabat, raja nya enda tau enda mai enam iku anak domba enggau siku kambin ti lelaki, ti nadai penimpang, nyadika piring tunu segala, ti diberi ngagai TUHAN. Ke genap iku bedus ti lelaki, raja enda tau enda mai piring 17.5 liter gandum. Ke genap iku anak domba, iya enda tau enda mai sebarang utai ti deka diberi iya. Ke genap 17.5 liter piring tepung, iya enda tau enda mai 3 liter minyak kana. Lebuh Gawai Anak Bulan, raja deka meri siku sapi ti lelaki, ti agi biak, enam iku anak domba, siku bedus ti lelaki, semua nadai penimpang magang. Ke genap iku sapi ti lelaki enggau siku bedus ti lelaki, raja enda tau enda meri 17.5 liter gandum, lalu ke genap iku anak domba, iya enda tau enda meri sebarang utai ti deka diberi iya. Ke genap 17.5 liter gandum, iya enda tau enda meri 3 liter minyak kana. Lebuh iya tama, iya enda tau enda tama nengah tempuan pintu besai nya, lalu iya enda tau enda mega pansut nengah nya. “Lebuh orang mayuh datai nyembah TUHAN lebuh maya gawai, orang ke tama nengah pintu utara enda tau enda pansut nengah pintu selatan lebuh sida udah besembiang, lalu orang ke tama nengah pintu selatan, enda tau enda pansut nengah pintu utara. Nadai siku orang tau pansut nengah pintu ti ditengah iya tama, tang enda tau enda pansut nengah pintu ti betapak enggau pintu nya. Raja enda tau enda tama nyereta orang mayuh, lalu pansut mega nyereta orang mayuh. Lebuh maya pengerami makai besai enggau lebuh maya gawai, 17.5 liter gandum enda tau enda diberi ke genap iku sapi ti lelaki tauka siku bedus ti lelaki, enggau sebarang utai ti deka diberi sida ke genap iku anak domba. Ke genap 17.5 liter gandum, 3 liter minyak kana enda tau enda diberi. “Lebuh raja deka ngenjuk piring nitihka peneka ati diri ngagai TUHAN, nemuka piring nya ditunu segala, tauka piring pemaik, pintu ti muak ke timur ti nuju ngagai tengah laman ti di dalam, enda tau enda dibuka ke iya. Iya enda tau enda ngenjuk piring nya baka chara iya ke ngenjuk piring lebuh Hari Sabat, lalu pintu nya enda tau enda ditutup lebuh iya udah pansut.” Ku TUHAN bejaku, “Genap pagi siku anak domba ti umur setaun, ti nadai penimpang, enda tau enda ditunu segala nyadika piring ti diberi ngagai TUHAN. Piring nya enda tau enda diberi tiap hari. Nambahka nya, dua kilogram tepung enda tau enda diberi tiap pagi, enggau seliter minyak kana kena nyampur tepung nya. Adat ngenjuk piring tu ngagai TUHAN enda tau enda dipejalaika belama iya. Anak domba, tepung, enggau minyak kana nya enda tau enda diberi ngagai TUHAN genap pagi, belama iya.” Ku TUHAN Allah Taala bejaku: “Enti raja meri tanah iya empu ngagai siku ari bala anak lelaki iya, tanah nya deka diempu anak iya nyadika pesaka iya. Tang enti iya meri tanah iya ngagai orang ke bekereja ke iya, tanah nya deka diempu orang nya nyentuk ngagai taun mulaika utai baru. Udah nya pesaka nya deka dipulaika baru ngagai raja. Semina anak lelaki raja aja tau terus bempu pesaka nya. Raja enda tau ngerampas pesaka orang. Tanah ti diberi iya ngagai bala anak lelaki iya enda tau enda tanah ti endang udah diletak nyadika pesaka raja empu, ngambika iya enda ngerampas tanah ari bala nembiak Aku.” Udah nya orang nya lalu mai aku nengah penama nya, ti ba tisi pintu nya, tunga ngagai rintai bilik bala imam muak ke utara. Dia aku lalu tepedaka siti endur ba pengabis ujung rintai bilik nya muak ke barat. Iya lalu bejaku ngagai aku, “Tu endur alai bala imam manduk dagin ti udah diberi nyadika piring pengampun dosa, tauka piring kena bebayar, enggau endur alai sida manggang tepung ti diberi nyadika piring, ngambika utai ti kudus nya enda dibai pansut ngagai tengah laman ti di luar, lalu ngemediska orang mayuh.” Genap iti tengah laman nya dikelingi enggau dinding batu, lalu bisi dapur ngimbai dinding nya. Ku orang nya madahka ngagai aku, “Nya dapur alai bala orang ke bekereja dalam Rumah Sembiang manduk piring ti diberi orang mayuh.” Orang nya nguluka aku pulai baru ngagai mua pintu Rumah Sembiang. Ai bisi pansut ari baruh semetung pintu nya lalu rarat tunga ke timur, tunga ngagai mua Rumah Sembiang. Ai nya rarat ari baruh selatan Rumah Sembiang, lalu mansa tisi selatan alta. Orang nya lalu mai aku pansut ari kandang Rumah Sembiang nengah pintu utara, lalu nguluka aku ngagai pintu ti nunga ke timur. Siti sungai ti mit rarat ari tisi selatan pintu nya. Ngena batang penyukat iya, iya lalu nyukat 500 meter ngili sungai nya tunga ke timur, lalu ngasuh aku bejalai nengah ai nya. Ai nya semina ngampuhka buku-ali aku. Udah nya iya nyukat 500 meter baru, lalu ai nya ngampuhka pala patung aku. Iya nyukat 500 meter da agi, lalu ai nya datai ba ikas punggung aku. Iya nyukat 500 meter da agi, lalu ai dia kelalu dalam datai ke aku nyau enda ulih bejalai nengah ai nya agi. Ai nya kelalu dalam, lalu enda ulih ditengah enti enda nyemerai. Ku iya bejaku ngagai aku, “Anak mensia, peratika semua utai tu enggau manah.” Udah nya orang nya mai aku pulai baru ke tebing, lalu lebuh aku datai ba tebing, aku tepedaka mayuh amat kayu ba tebing sepiak-sepiak. Ku iya bejaku ngagai aku, “Ai tu rarat nengah menua tu tunga ke timur, lalu nurun ngagai Lebak Jordan, terus ngagai Tasik Mati. Lebuh ai sungai tu rarat ngagai Tasik Mati, iya nganti ai ti masin ba tasik nya ngena ai ti tabar. Enda milih tunga ai sungai nya rarat, endur nya deka bisi semua macham jelu enggau ikan. Ai sungai nya deka ngasuh ai dalam Tasik Mati tabar, lalu enda milih tunga ai nya rarat, iya deka ngasuh utai dia idup. Orang berikan deka seruran bisi ba tebing nya nyembui pukat sida kenyau ari Mata Ai di En-gedi, nyentuk ngagai Mata Ai di En-eglaim. Pemayuh macham ikan ba sungai nya deka ngemayuh macham ikan ti ba Tasik Tengah. Tang ai ba paya enggau ba letung sepemanjai tebing sungai nya masin. Ai dia deka nyadi endur alai orang ngulihka garam. Ba tebing sepiak-sepiak sungai nya, semua macham kayu deka tumbuh lalu mansutka utai ti tau diempa. Daun sida enda nemu layu, lalu sida enda ngetu bebuah. Sida mansutka buah tiap bulan, laban sida bulih ai ari sungai ti rarat ari Rumah Sembiang. Kayu dia deka mansutka pemakai, lalu daun sida deka dikena ngeraika orang.” Ku TUHAN Allah Taala bejaku, “Tu garis entara menua ke menua ti deka dibagi ngagai dua belas raban bansa orang Israel, lalu raban bansa Josep deka nerima dua iti bagi. Aku udah besemaya ngena sumpah enggau bala aki ini kita, deka meri sida menua tu. Nya alai, diatu bagi meh menua tu ulih kita. “Garis entara menua di utara berengkah ba Tasik Tengah terus ke timur ngagai nengeri Hetlon, ngagai Lebo-hamat, ngagai nengeri Sedad, ngagai nengeri Berotah enggau Sibraim (nengeri nya ba entara menua perintah Damaskus enggau menua perintah Hamat), lalu ngagai nengeri Tikon (ba garis entara menua ke pelilih menua Hauran). Nya alai garis entara menua di utara berengkah ari Tasik Tengah lalu nuju ke timur ngagai nengeri Enon, ti tunga ke utara Damaskus lalu garis entara menua enggau Hamat tunga ke utara garis entara menua nya. “Garis entara menua di timur berengkah ba endur entara menua Damaskus enggau menua Hauran, lalu nuju ke selatan. Sungai Jordan nyadika garis entara menua kena nyeraraka menua Israel di barat enggau menua Giliat di timur, nyentuk ngagai Tamar ba Tasik Mati. “Garis entara menua di selatan berengkah ba Tamar lalu nuju ke selatan-barat ngagai mata ai Kades-meribah lalu udah nya nuju ke utara-barat niti garis entara menua Ejip, ngagai Tasik Tengah. “Garis entara menua di barat nya Tasik Tengah, terus ke utara ngagai siti endur ti tunga ke barat Lebo-hamat. “Bagi menua tu ngagai raban bansa kita. Menua tu nyadika pesaka kita. Orang ari menua bukai ti diau begulai enggau kita, lalu udah beranak betelesak di menua tu, enda tau enda bisi ungkup lebuh kita magi menua tu. Sida enda tau enda digaga sebaka enggau peranak orang Israel, lalu enda tau enda enggau bechabut undi ngambi ungkup menua sama enggau raban bansa orang Israel. Semua orang bansa bukai ke diau ngentapka diri di menua tu deka nerima ungkup sama enggau raban bansa ti enggau sida begulai diau. Aku TUHAN Allah Taala, udah bejaku.” Tanah ti nangkanka menua raban bansa Judah enda tau enda dibagi nyadi endur ti besai amat guna. Buka tanah nya 12.5 kilometer ari utara ke selatan. Lalu pemanjai iya ari timur nuju ke barat nya sebaka enggau pemanjai menua ti diberi ngagai raban bansa orang Israel ti bukai. Tu meh tanah alai Rumah Sembiang deka digaga. Ba tengah-tengah tanah tu, siti endur ti panjai 12.5 kilometer, buka 10 kilometer, deka diserahka ngagai TUHAN. Sida imam deka bulih bagi ari tanah ti kudus tu. Ari timur ke barat, pemanjai tanah sida nya 12.5 kilometer, lalu ari utara ke selatan, 5 kilometer. Lalu Rumah Sembiang deka digaga ba tengah-tengah tanah tu. Tanah ti kudus tu diberi ngagai bala sida imam ti ari peturun Sadok. Sida udah gawa ke Aku enggau ati ti tetap, lalu nadai enggau orang Israel ti bukai ngereja utai ti salah, baka ke udah dikereja raban bansa Lewi ti bukai. Nya alai sida diberi tanah ngimbai tanah ti diempu orang Lewi, lalu tanah nya deka nyadi endur ti pemadu kudus. Orang Lewi mega diberi tanah muak ke selatan ari tanah sida imam. Pemanjai tanah nya mega 12.5 kilometer ari timur ke barat, lalu buka iya 5 kilometer ari utara ke selatan. Tanah ti diserahka ngagai TUHAN nya tanah ti pemadu manah di menua Israel, lalu tanah nya enda tau dijual, tauka disilih, tauka ditukar nama ngagai nama orang bukai. Tanah nya kudus lalu endang enggi TUHAN. Teda tanah nya, ti panjai 12.5 kilometer enggau buka 2.5 kilometer, nya ukai tanah ti kudus, tang tau dikena orang mayuh. Sida tau diau dia, lalu ngena tanah nya. Nengeri deka digaga ba tengah-tengah tanah nya, lalu tanah nya besegi empat, pemanjai tisi sepiak-sepiak 2.25 kilometer. Ngelingi nengeri nya bisi tanah ti lapang. Buka tanah nya 125 meter. Teda tanah ti agi tinggal lebuh nengeri nya udah digaga muak ari selatan tanah ti kudus nya, deka nyadi endur alai orang nengeri nya betanamka utai. Pemanjai teda tanah nya muak ke timur nya 5 kilometer, lalu buka iya 2.5 kilometer. Pemanjai iya muak ke barat 5 kilometer, lalu buka iya 2.5 kilometer. Barang sapa diau dalam nengeri nya, enda milih bagi raban bansa sida nya, tau betanamka utai ba tanah nya. Nya alai tanah nya, nyengkaum tanah ti diungkup alai ngaga nengeri nya, besegi empat. Pemanjai tisi siti-siti 12.5 kilometer. Ba tisi selatan tanah ti diberi ngagai raban bansa Gat, garis entara menua nya nuju ke selatan-barat berengkah ari Tamar ngagai mata ai Kades, lalu udah nya, nuju ke utara-barat niti garis entara menua enggau orang Ejip, ngagai Tasik Tengah. Ku TUHAN Allah Taala bejaku, “Nya meh jalai menua nya deka dibagi ngagai semua raban bansa orang Israel, nyadika pesaka sida.” Pemanjai semua dinding ti ngelingi nengeri nya, 9 kilometer. Belabuh ari diatu, nama nengeri nya “ TUHAN Bisi Ditu!” Dalam taun ti ketiga Jehoiakim nyadi raja menua Judah, dia Raja Nebukadnesar menua Babilon datai ngagai Jerusalem lalu ngelulung nengeri nya. Lalu TUHAN nyerahka Raja Jehoiakim ngagai jari Raja Nebukadnesar sama enggau reta tengkira ti berega dalam Rumah Sembiang. Lalu Nebukadnesar nabanka sekeda orang tangkap ngagai menua Babilon. Iya mai lalu nyimpan reta tengkira dalam bilik setor rumah petara iya. Raja nya ngasuh Aspenas, ti nyadi tuai ke bala pemesai iya, milih orang Israel ke agi biak, ke ari peturun raja, enggau ari peturun orang ke tinggi pangkat, ke nadai penimpang, sigat, bepenemu-dalam sereta bepelajar, ke ulih bekereja dalam istana raja. Iya ngasuh Aspenas ngajar sida macha enggau nulis jaku orang Babilon. Raja mega meri atur ngasuh sida tiap hari diberi pemakai enggau wain ti diberi ngagai raban orang ke di istana raja. Lebuh sida udah dilatih tiga taun, sida lalu dibai betemu enggau raja. Bala sida nya nyengkaum Daniel, Hananiah, Misael, enggau Asariah, ke datai ari raban bansa Judah. Tuai pemesai nya meri sida nama baru: Daniel dikumbai iya Beltesasar; Hananiah dikumbai iya Sadrak; Misael dikumbai iya Mesak; lalu Asariah dikumbai iya Abednego. Daniel mutuska runding enggai ngamahka diri makai pemakai raja, tauka ngirup wain ti diirup raja, lalu iya minta Aspenas ngemendarka iya ngereja nya. Lalu Allah Taala ngasuh Aspenas kasihka Daniel. Tang ku Aspenas bejaku enggau Daniel, “Aku takutka raja; laban raja udah ngeletak utai ti patut diempa enggau diirup kita. Enti iya meda kita kurus agi ari orang bujang ke seumur enggau kita, iya tentu deka munuh aku.” Udah nya Daniel lalu bejaku enggau orang jaga ti udah diasuh Aspenas ngemataka sida: “Awakka nuan nguji kami dalam kandang sepuluh hari. Beri kami sayur enggau ai irup aja. Udah nya nuan tau mandingka kami enggau orang bujang ke makai pemakai raja, lalu ngaga pemutus nuan beduduk ba utai ti dipeda nuan.” Orang jaga nya besetuju nejuka sida Daniel ngujika diri dalam kandang sepuluh hari. Lebuh timpuh nyau chukup, sida berupai manah agi gaya, sereta gemu agi ari semua orang bujang ke makai pemakai raja. Nya alai, orang jaga nya ngambi pemakai raja ari sida, lalu meri sida sayur. Allah Taala meri sida penemu macha enggau nulis, sereta meri sida penemu-dalam. Nambahka nya, Iya meri Daniel pengelandik nerangka reti genera enggau mimpi. Ba ujung timpuh ti udah diletak raja, Aspenas mai semua orang bujang nya ngagai Nebukadnesar. Raja berandau enggau semua sida, lalu iya puas agi ati enggau Daniel, Hananiah, Misael, enggau Asariah ari sida ti bukai. Nya alai sida empat lalu diletak nyadi raban orang ke bekereja di istana raja. Dalam semua pekara pasal penemu-dalam enggau pasal meretika utai ti ditanyaka raja ngagai sida, raja nemu sida sepuluh kali pandai agi ari semua orang ke tau keramat, tauka orang ke nyadi lemambang ke di menua ti dipegai iya. Daniel mengkang bekereja di istana raja nyentuk ngagai maya Raja Sairus. Kedua taun Nebukadnesar udah nyadi raja, iya bisi mimpi. Mimpi nya balat amat ngasuh ati iya irau, datai ke nyau enda ulih tinduk. Nya alai iya mesanka bala nembiak iya ke nemu betilitka nasit, orang ke tau keramat, sida dukun enggau sida manang, minta sida nerangka reti mimpi nya ngagai iya. Sida datai lalu bediri di mua raja. Raja lalu bejaku enggau sida, “Ati aku balat irauka mimpi aku. Aku keran deka nemu reti mimpi nya.” Ku sida nyaut raja ngena jaku orang Aram, “Awakka Tuan Raja idup belama iya! Padahka mimpi nuan ngagai kami, nya baru kami nemu nerangka reti mimpi nya ngagai nuan.” Ku raja nyaut sida, “Aku udah mutuska runding deka ngasuh kita madahka mimpi nya ngagai aku. Udah nya baru kita nerangka reti mimpi nya ngagai aku. Enti kita enda ulih, aku deka ngasuh orang nyarikka tubuh kita, lalu rumah kita digaga nyadi tembawai. Tang enti kita ulih madahka mimpi enggau reti mimpi nya ngagai aku, aku deka ngupah kita ngena pemeri enggau basa ti besai. Nya alai, padahka mimpi nya, enggau reti iya ngagai aku.” Sida lalu nyaut raja nya baru, “Enti Tuan Raja deka madahka ngagai kami mimpi nya, nya baru kami nerangka reti iya.” Lebuh raja ninga nya, iya lalu bejaku enggau nyawa ti inggar, “Betul sangka aku! Kita tu semina masau jam ngapa, laban kita nemu aku endang udah mutuska penemu deka ngukum semua kita enti kita enda madahka mimpi nya ngagai aku. Kita udah besetuju enggau pangan diri deka ngemulaka aku, laban kita ngarapka aku deka ngubah runding diri. Padahka mimpi nya ngagai aku. Nya baru aku deka nemu kita amat nemu nerangka reti mimpi nya ngagai aku.” Bala penyanding penemu raja lalu nyaut, “Nadai orang di dunya tu ulih madahka utai ti keran deka ditemu Tuan Raja. Nadai raja, nyengkaum raja ti pemadu besai sereta pemadu bekuasa, udah bisi kala minta utai ti munyi tu ari bala nembiak iya ti tau tilit, ti tau keramat, enggau ari bala manang. Utai ti dipinta Tuan Raja nya kelalu mar dikereja. Semina petara aja ulih ngereja utai nya ke nuan, tang petara nadai diau begulai enggau mensia.” Lebuh raja ninga jaku nya, iya ringat. Iya lalu ngasuh semua penyanding penemu raja di menua Babilon, dibunuh magang. Nya alai atur lalu dipejalaika, ngasuh semua sida dibunuh magang, nyengkaum Daniel enggau bala pangan iya. Udah nya Daniel lalu mansang ngagai Ariok, ti nyadi tuai ke bala jejaga raja, ti udah diberi atur bejalaika ukum nya. Daniel bejaku enggau bejimat, lebuh iya nanya ngagai Ariok pasal kebuah raja ti udah meri atur ti kasar baka nya. Ariok lalu nusui ngagai Daniel pasal utai ti udah nyadi. Daniel lalu tekala nya betemu enggau raja lalu minta raja nginsur timpuh nya panjai agi, ngambika iya ulih madahka reti mimpi nya ngagai raja. Udah nya Daniel pulai, lalu nusui pasal utai ti udah nyadi ngagai pangan iya Hananiah, Misael, enggau Asariah. Iya ngasuh sida besampi ngagai Allah Taala ti di serega minta pengasih ari Iya, lalu minta Iya nerangka misteri nya ngagai sida, ngambika sida enda kena bunuh sama enggau bala penyanding penemu ti bukai di menua Babilon. Malam nya misteri nya lalu dipandangka ngagai Daniel ngena siti genera. Daniel lalu muji Allah Taala ti di serega: “Allah Taala endang pintar sereta bekuasa! Pujika Iya belama lama iya. Iya ngatur jam enggau musin. Iya ngeletak orang nyadi raja, lalu Iya mega muai raja. Iya meri penemu-dalam lalu ngasuh orang mereti. Iya mandangka utai ti dalam sereta resia. Iya nemu utai ti dilalaika dalam pemetang, lalu Iya Empu diau dalam penampak. Aku muji sereta ngemesaika Nuan, O Allah Taala aki ini aku. Nuan udah meri aku penemu-dalam enggau pengering. Nuan udah nyaut sampi aku lalu nunjukka ngagai kami utai ti patut dipadahka kami ngagai raja.” Daniel lalu mansang ngagai Ariok, ti udah diasuh raja munuh bala penyanding penemu raja. Ku Daniel bejaku enggau Ariok, “Anang munuh sida. Bai aku ngagai raja ngambika aku madahka reti mimpi nya ngagai iya.” Ariok lalu tekala nya mai Daniel betemu enggau Raja Nebukadnesar, lalu madahka ngagai raja, “Aku bisi udah tetemuka siku orang Judah ti udah dibuai ari menua sida, ke ulih madahka reti mimpi Tuan Raja.” Ku raja bejaku enggau Daniel (ke dikumbai Beltesasar), “Kati nuan ulih madahka mimpi aku, enggau reti iya?” Ku Daniel nyaut, “Tuan Raja, nadai siku manang tauka orang ke tau keramat, tauka orang ke tau tilit, tauka landik pasal bintang, ulih madahka misteri nya ngagai nuan. Tang di serega bisi Allah Taala ti mandangka utai ti resia. Iya udah madahka ngagai Tuan Raja utai ti deka nyadi jemah ila. Diatu aku deka madahka mimpi nya ngagai nuan, genera ti dipeda nuan lebuh nuan tinduk. “Lebuh Tuan Raja benung tinduk, nuan bemimpika utai ti deka nyadi jemah ila, lalu Allah Taala, ke mandangka utai ti resia, nunjuk ke nuan utai ti deka nyadi. Nyadi misteri tu udah dipandangka ngagai aku, ukai laban aku lebih agi bepenemu-dalam ari orang bukai, tang ngambika Tuan Raja nemu reti mimpi nya, lalu meretika runding ti udah datai ba ati nuan. “Tuan Raja, dalam genera nuan nya, nuan meda, bediri di mua nuan, siku engkeramba ti besai, ti terang sereta beperenching, lalu balat ngenakutka. Pala iya digaga ari emas ti pemadu tulin. Dada enggau lengan iya digaga ari pirak. Punggung enggau pun pah iya digaga ari temaga. Betis iya digaga ari besi, lalu kaki iya digaga ari besi bechampur enggau tanah liat. Lebuh nuan benung merening ngagai utai nya, sigi batu ti besai tingkil ari tingkah, lalu mangka ngagai kaki besi enggau tanah liat engkeramba nya, lalu ngeredakka kaki nya. Tekala nya besi, tanah liat, temaga, pirak enggau emas nya lalu besepur baka amau ba endur alai nungku. Ribut lalu ngebuka semua amau nya. Tang batu nya mansang besai-sebesai lalu nyadi sigi bukit ti ngelamun semua dunya. “Nya meh mimpi nuan. Diatu aku deka madahka reti mimpi nya ngagai nuan. Tuan Raja, nuan tu raja ti besai agi ari semua raja. Allah Taala ti di serega udah ngasuh nuan nyadi raja, lalu udah meri ngagai nuan kuasa, pengering enggau basa. Iya udah ngasuh nuan merintah semua dunya, sereta merintah semua jelu enggau burung. Pala emas nya ngambarka nuan empu. Udah bekau nuan, siti agi perintah deka pegari, tang iya enda ngemesai perintah nuan, lalu udah bekau nya, perintah ti ketiga, iya nya perintah temaga, ti deka merintah semua dunya. Udah nya bisi perintah ti keempat, ti kering baka besi, ti mechah lalu ngeredakka semua utai. Lalu baka besi ti mechahka semua utai, iya deka mechah lalu ngeredakka semua perintah ti dulu ari nya. Nuan mega bisi meda kaki enggau tunjuk kaki nya digaga ari tanah liat enggau ari besi. Reti nya, perintah nya deka bebagi. Iya deka ngembuan pengering besi, laban besi bisi bechampur enggau tanah liat. Tunjuk kaki - ti digaga ari besi enggau tanah liat - nunjukka perintah nya kering, tang bisi mega pengelemi. Nuan mega meda besi nya udah dichampur enggau tanah liat. Reti nya, orang ke megai perintah di menua nya deka nguji berakupka ruang bilik sida ngena chara belaki bini bepasuk bansa, tang sida enda ulih, baka besi ti enda ulih bechampur enggau tanah liat. Lebuh bala raja nya megai perintah, Allah Taala ti di serega deka numbuhka siti perintah ti enda nemu abis. Perintah nya ila enda ulih dialahka, tang iya deka ngerusak semua perintah bukai, lalu udah nya iya deka meruan belama iya. Nuan bisi meda chara batu nya tingkil ari tingkah, nadai ditegu mensia, enggau chara batu nya mangka ngagai engkeramba ti digaga ari besi, temaga, tanah liat, pirak enggau emas. Utai nya kena Allah Taala ti besai madahka ngagai Tuan Raja utai ti deka nyadi jemah ila. Aku udah madahka mimpi nuan, lalu udah madahka reti mimpi nya ti bendar ngagai nuan.” Udah nya Raja Nebukadnesar nyungkurka diri ke tanah, lalu meri atur ngasuh piring enggau pemeri diberi ngagai Daniel. Ku raja nya bejaku, “Allah Taala nuan besai agi ari semua petara. Iya TUHAN ke semua raja. Iya mandangka semua misteri. Aku nemu nya laban nuan udah ulih nerangka misteri tu.” Raja nya lalu meri Daniel pangkat ti tinggi. Iya meri pemeri ti manah ngagai Daniel. Iya ngasuh Daniel nyadi tuai sitak menua Babilon, sereta ngasuh iya nyadi tuai semua penyanding penemu raja. Nitihka pinta Daniel, raja lalu ngasuh Sadrak, Mesak, enggau Abednego nyadi tuai ngemataka pengawa perintah dalam sitak menua Babilon. Tang Daniel mengkang bekereja di istana raja. Raja Nebukadnesar ngasuh orang ngaga engkeramba emas. Peninggi engkeramba nya dua puluh tujuh meter, lalu buka iya tiga meter. Raja nya ngasuh orang nirika engkeramba nya ba emperan Dura, dalam sitak menua Babilon. Udah nya raja meri atur ngasuh semua bala pemesai iya begempuru - bala anak raja, bala tuan gabenor, sapit gabenor, orang ke ngemataka wang, bala hakim, majistret, enggau semua bala pemesai ari semua sitak menua. Sida diperintah datai ngagai pengerami nyerahka engkeramba ti udah didirika Raja Nebukadnesar. Lebuh semua bala pemesai begempuru ba pengawa nyerahka engkeramba nya, sida bediri di mua engkeramba nya. Siku orang lalu bejaku enggau nyawa ti inggar, “Kita ke datai ari semua menua, bansa enggau jaku! Kita deka ninga munyi terumpit ditangkanka enggau munyi kesuling, engkeratung, sape enggau belikan, enggau munyi kereban musik ti bukai. Lebuh musik nya berengkah ditebah, kita enda tau enda meremi lalu nyembah engkeramba emas ti didirika Raja Nebukadnesar. Barang sapa enda meremi lalu nyembah engkeramba nya deka tekala nya ditikauka ngagai serumbung api.” Nya alai, lebuh orang ari semua menua, bansa enggau jaku ninga musik nya, sida meremi lalu nyembah engkeramba emas ti didirika Raja Nebukadnesar. Nya meh maya sekeda orang Babilon ngambi peluang besalah orang Judah. Ku sida bejaku enggau Raja Nebukadnesar, “Awakka Tuan Raja idup belama iya! Tuan Raja udah meri atur: lebuh musik berengkah ditebah, semua orang enda tau enda meremi lalu nyembah engkeramba emas nya, lalu barang sapa enda meremi lalu nyembah engkeramba nya deka dibuai ngagai serumbung api. Sekeda orang Judah ti udah diasuh nuan megai sitak menua Babilon - Sadrak, Mesak, enggau Abednego - udah enda ngasika atur Tuan Raja. Sida enda nyembah petara nuan tauka meremi ngagai engkeramba ti didirika nuan.” Lebuh raja ninga nya, iya balat amat ringat, lalu ngasuh orang mai sida tiga nya ngagai iya. Ku iya bejaku enggau sida, “Sadrak, Mesak, enggau Abednego, kati kita amat enggai nyembah petara aku, lalu enggai meremi ngagai engkeramba emas ti didirika aku? Diatu, lebuh kita ninga munyi terumpit, kesuling, engkeratung, sape enggau belikan, enggau munyi semua kereban musik ti bukai, kita enda tau enda meremi lalu nyembah engkeramba nya. Enti kita enda, kita deka tekala nya ditikauka ngagai serumbung api. Kati kita bisi petara ti ulih ngelepaska kita ari jari aku?” Sadrak, Mesak, enggau Abednego lalu nyaut, “O Tuan Raja, kami enda ibuh bejaku ngarika diri empu. Enti Allah Taala ti dipetuaika kami ulih ngelepaska kami ari api ti mau nya, enggau ari kuasa nuan, awakka Iya meh ngelepaska kami, Tuan Raja. Tang enti Iya enda ngelepaska kami, kami madahka ngagai nuan Tuan Raja, enggai meh kami nyembah petara nuan, lalu meremi ngagai engkeramba emas ti didirika nuan.” Nebukadnesar lalu balat amat ringat. Mua iya mirah, ringat ngagai Sadrak, Mesak enggau Abednego. Iya lalu ngasuh orang masang api dalam serumbung nya tujuh kali angat agi ari selama. Iya lalu ngasuh orang ke pemadu kering ari bala soldadu iya nanchang sida tiga, lalu nikauka sida ngagai serumbung api nya. Sida tiga lalu ditanchang mengkang ngena pekayan sida, iya nya baju, baju panjai, selapuk, enggau semua pekayan bukai. Sida tiga lalu ditikauka ngagai serumbung api nya. Laban raja udah meri atur ngasuh orang masang api nya enggau naka pengangat, bala orang ke mai sida tiga ngagai serumbung api nya, lalu mati angus kena diang api nya. Sadrak, Mesak, enggau Abednego, ti agi mengkang ditanchang, labuh ngagai tengah-tengah serumbung api ti mau nya. Tekala nya Raja Nebukadnesar lalu bediri, laban iya alit ati. Ku iya nanya ngagai bala pemesai iya, “Ukai enda tiga iku orang ditanchang kita, lalu ditikauka kita ngagai serumbung api nya tadi?” Disaut sida, “Sigi amat, Tuan Raja.” “Enti pia, nama kebuah aku meda empat iku orang bejalai ba tengah-tengah api nya?” ku iya nanya. “Sida nya enda ditanchang, lalu sida enda bebadi, lalu iya ti keempat nya baka gamal melikat.” Nebukadnesar lalu mansang semak ngagai mua pintu serumbung api nya, lalu ngangau, “Sadrak! Mesak! Abednego! Nembiak Allah Taala ti Pemadu Tinggi! Pansut kita!” Sida tiga lalu pansut ari api nya. Semua anak raja, tuan gabenor, sapit gabenor, enggau pemesai raja ti bukai lalu begelumu meda orang tiga iku nya, ti enda bebadi laban api nya. Buk sida enda angus, gari sida enda diempa api, lalu sida nadai bebau asap. Ku Nebukadnesar bejaku, “Pujika Allah Taala ti disembah Sadrak, Mesak enggau Abednego! Iya udah ngirumka melikat Iya, lalu ngelepaska sida tu ke betuai sereta arapka Iya. Sida udah ngelanggar atur aku, lalu berambunka nyawa enggai meremi sereta nyembah petara bukai tang semina Allah Taala sida empu. “Diatu aku meri atur: enti orang ari sebarang menua, bansa enggau jaku, ngeleseka Allah Taala sida Sadrak, Mesak, enggau Abednego, tubuh orang nya deka dicharikka, lalu rumah iya deka digaga nyadi tembawai, laban nadai petara bukai ulih ngelepaska orang baka nya.” Raja nya lalu nikika pangkat Sadrak, Mesak, enggau Abednego ngagai pangkat ti tinggi agi dalam sitak menua Babilon. Raja Nebukadnesar ngirumka pesan tu ngagai orang di semua menua, bansa enggau jaku di dunya tu: “Tabi! Pendingka cherita aku pasal utai ti nyelai enggau kereja ajih ti udah diayanka Allah Taala ti Pemadu Tinggi ngagai aku. “Naka meh pemesai kereja ti nyelai ti dipandangka Allah Taala ngagai kitai! Naka meh pemesai kereja ajih ti dikereja Iya! Allah Taala endang Raja belama iya. Iya deka merintah belama lama iya. “Aku udah diau lantang senang dalam istana aku, sereta kaya-raja. Tang aku bisi mimpi ti ngasuh ati aku rawan, enggau genera ti balat ngenakutka ati aku lebuh aku tinduk. Aku lalu mesanka semua penyanding penemu di menua Babilon betemu enggau aku, lalu madahka reti mimpi nya ngagai aku. Udah nya semua orang ke tau tilit, orang ke tau keramat, bala manang, enggau orang ke landik pasal bintang, dibai tama, lalu aku madahka mimpi aku ngagai sida. Tang sida enda ulih nerangka reti mimpi nya ngagai aku. Udah nya Daniel datai. (Iya mega dikumbai Beltesasar, ngangkatka nama petara aku.) Roh bala petara ti kudus bisi dalam iya. Nya alai aku lalu madahka mimpi aku ngagai iya. Ku aku bejaku enggau iya: Beltesasar, nuan tu tuai orang ke tau nilit nasit. Aku nemu roh bala petara ti kudus bisi dalam nuan, lalu nuan meretika semua misteri. Baka tu ku mimpi aku. Padahka reti mimpi nya ngagai aku. “Lebuh aku tinduk, aku begenera meda sepun kayu ti besai bediri ba tengah-tengah dunya. Kayu nya mansang besai-sebesai datai ke nyau nyentuk ke langit, lalu ulih dipeda semua mensia di dunya tu. Daun iya manah, lalu buah iya lebat - chukup diempa semua mensia di dunya tu. Jelu babas belelak di baruh iya. Burung begagaka tansang ba dan iya, lalu genap macham utai ti idup bela makai buah iya. “Lebuh aku benung berundingka genera nya, aku meda siku melikat nurun ari serega. Melikat nya endang seruran bejaga sereta sedia. Iya bejaku enggau nyawa ti inggar, “Tebang kayu nya, lalu tetak dan iya. Gugurka daun iya, lalu taburka buah iya. Buru jelu ari baruh iya, enggau burung ari dan iya. Tang awakka tuga iya tinggal ba tanah, dibelit ngena belulang besi enggau temaga. Awakka tuga nya mengkang ba padang nya dibalut rumput. “ ‘Awakka ambun labuh ninggang orang tu, lalu awakka iya diau di babas begulai enggau jelu. Dalam kandang tujuh taun iya nadai agi ngembuan runding mensia, tang runding jelu. Tu meh pemutus penemu bala melikat ke sedia sereta bejaga nya. Nya alai, awakka semua orang di semua endur nemu Allah Taala ti Pemadu Tinggi bisi kuasa atas perintah mensia, lalu Iya ulih meri perintah nya ngagai sebarang orang ke dipilih Iya - nyengkaum ngagai orang ke pemadu nadai guna.’ “Tu meh mimpi aku,” ku Raja Nebukadnesar bejaku. “Nya alai, Beltesasar, padahka reti mimpi nya ngagai aku. Nadai orang ari bala penyanding penemu aku ulih madahka reti mimpi nya ngagai aku, tang nuan ulih, laban roh bala petara ti kudus bisi dalam nuan.” Lebuh iya ninga nya, Daniel, ke dikumbai Beltesasar, berasai balat amat irau ati, datai ke nyau enda ulih bejaku. Ku raja nya bejaku enggau iya, “Beltesasar, anang nejuka mimpi enggau pesan mimpi nya ngasuh ati nuan irau.” Ku Beltesasar nyaut, “Tuan Raja, naka meh pemanah enti sema mimpi enggau reti iya ditujuka ngagai bala munsuh nuan, lalu ukai ngagai nuan empu. Kayu ti tinggi, datai ke nyau nyentuk ke langit, ulih dipeda semua mensia di dunya tu. Daun iya manah, lalu buah iya chukup kena nupi semua dunya. Jelu babas belelak di baruh iya, lalu burung begagaka tansang ba dan iya. “Tuan Raja, kayu ti tinggi sereta tegap nya ngambarka nuan empu. Nuan udah nyadi besai datai ke nuan nyau nyentuk ke langit, lalu kuasa nuan ngerembai di serata dunya. Lebuh Tuan Raja benung ngemataka utai nya, siku melikat nurun ari serega lalu bejaku, ‘Tebang kayu nya, lalu rusak iya, tang awakka tuga iya mengkang ba tanah. Belit tuga nya ngena belulang besi enggau temaga, lalu tinggalka iya dia ba tanah dibalut rumput. Awakka ambun labuh ninggang orang tu, lalu awakka iya diau dia tujuh taun begulai enggau jelu.’ “Nya alai tu reti mimpi nuan, Tuan Raja. Tu utai ti udah dipadahka Allah Taala ti Pemadu Tinggi deka nyadi ba nuan. Nuan deka diburu ari orang mayuh, lalu nuan deka diau begulai enggau jelu babas. Dalam pengelama tujuh taun nuan deka ngulam rumput baka sapi, lalu tinduk ba sebelah padang, ditinggang ambun. Udah nya baru nuan deka ngaku Allah Taala ti Pemadu Tinggi endang bekuasa atas semua perintah mensia, lalu iya ulih meri perintah nya ngagai sebarang orang ke dipilih Iya. Melikat nya ngeletak tuga nya ditinggalka ba tanah. Reti nya, nuan deka nyadi raja baru lebuh nuan ngaku Allah Taala endang merintah semua dunya. Nya alai titihka jaku lalau ti diberi aku, Tuan Raja. Badu agi bedosa. Kereja utai ti ngena, lalu kasihka orang ke seranta. Nya baru nuan deka mengkang kaya-raja.” Semua utai nya lalu nyadi magang ba Raja Nebukadnesar. Dua belas taun udah lepas nya, lebuh iya benung bejalai ba perabung istana iya di Babilon, iya bejaku, “Peda pemanah nengeri Babilon! Aku udah ngaga iya nyadi indu nengeri aku, kena aku ngayanka kuasa, pengering, mulia enggau penampak nama aku ti nyadi raja.” Sebedau leka jaku nya pansut ari nyawa iya, siti nyawa lalu bejaku ari serega, “Raja Nebukadnesar, pendingka jaku aku! Kuasa nuan ti nyadi raja diatu diambi ari nuan. Nuan deka diburu ari orang mayuh, diau begulai enggau jelu babas, lalu makai rumput baka sapi dalam pengelama tujuh taun. Udah nya nuan deka ngaku Allah Taala ti Pemadu Tinggi bisi kuasa atas perintah mensia, lalu Iya ulih meri perintah nya ngagai sebarang orang ke dipilih Iya.” Utai ti disebut nya lalu nyadi tekala nya. Nebukadnesar diburu ari orang mayuh, lalu makai rumput baka sapi. Ambun labuh ninggang tubuh iya, lalu buk iya mansang panjai sepemanjai hari baka bulu menaul, lalu kukut iya panjai baka kukut burung. Ku raja nya bejaku, “Lebuh tujuh taun nya nyau udah abis, aku engkadah ke langit, lalu aku badu agi gila. Aku lalu muji Allah Taala ti Pemadu Tinggi, lalu ngemesai sereta ngemuliaka Iya ke idup belama lama iya. “Iya deka merintah belama lama iya, lalu perintah Iya deka meruan belama lama iya. Orang di dunya tu nadai reti ba Iya. Melikat di serega enggau mensia di dunya tu endang diperintah Iya magang. Nadai orang ulih ngelaban peneka Iya tauka nyakal utai ti dikereja Iya. “Lebuh aku nyau udah badu agi gila, basa, pangkat aku ti nyadi raja, enggau mulia perintah aku lalu dipulaika baru ngagai aku. Bala pemesai, enggau bala aku ti tinggi pangkat nyambut penatai aku, lalu kuasa aku ti nyadi raja dipulaika baru ngagai aku, sereta enggau basa ti lebih agi ari ti dulu suba. “Nya alai, diatu aku, Nebukadnesar, muji, ngemesai sereta ngemuliaka Raja Serega. Semua utai ti dikereja Iya endang ngena sereta lurus magang, lalu Iya ulih ngemaruhka sebarang orang ke ngenyumbungka diri.” Nyadi sekali Raja Belsasar ngambi seribu iku orang ke tinggi pangkat ngagai siti pengerami makai besai, lalu sida begulai ngirup wain. Lebuh sida benung ngirup, Belsasar ngasuh orang ngambi changkir enggau mangkuk emas enggau pirak ti udah ditabanka apai iya Nebukadnesar ari Rumah Sembiang di Jerusalem. Kebuah raja nya ngasuh orang ngambi mangkuk enggau changkir nya, ngambika iya, bala pemesai iya, bala bini iya, enggau bala indu simpan iya ulih ngirup ngena utai nya. Changkir enggau mangkuk emas nya lalu tekala nya dibai ke dalam, lalu semua sida bela ngirup wain ngena changkir enggau mangkuk nya lalu muji bala petara ti digaga ari emas, pirak, temaga, besi, kayu enggau batu. Tekala nya siti jari mensia lalu pegari, lalu belabuh nulis ba dinding istana nya, ba endur ti pemadu terang dipanchar lampu. Raja empu meda jari nya nulis. Raja balat amat takut. Mua iya puchat, lalu patung iya nyau getar-getar. Iya manjung ngasuh orang ngangauka bala orang ke tau keramat, bala manang, enggau bala orang ke landik pasal bintang. Lebuh sida tama, raja lalu bejaku enggau sida, “Barang sapa nemu macha tulis tu, lalu madahka reti iya ngagai aku, deka diasuh begari ngena gari ungu raja, betenggakka rantai emas, lalu nyadi orang ke lumur tiga bekuasa dalam menua tu.” Bala penyanding penemu raja lalu mansang ke mua, tang nadai siku sida nemu macha tulis nya, tauka madahka reti iya ngagai raja. Raja Belsasar balat amat irau ati, lalu mua iya balat agi puchat, lalu bala pemesai iya nadai nemu utai ti patut dikereja sida. Lebuh indai raja ninga raja enggau bala pemesai iya inggar, iya lalu tama ngagai balai endur makai besai nya. Ku iya, “Awakka Tuan Raja idup belama iya! Anang takut, lalu anang ngasuh mua nuan puchat baka nya. Di menua ti diperintah nuan tu bisi siku lelaki ke ngembuan Roh Allah Taala dalam iya. Lebuh apai nuan nyadi raja, lelaki tu udah ngayanka diri nemu berunding, bisi penemu, enggau penemu-dalam baka bala petara. Lalu Raja Nebukadnesar, iya nya apai nuan udah ngasuh iya nyadi tuai bala orang ke nemu nilit nasit, ti tau keramat, bala manang, enggau orang ke landik pasal bintang. Iya bisi pengelandik ti nyelai, lalu iya bepenemu-dalam, sereta landik nerangka reti mimpi, nerangka entelah, enggau nerangka utai ti resia. Nya alai, pesanka lelaki nya. Nama iya Daniel, tang raja udah ngumbai iya Beltesasar. Awakka Daniel madahka reti semua utai tu ngagai nuan.” Daniel lalu dibai betemu enggau raja, lalu ku raja bejaku enggau iya, “Kati nuan tu Daniel, orang Judah ti udah dibuai ari menua nuan empu, lalu ditabanka apai aku kitu ari menua Judah? Aku bisi udah ninga berita pasal Roh Allah Taala ti kudus bisi dalam nuan, lalu nuan bisi pengelandik sereta bisi penemu enggau penemu-dalam. Bala penyanding penemu enggau bala orang ke tau keramat udah dibai tama kitu, lalu diasuh macha tulis tu, ngambika sida madahka reti utai nya ngagai aku, tang sida enda nemu reti utai nya. Nyadi aku udah bisi ninga pasal nuan ke nemu nerangka utai ti resia, lalu nemu nerangka utai ti mar diperatika. Enti nuan nemu macha tulis tu, lalu madahka reti utai nya ngagai aku, nuan deka dirasukka enggau gari ungu ti diraja, betenggakka rantai emas kena nandaka nuan dibasa orang, lalu nyadi orang ke lumur tiga bekuasa di menua tu.” Ku Daniel nyaut, “Simpan nuan empu meh pemeri nuan nya, tauka beri ngagai orang bukai. Aku deka macha ke Tuan Raja utai ti udah ditulis nya, lalu madahka reti iya ngagai nuan. “Allah Taala ti Pemadu Tinggi udah ngasuh apai nuan Nebukadnesar nyadi raja ti besai, lalu udah meri ngagai iya mulia enggau kuasa. Iya udah besai amat kuasa datai ke orang ari semua menua, bansa, enggau jaku nyau getar-getar takutka iya. Enti iya deka munuh orang, iya munuh. Enti iya deka nejuka orang nya idup, iya nejuka orang nya idup. Iya mechat tauka ngemesaika orang nitihka peneka ati iya empu. Tang laban iya sumbung, kieh ati sereta jai enggau orang, iya udah dibuai ari kerusi diraja iya, lalu nadai dibasa orang agi. Iya udah diburu ari orang mayuh, lalu iya berunding baka jelu. Iya diau begulai enggau keledai kampung, ngulam rumput baka sapi, lalu tinduk ba sebelah padang, lalu iya nadai utai kena ngelindung diri ari ambun. Ke pengujung iya, iya ngaku Allah Taala ti Pemadu Tinggi endang bekuasa atas semua perintah mensia, lalu ulih meri perintah nya ngagai sebarang orang ke dipilih Iya. “Tang nuan ke anak iya, enda ngemaruhka diri, taja pen nuan nemu semua utai tu. Nuan ngereja utai ti ngelaban TUHAN ti di serega, lalu nuan udah mai ngagai endur tu changkir enggau mangkuk ti udah ditabanka ari Rumah Sembiang. Nuan enggau bala pemesai nuan, bala bini nuan, enggau bala indu simpan nuan bela ngirup wain ngena changkir enggau mangkuk nya, lalu muji bala petara ti digaga ari emas, pirak, temaga, besi, kayu enggau batu, petara ti enda ulih meda, enda ulih ninga, enda nemu utai. Tang nuan enda ngemesaika Allah Taala ti ngeletak nuan idup tauka mati, ke ngatur semua utai ti dikereja nuan. Nya kebuah Allah Taala udah ngasuh jari nya nulis leka jaku tu. “Tu utai ti udah ditulis: ‘Diitung, diitung, ditimbang, dibagi.’ Lalu tu reti utai ti ditulis nya: diitung:, Allah Taala udah ngitung penyampau hari perintah nuan, lalu udah ngabiska iya. Ditimbang: Nuan udah ditimbang ngena dachin, lalu ditemu kelalu lempung. Dibagi: Menua nuan deka dibagi, lalu diberi ngagai orang Media enggau orang Persia.” Belsasar lalu ngasuh bala ulun iya ngerasukka gari diraja ti bechura ungu ba Daniel, lalu ngerasukka tenggak emas ba rekung iya kena nandaka iya dibasa. Lalu iya ngasuh Daniel nyadi orang ke lumur tiga bekuasa di menua nya. Malam nya Raja Belsasar menua Babilon dibunuh. Lalu Darius orang Media, ke umur 62 taun lebuh maya nya, ngerampas kuasa lalu nyadi raja menua nya. Darius lalu mutuska runding deka ngeletak seratus dua puluh iku orang nyadi tuan gabenor di menua ti diperintah iya. Nambahka nya, iya milih Daniel enggau dua iku orang bukai ngemataka bala tuan gabenor, enggau ngintu semua reta tengkira raja. Enda lama udah bekau nya, Daniel ngayanka diri landik agi gawa ari orang dua iku ti bukai nya, enggau ari bala tuan gabenor. Laban Daniel berupai landik agi, raja lalu berunding deka ngasuh iya merintah semua menua nya. Udah nya orang dua iku nya, sereta enggau bala gabenor nya nguji ngiga penyalah Daniel lebuh iya bejalaika pengawa perintah di menua nya. Tang sida nadai nemu penyalah iya, laban Daniel endang orang ke tau dikarapka, lalu enda ngereja utai ti salah tauka enda lurus. Ku sida bejaku enggau pangan diri, “Kitai enda ulih ngiga utai kena besalahka Daniel, kelimpah ari utai ti besangkut-paut enggau agama iya empu.” Nya alai sida betemu enggau raja, lalu bejaku, “Raja Darius, awakka Tuan Raja idup belama iya! Semua kami ke bejalaika pengawa perintah di menua tu - bala orang ke ngemataka pengawa gabenor, sida gabenor empu, sapit gabenor, enggau bala pemesai ti bukai - udah besetuju minta nuan, Tuan Raja, meri siti atur nagang semua orang minta utai ari sebarang petara, tauka ari mensia, dalam kandang tiga puluh hari, tang semina minta utai ari Tuan Raja aja. Atur tu deka dipejalaika enggau terit, lalu barang sapa ngelanggar atur tu deka dibuai ngagai lubang singa. Nya alai, awakka Tuan Raja meri atur nya ngagai orang Media enggau orang Persia, lalu nyain atur nya, ngambika atur nya enda tau diubah.” Raja Darius lalu nyain atur nya. Lebuh Daniel nemu atur nya udah disain, iya lalu pulai ke rumah. Nyadi ba siti bilik ti di sadau rumah iya, mayuh jenila ti nunga ngagai Jerusalem. Endang baka selama, dalam bilik nya iya besugang ba mua jenila, lalu besampi ngagai Allah Taala tiga kali sehari. Lebuh bala orang ke ngelaban Daniel meda iya besampi ngagai Allah Taala, semua sida lalu mansang ngagai raja, deka bedawaka Daniel. Ku sida, “Tuan Raja, nuan udah nyain atur ngeletak barang sapa minta utai ari sebarang petara tauka mensia, tang semina ari Tuan Raja empu aja dalam kandang tiga puluh hari, deka dibuai ngagai lubang singa.” Ku raja nyaut, “Sigi amat! Nitihka adat orang Media enggau orang Persia, atur nya enda tau diubah.” Udah nya sida lalu nyaut raja, “Siku ari orang ke udah dibuai ari menua Judah, ke benama Daniel, enda bebasaka Tuan Raja lalu enda ngasika atur ti diberi nuan. Iya besampi tiap hari, tiga kali sehari.” Lebuh raja ninga nya, ati iya balat tusah, lalu iya enggau naka ulih ngiga jalai nyelamatka Daniel. Iya majak begigaka jalai nya nyentuk ngagai padam mata panas. Udah nya bala orang ke bepekat ngelaban Daniel lalu datai baru ngagai raja, lalu bejaku enggau iya, “Tuan Raja nemu, nitihka adat orang Media enggau orang Persia, nadai atur ti diberi raja, tau diubah.” Nya alai raja lalu meri atur ngasuh Daniel dibai lalu ditikauka ngagai lubang singa. Ku iya bejaku enggau Daniel, “Awakka Allah Taala nuan, ke dipetuaika nuan enggau ati ti taluk, ngidupka nuan.” Sigi batu lalu diengkahka ba mua lubang nya, lalu raja ngelekatka chop tambit iya empu, enggau chop bala pemesai iya, ba batu nya, ngambika orang enda ulih ngelepaska Daniel. Udah nya raja lalu pulai ngagai istana iya. Semalam-malam nya iya enda tinduk, enda makai, enda ngelantangka diri. Ba urung rerak tawas, raja angkat lalu beguai-guai mansang ngagai lubang singa. Lebuh iya datai dia, iya ngangau enggau ati ti irau, “Daniel, nembiak Allah Taala ti idup! Kati Allah Taala ti seruran dipetuaika nuan, ulih nyelamatka nuan ari bala singa?” Daniel lalu nyaut, “Awakka Tuan Raja idup belama iya! Allah Taala udah ngasuh melikat Iya nutup mulut singa, ngambika sida enda ngemediska aku. Iya ngereja nya laban Iya nemu aku endang nadai penyalah, enggau laban aku nadai udah ngereja utai ti salah ngelaban nuan, O Tuan Raja.” Raja lalu gaga amat ati, lalu meri atur ngasuh orang narit Daniel pansut ari lubang singa. Sida lalu narit iya pansut. Dia sida meda iya nadai nama-nama, laban iya arapka Allah Taala. Udah nya raja lalu meri atur ngasuh orang nangkap semua sida ke udah bedawaka Daniel, lalu ngasuh sida dibuai ngagai lubang singa nya, sama enggau bini anak sida. Sebedau sida terengkah ba buntut lubang nya, bala singa endang udah nyambarka sida, lalu ngeredakka semua tulang sida. Udah nya Raja Darius nulis ngagai orang di semua menua, bansa enggau jaku di dunya tu. “Tabi! Aku meri atur ngagai serata menua ti diperintah aku, ngeletak semua orang enda tau enda nangi sereta bebasaka Allah Taala ti dipetuaika Daniel. “Iya Allah Taala ti idup, lalu Iya deka merintah belama iya. Perintah Iya enda ulih dirusak, lalu kuasa Iya enda nemu abis. Iya ngidup sereta ngelepas. Iya ngereja pengawa ti nyelai, enggau kereja ajih di serega enggau di dunya. Iya udah nyelamatka Daniel ari jelu singa.” Daniel mujur dalam semua utai lebuh maya perintah Darius, enggau lebuh maya perintah Sairus ari Persia. Nyadi sekali lebuh malam hari dalam taun ti keterubah Belsasar nyadi raja menua Babilon, aku bemimpi, lalu begenera. Aku lalu nuliska mimpi nya. Tu gaya utai ti dipeda aku malam nya. Ribut muput ari semua endur lalu mangka ba tasik. Empat iku jelu ti besai, ti enda sebaka gamal, lalu pansut ari tasik. Jelu ti terubah nya baka gamal singa, tang bisi sayap baka menaul. Lebuh aku benung nengkilaka iya, sayap iya ditingkilka. Jelu nya lalu diangkatka, lalu diasuh bediri tegir-tegir baka mensia. Udah nya runding mensia lalu diberi ngagai iya. Jelu ti kedua nya baka beruang ti bediri ngena kaki belakang iya. Iya manggum tiga iti tulang kerigai. Siti nyawa lalu bejaku ngagai beruang nya, “Alai nuan makai dagin nya enggau naka ulih nuan!” Lebuh aku benung nengkila, siku agi jelu pegari. Gamal iya baka gamal engkuli, tang ba belakang iya bisi empat iti sayap, ti baka sayap burung, lalu iya bisi empat igi pala. Iya diberi kuasa merintah. Lebuh aku benung nengkila, jelu ti keempat pegari. Iya kering, jai sereta balat ngenakutka. Iya ngeredakka utai ti digigit iya ngena ngeli besi ti besai, lalu udah nya iya ngelunjak sida. Iya enda baka tiga iku jelu ti bukai, laban iya bisi sepuluh iti tanduk. Lebuh aku benung genung-genung merening ngagai tanduk nya, aku lalu tepedaka siti tanduk ti mit pansut ngimbai tanduk ti bukai. Tanduk ti mit nya lalu nyabut tiga iti tanduk ti bukai. Tanduk ti mit nya bisi mata mensia, enggau mulut ti temegah. Lebuh aku benung nengkila, mayuh kerusi diraja lalu diengkahka ba endur nya. Iya ke idup belama iya duduk ba siti ari kerusi diraja nya. Gari Iya burak baka seleju, lalu buk Iya baka bulu bedus ti tulin. Kerusi diraja Iya baka kerita ti beapi-api, lalu kaki kerita nya mau laban api. Api lalu pansut ari kerusi diraja nya. Beribu-ribu iku orang bekereja ke Iya, lalu bejuta-juta iku orang bediri di mua Iya. Pengawa bechara lalu belabuh, lalu mayuh bengkah bup dibuka. Lebuh aku benung nengkila, aku agi ulih ninga tanduk ti mit nya temegah mansutka penyumbung diri. Lebuh aku agi benung nengkila, jelu ti keempat nya lalu dibunuh, lalu bangkai iya dibuai ngagai api lalu ditunu. Kuasa jelu ti bukai nya lalu dirampas ari sida, tang sida dikemendarka idup enda lama aja. Dalam genera malam nya, aku tepedaka utai ti baka gamal anak mensia, datai dalam mua hari, lalu mansang ngagai Iya ke idup belama iya, lalu diserahka ngagai Iya. Iya diberi kuasa, basa enggau mulia, ngambika orang ari semua menua, bansa, enggau jaku betuaika Iya magang. Kuasa Iya deka meruan belama iya, lalu perintah Iya enda nemu abis. Genera ti dipeda aku, balat amat ngasuh ati aku irau, sereta takut. Aku lalu mansang ngagai siku ari orang ke bediri dia, minta iya nerangka reti semua utai nya. Nya alai iya madahka reti utai nya ngagai aku. Ku iya, “Jelu ti empat iku nya empat iku raja ti deka pegari di dunya. Lalu bala nembiak Allah Taala ti Pemadu Tinggi deka nerima kuasa diraja, lalu kuasa nya deka diempu sida belama lama iya.” Udah nya aku keran deka nemu pasal jelu ti keempat, ti enda sebaka enggau jelu ti bukai, jelu ti balat ngenakutka, ti ngeredakka utai ti diempa iya ngena kukut temaga, enggau ngena ngeli besi, lalu udah nya ngelunjak sida. Lalu aku mega keran deka nemu pasal sepuluh iti tanduk ti ba pala iya, enggau pasal tanduk siti ti pansut udah bekau nya, ti nyabut tiga iti tanduk ti bukai. Iya bisi mata enggau nyawa, lalu iya temegahka diri empu. Tanduk ti mit nya balat agi ngasuh ati takut ari tanduk ti bukai. Lebuh aku benung nengkila, tanduk ti mit nya lalu beperang ngelaban bala nembiak Allah Taala, lalu ngalahka sida. Udah nya, Iya ke idup belama iya datai, ngakim sereta ngarika bala nembiak Allah Taala ti Pemadu Tinggi. Maya udah datai alai bala nembiak Allah Taala deka nerima kuasa diraja. Tu penerang ti diberi ngagai aku: “Jelu ti keempat nya perintah ti keempat ti deka pegari di dunya, lalu iya lain agi ari semua perintah bukai. Iya deka ngeredakka, lalu ngelunjak semua dunya. Tanduk ti sepuluh iti nya sepuluh iku raja, ti deka merintah di menua nya. Udah nya siku agi raja deka pegari. Iya lain agi ari sida raja ke dulu agi ari nya, lalu iya deka muai raja ke tiga iku nya. Iya deka bejaku ngelaban Allah Taala ti Pemadu Tinggi, lalu nekanka pengidup bala nembiak Allah Taala. Iya deka nguji ngubah adat pengarap enggau gawai sida, lalu iya deka merintah bala nembiak Allah Taala tiga taun setengah. Udah nya kot deka belabuh ngatur pechara; kuasa iya dirampas ari iya, lalu iya dirusak abis lengis. Semua kuasa diraja enggau pengering semua perintah di dunya tu deka diserahka magang ngagai bala nembiak Allah Taala ti Pemadu Tinggi. Perintah sida deka meruan belama iya, lalu semua perintah di dunya tu deka betuaika sida lalu ngasika sida.” Nya meh pengujung jerita tu. Aku balat amat takut, datai ke mua aku nyau tepuchat-kelat, lalu aku nadai madahka utai tu ngagai orang. Ketiga taun Belsasar udah nyadi raja, aku begenera kedua kali. Dalam genera nya aku nemu diri dalam nengeri Susa ti bekuta, dalam sitak menua Elam. Aku bediri ba tebing Sungai Ulai, lalu ba tebing sungai nya aku tepedaka siku bedus ti lelaki ti bisi dua iti tanduk ti panjai. Siti ari tanduk nya panjai agi sereta baru agi ari tanduk ti siti. Aku nengkilaka bedus ti lelaki nya nanduk tunga ke barat, ke utara, enggau tunga ke selatan. Nadai siku jelu ulih nagang iya, tauka ulih ngerarika diri ari kuasa iya. Iya ngereja utai nitihka peneka ati iya empu, lalu iya sumbung. Lebuh aku benung belematika reti utai nya, siku kambin datai belanda laju amat ari barat datai ke kaki iya nyau enda terengkah ba tanah. Iya bisi siti tanduk ti besai ba entara mata iya. Iya mansang ngagai bedus ti lelaki ti dipeda aku bediri ba tebing sungai, lalu belanda nempuh iya enggau pengabis pengering iya. Aku nengkilaka iya nyerang bedus ti lelaki nya. Iya balat amat ringat datai ke nanduk bedus ti lelaki nya enggau naka pemalat, lalu matahka kedua-dua iti tanduk bedus ti lelaki nya. Bedus ti lelaki nya enda ulih ngelaban iya, lalu rebah ke tanah, lalu dilunjak iya, lalu nadai orang ulih ngelepaska bedus ti lelaki nya ari kuasa iya. Kambin nya majak balat agi sumbung, tang lebuh iya nyadi pemadu bekuasa, tanduk iya patah. Tanduk nya lalu diganti empat iti tanduk ti besai. Genap iti tanduk nya nunjuk kebukai magang. Ari siti tanduk nya pansut siti tanduk ti mit, lalu kuasa tanduk ti mit tu ngerembai tunga ke selatan, enggau ke timur, enggau ngagai Menua Ti Udah Disemaya. Tanduk nya nyadi kering datai ke ulih nyerang bala soldadu serega, nyerang bintang, lalu muai sekeda sida ke tanah, lalu ngelunjak sida. Tanduk ti mit nya mega berani nyakap Anak Raja ti nyadi tuai soldadu serega, madamka semua pengawa ti beberika piring tiap hari ngagai Anak Raja nya, lalu ngerusak Rumah Sembiang. Orang ngereja penyalah ba endur nya, ukai ngenjuk piring ti endang patut diberi tiap hari, lalu agama ti bendar dibuai ke tanah. Tanduk nya mujur dalam semua utai ti dikereja iya. Udah nya aku ninga siku melikat betanya ngagai pangan diri, “Ni pengelama utai ti dipeda dalam genera tu agi majak nyadi? Ni pengelama dosa ti jai tu deka majak nganti piring ti diberi tiap hari? Ni pengelama bala soldadu serega enggau Rumah Sembiang tu diindik?” Aku ninga melikat nya nyaut, “Utai tu deka majak nyadi 2,300 lemai enggau 2,300 pagi lebuh piring nya diberi. Udah nya baru Rumah Sembiang nya deka digaga baru.” Lebuh aku benung nguji berundingka reti genera nya, siku orang lalu tekala nya bediri di mua aku. Aku lalu ninga siku melikat ngangau ari seberai Sungai Ulai, “Gabriel, terangka ngagai iya reti utai ti udah dipeda iya.” Gabriel datai lalu bediri ngimbai aku. Aku lalu balat amat takut datai ke aku nyau rebah ke tanah. Ku Gabriel bejaku enggau aku, “Anak mensia, nuan enda tau enda nemu reti genera nya. Genera nya besangkut-paut enggau pengujung dunya.” Lebuh iya benung bejaku, aku rebah ke tanah, luput. Tang iya megai aku, ngangkatka aku lalu nirika aku. Lalu ku iya bejaku, “Aku ngayanka ngagai nuan utai ti deka nyadi ketegal pengeringat Allah Taala. Genera nya madahka pengujung dunya. “Bedus lelaki ti bisi dua iti tanduk ti dipeda nuan, ngambarka perintah menua Media enggau menua Persia. Kambin nya ngambarka perintah menua Gerika, lalu tanduk ti besai ba entara mata iya nya ngambarka raja ti keterubah. Tanduk ti empat iti, ti pansut lebuh tanduk ti keterubah nya patah, ngambarka perintah nya deka dibagi ngagai empat bengkah perintah, ti enda sebaka pengering enggau perintah ti keterubah. “Lebuh perintah empat bengkah nya baru deka abis, lalu nyau jai datai ke sida enda tau enda diukum, siku raja ke kieh sereta jai, deka pegari. Iya deka nyadi kering, tang ukai laban kuasa iya empu. Iya deka balat ngerusak utai, lalu iya deka mujur dalam semua utai ti dikereja iya. Iya deka ngerusak orang ke bekuasa, enggau bala nembiak Allah Taala. Laban iya pintar, iya ulih nipu orang. Iya deka temegahka diri empu, lalu ngerusak mayuh orang enggau ngenyit. Indah Raja ke pemadu besai ari semua raja deh dichakap iya, tang iya deka dirusak, tang ukai ngena kuasa mensia. Genera pasal piring ti diberi lebuh lemai enggau pagi hari, ti udah diterangka ngagai nuan, deka dikamatka. Tang awakka utai nya nyadi resia diatu, laban utai nya deka dikamatka jemah ila.” Aku tusah ati sereta sakit dalam kandang dua tiga hari nya. Udah nya aku angkat, lalu pulai baru ngagai pengawa ti udah diasuh raja kereja aku, tang aku agi mengkang alit ati ke genera nya, lalu enda nemu reti iya. Darius anak Serses, orang Media, megai perintah di menua Babilon. Dalam taun ti keterubah iya megai perintah, aku belajarka Bup Kudus, lalu berundingka tujuh puluh taun Jerusalem udah nyadi tembawai, nitihka utai ti udah dipadahka TUHAN ngagai nabi Jeremiah. Aku lalu besampi enggau bebendar ngagai TUHAN Allah Taala, minta kasih ngagai Iya. Aku bepasa, lalu begari ngena kain guni, lalu duduk malai amau. Aku besampi ngagai TUHAN Allah Taala aku, lalu ngaku dosa bansa aku empu. Ku aku, “ TUHAN Allah Taala, Nuan endang besai, lalu kami nangika Nuan. Nuan endang tetap ati ngagai sempekat Nuan, lalu ngayanka pengerindu ti meruan ngagai orang ke rinduka Nuan sereta ngereja utai ti diasuh Nuan. “Kami udah bedosa, kami udah jai, kami udah ngereja penyalah. Kami udah nulak utai ti diasuh Nuan kereja kami, lalu kami udah limpang ari utai ti ngena ti udah diayanka Nuan ngagai kami. Kami enda mendingka bala nembiak Nuan, iya nya sida nabi, ke bejaku dalam nama Nuan ngagai bala raja kami, bala orang ke merintah kami, bala aki ini kami, enggau ngagai semua bansa kami. Nuan, TUHAN, endang seruran ngereja utai ti ngena, tang kami udah ngemaluka diri empu. Utai tu endang amat ba semua bala kami ke diau di Judea enggau di Jerusalem, enggau ba semua orang Israel ti udah diachirka Nuan ba sebelah menua ti jauh enggau ti semak, ketegal sida udah enda tetap ati ngagai Nuan. Bala raja kami, bala orang ke merintah kami, enggau bala aki ini kami udah ngereja utai ti balat ngemaluka kami empu, lalu udah bedosa ngelaban Nuan, O TUHAN. Nuan endang penuh laban pengasih enggau pengampun, taja pen kami udah angkat ngelaban Nuan. Kami enda mendingka Nuan, O TUHAN Allah Taala kami, lebuh Nuan ngasuh kami nitihka adat ti udah diberi Nuan ngagai kami nengah bala nembiak Nuan, iya nya sida nabi. Semua orang Israel udah ngelanggar adat Nuan lalu enggai mendingka jaku Nuan. Kami udah bedosa ngelaban Nuan. Nya alai Nuan udah ngasuh kami ditinggang semua sumpah ti ditulis dalam Adat nembiak Nuan Moses. Nuan udah ngereja utai ti deka dikereja Nuan ngagai kami enggau ngagai orang ke merintah kami. Nuan udah ngukum Jerusalem lebih balat agi ari Nuan ke ngukum nengeri bukai di dunya tu, lalu ngasuh kami ditinggang semua ukum ti disebut dalam Adat Moses. Datai ke diatu, O TUHAN Allah Taala kami, kami apin nguji ngelengkaka dosa kami, tauka nitihka pemendar ti diberi Nuan ngagai kami lalu ngerinduka ati Nuan. Nuan, O TUHAN Allah Taala kami, endang sedia deka ngukum kami, lalu Nuan udah ngukum kami, laban Nuan endang seruran ngereja utai ti ngena, lalu kami enda mendingka Nuan. “O TUHAN Allah Taala kami, Nuan udah ngayanka kuasa Nuan lebuh Nuan mai bala nembiak Nuan pansut ari menua Ejip, lalu kuasa Nuan endang agi mengkang dikingatka kami. Kami udah bedosa. Kami udah salah. Nuan udah bejaku ngarika kami dulu menya, nya alai anang agi ringat ngagai Jerusalem. Nengeri tu endang enggi Nuan, bukit Nuan ti kudus. Semua orang di menua ti ngelingi kami endang enda bebasaka Jerusalem, sereta ngeleseka bala nembiak Nuan ketegal dosa kami, enggau ketegal penyai ti udah dikereja bala aki ini kami. O Allah Taala, dingaka sampi enggau peminta aku tu. Gaga baru meh Rumah Nuan ti udah rusak. Gaga iya baru ngambika semua orang deka nemu Nuan endang Allah Taala. Pendingka kami, O Allah Taala. Malik ngagai kami, lalu peda meh penusah kami, enggau pemerinsa nengeri ti ngangkatka nama Nuan. Kami besampi ngagai Nuan laban Nuan endang kasih, ukai laban kami udah ngereja utai ti ngena. TUHAN, pendingka kami. Ampun meh kami. Dingaka kami, lalu kereja meh utai ti dipinta kami! Anang betangguh, ngambika semua orang nemu Nuan endang Allah Taala. Nengeri tu enggau bala orang tu endang enggi Nuan magang.” Aku majak besampi, ngaku dosa aku enggau dosa bansa aku, dosa orang Israel, lalu minta TUHAN Allah Taala aku nirika baru Rumah Sembiang Iya ti kudus. Lebuh aku benung besampi, Gabriel, ti udah dipeda aku dalam genera ti dulu, datai terebai nurun ngagai aku. Nyadi jam ba urung nya endang maya orang ngenjuk piring lemai hari. Ku Gabriel nerangka ngagai aku, “Daniel, aku datai laban aku deka meri nuan penemu-dalam enggau pengelandik meretika utai. Lebuh nuan belabuh mantaika peminta nuan ngagai Allah Taala, Iya nyaut nuan. Iya rinduka nuan, nya alai aku udah datai ditu madahka saut ngagai nuan. Dingaka enggau manah lebuh aku nerangka genera nya. “Tujuh kali tujuh puluh taun nya meh pengelama ti udah diletak Allah Taala kena Iya ngelepaska bansa nuan enggau nengeri kita ke kudus tu, ari dosa enggau penyai. Dosa deka diampun, lalu pengelurus ti meruan belama iya deka didudukka, ngambika genera, enggau jaku nabi dikamatka, lalu Rumah Sembiang ti kudus deka diserahka baru. Peratika utai tu ngambika nuan mereti: Berengkah ari maya meri atur ngaga Jerusalem baru, nyentuk ngagai maya penatai tuai ke dipilih Allah Taala, tujuh kali tujuh taun deka lempus. Jerusalem deka digaga baru. Jalai raya enggau kuta ti tegap deka digaga baru, lalu nengeri nya deka mengkang bediri tujuh kali enam puluh dua taun, tang tu maya mayuh macham penusah nyadi. Lalu ba pengujung timpuh nya, tuai ti udah dipilih Allah Taala deka dibunuh enggau nadai kebuah. Nengeri nya enggau Rumah Sembiang deka diserang lalu dirusak bala soldadu pemerintah ti bekuasa. Pengujung nya deka datai baka ai bah, mai perang enggau pengerusak ti udah disediaka Allah Taala. Tuai nya deka ngaga siti sempekat enggau mayuh orang dalam kandang tujuh taun, lalu lebuh setengah ari timpuh nya udah lempus, iya deka madamka semua pengawa ti beberika piring enggau pemeri. Utai Ti Balat Jai deka diengkah ba legit Rumah Sembiang, lalu deka mengkang dia nyentuk ngagai maya orang ke ngengkahka iya dia besatup enggau penusah ti udah disediaka Allah Taala ke iya.” Dalam taun ti ketiga Sairus udah nyadi raja besai menua Persia, siti pesan bisi dipandangka ngagai Daniel, ke dikumbai Belsasar. Pesan nya endang amat, tang kelalu mar diperatika. Pesan nya udah diterangka ngagai Daniel dalam genera. Lebuh maya nya aku benung ngulit tiga minggu. Aku enda makai pemakai ti nyamai, tauka dagin, enda ngirup wain, tauka nyugu buk aku datai ke tiga minggu nya udah lempus. Kena dua puluh empat hari bulan ti kesatu taun nya, aku bediri ba tebing Sungai Tigris ti besai. Aku engkadah lalu tepedaka siku orang ke ngena pekayan linin, enggau belulang ti digaga ari emas ti tulin. Tubuh iya beperenching baka batu ti berega. Mua iya bepijar baka kilat, lalu mata iya baka daun api. Lengan enggau kaki iya beperenching baka temaga ti udah dipugar, lalu nyawa iya inggar munyi panjung bala mayuh. Semina aku aja ke meda genera nya. Sida ke enggau aku nadai meda utai, tang sida balat takut, rari lalu belalai. Semina aku aja agi tinggal dia, ke meda genera ti nyelai nya. Aku nyau lembut tulang, lalu mua aku puchat. Lebuh aku ninga nyawa orang nya, aku luput lalu rebah tetingkap ke tanah. Udah nya siti jari megai aku lalu ngangkatka aku, lalu aku angkat betunjang ngena jari enggau patung aku. Aku agi getar-getar. Ku melikat nya bejaku enggau aku, “Daniel, Allah Taala rinduka nuan. Bediri nuan lalu pendingka enggau manah utai ti deka disebut aku. Aku udah diasuh betemu enggau nuan.” Lebuh iya nyebut nya, aku lalu bediri, tang agi getar-getar. Udah nya ku iya bejaku, “Daniel, anang takut. Allah Taala udah ninga sampi nuan kenyau ari nuan ke terubah mutuska runding deka ngemaruhka diri ngambika nuan ulih meretika utai. Aku datai ditu laban aku deka nyaut sampi nuan. Melikat ke megai menua Persia udah ngelaban aku dua puluh satu hari. Udah nya Mikael, siku ari bala tuai melikat, datai nulung aku, laban aku udah ditinggalka kediri-diri di menua Persia. Aku udah datai ditu laban aku deka ngasuh nuan meretika utai ti deka nyadi ba bala nembiak nuan jemah ila. Genera tu nunjukka utai ti deka nyadi jemah ila.” Lebuh iya udah nyebut nya, aku lalu tegenung merening ke tanah, enda tepansutka jaku. Udah nya melikat nya, ke baka gamal mensia, ngangkatka jari iya lalu negu mulut aku. Ku aku bejaku enggau iya, “Tuan, genera tu ngasuh aku lembut tulang lalu aku enda ulih badu getar-getar. Aku nyau baka ulun ke bediri di mua tuan iya. Baka ni ku aku ulih bejaku enggau nuan? Aku nyau lembut tulang lalu enda ulih enseput.” Orang ke baka gamal mensia nya negu aku baru, lalu ngasuh aku berasai kering. Ku iya bejaku, “Anang takut, menyadi. Nuan nadai utai ngawa. Nuan enda tau enda kering sereta berani!” Lebuh iya bejaku ngagai aku, aku berasai kering, lalu ku aku bejaku, “Bejaku meh nuan, tuan, laban nuan udah ngasuh aku kering.” Iya lalu bejaku, “Kati nuan nemu kebuah aku datai ngagai nuan? Diatu aku enda tau enda pulai baru lalu beperang ngelaban melikat menua Persia, lalu lebuh aku udah ngalahka iya, melikat menua Gerika deka datai. Tang aku deka madahka ngagai nuan utai ti ditulis dalam bup pemendar. Nadai orang bukai nulung aku ngelaban melikat dua iku nya, semina Mikael aja, melikat ke nyaga nuan. Iya nya meh melikat ke nulung sereta nyaga aku. Lalu utai ti deka dipadahka aku ngagai nuan nya utai ti amat.” Ku melikat nya bejaku, “Tiga iku agi raja deka megai perintah di menua Persia, lalu ditangkanka raja ti keempat, ti deka nyadi kaya agi ari semua sida ti bukai. Lebuh iya udah nyadi kering laban pengaya iya, iya deka nyakap perintah menua Gerika. “Udah nya siku raja ti berani deka pegari. Iya deka merintah sebuah menua ti besai, lalu iya deka ngereja utai nitihka peneka ati iya. Tang lebuh kuasa iya nyau besai amat, menua ti diperintah iya deka pechah lalu dibagi empat. Bala raja ke ukai ari peturun iya deka merintah nganti iya, tang sida nya enda bekuasa baka iya. “Raja menua Ejip deka nyadi kering. Tang siku ari tuai soldadu iya deka nyadi kering agi, lalu megai perintah di menua ti besai agi. Nyau berapa taun udah bekau nya, raja menua Ejip deka beserakup enggau raja menua Siria, lalu ngasuh anak indu iya jadi enggau raja menua Siria. Tang penyerakup seduai nya enda tan lama, lalu anak indu raja menua Ejip nya, laki iya, anak iya, enggau bala ulun ke sama bejalai enggau iya, deka dibunuh magang. Enda lama udah bekau nya, siku ari kaban belayan indu nya deka nyadi raja. Orang nya deka nyerang bala soldadu raja menua Siria, tama ngagai kuta sida, lalu ngalahka sida. Orang nya deka mai pulai baru ngagai menua Ejip engkeramba petara sida enggau perengka emas enggau pirak ti udah diserahka ngagai bala petara nya. Lebuh menua nya udah bebaik dua tiga taun raja menua Siria deka nyerang menua Ejip, tang iya deka dipejalka nyurutka diri. “Bala anak lelaki raja menua Siria deka nyendiaka diri beperang, lalu ngempuruka mayuh bala soldadu. Siku ari bala anak raja nya deka ngalun baka ai bah, lalu nyerang kuta munsuh. Raja menua Ejip deka ringat, lalu beperang ngelaban raja menua Siria, lalu nangkap bala soldadu raja menua Siria. Raja menua Ejip deka temegahka diri ke menang, sereta temegahka pemayuh bala soldadu ti udah dibunuh iya, tang iya enda menang belama. “Raja menua Siria deka pulai baru, lalu ngempuruka mayuh agi bala soldadu ari ti dulu. Ba maya ti ngena, iya deka datai baru mai bala soldadu ti mayuh bendar, ti chukup disikap enggau senyata. Nya baru mayuh orang deka angkat ngelaban raja menua Ejip. Lalu sekeda orang ke mangah ari bansa nuan empu, Daniel, deka angkat ngelaban ketegal genera ti udah dipeda sida, tang sida deka alah. Raja menua Siria deka ngelulung nengeri ti bekuta nya, lalu ngalahka nengeri nya. Bala soldadu menua Ejip lalu enggai agi ngelaban. Indah soldadu sida ke pemadu kering, deh nadai pengering agi. Orang Siria ke nyerang nya deka merinsaka sida enggau sepeneka ati sida, lalu nadai orang tan ngelaban iya. Iya deka bediri di Menua Ti Udah Disemaya, lalu merintah menua nya. “Raja menua Siria deka bekira nyerang ngena semua bala soldadu iya. Udah nya, ngambika iya ulih ngerusak menua munsuh, iya deka beserakup enggau munsuh nya, lalu ngasuh anak indu iya jadi enggau munsuh nya. Tang pelan iya enda mujur. Udah bekau nya, raja menua Siria deka nyerang mayuh bengkah bansa ti ba tebing tasik, lalu ngalahka sida. Tang siku tuai orang menua bukai deka ngalahka iya, lalu madamka penyumbung iya. Tuai nya deka mutarka penyumbung raja Siria kena iya malas penyumbung raja nya empu. Raja nya deka pulai baru ngagai kuta di menua iya empu, tang iya deka alah laban munsuh, lalu nya meh pengujung iya. “Iya deka ditangkanka siku agi raja, ti deka ngasuh siku pemesai nekanka pengidup orang mayuh lalu mejalka sida mayar chukai, kena iya nambahka pengaya menua ti diperintah iya. Enda lama udah bekau nya iya deka dibunuh, tang ukai di mua orang mayuh, lalu ukai lebuh maya perang.” Melikat nya lalu majak meri penerang: “Raja menua Siria ti deka nangkanka iya, nya orang ke jai lalu enda patut nyadi raja, tang iya deka datai lalu ngerampas kuasa ngena jalai tipu. Barang sapa ngelaban iya, nyengkaum Imam Besai Allah Taala, deka dibuai lalu dibunuh. Iya deka nyain sempekat enggau mayuh bengkah bansa bukai, lalu nipu sida, lalu iya deka mansang kering-sekering, taja pen iya megai perintah di menua ti mit. Iya deka nyerang enggau ngenyit sitak menua ti kaya, lalu deka ngereja utai ti enda kala dikereja bala aki ini iya. Udah nya iya deka magi ngagai bala orang ke nitihka iya, barang enggau reta tengkira ti udah dirampas iya lebuh beperang. Iya deka bekira nyerang mayuh bengkah kuta, tang timpuh iya nyau deka abis enda lama da agi. “Enggau ati ti berani iya deka ngempuruka mayuh bala soldadu kena iya nyerang raja menua Ejip ke sedia deka ngelaban iya ngena bala soldadu ti mayuh sereta kering. Tang raja menua Ejip deka kena tipu, lalu iya enda ulih mujur. Bala penyanding penemu ti nyempil enggau iya, deka ngerusak iya. Bala soldadu iya deka lus dibunuh. Udah nya raja dua iku nya deka duduk begulai makai ba siti mija, tang juluk ati seduai iya jai, lalu seduai iya deka ngemulaka pangan diri. Seduai iya nadai bulih utai ti dikinginka seduai iya, laban timpuh utai nya apin datai. Raja menua Siria deka pulai baru ngagai menua iya empu mai semua perapasan ti udah dirampas iya, lalu udah mutuska runding deka ngerusak agama bala nembiak Allah Taala. Iya deka ngereja utai nitihka peneka ati iya, lalu udah nya pulai baru ngagai menua iya empu. “Udah bekau nya iya deka nyerang menua Ejip baru, tang sekali tu utai ti deka nyadi nya lain agi ari ti dulu. Orang bansa Rome deka datai ngena kapal lalu ngelaban iya, lalu iya deka takut. “Udah nya iya deka nikal, mai ati ti balat ringat, lalu nguji ngerusak agama bala nembiak Allah Taala, nitihka jaku lalau ari orang ke udah ngelengkaka agama nya. Sekeda bala soldadu iya deka ngamahka Rumah Sembiang. Sida deka madamka pengawa ti beberika piring tiap hari, lalu nirika Utai Ti Balat Jai. Ngena jalai tipu, raja nya deka ngulihka sukung ari sida ke udah ngelengkaka agama sida, tang orang ke nitihka Allah Taala deka ngelaban sida. Bala tuai ti bepenemu-dalam deka magi penemu-dalam ngagai mayuh orang bukai. Tang dalam berapa hari aja sekeda sida deka mati beperang, tauka mati ditunu, lalu sekeda deka dirumpak, lalu digaga nyadi orang tangkap. Lebuh pengawa bebunuh nya benung nyadi, bala nembiak Allah Taala deka nerima tulung mimit, taja pen mayuh orang ke setanah enggau sida semina deka beserakup kena ngiga penguntung ke diri empu aja. Sekeda bala tuai ti bepenemu-dalam deka dibunuh, tang pemati sida deka nuchi orang mayuh. Utai tu deka majak nyadi datai ke ujung, ba maya ti udah diletak Allah Taala. “Raja menua Siria deka ngereja utai nitihka peneka ati iya empu. Iya deka temegah madahka diri besai agi ari sebarang petara, kering agi ari Allah Taala ti Pemadu Tinggi. Iya ulih ngereja utai nya nyentuk ngagai maya Allah Taala deka ngukum iya. Allah Taala deka ngereja utai nitihka pelan Allah Taala empu. Raja nya enggai ibuhka petara ti udah dipetuaika bala aki ini iya, enggau petara ti dikerinduka sida ke indu. Iya ti bendar, iya enggai ibuhka semua petara, laban iya ngumbai diri besai agi ari sida. Tang iya deka ngemesaika petara ti nyaga kuta. Iya deka meri emas, pirak, batu ti berega, enggau pemeri bukai ti berega ngagai petara ti enda kala disembah aki ini iya. Iya deka ngasuh orang ke nyembah petara orang bansa bukai, nyaga kuta iya. Iya deka meri basa ti besai ngagai sida ke nerima iya nyadi raja, meri sida pangkat ti tinggi, lalu meri sida tanah nyadika upah sida. “Lebuh timpuh raja menua Siria nyau deka abis, raja menua Ejip deka nyerang iya, lalu raja menua Siria deka ngelaban ngena semua kuasa iya, ngena kerita perang, kuda, enggau berapa buah kapal. Iya deka nyerang mayuh bengkah menua, baka ai bah. Iya deka mega nyerang Menua Ti Udah Disemaya lalu munuh bepuluh ribu iku orang, tang menua Edom, Moap, enggau teda menua Amon, enda diserang. Lebuh iya nyerang semua menua nya, iya enda ngalau menua Ejip. Iya deka nabanka pengaya ti dilalaika ti digaga ari emas, pirak enggau utai bukai ti dikesayauka, ari menua Ejip. Iya deka ngalahka menua Libia enggau menua Etiopia. Udah nya iya deka takut ninga berita ti datai ari timur enggau ari utara, lalu iya deka bebendar belaban, lalu munuh mayuh orang. Iya deka nirika langkau kain diraja iya ti besai ba entara tasik enggau bukit ti kudus. Tang iya deka mati, nadai orang nulung.” Ku melikat nya bejaku, “Lebuh maya nya ila, melikat Mikael, ke nyaga bala nuan, deka pegari. Udah nya penusah ti besai deka nyadi. Nadai penusah ti jai agi ari nya udah kala nyadi kenyau ari penumbuh bansa ti terubah menya. Lebuh maya nya ila, semua orang ari bansa nuan, ke bisi nama ditulis dalam bup Allah Taala, deka diidupka. Mayuh sida ke udah mati, deka idup baru. Sekeda deka idup belama iya, lalu sekeda deka dipechat belama iya. Bala tuai ti bepenemu-dalam deka manchar baka penampak langit. Lalu sida ke udah ngajar orang ngereja utai ti ngena, deka manchar baka bintang belama iya.” Ku iya bejaku enggau aku, “Nya alai, Daniel, tutup bup nya, lalu lekatka chop tambit ba iya nyentuk ngagai pengujung dunya. Ba jam ke diatu, mayuh orang deka masau jam nguji meratika utai ti nyadi.” Udah nya aku lalu tepedaka dua iku orang bediri ba tebing sungai, siku ba tebing seberai, lalu siku ba tebing seberai. Siku ari seduai nya nanya melikat ke bediri ari ulu iya, “Ni pengelama baru utai ti nyelai nya badu agi nyadi?” Melikat nya lalu ngedarka jari iya kedua piak ke langit, lalu besumpah dalam nama Allah Taala ti idup belama iya, lalu aku ninga iya nyebut, “Pengelama iya tiga taun setengah. Lebuh bala nembiak Allah Taala badu agi diperinsa, nya meh maya semua utai tu badu agi nyadi.” Aku ninga utai ti disebut iya, tang aku enda meretika utai nya. Nya alai aku nanya, “Tang baka ni ku jalai semua utai tu deka badu agi nyadi, Tuan?” Ku iya nyaut, “Nuan enda tau enda mupuk diatu, Daniel, laban leka jaku tu resia sereta dilalaika nyentuk ngagai pengujung dunya. Mayuh orang deka dituchi. Sida ke jai enda ulih mereti, tang deka majak nyadi orang ke jai. Semina sida ke bepenemu-dalam aja deka mereti. “Kenyau ari maya pengawa ngenjuk piring tiap hari nya dipadamka, reti nya, kenyau ari maya penatai Utai Ti Balat Jai nya, 1,290 hari deka lempus. Beberekat meh orang ke mengkang tetap ati nyentuk ngagai 1,335 hari nya udah lempus! “Lalu nuan, Daniel, enda tau enda tetap ati nyentuk ke ujung. Udah bekau nya nuan deka mati, tang nuan deka angkat idup baru lalu nerima upah nuan ba pengujung dunya.” Tu pesan ti diberi TUHAN ngagai Hosea anak Beeri lebuh Usiah, Jotam, Ahas, enggau Hesekiah nyadi raja menua Judah lalu Jeroboam anak Jehoas nyadi raja menua Israel. Lebuh TUHAN bejaku ngagai orang Israel ngena Hosea keterubah iya, Iya bejaku munyi tu, “Hosea, alai nuan jadi enggau indu sundal, ngambika iya ngadaka anak ke nyundal baka iya, laban nya gaya menua tu udah butang ketegal iya udah ninggalka Aku.” Nya alai Hosea lalu jadi enggau indu siku ke benama Gomer anak Diplaim. Lebuh Gomer ngadaka anak lelaki seduai iya ke tuai, TUHAN bejaku ngagai Hosea, “Beri iya nama ‘Jesril,’ laban enda lama da agi Aku deka ngukum raja orang Israel laban aki iya Jehu udah munuh orang di Jesril. Aku deka ngerusak perintah Jehu. Lalu Aku deka ngerusak kuasa bala soldadu orang Israel ba Lebak Jesril lebuh maya nya ila.” Gomer ngadaka anak iya ti kedua. Sekali tu anak iya indu. Ku TUHAN bejaku ngagai Hosea, “Beri nama iya ‘Enda Dikerinduka,’ laban Aku enggai agi ngayanka pengerindu ngagai orang Israel tauka ngampun sida. Tang Aku deka ngayanka pengerindu ngagai orang Judah. Aku TUHAN Allah Taala sida deka ngelepaska sida, tang Aku enggai ngereja nya ngena perang - ngena pedang tauka panah enggau laja tauka ngena kuda tauka ngena orang ke nepan kuda.” Lebuh Gomer badu agi nusuka anak indu iya, iya lalu ngandung baru, lalu ngadaka siku agi anak lelaki. Ku TUHAN bejaku ngagai Hosea, “Beri iya nama ‘Ukai Bala Nembiak Aku,’ laban orang Israel ukai bala nembiak Aku, lalu Aku ukai Allah Taala sida.” Orang Israel deka mayuh tubuh baka pasir ti di tasik, enda ulih diitung tauka ditakar. Diatu Allah Taala bejaku ngagai sida, “Kita ukai nembiak Aku,” tang maya deka datai alai Iya deka nyebut ngagai sida, “Kita tu anak Allah Taala ti idup!” Orang Judah enggau orang Israel deka beserakup baru. Sida deka milih siku tuai, lalu sida deka sekali agi mansang sereta nyadi kaya di menua sida empu. Sigi amat, hari Jesril deka nyadi hari ti besai! Nuan patut ngumbai menyadi lelaki nuan, “Ammi,” lalu ngumbai menyadi indu nuan, “Ruhamah.” Anak, alai kita bejaku enggau indai kita, taja pen iya ukai bini Aku agi, lalu Aku pen ukai laki iya agi. Bejaku enggau iya minta iya badu agi butang, lalu badu agi nyundal, enggai ke Aku ngeruntun kain ari tubuh iya ngambika iya telanjai baka iya ke baru ada menya. Aku deka ngaga iya nyadi menua puang, lalu iya deka mati aus. Nya alai Aku deka ngandang iya ngena pagar ti digaga ari kayu ti beduri, lalu ngaga dinding kena mempang jalai iya. Iya deka belanda nitihka bala ambai iya, tang enda ulih nitihka sida. Iya deka begigaka sida, tang enda tetemuka sida. Udah nya iya deka bejaku, “Aku deka pulai baru ngagai laki aku ti terubah, laban aku udah lantang agi diau begulai enggau iya suba ari aku ke diatu.” Iya sigi enggai ngaku Aku udah meri iya gandum, wain, minyak kana, enggau semua pirak enggau emas ti dikena iya nyembah Baal. Nya alai lebuh maya ngetau nyau datai, Aku deka ngambi pulai baru gandum enggau wain ti udah diberi Aku ngagai iya, lalu deka ngambi bulu bedus enggau kain linin ti udah diberi aku kena iya begari. Aku deka nelanjaika iya di mua bala ambai iya, lalu nadai orang ulih ngelepaska iya ari kuasa Aku. Aku deka madamka semua gawai iya, iya nya gawai ninting taun, gawai tiap bulan, enggau pengerami Hari Sabat iya, iya nya semua gawai pengarap iya. Aku deka ngerusak kebun anggur enggau kayu ara iya ti dikumbai iya diberi bala ambai iya ketegal iya udah bekereja ke sida. Aku deka ngaga kebun anggur enggau kebun buah ara iya nyadi menua puang, laban jelu babas deka ngerusak sida. Aku deka ngukum iya laban iya udah begawai ke bala petara Baal, lebuh iya nunu menyan ngagai sida, lalu ngias diri ngena tinchin enggau batu ti berega, lalu nitihka bala ambai iya, lalu enda ingatka Aku, ku TUHAN bejaku. Nya alai Aku deka mai iya ngagai menua puang, laban Aku deka ngulihka ati iya baru ngena jaku ti siru. Aku deka meri kebun anggur iya pulai baru ngagai iya, lalu ngaga Emperan Penusah nyadika pintu pengadang. Iya deka nyaut Aku dia baka iya ti udah nyaut Aku lebuh iya agi biak suba, lebuh iya datai ari menua Ejip. Udah nya baru iya deka sekali agi ngumbai Aku laki iya, lalu enda agi ngumbai Aku Baal iya. Aku enggai sekali-kali nejuka iya nyebut nama Baal agi. Lebuh maya nya ila, Aku deka ngaga siti sempekat enggau semua jelu babas enggau burung, ngambika sida enda ngemediska bala nembiak Aku. Aku deka mega muai semua senyata perang ari menua tu, semua pedang enggau panah, ngambika bala nembiak Aku diau dalam pemaik enggau pengelikun. Israel, Aku deka ngambi nuan nyadika bini Aku dalam pengelurus, sereta tetap ati ngagai nuan. Aku deka seruran rindu sereta kasihka nuan lalu bempu nuan belama iya. Aku deka ngamatka semaya Aku, lalu ngaga nuan nyadika enggi Aku, lalu nuan deka ngaku Aku nyadika TUHAN nuan. Aku deka ngentapka bala nembiak Aku diau di menua tu, lalu ngasuh sida kaya-raja. Aku deka ngayanka pengerindu ngagai sida ke dikumbai “Enda Dikerinduka,” enggau ngagai sida ke dikumbai “Ukai Bala Nembiak Aku” Aku deka nyebut, “Kita tu nembiak Aku,” lalu sida deka nyaut, “Nuan meh Allah Taala kami.” Ku TUHAN bejaku ngagai aku, “Alai nuan mupuk baru lalu ayanka pengerindu nuan ke siku indu ke butang enggau ambai iya. Nuan enda tau enda rinduka iya baka Aku ti agi mengkang rinduka orang Israel, taja pen sida limpang ngagai petara bukai, lalu rindu mai piring buah anggur ti udah disalai ngagai engkeramba.” Nya alai aku lalu meli indu nya ngena rega 15 singkap duit pirak enggau 150 kilogram barli. Aku lalu madahka iya deka lama nganti aku, lalu enda tau nyundal, tauka butang, lalu aku pen enda mega tau beleman enggau iya. Nya meh pengelama orang Israel deka idup nadai raja tauka tuai bansa, nadai ngenjuk piring, nadai tiang batu keramat, nadai engkeramba, nadai anak patung kena nujum. Tang maya deka datai alai orang Israel deka sekali agi pulai baru ngagai TUHAN Allah Taala sida enggau ngagai peturun David ke nyadika raja sida. Udah nya baru sida deka nangika TUHAN, lalu nerima pemeri ti manah ari Iya. Ku TUHAN bedawaka orang Israel: “Kita orang Israel, pendingka utai ti disebut TUHAN. Penetap ati enggau pengerindu nadai agi di menua tu, lalu orang Israel enda ngaku Aku nyadika Allah Taala sida. Sida ngaga semaya, tang sida mungkir ari semaya nya. Sida bula, munuh orang, ngenchuri, sereta butang. Penyalah sida nambah-menambah. Orang nyau betangkan-tangkan mati dibunuh. Nya alai menua tu deka rangkai, lalu semua utai ti idup di menua tu deka mati magang. Semua mensia, jelu, burung, enggau ikan deka mati magang.” Ku TUHAN bejaku, “Anang besalah sebarang orang! Ukai semua orang salah. Aku bejaku ngelaban kita ke imam. Siang malam kita ngereja penyalah, lalu sida nabi pen nadai mega lebih ari kita. Aku deka ngerusak Israel ti indai kita. Nembiak Aku deka dirusak, laban sida enda bedulika Aku. Kita ke imam enda bedulika Aku, lalu udah nulak ajar Aku. Nya alai, Aku nulak kita, lalu enggai ngaku bala anak kita nyadika imam Aku. “Makin mayuh agi kita nyadi imam, makin mayuh agi ga kita bedosa ngelaban Aku. Nya alai Aku enggai agi masa kita, tang deka mechat kita. Kita gaga ati meda bala nembiak Aku bedosa, ngambika kita ulih ngelantangka diri ngena piring ti dikena muai dosa sida. Kita deka merinsa natka ukum baka orang mayuh! Aku deka ngukum kita ketegal penyai ti dikereja kita. Kita deka makai piring ti endang ungkup kita, tang kita deka mengkang lapar. Kita deka nyembah petara ti ngasuh peridi, tang kita deka mengkang nadai anak, laban kita udah ninggalka Aku lalu nitihka petara bukai.” Ku TUHAN bejaku, “Wain, nemuka lama tauka baru, bela ngasuh bala nembiak Aku enda nemu berunding! Bala nembiak Aku betanyaka utai ngagai kayu, lalu tungkat sida meri sida leka jaku. Laban roh sundal udah nesatka sida, lalu sida udah ninggalka Allah Taala sida, ngambika sida ulih nyundal. Sida ngenjuk piring ba endur alai nyembah engkeramba ba sebelah tuchung bukit, lalu sida nunu menyan di baruh kayu ti tinggi sereta jurai ba sebelah munggu, laban endur nya lindung! Nya lalu ngujungka bala anak indu kita nyundal, lalu menantu indu kita butang. Aku enggai ngukum anak indu kita ketegal sida nyundal, lalu Aku pen enda mega ngukum menantu indu kita ketegal sida butang, laban laki sida empu deh beleman enggau indu sundal, lalu ngenjuk piring sama enggau indu sundal dalam rumah sembiang. Pemeli kita empu deka ngujungka kita dirusak. “Tang taja pen kita orang Israel enda tetap ati ngagai Aku, awakka Judah enda ngereja utai ti salah baka nya. Anang nyembah di Gilgal tauka di Bet-aben, tauka ngaga semaya dia dalam nama Allah Taala ti idup. Orang Israel kieh baka penakan kuda. Baka ni ku Aku ulih engkani sida baka ke engkani anak domba ba padang rumput? Orang Israel udah kena laban jayau engkeramba. Awakka sida baka nya aja. Lebuh sida udah balat ngirup wain, sida lalu ngelantangka diri nyundal. Sida rindu agi ke diri dipechat ari ke dibasa. Sida deka ditabanka, baka ke dikebuka ribut, lalu sida deka malu ke piring ti diberi sida ngagai engkeramba. “Pendingka tu ulih kita ke imam! Peratika enggau manah, kita orang Israel! Anang enda mending, kita ke ari ruang bilik raja! Kita udah dikarapka ngakim enggau lurus, tang kita empu deka diakim! Kita udah nyadi panjuk di Mispah, nyadi jarin ti ditan ba Bukit Tabor, nyadi lubang kebung ti dalam di nengeri Akasia, lalu Aku deka ngukum semua kita. Aku nemu gaya bansa orang Israel. Sida enda ulih belalai ari Aku. Sida udah enda tetap ati ngagai Aku, lalu sida enda patut nyembah Aku.” Penyai ti udah dikereja orang mayuh nagang sida pulai baru ngagai Allah Taala sida. Pengawa ti besembahka engkeramba balat nanchang sida, lalu sida enda ngaku TUHAN. Penyumbung orang Israel deka besaksi ngelaban sida empu. Dosa sida empu ti ngasuh sida tesangkut lalu tetingkap, lalu orang Judah sama rebah enggau sida. Sida mai bedus enggau sapi sida lalu meri utai nya nyadika piring ngagai TUHAN, tang utai nya nadai mai penguntung ngagai sida. Sida enda ulih nemu TUHAN, laban Iya udah ninggalka sida. Sida udah enda tetap ati ngagai TUHAN. Bala anak sida ukai enggi TUHAN. Nya alai menua sida deka dirusak enda lama da agi. Sepu terumpit di Gibe-ah! Asuh orang megau orang mayuh di Ramah! Manjung meh kita di Bet-aben mai orang mansang beperang! Mansang beperang meh kita bala Benjamin! Israel deka dirusak lebuh maya sida diukum. Aku madahka ngagai semua raban bansa orang Israel, utai ti tetap deka nyadi! Ku TUHAN bejaku, “Aku ringat laban tuai orang Judah udah nyerang menua Israel, lalu ngenchuri tanah sida. Nya alai Aku deka mubuhka pengeringat Aku ngagai sida baka ai bah. Israel natka diri merinsa kena tekan. Iya udah lenyau menua ti endang patut diempu iya, laban iya keras minta tulung ari orang ke enda ulih nulung iya. Nya alai Aku deka ngerusak orang Israel, enggau orang Judah. “Lebuh Israel meda diri balat sakit, lalu lebuh Judah meda diri bakal, nya baru Israel mansang ngagai Asiria minta raja menua nya nulung iya, tang raja nya enda ulih ngeraika sida tauka nyumanka bakal sida. Aku deka nyerang orang Israel enggau orang Judah baka singa. Aku Empu deka nyarikka sida, lalu udah nya ninggalka sida. Lebuh Aku ngirit sida, nadai orang ulih ngelepaska sida. “Aku deka ninggalka nembiak Aku datai ke sida udah chukup merinsa ketegal dosa sida, lalu datai ngiga Aku. Lebuh sida tusah, sida nguji ngiga Aku.” “Aram kitai pulai baru ngagai TUHAN. Iya udah encharikka kitai, tang Iya deka ngeraika kitai. Iya udah ngemakalka kitai, tang Iya deka malut telih kitai. Dalam dua hari Iya deka ngidupka kitai baru; ba hari ti ketiga Iya deka ngangkatka kitai ngambika kitai tau idup di mua Iya. Aram kitai majak nguji meretika TUHAN. Iya tetap deka datai ngagai kitai, baka penumbuh mata hari, baka ujan ti labuh ninggang tanah.” Tang ku TUHAN bejaku, “Israel enggau Judah, nama utai ti patut dikereja Aku ngagai kita? Pengerindu kita ke Aku jampat lesap baka sebun ambun pagi hari, baka ai ambun ti lesap tumu pagi. Nya kebuah Aku udah ngasuh bala nabi Aku betemu enggau kita, mai pesan pasal ukum enggau pengerusak. Utai ti diguna Aku ari kita nya terang sereta nyata: Aku begunaka pengerindu ti meruan belama iya, ukai piring. Aku rindu agi ke kita nemu Aku, ari kita ke meri piring tunu ngagai Aku. “Tang di Adam, sida ngelanggar sempekat ti udah digaga Aku enggau sida. Dia meh endur alai sida ngayanka diri enda tetap ati ngagai Aku. Nengeri Giliat penuh laban orang ke jai enggau pemunuh. Bala sida imam nyau baka bala perumpak ke ngeramka ipa nganti orang ke mansa. Indah ba jalai raya ngagai endur ti kudus di Sekem deh sida bebunuhka orang, lalu ngereja penyalah ti besai. Aku bisi udah meda siti utai ti jai nyadi di menua Israel: bala nembiak Aku udah ngamahka diri besembahka engkeramba. “Nyadi kita orang Judah, Aku udah ngeletak maya alai Aku deka mai kita pulai baru. “Genap kali Aku deka ngeraika Israel, lalu ngasuh sida nyadi kaya-raja baru, Aku semina tepedaka utai ti jai ti dikereja sida. Sida nipu pangan diri. Sida tama ngagai rumah orang lalu ngenchuri. Sida ngerumpak orang ba sebelah jalai raya. Sida ngumbai Aku enda ingatka semua penyai nya. Tang dosa ngelulung sida, lalu Aku meda dosa nya.” Ku TUHAN bejaku, “Orang mayuh bepekat lalu nipu raja enggau bala pemesai iya. Semua sida nya orang ke aum-juak sereta enda taluk magang. Ati sida ke begedi mau baka api ti ba dapur, ti dikena ngaga roti, api ti enda ibuh disurungka datai ke roti nya mansau. Lebuh raja ngintu pengerami iya, bala pemesai iya mabuk ngirup wain. Sida mau baka api ti dikena manggang roti. Semalam-malam pengeringat sida ngungut, lalu lebuh pagi hari pengeringat nya mau baka api. “Sida balat ringat lalu munuh orang ke megai perintah. Bala raja sida udah dibunuh betangkan-tangkan, tang nadai siku orang besampi ngangauka Aku.” Ku TUHAN bejaku, “Orang Israel baka roti ti dipanggang setengah mansau. Sida begaul enggau orang bansa bukai. Sida enda nemu orang bansa bukai nginsap pengering sida. Lalu sida enda nemu pala diri nyau buban-banan. Penyumbung orang Israel deka besaksi ngelaban sida empu; tang taja pia, sida enda pulai baru ngagai TUHAN ti Allah Taala sida, tauka ngiga Iya ketegal semua utai nya. Israel nyau baka burung achang, beli lalu enda nemu berunding. Sida minta tulung menua Ejip, udah nya minta tulung orang Asiria! Tang lebuh sida bejalai, Aku deka nibarka jala Aku ngagai sida. Aku deka mai sida baka ke mai burung. Aku deka disiplin sida nitihka utai ti dipadahka sida ngagai gempuru sida. “Tulah meh sida, laban sida udah ninggalka Aku. Sida deka dirusak, laban sida udah angkat ngelaban Aku. Aku endang deka nebus sida, tang sida bejaku bula ngelaban Aku. Sida enda besampi ngagai Aku ari ati sida, tang nyungkurka diri ba peninduk sida, lalu duie-duie nyabak. Sida ngurik tubuh diri lebuh sida minta gandum enggau wain. Sida angkat ngelaban Aku! Aku tu ti udah matih sereta ngeringka lengan sida. Tang taja pia sida bepekat ngelaban Aku. Sida nguingka diri ngagai utai ti nadai guna. Sida udah nyadi baka panah ti enda menyana; bala pemesai sida deka mati laban pedang ketegal pemeli jaku sida. Lalu orang Ejip deka ketawaka sida.” Ku TUHAN bejaku, “Sepu terumpit kena megau orang mayuh! Bala munsuh nyerang menua Aku baka menaul, laban nembiak Aku udah ngelanggar sempekat enggau adat Aku. Taja pen sida ngumbai Aku Allah Taala sida, lalu ngumbai diri nembiak Aku sereta nemu Aku, tang sida udah nulak utai ti manah. Ketegal nya, bala munsuh sida deka begagaika sida. “Bala nembiak Aku udah milih raja, tang ukai dikemendarka Aku. Sida nuduhka orang nyadi tuai, tang ukai nitihka penemu Aku. Sida begagaka engkeramba ngena emas enggau pirak sida, kena sida ngerusak diri empu. Aku begedika sapi emas ti disembah orang di nengeri Samaria. Aku pedis ati ngagai sida. Ni pengelama baru sida deka diau tuchi di menua Israel? Engkeramba nya digaga tukang. Engkeramba nya ukai Allah Taala. Sapi emas orang Samaria deka dipechahka! Sida nanam ribut, nya alai sida deka ngetau kabut! Gandum sida nadai tangkai, lalu enda ulih mansutka roti. Tang enti sema iya ulih mansutka roti, orang bansa bukai ga deka makai roti nya. Israel nyau sebaka enggau bansa bukai, sereta nadai guna baka periuk ti udah pechah. Kieh baka keledai kampung, orang Israel bejalai ngatika diri. Sida udah mupuk ngiga tulung ari orang Asiria, lalu udah ngaji bansa bukai nyaga sida. Tang diatu Aku deka ngempuruka sida, lalu ngukum sida. Enda lama da agi, sida deka ngelingkang natka diri pedis lebuh raja menua Asiria nekanka pengidup sida. “Makin mayuh agi alta digaga orang Israel kena muai dosa, makin mayuh agi ga endur alai sida bedosa! Taja pen Aku nuliska mayuh jaku ajar ke sida, tang sida ngumbai ajar nya nyelai. Taja pen sida rindu ngenjuk piring, lalu bepakaika dagin, tang TUHAN enda nerima piring nya. Diatu Iya deka ngingatka penyai sida lalu ngukum sida ketegal dosa sida. Sida deka pulai baru ngagai menua Ejip! “Orang Israel enda ingatka Aku ti udah ngaga sida, lalu sida begagaka berapa buah istana. Orang Judah udah nambahka pemayuh nengeri ti bekuta, tang Aku deka nunu nengeri sida, lalu nganguska kuta sida.” Anang kita rami gaga, O Kita orang Israel! Anang rami tauka manjung baka orang bansa bukai. Kita udah ninggalka Allah Taala kita, lalu enda tetap ati ngagai Iya. Di serata menua tu kita udah nyual diri baka indu sundal ngagai petara Baal, lalu udah gaga ati ke gandum ti dikumbai kita kena iya mayar kita! Tang enda lama da agi kita enda chukup gandum enggau minyak kana, lalu nadai agi wain. Orang Israel enda agi diau di menua TUHAN, tang deka pulai baru ngagai menua Ejip, lalu di menua Asiria sida deka makai pemakai ti enda tuchi. Di menua orang bansa bukai sida enda ulih ngenjuk piring wain ngagai TUHAN, lalu piring sida enda ulih ngerinduka ati Iya. Piring nya baka pemakai ti diempa orang ke ngulit. Semua orang ke makai piring nya deka kamah laban iya, laban pemakai nya semina ngenyangka sida aja. Piring nya enda datai ba Rumah TUHAN. Nama utai ti deka dikereja sida lebuh maya gawai, enggau lebuh gawai TUHAN? Laban taja pen sida enda dirusak, orang Ejip deka ngumpul sida, lalu orang Mempis deka nguburka sida. Reta tengkira pirak enggau endur alai rumah sida ke udah bediri menya, deka dilamun rumput enggau madang duri. Maya ngukum udah datai; sida deka nerima ukum ti patut diterima sida. Sida deka nyebut, “Nabi nya beli. Iya gila.” Kita balat begedika aku laban dosa kita besai. Allah Taala udah ngirumka aku nyadi nabi ngambika aku nyadi jejaga orang Israel. Tang kita nguji manjuk aku baka ke manjuk burung di sebarang endur aku bejalai. Indah dalam Rumah Sembiang, deh orang mayuh begedika nabi. Sida udah ngereja penyai baka ke udah dikereja di Gibe-ah. Allah Taala deka ingatka dosa sida lalu ngukum sida ketegal dosa nya. Ku TUHAN bejaku, “Lebuh Aku terubah tetemuka Israel, Aku asai ke tetemuka buah anggur di menua puang. Lebuh Aku terubah meda aki ini kita, Aku asai ke tepedaka buah ara ti terubah mansau. Tang lebuh sida datai ba Bukit Peor, sida berengkah nyembah Baal, lalu enda lama udah nya sida lalu nyadi jai baka petara ti dikerinduka sida. Penampak nama Israel deka terebai kebukai baka burung, lalu sida nadai agi anak, nadai agi indu ke ngandung, nadai agi anak dikandung. Enti sida bisi anak, Aku deka ngambi anak sida, datai ke nadai siku sida agi idup. Tulah meh sida lebuh Aku ninggalka sida.” Suba aku bisi meda bala anak sida baka kayu engkerema ti ditanam ba padang ti manah tang diatu Israel enda tau enda mai bala anak iya pansut ngambika sida dibunuh. TUHAN, kereja siti aja utai ngagai orang tu: asuh bala indu sida nadai anak, tauka enda ulih nusuka anak! Ku TUHAN bejaku, “Semua pengawa sida ke jai udah belabuh dikereja sida di Gilgal. Dia meh endur alai Aku ke berengkah begedika sida. Lalu ketegal penyai ti udah dikereja sida, Aku deka muru sida ari menua Aku. Aku enggai agi rinduka sida. Semua bala tuai sida udah angkat ngelaban Aku. Orang Israel tu baka kayu ti udah rangkai urat, lalu enda bebuah. Sida nadai ulih beranak, tang enti sema sida beranak, Aku deka munuh anak ti balat dikesayauka sida.” Allah Taala ti dipetuaika aku, deka nulak bala nembiak Iya, laban sida enda mendingka Iya. Sida deka belelang ngagai menua bukai. Orang Israel baka batang anggur ti lebat buah. Kaya agi sida, mayuh agi ga alta digaga sida. Mayuh agi asil ulih sida ari tanah sida, manah agi ga gaya tiang batu keramat ti disembah sida. Orang ke ati deka ngelakar enda tau enda natka pemerinsa ketegal dosa sida. Allah Taala deka ngerubuh alta sida, lalu ngerusak tiang keramat sida. Enda lama da agi orang tu deka nyebut, “Kitai nadai raja, laban kitai enda nangika TUHAN. Tang nama utai ti ulih dikereja raja ke kitai?” Sida nyebut jaku ti nadai guna, lalu sida ngaga semaya ti bula, enggau sempekat ti nadai guna. Atur ti lurus udah nyadi atur ti bingkuk, ti tumbuh baka rumput ti berachun ba tanah umai ti udah dichangkul. Orang ke diau di nengeri Samaria deka takut, lalu deka ngulitka sapi sida ti lelaki ti digaga ari emas di Bet-aben. Sida enggau bala imam ke bekereja ke engkeramba nya deka nyabakka iya. Sida deka duie-duie nyabak lebuh emas dikerebakka ari engkeramba nya. Engkeramba nya deka dibai ngagai menua Asiria, lalu diberi nyadika pemeri ngagai raja. Orang Israel deka dipechat, lalu sida deka malu ketegal jaku lalau ti dititihka sida. Raja sida deka ditabanka, baka ke nganyutka repik kayu ba ai. Rumah sembiang alai orang ke nyembah engkeramba ba tuchung bukit di Aben, alai orang Israel ti nyembah engkeramba, deka dirusak. Madang duri enggau rumput deka tumbuh lalu ngelamun alta sida. Orang mayuh deka ngangauka bukit, “Lalaika kami!” sereta ngangauka munggu, “Lamun kami!” Ku TUHAN bejaku, “Orang Israel nadai nemu ngetu bedosa ngelaban Aku kenyau ari sida ke bedosa di Gibe-ah suba. Nya alai, sida deka diserang di Gibe-ah. Aku deka nyerang orang ke bedosa nya. Semua bansa deka setanah ngelaban sida, lalu sida deka diukum ketegal pemayuh dosa sida. “Dulu menya Israel udah kala nyadi baka sapi dara ti udah dilatih, lalu sedia deka nungku gandum. Tang Aku mutuska runding deka ngengkahka kungkung ba rekung iya ti manah nya, lalu nyendiaka iya ngereja pengawa ti kasar agi. Aku udah ngasuh Judah narit pengeradu tanah, lalu Israel deka narit perengka ti dikena mechahka tanah. Ku Aku bejaku, ‘Radu tanah bukai ke diri empu, tanam pengelurus, lalu ketau berekat ti deka datai ari pengangkun kita ke Aku. Tu meh maya kita patut nguingka diri ngagai Aku ti TUHAN kita, lalu Aku deka datai lalu nuang berekat ngagai kita.’ Tang kita nanam penyai, lalu kita ngetau penyai. Kita udah makai buah ti pansut ari pemula kita empu. “Laban kita ngarapka kerita perang kita enggau pemayuh bala soldadu kita, kita deka diserang munsuh, lalu semua kuta kita deka dirusak magang. Utai ti deka nyadi nya sebaka enggau utai ti udah nyadi lebuh Raja Salman ngerusak nengeri Bet-arbel lebuh perang nya suba, lalu sida ke indai enggau bala anak sida redak lalu mati. Tu utai ti deka nyadi ba kita, kita orang Betel, ketegal pemalat penyai ti udah dikereja kita. Lebuh perang belabuh, raja menua Israel deka mati.” “Lebuh Israel agi mit, Aku rinduka iya lalu Aku ngangauka anak Aku pansut ari menua Ejip. Tang makin bebendar agi Aku ngangauka iya, makin jauh agi ga iya ninggalka Aku. Bala nembiak Aku ngenjuk piring ngagai Baal. Sida nunu menyan ngagai engkeramba. Aku udah ngiring lalu ngajar orang Israel bejalai. Aku udah merap bala nembiak Aku tang sida enda ngaku Aku udah ngeraika sida. Aku nguluka sida enggau penelap sereta enggau pengerindu. Aku ngangkatka sida ngagai kuyu Aku. Aku ngenduk lalu nyapi sida. “Sida enggai pulai baru ngagai Aku, nya alai sida enda tau enda pulai baru ngagai menua Ejip, lalu Asiria deka merintah sida. Nengeri sida deka diserang, lalu pintu nengeri sida deka diruntuhka. Perang nya deka ngerusak bala nembiak Aku laban sida ngereja utai ti dikumbai sida manah. Nembiak Aku keras deka ninggalka Aku. Sida ngangauka Iya ti Pemadu Tinggi, tang Iya enda ngangkatka sida. “Baka ni ku Aku ulih ngelengkaka kita, Israel? Baka ni ku Aku ulih ninggalka kita? Baka ni ku Aku ulih ngerusak kita baka Aku ti udah ngerusak Admah, tauka ngaga kita baka Aku ti udah ngaga Seboim? Ati Aku sigi enggai ngereja nya! Ati Aku kelalu balat rinduka kita. Aku enggai ngukum kita lebuh Aku ringat. Aku enggai agi ngerusak Israel, laban Aku tu Allah Taala, ukai mensia, Aku ti kudus, ke meruan enggau kita. Aku enggai datai ngagai kita lebuh Aku ringat. “Bala nembiak Aku deka nitihka Aku lebuh Aku negung munyi singa ngelaban munsuh sida. Sida deka beguai datai ngagai Aku ari barat. Sida deka datai ari Ejip, ngelaju burung, enggau ari Asiria, baka burung achang. Aku deka mai sida pulai baru ngagai rumah sida empu. Aku ti TUHAN udah bejaku.” Ku TUHAN bejaku, “Orang Israel udah ngelulung Aku ngena pemula enggau jaku tipu, tang orang Judah agi nitihka Allah Taala sereta tetap ati ngagai Iya ti kudus. Semua utai ti dikereja orang Israel ari pagi nyentuk ngagai malam sigi nadai guna magang, sereta tau ngerusak. Sida majak bula sereta mangah. Sida ngaga sempekat enggau Asiria, lalu bedagang enggau menua Ejip.” TUHAN deka bedawaka orang Judah, lalu ngukum Israel ketegal ulah bala nembiak iya. Iya deka malas sida ketegal utai ti udah dikereja sida. Aki sida ke benama Jakop belaban enggau menyadi iya Esau lebuh seduai iya agi dalam kandung. Lebuh Jakop nyau besai tuai, iya belaban enggau Allah Taala. Iya belaban enggau siku melikat, lalu menang. Iya nyabak lalu minta berekat. Lalu Allah Taala datai ngagai aki kitai Jakop di Betel, lalu bejaku enggau iya. Tu meh TUHAN ti Pemadu Bekuasa, lalu nama Iya TUHAN, nama ke dikena kitai nyembah Iya. Nya alai, peturun Jakop, panggaika pengarap kita ba Allah Taala, lalu pulai baru ngagai Iya. Kita enda tau enda taluk sereta lurus, lalu enggau ati ti liat, anti meh Allah Taala kita. Ku TUHAN bejaku, “Orang Israel enda betul ati baka orang Kanaan. Sida rindu nipu orang ke meli utai ngena dachin ti enda betul. Ku sida, ‘Kami tu kaya. Kami udah bulih pengaya. Lalu nadai orang tau ngumbai kami bulih pengaya nya ngena jalai ti enda betul.’ Tang Aku TUHAN Allah Taala kita, ti udah mai kita pansut ari menua Ejip, deka ngasuh kita diau dalam langkau kain baru, baka kita kelia lebuh Aku datai ngagai kita di menua puang. “Aku udah bejaku ngagai bala nabi lalu meri sida genera, lalu nengah bala nabi nya Aku udah meri jaku tangkan ngagai bala nembiak Aku. Tang taja pia, engkeramba agi disembah di Giliat, lalu sida ke nyembah engkeramba nya, deka mati. Sapi ti lelaki digaga nyadika piring di Gilgal, lalu alta ti dia deka nyadi tugung batu ba padang.” Aki kitai Jakop rari ngagai menua Mesopotamia, alai iya ke bekereja ke orang siku, lalu ngibun raban bedus ke orang nya, kena iya ngulihka bini. TUHAN ngasuh siku nabi ngelepaska orang Israel ti nyadi ulun di menua Ejip, lalu ngibun sida. Orang Israel udah ngasuh TUHAN balat ringat. Sida patut dibunuh ketegal penyalah sida. TUHAN sida deka ngukum sida laban sida udah ngemaluka Iya. Dulu menya, lebuh raban bansa Epraim bejaku, raban bansa orang Israel ti bukai takut, laban sida bebasaka Epraim. Tang orang Israel bedosa laban sida nyembah Baal, lalu sida mati. Sida agi majak bedosa begagaka engkeramba ari besi ngambika bisi disembah sida - engkeramba ti digaga ari pirak, ti ditempa lalu digaga jari mensia. Lalu udah nya, ku sida bejaku, “Beri piring ngagai engkeramba tu!” Baka ni ku orang ulih nyium engkeramba nya, engkeramba ti baka gamal sapi ti lelaki? Nya alai orang tu deka lesap baka sebun ambun pagi hari, baka ai ambun ti lesap tumu pagi. Sida baka ampa ti dikebuka ribut ari endur alai nungku, baka asap ti pansut ari serumbung. Ku TUHAN bejaku, “Aku tu TUHAN Allah Taala kita ke udah mai kita pansut ari menua Ejip. Kita nadai petara bukai tang semina Aku aja. Semina Aku aja ke Penebus kita. Aku udah ngibun kita di menua puang ti rangkai. Tang lebuh kita datai ba menua ti manah, kita kenyang lalu puas ati, lalu udah nya kita sumbung lalu enda agi ingatka Aku. Nya alai Aku deka nerekam kita baka singa. Baka engkuli, Aku deka ngipa kita ba jalai ti ditengah kita. Aku deka nerekam kita baka beruang ti lenyau anak, lalu Aku deka nyarikka tubuh kita. Baka singa, Aku deka makai kita dia lalu nyarikka kita baka jelu babas. “Aku deka ngerusak kita orang Israel! Udah nya sapa ulih nulung kita? Kita minta raja enggau tuai bansa, tang baka ni ku sida ulih ngelepaska bansa kita? Aku ringat lalu meri kita raja, lalu lebuh Aku ngeransi, Aku ngambi raja nya ari kita. “Dosa enggau penyalah orang Israel udah dituliska, lalu ditaruh teguh. Israel bisi peluang idup, tang iya kelalu beli lalu enda ngambi peluang nya - baka anak mit ke baru deka ada, ke enggai pansut ari kandung. Aku enggai ngelepaska bansa orang tu ari dunya pemati tauka ngelepaska sida ari kuasa pemati. Bai kitu penyakit nuan, pemati! Bai kitu pengerusak nuan, dunya pemati! Aku enggai agi kasihka bansa orang tu. Taja pen orang Israel tumbuh baka rumput, Aku deka ngasuh ribut ti angat muput ari menua puang, lalu ribut nya deka ngerangkaika mata ai enggau telaga sida. Ribut nya deka ngambi abis lengis semua utai ti berega. Samaria deka diukum laban iya udah angkat ngelaban Aku. Bala nembiak iya deka mati beperang. Anak mit deka diempaska ngagai tanah, lalu perut indu ke ngandung deka diperuti.” O kita orang Israel, pulai meh kita baru ngagai TUHAN Allah Taala kita. Dosa kita udah ngasuh kita tesangkut lalu tetingkap. Pulai meh kita baru ngagai TUHAN, lalu awakka sampi tu nyadika piring kita ngagai Iya: “Buai semua dosa kami, lalu terima meh sampi kami, lalu kami deka muji Nuan munyi ti udah disemaya kami. Asiria nadai ulih ngidupka kami, lalu kuda perang enda ulih nyaga kami. Kami enggai agi nyebut ngagai engkeramba kami, ngumbai sida nya Allah Taala kami. O TUHAN, Nuan kasihka orang ke nadai petara bukai alai sida ngadap.” Ku TUHAN bejaku, “Aku deka mai bala nembiak Aku pulai baru ngagai Aku. Aku deka rinduka sida enggau pengabis ati Aku. Aku enda agi ringat ngagai sida. Ba orang Israel, Aku deka nyadi baka ujan ti labuh ba tanah ti rangkai. Sida deka bekuntum baka bungai. Sida deka beurat tegap baka kayu di menua Lebanon. Sida deka idup lalu nelesak baru, sereta manah gaya baka kayu kana. Sida deka bebau rengut baka kayu sidar di menua Lebanon. Sekali agi sida deka idup dilindung Aku. Sida deka galak baka gandum lalu sida deka bebuah lebat baka kebun anggur. Sida deka beberita baka wain menua Lebanon. Orang Israel enggai agi bekaul enggau engkeramba. Aku deka nyaut sampi sida, lalu ngibun sida. Baka kayu ti enda nemu layu, Aku deka ngelindung sida. Aku tu meh penatai semua berekat sida.” Awakka sida ke bepenemu-dalam meretika utai ti ditulis ditu, lalu awakka sida nyimpan utai nya dalam ati sida. Jalai TUHAN endang ngena, lalu orang ke lurus sigi idup nitihka jalai nya, tang orang ke bedosa tesangkut lalu tetingkap laban sida enda begunaka jalai nya. Tu pesan TUHAN ngagai Joel anak Petuel. Pendingka tu, kita ke tuai umur. Dinga, semua orang ke di menua Judah! Kati utai ti baka tu bisi udah kala nyadi ba rambau kita, tauka ba rambau aki ini kita menya? Padahka pasal utai tu ngagai bala anak kita, ngambika sida madahka iya ngagai bala anak sida, lalu anak sida deka madahka iya ngagai serak ti nangkanka sida. Bala buntak inggap ba utai ti ditanam. Utai ti enda diempa bala buntak nya, deka diempa bala buntak ti datai dudi. Dani lalu nyabak meh kita ke pemabuk. Nyabak meh kita ke ngirup wain. Buah anggur ti deka dikena ngaga wain, udah rusak. Bala buntak udah nyerang menua kitai. Sida kering, lalu enda ulih diitung. Ngeli sida tajam baka ngeli singa. Sida udah ngerusak batang anggur kitai lalu ngunyah kayu ara kitai. Sida udah ngelitika kulit kayu ara datai ke dan nyau burak magang. Nyabak meh kita, baka indu dara ke ngulitka pemati lelaki ti deka jadi enggau iya. Nadai agi gandum tauka wain diberi dalam Rumah Sembiang. Bala imam ngulit laban sida nadai agi piring diberi ngagai TUHAN. Umai nyau nadai agi utai tumbuh lalu tanah ngulit laban gandum udah rusak, buah anggur nyau rangkai, lalu kayu kana nyau layu. Tusah ati meh kita orang bumai. Nyabak meh kita ke ngintu kebun anggur, laban gandum, barli, enggau semua utai ti ditanam, udah rusak magang. Batang anggur enggau batang kayu ara udah layu. Semua kayu buah udah layu lalu mati, lalu orang nadai agi gaga ati. Rasukka kain guni, lalu nyabak meh kita imam ke bekereja ba alta! Mansang meh kita ngagai Rumah Sembiang lalu ngulit semalam-malam! Laban gandum tauka wain nyau nadai agi diberi ngagai Allah Taala. Asuh orang mayuh bepasa. Gempuruka semua orang mayuh! Gempuruka semua tuai enggau semua orang Judah ngagai Rumah Sembiang lalu nyabak ngagai Allah Taala! Naka meh pemalat hari nya! Laban Hari TUHAN nyau semak, hari alai Allah Taala ti Pemadu Bekuasa mai pengerusak. Kitai genung-genung nadai daya agi, meda utai ti ditanam kitai rusak. Kitai nyau nadai agi pengaga dalam Rumah Sembiang Allah Taala kitai. Benih mati ba tanah ti rangkai. Nadai agi gandum ditaruh, nya alai tibang ti puang rusak magang. Jelu sapi bemunyi laban sida merinsa laban sida nadai agi rumput di padang. Raban bedus mega merinsa. Aku nyabak ngagai Nuan, TUHAN, laban api udah makai rumput di menua puang, lalu nganguska semua kayu. Indah jelu babas deh nyabak ngagai Nuan laban sungai udah rangkai. Sepu terumpit kena megau orang mayuh di Sion, bukit Allah Taala ti kudus. Getar-getar meh kita orang Judah! Hari TUHAN nyau deka datai. Hari nya deka petang, chelum laban mua hari. Bala buntak nyerang baka pemetang ti map bukit. Nadai utai udah kala nyadi baka nya lalu nadai mega utai baka nya deka nyadi udah bekau nya. Bala buntak nya baka api ti makai semua utai ti tumbuh. Adap ke mua, menua nya baka Kebun Eden, tang adap kebelakang, menua nya baka menua puang. Nadai utai ti enda diempa sida. Gamal sida baka kuda. Sida belanda baka kuda perang. Lebuh sida merejuk ba sebelah tuchung bukit, sida beguru munyi kerita perang. Sida meretih munyi bangkai rumput ti diempa api. Sida bebaris baka bala soldadu ke sedia deka nyerang. Lebuh sida datai semak, semua orang takut magang. Mua semua orang nyau puchat magang. Sida nyerang baka bala soldadu. Sida niki dinding kuta baka soldadu. Semua sida maju terus ke mua lalu enda limpang tauka mempang jalai pangan diri. Sida mumbuska kuta, lalu nadai utai ulih nagang sida. Sida merejuk nyerang nengeri. Sida belanda melunggang kuta. Sida niki rumah lalu tama nengah jenila baka penchuri. Tanah berenyang lebuh sida nyerang. Langit begetar. Mata hari enggau bulan nyadi petang, lalu bintang nadai agi manchar. TUHAN meri atur ngagai bala soldadu Iya munyi guntur. Bala soldadu ke ngasika Iya endang mayuh sereta kering. Naka meh pemalat Hari TUHAN! Sapa ulih idup? “Tang taja pia,” ku TUHAN bejaku, “pulai baru meh kita diatu ngagai Aku enggau pengabis ati kita, bepasa, nyabak sereta ngulit. Awakka ati kita ke tusah ngayanka kita amat nesal ati. Enda chukup enti kita semina nyarikka gari kita aja.” Pulai meh kita baru ngagai TUHAN Allah Taala kita. Iya nelap sereta penuh pengasih. Iya liat ati lalu ngamatka semaya Iya. Iya endang seruran sedia deka ngampun, lalu enda ngukum. Nyangka ukur TUHAN Allah Taala kita deka ngubah runding Iya lalu merekatka kita ngena mayuh utai ti ditanam. Nya baru kita ulih meri Iya gandum enggau wain. Sepu terumpit ba Bukit Sion. Asuh orang bepasa, lalu kangauka orang begempuru! Gelumuka orang mayuh. Tuchi orang mayuh. Bai sida ke tuai. Gempuruka sida ke agi biak enggau bala anak mit mega. Indah orang ke baru jadi melaki-bini deh enda tau enda ninggalka rumah sida lalu datai. Sida imam, ke bekereja ke TUHAN ba entara alta enggau penama ngagai Rumah Sembiang, enda tau enda nyabak lalu besampi: “Kasihka bala nembiak Nuan, TUHAN. Anang nejuka bansa bukai ngelese sereta mechat kami ngena jaku, ‘Dini alai Allah Taala kita?’ ” Udah nya TUHAN lalu ngayanka Diri angkunka menua Iya. Iya kasihka bala nembiak Iya. Ku Iya nyaut sida: “Diatu Aku deka meri kita gandum, wain enggau minyak kana, lalu kita deka kenyang. Bansa bukai enda agi mechat kita. Aku deka muai bala buntak ti datai ari utara lalu muru sida ngagai menua puang. Rintai ti di mua deka diburu ngagai Tasik Mati, lalu rintai ti di belakang diburu ngagai Tasik Tengah. Bangkai sida deka bau but. Aku deka ngerusak sida ketegal semua utai ti udah dikereja sida ngagai kita. “Tanah, anang takut, tang gaga ati sereta lantang laban TUHAN udah ngereja utai ti besai! Jelu, anang takut, laban rumput nyau galak, kayu nyau bebuah, lalu buah ara enggau buah anggur nyau mayuh. “Gaga ati meh kita, orang Sion. Rami gaga ati meh kita ke TUHAN Allah Taala kita; Laban Iya udah meri kita ujan lebuh musin ruruh daun enggau lebuh musin bungai, nitihka musin sida. Pelangka deka penuh laban gandum. Ai anggur enggau minyak kana deka lilih ari pitan. Aku deka meri pulai baru ngagai kita utai ti udah lenyau ari jari kita dalam berapa taun bala buntak makai utai ti ditanam kita. Aku Empu ti udah ngasuh bala buntak nya nyerang kita. Diatu kita deka mayuh utai diempa, lalu kenyang. Kita deka muji TUHAN Allah Taala kita, ti udah ngereja utai ti badas ke kita. Bala nembiak Aku enda agi dipechat. Nya baru kita orang Israel deka nemu Aku endang begulai enggau kita lalu kita deka nemu Aku ti TUHAN, endang Allah Taala kita lalu kita nadai Allah Taala bukai. Bala nembiak Aku enda agi dipechat. “Udah nya, Aku deka nuang Roh Aku ngagai semua mensia: bala anak lelaki kita enggau anak indu kita deka madahka pesan Aku. Bala orang ke tuai deka bemimpi, lalu orang ke biak deka meda genera. Lebuh maya nya ila Aku deka mega nuang Roh Aku ngagai bala ulun ti lelaki enggau ti indu. “Aku deka meri tanda ke hari nya di langit enggau di dunya. Darah deka tetumpah, lalu api enggau asap deka pegari. Mata hari deka piam, lalu bulan deka bebali mirah baka darah sebedau Hari TUHAN ti besai sereta balat nya datai. Tang semua orang ke minta tulung TUHAN deka dilepaska. Munyi ti udah disebut TUHAN, ‘Sekeda orang di Jerusalem ulih ngerarika diri. Sida ke dipilih Aku, deka idup.’ ” Ku TUHAN bejaku, “Lebuh maya nya ila Aku deka ngasuh menua Judah enggau Jerusalem kaya-raja baru. Aku deka ngempuruka semua bansa lalu mai sida ngagai Lebak Ngakim. Dia Aku deka ngakim sida ketegal semua utai ti udah dikereja sida ngagai bala nembiak Aku, enggau ngagai pesaka Aku menua Israel, laban sida udah ngachirka orang Israel ngagai menua bukai lalu udah magi menua Aku, lalu udah bechabut undi kena nentuka sapa ti deka bempu nembiak Aku, lalu udah nyual nembiak ti lelaki kena meli indu sundal, lalu udah nyual indu kena meli wain lalu udah ngirup wain nya. “Nama utai ti dikereja nuan ngagai Aku, Tire, Sidon, enggau semua menua Pilistin? Kati kita nguji malas Aku? Enti pia, Aku deka malas penyai kita enggau jampat! Kita udah ngerampas pirak enggau emas Aku, lalu udah nabanka pengaya Aku ngagai rumah engkeramba kita. Kita udah nabanka orang Judah enggau orang Jerusalem jauh ari menua sida empu, lalu nyual sida ngagai orang Gerika. Diatu Aku deka mai sida pansut ari endur alai kita ke udah nyual sida. Aku deka ngereja ngagai kita, utai ti udah dikereja kita ngagai sida. Aku deka ngasuh bala anak lelaki enggau bala anak indu kita dijual ngagai orang Judah, lalu orang Judah deka nyual sida ngagai orang Sabian ti diau jauh. Aku ti TUHAN udah bejaku. “Sebut tu ngagai semua bansa: ‘Sedia beperang. Kangauka bala raja berani kita. Gempuruka semua soldadu kita, lalu mupuk! Tempa pengeradu tanah kita nyadi pedang enggau lungga ti dikena kita nyarau kayu nyadi sangkuh. Indah sida ke lemi deh enda tau enda belaban. Datai enggau jampat semua bansa ti ngelingi menua tu, lalu begempuru ba lebak.’ ” O TUHAN! Asuh meh bala soldadu Nuan nurun lalu nyerang sida! “Semua bansa enda tau enda sedia lalu datai ngagai Emperan Ngakim. Dia meh endur alai Aku ti TUHAN deka duduk ngakim semua bansa ti ngelingi menua tu. Sida nya bansa ti jai. Pantap sida baka ke mampat jagung lebuh maya ngetau. Anchurka sida baka ke mitan buah anggur dalam pitan ti penuh datai ke wain nyau lilih.” Beribu-ribu iku sida begempuru ba Emperan Ngakim. Nya meh endur alai Hari TUHAN deka datai enda lama da agi. Mata hari enggau bulan nyau piam, lalu bintang nadai agi manchar. TUHAN bejaku enggau nyawa ti inggar ari Bukit Sion. Nyawa Iya meletup munyi guntur pansut ari Jerusalem. Dunya enggau langit begetar. Tang TUHAN deka nyaga bala nembiak Iya. “Nya baru kita orang Israel deka nemu Aku endang TUHAN Allah Taala kita. Aku diau di Sion, bukit Aku ti kudus. Jerusalem deka nyadi nengeri ti kudus. Orang ari menua bukai enda agi ngalahka iya. Lebuh maya nya ila, bukit deka penuh laban kebun anggur, lalu jelu sapi deka ditemu ba semua munggu. Semua menua Judah deka mayuh ai. Siti sungai deka rarat ari Rumah Sembiang, lalu sungai nya deka mai ai ngagai Emperan Akasia. “Menua Ejip deka nyadi menua puang, lalu menua Edom deka nyadi tembawai ti nadai guna laban sida udah nyerang menua Judah lalu munuh orang ke nadai penyalah. Tu jaku Amos, siku pengibun bedus ari nengeri Tekoa. Dua taun sebedau tanah berenyang nyadi, lebuh Usiah nyadi raja menua Judah lalu Jeroboam anak Jehoas nyadi raja menua Israel, Allah Taala mandangka semua utai tu ngagai Amos pasal Israel. Ku Amos bejaku, “ TUHAN bejaku enggau nyawa ti inggar ari Bukit Sion. Nyawa Iya meletup ari Jerusalem. Padang rumput lalu rangkai, lalu rumput ba Bukit Karmel layu.” Ku TUHAN bejaku, “Orang Damaskus enda ngetu-ngetu bedosa, lalu ketegal nya Aku tetap deka ngukum sida. Sida balat amat merinsaka orang Giliat. Nya alai Aku deka ngirumka api ngagai istana ti udah digaga Raja Hasael, lalu Aku deka nunu semua kuta Raja Benhadat. Aku deka mechahka pintu nengeri Damaskus, lalu muai orang ke diau ba Lebak Aben, enggau pemerintah ke di Beteden. Orang Siria deka ditabanka nyadi orang tangkap ngagai menua Kir.” Ku TUHAN bejaku, “Orang Gasa enda ngetu-ngetu bedosa, lalu ketegal nya Aku tetap deka ngukum sida. Sida udah nabanka semua orang ari siti bansa, lalu nyual sida nyadi ulun ngagai orang Edom. Nya alai Aku deka ngirumka api ngagai dinding nengeri Gasa, lalu nunu semua kuta nengeri nya. Aku deka muai orang ke merintah di nengeri Asdot enggau Eskelon. Aku deka ngukum nengeri Ekron, lalu semua orang Pilistin ti agi idup deka mati magang. Ku TUHAN bejaku, “Orang Tire enda ngetu-ngetu bedosa, lalu ketegal nya Aku tetap deka ngukum sida. Sida udah nabanka semua orang ari siti bansa ngagai menua Edom, lalu sida udah mungkir ari sempekat pemaik ti udah digaga sida. Nya alai Aku deka ngirumka api ngagai dinding kuta nengeri Tire, lalu nunu semua kuta iya.” Ku TUHAN bejaku, “Orang Edom enda ngetu-ngetu bedosa, lalu ketegal nya Aku tetap deka ngukum sida. Sida udah begagaika kaban belayan sida empu, iya nya orang Israel, lalu nadai nemu kasihka sida. Pengeringat sida nadai besekat, lalu sida enda nemu badu ringat. Nya alai Aku deka ngirumka api ngagai nengeri Teman, lalu nunu semua kuta di Bosrah.” Ku TUHAN bejaku, “Orang Amon enda ngetu-ngetu bedosa, lalu ketegal nya Aku tetap deka ngukum sida, laban sida udah meruti perut indu ke ngandung di Giliat, lebuh sida beperang kena sida nambahka pemesai rampa menua sida. Nya alai Aku deka nyelup dinding kuta nengeri Rabah, lalu api nya deka makai kuta nengeri nya. Udah nya, orang deka manjung lebuh sida beperang, lalu bamuk baka kabut. Raja sida enggau bala pemesai iya deka dibuai ngagai menua bukai.” Ku TUHAN bejaku, “Orang Moap enda ngetu-ngetu bedosa, lalu ketegal nya Aku tetap deka ngukum sida. Sida enda bebasaka tulang raja menua Edom tang nunu tulang nya nyadi amau. Aku deka ngirumka api ngagai menua Moap lalu nunu semua kuta di Keriot. Orang Moap deka mati ninga munyi orang ke beperang, lebuh bala soldadu manjung lalu terumpit disepu. Aku deka munuh pemerintah ke di menua Moap enggau semua tuai menua nya.” Ku TUHAN bejaku, “Orang Judah enda ngetu-ngetu bedosa, lalu ketegal nya Aku tetap deka ngukum sida. Sida udah mechat ajar Aku, lalu enda nitihka pesan Aku. Sida udah dibai tesat ulih petara ti pelesu ke dipetuaika bala aki ini sida. Nya alai Aku deka ngirumka api ngagai menua Judah, lalu nunu kuta nengeri Jerusalem.” Ku TUHAN bejaku, “Orang Israel enda ngetu-ngetu bedosa, lalu ketegal nya Aku tetap deka ngukum sida, laban sida nyual orang ke lurus kena meli pirak, enggau nyual orang ke seranta kena meli sepasang selipar, nyadi ulun orang bukai. Sida ngindik orang ke lemi, enggau orang ke nadai daya, lalu ngejuka orang ke seranta. Anak enggau apai sama beleman enggau siku indu ke ulun, lalu ngamahka nama Aku ti kudus. Sida gali ngimbai alta belapikka kain ti nyadika gadai utang orang ke seranta, lalu dalam Rumah Sembiang Allah Taala sida ngirup wain ti udah dibeli ngena duit ukum orang ke berutang ba sida. “Tang taja pia, kita ke nembiak Aku, ketegal kita meh Aku udah ngeluska orang Amor, ti tinggi baka kayu sidar, sereta kering baka kayu oak. Aku udah mai kita pansut ari menua Ejip, nguluka kita nengah menua puang empat puluh taun, lalu meri kita menua orang Amor nyadika menua kita. Aku udah milih sekeda anak kita nyadi nabi, lalu sekeda nembiak kita nyadi Nasir. Kati nya enda pia, orang Israel? Aku ti TUHAN udah bejaku. Tang kita mejalka orang Nasir ngirup wain, lalu enda nyagi sida nabi madahka pesan Aku. Diatu Aku deka ngenyakka kita ke tanah, lalu kita deka bedemuh munyi kerita tarit ti sarat laban gandum. Indah orang ke laju belanda deh enda ulih ngerarika diri. Orang ke kering deka lembut tulang, lalu bala soldadu enda ulih ngidupka nyawa diri. Orang ke landik ngena panah deh enda ulih nanka diri. Orang ke laju belanda, enda ulih rari, lalu orang ke nepan kuda enda ulih rari ngidupka nyawa diri. Ba hari nya, indah soldadu ke pemadu berani deh deka ngelengkaka senyata sida, lalu rari.” TUHAN udah bejaku. Orang Israel, pendingka pesan tu ti udah disebut TUHAN ngelaban kita, ngelaban semua orang Israel ti udah dibai Iya pansut ari menua Ejip. “Ari semua bansa di dunya tu, semina kita aja ti udah dipilih Aku. Nya kebuah Aku deka ngukum kita ketegal semua penyai kita.” Kati dua iku orang ulih begulai bejalai enti seduai iya enda besemaya dulu? Kati singa negung sebedau iya bulih jelu? Kati anak singa merengung dalam lubang iya, enti iya apin nangkap utai? Kati burung ulih disintak panjuk, enti panjuk nya apin ditan? Kati panjuk ulih ingkas ngapa, enti utai nadai ngingkaska iya? Kati orang ke di nengeri enda takut lebuh terumpit begau disepu? Kati penusah ti besai ulih nyadi dalam nengeri, enti enda ari asuh TUHAN? TUHAN ti Pemadu Tinggi nadai kala ngereja utai ngapa enti Iya empai mandangka resia Iya dulu ngagai bala nembiak Iya, iya nya sida nabi. Lebuh singa negung, sapa enda takut? Lebuh TUHAN ti Pemadu Tinggi udah bejaku, sapa ulih nagang diri benabi? Bejaku ngagai sida ke diau di istana menua Ejip enggau di Asdot: “Begempuru ba munggu ngelingi Samaria, lalu peda pemalat penyarut enggau penyalah ti dikereja orang dia.” Ku TUHAN bejaku, “Orang tu ngisi rumah sida enggau utai ti dirampas enggau dirumpak sida. Sida enda nemu jalai idup enggau ati ti betul. Nya alai munsuh deka ngelulung menua sida, ngerusak kuta sida, lalu ngerumpak utai ari rumah sida.” Ku TUHAN bejaku, “Baka pengibun bedus ke semina ulih ngelepaska dua iti kaki, tauka siti pending bedus ari nyawa singa, baka nya meh gaya orang Israel, ke nyandih ba kerusi-panjai sida di Samaria, deka dilepaska. Ku TUHAN ti Pemadu Bekuasa bejaku, “Pendingka diatu, lalu beri jaku tangkan ngagai bala peturun Jakop: Lebuh Aku ngukum orang Israel ketegal dosa sida, Aku deka ngerusak semua alta di Betel. Sukut semua alta deka dipatahka, lalu labuh ke tanah. Aku deka ngerusak rumah ti dikena orang lebuh musin chelap enggau lebuh musin panas. Rumah ti dilagu enggau gading, deka nyadi tembawai. Semua rumah ti besai, deka dirusak magang.” Dingaka tu, kita indu Samaria ke baka sapi ti gemu di Basan, ke nekanka pengidup orang ke seranta, ke merinsaka orang ke suntuk, ke bejaku ngagai laki kita, ‘Bai utai irup kitu!’ Laban TUHAN ti Pemadu Tinggi endang kudus, nya alai Iya udah besemaya, “Maya deka datai alai sida deka ngirit kita ngena ginti. Genap iku kita deka nyadi baka ikan ti dikait ginti. Kita deka diirit ngagai lubang ti ba dinding kuta lalu dibuai ari nya ngagai Harmon,” ku TUHAN bejaku. “Datai ngagai Betel, lalu bedosa dia, ngagai Gilgal lalu tambahka dosa kita dia. Bai piring kita tiap pagi, enggau pemeri sepuluh peratus kita genap tiga hari. Beri piring terima kasih ari roti ti beragi, lalu padahka ngagai orang mayuh pasal diri ke ngenjuk piring ti diberi nitihka peneka ati diri, tuliska utai nya, laban nya utai ti dikerinduka kita orang Israel!” “Aku udah ngasuh lapar pungkang nyadi ba semua nengeri kita, tang taja pia, kita mengkang enggai mulaika diri ngagai Aku. Aku udah nagang hari ujan lebuh utai ti ditanam kita begunaka ai. Aku udah ngasuh hari ujan ba sebuah nengeri, tang nagang hari ujan ba nengeri ti bukai. Ujan labuh ba tanah umai sebelah, tang tanah umai ti bukai rangkai. Orang dalam berapa buah nengeri nyau lembut tulang laban aus, nya alai sida mansang ngagai nengeri bukai, ngarapka diri ulih tetemuka ai, tang ai dia enda chukup. Tang taja pia, kita mengkang enggai mulaika diri ngagai Aku. “Aku udah ngasuh ribut ti angat ngerangkaika utai ti ditanam kita. Buntak makai semua kebun enggau kebun anggur kita, kayu ara, enggau kayu kana kita. Tang taja pia, kita mengkang enggai mulaika diri ngagai Aku. “Aku udah ngasuh penyakit ti udu berampit nyerang kita, baka ke diasuh Aku nyadi di menua Ejip. Aku udah munuh anak bujang kita lebuh maya perang, lalu nabanka kuda kita. Aku udah ngisi idung kita enggau bau bangkai orang ke udah mati dalam kem kita. Tang taja pia, kita mengkang enggai mulaika diri ngagai Aku. “Aku udah ngerusak sekeda bala kita, baka Aku ti udah ngerusak Sodom enggau Gomorah. Kita ke mengkang idup nyau baka papung unggat ti ditarit ari api. Tang taja pia, kita mengkang enggai mulaika diri ngagai Aku,” ku TUHAN bejaku. “Nya alai, orang Israel, Aku deka ngukum kita. Lalu laban Aku deka ngukum kita, kita enda tau enda besedia betunga mua enggau Allah Taala kita, O Israel!” Allah Taala ngaga bukit lalu ngaga ribut. Iya ngasuh runding Iya ditemu mensia. Iya ngubah siang nyadi malam. Iya bejalai ba tuchung bukit di dunya tu. TUHAN Allah Taala ti Pemadu Bekuasa meh nama Iya! Orang Israel, pendingka leka sabak ti dikena aku ngenang pasal kita: Israel ti dara bungas, udah rebah, lalu enda angkat agi! Iya ditinggalka garing-garing ba tanah, lalu nadai orang ngangkatka iya. Laban ku TUHAN ti Pemadu Tinggi bejaku, “Sebuah nengeri di menua Israel ngirumka seribu iku soldadu, tang ka semina seratus iku aja ulih mulaika diri. Sebuah agi nengeri ngirumka seratus iku, tang ka semina sepuluh iku aja ulih mulaika diri.” Laban ku TUHAN bejaku ngagai orang Israel, “Datai ngagai Aku, nya baru kita idup. Anang besembah di Beer-seba. Anang nguji ngiga Aku di Betel, laban Betel deka lesap. Anang mansang ngagai Gilgal, laban orang ke diau dia deka diukum lalu dibuai ngagai menua bukai.” Datai ngagai TUHAN, nya baru kita idup. Enti kita enda datai ngagai Iya, Iya deka nurun baka api ngagai orang Israel. Api nya deka nganguska orang di Betel, lalu nadai orang ulih madamka iya. Tulah meh kita ke meri atur ti enda lurus, lalu enda begunaka pengelurus di dunya tu! TUHAN udah ngaga bintang, Bintang Tujuh enggau Bintang Banyak. Iya ngubah pemetang nyadi penampak siang hari lalu siang hari nyadi malam. Iya ngangauka ai tasik lalu mubuhka ai nya ngagai dunya. Nama Iya TUHAN. Iya ngerusak orang ke kering lalu ngerusak kuta sida. Kita begedika orang ke mantah atur ti enda lurus, lalu madahka utai ti bendar dalam kot. Kita udah nekanka pengidup orang ke seranta, lalu ngerumpak gandum ari sida. Nya alai kita enda ulih diau dalam rumah batu ti digaga kita, tauka ngirup wain ari kebun anggur ti ditanam kita. Aku nemu penyai dosa kita, enggau pemayuh penyalah ti udah dikereja kita. Kita merinsaka orang ke manah, makai suap, lalu nagang orang ke seranta bulih atur ti lurus dalam kot. Nya alai, orang ke pintar enda bemunyi lebuh maya ti baka nya! Kita patut ngereja utai ti ngena, ukai ngereja penyai, ngambika kita ulih idup. Nya baru TUHAN Allah Taala ti Pemadu Bekuasa deka meruan enggau kita, munyi ti ku kita. Begedika utai ti jai, rinduka utai ti ngena, lalu beri atur ti lurus dalam kot. Nyangka ukur TUHAN deka kasihka orang Israel ti agi idup. Nya alai ku TUHAN ti Pemadu Bekuasa bejaku, “Orang deka beterauh nyabak tusah ati ba sebelah jalai raya di nengeri. Indah orang bumai deh deka dibai, sama enggau orang ke tukang sabak, ngulitka orang ke mati. Orang deka beterauh nyabak ba semua kebun anggur. Semua utai tu deka nyadi, laban Aku deka datai ngukum kita.” TUHAN udah bejaku. Tulah meh kita ke nganti Hari TUHAN! Nama guna hari nya ba kita? Ba kita, hari nya deka nyadi hari pemetang, ukai hari penampak. Hari nya deka nyadi baka orang ke ngerarika diri ari singa, lalu besatup enggau beruang! Tauka, baka orang ke pulai ke rumah, bepegai ba dinding, lalu dipantuk ular! Hari TUHAN deka mai pemetang, ukai mai penampak. Hari nya deka piam lalu nadai penampak. Ku TUHAN bejaku, “Aku begedika gawai pengarap kita. Aku enggai meda utai nya! Lebuh kita mai piring tunu, enggau piring tepung ngagai Aku, Aku enggai nerima utai nya. Aku enggai nerima jelu ti gemu ti dienjuk kita ngagai Aku nyadika piring kita. Badu agi kita belagu. Aku enggai ninga musik belikan kita. Tang awakka atur ti lurus rarat baka ai sungai, lalu awakka pengelurus baka sungai ti enda nemu langkang. “Orang Israel, Aku nadai minta piring enggau pemeri dalam kandang empat puluh taun Aku ke nguluka kita nengah menua puang. Tang diatu, laban kita udah nyembah engkeramba Sakut, ti dikumbai kita raja, enggau Kaiwan ti petara bintang kita, kita enda tau enda mai sida lebuh Aku muai kita ngagai menua ti ngilah Damaskus,” ku TUHAN ke benama Allah Taala ti Pemadu Bekuasa bejaku. Tulah meh kita ke udah ngelantangka diri diau di Sion, enggau kita ke ngasaika diri diau likun di Samaria, kita ke tuai bansa ti besai tu, kita ke digusung orang Israel lebuh sida minta saup! Mupuk meh kita lalu peda nengeri Kalneh. Udah nya mupuk ngagai nengeri Hamat, lalu terus ngagai nengeri Gat di menua Pilistin. Kati semua nengeri nya manah agi ari menua Judah enggau menua Israel? Kati menua sida besai agi ari menua kita? Kita enda arapka hari pengerusak deka datai, tang utai ti dikereja kita semina ngasuh hari nya datai semak agi. Tulah kita, kita ke gali ngunjurka diri ba peninduk kita, bepakaika dagin rusa enggau dagin anak domba! Kita rindu ngarang lagu, baka David, lalu nebah lagu nya ngena belikan. Kita ngirup wain penuh mangkuk, lalu ngena minyak wangi ti pemadu manah bau, tang kita enda ngulitka menua Israel ti nyadi tembawai. Nya alai kita deka nyadi orang ke terubah-rubah dibuai ngagai menua bukai. Gawai enggau pengerami makai besai kita deka padam. TUHAN Allah Taala ti Pemadu Bekuasa udah meri jaku tangkan tu: “Aku begedika penyumbung orang Israel. Aku pedis ati ngagai rumah limas sida. Aku deka nyerahka indu nengeri sida, enggau semua utai dalam nengeri nya, ngagai bala munsuh.” Enti sepuluh iku lelaki agi tinggal dalam siti ruang bilik, sida deka mati. Kaban belayan orang ke mati nya, orang ke ngatur pengawa nyenggai iya, deka mai bangkai iya pansut ari rumah nya. Kaban belayan nya deka ngangauka orang ke agi idup dalam rumah nya, “Kati bisi orang enggau nuan dia?” Orang ke dalam rumah deka nyaut, “Nadai!” Udah nya kaban iya nya deka nyebut, “Anang ragak! Kitai enda tau enda bejimat. Nyebut nama TUHAN pen enda meh tau.” Lebuh TUHAN bejaku meri atur, rumah ti besai enggau ti mit deka diredakka. Kati kuda belanda ba atas batu? Kati orang kala ngeradu tasik ngena jelu sapi? Tang taja pia, kita udah nunsangka atur ti lurus lalu ngaga iya nyadi rachun, lalu utai ti ngena nyadi utai ti salah. Kita temegah madahka diri udah ngalahka nengeri Lo-debar. Ku kita temegah bejaku, “Kitai chukup kering ngalahka Karnaim.” Ku TUHAN Allah Taala ti Pemadu Bekuasa bejaku, “Kita orang Israel, Aku deka ngasuh bala soldadu ari menua bukai nguan menua kita. Sida deka nekanka pengidup kita kenyau ari Lebo-hamat di utara nyentuk ngagai Sungai Arabah di selatan.” Aku bisi siti genera ari TUHAN ti Pemadu Tinggi. Dalam genera nya aku tepedaka TUHAN nempa bala buntak lebuh rumput ti diempu raja udah dikempat, lalu rumput nya belabuh nyumbuk baru. Dalam genera nya aku tepedaka buntak makai semua utai ti tumbuh di menua nya, lalu ku aku bejaku, “ TUHAN ti Pemadu Tinggi, ampun bala nembiak Nuan! Baka ni ku jalai sida ulih idup? Sida iya mit amat sereta lemi!” TUHAN lalu ngubah runding Diri, lalu bejaku, “Utai ti dipeda nuan nya, enda nyadi.” Aku lalu bisi siti agi genera ari TUHAN ti Pemadu Tinggi. Dalam genera nya aku tepedaka TUHAN nyendiaka Diri ngukum bala nembiak Iya ngena api. Api nya nganguska tasik ti besai di baruh dunya, lalu belabuh nganguska tanah. Udah nya aku lalu bejaku, “Badu agi, O TUHAN ti Pemadu Tinggi! Baka ni ku bala Nuan ulih idup? Sida iya mit amat sereta lemi!” TUHAN lalu ngubah runding Diri baru, lalu bejaku, “Utai tu pen enda mega nyadi.” Aku bisi siti agi genera ari TUHAN. Dalam genera nya aku tepedaka TUHAN bediri ngimbai siti dinding ti udah digaga belalauka tali penyukat, lalu ba jari Iya bisi siti tali penyukat. Ku Iya nanya aku, “Amos, nama utai ti dipeda nuan?” “Tali penyukat,” ku aku nyaut. Udah nya Iya lalu bejaku, “Enggau tali tu Aku nunjukka nembiak Aku bingkuk baka dinding. Aku enggai agi ngubah runding Diri ti deka ngukum sida. Endur alai peturun Isak besembah, deka dirusak. Endur ti kuduska orang Israel, deka nyadi tembawai. Aku deka madamka peturun Raja Jeroboam. Udah nya Amasiah, ti nyadi imam di Betel, lalu madahka ngagai Jeroboam, raja menua Israel: “Amos benung bepekat enggau orang mayuh deka angkat ngelaban nuan. Utai ti disebut iya deka ngerusak menua tu. Tu utai ti disebut iya: ‘Jeroboam deka mati beperang, lalu orang Israel deka dibuai ari menua sida ngagai menua bukai.’ ” Udah nya Amasiah lalu bejaku enggau Amos, “Badu agi nuan benabi ditu! Pulai nuan ngagai menua Judah, lalu bantaika jaku ajar nuan din. Awakka sida ngupah nuan nyadi nabi. Anang agi benabi di Betel ditu. Tu palan alai raja besembah, rumah sembiang bansa.” Disaut Amos, “Aku ukai benabi ngiga upah. Aku tu pengibun bedus, lalu aku ngintu kayu ara. Tang TUHAN udah ngambi aku ari pengawa aku ke ngibun bedus, lalu ngasuh aku datai lalu benabi ngagai nembiak Iya Israel. Nya alai, diatu pendingka utai ti disebut TUHAN. Nuan ngasuh aku badu agi benabi, ngasuh aku ngetu bejaku ngelaban orang Israel. Nya alai, Amasiah, tu utai ti disebut TUHAN ngagai nuan, ‘Bini nuan deka nyadi indu sundal di nengeri tu, lalu bala anak nuan deka mati beperang. Menua nuan deka dibagi lalu diberi ngagai orang kapir, lalu nuan empu deka mati di menua orang kapir. Lalu orang Israel tetap deka dibuai ngagai menua bukai.’ ” Aku bisi siti agi genera ari TUHAN ti Pemadu Tinggi. Dalam genera nya aku tepedaka sebakul buah. Ku TUHAN nanya, “Amos, nama utai ti dipeda nuan?” “Sebakul buah,” ku aku nyaut. Ku TUHAN bejaku ngagai aku, “Pengujung udah datai ba bala nembiak Aku Israel. Aku enggai agi ngubah runding Diri ti deka ngukum sida. Ba hari nya lagu dalam istana deka bebali nyadi sabak orang ke ngulit. Bangkai mensia deka ngachir di semua endur, lalu orang enda bemunyi muai bangkai nya.” Pendingka tu, kita ke ngindik orang ke suntuk, lalu nguji ngerusak orang ke seranta di menua tu. Ku kita bejaku dalam ati diri, “Lama amat ga kitai nganti hari ti kudus tu abis, ngambika kitai ulih nyual gandum. Kemaya Hari Sabat deka abis, ngambika kitai ulih belabuh bejual baru? Nya baru kitai nyual gandum kitai ngena rega ti tinggi, ngena takar ti enda betul, lalu nginsur dachin kena ngakal orang ke meli utai. Kitai tau nyual gandum ti jai, ngena rega ti tinggi. Kitai deka ngiga orang ke seranta, ti enda ulih mayar utang diri, ti enda ulih mayar rega sepasang selipar. Udah nya kitai deka meli iya nyadika ulun kita.” TUHAN Allah Taala ke disembah orang Israel udah besumpah, “Aku deka seruran ingatka kereja sida ti jai. Nya alai tanah deka berenyang, lalu semua orang di menua tu deka tusah. Semua menua tu deka berenyang. Menua tu deka begelumbang baka Sungai Nile Maya deka datai alai Aku deka ngasuh mata hari padam lebuh tengah hari, lalu dunya petang lebuh siang hari. Aku TUHAN ti Pemadu Tinggi, udah bejaku. Aku deka ngubah gawai kita nyadi ulit, lalu ngubah lagu kita nyadi sabak tusah ati. Aku deka ngasuh kita ngukur pala diri, lalu ngasuh kita begari ngena kain guni, lalu kita deka nyadi baka apai indai ke ngulitka anak tunggal sida. Hari nya deka penuh laban penusah datai ke ujung. “Maya deka datai alai Aku deka ngasuh lapar pungkang nyadi di menua tu. Mensia deka lapar, tang ukai lapar ke pemakai. Sida deka aus, tang ukai aus ke ai. Sida deka lapar enggau aus ke pesan TUHAN. Aku TUHAN ti Pemadu Tinggi, udah bejaku. Mensia deka bejalai segau-segau ari Tasik Mati ngagai Tasik Tengah, lalu udah nya mutar ari utara ngagai timur. Sida deka ngiga pesan TUHAN di semua endur, tang sida enda tetemuka pesan nya. Lebuh hari nya, indah orang ke bujang enggau sida indu ke agi biak sereta bepengerai, deh deka luput laban aus. Sida ke besumpah atas nama engkeramba menua Samaria, lalu nyebut, ‘Dalam nama petara Dan’ tauka ‘Dalam nama petara Beer-seba’ - sida nya deka rebah lalu enda angkat agi.” Aku meda TUHAN bediri ngimbai alta. Iya meri atur tu: “Palu semua puchuk tiang Rumah Sembiang enggau naka pemalat ngambika pugu tiang berenyang. Patahka tiang nya, lalu awakka sida rebah ninggang pala mensia. Aku deka munuh sida ti bukai lebuh maya perang. Nadai siku sida ulih ngerarika diri. Nadai siku sida ulih ngidupka nyawa diri. Enti sida numbak lubang ngagai dunya pemati, Aku deka nangkap sida. Enti sida niki ke langit, Aku deka nurunka sida ari nya. Enti sida belalai ba tuchung Bukit Karmel, Aku deka ngiga sida, lalu nangkap sida. Enti sida belalai ari Aku ba buntut tasik, Aku deka ngasuh naga tasik ngigit sida. Enti sida ditangkap lalu ditabanka munsuh, Aku deka ngeletak sida dibunuh. Aku udah mutuska runding deka ngerusak sida, ukai deka nulung sida.” TUHAN ti Pemadu Bekuasa negu tanah, lalu tanah berenyang. Semua orang ke diau dia ngulit magang. Semua dunya deka begelumbang baka Sungai Nile. TUHAN ngaga rumah Iya di langit, lalu ari atas dunya Iya ngengkahka kebung langit. Iya ngangauka ai tasik lalu mubuhka sida ngagai dunya. Nama Iya TUHAN! Ku TUHAN bejaku, “Orang Israel, Aku berundingka kita baka Aku ke berundingka orang Etiopia Aku udah mai orang Pilistin ari Krit, enggau orang Siria ari Kir, baka Aku ti udah mai kita ari menua Ejip. Aku TUHAN ti Pemadu Tinggi, benung ngemataka perintah Israel ti bedosa tu, lalu Aku deka muai iya ari dunya tu. Tang Aku enda ngerusak semua peturun Jakop. “Aku deka meri atur, lalu ngusak orang Israel baka ke ngusak gandum dalam pengayak. Aku deka ngusak sida di semua bansa kena muai semua sida ke nadai guna. Bala nembiak Aku ke bedosa deka dibunuh lebuh beperang, iya nya semua sida ke nyebut, ‘Allah Taala enggai nejuka kitai bebadi.’ ” Ku TUHAN bejaku, “Hari deka datai alai Aku deka nirika perintah David baru, ti baka rumah ti udah tembawai. Aku deka ngaduka dinding iya, lalu ngaga iya baru. Aku deka ngaga iya baru baka gaya iya ti dulu kelia. Udah nya orang Israel deka ngambi teda menua Edom, enggau semua menua ti endang enggi Aku dulu menya,” ku TUHAN ti deka ngasuh utai tu nyadi bejaku. “Hari deka datai,” ku TUHAN bejaku, “alai gandum deka tumbuh jampat agi ari iya sempat diketau, lalu buah anggur deka jampat agi mansang ari iya sempat digaga nyadi wain. Wain ti manis deka beteritik ari bukit, lalu rarat ba sebelah munggu. Aku deka mai bala nembiak Aku pulai baru ngagai menua sida empu. Sida deka nirika baru nengeri sida ke udah nyadi tembawai, lalu diau dia. Sida deka nanam kebun anggur, lalu ngirup wain. Sida deka bekebun, lalu makai utai ti ditanam sida empu. Aku deka nanam bala nembiak Aku ba menua ti udah diberi Aku ngagai sida, lalu sida enda dichabut agi.” TUHAN Allah Taala kita udah bejaku. Tu jaku ti benabi ti disebut Obadiah. Iya madahka jaku TUHAN ti Pemadu Tinggi pasal orang Edom. TUHAN udah ngasuh seruan Iya bejalai ngagai mayuh bengkah bansa, lalu kami udah ninga pesan Iya: “Sedia! Aram kitai beperang ngelaban Edom!” Ku TUHAN bejaku ngagai Edom, “Aku deka ngasuh nuan lembut tulang. Semua orang deka mechat nuan. Penyumbung nuan udah nipu nuan empu. Indu nengeri nuan nya kuta ti digaga ari batu galang. Rumah nuan tinggi ba atas bukit, lalu ku nuan bejaku dalam ati diri, ‘Sapa ulih ngeruntun aku ke baruh?’ Tang taja pen nuan ngaga rumah nuan ngeninggi endur alai sarang burung menaul, datai ke iya nyau baka ke begulai enggau bintang, Aku deka ngeruntun nuan ke baruh. “Lebuh penchuri datai malam hari, sida semina ngambi utai ti dikedekaka sida. Lebuh orang ngetau buah anggur, sida selalu ninggalka sekeda buah enda diketau. Tang bala munsuh nuan udah ngeluska kita. Peturun Esau, pengaya nuan udah dirampas. Orang ke setanah enggau nuan, udah nipu nuan. Sida udah muru nuan ari menua nuan empu. Orang ke bebaik enggau nuan udah ngalahka nuan diatu. Pangan nuan ke sama makai enggau nuan, udah manjuk nuan. Ku sida bejakuka pasal nuan, ‘Kini ke tunga pemintar iya?’ “Ba hari Aku ngukum Edom, Aku deka ngerusak bala sida ke pintar lalu muai semua penemu-dalam ti dikembuan sida. Orang ke tau serang ari Teman, deka balat takut, lalu genap iku soldadu di menua Edom, deka dibunuh magang. “Laban nuan udah ngerumpak lalu munuh peturun Jakop ke endang kaban belayan nuan empu, nya alai nuan deka dirusak lalu nadai agi dibasa orang belama iya. Nuan bediri dia ngapa ba hari nya lebuh bala munsuh ngeruntuhka pintu nengeri Jerusalem. Nuan jai baka orang kampar ke nabanka pengaya Jerusalem lalu magi pengaya nya ngagai bala sida. Nuan enda patut ketawaka pemerinsa kaban belayan nuan orang Judah. Nuan enda patut gaga ati lebuh sida dirusak. Nuan enda patut ketawaka sida lebuh sida kena laban penusah. Nuan enda patut tama ngagai nengeri bala nembiak Aku lalu ketawaka pemerinsa sida sereta ngerampas pengaya sida lebuh sida ditinggang penusah. Nuan enda patut bediri ba simpang jalai raya lalu nangkap sida ke nguji ngerarika diri. Nuan enda patut nyerahka sida ngagai munsuh lebuh sida kena laban penusah. “Hari nyau semak alai Aku, ti TUHAN, deka ngakim semua bansa. Edom, utai ti udah dikereja nuan deka dikereja ngagai nuan empu. Nuan deka nerima utai ti udah diberi nuan empu. Bala nembiak Aku udah ngirup mangkuk ukum ti pait ba bukit Aku ti kudus. Tang semua bansa ti ngelingi menua nembiak Aku deka ngirup ari mangkuk ukum ti pait agi ari nya. Sida deka ngirup semua utai dalam mangkuk nya, lalu lesap. “Tang ba Bukit Sion sekeda orang ulih ngerarika diri lalu Bukit nya deka nyadi endur ti kudus. Bala peturun Jakop deka bempu menua ti endang enggi sida. Bala peturun Jakop enggau bala peturun Josep deka nyadi baka api. Sida deka ngerusak bala peturun Esau baka api ti nganguska jerami. Nadai siku peturun Esau deka mengkang idup. Aku ti TUHAN, udah bejaku. “Orang ke datai ari selatan menua Judah deka nguan menua Edom. Sida ke datai ari kaki bukit ti muak ke barat, deka ngalahka menua Pilistin. Orang Israel deka bempu menua Epraim enggau Samaria. Bala orang Benjamin deka ngambi menua Giliat. Bala orang ke udah dibuai ari utara menua Israel lalu diau di Halah deka pulai baru, lalu ngalahka menua Ponisia nyentuk ngagai Sarepat di utara. Orang ke udah dibuai ari Jerusalem, lalu diau di Sardis, deka ngalahka semua nengeri di selatan menua Judah. Orang Jerusalem ke menang deka nyerang Edom, lalu merintah menua nya. Lalu TUHAN Empu deka nyadi raja.” Nyadi sekali, TUHAN bejaku ngagai Jonah anak Amitai. Ku TUHAN bejaku, “Alai nuan mansang ngagai Nineweh, nengeri ti besai nya, lalu bejaku ngelaban nengeri nya, laban Aku nemu penyai orang di nengeri nya.” Tang Jonah mupuk ngagai endur bukai, deka ngerarika diri ari TUHAN. Iya mansang ngagai Jopa, alai iya ke tetemuka sebuah kapal ti baru deka bekejang ngagai menua Spain. Iya mayar tambang diri, lalu nepan kapal nya sama enggau bala kelasi, deka belayar ngagai menua Spain, deka ngejangka diri jauh ari TUHAN. Tang TUHAN ngasuh biaubalai mangka ba tasik nya, lalu kabut balat amat nyadi datai ke kapal nya nyau deka pechah. Bala kelasi balat amat takut, lalu rauh-rauh ngangauka petara sida minta tulung. Udah nya sida muai barang ari kapal nya, ngambika kapal sida lempung agi, Lebuh utai tu benung nyadi, Jonah udah nurun ke baruh, gali dalam ruang kapal nya, lalu tinduk jenak amat. Lebuh kepten kapal nya tetemuka Jonah, iya lalu bejaku enggau Jonah, “Nama kebuah nuan tinduk? Angkat, lalu besampi ngagai petara nuan minta iya nulung, nyangka iya deka sinu ati ke kitai, lalu enda nejuka kitai mati.” Ku bala kelasi bejaku enggau pangan diri, “Aram kita bechabut undi kena ngiga sapa ke ngasuh kitai ditinggang penusah tu.” Sida lalu bechabut undi, lalu nama Jonah kena chabut. Nya alai sida lalu bejaku enggau iya, “Padahka ngagai kami diatu, sapa ke patut diukum ketegal utai tu? Nama kebuah nuan ditu? Datai ari ni nuan? Nama bansa nuan?” “Aku tu orang Hebrew,” ku Jonah nyaut. “Aku nyembah TUHAN Allah Taala ti di serega, ke ngaga tanah enggau tasik.” Jonah lalu madahka ngagai sida pasal iya ke rari ari TUHAN. Bala kelasi lalu balat amat takut, lalu ku sida bejaku enggau iya, “Utai ti dikereja nuan nya amat jai!” Kabut nyau majak balat-sebalat. Nya alai bala kelasi lalu nanya iya, “Nama utai ti patut dikereja kami ngagai nuan kena ngasuh kabut tu teduh?” Ku Jonah nyaut, “Buai aku ke tasik, nya baru tasik deka teduh, laban aku nemu, kita dipangkaka kabut tu ketegal penyalah aku.” Tang bala kelasi nguji mai kapal nya ke tebing, bedayung enggau naka pemendar sida. Tang kabut nya majak balat-sebalat, lalu sida enda ulih ngampir ngagai tebing. Nya alai sida nyabak ngangauka TUHAN, “O TUHAN, kami besampi, anang ngukum kami ketegal kami munuh orang tu! Nuan, O TUHAN, endang betanggungjawapka semua utai tu. Utai tu endang dikereja Nuan Empu.” Udah nya sida lalu nanggung Jonah, lalu muai iya ngagai tasik. Tasik lalu tekala nya teduh. Bala kelasi lalu balat amat takutka TUHAN, datai ke sida nyau meri siti piring, lalu besemaya deka betuaika Iya. TUHAN lalu ngasuh siku ikan ti besai nelan Jonah, lalu Jonah mengkang dalam perut ikan nya tiga hari tiga malam. Jonah lalu besampi dalam perut ikan nya ngagai TUHAN Allah Taala iya: “Lebuh aku tusah, O TUHAN, aku ngangauka Nuan, lalu Nuan nyaut aku. Ari dunya pemati aku nyabak minta Nuan nulung, lalu Nuan ninga aku. Nuan nikauka aku ngagai tasik nyentuk ngagai tengah tasik, lalu aku dikelingi ai, lalu semua gelumbang Nuan ti besai ngelamun aku. Aku ngumbai diri udah dibuai ari Nuan lalu nadai agi meda Rumah Sembiang ti kudus. Ai ngelamun aku lalu ngasuh aku enda ulih enseput. Tasik ngelamun aku lalu rumput tasik melit pala aku. Aku tengelam terus ngagai pugu bukit ngagai menua ti bisi pintu ti dikunchi belama iya. Tang Nuan, O TUHAN Allah Taala aku, mai aku pulai baru idup-idup ari tasik. Lebuh aku ngasaika nyawa diri nyau deka apus, aku lalu besampi ngagai Nuan, O TUHAN, lalu dalam Rumah Nuan ti kudus, nuan ninga aku. Orang ke nyembah engkeramba ti nadai guna udah ngelengkaka penaluk sida ke Nuan. Tang aku deka belagu muji Nuan. Aku deka ngenjuk piring ngagai Nuan lalu ngereja utai ti udah disemaya aku. Pengelepas endang datai ari TUHAN!” Udah nya TUHAN lalu bejaku ngagai ikan nya. Ikan nya lalu ngeluaka Jonah ba tebing tasik. TUHAN lalu bejaku ngagai Jonah baru. Ku Iya, “Alai nuan mansang ngagai Nineweh, nengeri ti besai nya, lalu padahka ngagai orang dia pesan ti udah dipadahka Aku ngagai nuan.” Nya alai Jonah ngasika TUHAN, lalu mansang ngagai nengeri Nineweh. Nengeri nya besai amat, pejalai tiga hari ari tisi sepiak ngagai tisi sepiak. Jonah lalu belabuh bejalai nengah nengeri nya, lalu lebuh iya udah bejalai sehari, iya lalu bejaku enggau orang dia madahka pesan TUHAN, “Dalam empat puluh hari da agi nengeri Nineweh deka dirusak!” Orang Nineweh arapka pesan Allah Taala. Nya alai sida lalu mutuska penemu ngasuh semua orang bepasa, lalu semua orang, berengkah ari orang ke pemadu tinggi pangkat nyentuk ngagai orang ke pemadu baruh pangkat, bela ngerasukka kain guni kena sida nunjukka diri udah nesal ati. Lebuh raja nengeri Nineweh ninga pasal utai nya, iya lalu angkat ari kerusi diraja iya, muka baju panjai iya, ngerasukka kain guni, lalu duduk malai amau. Iya ngirumka atur ngagai orang di Nineweh: “Tu atur ari raja, enggau ari bala pemesai iya: Nadai mensia, tauka jelu, tauka raban bedus, tau makai utai. Sida enda tau makai tauka ngirup. Semua mensia enggau jelu enda tau enda ngerasukka kain guni. Semua orang enda tau enda bebendar besampi ngagai Allah Taala, lalu enda tau enda muai ulah ti jai, lalu badu agi mangah enggau orang. Nyangka ukur Allah Taala deka ngubah runding Diri, lalu badu agi ringat, ngambika kitai enda mati!” Allah Taala meda utai ti dikereja sida. Iya meda sida udah ngelengkaka ulah sida ke jai. Nya alai Iya ngubah runding Diri, lalu enda nyadi ngukum sida. Tang Jonah balat amat enda lantang ati meda nya, lalu iya ringat. Nya alai iya besampi, “ TUHAN, kati aku nadai udah nyebut, sebedau aku angkat ari rumah, madahka Nuan endang deka ngereja utai nya? Nya kebuah aku enggau naka ulih rari ngagai menua Spain! Aku nemu Nuan endang Allah Taala ti penuh laban pengerindu enggau pengasih, seruran liat ati, seruran nelap, lalu seruran sedia deka ngubah runding Diri, lalu enda nyadi ngukum. Nya alai, awakka aku mati, TUHAN. Manah agi aku mati ari ke idup.” Ku TUHAN nyaut, “Nuan enda patut ringat.” Jonah pansut ari nengeri nya tunga ke timur, lalu duduk. Iya ngaga siti dunju, lalu duduk belindung dalam dunju nya, deka meda utai ti deka nyadi ba nengeri nya. Udah nya TUHAN Allah Taala ngasuh sepun kayu tumbuh ngelindung Jonah, ngambika iya nyamai agi pendiau. Jonah gaga amat ati meda kayu nya. Tang ba urung dini hari pagi siti, Allah Taala ngasuh siku ulat nyerang kayu nya, lalu kayu nya mati. Lebuh mata hari nyau udah niki, Allah Taala lalu ngasuh ribut ti angat muput ari timur, lalu Jonah nyau deka luput laban mata hari ti manchar ngagai pala iya. Nya alai iya ngajihka diri mati. “Manah agi aku mati, ari ke idup,” ku iya bejaku. Tang ku Allah Taala bejaku ngagai iya, “Nuan enda patut ringat ketegal kayu nya.” Disaut Jonah, “Aku endang patut ringat, chukup balat ringat!” Ku TUHAN bejaku ngagai iya, “Kayu nya tumbuh dalam semalam, lalu lesap hari siti. Nuan nadai ngereja utai ngagai kayu nya, lalu nuan nadai ngasuh iya tumbuh, tang taja pia nuan tusah ati ke kayu nya! Nya alai Aku patut lebih agi kasihka nengeri Nineweh ti besai nya, laban nengeri nya bisi 120,000 iku anak mit ti nadai nemu utai, nyengkaum mayuh bala jelu!” Lebuh maya Jotam, Ahas, enggau Hesekiah nyadi raja menua Judah, TUHAN meri pesan tu ngagai Mikah, ke datai ari nengeri Moreset. TUHAN mandangka ngagai Mikah semua utai tu pasal Samaria enggau Jerusalem. Dingaka utai tu, semua bansa. Pendingka tu, semua kita ke diau di dunya! TUHAN, Raja ti Pemadu Tinggi deka besaksi ngelaban kita. Iya bejaku ari Rumah Sembiang Iya ti di serega. TUHAN deka datai ari endur Iya ti kudus. Iya deka nurun lalu bejalai ba tuchung bukit. Udah nya bukit deka luluh di baruh Iya baka lilin ti luluh laban api. Sida deka rarat ngagai lebak baka ai ti nurun bukit. Semua utai tu deka nyadi laban orang Israel udah bedosa lalu angkat ngelaban Allah Taala. Sapa ke patut dianu ketegal orang Israel angkat ngelaban? Samaria, indu nengeri nya empu! Sapa ke salah laban sida besembahka engkeramba di menua Judah? Jerusalem empu! Nya alai TUHAN bejaku, “Aku deka ngaga Samaria nyadi tembawai di menua pesisir, nyadi endur alai nanam anggur. Aku deka mubuhka tugung batu nengeri nya ngagai lebak, lalu deka ngerumbak pugu nengeri nya. Semua engkeramba ti dikesayauka orang di nengeri nya deka dipechahka magang, lalu semua utai ti diberi ngagai indu ke nyundal dalam rumah sembiang engkeramba nya, deka dirusak ngena api, lalu semua anak patung di nengeri nya deka ditugungka nyadi uras. Samaria udah bulih utai tu kena sida besembiang minta diri peridi, lalu diatu munsuh sida deka nabanka utai nya ngagai bala indu ke nyundal dalam rumah sembiang di menua bukai. Ketegal utai tu, aku deka ngulit sereta nyabak. Aku deka bejalai enda bekasut sereta telanjai. Aku deka meraung munyi ukui kampung, lalu ngulit baka burung unta. Bakal Samaria enda ulih suman, lalu Judah baru deka natka diri merinsa baka nya mega. Pengerusak udah datai ba pintu besai nengeri Jerusalem empu, ti alai bala nembiak Aku diau.” Anang madahka ngagai bala munsuh kitai di Gat pasal kitai ke alah. Anang nejuka sida meda kita nyabak. Kita orang Bet-le-aprah, baringka diri malai amau kena kita ngayanka diri tusah ati! Kita orang Sapir, alai kita mindah ngagai menua bukai, telanjai sereta malu. Sida ke diau di Sanan enda berani pansut ari nengeri sida. Lebuh kita ninga orang di Bet-esel ngulit, kita deka nemu diri enda ulih ngenduh di nengeri nya. Orang di Marot irau ati nganti bantu, laban TUHAN udah ngasuh penusah ti besai datai semak ngagai Jerusalem. Kita ti diau di Lakis, tanchangka kuda ngagai kerita perang kita. Kita udah bedosa nunda orang Israel, lalu ngasuh Jerusalem bedosa. Diatu, kita orang Judah, beri selamat tinggal ngagai nengeri Moreset Gat. Bala raja orang Israel nadai bulih tulung ari nengeri Aksip. Kita ke di Maresah, TUHAN deka nyerahka kita ngagai munsuh, ti deka ngalahka nengeri kita. Bala tuai orang Israel deka rari lalu belalai dalam lubang gua di Adulam. Kita orang Judah, kukur buk kita kena nandaka diri ngulitka anak ke dikerinduka kita. Kukur abis lengis buk kita baka pala burung ti bepakaika bangkai, laban anak kita deka dirampas ari kita, lalu ditabanka ngagai menua bukai. Tulah meh orang ke gali enda tinduk berundingka jalai ngereja penyai! Lebuh hari nyau tawas, lebuh sida bisi peluang, sida lalu ngereja penyai ti udah diperambu sida. Lebuh sida inginka tanah orang, sida ngerampas tanah nya. Lebuh sida inginka rumah orang, sida ngerampas rumah nya. Nadai ruang bilik, tauka reta tengkira ti likun. Nya alai TUHAN bejaku, “Aku berunding deka ngasuh penusah ti besai ninggang kita, lalu kita enda ulih ngerarika diri. Kita deka nemu diri tusah. Nya baru kita enda ngenyumbungka diri agi. Lebuh maya nya ila, orang deka ngena cherita pasal kita ke ditinggang penusah nyadika leka jaku sumpah, lalu sida deka belagu ngena lagu sinu ati tu kena sida ngenang pasal utai ti udah diasaika kita: Kami udah abis rusak! TUHAN udah ngerampas tanah kami Lalu udah meri tanah nya ngagai orang ke nangkap kami.” Nya alai, lebuh maya tanah nya dipulaika baru ngagai bala nembiak TUHAN, kita nadai ungkup. Ku orang mayuh ngajar aku, “Anang ngajar kami. Anang ngajar pasal utai nya. Allah Taala sigi enda mechat kami. Kati nuan ngumbai orang Israel kena tinggang sumpah? Kati TUHAN enda agi liat ati? Kati Iya amat deka ngereja utai nya? Kati Iya enda nelap lebuh Iya bejaku ngagai orang ke ngereja utai ti ngena?” Ku TUHAN nyaut, “Kita nyerang bala nembiak Aku baka munsuh. Orang ke pulai ngayau ngumbai diri likun di rumah, tang kita bisi dia, deka ngenchuri baju sida. Kita muru bala bini nembiak Aku ari rumah ti dikesayauka sida, lalu kita udah ngerumpak berekat ti udah diberi Aku ngagai bala anak sida belama iya. Angkat meh kita lalu mupuk. Kita nadai agi pengelikun ditu. Dosa kita udah ngasuh endur tu dirusak. “Orang tu begunaka nabi ke bejalai mai pemula enggau ati ti nipu, ke nyebut, ‘Aku benabi madahka kita deka mayuh wain enggau ai ti bisa.’ “Tang Aku deka ngempuruka kita, semua kita orang Israel ti agi tinggal. Aku deka ngempuruka kita baka bedus ti pulai baru ngagai raban sida empu. Baka padang rumput ti penuh laban bedus, baka nya meh menua kita deka penuh baru laban mensia.” Allah Taala deka muka jalai ke sida, lalu nguluka sida pulai ari menua bukai. Sida deka ngebuka diri pansut nengah pintu nengeri, lalu ngelepaska diri. Raja sida, iya nya TUHAN Empu, deka nguluka sida pansut. Pendingka tu, kita ke merintah orang Israel! Kita udah dikarapka meri atur ti lurus, tang kita begedika utai ti badas, lalu rinduka utai ti jai. Kita niti kulit bala nembiak Aku idup-idup, lalu nyarikka isi ari tulang sida. Kita bepakaika bala nembiak Aku. Kita niti kulit sida, matahka tulang sida, lalu netak sida baka ke netak dagin ti deka dipanduk. Maya deka datai alai kita deka nyabak ngangauka TUHAN, tang Iya enggai nyaut kita. Iya enggai mendingka sampi kita, laban kita udah ngereja penyai. Bala nembiak Aku ditipu bala nabi ke madahka sida deka diau dalam pemaik enti sida meri nabi nya duit, tang deka nyerang sida, enti sida enda meri duit ngagai sida nabi nya. “Nabi, timpuh kita nyau deka abis. Hari kita nyau deka malam. Laban kita udah nesatka bala nembiak Aku, kita nadai agi begenera, lalu kita enda ulih nujum agi.” Sida ke nujum, deka malu laban sida enda ulih nujum agi. Semua sida deka malu magang, laban Allah Taala enda nyaut sida. Tang ba pasal aku empu, TUHAN ngemenuhka aku enggau Roh sereta enggau kuasa Iya, lalu Iya meri aku ati ti lurus enggau pemerani kena aku madahka dosa orang Israel. Pendingka aku, kita ke merintah orang Israel, kita ke begedika atur ti lurus, lalu nyarutka utai ti ngena nyadi salah. Kita nirika nengeri Allah Taala, Jerusalem, beduduk ba pengawa kita ke bebunuhka orang enggau ba atur ti enda lurus. Orang ke merintah di nengeri tu megai perintah laban sida deka makai suap. Sida imam minta upah lebuh sida nerangka Adat, lalu sida nabi minta duit lebuh sida madahka pemandang sida empu, lalu semua sida nya bela madahka TUHAN bisi enggau sida. Ku sida, “Kitai enda bebadi, laban TUHAN bisi enggau kitai.” Nya alai, ketegal kita, Sion deka dichangkul baka tanah umai. Jerusalem deka nyadi tembawai, lalu Rumah Sembiang deka nyadi utan. Jemah ila bukit ti alai Rumah Sembiang bediri deka nyadi bukit ti pemadu tinggi, ti ngayung semua bukit. Mayuh bengkah bansa deka beterudus datai ngagai iya, lalu bala orang ari semua bansa deka nyebut, “Aram kitai niki ngagai bukit TUHAN, ngagai Rumah Sembiang Allah Taala ke disembah orang Israel. Iya deka ngajar kitai utai ti diasuh Iya kereja kitai. Kitai deka bejalai nengah jalai ti udah dipilih Iya. Laban ajar TUHAN deka datai ari Jerusalem. Iya bejaku ngagai bala nembiak Iya ari Sion.” Iya deka ngatur laya entara semua bansa, entara menua ti bekuasa, ti semak enggau ti jauh. Sida deka nempa pedang sida nyadika pengeradu tanah lalu sangkuh sida digaga nyadika duku kena nyarau dan kayu. Semua bansa enda agi beperang, lalu nadai agi nyendiaka diri beperang. Semua orang deka diau bebaik enggau pangan diri ba sebelah kebun anggur enggau ba madang kayu ara sida, lalu nadai agi orang deka ngemba sida. TUHAN ti Pemadu Bekuasa udah besemayaka utai tu. Genap bengkah bansa deka nyembah sereta ngasika petara sida empu, tang kitai deka nyembah sereta ngasika TUHAN Allah Taala kitai belama lama iya. Ku TUHAN bejaku, “Maya deka datai alai Aku deka ngempuruka bala orang ke udah diukum Aku, sida ke udah merinsa dibuai ngagai menua bukai. Sida iya kait-kupit sereta jauh ari menua diri, tang Aku deka ngepunka bansa ti baru ngena sida ke agi idup tu, lalu sida deka nyadi bansa ti kering. Aku deka merintah sida ba Bukit Sion berengkah ari maya nya datai ke belama lama iya.” Lalu nuan, Jerusalem, ti alai Allah Taala ngibun bala nembiak Iya, baka pengibun bedus ke nilik ari menara iya, nuan deka sekali agi nyadi indu nengeri ke perintah ti endang enggi nuan menya. Nama kebuah nuan duie-duie nyabak? Nama kebuah nuan pedis baka indu ke radai deka beranak? Laban nuan nadai raja, lalu bala penyanding penemu nuan semua udah mati magang? Ngelingkang sereta bedemuh meh kita orang Jerusalem, baka indu ke radai deka beranak, laban diatu kita deka angkat ari nengeri tu, lalu diau di menua pesisir. Kita deka mupuk ngagai menua Babilon, tang din TUHAN deka ngelepaska kita ari munsuh kita. Mayuh bengkah bansa udah begempuru deka nyerang nuan, Jerusalem. Ku sida, “Jerusalem enda tau enda dirusak! Kitai deka ngaga nengeri nya nyadi tembawai!” Tang semua bansa nya enda nemu utai ti dalam runding TUHAN. Sida enda nemu diri udah digempuruka lalu diukum, baka gandum ti dibai ari umai lalu ditungku. Ku TUHAN bejaku, “Kita orang Jerusalem, mansang kita lalu ukum bala munsuh kita! Aku deka ngasuh kita kering baka sapi ti lelaki ti bisi tanduk besi, sereta betunjingka temaga. Kita deka ngeredakka mayuh bengkah bansa, lalu pengaya ti udah dirampas sida, deka diserahka kita ngagai Aku ti TUHAN ke semua dunya.” Orang Jerusalem, gempuruka bala soldadu kita! Kitai tu dikelulung munsuh! Sida nyerang tuai orang Israel! Ku TUHAN bejaku, “Betlehem Epratah, nuan suku raban bansa ti pemadu mit ari peturun Judah, tang ari nuan Aku deka mansutka siku pemerintah ke orang Israel, ari peturun orang ke dulu kelia.” Nya alai TUHAN deka nejuka bala nembiak Iya diperintah munsuh sida, nyentuk ngagai maya indu ke deka beranak nya udah ngadaka anak lelaki iya. Udah nya, orang Israel ti udah dibuai ngagai menua bukai, deka pulai baru ngagai bala sida empu. Lebuh pemerintah nya datai, iya deka merintah bala nembiak iya ngena kuasa ti datai ari TUHAN, sereta enggau mulia TUHAN Allah Taala empu. Bala nembiak iya deka diau likun, laban semua mensia di serata dunya deka ngaku iya endang besai kuasa, lalu iya deka mai pemaik. Lebuh orang Asiria nyerang menua kitai, lalu ngelanggar kuta kitai, kitai deka ngasuh bala tuai kitai ke pemadu kering ngelaban sida. Ngena senyata sida, sida deka ngalahka menua Asiria, iya nya menua Nimrot, lalu sida deka ngelepaska kitai ari orang Asiria lebuh orang Asiria nyerang menua kitai. Orang Israel ti agi idup deka nyadi baka ambun ti ngasuh nyamai isi, ti dikirumka TUHAN ngagai mayuh bengkah bansa, baka ujan ti beberis ninggang utai ti tumbuh. Sida deka manggaika pengarap sida ba Allah Taala, ukai ba mensia. Sida ke tinggal dalam mayuh bengkah menua, deka nyadi baka singa ti begigaka pemakai dalam utan, tauka ba padang rumput. Iya tama ngagai raban bedus, nerekam sida, lalu nyarikka sida, lalu nadai orang ngelepaska sida. Israel deka ngalahka bala munsuh iya, lalu ngerusak semua sida. Ku TUHAN bejaku, “Lebuh maya nya ila, Aku deka munuh kuda kita lalu ngerusak kerita perang kita. Aku deka ngerusak nengeri di menua kita, lalu ngeruntuhka semua kuta kita. Aku deka muai pengaruh kita, lalu muai semua orang ke betilitka nasit. Aku deka ngerusak engkeramba enggau tiang batu keramat kita. Kita enda agi nyembah utai ti udah digaga kita empu. Aku deka numbangka engkeramba petara indu Aserah di menua kita, lalu ngerusak nengeri kita. Lalu laban Aku balat ringat, Aku deka malas penyai semua bansa ti enda ngasika Aku.” Pendingka pekara ti dibantaika TUHAN kena Iya ngelaban orang Israel. Angkat meh Nuan, O TUHAN, lalu bantaika pekara ti dibai Nuan. Awakka bukit enggau munggu ninga utai ti disebut Nuan. Kita bukit, kita pugu dunya ti meruan belama iya, pendingka pekara ti dibantaika TUHAN! TUHAN bisi pekara kena Iya ngelaban bala nembiak Iya. Iya deka besalah orang Israel. Ku TUHAN bejaku, “Nembiak Aku, nama utai ti udah dikereja Aku ba kita? Baka ni ku Aku udah nating kita? Saut Aku. Aku udah mai kita pansut ari menua Ejip. Aku udah ngelepaska kita ari pengidup kita ke nyadi ulun. Aku udah ngasuh Moses, Aron, enggau Miriam nguluka kita. Nembiak Aku, kingatka utai ti deka dikereja Raja Balak menua Moap ngagai kita, enggau chara Balaam anak Beor nyaut iya. Kingatka utai ti nyadi di rantau jalai ari kem di Akasia ngagai Gilgal. Kingatka semua utai nya, nya baru kita deka nemu utai ti udah dikereja Aku kena Aku ngidupka kita.” Nama utai ti deka dibai aku ngagai TUHAN Allah Taala ti di serega, lebuh aku datai nyembah Iya? Kati aku patut mai anak jelu sapi ti pemadu gemu nyadika piring tunu? Kati TUHAN deka gaga ati enti aku mai ngagai Iya seribu iku bedus, tauka minyak kana ti enda nemu abis? Kati aku patut meri ngagai Iya anak tuai aku, kena aku nebus dosa aku? Enda. TUHAN udah madahka ngagai kitai utai ti manah. Utai ti diguna Iya ari kitai nya baka tu: ngereja utai ti lurus, seruran ngayanka pengerindu, lalu diau begulai sejalai enggau Allah Taala kitai enggau ati ti baruh. Kitai pintar enti kitai nangika TUHAN. Ku Iya ngangau ngagai nengeri, “Pendingka tu, kita ke begelumu di nengeri! Dalam rumah orang ke jai, bisi pengaya ti udah ulih sida nipu. Sida ngena takar ti enda betul. Tu utai ti dipegedika Aku. Baka ni ku Aku ulih ngampun orang ke ngena takar enggau timbang ti enda betul? Orang ke kaya ngambi ulih ba orang ke seranta, lalu semua kita endang orang ke bula. Nya alai Aku udah ngepunka pengawa ngerusak kita, ketegal dosa kita. Kita makai, tang enda nemu kenyang. Iya ti bendar, kita agi lapar. Kita deka nabanka utai, tang kita enda ulih nyimpan utai nya. Sebarang utai ti disimpan kita deka dirusak Aku lebuh maya perang. Kita deka nanam gandum, tang kita nadai utai diketau. Kita deka mitan buah kana ngulihka minyak, tang kita nadai peluang ngena minyak nya. Kita deka ngaga wain, tang kita enda ngirup wain nya. Utai tu deka nyadi laban kita udah ngereja utai ti jai nunda Raja Omri enggau anak lelaki iya, Raja Ahap. Kita udah majak nitihka atur seduai iya, nya alai Aku deka ngerusak kita, lalu semua orang deka ngeleseka kita. Orang di semua endur deka mechat kita.” Nadai penyadi meh aku tu! Aku nyau baka orang ke lapar, ti nadai tetemuka buah ba kayu ara, lalu nadai tetemuka buah ba batang anggur. Semua buah anggur enggau semua buah ara ti nyamai diempa, udah digumpul orang magang. Siku pen nadai ga orang ke lurus ati agi tinggal di menua tu, nadai siku ke taluk ngagai Allah Taala. Genap iku orang bela nganti peluang bebunuhka orang. Genap iku orang bela ngasu bala diri empu. Semua sida bela landik magang ngereja penyai. Bala pemesai enggau bala hakim makai suap. Orang ke bekuasa madahka utai ti dikedekaka sida, nya alai sida bepekat enggau pangan diri. Indah orang ke pemadu betul ati dalam bala sida, deh nyadi orang ke nadai guna baka rumput. Maya udah datai alai Allah Taala deka ngukum orang mayuh, nitihka jaku tangkan ti udah diberi Iya nengah bala nabi ke ngibun sida. Diatu runding sida charut. Anang arapka utai ti disebut orang ke berimbai pendiau enggau kita, tauka ngarapka pangan kita. Bejimat kita lebuh kita nyebut utai, nemuka ngagai laki tauka ngagai bini kita. Lebuh maya nya ila, anak lelaki enda bebasaka apai sida, anak indu deka ngelaban indai sida, lalu indu ke biak belaya enggau mentua indu sida. Orang ke nyadi munsuh kita nya kita sebilik empu. Tang aku deka nganti TUHAN. Aku deka nganti Allah Taala enggau penuh pengarap. Iya deka ngelepaska aku. Allah Taala aku deka ninga aku. Munsuh kitai nadai kebuah ketawaka kitai. Kitai udah rebah, tang kitai deka angkat baru. Diatu kitai amat diau dalam petang, tang TUHAN deka meri kitai penampak. Kitai udah bedosa ngelaban TUHAN, nya alai diatu kitai enda tau enda tan ngasaika pengeringat Iya enda lama. Tang ba pengujung iya ila, Iya deka bejaku ngarika kitai, lalu ngaduka semua utai ti salah ti udah dikereja orang ngagai kitai. Iya deka mai kitai pansut ngagai penampak. Kitai deka mengkang idup lalu meda Iya ngelepaska kitai. Nya baru munsuh kitai deka meda nya, lalu berasai malu, iya nya bala munsuh ti udah mechat kitai ngena jaku, “Dini alai TUHAN Allah Taala kita?” Kitai deka meda bala munsuh kitai alah, dilunjak baka tanah luchak ba jalai raya. Orang Jerusalem, maya deka datai alai kita patut nirika kuta nengeri tu baru. Lebuh maya nya ila rampa menua kita deka ngerembai besai agi. Bala kita deka pulai baru ngagai kita ari semua endur - ari Asiria di timur, ari Ejip di selatan, ari menua ti ngelingi Sungai Eupratis, ari tasik luar, enggau ari bukit ti jauh. Tang dunya deka nyadi menua puang, ketegal penyai orang ke nguan iya. Awakka Nuan TUHAN nyadika pengibun bala nembiak Nuan, ti udah dipilih Nuan. Taja pen sida diau jauh ari pangan diri di menua puang, sida dikelingi tanah ti ami. Awakka sida mupuk lalu ngulam ba padang rumput ti galak di Basan enggau di Giliat, baka ke udah dikereja sida dulu kelia. Gaga meh kereja ajih ke kami, TUHAN, baka ke udah dikereja Nuan lebuh Nuan mai kami pansut ari menua Ejip. Semua bansa deka meda nya, lalu tusah ati, taja pen sida kering. Enggau ati ti tusah, sida deka nutup mulut sida lalu mampul pending sida. Sida deka nilat amau baka ular. Sida deka datai ari kuta sida, getar-getar takut. Enggau ati ti nangi sida deka nguingka diri ngagai TUHAN Allah Taala kitai. Nadai petara bukai ti sebaka enggau Nuan, O TUHAN. Nuan ngampun dosa bala nembiak Nuan ti agi idup. Nuan enda ringat belama iya, tang Nuan gaga ati ngayanka pengerindu Nuan ti meruan ngagai kami. Nuan deka kasihka kami baru. Nuan deka ngelunjak dosa kami, lalu muai dosa kami ngagai buntut tasik! Nuan deka ngayanka penetap ati Nuan, enggau pengerindu Nuan ti meruan, ngagai bala nembiak Nuan, iya nya peturun Abraham enggau Jakop, munyi ti udah disemaya Nuan ngagai bala aki ini kami dulu kelia. Tu pesan pasal Nineweh, cherita pasal genera ti dipeda Nahum ke datai ari Elkos. TUHAN nya Allah Taala ti ngiga balas. TUHAN malas sereta ringat. TUHAN malas munsuh Iya lalu ringat ngagai bala munsuh Iya. TUHAN enda mudah ringat, tang besai kuasa lalu nadai kala enda ngukum orang ke salah. Di sebarang endur alai TUHAN bejalai, biaubalai nyadi. Mua hari nya amau ti tekebu laban kaki Iya! Iya ngerara tasik, lalu tasik rangkai! Iya ngerangkaika semua sungai. Rumput di Basan enggau di Karmel layu, lalu bungai di Lebanon lesap magang. Bukit berenyang di mua TUHAN. Munggu lela di mua Iya. Tanah, dunya enggau semua mensia di dunya getar-getar magang lebuh TUHAN ngayanka Diri. Sapa ulih natka pengeringat TUHAN? Sapa tan ngasaika pengeringat Iya? Iya mubuhka pengeringat iya baka api. Batu besepur nyadi amau di mua Iya. TUHAN endang manah, nyadi kuta lebuh maya penusah. Iya nyaga orang ke ngenduh ba Iya. Iya ngena ai bah ngerusak semua munsuh Iya. Iya ngagai munuh Iya lalu munuh sida ba endur ti petang. Nama kebuah kita bepekat ngelaban TUHAN? Iya deka ngerusak kita. Nadai orang ulih ngelaban Iya lebih ari sekali. Sida tusut baka balun duri, mabuk baka orang ke mabuk; sida deka ditunu baka rumput ti rangkai. Ari nuan, Nineweh, siku orang udah pansut. Iya penuh laban akal ti jai, lalu iya bepekat ngelaban TUHAN. Tu utai ti disebut TUHAN ngagai bala nembiak Iya Israel: “Taja pen orang Asiria kering sereta mayuh tubuh, sida deka dirusak lalu lesap. Nembiak Aku, Aku udah merinsaka kita, tang Aku enda agi merinsaka kita. Diatu Aku deka madamka kuasa Asiria ti merintah kita, lalu mutuska rantai ti nanchang kita.” Tu atur ti udah diletak TUHAN pasal orang Asiria: “Sida nadai peturun nampung nama sida. Aku deka ngerusak engkeramba ti dalam rumah sembiang petara sida. Aku benung nyendiaka kubur ke orang Asiria, laban sida sigi enda patut idup!” Peda nyin, siku seruan datai nengah bukit mai berita ti manah! Iya benung di rantau jalai deka madahka pasal pemenang! Orang Judah, begawai meh kita, lalu beri ngagai Allah Taala utai ti udah disemaya kita ngena sumpah. Orang ke jai enda agi nyerang menua kita. Sida udah abis dirusak! Nineweh, nuan diatu benung diserang! Kuasa ti deka ngerusak nuan, udah datai. Tanka kuta! Jaga jalai raya! Sediaka diri empu beperang! ( TUHAN baru deka mulaika mulia ngagai Israel, baka mulia iya ti dulu menya sebedau bala munsuh ngerumpak iya.) Bala munsuh mai terabai ti mirah lalu sida ngena pekayan ti mirah. Sida sedia deka nyerang! Kerita perang sida bekilap baka api! Kuda sida seruran deka belanda! Kerita perang laju nengah jalai raya, laju amat kia-kia nengah padang ba sebelah nengeri. Sida baka sempun lalu bejalai kin kitu baka kilat. Bala pemesai dikangauka. Sida tesangkut lebuh sida mansang ke mua. Bala penyerang belanda mansang semak ngagai kuta lalu ngaga utai kena nerabai batang kayu ti dikena ngentung pintu kuta. Tekat sungai lalu tebuka. Semua orang di istana lalu balat amat takut. Kuin lalu ditangkap. Bala orang gaji iya bedemuh munyi burung achang lalu mandam dada diri. Baka ai ti pansut ari tekat ti pechah baka nya meh orang mayuh belanda pansut ari Nineweh! “Ngetu! Ngetu!” ku orang ngangau. Tang nadai siku orang nikal. Rampas perengka pirak! Rampas perengka emas! Nengeri nya penuh laban pengaya! Nineweh udah rusak, ditinggalka mensia, nadai orang nguan! Ati nyau anchur laban takut. Patung nyau getar-getar, nadai agi pengering, mua nyau puchat. Dini alai nengeri nya diatu ti udah baka lubang singa, endur alai anak singa makai, endur ti digusung singa, enggau singa ti indu endur alai anak sida diau likun? Singa munuh jelu ti deka diempa iya lalu nyarikka jelu nya ke bini iya enggau ke anak iya. Iya ngisi lubang iya enggau dagin ti udah dicharikka iya. “Aku ngelaban kita!” ku TUHAN ti Pemadu Bekuasa bejaku. “Aku deka nunu kerita perang kita. Bala soldadu kita deka mati beperang, lalu Aku deka ngerampas semua utai ti udah dirampas kita ari orang bukai. Peminta bala pengari kita, nadai agi didinga.” Tulah meh nengeri ti bula nya, ti bebunuhka orang, nengeri ti penuh laban pengaya ti deka dirampas sereta dirumpak! Pendingka munyi embat penyipat kuda, munyi guru kaki kerita, munyi redup kaki kuda, munyi rentak kerita perang! Bala soldadu ke nepan kuda nyerang, pedang enggau sangkuh bekilap! Tinggi amat tugung bangkai mensia, bangkai ti enda ulih diitung. Orang nyau tesangkut ba bangkai nya! Indu sundal ke benama Nineweh nya benung diukum. Ngena gamal iya ti manah, enggau jayau iya, iya ngulihka mayuh bengkah bansa lalu ngaga sida nyadi ulun iya. Ku TUHAN ti Pemadu Bekuasa bejaku, “Aku deka ngukum nuan, Nineweh! Aku deka nelanjaika nuan lalu ngasuh semua bansa meda nuan, meda pemalu nuan. Aku deka ngeleseka nuan lalu mukung nuan ngena utai ti kamah. Orang deka melut mata geli meda nuan. Semua orang ke meda nuan deka nyurutka diri. Sida deka bejaku munyi tu, “Nineweh udah nyadi tembawai! Sapa deka sinu ati ke iya? Sapa deka merindang iya?’ ” Nineweh, kati nuan manah agi ari Tebes, indu nengeri menua Ejip? Iya pen bisi mega sungai kena iya nyaga diri baka kuta. Sungai Nile nya meh kuta iya. Iya merintah menua Etiopia enggau menua Ejip. Kuasa iya endang nadai sekat. Libia setanah enggau iya. Tang taja pia, orang Tebes udah dibuai ngagai menua bukai. Bala anak sida dipalu datai ke mati ba semua sukut jalai raya. Orang ke tinggi pangkat ditanchang ngena rantai, dibagi lalu ditabanka bala orang ke udah nangkap sida. Nineweh, nuan mega deka mabuk! Nuan empu deka mega nguji ngerarika diri ari bala munsuh nuan. Semua kuta nuan deka nyadi baka kayu ara, ti benung mansau buah. Enti kayu nya diguyat, buah iya deka labuh terus ngagai nyawa nuan! Bala soldadu nuan nadai daya agi, lalu menua nuan nadai dijaga ari munsuh nuan. Api deka ngerusak alang pintu nengeri nuan. Sauk ai kena nyendiaka diri dikelulung munsuh, lalu gaga tegap agi kuta nuan! Lunjak tanah liat kena ngaga batu bata, lalu sediaka chuan! Enda ngira nama utai ti dikereja nuan, agi meh nuan deka ditunu datai ke mati, tauka dibunuh lebuh beperang. Nuan deka lus baka utai tanam ti diempa buntak. Nuan udah beranak betelesak baka buntak! Nembiak nuan ke bedagang nyau mayuh agi ari bintang ti di langit! Tang diatu sida nadai agi, baka buntak ti ngerembaika sayap lalu terebai ngagai endur bukai. Bala pemesai nuan baka bala buntak ti ngenduh dalam dinding lebuh hari chelap. Tang lebuh mata hari niki, sida terebai ngagai endur bukai, lalu nadai orang nemu tunga sida terebai! Raja Besai menua Asiria, bala tuan gabenor nuan udah mati, lalu bala pemesai nuan nyau tinduk belama iya! Bala nembiak nuan udah ngachir ba sebelah bukit, lalu nadai orang mai sida pulai. Telih nuan nadai utai kena ngubat, lalu bakal nuan enda ulih suman. Semua orang ke ninga berita pasal nuan ke rusak, nempapka jari gaga ati. Kati orang bisi udah ulih ngerarika diri ari ke diperinsaka nuan? Tu pesan ti dipadahka TUHAN ngagai nabi Habakuk. O TUHAN, ni pengelama aku enda tau enda ngangau minta tulung, baru Nuan deka mending, lalu ngelepaska kami ari orang ke mangah tu? Nama kebuah Nuan ngasuh aku meda penyalah enggau penusah ti baka tu? Baka ni ku Nuan tan meda penyalah ti baka tu? Aku dikelingi pengerusak enggau penusah, lalu orang belaban sereta belaya. Adat enda terit sereta nadai guna, lalu atur ti lurus endang enda kala dipejalaika. Orang ke jai ngelingi orang ke lurus. Nya alai atur ti lurus ditunsangka magang. Udah nya TUHAN lalu bejaku ngagai bala nembiak Iya, “Peratika semua bansa ti ngelingi kita. Kita deka tekenyit ati ke utai ti dipeda kita, laban Aku deka ngereja siti utai lebuh rambau kita, ti mar dikarapka kita enti utai nya dipadahka ngagai kita. Aku ngasuh orang Babilon, orang ke mangah sereta enda nemu jenuh nya, megai kuasa. Sida bejalai ngagai semua endur di dunya tu ngalahka menua bukai. Sida ngasuh orang nangi sereta takut, lalu ari penyumbung sida, sida ngumbai semua utai ti dikereja sida ngena magang. “Kuda sida laju agi ari engkuli, mangah agi ari ukui kampung ti lapar. Bala soldadu sida ke nepan kuda, datai ari menua ti jauh. Kuda sida ngerumbak tanah. Sida nyambar, baka menaul ti nyambarka utai ti deka diempa sida. “Bala soldadu sida nyerang lalu ngalah, lalu semua orang bela takut magang lebuh sida datai. Orang ke ditangkap sida ngemayuh igi pasir. Sida enda bebasaka raja, lalu ngeleseka bala pemesai. Nadai kuta ulih mempang sida. Sida nugungka tanah ba tisi kuta, lalu ngalahka kuta nya. Udah nya sida majakka pejalai sida baka ribut. Kuasa sida empu nyadika petara sida.” TUHAN, kenyau ari pun, Nuan endang Allah Taala. Nuan Allah Taala aku. Nuan kudus sereta meruan belama iya. TUHAN Allah Taala enggau Penyaga aku, Nuan udah milih orang Babilon, lalu ngasuh sida kering ngambika sida ulih ngukum kami. Tang baka ni ku Nuan tan meda orang ke aum-juak, ti jai tu? Mata Nuan kelalu kudus merening ngagai penyai, lalu Nuan enda tan meda orang ngereja penyalah. Nya alai, nama kebuah Nuan enda bemunyi lebuh sida ngerusak orang ke lurus agi ari sida? Baka ni ku Nuan ngaga mensia baka ke enggau ikan, tauka enggau bala indu utai ti nadai raja? Orang Babilon nangkap orang ngena ginti baka ke nangkap ikan. Sida ngirit orang ngena jala, lalu manjung gaga ati ke orang ke ditangkap sida! Indah pukat sida deh abis disembah sida, lalu sida ngenjuk piring ngagai pukat sida, laban pukat sida nya meri sida utai ti pemadu manah. Kati sida deka ngena pedang sida belama iya, lalu majak ngerusak semua bansa bukai enggau nadai pengasih? Aku deka niki menara ti alai aku jaga, lalu nganti TUHAN madahka ngagai aku utai ti deka diasuh Iya sebut aku, enggau saut ari Iya pasal serebana aku. Ku TUHAN nyaut aku: “Tuliska enggau terang ba batu-tulis utai ti dipadahka Aku ngagai nuan, ngambika utai nya nyamai dibacha. Tuliska utai nya, laban utai nya apin dikamatka diatu. Tang maya deka datai enda lama da agi, alai utai ti dipadahka Aku ngagai nuan, deka dikamatka. Utai nya baka ke lubah nyadi, tang anti aja utai nya. Iya tetap deka nyadi, lalu iya enda masau jam. Tu pesan nya: ‘Orang ke jai enda ulih idup, tang orang ke lurus deka idup ngena pengarap sida.’ ” Pengaya nemu nipu. Orang ke amu endang sumbung sereta kasak-kasak, enda nemu puas ati baka pemati. Nya kebuah sida ngalahka menua siti lalu udah nya ngalahka menua siti. Orang ke dialahka sida deka ngeleseka sida. Ku orang ke dialahka sida bejaku, “Kita ngerampas utai orang, tang kita deka tulah! Ni pengelama kita deka ngiga pengaya mejalka orang mayar utang sida?” Tang sebedau kita nemu diri, kita ke udah ngalahka orang bukai, deka mega berutang lalu dipejalka mayar anak duit nya. Munsuh deka datai, lalu kita getar-getar. Sida deka ngerumpak utai kita! Kita udah ngerumpak utai orang ari mayuh bengkah bansa, tang diatu sida ke agi idup deka ngerumpak utai kita, laban kita udah munuh orang, laban kita udah kasar enggau orang di dunya tu, sereta kasar enggau nengeri sida. Tulah meh kita ke udah ngaga ruang bilik kita kaya-raja ngena utai ti dirampas kita, lalu kita udah nguji ngaga rumah kita likun ari utai ti tau nganu! Tang pelan kita udah ngemaluka ruang bilik kita. Pengawa kita ke ngerusak mayuh bengkah bansa, deka ngerusak kita empu. Indah batu ti dikena ngaga kuta deh nemu nyabak ngelaban kita, lalu kasau ngelembungka sabak nya. Tulah meh orang ke nirika nengeri beduduk ba penyalah, lalu ngaga nengeri nya beduduk ba pengawa kita ke bebunuhka orang. Bansa ti dialahka kita ngelelakka diri ngereja pengawa ti nadai guna, lalu semua utai ti udah digaga sida abis retung diempa api. TUHAN ti Pemadu Bekuasa Empu ti udah ngereja nya. Tang dunya deka penuh laban penemu pasal mulia TUHAN, baka tasik ti penuh laban ai. Tulah meh kita ke ngemalu sereta ngeleseka pangan lebuh kita ringat; kita ngasuh sida guir-guir baka ke mabuk, ngambika kita ulih meda sida telanjai. Kita empu deka dikeleseka, ukai dibasa. Kita empu deka ngirup lalu guir-guir. TUHAN deka ngasuh kita ngirup mangkuk ukum kita empu, lalu kita deka dipechat, enda dibasa agi. Kita udah berimba utan di menua Lebanon. Diatu kita empu deka ditebang. Kita udah bebunuhka jelu dalam utan nya. Diatu jelu babas deka ngemba kita. Utai nya deka nyadi laban kita udah bebunuhka orang, enggau laban kita udah kasar enggau mensia di dunya tu, sereta kasar enggau nengeri sida. Nama guna engkeramba? Engkeramba nya semina utai ti digaga mensia, lalu iya nadai madahka utai bukai, tang semina pemula aja. Nama penguntung orang ke ngaga engkeramba enti iya manggaika pengarap iya ba petara ti enda nemu bejaku! Tulah meh kita ke bejaku ngagai repik kayu, “Dani!” tauka bejaku ngagai tekang batu, “Angkat!” Kati engkeramba ulih mandangka utai ngagai kita? Iya nyangka abis dibalut pirak enggau emas, tang iya nadai seput. Tang TUHAN diau dalam Rumah Sembiang Iya ti kudus. Awakka semua mensia di dunya tu diau enda engkeretik di mua Iya. Tu sampi nabi Habakuk: O TUHAN, aku bisi udah ninga pasal utai ti udah dikereja Nuan lalu aku nangi. Diatu kereja baru ba rambau kami tu utai ti udah dikereja Nuan dulu menya. Kasihka kami, taja pen Nuan ringat. Allah Taala datai baru ari Edom. Allah Taala ti kudus datai ari munggu di menua Paran. Mulia Iya ngemenuhka langit, lalu dunya penuh laban jaku puji ke Iya. Iya datai tampak baka kilat. Penampak bepijar pansut ari jari Iya. Dia meh endur alai kuasa Iya dilalaika. Iya ngasuh penyakit bejalai dulu ari Iya lalu Iya ngasuh pemati ngentudika Iya. Lebuh Iya ngetu, tanah berenyang. Lebuh Iya merening sekejap aja, semua bansa getar-getar. Bukit ti meruan belama iya diredakka. Munggu ti meruan belama iya, tengelam, munggu ti udah alai Iya bejalai dulu kelia. Aku meda orang Kusan takut lalu orang Media getar-getar. TUHAN, kati Nuan pedis ati ngagai sungai? Tauka Nuan ringat ngagai sungai, tauka Nuan ringat ngagai tasik, lebuh Nuan nepan kuda enggau kerita perang Nuan mai pemenang? Nuan ngedarka panah Nuan, sedia deka nimbakka laja Nuan. Nuan melah tanah ngena sungai. Bukit tepedaka Nuan lalu sida getar-getar. Ai tebubuh ari langit. Ai ti di baruh dunya beguntam, lalu gelumbang ti besai nyadi. Mata hari enggau bulan enda engkebut lebuh panah Nuan beperenching mansa, lebuh sangkuh Nuan bekilap. Nuan bejalai nengah dunya mai pengeringat. Nuan ngeransi lalu ngelunjak mayuh bengkah bansa. Nuan datai laban Nuan deka ngelepaska bala nembiak Nuan, deka ngelepaska raja ti udah dipilih Nuan. Nuan mumpung pala tuai orang ke jai lalu ngeluska semua orang ke nitihka iya. Laja Nuan ngebuska tuai soldadu iya lebuh laja nya datai baka kabut ti deka mambarka kami, ketawaka kami baka sida ke belalai nekanka pengidup orang ke seranta. Nuan ngelunjak tasik ngena kuda Nuan lalu ai tasik bepupu. Aku ninga semua utai nya, lalu aku getar-getar. Mulut aku nyau getar-getar laban aku takut. Tubuh aku lemi, lalu kaki aku jelepi. Aku enda engkeretik nganti Allah Taala ngukum sida ke nyerang kami. Taja pen kayu ara nadai bebuah lalu buah anggur nadai tumbuh ba batang iya, taja pen buah kana enda lekat lalu umai gandum nadai mansutka asil, taja pen semua bedus abis mati lalu bansal sapi puang, aku deka mengkang gaga ati sereta lantang laban TUHAN endang Juruselamat aku. TUHAN ti Pemadu Tinggi meri aku pengering. Iya ngasuh aku laju baka rusa lalu ngasuh aku diau likun ba sebelah bukit. Tu pesan ti diberi TUHAN ngagai Sepaniah lebuh Josiah anak Amon nyadi raja menua Judah. (Sepaniah datai ari peturun Raja Hesekiah, nengah Amariah, Gedaliah, enggau Kusi.) Ku TUHAN bejaku, “Aku deka ngerusak semua utai di dunya, semua mensia enggau jelu, burung enggau ikan. Aku deka ngalahka orang ke jai. Aku deka ngerusak semua mensia, lalu nadai siku sida agi idup. Aku ti TUHAN, udah bejaku. “Aku deka ngukum orang Jerusalem enggau semua orang di menua Judah. Aku deka ngerusak semua pengawa ti besembahka Baal ba endur nya, lalu orang nadai agi ingatka bala imam ke bekereja ke Baal. Aku deka ngerusak semua orang ke niki ngagai perabung rumah lalu nyembah mata hari, bulan, enggau bintang. Aku deka mega ngerusak orang ke nyembah Aku madahka diri deka taluk ngagai Aku, tang udah nya besumpah ngena nama petara Molek. Aku deka ngerusak sida ke nikal lalu enda agi nitihka Aku, sida ke enda datai ngagai Aku tauka enda minta iring Aku.” Hari nyau semak alai TUHAN deka ngakim. Nya alai anang engkeretik di mua Iya. TUHAN sedia deka ngaga bala nembiak Iya nyadika piring, lalu Iya udah ngasuh bala munsuh datai lalu ngerumpak menua Judah. “Ba hari sida disayat,” ku TUHAN bejaku, “Aku deka ngukum bala pemesai, bala anak lelaki raja, enggau semua orang ke nitihka adat asal orang bansa bukai. Aku deka ngukum semua orang ke besembah baka orang bansa bukai, ke ngenchuri sereta bebunuhka orang laban sida ingin deka ngisi rumah tuan sida enggau perapasan. “Ba hari nya ila,” ku TUHAN bejaku, “kita deka ninga munyi nyawa orang ke nyabak ba Pintu Ikan di Jerusalem. Kita deka ninga munyi orang ke nyabak ba endur ti baru digaga di Jerusalem, enggau munyi utai ti merentum ba sebelah bukit. Nyabak duie-duie meh kita lebuh kita ninga nya, kita ke diau ba endur ti baruh di nengeri nya, laban semua orang dagang kita mati magang! “Lebuh maya nya ila Aku deka mai lampu, lalu begigaka orang di serata nengeri Jerusalem, lalu Aku deka ngukum orang ke puas ati enggau diri empu, sereta arapka diri empu, ke bejaku dalam ati diri, ‘ TUHAN enda ngereja utai ti manah tauka utai ti jai.’ Pengaya sida deka dirumpak, lalu rumah sida dirusak. Sida enda agi diau dalam rumah ti digaga sida empu, tauka ngirup wain ari kebun anggur ti ditanam sida empu.” Hari TUHAN nyau semak - semak amat lalu deka datai enggau jampat! Hari nya deka balat ngenakutka datai ke soldadu ke pemadu berani deh deka nyabak tusah ati! Hari nya deka nyadi hari alai ngeransi, hari penusah enggau pemerinsa, hari pengerusak, hari ti petang, hari ti petang laban mua hari, hari ti penuh laban munyi terumpit orang ke beperang, enggau munyi panjung bala soldadu ke nyerang nengeri ti bekuta, enggau menara ti tinggi. Ku TUHAN bejaku, “Aku deka ngasuh penusah ti besai ninggang semua mensia, datai ke semua orang deka begama bejalai baka orang ke buta. Sida udah bedosa ngelaban Aku, lalu diatu darah sida deka dibubuhka baka ai, lalu bangkai sida deka betegaring but ba tanah.” Lebuh TUHAN ngeransi, indah semua pirak enggau emas sida deh enda ulih ngelepaska sida. Semua dunya deka dirusak api pengeringat TUHAN. Iya deka ngenyit ngeluska semua mensia ti diau di dunya. Kita bansa ti enda nemu malu, begempuru kita. Begempuru, sebedau kita dibuai kebukai baka ampa ti dikebuka ribut, sebedau pengeringat TUHAN ninggang kita, sebedau hari alai Iya ngayanka Diri ngeransi. Kuingka diri ngagai TUHAN, semua kita ke baruh ati, ti diau di menua tu, ke ngasika pesan Iya. Kereja utai ti ngena, lalu diau enggau ati ti baruh di mua TUHAN. Nyangka ukur kita enda diukum lebuh TUHAN ngayanka pengeringat Iya. Orang di Gasa nadai agi idup. Askelon nadai agi diuan mensia. Dalam setengah hari aja semua orang di nengeri Asdot deka abis diburu, lalu orang ke diau di Ekron deka diburu ari nengeri sida. Tulah meh kita orang Pilistin ke diau ba sebelah tebing tasik. TUHAN udah ngeletak ukum atas kita. Iya deka ngerusak kita, lalu nadai siku kita deka idup. Menua kita ke ba tebing tasik, deka nyadi padang, lalu langkau bala pengibun bedus enggau kandang bedus deka bisi dia. Orang Judah ti agi idup, deka nguan menua kita. Sida deka ngasuh jelu bedus sida ngulam dia, lalu sida deka tinduk dalam rumah orang di Askelon. TUHAN Allah Taala sida deka begulai enggau sida, lalu ngasuh sida nyadi kaya-raja baru. Ku TUHAN ti Pemadu Bekuasa bejaku, “Aku udah ninga orang Moap enggau orang Amon mechat sereta ngeleseka nembiak Aku, lalu temegah madahka diri deka ngerampas menua sida. Dalam nama Aku TUHAN ti idup, ti Allah Taala ke disembah orang Israel, Aku besumpah madahka Moap enggau Amon deka dirusak baka Sodom enggau Gomorah. Menua dua bengkah nya deka nyadi endur alai lubang garam, nyadi tembawai belama iya, dibap rumput. Bala nembiak Aku ti agi idup, deka ngerumpak sida lalu ngambi menua sida.” Nya meh jalai orang Moap enggau orang Amon deka diukum ketegal sida sumbung, tinggi ati, lalu mechat bala nembiak TUHAN ti Pemadu Bekuasa. TUHAN deka ngemba sida. Iya deka ngerusak semua petara dunya. Nya baru semua bansa deka nyembah TUHAN di menua sida empu. TUHAN deka mega munuh orang Etiopia. TUHAN deka ngerusak menua Asiria ngena kuasa Iya. Iya deka ngaga nengeri Nineweh nyadi tembawai ti nadai diuan mensia, nyadi menua puang ti nadai ai. Nineweh deka nyadi endur alai raban bedus, enggau semua macham jelu bukai gali. Burung puk deka diau ba tembawai nengeri nya, lalu bemunyi ari lubang jenila. Burung kak deka bemunyi ari tangga. Kayu sidar ti dikena ngaga rumah di nengeri nya deka diambi orang. Nya meh utai ti deka nyadi ba nengeri nya, ti balat temegahka kuasa diri lalu ngumbai diri likun. Orang ke diau di nengeri nya ngumbai nengeri sida nengeri ti pemadu besai di dunya tu. Tang iya deka nyadi endur ti enda agi diuan mensia, lalu nyadi endur alai jelu belelak! Semua orang ke mansa deka geli ke iya lalu nyurutka diri. Tulah meh nengeri Jerusalem ti jai, ti angkat ngelaban, ti nekanka pengidup bala nembiak iya. Iya enda mendingka TUHAN, tauka nerima disiplin ari Iya. Iya enda manggaika pengarap iya ba TUHAN, tauka minta saup ari Iya. Bala pemesai iya baka singa ti negung. Bala hakim iya baka ukui kampung ti lapar, kelalu bam lalu enggai ngelengkaka tulang nyentuk ngagai pagi. Bala nabi enda nemu betanggungjawap; sida aum-juak. Bala imam ngamahka utai ti kudus, lalu nyarutka Adat Allah Taala kena sida ngambi ulih ba orang. Tang TUHAN agi di nengeri nya. Iya ngereja utai ti lurus, lalu nadai kala ngereja utai ti salah. Enda kala ngelaung sepagi, Iya mai atur ti lurus ngagai nembiak Iya. Tang taja pia, orang ke enda lurus di nengeri nya majak ngereja utai ti salah, lalu enda nemu malu. Ku TUHAN bejaku, “Aku udah ngeluska mayuh bengkah bansa. Aku udah ngerusak nengeri sida lalu ngaga kuta enggau menara sida nyadi tembawai. Semua nengeri nadai agi diuan mensia. Jalai raya nadai agi orang nengah. Nadai siku orang ke agi idup. Ku pikir Aku, nya baru bala nembiak Aku deka bebasaka Aku, lalu nerima disiplin ari Aku, lalu sida deka seruran ingatka pelajar ti udah diajar Aku ngagai sida. Tang enda lama udah bekau nya, sida lalu ngereja penyai baka selama. “Anti aja,” ku TUHAN bejaku. “Anti aja hari Aku angkat besalah semua bansa. Aku udah mutuska runding deka ngempuruka semua bansa enggau menua ngambika sida ngasaika pengeringat Aku. Semua dunya tu deka dirusak api pengeringat Aku. “Udah nya Aku deka ngubah jaku semua mensia ari semua bansa, lalu sida deka besampi ngagai Aku siku aja, ukai besampi ngagai petara bukai. Semua sida deka ngasika Aku magang. Indah bala nembiak Aku ke ngachir di menua Etiopia ti jauh deh deka datai mai pemeri ngagai Aku. Lebuh maya nya ila, kita ke nembiak Aku, enda ibuh malu ke diri ti udah angkat ngelaban Aku. Aku deka muai semua orang ke sumbung sereta tinggi ati, lalu kita enda agi angkat ngelaban Aku ba Bukit Aku ti kudus. Aku deka nejuka orang ke baruh ati, ke baruh pendiau, ti deka datai ngagai Aku minta saup, diau dia. Orang Israel ti agi idup enda ngereja utai ti salah ngagai orang, enda nusui utai ti bula, tauka nguji nipu orang. Sida deka nyadi kaya-raja sereta diau likun, nadai takutka orang.” Belagu lalu manjung gaga ati meh kita orang Israel! Rami gaga ati enggau pengabis ati, meh nuan Jerusalem! TUHAN udah badu ngukum nuan. Iya udah muai semua munsuh nuan. TUHAN ti Raja orang Israel, bisi enggau nuan. Nuan nadai agi kebuah takut. Maya deka datai alai orang deka nyebut ngagai Jerusalem, “Anang takut, O Sion! Anang lembut tulang! TUHAN Allah Taala nuan bisi enggau nuan. Kuasa Iya ngasuh nuan menang. TUHAN deka gaga ati ke nuan, lalu ulih pengerindu Iya, Iya deka meri nuan pengidup ti baru. Iya deka belagu, lalu gaga ati ke nuan, baka orang ke rami gaga lebuh maya gawai.” Ku TUHAN bejaku, “Aku udah badu ngemba madahka Diri deka ngukum nuan lalu udah muai pemalu nuan. Maya deka datai alai Aku deka ngukum orang ke udah nekanka pengidup nuan. Aku deka ngelepaska semua orang ke enda ulih bejalai lalu mai pulai baru semua orang ke udah dibuai ngagai menua bukai. Aku deka ngalihka pemalu sida nyadi basa, lalu semua dunya deka muji sida. Maya deka datai alai Aku deka mai bala nembiak nuan ke pambar pendiau pulai baru. Aku deka ngasuh nuan tampak nama di serata dunya lalu ngasuh nuan nyadi kaya-raja baru.” TUHAN udah bejaku. Kena satu hari bulan ti keenam, kedua taun Darius nyadi raja besai menua Persia, TUHAN bejaku ngena nabi Hagai. Pesan nya diberi ngagai tuan gabenor menua Judah, Serubabel anak Sealtiel, enggau ngagai Imam Besai Josua anak Jehosadak. Ku TUHAN ti Pemadu Bekuasa bejaku ngagai Hagai, “Orang tu ngumbai tu ukai maya ti ngena alai ngaga Rumah Sembiang baru.” TUHAN lalu bejaku ngena nabi Hagai ngagai orang mayuh, ku Iya: “Nembiak Aku, nama kebuah kita diau dalam rumah ti manah, tang nejuka Rumah Aku tembawai? Kati kita enda meda utai ti nyadi ba kita diatu? Utai ti ditanam kita amat mayuh, tang kita enda bulih ngetau. Kita makai, tang pemakai kita enda kala chukup. Kita ngirup, tang kita enda kala chukup utai diirup! Kita ngena gari, tang kita agi tekangkang chelap. Kita bekereja ngulihka gaji, tang kita nyimpan gaji nya dalam kambut ti pesuk. Kati kita enda nemu kebuah utai tu nyadi? Alai kita mansang ngagai bukit, beramu, lalu gaga baru Rumah Sembiang. Nya baru Aku deka gaga ati, lalu disembah nitihka chara Aku patut disembah. “Kita ngarapka diri bulih mayuh utai, tang kita bulih ka semina mimit aja. Lalu lebuh kita mai utai nya ke rumah, Aku ngebuka utai nya kebukai. Nama kebuah? Laban Rumah Aku agi tembawai, tang kita kiruh begagaka rumah ke diri empu. Nya kebuah hari enda ujan, lalu utai enda tumbuh. Lalu Aku udah ngasuh kemarau nyadi di menua tu, ba sebelah bukit, ba umai gandum, ba kebun anggur enggau ba kebun buah kana, ba semua utai ti tumbuh, ba mensia enggau jelu, enggau ba semua pengawa ti dikereja kita.” Udah nya Serubabel seduai Josua enggau semua orang mayuh ti udah pulai ari menua Babilon, ngereja utai ti diasuh TUHAN Allah Taala sida. Sida nangika TUHAN lalu ngasika nabi Hagai, ti nyadi seruan TUHAN. Udah nya Hagai meri pesan TUHAN ngagai orang mayuh: “Aku deka meruan enggau kita - nya meh semaya Aku.” TUHAN lalu ngerak ati semua orang ngasuh sida bekereja ngaga Rumah Sembiang: Serubabel ti nyadi tuan gabenor menua Judah, Josua ti nyadi Imam Besai, enggau semua orang mayuh ti udah pulai ari menua Babilon. Sida belabuh gawa ngaga Rumah TUHAN ti Pemadu Bekuasa ti Allah Taala sida kena dua puluh empat hari bulan ti keenam, kedua taun Darius nyadi raja. Kena dua puluh satu hari bulan ti ketujuh taun nya, TUHAN bejaku baru ngagai nabi Hagai, ku Iya: Sebut ngagai Serubabel, tuan gabenor menua Judah, enggau ngagai Josua ti nyadi Imam Besai, enggau ngagai orang mayuh, munyi tu, “Kati kita ingatka gaya pemanah Rumah Sembiang ti dulu menya? Baka ni ku gaya Rumah Sembiang nya ba mata kita diatu? Iya baka ke nadai gaya. Tang kita enda tau lemi semengat. Kereja aja pengawa kita, laban Aku bisi enggau kita. Lebuh kita pansut ari menua Ejip, Aku udah besemaya deka meruan enggau kita. Diatu Aku agi meruan enggau kita, nya alai anang takut. “Enda lama da agi Aku deka ngusak langit enggau dunya, tanah enggau tasik. Aku deka ngusak semua bansa, lalu semua pengaya sida deka dibai kitu magang, lalu Rumah Sembiang deka penuh laban pengaya. Semua pirak enggau emas di dunya tu endang enggi Aku magang. Rumah Sembiang ti baru nya deka manah agi ari gaya Rumah Sembiang ti dulu menya, lalu dia meh endur alai Aku deka meri pengaya enggau pemaik ngagai bala nembiak Aku.” TUHAN ti Pemadu Bekuasa udah bejaku. Kena dua puluh empat hari bulan ti kesemilan kedua taun Darius nyadi raja, TUHAN ti Pemadu Bekuasa bejaku baru ngagai nabi Hagai. Ku Iya, “Pinta pemutus penemu ari bala iman ba pekara tu: ‘Enti orang ngambi dagin ti udah diserahka ngagai TUHAN, lalu ngandut dagin nya ngena baju panjai iya, lalu baju nya tekindaska roti tauka pemakai ti udah dipanduk, tauka wain, tauka minyak, tauka sebarang macham pemakai, kati utai ti kena kindas nya tau nyadi kudus?’ ” Sida imam lalu nyaut, “Enda.” Udah nya Hagai lalu nanya baru, “Enti sema orang nyadi kamah laban iya udah teteguka bangkai, lalu udah nya iya teteguka pemakai, kati nya tau ngasuh pemakai nya kamah?” Ku sida imam nyaut, “Tau.” Udah nya ku Hagai bejaku, “Nya meh utai ti deka nyadi ba orang ari bansa tu, ku TUHAN bejaku. Semua utai ti dikereja kita, enggau semua piring ti diberi kita, kamah magang.” Ku TUHAN bejaku, “Kati kita enda nemu utai ti udah nyadi ba kita? Sebedau kita belabuh ngaga Rumah Sembiang, kita mansang ngagai tugung gandum, ngarapka diri deka tetemuka 200 kilogram gandum, tang kita semina tetemuka 100 kilogram aja. Kita mansang deka ngauk 100 liter wain ari tajau, tang kita semina tetemuka 40 liter aja. Aku ngasuh ribut ti angat enggau ujan batu ngerusak semua utai ti ditanam kita, tang kita mengkang enggai nesal ati. Sehari tu, kena dua puluh empat hari bulan ti kesemilan, batu pemun Rumah Sembiang tembu didudukka. Peda kita utai ti deka nyadi berengkah ari diatu. Taja pen gandum nyau abis, lalu batang anggur, kayu kana, kayu delima, enggau kayu ara kita apin bebuah, tang berengkah ari diatu Aku deka merekatka kita.” Kena dua puluh empat hari bulan nya, TUHAN meri pesan ti kedua ngagai Hagai: “Padahka ngagai Serubabel, tuan gabenor menua Judah, Aku baru deka ngusak langit enggau dunya, lalu muai perintah, lalu ngerusak kuasa sida. Aku deka nungkupka kerita perang enggau orang ke nepan sida. Kuda deka mati, lalu orang ke nepan sida deka bebunuhka pangan diri. Ba hari nya ila Aku deka mai nuan Serubabel ke nembiak Aku, lalu Aku deka milih nuan merintah dalam nama Aku, laban Aku udah milih nuan, ku TUHAN ti Pemadu Bekuasa bejaku. Dalam bulan ti kelapan, kedua taun Darius nyadi raja besai menua Persia, TUHAN meri pesan tu ngagai nabi Sekariah anak Berekiah, uchu Ido. Ku Iya bejaku, “ TUHAN udah balat amat ringat ngagai bala aki ini kita. Nya alai sebut ngagai sida: Ku TUHAN ti Pemadu Bekuasa bejaku: Pulai baru ngagai Aku, lalu Aku deka pulai baru ngagai kita. Anang baka aki ini kita. Dulu kelia bala nabi meri sida pesan, nagang sida ngereja penyai, ngambika sida enda agi bedosa. Tang sida enggai mending tauka ngasika Aku, ku TUHAN bejaku. Dini alai bala aki ini kita diatu? Kati bala sida nabi idup belama iya? Tang jaku enggau adat Aku, ti udah diberi Aku ngena bala nembiak Aku, iya nya bala sida nabi, udah nyadi ba sida. Nya alai sida nesal ati lalu bejaku, “ TUHAN ti Pemadu Bekuasa, udah ngukum kitai setipak enggau penyalah kitai, nitihka pelan Iya.” Kena dua puluh empat hari bulan ti kesebelas (bulan Sebat), kedua taun Darius nyadi raja, TUHAN meri ngagai aku siti pesan dalam genera lebuh malam hari. Dalam genera malam nya aku tepedaka siku orang nepan kuda ti mirah. Iya udah ngetu ba madang kayu maitel ba siti lebak, lalu iya dititihka kuda ti bukai - kuda ti mirah, ti belang, enggau ti burak. Aku lalu nanya, “Tuan, nama utai nya?” Ku melikat ke bejaku enggau aku nyaut aku, “Aku deka madahka utai nya ngagai nuan. Orang ke bediri ba madang kayu maitel lalu nyaut, “Sida tu orang ke udah dikirumka TUHAN matau dunya.” Sida lalu bejaku ngagai melikat TUHAN ti bediri ba madang kayu maitel: “Kami udah matau dunya, lalu nemu dunya bisi pemaik.” Udah nya melikat TUHAN lalu bejaku, “ TUHAN ti Pemadu Bekuasa, Nuan udah ringat ngagai Jerusalem enggau ngagai semua nengeri menua Judah dalam pengelama tujuh puluh taun. Ni pengelama nuan agi ringat sebedau Nuan ngayanka pengasih Nuan ngagai sida?” TUHAN lalu nyaut melikat nya enggau jaku siru. Melikat nya ngasuh aku madahka utai ti udah disebut TUHAN ti Pemadu Bekuasa: “Aku balat amat rindu sereta sayauka Jerusalem, nengeri Aku ti kudus, lalu Aku balat amat ringat ngagai bansa bukai ti diau dalam pemaik. Laban lebuh Aku enda tentu ringat ngagai bala nembiak Aku, makin balat agi ga sida bansa bukai merinsaka bala nembiak Aku. Nya alai Aku udah pulai baru ngagai Jerusalem, deka ngayanka pengasih Aku. Rumah Sembiang deka didirika baru, lalu kuta nengeri nya deka digaga baru.” Melikat nya mega ngasuh aku nyebut tu: “ TUHAN ti Pemadu Bekuasa madahka semua nengeri Iya deka nyadi kaya-raja baru, lalu Iya deka sekali agi nulung Jerusalem, lalu milih nengeri nya nyadika nengeri Iya Empu.” Dalam siti agi genera aku tepedaka empat iti tanduk sapi. Aku nanya ngagai melikat ti udah bejaku ngagai aku, “Nama reti tanduk nya?” Ku iya nyaut, “Sida nya nunjukka mayuh bengkah perintah di dunya tu ti udah ngachirka orang Judah, orang Israel enggau orang ari Jerusalem.” Udah nya TUHAN lalu ngayanka ngagai aku empat iku tukang besi. Aku lalu nanya ngagai Iya, “Nama utai ti deka dikereja sida?” Ku Iya nyaut, “Sida datai laban sida deka ngemba lalu ngalahka semua bansa ti udah ngalahka menua Judah, sereta ngachirka bala nembiak iya.” Dalam siti agi genera, aku tepedaka siku orang megai tali penyukat. “Deka kini ke nuan?” ku aku nanya. “Ka nyukat Jerusalem,” ku iya nyaut, “ke nemu pemanjai enggau pemesai nengeri nya.” Udah nya melikat ti udah berandau enggau aku mansang ke mua, lalu siku agi melikat mansang betemu enggau iya, lalu bejaku ngagai iya, “Alai nuan belanda lalu padahka ngagai orang bujang nya: Jerusalem deka nyadi baka genturung pendiau ti nadai dinding kuta, laban mensia enggau jelu tupi deka kelalu mayuh dalam nengeri nya. Laban Aku deka nyadi kuta api ngelingi nengeri nya, lalu Aku deka bemulia dalam nengeri nya.” Barang sapa nyerang kita, nyerang orang ke pemadu dikesayauka Aku.” Nya alai TUHAN ti Pemadu Bekuasa ngasuh aku mai pesan tu ngagai semua bansa ti udah ngerumpak bala nembiak Iya: “ TUHAN Empu deka ngelaban kita, lalu kita deka dirumpak orang ke udah nyadi ulun kita.” Lebuh utai tu nyadi, nya baru semua orang deka nemu aku amat udah dikirumka TUHAN ti Pemadu Bekuasa. Ku TUHAN bejaku, “Belagu enggau ati ti gaga meh kita orang Jerusalem, laban Aku deka datai lalu diau enggau kita!” Lebuh maya nya ila, mayuh bengkah bansa deka datai ngagai TUHAN, lalu nyadika nembiak Iya. Iya deka diau enggau kita, lalu kita deka nemu Iya udah ngirumka aku ngagai kita. Judah deka nyadi pesaka TUHAN baru di menua Iya ti kudus, lalu Jerusalem deka nyadi nengeri ti pemadu dikerinduka Iya. Anang inggar semua kita di mua TUHAN, laban Iya deka datai ari endur Iya ti kudus. Dalam siti agi genera, TUHAN ngayanka Imam Besai Josua ke benung bediri di mua melikat TUHAN. Lalu Sitan bediri ngimbai Josua, sedia deka bedawaka iya. TUHAN lalu bejaku ngagai Sitan, “ TUHAN ngerara nuan, Sitan! TUHAN, ti udah milih Jerusalem, ngerara nuan. Ukai enda tu orang ke udah ditarit ari api baka papung unggat?” Nyadi Josua ngena gari ti kamah lebuh iya bediri di mua melikat nya. Ku melikat nya bejaku enggau bala orang ke bediri di mua iya, “Buka gari ti kamah nya ari iya.” Udah nya iya bejaku ngagai Josua, “Peda nuan, aku baru udah muai dosa nuan, lalu aku deka meri nuan gari ti baru.” Aku lalu bejaku, “Rasukka labung ti beresi ba pala iya.” Nya alai sida lalu ngengkahka labung ti beresi ba pala iya, lalu ngerasukka gari ti baru ba iya, di mua melikat TUHAN ti bediri dia. Udah nya melikat nya lalu bejaku ngagai Josua, “Tu utai ti disebut TUHAN ti Pemadu Bekuasa: Enti nuan ngasika adat aku, lalu ngereja pengawa ti udah diasuh Aku kereja nuan, nya baru nuan deka majak ngemataka Rumah Aku enggau semua balai iya, lalu Aku deka meri nuan kuasa enggau orang bediri ditu. Nya alai dinga nuan, Imam Besai Josua, nuan enggau semua pangan nuan ke duduk di mua nuan! Laban sida tu nyadi tanda ke utai ti manah: Aku deka mai nembiak Aku ke dikumbai Dan! Laban ba batu sigi ti besegi tujuh ti udah diengkah Aku di mua Josua, Aku deka nebukka siti tulis, ku TUHAN ti Pemadu Bekuasa bejaku, lalu dalam sehari aja Aku deka muai dosa menua tu. Ba hari nya ila, ku TUHAN ti Pemadu Bekuasa bejaku, kita deka ngambi ngabang orang ke berimbai pendiau enggau kita ngambika sida gaga ati ngasaika pemaik enggau pengelikun, dikelingi kebun anggur enggau kayu ara kita.” Melikat ti udah bejaku enggau aku datai baru, lalu ngerak aku baka ke ngerak orang ke tinduk. Iya lalu nanya aku, “Nama utai dipeda nuan?” Aku lalu nyaut, “Siti penuduk lampu ti digaga ari emas, ti bisi mangkuk ba puchuk iya. Ba penuduk lampu nya bisi tujuh iti lampu, lalu tiap-tiap iti lampu nya bisi tujuh iti endur alai engkah sumbu. Ngimbai penuduk lampu nya bisi dua batang kayu kana, sekayu muak ari kanan, lalu sekayu muak ari kiba.” Aku lalu nanya melikat nya, “Nama reti utai nya, tuan?” Melikat nya lalu nyaut aku, “Kati nuan enda nemu nya?” Aku lalu nyaut, “Enda aku nemu, tuan.” Iya lalu madahka ngagai aku, “Tu jaku TUHAN ngagai Serubabel: Ukai ngena pengering, ukai ngena kuasa, tang ulih Roh Aku, ku TUHAN ti Pemadu Bekuasa bejaku. Sapa nuan nya, O bukit ti besai? Nuan deka digaga nyadi emperan di mua Serubabel. Lalu iya deka mai pansut batu pemun lalu orang mayuh deka manjung, ‘Naka meh penelap Allah Taala!’ ” TUHAN lalu bejaku baru ngagai aku: “Jari Serubabel udah nudukka batu pemun Rumah Sembiang tu, lalu jari iya deka mega nembuka Rumah tu. Nya baru kita deka nemu TUHAN ti Pemadu Bekuasa udah ngirumka aku ngagai kita. Laban barang sapa ngeleseka hari ti mit tu, deka rami gaga, lalu deka meda tali penyukat enggau batu nya ba jari Serubabel. “Lampu tujuh iti nya mata TUHAN, ti meda semua utai di serata dunya.” Udah nya aku nanya iya, “Nama reti dua iti batang kayu kana ti muak ari kanan enggau ari kiba penuduk lampu nya? Lalu nama reti dua iti dan kayu kana ti nuang minyak nengah dua iti paip emas nya?” Iya lalu nanya aku, “Kati nuan enda nemu nya?” Aku lalu nyaut, “Enda aku nemu, tuan.” Iya lalu madahka ngagai aku, “Seduai nya orang ke udah dipilih bediri semak TUHAN ti merintah semua dunya.” Aku malik baru, lalu sekali tu aku tepedaka siti gulung surat ti terebai. Melikat nya nanya aku pasal utai ti dipeda aku. Aku lalu nyaut, “Siti gulung surat ti terebai. Pemanjai iya semilan meter, lalu buka iya empat meter setengah.” Lalu ku iya bejaku ngagai aku, “Ba gulung surat nya bisi dituliska jaku sumpah ke semua menua tu. Ba sepiak gulung surat nya, iya madahka genap iku penchuri deka dibuai ari menua tu. Lalu ba sepiak, iya madahka genap iku orang ke ngelanggar sumpah diri empu, deka mega dibuai. TUHAN ti Pemadu Bekuasa madahka sumpah nya deka ninggang rumah genap iku penchuri, enggau genap iku orang ke ngelanggar sumpah diri empu. Sumpah nya deka mengkang dalam rumah sida, lalu ngaga rumah nya nyadi tembawai.” Melikat nya pegari baru, lalu bejaku, “Peda nyin! Bisi siti agi utai bukai pansut!” Aku lalu nanya, “Nama utai nya?” Iya lalu nyaut, “Siti bakul pansut. Bakul nya dosa semua menua tu.” Tudung ti digaga ari bangkang lalu dikebakka. Aku lalu tepedaka siku indu duduk dalam bakul nya! Ku melikat nya bejaku, “Tu penyai.” Iya lalu ngenyakka indu nya ke dalam bakul nya baru, lalu nudung bakul nya baru. Udah nya aku engkadah, lalu tepedaka dua iku indu datai terebai nuju aku. Sayap seduai iya kering baka sayap burung undan. Seduai iya lalu ngangkatka bakul nya, lalu terebai. Aku lalu nanya ngagai melikat nya, “Kini ke tunga seduai iya mai bakul nya?” Disaut iya, “Ngagai menua Babilon, alai sida ke deka ngaga sebuah rumah ke iya. Lebuh rumah nya udah sedia, bakul nya deka diengkah dia, ba penuduk iya.” Aku begenera baru. Sekali tu aku tepedaka empat buah kerita perang pansut ari entara dua igi bukit temaga. Kerita perang ti dulu, ditarit seraban kuda ti bechura mirah. Iya ti kedua, ditarit seraban kuda ti bechura chelum, iya ti ketiga, ditarit seraban kuda ti bechura burak, lalu iya ti keempat, ditarit seraban kuda ti bepetik. Aku lalu nanya melikat nya, “Nama utai nya, tuan?” Ku melikat nya nyaut, “Sida nya empat bengkah ribut ti pansut ari serega, udah bekau sida ke nyerahka diri ngagai TUHAN ti merintah semua dunya.” Kerita perang ti ditarit raban kuda ti chelum nya mansang ke utara ngagai Babilon, raban kuda ti burak mansang ke barat, lalu raban kuda ti bepetik mansang ngagai siti menua ti di selatan. Lebuh raban kuda ti bepetik pansut, sida kasak-kasak enda liat nganti diri mupuk lalu meresa dunya. Ku melikat nya bejaku, “Mupuk meh kita lalu peresa dunya!” Sida lalu mupuk. Udah nya melikat nya lalu bejaku ngagai aku, “Kuda ti mansang ke utara ngagai menua Babilon udah madamka pengeringat TUHAN.” TUHAN meri pesan tu ngagai aku. Ku Iya, “Ambi pemeri ti diberi orang ke udah dibuai ngagai menua bukai, iya nya Heldai, Tobijah, enggau Jedaiah, lalu mupuk diatu ngagai rumah Josiah anak Sepaniah. Semua sida nya udah pulai ari menua Babilon. Gaga siti makota ari pirak enggau ari emas ti udah diberi sida, lalu rasukka makota nya ba pala Imam Besai, Josua anak Josadak. Padahka ngagai iya utai ti udah disebut TUHAN ti Pemadu Bekuasa, ‘Orang ke dikumbai Dan deka mansang galak-segalak ba endur alai iya diau, lalu iya deka ngaga Rumah Aku baru. Iya nya meh orang ke deka ngaga Rumah Sembiang, lalu deka dibasa baka raja, lalu iya deka merintah bala nembiak iya. Siku imam deka bediri ngimbai kerusi diraja iya, lalu seduai iya deka seati ngereja pengawa enggau pemaik.’ Makota nya deka disimpan dalam Rumah Aku kena ngingatka Heldai, Tobiah, Jedaiah, enggau Josiah.” Orang ke diau jauh deka datai lalu nulung ngaga Rumah Sembiang nya baru. Lalu lebuh Rumah nya udah tembu digaga, nya baru kita deka nemu TUHAN ti Pemadu Bekuasa udah ngirumka aku ngagai kita. Semua utai tu deka nyadi magang enti kita ngasika semua pesan TUHAN Allah Taala kita. Kena empat hari bulan ti kesemilan (bulan Kislep), keempat taun Darius nyadi raja, TUHAN meri siti pesan ngagai aku. Orang Betel udah ngasuh Sareser seduai Regemelek, enggau bala seduai iya mansang ngagai Rumah TUHAN ti Pemadu Bekuasa, lalu besampi minta berekat ari TUHAN sereta mai tanya tu ngagai bala imam enggau bala nabi: “Kati kitai patut majak ngulit sereta bepasa dalam bulan ti kelima ke Rumah Sembiang ti udah dirusak, baka ke udah dikereja kitai betaun-taun tu ti udah?” Tu pesan TUHAN ti datai ba aku. Ku TUHAN bejaku, “Padahka ngagai orang di menua tu, enggau ngagai bala imam, lebuh sida bepasa sereta ngulit dalam bulan ti kelima enggau dalam bulan ti ketujuh, dalam kandang tujuh puluh taun tu ti udah, sida ukai ngereja nya kena ngemesaika Aku. Lalu lebuh sida makai ngirup, sida semina ngemuaska diri empu aja.” Tu utai ti udah disebut TUHAN ngena bala nabi ke dulu kelia, lebuh maya Jerusalem agi kaya-raja sereta penuh laban mensia, enggau lebuh maya mensia diau, ukai semina dalam nengeri ti mit ngelingi nengeri Jerusalem, tang mega di selatan menua tu, enggau ba sebelah kaki bukit di barat. TUHAN meri pesan tu ngagai Sekariah: “Dulu kelia Aku meri pesan tu ngagai bala nembiak Aku: ‘Kita enda tau enda nentuka atur ti lurus dipejalaika, lalu kita enda tau enda ngayanka penelap enggau pengasih ngagai pangan diri. Anang nekanka pengidup indu ke balu, orang ke nadai apai indai, orang kampar ti diau begulai enggau kita, tauka orang ke suntuk. Lalu anang bekiraka jalai ngemediska pangan diri.’ “Tang bala nembiak Aku kieh, lalu enggai mending. Sida nutup runding sida lalu ngasuh ati sida kering baka batu. Nya alai laban sida enggai mendingka ajar ti diberi Aku beseruanka sida nabi ke idup dulu kelia, Aku balat amat ringat. Laban sida enda mending lebuh Aku bejaku, nya alai Aku enda nyaut lebuh sida besampi. Aku baka kabut, ngebuka sida lalu ngasuh sida diau di menua bukai. Menua ti manah tu ditinggalka sunyi, nadai orang nguan.” TUHAN ti Pemadu Bekuasa meri pesan tu ngagai Sekariah: “Aku endang lama udah keran deka nulung Jerusalem laban pemalat Aku rinduka nembiak iya, pengerindu ti udah nyungkak Aku ringat ngagai bala munsuh iya. Aku deka pulai baru ngagai Jerusalem, nengeri Aku ti kudus, lalu diau dia. Iya deka dikumbai nengeri ti tetap ati, lalu bukit TUHAN ti Pemadu Bekuasa deka dikumbai bukit ti kudus. Sida lelaki enggau sida indu ke tuai umur ke betungkat lebuh sida bejalai, deka duduk baru ba padang nengeri. Lalu jalai raya deka penuh laban nembiak ti lelaki enggau ti indu bemain ba jalai raya nengeri nya. “Utai tu baka ke enda ulih nyadi enti nitihka pikir orang Israel ti agi idup, tang ba Aku nadai utai enda ulih dikereja. Aku deka ngelepaska bala nembiak Aku ari menua ti alai sida udah ditabanka, lalu Aku deka mai sida pulai baru ari timur enggau ari barat, ngambika sida diau di Jerusalem. Sida deka nyadi nembiak Aku, lalu Aku deka nyadi Allah Taala sida, lalu Aku deka merintah sida enggau ati ti tetap sereta enggau pengelurus. “Kita enda tau enda berani! Kita diatu benung ningaka jaku ti udah disebut bala nabi lebuh batu pemun Rumah Sembiang TUHAN didudukka alai nirika Rumah Sembiang nya baru. Sebedau nya suba, nadai orang ulih ngaji mensia tauka nyua jelu, lalu nadai orang likun ari munsuh. Aku udah ngasuh orang ngelaban pangan diri. Tang diatu Aku ngereja utai ti lain agi ari nya ngagai bala nembiak Aku ti agi idup. Sida deka nanam gandum lalu sida nadai utai ngachau. Batang anggur sida deka bebuah, tanah deka mansutka asil, hari deka selalu ujan. Aku deka meri semua berekat tu ngagai bala nembiak Aku ti agi idup. Kita orang Judah enggau orang Israel! Dulu menya orang bansa bukai udah nyumpah pangan diri, ‘Awakka penusah besai baka ke ninggang orang Judah enggau orang Israel, mega ninggang nuan!’ Tang Aku deka ngidupka kita. Nya baru orang bansa bukai deka nyebut ngagai pangan diri, ‘Awakka nuan bulih berekat baka ke diterima orang Judah enggau orang Israel!’ Nya alai, anang takut, tang berani.” Ku TUHAN ti Pemadu Bekuasa bejaku, “Lebuh aki ini kita kelia ngereja utai ti nyungkak Aku ringat, Aku ngasuh penusah ti besai ninggang sida, lalu Aku enda ngubah runding Diri, tang bejalaika pelan nya. Tang diatu Aku deka merekatka orang Jerusalem enggau orang Judah. Nya alai anang takut. Tu utai ti patut dikereja kita: sebut utai ti bendar ngagai pangan diri. Dalam kot, beri atur ti lurus - atur ti mai pemaik. Anang bekira deka ngemediska pangan diri. Anang besaksi bula lalu ngelanggar sumpah diri empu. Aku begedika pemula, atur ti enda lurus, enggau ulah ti kasar.” TUHAN ti Pemadu Bekuasa meri pesan tu ngagai Sekariah: “Pengawa bepasa ti dikereja dalam bulan ti keempat, bulan ti kelima, bulan ti ketujuh enggau bulan ti kesepuluh deka nyadi gawai lantang ati enggau pengaga ke orang Judah. Kita enda tau enda rinduka pemendar enggau pemaik.” Ku TUHAN ti Pemadu Bekuasa bejaku, “Maya deka datai alai mensia ari mayuh bengkah nengeri deka datai ngagai Jerusalem. Sida ke datai ari nengeri siti deka nyebut ngagai sida ke datai ari nengeri bukai, ‘Kami deka nyembah TUHAN ti Pemadu Bekuasa. Aram mupuk enggau kami!’ Mayuh bansa enggau menua ti bekuasa deka datai ngagai Jerusalem, deka nyembah TUHAN ti Pemadu Bekuasa, lalu besampi minta berekat ari Iya. Lebuh maya nya ila, sepuluh iku orang ari bansa bukai deka mansang ngagai siku orang Judah lalu bejaku, ‘Kami ingin deka enggau kita, laban kami udah ninga Allah Taala bisi enggau kita.’ ” Tu pesan TUHAN: Iya udah ngeletak ukum ke menua Hadrak enggau ke nengeri Damaskus. Ukai semina raban bansa orang Israel aja, tang indu nengeri menua Siria mega enggi TUHAN. Hamat ti bekunsi entara menua enggau Hadrak, mega enggi TUHAN, lalu baka nya mega nengeri Tire enggau Sidon, enggau semua pengelandik sida. Nengeri Tire udah ngaga kuta ke diri empu lalu udah nugungka mayuh amat pirak enggau emas datai ke utai nya nyau ngemayuh pasir ti ba jalai raya! Tang TUHAN deka ngerampas semua utai ti dikemisi iya. TUHAN deka nikauka pengaya nengeri Tire ngagai tasik, lalu nengeri nya deka ditunu retung. Nengeri Askelon deka meda utai nya nyadi lalu takut. Nengeri Gasa deka meda utai nya lalu tusah ati. Baka nya mega Ekron, laban iya nadai utai diadang agi. Gasa deka mati raja, lalu Askelon nadai orang nguan. Orang penakan deka diau di Asdot. Ku TUHAN bejaku, “Aku deka ngemaruhka orang Pilistin ti sumbung. Sida enda agi makai dagin ti agi bedarah, tauka makai pemakai bukai ti enda tau diempa. Semua sida ke agi idup deka nyadi raban nembiak Aku, lalu deka nyadi baka suku raban bansa di menua Judah. Ekron deka nyadi raban nembiak Aku, baka orang Jebus. Aku deka nyaga menua Aku, lalu nagang bala soldadu bejalai ngerenchah menua tu. Aku enggai agi ngemendarka raja ti jai nekanka pengidup bala nembiak Aku. Aku udah meda pemalat bala nembiak Aku merinsa.” Rami gaga ati, rami gaga meh kita orang Sion! Manjung gaga ati meh kita orang Jerusalem! Peda kita, raja kita datai ngagai kita! Iya datai mai pemenang, tang iya baruh ati lalu nepan siku keledai, siku anak keledai ti agi biak, ti diadaka keledai. Ku TUHAN bejaku, “Aku deka muai kerita perang ari menua Israel lalu ngerampas kuda ari Jerusalem. Panah ti dikena beperang, deka dirusak. Raja kita deka ngasuh mayuh bengkah bansa bebaik enggau pangan diri. Iya deka merintah ari tasik siti ngagai tasik siti, ari Sungai Eupratis ngagai ujung dunya.” Ku TUHAN bejaku, “Ketegal sempekat Aku enggau kita ti udah ditanggam ngena darah ari piring, Aku deka ngelepaska kita ari menua bukai ti udah nyadi endur alai kita dibuai baka orang ke dikurung dalam lubang kebung ti rangkai. Pulai meh kita ke udah dibuai ngagai menua bukai, ke bisi pengadang diatu. Pulai ngagai endur ti likun. Diatu Aku madahka ngagai kita, Aku deka meri kita berekat dua kali lipat kena mansi semua pemerinsa ti udah ditatka kita. Aku deka ngena Judah baka panah soldadu lalu ngena Israel baka laja. Aku deka ngena lelaki orang Sion baka pedang, ngelaban orang Gerika.” TUHAN deka pegari di mua sida nembiak Iya. Iya deka nimbakka laja Iya baka kilat. TUHAN ti Pemadu Tinggi deka nyepu terumpit. Iya deka bejalai dalam biaubalai ari selatan. TUHAN ti Pemadu Bekuasa deka nyaga bala nembiak Iya, lalu sida deka ngerusak bala munsuh sida. Lebuh sida beperang, sida deka manjung baka orang ke mabuk lalu ngirup darah munsuh sida. Darah munsuh deka rarat baka darah piring ti dibubuhka ba alta ari mangkuk. Ba hari nya, TUHAN deka ngelepaska bala nembiak Iya, baka pengibun bedus ke ngelepaska raban bedus ari utai ti tau nganu. Sida deka beperenching di menua Iya baka batu berega ti ba makota. Naka meh pemanah enggau pemajik menua nya! Sida ke biak deka mansang kering-sekering bepakaika gandum enggau beirupka wain di menua nya. Pinta meh ujan ari TUHAN ngambika hari ujan lebuh musin bungai. TUHAN ti ngasuh mua hari nyadi, enggau ngasuh hari ujan, ngambika utai ti ditanam semua orang tumbuh magang. Orang betanyaka utai ngagai engkeramba enggau ngagai orang ke tau tilit, tang saut ti diterima sida nya utai ti bula sereta nadai reti. Sekeda sida nerangka mimpi, tang sida semina nesatka kita. Sida nguji merindang kita, tang utai nya nadai guna. Nya alai orang mayuh bekesegau ngapa baka bedus ti tesat. Sida tusah laban sida nadai tuai ngiring. Ku TUHAN bejaku, “Aku ringat ngagai orang bansa bukai ke merintah bala nembiak Aku, lalu Aku deka ngukum sida. Orang Judah endang enggi Aku, lalu Aku TUHAN ti Pemadu Bekuasa, deka ngibun sida. Sida deka nyadi kuda perang Aku ti bekuasa. Orang ke merintah sida, bala tuai, enggau bala tuai soldadu, deka datai ari bala sida empu. Orang Judah deka menang baka soldadu ke ngelunjak munsuh ba luchak jalai raya. Sida deka ngelaban, laban TUHAN bisi enggau sida. Indah bala munsuh ke nepan kuda deh alah laban sida. “Aku deka ngasuh orang Judah kering. Aku deka ngelepaska orang Israel. Aku deka kasihka sida lalu mai semua sida pulai baru ngagai menua sida empu. Sida nadai ngasaika diri udah ditulak Aku. Aku tu TUHAN Allah Taala sida. Aku deka nyaut sampi sida. Orang Israel deka kering baka soldadu, lantang ati baka orang ke udah ngirup wain. Peturun sida deka ingatka pemenang tu lalu gaga ati ketegal utai ti udah dikereja TUHAN. “Aku deka ngangauka bala nembiak Aku lalu ngempuruka sida. Aku deka ngelepaska sida lalu ngasuh sida mayuh tubuh baka ke dulu menya. Taja pen Aku udah ngachirka sida ngagai mayuh bengkah bansa, tang sida ke diau di menua ti jauh deka ingatka Aku. Sida enggau bala anak sida deka meruan idup lalu pulai sama sereta ngagai menua diri empu. Aku deka mai sida pulai ari menua Ejip enggau ari menua Asiria lalu ngentapka sida di menua sida empu. Aku deka mega ngentapka sida di Giliat enggau di Lebanon. Semua menua tu deka penuh laban mensia. Lebuh sida bejalai ngerenchah tasik penusah, Aku ti TUHAN, deka malu gelumbang, lalu Sungai Nile deka rangkai. Asiria ti sumbung deka dikemaruhka, lalu Ejip ti kering deka lenyau kuasa. Aku deka ngasuh bala nembiak Aku kering. Sida deka nyembah lalu ngasika Aku.” TUHAN udah bejaku. Buka pintu nuan, Lebanon, ngambika api ulih nganguska kayu sidar nuan! Nyabak duie-duie meh kita kayu saipris laban kayu sidar udah rebah. Kayu ti manah nya udah dirusak! Nyabak duie-duie meh kita kayu oak ti di Basan laban utan ti tebal udah diperimba! Bala pemerintah nyabak tusah ati laban mulia sida udah abis! Dinga singa negung, laban utan ti alai sida diau ngimbai Sungai Jordan udah rusak! Ku TUHAN Allah Taala aku bejaku ngagai aku, “Keluluka diri nyadi pengibun raban bedus ti deka disayat. Orang ke bempu sida nyayat sida, lalu orang nya enda diukum. Sida nyual dagin, lalu nyebut, ‘Puji TUHAN! Kitai tu kaya!’ Indah orang ke ngibun sida deh enda sinu ati ke sida.” ( Ku TUHAN bejaku, “Aku enggai agi sinu ati ke orang di dunya. Aku Empu deka ngasuh semua orang mayuh diperintah raja sida. Sida raja nya deka ngerusak dunya, lalu Aku enggai ngelepaska dunya ari kuasa sida.”) Sida ke bebeli enggau bejualka bedus nya ngaji aku, lalu aku nyadi pengibun ke bedus ti deka disayat. Aku ngambi dua iti tungkat: siti dikumbai aku “Pengasih” lalu siti dikumbai aku “Penyerakup.” Aku lalu ngibun raban bedus nya. Aku enda liat ati enggau tiga iku pengibun bedus ti bukai, ke begedika aku, lalu dalam sebulan aku muai sida tiga. Udah nya aku bejaku ngagai raban bedus nya, “Aku enggai agi nyadi pengibun kita. Awakka bedus ti endang deka mati, mati. Awakka bedus ti endang deka dirusak, terus dirusak. Sida ke agi tinggal deka ngerusak pangan diri.” Udah nya aku ngambi tungkat ti dikumbai “Pengasih” lalu matahka iya, kena muai sempekat ti udah digaga TUHAN enggau semua bansa. Nya alai sempekat nya dibuai lebuh hari nya. Orang ke bebeli enggau bejualka bedus nengkilaka aku, laban sida nemu TUHAN endang bejaku ngena utai ti dikereja aku. Ku aku bejaku enggau sida, “Enti kita deka, beri ngagai aku meh gaji aku. Tang enti kita enggai, awakka kita nyimpan gaji aku nya.” Nya alai sida meri ngagai aku tiga puluh singkap pirak nyadika gaji aku. Ku TUHAN bejaku ngagai aku, “Simpan pirak nya dalam sarang reta Rumah Sembiang.” Nya alai aku mai tiga puluh singkap duit pirak nya, upah ti dikira sida chukup ke aku, lalu nyimpan duit nya dalam sarang reta Rumah Sembiang. Udah nya aku matahka tungkat ti kedua, ti dikumbai “Penyerakup.” Menua Judah enggau menua Israel lalu badu agi beserakup. Udah nya TUHAN bejaku ngagai aku, “Keluluka diri sekali agi nyadi pengibun bedus, tang sekali tu nyadi pengibun ti nadai guna. Aku udah ngasuh siku pengibun ngemataka raban bedus Aku, tang iya enda nyaup bedus ti deka disayat. Iya enda mega ngiga bedus ti tesat, tauka ngeraika iya ti kena laban pemedis, tauka engkani bedus ti bepengerai, tang iya makai dagin bedus ti pemadu gemu. Indah tunjing bedus nya deh abis dikuyaska iya. Tulah meh pengibun bedus ti nadai guna nya, ke udah ninggalka raban bedus. Kuasa iya deka dirusak abis lebuh maya perang. Lengan iya deka lupis, lalu mata kanan iya deka buta.” Tu pesan pasal Israel ari TUHAN, TUHAN ti mintarka langit lalu ngaga dunya, lalu meri pengidup ngagai mensia. Ku Iya bejaku, “Aku deka ngasuh Jerusalem nyadi baka semangkuk wain. Semua bansa ti ngelingi iya deka ngirup ari mangkuk nya lalu guir-guir bejalai baka orang ke mabuk. Lalu lebuh sida ngelulung Jerusalem, semua nengeri ti bukai di menua Judah deka mega dikelulung sida. Tang ba maya nya ila, Aku deka ngaga Jerusalem nyadi baka batu ti berat. Semua bansa ti nguji nanggung iya, deka bebadi. Semua bansa di dunya tu deka beserakup nyerang iya. Lebuh maya nya ila Aku deka ngasuh kuda sida begau abis ati, lalu ngasuh semua orang ke nepan kuda gila magang. Aku deka nyaga orang Judah, tang Aku deka ngasuh kuda bala munsuh sida buta. Udah nya suku raban bansa ti diturunka Judah deka bejaku dalam ati diri, ‘ TUHAN ti Pemadu Bekuasa meri pengering ngagai nembiak Iya ti diau di Jerusalem.’ “Lebuh maya nya ila Aku deka ngasuh suku raban bansa ti diturunka Judah nyadi baka api ti dalam utan, tauka nyadi baka api ba padang gandum ti udah mansau - sida deka ngerusak semua bansa ti ngelingi sida. Orang Jerusalem deka mengkang diau likun dalam nengeri nya. “Aku ti TUHAN, deka meri pemenang ngagai bala soldadu Judah dulu, ngambika basa ti deka diterima peturun David enggau orang Jerusalem, enda lebih besai agi ari basa ti deka diterima orang Judah ti bukai. Lebuh maya nya ila TUHAN deka nyaga orang ke diau di Jerusalem, datai ke orang ke pemadu lemi ari bala sida deh nyadi kering baka David. Peturun David deka nguluka sida baka melikat TUHAN, baka Allah Taala empu. Lebuh maya nya ila, Aku deka ngerusak semua bansa ti nguji nyerang Jerusalem. “Aku deka ngirika roh pengasih enggau roh besampi ngagai bala peturun David enggau orang bukai ti diau di Jerusalem. Sida deka merening ngagai orang ke mati dibanchak sida, lalu sida deka ngulitka iya baka orang ke ngulitka anak tunggal diri, lalu duie-duie nyabakka iya, baka orang ke mati anak tuai. Lebuh maya nya ila, Jerusalem deka balat ngulit baka orang ke ngulitka Hadat Rimon ba emperan Megido. Ku TUHAN ti Pemadu Bekuasa bejaku, “Lebuh maya nya ila, siti ai ti engkeching deka dibuka kena nuchi peturun David enggau orang Jerusalem ari dosa sida enggau ari penyalah sida ke besembahka engkeramba. Lebuh maya nya ila Aku deka muai semua nama engkeramba ari menua tu, lalu nadai orang agi ingatka sida. Aku deka muai orang ke ngumbai diri nabi, lalu muai ati ti seruran deka besembahka engkeramba. Udah nya, enti orang deka majak benabi, apai enggau indai iya empu deka bejaku enggau iya, madahka iya enda tau enda dibunuh, laban iya ngumbai diri nyebut jaku TUHAN, tang iya ti bendar iya nyebut utai ti bula. Lebuh iya benabi, apai enggau indai iya empu deka manchak iya datai ke mati. Lebuh maya nya ila, nadai siku nabi deka temegahka genera diri, tauka ngeluluka diri nyadi nabi, tauka bekenaka gari ti kasar baka ke dikena nabi, lalu nipu orang mayuh. Tang iya deka nyebut, ‘Aku ukai nabi. Aku tu orang bumai. Aku udah bumai tanah tu seumur idup.’ Udah nya, enti orang bisi nanya iya, ‘Nama telih ti ba dada nuan nya?’ iya deka nyaut, ‘Aku telih ba rumah pangan aku.’ ” Ku TUHAN ti Pemadu Bekuasa bejaku, “Dani, pedang, lalu serang pengibun bedus nya ke bekereja ke Aku! Bunuh iya, ngambika raban bedus pambar. Aku deka nyerang bala nembiak Aku lalu di serata menua tu dua bagi ari tiga bagi orang deka mati. Lalu Aku deka nguji sebagi ari tiga bagi ti agi idup, lalu deka nuchi sida baka ke nuchi pirak ngena api. Aku deka nguji sida baka ke nguji emas. Nya baru sida deka besampi ngagai Aku, lalu Aku deka nyaut sida. Aku deka madahka sida nya nembiak Aku, lalu sida deka ngaku Aku Allah Taala sida.” Hari TUHAN nyau deka datai, alai perapasan ti dirampas ari kita deka dibagi di mua kita empu. Laban TUHAN deka ngempuruka semua bansa nyerang Jerusalem, lalu nengeri nya deka alah, utai dalam rumah dirumpak, lalu sida ke indu dipasung. Setengah ari orang Jerusalem deka dibuai ngagai menua bukai, tang sida ti bukai enda ditabanka ari nengeri nya. Udah nya TUHAN deka nyerang semua bansa ti nyerang Jerusalem, baka Iya ti udah nyerang dulu menya. Lebuh maya nya ila Iya deka bediri ba Bukit Kana, tunga ke timur ari Jerusalem. Udah nya siti darung ti besai deka melah Bukit Kana ari timur nyentuk ke barat. Setengah bukit nya deka nginsit tunga ke utara, lalu setengah tunga ke selatan. Kita deka rari nengah darung ti melah bukit nya, Kita deka rari baka aki ini kita kelia lebuh tanah berenyang lebuh rambau Usiah nyadi raja menua Judah. TUHAN Allah Taala aku deka datai, mai semua melikat enggau Iya. Lebuh maya nya ila, menua nadai agi chelap tauka dibalut ais, nadai agi petang. Hari deka seruran terang belama, nyengkaum lebuh malam hari. Semina TUHAN siku aja nemu maya utai nya deka nyadi. Ba hari nya, ai ti chiru deka rarat ari Jerusalem, setengah ngagai Tasik mati, lalu setengah ngagai Tasik Tengah. Ai nya deka rarat sepemanjai taun, lebuh musin kemarau, enggau lebuh musin pengujan. Udah nya baru TUHAN deka nyadi raja ke semua dunya. Genap iku orang deka nyembah Iya, ngena nama Iya siku aja. Semua menua, kenyau ari Geba di utara nyentuk ngagai Rimon di selatan, deka dirataka magang nyadi emperan. Jerusalem deka ngayung semua menua ti ngelingi iya. Rampa nengeri deka berengkah ari Pintu Benjamin nyentuk ngagai Pintu Sukut, ba alai pintu ti dulu menya, lalu ari Menara Hananel nyentuk ngagai pitan anggur raja. Orang deka diau likun dia, nadai agi takutka penusah. TUHAN deka ngasuh penyakit ninggang semua bansa ti nyerang Jerusalem. Isi, mata enggau dilah sida deka buruk lebuh sida agi idup. Lebuh maya nya ila TUHAN deka ngasuh sida balat begau abis ati, datai ke sida nangkap lalu ngamuk orang ke berimbai pendiau enggau sida. Indah orang Judah empu deh deka ngelaban orang ke di Jerusalem. Semua pengaya semua bansa ti ngelingi sida deka digumpul magang lalu dibai ngagai Jerusalem - emas, pirak, enggau tugung gari. Penyakit deka mega ninggang kuda, penakan kuda, jelu unta, enggau keledai - semua jelu ti dalam kem munsuh. Udah nya semua sida ke agi idup ari semua bansa ti udah nyerang Jerusalem, deka mansang ngagai nengeri nya tiap taun lalu nyembah TUHAN ti Pemadu Bekuasa nyadika raja sida, lalu ngintu Gawai Belangkau. Enti bansa siti-siti enggai mansang kia lalu nyembah TUHAN ti Pemadu Bekuasa nyadika raja sida, hari enda ujan di menua sida. Enti orang Ejip enggai ngintu Gawai Belangkau, sida deka ditinggang penyakit ti deka diasuh TUHAN ninggang semua bansa ti enggai mansang ngagai Gawai nya. Tu meh ukum ti deka ninggang menua Ejip enggau semua menua bukai, enti sida enggai ngintu Gawai Belangkau. Lebuh maya nya ila, indah luching ti ba rekung kuda deh deka dituliska enggau leka jaku “Diserahka ngagai TUHAN.” Periuk ti dikena manduk utai dalam Rumah Sembiang deka nyadi kudus baka mangkuk ti di mua alta. Genap igi periuk ti dikena manduk utai di Jerusalem enggau di serata menua Judah deka diserahka magang kena nyembah TUHAN ti Pemadu Bekuasa. Orang ke ngenjuk piring deka ngena periuk nya manduk dagin ti diambi ari piring. Lebuh maya nya ila, orang nadai agi bedagang dalam Rumah TUHAN ti Pemadu Bekuasa. Tu pesan ti diasuh TUHAN padahka Malaki ngagai orang Israel. Ku TUHAN bejaku ngagai bala nembiak Iya, “Aku endang seruran rinduka kita.” Tang ku sida nyaut, “Baka ni ku Nuan udah rinduka kami?” Ku TUHAN nyaut, “Esau enggau Jakop endang diri menyadi, tang Aku udah rinduka Jakop enggau peturun iya, lalu udah begedika Esau enggau peturun iya. Aku udah ngerusak menua Esau ti bebukit, lalu ngasuh menua nya diuan pasun.” Enti peturun Esau, orang Edom, nyebut, “Semua nengeri kami udah rusak, tang kami deka nirika sida baru,” TUHAN deka nyaut, “Awakka sida nirika nengeri sida baru, tang Aku deka ngeruntuhka nengeri nya baru. Orang deka ngumbai nengeri nya ‘Menua ti Jai’ enggau ‘Bansa ti dipegedika TUHAN belama iya.’ ” Orang Israel deka meda utai tu ngena mata sida empu, lalu sida deka nyebut, “ TUHAN endang kering, nyengkaum di luar menua Israel!” Ku TUHAN ti Pemadu Bekuasa bejaku ngagai sida imam, “Anak bebasaka apai indai sida, lalu ulun bebasaka tuan sida. Aku tu Apai kita, nya alai nama kebuah kita enda ngemesaika Aku? Aku tu Tuan kita, nya alai nama kebuah kita enda bebasaka Aku? Kita mechat Aku, tang kita nanya, ‘Baka ni ku kami udah mechat Nuan?’ Baka tu ku jalai kita mechat Aku: kita meri pemakai ti nadai guna ba alta Aku. Udah nya kita nanya, ‘Baka ni ku kami enda bebasaka Nuan?’ Aku madahka ngagai kita: kita enda bebasaka alta Aku. Lebuh kita mai jelu ti buta tauka sakit tauka kait-kupit nyadika piring ti diberi kita ngagai Aku, kati pengawa nya enda salah? Uji beri jelu nya ngagai tuan gabenor kita! Kati iya deka lantang ati enggau kita?” Kita imam, uji kita minta Allah Taala manah enggau kitai. Iya enggai nyaut sampi kita laban penyalah kita empu. Ku TUHAN ti Pemadu Bekuasa bejaku, “Naka meh pemanah enti sema siku ari bala kita nikupka pintu Rumah Sembiang, kena nagang kita nungkunka api ti nadai guna ba alta Aku. Aku enda lantang ati enggau kita. Aku enggai nerima piring ti dibai kita ngagai Aku. Laban kenyau ari rerak tawas nyentuk ngagai padam mata panas mensia di serata dunya ngemesaika nama Aku, lalu sida nunu menyan ke Aku di semua endur, lalu ngenjuk piring ti ulih diterima. Semua sida ngemesaika Aku! Tang kita ngeleseka nama Aku lebuh kita madahka alta Aku nadai guna, enggau lebuh kita meri ba alta nya pemakai ti enda diguna kita empu. Ku kita, ‘Kami nyau leju ngereja semua utai tu!’ lalu kita ngeleseka Aku. Piring ti diberi kita ngagai Aku nya jelu ti ulih kita ngenchuri, tauka jelu ti kait-kupit ti enda ulih bejalai, tauka sakit. Kati kita ngumbai Aku deka nerima utai nya ari kita? Tulah meh kita ke pengelakar! Kita ngenjuk jelu ti enda menyana nyadika piring kita ngagai Aku, taja pen kita bisi jelu ti manah ti disemaya kita ngagai Aku! Aku tu Raja ti besai, lalu mensia ari semua bansa nangika Aku magang.” Ku TUHAN ti Pemadu Bekuasa bejaku ngagai bala imam, “Pesan tu diberi ngagai kita: Kita enda tau enda ngemesaika Aku ngena utai ti dikereja kita. Enti kita enggai mendingka utai ti disebut Aku, Aku deka nyumpah kita. Aku deka nyumpah utai ti diterima lalu dikena kita nyukung diri. Iya ti bendar, Aku udah nyumpah utai nya, laban kita enda nerima pesan Aku enggau bendar. Aku deka ngukum bala anak kita, lalu nginsarka mua kita ba tai jelu, jelu ti diberi kita nyadika piring, lalu kita deka dibai pansut ngagai tugung tai. Nya baru kita deka nemu Aku udah meri kita pesan tu, ngambika kita enda ngelanggar sempekat ti udah digaga Aku enggau sida imam ti ari peturun Lewi. “Dalam sempekat Aku, Aku besemaya deka meri sida pengidup enggau pengerai, lalu nya meh utai ti udah diberi Aku ngagai sida, ngambika sida nemu bebasaka Aku. Lebuh maya nya kelia, sida amat bebasa sereta nangika Aku. Sida ngajar utai ti ngena, ukai utai ti salah. Sida sama seati enggau Aku. Sida ukai semina ngereja utai ti ngena, tang sida mega nagang mayuh orang bukai ngereja penyai. Imam endang betanggungjawap ngajar penemu ti bendar pasal Allah Taala. Orang patut datai ngagai sida ngambika nemu peneka Aku, laban sida imam tu endang seruan TUHAN ti Pemadu Bekuasa. “Tang diatu kita ke imam udah limpang ari jalai ti ngena. Ajar ti diberi kita udah ngasuh mayuh orang ngereja penyalah. Kita udah ngelanggar sempekat ti udah digaga Aku enggau kita. Nya alai, Aku diatu deka ngasuh orang Israel mechat kita laban kita enda ngasika peneka Aku, lalu lebuh kita ngajar bala nembiak Aku, kita bepilih mata.” Kati kitai enda saum apai? Ukai enda semua kitai tu digaga Allah Taala? Enti pia, nama kebuah kitai bulaka semaya ti digaga kitai enggau pangan diri? Lalu nama kebuah kitai mechat sempekat ti udah digaga Allah Taala enggau aki ini kitai? Orang Judah udah bulaka semaya sida enggau Allah Taala, lalu udah ngereja utai ti jai di Jerusalem, enggau di serata menua tu. Sida udah ngamahka Rumah Sembiang ti dikerinduka TUHAN. Orang ke lelaki udah jadi enggau indu ke nyembah petara orang bansa bukai. Awakka TUHAN muai orang ke ngereja utai nya ari bansa orang Israel, lalu enda agi nejuka sida enggau orang beberika piring ti dibai bansa kitai ngagai TUHAN ti Pemadu Bekuasa. Tu siti agi utai ti dikereja kita. Kita ngampuhka alta TUHAN ngena ai mata, nyabak duie-duie laban Iya enda agi nerima piring ti dibai kita ngagai Iya. Kita nanya, “Nama kebuah Iya enda agi nerima piring kita?” Laban TUHAN nemu kita udah bulaka semaya ti digaga kita enggau bini ti enggau kita jadi lebuh kita agi biak menya, laban kita udah enda tetap ati ngagai bini kita, taja pen iya pangan enggau bini kita, ulih sempekat ti digaga kita di mua Allah Taala. Ukai enda Allah Taala ngaga nuan saum tubuh, saum roh enggau iya? Nama tuju Allah Taala ngaga nya? Ngambika seduai bisi anak ke endang amat nembiak Allah Taala. Nya alai, kita enda tau enda netapka diri enda bulaka semaya enggau bini kita. “Aku begedika pengawa sarak,” ku TUHAN Allah Taala ke disembah orang Israel bejaku. “Aku begedi lebuh kita ngereja utai ti jai baka nya ngagai bini kita. Tentuka diri enda bulaka semaya ti madahka kita deka tetap ati ngagai bini kita.” Kita udah ngasuh TUHAN leju mendingka jaku kita. Tang agi ga kita nanya, “Baka ni ku kami udah ngasuh Iya leju?” Laban kita nyebut, “Semua orang ke ngereja penyai manah magang di mua TUHAN, lalu Iya gaga ati ke sida.” Tauka kita nanya, “Dini alai Allah Taala ti dikumbai lurus?” Aku deka ngasuh seruan Aku nyendiaka jalai ke Aku. Nya baru TUHAN ti digiga kita deka datai enggau ngenyit ba Rumah Sembiang Iya. Seruan ti dikedekaka kita deka datai lalu madahka sempekat Aku.” Tang sapa tan lebuh Iya datai? Sapa ulih idup lebuh Iya pegari? Iya deka nyadi baka sabun ti bisa, baka api ti meresi besi. Iya deka nuchi peturun Lewi, baka ke nuchi pirak tauka emas. Udah nya baru sida mai piring ti ngena ngagai TUHAN. Nya baru piring ti dibai orang Judah enggau orang Jerusalem ngagai TUHAN deka ngerinduka ati TUHAN baka menya. Udah nya baru Aku deka datai semak lalu ngakim kita. Aku deka tekala nya besaksi ngelaban manang, ngelaban orang ke butang, ngelaban orang ke besaksi bula, ngelaban orang ke enda meri gaji ngagai orang ke gawa ke sida, ngelaban orang ke nekanka pengidup orang ke patu balu, enggau pengidup orang kampar, lalu enda nangika Aku, ku TUHAN ti Pemadu Bekuasa bejaku. “Laban Aku tu TUHAN, lalu Aku enda berubah. Nya kebuah kita ke peturun Jakop enda lus. Kenyau ari maya aki ini kita kelia, kita udah limpang lalu enda nitihka Adat Aku. Pulai baru ngagai Aku, nya baru Aku deka pulai baru ngagai kita, ku TUHAN ti Pemadu Bekuasa bejaku. Tang ku kita bejaku, “Baka ni ku chara kami mulaika diri?” Kati bisi orang deka ngerumpak Allah Taala? Tang kita ngerumpak Aku! Lalu kita nanya, “Baka ni ku kami ngerumpak Nuan?” Ba pasal pemeri sepuluh peratus enggau piring kita! Kita kena sumpah, laban semua bansa kita ngerumpak Aku! Bai semua pemeri sepuluh peratus kita ngagai rumah setor Aku, ngambika pemakai seruran bisi dalam rumah Aku. Uji meh Aku, ku TUHAN ti Pemadu Bekuasa bejaku. Nya baru kita deka meda Aku nukangka pintu serega, lalu nuang mayuh macham utai ti manah, ti belimpah-limpah ngagai kita. Aku deka nagang bala buntak ngerusak utai ti ditanam kita, lalu anggur kita deka bebuah lebat, ku TUHAN ti Pemadu Bekuasa bejaku. Nya baru semua bansa deka ngumbai kita beberekat, laban menua kita nyamai alai diau, ku TUHAN ti Pemadu Bekuasa bejaku. Kita udah bejaku kasar ngelaban Aku, ku TUHAN bejaku. Tang kita nanya, “Baka ni ku kami udah bejaku ngelaban Nuan?” Kita udah nyebut, “Nadai guna betuaika Allah Taala. Nama penguntung ngereja utai ti diasuh Iya, tauka baka orang ke ngulit di mua TUHAN ti Pemadu Bekuasa? Nyadi kitai ngumbai orang ke sumbung lantang diau. Orang ke jai ukai semina nyadi kaya-raja, tang lebuh sida nguji Allah Taala, sida enda diukum.” Udah nya orang ke nangika TUHAN deka bejaku enggau pangan diri. TUHAN mending lalu ninga. Di mua TUHAN Empu, semua nama orang ke nangi sereta bebasaka TUHAN dituliska magang dalam siti bup. “Sida deka nyadi nembiak Aku, ku TUHAN ti Pemadu Bekuasa bejaku, nyadika pesaka Aku ba hari Aku bekereja, lalu Aku enda ngukum sida baka apai ti kasihka anak ke betuaika sida. Udah nya baru bala nembiak Aku deka, sekali agi, meda bida entara orang ke lurus enggau orang ke jai, entara orang ke betuaika Allah Taala enggau orang ke enda betuaika Iya. Hari deka datai, angat baka api, lalu semua orang ke sumbung enggau semua orang ke ngereja penyai, deka nyadi baka bangkai rumput. Sida deka ditunu lebuh hari nya, ku TUHAN ti Pemadu Bekuasa bejaku, ngambika sida nadai agi urat tauka dan. Tang ke kita ke nangika nama Aku, kuasa penyelamat Aku deka angkat atas kita baka mata hari, lalu ngeraika kita. Kita deka engkejuk baka anak sapi ti pansut ari bansal. Lalu kita deka ngindik orang ke jai, laban sida deka nyadi baka amau di baruh kaki kita, ba hari Aku ngereja utai nya, ku TUHAN ti Pemadu Bekuasa bejaku. “Kingatka ajar nembiak Aku Moses, adat enggau pesan ti udah diberi Aku ngagai iya ba Bukit Sinai ke semua orang Israel. “Tang Aku deka ngirumka nabi Elijah ngagai kita sebedau Hari TUHAN ti besai sereta balat ngenakut datai. Iya deka ngasuh apai enggau anak seati, ngambika Aku enda datai lalu ngerusak menua kita ngena sumpah.” Tu tusut pasal Jesus Kristus, ke peturun David, ke peturun Abraham. Nya alai, ari Abraham nyentuk ngagai David, empat belas serak; ari David ngagai maya orang Israel dibuai ngagai menua Babilon, empat belas serak, lalu ari maya nya ngagai pengada Kristus, empat belas serak. Baka tu ku gaya pengada Jesus Kristus. Indai Iya Maria udah betunang enggau Josep, tang sebedau seduai iya jadi melaki-bini, iya betubuh-bisi ulih kuasa Roh Kudus. Laban tunang iya, Josep, endang orang ke lurus, lalu enggai ngemaluka Maria di mua orang mayuh, nya alai iya berunding deka muai Maria ngena chara belalai. Tang lebuh Josep benung berundingka nya, siku melikat Tuhan pegari di mua iya dalam mimpi, lalu bejaku, “Josep, anak David, anang takut ngambi Maria nyadika bini nuan, laban iya betubuh-bisi ulih kuasa Roh Kudus. Iya deka ngadaka anak lelaki siku, lalu nuan deka meri Iya nama Jesus, laban Iya deka nyelamatka nembiak Iya ari dosa sida.” Semua utai tu nyadi kena ngamatka jaku ti udah disebut Tuhan beseruanka siku nabi, “Siku dara bungas deka betubuh-bisi, lalu ngadaka anak lelaki siku, lalu iya deka dikumbai Imanuel” (reti nya, “Allah Taala enggau kitai”). Lebuh Josep dani, iya lalu nitihka jaku melikat Tuhan. Iya jadi enggau Maria, tang iya enda beleman enggau Maria sebedau Maria ngadaka anak iya. Josep lalu meri anak mit nya nama Jesus. Lebuh Jesus ada di nengeri Betlehem, dalam menua Judea, lebuh rambau Herod nyadi raja, orang ke pandai pasal bintang datai ari Timur ngagai Jerusalem. Ku sida nanya, “Dini alai anak mit ke deka nyadi raja orang Judah ada? Kami bisi meda bintang Iya pegari di timur, lalu kami datai deka nyembah Iya.” Lebuh Raja Herod ninga nya, iya enggau semua orang di Jerusalem lalu irau ati. Iya lalu ngempuruka semua tuai imam enggau sida pengajar Adat, lalu nanya ngagai sida endur alai Kristus ada. Ku sida madah ngagai iya, “Di nengeri Betlehem dalam menua Judea, laban utai tu udah ditulis siku nabi: ‘Nuan Betlehem ti di menua Judah, nuan ukai nengeri ti pemadu mit enti dibandingka enggau pemerintah ti bukai di menua Judah, laban ari nuan deka datai siku pemerintah ti deka nyadi pengibun nembiak Aku Israel.’ ” Herod lalu mesanka orang ke pandai pasal bintang nya, lalu nemu ari sida maya bintang nya pegari. Iya lalu ngasuh sida mupuk ngagai Betlehem. Ku iya, “Mupuk meh kita, lalu giga enggau bebendar endur alai anak mit nya, lalu lebuh kita udah tetemuka Iya, padahka ngagai aku, ngambika aku ulih mega datai lalu nyembah Iya.” Sida lalu mupuk, lalu bintang ti udah dipeda sida di Timur bejalai dulu ari sida datai ke iya nyau ngetu ari atas endur alai anak mit nya. Lebuh sida meda bintang nya, sida gaga amat ati. Sida tama ngagai rumah nya, lalu meda anak mit nya, enggau indai Iya Maria. Sida besugang lalu nyembah Iya. Udah nya sida muka ma sida, lalu meri ngagai Iya emas, menyan, enggau mur. Sida lalu pulai ngagai menua sida empu nengah jalai bukai laban sida udah diberi jaku tangkan dalam mimpi, enda nyagi sida pulai ngagai Herod. Lebuh sida udah mupuk, siku melikat Tuhan pegari di mua Josep dalam mimpi, lalu bejaku ngagai iya, “Angkat nuan. Bai anak mit nya enggau indai Iya rari ngagai menua Ejip. Diau dia nyentuk ngagai maya aku ngasuh nuan ninggalka menua nya, laban Herod baru deka ngiga anak mit nya, lalu munuh Iya.” Josep lalu angkat, mai anak mit nya enggau indai Iya malam nya, lalu mupuk ngagai menua Ejip. Sida diau di menua nya nyentuk ngagai maya pemati Herod. Tu ngamatka jaku ti udah disebut Tuhan beseruanka siku nabi, “Aku ngangauka Anak Aku pansut ari menua Ejip.” Lebuh Herod nemu diri udah ditipu orang ke pandai pasal bintang nya, iya pedis ati. Iya lalu meri atur ngasuh semua anak mit ke lelaki, ke umur dua taun ke baruh, di Betlehem enggau di menua ti ngelingi nengeri nya, dibunuh magang, nitihka maya ti udah ditemu iya ari orang ke pandai pasal bintang nya. Nya meh jalai jaku Tuhan ti disebut nabi Jeremiah dikamatka: “Munyi nyawa bisi didinga di Ramah, munyi orang ke bekeduie nyabak. Rachel nyabakka bala anak iya. Iya enggai diperindang, laban sida nadai agi.” Lebuh Herod udah mati, siku melikat Tuhan pegari dalam mimpi ngagai Josep di menua Ejip, lalu bejaku, “Angkat. Bai anak mit nya enggau indai Iya, lalu pulai ngagai menua Israel, laban orang ke deka munuh Iya, udah mati.” Josep lalu angkat, mai anak mit nya enggau indai Iya, lalu pulai ngagai menua Israel. Tang lebuh Josep ninga Arkelaus udah nganti apai iya Herod nyadi raja menua Judea, iya takut mansang ngagai menua nya, lalu lebuh iya udah diberi jaku tangkan dalam mimpi, iya lalu mupuk ngagai pelilih menua Galili, Iya lalu diau ba sebuah nengeri ti dikumbai Nasaret. Tu ngamatka jaku ti udah disebut Tuhan beseruanka sida nabi: “Iya deka dikumbai Orang Nasaret.” Lebuh maya nya, John Pemaptisa datai lalu belabuh ngajar di menua puang Judea. Ku iya, “Nesal ati ke dosa kita, laban Perintah serega nyau semak!” John nya meh orang ke dikenang nabi Isaiah lebuh iya nyebut, “Siku orang ngangau di menua puang: ‘Sediaka jalai ke Tuhan. Gaga jalai Iya rurus!’ ” Gari John digaga ari bulu unta. Belulang ti melit punggung iya digaga ari kulit jelu, lalu iya beridup makai buntak enggau ai manyi. Orang ari Jerusalem, ari serata menua Judea, enggau ari serata menua ti semak Sungai Jordan datai ngagai iya. Sida ngaku dosa sida, lalu iya maptisa sida ba Sungai Jordan. Tang lebuh John meda mayuh orang Parisi enggau orang Saduki datai minta iya maptisa sida, iya lalu bejaku ngagai sida, “Kita anak ular! Sapa ngasuh kita rari ari pengeringat ti deka datai? Bebuah meh kita kena nunjukka kita amat udah nesal ati, lalu anang nyebut ngagai diri empu, ‘Kami tu peturun Abraham,’ laban aku madah ngagai kita, Allah Taala ulih ngaga batu tu nyadi peturun Abraham! Indah diatu deh kapak udah sedia deka mungga urat kayu. Semua kayu ti enda mansutka buah ti manah, deka ditebang, lalu dibuai ngagai api. “Aku maptisa kita ngena ai, kena nunjukka kita udah nesal ati, tang Iya ke datai dudi ari aku, bekuasa agi ari aku. Indah minching selipar Iya deh aku enda tau. Iya deka maptisa kita ngena Roh Kudus enggau api. Pekekas ti dikena Iya nampi bisi ba jari Iya. Iya deka nampi lalu nyimpan gandum dalam setor Iya, tang Iya deka nunu ampa dalam api ti enda nemu padam.” Udah bekau nya Jesus datai ari Galili ngagai John di Sungai Jordan ngambika Iya dibaptisa ulih John. John nguji nagang Iya. Ku John, “Aku baru patut dibaptisa ulih Nuan, lalu Nuan datai ngagai aku?” Tang ku Jesus nyaut iya, “Awakka baka nya aja diatu. Laban kitai enda tau enda ngereja semua utai ti lurus.” John lalu besetuju. Lebuh Jesus udah dibaptisa, Iya pansut ari dalam ai. Langit lalu tebuka. Iya lalu meda Roh Allah Taala nurun lalu inggap ba Iya baka burung achang. Siti nyawa lalu bejaku ari serega, “Tu Anak ke dikesayauka Aku. Aku rinduka Iya.” Udah nya Roh Kudus lalu mai Jesus ngagai menua puang, ngambika Iya diuji Sitan. Lebuh Iya udah bepasa empat puluh hari empat puluh malam, Iya lapar. Penguji datai lalu bejaku ngagai Iya, “Enti Nuan amat Anak Allah Taala, asuh batu tu nyadi roti.” Tang ku Jesus nyaut, “Endang udah ditulis, ‘Mensia enda ulih idup makai roti aja, tang beridup ba genap leka jaku ti pansut ari mulut Allah Taala.’ ” Udah nya Sitan mai Jesus ngagai Jerusalem, nengeri ti kudus, ngengkahka Iya ba legit perabung Rumah Sembiang, lalu bejaku ngagai Iya, “Enti Nuan amat Anak Allah Taala, terejun Nuan ari tu, laban endang udah ditulis, ‘Allah Taala deka ngasuh bala melikat Iya nyaga Nuan. Sida deka nyambut Nuan ngena jari sida, ngambika kaki Nuan enda terempas ba batu.’ ” Ku Jesus bejaku ngagai Sitan, “Munyi ti udah ditulis, ‘Anang nguji Tuhan Allah Taala nuan.’ ” Sitan lalu mai Jesus ngagai bukit sigi ti tinggi, lalu mandangka ngagai Iya semua perintah di dunya tu, enggau semua pengaya sida, lalu bejaku ngagai Iya, “Semua utai tu deka diberi aku ngagai Nuan, enti Nuan deka besugang lalu nyembah aku.” Jesus lalu bejaku ngagai iya, “Rari nuan Sitan! Laban endang udah ditulis, ‘Sembah Tuhan Allah Taala nuan, lalu betuaika Iya siku aja!’ ” Udah nya Sitan ninggalka Iya, lalu bala melikat datai lalu ngintu Iya. Lebuh Jesus ninga John udah kena tangkap, Iya lalu mupuk ngagai menua Galili. Iya ninggalka Nasaret, lalu diau di Kapernaum, sebuah nengeri ti ngimbai Danau Galili, di menua Sebulun enggau Naptali. Tu ngamatka jaku ti udah disebut nabi Isaiah, “Menua Sebulun enggau menua Naptali, ti tunga ngagai tasik, di seberai Sungai Jordan, Galili, menua orang bansa bukai! Orang ke diau dalam petang udah meda penampak ti besai. Penampak udah manchar ngagai sida ke diau di menua kelemayang pemati.” Kenyau ari nya Jesus lalu belabuh madahka pesan tu: “Nesal ati ke dosa kita, laban Perintah serega nyau semak!” Lebuh Jesus bejalai ba tebing Danau Galili, Iya tepedaka dua iku orang diri menyadi, Simon ke dikumbai Peter, enggau menyadi iya Andrew, benung nyala, laban seduai iya orang berikan. Ku Jesus bejaku ngagai seduai iya, “Titihka Aku. Aku deka ngajar seduai jalai ngulihka mensia.” Tekala nya seduai iya lalu ninggalka jala seduai, lalu nitihka Jesus. Lebuh Iya mupuk ari endur nya, Iya tepedaka dua iku agi orang diri menyadi, James seduai John, anak Sebedi, dalam perau sama enggau apai seduai iya Sebedi, benung nyeruri jala sida. Jesus lalu ngangauka seduai iya. Tekala nya seduai iya lalu ninggalka perau enggau apai seduai iya, lalu nitihka Jesus. Jesus lalu bejalai di serata menua Galili, ngajar dalam balai gempuru, lalu nusui Berita Manah pasal Perintah Allah Taala, sereta ngeraika orang ke kena laban semua macham penyakit enggau pemedis. Nya alai berita pasal Iya ngelekai di serata menua Siria, lalu orang mai ngagai Iya semua orang ke sakit, ke merinsa laban semua macham penyakit enggau pemedis, orang ke dirasuk antu, ke sakit gila-babi, orang ke sakit bajung, lalu Iya ngeraika semua sida. Mayuh amat orang nitihka Iya ari menua Galili enggau ari Sepuluh Buah Nengeri, ari Jerusalem, ari Judea, enggau ari menua ti di seberai Sungai Jordan. Lebuh Jesus meda bala orang mayuh, Iya niki ngagai bukit sigi, lalu lebuh Iya nudukka Diri, sida murid Iya lalu datai ngagai Iya. Iya lalu belabuh ngajar sida, ku Iya: “Beberekat meh orang ke seranta dalam roh, laban Perintah serega endang enggi sida. “Beberekat meh orang ke ngulit, laban sida deka diperindang. “Beberekat meh orang ke baruh ati, laban sida deka bempu dunya. “Beberekat meh orang ke lapar sereta auska pengelurus, laban Allah Taala deka ngemuaska sida. “Beberekat meh orang ke kasihka orang, laban sida deka nerima pengasih. “Beberekat meh orang ke tuchi ati, laban sida deka meda Allah Taala. “Beberekat meh orang ke bekereja ke pemaik, laban sida deka dikumbai anak Allah Taala. “Beberekat meh orang ke kena perinsa ketegal pengelurus, laban sida deka bempu Perintah serega. “Beberekat meh kita lebuh orang mechat kita lalu merinsaka kita, lalu nyebut semua macham utai ti bula ngelaban kita ketegal Aku. Lantang sereta gaga meh kita, laban upah ti besai udah disedia ke kita di serega, laban nya mega chara orang merinsaka sida nabi ke dulu ari kita. “Kita tu garam dunya. Tang enti garam nadai agi masin, baka ni ku jalai ngaga iya masin baru? Iya nadai guna agi, tang dibuai lalu diindik kaki mensia. “Kita tu penampak dunya. Nengeri ti didirika ba atas munggu, enda ulih dilalaika. Nadai mega orang nungkun lampu, lalu ngerungkup iya ngena bisin, tang ngengkahka lampu nya ba penuduk lampu, lalu lampu nya deka meri penampak ngagai semua orang dalam rumah nya. Baka nya mega kita; awakka penampak kita manchar ngagai orang, ngambika sida meda pemadas pengawa kita lalu ngemuliaka Apai kita ti di serega. “Anang ngumbai Aku datai deka muai Adat, tauka muai ajar sida nabi. Aku ukai datai deka muai Adat, tang deka ngamatka iya. Laban, enggau bendar Aku madah ngagai kita, sebedau langit enggau dunya lesap, nadai leka jaku tauka titik ti pemadu mit deka lenyau ari Adat, sebedau semua utai dikamatka. Nya alai, barang sapa ngelanggar pesan ti pemadu mit tu, lalu ngajar orang ngelanggar iya, deka dikumbai pemadu mit dalam Perintah serega, tang barang sapa ngasika pesan, lalu ngajar orang ngasika iya, deka dikumbai besai dalam Perintah serega. Laban, Aku madah ngagai kita, enti kita enda lebih agi lurus ari sida pengajar Adat enggau orang Parisi, kita enda ulih tama Perintah serega. Kita udah ninga pasal utai ti udah dipadahka ngagai orang ke dulu kelia, ‘Anang munuh orang; barang sapa munuh orang deka kena pechara.’ Tang Aku madah ngagai kita, enti kita ringat ngagai menyadi lelaki tauka menyadi indu kita enggau nadai kebuah-buah, kita deka kena pechara; lalu enti kita ngeleseka menyadi kita, kita deka dibai ngagai Kunsil; lalu enti kita nyebut, ‘Nuan tu beli’, kita deka dibuai ngagai api neraka. Nya alai lebuh kita deka meri pemeri kita ba alta, lalu teingatka menyadi lelaki tauka menyadi indu kita bisi enda nyamai ati ngagai kita, tinggalka pemeri kita dia di mua alta, bebaik dulu enggau iya, udah nya baru kita mansang lalu meri pemeri kita. “Bebaik enggau naka penyampat enggau orang ke bedawaka kita, lebuh kita benung mansang ngagai kot, enggai ke iya nyerahka kita ngagai hakim, lalu hakim nyerahka kita ngagai jejaga, lalu kita ditutup dalam rumah jil. Enggau bendar Aku madah ngagai kita, kita enda ulih pansut ari rumah jil nya datai ke kita udah mayar semua utang kita. “Kita udah ninga jaku ti munyi tu, ‘Anang butang.’ Tang Aku madah ngagai kita, barang sapa merening ngagai indu enggau ati ti kamah, udah butang enggau indu nya dalam ati iya. Enti mata kanan nuan mai nuan bedosa, keruk lalu buai iya! Manah agi nuan lenyau sebagi ari perengka tubuh nuan, ari ke nejuka semua tubuh nuan dibuai ngagai neraka. Lalu enti jari kanan nuan mai nuan bedosa, tetak lalu buai iya! Manah agi nuan lenyau jari sepiak, ari ke nejuka semua tubuh nuan dibuai ngagai neraka. “Jaku tu udah mega disebut, ‘Barang sapa muai bini, enda tau enda meri bini iya surat sarak.’ Tang Aku madah ngagai kita, genap iku orang ke muai bini, kelimpah ari bini iya butang, deka ngujungka bini iya butang, lalu barang sapa jadi enggau indu ke udah sarak, butang. “Kita udah mega ninga pasal jaku ti udah disebut ngagai orang ke dulu kelia, ‘Anang bulaka semaya, tang kereja utai ti udah disemaya kita enggau Tuhan.’ Tang Aku madah ngagai kita: anang besumpah, nemuka atas nama serega, laban nya kerusi diraja Allah Taala, tauka atas nama dunya, laban nya pelasar ke kaki Iya, tauka atas nama Jerusalem, laban nya nengeri Raja ti besai. Lalu anang besumpah atas pala kita empu, laban kita enda ulih ngaga indah selambar buk kita burak tauka chelum. Semina sebut aja ‘Au’ tauka ‘Enggai’. Utai ti lebih ari nya datai ari Sitan. “Kita udah ninga orang nyebut jaku tu, “Mata balas mata, ngeli balas ngeli.’ Tang Aku madah ngagai kita: Anang ngelaban orang ke jai. Enti orang nampar kuyu kanan kita, awakka iya mega nampar kuyu kiba kita. Lalu enti orang deka nyara kita laban iya deka ngambi baju kita, awakka iya mega ngambi kelambi kita. Lalu enti orang mejalka kita bejalai sekilometer, bejalai dua kilometer. Beri ngagai orang ke minta ari kita, lalu jali ngagai orang ke nginjau ari kita. “Kita udah ninga pasal jaku ti udah disebut, ‘Rinduka pangan kita, lalu begedika munsuh kita.’ Tang Aku madah ngagai kita: rinduka munsuh kita, lalu besampika orang ke merinsaka kita, ngambika kita nyadi anak Apai kita ti di serega, laban Iya ngasuh mata panas manchar ngagai orang ke jai enggau ngagai orang ke manah, lalu ngasuh hari ujan ke orang ke lurus enggau ke orang ke jai. Enti kita semina rinduka orang ke rinduka kita, nama upah kita? Indah sida pengumpul chukai deh nemu ngereja nya. Lalu enti kita semina nabi pangan kita, baka ni ku nya tau lebih ari utai ti dikereja orang bansa bukai? Indah orang bansa bukai deh nemu ngereja nya. Nya alai kita enda tau enda nyadi pemadu badas, baka Apai kita ti di serega. “Anang ngereja pengawa agama di mua orang mayuh, minta diri dipeda sida, laban enti kita ngereja nya, kita nadai bulih upah ari Apai kita ti di serega. “Nya alai, lebuh kita meri sedekah ngagai orang ke suntuk, anang mandangka diri ngereja nya baka ti dikereja orang ke pura-pura ngapa dalam balai gempuru tauka ba sebelah jalai raya, minta diri dipuji mensia. Enggau bendar Aku madah ngagai kita, sida udah nerima upah sida. Tang lebuh kita meri sedekah ngagai orang ke suntuk, anang nejuka jari kiba kita nemu utai ti dikereja jari kanan kita, ngambika pengawa nya dikereja kita belalai, lalu Apai kita ti meda utai ti dikereja kita belalai, deka ngupah kita. “Lalu lebuh kita besampi, anang baka orang ke pura-pura ngapa, laban sida rindu bediri lalu besampi dalam balai gempuru, enggau ba sukut jalai raya, minta diri dipeda orang. Enggau bendar Aku madah ngagai kita, sida udah nerima upah sida. Tang lebuh kita besampi, tama ke bilik, tikupka pintu, lalu besampi ngagai Apai kita ti enda dipeda. Lalu Apai kita ti meda utai ti dikereja kita belalai, deka ngupah kita. Lebuh kita besampi, anang besebutka mayuh macham leka jaku ti nadai reti baka orang bansa bukai, ke ngumbai sampi sida didinga laban sampi sida panjai. Anang baka nya, laban Apai kita nemu utai ti dipeguna kita sebedau kita minta ari Iya. Nya alai, baka tu ku chara kita patut besampi: ‘Apai kami ti di serega: Kudus meh nama Nuan. Datai meh Perintah Nuan. Nyadi meh peneka Nuan di dunya enggau di serega. Beri ngagai kami sehari tu pemakai umbas dipakai kami. Ampun kami penyalah kami, baka kami ke ngampun orang ke salah enggau kami. Lalu anang mai kami ngagai penguji, tang lepaska kami ari penyai. “Laban enti kita ngampun orang ke salah enggau kita, Apai kita ti di serega deka mega ngampun penyalah kita. Tang enti kita enggai ngampun orang ke salah enggau kita, Apai kita pen enggai mega ngampun penyalah kita. “Lalu lebuh kita bepasa, anang ngayanka mua ti tusah, baka orang ke pura-pura ngapa, laban sida ngurik mua diri ngambika orang nemu sida bepasa. Enggau bendar Aku madah ngagai kita, sida udah nerima upah sida. Tang lebuh kita bepasa, empungas mua kita, lalu sugu buk kita, ngambika orang enda nemu kita bepasa, tang semina dipeda Apai kita ti enda dipeda, lalu Apai kita ti meda utai ti dikereja kita belalai, deka ngupah kita. “Anang nyimpan pengaya ke diri empu di dunya, alai indu gegat enggau tegar deka ngerusak, lalu perumpak tama lalu ngenchuri, tang simpan pengaya ke diri empu di serega, alai indu gegat, enggau tegar enda ngerusak, lalu perumpak enda tama lalu ngenchuri. Laban dia alai pengaya kita, dia meh alai ati kita. “Mata nyadika lampu tubuh. Nya alai, enti mata kita menyana, semua tubuh kita penuh laban penampak, tang enti mata kita enda menyana, semua tubuh kita penuh laban pemetang. Nya alai, enti penampak ti dalam kita nya pemetang, naka meh pemalat pemetang nya! “Nadai orang ulih betuaika dua iku tuan, laban iya deka begedika siku, lalu rinduka siku, tauka angkunka siku, lalu mechat siku. Kita enda ulih betuaika Allah Taala enggau duit. “Nya alai Aku madah ngagai kita: anang irauka pasal pengidup kita, tauka utai ti deka diempa tauka diirup kita, tauka pasal tubuh enggau gari kita. Ukai enda pengidup beguna agi ari pemakai, lalu tubuh beguna agi ari gari? Peda kita burung. Sida nadai betanamka utai, nadai ngetau, tauka besimpanka utai dalam setor, tang taja pia, Apai kita ti di serega nupi sida! Kati kita enda berega agi ari burung? Kati kita ulih nginsur umur diri panjai agi ngena pengirau kita? “Lalu nama kebuah kita irauka gari? Peda kita penumbuh bungai babas. Sida enda gawa, tauka ngaga gari ke diri empu, tang taja pia, Aku madah ngagai kita, indah Raja Solomon enggau semua pengaya iya, deh nadai gari ngemanah siti ari bungai nya. Tang enti Allah Taala ngari rumput ti di babas, ti idup sehari tu lalu dibuai pagila ngagai api, enda ke Iya deka ngari kita? Naka meh pengemit pengarap kita. “Nya alai, anang irau lalu nyebut: ‘Nama utai ti deka diempa kitai? tauka, ‘Nama utai ti deka diirup kitai?’ tauka ‘Nama gari ti deka dikena kitai?’ Laban nya utai ti ngirauka ati orang kapir, lalu Apai kita ti di serega nemu kita begunaka semua utai nya. Tang giga dulu Perintah Allah Taala enggau pengelurus Iya, lalu semua utai nya deka mega diberi ngagai kita. Nya alai, anang irauka pasal pagila, laban pagila chukup pengirau ke diri empu. Penusah ke sehari tu chukup ke sehari tu. “Anang ngakim, ngambika kita enda diakim. Laban chara kita ngakim, deka dikena ngakim kita, lalu takar ti dikena kita nakar deka dikena nakar utai ke kita. Nama kebuah kita betilikka empeleman ba mata menyadi kita, tang enda bedulika lumpung kayu ti ba mata kita empu? Tauka, baka ni ku kita nyebut ngagai menyadi kita, ‘Awakka aku muai empeleman ari mata nuan,’ tang kita bisi lumpung kayu dalam mata kita empu? Kita tu orang ke pura-pura ngapa! Buai dulu lumpung kayu ari mata kita empu. Nya baru mata kita lansik, lalu kita ulih muai empeleman ari mata menyadi kita. “Anang meri utai ti kudus ngagai ukui, lalu anang nibarka batu mutiara ngagai babi, enggai ke sida ngelunjak utai nya, lalu mutar ngamuk kita. “Pinta, lalu kita deka nerima. Giga, lalu kita deka nemu. Tekung, lalu utai nya deka dibuka ke kita. Laban genap iku orang ke minta, deka nerima, lalu orang ke ngiga, deka nemu, lalu ke orang ke nekung, utai nya deka dibuka ke sida. Kati kita ke apai meri batu ngagai anak kita enti iya minta roti? Tauka meri iya ular, enti iya minta ikan? Enti kita ke jai nemu meri utai ti manah ngagai anak kita, Apai kita ti di serega tentu nemu agi meri utai ti manah ngagai orang ke minta ari Iya! “Kereja ngagai orang baka ke dikedekaka kita kereja orang ngagai kita, laban nya reti Adat, enggau ajar sida nabi. “Tama nengah pintu ti sempit, laban pintu ti besai enggau jalai ti luas nuju ngagai pengerusak, lalu mayuh orang nengah jalai nya. Tang pintu ti sempit, enggau jalai ti mar, nuju ngagai pengidup, lalu semina mimit aja orang tetemuka iya. “Bejaga ari nabi ti pelesu, ke datai ngagai kita baka bedus, tang iya ti bendar sida nya ukui kampung. Kita deka ngelala sida ari buah sida. Kati buah anggur diambi ari madang duri, tauka buah ara ari madang emperingat? Baka nya mega kayu, semua kayu ti galak mansutka buah ti manah, tang kayu ti enda galak mansutka buah ti enda manah. Kayu ti galak enda ulih mansutka buah ti enda manah, lalu kayu ti enda galak enda ulih mansutka buah ti manah. Kayu ti enda mansutka buah ti manah deka ditebang, lalu dibuai ngagai api. Nya alai, kita deka ngelala sida ari buah sida. “Ukai semua orang ke ngangauka Aku ‘Tuhan, Tuhan’ deka tama ngagai Perintah serega, tang semina orang ke ngereja peneka Apai Aku ti di serega. Lebuh Hari nya ila mayuh orang deka nyebut ngagai Aku ‘Tuhan, Tuhan! Kati kami nadai udah nusui pesan Allah Taala dalam nama Nuan, lalu muru antu dalam nama Nuan, lalu ngereja mayuh kereja ajih dalam nama Nuan?’ Udah nya Aku deka bejaku ngagai sida, ‘Aku enda ngelala kita. Rari ari Aku, kita ke ngereja penyai.’ “Nya alai, orang ke ninga jaku Aku lalu ngasi nya baka orang siku ke pintar, ke nirika rumah iya ba atas batu. Hari ujan, ai bah, lalu ribut bepuput lalu mangka ngagai rumah nya, tang rumah nya enda tumbang, laban iya didirika ba atas batu. “Tang orang ke ninga jaku Aku, lalu enda ngasi, nya baka orang ke beli, ke nirika rumah iya ba pasir. Hari ujan, ai bah, lalu ribut bepuput lalu mangka ngagai rumah nya, lalu rumah nya tumbang. Balat amat rumah nya tumbang.” Lebuh Jesus udah nyebut jaku nya, orang mayuh alit ati ke ajar Iya, laban Iya ngajar sida baka orang ke bisi kuasa, lalu enda baka sida pengajar Adat. Lebuh Jesus nurun ari bukit nya, mayuh amat orang nitihka Iya. Siku lelaki ke sakit lan datai ngagai Iya, besugang di mua Iya, lalu bejaku, “Tuhan, enti Nuan deka, Nuan ulih ngasuh aku tuchi.” Jesus ngunjurka jari, negu orang nya, lalu bejaku, “Aku deka. Tuchi meh nuan.” Orang nya lalu gerai tekala nya. Lalu ku Jesus bejaku ngagai iya, “Anang madahka tu ngagai orang, tang mansang nuan ngagai imam, minta iya meresa nuan, lalu beri piring ti diasuh Moses, kena mandangka ngagai orang mayuh, nuan udah gerai.” Lebuh Jesus tama ngagai nengeri Kapernaum, siku pemesai soldadu Rome betemu enggau Iya, minta saup Iya. Ku iya, “Tuan, nembiak aku sakit, gali di rumah, enda ulih engkebut, lalu merinsa amat.” Ku Jesus bejaku ngagai iya, “Aku deka kin lalu ngeraika iya.” Tang ku pemesai nya bejaku, “Tuan, rumah aku enda patut alai Nuan datai. Tak bejaku aja, lalu nembiak aku deka gerai. Laban aku empu bekereja di baruh orang, lalu aku mega bisi soldadu dipegai aku. Aku bejaku ngagai siku, ‘Mupuk nuan!’ lalu iya mupuk. Aku bejaku ngagai siku, ‘Datai kitu!” lalu iya datai. Aku bejaku ngagai ulun aku, ‘Kereja tu!” iya lalu ngereja.” Lebuh Jesus ninga nya, Iya balat alit ati, lalu bejaku ngagai orang ke nitihka Iya, “Enggau bendar Aku madah ngagai kita, indah di menua Israel deh Aku nadai udah kala tetemuka pengarap ti baka tu. Aku madah ngagai kita, mayuh orang deka datai ari timur enggau ari barat, lalu duduk makai enggau Abraham, Isak enggau Jakop dalam Perintah serega, tang orang ke patut bempu Perintah nya deka dibuai ngagai endur ti petang, alai sida deka nyabak sereta begerit ngeli.” Jesus lalu bejaku ngagai pemesai soldadu nya, “Mupuk meh nuan. Utai ti dikarapka nuan, deka nyadi.” Nembiak pemesai nya lalu gerai betul-betul ba maya nya. Lebuh Jesus tama ngagai rumah Peter, Iya meda mentua indu Peter gali ba peninduk iya, sakit chelap angat. Jesus negu jari iya, lalu iya gerai. Iya angkat, lalu mela Jesus. Lemai nya mayuh orang ke dirasuk antu dibai ngagai Jesus, lalu Iya muru roh antu ngena seleka aja jaku, lalu ngeraika semua sida ke sakit. Tu ngamatka jaku ti udah disebut Tuhan ngena nabi Isaiah, “Iya nanggung pemedis kitai lalu muai penyakit kitai.” Lebuh Jesus meda pemayuh orang begelumu ngelingi Iya, Iya lalu ngasuh sida murid Iya ngelayang ke seberai danau nya. Siku pengajar Adat datai ngagai Iya, lalu bejaku, “Pengajar, aku deka bejalai enggau Nuan ngagai sebarang endur Nuan bejalai.” Ku Jesus bejaku ngagai iya, “Munsang bisi lubang, lalu burung bisi tansang, tang Anak Mensia nadai endur alai ngalika Diri.” Siku ari sida murid Iya bejaku ngagai Iya, “Tuhan, awakka aku pulai dulu lalu nguburka apai aku.” Tang ku Jesus bejaku ngagai iya, “Titihka Aku. Awakka orang ke mati nguburka bala sida empu ke mati.” Lebuh Jesus nepan ngagai perau, sida murid Iya lalu mupuk enggau Iya. Tekala nya kabut lalu mangka ba danau nya, lalu perau sida nyau deka karam. Tang Jesus tinduk. Sida mansang ngagai iya lalu ngerak Iya. Ku sida, “Selamatka kitai, Tuhan! Mati kitai tu!” Ku Iya bejaku ngagai sida, “Nama kebuah kita takut? Mit amat meh pengarap kita.” Iya angkat lalu ngerara ribut enggau gelumbang. Semua utai lalu teduh magang. Sida balat alit ati, ku sida, “Sapa orang tu, datai ke ribut enggau gelumbang ngasika Iya?” Lebuh Jesus datai di menua Gadara, di seberai danau nya, dua iku lelaki ke dirasuk antu pansut ari pendam lalu mansang ngagai Iya. Seduai tu mangah amat, datai ke orang nyau nadai berani bejalai nengah jalai nya. Tekala nya seduai iya lalu merakka nyawa bejaku, “Nama guna Nuan enggau kami, Nuan Anak Allah Taala? Kati Nuan datai deka merinsaka kami sebedau maya ti patut?” Nyadi enda jauh ari endur nya bisi raban babi, benung makai. Lalu ku bala antu nya bejaku ngagai Jesus, “Enti Nuan muru kami, awakka kami tama ngagai raban babi nya.” Lalu ku Iya bejaku ngagai sida, “Mupuk meh kita!” Sida mupuk, lalu tama ngagai raban babi nya. Semua babi nya lalu belanda nurun tebiang, terejun ngagai danau, lalu mati lemas. Orang ke ngibun raban babi nya lalu rari, tama ngagai nengeri, lalu madahka semua utai nya, enggau pasal utai ti udah nyadi ba orang ke dirasuk antu nya. Genap iku orang lalu pansut ari nengeri nya deka betemu enggau Jesus, lalu lebuh sida meda Iya, sida lalu minta Iya mupuk ari menua sida. Jesus nepan ngagai perau, ngelayang danau nya ke seberai, lalu datai ba nengeri Iya Empu. Orang lalu mai ngagai Iya siku lelaki ke sakit bajung, gali ba peninduk. Lebuh Jesus meda pengarap sida, Iya lalu bejaku enggau orang ke sakit bajung nya, “Anang takut, anak! Dosa nuan diampun.” Sekeda pengajar Adat lalu bejaku enggau pangan diri, “Orang tu bejaku busung!” Tang Jesus nemu peragam ati sida, lalu ku Iya bejaku, “Nama kebuah kita berunding jai baka nya dalam ati kita? Ni ti nyamai agi disebut, ‘Dosa nuan diampun,’ tauka ‘Angkat nuan, lalu pulai ke rumah’? Tang ngambika kita nemu Anak Mensia bisi kuasa ngampun dosa di dunya tu” -- Iya lalu bejaku ngagai orang ke sakit bajung nya -- “Angkat nuan, bai peninduk nuan, lalu pulai ke rumah.” Lelaki nya angkat, lalu pulai ke rumah. Lebuh orang mayuh meda nya, sida takut, lalu muji Allah Taala ti udah meri kuasa ti besai baka nya ngagai mensia. Lebuh Jesus bejalai ari endur nya, Iya tepedaka siku pengumpul chukai ke benama Matthew, duduk dalam opis iya. Ku Jesus bejaku ngagai iya, “Titihka Aku.” Matthew angkat, lalu nitihka Iya. Lebuh Jesus benung makai dalam rumah Matthew, mayuh pengumpul chukai enggau orang ke bedosa datai lalu makai enggau Iya sereta enggau sida murid Iya. Lebuh orang Parisi meda nya, sida lalu bejaku ngagai murid Iya, “Nama kebuah pengajar kita begulai makai enggau pengumpul chukai sereta enggau orang ke bedosa?” Lebuh Jesus ninga nya, Iya lalu bejaku, “Orang ke gerai enda begunaka lutur, tang semina orang ke sakit. Mupuk kita lalu giga reti jaku tu: ‘Aku begunaka pengasih, ukai piring.’ Laban Aku datai ukai ngangauka orang ke lurus, tang ngangauka orang ke bedosa.” Udah nya sida murid John Pemaptisa datai ngagai Jesus, lalu nanya Iya, “Nama kebuah kami enggau orang Parisi selalu bepasa, tang murid Nuan enda?” Ku Jesus bejaku ngagai sida, “Kati bala pengabang ba gawai tikah ngulit seagi-agi lelaki ke ditikah nya meruan enggau sida? Maya deka datai alai lelaki ke ditikah nya deka diambi ari sida. Nya baru sida deka bepasa. Nadai orang nampal baju ti lama ngena chebik kain ti baru, laban chebik kain ti baru deka kesat, lalu ngasuh baju nya balat agi charik. Lalu nadai mega orang nyimpan wain ti baru dalam kambut wain ti lama, enggai ke kambut nya pechah, lalu wain nya deka nyaya, lalu kambut nya rusak, tang wain ti baru disimpan dalam kambut ti baru. Nya baru wain enggau kambut nya enda rusak.” Lebuh Jesus agi benung bejaku ngagai sida, siku pemesai orang Judah datai, besugang di mua Iya, lalu bejaku, “Anak indu aku baru udah mati. Tang aku minta Nuan datai lalu ngengkahka jari Nuan ba atas iya, ngambika iya idup baru.” Jesus angkat lalu nitihka iya, sama enggau sida murid Iya. Siku indu ke sakit begetah dua belas taun datai ari belakang, lalu negu puting kelambi Jesus, laban ku indu nya bejaku dalam ati diri, “Enti aku negu gari Iya, aku deka gerai.” Jesus nguing, tepedaka indu nya, lalu bejaku, “Anak, anang takut! Pengarap nuan udah ngeraika nuan.” Indu nya lalu gerai tekala nya. Lebuh Jesus datai ba rumah pemesai nya, lalu tepedaka bala orang ke besepuka kesuling, enggau orang ke begau, Iya lalu bejaku, “Pansut kita ari tu! Laban anak mit tu ukai mati, tang tinduk!” Sida lalu ketawaka Iya. Tang lebuh semua orang udah diburu pansut, Jesus tama, lalu megai jari anak mit nya. Anak mit nya lalu angkat. Berita pasal nya ngelekai di serata menua nya. Lebuh Jesus bejalai ari endur nya, dua iku orang ke buta nitihka Iya, lalu ngangau, “Anak David, kasihka kami!” Lebuh Jesus tama ngagai rumah nya, orang buta ke dua iku nya lalu datai ngagai Iya. Iya lalu bejaku ngagai seduai iya, “Kati seduai arapka Aku ulih ngeraika seduai?” “Kami arap, Tuhan!” ku seduai iya nyaut. Jesus lalu negu mata seduai iya, lalu bejaku, “Awakka utai ti dikarapka seduai nyadi!” Mata seduai iya lalu tebuka. Jesus lalu berat-rat nangkan seduai iya enggau jaku, “Anang madahka utai tu ngagai orang!” Tang seduai iya angkat ari endur nya, lalu madahka berita pasal Jesus di serata menua nya. Lebuh orang dua iku nya mupuk ari endur nya, siku lelaki ke bisu laban antu dibai ngagai Jesus. Lebuh antu nya udah diburu, orang nya lalu bejaku, lalu semua orang balat alit ati, ku sida, “Nadai utai baka tu udah kala dipeda di menua Israel!” Tang ku orang Parisi bejaku, “Iya muru antu ngena kuasa raja antu.” Jesus bejalai ngagai semua nengeri enggau genturung pendiau, ngajar dalam balai gempuru, nusui Berita Manah pasal Perintah Allah Taala, lalu ngeraika orang ari semua macham pemedis enggau penyakit. Lebuh Iya meda bala orang mayuh, Iya kasihka sida laban sida irau ati sereta nadai daya, baka bedus ti nadai orang ngibun. Iya lalu bejaku ngagai sida murid Iya, “Utai ti diketau mayuh, tang orang ke ngetau mimit. Nya alai besampi minta orang ke bempu umai ngirumka mayuh agi orang ngetau.” Jesus lalu ngangauka dua belas iku murid ngagai Iya, lalu meri sida kuasa muru roh ti jai, sereta ngeraika semua macham pemedis enggau penyakit. Tu nama sida ke dua belas iku nya: Simon, ke dikumbai Peter, enggau menyadi iya Andrew; James anak Sebedi, enggau menyadi iya John; Philip enggau Bartolomew; Thomas enggau Matthew ke pengumpul chukai, James anak Alpius enggau Tadeus; Simon ke digelar bujang berani, enggau Judas Iskariot, ke nyual Jesus. Sida ke dua belas iku nya lalu diasuh Jesus bejalai. Ku Iya, “Anang bejalai ngagai orang bansa bukai, tauka ngagai nengeri orang Samaria, tang bejalai ngagai orang Israel ke tesat baka bedus. Lebuh kita bejalai, padahka Berita Manah tu: ‘Perintah serega nyau semak!’ Geraika orang ke sakit, angkatka orang ke mati pulai idup baru, geraika orang ke sakit lan, buru antu. Kita udah nerima ngena chara pechuma, nya alai beri ngena chara pechuma. Anang mai duit emas tauka pirak tauka duit engkeraju. Anang mai kambut lebuh kita bejalai, tauka baju kena besilih, tauka selipar, tauka tungkat, laban orang ke bekereja endang patut diberi utai ti dipeguna iya. “Lebuh kita datai ba nengeri tauka genturung pendiau, giga orang ke deka nerima kita, lalu diau enggau iya datai ke kita angkat ari endur nya. Lebuh kita tama ngagai rumah orang, beri jaku tabi ngagai rumah nya. Enti orang dalam rumah nya nerima kita, awakka jaku tabi kita mengkang dia. Tang enti sida enggai nerima kita, ambi pulai baru jaku tabi kita nya. Lalu enti orang enggai nerima kita tauka enggai mendingka kita, tesai abus ari kaki kita lebuh kita angkat ari rumah tauka ari nengeri nya. Enggau bendar Aku madah ngagai kita, lebuh Hari Pechara ila, Allah Taala deka lebih agi kasihka orang Sodom enggau orang Gomorah, ari ke kasihka orang ke di nengeri nya! “Aku ngasuh kita bejalai baka bedus ngagai raban ukui kampung. Nya alai kita enda tau enda pintar baka ular, sereta nelap baka burung achang. Bejaga kita ari sida, laban sida deka nangkap kita, lalu ngirit kita ngagai kot, lalu nyipat kita dalam balai gempuru sida. Kita deka kena pechara di mua gabenor enggau raja ketegal Aku, ngambika kita besaksika pasal Aku ngagai sida enggau ngagai orang bansa bukai. Lebuh sida nyerahka kita ngambika kita kena pechara, anang irauka jalai kita deka bejaku tauka utai ti deka disebut kita, laban kita deka diberi utai ti deka disebut kita lebuh maya nya, laban ukai kita ke bejaku, tang Roh Apai kita ti bejaku ngena kita. “Menyadi deka nyerahka menyadi ngambika sida dibunuh, lalu apai deka nyerahka anak. Anak deka angkat ngelaban apai indai, lalu ngasuh sida dibunuh. Lalu semua orang deka begedika kita ketegal nama Aku. Tang orang ke tan datai ke ujung, deka diselamatka. Lebuh sida merinsaka kita ba nengeri siti, rari ngagai nengeri siti, laban enggau bendar Aku madah ngagai kita, kita enda ulih nembuka pengawa kita dalam semua nengeri di menua Israel sebedau Anak Mensia datai. “Murid nadai kala lebih ari pengajar iya, lalu ulun nadai kala lebih ari tuan iya. Nya alai, murid patut nemu puas ati enti iya sebaka enggau pengajar iya, lalu ulun sebaka enggau tuan iya. Enti tuai bilik dikumbai Belsebup, sida sebilik tentu deka dikumbai ngena nama ti jai agi ari nya! “Nya alai, anang takutka sida, laban nadai utai ti ditudung enda dikebakka, tauka dilalaika lalu enda ditemu. Utai ti dipadahka Aku ngagai kita dalam petang, enda tau enda ditusui kita lebuh siang hari, lalu utai ti dipetelaika Aku ngagai kita, enda tau enda disadaka kita ari puchuk perabung. Anang takutka sida ke munuh tubuh, tang enda ulih munuh semengat. Tang kita patut nangika Allah Taala ti ulih ngerusak tubuh enggau semengat kita di neraka. Ukai enda rega burung pipit ka semina satu sen aja? Taja pia, nadai siku sida deka labuh ke tanah, enti Apai kita enda ngemendarka nya. Indah semua lambar buk ba pala kita deh udah diitung magang. Nya alai, anang takut. Kita berega agi ari burung pipit! “Nya alai genap iku orang ke ngaku diri nembiak Aku di mua orang, deka diaku Aku di mua Apai Aku di serega. Tang barang sapa besangkalka Aku di mua orang, deka disangkalka Aku di mua Apai Aku di serega. “Anang ngumbai Aku datai mai pemaik ngagai dunya. Aku ukai datai mai pemaik, tang mai pedang. Aku datai laban Aku deka nyabung anak lelaki ngelaban apai, anak indu ngelaban indai, menantu indu ngelaban mentua indu. Munsuh kita ke pemadu jai nya kita sebilik empu. “Orang ke rinduka apai, tauka indai sida lebih agi ari sida ke rinduka Aku, enda tau nyadi murid Aku. Lalu orang ke rinduka anak lelaki tauka anak indu sida lebih ari sida ke rinduka Aku, enda tau nyadi murid Aku. Lalu orang ke enda ngesan regang diri empu lalu nitihka Aku, enda tau nyadi murid Aku. Orang ke ngidupka nyawa diri, deka ngelenyauka iya, lalu orang ke ngelenyauka nyawa diri ketegal Aku, deka ngidupka iya. “Barang sapa nerima kita, nerima Aku. Lalu barang sapa nerima Aku, nerima Iya ke ngirumka Aku. Barang sapa nerima seruan Allah Taala, laban iya seruan Allah Taala, deka sama enggau seruan nya bempu upah iya. Lalu barang sapa nerima orang ke manah, laban iya nya orang ke manah, deka sama enggau orang ke manah nya bempu upah iya. Lalu barang sapa meri ai irup ngagai murid Aku ke pemadu mit tu, laban iya murid Aku, enggau bendar Aku madah ngagai kita, sida deka nerima upah sida.” Lebuh Jesus udah tembu ngajar murid Iya ke dua belas iku nya, Iya angkat ari endur nya lalu ngajar sereta nusui Berita Manah dalam nengeri di menua nya. Lebuh John Pemaptisa, ke ditutup dalam rumah jil, ninga pasal utai ti dikereja Jesus, iya lalu ngasuh sekeda murid iya mai pesan tu ngagai Jesus, ku iya, “Kati Nuan tu orang ke deka datai, tauka kami nganti orang bukai?” Disaut Jesus, “Pulai kita lalu padahka ngagai John utai ti didinga enggau dipeda kita: orang ke buta, meda; orang ke kait-kupit, bejalai; orang ke sakit lan, dituchi, orang ke bengal, ninga; orang ke mati, diangkatka idup baru, lalu Berita Manah ditusui ngagai orang ke seranta. Beberekat meh orang ke enda nulak Aku!” Lebuh sida murid John mupuk, Jesus lalu belabuh bejaku ngagai orang mayuh pasal John: “Nama utai ti deka dipeda kita lebuh kita bejalai di menua puang? Buluh ti beguyat laban ribut? Nama kebuah kita bejalai ngagai menua puang? Deka meda orang ke ngena gari ti manah? Orang ke ngena gari ti manah diau dalam istana! Nama utai ti deka dipeda kita? Deka meda siku nabi? Sigi amat, tang lebih ari nabi. Nya meh orang ke dikenang dalam Bup Kudus: ‘Aku deka ngasuh seruan Aku bejalai dulu ari Nuan, ti deka nyendiaka jalai ke Nuan.’ Enggau bendar Aku madah ngagai kita, ari semua orang ke udah diadaka, nadai siku ke besai agi ari John Pemaptisa. Tang Iya ke pemadu mit dalam Perintah serega, lebih agi besai ari iya. Kenyau ari maya John Pemaptisa, nyentuk ngagai diatu, Perintah serega udah balat diserang, lalu orang ke mangah nguji ngerampas Perintah nya ngena chara ti kasar. Laban semua sida nabi enggau Adat Moses udah benabi nyentuk ngagai maya John datai, lalu enti kita deka nerima pesan sida, John nya meh Elijah ke deka datai. Awakka orang ke bisi pending, ninga. “Tang baka ni ku Aku mandingka rebak ti diatu? Sida nya baka bala anak mit ke duduk di pasar, lalu bekangauka pangan diri, ‘Kami nyepu kesuling ke kita, tang kita enggai betanda! Kami bekeduie nyabak, tang kita enda ngulit!’ Laban John datai ukai deka makai ngirup; tang ku sida, ‘Iya dirasuk antu!’ Anak Mensia datai, makai ngirup, tang ku sida, ‘Peda orang nya, bam, sereta pemabuk, bepangan enggau orang ke pengumpul chukai, enggau orang ke bedosa!’ Tang penemu-dalam Allah Taala dikamatka ulih utai ti dikereja penemu-dalam nya empu.” Jesus lalu belabuh nganu nengeri ti udah alai Iya ngereja mayuh kereja ajih, laban orang dia enda nesal ati ke dosa sida. “Tulah meh nuan, Korasin! Tulah meh nuan, Betsaida! Laban enti kereja ajih ti dikereja dalam seduai, udah dikereja di Tire enggau di Sidon, orang dia tentu lama udah nesal ati lalu ngerasukka kain guni, lalu ngerabu diri enggau amau. Tang enggau bendar Aku madah ngagai kita, lebuh Hari Pechara ila, Allah Taala deka lebih agi kasihka orang Tire enggau orang Sidon, ari ti kasihka kita! Lalu nuan, Kapernaum! Kati nuan deka diangkatka ke serega? Nuan deka dibuai ngagai neraka! Laban enti kereja ajih ti dikereja dalam nuan, udah dikereja di Sodom, nengeri nya tentu agi meruan nyentuk ngagai sehari tu! Tang Aku madah ngagai nuan, lebuh Hari Pechara ila, Allah Taala deka lebih agi kasihka Sodom, ari ti kasihka nuan!” Lebuh maya nya Jesus bejaku, “Aku meri terima kasih ngagai Nuan Apai, Tuhan ke bekuasa di serega enggau di dunya, laban Nuan udah ngelalaika utai nya ari orang ke bepenemu-dalam sereta pandai, lalu udah mandangka sida ngagai bala anak mit. Sigi amat Apai, laban nya endang peneka Nuan. “Semua utai udah diberi Apai ngagai Aku. Nadai orang ngelala Anak, semina Apai aja, lalu nadai orang ngelala Apai, semina Anak aja, enggau orang ke dipilih Anak alai Iya mandangka Apai. “Datai ngagai Aku semua kita ke lelak ngema utai ti berat, lalu Aku deka ngasuh kita belelak. Ambi lalu san tangkun Aku, lalu belajar ari Aku, laban Aku nelap sereta baruh ati, lalu belelakka semengat kita. Laban tangkun Aku mudah, lalu ma Aku lempung.” Lebuh maya nya, kena hari Sabat, Jesus bejalai nengah umai gandum. Sida murid Iya lapar lalu belabuh ngerurut tangkai gandum, lalu bepakaika igi gandum. Tang lebuh orang Parisi meda nya, sida lalu bejaku ngagai Jesus, “Peda Nuan, sida murid Nuan ngereja utai ti enda disagi Adat lebuh hari Sabat!” Ku Jesus bejaku ngagai sida, “Kati kita nadai udah kala macha pasal utai ti dikereja David lebuh iya enggau bala iya lapar, pasal iya ke tama ngagai rumah Allah Taala, lalu makai roti ti udah diberi ngagai Allah Taala, ti enda tau diempa iya, nitihka Adat, tauka diempa orang ke enggau iya, tang semina tau diempa imam aja? Kati kita nadai udah kala macha dalam Adat, pasal sida imam ke sengaja ngelanggar Adat hari Sabat dalam Rumah Sembiang genap hari Sabat, tang enda dikumbai salah? Aku madah ngagai kita, utai ti besai agi ari Rumah Sembiang bisi ditu. Lalu enti kita nemu reti jaku, ‘Aku begunaka pengasih, ukai piring’, kita tentu enda ngukum orang ke nadai penyalah, laban Anak Mensia Tuhan ke hari Sabat.” Jesus lalu mupuk ari endur nya, lalu tama ngagai sebuah balai gempuru. Dalam balai gempuru nya bisi siku lelaki ke mati jari sepiak. Lalu sida nanya Jesus, “Kati kitai ngelanggar Adat enti kitai ngeraika orang lebuh hari Sabat?” Sida nanya munyi nya ngambika sida ulih bedawaka Iya. Ku Jesus bejaku ngagai sida, “Baka ni enti siku ari bala kita bisi siku jelu bedus, lalu jelu nya labuh ngagai lubang kebung lebuh hari Sabat, enda ke iya deka ngulihka jelu nya ari lubang nya? Mensia berega agi ari bedus! Nya alai kitai enda ngelanggar Adat enti kitai ngereja pengawa ti manah lebuh hari Sabat.” Udah nya Iya lalu bejaku ngagai orang ke mati jari nya, “Unjurka jari nuan.” Orang nya lalu ngunjurka jari iya, lalu jari iya gerai, baka jari iya ti sepiak. Tang orang Parisi pansut lalu baum ngiga jalai munuh Jesus. Lebuh Jesus nemu sida bepekat ngelaban Iya, Iya lalu mupuk ari endur nya. Mayuh amat orang nitihka Iya, lalu Iya ngeraika semua sida, lalu nagang sida madahka pasal Iya ngagai orang bukai. Tu ngamatka jaku ti udah disebut Tuhan ngena nabi Isaiah: “Tu Nembiak Aku ti udah dipilih Aku. Aku rindu sereta gaga ati ke Iya. Aku deka nuang Roh Aku ba Iya, lalu Iya deka madahka atur ti lurus ngagai orang bansa bukai. Iya enda bekelikuh tauka merakka nyawa, lalu Iya enda bejaku inggar ba sebelah jalai raya. Iya enggai matahka buluh ti pechah, tauka madamka kelita ti kelap-kelap, datai ke Iya udah ngasuh atur ti lurus menang, lalu semua orang bansa bukai deka andal ati ke Iya.” Siku lelaki ke buta sereta bisu laban iya dirasuk antu, dibai ngagai Jesus, lalu Iya ngeraika orang nya. Orang nya lalu ulih bejaku sereta meda. Lalu semua orang mayuh balat alit ati, ku sida, “Kati Iya amat Anak David?” Tang lebuh orang Parisi ninga nya, sida lalu bejaku, “Iya muru antu ngena kuasa Belsebup ti nyadi raja antu.” Jesus nemu peragam ati sida, lalu ku Iya bejaku ngagai sida, “Genap bengkah menua ti bepechah-belah lalu beripih ngelaban diri empu, deka rusak, lalu nadai nengeri tauka ruang bilik ti bepechah-belah lalu beripih ngelaban diri empu, ulih tan. Lalu enti Sitan muru Sitan, iya beripih ngelaban diri empu. Nya alai baka ni ku perintah iya ulih tan? Lalu enti Aku muru antu ngena kuasa Belsebup, kuasa sapa dikena bala nembiak kita muru antu? Nya alai sida empu deka nyadi hakim kita. Tang enti Aku muru antu ngena kuasa Roh Allah Taala, reti nya Perintah Allah Taala udah datai ba kita. Tauka, baka ni ku orang ulih tama ngagai rumah orang ke kering lalu ngerumpak utai iya, enti iya enda dulu nanchang orang ke kering nya? Udah nya baru iya ulih ngerumpak utai ari rumah orang nya. “Orang ke enda setanah enggau Aku, ngelaban Aku, lalu orang ke enda enggau Aku ngempuru, mambar. Nya alai Aku madah ngagai kita: semua dosa ti dikereja mensia enggau jaku busung sida, deka diampun, tang barang sapa bejaku busung ngelaban Roh Kudus, enda diampun. Barang sapa bejaku ngelaban Anak Mensia, deka diampun, tang barang sapa bejaku ngelaban Roh Kudus, enda diampun, nemuka diatu tauka di dunya ti deka datai. “Intu kayu galak, lalu iya deka mansutka buah ti manah. Enti kitai nejuka kayu ringgas, iya deka mansutka buah ti jai. Kitai ngelala kayu ari buah iya. Kita anak ular! Baka ni ku kita ulih nyebut utai ti manah, enti kita empu endang jai? Laban mulut kita nyebut utai ti ngemenuhka ati kita. Orang ke manah mansutka utai ti manah ari ati iya ti manah, lalu orang ke jai mansutka utai ti jai ari ati iya ti jai. “Aku madah ngagai kita, lebuh Hari Pechara ila, orang enda tau enda madahka semua leka jaku ti enda menyana ti udah disebut sida, laban ulih jaku kita empu kita deka dikumbai lurus, lalu ulih jaku kita empu kita deka diukum.” Udah nya sekeda pengajar Adat enggau orang Parisi bejaku enggau Iya, “Pengajar, kami keran deka meda tanda ari Nuan.” Tang ku Iya nyaut sida, “Rebak ti jai sereta butang tu begigaka tanda, tang nadai tanda deka diberi ngagai sida kelimpah ari tanda nabi Jonah. Baka Jonah ke dalam perut ikan paus tiga hari tiga malam, baka nya meh Anak Mensia deka mengkang dalam tanah tiga hari tiga malam. Orang Nineweh deka angkat sama enggau orang ke ari rebak ti diatu lebuh Hari Pechara ila lalu besalahka sida, laban sida orang Nineweh udah nesal ati ke dosa sida lebuh sida ninga jaku ajar Jonah, lalu diatu utai ti besai agi ari Jonah bisi ditu! Kuin menua Sheba deka angkat sama enggau orang ke ari rebak ti diatu lebuh Hari Pechara lalu besalahka sida, laban iya udah datai ari ujung dunya deka mendingka penalam penemu Solomon, lalu diatu utai ti besai agi ari Solomon bisi ditu! “Lebuh roh ti jai pansut ari orang, iya bejalai nengah menua ti rangkai ngiga endur alai belelak, tang iya nadai tetemuka endur nya. Udah nya iya bejaku, ‘Aku deka pulai baru ngagai rumah ti udah ditinggalka aku.’ Lebuh iya datai ba rumah nya, iya nemu rumah nya puang, udah disapu sereta dikemas. Udah nya iya pansut, lalu mai tujuh iku roh ti bukai, ti jai agi ari iya empu, lalu sida tama lalu diau dia. Lalu pendiau orang nya jai agi ari ti keterubah. Baka nya meh utai ti deka nyadi ba rebak ti jai tu.” Lebuh Jesus agi benung bejaku ngagai orang mayuh, indai enggau sida menyadi lelaki Iya bediri di luar, deka bejaku enggau Iya. Siku orang lalu madah ngagai Iya, “Indai enggau sida menyadi lelaki Nuan bisi di luar, deka bejaku enggau Nuan.” Tang ku Jesus nyaut orang nya, “Sapa indai Aku, lalu sapa menyadi lelaki Aku?” Iya lalu nunjuk ngagai sida murid Iya, lalu bejaku, “Tu indai Aku, enggau menyadi lelaki Aku! Laban barang sapa ngereja utai ti dikedekaka Apai Aku ti di serega, nya meh menyadi lelaki, menyadi indu, enggau indai Aku.” Ba hari nya mega Jesus pansut ari rumah lalu duduk ba tebing danau. Mayuh amat orang begelumu ngelingi Iya. Nya alai Iya nepan sebuah perau, lalu nudukka Diri dia, lalu bala orang mayuh bediri ba tebing. Iya lalu madahka mayuh macham utai ngagai sida ngena jaku sempama. Ku Iya, “Orang siku naburka benih. Lebuh iya naburka benih, sekeda leka benih nya labuh ba jalai raya. Burung datai, lalu makai benih nya. Sekeda labuh ba tanah ti bebatu ti nadai mayuh tanah, lalu leka benih nya matuk tekala nya, laban tanah dia mabu, tang lebuh mata panas niki, sida kena panchar mata panas nya lalu layu laban sida nadai urat. Leka benih ti bukai labuh ba madang duri, lalu duri nya tumbuh lalu ngalahka sida. Benih ti bukai labuh ba tanah ti ami, lalu bebuah, sekeda mansutka seratus, sekeda enam puluh, lalu sekeda tiga puluh. Awakka orang ke bisi pending, ninga.” Udah nya sida murid datai lalu bejaku enggau Iya, “Nama kebuah Nuan bejaku ngagai sida ngena jaku sempama?” Ku Iya nyaut sida, “Kita udah diberi penemu pasal misteri Perintah serega, tang penemu nya apin diberi ngagai sida. Laban orang ke bisi utai, deka diberi mayuh agi, lalu iya deka ngembuan mayuh agi utai, tang orang ke nadai utai, indah utai ti mimit ti dikemisi iya deh deka dirampas ari iya. Nya kebuah Aku bejaku ngagai sida ngena jaku sempama, ngambika sida merening, tang enda meda, mending, tang enda ninga tauka mereti. Ba sida tu meh jaku nabi Isaiah dikamatka: ‘Kita amat deka mending, tang enda mereti, lalu kita amat merening, tang enda meda. Laban sida enda nemu berunding, lalu pending sida bengal, lalu sida udah nutup mata sida, enggai ke sida meda ngena mata sida, lalu ninga ngena pending sida, lalu mereti ngena ati sida, lalu nguingka diri ngagai Aku, lalu Aku ngeraika sida.’ “Tang beberekat meh mata kita, laban sida meda, enggau pending kita, laban sida ninga. Enggau bendar Aku madah ngagai kita, mayuh nabi enggau orang ke lurus ingin deka meda utai ti dipeda kita, tang nadai meda utai nya, lalu ingin deka mendingka utai ti dipendingka kita, tang nadai ninga utai nya. “Nya alai pendingka sempama penabur benih. Lebuh orang ninga pesan pasal Perintah Allah Taala, lalu enda meretika pesan nya, Sitan datai lalu ngerampas utai ti udah ditaburka ngagai ati orang nya. Nya meh leka benih ti labuh ba jalai raya. Nyadi benih ti labuh ba tanah ti bebatu nya orang ke ninga pesan nya lalu tekala nya nerima iya enggau ati ti gaga. Tang iya nadai urat, lalu semina tan enda lama aja. Lebuh iya dituntung penusah tauka pemerinsa ketegal pesan nya, iya lalu tekala nya mungkir. Benih ti labuh ba madang duri nya orang ke ninga pesan nya, tang pengangkun iya ke dunya, enggau ke pengaya ngalahka pesan nya, lalu pesan nya enda ulih bebuah. Nyadi benih ti labuh ba tanah ti ami nya orang ke ninga pesan nya, lalu meretika iya. Iya lalu bebuah, siku seratus leka, siku enam puluh, lalu siku tiga puluh.” Jesus madahka siti agi jaku sempama ngagai sida. Ku Iya, “Perintah Allah Taala tau dibandingka enggau orang siku ke nanam leka benih ti manah ba umai iya. Tang lebuh iya tinduk, munsuh datai lalu nanam leka rumput ba madang gandum nya, lalu mupuk ari endur nya. Nya alai lebuh gandum nya tumbuh, lalu murai, rumput mega pegari. Bala orang gaji iya datai lalu bejaku ngagai iya, ‘Tuan, ukai enda nuan naburka benih ti manah ba umai nya? Nama kebuah umai nya bisi rumput?’ Ku tuan nya nyaut, ‘Nya utai dikereja munsuh.’ Lalu ku sida bejaku ngagai iya, ‘Kati nuan deka ngasuh kami nyabut rumput nya?’ Tang ku iya nyaut, ‘Anang, enggai ke kita techabutka gandum lebuh kita nyabut rumput. Awakka gandum enggau rumput nya sama tumbuh nyentuk ngagai maya ngetau. Lebuh maya ngetau ila aku deka bejaku enggau orang ke ngetau, ngasuh sida ngumpul rumput nya dulu, nanchang lalu nunu rumput nya, lalu nyimpan gandum dalam setor aku.’ ” Jesus madahka siti agi jaku sempama ngagai sida. Ku Iya, “Perintah serega nya baka igi mustard ti dibai orang siku, lalu ditanam iya ba umai iya. Igi mustard nya leka ti pemadu mit ari semua leka utai, tang lebuh iya udah tumbuh, puchuk iya besai, lalu iya nyadi kayu, datai ke burung nyau begagaka tansang ba sebelah dan iya.” Jesus madahka siti agi jaku sempama ngagai sida. “Perintah serega nya baka ragi ti diambi siku indu lalu dichampurka iya enggau empat puluh liter tepung, datai ke semua tepung nya nyau kembai magang.” Semua utai nya dipadahka Jesus ngagai orang mayuh ngena jaku sempama. Iya enda nyebut utai ngagai sida enti enda ngena jaku sempama. Tu ngamatka jaku ti udah disebut beseruanka siku nabi: “Aku deka bejaku ngena jaku sempama, Aku deka nyebut pasal utai ti udah dilalaika kenyau ari penumbuh dunya.” Udah nya Iya ninggalka orang mayuh, lalu pulai ke rumah. Sida murid Iya lalu datai ngagai Iya, ku sida, “Padahka ngagai kami reti sempama pasal rumput ti ba umai nya.” Ku Jesus nyaut, “Orang ke naburka benih ti manah nya Anak Mensia. Umai nya dunya tu, lalu benih ti manah nya nembiak Perintah Allah Taala. Rumput nya nembiak Sitan, lalu munsuh ke nanam leka rumput nya Sitan. Maya ngetau nya pengujung dunya, lalu orang ke ngetau nya bala melikat. Baka rumput ti digumpul lalu ditunu, baka nya meh gaya utai ti deka nyadi lebuh pengujung dunya: Anak Mensia deka ngirumka bala melikat Iya, lalu sida deka muai ari Perintah Iya semua utai ti ngasuh bedosa, enggau semua orang ke ngereja penyai, lalu nikauka sida ngagai serumbung api, alai orang deka nyabak sereta begerit ngeli. Udah nya baru orang ke lurus deka manchar baka mata hari dalam Perintah Apai sida. Awakka orang ke bisi pending, ninga. “Perintah serega mega baka reta ti berega ti dilalaika dalam sebidang tanah, ti ditemu orang siku lalu dilamun iya baru. Enggau ati ti gaga iya mupuk lalu nyual semua reta iya, lalu meli tanah nya.” “Perintah serega mega baka siku orang dagang ke begigaka batu mutiara ti manah. Iya tetemuka sigi batu mutiara ti berega amat, mupuk lalu nyual semua reta iya, lalu meli batu mutiara nya. “Perintah serega mega baka jala ti ditibarka ngagai danau, lalu bulih semua macham ikan. Lebuh jala nya nyau penuh laban ikan, orang lalu narit jala nya ke tebing, duduk lalu nyimpan ikan ti manah dalam bakul, tang muai ikan ti enda manah. Baka nya meh gaya utai ti deka nyadi lebuh pengujung dunya. Bala melikat deka datai lalu nyeraraka orang ke jai ari orang ke lurus, lalu nikauka sida ke jai ngagai serumbung api, alai sida deka nyabak sereta begerit ngeli. “Kati kita meretika semua utai tu?” “Mereti,” ku sida nyaut. Lalu ku Iya bejaku ngagai sida, “Nya alai semua pengajar Adat ti udah dilatih bekereja ke Perintah serega nya baka orang ke bempu rumah, ke mansutka ari setor iya utai ti baru, enggau utai ti lama.” Lebuh Jesus udah tembu madahka semua jaku sempama nya, Iya lalu mupuk ari endur nya. Lebuh Iya datai ba menua Iya Empu, Iya ngajar orang mayuh dalam balai gempuru. Sida alit ati ke Iya lalu ku sida bejaku, “Dini alai orang tu bulih penemu-dalam tu, enggau kereja ajih tu? Ukai enda Iya tu anak tukang kayu? Ukai enda indai Iya benama Maria? Lalu ukai enda Iya tu menyadi James, Josep, Simon enggau Judas? Ukai enda semua menyadi indu Iya bisi ditu enggau kitai? Nya alai dini alai Iya bulih semua utai tu?” Nya alai sida nulak Iya. Tang ku Jesus bejaku ngagai sida, “Nabi endang dibasa orang, kelimpah ari di menua enggau dalam ruang bilik iya empu.” Lalu Iya nadai ngereja mayuh kereja ajih dia, laban sida enda arap. Lebuh maya nya Herod Antipas ke merintah di menua Galili, ninga pasal Jesus, lalu ku iya bejaku enggau bala pemesai iya, “Iya tu John Pemaptisa. Iya udah diangkatka ari mati. Nya kebuah kuasa nya bekereja dalam iya.” Laban Herod udah nangkap John, lalu nanchang iya, lalu nutup iya dalam rumah jil, ketegal Herodias, bini menyadi iya Philip, laban John udah bejaku ngagai Herod, “Nuan salah jadi enggau iya!” Tang taja pen Herod bisi ati deka munuh John, iya takutka orang mayuh, laban sida ngumbai John nabi. Tang lebuh Herod ngintu hari pengada iya empu, anak indu Herodias betanda di mua bala pengabang, lalu Herod gaga amat ati datai ke iya nyau besemaya ngena sumpah deka meri ngagai indu nya sebarang utai ti dipinta iya. Ari asuh indai iya, indu nya lalu bejaku, “Beri ngagai aku ditu pala John Pemaptisa ba atas pinggai!” Raja lalu tusah ati, tang laban iya udah besemaya di mua semua bala pengabang, iya lalu ngasuh orang ngereja utai ti dipinta indu nya. Iya ngasuh orang mumpung pala John dalam rumah jil, lalu pala nya dibai ngena pinggai, lalu disuaka ngagai indu nya. Indu nya lalu mai pala nya ngagai indai iya. Sida murid John datai, ngambi bangkai John, lalu nguburka iya. Udah nya sida mupuk lalu madah ngagai Jesus. Lebuh Jesus ninga nya, Iya mupuk keDiri ari endur nya ngena perau ngagai endur ti sunyi. Tang lebuh orang mayuh ninga nya, sida bedarat nitihka Iya ari nengeri sida empu. Lebuh Jesus angkat ari perau, Iya meda mayuh amat orang, lalu Iya sinu ati ke sida, lalu ngeraika sida ke sakit. Lebuh hari nyau lemai, sida murid datai ngagai Iya, lalu bejaku, “Endur tu nadai mensia, lalu hari pen nyau lemai. Asuh orang mayuh tu mupuk, ngambika sida bejalai ngagai genturung pendiau lalu meli pemakai ke diri empu.” Ku Jesus bejaku, “Sida enda ibuh mupuk. Kita empu meri sida utai diempa!” Ku sida bejaku enggau Iya, “Kami semina bisi lima iti tuku roti, enggau dua iku ikan.” Lalu ku Jesus bejaku, “Bai utai nya kitu ngagai Aku.” Iya lalu ngasuh orang mayuh duduk ba rumput. Iya ngambi lima iti tuku roti enggau dua iku ikan nya, engkadah ke langit, meri terima kasih ke roti enggau ikan nya, mechahka roti nya, lalu nyuaka roti nya ngagai sida murid, lalu sida nyadung roti nya ngagai orang mayuh. Lalu semua orang bela makai lalu kenyang magang. Udah nya, sida murid ngumpul dua belas bakul penuh teda pemakai nya. Pemayuh orang ke makai nya kira lima ribu iku lelaki, enda ngitung sida ke indu enggau anak mit. Udah nya Jesus ngasuh sida murid nepan perau lalu mupuk dulu ke seberai danau nya, lalu Iya Empu ngasuh orang mayuh pulai. Lebuh Iya udah ngasuh orang mayuh pulai, Iya lalu niki ngagai bukit sigi, deka besampi. Lebuh hari nyau lemai, semina Jesus aja bisi dia. Tang ba urung maya nya, perau ti ditepan sida murid nyau udah jauh ari tebing lalu dipangkaka gelumbang, laban sida nanjak ribut. Ba entara pukul tiga enggau pukul enam pagi, Jesus mansang ngagai sida, bejalai ba atas ai. Tang lebuh sida meda Iya bejalai ba atas ai, sida balat amat takut, lalu nyerauh, “Antu!” Tang Jesus lalu tekala nya bejaku enggau sida. Ku Iya, “Anang takut! Aku tu. Anang takut!” Peter lalu nyaut Iya. “Tuhan, enti nya amat Nuan, asuh aku bejalai ba atas ai ngagai Nuan.” Ku Jesus, “Kitu ke nuan!” Peter lalu angkat ari perau lalu bejalai ba atas ai mansang ngagai Jesus. Tang lebuh iya meda pemalat ribut, iya takut, lalu lebuh iya baru deka belabuh tengelam, iya lalu nyerauh, “Tuhan, selamatka aku!” Jesus lalu tekala nya nyapai iya, lalu bejaku, “Mit amat meh pengarap nuan! Nama kebuah nuan kakang?” Lebuh seduai iya nepan ngagai perau, ribut lalu teduh. Sida ke dalam perau nya lalu nyembah Iya. Ku sida, “Nuan amat Anak Allah Taala!” Lebuh sida udah ngelayang ke seberai, sida lalu sangkai di Genesaret. Lalu lebuh orang ke di menua nya ngelala Jesus, sida lalu mesanka orang ari serata menua nya, lalu sida mai ngagai Jesus semua orang ke sakit, minta Iya nejuka sida negu puting kelambi Iya, lalu semua orang ke negu puting kelambi Iya, gerai magang. Udah nya orang Parisi enggau sida pengajar Adat datai ari Jerusalem ngagai Jesus, lalu bejaku, “Nama kebuah sida murid Nuan ngelanggar adat asal aki ini kitai, enda masu jari sida sebedau sida makai!” Ku Jesus nyaut sida, “Lalu nama kebuah kita ngelanggar pesan Allah Taala ketegal adat asal kita? Laban Allah Taala udah meri pesan, ‘Bebasaka apai enggau indai nuan.’ Lalu Allah Taala udah mega bejaku ‘Orang ke bejai apai indai diri, enda tau enda bunuh.’ Tang ku kita, enti orang madah ngagai apai tauka indai iya: ‘Utai ti dipinta nuan ari aku, udah diberi ngagai Allah Taala,’ iya enda ibuh bebasaka apai indai iya. Nya alai, kita udah nulak jaku Allah Taala ketegal adat asal kita. Kita tu orang ke pura-pura ngapa! Betul amat jaku Isaiah lebuh iya benabika pasal kita! ‘Orang tu ngemesaika Aku ngena mulut sida aja, tang ati sida jauh ari Aku. Sida ngelebuka diri nyembah Aku, laban sida ngajar adat mensia.’ ” Jesus lalu ngangauka orang mayuh ngagai Iya, lalu bejaku ngagai sida, “Pendingka tu ulih kita, ngambika kita mereti! Utai ti tama ngagai nyawa orang, nadai ngasuh iya enda tuchi, tang utai ti pansut ari nyawa iya, nya utai ti ngasuh iya enda tuchi.” Udah nya, sida murid Iya datai lalu bejaku enggau Iya, “Kati Nuan nemu orang Parisi pedis ati ninga utai ti disebut Nuan?” Disaut Jesus, “Semua utai ti tumbuh, ti ukai ditanam Apai Aku ti di serega, deka dichabut magang. Anang ibuhka sida. Sida nya malin ke buta. Lalu enti malin ke buta ngiring orang ke buta, seduai iya deka sama labuh ngagai lubang kebung.” Tang ku Peter bejaku ngagai Iya, “Padahka reti jaku sempama nya ngagai kami.” Ku Jesus bejaku, “Kati kita empu agi mengkang enda mereti baka sida? Kati kita enda nemu? Utai ti tama ngagai nyawa, tama ngagai perut, lalu udah nya pansut ari tubuh. Tang utai ti pansut ari nyawa, datai ari ati. Nya utai ti ngamahka mensia. Laban ari ati pansut runding ti jai, munuh orang, butang, bambai, ngenchuri, besaksi bula, enggau bejakuka orang. Nya utai ti ngamahka mensia. Tang makai ngena jari ti enda dibasu, enda ngamahka mensia.” Jesus angkat ari endur nya lalu mupuk ngagai menua semak nengeri Tire enggau Sidon. Siku indu orang Kanaan ari menua nya mansang ngagai Jesus, lalu ngangau, “Kasihka aku, O Tuhan, Anak David! Anak indu aku balat amat diperinsaka antu.” Tang Jesus enda nyaut iya. Sida murid datai lalu bejaku enggau Iya, “Buru indu nya, laban iya rauh-rauh betitihka kitai!” Jesus lalu nyaut, “Aku udah diasuh datai semina ngagai bedus orang Israel ke tesat.” Tang indu nya datai lalu besugang di mua Jesus, lalu bejaku, “Saup aku, Tuhan!” Ku Jesus nyaut, “Aku enda patut ngambi pemakai ari anak mit, lalu nibarka nya ngagai ukui.” Indu nya lalu nyaut, “Nya endang amat, Tuhan, tang indah ukui deh makai teda pemakai ti labuh ari mija tuan iya.” Jesus lalu nyaut iya, “Endu, besai pengarap nuan! Utai ti dikedekaka nuan, deka nyadi.” Anak indu iya lalu gerai tekala nya. Jesus lalu mupuk ari endur nya, lalu bejalai ba tebing Danau Galili. Iya lalu niki ngagai bukit sigi, lalu nudukka Diri. Mayuh amat orang datai ngagai Iya, mai orang ke kait-kupit, orang ke bisi penimpang, ke buta, ke bisu, enggau mayuh orang bukai ke sakit. Sida ngengkahka sida ke sakit semak kaki Jesus, lalu Iya ngeraika sida. Orang mayuh balat alit ati meda orang ke bisu, bejaku, orang ke kait-kupit, bejalai, orang ke timpang pendiau, digeraika, lalu orang ke buta, meda; lalu sida muji Allah Taala orang Israel. Jesus ngangauka sida murid Iya ngagai Iya, lalu bejaku, “Aku sinu ati ke sida, laban sida udah enggau Aku tiga hari, lalu nadai utai diempa. Aku enggai ngasuh sida pulai lapar, enggai ke sida lepi di rantau jalai.” Lalu ku sida murid Iya bejaku enggau Iya, “Dini alai kami di menua puang tu ulih nemu pemakai ti chukup kena meri sida makai?” Jesus lalu nanya sida, “Berapa iti tuku roti dikemisi kita?” “Tujuh iti, enggau dua tiga iku ikan ti mit,” ku sida nyaut. Jesus lalu ngasuh orang mayuh duduk ba tanah, ngambi tujuh iti tuku roti enggau ikan nya. Lebuh Iya udah meri terima kasih, Iya mechahka roti enggau ikan nya, lalu meri roti nya ngagai sida murid; sida lalu nyadung utai nya ngagai bala mayuh. Semua sida bela makai magang, lalu kenyang. Udah nya sida murid lalu ngumpul tujuh bakul penuh teda pemakai nya. Pemayuh orang ke makai nya empat ribu iku lelaki, enda ngitung sida ke indu enggau anak mit. Lebuh Jesus udah ngasuh orang mayuh mupuk, Iya nepan perau, lalu mansang ngagai menua Magadan. Orang Parisi enggau orang Saduki lalu datai ngagai Jesus, deka nguji Iya. Sida minta Iya ngayanka ngagai sida siti tanda ari serega. Ku Jesus nyaut sida, “Lebuh hari nyau lemai, kita nyebut, ‘Manah hari pagila, laban langit mirah.’ Lalu lebuh pagi hari kita nyebut, ‘Kabut hari sehari tu lagi, laban langit mirah sereta mambam.’ Kita nemu madahka gaya hari ari utai ti dipeda kita di langit, tang kita enda nemu macha tanda utai ti nyadi diatu! Rebak ti jai sereta enda tetap ati tu begigaka tanda, tang tanda enda diberi, kelimpah ari tanda Jonah.” Iya ninggalka sida, lalu mupuk ari endur nya. Lebuh sida murid datai di seberai danau nya, sida enda ingat mai roti. Ku Jesus bejaku enggau sida, “Bejimat sereta bejaga ari ragi orang Parisi enggau ragi orang Saduki.” Sida lalu berandau enggau pangan diri. Ku sida, “Kitai nadai mai roti.” Tang Jesus nemu utai ti disebut sida, lalu ku Iya, “Mit amat meh pengarap kita. Nama kebuah kita berandauka pasal nadai roti? Kati kita lalu apin mereti? Kati kita enda ingatka lima iti roti ke lima ribu iku lelaki? Berapa bakul teda digumpul kita? Tauka tujuh iti tuku roti ke empat ribu iku orang? Berapa bakul teda digumpul kita? Nama kebuah kita lalu enda mereti? Aku ukai bejakuka pasal roti. Bejaga kita ari ragi orang Parisi enggau ragi orang Saduki!” Nya baru sida nemu Iya ukai ngasuh sida bejaga ari ragi ti dikena ngaga roti, tang bejaga ari ajar orang Parisi enggau ari ajar orang Saduki. Lebuh Jesus datai semak menua Sesaria Pilipi, Iya lalu nanya sida murid Iya, “Ba penemu orang, sapa Anak Mensia?” Ku sida nyaut, “Sekeda ngumbai Iya John Pemaptisa. Sekeda ngumbai Iya Elijah, lalu sida ti bukai ngumbai Iya Jeremiah tauka siku ari nabi ti bukai.” Iya lalu nanya sida, “Sapa Aku tu ku kita?” Simon Peter lalu nyaut, “Nuan tu Kristus, Anak Allah Taala ti idup.” Jesus lalu nyaut, “Beberekat meh nuan, Simon anak John! Laban mensia nadai madahka utai tu ngagai nuan, tang Apai Aku ti di serega. Lalu Aku madah ngagai nuan, nuan tu Peter lalu ba batu tu Aku deka nirika gerija Aku, lalu pintu neraka enda ulih ngalahka iya. Aku deka meri nuan kunchi Perintah serega, lalu sebarang utai ditanchang nuan di dunya tu, deka ditanchang di serega, lalu sebarang utai dibuka nuan di dunya tu, deka dibuka di serega.” Jesus lalu berat-rat enda nyagi sida murid madah ngagai orang Iya nya Kristus. Berengkah ari nya, Jesus lalu belabuh madah ngagai sida murid Iya, Iya enda tau enda mansang ngagai Jerusalem lalu natka Diri diperinsaka bala tuai bansa, bala tuai imam, enggau bala pengajar Adat, lalu dibunuh, lalu diangkatka idup baru ari mati ba hari ti ketiga. Peter lalu mai Iya ke tisi, lalu belabuh ngerara Iya. Ku Peter, “Allah Taala enda nyagi utai nya nyadi, Tuhan! Utai nya enda tau sekali-kali nyadi ba Nuan!” Tang Jesus nguing lalu bejaku ngagai Peter, “Rari ari Aku, Sitan! Nuan mempang jalai Aku, laban nuan berundingka utai mensia, ukai utai Allah Taala.” Jesus lalu madah ngagai sida murid Iya, “Enti orang deka nitihka Aku, awakka iya badu agi berundingka diri empu, ngesan regang iya, lalu nitihka Aku. Laban barang sapa deka ngidupka nyawa diri, deka ngelenyauka iya, lalu barang sapa ngelenyauka nyawa diri ketegal Aku, deka tetemuka iya. Laban nama penguntung orang, enti iya bempu semua dunya, tang ngelenyauka nyawa diri? Tauka, nama utai ti patut diberi orang kena iya nyilih nyawa diri? Laban Anak Mensia enggau bala melikat Iya deka datai dalam mulia Apai Iya, lalu ngupah genap iku orang nitihka utai ti udah dikereja sida siku-siku. Enggau bendar Aku madah ngagai kita, sekeda orang ke bediri ditu diatu apin mati sebedau sida meda Anak Mensia datai enggau Perintah Iya.” Enam hari udah bekau nya, Jesus mai enggau Iya Peter, James enggau menyadi James ke benama John, niki ngagai bukit sigi ti tinggi, kediri sida aja. Sida lalu meda gamal Iya berubah. Mua Iya manchar baka mata hari, lalu gari Iya bebali beperenching burak. Sida lalu tekala nya meda Moses seduai Elijah pegari lalu bejaku enggau Iya. Lalu ku Peter bejaku ngagai Jesus, “Tuhan, manah kitai diau ditu! Enti Nuan deka, awakka aku ngaga tiga buah langkau kain ditu, sebuah ke Nuan, sebuah ke Moses, lalu sebuah ke Elijah.” Lebuh Peter agi benung bejaku, siti remang ti terang ngayung sida, lalu nyawa bisi didinga bejaku ari dalam remang nya, “Tu Anak ke dikesayauka Aku. Aku rinduka Iya. Pendingka Iya!” Lebuh sida murid ninga nya, sida lalu nyungkurka diri ke tanah, laban sida kelalu balat takut. Tang Jesus datai lalu negu sida. Ku Iya, “Angkat. Anang takut!” Lebuh sida tiga engkadah, sida nadai meda orang bukai, semina Jesus aja. Lebuh sida nurun ari bukit nya, Jesus nangkan sida tiga enggau jaku, ku Iya, “Anang madahka pasal genera nya ngagai orang, nyentuk ngagai maya Anak Mensia udah diangkatka idup baru ari mati.” Sida murid lalu nanya Iya, “Nama kebuah sida pengajar Adat madahka Elijah deka dulu datai?” Disaut Jesus, “Elijah endang amat dulu datai, lalu nyendiaka semua utai. Tang, Aku madah ngagai kita, Elijah udah datai, lalu sida enda ngelala iya, tang merinsaka Iya sepeneka ati sida. Baka nya mega sida deka merinsaka Anak Mensia.” Nya baru sida murid nemu Iya bejaku ngagai sida pasal John Pemaptisa. Lebuh sida datai ba bala mayuh, siku orang datai ngagai Jesus, besugang di mua Iya, lalu bejaku, “Tuhan, kasihka anak aku, laban iya sakit gila-babi, lalu balat amat merinsa. Iya suah udah rebah ngagai api, tauka ngagai ai. Aku udah mai iya ngagai sida murid Nuan, tang sida enda ulih ngeraika iya.” Jesus lalu nyaut, “Kita tu orang ke enda tetap ati sereta jai! Ni pengelama Aku enda tau enda begulai enggau kita? Ni pengelama Aku enda tau enda sabar enggau kita? Bai iya kitu ngagai Aku!” Jesus lalu ngerara antu nya, lalu antu nya pansut ari nembiak nya, lalu nembiak nya gerai tekala nya. Udah nya sida murid datai kediri ngagai Jesus, lalu bejaku, “Nama kebuah kami enda ulih muru antu nya?” Disaut Iya, “Laban kita mit pengarap. Laban, enggau bendar Aku madah ngagai kita, enti kita bisi pengarap ngemesai igi ensabi, kita ulih bejaku ngagai bukit tu, ‘Mindah ari tu ngagai nyin!’ lalu bukit nya deka mindah. Nadai utai enda ulih dikereja kita! Tang utai bansa tu semina ulih diburu ngena sampi enggau bepasa.” Lebuh semua murid begempuru di Galili, Jesus bejaku ngagai sida, “Anak Mensia deka diserahka ngagai orang lalu sidai deka munuh Iya, lalu Iya deka diangkatka idup baru ari mati ba hari ti ketiga.” Ati sida lalu balat tusah. Lebuh sida datai di Kapernaum, orang ke ngumpul duit pupu ke Rumah Sembiang mansang ngagai Peter, lalu nanya, “Kati pengajar kita enda mayar duit pupu Rumah Sembiang?” “Mayar,” ku Peter nyaut. Lebuh Peter pulai ke rumah, Jesus lalu bejaku dulu enggau iya. Ku Iya, “Baka ni ku penemu nuan, Simon? Ari sapa raja dunya ngambi chukai tauka pupu? Ari peranak menua nya empu, tauka ari orang bukai?” “Ari orang bukai,” ku Peter nyaut. Lalu ku Jesus, “Enti pia, peranak menua enda ibuh mayar chukai. Tang ngambika sida enda pedis ati, alai nuan mupuk ngagai danau, lalu ulurka ginti. Dalam nyawa ikan ti terubah diejut nuan, nuan deka tetemuka sesingkap duit. Bai duit nya lalu beri ngagai sida, ke Aku enggau ke nuan.” Lebuh maya nya, sida murid datai ngagai Jesus, lalu nanya, “Sapa orang ke pemadu besai dalam Perintah serega?” Iya lalu ngangauka siku anak mit, lalu ngasuh iya bediri ba tengah-tengah sida. Iya lalu bejaku, “Enggau bendar Aku madah ngagai kita, enti kita enda berubah lalu nyadi baka anak mit, kita enda ulih tama ngagai Perintah serega. Barang sapa ngemaruhka diri baka anak mit tu, deka nyadi orang ke pemadu besai dalam Perintah serega. Barang sapa nerima anak mit baka tu dalam nama Aku, nerima Aku. Enti kita ngasuh siku ari sida ke mit ke arapka Aku, bedosa, manah agi enti batu kisar ti besai ditanchangka ba rekung orang nya, lalu iya dibuai ngagai tasik ti dalam. Tulah meh dunya laban utai ti ngasuh mensia bedosa! Penguji endang enda tau enda datai, tang tulah orang ke ngasuh penguji nya datai! Lalu enti jari tauka kaki nuan mai nuan bedosa, tetak lalu buai iya! Manah agi nuan tama ngagai pengidup nadai jari tauka kaki sepiak, ari ke bisi dua piak jari tauka kaki, tang nuan dibuai ngagai api ti enda nemu padam. Lalu enti mata nuan mai nuan bedosa, keruk lalu buai iya! Manah agi nuan tama ngagai pengidup mai sigi aja leka mata, ari ke bisi dua igi leka mata, tang nuan dibuai ngagai api neraka. “Bejimat kita, enggai ke kita mechat sida ke mit tu. Laban, Aku madah ngagai kita, di serega din melikat sida endang seruran bediri di mua Apai Aku di serega. Laban Anak Mensia datai ngambika Iya nyelamatka orang ke tesat. “Baka ni ku pikir kita? Enti orang siku bisi seratus iku bedus, lalu siku bedus nya lenyau, enda ke iya deka ninggalka sida ke semilan puluh semilan iku ba bukit, lalu bejalai ngiga siku ti lenyau nya? Lalu lebuh iya udah tetemuka bedus nya, enggau bendar Aku madah ngagai kita, iya deka lebih agi gaga ati ke bedus siku nya ari ke sida ke semilan puluh semilan iku ti enda lenyau. Baka nya meh Apai kita ti di serega enggai nejuka indah siku ari sida ke mit tu lenyau. “Enti menyadi nuan bedosa ngelaban nuan, mansang nuan ngagai iya, lalu padahka penyalah iya ngagai iya, entara seduai aja. Enti iya mendingka nuan, reti nya nuan udah ulih nguingka ati iya. Tang enti iya enggai mendingka nuan, bai siku tauka dua iku orang enggau nuan, ngambika ‘genap leka jaku ditetapka beduduk ba saksi dua tauka tiga iku orang.’ Enti iya enggai mendingka sida, padahka ngagai gerija. Lalu enti iya enggai mendingka gerija, gaga iya baka ke ngaga orang bansa bukai, tauka pengumpul chukai. “Enggau bendar Aku madah ngagai kita: sebarang utai ditanchang kita di dunya tu, deka ditanchang di serega, lalu sebarang utai dibuka kita di dunya tu, deka dibuka di serega. “Aku madah ngagai kita baru: enti dua iku kita di dunya tu besetujuka utai ti dipinta kita, utai nya deka dikereja ke kita ulih Apai Aku ti di serega. Laban lebuh dua tauka tiga iku orang begempuru dalam nama Aku, Aku bisi dia enggau sida.” Udah nya Peter datai ngagai Iya lalu bejaku, “Tuhan, enti menyadi aku bedosa ngelaban aku, berapa penyuah aku patut ngampun iya? Tujuh kali?” Ku Jesus madah ngagai iya, “Ukai tujuh kali, tang tujuh puluh kali tujuh. Nya alai Perintah serega tau dibandingka enggau siku raja ke deka meresa akaun bala orang gaji iya. Lebuh iya baru deka belabuh ngereja pengawa nya, siku orang gaji, ke udah nginjau bejuta-juta ringgit, dibai betemu enggau iya. Laban orang gaji nya enda tebayarka utang diri, nya alai raja lalu ngasuh iya dijual, sama enggau bini enggau bala anak iya, sereta enggau semua reta tengkira iya, kena mayar utang nya. Ulun nya lalu besugang di mua raja, minta kasih ari raja. Ku iya, ‘Aku minta nuan sabar enggau aku. Aku deka mayar semua utang aku!’ Laban raja nya kasihka ulun iya nya, nya alai iya ngelepaska iya, lalu muai utang iya. Tang lebuh ulun nya pansut, iya betemu enggau orang siku ke sama ulun baka iya empu, ke berutang semina mimit aja ba iya. Iya nyekal orang nya, lalu bejaku, ‘Bayar utang nuan!’ Orang ke dichekal iya lalu besugang, minta kasih ngagai iya, ‘Aku minta nuan sabar enggau aku. Aku deka mayar nuan!’ Tang iya enda sabar enggau orang nya. Iya lalu nutup orang nya dalam rumah jil, datai ke orang nya udah mayar utang iya. Lebuh orang gaji ti bukai meda nya, sida tusah amat ati, lalu madahka semua pekara nya ngagai raja. Raja lalu ngangauka ulun iya nya, lalu bejaku ngagai iya, ‘Nuan tu ulun ti jai! Aku udah muai semua utang nuan, laban nuan minta aku muai utang nya. Kati nuan enda nemu kasihka orang ke sama ulun baka nuan empu, baka aku ke udah kasihka nuan?’ Raja balat amat pedis ati, lalu ngasuh ulun nya ditutup dalam rumah jil, datai ke iya udah mayar semua utang iya. Baka nya meh Apai Aku ti di serega deka ngereja ngagai genap iku kita, enti kita enda ngampun menyadi kita enggau pengabis ati kita.” Lebuh Jesus udah badu nyebut semua utai nya, Iya mupuk ari menua Galili lalu bejalai ngagai menua Judea, di seberai Sungai Jordan. Mayuh amat orang nitihka Iya, lalu Iya ngeraika sida dia. Sekeda orang Parisi lalu datai ngagai Iya, deka nguji Iya. Ku sida, “Kati laki tau muai bini atas sebarang tegal?” Disaut Jesus, “Kati kita nadai udah kala macha pasal Allah Taala ti ngaga mensia lelaki enggau indu kenyau ari pun kelia? Ku Iya bejaku, ‘Ketegal nya, lelaki deka ninggalka apai enggau indai iya, lalu begulai enggau bini iya, lalu seduai iya deka nyadi setubuh’? Seduai iya ukai dua iku agi, tang siku. Nya alai, nadai orang tau nyeraraka utai ti udah ditampilka Allah Taala.” Ku orang Parisi nanya Iya, “Enti pia, nama kebuah Moses ngasuh laki meri surat sarak lalu muru bini diri?” Disaut Jesus, “Moses ngemendarka kita muai bini kita, laban kita kieh. Tang utai tu ukai baka nya kenyau ari pun. Nya alai, Aku madah ngagai kita, barang sapa muai bini, kelimpah ari bini iya butang, lalu orang nya bebini baru, iya butang.” Ku sida murid bejaku enggau Iya, “Enti nya adat entara laki enggau bini, manah agi enda bebini.” Tang ku Jesus bejaku ngagai sida, “Ukai semua orang ulih nerima ajar tu, tang semina orang ke diberi ajar tu. Laban sekeda orang ada nadai perengka tubuh kena bebini. Bisi mega orang nadai perengka nya ari asuh mensia. Bisi mega orang ke sengaja muai perengka tubuh diri ketegal Perintah serega. Awakka orang ke ulih nerima ajar tu, nerima iya.” Anak mit lalu dibai ngagai Iya, ngambika Iya ngengkahka jari Iya atas sida, lalu besampika sida. Tang murid Iya balat amat ngerara orang ke mai sida anak mit nya. Tang ku Jesus bejaku, “Awakka anak mit datai ngagai Aku, lalu anang nagang sida, laban Perintah serega diempu orang ke baka sida tu.” Iya lalu ngengkahka jari Iya atas sida, lalu mupuk ari endur nya. Nyadi sekali, siku orang datai ngagai Jesus, lalu nanya, “Pengajar, nama pengawa ti manah ti enda tau enda dikereja aku ngambika aku tau bulih pengidup ti meruan belama iya?” Ku Jesus bejaku ngagai iya, “Nama kebuah nuan nanyaka utai ti manah ngagai Aku? Ka semina siku aja ti manah. Enti nuan keran deka tama ngagai pengidup ti meruan belama iya, titihka pesan.” Orang nya lalu nanya, “Pesan ni?” Disaut Jesus, “Anang munuh orang. Anang butang. Anang ngenchuri. Anang besaksi bula. Bebasaka apai enggau indai nuan, lalu rinduka pangan nuan baka nuan ti rinduka diri empu.” Ku orang bujang nya nyaut, “Semua pesan nya udah dititihka Aku magang. Nama utai bukai ti enda tau enda dikereja aku?” Ku Jesus bejaku ngagai iya, “Enti nuan deka nyadi pemadu badas, mupuk nuan lalu jual semua reta tengkira nuan, lalu beri duit nya ngagai orang ke seranta, lalu nuan deka bisi pengaya di serega. Udah nya datai lalu titihka Aku.” Lebuh orang bujang nya ninga nya, iya angkat ari endur nya tusah ati laban iya orang ke kaya bendar. Jesus lalu bejaku enggau sida murid Iya, “Enggau bendar Aku madah ngagai kita, mar amat meh orang ke kaya tama ngagai Perintah serega. Aku nandu nya baru: nyamai agi jelu unta tama nengah lubang jarum ari orang ke kaya tama ngagai Perintah Allah Taala.” Lebuh sida murid ninga nya, sida alit ati, lalu nanya, “Enti pia, sapa ulih diselamatka?” Jesus merening ngagai sida, lalu bejaku, “Ba mensia, utai tu enda ulih, tang ba Allah Taala semua utai ulih magang.” Peter lalu bejaku, “Peda Nuan, kami udah ninggalka semua utai lalu nitihka Nuan. Nama utai ulih kami?” Ku Jesus bejaku ngagai sida, “Enggau bendar Aku madah ngagai kita, lebuh Anak Mensia duduk ba kerusi diraja Iya ti bemulia ba dunya ti baru, kita ke udah nitihka Aku deka mega duduk ba dua belas iti kerusi diraja, ngakim dua belas raban bansa orang Israel. Lalu genap iku orang ke udah ninggalka rumah, tauka menyadi lelaki, tauka menyadi indu, tauka apai, tauka indai, tauka anak, tauka umai, ketegal nama Aku, deka nerima seratus kali mayuh agi, lalu deka diberi pengidup ti meruan belama iya. Tang mayuh ke dulu deka nyadi dudi, lalu orang ke dudi deka nyadi dulu. “Laban Perintah serega nya baka orang siku ke mupuk tumu pagi ngiga orang ke tau digaji iya gawa ba kebun anggur iya. Lebuh iya udah besetuju deka meri gaji sesingkap duit pirak sehari ngagai siku-siku sida, iya lalu ngasuh sida bekereja ba kebun anggur iya. Iya mupuk baru ke pasar ba urung pukul semilan, lalu tepedaka sekeda orang ke lelaki beketegir ngapa enda gawa. Iya lalu bejaku ngagai sida, ‘Alai kita gawa ba kebun anggur. Aku deka meri kita gaji ti patut.’ Sida lalu mupuk. Iya ngereja baka nya baru ba urung pukul dua belas, enggau ba urung pukul tiga. Ba urung pukul lima, iya bejalai ke pasar, lalu tepedaka sekeda lelaki ti bukai mengkang beketegir enda gawa. Lalu ku iya bejaku ngagai sida, ‘Nama kebuah kita masau jam sehari-hari tu enda gawa?’ Sida lalu nyaut, ‘Laban orang nadai ngasuh kami gawa.’ Ku iya bejaku ngagai sida, ‘Alai kita gawa ba kebun anggur.’ “Lebuh hari nyau lemai, orang ke bempu kebun nya lalu madah ngagai mandur, ‘Kangauka bala orang gaji lalu bayar gaji sida, belabuh ari sida ke pemadu dudi, nyentuk ngagai sida ke pemadu dulu.’ Lebuh orang gaji ke berengkah gawa ari pukul lima datai, sida lalu dibayar sesingkap duit pirak siku. Lebuh orang ke pemadu dulu gawa datai, sida ngumbai diri deka nerima gaji ti besai agi. Tang sida mega diberi sesingkap duit pirak siku. Lebuh sida nerima gaji nya, sida lalu mut-mut ngagai orang ke ngaji sida. Ku sida, ‘Orang ke pemadu dudi semina bekereja sejam aja, lalu nuan udah ngaga gaji sida sebaka enggau gaji kami ke udah bekereja sehari-hari tu natka diri laban panas.’ Tang ku iya nyaut sida, ‘Unggal, nadai aku ngakal nuan. Ukai enda nuan empu ke besetujuka gaji sesingap duit pirak? Ambi gaji nuan, lalu pulai. Aku empu ke meri gaji ngagai orang ke pemadu dudi tu ngenyampau ti diberi aku ngagai nuan. Kati aku enda tau ngena duit aku sepeneka ati aku? Tauka nuan kepapas meda aku gerah mudah meri utai ngagai orang?’ Nya alai, orang ke dudi deka nyadi dulu, lalu orang ke dulu deka nyadi dudi.” Lebuh Jesus mansang ngagai Jerusalem, Iya mai murid ke dua belas iku ke tisi lebuh sida benung di rantau jalai, lalu bejaku ngagai sida, “Dinga kita, kitai deka mupuk ngagai Jerusalem, lalu Anak Mensia deka diserahka ngagai bala tuai imam, enggau ngagai bala pengajar Adat, lalu sida deka ngasuh Iya diukum bunuh. Sida deka nyerahka Iya ngagai orang bansa bukai, ti deka beduan Iya, nyipat Iya, lalu ngeregang Iya. Tang ba hari ti ketiga Iya deka diangkatka idup baru.” Udah nya bini Sebedi datai ngagai Jesus, mai anak lelaki iya ke dua iku. Iya besugang di mua Jesus, lalu minta Iya ngereja siti utai. Jesus lalu nanya iya, “Nama utai dipinta nuan?” Ku bini Sebedi nyaut, “Awakka anak aku dua iku tu duduk muak ari kanan enggau ari kiba Nuan dalam Perintah Nuan.” Tang ku Jesus nyaut iya, “Kita enda nemu utai ti dipinta kita. Kati seduai ulih ngirup ari mangkuk ti deka diirup Aku?” Seduai iya lalu nyaut, “Ulih.” Ku Jesus bejaku ngagai seduai iya, “Seduai deka ngirup ari mangkuk Aku, tang pasal duduk muak ari kanan enggau ari kiba Aku, Aku nadai kuasa ngeletak nya. Penuduk nya udah disediaka Apai Aku ke orang ke bempu kerusi nya.” Lebuh murid ke sepuluh iku ninga nya, sida lalu pedis ati ngagai seduai menyadi nya. Tang Jesus ngangauka sida, lalu bejaku, “Kita nemu, orang ke merintah orang bansa bukai, nekanka pengidup orang ke dipegai sida, lalu bala tuai sida merinsaka sida. “Tang ba kita utai nya enda baka nya. Barang sapa deka nyadi orang ke besai ba bala kita, enda tau enda nyadi kuli semua kita, lalu barang sapa deka nyadi dulu ba bala kita, enda tau enda nyadi ulun kita, baka Anak Mensia ke datai ukai minta Diri dibela, tang laban Iya deka mela, lalu nyerahka nyawa Diri kena nebus orang mayuh.” Lebuh sida mupuk ari Jeriko, mayuh amat orang nitihka Iya. Nyadi ba endur nya bisi dua iku orang buta duduk ba tisi jalai. Lebuh seduai iya ninga Jesus mansa, seduai iya lalu ngangau, “Kasihka kami, Anak David!” Bala orang mayuh lalu balat amat ngerara seduai iya, ngasuh seduai iya badu agi ragak. Tang seduai iya ngangau inggar agi, “Tuhan, Anak David, kasihka kami!” Jesus ngetu, lalu ngangauka seduai iya. Ku Iya, “Nama utai ti diasuh seduai kereja Aku ke seduai?” Ku seduai iya bejaku, “Tuhan, awakka kami duai ulih meda!” Jesus sinu ati ke seduai iya. Iya negu mata seduai iya, lalu tekala nya seduai iya ulih meda. Seduai iya lalu nitihka Jesus. Lebuh Jesus enggau sida murid Iya nyau datai semak Jerusalem, lalu udah datai di Betpagi ba Bukit Kana, Jesus bejaku enggau dua iku murid. Ku Iya, “Alai seduai mupuk ngagai nengeri ti di mua nyin. Din seduai deka nemu siku keledai ditanchang, enggau anak iya ngimbai iya. Buka tali jelu dua iku nya, lalu bai seduai iya ngagai Aku. Enti orang bisi bejaku ngagai seduai, sebut aja munyi tu, ‘Tuhan begunaka seduai iya.’ Lalu iya deka ngasuh seduai mai jelu nya tekala nya.” Utai tu nyadi kena ngamatka jaku ti udah disebut Tuhan beseruanka siku nabi: “Padahka ngagai anak indu Sion, Peda kita, Raja kita datai ngagai kita. Iya baruh ati, lalu nepan keledai enggau nepan keledai ti agi biak, ti anak keledai.” Murid ke dua iku nya mupuk, lalu ngereja utai ti diasuh Jesus. Seduai iya mai keledai enggau anak keledai nya, lalu ngelempaika serayung seduai iya ba belakang jelu dua iku nya, lalu Jesus nepan ba jelu nya. Mayuh amat orang nganchau serayung sida ba jalai raya, lalu sida ti bukai nyarau lalu nganchau dan kayu ba jalai raya nya. Lalu bala orang ke bejalai dulu ari Iya enggau ke ngentudika Iya manjung: “Hosanna ke Anak David! Beberekat meh Iya ke datai dalam nama Tuhan! Hosanna ba serega ti pemadu tinggi!” Lalu lebuh Iya tama ngagai Jerusalem, semua orang dalam nengeri nya begau magang. Ku sida nanya, “Sapa orang nya?” Lalu ku orang mayuh nyaut, “Iya nya nabi Jesus ke datai ari Nasaret di menua Galili.” Udah nya Jesus tama ngagai Rumah Sembiang lalu muru semua orang ke bejual-bebeli dalam Rumah Sembiang nya. Iya nungkupka mija orang ke penukar wang, enggau bangku orang ke nyual burung achang. Ku Iya bejaku ngagai sida, “Endang udah ditulis, ‘Rumah Aku deka dikumbai rumah sembiang.’ Tang kita ngaga iya nyadi sarang perumpak!” Orang ke buta, enggau orang ke kait-kupit datai ngagai Iya dalam Rumah Sembiang, lalu Iya ngeraika sida. Tang lebuh sida tuai imam enggau sida pengajar Adat meda utai ti badas ti dikereja Iya, sereta meda bala anak mit manjung dalam Rumah Sembiang, “Hosanna ke Anak David!” sida pedis ati lalu bejaku ngagai Iya, “Kati Nuan bisi ninga utai ti disebut sida?” Jesus lalu nyaut sida, “Bisi. Kati kita nadai udah kala macha: ‘Nuan udah ngasuh pantun puji ti pemadu badas pansut ari mulut bala anak mit, enggau anak mit ke benung nusu.’ ” Jesus ninggalka sida, pansut ari nengeri nya, mansang ngagai Betani, lalu bemalam dia. Lebuh Iya mulaika Diri ngagai nengeri tumu pagi hari siti, Iya lapar. Iya tepedaka sepun kayu ara ba tisi jalai. Iya lalu mansang ngagai kayu nya. Tang Iya nadai nemu utai dia, semina daun aja. Lalu ku Iya bejaku ngagai kayu nya, “Awakka nuan enda agi bebuah!” Kayu ara nya lalu layu tekala nya. Lebuh sida murid meda nya, sida balat alit ati. Ku sida, “Baka ni ku kayu ara nya tak layu tekala nya?” Lalu ku Jesus nyaut sida, “Enggau bendar Aku madah ngagai kita, enti kita arap lalu enda kakang ati, kita ulih ngereja utai ti udah dikereja Aku ngagai kayu ara tu. Lalu ukai semina nya aja, tang kita ulih bejaku ngagai bukit tu, ‘Angkat nuan lalu buai diri empu ngagai tasik,’ lalu utai nya deka nyadi. Enti kita arap, kita deka nerima sebarang utai ti dipinta kita dalam sampi.” Lebuh Jesus tama ngagai Rumah Sembiang, sida tuai imam, enggau sida tuai bansa datai ngagai Iya lebuh Iya benung ngajar, lalu nanya Iya, “Kuasa apa kena Nuan ngereja utai tu, lalu sapa meri Nuan kuasa nya?” Disaut Jesus, “Aku pen deka mega nanya kita siti tanya. Enti kita tesautka Aku, nya baru Aku deka madah ngagai kita kuasa ti dikena Aku ngereja utai tu. Kati pemaptisa John datai ari serega tauka ari mensia?” Sida lalu bekelikuh enggau pangan diri. Ku sida, “Enti kitai nyebut, ‘Ari serega,’ Iya deka nyebut ngagai kitai, ‘Enti pia, nama kebuah kita enda arapka iya?’ Tang enti kitai nyebut, ‘Ari mensia,’ kitai takutka orang mayuh, laban semua sida ngumbai John nabi.” Nya alai sida lalu nyaut Jesus, “Enda kami nemu.” Lalu ku Iya bejaku enggau sida, “Aku pen enggai meh madah ngagai kita kuasa ti dikena Aku ngereja utai tu.” “Baka ni ku runding kita? Orang siku bisi dua iku anak lelaki. Iya mansang ngagai anak iya ke tuai agi, lalu bejaku, ‘Anak, alai nuan gawa ba kebun anggur sehari tu.’ Lalu ku anak tuai iya nyaut, ‘Enggai.’ Tang udah nya, iya ngubah runding diri, lalu nurun gawa. Udah nya apai iya mansang ngagai anak iya ke biak agi, lalu bejaku munyi nya mega enggau iya. ‘Au, tuan,’ ku anak iya nya nyaut, tang iya enda nurun gawa. Ni bagi seduai nya ke ngereja utai ti dikedekaka apai seduai iya?” “Iya ke tuai agi,” ku sida nyaut. Jesus lalu bejaku ngagai sida, “Enggau bendar Aku madah ngagai kita, bala pengumpul chukai enggau bala indu sundal deka tama dulu agi ari kita ke dalam Perintah Allah Taala. Laban John Pemaptisa udah datai ngagai kita nunjukka jalai ngagai pengelurus, lalu kita enda arapka iya, tang sida pengumpul chukai enggau bala indu sundal arapka iya. Indah lebuh kita meda utai nya nyadi deh kita enda nesal ati ke dosa kita lalu arapka iya. “Pendingka jaku sempama siti tu. Orang siku bisi sebidang tanah. Iya numbuhka kebun anggur ba tanah nya, nirika pagar ngelingi kebun nya, numbak lubang alai ngaga pitan anggur, lalu ngaga sebuah menara. Udah nya iya nyua kebun anggur nya ngagai orang, lalu bejalai ngagai menua bukai. Lebuh maya ngetau, iya ngasuh bala ulun iya mansang ngagai orang ke nyua kebun anggur nya, deka ngambi buah. Bala orang ke nyua kebun nya lalu nangkap bala ulun iya, malu siku, munuh siku, lalu nuku siku ti bukai ngena batu. Orang nya lalu ngasuh mayuh agi ulun iya ti bukai mansang ngagai kebun nya. Bala orang ke nyua kebun nya lalu ngereja ngagai sida baka ti udah dikereja sida ngagai bala ulun ke dulu. Udah nya iya ngasuh anak lelaki iya empu, ku iya, ‘Sida tentu deka bebasaka anak lelaki aku.’ Tang lebuh bala orang ke nyua kebun anggur nya meda anak lelaki iya datai, sida lalu bejaku enggau pangan diri, ‘Tu orang ke bempu waris. Aram kitai munuh iya lalu ngerampas pesaka iya!’ Nya alai sida nangkap iya, muai iya ari kebun anggur nya, lalu munuh iya. “Nya alai lebuh orang ke bempu kebun anggur nya datai, nama utai ti deka dikereja iya ngagai orang ke nyua kebun anggur nya?” Disaut sida, “Iya deka munuh orang ke jai nya, lalu ngasuh orang bukai nyua kebun nya, iya nya orang ke deka meri iya buah lebuh maya ngetau.” Ku Jesus bejaku enggau sida, “Kati kita nadai udah kala macha dalam Bup Kudus: ‘Batu ti enda diguna tukang rumah udah nyadi batu ti pemadu beguna. Tu utai ti udah dikereja Tuhan, lalu ba mata kami, utai nya manah’? Nya alai, Aku madah ngagai kita, Perintah Allah Taala deka diambi ari kita, lalu diberi ngagai orang ke deka mansutka buah Perintah nya. Orang ke labuh ninggang batu nya, deka redak, lalu iya deka ngeredakka orang ke labuh ninggang iya.” Lebuh sida tuai imam enggau orang Parisi ninga jaku sempama Jesus, sida nemu Iya bejakuka pasal sida. Sida bisi amat ati deka nangkap Iya, tang sida takutka orang mayuh laban sida ngumbai Jesus nabi. Jesus lalu bejaku baru ngena jaku sempama ngagai orang mayuh. Ku Iya, “Perintah serega tau dibandingka enggau siku raja ke nyendiaka gawai tikah ke anak lelaki iya. Iya ngasuh bala orang gaji iya ngangauka orang ke udah diambi ngabang datai ngagai gawai tikah nya. Tang sida enggai datai. Iya lalu ngasuh bala orang gaji iya ti bukai, ku iya, ‘Padahka ngagai orang ke udah diambi ngabang: Dinga kita, aku udah nyendiaka pengerami makai besai. Jelu sapi aku, enggau anak sapi aku ti gemu udah disayat, lalu semua utai udah sedia magang. Datai meh kita ngagai gawai tikah!’ Tang sida enda tentu ibuhka tesau nya lalu mupuk ngagai endur bukai, siku ke umai, siku ngagai pengawa dagang iya, lalu sida ti bukai nangkap bala orang gaji raja nya, beduan lalu munuh sida. Raja nya lalu ringat. Iya ngirumka bala soldadu iya, munuh bala pemunuh nya, lalu nunu nengeri sida. Udah nya iya bejaku ngagai bala ulun iya, ‘Gawai tikah udah sedia, tang orang ke udah diambi ngabang enda tau datai. Nya alai bejalai kita ngagai jalai raya lalu ambi ngabang ngagai gawai tikah tu semua orang ke ditemu kita.’ Bala ulun iya lalu mansang ngagai semua jalai raya, lalu ngempuruka semua orang ke ditemu sida, orang ke manah enggau orang ke jai. Nya alai balai tikah nya nyau penuh laban bala pengabang. “Tang lebuh raja tama, deka meda bala pengabang, iya tepedaka siku lelaki ke enda ngena pekayan tikah. Iya lalu bejaku ngagai orang nya, ‘Unggal, baka ni ku nuan tama kitu enda ngena pekayan tikah?’ Orang nya lalu nadai nemu jalai bejaku. Udah nya raja lalu bejaku ngagai bala ulun iya, ‘Berekas kaki jari iya, lalu buai iya ke luar ngagai endur ti petang, alai orang deka nyabak sereta begerit ngeli.’ Laban mayuh dikangau, tang mimit aja dipilih.” Udah nya sida orang Parisi mupuk lalu baum deka manjuk Jesus ngena jaku Iya Empu. Sida lalu ngasuh bala murid sida enggau bala nembiak Herod mansang ngagai Jesus. Ku sida, “Pengajar, kami nemu Nuan endang madahka utai ti bendar, lalu ngajar utai ti bendar pasal jalai Allah Taala, lalu Nuan enda bedulika orang, laban Nuan endang enda bedulika sapa-sapa. Nya alai padahka runding Nuan ngagai kami. Kati kitai tau mayar chukai ngagai Raja Besai, tauka enda?” Tang Jesus nemu ati sida endang jai. Nya alai Iya bejaku, “Nama kebuah kita nguji Aku? Kita tu orang ke pura-pura ngapa? Pandangka ngagai Aku duit kena mayar chukai!” Sida lalu mai sesingkap duit ngagai Iya. Iya lalu nanya sida, “Gambar sapa enggau nama sapa tu?” Sida lalu nyaut, “Enggi Raja Besai.” Iya lalu bejaku ngagai sida, “Utai Raja Besai, beri ngagai Raja Besai, utai Allah Taala, beri ngagai Allah Taala.” Lebuh sida ninga nya, sida balat alit ati. Sida lalu ninggalka Iya, lalu mupuk ari endur nya. Sehari nya mega, sekeda orang Saduki datai ngagai Iya. Sida nya orang ke ngumbai nadai pengangkat ari mati. Lalu sida nanya Iya, “Pengajar, Moses madahka, ‘Enti lelaki mati nadai anak, menyadi lelaki iya enda tau enda jadi enggau balu nya, ngambika seduai iya bisi anak ngarika menyadi iya.’ Nyadi sekali ba bala kami bisi tujuh iku orang diri menyadi. Iya ke tuai bebini, lalu mati nadai anak, lalu ninggalka balu iya ke menyadi lelaki iya. Baka nya mega menyadi iya ti kedua, ti ketiga, nyentuk ngagai menyadi iya ti ketujuh. Ke penudi iya, indu nya mega mati. Lebuh pengangkat orang ari mati, sapa ari sida tujuh iku nya ke bempu bini nya? Laban semua sida bela udah ampit jadi enggau iya.” Tang ku Jesus nyaut sida, “Salah penemu kita, laban kita enda nemu Bup Kudus, tauka kuasa Allah Taala. Laban, lebuh pengangkat orang ari mati, sida nadai jadi melaki-bini, tauka nikah, tang nyadi baka melikat ti di serega. Nyadi pasal pengangkat orang ari mati: kati kita nadai udah kala macha utai ti udah dipadahka Allah Taala ngagai kita, ‘Aku tu Allah Taala ke disembah Abraham, Isak, enggau Jakop?’ Iya ukai Allah Taala ke orang ke mati, tang Allah Taala ke orang ke idup.” Lebuh orang mayuh ninga nya, sida balat amat alit ati ke ajar Iya. Lebuh orang Parisi ninga Jesus udah madamka penemu orang Saduki, sida lalu begempuru. Siku lawyer ari bala sida lalu mantaika siti tanya ngagai Jesus, deka nguji Iya. “Pengajar, ni pesan ti pemadu besai dalam Adat?” Ku Jesus bejaku ngagai iya, “ ‘Rinduka Tuhan Allah Taala nuan enggau pengabis ati nuan, enggau pengabis semengat nuan, enggau pengabis runding nuan.’ Tu pesan ti keterubah sereta pemadu besai. Lalu pesan ti kedua nya sebaka enggau nya: ‘Rinduka pangan nuan baka nuan ke rinduka diri empu.’ Semua Adat enggau ajar sida nabi beduduk ba pesan dua iti tu.” Lebuh orang Parisi begempuru, Jesus nanya sida, ku Iya, “Baka ni ku penemu kita pasal Kristus? Peturun sapa Iya nya?” Sida lalu nyaut, “Peturun David.” Iya lalu nanya sida, “Enti pia, baka ni ku David, ari iring Roh Kudus, ngumbai Kristus ‘Tuhan’? Laban David empu nyebut, ‘Ku Tuhan bejaku enggau Tuhan aku: Duduk muak ari kanan Aku datai ke Aku udah ngengkahka bala munsuh Nuan di baruh kaki Nuan.’ Enti David ngumbai Iya ‘Tuhan,’ baka ni ku Iya tau nyadi peturun David?” Nadai siku orang tesautka Iya, lalu kenyau ari nya, nadai agi orang berani betanyaka utai ngagai Iya. Udah nya Jesus lalu bejaku ngagai orang mayuh enggau ngagai sida murid Iya. “Sida pengajar Adat enggau orang Parisi udah diberi kuasa nerangka Adat Moses. Nya alai, kereja sebarang utai ti diajar sida ngagai kita, lalu titihka ajar nya, tang anang ngereja utai ti dikereja sida, laban sida enda ngereja utai ti diajar sida empu. Sida nanchangka ma ti berat, ti mar dibai, ba bau orang bukai, tang sida empu enggai enchukirka tunjuk mai ma nya. Sida minta diri dipeda orang mayuh lebuh sida ngereja semua pengawa sida. Sida ngaga papak kain ti besai alai sida nuliska jaku ari Bup Kudus, lalu dilekatka sida ba kening enggau ba lengan sida, lalu rambing puting gari sida panjai. Sida rindu duduk ba penuduk ti di atas lebuh pengerami makai besai, enggau duduk ba penuduk ti pemadu manah dalam balai gempuru, lalu sida rindu ditabi orang ba sebelah pasar, lalu rindu dikumbai orang ‘Pengajar.’ Tang kita enda tau dikumbai Pengajar, laban kita semina bisi siku aja Pengajar, lalu semua kita tu diri menyadi magang. Lalu anang ngumbai orang di dunya tu Apai, laban kita semina bisi siku aja Apai, Iya ke di serega. Lalu kita pen enda mega tau dikumbai kepala, laban kita semina bisi siku aja kepala, iya nya Kristus. Orang ke pemadu besai ba bala kita deka nyadi kuli kita. Semua orang ke ngeninggika diri, deka dikemaruhka, lalu semua orang ke ngemaruhka diri, deka ditinggika. “Tulah meh kita pengajar Adat, kita orang Parisi, kita ke pura-pura ngapa! Kita nutup pintu Perintah serega di mua orang mayuh, tang kita empu enda tama, lalu kita nagang orang bukai tama! Tulah meh kita pengajar Adat enggau kita orang Parisi! Kita tu orang ke pura-pura ngapa! Kita ngerampas rumah indu ke balu, lalu kita pura-pura ngayanka diri lama besampi! Nya alai kita deka diberi ukum ti pemadu berat! “Tulah meh kita pengajar Adat enggau kita orang Parisi! Kita tu orang ke pura-pura ngapa! Laban kita belayar meraka tasik, lalu ngelangkah mayuh bengkah menua, nguji mai siku orang ngagai agama kita, lalu kita ngaga orang nya nyadi peranak neraka dua kali lipat jai agi ari kita empu! “Tulah meh kita malin ke buta, ke nyebut, ‘Enti orang besumpah atas nama Rumah Sembiang, utai nya nadai ngawa, tang enti iya besumpah ngena nama emas ti dalam Rumah Sembiang, iya kena tanchang sumpah nya.’ Kita tu buta sereta beli! Laban ni ti besai agi, emas tauka Rumah Sembiang ti ngasuh emas nya kudus? Lalu ku kita, ‘Enti orang besumpah atas nama alta, utai nya nadai ngawa, tang enti iya besumpah atas nama pemeri ti ba alta nya, iya kena tanchang sumpah nya.’ Kita tu buta! Laban ni ti besai agi, pemeri tauka alta ti ngasuh pemeri nya kudus? Nya alai orang ke besumpah atas nama alta, besumpah mega atas nama alta nya enggau atas nama semua pemeri ti ba alta nya, lalu orang ke besumpah atas nama Rumah Sembiang, besumpah mega atas nama Rumah Sembiang nya enggau atas nama Allah Taala ti diau dalam Rumah Sembiang nya, lalu orang ke besumpah atas nama serega, besumpah mega atas nama kerusi diraja Allah Taala enggau atas nama Iya ke duduk ba kerusi diraja nya. “Tulah meh kita pengajar Adat, enggau kita orang Parisi! Kita tu orang ke pura-pura ngapa! Laban kita meri sepuluh peratus ari rempah kita, baka telasih, adas manis, enggau jintan, tang kita enggai ngereja utai ti beguna agi dalam Adat, baka pengelurus, pengasih enggau pengarap. Semua utai nya patut dikereja kita, tang anang nejuka utai bukai nya enda dikereja. Kita tu malin ke buta! Kita muai lalat ari ai irup kita, tang kita nelan unta! “Tulah meh kita pengajar Adat, enggau kita orang Parisi! Kita tu orang ke pura-pura ngapa! Laban kita nuchi mangkuk enggau chapak kita ari luar, tang dalam nyin sida penuh laban pengamu enggau ati ti semina berundingka diri empu aja. Kita orang Parisi endang amat buta! Tuchi dulu mangkuk enggau chapak kita ari dalam, ngambika sida mega tuchi ari luar! “Tulah meh kita pengajar Adat, enggau kita orang Parisi! Kita tu orang ke pura-pura ngapa! Laban kita tu baka kubur ti udah dichat burak, ti manah gaya dipeda ari luar, tang dalam nyin kita penuh laban tulang enggau semua macham utai ti kamah. Nya alai, di luar gamal kita baka ke lurus, tang dalam nyin kita penuh laban ati ti pura-pura ngapa enggau penyai. “Tulah meh kita pengajar Adat enggau kita orang Parisi! Kita tu orang ke pura-pura ngapa! Laban kita begagaka kubur ti manah ke sida nabi, lalu ngelagu tiang pengingat ke orang ke lurus, lalu ku kita, ‘Enti sema kami idup lebuh maya aki ini kami kelia, kami tentu enggai enggau sida munuh bala sida nabi!’ Nya meh jalai kita besaksi ngelaban diri empu, laban kita madahka diri peturun orang ke udah munuh sida nabi. Nya alai tembuka meh pengawa ti udah ditumbuhka bala aki ini kita! Kita ular, kita anak ular! Baka ni ku kita ulih nagang diri dibuai ngagai neraka? Nya alai, Aku ngirumka ngagai kita bala sida nabi, enggau orang ke bepenemu-dalam, enggau sida pengajar Adat. Sekeda sida deka dibunuh kita, lalu diregang, sekeda disipat kita dalam balai gempuru kita, lalu diperinsaka kita ari nengeri sebuah ngagai nengeri sebuah, ngambika kita ditinggang darah orang ke lurus ke udah dibunuh kita di dunya tu, belabuh ari darah Abel ke nadai penyalah, nyentuk ngagai darah Sekariah anak Berekiah ke dibunuh kita ba entara Endur ti Kudus enggau alta. Enggau bendar Aku madah ngagai kita, semua utai nya deka ninggang rebak ti diatu! “O Jerusalem, Jerusalem! Nuan munuh sida nabi lalu nuku ngena batu bala seruan ke dikirumka Allah Taala ngagai nuan! Aku suah udah deka ngaul semua nembiak nuan, baka indu manuk ti ngempuruka anak di baruh sayap iya, tang nuan enggai nejuka Aku! Nya alai rumah nuan deka ditinggalka puang nadai orang nguan. Laban, Aku madah ngagai nuan, berengkah ari diatu, nuan nadai agi meda Aku nyentuk ngagai maya nuan nyebut, ‘Beberekat meh Iya ke datai dalam nama Tuhan.’ ” Jesus pansut ari Rumah Sembiang, lalu lebuh Iya benung bejalai ninggalka rumah nya, sida murid Iya datai lalu nunjukka ngagai Iya semua rumah ti dalam Rumah Sembiang nya. Tang ku Iya nyaut sida, “Kita meda semua utai tu. Tang enggau bendar Aku madah ngagai kita, nadai sigi batu nya deka mengkang betusun ditu, tang semua deka diruntuhka magang.” Lebuh Jesus duduk ba Bukit Kana, sida murid datai ngagai Iya kediri, lalu bejaku, “Padahka ngagai kami, kemaya semua utai tu deka nyadi, lalu nama tanda ti nunjukka Nuan deka datai baru, enggau pengujung dunya?” Disaut Jesus, “Bejaga kita, enggai ke orang nesatka kita. Laban mayuh orang deka datai dalam nama Aku, ku sida, ‘Aku tu Kristus!’ lalu sida deka nesatka mayuh orang. Lalu kita deka ninga munyi perang, enggau berita pasal perang. Tang anang takut, laban utai nya enda tau enda nyadi, tang pengujung apin datai. Laban bansa siti deka beperang ngelaban bansa siti, lalu menua siti deka beperang ngelaban menua siti, lalu lapar pungkang enggau tanah berenyang deka nyadi ba mayuh bengkah endur. Semua utai tu deka nyadi baka indu ke radai deka beranak. “Udah nya sida deka nangkap kita, merinsaka kita, lalu munuh kita, lalu semua bansa deka begedika kita ketegal nama Aku. Udah nya mayuh orang deka ngelengkaka pengarap, lalu nyual pangan diri, sereta begedika pangan diri. Lalu mayuh nabi ti pelesu deka pegari, lalu nesatka mayuh orang. Lalu laban penyai deka nambah-menambah, mayuh orang enda agi rinduka pangan diri. Tang orang ke tan datai ke ujung, deka diselamatka. Lalu Berita Manah pasal Perintah Allah Taala deka ditusui di serata dunya, nyadika saksi ngagai semua bansa. Udah nya baru pengujung datai. “Nya alai lebuh kita meda utai ti jai, ti balat ngenakutka, ti dikenang nabi Daniel, bediri ba endur ti kudus (awakka orang ke macha meretika utai tu), awakka orang ke diau di Judea rari ngagai bukit. Awakka orang ke ba atas perabung enda nurun ngambi utai ari rumah iya, lalu awakka orang ke di umai, enda nikal lalu ngambi serayung iya. Naka meh penusah indu ke ngandung enggau sida indai ke nusuka anak lebuh maya nya! Besampi kita, ngambika kita ukai rari lebuh musin chelap, tauka lebuh hari Sabat! Laban lebuh maya nya ila penusah ti besai deka nyadi, baka ti nadai udah kala nyadi kenyau ari penumbuh dunya nyentuk ngagai sehari tu, tauka jemah ila. Lalu enti penyampau hari nya enda dikurangka, nadai mensia ulih diselamatka. Tang ketegal bala nembiak ke udah dipilih Allah Taala, penyampau hari nya deka dikurangka. “Udah nya, enti orang nyebut ngagai kita, ‘Peda kita! Nyin Kristus!’ tauka ‘Nyin Iya!’ anang arapka nya. Laban Kristus ti pelesu, enggau nabi ti pelesu endang deka pegari, lalu ngereja kereja ajih, enggau kereja ti nyelai, kena sida nesatka nembiak ti udah dipilih Allah Taala, enti ulih. Dinga kita! Aku udah madahka utai tu sebedau iya nyadi. “Nya alai, enti orang madah ngagai kita, ‘Peda kita! Nyin Iya di menua puang din,’ anang kita kia. Tauka enti sida nyebut ngagai kita, ‘Peda kita! Iya bisi di bilik!’ anang kita arapka nya. Laban Anak Mensia deka datai baka kilat ti nyelar ari timur ngagai barat. Dia alai bangkai, dia meh endur alai burung ti bepakaika bangkai deka begelumu.” “Enda lama udah bekau penusah ti besai nya nyadi, mata hari deka piam, lalu bulan nadai agi manchar, lalu bintang deka labuh ari langit, lalu kuasa ti di langit deka begegar. Udah nya tanda Anak Mensia deka pegari di langit, lalu semua mensia di dunya deka ngulit, lalu sida deka meda Anak Mensia datai ba atas remang ari serega, ngena kuasa enggau mulia ti besai. Terumpit ti besai deka disepu, lalu Anak Mensia deka ngasuh bala melikat Iya bejalai, lalu sida deka ngempuruka semua orang ke udah dipilih Allah Taala ari semua sukut dunya. “Pelajarka ari kayu ara. Lebuh dan iya nyau geduk, lalu belabuh bekantuk, kita nemu musin panas nyau semak. Baka nya mega lebuh kita meda semua utai tu, kita nemu Iya nyau semak, udah datai ba mua pintu. Enggau bendar Aku madah ngagai kita, rebak ti diatu apin mati sebedau semua utai tu udah nyadi magang. Langit enggau dunya deka lenyau, tang leka jaku Aku enda lenyau. “Tang nadai orang nemu hari tauka jam utai tu deka nyadi. Melikat ke di serega enda nemu, lalu Anak Mensia pen enda mega nemu. Semina Apai aja nemu. Baka lebuh maya Noah menya, baka nya meh gaya penatai Anak Mensia. Laban berapa hari sebedau bah besai nyadi, orang majak makai ngirup, jadi melaki-bini, nikah, nyentuk ngagai hari Noah tama ke dalam bandung, lalu sida nadai nemu utai, nyentuk ngagai maya ai bah datai lalu nabanka semua sida. Baka nya meh gaya penatai Anak Mensia. Lebuh maya nya ila, dua iku orang deka gawa di umai: siku ditabanka, lalu siku ditinggalka. Dua iku indu deka ngisar: siku ditabanka, lalu siku ditinggalka. Nya alai, bejaga kita, laban kita enda nemu hari Tuhan kita deka datai. Tang kita enda tau enda nemu tu, enti orang ke bempu rumah nemu kemaya penchuri deka datai, iya tentu deka bejaga lalu enda nejuka rumah iya dirumpak. Nya alai kita enda tau enda sedia, laban Anak Mensia deka datai ba jam ti enda disangka kita. “Nya alai, sapa ulun ke tetap ati sereta bepenemu-dalam, ke udah diasuh tuan iya ngemataka semua ulun ti bukai, ngambika bisi meri sida pemakai ba maya ti patut. Beberekat meh ulun nya ke ditemu tuan iya ngereja pengawa nya, lebuh tuan iya datai! Enggau bendar Aku madah ngagai kita, tuan iya deka ngasuh ulun nya ngemataka semua reta tengkira iya. Tang enti ulun nya jai, iya deka bejaku dalam ati diri, ‘Tuan aku laun datai’ lalu iya belabuh bepaluka ulun ti bukai, lalu makai ngirup enggau orang ke pemabuk. Lebuh tuan iya datai ba hari enggau jam ti enda disangka iya, tauka ditemu iya, tuan iya deka mepat iya, lalu muai iya sama enggau orang ke pura-pura ngapa, ngagai endur alai orang deka nyabak sereta begerit ngeli. “Lebuh maya nya ila, Perintah serega tau dibandingka enggau sepuluh iku indu dara, ke mai kelita mansang ngambat lelaki ke deka ditikah. Lima iku ari bala sida nya beli, lalu lima iku pintar. Lebuh sida ke beli mai kelita sida, sida nadai mekal diri enggau minyak, tang sida ke pintar mekal diri enggau minyak ke kelita sida. Lebuh lelaki ke deka ditikah nya laun datai, semua sida ngantuk lalu tinduk. Tang ba urung tengah malam, orang ngangau, ‘Dinga kita! Tu lelaki ke deka ditikah! Pansut kita lalu ambat iya.’ Indu dara ke sepuluh iku nya angkat lalu nginsur sumbu kelita sida. Sida ke beli lalu bejaku ngagai sida ke pintar, ‘Beri kami minyak, laban kelita kami nyau deka padam.’ Tang ku sida ke pintar nyaut, ‘Enggai kami! Enggai ke minyak kami enda chukup dibagi enggau kita. Manah kita mansang ngagai kedai lalu meli minyak ke diri empu.’ Lebuh sida benung mansang meli minyak, lelaki ke deka ditikah pen datai. Indu ke endang udah sedia nya tama enggau lelaki nya ngagai pengerami gawai tikah. Pintu lalu ditutup. “Udah nya sida ti bukai datai, lalu bejaku, ‘Tuan, tuan! Buka pintu ke kami!’ Tang ku lelaki nya nyaut, ‘Enggau bendar aku madah ngagai kita, aku enda ngelala kita.’ Nya alai bejaga kita, laban kita enda nemu hari tauka jam.” “Laban Perintah serega nya baka orang siku ke baru deka bejalai ngagai menua bukai. Iya ngangauka bala orang gaji iya, lalu ngasuh sida ngemataka reta tengkira iya. Ngagai siku iya nyerahka lima ribu singkap duit emas, ngagai siku ti bukai dua ribu singkap, lalu ngagai siku, seribu singkap, nitihka pengelandik sida siku-siku. Udah nya iya mupuk. Orang gaji ke nerima lima ribu singkap lalu tekala nya bedagang ngena duit nya, lalu bulih untung lima ribu singkap. Baka nya mega orang gaji ke nerima dua ribu singkap. Iya bulih untung dua ribu singkap. Tang orang gaji ke nerima seribu singkap mupuk, numbak lubang ba tanah lalu ngelalaika duit tuan iya dalam lubang tanah nya. “Nyau kelama udah bekau nya, tuan sida datai, lalu ngira akaun enggau sida. Lalu orang gaji ke nerima lima ribu singkap datai, mai lima ribu singkap nambahka nya. Ku iya, ‘Tuan, nuan udah nyerahka ngagai aku lima ribu singkap duit. Tu lima ribu singkap untung ti udah ulih aku.’ Ku tuan iya bejaku ngagai iya, ‘Manah pengawa nuan! Nuan tu orang gaji ke manah sereta tetap ati. Nuan tau dikarapka ngemataka utai ti mimit, nya alai aku deka ngasuh nuan ngemataka utai ti mayuh. Tama ke dalam lalu sama gaga ati enggau aku!’ Udah nya orang gaji ke udah nerima dua ribu singkap duit datai, lalu bejaku, ‘Tuan, nuan udah nyerahka ngagai aku dua ribu singkap duit. Tu dua ribu singkap untung ti ulih aku.’ Ku tuan iya bejaku ngagai iya, ‘Manah pengawa nuan! Nuan tu orang gaji ke manah sereta tetap ati! Nuan udah tau dikarapka ngemataka utai ti mimit, nya alai aku deka ngasuh nuan ngemataka mayuh utai. Tama ke dalam lalu sama gaga ati enggau aku!’ Udah nya, orang gaji ke nerima seribu singkap datai lalu bejaku, ‘Tuan, aku nemu nuan endang orang ke terit, ngetau utai ti ukai ditanam nuan, lalu ngumpul utai ti ukai ditaburka nuan, nya alai aku takut, lalu ngelalaika duit nuan dalam tanah. Tu duit nuan.’ Tang ku tuan iya nyaut iya, ‘Nuan tu orang gaji ke jai sereta ngelusu! Nuan nemu aku ngetau utai ti ukai ditanam aku, lalu ngumpul utai ti ukai ditaburka aku, ukai enda? Enti nuan nemu nya, nuan patut udah beranakka duit aku dalam bank, ngambika lebuh aku datai, aku ulih nerima duit nya enggau bungai iya. Nya alai ambi duit nya ari iya, lalu beri ngagai iya ke bisi sepuluh ribu singkap. Laban, genap iku orang ke bisi utai, deka diberi mayuh agi, lalu iya deka ngembuan mayuh agi utai. Tang orang ke nadai utai, indah utai ti dikemisi iya deh deka dirampas ari iya. Lalu buai orang gaji ke nadai guna nya ke luar ngagai endur ti petang, alai iya deka nyabak sereta begerit ngeli.’ “Lebuh Anak Mensia datai dalam mulia Iya, lalu semua melikat datai enggau Iya, nya baru Iya deka duduk ba kerusi diraja Iya ti bemulia. Semua bansa deka digempuruka di mua Iya, lalu Iya deka nyeraraka sida ari pangan diri, baka pengibun bedus ke nyeraraka bedus ari kambin, lalu Iya deka ngengkahka orang ke lurus muak ari kanan Iya, lalu sida ti bukai, muak ari kiba Iya. Udah nya Raja deka bejaku ngagai orang ke muak ari kanan Iya, ‘Datai kitu, kita ke udah diberekatka Apai Aku, awakka kita bempu Perintah ti udah disedia ke kita kenyau ari penumbuh dunya, laban lebuh Aku lapar, kita meri Aku makai. Lebuh Aku aus, kita meri Aku ngirup. Lebuh Aku nyadi orang kampar, kita ngelaluka Aku ngagai rumah kita. Aku telanjai, lalu kita meri Aku gari. Aku sakit, lalu kita ngintu Aku. Aku ditutup dalam rumah jil, lalu kita ngabas Aku.’ Udah nya sida ke lurus deka nyaut Iya, ‘Tuhan, kemaya kami meda Nuan lapar, lalu meri Nuan makai, tauka meda Nuan aus, lalu meri Nuan ngirup? Lalu kemaya kami meda Nuan nyadi orang kampar, lalu ngelaluka Nuan ngagai rumah kami, tauka meda Nuan telanjai, lalu meri Nuan gari? Lalu kemaya kami meda Nuan sakit, tauka meda Nuan dalam rumah jil, lalu ngabas Nuan?’ Lalu Raja nya deka nyaut sida, ‘Enggau bendar Aku madah ngagai kita, lebuh kita ngereja utai tu ngagai siku ari menyadi Aku ti pemadu mit tu, kita ngereja nya ngagai Aku!’ “Udah nya Iya deka bejaku ngagai sida ke muak ari kiba Iya, ‘Rari ari Aku, kita ke kena sumpah, ngagai api ti enda nemu padam, ti udah disedia Allah Taala ke Sitan enggau ke bala melikat iya! Laban lebuh Aku lapar, kita enda meri Aku makai. Lebuh Aku aus, kita enda meri Aku ngirup. Aku orang kampar, tang kita enda ngelaluka Aku ngagai rumah kita. Aku telanjai, tang kita enda meri Aku gari. Aku sakit enggau ditan dalam rumah jil, tang kita enda ngabas Aku.’ Udah nya sida deka nyaut Iya, ‘Tuhan, kemaya kami meda Nuan lapar tauka aus, tauka ngampar, tauka telanjai, tauka sakit, tauka ditan dalam rumah jil, lalu enda ngintu Nuan?’ Udah nya Iya deka nyaut sida, “Enggau bendar Aku madah ngagai kita, genap kali kita enda nulung siku ari sida ke pemadu mit tu, kita enda nulung Aku.’ Lalu sida deka diukum belama iya, tang sida ke lurus deka tama ngagai pengidup ti meruan belama iya.” Lebuh Jesus udah nyebut semua utai nya, Iya lalu bejaku ngagai sida murid Iya, “Kita nemu, Gawai Paska deka belabuh dua hari da agi, lalu Anak Mensia deka diserahka ngambika Iya diregang.” Sida tuai imam enggau sida tuai bansa lalu baum dalam istana imam besai ke benama Kaiapas, bekiraka jalai nangkap Jesus ngena chara belalai, lalu munuh Iya. Tang ku sida, “Ukai lebuh maya gawai, enggai ke orang begau.” Nyadi lebuh Jesus di Betani, ba rumah Simon ke udah sakit lan, siku indu datai ngagai Iya mai sebutul minyak wangi ti berega, lalu nuang minyak wangi nya ba pala Jesus, lebuh Jesus benung makai. Tang lebuh sida murid meda nya, sida pedis ati, lalu bejaku, “Nama kebuah masau minyak wangi nya baka nya? Minyak nya tau dijual ngena rega ti besai, lalu duit nya diberi ngagai orang ke seranta!” Tang Jesus nemu utai ti disebut sida, lalu bejaku ngagai sida, “Nama kebuah kita ngachau indu tu? Iya udah ngereja utai ti manah ke Aku. Laban kita deka seruran bisi orang ke seranta begulai enggau kita, tang Aku enda seruran begulai enggau kita. Lebuh iya nuang minyak wangi nya ba tubuh Aku, iya nyendiaka Aku dikubur. Enggau bendar Aku madah ngagai kita, di semua endur alai Berita Manah tu ditusui di serata dunya, utai ti udah dikereja iya deka ditusui, kena ngingatka iya.” Udah nya siku ari sida ke dua belas, ke benama Judas Iskariot, mansang ngagai sida tuai imam lalu bejaku, “Nama utai ti deka diberi kita ngagai aku enti aku nyerahka Jesus ngagai kita?” Sida lalu meri iya tiga puluh singkap duit pirak. Berengkah ari nya Judas belabuh begigaka peluang kena nyerahka Jesus ngagai sida. Nyadi ba hari ti keterubah ke Gawai Roti Ti Enda Beragi, sida murid datai ngagai Jesus, lalu bejaku, “Dini endur alai Nuan deka ngasuh kami nyendiaka pemakai Gawai Paska ke Nuan?” Ku Iya bejaku, “Mansang kita ngagai orang siku di nengeri, lalu sebut ngagai iya: ‘Ku Pengajar, Maya Aku nyau semak. Aku enggau bala murid Aku deka ngintu Gawai Paska ba rumah nuan.’ ” Sida murid lalu ngereja nitihka asuh Jesus lalu nyendiaka pemakai Gawai Paska. Lebuh hari nyau lemai, Iya duduk enggau sida dua belas iku. Lebuh sida benung makai, Jesus bejaku, “Enggau bendar Aku madah ngagai kita, siku ari kita deka nyual Aku.” Sida lalu tusah amat ati, lalu belabuh nanya Iya, udah siku-siku, “Ukai aku ti ku Nuan, Tuhan?” Disaut Iya, “Orang ke nyepuhka roti ke dalam mangkuk nyereta Aku, nya meh orang ke deka nyual Aku. Anak Mensia endang deka mati munyi ti disebut dalam Bup Kudus, tang naka meh penusah orang ke nyual Anak Mensia! Manah agi enti iya enda ada!” Judas, ke nyual Iya, lalu bejaku, “Ukai aku ti ku Nuan, Pengajar?” Disaut Jesus, “Nuan empu udah madahka diri.” Lebuh sida benung makai, Jesus ngambi roti, merekat lalu mechahka roti nya, nyuaka roti nya ngagai sida murid Iya, lalu bejaku, “Ambi, empa; tu tubuh Aku.” Udah nya Iya ngambi mangkuk, lalu lebuh Iya udah meri terima kasih, Iya nyuaka mangkuk nya ngagai sida murid, ku Iya, “Irup tu, semua kita, laban tu darah Aku kena nanggam sempekat baru Allah Taala, ti dituang ke orang mayuh ke pengampun dosa. Aku madah ngagai kita, Aku enda agi ngirup wain tu datai ngagai maya Aku ngirup iya baru enggau kita dalam Perintah Apai Aku.” Lebuh sida udah belagu siti pantun, sida lalu mupuk ngagai Bukit Kana. Jesus lalu madah ngagai sida, “Malam tu semua kita deka rari magang ketegal Aku, laban endang udah ditulis, ‘Aku deka munuh pengibun bedus, lalu raban bedus deka pambar.’ Tang lebuh Aku udah diangkatka idup baru, Aku deka mupuk dulu ari kita ngagai Galili.” Peter lalu bejaku ngagai Iya, “Enti sema semua orang rari ketegal Nuan, aku meh enda.” Ku Jesus bejaku ngagai Peter, “Enggau bendar Aku madah ngagai nuan: malam tu, sebedau manuk mengkukuk, nuan udah besangkalka Aku tiga kali.” Ku Peter bejaku ngagai Iya, “Enti sema aku mati enggau Nuan, enda meh aku besangkalka Nuan!” Semua murid ti bukai bela bejaku munyi nya magang. Udah nya Jesus mupuk enggau sida ngagai endur siti ti dikumbai Getsemani, lalu ku Iya bejaku ngagai sida, “Duduk ditu. Aku deka kin lalu besampi.” Iya lalu mai enggau Iya Peter enggau anak Sebedi ke dua iku. Ati Iya balat tusah sereta sinu. Udah nya Iya bejaku ngagai sida, “Ati Aku balat tusah, asai ke deka mati. Diau ditu, lalu bejaga enggau Aku.” Iya bejalai jauh mimit, nyungkurka Diri ke tanah, lalu besampi, “Apai, enti ulih, awakka mangkuk tu diambi ari Aku! Tang ukai nitihka peneka Aku, tang nitihka peneka Nuan.” Iya lalu pulai baru ngagai sida murid, lalu nemu sida tinduk, lalu ku Iya bejaku ngagai Peter, “Kati kita enda ulih bejaga enggau Aku sejam? Bejaga sereta besampi ngambika kita enda kena laban penguji. Ati amat deka, tang tubuh lemi.” Iya mupuk baru kedua kali, lalu besampi, “Apai, enti mangkuk tu enda tau diambi ari Aku, lalu Aku enda tau enda ngirup iya, awakka peneka Nuan nyadi.” Iya pulai baru, lalu nemu sida murid tinduk, laban sida nyau kelalu deka tinduk. Nya alai Iya ninggalka sida baru, mupuk, lalu besampi ketiga kali, munyi ti dulu. Udah nya Iya pulai baru ngagai sida, lalu bejaku, “Kati kita agi tinduk sereta belelak? Peda kita! Jam udah chukup, lalu Anak Mensia deka dijual ngagai orang ke bedosa. Angkat, aram kitai mupuk. Peda kita, orang ke nyual Aku udah datai!” Lebuh Jesus agi benung bejaku, Judas datai, iya nya siku ari sida ke dua belas. Mayuh amat orang ke betangkinka pedang enggau bebaika pemalu datai enggau iya ari asuh sida tuai imam enggau sida tuai bansa. Nyadi orang ke nyual Iya udah meri siti tanda ngagai sida, ku iya, “Orang ke disium aku, nya meh Iya. Tangkap Iya!” Judas mansang ngagai Jesus, lalu bejaku, “Tabi, Pengajar,” lalu nyium Iya. Ku Jesus bejaku ngagai iya, “Unggal, kereja enggau jampat utai ti deka dikereja nuan. Sida mansang, megai Iya, lalu nangkap Iya. Siku orang ke enggau Jesus lalu tekala nya nyintak pedang iya, lalu mantap ulun imam besai, mutuska pending iya. Jesus lalu bejaku ngagai iya, “Selitka pedang nuan. Semua orang ke ngena pedang deka mati laban pedang. Kati kita ngumbai Aku enda ulih ngangauka Apai Aku, lalu Iya tekala nya ngirumka lebih dua belas raban soldadu melikat? Tang enti baka nya, baka ni ku Bup Kudus dikamatka, ti madahka utai tu enda tau enda nyadi baka tu?” Jesus lalu bejaku ngagai orang mayuh, “Kati Aku tu perumpak alai kita bebaika pedang enggau pemalu mansang nangkap Aku? Tiap hari Aku duduk ngajar dalam Rumah Sembiang, lalu kita enda nangkap Aku. Tang semua utai tu nyadi kena ngamatka jaku ti udah ditulis sida nabi dalam Bup Kudus.” Udah nya semua murid ninggalka Iya, lalu rari. Udah nya orang ke nangkap Jesus lalu mai Iya ngagai rumah imam besai Kaiapas alai sida pengajar Adat enggau sida tuai bansa udah begempuru. Tang Peter nitihka Iya ari jauh, nyentuk ngagai tengah laman rumah imam besai. Iya tama lalu nudukka diri enggau bala jejaga, deka nengkilaka semua utai ti nyadi. Nyadi sida tuai imam enggau semua raban Kunsil nguji ngiga saksi ti bula kena ngelaban Jesus, ngambika sida ulih munuh Iya, tang sida nadai tetemuka saksi ke baka nya, taja pen mayuh orang mansang ke mua lalu nyebut utai ti bula pasal Iya. Ke pengujung iya, dua iku orang mansang ke mua lalu bejaku, “Orang tu udah nyebut, ‘Aku ulih ngerubuh Rumah Sembiang Allah Taala, lalu nirika iya baru dalam tiga hari.’ ” Imam besai bediri, lalu bejaku, “Kati Nuan enda nyaut nya? Nama utai ti disebut orang tu ngelaban Nuan?” Tang Jesus mengkang enda bemunyi. Imam besai lalu bejaku baru ngagai Iya, “Dalam nama Allah Taala ti idup, aku ngasuh nuan madah ngagai kami enti Nuan tu Kristus, Anak Allah Taala.” Ku Jesus bejaku ngagai iya, “Nuan empu udah nyebut nya. Tang Aku madah ngagai kita, berengkah ari diatu kita deka meda Anak Mensia duduk muak ari kanan Allah Taala ti Pemadu Bekuasa, lalu datai atas remang ari serega!” Imam besai lalu nyarikka gari diri, lalu bejaku, “Iya udah bejaku busung! Nama kebuah kitai begunaka saksi bukai? Kita empu baru udah ninga Iya bejaku busung! Baka ni ku penemu kita?” Sida lalu nyaut, “Iya patut dibunuh.” Sida lalu ngeludah mua Iya, lalu malu Iya. Lalu ku sekeda orang ke nampar Iya bejaku, “Benabi Nuan, Kristus! Sapa nampar Nuan!” Nyadi Peter duduk di luar, ba tengah laman. Siku indu ke nyadi kuli imam besai datai lalu bejaku ngagai Peter, “Nuan tu pen sama enggau Jesus orang Galili.” Tang Peter besangkal di mua semua bala sida, ku iya, “Nadai aku nemu utai ti ku nuan.” Lebuh Peter pansut ngagai mua pintu penama, siku agi kuli indu meda iya, lalu bejaku ngagai bala orang ke bediri semak dia, “Orang tu udah enggau Jesus orang Nasaret.” Peter lalu besangkal baru, “Aku besumpah, aku enda nemu orang nya!” Enda lama udah nya, sida lelaki ke bediri dia datai lalu bejaku ngagai Peter, “Nuan tu siku ari bala sida, ari chara nuan bejaku!” Ku Peter, “Aku besumpah, aku madahka utai ti amat! Awakka Allah Taala ngukum aku enti aku enda! Aku enda ngelala orang nya!” Tekala nya manuk lalu mengkukuk. Peter lalu ingatka utai ti udah dipadahka Jesus ngagai iya: ‘Sebedau manuk mengkukuk, nuan deka udah besangkalka Aku tiga kali.” Peter pansut lalu duie-duie nyabak. Pagi nya, semua tuai imam enggau sida tuai bansa lalu begigaka chara munuh Jesus. Sida nanchang Iya, mai Iya pansut, lalu nyerahka Iya ngagai Gabenor Pilate. Lebuh Judas, ke udah nyual Iya, ninga Jesus udah diukum, iya nesal ati lalu mulaika tiga puluh singkap duit pirak nya ngagai sida tuai imam, enggau tuai bansa. Ku iya, “Aku udah bedosa nyual orang ke nadai penyalah!” Tang ku sida nyaut iya, “Kapa kami ka ibuhka nya? Nya pekara nuan empu!” Judas lalu ngempaska duit nya dalam Rumah Sembiang, mupuk ari endur nya, lalu ngantung diri. Sida tuai imam lalu ngumpul duit nya, lalu ku sida, “Kitai ngelanggar Adat enti kitai nyimpan duit tu dalam sarang reta Rumah Sembiang, laban tu duit darah.” Nya alai sida berandauka nya, lalu meli, ngena duit nya, sebidang tanah ari tukang periuk, nyadika endur alai nguburka orang kampar. Nya kebuah tanah nya dikumbai, “Tanah Darah” nyentuk ngagai sehari tu. Utai tu nyadi kena ngamatka jaku ti udah disebut beseruanka nabi Jeremiah: “Lalu sida ngambi tiga puluh singkap duit pirak nya, penyampau ti udah dipesetujuka orang Israel kena sida meli Iya, lalu ngena duit nya sida meli tanah tukang periuk, nitihka pesan Tuhan ngagai aku.” Jesus bediri di mua gabenor, lalu gabenor nanya Iya: “Kati Nuan raja orang Judah?” Disaut Jesus, “Munyi ti disebut nuan.” Tang lebuh sida tuai imam enggau sida tuai bansa besalahka Iya, Iya enda nyaut. Udah nya Pilate bejaku ngagai iya, “Kati Nuan nadai ninga pemayuh utai ti disebut sida ngelaban Nuan?” Tang Jesus enda nyaut, seleka jaku pen enda, lalu tuan gabenor balat amat alit ati. Nyadi ba tiap Gawai Paska, tuan gabenor endang selalu ngelepaska siku orang tutup nitihka pinta orang mayuh. Nyadi lebuh maya nya bisi siku orang tutup ti tebilang, ke benama Jesus Barabas. Nya alai lebuh orang mayuh udah begempuru, Pilate lalu bejaku ngagai sida, “Sapa patut dilepaska aku ke kita? Jesus Barabas, tauka Jesus ke dikumbai Kristus?” Laban Pilate endang nemu bala tuai orang Judah nyerahka Jesus ngagai iya, laban sida kepapas. Lebuh Pilate benung ngakim pekara nya, bini iya ngirumka pesan ngagai iya munyi tu: “Anang ngereja utai nama-nama ngagai orang ke lurus nya, laban aku udah tusah amat ati pasal Iya dalam mimpi aku sehari tu.” Nyadi sida tuai imam enggau sida tuai bansa nyungkak orang mayuh minta Pilate ngelepaska Barabas, lalu munuh Jesus. Tuan gabenor lalu bejaku baru ngagai orang mayuh, “Sapa ari seduai tu ke dilepaska aku ke kita?” Sida lalu nyaut, “Barabas!” Pilate lalu bejaku, “Enti pia, nama utai ti patut dikereja aku ngagai Jesus ke dikumbai Kristus?” Semua sida lalu nyaut, “Regang Iya!” Pilate lalu nanya, “Nama kebuah? Nama penyalah Iya?” Tang sida manjung inggar agi, “Regang Iya!” Lebuh Pilate nemu diri nadai ulih ngereja utai nama-nama, laban orang mayuh nyau deka begau, iya ngambi ai, lalu masu jari diri di mua orang mayuh, lalu bejaku, “Aku enda tanggung pemati orang tu! Kita empu tanggung nya!” Semua orang mayuh lalu nyaut, “Awakka darah Iya ninggang kami enggau anak kami!” Nya alai Pilate ngelepaska Barabas ke sida. Iya ngasuh Jesus disipat, lalu nyerahka Iya ngambika Iya diregang. Udah nya bala soldadu Pilate mai Jesus ngagai istana gabenor, lalu semua bala soldadu bekelingika Iya Sida lalu muka gari ari tubuh Iya, lalu ngerasukka baju panjai ti ungu ba Iya. Sida lalu ngaga makota duri, ngengkahka makota nya ba pala Iya, lalu ngengkahka siti tungkat ba jari kanan Iya. Sida lalu besugang di mua Iya, lalu ngeleseka Iya. Ku sida, “Tabi ke Nuan Raja orang Judah!” Sida lalu ngeludah Iya, ngambi tungkat ari Iya, lalu malu pala Iya. Lebuh sida udah tembu beduan Iya, sida muka baju panjai ti ungu nya ari Iya, lalu ngerasukka gari Iya Empu baru ba Iya, lalu mai Iya pansut, deka ngeregang Iya. Lebuh sida pansut, sida betemu enggau siku lelaki ke benama Simon, ari Sairin. Sida lalu mejalka orang nya ngesan regang Jesus. Lebuh sida datai ba endur siti ti dikumbai Golgota (reti nya, “Endur Alai Keruntuk”) sida meri Iya wain dichampur enggau empedu, tang lebuh Jesus ensepi utai nya, Iya enggai ngirup. Lebuh sida udah ngeregang Iya, sida lalu bechabut undi ke gari Iya. Udah nya sida duduk nengkilaka Iya. Ba atas pala Iya sida ngengkahka siti pelekat ti madahka penyalah Iya. Baka tu ku jaku ti ditulis ba pelekat nya, “Tu Jesus, Raja orang Judah.” Dua iku penyamun lalu diregang sama enggau Iya, siku muak ari kanan, lalu siku muak ari kiba. Orang ke mansa ngeleseka Jesus, ngilikka pala sida lalu bejaku, “Nuan ke deka ngerubuh Rumah Sembiang, lalu nirika iya baru dalam tiga hari, idupka diri empu lalu nurun nuan ari regang nya!” Sida tuai imam enggau sida pengajar Adat, enggau sida tuai bansa mega ngeleseka Iya. Ku sida, “Iya ngidupka orang bukai, tang Iya enda ulih ngidupka Diri Empu! Enti Iya amat Raja orang Israel, awakka Iya nurun ari regang nya, ngambika kitai arapka Iya! Iya ngarapka Allah Taala. Awakka Allah Taala meh ngelepaska Iya, enti Allah Taala deka, laban Iya udah nyebut, ‘Aku tu Anak Allah Taala.’ ” Perumpak ke diregang sama enggau Iya mega ngeleseka Iya. Ba urung tengah hari, semua menua petang magang nyentuk ngagai pukul tiga ngalih hari. Ba urung pukul tiga, Jesus ngangau enggau nyawa ti inggar, “Eli, Eli, lama sabaktani?” reti nya, “Allah Taala Aku, Allah Taala Aku, nama kebuah Nuan ninggalka Aku?” Lebuh orang ke bediri dia ninga Iya manjung, sida lalu bejaku, “Iya ngangauka Elijah!” Siku ari bala sida lalu belanda tekala nya, ngambi siti bungai karang, nyepuhka bungai karang nya ngagai ai wain ti masam, nuatka bungai karang nya ngena kayu, lalu nguji ngasuh Jesus ngirup. Tang ku sida ti bukai bejaku, “Anang guai dulu! Nyangka Elijah bisi datai nyelamatka Iya!” Jesus ngangau baru enggau nyawa ti inggar, lalu ngapuska seput. Kain tirai ti digantung dalam Rumah Sembiang lalu charik belah dua ari atas ke baruh. Tanah berenyang, lalu batu belah. Kubur mega tebuka, lalu mayuh nembiak Tuhan ke udah mati, diangkatka idup baru. Sida pansut ari kubur lebuh Jesus udah diangkatka ari mati. Sida tama ngagai Nengeri ti Kudus, lalu mayuh orang meda sida. Lebuh pemesai soldadu enggau bala soldadu ke sama enggau iya nengkilaka Jesus, meda tanah berenyang, enggau semua utai bukai ti nyadi, sida takut, lalu ku sida, “Iya amat Anak Allah Taala!” Sida ke indu pen mayuh mega dia, nengkilaka Iya ari jauh. Sida tu udah nitihka Iya ari Galili, lalu ngintu Iya. Bala sida nya nyengkaum Maria Magdalin, Maria indai James seduai Josep, enggau bini Sebedi. Lebuh hari nyau lemai, siku orang ke kaya ari Arimatea datai. Nama iya Josep. Iya tu mega murid Jesus. Iya betemu enggau Pilate, lalu minta bangkai Jesus. Pilate lalu ngasuh orang nyerahka bangkai Jesus ngagai Josep. Josep lalu ngambi bangkai Jesus, lalu mungkus bangkai nya ngena kain linin ti baru. Iya ngengkahka bangkai nya dalam kubur Josep empu, ti udah ditebuk iya ba batu galang. Iya lalu maringka sigi batu ti besai ngagai mua lubang kubur nya, lalu mupuk ari endur nya. Maria Magdalin enggau Maria ti siku nya bisi dia, duduk nunga ngagai kubur nya. Hari siti, iya nya hari Sabat, sida tuai imam enggau sida orang Parisi betemu enggau Pilate. Ku sida, “Tuan, kami ingatka utai ti udah disebut orang ke bula nya, lebuh Iya agi idup. Ku Iya, ‘Udah bekau tiga hari, Aku deka angkat idup baru.’ Nya alai, asuh orang nyaga kubur nya nyentuk ngagai hari ti ketiga, enggai ke sida murid Iya datai lalu ngenchuri bangkai Iya, lalu madah ngagai orang mayuh, ‘Iya udah angkat idup baru ari mati,’ lalu pemula ti penudi tu deka jai agi ari pemula ti keterubah.” Ku Pilate bejaku enggau sida, “Bai seraban jejaga, lalu mupuk. Jaga kubur nya likun enggau naka ulih kita.” Sida mupuk lalu ngelekatka chop tambit ba batu ti dikena nutup kubur nya lalu ngasuh jejaga nyaga kubur nya. Udah lepas hari Sabat, tumu pagi hari Minggu, Maria Magdalin enggau Maria ti siku nya, mansang ngagai kubur. Tekala nya tanah lalu balat amat berenyang, laban siku melikat Tuhan nurun ari serega, datai lalu maringka batu ari mua kubur nya, lalu duduk ba batu nya. Gamal melikat nya baka kilat, lalu gari iya burak baka seleju. Bala jejaga balat amat takutka iya datai ke sida nyau getar-getar lalu baka orang ke mati. Tang ku melikat nya bejaku ngagai indu dua iku nya, “Anang takut. Aku nemu seduai ngiga Jesus, ke udah diregang. Iya nadai ditu laban Iya udah diangkatka ari mati, munyi ti udah dipadahka Iya. Datai kitu, lalu peda endur alai Iya gali. Udah nya mupuk seduai enggau jampat, lalu padahka ngagai sida murid Iya, ‘Iya udah diangkatka ari mati, lalu Iya diatu mansang ngagai Galili dulu ari kita. Din kita deka meda Iya!’ Tu pesan aku ngagai seduai.” Seduai iya lalu beguai-guai mupuk ari kubur nya, takut tang gaga ati, lalu belanda madahka sida murid Iya. Tekala nya Jesus betemu enggau seduai iya, lalu bejaku, “Tabi ke seduai.” Seduai iya lalu mansang ngagai Iya, megai kaki Iya, lalu nyembah Iya. Lalu ku Jesus bejaku ngagai seduai iya, “Anang takut. Mupuk meh seduai, lalu asuh bala menyadi Aku mupuk ngagai Galili. Din sida deka meda Aku.” Lebuh indu dua iku nya benung di rantau jalai, sekeda soldadu ke nyaga kubur nya mansang ngagai nengeri, lalu madah ngagai sida tuai imam pasal semua utai ti udah nyadi. Lebuh sida tuai imam udah baum enggau sida tuai bansa, sida lalu meri duit ngagai sida soldadu nya. Ku sida, “Padahka ngagai orang mayuh, ‘Sida murid Iya datai lebuh malam hari, lalu ngenchuri bangkai Iya, lebuh kami tinduk.’ Lalu enti tuan gabenor ninga pasal pekara tu, kami deka bejaku ngagai iya, ngambika kita enda kena penusah laban nya.” Bala soldadu lalu ngambi duit nya, lalu ngereja nitihka asuh sida, lalu jerita nya ditaburka ngagai orang Judah nyentuk ngagai sehari tu. Murid ke sebelas iku lalu mupuk ngagai menua Galili, ngagai bukit sigi ti udah dipadahka Jesus ngagai sida. Lebuh sida meda Iya, sida lalu nyembah Iya, tang sekeda sida kakang ati. Jesus mansang ngagai sida lalu bejaku, “Semua kuasa di serega enggau di dunya udah diberi magang ngagai Aku. Nya alai, bejalai kita ngagai semua bansa lalu gaga sida nyadi murid Aku, maptisa sida dalam nama Apai, Anak enggau Roh Kudus, lalu ajar sida ngasika semua pesan ti udah diberi Aku ngagai kita. Lalu ingat, Aku deka seruran enggau kita nyentuk ngagai pengujung dunya.” Tu pun Berita Manah pasal Jesus Kristus, ti Anak Allah Taala. Munyi ti ditulis dalam bup nabi Isaiah, “Ku Allah Taala bejaku, ‘Dinga! Aku ngirumka seruan Aku dulu ari Nuan; iya deka nyendiaka jalai ke Nuan.’ Siku orang ngangau di menua puang: ‘Sediaka jalai ke Tuhan; Gaga jalai Iya rurus!’ ” John Pemaptisa pegari di menua puang, madahka pemaptisa nesal ati ke pengampun dosa. Semua orang ari serata menua Judea, enggau ari Jerusalem mansang ngagai iya. Sida ngaku dosa sida, lalu iya maptisa sida ba Sungai Jordan. Gari John digaga ari bulu unta, lalu belulang ti melit punggung iya digaga ari kulit jelu. Lalu pemakai iya buntak enggau ai manyi. Ku iya madah ngagai orang mayuh, “Iya ke datai dudi ari aku lebih agi bekuasa ari aku, datai ke aku enda tau meremi lalu muka tali kasut Iya. Aku udah maptisa kita ngena ai, tang Iya deka maptisa kita ngena Roh Kudus.” Lebuh maya nya Jesus datai ari Nasaret di menua Galili lalu dibaptisa ulih John ba Sungai Jordan. Lebuh Iya pansut ari dalam ai, Iya tekala nya meda langit tebuka, lalu Roh Kudus nurun ngagai Iya baka burung achang. Nyawa lalu bisi didinga bejaku ari serega, “Nuan tu Anak ti dikesayauka Aku. Aku rindu bendar ke Nuan.” Roh Kudus lalu tekala nya mai Iya ngagai menua puang. Iya diau di menua puang empat puluh hari, diuji Sitan. Iya diau begulai enggau jelu babas, lalu bala melikat ngintu Iya. Lebuh John udah ditangkap, Jesus bejalai ngagai menua Galili, nusui Berita Manah Allah Taala. Ku Iyo bejaku, “Timpuh udah datai, lalu Perintah Allah Taala nyau semak! Nesal ati ke dosa kita, lalu arapka Berita Manah!” Lebuh Jesus benung bejalai ba tebing Danau Galili, Iya tepedaka dua iku orang berikan, Simon enggau menyadi lelaki iya Andrew, benung nyala. Ku Jesus bejaku ngagai seduai iya, “Titihka Aku. Aku deka ngajar seduai chara ngulihka mensia.” Tekala nya seduai iya ninggalka jala seduai, lalu nitihka Iya. Lebuh Iya udah bejalai jauh mimit ari nya, Iya tepedaka dua iku agi orang diri menyadi, James seduai John, anak Sebedi, benung nyeruri jala dalam perau sida. Tekala nya Iya ngangauka seduai iya, lalu seduai iya ninggalka apai seduai iya Sebedi sama enggau orang gaji sida dalam perau, lalu nitihka Jesus. Jesus enggau sida murid Iya datai di nengeri Kapernaum. Kena hari Sabat, Iya tama ngagai balai gempuru lalu ngajar. Sida alit ati ninga ajar Iya, laban Iya ngajar baka orang ke bisi kuasa, ukai baka sida pengajar Adat. Nyadi dalam balai gempuru nya bisi siku lelaki ke dirasuk roh ti jai. Ku orang nya bejaku enggau nyawa ti inggar, “Nama utai ti deka dikereja Nuan ngagai kami, Jesus orang Nasaret? Kati Nuan datai ditu deka ngerusak kami? Aku ngelala Nuan. Nuan tu Seruan ti Kudus ari Allah Taala!” Jesus lalu ngerara iya, “Anang bejaku! Pansut nuan ari iya!” Roh ti jai nya lalu ngusak orang nya, nyerauh lalu udah nya pansut ari iya. Semua orang balat alit ati lalu belabuh betanya ngagai pangan diri, “Nama utai tu? Tu ajar ti baru. Iya bisi kuasa! Iya ngerara roh ti jai, lalu sida ngasika Iya!” Berita pasal Iya lalu tekala nya belabuh ngelekai ngagai semua endur di serata menua Galili. Lebuh Jesus mupuk ari balai gempuru nya, Iya enggau James seduai John tama ngagai rumah Simon seduai Andrew. Nyadi mentua indu Simon gali sakit chelap angat, lalu sida madahka pasal iya ngagai Jesus. Jesus mansang lalu megai jari mentua Simon, lalu ngangkatka iya. Iya lalu gerai, lalu belabuh mela sida. Lebuh padam mata panas lemai nya, orang mai ngagai Jesus semua orang ke sakit, tauka dirasuk antu. Lalu semua orang di nengeri nya begelumu di mua rumah nya. Iya ngeraika mayuh orang ke sakit laban mayuh macham pemedis, lalu muru mayuh antu. Iya enda nyagi sida antu bejaku, laban sida ngelala sapa Iya. Pagi hari siti, sebedau rerak tawas, Jesus angkat, lalu bejalai ngagai siti endur ti sunyi, lalu besampi. Simon enggau bala pangan iya lalu ngiga Iya. Lebuh sida udah tetemuka Iya, sida lalu bejaku, “Semua orang ngiga Nuan.” Ku Iya nyaut, “Aram kitai bejalai ngagai nengeri bukai, ngambika Aku nusui Berita Manah dia mega, laban nya endang kebuah Aku datai.” Iya lalu bejalai di serata menua Galili, nusui Berita Manah dalam balai gempuru sida, lalu muru antu. Siku lelaki ke sakit lan datai ngagai Jesus, besugang, minta tulung Jesus. Ku iya, “Enti Nuan deka, Nuan ulih ngasuh aku tuchi.” Enggau ati ti sinu ke iya Jesus ngunjurka jari lalu negu orang nya, lalu bejaku, “Aku deka. Tuchi meh nuan!” Tekala nya penyakit nya lalu nadai agi ba orang nya, lalu iya nyadi tuchi. Lebuh Jesus udah berat-rat nangkan orang nya enggau jaku, Iya lalu kemaya nya ngasuh iya mupuk. Ku Jesus bejaku ngagai iya, “Anang madahka tu ngagai orang, tang mansang nuan ngagai imam lalu asuh iya meresa nuan, lalu beri piring ti udah diletak Moses, kena nuan mandangka diri ngagai orang mayuh nuan udah tuchi.” Tang orang nya mupuk lalu belabuh nusui berita nya di semua endur. Ketegal nya Jesus nyau enda ulih agi ngayanka Diri lebuh Iya tama ngagai nengeri. Tang Iya diau di luar ba endur ti sunyi, lalu orang datai ngagai Iya ari semua endur. Lebuh Iya pulai ngagai Kapernaum kira dua tiga hari udah bekau nya, orang lalu madahka Iya bisi di rumah. Mayuh amat orang begempuru dia, datai ke rumah nya nyau enda muat alai sida. Di mua pintu pen nadai meh endur. Lalu Iya nusui pesan Allah Taala ngagai sida. Empat iku lelaki datai ngagai Iya, mai orang siku ke sakit bajung. Laban orang kelalu mayuh, sida enda ulih mai orang nya ngagai Jesus, lalu sida ngerumbak perabung ba senentang endur alai Jesus, lalu ngulurka orang ke sakit nya ngena tikai iya empu. Lebuh Jesus meda pengarap sida, Iya lalu bejaku ngagai orang ke sakit bajung nya, “Anak, dosa nuan diampun.” Sekeda pengajar Adat ke duduk dia lalu betanya dalam ati diri, “Nama kebuah orang tu bejaku munyi nya? Nya jaku busung! Semina Allah Taala aja ulih ngampun dosa!” Tekala nya Jesus nemu utai ti diperagam ati sida, lalu ku Iya, “Nama kebuah kita beperagamka utai ti baka nya? Ni ti mudah agi disebut ngagai orang ke sakit bajung tu, ‘Dosa nuan diampun,’ tauka ‘Angkat, bai peninduk nuan, lalu bejalai’? Tang ngambika kita nemu Anak Mensia bisi kuasa di dunya tu ngampun dosa,” Iya lalu bejaku ngagai orang ke sakit bajung nya, “Aku bejaku ngagai nuan: angkat nuan! Bai peninduk nuan, lalu pulai ke rumah!” Orang nya lalu bediri, lalu tekala nya ngambi peninduk iya, lalu pansut ari endur nya dipeda semua sida. Semua sida lalu balat alit ati, lalu ngemuliaka Allah Taala. Ku sida, “Nadai kitai udah kala meda utai baka tu!” Jesus bejalai baru ngagai tebing Danau Galili, lalu bala orang mayuh begelumu ngelingi Iya, lalu Iya ngajar sida. Lebuh Iya benung bejalai, Iya tepedaka Lewi anak Alpius duduk dalam opis pengumpul chukai. Iya lalu bejaku ngagai Lewi, “Titihka Aku.” Lewi angkat lalu nitihka Iya. Lebuh Iya makai dalam rumah Lewi, mayuh pengumpul chukai enggau orang ke bedosa makai sama enggau Iya sereta enggau murid Iya, laban mayuh sida nya nitihka Iya. Lebuh sida pengajar Adat enggau orang Parisi meda Jesus begulai makai enggau orang ke bedosa, sereta enggau pengumpul chukai, sida lalu bejaku ngagai sida murid Iya, “Nama kebuah Iya begulai makai enggau pengumpul chukai sereta enggau orang ke bedosa?” Lebuh Jesus ninga nya, Iya lalu bejaku ngagai sida, “Orang ke gerai enda begunaka lutur, tang semina orang ke sakit. Aku datai ukai deka ngangauka orang ke lurus, tang orang ke bedosa.” Nyadi sida murid John Pemaptisa enggau sida orang Parisi bepasa. Orang lalu datai ngagai Jesus, lalu nanya Iya, “Nama kebuah sida murid John Pemaptisa enggau sida murid orang Parisi bepasa, tang murid Nuan enda?” Ku Jesus bejaku ngagai sida, “Kati bala pengabang bepasa lebuh lelaki ke ditikah agi mengkang begulai enggau sida? Seagi-agi lelaki ke ditikah nya mengkang begulai enggau sida, sida enda bepasa. Maya deka datai alai lelaki ke ditikah nya deka diambi ari sida, nya baru sida deka bepasa. “Nadai orang nampalka chebik kain ti baru ngagai kain ti lama, laban kain ti baru nya deka kesat lalu nyintak ari kain ti lama, lalu ngasuh kain ti lama nya balat agi charik. Lalu nadai mega orang nuang wain ti baru ngagai kambut wain ti lama, enggai ke wain nya ngasuh kambut nya pechah, lalu wain nya deka nyaya, lalu kambut nya rusak. Wain ti baru patut disimpan dalam kambut ti baru.” Nyadi sekali lebuh hari Sabat Jesus bejalai nengah umai gandum. Lebuh sida bejalai nengah umai nya sida murid Iya lalu belabuh ngelesit igi gandum. Orang Parisi lalu bejaku ngagai Iya, “Nama kebuah sida ngereja utai ti ngelanggar Adat lebuh hari Sabat!” Iya lalu bejaku ngagai sida, “Kati kita nadai udah kala macha pasal utai ti dikereja David, lebuh iya enggau bala iya lapar lalu begunaka pemakai? Iya tama ngagai rumah Allah Taala, lebuh maya Abiatar nyadi imam besai, lalu makai roti ti udah diberi ngagai Allah Taala, ti enda tau diempa orang bukai kelimpah ari sida imam, lalu iya mega meri roti nya ngagai bala iya?” Lalu ku Jesus bejaku ngagai sida, “Hari Sabat digaga ke mensia, ukai mensia ke hari Sabat. Nya alai Anak Mensia Tuhan ke hari Sabat.” Jesus lalu tama baru ngagai balai gempuru. Dalam balai gempuru nya bisi siku orang ke mati lengan sepiak. Sida lalu nengkilaka Jesus, deka meda enti Iya deka ngeraika orang nya lebuh hari Sabat, ngambika sida ulih besalahka Iya. Ku Iya bejaku ngagai orang ke mati lengan nya, “Datai ke mua kitu.” Lalu ku Iya bejaku ngagai sida, “Nitihka Adat, ni utai ti patut dikereja kitai lebuh hari Sabat, ngereja utai ti manah tauka utai ti jai; ngidupka nyawa tauka munuh?” Tang sida enda engkeretik. Jesus merening ngagai sida enggau ati ti pedis tang sinu ati ke sida laban sida kieh. Iya lalu bejaku ngagai orang ke mati jari nya, “Unjurka jari nuan.” Orang nya lalu ngunjurka jari iya, lalu jari iya gerai. Orang Parisi pansut, lalu baum tekala nya enggau bala nembiak Herod, bekiraka chara munuh Jesus. Jesus enggau sida murid Iya mupuk ngagai Danau Galili, lalu mayuh amat orang ari Galili, enggau ari Judea nitihka Iya, enggau ari Jerusalem, ari Idumea, ari menua ti ngilah Sungai Jordan, enggau ari menua ti ngelingi nengeri Tire enggau Sidon. Mayuh amat orang datai ngagai Iya lebuh sida ninga pasal semua utai ti dikereja Iya. Iya lalu ngasuh sida murid Iya nyendiaka sebuah perau ke Iya, laban orang kelalu mayuh, enggai ke sida ngempitka Iya; laban Iya udah ngeraika mayuh orang, datai ke semua orang ke sakit nyau berebut mansang ngagai Iya, deka negu Iya. Lalu genap kali roh ti jai meda Iya, sida nyungkurka diri di mua Iya, lalu merakka nyawa, “Nuan tu Anak Allah Taala!” Lalu Iya berat-rat nangkan sida enggau jaku, enggai ke orang ngelala Iya. Udah nya Jesus niki ngagai bukit sigi, lalu ngangauka orang ke dikedekaka Iya. Sida lalu datai ngagai Iya. Iya lalu milih dua belas iku sida ke dikumbai Iya rasul, ngambika sida bisi enggau Iya, sereta bisi diasuh Iya bejalai nusui Berita Manah, lalu bisi kuasa muru antu. Nya alai Iya milih dua belas iku sida: Simon (ke digelar Iya Peter), James anak Sebedi enggau menyadi iya John, (ke digelar Iya Boanerges, reti nya “Anak Guntur”), Andrew, Philip, Bartolomew, Matthew, Thomas, James anak Alpius, Tadeus, Simon ke digelar bujang berani, enggau Judas Iskariot, ke nyual Jesus. Udah nya Iya pulai ke rumah. Bala orang mayuh lalu begelumu baru, datai ke Jesus enggau sida murid Iya nyau enda ulih makai. Lebuh sida Jesus sebilik ninga nya, sida lalu datai deka nagang Iya, laban orang bisi udah bejaku, “Iya nyau udah gila!” Lalu ku bala pengajar Adat ke datai ari Jerusalem bejaku, “Iya bisi Belsebup dalam Iya, lalu Iya muru antu ngena kuasa raja antu.” Iya lalu ngangauka sida ngagai Iya, lalu bejaku ngagai sida ngena jaku sempama: “Baka ni ku Sitan ulih muru Sitan? Enti perintah bepechah-belah ngelaban diri empu, perintah nya enda tan. Lalu enti ruang bilik bepechah-belah ngelaban diri empu, ruang bilik nya enda tan. Lalu enti Sitan bepechah-belah ngelaban diri empu, iya enda tan, lalu perintah iya deka abis. “Tang nadai orang ulih tama ngagai rumah orang ke kering, lalu ngerampas reta tengkira iya, enti iya enda dulu nanchang orang ke kering nya. Udah nya baru iya ulih ngerampas utai ari rumah orang nya. “Enggau bendar Aku madah ngagai kita, semua mensia deka diampun ari dosa sida enggau ari jaku busung sida, tang barang sapa bejaku busung ngelaban Roh Kudus, enda diampun, laban iya ngereja dosa ti mengkang belama iya.” ( Jesus nyebut nya laban sida udah nyebut, “Iya bisi roh ti jai.”) Indai enggau sida menyadi lelaki Jesus datai. Sida bediri di luar, lalu ngasuh orang madahka Iya. Mayuh amat orang duduk ngelingi Iya, lalu ku sida bejaku ngagai Iya, “Indai enggau sida menyadi lelaki Nuan bisi di luar, ngiga Nuan.” Jesus lalu nyaut, “Sapa indai Aku? Sapa menyadi Aku?” Iya lalu merening ngagai orang ke duduk ngelingi Iya, lalu bejaku, “Tu meh indai Aku enggau menyadi Aku! Barang sapa ngereja peneka Allah Taala, nya meh menyadi lelaki, menyadi indu, enggau indai Aku.” Jesus lalu belabuh ngajar baru ba tebing Danau Galili. Mayuh amat orang begempuru ngelingi iya. Nya alai Iya nepan sebuah perau ti lagung-lagung ba danau nya, lalu nudukka Diri dia, lalu semua orang mayuh bediri ba tebing. Iya lalu belabuh ngajar sida mayuh macham utai ngena jaku sempama. Ku Iya: “Dinga kita! Siku penabur benih mansang naburka benih. Lebuh iya naburka benih nya, sekeda leka benih nya labuh ba jalai; burung datai lalu makai leka benih nya. Sekeda leka benih nya labuh ba tanah ti bebatu, ti nadai mayuh tanah. Leka benih nya lalu matuk tekala nya, laban tanah dia mabu, lalu lebuh mata panas nyau niki, utai nya layu lalu mati, laban iya nadai urat. Sekeda leka benih ti bukai labuh ba madang duri. Duri nya tumbuh lalu ngalahka benih ti tumbuh nya, lalu sida enda ulih bebuah. Lalu benih ti bukai labuh ba tanah ti ami, tumbuh lalu mansang besai lalu bebuah lebat, mansutka tiga puluh kali lipat, enam puluh kali lipat, enggau seratus kali lipat.” Lalu ku Jesus bejaku, “Awakka orang ke bisi pending, ninga.” Lebuh Jesus nyau keDiri, sida ke dua belas enggau orang bukai ke enggau sida lalu nanya ngagai Iya pasal jaku sempama nya. Lalu ku Iya bejaku ngagai sida, “Kita udah diberi misteri pasal Perintah Allah Taala, tang ke orang ti di luar, semua utai diberi ngagai sida ngena jaku sempama, ngambika sida merening tang enda meda, mending tang enda mereti, laban enti sida mereti, sida deka nguing ngagai Allah Taala, lalu Iya deka ngampun sida.” Lalu ku Iya bejaku ngagai sida, “Kati kita enda meretika sempama tu? Enti pia, baka ni ku kita ulih meretika semua sempama? Orang ke penabur benih nya naburka jaku Allah Taala. Benih ti labuh ba jalai nya orang ke ninga jaku nya. Lebuh sida ninga jaku nya, Sitan datai tekala nya lalu ngerampas jaku nya ari sida. Benih ti labuh ba tanah ti bebatu nya orang ke gaga ati ninga lalu nerima jaku nya. Tang sida nadai urat, lalu tan enda lama. Lebuh penusah tauka pemerinsa datai ketegal jaku nya, sida lalu tekala nya mungkir. Benih ti labuh ba madang duri nya orang ke ninga jaku nya, tang pengangkun sida ke dunya, enggau pengerindu sida ke pengaya, enggau pengingin sida ke utai bukai, tama lalu ngalahka jaku nya, lalu jaku nya enda bebuah. Tang benih ti labuh ba tanah ti manah nya orang ke ninga jaku nya, nerima iya lalu bebuah tiga puluh, enam puluh, enggau seratus kali lipat.” Lalu ku Iya bejaku ngagai sida, “Kati lampu ti ditungkun, dirungkup ngena bisin, tauka diengkah di baruh katil, tauka diengkah ba penuduk lampu? Laban nadai utai ti dilalai, enda dikebakka, lalu nadai utai ti resia, enda ditemu. Awakka orang ke bisi pending, ninga.” Lalu ku Iya bejaku ngagai sida, “Peratika utai ti didinga kita! Takar ti dikena kita, deka dikena nakar utai ke kita, lalu utai ti lebih agi ari nya deka diberi ngagai kita. Laban orang ke bisi utai deka diberi mayuh agi, lalu orang ke nadai utai, indah utai ti mimit ti dikemisi sida deh deka diambi ari sida.” Ku Iya mega bejaku, “Perintah Allah Taala nya baka orang siku ke naburka benih ba tanah. Malam hari iya tinduk, lalu lebuh siang hari iya angkat, tang iya enda nemu baka ni ku utai nya matuk lalu tumbuh. Tanah nya ti ngeluarka asil, terubah, batang pegari, udah nya utai nya murai, lalu udah nya tangkai pegari. Tang lebuh utai nya nyau mansau, orang lalu tekala nya ngerat batang iya ngena sabit, laban nya endang maya ngetau. Jesus mega nyebut, “Baka ni ku kitai mandingka Perintah Allah Taala? Tauka sempama ni ti deka dikena kitai madahka pasal Perintah nya? Perintah Allah Taala nya baka igi mustard, leka ti pemadu mit di dunya tu. Tang lebuh iya udah ditanam, iya tumbuh lalu nyadi utai ti besai agi ari semua utai bukai ti ditanam. Iya mansutka dan ti besai, datai ke burung nyau ulih ngaga tansang di baruh iya.” Jesus ngena mayuh jaku sempama ti baka nya kena Iya madahka pesan ngagai orang mayuh, naka ti ulih didinga sida. Iya enda bejaku ngagai sida enti enda ngena jaku sempama, tang lebuh Iya kediri enggau sida murid Iya, Iya nerangka semua utai ngagai sida. Lemai nya Iya bejaku ngagai sida murid Iya, “Aram kitai ngelayang ke seberai.” Sida lalu ninggalka orang mayuh, mai Iya enggau sida dalam perau. Perau bukai mega mupuk enggau Iya. Kabut besai nyadi, lalu gelumbang mangka ngagai perau sida datai ke perau nya nyau deka karam. Iya tinduk di kemudi, gali ba panggal. Sida ngerak Iya, lalu bejaku, “Pengajar, kati Nuan enda ibuhka kitai nyau deka mati?” Jesus dani lalu ngerara ribut, lalu bejaku ngagai gelumbang, “Teduh! Diau jenuh!” Ribut lalu teduh, lalu ai nadai agi beumbak. Ku Iya bejaku ngagai sida, “Nama kebuah kita takut? Kati kita mengkang enda arap?” Lalu sida balat takut, sereta belabuh bejaku enggau pangan diri, “Sapa orang tu datai ke ribut enggau gelumbang ngasika Iya?” Sida lalu datai di seberai Danau Galili, di menua Gerasa. Lebuh Jesus angkat ari perau lalu niki ke tebing, siku orang ke dirasuk antu lalu tekala nya pansut ari pendam lalu mansang ngagai Iya. Orang nya diau ba sebelah pendam, lalu nadai orang ulih masung iya; ngena rantai pen enda meh ulih, laban iya suah udah ditanchang ngena rantai lalu dikunchi, tang iya mutuska rantai lalu mechahka kunchi nya, lalu nadai orang ulih merekuhka iya. Siang malam iya bejalai segau-segau ba sebelah pendam, enggau ba sebelah bukit, rauh-rauh sereta ngurik diri ngena batu. Lebuh iya tepedaka Jesus ari jauh, iya belanda lalu meremi di mua Jesus, lalu manjung enggau pengabis penginggar nyawa iya. Ku iya, “Nama utai ti deka dikereja Nuan ba aku, Jesus, Anak Allah Taala ti Pemadu Tinggi? Dalam nama Allah Taala, anang merinsaka aku!” Iya nyebut nya laban Jesus udah bejaku ngagai iya, “Pansut nuan ari orang tu, nuan roh ti jai!” Jesus lalu nanya iya, “Sapa nama nuan?” Iya lalu nyaut, “Nama aku Bala, laban kami mayuh!” Iya lalu bebendar enda nyagi Jesus muru sida ari menua nya. Nyadi ba tisi munggu semak nya bisi raban babi, benung nyungkur. Roh ti jai nya lalu bejaku ngagai Jesus, “Kirumka kami ngagai raban babi nya; awakka kami tama ngagai sida.” Jesus lalu ngemendarka nya. Roh ti jai nya lalu pansut ari orang nya, lalu tama ngagai babi. Raban babi nya lalu belanda nurun tingkah ngagai danau, lalu lemas. Pemayuh babi nya kira 2,000 iku. Orang ke ngibun raban babi nya lalu rari, lalu madahka berita nya di nengeri enggau di menua pesisir. Orang mayuh lalu datai, keran deka meda utai ti udah nyadi. Sida datai ngagai Jesus lalu meda orang ke udah dirasuk antu nya duduk dia, udah begari, lalu udah suman. Iya nya meh orang ke udah dirasuk antu ke benama ‘Bala’ lalu sida takut. Orang ke udah meda utai nya nyadi ba orang ke dirasuk antu, enggau utai ti udah nyadi ba raban babi, lalu madah ngagai sida. Sida lalu minta Jesus mupuk ari menua sida. Lebuh Jesus benung nepan perau, orang ke udah dirasuk antu nya lalu minta Jesus mai iya. Tang Jesus enggai mai iya, lalu bejaku ngagai iya, “Pulai ke rumah ngagai bala pangan nuan, lalu padahka ngagai sida pemayuh utai ti udah dikereja Tuhan ke nuan, enggau pengasih Iya ke nuan.” Iya lalu mupuk, lalu belabuh madah ngagai orang dalam Sepuluh Buah Nengeri, pemayuh utai ti udah dikereja Jesus ke iya. Semua orang balat alit ati. Lebuh Jesus udah pulai baru ke seberai ngena perau, mayuh amat orang begelumu ngelingi Iya ba tebing danau nya. Siku tuai balai gempuru, ke benama Jairus, datai. Lebuh iya meda Jesus, iya lalu nyungkurka diri di kaki Jesus, minta kasih ngagai Iya, ku iya, “Anak indu aku nyau ka mati. Aku minta Nuan datai, lalu ngengkahka jari Nuan atas iya, ngambika iya gerai lalu idup!” Jesus lalu mupuk enggau iya. Mayuh amat orang nitih sereta bekelingika Iya. Nyadi dia bisi siku indu ke udah sakit begetah dua belas taun. Iya udah berubat ngagai mayuh bengkah lutur. Tang sida enda ulih ngeraika iya. Semua duit iya nyau abis kena iya berubat, tang iya nadai belinsur gerai, tang majak balat-sebalat sakit. Iya udah ninga pasal Jesus. Iya lalu datai ari belakang Jesus dalam tekang bala mayuh, lalu negu baju Jesus, laban ku iya bejaku dalam ati diri, “Enti aku negu baju Iya, aku deka gerai.” Iya lalu tekala nya badu agi begetah, lalu iya ngasaika tubuh diri udah digeraika ari penyakit nya. Jesus lalu tekala nya nemu kuasa bisi udah pansut ari Iya. Iya lalu nguing ngagai tekang bala mayuh lalu bejaku, “Sapa negu baju Aku?” Sida murid Iya lalu bejaku ngagai Iya, “Peda Nuan pemayuh orang besedul ngelingi Nuan, lalu agi ga Nuan nanya, “Sapa negu Aku?” Jesus majak gining-gining ngiga orang ke udah negu Iya. Tang lebuh indu nya nemu utai bisi udah nyadi ba iya, iya datai, getar-getar takut, besugang di kaki Jesus lalu madah ngagai Iya semua utai ti udah nyadi. Jesus lalu bejaku ngagai iya, “Anak, pengarap nuan udah ngeraika nuan. Mupuk meh nuan enggau selamat. Nuan udah gerai ari penyakit nuan.” Lebuh Jesus agi benung bejaku, sekeda seruan datai ari rumah Jairus, lalu madah ngagai Jairus, “Anak nuan udah mati. Anang agi ngiruh Pengajar.” Tang Jesus enda ibuhka utai ti disebut sida, lalu ku Iya bejaku ngagai Jairus, “Anang takut. Arap aja.” Iya lalu enda nyagi orang nitihka Iya, kelimpah ari Peter seduai James enggau menyadi James ke benama John. Lebuh sida datai ba rumah Jairus, Jesus meda orang begau, sereta ninga orang nyau bekeduie sereta rauh-rauh nyabak. Lebuh Iya udah tama, Iya lalu bejaku ngagai sida, “Nama kebuah kita begau lalu nyabak baka tu? Anak mit tu ukai mati, tang tinduk!” Sida lalu ketawaka Iya. Iya lalu muru semua sida pansut. Iya mai apai enggau indai anak mit nya, enggau sida ke enggau Iya, lalu tama ngagai endur alai anak mit nya. Iya megai jari anak mit nya, lalu bejaku ngagai iya, “Talita, koum,” reti nya, “Endu, angkat nuan!” Anak mit nya lalu angkat tekala nya, lalu belabuh bejalai, (umur iya dua belas taun). Sida balat amat alit ati. Jesus lalu berat-rat nangkan sida enggau jaku, enda nyagi sida madahka utai nya ngagai orang. Iya lalu ngasuh sida meri anak mit nya utai diempa. Jesus angkat ari endur nya lalu pulai baru ngagai menua Iya Empu, lalu sida murid Iya nitihka Iya. Lebuh hari Sabat, Iya belabuh ngajar dalam balai gempuru, lalu mayuh orang alit ati ninga Iya. Ku sida, “Dini alai orang tu bulih semua utai tu? Nama penemu-dalam tu ti udah diberi ngagai Iya? Nama kereja ajih ti benung dikereja Iya tu? Ukai enda Iya tu tukang kayu, anak Maria, menyadi James, Joses, Judas, enggau Simon? Ukai enda sida menyadi indu Iya bisi ditu enggau kitai?” Sida lalu nulak Iya. Lalu ku Jesus bejaku ngagai sida, “Nabi endang dibasa orang, kelimpah ari di menua iya empu, enggau ba bala kaban belayan iya empu, enggau dalam rumah iya empu.” Lalu Iya enda ulih ngereja kereja ajih dia, kelimpah ari ngengkahka jari atas dua tiga iku orang ke sakit, lalu ngeraika sida. Lalu Iya balat alit ati ke penadai pengarap sida. Udah nya Iya bejalai ngagai genturung pendiau, ngajar orang. Iya lalu ngangauka sida ke dua belas iku ngagai Iya, lalu ngasuh sida bejalai dua iku sepasang, lalu meri sida kuasa atas roh ti jai. Iya enda nyagi sida mai utai lebuh sida bejalai, semina tungkat aja: enda mai roti, kandi, duit dalam belulang sida, tang semina ngena selipar, lalu enda tau mai baju kena besilih. Ku Iya bejaku ngagai sida, “Lebuh kita tama ngagai rumah orang, diau dia nyentuk ngagai maya kita mupuk ari endur nya. Enti orang dia enggai nerima kita lalu enggai mendingka kita, tesai abus ari kaki kita lebuh kita mupuk ari endur nya, nyadika saksi kena ngelaban sida.” Sida mupuk, lalu madahka semua orang enda tau enda nesal ati ke dosa sida. Lalu sida muru mayuh antu, lalu nata mayuh orang ke sakit ngena minyak, lalu ngeraika sida. Raja Herod bisi ninga pasal nya, laban berita pasal Jesus udah ditemu orang mayuh. Sekeda orang nyebut, “John Pemaptisa udah diangkatka ari mati. Nya kebuah kuasa nya bekereja dalam Iya.” Tang ku sida ti bukai, “Iya nya Elijah.” Lalu ku sekeda sida ti bukai, “Iya nya nabi, baka siku ari sida nabi ke dulu kelia.” Tang lebuh Herod ninga nya, iya lalu bejaku, “John Pemaptisa, ti udah dipumpung aku pala, udah diangkatka ari mati.” Laban Herod udah ngasuh orang nangkap John, lalu nanchang iya dalam rumah jil, ketegal Herodias, bini menyadi iya Philip, laban Herod udah ngambi Herodias nyadika bini iya empu. Laban John udah bejaku ngagai Herod, “Nuan enda tau ngambi bini menyadi nuan!” Diatu Herodias bedendam ngagai John, lalu keran deka munuh iya, tang enda ulih laban Herod takutka John, laban iya nemu John endang orang ke lurus sereta kudus. Lebuh iya mendingka John, ati iya beba, tang taja pia iya rindu mendingka John. Tang siti peluang datai lebuh Herod, kena hari pengada iya, meri pengerami makai besai ke orang ke orang ke gawa dalam istana, bala pemesai enggau bala tuai bansa di menua Galili. Lebuh anak dara Herodias tama lalu betanda, Herod enggau bala pengabang rindu meda iya. Raja lalu bejaku ngagai indu nya, “Pinta ari aku sebarang utai ti dikedekaka nuan, lalu aku deka meri utai nya ngagai nuan.” Herod lalu besemaya ngena jaku sumpah ngagai indu nya, “Aku deka meri ngagai nuan sebarang utai ti dipinta nuan. Indah setengah ari menua ti dipegai aku deh deka aku beri ngagai nuan!” Indu nya pansut, lalu bejaku enggau indai iya, “Nama utai ti patut dipinta aku?” Indai iya lalu nyaut, “Pala John Pemaptisa.” Indu nya lalu tekala nya beguai-guai pulai baru ngagai raja, lalu bejaku, “Aku minta nuan meri ngagai aku diatu pala John Pemaptisa ba atas pinggai!” Raja lalu balat tusah ati; tang laban iya udah besumpah di mua bala pengabang, iya enggai nulak peminta indu nya. Iya lalu tekala nya ngangauka siku jejaga, lalu ngasuh iya ngambi pala John. Jejaga nya mupuk lalu mumpung pala John dalam rumah jil, mai pala John ngena pinggai, lalu meri pala nya ngagai indu nya. Indu nya lalu meri pala nya ngagai indai iya. Lebuh sida murid John ninga pasal nya, sida datai lalu ngambi bangkai John, lalu nguburka iya. Sida rasul pulai lalu begelumu ngelingi Jesus, lalu madah ngagai Iya semua utai ti udah dikereja enggau diajar sida. Iya lalu bejaku ngagai sida, “Aram kitai mupuk ngagai endur ti sunyi, kediri kitai aja, lalu belelak dia enda lama.” Laban mayuh amat orang datai pulai, datai ke Jesus enggau bala murid Iya nyau nadai peluang alai makai. Sida lalu mupuk, ngena sebuah perau ngagai endur ti sunyi, kediri sida aja. Tang mayuh orang meda sida bekejang, lalu ngelala sida. Nya alai sida berumban-rumban datai ari semua nengeri, lalu datai ba endur nya dulu agi ari sida. Lebuh Jesus niki ke tebing, Iya lalu tepedaka mayuh amat orang, lalu Iya sinu ati ke sida, laban sida baka bedus ti nadai orang ngibun. Iya lalu belabuh ngajar sida mayuh macham utai. Lebuh hari nyau udah lemai, sida murid Iya datai ngagai Iya, lalu bejaku, “Menua tu nadai mensia, lalu hari pen nyau jauh udah lemai. Asuh sida mupuk ngambika sida ulih bejalai ngagai umai enggau genturung pendiau ti semak ditu, lalu meli pemakai ke diri empu.” Tang ku Jesus nyaut sida, “Kita empu meri sida utai diempa.” Sida lalu nanya, “Kati Nuan ngasuh kami mupuk lalu meli roti rega dua ratus singkap duit pirak ke diempa sida?” Iya lalu nanya sida, “Berapa iti tuku roti dikemisi kita? Uji abas dulu.” Lebuh sida udah nemu pemayuh roti, sida lalu madah ngagai Iya, “Lima iti tuku roti, enggau dua iku ikan.” Jesus lalu bejaku ngagai sida murid Iya ngasuh semua orang mayuh duduk beraban-raban ba rumput. Orang mayuh lalu duduk beraban-raban, seratus enggau ngelima puluh iku dalam siti-siti raban. Iya lalu ngambi lima iti tuku roti, enggau dua iku ikan nya, engkadah ke langit, meri terima kasih lalu mechahka roti nya, lalu nyuaka roti nya ngagai sida murid Iya, ngambika disadung ngagai orang mayuh. Iya mega magi ikan ti dua iku nya ngagai semua sida. Semua sida bela makai lalu kenyang magang. Sida murid ngumpul dua belas bakul penuh repik roti enggau ikan nya. Pemayuh orang ke makai roti nya lima ribu iku. Jesus lalu kemaya nya ngasuh sida murid Iya nepan sebuah perau, lalu mupuk dulu ari Iya ngagai Betsaida, di seberai danau nya, benung Iya ke ngasuh orang mayuh pulai. Lebuh Iya udah meri selamat tinggal ngagai orang mayuh, Iya lalu niki ngagai bukit sigi, deka besampi. Lebuh hari nyau lemai, perau ti dikena sida murid Iya benung ba tengah danau, lalu Jesus keDiri ba darat. Iya meda sida bebendar amat bedayung nanjak ribut. Kira entara pukul tiga enggau pukul enam pagi, Iya bejalai ba atas ai mansang ngagai sida. Iya baru deka mansa sida, lalu lebuh sida meda Iya bejalai ba atas ai, sida ngumbai Iya antu, lalu sida nyerauh, laban semua sida bela meda Iya lalu takut. Tang Iya tekala nya bejaku ngagai sida, “Anang takut! Aku tu. Anang takut!” Iya lalu nepan ngagai perau sida. Ribut lalu teduh. Semua sida lalu balat alit ati, laban sida enda meretika pasal tuku roti, laban ati sida kieh. Lebuh sida udah ngelayang ke seberai, sida lalu sangkai di Genesaret, lalu nanchangka perau sida. Lebuh sida angkat ari perau, orang mayuh lalu tekala nya ngelala Jesus. Sida lalu berumban nesau orang mayuh di serata menua nya, lalu bebaika orang ke sakit ngena peninduk sida ngagai sebarang endur alai sida ninga Jesus bisi. Lalu di sebarang endur ti digagai Jesus, nemuka genturung pendiau, nengeri, tauka di umai, sida ngalika orang ke sakit ba sebelah pasar, lalu minta Iya nejuka sida ke sakit negu puting serayung Iya, lalu semua orang ke negu serayung Iya gerai magang. Lebuh orang Parisi enggau sekeda pengajar Adat ke datai ari Jerusalem begelumu ngelingi Iya, sida meda sekeda murid Jesus makai ngena jari ti enda tuchi, reti nya, enda dibasu. (Laban orang Parisi, enggau semua orang Judah, enda makai enti sida apin masu jari sida nitihka ajar aki ini sida; lalu sida enda makai utai ti udah dibeli ari pasar, enti utai nya apin dibasu. Lalu sida mayuh adat asal ti bukai ti dititihka sida, baka bebasuka mangkuk, periuk enggau pekekas bukai ti digaga ari temaga. ) Nya alai orang Parisi enggau sida pengajar Adat lalu nanya Iya, “Nama kebuah murid Nuan enda nitihka adat sida ke tuai, tang makai ngena jari ti enda tuchi?” Jesus lalu nyaut sida, “Betul jaku nabi Isaiah lebuh iya benabika pasal kita ke pura-pura ngapa tu, munyi ti udah ditulis: ‘Orang tu ngemesaika Aku ngena mulut sida, tang ati sida jauh ari Aku. Sida ngelebuka diri nyembah Aku, laban sida meri ajar mensia lalu ngumbai nya adat Aku.’ Kita ngelengkaka pesan Allah Taala, lalu bepegai ba ajar mensia.” Lalu ku Iya bejaku ngagai sida, “Kita pintar nulak pesan Allah Taala, ngambika kita nitihka ajar kita empu. Laban ku Moses, ‘Bebasaka apai enggau indai kita.’ Lalu iya mega nyebut, ‘Barang sapa bejai apai indai diri, enda tau enda dibunuh.’ Tang ku kita, enti orang madah ngagai apai tauka indai iya, ‘Utai ti patut diberi aku ngagai nuan, udah diberi aku ngagai Allah Taala,’ iya enda ibuh ngereja sebarang utai ke apai tauka indai iya. Nya jalai kita muai jaku Allah Taala lalu nukar iya ngena ajar kita empu, ti diberi kita ngagai orang. Lalu kita ngereja mayuh utai bukai ti baka nya.” Iya lalu ngangauka orang mayuh ngagai Iya baru, lalu bejaku ngagai sida, “Pendingka Aku, semua kita, lalu mereti: Nadai utai ti tama ngagai mensia tau ngasuh iya enda tuchi. Utai ti ngasuh mensia enda tuchi nya utai ti pansut ari mensia.” Awakka orang ke bisi pending, ninga! Lebuh Iya ninggalka orang mayuh, lalu tama ngagai rumah, sida murid Iya lalu nanya Iya pasal jaku sempama nya. Ku Iya bejaku ngagai sida, “Kati kita lalu enda mereti? Kati kita enda nemu, utai ti tama ari luar ngagai mensia, enda ulih ngasuh iya enda tuchi? Laban utai nya ukai tama ngagai ati, tang tama ngagai perut, lalu udah nya pansut ari tubuh.” (Lebuh Iya nyebut nya, Iya madahka semua pemakai tau diempa magang.) Lalu ku Iya, “Utai ti pansut ari mensia, nya utai ti ngasuh iya enda tuchi. Laban ari dalam mensia, ari ati mensia pansut runding ti jai: bambai, ngenchuri, munuh orang, butang, amu, ulah ti jai, nipu orang, ulah ti kamah, kepapas, bejakuka orang, sumbung, enggau pemeli. Semua utai ti jai nya pansut ari ati mensia; nya utai ti ngasuh iya enda tuchi.” Jesus angkat ari endur nya, lalu mupuk ngagai menua Tire. Iya lalu tama ngagai sebuah rumah, lalu enggai nejuka orang nemu Iya bisi dia. Tang Iya enda ulih belalai ari sidai. Siku indu, ke bisi anak indu ke dirasuk antu, tekala nya ninga pasal Jesus. Iya lalu datai lalu nyungkurka diri di kaki Jesus. Nyadi indu nya orang bansa Gerika, asal ari menua Poenisia, di menua Siria. Lalu iya minta Jesus muru antu ari anak indu iya. Ku Jesus bejaku ngagai iya, “Awakka sida ke mit diberi makai dulu, laban kitai enda patut ngambi pemakai ari sida ke mit lalu nibarka pemakai nya ngagai ukui.” Tang ku indu nya nyaut Iya, “Sigi amat, Tuan. Indah ukui ti di baruh mija deh makai repik pemakai sida anak mit!” Lalu ku Jesus bejaku ngagai iya, “Laban nuan udah nyebut nya, nuan tau mupuk. Antu nya udah pansut ari anak indu nuan!” Indu nya lalu pulai, lalu nemu anak iya gali ba katil, lalu antu nya nadai agi ba anak iya. Udah nya Jesus mulaika Diri ari menua Tire, lalu bejalai nengah menua Sidon mansang ngagai Danau Galili, ngerenchah menua Sepuluh Buah Nengeri. Orang lalu mai ngagai Iya siku lelaki ke bengal sereta bisu; sida lalu minta Jesus ngengkahka jari Iya atas orang nya. Jesus lalu mai orang nya ke tisi, ngejang ari bala mayuh. Iya ngachukka tunjuk Iya ngagai lubang pending orang nya, ngeludah dilah iya lalu negu dilah iya nya, engkadah ke langit, meresu ngesuhka seput, lalu bejaku ngagai orang nya, “Epata,” reti nya, “Tebuka meh!” Tekala nya orang nya lalu ulih ninga, dilah iya ulih engkebut, lalu iya ulih bejaku enggau terang. Jesus lalu enda nyagi sida nusui pasal nya ngagai orang. Tang makin balat Iya enda nyagi sida, makin balat agi ga sida nusui utai nya. Sida balat amat alit ati. Ku sida, “Semua utai ti dikereja Iya manah magang! Iya ngasuh orang ke bengal ulih ninga, lalu ngasuh orang ke bisu ulih bejaku!” Lebuh maya nya, mayuh amat orang begempuru, lalu sida nadai utai diempa. Nya alai Iya ngangauka sida murid Iya, lalu bejaku ngagai sida, “Aku sinu ati ke bala orang tu, laban sida udah enggau Aku tiga hari, lalu nadai utai diempa. Enti Aku ngasuh sida pulai lapar, sida deka lepi di rantau jalai, lalu sekeda sida datai ari jauh.” Ku sida murid nyaut Iya, “Baka ni ku kitai meri bala orang tu makai di menua puang tu?” Iya lalu nanya sida, “Berapa iti tuku roti dikemisi kita?” “Tujuh,” ku sida nyaut. Iya lalu ngasuh orang mayuh duduk ba tanah. Iya ngambi tujuh iti tuku roti nya, lalu lebuh Iya udah meri terima kasih, Iya mechahka roti nya, lalu nyuaka roti nya ngagai sida murid Iya, ngambika sida nyadung utai nya ngagai orang mayuh. Sida lalu nyadung roti nya. Sida mega bisi dua tiga iku ikan ti mit. Lebuh Iya udah merekatka ikan nya, Iya mega ngasuh sida murid nyadung ikan nya. Semua sida makai, lalu kenyang magang. Sida lalu ngumpul tujuh bakul penuh teda repik pemakai nya. Orang ke makai nya kira empat ribu iku. Iya lalu ngasuh orang mayuh pulai. Iya nepan perau enggau sida murid Iya, lalu mupuk ngagai pelilih menua Dalmanuta. Orang Parisi datai lalu belabuh betalat enggau Jesus, minta Iya ngayanka tanda ari serega, kena sida nguji Iya. Iya lalu meresu ngesuhka seput, lalu bejaku, “Nama kebuah orang ke rebak diatu minta tanda? Enggau bendar Aku madah ngagai kita, nadai tanda deka diberi ngagai rebak ti diatu!” Iya lalu ninggalka sida, nepan perau nya baru, lalu ngelayang ke seberai. Nyadi sida murid enda ingat mai roti. Sida semina bisi setuku aja dibai sida dalam perau nya. Lalu Jesus nangkan sida enggau jaku, “Bejimat kita, sereta bejaga ari ragi orang Parisi, enggau ragi Herod.” Sida lalu berandauka nya enggau pangan diri, “Laban kitai nadai roti.” Jesus nemu utai ti dikerandauka sida, lalu ku Iya bejaku ngagai sida, “Nama kebuah kita berandauka pasal nadai roti? Kati kita lalu apin nemu tauka mereti? Nama kebuah ati kita kieh? Kita bisi mata, lalu kita enda meda? Kita bisi pending, lalu kita enda ninga? Kati kita enda ingat? Lebuh Aku mechahka lima iti tuku roti ke lima ribu iku orang, berapa bakul teda digumpul kita?” “Dua belas,” ku sida nyaut. “Lalu tujuh iti tuku roti ke empat ribu iku orang, berapa bakul teda digumpul kita?” “Tujuh,” ku sida nyaut. Iya lalu bejaku ngagai sida, “Lalu kita mengkang enda mereti?” Sida lalu datai di Betsaida. Sekeda orang lalu mai ngagai Iya siku orang ke buta, minta Iya negu orang nya. Iya lalu megai jari orang nya, lalu nguluka iya pansut ari nengeri nya. Lalu lebuh Iya udah ngeludah mata orang nya, lalu ngengkahka jari Iya ba orang nya, Iya lalu nanya, “Kati nuan bisi meda utai?” Orang nya engkadah, lalu bejaku, “Aku meda orang, tang sida baka kayu bejalai.” Jesus lalu ngengkahka jari Iya baru ba mata orang nya. Orang nya lalu merening enggau naka ulih, lalu mata iya pulai suman baru sereta lansik. Jesus lalu ngasuh iya pulai ke rumah, ku Iya, “Anang tama ngagai nengeri nya.” Udah nya Jesus enggau sida murid Iya mupuk ngagai mayuh bengkah genturung pendiau di Siseria Pilipi, lalu di rantau jalai Iya nanya sida murid Iya, “Sapa Aku tu ku orang?” Sida lalu nyaut Iya, “John Pemaptisa. Orang bukai ngumbai Nuan Elijah, lalu sida ti bukai ngumbai Nuan siku ari sida nabi.” Iya lalu nanya sida, “Kati ku kita? Sapa Aku tu ku kita?” Peter lalu nyaut, “Nuan tu Kristus.” Jesus lalu berat-rat enda nyagi sida madahka pasal Iya ngagai orang. Iya lalu belabuh ngajar sida murid Iya, madahka Anak Mensia enda tau enda balat diperinsa, lalu ditulak sida tuai bansa, sida tuai imam, enggau sida pengajar Adat, lalu dibunuh, lalu tiga hari udah bekau nya Iya deka angkat idup baru. Iya madahka tu enggau terang ngagai sida. Peter lalu mai Iya ke tisi, lalu belabuh ngerara Iya. Tang Jesus nguing lalu merening ngagai sida murid Iya, lalu ngerara Peter. Ku Iya, “Rari nuan ari Aku, Sitan. Laban nuan berundingka utai mensia, ukai utai Allah Taala.” Iya lalu ngangauka orang mayuh sereta enggau sida murid Iya, lalu bejaku ngagai sida, “Enti orang deka nitihka Aku, awakka sida badu agi berundingka diri empu, ngesan regang diri, lalu nitihka Aku. Laban barang sapa deka ngidupka nyawa diri, deka ngelenyauka iya, lalu barang sapa ngelenyauka nyawa diri ketegal Aku, enggau ketegal Berita Manah, deka ngidupka iya. Laban nama penguntung orang, enti iya bempu semua dunya tang ngelenyauka nyawa diri? Laban nama utai ti ulih diberi orang kena iya nyilih nyawa diri? Barang sapa malu ke Aku sereta malu ke ajar Aku di mua rebak ti jai sereta bedosa tu, Anak Mensia deka mega malu ke orang nya lebuh Iya datai dalam mulia Apai Iya sama enggau bala melikat Iya ti kudus.” Lalu ku Iya bejaku ngagai sida, “Enggau bendar Aku madah ngagai kita, sekeda orang ke bediri ditu enda mati sebedau sida meda Perintah Allah Taala datai enggau kuasa.” Enam hari udah bekau nya Jesus mai Peter, James enggau John, lalu nguluka sida niki ngagai bukit sigi ti tinggi, kediri sida aja. Sida lalu meda gamal Iya berubah, lalu gari Iya bebali beperenching burak, burak agi ari ti ulih dibasu mensia di dunya tu. Sida lalu tepedaka Elijah seduai Moses lalu pegari lalu bejaku enggau Jesus. Peter lalu bejaku ngagai Jesus, “Pengajar, manah kitai diau ditu! Awakka kami ngaga tiga buah langkau, sebuah ke Nuan, sebuah ke Moses, lalu sebuah ke Elijah.” Peter enda nemu utai ti patut disebut iya, laban sida balat takut. Siti remang lalu ngelindung sida, lalu nyawa bisi didinga bejaku ari dalam remang nya, “Tu Anak ke dikesayauka Aku. Pendingka Iya!” Sida lalu malik kiba kanan, tang sida nadai meda orang bukai, semina Jesus aja. Lebuh sida nurun ari bukit nya, Jesus lalu enda nyagi sida madah ngagai orang utai ti udah dipeda sida, nyentuk ngagai maya Anak Mensia udah angkat ari mati. Nya alai sida nadai madahka pekara nya ngagai orang, lalu betanyaka reti utai ti dikumbai pengangkat ari mati. Sida lalu nanya Iya, “Nama kebuah sida pengajar Adat madahka Elijah enda tau enda datai dulu?” Ku Iya bejaku ngagai sida, “Elijah endang amat dulu datai lalu nyendiaka semua utai. Tang nama kebuah Bup Kudus madahka Anak Mensia deka balat diperinsa, lalu dikeleseka? Tang Aku madah ngagai kita, Elijah endang udah datai, lalu sida udah ngereja utai ngagai iya nitihka peneka ati sida, munyi ti udah ditulis pasal iya.” Lebuh sida datai ba bala murid ti bukai, sida meda mayuh amat orang bekelingika sida murid nya, sereta meda bala pengajar Adat bekelikuh enggau sida. Lebuh orang mayuh meda Jesus, sida alit ati, lalu belanda ngagai Iya lalu nyambut penatai Iya. Iya lalu nanya sida murid Iya, “Nama utai ti dipetalatka kita enggau sida?” Siku orang ari bala mayuh lalu nyaut Iya, “Pengajar, aku mai anak aku ngagai Nuan, laban iya dirasuk roh bisu. Genap kali roh nya nyerang iya, roh nya ngempaska iya ke tanah, lalu nyawa iya bepupu, ngeli iya kerik-kerik, lalu tubuh iya tekering. Aku udah minta sida murid Nuan muru roh nya, tang sida enda ulih.” Jesus lalu nyaut sida, “Kita tu orang ke enda arap! Ni pengelama Aku enda tau enda begulai enggau kita? Ni pengelama Aku enda tau enda sabar enggau kita? Bai iya kitu ngagai Aku.” Sida lalu mai nembiak nya ngagai Iya. Lebuh roh nya meda Jesus, iya lalu tekala nya ngusak nembiak nya. Nembiak nya lalu rebah ke tanah lalu maringka diri, lalu nyawa iya bepupu. Jesus lalu nanya apai nembiak nya, “Ni pengelama iya udah baka tu?” Iya lalu nyaut, “Kenyau ari iya agi mit. Roh ti jai nya suah udah nikauka iya ngagai api, enggau ngagai ai, deka munuh iya. Tang enti Nuan ulih, kasihka kami, lalu tulung kami.” Jesus lalu bejaku ngagai iya, “ ‘Enti Nuan ulih!’ -- Semua utai ulih magang ke orang ke arap.” Tekala nya apai nembiak nya lalu bejaku enggau nyawa ti inggar, “Aku arap! Tulung aku ngambika pengarap aku besai agi!” Lebuh Jesus meda orang mayuh belanda mansang ngagai sida, Iya lalu ngerara roh ti jai nya, ku Iya, “Nuan roh bengal enggau bisu, Aku merintah nuan pansut ari iya, lalu anang agi tama ngagai iya!” Lebuh roh nya udah nyerauh lalu balat amat ngusak nembiak nya, iya pansut, lalu nembiak nya nyau baka ke mati. Nyau ka semua orang lalu bejaku, “Mati iya nya!” Tang Jesus megai jari nembiak nya, lalu ngangkatka iya. Nembiak nya lalu ulih bediri. Lebuh Jesus udah tama ngagai rumah, sida murid Iya lalu nanya Iya lebuh sida kediri, “Nama kebuah kami enda ulih muru roh nya?” Ku Iya bejaku ngagai sida, “Roh ti bansa nya semina ulih diburu ngena sampi. Sida lalu mupuk ari endur nya, lalu bejalai nengah menua Galili. Jesus enggai ngasuh orang nemu endur alai Iya, laban Iya benung ngajar murid Iya. Ku Iya bejaku ngagai sida, “Anak Mensia deka diserahka ngagai jari mensia, lalu sida deka munuh Iya, lalu tiga hari udah bekau nya, Iya deka angkat idup baru.” Tang sida enda meretika utai ti ku Iya, lalu sida takut nanya Iya. Udah nya sida datai di Kapernaum. Lebuh Iya udah datai di rumah, Iya lalu nanya sida, “Nama utai ti dikelikuhka kita di rantau jalai tadi?” Tang sida enda bemunyi, laban lebuh sida di rantau jalai, sida udah bekelikuhka enggau pangan diri sapa ke pemadu besai. Jesus duduk, lalu ngangauka sida dua belas, lalu bejaku ngagai sida, “Barang sapa keran deka nyadi dulu, enda tau enda nyadi dudi ari semua, lalu nyadi pemela ke semua.” Iya lalu ngambi siku anak mit, lalu ngengkahka anak mit nya ba tengah-tengah sida. Iya merap anak mit nya, lalu bejaku ngagai sida, “Barang sapa nerima siku anak mit ti baka tu dalam nama Aku, nerima Aku. Lalu barang sapa nerima Aku, ukai nerima Aku, tang nerima Iya ke ngirumka Aku.” John lalu bejaku ngagai Iya, “Pengajar, kami bisi meda orang siku muru antu dalam nama Nuan, lalu kami nguji nagang iya, laban iya ukai raban kitai.” Tang ku Jesus bejaku, “Anang nagang iya, laban nadai orang ke ngereja kereja ajih dalam nama Aku lalu udah nya bejai Aku. Barang sapa enda ngelaban kitai, setanah enggau kitai. Laban enggau bendar Aku madah ngagai kita, barang sapa meri kita ai irup ketegal kita nembiak Aku, deka nerima upah. Barang sapa ngasuh siku ari sida ke mit tu, ke arapka Aku, bedosa, manah agi enti batu kisar ti besai ditanchangka ba rekung orang nya, lalu iya dibuai ngagai tasik. Enti jari nuan mai nuan bedosa, tetak iya! Manah agi nuan tama ngagai pengidup nadai jari sepiak, ari ke bisi dua piak jari, lalu nuan dibuai ngagai neraka, ngagai api ti enda nemu padam, alai ulat ti makai sida enda nemu mati, lalu api enda nemu padam. Lalu enti kaki nuan mai nuan bedosa, tetak iya! Manah agi nuan tama ngagai pengidup nadai kaki sepiak, ari ke bisi dua piak kaki, lalu nuan dibuai ngagai neraka alai ulat ti makai sida enda nemu mati, lalu api enda nemu padam. Lalu enti mata nuan mai nuan bedosa, keruk iya! Manah agi nuan tama ngagai Perintah Allah Taala mai sigi aja leka mata, ari ke bisi dua igi leka mata, lalu nuan dibuai ngagai neraka, alai ulat ti makai sida enda nemu mati, lalu api ti makai sida enda nemu padam. Laban semua orang deka dituchi ngena api, baka piring ti dituchi ngena garam. “Garam endang manah, tang enti iya nadai agi masin, baka ni ku jalai ngaga iya masin baru? Awakka kita masin baka garam, lalu diau bebaik enggau pangan diri.” Jesus angkat ari endur nya, lalu mupuk ngagai menua Judea, enggau ngagai menua ti ngilah Sungai Jordan. Mayuh amat orang datai baru ngagai Iya, lalu endang baka selama, Iya ngajar sida. Orang Parisi datai deka nguji Iya. Ku sida nanya, “Kati laki tau muai bini?” Iya lalu nyaut sida, “Nama pesan Moses ngagai kita?” Ku sida, “Moses ngemendarka laki nulis surat sarak, lalu muai bini iya.” Tang ku Jesus bejaku ngagai sida, “Moses nulis pesan nya ke kita, laban kita kieh. Tang kenyau ari penumbuh dunya, ‘Allah Taala ngaga mensia lelaki enggau indu.’ Ketegal nya, lelaki deka ninggalka apai indai iya, lalu begulai enggau bini iya, lalu seduai iya deka nyadi setubuh.’ Nya alai, seduai iya ukai dua iku agi, tang siku. Nya alai, nadai orang tau nyeraraka utai ti udah ditampilka Allah Taala.” Lebuh sida pulai baru ke rumah, sida murid nanya Iya baru pasal pekara nya. Lalu ku Iya bejaku ngagai sida, “Barang sapa muai bini, lalu jadi enggau indu bukai, butang ngelaban bini iya, lalu enti bini muai laki, lalu jadi enggau lelaki bukai, iya butang.” Orang mai anak mit ngagai Jesus, ngambika Iya ngengkahka jari Iya atas sida. Sida murid lalu nganu orang nya. Tang lebuh Jesus meda nya, Iya pedis ati lalu bejaku ngagai sida murid Iya, “Awakka sida ke mit datai ngagai Aku. Anang nagang sida, laban Perintah Allah Taala diempu orang ke baka sida tu. Enggau bendar Aku madah ngagai kita, barang sapa enda nerima Perintah Allah Taala baka anak mit, enda ulih tama ngagai Perintah nya.” Iya lalu merap sida anak mit nya, ngengkahka jari Iya atas sida, lalu merekatka sida. Lebuh Jesus baru deka mupuk, siku lelaki belanda datai lalu besugang di mua Iya, lalu nanya, “Pengajar ti manah, nama utai ti enda tau enda dikereja aku ngambika aku bulih pengidup ti meruan belama iya?” Ku Jesus bejaku ngagai iya, “Nama kebuah nuan ngumbai Aku manah? Nadai orang ke manah. Semina Allah Taala siku aja manah. Nuan nemu pesan: ‘Anang munuh orang; Anang butang; Anang ngenchuri; Anang betenahka orang; Anang nipu orang; Bebasaka apai indai nuan.’ ” Orang nya lalu nyaut, “Pengajar, semua pesan nya udah dititihka aku magang kenyau ari aku agi biak.” Jesus merening ngagai iya, rinduka iya, lalu bejaku ngagai iya, “Siti utai apin dikereja nuan. Mupuk nuan lalu jual semua utai ti dikemisi nuan, lalu beri ngagai orang ke seranta. Nya baru nuan bisi pengaya di serega. Udah nya titihka Aku.” Lebuh lelaki nya ninga nya, mua iya lalu bebali tusah lalu mupuk ari endur nya enggau ati ti balat tusah, laban iya kaya bendar. Jesus lalu malik kiba kanan, lalu bejaku ngagai sida murid Iya, “Mar amat meh orang ke kaya tama ngagai Perintah Allah Taala!” Sida murid tusah ati ninga nya, tang ku Jesus bejaku ngagai sida, “Anak, mar amat meh tama ngagai Perintah Allah Taala! Nyamai agi jelu unta tama nengah lubang jarum ari orang ke kaya tama ngagai Perintah Allah Taala.” Sida lalu balat amat alit ati, lalu bejaku enggau pangan diri, “Enti pia, sapa ulih diselamatka?” Jesus merening ngagai sida, lalu bejaku, “Ba mensia, utai tu enda ulih, tang ba Allah Taala utai tu enda baka nya, laban ba Allah Taala semua utai ulih magang.” Peter lalu belabuh bejaku enggau Iya, “Peda Nuan, kami udah ninggalka semua utai, lalu nitihka Nuan.” Ku Jesus bejaku, “Enggau bendar Aku madah ngagai kita, nadai orang ke udah ninggalka rumah, tauka menyadi lelaki, tauka menyadi indu, tauka indai, tauka apai, tauka anak, tauka tanah, ketegal Aku, enggau ketegal Berita Manah, enda nerima seratus kali lipat mayuh agi ba maya ti diatu -- rumah, menyadi lelaki, enggau menyadi indu, indai, anak, enggau tanah, sereta kena perinsa -- lalu dalam dunya ti deka datai, bulih pengidup ti meruan belama iya. Tang mayuh orang ke dulu deka nyadi dudi, lalu orang ke dudi deka nyadi dulu.” Lebuh Jesus enggau bala murid Iya benung di rantau jalai mansang ngagai Jerusalem, Jesus bejalai dulu ari sida. Sida balat irau ati, lalu orang ke nitihka sida takut. Jesus mai sida ke dua belas iku ke tisi baru, lalu belabuh madah ngagai sida utai ti deka nyadi ba Iya. Ku Iya, “Dinga kita, kitai mansang ngagai Jerusalem, lalu Anak Mensia deka diserahka ngagai bala tuai imam, enggau ngagai bala pengajar Adat, lalu sida deka nuduhka Iya diukum bunuh. Udah nya sida deka nyerahka Iya ngagai orang bansa bukai ke deka beduan Iya, ngeludah Iya, nyipat Iya, lalu munuh Iya. Lalu tiga hari udah bekau nya, Iya deka angkat idup baru.” Udah nya James seduai John, anak Sebedi, datai ngagai Jesus, lalu bejaku, “Pengajar, kami duai bisi utai ti deka dipinta kami duai ari Nuan.” Iya lalu nanya seduai iya, “Nama utai ti dipinta seduai?” Ku seduai iya, “Awakka kami duai enggau Nuan dalam Perintah Nuan, siku duduk ari kanan lalu siku ari kiba Nuan.” Tang ku Jesus bejaku ngagai seduai iya, “Seduai enda nemu utai ti dipinta diri. Kati seduai ulih ngirup ari mangkuk ti diirup Aku, tauka dibaptisa ngena baptisa ti dikena maptisa Aku?” “Ulih,” ku seduai iya nyaut. Jesus lalu bejaku ngagai seduai iya, “Seduai deka ngirup ari mangkuk ti diirup Aku, lalu seduai deka dibaptisa ngena baptisa ti dikena maptisa Aku. Tang ukai Aku ke ngeletak sapa ke duduk muak ari kanan tauka ari kiba Aku. Penuduk nya endang disedia ke orang ke patut duduk dia.” Lebuh murid ke sepuluh iku ninga nya, sida lalu pedis ati ngagai James seduai John. Jesus lalu ngangauka sida lalu bejaku ngagai sida, “Kita nemu, orang ke merintah orang bansa bukai, nekanka pengidup orang ke dipegai sida, lalu bala tuai sida merinsaka sida. Tang iya ukai baka nya ba bala kita. Barang sapa deka nyadi besai dalam bala kita, enda tau enda nyadi kuli kita, lalu barang sapa ari bala kita deka nyadi dulu, enda tau enda nyadika ulun semua kita. Laban Anak Mensia ukai datai minta Diri dibela, tang ngambika Iya mela, lalu nyerahka nyawa Diri kena nebus orang mayuh.” Sida lalu datai di Jeriko, lalu lebuh Jesus deka mupuk ari nengeri nya enggau sida murid Iya, sama enggau orang mayuh, siku orang ke benama Bartimius anak Timius, ke buta sereta seranta, duduk ba tisi jalai. Lebuh iya ninga orang nya Jesus ari Nasaret, iya lalu belabuh ngangau enggau nyawa ti inggar, “Jesus, Anak David! Kasihka aku!” Mayuh orang balat amat ngasuh iya badu agi ragak. Tang iya ngangau inggar agi, “Anak David, kasihka aku!” Jesus ngetu lalu bejaku, “Kangauka iya kitu.” Sida lalu ngangauka iya. Ku sida bejaku ngagai iya, “Anang tusah ati! Angkat nuan. Iya ngangauka nuan.” Orang ke buta nya lalu ngesaika serayung iya, engkejuk angkat, lalu bediri di mua Jesus. Jesus lalu bejaku ngagai iya, ku Iya, “Nama utai ti diasuh nuan kereja Aku ke nuan?” Iya lalu bejaku ngagai Jesus, “Pengajar, awakka aku ulih meda baru.” Ku Jesus bejaku ngagai iya, “Mupuk nuan, pengarap nuan udah ngeraika nuan.” Tekala nya iya lalu ulih meda, lalu nitihka Jesus. Lebuh sida nyau semak Jerusalem, datai ba Betpagi enggau Betani, ba Bukit Kana, Iya ngasuh dua iku murid Iya bejalai dulu, ku Iya, “Alai seduai mupuk ngagai genturung pendiau tunga ke mua seduai. Lebuh seduai tama ngagai genturung pendiau nya, seduai deka nemu siku anak keledai ditanchang, ti nadai udah kala ditepan orang. Buka tali iya, lalu bai iya kitu. Enti orang nyebut ngagai seduai, ‘Nama kebuah seduai ngereja nya?’ sebut jaku tu, ‘Tuhan begunaka iya, lalu Iya deka mulaika jelu tu enda lama da agi.’ ” Seduai iya mupuk, lalu nemu siku anak keledai ditanchang semak pintu, ba jalai raya. Lebuh seduai iya muka tali jelu nya, sekeda orang ke bediri dia lalu bejaku ngagai seduai iya, “Nama kebuah seduai muka tali anak keledai nya?” Seduai iya lalu madahka jaku Jesus ngagai sida. Sida lalu nejuka seduai iya mai anak keledai nya. Seduai iya lalu mai anak keledai nya ngagai Jesus, lalu ngelempaika serayung seduai iya ba jelu nya. Jesus lalu nepan ba jelu nya. Mayuh orang nganchau serayung sida ba jalai raya nya. Sida ke bukai nganchau dan kayu ti dijarau sida di kebun. Orang ke bejalai di mua, enggau orang ke nitih ari belakang manjung, “Hosanna! Beberekat meh Iya ke datai dalam nama Tuhan! Beberekat meh perintah aki kitai David ti deka datai! Hosanna ke Allah Taala di serega ti pemadu tinggi!” Jesus lalu tama ngagai nengeri Jerusalem, lalu mansang ngagai Rumah Sembiang. Lebuh Iya udah bejalai meda semua utai dia, Iya lalu pansut ngagai Betani enggau sida dua belas, laban hari nyau lemai. Hari siti, lebuh sida pulai ari Betani, Iya lapar. Lebuh Iya tepedaka ari jauh sepun kayu ara ti bedaun, Iya mansang ngagai kayu nya, deka ngiga buah ba kayu nya. Lebuh Iya datai ba kayu nya, Iya nadai tetemuka buah ba kayu nya tang semina daun aja, laban nya endang ukai musin buah ara. Iya lalu bejaku ngagai kayu nya, “Awakka orang nadai agi makai buah nuan!” Sida murid Iya ninga nya. Sida lalu datai di Jerusalem. Iya tama ngagai Rumah Sembiang, lalu belabuh muru orang ke bejual-bebeli dalam Rumah Sembiang nya. Iya nungkupka mija orang ke penukar wang, enggau bangku orang ke nyual burung achang. Lalu Iya enda nyagi orang mai utai nengah Rumah Sembiang. Udah nya Iya ngajar orang mayuh. Ku Iya, “Endang udah ditulis, ‘Rumah Aku deka dikumbai rumah sembiang ke semua bansa.’ Tang kita udah ngaga iya nyadi sarang perumpak.” Lebuh sida tuai imam enggau sida pengajar Adat ninga nya, sida majak begigaka jalai munuh Iya, laban sida takutka Iya, laban semua orang mayuh bela alit ati ninga ajar Iya. Lebuh hari nyau lemai, Iya enggau sida murid Iya pansut ari nengeri nya. Tumu pagi hari siti lebuh sida mansa, sida meda kayu ara nya udah mati nyentuk ngagai urat. Peter lalu ingat, lalu bejaku ngagai Iya, “Peda nya, Pengajar! Kayu ara ti disumpah Nuan, udah mati!” Jesus lalu nyaut sida, “Arapka Allah Taala. Enggau bendar Aku madah ngagai kita, barang sapa nyebut ngagai bukit tu, ‘Awakka nuan diangkatka lalu buai diri empu ngagai tasik,’ lalu kita enda kakang ati, tang arapka utai ti disebut kita nya deka nyadi, utai nya deka dikereja ke iya. Nya alai Aku madah ngagai kita, sebarang utai ti dipinta kita ngena sampi, arapka diri udah nerima utai nya, lalu utai nya deka diberi ngagai kita. Lalu lebuh kita bediri besampi, ampun dulu orang ke alai kita pedis ati, ngambika Apai kita ti di serega mega ngampun penyalah kita. Tang enti kita enggai ngampun orang, Apai kita ti di serega pen enggai mega ngampun penyalah kita.” Sida lalu datai baru di Jerusalem. Lebuh Iya benung bejalai dalam Rumah Sembiang, sida tuai imam, sida pengajar Adat, enggau sida tuai bansa datai ngagai Iya, lalu bejaku, “Nama kuasa ti dikena Nuan ngereja utai tu? Sapa meri Nuan kuasa ngereja nya?” Jesus lalu bejaku ngagai sida, “Aku deka nanya kita siti tanya. Saut Aku, nya baru Aku deka madahka kuasa ti dikena Aku ngereja utai tu. Kati pemaptisa John datai ari serega tauka ari mensia? Saut Aku.” Sida lalu betalat enggau pangan diri, “Enti kitai nyebut, ‘Ari serega,’ Iya deka nyebut, ‘Enti pia, nama kebuah kita enda arapka John?’ Tang enti kitai nyebut, ‘Ari mensia’?” -- sida takutka orang mayuh, laban semua orang bela ngumbai John nya nabi. Nya alai sida nyaut Jesus, “Enda kami nemu.” Jesus lalu bejaku ngagai sida, “Aku pen enggai meh madah ngagai kita kuasa ti dikena Aku ngereja utai tu.” Udah nya Iya belabuh bejaku ngagai sida ngena jaku sempama: “Orang siku numbuhka kebun anggur, ngaga pagar ngelingi kebun nya, numbak lubang alai ngengkahka pitan anggur, lalu ngaga sebuah menara peninjau; udah nya iya ngasuh orang nyua kebun nya, lalu iya bejalai ngagai menua bukai. Lebuh maya ngetau, iya ngasuh siku ulun iya mansang ngagai orang ke nyua kebun nya, deka ngambi ari sida ungkup iya ari asil kebun nya. Tang sida nangkap ulun nya, malu iya, lalu muru iya pulai puang. Udah nya iya ngirumka siku agi ulun. Siku tu dipalu sida ba pala lalu dikeleseka sida. Iya lalu ngirumka siku da agi ulun, lalu siku nya dibunuh sida. Lalu baka nya mega sida ngereja ngagai mayuh ulun ti bukai. Sekeda dipalu sida, lalu sida ti bukai dibunuh sida. Iya bisi siku agi orang ke deka dikirumka iya, iya nya anak ke dikesayauka iya. Ke pengujung iya, iya ngirumka anak iya nya, ku iya, ‘Sida tentu deka bebasaka anak aku.’ Tang ku bala orang ke nyua kebun nya bejaku enggau pangan diri, ‘Tu orang ke bempu waris. Aram kitai munuh iya, ngambika pesaka nya diempu kitai.’ Nya alai sida nangkap iya, munuh iya, lalu muai iya ari kebun anggur nya. “Nama utai ti deka dikereja orang ke bempu kebun nya? Iya deka datai, lalu munuh bala orang ke nyua kebun nya, lalu nyerahka kebun nya ngagai orang bukai. Kati kita nadai udah kala macha dalam Bup Kudus? ‘Batu ti ditulak tukang rumah udah nyadi batu ti pemadu beguna. Utai tu udah dikereja Tuhan, lalu ba peda kami, utai nya manah amat!’ ” Lebuh sida nemu Iya udah nyebut jaku sempama nya ngelaban sida, sida lalu nguji nangkap Iya, tang sida takutka orang mayuh. Nya alai sida ninggalka Iya, lalu mupuk ari endur nya. Sida lalu ngasuh sekeda orang Parisi enggau sekeda nembiak Herod mansang ngagai Jesus, deka manjuk Iya ngena jaku ti disebut Iya Empu. Sida datai lalu bejaku enggau Iya, “Pengajar, kami nemu Nuan endang madahka utai ti bendar, lalu enda bedulika orang; laban Nuan enda bepilih mua mata, tang ngajar utai ti bendar pasal jalai Allah Taala nitihka pemendar. Padahka ngagai kami, kati kitai ngelaban Adat tauka enda enti kitai mayar chukai ngagai Raja Besai? Kati kitai patut mayar tauka enda?” Tang Jesus nemu sida semina pura-pura ngapa nanyaka nya, nya alai Iya lalu nyaut, “Nama kebuah kita nguji Aku? Bai kitu sesingkap duit ngagai Aku ngambika Aku meda iya.” Sida lalu mai sesingkap duit ngagai Iya. Iya lalu bejaku ngagai sida, “Gambar sapa enggau nama sapa tu?” “Enggi Raja Besai,” ku sida nyaut. Jesus lalu bejaku ngagai sida, “Utai Raja Besai, beri ngagai Raja Besai. Utai Allah Taala, beri ngagai Allah Taala.” Sida lalu balat amat alit ati ke Iya. Sekeda orang Saduki, ke ngumbai mensia nadai angkat ari mati, datai ngagai Jesus lalu nanya ngagai Iya, “Pengajar, Moses udah nulis ke kitai, ‘enti lelaki mati ninggalka bini, tang nadai anak, menyadi lelaki iya enda tau enda jadi enggau balu nya, ngambika seduai iya bisi anak ngarika menyadi iya.’ Nyadi sida menyadi nya tujuh iku. Iya ke tuai jadi enggau indu nya, lalu lebuh iya mati iya nadai ninggalka anak. Udah nya menyadi ke lumur dua jadi enggau indu nya, lalu lelaki nya mega mati nadai ninggalka anak. Baka nya mega menyadi ke lumur tiga. Nadai siku sida tujuh nya ninggalka anak. Ke penudi iya, indu nya empu mega mati. Lebuh pengangkat orang ari mati, sapa bempu bini nya? Laban semua sida tujuh iku nya bela udah ampit magang jadi enggau iya.” Ku Jesus bejaku ngagai sida, “Enda ka penemu kita salah, laban kita enda nemu Bup Kudus, tauka kuasa Allah Taala? Laban lebuh orang angkat ari mati, sida enda jadi melaki-bini tauka nikah, tang baka melikat ti di serega. Nyadi pasal orang ke mati diangkatka idup baru, kati kita nadai udah kala macha dalam Bup Moses, ba genteran ti ngenang pasal babas ti diempa api, pasal jalai Allah Taala bejaku ngagai Moses, ‘Aku tu Allah Taala Abraham, Isak, enggau Jakop’? Iya ukai Allah Taala ke orang ke mati, tang ke orang ke idup. Penemu kita amat salah.” Siku pengajar Adat datai semak lalu ninga sida bekelikuh enggau pangan diri. Lebuh iya ninga pemanah saut Jesus, iya lalu nanya Jesus, “Ni pesan ti pemadu besai?” Jesus lalu nyaut, “Pesan ti pemadu besai nya, ‘Pendingka tu, O kita orang Israel! Tuhan Allah Taala kitai endang siku aja. Kita enda tau enda rinduka Tuhan Allah Taala kita, enggau pengabis ati kita, enggau pengabis semengat kita, enggau pengabis runding kita, enggau pengabis pengering kita.’ Pesan ti lumur dua nya: ‘Rinduka pangan nuan, baka nuan ke rinduka diri empu.’ Nadai pesan bukai ti besai agi ari pesan dua bengkah nya.” Pengajar Adat nya lalu bejaku ngagai Iya, “Betul utai ti ku Nuan, Pengajar! Munyi ti ku Nuan, ‘Allah Taala endang siku aja, lalu nadai petara bukai, kelimpah ari Iya,’ lalu ‘rinduka Iya enggau pengabis ati nuan, enggau pengabis runding nuan, enggau pengabis pengering nuan,’ lalu ‘rinduka pangan diri baka nuan ke rinduka diri empu.’ Tu lebih agi beguna ari semua piring tunu enggau semua piring bukai.” Lebuh Jesus meda iya udah nyaut enggau betul, Iya lalu bejaku ngagai iya, “Nuan enda jauh ari Perintah Allah Taala.” Udah bekau nya, nadai orang agi berani nanyaka utai ngagai Iya. Lebuh Jesus benung ngajar dalam Rumah Sembiang, Iya nanya, “Baka ni ku sida pengajar Adat tau ngumbai Kristus peturun David? David empu, ulih kuasa Roh Kudus, madah: ‘Ku Tuhan bejaku ngagai Tuhan aku, “Duduk Nuan muak ari kanan Aku datai ke Aku udah ngengkahka bala munsuh Nuan di baruh kaki Nuan.” ‘David empu ngumbai Iya ‘Tuhan.’ Nya alai baka ni ku Iya tau nyadi peturun David?” Lalu bala orang mayuh gaga amat mendingka Iya. Lebuh Iya ngajar sida, Iya bejaku munyi tu, “Bejaga kita ari sida pengajar Adat, ke rindu bejalai ngena baju panjai, lalu ditabi orang ba sebelah pasar, lalu milih penuduk ti pemadu manah dalam balai gempuru, enggau penuduk ti di atas lebuh pengerami makai besai. Sida ngerampas rumah indu ke balu, lalu pura-pura ngapa ngaga diri lama besampi. Sida deka diukum berat agi.” Jesus duduk semak sarang wang Rumah Sembiang, lalu nengkilaka orang nepuka duit ke dalam sarang wang nya. Mayuh orang ke kaya nepuka mayuh duit. Siku indu ke balu sereta seranta datai, lalu nepuka dua singkap duit engkeraju, ti mimit amat rega. Jesus lalu ngangauka sida murid Iya lalu bejaku ngagai sida, “Enggau bendar Aku madah ngagai kita, indu balu ke seranta tu udah nepuka mayuh agi duit ke dalam sarang wang nya ari semua sida bukai. Laban sida ti bukai meri ari pemayuh utai ti dikemisi sida, tang indu ke seranta tu, udah meri semua utai ti dikemisi iya, semua utai ti dikena iya beridup.” Lebuh Iya pansut ari Rumah Sembiang, siku murid bejaku ngagai Iya, “Pengajar, peda Nuan pemesai batu enggau pemesai rumah nya!” Jesus lalu nanya iya, “Kati nuan bisi meda rumah ti besai nya? Sigi pen nadai meh batu nya deka mengkang betusun baka nya. Semua batu nya deka diruntuhka magang.” Lebuh Jesus duduk ba Bukit Kana, ti betiban enggau Rumah Sembiang, Peter, James, John enggau Andrew datai kediri sida aja ngagai Iya, lalu nanya Iya, “Padahka ngagai kami, kemaya utai nya deka nyadi, enggau tanda ti deka nunjukka semua utai nya deka nyadi.” Jesus lalu bejaku ngagai sida, “Bejaga kita, enggai ke orang nesatka kita. Mayuh orang deka datai ngena nama Aku, lalu bejaku, ‘Aku tu meh Iya!’ lalu sida deka nesatka mayuh orang. Lebuh kita ninga munyi perang enggau berita perang, anang takut. Utai nya enda tau enda nyadi, tang pengujung apin datai. Bansa deka beperang ngelaban bansa, lalu menua deka beperang ngelaban menua. Tanah berenyang deka nyadi ba mayuh bengkah endur. Lapar pungkang deka nyadi. Utai tu semina pun iya aja, baka indu ke radai deka beranak. “Tang kita empu enda tau enda bejaga; laban kita deka diserahka ngagai Kunsil; lalu kita dipalu dalam balai gempuru; lalu kita deka bediri di mua gabenor, enggau di mua bala raja ketegal Aku, ngambika kita besaksi ngagai sida. Lalu Berita Manah enda tau enda dulu ditusui ngagai semua bansa. Lebuh sida mai kita ngagai kot lalu nyerahka kita, anang irauka utai ti deka disebut kita. Tak sebut aja sebarang utai ti diberi ngagai kita lebuh maya nya, laban ukai kita ke bejaku, tang Roh Kudus. Menyadi deka nyerahka menyadi ngambika iya dibunuh, lalu apai deka nyerahka anak, lalu anak deka angkat ngelaban apai indai, lalu ngasuh sida dibunuh. Lalu semua orang deka begedika kita ketegal nama Aku. Tang orang ke tan datai ke ujung, deka diselamatka. “Tang lebuh kita meda ‘Utai ti Pemadu Jai’ bediri ba endur ti enda patut alai iya bediri (awakka orang ke macha meretika utai tu), orang ke di Judea enda tau enda rari ngagai bukit. Orang ke ba atas perabung enda tau nurun, tauka tama ngagai rumah ngambi utai iya. Orang ke di umai enda tau pulai lalu ngambi kelambi iya. Naka meh penusah indu ke ngandung, enggau sida indai ke nusuka anak lebuh maya nya! Besampi minta utai nya ukai nyadi lebuh musin chelap! Laban lebuh maya nya ila penusah ti amat besai deka nyadi, baka ti nadai udah kala nyadi kenyau ari penumbuh dunya nyentuk ngagai diatu, tauka jemah ila. Lalu enti Tuhan enda ngurangka penyampau hari nya, nadai mensia ulih diselamatka, tang ketegal nembiak ke udah dipilih Iya, Iya udah ngurangka penyampau hari nya. Lalu enti orang nyebut ngagai kita lebuh maya nya, ‘Peda kita! Tu Kristus!’ tauka, ‘Peda kita! Nyin Iya!’, anang arapka nya. Laban Kristus ti pelesu, enggau nabi ti pelesu deka pegari, lalu ngereja mayuh kereja ajih, enggau kereja ti nyelai kena nesatka bala nembiak ke udah dipilih Allah Taala, enti ulih. Tang kita enda tau enda bejaga! Aku udah madahka semua utai ngagai kita. “Tang lebuh maya nya ila, udah bekau penusah ti besai nya nyadi, mata hari deka piam, lalu bulan enda agi manchar, lalu bintang deka labuh ari langit, lalu kuasa ti di langit deka begetar. Udah nya baru Anak mensia deka datai dalam remang ngena kuasa enggau mulia ti besai. Udah nya Iya deka ngirumka bala melikat, lalu ngempuruka bala nembiak Iya ke udah dipilih Iya ari empat iti sukut dunya, aru dunya sepiak ngagai dunya sepiak. “Pelajarka ari kayu ara. Lebuh dan iya nyau geduk, lalu daun iya belabuh bekantuk, kita nemu musin panas nyau semak. Baka nya mega, lebuh kita meda utai tu nyadi, kita nemu Iya nyau semak, bisi ba mua pintu. Enggau bendar Aku madah ngagai kita, rebak ti diatu apin mati sebedau semua utai tu nyadi. Langit enggau dunya deka lenyau, tang leka jaku Aku enda lenyau. “Tang nadai orang nemu hari tauka jam. Melikat ke di serega enda nemu, lalu Anak Mensia pen enda mega nemu. Semina Apai aja nemu. Bejaga, besedia, laban kita enda nemu kemaya hari nya deka datai. Iya baka orang siku ke bejalai ngagai menua bukai. Iya ninggalka rumah lalu ngasuh orang gaji iya ngemataka utai iya, siku-siku bela diberi iya pengawa, lalu ngasuh orang ke nyaga mua pintu iya bejaga. Nya alai, bejaga kita, laban kita enda nemu kemaya tuan rumah nya deka datai, nemuka lebuh lemai hari, tauka ba urung tengah malam, tauka sebedau dini hari, tauka ba urung rerak tawas, enggai ke iya tetemuka kita tinduk lebuh iya ngenyit datai. Nya alai Aku madah ngagai semua kita: Bejaga.” Dua hari sebedau Gawai Paska enggau Gawai Roti Ti Enda Beragi nyadi, sida tuai imam, enggau sida pengajar Adat ngiga jalai nangkap Jesus ngena chara belalai lalu munuh Iya, laban ku sida, “Ukai lebuh maya gawai, enggai ke orang begau.” Lebuh Jesus benung makai dalam rumah Simon ke udah sakit lan di Betani, siku indu datai mai sebutul minyak wangi ti berega, mechahka butul nya, lalu nuang minyak wangi nya ba pala Jesus. Tang sekeda orang ke bisi dia pedis ati meda nya, lalu bejaku enggau pangan diri, “Nama kebuah masau minyak wangi nya? Laban minyak wangi nya tau dijual ngena rega lebih tiga ratus singkap duit pirak lalu duit nya diberi ngagai orang ke seranta!” Sida lalu nganu indu nya. Tang ku Jesus bejaku, “Anang ngachau iya! Nama kebuah kita ngiruh iya? Iya udah ngereja utai ti manah ke Aku. Laban kita deka seruran bisi orang ke seranta enggau kita, lalu kita tau ngayanka penyiru kita ke sida sebarang maya kita deka. Tang Aku enda seruran bisi enggau kita. Iya udah ngereja utai ti ulih dikereja iya. Iya udah nata tubuh Aku kena nyendiaka Aku dikubur. Enggau bendar Aku madah ngagai kita, di sebarang endur Berita Manah tu ditusui di serata dunya, utai ti udah dikereja iya deka ditusui kena ngingatka iya.” Udah nya Judas Iskariot, siku ari sida ke dua belas, mansang ngagai sida tuai imam, deka nyual Jesus ngagai sida. Lebuh sida ninga nya, sida gaga amat lalu besemaya deka meri iya duit. Nya alai Judas lalu belabuh begigaka peluang nyual Jesus. Ba hari ti keterubah ke Gawai Roti Ti Enda Beragi, lebuh maya nyayat anak domba, sida murid bejaku enggau Iya, “Dini alai Nuan ngasuh kami nyendiaka pemakai Gawai Paska ke Nuan?” Iya lalu ngasuh dua iku murid Iya. Ku Iya bejaku ngagai seduai iya, “Alai seduai mansang ngagai nengeri. Siku lelaki ke mai tempayan ai deka betemu enggau seduai. Titihka iya, lalu tama ngagai rumah ti alai iya tama, lalu sebut ngagai orang ke bempu rumah nya, ‘Pengajar nanya, Dini alai bilik temuai alai Aku makai pemakai Gawai Paska enggau murid Aku?’ Iya deka madah ngagai seduai siti bilik ti besai di sadau, ti udah dikemas sereta disikap. Sediaka pemakai Gawai Paska ke kitai dia.” Nya alai murid dua iku nya lalu mupuk ngagai nengeri nya, lalu nemu semua utai munyi ti udah dipadahka Jesus ngagai seduai iya. Seduai iya lalu nyendiaka pemakai Gawai Paska. Lebuh hari nyau lemai, Jesus lalu datai enggau sida ke dua belas. Lalu lebuh sida benung duduk makai, Jesus bejaku, “Enggau bendar Aku madah ngagai kita, siku ari bala kita deka nyual Aku, iya ke sama makai enggau Aku.” Sida murid lalu belabuh tusah ati, lalu nanya Iya, udah siku, siku, “Ukai patut aku?” Ku Iya bejaku ngagai sida, “Siku ari kita ke dua belas, iya ke nyepuhka roti ngagai pinggai nyereta Aku. Laban Anak Mensia deka mupuk munyi ti ditulis pasal Iya. Tang naka meh penusah orang ke nyual Anak Mensia! Manah agi enti iya enda ada!” Lebuh sida benung makai, Iya ngambi roti, lalu lebuh Iya udah merekat roti nya Iya lalu mechahka roti nya, meri roti nya ngagai sida murid Iya, lalu bejaku, “Empa; tu tubuh Aku.” Udah nya Iya ngambi mangkuk, lalu lebuh Iya udah meri terima kasih, Iya lalu nyuaka mangkuk nya ngagai sida, lalu semua sida bela ngirup ari mangkuk nya. Ku Iya bejaku ngagai sida, “Tu darah Aku, darah sempekat, ti dituang ke orang mayuh. Enggau bendar Aku madah ngagai kita, Aku enda agi ngirup wain tu nyentuk ngagai hari Aku ngirup iya baru dalam Perintah Allah Taala.” Lebuh sida udah belagu siti pantun, sida lalu mupuk ngagai Bukit Kana. Jesus lalu bejaku ngagai sida, “Semua kita deka ninggalka Aku, laban endang udah ditulis, ‘Aku deka munuh pengibun bedus, lalu raban bedus deka pambar.’ Tang lebuh Aku udah diangkatka idup baru, Aku deka mupuk ngagai Galili dulu ari kita.” Peter lalu bejaku ngagai Iya, “Enti sema semua sida ninggalka Nuan, aku meh enda.” Jesus lalu bejaku ngagai iya, “Enggau bendar Aku madah ngagai nuan, sehari tu, malam tu, sebedau manuk mengkukuk kedua kali, nuan udah besangkalka Aku tiga kali.” Tang Peter bejaku bebendar agi, ku iya, “Enti sema aku enda tau enda mati enggau Nuan, enda meh aku besangkalka Nuan!” Semua murid ti bukai bela bejaku munyi nya magang. Sida datai ba endur siti ti dikumbai Getsemani, lalu ku Iya bejaku ngagai sida murid Iya, “Duduk ditu. Aku deka besampi.” Iya lalu mai Peter, James enggau John, lalu belabuh tusah amat ati sereta teguran, lalu ku Iya bejaku ngagai sida, “Ati Aku balat tusah, asai ke deka mati. Tinggal ditu lalu anang tinduk.” Iya bejalai jauh mimit, nyungkurka Diri ke tanah lalu besampi minta Diri, enti ulih, enda ibuh natka pemerinsa nya. Ku Iya besampi, “Abba, Apai, ba Nuan semua utai ulih magang. Ambi mangkuk tu ari Aku, tang ukai nitihka peneka Aku, tang nitihka peneka Nuan.” Udah nya Iya pulai baru ngagai sida murid, lalu nemu sida tinduk, lalu ku Iya bejaku ngagai Peter, “Simon, kati nuan tinduk? Kati nuan enda ulih bejaga sejam? Bejaga sereta besampi, ngambika kita enda kena laban penguji. Ati amat deka, tang tubuh lemi.” Iya mupuk baru lalu besampi munyi ti dulu. Udah nya Iya pulai baru lalu nemu sida tinduk, laban sida nyau kelalu deka tinduk. Lalu sida enda nemu chara madah ngagai Iya. Lebuh Iya pulai baru ketiga kali, Iya bejaku ngagai sida, “Kati kita agi tinduk sereta belelak? Umbas meh nya! Maya udah datai. Diatu Anak Mensia deka dijual ngagai orang ke bedosa. Angkat. Aram kitai mupuk. Peda kita, orang ke nyual Aku udah datai!” Kemaya nya, lebuh Jesus agi benung bejaku, Judas, siku ari sida ke dua belas, lalu datai, mai bala orang ke betangkinka pedang enggau bebaika pemalu, ari sida tuai imam, ari sida pengajar Adat, enggau ari sida tuai bansa. Nyadi orang ke nyual Iya, udah meri sida siti tanda. Ku iya, “Orang ke disium aku, nya meh Iya. Tangkap Iya, bai Iya lalu jaga Iya.” Nya alai lebuh Judas datai, iya lalu tekala nya mansang ngagai Jesus, lalu bejaku, “Pengajar!” lalu nyium Iya. Sida megai lalu nangkap Jesus. Tang siku ari orang ke bediri semak dia nyintak pedang iya, lalu mantap ulun imam besai, mutuska pending iya. Jesus lalu bejaku ngagai sida, “Kati kita betangkinka pedang enggau bebaika pemalu mansang nangkap Aku, baka ke nangkap perumpak? Tiap hari Aku begulai enggau kita lebuh Aku ngajar dalam Rumah Sembiang, lalu kita enda nangkap Aku. Tang awakka Bup Kudus dikamatka.” Semua murid ninggalka Iya, lalu rari. Siku orang bujang, ke beserayung semina ngena kain linin, nitihka Jesus. Sida nangkap iya, tang iya rari telanjai-lanjai, ninggalka serayung iya. Sida lalu mai Jesus ngagai imam besai. Semua sida tuai imam, sida tuai bansa enggau sida pengajar Adat lalu begempuru. Peter udah nitihka Jesus ari jauh, nyentuk ngagai tengah laman imam besai, lalu iya duduk bekindu enggau sida jejaga. Nyadi sida tuai imam enggau semua raban Kunsil ngiga saksi ngelaban Jesus, ngambika Iya diukum bunuh. Tang sida nadai tetemuka saksi. Laban mayuh orang besaksi bula ngelaban Iya, tang saksi sida enda besetuju enggau saksi pangan diri. Sekeda orang bediri lalu besaksi bula ngelaban Iya. Ku sida, “Kami udah ninga Iya nyebut, ‘Aku deka ngerusak Rumah Sembiang tu ti digaga mensia, lalu dalam tiga hari Aku deka nirika sebuah ti ukai digaga mensia.’ ” Tang indah ba senentang tu deh saksi sida mengkang enda besetuju enggau saksi pangan diri. Imam besai lalu bediri di mua sida, lalu nanya Jesus, “Kati Nuan nadai saut ngagai nya? Nama utai tu ti disebut sida ngelaban Nuan?” Tang Jesus enda bemunyi, lalu enda nyaut. Imam besai lalu nanya Iya baru, “Kati Nuan tu Kristus, Anak Iya ti Beberekat?” Jesus lalu bejaku, “Aku meh nya, lalu ‘kita deka meda Anak Mensia duduk muak ari kanan Iya ti Bekuasa,’ lalu ‘datai dalam remang ari serega!’ ” Imam besai lalu nyarikka baju panjai iya empu, lalu bejaku, “Nama kebuah kitai begunaka saksi bukai? Kita udah ninga Iya bejaku busung. Nnama pemutus penemu kita?” Semua sida bela madahka Iya patut diukum bunuh. Sekeda sida lalu belabuh ngeludah Iya, mampul mata Iya lalu nampar Iya. Ku sida, “Uji Nuan benabi!” Bala jejaga mega enggau ngambi peluang, lalu malu Iya. Lebuh Peter agi benung di baruh ba tengah laman, siku kuli indu ke bekereja ke imam besai mansa. Lebuh iya meda Peter bekindu, iya merening ngagai Peter, lalu bejaku, “Nuan pen udah meh enggau Jesus orang Nasaret.” Tang Peter besangkalka nya. Ku iya, “Nadai aku nemu tauka meretika utai ti ku nuan.” Iya lalu pansut ngagai mua pintu penama. Manuk lalu mengkukuk. Lebuh indu kuli nya meda Peter, iya lalu belabuh baru madah ngagai orang ke bediri dia, “Iya tu siku ari bala sida!” Tang Peter besangkal baru. Enda lama udah nya, lebuh orang ke bediri dia bejaku ngagai Peter baru, “Nuan tetap raban sida, laban nuan tu orang Galili.” Tang Peter lalu belabuh nyumpah, ku iya, “Nadai aku nemu orang ti ku kita!” Lebuh maya nya manuk mengkukuk kedua kali. Nya baru Peter ingatka utai ti udah disebut Jesus ngagai iya, “Sebedau manuk mengkukuk kedua kali, nuan udah besangkalka Aku tiga kali.” Peter lalu nyabak. Tumu pagi hari siti, sida tuai imam lalu baum enggau bala tuai bansa, bala pengajar Adat, enggau semua raban Kunsil. Sida nanchang Jesus ngena rantai, mai Iya ari endur nya, lalu nyerahka Iya ngagai Pilate. Pilate lalu nanya Iya, “Kati Nuan tu Raja orang Judah?” Disaut Jesus, “Munyi ti ku nuan.” Sida tuai imam lalu madahka Iya udah ngereja mayuh macham penyalah. Pilate lalu nanya Iya baru, “Kati Nuan nadai saut ngagai nya? Dinga Nuan pemayuh dawa ti dibantaika sida ngelaban Nuan.” Tang Jesus nadai agi nyaut, lalu Pilate balat alit ati. Ba genap Gawai Paska Pilate endang selalu ngelepaska siku orang tutup ke sida, sebarang orang ke dipinta sida. Nyadi dalam rumah jil bisi orang siku benama Barabas, sama enggau bala orang ke udah munuh orang sereta udah angkat ngelaban perintah. Nya alai bala orang mayuh datai lalu belabuh minta Pilate ngereja utai ke sida baka ti udah dikereja iya ngelama tu. Pilate lalu nanya sida, “Kati kita ngasuh aku ngelepaska Raja orang Judah ke kita?” Laban iya nemu sida tuai imam kepapaska Jesus; nya kebuah sida nyerahka Jesus ngagai iya. Tang sida tuai imam nyungkak orang mayuh minta Pilate ngelepaska Barabas ke sida. Pilate lalu bejaku baru ngagai sida, “Enti pia, nama utai ti patut dikereja aku ngagai Iya ke dikumbai kita Raja orang Judah?” Sida lalu manjung nyaut iya, “Regang Iya!” Pilate lalu nanya sida, “Nama kebuah? Nama penyalah ti udah dikereja Iya?” Tang sida manjung inggar agi, “Regang Iya!” Nyadi laban Pilate endang deka ngenyamaika ati orang mayuh, iya lalu ngelepaska Barabas ke sida. Lebuh Jesus udah disipat, iya lalu nyerahka Jesus ngambika Iya diregang. Bala soldadu lalu mai Jesus ke dalam ngagai tengah laman istana gabenor, lalu ngangauka semua raban soldadu ti bukai. Sida lalu ngerasukka baju panjai ti ungu ba Iya. Lebuh sida udah ngaga makota ari pating kayu ti beduri, sida lalu ngengkahka makota nya ba pala Iya. Sida lalu belabuh nabi Iya, “Tabi, Raja orang Judah!” Sida malu pala Iya ngena kayu, ngeludah Iya, besugang, lalu meremi di mua Iya. Lebuh sida udah beduan Iya, sida muka baju panjai ti ungu nya ari Iya, lalu ngerasukka gari Iya Empu ba Iya. Udah nya sida mai Iya pansut, deka ngeregang Iya. Sida mejalka siku orang ke mansa, ke datai ari menua pesisir, ngesan regang Iya. Orang nya benama Simon ke asal ari menua Sairin, lalu iya nya apai Aleksander seduai Rupus. Sida lalu mai Jesus ngagai endur siti ti dikumbai Golgota, reti nya, “Endur Keruntuk” Sida lalu meri Iya wain dichampur enggau mur, tang Jesus enggai ngirup nya. Udah nya sida ngeregang Iya, lalu bedua gari Iya entara bala sida, ngena chara bechabut undi kena nentuka sapa tau bulih gari iya. Jam nyau pukul semilan pagi lebuh sida ngeregang Iya. Pelekat ti madahka penyalah Iya, nyebut: “Raja orang Judah.” Dua iku penyamun mega diregang sama enggau Iya, siku muak ari kanan, lalu siku muak ari kiba Iya. Tu ngamatka jaku ti udah disebut dalam Bup Kudus, “Iya dibunuh begulai enggau orang ke udah ngereja penyalah.” Orang ke mansa ngeleseka Iya lalu ngilikka pala sida. Ku sida, “Nuan ke deka ngerusak Rumah Sembiang, lalu nirika iya baru dalam tiga hari, selamatka Diri Empu, lalu nurun ari regang nya!” Sida tuai imam enggau sida pengajar Adat mega ngeleseka Iya di mua pangan diri. Ku sida, “Iya nyelamatka orang bukai, tang Iya enda ulih nyelamatka Diri Empu! Awakka Kristus, Raja orang Judah, nurun ari regang nya diatu, ngambika kitai meda lalu arap.” Orang ke diregang sama enggau Iya, mega ngeleseka Iya. Ba urung tengah hari semua menua petang magang, nyentuk ngagai pukul tiga ngalih hari. Ba urung pukul tiga Jesus ngangau enggau nyawa ti inggar, “Eloi, Eloi, lama sabaktani?” reti nya, “Allah Taala Aku, Allah Taala Aku, nama kebuah Nuan ninggalka Aku?” Lebuh orang ke bediri dia ninga Iya ngangau, sekeda sida lalu bejaku, “Dinga nya, Iya ngangauka Elijah!” Siku orang lalu belanda, nyepuhka bungai karang ngagai wain ti masam, ngengkahka utai nya ba puting kayu, lalu ngasuh Jesus ngirup, ku iya, “Anang guai dulu! Awakka kitai meda enti Elijah deka datai lalu ngambi Iya ari regang nya!” Jesus lalu ngangau enggau nyawa ti inggar, lalu ngapuska seput. Kain dalam Rumah Sembiang lalu charik belah dua ari atas ke baruh. Lebuh pemesai soldadu ke bediri di mua Iya, meda chara Jesus ngapuska seput, iya lalu bejaku, “Orang tu amat Anak Allah Taala!” Sida ke indu mega bisi dia, nengkila ari jauh. Bala sida nya nyengkaum Maria Magdalin, Maria indai James ti biak seduai Joses, enggau Salomi. Sida nya udah nyempulang Jesus lalu nulung Iya enggau utai ti dipeguna Iya lebuh Iya agi di menua Galili, enggau mayuh indu bukai ke udah datai sama enggau Iya ngagai Jerusalem. Lebuh hari nyau lemai, lalu laban hari nya endang hari alai nyendiaka Gawai, iya nya hari sebedau hari Sabat, Josep ke asal ari Arimatea, siku raban Kunsil, ke nganti penatai Perintah Allah Taala, mansang enggau ati ti berani ngagai Pilate, minta bangkai Jesus. Pilate lalu iran ati enti Jesus amat udah mati. Nya alai iya mesanka pemesai soldadu, lalu nanyaka enti Jesus amat lama udah mati. Lebuh Pilate nemu Jesus udah mati ari padah pemesai soldadu nya, iya lalu nyerahka bangkai Jesus ngagai Josep. Josep lalu meli kain linin, nurunka bangkai Jesus, mungkus bangkai nya ngena kain linin nya, lalu ngalika bangkai nya dalam kubur ti udah ditebuk ba batu galang. Iya lalu maringka sigi batu ti besai ngagai mua kubur nya. Nyadi Maria Magdalin enggau Maria indai Joses bisi meda endur alai bangkai Jesus digalika. Udah bekau hari Sabat, Maria Magdalin, Maria indai James, enggau Salomi lalu meli rempah, ngambika sida ulih nata bangkai Jesus. Tumu pagi hari Minggu, lebuh mata panas udah tumbuh, sida mansang ngagai kubur. Sida udah berandau enggau pangan diri, “Sapa deka maringka batu nya ke kitai ari mua kubur nya?” Lebuh sida malik, sida meda batu nya endang udah dibaringka ari mua kubur nya. Batu nya besai amat. Lebuh sida tama ngagai kubur, sida meda siku orang bujang ke ngena baju panjai ti burak, duduk muak ari kanan. Sida lalu takut. Tang ku iya bejaku ngagai sida, “Anang takut. Kita ngiga Jesus orang Nasaret, ke udah diregang. Iya udah diangkatka idup baru. Iya nadai ditu. Peda kita endur alai sida udah ngalika Iya. Tang mupuk kita, lalu padahka ngagai sida murid Iya, enggau ngagai Peter, Iya mupuk dulu ari kita ngagai Galili. Din kita deka meda Iya, munyi ti udah dipadahka Iya ngagai kita.” Nya alai sida pansut lalu rari ari kubur, laban sida balat takut sereta balat alit ati, lalu sida nadai madahka utai nya ngagai orang, laban sida takut. Tumu pagi hari Minggu lebuh Jesus udah angkat ari mati, Iya pegari terubah ngagai Maria Magdalin, ke udah alai Iya muru tujuh iku antu. Sida indu mansang ngagai Peter enggau bala pangan iya lalu nusui pasal utai ti udah dipadahka ngagai sida. Maria Magdalin mansang lalu madah ngagai orang ke udah begulai enggau Jesus, ke benung ngulit sereta nyabak. Udah nya Jesus Empu ngirumka, ngena sida murid Iya, kenyau ari timur nyentuk ke barat, pesan ti kudus sereta idup belama iya pasal pengelepas ti meruan belama iya.] Tang lebuh sida ninga Jesus udah idup baru, lalu Maria Magdalin udah meda Iya, sida enda arapka nya. Udah nya Iya pegari ngena chara bukai ngagai dua iku orang ari bala sida, lebuh seduai iya benung di rantau jalai mansang ngagai menua pesisir. Seduai iya lalu nikal, lalu madah ngagai sida ti bukai. Tang sida enda arapka seduai iya. Udah nya Iya pegari ngagai murid ke sebelas iku, lebuh sida benung makai, lalu Iya nganu sida laban sida enda arap sereta kieh, laban sida enda arapka orang ke udah meda Iya, udah bekau Iya ke angkat idup baru. Lalu ku Iya bejaku ngagai sida, “Bejalai kita ngagai serata dunya, lalu tusui Berita Manah ngagai semua mensia. Orang ke arap lalu dibaptisa, deka diselamatka, tang orang ke enda arap deka diukum. Lalu tu tanda ti deka nyempulang orang ke arap: sida deka muru antu dalam nama Aku; sida deka bejaku ngena jaku ti nyelai. Enti sida tepegaika ular, tauka teirupka rachun, utai nya enda ngemediska sida; sida deka ngengkahka jari sida ba orang ke sakit, lalu orang nya deka gerai.” Lebuh Tuhan Jesus udah bejaku ngagai sida, Iya lalu dibai niki ke serega, lalu duduk muak ari kanan Allah Taala. Sida murid bejalai lalu nusui Berita Manah di semua endur, lalu Tuhan bekereja enggau sida lalu netapka pengamat pesan Iya ngena kereja ajih ti nyempulang pesan nya. [ Tabi Teopilus: Laban mayuh orang udah nguji ngena jalai ti betusun nuliska cherita pasal utai ti udah nyadi ba bala kami, nitihka cherita ti udah ditusui ngagai kami ulih orang ke meda utai nya nyadi kenyau ari pun, lalu udah nusui pesan nya, nya alai, lebuh aku udah enggau bejimat mansik semua utai nya kenyau ari pun, aku mega berunding deka nuliska utai nya ngena chara ti betusun, ke nuan, Tuan ti dipebasaka, ngambika nuan nemu utai ti bendar pasal semua utai ti udah diajar ngagai nuan. Lebuh Herod nyadi raja di menua Judea, bisi siku imam benama Sekariah. Iya peturun Imam Abijah. Bini iya peturun Aron, lalu nama iya Elisabet. Seduai iya sama lurus di mua Allah Taala, ngasika semua pesan enggau adat Tuhan. Tang seduai iya nadai anak, laban Elisabet mandul, lalu seduai iya pen nyau tuai amat umur. Nyadi sekali, lebuh Sekariah benung bekereja nyadi imam di mua Allah Taala, lebuh raban iya bekereja dalam Rumah Sembiang sehari nya, iya kena pilih ngena chara bechabut undi, nitihka adat asal sida imam, lalu iya tama ngagai Rumah Sembiang Tuhan lalu nunu menyan. Lebuh maya menyan benung ditunu, semua orang mayuh besampi di luar. Siku melikat Tuhan lalu pegari di mua Sekariah, bediri muak ari kanan alta ti alai nunu menyan. Lebuh Sekariah meda melikat nya, iya tekenyit sereta balat amat takut. Tang ku melikat nya bejaku ngagai iya, “Anang takut, Sekariah, laban sampi nuan udah didinga Allah Taala, lalu bini nuan Elisabet deka ngadaka anak lelaki siku, lalu nuan deka meri iya nama John. Nuan deka gaga sereta lantang ati, lalu mayuh orang deka rami gaga ati lebuh iya ada, laban iya deka nyadi orang ke besai di mua Tuhan. Iya enda tau ngirup wain tauka ai ti bisa. Indah sebedau iya ada deh Iya deka dipenuhka enggau Roh Kudus. Iya deka nguingka mayuh orang Israel ngagai Tuhan Allah Taala sida. Ngena roh enggau kuasa Elijah iya deka bejalai dulu ari Tuhan, nguingka ati apai indai ngagai anak sida, enggau nguingka orang ke enda ngasi ngagai penemu-dalam orang ke lurus, nyendiaka bala nembiak Tuhan, ke udah disedia ke Tuhan.” Sekariah lalu bejaku ngagai melikat nya, “Baka ni ku aku nemu utai tu deka nyadi? Laban aku nyau tuai, lalu bini aku mega nyau tuai.” Melikat nya lalu nyaut, “Aku tu Gabriel, ke bediri di mua Allah Taala, lalu aku udah diasuh bejaku ngagai nuan, lalu mai Berita Manah tu ngagai nuan. Tang diatu laban nuan enda arapka jaku aku, ti deka dikamatka ba maya ti patut, nuan deka bisu, enda ulih bejaku nyentuk ngagai hari semua utai nya nyadi.” Lebuh utai nya benung nyadi, orang ke di luar nganti Sekariah, lalu sida iranka kebuah iya lama amat dalam Rumah Sembiang. Lebuh iya pansut, iya enda ulih bejaku ngagai sida. Nya baru sida nemu iya bisi udah meda genera dalam Rumah Sembiang. Iya majak ngaga tanda ngena jari iya, lalu mengkang enda ulih bejaku. Lebuh iya udah nembuka pengawa iya dalam Rumah Sembiang, iya pulai ke rumah. Udah bekau nya, bini iya Elisabet lalu betubuh-bisi, lalu iya enda pansut ari rumah lima bulan. Ku Elisabet bejaku, “Tu meh utai ti udah dikereja Tuhan ke aku, lebuh Iya kasihka aku, lalu muai pemalu ti udah ditatka aku di mua orang mayuh!” Dalam bulan ti keenam Elisabet betubuh-bisi, Allah Taala ngasuh melikat Gabriel datai ngagai sebuah nengeri ti dikumbai Nasaret di menua Galili, ngagai siku dara bungas ke betunang enggau lelaki siku ke benama Josep ke ari peturun David. Nama dara bungas nya Maria. Melikat nya datai ngagai iya, lalu bejaku, “Tabi ke nuan, ke dikerinduka Allah Taala! Tuhan bisi enggau nuan!” Tang Maria beba runding ninga jaku melikat nya, lalu belematika reti jaku tabi nya. Lalu ku melikat nya bejaku ngagai iya, “Anang takut, Maria, laban nuan dikerinduka Allah Taala. Lalu diatu nuan deka betubuh-bisi, lalu ngadaka anak lelaki siku, lalu nuan deka meri iya nama Jesus. Iya deka nyadi orang ke tinggi pangkat, lalu Iya deka dikumbai Anak Allah Taala ti Pemadu Tinggi, lalu Tuhan Allah Taala deka meri Iya kerusi diraja aki Iya David. Iya deka merintah peturun Jakop belama iya, lalu Perintah Iya enda nemu abis!” Maria lalu bejaku ngagai melikat nya, “Baka ni ku utai tu tau nyadi, laban aku dara bungas?” Ku melikat nya bejaku enggau iya, “Roh Kudus deka datai atas nuan, lalu kuasa Allah Taala ti Pemadu Tinggi deka ngayung nuan. Nya alai anak mit ti deka diadaka nya kudus. Iya deka dikumbai Anak Allah Taala. Lalu diatu petunggal nuan Elisabet benung betubuh-bisi taja pen iya nyau tuai. Tu keenam bulan iya betubuh-bisi, taja pen iya dikumbai mandul. Laban nadai utai enda ulih dikereja Allah Taala.” Maria lalu bejaku, “Aku tu nembiak Tuhan. Awakka utai nya nyadi ba aku nitihka jaku nuan.” Melikat nya lalu ninggalka iya. Maria angkat lalu beguai-guai mupuk ngagai sebuah nengeri di menua Judah ti bebukit, tama ngagai rumah Sekariah, lalu meri tabi basa ngagai Elisabet. Lebuh Elisabet ninga jaku tabi Maria, anak mit ti dalam kandung Elisabet lalu engkebut. Penuh laban Roh Kudus, Elisabet lalu bejaku enggau nyawa ti inggar, “Beberekat meh nuan ari semua indu bukai, lalu beberekat meh anak ke dikandungka nuan! Lalu nama kebuah utai tu nyadi ba aku, datai ke indai Tuhan aku nyau nemuai ngagai aku? Laban lebuh aku ninga jaku tabi nuan tadi, anak mit ke dalam kandung aku engkebut gaga ati. Beberekat meh iya ke arapka jaku Tuhan deka dikamatka!” Maria lalu bejaku, “Semengat aku ngemesaika Tuhan, lalu ati aku gaga ke Allah Taala ti Juruselamat aku, laban Iya udah kasihka nembiak Iya ke baruh ati. Belabuh ari diatu semua serak deka ngumbai aku beberekat laban Allah Taala ti bekuasa udah ngereja utai ti besai ke aku. Kudus meh nama Iya. Iya mandangka pengasih Iya ngagai orang ke nangika Iya, ari serak siti ngagai serak siti. Iya udah mandangka pengering Iya ngena lengan Iya lalu udah mambarka orang ke sumbung enggau semua pelan sida. Iya udah muai raja ti bekuasa ari kerusi diraja sida, lalu ngeninggika orang ke baruh ati. Iya udah ngenyangka orang ke lapar enggau utai ti manah, lalu muru sida ke kaya pulai puang. Iya udah nulung nembiak Iya Israel, kena Iya ngingatka pengasih Iya, nitihka semaya ti digaga Iya enggau aki ini kitai, ngagai Abraham enggau ngagai peturun iya belama iya.” Maria lalu diau enggau Elisabet kira tiga bulan. Udah nya iya pulai ngagai rumah iya empu. Maya pen datai alai Elisabet deka beranak. Iya lalu ngadaka anak lelaki siku. Orang ke berimbai pendiau enggau iya, enggau kaban belayan iya ninga Tuhan udah ngayanka pengasih ti besai ngagai iya, lalu sida sama rami gaga ati enggau iya. Ba hari ti kelapan sida lalu datai deka nutus anak mit nya, lalu sida deka meri iya nama Sekariah, ngangkatka nama apai iya. Tang ku indai iya bejaku, “Ukai nya! Nama iya John.” Sida lalu bejaku ngagai iya, “Nadai kaban belayan nuan bisi nama nya!” Sida lalu bejaku ngena jari enggau apai iya, nanyaka nama ti deka diberi iya ngagai nembiak nya. Sekariah lalu minta papan tulis, lalu nulis, “Nama iya John.” Semua sida lalu balat alit ati. Tekala nya mulut Sekariah tebuka, dilah iya ulih engkebut, lalu iya belabuh bejaku muji Allah Taala. Semua orang ke berimbai pendiau enggau sida bela takut magang. Lalu semua utai nya dikenang orang magang di serata menua ti bebukit di menua Judea. Semua orang ninga nya lalu belematika utai nya. Ku sida, “Namaka penyadi nembiak tu ila?” Laban kuasa Tuhan amat bisi enggau iya. Apai iya Sekariah, ke penuh laban Roh Kudus, lalu benabi. “Pujika Tuhan Allah Taala ke disembah orang Israel, laban Iya udah kasihka nembiak Iya lalu nebus sida. Iya udah nyendiaka siku Juruselamat ti bekuasa ke kitai, ari peturun nembiak Iya David, munyi ti disebut Iya dulu kelia ngena sida nabi Iya ti kudus madahka kitai deka diselamatka ari munsuh kitai, enggau ari jari semua orang ke begedika kitai. Nya meh jalai Iya udah ngayanka pengasih ti udah disemaya Iya ngagai aki ini kitai lalu udah ngingatka sempekat Iya ti kudus, semaya ti digaga Iya ngena sumpah enggau aki kitai Abraham ngambika ngelepaska kitai ari jari munsuh kitai, ngambika kitai betuaika Iya enggau nadai penakut, dalam pengudus enggau pengelurus di mua Iya sepemanjai umur kitai. Lalu nuan, anak, deka dikumbai nabi Allah Taala ti Pemadu Tinggi, laban nuan deka bejalai dulu ari Tuhan nyendiaka jalai ke Iya, meri penemu pasal pengelepas ngagai nembiak Iya lebuh dosa sida diampun. Ulih pengasih Allah Taala kitai, penampak ari serega deka manchar ngagai kitai, ngambika meri penampak ngagai orang ke diau dalam pemetang enggau dalam kelemayang pemati, lalu ngiring kaki kitai ngagai jalai pemaik.” Anak mit nya mansang besai, kering dalam tubuh enggau roh, lalu iya diau di menua puang nyentuk ngagai maya iya ngayanka diri ngagai orang Israel. Lebuh maya nya, Raja Besai Augustus meri atur ngasuh semua orang di serata dunya ngerejister nama diri. Tu keterubah iya pengawa ngitung tubuh dikereja. Pengawa tu dikereja lebuh Kurinius nyadi gabenor menua Siria. Semua orang lalu mansang ngagai nengeri sida empu, ngerejister nama diri. Josep mega bejalai ari nengeri Nasaret di menua Galili, ngagai menua Judea, ngagai nengeri David, ti dikumbai Betlehem, laban iya ari peturun David. Iya mansang ngerejister nama diri sama enggau Maria, ke betunang enggau iya, ke benung betubuh-bisi. Lebuh seduai iya di Betlehem, Maria pen nyau chukup bulan alai beranak. Iya lalu ngadaka anak tuai iya, medung anak mit nya ngena kain, lalu ngalika iya dalam dulang, laban sida nadai endur dalam rumah numpang. Di menua nya bisi bala pengibun bedus diau di padang, benung ngibun raban bedus sida lebuh malam hari. Siku melikat Tuhan lalu pegari di mua sida, lalu mulia Tuhan manchar ngelingi sida, lalu sida balat amat takut. Tang ku melikat nya bejaku ngagai sida, “Anang takut! Laban aku mai ngagai kita Berita Manah ti ngasuh ati semua mensia gaga: sehari tu, di nengeri David, Juruselamat kita udah ada, iya nya Kristus ti Tuhan! Tu tanda ti diberi ngagai kita: kita deka nemu siku anak mit dibedung ngena kain, gali dalam dulang.” Tekala nya bala melikat ari serega lalu pegari sama enggau melikat nya, belagu muji Allah Taala. Ku sida, “Muliaka Allah Taala di serega ti pemadu tinggi, enggau pemaik di dunya ke orang ke dikerinduka Iya!” Lebuh bala melikat nya udah ninggalka sida lalu pulai ke serega, sida pengibun bedus nya lalu bejaku enggau pangan diri, “Aram kitai mupuk ngagai Betlehem, ngambika kitai meda utai ti udah nyadi, ti udah dipadahka Tuhan ngagai kitai.” Nya alai sida lalu beguai-guai mupuk, lalu tetemuka Maria seduai Josep, enggau anak mit nya gali dalam dulang. Lebuh sida meda nya, sida lalu madahka utai ti udah dipadahka melikat pasal anak mit nya, lalu semua orang ke ninga nya balat alit ati ke utai ti dipadahka sida pengibun bedus. Tang Maria nyimpan semua jaku nya lalu belematika jaku nya dalam ati iya. Sida pengibun bedus lalu pulai, ngemuliaka sereta muji Allah Taala ketegal semua utai ti udah didinga enggau dipeda sida, munyi ti udah dipadahka ngagai sida. Lapan hari udah bekau nya, anak mit nya lalu ditutus. Iya lalu diberi nama Jesus, nama ti udah diberi melikat sebedau Iya dikandungka. Lebuh maya nyau datai alai Josep seduai Maria patut nuchi diri nitihka Adat Moses, seduai iya mai anak mit nya ngagai Jerusalem, deka nyerahka Iya ngagai Tuhan, (munyi ti udah ditulis dalam Adat Tuhan: “Genap iku anak tuai ti lelaki enda tau enda diserahka ngagai Tuhan.”) Lalu seduai iya ngenjuk piring nitihka pesan ti ditulis dalam Adat Tuhan, iya nya “sepasang burung achang tauka dua iku burung puna”. Nyadi di Jerusalem lebuh maya nya bisi siku lelaki benama Simeon. Simeon nya orang ke lurus sereta angkunka Allah Taala, ke nganti pengelepas orang Israel, lalu Roh Kudus bisi enggau iya. Roh Kudus udah madahka iya apin mati sebedau iya meda Kristus. Nitihka iring Roh Kudus, Simeon lalu mansang ngagai Rumah Sembiang. Lalu lebuh Maria seduai Josep mai Jesus, anak mit nya ngagai Rumah Sembiang, deka ngereja utai ke Iya nitihka atur dalam Adat, Simeon merap anak mit nya, lalu muji Allah Taala. Ku iya, “Tuhan, awakka nembiak Nuan pulai enggau selamat, nitihka jaku Nuan, laban mata aku udah meda pengelepas Nuan, ti udah disediaka Nuan di mua semua mensia, penampak ti mandangka peneka Nuan ngagai orang bansa bukai enggau ke mulia nembiak Nuan Israel.” Apai indai anak mit nya lalu balat alit ati ke semua utai ti disebut pasal Iya. Udah nya Simeon merekatka sida, lalu bejaku ngagai Maria, indai anak mit nya, “Anak mit tu udah dipilih ngerusak enggau ngelepaska mayuh orang di menua Israel. Lalu Iya deka nyadi tanda ti deka disakal orang, ngambika peragam ati mayuh orang dipandangka - lalu ati nuan deka tusah asai ti direjang ngena pedang.” Nyadi dia mega bisi siku nabi indu benama Anna anak Panuel, ari raban bansa Aser. Iya tuai amat umur. Iya semina begulai enggau laki iya tujuh taun aja, lalu iya balu nyentuk ngagai umur iya lapan puluh empat taun. Iya enda kala ninggalka Rumah Sembiang, tang nyembah Allah Taala sereta bepasa, lalu besampi siang malam. Lebuh maya nya iya datai, belabuh muji Allah Taala, lalu bejakuka pasal anak mit nya ngagai semua orang ke nganti penebus Jerusalem. Lebuh Josep seduai Maria udah tembu ngereja semua utai nitihka Adat Tuhan, sida pulai ngagai menua Galili, ngagai nengeri sida empu, iya nya Nasaret. Anak mit nya lalu mansang besai sereta kering, penuh laban penemu-dalam, sereta dikerinduka Allah Taala. Nyadi genap taun apai indai Jesus mansang ngagai Jerusalem deka ngintu Gawai Paska. Lalu lebuh Jesus umur dua belas taun, sida mupuk ngagai Gawai nya baka selama. Tembu Gawai nya, lebuh sida mulaika diri, Nembiak nya, iya nya Jesus, ninggalka Diri di Jerusalem, tang apai indai Iya enda nemu nya. Seduai iya bejalai sehari nya ngumbai Iya bejalai enggau raban sida empu. Udah nya seduai iya lalu belabuh begigaka Iya ba bala kaban belayan enggau pangan sida. Lebuh seduai iya nadai tetemuka Iya, seduai iya lalu nikal ngagai Jerusalem, ngiga Iya. Tiga hari udah bekau nya, nya baru seduai iya tetemuka Iya dalam Rumah Sembiang, duduk enggau bala pengajar, mendingka sida, sereta betanyaka utai ngagai sida. Lalu semua orang ke ninga Iya balat alit ati ninga penalam penemu enggau saut Iya. Lebuh apai indai Iya meda Iya, seduai iya balat alit ati, lalu ku indai Iya bejaku enggau Iya, “Anak, nama kebuah Nuan miaka kami duai apai nuan baka tu? Peda Nuan, kami duai apai Nuan udah irau ati begigaka Nuan.” Iya lalu nyaut, “Nama kebuah seduai begigaka Aku? Kati seduai enda nemu Aku endang enda tau enda diau dalam rumah Apai Aku?” Tang seduai iya enda meretika utai ti disebut Iya ngagai seduai. Iya lalu mupuk enggau seduai iya lalu datai di Nasaret. Iya ngasika seduai iya, lalu indai Iya nyimpan semua utai nya dalam ati diri. Jesus mansang besai sereta bepenemu-dalam, lalu dikerinduka Allah Taala enggau mensia. Dalam taun ti kelima belas Tiberius nyadi Raja Besai, lalu Pontius Pilate nyadi gabenor menua Judea, lalu Herod merintah di menua Galili, lalu menyadi Herod ke benama Philip merintah di menua Iturea enggau Trikonitis, lalu Laisanias merintah di Abilene, lebuh Anas seduai Kaiapas nyadi imam besai, jaku Allah Taala datai ngagai John anak Sekariah, di menua puang. Iya lalu bejalai nengah semua menua ti ngimbai Sungai Jordan, ngajar pasal pemaptisa nesal ati ke pengampun dosa. Munyi ti ditulis dalam bup nabi Isaiah: “Siku orang ngangau di menua puang: ‘Sediaka jalai ke Tuhan. ‘Gaga jalai Iya rurus. Genap lebak deka ditambun, genap bukit enggau munggu deka diruntuhka, jalai ti bingkuk deka digaga rurus, lalu jalai ti kasar deka digaga alus, lalu semua mensia deka meda pengelepas Allah Taala!’ ” Ku John bejaku ngagai bala orang ke datai minta diri dibaptisa ulih iya, “Kita anak ular! Sapa ngasuh kita rari ari ukum ti deka datai? Kereja utai kena nunjukka kita amat udah nesal ati, lalu anang belabuh nyebut ngagai diri empu, ‘Kami tu peturun Abraham’, laban, aku madah ngagai kita, Allah Taala ulih ngaga batu tu nyadi peturun Abraham! Indah diatu deh kapak udah sedia deka mungga urat kayu. Semua kayu ti enda mansutka buah ti manah, deka ditebang, lalu dibuai ngagai api.” Orang mayuh lalu nanya iya, “Enti pia, nama utai ti patut dikereja kami?” Ku iya nyaut sida, “Barang sapa bisi dua lambar baju, enda tau enda meri ngagai orang ke nadai, lalu orang ke bisi pemakai, enda tau enda ngereja baka nya mega.” Indah sida pengumpul chukai deh datai minta iya maptisa sida, lalu ku sida nanya iya, “Pengajar, nama utai ti patut dikereja kami?” Ku iya nyaut sida, “Anang minta chukai lebih ari ti patut.” Soldadu mega nanya iya, “Baka ni ku kami? Nama utai ti patut dikereja kami?” Ku iya bejaku ngagai sida, “Anang ngerampas duit orang, tauka besaksi bula ngelaban orang. Kita patut nemu puas ati ke gaji diri.” Orang mayuh lalu belabuh andal ati, lalu betanya dalam ati diri pasal John, ngumbai iya Kristus. John lalu nyaut semua sida, “Aku maptisa kita ngena ai, tang siku orang ke bekuasa agi ari aku deka datai. Indah muka tali selipar Iya deh aku enda tau. Iya deka maptisa kita ngena Roh Kudus enggau api. Iya bisi utai ti deka dikena Iya nyapu endur alai nungku gandum, lalu Iya deka nyimpan gandum dalam setor Iya, tang Iya deka nunu ampa dalam api ti enda nemu padam.” John meransang orang mayuh ngena mayuh macham jaku lebuh iya nusui Berita Manah ngagai sida. Tang Raja Herod ke udah dirara John ketegal Herodias, bini menyadi iya, enggau ketegal semua penyai ti udah dikereja iya, nambahka semua penyai nya lebuh iya nutup John dalam rumah jil. Lebuh semua orang udah dibaptisa magang, lalu Jesus udah mega dibaptisa lalu besampi, langit lalu tebuka, lalu Roh Kudus nurun atas Iya baka burung achang. Munyi nyawa lalu bejaku ari serega, “Nuan tu Anak ke dikesayauka Aku. Aku rinduka Nuan.” Umur Jesus tiga puluh taun lebuh Iya belabuh ngereja pengawa Iya. Nitihka penemu orang, Iya anak Josep, anak Heli, anak Matat, anak Lewi, anak Melki, anak Janai, anak Josep, anak Matatias, anak Amos, anak Nahum, anak Esli, anak Naggai, anak Mat, anak Matatias, anak Semein, anak Josik, anak Joda, anak Joanan, anak Resa, anak Serubabel, anak Sealtiel, anak Neri, anak Melki, anak Addi, anak Kosam, anak Elmadam, anak Er, anak Josua, anak Elieser, anak Jorim, anak Matat, anak Lewi, anak Simeon, anak Judah, anak Josep, anak Jonam, anak Eliakim, anak Melea, anak Menna, anak Matata, anak Natan, anak David, anak Jesi, anak Obet, anak Boas, anak Salmon, anak Nason, anak Aminadap, anak Admin, anak Arni, anak Hesron, anak Peres, anak Judah, anak Jakop, anak Isak, anak Abraham, anak Terah, anak Nahor, anak Seruk, anak Reu, anak Pelek, anak Eber, anak Selah, anak Kainan, anak Apasat, anak Sem, anak Noah, anak Lamek, anak Metuselah, anak Enok, anak Jaret, anak Mahalalel, anak Kenan, anak Enos, anak Set, anak Adam, anak Allah Taala. Jesus penuh laban Roh Kudus pulai ari Jordan, lalu Iya dibai Roh Kudus ngagai menua puang, alai Iya ke diuji Sitan empat puluh hari. Iya nadai makai utai dalam kandang empat puluh hari nya, lalu ba ujung empat puluh hari nya, Iya lapar. Sitan lalu bejaku ngagai Iya, “Enti Nuan amat Anak Allah Taala, asuh batu tu nyadi roti.” Disaut Jesus, “Endang udah ditulis, ‘Mensia enda ulih idup makai roti aja.’ ” Sitan lalu mai Iya ngagai siti endur ti tinggi, lalu mandangka ngagai Iya dalam sekejap mata semua menua di dunya lalu bejaku ngagai Iya, “Aku deka meri semua kuasa enggau semua pengaya nya ngagai Nuan, laban semua utai nya udah diberi ngagai aku, lalu aku deka meri utai nya ngagai sebarang orang ke dipilih aku. Nya alai, enti Nuan deka nyembah aku, semua utai nya deka diempu Nuan magang.” Jesus lalu nyaut iya, “Endang udah ditulis, ‘Sembah Tuhan Allah Taala nuan, lalu betuaika Iya siku aja!’ ” Sitan lalu mai Jesus ngagai Jerusalem, lalu ngengkahka Iya ba legit perabung Rumah Sembiang, lalu bejaku ngagai Iya, “Enti Nuan amat Anak Allah Taala, terejun Nuan ari tu, laban endang udah ditulis, ‘Allah Taala deka ngasuh melikat Iya nyaga Nuan.’ Lalu tu mega udah ditulis, ‘Sida deka nyambut Nuan ngena jari sida, ngambika kaki Nuan enda terempas ba batu.’ ” Ku Jesus nyaut iya, “Endang udah disebut, ‘Anang nguji Tuhan Allah Taala nuan,’ ” Lebuh Sitan udah tembu nguji Jesus ngena genap macham chara, iya ninggalka Jesus, nganti maya ti manah. Jesus, penuh laban kuasa Roh Kudus, pulai ngagai menua Galili, lalu berita pasal Iya ngelekai di serata menua nya. Iya lalu belabuh ngajar dalam balai gempuru, lalu semua orang bela muji Iya. Lebuh Iya datai di Nasaret, alai Iya ke diau kenyau ari mit, Iya mansang ngagai balai gempuru baka selama lebuh hari Sabat. Iya bediri, deka macha ari Bup Kudus. Bup nabi Isaiah lalu disuaka ngagai Iya. Iya muka bup nya, lalu tetemuka siti endur alai jaku tu ditulis, “Roh Tuhan bisi ba Aku, laban Iya udah nata Aku ngambika Aku nusui Berita Manah ngagai orang ke seranta. Iya udah ngasuh Aku madahka pengelepas ke orang ke kena tangkap enggau pengerai ke orang ke buta, pengelepas ke orang ke kena tekan lalu madahka maya udah datai alai Tuhan deka ngelepaska nembiak Iya.” Iya lalu ngulungka bup nya baru, lalu nyuaka bup nya pulai baru ngagai orang ke udah nyuaka bup nya ngagai Iya. Iya lalu duduk. Semua orang dalam balai gempuru nya bela merening ngagai Iya magang. Iya lalu madah ngagai sida, “Sehari tu ayat dalam Bup Kudus tu udah dikamatka munyi ti udah didinga kita.” Semua sida bela bejaku muji Iya, sereta balat alit ati ke pemanah jaku Iya. Ku sida, “Ukai enda Iya tu anak Josep?” Iya lalu bejaku ngagai sida, “Kita tentu deka nyebut jaku-dalam tu ngagai Aku, ‘Lutur, geraika diri empu.’ Llalu kita deka nyebut, ‘Kereja mega di menua Nuan Empu ditu utai ti udah didinga kami kereja Nuan di Kapernaum.’ ” Lalu ku Iya bejaku ngagai sida, “Enggau bendar Aku madah ngagai kita, nadai siku nabi kala diterima di menua iya empu. Tang iya ti bendar: indu ke balu endang mayuh di menua Israel lebuh rambau Elijah menya, lebuh hari enda ujan tiga taun setengah, lalu lapar pungkang nyadi di serata menua tu. Tang Elijah ukai diasuh datai ngagai sida, tang semina ngagai siku indu ke balu ke diau di Sarepat, di menua Sidon. Lalu orang ke sakit lan mega mayuh di menua Israel lebuh rambau nabi Elisa menya, tang nadai siku sida digeraika, kelimpah ari Naaman orang Siria.” Lebuh sida ninga nya, semua sida ke dalam balai gempuru nya lalu balat amat pedis ati. Sida angkat, lalu muru Iya ari nengeri nya, mai Iya ngagai tuchung bukit ti alai nengeri nya bediri, deka nikauka Iya ari pala tingkah. Tang Iya enselit pansut nengah bala sida, lalu mupuk ari endur nya. Iya lalu mupuk ngagai Kapernaum, sebuah nengeri di menua Galili, lalu ngajar orang dia lebuh hari Sabat. Sida alit ati ninga ajar Iya, laban Iya bejaku ngena kuasa. Dalam balai gempuru nya bisi siku lelaki ke dirasuk antu. Iya nyerauh inggar amat, ku iya, “Nama utai ti deka dikereja Nuan ngagai kami, Jesus orang Nasaret? Kati Nuan deka ngerusak kami? Aku ngelala Nuan. Nuan tu Iya ti Kudus ari Allah Taala!” Tang Jesus ngerara iya, “Anang bejaku; pansut nuan ari iya!” Lebuh antu nya udah ngempaska lelaki nya di mua orang mayuh, iya lalu pansut ari orang nya, tang enda ngemediska iya. Semua orang mayuh balat alit ati, lalu bejaku enggau pangan diri, “Jaku nama tu? Iya bisi kuasa merintah sereta muru roh ti jai, lalu sida pansut!” Berita pasal Jesus lalu ngelekai ngagai semua endur di menua nya. Lebuh Jesus udah ninggalka balai gempuru nya, Iya tama ngagai rumah Simon. Nyadi mentua indu Simon balat amat sakit chelap angat, lalu sida nanya Jesus pasal iya. Jesus lalu meremi ari atas indu nya, lalu muru penyakit nya. Indu nya lalu gerai. Tekala nya Iya lalu angkat, lalu mela sida. Lebuh padam mata panas, semua orang ke bisi pangan ke sakit laban mayuh macham penyakit, mai pangan sida ngagai Jesus. Iya lalu ngengkahka jari Iya atas genap iku sida, lalu ngeraika sida. Antu mega pansut ari mayuh orang, lalu nyerauh, “Nuan tu Anak Allah Taala!” Tang Iya ngerara sida, lalu enda nyagi sida bejaku, laban sida nemu Iya endang Kristus. Ba urung rerak tawas, Iya angkat lalu mupuk ngagai endur siti ti sunyi. Orang mayuh lalu begigaka Iya. Lebuh sida udah tetemuka Iya, sida lalu enda nyagi Iya ninggalka sida. Tang ku Iya bejaku ngagai sida, “Aku enda tau enda mega nusui Berita Manah pasal Perintah Allah Taala ngagai nengeri bukai, laban nya kebuah Aku dikirumka.” Nya alai Iya majak nusui Berita Manah dalam balai gempuru di serata menua Judea. Nyadi sekali, lebuh Jesus bediri ba tebing Danau Genesaret, mayuh amat orang mansang ngagai Iya, deka mendingka jaku Allah Taala. Iya tepedaka dua buah perau ba tebing danau nya, tang orang berikan udah ninggalka perau nya, benung masu jala sida. Iya lalu nepan sebuah ari perau nya ke diempu Simon, lalu ngasuh Simon ngejangka perau nya jauh mimit ari tebing. Iya duduk, lalu ngajar orang mayuh ari perau nya. Lebuh Iya udah tembu bejaku ngagai sida, Iya lalu bejaku ngagai Simon, “Kejangka perau tu ngagai ai ti dalam, lalu ulurka pukat nuan ngambika bulih ikan.” Simon lalu nyaut, “Pengajar, kami udah bebendar gawa semalam-malam tu, tang nadai bulih utai. Tang laban Nuan ngasuh, aku deka ngulurka pukat.” Lebuh sida udah ngulurka pukat sida, sida bulih mayuh amat ikan, datai ke pukat sida nyau ka charik. Nya alai sida ngepai ngagai pangan sida ke ba perau sebuah, minta sida datai nulung sida. Sida datai lalu ngisi dua buah perau nya enggau ikan, datai ke perau nya nyau deka karam. Tang lebuh Simon Peter meda nya, iya lalu nyungkurka diri ngagai patung Jesus, ku iya, “Rari ari aku, Tuhan, laban aku tu orang ke bedosa!” Laban iya enggau semua orang ke enggau iya balat alit ati ke pemayuh ikan ti ulih sida, lalu baka nya mega James seduai John, anak Sebedi, ke sama bekunsi berikan enggau Simon. Jesus lalu bejaku ngagai Simon, “Anang takut. Berengkah ari diatu nuan deka ngulihka mensia.” Lebuh sida udah narit perau dua buah nya ke tebing, sida ninggalka semua utai, lalu nitihka Iya. Nyadi sekali lebuh Jesus dalam sebuah nengeri, siku lelaki ke sakit lan datai. Lebuh iya meda Jesus, iya nyungkurka diri, minta Jesus nulung iya, “Tuhan, enti Nuan deka, Nuan ulih ngaga aku nyadi tuchi!” Jesus lalu ngunjurka jari Iya, negu orang nya, lalu bejaku, “Aku deka! Tuchi meh nuan!” Tekala nya penyakit lan nya lalu nadai agi ba orang nya. Jesus lalu enda nyagi iya madahka nya ngagai orang. Ku Iya, “Mansang ngagai imam, ngambika imam nya meresa nuan, lalu beri piring ti diasuh Moses, nyadika saksi di mua orang mayuh nuan udah gerai.” Tang berita pasal Jesus majak balat agi ngelekai, lalu mayuh amat orang datai ningaka Iya, sereta digeraika ari penyakit sida. Tang Iya mupuk ngagai endur ti sunyi, lalu besampi. Nyadi sekali, lebuh Iya benung ngajar, orang Parisi enggau pengajar adat bisi duduk semak nya dia. Sida nya datai ari semua genturung pendiau di menua Galili enggau menua Judea, enggau ari Jerusalem. Lalu kuasa Tuhan bisi enggau Iya kena Iya ngeraika orang. Lebuh maya nya sekeda orang datai mai siku orang ke sakit bajung atas peninduk iya. Sida nguji mai iya tama ngagai rumah nya deka ngengkahka iya di mua Jesus. Tang lebuh sida nadai nemu jalai mai iya tama, laban orang kelalu mayuh, sida lalu mai iya ngagai perabung, lalu ngulurka iya ngena peninduk iya nengah lubang ba perabung nya ngagai tengah-tengah bala mayuh, di mua Jesus. Lebuh Iya meda pengarap sida, Iya lalu bejaku, “Unggal, dosa nuan diampun.” Sida pengajar adat enggau orang Parisi lalu belabuh betanya ngagai pangan diri, “Sapa orang tu ke bejaku busung baka tu? Sapa ulih ngampun dosa, kelimpah ari Allah Taala?” Lebuh Jesus nemu runding sida, Iya lalu nyaut sida, “Nama kebuah kita betanya munyi nya dalam ati kita? Ni ti nyamai agi disebut, ‘Dosa nuan diampun,’ tauka ‘Bediri, lalu bejalai’? Tang ngambika kita nemu Anak Mensia bisi kuasa di dunya tu ngampun dosa,” -- Iya lalu bejaku ngagai orang ke sakit bajung nya -- “Aku bejaku ngagai nuan: bediri nuan. Bai peninduk nuan, lalu pulai!” Tekala nya orang nya lalu bediri di mua sida, ngambi peninduk ti udah alai iya gali, lalu pulai ke rumah, ngemuliaka Allah Taala. Semua sida bela alit ati, lalu sida ngemulia sereta nangika Allah Taala. Ku sida, “Kitai udah meda utai ti nyelai sehari tu!” Udah bekau nya, Jesus pansut lalu tepedaka siku pengumpul chukai, ke benama Lewi, duduk dalam opis alai ngumpul chukai. Jesus lalu bejaku ngagai iya, “Titihka Aku.” Lewi angkat, ninggalka semua utai, lalu nitihka Iya. Lewi lalu nyendiaka pengerami makai besai dalam rumah iya ke Jesus. Mayuh amat pengumpul chukai enggau orang bukai makai enggau sida. Orang Parisi enggau sida pengajar Adat lalu mut-mut ngagai murid Jesus. Ku sida, “Nama kebuah kita makai ngirup enggau pengumpul chukai, enggau orang ke bedosa?” Jesus lalu nyaut, “Orang ke gerai enda begunaka lutur, tang semina orang ke sakit. Aku datai, ukai deka ngangauka orang ke lurus, tang ngangauka orang ke bedosa ngasuh sida nesal ati.” Udah nya sida bejaku ngagai Jesus, “Sida murid John, baka murid orang Parisi, suah bepasa sereta besampi, tang murid Nuan makai ngirup.” Jesus lalu bejaku ngagai sida, “Kita enda ulih ngasuh bala pengabang ba gawai tikah bepasa lebuh lelaki ke ditikah agi enggau sida, ukai enda? Hari deka datai alai lelaki ke ditikah nya deka diambi ari sida. Nya baru sida bepasa.” Iya mega madahka siti sempama ngagai sida: “Nadai orang nyarikka chebik ari kain ti baru, lalu nampalka iya ngagai kain ti lama, enggai ke nyarikka kain ti baru, lalu chebik ti baru nya enda sebaka enggau kain ti lama. Lalu nadai mega orang nyimpan wain ti baru dalam kambut ti lama, enggai ke wain ti baru nya mechahka kambut nya, lalu wain nya deka nyaya, lalu kambut nya rusak. Wain ti baru enda tau enda disimpan dalam kambut ti baru! Lalu nadai mega orang deka ngirup wain ti baru lebuh iya udah ngirup wain ti lama, laban ku iya, ‘Iya ti lama nyamai agi.’ ” Nyadi sekali lebuh Jesus bejalai nengah umai gandum kena hari Sabat, sida murid Iya ngambi tangkai gandum, ngusuk lalu makai leka gandum nya. Tang ku sekeda orang Parisi, “Nama kebuah kita ngereja utai ti enda disagi lebuh hari Sabat?” Jesus lalu nyaut, “Kati kita nadai udah kala macha pasal utai ti dikereja David lebuh iya enggau bala iya lapar? Iya tama ngagai rumah Allah Taala, ngambi lalu makai roti ti udah dienjuk ngagai Allah Taala, roti ti enda tau diempa mensia, kelimpah ari sida imam, lalu meri roti nya ngagai bala iya?” Iya lalu bejaku ngagai sida, “Anak Mensia Tuhan ke hari Sabat.” Nyadi sekali lebuh hari Sabat ti bukai, Iya tama ngagai balai gempuru, lalu ngajar, lalu siku lelaki ke mati jari kanan, bisi dia. Sida pengajar Adat enggau orang Parisi lalu nengkilaka Jesus, deka meda enti Iya deka ngeraika orang nya lebuh hari Sabat tauka enda, ngambika sida ulih besalahka Iya. Taja pen nemu runding sida, tang Iya bejaku ngagai orang ke mati jari nya, “Datai kitu, lalu bediri ditu.” Orang nya angkat, lalu bediri. Jesus lalu bejaku ngagai sida, “Aku nanya ngagai kita: Kati kitai tau ngereja utai ti manah tauka ngemedis lebuh hari Sabat, ngidupka nyawa, tauka munuh?” Lebuh Iya udah merening ngagai semua sida, Iya lalu bejaku ngagai orang ke mati jari nya, “Unjurka jari nuan.” Orang nya lalu ngunjurka jari iya, lalu jari iya gerai. Tang sida balat pedis ati, lalu berandau enggau pangan diri pasal utai ti deka dikereja sida ngagai Jesus. Lebuh maya nya, Iya niki ngagai bukit sigi, deka besampi, lalu Iya besampi semalam-malam nya ngagai Allah Taala. Ba urung rerak tawas, Iya ngangauka sida murid Iya, lalu milih dua belas iku ari bala sida, lalu Iya ngumbai sida nya rasul: Simon (ke digelar Iya Peter) enggau menyadi iya Andrew; James seduai John, Philip enggau Bartolomew, Matthew seduai Thomas, James anak Alpius, enggau Simon (ke digelar Bujang Berani), Judas anak James, enggau Judas Iskariot, ke nyual Iya. Iya lalu nurun ari bukit nya enggau sida, lalu bediri ba tanah ti rata, sama enggau mayuh sida murid Iya, sereta enggau mayuh amat orang ari semua menua Judea, Jerusalem, enggau ari Tire enggau ari Sidon ti ba tebing tasik. Sida udah datai deka mendingka Iya, sereta minta diri digeraika ari penyakit. Lalu orang ke dikeduan antu digeraika. Semua orang dalam bala mayuh nya nguji negu Iya, laban kuasa pansut ari Iya lalu ngeraika semua sida. Iya lalu merening ngagai sida murid Iya, lalu bejaku, “Beberekat meh kita ke seranta, laban kita deka bempu Perintah Allah Taala! “Beberekat meh kita ke lapar diatu, laban kita deka dikenyangka! “Beberekat meh kita ke nyabak diatu, laban kita deka ketawa! “Beberekat meh kita lebuh orang begedika kita, lebuh sida nulak kita, ngeleseka kita, lalu bejai kita ketegal Anak Mensia! Rami gaga ati meh kita lebuh hari nya, lalu merejuk gaga ati, laban upah ti besai disedia ke kita di serega. Laban nya meh utai ti udah dikereja aki ini sida kelia ngagai sida nabi. “Tang tulah meh kita ke kaya; laban kita udah nyamai diau! “Tulah meh kita ke kenyang diatu, laban kita deka lapar! “Tulah meh kita ke ketawa diatu, laban kita deka ngulit sereta nyabak! “Tulah meh kita lebuh semua orang muji kita, laban nya utai ti udah dikereja aki ini sida ngagai sida nabi ti pelesu. “Tang Aku madah ngagai kita ke mending: Rinduka munsuh kita. Kereja utai ti manah ngagai orang ke begedika kita. Berekatka orang ke nyumpah kita, besampika orang ke merinsaka kita. Enti orang nampar kuyu kita sepiak, awakka iya mega nampar kuyu kita sepiak. Enti orang ngambi kelambi kita, awakka iya mega ngambi baju kita. Beri ngagai semua orang ke minta utai ari kita, lalu lebuh orang ngambi utai kita, anang minta utai nya dipulaika baru. Kereja ngagai orang baka ke dikedekaka kita kereja sida ngagai kita. “Enti kita rinduka orang ke rinduka kita, baka ni ku nya tau nyadika berekat kita? Indah orang ke bedosa deh nemu rinduka orang ke rinduka sida! Lalu enti kita manah enggau orang ke manah enggau kita, baka ni ku nya tau nyadika berekat kita? Indah orang ke bedosa deh nemu ngereja nya! Enti kita nyali utai semina ngagai orang ke dikarapka ulih mulaika utai nya ngagai kita, baka ni ku nya tau nyadika berekat kita? Indah orang ke bedosa deh nemu nyali utai ngagai pangan diri, lalu ngarapka diri ulih nerima utai nya pulai baru! Tang rinduka munsuh kita, lalu kereja utai ti manah ngagai sida. Jali utai ngagai orang, lalu anang ngarapka diri nerima bayar. Nya baru upah kita besai, lalu kita deka nyadi anak Allah Taala ti Pemadu Tinggi; laban Iya manah enggau orang ke enda nemu beterima kasih, sereta enggau orang ke jai. Kasihka orang, baka Apai kita ti kasih. “Anang ngakim, nya baru kita enda diakim. Anang ngukum, nya baru kita enda diukum. Ampun, nya baru kita diampun. Beri, lalu kita deka diberi. Takar ti chukup, ti dienyak, digusak, ti meruap lalu lilih, deka diberi ngagai kita; laban takar ti dikena kita nakar deka dikena nakar utai ke kita.” Jesus mega madahka sempama tu ngagai sida: “Kati orang ke buta ulih ngiring orang ke buta? Enda ka seduai iya deka sama labuh ngagai lubang kebung? Murid endang nadai kala lebih ari pengajar iya; tang semua murid, lebuh sida udah tembu belatih, deka nyadi sebaka enggau pengajar sida. “Nama kebuah kita betilikka empeleman ba mata pangan kita, tang enda tepedaka lumpung kayu ti ba mata kita empu? Tauka, baka ni ku kita nyebut ngagai menyadi kita, ‘Menyadi, awakka aku muai empeleman ari mata nuan,’ tang kita enda meda lumpung kayu ti ba mata kita empu? Kita tu orang ke pura-pura ngapa! Buai dulu lumpung kayu ari mata kita empu, nya baru mata kita lansik lalu kita ulih muai empeleman ari mata menyadi kita. “Kayu ti manah enda mansutka buah ti jai. Lalu kayu ti jai enda mansutka buah ti manah. Laban genap batang kayu dikelala ari buah iya. Buah ara ukai diambi ari unak, lalu buah anggur ukai diambi ari madang emperingat. Orang ke manah mansutka utai ti manah ari ati iya, lalu orang ke jai mansutka utai ti jai ari ati iya. Laban iya nyebut utai ti ngemenuhka ati iya. “Nama kebuah kita ngumbai Aku, ‘Tuhan, Tuhan,’ tang enda ngereja utai ti diasuh Aku? Aku deka madah ngagai kita gaya orang ke datai ngagai Aku, ke mending lalu ngasika jaku Aku. Iya baka orang siku ke ngaga rumah. Iya numbak lubang ti dalam lalu nudukka pugu rumah iya ba atas batu. Sungai bah ngampuhka tebing, lalu mangka ngagai rumah nya, tang enda ulih nguyat rumah nya, laban rumah nya udah tegap digaga. Tang orang ke ninga tang enda ngasika jaku Aku, nya baka orang siku ke ngaga rumah ti nadai batu pemun. Lebuh ai bah mangka ngagai rumah nya, rumah nya tumbang tekala nya. Balat amat rumah nya rusak!” Lebuh Jesus udah nyebut semua utai nya ngagai orang mayuh, Iya lalu mupuk ngagai Kapernaum. Siku pemesai soldadu Rome bisi siku ulun. Ulun nya balat dikesayauka iya. Nyadi ulun nya sakit lalu nyau deka mati. Lebuh pemesai nya ninga pasal Jesus, iya lalu ngasuh sekeda tuai orang Judah betemu enggau Jesus, minta Jesus datai lalu ngeraika ulun iya. Lebuh bala tuai orang Judah betemu enggau Jesus, sida bebendar amat minta Iya datai. Ku sida, “Orang tu patut disaup Nuan, laban iya angkunka bansa kitai, lalu iya udah ngaga sebuah balai gempuru ke kami.” Jesus lalu mupuk enggau sida, tang lebuh Iya nyau ka datai ba rumah nya, pemesai nya lalu ngasuh pangan iya madah ngagai Jesus, “Tuan, anang ngiruh Diri, laban aku enda chukup badas alai Nuan datai. Nya kebuah aku enda datai ngagai Nuan. Tak sebut aja jaku, lalu geraika nembiak aku. Laban aku empu mega bekereja di baruh pemesai, lalu aku mega bisi soldadu dipegai aku. Aku bejaku ngagai siku, ‘Mupuk nuan!’ lalu iya mupuk. Ngagai siku ti bukai aku bejaku, ‘Kitu ke nuan,’ lalu iya datai. Lalu aku bejaku ngagai ulun aku, ‘Kereja tu!’ lalu iya ngereja utai nya.” Lebuh Jesus ninga nya, Iya balat alit ati ke pemesai nya. Jesus nguing ngagai bala orang mayuh ke nitihka Iya, lalu bejaku “Aku madah ngagai kita, Indah di menua Israel deh Aku nadai udah kala tetemuka pengarap ti baka tu.” Lebuh orang ke udah diasuh mai pesan pulai ngagai rumah pemesai nya, sida nemu ulun nya udah gerai. Enda lama udah bekau nya, Jesus bejalai ngagai sebuah nengeri ti dikumbai Nain, disempulang sida murid Iya, enggau orang mayuh. Lebuh Iya datai semak pintu nengeri nya, bala orang ke nganjung siku lelaki ti udah mati, pansut ari nengeri nya. Nyadi lelaki ke mati nya anak tunggal siku indu balu. Mayuh amat orang ari nengeri nya bejalai enggau indu nya. Lebuh Tuhan meda indu nya, Iya sinu ati ke iya, lalu bejaku ngagai iya, “Anang nyabak.” Iya mansang lalu negu sentubung nya, lalu orang ke ngesan sentubung nya ngetu. Jesus lalu bejaku, “Bujang! Aku bejaku ngagai nuan: angkat nuan!” Orang ke mati nya lalu duduk, lalu belabuh bejaku. Jesus lalu nyerahka iya ngagai indai iya. Semua sida nangi lalu ngemuliaka Allah Taala. Ku sida, “Nabi ke besai udah pegari ba bala kitai! Allah Taala udah datai nulung nembiak Iya!” Berita pasal Jesus lalu ngelekai di semua menua Judea enggau di serata menua ti ngelingi menua nya. Sida murid John madahka semua utai nya ngagai John. Nya alai John ngangauka dua iku murid iya lalu ngasuh seduai iya betemu enggau Tuhan, ngambika seduai iya nanya, “Kati Nuan tu orang ke deka datai, tauka kami nganti orang bukai?” Lebuh seduai iya betemu enggau Jesus, seduai iya lalu bejaku, “John Pemaptisa udah ngasuh kami duai betemu enggau Nuan lalu nanya Nuan, ‘Kati Nuan tu orang ke deka datai, tauka kami nganti orang bukai?’ ” Lebuh maya nya Jesus baru udah ngeraika mayuh orang ari penyakit, ari pemedis, enggau ari keduan roh ti jai, lalu mayuh orang ke buta ulih meda. Lalu ku Iya nyaut seduai iya, “Mupuk meh seduai, lalu padahka ngagai John pasal utai ti udah dipeda enggau didinga seduai: orang ke buta meda, orang ke lemi bejalai, orang ke sakit lan, dituchi, orang ke bengal ninga, orang ke mati diangkatka idup baru, lalu Berita Manah dipadahka ngagai orang ke seranta. Beberekat meh orang ke enda nulak Aku.” Lebuh seruan John udah mupuk, Jesus lalu belabuh bejaku ngagai orang mayuh pasal John: “Nama utai ti deka dipeda kita di menua puang? Buluh ti beguyat laban ribut? Nama utai ti deka dipeda kita? Deka meda orang ke ngena gari ti manah? Orang ke ngena gari ti manah lalu diau lantang senang, diau di istana! Nama utai ti deka dipeda kita? Siku nabi? Amat. Tang, Aku madah ngagai kita, kita meda lebih agi ari nabi. Tu meh orang ke dikenang dalam Bup Kudus: ‘Aku ngasuh seruan Aku bejalai dulu ari Nuan, ngambika iya nyendiaka jalai ke Nuan.’ Aku madah ngagai kita, ari semua orang ke diadaka indu, nadai siku ke besai agi ari John. Tang Iya ke pemadu mit dalam Perintah Allah Taala, besai agi ari iya.” (Semua orang ke ninga nya, nyengkaum sida pengumpul chukai, bela ngumbai Allah Taala amat lurus, laban sida udah dibaptisa ngena baptisa John. Tang orang Parisi enggau sida pengajar Adat ke enggai dibaptisa ulih John, nulak tuju Allah Taala dalam pengidup sida.) Ku Jesus nampung jaku Iya, “Ngagai apa Aku mandingka orang ke rebak diatu? Baka apa sida nya? Sida nya baka bala anak mit ke duduk ba sebelah pasar, ke bekangauka pangan diri, ‘Kami nyepu kesuling, tang kita enda betanda! Kami bekeduie nyabak, tang kita enda nyabak!’ Laban John pemaptisa udah datai, nadai makai utai, nadai ngirup wain, lalu ku kita, ‘Iya dirasuk antu!’ Anak Mensia udah datai makai enggau ngirup, lalu ku kita, ‘Peda orang nya! Iya bam sereta pemabuk, pangan sida pengumpul chukai, enggau orang ke bedosa!’ Tang taja pia, penemu-dalam diayanka amat ngena, ulih orang ke nerima iya.” Siku orang Parisi mai Jesus makai enggau iya. Jesus lalu mansang ngagai rumah orang nya, lalu belatur deka makai. Nyadi di nengeri nya bisi siku indu ke bedosa. Lebuh iya ninga Jesus bisi makai dalam rumah orang Parisi nya, iya lalu mai sebutul minyak wangi. Iya bediri ari belakang Jesus ngimbai kaki Iya, nyabak, lalu belabuh ngemasahka kaki Jesus ngena ai mata iya. Iya lalu ngendas kaki Jesus ngena buk iya, nyium lalu nata kaki Jesus ngena minyak wangi nya. Lebuh orang Parisi ke mai Jesus makai, meda nya, iya lalu bejaku dalam ati diri, “Enti orang tu amat nabi, Iya tentu nemu indu ke negu Iya nya orang ke bedosa.” Jesus lalu bejaku ngagai iya, “Simon, Aku bisi utai ti deka dipadahka ngagai nuan.” Simon lalu nyaut, “Padahka ngagai aku, Pengajar.” Jesus lalu madah ngagai iya, ku Iya, “Siku orang ke bejalika duit ngagai orang, bisi dua iku orang berutang ba iya. Siku berutang lima ratus singkap duit pirak, lalu siku berutang lima puluh singkap. Lebuh seduai iya enda tebayarka utang diri, iya muai utang seduai iya. Sapa ari seduai nya ke deka lebih agi rinduka iya?” Simon lalu nyaut, “Nyangka iya ke mayuh agi utang, ke enda ibuh mayar utang.” Jesus lalu nyaut, “Betul sangka nuan.” Jesus lalu nguing ngagai indu nya, lalu bejaku ngagai Simon, “Kati nuan bisi meda indu tu? Aku tama ngagai rumah nuan, tang nuan nadai meri Aku ai kena Aku masu kaki, tang iya udah masu kaki Aku ngena ai mata iya, lalu ngendas kaki Aku ngena buk iya. Nuan enda nyium Aku, tang kenyau ari Aku tama tadi iya enda ngetu-ngetu nyium kaki Aku. Nuan enda nata pala Aku ngena minyak, tang iya udah nata kaki Aku ngena minyak wangi. Nya alai, Aku madah ngagai nuan, dosa iya ti mayuh, udah diampun, nya kebuah iya balat rindu; tang orang ke diampun mimit, deka rindu mimit aja.” Jesus lalu bejaku ngagai indu nya, “Dosa nuan diampun.” Tang orang ke duduk makai enggau Iya ba mija nya lalu belabuh bejaku enggau pangan diri, “Sapa orang tu, datai ke Iya berani ngampun dosa?” Lalu ku Jesus bejaku ngagai indu nya, “Pengarap nuan udah nyelamatka nuan. Pulai meh nuan enggau selamat.” Enda tentu lama udah bekau nya, Jesus bejalai nengah nengeri enggau genturung pendiau, nusui Berita Manah pasal Perintah Allah Taala. Murid ke dua belas iku bisi enggau Iya, lalu pia mega sekeda indu ke udah digeraika Jesus ari antu enggau ari penyakit: Maria (ke dikumbai Magdalin) alai Jesus ke udah muru tujuh iku antu; enggau Joana, (bini Chusa, siku pemesai dalam opis Herod), enggau Susana, enggau mayuh indu ke bukai, ke ngena duit sida empu nulung Jesus enggau sida murid Iya. Lebuh mayuh amat orang begempuru, lalu orang ari mayuh bengkah nengeri datai ngagai Jesus, Iya bejaku ngena jaku sempama: “Orang siku mansang naburka benih. Lebuh iya naburka benih, sekeda benih nya labuh ba jalai raya lalu kena indik kaki mensia, lalu burung makai leka benih nya. Sekeda labuh ba batu, lalu lebuh iya tumbuh, iya layu, laban iya nadai ai. Sekeda labuh ba madang duri. Duri nya tumbuh sama enggau leka benih nya, lalu ngalahka iya. Lalu sekeda labuh ba tanah ti ami, lalu tumbuh, lalu bebuah seratus kali lipat.” Lebuh Iya udah nyebut nya, Iya lalu ngangau, “Awakka orang ke bisi pending, ninga.” Sida murid Iya lalu nanya ngagai Iya reti jaku sempama nya, Ku Iya, “Kita udah diberi penemu pasal misteri Perintah Allah Taala, tang ngagai sida ti bukai, Aku bejaku ngena jaku sempama, ngambika ‘sida merening, tang enda meda; mending, tang enda mereti.’ “Tu reti sempama nya: benih nya jaku Allah Taala. Benih ti labuh ba jalai raya nya orang ke ninga. Udah nya Sitan datai lalu ngerampas pesan nya ari ati sida, ngambika sida enda arap lalu enda diselamatka. Benih ti labuh ba batu nya orang ke ninga pesan nya, lalu nerima iya enggau ati ti gaga. Tang sida nadai urat. Sida arap enda lama, lalu lebuh penguji datai, sida badu agi arap. Benih ti labuh ba madang duri nya orang ke ninga, tang lebuh sida mupuk ari endur nya, sida alah laban pengirau, pengaya, enggau pengelantang dunya, lalu buah sida enda mansau. Tang benih ti labuh ba tanah ti ami nya orang ke ninga pesan, lalu ngingatka iya dalam ati ti manah sereta ngasi, lalu sida bebuah enggau ati ti liat sereta tan. “Nadai orang nungkun lampu, lalu ngerungkup iya ngena bisin, tauka ngengkahka iya di baruh katil, tang ngengkahka lampu nya ba penuduk lampu, ngambika orang ke tama ulih meda penampak nya. “Laban nadai utai ti dilalai, enda dikebakka, lalu nadai utai ti resia, enda ditemu. “Nya alai, pendingka enggau manah; laban orang ke bisi utai, deka diberi mayuh agi, tang orang ke nadai utai, indah utai ti mimit ti dikemisi sida, deh deka dirampas ari sida.” Udah nya indai enggau sida menyadi lelaki Jesus datai ngagai Iya, tang sida enda ulih betemu enggau Iya laban orang kelalu mayuh. Orang lalu madah ngagai Iya, “Indai Nuan enggau sida menyadi lelaki Nuan bisi di luar, deka betemu enggau Nuan.” Tang ku Iya bejaku ngagai sida, “Indai Aku enggau menyadi lelaki Aku nya orang ke ningaka jaku Allah Taala, lalu ngereja iya.” Nyadi sekali Iya nepan sebuah perau enggau sida murid Iya, lalu ku Iya bejaku ngagai sida, “Aram kitai ngelayang ke seberai danau tu.” Sida lalu bekejang. Lebuh sida belayar, Jesus tinduk. Ribut biaubalai lalu mangka ba danau nya, lalu ai belabuh tama ngagai perau sida, datai ke perau sida nyau deka karam. Sida mansang ngagai Iya lalu ngerak Iya enggau panjung, “Pengajar, Pengajar! Mati kitai tu!” Iya lalu dani, lalu ngerara ribut enggau gelumbang. Ribut enggau gelumbang lalu badu, lalu semua utai teduh magang. Ku Iya bejaku ngagai sida, “Kini ke tunga pengarap kita?” Sida takut sereta balat alit ati, lalu bejaku enggau pangan diri, “Sapa orang tu, datai ke Iya bejaku ngagai ribut enggau ai, lalu sida ngasika Iya?” Sida lalu datai di menua Gerasenes, di seberai Danau Galili. Lebuh Iya niki ke tebing, siku orang ari nengeri nya ke dirasuk antu, betemu enggau Iya. Orang nya lama udah telanjai, lalu iya enda diau di rumah, tang diau ba sebelah pendam. Lebuh iya meda Jesus, iya nyungkurka diri di mua Jesus lalu nyerauh enggau pengabis penginggar nyawa iya, “Nama utai ti deka dikereja Nuan ngagai aku, Jesus, Anak Allah Taala ti Pemadu Tinggi? Aku minta Nuan, anang merinsaka aku!” Laban Jesus udah muru antu nya pansut ari orang nya. (Antu nya suah udah ngerasuk orang nya. Iya ditutup dalam rumah jil, lalu ditanchang ngena rantai, tang iya mutuska rantai nya, lalu dibai antu nya ngagai menua puang.) Jesus lalu nanya iya, “Sapa nama nuan?” Iya lalu nyaut, “Nama aku Bala”; laban mayuh antu udah ngerasuk iya. Sida antu nya lalu minta Jesus enda muai sida ngagai lubang kebung ti dalam. Nyadi semak endur nya bisi raban babi benung makai ba munggu. Sida antu nya lalu minta Jesus ngemendarka sida tama ngagai raban babi nya. Jesus lalu ngemendarka sida. Sida antu nya lalu pansut ari orang nya, lalu tama ngagai babi. Semua babi nya lalu belanda nurun tebiang, terejun ngagai danau nya, lalu lemas. Lebuh bala orang ke ngibun raban babi meda utai nya, sida rari lalu madahka pasal utai nya ngagai orang ke di nengeri enggau di menua pesisir. Orang mayuh lalu datai deka meda utai ti udah nyadi. Lebuh sida datai ngagai Jesus, sida nemu orang ke udah dilepaska ari antu nya duduk semak kaki Jesus, udah begari, lalu enda agi gila. Semua sida lalu takut. Orang ke udah meda utai nya nyadi lalu madah ngagai sida jalai orang ke dirasuk antu nya digeraika. Udah nya semua orang di menua nya lalu minta Jesus mupuk ari menua sida, laban sida balat takut. Jesus lalu nepan perau lalu pulai. Orang ke udah dilepaska ari rasuk antu nya minta Jesus mai iya, ngambika iya ulih enggau Jesus. Tang Jesus ngasuh iya pulai. Ku Jesus bejaku, “Pulai nuan ke rumah, lalu padahka utai ti udah dikereja Allah Taala ke nuan.” Orang nya mupuk lalu madah ngagai semua orang di nengeri nya pasal utai ti udah dikereja Jesus ke iya. Lebuh Jesus udah mulaika Diri ke seberai, orang mayuh nyambut penatai Iya, laban semua sida bela nganti Iya. Siku lelaki ke benama Jairus lalu datai. Jairus tu siku pemesai ke ngemataka balai gempuru. Iya nyungkurka diri di kaki Jesus, lalu minta Jesus datai ngagai rumah iya, laban anak indu iya ke tunggal, ke umur dua belas taun, nyau deka mati. Lebuh Jesus benung bejalai, orang mayuh nyau besedul ngelingi Iya. Nyadi dia bisi siku indu ke udah sakit begetah dua belas taun. Taja pen duit iya nyau abis kena iya berubat ngagai lutur, tang nadai siku orang ulih ngeraika iya. Iya datai ari belakang Jesus lalu negu puting gari Jesus. Tekala nya iya lalu badu agi begetah. Jesus lalu nanya, “Sapa negu Aku?” Lebuh semua orang bela madahka diri nadai negu Iya, Peter lalu bejaku, “Pengajar, semua bala orang tu nyau besedul ngelingi Nuan.” Tang ku Jesus, “Bisi orang udah negu Aku, laban Aku ngasaika kuasa bisi udah pansut ari Aku.” Lebuh indu nya nemu diri enda ulih ngelalaika diri, iya lalu datai getar-getar, nyungkurka diri di mua Jesus, lalu madah ngagai Jesus di mua orang mayuh, kebuah iya negu Jesus, enggau pasal iya ke udah digeraika tekala nya. Jesus lalu bejaku ngagai iya, “Anak, pengarap nuan udah ngeraika nuan. Pulai meh nuan enggau selamat.” Lebuh Jesus benung bejaku, siku orang datai ari rumah Jairus, lalu bejaku, “Anak indu nuan udah mati. Anang agi ngiruh Pengajar.” Lebuh Jesus ninga nya, Iya lalu nyaut, “Anang takut. Arap aja. Iya deka idup.” Lebuh Iya datai ba rumah Jairus, Iya enda nyagi orang tama enggau Iya, kelimpah ari Peter, John, enggau James, enggau apai indai anak mit nya. Semua orang nyau bekeduie nyabakka anak mit nya. Tang ku Jesus bejaku, “Anang nyabak, laban iya ukai mati, tang tinduk!” Sida lalu ketawaka Iya, laban sida nemu anak mit nya endang udah mati. Tang Jesus megai jari anak mit nya, lalu ngangau. “Anak, angkat nuan!” Roh iya lalu pulai baru ngagai iya, lalu iya angkat tekala nya. Jesus lalu ngasuh sida meri iya utai diempa. Apai indai indu nya balat amat alit ati, tang Jesus enda nyagi seduai iya madah ngagai orang pasal utai ti udah nyadi. Jesus lalu ngempuruka murid Iya ke dua belas, lalu meri sida kuasa muru semua antu, enggau ngeraika penyakit, lalu ngasuh sida madahka berita pasal Perintah Allah Taala, sereta ngeraika orang ke sakit Ku Iya bejaku ngagai sida, “Anang mai utai lebuh kita bejalai: anang mai tungkat, tauka kambut, tauka pemakai, tauka duit. Baju kena besilih pen enda meh tau mai. Sebarang rumah alai kita tama, diau dia, datai ke kita mupuk ari endur nya. Di sebarang endur orang enda nerima kita, tesai abus ari kaki kita nyadika saksi kena ngelaban sida lebuh kita angkat ari endur nya.” Sida murid mupuk, lalu bejalai nengah semua genturung pendiau, nusui Berita Manah, sereta ngeraika orang di semua endur. Lebuh Herod ninga pasal semua utai ti nyadi, iya beba runding, laban sekeda orang madahka John Pemaptisa udah angkat idup baru. Sekeda madahka Elijah udah pegari, lalu sekeda madahka siku ari bala nabi ke dulu kelia udah angkat idup baru. Ku Herod, “John udah dipumpung aku pala; tang sapa orang tu ke didinga aku tu?” Lalu iya keran deka betemu enggau Jesus. Lebuh sida rasul pulai bejalai, sida lalu madah ngagai Jesus semua utai ti udah dikereja sida. Iya mai sida kediri enggau Iya ngagai sebuah nengeri ti dikumbai Betsaida. Lebuh orang mayuh ninga nya, sida lalu nitihka Iya. Iya lalu ngelaluka penatai sida lalu bejaku ngagai sida pasal Perintah Allah Taala, lalu ngeraika orang ke sakit. Lebuh hari nyau udah lemai, murid ke dua belas datai ngagai Iya, lalu bejaku, “Asuh bala orang tu pulai, ngambika sida bejalai ngagai genturung pendiau enggau ngagai menua ti ngelingi tu, lalu ngiga pemakai enggau rumah alai bemalam, laban menua tu nadai mensia.” Tang ku Jesus bejaku ngagai sida, “Kita meri sida utai diempa.” Disaut sida, “Kami semina bisi lima iti tuku roti, enggau dua iku ikan--enti kami enda mupuk lalu meli pemakai ke semua orang tu.” Laban orang lelaki ke bisi dia kira lima ribu iku. Iya lalu bejaku ngagai sida murid Iya, “Asuh sida duduk beraban-raban, kira lima puluh iku dalam siti-siti raban.” Sida murid lalu ngasuh semua orang dia duduk magang. Jesus lalu ngambi lima iti tuku roti enggau dua iku ikan nya, engkadah ke langit, merekat lalu mechahka roti enggau ikan nya, lalu nyuaka utai nya ngagai sida murid ngambika sida nyadung ngagai orang mayuh. Semua sida bela makai magang lalu kenyang. Teda pemakai nya lalu digumpul, dua belas bakul penuh. Nyadi sekali, lebuh Jesus benung besampi keDiri, lalu semina sida murid Iya aja bisi semak Iya, Iya nanya sida, “Sapa Aku tu ku orang?” Ku sida nyaut, “Sekeda ngumbai Nuan John Pemaptisa. Sekeda ngumbai Nuan Elijah. Lalu sekeda ti bukai ngumbai Nuan siku ari sida nabi ke dulu kelia, ke udah angkat idup baru.” Iya lalu bejaku ngagai sida, “Tang sapa Aku tu ku kita?” Peter lalu nyaut, “Nuan tu Kristus Allah Taala.” Iya lalu berat-rat enda nyagi sida madahka nya ngagai orang, ku Iya, “Anak Mensia enda tau enda balat diperinsa, lalu ditulak sida tuai bansa, sida tuai imam, enggau sida pengajar Adat, lalu dibunuh, lalu ba hari ti ketiga diangkatka idup baru.” Lalu ku Iya bejaku ngagai semua sida, “Enti orang deka nitihka Aku, awakka iya badu agi berundingka diri empu, ngesan regang iya tiap hari, lalu nitihka Aku. Laban barang sapa deka ngidupka nyawa diri, deka ngelenyauka iya, lalu barang sapa deka ngelenyauka nyawa diri ketegal Aku, deka ngidupka iya. Nama penguntung orang, enti iya bempu semua dunya, tang ngelenyauka nyawa diri? Orang ke malu ke Aku, sereta malu ke ajar Aku, Anak Mensia deka mega malu ke orang nya lebuh Iya datai dalam mulia Iya, enggau dalam mulia Apai Iya, enggau dalam mulia bala melikat Iya ti kudus. Tang enggau bendar Aku madah ngagai kita, sekeda orang ke bediri ditu apin mati sebedau sida meda Perintah Allah Taala.” Kira lapan hari udah bekau Iya nyebut nya, Iya mai Peter, John enggau James niki ngagai bukit sigi, deka besampi. Lebuh Iya benung besampi, mua Iya berubah, lalu gari Iya bebali beperenching burak. Tekala nya dua iku orang bejaku enggau Iya. Seduai nya Moses enggau Elijah, ke pegari ngena mulia lalu bejakuka pasal pemati Iya, ti baru deka dikereja Iya di Jerusalem. Nyadi Peter enggau pangan iya jenak amat tinduk, lalu lebuh sida dani, sida meda mulia Iya, sereta meda orang ke dua iku nya bediri enggau Iya. Lebuh orang ke dua iku nya ninggalka Jesus, Peter lalu bejaku enggau Jesus, “Pengajar, manah amat kitai diau ditu; awakka kami ngaga tiga buah langkau, sebuah ke Nuan, sebuah ke Moses, lalu sebuah ke Elijah.” (Peter enda nemu utai ti disebut diri.) Lebuh Peter agi benung nyebut nya, siti remang datai lalu ngelindung sida, lalu sida murid takut dibalut remang nya. Nyawa lalu bejaku ari dalam remang nya, ku iya, “Tu Anak Aku ke dipilih Aku. Pendingka Iya!” Lebuh nyawa nya udah badu bejaku, semina Jesus aja bisi dia. Sida murid lalu enda bemunyi, lalu nadai madah ngagai orang lebuh maya nya, pasal utai ti udah dipeda sida. Hari siti, lebuh sida udah nurun ari bukit nya, mayuh amat orang betemu enggau Jesus. Siku lelaki lalu ngangau ari bala mayuh, “Pengajar! Aku minta Nuan meda anak aku! Iya anak tunggal aku! Lebuh roh ti jai nyerang iya, iya nyerauh. Roh nya lalu ngusak iya, datai ke nyawa iya nyau bepupu. Roh nya merinsaka iya, lalu enggai ninggalka iya! Aku udah minta sida murid Nuan muru roh nya, tang sida enda ulih.” Jesus lalu nyaut, “Kita tu orang ke enda arap sereta jai! Ni pengelama Aku enda tau enda begulai enggau kita, lalu sabar enggau kita? Bai anak nuan kitu.” Lebuh nembiak nya mansang ngagai Jesus, antu nya lalu ngempaska iya ke tanah, lalu ngusak iya. Tang Jesus ngerara roh ti jai nya, ngeraika nembiak nya, lalu meri iya ngagai apai iya. Semua orang balat alit ati ke pemesai kuasa Allah Taala. Lebuh semua orang mayuh agi alit ati ke semua utai ti udah dikereja Jesus, Iya lalu bejaku ngagai sida murid Iya, “Kingatka jaku tu: Anak Mensia deka dijual ngagai jari mensia.” Tang sida murid enda nemu reti jaku Iya nya. Reti jaku Iya nya udah dilalaika ari sida, ngambika sida enda nemu reti utai nya. Lalu sida takut nanyaka reti jaku nya ngagai Iya. Sida murid betalatka enggau pangan diri pasal sapa ari bala sida ke pemadu besai. Tang Jesus nemu peragam ati sida, lalu Iya ngambi siku anak mit, ngasuh iya bediri ngimbai Iya, lalu bejaku ngagai sida, “Barang sapa nerima anak mit tu dalam nama Aku, nerima Aku, lalu barang sapa nerima Aku, nerima Iya ke ngirumka Aku. Laban orang ke pemadu mit ba bala kita, nya meh orang ke pemadu besai.” John lalu nyaut, “Pengajar, kami bisi udah meda orang siku muru antu dalam nama Nuan, lalu kami nguji nagang iya, laban iya enda nitihka kitai.” Tang ku Jesus bejaku ngagai iya, “Anang nagang iya, laban orang ke enda ngelaban kita, setanah enggau kita.” Lebuh Jesus nyau deka dibai niki ke serega, Iya mutuska runding deka mansang ngagai Jerusalem. Iya lalu ngasuh bala seruan bejalai dulu ari Iya. Di rantau jalai sida tama ngagai sebuah genturung pendiau di menua Samaria, deka nyendiaka semua utai ke Iya. Tang orang dia enggai nerima Iya, laban Iya endang semina deka mansang ngagai Jerusalem. Lebuh murid Iya, James seduai John meda nya, seduai iya lalu bejaku, “Tuhan, kati Nuan dekaka kami ngangauka api nurun ari langit lalu nganguska sida?” Tang Iya nguing lalu ngerara seduai iya. Sida lalu mansang ngagai siti agi genturung pendiau. Lebuh sida benung di rantau jalai, siku orang bejaku ngagai Jesus, “Aku deka nitihka Nuan, ngagai sebarang endur Nuan bejalai.” Jesus lalu bejaku ngagai iya, “Munsang bisi lubang, lalu burung bisi tansang, tang Anak Mensia nadai endur alai ngalika Diri.” Ku Iya bejaku ngagai siku ti bukai, “Titihka Aku.” Tang ku orang nya bejaku, “Tuan, awakka aku pulai dulu lalu nguburka apai aku.” Tang ku Jesus bejaku ngagai iya, “Awakka orang ke mati, nguburka bala sida empu ke mati. Tang nuan empu enda tau enda bejalai lalu nusui pasal Perintah Allah Taala.” Siku ti bukai bejaku, “Aku deka nitihka Nuan, Tuhan, tang awakka aku meri selamat tinggal ngagai kami sebilik dulu.” Ku Jesus bejaku ngagai iya, “Orang ke belabuh ngeradu tanah lalu malik kebelakang, enda tau nyadi nembiak Perintah Allah Taala.” Udah nya Tuhan lalu milih tujuh puluh iku sida ti bukai, lalu ngasuh sida bejalai dulu ari Iya, dua-dua iku begulai, ngagai genap buah nengeri enggau endur ti deka digusung Iya Empu. Ku Iya bejaku ngagai sida, “Utai ti diketau mayuh, tang orang ke ngetau mimit. Nya alai besampi minta orang ke bempu umai ngirumka mayuh agi orang ngetau umai Iya. Mupuk meh kita! Ingat, Aku ngasuh kita bejalai baka anak domba ngagai raban ukui kampung. Anang mai kandi duit, tauka kambut, tauka selipar. Lalu anang nabi orang di rantau jalai. Sebarang rumah alai kita tama, sebut dulu, ‘Awakka pemaik meruan dalam rumah tu.’ Enti orang ke rinduka pemaik bisi dalam rumah nya, pemaik kita deka mengkang ba orang nya. Enti enda pia, pemaik nya deka pulai baru ngagai kita. Diau ba rumah nya, lalu empa irup sebarang utai ti diberi sida ngagai kita, laban orang ke gawa endang patut diberi gaji. Anang mindah ari rumah sebuah ngagai rumah sebuah. Genap kali kita datai ba sebuah nengeri, lalu sida nerima kita, empa sebarang utai ti diberi ngagai kita. Geraika orang ke sakit dalam nengeri nya, lalu sebut ngagai sida, ‘Perintah Allah Taala udah datai semak kita.’ Tang genap kali kita tama ngagai nengeri, lalu sida enda nerima kita, bejalai kita nengah jalai raya di nengeri nya lalu sebut, ‘Indah abus ari nengeri kita empu, ti lekat ba kaki kami, deh ditesai kami, kena ngelaban kita. Tang awakka kita nemu tu: Perintah Allah Taala udah datai semak!’ Aku madah ngagai kita, lebuh Hari Pechara ila, Allah Taala deka lebih agi kasihka Sodom ari ke kasihka nengeri nya! “Tulah meh nuan, Korasin! Tulah meh nuan, Betsaida! Laban enti kereja ajih ti dikereja dalam seduai, udah dikereja di Tire enggau di Sidon, sida tentu lama udah nesal ati, lalu ngerasuka kain guni, lalu ngerabu pala diri enggau amau. Tang lebuh Hari Pechara ila Tire enggau Sidon deka nyamai agi ari kita. Lalu nuan, Kapernaum! Kati nuan deka diangkat ke serega? Enda. Nuan deka dibuai ngagai neraka!” Barang sapa mendingka kita, mendingka Aku, lalu barang sapa nulak kita, nulak Aku. Lalu barang sapa nulak Aku, nulak Iya ke ngirumka Aku.” Sida tujuh puluh iku pulai enggau ati ti gaga. Ku sida, “Tuhan, indah antu deh ngasika kami dalam nama Nuan!” Ku Jesus bejaku ngagai sida, “Aku meda Sitan labuh ari langit baka kilat. Dinga kita! Aku udah meri kita kuasa ngindik ular enggau kala, sereta ngalahka kuasa munsuh, lalu nadai utai ulih ngemediska kita. Tang anang kita gaga ati ketegal antu nunduk ngagai kita, tang awakka ati kita gaga laban nama kita ditulis di serega.” Iya lalu gaga ati dalam roh lalu bejaku, “Aku meri terima kasih ngagai Nuan Apai, Tuhan ti bekuasa di serega enggau di dunya, laban Nuan udah ngelalaika utai nya ari orang ke bepenemu-dalam sereta bepelajar, lalu udah mandangka utai nya ngagai bala anak mit. Sigi amat, Apai, laban nya endang peneka Nuan. Semua utai udah diserahka Apai Aku ngagai Aku, lalu nadai orang nemu sapa Anak, semina Apai aja; tauka nemu sapa Apai, tang semina Anak aja, enggau sebarang orang ke dipilih Anak alai Iya mandangka Apai.” Jesus lalu nguing ngagai sida murid Iya, lalu bejaku ngagai sida kediri, “Beberekat meh mata ke meda utai ti dipeda kita! Laban, Aku madah ngagai kita, mayuh nabi enggau raja udah keran deka meda utai ti dipeda kita, tang nadai meda utai nya; keran deka ninga utai ti didinga kita, tang nadai ninga utai nya.” Siku pengajar Adat lalu bediri, deka nguji Jesus. Ku iya, “Pengajar, nama utai ti enda tau enda dikereja aku ngambika aku bulih pengidup ti meruan belama iya?” Jesus lalu nyaut iya, “Nama utai ti ditulis dalam Adat? Nama utai ti dibacha nuan dia? Orang nya lalu nyaut, “Rinduka Tuhan Allah Taala nuan enggau pengabis ati nuan, enggau pengabis semengat nuan, enggau pengabis pengering nuan, enggau pengabis runding nuan, lalu rinduka pangan nuan baka nuan ke rinduka diri empu.” Jesus lalu bejaku ngagai iya, “Betul saut nuan; kereja nya, nya baru nuan deka idup.” Tang pengajar Adat nya ingin deka mandangka diri nemu utai ti disebut diri, nya alai iya lalu nanya Jesus, “Sapa pangan aku?” Jesus lalu nyaut, “Nyadi sekali orang siku nurun ari Jerusalem mansang ngagai Jeriko. Bala penyamun ngamuk iya, nelanjaika iya, malu iya, lalu ninggalka iya setengah mati. Seninjik bendar siku imam bejalai nengah jalai nya, lalu lebuh iya tepedaka orang nya, iya lalu ngelaung nengah tisi sepiak. Baka nya mega siku orang Lewi, lebuh iya datai ba endur nya lalu tepedaka orang nya, iya mega ngelaung nengah tisi sepiak. Tang lebuh siku orang Samaria bejalai nengah jalai nya, iya tepedaka orang nya, lalu kasihka iya. Iya mansang ngagai orang nya, nuang minyak enggau wain ba bakal orang nya, lalu malut bakal iya. Udah nya iya nepanka orang nya ba jelu iya empu, mai iya ngagai rumah numpang, lalu ngintu iya. Hari siti, iya mantaika dua singkap duit pirak, lalu meri duit nya ngagai orang ke bempu rumah numpang nya. Ku iya, ‘Intu iya. Lebuh aku pulai kitu baru, aku deka mayar nuan ungkus ti lebih ari nya ti dikena nuan ngintu iya.’ ” Dalam penemu nuan, sapa ari sida tiga nya pangan orang ke diamuk penyamun nya?” Ku pengajar Adat nya nyaut, “Orang ke kasihka iya.” Jesus lalu bejaku ngagai iya, “Mupuk meh nuan lalu kereja baka nya.” Lebuh Jesus enggau sida murid Iya benung di rantau jalai, Iya datai ba sebuah genturung pendiau, alai siku indu ke benama Marta ngelaluka Iya tama ngagai rumah iya. Nyadi Marta bisi menyadi indu siku benama Maria, ke duduk semak kaki Tuhan, mendingka utai ti disebut Iya. Tang Marta nejuka diri dikelimpangka mayuh macham pengawa. Nya alai iya mansang ngagai Jesus lalu nanya, “Tuhan, kati Nuan enda ibuhka menyadi aku ninggalka aku kediri mela utai? Asuh iya nulung aku!” Tang ku Tuhan nyaut iya, “Marta, Marta! Nuan irau sereta nejuka diri dikelimpangka mayuh macham utai. Semina siti aja utai ti beguna. Maria udah milih utai ti manah agi, lalu utai nya enda ulih dirampas ari iya.” Nyadi sekali Jesus besampi ba endur siti. Lebuh Iya udah badu besampi, siku ari sida murid Iya lalu bejaku ngagai Iya, “Tuhan, ajar kami besampi, baka John ke ngajar bala murid iya.” Jesus lalu bejaku ngagai sida, “Lebuh kita besampi, sebut: ‘Apai: Kudus meh nama Nuan; Datai meh Perintah Nuan. Beri ngagai kami sehari tu pemakai umbas dipakai kami. Ampun kami dosa kami, laban kami ke ngampun orang ke salah ngelaban kami. Lalu anang mai kami ngagai penguji.’ ” Lalu ku Iya bejaku ngagai sida, “Enti sema siku ari kita bisi siku pangan, lalu iya mansang ngagai pangan iya nya ba urung tengah malam lalu bejaku ngagai iya, ‘O wai, jali aku tiga iti tuku roti, laban pangan aku ke pegi udah datai lalu aku nadai utai kena aku meri iya makai!’ Lalu pangan iya nya deka nyaut ari dalam, ‘Anang ngiruh aku! Pintu udah dikunchi, lalu kami menyanak udah beterenah tinduk. Aku enda ulih angkat meri nuan utai.’ Aku madah ngagai kita, taja pen iya enggai angkat lalu meri pangan iya utai, tang laban iya endang pangan iya, lalu laban pangan iya ituk minta, iya deka angkat lalu meri pangan iya utai ti dipeguna iya. Nya alai Aku madah ngagai kita: Pinta, lalu kita deka nerima; giga, lalu kita deka nemu; tekung, lalu pintu deka dibuka ke kita. Laban genap iku orang ke minta, deka nerima, lalu orang ke ngiga deka tetemu, lalu ke orang ke nekung, pintu nya deka dibuka ke sida. Kati kita ke apai, meri anak kita batu, enti iya minta roti? Tauka meri iya ular, enti iya minta ikan? Tauka, meri iya kala, enti iya minta telu? Enti kita ke jai, nemu meri utai ti manah ngagai anak kita, Apai kita ti di serega tentu lebih agi nemu meri Roh Kudus ngagai orang ke minta ari Iya!” Nyadi sekali Jesus muru antu bisu. Lebuh antu nya udah pansut, orang ke bisu nya lalu belabuh bejaku. Orang mayuh lalu balat alit ati. Tang ku sekeda sida bejaku, “Iya muru antu ngena kuasa Belsebup, ti raja antu.” Sida ti bukai majak minta Iya ngayanka tanda ari serega, kena sida nguji Iya. Tang Jesus nemu peragam ati sida, lalu ku Iya bejaku ngagai sida, “Semua perintah ti bepechah-belah lalu beripih ngelaban diri empu, deka rusak, lalu ruang bilik ti bepechah-belah, deka alah. Enti Sitan bepechah-belah lalu ngelaban diri empu, baka ni ku perintah nya ulih tan? Laban kita ngumbai Aku muru antu ngena kuasa Belsebup. Enti Aku muru antu ngena kuasa Belsebup, ngena kuasa sapa murid kita muru antu? Nya alai sida empu deka nyadi hakim kita. Tang enti Aku muru antu ngena kuasa Allah Taala, nya nunjukka Perintah Allah Taala udah datai ba kita. Lebuh orang ke kering, ke chukup disikap enggau senyata, nyaga rumah iya, semua reta tengkira iya likun magang. Tang lebuh orang ke kering agi ari iya, nyerang lalu ngalahka iya, orang nya deka ngerampas senyata ti dikarapka iya, lalu magi perapasan iya. Barang sapa enda setanah enggau Aku, ngelaban Aku, lalu barang sapa enda enggau Aku ngempuru, mambar. “Lebuh roh ti jai udah pansut ari orang, iya bejalai segau-segau nengah menua ti rangkai, ngiga endur alai belelak. Lebuh iya nadai tetemuka endur nya, iya lalu bejaku, ‘Aku deka pulai baru ngagai rumah aku ti udah ditinggalka aku.’ Lebuh iya datai, iya nemu rumah nya udah disapu sereta dikemas. Iya lalu pansut, lalu mai tujuh iku roh ti bukai ti lebih jai agi ari iya empu. Sida tama lalu diau dia, lalu ke pengujung iya, pendiau orang nya jai agi ari ti dulu.” Lebuh Jesus benung nyebut nya, siku indu lalu bejaku enggau nyawa ti inggar ngagai Jesus ari tekang bala mayuh, “Beberekat meh indu ke udah ngandungka Nuan, enggau tusu ti udah nusuka Nuan!” Tang ku Jesus nyaut, “Beberekat agi orang ke ninga lalu ngasika jaku Allah Taala!” Lebuh orang nyau majak mayuh-semayuh, Jesus lalu belabuh bejaku, “Orang ke rebak diatu endang amat jai. Sida minta tanda, tang nadai tanda deka diberi ngagai sida, kelimpah ari tanda Jonah. Laban baka Jonah ke nyadika tanda ke orang Nineweh, baka nya meh Anak Mensia deka nyadika tanda ke orang ke rebak diatu. Lebuh Hari Pechara ila, kuin ari menua ti di Selatan deka bediri sama enggau orang ke rebak diatu, lalu besalah sida, laban iya udah datai ari tisi dunya deka mendingka penemu-dalam Solomon. Tang peda, utai ti besai agi ari Solomon bisi ditu diatu. Lebuh Hari Pechara ila orang Nineweh deka bediri sama enggau rebak ti diatu, lalu besalah sida, laban orang Nineweh empu udah nesal ati ke dosa sida, lebuh sida mendingka jaku ti dipadahka Jonah. Tang peda, utai ti besai agi ari Jonah bisi ditu diatu! “Nadai orang nungkun lampu, lalu ngerungkup iya ngena bisin; tang ngengkahka lampu nya ba penuduk lampu, ngambika orang ke tama ulih meda penampak nya. Mata kita nyadika lampu tubuh kita. Enti mata kita menyana, semua tubuh kita penuh laban penampak. Tang enti mata kita enda menyana, tubuh kita penuh laban pemetang. Nya alai, kita enda tau enda nentuka penampak ti dalam kita nya ukai pemetang. Enti semua tubuh kita penuh laban penampak, lalu nadai siti perengka dibalut pemetang, tubuh nya deka tampak semua, baka lebuh lampu ti manchar ngagai kita lalu meri kita penampak.” Lebuh Jesus udah tembu bejaku, siku orang Parisi lalu mai Iya makai. Nya alai Jesus tama lalu duduk ngimbai mija makai. Orang Parisi nya balat alit ati meda Jesus enda masu jari dulu sebedau Iya makai. Tuhan lalu bejaku ngagai iya, “Kita orang Parisi nuchi mangkuk enggau chapak kita ari luar aja, tang dalam nyin kita penuh laban pengamu enggau penyai. Kita tu beli! Kati Allah Taala ti ngaga utai ti di luar, enda mega ngaga utai ti di dalam? Nya alai beri utai ti dalam mangkuk kita nyadika sedekah ngagai orang ke seranta, nya baru semua utai deka nyadi tuchi ke kita. “Tang tulah meh kita orang Parisi! Kita meri sepuluh peratus ari rempah kita, baka telasih, daun rempah, enggau semua macham rempah ti bukai, tang kita enggai ngereja pengelurus, enggau pengerindu Allah Taala. Nya utai ti patut dikereja kita, tang anang nejuka utai bukai nya enda dikereja. “Tulah meh kita orang Parisi! Laban kita rindu duduk ba penuduk ti pemadu manah dalam balai gempuru, lalu rindu ditabi orang ba sebelah pasar. Tulah meh kita! Laban kita tu baka kubur ti enda dikelai, lalu kena lunjak orang, lalu sida enda nemu diri udah ngelunjak nya.” Siku pengajar adat lalu nyaut Iya, “Pengajar, lebuh Nuan nyebut nya, Nuan mega ngeleseka kami!” Lalu ku Jesus bejaku, “Tulah meh kita pengajar Adat! Laban kita ngengkahka ma ti mar dibai ba orang, tang kita empu enggai enchukirka tunjuk nulung sida mai ma nya. Tulah meh kita! Kita ngaga kubur ke sida nabi ke udah dibunuh aki ini kita. Nya alai kita empu besaksi sereta besetujuka utai ti udah dikereja aki ini kita. Laban aki ini kita udah munuh sida nabi, lalu kita empu ngaga kubur ke sida. Nya alai Penemu-dalam Allah Taala mega nyebut, ‘Aku deka ngirumka bala nabi enggau rasul ngagai sida. Sekeda deka diperinsaka sida lalu dibunuh,” ngambika rebak ti diatu betanggungjawap ke darah semua sida nabi ke udah dibunuh kenyau ari penumbuh dunya, berengkah ari darah Abel, nyentuk ngagai darah Sekariah ke dibunuh ba entara alta enggau langkau sembiang. Enggau bendar Aku madah ngagai kita, rebak ti diatu deka betanggungjawap ke semua utai nya! “Tulah meh kita pengajar adat! Laban kita udah naruh kunchi penemu. Kita empu enda tama, lalu kita mempang jalai orang ke deka tama!” Lebuh Jesus angkat ari endur nya, sida pengajar Adat enggau orang Parisi balat amat deka ngelaban Iya lalu deka nanya Iya pasal mayuh macham utai, nganti Iya tesebutka jaku ti tau dikena besalah Iya. Lebuh beribu-ribu iku orang begempuru, datai ke sida nyau teindikka kaki pangan diri, Jesus bejaku ngagai sida murid Iya. Ku Iya, “Bejaga kita ari ragi orang Parisi, reti nya ari jaku sida ti pura-pura ngapa. Nadai utai ti ditudung enda dikebakka, lalu nadai utai ti dilalaika, enda ditemu. Nya alai, utai ti udah disebut kita dalam petang, deka didinga lebuh siang hari, lalu utai ti dipetelaika kita di bilik, deka disadaka ari puchuk perabung. “Aku madah ngagai kita, unggal, anang takutka orang ke munuh tubuh, tang udah nya enda ulih ngereja utai lebih ari nya. Tang Aku madahka sapa ke patut dikenangika kita: nangika Allah Taala ti bisi kuasa muai kita ngagai neraka lebuh Iya udah munuh kita. Sigi amat. Aku madah ngagai kita: nangika Iya! Ukai enda lima iku burung pipit dijual ngena rega dua sen aja? Tang taja pia, nadai siku sida nya enda dikingatka Allah Taala. Indah semua lambar buk ba pala kita deh udah diitung magang. Nya alai anang takut. Kita lebih agi berega ari burung pipit! “Lalu Aku madah ngagai kita, genap iku orang ke ngaku Aku di mua orang, deka diaku Anak Mensia di mua bala melikat Allah Taala. Tang barang sapa besangkalka Aku di mua orang, deka disangkal Anak Mensia di mua bala melikat Allah Taala. Lalu genap iku orang ke bejaku ngelaban Anak Mensia, deka diampun, tang barang sapa bejaku busung ngelaban Roh Kudus, enda diampun. Lebuh sida mai kita ngagai balai gempuru, ngambika kita kena pechara di mua raja, di mua orang ke megai perintah, anang irauka jalai kita deka nyaut sida, tauka utai ti deka disebut kita, laban Roh Kudus deka ngajar kita, ba jam nya, utai ti patut disebut kita.” Siku orang ari tekang bala mayuh nyebut ngagai Jesus, “Pengajar, asuh menyadi lelaki aku magi reta kami sebilik enggau aku.” Tang ku Jesus bejaku ngagai iya, “Unggal, sapa ngasuh Aku nyadi hakim tauka bekuasa magi reta kita?” Lalu ku Jesus bejaku ngagai semua sida, “Bejimat kita. Jaga diri ari semua macham pengamu, laban pengidup mensia ukai bepanggai ba pemayuh reta tengkira.” Iya lalu madahka siti sempama ngagai sida. Ku Iya, “Tanah orang siku ke kaya mansutka mayuh amat asil, lalu ku iya berunding, ‘Nama utai ti deka dikereja aku, laban aku nadai endur alai nyimpan gandum aku?’ Lalu ku iya bejaku, ‘Tu utai ti deka dikereja aku: Aku deka ngererak setor aku ti lama, lalu ngaga sebuah ti besai agi, alai nyimpan semua gandum enggau reta tengkira aku. Lalu aku deka bejaku enggau diri empu, ‘Nuan udah besimpanka mayuh utai nyadika penabat ke berapa taun ti deka datai. Badu agi gawa, makai, ngirup lalu ngelantangka diri.’ Tang ku Allah Taala bejaku ngagai iya, ‘Nuan tu beli! Malam tu seput nuan deka diambi ari nuan, lalu sapa deka bempu semua utai ti udah disimpan nuan?’ Nya meh gaya utai ti deka nyadi ba orang ke nugungka pengaya ke diri empu, tang enda kaya di mua Allah Taala.” Lalu ku Iya bejaku ngagai sida murid Iya, “Nya alai Aku madah ngagai kita, anang irauka pengidup kita, utai ti deka diempa kita, tauka pasal tubuh, tauka pasal gari. Laban pengidup beguna agi ari pemakai, lalu tubuh beguna agi ari gari. Peratika burung kak: sida nadai nanam utai, tauka ngetau, lalu sida nadai setor tauka pelabuh, tang taja pia, Allah Taala nupi sida! Kita lebih agi berega ari burung! Kati pengirau kita ulih nambahka umur kita sejam? Enti kita enda ulih ngereja utai ti ngemit nya, nama kebuah kita irauka utai bukai? Peratika bungai bakung, jalai sida tumbuh. Sida enda gawa, tauka betenun. Tang Aku madah ngagai kita, indah Solomon enggau semua pengaya iya, deh nadai gari ti ngemanah sida bungai nya. Tang enti Allah Taala meri gari ngagai rumput ti idup sehari tu, lalu pagila dibuai ngagai api, Allah Taala tentu deka lebih agi meri gari ngagai kita, O kita ke mit pengarap! Lalu anang irauka utai ti deka diempa tauka diirup kita. Semina orang ke enda nemu Allah Taala aja ke irauka utai nya lalu Apai kita ti di serega nemu kita begunaka utai nya. Tang giga dulu Perintah Allah Taala, lalu semua utai nya deka mega diberi ngagai kita. “Anang takut, kita ke mimit tu, laban Apai kita endang gaga ati deka meri Perintah ngagai kita. Jual semua reta tengkira kita, lalu beri sedekah ngagai orang ke seranta. Gaga ke diri empu kambut duit ti enda nemu luya, lalu simpan pengaya ke diri empu di serega, alai penchuri, enggau indu gegat enda ulih ngerusak. Laban dia alai pengaya kita, dia meh ati kita. “Seruran besedia, lalu awakka lampu kita seruran menyadi belama, baka orang gaji ke nganti tuan sida pulai ari gawai tikah, ngambika sida ulih muka pintu ke iya, lebuh iya datai lalu nekung pintu. Beberekat meh orang gaji ke ditemu tuan sida enda tinduk lebuh iya datai. Enggau bendar Aku madah ngagai kita, iya deka nyendiaka diri, lalu ngasuh sida belatur duduk, lalu mela sida. Beberekat meh orang gaji nya enti tuan sida tetemuka sida udah sedia, lebuh iya datai ba urung tengah malam tauka ba urung dini hari. Tang awakka kita nemu tu: enti orang ke bempu rumah nemu maya penchuri datai, iya tentu deka bejaga enggai ke penchuri tama ngagai rumah iya. Kita pen enda tau enda mega besedia, laban Anak Mensia deka datai ba maya ti enda disangka kita.” Ku Peter bejaku, “Tuhan, kati Nuan madahka sempama tu ke kami, tauka ke semua orang?” Tuhan lalu bejaku, “Sapa ulun ke tetap ati sereta pintar, ke tau diasuh tuan iya ngemataka ulun iya, meri sida pemakai ba maya ti patut? Beberekat meh ulun nya ke ditemu tuan iya ngereja pengawa lebuh tuan iya datai! Enggau bendar Aku madah ngagai kita, tuan iya deka ngasuh iya ngemataka semua reta tengkira iya. Tang enti ulun nya bejaku dalam ati diri, ‘Tuan aku laun datai,’ lalu enti iya belabuh bepaluka sida ulun ti bukai, ke lelaki enggau ke indu, lalu makai ngirup lalu mabuk, tuan iya deka datai ba hari ti enda disangka iya, enggau ba jam ti enda ditemu iya, lalu mepat iya lalu ngasuh iya begulai enggau orang ke enda tetap ati. Ulun nya ke nemu utai ti dikedekaka tuan iya, tang enda nyendiaka diri tauka enda ngereja utai ti dikedekaka tuan iya, deka balat disipat. Tang ulun ke enda nemu utai ti dikedekaka tuan iya, lalu ngereja utai ti ngasuh iya patut kena sipat, deka disipat enda balat. Orang ke diberi mayuh, dipinta meri mayuh, lalu orang ke dikarapka ngemataka mayuh utai, deka dikarapka meri mayuh agi. “Aku datai laban Aku deka nyelup dunya tu ngena api. Naka meh pemanah enti sema dunya endang udah diselup! Aku bisi siti pemaptisa ti deka dikena maptisa Aku. Naka meh pemalat pemerinsa Aku sebedau pemaptisa nya tembu! Kati kita ngumbai Aku datai mai pemaik ngagai dunya? Ukai: Aku ukai datai mai pemaik, tang mai penyerekang. Belabuh ari diatu, orang lima iku diri sebilik deka beserekang, tiga ngelaban dua, lalu dua ngelaban tiga. Sida deka beserekang, apai ngelaban anak lelaki, lalu anak lelaki ngelaban apai, indai ngelaban anak indu, lalu anak indu ngelaban indai mentua indu ngelaban menantu indu, lalu menantu indu ngelaban mentua indu.” Iya mega nyebut ngagai orang mayuh, “Lebuh kita meda mua hari ayan tunga ke barat, kita lalu tekala nya nyebut, ‘Hari deka ujan,’ lalu hari amat ujan. Lalu lebuh ribut bepuput ari selatan, kita nyebut, ‘Angat hari sehari tu’, lalu hari amat angat. Kita tu orang ke pura-pura ngapa! Kita nemu nerangka gaya tanah enggau langit. Tang nama kebuah kita enda nemu nerangka tanda ke maya ti diatu? “Lalu nama kebuah kita enda nemu ngelala utai ti ngena? Lebuh kita mansang ngagai kot enggau orang ke deka bedawaka kita, kita enda tau enda, enggau naka ulih, nelesai laya kita enggau orang nya lebuh kita agi di rantau jalai, enggai ke iya ngirit kita ngagai hakim, lalu hakim nyerahka kita ngagai polis, lalu polis nutup kita dalam rumah jil. Aku madah ngagai kita, kita enda pansut ari rumah jil nya datai ke kita udah mayar semua duit ukum kita.” Lebuh maya nya sekeda orang ke bisi dia madah ngagai Jesus pasal darah orang Galili ti udah dichampurka Pilate enggau piring sida. Jesus lalu nanya sida, “Kati kita ngumbai orang Galili nya diperinsaka baka nya laban sida balat agi bedosa ari orang Galili ti bukai? Aku madah ngagai kita, ukai baka nya; tang enti kita enda nesal ati ke dosa kita, semua kita deka mati baka sida. Tauka orang ke lapan belas iku ke mati lebuh Menara Siloam runtuh ninggang sida -- kati kita ngumbai sida nya udah balat agi ngereja penyalah ari semua orang bukai ke diau di Jerusalem? Aku madah ngagai kita, ukai baka nya; tang enti kita enda nesal ati ke dosa kita, semua kita deka mati baka sida.” Udah nya Iya lalu madahka sempama tu: “Orang siku nanam sepun kayu ara ba kebun anggur iya. Iya datai deka ngiga buah ba kayu ara nya, tang nadai tetemuka buah dia. Nya alai iya lalu bejaku ngagai tukang kebun, ‘Peda nuan, tu ketiga taun aku udah datai begigaka buah ba kayu ara tu, tang aku nadai kala tetemuka buah. Tebang iya! Nama guna nejuka iya masau tanah nya ngapa?’ Tukang kebun nya lalu nyaut, ‘Awakka iya dia setaun da agi, tuan. Aku deka nyangkul ngelingi pun iya, lalu meri iya baja. Enti iya bebuah taun baru tu ila, manah meh nya. Tang enti iya enda, nuan tau nebang iya.’ ” Nyadi sekali, Jesus ngajar dalam sebuah balai gempuru lebuh hari Sabat. Dalam balai gempuru nya bisi siku indu ke dikeduan roh ti jai lapan belas taun. Iya balat amat bungkuk, lalu enda ulih bediri rurus. Lebuh Jesus meda iya, Jesus lalu ngangauka iya ke mua, lalu bejaku ngagai iya, “Endu, nuan udah dilepaska ari penyakit nuan!” Lebuh Iya ngengkahka jari atas indu nya, indu nya lalu tekala nya bediri rurus lalu muji Allah Taala. Tang kepala balai gempuru nya pedis ati laban Jesus udah ngeraika orang nya lebuh hari Sabat, lalu ku iya majak bejaku ngagai orang mayuh, “Kitai bisi enam hari alai kitai gawa. Datai meh kitai lebuh hari nya lalu digeraika, ukai kena hari Sabat.” Tang Tuhan nyaut iya, “Kita tu orang ke pura-pura ngapa! Kati kita enda muka tali jelu sapi tauka keledai kita, mai iya pansut ari bansal, lalu meri iya ngirup lebuh hari Sabat? Kati indu tu, ke anak Abraham, ke udah ditanchang Sitan lapan belas taun, enda tau dilepaska ari tanchang nya lebuh hari Sabat?” Lebuh Iya nyebut nya, semua orang ke nyakal Iya malu magang. Semua orang lalu rami gaga ati ke semua utai ti nyelai ti udah dikereja Iya. Iya lalu bejaku, “Baka ni ku gaya Perintah Allah Taala? Ngagai apa Aku mandingka iya? Iya baka igi mustard, ti dibai orang siku lalu ditanam iya ba umai iya. Mustard nya tumbuh, lalu nyadi kayu ti besai, lalu burung begagaka tansang ba dan iya.” Jesus lalu bejaku baru, “Ngagai apa Aku mandingka Perintah Allah Taala? Iya baka ragi ti diambi siku indu lalu dichampurka iya enggau empat puluh liter tepung, datai ke semua tepung nya nyau kembai magang.” Jesus bejalai nengah nengeri enggau genturung pendiau, ngajar orang, lebuh Iya benung mansang ngagai Jerusalem. Siku orang nanya Iya, “Tuan, kati semina mimit aja orang deka diselamatka?” Ku Iya bejaku ngagai sida, “Enggau naka ulih tama nengah pintu ti sempit, laban, Aku madah ngagai kita, mayuh orang deka nguji tama, tang enda ulih. Lebuh orang ke bempu rumah nya udah angkat lalu nikupka pintu, lalu kita belabuh bediri di luar, nekung pintu, lalu bejaku, ‘Tuan, buka pintu ke kami,’ iya deka nyaut kita, ‘Aku enda nemu ari ni penatai kita!’ Udah nya kita lalu belabuh nyebut, ‘Kami udah makai ngirup enggau nuan, lalu nuan udah ngajar ba sebelah jalai raya kami!’ Tang iya deka nyebut, ‘Aku enda nemu ari ni penatai kita. Rari ari aku, semua kita ke ngereja penyai!’ Kita deka nyabak lalu begerit ngeli lebuh kita meda Abraham, enggau Isak enggau Jakop enggau semua sida nabi dalam Perintah Allah Taala, lalu kita empu dibuai ke luar. Udah nya orang deka datai ari timur, ari barat, ari utara enggau ari selatan, lalu makai dalam Perintah Allah Taala. Orang ke dudi deka nyadi dulu, lalu orang ke dulu, deka nyadi dudi.” Lebuh maya nya, sekeda orang Parisi datai ngagai Jesus lalu bejaku ngagai Iya, “Angkat Nuan ari tu, laban Herod deka munuh Nuan.” Jesus lalu bejaku ngagai sida, “Padahka jaku Aku tu ngagai munsang nya: ‘Dinga nuan, Aku muru antu, lalu ngeraika orang ke sakit sehari tu enggau pagila, lalu ba hari ti ketiga, Aku deka nembuka pengawa Aku.’ Tang Aku enda tau enda majakka pejalai Aku sehari tu, enggau pagila, enggau lusa, laban nadai nabi kala mati ari luar Jerusalem. “O Jerusalem, Jerusalem, nengeri ti munuh sida nabi, lalu nuku ngena batu bala seruan ke dikirumka Allah Taala ngagai nuan! Berapa penyuah Aku udah deka ngempuruka nembiak nuan, baka indu manuk ti ngempuruka anak di baruh sayap iya, tang nuan enggai! Peda nuan, Rumah Sembiang nuan deka ditinggalka nadai orang nguan. Lalu Aku madah ngagai nuan, nuan nadai agi meda Aku, nyentuk ngagai maya nuan nyebut, ‘Beberekat meh Iya ke datai dalam nama Tuhan!’ ” Nyadi sekali, lebuh hari Sabat, Iya mansang makai ngagai rumah siku tuai orang Parisi, lalu sida bebendar nengkilaka Iya. Lebuh maya nya siku lelaki ke sup kaki jari, bisi di mua Iya. Jesus lalu nanya ngagai sida pengajar Adat enggau orang Parisi, “Kati kitai tau ngeraika orang lebuh hari Sabat, tauka enda?” Tang sida enda bemunyi. Nya alai Jesus megai orang nya, lalu ngeraika iya. Iya lalu ngasuh orang nya pulai. Iya lalu bejaku ngagai sida, “Enti anak kita, tauka jelu sapi kita labuh ngagai telaga lebuh hari Sabat, enda ke kita deka tekala nya narit iya pansut?” Sida lalu enda ulih nyaut nya. Lebuh Jesus meda chara sekeda bala pengabang milih endur ti pemadu manah, Iya lalu madahka sempama tu ngagai sida, “Lebuh orang ngambi kita ngabang ngagai gawai tikah, anang duduk ba endur ti pemadu manah, enggai ke orang ke tinggi agi pangkat ari kita bisi diambi ngabang, lalu orang ke ngambi kita ngabang, deka datai lalu nyebut enggau nuan, ‘Awakka iya duduk ditu,’ lalu nuan deka malu, lalu duduk ba endur ti pemadu baruh. Tang lebuh kita diambi orang ngabang, mansang ngagai endur ti pemadu baruh lalu duduk dia, ngambika orang ke empu pengawa datai lalu bejaku ngagai nuan, ‘Unggal, duduk ke atas kitu ke agi.’ Nya baru nuan dibasa semua orang ke sama duduk ba mija nya enggau nuan. Laban semua orang ke ngeninggika diri, deka dikemaruhka, lalu orang ke ngemaruhka diri, deka ditinggika.” Lalu ku Iya bejaku ngagai orang ke mai Iya makai, “Lebuh nuan ngambi orang ngabang ngagai pengerami makai besai, anang ngambi pangan tauka menyadi lelaki, tauka kaban belayan nuan, tauka pangan nuan ke kaya, enggai ke sida ngambi nuan ngabang, lalu malas pemanah nuan. Tang lebuh nuan nyendiaka pengerami makai besai, ambi ngabang orang ke seranta, ke kait-kupit, ke lemi, enggau ke buta. Nya baru nuan deka bulih berekat, laban sida enda ulih malas pemanah nuan. Nuan deka dibayar lebuh orang ke lurus diangkatka ari mati.” Lebuh siku ari bala pengabang ninga jaku nya, iya lalu bejaku ngagai Jesus, “Beberekat meh orang ke deka makai dalam Perintah Allah Taala!” Jesus lalu nyebut ngagai iya, “Nyadi sekali siku orang nyendiaka pengerami makai besai, lalu ngambi mayuh amat orang ngabang. Lebuh pengerami nya baru deka belabuh, iya lalu ngasuh bala ulun iya madahka orang ke udah diambi ngabang, ‘Datai meh, laban semua utai udah sedia magang diatu.’ Tang semua sida bela belabuh begigaka tegal ngambika sida enda datai. Iya ti keterubah madah ngagai ulun nya, ‘Aku baru udah meli sebidang tanah, lalu aku enda tau enda meda tanah nya. Aku minta ampun, laban aku enda ulih datai.’ Ku siku ti bukai bejaku, ‘Aku baru udah meli lima pasang sapi, lalu aku diatu deka ngujika sida. Aku minta ampun, laban aku enda ulih datai.’ Ku siku ti bukai bejaku, ‘Aku baru udah bebini, nya alai aku enda ulih datai.’ Nya alai ulun nya pulai, lalu madah ngagai tuan iya. Tuan iya lalu pedis ati lalu bejaku ngagai ulun iya, ‘Alai nuan mansang ngagai jalai raya, enggau ngagai jalai ti mit di nengeri, lalu bai kitu orang ke seranta, ke kait-kupit, ke buta enggau ke enda ulih bejalai.’ Ulun nya lalu madah ngagai tuan iya, ‘Atur nuan udah dipejalaika aku, tuan, tang agi bisi endur.’ Tuan nya lalu bejaku ngagai ulun nya, ‘Alai nuan mansang ngagai jalai raya enggau ngagai jalai ti mit, lalu pejalka orang datai, ngambika rumah aku penuh. Laban, aku madah ngagai kita, nadai siku orang ke diambi ngabang deka nyepi pemakai aku!’ ” Nyadi sekali, mayuh amat orang bejalai enggau Iya. Iya nguing lalu bejaku ngagai sida, “Barang sapa datai ngagai Aku lalu enda lebih agi rindu ke Aku ari iya ke rindu ke apai, indai, bini enggau anak, menyadi lelaki enggau menyadi indu, indah seput iya empu, enda tau nyadi murid Aku. Barang sapa enda ngesan regang diri empu lalu nitihka Aku, enda tau nyadi murid Aku. Laban sapa ari bala kita ke deka ngaga sebuah menara, enda dulu ngira ungkus utai nya, ngambika iya nemu sekalika iya bisi duit kena nembuka pengawa nya? Enggai ke lebuh batu pemun udah didudukka, iya enda tetembuka pengawa nya, lalu semua orang ke meda nya deka ngeleseka iya munyi tu, ‘Ngemunka pengawa, ulih, tang nembuka pengawa, enda ulih!’ Tauka sapa raja ke deka nyerang raja siku, enda dulu duduk lalu ngira enti iya ulih ngalahka dua puluh ribu iku soldadu munsuh ngena sepuluh iku soldadu iya empu? Enti iya enda ulih, iya deka ngasuh bala seruan iya betemu enggau raja nya lebuh iya agi jauh, lalu mai iya bebaik.” Nya alai, baka nya mega kita: nadai siku kita tau nyadi murid Aku enti kita enda ngelengkaka semua reta tengkira kita. “Garam endang manah, tang enti iya nadai agi masin, baka ni ku jalai ngaga iya masin baru? Iya enda ulih dikena ngasuh tanah ami, tauka digaga nyadi baja, tang dibuai. Awakka orang ke bisi pending, ninga.” Nyadi semua pengumpul chukai enggau orang ke bedosa, datai ngagai Jesus, deka mendingka Iya. Orang Parisi enggau sida pengajar Adat lalu belabuh mut-mut. Ku sida, “Orang tu nyambut orang ke bedosa, lalu makai enggau sida!” Nya alai Iya madahka sempama tu ngagai sida: “Enti sema siku ari bala kita bisi seratus iku bedus, lalu siku bedus nya lenyau, enda ke iya deka ninggalka semilan puluh semilan iku bedus ti bukai ba padang, lalu ngiga siku ti lenyau, datai ke iya nyau tetemuka iya? Lebuh iya udah tetemuka bedus nya, iya ngesan iya enggau ati ti gaga. Lalu lebuh iya datai di rumah, iya ngangauka bala pangan iya enggau orang ke berimbai pendiau enggau iya, lalu bejaku ngagai sida, ‘Aram rami gaga enggau aku, laban aku udah tetemuka bedus aku ti lenyau.’ Nya alai Aku madah ngagai kita, orang di serega din deka lebih agi rami gaga ati lebuh siku ari orang ke bedosa tu nesal ati, ari ke gaga ke semilan puluh semilan iku orang ke lurus ke enda ibuh nesal ati. “Tauka, enti sema siku indu bisi sepuluh singkap duit pirak, lalu sesingkap lenyau, enda ke iya deka nungkun lampu, nyapu rumah nya, lalu bebendar ngiga duit nya datai ke iya nyau tetemuka duit nya? Lebuh iya udah tetemuka duit nya, iya lalu ngangauka bala pangan iya enggau orang ke berimbai pendiau enggau iya, ku iya, ‘Aram rami gaga ati enggau aku laban aku udah tetemuka duit aku ti lenyau.’ Nya alai Aku madah ngagai kita, baka nya meh bala melikat Allah Taala deka rami gaga ati ke siku orang ke bedosa ke nesal ati.” Lalu ku Iya bejaku, “Orang siku bisi dua iku anak lelaki. Anak iya ke biak bejaku enggau apai iya, ku iya, ‘Apai, beri aku semua ungkup aku ari reta tengkira kitai.’ Orang nya lalu bedua reta tengkira iya ngagai anak iya ke dua iku nya. Dua tiga hari udah bekau nya, anak iya ke biak ngempuruka semua reta tengkira iya, lalu bejalai ngagai menua ti jauh, lalu masau reta tengkira iya idup ngena chara ti enda menuku. Lebuh semua reta iya udah abis, lapar pungkang lalu nyadi di serata menua nya, lalu iya belabuh suntuk. Nya alai iya makai gaji ba orang siku di menua nya. Orang nya lalu ngasuh iya gawa ba umai iya, engkani babi. Iya tetenguk amat deka ngisi perut iya ngena asi babi, tang nadai ga orang meri iya utai diempa. Tang lebuh iya nyau sedarka pemeli diri, iya lalu bejaku, ‘Semua orang gaji apai aku diberi pemakai lebih ari chukup, tang aku ditu mati lapar! Aku deka angkat lalu pulai ngagai apai aku, lalu bejaku ngagai iya, “Apai, aku udah bedosa ngelaban serega enggau ngelaban nuan. Aku enda patut agi dikumbai anak nuan. Gaga aku nyadi orang gaji nuan.” ’ Nya alai iya angkat lalu pulai ngagai apai iya. Tang lebuh iya agi jauh ari rumah, apai iya tepedaka iya, lalu sinu ati ke iya. Iya belanda lalu merap iya, lalu nyium iya. Anak iya nya lalu bejaku ngagai iya, ‘Apai, aku udah bedosa ngelaban serega enggau ngelaban nuan. Aku enda patut agi dikumbai anak nuan.’ Tang ku apai iya bejaku ngagai bala ulun iya, ‘Bai jampat baju panjai ti pemadu manah, lalu rasukka ba iya. Rasukka tinchin ba tunjuk iya, enggau selipar ba kaki iya. Ambi lalu sayat anak sapi ti pemadu gemu. Kitai deka makai selamat! Laban anak aku tu udah mati, tang diatu iya idup baru. Iya udah lenyau, tang diatu iya udah ditemu.’ Sida lalu makai selamat. “Lebuh maya nya, anak tuai iya agi di umai. Lebuh iya pulai ari umai, lalu datai semak rumah, iya ninga munyi musik enggau munyi orang ke betanda. Iya lalu ngangauka siku ulun, lalu nanyaka reti utai nya. Ku ulun nya nyaut, ‘Menyadi nuan udah datai, lalu apai nuan udah nyayat anak sapi ti pemadu gemu, laban menyadi nuan udah pulai enggau selamat.’ Iya lalu ringat lalu enggai tama. Apai iya pansut, lalu belabuh ngumbuk iya. Tang ku iya nyaut apai iya, ‘Dinga nuan! Betaun-taun aku udah gawa ke nuan baka ulun, lalu aku nadai udah kala enda ngasika nuan. Taja pia, nuan nadai kala meri aku anak kambin, siku pen nadai, kena aku makai selamat enggau pangan aku. Tang lebuh anak nuan tu datai ditu, ke udah masau semua reta tengkira nuan enggau indu sundal, nuan nyayat anak sapi ti gemu ke iya!’ Ku apai iya bejaku ngagai iya, ‘Anak, nuan endang seruran enggau aku, lalu semua utai ti dikemisi aku endang enggi nuan magang. Tang kitai enda tau enda makai selamat lalu rami gaga ati, laban menyadi nuan tu udah mati, lalu diatu iya udah idup baru. Iya udah lenyau, lalu diatu iya udah ditemu.’ ” Jesus lalu bejaku enggau sida murid Iya, “Siku orang kaya bisi siku pemesai ke ngemataka reta iya. Orang bisi bejaku madahka pemesai nya masau duit tuan iya. Orang kaya nya lalu ngangauka pemesai nya, lalu bejaku ngagai iya, ‘Nama utai tu ti didinga aku pasal nuan? Padahka ngagai aku jalai nuan udah ngemataka reta tengkira aku, laban nuan enda tau agi ngemataka reta tengkira aku.’ Pemesai nya lalu bejaku dalam ati diri, ‘Tuan aku deka muai aku ari pengawa. Nama utai ti patut dikereja aku? Aku enda kering nyangkul, lalu aku malu minta sedekah. Tu utai ti deka dikereja aku, ngambika lebuh aku dibuai ari pengawa, orang deka ngelaluka aku ngagai rumah sida.’ Nya alai iya ngangauka siku-siku orang ke berutang ba tuan iya. Iya lalu bejaku enggau orang ke terubah datai, ‘Berapa utang nuan ba tuan aku?’ Orang nya lalu nyaut, ‘Seratus tung minyak kana.’ Lalu ku pemesai nya bejaku ngagai iya, ‘Ambi surat utang nuan tu, duduk, lalu tuliska lima puluh.’ Udah nya pemesai nya nanya siku ti bukai, ‘Berapa pemayuh utang nuan?’ Orang nya lalu nyaut, ‘Seribu pikul gandum.’ Pemesai nya lalu bejaku, ‘Ambi surat utang nuan tu, lalu tuliska lapan ratus.’ Tuan iya lalu muji pemesai ke enda betul ati nya ketegal pemintar iya ngereja utai, laban orang dunya tu pintar agi ngatur utai ti mai penguntung ngagai sida empu ari nembiak penampak. Lalu Aku madah ngagai kita, gaga orang nyadika pangan kita ngena pengaya dunya, ngambika lebuh utai nya udah abis, kita deka diterima ke dalam rumah ti meruan belama iya. Barang sapa tau dikarapka ngemataka utai ti mimit, tau mega dikarapka ngemataka mayuh utai, lalu orang ke enda tau dikarapka ngemataka pekara ti mit, enda mega tau dikarapka ngemataka pekara ti besai. Nya alai, enti kita enda tau dikarapka ngemataka pengaya dunya, sapa deka ngarapka kita ngemataka pengaya ti bendar? Lalu enti kita enda tau dikarapka ngemataka utai orang bukai, sapa deka meri kita utai ti endang enggi kita? “Nadai orang ulih betuaika dua iku tuan, laban iya deka begedika siku lalu rinduka siku, tauka angkunka siku, lalu mechat siku. Kita enda ulih betuaika Allah Taala enggau duit.” Lebuh orang Parisi, ke angkunka duit, ninga semua utai nya, sida lalu ngeleseka Jesus. Nya alai Iya lalu bejaku ngagai sida, “Kita tu orang ke belurus diri empu di mua orang mayuh, tang Allah Taala nemu ati kita; laban utai ti dikangkunka mensia, nya utai ti dipegedika Allah Taala. “Adat enggau jaku ti ditulis sida nabi mengkang dikena nyentuk ngagai maya John. Tang berengkah ari maya John, Berita Manah pasal Perintah Allah Taala dipadahka ngagai orang mayuh, lalu semua orang bela majakka diri tama ngagai Perintah nya. Tang mudah agi serega enggau dunya lesap, ari siti titik dalam Adat tu lenyau. “Barang sapa muai bini, lalu jadi enggau indu bukai, butang. Lalu lelaki ke jadi enggau indu ke udah dibuai laki, butang. “Nyadi dia bisi siku orang kaya. Iya bekenaka pekayan ti berega, lalu diau makai nyamai tiap hari. LLalu ba mua pintu orang nya bisi siku orang ke seranta, ke abis dibalut rumbak. Nama iya Lasarus. Lasarus bisi amat ati deka makai pemakai ti labuh ari mija orang kaya nya. Indah ukui deh datai lalu nilat rumbak iya. Orang ke seranta nya mati, lalu dibai bala melikat ngambika iya diau enggau Abraham. Orang kaya nya mega mati, lalu dikuburka. Di dunya pemati, alai iya ke balat kena perinsa, iya engkadah lalu tepedaka ari jauh Abraham duduk ngimbai Lasarus. Orang kaya nya lalu ngangau, ‘Apai Abraham! Kasihka aku, lalu asuh Lasarus datai kitu ngambika iya nyepuhka ujung tunjuk iya ngagai ai, lalu ngenyelapka dilah aku, laban aku pedis amat merinsa dalam api tu!’ Tang ku Abraham bejaku, ‘Ingat, anak, lebuh nuan agi idup, nuan diberi semua utai ti manah, tang Lasarus diberi semua utai ti jai. Tang diatu iya lantang diau ditu, tang nuan pedis merinsa. Nambahka nya, ba entara kitai bisi siti darung ti dalam, ngambika orang ke deka meraka ari tu ngagai kita, enda ulih, lalu orang ke deka meraka ari endur kita ngagai kami, pen enda mega ulih.’ Ku orang kaya nya bejaku, ‘Enti pia, apai, aku minta nuan ngirumka Lasarus ngagai rumah apai aku, laban aku bisi lima iku menyadi lelaki, ngambika iya meri jaku tangkan ngagai sida, enggai ke sida datai ba endur pemerinsa tu.’ Abraham lalu nyaut, ‘Sida bisi Moses enggau sida nabi. Awakka bala menyadi nuan patut mendingka sida.’ Ku orang kaya nya bejaku, ‘Ukai baka nya, apai Abraham! Enti siku orang ke angkat ari mati mansang ngagai sida, nya baru sida deka nesal ati ke dosa sida.’ Tang ku Abraham, ‘Enti sida enggai mendingka Moses enggau sida nabi, sida pen enggai mega arap enti orang siku angkat ari mati.’ ” Lalu ku Iya bejaku ngagai sida murid Iya, “Utai ti ngasuh orang bedosa endang deka datai, tang tulah orang ke ngasuh dosa nya datai! Manah agi enti batu kisar ditanchangka ba rekung iya, lalu iya dibuai ngagai tasik, ari ke nejuka iya ngasuh siku ari orang ke pemadu mit tu bedosa. Bejaga kita! “Enti menyadi nuan bedosa, rara iya, lalu enti iya nesal ati, ampun iya. Lalu enti iya bedosa ngelaban nuan tujuh kali dalam sehari, lalu datai ngagai nuan tujuh kali, lalu iya nyebut, ‘Aku nesal ati ke penyalah aku,’ nuan enda tau enda ngampun iya.” Ku bala rasul bejaku ngagai Tuhan, “Tambahka pengarap kami.” Tuhan lalu nyaut, “Enti kita bisi pengarap ngemesai igi ensabi, kita ulih bejaku ngagai kayu tu, ‘Awakka nuan dichabut, lalu ditanam ba tasik!’ iya deka ngasika kita. “Sapa ari bala kita deka bejaku ngagai ulun iya ke baru pulai ngeradu tanah tauka ngibun bedus, ‘Datai kitu enggau jampat lalu duduk makai’? Enda ka kita deka bejaku ngagai ulun iya, ‘Sediaka pemakai ke aku. Rasukka pekayan nuan, lalu intu aku lebuh aku makai ngirup. Udah nya baru nuan tau makai’? Kati nuan meri terima kasih ngagai ulun nya ketegal iya udah ngereja pengawa iya? Kita pen baka nya mega. Lebuh kita udah ngereja semua utai ti diasuh kereja kita, sebut, ‘Kami tu ulun ke nadai guna. Kami semina udah ngereja pengawa ti patut dikereja kami.’ ” Lebuh Jesus benung majakka pejalai Iya ngagai Jerusalem, Iya bejalai nengah menua entara menua Samaria enggau menua Galili. Lebuh Iya tama ngagai sebuah genturung pendiau, sepuluh iku orang ke sakit lan mansang ngagai Iya. Sida bediri ari jauh lalu ngangau enggau nyawa ti inggar. Ku sida, “Jesus! Pengajar! Kasihka kami!” Lebuh Iya tepedaka sida, Iya lalu bejaku ngagai sida, “Mupuk kita, lalu asuh sida imam meresa kita.” Lebuh sida benung di rantau jalai, sida lalu nyadi tuchi. Lebuh siku ari bala sida meda diri udah gerai, iya nikal, lalu muji Allah Taala enggau nyawa ti inggar. Iya nyungkurka diri di kaki Jesus, lalu meri terima kasih ngagai Iya. Lelaki nya orang Samaria. Jesus lalu nanya, “Ukai enda sepuluh iku digeraika? Kini ke tunga sida ke semilan iku? Kati sida nadai nikal kitu lalu muji Allah Taala, kelimpah ari orang kampar tu?” Iya lalu bejaku ngagai orang Samaria nya, “Angkat nuan, lalu mupuk. Pengarap nuan udah ngeraika nuan.” Nyadi sekali orang Parisi nanyaka kemaya Perintah Allah Taala deka datai. Iya lalu nyaut sida, “Perintah Allah Taala ukai datai ngena tanda ti ulih dipeda. Lalu nadai mega orang nyebut, ‘Peda kita! Tu iya ditu!’ tauka, ‘Nyin iya!’, laban iya ti bendar Perintah Allah Taala bisi ba tengah-tengah kita.” Iya lalu bejaku ngagai sida murid, “Maya deka datai alai kita keran deka meda siti ari hari Anak Mensia, tang kita enda ulih meda hari nya. Orang deka nyebut ngagai kita, ‘Peda kita! Nyin iya!’ tauka, ‘Tu iya!’ Anang kita kia lalu anang nitihka sida. Laban baka kilat ti nyelar, lalu langit terang ari tisi siti ngagai tisi siti, baka nya meh gaya Anak Mensia lebuh hari Iya ila. Tang Iya enda tau enda dulu natka mayuh macham pemerinsa, lalu ditulak orang ke rebak diatu. Baka lebuh maya Noah menya, baka nya mega utai deka nyadi lebuh hari Anak Mensia ila. Semua orang majak makai ngirup, jadi melaki-bini, nikah, nyentuk ngagai hari Noah tama ke dalam bandung, lalu ai bah datai lalu ngerusak semua sida. Baka lebuh maya Lot menya. Semua orang majak makai ngirup, bebeli bejual, betanam sereta begagaka utai, tang lebuh Lot ninggalka nengeri Sodom, api enggau merirang lalu labuh ari langit lalu ngerusak semua sida. Nya meh gaya utai ti deka nyadi ba hari Anak Mensia dipandangka. Ba hari nya ila, orang ke ba atas perabung enda tau nurun lalu ngambi utai diri. Baka nya mega orang ke di umai: sida enda tau pulai ke rumah. Kingatka bini Lot! Barang sapa deka ngidupka nyawa diri, deka ngelenyauka iya, tang barang sapa ngelenyauka nyawa diri, deka ngidupka iya. Aku madah ngagai kita, lebuh malam nya, dua iku orang deka begulai tinduk. Siku deka ditabanka, lalu siku ditinggalka. Dua iku indu deka begulai ngisar. Siku deka ditabanka, lalu siku deka ditinggalka.” Dua iku orang gawa di umai. Siku deka ditabanka, lalu siku deka ditinggalka. Sida murid Iya lalu nanya Iya, “Dini, Tuhan?” Disaut Jesus, “Dia alai bangkai, dia meh endur alai burung ti bepakaika bangkai deka begempuru.” Iya lalu madahka siti sempama ngagai sida kena Iya madahka sida enda tau enda seruran besampi, lalu enda lemi semengat. Ku Iya, “Dalam sebuah nengeri bisi siku hakim ke enda nangika Allah Taala, sereta enda bebasaka orang. Lalu dalam nengeri nya mega bisi indu balu siku, ke seruran datai lalu bejaku ngagai iya, ‘Tulung aku ngelaban munsuh aku.’ Hakim nya lama enggai nulung iya, tang udah nya iya lalu berunding, ‘Taja pen aku enda nangika Allah Taala, sereta enda bebasaka orang, tang laban indu tu balat ngiruh aku, aku deka nulung iya, enggai ke iya seruran datai kitu lalu ngelelakka aku ngapa!’ ” Lalu ku Tuhan bejaku, “Dingaka utai ti disebut hakim ti jai nya. Enda ka Allah Taala deka nulung bala nembiak Iya, ke nyabak ngangauka Iya siang malam? Kati Iya deka ngerindang diri datai nulung sida? Aku madah ngagai kita, Iya deka nulung sida enggau jampat. Tang lebuh Anak Mensia datai, kati Iya deka tetemuka orang ke arap di dunya tu?” Iya mega madahka sempama tu ngagai orang ke ngumbai diri lurus lalu mechat orang bukai. “Dua iku orang mansang ngagai Rumah Sembiang deka besampi, siku orang Parisi, lalu siku pengumpul chukai. Orang Parisi bediri kediri, lalu besampi munyi tu, ‘Allah Taala, aku meri terima kasih ngagai Nuan, laban aku enda baka orang bukai ke penchuri, ke jai, ke butang, tauka baka pengumpul chukai nyin. Aku bepasa dua hari dalam seminggu. Aku meri sepuluh peratus ari semua utai ti ulih aku.’ Tang pengumpul chukai nya bediri ari jauh, enda berani engkadah ke langit, tang mandam dada diri, ku iya, ‘Allah Taala, kasihka aku ke bedosa tu!’ Aku madah ngagai kita, lebuh seduai iya pulai ke rumah, ukai orang Parisi nya ke lurus, tang pengumpul chukai nya ke lurus di mua Allah Taala. Laban semua orang ke ngeninggika diri deka dikemaruhka, lalu orang ke ngemaruhka diri deka ditinggika.” Sekeda orang mai sida ke mit ngagai Jesus ngambika Iya negu sida. Lebuh sida murid meda nya, sida lalu balat amat ngerara orang nya. Tang Jesus ngangauka sida anak mit nya ngagai Iya, lalu bejaku, “Awakka sida anak mit datai ngagai Aku lalu anang nagang sida, laban Perintah Allah Taala diempu orang ke baka sida tu. Enggau bendar Aku madah ngagai kita, barang sapa enda nerima Perintah Allah Taala baka anak mit, enda ulih tama ngagai Perintah nya.” Siku tuai orang Judah lalu nanya Iya, “Pengajar ti badas, nama utai ti enda tau enda dikereja aku ngambika aku bulih pengidup ti meruan belama iya?” Jesus lalu bejaku ngagai iya, “Nama kebuah nuan ngumbai Aku badas? Nadai siku ti badas, kelimpah ari Allah Taala siku aja. Nuan nemu pesan: ‘Anang butang. Anang munuh orang. Anang ngenchuri. Anang besaksi bula. Bebasaka apai enggau indai nuan.’ ” Orang nya lalu nyaut, “Aku udah nitihka semua pesan nya kenyau ari aku agi biak.” Lebuh Jesus ninga nya, Iya lalu bejaku ngagai orang nya, “Siti agi utai apin dikereja nuan. Jual semua reta tengkira nuan, lalu beri duit nya ngagai orang ke seranta. Nya baru nuan deka bisi pengaya di serega. Udah nya baru nuan datai lalu nitihka Aku.” Tang lebuh orang nya ninga nya, iya tusah ati, laban iya kaya bendar. Jesus merening ngagai iya, lalu bejaku, “Mar amat meh orang ke kaya tama ngagai Perintah Allah Taala! Nyamai agi jelu unta tama nengah lubang jarum, ari orang ke kaya tama ngagai Perintah Allah Taala.” Orang ke ninga nya lalu bejaku, “Enti pia, sapa ulih diselamatka?” Jesus lalu nyaut, “Utai ti enda ulih dikereja mensia, ulih dikereja Allah Taala.” Peter lalu bejaku, “Peda Nuan! Kami udah ninggalka rumah kami lalu nitihka Nuan.” Jesus lalu bejaku ngagai sida, “Enggau bendar Aku madah ngagai kita, nadai orang ke udah ninggalka rumah, tauka bini, tauka menyadi lelaki, tauka apai indai, tauka anak, ketegal Perintah Allah Taala, enda nerima berapa kali lipat mayuh agi di dunya tu, enggau dunya ti deka datai, pengidup ti meruan belama iya.” Jesus lalu mai murid ke dua belas iku ke tisi, lalu bejaku ngagai sida, “Dinga kita! Kitai deka mansang ngagai Jerusalem, lalu semua utai ti ditulis sida nabi pasal Anak Mensia deka dikamatka. Laban Iya deka diserahka ngagai orang bansa bukai, lalu dikeduan, dipechat, lalu diludah. Lebuh sida udah nyipat Iya, sida deka munuh Iya, lalu ba hari ti ketiga Iya deka angkat idup baru.” Tang sida enda meretika utai nya. Iya ti bendar, utai ti disebut Iya udah dipelalaika ari sida, lalu sida enda nemu utai ti disebut Jesus. Lebuh Jesus datai semak Jeriko, siku orang ke buta bisi duduk ba tisi jalai raya, minta sedekah. Lebuh iya ninga bala orang mansa, iya lalu nanyaka utai ti nyadi. Sida lalu madah ngagai iya, “Jesus orang Nasaret benung mansa.” Iya lalu manjung, “Jesus! Anak David! Kasihka aku!” Orang ke di mua lalu balat amat ngasuh iya badu agi ragak. Tang iya manjung inggar agi, “Anak David! Kasihka aku!” Jesus lalu ngetu, lalu ngasuh orang mai orang ke buta nya ngagai Iya. Lebuh orang ke buta nya datai semak, Jesus lalu nanya iya, “Nama utai ti diasuh nuan kereja Aku ke nuan?” Iya lalu nyaut, “Tuhan, awakka aku ulih meda baru.” Jesus lalu bejaku ngagai iya, “Awakka nuan ulih meda! Pengarap nuan udah ngeraika nuan.” Orang nya lalu tekala nya ulih meda baru, lalu nitihka Jesus, ngemuliaka Allah Taala. Lebuh orang mayuh meda nya, semua sida lalu muji Allah Taala. Jesus lalu datai di Jeriko, tang Iya enda bemalam dia. Nyadi di nengeri nya bisi siku orang benama Sakius. Iya tu kepala orang ke ngumpul chukai, lalu iya orang ke kaya. Iya nguji meda sapa orang ke benama Jesus, tang laban orang kelalu mayuh, iya enda ulih meda Jesus, laban iya baruh. Nya alai iya lalu belanda dulu ari bala mayuh, lalu niki sepun kayu, deka meda Jesus, ke deka mansa. Lebuh Jesus datai ba endur nya, Iya engkadah, lalu bejaku enggau Sakius, “Nurun jampat, Sakius, laban aku enda tau enda diau ba rumah nuan sehari tu.” Nya alai Sakius lalu beguai-guai nurun, lalu gaga ati ngelaluka Jesus. Semua orang ke meda nya lalu belabuh mut-mut. Ku sida, “Iya nyadi temuai orang ke bedosa!” Sakius bediri lalu bejaku ngagai Tuhan, “Tuhan, aku deka meri setengah ari semua reta tengkira aku ngagai orang ke seranta, lalu enti aku bisi udah ngakal orang, aku deka mulaika utai nya empat kali lipat.” Jesus lalu bejaku ngagai iya, “Sehari tu pengelepas udah datai ba rumah tu, laban iya mega peturun Abraham. Laban Anak Mensia datai ngambika Iya ngiga lalu nyelamatka orang ke tesat.” Lebuh orang mayuh agi benung mendingka Iya bejaku, Iya lalu madahka siti sempama ngagai sida, laban Iya nyau datai semak Jerusalem, enggau laban sida ngumbai Perintah Allah Taala baru deka pegari. Nya alai ku Iya bejaku, “Siku orang ke tinggi pangkat bejalai ngagai menua ti jauh, ngambika iya dichiri nyadi raja, lalu udah nya pulai baru ngagai menua iya empu. Iya ngangauka sepuluh iku orang gaji iya, lalu meri sida sepuluh singkap duit emas. Lalu bejaku ngagai sida, ‘Aku ngasuh kita bedagang ngena duit tu nyentuk ngagai maya aku pulai kitu baru.’ Tang bala nembiak iya begedika iya, lalu sida ngasuh bala seruan nitihka iya, ku sida, ‘Kami enggai meda orang tu nyadi raja kami.’ Lebuh iya pulai, udah bekau iya ke dichiri nyadi raja, iya lalu ngasuh orang manggil orang gaji ke udah alai iya nyuaka duit, deka nemu untung ti udah ulih sida bedagang. Iya ke terubah datai lalu bejaku, “Tuan, sesingkap duit nuan udah bulih sepuluh singkap.’ Lalu ku iya bejaku ngagai orang nya, ‘Manah pengawa nuan. Nuan tu orang gaji ti manah! Laban nuan tau dikarapka ngemataka utai ti mimit, aku deka ngasuh nuan ngemataka sepuluh buah nengeri.’ Iya ti kedua datai lalu bejaku, ‘Tuan, sesingkap duit nuan udah bulih lima singkap.’ Lalu ku tuan iya bejaku ngagai iya, ‘Nuan deka ngemataka lima buah nengeri.’ Iya ti siku datai lalu bejaku, ‘Tuan, tu duit nuan. Aku mungkus duit tu ngena perecha, laban aku takutka nuan, laban nuan orang ke terit. Nuan ngambi utai ti ukai disimpan nuan, lalu ngetau utai ti ukai ditanam nuan.’ Ku tuan nya bejaku ngagai orang gaji nya, ‘Aku deka ngakim nuan ngena leka jaku nuan empu, nuan orang gaji ti jai! Nuan nemu aku endang terit, ngambi utai ti ukai disimpan aku, lalu ngetau utai ti ukai ditanam aku. Nya alai nama kebuah nuan enda nyimpan duit aku dalam bank, ngambika lebuh aku pulai kitu baru, aku ulih nerima iya sama enggau bungai iya?’ Udah nya iya lalu bejaku ngagai orang ke bediri semak dia, ‘Ambi duit nya ari iya, lalu beri ngagai iya ke bisi sepuluh singkap.’ (Tang ku sida bejaku ngagai iya, ‘Tuan, iya udah bisi sepuluh singkap!’) ‘Aku madah ngagai kita, genap iku orang ke bisi utai deka diberi mayuh agi, tang orang ke nadai utai, indah utai ti mimit ti dikemisi sida deh deka diambi ari sida. Nyadi pasal bala munsuh aku ke enggai nerima aku nyadi raja sida, bai sida kitu, lalu bunuh sida di mua aku!’ ” Lebuh Iya udah nyebut nya, Iya lalu bejalai dulu ari sida ngagai Jerusalem. Lebuh Iya datai semak Betpagi enggau Betani, ba bukit sigi ti dikumbai Bukit Kana, Iya ngasuh dua iku murid Iya bejalai dulu ari sida, ku Iya, “Alai seduai bejalai ngagai nengeri ti di mua nyin. Lebuh seduai tama ngagai nengeri nya, seduai deka nemu siku anak keledai ditanchang dia, ti nadai udah kala ditepan orang. Buka tali iya, lalu bai iya kitu. Enti orang nanya seduai, ‘Nama kebuah seduai muka tali jelu nya?’ sebut aja jaku tu, ‘Tuhan begunaka iya.’ ” Seduai iya mupuk, lalu nemu semua utai munyi ti udah dipadahka Jesus ngagai seduai iya. Lebuh seduai iya muka tali anak keledai nya, orang ke bempu jelu nya lalu bejaku ngagai seduai iya, “Nama kebuah seduai muka tali anak keledai nya?” Seduai iya lalu nyaut, “Tuhan begunaka iya.” Seduai iya lalu mai anak keledai nya ngagai Jesus, ngelempaika serayung seduai iya ba belakang jelu nya, lalu nulung Jesus nepan ba jelu nya. Lebuh Iya nepan keledai nya, orang mayuh lalu nganchau serayung sida ba jalai raya. Lebuh Iya nyau datai semak jalai ti nurun ari Bukit Kana, semua bala murid Iya belabuh gaga ati muji Allah Taala enggau nyawa ti inggar ketegal semua utai ti besai ti udah dipeda sida, ku sida, “Beberekat meh Raja ke datai dalam nama Tuhan! Pemaik di serega, enggau mulia di serega ti pemadu tinggi!” Sekeda orang Parisi ke dalam tekang bala mayuh lalu bejaku ngagai Iya, “Pengajar, asuh murid Nuan badu agi inggar!” Disaut Iya, “Aku madah ngagai kita, enti sida enda bemunyi, batu deka manjung.” Lebuh Iya nyau datai semak lalu meda nengeri nya, Iya nyabakka nengeri nya, ku Iya, “Naka meh pemanah, enti sehari tu nuan ngelala utai ti ulih mai pemaik ngagai nuan! Tang diatu utai nya dilalaika ari mata nuan! Maya deka datai alai bala munsuh nuan deka ngaga kuta tanah ngelingi nuan kena ngelulung nuan, lalu mekulka nuan. Sida deka ngerusak nuan, enggau orang ke diau dalam nuan, lalu sigi pen nadai mega batu ditejuka mengkang betusun dalam nuan, laban nuan enda ngelala maya Allah Taala datai ngagai nuan.” Iya lalu tama ngagai Rumah Sembiang, lalu belabuh muru orang ke bejual dia. Ku Iya bejaku ngagai sida, “Endang udah ditulis, ‘Rumah Aku deka nyadi rumah sembiang.’ Tang kita udah ngaga iya nyadi sarang perumpak.” Tiap hari Iya ngajar dalam Rumah Sembiang. Sida tuai imam, sida pengajar Adat, enggau bala tuai orang Judah majak begigaka jalai munuh Iya, tang sida nadai tetemuka jalai ngereja nya, laban semua orang mayuh majak mendingka Iya. Nyadi sekali, lebuh Jesus benung ngajar orang mayuh dalam Rumah Sembiang sereta nusui Berita Manah, sida tuai imam enggau sida pengajar Adat enggau bala tuai orang Judah, datai lalu bejaku ngagai Iya, “Padahka ngagai kami, nama kuasa ti dikena Nuan ngereja utai tu? Sapa meri Nuan kuasa nya?” Iya lalu nyaut sida, “Aku deka nanya kita siti tanya. Padahka ngagai Aku, Kati baptisa John datai ari serega tauka ari mensia?” Sida lalu belabuh berandauka nya enggau pangan diri. Ku sida, “Enti kitai nyebut, ‘Ari serega,’ Iya deka nyebut, ‘Nama kebuah kita enda arapka iya?’ Tang enti kitai nyebut, ‘Ari mensia,’ semua orang deka nuku kitai ngena batu, laban sida arapka John nya nabi.” Nya alai sida lalu nyaut madahka diri enda nemu penatai baptisa nya. Jesus lalu bejaku ngagai sida, “Aku pen enggai meh madah ngagai kita kuasa ti dikena Aku ngereja utai tu.” Iya lalu belabuh madahka sempama tu ngagai orang mayuh: “Orang siku numbuhka sebidang kebun anggur. Iya ngasuh orang nyua kebun nya, lalu udah nya iya pegi lama amat ngagai menua bukai. Lebuh maya ngetau buah anggur, Iya ngasuh siku ari bala ulun iya mansang ngagai orang ke nyua kebun nya, deka ngambi ungkup iya ari buah anggur nya. Tang bala orang ke nyua kebun nya malu ulun nya, lalu ngasuh iya pulai puang. Iya lalu ngirumka siku agi ulun. Tang iya mega dipalu sereta dikeleseka sida, lalu diburu sida pulai puang. Iya lalu ngirumka ulun ti ketiga. Sida ngemakalka iya, lalu muai iya ari kebun nya. Udah nya orang ke bempu kebun anggur nya bejaku, ‘Nama utai ti deka dikereja aku? Aku deka ngirumka anak tunggal aku. Nyangka sida deka bebasaka iya.’ Tang lebuh bala orang ke nyua kebun nya meda anak tunggal iya nya, sida lalu berandauka nya enggau pangan diri, ku sida, ‘Tu orang ke bempu waris. Aram kitai munuh iya, ngambika pesaka tu diempu kitai!’ Sida lalu muai iya ari kebun anggur nya, lalu munuh iya. Nama utai ti deka dikereja orang ke bempu kebun anggur nya ngagai bala orang ke nyua? Iya deka datai lalu munuh sida lalu nyerahka kebun nya ngagai orang bukai.” Lebuh orang mayuh ninga nya, sida lalu bejaku, “Enda patut!” Tang Jesus merening ngagai sida, lalu bejaku, “Enti pia, nama reti jaku ti ditulis tu: ‘Batu ti ditulak tukang rumah udah nyadi batu ti pemadu beguna.’ Genap iku orang ke labuh ninggang batu nya, deka redak, lalu batu tu deka ngeredakka orang ke ditinggang iya.” Lebuh sida pengajar Adat enggau sida tuai imam nemu Iya udah nyebut jaku sempama nya kena Iya ngelaban sida, sida nguji nangkap Iya tekala nya, tang sida takutka orang mayuh. Nya alai sida nengkilaka Iya, lalu ngirumka bala pematau, ti pura-pura ngaga diri baka ke manah ati, ngambika sida ulih nangkap Iya ketegal utai ti disebut Iya, lalu nyerahka Iya ngagai tuan gabenor. Nya alai sida nanya Iya, “Pengajar, kami nemu Nuan endang nyebut sereta ngajar utai ti ngena, lalu Nuan enda bedulika orang, tang ngajar utai ti bendar pasal jalai Allah Taala. Kati kitai tau mayar chukai ngagai Raja Besai, tauka enda?” Tang Iya nemu akal sida, lalu ku Iya bejaku ngagai sida, “Pandangka sesingkap duit ngagai Aku. Gambar sapa enggau nama sapa tu?” Sida lalu nyaut, “Enggi Raja Besai.” Ku Iya bejaku ngagai sida, “Enti pia, utai Raja Besai, beri ngagai Raja Besai, utai Allah Taala, beri ngagai Allah Taala.” Sida lalu enda ulih manjuk Iya ngena utai ti disebut Iya di mua orang mayuh. Sida balat alit ati ke saut Iya, lalu sida enda bemunyi. Udah nya sekeda orang Saduki datai ngagai Iya. Nyadi orang Saduki enda arapka pengangkat ari mati. Sida lalu nanya Iya, “Pengajar, Moses nulis ke kitai, enti laki mati ninggalka bini, tang nadai ninggalka anak, menyadi lelaki iya enda tau enda jadi enggau balu nya, ngambika seduai iya bisi anak ngarika menyadi iya ke udah mati. Nyadi sekali bisi tujuh iku lelaki diri menyadi. Iya ke tuai bebini, lalu mati, nadai anak. Menyadi ke lumur dua enggau ke lumur tiga jadi enggau indu nya, lalu baka nya mega semua tujuh iku sida bela mati nadai anak. Ke pengujung iya, indu nya mega mati. Lebuh pengangkat orang ari mati, sapa bempu bini nya? Laban semua sida tujuh bela udah ampit jadi enggau iya.” Jesus lalu bejaku ngagai sida, “Orang ke rebak diatu jadi enggau pangan diri, lalu nikah, tang orang ke dikira patut diau ba dunya ti jemah ila, sereta patut angkat ari mati, enda jadi melaki-bini tauka nikah. Iya ti bendar sida enda ulih mati agi, laban sida baka melikat lalu nyadi anak Allah Taala, laban sida udah diangkatka ari mati. Nyadi pasal pengangkat orang ari mati, indah Moses deh bisi nunjukka dalam cherita pasal babas ti laban api, ngumbai Tuhan nya Allah Taala Abraham, Isak, enggau Jakop. Allah Taala ukai Allah Taala ke orang ke mati, tang ke orang ke idup, laban ba Allah Taala semua orang idup magang.” Sekeda sida pengajar Adat lalu nyaut, “Manah saut Nuan, Pengajar!” Laban sida nadai berani nanya iya agi. Iya lalu bejaku ngagai sida, “Baka ni ku orang ngumbai Kristus peturun David? Laban David empu nyebut dalam bup Masmur, ‘Ku Tuhan bejaku enggau Tuhan aku: Duduk Nuan muak ari kanan Aku, datai ke Aku udah ngaga munsuh Nuan nyadika pelasar kaki Nuan.’ David ngumbai Iya Tuhan; nya alai baka ni ku Kristus tau nyadi peturun iya?” Iya lalu bejaku ngagai sida murid Iya di mua orang mayuh, “Bejaga ari sida pengajar Adat, ke rindu bejalai ngena baju ti panjai, lalu rindu ditabi orang ba sebelah pasar lalu milih penuduk ti pemadu manah dalam balai gempuru enggau ba pengerami makai besai. Sida ngambi ulih ba indu ke balu lalu ngerampas rumah sida, lalu pura-pura lama besampi! Sida deka nerima ukum ti besai agi!” Jesus malik lalu tepedaka bala orang ke kaya nepuka pemeri sida ngagai sarang wang Rumah Sembiang, lalu Iya mega tepedaka siku indu ke balu sereta seranta, nepuka dua singkap duit engkeraju. Ku Jesus bejaku, “Enggau bendar Aku madah ngagai kita, indu ke balu sereta seranta tu udah meri mayuh agi ari semua sida nya; laban semua sida meri ari laluh utai ti dikemisi sida, tang indu ke seranta tu udah meri semua utai ti dikena iya beridup.” Lebuh sekeda murid benung berandauka pasal Rumah Sembiang, pasal Rumah nya ti dilagu ngena batu ti berega, sereta enggau piring ti dienjuk ngagai Allah Taaa, Iya bejaku, “Pasal utai tu ti dipeda kita, maya deka datai alai batu tu nadai agi betusun baka tu; semua deka diruntuhka magang.” Sida lalu nanya Iya, “Pengajar, kemaya utai nya deka nyadi, lalu nama tanda ti nunjukka utai nya deka nyadi?” Ku Iya bejaku, “Bejaga, enggai ke orang nesatka kita; laban mayuh orang deka datai dalam nama Aku, lalu nyebut, ‘Aku tu meh Iya!’ enggau, ‘Maya nyau semak!’ Anang nitihka sida. Lebuh kita ninga pasal perang enggau pasal pengachau ngelaban perintah nyadi, anang takut; laban utai nya endang enda tau enda dulu nyadi, tang pengujung enda datai tekala nya.” Iya lalu bejaku ngagai sida, “Bansa deka beperang ngelaban bansa bukai, lalu menua deka beperang ngelaban menua bukai. Tanah berenyang deka balat nyadi, lalu lapar pungkang, enggau penyakit deka balat nyadi ba mayuh bengkah endur; lalu tanda ti balat ngenakutka sereta nyelai deka pegari ari langit. Tang sebedau semua utai nya nyadi, sida deka nangkap lalu merinsaka kita; sida deka nyerahka kita ngambika kita kena pechara dalam balai gempuru, lalu ditutup dalam rumah jil, lalu kita deka dibai ngagai raja enggau gabenor ketegal nama Aku. Tu deka meri kita peluang besaksi. Nya alai kita enda tau enda mutuska runding enggai dulu berundingka jalai kita deka nyaut, laban Aku deka meri kita jaku enggau penemu-dalam ti enda ulih disaut tauka disakal munsuh kita. Kita deka diserahka ulih apai indai kita, menyadi lelaki kita, kaban belayan kita, enggau pangan kita, lalu sekeda kita deka dibunuh sida. Kita deka dipegedika semua orang ketegal nama Aku. Tang selambar pen nadai meh buk kita deka lenyau. Ulih ati ti tan kita deka diselamatka. “Lebuh kita meda Jerusalem dikelulung bala soldadu, nya baru kita deka nemu nengeri nya deka dirusak enda lama da agi. Lebuh maya nya, orang ke diau di Judea enda tau enda rari ngagai bukit. Lalu orang ke di nengeri enda tau enda angkat ari nengeri nya, lalu orang ke di menua pesisir enda tau tama ngagai nengeri; laban nya ‘Hari Bebalas,’ kena ngamatka semua utai ti udah ditulis. Naka meh penusah indu ke ngandung, enggau indu ke nusuka anak lebuh maya nya! Laban penusah ti besai deka ninggang dunya, lalu pengeringat Allah Taala deka ninggang bansa tu. Sida deka dibunuh ngena pedang, lalu sekeda deka ditabanka nyadi orang tangkap ngagai semua menua, lalu Jerusalem deka dilunjak orang bansa bukai, nyentuk ngagai maya timpuh orang bansa bukai udah abis. “Tanda deka pegari ba mata hari, ba bulan enggau ba bintang, lalu semua bansa di dunya deka tusah sereta irau ninga pemalat munyi segum tasik enggau pangka gelumbang. Orang deka luput laban takut, irauka utai ti deka ninggang dunya, laban kuasa ti di langit deka begegar. Udah nya baru sida deka meda Anak Mensia datai dalam remang ngena kuasa enggau mulia ti besai. Lebuh utai tu belabuh nyadi, bediri lalu angkatka pala kita, laban pengelepas kita nyau semak.” Udah nya Iya lalu madahka siti sempama ngagai sida, “Peratika kayu ara enggau semua kayu bukai. Lebuh daun sida belabuh bekantuk, kita empu ulih meda sereta nemu musin panas nyau semak. Baka nya mega, lebuh kita meda utai tu nyadi, kita deka nemu Perintah Allah Taala nyau semak. “Enggau bendar Aku madah ngagai kita, rebak tu apin mati sebedau semua utai tu nyadi. Langit enggau dunya deka lenyau, tang jaku Aku enda lenyau. “Tang bejaga kita, ngambika kita enda gian ngirup, lalu mabuk, lalu selalu irauka pengidup, enggai ke kita enda ngadang lebuh Hari nya ngenyit datai, baka panjuk ti nyintak, laban Hari nya deka datai ngagai semua orang ke diau di serata dunya. Bejaga berari, besampi minta diri kering rari ari semua utai ti deka nyadi, lalu bediri di mua Anak Mensia.” Iya ngajar tiap hari dalam Rumah Sembiang, lalu lebuh malam hari Iya pansut ari nengeri lalu bemalam ba Bukit Kana. Semua orang dani tumu pagi lalu mendingka Iya dalam Rumah Sembiang. Maya ngintu Gawai Roti Ti Enda Beragi, ti dikumbai Gawai Paska, nyau semak. Sida tuai imam enggau sida pengajar Adat begigaka jalai munuh Jesus, laban sida takutka orang mayuh. Udah nya Sitan tama ngagai Judas, ke dikumbai Iskariot, siku ari sida ke dua belas. Judas mupuk lalu berandau enggau sida tuai imam, enggau bala pemesai ke nyaga Rumah Sembiang, pasal jalai iya nyual Jesus ngagai sida. Sida gaga amat ati, lalu besetuju deka meri iya duit. Nya alai Judas besetuju, lalu belabuh begigaka peluang nyual Jesus ngagai sida, lebuh orang mayuh nadai dia. Hari Gawai Roti Ti Enda Beragi pen nyau datai, alai anak domba Gawai Paska deka disayat. Nya alai Jesus ngasuh Peter seduai John, ku Iya, “Alai seduai mupuk, lalu nyendiaka pemakai Gawai Paska ke kitai, ngambika kitai makai.” Seduai iya lalu nanya, “Dini alai Nuan ngasuh kami duai nyendiaka nya?” Disaut Jesus, “Dingaka tu: lebuh seduai tama ngagai nengeri, siku lelaki ke mai tepayan ai deka betemu enggau seduai. Titihka iya ngagai rumah ti alai iya tama, lalu sebut ngagai orang ke bempu rumah nya, ‘Pengajar nanya ngagai nuan, “Dini alai bilik temuai, alai Aku deka makai pemakai Gawai Paska enggau murid Aku?” ’ Iya deka madahka ngagai seduai siti bilik ti besai di sadau, ti udah dikemas. Sediaka semua utai dia ke kitai.” Seduai iya mupuk, lalu nemu semua utai munyi ti udah dipadahka Jesus ngagai seduai iya. Seduai iya lalu nyendiaka pemakai Gawai Paska. Lebuh jam nyau chukup, Iya lalu belatur duduk ba mija, sama enggau sida rasul. Ku Iya bejaku ngagai sida, “Aku bisi amat ati deka makai pemakai Gawai Paska tu enggau kita sebedau Aku kena perinsa, laban, Aku madah ngagai kita, Aku enda makai pemakai tu datai ke iya dikamatka dalam Perintah Allah Taala.” Iya lalu ngambi mangkuk, lalu lebuh Iya udah meri terima kasih, Iya lalu bejaku, “Ambi tu, lalu bagi entara bala kita, laban, Aku madah ngagai kita, belabuh ari diatu Aku enda ngirup wain tu nyentuk ngagai maya Perintah Allah Taala datai.” Iya lalu ngambi roti, lalu lebuh Iya udah meri terima kasih, Iya mechahka roti nya, lalu nyuaka nya ngagai sida, ku Iya, “Tu tubuh Aku, ti diberi ke kita. Kereja tu kena ngingatka Aku.” Baka nya mega, lebuh sida udah badu makai, Iya ngambi mangkuk, ku Iya, “Mangkuk tu ti dituang ke kita nya sempekat baru Allah Taala ti ditanggam ngena darah Aku. Tang, peda kita! Orang ke nyual Aku bisi enggau Aku ba mija tu! Laban Anak Mensia deka mati, nitihka atur Allah Taala, tang tulah orang ke nyual Iya!” Sida lalu belabuh betanya ngagai pangan diri, sapa ari bala sida ke deka ngereja nya. Sida murid mega bekelikuhka sapa ari bala sida ke tau dikumbai pemadu besai. Tang ku Iya bejaku ngagai sida, “Raja orang bansa bukai merintah orang ke dipegai sida, lalu orang ke megai kuasa atas sida ngumbai diri ‘Pangan Orang Mayuh’. Tang utai nya enda baka nya ba bala kita. Orang ke pemadu besai dalam bala kita enda tau enda nyadi baka orang ke pemadu biak, lalu orang ke nyadi kepala enda tau enda nyadi orang ke mela. Laban sapa ke besai agi? Iya ke duduk ba mija, tauka iya ke mela? Tentu orang ke duduk, ukai enda? Tang Aku begulai enggau kita nyadi orang ke mela. “Kita udah begulai enggau Aku lebuh Aku natka semua pemerinsa Aku, lalu Aku meri kita kuasa merintah, baka Apai ti udah meri Aku kuasa kena merintah, ngambika kita ulih makai ngirup ba mija Aku dalam Perintah Aku, lalu kita deka duduk ba kerusi diraja, ngakim dua belas raban bansa orang Israel. “Simon, Simon! Dinga nuan! Sitan udah minta Aku ngemendarka iya ngayak semua kita baka ke ngayak gandum, tang Aku udah besampika nuan Peter, ngambika pengarap nuan kering, lalu lebuh nuan udah pulai baru ngagai Aku, keringka sida menyadi nuan.” Lalu ku Peter bejaku ngagai Iya, “Tuhan, aku sedia deka ditutup dalam rumah jil lalu mati enggau Nuan!” Jesus lalu nyebut ngagai iya, “Aku madah ngagai nuan, Peter, sebedau manuk mengkukuk sehari tu, nuan udah besangkalka Aku tiga kali.” Ku Jesus bejaku ngagai sida, “Lebuh Aku ngasuh kita bejalai, lalu enda nyagi kita mai kandi duit, tauka kambut, tauka selipar, kati kita bisi suntuk utai?” “Nadai,” ku sida nyaut. Ku Iya bejaku ngagai sida, “Tang diatu, barang sapa bisi kandi duit, enda tau enda mai kandi nya, lalu baka nya mega orang ke bisi kambut. Lalu orang ke nadai pedang, enda tau enda nyual kelambi iya, lalu meli pedang. Laban Aku madah ngagai kita, jaku ti disebut dalam Bup Kudus, ‘Iya deka begulai enggau orang ke jai,’ enda tau enda dikamatka ba Aku, laban utai ti ditulis pasal Aku endang benung dikamatka diatu.” Sida murid Iya lalu bejaku, “Peda Nuan, Tuhan! Tu dua bilah pedang!” Iya lalu nyaut, “Umbas meh nya.” Iya pansut lalu mupuk baka selama ngagai Bukit Kana, lalu sida murid nitihka Iya. Lebuh Iya datai ba endur nya, Iya lalu nyebut ngagai sida, “Besampi ngambika kita enda kena laban penguji.” Iya lalu bejalai jauh mimit ari sida, kira sepenikau batu ari sida, besugang lalu besampi, “Apai, enti Nuan deka, ambi mangkuk tu ari Aku; ukai nitihka peneka Aku, tang awakka peneka Nuan nyadi.” Udah nya siku melikat ari serega pegari di mua Iya, lalu ngeringka Iya. Enggau ati ti balat tusah, Iya bebendar agi besampi, datai ke peluh Iya nyau baka darah neritik ngagai tanah. Lebuh Iya angkat ari endur Iya ke besampi, Iya pulai ngagai sida murid Iya, lalu nemu sida tinduk, laban sida lelak laban ati ti kelalu balat tusah. Iya lalu bejaku ngagai sida, “Nama kebuah kita tinduk? Angkat, lalu besampi, ngambika kita enda kena laban penguji.” Lebuh Iya agi benung bejaku, bala orang lalu ngenyit datai, diuluka Judas, siku ari sida ke dua belas. Judas mansang ngagai Jesus, deka nyium Iya. Tang ku Jesus bejaku ngagai iya, “Judas, kati nuan nyual Anak Mensia ngena sium?” Lebuh sida murid ke sama enggau Jesus meda utai ti deka nyadi, sida lalu nanya, “Tuhan, kati kami tau mantap sida ngena pedang?” Siku ari bala sida lalu mantap ulun imam besai, mutuska pending kanan iya. Tang ku Jesus bejaku, “Badu agi!” Iya lalu negu pending orang nya, lalu ngeraika iya. Jesus lalu bejaku ngagai sida tuai imam enggau bala polis ke nyaga Rumah Sembiang, enggau sida tuai bansa ke udah datai nangkap Iya, “Kati Aku tu penyamun alai kita datai mai pedang enggau pemalu?” Lebuh Aku begulai enggau kita tiap hari dalam Rumah Sembiang, kita enda nangkap Aku. Tang tu endang maya kita, maya kuasa pemetang merintah.” Sida lalu nangkap Jesus lalu mai Iya ari endur nya ngagai rumah imam besai. Tang Peter nitih ari jauh. Lebuh sida udah nungkunka api ba tengah laman nya lalu duduk, Peter mega duduk enggau sida. Siku indu ke ulun lalu tepedaka Peter duduk nunga api. Iya lalu merening ngagai Peter, lalu bejaku, “Orang tu pen udah meh enggau Iya!” Tang Peter besangkalka nya, ku iya, “Indu, aku enda ngelala Iya!” Enda lama udah nya, siku agi orang meda Peter lalu bejaku, “Nuan pen siku ari bala sida!” Tang ku Peter nyaut, “Ukai!” Kira sejam udah bekau nya, siku agi orang bejaku, “Orang tu tetap udah enggau Jesus, laban iya orang Galili!” Tang ku Peter nyaut, “Aku enda nemu utai ti ku nuan.” Tekala nya, lebuh Peter agi benung bejaku, manuk mengkukuk. Tuhan nguing lalu merening ngagai Peter. Peter lalu ingatka jaku Tuhan, jalai Iya nyebut ngagai Peter, “Sebedau manuk mengkukuk sehari tu, nuan udah besangkalka Aku tiga kali.” Peter pansut lalu duie-duie nyabak. Orang ke nyaga Jesus beduan Iya, lalu belabuh ngelese sereta malu Iya. Sida mega mampul mata Iya ngena kain, lalu majak nanya Iya, “Uji sangka! Sapa malu Nuan?” Sida majak nyebut mayuh macham utai bukai kena sida ngeleseka Iya. Lebuh hari nyau tawas, sida tuai bansa, tuai imam, enggau sida pengajar Adat begempuru, lalu sida mai Jesus ngagai Kunsil. Ku sida, “Padahka ngagai kami, enti Nuan tu Kristus?” Iya lalu nyaut, “Enti Aku madah ngagai kita, kita enggai arap, lalu enti Aku nanya kita, kita enggai nyaut. Tang belabuh ari diatu, Anak Mensia deka duduk muak ari kanan Allah Taala ti Bekuasa.” Semua sida lalu nanya, “Enti pia, kati Nuan tu Anak Allah Taala?” Lalu ku Iya bejaku ngagai sida, “Kita ngumbai Aku Anak Allah Taala.” Sida lalu bejaku, “Kitai enda ibuh begunaka saksi bukai. Kitai empu udah ninga nya ari mulut Iya Empu!” Semua raban Kunsil lalu angkat sereta, lalu mai Jesus ngagai Pilate. Sida lalu belabuh bedawaka Iya, ku sida, “Kami nemu orang tu nesatka bansa kami, nagang kami mayar chukai ngagai Raja Besai, lalu ngumbai Diri Kristus, reti nya raja.” Pilate lalu nanya Iya, “Kati Nuan raja orang Judah?” Jesus lalu nyaut iya, “Munyi ti ku nuan.” Pilate lalu bejaku ngagai sida tuai imam, enggau ngagai bala orang mayuh, “Aku nadai nemu kebuah kita bedawaka orang tu.” Tang sida bebendar agi bejaku, ku sida, “Iya megau orang mayuh, ngajar di serata menua Judea, kenyau ari Galili alai Iya ke berengkah, nyentuk ngagai endur tu.” Lebuh Pilate ninga nya, iya lalu nanya enti Jesus nya orang Galili. Lebuh iya ninga Jesus datai ari menua ti dipegai Herod, iya lalu ngasuh Jesus dibai ngagai Herod, ke bisi di Jerusalem lebuh maya nya. Lebuh Herod meda Jesus, iya gaga amat ati, laban iya lama udah keran deka betemu enggau Jesus, laban iya udah ninga berita pasal Jesus, lalu ngarapka diri ulih meda Jesus ngereja kereja ajih. Herod lalu lama nanya Jesus, tang Jesus enda nyaut iya. Sida tuai imam enggau sida pengajar Adat bisi bediri dia, bebendar amat bedawaka Jesus. Indah Herod enggau bala soldadu iya deh beduan sereta ngeleseka Jesus. Udah nya iya ngerasukka baju panjai ti manah ba Jesus, lalu ngirumka Jesus pulai baru ngagai Pilate. Ba hari nya Herod seduai Pilate lalu bebaik enggau pangan diri. Sebedau nya, seduai iya endang bemunsuh enggau pangan diri. Pilate lalu ngempuruka sida tuai imam, tuai bansa, enggau orang mayuh, lalu bejaku ngagai sida, “Kita udah mai orang tu ngagai aku, madahka Iya udah nesatka orang mayuh. Aku udah mansik Iya di mua kita empu, lalu aku nadai nemu Iya bisi udah ngereja penyalah munyi ti ku kita. Herod pen nadai mega nemu penyalah Iya, laban iya udah ngirumka Iya pulai baru ngagai aku. Orang tu nadai udah ngereja utai ti tau ngasuh Iya kena ukum bunuh. Nya alai aku deka ngasuh Iya disipat, lalu ngelepaska Iya.” Nyadi Pilate endang selalu ngelepaska siku orang jil ke orang mayuh ba genap Gawai Paska. Semua sida lalu manjung, ku sida, “Bunuh Iya! Lepaska Barabas ke kami!” ( Nyadi Barabas udah ditutup dalam rumah jil ketegal orang begau ngelaban perintah di nengeri nya, enggau ketegal iya udah munuh orang.) Laban Pilate endang deka ngelepaska Jesus, nya alai iya lalu bejaku baru ngagai sida. Tang sida majak manjung, “Regang Iya! Regang Iya!” Pilate lalu bejaku baru ketiga kali ngagai sida, ku iya, “Nama kebuah? Nama penyalah ti udah dikereja Iya? Aku nadai nemu Iya bisi udah ngereja penyalah ti tau ngasuh Iya kena ukum bunuh! Nya alai aku deka ngasuh Iya disipat, lalu ngelepaska Iya.” Tang sida majak manjung madahka Jesus enda tau enda diregang. Ke pengujung iya, Pilate lalu nurutka sida, lalu meri pemutus penemu madahka peminta sida dikemendarka. Pilate lalu ngelepaska orang ke dipinta sida, orang ke udah ditutup dalam rumah jil ketegal iya udah mai orang angkat ngelaban perintah lalu udah munuh orang. Pilate lalu nyerahka Jesus ngagai sida, nurutka pinta sida. Lebuh sida mai Iya ari endur nya, sida nangkap siku orang ke benama Simon orang Sairin, ke baru datai ari menua pesisir deka mansang ngagai nengeri, sida lalu manggaika regang nya ba belakang Simon, lalu mejalka iya ngesan regang nya ngentudi Jesus. Mayuh amat orang nitihka Jesus, nyengkaum sida indu ke mandam dada diri nyabakka Iya. Tang Jesus nguing ngagai sida, lalu bejaku, “Kita indu Jerusalem! Anang nyabakka Aku, tang nyabakka diri empu, enggau nyabakka anak kita. Laban hari deka datai alai orang deka nyebut, ‘Beberekat meh indu ke mandul, ke nadai kala ngandung, ke nadai kala nusuka anak!’ Sida lalu belabuh bejaku ngagai bukit, ‘Tinggang kami!’ lalu bejaku ngagai munggu, ‘Lamun kami!’ Laban enti sida ngereja nya lebuh kayu agi idup, nama utai ti deka nyadi lebuh kayu nya udah rangkai?” Dua iku orang bukai, ke udah ngereja penyalah, mega dibai ngambika seduai iya dibunuh sama enggau Iya. Lebuh sida datai ba endur ti dikumbai “Keruntuk,” sida lalu ngeregang Iya dia sama enggau dua iku orang ke udah ngereja penyalah, siku muak ari kanan, lalu siku muak ari kiba Iya. Udah nya Jesus bejaku, “Apai, ampun sida, laban sida enda nemu utai ti dikereja diri.” Sida lalu bedua gari Iya ngena chara bechabut undi. Orang mayuh bediri dia nengkilaka Iya, tang bala tuai orang Judah ngeleseka Iya. Ku sida, “Iya ngidupka orang bukai. Awakka Iya ngidupka Diri Empu, enti Iya amat Kristus ti udah dipilih Allah Taala!” Sida soldadu mega ngeleseka Iya. Sida mansang ngagai Iya lalu meri Iya wain ti masam, ku sida bejaku, “Enti Nuan amat raja orang Judah, selamatka Diri Empu!” Siti pelekat bisi mega diengkah ari atas Iya, “Tu Raja orang Judah.” Siku orang ke udah ngereja penyalah ke diregang dia majak ngeleseka Jesus. Ku iya, “Kati Nuan ukai Kristus? Selamatka Diri Empu enggau kami duai!” Tang iya ke siku ngerara iya, ku iya, “Kati nuan enda nangika Allah Taala, laban nuan sama kena ukum baka Iya? Tua endang patut diukum, laban tua amat udah ngereja penyalah, tang orang tu nadai udah ngereja penyalah.” Iya lalu bejaku ngagai Jesus, “Jesus, kingatka aku lebuh Nuan datai ngagai Perintah Nuan!” Jesus lalu nyaut, “Enggau bendar Aku madah ngagai nuan, sehari tu nuan deka sama enggau Aku di serega.” Ba urung tengah hari semua menua petang magang, nyentuk ngagai pukul tiga ngalih hari, laban mata hari nadai manchar agi. Kain tirai dalam Rumah Sembiang lalu charik belah dua. Jesus lalu ngangau enggau nyawa ti inggar, “Apai! Aku nyerahka semengat Aku ngagai jari Nuan!” Lebuh Iya udah nyebut nya, Iya lalu ngapuska seput. Lebuh kepala soldadu meda utai ti udah nyadi, iya lalu muji Allah Taala. Ku iya, “Orang tu amat nadai penyalah!” Lebuh semua orang ke begempuru nengkila dia meda utai ti nyadi, sida lalu pulai ke rumah, mandam dada diri. Tang semua orang ke bekelala enggau Jesus, nyengkaum sida indu ke udah nitihka Iya ari Galili, bediri nengkila ari jauh. Nyadi dia bisi siku orang ke badas sereta lurus, benama Josep. Iya tu raban Kunsil. Tang iya enda besetujuka pelan enggau utai ti dikereja sida. Iya datai ari nengeri Arimatea, di menua Judea lalu iya nganti Perintah Allah Taala. Iya mansang ngagai Pilate, lalu minta bangkai Jesus. Iya nurunka bangkai Jesus, mungkus Iya ngena kain linin, lalu ngalika Iya dalam kubur ti udah ditebuk ba batu galang, lalu nadai udah kala dikena alai nguburka orang. Nyadi hari nya Hari Nyendiaka Gawai, lalu hari Sabat nyau deka berengkah. Sida indu ke udah datai enggau Jesus ari Galili, nitihka Josep lalu sida meda kubur nya, sereta meda chara bangkai Jesus digalika dalam kubur nya. Udah nya sida pulai, lalu nyendiaka rempah enggau minyak wangi. Lebuh hari Sabat, sida diau, nitihka pesan. Tang tumu pagi hari Minggu, sida indu nya mansang ngagai kubur, mai rempah ti udah disediaka sida. Sida lalu nemu batu nya udah dibaringka ari mua kubur nya, tang lebuh sida tama ke dalam kubur nya, sida nadai nemu bangkai Tuhan Jesus dia. Lebuh sida agi beba ati berundingka nya, dua iku orang ke ngena gari ti beperenching, tekala nya bediri ngimbai sida. Sida lalu takut, lalu nyungkurka diri ke tanah, tang orang dua iku nya bejaku ngagai sida, “Nama kebuah kita begigaka orang ke idup ba bala orang ke mati? Iya nadai ditu tang udah angkat idup baru. Kingatka utai ti udah dipadahka Iya ngagai kita lebuh Iya agi di Galili, madahka Anak Mensia enda tau enda diserahka ngagai orang ke bedosa, lalu diregang, lalu ba hari ti ketiga, angkat idup baru.” Sida lalu ingatka jaku Iya, pulai ari kubur nya, lalu madahka semua utai nya ngagai murid ke sebelas iku, enggau ngagai semua sida ti bukai. Nyadi orang ke nusui pasal utai nya ngagai sida rasul nya Maria Magdalin enggau Joana, enggau Maria indai James enggau indu ke bukai ke sama enggau sida. Tang sida rasul ngumbai nya cherita ngapa, lalu sida enda arapka utai ti dipadahka sida indu nya. Tang Peter angkat lalu belanda ngagai kubur. Iya engkenduk lalu nilik ke dalam, lalu tepedaka semina kain linin aja bisi dia. Iya lalu pulai ke rumah, balat alit ati ke utai ti udah nyadi. Sehari nya mega dua iku murid mansang ngagai sebuah genturung pendiau ke benama Emaus, kira sebelas kilometer ari Jerusalem. Seduai iya berandauka pasal semua utai ti udah nyadi. Lebuh seduai iya benung berandau, Jesus Empu datai semak lalu bejalai enggau seduai iya, tang seduai iya enda ngelala Iya. Iya lalu bejaku ngagai seduai iya, “Nama utai ti dikerandauka seduai lebuh seduai bejalai tadi?” Seduai iya lalu ngetu sereta berupai tusah ati. Siku ari seduai iya, ke benama Kliopas, lalu nyaut Iya, “Kati Nuan tu siku temuai di Jerusalem ke enda nemu utai ti udah nyadi dua tiga hari tu ti udah?” Iya lalu nanya, “Utai nama?” Seduai iya lalu nyaut, “Pasal Jesus orang Nasaret, nabi ti bekuasa dalam pengawa enggau jaku di mua Allah Taala enggau di mua semua orang, enggau chara bala tuai imam kami enggau bala tuai kami nyerahka Iya ngambika Iya diukum bunuh, lalu sida ngeregang Iya. Tang kami udah ngarapka Iya deka ngelepaska Israel! Sigi amat, lalu nambahka nya, tu ketiga hari utai nya udah nyadi. Nambahka nya, sekeda indu ari bala kami udah ngasuh kami balat amat alit ati. Sida mansang ngagai kubur tumu pagi tadi, lalu lebuh sida nadai nemu bangkai Iya dia, sida pulai ari kubur lalu madahka diri udah begenera meda melikat, ke madahka Jesus idup. Sekeda orang ke enggau kami lalu mansang ngabas kubur, lalu nemu utai dia munyi ti dipadahka sida indu, tang sida nadai meda Jesus.” Jesus lalu bejaku ngagai seduai iya, “Kita amat beli. Lubah amat meh kita arapka semua jaku ti udah disebut sida nabi! Kati Kristus enda patut natka semua pemerinsa nya, lalu udah nya dimuliaka?” Jesus lalu nerangka ngagai seduai iya utai di udah disebut dalam semua Bup Kudus pasal Iya Empu, belabuh ari bup Moses enggau semua bup sida nabi. Lebuh sida nyau datai semak genturung pendiau ti digagai seduai iya, Jesus lalu ngaga Diri baka ke deka majakka pejalai Iya. Tang seduai iya bebendar ngumbuk Iya. Ku seduai iya bejaku, “Bemalam enggau kami duai, laban hari nyau lemai, hari nyau ka malam.” Iya lalu bemalam enggau seduai iya. Lebuh Iya belatur deka makai enggau seduai iya, Iya ngambi roti, merekat lalu mechahka roti, lalu nyuaka roti nya ngagai seduai iya. Nya baru mata seduai iya tebuka, lalu ngelala orang nya Jesus. Iya lalu lesap, nadai dipeda seduai iya agi. Ku seduai iya bejaku enggau pangan diri, “Enda ka ati tua asai ke disar api lebuh Iya bejaku enggau tua ba jalai raya tadi, lebuh Iya nerangka Bup Kudus ngagai tua?” Seduai iya lalu tekala nya angkat, lalu pulai ngagai Jerusalem, lalu nemu murid ke sebelas iku begempuru enggau sida murid ti bukai. Ku sida bejaku, “Tuhan amat udah angkat idup baru, lalu Iya udah pegari di mua Simon!” Udah nya seduai iya lalu madahka pasal utai ti udah nyadi di rantau jalai, enggau pasal seduai iya ke ngelala Iya lebuh Iya mechahka roti. Lebuh seduai iya benung nusui nya, Jesus Empu lalu tekala nya bediri ba tengah-tengah sida, lalu bejaku ngagai sida, “Awakka pemaik meruan enggau kita.” Tang sida tekenyit sereta balat takut, lalu ngumbai diri meda antu. Iya lalu bejaku ngagai sida, “Nama kebuah kita takut? Lalu nama kebuah ati kita kakang? Peda jari enggau kaki Aku. Aku meh tu. Tegu Aku, lalu peda, laban antu nadai isi tauka tulang baka Aku.” Lebuh Iya udah nyebut nya, Iya lalu mandangka jari enggau kaki Iya ngagai sida. Lebuh sida agi mengkang enda arap laban sida balat gaga sereta alit ati, Iya lalu bejaku ngagai sida, “Kati kita bisi utai diempa ditu?” Sida lalu nyuaka ngagai Iya sekerat ikan ti udah dipanduk. Iya ngambi lalu makai ikan nya di mua sida. Udah nya Iya lalu bejaku ngagai sida, “Tu meh utai ti udah dipadahka Aku ngagai kita lebuh Aku agi begulai enggau kita -- madahka semua utai ti udah ditulis pasal Aku dalam Adat Moses, dalam bup sida nabi, enggau dalam Masmur, enda tau enda dikamatka.” Udah nya Iya lalu muka runding sida, ngambika sida meretika Bup Kudus, lalu ku Iya bejaku ngagai sida, “Tu meh utai ti udah ditulis: Kristus enda tau enda natka pemerinsa, lalu angkat ari mati ba hari ti ketiga, lalu pesan pasal nesal ati, enggau pasal pengampun dosa dipadahka dalam nama Iya ngagai semua bansa, berengkah ari Jerusalem. Kita tu meh orang ke besaksika semua utai tu. Lalu Aku deka ngirumka ngagai kita utai ti udah disemaya Apai; nya alai diau kita di nengeri tu nyentuk ngagai maya kita diberi kuasa ari atas.” Udah nya Iya mai sida pansut ngagai Betani. Dia Iya ngangkatka jari Iya lalu merekatka sida. Lebuh Iya benung merekatka sida, Iya ninggalka sida lalu dibai niki ke serega, Sida lalu nyembah Iya, lalu pulai ngagai Jerusalem enggau ati ti gaga, lalu sida seruran diau dalam Rumah Sembiang muji Allah Taala. Ba pun iya kelia, Jaku endang udah bisi. Jaku nya enggau Allah Taala, lalu Jaku nya endang Allah Taala. Iya endang enggau Allah Taala kenyau ari pun. Semua utai digaga ulih Iya; enti nadai Iya, nadai utai ti udah digaga ulih digaga. Dalam Iya bisi pengidup lalu pengidup nya meri penampak ngagai semua mensia. Penampak nya manchar dalam pemetang, lalu pemetang enda ulih ngalahka iya. Siku orang dikirumka Allah Taala. Nama iya John. John datai besaksika pasal penampak nya ngambika, ulih iya, semua orang tau arap. John empu ukai penampak, tang iya datai ngambika iya besaksika pasal penampak nya. Penampak ti bendar ti meri penampak ngagai genap iku mensia, bisi datai ngagai dunya. Iya bisi di dunya, lalu dunya digaga ulih Iya. Tang taja pia, dunya enda ngelala Iya. Iya datai ngagai menua Iya Empu, tang bansa Iya Empu enda nerima Iya. Tang semua orang ke nerima Iya, ke arapka nama Iya, diberi Iya kuasa nyadi anak Allah Taala, ke diadaka Allah Taala, ukai diadaka mensia, tauka ulih peneka mensia. Jaku nya nyadi mensia, lalu diau begulai enggau kitai, lalu kami udah meda mulia Iya, mulia Iya ke nyadi Anak Tunggal Apai, ke penuh laban pengasih enggau pemendar. (John besaksika pasal Iya. Ku John ngangau, “Tu meh orang ke dikenang aku lebuh aku nyebut: ‘Iya ke datai dudi ari aku, besai agi ari aku, laban Iya endang udah bisi sebedau aku ada.’ ”) Ulih pemesai pengasih Iya, semua kitai udah nerima pengasih ti nambah-menambah. Adat amat udah diberi ulih Moses, tang pengasih enggau pemendar datai ulih Jesus Kristus. Nadai orang udah kala meda Allah Taala. Semina Anak Tunggal Allah Taala, ke begulai enggau Apai, ke madahka pasal Apai. Tu saksi John, lebuh orang Judah ngirumka sida imam enggau orang Lewi ari Jerusalem lalu nanya iya, “Sapa nuan tu?” John lalu ngaku, ukai besangkal, tang ngaku, “Aku ukai Kristus.” Sida lalu nanya iya, “Enti pia, kati nuan tu Elijah?” “Ukai,” ku John nyaut. “Kati nuan tu nabi nya?” ku sida nanya. “Ukai,” ku iya nyaut. Sida lalu nanya iya, “Sapa nuan tu deh? Padahka ngagai kami, ngambika kami bisi saut dibai ngagai orang ke ngirumka kami. Baka ni ku nuan madahka pasal diri empu?” Ku John bejaku, “Aku tu orang ke ngangau di menua puang: ‘Gaga jalai Tuhan rurus!’ munyi ti disebut nabi Isaiah.” Nyadi bala seruan nya udah dikirumka orang Parisi. Sida lalu nanya iya, “Enti pia, nama kebuah nuan maptisa orang, enti nuan ukai Kristus, tauka ukai Elijah, tauka ukai nabi nya?” John lalu nyaut sida, “Aku maptisa ngena ai, tang ba bala kita bisi siku ke enda dikelala kita, ke datai dudi ari aku. Indah muka tali kasut Iya deh aku enda tau.” Pekara tu nyadi di Betani, di seberai Sungai Jordan, alai John ke maptisa orang. Hari siti John tepedaka Jesus mansang ngagai iya, lalu ku John bejaku, “Peda kita, nyin Anak Domba Allah Taala, ke muai dosa dunya! Nya meh orang ke dikenang aku, ‘Siku orang deka datai dudi ari aku, ke besai agi ari aku, laban Iya endang udah bisi sebedau aku ada.’ Aku empu enda ngelala Iya, tang tu meh kebuah aku datai lalu maptisa orang ngena ai, ngambika Iya dipandangka ngagai orang Israel.” John lalu besaksi: “Aku meda Roh Kudus nurun ari serega baka burung achang lalu meruan ba Iya. Aku empu enda ngelala Iya; tang Allah Taala ti ngasuh aku maptisa orang ngena ai, udah madahka ngagai aku, ‘Nuan deka meda Roh Kudus nurun lalu meruan ba orang siku; nya meh orang ke deka maptisa ngena Roh Kudus.’ Lalu aku empu udah meda Iya lalu aku besaksi madahka Iya nya Anak Allah Taala.” Hari siti John bediri baru enggau dua iku ari sida murid iya, lalu lebuh iya ngemataka Jesus mansa, iya lalu bejaku inggar, “Peda seduai! Nyin Anak Domba Allah Taala!” Lebuh seduai iya ninga John nyebut nya, seduai iya lalu nitihka Jesus. Lebuh Jesus nguing lalu tepedaka seduai iya nitihka Iya, Iya lalu bejaku ngagai seduai iya, “Nama utai digiga seduai?” Seduai iya lalu nyaut, “Rabbi,” (reti nya, Pengajar,) “dini alai Nuan diau?” Jesus lalu nyaut seduai iya, “Aram kitai meda.” Sida datai ba endur alai Iya diau, lalu seduai iya diau enggau Iya sehari nya. Hari nyau udah pukul empat lemai. Siku ari seduai ke ninga John bejaku, lalu nitihka Jesus, nya Andrew, menyadi lelaki Simon Peter. Andrew lalu ngiga menyadi lelaki iya Simon, lalu madah ngagai iya, “Kami udah tetemuka Messiah.” (Reti nya: Iya ke udah ditata; tauka Kristus). Andrew lalu mai Simon ngagai Jesus. Jesus malik ngagai Simon, lalu bejaku, “Nama nuan Simon anak John, tang nuan deka dikumbai Kephas.” (Reti nya Peter) Hari siti Jesus mutuska runding deka mupuk ngagai Galili. Iya tetemuka Philip, lalu bejaku ngagai iya, “Titihka Aku!” Penatai asal Philip nya ari Betsaida, nengeri Andrew seduai Peter. Philip tetemuka Natanel, lalu madah ngagai iya, “Kami udah tetemuka orang siku ke dikenang Moses dalam Bup Adat enggau ditulis sida nabi, Jesus anak Josep, ari Nasaret.” Natanel lalu bejaku enggau Philip, “Kati utai ti badas ulih datai ari Nasaret?” Philip lalu nyaut, “Aram tua meda.” Lebuh Jesus meda Natanel mansang ngagai Iya, Iya lalu bejakuka pasal Natanel, “Tu baru orang Israel ke bendar, ke nadai nemu ngelakar!” Natanel lalu nanya Iya, “Baka ni ku Nuan ngelala aku?” Disaut Jesus, “Aku endang udah meda nuan di baruh kayu ara nya tadi, sebedau Philip ngangauka nuan.” Natanel lalu nyaut Iya, “Pengajar, Nuan amat Anak Allah Taala! Nuan tu meh Raja orang Israel!” Disaut Jesus, “Kati nuan arap laban Aku udah madahka Diri meda nuan di baruh kayu ara nya tadi? Nuan deka meda utai ti besai agi ari nya!” Lalu ku Iya bejaku ngagai Natanel, “Enggau bendar Aku madah ngagai kita: kita deka meda langit tebuka, lalu meda bala melikat Allah Taala nurun-niki ngagai Anak Mensia.” Dua hari udah bekau nya, orang bisi nikah di nengeri Kana, di menua Galili, lalu indai Jesus bisi dia. Jesus enggau sida murid Iya udah mega diambi ngabang ngagai gawai nya. Lebuh wain nyau abis, indai Jesus lalu bejaku enggau Iya, “Wain sida udah abis.” Jesus lalu bejaku ngagai iya, “Indu, nya ukai pekara nuan tauka pekara Aku. Maya Aku apin datai.” Indai Iya lalu bejaku ngagai bala orang gaji, “Kereja aja sebarang utai ti diasuh Iya.” Nyadi ba endur nya bisi enam igi benda alai nyimpan ai kena orang Judah nuchi diri. Sigi-sigi benda nya ulih ngundan kira 100 liter ai. Jesus lalu bejaku ngagai sida, “Isi semua benda nya enggau ai.” Sida lalu ngisi semua benda nya penuh enggau ai. Ku Iya bejaku ngagai sida, “Kauk ai nya, lalu bai ngagai tuai gawai.” Sida lalu mai ai nya ngagai tuai gawai. Lebuh tuai gawai nyepi ai nya, ti udah bebali nyadi wain, lalu enda nemu ari ni penatai wain nya (taja pen orang gaji ke ngauk ai nya nemu), tuai gawai nya lalu ngangauka lelaki ke benung ditikah, lalu bejaku ngagai iya, “Semua orang mantaika wain ti manah dulu, udah nya baru mantaika wain ti kurang agi nyamai, lebuh bala pengabang udah mabuk. Tang nuan udah naruh wain ti nyamai datai ke diatu!” Jesus ngereja kereja ajih ti keterubah nya di Kana, di menua Galili, alai Iya ke mandangka mulia Iya. Sida murid Iya lalu arapka Iya. Udah bekau nya, Iya enggau indai Iya, sida menyadi lelaki Iya, enggau sida murid Iya mupuk ngagai Kapernaum, lalu diau dia dua tiga hari. Hari Gawai Paska orang Judah pen nyau semak, lalu Jesus mupuk ngagai Jerusalem. Dalam Rumah Sembiang Iya tetemuka orang ke bejualka sapi, bedus, burung achang, enggau orang penukar wang duduk ba mija sida. Iya lalu ngaga siti penyipat ari tali, lalu muru semua sida, enggau jelu bedus enggau jelu sapi ari Rumah Sembiang. Iya mubuhka duit sida penukar wang, lalu nungkupka mija sida. Lalu ku Iya bejaku enggau orang ke nyual burung achang, “Bai utai tu ke luar! Badu agi ngaga rumah Apai Aku nyadi rumah kedai!” Sida murid Iya lalu ingatka utai ti udah ditulis, “Pengangkun Aku ke rumah Nuan, deka mau baka api dalam ati Aku.” Bala tuai orang Judah lalu bejaku ngagai Iya, “Nama kereja ajih ti deka dikereja Nuan, kena nunjukka Nuan bisi hak ngereja utai tu?” Disaut Jesus, “Rubuh Rumah Sembiang tu, lalu dalam tiga hari Aku deka nirika iya baru.” Orang Judah lalu bejaku ngagai Iya, “Empat puluh taun orang ngaga Rumah Sembiang tu, lalu Nuan deka nirika iya baru dalam tiga hari?” Tang Rumah Sembiang ti ku Jesus nya tubuh Iya Empu. Nya alai, lebuh Iya diangkatka ari mati, sida murid Iya ingatka Iya ke udah nyebut nya. Sida lalu arapka Bup Kudus, sereta arapka jaku ti udah disebut Jesus. Lebuh Jesus benung di Jerusalem lebuh Gawai Paska, mayuh orang arapka Iya lebuh sida meda kereja ajih ti dikereja Iya. Tang Jesus enda arapka sida, laban Iya nemu semua mensia, lalu Iya enda begunaka orang besaksika pasal mensia, laban Iya Empu nemu utai ti dalam ati semua mensia. Nyadi sekali siku orang Parisi, ke benama Nikodimus, ke ari raban tuai orang Judah, mansang ngagai Jesus lebuh malam hari, lalu bejaku enggau Iya, “Pengajar, kami nemu Nuan endang pengajar ke datai ari Allah Taala, laban nadai orang ulih ngereja kereja ajih baka ti dikereja Nuan, enti Allah Taala nadai enggau iya.” Jesus lalu nyaut iya, “Enggau bendar Aku madah ngagai nuan, nadai orang ulih meda Perintah Allah Taala enti iya enda diadaka baru. Ku Nikodimus bejaku ngagai Iya, “Baka ni ku orang ulih diadaka baru lebuh iya udah besai tuai? Kati iya ulih tama ke dalam kandung indai iya baru, lalu diadaka kedua kali?” Disaut Jesus, “Enggau bendar Aku madah ngagai nuan, nadai orang ulih tama ngagai Perintah Allah Taala enti iya enda diadaka ulih ai enggau Roh Kudus. Mensia ngadaka mensia, Roh ngadaka roh. Anang alit ati lebuh Aku madah ngagai kita, ‘Kita enda tau enda diadaka baru.’ Ribut bepuput ngagai sebarang endur iya deka. Kita ninga munyi iya, tang kita enda nemu ari ni penatai iya, tauka kini ke tunga iya bepuput. Baka nya mega orang ke diadaka Roh Kudus.” Ku Nikodimus bejaku enggau Iya, “Baka ni ku utai tu tau nyadi?” Disaut Jesus, “Nuan pengajar orang Israel, lalu nuan enda meretika utai tu? Enggau bendar Aku madah ngagai nuan, kami bejakuka pasal utai ti ditemu kami, lalu besaksika pasal utai ti udah dipeda kami, tang kita enggai nerima saksi kami. Enti Aku udah madah ngagai kita pasal utai dunya, lalu kita enda arap, baka ni ku kita deka arap enti Aku madah ngagai kita pasal utai serega? Nadai orang udah kala niki ke serega, kelimpah ari Iya ke nurun ari serega, iya nya Anak Mensia.” Baka Moses ke nuatka ular temaga di menua puang, baka nya meh Anak Mensia deka dituatka, ngambika barang sapa arapka Iya bulih pengidup ti meruan belama iya. “Laban Allah Taala balat rinduka dunya, nya alai Iya meri Anak Tunggal Iya, ngambika genap iku orang ke arapka Iya enda mati tang bulih pengidup ti meruan belama iya. “Laban Allah Taala ukai ngirumka Anak Iya ngagai dunya ngambika Iya ngakim dunya, tang ngambika Iya nyelamatka dunya. Orang ke arapka Iya enda diukum; tang orang ke enda arap, endang udah diukum, laban sida enda arapka nama Anak Tunggal Allah Taala. Baka tu ku ukum dipejalaika: penampak udah datai ngagai dunya, tang mensia rinduka pemetang lalu enda rinduka penampak laban pengawa sida jai. Laban semua orang ke ngereja penyai begedika penampak, lalu enggai datai ngagai penampak, enggai ke pengawa sida ti jai diayanka. Tang orang ke ngereja utai ti bendar, datai ngagai penampak, ngambika pengawa ti dikereja sida nyata nitihka peneka Allah Taala. Udah bekau nya, Jesus enggau sida murid Iya bejalai ngagai menua pesisir di menua Judea, lalu Iya diau lama mimit dia enggau sida, lalu maptisa orang. John mega maptisa orang di Anon, semak Salim, laban menua nya mayuh ai. Orang lalu majak datai, lalu dibaptisa. Lebuh maya nya John apin ditutup dalam rumah jil. Nyadi sekali bala murid John bekelikuh enggau siku orang Judah pasal adat nuchi diri. Sida datai ngagai John lalu bejaku ngagai iya, “Pengajar, Iya ke bisi enggau nuan di seberai Sungai Jordan, ke dikenang nuan, bisi ditu maptisa orang, lalu semua orang bela datai ngagai Iya.” Disaut John, “Nadai orang ulih nerima utai, enti Allah Taala enda meri utai nya. Kita empu nyadika saksi aku lebuh aku nyebut, ‘Aku ukai Kristus, tang aku udah diasuh datai dulu ari Iya.’ Lelaki ke ditikah nya meh orang ke bempu bini. Pangan lelaki ke ditikah, ke bediri semak iya lalu ninga iya, gaga ati ninga munyi nyawa iya. Nya kebuah ati aku pemadu gaga. Iya enda tau enda nyadi besai, tang aku nyadi mit.” Iya ke datai ari serega bekuasa atas semua. Iya ke datai ari dunya, endang enggi dunya, lalu iya bejakuka pasal utai dunya. Iya ke datai ari serega, bekuasa atas semua. Iya besaksika utai ti udah dipeda enggau didinga Iya, tang nadai orang nerima saksi Iya. Barang sapa nerima saksi Iya, nunjukka Allah Taala endang bendar. Iya ke dikirumka Allah Taala, nyebut jaku Allah Taala, laban Allah Taala udah meri Iya Roh Kudus enggau penuh. Apai rinduka Anak, lalu udah nyerahka semua utai ngagai jari Iya. Barang sapa arapka Anak, bulih pengidup ti meruan belama iya. Barang sapa enda ngasika Anak, nadai bulih pengidup, tang deka natka pengeringat Allah Taala. Lebuh Jesus nemu orang Parisi udah ninga Iya bulih mayuh agi murid ari John, lalu maptisa sida ( taja pen ukai Jesus Empu ke maptisa orang, tang sida murid Iya ti ngereja nya), Iya ninggalka menua Judea, lalu mulaika Diri baru ngagai menua Galili. Tang Iya enda tau enda nengah menua Samaria. Nya alai Iya datai ba sebuah nengeri ti dikumbai Saikar di menua Samaria, semak tanah ti udah diberi Jakop ngagai anak iya Josep. Telaga Jakop bisi dia, lalu Jesus, ke udah lelak bejalai, duduk semak telaga nya. Jam lebuh maya nya kira urung tengah hari. Siku indu orang Samaria datai nyauk. Jesus lalu bejaku ngagai iya, “Beri Aku ngirup.” ( Nyadi sida murid Iya udah ke pasar, mansang meli pemakai.) Indu orang Samaria nya lalu bejaku ngagai Iya, “Baka ni ku Nuan ke orang Judah, minta ai irup ari aku ke orang Samaria?” (Orang Judah enggai begulai enggau orang Samaria.) Jesus lalu nyaut iya, “Enti nuan nemu pemeri Allah Taala, lalu ngelala sapa ke nyebut ngagai nuan, ‘Beri Aku ngirup,’ nuan tentu deka minta ari Iya, lalu Iya deka meri nuan ai ti idup.” Indu nya bejaku, “Tuan, Nuan nadai beledi, lalu telaga nya dalam. Dini alai Nuan bulih ai ti idup nya? Kati Nuan besai agi ari aki kami Jakop, ke meri kami telaga tu, lalu iya, bala anak iya enggau jelu tupi sida bela ngirup ari telaga tu?” Ku Jesus nyaut iya, “Semua orang ke ngirup ai tu, deka aus baru, tang orang ke ngirup ai ti deka diberi Aku, enda agi aus. Ai ti deka diberi Aku deka nyadi, dalam sida, mata ai ti mansutka ai ti meri pengidup ti meruan belama iya.” Ku indu nya bejaku ngagai Iya, “Tuan, beri aku ai nya, ngambika aku enda agi aus, lalu enda agi ibuh nyauk.” Ku Jesus bejaku ngagai iya, “Alai nuan madahka laki nuan; udah nya pulai kitu baru.” Indu nya lalu nyaut Iya, “Aku nadai laki.” Disaut Jesus, “Betul jaku nuan ke madahka diri nadai laki, laban nuan lima kali udah belaki, lalu lelaki ke enggau nuan begulai diatu, ukai laki nuan. Betul jaku nuan.” Indu nya lalu bejaku, “Tuan, diatu baru aku nemu nuan tu nabi. Aki ini kami nyembah Allah Taala ba bukit tu, tang kita ngumbai orang enda tau enda nyembah Allah Taala di Jerusalem.” Jesus lalu bejaku ngagai iya, “Arapka Aku, Indu, maya deka datai alai orang nyembah Apai ukai ba bukit tu, tauka di Jerusalem. Kita nyembah utai ti enda dikelala kita. Kami nyembah utai ti dikelala kami, laban pengelepas datai ari orang Judah. Tang maya deka datai, lalu endang udah datai diatu, alai orang ke amat nyembah Apai, deka nyembah Iya dalam Roh enggau pemendar, laban nya gaya orang ke dikedekaka Apai nyembah Iya. Allah Taala endang Roh, lalu orang ke nyembah Iya enda tau enda nyembah Iya dalam Roh enggau pemendar.” Ku indu nya bejaku ngagai Iya, “Aku nemu Messiah” (ke dikumbai Kristus) “deka datai. Lebuh Iya datai, Iya deka madahka semua utai ngagai kitai.” Disaut Jesus, “Aku tu meh Iya, ke bejaku enggau nuan diatu.” Lebuh maya nya sida murid Iya pen datai. Sida tekenyit ati meda Iya bejaku enggau indu nya. Tang nadai siku sida nanya indu nya, “Nama utai dipinta nuan?” tauka nanya Jesus, “Nama kebuah Nuan bejaku enggau iya?” Indu nya lalu ninggalka tepayan ai iya, lalu pulai ngagai nengeri. Ku iya bejaku ngagai orang, “Aram kitai meda orang ke udah madah ngagai aku semua utai ti udah dikereja aku. Kada enda Iya nya Messiah.” Sida pansut ari nengeri nya, lalu mansang ngagai Jesus. Lebuh utai nya benung nyadi, sida murid Iya mai Jesus makai, “Pengajar, aram makai!” Tang ku Iya bejaku ngagai sida, “Aku bisi pemakai ti enda ditemu kita.” Sida murid lalu bejaku enggau pangan diri, “Nadai patut orang udah bisi meri iya pemakai.” Ku Jesus bejaku ngagai sida, “Pemakai Aku nya ngereja peneka Iya ke ngirumka Aku, lalu nembuka pengawa Iya. Ukai enda kita nyebut, ‘Empat bulan da agi, nya baru maya ngetau’? Tang Aku madah ngagai kita, perening kiba kanan ngelingi kita. Nya baru kita meda umai nyau mansau, sedia deka diketau. Orang ke ngetau diatu udah nerima gaji, lalu ngumpul buah ke pengidup ti meruan belama iya, ngambika orang ke nanam enggau orang ke ngetau deka sama rami gaga. Tu ngamatka jaku siti, ‘Siku nanam, siku ngetau.’ Aku ngasuh kita ngetau utai ti ukai ditanam kita. Orang bukai udah gawa, lalu kita bulih penguntung ari utai ti dikereja sida.” Mayuh orang Samaria di nengeri nya arapka Iya, laban saksi indu nya, “Iya madahka semua utai ti udah dikereja aku.” Nya alai lebuh orang Samaria datai ngagai Iya, sida minta Iya diau enggau sida, lalu Iya diau dia dua hari. Lalu mayuh agi orang arap ketegal jaku Iya. Ku sida bejaku ngagai indu nya, “Kami arap, ukai laban jaku nuan, tang laban kami empu udah ninga, lalu kami nemu Iya amat Juruselamat dunya.” Lebuh Jesus udah diau dia dua hari, Iya lalu mupuk ari endur nya ngagai Galili (laban Jesus Empu udah madah, nabi endang enda dibasa orang di menua iya empu.) Lebuh Iya datai di Galili, orang di menua nya lalu nyambut penatai Iya, laban sida udah meda semua utai ti udah dikereja Iya di Jerusalem, laban sida empu udah datai ngagai Gawai nya. Udah nya Iya pulai baru ngagai nengeri Kana, di menua Galili, alai Iya ti udah ngasuh ai bebali nyadi wain. Nyadi di Kapernaum bisi siku pemesai. Anak lelaki pemesai nya sakit. Lebuh iya ninga Jesus bisi udah datai ari Judea, iya mansang ngagai Jesus, minta Jesus datai lalu ngeraika anak iya, laban anak iya nyau ka mati. Jesus lalu bejaku ngagai iya, “Enti kita enda meda kereja ajih enggau kereja ti nyelai, kita enggai arap.” Pemesai nya lalu bejaku ngagai Iya, “Tuan, aram mupuk sebedau anak aku mati.” Jesus lalu bejaku ngagai iya, “Mupuk meh nuan. Anak nuan deka idup!” Orang nya arapka jaku Jesus, lalu mupuk. Lebuh iya benung di rantau jalai, bala ulun iya ngambat iya, madahka anak iya idup. Iya lalu nanyaka kemaya anak iya belinsur gerai. Sida lalu madah ngagai iya, “Pukul satu ngalih hari kemari. Nya maya pemedis nya nadai agi.” Orang nya lalu nemu, nya meh maya Jesus madah ngagai iya, “Anak nuan deka idup.” Iya empu lalu arap, sama enggau sida sebilik. Tu kereja ajih ti kedua ti dikereja Jesus udah bekau Iya ke pulai ari menua Judea ngagai menua Galili. Udah bekau nya, Jesus mupuk ngagai siti agi gawai orang Judah di Jerusalem. Nyadi di Jerusalem, ba semak Pintu Bedus, bisi siti letung ti dikumbai Betsata, ti bisi lima buah serambi. Mayuh amat orang ke sakit, ke buta, ke lemi, enggau ke sakit bajung gali dalam serambi nya. Sida nganti ai ba letung nya beriak, laban lebuh melikat Tuhan nurun ngagai letung nya, ai dia beriak. Orang ke sakit, ke dulu nurun ngagai letung nya lebuh ai nya beriak, digeraika ari sebarang penyakit iya. Nyadi ba endur nya bisi siku orang ke udah sakit tiga puluh lapan taun. Lebuh Jesus meda iya, lalu nemu iya endang lama udah gali dia, Iya lalu bejaku ngagai orang nya, “Kati nuan ingin digeraika?” Ku orang ke sakit nya nyaut Iya, “Tuan, aku nadai orang ngulurka aku ngagai letung nya, lebuh ai nya beriak. Lebuh aku benung nguji nurun, orang bukai ga dulu agi nurun ari aku.” Jesus lalu bejaku ngagai iya, “Angkat nuan. Bai tikai nuan, lalu bejalai.” Tekala nya orang nya lalu gerai. Iya ngambi tikai iya, lalu bejalai. Utai tu nyadi lebuh hari Sabat. Nya alai bala tuai orang Judah lalu bejaku ngagai orang ke udah digeraika nya, “Tu hari Sabat. Nuan ngelanggar Adat ngesan tikai nuan.” Tang ku orang nya nyaut sida, “Orang ke ngeraika aku bejaku ngagai aku, ngasuh aku ngambi tikai aku, lalu bejalai.’ ” Sida lalu nanya iya, “Sapa orang nya ke ngasuh nuan ngambi tikai nuan, lalu ngasuh nuan bejalai?” Nyadi orang ke udah digeraika nya enda nemu sapa orang nya, laban Jesus udah melesitka Diri ngagai tekang bala mayuh dia. Udah nya Jesus betemu enggau orang nya dalam Rumah Sembiang, lalu bejaku ngagai iya, “Nuan diatu udah gerai. Anang agi bedosa, enggai ke utai ti jai agi ari nya nyadi ba nuan.” Orang nya mupuk lalu madah ngagai bala tuai orang Judah, Jesus nya meh orang ke udah ngeraika iya. Nya alai orang Judah belabuh ngenusahka Jesus, laban Iya ngereja utai nya lebuh hari Sabat. Tang ku Jesus nyaut sida, “Apai Aku seruran gawa. Lalu Aku Empu mega gawa.” Ketegal nya orang Judah bebendar agi deka munuh Iya, laban Iya ukai semina ngelanggar adat hari Sabat, tang mega ngumbai Allah Taala Apai Iya, lalu ari nya ngaga Diri sebaka enggau Allah Taala. Ku Jesus bejaku ngagai sida, “Enggau bendar Aku madah ngagai kita, Anak enda ulih ngereja utai ngatika Diri, tang semina utai ti dipeda Iya kereja Apai, laban sebarang utai dikereja Apai nya mega dikereja Anak. Apai rinduka Anak, lalu ngayanka ngagai Anak semua utai ti dikereja Iya. Lalu Iya deka ngereja pengawa ti besai agi ari nya, ngambika kita alit ati. Baka Apai ke ngangkatka orang ari mati, lalu meri sida pengidup, baka nya mega Anak meri pengidup ngagai sebarang orang ke dikedekaka Iya. Apai enda ngakim orang, tang udah meri semua kuasa ngakim ngagai Anak, ngambika semua orang ngemesaika Anak, baka sida ke ngemesaika Apai. Barang sapa enda ngemesaika Anak, enda ngemesaika Apai ke ngirumka Iya. “Enggau bendar Aku madah ngagai kita, orang ke ninga jaku Aku lalu arapka Iya ti udah ngirumka Aku, bulih pengidup ti meruan belama iya, lalu enda diakim, tang udah meraka ari pemati ngagai pengidup. Enggau bendar Aku madah ngagai kita, maya deka datai, lalu endang udah datai diatu, alai orang ke mati deka ninga nyawa Anak Allah Taala, lalu orang ke ninga nyawa nya deka idup. Laban baka Apai ke pun pengidup, baka nya mega Iya udah ngeletak Anak nyadika pun pengidup, lalu udah meri Iya kuasa ngakim, laban Iya Anak Mensia. Anang tekenyit ati ketegal utai tu, laban maya deka datai alai semua orang ke udah mati deka ninga nyawa Iya, lalu deka pansut ari kubur: orang ke udah ngereja utai ti badas, diangkatka idup baru ngagai pengidup, lalu orang ke udah ngereja penyai, diangkatka idup baru lalu diukum. “Aku enda ulih ngereja utai ngatika Diri. Aku semina ngakim nitihka asuh Allah Taala, lalu pemutus penemu Aku lurus, laban Aku ukai ngereja utai nitihka peneka Aku Empu, tang nitihka peneka Iya ke ngirumka Aku. “Enti Aku besaksika pasal Diri Empu, saksi Aku ukai saksi ti bendar. Bisi siku orang ke besaksika Aku, lalu Aku nemu, saksi iya pasal Aku endang amat. Kita ngirumka seruan ngagai John, lalu iya madahka utai ti bendar. Ukai reti nya Aku begunaka saksi mensia, tang Aku nyebut utai tu ngambika kita diselamatka. John nya lampu ti menyadi lalu manchar, lalu kita gaga ati enda lama ngasaika penampak iya. Tang saksi Aku besai agi ari saksi John. Pengawa ti udah diasuh Apai tembuka Aku, iya nya pengawa ti dikereja Aku diatu, besaksi ngarika Aku nunjukka Apai udah ngirumka Aku. Lalu Apai, ke ngirumka Aku, udah mega besaksika pasal Aku. Kita nadai udah kala ninga nyawa Iya tauka meda Iya, lalu jaku Iya nadai dalam kita, laban kita enda arapka Iya ke dikirumka Apai. Kita mansik Bup Kudus, laban kita ngumbai diri ulih tetemuka pengidup ti meruan belama iya dalam Bup Kudus. Bup Kudus nya ti besaksika pasal Aku! Tang kita enggai datai ngagai Aku lalu bulih pengidup. Aku ukai minta Diri dipuji mensia. Tang Aku nemu kita nadai pengerindu Allah Taala dalam kita. Aku udah datai dalam nama Apai Aku, lalu kita enda nerima Aku. Tang enti orang datai dalam nama iya empu, kita nerima iya. Baka ni ku kita ulih arap, enti kita minta puji pangan diri, lalu enda minta puji ari Allah Taala siku aja? Anang ngumbai Aku deka bedawaka kita di mua Apai. Orang ke deka bedawaka kita nya Moses, ke alai kita manggaika pengadang kita. Enti kita arapka Moses, kita tentu nemu arapka Aku, laban iya nuliska pasal Aku. Tang enti kita enda arapka utai ti ditulis iya, baka ni ku kita ulih arapka jaku Aku?” Udah bekau nya Jesus lalu ngelayang ke seberai Danau Galili (mega dikumbai Tasik Tiberias). Mayuh amat orang majak nitihka Iya, laban sida udah meda kereja ajih ti dikereja Iya ba orang ke sakit. Jesus niki ngagai bukit sigi, lalu duduk enggau sida murid Iya. Nyadi Gawai Paska, iya nya gawai orang Judah, nyau semak. Lebuh Iya malik lalu tepedaka mayuh amat orang mansang ngagai Iya, Iya lalu bejaku ngagai Philip, “Dini alai kitai meli pemakai chukup ke semua orang tu?” Iya nyebut nya kena Iya nguji Philip, laban Iya nemu utai ti deka dikereja Diri. Philip lalu nyaut Iya, “Gaji enam bulan pen enda meh chukup kena meli roti ke sida tu datai ke semua sida ampit mimit siku-siku.” Siku ari murid Iya, Andrew, menyadi Simon Peter, lalu bejaku ngagai Iya, “Siku nembiak ditu bisi lima iti tuku roti barli, enggau dua iku ikan. Tang baka ni ku nya tau chukup ke orang ke ngemayuh tu?” Jesus lalu bejaku, “Asuh orang mayuh duduk.” Nyadi ba endur nya mayuh rumput. Nya alai semua orang mayuh duduk. Pemayuh sida kira lima ribu iku. Jesus lalu ngambi tuku roti nya, lalu lebuh Iya udah meri terima kasih, Iya nyadung roti nya ngagai sida ke duduk. Baka nya mega ikan, nitihka penyampau ti dikedekaka sida. Lebuh sida udah kenyang magang, Iya lalu bejaku ngagai sida murid Iya, “Gumpul semua teda pemakai nya, ngambika enda tebasau ngapa.” Nya alai sida ngumpul dua belas bakul penuh teda ari lima iti tuku roti barli ti udah diempa orang mayuh. Lebuh orang mayuh meda kereja ajih ti udah dikereja Jesus, sida lalu belabuh bejaku, “Orang tu amat nabi ke dianti datai ngagai dunya!” Lebuh Jesus nemu sida baru deka datai lalu mejalka Iya nyadi raja, Iya niki ngagai bukit baru, keDiri Iya aja. Lebuh hari nyau lemai, sida murid Iya lalu nurun ngagai danau, nepan sebuah perau, lalu ngelayang ke seberai ngagai Kapernaum. Hari nyau udah petang, lalu Jesus mengkang apin datai ngagai sida. Tasik lalu begelumbang, laban ribut balat amat nyadi. Lebuh sida udah bedayung kira tiga tauka empat batu, sida tepedaka Jesus bejalai ba atas ai, mansang semak ngagai perau sida. Sida lalu balat amat takut. Tang ku Iya bejaku ngagai sida, “Aku tu. Anang takut.” Sida lalu deka mai Iya nepan perau. Tekala nya perau nya lalu sangkai ba tebing ti digagai sida. Hari siti, bala orang ke tinggal di seberai danau nya, meda semina sebuah aja perau bisi dia. Sida mega nemu Jesus enda nepan perau nya enggau sida murid Iya, tang sida udah mupuk kediri. Udah nya perau ari Tiberias datai semak endur alai sida ke makai roti udah bekau Tuhan ke meri terima kasih. Nya alai lebuh orang mayuh nemu Jesus enggau bala murid Iya sama nadai dia, sida lalu nepan perau, lalu mupuk ngagai Kapernaum, ngiga Jesus. Lebuh sida nemu Jesus di seberai danau nya, sida lalu bejaku ngagai iya, “Pengajar, kemaya Nuan datai ditu?” Ku Jesus nyaut sida, “Enggau bendar Aku madah ngagai kita, kita ngiga Aku, ukai laban kita udah meda kereja ajih, tang laban kita udah kenyang makai roti. Anang bekereja ngulihka pemakai ti nemu buruk, tang bekereja ngulihka pemakai ti tan, ti meri pengidup ti meruan belama iya. Pemakai nya deka diberi Anak Mensia ngagai kita, laban Allah Taala ti Apai udah ngasuh Iya ngereja nya.” Sida lalu nanya Iya, “Nama utai ti patut dikereja kami ngambika kami ngereja peneka Allah Taala?” Ku Jesus nyaut, “Tu utai ti diasuh Allah Taala kereja kita: arapka Iya ke udah dikirumka Iya.” Sida lalu bejaku ngagai Iya, “Enti pia, nama tanda ti deka diberi Nuan ngambika kami meda lalu arapka Nuan? Nama utai ti deka dikereja Nuan? Aki ini kami makai mana di menua puang. Munyi ti udah ditulis, ‘Iya meri sida roti ari serega ke diempa sida.’ ” Jesus lalu bejaku ngagai sida, “Enggau bendar Aku madah ngagai kita, ukai Moses ke meri kita roti ari serega, tang Apai Aku ke meri kita roti ti bendar ari serega. Laban roti Allah Taala nya Iya ke nurun ari serega, lalu meri pengidup ngagai dunya.” Ku sida bejaku ngagai Iya, “Tuhan, beri roti nya ngagai kami berari.” Ku Jesus bejaku ngagai sida, “Aku tu meh roti pengidup. Barang sapa datai ngagai Aku, enda agi lapar, lalu barang sapa arapka Aku, enda agi aus. Tang munyi ti udah disebut Aku ngagai kita, kita udah meda Aku tang agi ga kita mengkang enda arap. Semua utai ti diberi Apai ngagai Aku, deka datai ngagai Aku, lalu barang sapa datai ngagai Aku sigi enda ditulak Aku, laban Aku udah datai ari serega, ukai deka ngereja peneka Aku Empu, tang ngereja peneka Iya ke ngirumka Aku. Lalu tu peneka Iya ke ngirumka Aku: Aku enda tau ngelenyauka indah siku ari semua orang ke udah diberi Iya ngagai Aku, tang ngangkatka iya ba hari ti penudi. Tu meh peneka Apai Aku, iya nya, semua orang ke meda Anak, lalu arapka Iya, bulih pengidup ti meruan belama iya, lalu Aku deka ngangkatka iya ba hari ti penudi.” Orang Judah lalu mutap pasal Iya, laban Iya udah nyebut, “Aku tu meh roti ti nurun ari serega.” Ku sida bejaku, “Ukai enda Iya tu Jesus anak Josep, lalu kitai ngelala apai indai Iya? Baka ni ku Iya diatu nyebut, ‘Aku udah nurun ari serega’?” Jesus lalu nyaut sida, “Anang mutap. Nadai orang ulih datai ngagai Aku enti Apai ke udah ngirumka Aku, enda ngasuh iya, lalu Aku deka ngangkatka iya ba hari ti penudi. Endang udah ditulis dalam bup sida nabi, ‘Lalu semua sida deka diajar Allah Taala.’ Genap iku orang ke udah ninga lalu belajar ari Apai, datai ngagai Aku. Ukai reti nya orang bisi udah meda Apai, kelimpah ari Iya ke datai ari Allah Taala. Semina Iya aja ke udah meda Apai. Enggau bendar Aku madah ngagai kita, barang sapa arap deka bulih pengidup ti meruan belama iya. Aku tu meh roti pengidup. Aki ini kita makai mana di menua puang, tang sida mati. Tu roti ti nurun ari serega, ngambika orang makai iya lalu enda mati. Aku tu roti ti idup, ke nurun ari serega. Barang sapa makai roti tu deka idup belama iya, lalu roti ti deka diberi Aku kena ngidupka dunya nya tubuh Aku Empu.” Orang Judah lalu bekelikuh enggau pangan diri. Ku sida, “Baka ni ku orang tu ulih meri isi Diri ke diempa kitai?” Jesus lalu bejaku ngagai sida, “Enggau bendar Aku madah ngagai kita, enti kita enda makai tubuh Anak Mensia, lalu enda ngirup darah Iya, kita nadai pengidup dalam kita. Orang ke makai tubuh Aku, lalu ngirup darah Aku, bisi pengidup ti meruan belama iya, lalu Aku deka ngangkatka sida ba hari ti penudi, laban tubuh Aku nya pemakai ti bendar, lalu darah Aku nya ai irup ti bendar. Orang ke makai tubuh Aku, lalu ngirup darah Aku, meruan dalam Aku, lalu Aku meruan dalam sida. Baka Apai ti idup udah ngirumka Aku, lalu Aku idup laban Apai, baka nya mega orang ke makai Aku deka idup laban Aku. Tu meh roti ti nurun ari serega, ukai baka roti ti diempa aki ini kita, tang sida mati. Tang orang ke makai roti tu deka idup belama iya.” Iya nyebut nya lebuh Iya ngajar dalam balai gempuru di Kapernaum. Lebuh mayuh ari bala sida murid Iya ninga nya, sida lalu bejaku, “Ajar tu kelalu mar. Sapa ulih nerima ajar tu?” Tang Jesus nemu sida murid Iya mutapka ajar nya, lalu ku Iya bejaku ngagai sida, “Kati kita enda nyamai ati ninga jaku nya? Enti pia, kati enti kita meda Anak Mensia niki ngagai endur Iya ti suba? Roh aja ke meri pengidup; kuasa mensia enda ulih ngereja utai. Jaku ti udah disebut Aku ngagai kita, nya Roh enggau pengidup. Tang sekeda kita enda arap.” Laban Jesus nemu kenyau ari pun, sapa ke enda arap, lalu sapa ke deka nyual Iya. Lalu ku Iya bejaku, “Nya meh kebuah Aku udah madah ngagai kita, nadai orang ulih datai ngagai Aku, enti Apai enda ngeletak iya.” Ketegal nya, mayuh murid Jesus ninggalka Iya, lalu enggai agi bejalai enggau Iya. Nya alai Iya lalu bejaku ngagai sida ke dua belas, “Kati kita deka mega ninggalka Aku?” Simon Peter lalu nyaut Iya, “Tuhan, sapa patut digagai kami? Nuan ngembuan jaku ti meri pengidup ti meruan belama iya. Kami udah arap lalu nemu, Nuan tu meh Anak Allah Taala ti kudus.” Ku Jesus nyaut sida, “Aku udah milih kita ke dua belas, ukai enda? Tang taja pia, siku ari kita nya sitan?” Iya bejakuka pasal Judas anak Simon Iskariot, laban Judas, siku ari sida ke dua belas, deka nyual Iya. Udah bekau nya Jesus bejalai ba sebelah menua Galili. Iya enggai bejalai di menua Judea, laban bala tuai orang Judah dia ngiga peluang deka munuh Iya. Gawai Belangkau nyau deka nyadi. Nya alai sida menyadi Iya lalu bejaku ngagai Iya, “Angkat ari tu lalu mansang ngagai menua Judea, ngambika sida murid Nuan mega meda pengawa ti dikereja Nuan; laban nadai orang ngelalaika pengawa diri, enti iya deka minta diri ditemu orang. Enti Nuan ngereja utai nya, pandangka Diri ngagai dunya!” ( Indah sida menyadi Iya deh enda arapka Iya.) Ku lalu bejaku ngagai sida, “Maya Aku apin datai. Tang maya kita endang seruran bisi. Dunya enda ulih begedika kita, tang iya begedika Aku, laban Aku besaksi ngelaban iya, madahka pengawa iya jai. Awakka kita aja meh mupuk ngagai gawai nya; Aku enda, laban maya Aku apin datai.” Lebuh Iya udah nyebut nya, Iya lalu ninggalka Diri di Galili. Tang lebuh sida menyadi lelaki Iya udah mupuk ngagai gawai nya, nya baru Iya Empu mupuk, ukai ngayanka Diri, tang belalai. Bala tuai orang Judah begigaka Iya ba gawai nya. Ku sida, “Dini alai Iya?” Mayuh orang mut-mut bejakuka pasal Iya. Tang ku sekeda sida, “Iya orang ke badas.” Kenu ku sekeda sida ti bukai, “Ukai. Iya nipu orang mayuh.” Tang nadai siku orang berani bejaku inggar pasal Iya, laban sida takutka tuai orang Judah. Kira ba setengan gawai nya, Jesus mansang ngagai Rumah Sembiang lalu belabuh ngajar. Bala tuai orang Judah balat amat alit ati. Ku sida, “Baka ni ku orang ke nadai kala besekula tu ngemayuh nya penemu?” Jesus lalu nyaut sida, “Ajar ti dibai Aku ukai enggi Aku, tang enggi Iya ke ngirumka Aku. Barang sapa bebendar deka ngereja peneka Allah Taala, deka nemu sekalika jaku ajar nya datai ari Allah Taala, tauka Aku bejaku ngatika Diri Orang ke bejaku ngatika diri, semina ngemuliaka diri empu. Tang orang ke keran deka ngemuliaka Iya ke ngirumka Iya, nya meh orang ke lurus ati, lalu iya nadai utai ti bula dalam iya. Ukai enda Moses ke meri kita Adat? Tang taja pia, nadai siku kita ngasika Adat. Nama kebuah kita begigaka peluang munuh Aku?” Orang mayuh lalu nyaut, “Nuan tu dirasuk antu! Sapa nguji munuh Nuan?” Ku Jesus nyaut sida, “Aku ngereja siti kereja ajih, lalu semua kita balat amat alit ati. Moses meri kita adat betutus (iya ti bendar, ukai Moses tang aki ini kita ke meri adat nya), lalu kita nutus orang lebuh hari Sabat. Enti orang ditutus lebuh hari Sabat, ngambika kita enda ngelanggar adat Moses, nama kebuah kita pedis ati ngagai Aku ketegal Aku ngeraika semua tubuh orang nya lebuh hari Sabat? Anang ngakim beduduk ba utai ti dipeda, tang ngakim ngena pengelurus. Sekeda orang Jerusalem bejaku, “Ukai enda Iya tu orang ke deka dibunuh sida? Lalu Iya bisi ditu, bejaku di mua orang mayuh, tang sida nadai nyebut utai ngagai Iya! Kada enda bala tuai nemu Iya endang Kristus. Tang kitai nemu ari ni penatai Iya; tang lebuh Kristus datai, nadai orang nemu ari ni penatai Iya.” Jesus lalu bejaku enggau nyawa ti inggar lebuh Iya ngajar dalam Rumah Sembiang, “Kita ngelala Aku, lalu kita nemu ari ni penatai Aku. Aku ukai datai ari peneka Aku Empu, tang Iya ke ngirumka Aku endang tau dikarapka, lalu kita enda ngelala Iya. Aku ngelala Iya, laban Aku datai ari Iya, lalu Iya udah ngirumka Aku.” Sida lalu nguji nangkap Iya, tang nadai siku sida terengkah jari ba Iya, laban maya Iya apin datai. Tang taja pia, mayuh orang arapka Iya. Ku sida, “Lebuh Kristus datai, kati Iya deka ngereja mayuh agi kereja ajih ari ti udah dikereja orang tu?” Lebuh orang Parisi ninga orang mayuh betegut bejakuka pasal Jesus, sida tuai imam enggau orang Parisi lalu ngasuh bala pemesai nangkap Iya. Ku Jesus bejaku, “Aku semina begulai enggau kita enda lama da agi. Udah nya Aku deka mupuk ngagai Iya ti udah ngirumka Aku. Kita deka ngiga Aku, tang kita enda tetemuka Aku. Lalu kita enda ulih datai ngagai endur alai Aku.” Ku bala tuai orang Judah bejaku enggau pangan diri, “Kini ke tunga Iya deka mupuk alai kitai enda tetemuka Iya? Kati Iya deka mupuk ngagai mayuh bengkah nengeri orang Gerika, alai bansa kitai ke pambar, lalu ngajar orang Gerika? Nama reti utai ti ku Iya lebuh Iya nyebut, ‘Kita deka ngiga Aku, tang kita enda tetemuka Aku,’ enggau ‘Kita enda ulih datai ngagai endur alai Aku’?” Ba hari ti penudi dalam gawai nya, iya nya hari ti pemadu besai, Jesus bediri, lalu bejaku enggau nyawa ti inggar, “Awakka semua orang ke aus datai ngagai Aku, lalu awakka orang ke arapka Aku, ngirup. Munyi ti disebut Bup Kudus, ‘Ari ati orang ke arap deka pansut ai ti meri pengidup.’ ” Jesus bejaku ngenang pasal Roh Kudus ti deka diterima orang ke arapka Iya. Laban lebuh maya nya, Roh Kudus apin diberi, laban Jesus apin dimuliaka. Lebuh sida ninga jaku nya, sekeda sida ke dalam tekang bala mayuh nya lalu bejaku, “Iya tu amat nabi nya!” Ku sida ti bukai, “Iya tu Kristus!” Tang ku sekeda orang bukai, “Nadai patut Kristus datai ari Galili? Ukai enda Bup Kudus madahka Kristus nya peturun David, lalu datai ari Betlehem, nengeri ti udah alai David diau kelia?” Nya alai orang mayuh beserekang penemu pasal Iya. Sekeda sida deka nangkap Iya, tang nadai siku sida terengkah jari ba Iya. Bala pemesai pulai baru ngagai bala tuai imam enggau orang Parisi, ke lalu nanya sida, “Nama kebuah kita enda nangkap Iya?” Ku bala pemesai nyaut, “Nadai orang udah kala bejaku baka nya!” Orang Parisi lalu nyaut sida, “Kati kita empu udah mega kena tipu Iya? Kati bala tuai tauka orang Parisi bisi udah arapka Iya? Tang bala sida tu, ke enda nemu Adat Moses, ditinggang sumpah.” Nikodimus, ke udah betemu enggau Jesus dulu ari nya, siku ari raban sida, lalu nanya sida, “Kati Adat kitai ngasuh kitai ngakim orang sebedau kitai mendingka iya lalu mansik utai ti dikereja iya?” Sida lalu nyaut iya, “Kati nuan datai ari Galili baka Iya? Pansik dalam Bup Kudus, nya baru nuan nemu, nadai nabi deka datai ari Galili.” Sida lalu pulai, Jesus lalu mupuk ngagai Bukit Kana. Tumu pagi hari siti, Iya datai baru ba Rumah Sembiang. Semua orang datai ngagai Iya. Iya lalu duduk, lalu belabuh ngajar sida. Sida pengajar Adat, enggau sida orang Parisi lalu mai siku indu ke udah ditangkap butang, lalu ngasuh indu nya bediri di mua semua sida, lalu bejaku ngagai Jesus, “Pengajar, indu tu udah ditangkap butang. Nyadi dalam Adat, Moses ngasuh kitai nuku orang ke baka tu ngena batu. Baka ni ku penemu Nuan?” Sida nyebut nya kena sida nguji Iya, ngambika sida ulih bedawaka Iya. Jesus meremi, lalu nulis ba tanah ngena tunjuk Iya. Ninga sida ituk nanya Iya, Iya bediri lalu bejaku ngagai sida, “Awakka orang ke enda kala bedosa ari bala kita, dulu nuku iya ngena batu.” Iya lalu meremi baru, lalu nulis ba tanah ngena tunjuk Iya. Lebuh sida ninga nya, siku-siku sida lalu mupuk ari endur nya, berengkah ari sida ke tuai. Semina Jesus aja agi tinggal, enggau indu ke bediri di mua Iya. Jesus bediri lalu bejaku enggau indu nya, “Indu, ni bala sida nya tadi? Kati orang nadai udah ngukum nuan?” Indu nya lalu nyaut, “Nadai, Tuhan.” Lalu ku Jesus bejaku, “Aku pen enda meh ngukum nuan. Mupuk meh nuan, tang anang agi bedosa.”] Jesus lalu bejaku baru ngagai sida, “Aku tu penampak dunya. Barang sapa nitihka Aku, enda bejalai dalam pemetang, tang deka ngembuan penampak ti meri pengidup.” Orang Parisi lalu bejaku ngagai Iya, “Nuan besaksika pasal Diri Empu. Saksi Nuan nadai guna.” Disaut Jesus, “Enti sema Aku besaksika pasal Diri Empu, saksi Aku endang amat, laban Aku nemu ari ni Aku datai, enggau kini ke tunga Aku deka mupuk, tang kita enda nemu ari ni penatai Aku, tauka kini ke tunga Aku deka mupuk. Kita ngakim ngena chara mensia. Aku enda ngakim orang. Tang enti sema Aku ngakim orang, pemutus penemu Aku endang ngena, laban ukai semina Aku aja ke ngakim, tang Aku enggau Apai ke ngirumka Aku. Utai tu endang bisi ditulis dalam Adat kita: saksi ti diguna nya saksi ari dua iku orang. Aku besaksika pasal Aku Empu, lalu Apai ke ngirumka Aku mega besaksika pasal Aku.” Sida lalu nanya Iya, “Dini alai Apai Nuan?” Jesus lalu nyaut, “Kita enda ngelala Aku tauka Apai Aku. Enti kita ngelala Aku, kita tentu ngelala Apai Aku.” Jesus nyebut semua jaku nya lebuh Iya benung ngajar dalam bilik sarang wang Rumah Sembiang. Tang nadai orang nangkap Iya, laban maya Iya apin datai. Jesus lalu bejaku baru ngagai sida, “Aku deka mupuk, lalu kita deka ngiga Aku, tang kita deka mati dalam dosa kita. Kita enda ulih datai ngagai endur ti deka digagai Aku.” Bala tuai orang Judah lalu bejaku, “Kati Iya deka munuh Diri? Kati nya kebuah Iya nyebut, ‘Endur ti deka digagai Aku, enda ulih digagai kita’?” Ku Iya bejaku ngagai sida, “Kita datai ari baruh, Aku datai ari atas. Kita endang orang dunya, Aku ukai orang dunya. Aku udah madahka kita deka mati dalam dosa kita, laban kita deka mati dalam dosa kita enti kita enda arapka ‘Aku tu meh Aku.’ ” Ku sida bejaku ngagai Iya, “Sapa Nuan?” Jesus lalu nyaut, “Orang ke udah dipadahka Aku ngagai kita kenyau ari pun. Aku mayuh utai ti deka disebut pasal kita, mayuh utai ti deka diukum. Tang Iya ke ngirumka Aku endang tau dikarapka, lalu Aku madah ngagai dunya utai ti udah didinga Aku ari Iya.” Sida enda nemu Iya bejakuka pasal Apai ngagai sida. Nya alai ku Iya bejaku, “Lebuh kita udah nuatka Anak Mensia, nya baru kita deka nemu Aku tu meh Iya, lalu nemu Aku ukai ngereja utai nitihka peneka Aku Empu, tang semina bejaku nitihka ajar Apai. Lalu Iya ke ngirumka Aku bisi enggau Aku. Iya nadai kala ninggalka Aku keDiri, laban Aku seruran ngereja utai ti ngerinduka ati Iya.” Lebuh Iya nyebut utai nya, mayuh orang arapka Iya. Jesus lalu madah ngagai orang Judah ke udah arapka Iya, “Enti kita bepegai ba jaku Aku, kita amat murid Aku, lalu kita deka nemu pemendar, lalu pemendar deka ngelepaska kita.” Sida lalu nyaut Iya, “Kami tu peturun Abraham, lalu nadai udah kala nyadi ulun orang. Nama reti, ‘Kita deka dilepaska’?” Ku Jesus nyaut sida, “Enggau bendar Aku madah ngagai kita, genap iku orang ke ngereja dosa, nyadi ulun dosa. Ulun enda diau tetap dalam rumah nya belama iya; tang anak diau dalam rumah nya belama iya. Nya alai, enti Anak ngelepaska kita, kita amat dilepaska. Aku nemu kita endang peturun Abraham; tang taja pia, kita ngiga peluang munuh Aku, laban kita enggai nerima jaku Aku. Aku madahka pasal utai ti udah dipadahka Apai ngagai Aku, baka kita ke ngereja utai ti didinga kita ari apai kita.” Ku sida nyaut Iya, “Kami anak Abraham.” Disaut Jesus, “Enti kita amat anak Abraham, kita tentu deka ngereja utai ti udah dikereja Abraham, tang diatu kita nguji munuh Aku, ke udah madahka utai ti bendar ti didinga Aku ari Allah Taala. Nya ukai utai ti dikereja Abraham. Kita ngereja utai ti udah dikereja apai kita.” Ku sida bejaku ngagai Iya, “Kami ukai anak ampang. Kami bisi apai. Allah Taala meh Apai kami.” Ku Jesus bejaku ngagai sida, “Enti Allah Taala amat Apai kita, kita tentu rinduka Aku, laban Aku datai ari Allah Taala, lalu diatu Aku bisi ditu. Aku ukai datai nitihka peneka ati7 Aku Empu, tang Allah Taala ke ngirumka Aku. Nama kebuah kita enda meretika utai ti disebut Aku? Laban kita enda ulih nerima jaku Aku. Kita tu anak Sitan, lalu kita keran deka ngereja utai ti dikedekaka apai kita. Iya endang pemunuh kenyau ari pun, lalu iya endang nadai kaul enggau pemendar, laban iya nadai pemendar dalam iya. Lebuh iya nyebut utai ti bula, iya endang bejaku nitihka perangai iya empu laban iya endang pemula, lalu iya endang apai pemula. Tang laban Aku madahka utai ti bendar, kita enggai arapka Aku. Sapa ari bala kita ngumbai Aku udah bedosa? Enti Aku madahka utai ti bendar, nama kebuah kita enda arapka Aku? Nembiak Allah Taala ninga jaku Allah Taala. Kebuah kita enda ninga jaku Allah Taala nya laban kita ukai nembiak Allah Taala.” Orang Judah lalu nyaut Iya, “Kati kami enda ngena enti kami ngumbai Nuan orang Samaria lalu Nuan dirasuk antu?” Disaut Jesus, “Aku ukai dirasuk antu, tang Aku ngemesaika Apai Aku, lalu kita ngeleseka Aku. Tang Aku ukai ngemesaika Diri Empu. Bisi siku ke patut dikemesaika, lalu Iya nyadi Hakim. Enggau bendar Aku madah ngagai kita, barang sapa ngasika jaku Aku, enda mati.” Ku orang Judah bejaku ngagai Iya, “Diatu baru kami nemu Nuan endang amat dirasuk antu! Abraham mati, lalu baka nya mega sida nabi, lalu ku Nuan, ‘Barang sapa ngasika jaku Nuan, enda mati.’ Kati Nuan besai agi ari apai kami Abraham, ke udah mati? Sida nabi mega mati! Sapa Nuan tu ku Nuan?” Disaut Jesus, “Enti Aku ngemesaika Diri Empu, utai nya nadai guna. Apai Aku ke ngemesaika Aku, Iya ke dikumbai kita Allah Taala kita, taja pen kita enda ngelala Iya. Tang Aku ngelala Iya. Enti Aku madahka Diri enda ngelala Iya, Aku bula baka kita. Tang Aku amat ngelala Iya, lalu Aku ngasika jaku Iya. Aki kita Abraham gaga ati deka meda hari Aku. Iya meda hari nya, lalu iya gaga.” Orang Judah lalu bejaku ngagai iya, “Umur Nuan deh apin bulih lima puluh taun, lalu Nuan udah meda Abraham?” Ku Jesus bejaku ngagai sida, “Enggau bendar Aku madah ngagai kita, sebedau Abraham ada, Aku endang udah bisi.” Sida lalu ngambi batu deka nuku Iya, tang Jesus belalai lalu pansut ari Rumah Sembiang. Lebuh Jesus benung bejalai, Iya tepedaka orang siku ke buta kenyau ari ada. Sida murid Iya lalu nanya Iya, “Pengajar, dosa sapa ti ngasuh iya ada buta? Dosa iya empu, tauka dosa apai indai iya?” Disaut Jesus, “Iya ke buta nya ukai laban dosa iya tauka dosa apai indai iya, tang ngambika kereja Allah Taala dipandangka ba iya. Kitai enda tau enda ngereja pengawa Iya ke ngirumka Aku, kala lebuh hari agi siang. Lebuh hari nyau malam, nadai orang ulih gawa. Seagi-agi Aku di dunya tu, Aku nyadika penampak dunya.” Lebuh Iya udah nyebut nya, Iya ngeludah ngagai tanah lalu ngaga tanah liat ngena liur Iya, lalu ngunsutka tanah liat nya ba mata orang nya, lalu bejaku ngagai iya, “Mupuk nuan, lalu basu mua nuan ba Letung Siloam.” (Reti ‘Siloam’ nya “Dikirumka”.) Orang nya mupuk, masu mua diri, lalu pulai baru sereta ulih meda. Bala pangan iya enggau orang ke udah meda iya minta sedekah sebedau nya, nanya, “Ukai enda iya tu ke selalu duduk minta sedekah?” Ku sekeda sida bejaku, “Iya meh nya.” Tang ku sida ti bukai, “Ukai, tang iya baka gamal orang nya.” Tang orang nya empu majak nyebut, “Aku meh tu.” Tang sida majak lalu nanya iya, “Enti pia, baka ni ku nuan diatu ulih meda?” Disaut iya, “Orang ke benama Jesus ngaga tanah liat, lalu ngunsutka tanah liat nya ba mata aku, lalu bejaku ngagai aku, ‘Mupuk nuan ngagai letung Siloam, lalu basu mua nuan’. Aku lalu mupuk, masu mua aku, lalu aku ulih meda.” Ku sida nanya iya, “Dini alai Iya?” Iya lalu nyaut, “Entah, enda aku nemu.” Sida lalu mai orang ke udah buta nya ngagai orang Parisi. Nyadi Jesus udah ngaga tanah liat lalu ngeraika orang nya kena hari Sabat. Orang Parisi mega nanya orang nya, baka ni ku iya ulih meda. Ku iya madah ngagai sida, “Iya ngengkahka tanah liat ba mata aku. Aku empungas mua aku, lalu diatu aku ulih meda.” Sekeda orang Parisi lalu bejaku, “Orang nya ukai ari Allah Taala, laban Iya enda ngasika adat hari Sabat.” Tang ku sida ti bukai bejaku, “Baka ni ku orang ke bedosa ulih ngereja kereja ajih baka nya?” Sida lalu beserekang penemu enggau pangan diri. Nya alai sida lalu nanya orang nya baru, “Nama penemu nuan pasal orang nya? Mata nuan ke udah digeraika Iya.” Iya lalu nyaut, “Iya nabi.” Bala tuai orang Judah enda arapka orang nya amat udah buta lalu diatu ulih meda. Sida lalu ngangauka apai indai orang ke nyau ulih meda nya, lalu nanya seduai iya, “Kati tu anak seduai, ke dipadahka seduai ada buta? Baka ni ku iya ulih meda diatu?” Disaut apai indai iya, “Kami nemu iya endang anak kami duai, lalu kami nemu iya endang ada buta, tang kami enda nemu baka ni ku iya diatu ulih meda, lalu kami pen enda mega nemu sapa ke ngasuh iya ulih meda. Tanya iya empu. Iya udah besai tuai. Iya nemu nyaut kediri empu!” Apai indai iya nyebut nya laban seduai iya takutka tuai orang Judah, laban bala tuai udah besetuju deka muai ari balai gempuru barang sapa madahka diri arapka Jesus nya Kristus. Nya kebuah apai indai iya nyebut, “Iya udah besai tuai. Tanya iya empu!” Sida lalu ngangauka orang ke buta nya kedua kali, lalu bejaku ngagai iya, “Nuan enda tau enda besumpah di mua Allah Taala, deka madahka utai ti bendar! Kami nemu orang nya orang ke bedosa.” Iya lalu nyaut, “Aku enda nemu enti Iya nya orang ke bedosa, tang Aku nemu, aku udah buta, tang diatu aku ulih meda.” Ku sida bejaku ngagai iya, “Nama utai ti dikereja Iya ngagai nuan? Baka ni ku Iya ngasuh nuan ulih meda?” Iya lalu nyaut sida, “Aku udah madahka nya ngagai kita, tang kita enggai mending. Nama kebuah kita keran deka ninga nya baru? Kati kita deka nyadi murid Iya?” Sida lalu ngeleseka iya, ku sida, “Nuan tu murid Iya. Kami murid Moses. Kami nemu Allah Taala udah bejaku ngagai Moses. Tang pasal orang tu, indah penatai Iya deh kami enda nemu!” Orang nya lalu nyaut, “Nyelai amat nya! Kita enda nemu ari ni penatai Iya, tang Iya udah ngasuh aku ulih meda! Kitai nemu Allah Taala enda mendingka orang ke bedosa, tang mendingka orang ke nyembah Iya lalu ngasika peneka Iya. Kenyau ari penumbuh dunya, nadai kitai udah kala ninga orang ngasuh orang ke buta kenyau ari ada, ulih meda. Enti orang tu ukai ari Allah Taala, Iya enda ulih ngereja utai.” Sida lalu nyaut iya, “Nuan tu bedosa kenyau ari ada. Kati nuan nguji ngajar kami?” Sida lalu muai iya ari balai gempuru. Jesus ninga sida udah muai iya, lalu lebuh Jesus udah tetemuka iya, Iya lalu nanya orang nya, “Kati nuan arapka Anak Mensia?” Iya lalu nyaut, “Sapa orang nya, Tuan? Padahka ngagai aku ngambika aku arapka Iya!” Jesus lalu bejaku ngagai iya, “Nuan udah meda Iya. Iya ke bejaku enggau nuan diatu meh Iya.” Orang nya lalu bejaku, “Aku arap, Tuhan!” Iya lalu nyembah Jesus. Jesus lalu bejaku, “Aku datai ngagai dunya laban Aku deka ngakim, ngambika orang ke buta, meda, lalu orang ke meda, buta.” Sekeda orang Parisi ke semak Iya ninga nya, lalu bejaku ngagai Iya, “Kati kami tu buta?” Ku lalu Jesus bejaku ngagai sida, “Enti kita buta, kita tentu enda bedosa. Tang laban kita ngumbai diri ulih meda, dosa kita mengkang.” “Enggau bendar Aku madah ngagai kita, orang ke enda tama ngagai kandang bedus nengah pintu, tang niki nengah jalai bukai, nya penchuri enggau perumpak. Tang orang ke tama nengah pintu nya pengibun bedus. Orang ke nyaga pintu, muka pintu ke iya. Raban bedus ninga nyawa iya, lalu iya ngangauka nama sida siku-siku, lalu nguluka sida pansut. Lebuh iya udah mai semua bedus iya pansut, iya lalu bejalai dulu ari sida, lalu sida nitihka iya, laban sida ngelala munyi nyawa iya. Sida enggai nitihka orang bukai, tang deka rari ari orang nya, laban sida enda ngelala munyi nyawa orang nya.” Jesus nyebut sempama tu ngagai sida, tang sida enda meretika utai ti disebut Iya ngagai sida. Nya alai Jesus lalu bejaku baru ngagai sida, “Enggau bendar Aku madah ngagai kita: Aku tu pintu ke raban bedus. Semua orang ke udah datai dulu ari Aku nya penchuri enggau perumpak, tang bedus enda mendingka sida. Aku tu pintu. Barang sapa tama nengah Aku, deka diselamatka, lalu iya deka tama, lalu pansut, lalu nemu padang rumput. Penchuri datai laban iya semina deka ngenchuri, munuh enggau ngerusak. Aku datai ngambika sida bulih pengidup, pengidup ti belipat-lipat. “Aku tu pengibun bedus ti badas. Pengibun bedus ti badas nyerahka nyawa diri ke bedus. Orang gaji ke ukai pengibun bedus sereta ukai bempu bedus, ninggalka bedus lebuh iya meda ukui kampung datai, lalu ukui kampung nerekam raban bedus lalu mambarka sida. Orang gaji nya rari laban orang gaji endang enggai ibuhka bedus nya. Aku tu pengibun bedus ti badas. Aku ngelala bedus Aku, lalu bedus Aku ngelala Aku, baka Apai ke ngelala Aku, lalu Aku ngelala Apai; lalu Aku nyerahka nyawa Aku ketegal sida. Aku bisi bedus ti bukai, ti ukai ari raban tu. Aku enda tau enda mega mai sida, lalu sida deka mendingka nyawa Aku. Nya alai sida deka nyadi siti raban, enggau siku aja pengibun. Nya meh kebuah Apai rinduka Aku, laban Aku nyerahka nyawa Diri, lalu ngambi nyawa nya pulai baru. Nadai orang ulih ngambi nyawa Aku ari Aku. Aku nyerahka nyawa Aku ari peneka Aku Empu. Aku bisi kuasa nyerahka iya, lalu Aku bisi kuasa ngambi iya pulai baru. Aku udah nerima pesan tu ari Apai Aku.” Orang Judah lalu beserekang penemu baru ketegal jaku nya. Mayuh sida nyebut, “Iya dirasuk antu, lalu udah gila! Nama kebuah kita mendingka Iya?” Ku sida ti bukai bejaku, “Tu ukai jaku orang ke dirasuk antu. Kati antu ulih ngasuh orang ke buta meda?” Lebuh maya nya Gawai Penyerah benung nyadi di Jerusalem. Musin lebuh maya nya endang musin chelap, lalu Jesus bejalai dalam Rumah Sembiang, dalam Serambi Solomon. Nya alai orang Judah lalu begelumu ngelingi Iya, lalu bejaku ngagai Iya, “Ni pengelama Nuan mengkang enggai madah ngagai kami? Enti Nuan amat Kristus, padahka ngagai kami enggau terang.” Disaut Jesus, “Aku udah madah ngagai kita, tang kita enda arap. Pengawa ti dikereja Aku dalam nama Apai Aku, besaksika pasal Aku, tang kita enda arap, laban kita ukai bedus Aku. Bedus Aku mendingka nyawa Aku. Aku ngelala sida, lalu sida nitihka Aku. Aku meri sida pengidup ti meruan belama iya, lalu sida enda mati. Nadai orang ulih ngerampas sida ari jari Aku. Utai ti udah diberi Apai ngagai Aku besai agi ari semua utai bukai, lalu nadai orang ulih ngerampas sida ari jari Apai. Kami Duai Apai endang siku.” Orang Judah lalu ngambi batu baru, deka nuku Iya. Jesus lalu nyaut sida, “Aku udah ngayanka mayuh bengkah kereja ti badas di mua kita ari Apai. Kereja ni ti ngasuh kita keran deka nuku Aku ngena batu?” Disaut sida, “Kami ukai deka nuku Nuan ngena batu ketegal pengawa ti badas ti dikereja Nuan, tang laban Nuan bejaku busung, laban Nuan, ke semina mensia aja, ngumbai Diri Allah Taala!” Disaut Jesus, “Kati jaku tu nadai ditulis dalam Adat kita: Ku Allah Taala bejaku, ‘Kita tu petara’? Enti orang ke nerima jaku Allah Taala nya dikumbai ‘petara’ -- lalu jaku Bup Kudus endang enda ulih dibuai -- baka ni ku kita ngumbai Aku, ke udah dipilih lalu dikirumka Apai ngagai dunya, bejaku busung ketegal Aku madahka Diri Anak Allah Taala? Enti Aku enda ngereja pengawa Apai Aku, anang meh kita arapka Aku. Tang enti Aku ngereja pengawa Apai Aku, taja pen kita enda arapka Aku, kita patut arapka pengawa ti dikereja Aku, ngambika kita nemu sereta meretika Apai bisi dalam Aku, lalu Aku dalam Apai.” Sida lalu sekali agi nguji nangkap Iya, tang Iya ngelechut ari jari sida. Iya lalu pulai baru meraka Sungai Jordan, ngagai endur alai John ke terubah maptisa orang, lalu diau dia. Mayuh orang datai ngagai Iya. Ku sida, “John nadai ngereja kereja ajih, tang semua utai ti disebut John pasal orang tu, amat magang.” Lalu mayuh orang dia arapka Iya. Siku orang ke benama Lasarus sakit di Betani, genturung pendiau ti alai Maria enggau menyadi indu iya Marta diau. ( Maria nya meh indu ke udah nata Tuhan ngena minyak wangi lalu ngendas kaki Tuhan ngena buk iya. Menyadi lelaki iya ke benama Lasarus sakit.) Nya alai Maria seduai Marta mesanka Jesus. Ku seduai iya, “Tuhan, iya ke dikesayauka Nuan, sakit.” Tang lebuh Jesus nerima pesan nya, Iya bejaku, “Penyakit tu enda ngujung ngagai pemati. Utai tu nyadi kena ngemuliaka Allah Taala, ngambika Anak Allah Taala dimuliaka ulih nya.” Nya alai, taja pen Jesus rinduka Marta, Maria enggau Lasarus, lebuh Iya ninga Lasarus sakit, Iya mengkang diau dua hari da agi ba endur ti alai Iya diau. Udah lepas nya Iya lalu bejaku ngagai sida murid, “Aram kitai pulai baru ngagai Judea.” Ku sida murid bejaku enggau Iya, “Pengajar, baru apin lama tu ti udah orang Judah deka nuku Nuan ngena batu, lalu Nuan deka kin ke baru?” Disaut Jesus, “Kitai semina bisi dua belas jam aja hari siang, ukai enda? Orang ke bejalai lebuh siang hari, enda tesangkut, laban sida meda penampak dunya tu. Tang orang ke bejalai lebuh malam hari tesangkut, laban penampak nadai dalam sida.” Lebuh Iya udah nyebut nya Iya lalu madah ngagai sida, “Pangan kitai Lasarus udah tinduk, tang Aku deka kin lalu ngerak iya.” Ku sida murid bejaku ngagai Iya, “Tuhan, enti iya tinduk, iya deka gerai.” Tang Jesus bejakuka pasal pemati Lasarus, tang sida ngumbai Iya madahka Lasarus tinduk. Jesus lalu bejaku enggau terang ngagai sida, “Lasarus udah mati. Aku gaga ke Diri nadai dia enggau iya, ngambika kita arap, ke penguntung kita. Tang aram kitai mupuk ngagai iya.” Thomas, ke digelar Besapit, lalu bejaku ngagai murid ti bukai, “Aram kitai mupuk, ngambika kitai mati sama enggau iya.” Lebuh Jesus datai, Iya nemu Lasarus empat hari udah dikuburka. Nyadi Betani nya kira tiga kilometer ari Jerusalem, lalu mayuh orang Judah udah nemuai ngagai Marta seduai Maria, deka merindang seduai iya ketegal pemati menyadi lelaki seduai iya. Lebuh Marta ninga Jesus baru deka datai, iya lalu ngambat Jesus, tang Maria tinggal di rumah. Marta lalu bejaku ngagai Jesus, “Tuhan, enti Nuan bisi ditu lebuh maya nya, menyadi aku tentu enda mati! Tang indah diatu deh aku nemu Allah Taala deka meri Nuan sebarang utai ti dipinta Nuan ari Iya.” Jesus lalu bejaku ngagai iya, “Menyadi nuan deka angkat idup baru.” Ku Marta bejaku ngagai Iya, “Aku nemu iya deka angkat idup baru lebuh pengangkat orang ari mati ba pengujung dunya.” Jesus lalu bejaku ngagai iya, “Aku tu meh pengangkat enggau pengidup. Orang ke arapka Aku, deka idup taja pen sida mati, lalu semua orang ke idup lalu arapka Aku, enda mati. Kati nuan arapka nya?” Maria lalu nyaut Iya, “Aku arap, Tuhan! Aku arapka Nuan tu Kristus, Anak Allah Taala, ke datai ngagai dunya.” Lebuh Marta udah nyebut nya, iya pulai ke rumah, lalu betelai enggau menyadi iya Maria. Ku iya, “Pengajar bisi ditu, lalu Iya ngangauka nuan.” Lebuh Maria ninga nya, iya lalu beguai-guai angkat lalu mansang ngagai Jesus. Nyadi lebuh maya nya Jesus apin datai ba genturung pendiau nya, tang agi ba endur alai Marta ke betemu enggau Iya. Lebuh orang Judah ke merindang Maria di rumah meda iya beguai-guai angkat lalu pansut, sida lalu nitihka iya, laban sida ngumbai iya deka mansang ngagai kubur lalu nyabak dia. Lebuh Maria datai ba endur alai Jesus, lalu meda Iya, iya lalu nyungkurka diri di kaki Jesus, lalu bejaku ngagai Iya, “Tuhan, enti Nuan bisi ditu lebuh maya nya, menyadi aku tentu enda mati!” Lebuh Jesus meda Maria nyabak, lalu meda orang Judah ke enggau iya mega nyabak, ati Iya balat sinu sereta tusah. Lalu ku Iya nanya sida, “Dini alai kita nguburka iya?” Sida lalu nyaut Iya, “Tuhan, aram kitai meda.” Jesus nyabak. Orang Judah lalu bejaku, “Peda pemalat Iya rinduka iya!” Tang ku sekeda bala sida bejaku, “Kati Iya ke ulih ngeraika orang ke buta, enda ulih nagang orang tu mati?” Jesus balat amat sinu ati baru, lalu datai ba kubur. Nyadi kubur nya lubang gua, ti ditutup ngena sigi batu. Jesus lalu bejaku, “Baringka batu nya ke tisi!” Marta, menyadi orang ke mati nya, lalu bejaku, “Tuhan, iya tentu udah bau but, laban iya empat hari udah mati!” Jesus lalu bejaku ngagai Marta, “Kati Aku nadai udah madah ngagai nuan, enti nuan arap, nuan deka meda mulia Allah Taala?” Nya alai sida lalu maringka batu nya ke tisi. Jesus engkadah lalu bejaku, “Apai, Aku meri terima kasih ngagai Nuan, laban Nuan udah ninga Aku. Aku nemu Nuan endang seruran ninga Aku, tang Aku udah nyebut tu ke penguntung sida ke bediri ditu, ngambika sida nemu arapka Nuan udah ngirumka Aku.” Lebuh Iya udah nyebut nya, Iya lalu ngangau enggau nyawa ti inggar, “Lasarus, pansut nuan!” Orang ke mati nya lalu pansut. Kaki jari iya ditanchang ngena urik kain, lalu mua iya dibalut ngena kain. Jesus lalu bejaku ngagai sida, “Buka kain nya ari iya, ngambika iya ulih bejalai.” Naya alai, mayuh orang Judah ke udah datai enggau Maria, lalu udah meda utai ti dikereja Jesus, arapka Iya. Tang sekeda sida mansang ngagai orang Parisi, lalu madahka utai ti udah dikereja Iya. Nya alai sida tuai imam enggau orang Parisi lalu mai raban Kunsil baum, lalu bejaku, “Nama utai ti patut dikereja kitai? Orang tu ngereja mayuh kereja ajih. Enti kitai nejuka Iya majak ngereja nya, semua orang deka arapka Iya, lalu orang Rome deka datai lalu ngerusak Rumah Sembiang enggau bansa kitai.” Tang siku ari bala sida, ke benama Kaiapas, ke nyadi imam besai taun nya, lalu bejaku ngagai sida, “Kita nadai nemu utai! Kita enda nemu, manah agi enti siku orang mati ngarika orang mayuh, ari ke nejuka semua bansa kitai dirusak.” Kaiapas ukai nyebut nya ari peneka iya empu, tang laban iya nyadi imam besai taun nya, iya benabi madahka Jesus deka mati ngarika bansa orang Judah, lalu ukai semina ke bansa orang Judah aja, tang kena ngempuruka semua nembiak Allah Taala ke ngachir pendiau. Nya alai berengkah ari nya, sida lalu bekira deka munuh Iya. Nya alai Jesus enda agi ngayanka Diri begulai enggau orang Judah, tang mupuk ari nya ngagai nengeri Epraim ba menua ti semak menua puang, lalu diau dia enggau sida murid Iya. Nyadi Gawai Paska nyau semak, lalu mayuh orang datai ari menua pesisir ngagai Jerusalem, deka nuchi diri sebedau Gawai Paska. Sida begigaka Jesus, lalu bejaku enggau pangan diri lebuh sida bediri dalam Rumah Sembiang, “Nama pikir kita? Kati Iya deka datai ngagai Gawai tu?” Nyadi sida tuai imam enggau orang Parisi udah meri atur: barang sapa nemu endur alai Jesus, patut madah ngagai sida, ngambika sida nangkap Iya. Enam hari sebedau Gawai Paska, Jesus datai di Betani, endur alai Lasarus diau, orang ke udah diangkatka Jesus ari mati. Dia sida nyendiaka makai lemai ke Jesus. Marta mela pemakai, lalu Lasarus bisi enggau orang ba mija nya enggau Jesus. Maria lalu ngambi sebutul minyak wangi ti berega, ti digaga ari narwasti ti tulin, nata kaki Jesus, lalu ngendas kaki Jesus ngena buk iya. Bau rengut minyak nya nyau bealun-alun dalam rumah nya. Tang Judas Iskariot, siku ari murid Iya, ke deka nyual Iya, bejaku, “Nama kebuah minyak wangi nya enda dijual ngena rega tiga ratus singkap duit pirak lalu duit nya diberi ngagai orang ke seranta?” (Iya nyebut nya, ukai laban iya ibuhka orang ke seranta, tang laban iya penchuri. Iya nyaga sarang duit sida, lalu iya selalu ngenchuri duit ari sarang duit nya.) Jesus lalu bejaku, “Anang ngachau iya! Iya meli minyak nya ngambika iya nyimpan minyak nya kena nyendiaka Aku dikubur. Kita seruran bisi orang ke seranta enggau kita, tang Aku enda seruran enggau kita.” Lebuh bala orang Judah ninga Jesus bisi dia, sida lalu mansang kia, ukai semina ketegal Jesus, tang laban sida deka meda Lasarus, ke udah diangkatka Iya ari mati. Nya alai bala tuai imam mega ngiga jalai munuh Lasarus, laban ketegal iya mayuh orang Judah ninggalka sida, lalu arapka Jesus. Hari siti, bala orang mayuh ke udah datai ngagai Gawai nya, ninga Jesus deka datai di Jerusalem. Nya alai sida lalu ngambi dan kayu engkerema, lalu mansang ngambat Iya enggau panjung, “Hosanna! Beberekat meh Iya ke datai dalam nama Tuhan, ke Raja orang Israel!” Jesus tetemuka siku keledai lalu nepan jelu nya. Munyi ti udah ditulis: “Anang takut, kita anak indu Sion! Peda kita, Raja kita datai, nepan anak keledai!” Sida murid Iya enda meretika utai nya lebuh maya nya, tang lebuh Jesus udah dimuliaka, nya baru sida ingatka utai tu udah ditulis pasal Iya, enggau utai ti udah dikereja ngagai Iya. Nya alai bala orang ke udah enggau Jesus lebuh Iya ngangauka Lasarus pansut ari kubur lalu ngangkatka Lasarus ari mati, majak besaksika pasal nya. Orang mayuh betemu enggau Jesus laban sida ninga Iya udah ngereja kereja ajih nya. Orang Parisi lalu bejaku enggau pangan diri, “Kitai enda ulih ngereja utai. Peda kita, semua dunya bela nitihka Iya!” Sekeda orang Gerika bisi mega datai enggau nyembah Allah Taala lebuh gawai nya. Sida datai ngagai Philip, ke berasal ari Betsaida di menua Galili, lalu bejaku ngagai iya, “Tuan, kami keran deka betemu enggau Jesus.” Philip lalu madah ngagai Andrew. Seduai iya lalu madah ngagai Jesus. Jesus lalu nyaut seduai iya, “Maya udah datai alai Anak Mensia deka dimuliaka. Enggau bendar Aku madah ngagai seduai, enti leka gandum enda labuh ke tanah lalu mati, iya deka mengkang semina leka aja. Tang enti iya mati, iya deka bebuah lebat. Orang ke sayauka nyawa diri, deka ngelenyauka iya, lalu orang ke begedika nyawa diri di dunya tu, deka bulih pengidup ti meruan belama iya. Barang sapa deka betuaika Aku, enda tau enda nitihka Aku, lalu dia alai Aku, dia meh endur alai orang ke betuaika Aku. Apai deka ngemesaika orang ke betuaika Aku. “Diatu ati Aku balat tusah. Kati Aku patut nyebut -- ‘Apai, lepaska Aku ari maya tu’? Enda patut, laban nya meh kebuah Aku udah datai ngagai maya tu. Apai, muliaka nama Nuan!” Nyawa lalu bejaku ari serega, “Aku udah ngemuliaka iya, lalu Aku deka ngemuliaka iya baru.” Bala orang ke bediri dia bisi ninga munyi nyawa nya, lalu ngumbai nya guntur. Ku sida ti bukai bejaku, “Siku melikat udah bejaku ngagai Iya!” Jesus lalu nyaut, “Nyawa nya bejaku ke penguntung kita, ukai ke penguntung Aku. Tu meh maya dunya deka diakim. Diatu iya ke merintah dunya tu deka diburu. Lalu lebuh Aku diangkatka ari dunya, Aku deka ngaul semua orang ngagai Aku Empu.” Iya nyebut nya kena Iya nunjukka gaya chara Iya deka mati. Orang mayuh lalu nyaut Iya, “Kami udah ninga ari Adat, madahka Kristus deka idup belama iya. Nya alai, kati ku Nuan madahka Anak Mensia enda tau enda diangkatka? Sapa Anak Mensia nya?” Disaut Jesus, “Penampak deka begulai enggau kita semina enda lama da agi. Bejalai meh kita kala lebuh kita agi bisi penampak, ngambika pemetang enda ulih nitihka kita. Enti kita bejalai dalam petang, kita enda nemu tunga kita deka bejalai. Arapka penampak, kala lebuh kita agi bisi penampak, ngambika kita nyadi anak penampak.” Lebuh Jesus udah nyebut nya, Iya mupuk lalu belalai ari sida. Taja pen Iya udah ngereja mayuh macham kereja ajih di mua sida, sida mengkang enda arapka Iya. Tu kena ngamatka jaku ti udah disebut nabi Isaiah: “Tuhan, sapa udah arapka pesan ti ditusui kami, lalu ngagai sapa kuasa Tuhan udah dipandangka?” Nya alai, sida enda ulih arap, laban Isaiah mega nyebut, “Iya udah ngasuh mata sida buta lalu ngasuh ati sida kieh, ngambika sida enda ulih meda ngena mata sida, lalu enda ulih mereti ngena ati sida lalu nguing -- lalu Aku ngeraika sida.” Isaiah nyebut nya laban iya meda mulia Jesus, lalu bejakuka pasal Jesus. Taja pia, mayuh tuai orang Judah arapka Jesus. Tang sida enda ngaku nya laban sida takutka orang Parisi, laban sida takutka diri dibuai ari balai gempuru, laban sida rindu agi dipuji mensia, ari ke dipuji Allah Taala. Jesus lalu bejaku enggau nyawa ti inggar, “Barang sapa arapka Aku, ukai arapka Aku, tang arapka Iya ke ngirumka Aku. Lalu barang sapa meda Aku, meda Iya ke ngirumka Aku. Aku udah datai nyadika penampak dunya, ngambika semua orang ke arapka Aku enda agi diau dalam pemetang. Aku enda ngakim orang ke ningaka pesan Aku, lalu enda ngasika pesan nya, laban Aku ukai datai ngakim dunya, tang nyelamatka dunya. Orang ke nulak Aku, lalu enda nerima pesan Aku, bisi siku hakim. Ba pengujung dunya, jaku ti udah disebut Aku deka nyadi hakim sida, laban Aku ukai bejaku ari peneka Aku Empu, tang Apai ke ngirumka Aku udah meri Aku pesan pasal utai ti enda tau enda disebut Aku. Lalu Aku nemu, pesan Iya meri pengidup ti meruan belama iya. Nya alai, Aku semina nyebut utai ti diasuh Apai.” Sebedau Gawai Paska berengkah, Jesus nemu maya endang udah datai alai Iya deka ninggalka dunya tu, lalu mupuk ngagai Apai. Iya endang seruran rinduka nembiak Iya ke di dunya tu, lalu Iya rinduka sida datai ke ujung. Sebedau sida makai lemai, Sitan endang udah nepu ke dalam ati Judas anak Iskariot runding ti deka nyual Jesus. Jesus nemu Apai udah meri semua kuasa ngagai Iya. Iya mega nemu Diri endang datai ari Allah Taala, lalu deka pulai ngagai Allah Taala. Iya angkat ari mija, muka serayung Iya, lalu nanchangka kain mandi ba punggung Iya. Udah nya Iya nuang ai ke dalam bisin, lalu belabuh masu kaki sida murid, lalu ngendas kaki sida ngena kain mandi ti udah ditanchangka Iya ba punggung Iya. Iya datai ngagai Simon Peter. Peter lalu bejaku enggau Iya, “Tuhan, kati Nuan deka masu kaki aku?” Jesus lalu bejaku ngagai iya, “Diatu Nuan enda nemu utai ti dikereja Aku, tang ila baru nuan nemu.” Peter lalu bejaku ngagai Iya, “Nuan enda tau sekali-kali masu kaki Aku!” Jesus lalu nyaut iya, “Enti Aku enda masu nuan, nuan nadai ungkup ba Aku.” Simon Peter lalu bejaku, “Tuhan, enti pia, anang semina masu kaki aku! Basu mega jari enggau pala aku!” Ku Jesus bejaku ngagai iya, “Orang ke udah mandi, enda ibuh masu diri, kelimpah ari masu kaki iya. Lalu kita tu tuchi, tang ukai semua kita tuchi.” Laban Iya nemu sapa ke deka nyual Iya. Nya kebuah Iya nyebut, “Ukai semua kita tuchi.” Lebuh Iya udah masu kaki sida, lalu udah ngerasukka serayung Iya baru, lalu pulai baru ngagai endur Iya ba mija nya, Iya lalu bejaku ngagai sida, “Kati kita nemu utai ti udah dikereja Aku ngagai kita? Kita ngumbai Aku Pengajar enggau Tuhan. Nya endang amat, laban Aku endang amat Pengajar enggau Tuhan. Nya alai, enti Aku ti Tuhan enggau Pengajar kita udah masu kaki kita, kita patut mega masu kaki pangan diri. Laban Aku udah meri kita siti teladan, ngambika kita mega ngereja utai ti udah dikereja Aku ngagai kita. Enggau bendar Aku madah ngagai kita, ulun nadai kala besai agi ari tuan sida, lalu orang ke dikirumka nadai kala besai agi ari orang ke ngirumka sida. Enti kita nemu utai tu, kita bulih berekat enti kita ngereja sida. Aku ukai bejakuka pasal semua kita. Aku nemu sapa ke udah dipilih Aku. Tang tu kena ngamatka Bup Kudus, ‘Orang ke makai roti Aku, udah ngangkatka tumbit iya deka ngelaban Aku.’ Aku madahka tu ngagai kita diatu, sebedau utai nya nyadi, ngambika, lebuh iya nyadi ila, kita deka arapka ‘Aku tu meh Iya.’ Enggau bendar Aku madah ngagai kita: barang sapa nerima orang ke dikirumka Aku, nerima Aku, lalu barang sapa nerima Aku, nerima Iya ke ngirumka Aku.” Lebuh Jesus udah nyebut nya, ati Iya balat tusah, lalu ku Iya bejaku, “Enggau bendar Aku madah ngagai kita, siku ari bala kita deka nyual Aku.” Sida murid lalu beperening ngagai pangan diri, enda nemu sapa ti ku Iya. Siku ari sida murid, iya ke dikerinduka Jesus, bisi duduk ngimbai Jesus. Simon Peter lalu ngepaika jari ngagai murid nya, minta iya nanya ngagai Jesus sapa ti ku Iya. Murid nya lalu nyingitka diri ngagai Jesus, lalu nanya Iya, “Tuhan, sapa orang nya?” Jesus lalu nyaut, “Orang ke deka diberi Aku roti tu, lebuh Aku udah nyepuhka roti tu ke dalam mangkuk.” Lebuh Iya udah nyepuhka roti nya, Iya lalu meri roti nya ngagai Judas anak Simon Iskariot. Lebuh Judas udah nerima roti nya, Sitan lalu tama ngagai iya. Ku Jesus bejaku ngagai Judas, “Kereja jampat utai ti deka dikereja nuan!” Nadai siku sida ke ba mija nya nemu kebuah Jesus nyebut nya ngagai Judas. Sekeda sida ngumbai Jesus ngasuh Judas meli roti kena ngintu gawai, tauka meri duit ngagai orang ke seranta, laban Judas ngemataka sarang duit sida. Nya alai lebuh Judas udah nerima roti nya, iya lalu pansut tekala nya. Hari endang udah malam. Lebuh Judas udah mupuk, Jesus lalu bejaku, “Diatu Anak Mensia udah dimuliaka, lalu Allah Taala udah dimuliaka dalam Iya. Enti Allah Taala dimuliaka dalam Iya, Allah Taala deka mega ngemuliaka Iya dalam Iya Empu, lalu ngemuliaka Iya diatu. Anak, Aku semina enda lama aja agi enggau kita. Kita deka ngiga Aku. Lalu munyi ti udah dipadahka Aku ngagai orang Judah, baka nya mega Aku madah ngagai kita, ‘Kita enda ulih datai ngagai endur ti deka digagai Aku.’ Aku meri kita pesan ti baru: rinduka pangan diri. Baka Aku ke udah rinduka kita, baka nya meh kita patut rinduka pangan diri. Enti kita rinduka pangan diri, nya baru semua orang deka nemu kita murid Aku.” Simon Peter lalu bejaku ngagai Iya, “Tuhan, ka kini ke Nuan?” Jesus lalu nyaut, “Diatu nuan enda ulih nitihka Aku ngagai endur ti deka digagai Aku, tang ila baru nuan nitihka Aku.” Peter lalu bejaku ngagai Iya, “Tuhan, nama kebuah aku enda ulih nitihka Nuan diatu? Aku sedia deka nyerahka nyawa aku ketegal Nuan!” Disaut Jesus, “Kati nuan amat sedia deka nyerahka nyawa diri ketegal Aku? Enggau bendar Aku madah ngagai nuan, sebedau manuk mengkukuk nuan udah besangkalka Aku tiga kali.” “Anang tusah ati. Arapka Allah Taala, lalu arap mega ke Aku. Dalam rumah Apai Aku mayuh bilik. Enti iya enda baka nya, Aku enda madah ngagai kita Aku deka kin lalu nyendiaka endur ke kita. Lalu enti Aku mupuk lalu nyendiaka endur ke kita, Aku deka pulai kitu baru, lalu mai kita ngagai Aku Empu, ngambika dia endur alai Aku, dia mega endur alai kita. Kita nemu jalai ngagai endur ti deka digagai Aku.” Thomas lalu bejaku ngagai Iya, “Tuhan, kami enda nemu kini ke Nuan deka mupuk. Baka ni ku kami nemu jalai kin?” Jesus lalu bejaku ngagai iya, “Aku tu meh jalai, pemendar, enggau pengidup. Nadai orang ulih datai ngagai Apai enti enda nengah Aku. Enti kita ngelala Aku, kita deka mega ngelala Apai Aku. Berengkah ari diatu kita ngelala Iya, lalu udah meda Iya.” Philip lalu bejaku ngagai Iya, “Tuhan, pandangka Apai ngagai kami, ngambika kami puas ati.” Jesus lalu bejaku ngagai iya, “Aku lama udah begulai enggau kita, Philip, lalu nuan mengkang enda ngelala Aku? Barang sapa udah meda Aku, udah meda Apai. Nya alai nama kebuah nuan nyebut, ‘Pandangka Apai ngagai kami’? Kati nuan enda arapka Aku dalam Apai, lalu Apai dalam Aku? Jaku ti disebut Aku ngagai kita ukai disebut Aku ari peneka Aku Empu, tang Apai ke dalam Aku ti ngereja pengawa Iya. Arapka Aku lebuh Aku madahka Diri dalam Apai, lalu Apai dalam Aku. Tang enti kita enda arapka nya, kita patut arapka Aku ketegal utai ti udah dikereja Aku. Enggau bendar Aku madah ngagai kita, orang ke arapka Aku, deka mega ngereja pengawa ti dikereja Aku. Indah pengawa ti besai agi ari nya deh deka dikereja sida, laban Aku mupuk ngagai Apai. Aku deka ngereja sebarang utai ti dipinta kita dalam nama Aku, ngambika Apai dimuliaka dalam Anak. Enti kita minta sebarang utai dalam nama Aku, Aku deka ngereja nya. “Enti kita rinduka Aku, kita deka ngasika pesan Aku, Lalu Aku deka minta ari Apai, lalu Iya deka meri kita siku Penyaup, ke deka diau enggau kita belama iya. Iya nya Roh pemendar, ke enda ulih diterima dunya, laban dunya enda meda tauka ngelala Iya. Kita ngelala Iya, laban Iya diau enggau kita, lalu deka meruan dalam kita. “Aku enda ninggalka kita baka anak patu; Aku deka datai ngagai kita. Enda lama da agi, dunya nadai agi meda Aku, tang kita deka meda Aku. Laban Aku idup, kita deka mega idup. Lebuh maya nya ila, kita deka nemu Aku endang dalam Apai, lalu kita dalam Aku, lalu Aku dalam kita. “Orang ke nerima lalu ngasika pesan Aku, nya meh orang ke rinduka Aku. Lalu orang ke rinduka Aku deka dikerinduka Apai Aku, lalu Aku deka rinduka sida, lalu mandangka Diri ngagai sida.” Judas, (ukai Judas Iskariot) lalu bejaku ngagai Iya, “Tuhan, nama kebuah Nuan deka mandangka Diri ngagai kami, lalu enda ngagai dunya?” Ku Jesus nyaut iya, “Orang ke rinduka Aku deka ngasika pesan Aku, lalu Apai Aku deka rinduka iya, lalu kami duai Apai deka datai ngagai iya, lalu diau enggau iya. Barang sapa enda rinduka Aku, enggai ngasika jaku Aku. Lalu jaku ti didinga kita nya ukai jaku Aku, tang jaku Apai ke ngirumka Aku. “Aku udah nyebut utai tu lebuh Aku agi enggau kita. Tang Penyaup, iya nya Roh Kudus, ke deka dikirumka Apai dalam nama Aku, deka ngajar kita semua utai, lalu ngasuh kita ingatka semua utai ti udah disebut Aku ngagai kita. “Aku ninggalka pemaik ba kita. Pemaik Aku diberi Aku ngagai kita. Aku ukai meri ngena chara dunya. Anang tusah ati, lalu anang takut. Kita udah ninga Aku nyebut ngagai kita, ‘Aku deka mupuk, lalu Aku deka datai baru ngagai kita.’ Enti kita rinduka Aku, kita deka gaga ati ninga Aku deka mupuk ngagai Apai, laban Apai besai agi ari Aku. Diatu Aku udah madahka tu ngagai kita sebedau iya nyadi, ngambika lebuh iya nyadi, kita deka arap. Aku enda bejaku lama agi enggau kita, laban pemerintah dunya tu deka datai. Iya nadai kuasa atas Aku, tang Aku ngereja utai ti diasuh Apai, ngambika dunya nemu Aku rinduka Apai. Angkat. Aram kitai mupuk.” “Aku tu pun anggur ti bendar, lalu Apai Aku tukang kebun. Iya muai ari Aku genap iti dan ti enda bebuah. Genap iti dan ti bebuah, dijarau Iya, ngambika dan nya bebuah lebat agi. Kita udah dituchi ulih jaku ti disebut Aku ngagai kita. Meruan dalam Aku, lalu Aku deka meruan dalam kita. Dan enda ulih bebuah ngatika diri enti iya enda meruan begempung enggau pun. Baka nya mega kita; kita enda ulih bebuah enti kita enda meruan dalam Aku. Aku tu pun anggur, kita nya dan. Orang ke meruan dalam Aku, lalu Aku meruan dalam sida, deka bebuah lebat, laban enti nadai Aku, kita enda ulih ngereja sebarang utai. Barang sapa enda meruan dalam Aku, deka dibuai baka dan lalu layu. Dan ti baka nya deka digumpul, ditikauka ngagai api, lalu ditunu. Enti kita meruan dalam Aku, lalu jaku Aku meruan dalam kita, pinta sebarang utai ti dikedekaka kita, lalu utai nya deka dikereja ke kita. Apai Aku dimuliaka, enti kita bebuah lebat lalu nyadi murid Aku. Baka Apai ke udah rinduka Aku, baka nya mega Aku udah rinduka kita. Meruan dalam pengerindu Aku. Enti kita ngasika pesan Aku, kita deka meruan dalam pengerindu Aku, baka Aku ke udah ngasika pesan Apai, lalu meruan dalam pengerindu Iya. Aku udah madahka utai tu ngagai kita, ngambika pengaga Aku bisi dalam kita, ngambika ati kita chukup gaga. Tu pesan Aku: rinduka pangan diri, baka Aku ke udah rinduka kita. Nadai orang ngembuan pengerindu ti besai agi ari tu, datai ke iya nyerahka nyawa diri ke pangan iya. Kita pangan Aku enti kita ngasika pesan Aku. Aku enda agi ngumbai kita ulun, laban ulun enda nemu utai ti dikereja tuan iya. Tang Aku udah ngumbai kita pangan, laban Aku udah madah ngagai kita semua utai ti didinga Aku ari Apai. Ukai kita ke milih Aku, tang Aku ke milih kita, lalu ngasuh kita bejalai lalu bebuah lebat, buah ti tan. Nya baru Apai deka meri ngagai kita sebarang utai ti dipinta kita ari Iya dalam nama Aku. Tu pesan ti diberi Aku ngagai kita: rinduka pangan diri. “Enti dunya begedika kita, ingat, iya endang udah dulu begedika Aku sebedau iya begedika kita. Enti kita enggi dunya, dunya deka rinduka kita nyadika enggi iya empu. Tang laban kita ukai enggi dunya, laban Aku udah milih kita ari dunya, nya alai dunya begedika kita. Kingatka jaku ti udah disebut Aku ngagai kita, ‘Ulun enda besai agi ari tuan iya.’ Enti sida merinsaka Aku, sida deka mega merinsaka kita. Enti sida ngasika jaku Aku, sida deka mega ngasika jaku kita. Tang sida deka ngereja semua utai tu ngagai kita ketegal nama Aku, laban sida enda ngelala Iya ke ngirumka Aku. Enti Aku nadai udah datai lalu bejaku ngagai sida, sida tentu enda bedosa. Tang diatu sida nadai kebuah bedosa. Barang sapa begedika Aku, begedi mega ke Apai Aku. Enti Aku nadai udah ngereja ba bala sida kereja ti nadai udah kala dikereja orang bukai, sida tentu enda bedosa. Tang diatu sida udah meda kereja ajih ti dikereja Aku, lalu sida begedika Kami Duai Apai. Tu ngamatka jaku ti ditulis dalam Adat sida, ‘Sida begedika Aku enggau nadai kebuah.’ Lebuh Penyaup datai, ke deka dikirumka Aku ngagai kita ari Apai, iya nya Roh pemendar, ke datai ari Apai, Iya deka besaksika pasal Aku. Lalu kita mega enda tau enda besaksika, laban kita udah enggau Aku kenyau ari pun. “Aku udah madahka tu ngagai kita, ngambika kita enda ngelengkaka pengarap kita. Sida deka muai kita ari balai gempuru. Iya ti bendar, maya deka datai alai orang ke munuh kita deka ngumbai diri ngereja nya ke Allah Taala. Lalu sida deka ngereja nya laban sida enda ngelala Apai tauka Aku. Tang Aku udah madahka tu ngagai kita, ngambika lebuh maya nya datai, kita ingatka utai ti dipadahka Aku ngagai kita pasal sida. Aku enda madahka utai tu ngagai kita ba pun iya suba, laban Aku bisi enggau kita. Tang diatu Aku deka mupuk ngagai Iya ke udah ngirumka Aku. Tang taja pia, nadai siku kita nanya Aku, ‘Ka kini ke Nuan?’ Tang laban Aku udah madahka nya ngagai kita, ati kita balat tusah. Tang enggau bendar Aku madah ngagai kita: kita untung enti aku mupuk, laban enti Aku enda mupuk, Penyaup enda datai ngagai kita. Tang enti Aku mupuk, Aku deka ngirumka Iya ngagai kita. Lalu lebuh Iya datai, Iya deka ngayanka dunya amat salah ba pasal dosa, ba pasal pengelurus, enggau ba pasal ukum: ba pasal dosa, laban sida enda arapka Aku; ba pasal pengelurus, laban Aku deka mupuk ngagai Apai, lalu kita nadai meda Aku agi; ba pasal ukum, laban iya ke merintah dunya tu udah diukum. “Aku mayuh utai ti deka dipadahka ngagai kita, tang kita enda ulih nerima utai nya diatu. Tang lebuh Roh pemendar datai, Iya deka ngiring kita ngagai semua pemendar, laban Iya ukai bejaku nitihka peneka Iya Empu, tang deka nyebut semua utai ti didinga Iya, lalu Iya deka madah ngagai kita semua utai ti deka nyadi. Iya deka ngemuliaka Aku, laban Iya deka ngambi utai Aku, lalu madahka utai nya ngagai kita. Semua utai ti dikemisi Apai endang enggi Aku magang. Nya kebuah Aku madahka Roh Kudus deka ngambi utai Aku, lalu madahka utai nya ngagai kita. “Enda lama da agi, kita nadai agi meda Aku, lalu enda lama udah nya, kita deka meda Aku.” Sekeda sida murid Iya lalu bejaku enggau pangan diri, “Nama reti utai ti dipadahka Iya ngagai kitai, ‘Enda lama da agi kita nadai agi meda Iya, lalu enda lama udah nya, kita deka meda Iya’? Lalu nama reti, ‘laban Aku mupuk ngagai Apai’?” Ku sida, “Nama reti ‘enda lama da agi’? Nadai kitai nemu utai ti ku Iya.” Jesus nemu sida bisi ati deka nanya Iya, nya alai Iya lalu bejaku ngagai sida, “Kati kita berandau enggau pangan diri pasal utai ti ku Aku lebuh Aku nyebut, ‘Enda lama da agi, kita nadai agi meda Aku, lalu enda lama udah nya, kita deka meda Aku’? Enggau bendar Aku madah ngagai kita: kita deka nyabak, sereta ngulit, tang dunya deka rami gaga ati. Ati kita deka tusah ati, tang ati kita ti tusah deka bebali nyadi pengaga. Lebuh indu radai deka beranak, iya pedis, laban maya iya udah datai. Tang lebuh iya udah ngadaka anak iya, iya enda agi ingatka pemedis nya, laban ati iya gaga ke anak ke udah diadaka ngagai dunya. Nya alai diatu ati kita tusah, tang Aku deka betemu enggau kita baru, lalu ati kita deka gaga, lalu nadai orang ulih ngerampas pengaga nya ari kita. Ba hari nya, kita enda agi minta utai ari Aku. Enggau bendar Aku madah ngagai kita, enti kita minta sebarang utai ari Apai dalam nama Aku, Iya deka meri utai nya ngagai kita. Nyentuk ngagai diatu, kita nadai udah minta utai dalam nama Aku. Pinta lalu kita deka nerima, ngambika ati kita chukup gaga. “Aku udah nyebut utai tu ngagai kita ngena jaku sempama. Tang maya deka datai alai Aku enda agi bejaku ngagai kita ngena jaku sempama, tang bejaku enggau terang pasal Apai. Lebuh maya nya ila, kita deka minta utai dalam nama Aku. Aku ukai madahka Diri deka minta ngagai Apai ngarika kita, laban Apai Empu rinduka kita, laban kita udah rinduka Aku lalu udah arapka Aku datai ari Allah Taala. Aku datai ari Apai, lalu Aku udah datai ngagai dunya. Lalu diatu Aku deka ninggalka dunya lalu mupuk ngagai Apai.” Ku sida murid Iya bejaku ngagai Iya, “Diatu baru Nuan bejaku enggau terang, ukai ngena jaku sempama. Diatu baru kami nemu Nuan nemu semua utai, lalu Nuan enda begunaka orang betanyaka utai ngagai Nuan. Ari nya kami arapka Nuan amat datai ari Allah Taala.” Ku Jesus nyaut sida, “Kati kita arap diatu? Maya deka datai, lalu endang udah datai diatu, alai semua kita deka pambar, lalu genap iku kita deka pulai ngagai rumah diri empu, lalu ninggalka Aku keDiri. Tang Aku ukai keDiri, laban Apai bisi enggau Aku. Aku udah madahka tu ngagai kita, ngambika dalam Aku kita bisi pemaik. Di dunya tu kita kena perinsa. Tang anang tusah; Aku udah ngalahka dunya.” Lebuh Jesus udah nyebut nya, Iya engkadah ke langit, lalu bejaku, “Apai, maya udah datai. Muliaka Anak Nuan, ngambika Anak ngemuliaka Nuan, laban Nuan udah meri Iya kuasa atas semua mensia, ngambika Iya ulih meri pengidup ti meruan belama iya ngagai semua orang ke udah diberi Nuan ngagai Iya. Tu pengidup ti meruan belama iya, ngambika sida ngelala Nuan, Allah Taala ti bendar, enggau Jesus Kristus, ke dikirumka Nuan. Aku udah ngemuliaka Nuan di dunya tu, laban Aku udah nembuka pengawa ti diasuh Nuan kereja Aku. Nya alai diatu, Apai, muliaka Aku di mua Nuan Empu ngena mulia ti dikemisi Aku di mua Nuan sebedau dunya digaga. “Aku udah madahka nama Nuan ngagai orang ke udah diberi Nuan ngagai Aku ari dunya tu. Sida endang enggi Nuan, lalu Nuan udah meri sida ngagai Aku, lalu sida udah ngasika jaku Nuan. Diatu sida nemu, semua utai ti udah diberi Nuan ngagai Aku endang ari Nuan magang, laban jaku ti diberi Nuan ngagai Aku, udah diberi Aku ngagai sida, lalu sida udah nerima jaku nya, lalu nemu enggau bendar Aku amat datai ari Nuan, lalu sida udah arapka Nuan udah ngirumka Aku. Aku besampika sida. Aku ukai besampika dunya, tang ke sida ke udah diberi Nuan ngagai Aku, laban sida endang enggi Nuan. Semua utai Aku endang enggi Nuan magang, lalu semua utai Nuan endang enggi Aku magang, lalu Aku udah dimuliaka dalam sida. Lalu diatu Aku nadai agi di dunya, tang sida agi mengkang di dunya, lalu Aku mupuk ngagai Nuan. Apai ti Kudus, jaga sida ngena kuasa nama Nuan, nama ti udah diberi Nuan ngagai Aku, ngambika sida nyadi siku, baka Tua ke endang siku. Lebuh Aku agi enggau sida, Aku udah nyaga sida ngena kuasa nama Nuan, nama ti udah diberi Nuan ngagai Aku. Aku udah nyaga sida, lalu nadai siku sida lenyau, kelimpah ari siku ke endang diletak deka lenyau, ngambika Bup Kudus dikamatka. Tang diatu Aku deka datai ngagai Nuan, lalu Aku nyebut utai tu di dunya tu, ngambika pengaga Aku nyadi pemadu chukup dalam sida. Aku udah meri pesan Nuan ngagai sida, lalu dunya udah begedika sida, laban sida ukai enggi dunya, baka Aku ke ukai enggi dunya. Aku ukai minta Nuan ngambi sida ari dunya, tang minta Nuan nyaga sida ari iya ti jai. Sida ukai enggi dunya, baka Aku ke ukai enggi dunya. Kuduska sida dalam pemendar. Jaku Nuan nya pemendar. Baka Nuan ke udah ngirumka Aku ngagai dunya, baka nya mega Aku ngirumka sida ngagai dunya. Lalu ketegal sida, Aku nguduska Diri Empu, ngambika sida mega dikuduska dalam pemendar. “Aku ukai semina besampika sida aja, tang mega besampi ke orang ke arapka Aku ulih pesan ti dibai sida, ngambika semua sida nyadi siku. Baka Nuan, Apai, ke dalam Aku, lalu Aku dalam Nuan, awakka sida mega dalam Tua, ngambika dunya arapka Nuan udah ngirumka Aku. Mulia ti udah diberi Nuan ngagai Aku, udah diberi Aku ngagai sida, ngambika sida nyadi siku, baka Tua ke endang siku, Aku dalam sida, lalu Nuan dalam Aku, ngambika sida nyadi siku, ngambika dunya nemu Nuan udah ngirumka Aku, lalu udah rinduka sida, baka Nuan ke udah rinduka Aku. Apai, Aku mega dekaka sida ke udah diberi Nuan ngagai Aku, begulai enggau Aku ba endur alai Aku diau, ngambika sida meda mulia Aku ti udah diberi Nuan ngagai Aku laban Nuan udah rinduka Aku kenyau ari sebedau dunya digaga. Apai ti lurus! Dunya enda ngelala Nuan, tang Aku ngelala Nuan, lalu sida nemu Nuan udah ngirumka Aku. Aku udah madahka nama Nuan ngagai sida, lalu Aku deka majak ngasuh sida nemu nama Nuan, ngambika pengerindu Nuan ke Aku bisi dalam sida, lalu Aku dalam sida.” Lebuh Jesus udah badu besampi, Iya enggau sida murid Iya lalu meraka Lebak Kidron, ngagai siti endur ti bisi sebidang kebun. Jesus enggau murid Iya lalu tama ngagai kebun nya. Nyadi Judas, ke udah nyual Iya, mega nemu endur nya, laban Jesus udah suah begempuru dia enggau sida murid Iya. Nya alai Judas mai seraban soldadu, enggau bala polis ari sida tuai imam enggau orang Parisi, lalu sida datai dia bebaika lampu, sempun enggau senyata. Udah nya Jesus, ke nemu semua utai ti deka nyadi ba Iya, mansang ke mua lalu nanya sida, “Sapa orang ke digiga kita?” Sida lalu nyaut, “Jesus orang Nasaret.” Jesus lalu nyaut, “Aku meh tu.” Judas, ke nyual Iya, bisi bediri dia enggau sida. Lebuh Jesus nyebut ngagai sida, “Aku meh tu,” sida nyurutka diri lalu rebah ke tanah. Iya lalu nanya sida baru, “Sapa orang ke digiga kita?” Sida lalu nyaut Iya, “Jesus orang Nasaret.” Jesus lalu nyaut sida, “Aku udah madahka Diri ngagai kita. Nya alai, enti kita ngiga Aku, lepaska sida tu.” Tu ngamatka jaku ti udah disebut Iya, “Nadai siku sida ke udah diberi Nuan ngagai Aku, lenyau.” Simon Peter, ke bisi mai pedang, lalu nyintak pedang iya, lalu mantap ulun imam besai, mutuska pending kanan iya. Nama ulun nya Malkus. Jesus lalu bejaku ngagai Peter, “Selitka pedang nuan! Kati Aku enda tau ngirup mangkuk ti udah diberi Apai ngagai Aku?” Bala soldadu enggau kepala sida, enggau bala polis orang Judah nangkap Jesus, lalu nanchang Iya. Terubah, sida mai Iya ngagai Anas, mentua lelaki Kaiapas ke nyadi imam besai ke taun nya. Kaiapas nya meh orang ke udah meri jaku lalau ngagai orang Judah, madahka manah agi enti siku orang mati ngarika semua orang mayuh. Simon Peter enggau siku murid ti bukai nitihka Jesus. Laban murid ke siku nya dikelala imam besai, iya tama enggau Jesus ngagai tengah laman rumah imam besai, tang Peter bediri di luar, ba mua pintu. Nya alai murid ke siku nya, ke dikelala imam besai, pansut lalu bejaku enggau indu ke nyaga mua pintu, lalu mai Peter tama. Indu ke nyaga mua pintu nya lalu bejaku ngagai Peter, “Nuan tu siku ari murid orang nya, ukai enda?” “Ukai,” ku Peter nyaut. Nyadi bala orang gaji enggau orang polis udah nungkun api, laban hari chelap, lalu sida bediri bekindu ngelingi api nya. Peter mega bediri bekindu enggau sida. Imam besai lalu nanya Jesus pasal sida murid Iya, enggau pasal ajar Iya. Disaut Jesus, “Aku udah bejaku enggau terang di mua semua orang. Aku udah seruran ngajar dalam balai gempuru enggau dalam Rumah Sembiang, alai orang Judah ke begempuru. Aku nadai kala belalai bejaku. Nama kebuah nuan nanya Aku? Tanya orang ke udah ninga Aku pasal jaku ti disebut Aku ngagai sida. Sida nemu utai ti udah disebut Aku.” Lebuh Jesus udah nyebut nya, siku polis lalu nampar mua Iya, ku polis nya bejaku, “Kati nya jalai Nuan nyaut imam besai?” Jesus lalu nyaut iya, “Enti Aku udah salah jaku, padahka penyalah nya ngagai Aku. Tang enti Aku nadai udah salah jaku, nama kebuah nuan nampar Aku?” Anas lalu ngasuh orang mai Jesus, ke mengkang ditanchang, ngagai Imam Besai Kaiapas. Nyadi Peter benung bediri bekindu. Sida lalu nanya iya, “Nuan tu siku ari murid orang nya, ukai enda?” Peter lalu besangkal. “Ukai.” Siku ulun imam besai, kaban belayan orang ke udah putus pending dipantap Peter, lalu nanya, “Ukai enda nuan tu ke dipeda aku dalam kebun nya tadi?” Peter lalu besangkal baru. Lebuh maya nya manuk lalu mengkukuk. Sida lalu mai Jesus ari rumah Kaiapas, ngagai istana gabenor. Hari lebuh maya nya agi tumu pagi. Sida enda tama ngagai istana, enggai ke sida enda tuchi lalu enda ulih makai pemakai Gawai Paska. Nya alai Pilate pansut ke luar ngagai sida, lalu nanya, “Nama dawa kena kita ngelaban orang tu?” Disaut sida. “Enti orang tu nadai udah ngereja penyalah, kami tentu enda nyerahka Iya kitu ngagai nuan.” Pilate lalu bejaku ngagai sida, “Bai Iya ari tu ulih kita, lalu akim Iya nitihka adat kita empu.” Sida orang Judah lalu nyaut, “Kami enda tau munuh orang.” ( Tu ngamatka jaku Jesus Empu, lebuh Iya madahka gaya pemati ti deka ditatka Iya.) Pilate lalu pulai baru ke dalam istana, ngangauka Jesus, lalu nanya Iya, “Kati Nuan Raja orang Judah?” Disaut Jesus, “Kati nuan nyebut nya ari ati nuan empu, tauka orang bukai bisi udah madah ngagai nuan pasal Aku?” Pilate lalu nyaut, “Kati aku tu orang Judah? Bansa Nuan Empu enggau sida tuai imam udah nyerahka Nuan ngagai aku. Nama utai ti udah dikereja Nuan?” Disaut Jesus, “Perintah Aku ukai ari dunya tu. Enti perintah Aku ari dunya tu, bala orang ke nitihka Aku tentu deka ngelaban ngambika Aku enda diserahka ngagai orang Judah. Tang perintah Aku ukai ari dunya tu.” Pilate lalu nanya Iya, “Reti nya Nuan tu Raja?” Disaut Jesus, “Nuan ngumbai Aku Raja. Nya meh kebuah Aku ada, lalu ketegal nya meh Aku udah datai ngagai dunya, ngambika Aku besaksika pasal pemendar. Semua nembiak pemendar mendingka nyawa Aku.” Pilate lalu nanya Iya, “Nama utai ti dikumbai pemendar?” Lebuh Pilate udah nyebut nya, iya pansut baru ke luar ngagai orang Judah, lalu madah ngagai sida, “Aku nadai nemu penyalah Iya. Tang kita bisi siti adat asal ti ngasuh aku ngelepaska siku orang tutup ke kita lebuh Gawai Paska. Kati kita dekaka Aku ngelepaska Raja orang Judah tu ke kita?” Sida lalu manjung nyaut iya, “Ukai Iya, tang Barabas!” Nyadi Barabas nya siku perumpak. Udah nya Pilate mai Jesus lalu ngasuh Iya disipat. Sida soldadu lalu ngaga siti makota duri, lalu ngengkahka makota nya ba pala Iya, lalu ngerasukka baju panjai ti ungu ba Iya. Udah nya sida majak mansang ngagai Iya, ku sida, “Tabi, Raja orang Judah!” lalu nampar mua Iya. Pilate pansut baru, lalu bejaku ngagai sida, “Peda kita, aku mai Iya pansut ngagai kita, ngambika kita nemu aku nadai nemu penyalah Iya.” Nya alai Jesus pansut, ngena makota duri, enggau baju panjai ti ungu. Pilate lalu bejaku ngagai sida, “Tu Iya!” Lebuh sida tuai imam enggau bala polis meda Iya, sida manjung, “Regang Iya! Regang Iya!” Pilate lalu bejaku ngagai sida, “Bai Iya enggau kita, lalu regang Iya. Aku nadai nemu penyalah Iya.” Orang Judah lalu nyaut iya, “Kami bisi adat, lalu nitihka adat nya, Iya enda tau enda mati, laban Iya udah ngumbai Diri Anak Allah Taala.” Lebuh Pilate ninga nya, iya lalu balat agi takut. Iya tama baru ke dalam istana, lalu nanya Jesus, “Ari ni penatai Nuan?” Tang Jesus enda nyaut. Nya alai ku Pilate bejaku ngagai Iya, “Kati Nuan enggai bejaku enggau aku? Kati Nuan enda nemu aku bisi kuasa ngelepaska Nuan, enggau kuasa ngeregang Nuan?” Jesus lalu nyaut iya, “Nuan nadai kuasa atas Aku enti kuasa nya enda diberi ari atas. Nya alai orang ke nyerahka Aku ngagai nuan besai agi dosa ari nuan.” Berengkah ari nya Pilate lalu nguji ngiga jalai ngelepaska Iya. Tang ku orang Judah manjung, “Enti nuan ngelepaska orang tu, nuan ukai pangan Raja Besai! Barang sapa ngumbai diri raja, sigi ngelaban Raja Besai!” Lebuh Pilate ninga nya, iya lalu mai Jesus pansut, lalu duduk ba penuduk hakim, ba endur ti dikumbai “Geladak Batu” (reti nya “Gabata” dalam Hebrew.) Hari nya Hari Alai Nyendiaka Gawai Paska. Hari lebuh maya nya nyau kira ba urung tengah hari. Pilate lalu bejaku ngagai orang Judah, “Tu Raja kita!” Sida lalu manjung, “Bunuh Iya! Bunuh Iya! Regang Iya!” Pilate lalu nanya sida, “Kati kita ngasuh Aku ngeregang Raja kita?” Sida tuai imam lalu nyaut, “Kami nadai raja bukai, kelimpah ari Raja Besai!” Pilate lalu nyerahka Jesus ngagai sida, ngambika Iya diregang. Sida lalu mai Jesus. Jesus lalu bejalai, ngesan regang Iya Empu, ngagai siti endur ti dikumbai “Endur Keruntuk,” ti dikumbai Golgota dalam Hebrew. Dia sida lalu ngeregang Iya, enggau dua iku orang bukai, siku ari sepiak-sepiak Iya, lalu Jesus ba entara seduai iya. Pilate mega nulis siti pelekat, lalu ngelekatka pelekat nya ba regang nya. Tu jaku ti ditulis ba pelekat nya: “Jesus orang Nasaret, Raja orang Judah.” Mayuh orang Judah macha pelekat nya, laban endur alai Jesus ke diregang nya semak nengeri, lalu pelekat nya ditulis dalam jaku Hebrew, Latin enggau Gerika. Sida tuai imam lalu bejaku ngagai Pilate, “Anang nulis ‘Raja orang Judah,’ tang tulis aja, ‘Orang tu ngumbai Diri Raja orang Judah.’ ” Disaut Pilate, “Utai ti udah ditulis aku, mengkang ditulis.” Lebuh bala soldadu udah ngeregang Jesus, sida ngambi gari Iya, lalu bedua gari nya ngagai empat iti bagi, sebagi ke siku-siku soldadu. Sida mega ngambi baju panjai iya, ti ditenun selajur enda dijait kenyau ari atas nyentuk ke baruh. Nya alai ku sida bejaku enggau pangan diri, “Anang nyarikka tu, tang awakka kitai bechabut undi ke baju tu.” Tu ngamatka Bup Kudus: “Sida bedua gari Aku entara bala sida lalu bechabut undi ke baju panjai Aku.” Llalu nya utai ti dikereja sida soldadu. Lebuh semua utai nya benung nyadi, indai Jesus, menyadi indai Iya, iya nya Maria bini Klopas, enggau Maria Magdalin bediri semak regang Jesus. Lebuh Jesus meda indai Iya, enggau murid ke dikerinduka Iya bediri ngimbai iya, Iya lalu bejaku ngagai indai Iya, “Indu, tu anak nuan.” Iya lalu bejaku ngagai murid nya, “Tu indai nuan.” Berengkah ari nya murid nya lalu mai indai Jesus ngagai rumah iya empu. Udah bekau nya, lebuh Jesus nemu semua utai udah tembu magang, Iya lalu bejaku, “Aku aus.” Tu ngamatka Bup Kudus. Ba endur nya bisi sigi kebuk ti penuh laban wain ti masam. Nya alai sida ngengkahka siti bungai karang ti penuh laban wain ti masam nya ba pating isop, lalu nuatka utai nya ngagai mulut Iya. Lebuh Jesus udah nerima wain nya, Iya lalu bejaku, “Udah tembu!” Iya lalu ngendukka pala, lalu ngapuska seput. Laban hari nya Hari Alai Nyendiaka Gawai, orang Judah enggai nejuka bangkai Jesus mengkang ba kayu regang lebuh hari Sabat (kelebih agi laban hari Sabat nya amat kudus). Nya alai sida lalu minta Pilate ngasuh orang matahka kaki orang ke diregang, ngambika bangkai sida tau diambi ari regang nya. Sida soldadu mansang lalu matahka kaki orang ke terubah, enggau kaki siku ti bukai ke diregang sama enggau Jesus. Tang lebuh sida datai ngagai Jesus, lalu meda Iya endang udah mati, sida enda matahka kaki Iya. Tang siku soldadu ngerejang rusuk Jesus ngena sangkuh. Tekala nya darah enggau ai lalu ensambur pansut. Siku orang ke meda nya, udah besaksika pasal utai nya, ngambika kita mega arap. Jaku saksi iya endang amat, lalu iya nemu diri endang madahka utai ti bendar. Utai tu nyadi ngambika Bup Kudus dikamatka, “Nadai siti tulang Iya dipatahka.” Siti agi genteran dalam Bup Kudus bisi mega nyebut, “Orang deka merening ngagai Iya ti udah direjang sida.” Udah nya, Josep ke datai ari nengeri Arimatea, ke udah nyadi murid Jesus ngena chara belalai laban iya takutka orang Judah, minta Pilate ngemendarka iya ngambi bangkai Jesus. Pilate lalu ngemendarka nya. Nya alai Josep mansang lalu ngambi bangkai Jesus. Nyadi Nikodimus, ke dulu ari nya udah datai ngagai Jesus lebuh malam hari, mega datai mai kira 35 kilogram mur bechampur enggau garu. Seduai iya ngambi bangkai Jesus, lalu mungkus Iya ngena kain linin, sama enggau rempah nya, nitihka adat asal orang Judah kena nyendiaka bangkai sebedau iya dikubur. Nyadi ba endur alai Jesus ke diregang bisi sebidang kebun, lalu ba kebun nya bisi siti kubur ti baru udah tembu digaga, ti nadai udah kala dikena alai nguburka orang. Nya alai laban hari nya Hari Alai Nyendiaka Gawai, lalu kubur nya semak dia, seduai iya lalu ngalika Jesus dia. Tumu pagi hari Minggu, lebuh hari agi petang, Maria Magdalin mansang ngagai kubur, lalu meda batu nya endang udah dibaringka ari mua kubur nya. Iya lalu belanda mansang ngagai Simon Peter, enggau ngagai siku murid ke dikerinduka Jesus, lalu madah ngagai seduai iya, “Sida udah ngambi Tuhan ari kubur, lalu kami enda nemu endur alai sida udah ngengkahka Iya!” Peter enggau murid nya mupuk lalu mansang ngagai kubur. Seduai iya sama belanda, tang murid ti siku nya laju agi ari Peter, lalu dulu agi datai ba kubur. Iya engkenduk lalu nilik ke dalam kubur, lalu tepedaka kain linin ti dikena mungkus Jesus, tang iya enda tama. Udah nya Peter, ke datai dudi ari iya, tama ke dalam kubur nya, lalu tepedaka kain linin nya dia, enggau kain ti udah dikena mungkus pala Jesus. Kain nya digulungka kediri, enda digulungka sama enggau kain linin. Udah nya murid ti siku nya, ke dulu agi datai ba kubur nya, mega tama. Iya meda, lalu arap, laban nyentuk ngagai maya nya, seduai iya apin meretika Bup Kudus ti madahka Jesus enda tau enda angkat ari mati. Udah nya murid ke dua iku nya lalu pulai. Tang Maria bediri nyabak di luar kubur. Lebuh iya nyabak, iya engkenduk lalu nilik ke dalam kubur. Iya lalu tepedaka dua iku melikat ke ngena gari burak, duduk ba endur alai bangkai Jesus udah digalika, siku muak ari pala, lalu siku muak ari kaki. Ku seduai iya bejaku ngagai Maria, “Indu, nama kebuah nuan nyabak?” Maria lalu bejaku ngagai seduai iya, “Sida udah ngambi Tuhan aku, lalu aku enda nemu dini alai sida udah engkah Iya!” Lebuh Maria udah nyebut nya, iya nguing, lalu tepedaka Jesus bediri dia, tang iya enda ngelala orang nya Jesus. Jesus lalu bejaku ngagai iya, “Indu, nama kebuah nuan nyabak? Sapa digiga nuan?” Maria ngumbai orang nya tukang kebun, nya alai ku iya bejaku, “Tuan, enti nuan udah mai Iya kebukai, padahka ngagai aku endur alai nuan udah ngengkahka Iya, ngambika aku ngambi Iya.” Jesus lalu bejaku ngagai iya, “Maria!” Maria nguing lalu bejaku ngagai Iya ngena jaku orang Hebrew, “Rabbouni!” (Reti nya “Pengajar.”) Ku Jesus bejaku ngagai iya, “Anang megai Aku, laban Aku apin niki ngagai Apai. Tang mupuk nuan ngagai sida menyadi Aku, lalu padahka ngagai sida, Aku niki ngagai Apai Aku enggau Apai kita, ngagai Allah Taala Aku enggau Allah Taala kita.” Maria Magdalin mupuk lalu madah ngagai sida murid, “Aku udah meda Tuhan.” Iya lalu madah ngagai sida utai ti udah disebut Tuhan ngagai iya. Lemai hari Minggu nya, lebuh pintu udah ditutup ba endur alai sida murid begempuru laban sida takutka orang Judah, Jesus datai, lalu bediri ba tengah-tengah sida, lalu bejaku ngagai sida, “Awakka pemaik meruan enggau kita.” Lebuh Iya udah nyebut nya, Iya mandangka jari enggau rusuk Iya ngagai sida. Sida murid lalu gaga ati meda Tuhan. Jesus lalu bejaku baru ngagai sida, “Awakka pemaik meruan enggau kita. Baka Apai ke udah ngirumka Aku, baka nya mega Aku ngirumka kita.” Lebuh Iya udah nyebut nya, Iya ngesuhka seput ngagai sida, lalu bejaku enggau sida “Terima meh Roh Kudus. Enti kita ngampun dosa orang, orang nya diampun ari dosa sida. Enti kita enda ngampun dosa orang, sida enda diampun.” Tang Thomas (ke dikumbai Besapit), siku ari sida ke dua belas, nadai enggau sida lebuh Jesus datai. Nya alai sida murid ti bukai madah ngagai iya, “Kami udah meda Tuhan!” Tang ku Thomas bejaku ngagai sida, “Enti aku enda meda abi paku lawang ba jari Iya, lalu ngachukka tunjuk aku ngagai abi paku lawang nya, lalu ngengkahka jari aku ba rusuk Iya, aku enggai arap.” Seminggu udah bekau nya, sida murid Iya begempuru baru ba rumah nya, lalu Thomas bisi enggau sida. Taja pen pintu udah ditutup, tang Jesus datai lalu bediri ba tengah-tengah sida, lalu bejaku, “Awakka pemaik meruan enggau kita.” Iya lalu bejaku ngagai Thomas, “Engkahka tunjuk nuan ditu, lalu peda jari Aku. Unjur lalu engkahka jari nuan ba rusuk Aku. Anang kakang ati, tang arap!” Thomas lalu nyaut Iya, “Tuhan aku, Allah Taala aku!” Jesus lalu nyebut ngagai iya, “Kati nuan arap laban nuan udah meda Aku? Beberekat meh orang ke arap, taja pen sida enda meda Aku!” Jesus ngereja mayuh kereja ajih ti bukai di mua sida murid Iya, ti enda dituliska dalam bup tu. Tang utai tu ditulis ngambika kita arapka Jesus nya Kristus, Anak Allah Taala, lalu ulih pengarap kita ke Iya, kita tau bulih pengidup dalam nama Iya. Udah nya, Jesus mandangka Diri baru ngagai sida murid Iya ba tebing Tasik Tiberias. Baka tu ku jalai Iya mandangka Diri. Nyadi Simon Peter, Thomas (ke dikumbai Besapit), Natanel (ke datai ari nengeri Kana di Galili), anak Sebedi ke dua iku, enggau dua iku murid ti bukai, begempuru. Simon Peter lalu bejaku ngagai sida, “Aku deka berikan.” Sida lalu nyebut, “Kami pen ka meh enggau nuan.” Sida mupuk lalu nepan sebuah perau, tang malam nya sida nadai bulih utai. Lebuh mata panas baru tumbuh, Jesus bediri ba tebing, tang sida murid enda ngelala orang nya Jesus. Jesus lalu bejaku ngagai sida, “Anak, bisi bulih utai?” Sida lalu nyaut, “Nadai.” Iya lalu bejaku ngagai sida, “Tibarka jala kita ari tisi kanan perau. Nya baru kita deka bulih ikan.” Sida lalu nibarka jala sida, lalu sida enda ulih narit jala nya, empa pemayuh ikan. Murid ke dikerinduka Jesus lalu bejaku ngagai Peter, “Tuhan nya!” Lebuh Simon Peter ninga orang nya Tuhan, iya lalu ngerasukka serayung iya (laban iya udah muka serayung iya) lalu terejun ke ai. Tang sida murid ti bukai mansang ke tebing ngena perau nya, narit jala ti penuh laban ikan, laban sida enda jauh ari tebing, semina kira seratus meter aja. Lebuh sida udah niki ke tebing, sida meda api endang udah menyadi lalu ikan enggau roti benung dipanggang ba api nya. Jesus lalu bejaku ngagai sida, “Bai kitu sekeda ikan ti baru udah ulih kita nya.” Simon Peter lalu nepan ngagai perau nya, lalu narit jala nya ke tebing, penuh laban ikan ti besai, seratus lima puluh tiga iku semua ikan nya. Tang taja pen ikan nya mayuh, jala nya enda charik. Ku Jesus bejaku ngagai sida, “Aram makai.” Siku pen nadai ga sida murid berani nanya Iya, “Sapa Nuan tu?” laban sida nemu Iya endang amat Tuhan. Jesus mansang ngagai sida, ngambi roti, lalu nyuaka roti nya ngagai sida. Iya mega nyuaka ikan ngagai sida. Tu ketiga kali Jesus udah mandangka Diri ngagai sida murid udah bekau Iya ke diangkatka ari mati. Lebuh sida udah badu makai, Jesus lalu bejaku ngagai Simon Peter, “Simon anak John, kati nuan rinduka Aku lebih ari sida ti bukai tu rinduka Aku?” Disaut Peter, “Sigi amat, Tuhan. Nuan nemu aku rinduka Nuan.” Lalu ku Jesus bejaku ngagai iya, “Beri anak domba Aku makai.” Jesus lalu nanya iya kedua kali, “Simon anak John, kati nuan rinduka Aku?” Peter lalu nyaut Iya, “Sigi amat, Tuhan. Nuan nemu aku rinduka Nuan.” Jesus lalu bejaku ngagai iya, “Ibun bedus Aku.” Jesus lalu nanya iya ketiga kali, “Simon anak John, kati nuan rinduka Aku?” Peter lalu tusah ati laban Jesus nanya iya ketiga kali, “Kati nuan rinduka Aku?” Nya alai ku iya bejaku ngagai Jesus, “Tuhan, Nuan nemu semua utai. Nuan nemu aku rinduka Nuan!” Jesus lalu bejaku ngagai iya, “Beri bedus Aku makai. Enggau bendar Aku madah ngagai nuan, lebuh nuan agi biak, nuan nanchangka belulang ke diri empu, lalu nuan bejalai ngagai sebarang endur nuan deka. Tang lebuh nuan nyau tuai, nuan deka ngunjurka jari nuan, lalu orang bukai deka nanchangka belulang ba nuan, lalu mai nuan ngagai endur ti enggai digusung nuan.” (Jesus nyebut nya kena Iya madahka gaya pemati Peter kena Peter ngemuliaka Allah Taala.) Udah nya Jesus lalu bejaku ngagai iya, “Titihka Aku!” Peter nguing, lalu tepedaka murid ke dikerinduka Jesus, nitihka seduai iya. Nya meh murid ke udah duduk semak Jesus lebuh sida makai, lalu udah nanya, “Tuhan, sapa orang ke deka nyual Nuan?” Lebuh Peter meda murid nya, iya lalu bejaku ngagai Jesus, “Tuhan, kati ku baka iya?” Jesus lalu nyebut ngagai Peter, “Enti ari peneka Aku iya mengkang idup nyentuk ngagai maya Aku datai, baka ni ku nya tau ngawa nuan? Titihka Aku!” Nya alai berita pasal nya lalu ngelekai ba bala orang ke nitihka Jesus, madahka murid nya enda nemu mati. Tang Jesus nadai madahka murid nya enda nemu mati. Utai ti ku Jesus nya, “Enti ari peneka Aku iya mengkang idup nyentuk ngagai maya Aku datai, baka ni ku nya tau ngawa nuan?” Iya nya meh murid ke besaksi lalu udah nuliska utai tu, lalu kami nemu, saksi iya amat magang. Tang mayuh mega utai bukai udah dikereja Jesus. Enti sema semua utai nya dituliska magang, jangka aku, dunya tu pen enda meh umbas alai nyimpan semua bup ti deka ditulis nya. Tabi Teopilus, Dalam bup ti keterubah, Teopilus, aku nuliska pasal semua utai ti udah dikereja enggau diajar Jesus kenyau ari pun nyentuk ngagai hari Iya dibai niki ke serega, lebuh Iya udah meri pesan, ulih kuasa Roh Kudus, ngagai sida rasul ke udah dipilih Iya. Dalam kandang empat puluh hari udah bekau Iya mati, Iya suah pegari di mua sida kena Iya nunjukka Diri amat idup. Sida meda Iya, lalu bejaku ngagai sida pasal Perintah Allah Taala. Lebuh Iya benung diau enggau sida, Iya enda nyagi sida ninggalka Jerusalem, tang nganti pemeri ti udah disemaya Apai. Ku Iya, “Tu utai ti udah didinga kita ari Aku: John maptisa ngena ai, tang kita deka dibaptisa ngena Roh Kudus dua tiga hari tu agi.” Lebuh sida begempuru, sida lalu nanya Iya, “Tuhan, kati tu maya Nuan deka mulaika Perintah ngagai orang Israel?” Iya lalu nyaut, “Kita enda ibuh nemu maya tauka musin ti udah diletak Apai ngena hak Iya Empu. Tang kita deka nerima kuasa lebuh Roh Kudus udah nurun atas kita, lalu kita deka nyadi saksi Aku di Jerusalem, di serata menua Judea enggau Samaria, enggau ngagai ujung dunya.” Lebuh Iya udah nyebut nya, Iya lalu dibai niki ke serega, dipeda semua sida, lalu siti remang ngelindung Iya ari sida. Lebuh sida benung engkadah ke langit nengkilaka Iya mupuk, tekala nya dua iku orang ke ngena gari burak bediri ngimbai sida lalu bejaku, “Kita orang Galili, nama kebuah kita bediri engkadah ke langit? Jesus tu, ke udah diambi ari kita lalu dibai niki ke serega, deka datai baru baka chara Iya ke mupuk ke serega, baka ke udah dipeda kita.” Sida lalu pulai ngagai Jerusalem ari Bukit Kana kira satu kilometer ari nengeri nya. Lebuh sida udah tama ngagai nengeri nya, sida lalu niki ke sadau, ti alai sida diau. Sida nya Peter, John, James, enggau Andrew, Philip enggau Thomas, Bartolomew enggau Matthew, James anak Alpius, Simon ke Bujang Berani, enggau Judas anak James. Semua sida seruran besampi, sama enggau sida ke indu, nyengkaum Maria indai Jesus, enggau sida menyadi lelaki Jesus. Lebuh maya nya Peter lalu bediri ba tengah-tengah bala sida ke arap (pemayuh semua sida kira seratus dua puluh iku) lalu bejaku, “Menyadi, Bup Kudus enda tau enda dikamatka, ba senentang Roh Kudus ke bejaku ngena mulut David, pasal Judas ke nyadi malin ke orang ke nangkap Jesus, laban iya udah nyadi raban kitai, lalu udah diberi ungkup dalam pengawa tu.” ( Nyadi Judas udah meli sebidang tanah ngena duit ti ulih iya ngereja pengawa ti jai nya. Iya rebah ba tanah nya lalu perut iya pechah, lalu semua perengka dalam iya tepambur pansut. Semua orang ke diau di Jerusalem bela udah ninga pasal nya, nya alai, dalam jaku sida empu, sida ngumbai tanah nya Akeldama, reti nya “Tanah Darah.”) “Laban endang udah ditulis dalam bup Masmur, ‘Awakka rumah iya puang, lalu awakka orang nadai diau dalam rumah nya.’ Lalu udah mega ditulis munyi tu: ‘Awakka orang bukai ngambi pengawa iya.’ Nya alai sida lalu nuduhka dua iku orang: Josep, ke dikumbai Barsabas (ke mega dikumbai Justus), enggau Matias. Sida lalu besampi, ku sida, “Tuhan, Nuan nemu ati semua orang. Tunjukka ngagai kami ni bagi seduai tu ke udah dipilih Nuan bekereja dalam pengawa tu nyadi rasul nganti Judas, ke udah limpang lalu mupuk ngagai endur iya empu.” Sida lalu bechabut undi ke seduai iya, lalu Matias kena pilih. Iya lalu ditambahka ngagai bala rasul ke sebelas iku nya. Lebuh hari Pentikos udah datai, semua sida begempuru ba endur siti. Tekala nya utai ti munyi ribut biaubalai lalu datai ari langit, lalu ngemenuhka rumah ti alai sida duduk. Utai ti baka daun api lalu pegari ba tengah-tengah sida, ti bechabang lalu inggap ba genap iku sida. Semua sida lalu dipenuhka enggau Roh Kudus, lalu belabuh bejaku ngena jaku orang bansa bukai nitihka penau ti diberi Roh Kudus. Nyadi di Jerusalem lebuh maya nya bisi orang Judah ke angkunka Allah Taala, ke datai ari semua menua di dunya tu. Lebuh sida ninga munyi utai nya, sida lalu begelumu, lalu semua sida tekenyit ati, laban genap iku sida bela ninga bala orang ke arap nya bejaku ngena jaku bansa sida. Sida balat alit ati sereta iran, lalu nanya, “Ukai enda semua sida ke bejaku tu orang Galili magang? Nya alai nama kebuah kitai bela ninga sida tu bejaku ngena jaku kitai empu? Kitai tu datai ari menua Partia, Media enggau Elam, Mesopotamia, Judea, enggau Kapadosia, Pontus enggau Asia, Prigia enggau Pampilia, Ejip enggau Libia semak Sairin, enggau temuai ari Rome, nyengkaum orang Judah enggau orang bansa bukai ke udah masuk pengarap orang Judah, orang ari Krit enggau Arabia. Tang semua kitai bela ninga sida tu bejaku ngena jaku kitai empu, madahka pasal pemesai pengawa Allah Taala!” Semua sida balat alit ati sereta beba penemu. Ku sida bejaku enggau pangan diri, “Nama reti utai tu?” Tang sida ti bukai ngelese, ku sida “Sida tu mabuk!” Tang Peter, ke bediri enggau sida ke sebelas iku, lalu bejaku enggau nyawa ti inggar ngagai orang mayuh: “Kita orang Judah, enggau semua kita ke diau di Jerusalem, awakka kita nemu utai tu, lalu pendingka utai ti disebut aku. Iya ti bendar, orang tu ukai mabuk munyi ti disangka kita, laban jam diatu baru pukul semilan pagi. Tu meh utai ti udah disebut nabi Joel: ‘Ba hari ti penudi, ku Allah Taala bejaku, Aku deka nuang Roh Aku ngagai semua mensia, lalu anak lelaki enggau anak indu kita deka benabi, lalu anak bujang kita deka meda genera, lalu sida ke tuai deka bemimpi. Sigi amat. Lebuh maya nya Aku deka nuang Roh Aku ngagai bala ulun ti indu enggau bala ulun Aku ti lelaki, lalu sida deka benabi. Lalu Aku deka ngayanka tanda ti nyelai di langit enggau kereja ti nyelai ba dunya di baruh, darah, api enggau sebun ti baka asap. Mata hari deka piam, lalu bulan deka bebali mirah baka darah, sebedau Hari Tuhan datai hari ti besai sereta bemulia nya. Lalu barang sapa ngangauka nama Tuhan, deka diselamatka.’ “Kita orang Israel, dingaka jaku aku tu. Jesus orang Nasaret udah dikirumka Allah Taala ngagai kita. Utai tu nyata ari kereja ajih, enggau kereja ti nyelai ti dikereja Allah Taala, ulih Jesus, ba bala kita. Kita empu nemu utai tu, laban utai tu nyadi ba bala kita. Jesus tu udah diserahka ngagai kita nitihka pelan enggau penemu Allah Taala. Kita ngeregang lalu munuh Iya ngena jari orang ke ari luar Adat. Tang Allah Taala udah ngangkatka Iya lebuh Iya udah ngelepaska Iya ari pemati, laban pemati nadai kuasa atas Iya. Laban David udah bejakuka pasal Iya munyi tu: ‘Aku seruran meda Tuhan di mua aku. Laban Iya muak ari kanan aku, nya alai aku enda takut. Nya alai ati aku gaga lalu dilah aku rami gaga, lalu aku deka diau dalam pengadang, laban Nuan enda ninggalka aku dalam dunya pemati, tauka nejuka Nembiak Nuan Ti Kudus, but. Nuan udah nunjukka jalai pengidup ngagai aku. Nuan deka seruran enggau aku lalu ati aku deka penuh laban pengaga.’ “Menyadi, awakka aku bejaku enggau terang ngagai kita pasal aki kitai David. Iya udah mati lalu udah dikuburka, lalu kubur iya agi bisi ditu nyentuk ngagai diatu. Laban iya endang nabi, iya nemu Allah Taala udah ngaga semaya ngena sumpah enggau iya madahka Diri deka ngasuh siku ari peturun iya nyadi raja. Laban David nemu utai tu deka nyadi, nya alai iya bejakuka pasal pengangkat Kristus ari mati. Ku iya, ‘Iya enda ditinggalka di dunya pemati, lalu tubuh Iya pen enda mega but.’ Jesus tu ke udah diangkatka Allah Taala ari mati, lalu semua kami tu nyadika saksi nya. Iya udah diangkatka muak ari kanan Allah Taala lalu lebuh Iya udah nerima Roh Kudus ti udah disemaya Apai, Iya nuang Roh Kudus nya ngagai kami, baka ti dipeda enggau didinga kita. Laban ukai David ke niki ke serega. Tang David empu nyebut: ‘Ku Tuhan bejaku ngagai Tuhan aku: Duduk muak ari kanan Aku datai ke Aku udah ngaga munsuh Nuan nyadika pelasar kaki Nuan.’ “Nya alai, awakka semua orang Israel nemu enggau terang: Jesus ke udah diregang kita, udah digaga Allah Taala nyadi Tuhan enggau Kristus!” Lebuh orang mayuh ninga nya, ati sida balat tusah. Sida lalu bejaku ngagai Peter enggau ngagai sida rasul ti bukai, “Menyadi, nama utai ti patut dikereja kami?” Ku Peter bejaku ngagai sida, “Nesal ati ke dosa kita, genap iku kita, lalu dibaptisa dalam nama Jesus Kristus, ngambika dosa kita diampun, lalu kita deka nerima Roh Kudus nyadika pemeri ti diberi Allah Taala. Semaya nya diberi ngagai kita, enggau ngagai anak kita, enggau ngagai semua orang ke jauh, iya nya semua orang ke dikangauka Tuhan Allah Taala kitai ngagai Iya.” Peter besaksi ngagai sida ngena mayuh jaku bukai, lalu meransang sida. Ku iya, “Lepaska diri ari rebak ti jai tu!” Sida ke arapka pesan iya, lalu dibaptisa. Kira tiga ribu iku orang ditambahka ngagai bala sida sehari nya. Sida angkun belajar ari sida rasul, begempuru enggau sida, makai roti, sereta besampi. Genap iku orang bela nangi laban mayuh kereja ajih enggau kereja ti nyelai dikereja sida rasul. Semua orang ke arap begulai enggau pangan diri lalu bekunsika pemisi sida enggau pangan diri. Sida nyual reta tengkira sida, lalu nyadung duit ti ulih sida ari nya ngagai semua bala sida, nitihka guna sida siku-siku. Tiap hari sida begempuru dalam Rumah Sembiang. Sida makai roti dalam rumah sida. Sida beserumpu makai lalu bekunsika pemakai enggau ati ti gerah mudah sereta gaga, muji Allah Taala sereta dikerinduka semua orang. Lalu tiap hari Tuhan nambahka orang ke diselamatka ngagai bala sida. Nyadi sekali, lebuh Peter seduai John mansang ngagai Rumah Sembiang lebuh maya besembiang ba urung pukul tiga ngalih hari, siku orang ke enda ulih bejalai kenyau ari ada dibai tama. Orang ngalika iya tiap hari ba mua pintu ti dikumbai Pintu ti Manah dalam Rumah Sembiang, ngambika iya ulih minta sedekah ari orang ke tama ngagai Rumah Sembiang nya. Lebuh iya meda Peter seduai John baru deka tama ngagai Rumah Sembiang nya, iya lalu minta sedekah ari seduai iya. Seduai iya lalu malik ngagai iya, lalu ku Peter bejaku, “Peda nuan kami duai tu!” Orang nya lalu merening ngagai seduai iya, ngarapka diri deka bulih sedekah ari seduai iya. Tang ku Peter bejaku, “Aku nadai pirak tauka emas, tang utai ti dikemisi aku, nya meh utai ti diberi aku ngagai nuan: dalam nama Jesus Kristus orang Nasaret, bediri nuan lalu bejalai!” Peter lalu megai jari kanan iya, lalu ngangkatka iya. Tekala nya kaki enggau buku-ali orang nya lalu kering. Iya engkejuk angkat, bediri, lalu bejalai, lalu tama ngagai Rumah Sembiang sama enggau Peter seduai John, ama bejalai, ama engkejuk, sereta muji Allah Taala. Semua orang bela meda iya bejalai sereta muji Allah Taala, lalu sida ngelala iya nya orang ke udah duduk minta sedekah ba mua Pintu ti Manah dalam Rumah Sembiang. Lalu sida balat alit ati sereta iranka utai ti udah nyadi ba iya. Lebuh orang nya majak bepegai ba Peter seduai John, semua orang mayuh alit ati lalu belanda ngagai sida tiga ba endur ti dikumbai Serambi Solomon. Lebuh Peter meda orang mayuh datai, iya lalu bejaku ngagai sida, “Kita orang Israel, nama kebuah kita alit ati ke tu? Nama kebuah kita merening ngagai kami? Ukai kuasa kami tauka pengudus kami ti ngasuh orang tu ulih bejalai. Allah Taala ke disembah Abraham, Isak enggau Jakop, Allah Taala ke disembah aki ini kitai, udah ngemuliaka Nembiak Iya Jesus, ke udah diserah lalu ditulak kita di mua Pilate, taja pen Pilate udah mutuska runding deka ngelepaska Iya. Tang kita nulak Iya ti kudus sereta lurus, lalu kita minta siku pemunuh diserahka ngagai kita, lalu kita munuh Iya ti Pun pengidup. Tang Allah Taala udah ngangkatka Iya ari mati. Kami empu nyadika saksi nya. Ulih pengarap ke nama Iya, ulih kuasa nama Iya, orang ke enda ulih bejalai tu, ke dipeda sereta dikelala kita empu, udah nyadi kering. Pengarap iya ke Jesus ti udah ngeraika iya, baka ke dipeda semua kita. “Menyadi, aku nemu kita enggau bala tuai kita, udah ngereja utai nya laban kita enda nemu utai ti dikereja diri. Tu chara Allah Taala ngamatka semua utai ti udah disebut Iya ngena semua sida nabi, madahka Kristus enda tau enda kena perinsa. Nya alai, nesal ati meh kita lalu pulai baru ngagai Allah Taala, ngambika dosa kita diampun, ngambika maya deka datai alai kita deka ngasaika pengering ari Tuhan, sereta ngambika Iya ngirumka Kristus ngagai kita, iya nya Jesus ke udah dipilih Iya ke kita, ke enda tau enda diau di serega nyentuk ngagai maya Allah Taala udah ngaga semua utai nyadi baru magang, munyi ti udah dipadahka Iya ngena bala nabi Iya ti kudus dulu kelia. Ku Moses bejaku, ‘Tuhan Allah Taala kita deka milih siku nabi ke kita, ari bala kita empu, baka Iya ke udah milih aku. Kita enda tau enda mendingka semua utai ti dipadahka iya ngagai kita. Barang sapa enda mendingka nabi nya deka dibuai ari raban nembiak Allah Taala.’ Lalu semua nabi ke udah bejaku, berengkah ari Samuel, enggau nabi bukai ke datai dudi ari iya, udah mega madahka hari nya. Kita tu peturun sida nabi nya enggau peturun sempekat ti udah diberi Allah Taala ngagai aki ini kita, lebuh Iya bejaku ngagai Abraham, ‘Ulih peturun nuan semua mensia di dunya tu deka diberekatka.’ Lebuh Allah Taala udah ngangkatka Nembiak Iya, Iya lalu ngirumka Iya ngagai kita dulu, ngambika Iya merekatka kita lebuh Iya nguingka genap iku kita ari penyai kita.” Lebuh Peter seduai John agi benung bejaku ngagai orang mayuh, sida imam, enggau kepala orang ke nyaga Rumah Sembiang, enggau orang Saduki datai ngagai seduai iya, laban sida pedis ati ngagai seduai iya laban seduai iya ngajar orang mayuh, lalu madahka dalam Jesus bisi pengangkat ari mati. Nya alai sida nangkap seduai iya, lalu nutup seduai iya dalam rumah jil, nyentuk ngagai hari siti, laban hari nyau lemai. Tang mayuh orang ke ninga pesan nya, arap, lalu pemayuh tubuh sida nambah ngagai kira lima ribu iku. Hari siti, bala orang ke megai perintah, sida tuai bansa enggau sida pengajar Adat begempuru di Jerusalem sama enggau Imam Besai Anas, enggau Kaiapas, John, Aleksander, enggau sida ti bukai ke ari ruang bilik imam besai. Lebuh sida udah ngasuh Peter seduai John bediri di mua sida, sida lalu nanya, “Ngena kuasa apa tauka ngena nama sapa seduai ngereja utai tu?” Peter, ke penuh laban Roh Kudus, lalu bejaku ngagai sida, “Kita orang perintah, enggau kita ke tuai bansa: enti kami duai sehari tu ditanyaka pasal kereja ti manah ti udah dikereja ba orang ke enda ulih bejalai, pasal jalai orang tu udah digeraika, awakka semua kita nemu, lalu awakka semua orang Israel nemu, orang ke bediri di mua kita ditu diatu, udah digeraika ulih kuasa nama Jesus Kristus orang Nasaret, ke udah diregang kita, lalu udah diangkatka Allah Taala idup baru ari mati. Jesus nya meh ‘batu ti ditulak kita ke tukang rumah, tang udah nyadi batu ti pemadu beguna.’ Pengelepas semina ditemu dalam orang siku aja, laban nadai nama bukai di baruh langit ti diberi ngagai mensia ti ulih nyelamatka kitai.” Lebuh sida meda pemerani Peter seduai John, lalu nemu seduai iya ukai orang ke bepelajar, tang orang ke sengapa-dia, sida balat alit ati. Nya baru sida nemu seduai iya udah bekaling enggau Jesus. Lebuh sida meda orang ke udah digeraika bediri ngimbai seduai iya, sida nadai nemu jalai besangkalka nya. Nya alai sida ngasuh seduai iya pansut ari balai nya. Sida lalu berandauka pasal pekara nya enggau pangan diri. Ku sida, “Nama utai ti patut dikereja kita ngagai orang tu? Laban semua orang ke diau di Jerusalem bela udah meda kereja ajih ti udah dikereja ulih seduai iya, lalu kitai nadai jalai besangkalka nya. Tang kena nagang pekara tu ngelekai ba bala orang mayuh, awakka kitai nangkan seduai iya enggau jaku, enda nyagi seduai iya bejaku ngagai sebarang orang dalam nama tu.” Nya alai sida lalu ngangauka Peter seduai John tama baru, lalu enda nyagi seduai iya bejaku tauka ngajar dalam nama Jesus. Tang ku Peter seduai John nyaut sida, “Sekalika kami, di mua Allah Taala, patut mendingka kita, lalu enda mendingka Allah Taala, awakka kita empu berunding, laban kami enda ulih nagang diri bejakuka pasal utai ti udah dipeda enggau didinga kami.” Lebuh sida udah ngemba seduai iya baru, sida lalu ngelepaska seduai iya, laban sida nadai nemu jalai ngukum seduai iya ketegal orang mayuh, laban semua sida bela muji Allah Taala ketegal utai ti udah nyadi. Laban orang ke udah digeraika ulih kereja ajih nya lebih empat puluh taun umur. Lebuh Peter seduai John udah dilepaska, seduai iya lalu pulai ngagai raban sida empu, lalu madahka jaku ti udah disebut sida tuai imam, enggau bala tuai bansa, ngagai seduai iya. Lebuh sida ninga nya, semua sida lalu besampi enggau nyawa ti inggar ngagai Allah Taala. Ku sida, “Tuhan ti Pemadu Tinggi, ke ngaga langit, tanah, enggau tasik, enggau semua utai ti dalam sida, ke udah bejaku ngena Roh Kudus nengah mulut nembiak Nuan David, ‘Nama kebuah orang bansa bukai pedis ati, lalu semua bansa berundingka utai ti nadai guna? Bala raja dunya angkat bediri, lalu orang ke megai perintah udah begempuru ngelaban Tuhan enggau ngelaban Kristus Iya.’ Laban dalam nengeri tu, iya ti bendar, Herod seduai Pontius Pilate, enggau orang bansa bukai, enggau orang Israel, udah begempuru ngelaban Nembiak Nuan ti kudus, Jesus ke udah dipilih Nuan, ngambika sida ngereja utai ti endang udah dulu diletak Nuan deka nyadi. Nya alai diatu, Tuhan, peda Nuan pemalat sida ngemba kami, lalu beri pemerani ngagai nembiak nuan kena sida nusui pesan Nuan, lebuh Nuan ngunjurka jari Nuan lalu ngeraika orang, lalu tanda ti nyelai enggau kereja ajih dikereja dalam nama Jesus, nembiak Nuan ti kudus.” Lebuh sida udah besampi, endur alai sida ke begempuru lalu berenyang. Semua sida lalu dipenuhka enggau Roh Kudus, lalu sida berani nusui pesan Allah Taala. Semua sida ke arap sama seati, sama sepenemu, lalu nadai siku sida ngumbai utai ti dikemisi sida semina diempu sida kediri, tang semua sida bekunsika semua utai ti dikemisi sida enggau pangan diri. Enggau kuasa ti besai, sida rasul besaksika pasal pengangkat Tuhan Jesus ari mati, lalu Allah Taala merekatka semua sida. Nadai siku sida suntuk utai, laban sida ke bisi tanah tauka rumah, nyual utai nya, lalu mai lalu ngengkahka rega utai nya semak kaki sida rasul, lalu duit nya disadung ngagai bala sida nitihka guna sida siku-siku. Siku orang Lewi ke benama Josep, ke asal ari Saiprus, ke dikumbai bala sida rasul Barnabas (reti nya, “Anak Peransang”) nyual tanah iya, mai duit nya, lalu ngengkahka duit nya semak kaki sida rasul. Tang siku lelaki ke benama Ananias enggau bini iya Sapira nyual sebidang tanah. Ari aum seduai melaki-bini iya, iya naruh sebagi ari duit nya, mai teda duit nya lalu ngengkahka duit nya semak kaki sida rasul. Peter lalu nanya iya, “Ananias, nama kebuah Sitan udah ngasuh nuan bulaka Roh Kudus, lalu ngasuh nuan naruh sebagi ari rega tanah nya? Lebuh tanah nya apin dijual, tanah nya endang enggi nuan, ukai enda? Lalu lebuh tanah nya udah dijual, duit nya endang sebarang ku nuan enggau, ukai enda? Nya alai, nama kebuah nuan berunding deka ngereja utai tu dalam ati nuan? Nuan ukai ngemulaka kami, tang ngemulaka Allah Taala!” Lebuh Ananias ninga jaku nya, iya rebah lalu mati. Semua orang ke ninga pekara nya bela takut magang. Bala orang ke bujang datai, mungkus bangkai iya, ngesan iya ke luar, lalu nguburka iya. Kira tiga jam udah bekau nya bini iya tama, enda nemu utai ti udah nyadi. Peter lalu nanya iya, “Padahka ngagai aku, kati tu semua rega tanah ti dijual seduai laki nuan?” Iya lalu nyaut, ‘Au. Nya meh rega iya.” Peter lalu bejaku ngagai iya, “Nama kebuah seduai besetuju deka nguji Roh Tuhan? Dinga nuan! Orang ke udah nguburka laki nuan, bisi bediri di mua pintu, lalu sida deka ngesan nuan pansut!” Tekala nya iya lalu rebah semak kaki Peter, lalu mati. Lebuh sida ke bujang tama lalu nemu iya udah mati, sida lalu ngesan iya ke luar, lalu nguburka iya ngimbai laki iya. Semua raban eklisia, enggau semua orang ke ninga pasal pekara nya lalu balat amat takut. Mayuh kereja ti nyelai enggau kereja ajih dikereja sida rasul ba bala orang mayuh. Lalu semua sida ke arap begempuru ba Serambi Solomon. Nadai orang bukai berani begulai enggau sida, tang orang balat muji sida. Tang taja pia, orang ke arapka Tuhan lebih agi majak nambah-menambah, orang ke lelaki enggau orang ke indu, datai ke orang nyau mai orang ke sakit ngagai jalai raya, lalu ngalika sida ba tilam tauka ba tikai, ngambika ayuk Peter ninggang sida lebuh iya mansa. Mayuh amat orang mega datai begempuru ari mayuh bengkah nengeri ti ngelingi Jerusalem, mai orang ke sakit enggau orang ke dikeduan roh ti kamah, lalu semua sida digeraika magang. Imam besai lalu ngereja siti utai. Iya enggau semua orang ke enggau iya, ke kepepaska sida rasul, nangkap sida rasul lalu nutup sida dalam rumah jil. Tang malam nya siku melikat Tuhan muka pintu rumah jil nya, mai sida pansut, lalu bejaku, “Mupuk kita, lalu bediri dalam Rumah Sembiang, lalu padahka ngagai orang mayuh semua pesan pasal pengidup tu.” Lebuh sida ninga nya, sida tama ngagai Rumah Sembiang ba urung rerak tawas, lalu majak ngajar orang mayuh. Lebuh imam besai enggau orang ke enggau iya datai, sida ngempuruka semua raban Kunsil, enggau semua tuai bansa orang Israel, lalu ngasuh orang mai sida rasul ari rumah jil ngagai sida. Tang lebuh sida polis ke nyaga Rumah Sembiang mansang ngagai rumah jil, sida nadai nemu sida rasul dalam rumah jil nya; nya alai sida lalu pulai baru ngagai Kunsil lalu madahka nya, “Kami nemu semua pintu ba rumah jil nya dikunchi magang, lalu semua jejaga bediri ba mua pintu, tang lebuh kami muka pintu, kami nadai nemu orang di dalam!” Lebuh pemesai ke nyaga Rumah Sembiang, enggau sida tuai imam ninga nya, sida beba runding lebuh sida berundingka utai ti udah nyadi. Udah nya siku orang datai lalu madah ngagai sida, “Dinga kita, orang ke ditutup kita dalam rumah jil diatu bediri dalam Rumah Sembiang, ngajar orang mayuh!” Pemesai nya lalu mupuk enggau bala polis ke nyaga Rumah Sembiang, lalu mai sida rasul, tang enda enggau chara ti kasar, laban sida takutka diri dituku orang mayuh ngena batu. Lebuh sida udah mai sida rasul, sida lalu ngasuh sida rasul bediri di mua raban Kunsil. Imam besai lalu nanya sida. Ku iya, “Kami udah meri atur ti terit, enda nyagi kita ngajar dalam nama tu, tang diatu kita udah ngisi Jerusalem ngena ajar kita, lalu kita keras deka ngasuh kami betanggungjawapka pemati Iya!” Tang ku Peter enggau sida rasul bukai nyaut, “Kami enda tau enda ngasika Allah Taala, ukai ngasika mensia. Allah Taala aki ini kitai udah ngangkatka Jesus ari mati, ke udah dibunuh kita ba kayu regang. Allah Taala udah ngangkatka Iya muak ari kanan Iya nyadi Kepala enggau Juruselamat, ngambika Iya ulih meri orang Israel peluang nesal ati lalu dosa sida diampun. Lalu kami empu nyadi saksi ke utai nya, lalu baka nya mega Roh Kudus ke udah diberi Allah Taala ngagai orang ke ngasika Iya.” Lebuh sida ninga nya, sida balat amat pedis ati, lalu deka munuh sida rasul. Tang siku orang Parisi ke benama Gamaliel ke dalam Kunsil nya, ke nyadi pengajar Adat sereta dibasa orang mayuh, bediri lalu ngasuh orang mai sida rasul pansut enda lama. Udah nya iya lalu bejaku ngagai raban Kunsil, “Kita orang Israel, perundingka enggau manah utai ti deka dikereja kita ngagai orang tu. Laban dulu suba Tadeus angkat ngelaban, ngumbai diri orang ke besai, lalu kira empat ratus iku orang nitihka iya. Tang iya dibunuh, lalu semua orang ke nitihka iya pambar lalu lesap. Udah nya Judas ari Galili angkat ngelaban lebuh maya ngitung tubuh, lalu mai orang enggau iya. Iya mega dibunuh, lalu semua orang ke nitihka iya pambar magang. Nya alai, ba pekara ke diatu, aku madah ngagai kita, anang ngereja sebarang utai ngagai sida. Awakka sida pia aja! Laban enti pelan tauka pengawa tu datai ari mensia, iya deka puntan. Tang enti utai tu datai ari Allah Taala, kita enda ulih ngalahka sida, lalu kita deka ditemu ngelaban Allah Taala!” Sida lalu besetuju enggau penemu Gamaliel. Lebuh sida udah ngasuh sida rasul tama, sida lalu ngasuh sida disipat. Udah nya sida enda nyagi sida bejaku dalam nama Jesus, lalu ngelepaska sida. Lebuh sida rasul angkat ari balai Kunsil, sida lalu rami gaga ati ke diri ke udah dikira patut kena perinsa ketegal nama Jesus. Lalu tiap hari, dalam Rumah Sembiang enggau dalam rumah sida empu, sida enda ngetu-ngetu ngajar sereta madahka Jesus nya Kristus. Lebuh maya nya menya, lebuh bala murid nyau majak nambah-menambah, orang Judah ke bejaku ngena jaku Gerika mutap ngelaban orang Hebrew, laban indu balu sida enda dikibuhka orang lebuh orang nyadung pemakai tiap hari. Sida rasul ke dua belas lalu ngempuruka semua orang ke arap, lalu bejaku ngagai sida, “Kami enda patut ngelengkaka pengawa nusui jaku Allah Taala, lalu meri orang makai. Nya alai, menyadi, pilih ari bala kita empu tujuh iku orang ke manah perangai, ke penuh laban Roh Kudus sereta bepenemu-dalam, ke tau diasuh kitai ngereja pengawa tu, lalu kami empu deka ngemeranka pengawa besampi enggau nusui Berita Manah.” Utai ti disebut sida ngelantangka ati semua sida, lalu sida milih Stepen ke penuh laban pengarap enggau Roh Kudus, sama enggau Philip, Prokorus, Nikanor, Timon, Parmenas enggau Nikolaus, siku orang bansa bukai ke datai ari Antiok ke udah masuk pengarap orang Judah. Sida lalu ngasuh orang nya bediri di mua sida rasul, ke besampi lalu ngengkahka jari atas sida. Jaku Allah Taala majak ngelekai. Pemayuh murid lalu balat amat majak nambah-menambah di Jerusalem, lalu mayuh amat mega sida imam nerima pengarap nya. Stepen, ke penuh laban berekat enggau kuasa, ngereja mayuh kereja ajih enggau kereja ti nyelai ba orang mayuh. Udah nya sekeda orang ari raban Balai Gempuru Orang Ke Udah Dilepaska enggau orang Judah ke datai ari menua Sairin, ari Aleksandria, enggau ari menua Silisia enggau Asia, belabuh betalat enggau Stepen. Tang sida enda ulih ngelaban penemu-dalam enggau kuasa Roh Kudus ti dikena iya bejaku. Sida lalu belalai nyungkak orang nyebut, “Kami udah ninga iya bejaku busung ngelaban Moses, enggau ngelaban Allah Taala!” Lalu sida nyungkak orang mayuh, enggau sida tuai bansa, enggau sida pengajar Adat. Sida lalu nangkap Stepen lalu mai iya ngagai Kunsil. Sida ngasuh orang besaksi bula ngelaban iya, munyi tu, “Orang tu enda ngetu-ngetu bejaku ngelaban endur ti kudus tu, enggau ngelaban Adat, laban kami udah ninga iya madahka Jesus orang Nasaret deka ngerusak endur tu, lalu ngubah semua adat asal ti diberi Moses ngagai kitai!” Semua orang ke duduk dalam Kunsil nya bela merening magang ngagai Stepen, lalu sida meda mua iya baka mua melikat. Imam besai lalu nanya Stepen, “Kati nya amat?” Stepen lalu nyaut, “Bala menyadi, apai, pendingka aku! Allah Taala ti bemulia pegari di mua aki kitai Abraham, lebuh iya di menua Mesopotamia, sebedau iya diau di Haran, lalu bejaku ngagai iya, ‘Tinggalka menua enggau kaban belayan nuan, lalu mupuk ngagai menua ti deka ditunjukka Aku ngagai nuan.’ Nya alai iya ninggalka menua Kaldea, lalu diau di Haran. Udah bekau pemati apai iya, Allah Taala ngasuh iya mindah ari menua nya ngagai menua tu, ti alai kita diau diatu. Allah Taala enda meri iya pesaka di menua nya, sekaki pen nadai, tang besemaya deka meri menua nya nyadika pesaka iya, enggau ngagai bala peturun iya, taja pen iya nadai anak. Allah Taala bejaku madahka peturun iya deka nyadi orang kampar di menua orang, ke deka ngaga sida nyadi ulun lalu merinsaka sida empat ratus taun. Ku Allah Taala bejaku, ‘Tang Aku deka ngukum bansa ti beulunka sida, lalu udah bekau nya sida deka pansut ari menua nya lalu nyembah Aku ba endur tu.’ Allah Taala lalu meri iya sempekat betutus. Nya alai Abraham nutus Isak ba hari ti kelapan udah bekau Isak ada. Isak beranakka Jakop, lalu Jakop beranakka dua belas iku aki ini kitai ke nurunka bansa kitai. Bala anak lelaki Jakop kepapaska menyadi sida Josep, nya alai sida nyual iya ngagai menua Ejip. Tang Allah Taala bisi enggau iya lalu ngelepaska iya ari semua penusah iya. Iya meri Josep penemu-dalam lalu ngasuh iya dikerinduka Raja Pharaoh menua Ejip. Nya alai raja nya ngasuh Josep merintah menua Ejip sereta ngemataka semua ruang bilik raja. Udah nya lapar pungkang nyadi di serata menua Ejip enggau menua Kanaan. Mensia balat amat merinsa lalu bala aki kitai nadai pemakai. Tang lebuh Jakop ninga menua Ejip bisi gandum, iya lalu ngasuh sida aki kitai mansang kin keterubah iya. Lebuh sida mansang kin kedua kali, Josep madahka diri ngagai bala menyadi iya, lalu raja nemu pasal sida Josep sebilik. Josep lalu ngirumka pesan ngagai apai iya Jakop, minta Jakop enggau semua tujuh puluh lima iku sida sebilik pindah ngagai menua Ejip. Nya alai Jakop pindah ngagai menua Ejip. Iya enggau bala anak iya mati di menua nya, lalu bangkai sida dibai pulai ngagai Sekem, lalu dikuburka dalam kubur ti udah dibeli Abraham ari raban peturun Hamor di Sekem. Tang lebuh timpuh nyau semak alai Allah Taala deka ngamatka semaya ti udah digaga Iya ngagai Abraham, pemayuh tubuh bansa kitai nyau nambah-menambah di menua Ejip, nyentuk ngagai maya siku agi raja, ke enda nemu Josep, merintah menua Ejip. Iya nipu bansa kitai lalu mejalka sida aki ini kitai muai anak sida ke baru ada, ngambika sida mati. Nya meh maya Moses ada. Gamal iya sigat di mua Allah Taala, lalu iya diibun dalam rumah apai iya empu tiga bulan, lalu lebuh iya dibuai, anak indu raja ngiru iya, lalu ngibun iya nyadika anak iya empu. Nya alai Moses diajar semua penemu-dalam orang Ejip, lalu iya nyadi orang ke bekuasa dalam jaku enggau pengawa. “Lebuh iya umur empat puluh taun, iya berunding deka nemuai ngagai bansa iya empu, iya nya orang Israel. Lebuh iya tepedaka siku orang Ejip merinsaka siku orang Israel, iya lalu nulung orang Israel nya, bebalas ngagai orang Ejip nya, lalu munuh iya. ( Moses ngumbai bansa iya empu nemu Allah Taala deka ngena iya ngelepaska sida, tang sida enda nemu nya.) Hari siti iya tepedaka dua iku orang Israel belaya. Iya lalu nguji ngasuh seduai iya bebaik enggau pangan diri. Ku iya, ‘Seduai sama sebansa. Nama kebuah seduai belaya baka tu?’ Tang orang ke ngelaya pangan iya, ngejuka Moses ke tisi, lalu bejaku, ‘Sapa ngasuh nuan merintah lalu nyadi hakim kami? Kati nuan deka munuh aku, baka nuan ke munuh orang Ejip nya kemari?’ Lebuh Moses ninga nya, iya lalu rari ari menua Ejip, lalu diau ngampar di menua Midian. Dia iya bisi dua iku anak lelaki. “Empat puluh taun udah bekau nya, siku melikat pegari di mua iya di menua puang ba Bukit Sinai, dalam api ti mau ba babas. Lebuh Moses meda nya, iya balat alit ati, lalu lebuh iya mansang deka meda semak agi, iya lalu ninga nyawa Tuhan bejaku, ‘Aku tu Allah Taala aki ini nuan, Allah Taala ke disembah Abraham, Isak, enggau Jakop.’ Moses lalu getar-getar takut, lalu enda berani merening agi. Tuhan lalu bejaku ngagai iya, ‘Buka selipar nuan, laban nuan bediri ba tanah ti kudus. Aku udah meda bala nembiak Aku balat kena perinsa di menua Ejip, lalu udah ninga demuh sida, lalu Aku udah nurun deka ngelepaska sida. Datai kitu diatu. Aku deka ngirumka nuan ngagai menua Ejip.’ “Moses nya meh orang ke ditulak orang Israel, lebuh sida bejaku, ‘Sapa ngasuh nuan merintah lalu ngakim kami?’ Iya nya meh orang ke udah diasuh Allah Taala nyadi tuai orang Israel, lalu ngelepaska sida, disaup melikat ke udah pegari di mua iya ba babas nya. Iya nguluka sida pansut ari menua Ejip, lebuh iya udah ngereja kereja ajih, enggau kereja ti nyelai di menua Ejip, ba Tasik Mirah, enggau di menua puang dalam kandang empat puluh taun. Moses nya meh orang ke udah bejaku ngagai orang Israel, ‘Allah Taala deka ngirumka siku nabi ngagai kita ari bansa kita empu, baka Iya ke udah ngirumka aku.’ Moses nya meh orang ke begempuru enggau bala mayuh di menua puang, enggau melikat ke bejaku ngagai iya ba Bukit Sinai, sereta enggau bala aki ini kitai. Lalu iya nerima pesan ti idup ngambika diberi ngagai kitai. “Sida aki ini kitai enggai ngasika iya, tang nulak iya ke tisi lalu keran deka pulai baru ngagai menua Ejip. Ku sida bejaku ngagai Aron, ‘Gaga petara ke kitai ngambika bisi nguluka kitai. Nyadi pasal Moses ke udah nguluka kitai pansut ari menua Ejip, kitai nadai nemu namaka penyadi iya.’ Lebuh maya nya sida ngaga siku engkeramba anak sapi, ngenjuk piring ngagai engkeramba nya, lalu begawai ngemesaika utai ti udah digaga jari sida empu. Tang Allah Taala ninggalka sida, lalu nejuka sida besembahka bintang ti di langit, munyi ti ditulis dalam bup sida nabi: ‘Kita orang Israel! Kati kita bisi nyayat jelu ke Aku lalu ngenjuk piring ngagai Aku lebuh kita empat puluh taun di menua puang? Nadai! Kita mai langkau kain petara Molek, enggau bintang petara Repan ti disembah kita, engkeramba ti udah digaga ke disembah kita. Nya alai, Aku deka muai kita ngilah Babilon.’ “Aki ini kitai bisi Langkau Kain Allah Taala di menua puang, ti udah diasuh Allah Taala gaga Moses, nitihka tukuh ti udah dipeda Moses. Udah nya, aki ini kitai ke udah nerima Langkau Kain nya ari aki ini sida, mai Langkau Kain nya lebuh sida bejalai enggau Josua, lalu ngerampas menua tu ari bansa orang ke diburu Allah Taala, lebuh aki ini kitai nyerang. Lalu Langkau Kain nya agi meruan nyentuk ngagai maya David, ke dikerinduka Allah Taala, ke minta Allah Taala ngemendarka iya ngaga sebuah rumah ke Allah Taala Jakop. Tang orang ke ngaga rumah nya ke Tuhan nya Solomon. “Tang taja pia, Allah Taala ti Pemadu Tinggi enda diau dalam rumah ti digaga jari mensia. Munyi ti disebut siku nabi, ‘Serega nya kerusi diraja Aku, lalu dunya nya pelasar ke kaki Aku. Rumah nama ti deka digaga kita ke Aku tauka dini endur alai Aku deka diau? Ku Tuhan bejaku. Ukai enda jari Aku Empu ti ngaga semua utai nya?’ “Kita tu orang ke kieh. Kita enda ditutus dalam ati enggau dalam pending kita. Kita seruran ngelaban Roh Kudus, baka aki ini kita. Ni nabi ke enda diperinsaka aki ini kita? Sida udah munuh sida nabi ke madahka dulu kelia pasal penatai Iya ke Lurus, lalu diatu kita udah nyual lalu munuh Iya. Kita tu orang ke udah nerima Adat ti diberi bala melikat, tang kita enda ngasika Adat nya!” Lebuh raban Kunsil ninga nya, sida pedis ati lalu kerik-kerik ngeli deka ngelaban iya. Tang Stepen, penuh laban Roh Kudus, engkadah ke langit, lalu meda mulia Allah Taala, enggau Jesus bediri muak ari kanan Allah Taala. Lalu ku Stepen bejaku, “Peda nyin! Aku meda serega tebuka, enggau Anak Mensia bediri muak ari kanan Allah Taala!” Tang sida mampul pending sida, manjung lalu semua sida belanda ngagai Stepen lalu nerekam iya. Sida lalu ngirit iya pansut ari nengeri, lalu belabuh nuku iya ngena batu. Orang ke besalah iya lalu ngengkahka serayung sida ba kaki orang bujang siku ke benama Saul. Lebuh sida benung nuku Stepen ngena batu, iya besampi, “Tuhan Jesus, sambut semengat aku!” Iya lalu besugang, lalu ngangau enggau nyawa ti inggar, “Tuhan! Anang besalahka sida ketegal dosa tu!” Lebuh iya udah nyebut nya, iya lalu mati. Saul rindu meda Stepen kena bunuh. Berengkah ari sehari nya raban eklisia di Jerusalem balat amat kena perinsa, lalu kelimpah ari sida rasul, semua sida pambar ngagai serata menua Judea enggau Samaria. Orang ke angkunka Allah Taala nguburka Stepen, lalu bekeduie nyabakka iya. Tang Saul belabuh ngerusak eklisia. Iya bejalai ari rumah sebuah ngagai rumah sebuah, lalu ngirit orang ke lelaki enggau orang ke indu, lalu nutup sida dalam rumah jil. Sida ke pambar pendiau, bejalai ari endur siti ngagai endur siti, nusui Berita Manah. Philip mupuk ngagai nengeri Samaria, lalu nusui pasal Kristus ngagai orang dia. Lalu semua orang mayuh bela keran mendingka utai ti disebut Philip, lebuh sida ninga iya sereta meda kereja ajih ti dikereja iya, laban roh ti jai manjung pansut ari mayuh orang ke dirasuk antu, lalu mayuh orang ke mati tubuh, tauka enda ulih bejalai, digeraika. Nya alai orang dalam nengeri nya balat amat gaga. Nyadi di nengeri nya bisi orang siku ke benama Simon. Iya lama udah ngereja pengawa keramat, ti ngasuh orang di Samaria balat alit ati, lalu madahka diri orang ke bekuasa. Semua orang di nengeri nya, orang ke kaya enggau orang ke seranta bela keran mendingka iya. Ku sida, “Iya tu kuasa Allah Taala, ti dikumbai ‘Kuasa Ti Besai,’ ” Lalu sida keran mendingka iya laban sida lama udah balat alit ati meda kereja keramat ti digaga iya. Tang lebuh sida arapka pesan ti ditusui Philip pasal Berita Manah Perintah Allah Taala, enggau pasal nama Jesus Kristus, sida lalu dibaptisa, nyengkaum lelaki enggau indu. Indah Simon empu deh arap. Lebuh iya udah dibaptisa, iya nitihka Philip, lalu iya balat alit ati lebuh iya meda kereja ti nyelai enggau kereja ajih nyadi. Lebuh sida rasul di Jerusalem ninga orang Samaria udah nerima jaku Allah Taala, sida lalu ngasuh Peter seduai John ngabas sida. Seduai iya mupuk, lalu besampika sida ngambika sida nerima Roh Kudus, (laban Roh Kudus apin nurun atas sida; sida semina udah dibaptisa dalam nama Tuhan Jesus). Peter seduai John lalu ngengkahka jari atas sida, lalu sida nerima Roh Kudus. Lebuh Simon meda Roh Kudus bisi diberi lebuh seduai iya ngengkahka jari atas sida, iya lalu nguji meri seduai iya duit, ku iya, “Beri kuasa tu mega ngagai aku, ngambika orang ke alai aku ngengkahka jari, nerima Roh Kudus.” Tang ku Peter bejaku ngagai iya, “Awakka duit nuan enggau nuan empu sama mati, laban nuan ngumbai diri ulih meli pemeri Allah Taala ngena duit! Nuan nadai bagi tauka ungkup dalam utai tu, laban ati nuan salah di mua Allah Taala. Nya alai nesal nuan ke penyai nuan tu, lalu besampi ngagai Tuhan, nyangka ukur Iya ulih ngampun nuan ari runding nuan ti jai nya. Laban aku meda nuan tu penuh laban ati ti kepapas, sereta ditanchang dosa.” Simon lalu bejaku ngagai Peter seduai John, “Besampi ke aku ngagai Tuhan, ngambika utai ti disebut nuan nya enda nyadi ba aku.” Lebuh Peter seduai John udah besaksi, lalu nusui pesan Tuhan, seduai iya pulai ngagai Jerusalem, lalu nusui Berita Manah ba mayuh bengkah genturung pendiau di Samaria. Udah nya siku melikat Tuhan bejaku ngagai Philip, “Angkat nuan, lalu bejalai tunga ke selatan ngagai jalai raya ti nuju ari Jerusalem ngagai Gasa.” (Jalai raya nya ngerenchah menua puang.) Philip angkat lalu mupuk. Nyadi siku pemesai ari Etiopia, ke udah dipeliri, ke ngemataka sarang wang Kuin Kandas menua Etiopia, udah mansang ngagai Jerusalem deka nyembah Allah Taala. Lalu iya diatu benung mulaika diri ngagai menua iya empu, duduk dalam kerita kuda iya, lalu macha bup nabi Isaiah. Roh Kudus lalu bejaku ngagai Philip, “Alai nuan mansang ngagai kerita kuda nya.” Philip lalu belanda ngagai kerita kuda nya, lalu ninga orang nya macha bup nabi Isaiah. Philip lalu nanya iya, “Kati nuan meretika utai ti dibacha nuan?” Disaut orang nya, “Baka ni ku aku ulih mereti, enti orang nadai nerangka utai nya ngagai aku?” Iya lalu ngasuh Philip niki ngagai kerita kuda nya. Philip lalu duduk ngimbai iya. Tu genteran dalam Bup Kudus ti dibacha iya: “Iya baka bedus ti deka disayat, baka anak domba ti enda bemunyi lebuh iya dikukur. Iya nadai bejaku seleka. Iya dikeduan, lalu enda diberi atur ti lurus. Sapa ulih bejakuka pasal peturun Iya? Laban nyawa Iya udah diambi ari dunya tu.” Pemesai nya lalu nanya Philip, “Padahka ngagai aku, sapa orang ke dikenang nabi nya? Pasal iya empu, tauka pasal orang bukai?” Philip lalu belabuh bejaku bepun ari ayat nya, lalu nusui ngagai iya Berita Manah pasal Jesus. Lebuh seduai iya benung di rantau jalai, seduai iya lalu datai ba endur siti ti bisi ai, lalu ku pemesai nya bejaku, “Peda nuan, ditu bisi ai. Nama utai ti tau nagang aku dibaptisa?” Ku Philip bejaku ngagai iya, “Enti nuan arap enggau pengabis ati nuan, nuan tau dibaptisa.” Pemesai nya lalu nyaut, “Aku arapka Jesus Kristus nya Anak Allah Taala.” Iya lalu ngasuh kerita kuda nya ngetu, lalu seduai iya sama nurun ngagai ai nya. Philip lalu maptisa iya. Lebuh seduai iya pansut ari ai nya, Roh Kudus lalu nabanka Philip, lalu pemesai nya nadai agi meda Philip. Iya lalu mupuk, gaga ati. Tang Philip nemu diri di Asotus, lalu lebuh iya bejalai nengah menua nya, iya nusui Berita Manah dalam semua nengeri, nyentukka iya nyau datai di Siseria. Lebuh maya nya Saul, ke agi majak ngemba lalu munuh murid Tuhan, betemu enggau imam besai lalu minta surat penerang kena iya madahka pejalai diri ngagai balai gempuru di Damaskus, ngambika, enti iya bisi tetemuka lelaki tauka indu ke nitihka Jalai Tuhan, iya tau nangkap sida, lalu mai sida ngagai Jerusalem. Lebuh Saul benung di rantau jalai semak Damaskus, siti penampak lalu ngenyit manchar ari langit ngelingi iya. Iya rebah ke tanah, lalu ninga nyawa bejaku ngagai iya, “Saul, Saul! Nama kebuah nuan merinsaka Aku?” Iya lalu nanya, “Sapa nuan, Tuan?” Nyawa nya lalu nyaut, “Aku tu Jesus, ke diperinsaka nuan.” “Tang angkat nuan, lalu tama ngagai nengeri nya, lalu nuan deka dipadahka utai ti enda tau enda dikereja nuan.” Orang ke bejalai sama enggau Saul bediri tegir-tegir, enda bejaku, laban sida bisi ninga munyi nyawa nya bejaku, tang nadai meda orang. Saul angkat ari tanah, tang taja pen mata iya menchelak, iya nadai meda utai. Nya alai sida megai jari iya, lalu ngiring iya ngagai Damaskus. Dalam kandang tiga hari iya nadai meda utai, enda makai, enda ngirup. Nyadi di Damaskus bisi siku murid benama Ananias. Tuhan bejaku ngagai iya dalam genera, “Ananias!” Ananias lalu nyaut, “Tu aku, Tuhan.” Tuhan lalu bejaku ngagai iya, “Angkat nuan, lalu bejalai ngagai jalai ti dikumbai Rurus, lalu lebuh nuan datai ba rumah Judas, tanyaka orang siku ke benama Saul, ke asal ari Tarsus. Iya diatu benung besampi, lalu iya udah begenera meda orang ke benama Ananias tama, lalu ngengkahka jari ba atas iya, ngambika iya ulih meda baru.” Tang ku Ananias nyaut, “Tuhan, aku udah ninga pasal orang tu ari mayuh orang bukai, pasal iya ke udah balat merinsaka bala nembiak Nuan di Jerusalem, lalu iya udah datai ditu ngena kuasa ari tuai imam, deka nangkap semua orang ke ngangauka nama Nuan.” Tang ku Tuhan bejaku ngagai Ananias, “Mupuk meh nuan, laban iya udah dipilih Aku nyadika perengka kena Aku madahka nama Aku ngagai orang bansa bukai, ngagai raja, enggau ngagai orang Israel. Aku Empu deka madah ngagai iya pemalat pemerinsa ti enda tau enda ditatka iya ketegal nama Aku.” Ananias lalu mupuk, lalu tama rumah nya. Iya ngengkahka jari iya atas Saul, lalu bejaku. “Menyadi aku, Saul, Tuhan Jesus Kristus, ke udah pegari di mua nuan lebuh nuan di rantau jalai mansang kitu, udah ngasuh aku datai, ngambika nuan ulih meda baru, lalu dipenuhka enggau Roh Kudus.” Tekala nya utai ti baka tisik ikan lalu labuh ari mata Saul, lalu iya ulih meda baru. Udah nya iya angkat lalu dibaptisa, lalu lebuh iya udah makai, iya lalu berasai kering baru. Saul lalu diau dua tiga hari enggau sida murid di Damaskus, lalu tekala nya belabuh nusui pasal Jesus dalam balai gempuru. Ku iya, “Iya Anak Allah Taala.” Semua orang ke ninga iya balat alit ati. Ku sida, “Ukai enda iya tu ke udah munuh orang ke arapka Jesus di Jerusalem suba? Lalu iya udah datai ditu deka nangkap lalu mai sida ngagai bala tuai imam?” Tang Saul majak mansang dalam kuasa, datai ke orang Judah ke diau di Damaskus nyau enda ulih mantah iya agi lebuh iya besaksi madahka Jesus nya Kristus. Nyau kelama udah bekau nya, orang Judah lalu bepekat deka munuh iya, tang Saul nemu sida bepekat ngelaban iya. Sida nengkilaka mua pintu nengeri siang malam, deka munuh iya, tang bala murid iya mai iya lebuh malam hari, lalu ngulurka iya ngena bakul ari lubang ti ba dinding kuta. Lebuh Saul udah datai di Jerusalem, iya nguji ngulaika diri enggau bala sida murid. Tang sida takutka iya, laban sida enda arapka iya amat udah nyadi murid. Tang Barnabas ngambi iya, lalu mai iya betemu enggau sida rasul, lalu madah ngagai sida pasal iya ke meda Tuhan lebuh iya di rantau jalai, pasal Tuhan ke udah bejaku ngagai iya, enggau pasal iya ke berani nusui Berita Manah di Damaskus dalam nama Jesus. Nya alai Saul diau enggau sida, lalu bejalai di serata nengeri Jerusalem, lalu bejaku enggau ati ti berani dalam nama Tuhan. Iya bejaku lalu betalat enggau orang Judah ke bejaku ngena jaku Gerika, tang sida nguji munuh iya. Lebuh sida ke arap nemu nya, sida lalu mai iya ngagai Siseria, lalu ngasuh iya mupuk ngagai Tarsus. Nya alai raban eklisia di serata menua Judea, Galili, enggau Samaria nadai agi pengachau sereta mansang dalam pengarap. Sida nangika Tuhan lalu ulih saup Roh Kudus, raban sida majak nambah-menambah. Nyadi lebuh Peter bejalai kia-kia ngagai semua orang ke arap, iya mega nemuai ngagai bala nembiak Tuhan ke diau di Lida. Dia iya betemu enggau orang siku ke benama Anias, ke sakit bajung lapan belas taun, lalu nadai kala angkat ari peninduk iya. Peter lalu bejaku ngagai iya, “Anias, Jesus Kristus ngeraika nuan. Angkat nuan, lalu kemas peninduk nuan.” Tekala nya Anias lalu angkat. Semua orang ke diau di Lida enggau di Saron bela meda Anias, lalu sida nguingka diri ngagai Tuhan. Nyadi di Jopa bisi siku murid, ke benama Tabita. (Dalam jaku Gerika nama iya Dorkas, reti nya “Kijang.”) Iya endang seruran ngereja utai ti manah, sereta nulung orang ke seranta. Lebuh maya nya, iya sakit, lalu mati. Lebuh sida udah meri iya mandi, sida lalu ngalika iya di sadau. Laban Lida enda jauh ari Jopa, sida murid di Joppa ke ninga Peter bisi di Lida lalu ngasuh dua iku orang mansang ngagai Peter, minta iya datai, “Datai enggau jampat ngagai kami.” Peter angkat, lalu mupuk enggau seduai iya. Lebuh iya datai, sida lalu mai iya ke sadau. Semua indu ke balu bediri ngimbai Peter, nyabak sereta mandangka semua baju enggau serayung ti udah digaga Dorkas lebuh iya agi begulai enggau sida. Peter lalu ngasuh semua sida pansut. Udah nya iya besugang, lalu besampi. Iya lalu nguing nunga ngagai bangkai Dorkas, lalu bejaku, “Tabita, angkat nuan!” Tabita lalu menchelakka mata, tepedaka Peter, lalu duduk. Peter lalu nyurungka jari ngagai iya, lalu nulung iya angkat. Udah nya Peter lalu ngangauka bala nembiak Tuhan, enggau sida indu ke balu, lalu mandangka iya amat idup. Berita pasal nya ngelekai di serata nengeri Jopa, lalu mayuh orang arapka Tuhan. Peter lalu diau lama di Jopa, ba rumah siku tukang samak ke benama Simon. Nyadi di Siseria bisi orang siku benama Kornelius. Iya tu pemesai dalam siti regimen soldadu Rome ti dikumbai Regimen Itali. Iya enggau semua sida sebilik angkun sereta nangika Allah Taala. Iya meri mayuh sedekah enggau ati ti gerah mudah ngagai orang Judah ke seranta, lalu seruran besampi ngagai Allah Taala. Nyadi sekali ba urung pukul tiga ngalih hari, iya begenera meda enggau terang siku melikat Allah Taala mansang lalu bejaku ngagai iya, “Kornelius!” Kornelius balat amat takut merening ngagai melikat nya, lalu bejaku, “Nama, tuan?” Melikat nya lalu nyaut, “Sampi nuan enggau sedekah nuan udah niki ngagai Allah Taala di serega, kena ngingatka nuan. Diatu asuh orang bejalai ngagai Jopa ngambi orang siku ke benama Simon Peter. Iya diau ba rumah Simon, ke tukang samak. Rumah nya ngimbai tebing tasik.” Lebuh melikat ke bejaku ngagai iya udah mupuk, Kornelius lalu ngangauka dua ulun iya, enggau siku soldadu ke angkunka Allah Taala, ari bala orang ke bekereja ke iya, lalu lebuh iya udah madah ngagai sida semua utai ti udah nyadi, iya lalu ngasuh sida mupuk ngagai Jopa. Hari siti, kira ba urung tengah hari sida datai semak nengeri Jopa. Ba urung maya nya mega Peter niki ngagai perabung deka besampi. Iya berasai lapar, lalu ingin deka makai. Lebuh pemakai benung dibela, iya begenera. Iya meda langit tebuka, lalu utai ti baka kain ti besai diulurka ngena empat iti sukut kain nya. Utai nya ngundan semua macham jelu, ular enggau burung. Peter lalu ninga munyi nyawa bejaku ngagai iya, “Angkat nuan Peter, bunuh lalu empa!” Tang ku Peter bejaku, “Enggai aku, Tuhan, laban aku nadai kala makai utai ti enda tuchi tauka kamah.” Nyawa nya lalu bejaku baru ngagai iya kedua kali, “Utai ti udah dituchi Allah Taala, anang nuan ngumbai iya enda tuchi.” Utai nya nyadi tiga kali. Udah nya utai nya lalu tekala nya ditarit pulai ke langit. Lebuh Peter agi iran ati berundingka reti genera nya, orang ke dikirumka Kornelius pen datai ba rumah nya. Sida bediri ba mua pintu penama ngagai rumah nya, nanyaka rumah Simon. Sida ngangau lalu nanya enti Simon ke benama Peter bisi diau dia. Lebuh Peter agi benung belematika reti genera nya, Roh Kudus lalu bejaku ngagai iya, “Dinga nuan, tiga iku orang diatu benung ngiga nuan. Angkat nuan lalu nurun, lalu anang kakang ati mupuk enggau sida, laban Aku udah ngirumka sida.” Peter lalu nurun betemu enggau sida, lalu bejaku, “Aku tu meh orang ke digiga kita. Nama kebuah kita datai kitu?” Disaut sida, “Kornelius, siku pemesai soldadu, ke badas sereta nangika Allah Taala, lalu dibasa semua orang Judah, udah diasuh siku melikat ti kudus mesanka nuan datai ngagai rumah iya, ngambika iya ulih ningaka utai ti deka disebut nuan.” Peter lalu mai sida tama, lalu bemalam enggau iya. Hari siti, iya angkat lalu mupuk enggau sida, lalu sekeda orang Jopa ke arap mega nyempulang iya Sehari udah bekau nya sida datai di Siseria. Kornelius endang udah nganti penatai sida, lalu udah ngempuruka semua kaban belayan enggau pangan iya. Lebuh Peter datai, Kornelius lalu ngambat iya, besugang lalu nyembah iya. Tang Peter ngasuh iya angkat, ku iya bejaku, “Angkat. Aku pen mensia baka nuan.” Lebuh iya bejaku enggau Kornilius, iya tama lalu nemu mayuh orang udah begempuru dia. Iya lalu bejaku ngagai sida, “Kita empu nemu, orang Judah endang enda tau begulai enggau, tauka nemuai ngagai orang bansa bukai, tang Allah Taala udah nunjukka ngagai aku, aku enda tau ngumbai orang enda tuchi tauka enda beresi. Nya alai, lebuh nuan mesanka aku, aku lalu datai, nadai nulak nya mimit. Nya alai, kati tau aku nanya ngagai nuan, kebuah nuan mesanka aku?” Disaut Kornelius, “Empat hari tu ti udah, betul-betul ba jam diatu, ba pukul tiga ngalih hari, aku besampi dalam rumah aku. Siku orang ke ngena gari ti beperenching burak ngenyit bediri di mua aku. Ku iya bejaku, ‘Kornelius! Sampi nuan udah didinga Allah Taala, lalu sedekah ti diberi nuan udah dikingatka Allah Taala. Nya alai asuh orang mupuk diatu ngagai Jopa lalu nanyaka orang siku ke benama Simon ti dikumbai Peter. Iya diau ba rumah Simon ke tukang samak, ngimbai tebing tasik.’ Nya alai aku lalu tekala nya mesanka nuan, lalu nuan udah manah amat datai kitu. Nyadi semua bala kami bisi ditu magang di mua Allah Taala, deka mendingka utai ti udah diasuh Tuhan sebut nuan.” Peter lalu belabuh bejaku ngagai sida: “Aku nemu Allah Taala endang amat enda bepilih mata, tang dalam semua bansa, barang sapa nangika Iya, lalu ngereja utai ti ngena sigi dikerinduka Iya. Kita nemu pesan ti dikirumka Iya ngagai orang Israel, ti ngajar pemaik ulih Jesus Kristus, ke nyadi Tuhan ke semua mensia. Pesan nya udah ngelekai di serata menua Judea, berengkah ari Galili, udah bekau John ke madahka pasal baptisa, pasal Allah Taala ke nata Jesus orang Nasaret ngena Roh Kudus enggau kuasa, pasal Jesus ke bejalai ngagai mayuh bengkah endur ngereja pengawa ti manah, lalu ngeraika semua orang ke dirasuk antu, laban Allah Taala bisi enggau Iya. Kami udah meda semua utai ti udah dikereja Iya di menua Judea enggau di Jerusalem. Udah nya sida munuh Iya ba kayu regang. Tang Allah Taala ngangkatka Iya ari mati ba hari ti ketiga, lalu ngasuh Iya pegari, ukai ngagai semua orang, tang ngagai kami ke udah dipilih Allah Taala nyadi saksi, ke udah makai ngirup enggau Iya, udah bekau Iya ke angkat ari mati. Iya ngasuh kami ngajar orang mayuh, lalu besaksi madahka Iya nya meh orang ke udah dichiri Allah Taala nyadi Hakim ke orang ke idup enggau ke orang ke mati. Semua nabi bela udah besaksika pasal Iya, madahka semua orang ke arapka Iya deka diampun ari dosa sida, ulih nama Iya.” Lebuh Peter agi benung bejaku, Roh Kudus lalu nurun atas semua orang ke mendingka pesan nya. Orang Judah ke arap, ke datai ari Jopa enggau Peter, balat amat alit ati meda pemeri Roh Kudus udah dituang mega ngagai orang bansa bukai, laban sida ninga orang nya bejaku ngena jaku ti nyelai, sereta ngemesaika Allah Taala. Peter lalu bejaku: “Kati orang ulih nagang orang ke udah nerima Roh Kudus baka kitai suba, dibaptisa ngena ai?” Iya lalu ngasuh sida dibaptisa dalam nama Jesus Kristus. Udah nya sida lalu minta Iya diau enggau sida dua tiga hari. Sida rasul enggau orang ke arap di menua Judea ninga pasal orang bansa bukai udah mega nerima jaku Allah Taala. Nya alai lebuh Peter mansang ngagai Jerusalem, orang Judah ke udah ditutus ngutuk iya. Ku sida, “Nama kebuah nuan nemuai ngagai orang ke enda ditutus lalu makai enggau sida?” Peter lalu nerangka ngagai sida, berengkah ari pun. Ku iya, “Lebuh aku besampi di nengeri Jopa, aku begenera. Dalam genera nya aku meda siti utai nurun ari langit, baka kain ti besai, ti diulurka ari langit ngena empat iti sukut iya, lalu datai semak aku. Lebuh aku nilik ke dalam, aku tepedaka jelu tupi, enggau jelu babas, ular enggau burung dalam kain nya. Aku mega ninga nyawa bejaku ngagai aku, ‘Angkat, Peter, bunuh lalu empa!’ Tang ku aku nyaut, ‘Enggai aku, Tuhan; laban nadai utai ti enda tuchi, tauka kamah, udah kala tama nyawa aku.’ Tang nyawa nya lalu nyaut kedua kali ari langit, ‘Utai ti udah dituchi Allah Taala, anang nuan ngumbai iya enda tuchi.’ Utai nya nyadi tiga kali. Udah nya, utai nya lalu ditarit pulai baru ke langit. Ba urung maya nya orang tiga iku ke dikirumka ngagai aku ari Sesarea datai ba rumah ti alai kami diau. Roh Kudus ngasuh aku bejalai enggau sida enggau enda bepilih mata. Sida enam iku ke arap mega nyempulang aku, lalu kami tama ngagai rumah orang nya. Orang nya lalu madahka ngagai kami pasal iyai ke meda siku melikat bediri dalam rumah iya lalu bejaku, ‘Asuh orang mansang ngagai Jopa, ngambi Simon ke dikumbai Peter. Iya deka madahka pesan ngagai nuan ti deka nyelamatka nuan enggau semua kita sebilik.’ Lebuh aku belabuh bejaku, Roh Kudus nurun atas sida, baka ti nyadi ba kitai ba pun iya suba. Aku lalu teingatka jaku Tuhan, jalai Iya bejaku, ‘John maptisa ngena ai, tang kita deka dibaptisa ngena Roh Kudus.’ Nya alai, enti Allah Taala meri sida pemeri baka ti diberi Iya ngagai kitai lebuh kitai arapka Tuhan Jesus Kristus, baka ni ku aku ulih nagang Allah Taala?” Lebuh sida ninga nya, sida lalu badu agi ngutuk iya. Sida lalu muji Allah Taala, ku sida, “Allah Taala udah mega meri ngagai orang bansa bukai peluang nesal ati lalu idup!” Sekeda sida ke pambar pendiau ketegal kena perinsa udah bekau Stepen dibunuh, bejalai nyentuk ngagai Poenisia, Saiprus, enggau Antiok, nusui pesan, tang semina ngagai orang Judah aja. Tang sekeda ari bala sida nya orang ke datai ari Saiprus enggau ari Sairin. Lebuh sida datai di Antiok, sida mega nusui Berita Manah pasal Tuhan Jesus Kristus ngagai orang bansa bukai. Kuasa Tuhan bisi enggau sida, lalu mayuh orang arap lalu nguingka diri ngagai Tuhan. Berita pasal tu bisi didinga eklisia di Jerusalem. Sida lalu ngasuh Barnabas ke Antiok. Lebuh iya datai di Antiok, lalu meda berekat Allah Taala, iya gaga amat ati, lalu iya meransang semua sida meruan tetap ati ngagai Tuhan enggau pengabis ati sida, laban iya orang ke manah, ke penuh laban Roh Kudus enggau pengarap. Mayuh amat orang dibai ngagai Tuhan. Udah nya Barnabas mupuk ngagai Tarsus, ngiga Saul. Lebuh iya udah tetemuka Saul, iya lalu mai Saul ngagai Antiok. Seduai iya betemu enggau raban eklisia, sereta ngajar mayuh orang setaun penuh. Antiok nya meh endur alai bala murid terubah dikumbai Kristian. Ba urung maya nya, sida nabi bisi datai ari Jerusalem ngagai Antiok. Siku ari sida, ke benama Agabus, bediri lalu bejaku ulih kuasa Roh Kudus, madahka lapar pungkang deka nyadi di serata dunya. (Utai nya nyadi lebuh Klaudius nyadi Raja Besai.) Sida murid lalu meri pemutus penemu deka ngasuh genap iku orang ngirumka tulung, nitihka penyampau ti ulih diberi sida siku-siku, ngagai sida ke arap di Judea. Sida lalu ngereja nya, lalu ngasuh Barnabas seduai Saul mai tulung nya ngagai bala tuai eklisia. Ba urung maya nya Raja Herod belabuh merinsaka sekeda raban eklisia. Iya ngasuh orang munuh James, menyadi John, ngena pedang. Lebuh iya meda orang Judah rindu meda nya, iya lalu nangkap Peter. (Utai tu nyadi lebuh Gawai Roti Ti Enda Beragi.) Lebuh iya udah nangkap Peter, iya lalu nutup Peter dalam rumah jil, lalu ngasuh empat bengkah raban soldadu nyaga iya, laban iya berunding deka nyara Peter di mua orang mayuh udah bekau Gawai Paska. Lebuh Peter benung ditutup dalam rumah jil, raban eklisia bebendar amat besampi ke iya ngagai Allah Taala. Malam sebedau Herod mai Peter ngagai orang mayuh, Peter tinduk entara dua iku soldadu, ditanchang ngena dua iti rantai. Mua pintu rumah jil nya mega dijaga soldadu. Tekala nya siku melikat Tuhan pegari, lalu penampak ti terang manchar dalam rumah jil nya. Iya nempik rusuk Peter, lalu ngerak iya. Ku melikat nya bejaku, “Angkat jampat!” Rantai nya lalu tebelengka ari rekuan Peter. Melikat nya lalu bejaku ngagai iya, “Begari nuan, lalu rasukka selipar nuan.” Peter lalu ngereja nya. Melikat nya lalu bejaku ngagai iya, “Rasukka serayung nuan, lalu titihka aku.” Peter lalu pansut lalu nitihka melikat nya. Iya enda nemu sekalika utai ti nyadi ulih saup melikat nya amat tauka enda. Iya ngumbai diri begenera. Lebuh seduai iya udah mansa jejaga ti keterubah, enggau ti kedua, seduai iya lalu datai ba pintu besi ti nuju ngagai nengeri. Pintu nya tebuka kediri empu ke seduai iya. Seduai iya pansut lalu bejalai nengah siti jalai raya, lalu melikat nya tekala nya ninggalka iya. Nya baru Peter sedarka diri empu, lalu ku iya bejaku, “Diatu baru aku nemu Tuhan udah ngirumka melikat Iya ngambika iya ngelepaska aku ari jari Herod, enggau ari semua utai ti disadang orang Judah.” Lebuh iya nyau sedarka nya, iya lalu mansang ngagai rumah Maria, indai John ke mega dikumbai Mark, alai mayuh orang begempuru sereta besampi. Lebuh Peter nekung pintu penama, siku indu kuli ke benama Roda datai deka muka pintu nya. Iya ngelala munyi nyawa Peter, lalu ati balat amat gaga, datai ke iya nyau enda muka pintu nya, tang belanda ke dalam baru lalu madahka Peter bisi ba mua pintu. Sida lalu bejaku ngagai iya, “Gila nuan tu!” Tang iya majak madahka utai nya endang amat. Ku sida, “Nya melikat iya.” Lebuh utai tu benung nyadi, Peter majak nekung pintu. Lebuh sida muka pintu, sida meda iya, lalu sida balat alit ati. Tang Peter ngepaika jari enda ngasuh sida inggar, lalu madah ngagai sida jalai Tuhan udah mai iya pansut ari rumah jil. Lalu ku iya bejaku, “Padahka tu ngagai James, enggau ngagai orang bukai ke arap.” Udah nya iya mupuk lalu bejalai ngagai endur bukai. Lebuh hari nyau tawas, bala soldadu lalu balat amat begau laban sida enda nemu penunga Peter. Lebuh Herod udah ngiga iya, lalu enda tetemuka iya, iya lalu mansik sida jejaga, lalu ngasuh sida diukum bunuh. Udah bekau nya, Herod angkat ari menua Judea ngagai Siseria, lalu diau dia. Nyadi Herod ringat ngagai orang Tire enggau Sidon. Nya alai sida ngaga siti raban lalu betemu enggau iya. Lebuh sida udah bejaku enggau Blastus, ke nyadi tuai nyaga istana, sida lalu mai Herod bebaik, laban menua sida bulih pemakai ari menua raja. Ba hari ti udah diletak, Herod begari ngena gari diraja, duduk ba kerusi diraja iya, lalu bejaku ngagai sida. Sida lalu majak manjung, “Munyi nyawa petara! Ukai munyi nyawa mensia!” Tekala nya melikat Tuhan lalu nampar Herod, laban iya enda ngemuliaka Allah Taala. Iya diempa ulat, lalu mati. Tang jaku Allah Taala majak ngelekai lalu mayuh orang arap. Lebuh Barnabas seduai Saul udah nembuka pengawa seduai iya, seduai iya lalu pulai ngagai Jerusalem, mai John ke mega dikumbai Mark enggau seduai iya. Nyadi eklisia di Antiok bisi nabi enggau pengajar: Barnabas, Simeon ke dikumbai Niger, Lusius ari Sairin, Manain ke pangan Herod, enggau Saul. Lebuh sida benung nyembah Tuhan sereta bepasa, Roh Kudus bejaku ngagai sida, “Pilih ke Aku Barnabas seduai Saul ke udah dikangauka Aku ngereja pengawa ti diasuh Aku kereja seduai iya.” Lebuh sida udah bepasa sereta besampi, sida lalu ngengkahka jari sida atas seduai iya, lalu ngasuh seduai iya mupuk. Nya alai, ari asuh Roh Kudus, Barnabas seduai Saul mupuk ngagai Seleusia, lalu ari nya seduai iya belayar ngagai pulau Saiprus. Lebuh seduai iya datai di Salamis, seduai iya lalu madahka jaku Allah Taala dalam berapa buah balai gempuru orang Judah, ditulung John Mark. Lebuh sida udah bejalai meraka pulau nya nyentuk ngagai Papos, sida betemu enggau siku manang, siku nabi ti pelesu orang Judah, ke benama Bar-Jesus. Bar-Jesus tu pangan Gabenor Sergius Paulus, orang ke pandai, ke mesanka Barnabas seduai Saul laban iya keran deka ningaka jaku Allah Taala. Tang manang Elimas (laban nya reti nama iya dalam jaku Gerika) nyakal Barnabas seduai Paul lalu nguji ngelimpangka Tuan Gabenor nya ari pengarap nya. Tang Saul, ke mega dikumbai Paul, penuh laban Roh Kudus, merening ngagai iya, lalu bejaku, “Nuan anak Sitan! Nuan ke nyadi munsuh ke semua pengelurus, ke penuh laban semua macham akal enggau penyai, kati nuan enggai badu bejaku ngelaban jalai Tuhan ti bendar? Nya alai diatu, dinga nuan -- jari Tuhan ngelaban nuan, lalu nuan deka buta enda lama, enda ulih meda mata hari.” Tekala nya utai ti baka ambun enggau pemetang lalu nurun atas iya, lalu iya bejalai gama-gama ngiga orang ngiring iya. Lebuh tuan gabenor meda utai nya nyadi, iya lalu arap laban iya balat alit ati ke ajar pasal Tuhan. Paul enggau orang ke bekaling enggau iya belayar ari Papos, lalu datai di Perga, di menua Pampilia. Tang John Mark ninggalka seduai iya, lalu pulai ngagai Jerusalem. Tang sida majakka pejalai ari Perga lalu datai di Antiok di menua Pisidia. Lalu lebuh hari Sabat, seduai iya tama ngagai balai gempuru, lalu duduk. Lebuh Bup Adat enggau bup sida nabi udah dibacha, bala pemesai balai gempuru lalu mesanka seduai iya, ku sida, “Menyadi, enti seduai bisi jaku peransang ke orang mayuh, kami minta seduai bejaku.” Paul lalu bediri, ngepaika jari lalu belabuh bejaku. “Kita orang Israel, enggau semua kita bukai ke nangika Allah Taala, pendingka aku! Allah Taala ke disembah orang Israel udah milih aki ini kitai, lalu ngaga sida nyadi bansa ti kering lebuh sida diau di menua Ejip, lalu ngena kuasa Iya ti besai, Iya mai sida pansut ari menua nya. Lalu dalam kandang empat puluh taun Iya sabar enggau sida di menua puang. Lalu lebuh Iya udah ngerusak tujuh bengkah bansa di menua Kanaan, Iya meri menua nya ngagai sida nyadika pesaka sida. Semua utai nya nyadi dalam pengelama empat ratus lima puluh taun. Udah nya Iya meri sida hakim nyentuk ngagai maya nabi Samuel. Udah nya sida minta siku raja, lalu Allah Taala meri sida Saul anak Kis, ari raban bansa Benjamin, lalu Saul merintah empat puluh taun. Lebuh Allah Taala udah muai Saul, Iya ngasuh David nyadi raja sida. Baka tu ku jaku ti disebut Allah Taala pasal David: ‘Aku nemu David anak Jesi tu orang ke ngerinduka ati Aku, ke deka ngereja semua utai ti dikedekaka Aku.’ Ari peturun David Allah Taala udah mai ngagai orang Israel siku Juruselamat, iya nya Jesus, munyi ti udah disemaya Iya. Sebedau Jesus datai, John endang udah dulu madahka pasal baptisa nesal ati ngagai semua orang Israel. Lalu lebuh John nyau deka nembuka pengawa iya, iya bejaku, ‘Sapa aku tu ku kita? Aku tu ukai Iya. Ukai, tang siku orang deka datai dudi ari aku. Indah muka tali selipar ti ba kaki Iya deh aku enda tau.’ “Menyadi, kita ke peturun Abraham, enggau semua kita bukai ke nangika Allah Taala, pesan pasal pengelepas tu udah dikirumka ngagai kitai. Laban orang ke diau di Jerusalem, enggau bala tuai sida enda ngelala Iya, tauka enda meretika jaku sida nabi ti dibacha tiap-tiap hari Sabat, sida ngamatka jaku sida nabi lebuh sida ngukum Iya. Taja pen sida nadai tetemuka kebuah nuduhka Iya diukum bunuh, tang sida minta Pilate ngasuh Iya dibunuh. Lebuh sida udah ngereja semua utai ti udah ditulis pasal Iya, sida nurunka Iya ari regang, lalu ngalika Iya dalam kubur. Tang Allah Taala ngangkatka Iya ari mati, lalu Iya pegari berapa hari di mua orang ke udah bejalai enggau Iya ari Galili ngagai Jerusalem, lalu diatu sida nya nyadika saksi Iya ngagai orang Israel. Lalu kami madahka ngagai kita Berita Manah pasal utai ti udah disemaya Allah Taala ngagai aki ini kitai. Iya udah ngamatka semaya ke kitai ti peturun sida, lebuh Iya ngangkatka Jesus ari mati, munyi ti udah ditulis dalam masmur ti kedua, ‘Nuan tu Anak Aku. Sehari tu Aku udah nyadi Apai Nuan.’ Nyadi ba pasal Allah Taala ti ngangkatka Jesus ari mati ngambika Iya enda but, Allah Taala udah bejaku munyi tu, ‘Aku deka meri ngagai Nuan semaya ti disebut ngagai David.’ Nya alai dalam masmur ti bukai Allah Taala mega nyebut, ‘Nuan enggai nejuka Nembiak Nuan Ti Kudus but.’ Laban David, lebuh iya udah bekereja nitihka peneka Allah Taala dalam rebak iya empu, iya mati, lalu dikuburka ngimbai sida aki ini iya, lalu iya but. Tang Jesus ke diangkatka Allah Taala ari mati, enda but. Nya alai, menyadi, awakka semua kita nemu, ulih Jesus pesan pasal pengampun dosa dipadahka ngagai kita, Ulih Jesus, semua orang ke arap dilepaska ari semua dosa ti enda ulih dibuai ngena Adat Moses. Nya alai bejaga kita, ngambika utai ti disebut sida nabi, enda nyadi ba kita: ‘Dingaka tu ulih kita, kita ke ngeleseka Allah Taala! Awakka kita balat alit ati, lalu mati! Laban Aku ngereja utai lebuh maya kita, utai ti enda dikarapka kita, taja pen orang nerangka utai nya ngagai kita!’ ” Lebuh Paul seduai Barnabas pansut ari balai gempuru nya, orang mayuh minta seduai iya bejakuka pasal utai nya baru lebuh hari Sabat ti deka datai. Lebuh orang mayuh udah mupuk ari balai gempuru nya, mayuh orang Judah, enggau orang bansa bukai ke angkunka Allah Taala sereta udah masuk pengarap orang Judah, nitihka Paul seduai Barnabas, lalu seduai iya meransang sida majak tetap ati idup dalam pengasih Allah Taala. Lebuh hari Sabat ti nangkanka nya, nyauka semua orang ke dalam nengeri nya datai mendingka jaku Tuhan. Tang lebuh orang Judah meda pemayuh orang, sida kepapas. Sida lalu ngelese sereta nyakal jaku Paul. Paul seduai Barnabas bejaku enggau berani. Ku seduai iya, “Jaku Allah Taala endang enda tau enda disebut dulu ngagai kita. Tang laban kita nulak jaku nya, lalu kita ngira diri enda patut nerima pengidup ti meruan belama iya, kami diatu deka nguingka diri ngagai orang bansa bukai. Laban tu pesan ti udah diberi Tuhan ngagai kami, ‘Aku udah ngaga seduai nyadi penampak ke orang bansa bukai, ngambika seduai mai pengelepas nyentuk ngagai ujung dunya.’ ” Lebuh orang bansa bukai ninga nya, sida gaga ati, lalu muji jaku Allah Taala, lalu sida ke udah dipilih nerima pengidup ti meruan belama iya, arap. Jaku Tuhan lalu ngelekai ngagai semua endur di menua nya. Tang orang Judah ngeruga ati orang indu ke tinggi pangkat ke angkunka Allah Taala, enggau sida lelaki ke tinggi pangkat di nengeri nya, lalu nyungkak sida merinsaka Paul seduai Barnabas, lalu muru seduai iya ari menua sida. Nya alai Paul seduai Barnabas nesai abus ari kaki seduai iya, kena ngelaban sida, lalu mupuk ngagai Ikonium. Sida murid lalu gaga amat ati, sereta penuh laban Roh Kudus. Di Ikonium seduai iya, baka selama tama ngagai balai gempuru orang Judah lalu bejaku, lalu mayuh amat orang Judah enggau orang bansa bukai arap. Tang orang Judah ke enda arap, ngeruga sereta ngerachun runding orang bansa bukai ngelaban orang ke arap. Nya alai seduai iya lama diau di Ikonium, bejaku enggau berani ngarika Tuhan, lalu Tuhan ngamatka pesan pasal pengasih Iya ngena kereja ajih enggau kereja ti nyelai ti dikereja Iya ngena seduai iya. Tang orang di nengeri nya beserekang penemu. Sekeda setanah enggau orang Judah, lalu sekeda setanah enggau rasul dua iku nya. Lalu lebuh orang bansa bukai, enggau orang Judah, enggau bala tuai sida deka nguji ngemediska seduai iya, lalu deka nuku seduai iya ngena batu, seduai iya nemu pasal nya lalu rari ngagai Listra enggau Derbe di menua Likonia, enggau ngagai menua ti ngelingi nya, lalu majakka pengawa nusui Berita Manah dia. Nyadi di Listra bisi siku lelaki ke enda ulih bejalai, ke udah lemi kenyau ari ada, lalu nadai kala bejalai. Iya mendingka Paul bejaku. Paul lalu merening ngagai iya, lalu lebuh iya meda orang nya bisi pengarap kena ngeraika, Paul lalu bejaku enggau nyawa ti inggar, “Bediri nuan!” Orang nya lalu engkejuk angkat, lalu belabuh bejalai. Lebuh orang mayuh meda utai ti udah dikereja Paul, sida lalu manjung ngena jaku orang Bansa Likonia, “Bala petara udah nurun ngagai kitai baka gamal mensia!” Sida lalu ngumbai Barnabas Seus, lalu Paul dikumbai sida Hermis, laban iya orang ke bejaku ngarika seduai iya. Imam petara Seus, (rumah sembiang Seus enda jauh ari luar nengeri), lalu mai jelu sapi ti lelaki enggau sengkilung bunga ngagai pintu nengeri, laban iya enggau orang mayuh deka ngenjuk piring ngagai rasul dua iku nya. Tang lebuh rasul Barnabas seduai Paul ninga nya, seduai iya lalu nyarikka gari diri, lalu belanda ngagai tekang bala mayuh, lalu bejaku enggau nyawa ti inggar, “Nama kebuah kita ngereja utai tu? Kami duai tu mensia baka kita, lalu kami mai Berita Manah ngagai kita, ngambika kita ngelengkaka utai ti nadai guna tu lalu nguingka diri ngagai Allah Taala ti idup, ke udah ngagai langit, tanah, tasik, enggau semua utai ti dalam sida. Dulu menya Iya nejuka semua bansa idup nitihka peneka ati sida empu, tang taja pia, Iya enda nejuka Diri nadai saksi ke utai ti manah ti dikereja Iya -- Iya meri kita ujan, ngasuh utai ti ditanam kita bebuah lebat nitihka musin, lalu ngemuaska kita ngena pemakai lalu ngemenuhka ati kita enggau pengaga.” Tang taja pen seduai iya bejaku munyi nya, seduai iya nyauka enda ulih nagang orang mayuh meri seduai iya piring. Tang sekeda orang Judah datai ari Antiok enggau ari Ikonium, lalu nguingka ati orang mayuh. Sida lalu nuku Paul ngena batu, lalu ngirit iya pansut ari nengeri nya, laban sida ngumbai iya udah mati. Tang lebuh sida murid begelumu ngelingi iya, iya angkat lalu pulai baru ngagai nengeri. Hari siti, iya mupuk enggau Barnabas ngagai Derbe. Lebuh seduai iya udah nusui Berita Manah ngagai orang di nengeri nya, lalu mayuh orang nyadi murid, seduai iya lalu pulai baru ngagai Listra, Ikonium, enggau ngagai Antiok. Dia seduai iya ngeringka semengat sida murid, lalu meransang sida seruran tetap dalam pengarap. Ku seduai iya, “Kitai endang enda tau enda ngasaika mayuh macham penusah enti kitai deka tama ngagai Perintah Allah Taala.” Lebuh seduai iya udah nuduhka orang nyadi tuai ba genap buah eklisia, seduai iya lalu nyerahka sida ngena sampi sereta bepasa ngagai Tuhan ke dikarapka sida. Udag nya seduai iya bejalai nengah menua Pisidia, lalu datai di Pampilia. Lebuh seduai iya udah madahka jaku Tuhan di Perga, seduai iya lalu nurun ngagai Atalia. Ari nya seduai iya belayar ngagai Antiok, alai seduai iya ke udah diserahka ngagai ibun Allah Taala ketegal pengawa ti udah tembu dikereja seduai iya. Lebuh seduai iya datai di Antiok, seduai iya lalu ngempuruka raban eklisia, lalu madahka semua utai ti udah dikereja Allah Taala ngena seduai iya, enggau pasal Allah Taala ke udah muka pintu pengarap ngagai orang bansa bukai. Lalu seduai iya diau lama dia enggau bala murid. Tang sekeda orang datai ari Judea lalu ngajar bala menyadi, ku sida, “Enti kita enda ditutus nitihka adat asal Moses, kita enda ulih diselamatka.” Lalu lebuh Paul seduai Barnabas udah bebendar bekelikuh ngelaban sida pasal pekara nya, Paul seduai Barnabas, enggau sekeda orang bukai lalu diasuh mupuk ngagai Jerusalem ngambika sida berandauka pasal pekara tu enggau sida rasul enggau tuai eklisia. Nya alai raban eklisia lalu ngasuh sida mupuk, lalu lebuh sida bejalai nengah menua Poenisia enggau Samaria, sida madahka pasal orang bansa bukai ke udah nguingka diri ngagai Allah Taala, lalu semua sida ke arap gaga amat ati ninga nya. Lebuh sida datai di Jerusalem, sida disambut raban eklisia enggau sida rasul enggau sida tuai eklisia. Sida lalu madahka pasal semua utai ti udah dikereja Allah Taala ngena sida. Tang sekeda orang ke arap, ke ari raban orang Parisi, bediri lalu bejaku, “Orang bansa bukai enda tau enda ditutus, lalu diasuh nitihka Adat Moses.” Sida rasul enggau sida tuai eklisia lalu bejuraika pekara nya. Lebuh sida udah lama belabanka penemu pasal pekara nya, Peter lalu bediri, lalu bejaku ngagai sida, ku iya, “Menyadi, kita nemu, suba Allah Taala udah milih aku ari bala kita, ngasuh aku nusui Berita Manah ngagai orang bansa bukai, ngambika sida ulih ninga, lalu arap. Lalu Allah Taala, ke nemu ati semua mensia, udah besaksi ngagai sida, lebuh Iya meri Roh Kudus ngagai sida, baka ti udah dikereja Iya ngagai kitai, lalu lebuh Iya udah nuchi ati sida ngena pengarap, Iya nadai ngagai sida lain ari kitai. Nya alai diatu, nama kebuah kita nguji Allah Taala, ngengkahka tangkun ti berat ba rekung sida murid, tangkun ti enda ulih disan aki ini kitai tauka kitai empu? Ukai baka nya, tang kitai arapka diri deka diselamatka ulih pengasih Tuhan Jesus, baka sida.” Semua orang ke begempuru dia lalu nadai engkeretik siku, lebuh sida mendingka Barnabas seduai Paul nusui pasal semua kereja ajih enggau kereja ti nyelai ti udah dikereja Allah Taala ngena seduai iya ba orang bansa bukai. Lebuh seduai iya udah badu bejaku, James lalu nyaut, “Menyadi, pendingka aku! Simon udah nusui pasal jalai Allah Taala terubah nurunka pengasih Iya ngagai orang bansa bukai, lalu ngaga sekeda sida nyadi nembiak Iya. Tu besetuju enggau jaku sida nabi, munyi ti udah ditulis, ‘Udah bekau nya, Aku deka pulai baru, lalu ngaga baru rumah David ti udah runtuh lalu ngaga iya baru ti udah nyadi tembawai, lalu nirika iya baru, ngambika semua bansa ngiga Tuhan, nyengkaum semua orang bansa bukai ke udah dikangauka nyadi nembiak Aku. Ku Tuhan bejaku ke udah madahka utai tu kenyau ari dulu kelia.’ Nya alai, aku udah mutuska runding, kitai enda patut ngenusahka orang bansa bukai ke nguingka diri ngagai Allah Taala, tang kitai patut nulis ngagai sida, madahka sida enda tau makai utai ti kamah laban engkeramba, enda tau ngereja ulah ti kamah, enda tau makai jelu ti udah mati dichekal, lalu enda tau makai darah. Laban Adat Moses, kenyau ari berapa serak, lama udah dipadahka dalam semua nengeri, lalu dibacha tiap-tiap hari Sabat dalam balai gempuru.” Udah nya, sida rasul enggau bala tuai eklisia, disukung semua raban eklisia, lalu berunding deka milih orang ari raban sida lalu ngasuh orang nya bejalai ngagai Antiok nyempulang Paul seduai Barnabas. Sida lalu milih Judas (ke dikumbai Barsabas) seduai Silas, dua iku tuai orang ke arap, mai surat tu: “Menyadi, kami ke rasul enggau tuai eklisia, ngirumka tabi basa ngagai semua bala kita ke orang bansa bukai, ke diau di Antiok di menua Siria enggau di Silisia. Kami bisi udah ninga sekeda orang ari bala kami, tang ukai ari asuh kami, bisi udah nyebut utai ti ngenusahka ati kita nya alai semua kami udah besetuju deka milih pengari lalu ngasuh sida nemuai ngagai kita, nyereta Barnabas seduai Paul, menyadi ti dikerinduka kitai, ke udah berambunka nyawa ketegal Jesus Kristus Tuhan kitai. Nya alai, kami udah ngasuh Judas seduai Silas nemuai ngagai kita, lalu seduai iya deka madah ngagai kita mua mata utai ti ditulis kami dalam surat tu. Laban dalam runding Roh Kudus enggau dalam runding kami, kami enda patut nating kita enggau utai bukai, kelimpah ari atur tu, iya nya: anang makai pemakai ti udah diberi ngagai engkeramba, anang makai darah, anang makai jelu ti mati dichekal, anang ngereja ulah ti kamah. Enti kita enda ngereja utai nya, nya manah amat. Selamat tinggal.” Nya alai sida lalu diasuh mupuk lalu mansang ngagai Antiok. Lebuh sida udah ngempuruka semua orang ke arap, sida lalu nyuaka surat nya ngagai sida. Lebuh raban eklisia macha surat nya, sida gaga amat ati ninga jaku peransang nya. Judas seduai Silas, ke sama-sama nabi, bejaku lama ngagai sida meransang lalu ngeringka sida ke arap. Lebuh seduai iya udah lama diau dia, sida ke arap lalu ngirumka seduai iya pulai baru enggau selamat ngagai orang ke udah ngirumka seduai iya. Tang Paul seduai Barnabas mengkang di Antiok, begulai enggau mayuh orang bukai, ngajar sereta madahka jaku Tuhan. Apin tentu lama udah bekau nya, Paul lalu nyebut ngagai Barnabas, “Aram tua pulai baru lalu nemuai ngagai sida ke arap dalam semua nengeri ti udah alai tua nusui jaku Tuhan, deka nemu pasal pemansang sida.” Nyadi Barnabas keran deka mai John Mark enggau seduai iya, tang Paul berunding enggai mai John Mark enggau seduai iya, laban John Mark udah ninggalka seduai iya di Pampilia, lalu enda enggau seduai iya ngereja pengawa nya. Seduai iya balat amat beserekang penemu, datai ke seduai iya nyau beserara ari pangan diri. Barnabas mai Mark enggau iya, lalu belayar ngagai Saiprus, tang Paul milih Silas lalu mupuk, udah bekau sida ke arap nyerahka iya ngagai pengasih Tuhan. Paul lalu bejalai nengah menua Siria enggau menua Silisia, ngeringka eklisia. Paul mega bejalai ngagai Derbe enggau ngagai Listra, alai siku murid ke benama Timoti diau. Indai iya orang Judah ke udah nyadi orang ke arap, tang apai iya orang bansa Gerika. Semua sida ke arap di Listra enggau di Ikonium bela muji Timoti. Paul deka mai Timoti nyempulang iya. Iya lalu nutus Timoti, ketegal orang Judah ke diau ba sebelah menua nya, laban semua sida nemu apai Timoti endang orang bansa Gerika. Lebuh seduai iya bejalai ari nengeri siti ngagai nengeri siti, seduai iya meri pemutus aum bala rasul enggau bala tuai eklisia di Jerusalem, lalu ngasuh sida nitihka nya. Nya alai, eklisia dikeringka dalam pengarap, lalu pemayuh tubuh sida nambah-menambah tiap hari. Seduai iya bejalai nengah menua Prigia enggau Galatia, laban Roh Kudus enda nyagi seduai iya nusui pesan Tuhan di menua Asia. Lebuh seduai iya datai ba garis entara menua Misia, seduai iya nguji mansang ngagai Bitinia, tang Roh Jesus enda nyagi seduai iya. Nya alai, seduai iya lalu bejalai mansa menua Misia terus ngagai Troas. Malam nya Paul bisi genera meda siku orang Masedonia bediri minta iya datai, ku iya, “Datai ngagai menua Masedonia lalu saup kami.” Lebuh Paul udah meda genera nya, kami duai lalu tekala nya nguji mupuk ngagai menua Masedonia, laban kami duai nemu Allah Taala udah ngasuh kami duai nusui Berita Manah ngagai orang di menua nya. Kami belayar terus ari Troas ngagai Samotras, lalu hari siti terus ngagai Neapolis, lalu ari nya ngagai Pilipi, indu nengeri pelilih menua Masedonia, ti kena pegai perintah Rome. Kami duai diau di nengeri nya dua tiga hari. Lebuh hari Sabat, kami duai pansut ari nengeri nya ngagai tebing sungai, laban kami duai ngadang endur nya bisi palan alai orang Judah begempuru besampi. Kami duai nudukka diri dia, lalu bejaku ngagai sida indu ke begempuru dia. Siku indu ke benama Lidia, ke nyembah Allah Taala, mendingka kami duai. Iya datai ari nengeri Tiatira, lalu iya bejualka kain ungu. Tuhan muka ati iya, ngasuh iya keran deka mendingka utai ti disebut Paul. Lebuh Lidia enggau semua sida sebilik udah dibaptisa, iya lalu ngumbuk kami duai ku iya, “Enti seduai ngira aku tetap ati ngagai Tuhan, aram diau dalam rumah aku.” Kami duai alah diumbuk iya. Nyadi sekali, lebuh kami duai mansang ngagai siti palan alai besampi, kami duai betemu enggau siku indu ke ulun ke agi biak umur, ke dirasuk antu ti ngasuh iya nemu nujum. Indu nya bulih mayuh amat duit ari pengawa nujum nya ke orang ke bempu iya. Lebuh iya nitihka Paul enggau bala kami, iya manjung, “Orang tu nembiak Allah Taala ti Pemadu Tinggi, ke madahka jalai pengelepas ngagai kita!” Berapa hari iya majak ngereja nya. Tang Paul, ke nyau ringat laban indu nya, mutar lalu bejaku ngagai roh nya, “Dalam nama Jesus Kristus, Aku muru nuan pansut ari iya!” Roh nya lalu tekala nya pansut ari indu nya. Tang lebuh orang ke bempu indu nya nemu diri nadai agi jalai bulih duit, sida lalu nangkap Paul seduai Silas, lalu ngirit seduai iya ngagai pasar, ngagai orang ke megai perintah. Lalu lebuh sida udah mai seduai iya ngagai bala hakim, sida lalu bejaku, “Seduai tu orang Judah, lalu seduai iya ngaga pengachau di nengeri kitai tu, ngajar adat ti enda tau diterima tauka dititihka kitai orang Rome.” Bala orang mayuh lalu ngamuk Paul seduai Silas, lalu sida hakim ngasuh orang ngeruntun gari ari tubuh seduai iya, lalu ngasuh seduai iya disipat. Lebuh sida udah balat amat nyipat seduai iya, sida lalu nutup seduai iya dalam rumah jil, lalu ngasuh jejaga rumah jil nya nyaga seduai iya enggau naka ulih. Lebuh jejaga rumah jil nya udah nerima atur nya, iya lalu nutup seduai iya dalam bilik jil ti di dalam amat, lalu nganchin kaki seduai iya ngena kanchin kayu. Kira ba urung tengah malam, Paul seduai Silas besampi sereta belagu muji Allah Taala, lalu orang jil ti bukai mendingka seduai iya. Tanah lalu ngenyit berenyang balat amat, datai ke pugu rumah jil nya nyau begusak. Semua pintu lalu tebuka tekala nya, lalu rantai tebelengka ari semua orang jil. Lebuh jejaga rumah jil nya dani, lalu meda pintu rumah jil nyau abis tebuka, iya lalu nyintak pedang deka munuh diri, laban iya ngumbai orang jil udah rari. Tang Paul ngangau enggau nyawa ti inggar, “Anang ngemediska diri, laban semua kami bisi ditu magang!” Jejaga rumah jil nya lalu ngasuh orang mai api, belanda tama, lalu getar-getar nyungkurka diri semak kaki Paul seduai Silas. Udah nya iya mai seduai iya pansut, lalu bejaku, “Tuan, nama utai ti enda tau enda dikereja aku, ngambika aku diselamatka?” Ku Paul seduai Silas nyaut, “Arapka Tuhan Jesus, lalu nuan deka diselamatka--nuan enggau semua kita sebilik.” Seduai iya lalu madahka jaku Tuhan ngagai iya, enggau ngagai semua orang ke dalam rumah iya. Iya lalu mai seduai iya tekala nya lalu nuchi bakal seduai iya. Udah nya iya enggau semua sida sebilik lalu dibaptisa tekala nya. Udah nya iya mai Paul seduai Silas ngagai rumah iya empu, lalu meri seduai iya makai. Iya enggau sida sebilik gaga amat ati, laban sida diatu udah arapka Allah Taala. Tang pagi hari siti, sida hakim lalu bejaku enggau orang polis, ku sida, “Lepaska orang nya.” Jejaga jil nya lalu madahka jaku nya ngagai Paul. Ku iya, “Sida hakim udah ngasuh seduai dilepaska. Nya alai pansut seduai, lalu mupuk enggau selamat.” Tang ku Paul nyaut, “Sida udah nyipat kami duai di mua orang mayuh, taja pen kami duai apin diukum. Kami tu peranak Rome, lalu sida udah nutup kami duai dalam rumah jil. Patut tauka enda sida diatu ngelepaska kami ngena chara belalai? Enggai nyadi baka nya! Awakka sida hakim empu datai lalu mai kami duai pansut.” Polis nya lalu madahka jaku nya ngagai sida hakim, lalu sida takut lebuh sida ninga Paul seduai Silas nya peranak Rome. Nya alai sida datai lalu minta ampun ngagai seduai iya. Udah nya sida mai seduai iya pansut ari rumah jil, lalu ngasuh seduai iya angkat ari nengeri nya. Lebuh Paul seduai Silas udah pansut ari rumah jil, seduai iya lalu mupuk ngagai rumah Lidia. Lebuh seduai iya udah betemu enggau lalu udah meransang sida ke arap, seduai iya lalu mupuk. Lebuh Paul seduai Silas udah bejalai nengah menua Ampipolis enggau menua Apolonia, seduai iya lalu datai di Tesalonika, ti bisi sebuah balai gempuru orang Judah. Baka ti selalu dikereja iya, Paul lalu tama ngagai balai gempuru nya lalu dalam tiga hari Sabat beturut-turut, iya betalat enggau sida ari Bup Kudus, madah sereta nerangka Kristus endang enda tau enda kena perinsa, lalu angkat idup baru ari mati. Ku Paul bejaku, “Jesus ke dipadahka aku ngagai kita nya meh Kristus.” Sekeda sida arap, lalu nitihka Paul seduai Silas, lalu baka nya mega mayuh amat orang bansa Gerika ke angkunka Allah Taala lalu udah masuk pengarap orang Judah, enggau mayuh indu ke tinggi pangkat. Tang orang Judah kepapas, lalu ari saup orang ke jai ba sebelah pasar, sida ngempuruka lalu nyungkak orang dalam nengeri nya begau. Lebuh sida begigaka Paul seduai Silas, deka mai seduai iya ngagai bala mayuh, sida nyerang rumah Jason. Lebuh sida nadai tetemuka seduai iya, sida lalu ngirit Jason enggau sekeda sida ke arap ngagai bala pemesai di nengeri nya. Ku sida manjung, “Orang tu udah ngaga pengachau di semua endur, lalu seduai iya udah mega datai ditu, lalu Jason udah nerima seduai iya nyadika temuai iya. Seduai iya ngelaban atur Raja Besai, madahka bisi siku agi raja ke benama Jesus.” Orang mayuh enggau bala pemesai di nengeri nya lalu irau ati ninga nya, lalu lebuh sida udah ngambi duit jamin ari Jason enggau ari sida ti bukai, sida lalu ngelepaska Paul seduai Silas. Malam nya sida ke arap lalu nganjung Paul seduai Silas ngagai Beria, lalu lebuh seduai iya datai di Beria, seduai iya lalu mansang ngagai balai gempuru. Nyadi orang Judah di Beria tebuka agi ati ari orang Judah ke di Tesalonika, laban sida ransing amat nerima pesan Tuhan, sereta mansik Bup Kudus tiap hari keran deka nemu enti jaku nya amat tauka enda. Nya alai mayuh sida arap, nyengkaum mayuh indu enggau lelaki bansa Gerika ke tinggi pangkat. Tang lebuh orang Judah ke di Tesalonika ninga Paul udah mega nusui jaku Allah Taala di Beria, sida lalu mansang ngagai nengeri nya mega lalu belabuh nyungkak sereta megau orang mayuh. Sida ke arap lalu tekala nya nganjung Paul ngagai tebing tasik, tang Silas seduai Timoti tinggal di Beria. Orang ke nganjung Paul lalu mai iya nyentuk ngagai Atens. Lebuh sida udah nerima atur ari Paul ngasuh Silas seduai Timoti datai ngagai iya di Atens enggau naka pengelengkas, sida lalu ninggalka iya. Lebuh Paul benung nganti Silas seduai Timoti di Atens, ati iya balat tusah meda nengeri nya penuh laban engkeramba. Nya alai iya betalat enggau orang Judah dalam balai gempuru sereta enggau orang bansa bukai ke angkunka Allah Taala, enggau sebarang orang ke enggau iya betemu tiap hari ba sebelah pasar. Sekeda raban orang ke dikumbai Epikuria enggau raban orang ke dikumbai Stoik mega betemu enggau iya. Ku sekeda sida, “Nama utai ti disebut orang ke kutap-kutap tu?” Ku sida ti bukai bejaku, “Iya munyi ke bejakuka pasal petara orang menua bukai.” Sida nyebut nya laban Paul nusui pasal Jesus enggau pengangkat ari mati. Sida lalu mai Paul ngagai balai ti dikumbai Areopagus, lalu ku sida bejaku, “Kati ulih nuan madah ngagai kami ajar ti baru ti dibai nuan tu? Ajar tu munyi ke nyelai didinga kami, nya alai kami keran deka nemu reti nya.” ( Nyadi semua orang Atens, enggau orang kampar ke diau di nengeri nya, nadai pengawa bukai tang semina madahka tauka ningaka penemu ti baru.) Nya alai Paul bediri di mua raban Areopagus, lalu bejaku, “Kita orang Atens, aku meda kita tu orang ke kering amat ba agama. Laban lebuh aku bejalai nengah nengeri kita, lalu meratika utai ti disembah kita, aku tetemuka siti alta ti ditulis enggau leka jaku tu, ‘Ke petara ti enda dikelala.’ Petara ti enda dikelala kita, ke disembah kita, nya meh petara ti dipadahka aku ngagai kita. Allah Taala ke ngaga dunya enggau semua utai ti dalam dunya, nya meh Tuhan ke merintah serega enggau dunya, lalu Iya ukai diau dalam rumah sembiang ti digaga mensia. Lalu Iya pen enda mega begunaka tulung ari mensia, laban Iya Empu ke meri pengidup enggau seput, enggau semua utai bukai, ngagai semua mensia. Iya udah ngaga semua bansa ari siku orang, lalu Iya ngasuh sida diau di serata dunya. Iya mega ngeletak umur sida, enggau endur alai sida diau, ngambika sida ngiga Allah Taala, nyangka begama ngiga Iya, lalu tetemuka Iya, taja pen Iya enda jauh ari kitai siku-siku. Laban ‘Kitai idup, engkebut, sereta diau dalam Iya’ Munyi ti disebut sekeda bala kita empu ti landik bepantun, ‘Laban kitai tu mega anak Iya.’ Nya alai, laban kitai tu anak Allah Taala, kitai enda patut ngumbai Iya baka anak patung ti ditempa ari emas tauka ari pirak, tauka ari batu ulih pengelandik enggau penau mensia. Taja pen Allah Taala enda ngingatka pemeli kitai mensia, tang diatu Iya ngasuh semua mensia di semua endur nesal ati ke dosa sida, laban Iya udah ngeletak siti hari alai Iya deka ngakim semua dunya ngena pengelurus, ulih orang siku ke udah dipilih Iya, lalu Iya udah ngasuh semua mensia nemu utai nya deka nyadi, lebuh Iya ngangkatka orang nya ari mati!” Lebuh sida ninga Paul bejakuka pasal pengangkat ari mati, sekeda sida ngelese. Tang ku sida ti bukai bejaku, “Kami keran deka mendingka nuan baru ba pasal pekara tu.” Ba senentang nya Paul lalu ninggalka sida. Tang sekeda ari bala sida nya nitihka Paul, lalu arap, nyengkaum Dionisius, ke raban Areopagus, enggau siku indu ke benama Damaris, enggau orang bukai ke enggau sida. Udah bekau nya, Paul angkat ari Atens, lalu mupuk ngagai Korint. Di Korint iya tetemuka siku orang Judah ke benama Akuila, ke asal ari Pontus, ke baru udah pulai ari Itali enggau bini iya Prisila, laban Klaudius udah muru semua orang Judah ari nengeri Rome. Paul lalu betemu enggau seduai iya, lalu laban jalai Paul ngidupka diri sebaka enggau jalai pengidup Akuila seduai Prisila, iya lalu diau enggau seduai iya, lalu begulai gawa. Sida begagaka langkau kain. Tiap hari Sabat Paul berandau dalam balai gempuru, nguji nguingka ati orang Judah enggau ati orang Gerika. Lebuh Silas seduai Timoti datai ari Masedonia, Paul nadai ngereja pengawa bukai tang semina madahka jaku Tuhan, besaksi ngagai orang Judah madahka Jesus nya Kristus. Lebuh sida nyakal sereta ngeleseka iya, iya lalu nesai abus ari gari iya, lalu bejaku ngagai sida, “Awakka kita empu betanggungjawapka diri empu! Aku nadai penyalah! Berengkah ari diatu, aku deka bejalai ngagai orang bansa bukai.” Iya lalu angkat ari balai gempuru nya, lalu mansang ngagai rumah siku orang bansa bukai ke benama Titus Justus, ke nyembah Allah Taala. Rumah Titus Justus berimbai enggau balai gempuru. Nyadi Krispus ke nyadi tuai balai gempuru, enggau sida sebilik, arapka Tuhan, lalu mayuh orang bukai di Korint ke ninga Paul bejaku, arap lalu dibaptisa. Nyadi sekali, lebuh malam hari, Tuhan bejaku ngagai Paul dalam genera, “Anang takut, tang majak bejaku, lalu anang nejuka orang madamka jaku nuan, laban Aku bisi enggau nuan, lalu nadai orang ulih terengkah jari ba nuan lalu ngemediska nuan, laban Aku mayuh nembiak dalam nengeri tu.” Paul lalu diau dia setaun enam bulan, ngajar jaku Allah Taala ngagai orang. Tang lebuh Galio dichiri nyadi gabenor menua Akaia, orang Judah besaup ngelaban Paul, lalu mai iya ngagai kot. Ku sida, “Orang tu ngumbuk orang mayuh nyembah Allah Taala ngena jalai ti ngelanggar Adat!” Lebuh Paul baru deka bejaku, Galio lalu bejaku ngagai orang Judah, “Enti pekara tu pasal penyalah ngelanggar adat, aku patut mendingka dawa kita orang Judah; tang laban pekara tu semina bekaul enggau pasal leka jaku, enggau pasal nama orang, enggau pasal adat kita empu, awakka kita empu meh mutarka pekara tu. Aku enggai ngatur pekara tu!” Iya lalu muru sida ari kot. Semua sida lalu nangkap Sostenis ke nyadi tuai balai gempuru, lalu malu iya di mua kot. Tang Galio enda bedulika nya. Lebuh Paul udah lama diau dia, iya lalu meri selamat tinggal ngagai sida ke arap, lalu belayar ngagai menua Siria, disempulang Prisila seduai Akuila. Di Kankria iya ngukur buk iya, laban iya udah ngaga sumpah. Lebuh sida datai di Epesus, Paul ninggalka Prisila seduai Akuila, mansang ngagai balai gempuru lalu berandau enggau orang Judah. Lebuh sida minta iya diau lama agi dia, iya enggai. Tang lebuh iya meri selamat tinggal ngagai sida, iya bejaku, “Aku deka nemuai baru ngagai kita, enti nya peneka Allah Taala.” Udah nya iya lalu belayar ari Epesus. Lebuh iya udah sangkai di Siseria, iya lalu mansang ngagai Jerusalem, meri tabi basa ngagai raban eklisia dia, lalu udah nya mupuk ngagai Antiok. Lebuh iya udah lama diau di Antiok, iya angkat lalu bejalai ari endur siti ngagai endur siti di menua Galatia enggau Prigia, ngeringka semua sida murid. Lebuh maya nya, siku orang Judah ke benama Apollos, ke asal ari Aleksandria, datai di Epesus. Apollos tu orang ke lanchar bejaku, lalu nemu amat pasal Bup Kudus. Iya udah diajar pasal Jalai Tuhan, lalu iya ransing amat madahka sereta ngajar enggau betul pasal Jesus, taja pen iya semina nemu pasal pemaptisa John. Iya belabuh bejaku enggau berani dalam balai gempuru. Tang lebuh Prisila seduai Akuila ninga iya, seduai iya lalu mai iya ke tisi, lalu nerangka ngagai iya penemu ti betul agi pasal Jalai Allah Taala. Lalu lebuh iya deka mupuk ngagai menua Akaia, sida ke arap di Epesus meransang iya, lalu nulis sepuchuk surat ngagai sida murid di Akaia, minta sida nyambut penatai iya. Lebuh iya datai di Akaia, iya bebendar amat nulung sida ke udah arap ulih pengasih Allah Taala, laban iya balat amat ngalahka kelikuh orang Judah lebuh sida belabanka penemu enggau iya di mua orang mayuh, lebuh iya nunjukka ari Bup Kudus, Jesus nya Kristus. Lebuh Apollos agi di Korint, Paul bejalai nengah menua atas, lalu datai di Epesus. Dia iya tetemuka sekeda murid. Lalu ku iya nanya sida, “Kati kita bisi nerima Roh Kudus lebuh kita arap?” “Nadai,” ku sida nyaut. “Indah ninga pasal Roh Kudus deh kami enda kala.” Iya lalu nanya sida, “Baptisa nama ti dikena maptisa kita?” “Baptisa John,” ku sida nyaut. Paul lalu bejaku ngagai sida, “John maptisa ngena baptisa nesal ati, ngasuh orang Israel arapka orang siku ke deka datai dudi ari iya, iya nya, Jesus.” Lebuh sida ninga nya, sida lalu dibaptisa dalam nama Tuhan Jesus. Lebuh Paul udah ngengkahka jari iya atas sida, Roh Kudus lalu nurun atas sida. Sida lalu bejaku ngena jaku ti nyelai, lalu benabi. Pemayuh semua sida kira dua belas iku. Paul lalu tama ngagai balai gempuru, lalu dalam kandang tiga bulan iya bejaku enggau berani, lalu betalatka pasal Perintah Allah Taala. Tang lebuh sekeda sida kieh ati, lalu enggai arap, sereta bejai Jalai Tuhan di mua semua raban sida, Paul ninggalka sida, lalu mai sida murid mupuk enggau iya, lalu tiap hari iya betalat enggau sida dalam balai Tiranus. Iya ngereja nya dua taun, datai ke semua orang ke diau di menua Asia, nyengkaum orang Judah enggau orang bansa bukai, udah bela ampit magang ninga jaku Tuhan. Allah Taala ngereja kereja ajih ti balat nyelai ngena Paul, datai ke perecha enggau serayung ti udah negu iya dibai ngagai orang ke sakit, lalu orang nya digeraika, lalu roh ti jai pansut ari sida. Udah nya sekeda orang Judah ke bejalai kia-kia muru roh ti jai, nguji ngena nama Tuhan Jesus muru roh ti jai, ku sida, “Aku muru nuan dalam nama Jesus ti dipadahka Paul.” Pengawa nya dikereja tujuh iku anak lelaki imam besai orang Judah ke benama Skeba. Tang ku roh ti jai nya bejaku ngagai sida, “Aku ngelala Jesus, lalu aku ngelala Paul, tang sapa kita tu?” Orang ke dirasuk antu nya lalu nerekam sida, nangkap sida lalu ngalahka sida. Sida lalu rari telanjai-lanjai ari rumah nya sereta abis bakal. Lebuh pekara tu ditemu semua orang Judah enggau orang bansa bukai ke diau di Epesus, semua sida takut magang, lalu nama Tuhan dikemesaika. Mayuh sida ke arap datai lalu ngaku, di mua orang mayuh, kereja ti jai ti udah dikereja sida. Mayuh manang datai mai bup sida, lalu nunu bup nya di mua orang mayuh. Lebuh rega semua bup nya diitung, rega semua utai nya nyau deka bulih lima puluh ribu singkap duit pirak. Nya alai jaku Tuhan balat amat ngelekai sereta mansang dalam kuasa. Lebuh utai nya udah nyadi, Paul lalu berunding, ari iring Roh Kudus, deka bejalai nengah menua Masedonia enggau menua Akaia, mansang ngagai Jerusalem. Ku iya bejaku, “Lebuh aku udah nemuai kia, aku enda tau enda mega nemuai ngagai Rome.” Nya alai iya ngirumka dua iku penulung iya, Timoti seduai Erastus, ngagai Masedonia, lalu iya empu diau lama mimit di menua Asia. Ba urung maya nya pengachau balat amat nyadi ketegal Jalai Tuhan. Siku tukang temaga ke benama Demetrius, ke begagaka engkeramba rumah sembiang ke petara Artemis ari pirak, meri penguntung ti besai ngagai tukang ke bekereja begagaka utai nya. Iya ngempuruka sida, enggau orang bukai ke sebaka pengawa enggau sida, lalu bejaku ngagai sida, “Kita nemu, kitai bulih pengaya ari pengawa dagang kitai tu. Lalu kita mega meda sereta ninga, ukai semina di Epesus tang nyau ka di serata semua menua Asia, orang ke benama Paul tu udah mujuk sereta nguingka mayuh orang arapka jaku iya lebuh iya madahka petara ti digaga ngena jari nya ukai petara. Nya alai, dagang kitai tau jai nama, lalu rumah sembiang petara Artemis ti besai tu tau pulai nadai guna agi, lalu iya ke disembah semua orang di Asia enggau di serata dunya, nadai agi dibasa orang!” Lebuh sida ninga nya, sida lalu pedis ati, lalu manjung, “Besai meh Artemis orang Epesus!” Semua orang dalam nengeri nya lalu begau magang. Sida lalu belanda ngagai siti balai di nengeri nya, ngirit Gaius seduai Aristarkus, dua iku orang Masedonia ke sama bejalai enggau Paul. Paul bisi amat ati deka mansang ngagai tekang bala mayuh, tang sida murid enda nyagi iya; indah sekeda orang perintah di menua nya, ke endang pangan Paul empu, deh ngirumka pesan ngagai iya, minta iya enda mansang ngagai balai nya. Nyadi semua orang ke begempuru ba balai nya nyau bekerauh begau. Sekeda nyebut tu, lalu sekeda nyebut nya, laban mayuh sida enda nemu kebuah sida begempuru. Sekeda orang Judah ngejuka Aleksander mansang ke mua, lalu madah ngagai iya utai ti patut disebut iya. Aleksander lalu ngepaika jari, minta orang badu agi ragak ngambika iya ulih bejaku ngarika diri di mua orang mayuh. Tang lebuh sida ngelala iya nya orang Judah, semua sida lalu manjung kira dua jam, ku sida, “Besai meh Artemis orang Epesus!” Tang lebuh kerani nengeri udah ngasuh orang badu agi ragak, iya lalu bejaku, “Orang Epesus, semua orang nemu nengeri Epesus endang bisi rumah sembiang ke petara Artemis ti besai, enggau pasal anak patung ti labuh ari langit. Laban utai nya enda ulih disangkal, kita patut diau diri, lalu enda ngereja utai ti enda menuku. Kita udah mai orang tu kitu, taja pen sida nadai ngerumpak rumah sembiang tauka ngeleseka petara kitai. Nya alai, enti Demetrius enggau bala orang ke gawa ke iya deka bedawaka sapa-sapa, bilik kot endang seruran tebuka, lalu kitai bisi hakim. Awakka sida bedawaka pangan diri dia. Enti kita bisi utai bukai ti keran deka ditemu kita, utai patut diputarka lebuh orang mayuh begempuru. Laban kitai tau dikumbai orang salah ngaga pengachau sehari tu, laban kitai nadai kebuah begau baka tu.” Lebuh iya udah nyebut nya, iya lalu ngasuh orang mayuh pulai. Lebuh orang nyau udah badu agi begau, Paul lalu mesanka sida murid, lalu lebuh iya udah meri sida jaku peransang, lalu meri selamat tinggal, iya lalu mupuk ngagai menua Masedonia. Lebuh iya udah bejalai nengah menua nya lalu udah meransang sida ke arap ngena mayuh macham ajar, iya datai di menua Gerika, lalu diau dia tiga bulan. Lebuh iya baru deka belayar ngagai menua Siria, orang Judah bepekat ngelaban iya, nya alai iya mutuska runding deka mulaika diri nengah menua Masedonia. Iya disempulang Sopater anak Pirus, ari Beria, Aristarkus seduai Sekundus, ke datai ari Tesalonika, Gaius ari Derbe; Timoti, Tikikus enggau Tropimus ari Asia. Sida mupuk dulu ari kami, lalu nganti kami di Troas, tang kami belayar ari Pilipi udah lepas Gawai Roti Ti Enda Beragi, lalu lima hari udah bekau nya, kami betemu enggau sida di Troas, alai kami ke diau tujuh hari. Kena hari Minggu, lebuh kami begempuru deka makai, Paul berandau enggau orang mayuh laban iya deka mupuk hari siti, lalu iya majak bejaku nyentuk ngagai tengah malam. Mayuh amat lampu ditungkun di sadau alai kami ke begempuru. Siku orang bujang ke benama Eutikus, ke duduk ba jenila, lalu belabuh tinduk jenak amat lebuh Paul majak bejaku. Laban iya jenak tinduk, iya labuh ke tanah ari tingkat tiga. Lebuh sida nanggung iya, iya endang udah mati. Tang Paul nurun, lalu ningkapka diri atas nembiak nya, lalu merap iya. Ku Paul, “Anang irau. Iya agi idup!” Lebuh Paul udah pulai baru ke sadau, lalu udah mechahka roti, lalu makai, iya majak berandau enggau sida, nyentuk ngagai rerak tawas. Udah nya iya lalu mupuk. Sida mai Eutikus ke idup nya pulai ke rumah, lalu ati sida lantang amat. Kami lalu bejalai dulu ngagai kapal, lalu belayar ngagai Asos, laban kami deka mai Paul nepan kapal nya dia, nitihka atur iya, laban iya deka mansang ngagai endur nya ngena jalai darat. Lebuh iya betemu enggau kami di Asos, kami lalu mai iya nepan kapal nya, lalu mupuk ngagai Mitilin. Kami belayar ari Mitilin, lalu hari siti kami datai di Chios. Sehari udah bekau nya, kami datai di Samos, lalu sehari udah bengkau nya, kami datai di Miletus. Laban Paul udah berunding deka belayar mansa Epesus, ngambika iya enda ngerindang diri di menua Asia, laban iya begaut deka ngenataika diri di Jerusalem kena hari Pentikos, enti ulih. Ari Miletus Paul ngirumka siti pesan ngagai Epesus, minta bala tuai eklisia betemu enggau iya. Lebuh sida betemu enggau iya, iya lalu bejaku enggau sida, “Kita empu nemu gaya pengidup aku, sekumbang aku ti diau begulai enggau kita, berengkah ari maya aku ke terubah datai di menua Asia, bekereja ke Tuhan enggau ati ti baruh, sereta enggau ai mata, natka penusah ti nuntung aku ari pekat orang Judah. Aku nadai kala nyurutka diri ari pengawa madahka pesan Tuhan ke penguntung kita, sereta ngajar kita di mua orang mayuh ari rumah sebuah ngagai rumah sebuah, lebuh aku besaksi ngagai orang Judah enggau ngagai orang bansa bukai pasal nesal ati ke dosa, enggau pasal arap ke Jesus Tuhan kitai. Nyadi diatu, laban aku tu nyadi orang tangkap Roh Kudus, aku deka mansang ngagai Jerusalem, enda nemu namaka utai ti deka nyadi ba aku din. Aku semina nemu, ari padah Roh Kudus, aku deka ditutup dalam rumah jil, lalu dituntung mayuh macham penusah dalam genap buah nengeri. Tang aku enda sayauka nyawa diri, asal ga aku ulih nembuka pejalai aku enggau pengawa ti udah diasuh Tuhan Jesus kereja aku, iya nya, besaksika Berita Manah pasal pengasih Allah Taala. “Lalu diatu aku nemu, nadai siku kita, ke udah alai aku nusui pasal Perintah Allah Taala, ulih meda aku agi. Nya alai aku madah ngagai kita sehari tu, aku enda betanggungjawapka nyawa kita, laban aku nadai kala enggai madah ngagai kita semua juluk ati Allah Taala. Nya alai, jaga diri empu, enggau semua raban eklisia ke udah diasuh Roh Kudus ibun kita, ngibun eklisia Allah Taala, ke udah ditebus Iya ngena darah Anak Iya Empu. Aku nemu, lebuh aku udah mupuk, ukui kampung ti mangah deka tama ngagai bala kita, lalu munuh kita. Lalu sekeda orang ari raban kita empu, deka madahka utai ti bula, ngambika murid tesat lalu nitihka sida. Nya alai, bejaga, lalu kingatka aku ke udah, dalam kandang tiga taun, enggau ai mata, enda ngetu-ngetu siang malam meri kita jaku tangkan. Nyadi diatu, aku nyerahka kita ngagai Allah Taala, enggau ngagai pesan pasal pengasih Iya, pesan ti ulih ngemansangka kita, lalu meri kita pesaka sama enggau semua orang ke udah dikuduska. Aku nadai kala ingin ke pirak tauka emas, tauka gari orang. Kita empu nemu, jari aku tu ti dikena aku gawa ngidupka diri, sereta nyangkung pangan ke bekaling enggau aku. Dalam semua utai nya, aku udah meri kita teladan, ngambika ari kitai ke bebendar bekereja, kita ulih nulung nyukung orang ke lemi, laban kitai ingatka jaku Tuhan Jesus, laban Iya Empu ke nyebut, ‘Beberekat agi orang ke meri, ari orang ke nerima.’ ” Lebuh iya udah badu bejaku, iya besugang enggau semua sida, lalu besampi. Semua sida lalu nyabak magang lebuh sida merap lalu nyium iya enggau ati ti pemadu sinu, kelebih agi laban iya udah madahka sida nadai agi meda iya. Sida lalu nganjung iya ngagai kapal. Lebuh kami udah ninggalka sida, lalu bekejang, kami lalu belayar terus ngagai Kos, lalu hari siti ngagai Rodes, lalu ari nya ngagai Patara. Lebuh kami tetemuka sebuah kapal ti deka belayar ngagai Poenisia, kami lalu nepan kapal nya, lalu bekejang. Lebuh kami meda pulau Saiprus, kami lalu belayar muak ari selatan pulau nya nuju ngagai menua Siria, lalu sangkai di Tire, laban kapal deka munggah barang dia. Kami lalu ngiga sida murid, lalu kami diau dia tujuh hari. Nitihka iring Roh Kudus, sida nagang Paul mupuk ngagai Jerusalem. Lebuh timpuh kami diau dia nyau abis, kami angkat lalu majakka pejalai kami. Semua sida, sama enggau bini anak sida, nganjung kami pansut ari nengeri. Kami besugang ba tebing tasik lalu besampi, l lalu meri selamat tinggal ngagai pangan diri. Udah nya kami lalu nepan kapal; sida lalu pulai. Lebuh kami udah belayar ari Tire, kami datai di Tolemais. Dia kami betemu enggau sida ke arap, lalu diau enggau sida sehari. Hari siti kami mupuk, lalu datai di Siseria. Kami datai ba rumah Philip ke Penginjil, siku ari sida ke tujuh iku, lalu diau enggau iya. Iya bisi empat iku anak indu ke apin belaki, ke bisi pemeri benabi. Lebuh kami diau dia dua tiga hari, siku nabi ke benama Agabus datai ari Judea. Iya datai ngagai kami, ngambi belulang Paul, lalu nanchang kaki jari iya empu ngena belulang nya, lalu bejaku, “Tu utai ti disebut Roh Kudus, ‘Baka tu ku orang Judah di Jerusalem deka nanchang orang ke bempu belulang tu, lalu nyerahka iya ngagai orang bansa bukai.” Lebuh kami ninga nya, kami enggau sida ti bukai lalu nguji nagang Paul mupuk ngagai Jerusalem. Paul lalu nyaut, “Nama kebuah kita nyabak lalu ngenusahka ati aku? Aku ukai semina sedia deka ditanchang jil di Jerusalem, tang sedia deka mati din ketegal nama Tuhan Jesus.” Lebuh iya enggai dikuingka kami, kami lalu badu agi bejaku, kelimpah ari ke nyebut “Awakka peneka Tuhan nyadi.” Udah bekau nya, kami besikap, lalu mupuk ngagai Jerusalem. Sekeda sida murid ke ari Siseria mega bejalai enggau kami, lalu mai kami ngagai rumah Mnason ke asal ari Saiprus, ke lama udah arap, lalu kami diau enggau iya. Lebuh kami datai di Jerusalem, sida menyadi gaga amat nyambut penatai kami. Hari siti Paul mupuk enggau kami deka betemu enggau James. Semua tuai eklisia bisi dia magang. Lebuh Paul udah meri tabi basa ngagai sida, iya lalu nusui enggau silik semua utai ti udah dikereja Allah Taala ngagai orang bansa bukai, ngena pengawa ti dikereja Paul. Lebuh sida ninga nya, sida lalu muji Allah Taala. Lalu ku sida bejaku ngagai Paul, “Dinga nuan tu, menyadi! Ditu beribu ribu iku orang Judah ke arap, lalu semua sida nya bela angkun magang ke Adat. Sida udah dipadahka pasal nuan ke udah ngajar semua orang Judah ke diau begulai enggau orang bansa bukai, ngasuh sida ngelengkaka Adat Moses, lalu nuan madahka sida enda ibuh nutus anak sida, tauka nitihka adat asal kitai. Nya alai, nama utai ti patut dikereja kitai? Laban sida tetap deka nemu nuan udah datai ditu. Nya alai, kereja aja utai ti diasuh kami. Nyadi kitai bisi empat iku orang ke udah besumpah. Bai sida tu lalu tuchi diri empu sama enggau sida, lalu bayar ungkus sida ke ngukur buk sida, ngambika semua orang nemu, utai ti udah ditusui orang pasal nuan endang nadai pengamat mimit. Nya baru sida deka nemu nuan endang amat bepegai ba Adat. Tang ba pasal orang bansa bukai ke udah arap, kitai udah ngirumka siti surat madahka pemutus aum kitai, madahka sida enda tau makai pemakai ti udah diberi ngagai engkeramba, tauka makai darah, tauka makai jelu ti mati dichekal, lalu enda tau ngereja ulah ti kamah.” Paul lalu mai orang empat iku nya enggau iya, lalu hari siti lebuh iya udah nuchi diri sama enggau sida, sida lalu tama ngagai Rumah Sembiang, deka nimpuh maya sida deka nembuka pengawa nuchi diri lalu ngenjuk piring ke tiap iku sida. Lebuh timpuh tujuh hari nya nyau deka abis, sekeda orang Judah ke datai ari Asia bisi tepedaka Paul dalam Rumah Sembiang. Sida lalu megau orang mayuh, lalu nangkap Paul enggau panjung, “Orang Israel! Tulung! Tu orang ke ngajar di semua endur ngelaban orang Israel, ngelaban Adat, enggau ngelaban Rumah Sembiang tu. Nambahka nya, iya udah mai orang bansa bukai ngagai Rumah Sembiang lalu udah ngamahka endur ti kudus tu!” ( Sida nyebut nya laban sida udah tepedaka Tropimus ke datai ari Epesus begulai enggau Paul dalam nengeri nya, lalu sida melabaka Paul udah bisi mai iya ngagai Rumah Sembiang.) Semua orang dalam nengeri nya lalu begau magang lalu belanda lalu nangkap Paul, lalu ngirit iya pansut ari Rumah Sembiang. Pintu Rumah Sembiang lalu tekala nya ditutup. Lebuh sida nguji munuh iya, orang lalu madah ngagai tuai soldadu orang Rome pasal orang ke kachau di serata nengeri Jerusalem. Tekala nya kepala soldadu nya lalu mai pemesai enggau bala soldadu, lalu belanda ngagai tekang bala mayuh. Lebuh orang mayuh meda kepala soldadu enggau bala soldadu datai, sida lalu badu agi malu Paul. Kepala soldadu nya lalu mansang ngagai Paul, nangkap iya, lalu ngasuh iya ditanchang ngena rantai. Iya lalu nanyaka sapa orang ke ditangkap iya nya, enggau utai ti udah dikereja iya. Sekeda orang dalam bala mayuh manjung nyebut utai sebengkah, lalu sida ti bukai nyebut utai bukai. Nyadi laban kepala soldadu nya enda nemu utai ti ku sida, laban orang kelalu inggar, iya lalu ngasuh Paul dibai ngagai berek soldadu. Lebuh Paul datai ba tangga berek, bala soldadu lalu ngesan Paul, laban bala orang mayuh balat amat deka ngamuk iya. Bala orang mayuh ke nitihka sida majak manjung, “Bunuh iya!” Lebuh bala soldadu baru deka mai Paul tama ngagai berek, Paul lalu bejaku enggau kepala soldadu, “Kati tau aku nyebut siti utai ngagai nuan?” Kepala soldadu nya lalu nanya, “Kati nuan nemu jaku Gerika? Enti pia, kati nuan tu ukai orang Ejip ke apin lama tu ti udah nguji mai orang ngelaban perintah lalu nguluka empat ribu iku bala penyamun ngagai menua puang?” Paul lalu nyaut, “Aku tu orang Judah, ari Tarsus di menua Silisia, peranak sebuah nengeri ti besai. Aku minta nuan nyagi aku bejaku ngagai orang mayuh tu.” Lebuh kepala soldadu udah meri iya pemendar bejaku, Paul lalu bediri ba tangga nya, ngepaika jari iya ngagai orang mayuh. Lebuh sida nyau jenuh, iya lalu bejaku ngagai sida ngena jaku Hebrew, ku iya, “Bala menyadi, bala apai, pendingka aku bejaku ngarika diri empu di mua kita!” Lebuh sida ninga iya bejaku ngagai sida ngena jaku Hebrew, sida lalu enda engkeretik. Ku Paul, “Aku tu orang Judah, ada di Tarsus di menua Silisia, tang nyadi orang ke besai tuai di nengeri tu lalu diajar Gamaliel enggau terit nitihka Adat aki ini kitai, lalu aku angkunka Allah Taala baka semua kita bukai sehari tu. Aku udah merinsaka orang ke nitihka Jalai Tuhan datai ke sida mati, nanchang orang ke lelaki enggau ke indu, lalu nutup sida dalam rumah jil, lalu imam besai enggau semua raban Kunsil ulih besaksika pasal aku. Aku udah nerima ari sida surat ti ditulis sida ngagai orang Judah ke diau di Damaskus, lalu aku mansang ngagai nengeri nya deka nanchang orang ke diau dia, lalu mai sida pulai ngagai Jerusalem, ngambika sida diukum. “Lebuh aku benung di rantau jalai semak ngagai Damaskus, kira ba urung tengah hari, siti penampak lalu ngenyit manchar ari langit ngelingi aku. Aku lalu rebah ke tanah, lalu ninga nyawa bejaku ngagai aku, ‘Saul, Saul! Nama kebuah nuan merinsaka Aku?’ Aku lalu nyaut, ‘Sapa Nuan, Tuan?’ Iya lalu bejaku ngagai aku, ‘Aku tu Jesus orang Nasaret ke diperinsaka nuan.’ Nyadi orang ke bejalai enggau aku bisi meda penampak nya, tang nadai ninga nyawa nya bejaku ngagai aku. Aku lalu nanya, ‘Nama utai ti patut dikereja aku, Tuhan?’ Tuhan lalu bejaku ngagai aku, ‘Angkat nuan lalu mupuk ngagai Damaskus. Dia nuan deka dipadahka semua utai ti udah diasuh kereja nuan.’ Lebuh aku enda ulih meda utai ketegal penerang penampak nya, orang ke enggau aku lalu megai jari aku lalu ngiring aku ngagai Damaskus. “Di nengeri nya bisi orang siku benama Ananias, ke angkunka Adat, sereta dibasa semua orang Judah ke diau dia. Iya datai ngagai aku, bediri ngimbai aku, lalu bejaku, ‘Menyadi, Saul, awakka nuan ulih meda baru!’ Tekala nya aku lalu ulih meda. Aku lalu meda iya. Iya lalu bejaku, ‘Allah Taala aki ini kitai udah milih nuan, ngambika nuan nemu peneka Iya, lalu meda Iya ti Lurus, lalu ninga nyawa Iya Empu, laban nuan deka nyadika saksi Iya ngagai semua dunya pasal utai ti udah dipeda enggau didinga nuan. Nya alai, anang betangguh. Angkat nuan, lalu dibaptisa, ngambika dosa nuan dibuai, lalu besampi dalam nama Iya.’ “Lebuh aku udah pulai ngagai Jerusalem, lalu lebuh aku benung besampi dalam Rumah Sembiang, aku begenera meda Tuhan bejaku ngagai aku. Ku Iya, ‘Angkat jampat lalu mupuk nuan ari Jerusalem, laban sida enggai nerima jaku saksi nuan pasal Aku.’ Aku lalu nyaut, ‘Tuhan, sida empu nemu aku udah bejalai ari balai gempuru sebuah ngagai balai gempuru sebuah, nangkap lalu malu sida ke arapka Nuan. Lalu lebuh saksi Nuan Stepen dibunuh, aku bisi bediri semak nya, rindu meda pengawa orang ke munuh iya, lalu ngemataka baju sida.’ Tuhan lalu bejaku ngagai aku, ‘Mupuk nuan, laban Aku deka ngasuh nuan bejalai jauh ngagai orang bansa bukai.’ ” Ngagai ba senentang tu, sida agi mendingka Paul. Tang udah nya, sida lalu belabuh manjung, ku sida, “Bunuh iya! Bunuh iya! Iya enda patut idup!” Lebuh sida manjung, sereta ngesaika serayung sida, lalu ngerabuka amau ngagai angin, kepala soldadu lalu ngasuh Paul dibai ngagai berek, lalu ngasuh iya disipat, deka mansik kebuah orang Judah manjung baka nya ngelaban iya. Tang lebuh sida udah nanchang iya ngena tali, Paul lalu bejaku ngagai siku pemesai soldadu ke bediri semak dia, “Kati kita tau nyipat orang ke peranak Rome, ke nadai udah diukum?” Lebuh pemesai soldadu nya ninga nya, iya lalu mansang ngagai kepala soldadu, lalu bejaku ngagai iya, “Nama utai ti deka dikereja nuan? Orang tu peranak Rome!” Kepala soldadu nya lalu mansang ngagai Paul, lalu nanya iya, “Padahka ngagai aku, kati nuan peranak Rome?” Paul lalu nyaut, “Au.” Kepala soldadu nya lalu nyaut, “Mar amat rega aku meli pangkat nyadi peranak Rome.” Ku Paul bejaku, “Aku nyadi peranak Rome ari ada.” Tekala nya orang ke deka mansik iya lalu nyurutka diri ari iya, lalu kepala soldadu mega takut lebuh iya nemu Paul nya peranak Rome, lalu iya udah nanchang Paul. Laban iya ingin deka nemu kebuah orang Judah bedawaka Paul, hari siti iya lalu ngelepaska Paul, lalu ngasuh sida tuai imam enggau semua raban Kunsil begempuru. Iya lalu mai Paul tama lalu ngasuh iya bediri di mua sida. Paul merening ngagai raban Kunsil lalu bejaku, “Menyadi! Nyentuk ngagai sehari tu aku udah idup enggau ati ti beresi di mua Allah Taala.” Imam Besai Ananias lalu ngasuh orang ke bediri semak Paul nampar mulut Paul. Paul lalu bejaku ngagai iya, “Allah Taala deka nampar nuan, nuan ti pura-pura ngapa! Kati nuan ngakim aku nitihka Adat, tang nuan empu ngelanggar Adat ngasuh orang nampar aku?” Orang ke semak Paul lalu bejaku, “Berani amat nuan mechat imam besai Allah Taala!” Paul lalu bejaku, “Menyadi, aku enda nemu iya imam besai. Laban endang udah ditulis, ‘Anang bejaku jai pasal kepala bansa kita.’ ” Lebuh Paul nemu sekeda orang ke dia nya orang Saduki, lalu sekeda ti bukai orang Parisi, iya lalu bejaku enggau nyawa ti inggar dalam balai Kunsil nya, “Menyadi, aku tu orang Parisi, anak orang Parisi. Aku kena pechara laban aku arapka orang deka diangkatka ari mati!” Lebuh iya udah nyebut nya, orang Parisi enggau orang Saduki lalu belabuh bekelikuh, lalu raban Kunsil beserekang penemu, ( laban orang Saduki madahka nadai utai ti dikumbai pengangkat ari mati, tauka melikat, tauka roh, tang orang Parisi ngumbai semua utai nya bisi magang.) Sida lalu inggar amat. Sekeda pengajar Adat ke orang Parisi bediri lalu bejaku, “Kami nadai nemu penyalah orang tu! Kada enda roh tauka melikat udah bejaku ngagai iya.” Lebuh sida majak balat agi bekelikuh, kepala soldadu lalu irau ati enggai ke Paul abis dipecharikka sida. Nya alai iya lalu ngasuh bala soldadu nurun lalu ngerampas Paul ari jari sida, lalu mai iya ngagai berek. Malam nya Tuhan bediri ngimbai Paul, lalu bejaku, “Anang takut! Baka nuan ke udah besaksika pasal Aku di Jerusalem, baka nya mega nuan deka besaksika pasal Aku di Rome.” Pagi hari siti, orang Judah lalu bepekat. Sida besumpah enda makai, enda ngirup, datai ke sida udah munuh Paul. Lebih empat puluh iku sida ke bepekat nya. Sida lalu mansang ngagai sida tuai imam, enggau tuai bansa, lalu bejaku, “Kami udah besumpah enda makai, enda ngirup, datai ke kami udah munuh Paul. Nya alai kita enggau raban Kunsil enda tau enda ngirumka pesan ngagai kepala soldadu, minta iya mai Paul betemu enggau kita, lalu kita ngaga diri baka ke deka mansik pekara pasal iya enggau silik agi. Lalu kami deka sedia munuh iya sebedau iya datai ditu.” Tang anak menyadi indu Paul bisi ninga pasal sida ke deka ngipa Paul. Nya alai iya mansang ngagai berek lalu dikemendarka tama, lalu madah ngagai Paul. Paul lalu ngangauka siku pemesai soldadu, lalu bejaku ngagai iya, “Bai orang bujang tu ngagai kepala soldadu, laban iya bisi utai ti deka dipadahka iya ngagai iya.” Nya alai pemesai soldadu nya lalu mai orang bujang nya betemu enggau kepala soldadu. Ku iya, “Orang jil ke benama Paul udah ngangauka aku, lalu minta aku mai orang bujang tu ngagai nuan, laban iya bisi utai ti deka dipadahka iya ngagai nuan.” Tuai soldadu nya lalu megai jari orang bujang nya lalu mai iya ke tisi, lalu nanya iya, “Nama utai ti deka dipadahka nuan ngagai aku?” Orang bujang nya lalu nyaut, “Orang Judah udah besetuju deka minta nuan mai Paul ngagai Kunsil pagila, pura-pura baka ke deka mansik pekara pasal Paul silik agi. Tang anang nurutka peminta sida, laban lebih empat puluh iku orang deka ngipa Paul. Sida udah besumpah enda makai, enda ngirup datai ke sida udah munuh iya. Sida diatu udah sedia, lalu nganti saut ari nuan.” Kepala soldadu nya ngasuh orang bujang nya pulai, lalu bejaku ngagai iya, “Anang madahka diri udah nusui tu ngagai aku.” Kepala soldadu nya lalu ngangauka dua iku pemesai, lalu bejaku, “Aku ngasuh kita besedia mupuk ngagai Sisarea pukul semilan malam tu, enggau dua ratus iku soldadu enggau tujuh puluh iku soldadu ke nepan kuda, enggau dua ratus iku soldadu ke besenyataka sangkuh. Sediaka mega dua tiga iku kuda ke Paul, lalu bai iya enggau likun ngagai Gabenor Peliks.” Iya lalu nulis sepuchuk surat ti munyi tu: “Ari Klaudius Lisias, ngagai Iya Ke Dipebasaka Tuan Gabenor Peliks: Tabi. Orang tu udah ditangkap orang Judah, lalu baru deka dibunuh sida, tang lebuh aku tetemuka iya nya peranak Rome, aku lalu mai bala jejaga, lalu nyelamatka iya. Laban aku keran deka nemu penyalah ti dikena sida bedawaka iya, aku lalu mai iya ngagai Kunsil. Aku lalu tetemuka iya udah kena dawa ketegal Adat sida empu, lalu ukai patut tau ngasuh iya diukum bunuh, tauka ditutup dalam rumah jil. Lebuh orang madah ngagai aku pasal orang Judah ke bepekat deka munuh iya, aku lalu tekala nya ngirumka iya ngagai nuan, lalu ngasuh orang ke bedawaka iya mantaika dawa sida di mua nuan.” Nya alai bala soldadu lalu nitihka atur kepala soldadu lalu ngambi Paul, lalu mai iya malam nya ngagai Antipatris. Hari siti bala soldadu ke bejalai kaki, pulai ngagai berek sida, ninggalka bala soldadu ke nepan kuda bejalai enggau Paul. Lebuh sida datai di Siseria lalu nyuaka surat nya ngagai gabenor, sida lalu nyerahka Paul ngagai iya. Lebuh tuan gabenor udah macha surat nya, iya lalu nanyaka menua asal Paul. Lebuh iya ninga Paul datai ari menua Silisia, iya lalu bejaku, “Aku deka mendingka nuan lebuh orang ke bedawaka nuan datai.” Iya lalu ngasuh Paul dijaga dalam istana Herod. Lima hari udah bekau nya Imam Besai Ananias lalu datai enggau bala tuai orang Judah enggau siku lawyer ke benama Tertulus. Sida lalu mantaika dawa sida ngelaban Paul di mua gabenor. Lebuh Paul udah dikangauka tama, Tertulus lalu belabuh bedawaka Paul munyi tu: “Tuan ti Dipebasaka! Nuan endang lama udah mai pemaik ngagai menua kami, lalu ulih pengelandik nuan, mayuh bengkah ubah ti manah udah digaga nuan ke bansa kami. Kami meri terima kasih ke semua utai ti udah dikereja nuan ke kami. Tang ngambika aku enda masau jam nuan, aku minta nuan mendingka kami enda lama. Kami nemu orang tu mai pengachau, ke ngachau semua orang Judah di serata dunya, sereta nyadi tuai ke siti raban ti dikumbai Raban Orang Nasaret. Iya mega bejaku jai ngelaban Rumah Sembiang. Nya alai kami nangkap iya, lalu deka ngakim iya nitihka Adat kami empu. Tang kepala soldadu ke benama Lisias datai lalu ngerampas iya ari jari kami lalu ngasuh orang ke bedawaka orang tu betemu enggau nuan. Lebuh nuan mansik orang tu, nuan deka nemu ari iya empu semua penyalah iya ti dikena kami bedawaka iya.” Orang Judah mega bedawaka iya, madahka semua utai nya endang amat magang. Lebuh tuan gabenor ngepaika jari ngasuh Paul bejaku, Paul lalu nyaut, “Aku gaga ati bejaku ngarika diri empu, laban aku nemu nuan endang lama udah nyadi hakim di menua tu. Tuan empu ulih mansik utai tu. Kira dua belas hari tu ti udah aku mansang ngagai Jerusalem deka nyembah Allah Taala. Orang Judah nadai nemu aku bekelikuh enggau orang, tauka nyungkak orang mayuh ngaga pengachau, nemuka dalam balai gempuru, tauka ba sebelah nengeri. Lalu sida pen enda mega ulih nunjukka enggau terang ngagai nuan kebuah sida bedawaka aku diatu. Tang aku ngaku tu di mua nuan: aku nyembah Allah Taala aki ini kami nitihka Jalai Tuhan ti dikumbai sida siti raban, lalu aku arapka semua utai ti ditulis dalam Adat, tauka dalam bup sida nabi. Aku bisi siti pengadang baka ti diterima sida empu, iya nya semua orang ke lurus enggau ke enda lurus deka diangkatka ari mati. Nya kebuah aku enggau naka ulih ngintu ati diri beresi di mua Allah Taala enggau di mua mensia. “Lebuh aku udah ninggalka Jerusalem dua tiga taun, aku lalu pulai baru ngagai nengeri nya, mai duit sedekah ngagai bansa aku empu, sereta meri piring. Lebuh aku benung ngereja nya, sida lalu nemu aku dalam Rumah Sembiang, benung nembuka pengawa aku ke nuchi diri. Nadai mayuh orang enggau aku, lalu aku mega nadai ngaga pengachau. Tang sekeda orang Judah ari menua Asia -- sida patut bisi ditu bedawaka aku di mua nuan, enti sida amat bisi utai kena bedawaka aku. Tauka, awakka bala sida tu madahka penyalah aku ti ditemu sida lebuh aku bediri di mua Kunsil. Nyangka meh sida besalah aku laban aku udah nyebut di mua sida, ‘Aku kena pechara sehari tu laban aku arapka orang ke mati deka diangkatka idup baru.’ ” Tang Peliks, ke endang nemu pasal Jalai Tuhan, nutup pechara nya. Ku iya, “Lebuh kepala soldadu Lisias datai, nya baru aku meri pemutus penemu pasal pekara kita tu.” Iya lalu ngasuh pemesai soldadu nyaga Paul, tang tau ngasuh Paul mindah kia-kia, lalu enda tau nagang bala pangan Paul meri iya utai ti dipeguna iya. Kira dua tiga hari udah bekau nya, Peliks datai enggau bini iya Drusila, ke bansa orang Judah. Iya lalu mesanka Paul, lalu mendingka Paul bejakuka pasal pengarap ke Jesus Kristus. Lebuh Paul bejakuka pasal pengelurus, pasal nagang diri, enggau pasal Hari Pechara ti deka datai, Peliks lalu takut. Ku iya, “Nuan tau mupuk diatu. Lebuh aku bisi peluang ila, aku mesanka nuan.” Lebuh maya nya, iya ngarapka Paul deka meri iya duit. Nya kebuah iya suah mesanka Paul lalu berandau enggau iya. Dua taun udah lepas nya, Peliks lalu diganti Porkius Pestus nyadi gabenor. Kena Peliks ngenyamaika ati orang Judah, iya nejuka Paul mengkang ditan dalam rumah jil. Tiga hari udah bekau Pestus datai di menua nya, iya lalu mansang ari Siseria ngagai Jerusalem. Sida tuai imam, enggau bala tuai orang Judah lalu mantaika dawa ti dikena sida ngelaban Paul. Lalu sida minta Pestus ngasuh orang mai Paul ngagai Jerusalem, laban sida deka ngipa lalu munuh iya di rantau jalai. Pestus lalu nyaut, madahka Paul agi ditanka dalam rumah jil di Siseria, lalu Pestus empu deka mansang kin enda lama da agi. “Nya alai,” ku iya bejaku, “awakka bala tuai kita mupuk enggau aku ngagai Siseria, lalu enti orang nya bisi udah ngereja penyalah, awakka sida bedawaka iya.” Lebuh iya udah diau enggau sida lapan ngagai sepuluh hari, iya lalu mupuk ngagai Siseria. Hari siti iya lalu duduk ba penuduk hakim, lalu ngasuh orang mai Paul tama. Lebuh Paul datai, bala orang Judah ke udah datai ari Jerusalem, bediri ngelingi iya, mantaika dawa ti berat ngelaban iya. Tang sida enda ulih nunjukka pengamat dawa nya. Paul lalu bejaku ngarika diri empu. Ku iya, “Aku nadai kala ngelanggar Adat orang Judah tauka ngelaban Rumah Sembiang, tauka ngelaban Raja Besai.” Tang Pestus minta diri dikerinduka orang Judah, nya alai iya nanya Paul, “Kati nuan deka mupuk ngagai Jerusalem lalu kena pechara din ba pasal semua pekara tu di mua aku empu?” Paul lalu nyaut, “Aku diatu bediri dalam kot Raja Besai, alai aku ke endang patut kena pechara. Lalu nuan empu nemu, aku nadai kala ngereja utai ti salah ngagai orang Judah. Nya alai, enti aku bisi udah ngereja penyalah lalu udah ngereja utai ti tau ngasuh aku patut kena ukum bunuh, aku ukai minta diri enda diukum mati. Tang enti sida nadai kebuah bedawaka aku, nadai orang ulih nyerahka aku ngagai sida. Aku ngapil ngagai Raja Besai.” Lebuh Pestus udah berunding enggau bala penyanding penemu iya, iya lalu nyaut, “Nuan udah ngapil ngagai Raja Besai. Ngagai Raja Besai meh nuan deka mupuk.” Dua tiga hari udah bekau nya, Raja Agripa enggau Bernis datai di Siseria, deka ngelaluka penatai Pestus. Lebuh Raja Agripa enggau Bernis diau dia dua tiga hari, Pestus lalu mantaika pekara Paul di mua raja. Ku iya, “Aku bisi siku orang tutup ke udah ditinggalka Peliks. Lebuh aku di Jerusalem, sida tuai imam enggau bala tuai orang Judah madahka pasal iya ngagai aku, minta aku ngukum iya. Aku madah ngagai sida, kami orang Rome nadai adat nyerahka orang ke kena dawa, sebedau iya betemu betunga mua enggau orang ke bedawaka iya, lalu apin diberi peluang bejaku ngarika diri empu ngelaban dawa nya. Nya alai, lebuh sida datai ditu suba, aku enda betangguh tang hari siti duduk ba penuduk hakim, lalu ngasuh orang mai iya tama. Lebuh bala orang ke bedawaka iya bediri, sida nadai madahka iya bisi udah ngereja penyalah baka ke disangka aku. Tang sida semina bekelikuh enggau iya pasal agama sida empu, enggau pasal orang siku ke benama Jesus, ke udah mati, tang Paul majak madahka orang nya idup. Laban aku enda nemu baka ni ku chara mansik pekara nya, nya alai aku lalu nanya iya enti iya deka mupuk ngagai Jerusalem, lalu dipecharaka din ba semua pekara nya. Tang lebuh Paul udah ngapil minta diri mengkang ditan dalam rumah jil, lalu minta pekara nya diatur Raja Besai, aku lalu ngasuh iya ditan nyentuk ngagai maya aku ulih ngirumka iya ngagai Raja Besai.” Ku Agripa bejaku enggau Pestus, “Aku bisi ati deka mendingka orang nya.” Pestus lalu nyaut iya, “Pagila nuan deka mendingka iya.” Hari siti Agripa seduai Bernis lalu datai enggau chukup gaya, lalu tama ngagai balai, disempulang sida tuai soldadu, enggau orang ke tinggi pangkat dalam nengeri nya. Pestus lalu ngasuh orang mai Paul tama. Ku Pestus bejaku, “Raja Agripa, enggau semua kita ke bisi enggau kami ditu diatu, tu meh orang ke didawaka semua orang Judah ngagai aku, ukai semina ditu tang mega di Jerusalem, lalu manjung madahka iya enda tau ditejuka idup agi. Tang aku nadai nemu iya bisi udah ngereja utai ti tau ngasuh iya diukum bunuh. Lalu lebuh iya ngapil ngagai Raja Besai, aku lalu mutuska runding deka ngirumka iya. Tang aku nadai utai nyemetak ti tau ditulis aku pasal iya ngagai Raja Besai. Nya kebuah aku mai iya kitu ngagai semua kita, kelebih agi ngagai nuan Raja Agripa, ngambika lebuh kitai udah meresa iya, aku bisi utai ditulis-- laban ba penemu aku, enda manah enti aku ngirumka orang jil, tang enda madahka dawa ti dikena ngelaban iya.” Agripa lalu bejaku ngagai Paul, “Nuan tau bejaku ngarika diri empu.” Paul lalu ngangkatka jari iya, lalu bejaku ngarika diri empu munyi tu: “Raja Agripa, aku gaga amat ati laban sehari tu aku diberi peluang bejaku ngarika diri empu di mua nuan, ngelaban semua dawa orang Judah, laban nuan nemu semua adat asal enggau pasal semua kelikuh orang Judah ti ngasuh sida beserekang penemu. Nya alai, aku minta nuan liat ati mendingka aku. “Semua orang Judah nemu gaya pengidup aku kenyau ari aku agi bujang, begulai enggau orang ari bansa aku empu enggau di Jerusalem. Sida endang lama udah nemu, enti sida deka besaksika pasal aku ke nyadi raban orang ke pemadu terit dalam agama kitai, lalu idup nyadi orang Parisi. Nyadi diatu aku bediri ditu kena pechara ketegal aku andal ati ke semaya ti udah digaga Allah Taala enggau aki ini kitai, semaya ti dikarapka dua belas raban bansa kitai tau ulih sida, lebuh sida bebendar nyembah Allah Taala siang malam. Ketegal pengadang nya meh aku kena dawa orang Judah, Tuan Raja. Nama kebuah kita enda arapka Allah Taala ulih ngangkatka orang ari mati? “Aku menya udah ngumbai diri patut ngereja mayuh macham utai kena ngelaban nama Jesus orang Nasaret. Lalu nya meh utai ti dikereja aku di Jerusalem. Ngena kuasa ari sida tuai imam, aku ukai semina nutup bala nembiak Tuhan dalam rumah jil, tang aku mega ngundi ngelaban sida lebuh sida diberi ukum bunuh. Aku suah udah merinsaka sida dalam semua balai gempuru, laban aku nguji mejalka sida bejaku busung; nyadi laban aku balat pedis ati ngagai sida, aku lalu begagaika sida nyentuk ngagai nengeri di menua bukai. Nya meh utai ti dalam runding aku lebuh aku bejalai ngagai Damaskus ngena kuasa enggau atur ti diberi sida tuai imam. Ba urung tengah hari, Tuan Raja, lebuh aku di rantau jalai, aku meda siti penampak manchar ari langit, ti terang agi ari mata hari, ti manchar ngelingi aku enggau ngelingi orang ke bejalai enggau aku. Lebuh semua kami udah rebah ke tanah, aku lalu ninga nyawa bejaku ngagai aku ngena jaku Hebrew, ‘Saul, Saul! Nama kebuah nuan merinsaka Aku? Nuan semina ngemediska diri empu ngapa ngelaban aku.’ Aku lalu bejaku, ‘Sapa Nuan, Tuan?’ Tuhan lalu nyaut, “Aku tu Jesus ke diperinsaka nuan. Tang angkat nuan, lalu bediri, laban tuju Aku ke pegari di mua nuan nya ngasuh nuan bekereja ke Aku lalu besaksika pasal utai ti udah dipeda nuan pasal Aku, enggau besaksika utai ti deka dipandangka Aku ngagai nuan ila. Aku deka ngelepaska nuan ari bansa nuan empu, enggau ari orang bansa bukai ke alai Aku deka ngirumka nuan, ngambika muka mata sida, ngambika sida nguingka diri ari pemetang ngagai penampak, enggau ari kuasa Sitan ngagai Allah Taala, ngambika dosa sida diampun, lalu sida nyadi raban orang ke dikuduska ulih pengarap sida ke Aku.’ “Udah bekau nya, Raja Agripa, aku enda kala enda ngasika genera ti datai ari serega, tang madahka, keterubah iya, ngagai sida ke diau di Damaskus, lalu udah nya ngagai sida ke diau di Jerusalem, enggau di serata menua Judea, lalu mega ngagai orang bansa bukai, madahka sida enda tau enda nesal ati ke dosa sida lalu nguing ngagai Allah Taala, lalu ngereja utai ti nunjukka sida amat udah nesal ati. Nya meh kebuah orang Judah nangkap aku dalam Rumah Sembiang, lalu nguji munuh aku. Tang aku disaup Allah Taala nyentuk ngagai sehari tu. Nya alai aku diatu bediri ditu besaksi ngagai semua orang ke mit enggau ke besai, nyebut utai ti udah dipadahka sida nabi enggau Moses deka nyadi: iya nya Kristus endang enda tau enda kena perinsa, lalu ari Iya ke nyadi orang ke terubah-rubah angkat ari mati, Iya madahka penampak ngagai orang Judah enggau ngagai orang bansa bukai.” Lebuh Paul agi benung bejaku ngarika diri empu munyi nya, Pestus lalu merak iya, “Paul, nuan tu gila! Nuan kelalu mayuh penemu. Nya utai ti ngasuh nuan gila!” Tang ku Paul nyaut, “Aku ukai gila, Tuan Gabenor, tang nyebut utai ti bendar. Raja empu nemu pasal utai nya, lalu aku bejaku enggau terang ngagai iya, laban aku nemu, nadai siti ari utai tu ti enda ditemu iya, laban utai nya ukai dikereja ba sebelah teluk. Raja Agripa, kati nuan arapka sida nabi? Aku nemu nuan arap!” Agripa lalu bejaku enggau Paul, “Kati nuan ngenyampat nya ngumbuk aku nyadi orang Kristian?” Paul lalu nyaut, “Nemuka jampat, tauka enda, aku besampi ngagai Allah Taala ngambika nuan enggau semua kita bukai ke mendingka aku sehari tu, tau nyadi baka aku, tang anang ga kita ditanchang ngena rantai baka aku.” Raja lalu angkat, lalu gabenor, Bernis, enggau semua orang ke duduk enggau sida mega angkat, lalu lebuh sida mupuk ari endur nya, sida lalu bejaku enggau pangan diri, “Orang tu nadai udah ngereja utai ti tau ngasuh iya kena ukum bunuh, tauka ditan dalam rumah jil.” Agripa lalu bejaku ngagai Pestus, “Orang tu patut udah dilepaska, enti iya enda udah ngapil ngagai Raja Besai.” Lebuh kami udah diatur belayar ngagai menua Itali, sida lalu nyerahka Paul enggau sekeda orang tutup ti bukai ngagai Julius, siku pemesai ari regimen ti dikumbai “Regimen Raja Besai.” Kami lalu nepan sebuah kapal ti datai ari Adramitium, ti baru deka belayar ngagai mayuh bengkah penyangkai kapal ba sebelah tebing menua Asia, lalu bekejang, disempulang Aristarkus, orang Masedonia ke datai ari Tesalonika. Hari siti kami sangkai di Sidon. Nyadi Julius manah amat enggau Paul, lalu ngemendarka iya betemu enggau pangan iya, ngambika sida ngintu iya. Kami bekejang ari Sidon lalu laban kami nanjak ribut, kami lalu belayar mansa Pulau Saiprus nengah endur ti kurang agi ribut. Lebuh kami udah belayar meraka tasik semak Silisia enggau Pampilia, kami datai di Mira di menua Lisia. Dia pemesai soldadu tetemuka sebuah kapal ti datai ari Aleksandria, ti deka belayar ngagai menua Itali. Iya lalu ngengkahka kami ba kapal nya. Kami belayar lubah amat dalam berapa hari, lalu nyau ka enda ulih datai semak nengeri Nidus. Lalu laban kami nanjak ribut, nya alai kami belayar belindung ba pulau Krit semak Salmoni. Kami belayar lubah amat, lalu datai ba endur siti ti dikumbai Pengkalan ti Likun, ti semak nengeri Lasea. Laban mayuh jam udah tebasau, lalu belayar pen tau mega ngasuh bebadi, laban Hari Pengampun Dosa udah ngelebus, nya alai Paul ngelalau sida enggau jaku. Ku iya, “Tuan, asai sepi aku, pejalai kitai tu tau ngasuh kitai bebadi sereta mayuh rugi, ukai semina rugi barang enggau kapal, tang nyawa kitai mega.” Tang pemesai soldadu bechaya agi ke juragan kapal, enggau orang ke bempu kapal nya, ari ke arapka jaku Paul. Laban penyangkai kapal nya enda manah alai ngenduh lebuh musin chelap, mayuh sida mai belayar ari endur nya, ngarapka diri ulih datai di Poeniks, lalu ngenduh dia lebuh musin chelap. Poeniks nya penyangkai kapal ti nunga ngagai selatan-barat enggau utara-barat pulau nya. Lebuh ribut ti enda balat belabuh muput ari selatan, sida ngumbai diri ulih ngereja utai ti deka dikereja sida, nya alai sida narit sauh, lalu belayar nebing pulau Krit. Tang enda lama udah nya kabut besai, ti dikumbai “Ribut Utara Timur” lalu mangka ari pulau Krit. Laban kapal kami balat dipuputka ribut nya, lalu enda ulih dikuingka ngambika nanjak ribut nya, kami lalu nejuka kapal nya anyut dibai ribut. Lebuh kami belindung mansa pulau siti ti mit, ti dikumbai Kauda, kami nyau ka enda ulih nanchangka perau ti dibai kapal. Lebuh sida udah narit perau nya ngagai kapal, sida lalu melit kapal nya erat ngena tali. Laban sida enggai ke kapal nya tepanggai ba pasir Sirtis, sida lalu ngulurka sauh lalu kapal nya anyut laban ribut. Kami balat amat dipangkaka kabut nya, nya alai hari siti sida belabuh muai barang ari kapal nya. Ba hari ti ketiga, sida muai sekeda perengka kapal. Lebuh kami nyau lama nadai meda mata hari, tauka bintang, lalu kabut nya majak balat mangka, kami nadai ngadang diri ulih idup. Laban sida lama udah enda makai, nya alai Paul mansang ngagai sida, lalu bejaku. “Kita patut udah mendingka aku, lalu enda bekejang ari Krit. Nya baru pengerusak enggau pengerugi tu ulih diseliahka. Tang anang takut, laban nadai siku kita deka mati. Semina kapal aja deka rusak, laban malam tadi siku melikat Allah Taala, iya nya Allah Taala ke dipetuaika sereta disembah aku, bisi bediri ngimbai aku, lalu bejaku, ‘Anang takut, Paul. Nuan enda tau enda bediri di mua Raja Besai. Lalu Allah Taala deka nyelamatka semua orang ke belayar enggau nuan.’ Nya alai, anang takut, laban aku arapka Allah Taala deka ngereja utai munyi ti udah dipadahka Iya ngagai aku. Tang kitai deka tepanggai ba tebing pulau siti.” Ba malam ti keempat belas, lebuh kami anyut nengah Tasik Adria, kira ba urung tengah malam, sida kelasi ngumbai kami datai semak tebing. Nya alai sida lalu ngabas penalam ai, lalu nemu penalam ai nya kira empat puluh meter. Enda lama udah nya sida ngabas penalam ai nya baru, lalu nemu penalam ai nya tiga puluh meter. Laban sida takut enggai ke kapal nya terempas ba batu, nya alai sida ngulurka empat iti sauh ari kemudi kapal nya, lalu besampi nganti hari siang. Tang lebuh sida kelasi nguji ngerarika diri ari kapal nya, lalu udah ngulurka perau ngagai tasik, lalu ngaga diri baka ke deka ngulurka sauh ari luan kapal nya, Paul lalu bejaku ngagai pemesai enggau ngagai bala soldadu. Ku iya, “Enti sida kelasi nya ninggalka kapal tu, kita enda ulih idup.” Sida soldadu lalu netak tali perau nya, lalu nejuka perau nya labuh. Sebedau dini hari, Paul lalu ngansak sida makai. Ku iya, “Tu keempat belas hari kita udah abis irau ati lalu nadai makai utai. Nya alai aku ngasuh kita makai utai, ngambika kita ulih ngidupka diri. Selambar pen nadai meh buk kita deka lenyau ari pala kita.” Lebuh Paul udah nyebut nya, iya ngambi roti, meri terima kasih ngagai Allah Taala di mua semua sida, mechahka roti nya, lalu belabuh makai. Semua sida lalu berasai diperansang magang, lalu sida empu mega makai. (Pemayuh kami ke dalam kapal nya 276 iku. ) Lebuh sida udah kenyang magang, sida lalu muai semua gandum ke tasik ngambika kapal nya lempung agi. Pagi hari nya, sida enda ngelala menua nya, tang sida tepedaka siti teluk ti bisi tebing pasir. Sida lalu bekira deka ngelanggarka kapal nya ngagai tebing pasir nya, enti sida ulih. Nya alai sida netak tali sauh, lalu ninggalka sauh nya di tasik, muka tali ti dikena nanchang tumpang kapal nya, nuatka layar ti ba luan kapal nya lalu nuju ngagai tebing. Tang kapal nya telanggarka betin, lalu tepanggai. Luan kapal nya lekat enda beguyat, lalu kemudi pechah dipangkaka gelumbang. Bala soldadu lalu bekira deka munuh semua orang tutup, enggai ke sida nyemerai ke tebing lalu rari. Tang pemesai soldadu ingin deka ngidupka Paul. Nya alai iya nagang sida munuh orang tutup. Iya lalu ngasuh semua orang ke tau nyemerai, terejun ari kapal nya, lalu nyemerai ke tebing. Sida ti bukai nitih ka sida, sekeda belatung ngena papan, tauka ngena perengka ari kapal nya. Nya meh jalai semua sida datai enggau likun ba tebing. Lebuh semua kami udah datai ba tebing, nya baru kami nemu pulau nya dikumbai Malta. Orang ba pulau nya manah amat enggau kami. Laban hari nyau belabuh ujan sereta chelap, sida lalu nungkun api lalu ngelaluka penatai semua kami. Paul ngeraup tugung rangkang, lalu lebuh iya nabakka kayu nya ngagai api, siku ular pansut ari tugung rangkang nya laban angat, mantuk lalu lekat ba jari iya. Lebuh orang ba pulau nya meda ular nya kating-kating lekat ba jari Paul, sida lalu bejaku enggau pangan diri, “Orang tu tentu pemunuh. Taja pen iya enda mati di tasik, tang petara enggai nejuka iya idup.” Tang Paul ngetikka ular nya ngagai api, lalu nadai apa nama laban ular nya. Sida ngumbai tubuh iya deka sup, tauka iya ngenyit rebah lalu mati, tang lebuh sida udah lama nganti, lalu nadai meda utai ti nyelai nyadi ba iya, sida lalu ngubah runding diri, lalu ngumbai iya petara. Enda jauh ari endur nya bisi tanah ti diempu Publius, ke nyadi tuai ba pulau nya. Iya ngelaluka penatai kami, lalu ngintu kami tiga hari. Nyadi apai Publius gali sakit chelap angat sereta pedis perut. Paul mansang ngagai iya lalu besampi, ngengkahka jari iya atas apai Publius, lalu ngeraika iya. Lebuh utai nya udah nyadi, semua orang ke sakit ba pulau nya, datai lalu digeraika magang. Sida balat amat masa kami, lalu lebuh kami deka belayar, sida mai ngagai kapal nya semua utai ti dipeguna kami. Tiga bulan udah bekau nya kami lalu belayar ngena sebuah kapal ti datai ari Aleksandria, ti dikumbai “Menyadi Lelaki Ti Besapit,” ti udah ngenduh ba pulau nya lebuh musin chelap nya. Kami sangkai di Sairakuse, lalu diau dia tiga hari. Ari nya kami lalu majak belayar, lalu datai di Regium. Hari siti ribut belabuh muput ari selatan, lalu ba hari ti kedua kami datai di Puteoli. Dia kami tetemuka sekeda sida ke arap, lalu kami dibai diau enggau sida tujuh hari. Udah nya kami datai di Rome. Lebuh sida ke arap di Rome ninga pasal kami, sida datai nyentuk ngagai Pasar Apius enggau Tiga Buah Rumah Numpang, deka ngambat kami. Lebuh Paul meda sida, iya meri terima kasih ngagai Allah Taala, lalu berasai diperansang. Lebuh kami datai di Rome, Paul disagi diau kediri, dijaga siku soldadu. Tiga hari udah bekau kami datai, Paul lalu ngempuruka bala tuai orang Judah di nengeri nya. Lebuh sida udah begempuru magang, iya lalu bejaku ngagai sida, “Menyadi, taja pen aku nadai ngereja utai ngelaban bansa kitai, tauka ngelaban adat asal aki ini kitai, tang aku udah ditangkap di Jerusalem, lalu diserahka ngagai orang Rome. Lebuh sida udah tembu mansik aku, sida berunding deka ngelepaska aku, laban sida nadai nemu kebuah alai aku patut kena ukum bunuh. Tang lebuh orang Judah nyakal penemu nya, aku lalu ngasaika diri enda tau enda ngapil ngagai Raja Besai, taja pen aku nadai ati deka bedawaka bansa kitai. Nya meh kebuah aku minta diri betemu lalu bejaku enggau kita, laban aku ditanchang ngena rantai baka tu, ketegal pengadang kitai orang Israel.” Sida lalu nyaut iya, “Kami nadai udah nerima surat ari Judea pasal nuan, lalu bala kitai ke datai ditu pen nadai mega madahka berita, tauka bejaku jai pasal nuan. Tang kami keran deka ningaka penemu nuan, laban kami nemu, semua orang di semua endur bela bejaku ngelaban raban tu.” Lebuh sida udah nimpuh hari alai betemu enggau Paul, sida datai ngagai endur alai iya ke diau. Iya lalu nerangka pekara nya ngagai sida kenyau ari pagi nyentuk ngagai lemai, besaksika pasal Perintah Allah Taala, lalu nguji nguingka sida ngagai Jesus ngena jaku ari Adat Moses enggau ngena jaku sida nabi. Sekeda sida arapka utai ti disebut iya, tang sida ti bukai enggai arap. Nya sida enda besetuju enggau pangan diri. Lebuh sida mupuk, Paul lalu nyebut jaku tu: “Betul amat utai ti disebut Roh Kudus lebuh Iya bejaku ngena nabi Isaiah ngagai sida aki ini kitai, ‘Bejalai ngagai orang tu, lalu sebut, Kita amat mending, tang enda mereti, lalu kita amat merening, tang enda meda, laban orang tu enda tajam runding, lalu pending sida bengal, lalu sida udah nutup mata sida, ngambika sida enda meda ngena mata sida, lalu ninga ngena pending sida, lalu mereti ngena ati sida, lalu nguing ngagai Aku, lalu Aku ngeraika sida.’ Nya alai, awakka kita nemu, pesan pasal pengelepas Allah Taala udah dikirumka ngagai orang bansa bukai. Sida deka mending!” Lebuh Paul udah nyebut nya, orang Judah angkat ari endur nya, lalu bekelikuh balat amat enggau pangan diri. Paul diau dua taun ba endur ti disua iya empu, lalu iya ngelaluka semua orang ke datai ngagai iya, lalu nusui pasal Perintah Allah Taala, lalu ngajar pasal Tuhan Jesus Kristus enggau nadai belalai, sereta nadai utai nekul. Surat ari Paul, ulun Jesus Kristus, ke dikangauka nyadi rasul, lalu dipilih nusui Berita Manah Allah Taala, ti udah disemaya Allah Taala dulu kelia nengah sida nabi Iya, dalam Bup Kudus, iya nya Berita Manah pasal Anak Iya, ke ada nyadi mensia ari peturun David; lalu dikumbai Anak Allah Taala ulih Roh pengudus, laban pengangkat Jesus Kristus Tuhan kitai ari mati. Ulih Iya, Allah Taala udah meri kami pengasih enggau pengawa nyadi rasul mai semua orang bansa bukai arap sereta ngasika nama Iya, nyengkaum kita ke dikangauka nyadi nembiak Jesus Kristus. Ngagai semua kita ke dikerinduka Allah Taala di Rome, ke udah dikangauka nyadi nembiak Tuhan: Awakka Allah Taala ti Apai kitai enggau Tuhan Jesus Kristus meri kita pengasih enggau pemaik. Tang aku enda tau enda dulu meri terima kasih ngagai Allah Taala aku dalam nama Jesus Kristus, ke semua bala kita, laban pengarap kita benung ditusui di serata dunya. Laban Allah Taala, ke dipetuaika aku enggau pengabis ati aku lebuh aku nusui Berita Manah pasal Anak Iya, nemu aku endang enda ngetu ingatka kita dalam sampi aku, minta Allah Taala, ari peneka Iya Empu, ngasuh aku ulih nemuai ngagai kita, laban aku balat lelengauka kita, ngambika aku ulih bekunsika berekat Roh enggau kita, kena ngeringka kita. Utai ti ku aku nya, ngambika kitai sama diperansang ulih pengarap pangan diri, iya nya pengarap kita, enggau pengarap aku. Aku dekaka kita nemu, menyadi, aku suah udah deka nemuai ngagai kita ngambika aku ulih mai orang ari bala kita arap, baka ti udah dikereja aku ba orang bansa bukai. Tang aku seruran bisi utai nanggul. Aku bisi tanggungjawap atas semua orang, orang ke udah mansang, enggau orang ke apin mansang, orang ke bisi pelajar, enggau orang ke nadai pelajar. Nya kebuah aku keran mega deka nusui Berita Manah ngagai kita ke diau di Rome. Laban aku enda malu ke Berita Manah, laban nya kuasa Allah Taala kena nyelamatka genap iku orang ke arap, keterubah orang Judah, lalu mega orang bansa bukai. Laban Berita Manah mandangka chara Allah Taala ngasuh orang bebaik enggau Iya, iya nya nengah pengarap kenyau ari pun datai ke ujung. Munyi ti ditulis, “Orang ke lurus deka idup ngena pengarap. Laban pengeringat Allah Taala dipandangka ari serega ngelaban semua dosa enggau penyai mensia ti nagang sida nemu pemendar. Laban utai ti patut ditemu sida pasal Allah Taala, endang nyata ba sida, laban Allah Taala udah ngayanka utai nya ngagai sida. Kenyau ari penumbuh dunya, kuasa Allah Taala ti meruan belama iya enggau kualiti Iya ti enda ulih dipeda, udah ditemu sereta dipeda mensia ari utai ti digaga Iya. Nya alai sida nadai kebuah enda nemu; laban taja pen sida nemu Allah Taala, tang sida enda ngemesaika Iya nyadika Allah Taala sida, tauka meri terima kasih ngagai Iya, tang sida berundingka utai ti nadai guna, lalu runding sida mapap sereta penuh laban pemetang. Sida ngumbai diri bepenemu-dalam, tang sida beli, lalu sida nyilih mulia Allah Taala ti idup belama iya, enggau engkeramba ti digaga neladan gamal mensia ti enda ulih idup belama iya, tauka neladan gamal burung, tauka jelu, tauka ular. Nya alai, Allah Taala nejuka sida ngereja ulah ti kamah ti dikinginka sida, ngambika sida ngamahka tubuh diri enggau pangan diri, laban sida nyilih pemendar pasal Allah Taala enggau pemula, lalu nyembah sereta betuaika utai ti digaga Allah Taala, ukai nyembah Allah Taala Empu ke ngaga semua utai lalu patut dipuji belama iya! Amin. Nya kebuah Allah Taala nejuka sida nurutka pengingin sida ti jai. Indu beleman enggau indu; lalu baka nya mega lelaki enggai beleman enggau indu. Lelaki tetengukka lelaki, lalu sida enda nemu malu beleman enggau orang ke sama lelaki baka sida empu, lalu sida nerima ukum ba tubuh sida empu ketegal penyalah sida. Nyadi laban sida ngumbai diri tau enda ibuh nemu Allah Taala, nya alai Iya nejuka sida diperintah runding ti jai, ngambika sida ngereja utai ti enda patut dikereja sida. Sida penuh laban genap macham penyalah, penyai, pengamu, ati ti begedika orang. Sida kepapas, munuh orang, belaya, ngelakar, bedendam, bejakuka orang, bejai orang, begedika Allah Taala, nadai nemu bebasaka orang, sumbung, temegah, ngaga penyai, ngelaban apai indai, beli, enda tetap ati, nadai nemu berundingka orang, nadai nemu kasihka orang. Sida nemu adat Allah Taala endang madahka orang ke ngereja utai nya patut dibunuh, tang sida ukai semina ngereja utai nya aja, tang sida mega meransang orang bukai ngereja utai nya. Nya alai, enda milih sapa-sapa kita nya, kita nadai kebuah ngakim pangan diri, laban lebuh kita ngakim orang, kita ngukum diri empu, laban kita ke ngakim orang, mega ngereja utai ti dikereja sida. Ku kita, “Kitai endang nemu, ukum ti diberi Allah Taala ngagai orang ke ngereja utai nya, endang beduduk ba pemendar.” Enda milih sapa-sapa kita nya, kati kita ngumbai diri ulih nyeliahka ukum Allah Taala ketegal kita ngakim orang ke ngereja utai nya, tang kita empu ngereja utai nya baka sida? Tauka kita ngeleseka pemesai penelap Allah Taala, pengetan enggau pengeliat ati Iya? Kati kita enda nemu, Iya nelap enggau kita laban Iya dekaka kita nesal ati ke dosa kita? Tang laban kita kieh lalu enggai nesal ati, kita nugungka ukum ke diri empu lebuh Hari Pechara, lebuh pengelurus ukum Allah Taala dipandangka. Laban Iya deka ngupah orang nitihka utai ti dikereja sida siku-siku. Orang ke liat ati ngereja pemadas, lalu ngiga mulia, basa enggau pengidup ti meruan, deka diberi Iya pengidup ti meruan belama iya. Tang orang ke semina berundingka diri empu aja, lalu enda ngasika pemendar, tang ngasika penyai, deka natka pengeringat enggau pemedis ati Allah Taala. Pemerinsa enggau penusah deka ditatka semua orang ke ngereja penyai, keterubah orang Judah, lalu mega orang bansa bukai, tang mulia, basa enggau pemaik deka diberi ngagai genap iku orang ke ngereja pemadas, keterubah orang Judah, lalu mega orang bansa bukai. Laban Allah Taala enda bepilih mata. Semua orang ke bedosa ari luar Adat, deka mati ari luar Adat, lalu semua orang ke bedosa di baruh Adat, deka diakim Adat. Laban ukai orang ke mendingka Adat ke dikumbai Allah Taala lurus, tang orang ke ngasika Adat. Orang bansa bukai nadai ngembuan Adat; tang tiap kali sida ngereja utai ti diletak Adat, nya nyadika adat sida, taja pen sida nadai ngembuan Adat. Pendiau sida nunjukka utai ti disebut Adat bisi ditulis dalam ati sida. Lalu ati sida ti beresi mega madahka nya; lalu sida charut runding, kadang-kadang ngumbai diri udah ngereja penyalah, lalu kadang-kadang ngumbai diri nadai udah ngereja penyalah lebuh hari nya datai, nitihka Berita Manah ti ditusui aku, lebuh Allah Taala, ulih Jesus Kristus, ngakim resia runding semua mensia. Tang enti kita ngumbai diri orang Judah, lalu manggaika diri ba Adat, lalu temegahka kaul kita enggau Allah Taala lalu nemu peneka Iya, lalu nemu ngira utai ti manah laban kita diajar pasal Adat, lalu enti kita nemu diri nyadi malin ke orang ke buta, nyadi penampak ke orang ke diau dalam pemetang, nyadi pengajar ke orang ke beli, enggau nyadi pengajar ke orang ke mit, laban Adat kita ngembuan semua penemu enggau pemendar, lalu udah nya kita ngajar orang bukai, kati kita enda ngajar diri empu? Kita ngajar orang, enda nyagi orang ngenchuri, kati kita ngenchuri? Kita ke enda nyagi orang butang, kati kita butang? Kita ke begedika engkeramba, kati kita ngerumpak rumah sembiang engkeramba? Kita ke temegahka Adat, kati kita ngelanggar Adat lalu ngeleseka Allah Taala? Laban endang udah ditulis, “Nama Allah Taala dikeleseka orang bansa bukai laban kita.” Betutus endang bisi reti ba kita enti kita ngasika Adat, tang enti kita ngelanggar Adat, tutus nya nadai guna. Nya alai, enti orang bansa bukai ke enda ditutus, ngasika Adat, enda ka Allah Taala deka ngira iya sebaka enggau orang ke udah ditutus? Nya alai orang bansa bukai ke ngasika Adat deka ngumbai kita orang Judah, ke bisi Adat sereta udah ditutus, salah laban kita ngelanggar Adat. Laban sapa orang Judah ke bendar, ke amat udah ditutus? Orang Judah ke bendar nya ukai orang ke semina ditutus ba batang tubuh. Orang Judah ke bendar nya orang ke ngaku diri orang Judah dalam ati iya. Lalu tutus ti bendar nya tutus dalam ati ukai ba batang tubuh. Tu pekara roh, ukai pekara tubuh. Orang ke baka nya ukai nerima puji ari mensia, tang ari Allah Taala. Enti pia, nama penguntung ke orang Judah? Tauka, nama guna betutus? Mayuh penguntung! Kesatu, orang Judah udah diberi pesan Allah Taala. Tang kati enti sekeda orang Judah enda tetap ati? Kati nya tau ngasuh Allah Taala enda tetap ati? Enda! Taja pen semua mensia bula, tang Allah Taala enda bula, munyi ti ditulis, “Ngambika Nuan ditemu lurus lebuh Nuan bejaku, lalu menang lebuh Nuan diakim.” Tang enti penyai kitai nunjukka pengelurus Allah Taala, baka ni ku jalai kitai bejaku? Kati kitai tau ngumbai Allah Taala enda lurus laban Iya ringat ngagai kitai? (Aku bejaku ngena chara mensia.) Enda tau! Laban enti Iya enda lurus, baka ni ku Iya ulih ngakim dunya? Tang enti pemula aku ngasuh pemendar pasal Allah Taala nyata agi, ke mulia nama Iya, nama kebuah aku agi dikumbai bedosa? Lalu nama kebuah enda nyebut -- sekeda orang betenah ngumbai kami bisi nyebut tu -- “Aram kitai ngereja penyai ngambika pemadas datai”? Awakka sida diukum. Nama deh? Kati kitai manah agi? Enda! Laban aku udah madah, orang Judah enggau orang bansa bukai endang di baruh kuasa dosa, munyi ti udah ditulis: “Nadai siku ke lurus, siku pen nadai, nadai siku ke mereti, nadai siku ke ngiga Allah Taala. Semua bela udah limpang magang. Semua sida nadai guna magang. Nadai siku ke ngereja utai ti badas, siku pen nadai. Nyawa sida merangap baka lubang kubur ti enda ditutup. Sida nipu orang ngena dilah sida. Rachun liur ular ti bisa di baruh bibir mulut sida. Nyawa sida penuh laban jaku sumpah enggau pemenchi. Sida jampat deka munuh. Sida ngerusak sereta ngemerinsa, lalu sida nadai nemu jalai pemaik. Sida enda nangika Allah Taala.” Diatu baru kitai nemu, semua utai ti disebut Adat endang ditujuka magang ngagai orang ke di baruh Adat, ngambika semua mulut badu agi bejaku, lalu semua dunya diakim Allah Taala. Laban nadai siku ke lurus di mua Allah Taala ketegal nitihka Adat, laban Adat semina ngasuh kitai nemu pasal dosa. Tang diatu pengelurus Allah Taala udah dipandangka, ari luar Adat, lalu Adat enggau sida nabi besaksika pasal pengelurus nya. Pengelurus ti ari Allah Taala nya datai ulih pengarap ke Jesus Kristus, ngagai semua orang ke arap. Laban semua mensia nadai bida ari pangan diri, laban semua bela udah bedosa magang lalu jauh ari mulia Allah Taala. Diatu sida digaga lurus ulih pengasih ti diberi Iya pechuma, lebuh sida ditebus Jesus Kristus. Allah Taala nyerahka Iya nyadika genselan kena muai dosa, ulih darah Iya, ti diterima ngena pengarap. Allah Taala ngereja nya kena Iya mandangka pengelurus Iya, laban ulih pengeliat ati Iya, Iya enda ngukum dosa ti udah dikereja dulu ari nya. Iya ngereja nya diatu kena Iya nunjukka Diri amat lurus, lalu ngaga orang ke arapka Jesus Kristus, nyadi lurus. Enti pia, nama utai dikemegahka kitai? Nadai! Laban kitai ngasika Adat? Ukai, tang laban adat pengarap. Laban kitai nemu, orang digaga lurus ulih pengarap, ukai laban iya ngasika Adat. Kati Allah Taala nya semina ke orang Judah aja? Kati Iya ukai Allah Taala ke orang bansa bukai mega? Iya mega Allah Taala ke orang bansa bukai, laban Allah Taala semina siku aja, lalu Iya deka ngaga orang Judah enggau orang bansa bukai lurus, ulih pengarap siti nya aja. Enti pia, kati kitai muai Adat laban kitai bisi pengarap tu? Enda! Kitai ngeringka Adat. Enti pia, baka ni ku kitai bejakuka pasal Abraham ke nurunka bansa kitai? Laban enti Abraham udah digaga lurus ulih pengawa ti dikereja iya, iya bisi utai ti tau dikemegahka iya, tang ukai di mua Allah Taala. Laban nama utai ti disebut Bup Kudus? “Abraham arapka Allah Taala, lalu ketegal nya, Allah Taala ngumbai iya lurus.” Ba orang ke bekereja, gaji ukai dikumbai pemeri, tang upah. Tang orang ke enda ngereja pengawa, tang manggaika pengarap iya ba Allah Taala ke ngaga orang ke jai nyadi lurus, orang nya deka dikumbai lurus ketegal pengarap iya. Nya meh gaya utai ti disebut David lebuh iya merekatka orang ke dikumbai Allah Taala lurus, enda ngira utai ti dikereja orang nya. Ku iya, “Beberekat meh orang ke udah diampun ari penyalah sida, lalu dosa sida dilamun. Beberekat meh orang ke bempu dosa ti enda dikingatka Tuhan!” Kati berekat nya semina diberi ngagai orang ke udah ditutus, tauka diberi mega ngagai orang ke enda ditutus? Kami udah madahka Abraham dikumbai lurus ketegal pengarap iya. Kemaya Abraham dikumbai lurus? Sebedau tauka udah bekau iya ditutus? Iya dikumbai lurus ukai lebuh iya udah ditutus, tang sebedau iya ditutus. Iya ditutus dudi agi ari nya, lalu tutus nya kena nanggam pengelurus iya ketegal pengarap iya lebuh iya apin ditutus. Nya alai Abraham nyadika apai semua orang ke arap, ke dikumbai Allah Taala lurus ketegal pengarap, taja pen sida enda ditutus. Lalu Abraham mega nyadi apai ke orang ke ditutus, ke ukai semina ditutus aja, tang idup neladan pengarap ti dikembuan apai kitai Abraham sebedau iya ditutus. Laban semaya ti madahka Abraham deka bempu dunya ukai datai ngagai iya tauka ngagai peturun iya ulih Adat, tang ulih pengelurus ti datai ulih pengarap. Laban enti waris nya diberi ngagai orang ke nitihka Adat, reti nya, pengarap nadai reti, lalu semaya nya mega nadai guna. Laban Adat mai pengeringat Allah Taala. Tang enti Adat nadai, penyalah mega nadai. Nya alai semaya nya bepanggai ba pengarap, ngambika semaya nya beduduk ba pengasih lalu dijamin deka diberi ngagai semua peturun Abraham, ukai semina ngagai orang ke nitihka Adat, tang mega ngagai orang ke bisi pengarap baka enggi Abraham, laban iya apai semua kitai, munyi ti udah ditulis, “Aku udah ngaga nuan nyadi apai ke mayuh bengkah bansa.” Nya meh jalai Allah Taala ti dikarapka Abraham ngaga semaya Iya enggau Abraham. Iya nya meh Allah Taala ke ngangkatka orang ari mati, ke ngasuh semua utai ti nadai, nyadi bisi. Abraham arap lalu andal ati, lalu iya nyadi Apai ke mayuh bengkah bansa, munyi ti udah dipadahka ngagai iya, “Baka nya meh pemayuh peturun nuan.” Pengarap iya enda lemi lebuh iya berundingka tubuh diri ti nyau deka mati, (laban umur iya kira seratus taun), tauka lebuh iya berundingka Sarah ke mandul. Iya nadai kakang mimit arapka semaya Allah Taala, tang mansang kering sekering dalam pengarap lalu ngemuliaka Allah Taala, laban iya nemu Allah Taala ulih ngereja utai ti udah disemaya Iya. Nya alai ketegal pengarap iya, “Abraham dikumbai lurus.” Nyadi leka jaku “dikumbai lurus” ukai semina ditulis ke Abraham aja, tang ke kitai mega. Kitai deka dikumbai lurus enti kitai arapka Allah Taala udah ngangkatka Jesus Tuhan kitai ari mati. Iya udah dibunuh ketegal dosa kitai, lalu udah diangkatka ari mati ngambika kitai digaga lurus di mua Allah Taala. Nya alai, laban kitai digaga lurus ulih pengarap, kitai diau dalam pemaik enggau Allah Taala ulih Jesus Kristus Tuhan kitai. Ulih Iya kitai udah ulih datai ngagai pengasih ti alai kitai bediri diatu, lalu kitai deka temegahka pengadang kitai ke deka enggau bempu mulia Allah Taala. Lalu ukai semina nya aja, tang kitai mega deka temegahka diri ke natka pemerinsa, laban kitai nemu pemerinsa deka ngadaka ati ti tan, lalu ati ti tan deka ngadaka perangai ti manah, lalu perangai ti manah deka ngadaka pengadang, lalu pengadang enda ngelebuka kitai, laban pengerindu Allah Taala udah dituang ke dalam ati kitai ulih Roh Kudus ke udah diberi ngagai kitai. Laban lebuh kitai agi lemi, ba maya ti patut, Kristus mati ke orang ke jai. Iya ti bendar, jarang orang deka mati ngarika orang ke lurus. Nyangka orang berani mati ngarika orang ke manah. Tang Allah Taala udah ngayanka pengerindu Iya ke kitai, iya nya lebuh kitai agi nyadi orang ke bedosa, Kristus mati ngarika kitai! Nya alai, laban kitai diatu udah digaga lurus ulih darah Kristus, tentu lebih agi ga kitai deka diselamatka ulih Iya ari pengeringat Allah Taala! Laban enti kitai, lebuh kitai agi nyadi munsuh Allah Taala, dibai bebaik enggau Iya ulih pemati Anak Iya, tentu lebih agi ga kitai deka diselamatka ulih nyawa Iya lebuh kitai udah dibai bebaik enggau Iya. Tang ukai semina nya aja; tang kitai mega rami gaga ati ke utai ti udah dikereja Allah Taala ulih Jesus Kristus Tuhan kitai, laban Iya udah mai kitai bebaik enggau Allah Taala. Nya alai, baka dosa ti datai ngagai dunya nengah orang siku, lalu pemati datai laban dosa, nya alai pemati ngelekai ngagai semua mensia, laban semua bela udah bedosa. Iya ti bendar, dosa endang udah bisi di dunya sebedau Adat diberi, tang dosa nadai kena itung laban Adat apin bisi. Tang taja pia, pemati endang udah merintah kenyau ari Adam nyentuk ngagai maya Moses, nyengkaum orang ke bempu dosa ti enda sebaka enggau penyalah Adam, ti ngambarka gaya orang siku ke deka datai. Tang pemeri ti diberi pechuma nya enda baka dosa Adam. Laban enti mayuh orang mati ketegal dosa orang siku nya, tentu mayuh agi ga pengasih Allah Taala enggau pemeri ti diberi pechuma deka diberi ngagai orang mayuh, ulih orang siku, iya nya Jesus Kristus. Lalu pemeri ti diberi pechuma nya enda baka dosa orang siku nya. Laban atur ti diberi udah bekau dosa siti nya nyadi, mai ukum, tang pemeri ti diberi pechuma udah bekau mayuh dosa nyadi, mai pengelurus. Enti ketegal dosa orang siku, pemati merintah ulih orang siku nya, tentu lebih agi ga orang ke nerima pengasih enggau pengelurus ti diberi pechuma deka merintah dalam pengidup tu, ulih orang siku, iya nya Jesus Kristus. Nya alai, baka dosa orang siku ti mai ukum ngagai semua mensia, baka nya mega pengawa ti lurus ti dikereja orang siku deka mai pengelurus enggau pengidup ngagai semua mensia. Laban baka orang siku ke enda ngasi nya mai mayuh orang bedosa, baka nya mega mayuh orang deka digaga lurus laban orang siku ngasi. Tang Adat datai, lalu tu ngasuh penyalah betambah; tang lebuh dosa betambah, pengasih Allah Taala betambah mayuh agi, ngambika, baka dosa ti merintah ngena pemati, baka nya mega pengasih merintah ngena pengelurus lalu mai ngagai pengidup ti meruan belama iya, ulih Jesus Kristus Tuhan kitai. Nya alai, baka ni ku jalai kitai bejaku? Kati kitai majak bedosa, ngambika pengasih nambah-menambah? Enda! Baka ni ku kitai ke udah mati ke dosa, tau majak diau dalam dosa? Kati kita enda nemu, semua kitai ke udah dibaptisa ke dalam Jesus Kristus, udah mega dibaptisa ke dalam pemati Iya? Nya alai, kitai udah dikuburka sama enggau Iya laban kitai udah dibaptisa ke dalam pemati Iya, ngambika baka Kristus ke diangkatka ari pemati ulih mulia Apai, baka nya mega kitai deka idup dalam pengidup ti baru. Laban enti kitai udah begempung enggau Iya dalam pemati Iya, kitai tetap mega deka begempung enggau Iya dalam pengangkat Iya ari mati. Kitai nemu, pendiau kitai ti lama udah diregang sama enggau Iya, ngambika tubuh ti bedosa dirusak, lalu kitai enda agi nyadi ulun dosa. Laban barang sapa mati, dilepaska ari dosa. Tang enti kitai udah mati enggau Kristus, kitai mega arapka diri deka idup enggau Iya. Kitai nemu, Kristus ke diangkatka ari mati, enda agi mati. Pemati nadai agi kuasa atas Iya. Pemati ti ditatka Iya nya pemati ke dosa, sekali aja, tang pengidup ti diasaika Iya diatu nya pengidup Iya ke Allah Taala. Nya alai kita enda tau enda ngumbai diri mati ke dosa, lalu idup ke Allah Taala dalam Jesus Kristus. Nya alai, anang nejuka dosa merintah tubuh kita, ti ngasuh kita ngasika pengingin tubuh. Anang agi nyerahka tubuh kita ngagai dosa, nyadika senyata kena ngereja penyai, tang serahka diri ngagai Allah Taala baka orang ke udah dibai ari pemati ngagai pengidup, lalu serahka tubuh kita ngagai Allah Taala nyadika senyata kena ngereja pengelurus. Laban dosa nadai agi merintah kita, laban kita ukai di baruh Adat, tang di baruh pengasih. Nama deh? Kati patut kitai bedosa laban kitai ukai di baruh Adat, tang di baruh pengasih? Enda tau sekali-kali! Kati kita enda nemu, enti kita nyerahka diri ngagai orang ngambika kita ngasika iya baka ulun, kita nyadi ulun orang ke dikasika kita, nemuka kita nyadi ulun dosa ti mai ngagai pemati, tauka ngasika Allah Taala ti mai ngagai pengelurus? Tang terima kasih ngagai Allah Taala, laban taja pen kita suba udah nyadi ulun dosa, tang kita, enggau pengabis ati kita, udah ngasika ajar ti bendar ti udah diberi ngagai kita, lalu laban kita udah dilepaska ari dosa, kita diatu udah nyadi ulun pengelurus. Aku bejaku ngena penemu mensia, laban kita lemi. Laban baka kita suba ke udah nyerahka tubuh kita nyadika ulun pengamah, sereta majak balat-sebalat nyadika ulun penyai, baka nya mega kita diatu enda tau enda nyerahka tubuh kita nyadika ulun pengelurus, ngambika kita nyadi kudus. Lebuh kita nyadi ulun dosa, kita enda diperintah pengelurus. Tang nama penguntung kita suba, lebuh kita ngereja utai ti dikemaluka kita diatu? Semua utai nya ngujung ngagai pemati magang! Tang laban kita diatu udah dilepaska ari dosa, lalu nyadi ulun Allah Taala, penguntung kita nya pengudus, ti ngujung ngagai pengidup ti meruan belama iya. Laban upah dosa nya pemati, tang pemeri ti diberi Allah Taala pechuma nya pengidup ti meruan belama iya dalam Jesus Kristus Tuhan kitai. Kati kita enda nemu, menyadi–aku bejaku ngagai orang ke nemu Adat–Adat semina bekuasa atas orang lebuh orang nya agi idup? Ambika banding, indu ke bisi laki, ditanchang adat ngagai laki iya, seagi-agi laki iya idup; tang enti laki iya mati, iya dilepaska ari adat ti nanchang iya ngagai laki iya. Lalu iya deka dikumbai butang enti iya diau enggau lelaki bukai lebuh laki iya empu agi idup. Tang enti laki iya mati, iya dilepaska ari tanchang adat nya, lalu enti iya belaki baru, iya enda butang. Baka nya mega kita, menyadi. Kita udah mati ke Adat, laban kita diatu udah nyadi raban tubuh Kristus, ngambika kita seraban enggau pangan diri, diempu Iya ke udah diangkatka idup baru ari mati, ngambika kitai bebuah ke Allah Taala. Lebuh kitai idup dalam tubuh kitai tu, pengingin kitai ti bedosa, ti disungkak Adat, mengkang bekereja dalam tubuh kitai, lalu ngeluarka buah ke pemati. Tang diatu kitai udah dilepaska ari Adat, mati ari utai ti udah nanchang kitai suba, ngambika kitai enda agi nyadi ulun Adat ti lama udah ditulis, tang nitihka jalai ti baru ti diberi Roh Kudus. Enti pia, baka ni ku jalai kitai bejaku? Kati kitai ngumbai Adat nya dosa? Enda! Enti nadai Adat, aku tentu enda nemu utai ti dikumbai dosa. Aku tentu enda nemu reti utai ti dikumbai inginka utai orang, enti Adat nadai udah nyebut, “Anang inginka utai orang.” Tang dosa udah tetemuka peluang dalam Adat, lalu ngaga semua macham pengingin ke utai orang dalam ati aku. Enti nadai Adat, dosa mati. Aku menya udah idup ari luar Adat, tang lebuh pesan datai, dosa idup baru lalu aku mati, lalu pesan ti besemaya deka meri pengidup, udah munuh aku. Laban dosa, lebuh iya udah tetemuka peluang dalam pesan nya, nipu aku lalu munuh aku ngena peluang nya. Nya alai, Adat endang kudus, lalu pesan endang kudus, lurus, sereta badas. Enti pia, kati utai ti badas mai pemati ngagai aku? Enda! Dosa ti mai pemati ngagai aku, ngena utai ti badas, ngambika dosa dipandangka endang amat dosa, lalu ulih pesan, dosa nya dipandangka amat utai ti pemadu jai. Laban kitai nemu, Adat endang asal ari Roh Allah Taala, tang asal aku ari mensia ke dijual nyadika ulun dosa. Aku enda nemu utai ti dikereja diri, laban aku enda ngereja utai ti dikedekaka aku, tang ngereja utai ti dipegedika aku. Nyadi enti aku ngereja utai ti dikenggaika aku, reti nya aku besetuju ngumbai Adat nya badas. Nya alai, ukai aku ke ngereja utai nya, tang dosa ti diau dalam aku. Laban aku nemu, nadai utai ti badas diau dalam aku, reti nya, dalam tubuh aku. Aku keran deka ngereja utai ti ngena, tang aku enda ulih ngereja utai nya. Laban aku ukai ngereja utai ti badas ti dikedekaka aku, tang ngereja utai ti jai ti dikenggaika aku. Enti aku ngereja utai ti dikenggaika aku, ukai aku ke ngereja utai nya, tang dosa ti diau dalam aku. Nya alai, aku nemu, tu amat adat ba aku: lebuh aku deka ngereja utai ti badas, aku lalu milih penyai. Laban dalam ati aku, aku endang rinduka adat Allah Taala, tang aku meda dalam tubuh aku, adat bukai beperang ngelaban Adat ti dalam ati aku lalu nanchang aku ngena adat dosa, ti diau dalam tubuh aku. Naka meh penusah aku tu! Sapa deka ngelepaska aku ari tubuh tu ti mai aku ngagai pemati? Aku meri terima kasih ngagai Allah Taala ulih Jesus Kristus Tuhan kitai! Nya alai, ngena runding aku, aku nyadi ulun adat Allah Taala, tang ngena tubuh aku, aku nyadi ulun adat dosa. Nya alai diatu orang ke dalam Jesus Kristus nadai kena ukum agi, laban adat Roh ti meri pengidup dalam Jesus Kristus, udah ngelepaska aku ari adat dosa enggau pemati. Laban Allah Taala udah ngereja utai ti enda ulih dikereja Adat laban mensia lemi. Nya alai Iya ngirumka Anak Iya Empu ngena gamal mensia ti bedosa, ngambika Iya muai dosa, ngukum dosa dalam tubuh mensia ngambika atur ti lurus ti dibai Adat dikamatka dalam kitai ke idup nitihka peneka Roh Kudus, ukai nitihka peneka mensia. Laban orang ke idup nitihka peneka mensia berundingka utai ti dikinginka mensia, tang orang ke idup nitihka peneka Roh Kudus berundingka utai ti dikedekaka Roh Kudus. Runding ti ditumpuka ngagai peneka mensia, nuju ngagai pemati, tang runding ti ditumpuka ngagai peneka Roh Kudus, nuju ngagai pengidup enggau pemaik. Nya kebuah runding ti ditumpuka ngagai peneka mensia, bemunsuh ngelaban Allah Taala. Iya enda nunduk ngagai adat Allah Taala, laban iya ti bendar, iya endang enda ulih nunduk ngagai Adat nya, lalu orang ke nurutka peneka mensia, enda ulih ngerinduka ati Allah Taala. Tang kita ukai idup nitihka peneka mensia. Kita idup nitihka peneka Roh, laban Roh Allah Taala diau dalam kita. Barang sapa nadai Roh Kristus, ukai nembiak Kristus. Tang enti Kristus diau dalam kita, taja pen tubuh kita mati laban dosa, Roh Allah Taala meri kita pengidup laban pengelurus. Enti Roh Iya ke udah ngangkatka Jesus ari mati, diau dalam kita, Iya ke udah ngangkatka Kristus ari mati, deka mega meri pengidup ngagai tubuh kita ti nemu mati, ulih Roh Iya ke diau dalam kita. Nya alai, menyadi, kitai berutang, tang ukai ba mensia lalu idup nitihka peneka mensia, laban enti kita idup nitihka peneka mensia, kita deka mati, tang enti, ulih Roh Kudus, kita munuh pengawa ti bedosa ti dikereja tubuh kita, kita deka idup. Laban semua orang ke diiring Roh Allah Taala endang anak Allah Taala. Laban kita ukai nerima roh ti ngasuh kita nyadi ulun penakut baru, tang kita udah nerima Roh ti ngiru kita nyadi anak Allah Taala. Lebuh kitai ngangau, “Abba! Apai!” iya nya Roh Kudus Empu ke besaksi ngagai roh kitai, madahka kitai tu anak Allah Taala, lalu enti kitai tu anak Allah Taala, kitai bempu waris Allah Taala, sama bempu waris enggau Kristus, laban enti kitai amat merinsa sama enggau Kristus, kitai deka mega dimuliaka sama enggau Iya. Aku ngira, pemerinsa ti ditatka kitai diatu, enda ulih dibandingka enggau mulia ti deka dipandangka ngagai kitai. Laban semua utai ti udah digaga Allah Taala endang balat lelengau nganti Allah Taala mandangka bala anak Iya, laban semua utai ti udah digaga Allah Taala endang ditaga nadai reti agi, ukai ulih peneka sida empu, tang ulih peneka Allah Taala ke ngaga iya baka nya, ngarapka semua utai ti udah digaga Allah Taala dilepaska ari tubuh sida ti nemu buruk, lalu bulih pengelepas ti bemulia ti endang enggi bala anak Allah Taala. Kitai nemu, semua utai ti digaga Allah Taala, bedemuh magang natka diri pedis nyentuk ngagai diatu, baka indu ke radai deka beranak. Lalu ukai semina nya aja, tang kitai empu ke terubah diberi Roh Kudus mega bedemuh dalam ati kitai nganti diri diiru nyadi anak, reti nya tubuh kitai ditebus. Kitai diselamatka laban pengadang. Utai ti dikumbai pengadang nya ukai utai ti dipeda kitai. Laban sapa ngadangka utai ti udah dipeda iya? Tang enti kitai ngadangka utai ti apin dipeda kitai, kitai nganti iya enggau ati ti liat. Baka nya meh chara Roh Kudus nulung kitai lebuh kitai lemi. Kitai enda nemu chara kitai patut besampi, tang Roh Kudus minta ngagai Allah Taala ngarika kitai ngena demuh ti enda ulih ditelah. Lalu Allah Taala, ke mansik ati kitai, nemu runding Roh Kudus, laban Roh Kudus minta ngarika nembiak Tuhan nitihka peneka Allah Taala. Kitai nemu, dalam semua utai, Allah Taala endang bekereja ke penguntung orang ke rinduka Iya, ke dikangauka Iya nitihka juluk ati Iya. Laban orang ke udah dikelala Allah Taala kenyau ari pun, mega diletak Iya nyadi sebaka enggau Anak Iya, ngambika Anak Iya nyadi Aka Tuai ke sida menyadi Iya dalam ruang bilik ti besai nya. Lalu orang ke udah diletak Iya nyadi sebaka enggau Anak Iya, mega dikangauka Iya; lalu orang ke dikangauka Iya mega digaga Iya lurus; lalu orang ke digaga Iya lurus, mega diberi Iya mulia. Enti pia, baka ni ku jalai kitai bejakuka pasal utai tu? Enti Allah Taala setanah enggau kitai, sapa ulih ngelaban kitai? Allah Taala enda ngalau Anak Iya Empu, tang nyerahka Iya ke kitai semua. Enda ka Iya enggau Jesus Kristus deka mega meri kitai semua utai bukai? Sapa ulih bedawaka orang ke udah dipilih Allah Taala? Allah Taala Empu ke ngumbai kitai nadai penyalah! Sapa ulih ngukum kitai? Jesus Kristus ke udah mati, ke udah diangkatka idup baru, ke duduk muak ari kanan Allah Taala, ke deka bejaku ngarika kitai. Sapa ulih nyeraraka kitai ari pengerindu Kristus? Kati penusah, tauka pemedis, tauka pemerinsa, tauka lapar pungkang, tauka penyeranta, tauka utai ti tau nganu nyawa, tauka pedang, ulih nyeraraka kitai ari pengerindu Kristus? Munyi ti udah ditulis, “Ketegal Nuan meh kami dibunuh sepemanjai hari. Kami tu baka bedus ti deka disayat.” Nadai! Dalam semua utai nya kitai lebih ari pemenang, ulih Iya ke rinduka kitai! Laban aku nemu, nadai utai, nemuka pemati, tauka pengidup, tauka melikat, tauka bala pemerintah, tauka utai ti diatu, tauka utai ti jemah ila, tauka kuasa, tauka dunya ti di atas enggau dunya ti di baruh, tauka semua utai bukai ti udah digaga Allah Taala, ulih nyeraraka kitai ari pengerindu Allah Taala dalam Jesus Kristus Tuhan kitai. Aku bejakuka pasal utai ti bendar dalam Kristus. Aku enda bula. Ati aku ti beresi diiring Roh Kudus lebuh aku besaksi madahka penyinu enggau penusah ati aku. Laban manah agi aku kena sumpah lalu diseraraka ari Kristus, ketegal bansa aku empu, ketegal kaban belayan aku empu. Sida nya orang Israel, ke diiru nyadi anak Allah Taala, ke bempu mulia, sempekat, ke diberi Adat, diberi hak nyembah Allah Taala, enggau diberi semaya. Sida nya peturun orang Hebrew ke tebilang nama, ke nyadi aki ini Kristus lebuh Iya nyadi mensia, ke endang Allah Taala ti bekuasa atas semua. Awakka Allah Taala dipuji belama iya. Amin. Ukai reti nya semaya Allah Taala udah puntan. Laban ukai semua orang Israel nya orang Israel ti bendar. Lalu ukai semua peturun Abraham nya peturun Abraham ti bendar; tang “Semina peturun ari Isak aja deka dikumbai peturun nuan.” Reti nya, ukai anak ke diadaka mensia ke deka nyadi nembiak Allah Taala, tang anak ke datai ari semaya aja ke deka nyadi peturun Abraham ti bendar. Laban baka tu ku utai ti disebut semaya nya: “Ba urung maya tu Aku deka datai baru, lalu Sarah deka ngadaka anak lelaki siku.” Lalu ukai semina nya aja. Utai ti sebaka enggau nya mega nyadi ba Rebekah, lebuh iya ngandungka anak iya ke besapit dua, ke aki kitai Isak. Taja pen seduai iya apin ada, tauka apin ngereja sebarang utai, nemuka utai ti badas tauka jai (ngambika juluk ati Allah Taala ti milih seduai iya, dikamatka, ukai nitihka pengawa ti dikereja mensia, tang nitihka kangau Allah Taala), Rebekah udah dipadahka munyi tu: “Iya ke tuai deka bekereja ke iya ti biak.” Munyi ti ditulis, “Aku rinduka Jakop, tang Aku begedika Esau.” Enti pia, baka ni ku jalai kitai bejaku? Kati Allah Taala enda lurus? Ukai! Laban ku Iya nyebut ngagai Moses, “Aku deka kasihka orang ke dikasihka Aku, lalu Aku deka sinu ati ke orang ke dikesinuka Aku.” Nya alai, utai nya ukai bepanggai ba peneka tauka ba pengawa mensia, tang bepanggai ba pengasih Allah Taala. Laban ku Bup Kudus nyebut ngagai raja menua Ejip, “Aku udah ngaga nuan nyadi raja kena Aku mandangka kuasa Aku, ngambika nama Aku dipadahka di serata dunya.” Nya alai, Allah Taala kasihka sebarang orang ke dikedekaka Iya, lalu Iya ngasuh orang kieh ati, sebarang orang ti patut ku Iya. Kita nyangka deka nyebut ngagai aku, “Enti pia, nama kebuah Allah Taala agi begigaka penyalah kitai? Laban sapa ulih nyakal peneka Iya?” Tang sapa nuan nya, ke semina mensia aja, ke berani bekelikuh ngelaban Allah Taala? Kati utai ti ditempa deka bejaku ngagai orang ke nempa iya, “Nama kebuah nuan ngaga aku baka tu?” Kati tukang periuk nadai kuasa atas tanah liat, lalu ngaga ari tanah liat nya sigi periuk ti dikena lebuh maya rami, lalu sigi dikena tiap hari? Kati enti Allah Taala, ke lama udah sabar enggau utai ti digaga Iya, deka mandangka pengeringat Iya lalu ngayanka kuasa Iya, ngagai utai ti nyungkak Iya ringat, ti deka dirusak Iya? Lalu kati enti Iya ngereja nya kena Iya mandangka pemesai mulia Iya ngagai orang ke dikasihka Iya, ke udah disediaka Iya nerima mulia ari Iya, nyengkaum kitai ke udah dikangauka Iya, ukai semina ari bansa orang Judah aja, tang mega ari orang bansa bukai? Munyi ti disebut Iya dalam bup Hosea: “Orang ke ukai nembiak Aku deka dikumbai Aku ‘Nembiak Aku.’ Lalu orang ke enda dikerinduka Aku deka dikumbai Aku ‘Orang ke dikerinduka Aku.’ “Lalu ba endur alai orang dipadahka, ‘Kita ukai nembiak Aku,’ dia sida deka dikumbai ‘anak Allah Taala ti idup.’ ” Lalu ku Isaiah bejaku enggau nyawa ti inggar pasal orang Israel: “Taja pen orang Israel ngemayuh pasir ti ba tebing tasik, semina teda sida aja deka diselamatka, laban Tuhan deka lengkas ngukum dunya.” Munyi ti udah dipadahka Isaiah, “Enti Tuhan ti Pemadu Bekuasa enda ngalau sekeda peturun ke kitai, kitai tentu udah nyadi baka Sodom enggau Gomorah.” Enti pia, baka ni ku jalai kitai bejaku? Orang bansa bukai ke enda begigaka pengelurus, udah bulih pengelurus ulih pengarap; tang orang Israel ke begigaka pengelurus beduduk ba Adat, enda ulih nitihka Adat nya. Nama kebuah? Laban sida enda ngiga pengelurus beduduk ba pengarap, tang beduduk ba utai ti dikereja sida. Sida udah tesangkut ba “batu ti ngasuh tesangkut,” munyi ti udah ditulis, “Peda kita, Aku ngengkahka sigi batu di Sion, batu ti deka ngasuh orang tesangkut, batu ti besai ti deka ngasuh sida rebah, lalu barang sapa arapka Iya, enda malu.” Menyadi, utai ti dikinginka ati aku, enggau sampi aku ngagai Allah Taala ke sida, iya nya, minta sida diselamatka. Aku berani besaksi madahka sida balat angkunka Allah Taala, tang pengangkun sida ke Iya ukai beduduk ba penemu ti bendar, laban sida enda nemu pengelurus ti datai ari Allah Taala. Nya alai sida numbuhka penemu ke diri empu lalu enda nunduk ngagai pengelurus Allah Taala. Laban Kristus mai pengujung ngagai Adat, ngambika genap iku orang digaga lurus ulih pengarap sida ke Iya. Moses bisi nuliska pasal pengelurus ti datai ari Adat, ku iya, “Orang ke ngiga pengelurus beduduk ba Adat, enda tau enda idup nitihka Adat.” Tang pengelurus ti datai ari pengarap madah: “Anang nyebut dalam ati kita, ‘Sapa deka niki ke serega?’ (reti nya, mai Kristus nurun). “Tauka ‘Sapa deka nurun ngagai dunya ti di baruh?’ ” (reti nya, ngangkatka Kristus ari mati). Utai ti disebut Bup Kudus nya munyi tu: “Jaku nya semak kita, ba mulut kita enggau dalam ati kita.” Nya meh pesan pengarap ti dipadahka kami, laban enti kita ngaku ngena mulut kita Jesus nya Tuhan, lalu dalam ati kita arapka Allah Taala udah ngangkatka Iya ari mati, kita deka diselamatka. Laban kita arap ngena ati kita, lalu digaga lurus, lalu kita ngaku ngena mulut kita, lalu diselamatka. Munyi ti disebut Bup Kudus, “Orang ke arapka Iya sigi enda asa ngapa.” Laban orang Judah enggau orang bansa bukai sigi nadai bida ari pangan diri; Tuhan siku nya aja ke nyadi Tuhan ke semua mensia, lalu Iya gerah mudah meri berekat ngagai semua orang ke ngangauka Iya. Laban, “Genap iku orang ke ngangauka nama Tuhan, deka diselamatka.” Tang baka ni ku orang ulih ngangauka Iya, enti sida apin arap? Lalu baka ni ku sida ulih arapka Iya, enti sida apin ninga pasal Iya? Lalu baka ni ku sida ulih ninga, enti orang nadai madahka pasal Iya ngagai sida? Lalu baka ni ku orang ulih madahka pasal Iya, enti orang nya enda diasuh? Munyi ti ditulis, “Naka meh pemanah kaki orang ke nusui Berita Manah!” Tang ukai semua sida nya udah ngasika Berita Manah, laban Isaiah bisi nyebut, “Tuhan, sapa udah arapka pesan kami?” Nya alai, pengarap datai ari ke ningaka pesan, lalu pesan didinga ari berita pasal Kristus. Tang aku nanya: kati sida nadai udah ninga? Sida endang udah ninga, laban Bup Kudus bisi nyebut, “Munyi nyawa sida udah ngelekai di serata dunya, lalu leka jaku sida udah ngelekai nyentuk ngagai ujung dunya.” Aku nanya baru: Kati orang Israel enda mereti? Orang ke terubah bejaku nya Moses, “Aku deka ngasuh kita kepapaska orang ke ukai dikumbai bansa. Aku deka ngasuh kita ringat ngena siti bansa ti beli.” Udah nya Isaiah bejaku berani agi ari nya lebuh iya nyebut, “Aku udah ditemu orang ke enda ngiga Aku. Aku udah mandangka Diri ngagai orang ke enda nanyaka Aku.” Tang ba pasal orang Israel, Iya nyebut, “Sepemanjai hari Aku ngangkatka jari Aku ngagai orang ke enda ngasi sereta ngelaban.” Nya alai aku nanya: Kati Allah Taala udah nulak nembiak Iya? Enda! Aku empu tu orang Israel, peturun Abraham, ari raban bansa Benjamin. Allah Taala enda nulak nembiak Iya, ke udah dipilih Iya kenyau ari pun. Kati kita enda nemu utai ti disebut Bup Kudus pasal Elijah, pasal iya ke bebendar besampi ngagai Allah Taala ngelaban orang Israel? Ku iya: “Tuhan, sida udah munuh bala nabi Nuan, sida udah ngeruntuhka alta Nuan. Semina aku siku aja agi tinggal, lalu sida nguji munuh aku.” Tang nama saut Allah Taala ngagai iya? “Aku udah ngalau ke Aku Empu tujuh ribu iku orang ke nadai udah besugang ngagai Baal.” Nya alai baka nya mega diatu: semina mimit aja orang agi tinggal, ke udah dipilih ulih pengasih. Tang enti sida udah dipilih ulih pengasih, reti nya sida ukai dipilih beduduk ba pengawa ti dikereja sida, laban enti sida dipilih beduduk ba pengawa ti dikereja sida, reti nya pengasih ukai pengasih. Nama deh? Orang Israel nadai bulih utai ti digiga sida. Orang ke dipilih Allah Taala bulih utai nya, tang sida ti bukai kieh, munyi ti ditulis, “Allah Taala udah meri sida roh luput, mata ti enda meda enggau pending ti enda ninga, nyentuk ngagai sehari tu.” Lalu ku David nyebut, “Awakka mija sida nyadika panjuk, nyadika perangkap, enggau nyadika ukum sida. Awakka mata sida buta, ngambika sida enda ulih meda. Lalu awakka sida bungkuk belama iya.” Nya alai aku nanya: kati sida udah tesangkut ngambika sida enda ulih angkat agi? Ukai! Tang ari penyalah sida, pengelepas udah datai ngagai orang bansa bukai, ngambika orang Israel kepapas. Enti penyalah orang Israel udah mai berekat ti besai ngagai dunya, lalu penyeranta sida dalam roh, udah mai berekat ti besai ngagai orang bansa bukai, tentu besai agi ga berekat deka datai lebuh semua orang Israel dibai magang ngagai Tuhan! Aku diatu bejaku ngagai kita ke orang bansa bukai. Seagi-agi aku nyadi rasul ke orang bansa bukai, aku deka temegahka pengawa aku, ngambika bansa aku empu kepapas, lalu ari nya, nyelamatka sekeda sida. Laban enti ari sida ke ditulak, semua dunya dibai bebaik enggau Allah Taala, namaka utai ti deka nyadi, lebuh semua sida diterima magang? Tentu pengidup ke orang ke mati! Enti roti ti keterubah nya kudus, semua tuku roti nya mega kudus. Lalu enti urat kayu nya kudus, dan kayu nya mega kudus. Tang enti sekeda dan kayu kana nya ditetak, lalu kita ke dan kayu kana ti tumbuh-diri dalam babas, dikawinka ngagai batang kana nya, ba endur alai dan nya, lalu bulih pengidup ari kayu nya, anang temegahka diri ti udah ngambi endur sida. Enti kita temegah, kingatka tu: ukai kita ke meri urat makai, tang urat ti meri kita makai. Tang kita nyangka deka nyebut, “Dan nya udah ditetak ngambika aku ulih dikawinka ngagai batang kana nya.” Nya amat. Sida udah dibuai laban sida enda arap, tang kita mengkang ba endur kita, laban kita arap. Nya alai anang sumbung ketegal nya, tang semina nangi aja. Laban enti Allah Taala enda ngalau dan ti asal, Iya pen enda mega ngalau kita. Nya alai, peratika penelap enggau penerit Allah Taala. Iya terit enggau orang ke udah rebah, tang Iya nelap enggau kita, enti kita meruan dalam penelap Iya. Tang enti kita enda, kita deka mega dibuai ari batang. Lalu enti orang Israel ngelengkaka ati sida ti enda arap, sida deka dikawinka baru ngagai endur asal sida, laban Allah Taala bisi kuasa ngawinka sida baru. Laban enti kita udah ditetak ari kayu kana ti tumbuh-diri dalam babas, lalu dikawinka ngagai batang kayu kana ti ditanam, ti enda patut ulih nyadi, tentu nyamai agi dan asal dikawinka baru ngagai batang asal sida. Aku enggai ke kita enda nemu misteri tu, menyadi, ngambika kita enda sumbung: sekeda orang Israel deka mengkang kieh datai ke semua orang bansa bukai udah sampal magang datai ngagai Allah Taala. Nya alai semua orang Israel deka diselamatka magang, munyi ti udah ditulis, “Juruselamat deka datai ari Sion Iya deka muai semua penyai ari peturun Jakop. Tu meh sempekat Aku enggau sida lebuh Aku muai dosa sida.” Ba pasal Berita Manah, orang Israel nyadi munsuh Allah Taala, ke penguntung kita. Tang ba pasal nyadi orang ke dipilih Allah Taala, sida iya dikerinduka Allah Taala, ketegal aki ini sida. Laban pemeri enggau kangau Allah Taala enda ulih diubah. Baka kita ke enda ngasi dulu menya, tang diatu kita udah bulih pengasih laban sida enda ngasi, baka nya mega sida diatu enda ngasi, ngambika ulih pengasih ti udah diayanka ngagai kita, sida mega tau nerima pengasih. Laban Allah Taala udah ngasuh semua mensia enda ngasi, ngambika Iya ulih ngayanka pengasih ngagai semua. Naka meh pemesai pengaya Allah Taala! Naka meh pemintar enggau penalam penemu Iya! Nadai orang tetemuka atur enggau jalai Iya! “Laban sapa nemu runding Tuhan? Sapa ulih ngajar Iya? “Sapa udah kala meri Iya utai, datai ke Iya nyau enda tau enda mayar utai nya?” Laban semua utai endang datai ari Iya, digaga ulih Iya, nyadika enggi Iya. Puji meh Iya belama iya! Amin. Nya alai, menyadi, ulih pengasih Allah Taala, aku minta kita nyerahka tubuh kita nyadi piring ti idup, ti kudus, ti dikerinduka Allah Taala. Nya meh jalai kita patut nyembah Iya. Anang nitihka chara dunya, tang awakka Allah Taala ngubah chara kita berunding, ngambika kita nemu peneka Iya--iya nya utai ti badas, ti ngerinduka ati Iya, ti pemadu menyana. Laban ulih pengasih ti diberi Allah Taala ngagai aku, aku bejaku ngagai genap iku kita: anang ngumbai diri pama agi ari ti patut, tang enggau ati ti baruh, peresa diri empu nitihka pemesai pengarap ti diberi Allah Taala ngagai kita siku-siku. Laban baka tubuh kitai ti mayuh perengka, lalu pengawa ti dikereja sida siti-siti endang enda sebaka, baka nya mega kitai; taja pen kitai tu mayuh, tang kitai tu nyadi siti tubuh dalam Kristus, seraban enggau pangan diri. Kitai bisi pemeri ti enda sebaka, tang nitihka pengasih ti udah diberi ngagai kitai. Enti kitai bisi pemeri kena benabi, awakka kitai benabi nitihka pemesai pengarap kitai; enti kitai bisi pemeri mela orang, awakka kitai mela orang; enti kitai bisi pemeri ngajar orang, awakka kitai ngajar orang; enti kitai bisi pemeri meransang orang, awakka kitai meransang orang; enti kitai bisi pemeri ngenjuk utai ngagai orang, awakka kitai ngenjuk utai ngagai orang enggau ati ti gerah mudah; enti kitai bisi pemeri nulung orang, awakka kitai nulung orang enggau ati ti ransing; enti kitai bisi pemeri ngayanka pengasih ngagai orang, awakka kitai ngereja nya enggau ati ti gaga. Rindu enggau pengabis ati; begedika penyai; bepegai teguh ba utai ti badas; rinduka pangan diri enggau ati ti angkun laban kita diri menyadi enggau pangan diri; awakka kita berebut ngayanka basa ngagai pangan diri. Anang lembau, seruran rajin nitihka Roh Kudus, bekereja ke Tuhan. Gaga ati ke pengadang kita, liat ati natka pemerinsa, majak besampi. Beri utai ngagai nembiak Tuhan ke suntuk, lalu sambut temuai ngagai rumah kita. Berekatka orang ke merinsaka kita; berekatka sida, anang nyumpah sida. Rami gaga enggau orang ke rami gaga, nyabak enggau orang ke nyabak. Diau bepangan enggau diri sama diri; anang ngeninggika diri, tang begulai enggau orang ke baruh ati; anang sumbung. Anang malas penyai ngena penyai, tang kereja utai ti ngena dipeda semua orang. Enti ulih, seagi-agi utai nya bepanggai ba kita, diau bebaik enggau semua orang. Menyadi, anang malas, tang awakka Allah Taala ngayanka pengeringat Iya; laban endang udah ditulis, “Aku ke malas, Aku deka mayar, ku Tuhan bejaku.” Anang. “Enti munsuh kita lapar, beri iya makai. Enti iya aus, beri iya ngirup, laban lebuh kita ngereja nya, kita nugungka bara api ba puchuk pala iya.” Anang alah laban penyai, tang alahka penyai ngena pemadas. Awakka semua orang nunduk ngagai perintah ti megai menua; laban perintah nadai tau bisi enti enda ari Allah Taala, lalu perintah ti bisi nya didudukka Allah Taala. Nya alai barang sapa ngelaban perintah, ngelaban utai ti udah didudukka Allah Taala, lalu orang ke ngelaban perintah deka diukum. Laban orang ke megai perintah ukai ngenakutka orang ke manah ulah, tang ngenakutka orang ke jai. Kati kita enggai ke diri takutka orang ke megai perintah? Enti pia, kereja utai ti badas. Nya baru kita deka nerima puji, laban orang ke megai perintah nya ulun Allah Taala, bekereja ke penguntung kita. Tang enti kita ngereja penyalah, kita patut takut, laban iya ukai bisi kuasa ngapa. Iya ulun Allah Taala ke bejalaika ukum Allah Taala ba orang ke ngereja penyalah. Nya alai, kita enda tau enda nunduk ngagai perintah, ukai semina laban kita deka nyeliahka pengeringat Allah Taala, tang laban kita beresi ati. Nya mega kebuah kita mayar chukai, laban orang ke megai perintah bekereja ke Allah Taala, bejalaika pengawa nya. Bayar ngagai sida utai ti patut dibayar kita. Bayar chukai ngagai orang ke patut alai kita mayar chukai, duit pupu ngagai orang ke patut alai kita mayar duit pupu, lalu beri basa ngagai orang ke patut dibasa kita. Anang berutang ba orang, kelimpah ari berutang pengerindu ba pangan diri, laban orang ke rinduka pangan diri, udah ngamatka Adat. Pesan ti nyebut, “Anang butang; anang munuh orang; anang ngenchuri; anang inginka utai orang,” enggau semua pesan bukai, tau disimpul ngena jaku tu, “Rinduka pangan diri baka nuan ke rinduka diri empu.” Pengerindu enda ngemediska orang. Nya alai pengerindu ngamatka Adat. Kelimpah ari nya, kita nemu, tu meh maya alai kita enda tau enda dani. Laban pengelepas diatu nyau datai semak agi ngagai kitai ari lebuh kita ke terubah arap suba. Hari nyau udah jauh malam, lalu nyau deka siang. Nya alai aram kitai muai semua pengawa pemetang, lalu ngerasukka senyata penampak; aram kitai diau menyana baka ke diau lebuh siang hari, ukai berami enda beiga-iga, ukai mabuk, ukai ngereja ulah ti kamah, ukai jai ulah, ukai belaya, ukai kepapas. Tang rasukka Tuhan Jesus Kristus, lalu anang berundingka jalai ngemuaska pengingin dosa. Sambut orang ke lemi pengarap, tang ukai laban kita deka bekelikuhka pasal runding sida. Sekeda orang ngumbai diri tau makai sebarang utai, tang orang ke lemi pengarap semina makai sayur aja. Orang ke makai sebarang utai, enda tau mechat orang ke enda, lalu orang ke enda makai sebarang utai, enda tau ngakim orang ke makai sebarang utai, laban Allah Taala udah nerima orang nya. Sapa kita nya, alai kita berani ngakim ulun orang bukai? Tuan sida empu ke deka mutuska penemu sekalika orang nya rebah tauka bediri. Lalu iya deka bediri, laban Tuhan ulih ngasuh iya bediri. Sekeda orang ngumbai hari siti besai agi ari hari ti bukai, lalu orang bukai ngumbai semua hari sebaka magang. Genap iku kitai patut mutuska penemu pasal nya ke diri empu. Orang ke ngintu hari nya, ngereja nya kena iya ngemesaika Tuhan. Orang ke makai utai, ngereja nya kena iya ngemesaika Tuhan, laban iya meri terima kasih ngagai Allah Taala; lalu orang ke enggai makai, ngereja nya kena iya ngemesaika Tuhan, lalu meri terima kasih ngagai Allah Taala. Kitai ukai idup ke diri empu, lalu kitai ukai mati ke diri empu. Enti kitai idup, kitai idup ke Tuhan, lalu enti kitai mati, kitai mati ke Tuhan. Nya alai, nemuka kitai idup tauka mati, kitai endang enggi Tuhan. Nya kebuah Kristus mati lalu angkat idup baru, ngambika Iya nyadi Tuhan ke orang ke idup enggau ke orang ke mati. Nama kebuah kita ngakim orang bukai? Lalu nama kebuah kita mechat menyadi kita? Laban semua kitai deka bediri di mua Allah Taala, lalu diakim Iya. Laban endang udah ditulis, “Laban Aku endang idup, ku Tuhan bejaku, genap iku orang deka besugang di mua Aku, lalu genap iku orang deka muji Allah Taala.” Nya alai, genap iku kitai deka madahka pasal diri empu ngagai Allah Taala. Nya alai, aram kitai badu agi ngakim pangan diri, tang mutus ati enggai sekali-kali ngereja utai ti tau ngasuh orang bukai tesangkut tauka bedosa. Laban aku diau dalam Tuhan Jesus, aku nemu, nadai pemakai ti enda tuchi. Tang pemakai nya nyadi enda tuchi ke orang, enti orang nya ngumbai iya enda tuchi. Enti menyadi nuan enda nyamai ati ketegal utai ti diempa nuan, reti nya nuan ukai ngereja utai nya beduduk ba pengerindu. Anang nejuka utai ti diempa nuan ngerusak orang, laban Kristus udah mati ngarika iya. Nya alai, anang nejuka utai ti dikumbai nuan manah, dipejai orang. Laban Perintah Allah Taala ukai pasal pemakai enggau utai ti diirup, tang pasal pengelurus, pemaik enggau pengaga dalam Roh Kudus. Orang ke bekereja ke Kristus baka nya dikerinduka Allah Taala, sereta dikerinduka mensia. Nya alai, aram kitai ngereja utai ti mai pemaik, enggau utai ti tau ngeringka pangan diri. Anang ngerusak utai ti udah dikereja Allah Taala ketegal pemakai. Semua pemakai tuchi magang, tang kitai salah enti kitai ngereja utai ti tau ngasuh orang bukai bedosa. Kitai ngereja utai ti ngena enti kitai enda makai dagin, tauka enda ngirup wain, tauka enda ngereja utai ti tau ngasuh menyadi kita bedosa. Utai ti dikarapka kita ba pasal pekara tu, nya semina entara kita enggau Allah Taala. Beberekat meh orang ke enda besalah diri empu, lebuh sida ngereja utai ti ngena ba ati sida empu! Tang orang ke kakang ati deka diukum enti sida makai, laban sida ukai ngereja nya ari pengarap, laban semua utai ti ukai datai ari pengarap, nya dosa magang. Kitai ke kering patut sabar enggau orang ke lemi, lalu ukai deka ngelantangka diri empu aja. Genap iku kitai patut ngelantangka ati pangan kitai, kena nulung sida mansang. Laban Kristus ukai datai ngelantangka Diri tang, munyi ti udah ditulis, “Jaku orang ke mechat kita, udah ninggang Aku.” Laban semua utai ti udah ditulis dulu kelia endang ditulis kena ngajar kitai, ngambika ulih pengeliat ati kitai enggau ulih peransang ari Bup Kudus, kitai bisi pengadang. Awakka Allah Taala, ke pun pengeliat ati enggau peransang, ngiring kita idup seati enggau pangan diri, nitihka teladan Jesus Kristus, ngambika semua kita ngemuliaka Allah Taala ti Apai Jesus Kristus Tuhan kitai. Nya alai, sambut pangan diri, baka Kristus ke udah nyambut kita, kena ngemuliaka Allah Taala. Laban, aku madah ngagai kita, Kristus bekereja ke orang Judah, kena mandangka Allah Taala endang tau dikarapka, ngambika Iya ngamatka semaya ti udah digaga Iya enggau aki ini sida, sereta ngambika orang bansa bukai ulih ngemuliaka Allah Taala ketegal pengasih Iya. Munyi ti udah ditulis, “Nya alai aku deka ngaku Nuan di mua orang bansa bukai, lalu belagu muji nama Nuan.” Bup Kudus mega bisi nyebut, “Rami gaga ati meh kita orang bansa bukai, sama enggau bala nembiak Tuhan!” Lalu Bup Kudus mega nyebut, “Puji meh Tuhan, semua kita orang bansa bukai, lalu awakka semua mensia muji Iya!” Lalu Isaiah mega nyebut, “Siku peturun Jesi deka datai. Iya ke angkat lalu merintah orang bansa bukai. Sida deka manggaika pengadang sida ba Iya. Awakka Allah Taala, ti pun pengadang, ngemenuhka kita enggau semua pengaga enggau pemaik ketegal pengarap kita, ngambika ulih kuasa Roh Kudus kita penuh laban pengadang. Menyadi, aku nemu kita penuh laban pemadas, ngembuan semua penemu, lalu ulih ngajar pangan diri. Tang ba pasal sekeda pekara, aku bisi udah nulis ngagai kita enggau nadai bepampul penemu, ngambika kita ingat, laban pengasih ti udah diberi Allah Taala ngagai aku, ngasuh aku bekereja ke Kristus ba orang bansa bukai, ngereja pengawa imam betusuika Berita Manah Allah Taala, ngambika orang bansa bukai nyadi pemeri ti dikerinduka Allah Taala, ti dituchi Roh Kudus. Nya alai, dalam Jesus Kristus, aku bisi kebuah temegahka pengawa ti dikereja aku ke Allah Taala. Laban aku enggai bejakuka pasal utai bukai tang semina pasal utai ti udah dikereja Kristus ngena aku, kena mai orang bansa bukai ngasika Iya, ulih jaku enggau ulih utai ti dikereja Iya, ulih kuasa kereja ajih enggau kereja ti nyelai, enggau ulih kuasa Roh Kudus. Nya alai aku udah nusui semua Berita Manah pasal Kristus berengkah ari Jerusalem nyentuk ngagai Ilirikum. Nya alai juluk ati aku endang seruran deka nusui Berita Manah, ukai ba endur alai orang bukai udah madahka pasal Kristus, enggai ke aku nirika eklisia ba pugu ti didudukka orang bukai, tang, munyi ti udah ditulis, “Orang ke nadai udah kala dipadahka pasal Iya, deka meda lalu orang ke apin kala ninga pasal Iya, deka mereti.” Nya kebuah aku suah enda ulih nemuai ngagai kita. Tang diatu, laban aku nadai agi utai dikereja di menua nya, lalu laban aku lama udah lelengauka kita, aku deka nemuai ngagai kita lebuh aku mupuk ngagai menua Spain. Laban aku endang ngarapka diri betemu enggau kita lebuh aku mansang kin, ngambika kita ulih nulung aku mupuk kin, lebuh aku udah ngelantangka diri begulai enggau kita enda lama. Tang diatu, aku deka mupuk ngagai Jerusalem, ngereja pengawa ke bala nembiak Tuhan din; laban Masedonia enggau Akaia udah gaga ati magi pemisi sida ngagai bala nembiak Tuhan ke suntuk di Jerusalem. Sida gaga ati ngereja nya. Iya ti bendar, sida berutang-budi ba orang Judah, laban enti orang Judah udah magi berekat Roh ngagai orang bansa bukai, orang bansa bukai patut mega ngena pengaya sida merekatka orang Judah. Nya alai lebuh aku udah nembuka pengawa tu, lalu udah nganjung ngagai sida semua duit ti udah digumpul, aku deka nemuai ngagai kita lebuh aku mansang ngagai menua Spain; lalu aku nemu, lebuh aku betemu enggau kita, aku deka mai semua berekat Kristus. Dalam nama Jesus Kristus, enggau ulih pengerindu Roh Kudus, aku minta kita, menyadi, sama bebendar besampi enggau aku ngagai Allah Taala, ke aku empu, ngambika aku dilepaska ari jari orang ke enda arap di menua Judea, sereta ngambika pengawa ti dikereja aku di Jerusalem diterima bala nembiak Tuhan din, ngambika, ulih peneka Allah Taala, aku ulih betemu enggau kita enggau ati ti gaga, lalu ngelantangka diri begulai enggau kita. Awakka Allah Taala, ke pun pemaik, meruan enggau kita semua. Amin. Aku ngasuh kita bekelala enggau menyadi indu kitai, Poebe, ke bekereja nyadi dikon ke eklisia di Kenkria, ngambika kita nyambut iya dalam nama Tuhan, baka ti patut dikereja ke nembiak Tuhan, lalu nulung iya enggau sebarang utai ti dipeguna iya ari kita, laban iya udah nulung mayuh orang, nyengkaum nulung aku empu. Aku ngirumka tabi basa ngagai Prisila seduai Akuila, ke sama bekereja enggau aku ke Jesus Kristus, ke udah berambunka nyawa ketegal aku. Aku enggau semua eklisia orang bansa bukai bela meri terima kasih ngagai seduai iya. Aku ngirumka tabi basa ngagai raban eklisia ke begempuru dalam rumah seduai iya. Aku meri tabi basa ngagai pangan aku Epinetus, orang ke terubah-rubah arapka Kristus di menua Asia. Aku ngirumka tabi basa ngagai Maria, ke udah bebendar amat bekereja ba bala kita. Aku ngirumka tabi basa ngagai Andronikus seduai Junia, ti kaban belayan aku empu, lalu udah sama kena jil enggau aku. Seduai tu orang ke dikelala sida rasul, lalu seduai iya dulu agi ari aku nyadi orang Kristian. Aku ngirumka tabi basa ngagai Ampliatus, pangan ke dikerinduka aku dalam Tuhan. Aku meri tabi basa mega ngagai Urbanus, ke sama gawa enggau kitai ke Kristus, enggau ngagai Stakis pangan ke dikerinduka aku. Tabi basa mega ngagai Apeles, ke udah ditemu taluk ke Kristus. Aku mega ngirumka tabi basa ngagai bala sida Aristobulus sebilik. Tabi basa mega ngagai Herodion, ke sama sebansa enggau aku empu, enggau ngagai orang Kristian ke dalam ruang bilik Narsisus. Aku ngirumka tabi basa ngagai Tripina seduai Triposa, ke bekereja ke Tuhan, enggau ngagai Persis, pangan ke dikerinduka aku, ke udah bebendar bekereja ke Tuhan. Aku ngirumka tabi basa ngagai Rupus ke landik bekereja ke Tuhan, enggau ngagai indai iya ke seruran ngintu aku baka ke ngintu anak iya empu. Aku mega ngirumka tabi basa ngagai Asinkritus, Plegon, Hermes, Patrobas, Hermas, enggau semua orang Kristian ke begulai enggau sida. Tabi basa mega ngagai Pilologus enggau Julia, ngagai Nereus enggau menyadi indu iya, ngagai Olimpas enggau ngagai semua nembiak Tuhan ke begulai enggau sida. Beri tabi pengerindu ngagai pangan diri. Semua eklisia Kristus bela ngirumka tabi basa ngagai kita. Menyadi, aku minta kita bejaga ari orang ke mai penyerekang lalu mechahka gerija, ke ngelaban ajar ti udah diajar ngagai kita. Anang begulai enggau sida! Laban orang ke baka nya ukai bekereja ke Kristus Tuhan kitai, tang bekereja nitihka pengingin sida empu. Ngena jaku ti manis enggau jaku kelangkung sida nipu orang ke enda nemu berunding. Laban taja pen semua orang udah bela ninga kita udah ngasi, datai ke ati aku empu nyau gaga ati ketegal kita, aku dekaka kita nyadi orang ke bepenemu-dalam ba pasal utai ti badas, sereta diau tuchi ba pasal utai ti jai; nya baru Allah Taala, ke pun pemaik, deka ngeredakka Sitan di baruh kaki kita enda lama da agi. Awakka pengasih Tuhan Jesus meruan enggau kita. Timoti, ke sama bekereja enggau aku, ngirumka tabi basa ngagai kita, lalu pia mega Lusius, Jason, enggau Sosipater, ke kaban belayan aku. Aku, Tertius, ke nyadi tukang tulis ke surat tu, ngirumka tabi basa ngagai kita dalam Tuhan. Gaius, ke bempu rumah ti alai aku diau enggau alai raban eklisia begempuru, ngirumka tabi basa ngagai kita. Erastus, ke nyadi tukang wang ke nengeri tu, enggau menyadi kitai Kuartus, ngirumka tabi basa ngagai kita. Awakka pengasih Jesus Kristus Tuhan kitai meruan enggau kita semua. Amin. Aram kitai ngemuliaka Allah Taala ke ulih ngeringka kita, nitihka Berita Manah ti ditusui aku enggau nitihka ajar Jesus Kristus, nitihka pemandang pasal misteri ti lama udah dilalaika dulu kelia tang diatu, ari asuh Allah Taala ti meruan belama iya, udah diayanka, lalu ulih jaku ti ditulis sida nabi, dipadahka ngagai semua orang bansa bukai ngambika semua orang tau arap lalu ngasi. Ngagai Allah Taala ti siku aja, ke nemu semua utai, beri meh mulia belama-lama iya, ulih Jesus Kristus! Amin. Ari Paul, ke dikangauka nyadi rasul Jesus Kristus nitihka peneka Allah Taala, enggau ari menyadi kitai Sostenes, Ngagai eklisia Allah Taala di Korint, ngagai orang ke dikuduska dalam Jesus Kristus, ke dikangauka nyadi nembiak Tuhan sama enggau semua orang di semua endur ke ngangauka nama Tuhan Jesus Kristus, ti Tuhan sida enggau Tuhan kitai: Awakka Allah Taala ti Apai kitai enggau Tuhan Jesus Kristus meri kita berekat enggau pemaik. Aku endang seruran meri terima kasih ngagai Allah Taala ke kita, ketegal pengasih ti udah diberi Iya ngagai kita dalam Jesus Kristus, laban dalam Jesus Kristus kita udah nyadi kaya dalam semua jaku enggau penemu, laban saksi kami pasal Kristus udah dikamatka ba kita, datai ke kita nadai kurang ba pemeri ti diberi Roh Kudus, lebuh kita nganti Jesus Kristus Tuhan kitai dipandangka. Iya deka mega negapka kita datai ke ujung, ngambika kita nadai penyalah lebuh Hari Jesus Kristus Tuhan kitai. Allah Taala endang tau dikarapka. Kita udah dikangauka Iya ngambika kita bekaul enggau Anak Iya Jesus Kristus Tuhan kitai. Diatu, dalam nama Jesus Kristus Tuhan kitai aku minta kita, menyadi, sama besetuju enggau pangan diri, enda beserekang, tang begempung enggau pangan diri, sama seati, sama sepenemu, sama juluk ati enggau pangan diri. Laban sida Kloi sebilik bisi udah madah ngagai aku, menyadi, pasal kita ke belaya enggau pangan diri. Utai ti ku aku nya siku nyebut, “Aku nitihka Paul,” siku nyebut, “Aku nitihka Apollos,” siku nyebut, “Aku nitihka Peter”, lalu siku nyebut, “Aku nitihka Kristus.” Kati Kristus udah dibagi? Kati Paul udah diregang ngarika kita? Tauka, kita udah dibaptisa dalam nama Paul? Aku meri terima kasih ngagai Allah Taala ke diri ke nadai udah maptisa kita, kelimpah ari maptisa Krispus seduai Gaius, enggai ke orang ngumbai kita udah dibaptisa dalam nama aku. ( Aku udah mega maptisa sida Stepanas sebilik. Tang kelimpah ari nya, aku enda ingat enti aku bisi udah maptisa orang bukai.) Laban Kristus ukai ngasuh aku maptisa orang, tang ngasuh aku nusui Berita Manah - ukai ngena pengelanchar bejaku ti datai ari penemu-dalam mensia, enggai ke kuasa regang Kristus lenyau ngapa. Laban pesan pasal regang nya utai ti mapap ba orang ke deka mati, tang ba kitai ke diselamatka, pesan nya kuasa Allah Taala. Laban endang udah ditulis, “Aku deka ngerusak penemu-dalam orang ke pintar, lalu ngemuntanka pemintar orang ke pandai.” Ni orang ke bepenemu-dalam? Ni orang ke bepelajar? Ni orang ke landik belabanka penemu di dunya tu? Kati Allah Taala nadai udah nunjukka pemeli penemu-dalam ti datai ari dunya? Laban dunya enda ulih ngelala Allah Taala ngena penemu-dalam sida, nya alai Allah Taala ngena penemu-dalam Iya, mutuska runding deka ngena pemeli pesan ti ditusui kami, nyelamatka orang ke arap. Laban orang Judah minta kereja ajih, lalu orang Gerika minta penemu-dalam, tang kami nusui pasal Kristus ke diregang, pesan ti ditulak orang Judah, lalu orang bansa bukai ngumbai pesan nya beli. Tang ba orang ke dikangauka Allah Taala, orang Judah enggau orang bansa bukai, Kristus nya kuasa enggau penemu-dalam Allah Taala. Laban pemeli Allah Taala pintar agi ari penemu-dalam mensia, lalu pengelemi Allah Taala kering agi ari pengering mensia. Peratika gaya kita suba, menyadi, lebuh Allah Taala ngangauka kita: nadai mayuh kita nya orang ke bepenemu-dalam enti dikira nitihka penemu mensia. Nadai mayuh kita nya orang ke bekuasa, nadai mayuh kita nya orang ke tinggi pangkat, tang Allah Taala udah milih orang ke beli di dunya tu kena Iya ngemaluka orang ke bepenemu-dalam. Iya udah milih utai ti lemi di dunya tu kena Iya ngemaluka utai ti kering. Allah Taala udah milih orang ke baruh pendiau sereta dikeleseka dunya, ke nadai reti, kena Iya ngerusak utai ti endang udah bisi, ngambika nadai orang ulih temegah di mua Allah Taala. Allah Taala nya ti pun pengidup kita dalam Jesus Kristus, ke nyadi penemu-dalam Allah Taala, nyadi pengelurus, pengudus enggau penebus kitai, ngambika, munyi ti udah ditulis, “Awakka orang ke deka temegah, temegahka Tuhan.” Lebuh aku datai ngagai kita suba, menyadi, aku ukai datai madahka misteri Allah Taala ngena jaku ti enda ditemu reti tauka ngena penemu-dalam. Laban aku udah mutuska runding enggai nemu utai bukai lebuh aku begulai enggau kita, tang semina Jesus Kristus, enggau pasal Iya ke diregang. Lalu aku datai ngagai kita mai pengelemi, sereta getar-getar nangi. Jaku enggau pesan aku ukai disebut ngena jaku ti datai ari penemu-dalam, tang ngayanka kuasa enggau Roh Allah Taala, ngambika pengarap kita ukai dipanggaika ba penemu-dalam mensia, tang ba kuasa Allah Taala. Tang taja pia, ngagai orang ke besai tuai, kami bejaku ngena penemu-dalam, tang ukai penemu-dalam dunya, tauka penemu-dalam bala roh ti merintah di dunya tu, ti deka diukum lalu lesap. Kami bejakuka pasal misteri penemu-dalam ti dilalaika Allah Taala, ti udah diletak Iya nyadika mulia kitai sebedau dunya digaga. Nadai siku pemerintah di dunya tu meretika penemu-dalam nya, laban enti sida udah meretika penemu-dalam nya, sida tentu enda ngeregang Tuhan ti bemulia. Tang, munyi ti udah ditulis, “Utai ti enda kala dipeda tauka didinga mensia, utai ti nadai kala diperagam mensia, nya meh utai ti udah disedia Allah Taala ke orang ti rinduka Iya.” Nya utai ti udah dipandangka Allah Taala ngagai kitai ulih Roh Kudus, laban Roh Kudus mansik semua utai. Indah utai ti dalam buntut runding Allah Taala deh abis dipansik Iya. Laban sapa nemu runding mensia kelimpah ari roh mensia ti dalam mensia nya empu? Baka nya mega, nadai orang nemu runding Allah Taala, kelimpah ari Roh Allah Taala Empu. Nyadi kitai udah nerima, ukai roh dunya, tang Roh ti datai ari Allah Taala, ngambika kitai ulih meretika pemeri ti diberi Allah Taala ngagai kitai. Lalu kami bejakuka utai nya ukai ngena leka jaku ti diajar penemu-dalam mensia, tang ngena leka jaku ti diajar Roh Kudus, lebuh kami nerangka utai roh ngagai orang ke bisi Roh Kudus. Orang ke nadai Roh Kudus enda ulih nerima pemeri ti diberi Roh Allah Taala, laban utai nya baka ke beli ba iya, lalu iya enda ulih meretika utai nya, laban utai nya semina ulih ditemu ari tulung Roh Kudus. Orang ke bisi Roh Kudus nemu semua utai, tang iya empu enda ulih diakim orang. “Laban sapa nemu runding Tuhan, datai ke iya ulih ngajar Tuhan?” Tang kitai bisi runding Kristus. Nya alai aku, menyadi, enda ulih bejaku enggau kita baka ke bejaku enggau orang ke bisi Roh Kudus, tang baka ke bejaku enggau orang ke agi nitihka chara dunya, ke agi mit dalam Kristus. Dulu suba aku nupi kita ngena ai tusu, ukai ngena pemakai ti kering, laban kita apin ulih makai pemakai nya. Indah diatu deh kita apin sedia, laban kita agi nitihka chara dunya. Laban seagi-agi kita kepapas, lalu belaya enggau pangan diri, enda ka nya nunjukka kita enggi dunya, lalu diau nitihka chara dunya? Laban lebuh kita nyebut, “Aku nitihka Paul,” lalu siku nyebut, “Aku nitihka Apollos”, enda ke kita bejaku nitihka chara dunya? Laban sapa Apollos? Lalu sapa Paul? Semina ulun Allah Taala aja, ke udah mai kita arap, nitihka pengawa ti udah diberi Tuhan ngagai kami duai siku-siku. Aku nanam, Apollos manjah, tang Allah Taala ti ngasuh utai nya tumbuh. Nya alai, iya ke nanam, enggau iya ke manjah, sama nadai tentu guna. Semina Allah Taala aja ke ngasuh utai nya tumbuh. Iya ke nanam enggau iya ke manjah, endang nadai lebih ari pangan diri, lalu genap iku deka diupah nitihka pengawa ti dikereja siku-siku orang. Laban kami duai sama bekereja enggau Allah Taala. Kita nya umai Allah Taala, rumah Allah Taala. Nitihka pengasih ti diberi Allah Taala ngagai aku, aku nudukka pugu, baka tukang ke landik ngaga rumah, lalu orang bukai nirika rumah ba atas pugu nya. Genap iku orang enda tau enda bejimat ngaga rumah ba atas pugu nya. Laban nadai orang tau nudukka pugu bukai kelimpah ari pugu ti udah didudukka; pugu nya Jesus Kristus. Enti orang nirika rumah ba atas pugu nya ngena emas tauka pirak, tauka batu ti berega, tauka kayu, tauka batang rumput, tauka rumput ti rangkai, pengawa ti dikereja sida siku-siku deka terang nyata, laban Hari Tuhan deka ngayanka utai nya, laban utai nya deka diayanka ngena api, lalu api nya deka nguji pengawa ti udah dikereja sida siku-siku. Enti utai ti udah digaga orang ba atas pugu nya tan diuji ngena api, orang ke ngaga utai nya deka nerima upah. Tang enti utai ti digaga orang nya angus, iya deka rugi, taja pen iya empu deka diselamatka, tang baka orang ke udah ngerenchah api. Kati kita enda nemu diri rumah Allah Taala, lalu Roh Allah Taala diau dalam kita? Enti orang ngerusak rumah Allah Taala, Allah Taala deka ngerusak orang nya. Laban rumah Allah Taala kudus, lalu kita nya rumah Allah Taala. Anang nipu diri empu. Enti kita ngumbai diri bepenemu-dalam nitihka kira dunya, kita patut nyadi orang ke beli, ngambika kita tau nyadi orang ke bepenemu-dalam. Laban penemu-dalam mensia nya utai ti beli ba Allah Taala. Laban endang udah ditulis, “Allah Taala manjuk orang ke bepenemu-dalam ngena pemintar sida empu.” Lalu Bup Kudus mega nyebut, “Tuhan nemu runding orang ke bepenemu-dalam endang nadai guna.” Nya alai, nadai orang tau temegahka mensia. Laban semua utai endang enggi kita magang, nemuka iya nya Paul, Apollos, tauka Peter, tauka dunya tu, tauka pengidup, tauka pemati, tauka utai ti diatu enggau utai ti jemah ila, semua sida nya endang enggi kita magang, lalu kita endang enggi Kristus, lalu Kristus endang enggi Allah Taala. Baka tu ku jalai kita patut ngira kami: kami tu ulun Kristus, ke ngibun misteri Allah Taala. Nambahka nya, orang ke ngibun utai Allah Taala, enda tau enda orang ke tau dikarapka. Tang ba aku siku, aku enda irauka diri diakim kita, tauka diakim dalam kot. Indah aku empu deh enda ngakim diri empu. Aku nadai nemu diri udah ngereja penyalah, tang ukai reti nya aku nadai penyalah. Tuhan ke ngakim aku. Nya alai anang ngakim orang sebedau maya ti patut, sebedau Tuhan datai. Lebuh Iya datai, Iya deka mantaika semua resia ti dilalaika dalam pemetang ngagai penampak, lalu deka mansutka juluk ati ti dipelalaika mensia. Nya baru semua orang deka nerima puji ari Allah Taala. Aku udah ngena semua utai nya ba aku empu, enggau ba Apollos, ke penguntung kita, menyadi, ngambika kita tau belajar ari kami duai reti utai ti udah ditulis munyi tu, “Anang ngelui utai ti udah ditulis”. Nya baru kita enda temegahka siku, lalu bejai siku. Laban sapa ngumbai kita lain agi ari orang bukai? Nama utai ti dikemisi kita, ti ukai diberi ngagai kita? Nya alai, enti utai nya udah diberi ngagai kita, nama kebuah kita temegahka utai nya, baka ke ngumbai utai nya ukai pemeri ti diberi ngagai kita? Kita udah chukup semua utai ti dipeguna kita! Kita udah nyadi kaya! Kita udah nyadi raja, taja pen kami tu ukai! Naka meh pemanah enti sema kita amat nyadi raja, ngambika kami tau nyadi raja sama enggau kita! Laban aku ngira Allah Taala udah mandangka kami ke nyadi rasul pengabis dudi ari semua orang bukai, baka orang ke diukum bunuh, laban kami udah dikeleseka dunya, melikat enggau mensia. Kami nyadi orang ke beli, ke Kristus, tang kita nyadi orang ke pintar dalam Kristus! Kami lemi, tang kita kering! Kita dibasa orang, tang kami dipechat orang. Nyentuk ngagai diatu kami lapar sereta aus, enda chukup gari, dipalu, sereta nadai endur alai diau, lalu kami bebendar gawa ngena jari kami empu. Lebuh orang mechat kami, kami merekatka sida. Lebuh orang merinsaka kami, kami tan natka diri diperinsa. Lebuh orang bejai kami, kami nyaut sida ngena jaku ti siru. Kami udah nyadi uras dunya, utai ti kamah ti enda diguna. Aku ukai nulis tu kena ngemaluka kita, tang meri kita jaku tangkan, laban kita anak ke dikerinduka aku. Laban taja pen kita bisi sepuluh ribu iku orang ngiring kita dalam Kristus, tang kita nadai mayuh apai. Laban iya ti bendar, ulih Berita Manah, aku nyadi apai kita dalam Jesus Kristus. Nya alai aku minta kita nunda teladan aku. Nya kebuah aku ngasuh Timoti, anak ke tetap ati sereta dikerinduka aku dalam Tuhan, nemuai ngagai kita, ngambika iya mai kita ngingatka gaya pengidup aku dalam Kristus, baka ke diajar aku ngagai semua eklisia. Tang sekeda kita udah ngenyumbungka diri, laban sida ngumbai aku enggai nemuai ngagai kita. Aku deka nemuai ngagai kita enda lama da agi, enti nya peneka Tuhan, lalu aku deka nemu, ukai semina utai ti disebut orang ke sumbung nya, tang kuasa sida. Laban Perintah Allah Taala ukai bepanggai ba jaku, tang bepanggai ba kuasa. Ni ti dipilih kita? Sekalika aku datai mai penyipat, tauka mai pengerindu enggau penelap? Orang bisi udah madah, sekeda bala kita bisi udah ngaga ulah ti kamah. Indah orang kapir deh enda ngaga ulah ti kamah baka nya. Laban siku lelaki tinduk enggau indai-tiri iya empu! Lalu kita temegahka nya! Enda ka kita patut tusah ati lalu muai orang ke udah ngaga ulah nya ari bala kita? Laban taja pen aku enda begulai enggau kita batang tubuh, tang aku bisi enggau kita dalam roh, lalu baka aku ke begulai enggau kita batang tubuh, aku udah ngeletak ukum dalam nama Tuhan Jesus ba orang ke udah ngaga ulah ti baka nya. Lebuh kita begempuru, lalu roh aku bisi enggau kita sama enggau kuasa Jesus Kristus Tuhan kitai, kita enda tau enda nyerahka orang nya ngagai Sitan, ngambika tubuh iya dirusak, tang roh iya diselamatka lebuh Hari Tuhan. Kita enda patut temegah! Kati kita enda nemu, ka semina mimit aja ragi diguna kena ngasuh semua tekang tepung kembai? Buai semua ragi ti lama, ngambika kita amat tuchi. Nya baru kita deka nyadi baka tekang tepung ti enda beragi, laban aku nemu kita sigi baka nya. Laban Gawai Paska kitai udah sedia, laban Kristus, iya nya anak domba Gawai Paska kitai, udah diserahka ngagai Allah Taala nyadika piring. Nya alai aram kitai ngintu Gawai Paska kitai, ukai ngena ragi ti lama, iya nya ragi pemenchi enggau penyai, tang ngena roti ti enda beragi, iya nya ati ti tuchi enggau pemendar. Aku bisi udah nulis nagang kita begulai enggau orang ke kamah ulah. Aku ukai bejakuka pasal orang dunya ke ngereja ulah ti kamah, tauka orang ke amu, tauka penchuri, tauka orang ke nyembah engkeramba, laban enti kita deka nyeliahka sida, kita enda tau enda pansut ari dunya tu. Tang diatu aku nulis ngagai kita, enda nyagi kita begulai enggau orang ke ngaku diri orang Kristian, tang ngereja ulah ti kamah, tauka amu, tauka nyembah engkeramba, tauka bejai orang, tauka pemabuk, tauka penchuri. Indah makai enggau orang ke baka nya, deh kita enda tau. Laban aku nadai hak ngakim orang ke ari luar eklisia. Kitai semina ngakim orang ke dalam eklisia. Allah Taala Empu ke deka ngakim orang ke ari luar eklisia. “Buru orang ke jai nya ari bala kita.” Enti kita bisi laya enggau pangan diri, kati kita berani mai pekara nya ngagai kot lalu minta diri diatur orang kapir, lalu enda minta diri diatur bala nembiak Tuhan? Kati kita enda nemu, nembiak Tuhan deka ngakim dunya? Lalu enti kita deka ngakim dunya, nama kebuah kita enda ulih ngatur pekara ti mit? Kati kita enda nemu kitai deka ngakim melikat? Anang kenang pasal ngakim utai ti dalam pengidup tu! Nya alai, enti kita bisi pekara ti baka nya, indah orang ke baruh pangkat dalam eklisia deh tau diasuh kita ngakim pekara nya! Aku nyebut tu kena aku ngemaluka kita. Nyangka meh kita nadai orang ke chukup bepenemu-dalam ngatur pekara entara kita ke diri menyadi dalam Tuhan, ti ngujungka kita ke sama Kristian mansang ngagai kot, lalu minta diri diatur orang ke ukai orang Kristian? Enti kita nyara pangan diri, nya nunjukka kita endang udah alah. Nama kebuah enda nejuka orang ngereja utai ti salah ngagai kita? Nama kebuah enda nejuka sida ngakal kita? Tang kita empu ngereja utai ti salah lalu nipu orang. Indah menyadi kita ke dalam Kristus deh ditipu kita! Kati kita enda nemu, orang ke jai enda ulih bempu Perintah Allah Taala? Anang nipu diri! Orang ke ngereja ulah ti kamah, tauka nyembah engkeramba, tauka butang, tauka lelaki beleman enggau lelaki, tauka ngenchuri, tauka amu, tauka pemabuk, tauka bejakuka orang, tauka perumpak, enda ulih bempu Perintah Allah Taala. Baka nya meh sekeda bala kita suba. Tang kita udah dituchi, udah dikuduska, udah digaga lurus dalam nama Tuhan Jesus Kristus enggau ulih Roh Allah Taala kitai. Nyangka orang bisi nyebut, “Aku tau ngereja semua utai.” Amat, tang ukai semua utai nya tau mai penguntung ngagai aku. “Aku tau ngereja semua utai.” Amat, tang aku enggai nyadi ulun utai. Nyangka bisi mega orang deka nyebut, “Pemakai ke perut, lalu perut ke pemakai.” Tang Allah Taala deka ngerusak utai dua bengkah nya. Tubuh ukai dikena ngereja ulah ti kamah, tang dikena ngereja utai ke Tuhan, lalu Tuhan ngintu tubuh nya. Lalu Allah Taala udah ngangkatka Tuhan ari mati, lalu Iya deka mega ngangkatka kitai ari mati ngena kuasa Iya. Kati kita enda nemu, tubuh kita nya perengka tubuh Kristus? Nya alai, patut tauka enda aku mai perengka tubuh Kristus, lalu ngaga iya nyadi perengka tubuh indu sundal? Enda tau sekali-kali! Kati kita enda nemu, barang sapa beleman enggau indu sundal, nyadi setubuh enggau indu sundal nya? Laban endang udah disebut, “Seduai iya deka nyadi setubuh.” Tang barang sapa begempung enggau Tuhan, nyadi setubuh dalam roh enggau Tuhan. Seliahka ulah ti kamah. Genap dosa ti dikereja mensia, dikereja iya ari luar tubuh, tang orang ke ngereja ulah ti kamah, bedosa ngelaban tubuh diri empu. Kati kita enda nemu, tubuh kita nya rumah Roh Kudus, ke diau dalam kita, ke udah diberi Allah Taala ngagai kita? Kita ukai enggi kita empu. Laban kita udah dibeli ngena rega ti besai. Nya alai, kena meh tubuh kita ngemuliaka Allah Taala. Nyadi ngenang pasal utai ti udah ditulis kita: Manah agi enti lelaki enda bebini. Tang laban ulah ti kamah kelalu suah udah nyadi, lelaki patut bisi bini ke diri empu, lalu indu patut bisi laki ke diri empu. Laki patut ngereja pengawa iya ke nyadi laki ngagai bini iya, lalu pia mega bini ngagai laki iya, laban ukai bini ke bekuasa atas tubuh diri, tang laki iya, lalu baka nya mega, ukai laki ke bekuasa atas tubuh diri, tang bini iya. Siku-siku seduai iya enda tau enggai besetubuh enggau pangan diri, semadi meh seduai iya sama besetuju deka ngetu enda lama ari tanggungjawap nya, ngambika seduai iya ulih besampi, tang udah nya seduai iya patut begulai baru, enggai ke Sitan nguji kita laban kita enda tetagangka pengingin diri. Aku nyebut tu kena ngajar kita, ukai meri atur. Naka meh pemanah enti semua orang baka aku magang. Tang genap iku kita endang bisi pemeri ari Allah Taala, enggi siku pemeri tu, enggi siku pemeri nya. Ngagai orang ke enda bebini, enda belaki, enggau ngagai sida indu ke balu, aku madah ngagai sida, manah agi enti sida terus enda belaki enda bebini baka aku. Tang enti sida enda tetagangka pengingin diri, sida patut jadi enggau pangan diri, laban manah agi sida jadi melaki-bini, ari ke merinsa natka diri tetengukka pangan diri. Ngagai orang ke bisi laki, bisi bini, aku meri pesan, ukai ari aku, tang ari Tuhan: bini enda tau ninggalka laki. (Tang enti iya ninggalka laki iya, iya enda tau jadi enggau lelaki bukai, tauka iya mulaika diri baru ngagai laki iya empu), lalu laki enda tau muai bini. Ngagai sida ti bukai, aku nyebut tu (aku, ukai Tuhan): enti lelaki ke orang Kristian bisi bini ke ukai orang Kristian, lalu indu nya besetuju deka begulai enggau iya, lelaki nya enda tau muai iya. Lalu enti indu ke orang Kristian bisi laki ke ukai orang Kristian, lalu laki iya besetuju deka begulai enggau iya, iya enda tau muai laki iya. Laban laki ke enda arap, digaga lurus ulih bini iya, lalu indu ke enda arap, digaga lurus ulih laki iya. Enti enda baka nya, anak kita enda tuchi, tang laban iya baka nya, anak kita kudus. Tang enti tawing ke ukai orang Kristian nyarakka diri, awakka iya nyarakka diri. Ba pekara ti baka nya, tawing ke orang Kristian nadai utai nanchang, laban Allah Taala udah ngangauka kita ngagai pemaik. Nuan ke bini, baka ni ku nuan nemu diri deka, tauka enda, nyelamatka laki nuan? Nuan ke laki, baka ni ku nuan nemu diri deka, tauka enda, nyelamatka bini nuan? Tang awakka genap iku kita idup nitihka pengidup ti udah diberi Tuhan ngagai kita lebuh Iya ngangauka kita suba. Tu meh atur ti diberi aku ngagai semua eklisia. Kati orang nya udah ditutus lebuh iya dikangau? Awakka iya enda ibuh muai litan tutus iya. Kati iya enda ditutus lebuh iya dikangau? Awakka iya terus enda ibuh ditutus. Betutus nadai guna, lalu enda betutus mega nadai guna. Utai ti beguna nya ngasika pesan Allah Taala dalam semua utai. Genap iku orang enda tau enda baka iya ke menya lebuh iya dikangau. Kati kita ulun lebuh kita dikangau? Nya nadai ngawa. Tang enti kita ulih ngelepaska diri ari pangkat ulun, lepaska diri empu. Laban orang ke udah dikangauka Tuhan lebuh iya agi nyadi ulun, nyadi orang ke dilepaska Tuhan. Baka nya mega, orang ke ukai ulun lebuh iya dikangau, iya nyadi ulun Kristus lebuh iya udah dikangau. Kita udah dibeli ngena rega ti besai; nya alai, anang nyadi ulun mensia. Nya alai, menyadi, enda milih gaya pengidup kita lebuh kita dikangau, awakka kita meruan enggau Allah Taala. Ngenang pasal orang ke dara bungas, aku nadai pesan ari Tuhan, tang aku meri penemu diri empu, laban ulih pengasih Tuhan, aku tau dikarapka. Aku ngira, ketegal penusah ti nyadi diatu, manah agi enti kita mengkang baka gaya kita ke diatu. Kati nuan bisi bini? Anang muai bini nuan. Kati nuan apin bebini? Anang bebini. Tang enti nuan bebini, nuan ukai bedosa. Lalu enti dara bungas belaki, iya ukai bedosa. Tang orang ke jadi melaki-bini deka dituntung penusah dunya, lalu aku ngasuh kita nyeliahka nya. Utai ti ku aku, menyadi, nya baka tu: kitai nyau suntuk hari. Berengkah ari diatu, awakka orang ke bisi bini idup baka orang ke nadai bini, lalu orang ke ngulit, baka orang ke enda ngulit, lalu orang ke rami gaga, baka orang ke enda rami gaga, lalu orang ke bebelika utai, baka orang ke nadai utai, lalu orang ke ngereja pengawa dunya, baka orang ke ukai ngereja pengawa dunya, laban gaya dunya ti diatu deka lenyau. Aku dekaka kita dilepaska ari pengirau. Lelaki ke enda bebini deka irauka pasal pekara Tuhan, baka ni ku jalai ngerinduka ati Tuhan. Tang lelaki ke bisi bini, irauka pekara dunya, baka ni ku jalai ngelantangka ati bini iya, lalu iya bebagi ati. Lalu indu ke enda belaki, tauka dara bungas, deka irauka pasal pekara Tuhan, irauka baka ni ku jalai ngaga diri tuchi tubuh tuchi roh, tang indu ke bisi laki deka irauka pekara dunya, irauka baka ni ku jalai ngelantangka ati laki iya. Aku nyebut tu ke penguntung kita empu, ukai kena nagang kita, tang dekaka kita ngereja utai ti ngena, ngambika kita enda belampung ati angkunka Tuhan. Enti orang ngira diri udah enda manah ulah enggau tunang iya, enti iya enda ulih nagang pengingin diri, lalu utai nya enda tau enda nyadi, awakka iya ngereja utai ti dikedekaka iya: awakka seduai iya jadi enggau pangan diri. Utai tu nadai pulai ke dosa. Tang enti lelaki, ukai ari pejal, tang ari ati iya empu, udah mutuska runding enggai bebini, iya ngereja utai ti manah enti iya enda jadi enggau tunang iya. Nya alai, lelaki ke jadi enggau tunang iya ngereja utai ti manah, tang lelaki ke enda bebini, ngereja utai ti manah agi. Bini ditanchang ngagai laki iya, asal ga laki iya agi meruan idup. Tang enti laki iya mati, iya tau jadi enggau sebarang lelaki bukai ke dikedekaka iya, asal ga lelaki nya nembiak Tuhan. Tang ba runding aku, indu nya deka beberekat agi enti iya mengkang enda belaki baru. Lalu aku ngira, aku mega bisi Roh Allah Taala. Ngenang pasal pemakai ti diberi ngagai engkeramba: kitai nemu, “Semua kitai bela bisi penemu.” Penemu ngasuh orang ngerigangka diri, tang pengerindu ngemansangka orang. Barang sapa ngumbai diri nemu utai, apin bisi penemu ti patut dikembuan iya; tang orang ke rinduka Allah Taala, dikelala Allah Taala. Nya alai, ba pasal pemakai ti udah diberi ngagai engkeramba, kitai sama nemu, “engkeramba endang ukai utai ti idup”, lalu “Allah Taala endang siku aja.” Laban enti sema utai ti dikumbai petara bisi di langit tauka di dunya--laban utai ti dikumbai “petara” enggau dikumbai “tuhan” endang amat mayuh-- tang ba kitai, kitai semina bisi siku aja Allah Taala, Apai ke pun semua utai, lalu kitai idup ke Iya; lalu kitai semina bisi siku aja Tuhan, iya nya Jesus Kristus. Ulih Iya semua utai udah digaga, lalu ulih Iya kitai idup. Tang ukai semua orang ngembuan penemu tu. Laban sekeda orang udah teleba enggau engkeramba nyentuk ngagai diatu, nya alai sida agi ngumbai pemakai ti diempa sida nya pemakai ti udah diberi ngagai engkeramba, lalu laban ati sida agi lemi, sida lalu ngumbai diri bedosa lebuh sida makai pemakai nya. “Pemakai enda ulih mai kitai semak ngagai Allah Taala. Kitai enda rugi, enti kitai enda makai, lalu kitai enda mega untung, enti kitai makai.” Tang bejimat, enggai ke kita ke tau ngereja semua utai, ngasuh orang ke lemi, bedosa. Laban enti orang ke lemi meda kita ke bisi penemu makai dalam rumah sembiang engkeramba, enda ka nya deka meransang iya makai pemakai ti dienjuk ngagai engkeramba, enti iya agi lemi? Nya alai, menyadi ke lemi nya, ke udah ditebus Kristus, deka rusak laban penemu kita. Tang lebuh kita bedosa ngelaban orang Kristian lalu nelihka ati sida ti agi lemi, kita bedosa ngelaban Kristus. Nya alai, enti pemakai ngasuh orang Kristian bedosa, aku enggai sekali-kali makai dagin, enggai ke aku ngasuh sida bedosa. Kati aku apin dilepaska? Kati aku ukai rasul? Kati aku nadai udah kala meda Jesus Tuhan kitai? Kati kita ukai asil ari pengawa ti dikereja aku ke Tuhan? Enti sema orang bukai enda ngaku aku rasul, kita ga patut ngaku aku rasul, laban pengidup kita dalam Tuhan nandaka aku amat rasul. Tu meh saut aku ngagai orang ke mansik aku. Kati kami nadai hak diberi pemakai enggau utai irup? Kati kami nadai hak mai bini kami baka rasul ti bukai, enggau baka sida menyadi Tuhan, enggau Peter? Tauka semina kami duai Barnabas aja ke enda tau enda bekereja ngulihka pengidup ke diri empu? Kati orang ke nyadi soldadu kala ngaji diri empu? Kati orang ke nanam kebun anggur enda tau makai buah ari kebun nya? Kati orang ke ngibun raban jelu enda tau ngirup ai tusu ari raban jelu nya? Kati aku nyebut tu ngena penemu mensia? Kati nya nadai disebut Adat? Laban endang udah ditulis dalam Adat Moses, “Anang mampul mulut sapi lebuh iya ngindik gandum.” Kati Allah Taala bejakuka pasal sapi? Enda ka Iya bejakuka pasal kitai? Utai nya endang ditulis ke kitai, laban orang ke ngeradu tanah enggau orang ke ngetau endang patut ngereja pengawa sida, laban sida ngarapka diri diberi ungkup ari utai ti ditanam. Enti kami udah nanam benih roh ba kita, kati kami enda tau minta utai ari kita? Enti orang bukai tau ngarapka diri bulih utai ari kita, kati kami enda besai agi hak tau bulih utai nya ari kita? Tang taja pia, kami nadai udah ngena hak nya, tang natka semua utai, ngambika kami enda nekul pejalai Berita Manah Kristus. Kati kita enda nemu, orang ke bekereja dalam Rumah Sembiang, bulih pemakai ari Rumah Sembiang, lalu orang ke ngenjuk piring ba alta, bulih ungkup ari piring nya? Baka nya mega Tuhan udah meri atur, ngeletak orang ke nusui Berita Manah patut bulih utai dikena beridup ari Berita Manah. Tang aku nadai udah ngena hak nya, lalu aku pen ukai mega nulis surat tu kena aku ngambu hak nya ke aku empu. Manah agi aku mati, ari ke ngereja nya. Nadai orang tau ngerampas hak kena aku temegahka diri empu! Enti aku nusui Berita Manah, aku enda tau temegahka nya, laban aku endang udah diasuh ngereja pengawa nya. Tulah meh aku enti aku enda nusui Berita Manah! Laban enti aku ngereja pengawa nya ari peneka ati aku empu, aku tentu bisi upah, tang enti aku ngereja pengawa nya ukai ari peneka ati aku empu, reti nya aku diasuh Allah Taala ngereja pengawa nya. Nya alai, nama upah aku? Semina tu aja: lebuh aku nusui Berita Manah, awakka aku enda minta bayar, enggai ke aku ngena semua hak aku ke bekereja ke Berita Manah. Laban taja pen aku ukai ulun orang, tang aku udah ngaga diri nyadika ulun semua orang, ngambika aku tau bulih mayuh agi orang ke Kristus. Ba orang Judah, aku baka orang Judah, ngambika aku ulih mai orang Judah ngagai Kristus. Ba orang ke di baruh Adat, aku nyadi baka orang ke di baruh Adat, taja pen aku ukai di baruh Adat, ngambika aku ulih mai orang ke di baruh Adat ngagai Kristus. Ba orang ke ari luar Adat, aku baka orang ke ari luar Adat (taja pen aku ukai dilepaska ari adat Allah Taala, tang di baruh adat Kristus) ngambika aku ulih mai orang ke di luar Adat ngagai Kristus. Ba orang ke lemi, aku baka orang ke lemi, ngambika aku ulih mai sida ngagai Kristus. Aku udah nyadi semua macham utai ke semua mensia, ngambika aku, ngena sebarang chara, ulih nyelamatka sekeda sida. Aku ngereja semua nya ke Berita Manah, ngambika aku tau nerima berekat ari nya. Kati kita enda nemu, orang ke belumba belanda endang mayuh, tang ka semina siku aja bulih prais? Nya alai, belanda meh kita ngambika kita bulih prais. Genap iku orang ke belumba, enda tau enda disiplin diri empu. Sida ngereja nya ngambika sida bulih makota ti nemu abis, tang kitai ngulihka makota ti enda nemu abis. Nya alai aku belanda terus ngagai adan. Aku enda belaban baka orang ke mukut angin, tang aku mandam tubuh aku lalu ngaga iya nyadi ulun aku, enggai ke aku enda bulih prais lebuh aku udah nusui Berita Manah ngagai orang bukai. Aku enggai ke kita enda nemu, menyadi, semua aki ini kitai di baruh remang magang, lalu semua sida bejalai nengah tasik, lalu semua sida dibaptisa magang nyadi nembiak Moses dalam remang enggau dalam tasik nya, lalu semua sida makai roti roh nya lalu ngirup siti aja ai roh, laban sida ngirup ari sigi batu roh ti nitihka sida, lalu batu nya Kristus. Tang taja pia, Allah Taala enda lantang ati ngagai nyau ka semua bala sida, lalu bangkai sida ngachir ba sebelah menua puang. Semua utai tu nyadi chunto ke kitai, ngambika kitai enda inginka utai ti jai, baka sida. Anang nyembah engkeramba, baka sekeda sida. Munyi ti udah ditulis, “Orang mayuh duduk makai ngirup lalu angkat betanda.” Kitai enda tau ngereja pengawa ti kamah, baka sekeda sida, lalu dua puluh tiga ribu iku sida mati dalam sehari. Kitai enda tau nguji Tuhan, baka sekeda sida, lalu sida mati dipantuk ular. Lalu anang mutap, baka sekeda sida, lalu sida dibunuh Melikat Pemati. Semua utai tu nyadi ba sida ngambika nyadika chunto ke kitai, lalu utai nya dituliska kena ngajar kitai, laban pengujung dunya udah datai ba kitai. Nya alai enti kita ngumbai diri bediri tegap, bejaga kita ngambika kita enda rebah. Nadai penguji ti udah diasaika kita enda udah diasaika semua orang. Allah Taala endang tau dikarapka, lalu Iya enda nejuka kita diuji lebih ari ti ulih ditatka kita; tang lebuh kita diuji, Iya deka meri kita jalai kena kita ngelepaska diri, ngambika kita tan natka penguji nya. Nya alai, pangan ke dikerinduka aku, anang nyembah engkeramba. Aku bejaku ngagai orang ke pintar. Peratika utai ti disebut aku. Mangkuk berekat ti diberekatka kitai, kati nya enda nunjukka kitai bekunsi ngirup darah Kristus? Lalu roti ti dipechahka kitai, kati nya enda nunjukka kitai bekunsi makai tubuh Kristus? Laban roti endang siti aja, kitai ke mayuh tu endang setubuh, laban semua kitai bela makai roti siti nya aja. Peratika orang Israel. Kati orang ke makai piring nya ukai orang ke sama besaup ngereja pengawa ba alta? Nama utai ti ku aku? Kati aku ngumbai pemakai ti diberi ngagai engkeramba nya bisi reti, tauka engkeramba empu bisi reti? Ukai! Utai ti ku aku nya, piring ti diberi orang ke enda nangika Allah Taala, diberi sida ngagai antu, ukai ngagai Allah Taala. Aku enda nyagi kita besaum enggau antu. Kita enda tau ngirup ari mangkuk Tuhan, lalu ngirup mega ari mangkuk antu. Kita enda tau makai ba mija Tuhan, lalu makai mega ba mija antu. Tauka kitai endang sengaja nyungkak Tuhan chemburu? Kati kitai kering agi ari Iya? “Semua utai tau dikereja magang,” tang ukai semua utai nya pulai ke penguntung. “Semua utai tau dikereja magang,” tang ukai semua utai nya ulih ngemansangka pengidup kitai. Anang berundingka diri empu aja, tang berunding ke orang bukai. Empa aja sebarang utai ti dijual ba kedai dagin, lalu anang betanyaka pasal utai nya ketegal pengasai ati kita, laban “Dunya enggau semua utai ti dalam dunya endang enggi Tuhan.” Enti orang ke enda arap mai kita makai, lalu kita deka makai enggau iya, empa aja sebarang utai ti dibantaika orang di mua kita, lalu anang betanyaka pasal utai nya ketegal pengasai ati kita. Tang enti orang nyebut ngagai kita, “Utai tu udah dienjuk nyadika piring,” anang kita makai utai nya, ketegal orang ke udah madahka utai nya ngagai kita, enggau ketegal pengasai ati, ketegal pengasai ati iya, nya utai ti ku aku, ukai ketegal pengasai ati kita. Laban nama kebuah aku ke tau makai sebarang utai, diperintah pengasai ati orang bukai? Enti aku meri terima kasih ngagai Allah Taala ke utai ti diempa aku, nama kebuah orang tau mantah aku enti aku makai pemakai nya ngena sampi terima kasih? Nya alai, nemuka kita makai tauka ngirup, tauka ngereja sebarang utai, kereja semua utai nya ke mulia Allah Taala. Anang ngenusahka ati orang Judah tauka ati orang bansa bukai, tauka ati raban eklisia Allah Taala. Tunda aja aku. Aku nguji ngelantangka ati semua orang dalam semua utai ti dikereja aku, ukai berundingka diri empu, tang berundingka semua orang, ngambika sida diselamatka. Nya alai, beteladan ba aku, baka aku ke beteladan ba Kristus. Aku muji kita, laban kita seruran ngingatka aku dalam semua utai, lalu nitihka ajar ti udah diberi aku ngagai kita. Tang aku deka ngasuh kita nemu, Kristus nyadi kepala semua lelaki, lalu laki nyadi kepala bini, lalu Allah Taala nyadi kepala Kristus. Lelaki ke betudung pala lebuh iya besampi tauka benabi, ngemaluka pala iya, tang indu ke enda betudung pala lebuh iya besampi tauka lebuh iya benabi, ngemaluka pala iya, laban nya sebaka reti enggau indu ke udah dikukur pala. Enti indu enggai nudung pala diri, iya patut ngukur buk iya; tang enti indu malu ke buk diri dikukur, iya patut nudung pala diri. Lelaki enda patut nudung pala diri, laban iya ngayanka gamal enggau mulia Allah Taala. Tang indu ngayanka mulia lelaki, laban lelaki ukai digaga ari indu, tang indu ari lelaki. Lalu lelaki ukai digaga ke indu, tang indu digaga ke lelaki. Nya kebuah, enggau ketegal sida melikat, indu enda tau nadai tanda kuasa ba pala iya. Tang, dalam Tuhan, indu enda tau nyeraraka diri ari lelaki, lalu lelaki pen enda mega tau nyeraraka diri ari indu. Laban indu digaga ari lelaki, lalu lelaki diadaka indu; tang semua utai endang datai ari Allah Taala magang. Awakka kita empu berunding: kati indu patut besampi ngagai Allah Taala enggau pala ti enda ditudung? Kati kita enda nemu, lelaki ke panjai buk, ngemaluka diri empu? Tang enti indu panjai buk, buk nya nyadika mulia iya. Laban buk nya diberi ngagai iya nyadika tudung pala iya. Tang enti orang bisi ati deka bekelikuhka pasal tu, kitai tauka eklisia nadai adat asal bukai. Tang ba atur ti nangkanka tu, aku enda muji kita, laban lebuh kita begempuru, kita ukai ngereja utai ti badas, tang ngereja utai ti jai. Laban, kena aku ngemunka jaku, lebuh kita begempuru besembiang, aku ninga kita bisi beserekang ari pangan diri. Aku arapka nya mimit. Iya ti bendar, kita endang patut bisi bagi entara bala kita, ngambika kita nyamai ngelala sapa orang Kristian ke bendar, sapa ke ukai. Lebuh kita begempuru, iya ti bendar kita ukai makai pemakai Tuhan. Laban lebuh kita makai, tiap iku kita terus makai pemakai diri empu, lalu sekeda kita lapar, lalu sekeda mabuk. Kati kita nadai rumah alai kita makai ngirup? Tauka, kita deka mechat eklisia Allah Taala, lalu ngemaluka orang ke nadai utai? Baka ni ku jalai aku bejaku ngagai kita tu? Kati aku patut muji kita? Sigi enda! Laban aku udah nerima ari Tuhan utai ti diberi aku ngagai kita, iya nya, malam Tuhan Jesus dijual, Iya ngambi roti, lalu lebuh Iya udah meri terima kasih, Iya mechahka roti nya, lalu bejaku, “Tu tubuh Aku ti diberi ke kita. Kereja tu kena ngingatka Aku.” Baka nya mega, lebuh sida udah badu makai, Iya ngambi mangkuk, lalu bejaku, “Mangkuk tu sempekat baru ti ditanggam ngena darah Aku. Kereja tu genap kali kita ngirup iya, kena ngingatka Aku.” Laban genap kali kita makai roti tu, lalu ngirup ari mangkuk tu, kita madahka pemati Tuhan, nyentuk ngagai Iya datai baru. Nya alai, barang sapa makai roti tauka ngirup ari mangkuk Tuhan ngena jalai ti enda bebasaka Iya, deka bedosa ngelaban tubuh enggau darah Tuhan. Peresa diri empu dulu; udah nya baru kita tau makai roti, lalu ngirup ari mangkuk nya. Laban barang sapa makai enggau ngirup, tang enda ngelala tubuh Tuhan, ngukum diri empu. Nya kebuah mayuh kita lemi sereta sakit, lalu sekeda udah mati. Tang enti kitai meresa diri empu, kitai enda diakim. Tang lebuh Tuhan ngakim kitai, Iya disiplin kitai, ngambika kitai enda diukum sama enggau dunya. Nya alai, menyadi, lebuh kita begempuru makai, anti pangan diri. Enti kita lapar, kita patut makai di rumah, ngambika lebuh kita begempuru, kita enda kena ukum. Pasal pekara bukai, aku deka mutarka nya lebuh aku datai ila. Nyadi pasal pemeri ti diberi Roh Kudus, menyadi, aku enggai ke kita enda nemu. Kita nemu, lebuh kita agi nyadi orang kapir suba, ati kita tetarit lalu kita dibai tesat ngagai engkeramba ti bisu. Nya alai aku dekaka kita nemu: nadai orang ke bejaku nitihka iring Roh Allah Taala kala nyebut “Awakka Jesus kena sumpah!” lalu nadai orang ulih nyebut “Jesus nya Tuhan,” enti enda ari iring Roh Kudus. Nyadi pemeri endang mayuh macham, tang Roh siku aja. Pengawa di dikereja endang mayuh macham, tang Tuhan siku aja. Jalai ngereja pengawa endang mayuh macham, tang Allah Taala siku aja ke meri penau ngagai genap iku orang kena sida ngereja pengawa. Siku-siku diberi tanda kena mandangka Roh Kudus, ke penguntung semua. Siku diberi ulih Roh nya penemu-dalam, lalu siku diberi penemu ulih Roh nya mega, siku diberi pengarap ulih Roh nya, siku diberi pemeri ngeraika orang ulih Roh nya, siku diberi pemeri ngereja kereja ajih, siku diberi pemeri benabi, siku diberi pemeri ngelala roh, ngagai siku, pemeri bejaku ngena mayuh macham jaku ti nyelai, ngagai siku, pemeri nyalinka jaku. Semua pengawa nya dikereja Roh siku nya aja, ke meri pemeri ngagai genap iku orang, nitihka peneka Roh nya Empu. Baka reti tubuh: taja pen perengka tubuh nya mayuh, tang semua sida nya nyadika raban siti tubuh nya. Baka nya mega Kristus. Laban semua kitai dibaptisa ke dalam siti tubuh, nemuka kitai nya orang Judah tauka orang bansa bukai, ulun tauka ukai ulun, lalu semua kitai bela diberi Roh siku nya aja ke diirup kitai. Iya ti bendar, tubuh ukai digaga ari siti aja perengka, tang ari mayuh bengkah perengka. Enti kaki nyebut, “Laban aku ukai jari, nya alai aku ukai raban tubuh nya,” jaku nya enda ulih ngasuh kaki nya badu agi nyadi perengka tubuh nya. Lalu enti pending nyebut, “Laban aku ukai mata, nya alai aku ukai raban tubuh,” jaku nya enda ulih ngasuh pending nya badu agi nyadi perengka tubuh nya. Enti sema semua tubuh nya semina mata aja, nama kena iya ninga? Enti semua tubuh nya semina pending aja, nama kena iya nyium utai? Tang kitai sama nemu, Allah Taala udah ngatur semua perengka dalam tubuh nya, genap iti sida, nitihka peneka Allah Taala Empu. Enti sema tubuh nya digaga ari siti aja perengka, dini deh alai tubuh? Nya alai, perengka tubuh endang amat mayuh, tang tubuh siti aja. Nya alai, mata enda tau nyebut ngagai jari, “Aku enda begunaka nuan!” Pala pen enda mega tau nyebut ngagai kaki, “Aku enda begunaka nuan!” Utai ti patut dikereja nya, perengka tubuh ti baka ke lemi, enda ulih enda diguna, lalu perengka ti kurang agi dibasa kitai, patut balat agi dibasa kitai, lalu perengka ti enda patut diayanka kitai, patut dilamun kitai enggau manah, tang perengka ti manah agi gaya enda ibuh dibasa kitai baka nya. Tang Allah Taala udah ngatur perengka tubuh nya baka nya, meri basa ti besai ngagai perengka ti kurang agi dibasa, ngambika nadai penyerekang dalam tubuh nya, tang semua perengka bela sama nemu ibuhka pangan diri. Enti siti ari perengka nya pedis, semua perengka bela pedis magang enggau iya. Enti siti ari perengka nya kena puji, semua perengka tubuh nya deka rami gaga ati enggau iya. Kita nya tubuh Kristus, lalu genap iku kita nya perengka tubuh nya. Lalu Allah Taala udah ngeletak dalam eklisia, kesatu rasul, kedua nabi, ketiga pengajar, udah nya orang ke ngereja kereja ajih, orang ke ngeraika orang, orang ke nulung orang, orang ke nyadi tuai, orang ke bejaku ngena jaku ti nyelai. Kati semua sida nya rasul magang? Kati semua sida nya nabi magang? Kati semua sida nya pengajar magang? Kati semua sida nya ngereja kereja ajih? Kati semua sida nya bisi pemeri ngeraika orang? Kati semua sida nya bejaku ngena jaku ti nyelai? Kati semua sida nya ulih nyalinka jaku? Tang kita patut inginka pemeri ti besai agi. Aku deka nunjukka jalai ti pemadu manah ke kita. Enti aku bejaku ngena mayuh macham jaku mensia, enggau ngena jaku melikat, tang nadai pengerindu, aku tu gong ti inggar dipangkung, tauka luching ti sering-sering. Lalu enti aku bisi kuasa kena benabi lalu nemu semua misteri, sereta nemu semua penemu, lalu enti aku bisi pengarap kena nginsitka bukit, tang nadai pengerindu, aku nadai guna. Enti aku meri semua utai aku ngagai orang, lalu enti aku nyerahka tubuh aku ngambika ditunu, tang nadai pengerindu, nya nadai pulai ke penguntung aku. Pengerindu nya liat ati, nelap, enda kepapas, enda temegah tauka sumbung, tauka jai jaku enggau orang. Pengerindu enda berundingka diri empu, enda jampat ringat tauka bedendam. Pengerindu enda gaga ati ke penyalah, tang gaga ati ke utai ti bendar. Pengerindu natka semua utai, arapka semua utai, ngadang semua utai, tan dalam semua utai. Pengerindu enda nemu abis. Tang jaku ti benabi nemu abis; jaku ti nyelai nemu abis; penemu nemu abis. Laban kitai semina nemu mimit aja, lalu jaku ti benabi endang enda kala chukup, tang lebuh utai ti pemadu badas datai, utai ti enda chukup badas deka lesap magang. Lebuh aku agi mit, aku bejaku baka anak mit, aku berunding baka anak mit, aku bekira baka anak mit. Lebuh aku nyau besai tuai, aku muai semua perangai anak mit. Kitai diatu semina meda ayas aja, baka ke meda dalam cheremin; ila baru kitai deka betemu betunga mua. Diatu aku semina nemu mimit aja; ila baru aku deka nemu semua utai, baka Allah Taala ke nemu semua utai pasal aku. Diatu utai tiga bengkah tu agi mengkang: pengarap, pengadang, enggau pengerindu. Tang utai ti pemadu besai nya pengerindu. Ulihka pengerindu, lalu bebendar minta pemeri ari Roh Kudus, kelebih agi pemeri kena nusui pesan Allah Taala. Laban orang ke bejaku ngena jaku ti nyelai, ukai bejaku ngagai mensia, tang bejaku ngagai Allah Taala; laban nadai orang meretika utai ti disebut iya, laban iya nyebut utai ti enda ditemu reti ngena jaku Roh. Tang orang ke nusui pesan Allah Taala, bejaku ngagai mensia, kena ngering, meransang sereta ngelantangka sida. Orang ke bejaku ngena jaku ti nyelai, semina mai penguntung ngagai diri empu, tang orang ke nusui pesan Allah Taala, mai penguntung ngagai semua raban eklisia. Aku dekaka semua kita bejaku ngena jaku ti nyelai, tang aku lebih agi dekaka kita nusui pesan Allah Taala Orang ke benabi beguna agi ari orang ke bejaku ngena jaku ti nyelai enti orang nadai nerangka reti jaku nya ngambika semua raban eklisia bulih penguntung ari nya. Enti aku datai ngagai kita, menyadi, lalu bejaku ngena jaku ti nyelai, baka ni ku aku ulih mai penguntung ngagai kita, enti aku enda mai pemandang, penemu, tauka pesan Allah Taala, tauka jaku ajar? Utai tu baka reti pekekas musik; enti pekekas musik baka kesuling tauka belikan enda ditebah enggau menyana, baka ni ku kitai nemu musik ti ditebah? Lalu enti terumpit enda nyaris disepu, sapa deka nyendiaka diri mansang beperang? Baka nya mega kita. Enti kita bejaku ngena jaku ti nyelai ti enda ditemu orang reti, baka ni ku orang nemu utai ti disebut kita? Laban kita semina bejaku ngagai angin. Bansa jaku dalam dunya tu endang mayuh, lalu semua sida nya bisi reti magang. Enti aku enda nemu reti jaku ti disebut orang, aku enggau orang nya baka orang kampar enggau pangan diri. Baka nya mega kita. Laban kita inginka pemeri ari Roh Kudus, kita patut lebih agi inginka pemeri ti tau dikena ngemansangka eklisia. Nya alai, orang ke bejaku ngena jaku ti nyelai, patut besampi minta kuasa kena nerangka utai ti disebut. Laban enti aku besampi ngena jaku ti nyelai, roh aku amat besampi, tang runding aku enda. Nya alai, nama utai ti patut dikereja aku? Aku deka besampi ngena jaku Roh, tang aku deka mega besampi ngena runding aku. Aku deka belagu ngena lagu Roh, tang aku deka mega belagu ngena runding aku. Enti kita meri terima kasih ngagai Allah Taala ngena jaku Roh, baka ni ku orang ke ukai raban eklisia ulih nyebut “Amin” ngagai sampi terima kasih nya enti iya enda nemu utai ti disebut kita? Kita amat besampi ngagai Allah Taala, tang orang nya nadai bulih penguntung ari sampi nya. Aku meri terima kasih ngagai Allah Taala laban aku bejaku ngena jaku ti nyelai lebih ari semua kita; tang dalam gerija, aku deka agi bejaku ngena lima iti leka jaku ngena runding aku, ngambika ngajar orang bukai, ari ke nyebut seribu leka jaku ngena jaku ti nyelai. Menyadi, anang berunding baka anak mit. Ba pekara ti jai, awakka kita baka anak mit, tang ba jalai kita berunding, kita patut nyadi orang ke besai tuai. Utai tu bisi ditulis dalam Bup Adat, “Aku deka bejaku ngagai orang tu ngena jaku ti nyelai enggau ngena mulut orang kampar, Aku deka bejaku ngagai orang tu tang taja pia, sida enggai mendingka Aku,” ku Tuhan bejaku. Nya alai, bejaku ngena jaku ti nyelai nya ukai tanda ke orang ke arap, tang ke orang ke enda arap. Tang nusui pesan Allah Taala nya ukai ke orang ke enda arap, tang ke orang ke arap. Nya alai, enti semua raban gerija begempuru lalu semua orang bejaku ngena jaku ti nyelai, lalu enti orang luar, tauka orang ke ukai orang Kristian tama, enda ke sida deka ngumbai kita gila? Tang enti semua orang nusui pesan Allah, lalu orang ke ukai orang Kristian tauka orang luar tama, sida tentu deka nemu diri orang ke bedosa ari utai ti disebut kita, lalu sida deka madahka pasal diri empu, madahka resia ti dalam ati sida, lalu nyungkurka diri nyembah Allah Taala, lalu bejaku, “Allah Taala amat bisi enggau kita.” Nama utai ti patut dikereja deh, menyadi? Lebuh kita begempuru besembiang, siku bepantun, siku mai jaku ajar, siku mai pemandang ari Allah Taala, siku bejaku ngena jaku ti nyelai, tauka nerangka reti jaku nya. Semua utai nya dikereja kena ngeringka eklisia. Enti orang bejaku ngena jaku ti nyelai, awakka semina dua tauka tiga iku aja abis mayuh tau bejaku, udah badu siku, nya baru siku, lalu awakka siku nerangka reti utai ti disebut. Tang enti orang dia nadai nerangka reti jaku nya, awakka sida badu agi bemunyi, tang semina bejaku ngagai diri empu enggau ngagai Allah Taala. Awakka dua tauka tiga iku nabi bejaku, lalu awakka orang bukai berundingka utai ti disebut. Enti orang ke duduk dia bisi pemandang ari Allah Taala, orang ke benabi nya patut ngetu bejaku, lalu nejuka orang ke bisi pemandang nya bejaku. Laban semua kita tau nusui pesan Allah Taala, udah badu siku, nya baru siku, ngambika semua belajar ari nya lalu diperansang. Roh nabi endang dikuasa nabi nya empu, laban Allah Taala ukai Allah Taala ti ngasuh utai charut, tang meri pemaik. Baka ti nyadi dalam semua eklisia nembiak Tuhan, sida ke indu enda tau bemunyi dalam gerija. Sida enda tau bejaku, tang seruran nunduk, munyi ti disebut Adat. Enti sida keran deka betanyaka pasal utai, sida patut betanya ngagai laki sida di rumah. Malu amat meda indu bejaku dalam gerija. Kati pesan Allah Taala bepun ari kita? Tauka semina kita aja ke udah nerima pesan nya? Enti kita ngumbai diri nabi, tauka ngumbai diri bisi pemeri ari Roh Kudus, awakka kita ngaku utai ti ditulis aku ngagai kita endang amat pesan ari Tuhan. Enti iya enggai ibuhka nya, anang ibuhka iya. Nya alai, menyadi, kita patut keran deka benabi, tang anang nagang orang bejaku ngena jaku ti nyelai; tang semua utai patut dikereja enggau menyana sereta meruan atur magang. Nyadi diatu, menyadi, aku deka ngasuh kita ngingatka Berita Manah ti udah ditusui aku ngagai kita, ti udah diterima kita, ti alai kita bediri tegap. Berita Manah nya nyelamatka kita, enti kita bepegai teguh ba jaku ti diajar aku ngagai kita -- nyangka meh kita semina arap ngapa. Laban aku meri ngagai kita utai ti pemadu beguna, ti udah diterima aku, iya nya, Kristus mati ketegal dosa kitai, munyi ti ditulis dalam Bup Kudus. Iya dikuburka, lalu diangkatka idup baru ba hari ti ketiga, munyi ti ditulis dalam Bup Kudus. Iya lalu pegari di mua Peter, lalu udah nya pegari di mua semua sida ke dua belas iku. Udah nya Iya pegari di mua lebih lima ratus iku murid Iya sereta sekali. Mayuh sida nya agi idup diatu, taja pen sekeda udah mati. Udah nya Iya pegari di mua James, lalu udah nya, di mua semua sida rasul. Ke penudi iya, Iya mega pegari di mua aku, ke ada salah maya. Laban aku tu rasul ke pemadu mit ari semua bala rasul, lalu enda patut dikumbai rasul, laban aku udah merinsaka eklisia Allah Taala. Tang ulih pengasih Allah Taala, aku nyadi aku ke diatu, lalu Iya enda lebu kasihka aku. Sigi amat enda lebu laban aku udah bebendar agi bekereja ari sida rasul ti bukai, taja pen ukai aku empu ke bekereja, tang pengasih Allah Taala ti dalam aku. Nya alai, nemuka orang ke bekereja nya aku tauka sida, kami mai Berita Manah lalu kita arap. Enti kami madahka Jesus udah diangkatka ari mati, baka ni ku sekeda kita tau ngumbai orang nadai diangkatka ari mati? Enti nadai pengangkat ari mati, reti nya Kristus nadai udah diangkatka ari mati; lalu enti Kristus nadai udah diangkatka ari mati, reti nya pesan ti ditusui kami nadai guna, lalu pengarap kita nadai guna. Lebih ari nya, kami empu lalu ditemu nyebut utai ti bula pasal Allah Taala, laban kami madahka Allah Taala udah ngangkatka Kristus ari mati, enti Iya amat nadai udah ngangkatka Kristus ari mati, enti orang ke mati amat enda diangkatka idup baru. Laban, enti orang ke mati enda diangkatka idup baru, Kristus pen enda mega diangkatka idup baru. Lalu enti Kristus nadai udah diangkatka idup baru, reti nya pengarap kita nadai guna, lalu kita agi mengkang dalam dosa kita. Reti nya orang ke udah mati dalam Kristus, udah lenyau magang. Enti pengadang kitai dalam Kristus semina ke pengidup kitai di dunya tu aja, reti nya, kami tu patut lebih agi dikesinuka ari semua orang bukai. Tang iya ti bendar, Kristus udah diangkatka ari mati, nyadi orang ke terubah diangkatka idup baru ari bala orang ke udah mati. Laban enti pemati datai ulih siku mensia, pengangkat ari mati mega datai ulih siku mensia, laban semua mensia mati dibai Adam, nya alai semua mensia deka idup dibai Kristus. Tang genap iku deka diangkatka begintir-gintir: keterubah, Kristus ke buah bungas, lalu lebuh Kristus datai baru, nya baru bala nembiak Kristus. Udah nya baru pengujung datai, lebuh Kristus nyerahka Perintah ngagai Allah Taala ti Apai, lebuh Iya udah ngerusak semua pemerintah, perintah enggau kuasa. Laban Iya enda tau enda merintah nyentuk ngagai maya Allah Taala udah ngengkahka semua munsuh Iya di baruh kaki Iya. Munsuh ti pemadu dudi dirusak nya pemati. Laban “Allah Taala udah ngengkahka semua utai di baruh kaki Kristus.” Tang leka jaku “semua utai” sigi terang enda nyengkaum Allah Taala Empu, ke ngengkahka semua utai di baruh kaki Kristus. Lebuh semua utai udah diengkahka magang di baruh Kristus, nya baru Anak Allah Taala Empu, deka diengkahka di baruh Allah Taala, ke udah ngengkahka semua utai di baruh Kristus, ngambika Allah Taala nyadi semua dalam semua. Enti nadai pengangkat ari mati, nama kebuah orang dibaptisa ngarika orang ke mati? Enti orang ke mati enda diangkatka idup baru, nama kebuah orang dibaptisa ngarika sida? Lalu nama kebuah kami berambunka nyawa diri tiap jam? Aku mati tiap hari, menyadi. Jaku tu amat, baka pengamat aku ke temegahka kita dalam Jesus Kristus Tuhan kitai. Enti aku udah belaban di Epesus nitihka juluk ati mensia baka ke ngelaban jelu babas, nama penguntung ulih aku ari nya? Enti orang ke mati enda diangkatka idup baru, “Aram kitai makai ngirup, laban pagila kitai mati.” Anang nejuka orang nipu kita: “Orang ke jai ngerusak moral ti menyana.” Anang enda nemu berunding, lalu badu agi bedosa. Aku nyebut tu kena aku ngemaluka kita laban sekeda kita nadai penemu pasal Allah Taala. Tang sekeda orang deka nanya, “Baka ni ku orang ke udah mati diangkatka idup baru? Baka ni ku gaya tubuh sida lebuh sida diangkatka idup baru?” Beli! Utai ti ditanam enda ulih idup enti iya enda dulu mati. Lalu utai ti ditanam nya ukai tubuh ti deka datai, tang leka aja, nemuka utai nya gandum, tauka utai bukai. Tang Allah Taala meri iya tubuh nitihka peneka Allah Taala Empu. Semacham leka, semacham ga tubuh. Ukai semua isi nya sebaka. Isi mensia lain ari isi jelu, ari isi burung, enggau ari isi ikan. Utai ti di serega bisi tubuh, lalu utai ti di dunya mega bisi tubuh, tang pemanah gaya tubuh ti di serega enda sebaka enggau pemanah gaya tubuh ti di dunya. Mata hari bisi pemanah gaya ke diri empu. Bulan bisi pemanah gaya ke diri empu. Bintang bisi pemanah gaya ke diri empu, lalu pemanah gaya bintang sigi-sigi endang enda sebaka. Baka nya mega pasal pengangkat ari mati. Utai ti ditanam nya tubuh ti nemu mati, tang tubuh ti diangkatka idup baru enda nemu mati agi. Lebuh iya ditanam, iya nadai dibasa, tang iya diangkatka dalam mulia. Iya lemi lebuh iya ditanam, tang lebuh iya diangkatka idup baru, iya bisi kuasa. Lebuh iya ditanam, iya endang tubuh dunya, tang lebuh iya diangkatka idup baru, iya nyadi tubuh roh. Enti tubuh dunya amat bisi, tubuh roh mega bisi. Munyi ti ditulis, “Mensia ti keterubah, iya nya Adam, nyadi mensia ke idup”, tang Adam ti penudi nya Roh ti meri pengidup. Tang ukai tubuh roh ke dulu datai, tang tubuh dunya, udah nya baru tubuh roh. Mensia ti keterubah, ke digaga ari amau, datai ari dunya, tang mensia ti kedua nya datai ari serega. Semua orang ke digaga ari amau, sebaka enggau iya ke digaga ari amau, tang orang serega sebaka tubuh enggau orang ke datai ari serega. Baka kitai ke sebaka gamal enggau mensia ti digaga ari amau, baka nya mega kitai deka sebaka gamal enggau Orang ke datai ari serega. Utai ti ku aku, menyadi, nya baka tu: isi enggau darah enda ulih bempu Perintah Allah Taala, lalu utai ti nemu mati, enda ulih bempu utai ti enda nemu mati. Dinga kita, aku deka madahka siti misteri ngagai kita! Ukai semua kitai deka mati, tang semua kitai deka diubah, tekala nya, dalam sekejap mata, lebuh terumpit ti penudi disepu. Laban terumpit nya deka disepu, lalu semua orang ke mati deka diangkatka idup baru nyadi orang ke enda nemu mati agi, lalu kitai deka diubah. Laban tubuh ti nemu buruk tu enda tau enda diubah nyadi tubuh ti enda nemu buruk, lalu tubuh ti nemu mati, enda tau enda diubah nyadi tubuh ti enda nemu mati. Lebuh tubuh ti nemu buruk tu diubah nyadi tubuh ti enda nemu buruk, lalu tubuh ti nemu mati diubah nyadi tubuh ti enda nemu mati, nya baru jaku ti ditulis dalam Bup Kudus dikamatka: “Pemati udah dirusak, pemenang udah ulih.” “O pemati, dini alai pemenang nuan? O pemati, dini alai penyengat nuan?” Penyengat pemati nya dosa, lalu dosa bulih kuasa ari Adat. Tang beri terima kasih ngagai Allah Taala ke udah meri kitai pemenang ulih Jesus Kristus Tuhan kitai! Nya alai, menyadi, bediri tegap, anang bekinsit, seruran bebendar gawa ke Tuhan, laban kita nemu, kita enda lebu gawa ke Iya. Ngenang pasal duit tulung ti diberi ngagai nembiak Tuhan: kereja aja utai nya baka ti diasuh aku kereja raban eklisia di Galatia. Genap hari ti keterubah tiap minggu, genap iku kita patut ngalau lalu naruh duit nitihka pemayuh ti ulih kita, ngambika kita enda ibuh begumpulka duit lebuh aku datai. Lalu lebuh aku datai, aku deka meri surat ngagai orang ke dikemendarka kita, lalu ngasuh sida mai pemeri kita ngagai Jerusalem. Enti kita ngira aku patut mega mansang kin enggau sida, awakka sida nyempulang aku. Aku deka nemuai ngagai kita lebuh aku udah nemuai ngagai menua Masedonia, laban aku endang deka bejalai nengah menua nya, lalu nyangka aku deka diau lama mimit enggau kita, nyangka sepemanjai musin chelap, ngambika kita ulih nulung nyendiaka aku nampung pejalai aku ngagai sebarang endur aku deka. Aku enggai semina ngelansa aja betemu enggau kita diatu, tang ngarapka diri ulih diau lama mimit enggau kita, enti nya peneka Tuhan. Tang aku deka diau di Epesus ditu nyentuk ngagai hari Pentikos, laban pintu udah ditukangka alai aku ngereja pengawa ti manah, taja pen mayuh orang nyakal aku. Enti Timoti datai, anang ngasuh iya nangi begulai enggau kita, laban iya bekereja ke Tuhan, baka aku empu. Nya alai anang nejuka orang ngeleseka iya. Tulung iya mupuk enggau selamat, ngambika iya ulih mulaika diri ngagai aku, laban aku ngadang iya pulai kitu baru sama enggau orang Kristian ti bukai. Nyadi pasal menyadi kitai Apollos, aku udah bebendar ngasuh iya nemuai ngagai kita sama enggau menyadi kitai ti bukai, tang iya apin deka nemuai ngagai kita diatu. Iya deka nemuai lebuh iya bisi peluang. Selalu bejaga, bediri tegap dalam pengarap, berani sereta kering. Kereja semua utai dalam pengerindu. Menyadi, kita nemu sida Stepanas sebilik endang orang ke terubah-rubah nyadi orang Kristian di menua Akaia, lalu sida udah, enggau ati ti angkun, nyerahka diri bekereja ke nembiak Tuhan. Aku meransang kita nulung orang ke baka nya, sereta nulung semua orang bukai ke sama gawa lalu bekereja enggau sida. Aku balat gaga ngelaluka penatai Stepanas, Portunatus, enggau Akaius laban sida tiga udah bekereja nganti kita betulungka aku, laban sida ngelantangka ati aku, enggau ngelantangka ati kita. Orang ke baka nya patut dikingatka kitai. Semua eklisia di menua Asia ngirumka tabi basa ngagai kita. Akuila seduai Prisila enggau raban eklisia ke begempuru dalam rumah seduai iya, ngirumka tabi basa dalam nama Jesus Kristus. Semua bala menyadi ditu bela ngirumka tabi basa. Beri tabi pengerindu ngagai pangan diri. Aku, Paul, nulis jaku tabi tu ngena jari aku empu. Awakka orang ke enda rinduka Tuhan, ditinggang sumpah. Datai meh Nuan, Tuhan! Awakka pengasih Tuhan Jesus meruan enggau kita. Pengerindu aku meruan enggau kita dalam Jesus Kristus. Amin. Surat ari Paul, rasul Jesus Kristus ulih peneka Allah Taala, enggau ari menyadi kitai Timoti, Ditujuka ngagai eklisia Allah Taala di Korint, nyengkaum semua nembiak Tuhan di serata menua Akaia. Awakka Allah Taala ti Apai kitai enggau Tuhan Jesus Kristus meri kita berekat enggau pemaik. Pujika Allah Taala ti Apai Jesus Kristus Tuhan kitai, Apai ti pun semua pengasih, Allah Taala ti pun semua pengelantang, ke merindang kami lebuh kami dituntung semua macham penusah, ngambika kami ulih merindang orang bukai ke dituntung penusah, ngena tulung ti udah dikena Allah Taala merindang kami. Laban lebuh kami natka semua pemerinsa Kristus, kami balat diperindang Kristus. Enti kami diperinsa, nya ke pengelantang enggau pengelepas kita, lalu enti kami ditulung, nya ke pengelantang kita, ti diasaika kita lebuh kita, enggau ati ti liat, natka pemerinsa baka ti ditatka kami. Pengandal kami ke kita endang enda beguyat, laban kami nemu, enti kita natka pemerinsa baka ti ditatka kami, kita deka mega diperindang baka kami. Kami enggai ke kita enda nemu, menyadi, pasal penusah ti ditatka kami di Asia, laban kami amat balat merinsa datai ke kami nyau asai ke deka mati. Iya ti bendar, kami asai ke kena ukum bunuh, datai ke kami nyau enda manggaika diri ba pengering kami empu agi, tang ba Allah Taala ke ngangkatka orang ari mati. Iya udah ngelepaska kami ari penusah ti tau ngambi nyawa, lalu Iya deka majak ngelepaska kami. Kami sigi arapka Iya deka ngelepaska kami baru, lebuh kita nyaup kami ngena sampi kita, ngambika mayuh orang deka meri terima kasih ngarika kami ketegal berekat ti udah diberi ngagai kami ari sampi mayuh orang. Tu utai ti dikemegahka kami: ati kami ti beresi udah besaksi madahka kami udah idup di dunya tu, kelebih agi dalam kaul kami enggau kita, dalam pengudus sereta enggau ati ti betul ari Allah Taala. Kami udah ngereja nya ukai ngena penemu-dalam ti datai ari dunya, tang nitihka pengasih Allah Taala. Laban kami ukai nuliska utai ti enda ulih dibacha tauka enda ditemu kita. Lalu aku ngarapka, baka kita ke udah mereti mimit pasal kami, kita deka meretika kami enggau penuh, ngambika kita ulih temegahka kami baka kami ke temegahka kita lebuh Hari Tuhan Jesus. Laban aku endang ngarapka tu, nya kebuah aku merambu diri nemuai ngagai kita dulu, ngambika kita lantang dua kali lipat; Aku merambu diri nemuai ngagai kita lebuh aku mansang ngagai menua Masedonia, lalu nemuai baru ngagai kita lebuh aku pulai ari Masedonia, lalu ngasuh kita nulung aku mulaika diri ngagai menua Judea. Lebuh aku merambu utai nya, kati runding aku kalik-kalik? Tauka aku merambu semua utai nya ngena chara mensia, ngambika aku nyebut “Au, au” lalu tekala nya nyebut “Enggai, enggai”? Laban Allah Taala endang tau dikarapka, nya alai pesan kami ngagai kita ukai “Au” enggau “Enggai.” Laban Anak Allah Taala, Jesus Kristus, ke udah ditusui Silas, Timoti enggau aku empu ngagai kita, ukai “Au,” enggau “Enggai,” tang dalam Iya semua utai endang seruran “Au” belama. Laban dalam Iya semua semaya Allah Taala endang “Au” magang. Nya kebuah kitai nyebut “Amin” dalam nama Iya, kena kitai ngemuliaka Allah Taala. Tang Allah Taala Empu udah ngasuh kami begempung enggau kita dalam Kristus, lalu udah nata kitai, lebuh Iya udah ngelai kitai tu endang enggi Iya lalu meri Roh Iya ke dalam ati kitai kena nyamin utai ti deka datai. Aku ngangauka Allah Taala nyadika saksi aku: Aku enda nemuai baru ngagai kita di Korint, laban aku enggai ngenusahka ati kita. Ukai reti nya kami merintah pengarap kita, tang bekereja enggau kita ke pengaga kita, laban kita bediri tegap ulih pengarap kita. Nya alai aku mutuska runding enggai nemuai ngagai kita baru, enggai ke aku ngenusahka ati kita. Laban enti aku ngenusahka ati kita, sapa deh tau dikarapka aku ngasuh ati aku gaga, kelimpah ari orang ke udah tusah ati laban aku? Aku nulis baka nya suba, ngambika lebuh aku datai, aku enda tusah ati laban orang ke patut ngasuh ati aku gaga, laban aku sigi arapka semua kita deka sama gaga ati enggau aku. Laban aku nulis ngagai kita enggau ati ti balat tusah sereta bekeberai ai mata, ukai deka ngenusahka ati kita, tang ngambika kita nemu pemesai pengerindu aku ke kita. Enti orang bisi udah ngenusahka ati orang bukai, iya ukai ngenusahka ati aku, tang ngenusahka ati semua kita, abis kurang iya, enggai ke jaku aku kelalu kasar. Ukum ti diletak bala mayuh ngagai orang nya, udah chukup ke iya. Nya alai diatu, kita patut ngampun sereta merindang iya, enggai ke iya enda ulih natka penusah ati diri. Nya alai aku minta kita madah ngagai iya baru pengerindu kita ke iya. Aku nulis surat nya suba kena aku ngabas ati kita, enti kita tan diuji lalu ngasi dalam semua utai. Barang sapa diampun kita, mega diampun aku. Orang ke udah diampun aku, enti aku udah ngampun orang, udah diampun aku di mua Kristus, ke penguntung kita. Lalu kitai ngereja nya ngambika kitai enda ulih ditipu Sitan; laban kitai ukai enda nemu pelan iya. Lebuh aku datai di Troas nusui Berita Manah pasal Kristus, Tuhan udah muka pintu ke aku. Tang aku seruran enda nyamai ati, laban aku nadai tetemuka menyadi kitai Titus dia. Nya alai aku lalu meri selamat tinggal ngagai sida, lalu mupuk ngagai Masedonia. Tang aku meri terima kasih ngagai Allah Taala, laban Iya seruran nguluka kami menang dalam Kristus, lalu bejaku ngena kami ngerembaika penemu pasal Kristus baka bau rengut ti nyelamar ngagai semua endur. Laban ba Allah Taala kami tu bau rengut Kristus ke orang ti benung diselamatka, enggau ke orang ti tesat. Ba orang ke tesat, kami tu bau but pemati, tang ba orang ke benung diselamatka, kami tu bau rengut pengidup. Sapa ulih ngereja pengawa nya? Laban kami ukai bejualka jaku Allah Taala baka mayuh orang bukai, tang dalam Kristus kami bejaku enggau ati ti beresi di mua Allah Taala, baka orang ke dikirumka Allah Taala. Kati kami munyi ke muji diri baru? Kati kami begunaka surat puji ngagai kita tauka ari kita baka orang bukai? Kita empu ke nyadi surat kami, ke ditulis ba ati kami, ngambika bisi ditemu sereta dibacha semua orang. Kita empu ke ngayanka diri endang amat surat Kristus, ti udah disediaka kami, ukai ditulis ngena ai dawat tang ngena Roh Kudus Allah Taala ti idup, ukai ditulis ba papak batu, tang ba ati mensia. Nya meh pemesai pengarap kami ke Allah Taala, ulih Kristus. Ukai reti nya kami ngumbai diri landik ngereja pengawa tu ngatika diri; pengelandik nya datai ari Allah Taala, ke udah meri kami pengelandik bekereja ke sempekat ti baru, ukai bekereja ke adat ti ditulis, tang bekereja ke Roh Kudus, laban adat ti ditulis, munuh, tang Roh Kudus meri pengidup. Enti Adat ti mai pemati, ti ditulis ba lampang batu, pegari ngena mulia ti ngemalat nya, datai ke orang Israel nyau enda ulih merening ngagai mua Moses, empa pemalat penampak mulia nya, taja pen mulia nya majak ayas-seayas, enda ka pengawa Roh Kudus deka lebih agi bemulia ari nya? Laban enti pengawa ti meri ukum bisi mulia, tentu besai agi ga mulia pengawa ti mai pengelurus! Laban utai ti bemulia suba nyau nadai agi bemulia diatu enti dibandingka enggau mulia ti lebih besai agi ari nya. Lalu enti utai ti tau lesap pegari ngena mulia, tentu besai agi ga mulia utai ti tan belama iya! Nya alai laban kami bisi pengadang tu, kami amat berani. Kami enda baka Moses, ke mampul mua diri ngena kain ngambika orang Israel enda meda penampak mulia nya majak ayas-seayas. Tang runding sida udah tumpul, laban nyentuk ngagai sehari tu, tambai mua sida agi mengkang lebuh sempekat lama dibacha. Tambai mua nya apin dibuai, laban semina Kristus aja ulih muai tambai nya. Indah nyentuk ngagai sehari tu, genap kali Adat Moses dibacha, deh runding sida agi mengkang dipampul kain tambai; tang lebuh orang nguingka diri ngagai Tuhan, kain tambai nya dibuai. Tuhan endang Roh, lalu dia alai Roh Tuhan, dia meh pengelepas. Lalu semua kitai, enggau mua ti enda dipampul sereta ngayanka mulia Tuhan, deka diubah nyadi sebaka gamal enggau Iya, enggau mulia ti nambah-menambah, laban mulia nya datai ari Tuhan ke endang Roh. Nya alai laban kami udah diberi pengawa tu ulih pengasih Allah Taala, kami enda mantul. Kami udah ngelengkaka semua utai ti dipelalaika ti tau ngasuh malu; kami enggai nipu orang, tauka nyarutka jaku Allah Taala, tang madahka utai ti bendar enggau terang di mua Allah Taala ngambika genap iku orang, ngena pengasai ati sida siku-siku, nemu kami endang madahka utai ti bendar. Lalu enti sema Berita Manah nya dipampul, iya semina dipampul ari orang ke tesat. Ba pekara nya, petara dunya udah mampul runding orang ke enda arap, kena nagang sida meda penampak Berita Manah pasal mulia Kristus, ke sebaka gamal enggau Allah Taala. Laban kami ukai nusui pasal kami empu, tang pasal Jesus Kristus ti Tuhan, lalu kami empu nyadi ulun kita, ketegal Jesus. Laban Allah Taala, ke nyebut, “Awakka penampak manchar ari pemetang,” udah manchar dalam ati kitai, ngambika kita nemu, mulia Iya ulih dipeda ba mua Jesus Kristus. Tang reta roh nya disimpan dalam periuk tanah kena nunjukka kuasa ti besai nya datai ari Allah Taala, ukai datai ari kami. Kami dituntung semua macham penusah, tang kami enda alah; beba runding tang enda kelalu tusah; kena perinsa, tang enda ditinggalka; dipalu, tang enda rusak; seruran mai pemati Jesus dalam tubuh kami, ngambika pengidup Jesus mega diayanka ba tubuh kami. Laban lebuh kami idup, kami endang seruran napi pemati ketegal Jesus, ngambika pengidup Jesus diayanka ba tubuh kami ke tau mati tu. Nya alai pemati bekereja dalam kami, tang pengidup bekereja dalam kita. Tang kami bisi roh pengarap baka ti ditulis dalam Bup Kudus, “Aku arap, nya alai aku bejaku.” Kami mega arap, nya alai kami bejaku, laban kami nemu, Iya ke udah ngangkatka Tuhan Jesus ari mati, deka mega ngangkatka kami ari mati sama enggau Jesus, lalu deka mai kami sama enggau kita, ngagai mua Iya Empu. Semua utai tu ke penguntung kita, ngambika pengasih ti ngelekai ngagai mayuh agi orang, ngasuh mayuh agi orang meri sampi terima kasih, kena ngemuliaka Allah Taala. Nya alai kami enda mantul. Taja pen tubuh kami majak lemi, tang roh kami digaga nyadi baru tiap hari. Laban penusah ti mit sereta enda lama tu nyendiaka kami nerima mulia ti meruan belama iya, ti nadai banding, laban kami ukai merening ngagai utai ti ulih dipeda, tang ngagai utai ti enda ulih dipeda; laban utai ti ulih dipeda semina tan enda lama, tang utai ti enda ulih dipeda, tan belama iya. Laban kami nemu, enti langkau kain ti alai kitai diau tu dirubuh, kitai bisi rumah ari Allah Taala, rumah ti meruan belama iya, ti ukai digaga jari mensia. Laban dalam langkau kain tu kitai bedemuh minta rumah ti di serega dirasukka ba kitai, ngambika lebuh rumah nya dirasukka ba kitai, kitai enda agi telanjai. Laban seagi-agi kitai diau dalam langkau kain tu, kitai bedemuh mai ma ti berat laban kitai enggai dilepaska ari tubuh tu, tang laban kitai keran dekaka tubuh serega dirasukka ba kitai, ngambika tubuh ti nemu mati tu ditelan pengidup. Allah Taala Empu ke udah nyendiaka kitai ke nya, lalu Iya udah meri kitai Roh Kudus nyadika jamin. Nya kebuah kami seruran kempang ati, lalu kami nemu, seagi-agi kami diau dalam tubuh tu, kami jauh ari Tuhan, laban kami idup ngena pengarap, ukai ngena utai ti dipeda. Kami sigi amat kempang ati lalu keran deka ninggalka tubuh tu, lalu diau begulai enggau Tuhan. Nya alai, tuju ati kami endang seruran deka ngelantangka ati Iya, nemuka kami diau dalam tubuh tu tauka ninggalka tubuh tu. Laban semua kitai enda tau enda bediri di mua Kristus lalu diakim ulih Iya, ngambika genap iku kitai nerima upah, nitihka utai ti udah dikereja kitai siku-siku ngena tubuh tu, nemuka utai nya manah tauka jai. Nya alai, laban kami nemu reti nangika Tuhan, kami nguji ngumbuk orang bukai. Tang Allah Taala ngelala sapa kami tu, lalu aku mega ngarapka kita ngelala sapa kami tu dalam ati kita. Kami ukai muji diri baru di mua kita, tang meri kita peluang temegahka kami, ngambika kita ulih nyaut orang ke temegahka utai ti dipeda ba mensia lalu ukai temegahka utai ti dalam ati mensia. Enti kami gila, kami gila ke Allah Taala. Enti kami enda gila, nya ke penguntung kita. Laban pengerindu Kristus mejalka kami, laban kami nemu, siku orang udah mati ngarika semua mensia, nya alai, semua mensia bela udah mati magang. Lalu Iya mati ke semua mensia, ngambika orang ke idup ukai idup ke diri empu agi, tang idup ke Iya ke udah mati lalu diangkatka idup baru ngarika sida. Nya alai, belabuh ari diatu, kami enda agi ngira orang ngena chara dunya. Taja pen kami dulu suba udah ngira Kristus ngena chara dunya, tang kami diatu enda agi ngira Iya ngena chara nya. Nya alai, enti orang nya dalam Kristus, iya nyadi mensia ti baru. Iya ke lama nadai agi, iya ke baru, udah datai! Semua utai tu datai ari Allah Taala magang, ke udah mai kitai bebaik enggau Iya Empu, ulih Kristus, lalu udah meri kitai pengawa mai semua mensia bebaik enggau Iya. Reti nya, dalam Kristus, Allah Taala udah mai semua dunya bebaik enggau Iya Empu, enda ngitung penyalah sida, lalu ngasuh kami nusui pesan pemaik tu. Nya alai, kami nyadika pengari Kristus, laban Allah Taala bejaku ngena kami. Kami bebendar ngarika Kristus ngumbuk kita, mai kita bebaik enggau Allah Taala. Ketegal kitai meh Allah Taala udah ngengkahka dosa kitai ba Iya ke enda bedosa, ngambika dalam Iya kitai digaga lurus di mua Allah Taala. Nya alai, laban kami sama bekereja enggau Allah Taala, kami mega bebendar ngumbuk kita, anang masau pengasih Allah Taala. Laban Allah Taala bisi nyebut: “Ba maya ti patut, Aku udah mendingka nuan, lalu lebuh hari pengelepas Aku udah nyaup nuan.” Dinga kita! Tu meh maya ti patut. Tu meh hari pengelepas. Kami nadai mempang jalai orang, ngambika orang enda ulih besalahka pengawa kami, tang dalam semua utai enggau ngena semua macham chara kami udah ngayanka diri amat ulun Allah Taala. Kami udah tan natka penusah, pemerinsa enggau penyuntuk, dipalu, ditutup dalam rumah jil, dijamah orang ke begau, bebendar bekereja, nadai tinduk, nadai utai diempa, ngena ulah ti tuchi, penemu, pengeliat ati, penelap, pengerindu ti bendar, madahka utai ti amat, enggau ulih kuasa Allah Taala; ngena pengelurus nyadika senyata ba jari kanan enggau ba jari kiba kami, dibasa orang, dikeleseka orang, dipejai orang, dipuji orang, dikumbai orang bula, taja pen kami madahka utai ti bendar; enda dikelala orang, taja pen semua orang ngelala kami; baka ke mati, tang, baka ke dipeda kita, kami agi mengkang idup; baka ke diukum, tang enda dibunuh; baka ke tusah ati, tang seruran rami gaga; baka ke seranta, tang ngaga mayuh orang nyadi kaya; baka ke nadai utai, tang bempu semua utai. Kami bejaku enggau terang ngagai kita orang Korint. Kami udah nukangka ati kami ngagai kita. Kami nadai sekat rinduka kita; kita empu ke nyekat diri rinduka kami. Kena kitai besilih -- Aku bejaku baka ke ngagai anak mit -- tukangka ati kita ngagai kami. Anang besulu enggau orang ke enda arap. Laban baka ni ku pengelurus ulih begulai enggau penyai? Tauka baka ni ku penampak ulih bekaul enggau pemetang? Baka ni ku Kristus ulih besetuju enggau Sitan? Tauka orang ke arap tau sebaka enggau orang ke enda arap? Baka ni ku rumah Allah Taala ulih besetuju enggau engkeramba? Laban kitai tu rumah Allah Taala ti idup! Munyi ti disebut Allah Taala, “Aku deka diau dalam sida lalu begulai enggau sida, lalu Aku deka nyadi Allah Taala sida, lalu sida deka nyadi nembiak Aku. Nya alai pansut kita ari sida, lalu seraraka diri ari sida, ku Tuhan bejaku, lalu anang negu utai ti enda tuchi; nya baru Aku deka nerima kita, lalu Aku deka nyadi Apai kita, lalu kita deka nyadi anak lelaki enggau anak indu Aku, ku Tuhan ti Pemadu Bekuasa bejaku.” Nya alai laban kitai bisi semaya tu, menyadi, aram kitai nuchi diri empu ari semua utai ti ngamahka tubuh enggau roh kitai, lalu nyadi pemadu kudus nangika Allah Taala. Sambut meh kami ke dalam ati kita, laban kami nadai udah ngereja utai ti salah ngagai orang, nadai udah kala jai enggau orang, tauka ngambi ulih ba orang. Aku nyebut tu ukai laban aku deka besalahka kita, laban munyi ti udah disebut aku suba, kami sayauka kita, mati sama, idup sama enggau kita. Aku suah temegahka kita. Aku balat gaga ati ke kita. Aku berasai diperansang. Taja pen kami dituntung mayuh macham penusah, tang ati aku lantang amat. Indah lebuh kami datai di Masedonia, deh kami enda ulih belelak, tang dituntung penusah di semua endur, betalat enggau orang, lalu ati kami berasai takut. Tang Allah Taala, ke meransang orang ke lemi semengat, udah meransang kami ngena penatai Titus, lalu ukai semina ngena penatai iya aja, tang mega ngena berita pasal kita ke udah ngelantangka ati Titus, lebuh iya madahka pasal kita ke balat lelengau sereta tusah ati ke aku, pasal kita ke angkun sereta irauka aku. Nya alai, ati aku berasai lantang agi ari selama. Laban, enti sema surat aku nya udah ngasuh ati kita enda lantang, aku enda nesal ati ke nya (taja pen aku nesal ati mimit lebuh aku meda kita tusah ati enda lama laban surat nya). Tang diatu ati aku gaga, ukai laban aku udah ngenusahka ati kita, tang laban ati kita ti tusah udah ngasuh kita nesal ati; laban ati ti tusah nya endang nitihka peneka Allah Taala, nya alai kami nadai ngemediska kita. Laban ati ti tusah ulih peneka Allah Taala, ngasuh kita nesal ati, lalu ati kita ti nesal mai kita ngagai pengelepas. Nya nadai ngasuh kita ngesal. Tang ati ti tusah ulih peneka mensia, mai pemati. Peda kita utai ti udah nyadi ari ati kita ti tusah ulih peneka Allah Taala: kita enda empelita agi, kita bebendar deka ngayanka diri nadai penyalah! Peda kita pemalat kita pedis ati, pemalat kita irau, pemalat kita lelengau, pemalat kita angkun, pemalat kita seruran sedia deka ngukum penyalah! Dalam semua pekara tu kita udah mandangka diri endang nadai penyalah. Nya alai, taja pen aku udah nulis surat nya suba ngagai kita, aku ukai nulis nya ketegal orang siku nya ke udah ngereja penyalah, lalu ukai mega ketegal orang ke udah pedis laban iya, tang ngambika, di mua Allah Taala, kita empu nemu pengangkun diri ke kami. Nya utai ti meransang ati kami. Nambahka nya, kami balat gaga ati meda pengaga ati Titus laban semua kita bela udah ngelantangka ati iya! Laban aku amat udah temegahka pasal kita di mua iya, lalu kita enda ngemaluka aku. Baka kami ke seruran madahka utai ti bendar ngagai kita, baka nya mega kami madahka utai ti bendar ngagai Titus lebuh kami temegahka pasal kita. Iya lalu balat agi rinduka kita, lebuh iya ngingatka semua kita ke ngasi, enggau gaya kita ke getar-getar sereta nangi nyambut penatai iya. Ati aku chukup gaga laban kita tau dikarapka dalam semua utai. Kami deka ke kita nemu, menyadi, pasal pengasih ti diberi Allah Taala ke mayuh bengkah eklisia di menua Masedonia. Taja pen sida udah balat diuji mayuh macham penusah, tang sida udah meri tulung enggau ati ti amat gaga sereta gerah mudah, taja pen sida udu seranta. Laban, aku madah ngagai kita, sida udah meri enggau naka ulih sida, enggau lebih agi ari ti ulih diberi sida. Ari peneka ati sida empu sida minta kami meri sida peluang sama enggau meri tulung ngagai bala nembiak Tuhan. Lalu sida ngereja nya, ukai baka ke disangka kami, tang sida dulu nyerahka diri ngagai Tuhan, lalu udah nya baru sida nyerahka diri ngagai kami, nitihka peneka Allah Taala. Nya alai kami ngasuh Titus, ke udah ngepunka pengawa pengasih nya, mega nembuka pengawa nya ba bala kita. Nyadi diatu baka kita ke mujur dalam semua utai--dalam pengarap, dalam jaku, dalam penemu, dalam pemendar kita ngereja utai, enggau dalam pengerindu kita ke kami--awakka kita mega mujur dalam pengawa pengasih tu. Aku ukai nyebut tu laban aku deka meri atur ngagai kita, tang laban aku deka nemu pengamat pengerindu kita, enti dibandingka enggau pengerindu orang bukai. Laban kita nemu pengasih Jesus Kristus Tuhan kitai: taja pen Iya kaya, tang ketegal kita, Iya nyadi seranta, ngambika ulih penyeranta Iya, kita tau nyadi kaya. Ba pekara tu aku meri kita jaku lalau ti tau dititihka kita: Taun siti tu kemari kita tu orang ti keterubah, ukai semina meri tang mega orang ke terubah bisi ati deka meri. Diatu tembuka pengawa nya, ngambika pengeransing kita ke merambu pengawa nya setipak enggau pengeransing kita nembuka iya, ngena utai ti dikemisi kita. Laban enti pengeransing nya bisi, pemeri kita nya deka diterima, beduduk ba utai ti dikemisi kita, ukai beduduk ba utai ti nadai ba jari kita. Aku ukai ngumbai kita patut ditating enggau pengawa ti berat nya, lalu orang bukai enda, tang ngambika semua bela bisi utai magang. Diatu lebuh kita bulih mayuh utai, kita meri sida utai ti dipeguna sida, ngambika lebuh sida bulih mayuh utai, sida meri kita utai ti dipeguna kita, ngambika semua bela bisi utai magang. Munyi ti udah ditulis, “Orang ke ngumpul mayuh, nadai bulih kelalu mayuh, lalu orang ke ngumpul mimit, nadai mega bulih kelalu mimit.” Aku meri terima kasih ngagai Allah Taala ke udah ngasuh Titus ransing ati nulung kita baka ti deka dikereja aku empu! Laban iya ukai semina nerima peminta kami, tang laban iya empu endang majak ransing agi ati deka nulung kita, nya alai iya deka nemuai ngagai kita ari peneka ati iya empu. Kami ngirumka enggau iya, siku menyadi ke dibasa orang dalam semua eklisia ketegal pengawa iya ke nusui Berita Manah. Lalu ukai semina nya aja, tang iya mega udah diasuh mayuh bengkah eklisia bejalai enggau kami lebuh kami ngereja pengawa pengasih tu, ke mulia Tuhan Empu, enggau kena nunjukka pengeransing kami ke deka nulung. Kami deka ngereja pengawa ba pasal pemeri tu enggau bejimat enggai ke orang mantah kami, laban kami endang deka ngereja utai ti ngena, ukai semina di mua Tuhan aja, tang mega di mua mensia. Nya alai, kami ngasuh menyadi kami tu bejalai enggau sida. Kami suah udah nguji iya, lalu kami nemu iya endang ransing dalam semua pekara. Lalu diatu iya balat agi ransing ari ke udah, laban iya arap amat ke kita. Nyadi pasal Titus, iya endang tawing aku bekereja betulungka kita. Pasal bala menyadi bukai, sida nya pengari ari mayuh bengkah eklisia, ke nyadi mulia Kristus. Nya alai di mua semua eklisia, ayanka pengerindu kita ke sida enggau kebuah kami ke temegahka kita di mua sida. Aku tau enda ibuh nulis ngagai kita pasal tulung ti diberi ngagai bala nembiak Tuhan, laban aku nemu kita endang keran deka nulung, lalu aku udah temegahka nya di mua orang Masedonia, madahka orang di menua Akaia endang udah sedia kenyau ari taun siti tu kemari, lalu pengeransing ati kita udah nyungkak nyauka semua bala sida. Tang diatu aku ngasuh Titus enggau sida menyadi tu nemuai ngagai kita, ngambika kami enda lebu temegahka kita ba pekara tu, ngambika kita endang amat sedia, munyi ti dipadahka aku ngagai sida; enggai ke lebuh orang Masedonia datai enggau aku, lalu nemu kita enda sedia, kami malu ke diri ke udah balat ngarapka kita! Lalu kita empu pen malu. Nya alai aku ngira, aku patut ngasuh sida menyadi nya nemuai dulu ngagai kita, lalu nyendiaka dulu pemeri ti udah disemaya kita, ngambika pemeri nya sedia magang, ukai ari pejal, tang ari peneka ati kita empu. Ingatka jaku tu: orang ke nanam mimit, deka ngetau mimit, lalu orang ke nanam mayuh, deka ngetau mayuh. Genap iku kita patut meri nitihka pemutus runding diri, ukai enggau ati ti lembau, tauka ari pejal, laban Allah Taala rinduka orang ke meri enggau ati ti gaga. Lalu Allah Taala ulih meri kita semua macham berekat ti belimpah-limpah, ngambika lebuh kita seruran chukup semua utai, kita ulih meri mayuh utai kena ngereja genap bengkah pengawa ti badas. Munyi ti ditulis, “Iya meri enggau ati ti gerah mudah. Iya meri ngagai orang ke seranta. Pengelurus Iya meruan belama iya.” Allah Taala, ke meri benih ngagai orang ke nanam, enggau roti ke pemakai, deka meri lalu nambahka semua utai kita, sereta nambahka asil pengelurus kita. Kita deka digaga nyadi kaya ngena semua macham chara laban kita meri enggau ati ti gerah mudah, ti deka nyungkak orang meri terima kasih ngagai Allah Taala ketegal pemeri kita ke diterima sida ari kami, laban pengawa ti dikereja kita tu ukai semina meri utai ti dipeguna bala nembiak Tuhan, tang mega nyungkak mayuh orang meri terima kasih ngagai Allah Taala. Nyadi laban kita udah diuji ngena pengawa tu, kita deka ngemuliaka Allah Taala ketegal kita ngasi lalu ngaku Berita Manah pasal Kristus, enggau ketegal kita meri enggau ati ti gerah mudah ngagai sida enggau ngagai orang bukai. Lalu enggau ati ti balat lelengau, sida deka besampika kita ketegal pemesai pengasih ti udah diberi Allah Taala ngagai kita. Beri terima kasih ngagai Allah Taala ketegal pemeri Iya ti enda ulih ditelah! Aku, Paul, ulih pemaruh ati enggau penelap Kristus, minta kita--aku ti takut lebuh aku betunga mua enggau kita, tang berani lebuh aku jauh ari kita -- aku minta kita anang nyungkak aku kasar enggau kita lebuh aku begulai enggau kita, baka ti deka dikereja aku ngagai orang ke ngumbai kami gawa ngena chara mensia. Kami endang idup ngena chara mensia, tang kami ukai beperang ngena chara mensia, laban senyata ti dikena kami beperang ukai senyata dunya, tang kuasa Allah Taala kena ngerusak kuta. Kami ngerusak kelikuh enggau semua utai ti ngelaban penemu pasal Allah Taala, lalu nangkap semua runding lalu ngasuh sida ngasika Kristus. Kami sedia deka ngukum semua orang ke enda ngasi, lebuh kita empu udah chukup ngasi. Kita semina meda gamal utai aja. Enti orang arapka diri nembiak Kristus, awakka iya berunding baru lalu ingatka kami tu mega nembiak Kristus, baka iya empu. Laban enti aku temegah lebih ari ti patut pasal kuasa kami, ti diberi Tuhan kena nirika kita, ukai kena ngeruntuhka kita, aku enda malu ke nya. Aku ukai baka ke ngemba kita ngena surat. Laban ku sida, “Surat iya kasar, sereta terit, tang iya empu lemi batang tubuh, lalu jaku iya nadai guna!” Orang ke baka nya patut nemu, utai ti ditulis kami lebuh kami enda begulai enggau kita, sigi deka mega dikereja kami lebuh kami begulai enggau kita. Kami enda berani nyemaka tauka mandingka diri enggau orang ke muji diri baka nya. Lebuh sida nyukat lalu mandingka diri enggau pangan diri, sida nunjukka diri beli. Tang kami enggai temegah lebih ari ti patut, tang semina deka temegahka pengawa ti udah diasuh Allah Taala kereja kami, nyengkaum bekereja ba bala kita. Laban kami ukai ngereja lebih ari ti patut lebuh kami bekereja ba bala kita, laban kami tu orang ke terubah-rubah datai ba kita mai Berita Manah pasal Kristus. Kami ukai temegah lebih ari ti patut, reti nya, temegahka pengawa orang bukai; tang kami ngarap, lebuh pengarap kita mansang, pengawa ti dikereja kami deka ngerembai besai agi, ngambika kami ulih nusui Berita Manah di menua bukai ngilah menua kita, lalu enda ibuh temegahka pengawa ti dikereja ba endur alai orang bukai udah nusui Berita Manah. “Awakka orang ke deka temegah, temegahka Tuhan.” Laban ukai orang ke muji diri ke diterima Tuhan, tang orang ke dipuji Tuhan. Aku ngarapka kita deka sabar enggau aku, enti aku beli mimit. Aku minta kita sabar enggau aku! Aku chemburuka kita, baka Allah Taala ke chemburuka kita, laban aku udah ngasuh kita betunang enggau siku laki, iya nya nyerahka kita dara bungas ngagai Kristus. Tang aku irau enggai ke, baka ular ke ngena pemintar iya nipu Awa, runding kita dibai tesat ari ati ti tuchi ti balat angkunka Kristus. Laban enti orang datai lalu nusui pasal Jesus ti lain agi ari Jesus ke ditusui kami, tauka kita nerima roh ti lain agi ari Roh ke diterima kita, tauka kita nerima berita manah ti lain agi ari Berita Manah ti diterima kita, kita jampat amat nunduk ngagai utai nya. Aku ngira diri enda kurang agi ari sida rasul ke ngumbai diri lebih agi bekuasa nya! Aku nyangka nadai udah kala belajar lanchar bejaku, tang aku bisi penemu, lalu tu udah diayanka kami ngagai kita dalam semua utai ti dikereja kami. Kati aku bedosa lebuh aku ngemaruhka diri ngambika kita ditinggika, ketegal aku nusui Berita Manah Allah Taala ngagai kita enggau nadai minta bayar? Aku ngerumpak eklisia bukai laban aku nerima sukung ari sida, ngambika aku ulih bekereja ke kita. Lalu lebuh aku begulai enggau kita, lalu aku suntuk utai, aku enda nating kita, laban utai ti dipeguna aku diberi bala menyadi ke datai ari Masedonia. Nya kebuah aku enggai, lalu deka majak enggai nating kita dalam semua utai. Laban ajar Kristus bisi dalam ati aku, nadai orang ulih madamka temegah aku tu di menua Akaia. Nama kebuah? Laban aku enda rinduka kita? Ukai! Allah Taala nemu aku rinduka kita! Lalu aku deka majak ngereja utai ti dikereja aku, ngambika enda meri peluang ngagai orang ke ngiga peluang temegah madahka diri bekereja baka kami. Laban orang ke temegah baka nya, nya nabi ti pelesu, pengelakar, ke nyaru diri nyadi rasul Kristus. Sigi aruh iya! Indah Sitan deh nemu nyaru diri nyadi melikat penampak. Nya alai, enda nyelai enti bala ulun Sitan nemu nyaru diri nyadi ulun pengelurus. Sida deka nerima ukum ti setipak enggau utai ti udah dikereja sida. Aku nandu nya baru: anang orang ngumbai aku beli. Tang enti sema kita ngumbai aku beli, terima aja meh aku ke beli tu, ngambika aku tau mega temegah mimit. Aku ke temegah tu ukai ari asuh Tuhan, tang ari pemeli aku empu. Laban mayuh orang temegahka utai ti dikereja dunya, aku pen deka mega temegah. Laban kita gaga ati sabar enggau orang ke beli, laban kita empu pintar! Kita sabar lebuh orang ngaga kita nyadi ulun, tauka ngelakar kita, tauka ngambi ulih ba kita, tauka ngerigangka diri, tauka nampar mua kita. Aku malu ngaku tu, tang kami enda ulih natka nya! Tang enti orang berani temegahka sebarang utai -- aku bejaku baka orang ke beli -- aku pen berani mega temegahka utai nya. Kati sida nya orang Hebrew? Aku mega orang Hebrew. Kati sida nya orang Israel? Aku mega orang Israel. Kati sida nya peturun Abraham? Aku mega peturun Abraham. Kati sida nya ulun Kristus? Aku bejaku munyi orang ke gila -- aku manah agi ari sida, aku udah bebendar agi bekereja ari sida, suah agi ari sida udah ditutup dalam rumah jil, suah agi udah disipat, lalu suah nyau deka mati. Lima kali aku udah disipat orang Judah, empat puluh kali (kurang siti) sekali-sekali aku disipat. Tiga kali aku dipalu ngena batang kayu; sekali aku dituku ngena batu; tiga kali ditabanka kapal karam, lalu sekali aku rarat sehari semalam ba tasik. Aku seruran bejalai, nyau deka bebadi ba sungai, laban perumpak, laban orang ke ari bansa aku empu, laban orang bansa bukai, nyau deka bebadi dalam nengeri, nyau deka bebadi di menua puang, ba tasik, nyau deka bebadi ba jari pangan ti pelesu; bebendar bekereja sereta merinsa, suah semalam-malam enda tinduk, lapar sereta aus, suah nadai pemakai, chelap sereta telanjai. Lalu kelimpah ari utai bukai, tiap hari aku ngasaika diri ditekanka pengirau ke semua eklisia. Sapa ke lemi, lalu aku enda lemi? Sapa ke dibai orang bedosa, lalu aku enda pedis ati? Enti aku enda tau enda temegah, aku deka temegahka utai ti nunjukka pengelemi aku. Allah Taala ti Apai Tuhan Jesus - awakka nama Iya dipuji belama iya! - nemu aku enda bula. Lebuh aku di Damaskus, tuan gabenor ke bekereja di baruh Raja Aretas, nyaga nengeri nya laban sida deka nangkap aku. Tang aku diulurka ngena bakul nengah lubang ba dinding kuta, lalu aku ngerarika diri ari iya. Aku enda tau enda temegah taja pen aku nadai bulih penguntung ari nya, tang aku deka temegahka pasal genera enggau pemandang ari Tuhan. Aku nemu siku orang Kristian ke udah dibai ngagai serega ba peringkat ti ketiga, empat belas taun tu ti udah. Aku enda nemu sekalika utai nya nyadi ba iya batang tubuh, tauka ukai -- semina Allah Taala aja nemu. Lalu aku nemu -- nemuka iya dibai batang tubuh tauka ukai, aku enda nemu; Allah Taala aja nemu -- iya dibai niki ke serega, alai iya ke ninga utai ti pemadu manah, ti enda ulih ditelah ngena jaku mensia. Aku deka temegahka orang ke baka nya, tang aku enggai temegahka diri empu, kelimpah ari temegahka pengelemi aku. Tang enti sema aku deka temegah, aku enda beli, laban aku deka madahka utai ti bendar. Tang aku enggai temegah, ngambika nadai orang ngira aku lebih ari ke dipeda sida ba aku, tauka didinga sida ari aku. Lalu kena nagang aku ngenyumbungka diri ketegal pemandang ti baka nya, sebengkah penyakit udah diberi ngagai tubuh aku, nyadika seruan Sitan, kena merinsaka aku. Tiga kali aku udah besampika ngagai Tuhan minta penyakit nya dibuai ari aku, tang ku Tuhan bejaku ngagai aku, “Pengasih Aku chukup ke nuan, laban kuasa Aku nyadi pemadu badas lebuh nuan lemi.” Nya alai aku deka lebih agi gaga ati temegahka pengelemi aku, ngambika kuasa Kristus meruan dalam aku. Nya alai ketegal Kristus aku gaga ke pengelemi aku, dipechat, dikeduan, diperinsa, enggau dituntung mayuh macham penusah. Laban lebuh aku lemi, aku kering. Aku udah beli. Kita empu ke nyungkak aku beli, laban iya ti bendar, kita patut muji aku, laban aku enda kurang agi ari sida “rasul” ke bekuasa nya, taja pen aku tu orang ke nadai guna. Tanda ti ngelai rasul ti bendar -- kereja ajih enggau kereja ti nyelai -- udah dikereja enggau ati ti liat ba bala kita. Baka ni ku kita kurang agi dikibuhka enti dibandingka enggau eklisia bukai, kelimpah ari aku ke enda nating kita? Ampun meh penyalah aku nya! Tu ketiga kali aku sedia deka nemuai ngagai kita. Lalu aku enggai nating kita, laban aku ukai minta utai kita, tang deka betemu enggau kita empu; laban ukai anak ke patut besimpanka utai ke apai indai, tang apai indai ke patut besimpanka utai ke anak. Aku gaga ati ngabiska semua utai aku, nyengkaum aku empu, kena nulung kita. Enti aku bebendar rinduka kita baka nya, kati kita deka kurang agi rinduka aku? Nadai ku enggau, aku amat enda nating kita. Tang kita ngumbai aku pintar nipu kita. Kati aku bisi udah kala ngambi ulih ba kita ngena bala seruan ke diasuh aku nemuai ngagai kita? Aku udah ngansak Titus nemuai ngagai kita, lalu ngasuh siku sida ke arap nemuai enggau iya. Kati Titus bisi udah ngambi ulih ba kita? Kati juluk ati kami duai Titus enda sebaka? Kati utai ti dikereja kami duai enda sebaka? Kati kita ngelamatu seruran ngumbai kami udah nguji bejaku ngarika diri empu di mua kita? Kami duai bejaku di mua Allah Taala dalam nama Kristus. Semua utai ti dikereja kami, menyadi, endang kena ngeringka pengarap kita. Laban aku irau enggai ke lebuh aku datai ila, aku nemu kita ukai baka ti dikedekaka aku, lalu kita nemu aku ukai baka ti dikedekaka kita. Aku irau enggai ke aku tetemuka kita belaya, kepapas, ringat, berundingka diri empu aja, mechat pangan diri, bejakuka pangan diri, sumbung sereta charut. Aku irau enggai ke lebuh aku nemuai baru ngagai kita ila, Allah Taala deka ngemaruhka aku di mua kita, lalu aku nyabakka mayuh orang ke udah bedosa dulu menya lalu apin nesal ati ke runding sida ke kamah, kereja kamah ti udah dikereja sida. Tu ketiga kali aku nemuai ngagai kita. “Semua dawa enda tau enda disukung dua tauka mayuh agi saksi.” Aku udah meri jaku tangkan ngagai sekeda bala kita ke udah bedosa suba, enggau ngagai semua sida ti bukai, lalu diatu aku meri sida jaku tangkan lebuh aku enda begulai enggau kita. Jaku tangkan tu munyi ti udah disebut aku lebuh aku nemuai kedua kali ngagai kita suba: iya nya, lebuh aku datai baru ila, aku deka nganu sida, laban kita minta aku ngayanka tanda kena nunjukka Kristus amat bejaku ngena aku. Kristus enda lemi lebuh Iya bekereja ba kita, tang bekuasa dalam kita. Iya lemi lebuh Iya diregang, tang Iya idup ulih kuasa Allah Taala. Kami lemi dalam Kristus, tang lebuh kami bekereja ba bala kita, kami deka idup begulai enggau Iya ulih kuasa Allah Taala. Peresa diri empu, kena nentuka kita amat idup ngena pengarap tauka enda. Uji diri empu. Kati kita enda nemu Jesus Kristus bisi dalam kita? Nyangka meh kita nemu diri enda mujur lebuh kita nguji diri empu! Aku ngarapka kita deka nemu kami ukai orang ke enda tan diuji. Tang kami besampi ngagai Allah Taala ngambika kita enda ngereja utai ti salah, ukai reti nya kami mandangka diri udah mujur lebuh kami diuji, tang ngambika kita ngereja utai ti ngena, taja pen kami baka ke enda mujur. Laban kami enda tau ngereja utai ngelaban pemendar, tang semina bekereja ke pemendar. Laban kami gaga lebuh kami lemi, lalu kita kering. Utai ti disampika kami nya kita nyadi pemadu badas. Nya kebuah aku nuliska utai tu lebuh aku enda begulai enggau kita, ngambika lebuh aku datai ila, aku enda ibuh kasar enggau kita lebuh aku ngena kuasa ti udah diberi Tuhan ngagai aku, kuasa kena ngemansang, ukai kena ngeruntuh. Ke pengujung iya, menyadi, selamat tinggal. Diau badas. Pendingka jaku aku. Besetuju enggau pangan diri. Diau bebaik enggau pangan diri, lalu Allah Taala ti pun pengerindu enggau pemaik deka meruan enggau kita. Tabi pangan diri dalam pengerindu. Semua nembiak Tuhan bela ngirumka tabi basa ngagai kita. Awakka pengasih Tuhan Jesus Kristus, enggau pengerindu Allah Taala, enggau kaul Roh Kudus meruan enggau kita semua. Surat ari Paul ke nyadi rasul, ukai ari atur mensia tauka ngena kuasa mensia, tang ulih Jesus Kristus enggau Allah Taala ti Apai, ke udah ngangkatka Jesus Kristus ari mati, enggau ari semua menyadi ke bisi enggau aku, Ngagai semua eklisia di Galatia: Awakka berekat enggau pemaik diberi ngagai kita ari Allah Taala ti Apai, enggau ari Tuhan Jesus Kristus, ke udah nyerahka Diri ketegal dosa kitai ngambika ngelepaska kitai ari dunya ti jai tu, nitihka peneka Allah Taala ti Apai kitai, ke endang patut dimuliaka belama-lama iya. Amin. Aku alit ati ke kita tu! Jampat amat kita ninggalka Iya ke udah ngangauka kita ulih pengasih Kristus, lalu nguingka diri ngagai “berita manah” ti bukai. Ukai reti nya kitai bisi “berita manah ti bukai,” tang sekeda orang nyarutka runding kita lalu nguji nunsangka Berita Manah Kristus. Tang enti sema kami, tauka melikat ari serega, bisi nusui ngagai kita berita manah ti lain agi ari Berita Manah ti udah ditusui kami ngagai kita, awakka orang nya diukum belama-lama iya. Munyi ti udah disebut kami suba, lalu diatu aku nandu nya baru: enti orang bisi nusui berita manah ti lain agi ari Berita Manah ti udah diterima kita, awakka orang nya diukum belama-lama iya. Kati aku diatu minta diri dikerinduka mensia, tauka minta diri dikerinduka Allah Taala? Tauka aku nguji ngerinduka ati mensia? Enti aku agi nguji ngerinduka ati mensia, aku ukai ulun Kristus. Laban aku dekaka kita nemu, menyadi: Berita Manah ti ditusui aku ukai datai ari mensia, laban aku ukai nerima Berita Manah nya ari mensia, lalu orang pen nadai mega ngajar nya ngagai aku. Aku nerima Berita Manah nya ari pemandang Jesus Kristus. Kita empu tentu udah ninga pasal pengidup aku dulu suba, lebuh aku balat angkunka agama orang Judah. Aku balat merinsaka lalu nguji ngerusak eklisia Allah Taala. Aku jauh nyulut mansang dalam agama orang Judah ari orang bukai ke sama serebak enggau aku, laban aku balat agi ari sida angkunka adat asal aki ini kitai. Tang lebuh Allah Taala, ke udah milih aku sebedau aku ada, lalu ngangauka aku bekereja ke Iya, gaga ati mandangka Anak Iya ngagai aku, ngambika aku nusui pasal Iya ngagai orang bansa bukai, aku nadai betanya ngagai orang, lalu aku pen enda mega mupuk ngagai Jerusalem, ngagai orang ke dulu agi ari aku nyadi rasul, tang mupuk tekala nya ngagai menua Arabia, lalu udah nya pulai baru ngagai Damaskus. Tiga taun udah bekau nya, nya baru aku mupuk ngagai Jerusalem nemuai ngagai Peter, lalu aku diau enggau iya lima belas hari. Tang aku nadai betemu enggau rasul ti bukai kelimpah ari James, menyadi Tuhan Empu. (Utai ti ditulis aku tu endang amat. Allah Taala Empu nemu aku enda bula!) Udah nya, aku bejalai ngagai menua Siria enggau Silisia. Lebuh maya nya, aku apin dikelala raban eklisia Kristus di Judea. Sida semina bisi udah ninga ari padah orang, “Orang ke udah merinsaka kitai suba, diatu benung ngajar pasal pengarap ti deka dirusak iya suba!” Lalu sida muji Allah Taala ketegal aku. Empat belas taun udah bekau nya, aku mupuk ngagai Jerusalem enggau Barnabas, mai Titus enggau aku. Aku kin nitihka pemandang ari Tuhan, lalu aku madah ngagai bala tuai eklisia (entara kami aja) pasal Berita Manah ti ditusui aku ngagai orang bansa bukai, kena nentuka aku enda lebu ngapa nusui Berita Manah nya. Indah Titus, ke sama enggau aku, deh enda dipejalka betutus, taja pen iya orang bansa Gerika. Pekara tu tebantai laban sekeda orang ke nyaru diri nyadi orang Kristian, udah enselit tama ngagai bala kitai, laban sida keran deka mansik pasal pengelepas kitai dalam Jesus Kristus, lalu nguji ngaga kitai nyadi ulun sida. Tang kami enda nunduk ngagai sida, sekejap pen enda, ngambika pemendar ti dibai Berita Manah meruan enggau kita. Lalu orang ke dikumbai kepala (aku enda bedulika pangkat sida, laban Allah Taala enda bepilih mata) nadai nambahka penemu ti baru ngagai pesan ti dibai aku. Laban lebuh sida meda aku udah diasuh Allah Taala nusui Berita Manah ngagai orang bansa bukai, baka Peter ke udah diasuh nusui Berita Manah ngagai orang Judah, (laban Allah Taala, ke ngasuh Peter bekereja nyadi rasul ba orang Judah, mega ngasuh aku bekereja nyadi rasul ba orang bansa bukai), lalu lebuh James, Peter enggau John, ke nyadi kepala, meda Allah Taala udah kasihka aku lalu meri pengawa tu ngagai aku, sida lalu betabi enggau kami duai Barnabas, nandaka kami saum pengawa. Sida lalu besetujuka kami duai Barnabas bejalai ngagai orang bansa bukai, lalu sida bejalai ngagai orang Judah. Sida semina minta siti aja utai ari kami duai, ngasuh kami duai ngingatka orang ke suntuk, utai ti endang deka dikereja aku. Tang lebuh Peter datai di Antiok, aku nyakal iya mua mata, laban iya terang amat salah. Laban sebedau orang ke dikirumka James datai, Peter endang selalu makai enggau orang bansa bukai. Tang lebuh bala orang nya datai, Peter nyurutka diri lalu nyeraraka diri ari orang bansa bukai, laban iya takutka orang ke ngemeranka pengawa betutus. Bala orang Judah ti bukai lalu belabuh takut baka Peter, datai ke Barnabas empu nyau dibai sida tesat laban ulah sida ti pura-pura ngapa baka nya. Tang lebuh aku meda sida enda nitihka pemendar ti dalam Berita Manah, aku lalu bejaku ngagai Peter di mua semua sida, “Nuan tu orang Judah, tang nuan diau baka orang bansa bukai, ukai baka orang Judah. Nya alai baka ni ku nuan tau mejalka orang bansa bukai diau baka orang Judah?” “Kitai tu orang Judah ari ada, ukai orang bansa bukai ke bedosa; tang taja pia, kitai nemu, orang digaga lurus ukai laban sida ngasika Adat, tang ulih pengarap sida ke Jesus Kristus. Nya alai kitai mega udah manggaika pengarap kitai ba Jesus Kristus, ngambika kitai digaga lurus ulih pengarap kitai ke Iya, lalu ukai laban kitai ngasika Adat, laban Adat enda ulih ngaga orang nyadi lurus. “Tang enti sema kitai ditemu bedosa lebuh kitai bebendar diau lurus dalam Kristus, kati nya nunjukka Kristus ngasuh kitai dosa? Ukai! Tang enti aku nirika utai ti udah dirubuh aku, nya nunjukka aku udah ngelanggar Adat. Laban, ulih Adat, aku udah mati ke Adat, ngambika aku tau idup ke Allah Taala. Aku udah diregang enggau Kristus; nya alai ukai aku ke idup, tang Kristus ke idup dalam aku, lalu pengidup aku dalam tubuh tu nya pengidup ulih pengarap aku ke Anak Allah Taala, ke udah rinduka aku lalu udah nyerahka Diri ketegal aku. Aku enda nulak pengasih Allah Taala; laban enti orang digaga lurus ulih Adat, reti nya Kristus udah lebu ngapa mati!” Kita orang Galatia amat beli! Sapa udah ngasuh kita beli? Kita udah dipadahka enggau terang pasal Jesus Kristus ke diregang. Awakka aku nanyaka tu ngagai kita: Kati kita nerima Roh Allah Taala laban kita ngasika Adat, tauka laban kita ninga lalu arapka utai ti didinga kita? Nama kebuah kita beli baka tu? Kita udah belabuh ngena Roh Allah Taala, kati kita diatu deka ngujungka nya ngena pengering mensia? Kati utai ti udah diasaika kita nya nadai reti magang ba kita? Enti utai nya amat nadai reti. Kati Allah Taala meri kita Roh Kudus lalu ngereja kereja ajih ba bala kita laban kita nitihka Adat, tauka laban kita arapka utai ti didinga kita? Peratika Abraham. “Iya arapka Allah Taala lalu ketegal nya Allah Taala ngumbai iya lurus.” Nya alai, ari nya kita nemu, semina orang ke arap aja ke nyadi peturun Abraham. Lalu Bup Kudus nemu Allah Taala deka ngaga orang bansa bukai lurus ulih pengarap, nya alai Berita Manah nya udah dulu dipadahka ngagai Abraham: “Semua bansa deka diberekatka nengah nuan.” Nya alai, orang ke arap deka diberekatka sama enggau Abraham ke arap. Semua orang ke manggaika diri ba Adat, ditinggang sumpah; laban endang udah ditulis, “Tulah meh semua orang ke enda nitih sereta enda ngasika semua utai ti ditulis dalam Bup Adat!” Nya alai utai tu terang: nadai orang digaga lurus di mua Allah Taala ulih Adat laban “Orang ke lurus deka idup ngena pengarap.” Tang Adat ukai bepanggai ba pengarap, laban, “Orang ke ngereja semua utai nitihka Adat, deka idup nitihka Adat.” Kristus nebus kitai ari sumpah ti dibai Adat, laban Iya udah nejuka Diri ditinggang sumpah ngarika kitai, laban endang udah ditulis, “Tulah meh semua orang ke digantung ari kayu,” ngambika, ulih Jesus Kristus, berekat ti diberi ngagai Abraham tau diberi ngagai orang bansa bukai, ngambika kitai, ulih pengarap, tau nerima Roh Kudus ti udah disemaya. Aku ngambi siti chunto ari utai ti nyadi tiap hari, menyadi: lebuh sempekat udah disain, nadai orang tau nambahka leka jaku ngagai sempekat nya, tauka muai sempekat nya. Nyadi semaya udah diberi ngagai Abraham, enggau ngagai siku peturun iya. Bup Kudus nadai nyebut “bala peturun”, tang semina siku aja peturun, “ngagai siku peturun nuan,” iya nya Kristus. Utai ti ku aku nya: Adat ti digaga empat ratus tiga puluh taun udah bekau sempekat nya diberi, enda ulih muai sempekat enggau semaya Allah Taala. Laban enti berekat nya datai ari Adat, iya ukai datai ari semaya. Tang Allah Taala meri berekat ngagai Abraham ngena semaya. Enti pia, nama guna enggau Adat? Adat diberi laban kitai bepenyalah. Tang Adat dikena semina nyentuk ngagai maya penatai siku peturun ti udah disemaya. Adat nya udah diberi bala melikat ngagai siku seruan, lalu seruan nya meri Adat nya ngagai orang mayuh. Kitai enda begunaka seruan, enti kitai semina bejakuka siku aja orang. Lalu Allah Taala endang siku aja. Kati nya nunjukka Adat ngelaban semaya Allah Taala? Ukai! Laban enti Adat ulih meri pengidup, pengelurus tentu datai nengah Adat. Tang Bup Kudus madahka semua dunya diperintah dosa, ngambika berekat ti udah disemaya diberi ngagai orang ke arap, ulih pengarap sida ke Jesus Kristus. Sebedau pengarap datai, kitai kena jil sereta dijaga Adat nyentuk ngagai maya pengarap dipandangka. Nya alai kitai diperintah Adat nyentuk ngagai maya penatai Kristus, ke deka ngaga kitai lurus ulih pengarap. Diatu pengarap nya udah datai, nya alai kitai nadai agi diperintah Adat, laban dalam Jesus Kristus semua kita nyadi anak Allah Taala, ulih pengarap. Semua kita ke udah dibaptisa dalam Kristus, udah ngerasukka Kristus. Kita ukai orang Judah agi tauka orang bansa bukai agi, ukai ulun tauka ulun, ukai lelaki, ukai indu, laban semua kita nyadi siku dalam Jesus Kristus. Lalu enti kita enggi Kristus, reti nya kita peturun Abraham, bempu waris nitihka semaya. Utai ti ku aku nya baka tu: lebuh orang ke bempu waris nya agi mit, iya sigi baka ulun, taja pen iya deka bempu reta tengkira jemah ila; tang iya diibun nyentuk ngagai maya ti chukup ku apai iya. Baka nya mega kitai. Lebuh kitai agi mit, kitai nyadi ulun roh ti merintah di dunya tu. Tang lebuh timpuh udah chukup, Allah Taala ngirumka Anak Iya, diadaka siku indu, diadaka di baruh Adat, ngambika Iya nebus orang ke di baruh Adat, ngambika kitai diberi semua hak nyadi anak Allah Taala. Lalu laban kita tu anak, Allah Taala udah ngirumka Roh Anak Iya ke dalam ati kitai. Roh Anak Iya nya ti ngangau, “Abba! Apai!” Nya alai, kita ukai ulun agi, tang anak, lalu enti kita nya anak, Allah Taala udah ngasuh kita bempu waris. Dulu suba, lebuh kita apin nemu Allah Taala, kita nyadi ulun utai ti ukai petara; tang diatu, kita udah nemu Allah Taala, tauka iya ti betul agi, Allah Taala udah nemu kita, nya alai nama kebuah kita keran deka nikal baru ngagai roh ti lemi, ti seranta, lalu nyadi ulun sida baru? Kita ngintu hari, bulan, musin enggau taun. Lebu ngapa meh aku udah gawa ba bala kita. Aku minta kita, menyadi, nyadi baka aku, laban aku udah nyadi baka kita. Kita nadai udah ngereja utai ti salah ngagai aku. Kita nemu, aku terubah nusui Berita Manah ngagai kita suba ketegal penyakit; taja pen penyakit aku balat ngiruh kita, kita enda ngelese tauka ngemaruhka aku, tang nerima aku baka ke nerima melikat Allah Taala, baka ke nerima Jesus Kristus. Kini ke tunga pengaga kita? Laban, aku madah ngagai kita, enti kita ulih, kita tentu udah ngeruk mata kita empu, lalu meri mata nya ngagai aku. Kati aku diatu nyau nyadi munsuh kita, laban aku madahka utai ti bendar ngagai kita? Orang bukai nyangka amat ibuhka kita, tang ukai enggau juluk ati ti manah. Sida semina nguji nyeraraka kita ari aku, ngambika kita keras nitihka sida. Manah amat enti orang nemu ibuh beduduk ba juluk ati ti manah, lalu ukai semina lebuh aku begulai enggau kita. Anak, aku tu baka indai ke radai deka beranak, nganti Kristus ditempa dalam kita. Naka meh pemanah enti aku tak begulai enggau kita diatu, ngambika aku enda ibuh bejaku munyi tu, laban aku beba ati berundingka kita tu! Awakka aku nanya kita ke ingin diperintah Adat: kati kita enda ninga utai ti disebut Adat? Laban endang udah ditulis, Abraham bisi dua iku anak, siku diadaka indu ke ulun, lalu siku diadaka indu ke ukai ulun. Anak ke diadaka indu ke ulun nya ada ngena jalai selama, tang anak ke diadaka indu ke ukai ulun, ada nitihka semaya. Tu tau diambi nyadika jaku sempama: indu dua iku nya nandaka dua bengkah sempekat. Siti sempekat nya ari Bukit Sinai, ke ngadaka anak ke deka nyadi ulun. Indu nya Hagar. Nyadi Hagar nya ngambarka Bukit Sinai di menua Arabia. Iya nandaka nengeri Jerusalem ti diatu, laban iya nyadi ulun sama enggau anak iya. Tang Jerusalem ti di serega nya ukai ulun, lalu iya nya indai kitai. Laban endang udah ditulis, “Rami gaga ati meh nuan, indu ke mandul! nuan ke nadai kala beranak, manjung sereta belagu meh nuan ke nadai kala ngasaika pemedis beranak! Laban anak ke diadaka indu ke nadai laki, mayuh agi ari anak ke diadaka indu ke bisi laki.” Diatu kita, menyadi, nyadi anak Allah Taala ari semaya, baka Isak. Lebuh maya nya menya, anak ke diadaka ngena jalai selama, beduan anak ke diadaka ulih Roh Kudus; nya meh gaya utai ti nyadi diatu. Tang nama utai ti disebut Bup Kudus? “Buru indu ke ulun nya enggau anak iya; laban anak indu ke ulun nya enda tau enggau bempu reta tengkira ti diempu anak ke diadaka indu ke ukai ulun.” Nya alai, menyadi, kitai tu ukai anak ari indu ke ulun, tang anak ari indu ke ukai ulun. Laban Kristus udah ngelepaska kitai ngambika kitai amat-amat dilepaska. Nya alai bediri tegap, lalu anang nejuka diri dikungkung nyadi ulun baru. Dinga kita! Aku, Paul, madah ngagai kita, enti kita nejuka diri ditutus, Kristus nadai guna ba kita. Sekali agi aku bejaku ngagai genap iku orang ke nejuka diri ditutus: iya enda tau enda ngasika semua Adat. Kita ke nguji diau lurus ulih Adat, udah ngetas diri ari Kristus; kita udah tebelengka ari pengasih Allah Taala. Laban ulih Roh Kudus enggau ulih pengarap, kitai gagit ati nganti pengelurus ti disadang kitai. Laban dalam Jesus Kristus, pengawa betutus tauka enda betutus, sigi nadai reti. Utai ti beguna nya pengarap ti ngayanka diri ulih pengerindu. Kita udah maju amat! Sapa udah nagang kita ngasika pemendar? Jaku pujuk ti baka nya ukai datai ari Allah Taala ke ngangauka kita. Ka semina mimit aja ragi diguna kena ngasuh semua tepung kembai. Tang aku nemu, dalam Tuhan, kita tetap enda ngembuan penemu bukai. Tang barang sapa udah nyarutka runding kita, deka diukum. Menyadi, nama kebuah aku agi kena perinsa enti aku amat agi mengkang ngajar pasal adat betutus? Enti aku agi mengkang ngajar nya, reti nya ajar aku pasal regang Kristus enda patut ngasuh orang pedis ati. Manah agi enti orang ke ngachau runding kita tak terus netak utai sida empu! Laban kita, menyadi, udah dikangauka ngagai pengelepas. Tang anang ngena pengelepas nya nyadika peluang kena kita nurutka pengingin tubuh, tang kena nulung pangan diri ulih pengerindu. Laban semua Adat disimpul ngena siti aja pesan: “Rinduka pangan diri baka kita ke rinduka diri empu.” Tang enti kita ngigit lalu bepakaika pangan diri, bejaga kita, enggai ke kita diempa pangan diri. Tang aku madah ngagai kita, idup nitihka iring Roh Kudus, lalu anang nurutka pengingin tubuh. Laban utai ti dikinginka tubuh bemunsuh ngelaban utai ti dikinginka Roh Kudus, lalu utai ti dikinginka Roh Kudus bemunsuh ngelaban utai ti dikinginka tubuh, laban utai dua bengkah nya endang bemunsuh ngelaban pangan diri, lalu nagang kita ngereja utai ti dikedekaka kita. Tang enti kita diiring Roh Kudus, kita ukai diperintah Adat. Utai ti dikereja mensia endang nyata: bambai, runding ti kamah, kereja ti kamah, besembahka engkeramba, bemanang, bemunsuh, charut enggau pangan diri, kepapas, belaya, bepechah-belah, beripih, ngining orang, pemabuk, berami enda beiga-iga, enggau utai ti baka nya. Aku meri kita jaku tangkan, baka ti udah dikereja aku suba: orang ke ngereja utai nya enda ulih bempu Perintah Allah Taala. Tang buah Roh Kudus nya pengerindu, pengaga, pemaik, pengeliat ati, penyiru, pemadas, penetap ati, penelap, ulih nagang diri. Nadai adat ngelaban utai nya. Lalu orang ke enggi Jesus Kristus, udah ngeregang tubuh sama enggau penenguk enggau pengingin iya. Enti kitai idup nitihka Roh Allah Taala, awakka Roh nya meh ngiring kitai. Anang sumbung; anang nyemekih pangan diri; anang ngining pangan diri. Menyadi, enti orang bisi ditemu ngereja penyalah, kita ke udah nerima Roh Kudus patut mai iya pulai baru ngagai jalai ti ngena enggau chara ti nelap. Tang bejaga kita, enggai ke kita empu kena laban penguji. Besaup mai ma pangan diri; nya meh jalai kita ngamatka adat Kristus. Laban enti orang ngumbai diri pama agi ari ti patut, iya nipu diri empu. Genap iku kita patut meresa pengawa diri. Nya baru iya tau temegahka diri empu, ukai temegahka orang bukai. Laban genap iku kita enda tau enda mai ma diri empu. Orang ke diajar pasal pesan Allah Taala, enda tau enda bekunsika semua utai ti manah enggau pengajar iya. Anang nejuka diri ditipu. Allah Taala enda ulih dikeleseka, laban kita deka ngetau utai ti ditanam kita empu. Enti kita nanam nitihka pengingin tubuh, kita deka ngetau pemati, tang enti kita nanam nitihka iring Roh Kudus, kita deka ngetau, ari Roh Kudus, pengidup ti meruan belama iya. Nya alai anang leju ngereja utai ti badas, laban ba maya ti patut kitai deka ngetau, enti kitai enda mantul ngapa. Nya alai, genap kali kitai bisi peluang, kereja pengawa ti badas ngagai semua orang, kelebih agi ngagai orang ke sama pengarap enggau kita. Peda kita pemesai tulis aku lebuh aku nulis ngena jari aku empu! Semina orang ke minta diri dipuji mensia ba tubuh aja ke mejalka kita ditutus, lalu sida ngereja nya ngambika sida enda kena perinsa ketegal regang Kristus. Indah orang ke ditutus deh enda nitihka Adat. Tang sida dekaka kita ditutus ngambika sida ulih ngemegahka diri ketegal kita. Tang aku enggai temegahka utai ti baka nya, tang semina temegahka regang Jesus Kristus Tuhan kitai, ti udah dikena ngeregang dunya ke aku, lalu aku diregang ke dunya. Laban betutus tauka enda betutus sigi nadai reti. Utai ti beguna nya nyadi mensia ti baru. Awakka pemaik enggau pengasih meruan enggau semua orang ke nitihka adat tu, nyengkaum orang Israel ke nembiak Allah Taala. Berengkah ari diatu, awakka orang enda agi ngenusahka aku, laban aku mai litan Jesus ba tubuh aku tu. Awakka pengasih Jesus Kristus Tuhan kitai meruan enggau kita semua, menyadi. Amin. Surat ari Paul, ke nyadi rasul Jesus Kristus ulih peneka Allah Taala, Ngagai bala nembiak Tuhan ke diau di Epesus, ke tetap ati dalam Jesus Kristus: Awakka Allah Taala ti Apai kitai enggau Tuhan Jesus Kristus meri kita berekat enggau pemaik. Pujika Allah Taala ti Apai Jesus Kristus Tuhan kitai, ke udah merekatka kitai dalam Kristus ngena semua berekat roh di serega. Laban Iya udah milih kitai dalam Kristus sebedau dunya digaga, ngambika kitai kudus, lalu nadai bepenyalah di mua Iya. Ulih pengerindu Iya udah milih kitai, ulih Jesus Kristus, ngambika kitai diiru nyadi anak Iya nitihka peneka enggau juluk ati Iya. Beri meh puji ngagai Allah Taala ketegal pengasih Iya ti bemulia ti udah diberi Iya pechuma ngagai kitai dalam Anak ke dikerinduka Iya. Dalam Iya kitai ditebus ulih darah Iya, iya nya dosa kitai diampun, nitihka pemesai pengasih Iya ti udah dituang Iya ngagai kitai ngena semua penemu-dalam enggau pemereti ati Iya. Lalu Iya udah madahka ngagai kitai misteri peneka Iya, nitihka juluk ati Iya ti diletak Iya dalam Kristus, ti deka dipejalaika Iya ba maya ti patut, iya nya, ngempuruka semua utai ti di serega enggau di dunya, di baruh siku kepala, iya nya Kristus. Dalam Kristus kitai mega udah dipilih nitihka pelan Iya ke ngereja semua utai nitihka juluk ati enggau peneka Iya, ngambika kitai, ke terubah-rubah manggaika pengadang ba Kristus, ulih idup lalu muji mulia Iya! Lalu kita mega nyadi nembiak Kristus lebuh kita ninga pesan ti bendar, iya nya Berita Manah ti mai pengelepas ngagai kita, lalu lebuh kita udah arapka Iya, kita lalu ditanda ngena Roh Kudus ti udah disemaya. Roh Kudus nya nyadika jamin kitai deka nerima pesaka, iya nya penebus kitai ke enggi Allah Taala. Pujika mulia Allah Taala! Aku bisi udah ninga pasal pengarap kita ke Tuhan Jesus, enggau pasal pengerindu kita ke semua nembiak Tuhan. Nya kebuah aku enda ngetu-ngetu meri terima kasih ke kita lebuh aku ngingatka kita dalam sampi aku. Aku besampi minta Apai ti bemulia, Allah Taala Jesus Kristus, meri kita Roh penemu-dalam enggau pemandang ngambika kita lebih agi nemu Iya. Aku mega besampi ngambika mata ati kita diberi penerang, ngambika kita nemu pengadang, laban kita udah dikangauka ngagai pengadang nya, iya nya pemayuh pesaka ti bemulia ti disedia Iya ke bala nembiak Iya, enggau pemesai kuasa Iya ti nadai banding, ke kitai ti arap. Kuasa nya sebaka enggau kuasa ti besai ti udah dikena Iya ngangkatka Kristus ari mati, lalu nudukka Iya muak ari kanan Iya Empu di serega, jauh ari atas semua adat enggau pemerintah, kuasa, enggau perintah, enggau ari atas semua nama, ukai semina di dunya tu, tang mega di dunya ti deka datai. Lalu Iya udah ngengkahka semua utai di baruh kaki Kristus, lalu udah ngeletak Iya ari atas semua utai, ke penguntung eklisia. Eklisia nya tubuh Kristus, ti penuh laban semua personaliti Kristus Empu ke menuhka semua utai di semua endur. Kita menya mati laban penyalah enggau dosa, lebuh kita agi diau nurutka sida, nitihka chara dunya, nitihka pemerintah ti merintah kuasa ti di langit, iya nya roh ti benung bekereja ba orang ke enda ngasika Allah Taala. Semua kitai suba udah idup begulai enggau sida, nurutka pengingin mensia, nurutka pengingin tubuh enggau runding mensia. Nya alai Allah Taala ringat ngagai kitai, baka Iya ke ringat ngagai semua orang bukai. Tang laban Allah Taala balat rinduka kitai, ulih pemesai pengasih Iya, Iya udah ngasuh kitai idup begulai enggau Kristus, taja pen kitai udah mati dalam dosa kitai -- kita diselamatka ulih pengasih. Lalu Iya ngangkatka kitai idup baru enggau Kristus, lalu ngasuh kitai duduk enggau Iya di serega dalam Jesus Kristus, ngambika, dalam dunya ti deka datai, Iya ulih mandangka pemesai pengasih Iya ti nadai banding, ngena penelap ati Iya ke kitai dalam Jesus Kristus. Laban kita udah diselamatka ulih pengasih, ketegal pengarap. Pengelepas nya ukai utai ti ulih kita ari pengawa kita; pengelepas nya pemeri Allah Taala, ukai datai ari pengawa ti dikereja kita, ngambika kita enda ulih temegahka nya. Laban kitai digaga Allah Taala, ditempa Iya dalam Jesus Kristus ngambika kitai ngereja pengawa ti manah ti udah disedia Allah Taala ke kitai nyadika jalai pengidup kitai. Nya alai ingat: dulu suba kita orang bansa bukai, lalu orang Judah ke betutus ngumbai kita “orang ke enda betutus” (utai ti dikereja jari mensia ba tubuh mensia). Ingat: dulu suba kita nadai Kristus, diseraraka ari bansa orang Israel, nadai ungkup dalam sempekat, nadai pengadang, lalu nadai Allah Taala di dunya tu. Tang diatu, dalam Jesus Kristus, kita ke udah diau jauh suba, udah dibai semak, ulih darah Kristus. Laban Kristus Empu nyadika pemaik kitai. Ngena tubuh Iya Empu, Iya udah ngaga orang Judah enggau orang bansa bukai nyadi siku, lalu udah ngeruntuhka dinding pemenchi ti nyeraraka kitai. Iya udah muai Adat enggau semua pesan enggau atur ti dalam Adat, ngambika Iya, dalam Iya Empu, ngaga siti aja bansa kena Iya nganti dua bengkah bansa nya, lalu mai pemaik ngagai sida. Iya lalu mai bansa dua bengkah nya bebaik enggau Allah Taala, dalam siti tubuh, ulih kayu regang, lalu munuh ati sida ti seruran deka bemunsuh enggau pangan diri. Nya alai Kristus datai lalu madahka pemaik ngagai kita ke jauh ari Allah Taala, enggau ngagai orang Judah ke semak Iya, laban ulih Kristus, kitai sama ulih datai ngagai Apai ulih siku Roh. Nya alai, kita ukai temuai agi, ukai orang kampar agi, tang sama nyadi peranak enggau bala nembiak Tuhan, nyadi raban ruang bilik Allah Taala. Ruang bilik nya didirika ba atas pugu ti didudukka sida rasul enggau sida nabi, lalu Jesus Kristus Empu nyadika batu pemun nya. Dalam Iya semua perengka rumah nya dipejantilka lalu mansang nyadi rumah sembiang ti kudus dalam Tuhan. Lalu dalam Iya kita mega didirika nyadi rumah alai Roh Allah Taala diau. Nya kebuah aku, Paul, nyadi orang jil Jesus Kristus ke penguntung kita orang bansa bukai. Kita tentu udah ninga pasal Allah Taala ke udah, ulih pengasih Iya, meri aku pengawa ke penguntung kita, enggau pasal jalai misteri nya udah dipadahka ngagai aku ngena pemandang, munyi ti udah ditulis aku mimit. Lebuh kita macha tu, nya baru kita meretika utai ti ditemu aku pasal misteri Kristus, misteri ti nadai udah kala dipandangka ngagai bala anak mensia ba serak ti bukai, baka ti udah dipandangka Roh Kudus diatu ngagai sida rasul Iya ti kudus enggau ngagai sida nabi. Misteri nya baka tu: Ulih Berita Manah, orang bansa bukai udah dibai sama enggau orang Judah bempu pesaka, nyadi raban tubuh nya, lalu sama enggau bempu utai ti udah disemaya dalam Jesus Kristus. Aku nyadi ulun Berita Manah tu ari pengasih Allah Taala, pengasih ti udah diberi ngagai aku ulih kuasa Iya ti bekereja dalam aku. Taja pen aku tu orang ke pemadu mit ari semua nembiak Tuhan, pengasih tu udah diberi ngagai aku, iya nya nusui ngagai orang bansa bukai pasal pemesai pengaya Kristus, lalu mai semua bansa nemu misteri Iya ti dilalaika sejeman-jeman tu dalam Allah Taala ke ngaga semua utai; ngambika diatu, ulih eklisia, semua penemu-dalam Allah Taala dipadahka ngagai bala pemerintah, enggau kuasa ti di langit, nitihka juluk ati Iya ti meruan belama iya, ti udah dipejalaika Iya dalam Jesus Kristus Tuhan kitai. Dalam Iya enggau ulih pengarap kitai ke Iya, kitai berani sereta kempang ati datai ngagai Allah Taala. Nya alai aku enda nyagi kita mantul ngapa ketegal pemerinsa aku ke kita, laban nya pulai ke mulia kita. Nya meh kebuah aku besugang di mua Apai, ke meri nama ngagai semua ruang bilik ti di serega enggau di dunya. Aku besampi ngambika, ari pemesai pengaya Iya ti bemulia, Iya ngeringka ati kita ngena kuasa ulih Roh Iya, sereta ngambika Kristus diau dalam ati kita, ulih pengarap, lebuh kita beurat sereta negapka diri dalam pengerindu. Aku besampi ngambika kita, sama enggau semua nembiak Allah Taala, bisi kuasa kena nemu pemesai, pemanjai, peninggi enggau penalam pengerindu Kristus ti ngelui peragam mensia, ngambika kita dipenuhka enggau semua personaliti Allah Taala. Ngagai Iya ke ulih ngereja utai lebih ari ti dipinta tauka diperagam kitai, ulih kuasa ti bekereja dalam kitai, awakka semua turun-menurun dalam eklisia, enggau dalam Jesus Kristus, ngemuliaka Iya belama-lama iya. Amin. Nya alai aku, ke nyadi orang jil Tuhan, bebendar minta kita diau menyana nitihka kangau Tuhan, baruh ati, nelap, liat ati, sabar enggau pangan diri dalam pengerindu, lalu enggau naka ulih nyaga penyerakup dalam Roh ngena pemaik ti nanggam kita semua. Tubuh siti aja, lalu Roh Kudus siku aja, baka kita ke udah dikangauka ngagai siti aja pengadang, siku aja Tuhan, siti aja pengarap, siti aja pemaptisa, siku aja Allah Taala ti Apai semua, ke ari atas semua, ke bekereja ngena semua, dalam semua. Tang genap iku kitai udah diberi pengasih nitihka pemesai ungkup ti diletak Kristus. Nya kebuah Bup Kudus nyebut, “Lebuh Iya niki ke atas ngagai endur ti pemadu tinggi, Iya mai mayuh orang tangkap enggau Iya; Iya meri pemeri ngagai mensia.” (Nama reti “Iya niki”? Reti nya, terubah, Iya nurun ngagai buntut dunya. Iya ke nurun nya mega Iya ke niki ke atas jauh ngilah semua langit, ngambika Iya ngemenuhka semua utai enggau Iya Empu.) Iya nya ke meri pemeri ngambika sekeda nyadi rasul, sekeda nyadi nabi, sekeda nyadi penginjil, sekeda nyadi gembala lalu sekeda nyadi pengajar, kena nyikap nembiak Tuhan ngereja pengawa orang Kristian, kena ngemansangka tubuh Kristus, datai ke semua kitai nyau segempung magang dalam pengarap, sama sepenemu pasal Anak Allah Taala, nyadi orang ke besai tuai lalu nyadi sebaka enggau Kristus. Kitai enda tau agi nyadi anak mit ke dikebu lalu ditabanka kia-kia ulih genap macham ajar ti datai ari akal mensia, enggau ulih kelakar orang ke nipu. Tang kitai patut bejakuka pasal utai ti bendar dalam pengerindu, mansang dalam semua utai ngagai Iya ke nyadi kepala, iya nya Kristus, ke bejantilka semua perengka tubuh, lalu nanggam sida ngena semua rakat ti diberi ngagai tubuh nya, lalu ngasuh semua perengka tubuh nya sama bekereja enggau menyana ngemansang lalu niri negika tubuh nya dalam pengerindu. Nya alai, aku netap lalu nekanka tu dalam nama Tuhan: badu agi diau baka orang bansa bukai ke enda menuku runding. Runding sida nyau petang, lalu sida diseraraka ari pengidup Allah Taala laban sida nadai nemu utai sereta kieh. Sida nyau enda nemu malu agi, lalu udah nyerahka diri ngagai pengidup ti kamah, sereta seruran ingin deka ngereja semua macham ulah ti kamah. Nya ukai utai ti dipelajarka kita pasal Kristus! Laban kita tentu udah ninga lalu diajar pasal Iya, laban pemendar endang dalam Jesus. Kita udah diajar muai jalai pengidup kita ti lama, ulah ti lama ti dirusak sereta ditipu pengingin pengidup nya, lalu ngelakka runding enggau ati kita diubah nyadi baru, lalu kita nyadi mensia ti baru, ditempa neladan gamal Allah Taala lalu nyadi amat lurus sereta kudus. Nya alai, badu agi bula! Awakka semua kitai nyebut utai ti bendar ngagai pangan diri, laban semua kitai tu raban siti tubuh. Anang bedosa lebuh kita ringat. Anang ringat apus hari, lalu anang meri peluang ngagai Sitan. Orang ke penchuri enda tau enda badu agi ngenchuri, lalu ngereja pengawa ti menyana ngena jari iya empu, ngambika iya bisi utai dipekunsika enggau orang ke suntuk. Anang mansutka jaku ti jai, tang semina nyebut jaku ti manah kena ngemansangka pengarap orang, ba maya ti patut, ngambika jaku nya meri berekat ngagai orang ke ninga. Lalu anang ngenusahka ati Roh Kudus Allah Taala, ke udah dikena ngechop kita ke Hari Penebus. Buai semua dengki, tebiat ngeransi, pengeringat, jaku laya, tebiat bejakuka orang, enggau semua ati ti begedi, lalu nelap enggau pangan diri, siru enggau pangan diri, ngampun pangan diri, baka Allah Taala, dalam Kristus, ke udah ngampun kita. Nya alai tunda teladan Allah Taala, laban kita tu anak ke dikesayauka Iya. Lalu idup dalam pengerindu, baka Kristus ke udah rinduka kitai, lalu udah nyerahka Diri ketegal kitai, nyadika genselan enggau piring ti bebau rengut, ti diberi ngagai Allah Taala. Tang pengawa bambai, enggau semua ulah ti kamah, tauka pengamu enda patut nyadi ba bala kita, laban kita nembiak Tuhan. Anang bejaku kamah, tauka bejaku beli, tauka enda senunuh bejaku laban utai nya enda patut; tang beri terima kasih ngagai Allah Taala. Kita enda tau enda nemu tu: orang ke bambai, tauka ngereja ulah ti kamah, tauka orang ke amu (sama reti enggau nyembah engkeramba), nadai ungkup dalam Perintah Kristus, enggau dalam Perintah Allah Taala. Anang nejuka orang nipu kita ngena jaku ti nadai reti, laban nya utai ti nyungkak Allah Taala ringat ngagai orang ke enda ngasika Iya. Nya alai anang begulai enggau orang ke baka nya. Laban dulu menya kita nya pemetang, tang diatu, dalam Tuhan, kita nyadi penampak. Nya alai, idup baka anak penampak, laban penampak mansutka semua buah ti badas, ti ngena, ti bendar. Uji giga utai ti ngerinduka ati Tuhan. Anang enggau orang ngereja pengawa pemetang ti nadai guna, tang pansutka penyai sida. Indah nyebut utai ti dikereja sida belalai deh kitai malu. Tang semua utai ti diayanka penampak, deka nyata magang dipeda, laban penampak ngasuh semua utai nyata magang dipeda. Nya kebuah Bup Kudus nyebut: “Dani meh kita ke tinduk! Angkat ari pemati, lalu Kristus deka manchar ngagai kita.” Nya alai idup enggau bejimat, ukai baka orang ke beli, tang baka orang ke bepenemu-dalam. Kena semua peluang kita enggau badas, laban hari tu jai. Nya alai, anang beli, tang giga semua peneka Tuhan. Anang mabuk beirupka wain, laban pengawa nya jai, tang awakka kita dipenuhka enggau Roh Kudus, bejaku enggau pangan diri ngena masmur, pantun enggau lagu Roh, belagu muji Tuhan dalam ati kita, seruran meri terima kasih ngagai Allah Taala ti Apai, ke semua utai dalam nama Jesus Kristus Tuhan kitai. Nunduk ngagai pangan diri, kena masa Kristus. Kita ke bini, nunduk ngagai laki kita, baka ke nunduk ngagai Tuhan. Laban laki nyadi kepala bini, baka Kristus ke nyadi kepala eklisia, iya nya tubuh Iya Empu, lalu Iya Empu nyadika Juruselamat ke eklisia nya. Baka eklisia ke nunduk ngagai Kristus, baka nya mega bini patut nunduk ngagai laki dalam semua utai. Kita ke laki, rinduka bini kita, baka Kristus ke rinduka eklisia, lalu nyerahka Diri Empu ke eklisia, ngambika nguduska eklisia, lebuh Iya udah nuchi eklisia nya ngena ai enggau ulih jaku Iya, lalu nyerahka eklisia nya enggau semua pemadas iya ngagai Iya Empu, nadai bepetik, enda ngeriut, tauka utai ti baka nya, ngambika eklisia nya kudus sereta nadai penimpang. Baka nya meh laki patut rinduka bini diri, baka iya ke rinduka tubuh diri empu. Laki ke rinduka bini diri, rinduka diri empu. Laban nadai orang kala begedika tubuh diri, tang iya nupi sereta bejimat ngintu tubuh nya, baka ti dikereja Kristus ke eklisia, laban kitai tu raban tubuh Iya. “Nya kebuah lelaki ninggalka apai indai iya, lalu jadi enggau bini iya, lalu seduai iya nyadi setubuh enggau pangan diri.” Tu misteri ti besai kena aku mandingka Kristus enggau eklisia. Tang genap iku kita patut rinduka bini diri, baka kita ke rinduka diri empu, lalu bini patut masa laki. Kita ke anak, ngasika apai indai kita dalam Tuhan, laban utai nya ngena. “Bebasaka apai enggau indai nuan” - nya terubah-rubah pesan ti disempulang enggau semaya: “ngambika nuan mujur, sereta panjai umur nguan menua.” Lalu kita ke apai, anang ngereja utai ti tau ngemediska ati anak kita, tang iring sida nyadi orang ke besai tuai dalam disiplin enggau ajar Tuhan. Kita ke ulun, ngasika tuan kita enggau ati ti nangi sereta bejimat, enda belampung ati, baka ke ngasika Kristus; ukai semina lebuh sida meda kita, ketegal kita deka minta diri dipuji sida, tang laban kita ulun Kristus ke ngereja peneka Allah Taala enggau pengabis ati kita. Kereja pengawa kita enggau ati ti ransing, baka ke ngereja pengawa ke Tuhan, ukai baka ke ngereja pengawa ke mensia, laban kita nemu, Tuhan deka ngupah genap iku kitai ketegal kereja ti manah ti dikereja kitai, nemuka kitai nya ulun tauka ukai ulun. Lalu kita ke bempu ulun, kereja baka nya mega ngagai ulun kita. Badu agi ngemba sida, laban kita nemu, kita enggau sida sama besaumka siku aja Tuan di serega, lalu Iya enda bepilih mata. Ke pengujung iya, keringka diri dalam Tuhan, ngena pengering kuasa Iya. Rasukka semua senyata Allah Taala, ngambika kita ulih ngelaban akal Sitan. Laban kitai ukai beperang ngelaban isi enggau darah, tang ngelaban bala pemerintah, ngelaban perintah, ngelaban kuasa dunya ti petang tu, enggau ngelaban kuasa roh ti jai di langit. Nya alai, rasukka semua senyata Allah Taala, ngambika kita tan lebuh hari ti jai nya datai, lalu lebuh kita udah ngereja semua utai, kita deka mengkang bediri tegap. Nya alai bediri kita, lalu tanchangka pemendar nyadika belulang ba punggung kita, enggau pengelurus nyadika terabai dada kita, enggau ati ti seruran sedia deka nusui Berita Manah pasal pemaik, nyadika kasut kita. Nambahka nya, ambi pengarap nyadika terabai kena kita madamka semua laja ti beapi-api ti ditimbakka Sitan. Lalu ambi pengelepas nyadika selapuk kebal kita, enggau jaku Allah Taala nyadika pedang Roh. Besampi dalam Roh tiap kali kita besampi, ngena semua macham sampi enggau peminta. Nya alai seruran bejaga lalu majak besampika semua nembiak Tuhan. Besampi mega ke aku ngambika lebuh aku bejaku, leka jaku diberi ngagai aku lebuh aku, enggau ati ti berani, madahka misteri Berita Manah, laban aku nyadi pengari ke Berita Manah nya, taja pen aku kena jil ketegal Berita Manah nya. Besampi ke aku, ngambika aku berani nusui Berita Manah nya, laban aku enda tau enda nusui Berita Manah nya. Menyadi kitai Taikikus, ke tetap ati nyadi ulun Tuhan, deka madahka semua utai ngagai kita, ngambika kita nemu pasal aku, enggau pasal utai ti dikereja aku. Aku ngasuh iya nemuai ngagai kita ketegal tuju tu aja, ngambika kita nemu gaya pendiau kami, sereta meransang kita. Awakka Allah Taala ti Apai, enggau Tuhan Jesus Kristus meri pemaik, pengerindu enggau pengarap ngagai semua orang Kristian. Awakka berekat Allah Taala meruan enggau semua orang ke enda badu rinduka Tuhan Jesus Kristus. Surat ari Paul enggau Timoti, ulun Jesus Kristus, Ngagai semua nembiak Tuhan ke diau di Pilipi, nyengkaum sida bishop enggau sida dikon: Awakka Allah Taala ti Apai kitai enggau Tuhan Jesus Kristus meri kita berekat enggau pemaik. Aku meri terima kasih ngagai Allah Taala aku ke kita genap kali aku ingatka kita. Dalam semua sampi aku ke semua kita, aku besampi enggau ati ti gaga, laban kenyau ari hari ti keterubah nyentuk ngagai diatu, kita udah sama enggau aku ngerembaika Berita Manah. Lalu aku nemu, Allah Taala ke udah ngepunka pengawa ti badas tu ba kita, deka nembuka pengawa nya lebuh Hari Jesus Kristus. Aku endang patut berunding baka tu ke semua kita, laban aku endang seruran ngingatka kita dalam ati aku, laban semua kita udah sama enggau aku ngereja pengawa ti udah diberi Allah Taala ngagai aku, nemuka lebuh aku bejaku ngarika sereta netapka pengamat Berita Manah dalam rumah jil tu tauka di luar. Laban Allah Taala nemu aku amat lelengauka kita ngena pengerindu Jesus Kristus. Tu sampi aku ke kita: minta pengerindu kita majak nambah-menambah, sama enggau penemu enggau penalam perening kita, ngambika kita nemu milih utai ti pemadu badas, lalu nyadi tuchi sereta nadai bepenyalah lebuh Hari Kristus, penuh laban buah pengelurus ti datai ulih Jesus Kristus, ti mai puji enggau mulia ngagai Allah Taala. Aku dekaka kita nemu, menyadi, utai ti udah nyadi ba aku amat udah nulung ngerembaika Berita Manah, datai ke semua orang ke nyaga istana Raja Besai, enggau semua orang bukai, nemu aku kena tan dalam rumah jil ketegal Kristus; lalu mayuh bala menyadi nyadi kempang ati dalam Tuhan, lalu majak berani agi nusui pesan Allah Taala. Sekeda amat madahka pasal Kristus laban sida kepapas tauka nyemekih pangan diri, tang sida ti bukai, ari ati ti manah. Raban ti kedua nya ngereja nya ari pengerindu, laban sida nemu aku udah dipaduka bejaku ngeringka Berita Manah. Raban ti keterubah nya, madahka pasal Kristus laban sida tinggi ati ke diri empu, ukai beduduk ba ati ti betul, laban sida nguji ngenusahka ati aku lebuh aku agi dalam rumah jil. Tang nya nadai ngawa, asal ga Berita Manah Kristus ditusui ngena semua macham chara, nemuka juluk ati nya salah tauka ngena. Lalu aku gaga ati ke nya. Sigi amat, aku endang deka majak rami gaga ati, laban aku nemu, ari sampi kita, enggau ari tulung Roh Jesus Kristus, aku deka dilepaska. Aku endang ngarap sereta ngadang diri enda malu, tang bejaku enggau naka pemerani, ngambika Kristus seruran dimuliaka dalam tubuh aku baka selama, nemuka ngena pengidup tauka ngena pemati aku. Laban ba aku, enti aku idup, aku idup ke Kristus, lalu enti aku mati, aku untung. Enti aku majak idup di dunya tu, reti nya aku ulih ngereja mayuh agi pengawa ti beguna. Lalu aku enda nemu ni ti patut dipilih aku. Aku enda nemu jalai milih utai ari utai dua bengkah nya. Aku bisi amat ati deka ninggalka pengidup tu, lalu begulai enggau Kristus, laban nya lebih manah agi; tang aku beguna agi ba kita enti aku mengkang idup. Nya alai laban aku nemu nya, aku nemu diri deka mengkang idup lalu majak diau enggau semua kita, ngemansang sereta meri pengaga ngagai kita dalam pengarap, ngambika aku mayuh agi peluang temegah enggau kita dalam Jesus Kristus lebuh aku nemuai baru ngagai kita. Utai ti lebih beguna nya, kita enda tau enda idup nitihka ajar ti dibai Berita Manah Kristus, ngambika, nemuka aku bisi enggau kita, tauka nadai enggau kita, aku ulih ninga kita sama seati, sama sepenemu, begandin bau bebendar bekereja ke pengarap ti dibai Berita Manah, lalu enda takutka munsuh kita. Ba munsuh kita, tu nunjukka sida deka dirusak, tang ba kita, tu nunjukka kita dilepaska. Semua utai tu endang dikereja Allah Taala magang. Laban ulih pengasih Iya, Iya udah meri kita hak ukai semina arapka Kristus, tang mega natka pemerinsa ketegal Iya, laban diatu kita sama enggau aku bebendar ngereja pengawa, pengawa ti udah dipeda kita kereja aku, lalu agi mengkang dikereja aku diatu, munyi ti didinga kita. Nya alai enti kita berasai diperansang laban kita begempung enggau Kristus, enti kita berasai lantang laban pengerindu Iya, enti kita bisi kaul enggau Roh Kudus, enti kita nelap sereta siru enggau pangan diri, awakka kita ngenyukupka pengaga ati aku: awakka kita sama sepenemu, rinduka pangan diri, besetuju sereta sebaka runding enggau pangan diri. Anang ngereja utai semina berundingka diri empu aja, tauka beduduk ba ati ti deka ngenyumbungka diri, tang enggau ati ti baruh, seruran ngumbai orang bukai pama agi ari kita. Anang semina berundingka diri empu aja, tang berunding mega ke orang bukai. Gaga runding kita sebaka enggau runding Jesus Kristus: Taja pen Iya endang Allah Taala tang Iya enda ngumbai diri sebaka enggau Allah Taala, tang Iya ngelengkaka semua nya, lalu ngaga Diri nyadi ulun, ada ngena gamal mensia. Iya ngemaruhka Diri, lalu ngasi nyentuk ke mati, indah mati ba kayu regang. Nya alai Allah Taala udah ngangkatka Iya tinggi lalu meri Iya nama ti ari atas semua nama, ngambika lebuh nama Jesus disebut, semua utai di serega, di dunya enggau di dunya ti di baruh, besugang magang, lalu semua dilah deka ngaku Jesus nya Tuhan, ke mulia Allah Taala ti Apai. Nya alai, menyadi ke dikerinduka aku, baka kita ke udah seruran ngasika aku, ukai semina lebuh aku begulai enggau kita, tang kelebih agi lebuh aku enda begulai enggau kita, awakka kita bekereja enggau ati ti nangi sereta getar-getar ngenyukupka pengelepas kita; laban Allah Taala ke bekereja dalam kita ti ngasuh kita deka sereta ulih ngereja utai ti ngerinduka ati Iya. Anang mutap tauka bekelikuh lebuh kita ngereja semua utai, ngambika kita nyadi anak Allah Taala ke nadai bepenyalah, tuchi, nadai penimpang, lebuh kita diau begulai enggau orang ke jai sereta bedosa, ke alai kita manchar baka bintang di dunya tu. Enti kita bepegai teguh ba jaku ti meri pengidup, nya baru aku, lebuh Hari Kristus, tau temegahka diri ke enda lebu ngapa gawa. Tang enti sema darah aku dituang kena ngenselan piring pengarap kita, ati aku gaga lalu sama rami gaga ati enggau semua kita, baka kita ke gaga lalu sama rami gaga ati enggau aku. Enti Tuhan nulung, aku ngarapka diri ulih ngasuh Timoti nemuai ngagai kita enda lama da agi, ngambika ati aku lantang lebuh aku ninga berita pasal kita. Aku nadai orang bukai ke baka iya, ke deka balat ibuhka pengelantang kita. Semua orang bukai semina berundingka pekara diri empu aja, ukai berundingka pekara Jesus Kristus. Tang kita nemu pemesai guna Timoti ba aku, pasal iya ke sama bekereja enggau aku nusui Berita Manah, baka anak ke nulung apai. Nya alai aku ngarapka diri ulih ngasuh iya nemuai ngagai kita, sepengelengkas aku nemu gaya pengidup aku ditu; lalu aku ngarapka Tuhan deka mega ngasuh aku empu nemuai ngagai kita enda lama da agi. Tang aku ngira diri patut ngirumka ngagai kita menyadi aku Epaproditus, ke sama gawa enggau aku, sereta sama nyadi soldadu enggau aku, ke nyadi seruan kita nulung aku, laban iya lelengauka semua bala kita, lalu udah irau ati laban iya nemu kita udah ninga pasal iya ke enda dapat. Iya endang amat udah sakit, lalu nyau deka mati. Tang Allah Taala udah kasihka iya, ukai semina kasihka iya, tang kasihka aku mega, enggai ke ati aku kelalu tusah. Nya alai aku balat agi keran deka ngasuh iya nemuai ngagai kita, ngambika kita rami gaga betemu enggau iya baru, sereta ngambika aku kurang agi irau. Nya alai, sambut meh iya dalam Tuhan enggau ati ti gaga. Lalu beri meh basa ngagai semua orang ke baka nya, laban iya nyau ka mati bekereja ke Kristus, berambunka nyawa ngarika kita nembuka pengawa kita ba aku. Ke pengujung iya, menyadi, rami gaga meh kita dalam Tuhan. Aku enda leju betandu nuliska utai tu ngagai kita, laban utai tu pulai ke pengelikun kita. Bejaga ari sida ukui, iya nya orang ke ngereja penyai, bejaga ari orang ke besayatka tubuh. Laban kitai tu orang ke nerima tutus ti bendar, ke nyembah Allah Taala dalam Roh, ke temegahka diri dalam Jesus Kristus, lalu enda manggaika diri ba utai ti dikereja ba tubuh, taja pen aku bisi kebuah temegahka utai ti dikereja ba tubuh aku. Enti orang ngumbai diri bisi kebuah temegahka utai ti dikereja ba tubuh, aku mayuh agi kebuah: aku ditutus lebuh umur aku lapan hari. Aku orang Israel, ari raban bansa Benjamin, orang Hebrew ke diadaka orang Hebrew. Nyadi ba pasal Adat, aku orang Parisi. Ba pasal pengangkun aku ke Adat, aku udah merinsaka eklisia. Ba pasal diau lurus di baruh Adat, aku nadai penyalah. Tang semua penguntung ti udah ulih aku suba, diatu dikumbai aku pengerugi magang, ketegal Kristus. Lebih agi ari nya, aku ngira semua utai pengerugi magang enti dibandingka enggau utai ti lebih agi beguna, iya nya nemu Jesus Kristus Tuhan aku. Ketegal Iya, aku udah muai semua utai, lalu ngira semua utai nya uras magang, ngambika aku tau bempu Kristus, lalu diau dalam Iya, ukai ngembuan pengelurus ke aku empu ti datai ari Adat, tang pengelurus ti datai ulih pengarap ke Kristus, pengelurus ti datai ari Allah Taala, ti beduduk ba pengarap. Aku ingin deka nemu Kristus, sereta nemu kuasa pengangkat Iya ari mati, lalu sama enggau Iya ngasaika pemerinsa Iya, lalu nyadi sebaka enggau Iya dalam pemati Iya, ngambika, enti ulih, aku diangkatka idup baru ari mati. Ukai reti nya aku udah bulih semua utai nya, tauka udah datai ba adan. Tang aku majak bebendar ngulihka prais nya, laban Kristus udah bempu aku. Menyadi, aku ukai ngumbai diri udah bulih prais nya. Utai ti dikereja aku nya, aku badu agi ngingatka utai ti udah, lalu bebendar ngulihka utai ti di mua. Aku majak belanda terus ngagai adan, ngulihka prais, iya nya kangau Allah Taala, ulih Jesus Kristus, ke mai aku ke serega. Awakka semua kitai ke besai tuai sebaka runding enggau pangan diri. Lalu enti runding kita enda sebaka, Allah Taala deka mega madahka nya ngagai kita. Tang aram kitai bepegai teguh ba utai ti udah ulih kitai. Menyadi, awakka kita sama enggau orang bukai nunda teladan aku, lalu peratika sida ke nunda teladan ti udah diberi kami ngagai kita. Laban, munyi ti suah udah dipadahka aku ngagai kita, lalu diatu aku madahka nya baru ngagai kita enggau ai mata, mayuh orang nyadi munsuh regang Kristus. Sida nya deka dirusak. Perut sida nyadika petara sida, lalu sida temegahka utai ti patut dikemaluka sida. Sida numpuka runding sida ngagai utai dunya. Tang kitai tu peranak serega, lalu kitai nganti Juruselamat kitai datai ari serega, iya nya Tuhan Jesus Kristus. Iya deka ngubah tubuh kitai ti lemi tu, ngambika iya nyadi sebaka enggau tubuh Iya Empu ti bemulia, ngena kuasa ti dikena Iya ngasuh semua utai nunduk ngagai Iya magang. Nya alai, menyadi ke dikerindu sereta dikelengauka aku, ke nyadika pengaga enggau makota aku, bediri tegap dalam Tuhan, menyadi. Aku minta Eudia, lalu aku minta Sintike besetuju enggau pangan diri dalam Tuhan. Lalu aku minta nuan, pangan aku ke taluk, nulung sida indu tu, laban sida udah bebendar enggau aku nusui Berita Manah, sama enggau Klemen, enggau semua sida bukai ke sama bekereja enggau aku, ke bisi nama dalam bup pengidup. Seruran gaga ati dalam Tuhan. Aku nandu nya baru: awakka kita gaga ati! Awakka semua orang nemu penyiru kita. Tuhan nyau semak. Anang irauka utai, tang dalam semua utai, bantaika semua peminta kita ngagai Allah Taala ngena sampi, sampi peminta, enggau sampi terima kasih. Lalu pemaik Allah Taala, ti ngelui peragam mensia, deka nyaga ati enggau runding kita dalam Jesus Kristus. Ke pengujung iya, menyadi, perundingka utai ti bendar, ti manah, ti lurus, ti tuchi, ti badas, ti nelap, ti pemadu menyana, ti tau dipuji. Kereja semua utai ti udah dipelajar, udah diterima, udah didinga, udah dipeda kita kereja aku; lalu Allah Taala ti meri pemaik deka meruan enggau kita. Ati aku balat gaga dalam Tuhan, laban kita diatu nyau nemu ibuhka aku baru. Iya ti bendar, kita endang amat nemu ibuhka aku suba, tang kita nadai peluang alai kita ngayanka nya. Ukai reti nya aku beserabanaka penyuntuk diri, laban aku udah belajar nemu puas ati, nemuka aku suntuk tauka enda. Aku nemu reti asai suntuk, lalu aku mega nemu reti asai mayuh utai. Dalam semua utai, aku udah nemu chara ti resia kena aku napi maya aku kenyang tauka lapar, maya aku mayuh utai tauka suntuk. Aku ulih ngereja semua utai ulih Iya ke meri aku pengering. Tang manah amat kita udah nulung aku lebuh aku dituntung penusah. Kita orang Pilipi endang nemu, lebuh aku baru belabuh nusui Berita Manah suba, lebuh aku angkat ari menua Masedonia, nadai eklisia deka nulung aku, kelimpah ari kita; laban indah lebuh aku di Tesalonika deh kita suah ngirumka tulung ngagai aku. Ukai reti nya aku minta pemeri nya, tang aku deka meda penguntung kita ditambahka ngagai akaun kita. Aku udah nerima semua bayar, lebih ari chukup! Aku puas ati, laban aku udah nerima ari Epaproditus pemeri ti dikirumka kita ngagai aku, piring ti bebau rengut, piring ti diterima sereta dikerinduka Allah Taala. Lalu Allah Taala aku, deka meri semua utai ti dipeguna kita, nitihka pengaya mulia Iya dalam Jesus Kristus. Beri meh mulia ngagai Allah Taala enggau Apai kitai belama-lama iya! Amin. Beri tabi basa ngagai genap iku nembiak Tuhan. Bala menyadi ke begulai enggau aku ditu, bela ngirumka tabi basa ngagai kita. Semua nembiak Tuhan bela ngirumka tabi basa ngagai kita, kelebih agi sida ke dalam istana Raja Besai. Awakka pengasih Tuhan Jesus Kristus meruan enggau kita semua. Amin. Surat ari Paul, rasul Jesus Kristus ulih peneka Allah Taala, enggau ari menyadi kitai Timoti, Ngagai bala nembiak Tuhan enggau ngagai menyadi lelaki enggau menyadi indu kitai ke tetap ati ngagai Kristus di Kolosi: Awakka Allah Taala ti Apai kitai meri kita berekat enggau pemaik. Kami seruran meri terima kasih ngagai Allah Taala ti Apai Jesus Kristus Tuhan kitai, lebuh kami besampika kita, laban kami bisi ninga pasal pengarap kita ke Jesus Kristus, enggau pasal pengerindu kita ke semua nembiak Tuhan, ketegal pengadang ti disedia ke kita di serega. Kita udah ninga pasal pengadang tu suba dalam pesan ti bendar, iya nya Berita Manah ti udah datai ba kita. Baka iya ti bebuah sereta ngerembai di serata dunya, baka nya mega Berita Manah nya udah bebuah ba bala kita kenyau ari maya kita ke terubah ninga iya lalu belabuh meretika semua pemendar pasal pengasih Allah Taala. Kita udah nemu pasal pengasih nya ari Epapras, orang ke sama bekereja enggau kami, ke dikerinduka kami. Epapras nya orang ke tetap ati bekereja ke Kristus ngarika kita, lalu iya udah madah ngagai kami pasal pengerindu kita dalam Roh Kudus. Nya kebuah, kenyau ari maya kami ninga nya, kami enda ngetu besampika kita, minta kita dipenuhka enggau penemu pasal peneka Allah Taala, sereta enggau semua penemu-dalam enggau pemereti ti datai ari Roh Kudus, ngambika kita idup nitihka jalai Tuhan, ngerinduka ati Iya lebuh kita bebuah ngereja semua pengawa ti manah, sereta mansang dalam penemu pasal Allah Taala. Awakka kita digaga nyadi kering ulih semua pengering ti datai ari kuasa Iya ti bemulia, lalu awakka kita sedia tan natka semua pemerinsa enggau ati ti liat, lebuh kita, enggau ati ti gaga meri terima kasih ngagai Apai, ke udah ngasuh kami bekunsika pesaka nembiak Tuhan ke diau dalam penampak. Iya udah ngelepaska kitai ari kuasa pemetang, lalu mindahka kitai ngagai Perintah Anak ke dikerinduka Iya, ke udah nebus kitai, reti nya, udah ngampun dosa kitai. Kristus nya meh gamal Allah Taala ti enda ulih dipeda. Iya Anak ke terubah diadaka ari atas semua utai ti digaga, laban semua utai ti di serega enggau di dunya udah digaga ulih Kristus, utai ti ulih dipeda enggau ti enda ulih dipeda, nemuka utai nya kerusi diraja, tauka kuasa, tauka perintah, tauka pemerintah -- semua utai nya udah digaga ulih Kristus, ke Kristus. Kristus endang udah bisi dulu ari semua utai, lalu semua utai begempung dalam Iya. Kristus nyadi kepala ke tubuh, iya nya eklisia. Kristus nyadika pun, Anak ke terubah diangkatka ari mati, ngambika Iya ari atas semua. Laban semua personaliti Allah Taala udah gaga diau dalam Kristus, lalu ulih Kristus, Allah Taala udah gaga ati mai semua utai bebaik enggau Allah Taala Empu, nemuka di dunya tauka di serega, ulih darah Kristus ti dituang ba kayu regang. Lalu kita, ke udah beserara ari Allah Taala, lalu udah bemunsuh enggau Iya dalam ati kita, lalu udah ngereja penyai, diatu udah dibai Kristus bebaik enggau Allah Taala ngena tubuh Kristus Empu, ulih pemati Iya, ngambika Iya nyerahka kita kudus, nadai bepenyalah, nadai jalai mantah, ngagai Allah Taala, asal ga kita majak tegap sereta tan dalam pengarap, enda bekinsit ari pengadang ti disemaya Berita Manah ti udah didinga kita, ti udah ditusui ngagai semua orang di baruh langit. Aku udah nyadi ulun Berita Manah nya. Diatu aku gaga ati natka pemerinsa, ke penguntung kita, lalu dalam tubuh aku empu, aku ngenyukupka pemerinsa ti enda ditatka Kristus, ke penguntung eklisia, iya nya tubuh Iya. Aku udah diasuh Allah Taala bekereja ke eklisia, ngereja pengawa ti udah diberi Iya ngagai aku ke penguntung kita, ngambika jaku Allah Taala ditemu magang, iya nya misteri ti udah dilalaika Allah Taala ari semua serak sejeman-jeman tu, tang diatu dipandangka ngagai nembiak Iya. Allah Taala udah mandangka nya laban Iya dekaka kita orang bansa bukai nemu pemesai pengaya enggau mulia misteri nya, iya nya Kristus ke diau dalam kita, ke alai kita manggaika pengadang kita deka sama enggau bempu mulia Allah Taala. Kristus nya ke ditusui kami, lalu kami meri jaku tangkan sereta ngajar genap iku orang ngena semua penemu-dalam, ngambika kami ulih nyerahka genap iku sida chukup badas dalam Kristus. Nya meh kebuah aku bebendar bekereja ngena semua pengering kuasa ti diberi Iya ngagai aku. Laban aku dekaka kita nemu pemendar aku bekereja ke kita, enggau ke sida ke di Laudisia, enggau ke semua orang ke enda kala betemu betunga mua enggau aku. Aku dekaka ati sida diperansang sereta begempung dalam pengerindu, ngambika sida meretika semua utai, lalu nemu misteri Allah Taala, iya nya Kristus Empu, ke alai semua penemu-dalam enggau penemu dilalaika. Aku nyebut tu ngambika orang enda ulih nipu kita ngena kelakar ti manah didinga. Laban taja pen aku enda begulai enggau kita batang tubuh, tang aku begulai enggau kita dalam roh, lalu aku gaga meda kita seati sereta tegap dalam pengarap kita ke Kristus. Nyadi laban kita udah nerima Jesus Kristus nyadika Tuhan kita, awakka kita majak idup dalam Iya, beurat sereta mansang dalam Iya, lalu nyadi tegap dalam pengarap, nitihka ajar ti udah diberi ngagai kita, lalu seruran meri terima kasih. Anang nejuka orang nipu kita ngena penemu enggau kelakar ti nadai reti, ti datai ari ajar mensia, ti datai ari ajar bala roh ti merintah di langit enggau di dunya tu, ukai ari Kristus. Laban semua personaliti Allah Taala endang diau dalam tubuh Kristus, lalu kita udah diberi pengidup enggau penuh dalam Kristus ke ari atas semua pemerintah enggau kuasa. Dalam Kristus mega kita udah ditutus ngena chara roh, lebuh Iya ngelepaska kita ari ulah ti bedosa, ukai ditutus jari mensia tang, tang ditutus Kristus, lebuh kita dikuburka sama enggau Iya lebuh kita dibaptisa, lalu kita mega diangkatka ari mati sama enggau Iya ulih pengarap kita ke kuasa Allah Taala ti ngangkatka Iya ari mati. Lebuh kita agi mati dalam dosa, lalu kita apin ditutus ari dosa kita, Allah Taala ngidupka kita sama enggau Kristus, lebuh Iya ngampun kitai ari semua dosa kitai, lebuh Iya muai semua adat ti ditulis enggau atur ti ngelaban kitai. Iya muai semua utai nya, lebuh Iya mantangka sida ba kayu regang. Iya ngerampas semua senyata ari perintah enggau kuasa, lalu mandangka sida ngagai orang mayuh, kena Iya ngayanka Diri udah menang ngelaban sida ngena kayu regang. Nya alai anang nejuka orang ngakim kita pasal utai ti diempa tauka diirup kita, tauka pasal hari ti kudus, tauka pasal Gawai Anak Bulan, tauka pasal hari Sabat. Semua utai nya semina ayuk utai ti deka datai, tang utai ti bendar diempu Kristus. Anang nejuka orang ngumbai kita enda chukup badas. Sida nya orang ke pura-pura baruh ati lalu besembahka melikat. Sida bejakuka pasal genera, ngerigangka diri enggau nadai kebuah ngena runding mensia. Sida enda bepegai teguh ba Kristus, ke nupi sereta bejantilka semua perengka tubuh nya ngena urat enggau rakat, lalu ngasuh tubuh nya mansang besai nitihka peneka Allah Taala. Enti kita udah mati enggau Kristus, lalu udah dilepaska ari roh ke merintah di langit enggau di dunya, nama kebuah kita diau baka ke agi diempu dunya? Nama kebuah kita nunduk ngagai adat baka “Anang megai nya, Anang ensepi nya, Anang negu nya”? Semua adat nya bejakuka pasal utai ti nemu abis lebuh sida udah dikena, laban utai nya semina adat enggau ajar mensia. Adat nya baka ke beduduk ba penemu-dalam, ngasuh orang pura-pura ngayanka diri kudus, ngayanka diri baka ke baruh ati, merinsaka tubuh diri, tang utai nya nadai guna kena nagang pengingin tubuh. Nya alai enti kita udah diangkatka idup baru enggau Kristus, tumpuka ati kita ngagai utai ti di serega, alai Kristus ke duduk muak ari kanan Allah Taala. Berundingka utai serega, ukai berundingka utai dunya, laban kita udah mati, lalu pengidup kita diatu dilalaika enggau Kristus dalam Allah Taala. Lebuh Kristus, ke nyadi pengidup kitai, pegari, kita deka mega pegari enggau Iya dalam mulia! Nya alai bunuh semua pengingin dunya ti dalam kita, baka: pengawa bambai, ulah ti kamah, runding ti kamah, pengingin ti jai, enggau pengamu (reti nya nyembah engkeramba). Nya utai ti nyungkak Allah Taala ringat ngagai orang ke enda ngasi. Nya meh gaya pengidup kita suba, lebuh kita agi nitihka pengingin dunya. Tang diatu buai semua utai nya ari kita, baka: pengeringat, ati ti ngeransi, ati ti bedendam, ati ti seruran deka bejakuka orang, enggau jaku ti kamah. Anang bulaka pangan diri, laban kita udah ngelengkaka pengidup ti lama, enggau semua pengawa iya, lalu udah nyadi mensia ti baru, ke majak diubah nyadi baru belama dalam penemu neladan gamal Allah Taala Empu. Dalam pengidup ti baru tu sigi nadai bida entara orang bansa bukai enggau orang Judah, entara orang ke udah ditutus enggau orang ke enda ditutus, entara orang ke enda beradat enggau orang ke semina pama mimit ari jelu, entara orang ke ulun enggau orang ke ukai ulun, tang Kristus nyadi semua, dalam semua! Nya alai, laban kita udah dipilih Allah Taala nyadi orang ke kudus sereta dikerinduka Iya, rasukka penyiru, penelap, ati ti baruh, ati ti nemu nunduk ngagai pangan diri, enggau ati ti liat. Sabar enggau pangan diri, lalu ampun pangan diri enti kita bisi enda nyamai ati ngagai pangan diri. Baka Tuhan ke udah ngampun kita, baka nya mega kita ngampun pangan diri. Lebih ari semua, rasukka pengerindu kena ngempung semua utai nyadi siti. Lalu awakka pemaik Kristus merintah dalam ati kita, laban semua kita udah dikangauka ngagai pemaik nya dalam siti tubuh. Lalu seruran beterima kasih. Awakka semua jaku Kristus diau dalam kita. Ajar lalu rara pangan diri ngena semua penemu-dalam, lalu belagu ngena masmur, pantun, enggau ngena lagu Roh ngagai Allah Taala, enggau ati ti beterima kasih. Dalam semua utai ti dikereja kita, nemuka ngena jaku tauka ngena pengawa, kereja semua utai nya dalam nama Tuhan Jesus, meri terima kasih ngagai Allah Taala dalam nama Iya. Kita ke bini, nunduk ngagai laki kita, laban nya endang patut dikereja kita dalam Tuhan. Kita ke laki, rinduka bini kita, lalu anang kasar enggau sida. Kita ke anak, ngasika apai indai kita dalam semua utai, laban nya ngerinduka ati Tuhan. Kita ke apai, anang ngereja utai ti tau ngasuh anak kita ringat, enggai ke sida alah semengat. Kita ke ulun, ngasika tuan kita dalam semua utai, ukai semina lebuh sida meda kita ketegal kita minta diri dikerinduka sida, tang enggau pengabis ati kita laban kita nangika Tuhan. Kereja semua utai enggau pengabis ati kita, baka ke bekereja ke Tuhan, ukai ke mensia, laban kita nemu, kita deka nerima ari Tuhan pesaka nyadika upah kita, laban kita bekereja ke Tuhan Jesus Kristus. Laban orang ke ngereja penyalah deka diupah nitihka penyalah ti dikereja iya, lalu Tuhan enda bepilih mata. Kita ke tuan, intu ulun kita enggau badas sereta lurus, laban kita empu nemu kita bisi mega Tuan di serega, Seruran majak besampi. Lebuh kita besampi, seruran bejaga sereta besampi terima kasih. Besampi mega ke kami, minta Allah Taala muka pintu ngambika kami ulih nusui misteri Kristus. Nya pengawa ti ngasuh aku kena tutup. Besampi ke aku, ngambika aku ulih nerangka misteri nya, baka ti patut dikereja aku. Kita enda tau enda pintar lebuh kita begulai enggau orang ke ukai orang Kristian, ngena semua peluang kita. Awakka jaku kita seruran badas sereta ngenyamaika ati orang, ngambika kita nemu jalai kita patut nyaut semua orang. Taikikus deka madahka semua berita pasal aku ngagai kita. Iya tu menyadi ke dikerinduka kami, ke tetap ati enggau kami bekereja ke Tuhan. Aku udah ngasuh iya nemuai ngagai kita ketegal tuju tu aja, iya nya, ngambika kita nemu berita pasal kami, sereta ngambika iya meransang kita. Iya deka datai sama enggau Onisimus, menyadi ke tetap ati, ke dikerinduka kitai, ke ari raban kita empu. Seduai iya deka madah ngagai kita semua utai ti nyadi ditu. Aristarkus, ke ditutup dalam rumah jil sama enggau aku, ngirumka tabi basa ngagai kita, lalu baka nya mega Mark, petunggal Barnabas. (Kita udah nerima atur pasal iya; enti iya datai, sambut meh iya.) Jesus, ke dikumbai Justus, mega ngirumka tabi basa. Ka semina sida tiga tu aja orang Judah ke arap, ke bekereja enggau aku ke Perintah Allah Taala, lalu sida tiga tu udah ngelantangka ati aku. Epaphras, iya nya siku raban kita empu, ke nyadi ulun Jesus Kristus, ngirumka tabi basa. Iya seruran bebendar amat besampika kita, ngambika kita nyadi orang ke besai tuai dalam pengarap, lalu nemu semua peneka Allah Taala. Laban aku besaksi madahka iya udah bebendar amat bekereja ke kita, enggau ke sida ke di Laudisia, enggau di Hierapolis. Luke, lutur ke dikesayauka kitai, enggau Demas ngirumka tabi basa ngagai kita. Beri tabi basa ari aku ngagai bala menyadi ke di Laudisia, kelebih agi ngagai Nympa, enggau ngagai raban eklisia ke begempuru dalam rumah iya. Lalu lebuh surat tu udah dibacha di mua bala kita, awakka iya mega dibacha dalam eklisia di Laudisia. Lalu kita patut mega macha surat ari Laudisia. Lalu sebut ngagai Arkipus, “Nuan enda tau enda nembuka pengawa ti udah diterima nuan dalam Tuhan.” Aku, Paul, ke nulis leka jaku tu: Tabi ari Paul. Kingatka aku ke ditanchang ngena rantai! Awakka Allah Taala merekatka kita. Surat ari Paul, Silas, enggau Timoti, Ngagai eklisia di Tesalonika dalam Allah Taala ti Apai enggau Tuhan Jesus Kristus: Awakka berekat enggau pemaik diberi ngagai kita. Kami seruran meri terima kasih ngagai Allah Taala ke semua kita, lalu seruran nyebut nama kita dalam sampi kami, ngingatka di mua Allah Taala ti Apai, pengawa ti dikereja kita ke pengarap, pengawa ti dikereja kita ketegal pengerindu, enggau penegap pengadang kita ke Jesus Kristus Tuhan kitai. Laban kami nemu, menyadi ke dikerinduka Allah Taala, Iya udah milih kita, laban Berita Manah ti ditusui kami ngagai kita ukai semina ditusui kami ngena leka jaku aja, tang mega ngena kuasa, enggau Roh Kudus, sereta enggau ngena pemesai pengarap kami ke Berita Manah. Kita nemu gaya pendiau kami, lebuh kami begulai enggau kita, ke penguntung kita. Lalu kita nunda teladan kami enggau teladan Tuhan. Taja pen kita balat diperinsa, tang kita nerima jaku nya ngena pengaga ti datai Roh Kudus, ngambika kita nyadi teladan ke semua orang ke arap di Masedonia enggau di Akaia. Laban jaku Tuhan udah ngerembai ari kita ukai semina di Masedonia, enggau di Akaia, tang di semua endur alai pengarap kita ke Allah Taala udah ditemu orang. Nya alai kami enda ibuh bejakuka pasal nya, laban orang ke di menua nya empu madahka gaya pemendar kita nyambut kami, enggau gaya kita nguingka diri ari engkeramba ngagai Allah Taala, lalu bekereja ke Allah Taala ti bendar, Allah Taala ti idup, sereta nganti Anak Iya datai ari serega, ke udah diangkatka Iya ari mati, iya nya Jesus ke ngelepaska kitai ari pengeringat ti deka datai. Kita empu nemu, menyadi, kami enda lebu udah nemuai ngagai kita suba, tang taja pen kami udah balat diperinsa sereta dikeduan di Pilipi, baka ke ditemu kita, kami udah diberi Allah Taala pemerani nusui Berita Manah Allah Taala, taja pen mayuh orang nyakal kami. Laban ajar kami ukai datai ari ati ti ngelakar, tauka ari juluk ati ti enda tuchi, tauka ari ati ti deka nipu, tang laban kami udah dikemendarka lalu diasuh Allah Taala nusui Berita Manah, nya alai kami bejaku, ukai deka ngerinduka ati mensia, tang deka ngerinduka ati Allah Taala ke nguji ati kami. Kita empu nemu, lalu Allah Taala Empu nyadika saksi kami, kami nadai kala ngena jaku kelangkung, tauka ngena jaku ti ngelalaika pengamu; lalu kami pen ukai mega minta puji ari mensia, nemuka ari kita tauka ari orang bukai, taja pen kami nyangka patut minta sebarang utai ari kita laban kami tu rasul Kristus. Tang kami nelap lebuh kami begulai enggau kita, baka indai ke siru enggau anak diri. Kami balat rinduka kita datai ke kami sedia deka bekunsi enggau kita, ukai semina Berita Manah ari Allah Taala, tang mega nyawa kami empu, laban kami balat sayauka kita. Kita, menyadi, tentu ingatka pemendar kami gawa. Kami gawa siang malam, ngambika kami enda nating kita lebuh kami nusui Berita Manah Allah Taala ngagai kita. Kita empu meda lalu Allah Taala mega meda ulah kami endang tuchi, betul, sereta nadai salah, lebuh kami begulai enggau kita. Kita empu nemu, kami ngintu kita baka apai ke ngintu anak diri, ngansak, meransang sereta mujuk kita idup ngemuliaka Allah Taala, ke udah ngangauka kita ngagai perintah enggau ngagai mulia Iya Empu. Lalu kami mega seruran meri terima kasih ngagai Allah Taala ke nya, ngambika lebuh kita nerima jaku Allah Taala ti didinga kita ari kami suba, kita nerima iya ukai baka ke nerima jaku mensia, tang nerima jaku Allah Taala, laban iya endang amat jaku Allah Taala, ti bekereja dalam kita ke arap. Laban kita, menyadi, nunda teladan eklisia Allah Taala dalam Jesus Kristus ti di Judea, laban kita empu natka diri diperinsaka bansa kita empu, baka sida di Judea ke diperinsaka orang Judah, ke udah munuh Tuhan Jesus enggau sida nabi, lalu muru kami. Sida ngasuh Allah Taala enda lantang ati, sereta ngelaban semua orang laban sida nagang kami madah ngagai orang bansa bukai Berita Manah ti ulih nyelamatka sida. Nya alai, baka selama, sida endang seruran ngisi diri penuh enggau dosa. Tang diatu Allah Taala udah ringat ngagai sida! Menyadi, lebuh kami nadai begulai enggau kita batang tubuh enda lama, kami balat lelengauka kita lalu gagit ati deka betemu betunga mua enggau kita. Laban kami endang amat deka nemuai ngagai kita. Aku, Paul, endang enda ngetu-ngetu nguji nemuai ngagai kita, tang Sitan nagang kami. Laban nama pengadang kami, tauka pengaga kami, tauka utai ti tau dikemegahka kami di mua Tuhan Jesus, enti ukai kita, lebuh Iya datai baru? Iya ti bendar, kita nyadi nyadika mulia enggau pengaga kami. Nya alai lebuh kami nyau enda ulih natka diri agi, kami lalu mutuska runding ninggalka diri di Atens. Kami lalu ngasuh Timoti, menyadi kitai, ke bekereja ke Allah Taala sama enggau kami ngerembaika Berita Manah pasal Kristus, ngambika iya ngeringka sereta meransang kita dalam pengarap, ngambika nadai siku kita beguyat lebuh kita kena perinsa. Kita empu nemu, pemerinsa nya endang ungkup kitai. Laban lebuh kami begulai enggau kita, kami bisi madah, sebedau utai nya nyadi, kitai sigi deka kena perinsa. Diatu kita nemu utai nya udah nyadi. Nya meh kebuah, lebuh aku nyau enda ulih natka diri agi, aku lalu ngasuh Timoti nemuai ngagai kita ngambika aku nemu pasal pengarap kita, laban aku irau enggai ke Sitan nguji kita, lalu ngelebuka pengawa kami. Tang diatu Timoti baru udah pulai kitu ari kita, lalu udah mai berita ti manah pasal pengarap enggau pengerindu kita. Iya madahka pasal kita ke udah manah amat seruran ngingatka kami sereta lelengauka kami, baka kami ke lelengauka kita. Nya meh kebuah, menyadi, dalam semua penusah enggau pemerinsa kami, kami berasai diperansang ulih kita ketegal pengarap kita. Laban diatu kami idup, enti kita majak bediri tegap dalam Tuhan. Baka ni ku kami ulih meri terima kasih ti chukup ngagai Allah Taala, ke semua pengaga ti diasaika kami di mua Allah Taala ketegal kita? Siang malam kami enggau naka pemendar besampi minta diri betemu enggau kita mua mata, lalu meri ngagai kita utai ti agi bisi kurang dalam pengarap kita. Nya alai diatu awakka Allah Taala ti Apai kitai, enggau Jesus Kristus Tuhan kitai, nujuka pejalai kami ngagai kita. Lalu awakka Tuhan ngasuh kita majak balat agi rinduka pangan diri, enggau rinduka semua orang, baka kami ke balat rinduka kita. Lalu awakka Iya ngeringka ati kita kudus sereta nadai bepenyalah di mua Allah Taala ti Apai kitai, lebuh Tuhan Jesus datai, sama enggau semua nembiak Iya ti kudus. Ke pengujung iya, menyadi, kami minta lalu meransang kita dalam Tuhan, baka kita ke udah belajar ari kami jalai kita patut idup, lalu ngerinduka ati Allah Taala, baka ke dikereja kita diatu, awakka kita majak ngereja lebih agi ari nya. Laban kita nemu ajar ti udah diberi kami ngagai kita di baruh kuasa Tuhan Jesus. Laban tu peneka Allah Taala ke kita, ngambika kita dikuduska: badu agi bambai; kita patut nemu nagang pengingin tubuh diri ngena jalai ti kudus sereta menyana, ukai ngembuan pengingin ti kamah baka orang bansa bukai ke enda nemu Allah Taala; ngambika nadai siku kita ngereja utai ti salah tauka ngambi ulih ba pangan diri, laban Tuhan deka malas orang ke ngereja nya, munyi ti udah dipadahka kami ngagai kita kena kami nangkan kita. Laban Allah Taala ukai ngangauka kitai ngagai pengidup ti kamah, tang ngagai pengidup ti kudus. Nya alai, barang sapa nulak ajar tu, ukai nulak ajar mensia, tang nulak ajar Allah Taala, ke meri Roh Kudus Iya ngagai kita. Pasal pengerindu ke pangan ke sama pengarap, kita enda ibuh begunaka orang nuliska nya ngagai kita, laban kita empu udah diajar Allah Taala, ngasuh kita rinduka pangan diri; lalu kita endang amat rinduka semua menyadi di serata menua Masedonia. Tang kami meransang kita, menyadi, ngasuh kita majak ngereja lebih agi ari nya, ngasuh kita likun ulah, ngereja pengawa diri, lalu bekereja ngena jari kita empu munyi ti diasuh kami; ngambika kita manah ulah lebuh kita begulai enggau orang ke ukai Kristian, lalu enda bepanggai ba orang. Tang kami enggai ke kita enda nemu, menyadi, pasal orang ke udah mati, ngambika kita enda tusah ati baka orang ke nadai pengadang. Laban kitai arapka Jesus udah mati, lalu udah angkat idup baru, nya alai, ulih Jesus, Allah Taala deka mai enggau Iya orang ke udah mati. Laban tu utai ti dipadahka kami ngagai kita ari jaku Tuhan Empu, iya nya, kitai ke idup, ke agi tinggal di dunya tu nyentuk ngagai maya penatai Tuhan, enda mupuk dulu ari orang ke udah mati. Laban Tuhan Empu deka nurun ari serega enggau nyawa ti inggar, enggau nyawa tuai melikat, enggau munyi terumpit Allah Taala. Lalu orang ke mati, ke udah arapka Tuhan, deka angkat dulu. Udah nya baru kitai ke agi idup, ke agi tinggal, deka digempuruka sama enggau sida dalam remang lalu betemu enggau Tuhan di langit, lalu kitai deka diau begulai enggau Tuhan belama iya. Nya alai peransang pangan diri ngena jaku tu. Tang ba pasal maya enggau musin, menyadi, kami enda ibuh nuliska pasal nya ngagai kita. Laban kita empu nemu, Hari Tuhan deka datai baka penchuri ke datai lebuh malam hari. Lebuh orang nyebut, “Kitai bisi pemaik sereta likun,” pengerusak deka ngenyit ninggang sida, baka indu ke radai deka beranak, lalu sida nadai jalai ngerarika diri. Tang kita, menyadi, ukai diau dalam pemetang lalu kita enda patut tekenyit lebuh Hari nya datai baka penchuri, laban semua kita endang anak penampak, anak siang hari. Kitai tu ukai anak malam hari tauka anak pemetang. Nya alai, anang kitai tinduk baka orang bukai, tang awakka kitai seruran dani sereta sedia belama; laban orang ke tinduk, tinduk lebuh malam hari, lalu orang ke mabuk, mabuk lebuh malam hari. Tang laban kitai tu anak siang hari, kitai patut nemu nagang diri, lalu ngerasukka pengarap enggau pengerindu nyadika terabai dada kitai, enggau pengadang kitai ke pengelepas nyadika selapuk kebal kitai. Laban Allah Taala ukai milih kitai ngambika kitai ditinggang pengeringat, tang ngambika kitai bulih pengelepas ulih Tuhan kitai Jesus Kristus ke udah mati ke kitai, ngambika, nemuka kitai dani tauka tinduk, kitai tau idup begulai enggau Iya. Nya alai peransang sereta tulung sukung pangan diri, baka ke dikereja kita diatu. Tang, menyadi, kami minta kita bebasaka orang ke bekereja ba bala kita, ke nyadi tuai kita dalam Tuhan sereta meri jaku tangkan ngagai kita. Beri basa enggau pengerindu ti pemadu besai ngagai sida ketegal pengawa sida. Diau bebaik enggau pangan diri. Lalu kami ngasuh kita, menyadi, meri jaku tangkan ngagai orang ke ngelusu, meransang orang ke takut, nulung orang ke lemi, lalu liat ati enggau semua sida. Bejaga kita, anang malas penyai ngena penyai, tang seruran ngereja utai ti badas ngagai pangan diri enggau ngagai semua orang. Seruran gaga ati; seruran besampi; beri terima kasih dalam semua utai, laban nya utai ti dikedekaka Allah Taala ari kita dalam Jesus Kristus. Anang madamka Roh Kudus. Anang ngeleseka jaku sida nabi, tang uji dulu semua utai. Bepegai teguh ba utai ti badas, seliahka semua penyai. Awakka Allah Taala ti meri pemaik, nguduska kita enggau penuh; lalu awakka roh enggau semengat enggau tubuh kita diintu enggau menyana sereta nadai bepenyalah lebuh Jesus Kristus Tuhan kitai datai. Iya ke ngangauka kita, deka ngereja nya laban Iya endang tau dikarapka. Menyadi, besampi ke kami. Beri tabi basa ngena pengerindu ngagai semua menyadi dalam Tuhan. Dalam nama Tuhan aku ngansak kita macha surat tu ngagai semua bala menyadi. Awakka pengasih Jesus Kristus Tuhan kitai meruan enggau kita. Surat ari Paul, Silas enggau Timoti, Ngagai eklisia di Tesalonika dalam Allah Taala ti Apai kitai enggau Tuhan Jesus Kristus: Awakka Allah Taala ti Apai kitai enggau Tuhan Jesus Kristus meri kita berekat enggau pemaik. Kami enda tau enda seruran meri terima kasih ngagai Allah Taala ke kita, menyadi, laban nya endang patut, laban pengarap kita deras amat mansang, lalu pengerindu genap iku kita ke pangan diri nambah-menambah. Nya alai kami empu temegahka kita di mua semua eklisia Allah Taala, ketegal kita tan ati, enggau ketegal pengarap kita, taja pen kita natka semua macham pemerinsa enggau penusah. Semua utai tu nunjukka Allah Taala endang ngakim ngena pengelurus, ngambika kita ulih tama ngagai Perintah Iya. Ketegal Perintah nya meh kita kena perinsa diatu. Laban Allah Taala ngereja utai ti lurus lebuh Iya merinsaka orang ke merinsaka kita, lalu meri pemaik ngagai kita ke kena perinsa, enggau ngagai kami, lebuh Tuhan Jesus nurun ari serega enggau bala melikat Iya ti bekuasa, dalam daun api ti mau, ngukum orang ke enda ngelala Allah Taala, enggau orang ke enda ngasika Berita Manah Jesus Kristus Tuhan kitai. Sida deka diukum lalu dirusak belama-lama iya, diseraraka ari Tuhan, enggau ari kuasa mulia Iya, lebuh Iya datai nerima puji ari semua nembiak Iya, sereta dibasa semua orang ke arap, laban pesan ti ditusui kami ngagai kita udah dikarapka kita. Nya meh kebuah kami seruran besampika kita, ngambika Allah Taala ngaga kita amat patut dikangauka Iya, lalu nembuka semua utai ti dikinginka Iya enggau semua kereja ti badas, ulih kuasa Iya, ngambika nama Jesus Kristus Tuhan kitai dimuliaka dalam kita, lalu kita dimuliaka dalam Iya, nitihka pengasih Allah Taala kitai enggau pengasih Tuhan Jesus Kristus. Nyadi pasal penatai Jesus Kristus Tuhan kitai, enggau pasal kitai ke deka digempuruka begulai enggau Iya, kami minta kita, menyadi, anang mudah irau ati tauka teguran ketegal orang bisi ngumbai Hari Tuhan udah datai. Sida nyangka madahka diri udah ninga utai nya ari Roh Kudus, tauka ari orang bukai, tauka ari surat ti ditulis kami. Tang anang sekali-kali nejuka orang nipu kita; laban Hari Tuhan apin datai, sebedau Pengawa Ti Ngelaban nyadi, lalu orang siku ti enda beradat nya dipandangka, ke diletak deka dirusak. Iya ngelaban sereta ngeninggika diri ari atas semua utai ti dikumbai petara tauka utai ti disembah, lalu nudukka diri dalam Rumah Sembiang Allah Taala, lalu madahka diri Allah Taala. Kati kita enda ingatka semua nya? Aku udah madahka semua utai nya ngagai kita lebuh aku agi begulai enggau kita. Lalu kita nemu utai ti nagang iya ti enda beradat nya diatu, ngambika iya dipandangka ba maya ti patut. Laban diatu misteri ti enda beradat nya udah berengkah bekereja, tang semina nyentuk ngagai maya iya ke nagang iya ke enda beradat nya dibai ke tisi. Udah nya baru iya ke enda beradat nya dipandangka, lalu dibuai Tuhan Jesus ngena kesuh nyawa Iya, lalu ngabiska iya lengis ngena mulia Iya lebuh Iya datai. Penatai iya ti enda beradat nya nyata dalam semua pengawa Sitan ke ngena semua kuasa, tanda, kereja ajih ti pelesu, enggau semua macham tipu ti jai, ba orang ke deka mati, laban sida enggai rinduka pemendar ti ulih nyelamatka sida. Nya kebuah Allah Taala ngirumka siti kuasa penipu ti besai ngambika sida arapka utai ti pelesu, ngambika semua orang ke enda arapka pemendar tang rinduka dosa, diukum. Tang kami enda tau enda seruran meri terima kasih ngagai Allah Taala ke kita, menyadi ke dikerinduka Tuhan, laban Allah Taala udah milih kita ngambika kita diselamatka ulih Roh Kudus ti nguduska kita, enggau ulih pengarap kita ke pemendar. Nya meh kebuah Allah Taala udah ngangauka kita ulih Berita Manah ti ditusui kami, ngambika kita tau bulih mulia Jesus Kristus Tuhan kitai. Nya alai, menyadi, bediri tegap lalu bepegai teguh ba ajar ti diberi kami ngagai kita, nemuka ngena mulut tauka ngena surat kami. Awakka Jesus Kristus Tuhan kitai, enggau Allah Taala ti Apai kitai, ke rinduka kitai, lalu udah meri kitai peransang ti meruan belama iya, enggau pengadang, ulih pengasih Iya, meransang sereta ngeringka ati kita ngereja enggau nyebut semua utai ti manah. Ke pengujung iya, menyadi, besampika kami, ngambika pesan Tuhan majak ngelekai lalu dibasa, di semua endur baka ti udah nyadi ba bala kita, lalu besampi mega minta Allah Taala ngelepaska kami ari orang ke jai; laban ukai semua orang arap. Tang Tuhan endang tau dikarapka. Iya deka meri kita pengering, lalu nyaga kita ari iya ti jai. Lalu dalam Tuhan kami nemu kita diatu benung ngereja, sereta deka majak ngereja utai ti diasuh kami kereja kita. Awakka Tuhan nujuka ati kita ngagai pengerindu Allah Taala, enggau ngagai pengeliat ati Kristus. Dalam nama Jesus Kristus Tuhan kitai, menyadi, kami ngasuh kita ngejangka diri ari menyadi ke ngelusu, ke enda nitihka ajar ti diterima kita ari kami. Laban kita empu nemu jalai kita patut nunda teladan kami; kami enda ngelusu lebuh kami begulai enggau kita, lalu kami enda makai utai orang enti kami enda mayar utai nya; tang kami bebendar gawa siang malam, ngambika kami enda nating kita. Kami ngereja nya ukai laban kami nadai hak nating kita, tang ngambika kami nyadika teladan ti tau ditunda kita. Indah lebuh kami begulai enggau kita suba, deh kami meri atur tu ngagai kita: Barang sapa enggai gawa, awakka iya enda makai. Laban kami bisi ninga sekeda kita ngelusu, kiruhka pengawa orang, lalu enggai gawa. Dalam nama Jesus Kristus Tuhan kitai, kami ngasuh sereta meransang orang ke baka nya ngeringak ngereja pengawa diri, ngiga pengidup ke diri empu. Menyadi, anang leju ngereja utai ti ngena. Enti orang enggai ngasika utai ti disebut kami dalam surat tu, kita enda tau enda nemu sapa orang nya. Anang begulai enggau iya, ngambika iya nemu malu. Tang anang ngaga iya nyadi munsuh, tang beri iya jaku tangkan, laban iya menyadi dalam Tuhan. Awakka Tuhan Empu, ke pun pemaik, seruran meri kita pemaik ngena semua macham chara. Awakka Tuhan meruan enggau kita semua. Aku, Paul, ke nulis leka jaku tabi basa tu ngena jari aku empu. Tu endang jalai aku nyain semua surat aku. Tu endang jalai aku nulis. Awakka pengasih Jesus Kristus Tuhan kitai meruan enggau kita semua. Surat ari Paul, rasul Jesus Kristus ari atur Allah Taala ti Juruselamat kitai, enggau ulih Jesus Kristus ke nyadi pengadang kitai, Ngagai Timoti, anak aku ti bendar dalam pengarap: Awakka Allah Taala ti Apai kitai enggau Jesus Kristus Tuhan kitai meri nuan berekat, pengasih enggau pemaik. Munyi ti diasuh aku kereja nuan lebuh aku mansang ngagai menua Masedonia suba, awakka nuan mengkang diau di Epesus, ngambika nuan ulih nagang orang mai ajar ti lain agi ari ajar kitai, tauka nusui cherita kelulu, enggau betusut, ti semina ngasuh orang bekelikuh ngapa, ukai belajarka pengawa Allah Taala ti semina ulih ditemu ngena pengarap. Tuju ke meri pesan ti baka nya, iya nya pengerindu, ti datai ari ati ti tuchi, ari ati ti beresi, enggau ari pengarap ti bendar. Sekeda orang udah limpang ari semua utai tu, lalu berandauka utai ti nadai guna. Sida keran deka nyadi pengajar Adat, tang sida enda nemu utai ti disebut diri tauka pasal pekara ti dikeringka sida. Kitai sama nemu, Adat endang manah, enti kitai ngena iya enggau jalai ti patut. Kitai mega nemu, Adat ukai digaga ke orang ke lurus, tang ke orang ke ngelanggar Adat, ke orang ke enda nangika Allah Taala, ke orang ke bedosa, ke orang ke bejaku busung ngelaban Allah Taala, ke orang ke munuh apai indai, ke orang ke pemunuh, ke orang ke ngereja ulah ti kamah, ke orang ke beleman ngena jalai ti salah, ke orang ke betangkapka orang lalu nyual sida nyadi ulun, ke orang ke pemula, ke orang ke besaksi bula, tauka ngereja sebarang utai bukai ti ngelaban ajar ti bendar ti ditemu dalam Berita Manah ti bemulia, ti udah diserahka Allah Taala ti beberekat, ngagai aku. Aku meri terima kasih ngagai Jesus Kristus Tuhan kitai, ke udah meri aku pengering, laban Iya udah ngira aku tetap ati, lalu udah ngeletak aku bekereja ke Iya, taja pen aku dulu menya udah bejaku busung ngelaban Iya, lalu udah merinsaka Iya. Tang aku udah bulih pengasih, laban lebuh maya nya suba aku nadai nemu utai, laban aku apin arap. Tuhan kitai lalu nuang pengasih Iya ngagai aku, lalu meri aku pengarap enggau pengerindu ti dalam Jesus Kristus. Tu jaku ti bendar, ti patut diterima semua orang: Jesus Kristus datai ngagai dunya ngambika nyelamatka orang ke bedosa. Lalu aku tu orang ke pemadu jai ari semua orang ke bedosa. Tang nya meh kebuah aku udah nerima pengasih ngambika aku ke pemadu jai tu, ulih dikena Jesus Kristus ngayanka pengabis pengeliat ati Iya, lalu ngaga aku nyadi teladan ke semua orang ke deka arapka Iya, ngambika sida bulih pengidup ti meruan belama iya. Beri meh basa enggau mulia ngagai Raja ke meruan belama iya, ke enda nemu mati, ke enda dipeda, ti Allah Taala siku aja, belama-lama iya! Amin. Timoti, anak aku, aku meri nuan atur tu nitihka jaku ti benabi ti udah disebut dulu suba ba pasal nuan, ngambika lebuh nuan nitihka atur tu, nuan deka kering belaban, bepegai ba pengarap enggau ba ati ti beresi. Sekeda orang udah nulak utai tu, lalu ngerusak pengarap diri. Sida nya nyengkaum Himinius seduai Aleksander, ke udah diserahka aku ngagai Sitan ngambika seduai iya nemu belajar enda agi bejaku busung. Nya alai, ke lumur satu, aku minta jaku peminta, sampi, sampi ke orang bukai, enggau sampi terima kasih disebut ke semua orang, ke raja enggau ke semua orang ke megai kuasa, ngambika kitai diau likun dalam pemaik, nangi sereta bebasaka Allah Taala ngena chara ti patut. Tu meh utai ti manah, ti ngerinduka ati Allah Taala ke Juruselamat kitai, ke dekaka semua mensia diselamatka, lalu nemu penemu pasal pemendar. Laban Allah Taala endang siku aja, lalu semina siku aja orang ke mai pemaik entara Allah Taala enggau mensia, iya nya Jesus Kristus, ke udah nyerahka Diri nyadika penebus semua mensia, ke udah dipadahka ba maya ti patut. Nya meh kebuah aku udah diasuh nyadi penginjil enggau nyadi rasul -- aku madahka utai ti bendar, aku enda bula -- nyadi pengajar ke orang bansa bukai ba pasal pengarap enggau pemendar. Aku dekaka orang ke lelaki di semua endur besampi, ngangkatka jari ti kudus sereta nadai mai ati ti pedis tauka kelikuh. Aku mega dekaka sida ke indu begari penumbas iya sereta menyana, ngena gari ti patut, ukai ngena buk ti kelalu balat gaya, tauka bekenaka perengka emas, tauka batu mutiara, tauka bekenaka gari ti mar rega, tang ngereja pengawa ti badas, baka ti patut dikereja indu ke nangika Allah Taala. Awakka sida ke indu belajar enggau enda bemunyi sereta baruh ati. Aku enda ngemendarka indu ngajar, tauka bekuasa atas lelaki. Sida enda tau bemunyi. Laban Adam dulu agi ditempa, udah nya baru Awa; lalu ukai Adam ke kena tipu, tang indu nya ke kena tipu lalu bedosa. Tang taja pia, indu deka diselamatka laban iya beranak, enti iya, enggau ati ti baruh, majak dalam pengarap, pengerindu enggau pengudus. Tu jaku ti bendar: barang sapa ingin deka nyadi bishop, iya inginka pengawa ti badas. Orang ke nyadi bishop enda tau enda orang ke nadai jalai mantah, siku aja bini, nemu nagang diri, nemu bejimat mansutka runding, sereta manah ulah, nemu ngelaluka temuai, landik ngajar, ukai orang ke pemabuk, enda mangah tang siru enggau orang, ukai seruran deka belaya, lalu enda angkunka duit. Iya enda tau enda nemu ngintu ruang bilik diri empu enggau menyana, lalu ngajar bala anak iya ngasi sereta bebasaka iya; laban enti orang nya enda nemu ngintu ruang bilik diri empu, baka ni ku iya ulih ngintu eklisia Allah Taala? Iya enda tau orang ke baru udah nyadi orang Kristian, enggai ke iya ngerigangka diri laban sumbung, lalu diukum baka Sitan. Nambahka nya, iya enda tau enda orang ke dibasa orang ke ari luar eklisia, enggai ke iya dipechat lalu disintak panjuk Sitan. Baka nya mega orang ke nyadi dikon. Sida patut orang ke enda empelita ngereja pengawa, ukai orang ke aum-juak, ukai orang ke gian ngirup, lalu enda amuka duit. Sida enda tau enda, enggau ati ti beresi bepegai teguh ba misteri pengarap kitai. Lalu awakka sida diuji dulu. Udah nya, enti sida ditemu nadai udah ngereja penyalah, nya baru sida tau diambi nyadi dikon. Bini sida mega patut orang ke manah ulah, enda bejakuka orang, tang nemu nagang diri, sereta tetap ati dalam semua utai. Dikon enda tau bebini lebih ari siku, sereta nemu ngintu anak enggau ruang bilik diri enggau menyana, laban dikon ke ngereja pengawa sida enggau menyana deka dibasa orang, sereta berani bejakuka pasal pengarap sida ke Jesus Kristus. Aku ngarapka diri ulih nemuai ngagai nuan enda lama da agi, tang aku nuliska semua atur tu ngagai nuan ngambika, enti aku laun mimit datai, nuan nemu jalai diri patut begaya dalam ruang bilik Allah Taala, iya nya eklisia Allah Taala ti idup, ti nyadika tiang ti besai enggau sukung ke pemendar. Misteri agama kitai endang amat besai: Iya pegari ngena tubuh mensia. Roh Kudus madahka Iya endang amat, dipeda bala melikat, ditusui ngagai semua bansa, dikarapka mensia di serata dunya, dibai niki ke serega. Roh Kudus terang amat madahka, jemah ila sekeda orang deka ngelengkaka pengarap laban sida mendingka roh ti nipu, enggau ajar antu, ti dikerembaika ulih orang ke pura-pura ngapa sereta bula, ke bempu ati ti asai ke disar ngena besi ti angat. Sida nagang orang belaki bebini, nagang orang makai sekeda pemakai ti digaga Allah Taala ngambika bisi diterima enggau sampi terima kasih ulih orang ke arap sereta nemu pemendar. Laban semua utai ti digaga Allah Taala endang manah magang, lalu nadai siti ari utai nya tau ditulak, enti iya diterima ngena sampi terima kasih, laban iya dikuduska ulih jaku Allah Taala sereta enggau sampi. Enti nuan meri ajar tu ngagai bala menyadi kitai, nuan nyadi ulun ti badas ke Jesus Kristus, ulun ke beridup ba jaku pengarap, enggau ba ajar ti badas ti udah dititihka nuan. Seliahka semua cherita kelulu, laban utai nya ukai ari Allah Taala. Patihka diri idup nangika Allah Taala, laban taja pen matihka tubuh beguna, tang matihka diri nangika Allah Taala lebih agi beguna dalam semua pekara, laban ati ti nangi baka nya ngundan semaya ke pengidup ti diatu, enggau pengidup ti deka datai. Jaku tu amat, lalu patut diterima magang. Laban nya meh tuju kitai bebendar bekereja, laban kitai manggaika pengadang kitai ba Allah Taala ti idup, ke nyadi Juruselamat ke semua mensia, kelebih agi ke orang ti arap. Beri ajar tu ngagai sida, lalu asuh sida nitihka iya. Anang nejuka orang ngemaruhka nuan ketegal nuan agi biak, tang awakka nuan empu, ari jaku, ulah, pengerindu, pengarap enggau pengidup nuan ti tuchi, nyadi teladan ke orang ti arap. Sekumbang nuan ke nganti penatai aku, bacha Bup Kudus di mua orang mayuh, tusui Berita Manah, lalu ajar sida. Anang enda ngena pemeri Roh Kudus ti dikemisi nuan, ti udah diberi ngagai nuan lebuh jaku ti benabi disebut bala tuai lebuh sida ngengkahka jari sida atas nuan. Kena semua pemeri nya enggau pengabis ati nuan, ngambika semua orang ulih meda pemansang nuan. Jaga diri empu, lalu jaga mega ajar ti diberi nuan ngagai orang. Majak ngereja nya, laban enti nuan ngereja nya, nuan deka nyelamatka diri empu enggau orang ke mendingka nuan. Anang bejaku kasar enggau orang ke tuai agi umur ari nuan, tang bejaku enggau iya baka ke bejaku enggau apai nuan empu, lalu enggau orang ke biak agi ari nuan, baka ke bejaku enggau menyadi, enggau indu ke tuai agi, baka ke bejaku enggau indai nuan empu, enggau indu ke biak agi, baka ke bejaku enggau menyadi indu nuan, ngena ati ti tuchi. Bebasaka indu ke balu ke endang amat suntuk. Enti indu ke balu nya bisi anak tauka uchu, sida patut dulu belajar ngereja tanggungjawap agama ngagai ruang bilik sida empu kena malas pemanah apai indai sida, laban nya ngerinduka ati Allah Taala. Indu ke balu, ke diau kediri, udah manggaika pengadang iya ba Allah Taala, lalu majak besampi sereta mantaika peminta iya ngagai Allah Taala siang malam. Tang indu ke balu, ke rindu nurutka pengingin tubuh diri, endang udah mati, taja pen iya agi idup. Beri mega atur tu, ngambika sida nadai jalai orang mantah. Lalu barang sapa enda ngintu kaban belayan diri empu, kelebih agi sida sebilik, udah nulak pengarap, lalu jai agi ari orang ke enda arap. Awakka nama indu ke balu disimpan dalam list nama indu ke balu, enti umur iya lebih ari enam puluh taun, lalu iya semina sekali aja udah belaki. Lalu iya pen endang selalu ditemu ngereja pengawa ti manah baka ngiring bala anak iya empu enggau menyana, ngelaluka temuai ngagai rumah iya, masu kaki nembiak Tuhan, nulung orang ke kena perinsa, lalu angkun ngereja pengawa ti manah dalam semua utai. Tang anang nyimpan nama indu ke balu ke agi biak umur dalam list nama indu ke balu, laban lebuh pengingin sida nyeraraka sida ari Kristus, sida deka belaki, lalu kena ukum laban sida udah bulaka semaya sida ti keterubah enggau Kristus. Kelimpah ari nya, sida masau jam mawa ari rumah sebuah ngagai rumah sebuah, lalu ukai semina enda gawa, tang sida mega bejakuka orang, ngachau pengawa orang, besebutka utai ti enda patut disebut sida. Nya alai, aku dekaka indu ke balu, ke agi biak umur, belaki baru, beranak, ngintu rumah tangga diri empu, lalu enda meri peluang ngagai munsuh ngeleseka kitai. Laban sekeda udah limpang lalu nitihka Sitan. Enti indu ke Kristian bisi kaban belayan ke balu, awakka iya nulung sida, ngambika sida enda nating eklisia, ngambika eklisia ulih nulung indu ke balu ke amat nadai orang nulung. Bala tuai ke ngereja pengawa sida enggau menyana patut diberi dua kali lipat gaji, kelebih agi sida ke bebendar nusui Berita Manah enggau ngajar; laban Bup Kudus nyebut, “Anang mampul mulut sapi lebuh iya ngindik gandum.” Bup Kudus mega nyebut, “Orang ke gawa patut diberi gaji.” Anang mendingka jaku dawa ngelaban tuai eklisia, enti jaku dawa nya enda disukung dua tauka tiga iku saksi. Nyadi pasal orang ke majak bedosa, rara sida di mua semua orang mayuh, ngambika orang bukai nemu takut. Di mua Allah Taala, enggau di mua Jesus Kristus, enggau di mua bala melikat ti kudus, aku ngasuh nuan nitihka atur tu enggau enda belampung ati sereta enda bepilih mata ngereja utai. Anang kelalu beguai ngengkahka jari atas orang. Lalu anang enggau orang ngereja dosa. Intu diri empu tuchi. Anang semina ngirup ai amat aja, tang irup wain mimit kena nulung perut nuan, laban nuan selalu sakit. Dosa sekeda orang amat nyata sebedau sida kena ukum, tang dosa orang bukai semina nyata ila. Pengawa ti manah deka mega nyata dipeda. Indah lebuh sida enda nyata, deh sida enda ulih dipelalaika belama. Semua ulun enda tau enda bebasaka tuan sida, ngambika nama Allah Taala enggau ajar kitai enda dikeleseka orang. Orang ke nyadi ulun orang Kristian, enda tau enda bebasaka tuan sida, laban tuan sida mega orang Kristian baka sida empu. Utai ti patut dikereja sida nya, sida patut bebendar agi bekereja ke tuan sida, laban orang ke bulih penguntung ari pengawa ti dikereja sida nya orang ke arap, ke dikerinduka sida. Ajar sereta peransang orang ngereja tanggungjawap nya. Barang sapa mai ajar ti lain agi ari nya, ti enda besetuju enggau jaku ti bendar ari Jesus Kristus Tuhan kitai, lalu enda nitihka ajar pasal idup nangika Allah Taala, orang nya semina ngerigangka diri lalu nadai nemu utai. Iya seruran ingin deka bekelikuh, deka betalatka leka jaku ti semina nyungkak orang kepapas, beserekang penemu, bejai pangan diri, besangkaka pangan diri, belaya enggau pangan diri, jai runding, sereta nadai nemu pemendar, ngarapka diri tau bulih pengaya ari pengawa agama. Agama amat tau ngasuh kitai balat kaya, enti kitai nemu puas ati ke utai ti dikemisi kitai, laban kitai nadai mai utai ngagai dunya tu, lalu kitai pen enda mega ulih mai utai ari dunya tu; tang enti kitai bisi pemakai enggau gari, kitai patut nemu puas ati ke nya. Tang orang ke keran deka nyadi kaya, deka kena laban penguji, lalu dipanjuk mayuh macham pengingin ti beli, ti ngemedis, ti ngerusak. Laban pengangkun ke duit nya pun semua macham penyai. Pengangkun ti baka nya ti mai sekeda orang limpang ari pengarap, lalu ngachuk sida ngena mayuh macham pemedis. Tang nuan, nembiak Allah Taala, enda tau enda nyeliahka semua utai nya. Ulihka pengelurus, ati ti nangika Allah Taala, pengarap, pengerindu, ati ti tan, enggau penelap. Gawa bebendar ke pengarap. Ulihka pengidup ti meruan belama iya laban nuan udah dikangauka ngagai pengidup nya lebuh nuan ngaku diri arap di mua bala saksi. Di mua Allah Taala, ke meri pengidup ngagai semua utai, enggau di mua Jesus Kristus, ke ngaku Diri di mua Pontius Pilate, aku ngasuh nuan ngasika pesan enggau nadai penimpang, enggau nadai jalai mantah nyentuk ngagai Hari Jesus Kristus Tuhan kitai dipandangka, ti deka dikereja Allah Taala ba maya ti patut–Allah Taala ti beberekat, Raja ti siku aja, ke ari atas semua raja, enggau Tuhan ari atas semua tuhan. Semina Iya siku aja ke enda nemu mati, ke diau dalam penampak ti enda ulih digagai mensia, ke nadai kala dipeda, tauka ulih dipeda mensia. Beri meh basa enggau kuasa ti meruan belama-lama ngagai Iya! Amin. Nyadi pasal orang ke kaya di dunya tu, padahka ngagai sida, sida enda tau sumbung, tauka manggaika pengadang sida ba pengaya ti tau lenyau, tang ba Allah Taala ke meri kitai semua utai kena kitai ngelantangka diri. Sida enda tau enda ngereja pemadas, kaya dalam pengawa ti badas, ngembuan ati ti gerah mudah, sereta sedia deka bekunsika utai enggau orang bukai. Nya meh jalai sida besimpanka pengaya ke diri empu nyadika pugu ti badas ke jemah ila, ngambika sida tau bulih pengidup, iya nya pengidup ti bendar. Timoti, jaga utai ti udah diserahka ngagai nuan. Seliahka jaku ti kamah, enggau kelikuh pasal utai ti dikumbai sekeda orang “Penemu,” laban sekeda orang udah madahka diri bisi “penemu”, lalu nya ngujungka sida limpang ari pengarap. Awakka berekat Allah Taala meruan enggau kita. Surat ari Paul, rasul Jesus Kristus ulih peneka Allah Taala, ketegal semaya pasal pengidup dalam Jesus Kristus, Ngagai Timoti, anak ke dikesayauka aku: Awakka Allah Taala ti Apai enggau Jesus Kristus Tuhan kitai meri nuan berekat, pengasih enggau pemaik. Aku meri terima kasih ngagai Allah Taala ke disembah aku enggau ati ti beresi, baka ti dikereja aki ini aku kelia, lebuh aku seruran ngingatka nuan dalam sampi aku. Lebuh aku ingatka ai mata nuan, aku lelengau amat deka betemu enggau nuan ngambika ati aku gaga. Aku ingatka pemesai pengarap nuan, pengarap ti idup dalam ini nuan Lois enggau indai nuan Eunis, lalu diatu idup dalam nuan empu. Nya meh kebuah aku ngasuh nuan seruran ingat ngidupka pemeri Allah Taala ti bisi dalam nuan, lebuh aku ngengkahka jari aku ba nuan; laban Allah Taala ukai meri kitai roh penakut, tang roh kuasa, roh pengerindu enggau roh disiplin diri empu. Nya alai, anang malu besaksika Tuhan kitai, lalu anang malu ke aku ke ditan dalam rumah jil ketegal Iya, tang awakka nuan sama enggau aku, natka pemerinsa ketegal Berita Manah ngena kuasa Allah Taala, ke udah nyelamatka kitai, lalu udah ngangauka kitai nyadi nembiak Iya, ukai ketegal utai ti dikereja kitai, tang ketegal juluk ati enggau pengasih Iya. Pengasih nya udah diberi ngagai kitai dalam Jesus Kristus kenyau ari sebedau penumbuh dunya, tang diatu pengasih nya udah dipandangka ngagai kitai ulih penatai Juruselamat kitai, Jesus Kristus, ke udah ngerusak pemati, lalu udah mandangka pengidup ti meruan belama iya ulih Berita Manah. Ketegal Berita Manah tu meh aku udah dipilih nyadi rasul enggau nyadi pengajar, ti ngujungka aku merinsa baka tu. Tang aku enda malu, laban aku nemu sapa ke dikarapka aku, lalu aku nemu, Iya ulih nyaga, nyentuk ngagai Hari nya, semua utai ti udah diserahka aku ngagai Iya. Titihka semua ajar ti udah didinga nuan ari aku, ngena pengarap enggau pengerindu Jesus Kristus. Ngena saup Roh Kudus ke diau dalam kitai, jaga pesaka ti badas ti udah diserahka ngagai nuan. Nuan nemu, semua orang di menua Asia, nyengkaum Pigelus enggau Hemoginis, udah ninggalka aku. Awakka Tuhan ngayanka pengasih ngagai sida Onisiporus sebilik, laban iya suah udah ngelantangka ati aku sereta enda malu ke aku ke ditan dalam rumah jil. Lebuh iya datai di Rome suba, iya bebendar ngiga aku, datai ke iya nyau tetemuka aku. Awakka Tuhan meri iya pengasih lebuh Hari nya ila! Nuan nemu iya udah bebendar amat nulung aku di Epesus. Nya alai, anak, anang enda ngeringka diri dalam pengasih Jesus Kristus, lalu jaku ti udah didinga nuan ari aku di mua orang mayuh, serahka jaku nya ngagai orang ke tetap ati, ke ulih ngajar orang bukai. Awakka nuan sama enggau kami taluk natka pemerinsa nyadi soldadu Jesus Kristus. Nadai orang ke nyadi soldadu malut diri enggau pengawa orang periman, laban tuju ati iya endang keran deka ngelantangka ati komandant iya. Baka nya mega, orang ke belumba enda bulih prais enti iya enda nitihka atur lumba. Orang bumai ke bebendar gawa, sigi patut diberi ungkup ari utai ti terubah diketau. Belematika utai ti disebut aku, laban Tuhan deka ngasuh nuan meretika semua utai nya. Kingatka Jesus Kristus, ke udah diangkatka ari mati, ke datai ari peturun David, munyi ti udah dipadahka aku dalam Berita Manah. Ketegal Berita Manah nya meh aku kena perinsa, datai ke aku ditanchang ngena rantai baka orang ke udah ngereja penyalah. Tang jaku Allah Taala enda ditanchang. Nya alai aku natka semua utai ke penguntung orang ke udah dipilih Allah Taala, ngambika sida mega tau bulih pengelepas enggau mulia ti meruan belama iya dalam Jesus Kristus. Tu jaku ti bendar: “Enti kitai udah mati enggau Iya, kitai deka mega idup enggau Iya. Enti kitai tan, kitai deka mega merintah enggau Iya. Enti kitai besangkalka Iya, Iya deka mega besangkalka kitai. Enti kitai enda tetap ati, Iya meruan tetap ati laban Iya enda ulih besangkalka Diri Empu.” Asuh sida ngingatka tu, lalu beri sida jaku tangkan di mua Allah Taala ngambika sida enda betalatka leka jaku, laban utai nya nadai pulai ke penguntung, tang semina ngerusak orang ke mending. Enggau naka ulih serahka diri empu ngagai Allah Taala, laban Iya udah ngemendarka nuan, ke enda malu ke pengawa diri, ngajar pesan ti bendar ngena jalai ti betul. Seliahka semua jaku ti nadai guna ti ngeleseka Allah Taala, laban jaku nya semina ngasuh orang ngejangka diri jauh agi ari Allah Taala. Jaku ajar sida nya baka rumbak ti enda nemu gerai. Orang ke bejaku baka nya nyengkaum Himineus seduai Pilitus, ti udah limpang ari pemendar, laban seduai iya ngumbai pengangkat ari mati udah nyadi. Seduai iya ngachau pengarap sekeda orang. Tang pugu ti didudukka Allah Taala endang meruan tegap. Pugu nya ngundan tulis ti munyi tu: “Tuhan nemu sapa ke enggi Iya” enggau leka jaku, “Awakka semua orang ke ngangauka nama Tuhan, ngelengkaka penyai.” Dalam sebuah rumah ti besai bisi mayuh macham mangkuk ti digaga ari pirak enggau emas, tang sekeda mega digaga ari kayu enggau ari tanah liat. Sekeda dikena lebuh maya rami, lalu sekeda dikena sebarang maya. Enti orang nuchi diri empu ari semua penyai, iya nyadi pekekas ti dikena ngereja pengawa ti menyana, digaga kudus, ti tau diguna Tuan iya sereta disediaka ngereja pengawa ti badas. Seliahka semua pengingin nembiak, lalu bebendar ngulihka pengelurus, pengarap, pengerindu, enggau pemaik, sama enggau orang ke ngangauka nama Tuhan ngena ati ti tuchi. Seliahka semua kelikuh ti beli ti nadai reti. Nuan nemu, utai nya semina ngasuh belaya ngapa. Lalu ulun Tuhan enda tau belaya, tang patut nelap enggau semua orang, landik ngajar, liat ati, lalu enggau penyiru ngerara orang ke ngelaban, ngarapka Allah Taala deka ngasuh sida nesal ati ke dosa sida lalu nemu pemendar, lalu ulih ngelepaska diri ari panjuk Sitan ti udah nangkap lalu ngasuh sida ngereja utai ti dikedekaka iya. Tang nuan enda tau enda nemu tu: ba hari ti penudi mayuh macham penusah deka nyadi. Laban orang deka semina berundingka diri empu aja, angkunka duit, temegah, sumbung, bejai orang, enda ngasika apai indai, enda nemu meri terima kasih, enda kudus, kasar enggau orang, nadai nemu siruka orang, bejakuka orang, enda nemu nagang diri, mangah, begedika utai ti badas, aum-juak, enda berunding ngereja utai, ngerigangka diri laban sumbung, semina deka ngelantangka diri lalu enda rinduka Allah Taala, baka ke bepegai ba agama, tang sida besangkalka kuasa agama nya. Anang begulai enggau sida! Laban sekeda bala sida tama ngagai rumah orang, lalu bekuasa atas indu ke beli, ke alah ditating dosa sereta alah laban semua macham pengingin, ke seruran diajar tang nadai tetemuka penemu pasal pemendar. Baka Jannes seduai Jambres ke ngelaban Moses, baka nya meh orang tu nyakal pemendar. Runding sida jai, lalu pengarap sida pelesu. Tang sida enda ulih majakka pengawa nya laban, baka ti nyadi ba Jannes seduai Jambres, semua orang deka meda pemeli sida. Tang nuan udah nemu ajar aku, ulah aku, tuju pengidup aku, pengarap aku, pengeliat ati aku, pengerindu aku, penegap aku, pemerinsa aku, penusah aku, utai ti nyadi ba aku di Antiok, di Ikonium, enggau di Listra, pasal pemalat pemerinsa ti ditatka aku! Tang Tuhan udah ngelepaska aku ari semua utai nya. Iya ti bendar, semua orang ke keran deka diau kudus dalam Jesus Kristus, deka kena perinsaka magang. Tang orang ke jai, enggau orang ke pura-pura ngapa, deka majak jai se-jai, nipu orang, lalu sida empu deka kena tipu. Tang nuan enda tau enda majak bepegai ba utai ti udah dipelajar sereta dikarapka nuan laban nuan nemu sapa ke udah ngajar nuan utai nya, lalu nuan, kenyau ari nuan agi mit, endang udah nemu Bup Kudus ulih ngajar nuan ngulihka pengelepas ulih pengarap ke Jesus Kristus. Semua Bup Kudus endang bepun ari Allah Taala magang, lalu beguna kena ngajar, kena ngerara, kena ngaduka utai ti salah, enggau kena matihka orang diau lurus, ngambika semua nembiak Allah Taala chukup disikap ngereja genap macham pengawa ti badas. Di mua Allah Taala enggau di mua Jesus Kristus ke deka ngakim orang ke idup enggau orang ke mati, enggau ketegal Iya deka datai baru, enggau ketegal Perintah Iya, aku ngasuh nuan nusui Jaku nya, lalu majak nusui Jaku nya, nemuka maya nya ngena tauka enda; nguingka ati orang, ngerara, enggau meransang orang, ngena pengabis pengeliat ati nuan lebuh nuan ngajar. Laban maya deka datai alai orang enggai mendingka ajar ti ngena, tang ingin deka ngempuruka bala pengajar ke deka nyebut utai ti dikerinduka sida, lalu sida deka limpang ari ajar ti bendar lalu mendingka cherita kelulu. Tang nuan enda tau enda seruran tegap dalam semua utai, tan natka pemerinsa, bekereja nyadi penginjil, lalu ngereja semua pengawa nuan. Ba pasal aku empu, aku udah dituang baka genselan, lalu aku nyau deka ninggalka dunya tu. Aku udah bebendar belaban. Aku udah datai ba adan, lalu aku agi mengkang bepegai ba pengarap. Berengkah ari diatu, makota pengelurus udah ditaruh ke aku, ti deka diberi Tuhan, Hakim ti Lurus, ngagai aku lebuh Hari nya ila, lalu ukai semina ngagai aku aja, tang mega ngagai semua orang ke lelengau deka meda Iya pegari. Datai kitu ngagai aku enggau naka pengelengkas, laban Demas, ke angkunka dunya, udah ninggalka aku lalu mupuk ngagai Tesalonika; Kresen udah mupuk ngagai Galatia, lalu Titus ngagai Dalmatia. Semina Luke aja bisi enggau aku. Ambi Mark lalu bai iya enggau nuan, laban iya beguna dalam pengawa aku. Aku udah ngasuh Tikikus mupuk ngagai Epesus. Lebuh nuan mansang kitu, bai kelambi ti ditinggalka aku ba Karpus di Troas. Bai mega semua bup, kelebih agi bup ti digaga ari kulit jelu. Tukang temaga ke benama Aleksander, balat amat ngenusahka aku. Tuhan deka malas iya ketegal utai ti dikereja iya. Bejaga ari iya, laban iya balat amat nyakal pesan kitai. Lebuh aku terubah kena pechara suba, nadai siku orang nyukung aku. Semua orang bela ninggalka aku. Awakka Allah Taala enda besalahka sida ketegal nya! Tang Tuhan mengkang bediri ngimbai aku, lalu meri aku pengering kena aku madahka semua pesan, ngambika semua orang bansa bukai ninga pesan nya. Lalu aku pen dilepaska ari nyawa singa. Tuhan deka ngelepaska aku ari semua penyai, lalu nyelamatka aku, ngambika aku pulai ngagai Perintah Iya di serega. Awakka Iya bempu mulia belama-lama iya! Amin. Aku ngirumka tabi basa ngagai Prisila seduai Akuila, enggau ngagai sida Onisiporus sebilik. Erastus mengkang diau di Korint; aku ninggalka Tropimus di Miletus, laban iya sakit. Datai kitu enggau naka ulih sebedau musin chelap. Eubulus ngirumka tabi basa ngagai nuan, lalu baka nya mega Puden, Linus, enggau Klaudia enggau semua orang Kristian ti bukai. Awakka Tuhan meruan enggau nuan. Awakka berekat Allah Taala meruan enggau semua kita. Surat ari Paul, ulun Allah Taala sereta nyadi rasul Jesus Kristus, ketegal pengarap orang ke udah dipilih Allah Taala enggau ketegal penemu pasal pemendar ti mai ngagai pengidup ti nangika Allah Taala, pengarap enggau penemu ti beduduk ba pengadang ke pengidup ti meruan belama iya, ti udah disemaya Allah Taala (Allah Taala enda kala bula) kenyau ari sebedau penumbuh dunya, lalu ba maya ti patut, Iya udah mandangka semaya nya ngena pesan Iya. Pesan nya udah diserahka ngagai aku, lalu aku nusui pesan nya nitihka asuh Allah Taala ti Juruselamat kitai. Ngagai Titus, anak aku ti bendar dalam pengarap kitai: Awakka Allah Taala ti Apai, enggau Jesus Kristus ti Juruselamat kitai meri nuan berekat enggau pemaik. Kebuah aku ninggalka nuan di Krit, nya ngambika nuan ulih mutarka semua pekara ti apin diputarka, lalu ngeletak orang nyadika tuai eklisia ba genap bengkah nengeri nitihka atur ti diberi aku ngagai nuan. Tuai eklisia enda tau enda orang ke nadai penyalah, ke bisi siku aja bini, lalu anak iya endang orang ke arap, ke nadai kala didinga enda manah ulah, tauka enda ngasi. Laban bishop, ke ngemataka pengawa Allah Taala, enda tau enda orang ke nadai jalai mantah, enda sumbung, tauka jampat ringat, tauka pemabuk, tauka mangah, tauka amuka duit. Tang iya enda tau enda rindu nyambut temuai, rinduka utai ti badas, ulih nagang diri, lurus, kudus sereta nemu disiplin diri empu. Iya enda tau enda bepegai teguh ba pesan ti tau dikarapka, ti udah diajar, ngambika iya ulih meransang orang ngena ajar ti betul, lalu nyakal orang ke ngelaban ajar nya. Laban mayuh orang deka ngelaban, orang ke semina bejaku ngapa, ke nipu, kelebih agi orang Judah. Padamka jaku sida nya, laban sida ngachau ruang bilik orang ngena ajar ti enda patut diberi, ketegal sida ngulihka duit. Siku ari bala sida, ke endang nabi sida empu, udah nyebut, “Orang Krit endang seruran bula, mangah baka jelu, ngelusu, bam.” Nya endang amat. Nya alai rara sida enggau terit, ngambika sida kering dalam pengarap, lalu enda mendingka cherita kelulu orang Judah, tauka mendingka pesan ti diberi orang ke nulak pemendar. Ba orang ke tuchi, semua utai tuchi magang, tang ba orang ke jai sereta enda arap, nadai siti utai ti tuchi. Runding enggau ati sida endang jai. Sida ngumbai diri nemu Allah Taala, tang utai ti dikereja sida besangkalka nya. Sida dipegedika, enda ngasi, enda tau dikarapka ngereja pengawa ti badas. Tang nuan empu enda tau enda meri ajar ti bendar. Asuh sida ke lelaki, ke tuai agi umur, nagang diri, enda empelita diau, bejimat berunding, tegap dalam pengarap, dalam pengerindu, sereta ngembuan ati ti tan. Baka nya mega, asuh sida indu ke tuai agi umur diau tuchi, enda bejakuka orang, enda pengirup. Asuh sida ngajar utai ti badas, ngambika sida ulih matihka indu ke agi biak rinduka laki enggau anak sida, nagang diri, diau tuchi, ngintu ruang bilik sida enggau menyana, nelap, sereta nunduk ngagai laki sida, ngambika jaku Allah Taala nadai jalai mantah. Baka nya mega, peransang lelaki ke agi biak belajar nagang diri. Ayanka diri empu nyadika teladan ti badas dalam semua utai ti dikereja nuan, lalu dalam semua ajar nuan, ayanka diri amat lurus ati, enda empelita ulah, bejaku menyana lalu nadai jalai mantah, ngambika orang ke ngelaban nuan nemu malu laban sida nadai jalai bejaika kitai. Asuh ulun nunduk ngagai tuan sida lalu ngemuaska ati tuan sida dalam semua utai. Sida enda tau besaut enggau tuan sida, tauka ngenchuri utai ari sida, tang ngayanka diri endang seruran manah sereta tetap ati, ngambika dalam semua utai sida mai puji ngagai ajar ti diberi Allah Taala ti Juruselamat kitai. Laban pengasih Allah Taala udah pegari, mai pengelepas ngagai semua mensia, ngajar kitai muai semua ulah ti jai, enggau semua pengingin dunya, lalu nemu nagang diri, diau lurus, sereta nangika Allah Taala dalam dunya tu, sekumbang kitai ke nganti pengadang ti beberekat, enggau mulia Allah Taala, enggau Jesus Kristus ti Juruselamat kitai, pegari ke udah nyerahka Diri ketegal kitai, ngambika Iya ulih nebus kitai ari semua penyai, lalu nuchi kitai ngambika kitai diempu Iya siku aja, lalu gagit ati ngereja pengawa ti badas. Padahka utai tu ngagai orang. Peransang lalu rara orang ngena semua kuasa. Anang nejuka orang ngemaruhka nuan. Asuh bala nembiak nuan nunduk ngagai orang ke megai perintah enggau ngagai orang ke megai kuasa, ngasika sida, lalu sedia deka ngereja pengawa ti badas, enda bejaku jai pasal orang, enda belaya, siru enggau orang, sereta bebasaka semua orang. Laban dulu menya kitai empu udah beli, enda ngasi, tesat, nyadi ulun semua macham pengingin enggau nyadi ulun ati ti selalu deka ngelantangka diri, jai ati ngagai orang, kepapaska orang, dipegedika orang lalu begedika pangan diri. Tang lebuh pemadas, penelap enggau pengerindu Allah Taala ti nyadi Juruselamat kitai pegari, Iya nyelamatka kitai, ukai laban kitai udah ngereja pengawa ti lurus, tang ulih pengasih Iya. Iya nyelamatka kitai ulih Roh Kudus, ke masu kitai, lalu ngadaka kitai baru, lalu meri kitai pengidup ti baru. Roh Kudus nya dituang Allah Taala ngagai kitai belimpah-limpah, ulih Jesus Kristus ti Juruselamat kitai, ngambika kitai digaga lurus ulih pengasih Allah Taala, lalu bempu pengidup ti meruan belama iya ti disadang kitai. Tu jaku ti bendar. Aku dekaka nuan bebendar ngemeranka semua pekara nya, ngambika orang ke udah arapka Allah Taala nemu ngereja pengawa ti badas. Semua utai nya badas magang sereta beguna ke semua orang. Tang seliahka kelikuh ti beli, tauka tusut pasal penatai aki ini, tauka penyerekang, enggau laya pasal Adat, laban utai nya nadai pulai ke penguntung, sereta nadai guna. Beri jaku tangkan enda kurang ari dua kali ngagai orang ke mai penyerekang ngagai gerija udah nya anang agi bekaul enggau iya, laban nuan nemu, orang ke baka nya endang jai sereta bedosa. Iya ngukum diri empu. Lebuh aku ngasuh Artemas, tauka Tikikus, nemuai ngagai nuan, aku minta nuan enggau naka ulih nemuai ngagai aku di Nikopolis, laban aku udah mutuska runding deka ngenduh dia lebuh musin chelap. Enggau naka ulih, tulung lawyer Senas enggau Apollos nyendiaka diri mupuk. Anang nejukka seduai iya suntuk sebarang utai. Lalu awakka bala kitai belajar ngereja pengawa ti badas, ngambika sida ulih nulung orang ke suntuk, lalu enda masau jam ngapa. Semua orang ke enggau aku bela ngirumka tabi basa ngagai nuan. Beri tabi basa kami ngagai pangan ke sama pengarap enggau kitai. Awakka berekat Allah Taala meruan enggau kita semua. Surat ari Paul, ke nyadi orang jil Jesus Kristus, enggau ari menyadi kitai Timoti, Ngagai pangan kami Pilimon ke sama bekereja enggau kami, enggau ngagai menyadi indu kami Apia, enggau ngagai Arkipus ke sama nyadi soldadu enggau kami, enggau ngagai raban eklisia ke begempuru dalam rumah nuan. Awakka Allah Taala ti Apai kitai enggau Tuhan Jesus Kristus meri kita berekat enggau pemaik. Lebuh aku ngingatka nuan dalam sampi aku, aku selalu meri terima kasih ngagai Allah Taala aku, laban aku ninga pasal pengerindu nuan ke semua nembiak Tuhan, enggau pasal pengarap nuan ke Tuhan Jesus. Aku besampi ngambika nuan cheregas bekunsika pengarap, ngambika nuan meretika semua utai ti badas ti dikembuan kitai dalam Kristus. Pengerindu nuan udah ngasuh ati aku balat gaga, lalu aku berasai diperansang, laban nuan, menyadi, udah ngelantangka ati bala nembiak Tuhan. Nya alai, taja pen dalam Kristus aku berani sereta tau ngasuh nuan ngereja utai ti patut dikereja nuan, tang aku semina minta aja, ketegal pengerindu. Nya alai, aku, Paul -- orang tuai lalu diatu nyadi orang jil Kristus, aku minta utai ari nuan ngarika anak aku, Onisimus, laban aku udah nyadi apai iya sekumbang aku ke dalam rumah jil tu. Dulu suba iya nadai guna ba nuan, tang diatu iya besai amat guna ba nuan enggau ba aku. Aku diatu ngirumka iya pulai baru ngagai nuan, taja pen aku balat sayauka iya. Aku bisi amat ati deka ngetanka iya ditu, ngambika iya nyadika pengari nuan nulung aku, lebuh aku ditan dalam rumah jil tu ketegal Berita Manah. Tang aku enggai ngereja utai enti nuan enda dulu ngemendarka nya, ngambika sebarang utai ti dikereja nuan, semina dikereja nuan nitihka ati nuan empu, ukai ari pejal. Nyangka nya kebuah iya beserara enda lama ari nuan, ngambika nuan tau bempu iya baru belama iya, ukai nyadi ulun, tang lebih agi ari nya, nyadi menyadi ke dikesayau - ke dikesayauka aku tang kelebih agi, dikesayauka nuan, dalam batang tubuh enggau dalam Tuhan. Nya alai, enti nuan ngira aku tu tawing nuan ngereja pengawa, sambut meh iya, baka nuan ke nyambut aku. Enti iya bisi udah ngereja utai ti salah ngagai nuan, tauka berutang ba nuan, simpan utang nya dalam akaun aku. Aku, Paul, nulis tu ngena jari aku empu: Aku, Paul, deka mayar utang nya -- enda ngira nuan empu ke berutang nyawa ba aku. Sigi amat, menyadi, aku minta utai siti tu ari nuan dalam Tuhan: Asuh ati aku lantang dalam Kristus. Aku enda ngarapka nuan deka ngereja utai ti dipinta aku, nya kebuah aku nulis ngagai nuan, laban aku nemu nuan deka ngereja lebih agi ari ti dipinta aku. Siti agi utai--sediaka siti bilik ke aku, laban aku ngarapka diri ulih nemuai baru ngagai kita, ari sampi semua kita. Epapras, ke sama ditan dalam rumah jil enggau aku ketegal Jesus Kristus, ngirumka tabi basa ngagai nuan, lalu baka nya mega Mark, Aristarkus, Demas enggau Luke ke sama bekereja enggau aku. Awakka pengasih Tuhan Jesus Kristus meruan enggau nuan. Dulu kelia Allah Taala suah bendar bejaku ngagai aki ini kitai, ngena mayuh macham chara, beseruanka sida nabi, tang ba hari ti penudi tu, Iya udah bejaku ngagai kitai ngena Anak Iya Empu, ke diletak Iya bempu semua utai. Lalu ulih Anak Iya, Iya udah mega ngaga dunya. Anak Iya nya mandangka penampak mulia Allah Taala. Lalu gamal Iya mega betul-betul sebaka enggau gamal Allah Taala, lalu Iya ngempung semua utai di dunya enggau di dunya luar ngena jaku Iya ti bekuasa. Lebuh Iya udah ngaga chara kena muai dosa, Iya duduk muak ari kanan Allah Taala ti Pemadu Tinggi di serega. Nya alai Iya jauh lebih agi tinggi ari sida melikat, baka nama Iya ti jauh lebih agi manah ari nama sida melikat. Laban Allah Taala nadai kala nyebut ngagai melikat, “Nuan tu Anak Aku, sehari tu Aku udah nyadi Apai nuan.” Tauka, “Aku deka nyadi Apai iya, lalu iya deka nyadi Anak Aku.” Lalu lebuh Allah Taala ngasuh Anak Tuai Iya datai ngagai dunya, Iya bejaku munyi tu, “Awakka semua melikat Allah Taala nyembah Iya.” Tang ba pasal melikat, Allah Taala bejaku munyi tu, “Allah Taala ngaga melikat Iya nyadi ribut, lalu bala nembiak Iya nyadi daun api.” Tang ba pasal Anak Iya, Iya bejaku munyi tu, “Tang kerusi diraja Nuan, O Allah Taala, deka meruan belama-lama iya! lalu Nuan deka merintah ngena pengelurus. Nuan rinduka pengelurus, lalu begedika penyai. Nya alai Allah Taala, iya nya Allah Taala Nuan, udah nata Nuan ngena minyak pengaga lebih ari sida pangan Nuan.” Allah Taala mega bejaku munyi tu: “Ba pun iya kelia, Tuhan, Nuan udah ngaga dunya, lalu langit digaga Nuan ngena jari Nuan. Semua utai nya deka lesap magang, tang Nuan deka meruan belama iya. Semua utai nya deka luya baka kain. Nuan deka ngelipatka sida baka ke ngelipatka kelambi, lalu sida deka berubah baka gari. Tang Nuan enda berubah, lalu umur Nuan enda nemu abis.” Allah Taala nadai kala bejaku munyi tu ngagai melikat, “Duduk muak ari kanan Aku datai ke Aku udah ngaga munsuh Nuan nyadika pelasar kaki Nuan.” Kati semua melikat ukai roh, ke diasuh Allah Taala bekereja ke orang ke deka nerima pengelepas? Nya alai kitai enda tau enda bebendar agi bepegai ba ajar ti udah didinga kitai, ngambika kitai enda limpang. Laban enti pesan ti udah dipadahka melikat nya pesan ti bendar, lalu semua orang ke ngereja penyalah, tauka enda ngasi, udah diukum nitihka pematut, baka ni ku kitai ulih ngerarika diri enti kitai enggai ibuhka pengelepas ti besai baka nya? Pengelepas nya terubah dipadahka Tuhan Empu, lalu udah nya pengamat pesan nya dipadahka ngagai kitai ulih orang ke ninga Iya. Lalu Allah Taala udah mega besaksika pengamat pesan nya ngena tanda enggau kereja ti nyelai, ngena mayuh macham pemeri Roh Kudus ti diberi nitihka peneka Iya Empu. Ukai melikat ke diasuh Allah Taala merintah dunya ti deka datai, ti dikenang kitai diatu. Utai tu bisi udah disebut, “Sapa mensia, alai Nuan deka ibuhka iya? Tauka anak mensia, alai Nuan deka ngibun iya? Nuan udah ngaga iya baruh mimit ari melikat enda lama aja. Nuan udah meri iya makota, mulia enggau basa, lalu ngengkahka semua utai di baruh kaki iya.” Lebuh Allah Taala ngengkahka semua utai di baruh kuasa iya, Allah Taala nadai ninggalka utai ti enda diengkahka di baruh kuasa iya. Tang diatu, kitai nadai meda semua utai diengkah di baruh kaki iya. Tang kitai meda Jesus, ke udah digaga baruh mimit ari melikat enda lama, diberi makota mulia enggau basa laban Iya udah merinsa natka pemati, ngambika, ulih pengasih Allah Taala, Iya mati ke semua mensia. Laban Allah Taala, ke ngaga sereta bempu semua utai, endang patut ngasuh Jesus nyadi pemadu badas ulih pemerinsa, lebuh Jesus muka jalai pengelepas ke mayuh anak Allah Taala lalu mai sida bempu mulia Iya. Laban Iya ke ngudus, enggau orang ke dikuduska Iya, sama datai ari ruang bilik siti aja. Nya kebuah Jesus enda malu ngumbai sida menyadi Iya. Ku Iya, “Aku deka madahka nama Nuan ngagai sida menyadi Aku. Aku deka muji Nuan lebuh bala sida begempuru.” Iya mega nyebut, “Aku deka manggaika pengarap Aku ba Iya.” Lalu Iya mega nyebut, “Tu Aku, enggau bala anak ke udah diberi Allah Taala ngagai Aku.” Nya alai, laban bala anak endang mensia, Jesus mega nyadi mensia baka sida, ngambika ulih pemati Iya, Iya ulih ngerusak Sitan ke megai kuasa pemati, lalu ngelepaska semua orang ke nyadi ulun seumur idup ari penakut sida ke pemati. Laban utai tu terang, ukai melikat ke ditulung Iya, tang peturun Abraham. Nya alai Iya enda tau enda digaga sebaka enggau bala menyadi Iya dalam semua utai, ngambika Iya nyadi Imam Besai ti kasih, sereta tetap ati bekereja ke Allah Taala, ngambika Iya ngaga piring kena muai dosa orang mayuh. Laban Iya Empu udah merinsa lebuh Iya diuji, nya alai Iya ulih nulung orang ke kena laban penguji. Nya alai, menyadi ti kudus, ke sama udah dikangauka Allah Taala, peratika Jesus, ke nyadi Rasul sereta nyadi Imam Besai ke pengarap kitai. Iya udah tetap ati ngagai Allah Taala ke udah milih Iya, baka Moses ke udah tetap ati diau dalam rumah Allah Taala. Tang Jesus patut balat agi dibasa ari Moses, baka tukang rumah ke balat agi dibasa ari rumah ti digaga iya. Laban semua rumah endang digaga orang, tang Allah Taala ngaga semua utai. Moses udah tetap ati gawa nyadi ulun dalam rumah Allah Taala, besaksika pasal utai ti deka disebut Allah Taala jemah ila. Tang Kristus tetap ati ngibun rumah Allah Taala laban Iya Anak. Lalu kitai tu rumah Allah Taala, enti kitai bepegai teguh ba ati ti kempang enggau ba pengadang ti dikemegahka kitai. Nya alai, munyi ti disebut Roh Kudus, “Sehari tu, enti kita ninga nyawa Iya, anang ngasuh ati kita kieh, baka aki ini kita ke angkat ngelaban, lebuh maya penguji di menua puang, alai aki ini kita ke nguji Aku, taja pen sida udah meda utai ti dikereja Aku dalam kandang empat puluh taun. Nya alai Aku ringat ngagai bala orang ke ari serak nya, lalu ku Aku nyebut, ‘Ati sida seruran limpang, lalu sida apin nemu jalai Aku.’ Aku ringat lalu besumpah: ‘Sida enda tau tama ngagai endur alai Aku belelak!’ ” Bejimat kita, menyadi, enggai ke kita ngembuan ati ti jai, ati ti enda arap, lalu ninggalka Allah Taala ti idup. Tang peransang pangan diri tiap hari, seagi-agi hari tu dikumbai “Sehari tu,” ngambika nadai siku kita ditipu dosa lalu nyadi kieh. Laban kitai nyadi tawing Kristus enti kitai bepegai teguh ba ati ti kempang datai ke ujung, baka ti dikembuan kitai ba pun iya suba. Munyi ti disebut dalam Bup Kudus: “Sehari tu, enti kita ninga nyawa Iya, anang ngasuh ati kita kieh, baka sida ke angkat ngelaban.” Sapa orang ke ninga nyawa Allah Taala, tang angkat ngelaban Iya? Ukai enda semua sida nya orang ke pansut ari menua Ejip ke diuluka Moses? Lalu ngagai sapa Allah Taala ringat empat puluh taun? Ukai Iya enda ringat ngagai orang ke bedosa, lalu sida mati di menua puang? Lalu ngagai sapa Allah Taala besumpah, madahka sida enda tau tama ngagai endur alai Iya belelak, enti enda ngagai sida ke enda ngasi? Nya alai ari nya kitai meda, sida enda ulih tama ngaga endur alai Allah Taala belelak, laban sida enda arap. Nya alai, seagi-agi semaya ti ngasuh kitai tama ngagai endur alai Allah Taala belelak nya agi meruan, kitai enda tau enda bejimat ngambika nadai siku kitai ditemu enda patut tama ngagai endur nya. Laban Berita Manah ti didinga kitai sebaka enggau Berita Manah ti didinga sida, tang pesan ti didinga sida nadai pulai ke penguntung sida, laban sida enda nerima pesan nya ngena pengarap. Nya alai kitai ke arap, tama ngagai endur alai Allah Taala belelak, munyi ti disebut Allah Taala, “Aku ringat lalu besumpah: ‘Sida enda tau tama ngagai endur alai Aku belelak,’ ” taja pen pengawa Iya udah tembu kenyau ari penumbuh dunya. Laban pasal hari ti ketujuh udah disebut munyi tu: “Lalu ba hari ti ketujuh Allah Taala belelak ari semua pengawa Iya.” Lalu Iya bejaku baru: “Sida enda tau tama ngagai endur alai Aku belelak.” Nya alai sekeda orang deka tama ngagai endur alai belelak nya, lalu orang ke udah diajar pasal Berita Manah enda tama laban sida enda ngasi. Nya alai Allah Taala ngeletak siti agi hari, ti dikumbai Iya “Sehari tu,” ti disebut Iya lama udah bekau nya ngena David, munyi ti udah disebut tadi: “Sehari tu, enti kita ninga nyawa Iya, anang ngasuh ati kita kieh.” Laban enti Josua udah ngasuh sida belelak, Allah Taala tentu enda ibuh bejakuka pasal hari bukai, udah bekau nya. Nya alai bala nembiak Allah Taala agi ulih belelak lebuh hari Sabat; laban orang ke tama ngagai endur alai Allah Taala belelak, mega ngetu ari pengawa sida, baka Allah Taala ke ngetu ari pengawa Iya. Nya alai, aram kitai enggau naka ulih tama ngagai endur alai belelak nya, ngambika nadai siku kitai enda mujur baka sida ketegal enda ngasi. Laban jaku Allah Taala idup sereta bekuasa, tajam agi ari pedang ti bemata dua, ti ngerejang datai ke iya nyeraraka semengat ari roh, nyeraraka buku tulang ari untak tulang; iya ulih ngakim runding enggau niat ati mensia. Nadai utai ulih dipelalaika ari Allah Taala. Semua deka dikebak lalu diayanka magang di mua Iya. Lalu semua kitai enda tau enda madahka pasal diri empu ngagai Iya. Nya alai, laban kitai bisi Imam Besai ti Pemadu Tinggi, ke udah pulai ke serega, iya nya Jesus, ti Anak Allah Taala, aram kitai bepegai teguh ba pengarap kitai. Laban Imam Besai kitai ukai enda nemu sinu ati ke pengelemi kitai. Iya udah diuji ngena semua macham chara baka kitai empu, tang Iya enda bedosa. Nya alai, aram kitai mansang enggau ati ti kempang ngagai kerusi diraja Allah Taala ti kasih, ngambika kitai ulih nerima pengasih lalu nemu berekat, kena nulung kitai lebuh kitai begunaka iya. Genap iku imam besai ke dipilih ari bala mensia, endang diletak bekereja ke Allah Taala ngarika mensia, meri pemeri enggau piring kena muai dosa. Iya nemu nelap enggau orang ke nadai nemu utai, enggau orang ke enda ngasi, laban iya empu endang mayuh pengelemi. Lalu ketegal nya, iya enda tau enda ngenjuk piring ke dosa iya empu, enggau ke dosa orang mayuh. Nadai orang tau ngambu diri nyadi imam besai, tang semina ari kangau Allah Taala, baka Aron. Baka nya mega Kristus. Iya enda ngemesaika Diri lalu ngaga Diri nyadi Imam Besai. Tang Allah Taala nyebut ngagai Iya, “Nuan tu Anak Aku. Sehari tu Aku udah nyadi Apai Nuan”; munyi ti disebut Iya ba endur bukai, “Nuan nyadi Imam belama iya murihka Melkisedek.” Lebuh Jesus idup di dunya tu, Iya besampi sereta mantaika peminta Iya ngena sabak ti inggar, sereta enggau ai mata, ngagai Allah Taala, ke ulih ngelepaska Iya ari pemati. Lalu Allah Taala ninga Iya laban Iya baruh ati sereta nunduk ngagai Allah Taala. Tang taja pen Iya Anak Allah Taala, Iya belajar ngasi ulih pemerinsa ti ditatka Iya; lalu laban Iya digaga nyadi pemadu badas, Iya nyadika pun pengelepas ti meruan belama iya ke semua orang ke ngasika Iya, laban Iya udah diletak Allah Taala nyadi Imam Besai, murihka Melkisedek. Kami mayuh utai ti patut disebut ba pekara tu, tang utai nya mar diterangka ngagai kita, laban kita lubah amat mereti. Laban taja pen kita diatu patut udah nyadi pengajar, tang kita agi begunaka orang ngajar kita, ngulang pesan Allah Taala belabuh ari pun baru. Kita agi begunaka ai tusu, ukai asi kering, laban genap iku orang ke beridup ba ai tusu nya orang ke enda nemu ajar pasal pengelurus, laban iya agi mit. Tang asi kering nya ke orang ke besai tuai, ke udah matihka diri ngelala bida entara utai ti badas enggau utai ti jai. Nya alai, aram kitai ninggalka pun pelajar pasal Kristus, lalu mansang ngagai ajar ke orang ti besai tuai, lalu enda agi ibuh bejakuka pasal nesal ati ari kereja ti ngujung ngagai pemati, ajar pasal pemaptisa, pasal ngengkahka jari atas orang, pasal pengangkat ari mati, enggau pasal ukum ti meruan belama iya. Lalu kitai deka ngereja nya, enti Allah Taala ngemendar. Laban orang ke udah ngelengkaka pengarap enda ulih dibai nesal ati baru, laban sida udah meda penampak Allah Taala, udah ngasaika pemeri ari serega, lalu udah dipenuhka enggau Roh Kudus, udah ngasaika pemadas jaku Allah Taala, lalu udah ngasaika kuasa dunya ti deka datai, lalu udah nya sida ngelengkaka pengarap, laban lebuh sida ngereja nya sida ngeregang Anak Allah Taala baru, lalu ngeleseka Iya di mua orang mayuh. Tanah ti nginsap ai ujan ti selalu labuh ninggang iya, lalu ngasuh utai tumbuh ke guna orang ke nanam utai dia, nerima berekat ari Allah Taala. Tang enti tanah nya mansutka duri enggau emperingat, tanah nya nadai guna, lalu iya deka disumpah. Ke pengujung iya, iya deka ditunu. Tang taja pen kami bejaku munyi tu, menyadi, tang ba pasal kita, kami nemu kita deka bulih utai ti manah agi, utai ti nyempulang pengelepas kita. Laban Allah Taala ukai enda lurus. Iya deka mengkang ingatka pengawa ti udah dikereja kita, enggau pengerindu ti dipandangka kita lebuh kita bekereja nulung nembiak Tuhan, baka ti agi dikereja kita diatu. Kami dekaka genap iku kita mengkang rajin datai ke ujung ngambika kita ulih nerima utai ti disadang kita. Kami enggai ke kita ngelusu, tang dekaka kita nunda teladan orang ke arap sereta liat ati, ngambika kita nerima utai ti udah disemaya Allah Taala. Lebuh Allah Taala ngaga semaya enggau Abraham, Iya nadai orang ke besai agi ari Iya Empu alai Iya manggaika sumpah Iya. Nya alai Iya besumpah atas nama Iya Empu. Ku Iya, “Aku tetap deka merekatka nuan lalu meri nuan mayuh peturun.” Nya alai lebuh Abraham udah nganti enggau ati ti liat, iya nerima utai ti udah disemaya Allah Taala. Mensia endang besumpah atas nama utai ti besai agi ari sida empu, lalu semua kelikuh ditelesai ngena sumpah. Baka nya mega, lebuh Allah Taala deka ngayanka enggau terang agi ngagai orang ke deka nerima semaya, pasal juluk ati Iya ti enda berubah, Iya netapka semaya nya ngena sumpah. Ulih jaku sumpah enggau jaku semaya ti enda ulih diubah nya, Allah Taala nunjukka Diri enda bula. Nya alai kitai ke udah belindung ba Allah Taala balat agi diperansang bepegai ba pengadang ti di mua kitai. Pengadang kitai nya nyadika sauh ti tegap ke semengat kitai. Ulih pengadang nya kitai ngarapka diri deka tama ngagai Endur ti Pemadu Kudus ti ari belakang tirai, alai Jesus ke udah dulu tama ngarika kitai, lebuh Iya udah nyadi Imam Besai belama iya, murihka Melkisedek. Melkisedek nya raja menua Salem, lalu iya mega nyadi imam Allah Taala ti Pemadu Tinggi. Iya betemu enggau Abraham ke baru pulai beperang bebunuhka bala raja, lalu iya merekatka Abraham. Lalu Abraham meri Melkisedek sepuluh peratus ari semua perapasan ti ulih iya. (Reti ti keterubah ke nama Melkisedek nya “Raja Pengelurus”, lalu iya mega raja Salem, reti nya, “Raja Pemaik.”) Nadai orang nemu sapa apai indai iya, sapa aki ini iya. Lalu nadai mega orang nemu kemaya iya ada tauka kemaya iya mati, tang iya baka Anak Allah Taala ke nyadi imam belama iya. Peda pemesai iya! Indah aki kitai Abraham deh meri ngagai iya sepuluh peratus ari semua perapasan ti ulih iya beperang. Lalu bala peturun Lewi ke diletak nyadi imam, diberi pesan dalam Adat ngasuh sida ngumpul pemeri sepuluh peratus ari orang Israel, reti nya, ari bansa sida empu, taja pen sida nya mega peturun Abraham. Tang Melkisedek tu, ke ukai ari peturun Lewi, nerima pemeri sepuluh peratus ari Abraham, lalu iya merekatka Abraham ke udah nerima semaya Allah Taala. Semua kitai ulih besetujuka tu: orang ke baruh pangkat sigi diberekatka ulih orang ke tinggi agi pangkat. Ba pekara tu, pemeri sepuluh peratus nya diterima mensia ke tau mati, tang ba pekara Melkisedek, pemeri sepuluh peratus nya diterima orang ke idup. Kitai tau ngumbai Lewi, ke nerima pemeri sepuluh peratus, mayar pemeri sepuluh peratus nengah Abraham, laban Lewi agi dalam tubuh aki iya Abraham lebuh Melkisedek betemu enggau Abraham. Enti pemadas ti pemadu menyana nya ulih diterima orang Israel nengah bala imam Lewi (laban orang Israel nerima Adat nengah sida imam Lewi), nama kebuah kitai agi begunaka siku agi imam ke murihka Melkisedek, tang enda begunaka imam ke murihka Aron? Laban lebuh atur kena milih imam diubah, Adat mega enda tau enda diubah. Laban orang ke dikenang dalam pekara tu datai ari raban bansa bukai, lalu nadai orang ari raban bansa nya udah kala bekereja ba alta. Laban Tuhan kitai endang terang datai ari peturun Judah, lalu Moses nadai kala nyebut pasal imam lebuh iya bejakuka pasal raban bansa tu. Pekara tu tau nyadi terang agi lebuh siku agi imam pegari, ke baka Melkisedek, ke nyadi imam, ukai nitihka atur mensia, tang ulih kuasa pengidup ti enda nemu abis. Laban Bup Kudus nyebut munyi tu pasal Iya, “Nuan deka nyadi imam belama iya murihka Melkisedek.” Nya alai Adat ti lama, nadai agi dikena laban iya lemi sereta nadai guna, laban Adat enda ulih ngaga utai nyadi pemadu badas. Lalu diatu, pengadang ti badas agi udah disediaka, ti dikena kitai mansang semak ngagai Allah Taala. Utai tu ditetapka ngena jaku sumpah. Orang bukai nyadi imam ukai ulih jaku sumpah, tang Jesus nyadi imam ulih jaku sumpah, laban Allah Taala nyebut ngagai Iya, “Tuhan udah besumpah lalu Iya enda ngubah runding Diri: ‘Nuan deka nyadi imam belama iya.’ ” Jaku tu ngeletak Jesus nyadi jamin ke sempekat ti badas agi. Nambahka nya, sida imam menya endang mayuh, laban sida mati, lalu enda ulih majakka pengawa diri ke nyadi imam. Tang Jesus nyadi Imam belama iya, laban Iya idup belama iya. Nya alai Iya ulih, ke diatu enggau ke belama-lama iya, nyelamatka orang ke datai ngagai Allah Taala, ulih Iya, laban Iya idup belama iya lalu bejaku ngarika sida ngagai Allah Taala. Laban kitai endang patut bisi imam besai ti baka nya, ke kudus, nadai bepenyalah, nadai penimpang, diseraraka ari orang ke bedosa, ditinggika ari atas langit. Iya enda baka imam besai ti bukai. Iya enda ibuh ngenjuk piring tiap hari, terubah ke dosa iya empu, lalu udah nya ke dosa orang mayuh. Tang Iya ngenjuk piring sekali aja ke belama-lama iya, lebuh Iya nyerahka Diri Empu. Adat ngeletak orang ke lemi nyadi imam besai. Tang jaku sumpah, ti datai dudi agi ari Adat, ngeletak Anak, ke udah digaga nyadi pemadu badas belama-lama iya, nyadi Imam Besai. Batang penemu ti disebut kami nya baka tu: kitai bisi Imam Besai ti baka nya, ke duduk muak ari kanan kerusi diraja Allah Taala ti Pemadu Tinggi di serega. Iya bekereja dalam langkau sembiang, iya nya, dalam langkau kain ti bendar, ti didirika Tuhan, ukai didirika mensia. Genap iku imam besai endang diletak ngenjuk pemeri enggau piring; nya alai, Imam Besai kitai tu pen enda tau enda mega bisi utai diberi. Enti sema Iya di dunya tu, Iya tetap enda nyadi imam, laban kitai endang bisi imam, ke ngenjuk pemeri nitihka Adat. Sida nyembah dalam langkau kain ti semina gambar enggau ayuk Langkau Kain ti di serega. Laban lebuh Moses baru deka nirika langkau kain, Allah Taala bejaku munyi tu ngagai iya, “Nuan enda tau enda ngaga semua utai nitihka pelan ti udah ditunjukka ke nuan ba bukit nya.” Tang diatu, Jesus udah diberi pengawa ti lebih badas agi. Iya nyadi pengari ke sempekat ti lebih agi bemulia, ti beduduk ba semaya ti badas agi. Laban enti sempekat ti keterubah nya udah chukup badas, kitai tentu enda ibuh begunaka sempekat ti kedua. Tang Allah Taala besalahka sempekat ti keterubah lebuh Iya nyebut, “Maya deka datai, ku Tuhan bejaku, alai Aku deka ngaga sempekat ti baru enggau orang Israel, sereta enggau orang Judah, ti enda baka sempekat ti digaga Aku enggau aki ini sida lebuh Aku megai jari sida lalu nguluka sida pansut ari menua Ejip. Laban sida enda tetap ati ngagai sempekat Aku, nya alai Aku enggai ibuhka sida, ku Tuhan bejaku. Tu sempekat ti deka digaga Aku enggau orang Israel jemah ila, ku Tuhan bejaku: Aku deka nyimpan Adat Aku dalam runding sida lalu nuliska Adat nya ba ati sida, lalu Aku deka nyadi Allah Taala sida, lalu sida deka nyadi nembiak Aku. Sida enda ibuh ngajar pangan diri tauka nyebut ngagai pangan diri, ‘Kelala meh Tuhan.’ Laban semua sida deka ngelala Aku, kenyau ari sida ke pemadu mit nyentuk ngagai sida ke pemadu besai. Laban Aku deka ngampun penyalah sida lalu enda agi ngingatka dosa sida.” Lebuh Allah Taala bejakuka sempekat ti baru, Iya nunjukka sempekat ti keterubah nadai agi diguna, luya lalu deka jampat lesap. Indah sempekat ti keterubah deh ngundan atur kena besembah, lalu bisi langkau sembiang. Laban sebuah langkau kain udah disediaka. Iya ti di luar nya alai nyimpan penuduk lampu enggau mija enggau roti Allah Taala. Endur tu dikumbai Endur ti Kudus. Ari belakang tirai ti kedua bisi siti langkau kain ti dikumbai Endur ti Pemadu Kudus. Dalam Endur ti Pemadu Kudus nya bisi alta emas alai nunu menyan, enggau Peti Lampang Batu Adat ti disampak enggau emas. Peti nya ngundan kebuk emas alai nyimpan mana, tungkat Aron ti bekantuk, enggau dua iti lampang batu ti alai sempekat ditulis. Ari atas Peti nya bisi dua iku melikat cherub, nandaka mulia Allah Taala, ngelindung endur alai dosa diampun. Tang kitai enda ulih berandauka semua utai tu enggau silik diatu. Lebuh semua utai nya udah disediaka magang, sida imam tama tiap hari ngagai langkau kain ti di luar, ngereja pengawa sida, tang semina imam besai aja tau tama ngagai langkau kain ti kedua, tang semina sekali aja dalam setaun, mai darah ti dienjuk iya ngagai Allah Taala ke dosa iya empu, enggau ke dosa orang mayuh, dosa ti dikereja sida enggau enda sengaja. Nya chara Roh Kudus nunjukka jalai ngagai Endur ti Pemadu Kudus enda dibuka seagi-agi langkau kain ti di luar nya mengkang bediri. Tu ngambarka maya ti diatu, alai pemeri enggau piring ti dienjuk enda ulih meresi ati orang ke nyembah Allah Taala, laban pengawa nya semina pasal pemakai enggau utai ti diirup aja, atur kena nuchi tubuh ti dipejalaika nyentuk ngagai maya Allah Taala ngaga atur ti baru. Lebuh Kristus datai nyadi Imam Besai ke utai ti badas, ti endang udah bisi ditu diatu, Iya tama nengah langkau sembiang ti besai sereta badas agi ti ukai digaga mensia, reti nya, ukai digaga ari utai ti udah digaga Iya Empu. Iya tama sekali aja ke belama-lama iya ngagai Endur ti Kudus, ukai ngena darah kambin tauka darah sapi, tang ngena darah Iya Empu, lalu bulih pengelepas ti meruan belama iya. Laban enti darah kambin enggau darah sapi enggau amau sapi ti dikerabuka ngagai orang ke enda tuchi, ulih nuchi sida ngambika sida nyadi beresi, tentu balat agi ga darah Kristus, ke udah nyerahka Diri ulih Roh Kudus nyadika piring ti nadai penimpang ngagai Allah Taala, deka nuchi ati kitai ari pengawa ti jai ti ngujung ngagai pemati, ngambika kitai ulih betuaika Allah Taala ti idup. Nya kebuah Kristus nyadi pengari ke sempekat ti baru, ngambika orang ke dikangauka Allah Taala, ulih nerima pesaka ti meruan belama iya, ti udah disemaya Allah Taala, laban ulih pemati Iya, Iya nebus orang ari penyalah ti dikereja sida di baruh sempekat ti keterubah. Ba pasal will, pemati orang ke ngaga will nya enda tau enda ditentuka dulu. Laban will nya semina tau diguna lebuh orang ke bempu will nya udah mati. Atur dalam will nya enda tau dipejalaika enti orang ke ngaga will nya agi idup. Indah sempekat ti keterubah deh enda tau enda dipejalaika ngena darah. Laban lebuh Moses udah madahka semua pesan dalam Bup Adat ngagai semua orang Israel, iya ngambi darah sapi enggau darah kambin, ai, bulu bedus ti ungu, enggau pating isop, lalu mechikka utai nya ngagai Bup Adat, enggau ngagai semua orang mayuh, lalu bejaku, “Tu darah sempekat ti diasuh Allah Taala titihka kita.” Moses mega mechikka darah nya ngagai langkau sembiang, enggau ngagai semua perengka ti dikena sida nyembah Allah Taala. Iya ti bendar, nitihka Adat, nyauka semua utai dituchi ngena darah, lalu enti nadai genselan darah, dosa enda diampun. Nya kebuah utai ti ngambarka utai serega enda tau enda dituchi ngena genselan nya, tang utai serega empu begunaka piring ti badas agi ari nya. Laban Kristus ukai tama ngagai Endur ti Kudus ti digaga jari mensia, ti semina ngambarka utai serega, tang Iya tama ngagai serega empu, lalu pegari ngarika kitai di mua Allah Taala. Lalu Iya pen enda mega suah nyerahka Diri baka imam besai ke tama ngagai Endur ti Kudus tiap taun mai darah ti ukai darah Iya empu, laban enti Iya suah tama kia, Iya tentu enda tau enda suah natka Diri merinsa kenyau ari penumbuh dunya. Tang diatu, Iya udah ngayanka Diri sekali aja ba pengujung dunya, nyerahka Diri Empu nyadika piring kena muai dosa. Genap iku mensia enda tau enda mati sekali aja, lalu udah nya diakim. Baka nya mega Kristus. Lebuh Iya udah diserahka sekali aja ngambika Iya muai dosa orang mayuh, Iya deka pegari kedua kali, ukai muai dosa, tang deka nyelamatka orang ke nganti Iya. Adat semina ayuk utai ti badas ti deka datai, ukai utai nya empu. Nya kebuah iya, ngena piring ti dienjuk enda ngetu-ngetu tiap taun, enda ulih ngaga orang ke datai semak ngagai Allah Taala nyadi pemadu badas. Enti iya ulih, endaka piring nya badu agi dienjuk, laban orang ke nyembah tentu dituchi sekali aja ke belama iya, lalu nadai agi ngasaika diri agi bedosa? Tang piring ti diberi nya ngasuh orang ngingatka dosa sida tiap-tiap taun. Laban darah sapi enggau darah kambin enda ulih muai dosa. Nya kebuah, lebuh Kristus datai ngagai dunya tu, Iya bejaku, “Nuan enda begunaka piring enggau pemeri, tang Nuan udah nyendiaka tubuh ke Aku. Nuan enda rinduka piring tunu enggau piring pengampun dosa Udah nya Aku bejaku, ‘Tu Aku, O Allah Taala sedia deka ngereja peneka Nuan, munyi ti udah ditulis pasal Aku dalam Bup Adat.’ ” Lebuh Iya nyebut, “Nuan enda beguna tauka rinduka piring enggau pemeri, tauka jelu ti ditunu ba alta, enggau piring pengampun dosa,” (taja pen Adat ngasuh utai nya diberi) Iya lalu nyebut, “Tu Aku, sedia deka ngereja peneka Nuan.” Nya alai, Allah Taala muai atur ti keterubah ngambika Iya numbuhka atur ti kedua. Lalu ulih peneka Iya, kitai udah dikuduska ulih piring tubuh Jesus Kristus ti diberi sekali aja ke belama-lama iya. Tiap hari genap iku imam bediri ngereja pengawa diri, ngenjuk piring ti sebaka belama, ti enda ulih muai dosa. Tang lebuh Kristus udah meri sekali aja ke belama-lama iya piring pengampun dosa, Iya duduk muak ari kanan Allah Taala, nganti bala munsuh Iya nyadika pelasar kaki Iya. Laban, ngena siti aja piring, Iya udah ngaga orang ke dikuduska Iya nyadi pemadu badas. Lalu Roh Kudus mega besaksika pasal nya ngagai kitai, laban lebuh Iya udah nyebut, “Tu sempekat ti deka digaga Aku enggau sida udah bekau nya ila, ku Tuhan bejaku: Aku deka nyimpan Adat Aku dalam ati sida lalu nuliska Adat nya dalam runding sida.” Udah nya Iya mega nyebut, “Aku enda agi ngingatka dosa enggau penyalah sida.” Lebuh semua dosa enggau penyalah udah diampun, piring pengampun dosa enda agi diguna. Nya alai, menyadi, laban kitai kempang ati tama ngagai Endur ti Pemadu Kudus ngena darah Jesus, ngena jalai ti baru sereta idup tu, ti udah dibuka Iya ke kitai nengah kain tirai nya, iya nya, nengah tubuh Iya Empu, lalu laban kitai bisi siku Imam ti besai, ke ngemataka rumah Allah Taala, aram kitai datai semak ngagai Allah Taala, mai ati ti tuchi, enggau pengarap ti bendar, laban ati kitai udah dipechik lalu dituchi ari penyalah, lalu tubuh kitai udah dibasu ngena ai ti tuchi. Aram kitai bepegai teguh ba pengadang ti diaku kitai, enda beguyat, laban Iya ke ngaga semaya nya endang tau dikarapka. Lalu aram kitai berundingka chara kitai tau nyungkak pangan diri ngayanka pengerindu lalu ngereja pengawa ti badas, enda ngelengkaka pengawa begempuru, baka sekeda orang, tang meransang pangan diri, lalu bebendar agi ngereja nya laban kita meda Hari Tuhan nyau semak. Laban enti kitai sengaja majak bedosa lebuh kitai udah nerima penemu pasal pemendar, kitai nadai agi piring pengampun dosa, tang semina ati ti takut nganti diri diakim, enggau nganti api ti mau ti deka nunu semua munsuh Allah Taala. Orang ke udah ngelanggar Adat Moses deka diukum bunuh enggau nadai pengasih, beduduk ba saksi dua tauka tiga iku orang. Dalam runding kita, baka ni ku pemalat ukum ti patut ditatka orang ke udah ngelunjak Anak Allah Taala, ke udah busung ngelaban darah sempekat ti udah dikena nguduska sida, lalu udah ngeleseka Roh Kudus ti meri pengasih? Laban kitai nemu sapa ke nyebut, “Aku deka malas. Aku deka mayar.” Kitai mega nemu sapa ke nyebut, “Tuhan deka ngakim bala nembiak Iya.” Naka meh pemalat kitai takut enti kitai labuh ngagai jari Allah Taala ti idup. Tang kingatka gaya kita menya, lebuh kita baru udah nemu penampak. Kita natka diri balat diperinsa, kadang-kadang dipechat sereta dikeduan di mua orang mayuh, lalu kadang-kadang kita diperinsaka sama enggau orang ke kena perinsa. Kita kasihka orang ke ditutup dalam rumah jil, lalu kita gaga ati nejuka orang ngerampas utai kita, laban kita nemu diri bisi pesaka ti manah sereta tan agi. Nya alai, anang ngelengkaka ati kita ti kempang, laban iya deka bulih upah ti besai. Kita begunaka ati ti tan, ngambika lebuh kita udah ngereja peneka Allah Taala, kita nerima utai ti udah disemaya. “Laban enda lama da agi, Iya ke deka datai, tetap datai, lalu enda betangguh; Tang nembiak Aku ke lurus deka idup ngena pengarap. Aku enda rinduka orang ke mungkir.” Tang kitai tu ukai orang ke mungkir lalu dirusak, tang orang ke arap, lalu diselamatka. Reti pengarap nya arapka utai ti disadang, arapka utai ti enda dipeda. Sida ke dulu kelia dikerinduka Allah Taala, ulih pengarap. Ulih pengarap, kitai nemu langit enggau dunya digaga ulih jaku Allah Taala, ngambika utai ti dipeda, digaga ari utai ti enda dipeda. Ulih pengarap, Abel ngenjuk piring ti lebih agi dikerinduka Allah Taala ari piring ti diberi Kain. Ulih pengarap, Abel dikumbai Allah Taala lurus, laban Allah Taala rinduka pemeri iya. Abel mati, tang ulih pengarap iya, iya agi mengkang bejaku diatu. Ulih pengarap, Enok dibai ke atas ngambika iya enda mati, lalu nadai orang nemu endur alai iya, laban Allah Taala udah nabanka iya. Tang sebedau iya ditabanka, iya udah ngerinduka ati Allah Taala. Nadai orang ulih ngerinduka ati Allah Taala enti iya enda arapka Allah Taala, laban barang sapa datai ngagai Allah Taala enda tau enda arapka Allah Taala endang amat bisi, lalu arapka Iya deka ngupah orang ke ngiga Iya. Ulih pengarap, Noah, lebuh iya diberi Allah Taala jaku tangkan pasal utai ti deka nyadi, ngasi lalu ngaga sebuah bandung kena iya ngidupka sida sebilik. Nya meh jalai orang di dunya tu diukum, lalu Noah nerima ari Allah Taala pengelurus ti datai ulih pengarap. Ulih pengarap, Abraham ngasi lebuh iya diasuh bejalai ngagai siti endur ti deka diterima iya nyadika pesaka. Iya mupuk, taja pen iya enda nemu tunga pejalai diri. Ulih pengarap, iya diau di menua ti udah disemaya, nyadi orang kampar, diau dalam langkau kain, lalu baka nya mega Isak enggau Jakop, ke nerima semaya nya baka iya. Laban Abraham nganti sebuah nengeri ti bisi batu pemun, ti diperambu lalu digaga Allah Taala. Ulih pengarap, Abraham ulih nyadi apai, taja pen iya kelalu tuai umur, lalu Sarah empu pen mandul, laban iya arapka Allah Taala deka ngamatka semaya Iya. Nya alai orang siku, ke nyau deka mati, ngadaka peturun ngemayuh bintang ti di langit, ti enda ulih diitung baka igi pasir ti ba tebing tasik. Semua sida nya mengkang arap datai ke sida mati. Sida nadai nerima utai ti udah disemaya, tang sida udah meda lalu ngelaluka utai nya ari jauh, lalu ngaku diri orang kampar, ke tasah di dunya tu, laban orang ke bejaku munyi nya terang madahka diri ngiga menua sida empu. Enti sema sida berundingka menua ti udah ditinggalka sida, sida tentu bisi peluang mulaika diri. Tang sida inginka menua ti manah agi, iya nya menua serega. Nya alai Allah Taala enda malu dikumbai sida Allah Taala sida, laban Iya udah nyendiaka sebuah nengeri ke sida. Ulih pengarap, Abraham nyerahka anak iya Isak nyadika piring lebuh iya diuji, lalu iya tke udah nerima semaya, sedia deka nyerahka anak tunggal iya, ke udah dikenang Allah Taala munyi tu, “Peturun nuan deka datai nengah Isak.” Abraham ngira Allah Taala ulih ngangkatka orang ari mati, nya alai, ba reti iya, Abraham amat nerima Isak ari mati. Ulih pengarap, Isak merekatka Jakop seduai Esau. Ulih pengarap, Jakop, lebuh iya nyau deka mati, merekatka genap iku anak Josep, meremika diri bekering ba tungkat iya nyembah Allah Taala. Ulih pengarap, Josep, lebuh iya nyau deka mati, bejakuka pasal orang Israel ke deka pansut ari menua Ejip, lalu meri atur pasal chara sida patut nguburka iya. Ulih pengarap, apai indai Moses ngelalaika iya tiga bulan udah bekau iya ada, laban sida meda gamal iya sigat, lalu sida enda takutka adat raja. Ulih pengarap, Moses enggai dikumbai uchu raja lebuh iya nyau besai tuai, tang ingin deka natka pemerinsa sama enggau bala nembiak Allah Taala, lalu enda ngelantangka diri ngereja utai ti tau ngasuh bedosa. Iya ngira, natka diri diperinsa ketegal Kristus nya berega agi ari semua pengaya menua Ejip, laban iya seruran merening ke mua ngagai upah ti deka diterima iya. Ulih pengarap, iya ninggalka menua Ejip, lalu enda takutka pengeringat raja. Iya majak ngasuh ati diri tan, indah-indah baka ke meda Allah Taala ti enda ulih dipeda. Ulih pengarap, iya ngintu Gawai Paska, lalu mechikka darah, ngambika Melikat Pemati ti munuh anak tuai, enda negu anak tuai orang Israel. Ulih pengarap, orang Israel meraka Tasik Mirah baka ke bejalai nengah tanah ti rangkai. Tang lebuh orang Ejip nguji bejalai nengah nya, sida lemas. Ulih pengarap, dinding kuta nengeri Jeriko runtuh, lebuh orang Israel udah bejalai ngelingi nengeri nya tujuh hari. Ulih pengarap, indu sundal ke benama Rahap enda mati sama enggau orang ke enda ngasika Allah Taala, laban iya udah ngelaluka pematau orang Israel. Nama utai bukai ti patut dikenang aku? Aku enda chukup jam kena aku bejakuka pasal Gideon, Barak, Samson, Jeptah, David, Samuel enggau bala sida nabi ke ngalahka mayuh bengkah menua ulih pengarap, ke bejalaika atur ti lurus, nerima semaya, nutup mulut singa, madamka api ti mau, ngerarika diri ari pedang, ke ngalihka pengelemi nyadi pengering, ke kering beperang, lalu ngalahka bala soldadu orang menua bukai. Sida ke indu nerima kaban belayan sida ke udah mati, ke diangkatka idup baru. Sekeda sida ti bukai kena perinsa lalu enggai dilepaska, laban sida ngarapka diri deka bulih pengangkat ari mati ti menyana agi. Sida ke bukai dikeleseka lalu disipat, ditanchang ngena rantai, lalu ditutup dalam rumah jil. Sida dituku ngena batu, ditetak putus dua. Sida dibunuh ngena pedang. Sida segau-segau, begari ngena kulit bedus enggau kulit kambin, seranta, diperinsa, dikeduan. Dunya endang amat enda chukup badas ke sida! Sida bejalai segau-segau ba sebelah menua puang enggau ba sebelah bukit, diau dalam lubang gua, enggau dalam lubang tanah. Semua sida nadai nerima utai ti disemaya, taja pen sida dipuji ketegal pengarap sida, laban Allah Taala udah nyendiaka utai ti badas agi, iya nya, sida deka nyadi pemadu badas enti sida begulai enggau kitai. Nya alai, laban kitai dikelingi mayuh amat saksi, aram kitai mega muai semua utai ti berat ti nating kitai, enggau dosa ti balat lekat ba kitai, lalu awakka kitai belanda enggau ati ti liat dalam lumba kitai. Aram kitai merening ngagai Jesus ke ngemunka lalu ngaga pengarap kitai nyadi pemadu badas. Iya enda malu natka Diri diregang ketegal pengaga ti deka diasaika Iya, lalu diatu Iya duduk muak ari kanan kerusi diraja Allah Taala. Uji kita ngira pasal Iya ke natka diri dilaban orang ke bedosa, ngambika kita enda lelak tauka alah semengat. Dalam perang kita ngelaban dosa, kita nadai udah kala belaban datai ke kita nyau pansut darah. Lalu kita enda ingatka jaku peransang ti ngumbai kita nya anak Allah Taala -- “Anak, anang enda bedulika disiplin Tuhan, tauka lemi ati lebuh Iya nganu kita. Laban Tuhan disiplin semua orang ke dikerinduka Iya, lalu nganu semua orang ke diterima Iya nyadi anak.” Tatka semua pemerinsa nyadika disiplin ari Allah Taala laban Iya ngaga kita nyadi anak Iya. Laban sapa anak ke nadai kala didisiplin apai iya? Enti Iya enda disiplin kita baka Iya ke disiplin semua anak Iya ti bukai, reti nya kita anak ampang, ukai anak ti bendar. Nambahka nya, indah apai ada kitai deh disiplin kitai, lalu kitai bebasaka sida ketegal nya. Kati kitai enda lebih agi patut nunduk ngagai Apai Roh kitai, lalu idup? Laban apai ada kitai semina disiplin kitai enda lama aja, nitihka pematut ku ati sida, tang Allah Taala disiplin kitai ke penguntung kitai, ngambika kitai nyadi kudus baka Iya Empu. Lebuh kitai kena disiplin, utai nya asai ti pedis, ukai nyamai. Udah nya baru iya mai buah pengelurus ti meri pemaik ngagai orang ke dilatih ngena disiplin nya. Nya alai, kedarka jari kita ti lelak, lalu keringka patung kita ti lemi, lalu gaga jalai kita rurus, ngambika kaki ti lemi enda selau, tang digeraika. Diau bebaik enggau semua orang, lalu diau kudus, laban enti kita enda, kita enda ulih meda Tuhan. Kita enda tau enda nentuka nadai siku kita enda bulih pengasih Allah Taala; enda tau enda nentuka nadai siku kita bedendam ngagai pangan diri, ti tau ngasuh penyarut nyadi, lalu ngujungka mayuh orang enda tuchi. Kita enda tau enda nentuka nadai siku kita baka Esau, ke nadai moral sereta enda nangika Allah Taala, lalu nyual waris iya ketegal semangkuk pemakai. Kita nemu, udah bekau nya, lebuh iya minta berekat ari apai iya, peminta iya ditulak, laban iya nadai jalai nesal ati ke penyalah diri, taja pen iya minta berekat nya enggau ai mata. Kita ukai datai ngagai utai ti ulih ditegu, ngagai api ti mau, ngagai mua hari ti petang, tauka ngagai kabut, tauka ngagai munyi terumpit, tauka ngagai nyawa ti bejaku, datai ke sida ke ninga nyawa nya minta nyawa nya badu agi bejaku ngagai sida, laban sida enda tan ninga pesan ti diberi ngagai sida, “Indah jelu ti negu bukit tu deh enda tau enda dituku ngena batu datai mati.” Utai ti dipeda sida balat amat ngenakut, datai ke Moses empu nyau nyebut, “Aku getar-getar takut!” Tang kita udah datai ngagai Bukit Sion, ngagai nengeri Allah Taala ti idup, ngagai nengeri Jerusalem ti di serega, enggau ngagai gempuru beribu-ribu iku melikat serega; ngagai gempuru bala anak tuai ke bisi nama ditulis di serega. Kita udah datai ngagai Allah Taala, Hakim ke semua mensia, enggau ngagai roh orang ke lurus ke udah digaga nyadi pemadu badas, enggau ngagai Jesus, ke nyadi pengari ke sempekat ti baru, enggau ngagai darah ti dipechikka, ti bejaku badas agi ari darah Abel. Kita enda tau enda nentuka diri enda nulak Iya ke bejaku; laban enti sida ke dulu menya enda ulih ngerarika diri lebuh sida nulak Iya ke meri jaku tangkan ngagai sida di dunya tu, tentu lebih agi ga kitai enda ulih ngerarika diri, enti kitai nulak Iya ke meri kitai jaku tangkan ari serega! Lebuh maya nya menya, tanah berenyang laban penginggar nyawa Iya, tang diatu Iya udah besemaya, “Aku deka sekali agi, ukai semina ngusak dunya, tang langit mega.” Leka jaku “sekali agi” terang nunjukka utai ti ulih digusak deka dibuai, iya nya utai ti udah digaga, ngambika semina utai ti enda ulih digusak aja tinggal. Nya alai, laban kitai nerima Perintah ti enda ulih digusak, aram kitai meri terima kasih kena kita nyembah Allah Taala, sembah ti dikerinduka Iya, ngena ati ti nangi sereta enggau basa; laban “Allah Taala kitai api ti ngerusak.” Majak rinduka diri menyadi dalam Kristus. Anang enda ngelaluka temuai ngagai rumah kita, laban sekeda orang ke ngereja nya enda nemu diri udah ngelaluka melikat. Kingatka orang ke dalam jil, baka ke ngasaika kita empu kena jil sama enggau sida. Kingatka orang ke kena perinsa, baka ke ngasaika kita empu kena perinsa. Awakka adat melaki-bini dibasa semua orang, lalu awakka laki enggau bini meruan tetap ati ngagai pangan diri, laban Allah Taala deka ngakim orang ke ngereja ulah ti kamah, enggau orang ke butang. Anang angkunka duit. Kita patut nemu puas ati ke utai ti dikemisi kita, laban Allah Taala udah nyebut, “Aku enggai sekali-kali ninggalka kita, tauka ngelengkaka kita.” Nya alai, kitai kempang ati nyebut, “Tuhan endang penyaup aku, nya alai aku enda takut. Nama utai ulih dikereja orang ngagai aku?” Kingatka bala tuai kita, ke nusui pesan Allah Taala ngagai kita. Peratika pengidup sida, lalu tunda pengarap sida. Jesus Kristus enda berubah kemari, sehari tu enggau ke belama iya. Anang nejuka diri tesat dibai semua macham jaku ajar ti nyelai. Manah agi enti ati kitai dikeringka ulih pengasih Allah Taala, ukai dikeringka ulih adat pasal pemakai, ti nadai mai penguntung ngagai orang ke nitihka adat nya. Kitai bisi alta, lalu orang ke bekereja dalam langkau sembiang enda tau makai utai ari alta nya. Laban jelu ti bempu darah ti dibai imam besai ngagai Endur ti Kudus nyadika piring kena muai dosa, ditunu di luar kem. Nya alai Jesus mega mati di luar nengeri, ngambika darah Iya nuchi orang mayuh. Nya alai, aram kitai mupuk ngagai Iya di luar kem, ngambika kitai dikeleseka sama enggau Iya. Laban di dunya tu kitai nadai nengeri ti tan belama iya. Kitai ngiga nengeri ti deka datai. Nya alai, ulih Iya, aram kitai seruran meri puji ngagai Allah Taala, nyadika piring kitai, iya nya piring ti diberi kitai ngena mulut ti ngaku Iya Tuhan. Anang enda ngereja utai ti badas lalu bekunsika utai ti dikemisi kita, laban nya piring ti dikerinduka Allah Taala. Ngasika tuai kita, lalu nunduk ngagai sida, laban sida ngemataka semengat kita, lalu sida enda tau enda madah ngagai Allah Taala pasal semua pengawa ti udah dikereja sida. Awakka sida ngereja pengawa nya enggau ati ti gaga, ukai enggau ati ti tusah laban nya nadai pulai ke penguntung kita. Besampi ke kami, laban kami nemu ati diri beresi, ingin deka ngereja utai ti badas berari. Aku ngasuh kita bebendar agi besampi, ngambika aku jampat agi pulai baru ngagai kita. Awakka Allah Taala ti pun pemaik, ke udah ngangkatka Jesus Kristus Tuhan kitai ari mati, ke nyadi Pengibun ti Besai, ulih darah sempekat ti meruan belama iya, nyikap kita enggau semua utai ti badas, ngambika kita ulih ngereja peneka Iya, ngereja dalam kami utai ti ngerinduka ati Iya, ulih Jesus Kristus, ke dipuji belama-lama iya. Amin. Menyadi, aku minta kita sabar mendingka jaku peransang aku tu, laban surat aku tu pandak. Aku dekaka kita nemu, menyadi kitai Timoti udah dilepaska ari rumah jil. Enti iya lengkas datai kitu, aku deka enggau iya nemuai ngagai kita. Beri tabi basa ari kami ngagai semua tuai, enggau ngagai semua nembiak Tuhan. Sida ke datai ari Itali mega ngirumka tabi basa ngagai kita. Awakka berekat Allah Taala meruan enggau kita semua. Surat James, ulun Allah Taala enggau ulun Tuhan Jesus Kristus: Ngagai dua belas raban bansa ke diau ngachir di serata dunya. Menyadi, lebuh kita dituntung mayuh macham penguji, kita patut gaga ati, laban kita nemu, lebuh pengarap kita diuji, iya ngadaka ati ti tan. Lalu awakka ati ti tan nya nembuka pengawa iya, ngambika kita nyadi orang ke besai tuai sereta nyadi pemadu badas, nadai kurang utai. Enti kita nadai penemu-dalam, pinta ngagai Allah Taala ke meri enggau gerah mudah sereta enda mansik penyalah, lalu utai nya deka diberi ngagai kita. Tang pinta ngena pengarap, enggau ati ti enda kakang, laban orang ke kakang ati nya baka gelumbang ti di tasik, ti dipuput lalu dikebuka ribut. Orang nya enda tau ngarapka diri deka nerima sebarang utai ari Tuhan. Laban iya ati dua ati tiga, enda tetap ati dalam semua utai ti dikereja iya. Awakka menyadi ke baruh pendiau temegahka diri ke diberi Allah Taala pangkat ti tinggi, lalu awakka orang ke kaya temegahka diri ke baruh pendiau, laban orang ke kaya deka lesap baka bungai rumput. Laban mata panas niki, hari lalu angat, lalu ngelayuka rumput. Bungai rumput nya labuh, lalu pemajik iya nadai agi. Baka nya meh orang ke kaya deka lesap lebuh sida benung ngereja pengawa sida. Beberekat meh orang ke tan natka penguji, laban lebuh iya tan diuji, iya deka nerima makota pengidup ti udah disemaya Tuhan ke orang ke rinduka Iya. Orang ke kena laban penguji, enda tau nyebut, “Aku diuji Allah Taala,” laban Allah Taala enda ulih diuji penyai, lalu Iya Empu enda nguji orang. Tang kitai diuji pengingin kitai empu, ti ngumpan lalu manjuk kitai; udah nya, lebuh pengingin nya udah ngandung, iya ngadaka dosa, lalu dosa, lebuh iya udah chukup tuai, ngadaka pemati. Menyadi ke dikerinduka aku, anang nejuka diri kena tipu. Semua pemeri ti menyana, ti pemadu badas endang datai ari atas magang, nurun ari Apai penampak ke enda berubah, ke enda mindah kin kitu baka ayuk. Ari peneka Iya Empu Iya udah ngadaka kitai, ulih jaku pemendar, ngambika kitai nyadi lumur satu ari semua utai ti idup ti digaga Iya. Kita, menyadi ke dikerinduka aku, enda tau enda nemu tu: genap iku orang enda tau enda jampat mending, lubah mansutka jaku, lubah ringat, laban pengeringat kita enda ulih mansutka pengelurus ti dikedekaka Allah Taala. Nya alai buai semua ulah ti kamah enggau semua penyai ti balat mayuh ba kita, lalu terima enggau ati ti baruh jaku ti ditanam, ti bisi kuasa nyelamatka semengat kita. Tang anang semina mendingka jaku nya, lalu nipu diri empu. Kereja utai ti diasuh jaku nya. Laban enti orang semina mending lalu enda ngereja utai ti diasuh jaku nya, sida nya baka orang ke meda gamal diri empu ba cheremin; laban sida meda gamal diri, lalu mupuk, lalu tekala nya enda ingatka gamal diri agi. Tang orang ke merening ngagai adat ti pemadu badas, adat pengelepas, lalu majak ngasika adat nya, lalu ukai semina mending lalu udah nya enda ingatka adat nya agi, tang ngereja utai ti diasuh adat nya, orang nya deka diberekatka dalam semua utai ti dikereja iya. Enti orang ngumbai diri orang ke bepengarap, lalu enda nagang dilah diri, tang nipu diri empu, pengarap sida nya nadai guna. Pengarap ti tuchi, ti bendar di mua Allah Taala ti Apai nya: ngintu orang ke patu balu, ke merinsa, sereta ngintu diri tuchi ari penyai dunya. Menyadi, kati kita ke arapka Jesus Kristus Tuhan kitai ti bemulia enda bepilih mata? Enti sema siku orang ke ngena tinchin emas, enggau gari ti manah, datai ngagai gempuru kita, lalu siku orang ke seranta, ke ngena gari ti kamah mega datai, lalu kita ibuhka orang ke ngena gari ti manah nya, lalu bejaku ngagai iya, “Duduk ditu,” tang bejaku ngagai orang ke seranta nya, “Bediri din”, tauka “Duduk semak kaki aku,” enda ke kita bepilih mata, lalu ngakim orang ngena runding ti jai? Pendingka tu, menyadi ke dikerinduka aku! Kati Allah Taala nadai udah milih orang ke seranta di dunya tu nyadi orang ke kaya dalam pengarap, sereta bempu Perintah ti udah disemaya Iya ke orang ke rinduka Iya? Tang kita udah ngeleseka orang ke seranta! Ukai enda orang ke kaya ke nekanka pengidup kita? Ukai enda orang ke kaya ke ngirit kita ngagai kot? Ukai enda orang ke kaya ke bejaku busung ngelaban nama ti badas ti udah diberi ngagai kita? Kita ngereja utai ti manah enti kita ngasika Adat Perintah Allah Taala ti ditulis dalam Bup Kudus, “Rinduka pangan diri baka kita ke rinduka diri empu.” Tang enti kita bepilih mata, kita bedosa, lalu kita deka diukum Adat laban kita ngelanggar Adat. Laban barang sapa nitihka Adat, tang ngelanggar siti ari Adat nya, udah ngelanggar semua Adat. Laban Iya ke nyebut, “Anang butang,” mega nyebut, “Anang munuh orang.” Laban enti kita enda butang, tang munuh orang, kita udah ngelanggar Adat. Nya alai, bejaku lalu kereja utai baka orang ke deka diukum Adat ti ngelepaska kitai. Laban lebuh Allah Taala ngakim, Iya enda ngayanka pengasih ngagai orang ke enda ngayanka pengasih ngagai orang bukai. Pengasih lebih agi bekuasa ari ukum. Nama penguntung kita, menyadi, enti kita ngumbai diri bisi pengarap, tang pengarap nya nadai ngereja utai? Kati pengarap ti baka nya ulih nyelamatka kita? Enti sema menyadi lelaki tauka menyadi indu kita begunaka gari lalu nadai pemakai, lalu kita nyebut ngagai iya, “Mupuk meh nuan enggau selamat. Awakka nuan enda chelap, sereta bisi utai diempa,” tang kita enda meri iya utai ti dipeguna iya, nama guna nya? Baka nya mega pengarap; pengarap mati enti iya nadai pengawa. Tang sekeda orang deka nyebut, “Nuan bisi pengarap; aku bisi pengawa.” Pandangka ngagai aku pengarap nuan ti nadai pengawa, lalu aku deka mandangka ngagai nuan pengarap aku ngena pengawa ti dikereja aku. Kita arapka Allah Taala endang siku aja. Manah! Indah antu deh arapka nya, lalu getar-getar takut. Kita tu amat beli. Kati kita ngasuh orang nunjukka ngagai kita, pengarap ti nadai pengawa nya pengarap ti nadai guna? Kati aki kitai Abraham enda dikumbai lurus ketegal pengawa ti dikereja iya, lebuh iya nyerahka anak iya, Isak, ba alta? Nya alai, pengarap diayanka ulih pengawa, lalu pengarap nyadi chukup menyana ulih pengawa. Tu ngamatka jaku ti disebut dalam Bup Kudus, “Abraham arapka Allah Taala, lalu ketegal nya Allah Taala ngumbai iya lurus,” lalu iya dikumbai pangan Allah Taala. Nya alai, orang digaga lurus ulih pengawa, lalu ukai semina ulih pengarap aja. Baka nya mega indu sundal ke benama Rahap. Iya digaga lurus ulih pengawa ti dikereja iya, lebuh iya nyambut pematau orang Israel, lalu ngasuh seduai iya mupuk nengah jalai bukai. Baka tubuh ti mati enti iya nadai roh, baka nya mega pengarap; iya mati enti iya nadai pengawa. Menyadi, enda mayuh kita tau nyadi pengajar laban, kita nemu, kami ke ngajar deka diakim balat agi. Laban semua kitai bela ngereja mayuh macham penyalah. Orang ke nadai kala nyebut utai ti salah lebuh iya bejaku, iya nya orang ke pemadu badas, ke ulih nagang semua tubuh diri. Enti kitai ngengkahka repik besi ba nyawa kuda, kena ngasuh iya ngasika kitai, kitai ulih ngasuh kuda nya nguingka tubuh diri. Tauka, peda kita kapal. Taja pen kapal nya besai lalu belayar dipuputka ribut ti deras, tang iya dikemudika ngena tumpang ti mit amat ngagai sebarang endur alai juragan ngemudika iya. Baka nya mega dilah. Taja pen iya mit, tang iya balat temegah. Peda kita utan ti besai. Iya ulih diselup ngena api ti mit lalu angus! Dilah nya api, dunya ti jai dalam tubuh kitai, ti ngamahka kitai, nyelup semua pengidup kitai ngena api, lalu dilah nya empu diselup api neraka. Mensia ulih bejinak lalu udah bejinakka semua utai bukai ti idup, baka jelu babas enggau burung, ular enggau ikan, tang nadai orang ulih bejinakka dilah. Dilah nya utai ti jai, ti enda nemu jenuh, ti penuh laban rachun ti bisa. Ngena dilah nya kitai muji Tuhan ti Apai kitai, lalu ngena dilah nya mega kitai nyumpah orang ke digaga neladan gamal Allah Taala Empu. Ari nyawa siti nya pansut jaku berekat enggau jaku sumpah. Menyadi, utai tu enda tau baka nya! Kati mata ai ulih mansutka ai amat enggau ai ti masin? Kati kayu ara, menyadi, ulih mansutka buah kana? Tauka pun anggur ulih mansutka buah ara? Mata ai ti mansutka ai ti masin, enda ulih mansutka ai amat. Sapa bala kita ke bepenemu-dalam sereta mereti? Awakka iya ngayanka pemadas pengidup diri ngena pengawa ti dikereja iya ngena ati ti baruh ti datai ari penemu-dalam. Tang enti kita kepapas, lalu semina berundingka diri empu aja, anang temegahka nya tauka besangkalka pemendar. Penemu-dalam ti baka nya ukai datai ari atas, tang datai ari dunya, ari mensia, ari antu. Laban dia endur alai ati ti kepapas, enggau ati ti semina berundingka diri empu aja, dia meh endur alai penyarut enggau semua pengawa ti jai nyadi. Tang penemu-dalam ti datai ari atas nya, lumur satu, tuchi, mai pemaik, nelap, siru, penuh laban pengasih enggau buah ti manah, enda bepilih mata tauka pura-pura ngapa. Lalu orang ke nanam pemaik, deka ngetau pengelurus. Nama utai ti ngasuh kita beperang ngelaban pangan diri? Nama utai ti ngasuh kita belaya? Kati utai nya enda datai ari mayuh macham pengingin kita ti beperang dalam kita? Kita ingini deka bempu utai, tang kita nadai bulih utai nya. Nya alai kita munuh orang. Kita inginka utai, tang enda teulihka utai nya. Nya alai kita berebut lalu belayaka utai nya. Kita nadai bulih utai, laban kita enda minta ari Allah Taala. Kita minta, tang kita enda nerima, laban juluk ati kita salah, laban kita minta utai nya kena kita ngelantangka diri. Kita tu orang ke enda tetap ati! Kati kita enda nemu, enti kita bepangan enggau dunya kita bemunsuh ngelaban Allah Taala? Nya alai barang sapa ingin deka bepangan enggau dunya, deka nyadi munsuh Allah Taala. Kati kita ngumbai Bup Kudus nyebut utai ngapa lebuh iya nyebut, “Allah Taala balat lelengauka roh ti udah diasuh Iya diau dalam kitai”? Tang Iya meri pengasih ti besai agi. Nya kebuah Bup Kudus nyebut, “Allah Taala ngelaban orang ke sumbung, tang ngayanka pengasih ngagai orang ke baruh ati.” Nya alai, nunduk ngagai Allah Taala. Laban meh Sitan, lalu iya deka rari ari kita. Datai semak ngagai Allah Taala, lalu Iya deka datai semak ngagai kita. Basu jari kita, kita orang ke bedosa, lalu tuchi ati kita, kita ke ati dua tiga. Tusah ati, ngulit lalu nyabak meh kita. Tukar ketawa kita ngagai sabak, lalu tukar pengaga kita ngagai ati ti tusah. Diau enggau ati ti baruh di mua Tuhan, nya baru Iya deka ngeninggika kita. Anang bejai pangan diri, menyadi. Orang ke bejai pangan diri, tauka ngakim pangan diri, bejaku jai ngelaban Adat, sereta ngakim Adat. Tang enti kita ngakim Adat, kita ukai ngereja utai ti diasuh Adat, tang nyadi hakim Adat. Semina Allah Taala aja ke meri Adat enggau nyadi Hakim, ke ulih nyelamat enggau ngerusak. Tang sapa kita nya ku kita, alai kita deka ngakim pangan diri? Dingaka aku, kita ke nyebut, “Sehari tu tauka pagila kitai deka bejalai ngagai nengeri tu, nengeri nya, diau setaun dia, lalu bedagang ngulihka duit.” Indah utai ti deka nyadi pagila deh kita enda nemu. Nama reti pengidup kita? Kita tu ambun ti pegari sekejap aja, lalu udah nya lesap. Utai ti patut disebut kita nya, “Enti nya peneka Tuhan, kitai deka ngereja tu, tauka ngereja nya.” Tang kita sumbung lalu temegah bejaku. Semua jaku temegah ti baka nya endang jai magang. Nya alai, barang sapa nemu utai ti patut dikereja diri, tang enda ngereja iya, bedosa. Dingaka aku, kita ke kaya. Nyabak duie-duie meh kita laban kita deka ditinggang pemerinsa. Pengaya kita udah buruk, lalu gari kita abis diempa indu gegat. Perengka emas enggau pirak kita udah betegar, lalu tegar nya deka nyadika saksi kena ngelaban kita, lalu deka makai isi kita baka api. Kita udah nugungka pengaya ba hari ti penudi. Dinga kita! Gaji kuli ke bekereja ba umai kita ti enda dibayar kita, diatu ngangau, lalu sabak orang ke ngetau udah didinga Allah Taala, Tuhan ti Pemadu Bekuasa. Kita udah nyamai diau di dunya tu, ngelantangka diri. Kita udah nupi diri gemu nyendiaka diri disayat. Kita udah ngukum lalu munuh orang ke lurus, ke enda ngelaban kita. Nya alai, menyadi, kita enda tau enda liat ati nyentuk ngagai maya Tuhan datai. Peda kita pengeliat ati orang bumai nganti umai sida mansutka asil. Sida liat ati nganti hari ujan lebuh musin ruruh daun enggau lebuh musin bungai. Kita mega enda tau enda liat ati. Keringka ati kita, laban Tuhan nyau semak. Menyadi, anang mut-mut ngelaban pangan diri, enggai ke Allah Taala ngakim kita. Hakim diatu benung bediri ba mua pintu. Awakka kita, menyadi, beteladan liat ati ba sida nabi ke bejaku dalam nama Tuhan. Kitai ngumbai sida ke ngayanka ati ti tan nya beberekat. Kita udah ninga pasal Jop ke tan ati, lalu kita udah meda juluk ati Tuhan, pasal Tuhan ke penuh laban penyiru enggau pengasih. Lebih ari semua, menyadi, anang besumpah, nemuka atas nama serega tauka nama dunya, tauka besumpah ngena jalai bukai, tang semina sebut aja “Au” lebuh kita deka nyebut “Au”, tauka “Enggai” enti kita deka nyebut “Enggai,” ngambika kita enda kena ukum. Kati bala kita bisi merinsa? Iya patut besampi. Kati bala kita bisi lantang ati? Iya patut belagu pantun puji. Kati bala kita bisi sakit? Iya patut mesanka bala tuai eklisia, minta sida besampika iya, nata iya ngena minyak dalam nama Tuhan. Sampi ti disebut ngena pengarap deka ngeraika orang ke sakit. Tuhan deka ngeraika sida, lalu enti sida udah bedosa, dosa sida deka diampun. Nya alai, kita patut ngaku dosa kita ngagai pangan diri, lalu besampika pangan diri, ngambika kita digeraika. Sampi orang ke lurus endang bekuasa sereta bisa. Elijah endang mensia baka kitai. Iya bebendar besampi minta hari enda ujan, lalu hari enda ujan di menua nya tiga taun setengah. Udah nya iya besampi baru; hari lalu ujan, lalu tanah mansutka asil. Menyadi, enti bala kita bisi limpang ari pemendar, lalu siku ari bala kita mai iya pulai baru, awakka kita nemu tu: barang sapa mai orang ke bedosa pulai baru ari jalai ti salah, deka nyelamatka semengat orang nya ari pemati, lalu deka ngasuh mayuh dosa diampun. Ari Peter, rasul Jesus Kristus, Ngagai nembiak Allah Taala ke tasah lalu diau ngachir ba sebelah menua Pontus, Galatia, Kapadosia, Asia, enggau Bitinia, ke udah dipilih Allah Taala ti Apai, lalu dikuduska ulih Roh Kudus ngambika kita ngasika Jesus Kristus lalu dipechik ngena darah Iya: Awakka berekat enggau pemaik diberi nambah-menambah ngagai kita. Pujika Allah Taala ti Apai Jesus Kristus Tuhan kitai! Ulih pengasih Iya ti besai, Iya udah meri kitai pengada ti baru ngagai pengadang ti idup ulih pengangkat Jesus Kristus ari mati, enggau ngagai pesaka ti enda nemu buruk, ti tuchi sereta enda nemu abis, ti ditaruh di serega ke kita ke benung dijaga kuasa Allah Taala, ulih pengarap, ngambika kita bulih pengelepas ti sedia deka dipandangka ba pengujung dunya. Kita rami gaga ati ke tu, taja pen kita diatu merinsa enda lama natka mayuh macham penguji, ngambika pengamat pengarap kita - ti berega agi ari emas ti diuji ngena api, taja pen emas nya nemu rusak - tau nerima puji, mulia enggau basa lebuh Jesus Kristus dipandangka. Taja pen kita nadai udah meda Iya, kita rinduka Iya. Lalu taja pen kita nadai meda Iya diatu, kita arapka Iya, lalu ati kita gaga laban pengelantang ti enda ulih ditelah, laban kita nerima utai ti dituju pengarap kita, iya nya pengelepas ke semengat kita. Pengelepas nya ti udah digiga sereta dipansik bala sida nabi, ke bejaku madahka pasal pengasih ti deka diberi ngagai kita. Sida nguji mansik maya enggau baka ni ku utai nya deka nyadi. Tu meh maya ti udah ditunjukka Roh Kristus ti dalam sida, lebuh Roh nya madahka gaya pemerinsa ti deka ditatka Kristus, enggau mulia ti deka nangkanka pemerinsa nya. Sida endang udah dipadahka, sida ukai ngereja nya ke penguntung sida empu, tang ke penguntung kita, lalu utai tu udah dipadahka ngagai kita ulih orang ke nusui ngagai kita Berita Manah ti dibai Roh Kudus ke dikirumka ari serega. Indah sida melikat deh ingin deka nemu nya. Nya alai, sediaka runding kita ngereja pengawa. Disiplin diri empu. Panggaika semua pengadang kita ba pengasih ti deka dibai Jesus Kristus ngagai kita lebuh Iya dipandangka. Diau baka anak mit ke ngasi. Anang nurutka pengingin kita ti jai baka lebuh kita ke apin nemu Allah Taala suba, tang intu diri kudus dalam semua utai, laban Iya ke ngangauka kita, kudus; laban endang udah ditulis, “Diau kudus, laban Aku kudus.” Enti kita ngumbai Allah Taala Apai, ke deka ngakim semua mensia enda bepilih mata tang nitihka utai ti udah dikereja siku-siku mensia, diau nangika Iya sekumbang kita ke diau nyadi orang kampar di dunya tu. Kita nemu, kita ukai ditebus ngena utai ti nemu rusak baka pirak tauka emas, lebuh Iya nebus kita ari jalai pengidup ti nadai guna, ti diajar aki ini kita, tang ngena darah Kristus ti berega, baka darah anak domba ti nadai penimpang tauka petik. Iya endang udah dipilih Allah Taala sebedau dunya digaga, tang dipandangka ba pengujung dunya, ke penguntung kita. Ulih Iya, kita arapka Allah Taala, ke udah ngangkatka Iya ari mati lalu udah meri Iya mulia, ngambika pengarap enggau pengadang kita dipanggaika ba Allah Taala. Semengat kita diatu udah dituchi laban kita ngasika pemendar, ngambika kita amat rinduka orang ke saum pengarap enggau kita, sereta ngambika kita rinduka pangan diri enggau pengabis ati kita. Laban kita udah diadaka baru, ukai ari benih ti nemu buruk, tang ari benih ti enda nemu buruk, ulih kuasa jaku Allah Taala ti idup, ti meruan belama iya. Laban “Semua mensia baka rumput, lalu semua mulia sida baka bungai rumput. Rumput layu, lalu bungai gugur, tang Jaku Tuhan meruan belama iya.” Jaku nya meh Berita Manah ti udah dipadahka ngagai kita. Nya alai, buai semua penyai, semua penipu, semua pemula, semua ati ti kepapas, semua tebiat bejakuka orang. Baka anak mit ke baru ada, seruran auska ai tusu Roh, ngambika ulih nya kita tau mansang dalam pengelepas kita, enti kita amat udah ngasaika pemadas Tuhan. Datai meh kita ngagai Iya, laban Iya batu ti idup, ti ditulak mensia, tang dipilih Allah Taala nyadika batu ti berega. Lalu baka batu ti idup, awakka kita ngelakka diri digaga nyadi rumah Roh Kudus, nyadi bala imam ti kudus ke ngenjuk piring ti dikerinduka Allah Taala, ulih Jesus Kristus. Laban Bup Kudus nyebut, “Aku ngengkahka sigi batu di Sion, batu pemun, batu ti dipilih sereta berega, lalu barang sapa arapka Iya, sigi enda malu.” Nya alai, ba kita ke arap, batu nya endang amat berega. Tang ba orang ke enda arap, “Batu ti ditulak tukang rumah, udah nyadi batu ti pemadu beguna.” Siti agi ayat dalam Bup Kudus nyebut, “Batu ti ngasuh sida tesangkut, batu ti ngasuh sida rebah.” Sida tesangkut laban sida enda ngasika jaku Allah Taala. Tu endang udah diletak Allah Taala ke sida. Tang kita tu bansa ti dipilih, bala imam diraja, bansa ti kudus, nembiak Allah Taala, ngambika kita madahka pasal pemanah pengawa Allah Taala ke udah ngangauka kita pansut ari pemetang ngagai penampak Iya ti badas. Dulu suba kita ukai nembiak Allah Taala, tang diatu kita nembiak Iya. Dulu suba kita nadai nerima pengasih, tang diatu kita udah nerima pengasih. Menyadi ke dikerinduka aku, aku bejaku ngagai kita ke nyadi orang kampar, ke tasah di dunya tu: anang nurutka pengingin tubuh ti seruran beperang ngelaban semengat kita. Diau menyana begulai enggau orang bansa bukai, ngambika, taja pen sida ngumbai kita ngereja penyai, sida tau meda pemadas pengawa kita lalu muji Allah Taala lebuh Iya datai ngakim. Nunduk ngagai semua institusi mensia, ketegal Tuhan, ngagai Raja Besai, ke nyadi tuai megai menua, tauka ngagai gabenor, ke diasuh iya ngukum orang ke ngereja penyalah lalu muji orang ke ngereja utai ti ngena. Laban Allah Taala dekaka kita ngereja utai ti badas, laban lebuh kita ngereja nya kita nutup mulut orang ke nadai nemu utai sereta beli. Diau baka orang ke udah dilepaska, tang anang nguna pengelepas nya kena ngelalaika penyai, tang diau nyadi ulun Allah Taala. Bebasaka semua orang. Rinduka orang ke arap. Nangika Allah Taala. Bebasaka Raja Besai. Kita ti ulun, nunduk ngagai tuan kita enggau pengabis basa, ukai semina ngagai sida ke nelap sereta nemu siru enggau kita, tang mega ngagai sida ke kasar enggau kita. Laban Allah Taala deka merekatka kita ketegal nya, enti kita liat ati natka pemedis ti ukai patut ditatka kita ketegal kita nemu peneka Iya. Laban, nama penguntung kita, enti kita liat ati natka diri dipalu ketegal penyalah kita? Tang enti kita natka diri kena perinsa ketegal kita ngereja utai ti ngena, Allah Taala deka merekatka kita. Laban kita udah dikangauka Allah Taala ngagai pemerinsa nya, laban Kristus udah mega merinsa ngarika kita, ninggalka siti teladan ke kita, ngambika kita nitihka singkang Iya. Iya nadai kala bedosa. Lalu Iya nadai kala nipu orang. Lebuh Iya dikeduan, Iya enda malas. Lebuh Iya diperinsa, Iya enda ngemba orang, tang Iya nyerahka Diri ngagai Allah Taala ke ngakim ngena pengelurus. Iya udah mai dosa kitai dalam tubuh Iya ba kayu regang, ngambika kitai dilepaska ari dosa, lalu idup ke pengelurus. Ulih bakal Iya, kita digeraika. Laban kita udah tesat baka bedus, tang diatu kita udah dibai pulai baru ngagai Pengibun enggau Penyaga semengat kita. Baka nya mega kita ke bini: nunduk ngagai laki kita, ngambika enti sida enda ngasika jaku Allah Taala, sekeda sida ulih dibai arap ketegal ulah kita, ukai ketegal jaku kita, lebuh sida meda pengudus enggau pemadas ulah kita. Pemajik kitai ukai datai ari utai ti ulih dipeda, baka jalai kita ngaduka buk kita, tauka bekenaka perengka emas, tauka gari, tang awakka pemajik kita datai ari ati kita ti bendar, ti enda nemu luya, ti nelap sereta imun, ti pemadu berega di mua Allah Taala. Nya meh chara sida indu ke kudus dulu kelia, ke manggaika pengadang sida ba Allah Taala, ngias diri kena sida nunduk ngagai laki sida. Baka nya ku jalai Sarah ngasika Abraham, lalu ngumbai Abraham tuan iya. Kita anak Sarah, enti kita ngereja utai ti ngena lalu enda takutka sebarang utai. Baka nya mega kita ke laki, kita enda tau enda siru enggau bini kita, lalu bebasaka sida laban sida iya indu sereta lemi agi ari kita, laban sida mega sama enggau kita bempu pengidup ti diberi Allah Taala, ngambika nadai utai nekul sampi kita. Ke pengujung iya, semua kita enda tau enda segempung dalam roh, siruka pangan diri, rinduka pangan diri, nelap enggau pangan diri, sereta baruh ati. Anang malas penyai ngena penyai, tauka jaku kelese ngena jaku kelese, tang balas jaku kelese ngena jaku berekat. Tu meh kebuah kita dikangau - ngambika kita bulih berekat. Laban, “Orang ke inginka pengidup lalu ingin deka meda hari ti manah, awakka sida nagang dilah sida nyebut utai ti jai, sereta nagang mulut sida nipu orang. Awakka sida ngelengkaka penyai lalu ngereja pemadas. Awakka sida ngulihka pemaik lalu diau dalam pemaik. Laban mata Tuhan merening ngagai orang ke lurus lalu pending Iya ninga sampi sida, tang Tuhan ngelaban orang ke ngereja penyai.” Sapa deka ngemediska kita enti kita ransing ati ngereja utai ti badas? Tang enti sema kita kena perinsa ketegal kita ngereja utai ti ngena, kita deka bulih berekat. Anang takutka utai ti diketakutka sida, lalu anang irau. Tang beri basa dalam ati kita ngagai Kristus nyadika Tuhan kita. Seruran besedia deka nyaut orang ke minta kita nerangka pengadang ti dikembuan kita, tang kereja nya enggau ati ti nelap sereta nangi. Lalu intu ati kita beresi, ngambika lebuh kita dipechat, orang ke mechat ulah kita ti badas dalam Kristus, deka malu ke jaku diri empu. Laban, manah agi kitai kena perinsa ketegal ngereja utai ti badas, enti nya peneka Allah Taala, ari ke kena perinsa ketegal penyalah. Laban Kristus mega kena perinsa ketegal dosa sekali aja ke belama-lama iya, iya nya orang ke lurus mati ngarika orang ke bedosa, ngambika Iya mai kitai ngagai Allah Taala. Iya dibunuh batang tubuh, tang diidupka dalam roh, lalu dalam roh Iya bejalai lalu nusui Berita Manah ngagai sida roh ti kena tutup, ke enda ngasi dulu menya lebuh Allah Taala liat ati nganti lebuh maya Noah menya, lebuh bandung benung digaga, ti alai semina mimit aja orang - lapan iku aja semua sida - diselamatka ulih ai. Ai nya ngambarka pemaptisa ti nyelamatka kita diatu. Pemaptisa nya ukai pengawa bebuaika utai ti kamah ari tubuh, tang kena nunjukka kita nguingka diri ngagai Allah Taala enggau ati ti beresi, ulih pengangkat Jesus Kristus ari mati, ke udah niki ke serega, lalu duduk muak ari kanan Allah Taala, bekuasa ari atas semua melikat, semua perintah enggau semua kuasa. Nya alai laban Kristus udah natka tubuh Diri diperinsa, runding kita pen enda tau enda mega sebaka enggau runding Kristus, laban barang sapa udah natka diri diperinsa batang tubuh, enda agi bedosa, ngambika iya, kenyau ari diatu nyentuk ngagai umur iya abis, enda agi idup nitihka pengingin mensia, tang nitihka peneka Allah Taala. Udah chukup meh kita dulu suba ngereja utai baka ti dikerinduka orang bansa bukai: kereja ti jai, ti kamah, mabuk, berami enda beiga-iga, berami ngirup, enggau besembahka engkeramba. Diatu sida tekenyit ati meda kita enda agi enggau sida ngereja utai nya, lalu sida bejai kita. Tang sida enda tau enda madahka pasal diri empu ngagai Iya ke sedia deka ngakim orang ke idup enggau orang ke mati. Laban nya meh kebuah Berita Manah udah ditusui ngagai orang ke mati, ngambika, taja pen sida udah diakim lebuh sida agi idup baka semua orang bukai ketegal semua utai ti udah dikereja sida, sida tau idup dalam roh baka Allah Taala. Pengujung semua utai nyau semak. Nya alai diau menyana lalu disiplin diri empu, ngambika kita ulih besampi. Iya ke lebih agi, seruran rinduka pangan diri, laban pengerindu muai mayuh macham dosa. Sambut pangan diri ngagai rumah kita, tang anang mut-mut ngereja nya. Laban kita udah diasuh Allah Taala ngibun pemeri ti diberi Iya, kena meh pemeri nya nulung pangan diri. Lebuh kita bejaku, kita patut bejaku baka ke nyebut jaku Allah Taala. Lebuh kita mela orang, kita enda tau enda ngereja nya ngena pengering ti diberi Allah Taala, ngambika Allah Taala dipuji dalam semua utai, ulih Jesus Kristus. Awakka Iya bempu mulia enggau kuasa belama-lama iya. Amin. Pangan ke dikerinduka aku, anang tekenyit ati ke pemerinsa ti balat ninggang kita, kena nguji kita. Utai ti nyadi ba kita nya baka ke nyelai. Tang awakka kita rami gaga ati laban kita sama enggau natka pemerinsa Kristus, ngambika kita tau mega manjung gaga ati sereta lantang lebuh mulia Iya dipandangka. Enti kita dikeleseka orang ketegal nama Kristus, kita bulih berekat, laban Roh mulia, enggau Roh Allah Taala bisi enggau kita. Tang enti kita kena perinsa, awakka kita ukai diperinsa ketegal kita udah munuh orang, tauka udah ngenchuri, tauka udah ngereja penyalah, tauka udah tuyu ngachau orang. Tang enti kita kena perinsa ketegal kita nya orang Kristian, anang malu ke nya, tang beri puji ngagai Allah Taala laban kita nyandang nama Kristus. Laban maya udah datai alai raban ruang bilik Allah Taala Empu deka belabuh diakim. Enti pengawa ngakim nya berengkah ba kitai, namaka penyadi orang ke enda ngasika Berita Manah Allah Taala? Lalu “Enti orang ke lurus nyau deka enda ulih diselamatka, namaka penyadi orang ke bedosa, enggau orang ke enda arapka Allah Taala?” Nya alai, awakka orang ke kena perinsa ari peneka Allah Taala, nyerahka diri ngagai Allah Taala ke tetap ati, lalu awakka sida majak ngereja kereja ti badas. Nya alai aku ke tuai eklisia, lalu udah meda pemerinsa Kristus, lalu deka sama enggau bempu mulia ti deka dipandangka, aku meransang kita ke nyadi tuai: ibun bala nembiak Allah Taala ke diasuh ibun kita, ukai ari pejal, tang enggau ati ti ransing, baka ti dikedekkaka Allah Taala kereja kita, lalu ukai laban kita minta gaji. Anang ngaga diri nyadi tuan atas orang ke diibun kita, tang nyadi teladan ke sida. Lalu lebuh Tuai Pengibun pegari, kita deka nerima makota mulia ti enda nemu abis. Baka nya mega kita ke agi biak; nunduk ngagai bala tuai kita. Lalu semua kita enda tau enda baruh ati lebuh kita begulai enggau pangan diri, laban “Allah Taala ngelaban orang ke sumbung, tang ngayanka pengasih ngagai orang ke baruh ati.” Nya alai, diau enggau ati ti baruh, di baruh jari Allah Taala ti bekuasa, ngambika Iya ngangkatka kita tinggi ba maya ti patut. Serahka semua pengirau kita ngagai Iya, laban Iya ngibun kita. Disiplin diri empu sereta bejaga! Sitan ti munsuh kita bejalai segau-segau baka singa ti negung, begigaka orang ke deka diempa iya. Laban meh Sitan, bediri tegap dalam pengarap, laban kita nemu, semua orang bukai ke arap di serata dunya tu sama natka pemerinsa nya baka kita. Lalu lebuh kita udah natka pemerinsa nya enda lama, Allah Taala ti pun semua pengasih, ti udah ngangauka kita ngagai mulia Iya ti meruan belama iya dalam Kristus, deka ngaga kita nyadi baru, ngering sereta negapka kita. Awakka Iya bempu kuasa belama-lama iya! Amin. Silas, menyadi aku ke tetap ati, udah nulung aku nulis surat ti pandak tu ngagai kita kena aku meransang kita sereta madahka ngagai kita pengasih Allah Taala ti bendar. Bediri tegap dalam pengasih nya. Menyadi kita ke di Babilon, ke udah dipilih baka kita empu, ngirumka tabi basa ngagai kita, lalu baka nya mega anak aku Mark. Beri tabi basa ngagai pangan diri ngena pengerindu orang Kristian. Awakka pemaik meruan enggau semua kita ke nembiak Kristus. Ari Simon Peter, ke nyadi ulun enggau rasul Jesus Kristus, Ngagai orang ke udah nerima pengarap baka enggi kami, ulih pengelurus Allah Taala enggau Jesus Kristus ti Juruselamat kitai. Awakka berekat enggau pemaik diberi nambah-menambah ngagai kita, ba penemu pasal Allah Taala enggau pasal Jesus Kristus Tuhan kitai. Kuasa Iya udah meri kitai semua utai kena kitai idup sereta nangika Allah Taala, ulih penemu pasal Iya ke udah ngangauka kitai ngena mulia enggau pemadas Iya. Ulih semua utai nya Iya udah meri kitai semaya ti besai, ngambika ulih utai nya kita ulih ngerarika diri ari penyai ti datai ari pengingin ti kamah di dunya tu, lalu sama enggau bempu mulia enggau pemadas Allah Taala. Ketegal nya kita enda tau enda, enggau naka ulih, nambahka pemadas ngagai pengarap kita, lalu ngagai pemadas, tambahka penemu, lalu ngagai penemu, tambahka ati ti nemu nagang diri. Ngagai ati ti nemu nagang diri, tambahka ati ti tan. Ngagai ati ti tan, tambahka ati ti nangika Allah Taala, lalu ngagai ati ti nangika Allah Taala, tambahka ati ti siru ke pangan diri, lalu ngagai penyiru, tambahka pengerindu. Laban enti kita ngembuan semua kualiti nya nambah-menambah, sida deka ngasuh kita chakah sereta bulih penemu pasal Jesus Kristus Tuhan kitai. Tang enti orang nadai kualiti nya, iya pandak perening sereta buta, lalu enda ingatka diri ke udah dituchi ari dosa iya ti lama. Nya alai, menyadi, awakka kita lebih agi ransing netapka diri amat udah dikangauka sereta udah dipilih, laban enti kita ngereja nya, kita enda ngelengkaka pengarap kita. Laban nya meh jalai kita deka diberi hak enggau penuh kena kitai tama ngagai Perintah ti meruan belama-lama iya, ti diempu Jesus Kristus ti Tuhan enggau Juruselamat kitai. Nya kebuah aku deka seruran ngasuh kita ngingatka utai nya, taja pen kita udah nemu utai nya, lalu udah bediri tegap dalam pemendar ti dikemisi kita. Aku ngira, seagi-agi aku idup, aku patut seruran ngasuh kita ngingatka utai nya, laban aku nemu diri deka mati enda lama da agi, munyi ti udah terang dipadahka Jesus Kristus Tuhan kitai ngagai aku. Nya alai aku enggau naka ulih ngiga jalai kena ngasuh kita seruran ulih ngingatka utai nya lebuh aku udah mati ila. Laban kami ukai nitihka cherita kelulu lebuh kami madahka ngagai kita pasal kuasa enggau penatai Jesus Kristus Tuhan kitai. Mata kami empu udah meda mulia Iya. Laban Iya nerima basa enggau mulia ari Allah Taala ti Apai, lebuh nyawa Allah Taala ti Pemadu Bemulia bejaku ngagai Iya munyi tu, “Tu Anak ke dikesayauka Aku. Aku rinduka Iya.” Kami empu bisi ninga munyi nyawa nya datai ari serega, lebuh kami begulai enggau Iya ba bukit ti kudus nya. Lalu nya ngasuh kami arap agi ke jaku sida nabi. Kita untung enti kita mendingka pesan nya, laban pesan nya baka lampu ti manchar ba endur ti petang nyentuk ngagai rerak tawas, lalu penampak bintang pagi manchar dalam ati kita. Dulu ari semua utai bukai, kita enda tau enda nemu tu: nadai orang ulih nerangka jaku ti benabi dalam Bup Kudus ngena penemu iya empu, laban jaku ti benabi nadai kala datai ari peneka mensia, tang mensia, nyebut pesan Allah Taala ti dibai Roh Kudus. Tang nabi ti pelesu udah mega ngayanka diri ba bala orang mayuh, lalu pengajar ti pelesu deka mega pegari ba bala kita. Sida deka belalai mai ajar ti ngerusak. Sida deka besangkalka Jesus Kristus ke udah nebus sida -- minta diri ngenyit dirusak. Tang taja pia, mayuh orang deka nitihka ulah sida ti kamah, lalu ketegal sida, jalai pemendar deka dikeleseka. Lalu ketegal pengamu sida, sida deka ngambi ulih ba kita ngena jaku tipu. Ukum ti lama udah disebut ngelaban sida, sigi agi mengkang, lalu sida deka dirusak! Laban enti Allah Taala enda ngalau sida melikat lebuh sida bedosa, tang muai sida ngagai neraka, lalu nanchang sida ngena rantai ba endur ti pemadu petang nyentuk ngagai Hari Pechara; lalu enti Iya enda ngalau dunya ti dulu kelia, taja pen Iya nyelamatka Noah, ke ngajar pasal pengelurus, sama enggau tujuh iku orang bukai, lebuh Iya ngampuhka dunya orang ke bedosa ngena ai bah; lalu enti Iya ngeretungka nengeri Sodom enggau Gomorah abis lengis, kena Iya ngajar orang ke enda nangika Allah Taala; lalu enti Iya nyelamatka Lot, orang ke lurus, ke balat tusah ati ke pengamah ulah orang ke jai, (laban orang ke lurus nya diau begulai enggau sida tiap hari, lalu balat tusah ati ketegal utai ti enda beradat ti dipeda enggau didinga iya), Tuhan tentu nemu nyelamatka orang ke nangika Allah Taala, ari penguji ti nuntung sida, lalu ngetanka orang ke enda lurus dalam ukum nyentuk ngagai Hari Pechara, kelebih agi orang ke ngereja ulah ti kamah, sereta ngeleseka kuasa Allah Taala. Sida tu berani sereta sumbung, lalu enda takut ngeleseka utai ti bemulia, Indah sida melikat, taja pen sida lebih agi kering sereta lebih agi bekuasa ari sida, deh enda besalah sida melikat nya ngena jaku kelese di mua Tuhan. Tang sida pengajar ti pelesu tu baka jelu - enda nemu berunding, ada ngambika sida ditangkap lalu disayat. Sida ngeleseka utai ti enda ditemu sida reti, lalu sida deka mega dirusak baka jelu nya, natka ukum ketegal penyalah sida. Sida ngumbai diri tau ngelantangka diri ngemuaska pengingin tubuh diri lebuh siang hari. Sida nya orang ke jai, ke berami enda beiga-iga lebuh sida begulai makai enggau kita. Mata sida seruran jelik-jelik deka butang, enda nemu puas ati bedosa. Sida nipu orang ke enda nemu berunding. Ati sida udah dipatihka nyadi amu. Sida nya kena sumpah! Sida udah limpang ari jalai ti rurus, lalu udah tesat niti jalai ti ditengah Balaam anak Beor, ke rindu ngulihka duit ngereja penyalah. Tang iya dirara ketegal penyalah iya. Keledai ke bisu, bejaku ngagai iya ngena nyawa mensia, ngasuh nabi nya badu agi gila. Orang tu baka mata ai ti rangkai, baka ambun ti dipuputka kabut. Allah Taala udah nyendiaka siti endur ti pemadu petang ke sida. Laban sida bejaku sumbung sereta nadai reti, lalu ngena pengamah pengingin mensia nipu orang ke baru udah ngerarika diri ari bala orang ke diau dalam penyalah. Sida besemaya deka ngelepaska orang nya, tang sida empu agi mengkang nyadi ulun penyai, laban mensia endang nyadi ulun utai ti ngalahka sida. Laban enti orang udah ngerarika diri ari pengamah dunya ulih penemu pasal Jesus Kristus ti Tuhan enggau Juruselamat kitai, lalu udah nya sida dipanjuk kuasa pengamah nya baru lalu alah, ba pengujung iya, pendiau orang nya deka jai agi ari ti keterubah. Manah agi enti sida tak terus nadai kala nemu jalai pengelurus, ari ke nemu jalai nya, lalu udah nya nikal ari pesan ti kudus ti udah diberi ngagai sida. Utai nya udah nyadi ba sida nitihka jaku-dalam ti bendar: “Ukui pulai ngagai mutah iya empu” “Babi ti udah diberi mandi, pulai baru ngagai pelangkan iya.” Pangan ke dikerinduka aku, tu surat ti kedua ti ditulis aku ngagai kita. Dalam surat ti dua iti tu, aku udah ngasuh kita berunding, ngambika kita ngingatka jaku ti udah disebut bala nabi ti kudus dulu kelia, enggau pesan ti diberi Tuhan enggau Juruselamat, ngena bala sida rasul kita. Tang kita enda tau enda dulu nemu tu: ba hari ti penudi, orang ke ngelese deka datai, ngelese sereta nurutka pengingin sida ti kamah, lalu bejaku, “Ni Tuhan kita ke besemaya deka datai? Kenyau ari aki ini kitai udah mati kelia, semua utai mengkang enda berubah baka lebuh penumbuh dunya!” Sida endang sengaja enggai arapka langit udah digaga dulu kelia ulih jaku Allah Taala, lalu dunya ditempa ari ai, ulih ai, lalu dunya nya udah mega diampuhka ulih ai lalu dirusak. Tang ulih jaku nya mega langit enggau dunya ti diatu mengkang digalau ngambika sida dirusak ngena api, digalau nyentuk ngagai Hari Pechara lebuh orang ke enda nangika Allah Taala diakim lalu dirusak. Tang anang enda ingatka utai siti tu, menyadi: Ba Tuhan, sehari baka seribu taun, lalu seribu taun baka sehari. Tuhan ukai lubah ngamatka semaya Iya, munyi ku sekeda orang, tang Iya sabar enggau kita, laban Iya enggai nejuka indah siku kita dirusak, tang semua nesal ati. Tang Hari Tuhan deka datai baka penchuri. Langit deka lesap enggau munyi ti inggar, lalu semua utai deka luluh magang laban api, lalu dunya enggau semua utai ti udah dikereja di dunya tu deka diayanka magang. Nya alai laban semua utai deka dirusak magang ngena chara nya, baka ni ku gaya kita patut idup? Kita patut diau kudus sereta nangika Allah Taala, nganti sereta minta Hari Allah Taala datai enggau jampat. Ba Hari nya, langit deka dirusak ngena api lalu semua utai deka luluh magang laban api nya. Tang nitihka semaya Allah Taala, kitai nganti langit ti baru enggau dunya ti baru, endur alai pengelurus diau. Nya alai, menyadi, lebuh kita nganti semua utai nya, kita enda tau enda enggau naka ulih diau bebaik enggau Iya, nadai bepenyalah, nadai penimpang, lalu ngira pengeliat ati Tuhan nya peluang kena nyelamatka kita, munyi ti udah ditulis menyadi kitai Paul ngagai kita ngena penemu-dalam ti diberi Allah Taala ngagai iya. Nya meh jalai iya nuliska pasal utai nya dalam semua surat iya. Sekeda utai ti disebut dalam surat iya mar diperatika, lalu orang ke nadai nemu utai sereta enda tetap dalam pengarap, nyarutka utai nya baka ti dikereja sida ngagai jaku bukai dalam Bup Kudus, ti ngujungka sida empu dirusak. Nya alai, menyadi, laban kita udah diberi jaku tangkan tu, anang enda bejaga, enggai ke kita dibai orang ke enda beradat ngereja penyalah, lalu labuh ari penuduk kita ti likun. Tang mansang kita dalam pengasih enggau penemu pasal Jesus Kristus ti Tuhan enggau Juruselamat kitai. Beri meh mulia ngagai Iya diatu enggau belama-lama iya! Amin. Kami madah ngagai kita pasal Jaku ti meri pengidup, ti endang udah bisi kenyau ari pun. Kami udah ninga Iya lalu mata kami empu udah meda Iya. Kami sigi amat udah meda Iya, lalu jari kami empu udah negu Iya. Pengidup nya udah dipandangka, lalu kami udah meda Iya, lalu besaksika pasal Iya, lalu madahka ngagai kita pengidup ti meruan belama iya, pengidup ti begulai enggau Apai, lalu udah dipandangka ngagai kami. Kami madahka ngagai kita utai ti udah dipeda enggau didinga kami ngambika kita mega bisi kaul enggau kami. Kami endang amat bisi kaul enggau Apai sereta enggau Anak Iya Jesus Kristus. Kami nuliska utai tu ngambika ati kami chukup gaga. Tu pesan ti udah didinga kami ari Iya, lalu dipadahka kami ngagai kita, iya nya, Allah Taala nya penampak, lalu dalam Iya nadai pemetang. Enti kitai ngumbai diri bisi kaul enggau Iya, tang agi diau dalam pemetang, kitai bula lalu ukai idup nitihka pemendar. Tang enti kitai diau dalam penampak, baka Iya ke diau dalam penampak, kitai bisi kaul enggau pangan diri, lalu darah Anak Iya, Jesus, nuchi kitai ari semua dosa. Enti kitai madahka diri nadai dosa, kitai nipu diri empu, lalu pemendar nadai dalam kitai. Enti kitai ngaku dosa kitai, Iya endang tau dikarapka sereta lurus, lalu Iya deka ngampun kitai ari dosa kitai, lalu nuchi kitai ari semua penyai. Enti kitai madahka diri nadai dosa, kitai ngumbai Allah Taala bula, lalu jaku Iya nadai dalam kitai. Anak, aku nuliska tu ngagai kita, ngambika kita enda bedosa. Tang enti orang ngereja dosa, kitai endang bisi siku Penyaup ke bejaku ngagai Apai ngarika kitai, iya nya Jesus Kristus ti lurus, ke nyadi piring kena muai dosa kitai, lalu ukai semina dosa kitai aja, tang mega dosa semua mensia. Enti kitai ngasika pesan Allah Taala, nya tanda kitai amat nemu Iya. Barang sapa nyebut, “Aku nemu Iya,” tang enda ngasika pesan Iya, orang nya bula, lalu pemendar nadai dalam iya. Tang barang sapa ngasika jaku Allah Taala, pengerindu Allah Taala amat digaga nyadi pemadu badas dalam orang nya. Baka tu ku jalai kitai nemu diri amat dalam Allah Taala: barang sapa madahka diri meruan dalam Allah Taala patut idup baka Jesus Kristus. Pangan ke dikerinduka aku, aku ukai nuliska pesan ti baru ngagai kita, tang pesan ti lama ti endang udah dikemisi kita kenyau ari pun. Pesan ti lama nya meh pesan ti udah didinga kita. Tang taja pia, aku nulis ngagai kita pesan ti baru ti amat bisi dalam Kristus enggau dalam kita, laban pemetang nyau deka nadai agi, lalu penampak ti bendar udah belabuh manchar. Barang sapa ngumbai diri diau dalam penampak tang begedika menyadi diri, agi diau dalam pemetang. Barang sapa rinduka menyadi diri, diau dalam penampak, lalu orang ke baka nya nadai ngembuan utai ti tau ngasuh bedosa. Tang barang sapa begedika orang ke sama pengarap enggau iya, agi mengkang dalam pemetang, agi idup nitihka jalai pemetang lalu enda nemu tunga pejalai diri, laban pemetang udah ngasuh iya buta. Aku nulis ngagai kita, anak, laban dosa kita udah diampun ketegal nama Kristus. Aku nulis ngagai kita ke apai, laban kita ngelala Iya ke endang udah bisi kenyau ari pun. Aku nulis ngagai kita ke agi biak, laban kita udah ngalahka Sitan. Aku nulis ngagai kita, anak, laban kita ngelala Apai. Aku nulis ngagai kita ke apai, laban kita ngelala Iya endang udah bisi kenyau ari pun. Aku nulis ngagai kita ke biak, laban kita kering, lalu Jaku Allah Taala meruan dalam kita, lalu kita udah ngalahka Sitan. Anang angkunka dunya tauka utai dunya. Enti kita angkunka dunya, kita enda angkunka Apai. Laban semua utai di dunya tu -- utai ti dikinginka tubuh, utai ti dikinginka mata, temegahka pengaya -- ukai datai ari Apai, tang datai ari dunya. Lalu dunya enggau pengingin iya deka lenyau, tang orang ke ngereja peneka Allah Taala deka idup belama iya. Anak, tu meh pengujung dunya! Munyi ti udah didinga kita, Munsuh Kristus deka datai. Nya alai diatu mayuh Munsuh Kristus udah datai. Nya meh jalai kitai nemu pengujung dunya udah datai. Sida pansut ari bala kitai, tang sida ukai raban kitai, laban enti sida raban kitai, sida tentu agi meruan begulai enggau kitai. Tang lebuh sida pansut ari bala kitai, nya nyata nunjukka sida ukai raban kitai. Tang kita udah ditata Iya ti Kudus, lalu semua kita bisi penemu. Aku nulis ngagai kita, ukai laban kita enda nemu pemendar, tang laban kita nemu pemendar, lalu kita nemu, nadai pemula kala datai ari pemendar. Sapa orang ke bula? Orang ke bula nya orang ke ngumbai Jesus nya ukai Kristus. Nya meh Munsuh Kristus, orang ke besangkalka Apai enggau Anak. Nadai orang ke besangkalka Anak, bisi Apai dalam iya; barang sapa ngaku Anak, bisi Apai dalam iya. Awakka utai ti didinga kita kenyau ari pun, meruan dalam kita. Enti utai ti didinga kita kenyau ari pun meruan dalam kita, kita deka meruan dalam Anak, enggau dalam Apai. Tu utai ti udah disemaya Iya ngagai kitai - pengidup ti meruan belama iya. Aku nuliska tu ngagai kita pasal orang ke deka nipu kita. Tang ba pasal kita empu, Roh ti udah diterima kita ari Iya meruan dalam kita. Nya alai kita enda begunaka orang ngajar kita, laban Roh Iya ngajar kita semua utai. Lalu ajar Iya endang amat, ukai utai ti bula. Nya alai, munyi ti udah diajar ngagai kita, awakka kita meruan dalam Iya. Nya alai, anak, meruan dalam Iya, ngambika lebuh Iya dipandangka, kitai deka kempang ati lalu enda malu bediri di mua Iya lebuh Iya datai. Enti kita nemu Kristus endang lurus, kita patut nemu, semua orang ke ngereja utai ti lurus, endang diadaka Iya magang. Peda kita pemesai pengerindu Apai ke kitai, datai ke kitai nyau dikumbai anak Allah Taala, laban kitai endang amat anak Iya. Kebuah dunya enda ngelala kitai nya laban dunya enda ngelala Iya. Menyadi ke dikerinduka aku, kitai diatu udah nyadi anak Allah Taala. Gaya kitai ti jemah ila apin dipandangka. Utai ti ditemu kitai nya, lebuh Iya dipandangka, kitai deka sebaka enggau Iya, laban kitai deka meda Iya mua mata. Lalu semua orang ke bisi pengadang tu ke Kristus, nuchi diri empu, baka Kristus Empu ke endang tuchi. Genap iku orang ke bedosa endang ngelanggar adat, laban reti dosa nya ngelanggar adat. Kita nemu, Kristus pegari ngambika Iya muai dosa, lalu Iya Empu endang nadai dosa dalam Iya. Semua orang ke meruan dalam Iya, enda agi majak bedosa. Semua orang ke majak bedosa nadai udah kala meda tauka ngelala Iya. Anak, anang nejuka orang nipu kita! Genap iku orang ke ngereja utai ti badas, endang amat lurus baka Kristus Empu. Genap iku orang ke bedosa endang anak Sitan, laban Sitan endang udah bedosa kenyau ari pun. Kebuah Anak Allah Taala dipandangka nya ngambika Iya ngerusak pengawa Sitan. Orang ke udah diadaka Allah Taala enda agi bedosa laban benih Allah Taala meruan dalam sida; sida enda ulih bedosa laban sida udah diadaka Allah Taala. Baka tu ku jalai kita ngelala sapa ke anak Allah Taala, enggau sapa ke anak Sitan: barang sapa enda diau lurus, ukai anak Allah Taala. Orang ke enda rinduka menyadi diri, ukai anak Allah Taala. Laban tu pesan ti udah didinga kita kenyau ari pun: rinduka pangan diri. Kitai enda tau baka Kain ke endang enggi Sitan, lalu iya munuh menyadi iya Abel. Nama kebuah iya munuh Abel? Laban utai ti dikereja iya jai, lalu utai ti dikereja menyadi iya, lurus. Anang tekenyit ati, menyadi, enti dunya begedika kita. Kitai nemu diri udah meraka ari pemati ngagai pengidup, laban kitai rinduka pangan diri. Barang sapa enda rinduka pangan diri, mengkang dalam pemati. Semua orang ke begedika pangan diri endang pemunuh, lalu kita nemu, orang ke pemunuh nadai pengidup ti meruan belama iya dalam iya. Baka tu ku jalai kitai ngelala pengerindu: Kristus udah nyerahka nyawa Diri ketegal kitai. Nya alai, kitai patut mega nyerahka nyawa diri ketegal pangan kitai! Enti orang ke kaya tepedaka pangan iya suntuk, tang enggai nulung iya, baka ni ku pengerindu Allah Taala bisi dalam iya? Anak, aram kitai rinduka pangan diri, ukai ngena leka jaku tauka ngena utai ti disebut kitai, tang ngena pemendar enggau pengawa ti dikereja kitai. Nya meh jalai kitai nemu diri enggi pemendar, lalu kempang ati bediri di mua Iya genap kali ati kitai besalahka kitai; laban Allah Taala besai agi ari ati kitai, lalu Iya nemu semua utai. Menyadi ke dikesayauka aku, enti ati kitai enda besalahka kitai, kitai berani bediri di mua Allah Taala; lalu nerima ari Iya sebarang utai ti dipinta kitai, laban kitai ngasika pesan Iya, lalu ngereja utai ti ngerinduka ati Iya. Lalu tu pesan Iya: arapka nama Anak Iya Jesus Kristus, lalu rinduka pangan diri, munyi ti udah diasuh Iya kereja kitai. Semua orang ke ngasika pesan Iya, meruan dalam Iya, lalu Iya meruan dalam sida. Lalu kitai nemu Iya meruan dalam kitai ulih Roh Kudus ke udah diberi Iya ngagai kitai. Menyadi, anang arapka semua roh, tang uji roh nya dulu kena nentuka roh nya datai ari Allah Taala; laban mayuh nabi ti pelesu udah pansut ngagai dunya. Baka tu ku jalai kita ngelala Roh Allah Taala: semua roh ke ngaku Jesus Kristus udah datai nyadi mensia, nya roh ti datai ari Allah Taala, lalu semua roh ke enda ngaku Jesus udah datai nyadi mensia, ukai roh ti datai ari Allah Taala. Roh nya roh Munsuh Kristus, ke udah didinga kita deka datai, lalu endang udah bisi di dunya tu diatu. Tang kita, anak, endang enggi Allah Taala, lalu kita udah ngalahka sida, laban Iya ke dalam kita lebih agi bekuasa ari iya ke di dunya. Sida nya endang enggi dunya, nya alai sida nyebut utai dunya, lalu dunya mendingka sida. Kitai tu endang enggi Allah Taala. Barang sapa ngelala Allah Taala, mendingka kitai, lalu orang ke ukai enggi Allah Taala, enggai mendingka kitai. Tu meh jalai kitai ngelala bida entara Roh pemendar enggau roh pemula. Menyadi, aram kitai rinduka pangan diri, laban pengerindu datai ari Allah Taala. Semua orang ke rinduka pangan diri endang anak Allah Taala, lalu ngelala Allah Taala. Barang sapa enda rinduka pangan diri, enda ngelala Allah Taala, laban Allah Taala endang pengerindu. Baka tu ku jalai pengerindu Allah Taala udah dipandangka ngagai kitai: Iya udah ngirumka Anak Tunggal Iya ngagai dunya, ngambika kitai tau idup ulih Iya. Tu meh pengerindu, ukai reti nya kitai udah rinduka Allah Taala, tang Iya udah rinduka kitai, lalu udah ngirumka Anak Iya nyadika piring kena muai dosa kitai. Menyadi, laban Allah Taala udah balat rinduka kitai, kitai mega patut rinduka pangan diri. Nadai orang udah kala meda Allah Taala, tang enti kitai rinduka pangan diri, Allah Taala meruan dalam kitai, lalu pengerindu Iya digaga nyadi pemadu badas dalam kitai. Baka tu ku jalai kitai nemu diri meruan dalam Iya, lalu Iya meruan dalam kitai, laban Iya udah meri kitai Roh Iya. Lalu kami udah meda sereta besaksi madahka Apai udah ngirumka Anak Iya nyadika Juruselamat dunya. Allah Taala meruan dalam orang ke ngaku Jesus Kristus nya Anak Allah Taala, lalu sida meruan dalam Allah Taala. Nya alai kitai nemu sereta arapka Allah Taala rinduka kitai. Allah Taala nya pengerindu, lalu orang ke meruan dalam pengerindu, meruan dalam Allah Taala, lalu Allah Taala meruan dalam sida. Pengerindu udah digaga nyadi pemadu badas dalam kitai, ngambika kitai berani lebuh Hari Pechara, laban kitai idup baka Iya di dunya tu. Pengerindu nadai mai penakut, tang pengerindu ti pemadu menyana muai semua penakut, laban penakut bisi kaul enggau ukum, lalu barang sapa agi ngembuan penakut nunjukka pengerindu apin nyadi pemadu menyana dalam iya. Kitai rindu laban Allah Taala udah dulu rinduka kitai. Enti orang madahka diri rinduka Allah Taala, tang begedika menyadi diri, iya bula, laban orang ke enda rinduka menyadi diri ke ulih dipeda iya, enda ulih rinduka Allah Taala ke enda dipeda iya. Tu pesan ti udah diberi Allah Taala ngagai kitai: orang ke rinduka Allah Taala, enda tau enda mega rinduka menyadi diri. Barang sapa arapka Jesus nya Kristus, sigi anak Allah Taala, lalu barang sapa rinduka apai, rindu mega ke anak. Baka tu ku jalai kitai nemu diri rinduka bala anak Allah Taala, lebuh kitai rinduka Allah Taala lalu ngasika pesan Iya. Laban reti rinduka Allah Taala nya kitai ngasika pesan Iya. Lalu pesan Iya ukai utai ti mar dititihka kitai. Laban barang sapa diadaka Allah Taala, ngalahka dunya. Lalu kitai ngalahka dunya ngena pengarap kitai. Sapa ulih ngalahka dunya kelimpah ari orang ke arapka Jesus nya Anak Allah Taala? Jesus Kristus datai ngagai dunya ngena ai enggau darah, ukai semina ngena ai aja tang ngena ai enggau darah. Lalu Roh Kudus Empu ke besaksika nya, laban Roh Kudus nya pemendar. Nya alai tiga bengkah utai ti besaksi: Roh Kudus, ai, enggau darah, lalu sida tiga nya besetuju enggau pangan diri. Enti kitai teterimaka saksi mensia, saksi Allah Taala lebih besai agi ari nya, laban tu saksi ti diberi Allah Taala pasal Anak Iya. Orang ke arapka Anak Allah Taala bisi saksi nya dalam ati sida. Barang sapa enda arapka Allah Taala, udah ngumbai Allah Taala bula, laban iya enda arapka saksi Allah Taala pasal Anak Iya. Tu meh saksi nya: Allah Taala meri kitai pengidup ti meruan belama iya, lalu pengidup nya dalam Anak Iya. Barang sapa bisi Anak Allah Taala, bisi pengidup. Barang sapa nadai Anak Allah Taala, nadai pengidup. Aku nuliska tu ngagai kita ke arapka nama Anak Allah Taala, ngambika kita nemu diri bisi pengidup ti meruan belama iya. Baka tu ku pemerani kitai di mua Allah Taala, iya nya enti kitai minta sebarang utai nitihka peneka Iya, Iya ninga kitai. Lalu enti kitai nemu Iya ningaka kitai genap kali kitai minta sebarang utai ari Iya, kitai nemu diri udah bulih utai ti dipinta kitai ari Iya. Enti kita meda menyadi kita bedosa, tang dosa nya enda ngujung ngagai pemati, kita patut besampi ngagai Allah Taala, lalu Allah Taala deka meri pengidup ngagai iya, enti dosa nya enda ngujung ngagai pemati. Bisi siti dosa ti ngujung ngagai pemati; aku ukai madahka kita patut besampika nya. Semua penyalah endang dosa magang, tang bisi dosa ti enda ngujung ngagai pemati. Kitai nemu, orang ke diadaka Allah Taala, enda agi bedosa tang dijaga Anak Allah Taala, lalu Sitan enda ulih negu iya. Kitai nemu diri anak Allah Taala, lalu kitai mega nemu semua dunya di baruh kuasa Sitan. Lalu kitai nemu Anak Allah Taala udah datai lalu udah meri kitai penemu, ngambika kitai nemu Allah Taala ti bendar. Lalu kitai meruan dalam Allah Taala ti bendar, dalam Anak Iya Jesus Kristus. Iya nya meh Allah Taala ti bendar, enggau pengidup ti meruan belama iya. Anak, kejangka diri jauh ari engkeramba! Ari tuai eklisia, Ngagai siku indu enggau bala anak iya, ke amat dikerinduka aku, lalu ukai semina aku aja, tang mega dikerinduka semua orang ke nemu pemendar, ketegal pemendar ti meruan dalam kitai, lalu deka meruan enggau kitai datai ke belama iya. Awakka Allah Taala ti Apai, enggau Jesus Kristus ti Anak Allah Taala meri kitai berekat, pengasih enggau pemaik dalam pemendar enggau pengerindu. Ati aku balat amat gaga lebuh aku nemu sekeda bala anak nuan diau dalam pemendar baka ti udah diasuh Apai. Lalu diatu, Endu, aku ukai nuliska pesan ti baru ngagai nuan, tang pesan ti endang udah dikemisi kitai kenyau ari pun. Aku minta kitai rinduka pangan diri. Reti pengerindu nya kitai ngasika pesan Allah Taala. Nya meh pesan ti udah didinga kita kenyau ari pun, iya nya, kita enda tau enda idup dalam pengerindu. Mayuh orang ke penipu udah pansut ngagai dunya. Sida nya orang ke enda ngaku Jesus Kristus udah datai nyadi mensia. Nya meh orang ke penipu, ke Munsuh Kristus. Bejaga kita, ngambika utai ti udah diulihka kita enda lenyau ari kitai, tang ngambika kita nerima semua upah kita. Barang sapa enda bepegai ba ajar Kristus, tang ngelui ajar nya, nadai Allah Taala. Barang sapa bepegai ba ajar Kristus, bisi Apai enggau Anak. Enti orang ke enda mai ajar tu datai ngagai rumah kita, anang ngelaluka sida. Meri tabi basa ngagai sida pen enda meh tau, laban enti kita nabi sida, reti nya kita bekunsi enggau sida ngereja pengawa sida ti jai. Aku mayuh utai ti deka disebut ngagai kita, tang aku enggai nuliska nya, laban aku ngarapka diri ulih nemuai ngagai kita, lalu bejaku betunga mua enggau kita, ngambika kitai sama chukup gaga. Bala anak menyadi indu ke dikerinduka nuan ngirumka tabi basa ngagai nuan. Ari tuai eklisia, Ngagai pangan aku Gaius, ke dikerinduka aku enggau bendar. Menyadi, aku besampi ngambika nuan mujur dalam semua utai, sereta gerai nyamai, baka nuan ke mujur dalam roh. Aku balat amat gaga ati lebuh sekeda menyadi datai, lalu madahka nuan meruan tetap ati ke pemendar, iya nya pasal nuan ke diau nitihka pemendar. Nadai utai bukai ulih ngasuh ati aku lebih agi gaga ari ke ninga bala anak aku diau dalam pemendar. Menyadi, nuan endang amat ngereja pengawa nuan enggau ati ti tetap ke orang Kristian, kelebih agi ke orang ke enda dikelala nuan. Sida udah madah ngagai eklisia pasal pengerindu nuan. Tulung sida nyendiaka pejalai sida, laban nya ngerinduka ati Allah Taala. Laban sida bejalai ketegal Kristus, lalu sida nadai nerima tulung ari orang ke enda arapka Allah Taala. Nya alai, kitai patut nulung orang ke baka nya, ngambika kitai sama enggau sida ngereja pengawa ke pemendar. Aku bisi udah nulis ngagai eklisia, tang Diotrepes ke keran deka nyadi tuai, enda bedulika kami. Nya alai, enti aku datai ila, aku deka mantaika utai ti udah dikereja iya, laban iya bejaku bula pasal aku. Nyadi laban iya enda puas ati ngereja nya, iya lalu enggai nerima penatai bala menyadi, sereta nagang orang ke deka nerima penatai sida, lalu muai orang nya ari eklisia. Menyadi, anang nunda utai ti jai, tang tunda utai ti badas. Barang sapa ngereja pemadas, endang enggi Allah Taala. Barang sapa ngereja penyai, nadai kala meda Allah Taala. Semua orang bela udah besaksi muji Demetrius. Allah Taala Empu mega muji iya. Lalu aku mega besaksika pasal iya, lalu kita nemu, utai ti disebut kami endang amat. Aku mayuh amat utai ti deka disebut ngagai kita, tang aku enggai nuliska nya laban aku ngarapka diri betemu enggau kita enda lama da agi, lalu kitai bejaku betunga mua enggau pangan diri. Awakka pemaik meruan enggau kita. Semua pangan nuan bela ngirumka tabi basa ngagai nuan. Beri tabi basa ngagai semua pangan kitai. Ari Jude, menyadi James, ke nyadi ulun Jesus Kristus, Ngagai orang ke udah dikangau, ke dikerinduka Allah Taala ti Apai, sereta dijaga Jesus Kristus: Awakka pengasih, pemaik enggau pengerindu nambah-menambah diberi ngagai kita. Menyadi, lebuh aku benung gagit ati nyendiaka diri nulis ngagai kita pasal pengelepas ti dikembuan semua kitai, aku ngira diri enda tau enda nulis ngagai kita minta kita bebendar gawa ke pengarap ti udah diberi sekali aja ngagai nembiak Tuhan. Laban sekeda orang udah belalai enselitka diri tama ngagai bala kitai. Sida endang lama udah diletak deka diukum laban sida enda nangika Allah Taala. Sida nyarutka pesan pasal pengasih Allah Taala, lalu ngaga nya nyadika peluang kena sida ngereja pengawa ti kamah, lalu enggai ngaku Tuan enggau Tuhan kitai, Jesus Kristus, ti siku aja. Diatu aku deka ngasuh kita ngingatka tu, taja pen kita udah nemu semua utai tu, iya nya, Tuhan udah ngelepaska orang Israel ari menua Ejip, tang udah nya, Iya munuh sida ke enda arap. Kingatka melikat ke enda nitihka sekat hak sida, tang ninggalka endur alai sida diau. Iya udah nanchang sida ngena rantai lalu nyimpan sida dalam endur ti pemadu petang, ngambika sida diakim lebuh Hari Pechara. Lalu kingatka mega Sodom enggau Gomorah, enggau nengeri ti ngelingi nengeri dua buah nya, ti ngereja ulah ti kamah, lalu nyarutka pengawa beleman. Sida diukum ngena api ti enda nemu padam, kena ngajar semua mensia. Orang tu pen baka nya mega. Sida ngamahka tubuh diri, enggai diperintah Allah Taala, lalu mechat utai idup ti bemulia di serega. Indah tuai melikat ke benama Mikael deh enda berani mechat Sitan lebuh iya berebutka bangkai Moses enggau Sitan, tang semina nyebut, “Tuhan ngerara nuan!” Tang bala orang tu mechat semua utai ti enda ditemu sida reti. Lalu utai ti ditemu sida ngena pengasai, baka jelu ti enda nemu berunding, nya meh utai ti ngerusak sida. Tulah meh sida! Sida niti jalai Kain, lalu ngereja penyalah ketegal duit baka penyalah ti dikereja Balaam, lalu sida dirusak baka Korah ke angkat ngelaban. Sida tu ngamahka gempuru kita lebuh kita beserumpu makai, laban sida enda nemu malu lebuh sida makai, lalu semina berundingka diri empu aja. Sida nya baka mua hari ti dipuputka ribut, tang nadai ngasuh hari ujan. Sida nya baka kayu ti nadai buah lebuh musin ruruh daun, mati dua kali, lalu dichabut. Sida nya baka gelumbang di tasik, ti ngayanka pupu ti ngasuh sida malu. Sida nya baka bintang ti terebai, ti deka dibuai ngagai endur ti pemadu petang ti disedia Allah Taala ke sida belama iya. Enok, tujuh serak ari Adam, udah benabika pasal sida nya dulu kelia: “Peda kita, Tuhan datai enggau beribu-ribu iku bala melikat Iya ti kudus, deka ngakim semua mensia, lalu ngukum genap iku orang ketegal semua penyai ti udah dikereja sida, enggau ketegal semua jaku jai ti udah disebut orang ke bedosa, ke enda arapka Allah Taala, kena sida ngelaban Iya!” Orang nya seruran mutap, seruran nganu pangan diri. Sida nurutka pengingin sida ti kamah. Sida muji diri, lalu ngelangkungka orang kena sida ngambi ulih ba orang. Tang kita, menyadi, enda tau enda ingatka utai ti udah dipadahka bala rasul Jesus Kristus Tuhan kitai sebedau utai nya nyadi. Ku sida madah ngagai kita, “Ba hari ti penudi, orang ke ngelese deka datai, nurutka pengingin sida ti kamah.” Nya meh orang ke nyungkak orang beserekang penemu. Sida tu diperintah pengingin dunya, sereta nadai ngembuan Roh Kudus. Tang kita, menyadi, enda tau enda negapka pengarap kita ti pemadu kudus, lalu besampi nitihka iring Roh Kudus; meruan dalam pengerindu Allah Taala; nganti pengasih Jesus Kristus Tuhan kitai ti deka mai kitai ngagai pengidup ti meruan belama iya. Kasihka orang ke kakang ati; Rampas sekeda orang ari api, lalu selamatka sida; kasihka sida ti bukai enggau ati ti nangi, datai ke kita nyau begedika gari ti udah dikena sida ngereja ulah ti kamah. Ngagai Iya ke ulih nagang kita rebah, lalu nyerahka kita nadai bepenyalah sereta enggau ati ti gaga ngagai Iya ke bemulia, ngagai Allah Taala ti siku aja ke nyadi Juruselamat kitai, beri meh puji, mulia, pengering, enggau kuasa, ulih Jesus Kristus Tuhan kitai, kenyau ari dulu kelia, ngagai diatu, enggau ke belama-lama iya! Amin. Tu pemandang ari Jesus Kristus, ti diberi Allah Taala ngagai Iya, ngambika Iya ngayanka ngagai bala nembiak Iya utai ti enda tau enda nyadi enda lama da agi. Iya madahka utai nya ngagai nembiak Iya John, ngena siku melikat Iya. Lalu John besaksika pasal utai ti dipeda iya, iya nya, jaku Allah Taala, enggau saksi Jesus Kristus, madahka semua utai ti dipeda iya. Beberekat meh orang ke macha jaku ti benabi tu ngena nyawa ti inggar, lalu beberekat meh orang ke ninga sereta ngasika utai ti ditulis dalam bup tu, laban maya nyau semak. Ari John ngagai tujuh buah eklisia di Asia: Awakka berekat enggau pemaik diberi ngagai kita ari Allah Taala ti bisi diatu, ti udah bisi, enggau ti deka datai, enggau ari tujuh iku roh ke di mua kerusi diraja Iya, enggau ari Jesus Kristus, Saksi ke tetap ati, ke terubah diangkatka ari mati, ke merintah semua raja di dunya. Ngagai Iya ke rinduka kitai, lalu udah ngelepaska kitai ari dosa, ulih darah Iya, lalu udah ngaga kitai nyadi perintah imam ti bekereja ke Allah Taala Iya, ti Apai Iya, beri meh mulia enggau kuasa ngagai Iya belama-lama iya! Amin. Peda! Iya datai dalam remang, lalu semua orang deka meda Iya, nyengkaum orang ke udah ngerejang Iya. Lalu semua bansa di dunya tu deka bekeduie nyabak ketegal Iya. Awakka utai nya nyadi! Amin. “Aku tu Pun enggau Pengujung,” ku Tuhan Allah Taala ti Pemadu Bekuasa bejaku, Iya ti diatu, ti udah, enggau ti deka datai. Aku, John, menyadi kita, ke sama enggau kita natka pemerinsa, bempu Perintah, enggau ngembuan ati ti liat sereta tan, ti endang enggi kitai dalam Jesus, udah dibuai ngagai pulau Patmos ketegal jaku Allah Taala enggau ketegal saksi Jesus. Roh Kudus bekuasa ba aku lebuh Hari Tuhan, lalu aku ninga nyawa ti inggar bejaku ari belakang aku munyi terumpit. Ku iya, “Tuliska dalam siti bup utai ti dipeda nuan, lalu kirumka bup nya ngagai tujuh buah eklisia: ngagai Epesus, Smirna, Pergamum, Tiatira, Sardis, Piladelpia, enggau Laudisia.” Aku lalu nguing deka meda orang ke bejaku ngagai aku, lalu lebuh aku nguing, aku tepedaka tujuh iti penuduk lampu ti digaga ari emas. Ba tengah-tengah penuduk lampu nya bisi utai ti baka anak mensia ke ngena baju ti panjai, lalu dada Iya dibelit siti selampai emas. Pala enggau buk Iya burak baka bulu bedus, ngemurak seleju, lalu mata Iya baka daun api. Kaki Iya beperenching baka temaga ti udah dipugar, baka ti udah dituchi ngena api, lalu nyawa Iya munyi guru ai wung. Jari kanan Iya megai tujuh igi bintang, lalu ari nyawa Iya pansut siti pedang ti bemata dua, lalu mua Iya beperenching baka penerang mata hari ti manchar tengah hari. Lebuh aku meda Iya, aku rebah di kaki Iya baka ke mati. Tang Iya ngengkahka jari kanan Iya ba aku, lalu bejaku, “Anang takut! Aku tu Pun enggau Pengujung, Iya ke idup! Aku udah mati, tang peda, Aku idup belama-lama iya, lalu Aku megai kunchi Pemati enggau Dunya pemati. Nya alai, tuliska utai ti dipeda nuan, utai ti diatu enggau utai ti deka nyadi udah bekau tu ila. Misteri pasal tujuh igi bintang ti dipeda nuan ba jari kanan Aku, enggau pasal tujuh iti penuduk lampu ti digaga ari emas nya: tujuh igi bintang nya tujuh iku melikat ke tujuh buah eklisia, lalu tujuh iti penuduk lampu nya tujuh buah eklisia. “Tuliska tu ngagai melikat eklisia di Epesus: ‘Tu jaku ari Iya ke megai tujuh igi bintang ba jari kanan Iya, ke bejalai ba tengah-tengah tujuh iti penuduk lampu. Aku nemu utai ti dikereja nuan, pemendar nuan bekereja, pasal ati nuan ti liat sereta tan. Aku nemu nuan enggai meda orang ke jai. Nuan udah nguji orang ke ngumbai diri rasul, tang ukai, lalu nuan udah nemu sida nya orang ke bula. Aku mega nemu nuan liat ati natka pemerinsa ketegal nama Aku, lalu nuan enda kala mantul. Tang Aku bisi jaku ngelaban nuan: nuan udah ngelengkaka pengerindu nuan ti keterubah. Nya alai kingatka penyauh nuan udah labuh. Nesal ati ke dosa nuan, lalu kereja pengawa ti terubah dikereja nuan suba. Enti nuan enda, Aku deka datai ngagai nuan, lalu enchabut penuduk lampu nuan ari endur iya, enti nuan enda nesal ati ke dosa nuan. Tang tu utai ti manah pasal nuan: nuan begedika utai ti dikereja orang Nikolaitan. Aku mega begedika utai nya. “Awakka orang ke bisi pending, ningaka jaku ti disebut Roh Allah Taala ngagai eklisia! Aku deka ngemendarka orang ke menang makai buah ari kayu pengidup ti tumbuh ba Kebun Allah Taala.’ “Tuliska tu ngagai melikat eklisia di Smirna: ‘Tu jaku ari Iya ti Pun enggau Pengujung, ke udah mati lalu udah angkat idup baru. “ ‘Aku nemu penusah nuan enggau penyeranta nuan (tang nuan kaya). Aku nemu orang ke ngumbai diri orang Judah, tang ukai, ke bejai nuan. Sida nya balai gempuru Sitan. Anang takutka pemerinsa ti baru deka ditatka nuan. Aku madah ngagai nuan, Sitan baru deka muai sekeda bala kita ngagai rumah jil, ngambika kita diuji, lalu kita deka kena perinsa sepuluh hari. Kita enda tau enda tetap ati datai ke mati, lalu Aku deka meri kita makota pengidup. “Awakka orang ke bisi pending, ningaka jaku ti disebut Roh Kudus ngagai semua eklisia. Orang ke menang enda kena laban pemati ti kedua.’ “Tuliska tu ngagai melikat eklisia di Pergamum: ‘Tu jaku ari Iya ke bisi pedang ti bemata dua. “ ‘Aku nemu endur alai nuan diau, iya nya ba endur alai kerusi diraja Sitan. Tang nuan bepegai teguh ba nama Aku, lalu nuan enda besangkalka pengarap nuan ke Aku. Indah lebuh maya Antipas, saksi Aku ke tetap ati, dibunuh ba tengah-tengah bala kita, ba endur alai Sitan diau, deh nuan enda besangkalka pengarap nuan ke Aku. Tang Aku bisi dua tiga iti utai disebut ngelaban nuan: sekeda kita nitihka ajar Balaam, ke ngajar Balak chara nguluka orang Israel bedosa, ngambika sida makai pemakai ti diberi ngagai engkeramba, sereta ngereja ulah ti kamah. Sekeda kita mega nitihka ajar raban Nikolaitan. Nya alai, nesal ati ke dosa kita. Enti kita enda, Aku deka lengkas datai ngagai kita, lalu nyerang sida ngena pedang ti pansut ari nyawa Aku. Awakka orang ke bisi pending, ningaka jaku ti disebut Roh Kudus ngagai semua eklisia. Aku deka meri mana ti resia ngagai orang ke menang, lalu Aku deka meri ngagai iya sigi batu ti burak, ti udah ditulis enggau siti nama ti baru, ti enda ditemu orang reti, kelimpah ari orang ke nerima batu nya.’ “Tuliska tu ngagai melikat eklisia di Tiatira: ‘Tu jaku Anak Allah Taala ti bisi mata ti baka daun api, enggau kaki ti baka temaga ti udah dipugar. “ ‘Aku nemu utai ti dikereja nuan, pengerindu nuan, pengarap nuan, pengawa ti dikereja nuan, pasal ati nuan ti liat sereta tan. Aku nemu utai ti dikereja nuan diatu besai agi ari utai ti udah dikereja nuan terubah iya suba. Tang tu jaku Aku ngelaban nuan: nuan enda ngerara indu ke benama Jesebel, ke ngumbai diri nabi lalu ngajar sereta nipu bala nembiak Aku lalu mai sida ngereja ulah ti kamah, sereta makai pemakai ti diberi ngagai engkeramba. Aku udah meri iya peluang nesal ati, tang iya enggai nesal ati ke kereja iya ti kamah. Nya alai Aku deka nikauka iya ngagai katil, lalu Aku deka ngasuh orang ke butang enggau Iya ditinggang penusah ti besai, enti sida enda nesal ati ke pengawa ti dikereja iya; lalu Aku deka munuh semua anak iya. Lalu semua eklisia deka nemu, Aku mansik runding enggau ati semua mensia. Lalu Aku deka meri ngagai genap iku kita nitihka utai ti udah dikereja kita. Tang ngagai kita ke bukai di Tiatira, ke nadai udah nitihka ajar indu nya, ke nadai udah belajarka utai ti dikumbai sekeda orang ‘resia ti dalam ti datai ari Sitan,’ Aku madah ngagai kita, Aku enda nambahka pemerat tanggungjawap kita; tang kita enda tau enda bepegai teguh ba utai ti dikemisi kita, nyentuk ngagai maya Aku datai. Orang ke menang, ke majak ngereja pengawa Aku nyentuk ke ujung, deka diberi Aku kuasa atas semua bansa; lalu iya deka merintah sida ngena sebatang besi, baka ke ngeredakka periuk tanah, baka Aku ke udah nerima kuasa ari Apai; Lalu Aku deka meri ngagai iya bintang pagi. Awakka orang ke bisi pending, ningaka jaku ti disebut Roh Kudus ngagai semua eklisia.’ “Tuliska tu ngagai melikat eklisia di Sardis: ‘Tu jaku Iya ke bisi tujuh iku Roh Allah Taala, enggau tujuh igi bintang. Aku nemu utai ti dikereja nuan. Orang ngumbai nuan idup, tang nuan mati! Dani lalu keringka teda utai ti agi dikemisi nuan, ti nyau deka mati, laban Aku nadai udah kala nemu pengawa nuan pemadu menyana di mua Allah Taala Aku. Nya alai, kingatka utai ti udah diterima enggau didinga nuan. Nuan enda tau enda ngasika semua utai nya, lalu nesal ati ke dosa nuan. Enti nuan enda dani, Aku deka datai baka penchuri, lalu nuan enda nemu maya Aku deka datai ngagai nuan. Tang nuan agi bisi dua tiga iku orang di Sardis, ke nadai udah ngamahka gari diri. Sida deka bejalai enggau Aku ngena pekayan ti burak, laban sida endang patut. Orang ke menang deka ngena gari ti burak baka nya, lalu Aku enda muai nama sida ari bup pengidup. Aku deka ngaku sida endang enggi Aku di mua Apai Aku enggau di mua bala melikat Iya. Awakka orang ke bisi pending, ningaka jaku ti disebut Roh Allah Taala ngagai semua eklisia!’ “Tuliska tu ngagai melikat eklisia di Piladelpia: ‘Tu jaku ari Iya ti kudus sereta bendar, ke bisi kunchi David, ke muka pintu lalu nadai orang ulih nikupka pintu nya, ke nikupka pintu, lalu nadai orang ulih nukangka pintu nya. “ ‘Aku nemu utai ti dikereja nuan. Peda nuan, Aku udah ngengkahka di mua nuan siti pintu ti tetukang, ti enda ulih ditikupka orang. Aku nemu nuan endang enda kering, tang taja pia, nuan udah nitihka ajar Aku, lalu enda besangkalka nama Aku. Aku deka ngasuh balai gempuru Sitan, ke ngumbai diri orang Judah, tang ukai, sereta bula–Aku deka ngasuh sida datai lalu meremi di kaki nuan, lalu sida deka nemu Aku udah rinduka nuan. Laban nuan udah nitihka pesan Aku ti ngasuh nuan liat ati sereta tan, Aku deka ngintu nuan likun lebuh maya penusah ti deka ninggang dunya, lebuh semua mensia ke diau di dunya tu diuji. Aku deka datai enda lama da agi. Pegai teguh utai ti dikemisi nuan, ngambika nadai orang ulih ngerampas makota nuan. Orang ke menang deka digaga Aku nyadi tiang ti besai dalam Rumah Sembiang Allah Taala Aku, lalu iya deka diau dia belama-lama iya, lalu Aku deka nuliska nama Allah Taala Aku ba iya, enggau nama nengeri Allah Taala Aku, iya nya Jerusalem ti baru, ti nurun ari Allah Taala, ti pansut ari serega, enggau nama Aku Empu ti baru. Awakka orang ke bisi pending, ningaka jaku ti disebut Roh Kudus ngagai semua eklisia!’ “Tuliska tu ngagai melikat eklisia di Laudisia: ‘Tu jaku Iya ke benama Amin, ke tetap ati, Saksi ti bendar, ti pun semua utai ti udah digaga Allah Taala. “ ‘Aku nemu utai ti dikereja nuan. Nuan enda chelap enda angat. Naka meh pemanah enti nuan tak angat, tauka chelap! Nya alai, laban nuan semina nyilu kuku aja, enda angat enda chelap, Aku deka nyemburka nuan ari nyawa Aku! Laban nuan nyebut, “Aku kaya, bisi semua utai, lalu nadai suntuk utai,” tang nuan enda nemu diri merinsa, tusah, seranta, buta sereta telanjai. Nya alai, Aku ngajar nuan meli emas ari Aku, emas ti udah dituchi ngena api, ngambika nuan nyadi kaya, lalu meli gari ti burak kena nuan mungkur tubuh nuan ti telanjai, sereta meli minyak kena nuan ngunsut mata nuan, ngambika nuan ulih meda. Aku nganu sereta disiplin semua orang ke dikerinduka Aku. Nya alai, diau menyana, lalu nesal ati ke dosa nuan. Dinga nuan, Aku bediri di mua pintu lalu nekung. Enti orang ninga nyawa Aku lalu muka pintu, Aku deka tama lalu makai enggau iya, lalu iya deka makai enggau Aku. Orang ke menang deka dibai Aku duduk enggau Aku ba kerusi diraja Aku, baka Aku ke udah menang lalu duduk enggau Apai Aku ba kerusi diraja Iya. Awakka orang ke bisi pending, ningaka jaku ti disebut Roh Kudus ngagai semua eklisia!’ ” Udah nya aku malik, lalu tepedaka siti pintu tebuka di serega. Nyawa ti terubah bejaku munyi terumpit lalu bejaku ngagai aku, “Niki ke atas kitu. Aku deka nunjuk ke nuan utai ti enda tau enda nyadi udah lepas tu.” Tekala nya Roh Kudus lalu bekuasa ba aku, lalu aku tepedaka siti kerusi diraja di serega, enggau siku orang duduk ba kerusi diraja nya! Orang ke duduk ba kerusi diraja nya baka batu asija enggau batu akek mirah, lalu ngelingi kerusi diraja nya bisi anakraja ti bechura baka batu samerut. Ngelingi kerusi diraja nya bisi dua puluh empat iti kerusi diraja ti bukai, lalu duduk ba kerusi diraja nya bisi dua puluh empat iku tuai, ke ngena gari burak, enggau makota emas ba pala sida. Ari kerusi diraja nya pansut kilat, enggau munyi guru enggau letup guntur, lalu di mua kerusi diraja nya bisi tujuh iti sempun ti mau, iya nya tujuh iku roh Allah Taala. Lalu di mua kerusi diraja nya bisi siti utai ti baka tasik ti digaga ari cheremin, ti baka batu kristal. Lalu ngelingi kerusi diraja nya, ari sepiak-sepiak, bisi empat iku utai ti idup, ti penuh laban mata ari mua enggau ari belakang. Iya ti keterubah nya baka gamal singa. Iya ti kedua, baka gamal sapi. Iya ti ketiga baka mua mensia, lalu iya ti keempat baka menaul ti terebai. Lalu genap iku utai ti idup nya bisi enam iti sayap, lalu genap iku sida penuh laban mata di dalam enggau di luar, lalu sida belagu siang malam, ku sida: “Kudus, kudus, kudus meh Tuhan Allah Taala ti Pemadu Bekuasa, ti udah bisi, ti bisi diatu enggau ti deka datai.” Lalu genap kali empat iku utai ti idup nya belagu ngemuliaka sereta meri basa enggau terima kasih ngagai Iya ke duduk ba kerusi diraja nya, ke idup belama-lama iya. Bala tuai ke dua puluh empat iku nya lalu nyungkurka diri di mua Iya ke duduk ba kerusi diraja nya, lalu nyembah Iya ke idup belama-lama iya. Sida ngengkahka makota sida di mua kerusi diraja nya, lalu belagu, “O Tuhan Allah Taala kami, Nuan endang patut nerima mulia, basa enggau kuasa, laban Nuan udah ngaga semua utai, lalu ulih peneka Nuan, sida ditempa, lalu diberi pengidup.” Aku lalu tepedaka siti gulung surat ti mit ba jari kanan Iya ke duduk ba kerusi diraja nya. Gulung surat nya ditulis ari belakang enggau ari mua, lalu ditambit ngena tujuh iti chop tambit. Lalu aku tepedaka siku melikat ti kering, ngangau enggau nyawa ti inggar, “Sapa patut muka gulung surat nya lalu mechahka chop tambit nya?” Tang nadai orang di serega tauka di dunya, tauka di dunya ti di baruh ditemu tau muka lalu meda utai ti di dalam gulung surat nya. Aku lalu duie-duie nyabak, laban nadai siku orang ditemu patut muka gulung surat nya, tauka meda utai ti di dalam surat nya. Udah nya siku ari bala tuai lalu bejaku ngagai aku, “Anang nyabak. Peda nuan! Singa raban bansa Judah, Peturun David, udah menang. Iya ulih muka gulung surat enggau tujuh iti chop tambit nya.” Lalu ba entara kerusi diraja enggau empat iku utai ti idup, enggau ba tengah-tengah bala tuai nya aku tepedaka siku Anak Domba bediri. Iya baka ke udah disayat. Iya bisi tujuh iti tanduk enggau tujuh igi mata, iya nya tujuh iku roh ari Allah Taala, ti dikirumka ngagai dunya. Anak Domba nya datai lalu ngambi gulung surat nya ari jari kanan Iya ke duduk ba kerusi diraja. Lalu lebuh Anak Domba nya ngambi gulung surat nya, empat iku utai ti idup nya enggau dua puluh empat iku bala tuai nya lalu nyungkurka diri di mua Anak Domba nya. Genap iku sida bela bisi belikan enggau mangkuk emas ti penuh laban menyan, iya nya sampi bala nembiak Tuhan. Sida bepantun ngena lagu ti baru, ku sida: “Nuan endang patut ngambi gulung surat lalu muka chop tambit nya, laban Nuan udah dibunuh, lalu ulih darah Nuan, Nuan udah meli ke Allah Taala mensia ari semua raban bansa, jaku, menua enggau bansa, lalu Nuan udah ngaga sida nyadi perintah imam ke bekereja ke Allah Taala kami lalu sida deka merintah di dunya.” Aku lalu malik, lalu ninga ngelingi kerusi diraja nya enggau ngelingi utai ti idup enggau ngelingi bala tuai nya, munyi nyawa beribu-ribu, bejuta-juta iku melikat! Sida belagu enggau nyawa ti inggar: “Anak Domba ti udah dibunuh endang patut nerima kuasa, pengaya, penemu-dalam, enggau pengering, basa, mulia enggau puji!” Aku lalu ninga munyi semua utai ti idup di serega, di dunya enggau di baruh dunya, enggau dalam tasik, iya nya semua utai ti idup dalam sida, belagu: “Beri meh puji enggau basa, mulia enggau kuasa ngagai Iya ke duduk ba kerusi diraja, enggau ngagai Anak Domba, belama-lama iya!” Empat iku utai ti idup nya lalu nyaut, “Amin!” Bala tuai lalu nyungkurka diri nyembah Allah Taala sereta nyembah Anak Domba. Aku lalu tepedaka Anak Domba muka siti ari tujuh iti chop tambit nya, lalu ninga siku utai ti idup nya ngangau ngena nyawa ti meletup munyi guntur, “Datai kitu!” Aku malik, lalu tepedaka siku kuda ti burak. Orang ke nepan kuda nya bisi siti panah, lalu iya diberi siti makota, lalu iya pansut ari serega ngagai dunya, iya ke menang ke ingin deka menang suah agi. Lebuh Anak Domba nya muka chop tambit ti kedua, aku lalu ninga utai ti idup ti kedua nya bejaku, “Datai kitu!” Siku kuda ti bechura mirah lalu pansut. Orang ke nepan iya udah diberi kuasa muai pemaik ari dunya, ngambika orang bebunuhka pangan diri. Lalu iya diberi siti pedang ti besai. Lebuh Anak Domba nya muka chop tambit ti ketiga, aku lalu ninga utai ti idup ti ketiga bejaku, “Datai kitu!” Aku lalu tepedaka siku kuda ti chelum. Orang ke nepan kuda nya megai siti dachin. Aku lalu ninga utai ti munyi nyawa mensia ba tengah-tengah empat iku utai ti idup nya bejaku, “Satu kilogram gandum ke gaji sehari, enggau 3 kilogram barli ke gaji sehari. Tang anang ngerusak minyak kana enggau wain!” Lebuh Anak Domba nya muka chop tambit ti keempat, aku lalu ninga utai ti idup ti keempat bejaku, “Datai kitu!” Aku malik, lalu tepedaka siku kuda ti bechura pudar. Orang ke nepan kuda nya benama Pemati, dititihka Dunya Pemati. Seduai iya diberi kuasa merintah sebagi ari empat bagi dunya, ngambika seduai iya munuh mensia ngena pedang, ngena lapar pungkang, ngena penyakit, enggau ngena jelu babas. Lebuh Anak Domba muka chop tambit ti kelima, aku lalu tepedaka di baruh alta, semengat orang ke udah dibunuh ketegal sida udah madahka jaku Allah Taala, lalu udah besaksika pasal Iya. Sida ngangau enggau nyawa ti inggar, “O Tuhan ti Pemadu Bekuasa, ti kudus sereta bendar! Ni pengelama baru Nuan deka ngakim lalu ngukum orang ke diau di dunya tu ke udah munuh kami?” Udah nya genap iku sida lalu diberi baju panjai ti burak, lalu sida diasuh belelak lama agi, datai ke semua orang ke udah nyadi ulun Kristus baka sida empu, enggau sida ke arap, udah dibunuh magang baka sida empu, kena ngenyukupka pemayuh sida. Lebuh Anak Domba muka chop tambit ti keenam, aku malik lalu aku meda tanah balat amat berenyang, mata hari bebali chelum baka kain guni ti chelum, bulan bebali mirah baka darah, lalu bintang labuh ari langit ngagai dunya, baka buah ara ti apin mansau ti digusak kabut. Langit lesap baka surat ti digulung, lalu semua bukit enggau pulau dipindahka ari endur sida. Udah nya bala raja dunya, bala pemerintah enggau bala tuai soldadu, orang ke kaya enggau ke bekuasa, enggau semua orang bukai, ti ulun enggau ti ukai ulun, lalu belalai dalam lubang gua, enggau ba selikap batu ba sebelah bukit. Sida ngangauka bukit, enggau ngangauka batu, “Tinggang kami lalu lalaika kami ari Iya ke duduk ba kerusi diraja, enggau ari pengeringat Anak Domba; laban hari pengeringat udah datai. Sapa ulih tan laban nya?” Udah nya aku lalu tepedaka empat iku melikat bediri ba empat iti sukut dunya, nagang empat bengkah ribut muput ngagai tanah tauka ngagai tasik, tauka ngagai kayu. Udah nya aku lalu tepedaka siku agi melikat niki ari timur mai chop tambit Allah Taala ti idup. Iya lalu ngangau enggau nyawa ti inggar ngagai empat iku melikat ke udah diberi kuasa ngerusak tanah enggau tasik. Ku iya, “Anang ngerusak tanah, tasik, tauka kayu, sebedau kitai ngechop kening bala ulun Allah Taala.” Aku lalu ninga pemayuh tubuh sida ke deka dichop: 144,000 iku, ari semua raban bansa orang Israel, Udah nya aku malik, lalu tepedaka mayuh amat orang, datai ke sida nyau enda ulih diitung. Sida nya datai ari genap bengkah bansa, ari semua raban bansa, menua, enggau jaku, lalu sida bediri di mua kerusi diraja enggau di mua Anak Domba. Sida ngena baju panjai ti burak, lalu sida megai dan engkerema ba jari sida, lalu sida ngangau enggau nyawa ti inggar, “Pengelepas endang datai ari Allah Taala kitai ke duduk ba kerusi diraja, enggau ari Anak Domba!” Semua melikat lalu bediri ngelingi kerusi diraja nya, enggau ngelingi bala tuai enggau ngelingi empat iku utai ti idup, lalu sida nyungkurka diri di mua kerusi ti diraja nya, lalu nyembah Allah Taala. Ku sida, “Amin! Beri meh puji, mulia, penemu-dalam, terima kasih, basa, kuasa enggau pengering ngagai Allah Taala kitai belama-lama iya! Amin!” Siku ari bala tuai lalu nanya aku, “Sapa bala orang nya ke ngena baju panjai ti burak, lalu ari ni penatai sida?” Ku aku bejaku ngagai iya, “Tuan, nuan nemu.” Lalu ku iya bejaku ngagai aku, “Tu meh bala orang ke udah pansut ari penusah ti besai. Sida udah masu baju panjai sida, lalu ngaga baju nya burak ngena darah Anak Domba. Nya kebuah sida bediri di mua kerusi diraja Allah Taala lalu nyembah Iya siang malam dalam Rumah Sembiang Iya; Lalu Iya ke duduk ba kerusi diraja nya deka nyaga sida. Sida enda agi lapar tauka aus, lalu mata hari enggau pengangat mata hari nadai agi manchar ngagai sida, laban Anak Domba, ke ba tengah-tengah kerusi diraja nya deka nyadi Pengibun sida, lalu Iya deka ngiring sida ngagai mata ai ti idup. Lalu Allah Taala deka ngendas semua ai mata ari mata sida.” Lebuh Anak Domba muka chop tambit ti ketujuh, semua utai di serega lalu enda engkeretik kira setengah jam. Udah nya aku lalu tepedaka melikat tujuh iku nya bediri di mua Allah Taala, lalu diberi tujuh iti terumpit. Siku agi melikat datai, lalu bediri ngimbai alta, mai sarang menyan ti digaga ari emas. Iya lalu diberi mayuh amat menyan, enggau sampi semua nembiak Tuhan ba alta emas ti di mua kerusi diraja nya. Asap ari menyan nya lalu niki sama enggau sampi bala nembiak Tuhan, ari jari melikat ke bediri di mua Allah Taala. Udah nya melikat nya ngambi sarang menyan nya, ngisi sarang menyan nya enggau bara api ari alta, lalu nikauka sarang menyan nya ngagai dunya. Guntur meletup lalu beguru, kilat nyelar lalu tanah berenyang. Tujuh iku melikat ke bisi tujuh iti terumpit, lalu sedia deka nyepu terumpit sida. Melikat ti keterubah lalu nyepu terumpit iya. Ujan batu enggau api, bechampur enggau darah lalu labuh ninggang dunya. Sebagi ari tiga bagi dunya lalu angus. Sebagi ari tiga bagi kayu, enggau semua rumput angus. Udah nya melikat ti kedua nyepu terumpit iya. Utai ti baka bukit ti besai, ti mau laban api, lalu ditikauka ngagai tasik. Sebagi ari tiga bagi tasik lalu bebali nyadi darah. Lalu sebagi ari tiga bagi utai ti idup dalam tasik mati; sebagi ari tiga bagi ari semua kapal rusak. Melikat ti ketiga lalu nyepu terumpit iya. Sigi bintang ti besai, ti mau baka sempun, labuh ari langit, lalu ninggang sebagi ari tiga bagi sungai, enggau mata ai. Nama bintang nya “Pait.” Sebagi ari tiga bagi ai lalu bebali pait, lalu mayuh orang mati laban ai nya, laban ai nya udah nyadi pait. Melikat ti keempat lalu nyepu terumpit iya. Sebagi ari tiga bagi mata hari, sebagi ari tiga bagi bulan, enggau sebagi ari tiga bagi bintang lalu lenyau sebagi ari tiga bagi penampak sida. Ketegal nya sebagi ari tiga bagi penampak siang hari lenyau, lalu baka nya mega penampak malam hari. Udah nya aku malik, lalu aku ninga munyi siku menaul ti terebai ba tengan langit bejaku enggau nyawa ti inggar, “Tulah! Tulah! Tulah meh orang ke diau di dunya, lebuh terumpit ti bukai nya disepu melikat tiga iku nya!” Melikat ti kelima lalu nyepu terumpit iya. Aku lalu tepedaka sigi bintang ti udah labuh ari langit ngagai dunya. Bintang nya lalu diberi siti kunchi kena muka lubang kebung ti nadai buntut. Bintang nya lalu muka lubang kebung nya. Asap lalu pansut ari lubang kebung nya, baka asap ti pansut ari serumbung api ti besai. Mata hari enggau angin lalu petang laban asap ti pansut ari lubang kebung nya. Bala buntak lalu pansut ari asap nya lalu nurun ngagai dunya. Sida diberi kuasa baka kuasa kala. Sida ditagang ngemediska rumput tauka kayu, tauka utai bukai ti tumbuh, tang semina ngemediska orang ke nadai chop Allah Taala ba kening sida. Buntak nya tau merinsaka sida lima bulan, tang enda tau munuh sida. Pedis amat sida diperinsa, asai ti disengat kala. Dalam kandang lima bulan nya, sida deka ngiga pemati, tang enda tetemuka pemati. Sida ingin deka mati, tang pemati deka rari ari sida. Buntak nya baka gamal kuda ti udah disediaka kena beperang. Ba pala sida bisi utai ti baka makota ti digaga ari emas, lalu mua sida baka mua mensia. Buk sida baka buk indu, lalu ngeli sida baka ngeli singa. Sida bisi tisik ti baka terabai dada, lalu sayap sida engkebap munyi kerita perang ti laju mansang beperang. Iku sida baka iku kala, lalu sida bisi perengka kena nyengat, lalu kuasa ti dikena sida ngemediska mensia dalam kandang lima bulan nya, bisi ba iku sida. Sida bisi siku raja, iya nya melikat ke bekuasa atas lubang kebung ti nadai buntut nya. Dalam Hebrew nama melikat nya Abadon. Dalam jaku Gerika, nama iya Apolion (reti nya “Pengerusak”). Penusah ti keterubah udah lepas. Dua bengkah agi penusah deka datai. Udah nya melikat ti keenam lalu nyepu terumpit iya, lalu aku ninga munyi siti nyawa datai ari empat iti sukut alta emas ti di mua Allah Taala, bejaku ngagai melikat ti keenam, “Lepaska empat iku melikat ke ditanchang ba Sungai Eupratis ti besai!” Melikat ti empat iku nya lalu dilepaska. Sida endang udah disediaka ngambika ba jam, hari, bulan enggau taun nya, sida munuh sebagi ari tiga bagi mensia. Pemayuh soldadu ke nepan kuda: dua ratus juta. Aku bisi ninga pemayuh bala sida. Baka tu ku gaya bala kuda ti dipeda aku dalam genera nya: bala orang ke nepan kuda nya bisi terabai dada ti mirah baka api, biru baka batu nilam, kuning baka merirang, lalu pala bala kuda nya baka pala singa, lalu ari nyawa bala kuda nya pansut api, asap enggau merirang. Sebagi ari tiga bagi mensia mati laban tiga bengkah penusah ti besai nya, iya nya api, asap, enggau merirang ti pansut ari nyawa bala kuda nya, laban kuasa kuda nya dalam nyawa sida, enggau ba iku sida. Iku sida baka ular, lalu bisi pala kena sida ngemakalka orang. Mensia ti bukai, ke enda mati laban penusah ti besai nya, enggai nesal ati ke pengawa sida ke begagaka engkeramba, lalu enggai badu besembahka antu enggau engkeramba ti digaga ari emas, pirak, temaga, batu enggau ari kayu, ti enda ulih meda, tauka ninga, tauka bejalai. Sida mega enggai nesal ati ke diri ke udah munuh orang, udah bedukun, udah ngereja pengawa ti kamah, udah ngenchuri. Udah nya aku lalu tepedaka siku agi melikat ti kering, nurun ari serega. Iya dibalut remang, lalu ari atas puchuk pala iya bisi anakraja. Mua iya baka mata hari, lalu kaki iya baka tiang api. Iya megai siti gulung surat ti mit, ti tebuka ba jari iya. Iya nanam kaki kanan iya ba tasik, lalu kaki kiba iya ditanam iya ba tanah. Iya lalu ngangau enggau nyawa ti inggar, munyi singa ti negung. Lebuh iya ngangau, tujuh bengkah guntur lalu meletup. Lebuh guntur tujuh bengkah nya udah meletup, aku baru deka belabuh nulis. Tang aku ninga nyawa bejaku ari serega, “Awakka utai ti udah disebut tujuh bengkah guntur nya nyadika resia. Anang nuliska utai nya!” Udah nya, melikat ke dipeda aku bediri ba tasik enggau ba tanah, ngedarka jari kanan iya ke langit. Iya lalu besumpah atas nama Allah Taala ti idup belama-lama iya, ti udah ngaga langit, tanah, enggau tasik enggau semua utai ti dalam sida. Ku melikat nya bejaku, “Enda lama agi nganti. Lebuh melikat ti ketujuh nyepu terumpit iya, misteri Allah Taala deka dikamatka, munyi ti udah dipadahka Iya ngagai bala ulun Iya, iya nya sida bala nabi.” Udah nya nyawa ti udah didinga aku bejaku ari serega lalu bejaku baru ngagai aku. Ku iya, “Ambi gulung surat ti tebuka nya ari jari melikat ke bediri ba tasik enggau ba tanah.” Aku lalu mansang ngagai melikat nya, lalu minta iya meri gulung surat ti mit nya ngagai aku. Lalu ku iya bejaku ngagai aku, “Ambi tu, lalu empa. Iya deka berasai pait dalam perut nuan, tang manis asai ai manyi dalam nyawa nuan.” Aku lalu ngambi gulung surat ti mit nya ari jari iya, lalu aku makai gulung surat nya. Lalu gulung surat nya manis asai ai manyi dalam nyawa aku. Tang lebuh aku udah nelan iya, iya lalu nyadi pait dalam perut aku. Aku lalu diberi pesan tu: “Nuan enda tau enda, sekali agi, benabika pasal mayuh bengkah menua, bansa, jaku enggau raja.” Udah nya aku lalu diberi siti penyukat ti baka tungkat. Aku lalu diasuh nyukat: “Angkat nuan lalu sukat Rumah Sembiang Allah Taala, enggau alta nya, lalu itung orang ke besembiang dia, tang anang nyukat tengah laman ti ari luar Rumah Sembiang. Awakka iya enda disukat, laban endur nya diungkup ke orang kapir, lalu sida deka ngelunjak nengeri ti kudus dalam kandang empat puluh dua bulan. Lalu Aku deka meri ngagai saksi aku ke dua iku nya kuasa kena benabi dalam kandang seribu dua ratus enam puluh hari, begari ngena kain guni.” Saksi ke dua iku nya dua batang kayu kana, enggau dua iti penuduk lampu ti bediri di mua Tuhan ke merintah dunya. Enti orang deka ngemediska seduai iya, api deka pansut ari nyawa seduai iya, lalu ngerusak munsuh nya. Barang sapa deka ngemediska seduai iya, deka dibunuh ngena chara nya. Seduai iya bisi kuasa nutup langit ngambika hari enda ujan sekumbang seduai iya ke benabi, lalu seduai iya bisi kuasa atas semua ai, ngasuh ai bebali nyadi darah, enggau kuasa ngemediska dunya ngena semua macham penusah nitihka penyuah ti dikedekaka seduai iya. Lalu lebuh seduai iya udah tembu nusui pesan seduai iya, jelu ti niki ari lubang kebung ti nadai buntut nya deka ngelaban seduai iya, ngalah lalu munuh seduai iya, lalu bangkai seduai iya deka ditejuka garing-garing ba jalai raya di nengeri ti besai nya, alai Tuhan ti udah diregang. Nengeri nya ngelambangka Sodom, tauka Ejip. Dalam pengelama tiga hari setengah orang ari semua menua, raban bansa, jaku enggau bansa deka meda bangkai seduai iya, lalu enda nyagi orang nguburka seduai iya. Lalu orang ke diau di dunya deka gaga ati, begawai lalu bekirumka pemeri ngagai pangan diri, ketegal utai ti udah nyadi ba nabi dua iku nya, ti udah balat merinsaka semua orang ke diau di dunya. Tang udah lepas tiga hari setengah, seput pengidup datai ari Allah Taala, lalu tama ngagai seduai iya, lalu seduai iya bediri, lalu semua orang ke meda seduai iya, bela takut magang. Udah nya seduai iya lalu ninga nyawa ti inggar bejaku ngagai seduai iya ari serega, “Niki ke atas kitu!” Seduai iya lalu niki ke serega dalam remang, dikemataka bala munsuh seduai iya. Tekala nya tanah lalu balat amat berenyang lalu sebagi ari sepuluh bagi nengeri runtuh. Tujuh ribu iku orang mati laban tanah ti berenyang nya, lalu sida ti bukai takut lalu ngemuliaka Allah Taala ti di serega. Penusah ti kedua udah lepas, tang penusah ti ketiga deka datai enda lama da agi! Udah nya melikat ti ketujuh lalu nyepu terumpit iya. Siti nyawa lalu bejaku inggar di serega, “Perintah dunya diatu udah nyadi Perintah Tuhan kitai enggau Perintah Kristus Iya, lalu Iya deka merintah belama-lama iya!” Bala tuai ke dua puluh empat iku, ke duduk ba kerusi diraja sida di mua Allah Taala, lalu nyungkurka diri nyembah Allah Taala, ku sida, “Kami meri terima kasih ngagai Nuan, Tuhan Allah Taala ti Pemadu Bekuasa, Iya ke diatu, enggau ti udah! laban Nuan udah ngambi kuasa Nuan ti besai lalu udah belabuh merintah! Orang kapir balat ringat, tang pengeringat Nuan datai alai orang ke mati deka diakim, alai Nuan deka meri upah ngagai bala nembiak Nuan, iya nya bala sida nabi, enggau semua nembiak Tuhan, enggau semua orang ke nangika nama Nuan, sida ke mit enggau ke besai, maya alai ngerusak sida ke nyadi pengerusak dunya!” Rumah Sembiang Allah Taala di serega lalu dibuka, lalu Peti Lampang Batu Adat bisi dipeda dalam Rumah Sembiang nya. Kilat nyelar, munyi letup enggau guru guntur bisi didinga, tanah berenyang, ujan batu balat amat nyadi. Udah nya siti tanda ti besai lalu pegari di langit, iya nya siku indu ke begari ngena mata hari, lalu kaki iya bepelasarka bulan, lalu ba pala iya bisi siti makota ti digaga ari dua belas igi bintang. Iya ngandung lalu nyabak laban iya radai deka beranak. Siti agi tanda pegari di langit, iya nya siku naga ti besai ti bechura mirah, ti bisi tujuh igi pala enggau sepuluh iti tanduk, enggau tujuh iti makota ba pala iya. Iya narit sebagi ari tiga bagi bintang ti di langit ngena iku iya, lalu nikauka sida ke baruh ngagai dunya. Naga nya lalu bediri di mua indu ke baru deka beranak nya, deka makai anak indu nya lebuh anak mit nya ada. Indu nya lalu ngadaka anak lelaki siku, ti deka merintah semua bansa ngena sebatang besi. Tang anak iya dirampas lalu dibai ngagai Allah Taala enggau ngagai kerusi diraja Iya. Indu nya lalu rari ngagai menua puang, ngagai siti endur ti udah disedia Allah Taala ke iya, alai iya deka ditupi dalam pengelama seribu dua ratus enam puluh hari. Perang lalu nyadi di serega. Mikael enggau bala melikat iya beperang ngelaban naga nya, lalu naga nya enggau bala melikat iya beperang ngelaban Mikael enggau bala melikat iya. Tang naga enggau bala melikat iya alah, lalu sida nadai agi endur di serega. Naga ti besai nya, iya nya ular ti tuai, ti dikumbai Antu tauka Sitan ke nipu semua dunya, lalu dibuai ari serega. Iya enggau semua bala melikat iya dibuai ke baruh ngagai dunya. Aku lalu ninga nyawa ti inggar bejaku di serega, “Diatu pengelepas, kuasa enggau Perintah Allah Taala kitai, enggau kuasa Kristus Iya, udah datai, laban iya ke bedawaka bala menyadi kitai di mua Allah Taala kitai siang malam, udah dibuai ke baruh. Lalu sida udah ngalahka iya ngena darah Anak Domba, enggau ngena jaku saksi sida, laban sida enda sayauka nyawa diri datai ke mati. Nya alai, rami gaga ati meh kita serega, enggau semua kita ke diau dia! Tang naka meh penusah tanah enggau tasik, laban Sitan udah nurun ngagai kita, balat pedis ati, laban iya nemu timpuh diri nyau deka abis.” Lebuh naga nya nemu diri udah dibuai ke baruh ngagai dunya, iya lalu begagaika indu ke udah ngadaka anak lelaki nya. Tang indu nya diberi dua iti sayap menaul ti besai, ngambika iya ulih terebai lalu rari ari naga nya, ngagai menua puang, ngagai endur alai iya deka ditupi tiga taun setengah. Naga nya lalu nyemburka ai baka ai bah ari nyawa iya, kena iya ngagai indu nya, ngambika indu nya ditabanka ai nya. Tang tanah nulung indu nya. Tanah merangapka nyawa lalu nelan ai ti pansut ari nyawa naga nya. Naga nya pedis amat ati ngagai indu nya, lalu nyerang bala peturun iya ti bukai, iya nya semua orang ke ngasika pesan Allah Taala, sereta besaksika Jesus. Iya lalu bediri atas pasir ba tebing tasik. Aku lalu tepedaka siku jelu pansut ari tasik. Iya bisi sepuluh iti tanduk enggau tujuh igi pala, enggau sepuluh iti makota ba tanduk iya, enggau nama ti mechat Allah Taala ba pala iya. Jelu ti dipeda aku nya baka engkuli. Kaki iya baka kaki beruang, lalu nyawa iya baka nyawa singa. Naga nya meri pengering, enggau kerusi diraja, enggau kuasa iya ti besai, ngagai jelu nya. Sigi ari pala jelu nya baka ke udah balat bakal, tang bakal nya udah gerai, lalu semua orang di dunya tu bela nitihka jelu nya sereta alit ati. Semua orang bela nyembah naga nya, laban iya udah meri kuasa iya ngagai jelu nya, lalu sida nyembah jelu nya, ku sida, “Sapa orang ke sebaka enggau jelu tu, lalu sapa ulih ngelaban iya?” Jelu nya lalu diberi kuasa bejaku sumbung sereta bejaku busung ngelaban Allah Taala, lalu iya dikemendarka ngena kuasa nya dalam pengelama empat puluh dua bulan. Iya muka nyawa iya lalu bejaku busung ngelaban Allah Taala, ngeleseka nama Allah Taala, enggau endur alai Allah Taala diau, iya nya semua orang ke diau di serega. Iya mega dikemendarka nyerang bala nembiak Tuhan, lalu ngalahka sida, lalu iya diberi kuasa atas semua raban bansa, menua, jaku enggau bansa, lalu semua orang ke diau di dunya deka nyembah iya, iya nya semua orang, kenyau ari sebedau penumbuh dunya, ti nadai nama ditulis dalam bup pengidup Anak Domba ti udah dibunuh. Enti orang bisi pending, awakka iya ninga: Enti orang deka ditangkap, iya tetap deka ditangkap. Enti orang deka dibunuh ngena pedang, iya tetap dibunuh ngena pedang. Tu begunaka ati ti tan enggau pengarap ari bala nembiak Tuhan. Udah nya aku tepedaka siku agi jelu pansut ari dalam tanah. Iya bisi dua iti tanduk baka anak domba, lalu iya bejaku munyi naga. Iya bejalaika semua kuasa jelu ti keterubah, ngarika jelu nya empu, lalu iya mejalka dunya enggau semua orang ke diau dalam dunya, nyembah jelu ti keterubah, ti bisi bakal ti udah gerai. Iya ngereja kereja ajih, nyengkaum ngasuh api nurun ari langit ngagai dunya, dipeda semua orang mayuh. Lalu iya nipu mensia ti diau di dunya ngena kereja ajih ti diasuh kereja iya ngarika jelu nya, ngasuh sida ngaga siku anak patung neladan gamal jelu ti udah bakal laban pedang, tang agi idup; lalu iya dikemendarka ngesuhka seput ke dalam anak patung jelu nya, ngambika anak patung nya nemu bejaku enggau munuh semua orang ke enggai nyembah anak patung jelu nya. Iya mega mejalka semua orang ke mit, ke besai, ke kaya enggau ke seranta, ti ulun enggau ti ukai ulun, dikelai ngena siti tanda ba jari kanan tauka ba kening sida, ngambika nadai orang ulih bebeli tauka bejualka utai enti sida nadai kelai nya, iya nya, nama jelu nya, tauka lumur nama nya. Tu begunaka penemu-dalam. Awakka orang ke pintar, ngira lumur jelu nya, laban nya lumur mensia. Lumur nya 666. Udah nya aku malik, lalu tepedaka Anak Domba bediri ba Bukit Sion. Lalu sama bediri enggau Iya mega 144,000 iku orang ke bisi nama Anak Domba enggau nama Apai Iya ditulis ba kening sida. Aku lalu ninga nyawa bejaku ari serega, munyi guru ai wung, munyi letup guntur, munyi belikan. Sida bepantun ngena lagu ti baru di mua kerusi diraja, di mua empat iku utai ti idup, enggau di mua bala tuai. Nadai orang ulih belajarka lagu nya, kelimpah ari sida 144,000 iku nya ti udah ditebus ari dunya. Sida nya meh orang ke nadai udah kala beleman enggau indu, laban sida udah diau tuchi. Sida nya meh orang ke nitihka Anak Domba ngagai sebarang endur Iya bejalai. Sida udah ditebus ari semua bansa mensia nyadi orang ke terubah-rubah iya diserahka ngagai Allah Taala enggau ngagai Anak Domba, lalu sida nadai kala bula. Sida nadai penyalah. Udah nya aku tepedaka siku agi melikat terebai ba tengan langit, mai Berita Manah ti meruan belama iya ti deka ditusui ngagai orang ke diau di dunya, ngagai semua bansa, raban bansa, jaku enggau menua. Ku iya bejaku enggau nyawa ti inggar, “Nangika Allah Taala, lalu pujika mulia Iya, laban maya udah datai alai Iya deka ngakim. Sembah meh Iya ti udah ngaga serega, tanah, tasik enggau mata ai!” Melikat ti kedua lalu bejaku nangkanka melikat ti keterubah, ku iya, “Udah alah! Alah meh Babilon ti besai nya ti udah mejalka semua bansa ngirup wain pengingin iya ti kamah!” Melikat ti ketiga lalu bejaku enggau nyawa ti inggar nangkanka seduai ti dulu, “Enti orang nyembah jelu enggau anak patung iya, lalu nerima kelai ba kening tauka ba jari sida, orang nya deka mega ngirup wain pengeringat Allah Taala, ti dituang enda ditaku ngagai mangkuk pengeringat Allah Taala, lalu orang nya deka diperinsaka ngena api enggau merirang di mua bala melikat ti kudus enggau di mua Anak Domba. Lalu asap ari api ti dikena merinsaka sida deka pansut ke atas belama-lama iya, lalu sida enda ulih belelak siang malam, iya nya sida ke nyembah jelu nya enggau nyembah anak patung iya, lalu nerima tanda nama iya.” Tu begunaka ati ti tan ari bala nembiak Tuhan, iya nya sida ke ngasika pesan Allah Taala, sereta tetap ati arapka Jesus. Aku lalu ninga nyawa bejaku ari serega, ku iya, “Tuliska tu: belabuh ari diatu, beberekat meh orang ke mati dalam Tuhan!” “Sigi amat beberekat,” ku Roh Allah Taala nyaut, “ngambika sida belelak ari pengawa sida, laban utai ti udah dikereja sida, nitihka sida.” Udah nya aku malik, lalu tepedaka siti remang ti burak, lalu duduk ba atas remang nya bisi siku orang ke baka gamal Anak Mensia. Ba pala iya bisi makota emas, lalu ba jari iya bisi siti bikung ti tajam. Siku melikat pansut ari Rumah Sembiang, lalu ngangau enggau nyawa ti inggar ngagai iya ke duduk ba atas remang, “Biauka bikung nuan, lalu ngetau, laban maya ngetau udah datai, laban dunya udah mansau!” Iya ke duduk ba atas remang nya lalu miauka bikung iya ngagai dunya, lalu dunya diketau. Udah nya siku agi melikat pansut ari Rumah Sembiang di serega, lalu iya mega bisi bikung ti tajam. Udah nya siku agi melikat pansut ari alta. Melikat tu bekuasa atas api, lalu iya ngangau enggau nyawa ti inggar ngagai melikat ke bisi bikung ti tajam nya, ku iya, “Biauka bikung nuan, lalu ketau tangkai buah anggur dunya, laban buah anggur udah mansau!” Melikat nya lalu miauka bikung iya ngagai dunya, lalu ngetau buah anggur ari dunya, lalu nibarka buah anggur nya ngagai pitan pengeringat Allah Taala. Buah anggur nya lalu diindik ari luar nengeri. Darah lalu pansut ari pitan anggur nya lalu rarat 300 kilometer, enggau kira 2 meter penalam. Udah nya aku tepedaka siti agi tanda di langit, tanda ti besai sereta manah, iya nya tujuh iku melikat ke mai tujuh bengkah penusah, iya nya penusah ti penudi, laban udah bekau penusah tu nyadi, Allah Taala badu agi ringat. Aku lalu tepedaka utai ti baka tasik cheremin ti bechampur enggau api, enggau orang ke udah ngalahka jelu enggau anak patung iya, enggau lumur nama iya, bediri ba tebing tasik cheremin nya, megai belikan Allah Taala ba jari sida. Lalu sida bepantun ngena lagu Moses, ulun Allah Taala ti kudus, enggau lagu Anak Domba, ku sida, “Naka meh pemesai enggau pemanah kereja Nuan, O Tuhan Allah Taala ti Pemadu Bekuasa! Jalai Nuan endang lurus sereta betul, O Raja ke belama-lama iya! Sapa enda nangi lalu muji nama Nuan, O Tuhan? Laban semina Nuan siku aja ti kudus. Semua bansa deka datai lalu nyembah Nuan, laban ukum ti diberi Nuan udah dipandangka.” Udah nya aku malik, lalu tepedaka langkau sembiang ti dalam Rumah Sembiang di serega tebuka, lalu tujuh iku melikat, ke mai tujuh bengkah penusah ti besai, pansut ari Rumah Sembiang nya. Sida bepekayan ngena kain linin ti beperenching, lalu dada sida dibelit ngena selampai emas. Siku ari empat iku utai ti idup nya lalu meri ngagai tujuh iku melikat nya tujuh igi mangkuk emas ti penuh laban pengeringat Allah Taala ti idup belama-lama iya. Rumah Sembiang nya lalu penuh laban asap ti pansut ari mulia enggau ari kuasa Allah Taala, lalu nadai orang ulih tama ngagai Rumah Sembiang nya sebedau penusah besai tujuh bengkah ti dibai tujuh iku melikat nya, abis. Udah nya aku ninga nyawa ti inggar bejaku ari Rumah Sembiang nya ngagai melikat ke tujuh iku nya, “Mupuk meh kita lalu tuang tujuh igi mangkuk pengeringat Allah Taala nya ngagai dunya!” Melikat ti keterubah lalu mupuk, lalu nuang mangkuk iya ngagai dunya. Penyakit rumbak ti balat sereta bebau lalu pegari ba orang ke bisi kelai jelu, ti nyembah anak patung jelu nya. Udah nya melikat ti kedua lalu nuang mangkuk iya ngagai tasik. Ai tasik lalu bebali nyadi baka darah orang ke mati, lalu semua utai ti idup dalam tasik nya, mati magang. Udah nya melikat ti ketiga nuang mangkuk iya ngagai sungai, enggau ngagai mata ai, lalu ai sungai enggau mata ai bebali nyadi darah. Aku lalu ninga melikat ke ngibun ai bejaku, “Ukum ti diberi Nuan endang lurus, O Allah Taala ti Kudus, Nuan ke diatu enggau ti udah! Laban mensia udah munuh bala nembiak Tuhan enggau sida nabi, lalu diatu Nuan udah meri sida darah ke diirup sida. Sida endang patut ngirup nya!” Aku lalu ninga nyawa bejaku ari alta, “Sigi amat, Tuhan Allah Taala ti Pemadu Bekuasa! Ukum ti diberi Nuan endang bendar sereta lurus!” Udah nya melikat ti keempat nuang mangkuk iya ngagai mata hari, lalu mata hari dikemendarka nganguska mensia ngena api. Mensia lalu angus laban pengangat ti balat, lalu sida nyumpah nama Allah Taala ti bisi kuasa atas semua penusah ti besai nya, tang sida enggai nesal ati ke dosa sida, sereta enggai ngemuliaka Iya. Melikat ti kelima lalu nuang mangkuk iya ngagai kerusi diraja jelu nya, lalu semua perintah jelu nya dibalut pemetang. Orang nyau ngigit dilah diri laban balat tusah, lalu nyumpah Allah Taala ti di serega ketegal pemedis enggau rumbak sida. Tang sida enggai nesal ati ke utai ti udah dikereja sida. Melikat ti keenam lalu nuang mangkuk iya ba Sungai Eupratis. Sungai nya lalu rangkai, nyendiaka jalai ti deka ditengah bala raja ke datai ari timur. Aku lalu tepedaka tiga iku roh ti kamah, ti baka gamal engkatak, pansut ari nyawa naga nya, enggau ari nyawa jelu nya, enggau ari nyawa nabi ti pelesu nya. Sida nya roh antu ti ngereja kereja ajih, ke bejalai ngagai semua raja di dunya tu, lalu ngempuruka sida beperang lebuh Hari Besai Allah Taala ti Pemadu Bekuasa. “Peda nuan, Aku datai baka penchuri! Beberekat meh orang ke dani, ke mengkang ngena gari diri, ngambika iya enda bejalai telanjai ngayanka tubuh diri!” Sida roh antu nya lalu ngempuruka bala raja nya ba siti endur ti dikumbai Armagedon dalam Hebrew. Melikat ti ketujuh lalu nuang mangkuk iya ngagai angin, lalu nyawa ti inggar bejaku ari kerusi diraja ti dalam Rumah Sembiang nya, ku iya, “Udah tembu!” Kilat lalu nyelar, guntur meletup lalu beguru, tanah balat amat berenyang. Nadai tanah udah kala ngemalat nya berenyang kenyau ari mensia terubah diau di dunya tu. Nengeri ti besai nya lalu pechah tiga, lalu semua nengeri dalam semua menua runtuh magang, lalu Allah Taala ingatka Babilon ti besai, lalu mejalka nengeri nya ngirup ari mangkuk pengeringat Allah Taala. Semua pulau di tasik rari magang, lalu semua bukit nadai agi ditemu. Tekang ujan batu ti besai, pemerat sigi-sigi kira 50 kilogram, labuh ari langit lalu ninggang mensia. Mensia lalu nyumpah Allah Taala ketegal penusah laban ujan batu nya, laban ujan batu nya amat balat. Udah nya siku ari tujuh iku melikat ke bisi tujuh igi mangkuk nya datai, lalu bejaku ngagai aku, “Aram tua mupuk. Aku deka nunjuk ke nuan jalai indu sundal ti tebilang nya deka diukum, iya ke duduk atas mayuh bengkah sungai, ti udah bambai enggau bala raja dunya, ti udah mabuk bambai enggau iya.” Melikat nya lalu mai aku dalam roh ngagai menua puang, lalu aku tepedaka siku indu duduk ba atas jelu ti mirah-redam, ti penuh laban nama ti mechat Allah Taala. Jelu nya bisi tujuh igi pala, enggau sepuluh iti tanduk. Indu nya bepekayan ngena gari ti ungu enggau mirah-redam, lalu diias ngena perengka emas, batu ti berega enggau batu mutiara. Iya megai sigi mangkuk emas ti penuh laban utai ti jai sereta kamah, ti datai ari kereja iya ti bambai; lalu ba kening iya bisi dituliska siti nama ti misteri: “Babilon ti Besai, indai ke semua indu sundal, enggau ke semua utai ti jai di dunya tu.” Aku lalu meda indu nya mabuk laban darah bala nembiak Tuhan, enggau laban darah orang ke dibunuh ketegal sida udah taluk ke Jesus. Lebuh aku meda iya, aku balat alit ati. Tang ku melikat nya bejaku ngagai aku, “Nama kebuah nuan balat alit ati baka nya? Aku deka madahka ngagai nuan misteri pasal indu enggau pasal jelu ti bisi tujuh igi pala enggau sepuluh iti tanduk, ti ditepan iya. Jelu ti dipeda nuan nya endang idup dulu menya, tang iya enda agi idup diatu. Iya baru deka niki ari lubang kebung ti dalam, lalu iya deka dirusak. Semua orang ke diau di dunya, ke apin bisi nama ditulis dalam bup pengidup kenyau ari penumbuh dunya, deka balat alit ati lebuh sida meda jelu nya, laban dulu menya iya idup, tang diatu iya enda agi idup, lalu iya deka pegari baru. Tu begunaka penemu-dalam enggau pemintar: tujuh igi pala nya tujuh igi bukit, ti alai indu nya duduk. Sida nya mega tujuh iku raja. Lima ari sida nya udah alah, siku agi merintah, lalu siku ti bukai apin datai, lalu lebuh iya datai ila, iya enda tau enda merintah enda lama. Nyadi pasal jelu ti udah idup dulu menya, tang enda agi idup diatu, nya raja ti kelapan, tang iya nya siku ari sida ke tujuh iku nya, lalu iya deka dirusak. Lalu sepuluh iti tanduk ti dipeda nuan, nya sepuluh iku raja ke apin berengkah merintah, tang sida deka diberi kuasa merintah nyadi raja sejam aja, sama enggau jelu nya. Sida ke sepuluh iku nya endang seati enggau pangan diri, lalu sida meri pengering enggau kuasa sida ngagai jelu nya. Sida deka beperang ngelaban Anak Domba, lalu Anak Domba deka ngalahka sida, laban Iya Tuhan ari atas semua tuhan, Raja ari atas semua raja, lalu orang ke enggau Iya endang udah dikangauka lalu dipilih sereta tetap ati.” Lalu ku melikat nya madah ngagai aku, “Sungai ti dipeda nuan nya, ti alai indu sundal nya duduk, nya mayuh bengkah menua, mensia, bansa, enggau jaku. Lalu sepuluh iti tanduk ti dipeda nuan nya, enggau jelu nya, deka begedika indu sundal nya. Sida deka ngerampas semua utai iya, lalu nelanjaika iya, lalu makai isi iya, lalu nunu iya, laban Allah Taala udah ngasuh sida raja nya seati ngereja juluk ati Iya, lalu berunding deka nyerahka kuasa diraja sida ngagai jelu nya, nyentuk ngagai maya jaku Allah Taala dikamatka. Indu ke dipeda nuan nya, nya meh nengeri ti besai ti merintah bala raja di dunya tu.” Udah nya aku tepedaka siku agi melikat nurun ari serega. Kuasa iya besai, lalu dunya nyau tampak terang laban mulia iya. Lalu iya ngangau enggau nyawa ti inggar, “Udah alah! Babilon ti besai udah alah! Iya udah nyadika endur alai antu diau, nyadika endur alai roh ti kamah, nyadika endur alai semua burung ti kamah sereta dipegedika, diau. Laban semua bansa bela udah ngirup wain pengingin iya ti kamah, lalu sida raja dunya tu udah bambai enggau iya, lalu bala sedagar dunya nyadi kaya laban pengaya ti datai ari pengamah ulah iya.” Udah nya aku ninga siti agi nyawa bejaku ari serega, “Pansut ari iya, kita ke nembiak Aku, enggai ke kita bedosa enggau iya, enggai ke kita sama enggau iya natka penusah ti besai; laban dosa iya nyau betugung ngeninggi langit, lalu Allah Taala udah ngingatka penyai iya. Kereja ngagai iya baka ke udah dikereja iya ngagai kita. Bayar iya dua kali lipat ke semua utai ti udah dikereja iya. Iri mangkuk iya enggau ai ti dua kali bisa agi ari ai ti udah disediaka iya ke kita. Baka iya ti udah ngemuliaka diri empu sereta nyamai diau, baka nya meh beri ngagai iya pemerinsa enggau ati ti tusah. Laban iya udah bejaku dalam ati diri, ‘Aku duduk ditu nyadi kuin! Aku ukai indu ke balu. Aku enda tusah ati,’ baka nya meh penusah ti besai deka nuntung iya dalam sehari aja, penyakit, ati ti tusah, enggau lapar pungkang, lalu iya deka ditunu ngena api, laban Tuhan Allah Taala, ke ngakim iya, endang bekuasa.” Lalu bala raja dunya ti bambai enggau iya, lalu ngereja ulah ti kamah enggau iya, deka bekeduie nyabakka iya, lebuh sida meda asap pansut ari api ti nganguska iya. Sida deka bediri ari jauh, laban sida takut meda pemerinsa iya. Ku sida, “Naka meh pemalat penusah nuan! Naka meh pemalat penusah nuan nengeri Babilon ti besai, nuan nengeri ti kering, Babilon! Dalam sejam aja ukum nuan datai.” Bala sedagar dunya mega nyabak sereta ngulitka iya, laban nadai orang agi meli barang sida, barang ti digaga ari emas, pirak, batu ti berega, batu mutiara, barang ti digaga ari linin, kain ungu, sutera, kain ti mirah-redam, semua macham kayu ti jarang dipeda, enggau semua macham utai ti digaga ari gading, enggau ari kayu ti berega, utai ti digaga ari temaga, ari besi enggau ari batu burak, kulit kayu manis, rempah, menyan, mur, enggau minyak tata ti berega, wain enggau minyak, tepung enggau gandum, jelu sapi enggau jelu bedus, kuda enggau kerita kuda, enggau ulun, iya nya semengat mensia. Ku bala sedagar nya bejaku ngagai iya, “Semua utai ti manah ti dikinginka nuan, udah lesap magang, lalu semua pengaya enggau pemajik nuan udah lenyau magang, lalu nadai ditemu agi!” Bala orang sedagar, ti nyadi kaya bedagang dalam nengeri nya, deka bediri ari jauh, laban sida takut meda pemerinsa iya, lalu sida deka bekeduie nyabak sereta ngulit. Ku sida, “Naka meh pemalat penusah nya! Naka meh pemalat penusah nengeri ti besai nya ti ngena kain linin, kain ungu, kain ti mirah-redam, ti diias ngena perengka emas, batu ti berega enggau batu mutiara! Lalu dalam sejam aja semua pengaya iya abis dirusak.” Lalu semua juragan kapal, orang tambang ke belayar ngena kapal, kelasi, enggau semua orang ke bedagang di tasik, bediri ari jauh, lalu nyerauh lebuh sida meda asap ti pansut ari api ti nganguska iya. Ku sida, “Kati nengeri bukai bisi udah baka nengeri ti besai nya?” Sida lalu ngerabu pala diri enggau amau, duie-duie nyabak sereta ngulit. Ku sida, “Naka meh pemalat penusah nya! Naka meh pemalat penusah nengeri ti besai nya, alai semua orang ke bisi kapal ti belayar di tasik, nyadi kaya laban pengaya iya! Lalu dalam sejam aja semua utai iya abis dirusak! Rami gaga ati meh nuan ke iya, O serega, kita nembiak Tuhan, enggau kita rasul enggau kita nabi, laban Allah Taala udah ngukum iya ke kita!” Udah nya, siku melikat ti kering lalu ngambi sigi batu ti mesai batu kisar, lalu nikauka batu nya ngagai tasik. Ku iya, “Baka tu ku pemalat nengeri Babilon ti besai nya deka ditikau ke baruh, lalu nadai ditemu agi; Munyi belikan enggau munyi nyawa orang ke belagu, munyi nyawa orang ke nebah kesuling enggau terumpit, nadai agi didinga dalam nuan; lalu orang ke landik begagaka utai nadai agi ditemu dalam nuan; Lalu munyi batu kisar nadai agi didinga dalam nuan; Penampak lampu nadai agi manchar dalam nuan; Lalu munyi nyawa indu enggau nyawa lelaki ke ditikah nadai agi didinga dalam nuan; Laban bala sedagar nuan endang orang ke pemadu bekuasa dalam dunya, lalu semua bansa udah ditipu kereja keramat nuan. Darah sida nabi, darah nembiak Tuhan, enggau darah semua orang ke udah dibunuh di dunya, ditemu magang dalam nengeri nya.” Udah nya aku lalu ninga utai ti munyi nyawa bala mayuh di serega. Ku sida, “Aliluya! Pengelepas, mulia enggau kuasa endang enggi Allah Taala kitai, laban Iya ngakim ngena pemendar enggau pengelurus! Iya udah ngukum indu sundal nya ti udah ngamahka dunya ngena pengawa iya ti bambai, lalu Allah Taala udah malas iya laban iya udah munuh bala nembiak Allah Taala.” Sida lalu manjung baru, “Aliluya! Asap ari api ti nganguska nengeri ti besai nya deka niki ke atas belama-lama iya!” Bala tuai ti dua puluh empat iku nya, enggau empat iku utai ti idup lalu nyungkurka diri nyembah Allah Taala, ke duduk ba kerusi diraja nya. Ku sida, “Amin! Aliluya!” Lalu ari kerusi diraja nya pansut munyi siti nyawa. Ku iya, “Beri puji ngagai Allah Taala, semua kita ke nembiak Iya, kita ke nangika Iya, ke besai enggau ke mit.” Udah nya aku lalu ninga utai ti munyi nyawa bala mayuh, munyi guru ai wung, enggau munyi letup guntur. Ku sida, “Aliluya! Laban Tuhan kitai, Allah Taala ti Pemadu Bekuasa, endang merintah. Aram kitai rami gaga ati sereta lantang ngemesaika nama Iya, Laban gawai tikah Anak Domba udah datai lalu tunang Iya udah nyendiaka diri. Tunang Iya udah diberi kain linin ti tuchi ti beperenching nyadika pekayan iya.” (Kain linin nya pengawa ti lurus ti dikereja bala nembiak Tuhan.) Melikat nya lalu bejaku ngagai aku, “Tuliska tu: Beberekat meh orang ke udah diambi ngabang ngagai gawai tikah Anak Domba.” Lalu ku iya bejaku ngagai aku, “Tu jaku ti bendar ari Allah Taala.” Aku lalu nyungkurka diri di kaki iya, deka nyembah iya, tang ku iya bejaku ngagai aku, “Anang nyembah aku! Aku tu pen ulun baka nuan, baka semua orang bukai ke arapka pemendar ti dipandangka Jesus. Sembah Allah Taala!” Laban pemendar ti dipandangka Jesus nya roh ti benabi. Udah nya aku meda serega tebuka. Siku kuda ti burak lalu pegari. Orang ke nepan iya nya benama Tetap Ati Sereta Bendar. Iya ngakim tauka beperang ngena pengelurus. Mata Iya baka daun api, lalu ba pala Iya mayuh bengkah makota. Lalu Iya bisi nama ti ditulis ba Iya, ti enda ditemu orang, tang semina ditemu Iya Empu aja. Baju panjai Iya udah disepuhka ngagai darah. Nama Iya “Jaku Allah Taala.” Lalu bala soldadu serega, ke bepekayan ngena kain linin ti burak sereta tuchi, nitihka Iya, nepan kuda ti burak. Ari nyawa Iya pansut siti pedang ti tajam, ti dikena Iya ngalahka semua bansa, lalu Iya deka merintah sida ngena sebatang besi. Iya deka ngindik buah anggur dalam pitan pengeringat Allah Taala ti pemadu Bekuasa. Ba baju panjai Iya enggau ba pah Iya bisi dituliska nama tu, “Raja ke semua raja, enggau Tuhan ke semua tuhan.” Udah nya aku tepedaka siku melikat bediri atas mata hari. Iya ngangau enggau nyawa ti inggar ngagai semua burung ti terebai ba tengan langit, “Datai lalu begempuru ngagai pengerami makai besai Allah Taala. Datai meh kita lalu empa meh isi bala raja, isi bala tuai soldadu, isi bala orang ke bekuasa, isi kuda enggau isi orang ke nepan kuda, enggau isi semua mensia ti ulun enggau ti ukai ulun, ke besai enggau ke mit!” Udah nya aku tepedaka jelu nya enggau bala raja dunya, enggau bala soldadu sida begempuru deka beperang ngelaban Iya ke nepan kuda nya, enggau ngelaban bala soldadu Iya. Jelu nya lalu ditangkap, sama enggau nabi ti pelesu nya, ti udah ngereja kereja ajih di mua jelu nya kena iya nipu orang ke bisi kelai jelu nya, enggau orang ke udah nyembah anak patung jelu nya. Jelu nya enggau nabi ti pelesu nya lalu dibuai idup-idup ngagai danau api ti mau laban merirang. Sida ke bukai dibunuh ngena pedang ti pansut ari nyawa Iya ke nepan kuda nya, lalu semua burung bebendar amat makai isi sida. Udah nya aku tepedaka siku melikat nurun ari serega, megai kunchi lubang kebung ti nadai buntut nya, enggau siti rantai ti besai. Iya lalu nangkap naga nya, iya nya ular ti tuai nya, iya nya Antu tauka Sitan, lalu nanchang iya seribu taun. Melikat nya lalu nikauka iya ngagai lubang kebung nya, ngunchi pintu lubang kebung nya, lalu nanggam pintu nya, ngambika iya enda agi nipu mensia, datai ke pengujung seribu taun nya. Udah nya iya enda tau enda dilepaska enda lama. Udah nya aku tepedaka mayuh kerusi diraja, lalu duduk ba kerusi diraja nya bala orang ke udah diberi kuasa ngakim. Aku mega tepedaka semengat orang ke udah dipumpung pala ketegal sida udah besaksika pasal Jesus, sereta udah madahka jaku Allah Taala, orang ke nadai udah nyembah jelu nya tauka nyembah anak patung iya, sereta nadai udah nerima kelai jelu nya ba kening tauka ba jari sida. Sida angkat idup baru lalu merintah enggau Kristus seribu taun. Orang bukai ke udah mati, enda angkat idup baru, datai ke seribu taun nya udah abis. Tu pengangkat ari mati ti keterubah. Beberekat sereta kudus meh orang ke diangkatka ari mati ti keterubah tu! Pemati ti kedua nadai kuasa atas sida, tang sida deka nyadi imam Allah Taala, enggau imam Kristus, lalu sida deka merintah enggau Iya seribu taun. Ba pengujung seribu taun nya, Sitan deka dilepaska ari rumah jil iya, lalu iya deka pansut lalu nipu semua bansa ba empat iti sukut dunya, iya nya, Gok enggau Magok, ngempuru lalu nyendiaka sida beperang. Pemayuh sida nya nyau ngemayuh igi pasir ti ba tebing tasik. Sida lalu bejalai ngagai semua endur di serata dunya, lalu ngelulung kem bala nembiak Tuhan, enggau nengeri ti dikerinduka Allah Taala. Tang api nurun ari serega, lalu ngerusak sida. Sitan ti udah nipu sida lalu ditikauka ngagai danau api enggau merirang, alai jelu enggau nabi ti pelesu nya udah dibuai, lalu sida deka diperinsaka siang malam belama-lama iya. Udah nya aku tepedaka siti kerusi diraja ti besai sereta burak, enggau siku orang ke duduk ba kerusi diraja nya. Dunya enggau langit rari ari Iya, lalu nadai ditemu agi. Aku lalu tepedaka orang ke udah mati, ke besai enggau ke mit, bediri di mua kerusi diraja nya, lalu mayuh bengkah bup dibuka. Siti agi bup dibuka, iya nya bup pengidup. Lalu orang ke udah mati diakim nitihka utai ti udah dikereja sida, munyi ti ditulis dalam bup nya. Tasik lalu nyerahka orang ke mati dalam iya. Pemati enggau Dunya pemati nyerahka orang ke mati dalam seduai iya, lalu semua orang nya diakim nitihka utai ti udah dikereja sida. Udah nya Pemati enggau Dunya pemati dibuai ngagai danau api. Danau api nya pemati ti kedua. Orang ke nadai nama ditulis dalam bup pengidup, dibuai ngagai danau api nya. Udah nya aku tepedaka langit ti baru enggau dunya ti baru; laban langit ti dulu enggau dunya ti dulu udah lesap, lalu tasik nadai agi. Aku lalu tepedaka nengeri ti kudus, iya nya Jerusalem ti baru, nurun ari serega, ari Allah Taala, dikemas baka indu ke deka ditikah enggau laki iya; aku lalu ninga nyawa ti inggar bejaku ari kerusi diraja nya, “Diatu Allah Taala deka diau enggau nembiak Iya! Iya deka diau enggau sida, lalu sida deka nyadika nembiak Iya, lalu Allah Taala Empu deka begulai enggau sida, lalu nyadi Allah Taala sida. Iya deka ngendas semua ai mata ari mata sida, lalu pemati nadai agi, nadai agi ngulit, nadai agi nyabak, nadai agi pedis, laban utai ti lama nyau nadai agi.” Udah nya Iya ke duduk ba kerusi diraja bejaku, “Peda nuan, diatu Aku ngaga semua utai nyadi baru magang!” Iya mega bejaku ngagai aku, “Tuliska tu, laban leka jaku tu bendar sereta tau dikarapka.” Lalu ku Iya bejaku ngagai aku, “Udah tembu! Aku tu Pun enggau Pengujung. Ngagai orang ke aus, Aku deka meri sida ai ari mata ai pengidup nyadika pemeri. Orang ke menang deka nerima pesaka tu ari Aku, lalu Aku deka nyadi Allah Taala sida, lalu sida deka nyadi anak Aku. Tang orang ke penakut, ke aum juak, ke ngereja penyai, ke pemunuh, ke bambai, ke bemanang, ke nyembah engkeramba, enggau semua orang ke bula, endur alai sida nya danau api enggau merirang. Nya pemati ti kedua.” Siku ari tujuh iku melikat nya, ke bisi tujuh igi mangkuk ti penuh laban tujuh bengkah penusah besai ti penudi, datai lalu bejaku ngagai aku, “Datai kitu, laban aku deka nunjuk ke nuan Tunang, iya nya bini Anak Domba.” Melikat nya lalu mai aku dalam roh ngagai tuchung bukit sigi ti besai sereta tinggi, lalu mandangka ngagai aku nengeri Jerusalem ti kudus, ti nurun ari serega, ari Allah Taala, ti beperenching laban mulia Allah Taala, beperenching baka batu ti berega, baka batu asija, chiru baka batu kristal. Nengeri nya bisi dinding kuta ti besai sereta tinggi, enggau dua belas iti pintu, lalu ba genap iti pintu nya bisi siku melikat, lalu ba semua pintu kuta nya bisi dituliska nama dua belas raban bansa orang Israel; tiga iti pintu ba dinding kuta ti muak ke timur, tiga muak ke utara, tiga muak ke selatan, lalu tiga muak ke barat. Lalu dinding kuta nengeri nya didirika ba atas dua belas igi batu pemun, lalu ba dua belas igi batu pemun nya bisi dituliska nama dua belas iku rasul Anak Domba. Melikat ke bejaku ngagai aku bisi sebatang penyukat ti digaga ari emas, kena nyukat nengeri, pintu, enggau dinding kuta nengeri nya. Nengeri nya besegi empat. Buka iya sebaka enggau pemanjai iya. Melikat nya nyukat nengeri nya ngena penyukat nya. Pemanjai iya, buka iya sebaka enggau peninggi iya, iya nya dua ribu empat ratus kilometer. Melikat nya mega nyukat dinding nengeri nya, lalu penebal iya enam puluh meter, nitihka penyukat mensia ti dikena iya. Dinding nya digaga ari batu asija, lalu nengeri nya empu digaga ari emas ti tulin, ti senayau baka gelas. Batu pemun ke dinding nengeri nya dilagu ngena semua macham batu ti berega. Batu pemun ti keterubah nya batu asija, iya ti kedua batu nilam, ti ketiga batu sejabu, ti keempat batu samerut, ti kelima batu unam, ti keenam batu akek mirah, ti ketujuh batu ratna chempaka, ti kelapan batu pirus, ti kesemilan batu jakut kuning, ti kesepuluh batu akek gadung, ti kesebelas batu kuning, ti kedua belas batu kechubung. Lalu pintu ti dua belas iti nya digaga ari dua belas igi batu mutiara, siti-siti pintu digaga ari sigi batu mutiara, lalu jalai raya di nengeri nya digaga ari emas ti tulin, ti senayau baka gelas. Aku nadai meda Rumah Sembiang dalam nengeri nya, laban Tuhan Allah Taala ti Pemadu Bekuasa Empu enggau Anak Domba nyadika Rumah Sembiang dalam nengeri nya. Lalu nengeri nya enda begunaka mata hari tauka bulan manchar ngagai iya, laban mulia Allah Taala manchar ngagai iya, lalu Anak Domba nyadika lampu iya. Semua bansa deka bejalai dalam penampak nya, lalu bala raja dunya deka mai mulia sida ngagai nengeri nya, lalu pintu nengeri nya deka tebuka belama, laban dia nadai malam. Orang deka mai ngagai nengeri nya semua mulia enggau pengaya ari semua bansa. Tang nadai utai ti enda tuchi, tauka orang ke ngereja penyai, tauka orang ke bula, tau tama ngagai nengeri nya, tang semina orang ke bisi nama ditulis dalam bup pengidup Anak Domba. Udah nya melikat nya mandangka ngagai aku sungai ai pengidup, ti bekilat baka batu kristal, ti rarat ari kerusi diraja Allah Taala enggau ari kerusi diraja Anak Domba nengah tengah-tengah jalai raya nengeri nya. Ba tebing sungai nya ari sepiak-sepiak bisi kayu pengidup, ti bebuah dua belas kali setaun, sekali tiap-tiap bulan, lalu daun kayu nya dikena ngeraika bansa. Utai ti disumpah Allah Taala nadai ditemu dalam nengeri nya, tang kerusi diraja Allah Taala enggau kerusi diraja Anak Domba bisi di nengeri nya, lalu bala nembiak Iya deka nyembah Iya; lalu sida deka meda mua Iya, lalu nama Iya bisi ba kening sida. Malam nadai agi, lalu sida enda begunaka lampu tauka penampak mata hari, laban Tuhan Allah Taala Empu deka nyadika penampak sida, lalu sida deka merintah belama-lama iya. Lalu ku melikat nya bejaku ngagai aku, “Jaku tu amat, sereta tau dikarapka. Lalu Tuhan, Allah Taala ti meri roh benabi, udah ngirumka melikat Iya ngambika nunjukka ngagai bala nembiak Iya utai ti enda tau enda nyadi enda lama da agi.” “Dinga kita, Aku deka datai enda lama da agi. Beberekat meh orang ke ngasika jaku ti benabi dalam bup tu.” Aku, John, udah ninga sereta meda semua utai tu. Lalu lebuh aku ninga sereta meda sida, aku lalu nyungkurka diri nyembah melikat ke udah nunjukka utai nya ngagai aku. Tang ku iya bejaku ngagai aku, “Anang nyembah aku! Aku pen ulun baka nuan, baka bala nabi ke menyadi nuan, baka semua orang ke ngasika jaku ti dalam bup tu. Sembah Allah Taala!” Lalu ku iya bejaku ngagai aku, “Anang ngelalaika jaku ti benabi ti disebut dalam bup tu, laban maya nyau semak. Awakka orang ke ngereja penyai, majak ngereja penyai, lalu awakka orang ke kamah, majak ngereja ulah ti kamah, lalu orang ke lurus, majak ngereja pengelurus, lalu orang ke kudus, majak kudus.” “Dinga, Aku deka datai enda lama da agi, mai upah ngagai genap iku orang, kena mayar iya nitihka utai ti udah dikereja iya. Aku tu Alpa enggau Omega, Iya ti pemadu dulu enggau pengabis dudi, ti Pun enggau Pengujung.” Beberekat meh orang ke masu baju panjai sida, ngambika sida bulih hak makai buah ari kayu pengidup, lalu tau tama ngagai nengeri nya nengah pintu nengeri. Tang orang ke ngereja penyai, orang ke bemanang, ke bambai, ke pemunuh, ke nyembah engkeramba enggau semua orang ke bula, enda tau tama ngagai nengeri nya. “Aku, Jesus, udah ngasuh melikat Aku madahka utai tu ngagai kita ke dalam eklisia. Aku tu urat enggau peturun David, bintang pagi ti manchar terang.” Roh enggau Tunang lalu nyebut, “Datai kitu!” Lalu awakka semua orang ke ninga, nyebut, “Datai kitu!” Lalu awakka semua orang ke aus, datai. Awakka barang sapa deka, ngambi ai pengidup nyadika pemeri. Aku meri jaku tangkan ngagai semua orang ke ninga jaku ti benabi dalam bup tu: enti orang nambahka jaku ngagai jaku tu, Allah Taala deka nambahka ngagai sida semua penusah ti dipadahka dalam bup tu, lalu enti orang muai utai ari jaku ti benabi dalam bup tu, Allah Taala deka muai ungkup sida ari kayu pengidup, enggau ungkup sida ari Nengeri Ti Kudus, ti dipadahka dalam bup tu. Iya ke besaksika semua utai tu, nyebut, “Aku endang deka datai enda lama da agi!” Amin. Datai meh Nuan Tuhan Jesus! Awakka pengasih Tuhan Jesus Kristus meruan enggau semua nembiak Tuhan. Amin.