نەژادنامەیا عیسایێ مەسیح ، كوڕێ داوودی، كوڕێ ئیبراهیمی، ئەڤەیە:
ئیبراهیمی ئیسحاق ژێبوو، ئیسحاقی یەعقوب ژێبوو، یەعقوبی یەهودا و برایێن وی ژێبوون،
یەهودای پێرێز و زەراح ژ تامارێ بوون، پێرێزی حەسرۆن ژێبوو، حەسرۆنی ئارام ژێبوو،
ئارامی عەمیناداب ژێبوو، عەمینادابی نەحشۆن ژێبوو، نەحشۆنی سەلمۆن ژێبوو،
سەلمۆنی بۆعەز ژ راحابێ بوو، بۆعەزی عوڤێد ژ رائووتێ بوو، عوڤێدی یێشا ژێبوو
و یێشای داوود پاشا ژێبوو. داوودی سلێمان ژ ژنا ئوریای بوو،
سلێمانی رەحەڤعام ژێبوو، رەحەڤعامی ئەبیا ژێبوو، ئەبیای ئاساف ژێبوو،
ئاسافی یەهۆشافات ژێبوو، یەهۆشافاتی یەهۆرام ژێبوو، یەهۆرامی عوزیا ژێبوو،
عوزیای یۆتام ژێبوو، یۆتامی ئاحاز ژێبوو، ئاحازی حزقیا ژێبوو،
حزقیای مناشە ژێبوو، مناشەی ئامۆن ژێبوو، ئامۆنی یۆشیا ژێبوو
و یۆشیای یەهۆیاخین و برایێن وی د دەمێ راگوهاستنێ دا بۆ بابلێ ژێبوون.
پشتی راگوهاستنێ بۆ بابل: یەهۆیاخینی شەئەلتئێل ژێبوو، شەئەلتئێلی زەروبابل ژێبوو،
زەروبابلی ئەبیهود ژێبوو، ئەبیهودی ئێلیاقیم ژێبوو، ئێلیاقیمی عازور ژێبوو،
عازوری سادۆق ژێبوو، سادۆقی ئەخیم ژێبوو، ئەخیمی ئێلیهود ژێبوو،
ئێلیهودی ئێلعازار ژێبوو، ئێلعازاری مەتتان ژێبوو، مەتتانی یەعقوب ژێبوو
و یەعقوب بابێ یوسڤێ هەڤژینێ مەریەمێ بوو، ئەوا عیسایێ كو دبێژنێ مەسیح ژێبووی.
ئەڤجا ژمارەیا بەرەبابان ژ ئیبراهیمی هەتا داوودی چواردەنە و ژ داوودی هەتا راگوهاستنێ بۆ بابلێ چواردەنە و ژ راگوهاستنێ بۆ بابلێ هەتا مەسیحی چواردە بەرەبابن.
ژدایكبوونا عیسایێ مەسیح هۆسا بوو: دایكا وی مەریەم دەزگرا یوسڤی بوو. ژ بەری كو ئەو هەردوو بگەهنە ئێك، دەركەفت كو مەریەم ژ گیانێ پیرۆز یا ب دوو گیان كەفتی.
لێ چنكو یوسڤێ دەزگرێ وێ مرۆڤەكێ راستدار بوو و نەدڤیا وێ شەرمزار بكەت، ئینا بڕیار دا ب نەپەنی ڤە بەردەت.
لێ دەمێ هزر د ڤێ چەندێ دا دكر، وەسا چێبوو فریشتەیەكێ خودانی بۆ وی د خەونێ دا دیار بوو و گۆتێ: «یوسڤێ كوڕێ داوودی تۆ ژ هندێ نەترسە كو مەریەمێ وەكو هەڤژین بۆ خۆ ببەی، چنكو ئەوێ د زكێ وێ دا ژ گیانێ پیرۆزە.
دێ وێ كوڕەك بیت و تۆ دێ ناڤێ وی كەیە عیسا ، چنكو ئەو دێ گەلێ خۆ ژ گونەهێن وان قورتال كەت.»
ئەڤە هەمی هاتە رویدان، دا ئەوا خودانی ل سەر ئەزمانێ پێغەمبەری گۆتی، ب ج‍‌ھ بهێت:
«ئەڤە دێ كچا پاكیزە ب دووگیان كەڤیت و دێ كوڕەك بیت و دێ بێژنێ عەمانوئێل» و رامانا ڤی ناڤی ژی: «خودێ ل گەل مەیە.»
دەمێ یوسڤ ژ خەو رابووی، وی ئەو كر یا فریشتەیێ خودانی فەرمان لێ كری و مەریەم وەكو هەڤژین بۆ خۆ بر.
لێ ئەو نەچوو د ناڤ نڤینێن وێ دا هەتا كوڕەك بووی و ناڤێ وی كرە عیسا.
پشتی عیسا ل بێت‌لەحم، ل دەڤەرا یەهودیایێ ل سەردەمێ هێرودێسێ پاشا، ژ دایك بووی، وەسا چێبوو هندەك موغ ژ لایێ رۆژهەلاتێ ڤە هاتنە ئورشەلیمێ
و پرسیار كرن: «كانێ ئەوێ ژ دایك بووی كو پاشایێ جوهیانە؟ چنكو مە ستێرا وی ل رۆژهەلاتێ دیتیە، ئەڤجا ئەم یێن هاتین بۆ وی سوجدێ ببەین.»
دەمێ هێرودێس پاشای ئەڤە بهیستی، ئەو و هەمی خەلكێ ئورشەلیمێ تێك چوون.
ئینا وی هەمی سەرۆكێن كاهنان ل گەل مامۆستایێن دەستووری یێن جوهیان كۆم كرن و ژێ پرسی: «مەسیح دێ ل كیرێ ژ دایك بیت؟»
ئینا وان گۆتە وی: «ل بێت‌لەحما یەهودیایێ، چنكو هۆسا ل سەر ئەزمانێ پێغەمبەری یا هاتیە نڤیسین:
‹لێ تۆ، هەی بێت‌لەحما ل ئەردێ یەهودای، قەت د ناڤ سەروەرێن یەهودای دا نە یا كێمترینی، چنكو دێ ژ ناڤ تە سەروەرەك دەركەڤیت، دێ شڤانیێ ل گەلێ من ئیسرائیلێ كەت.›»
پاشی هێرودێسی ب نهێنی ڤە گازی كرە موغان و دەمێ دیاربوونا ستێرێ ژ وان پرسی.
پاشی هنارتنە بێت‌لەحم و گۆت: «هەڕن و باش ل زاڕۆكی بگەڕن و دەمێ هوین دبینن بێژنە من، دا ئەز ژی بهێم و سوجدێ بۆ ببەم.»
پشتی وان ئاخفتنا پاشای بهیستی، ب رێ كەفتن، پاشی وەسا چێبوو ئەو ستێرا كو بەری هنگی وان ل رۆژهەلاتێ دیتی، ل پێشیا وان دچوو، هەتا ل هنداڤ وی جهی راوەستیای یێ زاڕۆك لێ.
دەمێ وان ستێر دیتی، كەیفخۆشیەكا گەلەك مەزن بۆ وان چێبوو.
دەمێ ب ژۆر كەفتینە مالێ، وان زاڕۆك ل گەل مەریەما دایكا وی دیت. ئینا چوك ڤەدان و سوجدە بۆ وی بر، پاشی سندوقێن خۆ ڤەكرن و خەلاتێن زێڕی و بخویر و موڕ پێشكێشی وی كرن.
ئەو د رێكەكا دی را بەرەڤ وەڵاتێ خۆ ڤەگەڕیانەڤە، ژ بەر كو د خەونێ دا هاتنە ئاگەهدار كرن كو نەزڤڕنەڤە نك هێرودێسی.
دەمێ موغ چووین، وەسا چێبوو فریشتەیەكێ خودانی د خەونێ دا بۆ یوسڤی دیار بوو و گۆتێ: «رابە، زاڕۆكی و دایكا وی بڕەڤینە مسرێ و ل وێرێ بمینە هەتا ئەز دبێژمە تە، چنكو هێرودێسی ل بەرە ل زاڕۆكی بگەڕیێت، دا وی بكوژیت.»
ئەڤجا یوسڤ د وێ شەڤێ دا رابوو و زاڕۆك و دایكا وی بەرەڤ مسرێ ڤە برن
و هەتا مرنا هێرودێسی ل وێرێ ما. ئەڤ چەندە چێبوو دا ئەوا خودانی ل سەر ئەزمانێ پێغەمبەری گۆتی، ب ج‍‌ھ بهێت: «من كوڕێ خۆ ژ مسرێ گازی كر.»
دەمێ هێرودێسی زانی موغان رێز لێ نەگرت، گەلەك تۆڕە بوو. سەرباز هنارتن و هەمی كوڕكێن بێت‌لەحم و دەوروبەرێن وێ، ئەوێن ژ دوو ساڵیێ بچویكتر كوشتن، ل دویڤ وی دەمی یێ ژ موغان زانی.
هنگی ئەوا ل سەر ئەزمانێ یەرمیا پێغەمبەری هاتیە گۆتن، ب ج‍‌ھ هات، ئەوا دبێژیت:
«دەنگەك ل رامە هاتە بهیستن، گری و نالینەكا دژوار! راحێل بۆ كوڕێن خۆ دكەتە گری و رازی نابیت دلێ وێ بهێتە خۆشكرن، چنكو ئەو نەماینە.»
پشتی هێرودێس مری، وەسا چێبوو فریشتەیەكێ خودانی ل مسرێ د خەونەكێ دا بۆ یوسڤی دیار بوو
و گۆتێ: «رابە زاڕۆكی و دایكا وی ببە و هەڕە ئەردێ ئیسرائیلێ، چنكو ئەوێن ل كوشتنا زاڕۆكی دگەڕیان، یێن مرین!»
ئەڤجا رابوو زاڕۆك و دایكا وی برن و چوو د ئەردێ ئیسرائیلێ دا.
لێ دەمێ گو‍‌ھ لێ بووی كو ئەرخیلاووس ل شوینا بابێ خۆ هێرودێسی یێ دەستهەلاتێ ل سەر دەڤەرا یەهودیایێ دكەت، ترسیا بچیتە وێرێ. هنگی د خەونێ دا هاتە ئاگەهدار كرن، ئەڤجا قەستا دەڤەرا جەلیل كر.
هات و ل باژێڕێ دگۆتنێ ‹ناسیرە› خۆج‍‌ھ بوو. ئەڤ چەندە چێبوو، دا ئەوا ل سەر ئەزمانێ پێغەمبەران هاتیە گۆتن، ب ج‍‌ھ بهێت: «دێ بێژنێ یێ ناسیرەیی.»
د وان رۆژان دا، یوحەننایێ تافیركەر ل چۆلێ یەهودیایێ دیار بوو، ئەوی رادگەهاند
و دگۆت: «ل خۆ بزڤڕن، چنكو پاشایەتیا ئەسمانان یا نێزیك بووی.»
یوحەننا ئەوە یێ ئیشایا پێغەمبەری بەحسێ وی كری و گۆتی: «دەنگەك ل چۆلی گازی دكەت: ‹رێكێ بۆ خودانی ئامادە بكەن، پەیادەڕێیان بۆ هاتنا وی راست بكەن.›»
یوحەننای جلكەكێ ژ پویرتێ حێشتران دكرە بەر خۆ و ناڤتەنگا خۆ ب قایشەكا كەڤلی گرێ ددا و خوارنا وی كولی و هنگڤینێ چۆلی بوون.
هنگی خەلكێ ئورشەلیمێ و هەمی دەڤەرا یەهودیایێ و هەمی دەوروبەرێن رویبارێ ئوردن دەردكەفتن و بەرەڤ وی دچوون
و دانپێدان ب گونەهێن خۆ دكر و ل سەر دەستێ وی د رویبارێ ئوردن دا دهاتنە تافیركرن.
دەمێ یوحەننای دیتی گەلەك ژ فەریسی و سەدوقیان یێ دهێنە نك وی دا بهێنە تافیركرن، گۆتە وان: «هەی تێژكێن ماران، كێ هوین ئاگەهدار كرینە ژ تۆڕەبوونا بهێت بڕەڤن؟
بەرهەمەكێ وەسا بدەن كو هەژی لخۆزڤڕینێ بیت
و د دلێ خۆ دا نەبێژن: ‹ئیبراهیم بابێ مەیە›، چنكو ئەز دبێژمە هەوە كو خودێ دشێت ژ ڤان بەران زاڕۆكان بۆ ئیبراهیمی دەربئێخیت.
ئەڤە دەڤێ بڤری یێ ل سەر رەها دارێ هاتیە دانان. ئەڤجا هەر دارەكا بەرهەمەكێ باش نەدەت، دێ هێتە بڕین و بۆ ناڤ ئاگری هێتە هاڤێتن.
ژ بۆ لخۆزڤڕینێ ئەز هەوە ب ئاڤێ تافیر دكەم، لێ ئەوێ پشتی من دهێت ژ من ب هێزترە، ئەز نە یێ هەژی هەلگرتنا پێلاڤا ویمە. ئەو دێ هەوە ب گیانێ پیرۆز و ئاگری تافیر كەت.
ملهێبا وی یا د دەستی دا و دێ بێدەرا خۆ پاقژ كەت و گەنمێ خۆ د عومبارێ دا خڕڤە كەت، لێ كایێ دێ ب ئاگرەكێ ناڤەمریێت، سوژیت.»
هنگی عیسا ژ دەڤەرا جەلیل هاتە رویبارێ ئوردن و چوو نك یوحەننای، دا ل سەر دەستێ وی بهێتە تافیركرن.
لێ یوحەننا رازی نەبوو و گۆت: «ئەز یێ پێدڤیمە ل سەر دەستێ تە بهێمە تافیركرن و تۆ یێ دهێیە نك من؟!»
ئینا عیسای بەرسڤا وی دا و گۆتێ: «ڤێ گاڤێ رازی ببە! چنكو هۆسا باشە كو هەر تشتێ خودێ دڤێت ، ئەم وی ب ج‍‌ھ بینین.» وێ گاڤێ یوحەننا رازی بوو.
پشتی عیسا هاتیە تافیركرن، ئێكسەر ژ ئاڤێ دەركەفت و ژ نشكەكێ ڤە ئەسمان بۆ وی ڤەبوو و دیت گیانێ خودێ وەكو كووترەكێ هاتە خوار و ل سەر وی دادا
و دەنگەكی ژ ئەسمانان گۆت: «ئەڤەیە كوڕێ من یێ خۆشتڤی، ئەوێ دلێ من پێ خۆش بووی!»
پاشی گیانێ خودێ عیسا برە چۆلی، دا ژ لایێ ئبلیسی ڤە بهێتە تاقیكرن.
پشتی چل رۆژ و چل شەڤان ب رۆژی بووی، برسی بوو.
تاقیكەر هاتە نك وی و گۆتێ: «ئەگەر تۆ كوڕێ خودێی، بێژە ڤان بەران ببنە نان!»
عیسای بەرسڤ دا و گۆت: «یا هاتیە نڤیسین: ‹مرۆڤ نە ب تنێ ب نانی دژیت، لێ ب هەر پەیڤەكا ژ دەڤێ خودێ دەردكەڤیت.› »
پاشی ئبلیسی ئەو برە باژێڕێ پیرۆز و ل سەر لێڤا بانێ پەرستگەهێ راوەستاند
و گۆتێ: «ئەگەر تۆ كوڕێ خودێی، خۆ بهاڤێژە خوارێ، چنكو یا هاتیە نڤیسین: ‹ئەو دێ دەربارەی تە فەرمانێ ل فریشتەیێن خۆ كەت و دێ تە ل سەر دەستێن خۆ هەلگرن، نەكو پێیێ تە ب بەرەكی بكەڤیت›.»
عیسای گۆتێ: «هەروەسا یا هاتیە نڤیسین: ‹خودان خودایێ خۆ تاقی نەكە›!»
پاشی ئبلیسی ئەو برە سەرێ چیایەكێ گەلەك بلند و هەمی پاشایەتیێن جیهانێ و مەزناهیا وان نیشا دان
و گۆتێ: «ئەز دێ ڤان هەمیان دەمە تە، ئەگەر تۆ بۆ من چوك ڤەدەی و سوجدێ ببەی!»
ئینا عیسای گۆتێ: «هەڕە هەی ئبلیس! چنكو یا هاتیە نڤیسین: ‹بۆ خودان خودایێ خۆ سوجدێ ببە و وی ب تنێ بپەرێسە›.»
وی دەمی ئبلیسی ئەو هێلا و وەسا چێبوو فریشتە هاتنە نك و خزمەتا وی كر.
پشتی عیسای گو‍‌ھ لێ بووی كو یوحەننا یێ هاتیە گرتن، چوو جەلیل
و ناسیرە هێلا و بەرەڤ كەفەرناحوم چوو، ئەوا دكەڤیتە سەر لێڤا دەریاكێ، ل ناڤ سنوورێن زەبولون و نەفتالی و ل وێرێ ئاكنجی بوو.
ئەڤ چەندە چێبوو داكو ئەوا ب رێیا ئیشایا پێغەمبەری هاتیە گۆتن، ب ج‍‌ھ بهێت، دەمێ دبێژیت:
«ئەردێ زەبولون و ئەردێ نەفتالی، رێكا دەریایێ ل لایێ دی یێ رویبارێ ئوردن و دەڤەرا جەلیلا مللەتان،
ئەو خەلكێ د تاریاتیێ دا روینشتی، رۆناهیەكا مەزن دیت و ئەوێن ل دەڤەر و سیبەرا مرنێ دروینشتی، رۆناهیەك ب سەردا هەلات.»
ژ هنگی وەرە عیسای دەست ب راگەهاندنا مزگینیێ كر و دگۆت: «ل خۆ بزڤڕن، چنكو پاشایەتیا ئەسمانان یا نێزیك بووی.»
دەمێ عیسا ل بەر كنارێ دەریاكا جەلیل بڕێڤە دچوو، دوو برایێن ئێك دیتن، ئەو ژی شەمعون یێ دگۆتنێ پەترۆس و برایێ وی ئەندراوس بوون، یێ تۆڕێ دهاڤێژنە د دەریاكێ دا، چنكو ئەو ماسیگر بوون.
گۆتە وان: «ب دویڤ من بكەڤن، دێ هەوە كەمە نێچیرڤانێن مرۆڤان!»
ئێكسەر وان تۆڕێن خۆ هێلان و ب دویڤ وی كەفتن.
پاشی ژ وێرێ وێڤەتر چوو، دوو برایێن دی دیتن، ئەو ژی یەعقوبێ كوڕێ زەبەدی و یوحەننایێ برایێ وی بوون. د بەلەمێ دا ل گەل بابێ خۆ تۆڕێن خۆ دروست دكرن، ئینا گازی وان كر.
وان ئێكسەر بەلەم و بابێ خۆ هێلان و ب دویڤ وی كەفتن.
عیسا ل ناڤ هەمی دەڤەرا جەلیل دگەڕیا و فێركرن د ناڤ كنیشتەیێن وان دا دكر، مزگینیا پاشایەتیێ رادگەهاند و هەمی دەرد و نەخۆشیێن د ناڤ خەلكی دا ساخ دكرن.
ئەڤجا ناڤودەنگێن وی ل هەمی سوریێ بەڵاڤ بوو، ئەوان ژی هەمی نەخۆش ئینانە نك، یێن دەرد و ژانێن جۆراوجۆر لێ، یێن ئەجنەیان هنگافتی، یێن تەبۆیی و یێن فاڵنجیبووی. وی هەمی ساخ كرن
و جەماوەرێن مەزن ژ جەلیل و دێكاپۆلیس و ئورشەلیمێ و یەهودیایێ و لایێ دی یێ رویبارێ ئوردن ب دویڤ كەفتن.
دەمێ عیسای جەماوەرێ خڕڤەبووی دیتی، سەركەفتە چیای و روینشت. شاگردێن وی خۆ نێزیكی وی كر
و وی دەست ب فێركرنا وان كر و گۆت:
«خوزیكێن وان یێن ب گیانی د هەژار، چنكو پاشایەتیا ئەسمانان یا وانە.
خوزیكێن خەمباران، چنكو دێ هێنە دلشادكرن.
خوزیكێن دەروونبچویكان، چنكو ئەو دێ بنە میراتگرێن ئەردی.
خوزیكێن برسی و تێهنیێن راستداریێ، چنكو ئەو دێ هێنە تێركرن.
خوزیكێن دلۆڤانان، چنكو دێ دلۆڤانی پێ هێتە برن.
خوزیكێن دلپاقژان، چنكو ئەو دێ خودێ بینن.
خوزیكێن ئاشتیخوازان، چنكو دێ بێژنە وان كوڕێن خودێ.
خوزیكێن وان یێن ژ بەر راستداریێ تەپەسەر دبن، چنكو پاشایەتیا ئەسمانان یا وانە.
خوزیكێن هەوە، دەمێ ژ بەر من هەوە فهێت دكەن و تەپەسەر دكەن و ژ درەو ڤە هەمی جۆرێن پەیڤێن خراب دژی هەوە دبێژن.
دلخۆش و دلشاد ببن! ژ بەر كو خەلاتێ هەوە ل ئەسمانان یێ مەزنە، چنكو وان بەری هەوە پێغەمبەر ژی هۆسا تەپەسەر دكرن.
هوین خوێیا ئەردینە. لێ ئەگەر خوێ سویراتیا خۆ بەردا، دێ جارەكا دی ب چ هێتە سویركرن؟ ئێدی ب كێر چ ناهێت ژبلی كو بۆ ژ دەرڤە بهێتە هاڤێتن و مرۆڤ پێ لێ دانن.
هوین رۆناهیا جیهانێنە. ئەو باژێڕێ ل سەر چیای بیت ناهێتە ڤەشارتن،
هەروەسا كەس چرایەكی هەلناكەت و ل بن ئامانەكی بنخێڤیت، لێ ددانیتە سەر چرادانكێ، دا رۆناهیێ بدەتە هەمی كەسێن د مالێ ڤە.
بلا ب ڤی رەنگی رۆناهیا هەوە بەرامبەری خەلكی شەوقێ بدەت، دا كارێن چاك یێن هەوە ببینن و بابێ هەوە یێ ل ئەسمانان مەزن بكەن.
هزر نەكەن ئەز یێ هاتیم دەستووری یان نڤیسارێن پێغەمبەران ژ كار بئێخم، نەخێر، ئەز یێ هاتیم دا تەمام كەم.
ئەز راستیێ دبێژمە هەوە: هەتا ئەرد و ئەسمان ژ ناڤ نەچن، پیتەك یان خالەك ژ دەستووری ژ ناڤ ناچیت، هەتا هەمی ب ج‍‌ھ نەهێت.
لەوما هەر كەسێ بچویكترین فەرمان ژ ڤان فەرمانان ب ج‍‌ھ نەئینیت و خەلك وەسا فێر كر، دێ ل پاشایەتیا ئەسمانان ب بچویكترین هێتە بناڤكرن، لێ ئەوێ ب ج‍‌ھ بینیت و خەلك فێر كریێ، دێ د پاشایەتیا ئەسمانان دا بێژنێ مەزن.
ئەڤجا ئەز دبێژمە هەوە: ئەگەر راستداریا هەوە ژ یا فەریسیان و مامۆستایێن دەستووری پتر نەبیت، چ جاران هوین ناچنە د ناڤ پاشایەتیا ئەسمانان دا.
هەوە یا بهیستی كو یا گۆتیە خەلكێ بەرێ: ‹كوشتنێ نەكە و هەر كەسێ كوشتنێ بكەت، دێ هێتە حوكمكرن،›
لێ ئەز دبێژمە هەوە: هەر كەسێ ژ برایێ خۆ تۆڕە ببیت، هەژی حوكمكرنێیە و هەر كەسێ برایێ خۆ بێڕێز بكەت، هەژیە ل بەر جڤاتا بلند بهێتە دادگەهكرن و هەر كەسێ بێژیت ‹هەی دەبەنگ!› هەژی ئاگرێ دۆزەخێیە.
ئەڤجا ئەگەر تە پێشكێشیێ خۆ ئینا قوربانگەهێ و ل وێرێ هاتە بیرا تە، كو برایێ تە تشتەكێ ل سەر تە هەی،
پێشكێشیێ خۆ ل بەر قوربانگەهێ بهێلە و هەڕە برایێ خۆ ئاشت بكە و پاشی وەرە پێشكێشیێ خۆ بدە.
لەزێ بكە هێشتا هوین د رێكا دادگەهێ دا ل گەل هەڤڕكێ خۆ پێك وەرە، نەكو ئەو تە رادەستی دادوەری بكەت و دادوەر تە رادەستی زێرەڤانی بكەت و ئەو تە بهاڤێتە د زیندانێ دا.
ئەز راستیێ دبێژمە تە: تۆ چ جاران ژ وێرێ دەرناكەڤی، تاكو تۆ فلسێ دویماهیێ نەدەی.
هەوە یا بهیستی كو یا گۆتی: ‹دەهمەنپیسیێ نەكە،›
لێ ئەز دبێژمە هەوە: هەر كەسێ ب چاڤەكێ خراب بەرێ خۆ بدەتە ژنكەكێ، ئەوی د دلێ خۆ دا دەهمەنپیسی ل گەل وێ كر.
ئەگەر چاڤێ تە یێ راستێ ببیتە ئەگەرێ هەلنگفتنا تە، بینە دەرێ و بهاڤێژە. بۆ تە چێترە ئێك ژ ئەندامێن لەشێ تە ژ ناڤ بچیت، نەكو هەمی لەشێ تە بۆ دۆزەخێ بهێتە هاڤێتن.
ئەگەر دەستێ تە یێ راستێ ببیتە ئەگەرێ هەلنگفتنا تە، ببڕە و بهاڤێژە. بۆ تە چێترە ئێك ژ ئەندامێن لەشێ تە ژ ناڤ بچیت، نەكو هەمی لەشێ تە بچیتە د دۆزەخێ دا.
یا هاتیە گۆتن: ‹هەر كەسێ ژنا خۆ بەردەت، پێدڤیە بەلگەنامەیا بەردانێ بدەتێ.›
لێ ئەز دبێژمە هەوە: هەر كەسێ نە ژ بەر دەهمەنپیسیێ ژنا خۆ بەردەت، دبیتە ئەگەرێ هندێ كو ئەو ژن ببیتە دەهمەنپیس ، هەروەسا هەر كەسێ ژنكەكا بەردای بۆ خۆ بینیت، دەهمەنپیسیێ دكەت.
هەروەسا، هەوە یا بهیستی كو یا گۆتیە خەلكێ بەرێ: ‹سویندا خۆ نەشكێنە، لێ ئەو سۆزا تە بۆ خودانی دای، ب ج‍‌ھ بینە.›
لێ ئەز دبێژمە هەوە: قەت سویند نەخۆن، نە ب ئەسمانی، چنكو ئەو تەختێ خودێیە،
نە ب ئەردی ژی، چنكو ئەو جهێ پێیێن ویە، نە ب ئورشەلیمێ ژی، چنكو ئەو باژێڕێ پاشایێ مەزنە.
ب سەرێ خۆ ژی سویند نەخۆ، چنكو تۆ نەشێی مویەكێ ب تنێ، سپی بكەی یان رەش بكەی.
بلا ‹بەلێ› یا هەوە ‹بەلێ› بیت و ‹نە› یا هەوە ‹نە› بیت و ژ ڤێ پێڤەتر، ژ خرابیێیە.
هەوە یا بهیستی، كو یا گۆتی: ‹چاڤ ب چاڤیە و ددان ب ددانی.›
لێ ئەز دبێژمە هەوە: بەرهنگاریا كەسەكێ خراب نەكەن. لێ ئەوێ شەقەك ل رویێ تە یێ راستێ دا، رویێ خۆ یێ دی ژی بدە بەر.
ئەوێ بڤێت تە ببەتە دادگەهێ داكو كراسێ تە ژ تە بستینیت، كوركێ خۆ ژی بۆ بهێلە.
ئەگەر ئێكی تۆ نەچار كری میلەكی ل گەل بچی ، تۆ دوو میلان ل گەل هەڕە.
ئەوێ ژ تە بخوازیت تۆ بدێ و ئەوێ قەرەك ژ تە بڤێت بێ هیڤی ڤەنەگێڕە.
هەوە یا بهیستی، كو یا گۆتی: ‹حەز ژ نێزیكێ خۆ بكە و كەربێن خۆ ژ دوژمنێ خۆ ڤەكە.›
لێ ئەز دبێژمە هەوە: حەز ژ دوژمنێن خۆ بكەن و نڤێژان بكەن بۆ ئەوێن هەوە تەپەسەر دكەن،
دا ببنە كوڕێن بابێ خۆ ئەوێ ل ئەسمانی، ئەوێ رۆژا خۆ ل سەر باش و خرابان دهەلینیت و بارانێ ل سەر بێگونە‍‌ھ و گونەهباران دبارینیت.
ما چ پاداشت د هندێ دایە كو هوین حەز ژ وان بكەن یێن حەز ژ هەوە دكەن؟ ما باجگر ژی ڤێ چەندێ ناكەن؟
و ئەگەر هەوە ب تنێ سڵاڤی برایێن خۆ كر، ئەرێ ما هەوە قەنجیەك كر؟ ما پووتپەرێس ژی وێ ناكەن؟
ئەڤجا د بێكێماسی بن هەروەكو بابێ هەوە یێ ئەسمانی یێ بێكێماسیە.
هشیار بن ئایینداریا خۆ ل پێش چاڤێن خەلكی نەكەن داكو ژ لایێ وان ڤە بهێنە دیتن، چنكو هنگی هەوە ل نك بابێ خۆ یێ ل ئەسمانان پاداشت نابیت.
لەوما هەر دەمێ تۆ خێرەكێ دكەی، دەنگی ژێ نەئینە ، هەروەكو مرۆڤێن دووڕوی ل جادە و كنیشتەیان دكەن، دا ژ لایێ مرۆڤان ڤە بهێنە مەزن كرن. ب راستی دبێژمە هەوە: وان پاداشتێ خۆ وەرگرتییە.
لێ دەمێ تۆ خێرەكێ دكەی، نەهێلە دەستێ تە یێ چەپێ بزانیت كا دەستێ تە یێ راستێ چ دكەت،
داكو خێرا تە یا نەپەنی بیت و بابێ تە، ئەوێ نەپەنیان دبینیت، دێ پاداشتێ تە دەتە تە.
دەمێ هوین نڤێژێ دكەن، وەكو مرۆڤێن دووڕوی نەبن، ئەوێن حەز دكەن ل كنیشتەیان و دووڕیانێن جادەیان بڕاوەستن و نڤێژان بكەن داكو مرۆڤ وان ببینن. ب راستی دبێژمە هەوە: وان پاداشتێ خۆ وەرگرتییە.
لێ دەمێ تۆ نڤێژێ دكەی، هەڕە د ژۆرا خۆ ڤە و دەرگەهی بگرە و بۆ بابێ خۆ، ئەوێ نەبەرچاڤ، نڤێژان بكە و بابێ تە، ئەوێ نەپەنیان دبینیت، دێ پاداشتێ تە دەتە تە.
دەمێ هوین نڤێژان دكەن، وەكو پووتپەرێسان دپڕبێژ نەبن، چنكو یا ژ وان ڤە چەند زێدە بئاخڤن دێ پتر هێنە بهیستن.
ئەڤجا وەكو وان نەبن، چنكو بابێ هەوە دزانیت كا هەوە چ دڤێت بەری هوین داخوازێ ژێ بكەن.
ئەڤجا هوین نڤێژان هۆسا بكەن: بابێ مە یێ ل ئەسمانان، بلا ناڤێ تە پیرۆز بیت،
بلا پاشایەتیا تە بهێت، بلا حەزا تە ب ج‍‌ھ بهێت، كا چەوا ل ئەسمانی، هەروەسا ل سەر ئەردی ژی.
نانی تێرا مە، ئەڤرۆ بدە مە.
ل قەرێن مە ببورە ، هەروەكو ئەم ل قەردارێن خۆ دبورین.
مە نەئێخە د تاقیكرنێ دا، لێ مە ژ خرابكاری قورتال بكە، چنكو پاشایەتی و هێز و مەزناهی هەروهەر یێن تەنە. ئامین.
ئەگەر هوین ل گونەهێن خەلكی یێن د دەرهەقا هەوە دا دهێنە كرن ببورن، بابێ هەوە یێ ئەسمانی ژی دێ ل گونەهێن هەوە بوریت،
لێ ئەگەر هوین ل گونەهێن خەلكی نەبورن، بابێ هەوە ژی ل گونەهێن هەوە نابوریت.
دەمێ هوین رۆژیان دگرن، ناڤ چاڤێن خۆ تێك نەدەن، هەروەكو دووڕوی دكەن، چنكو ئەو ناڤ چاڤێن خۆ تێك ددەن دا بۆ خەلكی دیار بكەن كو ئەو ب رۆژینە. ب راستی دبێژمە هەوە: وان پاداشتێ خۆ وەرگرتیە.
لێ دەمێ تۆ رۆژیێ دگری، دێمێ خۆ بشوو و سەرێ خۆ چەور بكە،
دا نە بۆ خەلكی، لێ بۆ بابێ تە یێ نەهێتە دیتن، دیار ببیت كو تۆ یێ ب رۆژی. ئەڤجا بابێ تە، ئەوێ نەپەنیان دبینیت، دێ پاداشتێ تە دەتە تە.
گەنجینەیان بۆ خۆ ل سەر ئەردی كۆم نەكەن، ل وی جهێ دێ ژەنگ و خویرك پویچ كەن و دێ دزیكەر كونكەن و دزن.
لێ گەنجینەیان بۆ خۆ ل ئەسمانی كۆم كەن، ل وی جهێ نە ژەنگ و خویرك پویچ دكەن و نە دزیكەر كون دكەن و ددزن.
چنكو گەنجینەیا تە ل كیرێ بیت، دلێ تە ژی دێ ل وێرێ بیت!
چرایێ لەشی چاڤە. ئەڤجا ئەگەر چاڤێ تە یێ ساخلەم بیت، لەشێ تە هەمی دێ یێ ب رۆناهی بیت.
ئەگەر چاڤێ تە یێ خراب بیت، لەشێ تە هەمی دێ یێ تاری بیت. ئەگەر ئەو رۆناهیا د ناڤ تە دا تاریاتی بیت، تاریاتیەكا چەندا دژوارە!
كەس نەشێت خزمەتا دوو خودانان بكەت، چنكو یان دێ كەرب ژ ئێكی ڤەبن و حەز ژ یێ دی كەت، یان ژی دێ گەهیتە ئێك ژ وان و یێ دی پشت گو‍‌ھ ڤە هاڤێت. هوین نەشێن خزمەتا خودێ و پارەی بكەن.
ژ بەر ڤی ئەگەری ئەز دبێژمە هەوە: خەما ژیانا خۆ هەلنەگرن كا دێ چ خۆن و چ ڤەخۆن، یان لەشێ خۆ كا دێ چ كەنە بەر خۆ. ما ژیان ب تنێ خوارنە؟ و لەش ژی ب تنێ جل و بەرگە؟
بەرێ خۆ بدەنە باڵندەیێن ئەسمانی: ئەو نە دچینن و نە ددروین و نە ژی د عومباران دا كۆم دكەن و بابێ هەوە یێ ئەسمانی خوارنێ ددەتێ. ئەرێ ما هوین گەلەك ژ وان ب بهاتر نینن؟
ما كی ژ هەوە ب خەمخوارنێ دشێت دەمژمێرەكا ب تنێ ل سەر ژیێ خۆ زێدە بكەت؟
هەروەسا بۆچی ژ بەر جلكان هوین خەمان دخۆن؟ بەرێ خۆ بدەنە سیسنێن ئاقاری چەوا وەرارێ دكەن، نە خۆ دوەستینن و نە رستنێ دكەن،
لێ ئەز دبێژمە هەوە: خۆ سلێمانی ژی، د هەمی مەزناهیا خۆ دا، وەكو ئێك ژ ڤان جلێن جوان ل بەر خۆ نەكرینە!
ئەگەر خودێ گول و گیایێ ئاقاری، ئەوێ ئەڤرۆ هەی و سوبەهی دهاڤێژنە د تەنویرێ دا، هۆسا ب جلك بئێخیت، ئەرێ گەلی كێمباوەران، ما نە گەلەك مسۆگەرترە ئەو هەوە ب جلك بئێخیت؟
ئەڤجا خەمێ نەخۆن و بێژن: ‹ئەم دێ چ خۆین؟› یان ‹ئەم دێ چ ڤەخۆین؟› یان ‹ئەم دێ چ كەینە بەر خۆ؟›.
مللەتێن پووتپەرێس بزاڤێ بۆ ڤان هەمیان دكەن. بابێ هەوە یێ ئەسمانی دزانیت كو هەوە پێدڤی یا ب ڤان هەمیان هەی.
لێ هوین ل پێشیێ بزاڤێ بۆ پاشایەتیا خودێ و راستداریا وی بكەن، ئەڤە هەمی ژی بۆ هەوە دێ هێنە دان.
ژ بەر ڤێ چەندێ خەما سوبەهی نەخۆن، چنكو سوبەهی دێ خەمێ ژ خۆ خۆت. دەردێن هەر رۆژەكێ تێرا وێ هەنە!
دادكرنێ نەكەن، دا هوین نەهێنە دادكرن،
چنكو ب وێ دادكرنا هوین خەلكی پێ داد دكەن، هوین ژی دێ پێ هێنە دادكرن و ب وی پیڤەرێ هوین دپیڤن، دێ بۆ هەوە ژی ب وی هێتە پیڤان.
بۆچی تۆ زلكی د چاڤێ برایێ خۆ دا دبینی، لێ تۆ گاریتەی د چاڤێ خۆ دا نابینی؟
یان چەوا تۆ دشێی بێژییە برایێ خۆ: ‹بهێلە ئەز زلكی ژ چاڤێ تە بینمە دەرێ،› لێ ئەڤە گاریتە یێ د چاڤێ تە دا!
هەی دووڕوی، ل پێشیێ گاریتەی ژ چاڤێ خۆ بینە دەرێ، هنگی دێ باش بینی كو زلكی ژ چاڤێ برایێ خۆ بینیە دەرێ.
تشتێ پیرۆز نەدەنە سەیان و مراریێن خۆ نەهاڤێژنە بەر پێیێن بەرازان، نەكو بەراز پێ لێ بدانن و سە ژی ڤەگەڕیێن و هەوە بدڕینن.
بخوازن، دێ بۆ هەوە هێتە دان. لێ بگەڕن، دێ بینن. دەرگەهی بقوتن، دێ بۆ هەوە هێتە ڤەكرن.
چنكو هەر كەسێ بخوازیت دێ وەرگریت و یێ لێ بگەڕیێت دێ بینیت و یێ دەرگەهی بقوتیت دێ بۆ وی هێتە ڤەكرن.
كی ژ هەوە، كوڕێ وی نانی ژێ بخوازیت، دێ بەرەكی دەتێ؟
یان ماسیەكێ ژێ بخوازیت، دێ مارەكی دەتێ؟
ئەڤجا ئەگەر هوینێن خراب دزانن دیاریێن باش بدەنە زاڕۆكێن خۆ، پا چەند مسۆگەرتر بابێ هەوە یێ ل ئەسمانان دێ تشتێن باش دەتە وان كەسێن ژێ دخوازن!
ئەوا هەوە دڤێت مرۆڤ بۆ هەوە بكەن، هوین ژی وێ بۆ وان بكەن، چنكو ئەڤەیە رامانا دەستووری و پەیاما پێغەمبەران.
د دەرگەهێ تەنگ را هەڕنە ژۆر! چنكو ئەو دەرگەهێ دچیتە وێرانكرنێ یێ فرەهە و رێكا وی یا خۆشە و گەلەكن ئەوێن تێڕا دچنە ژۆر،
لێ دەرگەهێ دچیتە ژیانێ گەلەك یێ تەنگە و رێكا وێ ژی گەلەك یا ب زەحمەتە و كێمن ئەوێن بسەرهەلدبن.
هشیاری پێغەمبەرێن درەوین بن، ئەوێن د كەڤلێن میهان دا دهێنە نك هەوە، لێ ئەو ژ ناڤ دا گورگێن هارن!
دێ وان ژ بەرهەمێ وان نیاسن. ئەرێ ما مرۆڤ ژ ستریان تری دچنن، یان ژ قیڤاران هژیران دچنن؟
هۆسا هەر دارەكا باش دێ بەرهەمەكێ باش دەت، لێ دارا خراب دێ بەرهەمەكێ خراب دەت.
دارەكا باش نەشێت بەرهەمەكێ خراب بدەت و دارەكا خراب ژی نەشێت بەرهەمەكێ باش بدەت.
هەر دارەكا بەرهەمەكێ باش نەدەت، دێ هێتە بڕین و بۆ ناڤ ئاگری هێتە هاڤێتن.
ئەڤجا هوین دێ وان ژ بەرهەمێ وان نیاسن.
نە هەر كەسەكێ بێژیتە من ‹خودان، خودان!› دێ چیتە د پاشایەتیا ئەسمانان دا، لێ ئەو دێ چیت یێ حەزا بابێ من یێ ل ئەسمانان ب ج‍‌ھ دئینیت.
د وێ رۆژێ دا گەلەك دێ بێژنە من: ‹خودان، خودان! ما مە ب ناڤێ تە پەیاما خودێ نە راگەهاند؟ و ب ناڤێ تە مە ئەجنە نە دەرئێخستن؟ و مە گەلەك حنێر ب ناڤێ تە نەكرن؟›
هنگی ئەز دێ ب ئاشكرایی بێژمە وان: ‹من چ جاران هوین نەنیاسینە. ژ من دویر بكەڤن، هەی خودانێن كارێن خراب!›
ئەڤجا هەر كەسێ گوهێ خۆ بدەتە گۆتنێن من و كار پێ بكەت، ئەو وەكو مرۆڤەكێ ئاقلمەندە یێ خانیێ خۆ ل سەر كەڤری ئاڤا كری،
پشتی هنگی باران بارین و لافاو رابوون و باڕۆڤە هاتن و ب وی خانی كەفتن، لێ نەكەفت، چنكو بنیاتێ وی ل سەر كەڤری هاتبوو دانان.
لێ هەر كەسێ گو‍‌ھ بدەتە ڤان ئاخفتنێن من و كار پێ نەكەت، ئەو وەكو مرۆڤەكێ دەبەنگە كو خانیێ خۆ ل سەر خیزی ئاڤا كری.
ئەڤجا باران بارین و لافاو رابوون و باڕۆڤە هاتن و ب وی خانی كەفتن و خانی كەفت و كەفتنا وی یا مەزن بوو.»
دەمێ عیسای ئەڤ گۆتنێن خۆ تەمام كرین، خڕڤەبووی ژ فێركرنا وی حێبەتی بوون،
چنكو وی وەكو مرۆڤەكێ خودان دەستهەلات ئەو فێر دكرن، نە وەكو مامۆستایێن وان یێن دەستووری.
دەمێ ژ چیای هاتیە خوارێ، جەماوەرەكێ مەزن ب دویڤ كەفت.
وەسا چێبوو مرۆڤەكێ گوڕی هاتە نك و سوجدە بۆ بر و گۆت: «خودان! ئەگەر تە بڤێت، تۆ دشێی من پاقژ بكەی!»
عیسای دەستێ خۆ درێژ كر و دەست كرێ و گۆت: «من دڤێت، پاقژ ببە!» د ج‍‌ھ دا ژ گوڕیاتیا خۆ پاقژ بوو.
ئەڤجا عیسای گۆتێ: «هشیار بە، بۆ چ كەسان نەبێژی! لێ هەڕە و خۆ نیشا كاهنی بدە و وی پێشكێشیێ مووسای فەرمان پێ كری، بدە، وەك شاهدەیی بۆ وان.»
دەمێ عیسا چوویە كەفەرناحوم، سەرلەشكەرەك هاتە نك وی و هیڤی ژێ كرن و گۆت:
«خودان! خزمەتكارێ من یێ فاڵنجیە و یێ ل مال د ناڤ نڤینان دا، ژ ئێشانێ گەلەك دنالیت.»
عیسای گۆتێ: «دێ هێم و ساخ كەم.»
سەرلەشكەری بەرسڤ دا و گۆت: «خودان، ئەز نە هەژی وێ چەندێمە تۆ بهێیە مالا من، لێ ب تنێ تۆ پەیڤەكێ بێژە، دێ خزمەتكارێ من ساخ بیت،
چنكو ئەز ب خۆ ژی یێ ل ژێر دەستهەلاتێ و من سەرباز یێ ل ژێر دەستێ خۆ هەین. دەمێ دبێژمە ئێك ژ وان: ‹هەڕە!› دچیت و دبێژمە ئێكێ دی: ‹وەرە!› دهێت و دبێژمە بەنیێ خۆ: ‹ڤێ بكە!› دكەت.»
دەمێ عیسای گو‍‌ھ لێ بووی، حێبەتی بوو و گۆتە وان یێن ل دویڤ وی هاتین: «ئەز راستیێ دبێژمە هەوە: من كەسەك ژ ئیسرائیلیان ب باوەریەكا هۆسا مەزن نەدیتیە!
و دبێژمە هەوە كو دێ گەلەك ژ رۆژهەلاتێ و رۆژئاڤایێ ڤە هێن و دێ ل گەل ئیبراهیمی و ئیسحاقی و یەعقوبی د ناڤ پاشایەتیا ئەسمانان دا ل سەر سفرێ روینن،
لێ كوڕێن پاشایەتیێ دێ بۆ تاریا ژ دەرڤە هێنە هاڤێتن. ل وێرێ گری و گڤاشتنا ددانانە.»
پاشی عیسای گۆتە سەرلەشكەری: «هەڕە، وەكو تە باوەری پێ ئینای، بلا ببیت.» د وێ گاڤێ دا خزمەتكارێ وی ساخ بوو.
دەمێ عیسا هاتیە مالا پەترۆسی، خەسیا وی ل ناڤ نڤینان دیت یا تا گرتی بوو.
وی دەستێ خۆ كرە دەستێ وێ، تایێ بەردا و رابوو و وێ دەست ب خزمەتا وی كر.
دەمێ بوویە ئێڤار، گەلەك ئەوێن گیانێن پیس تێدا، ئینانە نك و وی ئەو گیان ب پەیڤەكێ ژ ناڤ وان دەرئێخستن و هەمی نەخۆش ساخ كرن.
ئەڤ چەندە چێبوو دا ئەوا ل سەر ئەزمانێ ئیشایا پێغەمبەر هاتی، ب ج‍‌ھ بهێت، دەمێ گۆتی: «وی دەردێن مە هەلگرتن و نەخۆشیێن مە كرنە پشتا خۆ.»
دەمێ عیسای جەماوەرەكێ مەزن ل دەوروبەرێن خۆ دیتی، فەرمان دا كو ئەو و شاگردێن خۆ دەربازی رەخێ دی یێ دەریاكێ ببن.
هنگی مامۆستایەكێ دەستووری هاتە نك و گۆتێ: «مامۆستا، تۆ كیڤە بچی دێ ل دویڤ تە هێم!»
ئینا عیسای گۆتێ: «رویڤیان كون رویڤیێن هەین و باڵندەیێن ئەسمانی هێلینێن هەین، لێ كوڕێ مرۆڤ چ ج‍‌ھ نینن سەرێ خۆ دانیتێ.»
ئێكێ دی ژ شاگردێن وی گۆتێ: «خودان، دەستویریا من بدە، دا ل بەراهیێ ئەز بچم بابێ خۆ ڤەشێرم!»
لێ عیسای گۆتێ: «ب دویڤ من بكەڤە و بهێلە مری مریێن خۆ ڤەشێرن.»
پاشی ئەو ل بەلەمێ سیار بوو و شاگردێن وی كەفتنە دویڤ.
وەسا چێبوو باڕۆڤەیەكا ب هێز ب سەر دەریاكێ دا گرت، هەتا پێلێن ئاڤێ ب سەر بەلەمێ كەفتین، لێ ئەو یێ نڤستی بوو.
شاگرد چوون و ئەو هشیار كر و گۆتێ: «خودان، مە قورتال بكە! ئەم یێ ژ ناڤ دچین!»
وی بەرسڤ دا: «هەی كێمباوەران، بۆچی هوین دترسن؟» پاشی رابوو با و دەریاك پاشڤە برن و ئارامیەكا مەزن پەیدا بوو.
هەمی گوهشین و پرسیاركرن: «ئەرێ ئەڤە چ جۆرێ مرۆڤانە؟ هەتا با و دەریا ژی گوهێ خۆ ددەنێ!»
دەمێ ئەو گەهشتیە لایێ دی یێ دەڤەرا گادارینان، دوو مرۆڤێن ئەجنەیان هنگافتی ژ ناڤ گۆڕستانێ هاتنە بەرسینگی. ئەو گەلەك د هار بوون، هەتا كەس نەدشیا د وێرێ را بچیت.
ژ نشكەكێ ڤە كرنە گازی و گۆتن: «تە چ ژ مە دڤێت، عیسایێ كوڕێ خودێ؟ ئەرێ تۆ بەری دەمێ دەستنیشانكری هاتی، دا مە ئەشكەنجە بدەی؟»
پیچەكێ دویر ژ وان، رەڤدەیەكا مەزن یا بەرازان دچەری.
ئەجنەیان هیڤی ژ عیسای كرن و گۆتنێ: «ئەگەر دێ مە دەرئێخی، مە بهنێرە د ناڤ رەڤدەیا بەرازان دا.»
وی گۆتە وان: «هەڕن». ئەڤجا ئەو دەركەفتن و چوونە د بەرازان دا، ئێكسەر رەڤدە هەمی ژ قونتارا رك بەرەڤ دەریاكێ بەزی و خۆ هاڤێتە د ئاڤێ دا و ژ ناڤ چوو.
گاڤان رەڤین و چوونە باژێڕی و هەمی تشتێ ب سەرێ ئەجنە هنگافتیان هاتی، راگەهاند.
پاشی وەسا چێبوو هەمی خەلكێ باژێڕی دەركەفتن دا عیسای ببینن و دەمێ وان ئەو دیتی، وان هیڤی ژێ كر كو ژ دەڤەرا وان بچیت.
عیسا ل بەلەمێ سیار بوو و ل دەریاكێ دەرباز بوو و ڤەگەڕیا باژێڕێ خۆ.
وەسا چێبوو هندەكان فاڵنجیەكێ ل ناڤ نڤینان درێژكری ئینا نك وی. دەمێ عیسای باوەریا وان دیتی، گۆتە یێ فاڵنجی: «پشتڕاست بە كوڕێ من، ل گونەهێن تە هاتە بورین.»
هنگی هندەك مامۆستایێن دەستووری ل گەل خۆ گۆت: «ئەڤ مرۆڤە یێ كوفریێ دكەت.»
هزرێن وان بۆ عیسای د ئاشكرا بوون و گۆت: «بۆچی هوین هزرێن خراب د دلێ خۆ دا دكەن؟
ما كیژ ژ ڤان ب ساناهیترە مرۆڤ بێژیت: ‹ل گونەهێن تە هاتە بورین› یان بێژیت: ‹رابە و بڕێڤە هەڕە›؟
لێ ئەز دێ بۆ هەوە سەلمینم كو كوڕێ مرۆڤ ل سەر ئەردی دەستهەلاتا هەی ل گونەهان ببوریت،» پاشی گۆتە یێ فاڵنجی: «رابە و نڤینێن خۆ هەلگرە و هەڕە مالا خۆ.»
ئینا رابوو و چوو مالا خۆ.
دەمێ خڕڤەبوویان ئەڤە دیتی، سەهمێ گرتن و پەسنا خودێ كر، ئەوێ كو دەستهەلاتەكا هۆسا دایە مرۆڤان.
دەمێ عیسا د وێرێ را دبوری، مرۆڤەك دیت ناڤێ وی مەتتا بوو، ل جهێ باج وەرگرتنێ یێ روینشتی بوو، عیسای گۆتێ: «ب دویڤ من بكەڤە.» ئەو رابوو و ب دویڤ وی كەفت.
دەمێ عیسا ل سەر سفرێ ل مالا مەتتای، وەسا چێبوو گەلەك باجگر و گونەهكارێن دی هاتن و ل گەل وی و شاگردێن وی روینشتن.
دەمێ فەریسیان ئەڤ چەندە دیتی، پرسیار ژ شاگردێن وی كر: «بۆچی مامۆستایێ هەوە ل گەل باجگر و گونەهكاران خوارنێ دخۆت؟»
دەمێ عیسای گو‍‌ھ لێ بووی، بەرسڤ دا: «مرۆڤێن ساخلەم پێدڤی ب نۆژداری نینە، لێ مرۆڤێن نەساخ.
ئەڤجا هەڕن و د ڤێ گۆتنێ بگەهن: ‹من دلۆڤانی دڤێت، نەكو قوربان.› ئەز نەهاتیمە گازی مرۆڤێن راستدار بكەم، لێ یێن گونەهكار.»
پاشی شاگردێن یوحەننای هاتنە نك عیسای و گۆتنێ: «بۆچی ئەم و فەریسی گەلەك جاران رۆژیان دگرین، لێ شاگردێن تە ناگرن؟»
عیسای گۆتە وان: «ئەرێ ما داخوازكریێن داوەتێ دشێن شینیێ دانن، هێشتا زاڤا د ناڤ وان دا؟ لێ رۆژ دێ هێن، زاڤا دێ ژ ناڤ وان هێتە راكرن، هنگی ئەو دێ رۆژیان گرن.
كەس جلكەكێ كەڤن ب پاتەكێ ل ئاڤێ نەدای پنی ناكەت، چنكو پاتە ژ جلكی دكێشیت و كون خرابتر لێ دهێت.
هەروەسا كەس شەرابا نوی ناكەتە مەشكێن كەڤن. ئەگەر وە كر، مەشك دێ پەقن و شەراب دێ رێژیت و مەشك دێ پویچ بن. لێ شەرابا نوی دكەنە مەشكێن نوی، ئەڤجا شەراب و مەشك پێكڤە دهێنە پاراستن.»
دەمێ وی ئەڤە دگۆت، وەسا چێبوو بەرپرسەك هات و سوجدە بۆ بر و گۆت: «كچا من نوكە یا مری، لێ تۆ وەرە و دەستێ خۆ دانە سەر، ئەو دێ ژیتەڤە.»
ئەڤجا عیسا رابوو و ل گەل شاگردێن خۆ ل دویڤ وی چوو.
پاشی وەسا چێبوو ژنكەك، ئەو دوازدە ساڵ بوو خوین ژ بەر دچوو، هاتە نك و ژ پشتێ ڤە دەستێ خۆ كرە ریشالۆكەكا كراسێ وی ،
چنكو وێ دگۆتە خۆ: «ئەگەر ب تنێ ئەز دەستێ خۆ بكەمە كراسێ وی ژی، دێ ساخ بم.»
عیسا زڤڕی و دیت و گۆت: «پشتڕاست بە كچا من، باوەریا تە تۆ ساخ كری.» ئەو ژنك د وێ گاڤێ دا ساخ بوو.
دەمێ عیسا گەهشتیە مالا بەرپرسی، دیت بلوورڤان و جەماوەرێ قێژقێژێ دكەن،
گۆت: «دەركەڤن! كچك نەمریە، لێ یا نڤستیە!» ئینا ئەو پێ كەنین.
پشتی خڕڤەبووی هاتینە دەرئێخستن، ئەو چوو ژۆر و دەستێ وێ گرت. ئینا كچك رابووڤە.
ئەڤجا دەنگوباسێن ڤێ چەندێ ل هەمی دەڤەرێ بەڵاڤ بوون.
دەمێ عیسا ژ وێرێ دچوو، دوو كەسێن كۆرە ب دویڤ كەفتن، گازی دكر و دگۆتێ: «كوڕێ داوودی ، دلۆڤانیێ ب مە ببە!»
دەمێ ئەو چوویە د خانی ڤە، هەردوویێن كۆرە ب پێشڤە هاتن و عیسای پرسیار ژ وان كر: «ئەرێ هوین باوەریێ دئینن، كو ئەز دشێم ڤێ بكەم؟» وان بەرسڤ دا: «بەلێ خودان.»
ئینا دەستێ خۆ كرە چاڤێن وان و گۆت: «بلا بۆ هەوە ل دویڤ باوەریا هەوە بهێتە كرن.»
ئەڤجا چاڤێن وان ڤەبوون و عیسای ئەو ب توندی ئاگەهدار كرن و گۆت: «هشیار بن، بلا كەس پێ نەزانیت!»
لێ ئەو دەركەفتن و دەنگوباس دەربارەی وی ل سەرانسەری دەڤەرێ بەڵاڤ كرن.
دەمێ ئەو دەركەفتین، وەسا چێبوو هندەكان مرۆڤەكێ لال یێ ئەجنەیەكی هنگافتی ئینا نك عیسای.
دەمێ ئەجنە هاتیە دەرئێخستن، یێ لال ئاخفت و خڕڤەبووی حێبەتی بوون و گۆتن: «وەكو ڤی تشتی چ جاران ل ئیسرائیلێ نەهاتیە دیتن،»
لێ فەریسیان گۆت: «ئەو ب دەستهەلاتا سەرۆكێ ئەجنەیان، ئەجنەیان دەردئێخیت.»
عیسا ل ناڤ باژێڕ و گوندان دگەڕیا و ل كنیشتەیێن وان فێركرن دكر و مزگینیا پاشایەتیێ رادگەهاند و هەمی نەخۆشی و لاوازی ساخ دكرن.
دەمێ وی خڕڤەبووی دیتین، دلێ وی ب وان سۆت، چنكو ئەو وەكو پەزێ بێ شڤان د شەپرزە و بژاڵە بوون.
د وی دەمی دا گۆتە شاگردێن خۆ: «دروین گەلەكە، لێ پالە د كێمن،
لەوما ژ خودانێ دروینێ بخوازن، دا پالەیان بۆ دروینا خۆ بهنێریت.»
پاشی گازی كرە هەر دوازدە شاگردێن خۆ و دەستهەلات ل سەر گیانێن پیس دایێ، داكو وان دەربئێخن و خەلكی ژ هەر لاوازی و نەخۆشیەكێ ساخ بكەن.
ئەڤەنە ناڤێن هەر دوازدە هنارتیان: ل پێشیێ شەمعون ئەوێ دگۆتنێ پەترۆس و ئەندراوسێ برایێ وی، یەعقوبێ كوڕێ زەبەدی و یوحەننایێ برایێ وی،
فیلیپۆس و بەرتولماوس، توماس و مەتتایێ باجگر، یەعقوبێ كوڕێ حەلفی و تەداوس،
شەمعونێ وەڵاتپەروەر و یەهودایێ ئەسخەریوتی ئەوێ بێبەختی ل عیسای كری.
عیسای ئەڤ دوازدە هنارتن و شیرەتكرن و گۆتێ: «د رێكا مللەتێن دی را نەچن و نەچنە د باژێڕێن سامەریان ڤە،
لێ هەڕنە پەزێن بەرزە بووی ژ مالا ئیسرائیل.
دەمێ هوین دچن، مزگینیێ بگەهینن و بێژن: پاشایەتیا ئەسمانان یا نێزیك بووی.
نەخۆشان ساخ كەن، مریان راكەن، گوڕیان پاقژ كەن و ئەجنەیان دەربئێخن. هەوە بێ بەرامبەر وەرگرت، بێ بەرامبەر بدەن.
د كەمەرێن خۆ دا زێڕی و زیڤی و سفری هەلنەگرن،
نە چانتكی بۆ رێكێ، نە دوو كراسان، نە پێلاڤەكێ و نە ژی دارەكی، چنكو پالە هەژی خوارنا خۆیە.
هەر گوند و باژێڕەكێ هوین چوونێ، لێ بگەڕیێن كا كی ل وێرێ یێ هەژییە ل نك وی بمینن، هەتا هوین ژ وێرێ دچن.
دەمێ هوین دچنە مالەكێ سڵاڤ كەنێ
و ئەگەر ئەو مال یا هەژی بیت، بلا ئاشتیا هەوە ل سەر بیت و ئەگەر نە یا هەژی بیت بلا ئاشتی بۆ هەوە بزڤڕیت.
ئەگەر كەسەكی ل مالەكێ یان باژێڕەكی هوین قەبیل نەكرن و گوهێ خۆ نەدا ئاخفتنا هەوە، دەمێ ژ وێرێ دەردكەڤن، تۆزێ ژ پێیێن خۆ داقوتن.
راستیە دبێژمە هەوە: دێ رەوشا وەڵاتێ سەدۆم و عەمۆرایێ ل رۆژا دادكرنێ ژ یا وی باژێڕی باشتر بیت.
گوهداریێ بكەن، ئەز هەوە وەكو میهان بۆ ناڤ گورگان دهنێرم، ئەڤجا وەكو ماران د هشیار بن و وەكو كووتران د بێگونە‍‌ھ بن.
لێ ژ مرۆڤان هشیار بن: چنكو ئەو دێ هەوە رادەستی دادگەهان كەن و دێ د كنیشتەیێن خۆ دا هەوە دەنە بەر قامچیان
و ژ بەر من دێ هەوە بەنە بەرامبەری حوكمداران و پاشایان، دا هوین ل بەرامبەری وان و مللەتێن نەجوهی شاهدەییێ بدەن.
لێ دەمێ هەوە رادەست دكەن، خەمێ نەخۆن كا دێ چەوا ئاخڤن یان دێ چ بێژن، ل وی دەمی دێ بۆ هەوە هێتە دان كا دێ چ بێژن.
چنكو نە هوینن ئەوێ دئاخڤیت، لێ گیانێ بابێ هەوە یێ د ناڤ هەوە دا دئاخڤیت.
برا دێ برای رادەستی مرنێ كەت و باب دێ زاڕۆكی رادەست كەت، زاڕۆك دێ بەرامبەر دایك و بابێن خۆ رابن و دەنە كوشتن
و دێ ژ بەر ناڤێ من كەربێن هەمیان ژ هەوە ڤەبن. لێ یێ تا دویماهیێ خۆ راگریت، ئەو دێ قورتال بیت.
ئەگەر هوین ل باژێڕەكی تەنگاڤ كرن، بڕەڤنە باژێڕەكێ دی. راستیە دبێژمە هەوە: هوین ناگەهن ل هەمی باژێڕێن ئیسرائیل بگەڕن، هەتا كوڕێ مرۆڤ نەهێت.
شاگرد د سەر مامۆستایێ خۆ را نینە و بەنی ژی د سەر خودانێ خۆ را نینە.
بەسی شاگردیە وەكو مامۆستایێ خۆ لێ بهێت و بەنی ژی وەكو خودانێ خۆ لێ بهێت. ئەگەر خودانێ مالێ ب بەعلزەبولی هاتبیتە ناڤكرن، پا دێ خەلكێ مالا وی یێ چەوا بیت؟
ئەڤجا ژ وان نەترسن. چ نخافتی نینن ئاشكرا نەبن و چ ڤەشارتی نینن نەهێنە زانین.
ئەوا ئەز ل تاریاتیێ دبێژمە هەوە، هوین ل رۆناهیێ بێژن و ئەوا هوین ب پستەپستێ دبهیسن، ل سەر بانان گازی بكەن.
ژ وان نەترسن یێن لەشی دكوژن. ئەو نەشێن گیانی بكوژن. لێ ژ وی بترسن یێ دشێت گیان و لەشی پێكڤە د دۆزەخێ دا ژ ناڤ ببەت.
ما نە دوو چویچك ب فلسەكی دهێنە فرۆتن؟ ل گەل هندێ ئێك ژ وان بێی بابێ هەوە ناكەڤیتە ئەردی.
هندی هوینن، خۆ مویێن سەرێ هەوە ژی د هژمارتینە.
ئەڤجا نەترسن، هوین ژ گەلەك چویچكان ب بهاترن.
هەر كەسێ ل بەرامبەری مرۆڤان دانپێدانێ ب من بكەت، ئەز ژی دێ ل بەرامبەری بابێ خۆ یێ ل ئەسمانان دانپێدانێ ب وی كەم،
و هەر كەسێ ل بەرامبەری مرۆڤان من ماندەل بكەت، ئەز ژی دێ ل بەرامبەری بابێ خۆ یێ ل ئەسمانان وی ماندەل كەم.
هزر نەكەن ئەز یێ هاتیم دا ئاشتیێ بینمە سەر رویێ ئەردی. ئەز نەهاتیمە ئاشتیێ بینم، لێ شیری بینم.
ئەز یێ هاتیم مرۆڤی بكەمە دژی بابێ وی و كچێ دژی دایكا وێ و بویكێ دژی خەسیا وێ
و ئها هۆسا دوژمنێن مرۆڤی دێ بنە خەلكێ مالا وی.
هەر كەسێ باب یان دایكا خۆ پتر ژ من بڤێت، ئەو نە هەژی منە و هەر كەسێ كوڕێ خۆ یان كچا خۆ پتر ژ من بڤێت، دیسان ئەو نە هەژی منە.
هەر كەسێ خاچا خۆ هەلنەگریت و ب دویڤ من نەكەڤیت، ئەو نە هەژی منە.
هەر كەسێ ژیانا خۆ بپارێزیت، دێ وێ ژ دەست دەت و هەر كەسێ ژیانا خۆ ژ پێخەمەتی من ژ دەست بدەت، دێ وێ پارێزیت.
ئەوێ هەوە قەبیل بكەت، ئەز قەبیل كرم و یێ من قەبیل بكەت، ئەوی ئەو قەبیل كر یێ ئەز هنارتیم.
هەر كەسێ پێغەمبەرەكی قەبیل بكەت ژ بەر كو پێغەمبەرە، دێ خەلاتێ پێغەمبەرەكی وەرگریت و هەر كەسێ راستدارەكی قەبیل بكەت ژ بەر كو یێ راست و دروستە، دێ خەلاتێ راستدارەكی وەرگریت.
هەر كەسێ خۆ پەرداغەكا ئاڤا تەزی ژی بدەتە ئێكی ژ ڤان كەسێن بچویك ژ بەر كو شاگردێ منە، ئەز ب راستی دبێژمە هەوە، خەلاتێ وی چ جاران بەرزە نابیت.»
پشتی عیسا ژ شیرەتكرنا هەر دوازدە شاگردێن خۆ ب دویماهی هاتی، ژ وێرێ چوو دا فێركرنێ بكەت و مزگینیێ د باژێڕێن جەلیل دا بدەت.
دەمێ یوحەننای د زیندانێ دا گو‍‌ھ ل كارێن عیسای بووی، هندەك ژ شاگردێن خۆ هنارتنە نك و
پرسیار ژێ كر: «ئەرێ تۆی ئەوێ دێ هێت، یان خۆ ل هیڤیا ئێكێ دی بگرین؟»
عیسای بەرسڤا وان دا و گۆت: «هەڕن و ئەو تشتێن هوین دبهیسن و دبینن، بێژنە یوحەننای:
كۆرە یێ دبینن، لەنگ یێ بڕێڤە دچن، گوڕی یێ پاقژ دبن، كەڕ یێ دبهیسن، مری یێ رادبنەڤە و مزگینی بۆ بەلەنگازان دهێتە دان.
خوزیكێن وی یێ د من نەهەلنگڤیت!»
دەمێ شاگردێن یوحەننای دچوون، عیسای بۆ وی خەلكێ كۆمبووی دەربارەی یوحەننای دەست ب ئاخفتنێ كر و گۆت: «هوین دەركەفتنە چۆلی دا چ ببینن؟ لەڤەنەكێ ب بای دهەژیێت؟
ئەڤجا هوین دەركەفتن دا چ ببینن؟ مرۆڤەكێ جلكێن نازك ل بەر؟ نەخێر، خودانێن جلكێن نازك د كۆچكێن پاشایان دانە.
ئەڤجا هوین دەركەفتن دا چ ببینن؟ پێغەمبەرەكی؟ بەلێ، ئەز دبێژمە هەوە، ئەو ژ پێغەمبەرەكی ژی زێدەترە.
ئەڤەیە یێ دەربارەی وی هاتیە نڤیسین: ‹ئەڤە ئەز دێ هنارتیێ خۆ ل پێشیا تە هنێرم، ئەوێ دێ رێكا تە ل پێشیا تە ئامادە كەت.›
راستیێ دبێژمە هەوە: كەسەك ژ دایكا خۆ نەبوویە ژ یوحەننایێ تافیركەر مەزنتر. لێ بچویكترین كەس ل پاشایەتیا ئەسمانان ژ وی مەزنترە.
ژ دەمێ یوحەننایێ تافیركەر هەتا نوكە، خورتی یا ل پاشایەتیا ئەسمانان دهێتە كرن و یێن خورت ب توندی ب دەست خۆ ڤە دئینن.
چنكو هەمی پێغەمبەران و دەستووری هەتا دەمێ یوحەننای پەیام رادگەهاندن،
ئەگەر هەوە دڤێت قەبیل بكەن ژی، ئەڤەیە ئەو ئلیاسێ پێدڤیە بهێت.
ئەوێ گو‍‌ھ هەبن، بلا ببهیسیت.
لێ پا ئەز ڤی نفشی ب چ هەڤبەر بكەم؟ ئەو وەكو وان زاڕۆكانە یێن ل ناڤ بازاڕی دروینشتی و گازی هەڤالێن خۆ دكەن
و دبێژن: ‹مە زڕنا بۆ هەوە لێ دا، هەوە سەما نەكر و مە بۆ هەوە ڤەلووراند، هەوە شینی نەكر.›
ژ بەر كو یوحەننا هات، نەدخۆت و نەڤەدخۆت و ئەو دبێژن: ‹ئەجنەیەكێ تێدا.›
كوڕێ مرۆڤ هات، دخۆت و ڤەدخۆت و ئەو دبێژن: ‹ئەڤە مرۆڤەكە یێ ب دویڤ خوارنێ و مەی ڤەخوارنێ كەفتی و هەڤالێ باجگر و گونەهكارانە.› لێ ئاقلمەندی ب كریارێن وێ دهێتە سەلماندن.»
پاشی عیسای دەست ب پاشڤەبرنا وان باژێڕان كر، ئەوێن پڕانیا حنێرێن وی لێ هاتینە كرن، چنكو ل خۆ نەزڤڕین.
گۆت: «نەخوزیكێن تە خۆرازین! نەخوزیكێن تە بێت‌سایدا! ئەو حنێرێن ل ناڤ هەوە روی داین، ئەگەر ل سور و سایدا روی دابان، ئەو هەر ژ مێژە دا ل خۆ زڤڕن، كو خراری بكەنە بەر خۆ و خولیێ ب سەرێ خۆ دا كەن،
لێ دبێژمە هەوە: ل رۆژا دادكرنێ دێ رەوشا سور و سایدایێ ژ یا هەوە باشتر بیت.
تۆ ژی هەی كەفەرناحوم، ما دێ بۆ ئەسمانی هێیە بلندكرن؟ نەخێر! تۆ دێ كەڤیە وارێ مریان. ئەگەر ئەو حنێرێن ل ناڤ تە هاتینە كرن ل سەدۆمێ هاتبانە كرن، دا هەتا ئەڤرۆ مینیت،
لێ دبێژمە هەوە: ل رۆژا دادكرنێ دێ رەوشا وەڵاتێ سەدۆمێ ژ یا تە باشتر بیت.»
ل وی دەمی عیسای گۆت: «باب، خودانێ ئەرد و ئەسمانی، ئەز سوپاسیا تە دكەم، چنكو تە ئەڤ تشتێن هەنێ ژ تێگەهشتی و ئاقلمەندان ڤەشارتن و تە بۆ زاڕۆكان ئاشكرا كرن.
بەلێ باب، چنكو هۆسا د دیتنا تە دا باش بوو.
هەمی تشت ژ لایێ بابێ من ڤە بۆ من یێن هاتینە دان. كەس كوڕی ناس ناكەت ژبلی بابی، كەس بابی ژی ناس ناكەت ژبلی كوڕی و هەر كەسێ كوڕی بڤێت بابی بۆ وی ئاشكرا بكەت.
وەرنە نك من، هەی هەمی ماندیبووی و بارگرانان، ئەز دێ بێهنا هەوە ڤەدەم.
نیركێ من داننە سەر ستۆیێ خۆ و ژ من فێر ببن، چنكو ئەز یێ دلنەرم و دەروونبچویكم و دێ بۆ دەروونێن خۆ بێهنڤەدانێ بینن.
چنكو نیركێ منێ گونجایە و بارێ منێ سڤكە.»
وی دەمی عیسا ل رۆژا شەمبیێ د ناڤ دەخلان را بوری. شاگردێن وی برسی بوون و دەست ب گولیكرنێ كر و خوارن.
دەمێ فەریسیان دیتی، گۆتێ: «بەرێ خۆ بدێ، شاگردێن تە یێ وێ دكەن، ئەوا نە رەوایە د شەمبیێ دا بهێتە كرن!»
ئینا گۆتە وان: «ما هەوە نە خواندیە كا داوودی چ كر ، دەمێ ئەو و یێن ل گەل وی برسی بووین،
چەوا چوو د مالا خودێ ڤە و نانێ پێشكێشیێ خوار، ئەوێ نە بۆ وی رەوا بوو بخۆت، نە بۆ یێن ل گەل وی، ب تنێ بۆ كاهنان رەوا بوو؟
یان ما هەوە د دەستووری دا نە خواندیە كو ل شەمبیێ كاهن د پەرستگەهێ ڤە زێدەگاڤیێ ل سەر پیرۆزیا شەمبیێ دكەن و گونەهبار نابن؟
لێ ئەز دبێژمە هەوە: ئێكێ ژ پەرستگەهێ مەزنتر یێ ل ڤێرێ.
ئەگەر هوین د رامانا ڤێ ئاخفتنێ گەهشتبان: ‹من دلۆڤانی دڤێت، نەكو قوربان،› هەوە یێن بێگونە‍‌ھ داد نەدكرن.
چنكو كوڕێ مرۆڤ خودانێ شەمبیێیە.»
پاشی وێرێ ب ج‍‌ھ هێلا و چوو د كنیشتەیا وان ڤە،
وەسا چێبوو مرۆڤەكێ دەست گورۆج ل وێرێ بوو. وان پرسیار ژ عیسای كر: «ئەرێ ساخكرن ل شەمبیێ رەوایە؟» مەبەستا وان ئەو بوو كو عیسای تاوانبار بكەن.
ئەوی گۆتە وان: «ئەگەر ئێك ژ هەوە پەزەك هەبیت و ل رۆژا شەمبیێ بكەڤیتە د چاڵەكێ دا، ما ناگریت و دەربئێخیت؟
ئەڤجا مرۆڤ چەند ژ پەزی ب بهاترە! ژ بەر هندێ رەوایە باشی ل شەمبیێ بهێتە كرن.»
پاشی گۆتە وی مرۆڤی: «دەستێ خۆ درێژ كە.» وی ژی دەستێ خۆ درێژ كر و ساخ بووڤە وەكو دەستێ دی لێ هات.
لێ فەریسی دەركەفتن و ل دژی عیسای دەست ب پیلان دانانێ كرن، كا چەوا وی بكوژن.
لێ عیسای زانی، ئینا ژ وێرێ چوو. گەلەك ب دویڤ كەفتن و وی هەمی نەساخێن وان ساخ كرن
و فەرمان ل وان كر كو وی ئاشكرا نەكەن.
ئەڤ چەندە چێبوو، دا ئەوا ل سەر ئەزمانێ ئیشایا پێغەمبەری هاتی ب ج‍‌ھ بهێت، دەمێ دبێژیت:
«ئەڤەیە خزمەتكارێ من، یێ من هەلبژارتی، خۆشتڤیێ من، یێ دلێ من پێ خۆش بووی. ئەز دێ گیانێ خۆ دانمە سەر و ئەو دێ دادوەریێ ل سەر مللەتان بەڵاڤ كەت.
نە هەڤڕكیێ دكەت و نە هەواران رادهێلیت و كەسێ ل سەر جادەیان گو‍‌ھ ل دەنگێ وی نابیت،
لەڤەنەكێ هەڕشی ژی ناشكێنیت و پەتیلەكا نیڤ ڤەمری ناڤەمرینیت ، هەتا كو دادوەریێ ب سەر نە ئێخیت.
هیڤیا مللەتان دێ ب ناڤێ وی ڤە هێتە گرێدان.»
پاشی وان مرۆڤەكێ كۆرە و لال یێ ئەجنەیان هنگافتی ئینا نك عیسای و عیسای ئەو ساخ كر، ئێدی ئەو مرۆڤ شیا بئاخڤیت و ببینیت ژی.
هەمی خڕڤەبووی گوهشین و گۆتن: «ئەرێ ما ئەڤەیە كوڕێ داوودی؟»
لێ دەمێ فەریسیان ئەڤە بهیستی، وان گۆت: «ئەو ب تنێ ب دەستهەلاتا بەعلزەبولێ سەرۆكێ ئەجنەیان ئەجنەیان دەردئێخیت.»
ئینا عیسای هزرێن وان زانین و گۆتێ: «هەر پاشایەتیەكا دووبەرەكی بكەڤیتە د ناڤ دا، دێ وێران بیت و هەر باژێڕەك یان مالەكا دووبەرەكی بكەڤیتە د ناڤ دا، خۆ راناگریت.
ئەگەر ئبلیس ئبلیسی دەربئێخیت، ئەڤە دووبەرەكی كەفتە د ناڤ دا، ئەڤجا چەوا پاشایەتیا وی دێ خۆ راگریت؟
و ئەگەر ئەز ب ‹بەعلزەبولی› ئەجنەیان دەربئێخم، پا كوڕێن هەوە ب كێ دەردئێخن؟ ژ بەر هندێ ئەو دێ دادوەرێن هەوە بن،
لێ ئەگەر ئەز ب گیانێ خودێ ئەجنەیان دەردئێخم، ئەڤە پاشایەتیا خودێ یا ب سەر هەوە دا هاتی.
یان چەوا ئێك دشێت بچیتە د مالا زەڵامەكێ هێزدار ڤە و كەلوپەلێن وی تالان بكەت، ئەگەر ئەو ل بەراهیێ وی زەڵامێ هێزدار گرێ نەدەت و پشتی هنگی مالا وی تالان بكەت؟
هەر كەسێ ل گەل من نەبیت، ئەو دژی منە و هەر كەسێ ل گەل من خڕڤە نەكەت، ئەو بژاڵە دكەت.
ژ بەر هندێ ئەز دبێژمە هەوە: هەر گونەهەك و هەر گۆتنەكا خراب دێ ل مرۆڤان هێنە بورین، لێ ل كوفركرنێ د دەرهەقا گیانی دا ناهێتە بورین.
هەر كەسێ گۆتنەكا خراب د دەرهەقا كوڕێ مرۆڤ دا بێژیت، دێ ل وی هێتە بورین، لێ هەر كەسێ كوفریەكێ د دەرهەقا گیانێ پیرۆز دا ببێژیت، ل وی ناهێتە بورین، نە د ڤی جیهانێ دا و نە ژی د جیهانا دی دا.
دار ژ بەرهەمێ وێ دهێتە نیاسین، ئەڤجا خۆ ئێك دل بكەن: یان دار یا باشە و بەرهەمێ وێ یێ باشە، یان ژی دار یا خرابە و بەرهەمێ وێ یێ خرابە!
هەی تێژكێن ماران، چەوا هوینێن خراب دشێن ئاخفتنەكا چاك بێژن؟ چنكو دل ب چ یێ پڕە، دەڤ وێ دبێژیت.
مرۆڤێ باش ژ گەنجینەیا باشیێ، باشیێ دەردئێخیت و مرۆڤێ خراب ژ گەنجینەیا خرابیێ، خرابیێ دەردئێخیت.
لێ ئەز دبێژمە هەوە: هەر پەیڤەكا پویچ یا مرۆڤ بێژیت، ل رۆژا دادكرنێ دێ ژێ بەرپرسیار بیت.
چنكو تۆ ب ئاخفتنا خۆ دێ هێیە بێگونەهكرن و تۆ ب ئاخفتنا خۆ دێ هێیە گونەهبار كرن.»
وی دەمی هندەك مامۆستایێن دەستووری و فەریسیان بەرسڤا وی دا و گۆتن: «مامۆستا، ئەم حەز دكەین نیشانەكێ ل سەر دەستێ تە ببینین!»
وی بەرسڤا وان دا و گۆت: «نفشەكێ خرابكار و دەهمەنپیس نیشانەكێ دخوازیت، لێ ژبلی نیشانا یونس پێغەمبەری چ نیشان بۆ ڤی نفشی ناهێنە دان.
هەروەكو یونس سێ شەڤ و سێ رۆژان مایە د زكێ نەهنگی دا ، هەروەسا كوڕێ مرۆڤ ژی سێ شەڤ و سێ رۆژان دێ مینیتە د دلێ ئەردی دا.
خەلكێ نەینەوا دێ د رۆژا دادكرنێ دا ل گەل ڤی نفشی رابن و دێ وی گونەهبار كەت، چنكو ئەو ژ بەر ئاگەهداریا یونسی راگەهاندی، ل خۆ زڤڕین و ئەڤە ئێكێ ژ یونسی مەزنتر ل ڤێرێیە!
شاژنا باشووری دێ د رۆژا دادكرنێ دا، ل گەل ڤی نفشی رابیت و دێ وی گونەهبار كەت، چنكو ئەو ژ دویماهیا جیهانێ هات دا گو‍‌ھ بدەتە ئاقلمەندیا سلێمانی و ئەڤە ئێكێ ژ سلێمانی مەزنتر ل ڤێرێیە!
دەمێ گیانێ پیس ژ مرۆڤی دەردكەڤیت، د ناڤ بیابانێ دا ل حەوانگەهەكێ دگەڕیێت، لێ نابینیت.
هنگی ئەو دبێژیت: ‹دا بزڤڕمە مالا خۆ یا ئەز ژێ دەركەفتیم.› دەمێ دگەهیتە مالێ، دبینیت یا ڤاڵا و مالشتی و لێكدایە.
پاشی دچیت حەفت گیانێن دی یێن ژ خۆ پیستر ل گەل خۆ دئینیت و دچنە د وی جهی دا و تێدا ئاكنجی دبن. ئەڤجا رەوشا دویماهیێ یا وی مرۆڤی ژ یا بەرێ كمباختر لێ دهێت. رەوشا ڤی نفشێ خرابكار ژی دێ یا هۆسا بیت!»
دەمێ ئەو هێشتا بۆ خڕڤەبوویان دئاخفت، وەسا چێبوو دایك و برایێن وی هاتن و ژ دەرڤە راوەستیان، داخواز دكر ل گەل وی بئاخڤن.
ئینا ئێك ژ ئامادەبوویان گۆتێ: «ئەڤە دایكا تە و برایێن تە ژ دەرڤە د راوەستیاینە، دڤێن ل گەل تە بئاخڤن.»
لێ عیسای بەرسڤا وی دا و گۆت: «دایكا من كیە و برایێن من كینە؟»
و دەستێ خۆ درێژ كرە شاگردێن خۆ و گۆت: «ئها ئەڤەنە دایك و برایێن من.
چنكو هەر كەسێ ب حەزا بابێ من یێ ل ئەسمانان بكەت، ئەوە خویشك و برا و دایكا من.»
هەر وێ رۆژێ عیسا ژ مال دەركەفت و ل سەر لێڤا دەریاكێ روینشت.
گەلەك خەلك لێ خڕڤە بوو، ژ بەر هندێ ئەو ل بەلەمەكێ سیار بوو و روینشت، هەمی خەلك ژی ل سەر لێڤا دەریاكێ مانە راوەستیای.
بۆ وان ب نموونەیان ل سەر گەلەك تشتان ئاخفت و گۆت: «تۆڤچین دەركەفت دا تۆڤی بهاڤێژیت.
دەمێ وی تۆڤ دهاڤێت، هندەك ژێ كەفتە سەر رێكێ، ئینا باڵندە هاتن و خوار.
هندەك ژی كەفتە سەر ئەردەكێ كەڤرین یێ كێم ئاخ و زوی شین بوو، چنكو ئاخا وی نە یا كویر بوو،
لێ دەمێ رۆژ هەلاتی، سۆت و چنكو یێ بێ رە‍‌ھ بوو، هشك بوو.
هندەك ژی كەفتە ناڤ ستریان، ستریان وەرار كر و ئەو فەتساند.
هندەك ژی كەفتە ئەردەكێ باش و بەرهەم دا. هندەك ژێ سەد جاركی بەرهەم دا و هندەكان شێست جاركی و هندەكان ژی سی‍‌ھ جاركی.
ئێدی ئەوێ گو‍‌ھ هەبن، بلا ببهیسیت.»
ئینا شاگرد هاتنە نك وی و ژێ پرسی: «بۆچی تۆ بۆ وان ب نموونەیان دئاخڤی؟»
وی بەرسڤا وان دا و گۆت: «تێگەهشتنا نهێنیێن پاشایەتیا ئەسمانان بۆ هەوە یا هاتیە دان، لێ بۆ وان نەهاتیە دان،
چنكو ئەوێ هەیی دێ پتر بۆ وی هێتە دان تاكو د سەردا دچیت، لێ ئەوێ نەیی، خۆ یێ هەی ژی دێ ژێ هێتە ستاندن.
ئەز بۆ وان ب نموونەیان دئاخڤم، چنكو ئەو دنێڕن لێ نابینن و گو‍‌ھ ددەن لێ نابهیسن و تێناگەهن.
ئەڤجا پەیاما خودێ یا ئیشایای راگەهاندی د وان دا ب ج‍‌ھ دهێت، ئەوا دبێژیت: ‹هوین دێ گو‍‌ھ ڤەكری بهیسن و تێناگەهن، دێ چاڤ ڤەكری لێ نێڕن و نابینن،
چنكو ئەڤ مللەتە یێ سەرهشك بووی و گوهێن وان یێن گران بووین و چاڤێن خۆ یێن نقاندین، نەكو ب چاڤێن خۆ ببینن و ب گوهێن خۆ ببهیسن و ب مەژیێ خۆ تێبگەهن و بزڤڕن، دا ساخ بكەم.›
لێ خوزیكێن چاڤێن هەوە، چنكو دبینن و گوهێن هەوە، چنكو دبهیسن.
ئەز ب راستی دبێژمە هەوە: هزرەتا گەلەك پێغەمبەر و راستداران ئەو بوو، وێ چەندێ ببینن یا هوین دبینن، لێ وان نەدیت و وێ چەندێ ببهیسن یا هوین دبهیسن، لێ وان نەبهیست.
ئەڤجا هوین گوهێ خۆ بدەنە رامانا نموونەیا تۆڤچینی:
هەر كەسێ پەیڤا پاشایەتیێ ببهیسیت و تێنەگەهیت، یێ خرابكار دهێت و ئەوا د دلێ وی دا هاتیە چاندن، دڕەڤینیت، ئەڤەیە تۆڤێ ل سەر رێكێ هاتیە چاندن.
لێ تۆڤێ ل سەر ئەردێ كەڤرین هاتیە چاندن، ئەو كەسن یێن پەیڤێ دبهیسن و ئێكسەر ب دلخۆشی وەردگرن،
لێ ژ بەر كو رە‍‌ھ تێدا نینە، ئەو د دۆمكورتن و دەمێ تەنگاڤی یان تەپەسەری ژ بەر پەیڤێ ب سەرێ وان دهێت، ئێكسەر پەیڤێ دهێلن.
ئەو تۆڤێ ل ناڤ ستریان هاتیە چاندن، ئەو كەسن یێن پەیڤێ دبهیسن، لێ خەمێن ڤێ جیهانێ و خاپاندنا دەولەمەندیێ پەیڤێ دفەتسینن و پەیڤ بێ بەرهەم دبیت.
لێ ئەو تۆڤێ ل ئەردێ باش هاتیە چاندن، ئەو كەسن یێن پەیڤێ دبهیسن و تێدگەهن. ئەو بەرهەمی ددەن، هندەك ژێ سەد جاركی و هندەك ژێ شێست جاركی و هندەك ژێ سی‍‌ھ جاركی بەرهەمی ددەن.»
نموونەیەكا دی بۆ وان ئینا و گۆت: «پاشایەتیا ئەسمانان وەكو وی مرۆڤیە یێ تۆڤەكێ باش ل ناڤ زەڤیا خۆ چاندی
و دەمێ خەلك نڤستی، دوژمنێ وی هات و زیوان هاڤێتە ناڤ گەنمی و چوو.
پشتی گەنم شین بووی و گولی دای، زیوان ژی ل گەل دیار بوو.
بەنیێن خودانێ زەڤیێ هاتن و گۆتنێ: ‹ئەزبەنی، ما تە تۆڤێ باش نەهاڤێتبوو زەڤیا خۆ؟ پا ئەڤ زیوانە ژ كیڤە هات؟›
بەرسڤا وان دا: ‹دوژمنەكی ئەڤە یا كری!› ئینا بەنیان پرسیار ژێ كر: ‹تە دڤێت بچین و زیوانێ كۆم كەین؟›
بەرسڤا وان دا: ‹نەخێر، نەكو ل گەل كۆمكرنا زیوانێ هوین گەنمی هەلكێشن.
بهێلن هەردوو پێكڤە شین ببن، هەتا دەمێ دروینێ دهێت. د وی دەمی دا، دێ بێژمە پالەیێن دروینێ: ل بەراهیێ زیوانێ كۆم كەن و بكەنە گورز دا بهێتە سۆتن، لێ گەنمی كۆم كەن و بكەنە د عومبارا من دا.›
وی بۆ وان نموونەیەكا دی ژی ئینا و گۆت: پاشایەتیا ئەسمانان وەكو دندكەكا خەردەلێیە، مرۆڤەكی بر و هاڤێتە زەڤیا خۆ.
ئەو ژ هەمی تۆڤان بچویكترە، لێ دەمێ شین دبیت ژ هەمی دەرامەتی مەزنتر لێ دهێت و دبیتە دار كو باڵندەیێن ئەسمانی ل سەر چەقێن وێ ڤەدحەویێن.»
نموونەیەكا دی ژی بۆ وان ئینا و گۆت: «پاشایەتیا ئەسمانان وەكو هەڤیرترشییە، كو ژنكەكێ ئینای و كریە د ناڤ سێ لەگەنێن ئاری دا ، هەتا هەمی ترش بووی.»
ئەڤە هەمی عیسای ب نموونە بۆ خڕڤەبوویان گۆت و تشتەك بێی نموونە بۆ وان نەگۆت.
ئەڤ چەندە چێبوو، دا ئەوا پێغەمبەری گۆتی ب ج‍‌ھ بهێت: ئەز دێ ب نموونەیان ئاخڤم، ئەو تشتێن ژ دامەزراندنا جیهانێ د ڤەشارتی، دێ ئاشكرا كەم.
پاشی عیسای خڕڤەبووی ڤەڕەڤاندن و چوو مال، شاگردێن وی هاتنە نك و گۆتنێ: «رامانا نموونەیا زیوانا زەڤیێ بۆ مە شڕۆڤە بكە.»
بەرسڤ دا و گۆتە وان: «تۆڤچینێ تۆڤێ باش، ئەو كوڕێ مرۆڤە
و زەڤی جیهانە و تۆڤێ باش كوڕێن پاشایەتیێنە و زیوان ژی كوڕێن خرابیێنە
و ئەو دوژمنێ زیوان چاندی ئبلیسە، دروین ژی دویماهیا جیهانێیە و پالەیێن دروینێ ژی فریشتەنە.
دێ ل دویماهیا جیهانێ وەسا چێبیت كا چەوا زیوانێ كۆم دكەن و ب ئاگری دسوژن،
كوڕێ مرۆڤ دێ فریشتەیێن خۆ هنێریت، داكو یێن بووینە ئەگەرێ هەلنگفتنێ و خرابكاران ژ پاشایەتیا وی كۆم كەن
و دێ هاڤێژنە د ئێتوینا ئاگری دا و ل وێرێ گری و گڤاشتنا ددانانە.
هنگی یێن راستدار وەكو رۆژێ د پاشایەتیا بابێ خۆ دا، دێ رۆناهیێ دەن. ئەوێ گو‍‌ھ هەبن، بلا ببهیسیت.»
«پاشایەتیا ئەسمانان وەكو گەنجینەیەكا ڤەشارتی یا د ناڤ زەڤیەكێ دایە، ئەوا مرۆڤەكی دیتی و ڤەشارتیەڤە، ئینا ژ كەیفان دا چوو هەمی تشتێن هەین فرۆتن و ئەو زەڤی كڕی.
دیسان پاشایەتیا ئەسمانان وەكو بازرگانەكیە، ئەوێ ل مراریێن بهاگران دگەڕیا
و دەمێ وی مراریەكا گەلەك ب بها دیتی، چوو هەمی تشتێن هەین فرۆتن و ئەو مراری كڕی.»
«دیسان پاشایەتیا ئەسمانان وەكو تۆڕەكێیە، ئەوا هاڤێتیە د دەریایێ دا و ژ هەمی رەنگان ماسی پێ گرتین
و دەمێ پڕ بووی، وان كێشا بەر لێڤا دەریایێ و روینشتن و یێن باش ژێ گرتن و كرنە د سەڵكان دا و یێن خراب هاڤێتن.
د دویماهیا جیهانێ دا دێ هۆسا بیت: دێ فریشتە هێن و خرابكاران ژ ناڤ راستداران دەرئێخن
و دێ هاڤێژنە د ئێتوینا ئاگری دا و ل وێرێ گری و گڤاشتنا ددانانە.»
عیسای پرسیار ژ وان كر: «ئەرێ هوین د ڤان هەمیان گەهشتن؟» وان بەرسڤا وی دا: «بەلێ.»
پاشی گۆتە وان: «ئەڤجا هەر مامۆستایەكێ دەستووری یێ ل سەر پاشایەتیا ئەسمانان هاتیە پەروەردەكرن، وەكو خودان ملكەكیە، ئەوێ ژ گەنجینەیا خۆ، تشتێن نوی و یێن كەڤن دەردئێخیت.»
پشتی عیسای ئەڤ نموونە ب دویماهی ئیناین، ژ وێرێ چوو
و هاتە باژێڕكێ خۆ و دەست ب فێركرنێ د كنیشتەیێن وان دا كر، ئەڤجا ئەو گوهشین و گۆتن: «ئەرێ وی ئەڤ ئاقلمەندی و حنێرە ژ كیڤە ئیناینە؟
ئەرێ ئەو نە كوڕێ دارتاشیە؟ ئەرێ ناڤێ دایكا وی نە مەریەمە، برایێن وی یەعقوب و یوسڤ و شەمعون و یەهودا نینن؟
ئەرێ هەمی خویشكێن وی ل نك مە نینن؟ پا ئەڤە هەمی ژ كیرێ ئیناینە؟»
و ئەو ژ وی دلگران بوون. لێ عیسای گۆتە وان: «چ پێغەمبەر د بێ رێز نینن، ب تنێ د باژێڕ و مالا خۆ دا نەبیت.»
وی ل وێرێ، ژ بەر بێباوەریا وان، گەلەك حنێر نەكرن.
ل وی دەمی، هێرودێسێ دەستهەلاتدار نوچەیێن عیسای بهیستن،
ئینا گۆتە خزمەتكارێن خۆ: «ئەڤە یوحەننایێ تافیركەرە. ئەو ژ ناڤ مریان یێ رابووی، ژ بەر هندێ حنێر ل سەر دەستێ وی چێدبن.»
هێرودێسی یوحەننا ژ بەر هیرودیایا هەڤژینا برایێ خۆ فیلیپۆسی گرتبوو و ب زنجیران گرێ دابوو و كربوو د زیندانێ دا،
چنكو یوحەننای دگۆتە وی: «نە یا رەوایە تۆ وێ ل خۆ مارە بكەی.»
هێرودێسی دڤیا یوحەننای بكوژیت، لێ ئەو ژ خەلكی دترسیا، چنكو وان یوحەننا ب پێغەمبەر ددانا.
ل دەمێ گێڕانا ئاهەنگا ژدایكبوونا هێرودێسی، كچا هیرودیایێ ل ناڤەڕاستێ سەما كر و هێرودێس گەلەك پێ دلخۆش بوو.
ئینا سویند خوار و سۆز دایێ، كو هەر تشتەكێ وێ بڤێت بدەتێ.
كچكێ ل دویڤ هاندانا دایكا خۆ گۆتێ: «ل ڤێرێ تۆ سەرێ یوحەننایێ تافیركەر ل سەر سێنیەكێ بدە من!»
پاشا خەمگین بوو، لێ ژ بەر وان سویندێن وی خوارین و ژ بەر مێڤانان، وی فەرمان دا كو ئەو تشتێ وێ بڤێت وەرگریت.
فەرمان هنارتە زیندانێ و سەرێ یوحەننای بڕی
و سەرێ وی ل سەر سێنیەكێ ئینا و دا كچكێ، ئەوێ ژی ئینا نك دایكا خۆ.
شاگردێن یوحەننای هاتن و تەرمێ وی بر و ڤەشارت. پشتی هنگی چوون گۆتنە عیسای.
دەمێ عیسای ئەو رویدان بهیستی، ب تنێ ب بەلەمێ بۆ جهەكێ ڤەدەر چوو. خەلكی ئەڤ چەندە بهیست، ئینا ژ باژێڕان ب پێیان خۆ گەهاندە وی.
دەمێ عیسا ژ بەلەمێ هاتیە خوارێ و كۆمەكا مەزن یا مرۆڤان دیتی، دلێ وی ب وان سۆت و نەساخێن وان ساخ كرن.
گاڤا بوویە ئێڤار، شاگرد هاتنە نك وی و گۆتنێ: «ئەڤە جهەكێ ڤەدەرە و دەم بوویە درەنگی. جەماوەری بڤەڕەڤینە، دا بچنە گوندان و خوارنێ بۆ خۆ بكڕن.»
لێ عیسای گۆتە وان: «چوونا وان نە یا پێدڤیە. هوین تشتەكی بدەنێ دا بخۆن.»
ئینا وان گۆتێ: «ل ڤێرێ مە ژبلی پێنج نان و دوو ماسیان تشتەكێ دی نینە.»
ئینا گۆت: بۆ من بیننە ڤێرێ.
عیسای گۆتە جەماوەری ل سەر گیای رویننە خوار. پاشی هەر پێنج نان و هەردوو ماسی وەرگرتن، بەرێ خۆ دا ئەسمانی و سوپاسیا خودێ كر و نان كەر كر و داڤ شاگردان، ئینا وان ل سەر جەماوەری بەڵاڤ كرن.
هەمیان خوار و تێر بوون، پاشی دوازدە سەڵكێن تژی پرتێن بەرمایكان راكرن.
ژمارەیا ئەوێن خواری نێزیكی پێنج هزار زەڵامان بوو، ژبلی ژن و زاڕۆكان.
هەر د وێ گاڤێ دا عیسای لەز ل شاگردان كر، كو ل بەلەمێ سیار بن و بەری وی بچنە لایێ دی یێ دەریاكێ، هەتا ئەو جەماوەری ڤەدڕەڤینیت.
پشتی وی جەماوەر ڤەڕەڤاندی، ب تنێ ب سەر چیای كەفت دا نڤێژێ بكەت. شەڤ ب سەردا هات و ئەو ب تنێ ل وێرێ بوو،
لێ بەلەما شاگردان گەهشتبوو نیڤا دەریاكێ و پێلان لێ ددا، چنكو بەرێ بای دژی وان بوو.
بەری ئەلندێ، عیسا ب پێیان ل سەر ئاڤا دەریاكێ چوو نك وان.
دەمێ شاگردان دیتی ئەو یێ ل سەر ئاڤێ بڕێڤە دچیت، بزدیان و گۆتن: «ئەڤە رەشەیەكە!» و ژ ترسان دا كرنە هەوار.
هەر د گاڤێ دا عیسای گۆتە وان: «پشتڕاست بن! ئەزم، نەترسن!»
پەترۆسی گۆتێ: «خودان، ئەگەر تۆ ئەو بی، فەرمانێ بدە من، داكو ئەز ب پێیان ل سەر ئاڤێ بهێمە نك تە.»
عیسای گۆتێ: «وەرە!» ئینا پەترۆس ژ بەلەمێ هاتە خوار و ل سەر ئاڤێ بەرەڤ عیسای ڤە چوو.
لێ دەمێ وی دیتی با یێ دژوارە ترسیا و دەست ب نقوومبوونێ كر، كرە هەوار: «خودان، من قورتال بكە!»
لێ د گاڤێ دا عیسای دەستێ خۆ درێژ كرێ و گرت و گۆتێ: «هەی كێمباوەر، تۆ بۆچی ب گۆمان كەفتی؟»
دەمێ ئەو ل بەلەمێ سیار بووین، با راوەستیا،
ئینا ئەوێن د بەلەمێ دا سوجدە بۆ بر و گۆتن: «ب راستی تۆ كوڕێ خودێی.»
دەمێ ئەو دەربازی لایێ دی یێ دەریاكێ بووین، ل دەڤەرا جەنیسارتێ پەیا بوون.
خەلكێ وێ دەڤەرێ ئەو نیاسی و خەلكێ دەوروبەر ئاگەهدار كرن، ئەڤجا هەمی نەساخ ئینانە نك
و هیڤی ژێ دكرن، كو ب تنێ ئەو دەستێ خۆ بكەنە ریشالۆكەكا كراسێ وی و هەمیێن دەستێ خۆ گەهاندیێ ساخ بوون.
ل وی دەمی، هندەك فەریسی و مامۆستایێن دەستووری ژ ئورشەلیمێ هاتنە نك عیسای و گۆتن:
«بۆچی شاگردێن تە سەرپێچیا تیتالێن باب و كالان دكەن؟ ئەو بەری خوارنێ دەستێن خۆ ناشوون.»
عیسای بەرسڤ دا و گۆتە وان: «ئەرێ بۆچی هوین ژ بەر تیتالێن خۆ سەرپێچیا فەرمانا خودێ دكەن؟
خودێ یێ گۆتی: ‹رێزێ ل دایك و بابێن خۆ بگرە› و ‹هەر كەسێ ئاخفتنێن كرێت بێژیتە بابێ خۆ یان دایكا خۆ، دڤێت بهێتە كوشتن.›
لێ هوین دبێژن: هەر كەسێ بێژیتە بابێ خۆ یان دایكا خۆ: ‹ئەو مفایێ هەوە ژ من ددیت، وەكو پێشكێشی من دا خودێ،›
ئێدی ل سەر وی نەما ئەو رێزێ ل دایك و بابێن خۆ بگریت. هوین هۆسا پەیڤا خودێ بۆ پاراستنا تیتالێن خۆ ژ كار دئێخن.
هەی مرۆڤێن دووڕوی! ئیشایا یێ راست بوو دەمێ پەیاما خودێ دەربارەی هەوە راگەهاندی، دەمێ گۆتی:
‹ئەڤ مللەتە ب دەڤی رێزێ ل من دگریت، لێ دلێ وی گەلەك یێ ژ من دویرە.
ئەو ژ قەستا من دپەرێسن، چنكو ئەو راسپاردەیێن مرۆڤان، هەروەكو فەرمانێن من بن، نیشا خەلكی ددەن.› »
پاشی گازی خەلكی كر و گۆتێ: «گو‍‌ھ بدەن و تێبگەهن:
ئەوێ مرۆڤی دهەڕمینیت، نە ئەوە یێ دچیتە د دەڤی دا، لێ ئەوێ ژ دەڤی دەردكەڤیت.»
هنگی شاگردان خۆ نێزیكی وی كر و گۆتنێ: «تۆ دزانی دەمێ فەریسیان گو‍‌ھ ل ڤێ ئاخفتنێ بووی، دلگران بوون؟»
وی بەرسڤ دا: «هەر شینكاتیەكا بابێ من یێ ئەسمانی نەچاندبیت، دێ هێتە هەلكێشان.
وان بهێلن، ئەو د كۆرەنە رێبەراتیا كۆرەیان دكەن. ئەگەر ئێكێ كۆرە كۆرەیەكی بڕێڤە ببەت، هەردوو دێ كەڤنە د چاڵەكێ دا.»
پەترۆسی گۆتێ: «بۆ مە ڤێ نموونەیێ روهن بكە.»
عیسای گۆت: «ئەرێ هوین ژی هێشتا تێنەگەهشتینە؟
ما هوین نزانن هەر چ تشتێ دچیتە د دەڤی دا، دچیتە د زكی ژی دا، پاشی دەردكەڤیتە ژ دەرڤە؟
لێ ئەوێ ژ دەڤی دەردكەڤیت، ئەو ژ دلی دەردكەڤیت و ئەوە مرۆڤی دهەڕمینیت.
چنكو ژ دلی ئەڤە دەردكەڤن: هزرێن خراب، كوشتن، دەهمەنپیسی، بێنامویسی، دزی، شاهدەییا ب درەو و بوهتان.
ئەڤەنە ئەوێن مرۆڤی دهەڕمینن. لێ خوارنا زادی ب دەستێن نەشویشتی مرۆڤی ناهەڕمینیت.»
عیسای ئەو دەڤەر هێلا و چوو دەوروبەرێن سور و سایدا.
وەسا چێبوو ژنەكا كەنعانی كو خەلكا وان دەڤەران بوو، هاتە نك و ب هەواركی ڤە گۆت: «خودان، كوڕێ داوودی، دلۆڤانیێ ب من ببە! ئەجنەیەكی كچا من یا هنگافتی و گەلەك ئەشكەنجە ددەت.»
لێ وی ب چ پەیڤان بەرسڤ نەدا، ئەڤجا شاگردێن وی نێزیك بوون و داخواز ژێ كر: «ڤێ ژ مە دویر بئێخە، چنكو یا ب دویڤ مە ڤە دكەتە هەوار.»
لێ وی بەرسڤ دا: «ئەز ب تنێ بۆ وان پەزێن بەرزە یێن مالا ئیسرائیلێ یێ هاتیمە هنارتن.»
لێ ئەو ژنك هاتە نك و سوجدە بۆ بر و گۆتێ: «خودان، هاریكاریا من بكە.»
وی بەرسڤ دا: «نە دروستە نانێ زاڕۆكان ببەن و بهاڤێژنە بەر كویچكان!»
وێ بەرسڤ دا: «دروستە خودان، لێ كویچك ژی وان پرتان دخۆن یێن ژ مێزا خودانێ وان دكەڤن.»
ئێدی عیسای بەرسڤا وێ دا: «خانم، باوەریا تە یا ب هێزە! داخوازا تە ب ج‍‌ھ هات.» ئینا د وێ گاڤێ دا كچا وێ ساخ بوو.
عیسای ئەو دەڤەر هێلا و بەرەڤ كنارێ دەریاكا جەلیل ڤە چوو و ب سەر چیای كەفت و ل وێرێ روینشتە خوار.
ئینا جەماوەرەكێ مەزن هاتە نك و گەلەك مرۆڤێن لەنگ و كۆرە و سەقەت و لال و گەلەك نەساخێن دی ل گەل خۆ ئینان و ل بەر پێیێن وی دانان، ئەوی ژی ساخ كرن.
ژ بەر ڤێ چەندێ جەماوەر حێبەتی بوو، دەمێ وان دیتی لال یێ دئاخڤن و پەككەفتی یێ ساخ دبن و لەنگ یێ بڕێڤە دچن و كۆرە یێ دبینن. ئینا وان خودایێ ئیسرائیلێ مەزن كر.
عیسای گازی شاگردێن خۆ كر و گۆت: «دلێ من یێ ب جەماوەری ڤە، چنكو ئەڤە سێ رۆژە ئەو ل گەل من و وان چ نینە بخۆن. من نەڤێت ئەز وان برسی ڤەڕەڤینم، نەكو د رێكێ دا ژ برسا دا بكەڤن!»
شاگردان گۆتێ: «مە ژ كیڤە ل ڤی چۆلی هند نان هەیە، ڤی جەماوەری هەمیێ تێر بكەت؟»
عیسای گۆتە وان: «هەوە چەند نان هەنە؟» وان گۆت: «حەفت نان و چەند ماسیێن بچویك.»
عیسای فەرمان ل جەماوەری كر، كو ل سەر ئەردی رویننە خوار.
پاشی هەر حەفت نان و ماسی هەلگرتن و سوپاسیا خودێ كر و كەر كرن و دانە شاگردێن خۆ و شاگردان ژی دا جەماوەری.
ئینا هەمیان خوار و تێر بوون و حەفت سەڤیكێن تژی ژ پرتێن بەرمایكان راكرن.
و ئەوێن خوارین، ژبلی ژنان و زاڕۆكان، چوار هزار زەڵام بوون.
پاشی عیسای جەماوەر ڤەڕەڤاند و ل بەلەمێ سیار بوو و چوو دەڤەرا مەگەدانێ.
فەریسی و سەدوقی هاتنە نك عیسای، دا وی تاقی بكەن، داخواز ژێ كر كو نیشانەكێ ژ ئەسمانی نیشا وان بدەت.
بەرسڤا وان دا: «دەمێ رۆژ ئاڤا دبیت، هوین دبێژن: ‹دێ ساهی بیت، چنكو ئەسمان یێ سۆر بووی.›
لێ سپێدێ دبێژن: ‹ئەڤرۆ دێ سەقا یێ نەخۆش بیت، چنكو ئەسمان یێ سۆر و گرتییە.› هوین دزانن دیمەنێ ئەسمانی شڕۆڤە بكەن، لێ هوین نەشێن نیشانێن سەردەمان شڕۆڤە بكەن.
نفشەكێ خرابكار و دەهمەنپیس نیشانەكێ دخوازیت، لێ ژبلی نیشانا یونس پێغەمبەری ، چ نیشان بۆ ڤی نفشی ناهێنە دان.» پاشی ئەو هێلان و چوو.
دەمێ شاگردێن وی چووینە كنارێ دی، ژ بیر كربوو كو نانی ل گەل خۆ ببەن.
عیسای گۆتە وان: «ئاگەهدار بن، هشیار بن ژ هەڤیرترشێ فەریسی و سەدوقیان!»
شاگردان د ناڤبەرا خۆ دا دەست هاڤێتە دانوستاندنێ و گۆتن: «مە نان ل گەل خۆ نە ئینایە، لەوما یێ ڤێ دبێژیت.»
عیسای زانی و گۆتە وان: «هەی ئەوێن كێمباوەر، هوین بۆچی د ناڤبەرا خۆ دا دبێژن: ‹مە نان نینە›؟
ما هێشتا هوین تێنەگەهشتینە؟ ما بیرا هەوە ناهێتە پێنج نانێن كو پێنج هزار تێر كرین و هەوە چەند سەڵك ژێ كۆم كرین؟
و وان حەفت نانێن چوار هزار تێر كرین و هەوە چەند سەڤیك ژێ كۆم كرین؟
هوین چەوا تێناگەهن كو من بەحسێ نانی نەدكر؟ هشیاری هەڤیرترشێ فەریسی و سەدوقیان بن.»
هنگی ئەو تێگەهشتن، كو وی نە ژ بەر هەڤیرترشێ نانی، لێ ژ بەر فێركرنا فەریسی و سەدوقیان ئەو ئاگەهداركرن.
دەمێ عیسا گەهشتیە دەڤەرا قەیسەریا فیلیپۆسی، پرسیار ژ شاگردێن خۆ كر: «خەلك دبێژن كوڕێ مرۆڤ كیە؟»
وان بەرسڤ دا: «هندەك دبێژن یوحەننایێ تافیركەرە و هندەك دبێژن ئلیاسە و هندەك ژی دبێژن یەرمیایە یان ژی ئێكە ژ پێغەمبەرێن دی.»
عیسای گۆتە وان: «و هوین چ دبێژن، ئەز كیمە؟»
ئینا شەمعون پەترۆسی بەرسڤا وی دا و گۆت: «تۆ مەسیحی ، كوڕێ خودایێ زیندی.»
عیسای بەرسڤ دا و گۆتە وی: «خوزیكێن تە، شەمعونێ كوڕێ یۆنای! چنكو چ خوین و گۆشتان ئەڤە بۆ تە دیار نەكریە، لێ بابێ منێ ل ئەسمانان.
ئەز دبێژمە تە: تۆ پەترۆسی و ل سەر ڤی كەڤری دێ جڤاكا باوەردارێن خۆ ئاڤا كەم و دەرگەهێن وارێ مریان نەشێن ل دژی وێ سەركەفتنێ بینن.
دێ كلیلێن پاشایەتیا ئەسمانان دەمە تە و هەر تشتەكێ تۆ ل ئەردی گرێ دەی، دێ ل ئەسمانان یێ گرێدای بیت و هەر تشتەكێ ل ئەردی ڤەكەی، دێ ل ئەسمانان یێ ڤەكری بیت.»
هنگی عیسای فەرمان دا شاگردێن خۆ كو نەبێژنە كەسێ ئەو مەسیحە.
د وی دەمی دا، عیسای دەست پێ كر شاگردێن خۆ ئاگەهدار كرن، كو پێدڤیە ئەو بچیتە ئورشەلیمێ و ژ لایێ ریهسپی و سەرۆكێن كاهنان و مامۆستایێن دەستووری ڤە بهێتە ئازاردان و كوشتن و ل رۆژا سێیێ راببیتەڤە.
پەترۆسی ئەو ڤەدەر كر و پاشڤە بر و گۆتێ: «خودان، دویری تە! چ جاران ئەڤ تشتە ب سەرێ تە ناهێت.»
عیسا ل پەترۆسی زڤڕی و گۆتێ: «ژ بەر چاڤێن من هەڕە هەی ئبلیس! تۆ ئاستەنگی ل پێشیا من، چنكو هزرێن تە نە ل سەر تشتێن خودێنە، لێ ل سەر تشتێن مرۆڤانە.»
هنگی عیسای گۆتە شاگردێن خۆ: «ئەگەر ئێكی بڤێت ل دویڤ من بهێت، بلا خۆ ماندەل بكەت و خاچا خۆ هەلگریت و ب دویڤ من بكەڤیت.
چنكو ئەوێ بڤێت ژیانا خۆ قورتال بكەت، دێ وێ ژ دەست دەت، لێ ئەوێ ژیانا خۆ ژ پێخەمەتی من ژ دەست بدەت، دێ وێ پارێزیت.
مرۆڤ دێ چ مفای كەت، ئەگەر جیهان هەمی ب دەست خۆ ڤە ئینا، لێ ژیانا خۆ ژ دەست دا؟ مرۆڤ دێ ب پێش ژیانا خۆ ڤە چ دەت؟
كوڕێ مرۆڤ دێ ب مەزناهیا بابێ خۆ ڤە ل گەل فریشتەیێن خۆ هێت، هنگی هەر كەسەك دێ ل دویڤ كارێن خۆ هێتە خەلاتكرن.
ب راستی دبێژمە هەوە: هندەك ژ ئەوێن ل ڤێرێ راوەستیاین، تاكو هاتنا كوڕێ مرۆڤ د پاشایەتیا وی دا نەبینن، تام ناكەنە مرنێ.»
پشتی شەش رۆژان، عیسای پەترۆس، یەعقوب و برایێ وی یوحەننا ل گەل خۆ برن و سەرئێخستنە چیایەكێ بلند، ل وێرێ ئەو ب تنێ بوون.
دیمەنێ وی ل بەر چاڤێن وان هاتە گوهۆڕین و دێمێ وی وەكو رۆژێ روهن بوو، جلكێن وی وەكو رۆناهیێ سپی بوون،
ژ نشكەكێ ڤە مووسا و ئلیاس بۆ وان دیار بوون، كو یێ ل گەل عیسای دئاخڤن.
ئینا پەترۆسی گۆتە عیسای: «خودان، باش بوو ئەم ل ڤێرێ! ئەگەر تە بڤێت، ئەز دێ سێ كەپران ل ڤێرێ چێكەم: ئێك بۆ تە، ئێك بۆ مووسای و ئێك ژی بۆ ئلیاسی.»
هێشتا ئەو دئاخفت، وەسا چێبوو عەورەكێ رۆناهیدار سیبەر ل وان كر و دەنگەك ژ عەوری هات و گۆت: «ئەڤەیە كوڕێ من یێ خۆشتڤی، ئەوێ دلێ من پێ خۆش بووی، گوهێ خۆ بدەنێ!»
دەمێ شاگردان ئەو دەنگ بهیستی، دەڤ و دەڤ خۆ هاڤێتە ئەردی و گەلەك ترسیان،
عیسا ژی هات و دەستێ خۆ كرێ و گۆت: «رابن، نەترسن.»
وان سەرێ خۆ بلندكر، ژبلی عیسای كەس نەدیت.
دەمێ ئەو ژ چیای دهاتنە خوارێ، عیسای فەرمان ل وان كر و گۆت: «ئەوا هەوە دیتی نەبێژنە كەسێ، تاكو كوڕێ مرۆڤ ژ ناڤ مریان رانەبیت.»
ئینا شاگردێن وی پرسیار ژێ كر: «ئەرێ بۆچی مامۆستایێن دەستووری دبێژن پێدڤیە ل بەراهیێ ئلیاس بهێت؟»
وی بەرسڤا وان دا و گۆت: «راستە، ئلیاس دێ هێت و هەمی تشتان رێك ئێخیتەڤە.
لێ ئەز دبێژمە هەوە: ئلیاس یێ هاتی و وان نەنیاسی، لێ وان چ تشتێ ڤیای ل گەل كر، هەروەسا كوڕێ مرۆڤ ژی ل سەر دەستێن وان دێ هێتە ئێشاندن.»
وێ گاڤێ شاگرد تێگەهشتن، كو وی بۆ وان بەحسێ یوحەننایێ تافیركەر دكر.
دەمێ ئەو گەهشتینە نك جەماوەری، زەڵامەك هاتە نك عیسای و كەفتە سەر چۆكێن خۆ
و گۆت: «خودان، دلۆڤانیێ ب كوڕێ من ببە، چنكو تەپ دهێنێ و ئازارەكا دژوار دكێشیت و گەلەك جاران دكەڤیتە د ناڤ ئاگری یان ئاڤێ دا.
من ئینا نك شاگردێن تە، لێ ئەو نەشیان وی ساخ بكەن.»
عیسای بەرسڤ دا و گۆت: «هەی نفشێ بێباوەر و خوار، تا كەنگی دێ د ناڤ هەوە دا مینم؟ تا كەنگی دێ بێهنا خۆ ل هەوە فرە‍‌ھ كەم؟ وی بیننە نك من ل ڤێرێ.»
عیسای ل ئەجنەی حەیتاند، ئینا ژ كوڕكی دەركەفت و د وێ گاڤێ دا ساخ بوو.
ئینا شاگرد ب تنێ هاتنە نك عیسای و ژێ پرسین: «بۆچی ئەم نەشیاین ئەجنەی دەربئێخین؟»
وی گۆتە وان: «ژ كێمباوەریا هەوەیە. ئەز راستیێ دبێژمە هەوە: ئەگەر هەوە تەمەت دندكەكا خەردەلێ باوەری هەبیت، دێ بێژنە ڤی چیای: ‹ژ ڤێرێ هەڕە وێراهە،› دێ چیت. چ تشت ل بەر هەوە ئاسێ نابن.
لێ ئەڤ توخمە دەرناكەڤن، ئەگەر ب نڤێژ و رۆژیان نەبیت.»
دەمێ ئەو پێكڤە ل جەلیل كۆمبووین، عیسای گۆتە شاگردێن خۆ: «چ نەمایە دێ كوڕێ مرۆڤ رادەستی مرۆڤان هێتە كرن،
دێ وی كوژن و ل رۆژا سێیێ دێ رابیتەڤە.» ئینا گەلەك ب خەم كەفتن.
دەمێ ئەو گەهشتینە كەفەرناحوم، باجگرێن دوو دەرهەمان هاتنە نك پەترۆسی و گۆتنێ: «ما مامۆستایێ هەوە باجا دوو دەرهەمی نادەت؟»
پەترۆسی بەرسڤ دا: «بەلێ.» دەمێ پەترۆس هاتیە د خانی ڤە، ئێكسەر عیسای پرسیار ژێ كر: «تۆ چ دبێژی شەمعون: پاشایێن ئەردی باجێ یان خویكێ ژ كێ وەردگرن؟ ژ كوڕێن خۆ یان ژ بیانیان؟»
پەترۆسی بەرسڤ دا: «ژ بیانیان.» عیسای گۆتێ: «ئەگەر هۆسایە، كوڕ ژ وێ د ئازادن.
لێ داكو ئەم بۆ وان نەبینە ئاستەنگ، هەڕە دەریاكێ و شوكێ بهاڤێژە و ئێكەمین ماسیا دەردكەڤیت بگرە و دەڤێ وێ ڤەكە، دێ ستاتیرەكی بینی. ببە و باجێ ژ پێش من و خۆ ڤە بدە.»
د وی دەمی دا شاگرد بەرەڤ عیسای ڤە هاتن و گۆتنێ: «یێ هەری مەزن ل پاشایەتیا ئەسمانان كیە؟»
گازی كرە زاڕۆكەكی و د ناڤبەرا وان دا راوەستاند
و گۆت: «ب راستی دبێژمە هەوە: ئەگەر هوین نەهێنە گوهۆڕین و وەكو زاڕۆكان لێ نەهێن، چ جاران هوین ناچنە د پاشایەتیا ئەسمانان دا.
هەر كەسێ خۆ وەكو ڤی زاڕۆكی دەروونبچویك بكەت، ئەوە یێ هەری مەزن ل پاشایەتیا ئەسمانان.
هەر كەسێ زاڕۆكەكێ وەكو ڤی ب ناڤێ من قەبیل بكەت، ئەوی ئەز قەبیل كرم.
لێ هەر كەسێ ببیتە ئەگەرێ هەلنگفتنا ئێك ژ ڤان بچویكێن باوەری ب من هەی، بۆ وی باشترە بەرئاشەك ب ستۆیێ وی ڤە بهێتە گرێدان و د كویراتیا دەریایێ دا بهێتە خەندقاندن.
نەخوزیكێن جیهانێ ژ بەر ئەگەرێن هەلنگفتنێ! پێدڤیە ئەگەرێن هەلنگفتنێ هەبن، لێ نەخوزیكێن وی كەسی یێ ئەگەرێ هەلنگفتنێ ل سەر دەستێ وی دهێت.
ئەگەر دەستێ تە یان پێیێ تە ببیتە ئەگەرێ هەلنگفتنا تە، ببڕە و بهاڤێژە. باشترە تۆ دەست بڕی یان لەنگ بچیە د ژیانێ دا ، ژ كو تۆ یێ ب دوو دەست و دوو پێیان بی و بۆ ناڤ ئاگرێ هەروهەر بهێیە هاڤێتن.
ئەگەر چاڤێ تە ببیتە ئەگەرێ هەلنگفتنا تە، بینە دەر و بهاڤێژە. باشترە تۆ یێ ب چاڤەكی بی و بچیە د ژیانێ دا، ژ كو تۆ یێ ب دوو چاڤان بی و بۆ ناڤ ئاگرێ دۆزەخێ بهێیە هاڤێتن.»
«هشیار بن، كەس ب سڤكاتی بەرێ خۆ نەدەتە ئێك ژ ڤان بچویكان! ئەز دبێژمە هەوە: فریشتەیێن وان ل ئەسمانان هەردەم دێمێ بابێ من یێ ل ئەسمانان دبینن.
چنكو كوڕێ مرۆڤ یێ هاتی، دا یێن بەرزە قورتال بكەت.
هوین چ دبێژن؟ ئەگەر مرۆڤەكی سەد پەز هەبن و ئێك ژ وان بەرزە بوو، ما ئەو وان نۆت و نەهان ل چیای ناهێلیت و ناچیت ل دویڤ یا بەرزە بگەڕیێت؟
ب راستی دبێژمە هەوە: ئەگەر وی دیت، دێ كەیفا وی ب وێ پتر بیت ژ كەیفا وی ب وان نۆت و نە‍‌ھ پەزێن بەرزە نەبووی.
هۆسا بابێ هەوە ئەوێ ل ئەسمانان نەڤێت ئێك ژ ڤان بچویكان ژ ناڤ بچیت.
ئەگەر برایێ تە گونەهەك د دەرهەقا تە دا كر، تۆ ب تنێ هەڕە نك وی و گازندەیێ ژێ بكە. ئەگەر گوهێ خۆ دا تە، تە برایێ خۆ ب دەست خۆ ڤە ئینا.
ئەگەر گوهێ خۆ نەدا تە، كەسەكی یان دوویان ل گەل خۆ ببە، دا ‹هەر تاوانەك ب دەڤێ دوو یان سێ شاهدان بهێتە سەلماندن.›
ئەگەر گوهێ خۆ نەدا وان، تۆ بێژە جڤاكا باوەرداران و ئەگەر گوهێ خۆ نەدا جڤاتێ ژی، بلا ئەو ل نك تە وەكو ئێكێ پووتپەرێس یان باجگر بیت.
ب راستی دبێژمە هەوە: هەر تشتەكێ هوین ل ئەردی گرێ دەن، دێ ل ئەسمانی یێ گرێدای بیت و هەر تشتەكێ هوین ل ئەردی ڤەكەن، دێ ل ئەسمانی یێ ڤەكری بیت.
دیسان دبێژمە هەوە: ئەگەر دوو ژ هەوە ل ئەردی ل سەر داخوازەكێ پێك هاتن، داخوازا وان چ تشت بیت، دێ بۆ وان ژ نك بابێ من یێ ل ئەسمانان ب ج‍‌ھ هێت.
چنكو هەر جهەكێ دوو یان سێ ب ناڤێ من كۆم ببن، ئەز یێ ل وێرێ د ناڤ وان دا.»
پاشی پەترۆس هاتە نك و پرسیار ژێ كر: «هەی خودان، چەند جاران برایێ من دەربارەی من گونەهان بكەت، ئەز لێ ببورم؟ ئەرێ هەتا حەفت جاران؟»
عیسای بەرسڤا وی دا: «ئەز دبێژمە تە: نە هەتا حەفت جاران، لێ هەتا حەفتێ جاران حەفت!
چنكو پاشایەتیا ئەسمانان وەكو پاشایەكیە، ڤیا ژمێریاریێ ل گەل بەنیێن خۆ بكەت.
دەمێ ل گەل وان دەست ب ژمێریاریێ كری، ئێك ئینانە نك ب دە‍‌ھ هزار قالبێن زێڕی یێ قەردار بوو،
لێ وی نەبوو قەرێ خۆ بدەت، خودانێ وی فەرمان دا كو ئەو و ژن و زاڕۆك و هەر تشتەكێ وی هەی بهێنە فرۆتن و قەرێ وی بهێتە دان.
ئەڤجا بەنی سوجدە بۆ بر و گۆت: ‹بێهنا خۆ ل من فرە‍‌ھ بكە، ئەز دێ هەمی قەرێ خۆ دەم.›
ئینا دلێ خودانی ما ب بەنی ڤە، ئەڤجا بەردا و قەرێ وی پێ هێلا.
دەمێ ئەو بەنی دەركەفتی، هەڤالەكێ خۆ یێ بەنی دیت، ئەوێ ب سەد دیناران قەردارێ وی، حەفكا وی گرت و گۆتێ: ‹قەرێ من بدە!›
ئەڤجا هەڤالێ وی خۆ هاڤێتە بەر پێیێن وی و هیڤی ژێ كرن و گۆتێ: ‹بێهنا خۆ ل من فرە‍‌ھ بكە، ئەز دێ دەمە تە.›
لێ ئەو رازی نەبوو و هاڤێتە د زیندانێ دا، هەتا قەرێ خۆ بدەت.
دەمێ هەڤالێن وی یێن بەنی ئەڤ تشتە دیتی، گەلەك پێ نەخۆش بوون و چوون ئەڤ چەندە گۆتنە خودانێ خۆ.
ئینا خودانی ژی گازی كرێ و گۆتێ: ‹هەی بەنیێ خراب، ئەو قەر هەمی من ب تە هێلا، چنكو تە هیڤی ژ من كرن.
ئەرێ ما نە پێدڤی بوو تە دلۆڤانی ب هەڤالێ خۆ یێ بەنی بربا، هەروەكو من دلۆڤانی ب تە بری؟›
خودان گەلەك تۆڕە بوو، دا دەستێ ئەشكەنجەكەران، هەتا قەرێ خۆ هەمیێ بدەت.
هۆسا بابێ من یێ ئەسمانی ژی دێ ڤێ ب سەرێ هەوە ئینیت، ئەگەر هەر ئێك ژ هەوە ژ دل ل برایێ خۆ نەبوریت.»
پشتی عیسای ئەڤ ئاخفتنە ب دویماهی ئیناین، ژ جەلیلێ دەركەفت و چوو دەڤەرا یەهودیایێ، ئەوا دكەڤیتە لایێ دی یێ رویبارێ ئوردن.
گەلەك جەماوەر ب دویڤ كەفتن و نەساخێن وان ل وێرێ ساخ كرن.
هندەك فەریسی هاتنە نك عیسای، داكو تاقی بكەن، ژێ پرسین: «ئەرێ رەوایە زەڵام ژ بەر هەر ئەگەرەكێ هەبیت، ژنا خۆ بەردەت؟»
وی بەرسڤ دا و گۆت: «ئەرێ ما هەوە نەخواندیە، كو ئافرێندەری ‹ژ دەستپێكێ مرۆڤ نێر و مێ یێن داین› ؟
و گۆت: ‹ژ بەر ڤێ چەندێ زەڵام دێ دایك و بابێن خۆ هێلیت و ب ژنا خۆ ڤە نویسیێت و دێ هەردوو بنە ئێك لەش›،
هۆسا ئێدی ئەو نە دوونە، لێ ئێك لەشن. ئەڤجا ئەوێن خودێ ئەو كرینە ئێك، بلا مرۆڤ ژێكڤە نەكەت.»
ژێ پرسین: «لێ بۆچی مووسای فەرمان دابوو كو مێر بەلگەنامەیا بەردانێ بدەتە ژنا خۆ، ئەگەر وێ بەردەت؟»
عیسای بەرسڤا وان دا: «ژ بەر سەرهشكیا هەوە مووسای هێلا هوین ژنێن خۆ بەردەن، لێ ل دەستپێكێ هۆسا نەبوو
و ئەز دبێژمە هەوە: هەر كەسێ ژبلی ئەگەرێ دەهمەنپیسیێ ژنا خۆ بەردەت و بۆ خۆ ئێكا دی بینیت، ئەو دەهمەنپیسیێ دكەت.»
ئینا شاگردێن وی گۆتێ: «ئەگەر كاودانێ مێری ل گەل ژنێ یێ هۆسا بیت، باشترە ژنێ نەئینیت.»
عیسای بەرسڤا وان دا: «هەمی كەس نەشێن ڤێ گۆتنێ قەبیل بكەن، ژبلی وان یێن خودێ ئەو كەرەم ل گەل كری.
چنكو هندەك ژ زكماكی د خەساندینە و هندەك ژی ژ لایێ خەلكی ڤە هاتینە خەساندن و هندەكێن دی بڕیار دایە ژ پێخەمەت پاشایەتیا ئەسمانان وەكو یێن خەساندی بژین. ئەڤجا یێ بشێت ڤێ چەندێ قەبیل بكەت، بلا قەبیل بكەت.»
پشتی هنگی هندەك زاڕۆك ئینانە نك عیسای، دا دەستێن خۆ بدانیتە سەر وان و نڤێژێ بكەت، شاگردان ژی ل وان حەیتاند.
لێ عیسای گۆت: «بهێلن زاڕۆك بهێنە نك من و رێ لێ نەگرن، چنكو پاشایەتیا ئەسمانان بۆ یێن وەكو وانە.»
وی دەستێن خۆ دانانە سەر وان و ژ وێرێ چوو.
پاشی وەسا چێبوو ئێك ب نك عیسای ڤە هات و گۆتێ: «مامۆستا، چ چاكیێ بكەم دا ژیانا هەروهەر ب دەست خۆ ڤە بینم؟»
عیسای بەرسڤا وی دا: «بۆچی تۆ دەربارەی چاكیێ پرسیارا من دكەی؟ ب تنێ ئێكێ هەی یێ چاكە. لێ ئەگەر تە بڤێت تۆ بچیە د ژیانێ دا، فەرمانان ب ج‍‌ھ بینە.»
وی گۆتێ: «كیژ فەرمانان؟» عیسای بەرسڤ دا: «‹كوشتنێ نەكە، دەهمەنپیسیێ نەكە، دزیێ نەكە، شاهدەییا ب درەو نەدە،
رێزێ ل دایك و بابێن خۆ بگرە› و ‹حەز ژ نێزیكێ خۆ بكە، وەك چەوا تۆ حەز ژ خۆ دكەی›.»
گەنجی گۆتێ: «من ئەڤە هەمی ب ج‍‌ھ ئیناینە. ئێدی چ یێ ژ من كێمە؟»
عیسای گۆتە وی: «ئەگەر تە بڤێت تۆ یێ كامل بی، هەڕە تشتێن خۆ بفرۆشە و بدە هەژاران، دێ تە گەنجینەیەك ل ئەسمانان هەبیت، پاشی وەرە ب دویڤ من بكەڤە.»
دەمێ گەنجی ئەڤ ئاخفتنە بهیستی، چوو یێ خەمبار، چنكو ئەو خودان سامانەكێ مەزن بوو.
ئینا عیسای گۆتە شاگردێن خۆ: «راستیە دبێژمە هەوە: زەحمەتە مرۆڤێ دەولەمەند بچیتە د پاشایەتیا ئەسمانان دا.
دیسان دبێژمە هەوە: چوونا حێشترێ د كونا دەرزیكێ را ب ساناهیترە ژ ب ژۆركەفتنا دەولەمەندەكی بۆ پاشایەتیا خودێ.»
دەمێ شاگردان ئەڤ تشتە بهیستی، گەلەك حێبەتی بوون و گۆتن: «ئەڤجا كی دشێت قورتال ببیت؟»
عیسای بەرێ خۆ دا وان و گۆت: «ئەڤە ل نك مرۆڤان مەحالە، لێ ل نك خودێ، هەمی تشت د شیان دانە.»
وی دەمی پەترۆسی لێ ڤەگێڕا و گۆت: «ئەڤە مە هەمی تشت یێن هێلاین و ئەم یێ ب دویڤ تە كەفتین. ئەڤجا بۆ مە دێ چ هەبیت؟»
عیسای بەرسڤا وان دا: «ب راستی دبێژمە هەوە: د نویكرنێ دا، دەمێ كوڕێ مرۆڤ ل سەر تەختێ مەزناهیا خۆ دروینیت، هوین ئەوێن ب دویڤ من كەفتین، دێ ل سەر دوازدە تەختان روینن و دادوەریێ ل سەر هەر دوازدە هۆزێن ئیسرائیل كەن.
هەر كەسێ خانی، یان برا، یان خویشك، یان باب، یان دایك، یان زاڕۆك یان زەڤی ژ پێخەمەت ناڤێ من هێلا بیت، دێ سەد جاركی هندێ وەرگریت و دێ ژیانا هەروهەر ب میرات وەرگریت.
لێ گەلەكێن پێشیێ دێ بنە یێن پاشیێ و گەلەكێن پاشیێ دێ بنە یێن پێشیێ.»
«پاشایەتیا ئەسمانان وەكو خودان ملكەكیە، سپێدێ زوی ژ مالێ دەركەفت دا بۆ رەزێ خۆ پالەیان بگریت.
ل گەل وان پێك هات كو هەر رۆژێ دینارەكێ بدەتێ، پاشی هنارتنە ناڤ رەزێ خۆ.
ل دۆرێن دەمژمێر نە‍‌ھ، دەركەفت و هندەكێن دی یێن بێكار ل بازاڕی دیتن.
گۆتە وان: ‹هوین ژی هەڕنە ناڤ رەزی، ئەز دێ وێ دەمە هەوە یا مافێ هەوە بیت.› ئەو ژی چوون.
ل دەمژمێر دوازدە و ل دەمژمێر سێیێ ژی ئەو دەركەفتە بازاڕی و هەمان تشت كر.
ل دۆرێن دەمژمێر پێنجێ ئێڤاری، جارەكا دی دەركەفت، هندەك پالەیێن دی دیتن و گۆتە وان: ‹بۆچی هوین ب درێژاهیا رۆژێ بێكار ل ڤێرێ د راوەستیاینە؟›
وان بەرسڤا وی دا: ‹چنكو كەسێ ئەم نەبرینە پالەتیێ.› گۆتە وان: ‹هوین ژی هەڕنە ناڤ رەزێ من.›
دەمێ بوویە شەڤ، خودانێ رەزی گۆتە سەركارێ خۆ: ‹گازی پالەیان بكە و مافێ وان بدێ، ژ یێن دویماهیێ دەست پێ بكە هەتا دگەهیە یێن بەراهیێ.›
ئەوێن دەمژمێر پێنجێ ئێڤاری دەست ب كاری كری، هاتن و هەر ئێكی دینارەك وەرگرت.
ئەڤجا یێن بەراهیێ هاتن، وان هزر كر ئەو دێ پتر وەرگرن، لێ هەر ئێكی ژ وان ژی دینارەك وەرگرت.
دەمێ وان دینار وەرگرتی گازندە ژ خودانێ مالی كرن
و گۆتنێ: ‹ئەوێن دویماهیێ هاتین ب تنێ دەمژمێرەكێ كار كر و تە ئەو ئینانە رێزا مە، و مە خۆ ل بەر گرانیا رۆژێ و گەرمێ گرتییە.›
بەرسڤا ئێك ژ وان دا: ‹هەڤال، من مافێ تە نەخوارییە. ما ئەز و تۆ ل سەر دینارەكێ پێك نەهاتبووین؟
مافێ خۆ وەرگرە و هەڕە سەر رێكا خۆ. من دڤێت وەكو تە بدەمە ئەڤێ دویماهیێ ژی.
ما من ماف نینە ب مالێ خۆ وێ بكەم یا من دڤێت؟ یان ژی چاڤێن تە ب مەردینیا من رانابن؟›
هۆسا ئەوێن پاشیێ دێ بنە یێن پێشیێ و یێن پێشیێ دێ بنە یێن پاشیێ.»
دەمێ عیسا بەرەڤ ئورشەلیمێ ب سەر دكەفت، هەر دوازدە شاگردێن خۆ بڕێڤە ڤەدەر كرن و گۆتە وان:
«ئەڤە ئەم یێ بەرەڤ ئورشەلیمێ ب سەر دكەڤین و كوڕێ مرۆڤ دێ رادەستی سەرۆكێن كاهنان و مامۆستایێن دەستووری هێتە كرن و ئەو دێ حوكمێ مرنێ ل سەر دانن
و دێ وی رادەستی مللەتان كەن، ئەڤجا ئەو دێ تڕانەیان پێ كەن و قامچی دەن و خاچ دەن، لێ ل رۆژا سێیێ دێ ژ ناڤ مریان رابیت.»
وی دەمی دایكا كوڕێن زەبەدی ل گەل هەردوو كوڕێن خۆ نێزیكی عیسای بوون و وێ سوجدە بۆ بر و داخوازەك ژێ كر.
وی گۆتێ: «تە چ دڤێت؟» بەرسڤا وی دا: «فەرمانێ بدە كو هەردوو كوڕێن من د پاشایەتیا تە دا، ئێك ل دەستێ تە یێ راستێ و یێ دی ل دەستێ تە یێ چەپێ، روینن.»
عیسای بەرسڤ دا و گۆت: «هوین نزانن كا هوین چ دخوازن. ما هوین دشێن ژ وێ پەرداغێ ڤەخۆن، یا كو نێزیكە ئەز دێ ژێ ڤەخۆم؟» وان بەرسڤا وی دا: «ئەم دشێین.»
عیسای گۆتە وان: «راستە، هوین دێ ژ پەرداغا من ڤەخۆن، لێ دەستویریا روینشتنێ ل لایێ منێ راستێ و چەپێ، نە د دەستێ من دایە بدەم، لێ ب تنێ بۆ وانە یێن ژ لایێ بابێ من ڤە بۆ وان هاتیە ئامادە كرن.»
دەمێ هەر دە‍‌ھ شاگردێن دی ئەڤ تشتە بهیستی، ژ هەردوو برایان دلگران بوون.
لێ عیسای گازی وان هەمیان كر و گۆت: «هوین دزانن سەرۆكێن مللەتان زاڵدەستیێ ل وان دكەن و مەزنێن وان ژی دەستهەلاتداریێ ل سەر دكەن،
لێ د ناڤ هەوە دا وەسا نابیت. ئەوێ حەز بكەت د ناڤ هەوە دا یێ مەزن بیت، دڤێت ببیتە خزمەتكارێ هەوە
و ئەوێ حەز بكەت د ناڤ هەوە دا یێ پێشیێ بیت، دڤێت ببیتە بەنیێ هەوە.
هەروەسا كوڕێ مرۆڤ ژی نەهاتیە داكو خزمەتا وی بهێتە كرن، لێ دا ئەو خزمەتێ بكەت و خۆ ژ پێش گەلەكان ڤە بكەتە گۆری.»
دەمێ عیسا و شاگردێن خۆ ژ ئەریحا دەردكەفتن، جەماوەرەكێ مەزن ل دویڤ وی چوون.
وەسا چێبوو دوو كۆرە ل رەخێ رێكێ د روینشتی بوون. دەمێ بهیستی كو عیسا یێ دبوریت، كرنە گازی: «خودان، كوڕێ داوودی، دلۆڤانیێ ب مە ببە!»
جەماوەری ئەو پاشڤە برن دا بێدەنگ ببن، لێ وان ب دەنگەكێ بلندتر كرە هەوار و گۆتن: «خودان، كوڕێ داوودی، دلۆڤانیێ ب مە ببە!»
عیسا راوەستیا و ئەو گازی كرن و گۆتە وان: «هەوە چ دڤێت ئەز بۆ هەوە بكەم؟»
وان گۆتێ: «خودان، بیناهیێ بدە چاڤێن مە.»
دلێ وی ما ب وان ڤە و دەستێ خۆ كرە چاڤێن وان. د گاڤێ دا وان بیناهی كر و ئەو ل دویڤ وی چوون.
دەمێ نێزیكی ئورشەلیمێ بووین و هاتینە گوندێ بێت‌فاجی ل نك چیایێ زەیتوونان، عیسای دوو شاگردێن خۆ هنارتن
و گۆتە وان: «هەڕنە ڤی گوندێ بەرامبەری هەوە، ئێكسەر دێ ماكەرەكا گرێدای ل گەل جانەكەرەكی بینن، وان ڤەكەن و بۆ من بینن.
ئەگەر ئێكی تشتەك گۆتە هەوە، بێژنێ: ‹خودانی پێدڤی یا پێ هەی.› ئەو دێ ئێكسەر هنێریت.»
و ڤێ وەسا روی دا، داكو ئەو تشتێ ل سەر زارێ پێغەمبەری هاتیە گۆتن، ب ج‍‌ھ بهێت:
‹بێژنە سییۆنا كچ ، ئها ئەڤە پاشایێ تە یێ دهێتە نك تە، یێ دلنەرم و سیارە ل كەری، ل جانەكەرێ تێژكێ ماكەرێ.›
ئەڤجا شاگرد چوون و ئەو كر ئەوا عیسای فەرمان پێ دای.
ماكەر و جانەكەر ئینان و جلكێن خۆ دانانە سەر و عیسا لێ سیار بوو.
بەهرا پتر ژ جەماوەرێ خڕڤەبووی رێك ب جلكێن خۆ رائێخست و هندەكێن دی چەقێن داران بڕین و رێك پێ رائێخست.
جەماوەرێ بەری عیسای دچوو و یێ ل پشت وی دهات، گازی دكر و دگۆت: «هۆساننا بۆ كوڕێ داوودی! ‹یێ بەرەكەتدارە ئەوێ ب ناڤێ خودانی دهێت!› هۆساننا ل بلنداهیان!»
دەمێ عیسا ب ژۆر كەفتیە ئورشەلیمێ، هەمی باژێڕ تێكهەژیا و خەلكی دگۆت: «ئەڤە كیە؟!»
خڕڤەبوویان بەرسڤ دا: «ئەڤە عیسا پێغەمبەرە، ژ ناسیرەیا دەڤەرا جەلیلێیە.»
ئەڤجا عیسا چوو د حەوشا پەرستگەهێ دا و هەمیێن كڕین و فرۆتن دكر دەرئێخستن. وی مێزێن پارەگوهۆڕان و تەختكێن كووترفرۆشان وەرگێڕان
و گۆتە وان: «یا هاتیە نڤیسین: ‹مالا من ب مالا نڤێژێ دێ هێتە نیاسین› ، لێ هەوە یا كریە ‹كونجا رێگران›!»
ل پەرستگەهێ هندەكێن كۆرە و لەنگ هاتنە نك و وی ئەو ساخ كرن.
دەمێ سەرۆكێن كاهنان و مامۆستایێن دەستووری ئەو حێبەتیێن وی كرین، دیتین و گو‍‌ھ ل گازیكرنا زاڕۆكان د حەوشا پەرستگەهێ دا بووی دەمێ دگۆتن: «هۆساننا ژ بۆ كوڕێ داوودی!»، گەلەك پێ نەخۆش بوون.
ئینا گۆتنێ: «تە گو‍‌ھ لێ هەیە ئەوێن هەنێ چ دبێژن؟» عیسای گۆتێ: «بەلێ! ما هەوە ئەڤ تشتە نەخواندیە: ‹تە ل سەر زارێ زاڕۆكان و ساڤایان پەسن بۆ خۆ ئامادە كرن›؟ »
پاشی هێلان و چوو ژ دەرڤەی باژێڕی بۆ گوندێ بێت‌عەنیا و ب شەڤ ما ل وێرێ.
سپێدەیا رۆژا پاشتر، دەمێ ئەو دزڤڕی باژێڕی، یێ برسی بوو.
دارهژیرەك ل رەخێ رێكێ دیت و قەستا وێ كر، لێ وی چ پێڤە نەدیت ژبلی بەلگان ب تنێ. وی گۆتە دارێ: «ئێدی تۆ هەتا هەتایێ بەرهەمی نەدەی.» ئێكسەر دارهژیر هشك بوو.
دەمێ شاگردان ئەو دیتی، گوهشین و گۆتن: «چەوا ئێكسەر دارهژیر هشك بوو؟»
عیسای بەرسڤا وان دا: «راستیێ دبێژمە هەوە: ئەگەر هەوە باوەری هەبیت و د بێگۆمان بن، نە ب تنێ وەكو من ل دارهژیرێ كری هوین دێ كەن، لێ ئەگەر هوین بێژنە ڤی چیای ژی: ‹رابە و خۆ بهاڤێژە د دەریایێ دا،› دێ ئەڤ چەندە ب ج‍‌ھ هێت.
هەر تشتێ هوین د نڤێژێ دا ب باوەری داخواز بكەن، دێ ب دەست ڤە ئینن.»
دەمێ گەهشتیە پەرستگەهێ و دەست ب فێركرنێ كری، سەرۆكێن كاهنان و ریهسپیێن مللەتی هاتنە نك و پرسیار ژێ كرن: «تۆ ب چ دەستهەلات ڤان كاران دكەی؟ و كێ ئەڤ دەستهەلاتە دایە تە؟»
عیسای بەرسڤا وان دا و گۆت: «ئەز ژی دێ پرسیارەكێ ژ هەوە كەم، ئەگەر هەوە بەرسڤا من دا، ئەز ژی دێ بێژمە هەوە ب چ دەستهەلات ئەز ڤان كاران دكەم.
تافیركرنا یوحەننای ژ كیرێ بوو؟ ژ ئەسمانی یان ژ مرۆڤان؟» وان د ناڤبەرا خۆ دا گۆت: «ئەگەر ئەم بێژین: ‹ژ ئەسمانی بوو،› دێ بێژیتە مە: ‹ئەڤجا بۆچی هەوە باوەر ژێ نەكر؟›
لێ ئەگەر ئەم بێژین: ‹ژ مرۆڤان بوو،› ئەم ژ خەلكی دترسین، چنكو ئەو هەمی یوحەننای ب پێغەمبەر ددانن.»
ئەڤجا وان بەرسڤا عیسای دا: «ئەم نزانین.» وی گۆتە وان: «ئەز ژی نابێژمە هەوە ب چ دەستهەلات ڤان كاران دكەم.»
«هوین چ دبێژن؟ مرۆڤەكی دوو كوڕ هەبوون، ئەو چوو نك یێ ئێكێ و گۆتێ: ‹كوڕێ من، ئەڤرۆ هەڕە ناڤ رەزی كار بكە.›
وی بەرسڤ دا: ‹ئەز ناچم،› لێ پاشی پەشیمان بوو و چوو.
پاشی زەڵام چوو نك كوڕێ خۆ یێ دی و ئەوا گۆتیە كوڕێ خۆ یێ ئێكێ گۆتە وی ژی. بەرسڤ دا: ‹سەر چاڤان باب!› لێ ئەو نەچوو.
كێ ژ هەردوویان ب حەزا بابێ خۆ كر؟» ئەوان بەرسڤ دا: «یێ ئێكێ.» عیسای گۆتە وان: «راستیێ دبێژمە هەوە: باجگر و لەشفرۆش بەری هەوە دچنە د پاشایەتیا خودێ دا.
یوحەننا هات و رێیا راستداریێ نیشا هەوە دا، هەوە باوەر ژێ نەكر، لێ باجگر و لەشفرۆشان باوەر ژێ كر. خۆ پشتی هەوە ئەڤ تشتە دیتی ژی، هوین پەشیمان نەبوون كو باوەر ژێ بكەن.»
«گو‍‌ھ بدەنە نموونەیەكا دی: خودان ملكەكی رەزەك دانا و پەرژان كر و ئویسلەیەك د ناڤ دا كۆلا و بورجەكا نوبەداریێ د ناڤ دا ئاڤا كر، پاشی رەز ب كرێ داڤ رەزڤانان و چوو وەڵاتەكێ دی.
دەمێ گەهشتنا فێقی نێزیك بووی، وی بەنیێن خۆ هنارتنە نك رەزڤانان، داكو بەرهەمێ رەزی بۆ وی بینن.
رەزڤانان بەنیێن وی گرتن، ئێك ژ وان قوتا و ئێكێ دی كوشت و ئێكێ دی بەرباران كر.
پاشی خودانێ مالێ ژ جارا پێشیێ پتر بەنی هنارتن و رەزڤانان وە ل وان ژی كر، هەروەكو ل یێن پێشیێ كری.
ل دویماهیێ كوڕێ خۆ هنارت. وی د دلێ خۆ دا دگۆت: ‹دێ رێزێ ل كوڕێ من گرن.›
لێ دەمێ رەزڤانان كوڕێ وی دیتی، گۆتە ئێكودوو: ‹ئەڤە میراتگرە! وەرن ئەم وی بكوژین و میراتێ وی بدەست خۆ ڤە بینین.›
ئینا وان ئەو گرت و ژ ناڤ رەزی دەرئێخست و كوشت.
دەمێ خودانێ رەزی دهێت، دێ چ ل وان رەزڤانان كەت؟»
وان بەرسڤا عیسای دا: «ئەو دێ وان خرابكاران ب توندی ژ ناڤ بەت، پاشی دێ رەزی دەتەڤ هندەك رەزڤانێن دی، یێن كو دێ بەرهەمێ رەزی د دەمێ چنینێ دا دەنە وی.»
عیسای گۆتە وان: «ئەرێ ما هەوە د نڤیساران دا نەخواندیە: ‹ئەو بەرێ هۆستایان رەتكری، یێ بوویە بەرێ بنیاتی. ئەڤە ژ لایێ خودانی ڤە چێبوویە و ئەو ل بەر چاڤێن مە تشتەكێ حنێرە!›
ژ بەر هندێ ئەز دبێژمە هەوە: پاشایەتیا خودێ دێ ژ هەوە هێتە ستاندن و دێ بۆ مللەتەكی هێتە دان كو بەرهەمێ وێ بدەت.
هەر كەسێ بكەڤیتە سەر ڤی بەری، دێ پرتكیت و هەر كەسێ بەر بكەڤیتە سەر، دێ وی هەڕشینیت.»
دەمێ سەرۆكێن كاهنان و فەریسیان گو‍‌ھ ل نموونەیێن وی بووی، وان زانی ئەو بەحسێ وانە.
هەر چەندە وان بزاڤ دكر وی دەستەسەر كەن، لێ ئەو ژ خەلكی ترسیان، چنكو وان ئەو ب پێغەمبەر ددانا.
جارەكا دی عیسا بۆ وان ب نموونەیان ئاخفت و گۆت:
«پاشایەتیا ئەسمانان وەكو پاشایەكیە داوەتا كوڕێ خۆ گێڕا
و بەنیێن خۆ هنارتن داكو گازی وان كەسان بكەن، ئەوێن بۆ داوەتێ هاتینە داخوازكرن، لێ وان نەڤیا ئامادە ببن.
جارەكا دی پاشای هندەك بەنیێن دی هنارتن و گۆتە وان: ‹بێژنە داخوازكریان: ئەڤە من نانخوارنا خۆ یا ئامادەكری، گا و ربیتەكریێن من یێن هاتینە سەرژێكرن و هەمی تشت یێ ئامادەیە، ئەڤجا وەرنە داوەتێ.›
لێ وان چ پویتە پێ نەدا، ئەڤجا ئێك چوو ناڤ چەمێ خۆ و یێ دی چوو سەر بازرگانیا خۆ
و ئەڤێن دی بەنیێن وی گرتن و كرێت كرن و كوشتن.
پاشا تۆڕە بوو و لەشكەرێن خۆ هنارتن و ئەو مێركوژ ژناڤبرن و باژێڕێ وان سۆت.
پاشی گۆتە بەنیێن خۆ: ‹داوەت یا ئامادەیە، لێ داخوازكری نە د هەژی بوون.
ئەڤجا هەڕنە سەرێن رێیان و هەر كەسێ هوین دبینن داخواز كەنە خوارنا داوەتێ.›
بەنی دەركەفتنە سەرێن رێیان و هەر كەسێ چاك یان خراب دیتبان كۆم دكرن، هەتا جهێ داوەتێ ژ مێڤانان تژی بووی.
دەمێ پاشا هاتیە ژۆر دا مێڤانان ببینیت، ئێك ل وێرێ دیت جلكێن داوەتێ ل بەر نەبوون.
گۆتە وی: ‹هەڤال، تۆ چەوا بێی جلكێن داوەتێ هاتیە ژۆر؟› ئەو بێدەنگ ما.
ل وی دەمی پاشای گۆتە خزمەتكارێن خۆ: ‹دەست و پێیێن وی گرێ دەن و بهاڤێژنە ژ دەرڤە، ل ناڤ تاریاتیێ. ل وێرێ گری و گڤاشتنا ددانانە.›
چنكو یێن داخوازكری گەلەكن، لێ یێن هەلبژارتی د كێمن.»
پاشی فەریسی چوون و پیلانەك داڕشت كا دێ چەوا عیسای ب ئاخفتنێن وی ئێخنە داڤان.
ئینا هندەك شاگردێن خۆ ل گەل لایەنگرێن هێرودێسی هنارتنە نك وی و گۆتنێ: «مامۆستا، ئەم دزانین تۆ یێ راستگۆی و رێكا خودێ راست نیشا خەلكی ددەی، تۆ هەمیان وەكو ئێك دبینی و تۆ بەرێ خۆ نادەیە ئاستێن مرۆڤان.
ئەڤجا بێژە مە، بۆچوونا تە چیە؟ ئەرێ رەوایە باج بۆ قەیسەری بهێتە دان یان نە؟»
عیسای نیازخرابیا وان زانی و گۆت: «هەی دووڕوینۆ، بۆچی هوین من تاقی دكەن؟
پارەیێ باجێ نیشا من بدەن.» وان دینارەك بۆ ئینا.
ئەڤجا وی گۆتە وان: «ئەڤ وێنە و ناڤە یێن كێنە؟»
وان گۆتە وی: «یێن قەیسەرینە.» ئەڤجا گۆتە وان: «یێ قەیسەری بدەنە قەیسەری و یێ خودێ ژی بدەنە خودێ.»
دەمێ وان ئەڤ تشتە بهیستی حێبەتی بوون و وان عیسا هێلا و چوون.
ل وێ رۆژێ، سەدوقی ئەوێن دبێژن رابوونا مریان نینە، هندەك ژ وان هاتنە نك وی و پرسیار ژێ كر
و گۆتێ: «مامۆستا، مووسای یا گۆتی: ‹ئەگەر زەڵامەك بێ زاڕۆك مر، پێدڤیە برایێ وی هەڤژینا وی بۆ خۆ بینیت و دویندەهێ بۆ ناڤێ برایێ خۆ پەیدا بكەت.›
ئەڤجا ل نك مە حەفت برا هەبوون، یێ ئێكێ ژن ئینا و بێ دویندە‍‌ھ مر و هەڤژینا خۆ بۆ برایێ خۆ هێلا.
هەروەسا یێ دوویێ و پاشی یێ سێیێ هەتا یێ حەفتێ ژی.
پشتی وان هەمیان، ژن ژی مر.
ئەڤجا ل رۆژا رابوونێ، ئەو ژن دێ هەڤژینا كیژ ژ وان حەفتان بیت؟ چنكو یا هەمیان بوو.»
عیسای بەرسڤا وان دا و گۆت: «هوین د شاشن، چنكو هوین نە د نڤیسارێن پیرۆز و نە د هێزا خودێ دگەهن.
پشتی رۆژا رابوونێ مرۆڤ نە ژنێ دئینن و نە شوی دكەن، لێ دێ وەكو فریشتەیێن ئەسمانی بن.
دەربارەی رابوونا مریان، ما هەوە نەخواندیە ئەوا ژ لایێ خودێ ڤە بۆ هەوە هاتیە گۆتن:
‹ئەز خودایێ ئیبراهیمی و خودایێ ئیسحاقی و خودایێ یەعقوبیمە› ؟ ئەو نە خودایێ مریانە، لێ یێ زیندیانە.»
دەمێ خەلكی ئەڤ چەندە بهیستی، ژ بەر فێركرنا وی حێبەتی بوون.
لێ دەمێ فەریسیان بهیستی كو عیسای سەدوقی یێن بێدەنگ كرین، ل گەل ئێك كۆمبوون
و ئێك ژ وان كو زانایێ دەستووری بوو، ئەڤ پرسیارە ژێ كر، دا وی تاقی بكەت:
«مامۆستا، فەرمانا هەری مەزن د دەستووری دا چیە؟»
بەرسڤا وی دا: «‹ژ هەمی دلێ خۆ و ژ هەمی دەروونێ خۆ و ژ هەمی هزرا خۆ حەز ژ خودان خودایێ خۆ بكە.›
ئەڤەیە فەرمانا ئێكێ و یا هەری مەزن.
یا دوویێ ژی وەكو وێیە: ‹حەز ژ نێزیكێ خۆ بكە، وەك چەوا تۆ حەز ژ خۆ دكەی.›
دەستوور هەمی و پەیامێن پێغەمبەران ب ڤان هەردوو فەرمانان ڤە د هەلاویستینە.»
دەمێ فەریسی پێكڤە كۆمبووین، عیسای پرسیار ژ وان كر:
«هوین دەربارەی مەسیحی چ دبێژن: ئەو كوڕێ كێیە؟» وان بەرسڤا وی دا: «كوڕێ داوودیە.»
گۆتە وان: «ئەڤجا چەوا داوود ب سرۆشێ گیانێ خودێ دبێژیتە وی خودان:
‹خودانی گۆتە خودانێ من: ل دەستێ من یێ راستێ روینە، تاكو ئەز دوژمنێن تە بكەمە دبن پێیێن تە ڤە.›
ئەڤجا ئەگەر داوود دبێژیتێ ‹خودان›، پا چەوا كوڕێ ویە؟»
كەس ژ وان نەشیا خۆ ب پەیڤەكێ ژی بەرسڤا وی بدەت. ژ وێ رۆژێ وەرە كەس نەدوێریا پرسیاران ژێ بكەت.
هنگی عیسای گۆتە جەماوەری و شاگردێن خۆ:
«مامۆستایێن دەستووری و فەریسی ل سەر كورسیكا مووسای دروینن،
ئەڤجا هەر تشتێ ئەو دبێژنە هەوە، هوین بكەن و ب ج‍‌ھ بینن، لێ ل دویڤ كریارێن وان نەكەن، چنكو ئەو دبێژن، لێ ناكەن.
ئەو بارێن گران و دەستنەخۆش گرێ ددەن و دداننە سەر ملێن مرۆڤان، لێ ئەو ب خۆ تبلەكا خۆ بۆ هەلگرتنا باری نالڤینن.
هەمی تشتێن دكەن ژ بەر هندێیە، داكو خەلك وان ببینن. ئەو نڤشتیێن خۆ پەحن دكەن و ریشالۆكێن كراسێ خۆ شۆڕ دكەن
و حەز دكەن د مێڤانداریان دا ل سەرێ ژۆری و د كنیشتەیان دا ل كورسیكێن پێشیێ بن
و ل بازاڕان سڵاڤ لێ بهێنە كرن و خەلك بێژیتە وان ‹رابی ›.
لێ بلا هوین ب ‹رابی› نەهێنە گازی كرن، چنكو مامۆستایێ هەوە ئێكە و هوین هەمی برانە.
هەروەسا ل سەر ئەردی نەبێژنە كەسێ ‹باب›، چنكو بابێ هەوە ئێكە، ئەوێ ل ئەسمانی.
هەروەسا بلا هوین ب ‹رێبەر› نەهێنە گازی كرن، چنكو رێبەرێ هەوە ئێكە، ئەو ژی مەسیحە.
د ناڤ هەوە دا یێ هەری مەزن، دێ خزمەتكارێ هەوە بیت.
هەر كەسێ خۆ بلند بكەت، دێ هێتە نزمكرن و هەر كەسێ خۆ نزم بكەت، دێ هێتە بلندكرن.
نەخوزیكێن هەوە گەلی مامۆستایێن دەستووری و فەریسیان، هەی دووڕوینۆ! چنكو هوین دەرگەهێ پاشایەتیا ئەسمانان ل بەر مرۆڤان دگرن، نە هوین ب ژۆر دكەڤن و نەدهێلن ژی ئەوێن حەز بكەن، ب ژۆر بكەڤن.
نەخوزیكێن هەوە گەلی مامۆستایێن دەستووری و فەریسیان، هەی دووڕوینۆ! چنكو هوین مالێ بیژنان دخۆن و بۆ رویمەتی نڤێژان درێژ دكەن. ژ بەر هندێ هوین دێ سزادانەكا گرانتر وەرگرن.
نەخوزیكێن هەوە گەلی مامۆستایێن دەستووری و فەریسیان، هەی دووڕوینۆ! چنكو هوین ل دەریا و دێمی دگەڕیێن، دا ئێكی بیننە سەر باوەریا خۆ و ئەگەر وەسا چێبوو، هوین وی دوو جاران ژ خۆ پتر دكەنە كوڕێ دۆزەخێ.
نەخوزیكێن هەوە گەلی سەركێشێن كۆرە. هوین دبێژن: ‹هەر كەسێ سویندێ ب پەرستگەهێ بخۆت، سویند ل سەر نینە، لێ یێ سویندێ ب زێڕێ پەرستگەهێ بخۆت، دڤێت پێگیریێ پێ بكەت.›
گەلی دەبەنگ و كۆرەیان، ما كیژ مەزنترە، زێڕ یان پەرستگە‍‌ھ ئەوا زێڕی پیرۆز دكەت؟
دیسان هوین دبێژن: ‹هەر كەسێ ب قوربانگەهێ سویند بخۆت، سویند ل سەر نینە. لێ ئەوێ سویندێ ب پێشكێشیێ ل سەر قوربانگەهێ بخۆت، دڤێت پێگیریێ پێ بكەت.›
گەلی كۆرەیان! ما كیژ مەزنترە، قوربان یان قوربانگەها قوربانی پیرۆز دكەت؟
ئەڤجا هەر كەسێ سویندێ ب قوربانگەهێ بخۆت، وی سویند ب وێ و ب هەمی تشتێ ل سەر ژی خوار.
هەر كەسێ سویندێ ب پەرستگەهێ ژی بخۆت، وی سویند ب وێ و ب ئاكنجیێ وێ ژی خوار.
هەر كەسێ سویندێ ب ئەسمانی ژی بخۆت، ئەوی سویند ب تەختێ خودێ و ئەوێ ل سەر روینشتی ژی خوار.
نەخوزیكێن هەوە گەلی مامۆستایێن دەستووری و فەریسیان، هەی دووڕوینۆ! چنكو هوین دەهێكێ ژ پوینگی و سبتێ و رەها زەر ددەن، لێ هەوە تشتێن گرنگتر د دەستووری دا، ئانكو دادپەروەری، دلۆڤانی و دلسۆزی، ب پاش گوهێن خۆ ڤە هاڤێتینە. پێدڤی بوو هوین ئەڤان بكەن و یێن دی ژی ب پاش گوهێن خۆ ڤە نەهاڤێژن.
گەلی سەركێشێن كۆرە، هوین خۆ ژ وێ ڤەخوارنێ ددەنە پاش یا پێشكەك بكەڤیتە تێدا، لێ هوین حێشترێ دادعیرن.
نەخوزیكێن هەوە گەلی مامۆستایێن دەستووری و فەریسیان، هەی دووڕوینۆ! چنكو هوین دەرڤەیا پەرداغ و سێنیكێن خۆ دشوون، لێ ئەو ژ ناڤ دا دپڕن ژ وی تشتی یێ هەوە ب تالانی و چاڤبرسیێ بدەست خۆ ڤە ئینای.
هەی فەریسیێ كۆرە! تۆ ل بەراهیێ ناڤخۆیا پەرداغێ بشوو، داكو دەرڤەیا وێ ژی پاقژ ببیت.
نەخوزیكێن هەوە گەلی مامۆستایێن دەستووری و فەریسیان، هەی دووڕوینۆ! چنكو هوین وەكو گۆڕێن گێچكرینە، كو ژ دەرڤە جوان دیار دبن، لێ ژ ناڤ دا دپڕن ژ هەستیكێن مریان و هەمی پیساتیێ.
هوین ژی هۆسا، بۆ خەلكی دیار دبن كو هوین د راستدارن، لێ ژ ناڤ دا د پڕی دووڕویاتی و خرابینە.
نەخوزیكێن هەوە گەلی مامۆستایێن دەستووری و فەریسیان، هەی دووڕوینۆ! چنكو هوین گۆڕێن پێغەمبەران ئاڤا دكەن و گۆڕێن مرۆڤێن چاك دنەخشینن
و هوین دبێژن: ‹ئەگەر ئەم ل سەردەمێ بابكالێن خۆ ژیاباین، مە پشكداری د كوشتنا پێغەمبەران دا نەدكر.›
ب ڤێ چەندێ هوین دژی خۆ شاهدەییێ ددەن كو هوین كوڕێن كوژەكێن پێغەمبەرانە.
ئەڤجا هوین ژی شووپا بابكالێن خۆ تەمام كەن.
هەی مارێن تێژكێن كۆرەماران، دێ چەوا ژ سزایێ دۆزەخێ رەڤن؟
ئەڤجا ئەڤە ئەز دێ پێغەمبەر، ئاقلمەند و مامۆستایێن دەستووری بۆ هەوە هنێرم. هوین دێ هندەك ژ وان كوژن و خاچ دەن و هندەكان ژی د كنیشتەیێن خۆ دا قامچی دەن و دێ ژ باژێڕەكی بۆ یێ دی راتەقینن.
لەوما هەر خوینەكا پاقژ یا ل سەر ئەردی هاتیە رشتن، هەر ژ خوینا هابیلێ راستدار تا خوینا زەكەریایێ كوڕێ بەرەخیای، ئەوێ هەوە د ناڤبەرا پەرستگە‍‌ھ و قوربانگەهێ دا كوشتی، دێ كەڤیتە ستۆیێ هەوە.
ئەز ب راستی دبێژمە هەوە: ئەڤە هەمی دێ كەڤیتە ستۆیێ ڤی نفشی.
ئورشەلیم، ئورشەلیم، هەی كوژەكا پێغەمبەران و بەربارانكەرا ئەوێن بۆ تە هاتینە هنارتن، چەند جاران من حەز دكر زاڕۆكێن تە خڕڤە بكەم، كا چەوا مریشك چیچەلۆكێن خۆ د بن چەنگێن خۆ ڤە خڕڤە دكەت، لێ هەوە نەڤیا!
ئەڤە مالا هەوە ما ب هیڤیا هەوە ڤە و دێ كاڤل بیت.
ئەز دبێژمە هەوە: ئێدی هوین من نابینن، تاكو هوین بێژن: ‹یێ بەرەكەتدارە ئەوێ ب ناڤێ خودانی دهێت.› »
عیسا ژ پەرستگەهێ دەركەفت و دچوو، ئینا شاگردێن وی خۆ گەهاندێ، دا ئاڤاهیێن پەرستگەهێ نیشا وی بدەن.
وی گۆتە وان: «ما هوین ڤان هەمیان نابینن؟ ئەز راستیێ دبێژمە هەوە: ل ڤێرێ بەر ل سەر بەری نامینیت هەمی دێ هێنە هەڕفاندن.»
دەمێ ئەو ل سەر چیایێ زەیتوونان یێ روینشتی، شاگردێن وی ب تنێ هاتنە نك و گۆتێ: «بێژە مە، ئەڤ چەندە دێ كەنگی چێبن؟ و نیشانا هاتنا تە و دویماهیا سەردەمی چیە؟»
عیسای بەرسڤا وان دا: «هشیار بن كەس هەوە د سەردا نەبەت،
چنكو گەلەك دێ ب ناڤێ من هێن و دێ بێژن: ‹ئەزم مەسیح!› و دێ گەلەكان د سەردا بەن.
دێ هەوە گو‍‌ھ ل جەنگ و دەنگوباسێن جەنگان بیت. هشیار بن نەڤەجنقن، چنكو دڤێت ئەڤ تشتە روی بدەن. لێ ئەڤە هێشتا نە دویماهیە.
چنكو دێ مللەتەك دژی مللەتەكی و پاشایەتیەك دژی پاشایەتیەكێ رابیت و دێ ل گەلەك جهان كولب و بیڤەلەرز پەیدا بن،
لێ ئەڤە هەمی دەستپێكا ژانێن زاڕۆكبوونێنە.
هنگی دێ هەوە رادەستی تەنگاڤیێ كەن و كوژن و دێ ژ بەر ناڤێ من كەربێن هەمی مللەتان ژ هەوە ڤەبن،
وی دەمی دێ گەلەك هەلنگڤن و ئێكودوو دەنە گرتن و كەربێ ژ ئێكودوو هەلگرن.
دێ گەلەك پێغەمبەرێن درەوین پەیدا بن و دێ گەلەكان د سەردا بەن.
ژ بەر زێدەبوونا كارێن خراب، دێ ڤیانا گەلەك مرۆڤان سار بیت،
لێ ئەوێ تا دویماهیێ خۆ راگریت ئەو دێ قورتال بیت
و ئەڤ مزگینیا پاشایەتیێ دێ ل هەمی جیهانێ هێتە بەڵاڤكرن، كو بۆ هەمی مللەتان ببیتە شاهدەیی و پاشی دێ ب دویماهی هێت.
ئەڤجا دەمێ هوین ‹پیساتیا وێرانكرنێ› ئەوا ل سەر زارێ دانیێل پێغەمبەری هاتی، دبینن ل جهێ پیرۆز یا ئامادەیە» (بلا خواندەڤان تێبگەهیت)
«هنگی بلا ئەوێن ل دەڤەرا یەهودیایێ بڕەڤنە چیایان
و ئەوێ ل سەر بانی بیت، بلا نەهێتە خوارێ دا تشتەكی ژ مالا خۆ ببەت
و ئەوێ ل ناڤ زەڤیێ بیت، بلا ڤەنەگەڕیێت دا كوركێ خۆ ببەت.
لێ ل وان رۆژان، نەخوزیكێن ژنكێن دووگیان و شیردەران!
نڤێژان بكەن داكو رەڤینا هەوە نەكەڤیتە زڤستانێ یان رۆژا شەمبیێ.
چنكو هنگی دێ تەنگاڤیەكا مەزن روی دەت، كو وەكو وێ هەر ژ دەستپێكا جیهانێ هەتا نوكە روی نەدایە و چ جاران روی نادەت ژی.
ئەگەر ئەو رۆژ نەهاتبانە كورتكرن، كەس قورتال نەدبوو، لێ ژ بەر هەلبژارتیان ئەو رۆژ دێ هێنە كورتكرن.
هنگی ئەگەر ئێكی گۆتە هەوە: ‹ئها ئەڤە مەسیح یێ ل ڤێرێ!› یان ژی ‹یێ ل وێراهە!›، باوەر نەكەن.
چنكو دێ مەسیحێن درەوین و پێغەمبەرێن درەوین دیار بن و دێ نیشانێن مەزن دیار كەن و مەندەهۆشیان كەن، داكو، ئەگەر د شیان دا با، خۆ هەلبژارتیێن خودێ ژی د سەر دا ببەن.
ئەڤە من پێشوەخت گۆتە هەوە،
ئەڤجا ئەگەر وان گۆتە هەوە: ‹وێهە مەسیح یێ ل چۆلی› هوین دەرنەكەڤن. یان ژی ئەگەر گۆتن: ‹یێ د ژۆرڤە› هوین باوەر نەكەن.
چنكو كا چەوا برویسی ل رۆژهەلاتێ ڤەددەت و ل رۆژئاڤایێ دیار دبیت، هاتنا كوڕێ مرۆڤ ژی دێ یا وەسا بیت.
مرار ل كیرێ بیت، باڵندەیێن كەلەخان دێ ل وێرێ خڕڤە بن.
ئێكسەر پشتی تەنگاڤیا وان رۆژان، رۆژ دێ هێتە تاری كرن و هەیڤ رۆناهیا خۆ نادەت، ستێر دێ ژ ئەسمانی رژیێن و ئەختەرێن ئەسمانان دێ هێنە تێكهەژاندن.
هنگی دێ نیشانا كوڕێ مرۆڤ ل ئەسمانی دیار بیت و دێ هۆزێن ئەردی هەمی شینیێ دانن و دێ بینن كوڕێ مرۆڤ ب هێز و گەلەك مەزناهی ل سەر عەورێن ئەسمانی یێ دهێت.
ئەڤجا دێ فریشتەیێن خۆ ب لێدانا بۆڕیزانەكا دەنگ مەزن هنێریت، دێ هەلبژارتیێن وی ژ هەر چوار كوژیێن جیهانێ ، ژ ڤی لایێ ئەسمانان هەتا لایێ دی، خڕڤە كەن.
ژ دارهژیرێ فێری ڤێ نموونەیێ ببن: دەمێ چەقێن وێ دبشكڤن و بەلگ پێڤە دهێن، هوین دزانن هاڤین یا نێزیكە.
وەسا هوین ژی، دەمێ ڤان هەمی تشتان دبینن، بزانن یا نێزیكە و ل بەر دەرگەهیە.
راستیێ دبێژمە هەوە: ئەڤ نفشە ژ ناڤ ناچیت، تا ئەڤ تشتە هەمی روی نەدەن.
ئەرد و ئەسمان دێ ژ ناڤ چن، لێ پەیڤێن من چ جاران ژ ناڤ ناچن.
لێ سەبارەت وێ رۆژێ و وێ دەمژمێرێ كەس نزانیت، نە فریشتەیێن ئەسمانان و نە ژی كوڕ، لێ ب تنێ باب دزانیت.
ل دەمێ نوحی كا چەوا بوو، هاتنا كوڕێ مرۆڤ ژی دێ یا وەسا بیت.
ل رۆژێن بەری تووفانێ، مرۆڤان دخوار و ڤەدخوار، ژن دئینا و شوی دكر، تا وێ رۆژا نوح چوویە د گەمیێ دا،
وان هەست پێ نەدكر هەتا تووفان رابووی و هەمی ژناڤبرین. هاتنا كوڕێ مرۆڤ ژی دێ یا وەسا بیت.
هنگی دوو زەڵام دێ ل ناڤ زەڤیێ بن، ئێك دێ هێتە برن و یێ دی دێ هێتە هێلان.
دوو ژنك دێ دستاڕەكی هێرن، ئێك دێ هێتە برن و یا دی دێ هێتە هێلان.
ئەڤجا هشیار بمینن، چنكو هوین نزانن كیژ رۆژێ دێ خودانێ هەوە هێت،
لێ هوین ڤێ بزانن: ئەگەر خودانێ مالێ زانیبا كیژ دەمێ شەڤێ دێ دز هێت، دا هشیار مینیت و نەدهێلا بكەڤیتە مالا وی.
ئەڤجا هوین ژی د ئامادە بن، چنكو كوڕێ مرۆڤ دێ د دەمەكێ وەسا دا هێت، كو هوین هزر نەكەن.
ئەڤجا ئەو بەنیێ دلسۆز و ئاقلمەند كیە، ئەوێ خودان وی بكەتە بەرپرسێ خزمەتكارێن خۆ، دا خوارنێ د دەمێ وێ دا بدەتێ؟
خوزیكێن وی بەنی یێ كو دەمێ خودانێ وی دهێت، وی ببینیت ئەو یێ وە دكەت.
راستیێ دبێژمە هەوە: ئەو دێ وی كەتە بەرپرسێ هەمی مالێ خۆ.
لێ ئەگەر ئەوی بەنیێ خراب د دلێ خۆ دا گۆت: ‹خودانێ من دێ گیرۆ بیت›
و دەست ب قوتانا بەنیێن دی بكەت و ل گەل سەرخۆشان بخۆت و ڤەخۆت،
خودانێ وی بەنی دێ ل رۆژەكێ هێت كو ئەو چاڤەڕێ نەبیت و ل دەمژمێرەكێ كو ئەو نەزانیت.
ئەڤجا دێ وی پارچە پارچە كەت و چارەنڤیسێ وی كەتە ل گەل دووڕویان. ل وێرێ گری و گڤاشتنا ددانانە.»
«هنگی دێ پاشایەتیا ئەسمانان وەكو ڤێ چەندێ بیت: دە‍‌ھ كچكان چرایێن خۆ هەلگرتن و چوونە پێشوازیا زاڤای.
پێنج ژ وان د ئاقلمەند بوون و پێنج د دەبەنگ بوون.
یێن دەبەنگ چرایێن خۆ برن، لێ زەیت ل گەل خۆ نەبر،
لێ یێن ئاقلمەند ئامانێن زەیتێ ژی ل گەل چرایێن خۆ برن.
زاڤا گیرۆ بوو و خەوا وان هات و هەمی نڤستن.
ل نیڤ شەڤ، گازی بلند بوون: ‹ئەڤە زاڤا هات، هەڕنە پێشوازیا وی!›
ئینا هەمی كچك ژ خەو رابوون و چرایێن خۆ ئامادە كرن.
یێن دەبەنگ گۆتە یێن ئاقلمەند: ‹هندەكێ ژ زەیتا خۆ بدەنە مە، چنكو چرایێن مە یێن ڤەدمرن!›
ئینا یێن ئاقلمەند بەرسڤ دا و گۆتن: ‹نەخێر، ئەو تێرا مە و هەوە ناكەت. ئەڤجا هەڕنە نك زەیت فرۆشان و بۆ خۆ بكڕن.›
دەمێ ئەو چووین دا بكڕن، زاڤا هات، ئینا یێن ئامادە ل گەل زاڤای چوونە د ژۆرڤە و دەرگە‍‌ھ هاتە گرتن.
پاشی كچكێن دی ژی ڤەگەڕیان و گۆتن: ‹ئەزبەنی، ئەزبەنی، دەرگەهی ل مە ڤەكە.›
لێ زاڤای بەرسڤ دا: ‹ب راستی دبێژمە هەوە: ئەز هەوە نانیاسم.›
ئەڤجا هشیار بمینن، چنكو هوین وێ رۆژێ و وێ دەمژمێرێ ژی نزانن.
دیسان پاشایەتیا ئەسمانان وەكو مرۆڤەكێ ل بەر گەشتێیە. بەنیێن خۆ داخوازكرن و سامانێ خۆ دا دەستێ وان.
پێنج تالانتێن زیڤی دانە ئێك ژ وان و دوو دانە یێ دی و یێ سێیێ تالانتەك دایێ، هەر ئێك ل دویڤ شیانا وی و پاشی گەشت كر.
یێ پێنج تالانت وەرگرتین ئێكسەر چوو و بازرگانی پێ كر، ئینا پێنج تالانتێن دی قازانج كرن.
هەروەسا یێ دوو تالانت برین، ئەوی ژی دوو قازانج كرن.
لێ یێ تالانتەك بری، چوو و كووركەك د ئەردی دا كۆلا و پارەیێ خودانێ خۆ تێدا ڤەشارت.
پشتی دەمەكێ درێژ، خودانێ وان بەنیان ڤەگەڕیا و ژمێریاری ل گەل وان كر.
ئەوێ كو پێنج تالانت وەرگرتین، پێنج تالانتێن دی ژی ئینان و گۆت: ‹ئەزبەنی، تە پێنج تالانت دابوونە من، ئەڤە ژبلی وان، من پێنج تالانتێن دی قازانج كرن.›
ئینا خودانێ وی گۆتێ: ‹دەستخۆش، بەنیێ قەنج و دلسۆز! تۆ ل سەر پیچەكێ یێ دلسۆز بووی، ئەڤجا ئەز دێ تە دانمە سەر گەلەكێ. وەرە پشكداری بەختەوەریا خودانێ خۆ ببە!›
پاشی یێ دوو تالانت وەرگرتین هات و گۆت: ‹ئەزبەنی، تە دوو تالانت دابوونە من، ئەڤە ژبلی وان، من دوو تالانتێن دی قازانج كرن!›
ئینا خودانێ وی گۆتێ: ‹دەستخۆش، بەنیێ قەنج و دلسۆز! تۆ ل سەر پیچەكێ یێ دلسۆز بووی، ئەڤجا ئەز دێ تە دانمە سەر گەلەكێ. وەرە پشكداری بەختەوەریا خودانێ خۆ ببە.›
پاشی یێ ئێك تالانت وەرگرتی هات و گۆت: ‹ئەزبەنی، من دزانی تۆ مرۆڤەكێ زۆرداری، تۆ ژ وی ئەردی ددروی یێ تە نەچاندی و ژ وی ئەردی كۆم دكەی یێ تە تۆڤ نەهاڤێتیێ.
ئینا ئەز ترسیام و ئەز چووم و من تالانتێ تە د ئەردی دا ڤەشارت. ئەڤجا ئەڤە پارەیێ تە!›
ئینا خودانێ وی بەرسڤ دا: ‹هەی بەنیێ خراب و تەمبەل! تە دزانی ئەز ژ ئەردێ من نەچاندی ددوریم و ژ ئەردێ من تۆڤ نەهاڤێتیێ كۆم دكەم.
ئەڤجا پێدڤی بوو، تە پارەیێ من دانابا نك پارەگوهۆڕان، دا هەر دەمێ ئەز هاتبام، من پارەیێ خۆ ل گەل ریبایێ وەرگرتبا!
ئەڤجا تالانتی ژێ بستینن و بدەنە خودانێ دە‍‌ھ تالانتان.
چنكو هەر كەسێ هەیی دێ پتر بۆ وی هێتە دان، تاكو د سەردا دچیت، لێ ئەوێ نەیی، خۆ یێ هەی ژی دێ ژێ هێتە ستاندن،
لێ ڤی بەنیێ بكێرنەهاتی بهاڤێژنە د تاریا ژ دەرڤە دا. ل وێرێ گری و گڤاشتنا ددانانە.›
دەمێ كوڕێ مرۆڤ ب مەزناهیا خۆ ڤە دهێت و هەمی فریشتە یێن د گەل دا، دێ ل سەر تەختێ مەزناهیا خۆ روینیت.
ل بەرامبەر وی هەمی مللەت دێ هێنە كۆمكرن و دێ وان ژ ئێك جودا كەت هەروەكو شڤان پەزێ سپی ژ پەزێ رەش جودا دكەت.
ئەو دێ پەزێ سپی ل دەستێ خۆ یێ راستێ راوەستینیت و ل دەستێ چەپێ پەزێ رەش.
پاشی دێ پاشا بێژیتە یێن ل دەستێ خۆ یێ راستێ: ‹وەرن هەی ئەوێن بەرەكەتا بابێ من ل سەر، ببنە میراتگرێن وێ پاشایەتیا هەر ژ دامەزراندنا جیهانێ بۆ هەوە هاتیە ئامادەكرن،
چنكو ئەز برسی بووم، هەوە ئەز تێر كرم، ئەز تێهنی بووم، هەوە ئاڤ دا من، ئەز یێ بیانی بووم، هەوە ئەز حەواندم،
یێ رویس بووم، هەوە ئەز ب جلك ئێخستم، نەساخ بووم، هەوە سەرەدانا من كر، زیندانی بووم، هوین هاتنە نك من.›
ل وی دەمی دێ یێن راستدار بەرسڤێ دەن و بێژن: ‹خودان، كەنگی مە تۆ برسی دیتی و خوارن دایە تە، یان ژی تێهنی و ئاڤ دایە تە؟
كەنگی مە تۆ بیانی دیتی و تۆ حەواندی، یان ژی رویس و تۆ ب جلك ئێخستی؟
كەنگی مە تۆ نەساخ یان زیندانی دیتی و ئەم هاتینە سەرەدانا تە؟›
ئەڤجا پاشا دێ بەرسڤا وان دەت: ‹ب راستی دبێژمە هەوە: چنكو هەوە ئەڤ چەندە یا ل گەل ئێك ژ ڤان بچویكترین برایێن من كری، هەوە ئەو یا ل گەل من كری.›
پاشی دێ بێژیتە ئەوێن ل دەستێ چەپێ: ‹ژ من دویر بكەڤن، هەی ئەوێن تۆڕەبوونا بابێ من ل سەر، بەرەڤ ئاگرێ هەروهەر، ئەوێ بۆ ئبلیسی و فریشتەیێن وی هاتیە ئامادەكرن،
چنكو ئەز برسی بووم و هەوە خوارن نەدا من و ئەز تێهنی بووم و هەوە ئاڤ نەدا من،
ئەز یێ بیانی بووم، هەوە ئەز نەحەواندم، رویس بووم و هەوە ئەز ب جلك نە ئێخستم، نەساخ و زیندانی بووم و هەوە سەرەدانا من نەكر.›
ئەڤجا ئەڤە دێ بەرسڤێ دەن و بێژن: ‹خودان، كەنگی مە تۆ برسی، یان تێهنی، یان بیانی، یان رویس، یان ژی نەساخ، یان زیندانی دیتی و ئەم د هانا تە نەهاتین؟›
دێ هنگی بەرسڤا وان دەت و بێژیت: ‹ب راستی دبێژمە هەوە: چنكو هەوە ئەڤ چەندە ل گەل ئێك ژ ڤان بچویكترین برایێن من نەكر، هەوە ل گەل من ژی نەكر.›
ئەڤجا ئەڤێن هەنێ دێ چنە سزایێ هەروهەر، لێ یێن راستدار دێ چنە ژیانا هەروهەر.»
دەمێ عیسای ئەڤ هەمی ئاخفتنە ب دویماهی ئیناین، گۆتە شاگردێن خۆ:
«هوین دزانن پشتی دوو رۆژێن دی جەژنا دەربازبوونێیە و دێ كوڕێ مرۆڤ رادەست كەن، دا بهێتە خاچدان.»
هنگی سەرۆكێن كاهنان و ریهسپیێن مللەتی ل كۆچكا سەرۆككاهنی، كو ناڤێ وی قەیافا بوو، كۆمبوون
و پیلانەك دانا، كو عیسای ب فێلبازی بگرن و بكوژن.
لێ وان دگۆت: «ئەم ل جەژنێ وی ناگرین، دا تێكدان د ناڤ خەلكی دا چێنەبیت.»
دەمێ عیسا ل بێت‌عەنیا، ل مالا شەمعونێ گوڕی،
ژنكەكێ گولاڤدانكەكا روینێ بێهنخۆش یێ بهاگران ڤێ بوو، هاتە نك و دەمێ ل سەر سفرێ یێ روینشتی، وێ هەمی ب سەرێ وی دا كر.
گاڤا شاگردێن وی ئەڤ چەندە دیتی، دلتەنگ بوون و گۆتن: «بۆچی ئەڤ زەعێكرنە؟
چێدبوو ئەڤ گولاڤە ب بهایەكێ باش هاتبا فرۆتن و دابا هەژاران.»
لێ عیسای ب ڤێ چەندێ زانی و گۆتە وان: «بۆچی هوین ڤێ ژنكێ تەنگاڤ دكەن؟ وێ كارەكێ باش بۆ من كر.
هەژار هەمی دەمان یێن ل نك هەوە هەین، لێ ئەز هەمی دەمان ل نك هەوە نابم.
دەمێ وێ گولاڤ ب لەشێ من دا كری، وێ ئەز بۆ ڤەشارتنێ ئامادە كرم.
راستیێ دبێژمە هەوە: ئەڤ مزگینیە ل هەر جهەكی ل سەرانسەری جیهانێ بهێتە راگەهاندن، دێ بەحسێ ئەوا ڤێ ژنكێ كری ژی ژ بۆ بیرهاتنا وێ هێتە كرن.»
هنگی ئێك ژ دوازدە شاگردان، ئەوێ ناڤێ وی یەهودایێ ئەسخەریوتی، چوو نك سەرۆكێن كاهنان
و گۆت: «دێ چ دەنە من، ئەز وی رادەستی هەوە بكەم؟» ئینا وان سۆزا سی‍‌ھ زیڤان دایێ.
ئێدی ژ وی دەمی وەرە، یەهودا ل دەلیڤەیەكێ دگەڕیا، دا وی رادەستی وان بكەت.
ل رۆژا ئێكێ ژ جەژنا نانێ شكەڤا ، شاگرد هاتنە نك عیسای و گۆتنێ: «تە دڤێت ئەم ل كیرێ شیڤا جەژنا دەربازبوونێ ئامادە بكەین، دا تۆ بخۆی؟»
ئینا گۆتە وان: «هەڕنە باژێڕی ل نك فلان كەسی و بێژنێ: ‹مامۆستا دبێژیت: دەمێ من یێ نێزیك بووی و دێ جەژنا دەربازبوونێ ل گەل شاگردێن خۆ ل نك تە كەم.›»
شاگردان ئەو كر یا عیسای فەرمان پێ دای و ل وێرێ شیڤا دەربازبوونێ ئامادە كر.
دەمێ بوویە شەڤ، ل گەل هەر دوازدان ل سەر سفرێ روینشت.
د بەر خوارنێ را عیسای گۆت: «ب راستی دبێژمە هەوە: ئێك ژ هەوە دێ بێبەختیێ ل من كەت.»
ئەو گەلەك دلتەنگ بوون و دەست پێ كر ئێك ئێكە پرسیار ژێ كر: «خودان، ئەرێ ئەو ئەزم؟»
بەرسڤا وان دا: «ئەوێ پاریێ خۆ ل گەل من د سێنیكێ هەلاندی، ئەو دێ من دەتە دەست.
كوڕێ مرۆڤ دێ وەسا چیت، هەروەكو دەربارەی وی هاتیە نڤیسین، لێ نەخوزیكێن وی كەسی یێ كوڕێ مرۆڤ رادەست بكەت. بۆ وی كەسی باشتر بوو ئەو ژ دایك نەببا.»
ئەڤجا یەهودا، ئەوێ دێ بێبەختیێ ل وی كەت، بەرسڤ دا و گۆت: «مامۆستا، ئەرێ ئەو ئەزم؟» عیسای بەرسڤا وی دا: «تە گۆت.»
دەمێ وان خوارن دخوار، عیسای نان هەلگرت و سوپاسی كر و كەر كر و دا شاگردان و گۆت: «وەرگرن، بخۆن، ئەڤە لەشێ منە!»
پاشی پەرداغ هەلگرت و سوپاسی كر و دا وان و گۆتێ: «هوین هەمی ژێ ڤەخۆن،
چنكو ئەڤە خوینا منە، خوینا پەیمانێ، ئەوا ژ پێخەمەتی گەلەكان بۆ لێبورینا گونەهان دێ هێتە رشتن.
ئەز دبێژمە هەوە: ئێدی ئەز ژ ڤی بەرهەمێ مێوێ ڤەناخۆم، تا وێ رۆژا ئەز ل گەل هەوە ل پاشایەتیا بابێ خۆ ژ یا نوی ڤەدخۆم.»
پشتی وان سروودەك بۆ پەسنا خودێ گۆتی، چوونە چیایێ زەیتوونان.
پشتی هنگی گۆتە وان «ئەڤ شەڤە هوین هەمی دێ ژ بەر من هەلنگڤن، چنكو یا هاتیە نڤیسین: ‹ئەز دێ ل شڤانی دەم، كەرێ پەزی دێ بژاڵە بیت.›
لێ پشتی رابوونا من، ئەز دێ بەراهیا هەوە چمە جەلیل.»
پەترۆسی بەرسڤا وی دا و گۆتێ: «ئەگەر هەمی ژی ژ بەر تە بهەلنگڤن، ئەز چ جاران ناهەلنگڤم!»
عیسای گۆتێ: «ب راستی دبێژمە تە: ئەڤ شەڤە بەری دیكل بانگ بدەت، تۆ دێ سێ جاران من ماندەل كەی.»
پەترۆسی گۆتێ: «خۆ ئەگەر یا پێدڤی بیت ئەز ل گەل تە بمرم ژی، ئەز تە ماندەل ناكەم!» هەمی شاگردان ژی وە گۆت.
پاشی عیسا و شاگردێن خۆ چوونە وی جهێ دبێژنێ گەتسێمانی و گۆتە وان: «ل ڤێرێ روینن، تا ئەز بچمە وێراهە نڤێژێ بكەم.»
پەترۆس و هەردوو كوڕێن زەبەدی ل گەل خۆ برن و خەمگینیێ و دلتەنگیێ ب سەر وی دا گرت.
هنگی گۆتە وان: «دلێ من تا رادەیێ مرنێ یێ ب خەمە! ل ڤێرێ بن و ل گەل من هشیار بمینن.»
پاشی پیچەكێ پێشڤە چوو و خۆ دەڤ و دەڤ هاڤێتە ئەردی و نڤێژ كر و گۆت: «بابێ من، ئەگەر چێببیت، بلا ئەڤ پەرداغە ژ من دەرباز ببیت. لێ نە وەكو من دڤێت، بەلكو وەكو تە دڤێت.»
پشتی هنگی ڤەگەڕیا نك شاگردان و دیت د نڤستینە، ئینا گۆتە پەترۆسی: «ما هوین نەشیان دەمژمێرەكێ ژی ل گەل من هشیار بمینن؟
هشیار بمینن و نڤێژان بكەن، دا هوین نەكەڤنە د تاقیكرنێ دا. گیان یێ ئامادەیە، لێ لەش یێ لاوازە.»
دیسان بۆ جارا دوویێ چوو و نڤێژ كر و گۆت: «بابێ من، ئەگەر چێ نەبیت ئەڤە ژ من دەرباز ببیت، تاكو ئەز وێ ڤەنەخۆم، بلا ب حەزا تە بیت.»
ڤەگەڕیاڤە نك شاگردان، دیسان دیت د نڤستینە، چنكو خەوێ چاڤێن وان گران كربوون.
ئەو هێلان و زڤڕی بۆ جارا سێیێ نڤێژ كر و هەر ئەو ئاخفتن دووبارە كر.
پاشی هاتە نك شاگردێن خۆ و گۆتە وان: «ئەڤە هێشتا هوین د نڤستینە و بێهنا خۆ ڤەددەن؟ ئەڤە ئەو دەم هات و كوڕێ مرۆڤ رادەستی گونەهكاران دهێتە كرن.
رابن دا بچین، ئها ئەڤە ئەوێ من رادەست دكەت، نێزیك بوو!»
دەمێ ئەو دئاخفت، وەسا چێبوو یەهودا، كو ئێك ژ هەر دوازدان بوو، گەهشت و كۆمەكا مەزن یا مرۆڤان ب شیر و دار ڤە ل گەل بوون. ئەو ژ لایێ سەرۆكێن كاهنان و ریهسپیێن مللەتی ڤە هاتبوونە هنارتن.
ئەوێ وی رادەست دكەت نیشانەك دابوو وان و گۆتبوویێ: «ئەوێ ئەز ماچی بكەم، ئەو ئەوە. وی بگرن.»
یەهودا ئێكسەر هاتە نك عیسای و گۆت: «سڵاڤ، مامۆستا!» و ماچی كر.
عیسای گۆتێ: «هەڤال، تۆ بۆ چ هاتی، وێ بكە.» ئەوێن د گەل یەهودای دا، هاتنە پێش و عیسا دەستەسەر كر و گرت.
وەسا چێبوو ئێك ژ ئەوێن ل گەل عیسای دەست دا شیرێ خۆ و ئینا دەرێ و ڤەوەشاندە بەنیێ سەرۆككاهنی و گوهێ وی ژێڤە كر.
ئینا عیسای گۆتێ: «شیرێ خۆ بزڤڕینە جهێ وی! یێ دەست بهاڤێژیتە شیری، دێ ب شیری ژ ناڤ چیت.
ما تۆ هزر دكەی، ئەز نەشێم داخوازێ ژ بابێ خۆ بكەم و ئەو د ج‍‌ھ دا پتر ژ دوازدە سوپایێن فریشتەیان بۆ من نەهنێریت؟
لێ ئێدی دا چەوا نڤیسار ب ج‍‌ھ هێن، كو دبێژن پێدڤیە هۆسا روی بدەت؟»
وێ گاڤێ عیسای گۆتە وێ كۆمێ: «دێ بێژی هوین بۆ ب سەرداگرتنا قاچاخەكی ب شیر و داران دەركەفتین، دا من بگرن؟ هەر رۆژ ئەز ل پەرستگەهێ یێ روینشتی بووم و من فێركرن دكر و هەوە ئەز نەدگرتم.
لێ ئەڤێ هەمیێ روی دا، دا نڤیسارێن پێغەمبەران ب ج‍‌ھ بهێن.» ل وی دەمی هەمی شاگردان ئەو هێلا و رەڤین.
ئەوێن عیسا گرتی، ئەو برە نك قەیافایێ سەرۆككاهن. ل وێرێ مامۆستایێن دەستووری و ریهسپی كۆم ببوون.
پەترۆس ژ دویر ڤە ب دویڤ را تا حەوشا سەرۆككاهنی چوو، قەستا ژۆر كر و ل گەل زێرەڤانان روینشت، دا ئەنجامی ببینیت.
سەرۆكێن كاهنان و جڤاتا بلند هەمی ل شاهدەییا ب درەو دەربارەی عیسای دگەڕیان، دا وی بدەنە كوشتن،
لێ وان نەدیت، سەرەڕای كو گەلەك شاهدێن درەوین خۆ دیار كر. ل دویماهیێ دوو هاتنە پێش
و گۆتن: «ڤی مرۆڤی گۆت: ‹ئەز دشێم پەرستگەها خودێ بهەڕفینم و د سێ رۆژان دا ئاڤا بكەم.›»
سەرۆككاهن رابوو و گۆتێ: «ما تۆ چ بەرسڤان نادەی؟ ئەڤە چ شاهدەییە ئەڤ كەسە ل سەر تە ددەن؟»
لێ عیسا بێدەنگ ما. سەرۆككاهنی گۆتێ: «ئەز تە ب خودایێ زیندی ددەمە سویندێ، بێژە مە: ئەرێ تۆی مەسیحێ كوڕێ خودێ؟»
عیسای بەرسڤا وی دا: «تە گۆت! و ئەز دبێژمە هەوە: ژ نوكە پێڤە هوین دێ كوڕێ مرۆڤ بینن، ل دەستێ راستێ یێ هێزداری یێ روینشتی و ل سەر عەورێن ئەسمانی یێ دهێت.»
هنگی سەرۆككاهنی جلكێن خۆ دڕاندن و گۆت: «وی كوفری كر! ما ئێدی مە چ پێدڤی ب شاهدان هەیە؟ ئها ئەڤە هەوە كوفریا وی بهیست!
ئەڤجا هوین چ دبێژن؟» وان بەرسڤ دا و گۆت: «ئەو یێ هەژی مرنێیە!»
ل وی دەمی وان تف كرنە دێمێ وی و دا بەر كولمان و هندەكێن دی زللە‍‌ھ لێدان
و گۆتن: «هەی مەسیح، ئەگەر تۆ پێغەمبەر بی، بۆ مە بێژە كی بوو دانایە تە؟»
ل وی دەمی پەترۆس د حەوشێ دا یێ روینشتی بوو، ئینا كچكەكا خزمەتكار هاتە نك و گۆتێ: «تۆ ژی ل گەل عیسایێ جەلیلی بووی.»
ئینا پەترۆسی بەرامبەری هەمیان ماندەل كر و گۆت: «ئەز نزانم تۆ چ دبێژی.»
دەمێ دەركەفتیە بەر دەرگەهێ حەوشێ، خزمەتكارەكا دی ئەو دیت و گۆتە ئامادەبوویان: «ئەڤە ژی ل گەل عیسایێ ناسیرەیی بوو.»
پەترۆسی دیسان ماندەل كر و سویند خوار، گۆت: «ئەز وی زەڵامی نانیاسم!»
پشتی دەمەكێ كورت، ئەوێن كو ل وێرێ بوون، چوونە نك پەترۆسی و گۆتێ: «ب راستی تۆ ژی ئێك ژ وانی، چنكو ژ زاراڤێ تە یا دیارە.»
هنگی وی دەست ب نفرین و سویندخوارنێ كر و گۆت: «ئەز وی زەڵامی نانیاسم!» ئینا د ج‍‌ھ دا دیكلی بانگ دا.
ئینا ئاخفتنا عیسای هاتە بیرا پەترۆسی دەمێ گۆتیێ: «بەری دیكل بانگ بدەت، تۆ دێ سێ جاران من ماندەل كەی.» پەترۆس دەركەفتە ژ دەرڤە و گریەكا تەحل كر.
دەمێ بوویە سپێدە، هەمی سەرۆكێن كاهنان و ریهسپیێن مللەتی پیلانەك ل سەر عیسای دانا، كا دێ چەوا دەنە كوشتن.
پاشی ئەو گرێ دا و بر و رادەستی پیلاتۆسێ والی كر.
دەمێ یەهودای، ئەوێ عیسا رادەست كری، دیتی كو عیسا هاتە گونەهباركرن، پەشیمان بوو و ئەو سی‍‌ھ زیڤ بۆ سەرۆكێن كاهنان و ریهسپیان ڤەگێڕانەڤە
و گۆت: «من گونە‍‌ھ كر، دەمێ من خوینەكا بێگونە‍‌ھ رادەست كری.» وان بەرسڤ دا: «مە چ ژێیە؟ ئەو د ستۆیێ تە دایە!»
ئینا وی زیڤ هاڤێتنە د پەرستگەهێ ڤە، پاشی چوو و خۆ سێدارە دا.
سەرۆكێن كاهنان زیڤ هەلگرتن و گۆتن: «نە یا رەوایە بكەینە د گەنجینێ دا، چنكو پارەیێن خوینێنە.»
ئەڤجا ئەو رێككەفتن كو ب وی پارەی زەڤیا گلكاری بكڕن، دا بكەنە گۆڕستان بۆ بیانیان.
ژ بەر هندێ هەتا ئەڤرۆ دبێژنێ زەڤیا خوینێ.
وی دەمی، ئەو پەیڤا ب رێیا یەرمیا پێغەمبەر هاتیە گۆتن، ب ج‍‌ھ هات: «وان ئەو سی‍‌ھ زیڤ برن، كو بهایێ وی بوون، ل دویڤ وی بهایێ ژ لایێ هندەك ژ كوڕێن ئیسرائیلی ڤە بۆ وی هاتیە ڤەبڕین،
و ژ پێش بهایێ زەڤیا گلكاری ڤە دان، هەروەكو خودانی فەرمان ل من كری.»
ئینا عیسا بەرامبەری والی راوەستیا و والی پرسیار ژێ كر: «ئەرێ تۆ پاشایێ جوهیانی؟» عیسای بەرسڤا وی دا: «تە ب خۆ گۆت.»
دەمێ سەرۆكێن كاهنان و ریهسپیان ئەو تاوانبار دكر، وی چ بەرسڤ نەدان.
ئەڤجا پیلاتۆسی گۆتە وی: «ما تە گو‍‌ھ لێ نینە ئەو یێ چەند شاهدەییان ل دژی تە ددەن؟»
عیسای دەربارەی تاوانەكێ ژی بەرسڤا وی نەدا و والی گەلەك حێبەتی بوو.
والی نەریتەك هەبوو، ل جەژنێ گرتیەكی یێ كو خەلك دخوازیت، ئازاد بكەت.
وی دەمی گرتیەكێ ناڤدار هەبوو ناڤێ وی باراباس بوو.
ئەڤجا دەمێ ئەو كۆم بووین، پیلاتۆسی پرسیار ژ وان كر: «هەوە دڤێت بۆ هەوە كێ ئازاد بكەم: باراباسی یان ژی عیسایێ دبێژنێ مەسیح؟»
وی دزانی وان ژ زكڕەشی عیسا رادەستی وی كریە.
دەمێ ئەو ل سەر كورسیكا دادوەریێ یێ روینشتی، هەڤژینا وی ئێك هنارتە نك و گۆتێ: «نەكەی چ ل وی مرۆڤێ راستدار بكەی! چنكو ئەڤرۆ د خەونێ دا، ژ بەر وی، من گەلەك ئازار یا دیتی.»
لێ سەرۆكێن كاهنان و ریهسپیان جەماوەر هاندا، كو داخوازا ئازادكرنا باراباسی و كوشتنا عیسای بكەن.
ئەڤجا پیلاتۆسی گۆتە وان: «هەوە كی ژ هەردوویان دڤێت ئەز بۆ هەوە ئازاد بكەم؟» وان بەرسڤ دا: «باراباسی.»
پیلاتۆسی گۆتە وان: «پا ئەز چ ل عیسایێ دبێژنێ مەسیح بكەم؟» هەمیان بەرسڤ دا: «بلا بهێتە خاچدان!»
والی گۆت: «ما ئەڤی چ خرابی كریە؟» ئینا قێڕیێن وان بلندتر لێ هاتن: «بلا بهێتە خاچدان!»
دەمێ پیلاتۆسی دیتی چ مفا نینە، لێ تێكدان دێ پەیدا بیت، ئاڤ ئینا و ل بەرامبەر جەماوەری دەستێن خۆ شویشتن و گۆت: «ئەز ژ خوینا ڤی مرۆڤی یێ بێگونەهم، ئەو ل ستۆیێ هەوەیە!»
خەلكێ هەمیێ بەرسڤ دا: «بلا خوینا وی ل سەر ستۆیێ مە و زاڕۆكێن مە بیت!»
وی دەمی باراباس بۆ وان ئازاد كر، لێ عیسا قامچی دا، پاشی رادەستی وان كر داكو بهێتە خاچدان.
هنگی سەربازێن والی عیسا برە د كۆچكا والی ڤە و هەمی بەتالیون ل وی كۆم كر.
ئەو رویس كر و كوركەكێ سۆر كرە بەر
و تانجەك ژ ستریان ڤەهاند و دانا سەر سەرێ وی، لەڤەنەك ژی كرە د دەستێ وی یێ راستێ دا و ل بەر سینگێ وی چۆكڤەدان و تڕانە پێ كرن و گۆت: «بژی پاشایێ جوهیان!»
و وان تف كرێ و لەڤەن ژێ ستاند و ل سەرێ وی ددا.
پشتی تڕانە پێ كرین، كورك ژ بەر كر و جلكێن وی كرنە بەر و بۆ خاچدانێ بر.
دەمێ ئەو دەردكەفتن، وان زەڵامەكێ قەیرەوانی دیت، ناڤێ وی شەمعون بوو، وان ئەو نەچار كر كو خاچا عیسای هەلگریت.
دەمێ ئەو گەهشتینە وی جهێ دبێژنێ گۆلگۆتە (كو رامانا وی كلۆخە)
شەرابەكا تێكهەل ل گەل زەرداڤێ دانە عیسای، دا ڤەخۆت، لێ دەمێ تام كریێ رازی نەبوو ڤەخۆت.
پشتی ئەو خاچ دای، پشك هاڤێتە جلكێن وی و ل خۆ لێكڤەكرن
و ل وێرێ روینشتن و زێرەڤانی ل وی دكر.
تاوانا وی ل هنداڤ سەرێ وی هەلاویست، كو هاتبوو نڤیسین: «ئەڤە عیسایە، پاشایێ جوهیان.»
هنگی ل گەل وی دوو قاچاخ ل خاچێ دان، ئێك ل لایێ وی یێ راستێ و یێ دی ل لایێ وی یێ چەپێ.
یێن كو د وێرێ را دهاتن و دچوون ئەو كرێت دكر و سەرێ خۆ لێ دهەژاند
و دگۆت: «هەی ئەوێ دا پەرستگەهێ د سێ رۆژان دا هەڕفینیت و ئاڤا كەتەڤە، خۆ قورتال بكە! ئەگەر تۆ كوڕێ خودێی ژ خاچێ وەرە خوار!»
هەروەسا سەرۆكێن كاهنان ل گەل مامۆستایێن دەستووری و ریهسپیان ژی تڕانە پێ دكرن و دگۆتن:
«هندەكێن دی قورتال كرن، لێ نەشێت خۆ قورتال بكەت! پاشایێ ئیسرائیلێیە ژی! بلا نوكە ژ خاچێ بهێتە خوارێ، دێ باوەریێ پێ ئینین.
خۆ ب هیڤیا خودێ ڤە هێلا، ئەگەر خودێ ئەو بڤێت، بلا نوكە وی قورتال بكەت، چنكو وی گۆتبوو: ‹ئەز كوڕێ خودێمە!›»
و ئەو قاچاخێن ل گەل وی هاتینە خاچدان ژی وەسا ئەو فهێت دكر.
ژ دەمژمێر دوازدەی نیڤرۆ تا دەمژمێر سێ، تاریاتیێ هەمی ئەرد گرت.
ل دۆرێن دەمژمێر سێ، عیسای ب دەنگەكێ بلند كرە هەوار: «ئێلی، ئێلی، لەما ساباختانی؟» ئانكو: «خودایێ من، خودایێ من، بۆچی تە ئەز هێلام؟»
هندەك ژ ئامادەبوویان گو‍‌ھ ل وی بوو و گۆتن: «ئەو یێ گازی ئلیاسی دكەت!»
دەملدەست ئێك ژ وان كرە غار و ئیسفەنجەك د سهكێ هەلاند و دانا سەر لەڤەنەكی و گەهاندە وی، دا ڤەخۆت.
لێ ئەوێن دی گۆت: «بهێلە دا ببینین كا دێ ئلیاس هێت وی قورتال كەت؟»
عیسای جارەكا دی ب دەنگەكێ بلند كرە هەوار و گیانێ خۆ ژ دەست دا.
ئها وێ گاڤێ پەردەیا پەرستگەهێ ژ سەری تا بنی شەق بوو و بوو دوو پارچە و ئەرد هەژیا و كەڤر كەلشین
و گۆڕ ڤەبوون و گەلەك كەسێن پیرۆز یێن مری، رابوون.
ئەو ژ گۆڕان دەركەفتن و پشتی رابوونا عیسای، چوونە د باژێڕێ پیرۆز ڤە و بۆ گەلەكان دیار بوون.
دەمێ سەرلەشكەری و ئەوێن د گەل دا زێرەڤانیا عیسای دكر، ئەو بیڤەلەرز و هەمی تشتێن رویدای دیتین، ترسەكا مەزن گرتن و گۆتن: «ب راستی، ئەڤە كوڕێ خودێ بوو.»
گەلەك ژنك ل وێرێ بوون، ژ دویر ڤە بەرێ خۆ ددایێ، ئەو ژ جەلیلێ ب دویڤ عیسای كەفتبوون و خزمەتا وی دكر.
د ناڤ وان دا مەریەما مەجدەلی و مەریەما دایكا یەعقوب و یوسڤی و دایكا كوڕێن زەبەدی بوون.
دەمێ بوویە ئێڤار، زەڵامەكێ دەولەمەند ژ باژێڕێ رامە هات، ناڤێ وی یوسڤ بوو، ئەو ژی شاگردێ عیسای بوو.
ئەو چوو نك پیلاتۆسی و داخوازا تەرمێ عیسای ژێ كر. ئینا پیلاتۆسی فەرمان دا، كو تەرمی بدەنێ.
یوسڤی تەرم بر و ب كتانەكێ پاقژ كفن كر
و دانا د گۆڕێ خۆ یێ نوی، یێ د كەڤری كۆلای دا. پاشی بەرەكێ مەزن گڕێل كرە بەر دەرێ گۆڕی و چوو.
مەریەما مەجدەلی و مەریەما دی ل وێرێ بوون، بەرامبەری گۆڕی د روینشتی بوون.
رۆژا پاشتر، كو پشتی رۆژا ئامادەكرنێ ژی بوو، سەرۆكێن كاهنان و فەریسی پێكڤە چوونە نك پیلاتۆسی
و گۆتن: «ئەزبەنی، بیرا مە هات، وی خاپینۆكی ب ساخیا خۆ گۆتبوو: ‹ئەز دێ پشتی سێ رۆژان رابم.›
ئەڤجا فەرمانێ بدە، داكو هەتا رۆژا سێیێ گۆڕ بهێتە پاراستن، نەوەكو شاگردێن وی بهێن و بدزن و بێژنە مللەتی: ‹ئەو یێ ژ ناڤ مریان رابووی.› هنگی خاپاندنا دویماهیێ دێ ژ یا ئێكێ خرابتر بیت.»
پیلاتۆسی بەرسڤا وان دا: «ئەڤە زێرەڤان یێ ل بن فەرمانا هەوە. هەڕن و وەكو هوین دزانن وەسا گۆڕی بپارێزن.»
ئەڤجا ل گەل كۆما سەربازان چوون و بەر موهر كر و زێرەڤان دانانە بەر گۆڕی.
پشتی شەمبیێ، ل گەل ئەلندا رۆژا ئێكێ ژ حەفتیێ ، مەریەما مەجدەلی و مەریەما دی چوون، دا بەرێ خۆ بدەنە گۆڕی.
ژ نشكەكێ ڤە بیڤەلەرزەكا ب هێز چێبوو، چنكو فریشتەیەكێ خودانی ژ ئەسمانی هاتە خوارێ و چوو سەر گۆڕی و بەر گڕێل كر و ل سەر روینشت.
دیمەنێ فریشتەی وەكو برویسیێ بوو و جلكێن وی وەكو بەفرێ د سپی بوون.
ژ سەهما وی، زێرەڤان لەرزین و وەكو مریان لێ هاتن.
فریشتەی گۆتە ژنكان: «نەترسن! ئەز دزانم هوین یێ ل عیسایێ خاچدای دگەڕیێن.
ئەو نە ل ڤێرێیە، چنكو هەروەكو وی گۆتی، یێ رابووی. وەرن و بەرێ خۆ بدەنە وی جهێ لێ هاتبوو درێژ كرن.
پاشی ب لەز هەڕن و بێژنە شاگردێن وی: ‹ئەو یێ ژ ناڤ مریان رابووی و بەری هەوە یێ دچیتە جەلیل، ل وێرێ دێ وی بینن.› ئەڤە من گۆتە هەوە.»
ئینا ئەو ب لەز ژ دەڤ گۆڕی چوون و ب ترس و كەیفەكا مەزن دكرە غار، دا مزگینیێ بدەنە شاگردێن وی.
وەسا چێبوو عیسا ب خۆ هاتە بەراهیا وان و گۆتێ: «سڵاڤ ل هەوە بن!» ئینا ئەو بەرەڤ عیسای ڤە چوون و پێیێن وی گرتن و سوجدە بۆ بر.
عیسای گۆتە وان: «نەترسن، هەڕن و بێژنە برایێن من، بلا بچنە جەلیل، ل وێرێ دێ من بینن!»
دەمێ ئەو ژنك دچوون، وەسا چێبوو هندەك ژ زێرەڤانان هاتنە باژێڕی و هەمی تشتێ رویدای بۆ سەرۆكێن كاهنان ڤەگێڕا.
ئینا سەرۆكێن كاهنان ل گەل ریهسپیان كۆمبوون و ل سەر پیلانەكێ رێككەفتن و گەلەك پارە دانە سەربازان
و گۆتنە وان: «بێژن: ‹شاگردێن وی ب شەڤ هاتن و دەمێ ئەم د نڤستی، تەرمێ وی دزین.›
ئەگەر ئەڤە گەهشتە گوهێ والی، ئەم دێ وی رازی كەین و دێ هەوە ژی ژ وێ گرفتاریێ پارێزین.»
ئینا سەربازان پارە وەرگرتن و كا چەوا بۆ وان هاتیە گۆتن، ب ج‍‌ھ ئینا. ئەڤ گۆتنە هەتا نوكە ژی د ناڤ جوهیان دا یا بەڵاڤە.
هەر یازدە شاگرد چوونە جەلیلێ، بۆ وی چیایێ عیسای بۆ وان دەستنیشانكری.
دەمێ وان دیتی، سوجدە بۆ بر، لێ هندەك ب گۆمان كەفتن.
عیسا بەرەڤ شاگردان چوو و گۆت: «هەمی دەستهەلاتا ل ئەردی و ل ئەسمانی بۆ من یا هاتیە دان.
ئەڤجا هەڕن و هەمی مللەتان بكەنە شاگرد، كو وان ب ناڤێ باب و كوڕ و گیانێ پیرۆز تافیر بكەن
و وان فێر بكەن كو پێگیریێ ب هەمی فەرمانێن من داینە هەوە بكەن. ئەڤە ئەز هەمی رۆژان هەتا دویماهیا سەردەمی، ل گەل هەوەمە.»
ئەڤەیە دەستپێكا مزگینیا عیسایێ مەسیحێ كوڕێ خودێ.
هەروەكو د پەیاما ئیشایا پێغەمبەری دا هاتیە نڤیسین: «ئەڤە ئەز دێ هنارتیێ خۆ ل پێشیا تە هنێرم، ئەوێ دێ رێكا تە ئامادە كەت»
«دەنگەك ل چۆلی گازی دكەت: ‹رێكێ بۆ خودانی ئامادە بكەن، پەیادەڕێیان بۆ هاتنا وی راست بكەن›»،
وەسا یوحەننایێ تافیركەر ل چۆلی دیار بوو. ئەوی رادگەهاند كو خەلك ل خۆ بزڤڕن و بهێنە تافیركرن ، داكو ل گونەهێن وان بهێتە بورین.
هەمی خەلكێ دەڤەرا یەهودیایێ و هەمی خەلكێ ئورشەلیمێ دەردكەفتن و بەرەڤ وی دچوون و دانپێدان ب گونەهێن خۆ دكر و ل سەر دەستێ وی د رویبارێ ئوردن دا دهاتنە تافیركرن.
یوحەننای جلكەكێ ژ پویرتێ حێشتران ل بەر بوو و ناڤتەنگا خۆ ب قایشەكا كەڤلی گرێ ددا، كولی و هنگڤینێ چۆلی دخوارن.
وی گازی دكر و دگۆت: «پشتی من دێ ئێكێ ژ من ب هێزتر هێت، ئەوێ ئەز هەژی هندێ نینم بچەمیێم و بەندكێ پێلاڤا وی ڤەكەم.
من هوین ب ئاڤێ تافیر كرن، لێ ئەو دێ هەوە ب گیانێ پیرۆز تافیر كەت.»
د وان رۆژان دا عیسا ژ ناسیرەیێ ل دەڤەرا جەلیل هات و ل سەر دەستێ یوحەننای د رویبارێ ئوردن دا هاتە تافیركرن.
چەوا عیسا ژ ئاڤێ دەركەفت، دیت ئەسمان شەق بوو و گیانێ پیرۆز وەكو كووترەكێ هاتە خوار و ل سەر وی دادا
و دەنگەك ژ ئەسمانان هات و گۆت: «تۆ كوڕێ منی یێ خۆشتڤی، دلێ من ب تە یێ خۆش بووی.»
ئێكسەر گیانێ پیرۆز عیسا دەرئێخستە چۆلی.
چل رۆژان ل وێرێ ما و ژ لایێ ئبلیسی ڤە دهاتە تاقیكرن. د ناڤ دڕندان دا بوو و فریشتەیان خزمەتا وی دكر.
پشتی یوحەننا هاتیە زیندانكرن، عیسا هاتە جەلیل و مزگینیا خودێ رادگەهاند
و دگۆت: «دەم یێ ب دویماهی هاتی، پاشایەتیا خودێ یا نێزیك بووی. ل خۆ بزڤڕن و باوەریێ ب مزگینیێ بینن.»
دەمێ ئەو ل بەر كنارێ دەریاكا جەلیل بڕێڤە دچوو، وی شەمعون و برایێ وی ئەندراوس دیتن، یێ تۆڕێ دهاڤێژنە د دەریاكێ دا، چنكو ئەو ماسیگر بوون.
عیسای گۆتە وان: «ب دویڤ من بكەڤن، دێ هەوە كەمە نێچیرڤانێن مرۆڤان.»
ئینا د گاڤێ دا تۆڕێن خۆ هێلان و ب دویڤ وی كەفتن.
پیچەكێ وێڤەتر چوو، یەعقوبێ كوڕێ زەبەدی و یوحەننایێ برایێ وی دیتن، ئەو د بەلەمێ دا بوون تۆڕ دروست دكرن.
د ج‍‌ھ دا گازی وان كر، وان ژی بابێ خۆ زەبەدی ل گەل پالەیێن وی د بەلەمێ دا هێلان و ب دویڤ وی كەفتن.
چوونە كەفەرناحوم، رۆژا شەمبیێ عیسا چوو د كنیشتەیێ ڤە و دەست ب فێركرنێ كر.
ئەو خەلكێ ل وێرێ ژ فێركرنا وی حێبەتی بوون، چنكو وی وەكو مرۆڤەكێ خودان دەستهەلات ئەو فێر دكرن، نە وەكو مامۆستایێن دەستووری.
د وی دەمی دا زەڵامەك ل كنیشتەیا وان هەبوو گیانەكێ پیس هنگافتبوو ، كرە قێڕی
و گۆت: «تە چ ژ مە دڤێت، عیسایێ ناسیرەیی؟ تۆ هاتی مە ژ ناڤ ببەی؟ ئەز دزانم تۆ كی، تۆ پیرۆزێ خودێی!»
عیسای ئەو پاشڤە بر و گۆتێ: «بێدەنگ بە و ژێ دەركەڤە!»
گیانێ پیس زەڵام ئێخست و قێڕیەكا ب هێز راهێلا و ژێ دەركەفت.
خەلك هەمی گوهشین و پرسیار ژ ئێكودوو كرن: «ئەڤە چیە؟ فێركرنەكا نویە یا ب دەستهەلاتداری ڤە دهێتە گۆتن! فەرمانێ ل گیانێن پیس ژی دكەت و ئەو ب فەرمانا وی دكەن!»
ناڤودەنگێ عیسای د گاڤێ دا ل هەمی دەوروبەرێن جەلیل بەڵاڤ بوو.
دەمێ ئەو ژ كنیشتەیێ دەركەفتین، ل گەل یەعقوبی و یوحەننای هاتنە مالا شەمعون و ئەندراوسی.
خەسیا شەمعونی د ناڤ نڤینان دا یا تاوی بوو، وان ئێكسەر بەحسێ رەوشا وێ بۆ عیسای كر.
بەرەڤ وێ چوو و دەستێ وێ گرت و راكر و تایێ بەردا و وێ دەست ب خزمەتا وان كر.
ب شەڤ، پشتی رۆژ چوویە ئاڤا، هەمی مرۆڤێن نەساخ و ئەوێن ئەجنەیان هنگافتین ئینانە نك عیسای.
خەلكێ باژێڕی هەمی ل بەر دەرگەهی خڕڤەبوون.
گەلەك نەساخ ژ گەلەك جۆرێن نەساخیان چارەسەر كرن، گەلەك ئەجنە ژی دەرئێخستن و وی نەدهێلا ئەجنە بئاخڤن، چنكو وان دزانی ئەو كیە.
سپێدەیا رۆژا پاشتر بەری ئەلندێ، عیسا رابوو و دەركەفت و قەستا جهەكێ ڤەدەر كر و ل وێرێ نڤێژ دكر.
شەمعون و ئەوێن د گەل دا چوون و لێ گەڕیان،
دەمێ وان ئەو دیتی گۆتنێ: «هەمی یێ داخوازا تە دكەن!»
ئینا عیسای گۆتە وان: «وەرن دا بچینە گوندێن دەوروبەر، دا مزگینیێ ل وێرێ ژی رابگەهینم. چنكو ئەز یێ ژ بەر هندێ هاتیم.»
ل هەمی دەڤەرا جەلیل دگەڕیا، مزگینی ل كنیشتەیێن وان رادگەهاند و ئەجنە دەردئێخستن.
زەڵامەكێ گوڕی هاتە نك وی، هیڤی ژێ كرن و بەرامبەری وی چۆكڤەدان و گۆتێ: «ئەگەر تە بڤێت، تۆ دشێی من پاقژ بكەی.»
دلێ عیسای پێ سۆت و دەستێ خۆ كرێ و گۆتێ: «من دڤێت، پاقژ ببە.»
د گاڤێ دا گوڕیاتی لێ نەما و پاقژ بوو.
عیسای د گاڤێ دا ئەو ب رێ ئێخست، پشتی ب توندی هۆشداریا وی كری
و گۆتێ: «هشیار بە، چ تشتان بۆ چ كەسان نەبێژی! لێ هەڕە و خۆ نیشا كاهنی بدە و ئەوا مووسای فەرمان پێ دای ژ پێش پاقژبوونا خۆ ڤە پێشكێش بكە، وەك شاهدەیی بۆ وان.»
لێ ئەو دەركەفت و دەست پێ كر ب ئاشكرایی دگۆت و سەرهاتیا خۆ بەڵاڤ دكر، تا ئێدی عیسا نەدشیا ب ئاشكرایی بچیتە چ باژێڕان، لێ ئەو دما ژ دەرڤە ل جهێن ڤەدەر. خەلك ژی ژ هەمی جهان هەر دهاتنە نك وی.
پشتی چەند رۆژان، عیسا ڤەگەڕیا ڤە باژێڕێ كەفەرناحوم، خەلكی گو‍‌ھ لێ بوو كو ئەو یێ ل مال.
ئینا گەلەك ژ وان لێ كۆم بوون تا ل بەر دەری ژی جهی نەدكر، ئەوی ژی پەیاما خودێ بۆ وان رادگەهاند.
هندەك هاتن و فاڵنجیەك د گەل دا بوو و چوار زەڵامان هەلگرتبوو،
لێ ژ بەر بۆشاتیێ، نەدشیان نێزیكی وی ببن و چوونە وی جهێ عیسا تێدا و بان كون كر و مرۆڤێ فاڵنجی ب نڤین ڤە داهێلا خوارێ.
دەمێ عیسای باوەریا وان دیتی، گۆتە یێ فاڵنجی: «كوڕێ من، ل گونەهێن تە هاتە بورین!»
هندەك مامۆستایێن دەستووری د ناڤ وان دا د روینشتی بوون و د دلێ خۆ دا دگۆتن:
«چەوا ئەڤ زەڵامە ئاخفتنەكا هۆسا دبێژیت؟ ئەو یێ كوفریان دكەت! ما كی ژ خودێ پێڤەتر دشێت ل گونەهان ببوریت؟»
د ج‍‌ھ دا عیسای ب گیانێ خۆ زانی ئەو چ هزر دكەن، ئەڤجا گۆتە وان: «بۆچی هوین هۆسا د دلێ خۆ دا هزران دكەن؟
كیژ ژ ڤان ب ساناهیترە، كو مرۆڤ بۆ ڤی فاڵنجی بێژیت: ‹ل گونەهێن تە هاتە بورین› یان بێژیت: ‹رابە نڤینێن خۆ هەلگرە و بڕێڤە هەڕە›؟
لێ ئەز دێ بۆ هەوە سەلمینم كو كوڕێ مرۆڤ ل سەر ئەردی دەستهەلاتا هەی ل گونەهان ببوریت،» ئەڤجا گۆتە یێ فاڵنجی:
«دبێژمە تە: رابە و نڤینێن خۆ هەلگرە و هەڕە مالا خۆ.»
د گاڤێ دا ئەو زەڵام رابوو و نڤینێن خۆ هەلگرتن و ل پێش چاڤێن هەمیان دەركەفت. ئینا هەمی گوهشین و پەسنا خودێ دكر و دگۆتن: «مە چ جاران وەكو ڤی تشتی نەدیتیە!»
جارەكا دی عیسا دەركەفتە كنارێ دەریاكێ. هەمی خەلك هاتنە نك وی و ئەوی دەست ب فێركرنا وان كر.
دەمێ ئەو بڕێڤە دچوو، لێڤی یێ كوڕێ حەلفی دیت ل جهێ باج وەرگرتنێ یێ روینشتی بوو، عیسای گۆتێ: «ب دویڤ من بكەڤە.» ئەو رابوو و ب دویڤ وی كەفت.
دەمێ عیسا ل سەر سفرێ ل مالا لێڤی، گەلەك باجگر و گونەهكارێن دی ل گەل وی و شاگردێن وی د روینشتی بوون، چنكو ئەوێن ب دویڤ وی كەفتین گەلەك بوون.
دەمێ مامۆستایێن دەستووری یێن فەریسی، دیتی عیسا یێ ل گەل گونەهكار و باجگران خوارنێ دخۆت، گۆتنە شاگردێن وی: «بۆچی ل گەل باجگر و گونەهكاران خوارنێ دخۆت؟»
دەمێ عیسای گو‍‌ھ لێ بووی، گۆتێ: «مرۆڤێن ساخلەم پێدڤی ب نۆژداری نینە، لێ مرۆڤێن نەساخ. ئەز نەهاتیمە گازی مرۆڤێن راستدار بكەم، لێ یێن گونەهكار.»
شاگردێن یوحەننای و فەریسی ب رۆژی بوون، ئەڤجا هندەك مرۆڤ هاتنە نك عیسای و گۆتنێ: «بۆچی شاگردێن فەریسیان و شاگردێن یوحەننای رۆژیان دگرن، لێ شاگردێن تە ناگرن؟»
گۆتە وان: «ئەرێ ما داخوازكریێن داوەتێ دشێن ب رۆژی بن، هێشتا زاڤا د ناڤ وان دا؟ هندی زاڤا د ناڤ وان دا بیت، ئەو نەشێن ب رۆژی بن.
لێ رۆژ دێ هێن، زاڤا دێ ژ ناڤ وان هێتە راكرن، هنگی ل وێ رۆژێ ئەو دێ رۆژیان گرن.
كەس جلكەكێ كەڤن ب پاتەكێ ل ئاڤێ نەدای پنی ناكەت، نەكو پاتەیێ نوی تێك بچیت و ژ جلكێ كەڤن بكێشیت و كون خرابتر لێ بهێت.
كەس ژی شەرابا نوی ناكەتە مەشكێن كەڤن، ئەگەر وە كر شەراب دێ مەشكان پەقینیت و شەراب دێ هێتە رشتن و مەشك ژی دێ پویچ بن. لێ شەرابا نوی دكەنە مەشكێن نوی.»
د شەمبیێ دا، عیسا د ناڤ دەخلان را دبوری و شاگردێن وی بڕێڤە دەست ب گولیكرنێ كر.
ئینا فەریسیان گۆتە وی: «بەرێ خۆ بدێ، بۆچی ئەو وێ دكەن، ئەوا نە رەوایە د شەمبیێ دا بهێتە كرن؟»
گۆتە وان: «ما هەوە قەت ئەو نەخواندیە كا داوودی چ كر، دەمێ ئەو و یێن ل گەل وی كەفتینە هەوجەییێ و برسی بووین،
چەوا ل سەردەمێ ئەبیاتارێ سەرۆككاهن، ئەو چوو د مالا خودێ ڤە و نانێ پێشكێشیێ خوار و دا یێن ل گەل خۆ ژی، هەر چەندە ژبلی كاهنان نە رەوایە كەس ژێ بخۆت؟»
و وی گۆتە وان: «شەمبی ژ پێخەمەت مرۆڤان یا هاتیە چێكرن، نە مرۆڤ ژ پێخەمەت شەمبیێ.
ئەڤجا كوڕێ مرۆڤ خودانێ شەمبیێیە ژی.»
عیسا جارەكا دی چوو د كنیشتەیێ ڤە، مرۆڤەكێ دەست گورۆج ل وێرێ بوو.
چاڤێ وان لێ بوو كا دێ وی ل شەمبیێ ساخ كەت، دا وی تاوانبار بكەن.
گۆتە زەڵامێ دەست گورۆج: «رابە ل ناڤەندێ راوەستە!»
پاشی گۆتە وان: «ئایا ل شەمبیێ كرنا كارێ باش رەوایە، یان كارێ خراب؟ قورتالكرنا ژیانەكێ یان كوشتن؟» لێ ئەو بێدەنگ بوون.
عیسا ب تۆڕەبوون ڤە ل وان زڤڕی و ژ سەرهشكیا وان خەمگین بوو، گۆتە وی مرۆڤی: «دەستێ خۆ درێژ كە!» وی ژی دەستێ خۆ درێژ كر و دەستێ وی ساخ بووڤە.
ئینا فەریسی دەركەفتن و د گاڤێ دا ل گەل لایەنگرێن هێرودێسی ل دژی عیسای دەست ب پیلان دانانێ كرن، كا چەوا وی بكوژن.
عیسا و شاگردێن خۆ ژ وێرێ چوونە دەریاكێ و جەماوەرەكێ مەزن ژ جەلیلێ ب دویڤ كەفتن.
دەمێ خەلكی گو‍‌ھ ل وان تشتێن وی كرین بووی، گەلەك كەس ژ یەهودیایێ، ئورشەلیمێ، ئەدومیێ، رەخێ دی یێ رویبارێ ئوردن و ژ دەوروبەرێن سور و سایدایێ ژی هاتنە نك وی.
عیسای ژ بەر وێ گێلەشۆكا مەزن گۆتە شاگردێن خۆ كو بۆ وی بەلەمەكا بچویك ئامادە بكەن، داكو ژ بەر پالدانێ فشار لێ نەهێتە كرن.
چنكو وی گەلەك خەلك ساخ كربوون، لەوما هەر ئێكێ نەساخ ژی بزاڤ دكر خۆ نێزیكی عیسای بكەت، داكو دەستێ خۆ بگەهینیتێ.
ئەو كەسێن گیانێن پیس تێدا، دەمێ وان عیسا ددیت، بەرامبەری وی دكەفتنە سەر چۆكێن خۆ و دكرنە قێڕی: «تۆ كوڕێ خودێی!»
لێ وی ب توندی فەرمان ل وان دكر، كو وی ئاشكرا نەكەن.
پاشی عیسا ب سەر چیای كەفت و گازی وان كر یێن وی دڤیان. ئەو ژی چوونە نك وی.
دوازدە شاگرد دەست نیشان كرن و ناڤێ ‹هنارتی› دانا سەر وان، دا ل گەل وی بن و وان بهنێریت دا مزگینیێ رابگەهینن
و وان دەستهەلات بۆ دەرئێخستنا ئەجنەیان هەبیت.
ئەڤە ئەو دوازدەنە ئەوێن وی دەست نیشان كرین: شەمعون ئەوێ ناڤێ وی كریە پەترۆس،
یەعقوب و یوحەننایێ برایێ وی، كوڕێن زەبەدی، ناڤێ وان كرە بووانەرجس ئانكو كوڕێن برویسیێ،
ئەندراوس، فیلیپۆس، بەرتولماوس، مەتتا، توماس، یەعقوبێ كوڕێ حەلفی، تەداوس، شەمعونێ وەڵاتپەروەر
و یەهودایێ ئەسخەریوتی ئەوێ بێبەختی ل عیسای كری.
پاشی عیسا هاتە مالەكێ و جارەكا دی جەماوەرەك لێ خڕڤەبوو، تاكو ئێدی عیسا و شاگردێن وی نەشیاین خوارنێ ژی بخۆن.
دەمێ مرۆڤێن وی گو‍‌ھ لێ بووی، هاتن دا ببەن، چنكو دگۆتن: «ئەو یێ تێكچووی.»
مامۆستایێن دەستووری ئەوێن ژ ئورشەلیمێ هاتینە خوار دگۆتن: «بەعلزەبولی یێ هنگافتی» و «ئەو ب دەستهەلاتا سەرۆكێ ئەجنەیان، ئەجنەیان دەردئێخیت.»
ئەڤجا عیسای گازی وان كر و ب نموونەیان ل گەل وان ئاخفت و گۆت: «ئبلیس چەوا دشێت ئبلیسی دەربئێخیت؟
ئەگەر پاشایەتیەكێ دووبەرەكی بكەڤیتە د ناڤ دا، ئەو نەشێت خۆ رابگریت.
یان ئەگەر مالەكێ دووبەرەكی بكەڤیتە د ناڤ دا، ئەو نەشێت خۆ رابگریت.
ئەگەر ئبلیس دژی خۆ راوەستیا و دووبەرەكی كەفتە د ناڤ دا، ئەو نەشێت خۆ رابگریت، لێ ئەو دێ نەمانا وی بیت.
ب راستی ژی كەس نەشێت بچیتە د مالا زەڵامەكێ هێزدار ڤە و كەلوپەلێن وی تالان بكەت، ئەگەر ئەو ل بەراهیێ وی زەڵامێ هێزدار گرێ نەدەت و پشتی هنگی مالا وی تالان بكەت.
راستیێ دبێژمە هەوە: هەر گونەهەك و هەر گۆتنەكا خراب یا چەوا بیت، خودێ دێ ل مرۆڤان بوریت،
لێ ئەوێ كوفریان د دەرهەقا گیانێ پیرۆز دا بكەت، چ جاران ل وی ناهێتە بورین، گونەها وی دێ هەروهەر مینیت.»
ب ڤێ ئاخفتنێ بەرسڤا وان دا ئەوێن دگۆتن: «گیانەكێ پیس یێ هنگافتی.»
د وی دەمی دا، دایك و برایێن وی هاتن و ژ دەرڤە راوەستیان و هنارتنە د دویڤ را.
جەماوەرەك ل دۆرێن وی یێ روینشتی بوو، گۆتنە وی: «ئەڤە دایكا تە و برایێن تە ژ دەرڤە د راوەستیاینە، داخوازا تە دكەن.»
بەرسڤا وان دا و گۆت: «دایكا من و برایێن من كینە؟»
بەرێ خۆ دا ئەوێن ل دەوروبەرێن وی دروینشتی و گۆت: «ئها ئەڤەنە دایك و برایێن من!
چنكو هەر كەسێ ب حەزا خودێ بكەت، ئەوە خویشك و برا و دایكا من.»
عیسای جارەكا دی ل سەر لێڤا دەریاكێ دەست ب فێركرنێ كر. خەلكەكێ زۆر لێ خڕڤە بوو، ژ بەر هندێ ئەو ل بەلەمەكا د دەریایێ دا سیار بوو و روینشت و هەمی خەلك ژی ل سەر لێڤا دەریاكێ ل ئەردی بوون.
وی ب نموونەیان ئەو فێری گەلەك تشتان دكرن. د فێركرنا خۆ دا گۆتە وان:
«هشیار بن و گوهێ خۆ بدەنێ! تۆڤچین دەركەفت دا تۆڤی بهاڤێژیت.
دەمێ وی تۆڤ دهاڤێت، هندەك ژێ كەفتە سەر رێكێ، ئینا باڵندە هاتن و خوار.
هندەك ژی كەفتە سەر ئەردەكێ كەڤرین یێ كێم ئاخ و زوی شین بوو، چنكو ئاخا وی نە یا كویر بوو.
دەمێ رۆژ هەلاتی، سۆت و چنكو یێ بێ رە‍‌ھ بوو، هشك بوو.
هندەك ژی كەفتە ناڤ ستریان، ستریان وەرار كر و ئەو فەتساند و چ بەرهەم نەدا.
هندەك ژی كەفتە ئەردەكێ باش و بەرهەم دا. ئەو شین بوو و وەرار كر و بەرهەم دا، هندەكان سی‍‌ھ جاركی و هندەكان شێست جاركی و هندەكان ژی سەد جاركی.»
پاشی عیسای گۆت: «ئەوێ گو‍‌ھ بۆ بهیستنێ هەبن، بلا ببهیسیت.»
دەمێ عیسا مایە ب تنێ، ئەوێن ل دەوروبەرێن وی و هەر دوازدان پرسیارا رامانا نموونەیێ ژێ كر،
وی گۆتە وان: «نهێنیا پاشایەتیا خودێ بۆ هەوە یا هاتیە دان، لێ بۆ ئەوێن ژ دەرڤە، هەمی تشت ب نموونەیان دهێتە گۆتن
دا ‹چاڤ ڤەكری لێ بنێڕن و نەبینن، گو‍‌ھ ڤەكری ببهیسن و تێنەگەهن، نەكو بزڤڕنەڤە، ئەڤجا ل گونەهێن وان بهێتە بورین.›»
پاشی گۆتە وان: «ما هوین د ڤێ نموونەیێ نەگەهشتن؟ پا چەوا دێ د هەمی نموونەیێن دی گەهن؟
تۆڤچین پەیڤێ دچینیت.
ئەوێن ل سەر رێكێ، ل وی جهێ پەیڤ دهێتە چاندن، ئەڤەنە: دەمێ گو‍‌ھ لێ دبن، ئێكسەر ئبلیس دهێت و پەیڤا د دلێ وان دا هاتیە چاندن، دڕەڤینیت.
هەروەسا ئەوێن ل سەر ئەردێ كەڤرین هاتینە چاندن، ئەو كەسن یێن دەمێ گو‍‌ھ ل پەیڤێ دبن، ئێكسەر ب دلخۆشی وەردگرن،
لێ ژ بەر كو رە‍‌ھ د وان دا نینن، ئەو د دۆمكورتن، ئەڤجا دەمێ تەنگاڤی یان تەپەسەری ژ بەر پەیڤێ ب سەرێ وان دهێت، ئێكسەر پەیڤێ دهێلن.
هندەكێن دی ئەون یێن د ناڤ ستریان دا هاتینە چاندن. ئەون یێن پەیڤێ دبهیسن،
لێ خەمێن ڤێ جیهانێ و خاپاندنا دەولەمەندیێ و حەزژێكرنا تشتێن دی دكەڤیتە د ناڤ وان دا و پەیڤێ دفەتسینن و پەیڤ بێ بەرهەم دبیت.
ئەوێن ل ئەردێ باش هاتینە چاندن ئەڤەنە: ئەون یێن پەیڤێ دبهیسن و وەردگرن و بەرهەمی ددەن، هندەك سی‍‌ھ جاركی، هندەك شێست جاركی و هندەك سەد جاركی.»
هەروەسا گۆتە وان: «ئەرێ كەسەك چرایەكی دئینیت، دا ل بن ئامانەكی یان ژی ل بن تەختی دانیت؟ ما نادانیتە سەر چرادانكێ؟
چ ڤەشارتی نینن، ئەگەر بۆ ئاشكرابوونێ نەبن و تشتەك نەبوویە نهێنی، ئەگەر بۆ دیاربوونێ نەبیت.
ئەگەر كەسەكی گو‍‌ھ بۆ بهیستنێ هەبن، بلا ببهیسیت.»
پاشی گۆتە وان: «بنێڕن تشتێ هوین گوهداریێ دكەن! ب وی پیڤەرێ هوین دپیڤن، دێ بۆ هەوە ژی ب وی هێتە پیڤان و دێ بۆ هەوە زێدەتر بیت،
چنكو ئەوێ هەیی دێ پتر بۆ وی هێتە دان و ئەوێ نەیی، خۆ یێ هەی ژی دێ ژێ هێتە ستاندن.»
گۆت ژی: «پاشایەتیا خودێ هۆسایە: مرۆڤەكی تۆڤ دهاڤێتە سەر ئەردی.
ب شەڤێ دنڤیت و ب رۆژێ رادبیت، تۆڤ شین دبیت و وەرارێ دكەت و ئەو نزانیت چەوا.
ئەرد ب خۆ بەرهەمی ددەت، ل پێشیێ بستیكێ ددەت، پاشی دكەتە گولی، پاشی دكەتە گولیەكا تژی گەنم.
ئەڤجا دەمێ بەرهەم دگەهیت، ئێكسەر شالۆكێ دهاڤێژیتێ، چنكو دەمێ دروینێ یێ هاتی.»
پاشی گۆت: «ئەم پاشایەتیا خودێ وەكو چ دانین؟ یان ژی ب چ نموونە دیار بكەین؟
ئەو وەكو دندكەكا خەردەلێیە، كو ژ هەمی تۆڤێن ل سەر ئەردی دهێنە چاندن بچویكترە،
لێ پشتی چاندنێ بلند دبیت و دبیتە مەزنترین شینكاتی و چەقێن هند مەزن ددەت كو باڵندەیێن ئەسمانی دشێن ل بن سیبەرا وێ ڤەحەویێن.»
ب گەلەك نموونەیێن ژ ڤی شێوەی، عیسای ل دویڤ ئاستێ ئەو دشیان تێبگەهن پەیاما خودێ بۆ وان رادگەهاند
و بێ نموونە ل گەل وان نەدئاخفت، لێ دەمێ ل گەل شاگردێن خۆ ڤەدەر دبوو، ئەوی هەمی تشت دیار دكرن.
دەمێ بوویە ئێڤار، گۆتە وان: «دا دەرباز ببینە رەخێ دی یێ ئاڤێ!»
و شاگردان جەماوەر ڤەڕەڤاند و عیسا ب بەلەم ڤە بر، هندەك بەلەمێن دی ژی د گەل دا بوون.
باڕۆڤەیەكا توند هات و پێلان ل بەلەمێ ددا و چ نەمابوو تژی ئاڤ ببیت.
عیسای ژی ل پاشیا بەلەمێ سەرێ خۆ ل سەر بالیفكێ دانابوو و نڤستبوو، ئینا هشیار كر و گۆتنێ: «مامۆستا، ما دلێ تە ب مە ڤە نینە كو ئەم ژ ناڤ بچین؟»
ئینا ئەو رابوو و ل بای حەیتاند و گۆتە دەریاكێ: «كڕ بە، بێدەنگ بە!» با راوەستیا و ئارامیەكا مەزن پەیدابوو.
ئەڤجا گۆتە وان: «بۆچی هوین دترسن؟ ما هێشتا هەوە باوەری نینە؟»
ترسەكا مەزن ئەو گرتن و گۆتنە ئێكودوو: «ئەڤە كیە؟ هەتا با و دەریا ژی گوهێ خۆ ددەنێ!»
پاشی گەهشتنە رەخێ دی یێ دەریاكا جەلیل، ل دەڤەرا جەراسینیان.
دەمێ ژ بەلەمێ هاتیە خوار، ئێكسەر ژ گۆڕستانێ زەڵامەك هاتە بەراهیا وی، گیانەكێ پیس تێدا بوو.
ئەو د ناڤ گۆڕستانێ دا دژیا و ئێدی كەس نەدشیا وی گرێ بدەت، خۆ ب زنجیران ژی،
چنكو ئەو گەلەك جاران ب قەید و زنجیران هاتبوو گرێدان، زنجیر دقەتاندن و قەید دشكاندن، كەسەك نەدشیا وی ئاسێ كەت.
هەردەم ب شەڤ و رۆژ ل ناڤ گۆڕان و ل چیایان دكرە گازی و لەشێ خۆ ب بەران بریندار دكر.
دەمێ وی عیسا ژ دویر ڤە دیتی، كرە غار و چوو نك و بۆ وی چۆكڤەدان
و هندی ژێ هاتی كرە هەوار: «تە چ ژ من دڤێت، عیسایێ كوڕێ خودایێ هەری بلند؟ تۆ ب ناڤێ خودێ كەیە، من ئەشكەنجە نەدە!»
چنكو عیسای گۆتبوو وی: «هەی گیانێ پیس، ژ ڤی مرۆڤی دەركەڤە!»
عیسای پرسیار ژێ كر: «ناڤێ تە چیە؟» ئینا بەرسڤ دا: «ناڤێ من ‹لەشكەر›ە، چنكو ئەم گەلەكین!»
وی گەلەك هیڤی ژ عیسای كرن كو وان نە هنێریتە ژ دەرڤەی دەڤەرێ.
ل وێرێ، ل قونتارا چیای، رەڤدەیەكا مەزن یا بەرازان دچەری.
گیانێن پیس هیڤی ژ عیسای كرن و گۆتن: «مە بهنێرە د ناڤ بەرازان دا، داكو بچینە تێدا!»
ئەڤجا دەستویریا وان دا و گیانێن پیس دەركەفتن و چوونە د بەرازان دا. ئینا رەڤدە ژ وێ قونتارا رك بەرەڤ دەریاكێ بەزی و خۆ هاڤێتە تێدا و خەندقی، ژمارەیا وان نێزیكی دوو هزاران بوو.
گاڤان ژی رەڤین و ئەو رویدان ل باژێڕی و ل گوندان راگەهاند، ئینا خەلك دەركەفتن دا ببینن كا چ رویدایە.
دەمێ هاتینە نك عیسای، دیتن ئەو زەڵامێ لەشكەرەكێ ئەجنەیان تێدا ل وێرێ یێ روینشتیە و جلكێن ل بەر و یێ ل سەر هشێن خۆ، ئینا ترسیان.
ئەوێن ئەڤ رویدانە دیتی و كا چ ب سەرێ وی مرۆڤێ ئەجنە تێدا ئاكنجی و ب سەرێ بەرازان هاتی، بۆ خەلكی بەحس كر.
ئەڤجا هیڤی ژ عیسای كرن كو ژ دەڤەرا وان بچیت.
دەمێ عیسا ل بەلەمێ سیار دبوو، ئەو زەڵامێ بەرێ گیانێن پیس تێدا، هیڤی ژێ كرن كو ل گەل وی بیت.
ئینا عیسای دەستویری نەدایێ، لێ گۆتێ: «هەڕە مالا خۆ و بێژە مرۆڤێن خۆ كا خودانی چەند بۆ تە كر و چەوا دلۆڤانی ب تە بر.»
ئینا ئەو چوو و كا عیسای چەند بۆ كربوو، ل دەڤەرا دێكاپۆلیس راگەهاند، ئەڤجا هەمی حێبەتی مان.
دەمێ عیسا دیسان ب بەلەمێ دەربازی لایێ دی یێ دەریاكێ بووی، جەماوەرەكێ مەزن ب رەخ دەریاكێ ڤە لێ خڕڤە بوون.
ئێك ژ سەرۆكێن كنیشتەیێ، ناڤێ وی یائیرۆس بوو، هات و چەوا ئەوی عیسا دیت خۆ هاڤێتە بەر پێیێن وی
و گەلەك هیڤی ژێ كرن و گۆت: «كچا من یا بچویك یا ل بەر مرنێ، وەرە و دەستێن خۆ دانە سەر، دا ئەو ساخ ببیت و بژیت.»
ئینا ل گەل چوو و كۆمەكا مەزن ژی ب دویڤ وی كەفت و ئاسێ كر.
ژنكەك ل وێرێ هەبوو، ئەو دوازدە ساڵ بوو خوین ژ بەر دچوو.
ئەوێ گەلەك ئازار ل سەر دەستێ گەلەك نۆژداران كێشابوون و چ مالێ هەی مەزاختبوو و چ مفا نەدیتبوو، لێ رەوشا وێ ئالۆزتر لێ هاتبوو.
ئەوێ گو‍‌ھ ل دەنگوباسێن عیسای ببوو، ئەڤجا د ناڤ كۆمێ را هات و ژ پشتێ ڤە دەستێ خۆ كرە كراسێ وی.
چنكو وێ د دلێ خۆ دا دگۆت: «خۆ ئەگەر ئەز دەستێ خۆ بكەمە جلكێن وی ژی دێ ساخ بم.»
د گاڤێ دا خوین ژ بەر چوونا وێ راوەستیا، د لەشێ خۆ دا هەست پێ كر كو یا ژ دەردێ خۆ ساخ بووی.
ئێكسەر عیسا پێ حەسیا كو هێزەك ژێ دەركەفت، ل كۆمێ زڤڕی و گۆت: «كێ دەستێ خۆ كرە جلكێن من؟»
ئینا شاگردێن وی گۆتنێ: «تۆ یێ دبینی خەلكێ تە پالددەت و تۆ یێ پرسیار دكەی: ‹كێ دەستێ خۆ كرە من؟›»
لێ عیسا ل دەوروبەرێن خۆ دزڤڕی داكو یا وە كری ببینیت.
لێ ژنك ب ترس و لەرز هات، ژ بەر كو دزانی چ كارێ ب سەری هاتی، ئینا خۆ هاڤێتە بەر پێیێن وی و راستی هەمی بۆ گۆت.
ئینا گۆتە وێ: «كچا من، باوەریا تە تۆ ساخ كری. ب ئاشتی هەڕە و ژ دەردێ خۆ ساخ ببە.»
هێشتا عیسا دئاخفت، هندەك ژ مالا سەرۆكێ كنیشتەیێ هاتن و گۆتن: «كچا تە مر، ئەڤجا بۆچی دێ پتر زەحمەتێ بۆ مامۆستای چێكەی؟»
لێ عیسای گو‍‌ھ نەدا ئاخفتنا وان و گۆتە سەرۆكێ كنیشتەیێ: «نەترسە، ب تنێ باوەریێ بینە.»
ئەوی نەهێلا كەسەك ژبلی پەترۆسی و یەعقوبی و یوحەننای برایێ یەعقوبی د گەل دا بچیت.
دەمێ گەهشتینە مالا سەرۆكێ كنیشتەیێ، گێلەشۆكەك دیت، گەلەك یێ دگریێن و دلوورینن.
چوو د ژۆرڤە و گۆتە وان: «بۆچی هوین دكەنە قێڕی و دگریێن؟ زاڕۆك نەمریە، لێ یا نڤستیە!»
ئینا ئەو پێ كەنین. لێ ئەوی هەمی دەرئێخستن و دایك و بابێن كچكێ و ئەوێن د گەل وی دا، برنە جهێ كچك تێڤە.
دەستێ وێ گرت و گۆتێ: «تالیتا قومی» كو وەرگێڕانا وێ: «كچكێ، دبێژمە تە رابە.»
د گاڤێ دا كچك رابوو و بڕێڤە چوو. كچك یا دوازدە ساڵی بوو. ئەڤجا گەلەك گوهشین.
ئەوی ئەو گەلەك راسپاردن كو بلا كەس ب ڤێ چەندێ نەزانیت و گۆتێ: «خوارنێ بدەنێ دا بخۆت.»
عیسای ئەو ج‍‌ھ هێلا و هاتە باژێڕكێ خۆ، شاگردێن وی ژی كەفتنە دویڤ.
دەمێ بوویە شەمبی، د ناڤ كنیشتەیێ دا دەست ب فێركرنێ كر. گەلەك كەس ل وێرێ بوون، دەمێ وان ئەو بهیستی، گوهشین و گۆتن: «ئەوی ئەڤ هەمی تشتە ژ كیڤە ئیناینە؟ و ئەڤە چ ئاقلمەندییە بۆ هاتیە دان؟ و ئەڤە چ حنێرن ل سەر دەستێن وی چێ دبن؟
ئەرێ ئەڤە نە ئەو دارتاشێ كوڕێ مەریەمێیە، برایێ یەعقوب و یوسی و یەهودا و شەمعونیە؟ ئەرێ ما خویشكێن وی نە ل ڤێرێنە د ناڤ مە دانە؟» هۆسا ئەو ژ وی دلگران بوون.
ئینا عیسای گۆتە وان: «چ پێغەمبەر د بێ رێز نینن، ب تنێ د ناڤ باژێڕ و كەسوكار و مالا خۆ دا نەبیت.»
نەدشیا ل وێرێ چ حنێران بكەت، ژبلی كو دەستێ خۆ كرە چەند نەساخان و ساخ كرنەڤە.
ئەو ژ بەر بێباوەریا وان یێ گوهشی بوو. پاشی ل گوندێن دەوروبەران دگەڕیا و فێركرن دكر.
وی گازی كرە هەر دوازدە شاگردان و دەست پێ كر جۆت جۆتە هنارتن و دەستهەلات ل سەر گیانێن پیس دا وان.
ئەو راسپاردن كو چ تشتی بۆ رێكێ ژبلی دارەكی هەلنەگرن، نە نانی، نە چانتكی و نە پارەی د كەمەرێن خۆ دا،
لێ پێلاڤەك ل پێ وان بیت و دوو كراسان نەكەنە بەر خۆ.
هەروەسا گۆتە وان: «هەر گاڤا هوین چوونە د مالەكێ ڤە، تێدا بمینن هەتا هوین ژ وێرێ دچن.
ل هەر جهەكێ خەلكێ وی هەوە قەبیل نەكەن و گوهێ خۆ نەدەنە ئاخفتنێن هەوە، دەمێ وی جهی دهێلن، تۆزا بنێ پێیێن خۆ داقوتن، دا ل سەر وان ببیتە شاهدەیی.»
ئینا ب رێ كەفتن و گۆتنە خەلكی كو پێدڤیە ئەو ل خۆ بزڤڕن
و وان گەلەك ئەجنە دەرئێخستن و نەخۆش زەیت كرن و ساخ كرن.
هێرودێسێ پاشا گو‍‌ھ ل نوچەیێن عیسای بوو، چنكو ناڤێ وی بەڵاڤ ببوو. هندەك مرۆڤان دگۆت: «یوحەننایێ تافیركەر ژ ناڤ مریان یێ رابووی، ژ بەر هندێ ئەو حنێر ل سەر دەستێ وی چێدبن.»
لێ هندەكێن دی دگۆت: «ئەڤە ئلیاسە.» هەروەسا هندەكان دگۆت: «ئەڤە پێغەمبەرەكە وەكو پێغەمبەرێن بەرێ.»
دەمێ هێرودێسی گو‍‌ھ لێ بووی گۆت: «ئەڤە یوحەننایە ئەوێ من سەرێ وی دایە بڕین، ژ ناڤ مریان یێ رابووی!»
هێرودێسی یوحەننا گرتبوو و د ناڤ زیندانێ دا گرێ دابوو، ژ بەر هیرودیایێ ئەوا وی مارە كری، ئەو ژی هەڤژینا فیلیپۆسێ برایێ وی بوو.
ژ بەر كو یوحەننای دگۆتە وی: «نە یا رەوایە تۆ ژنبرا خۆ مارە بكەی.»
ئەڤجا كەربێن هیرودیایێ ژ یوحەننای ڤەدبوون و دڤیا بكوژیت، لێ نەدشیا،
چنكو هێرودێس ژ یوحەننای دترسیا و دزانی كو ئەو زەڵامەكێ راستدار و پیرۆزە، ژ بەر هندێ دپاراست. دەمێ وی گوهداریا یوحەننای دكر، تەنگاڤ دبوو، لێ ل گەل هندێ ب دلخۆشی دبهیست.
پاشی بۆ هیرودیایێ دەرفەت چێبوو دەمێ هێرودێسی ب هەلكەفتا ژدایكبوونا خۆ شیڤەكا بەركەفتی بۆ ماقویلێن خۆ و فەرماندە و ناڤدارێن دەڤەرا جەلیلێ چێكری.
دەمێ كچا هیرودیایێ ب ژۆر كەفتی و سەما كری، هێرودێس و مێڤانێن وی پێ دلخۆش بوون. ئینا پاشای گۆتە كچكێ: «تە چ دڤێت ژ من بخوازە، ئەز دێ دەمە تە.»
سویند ژی بۆ وێ خوار و گۆت: «تۆ چ بخوازی ئەز دێ دەمە تە، ئەگەر نیڤا پاشایەتیا من ژی بیت.»
ئینا كچك دەركەفت و پرسیار ژ دایكا خۆ كر: «ئەز چ بخوازم؟» بەرسڤا وێ دا: «سەرێ یوحەننایێ تافیركەر!»
د گاڤێ دا ب لەز ب ژۆر كەفت و داخواز ژ پاشای كر و گۆت: «من دڤێت تۆ ڤێ گاڤێ سەرێ یوحەننایێ تافیركەر ل سەر سێنیەكێ بدەیە من!»
پاشا گەلەك خەمگین بوو، لێ ژ بەر وان سویندێن وی خوارین و ژ بەر مێڤانان، وی نەدڤیا داخوازا وێ ڤەگەڕینیت.
ئێكسەر پاشای سەربڕەك هنارت و فەرمان دایێ، كو سەرێ یوحەننای بینیت. سەربڕ چوو و سەرێ وی د زیندانێ دا بڕی
و سەرێ وی ل سەر سێنیەكێ ئینا و دا كچكێ، كچكێ ژی دا دایكا خۆ.
دەمێ دەنگوباس گەهشتینە شاگردێن یوحەننای، هاتن و تەرمێ وی بر و دانا د گۆڕەكی دا.
هنارتی ڤەگەڕیانە نك عیسای و هەمی كریار و فێركرنێن وان كرین گۆتنێ.
گەلەك خەلك دهاتن و دچوون، لەوما وان چ دەرفەت نەبوو كو خوارنا خۆ بخۆن، ئینا عیسای گۆتە وان: «هوین ب تنێ وەرنە جهەكێ ڤاڵا و پیچەكێ بێهنا خۆ ڤەدەن.»
ئەو ب تنێ ب بەلەمێ بۆ جهەكێ ڤەدەر چوون.
لێ خەلكی دیتن یێن دچن و گەلەك ژ وان ئەو نیاسین، ئەڤجا ژ هەمی باژێڕان ب پێیان غار دان و بەری وان گەهشتنە وێرێ و لێ كۆم بوون.
دەمێ عیسا ژ بەلەمێ هاتیە خوارێ، كۆمەكا مەزن یا مرۆڤان دیت، دلێ وی ب وان سۆت، چنكو ئەو وەكو پەزێ بێ شڤان بوون. ئینا ئەو فێری گەلەك تشتان كرن.
دەمەكێ درێژ ژ رۆژێ بوری، شاگردێن وی هاتنە نك وی و گۆتێ: «ئەڤە جهەكێ ڤەدەرە و هندە دێ رۆژ ئاڤا بیت،
ئەڤجا بێژە خەلكی داكو بچنە مال و گوندێن دەوروبەران و بۆ خۆ تشتەكی بكڕن و بخۆن.»
لێ عیسای بەرسڤا وان دا: «هوین تشتەكی بدەنێ دا بخۆن.» ئەوان گۆتێ: «ئەرێ تە دڤێت ئەم بچین و ب بهایێ دوو سەد دیناران بۆ وان نانی بكڕین و بدەینێ دا بخۆن؟»
لێ عیسای گۆتە وان: «هەوە چەند نان هەنە؟ هەڕن سەحكەنێ.» دەمێ وان زانی چەندێ هەی، گۆتە وی: «پێنج نان و دوو ماسی.»
ئینا فەرمان دا وان، دا بێژنە خەلكی كو كۆم كۆم ل سەر گیایێ كەسك رویننە خوارێ.
ئینا سەد سەد و پێنجی پێنجی روینشتن.
پاشی عیسای هەر پێنج نان و هەردوو ماسی وەرگرتن، بەرێ خۆ دا ئەسمانی و سوپاسیا خودێ كر و نان كەر كر و داڤ شاگردێن خۆ، داكو بدەنە خەلكی و هەردوو ماسی ژی ل سەر هەمیان لێكڤە كرن.
هەمیان خوار و تێر بوون،
پاشی دوازدە سەڵكێن تژی پرتێن نانی و ماسیان راكرن.
ژمارەیا ئەوێن ژ وی نانی خواری پێنج هزار زەڵام بوون.
هەر د وێ گاڤێ دا عیسای فەرمان ل شاگردێن خۆ كر كو ل بەلەمێ سیار بن و بەری وی بچنە بێت‌سایدا ل لایێ دی یێ دەریاكێ، هەتا ئەو جەماوەری ڤەدڕەڤینیت.
پشتی خاترخواستنێ، چوو چیای دا نڤێژێ بكەت.
دەمێ بوویە شەڤ بەلەم ل نیڤا دەریاكێ بوو و عیسا ب تنێ ل سەر هشكاتیێ بوو.
عیسای دیت شاگردێن وی گەلەك ب هاژوتنێ دوەستیێن، چنكو بەرێ بای دژی وان بوو. بەری ئەلندێ عیسا ب پێیان ل سەر ئاڤا دەریاكێ چوو نك وان و ڤیا ژ وان دەرباز ببیت.
دەمێ وان دیتی ئەو یێ ل سەر ئاڤێ بڕێڤە دچیت، هزر كرن رەشەیەكە، ئینا كرنە هەوار،
چنكو هەمیان ئەو دیت و ترسیان. لێ د گاڤێ دا ل گەل وان ئاخفت و گۆت: «پشتڕاست بن! ئەزم، نەترسن!»
ل گەل وان ل بەلەمێ سیار بوو و با راوەستیا، ئەڤجا گەلەك گوهشین و حێبەتی بوون،
چنكو ئەو د حنێرا نانی نە گەهشتبوون، ژ بەر كو د مەژی هشك بوون.
دەمێ ئەو دەربازی لایێ دی یێ دەریاكێ بووین، ل دەڤەرا جەنیسارتێ پەیا بوون و بەلەم گرێ دا.
دەمێ ژ بەلەمێ هاتینە خوار، خەلكی ئێكسەر عیسا نیاسی.
ئەڤجا رابوون و ب لەز ل وان دەوروبەران گەڕیان و نەساخ ل سەر نڤینان هەلگرتن و دئینانە هەر جهەكێ گو‍‌ھ لێ ببا كو یێ ل وێرێ.
هەر چ گوند یان باژێڕ و دەڤەرا چووبایێ، دا نەساخان داننە گۆڕەپانان و هیڤی ژێ دكرن كو ب تنێ دەستێ خۆ بكەنە ریشالۆكەكا كراسێ وی و هەمیێن دەستێ خۆ گەهاندیێ ساخ دبوون.
فەریسی و هندەك مامۆستایێن دەستووری ژ ئورشەلیمێ هاتبوون و ل نك وی كۆم بوون.
وان دیت كو هندەك شاگردێن وی یێ خوارنێ ب دەستێن هەڕمی، ئانكو نەشویشتی، دخۆن.
(فەریسی و جوهی هەمی ب تیتالێن باب و كالان ڤە د گرێداینە، هەتا ب شێوازێ دروست دەستێن خۆ نەشوون، ناخۆن.
ئەگەر ژ بازاڕی زڤڕیبان ژی خوارن نەدخوار هەتا دەستێن خۆ نەشویشتبان. گەلەك تشتێن دی ژی ژێ وەرگرتبوون دا ب ج‍‌ھ بینن، وەكو شویشتنا پەرداغ، دوولك، ئامانێن سفری و نڤینان.)
فەریسی و مامۆستایێن دەستووری پرسیار ژێ كرن: «بۆچی شاگردێن تە ل دویڤ تیتالێن باب و كالان ناچن، لێ ب دەستێن هەڕمی خوارنێ دخۆن؟»
بەرسڤا وان دا: «ئیشایا یێ راست بوو دەمێ پەیاما خودێ دەربارەی هەوە دووڕویان راگەهاندی، هەروەكو هاتیە نڤیسین: ‹ئەڤ مللەتە ب دەڤی رێزێ ل من دگریت، لێ دلێ وی گەلەك یێ ژ من دویرە.
ئەو ژ قەستا من دپەرێسن، چنكو ئەو راسپاردەیێن مرۆڤان، هەروەكو فەرمانێن من بن، نیشا خەلكی ددەن.›
هەوە فەرمانا خودێ هێلا و هوین پێگیریێ ب تیتالێن مرۆڤان دكەن.»
پاشی گۆتە وان: «هوین چەند د شارەزانە، كو فەرمانا خودێ بدەنە رەخەكی داكو تیتالێن خۆ بپارێزن!
مووسای یا گۆتی: ‹رێزێ ل دایك و بابێن خۆ بگرە› و ‹هەر كەسێ ئاخفتنێن كرێت بێژیتە دایكا خۆ یان بابێ خۆ، دڤێت بهێتە كوشتن.›
لێ هوین دبێژن: ئەگەر ئێك بێژیتە دایكا خۆ یان بابێ خۆ: ئەو مفایێ هەوە ژ من ددیت، ئەز دێ وی كەمە ‹قوربان ›، (ئانكو پێشكێشی بۆ خودێ،)
ئێدی هوین ناهێلن ئەو چ تشتی بۆ بابێ خۆ یان دایكا خۆ بكەت.
هوین هۆسا ب ڤان تیتالێن خۆ یێن بۆ نفشێن نوی دهێلن، پەیڤا خودێ ژ كار دئێخن. گەلەك تشتێن دی ژی وەكو ڤێ هوین دكەن.»
دیسان گازی خەلكی كر و گۆتێ: «هوین هەمی گوهێ خۆ بدەنە من و تێبگەهن:
تشتەك نینە ژ دەرڤە بهێتە د لەشێ مرۆڤی دا و مرۆڤی بهەڕمینیت، لێ ئەو تشتێن ژ مرۆڤی دەردكەڤن، مرۆڤی دهەڕمینن.
ئەوێ گو‍‌ھ بۆ بهیستنێ هەبن، بلا ببهیسیت!»
دەمێ ژ نك جەماوەری چووی و ڤەگەڕیایە مال، شاگردان دەربارەی وێ نموونەیێ پرسیار ژێ كر.
ئینا گۆتە وان: «ئەرێ هوین ژی تێنەگەهشتینە؟ ما هوین نزانن هەر چ تشتێ ژ دەرڤە دهێتە د ناڤ مرۆڤی دا، نەشێت مرۆڤی بهەڕمینیت؟
چنكو ناچیتە د دلێ وی دا، لێ دچیتە د زكی دا، پاشی دەردكەڤیتە ژ دەرڤە.» ب ڤێ ئاخفتنێ هەمی خوارن پاقژ هێلان.
ئینا گۆت: «ئەو تشتێ ژ مرۆڤی دەردكەڤیت، ئەوە مرۆڤی دهەڕمینیت،
چنكو ژ ناڤ دا، ژ دلێ مرۆڤان هزرێن خراب دەردكەڤن: بێنامویسی، دزی، كوشتن،
دەهمەنپیسی، زكڕەشی، خرابی، خاپاندن، بێدەلنگی، چاڤپێنەڕابوون، بوهتان ، دفنبلندی و بێمێشكی.
ئەڤ تشتێن خراب هەمی ژ ناڤ مرۆڤی دزێن و مرۆڤی دهەڕمینن.»
پاشی عیسای ئەو دەڤەر هێلا و چوو دەوروبەرێن سور. چوو مالەكێ و ئەوی دڤیا كەس پێ نەزانیت، د سەر هندێ را ئەو نەدشیا ڤەشارتی بمینیت.
لێ ژنكەكێ های ژێ هەبوو، كچا وێ گیانەكێ پیس تێدا بوو، ئینا ئێكسەر هات و خۆ هاڤێتە بەر پێیێن وی.
ئەو ژنك یونانی بوو و خەلكا فینیقیا سوریێ بوو. هیڤی ژێ كر كو ئەجنەی ژ كچا وێ دەربئێخیت.
لێ ئەوی گۆتە وێ: «بهێلە زاڕۆك ل پێشیێ تێر بن، چنكو نە دروستە نانێ زاڕۆكان ببەن و بهاڤێژنە بەر كویچكان.»
بەرسڤا وی دا و گۆت: «دروستە خودان، لێ كویچكێن ل بن مێزێ ژ بەرمایكێن زاڕۆكان دخۆن!»
ئینا گۆتە وێ: «ژ بەر ڤێ پەیڤێ هەڕە، ئەجنە ژ كچا تە دەركەفت.»
دەمێ ژنك ڤەگەڕیایە مالا خۆ، دیت كو كچا وێ یا ل سەر تەختی درێژ كریە و ئەجنە یێ ژێ دەركەفتی.
پاشی عیسای دەوروبەرێن سور هێلان، د رێكا سایدا را بوری و د ناڤ توخیبێن دەڤەرا دێكاپۆلیس را دەرباز بوو و هاتە دەریاكا جەلیل.
وان ئێكێ كەڕ و لال ئینا نك وی و هیڤی ژێ كرن كو دەستێ خۆ بدانیتە سەر،
ئینا ئەو ب تنێ برە وێڤەی كۆمبوویان و تبلێن خۆ كرنە د گوهێن زەڵامی را، پاشی تف كر و دەست كرە ئەزمانێ وی،
بەرێ خۆ دا ئەسمانی، بێهنا خۆ هەلكێشا و گۆتە وی: «ئەففاتا!» ئانكو: «ڤەببە.»
د وی دەمی دا گو‍‌ھ و گرێیا ئەزمانێ وی ڤەبوون و راست ئاخفت.
عیسای ئەو راسپاردن كو نەبێژنە كەسێ، لێ چەند وی پتر ئەو دراسپاردن، ئەوان پتر رویدان رادگەهاند.
خەلك گەلەك گوهشین و دگۆتن: «ئەوی هەمی كریار ب باشی كرینە! ئەو وە دكەت كو یێن كەڕ ببهیسن و یێن لال بئاخڤن.»
د وان رۆژان دا، دیسان گەلەك خەلك كۆم بوون و چ خوارن ل گەل وان نەبوو بخۆن. ئینا عیسای گازی كرە شاگردێن خۆ و گۆتە وان:
«دلێ من یێ ب ڤی جەماوەری ڤە، چنكو ئەڤە سێ رۆژە ئەو ل گەل من و وان چ نینە بخۆن.
ئەگەر ئەز وان برسی بهنێرمە مالێن وان، دێ ب رێكێ ڤە كەڤن و هندەك ژ وان یێ ژ دویر هاتین.»
ئینا شاگردێن وی گۆتێ: «ژ كیڤە مرۆڤ دشێت ل ڤی چۆلی ڤان ژ نانی تێر بكەت؟»
ئینا پرسیار ژ وان كر: «هەوە چەند نان هەنە؟» وان گۆت: «حەفت.»
ئینا عیسای فەرمان ل جەماوەری كر كو ل سەر ئەردی رویننە خوار. پاشی هەر حەفت نان هەلگرتن و سوپاسیا خودێ كر و كەر كرن و دانە شاگردێن خۆ، دا ئەو ل بەر جەماوەری بدانن. وان ژی ل بەر وان دانا.
هەروەسا هندەك ماسیێن بچویك ل گەل وان بوون، ئینا عیسای ژ بەر وان ژی سوپاسیا خودێ كر و فەرمان ب بەڵاڤكرنا وان ژی دا.
ئەوان خوار و تێر بوون، پاشی پرتێن بەرمایكان راكرن، كو حەفت سەڤیك بوون.
ئەوێن ل وێرێ نێزیكی چوار هزار كەسان بوون. پشتی ئەو ڤەڕەڤاندین،
د گاڤێ دا ل گەل شاگردێن خۆ ل بەلەمێ سیار بوو و چوو دەوروبەرێن دەلمانوتە.
فەریسی دەركەفتن و ل گەل وی دەست ب گەنگەشەیێ كر و نیشانەك ژ ئەسمانی ژێ خواست، داكو وی پێ تاقی بكەن.
ئینا ئاخینكەك ژ نیڤا دلێ خۆ راهێلا و گۆت: «بۆچی ئەڤ نفشە نیشانەكێ دخوازیت؟ راستیێ دبێژمە هەوە: چ نیشان بۆ ڤی نفشی ناهێنە دان.»
پاشی ئەو هێلان و جارەكا دی ل بەلەمێ سیار بوو، بۆ لێڤا دی یا دەریاكێ چوو.
شاگردان ژ بیر كربوو كو نانی ل گەل خۆ ببەن، ژ ئێك نانی پێڤەتر د بەلەمێ دا ل گەل وان نەبوو.
عیسای شیرەت ل وان كر و گۆت: «ئاگەهدار بن، ژ هەڤیرترشێ فەریسیان و هەڤیرترشێ هێرودێسی هشیار بن.»
ئینا ئەوان د ناڤبەرا خۆ دا دانوستاندن كر و گۆتن: «نان د گەل مە دا نینە، لەوما یێ ڤێ دبێژیت.»
ئینا عیسای زانی و گۆتە وان: «هوین بۆچی د ناڤبەرا خۆ دا دبێژن كو نان ل گەل هەوە نینە؟ ما هێشتا هەوە نەزانیە و هوین تێنەگەهشتینە؟ ئەرێ ما تا ڤێ گاڤێ ژی هوین د مەژی هشكن؟
ما هەوە چاڤ هەنە و هوین نابینن؟ هەوە گو‍‌ھ هەنە و هوین نابهیسن؟ ما ناهێتە بیرا هەوە،
دەمێ من پێنج نان بۆ پێنج هزاران كەر كرین، هەوە چەند سەڵكێن تژی ژ بەرمایكان راكرن؟» وان بەرسڤا وی دا: «دوازدە.»
هەروەسا وی گۆت: «و دەمێ من حەفت نان بۆ چوار هزاران كەر كرین، هەوە چەند سەڤیكێن تژی ژ بەرمایكان هەلگرتن؟» وان بەرسڤ دا: «حەفت.»
ئینا گۆتە وان: «ما هێشتا هوین تێنەگەهشتینە؟»
ئەو گەهشتنە بێت‌سایدا و هندەكان كۆرەیەك ئینانە نك و هیڤی ژێ كرن كو ئەو دەستێ خۆ بكەتێ.
ئینا ئەوی دەستێ كۆرەی گرت و برە ژ دەرڤەی گوندی، ل وێرێ تف كرە چاڤێن وی و دەستێن خۆ دانانە سەر وی و پرسیار ژێ كر: «تۆ تشتەكی دبینی؟»
ئەوی ژی بەرێ خۆ دا دۆرێن خۆ و گۆت: «ئەز مرۆڤان دبینم، دێ بێژی دارن بڕێڤە دچن.»
عیسای دیسان دەستێن خۆ دانانە سەر چاڤێن وی. ئینا یێ كۆرە بەرێ خۆ دا دەوروبەرێن خۆ و بیناهی ڤەگەڕیا چاڤێن وی و هەمی تشت ب زەڵالی دیتن.
پاشی ئەو هنارتە مالا وی و گۆتێ: «نەچە د ناڤ گوندی دا.»
پاشی عیسا و شاگردێن خۆ چوونە گوندێن قەیسەریا فیلیپۆسی و د رێكێ دا پرسیارا شاگردێن خۆ كر: «خەلك دبێژن ئەز كیمە؟»
ئینا بەرسڤا وی دان: «هندەك دبێژن تۆ یوحەننایێ تافیركەری و هندەك دبێژن تۆ ئلیاسی و هندەك دبێژن تۆ ئێك ژ پێغەمبەرانی.»
ئینا پرسیارا وان كر: «و هوین چ دبێژن، ئەز كیمە؟» پەترۆسی بەرسڤا وی دا و گۆت: «تۆ مەسیحی.»
ئینا فەرمان ل وان كر كو بەحسێ وی بۆ كەسێ نەكەن.
عیسای دەست ب فێركرنا وان كر، كو دڤێت كوڕێ مرۆڤ گەلەك ئازارێ بكێشیت و ژ لایێ ریهسپی و سەرۆكێن كاهنان و مامۆستایێن دەستووری ڤە بهێتە رەتكرن و بهێتە كوشتن و پشتی سێ رۆژان راببیتەڤە.
وی ئاخفتنا خۆ ب ئاشكرایی گۆت، ئینا پەترۆسی ئەو ڤەدەر كر و پاشڤە بر.
لێ عیسا زڤڕی و بەرێ خۆ دا شاگردێن خۆ و ل پەترۆسی حەیتاند و گۆت: «ژ بەر چاڤێن من هەڕە هەی ئبلیس! چنكو هزرێن تە نە ل سەر تشتێن خودێنە، لێ ل سەر تشتێن مرۆڤانە.»
پاشی گازی جەماوەری و شاگردێن خۆ كر و گۆتێ: «ئەگەر ئێكی بڤێت ل دویڤ من بهێت، بلا خۆ ماندەل بكەت و خاچا خۆ هەلگریت و ب دویڤ من بكەڤیت.
ژ بەر كو ئەوێ بڤێت ژیانا خۆ قورتال بكەت، دێ وێ ژ دەست دەت، لێ ئەوێ ژیانا خۆ ژ پێخەمەتی من و مزگینیێ ژ دەست بدەت، دێ وێ قورتال كەت.
ئەڤجا دێ چ مفایێ مرۆڤی بیت، ئەگەر هەمی جیهان ب دەست خۆ ڤە ئینا، لێ ژیانا خۆ ژ دەست دا؟
مرۆڤ دشێت ب پێش ژیانا خۆ ڤە چ بدەت؟
چنكو هەر كەسێ ل بەر چاڤێن ڤی نفشێ دەهمەنپیس و گونەهكار شەرم بكەت دانپێدانێ ب من و پەیڤێن من بكەت، كوڕێ مرۆڤ ژی، دەمێ ب مەزناهیا بابێ خۆ ڤە ل گەل فریشتەیێن پیرۆز دهێت، دێ شەرم كەت دانپێدانێ ب وی بكەت.»
گۆتە وان: «ب راستی دبێژمە هەوە: هندەك ژ ئەوێن ل ڤێرێ راوەستیاین، تاكو نەبینن پاشایەتیا خودێ ب هێز یا هاتی، تام ناكەنە مرنێ.»
پشتی شەش رۆژان، عیسای پەترۆس، یەعقوب و یوحەننا ل گەل خۆ برن و سەرئێخستنە چیایەكێ بلند، ل وێرێ ئەو ب تنێ بوون. دیمەنێ وی ل بەر چاڤێن وان هاتە گوهۆڕین
و جلكێن وی سپی بوون و تەیسین، كو چ كەس ل سەر ئەردی نەشێن وەسا سپی بكەن.
بۆ وان ئلیاس و مووسا دیار بوون كو یێ ل گەل عیسای دئاخڤن.
پەترۆسی گۆتە عیسای: «مامۆستا، باش بوو ئەم ل ڤێرێ! ئەڤجا دا ئەم سێ كەپران چێكەین، ئێك بۆ تە، ئێك بۆ مووسای و ئێك بۆ ئلیاسی.»
پەترۆسی نەدزانی كا چ دبێژیت، چنكو هەر سێ شاگرد د بەهتی بوون.
پاشی عەورەك هات و سیبەر ل وان كر، دەنگەك ژ عەوری هات: «ئەڤەیە كوڕێ من یێ خۆشتڤی، گوهێ خۆ بدەنێ!»
ژ نشكەكێ ڤە ل دۆر خۆ زڤڕین و ژبلی عیسای كەس ل گەل خۆ نەدیت.
دەمێ ئەو ژ چیای دهاتنە خوارێ، عیسای فەرمان ل وان كر كو ئەو تشتێ وان دیتی نەبێژنە كەسێ، تاكو كوڕێ مرۆڤ ژ ناڤ مریان رانەبیت.
وان پەیڤ د دلێ خۆ دا ژ بەر كر و پرسیار ژ ئێكودوو كر: «رابوون ژ ناڤ مریان چیە؟»
و پرسیار ژێ كر: «بۆچی مامۆستایێن دەستووری دبێژن پێدڤیە ل بەراهیێ ئلیاس بهێت؟»
وی بەرسڤا وان دا: «راستە، ئلیاس دێ ل بەراهیێ هێت و هەمی تشتان رێك ئێخیتەڤە. پا چەوا دەربارەی كوڕێ مرۆڤ هاتیە نڤیسین كو ئەو دێ گەلەك ئازارێ كێشیت و هێتە كرێت كرن؟
لێ ئەز دبێژمە هەوە: ئلیاس یێ هاتی و وان چ تشتێ ڤیای ل گەل كر، كا چەوا دەربارەی وی هاتیە نڤیسین.»
دەمێ ڤەگەڕیاینە نك شاگردێن دی، دیت گەلەك یێ ل دۆران خڕڤەبووین و هندەك مامۆستایێن دەستووری گەنگەشە ل گەل دكر.
چەوا خڕڤەبوویان ئەو دیت، گوهشین و كرنە غار و سڵاڤ لێ كر.
عیسای پرسیار ژ وان كر: «هوین گەنگەشەیێ دەربارەی چ ل گەل دكەن؟»
ئینا ئێك ژ خڕڤەبوویان بەرسڤا وی دا: «مامۆستا، من كوڕێ خۆ یێ ئینایە نك تە، گیانەكێ پیس یێ تێدا وی لال دكەت،
ل هەر جهێ وی بهنگێڤیت تەپ دهێتێ و كەف ب سەر دەڤی دكەڤیت و ددانێن خۆ دقرچینیت و رەق دبیت. من داخواز ژ شاگردێن تە كر كو وی ژێ دەربئێخن، لێ نەشیان.»
ئینا بەرسڤا وان دا و گۆت: «هەی نفشێ بێباوەر، تا كەنگی دێ د ناڤ هەوە دا مینم؟ تا كەنگی دێ بێهنا خۆ ل هەوە فرە‍‌ھ كەم؟ وی بیننە نك من.»
ئینانە نك. دەمێ ئەو دیتی، ئێكسەر گیانێ پیس زاڕۆك ڤەهەژاند و كەفتە ئەردی و خۆ گەڤزاند و كەف ب سەر دەڤی كەفت.
عیسای پرسیار ژ بابێ كوڕكی كر: «ئەڤە ژ كەنگی وەرە هۆ لێ دهێتە هە؟» گۆت: «ژ بچویكاتی وەرە.
گەلەك جاران گیانێ پیس ئەو دهاڤێتە د ناڤ ئاگری یان ئاڤێ دا، داكو بكوژیت. ئەگەر تۆ دشێی تشتەكی بكەی، دلۆڤانیێ ب مە ببە و هاریكاریا مە بكە.»
عیسای گۆتێ: «تە گۆت: ‹ئەگەر تۆ بشێی؟› هەمی تشت بۆ خودان باوەری یێ بەردەستە.»
د ج‍‌ھ دا بابێ كوڕكی گازی كر: «من باوەریا هەی، هاریكاریا بێباوەریا من بكە!»
دەمێ عیسای دیتی خەلك یێ دبەزنە نك و ل وێرێ خڕڤە دبن، ل گیانێ پیس حەیتاند و گۆتێ: «هەی گیانێ كەڕ و لال، ئەز فەرمانێ ل تە دكەم ژ كوڕكی دەركەڤە و ئێدی لێ نەزڤڕەڤە!»
گیانێ پیس كرە هەوار و زاڕۆك ب هێز ڤەهەژاند، پاشی دەركەفت و زاڕۆك وەكو مریان لێ هات، تاكو بەهرا پتر ژ خڕڤەبوویان گۆتی: «مر.»
لێ دەمێ عیسای دەستێ وی گرتی و راكریەڤە، ئەو رابووڤە.
دەمێ چوویە مال، شاگردێن وی ب تنێ پرسیار ژێ كر: «بۆچی ئەم نەشیاین گیانێ پیس دەربئێخین؟»
بەرسڤا وان دا: «ئەڤ توخمە ب چ تشتان دەرناكەڤن، ب تنێ ب نڤێژان نەبیت.»
ژ وێرێ چوون و ژ دەڤەرا جەلیل دەرباز بوون و عیسای نەدڤیا كەس پێ بزانیت،
چنكو وی شاگردێن خۆ فێر دكرن و دگۆتێ: «دێ كوڕێ مرۆڤ رادەستی مرۆڤان هێتە كرن و دێ وی كوژن و پشتی كوشتنا وی ل رۆژا سێیێ دێ رابیتەڤە.»
لێ ئەو د ڤێ ئاخفتنێ نەگەهشتن و ترسیان پرسیارێ ژێ بكەن.
گەهشتنە كەفەرناحوم و دەمێ ب ژۆر كەفتین، پرسیار ژ وان كر: «هەوە ب رێكێ ڤە گەنگەشە ل سەر چ دكر؟»
لێ ئەو بێدەنگ بوون، چنكو د رێكێ دا وان گەنگەشەیا هندێ دكر كا یێ هەری مەزن ژ وان كیە.
روینشت و گازی هەر دوازدە شاگردێن خۆ كر و گۆتێ: «ئەگەر ئێكی ڤیا خۆ بكەتە یێ پێشیێ، بلا ل دویماهیا هەمیان بیت و خزمەتكارێ هەمیان بیت.»
ئەوی زاڕۆكەك ئینا و د ناڤبەرا وان دا راوەستاند و هەمبێز كر و گۆتە وان:
هەر كەسێ زاڕۆكەكێ وەكو ڤی ب ناڤێ من قەبیل بكەت، ئەوی ئەز قەبیل كرم و یێ من قەبیل بكەت، ئەوی نە ب تنێ ئەز قەبیل كرم، لێ ئەو ژی قەبیل كر یێ ئەز هنارتیم.
ئینا یوحەننای گۆتە وی: «مامۆستا، مە كەسەك دیت ب ناڤێ تە ئەجنە دەردئێخستن، لێ مە نەهێلا وی كاری بكەت، چنكو ئەو نە ژ مە بوو.»
عیسای گۆت: «رێكێ لێ نەگرن، چنكو كەس نەشێت حنێران ب ناڤێ من بكەت و بشێت زوی ب زوی ب خرابی بەحسێ من بكەت،
چنكو ئەوێ دژی مە نەبیت، د گەل مە دایە.
هەر كەسێ پەرداغەكا ئاڤێ ب ناڤێ من بدەتە هەوە چنكو هوین یێن مەسیحن، ئەز ب راستی دبێژمە هەوە، خەلاتێ وی چ جاران بەرزە نابیت.»
«هەر كەسێ ببیتە ئەگەرێ هەلنگفتنا ئێك ژ ڤان بچویكێن باوەری ب من هەی، بۆ وی باشترە بەرئاشەك ب ستۆیێ وی ڤە بهێتە گرێدان و بهاڤێژنە د دەریایێ دا.
ئەگەر دەستێ تە ببیتە ئەگەرێ هەلنگفتنا تە، ببڕە. باشترە تۆ دەست بڕی بچیە د ژیانێ دا، ژ كو تۆ یێ ب دوو دەستان بی و بچیە د دۆزەخێ دا، د ناڤ ئاگرەكی دا، كو نەهێتە ڤەمراندن،
ل وێرێ نە ئەو كرم دمرن یێن لەشێ وان دخۆن، نە ژی ئەو ئاگر ڤەدمریت یێ لەشێ وان دسوژیت.
ئەگەر پێیێ تە ببیتە ئەگەرێ هەلنگفتنا تە، ببڕە. باشترە تۆ لەنگ بچیە د ژیانێ دا، ژ كو تۆ یێ ب دوو پێیان بی و بۆ دۆزەخێ بهێیە هاڤێتن،
ل وێرێ نە ئەو كرم دمرن یێن لەشێ وان دخۆن، نە ژی ئەو ئاگر ڤەدمریت یێ لەشێ وان دسوژیت.
ئەگەر چاڤێ تە ببیتە ئەگەرێ هەلنگفتنا تە، بینە دەر. باشترە تۆ یێ ب چاڤەكی بی و بچیە د پاشایەتیا خودێ دا، ژ كو تۆ یێ ب دوو چاڤان بی و بۆ دۆزەخێ بهێیە هاڤێتن،
ل وێرێ نە ئەو كرم دمرن یێن لەشێ وان دخۆن، نە ژی ئەو ئاگر ڤەدمریت یێ لەشێ وان دسوژیت.
چنكو هەر كەسەك ب ئاگری دهێتە خوێ كرن.
خوێ یا باشە، لێ ئەگەر خوێ سویراتیا خۆ بەردا، دێ جارەكا دی ب چ سویر كەن؟ بلا خوێ د ناڤ هەوە دا هەبیت و ل گەل ئێكودوو د ئاشتیخواز بن.»
ژ وێرێ رابوو و هاتە دەڤەرا یەهودیایێ و ئەو ئەردێ ل لایێ دی یێ رویبارێ ئوردن. ئینا جارەكا دی جەماوەر لێ خڕڤەبوو، وی وەكو هەر جار، دەست ب فێركرنا وان كر.
هندەك فەریسی هاتنە نك و پرسیار ژێ كرن، دا تاقی بكەن: «ئەرێ رەوایە زەڵام ژنا خۆ بەردەت؟»
بەرسڤا وان دا: «ما مووسای ب چ فەرمان ل هەوە كریە؟»
ئینا گۆتن: «مووسای دەستویری دا كو مێر بەلگەنامەیا بەردانێ بنڤیسیت و ژنا خۆ بەردەت.»
عیسای بەرسڤا وان دا: «ژ بەر سەرهشكیا هەوە مووسای ئەڤ فەرمانە بۆ هەوە نڤیسی.
لێ ژ دەستپێكا ئافراندنێ ‹خودێ مرۆڤ نێر و مێ یێن داین.›
‹ژ بەر ڤێ چەندێ زەڵام دێ دایك و بابێن خۆ هێلیت و ب ژنا خۆ ڤە نویسیێت
و دێ هەردوو بنە ئێك لەش›، هۆسا ئێدی ئەو نە دوونە، لێ ئێك لەشن.
ئەڤجا ئەوێن خودێ ئەو كرینە ئێك، بلا مرۆڤ ژێكڤە نەكەت.»
پاشی ل مال ژی شاگردێن وی دەربارەی ڤێ چەندێ پرسیار ژێ كرن.
ئینا گۆتە وان: «هەر كەسێ ژنا خۆ بەردەت و ئێكا دی بینیت، ئەو د دەرهەقا ژنا خۆ دا دەهمەنپیسیێ دكەت
و ئەگەر ژنێ زەڵامێ خۆ هێلا و شوی ب ئێكێ دی كر، ئەو دەهمەنپیسیێ دكەت!»
هندەكان زاڕۆك ئینانە نك دا دەستێ خۆ بدانیتە سەر وان، شاگردان ژی ل وان حەیتاند.
لێ دەمێ عیسای ئەڤ چەندە دیتی، تۆڕە بوو و گۆتە وان: «بهێلن زاڕۆك بهێنە نك من و رێ لێ نەگرن، چنكو پاشایەتیا خودێ بۆ یێن وەكو وانە.
ب راستی دبێژمە هەوە: هەر كەسێ وەكو زاڕۆكەكی پاشایەتیا خودێ قەبیل نەكەت، ئەو ناچیتە د وێ دا.»
پاشی زاڕۆك هەمبێز كرن و دەستێن خۆ دانانە سەر وان و بەرەكەتدار كرن.
پشتی ب رێ كەفتی، زەڵامەك ب لەز گەهشتێ و كەفتە سەر چۆكان و پرسیار ژێ كر: «مامۆستایێ چاك، ئەز چ بكەم دا ببمە میراتگرێ ژیانا هەروهەر؟»
عیسای گۆتێ: «بۆچی تۆ دبێژیە من چاك؟ كەسێ چاك نینە ژبلی ئێكی، ئەو ژی خودێیە.
تۆ فەرمانان دزانی: ‹كوشتنێ نەكە، دەهمەنپیسیێ نەكە، دزیێ نەكە و شاهدەییا ب درەو نەدە›، مافێ كەسێ نەخۆ، ‹رێزێ ل دایك و بابێن خۆ بگرە.›»
ئینا زەڵامی بەرسڤا وی دا و گۆت: «مامۆستا، من هەر ژ لاوینیا خۆ ئەڤە هەمی ب ج‍‌ھ ئیناینە.»
عیسای سەحكرێ و حەز ژێ كر و گۆتێ: «تشتەك ب تنێ یێ ژ تە كێمە: هەڕە هەمی تشتێ تە هەی بفرۆشە و بدە هەژاران، دێ تە گەنجینەیەك ل ئەسمانی هەبیت. پاشی وەرە ب دویڤ من بكەڤە.»
لێ ئەو ب ڤێ گۆتنێ دلگران بوو و چوو یێ خەمبار، چنكو ئەو خودان سامانەكێ مەزن بوو.
عیسای بەرێ خۆ دا دەوروبەرێن خۆ و گۆتە شاگردێن خۆ: «چەند یا ب زەحمەتە دەولەمەند بچنە د پاشایەتیا خودێ دا!»
شاگرد ژ گۆتنا وی گوهشین، لێ عیسای جارەكا دی گۆتە وان: «لاوێن من، ب ژۆركەفتنا پاشایەتیا خودێ، چەند یا ب زەحمەتە!
چوونا حێشترێ د كونا دەرزیكێ را ب ساناهیترە ژ ب ژۆركەفتنا دەولەمەندەكی بۆ پاشایەتیا خودێ.»
هندی بێژی ئەو حێبەتی بوون و گۆتنە ئێكودوو: «ئەڤجا كی دشێت قورتال ببیت؟»
عیسای بەرێ خۆ دا وان و گۆت: «ئەڤە ل نك مرۆڤان مەحالە، لێ نە ل نك خودێ، چنكو ل نك خودێ هەمی تشت د شیان دانە.»
ئینا پەترۆسی گۆتێ: «ئەڤە مە هەمی تشت یێن هێلاین و ئەم یێ ب دویڤ تە كەفتین.»
عیسای بەرسڤ دا: «راستیێ دبێژمە هەوە: هەر كەسێ ژ پێخەمەت من و مزگینیێ خانی، یان برا، یان خویشك، یان دایك، یان باب، یان هەڤژین، یان زاڕۆك یان زەڤی هێلا بیت،
دێ سەد جاركی بەرامبەری ڤان مال، خویشك، برا، دایك، زاڕۆك و زەڤیان، ل گەل تەپەسەریان، ل ڤێ جیهانێ هەر ب دەست ڤە ئینیت و دێ د سەردەمێ داهاتی ژی دا، ژیانا هەروهەر وەرگریت.
لێ گەلەكێن پێشیێ دێ بنە یێن پاشیێ و گەلەكێن پاشیێ دێ بنە یێن پێشیێ.»
ئەو بەرەڤ ئورشەلیمێ ب سەر دكەفتن، عیسا ل پێشیا وان بوو. شاگرد د مەندەهۆش بوون و ئەوێن ب دویڤ كەفتین، د ترسیای بوون. جارەكا دی ئەو دوازدە شاگرد ڤەدەر كرن و دەربارەی ئەوا دێ ب سەرێ وی هێت ئاگەهدار كرن
و گۆت: «ئەڤە ئەم یێ بەرەڤ ئورشەلیمێ ب سەر دكەڤین، دێ كوڕێ مرۆڤ رادەستی سەرۆكێن كاهنان و مامۆستایێن دەستووری هێتە كرن و ئەو دێ حوكمێ مرنێ ل سەر دانن و دێ وی رادەستی نەجوهیان كەن.
نەجوهی ژی دێ تڕانەیان پێ كەن و تف كەنێ و قامچی دەن و كوژن. پشتی سێ رۆژان دێ رابیتەڤە.»
ل وی دەمی یەعقوب و یوحەننایێ كوڕێن زەبەدی هاتنە نك و گۆتنێ: «مامۆستا، ئەم حەز دكەین هەر تشتەكێ ژ تە بخوازین، تۆ بۆ مە بكەی.»
گۆتە وان: «هەوە چ دڤێت ئەز بۆ هەوە بكەم؟»
وان بەرسڤ دا: «دەمێ مەزناهیا تە یا ب روومەت دهێت، دەستویریێ بدە مە، ئێك ژ مە ل دەستێ راستێ یێ كورسیكا تە روینیت و یێ دی ل دەستێ چەپێ.»
عیسای گۆتە وان: «هوین نزانن كا هوین چ دخوازن. ما هوین دشێن ژ وێ پەرداغێ ڤەخۆن یا ئەز دێ ژێ ڤەخۆم، یان ب وێ تافیركرنێ بهێنە تافیركرن یا ئەز دێ پێ هێمە تافیركرن؟»
وان بەرسڤا وی دا: «ئەم دشێین.» عیسای گۆتە وان: «بەلێ، ئەو پەرداغا ئەز دێ ژێ ڤەخۆم، هوین دێ ژێ ڤەخۆن و ئەو تافیركرنا ئەز دێ پێ هێمە تافیركرن، هوین دێ پێ هێنە تافیركرن.
لێ دەستویریا روینشتنێ ل لایێ منێ راستێ یان یێ چەپێ نە د دەستێ من دایە بدەم، لێ ب تنێ بۆ وانە یێن بۆ وان هاتیە ئامادە كرن.»
دەمێ هەر دە‍‌ھ شاگردێن دی ئەڤ تشتە بهیستی، ژ یەعقوب و یوحەننای دلگران بوون.
لێ عیسای گازی وان هەمیان كر و گۆتە وان: «هوین دزانن ئەوێن ب سەرۆكێن مللەتان دهێنە نیاسین زاڵدەستیێ ل وان دكەن و مەزنێن وان ژی دەستهەلاتداریێ ل سەر دكەن،
لێ د ناڤ هەوە دا وەسا نابیت. ئەوێ حەز بكەت د ناڤ هەوە دا یێ مەزن بیت، دڤێت ببیتە خزمەتكارێ هەوە
و ئەوێ حەز بكەت د ناڤ هەوە دا یێ پێشیێ بیت، دڤێت ببیتە بەنیێ هەمیان.
چنكو خۆ كوڕێ مرۆڤ ژی نەهاتیە داكو خزمەتا وی بهێتە كرن، لێ دا ئەو خزمەتێ بكەت و خۆ ژ پێش گەلەكان ڤە گۆری بكەت.»
ئەو گەهشتنە ئەریحا. دەمێ ئەو ژ ئەریحا دەردكەفت ل گەل شاگردێن خۆ و جەماوەرەكێ مەزن، بارتیماوس كوڕێ تیماوسی، خوازۆكەكێ كۆرە بوو، ل رەخێ رێكێ یێ روینشتی بوو.
دەمێ گو‍‌ھ لێ بووی كو ئەو عیسایێ ناسیرەییە، كرە هەوار و گۆت: «عیسایێ كوڕێ داوودی، دلۆڤانیێ ب من ببە!»
گەلەكان ئەو پاشڤە بر دا بێدەنگ ببیت، لێ ئەوی گەلەك پتر كرە هەوار: «كوڕێ داوودی، دلۆڤانیێ ب من ببە!»
ئینا عیسا راوەستیا و گۆت: «گازی كەنێ.» گازی كرنە كۆرەی و گۆتنێ: «پشتڕاست بە و رابە! ئەوێ گازی تە دكەت.»
ئەوی ژی كراسێ خۆ هاڤێت و ب لەز رابوو و هاتە نك عیسای.
ئینا عیسای گۆتێ: «تە چ دڤێت ئەز بۆ تە بكەم؟» یێ كۆرە گۆت: «مامۆستا، بیناهیێ بكەم.»
ئینا عیسای گۆتێ: «هەڕە، باوەریا تە تۆ ساخ كری.» د ج‍‌ھ دا بیناهی كر و ل دویڤ عیسای كەفتە رێكێ.
دەمێ نێزیكی ئورشەلیمێ بووین و گەهشتینە گوندێن بێت‌فاجی و بێت‌عەنیا ل نك چیایێ زەیتوونان، دوو شاگردێن خۆ هنارتن
و گۆتە وان: «هەڕنە ڤی گوندێ بەرامبەری هەوە، دەمێ هوین دچنە ناڤ گوندی، ئێكسەر دێ جانەكەرەكێ گرێدای بینن كو هێشتا كەس لێ سیار نەبوویە. وی ڤەكەن و بینن.
ئەگەر ئێكی گۆتە هەوە: ‹بۆچی هوین هۆ دكەنە هە؟› بێژنێ: ‹خودانی پێدڤی یا پێ هەی و ئەو دێ ئێكسەر هنێریتە ڤێرێ ڤە.›»
ئینا هەردوو شاگرد چوون و جانەكەرەك دیت یێ ژ دەرڤە ل بەر دەرگەهی ل سەر رێكێ گرێدایە و هەفسارێ وی ڤەكر.
هندەكان ل وێرێ پرسیار ژێ كر: «بۆچی هوین هەفسارێ جانەكەری ڤەدكەن؟»
شاگردان بەرسڤا وان دا ب ئەوا عیسای گۆتیە وان، ئینا ئەو هێلان.
وان جانەكەر بۆ عیسای ئینا و جلكێن خۆ دانانە سەر و ئەو لێ سیار بوو.
گەلەك مرۆڤان جلكێن خۆ ل سەر رێكێ رائێخستن و هندەكێن دی ژ بیستانان چەقێن داران بڕین و رێك پێ رائێخست.
ئەوێن بەری وی دچوون و یێن ل پشت وی دهاتن دكرە گازی: «هۆساننا! ‹یێ بەرەكەتدارە ئەوێ ب ناڤێ خودانی دهێت!›
پاشایەتیا بابێ مە داوودی ئەوا دهێت یا بەرەكەتدارە، هۆساننا ل بلنداهیان!»
عیسا ب ژۆر كەفتە ئورشەلیمێ و چوو د حەوشا پەرستگەهێ دا. پشتی سەحكریە دەوروبەرێن خۆ، ل گەل هەر دوازدە شاگردێن خۆ دەركەفتە بێت‌عەنیا، چنكو دەم درەنگی بوو.
ل رۆژا د دویڤ دا، پشتی ژ بێت‌عەنیا دەركەفتین، برسی بوو.
دارهژیرەكا كەسك ژ دویر ڤە دیت و قەستا وێ كر، بەلكو هندەك هژیران پێڤە ببینیت. دەمێ گەهشتیە نك، چ پێڤە نەدیت ژبلی بەلگان، چنكو دەمێ هژیران هێشتا نەهاتبوو.
وی گۆتە دارێ: «ئێدی هەتا هەتایێ كەس ژ بەرهەمێ تە نەخۆت.» شاگردان ژی گو‍‌ھ ل ڤێ چەندێ بوو.
هاتنە ئورشەلیمێ، چوو د حەوشا پەرستگەهێ دا و دەست ب دەرئێخستنا وان كر یێن كڕین و فرۆتن د حەوشا پەرستگەهێ دا دكر، مێزێن پارەگوهۆڕان و تەختكێن كووترفرۆشان وەرگێڕان
و هەر كەسێ كەلوپەلەك د گەل دا با نەدهێلا د حەوشا پەرستگەهێ را دەرباز ببیت.
وی دەست ب فێركرنێ كر و گۆتە وان: «ما نەهاتیە نڤیسین: ‹مالا من ب مالا نڤێژێ بۆ هەمی مللەتان دێ هێتە نیاسین› ؟ لێ هەوە یا كریە ‹كونجا رێگران›!»
سەرۆكێن كاهنان و مامۆستایێن دەستووری گو‍‌ھ ل ڤێ چەندێ بوو و دەست پێ كر ل رێیەكێ گەڕیان كو وی بكوژن. ئەو ژ وی دترسیان، چنكو مللەت هەمی ب فێركرنا وی حێبەتی ببوون.
دەمێ بوویە شەڤ، عیسا و شاگردێن خۆ دەركەفتنە ژ دەرڤەی باژێڕی.
سپێدێ زوی، دەمێ دبورین، وان دیت ئەو دارهژیر ژ رەهان یا هشك بووی.
بیرا پەترۆسی ل ئاخفتنا عیسای هات و گۆتێ: «بنێڕە، مامۆستا! ئەو دارهژیرا تە نفرین لێ كری، یا هشك بووی.»
ئینا عیسای بەرسڤا وان دا: «بلا هەوە باوەری ب خودێ هەبیت.
راستیێ دبێژمە هەوە: هەر كەسێ بێژیتە ڤی چیای: ‹رابە و خۆ بهاڤێژە د دەریایێ دا،› گۆمان د دلی دا نەبیت، لێ باوەر بكەت كو ئەو تشتێ ببێژیت دێ چێبیت، تشتێ گۆت دێ بۆ وی ب ج‍‌ھ هێت.
ژ بەر هندێ ئەز دبێژمە هەوە: دەمێ نڤێژێ دكەن هەر تشتێ هوین داخواز بكەن، باوەریێ بینن هەوە یا وەرگرتی و دێ بۆ هەوە بیت.
هەر دەمێ هوین بۆ نڤێژێ رادوەستن و هەوە تشتەك ل سەر ئێكی هەبیت، لێ ببورن، داكو بابێ هەوە ژی ئەوێ ل ئەسمانان ل گونەهێن هەوە ببوریت.
لێ ئەگەر هوین لێ نەبورن، بابێ هەوە ژی ئەوێ ل ئەسمانی ل گونەهێن هەوە نابوریت.»
زڤڕینە ئورشەلیمێ و دەمێ د حەوشا پەرستگەهێ دا دگەڕیا، سەرۆكێن كاهنان و مامۆستایێن دەستووری و ریهسپی هاتنە نك
و گۆتنە وی: «تۆ ب چ دەستهەلات ڤان كاران دكەی؟ كێ ئەڤ دەستهەلاتە دایە تە كو تۆ ڤان كاران بكەی؟»
عیسای گۆتە وان: «ئەز ژی دێ پرسیارەكێ ژ هەوە كەم. بەرسڤا من بدەن، ئەز ژی دێ بێژمە هەوە ب چ دەستهەلات ئەز ڤان كاران دكەم.
تافیركرنا یوحەننای ژ ئەسمانی بوو یان ژ مرۆڤان؟ بەرسڤا من بدەن.»
وان د ناڤبەرا خۆ دا گۆت: «ئەگەر ئەم بێژین: ‹ژ ئەسمانی بوو،› دێ بێژیت: ‹ئەڤجا بۆچی هەوە باوەر ژێ نەكر؟›
لێ ئەگەر ئەم بێژین: ‹ژ مرۆڤان بوو›…؟» (ئەو ژ خەلكی دترسیان، چنكو ل نك هەمیان ئەو باوەری هەبوو كو یوحەننا ب راستی پێغەمبەرە.)
ئەڤجا وان بەرسڤا عیسای دا: «ئەم نزانین.» عیسای گۆتە وان: «ئەز ژی نابێژمە هەوە ب چ دەستهەلات ئەز ڤان كاران دكەم.»
ئینا عیسای ب نموونەیان دەست ب ئاخفتنێ كر و گۆت: «مرۆڤەكی رەزەك دانا و پەرژان كر و ئویسلەیەك كۆلا و بورجەكا نوبەداریێ د ناڤ دا ئاڤا كر، پاشی رەز ب كرێ داڤ رەزڤانان و چوو وەڵاتەكێ دی.
ل دەمێ چنینێ، وی بەنیەك هنارتە نك رەزڤانان، داكو پشكا خۆ ژ بەرهەمێ رەزی ژ وان وەرگریت،
لێ وان بەنی گرت و قوتا و دەستڤاڵا زڤڕاند.
پاشی ئەوی بەنیەكێ دی هنارتە نك وان، لێ وان سەرێ وی شكاند و كرێت كر.
پاشی ئێكێ دی هنارت و ئەو ژی كوشت. گەلەكێن دی هنارتن، لێ وان هندەك قوتان و هندەك كوشتن.
ئەوی ئێك مابوو، ئەو ژی كوڕێ وی یێ خۆشتڤی بوو، ئینا ل دویماهیێ هنارتە نك وان. وی د دلێ خۆ دا دگۆت: ‹دێ رێزێ ل كوڕێ من گرن.›
لێ وان رەزڤانان گۆتە ئێكودوو: ‹ئەڤە میراتگرە، وەرن ئەم وی بكوژین، دێ میرات بۆ مە مینیت.›
ئینا وان ئەو گرت و كوشت و هاڤێتە ژ دەرڤەی رەزی.
ئەڤجا خودانێ رەزی دێ چ كەت؟ ئەو دێ هێت رەزڤانان كوژیت و رەزی دەتەڤ هندەكێن دی.
ئەرێ ما هەوە ئەڤ نڤیسارە نەخواندینە: ‹ئەو بەرێ هۆستایان رەتكری، یێ بوویە بەرێ بنیاتی.
ئەڤە ژ لایێ خودانی ڤە چێبوویە و ئەو ل بەر چاڤێن مە تشتەكێ حنێرە!› »
ئەوان بزاڤ كر عیسای بگرن، چنكو ئەوان زانی وی ب ڤێ نموونەیێ بەحسێ وان دكر، لێ ژ خەلكی ترسیان، ئینا وان ئەو هێلا و چوون.
پاشی هندەك ژ فەریسیان و لایەنگرێن هێرودێسی هنارتنە نك، داكو ب ئاخفتنەكێ بئێخنە داڤان.
ئینا هاتن و گۆتنێ: «مامۆستا، ئەم دزانین تۆ یێ راستگۆی. تۆ هەمیان وەكو ئێك دبینی و تۆ بەرێ خۆ نادەیە ئاستێن مرۆڤان، لێ تۆ رێكا خودێ راست نیشا خەلكی ددەی. ئەرێ رەوایە باج بۆ قەیسەری بهێتە دان یان نە؟ ئەم بدەین یان نەدەین؟»
لێ عیسای ب دووڕویاتیا وان زانی و گۆتێ: «بۆچی هوین من تاقی دكەن؟ دینارەكێ بینن دا بەرێ خۆ بدەمێ.»
وان دینارەك ئینا، ئەڤجا وی گۆتە وان: «ئەڤ وێنە و ناڤە یێن كێنە؟» وان گۆتە وی: «یێن قەیسەرینە.»
ئەڤجا عیسای گۆتە وان: «یێ قەیسەری بدەنە قەیسەری و یێ خودێ ژی بدەنە خودێ.» ئینا ئەو ژ وی حێبەتی بوون.
سەدوقی، ئەوێن دبێژن رابوونا مریان نینە، هندەك ژ وان هاتنە نك وی و پرسیار ژێ كر و گۆتێ:
«مامۆستا، مووسای بۆ مە یا نڤیسی: ئەگەر برایێ ئێكی مر و هەڤژینا وی ما و چ زاڕۆك نەبوون، پێدڤیە برایێ وی هەڤژینا وی بۆ خۆ بینیت و دویندەهێ بۆ ناڤێ برایێ خۆ پەیدا بكەت.
ئەڤجا حەفت برا هەبوون، یێ ئێكێ ژن ئینا و مر و چ دویندە‍‌ھ ل دویڤ خۆ نەهێلا.
ئینا یێ دوویێ ئەو بۆ خۆ ئینا و ئەو ژی بێ زاڕۆك مر، هەروەسا یێ سێیێ ژی
و هەتا یێ حەفتێ مر و چ دویندە‍‌ھ ل دویڤ خۆ نەهێلان. ل دویماهیا هەمیان ژن ژی مر.
ل رۆژا رابوونێ، دەمێ رادبنەڤە، ئەو ژن دێ هەڤژینا كێ بیت؟ چنكو هەڤژینا هەر حەفتان بوو.»
ئینا عیسای گۆتە وان: «ما نە ژ بەر هندێ هوین شاش دبن، كو هوین نە د نڤیسارێن پیرۆز و نە د هێزا خودێ دگەهن؟
دەمێ مرۆڤ ژ مرنێ رادبنەڤە، نە ژنێ دئینن و نە شوی دكەن، لێ دێ وەكو فریشتەیێن ئەسمانان بن.
دەربارەی مریان و رابوونا وان، ما هەوە سەرهاتیا تڕاشێ د پەرتووكا مووسای دا نە خواندیە، كا چەوا خودێ ل گەل وی ئاخفت و گۆتێ: ‹ئەز خودایێ ئیبراهیمی و خودایێ ئیسحاقی و خودایێ یەعقوبیمە› ؟
ئەو نە خودایێ مریانە، لێ یێ زیندیانە. شاشیا هەوە گەلەك یا مەزنە.»
ئێك ژ مامۆستایێن دەستووری ل وێرێ بوو، گو‍‌ھ ل گەنگەشەیا وان بوو و زانی عیسای ب رەنگەكێ باش بەرسڤا سەدوقیان دابوو، ئینا خۆ نێزیك كر و پرسیار ژێ كر: «كیژ فەرمان ژ هەمیان مەزنترە؟»
عیسای بەرسڤ دا: «مەزنترین فەرمان ئەڤەیە: ‹ئیسرائیل، گوهێ خۆ بدێ! خودان خودایێ مە ئێك خودانە.
ژ هەمی دلێ خۆ و ژ هەمی دەروونێ خۆ و ژ هەمی هزرا خۆ و ب هەمی هێزا خۆ حەز ژ خودان خودایێ خۆ بكە.›
فەرمانا دوویێ ئەڤەیە: ‹حەز ژ نێزیكێ خۆ بكە، وەك چەوا تۆ حەز ژ خۆ دكەی.› چ فەرمان ژ وان هەردوویان مەزنتر نینن.»
ئینا مامۆستایێ دەستووری گۆتێ: «باشە مامۆستا، ئەڤە تە ب راستی گۆت! خودێ ئێكە و كەسەك ژ وی پێڤەتر نینە
و حەزژێكرنا مرۆڤی بۆ خودێ، ژ هەمی دل و ب هەمی تێگەهشتنێ و ب هەمی هێزێ، هەروەسا حەزژێكرنا مرۆڤی بۆ نێزیكێ خۆ هەروەكو حەز ژ خۆ دكەت، فەرترە ژ هەمی قوربانیێن سۆتنێ و سەرژێكریان. »
عیسای دیت وی ب شارەزایی بەرسڤ دا و گۆتە وی: «تۆ ژ پاشایەتیا خودێ نە یێ دویری.» ئێدی كەس نەدوێریا پرسیاران ژێ بكەت.
دەمێ عیسای د حەوشا پەرستگەهێ دا فێركرن دكر گۆت: «چەوا مامۆستایێن دەستووری دبێژن مەسیح كوڕێ داوودیە؟
داوودی ب خۆ ب سرۆشێ گیانێ پیرۆز گۆت: ‹خودانی گۆتە خودانێ من: ل دەستێ من یێ راستێ روینە، تاكو ئەز دوژمنێن تە بكەمە دبن پێیێن تە ڤە.›
داوود ب خۆ دبێژیتێ ‹خودان›، پا چەوا كوڕێ ویە؟» و وی جەماوەرێ مەزن گەلەك ب دلخۆشی گوهداریا وی دكر.
ئەوی د فێركرنا خۆ دا گۆت: «هشیاری مامۆستایێن دەستووری بن. ئەو حەز دكەن ب جلكێن شۆڕ دەركەڤن و ل بازاڕان سڵاڤ لێ بهێنە كرن
و د كنیشتەیان دا ل كورسیكێن پێشیێ بن و ل مێڤانداریان ل سەرێ ژۆری بن.
ئەو مالێ بیژنان دخۆن و بۆ رویمەتی نڤێژان درێژ دكەن. ئەو دێ سزادانەكا گرانتر وەرگرن.»
دەمێ عیسا بەرامبەری پارەدانكا پەرستگەهێ روینشتی، دیت كا چەوا خەلكی پارە دكرنە د پارەدانكێ دا و گەلەك ژ دەولەمەندان پارەیەكێ زۆر دكرە تێدا.
پاشی بیژنەكا هەژار هات و دوو فلس كرنە د پارەدانكێ دا.
ئینا گازی كرە شاگردێن خۆ و گۆتە وان: «راستیێ دبێژمە هەوە: ڤێ بیژنا هەژار ژ هەمیان پتر كرنە د پارەدانكێ دا،
چنكو ڤان هەمیان ژ سامانێ خۆ یێ زێدە كرە تێدا، لێ وێ سەرەڕای بەلەنگازیا خۆ، هەر چ یێ وێ هەی، هەمی پارەیێ ژیارا خۆ، كرە تێدا.»
دەمێ ژ پەرستگەهێ دەركەفتی، ئێك ژ شاگردێن وی گۆتێ: «مامۆستا، بەرێ خۆ بدێ، ئەڤ بەر و ئاڤاهیە چەند جهێ مەندەهۆشیێنە!»
ئینا عیسای بەرسڤا وی دا: «تۆ ڤان ئاڤاهیێن مەزن دبینی؟ بەر ل سەر بەری نامینیت، هەمی دێ هێنە هەڕفاندن.»
دەمێ ئەو ل سەر چیایێ زەیتوونان ل بەرامبەر پەرستگەهێ یێ روینشتی، پەترۆس، یەعقوب، یوحەننا و ئەندراوس ب تنێ ل گەل بوون و پرسیار ژێ كر:
«بێژە مە ئەڤە دێ كەنگی چێبن؟ و دێ چ نیشان هەبیت، دەمێ بجههاتنا وان هەمی تشتان نێزیك ببیت؟»
عیسای دەست پێ كر و گۆتە وان: «هشیار بن كەس هەوە د سەردا نەبەت.
گەلەك دێ ب ناڤێ من هێن و دێ بێژن: ‹ئەز ئەوم!› و دێ گەلەكان د سەردا بەن،
دەمێ هەوە گو‍‌ھ ل جەنگ و دەنگوباسێن جەنگان دبیت، نەڤەجنقن. دڤێت ئەڤ تشتە روی بدەن، لێ ئەڤە هێشتا نە دویماهیە.
چنكو دێ مللەتەك دژی مللەتەكی و پاشایەتیەك دژی پاشایەتیەكێ رابیت و دێ ل گەلەك جهان بیڤەلەرز روی دەن و دێ كولب پەیدا بن، لێ ئەڤە دەستپێكا ژانێن زاڕۆكبوونێنە.
لێ هوین د هشیار بن. ئەو دێ هەوە رادەستی دادگەهان كەن و دێ ل كنیشتەیان هێنە قوتان و ژ بەر من ل بەرامبەر حوكمداران و پاشایان دێ هێنە راوەستاندن، دا هوین ل بەرامبەری وان شاهدەییێ بدەن.
بەری دویماهی بهێت، دڤێت مزگینی بۆ هەمی مللەتان بهێتە راگەهاندن.
دەمێ هەوە دبەن دا رادەست بكەن، بەری هنگی خەمێ نەخۆن كا دێ چ بێژن، لێ ل وی دەمی وێ بێژن یا بۆ هەوە دهێتە دان، چنكو نە هوینن ئەوێ دئاخڤیت، لێ گیانێ پیرۆزە.
برا دێ برای رادەستی مرنێ كەت و باب دێ زاڕۆكی رادەست كەت، زاڕۆك دێ بەرامبەر دایك و بابێن خۆ رابن و دەنە كوشتن
و دێ ژ بەر ناڤێ من كەربێن هەمیان ژ هەوە ڤەبن، لێ یێ تا دویماهیێ خۆ راگریت، ئەو دێ قورتال بیت.
دەمێ هوین ‹پیساتیا وێرانكرنێ› دبینن یا ئامادەیە ل وی جهێ چێنابیت لێ بیت» (بلا خواندەڤان تێبگەهیت) «هنگی بلا ئەوێن ل دەڤەرا یەهودیایێ بڕەڤنە چیایان.
ئەوێ ل سەر بانی بیت، دەمێ دهێتە خوارێ بلا نەچیتە د خانی ڤە دا تشتەكی ژ مالا خۆ ببەت
و ئەوێ ل ناڤ زەڤیێ بیت، بلا ڤەنەگەڕیێت دا كوركێ خۆ ببەت.
ل وان رۆژان، نەخوزیكێن ژنكێن دووگیان و شیردەران.
نڤێژان بكەن دا ئەڤە نەكەڤیتە زڤستانێ،
چنكو ل وان رۆژان دێ تەنگاڤیەكا وەسا روی دەت، كو وەكو وێ هەر ژ دەستپێكا جیهانا خودێ ئافراندی و هەتا نوكە روی نەدایە و چ جاران روی نادەت ژی.
ئەگەر خودانی ئەو رۆژ كورت نەكربان، كەس قورتال نەدبوو، لێ ژ بەر وان بژارەیێن وی هەلبژارتین، وی ئەو رۆژ كورت كرینە.
هنگی ئەگەر ئێكی گۆتە هەوە: ‹ئها ئەڤە مەسیح یێ ل ڤێرێ!› یان ژی ‹ئها ئەڤە یێ ل وێراهە!› باوەر نەكەن.
چنكو دێ مەسیحێن درەوین و پێغەمبەرێن درەوین دیار بن و دێ نیشانان دیار كەن و مەندەهۆشیان كەن، داكو، ئەگەر د شیان دا با، هەلبژارتیێن خودێ ژی د سەر دا ببەن.
ئەڤجا هشیار بن! من پێشوەخت هەمی تشت گۆتنە هەوە.
د وان رۆژان دا، پشتی وێ تەنگاڤیێ، ‹رۆژ دێ هێتە تاری كرن و هەیڤ رۆناهیا خۆ نادەت،
ستێر دێ ژ ئەسمانی رژیێن و هێزێن ل ئەسمانان دێ هێنە تێكهەژاندن.›
هنگی دێ بینن كوڕێ مرۆڤ ب هێزەكا زۆر و مەزناهی د ناڤ عەوران دا یێ دهێت.
هنگی دێ فریشتەیێن خۆ هنێریت و هەلبژارتیێن خۆ ژ هەر چوار كوژیێن جیهانێ، ژ سەروبنێن ئەردی هەتا سەروبنێن ئەسمانی، خڕڤە كەت.
ژ دارهژیرێ فێری ڤێ نموونەیێ ببن: دەمێ چەقێن وێ دبشكڤن و بەلگ پێڤە دهێن، هوین دزانن هاڤین یا نێزیكە.
وەسا هوین ژی، دەمێ دبینن ئەڤ تشتە روی ددەن، بزانن یا نێزیكە و ل بەر دەرگەهیە.
راستیێ دبێژمە هەوە: ئەڤ بەرەبابە ژ ناڤ ناچیت، تاكو ئەڤ تشتە هەمی روی نەدەن.
ئەرد و ئەسمان دێ ژ ناڤ چن، لێ پەیڤێن من چ جاران ژ ناڤ ناچن.
لێ سەبارەت وێ رۆژێ یان وێ دەمژمێرێ، كەس نزانیت، نە فریشتەیێن ل ئەسمانی و نە ژی كوڕ، لێ ب تنێ باب دزانیت.
بنێڕن هەوە های ژ خۆ هەبیت، چنكو هوین نزانن ئەو دەم كەنگی دێ هێت.
هەروەكو مرۆڤەكێ رێڤنگ، دەمێ ژ مالا خۆ دچیت و كارێ هەر بەنیەكێ خۆ بۆ دەست نیشان دكەت و شیرەتان ل دەرگەهڤانی دكەت كو هشیار بیت.
ئەڤجا هشیار بمینن، چنكو هوین نزانن كەنگی دێ خودانێ مالێ ڤەگەڕیێت، ئێڤاری، یان نیڤا شەڤێ، یان ل گەل بانگێ دیكلی، یان ژی سپێدێ،
نەوەكو ژ نشكەكێ ڤە بهێت و هەوە نڤستی ببینیت.
ئەوا ئەز دبێژمە هەوە، ئەز بۆ هەمیان دبێژم: هشیار بن!»
دوو رۆژ بۆ جەژنا دەربازبوونێ و جەژنا نانێ شكەڤا مابوون. هێشتا سەرۆكێن كاهنان و مامۆستایێن دەستووری ل رێكەكێ دگەڕیان كا چەوا عیسای ب فێلبازی بگرن و بكوژن.
وان دگۆت: «ئەم ل جەژنێ وی ناگرین، نەكو تێكدان د ناڤ خەلكی دا چێببیت.»
دەمێ عیسا ل بێت‌عەنیا ل سەر سفرێ یێ روینشتی ل نك شەمعونێ گوڕی، ژنكەك هات و گولاڤدانكەكا روینێ بێهنخۆش یێ بهاگران ژ جۆرێ ناردینا خۆڕستی ڤێ بوو، گولاڤدانك شكاند و گولاڤ ب سەرێ وی دا كر.
هندەك دلتەنگ بوون و گۆتنە ئێكودوو: «بۆچی ئەڤ گولاڤە هاتە زەعێكرن؟
چێدبوو ئەڤ گولاڤە ب سێ سەد دیناران هاتبا فرۆتن و بهایێ وێ دابا هەژاران!» هۆسا نەرازیبوونا خۆ ژێ دیار كر.
لێ عیسای گۆت: «بهێلن! بۆچی هوین وێ تەنگاڤ دكەن؟ وێ كارەكێ باش بۆ من كر.
هەژار هەمی دەمان یێن ل نك هەوە هەین و هەر دەمێ هەوە بڤێت هوین دشێن چاكیێ لێ بكەن، لێ ئەز هەمی دەمان ل نك هەوە نابم.
ئەوێ ئەو كر یا وێ پێ چێدبیت: بەری دەمی لەشێ من بۆ ڤەشارتنێ گولاڤ كر.
راستیێ ژی دبێژمە هەوە: ئەڤ مزگینیە ل هەر جهەكی ل سەرانسەری جیهانێ بهێتە راگەهاندن، دێ بەحسێ ئەوا ڤێ ژنكێ كری ژی ژ بۆ بیرهاتنا وێ هێتە كرن.»
پاشی یەهودایێ ئەسخەریوتی، كو ئێكە ژ دوازدە شاگردان چوو نك سەرۆكێن كاهنان، دا عیسای رادەستی وان بكەت.
دەمێ وان گو‍‌ھ ل ڤێ چەندێ بووی كەیفخۆش بوون، سۆز دایێ ئەو هندەك پارەیان بدەنێ. ئەڤجا یەهودا ل دەلیڤەیەكێ دگەڕیا، دا وی رادەستی وان بكەت.
ل رۆژا ئێكێ ژ جەژنا نانێ شكەڤا، ل وێ رۆژێ بەرخێ دەربازبوونێ دهاتە سەرژێكرن، شاگردێن وی پرسیار ژێ كرن: «تە دڤێت ئەم بچین ل كیرێ شیڤا جەژنا دەربازبوونێ ئامادە بكەین، دا تۆ بخۆی؟»
ئینا دوو شاگردێن خۆ هنارتن و گۆتە وان: «هەڕنە باژێڕی، دێ زەڵامەك هێتە پێشیا هەوە، جەڕەكێ ئاڤێ یێ هەلگرتی، ئەڤجا ل دویڤ هەڕن،
دەمێ دچیتە د مالەكێ ڤە بێژنە خودانێ وێ مالێ: ‹مامۆستا دبێژیت: كانێ ئەو ژۆرا مێڤانان یا ئەز دێ ل گەل شاگردێن خۆ تێڤە شیڤا دەربازبوونێ خۆم؟›
ئەو دێ ل قاتێ سەری ژۆرەكا مەزن، یا رائێخستی و ئامادە نیشا هەوە دەت. ل وێرێ بۆ مە ئامادە بكەن.»
هەردوو شاگرد دەركەفتن و چوونە باژێڕی و هەروەكو گۆتبوویێ وەسا دیت، ئەڤجا شیڤا دەربازبوونێ ئامادە كر.
دەمێ بوویە شەڤ، عیسا ل گەل هەر دوازدان هات.
دەمێ ئەو د روینشتی بوون خوارن دخوار، عیسای گۆت: «ب راستی دبێژمە هەوە: ئێك ژ هەوە دێ بێبەختیێ ل من كەت و نوكە یێ خوارنێ ل گەل من دخۆت.»
ئەو دلتەنگ بوون و دەست پێ كر ئێك ل دویڤ ئێكی پرسیار ژێ كر: «ئەرێ ئەو ئەزم؟»
ئینا گۆتە وان: «ئەو ئێك ژ دوازدانە، ئەوێ ل گەل من پاریێ خۆ د سێنیكێ دهەلینیت.
كوڕێ مرۆڤ دێ وەسا چیت، هەروەكو دەربارەی وی هاتیە نڤیسین، لێ نەخوزیكێن وی كەسی یێ كوڕێ مرۆڤ رادەست بكەت. بۆ وی كەسی باشتر بوو ئەو ژ دایك نەببا.»
دەمێ وان خوارن دخوار، وی نان هەلگرت و سوپاسیا خودێ كر، پاشی كەر كر و دا وان و گۆت: «وەرگرن، ئەڤە لەشێ منە.»
پاشی پەرداغ هەلگرت و سوپاسی كر و دا وان و هەمیان ژێ ڤەخوار
و گۆتێ: «ئەڤە خوینا منە، خوینا پەیمانێ، ئەوا ژ پێخەمەتی گەلەكان دێ هێتە رشتن.
راستیێ دبێژمە هەوە: ئێدی ئەز ژ بەرهەمێ مێوێ ڤەناخۆم تا وێ رۆژا ئەز ل پاشایەتیا خودێ ژ یا نوی ڤەدخۆم.»
پشتی وان سروودەك بۆ پەسنا خودێ گۆتی، چوونە چیایێ زەیتوونان.
عیسای گۆتە وان: «هوین هەمی دێ هەلنگڤن، چنكو یا هاتیە نڤیسین: ‹ئەز دێ ل شڤانی دەم، پەز دێ بژاڵە بیت.›
لێ پشتی رابوونا من، ئەز دێ بەراهیا هەوە چمە جەلیل.»
پەترۆسی گۆتێ: «خۆ ئەگەر هەمی ژی بهەلنگڤن، ئەز ناهەلنگڤم!»
عیسای گۆتێ: «ب راستی دبێژمە تە: ئەڤرۆ، هەر ئەڤ شەڤە، بەری دیكل دوو جاران بانگ بدەت، تۆ دێ سێ جاران من ماندەل كەی.»
لێ پەترۆسی پتر دووپات كر: «ئەگەر یا پێدڤی بیت ئەز ل گەل تە بمرم ژی، ئەز تە ماندەل ناكەم!» هەمیان ژی وە گۆت.
پاشی هاتنە جهەكی ناڤێ وی گەتسێمانی بوو و گۆتە شاگردێن خۆ: «ل ڤێرێ روینن، تا ئەز نڤێژێ بكەم.»
پەترۆس و یەعقوب و یوحەننا ل گەل خۆ برن و خەمگینیەكا دژوار و دلتەنگیێ ب سەر وی دا گرت.
گۆتە وان: «دلێ من تا رادەیێ مرنێ یێ ب خەمە! ل ڤێرێ بن و هشیار بمینن.»
پاشی پیچەكێ پێشڤە چوو و خۆ دەڤ و دەڤ هاڤێتە ئەردی و نڤێژ كر، دا ئەگەر چێببیت، ئەو دەم د سەر را ببوریت
و گۆت: «ئابا ، بابۆ! تۆ دشێی هەمی تشتان بكەی، ڤێ پەرداغێ ژ من دەرباز بكە، لێ نە ئەو بیت یا من دڤێت، بەلكو بلا ئەو بیت یا تە دڤێت.»
پشتی هنگی ڤەگەڕیا و دیت د نڤستینە، ئینا گۆتە پەترۆسی: «تۆ ژی یێ نڤستی شەمعون؟ ما تۆ نەشیای دەمژمێرەكێ هشیار بمینی؟
هشیار بمینن و نڤێژان بكەن، دا هوین نەكەڤنە د تاقیكرنێ دا. گیان یێ ئامادەیە، لێ لەش یێ لاوازە.»
جارەكا دی چوو و نڤێژ كر و هەر ئەو ئاخفتن دووبارە كر.
ڤەگەڕیاڤە نك شاگردان، دیسان دیت د نڤستینە، چنكو خەوێ چاڤێن وان گران كربوون و نەدزانین ب چ بەرسڤا وی بدەن.
بۆ جارا سێیێ ڤەگەڕیا و گۆتە وان: «ئەڤە هێشتا هوین د نڤستینە و بێهنا خۆ ڤەددەن؟ بەسە! دەم هات، ئها ئەڤە كوڕێ مرۆڤ رادەستی گونەهكاران دهێتە كرن.
رابن دا بچین، ئها ئەڤە ئەوێ من رادەست دكەت نێزیك بوو!»
هەر ل دەمێ ئەو دئاخفت، یەهودا، كو ئێك ژ هەر دوازدان بوو، گەهشت و كۆمەكا مرۆڤان ب شیر و دار ڤە ل گەل بوون. ئەو ژ لایێ سەرۆكێن كاهنان و مامۆستایێن دەستووری و ریهسپیان ڤە هاتبوونە هنارتن.
ئەوێ وی رادەست دكەت نیشانەك دابوو وان و گۆتبوویێ: «ئەوێ ئەز ماچی بكەم، ئەو ئەوە. وی بگرن و ببەن و باش لێ هشیار بن.»
دەمێ یەهودا گەهشتی، ئێكسەر هاتە نك عیسای و گۆت: «مامۆستا!» و ماچی كر.
ئینا وان دەستەسەر كر و گرت.
لێ ئێك ژ وان ئەوێن ل وێرێ راوەستیای شیرێ خۆ ئینا دەرێ و ڤەوەشاندە بەنیێ سەرۆككاهنی و گوهێ وی ژێڤە كر.
عیسای گۆتە وان: «دێ بێژی هوین بۆ ب سەرداگرتنا قاچاخەكی ب شیر و داران یێن دەركەفتین، دا من بگرن؟
هەر رۆژ ئەز ل پەرستگەهێ د ناڤ هەوە دا بووم و من فێركرن دكر و هەوە ئەز نەدگرتم. لێ ئەڤێ روی دا، دا نڤیسارێن پیرۆز ب ج‍‌ھ بهێن.»
هەمیان ئەو هێلا و رەڤین.
گەنجەك ل دویڤ وی دچوو، تشتەك ل بەر نەبوو ژبلی پەڕوكەكێ كتانی، ئینا وان ئەو گەنج گرت،
لێ وی پەڕوكێ كتانی ل وێرێ هێلا و رویس رەڤی.
وان عیسا برە نك سەرۆككاهنی و هەمی سەرۆكێن كاهنان و مامۆستایێن دەستووری و ریهسپی لێ كۆم بوون.
پەترۆس ژ دویر ڤە ب دویڤ را تا ناڤ حەوشا سەرۆككاهنی چوو، ل گەل زێرەڤانان یێ روینشتی بوو، خۆ ل بەر ئاگری گەرم دكر.
سەرۆكێن كاهنان و جڤاتا بلند هەمی ل شاهدەییێ دەربارەی عیسای دگەڕیان، دا وی بدەنە كوشتن، لێ وان نەددیت،
گەلەكان شاهدەییا ب درەو ل سەر دا، لێ شاهدەییێن وان وەكو ئێك نەبوون.
هندەك رابوون ژ درەو شاهدەیی ل سەر دا و دگۆتن:
«مە یێ گو‍‌ھ لێ بووی دبێژیت: ئەز دێ ڤێ پەرستگەهێ هەڕفینم، ئەوا دەستان ئاڤا كری و دێ د سێ رۆژان دا ئێكا دی ئاڤا كەم كو ب دەستان نە هاتبیتە ئاڤاكرن.»
لێ خۆ د ڤێ چەندێ ژی دا شاهدەییا وان وەكو ئێك نەبوو.
سەرۆككاهن رابوو و د ناڤ جڤاتێ دا راوەستیا و پرسیار ژ عیسای كر: «ما تۆ چ بەرسڤان نادەی؟ ئەڤە چ شاهدەییە ئەڤ كەسە ل سەر تە ددەن؟»
لێ ئەو بێدەنگ ما، چ ئاخفتن نەدكرن. سەرۆككاهنی دیسان پرسیار ژێ كر و گۆت: «ئەرێ تۆی مەسیح، كوڕێ پیرۆزمەندی؟»
عیسای گۆت: «ئەز ئەوم و هوین دێ كوڕێ مرۆڤ بینن، ل دەستێ راستێ یێ هێزداری یێ روینشتی و ل گەل عەورێن ئەسمانی یێ دهێت.»
ئەڤجا سەرۆككاهنی جلكێن خۆ دڕاندن و گۆت: «ما ئێدی مە چ پێدڤی ب شاهدان هەیە؟
هەوە كوفریا وی بهیست: ئەڤجا هوین چ دبێژن؟» هەمیان پێكڤە بڕیار دا، كو هەژی مرنێیە.
ئینا هندەكان دەست پێ كر تف كرنێ و سەروچاڤێن وی نخافتن و دا بەر كولمان و گۆتنێ: «ب رێكا سرۆشێ بێژە!» و زێرەڤانان ئەو بر و دا بەر زللەهان.
دەمێ پەترۆس ل حەوشێ ل خوارێ، كچكەكا خزمەتكارا سەرۆككاهنی هات
و دەمێ پەترۆس دیتی یێ خۆ گەرم دكەت، لێ نێڕی و گۆتێ: «تۆ ژی ل گەل عیسایێ ناسیرەیی بووی!»
لێ وی ماندەل كر و گۆت: «ئەز نزانم و تێناگەهم تۆ چ دبێژی!» پاشی دەركەفتە بەر دەرگەهی و دیكلی بانگ دا
و كچكا خزمەتكار ئەو دیت، دیسان دگۆتە یێن ل وێرێ راوەستیاین: «ئەڤە ئێك ژ وانە.»
جارەكا دی ماندەل كر. پشتی دەمەكێ كورت، هندەكێن دی یێن راوەستیای ژی گۆتنە پەترۆسی: «ب راستی تۆ ژی ئێك ژ وانی، چنكو تۆ ژی ژ جەلیلێی.»
وی دەست ب نفرین و سویندخوارنێ كر و گۆت: «ئەز وی زەڵامێ هوین بەحسێ وی دكەن، نانیاسم.»
ئینا د ج‍‌ھ دا دیكلی بۆ جارا دوویێ بانگ دا، ئەڤجا ئەو ئاخفتن هاتە بیرا پەترۆسی یا عیسای گۆتیێ: «بەری دیكل دوو جاران بانگ بدەت، تۆ دێ سێ جاران من ماندەل كەی.» دەمێ هزرا وی كری، نەشیا خۆ و گریا.
دەمێ بوویە سپێدە، سەرۆكێن كاهنان و ریهسپی و مامۆستایێن دەستووری و جڤاتا بلند هەمی كەفتنە دانوستاندنێ، پاشی عیسا گرێ دا و بر و رادەستی پیلاتۆسی كر.
ئینا پیلاتۆسی پرسیار ژێ كر: «ئەرێ تۆ پاشایێ جوهیانی؟» عیسای بەرسڤا وی دا: «تە ب خۆ گۆت.»
سەرۆكێن كاهنان ئەو ب گەلەك تشتان تاوانبار كر.
پیلاتۆسی جارەكا دی پرسیار ژێ كر و گۆت: «ما تۆ چ بەرسڤان نادەی؟ گوهێ خۆ بدێ یێ چەند تاوانان ئاراستەی تە دكەن!»
لێ عیسای چ بەرسڤێن دی نەدان و پیلاتۆس حێبەتی بوو.
ژ نەریتێن پیلاتۆسی ئەو بوو ل هەر جەژنەكێ گرتیەكی كو خەلك دخوازیت، ئازاد بكەت.
زەڵامەكێ زیندانكری ب ناڤێ باراباس هەبوو ل گەل كۆمەكا تێكدەران، ئەوێن د دەمێ یاخیبوونێ دا كوشتن كری.
جەماوەر هات و داخواز ژ پیلاتۆسی كر، كو وێ بكەت ئەوا هەردەم بۆ وان دكر،
ئینا گۆتە وان: «ئەرێ هەوە دڤێت ئەز پاشایێ جوهیان بۆ هەوە ئازاد بكەم؟»
چنكو وی دزانی سەرۆكێن كاهنان ژ زكڕەشی عیسا رادەستی وی كریە.
لێ سەرۆكێن كاهنان جەماوەر ئازراند بۆ داخوازا ئازادكرنا باراباسی ل شوینا عیسای.
ئەڤجا پیلاتۆسی دیسان پرسیار ژ وان كر: «پا هەوە دڤێت ئەز چ ل وی بكەم یێ هوین دبێژنێ پاشایێ جوهیان؟»
ئینا ل قێڕیان دان و گۆتن: «ل خاچێ بدە!»
پیلاتۆسی گۆتە وان: «ما ئەڤی چ خرابی كریە؟» ئینا قێڕیێن وان بلندتر لێ هاتن: «ل خاچێ بدە!»
لێ چنكو پیلاتۆسی دڤیا جەماوەری رازی بكەت، ئینا باراباس بۆ وان ئازاد كر و عیسا قامچی دا، پاشی رادەستی وان كر داكو بهێتە خاچدان.
پاشی سەربازان عیسا برە د ناڤ حەوشا كۆچكا والی دا و هەمی بەتالیون گازی كر، دا كۆم ببن.
وان كوركەكێ بنەفشی كرە بەر و تانجەك ژ ستریان ڤەهاند و دانا سەر سەرێ وی
و دەست ب سڵاڤكرنێ ل وی كر و گۆت: «بژی پاشایێ جوهیان!»
ب لەڤەنەكی ددانا سەرێ وی و تف دكرێ و چۆكڤەدان و بۆ وی سوجدە دبرن.
پشتی تڕانە پێ كرین، كوركێ بنەفشی ژ بەر كر و جلكێن وی كرنە بەر و برە ژ دەرڤە، دا ل خاچێ بدەن.
زەڵامەكێ قەیرەوانی ب رێكا خۆ ژ ئاقاری دهات، ناڤێ وی شەمعون بوو و بابێ ئەسكەندەری و روفۆسی بوو. وان ئەو نەچار كر كو خاچا عیسای هەلگریت.
عیسا ئینا وی جهێ دبێژنێ گۆلگۆتە (كو رامانا وی كلۆخە)
و بۆ وی شەرابەكا تێكهەل ل گەل موڕێ ئینا، لێ وی ڤەنەخوار.
ئەو ل خاچێ دا و جلكێن وی ل خۆ لێكڤەكرن، ب هاڤێتنا پشكێ، دا هەر ئێك بەهرا خۆ بزانیت.
دەمژمێر نەهێ رۆژێ بوو، دەمێ ل خاچێ دای.
ل سەر دەپەكی تاوانا وی هۆسا هاتبوو نڤیسین: «پاشایێ جوهیان»
و دوو قاچاخ ژی ل گەل وی ل خاچێ دان، ئێك ل لایێ وی یێ راستێ و یێ دی ل لایێ وی یێ چەپێ.
ئەو نڤیسار ژی ب ج‍‌ھ هات: «ل گەل تاوانباران هاتە هژمارتن.»
یێن كو د وێرێ را دهاتن و دچوون ئەو كرێت دكر و سەرێ خۆ لێ دهەژاند و دگۆت: «ها! هەی ئەوێ دا پەرستگەهێ د سێ رۆژان دا هەڕفینیت و ئاڤا كەتەڤە!
ژ خاچێ وەرە خوار و خۆ قورتال بكە!»
هەروەسا سەرۆكێن كاهنان ل گەل مامۆستایێن دەستووری ژی تڕانە پێ دكرن و دگۆتنە ئێكودوو: «هندەكێن دی قورتال كرن، لێ نەشێت خۆ قورتال بكەت!
بلا مەسیح، پاشایێ ئیسرائیلێ، ژ خاچێ بهێتە خوارێ، دا ببینین و باوەریێ پێ بینین!» هەروەسا ئەوێن ل گەل وی هاتینە خاچدان ژی ئەو فهێت دكر.
دەمێ بوویە دەمژمێر دوازدەی نیڤرۆ، ژ وی دەمی تا دەمژمێر سێ، تاریاتیێ هەمی ئەرد گرت.
ل دەمژمێر سێ، عیسای ب دەنگەكێ بلند كرە هەوار: «ئێلۆیی، ئێلۆیی، لەما ساباختانی؟» رامانا وێ ئەوە كو: «خودایێ من، خودایێ من، بۆچی تە ئەز هێلام؟»
هندەك ژ ئامادەبوویان گو‍‌ھ ل وی بوو و گۆتن: «ئەڤە ئەو یێ گازی ئلیاسی دكەت!»
ئێكی كرە غار و ئیسفەنجەك د سهكێ هەلاند و دانا سەر لەڤەنەكی و گەهاندە وی دا ڤەخۆت و گۆت: «بهێلن دا ببینین كا دێ ئلیاس هێت وی ئینیتە خوار؟»
عیسای ب دەنگەكێ بلند كرە قێڕی و گیانێ خۆ ژ دەست دا.
پەردەیا پەرستگەهێ ژ سەری تا بنی شەق بوو و بوو دوو پارچە.
سەرلەشكەر بەرامبەر خاچێ یێ راوەستیای بوو و دەمێ دیتی كا چەوا عیسای گیان ژ دەست دا، گۆت: «ب راستی، ئەڤ مرۆڤە كوڕێ خودێ بوو.»
هەروەسا هندەك ژنكان ژ دویر ڤە بەرێ خۆ ددایێ، مەریەما مەجدەلی و مەریەما دایكا هەردوو برا یەعقوبێ بچویك و یوسی، هەروەسا سالومە ژی د ناڤ وان دا بوون،
ئەوێن ل جەلیل ب دویڤ كەفتین و خزمەتا وی كری، ژبلی وان گەلەك ژنكێن دی ژی بوون یێن ل گەل وی سەركەفتینە ئورشەلیمێ.
دەمێ بوویە ئێڤار، ژ بەر كو رۆژا ئامادەكرنێ بوو، ئانكو رۆژا بەری شەمبیێ،
یوسڤێ ئاریمەتیایی هات، ئەو ژی ئەندامەكێ رێزدار بوو د ناڤ جڤاتا بلند دا و چاڤەڕێیا پاشایەتیا خودێ دكر، وی مێرانی كر و چوو نك پیلاتۆسی و داخوازا تەرمێ عیسای ژێ كر.
پیلاتۆس گوهشی بوو كو ئەو هۆسا زوی مر و گازی سەرلەشكەری كر و ژێ پرسی: «ئەرێ راستە ئەو هۆسا زوی مریە؟»
و دەمێ ژ سەرلەشكەری زانی، رێ دا یوسڤی تەرمێ عیسای ببەت.
وی پارچەیەكا كتانی كڕی و تەرم ژ خاچێ ئینا خوارێ و ب وی كتانی كفن كر و دانا د گۆڕەكێ د كەڤری كۆلای دا و بەرەك گڕێل كرە بەر دەرێ گۆڕی.
مەریەما مەجدەلی و مەریەما دایكا یوسی دیت، كا ل كیڤە هاتە دانان.
دەمێ شەمبی ب دویماهی هاتی، مەریەما مەجدەلی ل گەل مەریەما دایكا یەعقوبی ل گەل سالومەیێ دەرمانك كڕین داكو بچن تەرمێ عیسای پێ چەور بكەن.
سپێدێ زوی ژ رۆژا ئێكشەمبێ، ل گەل هەلاتنا رۆژێ هاتنە نك گۆڕی.
بڕێڤە وان دگۆتە ئێكودوو: «كی دێ بۆ مە بەری ژ بەر دەرگەهێ گۆڕی گڕێل كەت؟»
لێ وان سەحكرە بەری و سەرەڕای هندێ كو گەلەك یێ مەزن بوو، بەر یێ هاتیە گڕێل كرن.
دەمێ چووینە د ناڤ گۆڕی دا، ل رەخێ راستێ گەنجەكێ روینشتی دیت، كراسەكێ سپی ل بەر بوو، ئینا مەندەهۆش بوون.
وی گۆتە وان: «نەترسن! هوین ل عیسایێ ناسیرەیی یێ خاچدای دگەڕیێن. ئەو یێ رابووی! نە ل ڤێرێیە. ئەڤە ئەو جهە یێ وان لێ دانای.
نوكە هەڕن و بێژنە شاگردێن وی و بێژنە پەترۆسی ژی، كو ئەو دێ بەری هەوە چیتە جەلیلێ و ل وێرێ دێ وی بینن هەروەكو گۆتیە هەوە.»
دەركەفتن و ژ سەر گۆڕی رەڤین، چنكو سەهمێ ئەو گرتبوون و دلەرزین و چ تشت نەگۆتنە كەسێ چنكو دترسیان.
پشتی عیسا ل رۆژا ئێكشەمبێ سپێدێ زوی رابووی، ل پێشیێ بۆ مەریەما مەجدەلی ئەوا حەفت ئەجنە ژێ دەرئێخستین دیار بوو.
ئەو ژی چوو و مزگینی گەهاندە شاگردێن وی، كو ب هەوار و گری بوون.
دەمێ ئەوان بهیستی كو عیسا یێ ساخە و ئەوێ یێ دیتی، وان باوەر نەكر.
پشتی هنگی عیسا ب رەنگەكێ دی بۆ دوو ژ وان شاگردان دیار بوو دەمێ ئەو ب رێكێ ڤە ل چۆلی دچوون.
ئەو زڤڕین و گۆتنە یێن دی، لێ ژ وان ژی باوەر نەكر.
پاشی بۆ هەر یازدە شاگردان، دەمێ خوارنا خۆ دخوار دیار بوو. ژ بەر بێباوەری و سەرهشكیا وان، وی ئەو پاشڤە برن، چنكو ئەوان باوەر ژ وان نەدكر یێن عیسا پشتی رابوونا وی دیتی.
وی گۆتە وان: «هەڕنە هەمی جیهانێ و مزگینیێ بدەنە هەمی ئافراندیان.
یێ باوەریێ بینیت و بهێتە تافیركرن، دێ قورتال بیت و یێ باوەریێ نەئینیت دێ هێتە گونەهباركرن.
ئەوێن باوەری ئینای، ئەڤ نیشانە دێ ل گەل وان بن: ب ناڤێ من دێ ئەجنەیان دەرئێخن، دێ ب زمانێن نوی ئاخڤن،
دێ ب دەستێ خۆ ماران گرن و ئەگەر ژەهر ژی ڤەخوار چ زیان ناگەهیتە وان و دێ دەستێن خۆ داننە سەر نەساخان و نەساخ دێ ساخ بن.»
ئەڤجا پشتی كو خودان عیسا ل گەل وان ئاخفتی، بلند بوو ئەسمانی و ل ملێ راستێ یێ خودێ روینشت.
شاگرد ژی چوون و ل هەمی جیهانێ مزگینی ددا و خودانی ل گەل وان كار دكر و پەیاما وان پەسەند دكر ب رێكا نیشانێن ل سەر دەستێ وان دهاتنە كرن.
تیوفیلۆسێ هێژا، ژ بەر كو گەلەكان دەست هاڤێتیە نڤیسینا وان رویدانێن د ناڤ مە دا پەیدا بووین،
هەروەكو ژ لایێ ئەوێن ل دەستپێكێ ب چاڤێن خۆ دیتی و بووینە خزمەتكارێن پەیڤێ ، بۆ مە هاتیە راگەهاندن،
پشتی من هەمی تشت ژ دەستپێكێ ب هویری شڕۆڤە كرین، من ژی ب باشی دیت، ب رێكوپێكی بۆ تە بنڤیسم،
دا تۆ راستیا وان پەیڤێن تۆ پێ هاتیە فێركرن بزانی.
ل سەردەمێ هێرودێسی، پاشایێ یەهودیایێ، كاهنەك هەبوو ناڤێ وی زەكەریا بوو، ژ ئویجاخا ئەبیای بوو و هەڤژینا وی ژ دویندەها هارونی بوو، ناڤێ وێ ئەلیزابێت بوو.
هەردوو بەرامبەری خودێ د راست بوون و بێ گازندە فەرمان و شیرەتێن خودانی ب ج‍‌ھ دئینان.
لێ چ زاڕۆك نەبوون، چنكو ئەلیزابێت یا خرش بوو و هەردوو ژی ب ناڤ ساڵ ڤە چووبوون.
هۆسا چێبوو دەمێ وی د گەڕا ئویجاخا خۆ دا خزمەتا خۆ یا كاهنایەتیێ بەرامبەر خودێ دكر،
ل دویڤ داب و نەریتێن كاهنایەتیێ پشك بۆ زەكەریای كەفت كو بچیتە د پەرستگەها خودانی ڤە، دا بخویرێ بسوژیت.
ل دەمێ بخویر سۆتنێ، هەمی كۆمەڵا خەلكی ژ دەرڤە نڤێژ دكر.
هنگی فریشتەیەكێ خودانی بۆ وی دیار بوو و ل رەخێ راستێ ژ قوربانگەها بخویرێ یێ راوەستیای بوو.
دەمێ زەكەریای فریشتە دیتی، تێكچوو و ترس كەفتە دلێ وی.
فریشتەی گۆتێ: «زەكەریا نەترسە، چنكو داخوازا تە هاتە بهیستن و دێ هەڤژینا تە ئەلیزابێتێ كوڕەك بیت و تۆ دێ ناڤێ وی كەیە یوحەننا.
ئەو دێ بیتە كەیف و دلخۆشیا تە و دێ گەلەك مرۆڤ ب ژدایكبوونا وی دلشاد بن.
چنكو دێ ل بەرامبەری خودانی گەلەك یێ مەزن بیت. ب ئێكجاری شەراب و مەیێ ڤەناخۆت و هێشتا ئەو د زكێ دایكا خۆ دا، دێ ژ گیانێ پیرۆز پڕ بیت.
دێ گەلەكان ژ گەلێ ئیسرائیل بۆ خودان خودایێ وان ڤەگەڕینیت.
دێ ب گیان و شیانا ئلیاسی ل پێش وی چیت، داكو دلێن بابان ڤەگەڕینیتە سەر زاڕۆكان و نەگوهداران ڤەگەڕینیتە ئاقلمەندیا چاكان ، داكو مللەتەكی بۆ خودانی ئامادە بكەت.»
ئینا زەكەریای پرسیارا فریشتەی كر: «دێ چەوا ژ ڤێ ئاخفتنێ پشت راست بم؟ چنكو ئەز كالەمێرم و هەڤژینا من ژی یا ب ناڤ ساڵ ڤە چووی.»
ئەڤجا فریشتەی بەرسڤا وی دا: «ئەز جبرائیلم ئەوێ ل بەر دەستێ خودێ راوەستیای، ئەز یێ هنارتیم داكو ل گەل تە بئاخڤم و ڤێ مزگینیێ بدەمە تە.
ئەڤە تۆ دێ بێدەنگ مینی و نەشێی بئاخڤی تا وێ رۆژا ئەڤ تشتە ب ج‍‌ھ بهێن، چنكو تە باوەری ب ئاخفتنا من نەئینا، ئەوا دێ د دەمێ خۆ دا ب ج‍‌ھ هێت.»
د وی دەمی دا خەلكێ ژ دەرڤە چاڤەڕێی زەكەریای بوو، ئەو ژ بەر گیرۆبوونا وی د ناڤ پەرستگەهێ دا حێبەتی مابوون.
دەمێ زەكەریا دەركەفتی، نەشیا بۆ وان بئاخڤیت، ئینا وان زانی ئەوی د پەرستگەهێ ڤە بینینەكا دیتی. ئەو ب ئاماژەیان ل گەل وان ئاخفت و لال ما.
دەمێ رۆژێن خزمەتا وی ب دویماهی هاتین، بەرەڤ مالا خۆ ڤەگەڕیا.
پشتی وان رۆژان هەڤژینا وی ئەلیزابێت ب دوو گیان كەفت، لێ وێ پێنج هەیڤان خۆ ڤەشارت و گۆت:
«خودانی د ڤان رۆژان دا چەند باشی ل من كر! وی بەرێ خۆ دا رەوشا من و ئەو شەرمزاریا من د ناڤ مرۆڤان دا هەی، راكر!»
ل هەیڤا شەشێ جبرائیل ژ لایێ خودێ ڤە بۆ باژێڕەكێ جەلیل هاتە هنارتن، ناڤێ وی ناسیرە بوو،
داكو بچیتە نك كچەكا پاكیزە دەزگرا زەڵامەكێ ژ بنەمالا داوودی، ناڤێ وی یوسڤ بوو و ناڤێ وێ پاكیزەیێ مەریەم بوو.
فریشتە چوو ژۆر و گۆتێ: «سڵاڤ ل تە بن ئەوا كەرەم ل گەل هاتیە كرن، خودان ل گەل تەیە.»
ئینا مەریەم ژ بەر گۆتنێن فریشتەی تێكچوو و پرسیار ژ خۆ كر: «ئەرێ تۆ بێژی ئەڤ سڵاڤە چ بیت؟»
ئەڤجا فریشتەی گۆتێ: «مەریەم، تۆ نەترسە، كەرەم ژ نك خودێ بۆ تە هاتیە دان.
ئەڤە تۆ دێ ب دوو گیان كەڤی و دێ تە كوڕەك بیت، دێ ناڤێ وی كەیە عیسا.
دێ مەزن بیت و ب كوڕێ یێ هەری بلند هێتە نیاسین و خودان خودێ دێ تەختێ بابێ وی داوودی دەتێ.
دێ هەتا هەتایێ پاشایەتیێ ل بنەمالا یەعقوبی كەت و دویماهی بۆ پاشایەتیا وی نینە.»
مەریەمێ گۆتە فریشتەی: «دێ چەوا ئەڤ تشتە چێبیت، چنكو ئەز هێشتا كچم؟»
فریشتەی گۆتێ: «گیانێ پیرۆز دێ دادەتە سەر تە و شیانا یێ هەری بلند دێ سیبەرێ ل تە كەت. ژ بەر هندێ ئەو پیرۆزێ ژ تە دبیت دێ بێژنێ كوڕێ خودێ.
ئەڤە مرۆڤا تە ئەلیزابێت ژی د پیراتیا خۆ دا ب كوڕكەكی یا ب دوو گیان كەفتی. ئەوا ب خرشی دهاتە نیاسین، ئەڤە هەیڤا وێ یا شەشێیە.
چنكو چ تشت نینە د شیانا خودێ دا نەبیت.»
ئینا مەریەمێ گۆت: «ئەڤە ئەز بەنیا خودانیمە. بلا ئەوا تە گۆتی ب ج‍‌ھ بهێت.» پاشی فریشتە ژ نك چوو.
ل وان رۆژان مەریەم رابوو ب لەز چوو دەڤەرا چیایی بۆ باژێڕەكێ هۆزا یەهودای
و چوو د مالا زەكەریای ڤە و سڵاڤ ل ئەلیزابێتێ كر.
دەمێ ئەلیزابێتێ گو‍‌ھ ل سڵاڤا مەریەمێ بووی، ئەو زاڕۆكێ د زكێ وێ دا خۆ هەڵاڤێت و ئەلیزابێت ژ گیانێ پیرۆز پڕ بوو
و ب دەنگەكێ بلند گازی كر و گۆت: «تۆ ل ناڤ ژنان یا بەرەكەتداری، بەرهەمێ زكێ تە ژی یێ بەرەكەتدارە.
ئەڤە چ بەختەوەریەكە كو دایكا خودانێ من سەرەدانا من بكەت؟
چنكو دەمێ دەنگێ سڵاڤا تە گەهشتیە گوهێ من، زاڕۆكێ د زكێ من دا خۆ ژ كەیفان دا هەڵاڤێت.
خوزیكێن وێ یا باوەری ئینای، كو ئاخفتنا خودانی دێ ب ج‍‌ھ هێت، ئەوا ژ زاردەڤێ خودێ بۆ وێ هاتیە گۆتن.»
مەریەمێ گۆت: «دەروونێ من پەسنا خودانی دكەت
و گیانێ من ب خودێ، قورتالكەرێ من، گەلەك كەیفخۆش دبیت،
چنكو ئەوی بەرێ خۆ دا بەلەنگازیا بەنیا خۆ و ئەڤە ژ نوكە و پێڤە هەمی بەرەباب دێ بێژنە من: خوزیكێن تە.
شیانداری گەلەك كارێن مەزن ل من كرن، ناڤێ وی پیرۆزە.
دلۆڤانیا وی بەرەباب ل دویڤ بەرەبابی بۆ وانە، یێن كو ژ وی دترسن.
وی ب زەندێن خۆ كارەكێ ب هێز كر و ئەوێن د دلێ خۆ دا دفنبلند بەڵاڤ كرن.
ئەوێن ب شیان ژ تەختێ وان ئینانە خوارێ و ئەوێن هەژار بلند كرن.
یێن برسی ب تشتێن باش تێر كرن و یێن دەولەمەند ژی دەستڤاڵا هنارتن.
ئەوی دلۆڤانی ئینا بیرا خۆ و هاریكاریا خزمەتكارێ خۆ ئیسرائیل كر،
هەروەكو بۆ هەتا هەتایێ سۆز دایە باب و باپیرێن مە ئیبراهیم و دویندەها وی.»
مەریەم نێزیكی سێ هەیڤان ل نك ئەلیزابێتێ ما و پاشی ڤەگەڕیا مالا خۆ.
هندی ئەلیزابێت بوو، رۆژێن وێ ب دویماهی هاتن و زاڕۆك بوو.
هەڤسوی و مرۆڤێن وێ گو‍‌ھ لێ بوو، كو خودانی گەلەك دلۆڤانی یا پێ بری و گەلەك ل گەل وێ دلخۆش بوون.
ل رۆژا هەشتێ هاتن دا كوڕكی سونەت بكەن و وان دڤیا ب ناڤێ بابێ وی زەكەریای ناڤ بكەن،
لێ دایكا وی گۆت: «نەخێر، دێ ناڤێ وی كەینە: یوحەننا.»
وان گۆتێ: «كەسەك ژ هۆزا تە ب ڤی ناڤی نەهاتیە ناڤكرن.»
ئینا ئەوان ب ئاماژەیان گۆتە بابێ وی كا دڤێت ناڤێ وی بكەتە چ.
زەكەریای دەپەك ژ وان خواست و ل سەر نڤیسی: «ناڤێ وی یوحەننایە.» ئینا هەمی گوهشین.
ئێكسەر دەڤێ زەكەریای ڤەبوو و ئەزمانێ وی گەڕیا و ئاخفت و پەسنا خودێ كر.
هەمی ئاكنجیێن دەوروبەرێن وان ترسیان و ئەڤ رویدانە ل هەمی چیایێن یەهودیایێ بوونە بابەتێن ئاخفتنێن وان.
هەمی گوهداران كرە د دلێ خۆ دا و گۆتن: «ئەرێ تۆ بێژی ئەڤ كوڕكە دێ بیتە چ؟» چنكو دەستێ خودانی د گەل دا بوو.
بابێ وی زەكەریا ژ گیانێ پیرۆز پڕ بوو و ب سرۆشێ ئاخفت و گۆت:
«مەزناهی بۆ خودان خودایێ ئیسرائیل، چنكو سەرا گەلێ خۆ دا و رزگار كر
و بۆ مە شاخەكێ قورتالبوونێ ژ بنەمالا خزمەتكارێ خۆ داوودی دروست كر،
وەكو خودێ ل سەر ئەزمانێ پێغەمبەرێن خۆ یێن بەرێ و پیرۆز گۆتی،
بۆ قورتالبوونێ ژ هەمی دوژمن و كیندارێن مە،
كو پشتی ئەم ژ دەستێ دوژمنێن مە قورتال كرین،
دا قورتالبوونێ ب رێكا لێبورینا گونەهێن وان بۆ خەلكێ وی رابگەهینی.
ژ هەستێن وی یێن دلۆڤان، دێ خودایێ مە ژ ژۆری، هەروەكو رۆژ دهەلێت، هێتە سەرەدانا مە،
داكو رۆناهیێ بدەتە وان، یێن ل تاریستان و سیبەرا مرنێ روینشتین، بەرێ مە ژی بدەتە رێكا ئاشتیێ.»
ئەو زاڕۆك مەزن دبوو و ب گیانی ب هێز دكەفت و تا رۆژا بۆ ئیسرائیلێ دیار بووی، ل چۆلی دژیا.
ل وی سەردەمی ئوگستۆسێ قەیسەر فەرمانەك دا، هەمی مرۆڤێن ئیمپراتۆریێ بهێنە سەرژمێركرن.
ئەڤە ئێكەم سەرژمێری بوو هاتیە كرن، دەمێ كرینیۆسی حوكمڕانی ل سوریایێ دكر.
ئینا هەمی چوونە باژێڕێن خۆ، دا ناڤێن خۆ تۆمار بكەن.
یوسڤ ژی ژ باژێڕێ ناسیرە ل دەڤەرا جەلیل چوو باژێڕێ داوودی یێ كو دبێژنێ بێت‌لەحم ل دەڤەرا یەهودیایێ، چنكو ئەو ژ بنەمال و بابكێ داوودی بوو،
دا ناڤێ وی ل گەل دەزگرا وی، مەریەمێ ئەوا دووگیان، بهێتە تۆماركرن.
دەمێ ئەو ل وێرێ، رۆژێن مەریەمێ تەمامبوون و بوو دەمێ زاڕۆكبوونێ.
وێ كوڕێ خۆ یێ نەخری بوو و د پێچكەكێ پێچا و د هافڕی دا رازاند، چنكو د خانی ڤە جهێ وان نەبوو.
ل وێ دەڤەرێ هندەك شڤان هەبوون ل چۆلی دمان، ب شەڤێ نوبەداری ل كەرێ پەزی دگرت.
ژ نشكەكێ ڤە فریشتەیەكێ خودانی بۆ وان دیار بوو و مەزناهیا خودانی دەوروبەرێن وان كرە رۆناهی و ترسەكا مەزن ئەو گرتن.
فریشتەی گۆتە وان: «نەترسن، ئەڤە ئەز یێ مزگینیا دلخۆشیەكا مەزن ددەمە هەوە، كو دێ بۆ هەمی مللەتی بیت.
ئەڤرۆ ل باژێڕێ داوودی قورتالكەرەك بۆ هەوە یێ ژ دایك بووی، ئەو ژی مەسیحێ خودانە.
نیشان ژی بۆ هەوە دێ ئەڤە بیت: دێ زاڕۆكەكێ د ناڤ پێچكێ دا پێچایی و د هافڕی دا رازایی بینن.»
ژ نشكەكێ ڤە گەلەك سەربازێن ئەسمانی ل گەل فریشتەی دیار بوون و پەسنا خودێ كرن و گۆتن:
«مەزناهی بۆ خودێ ل بلنداهیان و ل سەر ئەردی ژی ئاشتی بۆ مرۆڤان، یێن كو خودێ ژێ رازی.»
دەمێ فریشتەیان شڤان هێلاین و چووینە ئەسمانی، شڤانان گۆتە ئێكودوو: «ئەڤجا دا بچینە بێت‌لەحم، دا ئەڤ تشتێ رویدای و خودانی گەهاندیە مە، ببینین.»
شڤان ب لەز چوون، مەریەم و یوسڤ دیتن و زاڕۆك د هافڕی دا یێ رازایی بوو.
دەمێ دیتین، ئەو ئاخفتنا دەربارەی زاڕۆكی بۆ وان هاتیە گۆتن بەڵاڤ كر.
هەمی ئەوێن ئەڤ ئاخفتنە ژ شڤانان گو‍‌ھ لێ بووی، گوهشین.
لێ هندی مەریەم بوو، ئەڤ تشتە هەمی د دلێ خۆ دا هەلدگرتن و ب كویری هزر تێدا دكر.
شڤان ڤەگەڕیان سوپاسی و پەسنا خودێ دكر، ژ بەر بجههاتنا هەمی تشتێن دیتین و گو‍‌ھ لێ بووین، هەروەكو فریشتەی گۆتیە وان.
پشتی هەشت رۆژ ب سەر ژدایكبوونێ ڤە بورین، دەمێ سونەتكرنا وی هات و ناڤێ وی كرنە عیسا، هەروەكو ژ لایێ فریشتەی ڤە، بەری دایكا وی ب وی ب دووگیان بكەڤیت، ناڤ ل سەر هاتیە دانان.
دەمێ ل دویڤ دەستوورێ مووسای رۆژێن پاقژكرنا وان هاتین، وان كوڕك برە ئورشەلیمێ، دا پێشكێشی خودانی بكەن،
هەروەكو د دەستوورێ خودانی دا هاتیە نڤیسین: «هەر نەخریەك ژ نێران دبێژنێ پیرۆزێ خودانی»
و داكو قوربانەكی بدەن، وەكو د دەستوورێ خودانی دا هاتی: «ژ جۆتەكێ كەڤۆكان یان دوو تێژكێن كووتران».
زەڵامەك ل ئورشەلیمێ هەبوو دگۆتنێ شەمعون. یێ راست و ژ خودێ ترس بوو. چاڤەڕێی دلخۆشكرنا ئیسرائیلێ بوو و گیانێ پیرۆز ل سەر بوو.
ژ لایێ گیانێ پیرۆز ڤە بۆ وی هاتبوو دیاركرن، كو ئەو نامریت تاكو مەسیحێ خودانی نەبینیت.
گیانێ پیرۆز بەرێ شەمعونی دابوو پەرستگەهێ، ل دەمێ دایك و بابێن عیسایێ زاڕۆك ئەو گەهاندیە پەرستگەهێ، دا بۆ وی ئەوا د دەستووری دا هاتی، بكەن.
شەمعونی ئەو هەمبێز كر و سوپاسیا خودێ كر و گۆت:
«ئەڤجا خودانێ من یێ باڵادەست، نوكە تۆ ل دویڤ گۆتنا خۆ بەنیێ خۆ ب ئاشتیانە بەرددەی،
چنكو ئەڤە چاڤێن من قورتالكرنا تە دیتن،
ئەوا تە ل بەر چاڤێ هەمی مللەتان ئامادەكری.
ئەوە رۆناهی بۆ ڤەكرنا چاڤێن نەجوهیان و شانازی بۆ گەلێ تە ئیسرائیل. »
دایك و بابێن عیسای ژ ڤان ئاخفتنێن دەربارەی وی هاتینە گۆتن، گوهشین.
شەمعونی ئەو بەرەكەتدار كرن و گۆتە مەریەما دایكا وی: «بەرێ خۆ بدێ، ئەڤ زاڕۆكە بۆ كەفتن و رابوونا گەلەكان ل ئیسرائیلێ یێ هاتیە دانان و وەكو نیشانەكێ دێ بەرهنگاری لێ هێتە كرن،
داكو دلێن گەلەكان بهێنە ئاشكراكرن. دێ شیرەك دلێ تە ژی كون كەت.»
پێغەمبەرەكا ژن هەبوو، دگۆتنێ حەننا كچا پەنوئێلی ژ هۆزا ئاشێر بوو و گەلەك یا ب ناڤ ساڵ ڤە چوویبوو. پشتی شوی كرنێ حەفت ساڵان ل گەل مێرێ خۆ ژیابوو
و هەشتێ و چوار ساڵان بیژن مابوو. ئەوێ پەرستگە‍‌ھ ب ج‍‌ھ نەدهێلا، ب شەڤ و رۆژان پەرستن دكر ب رۆژی گرتنێ و نڤێژان.
د وی دەمی دا ئەو هات و ل نك وان راوەستیا و دەست ب پەسنا خودێ كر و دەربارەی عیسای بۆ هەمیێن چاڤەڕێیا رزگاركرنا ئورشەلیمێ دكرن، ئاخفت.
پشتی وان هەمی تشت ل دویڤ دەستوورێ خودانی ب ج‍‌ھ ئیناین، بۆ باژێڕێ خۆ ناسیرە كو دكەڤیتە هەرێما جەلیل ڤەگەڕیانە ڤە.
زاڕۆك مەزن دبوو و ب هێز دكەفت و ژ ئاقلمەندیێ پڕ دبوو و كەرەما خودێ ل سەر بوو.
دایك و بابێن وی ساڵێ جارەكێ ژ بەر جەژنا دەربازبوونێ دچوونە ئورشەلیمێ.
دەمێ ژیێ وی گەهشتیە دوازدە ساڵیێ، ل دویڤ داب و نەریتێن جەژنێ چوونە ئورشەلیمێ.
پشتی رۆژێن جەژنێ تەمام بووین، دەمێ رێكا ڤەگەڕیانێ گرتی، عیسایێ لاوك ما ل ئورشەلیمێ و دایك و بابێن وی نەدزانی.
وان هزر كر یێ د ناڤ كاروانیان دا، رێیا رۆژەكێ چوون، پشتی هنگی د ناڤ كەس و ناسیارێن خۆ دا لێ گەڕیان.
لێ دەمێ نەدیتی، ڤەگەڕیانە ئورشەلیمێ و لێ گەڕیان.
پشتی هنگی ب سێ رۆژان عیسا ل پەرستگەهێ دیت یێ د ناڤبەرا مامۆستایێن دەستووری دا روینشتیە و گوهێ خۆ ددەتێ و پرسیاران ژ وان دكەت.
هەمی مرۆڤێن ئاخفتنێن وی دبهیستن، ژ تێگەهشتن و بەرسڤێن وی دگوهشین.
دەمێ چاڤێ دای و بابێن وی ب وی كەفتی، مەندەهۆش بوون و دایكا وی گۆتێ: «كوڕێ من، تە بۆچی ئەڤە ب سەرێ مە ئینا؟ ئەز و بابێ تە ب شەپرزەیی ل تە دگەڕیاین.»
عیسای بەرسڤا وان دا و گۆت: «بۆچی هوین ل من دگەڕیان؟ ئەرێ ما هەوە نەدزانی كو پێدڤیە ئەز ل مالا بابێ خۆ بم؟ »
لێ ئەو د ئاخفتنێن وی نەگەهشتن.
پاشی ل گەل وان بەرەڤ باژێڕێ ناسیرە ڤەگەڕیا و گوهدارێ وان بوو و دایكا وی ئەڤ تشتە هەمی د دلێ خۆ دا هەلدگرتن.
عیسای ژی ژ لایێ ئاقلمەندی و بەژنێ و رەزامەندیێ ل نك خودێ و مرۆڤان گەشە دكر.
ل ساڵا پازدێ ژ حوكمڕانیا تیبەریۆسێ قەیسەر، دەمێ پیلاتۆسێ پونتی والیێ یەهودیایێ و هێرودێس دەستهەلاتدارێ جەلیلێ و برایێ وی فیلیپۆس دەستهەلاتدارێ ئیتوریایێ و تراخونیتسێ و لیسانیۆس دەستهەلاتدارێ ئەبیلینێ،
دەمێ حەننان و قەیافای سەرۆكاتیا كاهنان دكر، هنگی پەیڤا خودێ بۆ یوحەننایێ كوڕێ زەكەریای ل چۆلی هات.
یوحەننا چوو ل سەرانسەری رویبارێ ئوردن رادگەهاند، كو خەلك ل خۆ بزڤڕن و بهێنە تافیركرن ، داكو ل گونەهێن وان بهێتە بورین.
هەروەكو د پەرتووكا ئیشایا پێغەمبەری دا هاتیە نڤیسین: «دەنگەك ل چۆلی گازی دكەت: ‹رێكێ بۆ خودانی ئامادە بكەن، پەیادەڕێیان بۆ هاتنا وی راست بكەن،
هەر نهالەك دێ هێتە داگرتن و هەر چیایەك و گرەك دێ هێتە نزمكرن و ئەو رێیێن خواروڤیچ دێ هێنە راستكرن و یێن سەخت و دژوار دێ هێنە خۆشكرن
و هەر كەسەك دێ قورتالبوونا خودێ بینیت.›»
یوحەننای دگۆتە ئەوان كەسان، یێن لێ خڕڤەبووین دا ل سەر دەستێ وی بهێنە تافیركرن: «هەی تێژكێن ماران، كێ هوین ئاگەهدار كرینە ژ تۆڕەبوونا بهێت بڕەڤن؟
بەرهەمێن وەسا بدەن، كو هەژی لخۆزڤڕینێ بن و د دلێ خۆ دا نەبێژن ‹ئیبراهیم بابێ مەیە.› چنكو ئەز دبێژمە هەوە: خودێ دشێت ژ ڤان بەران زاڕۆكان بۆ ئیبراهیمی دەربئێخیت.
ئەڤە دەڤێ بڤری یێ ل سەر رەها دارێ هاتیە دانان. ئەڤجا هەر دارەكا بەرهەمەكێ باش نەدەت، دێ هێتە بڕین و بۆ ناڤ ئاگری هێتە هاڤێتن.»
كۆمبوویان پرسیار ژێ كر: «پا ئەم چ بكەین؟»
یوحەننای بەرسڤا وان دا: «یێ دوو كراس هەبن، بلا ئێكی بدەتە یێ بێ كراس و یێ خوارن هەبیت، بلا هەر وی تشتی بكەت.»
هندەك باجگر ژی هاتن داكو بهێنە تافیركرن و پرسیار ژێ كر: «مامۆستا، ئەم چ بكەین؟»
یوحەننای گۆتە وان: «پتر ژ وێ یا بۆ هەوە هاتیە دەستنیشانكرن وەرنەگرن.»
هندەك سەربازان ژی پرسیار ژێ كر «پا ئەم چ بكەین؟» یوحەننای بەرسڤا وان دا: «ب زۆری یان ب شاهدەییا ب درەو پارەی ژ كەسێ نەستینن و ب مووچێ خۆ رازی بن.»
خەلك یێ ب هیڤی بوو و هەمیان دەربارەی یوحەننای د دلێ خۆ دا پرسیار دكر: «ئەرێ ئەڤە مەسیحە؟»
یوحەننای بەرسڤا وان هەمیان دا: «ئەز هەوە ب ئاڤێ تافیر دكەم، لێ ئێكێ ژ من ب هێزتر دێ هێت، ئەوێ ئەز هەژی هندێ نینم بەندكێ پێلاڤا وی ڤەكەم. ئەو دێ هەوە ب گیانێ پیرۆز و ئاگری تافیر كەت.
ملهێبا وی یا د دەستی دا، دا بێدەرا خۆ پاقژ بكەت و گەنمی د عومبارا خۆ دا خڕڤە كەت، لێ كایێ دێ ب ئاگرەكێ ناڤەمریێت، سوژیت.»
هۆسا یوحەننای دەربارەی گەلەك تشتێن دی ئاگەهداریا خەلكی دكر و مزگینی ددا وان.
لێ هێرودێسێ دەستهەلاتدار، ئەوێ یوحەننای پاشڤە بری، ژ بەر ژنبرا وی هیرودیایێ و ژ بەر هەمی خرابیێن وی كرین،
زێدەباری ئەوان هەمیان ئەو رابوو یوحەننا كرە د زیندانێ دا.
دەمێ هەمی خەلك هاتینە تافیركرن، عیسا ژی هاتە تافیركرن. دەمێ عیسای نڤێژ دكر، ئەسمان ڤەبوو
و گیانێ پیرۆز ب شێوەیێ لەشەكێ وەكو كووترەكێ هاتە خوار و ل سەر وی دادا و دەنگەك ژ ئەسمانی هات و گۆت: «تۆ كوڕێ منی یێ خۆشتڤی، دلێ من ب تە یێ خۆش بووی.»
دەمێ عیسای دەست پێ كری، ژیێ وی نێزیكی سی‍‌ھ ساڵان بوو و ل نك خەلكی ئەو بوو، كو عیسا كوڕێ یوسڤێ كوڕێ هێلیێ
كوڕێ مەتتاتێ كوڕێ لێڤیێ كوڕێ مەلكیێ كوڕێ یاننایێ كوڕێ یوسڤێ
كوڕێ مەتتیسیایێ كوڕێ عامۆسێ كوڕێ ناحومێ كوڕێ حێسلیێ كوڕێ نەجایێ
كوڕێ مەحەتێ كوڕێ مەتتیسیایێ كوڕێ شێمەینێ كوڕێ یوسێخێ كوڕێ یۆدایێ
كوڕێ یۆحەنانێ كوڕێ ریسایێ كوڕێ زەروبابلێ كوڕێ شەئەلتئێلێ كوڕێ نەریێ
كوڕێ مەلكیێ كوڕێ ئەددیێ كوڕێ قۆسامێ كوڕێ ئێلمودامێ كوڕێ ئێری،
كوڕێ یەشوعێ كوڕێ ئەلیعەزەرێ كوڕێ یۆریمێ كوڕێ مەتتاتێ كوڕێ لێڤیێ
كوڕێ شەمعونێ كوڕێ یەهودایێ كوڕێ یوسڤێ كوڕێ یۆنامێ كوڕێ ئێلیاقیمێ
كوڕێ مەلەیایێ كوڕێ مەنای كوڕێ مەتتاسایێ كوڕێ ناتانێ كوڕێ داوودێ
كوڕێ یێشایێ كوڕێ عوڤێدێ كوڕێ بۆعەزێ كوڕێ سەلمۆنێ كوڕێ نەحشۆنێ
كوڕێ عەمینادابێ كوڕێ رامێ كوڕێ حەسرۆنێ كوڕێ پێرێزێ كوڕێ یەهودایێ
كوڕێ یەعقوبێ كوڕێ ئیسحاقێ كوڕێ ئیبراهیمێ كوڕێ تێرەحێ كوڕێ ناحۆرێ
كوڕێ سەرووگێ كوڕێ رەعۆیێ كوڕێ پەلەگێ كوڕێ عێڤەرێ كوڕێ شێلەحێ
كوڕێ قێنانێ كوڕێ ئەرپەخشادێ كوڕێ سامێ كوڕێ نوحێ كوڕێ لامەخێ
كوڕێ مەتوشێلەحێ كوڕێ حەنۆخێ كوڕێ یارەدێ كوڕێ مەهەلەلئێلێ كوڕێ قینانێ
كوڕێ ئەنۆشێ كوڕێ شیتێ كوڕێ ئادەمێ كوڕێ خودێیە.
عیسا ژ رویبارێ ئوردن ڤەگەڕیا، یێ پڕ ژ گیانێ پیرۆز. گیانی چل رۆژان رێڤەبەریا وی د چۆلی دا دكر
و ژ لایێ ئبلیسی ڤە دهاتە تاقیكرن. ل وان رۆژان چ نەخوار، دەمێ هەر چل رۆژ ب دویماهی هاتین، برسی بوو.
ئبلیسی گۆتێ: «ئەگەر تۆ كوڕێ خودێی، بێژە ڤی بەری ببە نان.»
عیسای بەرسڤا وی دا و گۆتێ: «یا هاتیە نڤیسین: ‹مرۆڤ نە ب تنێ ب نانی دژیت.› »
پاشی ئبلیسی ئەو برە جهەكێ بلند و هەمی پاشایەتیێن جیهانێ د چركەیەكێ دا نیشا دان
و گۆتێ: «ئەز دێ ڤێ هەمی دەستهەلاتێ و مەزناهیا وان دەمە تە، چنكو ئەڤ جیهانە بۆ من یا هاتیە دان و ئەز ژی دێ دەمە وی یێ من بڤێت،
لەوما ئەگەر تۆ بۆ من سوجدێ ببەی، هەمی دێ بنە یێن تە.»
عیسای بەرسڤا وی دا و گۆتێ: «یا هاتیە نڤیسین: ‹بۆ خودان خودایێ خۆ سوجدێ ببە و وی ب تنێ بپەرێسە.› »
پاشی ئبلیسی ئەو برە ئورشەلیمێ و ل سەر لێڤا بانێ پەرستگەهێ راوەستاند و گۆتێ: «ئەگەر تۆ كوڕێ خودێی، خۆ ژ ڤی بانی بهاڤێژە خوارێ،
چنكو یا هاتیە نڤیسین: ‹ئەو دێ دەربارەی تە فەرمانێ ل فریشتەیێن خۆ كەت، كو تە بپارێزن›
و ‹ئەو دێ تە ل سەر دەستێن خۆ هەلگرن، نەكو پێیێ تە ب بەرەكی بكەڤیت.› »
ئینا عیسای بەرسڤا وی دا و گۆتێ: «یا هاتیە گۆتن: ‹خودان خودایێ خۆ تاقی نەكە.› »
دەمێ ئبلیسی هەمی تاقیكرن ب دویماهی ئیناین، عیسا تا دەمەكی هێلا و چوو.
عیسا ب هێزا گیانی بەرەڤ دەڤەرا جەلیل ڤەگەڕیا و ناڤودەنگێن وی ل هەمی گوندێن دەوروبەران بەڵاڤ بوون.
ئەوی ل كنیشتەیێن وان فێركرن دكر و هەمیان پەسنا وی دكر.
پاشی هاتە باژێڕكێ ناسیرە، ئەوێ لێ مەزن بووی و ل دویڤ تیتالێن خۆ، ل رۆژا شەمبیێ چوو د كنیشتەیێ ڤە و رابوو ژ پێرڤە داكو بخوینیت.
ئینا پەرتووكا ئیشایا پێغەمبەری داڤێ. دەمێ پەرتووك ڤەكری ئەو ج‍‌ھ دیت، ئەوێ كو تێدا هاتبوو نڤیسین:
«گیانێ خودانی ل سەر منە، چنكو وی ئەز یێ ب زەیتكرنێ دەستنیشان كریم دا مزگینیێ بدەمە بەلەنگازان. ئەز یێ هنارتیم دا ئازادیێ بۆ دیلكریان و بینینێ بۆ كۆرەیان رابگەهینم، دا ئازادیێ بدەمە بندەستان،
دا مزگینیا هاتنا ساڵا خودانی یا رەزامەندیێ رابگەهینم.»
پاشی پەرتووك پێچا و داڤ خزمەتكاری و روینشت و هەمی كەسێن ل كنیشتەیێ ئامادە، چاڤێن وان رك ل عیسای بوون
و دەست پێ كر و گۆتە وان: «ئەڤرۆ ب بهیستنا هەوە، ئەڤ نڤیسارە ب ج‍‌ھ هات.»
هەمیان ل وێرێ بەحسێ وی ب باشی دكر، ژ گۆتنێن چاكانە یێن ژ دەڤێ وی دەركەفتین، حێبەتی دبوون و پرسیار دكر: «ما ئەڤە نە كوڕێ یوسڤیە؟»
ئەڤجا گۆتە وان: «بێگۆمان هوین دێ ڤێ گۆتنێ بێژنە من: ‹نۆژدارۆ، خۆ چارەسەر بكە!› و ئەوێن مە بهیستین تە ل كەفەرناحوم یێن كرین، ل باژێڕێ خۆ ژی بكە.»
هەروەسا گۆت: «راستیێ دبێژمە هەوە: چ پێغەمبەر د باژێڕێ خۆ دا ناهێنە وەرگرتن.
ئەز راستیێ دبێژمە هەوە: ل سەردەمێ ئلیاسی، دەمێ سێ ساڵ و شەش هەیڤان باران نەباری و كولبەكا مەزن ل ئەردی هەمیێ چێبووی، گەلەك بیژن ل ئیسرائیلێ هەبوون،
لێ ئلیاس بۆ كەسەكێ ژ وان نەهاتبوو هنارتن، ژبلی بیژنەكێ ل سارێفاتا سایدایێ.
هەروەسا ل سەردەمێ ئەلیشەع پێغەمبەری ژی گەلەك ل ئیسرائیلێ هەبوون تووشی گوڕیاتیێ ببوون، لێ كەس ژ وان نەخۆشان چارەسەر نەبوو، ب تنێ نەعمانێ سوری نەبیت.»
دەمێ ئەوێن د كنیشتەیێ ڤە، ئەڤ ئاخفتنە بهیستی، هەمی تۆڕە بوون
و رابوون ژ باژێڕی دەرئێخست و برە سەر لێڤا وی چیایێ باژێڕێ وان ل سەر هاتیە ئاڤاكرن، داكو تێدا بهاڤێژن.
لێ عیسا د ناڤ هەمیان را دەرباز بوو و چوو.
ئەو خوار كەفتە كەفەرناحوم، كو باژێڕەكێ دەڤەرا جەلیلێیە و د شەمبیێ دا خەلك فێر دكر.
خەلك ژ فێركرنا وی حێبەتی بوون، چنكو ئاخفتنا وی یا ب دەستهەلات بوو.
ل كنیشتەیێ زەڵامەك هەبوو گیانەكێ پیس د وی دا بوو، ئینا وی ب دەنگەكێ بلند گازی كر:
«وەی! عیسایێ ناسیرەیی، تە چ ژ مە دڤێت؟ تۆ هاتی مە ژ ناڤ ببەی؟ ئەز دزانم تۆ كی، تۆ پیرۆزێ خودێی.»
عیسای ئەو پاشڤە بر و گۆتێ: «بێدەنگ بە و ژێ دەركەڤە.» ئەڤجا ئەجنەی ئەو ل ناڤەندا وان ل ئەردی دا و بێی ب ئێشینیت ژێ دەركەفت.
گوهشینێ هەمی گرتن و پرسیار ژ ئێكودوو كرن «ئەڤە چ پەیڤە؟ ب دەستهەلات و هێز فەرمانێ ل گیانێن پیس دكەت و دەردكەڤن!»
ئێدی ناڤودەنگێن وی ل هەمی دەڤەرێن دەوروبەر بەڵاڤ دبوون.
پاشی ژ كنیشتەیێ دەركەفت و چوو مالا شەمعونی. تایەكا گەلەك دژوار ل خەسیا شەمعونی بوو. ئەڤجا وان هاریكاری ژێ خواست.
عیسا ل هنداڤ وێ راوەستیا و ل تایا وێ خوڕی، ئینا تایێ بەردا و ئێكسەر رابووڤە و وێ دەست ب خزمەتا وان كر.
دەمێ رۆژ ئاڤا دبوو، هەر كەسێ نەخۆشەك هەبا و چ جۆرێ ئێشێ لێ با، دئینانە نك عیسای و ئەوی دەستێن خۆ ددانانە سەر هەر ئێك ژ وان و ساخ دكرن.
ئەجنە ژی ژ گەلەكان دەردكەفتن و گازی دكرن و دگۆتن: «تۆ كوڕێ خودێی.» ئەوی ئەو پاشڤە دبرن و نەدهێلا بئاخڤن، چنكو وان دزانی ئەو مەسیحە.
دەمێ رۆژ هەلاتی، چوو جهەكێ ڤەدەر و خەلك لێ دگەڕیا و هاتنە نك وی و مانە پێڤە كو وان ب ج‍‌ھ نەهێلیت،
لێ گۆتە وان: «دڤێت ئەز مزگینیا پاشایەتیا خودێ بگەهینمە باژێڕێن دی ژی، چنكو ژ بەر ڤێ چەندێ ئەز یێ هاتیمە هنارتن.»
و ل كنیشتەیێن یەهودیایێ ب بەردەوامی مزگینی رادگەهاند.
رۆژەكێ عیسا ل بەر لێڤا دەریاكا جەنیسارتێ یێ راوەستیای بوو، خەلك ژ بۆ گوهدانا پەیڤا خودێ ل دۆرێن وی خڕڤە ببوون.
وی دوو بەلەم ل بەر كنارێ دەریاكێ دیتن، ماسیگر ژێ دەركەفتبوون و تۆڕێن خۆ دشویشتن.
عیسا ل ئێك ژ وان بەلەمان سیار بوو، ئەو ژی یا شەمعونی بوو. داخواز ژێ كر پیچەكێ ژ دێمی دویر بئێخیت، پاشی روینشت و ژ ناڤ بەلەمێ خەلك فێر كر.
دەمێ ئاخفتنێن خۆ ب دویماهی ئیناین، گۆتە شەمعونی: «بهاژو جهێ كویر و تۆڕێن خۆ بۆ نێچیرێ بهاڤێژن.»
ئینا شەمعونی بەرسڤا وی دا: «هێژا، مە ب درێژاهیا شەڤێ هەمیێ بزاڤ كر و مە چ ماسی نەگرتن، لێ ژ بەر پەیڤا تە ئەز دێ تۆڕان هاڤێژم.»
دەمێ تۆڕ هاڤێتین، گەلەك ماسی گرتن، تاكو داڤێن تۆڕێن وان دەست ب قەتیانێ كری.
ئەڤجا ب نیشانان گازی كرە هەڤپشكێن خۆ یێن دی، ئەوێن د بەلەما دی دا، داكو بهێن و هاریكاریا وان بكەن. ئینا هاتن و هەردوو بەلەم تژی ماسی كرن و ژ گرانیا ماسیان چ نەما بوو بەلەم نقووم ببن،
لێ دەمێ شەمعونی ئەڤ تشتە دیتی، خۆ هاڤێتە بەر پێیێن عیسای و گۆت: «خودان، ژ من دویر بكەڤە، چنكو ئەز مرۆڤەكێ گونەهكارم.»
چنكو ئەو و هەمی مرۆڤێن ل گەل وی، ژ بەر وێ نێچیرا ماسیێن وان گرتین، مەندەهۆش ببوون،
یەعقوب و یوحەننایێ كوڕێن زەبەدی هەڤپشكێن شەمعونی ژی مەندەهۆش ببوون. ئینا عیسای گۆتە شەمعونی: «نەترسە! ژ نوكە و پێڤە تۆ دێ نێچیرڤانیا مرۆڤان كەی.»
پشتی وان بەلەم ڤەگەڕاندینە دێمی، هەمی تشت هێلان و ب دویڤ وی كەفتن.
جارەكێ عیسا ل باژێڕەكی بوو، مرۆڤەك لێ هەبوو لەشێ وی هەمیێ گوڕی بوو. دەمێ وی عیسا دیتی خۆ دەڤ و دەڤ هاڤێتە ئەردی و هیڤی ژێ كرن و گۆت: «خودان! ئەگەر تە بڤێت، تۆ دشێی من پاقژ بكەی.»
عیسای دەستێ خۆ درێژ كر و دەست كرێ و گۆت: «من دڤێت، پاقژ ببە.» د ج‍‌ھ دا گوڕیاتی ژێ چوو
و شیرەت لێ كر كو ڤێ چەندێ نەبێژیتە كەسەكی، لێ گۆتێ: «هەڕە و خۆ نیشا كاهنی بدە و ئەوا مووسای فەرمان پێ دای پێش پاقژبوونا خۆ ڤە پێشكێش بكە، وەك شاهدەیی بۆ هەمیان.»
لێ ناڤودەنگێن عیسای پتر بەڵاڤ دبوون و خەلكەكێ زۆر كۆم دبوون، داكو گوهێ خۆ بدەنێ و ل سەر دەستێ وی ژ نەساخیێن خۆ ساخ ببن.
لێ وی خۆ ڤەدكێشا جهێن ڤەدەر و نڤێژدكرن.
رۆژەكێ عیسای فێركرن دكر، ل وێرێ هندەك فەریسی و مامۆستایێن دەستووری، ئەوێن ژ هەمی گوندێن جەلیل و یەهودیایێ و ئورشەلیمێ هاتین، د روینشتی بوون. هێزا خودانی بۆ ساخكرنێ ل گەل وی بوو.
وی دەمی هندەك زەڵامان فاڵنجیەك ل سەر نڤینان هەلگرتبوو، ئەوان بزاڤ دكر ببەنە ژۆر و داننە بەر عیسای.
دەمێ ژ بەر بۆشاتیێ ئەو نەشیاین بچنە ژۆر، برە سەربانی و هندەك قەرمید راكرن و ب نڤین ڤە داهێلا نیڤا مالێ، ل بەرسینگێ عیسای.
دەمێ عیسای باوەریا وان دیتی، گۆت: «كوڕێ من ، ل گونەهێن تە هاتە بورین.»
ئینا مامۆستایێن دەستووری و فەریسیان دەست پێ كر د دلێ خۆ دا گۆتن: «ئەڤە كیە كوفریان دكەت؟ كی دشێت ل گونەهان ببوریت، ئەگەر خودێ نەبیت؟»
لێ عیسای زانی ئەو هزرێ د چ دا دكەن، ئەڤجا بەرسڤا وان دا و گۆتێ: «هوین چ هزرا د دلێ خۆ دا دكەن؟
كیژ ژ ڤان ب ساناهیترە مرۆڤ بێژیت: ‹ل گونەهێن تە هاتە بورین،› یان بێژیت: ‹رابە و بڕێڤە هەڕە!›؟
لێ ئەز دێ بۆ هەوە سەلمینم كو كوڕێ مرۆڤ ل سەر ئەردی دەستهەلاتا هەی ل گونەهان ببوریت» و گۆتە ئەوێ فاڵنجی: «دبێژمە تە: رابە و نڤینێن خۆ هەلگرە و هەڕە مالا خۆ.»
د ج‍‌ھ دا ل پێش چاڤێن وان رابوو و نڤینێن خۆ هەلگرتن و پەسنا خودێ دكر و چوو مالا خۆ.
مەندەهۆشیێ هەمی گرتن، وان پەسنا خودێ دكر و پڕ ب ترس ڤە دگۆتن: «ئەڤرۆ مە تشتێن حێبەتی دیتن.»
پشتی هنگی دەركەفت و باجگرەك دیت، ناڤێ وی لێڤی بوو، ل جهێ باج وەرگرتنێ یێ روینشتی بوو، عیسای گۆتێ: «ب دویڤ من بكەڤە.»
ئەوی هەمی تشت ب ج‍‌ھ هێلان و ب دویڤ وی كەفت.
پاشی لێڤی مێڤانداریەكا مەزن بۆ وی ل مالا خۆ دانا و جەماوەرەكێ مەزن ژ باجگر و كەسێن دی ل گەل وان ل سەر سفرێ د روینشتی بوون.
مامۆستایێن دەستووری و فەریسیان نەرازیبوونا خۆ بەرامبەری شاگردێن عیسای دیار كر و گۆتن: «بۆچی هوین ل گەل باجگر و گونەهكاران دخۆن و ڤەدخۆن؟»
ئینا عیسای بەرسڤا وان دا و گۆت: «مرۆڤێن ساخلەم پێدڤی ب نۆژداری نینە، لێ مرۆڤێن نەساخ.
ئەز نەهاتیمە گازی مرۆڤێن راستدار بكەم، لێ گازی یێن گونەهكار بكەم، دا ل خۆ بزڤڕن.»
ئەڤجا گۆتنێ: «شاگردێن یوحەننای و فەریسی گەلەك جاران رۆژیان دگرن و نڤێژان دكەن، لێ شاگردێن تە دخۆن و ڤەدخۆن.»
عیسای بەرسڤا وان دا و گۆت: «ما هوین دشێن وە ل داخوازكریێن داوەتێ بكەن، ب رۆژی بن، هێشتا زاڤا د ناڤ وان دا؟
لێ رۆژ دێ هێن، زاڤا دێ ژ ناڤ وان هێتە راكرن، هنگی ل وان رۆژان ئەو دێ رۆژیان گرن.»
نموونەیەك ژی بۆ وان ئینا «كەسەك نینە پاتەكی ژ جلكەكێ نوی ڤەكەت، داكو جلكەكێ كەڤن پێ پنی بكەت. ئەگەر وە بكەت، دێ جلكێ نوی دڕینیت، پاتێ ژ جلكێ نوی ڤەكری ب كێر جلكێ كەڤن ناهێت.
كەس ژی شەرابا نوی ناكەتە مەشكێن كەڤن، ئەگەر وە كر شەرابا نوی دێ مەشكان پەقینیت و شەراب دێ هێتە رشتن و مەشك دێ پویچ بن.
لێ دڤێت شەرابا نوی بكەنە مەشكێن نوی.
كەسەك ژی نینە شەرابا كەڤن ڤەخۆت و دلێ وی بچیتە شەرابا نوی، چنكو دێ بێژیت ‹یا كەڤن خۆشترە.›»
رۆژەكا شەمبی، عیسا د ناڤ دەخلان را دبوری و شاگردێن وی گولیێن گەنمی ڤەڕویچكاندن، ب دەستان دپەرخاندن و دخوارن.
ئینا هندەك فەریسیان گۆتە وان: «بۆچی هوین وێ دكەن، ئەوا نە رەوایە د شەمبیێ دا بهێتە كرن؟»
ئینا عیسای بەرسڤا وان دا: «ما هەوە نە خواندیە كا داوودی چ كر، دەمێ ئەو و یێن ل گەل وی برسی بووین،
چەوا چوو د مالا خودێ ڤە و نانێ پێشكێشیێ راكر و خوار و دا یێن ل گەل خۆ ژی، هەر چەندە ژبلی كاهنان نە رەوایە كەس ژێ بخۆت؟ »
پاشی گۆتە وان: «كوڕێ مرۆڤ خودانێ شەمبیێیە.»
رۆژەكا دی ژ رۆژێن شەمبیێ عیسا چوو د كنیشتەیێ ڤە و دەست ب فێركرنێ كر، مرۆڤەك ل وێرێ بوو، دەستێ وی یێ راستێ یێ گورۆج بوو.
هنگی چاڤێ مامۆستایێن دەستووری و فەریسیان ل عیسای بوو، كا دێ ل شەمبیێ نەساخان ساخ كەت، چنكو ئەو ل تشتەكی دگەڕیان عیسای پێ تاوانبار بكەن.
لێ وی زانی چ د دلێ وان دایە، ئینا گۆتە زەڵامێ دەست گورۆج: «رابە و ل ناڤەندێ راوەستە.» ئەو رابوو و راوەستیا.
عیسای گۆتە وان: «ئەز دێ پرسیارەكێ ژ هەوە كەم: ئایا ل شەمبیێ كرنا كارێ باش رەوایە، یان كارێ خراب؟ قورتالكرنا ژیانەكێ یان ژناڤبرن؟»
ئەو ل وان هەمیان زڤڕی، پاشی گۆتە وی مرۆڤی: «دەستێ خۆ درێژ كە.» وی ژی وە كر و دەستێ وی ساخ بووڤە.
وی دەمی ئەو ژ تۆڕەییێ پڕ بوون و پرسیار ژ ئێكودوو كرن، كا چ ل عیسای بكەن.
د وان رۆژان دا عیسا چوو چیای داكو نڤێژان بكەت. وی ئەو شەڤ هەمی ب نڤێژان ڤە بۆ خودێ بوراند
و دەمێ رۆژ هەلاتی، گازی شاگردێن خۆ كر و دوازدە كەس ژ وان هەلبژارتن و ناڤێ ‹هنارتی› دانا سەر وان و ئەو دوازدە كەس ژی ئەڤە بوون:
شەمعون ئەوێ عیسای ناڤێ وی كریە پەترۆس، ئەندراوسێ برایێ وی، یەعقوب، یوحەننا، فیلیپۆس، بەرتولماوس،
مەتتا، توماس، یەعقوبێ كوڕێ حەلفی، شەمعونێ دگۆتنێ وەڵاتپەروەر ،
یەهودایێ كوڕێ یەعقوبی و یەهودایێ ئەسخەریوتی، ئەوێ بوویە كەسەكێ بێبەخت.
پشتی عیسا ل گەل وان هاتیە خوارێ، ل ئەردەكێ دەشت راوەستیا. ل وێرێ جەماوەرەكێ مەزن ژ شاگردان و خەلكەكێ گەلەك زۆر ژ هەمی دەڤەرا یەهودیایێ، ئورشەلیمێ و كنارێ سور و سایدا، لێ كۆم بوون.
ئەو هاتبوون دا گوهێ خۆ بدەنە عیسای و ژ ئێشێن خۆ ساخ ببن. ئەوێن ژ لایێ گیانێن پیس ڤە دهاتنە ئێشاندن، ساخ دبوون
و هەمی خەلكێ بزاڤ دكر دەستێ خۆ لێ بدەن، چنكو هێزەك ژ وی دەردكەفت و هەمی ساخ دكرن.
بەرێ خۆ دا شاگردێن خۆ و گۆت: «خوزیكێن هەوە گەلی هەژاران، چنكو پاشایەتیا خودێ یا هەوەیە،
خوزیكێن هەوە برسیێن نوكە، چنكو هوین دێ تێر بن. خوزیكێن هەوە ئەوێن هوین نوكە دگریێن، چنكو هوین دێ كەنن.
خوزیكێن هەوە دەمێ خەلك پێخەمەت كوڕێ مرۆڤ كەربێ ژ هەوە رادكەن و هەوە ژ ناڤ خۆ دەردئێخن و هەوە فهێت دكەن و ناڤێ هەوە ب خرابی دئینن.
ل وێ رۆژێ دلشاد بن و خۆ بهەڵاڤێژن، چنكو خەلاتێ هەوە ل ئەسمانی یێ مەزنە. بابكالێن وان ژی هۆسا رەفتار ل گەل پێغەمبەران دكر.
لێ نەخوزیكێن هەوە گەلی دەولەمەندان، چنكو هەوە خۆشیا خۆ وەرگرت.
نەخوزیكێن هەوە گەلی تێربوویێن ئەڤرۆ، چنكو هوین دێ برسی بن. نەخوزیكێن هەوە ئەوێن هوین ئەڤرۆ دكەنن، چنكو هوین دێ كەڤنە شینی و گرینێ.
نەخوزیكێن هەوە دەمێ هەمی مرۆڤ بەحسێ هەوە ب باشی دكەن، چنكو بابكالێن وان ژی هۆسا رەفتار ل گەل پێغەمبەرێن درەوین دكر.
لێ دبێژمە هەوەیێن گوهدار: حەز ژ دوژمنێن خۆ بكەن و ل گەل ئەوێن كەربێ ژ هەوە رادكەن، چاكیێ بكەن.
ئەوێن نفرینان ل هەوە دكەن، بەرەكەتێ بۆ بخوازن و ئەوێن زیانێ ل هەوە دكەن، نڤێژان بۆ بكەن.
ئەگەر ئێكی زللەهەك دانا رویێ تە، رویێ خۆ یێ دی ژی بدە بەر و ئەگەر ئێكی كوركێ تە ژ تە ستاند، كراسێ خۆ ژی ژێ ڤەنەگێڕە.
هەر كەسێ ژ تە بخوازیت تۆ بدێ و هەر كەسێ تشتێن تە ژ تە بستینیت، داخوازا وان ژێ نەكە.
كا چەوا هەوە دڤێت مرۆڤ رەفتارێ ل گەل هەوە بكەن، هوین ژی وەسا رەفتارێ ل گەل بكەن.
ئەگەر هەوە ب تنێ حەز ژ وان كر، یێن حەز ژ هەوە دكەن، ئەرێ پا باشیا هەوە چیە؟ خۆ مرۆڤێن گونەهكار ژی حەز ژ وان كەسان دكەن، ئەوێن حەز ژ وان دكەن.
ئەگەر هوین ل گەل وان د باش بن ئەوێن ل گەل هەوە د باش، ئەرێ پا باشیا هەوە چیە؟ خۆ مرۆڤێن گونەهكار ژی ڤێ چەندێ دكەن.
ئەگەر هەوە قەر ل گەل وان كەسان كر، یێن هوین بزانن دێ قەرێ هەوە ل هەوە زڤڕینن، ئەرێ پا باشیا هەوە چیە؟ خۆ مرۆڤێن گونەهكار ژی ل گەل گونەهكاران ڤێ چەندێ دكەن.
لێ حەز ژ دوژمنێن خۆ بكەن و چاكیێ بكەن و قەری بدەن بێی كو چاڤەڕێی ڤەگەڕاندنێ بن. ب ڤی رەنگی خەلاتێ هەوە دێ یێ مەزن بیت و دێ بنە كوڕێن خودایێ هەری بلند. چنكو ئەو چاكیا خۆ ب سەر مرۆڤێن نەسوپاسدار و خراب دا دادرێژیت.
دلۆڤان بن هەروەكو بابێ هەوە یێ دلۆڤانە.
دادكرنێ نەكەن، هوین ناهێنە دادكرن. گونەهباركرنێ نەكەن، هوین ناهێنە گونەهباركرن. لێبورینێ بكەن، دێ ل هەوە هێتە بورین.
بدەن، دێ بۆ هەوە هێتە دان، پیڤانەكا باش و قوتای و حەشاندی و د سەردا چووی دێ هێتە د كۆشا هەوە دا. چنكو ب وی پیڤەرێ هوین دپیڤن، دێ بۆ هەوە ب وی هێتە پیڤان.»
بۆ وان نموونەیەك ژی ئینا: «ما كۆرە دشێت كۆرەی ب رێ ببەت؟ ئەرێ ما هەردوو ناكەڤنە د چاڵەكێ دا؟
شاگرد د سەر مامۆستایێ خۆ را نینە. لێ ئەوێ راهێنانێن خۆ تەمام كرین، دێ وەكو مامۆستایێ خۆ لێ هێت.
بۆچی تۆ زلكی د چاڤێ برایێ خۆ دا دبینی، لێ تۆ گاریتەی د چاڤێ خۆ دا نابینی؟
یان چەوا تۆ دشێی بێژییە برایێ خۆ: ‹برا، بهێلە ئەز زلكی ژ چاڤێ تە بینمە دەرێ› و گاریتەی د چاڤێ خۆ دا نابینی؟ هەی دووڕوی، ل پێشیێ گاریتەی ژ چاڤێ خۆ بینە دەرێ، هنگی دێ باش بینی كو زلكێ د چاڤێ برایێ خۆ دا بینیە دەرێ.
دارا باش بەرهەمێ خراب نادەت و دارا خراب ژی بەرهەمێ باش نادەت.
هەر دارەك ژ بەرهەمێ وێ دهێتە نیاسین. هژیر ژ ستریان ناهێنە چنین و تری ژ دڕیان ناهێتە چنین.
مرۆڤێ باش، باشیێ ژ گەنجینەیا دلێ خۆ یا باش دەردئێخیت، لێ مرۆڤێ خراب، خرابیێ ژ گەنجینەیا دلێ خۆ یا خراب دەردئێخیت، چنكو دل ب چ یێ پڕە، دەڤ وێ دبێژیت.»
بۆچی هوین دبێژنە من: ‹خودان، خودان!› و هوین ب گۆتنێن من ناكەن؟
هەر كەسێ بهێتە نك من و گوهێ خۆ بدەتە گۆتنێن من و كار پێ بكەت، ئەز دێ دیار كەم كا وەكو چیە:
ئەو وەكو وی مرۆڤیە ئەوێ خانیەك ئاڤا كری، كو كویر كۆلای و بنیات دانایە سەر كەڤری. گاڤا ئاڤ رابووی و لافاوان ل وی خانی دای، نەشیا بلڤینیت، چنكو باش هاتبوو ئاڤا كرن.
لێ هەر كەسێ گو‍‌ھ لێ بووی و كار پێ نەكەت، ئەو وەكو وی مرۆڤیە یێ خانیەكێ بێ بنیات ل سەر ئەردی ئاڤا كری. دەمێ لافاوێ لێ دای، د ج‍‌ھ دا هەڕفی و هەڕفینا وی خانی گەلەك یا مەزن بوو.
پشتی هەمی ئاخفتنێن خۆ گەهاندینە گوهێن خەلكی، چوو باژێڕێ كەفەرناحوم.
سەرلەشكەری بەنیەكێ نەساخ هەبوو، كەفتبوو دەراڤێ مرنێ و ل نك وی گەلەك یێ خۆشتڤی بوو.
دەمێ وی گو‍‌ھ ل ناڤودەنگێن عیسای بووی، ریهسپیێن جوهیان هنارتنە نك وی و هیڤی ژێ كرن، كو بهێت بەنیێ وی چارەسەر بكەت،
دەمێ گەهشتینە نك عیسای، گەلەك هیڤی ژێ كرن و گۆتنێ: «ئەڤ سەرلەشكەرە گەلەكێ هەژییە تۆ داخوازا وی ب ج‍‌ھ بینی،
چنكو ئەو گەلەك حەز ژ مللەتێ مە دكەت و كنیشتە یا بۆ مە ئاڤاكری.»
ئینا عیسا ل گەل وان چوو. دەمێ گەهشتیە نێزیكی مالا سەرلەشكەری، وی هندەك هەڤالێن خۆ هنارتن داكو بێژنە عیسای: «ئەزبەنی، خۆ زەحمەت نەدە، چنكو ئەز نە هەژی وێ چەندێمە تۆ بهێیە مالا من.
لەوما من خۆ هەژی نەدیت بهێمە دیدارا تە. هەما ب تنێ تۆ پەیڤەكێ بێژە، دێ خزمەتكارێ من ساخ بیت.
چنكو ئەز ب خۆ ژی یێ ل ژێر دەستهەلاتێ دانایمە و من سەرباز یێ ل ژێر دەستێ خۆ هەین، دەمێ دبێژمە ئێك ژ وان: ‹هەڕە!› دچیت و دبێژمە ئێكێ دی: ‹وەرە!› دهێت. دبێژمە بەنیێ خۆ: ‹ڤێ بكە!› دكەت.»
دەمێ عیسای گو‍‌ھ ل ڤێ چەندێ بووی، ژ وی حێبەتی بوو، پاشی ل خۆ زڤڕی و بەرێ خۆ دا وێ كۆما ل دویڤ دهێت و گۆت: «ئەز دبێژمە هەوە: خۆ ل ئیسرائیلێ ژی من باوەریەكا هۆسا مەزن نەدیتیە.»
دەمێ هنارتیێن سەرلەشكەری ڤەگەڕیاینە مال، دیتن بەنی یێ ساخ بووی.
ل رۆژا دی ئەو چوو باژێڕەكی دبێژنێ ‹نایین›. شاگردێن وی و خەلكەكێ زۆر ل گەل چوون.
دەمێ نێزیكی دەرگەهێ باژێڕی بووی، وەسا چێبوو مریەك ژ باژێڕی دەردئێخست، كو ئێكانەیێ دایكا خۆ یا بیژن بوو و جەماوەرەكێ مەزن ژ باژێڕی د گەل وێ دا بوو.
دەمێ خودانی دایك دیتی، دلێ وی پێ سۆت و گۆتێ: «نەكە گری».
پاشی چوو پێش و دەست كرە داربەستێ، ئەو مرۆڤێن مری ل سەر ملێن وان، راوەستیان. وی گۆت: «لاوو، ئەز دبێژمە تە: رابە.»
ئینا مری روینشت و دەست ب ئاخفتنێ كر و عیسای ئەو گەنج دا دەستێ دایكا وی.
ترسێ دلێ وی خەلكی هەمیێ گرت، پەسنا خودێ كر و گۆتن: «پێغەمبەرەكێ مەزن یێ ژ ناڤ مە رابووی و خودێ سەرەدانا گەلێ خۆ كر.»
ئەڤ دەنگوباسە ل هەمی دەڤەرا یەهودیایێ و دەوروبەرێن وێ بەڵاڤ بوو.
شاگردێن یوحەننای ئەڤە هەمی گەهاندنە وی. یوحەننای گازی كرە دوو شاگردێن خۆ
و هنارتنە نك خودانی، داكو بێژنێ: «ئەرێ تۆی ئەوێ دێ هێت، یان خۆ ل هیڤیا ئێكێ دی بگرین؟»
دەمێ هەردوو زەڵام هاتینە نك وی، گۆتنێ: یوحەننایێ تافیركەر ئەم یێن هنارتینە نك تە و دبێژیت: «ئەرێ تۆی ئەوێ دێ هێت یان خۆ ل هیڤیا ئێكێ دی بگرین؟»
ل وی دەمی عیسای گەلەك ژ نەساخی و دەرد و گیانێن پیس ساخ كرن و بیناهی دا گەلەك مرۆڤێن كۆرە.
ئینا عیسای بەرسڤا وان دا و گۆت: «هەڕن ئەوا هەوە دیتی و بهیستی بگەهیننە یوحەننای: كۆرە یێ دبینن، لەنگ یێ بڕێڤە دچن، گوڕی یێ پاقژ دبن، كەڕ یێ دبهیسن، مری یێ رادبنەڤە و مزگینی بۆ بەلەنگازان دهێتە دان.
خوزیكێن وی یێ د من نەهەلنگڤیت.»
چەوا هنارتیێن یوحەننای چوون، عیسا بۆ وی خەلكێ كۆمبووی دەربارەی یوحەننای دەست ب ئاخفتنێ كر و گۆت: «هوین دەركەفتنە چۆلی دا چ ببینن؟ لەڤەنەكێ ب بای دهەژیێت؟
ئەڤجا هوین دەركەفتن دا چ ببینن؟ مرۆڤەكێ جلكێن نازك ل بەر؟ ئەڤە ئەوێن جلێن بهاگران ل بەر خۆ دكەن و د خۆشیان دا دژین د كۆچكێن پاشایان دانە.
ئەڤجا هوین دەركەفتن دا چ ببینن؟ ئایا پێغەمبەرەكی؟ بەلێ، ئەز دبێژمە هەوە، ژ پێغەمبەرەكی ژی زێدەترە.
ئەڤەیە یێ دەربارەی وی هاتیە نڤیسین: ‹ئەڤە ئەز دێ هنارتیێ خۆ ل پێشیا تە هنێرم، ئەوێ دێ رێكا تە ل پێشیا تە ئامادە كەت.›
ئەڤجا ئەز دبێژمە هەوە: ل ناڤ وان یێن كو ژ ژنان بووین، كەس ژ یوحەننای مەزنتر نینە. لێ بچویكترین كەس ل پاشایەتیا خودێ ژ وی مەزنترە.»
هەمی خەلكێ گو‍‌ھ ل ڤێ چەندێ بووی، تا باجگران ژی، نەخشەیێ خودێ بۆ قورتالبوونێ پەسەند كر، چنكو ئەو ل سەر دەستێ یوحەننای هاتبوونە تافیركرن.
لێ فەریسی و زانایێن دەستووری حەزا خودێ رەتكر، چنكو ل سەر دەستێ یوحەننای نەهاتبوونە تافیركرن.
«ئەرێ ئەز مرۆڤێن ڤی نفشی ب چ هەڤبەر بكەم؟ ئەرێ وەكو چنە؟
ئەو وەكو زاڕۆكێن ل بازاڕی دروینشتینە، گازی ئێكودوو دكەن و دبێژن: ‹مە زڕنا بۆ هەوە لێ دا، هەوە سەما نەكر و مە بۆ هەوە ڤەلووراند، هەوە نەكرە گری.›
یوحەننایێ تافیركەر هات، نە نانی دخۆت، نە ژی مەیێ ڤەدخۆت و هەوە گۆت: ‹ئەجنەیەكێ تێدا›.
كوڕێ مرۆڤ هات، دخۆت و ڤەدخۆت و هەوە گۆت ‹ئەڤە مرۆڤەكە یێ ب دویڤ خوارنێ و مەی ڤەخوارنێ كەفتی و هەڤالێ باجگر و گونەهكارانە›،
لێ ئاقلمەندی ژ لایێ هەمی زاڕۆكێن وێ ڤە دهێتە سەلماندن.»
ئێك ژ فەریسیان داخواز ژێ كر خوارنێ ل گەل وی بخۆت، چوو مالا یێ فەریسی و ل سەر سفرێ روینشت.
ل وی باژێڕی ژنكەكا گونەهكار هەبوو. چەوا وێ ژنكێ زانی عیسا ل مالا یێ فەریسی یێ روینشتیە ، گولاڤدانكەكا روینێ بێهنخۆش هەلگرت و چوو مالا وی
و ل پشت عیسای و ل نك هەردوو پێیێن وی و ب گریڤە راوەستیا و دەست پێ كر ب رۆندكان پێیێن وی تەڕ كرن و ب پرچا خۆ زوها كرن و هەردوو پێیێن وی ماچی دكرن و بێهنا خۆش لێ دكر.
دەمێ فەریسیێ ئەو مێڤان كری ئەڤ تشتە دیتی، ل گەل خۆ ئاخفت و گۆت: «ئەگەر ئەڤە پێغەمبەر با، دا زانیت كا كیە دەست دكەتێ و كا چ جۆرە ژنە، چنكو یا گونەهكارە!»
ئینا عیسای بەرسڤا وی دا و گۆت: «شەمعون، من تشتەكێ هەی دێ بۆ تە بێژم» شەمعونی بەرسڤ دا و گۆت: «بێژە مامۆستا.»
عیسای گۆت: «قەردەرەكی دوو قەردار هەبوون، پێنج سەد دینار ل سەر ئێكی بوون و پێنجی دینار ل سەر یێ دی.
لێ چنكو هەردوویان پارە نەبوون وان قەران ژ سەر خۆ راكەن، ئینا خودانێ قەری هەردوو ئازا كرن. تۆ بێژی كی ژ وان هەردوویان دێ پتر حەز ژ وی كەت؟»
ئینا شەمعونی بەرسڤ دا: «ئەز دبێژم ئەوێ وی پتر پێ هێلاین.» عیسای گۆتێ: «تە راست گۆت.»
پاشی بەرێ خۆ دا ژنكێ و گۆتە شەمعونی: «تۆ ڤێ ژنكێ دبینی؟ ئەز هاتمە مالا تە و تە ئاڤەك نەئینا ئەز پێیێن خۆ پێ بشووم، لێ ئەوێ پێیێن من ب رۆندكان شویشتن و ب پرچا خۆ ڤەمالین.
تە ماچەك ژی ل من نەدا، لێ ئەڤە ئەز هاتیمە د ژۆرڤە ئەو ژ ماچیكرنا پێیێن من ڤەنەبوویە.
تە زەیت ل سەرێ من نەكر، لێ ئەوێ روینێ بێهنخۆش ل پێیێن من كر.
ژ بەر ڤێ چەندێ ئەز دبێژمە تە، ل گونەهێن وێ یێن گەلەك هاتە بورین، لەوما وێ گەلەك حەزژێكرن دیار كر. ئەوێ پیچەك ژی لێ دهێتە بورین، پیچەك حەزژێكرنێ دكەت.»
پاشی گۆتە وێ: «ل گونەهێن تە هاتە بورین.»
ئینا ئەوێن ل سەر سفرێ روینشتی د ناڤبەرا خۆ دا گۆتن: «ئەڤە كیە هەتا ل گونەهان ژی ببوریت؟»
وی گۆتە ژنكێ «باوەریا تە تۆ قورتال كری، ب ئاشتی هەڕە».
پشتی هنگی ل باژێڕ و گوندان دگەڕیا، مزگینیا پاشایەتیا خودێ ددا و خەلك پێ ئاگەهدار دكر. دوازدە شاگردێن وی د گەل دا بوون،
هندەك ژنك ژی ل گەل بوون، ئەوێن ل سەر دەستێ وی ژ نەساخی و گیانێن پیس ساخ بووین. ئەو ژی ئەڤە بوون: مەریەم ئەوا ب مەجدەلی دهاتە بناڤكرن، یا كو حەفت ئەجنە ژ وێ دەرئێخستین،
یووەننا هەڤژینا حوزایێ بریكارێ هێرودێسی، سۆسن و گەلەكێن دی یێن ب مالێ خۆ هاریكاریا وی دكرن.
دەمێ گەلەك خەلك ژ هەمی باژێڕان لێ خڕڤەبووین، نموونەیەك بۆ وان ئینا:
«تۆڤچین دەركەفت دا تۆڤێ خۆ بهاڤێژیت. دەمێ وی تۆڤ دهاڤێت، هندەك ژێ كەفتە سەر رێكێ، ئینا پێ لێ هاتە دانان و باڵندەیێن ئەسمانی خوار.
هندەك ژی كەفتە سەر كەڤری و پشتی شین بووی، هشك بوو، چنكو یێ بێ ش‍‌ھ بوو.
هندەك ژی كەفتە ناڤ ستریان و ل گەل ئێك شین بوون، ئینا ستریان ئەو فەتساند.
هندەك ژی كەفتە ئەردەكێ باش و دەمێ شین بووی، بەرهەمەكێ سەد جاركی دا.» ئەڤ چەندە گۆت و گازی كر: «ئەوێ گو‍‌ھ بۆ بهیستنێ هەبن، بلا ببهیسیت.»
شاگردێن وی پرسیار ژێ كر: «مەبەستا ڤێ نموونەیێ چیە؟»
ئینا گۆت: «تێگەهشتنا نهێنیێن پاشایەتیا خودێ بۆ هەوە یا هاتیە دان، لێ بۆ مرۆڤێن دی ئەز ب نموونەیان دئاخڤم، داكو لێ ‹بنێڕن و نەبینن، ببهیسن و تێنەگەهن›.
ئەڤەیە مەبەستا نموونەیێ: تۆڤ پەیڤا خودێیە.
ئەو تۆڤێ كەفتیە سەر رێكێ، ئەو كەسن یێن گو‍‌ھ ل پەیڤێ دبن، پاشی ئبلیس دهێت و پەیڤێ ژ دلێ وان دڕەڤینیت، نەكو باوەریێ بینن و قورتال ببن.
ئەو تۆڤێ كەفتیە سەر كەڤری، ئەو كەسن یێن دەمێ گو‍‌ھ ل پەیڤێ دبن ب دلخۆشی وەردگرن و ئەو كەس د بێ رەهن، دەمەكێ كورت باوەریێ دئینن و د دەمێ تاقیكرنێ دا دەست ژ پەیڤێ بەرددەن.
ئەو تۆڤێ كەفتیە د ناڤ ستریان دا، ئەو كەسن یێن پەیڤێ دبهیسن، لێ ئەو ب خەم و دەولەمەندی و خۆشیێن ژیانێ ڤە مژویل دبن و پێ دهێنە فەتساندن و بەرهەمێ گەهشتی نادەن.
لێ ئەو تۆڤێ كەفتیە سەر ئەردێ باش، ئەو كەسن یێن پەیڤێ دبهیسن و د دلەكێ باش و راست دا ڤەدشێرن و ب خۆڕاگریێ بەرهەمی ددەن.
كەسەك چرایەكی هەلناكەت و ب ئامانەكی بنخێڤیت، یان ژی دانیتە دبن تەختی ڤە، لێ ددانیتە سەر چرادانكێ، داكو ئەوێن دهێنە د ژۆرڤە رۆناهیێ ببینن.
چ ڤەشارتی نینن ئاشكرا نەبن و چ نهێنی نینن كو نەهێنە زانین و نەكەڤنە بەر رۆناهیێ.
ئەڤجا هایدار بن كا چەوا گوهداریێ دكەن، چنكو ئەوێ هەیی دێ پتر بۆ وی هێتە دان و ئەوێ نەیی، خۆ یێ هزر بكەت یێ ویە ژی، دێ ژێ هێتە ستاندن.»
د وی دەمی دا، دایك و برایێن وی هاتن و دڤیان بچنە نك، لێ ژ بەر قەرەبالغا مرۆڤان نەشیان بگەهنێ.
ئینا گۆتنێ: «دایكا تە و برایێن تە ژ دەرڤە د راوەستیاینە، دڤێن تە ببینن.»
لێ وی بەرسڤا وان دا و گۆت: «دایكا من و برایێن من ئەون یێن گو‍‌ھ ل پەیڤا خودێ دگرن و پێ دكەن.»
رۆژەكێ ئەو و شاگردێن خۆ ل بەلەمەكێ سیار بوون و گۆتە وان: «دا دەرباز بینە رەخێ دی یێ دەریاكێ» و هاژوتن.
ئەو یێ د دەریاكێ دا بەلەمێ دهاژون و عیسا نڤست. ژ نشكەكێ ڤە باڕۆڤەیەكێ ب سەر دەریاكێ دا گرت و بەلەم تژی ئاڤ دكر و كەفتنە د مەترسیێ دا.
ئینا چوونە نك عیسای و هشیار كرن و گۆتنێ: «مامۆستا، مامۆستا ئەم دێ ژناڤچین!» عیسا ژ خەو رابوو و ل با و پێلێن ئاڤێ حەیتاند، ئینا د ج‍‌ھ دا راوەستیان و ئارامی پەیدا بوو.
پاشی گۆتە وان: «كا باوەریا هەوە؟» ئینا ترسیان و گوهشین و گۆتنە ئێكودوو: «ئەڤە كیە؟ ئەو فەرمانێ ل بای و ئاڤێ ژی دكەت و گوهێ خۆ ددەنێ!»
پاشی گەهشتنە دەڤەرا جەراسینیان، كو دكەڤیتە بەرامبەری دەڤەرا جەلیل.
دەمێ عیسا پەیا بووی و گەهشتیە هشكاتیێ، زەڵامەكێ خەلكێ وی باژێڕی كەفتە بەرسینگێ وی، كو ئەجنە تێدا ئاكنجی ببوون. ئەوی زەڵامی ژمێژە جلك نەكربوونە بەر خۆ و د خانیان ڤە نەدژیا، لێ هەر ل ناڤ گۆڕستانان بوو.
دەمێ چاڤێ وی ب عیسای كەفتی، كرە هەوار و كەفتە بەر پێیێن وی و ب دەنگەكێ بلند گۆت: «تە چ ژ من دڤێت، عیسایێ كوڕێ خودایێ هەری بلند؟ ئەز هیڤیێ ژ تە دكەم من ئەشكەنجە نەدەی.»
چنكو عیسای فەرمان دابوو گیانێ پیس ژ وی مرۆڤی دەركەڤیت. ئەو گیان گەلەك جاران ل سەر وی زاڵ دبوو، هندی ب بەند و زنجیران گرێ دابا و زێرەڤانی لێ كربا، ئەو دا بەندێن خۆ شكێنیت و ئەجنەی ئەو دڕەڤاندە چۆلی.
ئینا عیسای پرسیار ژێ كر: «ناڤێ تە چیە؟» گۆت: «لەشكەر»ە، چنكو گەلەك ئەجنە چووبوونە د ناڤ وی دا.
ئەجنەیان هیڤی ژ عیسای كرن، كو بەرێ وان نەدەتە چاڵا بێ بن.
ل وێرێ، ل قونتارا چیای، رەڤدەیەكا مەزن یا بەرازان دچەری، ئینا ئەجنەیان هیڤی ژ عیسای كرن، كو دەستویریێ بدەتێ داكو بچنە د بەرازان دا، ئینا رێ دایێ.
ئەڤجا ئەجنە ژ وی مرۆڤی دەركەفتن و چوونە د بەرازان دا، ئینا رەڤدە ژ وێ قونتارا رك بەرەڤ دەریاكێ بەزی و خۆ هاڤێتە تێدا و خەندقی.
دەمێ گاڤانان ئەڤ رویدانە دیتی، رەڤین و ل باژێڕی و گوندان راگەهاند.
خەلك دەركەفتن داكو وێ رویدانێ ببینن و هاتنە نك عیسای و دیت ئەو مرۆڤێ ئەجنە ژێ دەركەفتین، ل بەر پێیێن عیسای یێ روینشتیە و جلكێن ل بەر و یێ ل سەر هشێن خۆ، ئینا ترسیان.
ئەوێن ئەڤ رویدانە ژی دیتی و كا چەوا ئەو مرۆڤێ ئەجنە تێدا ئاكنجی ساخ بوو، بۆ خەلكی ڤەگێڕا.
ئینا هەمی خەلكێ دەڤەرا جەراسینیان داخواز ژ عیسای كر كو ژ نك وان بچیت، چنكو ترسەكا مەزن ب سەر وان دا هات، ئینا عیسا ل بەلەمێ سیار بوو و ڤەگەڕیا ڤە.
ئەوێ ئەجنە ژێ دەركەفتین، هیڤی ژ عیسای كرن كو بهێلیت ل گەل وی بیت، لێ عیسای ڤەگەڕاندەڤە و گۆتێ:
«هەڕە مالا خۆ و كا خودێ چەند بۆ تە كر، بۆ خەلكی دیار كە.» ئینا ئەو چوو و ل هەمی باژێڕی دگەڕیا و كا عیسای چەند بۆ كربوو رادگەهاند.
دەمێ عیسا ڤەگەڕیایە ڤە، جەماوەرەكی پێشوازیا وی كر، چنكو هەمی ب ژڤانێ هاتنا وی بوون.
وەسا چێبوو زەڵامەكی دگۆتنێ یائیرۆس، سەرۆكەكێ كنیشتەیێ بوو، هات و خۆ هاڤێتە بەر پێیێن عیسای و هیڤی ژێ كرن، ل گەل بچیتە مالا وی.
چنكو كچەكا ئێكانە هەبوو، ژیێ وێ نێزیكی دوازدە ساڵان بوو، ل بەر مرنێ بوو. دەمێ عیسا ب رێ دچوو، جەماوەری د ناڤ خۆ دا ئاسێ دكر.
ژنكەك ل وێرێ هەبوو، ئەو دوازدە ساڵ بوو خوین ژ بەر دچوو و چ مالێ هەی دابوو نۆژداران، لێ ل سەر دەستێ چ ژ وان ساخ نەببوو.
ئەو هاتە نك و ژ پشتێ ڤە دەستێ خۆ كرە ریشالۆكەكا كراسێ وی و د ج‍‌ھ دا خوینژبەرچوونا وێ راوەستیا.
عیسای گۆت: «كێ دەستێ خۆ كرە من؟» دەمێ هەمیان ماندەل كری، پەترۆسی گۆت: «مامۆستا، خەلكی دەوروبەرێن تە یێن تەنگ كرین و تە پال ددەن.»
لێ عیسای گۆت: «كەسەكی دەستێ خۆ كرە من، چنكو من هەست پێ كر هێزەك ژ من دەركەفت.»
دەمێ ژنكێ دیتی ئەو نەهاتە ڤەشارتن، هات و دلەرزی و خۆ هاڤێتە بەر پێیێن عیسای و ل پێش چاڤێن هەمیان گۆت كا ژ بەر چ وێ دەست هاڤێتە عیسای و كا چەوا د ج‍‌ھ دا ساخ بوو.
عیسای گۆتێ: «كچا من، باوەریا تە تۆ ساخ كری، ب ئاشتی هەڕە.»
هێشتا ئەو دئاخفت، كەسەك ژ مالا سەرۆكێ كنیشتەیێ هات و گۆتێ: «كچا تە مر، ئەڤجا پتر زەحمەتێ بۆ مامۆستای چێنەكە.»
لێ دەمێ عیسای ئەڤ چەندە بهیستی، گۆتێ: «نەترسە، ب تنێ باوەریێ بینە و كچا تە دێ ساخ بیت.»
دەمێ گەهشتیە مال، نەهێلا كەسەك ژبلی پەترۆسی و یوحەننای و یەعقوبی و دایك و بابێن كچكێ ل گەل بچیتە ژۆر.
هەمیان بۆ دكرە گری و سینگێ خۆ ڤەدقوتا، ئینا گۆت: نەكەنە گری! ئەو نە مریە، لێ یا نڤستیە.
ئینا ئەو پێ كەنین، چنكو وان دزانی یا مری.
دەستێ وێ گرت و گازی كرێ و گۆت: «كچكێ، رابە.»
گیانێ وێ ڤەگەڕیاڤە و ئێكسەر رابوو، عیسای فەرمان دا وان كو خوارنێ بدەنێ.
دایك و بابێن وێ گوهشین، لێ وی ئەو راسپاردن كو ڤێ رویدانێ نەبێژنە كەسێ.
عیسای هەر دوازدە شاگرد خڕڤەكرن و شیان و دەستهەلات ل سەر ئەجنەیان و ساخكرنا نەخۆشیان دا وان
و هنارتن داكو پاشایەتیا خودێ بۆ خەلكێ رابگەهینن و ژ نەساخیان ساخكەن
و گۆتە وان: «بۆ رێكێ چ تشتان هەلنەگرن، نە داری و نە چانتكی و نە نانی و نە پارەیان و بلا كەسێ دوو كراس د گەل دا نەبن.
چ مالا هوین بچنێ، ل وێرێ بمینن، هەتا هوین ژ وی باژێڕی دەردكەڤن.
ئەگەر خەلكێ باژێڕەكی هوین قەبیل نەكرن، دەمێ ژ باژێڕی دەردكەڤن، تۆزێ ژ پێیێن خۆ داقوتن، دا ل سەر وان ببیتە شاهدەیی.»
ئەڤجا ئەو دەركەفتن و چوونە گوندان و ل هەمی جهان مزگینی دگەهاند و خەلك ساخ دكرن.
هێرودێسێ دەستهەلاتدار، ئەو هەمی رویدانێن چێدبوون بهیستن. ئینا هزرێن هێرودێسی ئالۆز بوون، چنكو هندەكان دگۆت: ‹یوحەننا ژ ناڤ مریان یێ رابووی.›
هندەكان ژی دگۆت: ‹ئلیاس یێ دیار بووی› و هندەكێن دی دگۆت: ‹ئێك ژ پێغەمبەرێن كەڤن یێ ژ مرنێ رابووی.›
هێرودێسی گۆت: «من سەرێ یوحەننای یێ دایە بڕین، لێ ئەو كیە، ئەوێ ئەز ڤان تشتان دەربارەی وی دبهیسم؟» و وی بزاڤ دكر ببینیت.
پشتی هنارتی ڤەگەڕیاین، هەمی كریارێن وان كرین بۆ عیسای گۆتن. ئینا ئەوی هنارتی ب تنێ ل گەل خۆ برنە باژێڕەكی دبێژنێ بێت‌سایدا.
لێ خەلكی پێ زانی و خۆ گەهاندە وی. عیسای پێشوازیا وان كر و بۆ وان بەحسێ پاشایەتیا خودێ كر و ئەوێن پێدڤی ب چارەسەركرنێ ساخ كرن.
دەمێ رۆژ بەرەڤ ئاڤابوونێ ڤە چووی، هەر دوازدە شاگردێن وی هاتنە نك و گۆتنێ: «جەماوەری بڤەڕەڤینە دا بچنە گوند و مالێن دەوروبەر و ل وێرێ ڤەحەویێن و خوارنەكێ پەیدا بكەن، چنكو ئەم یێ ل جهەكێ ڤەدەر.»
ئینا گۆتە وان: «هوین تشتەكی بدەنێ دا بخۆن.» ئەوان گۆت: «مە ژ پێنج نان و دوو ماسیان پێڤەتر نینە، ژبلی ئەگەر ئەم بچین خوارنێ بۆ ڤی هەمی جەماوەری بكڕین.»
چنكو ژمارەیا زەڵامان نێزیكی پێنج هزاران بوو. پاشی گۆتە شاگردێن خۆ: «وان بكەنە كۆم كۆم و بلا پێنجی پێنجی روینن.»
ئەوان گۆتنا وی ب ج‍‌ھ ئینا و داخواز ژ هەمیان كر روینن.
عیسای هەر پێنج نان و هەردوو ماسی وەرگرتن، بەرێ خۆ دا ئەسمانی و سوپاسیا خودێ كر و ئەو كەر كرن و دانەڤ شاگردێن خۆ، داكو بدەنە جەماوەری.
هەمیان خوار و تێر بوون، پاشی دوازدە سەڵكێن پرتێن بەرمایكان راكرن.
دەمێ عیسای ب تنێ نڤێژ دكر و شاگردێن وی ل گەل بوون، پرسیار ژ وان كر: «خەلك دبێژن ئەز كیمە؟»
ئەوان بەرسڤا وی دا: «هندەك دبێژن تۆ یوحەننایێ تافیركەری و هندەك دبێژن تۆ ئلیاسی و هندەك ژی دبێژن تۆ ئێك ژ پێغەمبەرێن كەڤنی ژ مرنێ رابووی.»
عیسای گۆتە وان: «و هوین چ دبێژن، ئەز كیمە؟» پەترۆسی بەرسڤا وی دا و گۆت: «تۆ مەسیحێ خودێی.»
لێ عیسای ئەو ب توندی ئاگەهدار كرن و فەرمان ل وان كر، كو ڤێ چەندێ نەبێژنە كەسێ
و گۆت: «دڤێت كوڕێ مرۆڤ گەلەك ئازارێ بكێشیت و ژ لایێ ریهسپی و سەرۆكێن كاهنان و مامۆستایێن دەستووری ڤە بهێتە رەتكرن و بهێتە كوشتن و ل رۆژا سێیێ راببیتەڤە.»
پاشی گۆتە هەمیان «ئەگەر ئێكی بڤێت ل دویڤ من بهێت، بلا خۆ ماندەل بكەت و هەر رۆژ خاچا خۆ هەلگریت و ب دویڤ من بكەڤیت.
هەر كەسێ بڤێت ژیانا خۆ قورتال بكەت، دێ وێ ژ دەست دەت، لێ ئەوێ ژیانا خۆ پێخەمەتی من ژ دەست بدەت، دێ وێ قورتال كەت.
چنكو ما دێ چ مفایێ مرۆڤی بیت، ئەگەر جیهان هەمی ب دەست خۆ ڤە ئینا، لێ خۆ ژ دەست دا، یان ژی خۆ دۆڕاند ؟
چنكو هەر كەسێ شەرم بكەت دانپێدانێ ب من و پەیڤێن من بكەت، كوڕێ مرۆڤ ژی، دەمێ ب مەزناهیا خۆ و یا بابێ خۆ و یا فریشتەیێن پیرۆز ڤە دهێت، دێ شەرم كەت دانپێدانێ پێ بكەت.
لێ ب راستی دبێژمە هەوە: هندەك ژ ئەوێن ل ڤێرێ راوەستیاین، تاكو هاتنا پاشایەتیا خودێ نەبینن، تام ناكەنە مرنێ.»
نێزیكی هەشت رۆژان پشتی وان ئاخفتنان، عیسای پەترۆس و یوحەننا و یەعقوب ل گەل خۆ برن و سەركەفتە چیایەكی، داكو نڤێژێ بكەت.
دەمێ عیسای نڤێژ دكر، دیمەنێ دێمێ وی هاتە گوهۆڕین و جلكێن وی سپی بوون و تەیسین.
ژ نشكەكێ ڤە دوو زەڵام ل گەل دئاخفتن، ئێك ژ وان مووسا بوو و یێ دی ئلیاس بوو.
ئەو هەردوو ب مەزناهی دیار بوون و بەحسێ دەركەفتنا عیسای دكر كو نێزیك ببوو ل ئورشەلیمێ ب ج‍‌ھ بینیت.
خەوێ چاڤێن پەترۆسی و یێن د گەل دا گران كربوون، لێ دەمێ باش هشیار بووین، مەزناهیا وی و هەردوو مرۆڤێن ل گەل وی راوەستیای دیتن.
دەمێ هەردوو مرۆڤ ژ عیسای دویر كەفتین، پەترۆسی گۆتە عیسای: «مامۆستا، باش بوو ئەم ل ڤێرێ! ئەڤجا دا ئەم سێ كەپران چێكەین، ئێك بۆ تە، ئێك بۆ مووسای و ئێك ژی بۆ ئلیاسی.» پەترۆسی نەدزانی چ دبێژیت،
لێ دەمێ ئەوی ئەو ئاخفتن دكرن، عەورەك هات و سیبەر ل وان كر. دەمێ كەفتینە ناڤ عەوری، شاگرد ترسیان.
دەنگەك ژ عەوری هات و گۆت: «ئەڤەیە كوڕێ من یێ من هەلبژارتی، گوهێ خۆ بدەنێ.»
دەمێ دەنگ ژ عەوری دەركەفتی، وان عیسا ب تنێ دیت. شاگردان ئەڤ رویدانە ڤەشارت و ل وان رۆژان ئەو تشتێ دیتی نەگۆتە كەسێ.
ل رۆژا پاشتر دەمێ ژ چیای هاتینە خوارێ، جەماوەرەكێ زۆر كەفتنە پێشیا وی
و زەڵامەكی ژ ناڤ وان گازی كر: «مامۆستا، ئەز هیڤیێ ژ تە دكەم تۆ بەرێ خۆ بدەیە كوڕێ من، چنكو ئێكانەیێ منە.
ژ نشكەكێ ڤە گیانەكێ پیس وی دهنگێڤیت و دەملدەست دكەتە قێڕی. ئەو تەپێ دئینیتێ و كەف ب سەر دەڤی دكەڤیت، دهەڕشینیت و زوی ب زوی ژێڤەنابیت.
من هیڤی ژ شاگردێن تە كر كو وی ژێ دەربئێخن، لێ نەشیان.»
عیسای بەرسڤ دا و گۆت: «هەی نفشێ بێباوەر و خوار، تا كەنگی دێ د ناڤ هەوە دا مینم و بێهنا خۆ ل هەوە فرە‍‌ھ كەم؟» گۆتە زەڵامی: «كوڕێ خۆ بینە ڤێرێ.»
دەمێ زاڕۆك دهات، ئەجنەی ئەو ل ئەردی دا و تەپێ گرت. عیسای ل گیانێ پیس حەیتاند و زاڕۆك ساخ كر و داڤ بابێ وی.
ئینا هەمی ژ مەزناهیا خودێ بەهتین. هێشتا هەمی د گوهشینا كریارێن عیسای دا مابوون، عیسای گۆتە شاگردێن خۆ:
«هوین ڤێ ئاخفتنێ بكەنە د گوهێن خۆ دا: چ نەمایە دێ كوڕێ مرۆڤ رادەستی مرۆڤان هێتە كرن.»
لێ ئەو د ڤێ ئاخفتنێ نەگەهشتن و ژ وان هاتبوو ڤەشارتن، لەوما ئەو تێنەگەهشتن. ترسیان ژی پرسیارێ دەربارەی وێ ئاخفتنێ ژێ بكەن.
د سەر ڤێ چەندێ را د ناڤ وان دا گەنگەشەیەك چێبوو، كا د ناڤ وان دا یێ هەری مەزن كیە.
لێ عیسای ئەوا د دلێ وان دا زانی، ئەڤجا زاڕۆكەك ئینا و ب رەخ خۆ ڤە راوەستاند
و گۆتە وان: «هەر كەسێ ب ناڤێ من ڤی زاڕۆكی قەبیل بكەت، ئەوی ئەز قەبیل كرم و یێ من قەبیل بكەت، ئەوی ئەو قەبیل كر یێ ئەز هنارتیم. هەر كەسێ د ناڤ هەوە هەمیان دا یێ هەری بچویك بیت، ئەوە یێ مەزن.»
پاشی یوحەننای گۆت: «مامۆستا، مە كەسەك دیت ب ناڤێ تە ئەجنە دەردئێخستن، لێ مە نەهێلا وی كاری بكەت، چنكو ئەو ل گەل مە ب دویڤ تە ناكەڤیت.»
ئینا عیسای گۆتێ: «رێكێ لێ نەگرن، چنكو ئەوێ دژی هەوە نەبیت، د گەل هەوە دایە.»
دەمێ رۆژێن بلندبوونا وی نێزیك بووین، بڕیار دا بچیتە ئورشەلیمێ.
وی هندەك هنارتی ل پێشیا خۆ هنارتن، چوونە گوندەكی ژ گوندێن سامەریان، داكو خانیەكی بۆ وی ل وی گوندی ئامادە بكەن.
لێ رازی نەبوون پێشوازیا وی بكەن، چنكو ئەو بەرەڤ ئورشەلیمێ ڤە دچوو.
دەمێ هەردوو شاگردێن وی یەعقوب و یوحەننای ئەڤ تشتە دیتی، گۆتن: «خودان، تە دڤێت ژ خودێ بخوازین ئاگر ژ ئەسمانان بهێتە خوارێ و وان ب ئێكجاری بسوژیت؟»
ئینا عیسا ل وان زڤڕی و ئەو پاشڤە برن،
پاشی چوونە گوندەكێ دی.
دەمێ د رێكێ دا دچوون، ئێكی دگۆتێ: «تۆ كیڤە بچی، دێ ل دویڤ تە هێم.»
ئینا عیسای گۆتێ: «رویڤیان كون رویڤیێن هەین و باڵندەیێن ئەسمانی هێلینێن هەین، لێ كوڕێ مرۆڤ چ ج‍‌ھ نینن سەرێ خۆ دانیتێ.»
گۆتە ئێكێ دی: «ل دویڤ من وەرە.» لێ وی مرۆڤی گۆت: «خودان، دەستویریا من بدە، دا ل بەراهیێ ئەز بچم بابێ خۆ ڤەشێرم.»
عیسای گۆتێ: «بهێلە مری مریێن خۆ ڤەشێرن. لێ تۆ هەڕە مزگینیا پاشایەتیا خودێ بدە.»
ئێكێ دی گۆتێ: «خودان، ئەز دێ ب دویڤ تە كەڤم، لێ تۆ دەستویریا من بدە، ئەز ل پێشیێ خاترا خۆ ژ مالا خۆ بخوازم.»
عیسای گۆتێ: «كەس نینە دەستێ خۆ دانیتە سەر هنجاڕی و بەرێ خۆ بدەتە پشت خۆ و ب كێر پاشایەتیا خودێ بهێت.»
پشتی هنگی خودانی حەفتێ و دوو كەسێن دی ژی دەستنیشان كرن و دوو دووە ل پێشیا خۆ هنارتنە هەر ج‍‌ھ و باژێڕێ كو دڤیا بچیتێ
و گۆتە وان: «دروین گەلەكە، لێ پالە د كێمن، لەوما ژ خودانێ دروینێ بخوازن، دا پالەیان بۆ دروینا خۆ بهنێریت.
هەڕن! ئەڤە ئەز هەوە وەكو بەرخان بۆ ناڤ گورگان دهنێرم.
نە كیسكێ پارەی، نە چانتكی و نە پێلاڤان هەلنەگرن و د رێكێ دا سڵاڤێ ل كەسێ نەكەن.
هەر مالا هوین بچنێ ل پێشیێ بێژن: ‹ئاشتی ل سەر ڤێ مالێ بیت.›
ئەگەر ل وێرێ مرۆڤەكێ هەژی ئاشتیێ هەبیت، دێ ئاشتیا هەوە ل سەر وی مینیت، ئەگەر نەبیت، دێ بۆ هەوە ڤەگەڕیتەڤە.
هوین د وێ مالێ دا بمینن و بخۆن و ڤەخۆن ژ وی تشتێ وان هەی، چنكو پالە هەژی كرێیا خۆیە. ژ مالەكێ بۆ مالەكێ نەچن.
هەر باژێڕەكێ هوین بچنێ و هەوە وەربگریت، ژ وێ خوارنێ بخۆن ئەوا بۆ هەوە دهێتە پێشكێش كرن.
نەساخێن تێدا ساخ بكەن و بێژنە خەلكی: ‹پاشایەتیا خودێ یا نێزیكی هەوە بووی.›
لێ هەر باژێڕێ هوین بچنێ و هەوە قەبیل نەكەت، دەركەڤنە كۆلانێن وی باژێڕی و بێژن:
‹خۆ تۆزا باژێڕێ هەوە ژی، ئەوا ب پێیێن مە ڤە مای، ب سەر هەوە دا دادقوتین، لێ ئەڤێ بزانن: پاشایەتیا خودێ یا نێزیك بووی.›
ئەز دبێژمە هەوە: ل وێ رۆژێ دێ رەوشا سەدۆمێ ژ یا وی باژێڕی باشتر بیت.
نەخوزیكێن تە خۆرازین! نەخوزیكێن تە بێت‌سایدا! ئەو حنێرێن ل ناڤ هەوە روی داین، ئەگەر ل سور و سایدا روی دابان، ئەو هەر ژ مێژە دا ل خۆ زڤڕن و خراری كەنە بەر خۆ و روینن خولیێ ب سەرێ خۆ دا كەن.
لێ ل دادكرنێ دێ رەوشا سور و سایدایێ ژ یا هەوە باشتر بیت.
تۆ ژی هەی كەفەرناحوم، ما دێ بۆ ئەسمانی هێیە بلندكرن؟ نەخێر! تۆ دێ كەڤیە وارێ مریان.
ئەوێ گوهداریا هەوە بكەت، ئەوی گوهداریا من كر و ئەوێ هەوە رەت بكەت، ئەز رەت كرم و یێ من رەت بكەت، ئەوی ئەو رەت كر یێ ئەز هنارتیم.»
پاشی هەر حەفتێ و دوو ب دلخۆشی ڤەگەڕیان و گۆتن: «خودان، ب ناڤێ تە، خۆ ئەجنە ژی دكەڤنە ژێر دەستهەلاتا مە.»
عیسای گۆتە وان: «من ئبلیس دیت وەكو برویسیێ ژ ئەسمانی كەفت.
ئەڤە من هند دەستهەلات دا هەوە، دا هوین پێ ل مار و دویپشك و هەمی هێزا دوژمنی بكەن و چ تشت نەشێت چ زیانێ ل هەوە بكەت،
سەرەڕای هندێ ب ڤێ چەندێ دلخۆش نەبن، كو گیانێن پیس دكەڤنە ژێر دەستهەلاتا هەوە، لێ دلخۆش ببن، چنكو ناڤێن هەوە ل ئەسمانان یێن هاتینە نڤیسین.»
د وێ گاڤێ دا عیسا گەلەك ب گیانێ پیرۆز دلخۆش بوو و گۆت: «باب، خودانێ ئەرد و ئەسمانی، ئەز سوپاسیا تە دكەم، چنكو تە ئەڤ تشتێن هەنێ ژ تێگەهشتی و ئاقلمەندان ڤەشارتن و تە بۆ زاڕۆكان ئاشكرا كرن. بەلێ باب، چنكو هۆسا د دیتنا تە دا باش بوو.»
«هەمی تشت ژ لایێ بابێ من ڤە بۆ من یێن هاتینە دان. كەس نزانیت كوڕ كیە ژبلی بابی، هەروەسا كەس نزانیت باب كیە ژبلی كوڕی و هەر كەسێ كوڕی بڤێت بابی بۆ وی ئاشكرا بكەت.»
پاشی ل شاگردان زڤڕی و گۆتە وان ب تنێ: «خوزیكێن وان چاڤان یێن وێ چەندێ دبینن یا هوین دبینن.
ئەز دبێژمە هەوە: گەلەك پێغەمبەر و پاشایان حەز دكر وێ چەندێ ببینن یا هوین دبینن، لێ وان نەدیت، وان حەز دكر وێ چەندێ ببهیسن یا هوین دبهیسن، لێ وان نەبهیست.»
وێ گاڤێ زانایەكێ دەستووری رابوو دا وی تاقی بكەت و گۆتێ: «مامۆستا، ئەز چ بكەم دا ببمە میراتگرێ ژیانا هەروهەر؟»
عیسای گۆتێ: «د دەستووری دا چ هاتیە نڤیسین؟ تۆ چەوا دخوینی؟»
ئینا بەرسڤ دا: «‹ژ هەمی دلێ خۆ و ژ هەمی دەروونێ خۆ و ب هەمی هێزا خۆ و ژ هەمی هزرا خۆ حەز ژ خودان خودایێ خۆ بكە› و ‹حەز ژ نێزیكێ خۆ بكە، وەك چەوا تۆ حەز ژ خۆ دكەی.› »
عیسای گۆتێ: «بەرسڤا تە یا دروستە، ئەگەر تە پێ كر دێ ژی.»
لێ ئەوی دڤیا خۆ وەك مرۆڤەكێ چاك دەربئێخیت. ئەڤ پرسیارە ژ عیسای كر: «نێزیكێ من كیە؟»
عیسای بەرسڤا وی دا و گۆتێ: «مرۆڤەك ژ ئورشەلیمێ ژۆردا دهاتە ئەریحا، ئەو مرۆڤ كەفتە د لەپێ رێگران دا و شەلاند و قوتا و نیڤ كوشتی هێلا و چوون.
وەسا چێبوو كاهنەك د وێ رێكێ را بوری و چاڤێ وی ب وی مرۆڤی كەفت، لێ ئەو چوو رەخێ دی یێ رێكێ و ژێ دەرباز بوو.
هەروەسا ئێك ژ لێڤیان د وێ رێكێ را هات، بەرێ خۆ دایێ و ئەو ژی چوو رەخێ دی یێ رێكێ و ژێ دەرباز بوو.
لێ رێڤنگەكێ سامەری د وێرێ را بوری و دەمێ چاڤێ وی ڤێ كەفتی، دلێ وی پێ سۆت.
ئینا خۆ نێزیك كر و زەیت و شەراب ب برینێن وی دا كرن و پێچان، پاشی ل دەوارێ خۆ سیار كر و گەهاندە خانێ و چاڤێ خۆ دایێ.
ل رۆژا پاشتر، دوو دینار ئینانە دەرێ و دانە خودانێ خانێ و گۆتێ: ‹چاڤێ خۆ بدێ و هندی تۆ پتر ل ڤی مرۆڤی بمەزێخی، دەمێ ئەز ڤەدگەڕم دێ دەمە تە.›
ئەڤجا ب هزرا تە كی ژ وان هەر سێیان نێزیكێ وی كەسی بوو یێ كەفتیە دەستێ رێگران؟»
ئەوی بەرسڤا عیسای دا و گۆت: «ئەو مرۆڤێ دلۆڤانی پێ بری.» عیسای گۆتێ: «هەڕە تۆ ژی وەكو وی بكە.»
دەمێ عیسا و شاگردێن خۆ ب رێ دچوون، گەهشتنە گوندەكی. ژنكەكێ دگۆتنێ مەرتا ئەو ل مالا خۆ مێڤان كر.
ئەوێ ژنكێ خویشكەك هەبوو دگۆتنێ مەریەم، ل نك پێیێن خودانی روینشت و گوهێ خۆ ددا گۆتنێن وی.
هندی مەرتا بوو گەلەك ب خزمەتێ ڤە شەپرزە ببوو، ئینا هات و گۆتە عیسای: «خودان، تە های ژێ نینە كو خویشكا من ئەز یا هێلایم دا ب تنێ خزمەتێ بكەم؟ بێژێ بلا هاری من بكەت.»
خودانی بەرسڤا وێ دا و گۆت: «مەرتا، مەرتا، تۆ خەما گەلەك تشتان دخۆی و یا شەپرزەیی،
لێ ب تنێ تشتەك یێ پێدڤیە و مەریەمێ بۆ خۆ بەهرا باش یا هەلبژارتی كو ژێ ناهێتە ستاندن.»
عیسای ل جهەكی نڤێژ دكر، دەمێ نڤێژا خۆ ب دویماهی ئینای، ئێك ژ شاگردێن وی گۆتێ: «خودان، مە فێری نڤێژان بكە، هەروەكو یوحەننای ژی شاگردێن خۆ فێر كرین.»
ئینا گۆتە وان: «دەمێ هوین نڤێژێ دكەن، بێژن: ‹بابۆ، بلا ناڤێ تە پیرۆز بیت. بلا پاشایەتیا تە بهێت.
نانی تێرا مە، هەر رۆژ بدە مە.
ل گونەهێن مە ببورە، چنكو ئەم ژی ل وان هەمی كەسان دبورین، یێن گونە‍‌ھ د دەرهەقا مە دا كرین. و مە نەئێخە د تاقیكرنێ دا.›»
پاشی گۆتە وان: «كی ژ هەوەیە كو هەڤالەك هەبیت و نیڤا شەڤێ بچیتە نك و بێژیتێ: ‹هەڤال، سێ نانان ب قەر بدە من،
چنكو هەڤالەكێ من ب رێڤنگی یێ هاتیە نك من و من چ نینە بدەمێ.›
لێ هەڤالێ وی بەرسڤا وی بدەت و د ژۆرڤە بێژیتێ: ‹سەرێ من گێژ نەكە، من دەرگەهێ گرتی ئەز و زاڕۆكێن خۆ یێن د ناڤ نڤینان دا، ئەز نەشێم رابم و بدەمە تە.›
ئەز دبێژمە هەوە: ئەگەر نە ژ بەر هەڤالینیێ رابیت و بدەتێ، لێ ژ بەر رژدبوونا وی دێ رابیت و ل دویڤ پێدڤیا وی دەتێ.
ئەڤجا ئەز دبێژمە هەوە: بخوازن، دێ بۆ هەوە هێتە دان. لێ بگەڕن، دێ بینن. دەرگەهی بقوتن، دێ بۆ هەوە هێتە ڤەكرن.
چنكو هەر كەسێ بخوازیت دێ وەرگریت و یێ لێ بگەڕیێت دێ بینیت و یێ دەرگەهی بقوتیت دێ بۆ وی هێتە ڤەكرن.
كا ئەو كیژ بابە ژ هەوە، كوڕێ وی ماسیەكێ ژێ بخوازیت، دێ مارەكی ژ پێشڤە دەتێ؟
یان هێكەكێ ژێ بخوازیت، ما دێ دویپشكەكی دەتێ؟
ئەڤجا ئەگەر هوین، سەرەڕای كو د خرابن ژی، دزانن تشتێن باش بدەنە زاڕۆكێن خۆ، پا چەند مسۆگەرتر بابێ ل ئەسمانی دێ گیانێ پیرۆز دەتە وان كەسێن ژێ دخوازن.»
جارەكێ عیسای ئەجنەیەك ژ مرۆڤەكی دەردئێخست. وی ئەجنەی ئەو مرۆڤ لال كربوو و دەمێ ئەجنە هاتیە دەرئێخستن، یێ لال ئاخفت و خڕڤەبووی حێبەتی بوون.
لێ هندەكان ژ وان گۆت: «ئەو ب دەستهەلاتا بەعلزەبولێ سەرۆكێ ئەجنەیان، ئەجنەیان دەردئێخیت.»
هندەكێن دی داكو تاقی بكەن نیشانەك ژ ئەسمانی ژێ خواست.
لێ عیسای هزرێن وان زانین و گۆتێ: «هەر پاشایەتیەكا دووبەرەكی بكەڤیتە د ناڤ دا، دێ وێران بیت و هەر مالەكا دووبەرەكی بكەڤیتە د ناڤ دا، دێ هەڕفیت.
ئەڤجا ئەگەر دووبەرەكی بكەڤیتە د ناڤ ئبلیسی ژی دا، چەوا پاشایەتیا وی دێ خۆ راگریت؟ هەوە گۆت ئەز ب ‹بەعلزەبولی› ئەجنەیان دەردئێخم،
لێ ئەگەر ئەز ب ‹بەعلزەبولی› ئەجنەیان دەربئێخم، پا كوڕێن هەوە ب كێ دەردئێخن؟ ژ بەر هندێ ئەو دێ دادوەرێن هەوە بن.
لێ ئەگەر ئەز ب تبلا خودێ ئەجنەیان دەردئێخم، ئەڤە پاشایەتیا خودێ یا ب سەر هەوە دا هاتی.
دەمێ زەڵامەكێ هێزدار ب چەكێن باش زێرەڤانیێ ل مالا خۆ دكەت، ناڤمالیا وی دێ د ئێمناهیێ دا بیت.
لێ دەمێ ئێكێ ژ وی ب هێزتر هێرشێ بكەتێ و بشێتێ، ئەو چەكێن وی پشتا خۆ پێ گەرم دكر ژێ دستینیت، پاشی كەلەپویرتی لێكڤە دكەت.
هەر كەسێ ل گەل من نەبیت، ئەو دژی منە و هەر كەسێ ل گەل من خڕڤە نەكەت ئەو بژاڵە دكەت.
دەمێ گیانێ پیس ژ مرۆڤی دەردكەڤیت، د ناڤ بیابانێ دا ل حەوانگەهەكێ دگەڕیێت، لێ نابینیت. هنگی ئەو دبێژیت: ‹دا بزڤڕمە مالا خۆ یا ئەز ژێ دەركەفتیم.›
دەمێ دگەهیتە مالێ، دبینیت یا مالشتی و لێكدایە.
پاشی دچیت حەفت گیانێن دی یێن ژ خۆ پیستر دئینیت و دچنە د وی جهی دا و تێدا ئاكنجی دبن، ئەڤجا رەوشا دویماهیێ یا وی مرۆڤی ژ یا بەرێ كمباختر لێ دهێت.»
دەمێ هێشتا عیسا دئاخفت، ژنكەكێ ژ ناڤ كۆمێ دەنگێ خۆ بلند كر و گۆت «خوزیكێن وی زكێ تۆ هەلگرتی و وی سنگێ شیر دایە تە.»
لێ عیسای گۆت: «هێشتا پتر خوزیكێن وان ئەوێن گو‍‌ھ ل پەیڤا خودێ دبن و پێ دكەن.»
دەمێ خەلك پتر لێ خڕڤە دبوون، عیسای دەست پێ كر و گۆت: «ئەڤ نفشە، نفشەكێ خرابكارە، نیشانەكێ دخوازیت، لێ ژبلی نیشانا یونسی چ نیشان بۆ ڤی نفشی ناهێنە دان.
كا چەوا یونس بۆ خەلكێ نەینەوا بوویە نیشان، هەروەسا كوڕێ مرۆڤ ژی دێ بیتە نیشانا ڤی نفشی.
شاژنا باشووری دێ د رۆژا دادكرنێ دا، ل گەل مرۆڤێن ڤی نفشی رابیت و دێ وان گونەهبار كەت، چنكو ئەو ژ دویماهیا جیهانێ هات، دا گو‍‌ھ بدەتە ئاقلمەندیا سلێمانی. ئەڤە ئێكێ ژ سلێمانی مەزنتر ل ڤێرێیە.
خەلكێ نەینەوا دێ د رۆژا دادكرنێ دا ل گەل ڤی نفشی رابن و دێ وی گونەهبار كەت، چنكو ئەو ژ بەر ئاگەهداریا یونسی راگەهاندی، ل خۆ زڤڕین. ئەڤە ئێكێ ژ یونسی مەزنتر ل ڤێرێیە.
كەسەك چرایەكی هەلناكەت و دانیتە ئەردەكێ ڤەشارتی، یان دانیتە بن ئامانەكی، لێ دێ دانیتە سەر چرادانكێ، داكو ئەوێن دهێنە د ژۆرڤە رۆناهیێ ببینن.
چرایێ لەشی چاڤە. ئەگەر چاڤێ تە یێ ساخلەم بیت، لەشێ تە هەمی دێ یێ ب رۆناهی بیت، لێ ئەگەر چاڤێ تە یێ خراب بیت، دێ لەشێ تە ژی هەمی یێ تاری بیت.
ئەڤجا هشیار بە نەكو رۆناهی یا د لەشێ تە دا ببیتە تاری.
ئەگەر لەشێ تە هەمی رۆناهی بیت و چ رەخێن تاری لێ نەبن، دێ هەمی لەش رۆناهی بیت، هەروەكو دەمێ چرایەك ب شەوقا خۆ تە روهن دكەت.»
دەمێ عیسا دئاخفت، ئێكێ فەریسی داخواز ژێ كر كو فراڤینێ ل نك وی بخۆت. عیسا چوو مالا وی و ل سەر سفرێ روینشت.
لێ یێ فەریسی حێبەتی بوو، دەمێ دیتی عیسای ژ بەری خوارنێ دەستێن خۆ نە شویشتن.
ئینا خودانی گۆتێ: «هوین فەریسی دەرڤەیا پەرداغ و سێنیكێن خۆ دشوون، لێ د ناخێ خۆ دا هوین ژ چاڤبرسی و خرابیێ دپڕن.
هەی بێ مەژینۆ، ما ئەوێ دەرڤەیا وی چێكری ناڤخۆیا وی ژی چێنەكریە؟
ئەڤجا ئەوا د ناڤ پەرداغ و سێنیكێن هەوە دا بكەنە خێر، هنگی هەمی تشت دێ بۆ هەوە پاقژ بن.
لێ نەخوزیكێن هەوە گەلی فەریسیان! چنكو هوین دەهێكێ ژ پوینگی و جاترێ و هەر كەسكاتیەكێ ددەن، لێ هوین دادپەروەریێ و حەزژێكرنا خودێ، ب پاش گوهێن خۆ ڤە دهاڤێژن. پێدڤی بوو هەوە ئەو ژی كربا و یا دی ژی ب پاش گوهێن خۆ ڤە نەهاڤێتبا.
نەخوزیكێن هەوە گەلی فەریسیان، چنكو هوین د كنیشتەیان دا حەز ژ كورسیكێن پێشیێ دكەن و ل بازاڕان سڵاڤ لێ بهێنە كرن.
نەخوزیكێن هەوە، چنكو هوین وەكو گۆڕێن ڤەشارتینە، مرۆڤ د سەر را دچن و نزانن گۆڕە.»
ئێك ژ زانایێن دەستووری گۆتێ: «مامۆستا، تۆ ب ڤێ گۆتنا خۆ مە ژی كرێت دكەی.»
ئینا گۆت: «نەخوزیكێن هەوە ژی گەلی زانایێن دەستووری، چنكو هوین بارێن گران ل مرۆڤان دكەن، لێ هوین تبلەكێ ژ تبلێن خۆ نادەنە بەر.
نەخوزیكێن هەوە، چنكو هوین گۆڕێن پێغەمبەران ئاڤا دكەن و بابكالێن هەوە ئەو پێغەمبەرێن كوشتین.
ئەڤجا هوین شاهدەییێ ددەن كو ب كارێن بابكالێن خۆ د رازینە، چنكو وان پێغەمبەر كوشتن و هوین گۆڕێن وان ئاڤا دكەن.
ژ بەر ڤێ چەندێ ژی ئاقلمەندیا خودێ گۆت: ‹ئەز دێ پێغەمبەر و هنارتیان بۆ وان هنێرم، لێ ئەو دێ هندەك ژ وان پێغەمبەر و هنارتیان كوژن و هندەكان تەپەسەر كەن.›
لەوما خوینا ژ هەمی پێغەمبەران هاتیە رشتن، هەر ژ دامەزراندنا جیهانێ، دێ ژ ڤی نفشی هێتە خواستن،
هەر ژ خوینا هابیلی تا خوینا زەكەریای، ئەوێ د ناڤبەرا قوربانگە‍‌ھ و پەرستگەهێ دا هاتیە كوشتن. ئەز دبێژمە هەوە: بەلێ، ئەو خوین دێ ژ ڤی نفشی هێتە خواستن.
نەخوزیكێن هەوە گەلی زانایێن دەستووری، چنكو هەوە كلیلا زانینێ بر. هوین ب خۆ ب ژۆر نەكەفتن و بۆ یێن ب ژۆر دكەفتن ژی بوونە ئاستەنگ.»
دەمێ ئەو ژ وێرێ دەركەفتی، مامۆستایێن دەستووری و فەریسیان دەست ب دوژمنداریا وی كر و ئەو رادكێشا گەلەك بابەتان
و چاڤێ وان لێ بوو داكو ب ئاخفتنەكێ بئێخنە داڤان.
د وی دەمی دا ب هزاران مرۆڤ كۆمبوون، تا گەلەك ژ وان پێ ل ئێكودوو ددانا، وی دەست پێ كر و ل بەراهیێ ل گەل شاگردێن خۆ ئاخفت و گۆت: «هشیار بن ژ هەڤیرترشێ فەریسیان، كو دووڕویاتیە.
چ نەپەنی نینن ئاشكرا نەبن و چ ڤەشارتی نینن نەهێنە زانین.
لەوما یا هەوە د تاریاتیێ دا گۆتی، دێ د رۆناهیێ دا هێتە بهیستن و ئەو تشتێن هەوە د ژۆران ڤە ب پستەپستێ گۆتین، دێ ل بانان هێنە گازی كرن.
گەلی خۆشتڤیان، ئەز دبێژمە هەوە: ژ وان نەترسن یێن لەشی دكوژن و پاشی ژ وێ پێڤە نەشێن چ دی بكەن.
لێ ئەز دێ نیشا هەوە دەم ژ كێ بترسن: هوین ژ وی بترسن یێ دشێت پشتی كوشتنێ هەوە بهاڤێژیتە د دۆزەخێ دا. بەلێ، ئەز دبێژمە هەوە، هوین ژ وی بترسن.
ما نە پێنج چویچك ب دوو فلسان دهێنە فرۆتن؟ ل گەل هندێ خودێ چ ژ وان ژ بیر ناكەت.
خۆ مویێن سەرێ هەوە ژی د هژمارتینە. ئەڤجا نەترسن هوین ژ گەلەك چویچكان ب بهاترن.
ئەز دبێژمە هەوە: هەر كەسێ ل بەرامبەری مرۆڤان دانپێدانێ ب من بكەت، كوڕێ مرۆڤ ژی ل بەرامبەری فریشتەیێن خودێ دێ دانپێدانێ ب وی كەت،
لێ ئەو كەسێ ل بەرامبەری مرۆڤان من ماندەل بكەت، دێ ل بەرامبەری فریشتەیێن خودێ هێتە ماندەلكرن.
هەر كەسێ گۆتنەكا خراب د دەرهەقا كوڕێ مرۆڤ دا بێژیت، دێ ل وی هێتە بورین. لێ ئەوێ كوفریان د دەرهەقا گیانێ پیرۆز دا بكەت، ل وی ناهێتە بورین.
دەمێ هەوە بۆ كنیشتەیان و حوكمدار و دەستهەلاتداران رادكێشن، خەمێ نەخۆن كا دێ چەوا بەڕەڤانیێ ژ خۆ كەن و چ بێژن.
چنكو گیانێ پیرۆز هنگی دێ هەوە فێر كەت كا چ پێدڤیە هوین بێژن.»
ئێكی ژ كۆمبوویان گۆتێ: «مامۆستا، بێژە برایێ من، بلا بەهرا من ژ میراتی بدەتە من.»
ئینا گۆتێ: «كابرا، كێ ئەز ل سەر هەوە كریمە دادوەر و لێكڤەكەر؟»
پاشی گۆتە جڤاتێ: «هشیار بن خۆ ژ چاڤبرساتیێ بپارێزن، چنكو ژیانا مرۆڤی ب زێدەییا سامانی نینە.»
پاشی نموونەیەك بۆ وان ئینا و گۆت: «ئەردێ كەسەكێ دەولەمەند بەرهەمەكێ باش دا.
هزرێن خۆ كرن و گۆت: ‹ئەز چ بكەم، من چ ج‍‌ھ نینە ئەز بەرهەمێ خۆ تێدا عومبار بكەم؟›
ئەڤجا گۆت: ‹ئەز دێ ڤێ كەم: دێ عومبارێن خۆ هەڕفینم و یێن مەزنتر ئاڤاكەم، دێ د وان عومباران دا دەخل و دان و مالێ خۆ عومبار كەم.
ئەز دێ بێژمە خۆ: جوامێرۆ! تە گەلەك مال یێ عومبار كری بۆ گەلەك ساڵان یێ هەی. ئەڤجا تۆ بێهنا خۆ ڤەدە و بخۆ و ڤەخۆ و كەیفێ بكە.›
لێ خودێ گۆتێ: ‹دەبەنگۆ، ئەڤ شەڤە دێ گیانێ تە ژ تە هێتە ستاندن. ئەڤجا یێ تە خڕڤە كری دێ بۆ كێ مینیت؟›
هۆسایە رەوشا وی كەسێ بۆ خۆ خڕڤە دكەت و ل نك خودێ نە یێ دەولەمەندە.»
پاشی گۆتە شاگردێن خۆ: «ژ بەر ڤی ئەگەری ئەز دبێژمە هەوە: خەما ژیانا خۆ هەلنەگرن كا دێ چ خۆن، یان لەشێ خۆ كا دێ چ كەنە بەر خۆ،
چنكو ژیان نە ب تنێ خوارنە، لەش ژی نە ب تنێ جل و بەرگە.
هزرا خۆ د قەلەڕەشكان دا بكەن: ئەو نە دچینن و نە ددروین، نە چ كوار و نە ژی عومبار هەنە، لێ خودێ ب خودان دكەت. ئەڤجا هوین چەند ژ باڵندەیان ب بهاترن!
ما كی ژ هەوە ب خەمخوارنێ دشێت دەمژمێرەكێ ل سەر ژیێ خۆ زێدە بكەت؟
ئەگەر هوین نەشێن كارەكێ هۆسا یێ بچویك بكەن، بۆچی هوین خەمێ ژ یێن مایی دخۆن؟
بەرێ خۆ بدەنە سیسنان چەوا وەرارێ دكەن: نە خۆ دوەستینن و نە رستنێ دكەن، لێ ئەز دبێژمە هەوە: خۆ سلێمانی ژی، د هەمی مەزناهیا خۆ دا، وەكو ئێك ژ ڤانا جلێن جوان ل بەر خۆ نەكرینە.
ئەگەر خودێ گیایێ زەڤیێ یێ ئەڤرۆ هەی و سوبەهی دهاڤێژنە د تەنویرێ دا هۆسا ب جلك بئێخیت، ئەرێ گەلی كێمباوەران، ما نە گەلەك مسۆگەرترە ئەو هەوە ب جلك بئێخیت؟
هوین بزاڤێ بۆ خوارن و ڤەخوارنێ نەكەن و خەمان نەخۆن،
چنكو مللەتێن جیهانێ بزاڤێ بۆ ڤان هەمیان دكەن و بابێ هەوە دزانیت كو هەوە پێدڤیا ب ڤان هەی.
لێ هوین بزاڤێ بۆ پاشایەتیا خودێ بكەن و ئەڤە ژی دێ بۆ هەوە هێنە دان.
نەترسە، كەرێ پەزی یێ بچویك، چنكو بابێ هەوە پێخۆش بوو كو پاشایەتیێ بدەتە هەوە.
ئەوێ هەوە هەی بفرۆشن و بكەنە خێر. بۆ خۆ سامانەكی مسۆگەر كەن كو پویچ نابیت و گەنجینەیەكێ ل ئەسمانان كو چ جاران ڤاڵا نابیت، ل وی جهێ نە دز نێزیك دبن و نە خویرك دكەڤنێ.
چنكو گەنجینەیا هەوە ل كیرێ بیت، دلێ هەوە ژی دێ ل وێرێ بیت.
بلا ناڤتەنگێن هەوە د گرێدای بن و چرایێن هەوە دهەلبن
و وەكو وان مرۆڤان بن، یێن ل هیڤیا خودانێ خۆ دمینن، كا دێ كەنگی ژ داوەتێ ڤەگەڕیێت، داكو دەمێ بهێت و دەرگەهی بقوتیت، ئێكسەر بۆ وی ڤەكەن.
خوزیكێن وان بەنیان یێن كو دەمێ خودانێ وان ڤەدگەڕیێت، وان هشیار دبینیت. راستیێ دبێژمە هەوە: ئەو دێ ناڤتەنگا خۆ گرێ دەت و دێ داخوازێ ژ وان كەت ل سەر سفرێ روینن و دێ خزمەتا وان كەت.
ئەگەر ل نیڤ شەڤ یان بەری سپێدێ هات و هۆسا دیتن، وی دەمی خوزیكێن وان بەنیان.
لێ هوین ڤێ بزانن: ئەگەر خودانێ مالێ زانیبا كیژ دەمژمێرێ دێ دز هێت، ئەوی نەدهێلا بكەڤیتە مالا وی.
هوین ژی د ئامادە بن، چنكو كوڕێ مرۆڤ دێ د دەمەكێ وەسا دا هێت، كو هوین هزر نەكەن.»
پەترۆسی گۆتێ: «خودان، تۆ ڤێ نموونەیێ بۆ مە دبێژی یان بۆ هەمیان؟»
خودانی گۆت: «ئەڤجا ئەو بریكارێ دلسۆز و ئاقلمەند كیە، ئەوێ خودان وی بكەتە بەرپرسێ خزمەتكارێن خۆ، دا بەهرا وان ژ خوارنێ د دەمێ وێ دا بدەتێ؟
خوزیكێن وی بەنی یێ كو دەمێ خودانێ وی دهێت، وی ببینیت ئەو یێ وە دكەت.
راستیێ دبێژمە هەوە: ئەو دێ وی كەتە بەرپرسێ هەمی مالێ خۆ.
لێ ئەگەر ئەوی بەنی د دلێ خۆ دا گۆت: ‹خودانێ من دێ گیرۆ بیت› و دەست ب قوتانا بەنیێن دی بكەت و بخۆت و ڤەخۆت و سەرخۆش ببیت،
خودانێ وی بەنی دێ ل رۆژەكێ هێت كو ئەو چاڤەڕێ نەبیت و ل دەمژمێرەكێ كو ئەو نەزانیت، ئەڤجا دێ وی پارچە پارچە كەت و چارەنڤیسێ وی كەتە ل گەل بێباوەران.
ئەو بەنیێ حەزا خودانێ خۆ دزانیت و ئەو خۆ ئامادە نەكەت و ل دویڤ حەزا وی نەكەت، ئەو دێ گەلەك هێتە قوتان،
لێ ئەوێ نەزانیت و تشتێن هەژی قوتانێ بكەت، ئەو دێ پیچەك هێتە قوتان. هەر كەسێ گەلەك بۆ هاتیە دان، دێ گەلەك ژێ هێتە خواستن و یێ گەلەك ل نك دهێتە دانان، دێ پتر ژێ هێتە خواستن.
ئەز یێ هاتیم دا ئاگری بهاڤێژمە سەر ئەردی و من چەند حەز دكر ئەو نوكە یێ هەلبا!
لێ من تافیركرنەك یا هەی كو دڤێت پێ بهێمە تافیركرن و ئەز چەند یێ تەنگاڤم تاكو ب ج‍‌ھ بهێت!
ما هوین وەسا هزر دكەن كو ئەز یێ هاتیم دا ئاشتیێ بینمە سەر رویێ ئەردی؟ ئەز دبێژمە هەوە: نەخێر، لێ دووبەرەكیێ.
چنكو ژ نوكە پێڤە، پێنج د مالەكێ دا دێ ژێكڤە بن، سێ دژی دوویان، دوو دژی سێیان.
باب دژی كوڕی و كوڕ دژی بابی، دایك دژی كچێ و كچ دژی دایكێ، خەسی دژی بویكێ و بویك دژی خەسیێ دێ ل بەر ئێك راوەستن.»
پاشی گۆتە جەماوەری: «دەمێ هوین عەورەكی دبینن ل رۆژئاڤا دەردكەڤیت، ئێكسەر هوین دبێژن باران دێ هێت، ئەو ژی وەسا چێدبیت.
هەروەسا دەمێ بایێ باشووری دهێت، هوین دبێژن دێ گەرم بیت، ئەو ژی وەسا چێدبیت.
گەلی دووڕویان، هوین دزانن دیمەنێ ئەرد و ئەسمانی شڕۆڤە بكەن، پا چەوا هوین نزانن ڤی سەردەمی شڕۆڤە بكەن؟
بۆچی هوین ب خۆ ناهەلسەنگینن كا یا راست چیە؟
دەمێ تۆ ل گەل هەڤڕكێ خۆ قەستا هەرێمداری دكەی، هەر بڕێڤە بزاڤێ بكە هوین پێك بهێن، نەكو تە رادەستی دادوەری بكەت و دادوەر تە رادەستی زێرەڤانێ دادگەهێ بكەت و زێرەڤانێ دادگەهێ تە بهاڤێتە د زیندانێ دا.
ئەز دبێژمە تە: تۆ چ جاران ژ وێرێ دەرناكەڤی، تاكو تۆ فلسێ دویماهیێ نەدەی.»
وێ گاڤێ هندەك ل وێرێ بوون بۆ عیسای بەحسێ وان جەلیلیان دكر، ئەوێن پیلاتۆسی خوینا وان ل گەل خوینا قوربانێن وان تێكهەلكری.
عیسای بەرسڤا وان دا و گۆت: «ئەرێ هوین هزر دكەن، كو گونەهێن وان جەلیلیان ژ جەلیلیێن دی پتر بوون، لەوما ئەڤە ب سەرێ وان هات؟
ئەز دبێژمە هەوە: نەخێر، لێ ئەگەر هوین ل خۆ نەزڤڕن، هوین هەمی ژی دێ وەسا ژ ناڤ چن.
یان ژی ئەو هەژدە كەسێن ل سیلوامێ بورج ب سەردا هەڕفتی و كوشتین، ما هوین هزر دكەن ئەو ژ هەمی ئاكنجیێن ئورشەلیمێ گونەهبارتر بوون؟
ئەز دبێژمە هەوە: نەخێر، لێ ئەگەر هوین هەمی ل خۆ نەزڤڕن، هوین ژی دێ وەسا ژ ناڤ چن.»
پاشی ئەڤ نموونەیە بۆ ئینا: «مرۆڤەكی دارهژیرەك ل ناڤ رەزێ خۆ چاندبوو. هات دا بەرهەمێ وێ ببینیت، لێ چ پێڤە نەدیت.
گۆتە رەزڤانی: ‹ئەڤە سێ ساڵە ئەز دهێمە ڤێرێ دا بەرهەمێ ڤێ هژیرێ ببینم، لێ ئەز چ بەرهەمێ وێ نابینم. ئەڤجا ببڕە! ما دێ بۆچی ئەردێ مە گریت؟›
لێ رەزڤانی بەرسڤا وی دا و گۆت: ‹ئەزبەنی، ئەڤ ساڵە ژی بهێلە، تاكو ئەز ئاخا دەوروبەرێن وێ بكۆلم و زبلی بهاڤێژمێ.
بەلكو ساڵا بهێت بەرهەمی بدەت. ئەگەر نە، پاشی ببڕە.›»
د رۆژەكا شەمبی دا، عیسای ل كنیشتەیەكێ فێركرن دكر.
ل وێرێ ژنكەك هەبوو ئەو هەژدە ساڵ بوو ژ بەر گیانەكێ نەخۆشیێ ، پشتكۆڤل ببوو و نەدشیا خۆ راست كەت.
دەمێ عیسای دیتی، گازی كرێ و گۆتێ: «خانم، تۆ ژ نەخۆشیا خۆ ئازاد بووی.»
دەستێن خۆ دانانە سەر پشتا وێ، هەر د ج‍‌ھ دا راست بوو و وێ پەسنا خودێ كر،
لێ سەرۆكێ كنیشتەیێ گەلەك تۆڕە بوو، چنكو عیسای ئەو ژنك ل رۆژا شەمبیێ ساخكر، ئینا گۆتە كۆمبوویان: «شەش رۆژ هەنە پێدڤیە مرۆڤ تێدا كار بكەت، د ڤان رۆژان دا وەرن بۆ ساخكرنێ، نەكو ل رۆژا شەمبیێ.»
خودانی بەرسڤا وی دا و گۆت: گەلی دووڕویان، ئەرێ ما هەر ئێك ژ هەوە رۆژا شەمبیێ هەفسارێ گای یان كەرێ خۆ ڤەناكەت و ژ گۆڤێ دەربئێخیت و ئاڤ بدەت؟
لێ ئەڤا هەنێ كچەكا ئیبراهیمیە و ئەڤە هەژدە ساڵ بوو ئبلیسی ئەو گرێ دابوو، ئەرێ ما یا پێدڤی نەبوو ل رۆژا شەمبیێ ژ وێ گرێدانێ بهێتە ڤەكرن؟
دەمێ ئەڤ ئاخفتنە گۆتیێ، هەمی هەڤڕكێن وی شەرمزار بوون. لێ هەمی كۆمبوویێن دی ژ بەر هەمی كارێن مەزن یێن وی دكرن، كەیفخۆش بوون.
ئەڤجا عیسای گۆت: «پاشایەتیا خودێ وەكو چیە؟ ب چ هەڤبەر بكەم؟
ئەو وەكو دندكەكا خەردەلێیە ، مرۆڤەكی بر و هاڤێتە باغچەیێ خۆ و شین بوو و بوو دار و باڵندەیێن ئەسمانی ل سەر چەقێن وێ ڤەحەویان.»
دیسان گۆت: «ئەز پاشایەتیا خودێ ب چ هەڤبەر بكەم؟
ئەو وەكو هەڤیرترشییە، كو ژنكەكێ ئینای و كریە د ناڤ سێ لەگەنێن ئاری دا، هەتا هەمی ترش بووی.»
عیسا د گوند و باژێڕان دا دەرباز دبوو و فێركرن دكر و بەرەڤ ئورشەلیمێ دچوو.
ئێكی گۆتێ: «خودان، ئەرێ ئەوێن قورتال دبن د كێمن؟» ئینا عیسای گۆتە وان:
«خەباتێ بكەن دا د دەرگەهێ تەنگ را بچنە ژۆر. ئەز دبێژمە هەوە: گەلەك دێ بزاڤێ كەن بچنە ژۆر، لێ ئەو نەشێن.
پشتی خودانێ مالێ رادبیت و دەرگەهی دگریت، هوین دێ ژ دەرڤە راوەستیای مینن و دەرگەهی قوتن و بێژن: ‹خودان، دەرگەهی ل مە ڤەكە،› دێ بەرسڤا هەوە دەت و بێژیت: ‹ئەز نزانم هوین ژ كینە.›
وێ گاڤێ هوین دێ بێژن: ‹ئەم ئەوین یێن ل گەل تە خواری و ڤەخواری و تە ل كۆلانێن مە فێركرن كری.›
دێ بێژیتە هەوە: ‹ئەز نزانم هوین ژ كینە. هوین هەمی ئەوێن خرابیێ دكەن، ژ من دویر كەڤن.›
ل وێرێ گری و گڤاشتنا ددانانە ، دەمێ هوین ئیبراهیم، ئیسحاق، یەعقوب و هەمی پێغەمبەران د پاشایەتیا خودێ دا ببینن و هوین بۆ ژ دەرڤە یێن هاتینە دەرئێخستن.
مرۆڤ دێ ژ رۆژهەلات و رۆژئاڤا و ژ باكوور و باشووری هێن و دێ د پاشایەتیا خودێ دا ل سەر سفرێ روینن.
باوەر بكە، هندەكێن پاشیێ دێ بنە یێن پێشیێ و هندەكێن پێشیێ دێ بنە یێن پاشیێ.»
د وی دەمی دا هندەك فەریسی هاتنە نك عیسای و گۆتنێ: «ڤێرێ ب ج‍‌ھ بهێلە و هەڕە، چنكو هێرودێسی دڤێت تە بكوژیت.»
ئینا گۆتە وان: «هەڕن و بێژنە وی رویڤی: ‹ئەڤە ئەز ئەڤرۆ و سوبەهی ئەجنەیان دەردئێخم و نەساخان ساخ دكەم و ل رۆژا سێیێ دێ گەهمە مەرەما خۆ.›
لێ پێدڤیە ئەڤرۆ و سوبەهی و دووسبە ل سەر رێیا خۆ یێ بەردەوام بم، چنكو نابیت پێغەمبەرەك ژ دەرڤەی ئورشەلیمێ بهێتە كوشتن.
ئورشەلیم، ئورشەلیم، هەی كوژەكا پێغەمبەران و بەربارانكەرا ئەوێن بۆ تە هاتینە هنارتن. چەند جاران من حەز دكر زاڕۆكێن تە خڕڤە بكەم، كا چەوا مریشك چیچەلۆكێن خۆ د بن چەنگێن خۆ ڤە خڕڤە دكەت، لێ هەوە نەڤیا.
ئەڤە مالا هەوە ما ب هیڤیا هەوە ڤە. ئەز دبێژمە هەوە: ئێدی هوین من نابینن، تاكو ئەو دەم بهێت یێ هوین بێژن: ‹یێ بەرەكەتدارە ئەوێ ب ناڤێ خودانی دهێت.› »
ل رۆژەكا شەمبی، عیسا بۆ نان خوارنێ چوو مالا ئێك ژ سەرۆكێن فەریسیان و ئەوان ب هویری بەرێ خۆ ددایێ.
ل وێرێ، ل بەرامبەری وی مرۆڤەك هەبوو ئاڤبەند لێ بوو.
عیسای پرسیار ژ زانایێن دەستووری و فەریسیان كر و گۆت: «ئەرێ ل رۆژا شەمبیێ، ساخكرن ژ نەخۆشیێ رەوایە یان نە؟»
ئەو بێدەنگ مان. ئینا عیسای ئەو مرۆڤ گرت و ساخ كر و ب رێ ئێخست.
پاشی گۆتە وان: «كی ژ هەوەیە كوڕێ وی یان گایێ وی ل رۆژا شەمبیێ بكەڤیتە د بیرێ دا، ئەو د گاڤێ دا دەرنائێخیت؟»
ئەو نەشیان بەرسڤا وی بدەن.
پشتی دیتی كا چەوا مێڤان یێ سەرێ دیوانێ هەلدبژێرن، نموونەیەك بۆ وان ئینا و گۆت:
«دەمێ ئێك تە داخواز دكەتە داوەتێ، تۆ ل سەرێ دیوانێ نەروینە، چنكو دبیت وی ئێكێ ژ تە رێزدارتر داخواز كربیت
و ئەوێ تۆ و ئەو داخواز كرین، دێ هێت و بێژیتە تە: ‹تۆ جهێ خۆ بدە ڤی مرۆڤی،› د وێ گاڤێ دا، تۆ دێ ب شەرمینی زڤڕی و چیە بنێ دیوانێ.
لێ دەمێ تۆ دهێیە داخوازكرن، هەڕە بنێ دیوانێ روینە، داكو دەمێ ئەوێ تۆ داخوازكری دهێت، دێ بێژیتە تە: ‹هەڤال، رابە وەرە پێشیێ،› د وی دەمی دا دێ رێزا تە د ناڤ روینشتیان دا بلندتر بیت.
چنكو هەر كەسێ خۆ بلند بكەت دێ هێتە نزمكرن و یێ خۆ نزم بكەت دێ هێتە بلندكرن.»
پاشی گۆتە وی كەسێ ئەو داخوازكری: «دەمێ تۆ فراڤینەكێ یان شیڤەكێ چێدكەی، تۆ گازی هەڤال، برا، كەسێن خۆ، هەروەسا هەڤسویێن دەولەمەند نەكە، نەكو ئەو ژی تە داخواز بكەن و چاكیا تە ل تە ڤەگەڕینن،
لێ دەمێ تۆ خوارنێ چێدكەی، گازی هەژار، فاڵنجی، لەنگ و كۆرەیان بكە.
هنگی تۆ دێ بەختەوەر بی، ژ بەر كو ئەو نەشێن قەنجیێ ل تە ڤەگەڕینن، چنكو د رۆژا رابوونا راستداران دا، دێ هێیە پاداشتكرن.»
دەمێ ئێك ژ روینشتیان گو‍‌ھ ل ڤێ چەندێ بووی، گۆتە عیسای: «خوزیكێن وی یێ خوارنێ ل پاشایەتیا خودێ بخۆت.»
ئینا گۆتە وی: «مرۆڤەكی شیڤەكا بەرفرە‍‌ھ چێكر و گەلەك كەس داخواز كرن.
ل دەمێ خوارنێ، بەنیێ خۆ هنارتە ب دویڤ داخوازكریان را، دا بێژیتە وان: ‹فەرموون، هەمی تشت د ئامادەنە.›
لێ ئێك ل دویڤ ئێكی بەهانە گرتن، یێ ئێكێ گۆت: ‹من زەڤیەكا كڕی، دڤێت ئەز بچم ببینم. هیڤیدارم ل من ببوری.›
یێ دی گۆت: ‹من پێنج جۆتێن گایان یێن كڕین و ئەز دێ چم وان تاقی كەم. هیڤیدارم تۆ ل من ببوری.›
یێ دی گۆت: ‹من ژنەكا ئینای، لەوما ئەز نەشێم ئامادە ببم.›
بەنیێ وی ڤەگەڕیا و ئەو چەند گۆتە خودانێ خۆ. هنگی خودانێ مالێ تۆڕە بوو و گۆتە بەنیێ خۆ: ‹ب لەز دەركەڤە جادە و كۆلانێن باژێڕی، تۆ هەژار، فاڵنجی، لەنگ و كۆرەیان ل ڤێرێ ئامادە بكە.›
پشتی هنگی بەنی گۆتێ: ‹ئەزبەنی، ئەوا تە فەرمان پێ دای، هاتە بجهئینان و هێشتا جهێ مای.›
ئینا خودانێ وی بەرسڤ دا و گۆت: ‹دەركەڤە د رێك و كۆلانان دا و مرۆڤان ب خورتی بینە ژۆر، تا مالا من تژی ببیت.
ئەز دبێژمە هەوە: ئێك ژ وان زەڵامێن داخوازكری تام ناكەتە شیڤا من.›»
كۆمەكا مەزن ل گەل عیسای دچوون، ئەو ل خۆ زڤڕی و گۆتە وان:
«ئەگەر ئێك ل دویڤ من بهێت و وی ئەز ژ باب، دایك، ژن، زاڕۆك، خویشك و برایێن خۆ، هەروەسا خۆ ژی، گەلەك زێدەتر نەڤێم، ئەو نەشێت ببیتە شاگردێ من.
ئەو كەسێ خاچا خۆ هەلنەگریت و ل دویڤ من نەهێت، نەشێت ببیتە شاگردێ من.
كی ژ هەوە ئەگەر بڤێت بورجەكێ ئاڤا بكەت، ل بەراهیێ ناڕوینیت و ژمێریاریا بودجا وێ ناكەت، كا وی تێرا تەمامكرنا وێ هەیە؟
نەكو بنیاتێ وێ دانیت و پاشی نەشێت ب دویماهی بینیت. ئەڤجا هەمی تەماشەڤان تڕانەیێن خۆ پێ بكەن
و بێژن: ‹ئەڤی مرۆڤی دەست ب ئاڤاكرنێ كر و نەشیا ب دویماهی بینیت.›
یان كیژ پاشایە ئەگەر بچیتە شەڕێ پاشایەكێ دی، ل بەراهیێ ناڕوینیت و هزرا خۆ ناكەت، كا دێ شێت ب دە‍‌ھ هزاران ل بەرامبەری وی راوەستیت یێ كو ب بیست هزاران ب سەر وی دا دگریت؟
ئەگەر نەشێت، هێشتا دوژمنێ وی یێ دویر، شاندەكی دهنێریتە نك وی و داخوازا ئاشتیێ دكەت.
لەوما هەر كەسێ ژ هەوە هەمی تشتێ هەیی نەهێلیت، ئەو نەشێت ببیتە شاگردێ من.
خوێ یا باشە، لێ ئەگەر خوێ سویراتیا خۆ بەردا، دێ جارەكا دی ب چ هێتە سویركرن؟
ئەو نە ب كێر ئاخێ و نە ژی زبلی دهێت، دهاڤێژنە ژ دەرڤە. ئەوێ گو‍‌ھ بۆ بهیستنێ هەبن، بلا ببهیسیت.»
هەمی باجگر و گونەهكاران خۆ نێزیكی عیسای دكر دا گوهێ خۆ بدەنێ،
ئینا فەریسی و مامۆستایێن دەستووری پتەپت كر و گۆتن: «ئەڤ مرۆڤە گونەهكاران وەردگریت و ل گەل وان دخۆت.»
ئەڤجا عیسای ئەڤ نموونە بۆ وان ئینا و گۆتێ:
«كی ژ هەوە سەد پەز هەبن و ئێك ژێ بەرزە ببیت، وان نۆت و نەهان ل چۆلی ناهێلیت و ل دویڤ یا بەرزە ناچیت تاكو ببینیت؟
پشتی دبینیت، ب كەیفخۆشی ددانیتە سەر ملێن خۆ
و ڤەدگەڕیتە مال و گازی هەڤال و هەڤسویێن خۆ دكەت و دبێژیتە وان: ‹هوین ل گەل من دلخۆش ببن، چنكو من پەزێ خۆ یێ بەرزە دیت.›
ئەز دبێژمە هەوە: هۆسا دێ ل ئەسمانی، ژ بەر گونەهكارەكێ ل خۆ زڤڕی، دلخۆشی پتر هەبیت ژ نۆت و نە‍‌ھ راستدارێن نە پێدڤی لخۆزڤڕینێ.
یان كیژ ژنە دە‍‌ھ دەرهەم هەبن، ئەگەر دەرهەمەك بەرزەكر، ئەرێ ما ئەو چرایەكی هەلناكەت و مالێ نامالیت و ب هویری لێ ناگەڕیێت تاكو ببینیت؟
پشتی دبینیت، دێ گازی هەڤال و هەڤسویان كەت و بێژیت: ‹هوین ل گەل من دلخۆش ببن، چنكو من دەرهەمێ خۆ یێ بەرزە دیت.›
ئەز دبێژمە هەوە: هۆسا دێ كەیف د ناڤ فریشتەیێن خودێ دا پەیدا بیت دەمێ گونەهكارەك ل خۆ دزڤڕیت.»
پاشی گۆت: «مرۆڤەكی دوو كوڕ هەبوون.
كوڕێ بچویك گۆتە بابێ خۆ: ‹بابۆ، تۆ بەهرا من ژ میراتی بدە من.› ئینا بابێ هەر تشتێ هەیی ل سەر وان لێكڤەكر.
پشتی چەند رۆژان، كوڕێ بچویك هەمی تشتێن خۆ خڕڤەكرن و چوو وەڵاتەكێ دویر، ل وێرێ هەمی مالێ خۆ ب خۆشیێن ژیانێ ڤە مەزاخت.
پشتی وی تشتێن خۆ هەمی مەزاختین، كولبەكا دژوار ب سەر وی وەڵاتی دا هات، ئینا ئەو كەفتە تەنگاڤیێ.
ئەڤجا ئەو چوو خۆ گەهاندە ئێك ژ خەلكێ وی وەڵاتی، ئەوی ژی هنارتە ناڤ زەڤیێن خۆ، دا ببیتە گاڤانێ بەرازان.
خوزی رادهێلان كو زكێ خۆ ژ وان خڕنیڤكێن بەرازان دخوارن تژی كربا، لێ كەسێ چ نەددایێ.
پاشی هشێن وی هاتنە سەری و گۆتە خۆ: ‹چەند پالەیێن بابێ من نان ژ بەر دمینیت و ئەڤە ئەز یێ ژ برسا دمرم!
ئەز دێ رابم چمە نك بابێ خۆ و دێ بێژمێ: بابۆ، د راستا تە و ئەسمانی دا من گونە‍‌ھ كر،
ئێدی ئەز نە هەژی هندێمە، كو ب كوڕێ تە بهێمە بناڤكرن. من بكە ئێك ژ پالەیێن خۆ.›
ئینا رابوو و ڤەگەڕیا نك بابێ خۆ. لێ هەر ژ دویر ڤە بابێ وی ئەو دیت، دلێ وی پێ سۆت و كرە غار و هەمبێز كر و ب گەرمی ماچی كر.
كوڕی گۆتێ: ‹بابۆ، د راستا تە و ئەسمانی دا من گونە‍‌ھ كر. ئێدی ئەز نە هەژی هندێمە كو ب كوڕێ تە بهێمە بناڤكرن.›
لێ بابێ گۆتە بەنیێن خۆ: ‹ب لەز باشترین كراس بینن و بكەنە بەر و گوستیرەكێ بكەنە تبلێ و پێلاڤەكێ بكەنە پێیان
و جانەگایێ ربیتەكری بینن و سەرژێ كەن. بلا ئەم بخۆین و كەیفێ بكەین!
چنكو ئەڤ كوڕێ من یێ مری بوو و ساخ بووڤە، یێ بەرزە بوو و هاتە دیتن.› ئینا وان دەست ب كەیفێ كر.
د وی دەمی دا كوڕێ وی یێ مەزن ل ناڤ زەڤیێ بوو. گاڤا هاتی و نێزیكی مال بووی، گو‍‌ھ ل دەنگێ موزیكێ و سەمایێ بوو.
گازی ئێك ژ خزمەتكاران كر و پرسیار ژێ كر: ‹ئەرێ ئەڤە چیە؟›
بەرسڤا وی دا: ‹برایێ تە یێ هاتیەڤە و بابێ تە جانەگایێ ربیتەكری یێ سەرژێ كری، چنكو ئەو ب ساخی یێ ڤەگەڕیای.›
ئینا ئەو تۆڕە بوو و نەدڤیا بچیتە د ژۆرڤە. ئەڤجا بابێ وی دەركەفت و هیڤی ژێ كرن،
لێ وی بەرسڤا بابێ خۆ دا و گۆت: ‹ئەڤە چەندین ساڵە ئەز یێ خزمەتا تە دكەم و من چ جاران ئاخفتنا تە نەشكاندیە، لێ تە كاركەك ژی نە دایە من، كو ئەز ل گەل هەڤالێن خۆ كەیفێ بكەم.
لێ دەمێ ئەڤ كوڕێ تە، ئەوێ مالێ تە ل گەل لەشفرۆشان پویچ كری هاتیەڤە، تە جانەگایێ ربیتەكری بۆ سەرژێ كر.›
بابێ وی گۆتێ: ‹كوڕێ من، تۆ هەردەم یێ ل گەل من، هەر تشتێ من هەی یێ تەیە،
لێ یا فەر بوو ئەم دلشاد و كەیفخۆش ببین، چنكو ئەڤ برایێ تە، یێ مری بوو، ساخ بووڤە، یێ بەرزە بوو، هاتە دیتن.›»
عیسای گۆتە شاگردێن خۆ: «مرۆڤەكێ دەولەمەند بریكارەك هەبوو، بۆ وی هاتە گۆتن كو بریكار مالێ وی پویچ دكەت.
ئینا گازی بریكاری كر و پرسیار ژێ كر: ‹ئەڤە چیە من دەربارەی تە گو‍‌ھ لێ دبیت؟ كا تۆ ژمێریاریا بریكاریا خۆ بدە من. چنكو ئێدی تۆ نەشێی بریكار بی.›
ئینا بریكاری گۆتە خۆ: ‹ئەز چ بكەم؟ چنكو خودانێ من دێ بریكاریێ ژ من ستینیت. من هێز نینە كۆلانێ بكەم و شەرم دكەم خوازۆكیێ بكەم.
ئەڤە من زانی دێ چ كەم، داكو دەمێ ژ بریكاریێ دهێمە دەرئێخستن، من د مالێن خۆ دا وەربگرن.›
ئینا ئێك ئێكە گازی قەردارێن خودانێ خۆ كرن و پرسیار ژ یێ ئێكێ كر: ‹چەند قەرێ خودانێ من ل سەر تەیە؟›
بەرسڤ دا و گۆت: ‹سەد جڕنیێن زەیتا زەیتوونان.› ئینا گۆتێ: ‹پسۆلەیا خۆ بگرە و ب لەز روینە و بنڤیسە پێنجی.›
پاشی گۆتە یێ دی: ‹و چەند ل سەر تەیە؟› بەرسڤ دا و گۆت: ‹سەد كوارێن گەنمی.› گۆتێ: ‹پسۆلەیا خۆ بگرە و بنڤیسە هەشتێ.›
ئەڤجا خودانێ وی پەسنا بریكارێ خۆ یێ دەستپیس كر، ژ بەر كو ب ژیری رەفتار كر. چنكو كوڕێن ڤی سەردەمی ل گەل نفشێ خۆ ژ كوڕێن رۆناهیێ ژیرترن.
ئەز دبێژمە هەوە: ب مالێ دونیایێ بۆ خۆ هەڤالان پەیدا بكەن، داكو دەمێ مالێ هەوە نەما، هوین ل مالێن هەتا هەتایێ بهێنە وەرگرتن.
یێ ل سەر پیچەكێ دەستپاك بیت، دێ ل سەر گەلەكێ ژی یێ دەستپاك بیت و یێ ل سەر پیچەكێ دەستپاك نەبیت، ل سەر گەلەكێ ژی یێ دەستپاك نابیت.
ئەڤجا ئەگەر هوین ل سەر مالێ دونیایێ د دەستپاك نەبن، ئەو كیە دێ هەوە ل سەر دەولەمەندیا راستەقینە دانیت؟
ئەگەر هوین ل سەر مالێ ئێكێ دی د دەستپاك نەبن، یێ هەوە كی دێ دەتە هەوە؟
چ خزمەتكار نەشێن خزمەتا دوو خودانان بكەن، چنكو یان دێ كەرب ژ ئێكی ڤەبن و حەز ژ یێ دی كەت، یان ژی دێ گەهیتە ئێك ژ وان و یێ دی پشت گو‍‌ھ ڤە هاڤێت. هوین نەشێن خزمەتا خودێ و پارەی بكەن.»
فەریسیان ژی ئەوێن حەز ژ پارەی دكر، گو‍‌ھ ل ڤێ چەندێ هەمیێ بوو و تڕانەیێن خۆ پێ كرن.
ئەوی گۆتە وان: «هوین خۆ ل بەر چاڤێن خەلكی راستدار دەردئێخن، لێ خودێ یا د دلێ هەوە دا دزانیت. ئەو تشتێ د ناڤ مرۆڤان دا یێ دلخواز بیت، ئەو ل نك خودێ یێ دلڕەشە.
دەستوور و رێنمایێن پێغەمبەران تاكو دەمێ یوحەننای دهاتنە راگەهاندن. ژ هنگی وەرە مزگینیا پاشایەتیا خودێ یا دهێتە راگەهاندن و هەر كەسەك ب زۆری یێ خۆ دكەتە د ناڤ دا.
لێ ژناڤچوونا ئەرد و ئەسمانی ب ساناهیترە ژ كەفتنا خالەكا دەستووری.
هەر كەسێ ژنا خۆ بەردەت و ئێكا دی بینیت، دەهمەنپیسیێ دكەت و هەر كەسێ ژنەكا بەردای بینیت، ئەو دەهمەنپیسیێ دكەت.
مرۆڤەكێ دەولەمەند هەبوو، جلكێن بنەفشی و كتانی دكرنە بەر خۆ و هەمی رۆژان د خۆشیەكا مەزن دا دژیا.
مرۆڤەكێ بەلەنگاز ژی هەبوو دگۆتنێ لەعازەر، ل بەر دەرگەهێ وی دەولەمەندی كەفتبوو و كولكان لەشێ وی گرتبوو.
دلێ وی نەساخی دچوویێ ژ بەرمایكێن مێزا دەولەمەندی تێر ببیت، سە ژی دهاتن و كولكێن وی دئالیستن.
وەسا چێبوو ئەو بەلەنگاز مر و فریشتەیان هەلگرت و كرە د هەمبێزا ئیبراهیمی دا، پاشی ئەوێ دەولەمەند ژی مر و هاتە ڤەشارتن.
دەمێ د وارێ مریان دا دهاتە ئەشكەنجەدان، سەرێ خۆ راكر، ژ دویر ڤە چاڤێن وی ب ئیبراهیمی كەفتن و لەعازەر یێ د هەمبێزا وی دا.
ئینا گازی كر و گۆت: ‹بابێ من ئیبراهیم، دلۆڤانیێ ب من ببە و لەعازەری بهنێرە نك من، داكو تبلا خۆ ب ئاڤێ تەڕ بكەت و ئەزمانێ من پێ سار بكەت، چنكو ئەز د ڤێ گوڕیا ئاگری دا یێ ئازاران دكێشم.›
لێ ئیبراهیمی گۆت: ‹كوڕێ من، بینە بیرا خۆ كو تە خۆشیێن خۆ د ژیانا خۆ دا وەرگرتن و لەعازەری ژی نەخۆشی كێشان، لێ ڤێ گاڤێ ئەو ل ڤێرێ یێ دهێتە دلخۆش كرن و تۆ یێ ئازاران دكێشی.
سەرەڕای ڤێ هەمیێ، نهالەكا گەلەك مەزن د ناڤبەرا مە و هەوە دا یا هاتیە دانان، تاكو ئەوێن بڤێن ژ ڤێرێ بچن و دەربازی لایێ هەوە ببن، ئەو نەشێن، هەروەسا ئەوێن ل لایێ هەوە ژی نەشێن دەربازی لایێ مە ببن.›
ئینا گۆت: ‹ئەڤجا بابۆ، ئەز هیڤیان ژ تە دكەم تۆ وی بهنێرییە مالا بابێ من،
چنكو من پێنج برایێن هەین، بلا وان ئاگەهدار بكەت، دا ئەو ژی نەهێنە ڤی جهێ ئەشكەنجەدانێ.›
لێ ئیبراهیمی گۆتێ: ‹وان مووسا و پێغەمبەرێن هەین، بلا گوهێ خۆ بدەنە وان.›
ئینا وی گۆت: ‹نە، بابێ من ئیبراهیم، ئەگەر ئێك ژ ناڤ مریان رابیت و بچیتە نك وان، دێ ل خۆ زڤڕن.›
ئیبراهیمی گۆتێ: ‹ئەگەر ئەو گوهێ خۆ نەدەنە مووسای و پێغەمبەران، خۆ ئەگەر ئێك ژ ناڤ مریان ژی رابیت، ئەو باوەر ناكەن.›»
عیسای گۆتە شاگردێن خۆ: «مەحالە هەلنگافتن نەهێن، لێ نەخوزیكێن وی كەسی یێ دبیتە ئەگەرێ هەلنگفتنێ.
بۆ وی باشترە بەرئاشەك ب ستۆیێ وی ڤە بهێتە گرێدان و بهاڤێژنە د دەریایێ دا، كو ئەو ئێك ژ ڤان بچویكان بهەلنگێڤیت.
هشیاری خۆ بن: ئەگەر برایێ تە گونەهەك كر، لێ بحەیتینە و ئەگەر ل خۆ زڤڕی، لێ ببورە.
ئەگەر رۆژێ حەفت جاران گونە‍‌ھ دژی تە كرن و هەر حەفت جاران ل تە زڤڕی و گۆت: ‹ئەز یێ پەشیمانم› دڤێت تۆ ل وی ببوری.»
ئینا هنارتیان گۆتە خودانی: «باوەریا مە پتر لێ بكە.»
خودانی گۆت: «ئەگەر هەوە تەمەت دندكەكا خەردەلێ باوەری هەبا، هەوە گۆتبا ئەڤێ دارا تویێ: ‹وەرە هەلكێشان و د دەریایێ دا وەرە چاندن،› دا ئەو ب گۆتنا هەوە كەت.
كی ژ هەوە بەنیەك هەیە كێلانێ یان شڤانیێ دكەت و دەمێ ژ ئاقاری ڤەدگەڕیێت، دبێژیتێ: ‹فەرموو وەرە سەر سفرێ.›
ل شوینا ڤێ، ئەرێ ما نابێژیتێ: ‹خوارنەكێ بۆ من ئامادە بكە داكو ئەز شیڤێ بخۆم و ناڤتەنگا خۆ گرێ بدە و خزمەتا من بكە تاكو ئەز دخۆم و ڤەدخۆم، پاشی تۆ بخۆ و ڤەخۆ.›
ئەرێ ما دێ سوپاسیا بەنی كەت چنكو ب فەرمانا وی كر؟
هەروەسا هوین ژی، دەمێ فەرمان ل هەوە بهێنە كرن و هوین هەمیان ب ج‍‌ھ دئینن، بێژن: ‹ئەم بەنیێن ب كێرنەهاتینە، مە ئەو كر ئەوا ل سەر مە پێدڤی بوو بكەین.›»
دەمێ عیسا بەرەڤ ئورشەلیمێ دچوو، د ناڤبەرا سامەریایێ و جەلیلێ را بوری.
دەمێ ئەو ب ژۆر دكەفتە گوندەكی، دە‍‌ھ زەڵامێن گوڕی كەفتنە پێشیا وی و ل دویر راوەستیان.
وان دەنگێ خۆ بلند كر و گۆتن: «عیسا، مامۆستا دلۆڤانیێ ب مە ببە.»
گاڤا عیسای ئەو دیتین، گۆتە وان: «هەڕن خۆ نیشا كاهنان بدەن.» دەمێ ئەو دچوون، ئەو پاقژ بوون.
ئێك ژ وان، دەمێ خۆ دیتی یێ ساخ بووی، ڤەگەڕیاڤە و ب دەنگەكێ بلند پەسنا خودێ كر
و خۆ دەڤ و دەڤ هاڤێتە بەر پێیێن عیسای و سوپاسیا وی كر. ئەو مرۆڤ یێ سامەری بوو.
ئینا عیسای بەرسڤ دا و گۆت: «ئەرێ ما هەر دە‍‌ھ پاقژ نەبوون؟ پا كا نەهێن دی؟
ما كەس ژ ڤی بیانی پێڤەتر نینە ڤەگەڕیێت و پەسنا خودێ بكەت؟»
پاشی گۆتە وی: «رابە و هەڕە، باوەریا تە تۆ ساخ كری.»
دەمێ فەریسیان پرسیار ژێ كری: «كەنگی دێ پاشایەتیا خودێ هێت؟» گۆتە وان: «پاشایەتیا خودێ ب نیشانەكا بەرچاڤ ناهێت
و نابێژن: ‹ئەڤە یا ل ڤێرێ› یان ‹یا ل وێراهە،› چنكو پاشایەتیا خودێ د ناڤ هەوە دایە.»
پاشی گۆتە شاگردێن خۆ: «دەمەك دێ هێت هوین دێ خوزیان راهێلن كو رۆژەكێ ب تنێ ژی ژ رۆژێن كوڕێ مرۆڤ ببینن و هوین نابینن.
دێ بێژنە هەوە: ‹یێ ل وێراهە› یان ‹ئەڤە یێ ل ڤێرێ،› هوین نەچن و ب دویڤ نەكەڤن.
چنكو كا چەوا برویسی ل رەخەكێ ئەسمانی ڤەددەت و رۆناهیێ ددەتە رەخێ دی، كوڕێ مرۆڤ ژی د رۆژا خۆ دا، دێ یێ وەسا بیت.
لێ دڤێت ل بەراهیێ ئەو گەلەك ئازارێ بكێشیت و ژ لایێ ڤی نفشی ڤە بهێتە رەتكرن.
ل دەمێ نوحی كا چەوا بوو، ل دەمێ كوڕێ مرۆڤ ژی دێ یا وەسا بیت.
مرۆڤان دخوار، ڤەدخوار، ژن دئینا و شوی دكر، تا وێ رۆژا نوح چوویە د گەمیێ دا و تووفان رابووی و هەمی ژ ناڤ چووین.
هەروەسا ل دەمێ ڵۆتی ژی كا چەوا بوو: مرۆڤان دخوار، ڤەدخوار، دكڕی، دفرۆت، دچاند و ئاڤا دكر.
لێ ل رۆژا ڵۆت ژ سەدۆمێ دەركەفتی، ئاگر و كپریت ژ ئەسمانی بارین و هەمی ژناڤبرن.
ل رۆژا كوڕێ مرۆڤ ژی دیار دبیت، دێ یا وەسا بیت.
ل وێ رۆژێ، ئەوێ ل سەر بانی بیت و تشتێن وی ل خوارێ بن، بلا نەهێتە خوارێ دا ببەت و ئەوێ ل ناڤ زەڤیێ بیت، بلا ژێ نەزڤڕیتەڤە.
هەڤژینا ڵۆتی بیننە بیرا خۆ.
هەر كەسێ بزاڤێ بكەت ژیانا خۆ بپارێزیت، دێ وێ ژ دەست دەت، لێ هەر كەسێ ژیانا خۆ ژ دەست بدەت، دێ وێ پارێزیت.
ئەز دبێژمە هەوە: د وێ شەڤێ دا، دوو كەس دێ ل سەر تەختەكی بن، ئێك دێ هێتە برن و یێ دی دێ هێتە هێلان.
دوو ژنك دێ پێكڤە دستاڕەكی هێرن، ئێك دێ هێتە برن و یا دی دێ هێتە هێلان.
دوو دێ ل ناڤ زەڤیێ بن، ئێك دێ هێتە برن و یێ دی دێ هێتە هێلان.»
ئینا ئەوان پرسیار ژێ كر: «ل كیڤە، خودان؟» گۆتە وان: «كەلەخ ل كیرێ بیت، باڵندەیێن كەلەخان ژی دێ ل وێرێ خڕڤە بن.»
نموونەیەك بۆ وان ئینا كو پێدڤیە هەردەم نڤێژێ بكەن و بێ ئومێد نەبن
و گۆت: «ل باژێڕەكی دادوەرەك هەبوو، نە ژ خودێ دترسیا و نە شەرم ژ مرۆڤان دكر.
ل وی باژێڕی بیژنەك ژی هەبوو، دهاتە نك وی و دگۆتێ: ‹مافێ من ژ هەڤڕكێ من بستینە.›
دادوەر بۆ دەمەكی رازی نەبوو، لێ پشتی هنگی گۆتە خۆ: ‹هەر چەندە ئەز ژ خودێ ناترسم و شەرمێ ژ مرۆڤان ناكەم،
لێ چنكو ئەڤ بیژنە سەرگێژیێ بۆ من چێدكەت، ئەز دێ مافێ وێ بۆ وێ وەرگرم، نەكو ئەو ب هاتنا خۆ من بوەستینیت.›»
پاشی خودانی گۆت: «گوهێ خۆ بدەنێ دادوەرێ بێداد چ دبێژیت.
ئەرێ ما خودێ مافێ هەلبژارتیێن خۆ، ئەوێن ب شەڤ و رۆژ هەوارا خۆ دگەهیننێ، وەرناگریت؟ ئەرێ دێ بەرسڤا وان گیرۆ كەت؟
ئەز دبێژمە هەوە: ئەو دێ زوی مافێ وان بۆ وەرگریت. لێ دەمێ كوڕێ مرۆڤ دهێت، ما دێ باوەریێ ل سەر رویێ ئەردی بینیت؟»
ئەڤ نموونە ژی بۆ هندەك كەسان ئینا، ئەوێن ژ راستداریا خۆ دپشتڕاست و مرۆڤێن دی ژ خۆ نزمتر ددیتن:
«دوو مرۆڤ چوونە پەرستگەهێ، دا نڤێژێ بكەن، ئێك فەریسی بوو و یێ دی باجگر.
یێ فەریسی راوەستیا و بۆ خۆ هۆسا نڤێژ كر: ‹خودێ، ئەز سوپاسیا تە دكەم، كو ئەز نە وەكو مرۆڤێن دی یێن رێگر و خرابكار و دەهمەنپیسم، نە ژی وەكو ڤی باجگریمە.
حەفتیێ دوو جاران رۆژیێ دگرم و تشتێ ب دەست من دكەڤیت، ئەز دەهێكێ ژێ ددەم.›
لێ یێ باجگر دویر راوەستیا و شەرم دكر خۆ بەرێ خۆ ژی بدەتە ئەسمانی، ل سینگێ خۆ ددا و دگۆت: ‹خودێ، دلۆڤانیا خۆ ب من ببە، ئەز گونەهكارم.›
ئەز دبێژمە هەوە: ئەڤ مرۆڤێ باجگر بێگونە‍‌ھ ڤەگەڕیا مالا خۆ و نە یێ دی، چنكو هەر كەسێ خۆ بلند بكەت دێ هێتە نزمكرن و یێ خۆ نزم بكەت دێ هێتە بلندكرن.»
هندەك زاڕۆكێن ساڤا ژی ئینانە نك عیسای، دا دەستێ خۆ بدانیتە سەر وان. دەمێ شاگردان ئەڤە دیتی، ل وان حەیتاند.
لێ عیسای گازی وان كر و گۆت: «بهێلن زاڕۆك بهێنە نك من و رێ لێ نەگرن، چنكو پاشایەتیا خودێ بۆ یێن وەكو وانە.
ب راستی دبێژمە هەوە: هەر كەسێ وەكو زاڕۆكەكی پاشایەتیا خودێ قەبیل نەكەت، ئەو ناچیتە د وێ دا.»
سەرۆكەكی پرسیار ژێ كر و گۆتێ: «مامۆستایێ چاك، ئەز چ بكەم، دا ببمە میراتگرێ ژیانا هەروهەر؟»
ئینا عیسای گۆتێ: «بۆچی تۆ دبێژیە من چاك؟ كەسێ چاك نینە ژبلی ئێكی، ئەو ژی خودێیە.
تۆ فەرمانان دزانی: ‹دەهمەنپیسیێ نەكە، كوشتنێ نەكە، دزیێ نەكە، شاهدەییا ب درەو نەدە، رێزێ ل دایك و بابێن خۆ بگرە.› »
ئینا گۆت: «من هەر ژ لاوینیێ ئەڤە هەمی ب ج‍‌ھ ئیناینە.»
دەمێ عیسای ئەڤ چەندە بهیستی، گۆتە وی: «هێشتا تشتەكێ ژ تە كێمە: هەمی تشتێ تە هەی بفرۆشە و ل سەر هەژاران بەڵاڤ بكە، دێ تە گەنجینەیەك ل ئەسمانان هەبیت، پاشی وەرە ب دویڤ من بكەڤە.»
گاڤا وی ئەڤ چەندە بهیستی دلگران بوو، چنكو گەلەك یێ دەولەمەند بوو.
عیسای دیت كو ئەو خەمگرتی بوو، گۆت: «چەند یا ب زەحمەتە دەولەمەند بچنە د پاشایەتیا خودێ دا.
چوونا حێشترێ د كونا دەرزیكێ را ب ساناهیترە ژ ب ژۆركەفتنا دەولەمەندەكی بۆ پاشایەتیا خودێ.»
ئینا ئەوێن ئەڤ گۆتنە بهیستی، گۆتن: «ئەڤجا كی دشێت قورتال ببیت؟»
عیسای گۆت: «تشتێن ل نك مرۆڤان مەحالن، ئەو ل نك خودێ د شیان دانە.»
پەترۆسی گۆت: «ئەڤە مە هەمی تشتێن خۆ یێن هێلاین و ئەم یێ ب دویڤ تە كەفتین.»
ئینا گۆتە وان: «راستیێ دبێژمە هەوە: هەر كەسێ مال، یان هەڤژین، یان برا، یان دایك و باب، یان زاڕۆك ژ پێخەمەت پاشایەتیا خودێ هێلا بیت،
دێ د ڤی سەردەمی دا، گەلەك پترێ ب دەست خۆ ڤە ئینیت و د سەردەمێ داهاتی ژی دا، ژیانا هەروهەر وەرگریت.»
پاشی عیسای هەر دوازدە شاگرد ڤەدەر كرن و گۆتە وان: «ئەڤە ئەم یێ بەرەڤ ئورشەلیمێ ب سەر دكەڤین و هەر تشتێ دەربارەی كوڕێ مرۆڤ ب رێیا پێغەمبەران هاتیە نڤیسین، دێ ب ج‍‌ھ هێت.
دێ رادەستی نەجوهیان هێتە كرن و تڕانە پێ هێنە كرن و جڤین پێ هێنە دان و دێ تف لێ هێنە كرن
و دێ وی دەنە بەر قامچیان و كوژن و ل رۆژا سێیێ دێ رابیتەڤە.»
لێ ئەو د چ ژ وان تشتان نەگەهشتن. ئەو ئاخفتن ل وان یا ڤەشارتی بوو و وان نەزانی وی چ گۆت.
دەمێ عیسا نێزیكی ئەریحا دبوو، ئێكێ كۆرە ل رەخێ رێكێ یێ روینشتی بوو، خوازۆكی دكر.
گاڤا گو‍‌ھ ل بورینا كۆمێ بووی، پرسیار كر: «ئەڤە چیە؟»
گۆتنێ «عیسایێ ناسیرەیی د ڤێرێ را یێ دبوریت.»
ئینا گازی كر: «عیسایێ كوڕێ داوودی، دلۆڤانیێ ب من ببە!»
ئینا ئەوێن ل پێشیێ، كۆرە پاشڤە بر دا بێدەنگ ببیت. لێ ئەوی گەلەك پتر كرە هەوار: «كوڕێ داوودی دلۆڤانیێ ب من ببە!»
عیسا راوەستیا و فەرمان دا كو وی مرۆڤی بیننە نك وی. دەمێ نێزیك بووی، پرسیار ژێ كر:
«تە چ دڤێت ئەز بۆ تە بكەم؟» گۆتێ: «خودان، بیناهیێ بكەم.»
عیسای گۆتێ: «بیناهیێ بكە. باوەریا تە تۆ ساخ كری.»
د ج‍‌ھ دا بیناهی كر و ب دویڤ كەفت و پەسنا خودێ كر. دەمێ خەلكی هەمیان ئەڤ چەندە دیتی، پەسنا خودێ كرن.
پاشی چوو ئەریحا و د ناڤ را دەرباز دبوو.
زەڵامەك ل وێرێ بوو دگۆتنێ زەككا، سەرۆكێ باجگران بوو و یێ دەولەمەند بوو.
وی بزاڤ دكر عیسای ببینیت، كا ئەو كیە، لێ ژ بەر بۆشاتیێ نەدشیا، چنكو یێ بەژن كورت بوو،
ئینا كرە غار و چوو سەر دارهژیرەكێ، داكو عیسای ببینیت، چنكو ل بەر بوو د وێرێ را دەرباز ببیت.
دەمێ عیسا گەهشتیە وی جهی، بەرێ خۆ دا سڵال و زەككا دیت و گۆتێ: «زەككا، لەزێ بكە وەرە خوارێ، چنكو دڤێت ئەڤرۆ ئەز ل مالا تە بمینم.»
ئینا ب لەز هاتە خوارێ و ب دلخۆشی پێشوازیا وی كر.
هەمیێن ئەڤ چەندە دیتی، نەرازی بوون و گۆتن: «ئەو ل نك مرۆڤەكێ گونەهكار بوو مێڤان.»
لێ زەككا راوەستیا و گۆتە خودانی: «خودان، ئەڤە ئەز یێ نیڤا سامانێ خۆ ددەمە هەژاران و ئەگەر من تشتەك ب زۆری ژ ئێكی ستاندبیت، ئەز یێ چوار جاركی ددەمێ.»
ئینا عیسای گۆتێ: «ئەڤرۆ قورتالبوون بۆ ڤێ مالێ هات، چنكو ئەو ژی كوڕێ ئیبراهیمیە.
كوڕێ مرۆڤ یێ هاتی، دا ل مرۆڤێن بەرزە بگەڕیێت و قورتال بكەت.»
دەمێ ئەوان گوهێ خۆ ددا ڤێ ئاخفتنێ، عیسا بەردەوام بوو و نموونەیەك بۆ وان ئینا. چنكو ئەو نێزیكی ئورشەلیمێ ببوو و وان هزردكر كو پاشایەتیا خودێ نوكە دێ دیار بیت.
ئینا گۆت: «مرۆڤەك ژ مالەكا مەزن چوو وەڵاتەكێ دویر، داكو پاشایەتیەكێ بۆ خۆ وەرگریت و ڤەگەڕیتەڤە.
ئینا گازی هەر دە‍‌ھ بەنیێن خۆ كر و دە‍‌ھ زێڕ دانە وان و گۆت: ‹بازرگانیێ پێ بكەن تاكو ئەز ڤەدگەڕیێمەڤە.›
لێ هەڤوەڵاتیێن وی حەز ژ وی نەدكر، ئینا هندەك د دویڤ دا هنارتن، داكو بێژنێ: ‹مە نەڤێت ئەو پاشایەتیێ ل مە بكەت.›
دەمێ پاشایەتی وەرگرتی و ڤەگەڕیای، فەرمان دا كو گازی هەر دە‍‌ھ بەنیان بكەن، ئەوێن دە‍‌ھ زێڕ داینە وان، داكو بزانیت كا هەر ئێكێ ژ وان چ قازانج ژ بازرگانیا خۆ كریە.
یێ ئێكێ هات و گۆت: ‹ئەزبەنی، زێڕێ تە دە‍‌ھ زێڕ قازانج كرن.›
ئینا گۆتێ: ‹دەستخۆش، بەنیێ قەنج! ئەڤجا چنكو تۆ ل سەر پیچەكێ یێ دلسۆز بووی، هەڕە سەروەریێ ل دە‍‌ھ باژێڕان بكە.›
پاشی یێ دوویێ هات و گۆت: ‹ئەزبەنی، زێڕێ تە پێنج زێڕ قازانج كرن.›
ئینا گۆتە وی ژی: ‹تۆ سەروەریێ ل پێنج باژێڕان بكە.›
پاشی بەنیێ دی هات و گۆت: ‹ئەزبەنی، ئەڤە زێڕێ تەیە، من یێ د ناڤ دەستمالەكێ دا پێچای.
ئەز ژ تە دترسیام، چنكو تۆ مرۆڤەكێ دلڕەقی، تۆ وی دبەی یێ تە نەدانای و تۆ وی ددروی یێ تە نەچاندی.›
ئینا گۆتە وی: ‹ژ دەڤێ تە ئەز دێ تە گونەهبار كەم، هەی بەنیێ خراب: مادەم تە دزانی ئەز مرۆڤەكێ دلڕەقم، ئەز وی دبەم یێ من نەدانای و وی ددرویم یێ من نەچاندی،
پا بۆچی تە پارەیێ من نەددانا نك پارەگوهۆڕان، دا هەر دەمێ ئەز هاتبام، من ئەو ل گەل ریبایێ وەرگرتبا؟›
پاشی گۆتە ئەوێن ل وێرێ راوەستیای: ‹زێڕی ژێ بستینن و بدەنە خودانێ دە‍‌ھ زێڕان.›
ئینا گۆتنێ: ‹ئەزبەنی، ئەوی دە‍‌ھ زێڕێن هەین.›
ئینا گۆت: ‹ئەز دبێژمە هەوە: هەر كەسێ هەیی دێ پتر بۆ وی هێتە دان، لێ ئەوێ نەیی، خۆ یێ هەی ژی دێ ژێ هێتە ستاندن.
لێ دوژمنێن من ئەوێن نەدڤیان ئەز پاشایەتیێ ل وان بكەم، ل ڤێرێ بۆ من ئامادە بكەن و ل بەر چاڤێن من ڤەكوژن.›»
پشتی ئەڤ چەندە گۆتی، بەرەڤ ئورشەلیمێ چوو.
دەمێ نێزیكی گوندێن بێت‌فاجی و بێت‌عەنیا بووی ل نك چیایێ دگۆتنێ چیایێ زەیتوونان، دوو شاگردێن خۆ هنارتن
و گۆتە وان: «هەڕنە ڤی گوندێ بەرامبەری هەوە، دەمێ هوین دچنە ناڤ گوندی، دێ جانەكەرەكێ گرێدای بینن كو چ جاران كەس لێ سیار نەبوویە. وی ڤەكەن و بینن.
ئەگەر ئێكی پرسیار ژ هەوە كر: ‹بۆچی هوین وی ڤەدكەن؟› هۆسا بەرسڤا وی بدەن: ‹خودانی پێدڤی یا پێ هەی.›»
ئەوێن هاتینە هنارتن چوون و وەكو خودانی گۆتیە وان دیت.
دەمێ ئەوان جانەكەر ڤەدكر، خودانێن وی پرسیار ژ وان كر: «بۆچی هوین وی ڤەدكەن؟»
ئینا وان گۆت: «خودانی پێدڤی یا پێ هەی.»
پاشی بۆ عیسای ئینا و جلكێن خۆ دانانە سەر جانەكەری و عیسا لێ سیار كر.
دەمێ ئەو ب رێ دچوو، خەلكی جلكێن خۆ ل سەر رێكێ رادئێخستن.
دەمێ نێزیكی نشیڤیا چیایێ زەیتوونان بووی، هەمی جەماوەرێ شاگردان ژ بۆ هەمی ئەو حنێرێن وان دیتین، دەست پێ كر ب دلخۆشی و ب دەنگەكێ بلند پەسنا خودێ كرن.
دگۆتن: «‹یێ بەرەكەتدارە ئەو پاشایێ ب ناڤێ خودانی دهێت!› ئاشتی ل ئەسمانی و مەزناهی ل بلنداهیان.»
لێ هندەك ژ فەریسیان ژ كۆمێ گۆت: «مامۆستا، ل شاگردێن خۆ بحەیتینە.»
ئینا ئەوی بەرسڤا وان دا و گۆت: «ئەز دبێژمە هەوە: ئەگەر ئەڤێن هەنێ بێدەنگ ببن، بەر دێ گازی كەن.»
دەمێ نێزیك بووی و باژێڕ دیتی، بۆ كرە گری
و گۆت: «خوزی تە د ڤێ رۆژێ دا زانیبا كا چ تشت بۆ ئاشتیا تەنە! لێ نوكە ئەو ژ بەر چاڤێن تە هاتنە ڤەشارتن.
رۆژ دێ ب سەر تە دا هێن، دوژمنێن تە دێ ل دۆرێن تە چەپەری چێكەن و دێ تە دۆرپێچ كەن و دێ تە ژ هەمی رەخان ڤە ئاسێ كەن.
دێ تە ب سەر زاڕۆكێن تە دا هەڕفینن و بەری ل سەر بەری ناهێلن، چنكو دەمێ خودێ سەرەدانا تە كری تۆ ب خۆ نەحەسیای.»
چوو د حەوشا پەرستگەهێ دا و دەست ب دەرئێخستنا وان كر یێن فرۆتن دكر
و گۆتە وان «یا هاتیە نڤیسین: ‹مالا من دێ مالا نڤێژێ بیت، › لێ هەوە یا كریە ‹كونجا رێگران›!»
ئەوی هەر رۆژ ل پەرستگەهێ فێركرن دكر. سەرۆكێن كاهنان و مامۆستایێن دەستووری و ریهسپیێن مللەتی ژی بزاڤ دكر وی بكوژن.
لێ وان رێكا خۆ نە ددیت، چنكو هەمی خەلك گرێدایی گۆتنێن وی بوو.
رۆژەكێ ژ وان رۆژان، دەمێ د حەوشا پەرستگەهێ دا خەلك فێر دكر و مزگینی ددا، سەرۆكێن كاهنان و مامۆستایێن دەستووری ل گەل ریهسپیان ل بەرامبەری وی راوەستیان
و گۆتنێ: «بێژە مە، تۆ ب چ دەستهەلات ڤان كاران دكەی؟ ئەو كیە ئەڤ دەستهەلاتە دایە تە؟»
ئینا عیسای بەرسڤا وان دا و گۆت: «ئەز ژی دێ پرسیارەكێ ژ هەوە كەم، بێژنە من:
تافیركرنا یوحەننای ژ ئەسمانی بوو یان ژ مرۆڤان؟»
ئینا دانوستاندن د ناڤ خۆ دا كر و گۆتن: «ئەگەر ئەم بێژین ‹ژ ئەسمانی بوو،› دێ بێژیت، ‹ئەڤجا بۆچی هەوە باوەر ژێ نەكر؟›
لێ ئەگەر ئەم بێژین ‹ژ مرۆڤان بوو› ئەڤ خەلكە هەمی دێ مە بەرباران كەن، چنكو ئەو دپشتڕاستن كو یوحەننا پێغەمبەرە.»
ئینا وان بەرسڤ دا كو ئەو نزانن ژ كێ بوو.
عیسای گۆتە وان: «ئەز ژی نابێژمە هەوە ب چ دەستهەلات ئەز ڤان كاران دكەم.»
ئەوی دەست پێ كر ئەڤ نموونەیە بۆ خەلكی ئینا: «مرۆڤەكی رەزەك دانا و كرە د دەستێ هندەك رەزڤانان دا و بۆ دەمەكێ درێژ چوو وەڵاتەكێ دی.
ل دەمێ چنینێ، بەنیەك هنارتە نك رەزڤانان، داكو پشكا وی ژ بەرهەمێ رەزی بدەنێ، لێ رەزڤانان بەنی قوتا و دەستڤاڵا زڤڕاند.
پاشی ئەوی بەنیەكێ دی هنارت، لێ ئەو ژی قوتا و كرێت كر و دەستڤاڵا زڤڕاند.
پاشی بەنیێ سێیێ هنارت، ئینا ئەو ژی بریندار كر و دەرئێخست.
ئینا خودانێ رەزی گۆت: ‹ئەز چ بكەم؟ ئەز دێ كوڕێ خۆ یێ خۆشتڤی هنێرم، بەلكو رێزێ لێ بگرن.›
لێ دەمێ رەزڤانان دیتی، دانوستاندن د ناڤبەرا خۆ دا كر و گۆت: ‹ئەڤە میراتگرە، وەرن ئەم وی بكوژین، دا میرات بۆ مە بمینیت.›
ئینا وان ئەو دەرئێخستە ژ دەرڤەی رەزی و كوشت. ئەڤجا خودانێ رەزی دێ چ ل وان كەت؟
ئەو دێ هێت و وان رەزڤانان ژ ناڤ بەت و رەزی دەتەڤ هندەكێن دی.» دەمێ خەلكی گو‍‌ھ ل ڤێ چەندێ بووی، گۆتن: «خودێ نەكەت!»
لێ ئەوی بەرێ خۆ دا وان و گۆت: «ئەڤجا رامانا ئەڤا هاتیە نڤیسین چیە؟ ‹ئەو بەرێ هۆستایان رەتكری، یێ بوویە بەرێ بنیاتی.›
هەر كەسێ بكەڤیتە سەر ڤی بەری، دێ پرتكیت و هەر كەسێ بەر بكەڤیتە سەر، دێ وی هەڕشینیت.»
ئینا هەر د وی دەمی دا، سەرۆكێن كاهنان و مامۆستایێن دەستووری بزاڤ كر عیسای بگرن، چنكو ئەوان زانی وی ب ڤێ نموونەیێ بەحسێ وان دكر، لێ ئەو ژ خەلكی ترسیان.
ئینا دویڤچوونا وی كر و هندەك سیخوڕ هنارتنە دۆرێن وی و خۆ ب هندێ دئینا دەر كو ئەو مرۆڤێن راستدارن، داكو عیسای ل سەر ئاخفتنەكا وی بگرن و رادەستی دادگە‍‌ھ و دەستهەلاتا والی بكەن.
ئەوان ئەڤ پرسیارە ژ عیسای كر: «مامۆستا، ئەم دزانین تۆ د ئاخفتن و فێركرنا خۆ دا یێ راستی، تۆ لایەنگریا كەسێ ناكەی، لێ تۆ رێكا خودێ راست نیشا خەلكی ددەی.
بۆ مە رەوایە باجێ بدەینە قەیسەری یان نە؟»
عیسای هەست ب فێلبازیا وان كر و گۆتە وان:
«كا دینارەكێ نیشا من بدەن. ئەڤ وێنە و ناڤێ ل سەر یێن كێنە؟» وان گۆت: «یێن قەیسەرینە.»
ئینا گۆتە وان: «ئەڤجا یێ قەیسەری بدەنە قەیسەری و یێ خودێ ژی بدەنە خودێ.»
ئینا ئەو نەشیان بەرامبەری خەلكی، عیسای ب ئاخفتنەكا وی گونەهبار بكەن. ب بەرسڤا وی حێبەتی بوون و بێدەنگ بوون.
سەدوقی، ئەوێن دبێژن رابوونا مریان نینە، هندەك ژ وان هاتن و پرسیار ژێ كر و گۆتێ:
«مامۆستا، مووسای بۆ مە یا نڤیسی: ئەگەر برایێ ئێكی مر و زاڕۆك ژ هەڤژینا خۆ نەبوون، پێدڤیە برایێ وی هەڤژینا وی بۆ خۆ بینیت و دویندەهێ بۆ ناڤێ برایێ خۆ پەیدا بكەت.
ئەڤجا حەفت برا هەبوون، یێ ئێكێ ژن ئینا و بێ دویندە‍‌ھ مر.
ئینا یێ دوویێ ئەو بۆ خۆ ئینا،
پاشی یێ سێیێ بۆ خۆ ئینا و هۆسا هەر حەفتان. هەمی مرن و چ زاڕۆك ل دویڤ خۆ نەهێلان.
ل دویماهیێ ژن ژی مر.
ئەڤجا ل رۆژا رابوونێ، ئەو ژن دێ هەڤژینا كێ بیت، چنكو هەڤژینا هەر حەفتان بوو؟»
عیسای بەرسڤا وان دا و گۆت: «مرۆڤێن ڤی سەردەمی شوی دكەن و ژنێ دئینن،
لێ ئەوێن دهێنە هژمارتن كو د هەژینە بگەهنە وێ جیهانێ و رابوونا مریان، نە ژنێ دئینن و نە شوی دكەن،
ئێدی ئەو نەشێن بمرن ژی، چنكو ئەو وەكو فریشتەیانن. ئەو كوڕێن خودێنە، چنكو كوڕێن رابوونێنە.
مووسای ژی د سەرهاتیا تڕاشێ دا ، دیار كر كو مری رادبن، دەمێ دەربارەی خودانی دبێژیت: ئەو خودایێ ئیبراهیمی و خودایێ ئیسحاقی و خودایێ یەعقوبیە.
ئەڤجا ئەو نە خودایێ مریانە، لێ یێ زیندیانە، چنكو بۆ وی، هەمی د زیندینە.»
ئینا هندەك مامۆستایێن دەستووری گۆتن: «مامۆستا، تە باش گۆت.»
پشتی هنگی نەوێریان چ پرسیاران ژێ بكەن.
عیسای گۆتە وان: «چەوا دبێژن مەسیح كوڕێ داوودیە؟
چنكو داوود ب خۆ د پەرتووكا زەبوورێ دا دبێژیت: ‹خودانی گۆتە خودانێ من: ل دەستێ من یێ راستێ روینە،
تاكو ئەز دوژمنێن تە بكەمە تەختەپێ بۆ پێیێن تە.›
مادەم داوود دبێژیتێ ‹خودان›، پا چەوا كوڕێ ویە؟»
دەمێ هەمی خەلكی گوهێ خۆ ددایێ، گۆتە شاگردێن خۆ:
«هشیاری مامۆستایێن دەستووری بن. ئەو حەز دكەن ب جلكێن شۆڕ دەركەڤن و حەز دكەن ل بازاڕان سڵاڤ لێ بهێنە كرن و د كنیشتەیان دا ل كورسیكێن پێشیێ بن و ل مێڤانداریان ل سەرێ ژۆری بن.
ئەو مالێ بیژنان دخۆن و بۆ رویمەتی نڤێژان درێژ دكەن. ئەو دێ سزادانەكا گرانتر وەرگرن.»
بەرێ خۆ دایێ و دیت دەولەمەند یێ پێشكێشیێن خۆ دكەنە د پارەدانكا پەرستگەهێ دا،
هەروەسا دیت بیژنەكا هەژار یا دوو فلسان دكەتە د پارەدانكێ دا.
ئینا گۆت: «راستیێ دبێژمە هەوە: ڤێ بیژنا هەژار ژ هەمیان پتر كرنە تێدا،
چنكو ڤان هەمیان ژ سامانێ خۆ یێ زێدە پارە دان، لێ وێ سەرەڕای بەلەنگازیا خۆ، هەر چ یێ وێ بۆ ژیارا خۆ هەی كرە تێدا.»
دەمێ هندەكان بەحسێ پەرستگەهێ دكر، كو ب بەرێن جوان و پێشكێشیان هاتیە خەملاندن، عیسای گۆت:
«ئەڤ تشتێن هوین دبینن، رۆژ دێ هێن كو بەر ل سەر بەری نامینیت، هەمی دێ هێنە هەڕفاندن.»
ئینا وان پرسیار ژێ كر و گۆتن: «مامۆستا، ئەڤە دێ كەنگی چێبن؟ و دێ چ نیشان هەبیت، دەمێ رویدانا وان نێزیك ببیت؟»
عیسای گۆت: «هشیار بن نەهێنە دسەردابرن، چنكو گەلەك دێ ب ناڤێ من هێن و دێ بێژن ‹ئەز ئەوم!› و ‹ئەو دەم نێزیك بوو.› ل دویڤ وان نەچن.
دەمێ هەوە گو‍‌ھ ل جەنگ و نەئارامیان دبیت، نەڤەجنقن. چنكو دڤێت ل پێشیێ ئەڤ تشتە روی بدەن. لێ دویماهی ئێكسەر ناهێت.»
پاشی گۆتە وان: «دێ مللەتەك دژی مللەتەكی و پاشایەتیەك دژی پاشایەتیەكێ رابیت
و دێ بیڤەلەرزێن مەزن و ل گەلەك جهان كولب و دەردێن ڤەگر و كوژەك پەیدا بن و تشتێن ب ترس و نیشانێن مەزن دێ ژ ئەسمانی دیار بن.
لێ بەری ڤێ هەمیێ، ژ پێخەمەت ناڤێ من، ئەو دێ هەوە گرن و تەپەسەر كەن و دێ هەوە رادەستی كنیشتەیان كەن و هاڤێژنە د زیندانان دا و دێ هەوە راكێشنە نك پاشا و حوكمداران.
ئەڤ رویدانە دێ چێبن، دا هوین بۆ من شاهدەییێ بدەن.
ئەڤجا خۆ ئێكدل كەن و بەری هنگی خەمێ نەخۆن كا دێ چەوا بەڕەڤانیێ ژ خۆ كەن،
چنكو ئەز دێ دەڤ و ئاقلمەندیەكێ دەمە هەوە، هەمی بەرهنگارێن هەوە نەشێن بەرگریێ بكەن یان بەرسڤا ئاخفتنێن هەوە بدەن.
خۆ دایك و باب و برا و مرۆڤ و هەڤالێن هەوە ژی دێ هەوە رادەستی دەستهەلاتداران كەن و ژ هەوە دەنە كوشتن.
دێ ژ بەر ناڤێ من كەربێن هەمیان ژ هەوە ڤەبن،
لێ مویەك ژ سەرێ هەوە ژ ناڤ ناچیت،
ب خۆڕاگرتنا خۆ هوین دێ ژیانا خۆ ب دەست ڤە ئینن.
دەمێ هوین دبینن ئورشەلیم ب لەشكەران یا دۆرپێچ كریە، هنگی بزانن وێرانكرنا وێ نێزیك بوو.
هنگی ئەوێن ل دەڤەرا یەهودیایێ بلا بڕەڤنە چیایان، ئەوێن د ئورشەلیمێ دا بلا ژێ دەربكەڤن، ئەوێن ل گوندان بلا نەچنە باژێڕی،
چنكو ئەڤ رۆژێن هەنێ یێن تۆلڤەكرنێنە، داكو هەر تشتێ هاتیە نڤیسین ب ج‍‌ھ بهێت،
ل وان رۆژان، نەخوزیكێن ژنكێن دووگیان و شیردەران! چنكو دێ تەنگاڤیەكا گران ب سەر ئەردی و تۆڕەبوونەكا مەزن ب سەر ڤی مللەتی دا هێت.
دێ ب دەڤێ شیری كەڤن و ب دیلی بۆ ناڤ هەمی مللەتان دێ هێنە برن و ئورشەلیم دێ ژ لایێ مللەتان ڤە هێتە بنپێ كرن، تاكو دەمێن مللەتان ب دویماهی دهێت.
دێ نیشان ل هەیڤ و رۆژ و ستێران پەیدا بن، ل سەر ئەردی ژی ژ بەر هورمە هورما دەریایێ و پێلێن وێ، مللەت دێ بزدیێن و شاش بن.
دێ مرۆڤ دلگرتی بن، ژ بەر ترس و چاڤەڕێكرنا وان تشتێن كو دێ ب سەرێ جیهانێ هێن، چنكو هێزێن ئەسمانان دێ هێنە تێكهەژاندن.
هنگی دێ بینن ‹كوڕێ مرۆڤ ب هێز و گەلەك مەزناهی د ناڤ عەورەكی دا یێ دهێت.›
دەمێ ئەڤ تشتە دەست پێ دكەن، راست راوەستن و سەرێ خۆ بلند كەن، چنكو رزگاركرنا هەوە نێزیك دبیت.»
نموونەیەك ژی بۆ وان ئینا: «بەرێ خۆ بدەنە دارهژیرێ و دارێن دی.
دەمێ بەلگ دان، هوین ب خۆ دبینن و دزانن هاڤین یا نێزیكە.
وەسا هوین ژی، دەمێ دبینن ئەڤ تشتە روی ددەن، بزانن كو پاشایەتیا خودێ یا نێزیكە.
راستیێ دبێژمە هەوە: ئەڤ نفشە ژ ناڤ ناچیت تا هەمی تشت روی نەدەن.
ئەرد و ئەسمان دێ ژ ناڤ چن، لێ پەیڤێن من چ جاران ژ ناڤ ناچن.
هشیاری خۆ بن، نەكو دلێن هەوە ب مەی ڤەخوارنێ و سەرخۆشیێ و خەمێن ژیانێ گران ببن و ئەو رۆژ ژ نشكەكێ ڤە ب سەر هەوە دا بهێت،
چنكو دێ وەكو خەفكەكێ، هەمی ئاكنجیێن سەر رویێ ئەردی گریت.
ئەڤجا هشیار بمینن و ل هەمی دەمان نڤێژان بكەن، داكو هوین بشێن خۆ ژ ڤان هەمی تشتێن كو نێزیكە دێ روی دەن قورتال بكەن و رویسپی ل بەرامبەر كوڕێ مرۆڤ راوەستن.»
عیسای ب رۆژ ل پەرستگەهێ فێركرن دكر و ب شەڤ دەردكەفت و ل چیایێ دبێژنێ چیایێ زەیتوونان دما.
خەلك هەمی ژی سپێدێ زوی رادبوون و دهاتنە پەرستگەهێ، دا گوهێ خۆ بدەنێ.
جەژنا نانێ شكەڤا نێزیك بوو، یا كو دبێژنێ جەژنا دەربازبوونێ.
سەرۆكێن كاهنان و مامۆستایێن دەستووری ل رێكەكێ دگەڕیان كا چەوا عیسای بكوژن، چنكو ئەو ژ مللەتی دترسیان.
ئینا ئبلیس كەفتە د دلێ یەهودای دا، یێ كو دگۆتنێ ‹ئەسخەریوتی› و ئەو ئێك ژ دوازدە شاگردان بوو.
ئەو چوو و ل گەل سەرۆكێن كاهنان و سەركردەیێن زێرەڤانێن پەرستگەهێ ئاخفت، كا دێ چەوا عیسای رادەستی وان كەت.
ئینا كەیفا وان هات و بڕیار دا هندەك پارەیان بدەنێ.
ئەو ژی ب وێ چەندێ رازی بوو و ل دەلیڤەیەكێ دگەڕیا، دا وی ل دویری خەلكی رادەستی وان بكەت.
رۆژا جەژنا نانێ شكەڤا هات، كو پێدڤی بوو تێدا بەرخێ دەربازبوونێ سەرژێ كەن.
ئینا عیسای، پەترۆس و یوحەننا هنارتن و گۆت: «هەڕن و بۆ مە شیڤا جەژنا دەربازبوونێ ئامادە بكەن، داكو ئەم بخۆین.»
ئینا پرسیار ژێ كر: «تە دڤێت ئەم ل كیرێ ئامادە بكەین؟»
وی گۆتە وان: «گوهێ خۆ بدەنێ: دەمێ هوین دچنە ناڤ باژێڕی، دێ زەڵامەك هێتە پێشیا هەوە، جەڕەكێ ئاڤێ یێ هەلگرتی، ئەڤجا ل دویڤ وی هەڕنە وێ مالا ئەو دچیتە د ژۆرڤە
و بێژنە خودانێ وێ مالێ: ‹مامۆستا دبێژیتە تە: كانێ ئەو ژۆرا مێڤانان یا ئەز دێ ل گەل شاگردێن خۆ تێڤە شیڤا دەربازبوونێ خۆم؟›
ئەو دێ ل قاتێ سەری ژۆرەكا مەزن، یا رائێخستی نیشا هەوە دەت. ل وێرێ ئامادە بكەن.»
چوون و هەروەكو گۆتبوویێ وەسا دیت. ئەڤجا شیڤا دەربازبوونێ ئامادە كر.
گاڤا ئەو دەم هاتی، ئەو ل گەل هنارتیان ل سەر سفرێ روینشت
و گۆتە وان: «من گەلەك حەز دكر، ڤێ شیڤا دەربازبوونێ ل گەل هەوە بخۆم، بەری ئازارێ بكێشم.
چنكو ئەز دبێژمە هەوە: ئێدی وێ ناخۆم تاكو د پاشایەتیا خودێ دا تەمام دبیت.»
پاشی پەرداغەك هەلگرت و سوپاسیا خودێ كر و گۆت: «ڤێ بگرن و د ناڤبەرا خۆ دا لێكڤەكەن،
چنكو ئەز دبێژمە هەوە: ئێدی ئەز ژ بەرهەمێ مێوێ ڤەناخۆم تا پاشایەتیا خودێ بهێت.»
وی نان ژی هەلگرت و سوپاسی كر، كەر كر و دا وان و گۆت: «ئەڤە لەشێ منە، یێ كو پێخەمەتی هەوە دێ هێتە دان. هوین ڤێ چەندێ بۆ بیرئینانا من بكەن.»
هەروەسا پشتی شیڤێ پەرداغ ژی هەلگرت و گۆت: «ئەڤ پەرداغە پەیمانا نویە ب خوینا من، كو پێخەمەتی هەوە دێ هێتە رشتن.
لێ ئەڤە دەستێ وی كەسێ من ددەتە دەست، یێ ل گەل من ل سەر سفرێ.
راستە، كوڕێ مرۆڤ دێ وەسا چیت، كا چەوا بۆ هاتیە دانان، لێ نەخوزیكێن وی كەسی یێ وی رادەست بكەت.»
ئینا د ناڤ خۆ دا كەفتنە دانوستاندنێ، كا كێ ژ وان ل بەرە ڤێ چەندێ بكەت.
هەروەسا گەنگەشەیەك د ناڤبەرا وان دا پەیدابوو كا د ناڤ وان دا كی ب یێ هەری مەزن بهێتە هژمارتن.
ئینا عیسای گۆتە وان: «پاشایێن مللەتان سەروەریێ ل وان دكەن و ئەو كەسێن دەستهەلات ل سەر وان هەی، ب چاكخواز دهێنە بناڤكرن.
لێ بۆ هەوە وەسا نابیت. بلا یێ هەری مەزن د ناڤ هەوە دا، وەكو یێ بچویكترین بیت و رێبەر وەكو خزمەتكاری بیت.
ئەڤجا یێ مەزنتر كیە: ئەوێ ل سەر سفرێ روینشتی یان ژی یێ خزمەتێ دكەت؟ ما نە ئەوە یێ روینشتی؟ لێ ئەز د ناڤ هەوە دا وەكو وی كەسیمە یێ خزمەتێ دكەت.
هوینن یێن كو د تاقیكرنێن من دا ل گەل من ماین.
ئەز ژی دێ پاشایەتیێ دەمە هەوە هەروەكو بابێ من ئەو دایە من،
داكو هوین د پاشایەتیا من دا ل سەر سفرا من بخۆن و ڤەخۆن و ل سەر تەختان روینن و دادوەریێ ل سەر هەر دوازدە هۆزێن ئیسرائیل بكەن.
شەمعون، شەمعون، گوهێ خۆ بدێ: ئبلیسی داخوازا هەوە یا كری، دا وەكو گەنمی هەوە بێژینگ بكەت.
لێ من بۆ تە داخواز ژ خودێ كر، داكو باوەریا تە ژ ناڤ نەچیت. تۆ ژی دەمێ ڤەگەڕیای، برایێن خۆ بهێز بئێخە.»
ئینا شەمعونی گۆتێ: «خودان، ئەز یێ ئامادەمە ل گەل تە بۆ زیندانێ و مرنێ ژی بچم.»
عیسای گۆت: «پەترۆس، ئەز دبێژمە تە: ئەڤرۆ بەری دیكل بانگ بدەت، تۆ دێ سێ جاران ماندەل كەی، كو تۆ من دنیاسی.»
پاشی گۆتە وان: «دەمێ من هوین بێی كیسكێ پارەی و چانتك و پێلاڤ هنارتین، ما هەوە پێدڤی ب تشتەكی هەبوو؟» ئینا گۆتن: «نەخێر.»
عیسای گۆتە وان: «لێ ڤێ گاڤێ هەر كەسێ كیسكەكێ پارەی یان چانتكەك هەبیت بلا هەلگریت. یێ شیر نەبیت، بلا كراسێ خۆ بفرۆشیت و شیرەكی پێ بكڕیت.
ئەز دبێژمە هەوە: ئەڤا هاتیە نڤیسین: ‹و ل گەل سەرپێچكاران هاتە هژمارتن› پێدڤیە ب من ب ج‍‌ھ بهێت، چنكو ئەو تشتێن دەربارەی من، ب ج‍‌ھ دهێن.»
ئینا گۆتن: «خودان، ئەڤە دوو شیر یێ ل ڤێرێ هەین.» ئینا وی گۆتە وان: «بەسە.»
پاشی دەركەفت و وەكو هەر جار چوو چیایێ زەیتوونان و شاگردێن وی ب دویڤ كەفتن.
دەمێ گەهشتیە وێرێ، گۆتە وان: «نڤێژان بكەن، دا هوین نەكەڤنە د تاقیكرنێ دا.»
ب دویراتیا هاڤێتنا بەرەكی ژ وان دویر كەفت و چۆكڤەدان و نڤێژ كر
و گۆت: «بابۆ، ئەگەر حەز بكەی، ڤێ پەرداغێ ژ من دەرباز كە، لێ نە ب حەزا من، بەلكو بلا ب حەزا تە بیت.»
ئینا فریشتەیەك ژ ئەسمانی بۆ وی دیار بوو و ئەو بهێز ئێخست.
عیسای د تەنگاڤیێ دا، پتر ب گەرمی نڤێژ دكر و خوها وی وەكو چپكێن خوینێ لێ هاتن و دكەفتنە ئەردی.
پشتی ژ نڤێژێ رابووی، هاتە نك شاگردان، دیت ئەو ژ خەمان دا یێن د خەو چووین.
ئینا گۆتە وان: «بۆچی هوین د نڤستینە؟ رابن و نڤێژان بكەن، دا هوین نەكەڤنە د تاقیكرنێ دا.»
دەمێ عیسا دئاخفت، وەسا چێبوو كۆمەكا مرۆڤان ب سەر وان دا گرت و ئەوێ دبێژنێ یەهودا، كو ئێك ژ هەر دوازدان بوو، ل پێشیا وان بوو. ب پێش عیسای ڤە هات دا ماچی بكەت.
عیسای گۆتێ: «یەهودا، ما ب ماچەكێ تۆ كوڕێ مرۆڤ ددەیە گرتن؟»
دەمێ ئەوێن ل دەوروبەرێن وی زانی دێ چ روی دەت، گۆتن: «خودان، ئەم ب شیری دانینێ؟»
هنگی ئێكی ژ وان شیر ڤەوەشاندە بەنیێ سەرۆككاهنی و گوهێ وی یێ راستێ ژێڤە كر.
عیسای بەرسڤ دا و گۆت: «بەسە، بهێلن.» و دەستێ خۆ كرە گوهێ وی و ساخ كر.
پاشی عیسای گۆتە سەرۆكێن كاهنان و سەركردەیێن زێرەڤانێن پەرستگەهێ و ریهسپیان، ئەوێن ب سەر وی دا گرتی: «دێ بێژی هوین بۆ ب سەرداگرتنا قاچاخەكی ب شیر و داران دەركەفتین!
هەر رۆژ ئەز ل پەرستگەهێ د ناڤ هەوە دا بووم، هەوە دەستێ خۆ درێژ نەكرە من. لێ ئەڤەیە دەمێ هەوە و دەستهەلاتا تاریستانێ.»
عیسا گرت و بر و كرە د مالا سەرۆككاهنی ڤە. پەترۆس ژی ژ دویر ڤە ب دویڤ را دچوو.
دەمێ ئاگرەك ل نیڤا حەوشێ هەلكری و ل گەل ئێك روینشتین، پەترۆس ژی د ناڤ وان دا روینشت.
كچكەكا خزمەتكار پەترۆس دیت یێ ل بەر رۆناهیا ئاگری روینشتی، ئینا ب هویری بەرێ خۆ دایێ و گۆت: «ئەڤە ژی ل گەل وی بوو!»
لێ وی ماندەل كر و گۆت: «كچێ، ئەز وی نانیاسم!»
پشتی دەمەكێ كورت ئێكێ دی ئەو دیت و گۆتێ: «تۆ ژی ژ وانی!» لێ پەترۆسی گۆت: «برا، ئەز نە ژ وانم!»
پشتی نێزیكی دەمژمێرەكێ بوری، ئێكێ دی دووپات كر و گۆت: «ب راستی ئەڤە ژی ل گەل وان بوو، چنكو ئەو ژی جەلیلییە!»
پەترۆسی گۆت: «برا، ئەز نزانم تۆ چ دبێژی!» ئینا د ج‍‌ھ دا دەمێ ئەو دئاخفت، دیكلی بانگ دا.
خودان لێ زڤڕی و رك و رك ل پەترۆسی نێڕی، ئینا ئاخفتنا خودانی هاتە بیرا پەترۆسی دەمێ گۆتیێ: «ئەڤرۆ، بەری دیكل بانگ بدەت، تۆ دێ سێ جاران من ماندەل كەی.»
پەترۆس دەركەفتە ژ دەرڤە و گریەكا تەحل كر.
ئەو زەڵامێن زێرەڤانی ل عیسای دكر تڕانە پێ دكرن و لێ ددان
و چاڤێن وی گرێ دان و پرسیار ژێ دكر: «ئەگەر تۆ پێغەمبەر بی، بێژە كی بوو دانایە تە؟»
گەلەك ئاخفتنێن دی یێن كرێت ژی دگۆتنێ.
دەمێ بوویە رۆژ، جڤاتا ریهسپیێن مللەتی و سەرۆكێن كاهنان و مامۆستایێن دەستووری كۆمبوون و عیسا برە پێشیا جڤاتا خۆ.
گۆتن: «ئەگەر تۆی مەسیح، بێژە مە.» ئینا گۆتە وان: «ئەگەر ئەز بێژمە هەوە، هوین هەر باوەر ناكەن
و ئەگەر ئەز پرسیارێ ژی ژ هەوە بكەم، هوین بەرسڤا من هەر نادەن.
لێ ژ نوكە پێڤە ‹كوڕێ مرۆڤ دێ ل دەستێ راستێ یێ خودایێ هێزدار یێ روینشتی بیت.› »
ئینا هەمیان گۆت: «ئانكو تۆ كوڕێ خودێیی؟» ئەوی ژی گۆتە وان: «هوین ب خۆ دبێژن ئەز ئەوم.»
ئینا گۆتن: «ما ئێدی مە چ پێدڤی ب شاهدەییێ هەیە؟ ئەڤە مە ب خۆ ژ دەڤێ وی بهیست.»
پاشی هەمی جڤات رابوو و عیسا برە نك پیلاتۆسی
و دەست پێ كر سكالا ل وی كرن و گۆتن: «مە دیت ئەڤە یێ مللەتێ مە د سەردا دبەت و ناهێلیت باج بۆ قەیسەری بهێتە دان و دبێژیت كو ئەو مەسیحە، ئانكو پاشایە.»
ئینا پیلاتۆسی پرسیار ژێ كر: «ئەرێ تۆ پاشایێ جوهیانی؟» عیسای بەرسڤا وی دا: «تە ب خۆ گۆت.»
ئینا پیلاتۆسی گۆتە سەرۆكێن كاهنان و جەماوەری: «ئەز چ تاوانەكێ ل نك ڤی مرۆڤی نابینم.»
لێ ئەو ل سەر ئاخفتنا خۆ رژد بوون و گۆتن: «ئەو ب فێركرنا خۆ ل هەمی یەهودیایێ، هەر ژ جەلیل و تا ڤێرێ، مللەتی دئازرینیت.»
دەمێ پیلاتۆسی ئەڤە گو‍‌ھ لێ بووی، پرسیاركر: «ئەرێ ئەڤ زەڵامە جەلیلییە؟»
دەمێ زانی عیسا ل ژێر دەستهەلاتا هێرودێسییە، هنارتە نك هێرودێسی، كو ئەو ژی د وان رۆژان دا ل ئورشەلیمێ بوو.
دەمێ هێرودێسی عیسا دیتی، گەلەك كەیفخۆش بوو. ئەو دەمەكێ درێژ بوو دڤیا ببینیت، چنكو وی گەلەك تشت دەربارەی عیسای گو‍‌ھ لێ ببوون و هزرەتا وی بوو نیشانەكێ ل سەر دەستێ وی ببینیت.
هێرودێسی گەلەك پرسیار ل بەر وی دانان، لێ عیسای چ بەرسڤ نەدان.
ئەڤجا سەرۆكێن كاهنان و مامۆستایێن دەستووری هاتنە پێش و ئەو ب توندی تاوانبار كر.
پاشی هێرودێسی ل گەل سەربازێن خۆ سڤكاتی و تڕانە پێ كرن و كراسەكێ جوان كرە بەر و ڤەگەڕاندە نك پیلاتۆسی.
ل وێ رۆژێ پیلاتۆس و هێرودێس بوونە هەڤالێن ئێك، چنكو ژ بەری هنگی دوژمناتی د ناڤبەرا وان دا هەبوو.
پیلاتۆسی سەرۆكێن كاهنان و رێبەرێن مللەتی و خەلك داخواز كرن
و گۆتە وان: «هەوە ئەڤ مرۆڤە ئینایە نك من وەكو كەسەكێ مللەتی د سەردا دبەت. ئەڤە من بەرامبەری هەوە لێپرسین كر و من هیچ تاوانەك ل نك ڤی مرۆڤی نەدیت ژ وان تاوانێن هوین سكالایێ لێ دكەن.
هێرودێسی ژی چ ژێ نەدیتیە، لەوما ڤەگەڕاندە نك مە. ئەڤی چ تشتێ وەسا نەكریە كو هەژی مرنێ بیت.
ئەڤجا ئەز دێ وی قامچی دەم و بەردەم.»
ل سەر وی یا فەربوو، ل هەر جەژنەكێ ئێكی بۆ وان بەردەت.
لێ هەمیان پێكڤە كرە گازی: «ئەڤی ببە و بۆ مە باراباسی بەردە.»
باراباس ژ ئەگەرێ تێكدانا د باژێڕی دا چێبووی و كوشتنێ هاتبوو زیندان كرن.
جارەكا دی پیلاتۆس بۆ وان ئاخفت، چنكو دڤیا عیسای بەردەت.
ئەوان پێكڤە كرە گازی: «ل خاچێ بدە! ل خاچێ بدە!»
ئینا جارا سێیێ گۆتە وان: «ما ئەڤی چ خرابی كریە؟ من چ تاوان ل نك وی نەدیتن كو سزایێ وی مرن بیت، ئەڤجا ئەز دێ وی قامچی دەم و بەردەم.»
لێ ئەو ل سەر ركا خۆ مان و ب دەنگەكێ بلند كرە گازی و داخواز كر بهێتە خاچدان و دەنگێ وان ب سەر دەنگێ وی كەفت.
ئینا پیلاتۆسی بڕیار دا داخوازا وان ب ج‍‌ھ بهێت.
ئەڤجا ئەو بەردا یێ ژ ئەگەرێ تێكدانێ و كوشتنێ هاتیە گرتن، ئەوێ وان داخواز كری. عیسا ژی رادەستی حەزا وان كر.
دەمێ وان عیسا دبر، وان زەڵامەكێ قەیرەوانی گرت، ژ ئاقاری دهات، ناڤێ وی شەمعون بوو، خاچ دانا سەر ملێن وی داكو ل دویڤ عیسای ببەت.
جەماوەرەكێ مەزن ژ خەلكی ب دویڤ كەفتبوون و د ناڤ وان دا ژنك ژی هەبوون سینگێ خۆ ڤەدقوتا و بۆ دگریان.
ئینا عیسا ل وان زڤڕی و گۆت: «كچێن ئورشەلیمێ، بۆ من نەگریێن، لێ هوین بۆ خۆ و بۆ زاڕۆكێن خۆ بگریێن.
چنكو ئەڤە هندەك رۆژ دێ هێن، مرۆڤ دێ بێژن: ‹خوزیكێن ژنێن خرش و زكێن زاڕۆك نەبووین و سنگێن شیر نەدای.›
هنگی دێ مرۆڤ دەست پێ كەن و بێژنە چیایان ‹ب سەر مە دا وەرن› و بێژنە گركان ‹مە بنخێڤن.›
چنكو ئەگەر ڤێ ب سەرێ دارا تەڕ بینن، پا دێ رەوشا یا هشك چ بیت؟»
دوو كەسێن دی یێن گونەهبار ژی برن دا د گەل وی دا بهێنە كوشتن.
دەمێ گەهشتینە وی جهێ دبێژنێ كلۆخ، ئەو ل وێرێ ل گەل گونەهباران خاچ دا، ئێك ل لایێ وی یێ راستێ و یێ دی ل لایێ وی یێ چەپێ.
ئینا عیسای گۆت: «بابۆ، ل وان ببورە، چنكو ئەو نزانن چ دكەن.» پاشی ب هاڤێتنا پشكێ جلكێن وی ل سەر خۆ لێكڤەكرن.
خەلك ل وێرێ یێ راوەستیای بوو بەرێ خۆ ددایێ. سەرۆكان ژی تڕانە پێ دكرن و دگۆتن: «وی هندەكێن دی قورتال كرن، ئەڤجا ئەگەر ئەوە مەسیح، هەلبژارتیێ خودێ، بلا خۆ قورتال بكەت!»
سەربازان ژی تڕانە پێ كرن و خۆ نێزیكی وی كر و سهك بۆ پێشكێش كر
و گۆتن: «ئەگەر تۆ پاشایێ جوهیانی، خۆ قورتال بكە!»
دەپەك ژی ل هنداڤ سەرێ وی یێ هەلاویستی بوو و ئەڤ چەندە ل سەر نڤیسی بوو: «ئەڤە پاشایێ جوهیانە.»
ئێك ژ وان گونەهبارێن هەلاویستی جڤین ددانێ و دگۆت: «ما تۆ مەسیح نینی؟ دێ خۆ و مە قورتال بكە.»
لێ یێ دی ئەو پاشڤە بر و گۆتێ: «ما تۆ ژ خودێ ناترسی، نێ تۆ ژی یێ ل ژێر هەمان سزای؟
سزایێ مە یێ دادپەروەرانەیە، چنكو ئەم یێ سزایێ كریارێن خۆ وەردگرین، لێ ڤی مرۆڤی چ خرابی نەكریە.»
پاشی گۆت: «عیسا، من بینە بیرا خۆ دەمێ تۆ بهێیە د پاشایەتیا خۆ دا.»
عیسای گۆتێ: «راستیێ دبێژمە تە، تۆ دێ ئەڤرۆ د گەل من دا ل بەهەشتێ بی.»
دەمژمێر نێزیكی دوازدەی نیڤرۆ بوو، ژ وی دەمی تا دەمژمێر سێ، تاریاتیێ هەمی ئەرد گرت،
چنكو چاڤێ رۆژێ تاری بوو. پەردەیا پەرستگەهێ ژی د نیڤێ را شەق بوو و بوو دوو پارچە.
عیسای ب دەنگەكێ بلند كرە گازی و گۆت: «بابۆ، ئەز گیانێ خۆ ددەمە دەستێن تە.» پشتی ئەڤە گۆتی، گیانێ خۆ ژ دەست دا.
دەمێ سەرلەشكەری ئەڤ تشتێ چێبووی دیتی، پەسنا خودێ كر و گۆت: «ب راستی، ئەڤ مرۆڤە یێ راستدار بوو.»
هەمی ئەوێن بۆ دیتنا ڤی دیمەنی خڕڤەبووین، دەمێ ئەو تشتێن چێبووین دیتین، ڤەگەڕیان و ل سینگێ خۆ ددا.
لێ هەمی نیاسێن وی و ئەو ژنكێن ژ جەلیلێ ل دویڤ هاتین، ژ دویر ڤە راوەستیابوون و بەرێ خۆ ددانە وی سەروبەری.
زەڵامەك ب ناڤێ یوسڤ هەبوو، ئەندامەكێ جڤاتا ریهسپیێن مللەتی و مرۆڤەكێ باش و یێ راستدار بوو.
ئەو ل گەل بڕیارا جڤاتێ و كریارا وان نەبوو. ئەو ژ باژێڕێ ئاریمەتیایێ بوو، كو ئەو ژی ئێك ژ باژێڕێن جوهیانە. ئەوی ژی چاڤەڕێیا پاشایەتیا خودێ دكر.
ئەڤ مرۆڤە چوو نك پیلاتۆسی و داخوازا تەرمێ عیسای ژێ كر.
پاشی ژ خاچێ ئینا خوارێ و ب كتانی كفن كر و دانا د گۆڕەكێ د كەڤری كۆلای دا، بەری هنگی كەسەك تێدا نەهاتبوو ڤەشارتن.
ئەو رۆژا ئامادەكرنێ بوو و شەمبیێ دەست پێ دكر.
ئەو ژنكێن ژ جەلیلێ ل گەل عیسای هاتین، ب دویڤ یوسڤی كەفتن و گۆڕ دیت كا تەرمێ وی چەوا دانایە.
پاشی ڤەگەڕیانەڤە و دەرمانك و موڕ ئامادە كرن و ل شەمبیێ، ل دویڤ فەرمانا دەستووری، بێهنا خۆ ڤەدان.
ل رۆژا ئێكێ ژ حەفتیێ ، ل گەل ئەلندێ، ئەو ژنك چوونە سەر گۆڕی و دەرمانكێن ژ بەری هنگی ئامادە كرین، ل گەل خۆ برن.
وان دیت ئەو بەرێ د دەرێ گۆڕی دا یێ هاتیە گڕێلكرن.
چوونە ژۆر و وان تەرمێ خودان عیسای نەدیت.
دەمێ هێشتا ئەو ژ ڤێ چەندێ د مەندەهۆش، ژ نشكەكێ ڤە دوو زەڵام ب جلكێن تەیسۆك ل نك وان راوەستیان.
ئەوان ژ ترسان دا خۆ بەردا ئەردی، ئینا وان زەڵامان گۆتە وان: «بۆچی هوین د ناڤ مریان دا ل یێ زیندی دگەڕیێن؟
ئەو نە ل ڤێرێیە، یێ رابووی. بیننە بیرا خۆ دەمێ هێشتا ئەو ل جەلیلێ چ گۆتە هەوە:
‹دڤێت كوڕێ مرۆڤ رادەستی گونەهكاران بهێتە كرن و بهێتە خاچدان و ل رۆژا سێیێ راببیتەڤە.›»
ئینا گۆتنا وی هاتە بیرا وان.
ئەو ژ سەر گۆڕی ڤەگەڕیانەڤە و ئەڤە هەمی گەهاندە هەر یازدە شاگردان و هەمیێن دی.
ئەوێن نوچە گەهاندیە هنارتیان، ئەڤە بوون: مەریەما مەجدەلی، یووەننا، مەریەما دایكا یەعقوبی و هندەكێن دی ئەوێن د گەل وان دا بوون.
ل نك هنارتیان، هەروەكو ئەو ژ بەر دئاخڤن و باوەر ژ وان نەكر،
لێ پەترۆس رابوو و غار دا سەر گۆڕی. وی خۆ چەماند و ب تنێ پارچەیێن كتانی دیتن، ئینا ئەو ژ وێرێ چوو، یێ حێبەتی بوو ژ وێ رویدانێ.
وەسا چێبوو دوو شاگرد هەر د وێ رۆژێ دا دچوونە گوندەكی دبێژنێ ئەمائۆس، ئەڤ گوندە نێزیكی یازدە كیلۆمەتران ژ ئورشەلیمێ یێ دویر بوو.
ئەو دەربارەی هەمی رویدانێن پەیدا بووین ل گەل ئێكودوو دئاخفتن.
دەمێ ئەو دئاخفتن و دانوستاندن دكر، عیسا ب خۆ نێزیكی وان بوو و ل گەل وان ب رێ چوو،
لێ چاڤێن وان ژ نیاسینا وی هاتنە گرتن.
وی گۆتە وان: «هوین بڕێڤە، ل گەل ئێك، بەحسێ چ دكەن؟» ئینا ب رویەكێ خەمگین راوەستیان.
ئێكی ژ وان ناڤێ وی كلیوپاس بوو، بەرسڤ دا و گۆتێ: «چەوا ژ بیانیێن ل ئورشەلیمێ، تە ب تنێ نەزانیە كا د ڤان رۆژان دا چ تشتی ل وێرێ رویدایە؟»
ئینا گۆتە وان: «ما چ رویدایە؟» وان گۆت: «ئەم یێ بەحسێ رویدانێن دەربارەی عیسایێ ناسیرەیی دكەین، كو پێغەمبەرەك بوو، ل نك خودێ و هەمی مللەتی، د گۆتن و كریارێ دا، خودان هێز بوو
و كا چەوا سەرۆكێن كاهنان و رێبەرێن مە، ئەو رادەستی سزایێ مرنێ كر و خاچدا.
لێ هیڤیا مە ئەو بوو، كو ئەوە یێ ئیسرائیلێ رزگار بكەت. سەرەڕای ڤێ هەمیێ، ئەڤە رۆژا سێیێیە ژ رویدانا وان تشتان.
د سەر ڤێ چەندێ را، هندەك ژنكان د ناڤ مە دا ئەم مەندەهۆش كرین. ئەو سپێدێ زوی ل سەر گۆڕی بوون
و تەرمێ وی نەدیت، ئەو هاتن و گۆتن: ‹فریشتە بۆ مە دیار بوون، وان گۆتە مە كو عیسا یێ زیندیە.›
هندەك ژ ئەوێن ل گەل مە، چوونە سەر گۆڕی و دیت وەسایە هەروەكو ژنان گۆتی، لێ وان ئەو ب خۆ نەدیت.»
ئینا عیسای گۆتە وان: «هەی ئەوێن مەژی هشك، یێن كو باوەریا هەوە درەنگ ب هەمی گۆتنێن پێغەمبەران دهێت،
ما نە یا پێدڤی بوو مەسیح ڤان ئازاران بكێشیت و پاشی بگەهیتە مەزناهیا خۆ؟»
پاشی وی ژ مووسای دەست پێ كر و ژ هەمی پێغەمبەران، تشتێن دەربارەی خۆ د هەمی نڤیساران دا، بۆ وان شڕۆڤە كرن.
دەمێ نێزیكی وی گوندی بووین یێ هەردوو شاگرد دچوونێ، عیسای وەسا ل خۆ دیار كر كو ئەو دێ دویرتر چیت.
لێ ئەو مانە پێڤە و گۆتێ: «ل نك مە بمینە، چنكو ئێڤارە و رۆژ یا ئاڤا دبیت.» ئینا عیسا چوو ژۆر داكو ل گەل وان بمینیت.
دەمێ ل گەل وان ل سەر سفرێ روینشتی، نان هەلگرت و سوپاسیا خودێ كر و كەر كر و دا وان.
هنگی چاڤێن وان ڤەبوون و ئەو نیاسی، پاشی ژ بەر چاڤێن وان بەرزە بوو.
ئینا گۆتە ئێكودوو: «ما نە دلێ مە د سینگێ مە دا گەرم دبوو، دەمێ د رێكێ دا ل گەل مە دئاخفت و بۆ مە نڤیسار روهن دكرن؟»
پاشی هەر د وی دەمی دا رابوون و ڤەگەڕیانە ئورشەلیمێ، دیت هەر یازدە و ئەوێن د گەل وان دا یێن كۆمبووین
و یێ دبێژن: «راستە، خودانێ رابووی و ئەو بۆ شەمعونی یێ دیار بووی!»
هەردوویان ژی ئەو چەندا د رێكێ دا رویدای و كا چەوا د نان كەركرنێ دا، وان ئەو نیاسی، گەهاندە وان.
هێشتا ئەو هەردوو دئاخفتن، عیسا ب خۆ د ناڤ وان دا راوەستیا و گۆتێ: «ئاشتی بۆ هەوە بیت!»
ئەو بزدیان و ترسیان و هزركر وان گیانەك دیت.
ئینا وی گۆتە وان: «بۆچی هوین تێكچوون؟ بۆچی گۆمان دكەڤیتە د دلێ هەوە دا؟
بەرێ خۆ بدەنە دەست و پێیێن من، ئەڤە ئەز ب خۆمە. دەست بكەنە من و ببینن، چنكو گیانی گۆشت و هەستی نینن، وەكو هوین دبینن من یێن هەین.»
پشتی ئەو چەند گۆتی، دەست و پێیێن خۆ نیشا وان دان.
هێشتا ئەو ژ خۆشیان دا نەدشیان باوەر بكەن و د حێبەتی بوون، عیسای گۆتە وان: «هەوە تشتەكێ خوارنێ ل ڤێرێ هەیە؟»
ئینا وان پارچەیەكا ماسیا براژتی دایێ.
وی ژ وان وەرگرت و ل بەر چاڤێن وان خوار.
پاشی گۆتە وان: «ئەڤە ئەو گۆتنە یا كو هێشتا ئەز د ناڤ هەوە دا من گۆتیە هەوە، كو دڤێت چ تشتێ دەربارەی من د دەستوورێ مووسای و پەرتووكێن پێغەمبەران و زەبوورێ دا هاتیە نڤیسین، ب ج‍‌ھ بهێت.»
وی دەمی زێهنێ وان ڤەكر، دا د نڤیساران بگەهن
و گۆتە وان: «هۆسا یا هاتیە نڤیسین، كو دڤیا مەسیح ئازارێ بكێشیت و ل رۆژا سێیێ ژ ناڤ مریان راببیت
و ب ناڤێ وی مزگینیا لخۆزڤڕینێ بۆ لێبورینا گونەهان بهێتە دان، هەر ژ ئورشەلیمێ بگرە تا هەمی مللەتان.
هوین بۆ ڤان تشتان شاهدن.
ئەڤە ئەز دێ سۆزا بابێ خۆ بۆ هەوە هنێرم. ل باژێڕی بمینن تاكو هوین ژ بلنداهیێ ب هێزێ دهێنە راپێچان.»
پاشی هەتا بێت‌عەنیا برن و وی دەستێن خۆ بلندكرن و ئەو بەرەكەتدار كرن.
دەمێ وی ئەو بەرەكەتدار دكرن، ئەو هێلان و بۆ ئەسمانی هاتە بلند كرن.
ئەوان ژی سوجدە بۆ بر و ب دلشادیەكا مەزن ڤەگەڕیانە ئورشەلیمێ
و بەردەوام ل پەرستگەهێ بوون و پەسنا خودێ دكر.
ل دەستپێكێ پەیڤ هەبوو. پەیڤ ل گەل خودێ بوو و پەیڤ خودێ بوو.
ئەو ل دەستپێكێ ل گەل خودێ بوو.
ب وی هەمی تشت چێبوون، تشتەك ژ ئەوێن چێبووین بێی وی چێنەبوویە.
ژیان د وی دا بوو و ئەو ژیان بۆ مرۆڤان رۆناهی بوو.
رۆناهی د تاریاتیێ دا شەوقێ ددەت و تاری ب سەر رۆناهیێ نەكەفت.
مرۆڤەك هات، خودێ ئەو هنارت بوو، ناڤێ وی یوحەننا بوو.
ئەڤە بۆ شاهدەییێ هاتبوو، دا شاهدەییێ بۆ رۆناهیێ بدەت، دا هەمی ب رێیا وی باوەریێ بینن.
ئەو ب خۆ نە رۆناهی بوو، لێ ئەو هات دا شاهدەییێ بۆ رۆناهیێ بدەت.
رۆناهیا راستەقینە، ئەوا هەمی مرۆڤان روهن دكەت، دهاتە جیهانێ.
ئەو ل جیهانێ بوو و جیهان ب وی چێبوو، لێ جیهانێ ئەو نەنیاسی.
ئەو هاتە سەر ملكێ خۆ و خەلكێ وی ئەو قەبیل نەكر،
لێ هەمی ئەوێن ئەو قەبیل كری، ئانكو باوەری ب ناڤێ وی ئینای، ماف دا وان كو ببنە زاڕۆكێن خودێ،
ئەوێن نە ژ خوینێ و نە ژ حەزا لەشی و نە ب بڕیارا زەڵامەكی بووین، لێ ئەوێن ژ خودێ بووین.
پەیڤ ژی بوو لەش و د ناڤ مە دا ئاكنجی بوو، ئەو یێ پڕی كەرەم و راستی بوو. مە مەزناهیا وی دیت، مەزناهیا كوڕێ ئێكانەیێ بابی.
یوحەننای بۆ وی شاهدەیی دا و كرە گازی و گۆت: «ئەڤەیە ئەوێ من دەربارەی وی گۆتی: ئەوێ پشتی من دهێت ب پێش من كەفت، چنكو ئەو بەری من هەبوو.»
ژ پڕبوونا وی مە هەمیان كەرەم ل سەر كەرەمێ وەرگرت.
دەستوور ب رێكا مووسای هاتبوو دان، كەرەم و راستی ب رێكا عیسایێ مەسیح هاتن.
كەسێ چ جاران خودێ نەدیتیە، لێ كوڕێ ئێكانە، كو ئەو ب خۆ ژی خودێیە، ئەوێ د هەمبێزا بابی دا، ئەوی خودێ یێ دایە نیاسین.
ئەڤە شاهدەییا یوحەننایە، دەمێ جوهیان هندەك كاهن و لێڤی ژ ئورشەلیمێ هنارتین، دا پرسیارێ ژێ بكەن: «تۆ كی؟»
ئینا دانپێدان كر و ماندەل نەكر و گۆت: «ئەز نە مەسیحم.»
وان پرسیار ژێ كر: «پا تۆ كی؟ تۆ ئلیاسی؟» وی گۆت: «ئەز نە ئەوم.» «ما تۆ ئەو پێغەمبەری ؟» بەرسڤ دا: «نەخێر.»
ئینا وان گۆتێ: «تۆ كی، دا بەرسڤێ بدەینە وان ئەوێن ئەم هنارتین؟ تۆ دەربارەی خۆ چ دبێژی؟»
گۆت: «ئەز دەنگەكم ل چۆلی گازی دكەت: ‹رێكێ بۆ هاتنا خودانی راست بكەن،› هەروەكو ئیشایا پێغەمبەر گۆتی.»
ئەوێن هاتینە هنارتن، ژ فەریسیان بوون.
وان پرسیار ژێ كر و گۆتێ: «ئەگەر تۆ نە مەسیح بی و نە ئلیاس بی و نە ئەو پێغەمبەر بی، پا تۆ بۆچی تافیركرنێ دكەی؟»
یوحەننای بەرسڤ دا: «ئەز ب ئاڤێ تافیركرنێ دكەم، لێ ئێك یێ د ناڤ هەوە دا ئامادەیە، هوین وی نانیاسن،
ئەوە یێ پشتی من دهێت كو ئەز نە یێ هەژیمە بەندكێن پێلاڤا وی ڤەكەم.»
ئەڤێ چەندێ ل بێت‌عەنیا روی دا، ل لایێ دی یێ رویبارێ ئوردن ، ل جهێ یوحەننای تافیركرن دكر.
ل رۆژا د دویڤ دا، یوحەننای دیت عیسا یێ بەرەڤ وی ڤە دهێت، ئینا گۆت: «ئەڤەیە بەرخێ خودێ ئەوێ گونەها جیهانێ رادكەت.
ئەڤەیە ئەوێ من دەربارەی وی گۆتی: كەسەك پشتی من دهێت، یێ ب پێش من كەفتی، چنكو ئەو بەری من هەبوو.
من ئەو نەدنیاسی، لێ ئەز هاتم ب ئاڤێ تافیركرنێ بكەم، دا ئەو بۆ ئیسرائیلێ بهێتە دیاركرن.»
هنگی یوحەننای شاهدەیی دا و گۆت: «من گیان دیت وەكو كووترەكێ ژ ئەسمانی دهاتە خوار و ل سەر وی دادا و ما.
من ئەو نەدنیاسی، لێ ئەڤێ ئەز هنارتیم ب ئاڤێ تافیركرنێ بكەم گۆتە من: ‹ئەوێ تۆ دبینی، گیان دهێتە خوارێ و ل سەر وی داددەت و دمینیت، ئها ئەوە یێ ب گیانێ پیرۆز تافیركرنێ دكەت.›
من ژی دیت و شاهدەیی دا، كو ئەڤەیە كوڕێ خودێ.»
ل رۆژا پاشتر، دیسان یوحەننا ل گەل دوو شاگردێن خۆ یێ راوەستیای بوو.
وی بەرێ خۆ دا عیسای یێ بڕێڤە دچیت و گۆت: «ئەڤەیە بەرخێ خودێ.»
دەمێ هەردوو شاگردان گو‍‌ھ ل ئاخفتنا وی بووی، ل دویڤ عیسای چوون.
عیسا ل خۆ زڤڕی، دیت كو ئەو یێ ل دویڤ وی دچن، ژ وان پرسی: «هەوە چ دڤێت؟» گۆتن: «رابی،» ئەوا وەرگێڕانا وێ مامۆستا، «تۆ ل كیرێ یێ ئاكنجی؟»
ئینا گۆتە وان: «وەرن، هوین دێ بینن.» ئەو چوون و دیت ل كیرێ یێ ئاكنجیە و وێ رۆژێ ل نك وی مان، دەم نێزیكی دەمژمێر چوارێ ئێڤاری بوو.
ئەندراوس برایێ شەمعون پەترۆسی، ئێك ژ وان هەردوویان بوو یێن گو‍‌ھ ل یوحەننای بووی و ل دویڤ عیسای چووین.
ئەو ئێكسەر ل برایێ خۆ شەمعونی گەڕیا و دیت، گۆتێ: «مە ‹مەسیح › دیت» ئەوێ كو وەرگێڕانا وی ‹یێ زەیتكری› یە،
ئەو ئینا نك عیسای. عیسای بەرێ خۆ دا شەمعونی و گۆت: «تۆ شەمعونێ كوڕێ یوحەننای، تۆ دێ ب كیفاس هێیە بناڤكرن» كو وەرگێڕانا وێ ‹پەترۆس›ە.
ل رۆژا د دویڤ دا، عیسای بڕیار دابوو بچیتە جەلیل، ئەو ل فیلیپۆسی گەڕیا و دیت و گۆتێ: «ل دویڤ من وەرە.»
فیلیپۆس ژ بێت‌سایدا بوو، باژێڕێ ئەندراوسی و پەترۆسی.
پاشی فیلیپۆس ل ناتانائێلی گەڕیا و دیت و گۆتێ: «مە ئەو دیت یێ مووسای د دەستووری دا و پێغەمبەران دەربارەی وی نڤیسی، كو ئەو عیسایێ كوڕێ یوسڤیە، ئەوێ ژ ناسیرە.»
ناتانائێلی گۆت: «ما تشتەكێ باش ژ ناسیرە دەردكەڤیت؟» فیلیپۆسی بەرسڤا وی دا: «وەرە و ببینە.»
دەمێ عیسای ناتانائێل دیتی یێ بەرەڤ وی ڤە دهێت، دەربارەی وی گۆت: «ئەڤە ئیسرائیلیەكێ رەسەنە، چ سەختەیی تێدا نینە!»
ناتانائێلی گۆتێ: «تۆ ژ كیڤە من دنیاسی؟» عیسای بەرسڤا وی دا: «من تۆ ل بن دارهژیرێ دیتی، بەری فیلیپۆس گازی تە بكەت.»
ناتانائێلی بەرسڤا وی دا: «رابی ، تۆ كوڕێ خودێی، تۆ پاشایێ ئیسرائیلێی!»
عیسای بەرسڤا وی دا و گۆتێ: «چنكو من گۆتە تە، من تۆ ل بن دارهژیرێ دیتی، تە باوەری ئینا؟ تۆ دێ ژ ڤێ مەزنتر بینی.»
پاشی گۆتێ: «ب راستی ب راستی دبێژمە هەوە: هوین دێ ئەسمانی بینن یێ ڤەكریە و فریشتەیێن خودێ ل سەر كوڕێ مرۆڤ بلند دبن و دهێنە خوار!»
دوو رۆژان پشتی هنگی داوەتەك ل قانایا جەلیلێ هەبوو و دایكا عیسای ل وێرێ بوو.
عیسا و شاگردێن وی ژی بۆ داوەتێ هاتبوونە داخوازكرن.
دەمێ شەراب نەمای، دایكا عیسای گۆتە وی: «وان شەراب نەما.»
عیسای گۆتە وێ: «خانم، من چ پەیوەندی پێڤە هەیە؟ دەمێ من هێشتا نەهاتیە.»
دایكا وی گۆتە خزمەتكاران: «چ دبێژیتە هەوە، هوین وێ بكەن.»
شەش جڕنیێن بەری، كو ژ بۆ داب و نەریتێن پاقژكرنێ یێن جوهیان، ل وێرێ بوون، هەر ئێك ژ وان هەشتێ هەتا سەد و بیست لیترێن ئاڤێ دچوونێ.
عیسای گۆتە وان: «جڕنیان تژی ئاڤ بكەن.» ئینا وان هند كرێ هەتا دایە د لێڤان را.
پاشی گۆتە وان: «نوكە ژێ ببەن و بۆ رێبەرێ مێڤانداریێ پێشكێش بكەن.» وان ژی وە كر.
دەمێ رێبەرێ مێڤانداریێ تام كریە وێ ئاڤا بوویە شەراب، وی نەدزانی كا ئەو ژ كیڤە ئینایە، لێ خزمەتكارێن ئاڤ كێشای دزانی، ئینا رێبەرێ مێڤانداریێ گازی زاڤای كر
و گۆتێ: «هەمی كەس ل بەراهیێ شەرابا باش پێشكێش دكەن و پشتی مێڤان سەرخۆش دبن، یا ئەرزانتر پێشكێش دكەن، لێ تە شەرابا باش بۆ نوكە یا هەلگرتی!»
عیسای ئەڤ تشتە ل قانایا جەلیلێ كر، ئەڤە نیشانا وی یا دەستپێكێ بوو. ئەوی هۆسا مەزناهیا خۆ دیار كر و شاگردێن وی باوەری پێ ئینا.
پشتی ڤێ چەندێ، عیسا و دایكا خۆ و برایێن خۆ و شاگردێن خۆ خواركەفتنە باژێڕێ كەفەرناحومێ و چەند رۆژەكان ل وێرێ مان.
جەژنا دەربازبوونێ یا جوهیان نێزیك بوو، ئینا عیسا سەركەفتە ئورشەلیمێ.
وی د حەوشا پەرستگەهێ دا فرۆشكارێن چێل، پەز و كووتران و پارەگوهۆڕێن روینشتی دیتن،
ئینا قامچیەك ژ بەندكان ڤەهاند و هەمی، ل گەل چێل و پەزێن وان، ژ پەرستگەهێ كرنە دەرێ، مێزێن پارەگوهۆڕان ب سەرئێك دا ئینانە خوار و پارەیێن وان بژاڵە كرن،
گۆتە كووترفرۆشان: «ئەڤان ژ ڤێرێ راكەن، مالا بابێ من نەكەنە جهێ بازرگانیێ!»
هاتە بیرا شاگردێن وی كو یا نڤیسیە: «ئیرەیی ل سەر مالا تە دێ من خۆت.»
وی دەمی جوهیان پرسیار ژێ كر: «دێ تۆ چ نیشان نیشا مە دەی، كو تە دەستهەلاتا هەی، بۆ ڤان تشتێن تۆ دكەی؟»
عیسای بەرسڤ دا و گۆتە وان: «ئەڤێ پەرستگەهێ بهەڕفینن و د سێ رۆژان دا دێ ئاڤا كەم.»
جوهیان گۆت: «ئەڤ پەرستگەهە ب چل و شەش ساڵان هاتیە ئاڤاكرن، ئەرێ تۆ د سێ رۆژان دا دێ ئاڤا كەی؟»
لێ ئەوی بەحسێ پەرستگەها لەشێ خۆ دكر.
دەمێ ژ ناڤ مریان رابووی، هاتە بیرا شاگردێن وی كو وی ئەڤ ئاخفتنە گۆتبوو، ئینا باوەر ژ نڤیسارێ و ئاخفتنا عیسای گۆتی كر.
دەمێ ل جەژنا دەربازبوونێ، ئەو ل ئورشەلیمێ، گەلەكان باوەری ب ناڤێ وی ئینا، چنكو وان ئەو نیشانێن كرین دیتن.
لێ عیسای خۆ ب دەست وان ڤە بەرنەددا، چنكو وی هەمی دنیاسین.
ئەو یێ پێدڤی نەبوو كەس بۆ وی دەربارەی مرۆڤان شاهدەییێ بدەت، چنكو ئەوی دزانی كا چ د دلێ مرۆڤان دا هەیە.
كەسەكێ فەریسی هەبوو، ناڤێ وی نیكودیمۆس بوو، ئەو ئێك ژ سەرۆكێن جوهیان بوو.
ئەڤە ب شەڤێ هاتە نك عیسای و گۆتێ: «رابی ، ئەم دزانین تۆ مامۆستایەكی ژ نك خودێ هاتی، چنكو كەس نەشێت وان نیشانێن تۆ دكەی بكەت، ئەگەر خودێ ل گەل نەبیت.»
عیسای بەرسڤا وی دا و گۆتێ: «ب راستی ب راستی دبێژمە تە: كەس نەشێت پاشایەتیا خودێ ببینیت، ئەگەر جارەكا دی ژ دایك نەبیتەڤە.»
نیكودیمۆسی پرسیار ژێ كر: «دێ چەوا مرۆڤ ژ دایك بیتەڤە و ئەو یێ پیر؟ ئەرێ ما دێ شێت چیتە د زكێ دایكا خۆ دا و پاشی ژ دایك بیتەڤە؟»
عیسای بەرسڤا وی دا: «ب راستی ب راستی دبێژمە تە: كەس نەشێت بچیتە د پاشایەتیا خودێ دا ئەگەر ژ ئاڤێ و گیانی ژ دایك نەبیت.
ئەوێ ژ لەشی دبیت لەشە و یێ ژ گیانی دبیت گیانە.
ئەڤجا تۆ نەگوهشە كو من گۆتە تە: دڤێت هوین جارەكا دی ژ دایك ببنەڤە.
بای بۆ كیڤە دڤێت دچیت، تە گو‍‌ھ ل دەنگێ وی هەیە، لێ تۆ نزانی ژ كیڤە دهێت یان كیڤە دچیت. هەر كەسێ ژ گیانێ خودێ ژی ژ دایك دبیت، یێ هۆسایە.»
نیكودیمۆسی بەرسڤا وی دا و گۆت: «چەوا چێدبیت ئەڤ تشتە رویبدەت؟»
عیسای بەرسڤا وی دا و گۆتێ: «تۆ مامۆستایێ ئیسرائیلێی و تۆ ڤان تشتان نزانی؟!
ب راستی ب راستی دبێژمە تە: ئەم وێ دبێژین یا ئەم دزانین و شاهدەییێ ب وێ ددەین یا مە دیتی، لێ هوین شاهدەییا مە قەبیل ناكەن.
من بۆ هەوە بەحسێ كاروبارێن ئەردی كر و هەوە باوەر نەكر، ئەڤجا دێ چەوا باوەر كەن، ئەگەر ئەز بۆ هەوە بەحسێ كاروبارێن ئەسمانی بكەم؟
كەسەك سەرنەكەفتیە ئەسمانی، ئەگەر ئەو نەبیت، ئەوێ ژ ئەسمانی هاتیە خوارێ، كو ئەو ژی كوڕێ مرۆڤە.
كا چەوا مووسای مار ل چۆلی بلند كر ، هەروەسا دڤێت كوڕێ مرۆڤ ژی بهێتە بلندكرن،
داكو هەر كەسێ باوەریێ پێ بینیت، ژیانا هەروهەر هەبیت.
خودێ هۆسا حەز ژ جیهانێ كر، كو وی كوڕێ خۆ یێ ئێكانە دایێ، داكو هەر كەسێ باوەریێ پێ بینیت ژ ناڤ نەچیت، لێ ژیانا هەروهەر هەبیت.
خودێ كوڕێ خۆ نەهنارتیە جیهانێ، دا جیهانێ گونەهبار بكەت، لێ دا جیهانێ ب وی قورتال بكەت.
ئەوێ باوەریێ پێ بینیت ناهێتە گونەهباركرن، لێ ئەوێ باوەریێ پێ نەئینیت، ئەو هەر ژ نوكە هاتیە گونەهباركرن، چنكو وی باوەری ب ناڤێ كوڕێ خودێ یێ ئێكانە نەئینا.
گونەهباركرن ژی ل سەر وی بنەمایە كو رۆناهی هاتە جیهانێ، لێ مرۆڤان ل شوینا رۆناهیێ حەز ژ تاریاتیێ كر، چنكو كارێن وان د خراب بوون.
هەر كەسێ خرابیێ دكەت، وی كەرب ژ رۆناهیێ ڤەدبن و ناهێتە نك رۆناهیێ، دا كریارێن وی ئاشكرا نەبن.
لێ ئەوێ ل سەر راستیێ دچیت، دهێتە نك رۆناهیێ، دا دیار ببیت كو كارێن وی ل دویڤ حەزا خودێ هاتینە كرن.»
پشتی هنگی عیسا ل گەل شاگردێن خۆ چوو دەڤەرا یەهودیایێ و ل وێرێ ل گەل وان ما و تافیركرن دكر.
یوحەننای ژی ل عەینونێ ل نك سالیم تافیركرن دكر، چنكو ل وێرێ ئاڤ یا مشە بوو. خەلك دهاتن و دهاتنە تافیركرن.
هێشتا یوحەننا نەهاتبوو زیندان كرن.
وی دەمی گەنگەشەیەك دەربارەی داب و نەریتێن پاقژكرنێ د ناڤبەرا شاگردێن یوحەننای و جوهیەكی دا پەیدا بوو.
ئەو چوونە نك یوحەننای و گۆتنێ: «رابی ، ئەو كەسێ ل لایێ دی یێ رویبارێ ئوردن ل گەل تە بوو، ئەوێ كو تە شاهدەیی بۆ دای، ئەڤە ئەو یێ تافیركرنێ دكەت و هەمی خەلك دچنە نك وی.»
یوحەننای بەرسڤ دا و گۆت: «كەس نەشێت تشتەكی وەرگریت، ئەگەر بۆ وی ژ ئەسمانی نەهاتبیتە دان.
هوین ب خۆ شاهدەییێ بۆ من ددەن، كو من یا گۆتی: ئەز نە مەسیحم، لێ ل پێشیا وی ئەز یێ هاتیمە هنارتن.
بویك بۆ كێ بیت، ئەو زاڤایە. لێ هەڤالێ زاڤای، ئەوێ كو د خزمەتا زاڤای دا راوەستیایە و گو‍‌ھ ل دەنگێ وی دبیت، ب دەنگێ وی دلخۆش دبیت. ئەڤجا ئەڤ دلخۆشیە یا منە، كو ئەو نوكە تەمام بوویە.
پێدڤیە ئەو زێدە ببیت و ئەز كێم ببم.»
ئەوێ ژ ژۆری بهێت، ئەو د سەر هەمیان دایە، لێ یێ ژ ئەردی بیت، ئەو یێ ئەردیە و ئاخفتنێن ئەردی دكەت. یێ ژ ئەسمانی دهێت ئەو د سەر هەمیان دایە.
ئەو شاهدەییێ ب وێ ددەت، یا وی دیتی و بهیستی و كەس شاهدەییا وی قەبیل ناكەت.
ئەوێ شاهدەییا وی قەبیل دكەت، ئەو پەسەند دكەت كو خودێ یێ راستە.
ژ بەر كو یێ خودێ ئەو هنارتی، ئەو ئاخفتنێن خودێ دبێژیت، چنكو خودێ بێ پیڤان گیانێ خۆ ددەت.
باب حەز ژ كوڕی دكەت و هەمی تشت یێن كرینە د دەستێ وی دا.
ئەوێ باوەریێ ب كوڕی بینیت، ژیانا هەروهەر یا هەی. ئەوێ ب گۆتنا كوڕی نەكەت، ئەو ژیانێ نابینیت، لێ تۆڕەبوونا خودێ ل سەر وی دمینیت.
فەریسیان بهیست كو عیسا ژ یوحەننای پتر مرۆڤان دكەتە شاگرد و تافیركرنێ دكەت،
هەر چەندە عیسای ب خۆ تافیركرن نەدكر، لێ شاگردێن وی دكر.
دەمێ عیسای ئەڤ چەندە زانی ، دەڤەرا یەهودیایێ هێلا و دیسان قەستا جەلیلێ كرەڤە.
پێدڤی ژی بوو ئەو د سامەریایێ را دەرباز ببیت.
گەهشتە باژێڕەكێ سامەریایێ دگۆتنێ سوخار، نێزیكی وی ئەردی بوو، ئەوێ یەعقوبی دایە كوڕێ خۆ یوسڤی،
بیرا یەعقوبی ژی ل وێرێ بوو. عیسا ژ رێڤنگیێ وەستیا بوو، ئینا ل سەر لێڤا بیرێ روینشت، دەمژمێر نێزیكی دوازدەی نیڤرۆ بوو.
ژنكەكا سامەری هات دا ئاڤێ ببەت. عیسای گۆتێ: «كا هندەك ئاڤێ بدە من، دا ڤەخۆم.»
شاگردێن وی چووبوونە باژێڕی، دا خوارنێ بكڕن.
ئینا ژنكا سامەری گۆتێ: «چەوا تۆ داخوازا ئاڤێ ژ من دكەی؟ تۆ جوهی و ئەز ژنكەكا سامەریمە.» چنكو جوهی تێكهەلیا سامەریان ناكەن.
عیسای بەرسڤا وێ دا و گۆتێ: «ئەگەر تە دانا خودێ زانیبا و ئەگەر تە زانیبا كا كیە دبێژیتە تە: ‹ئاڤێ بدە من،› تۆ دا ژێ داخواز كەی و ئەو دا ئاڤا ژیانێ دەتە تە.»
ژنكێ گۆتێ: «ئەزبەنی، تە چ ئامان نینن و بیر یا كویرە. ئەڤجا تۆ دێ وێ ئاڤا ژیانێ ژ كیڤە ئینی؟
ما تۆ ژ بابێ مە یەعقوبی، ئەوێ ئەڤ بیرە دایە مە، مەزنتری؟ ئەوا وی ب خۆ و كوڕێن وی و كەوالێن وی ئاڤ ژێ ڤەخواری.»
عیسای بەرسڤ دا و گۆتێ: «هەر كەسێ ژ ڤێ ئاڤێ ڤەخۆت دێ تێهنی بیتەڤە،
لێ ئەوێ ژ وێ ئاڤا ئەز ددەمێ ڤەخۆت، ئەو چ جاران تێهنی نابیت. ئەو ئاڤا ئەز ددەمێ، د وی دا دێ بیتە كانیەكا ئاڤێ، كو بزێت و ژیانا هەروهەر بدەت.»
ئینا ژنكێ گۆتێ: «ئەزبەنی، وێ ئاڤێ بدە من، داكو تێهنی نەبم و ئێدی نەهێمە ڤێرێ داكو ئاڤێ بكێشم.»
عیسای گۆتێ: «هەڕە و گازی هەڤژینێ خۆ بكە و ڤەگەڕە ڤێرێ.»
ژنكێ بەرسڤ دا و گۆت: «من هەڤژین نینە.» ئینا عیسای گۆتێ: «تە راست گۆت دەمێ تە گۆتی: ‹من هەڤژین نینە.›
چنكو تە پێنج هەڤژین هەبوون، ئەوێ نوكە تە هەی، نە هەڤژینێ تەیە. تە ئەڤە راست گۆت.»
ژنكێ گۆتێ: «ئەزبەنی، ئەز یا دبینم كو تۆ پێغەمبەری!
بابكالێن مە ل ڤی چیای پەرستن دكر و هوین دبێژن، جهێ كو پێدڤیە مرۆڤ پەرستنێ لێ بكەت، ل ئورشەلیمێیە.»
ئینا عیسای گۆتێ: «باوەر ژ من بكە خانم، دەمەك دێ هێت، كو هوین دێ بابی پەرێسن، لێ نە ل ڤی چیای و نە ل ئورشەلیمێ.
هوین وی دپەرێسن، یێ هوین نەنیاسن، لێ ئەم وی دپەرێسین، یێ ئەم دنیاسین، چنكو قورتالبوون ژ نك جوهیان دهێت.
لێ دێ دەمەك هێت، كو نوكەیە، پەرستڤانێن راستەقینە ب گیان و راستیێ، بابی دپەرێسن، چنكو باب ل وان دگەڕیێت، یێن هۆسا وی دپەرێسن.
خودێ گیانە و پێدڤیە ئەوێن وی دپەرێسن، ب گیان و راستیێ پەرستنێ بكەن.»
ژنكێ گۆتێ: «ئەز دزانم كو مەسیح »، ئەوێ دبێژنێ یێ زەیتكری ، «دێ هێت. دەمێ ئەو بهێت، دێ بۆ مە هەمی تشتان دیار كەت.»
عیسای گۆتێ: «ئەز ئەوم، ئەوێ كو ل گەل تە دئاخڤیت.»
هنگی شاگرد گەهشتن و گوهشین دەمێ وان دیتی ئەو یێ ل گەل ژنكەكێ دئاخڤیت. لێ كەسێ ژ وان نەگۆت: «تە چ ژێ دڤێت؟» یان «بۆچی تۆ ل گەل وێ دئاخڤی؟»
ئینا ژنكێ جەڕكێ خۆ هێلا و ڤەگەڕیا باژێڕی و گۆتە خەلكی:
«وەرن، مرۆڤەكی ببینن كو هەمی ئەو تشتێن من كرین، گۆتنە من. ئایا چێدبیت ئەو مەسیح بیت؟»
ئەڤجا ژ باژێڕی دەركەفتن و هاتنە نك وی.
د وی دەمی دا، شاگردان هیڤی ژێ دكرن و دگۆتنێ: «رابی ، تشتەكی بخۆ!»
لێ گۆتە وان: «من خوارنەكا هەی ئەز بخۆم، كو هوین نزانن چیە!»
ئینا شاگردان گۆتە ئێكودوو: «ئەرێ كەسەكی تشتەكێ خوارنێ بۆ ئینایە؟»
عیسای گۆتە وان: «خوارنا من ئەوە كو ئەز ب حەزا وی بكەم یێ ئەز هنارتیم و كارێ وی ب دویماهی بینم.
ما هوین نابێژن: ‹هێشتا چوار هەیڤ بۆ دروینێ یێن ماین›؟ ئەڤە ئەز دبێژمە هەوە: چاڤێن خۆ ڤەكەن و ببینن كو زەڤیێن زەر بووین و دەمێ دروینا وان یێ هاتی!
پالەیێ دروینێ ژی یێ كرێیا خۆ وەردگریت و بۆ ژیانا هەروهەر یێ بەرهەمی كۆم دكەت، دا تۆڤچین و پالەیێ دروینێ پێكڤە دلخۆش ببن.
ل ڤێرێ ئەو گۆتن راستە یا دبێژیت: ‹ئێك دچینیت و ئێكێ دی ددرویت.›
من هوین هنارتن، دا وی بدروین یێ هوین پێڤە نەوەستیاین. هندەكێن دی یێن وەستیاین و هوین بەرهەمێ وەستیانا وان دچنن.»
گەلەك ژ سامەریێن وی باژێڕی، باوەری پێ ئینا، ژ بەر ئاخفتنا وێ ژنكێ، یا شاهدەیی ددا، كو: «وی هەمی ئەو تشتێن من كرین، گۆتنە من.»
دەمێ سامەری هاتینە نك وی، داخواز ژێ كر كو ل نك وان بمینیت. ئەو ژی دوو رۆژان ما ل وێرێ.
گەلەكێن دی ژ بەر ئاخفتنا وی، باوەری پێ ئینا
و گۆتنە ژنكێ: «ئێدی نە ژ بەر ئاخفتنا تە، ئەم باوەریێ دئینین، لێ چنكو مە ب خۆ بهیست و ئەم دزانین كو ب راستی ئەڤە قورتالكەرێ جیهانێیە.»
پشتی وان هەردوو رۆژان، ژ وێرێ چوو جەلیلێ.
عیسای ب خۆ شاهدەیی دابوو، كو پێغەمبەرەكی د باژێڕێ خۆ دا رێز نینە.
دەمێ گەهشتیە جەلیلێ، خەلكێ وێ پێشوازی لێ كر، چنكو هەر تشتێ وی ل جەژنا دەربازبوونێ ل ئورشەلیمێ كری، وان دیتبوو، ژ بەر كو ئەو ژی هاتبوونە جەژنێ.
عیسا جارەكا دی هاتە قانایا جەلیلێ، ئەو جهێ ئاڤ لێ كریە شەراب. ل وێرێ كاربدەستەكێ پاشای هەبوو، كوڕێ وی ل كەفەرناحومێ یێ نەساخ بوو.
دەمێ بهیستی كو عیسا ژ یەهودیایێ یێ هاتیە جەلیل، چوو نك و هیڤی ژێ كرن، كو خواركەڤیتە كەفەرناحوم و كوڕێ وی ساخ بكەت، چنكو ل بەر مرنێ بوو.
وی دەمی عیسای گۆتێ: «هوین باوەریێ نائینن تا هوین نیشانان و مەندەهۆشیان نەبینن.»
كاربدەستێ پاشای گۆتێ: «ئەزبەنی، بەری زاڕۆكێ من بمریت، وەرە!»
عیسای بەرسڤا وی دا: «هەڕە، كوڕێ تە یێ ساخە.» ئەڤجا زەڵامی باوەر ژ وێ ئاخفتنێ كر یا عیسای گۆتیێ و چوو.
دەمێ ئەو ب رێ دچوو، هندەك بەنیێن وی گەهشتنێ و گۆتنێ كو كوڕێ وی یێ ساخە.
ئینا پرسیار ژ وان كر: «كیژ دەمژمێرێ، باشبوونا وی دەست پێ كریە؟» ئەوان گۆتێ: «دوهی دەمژمێر ئێكی پشتی نیڤرۆ، تایێ ئەو بەردا.»
هنگی بابێ كوڕكی زانی، كو ئەو دەمژمێر بوو، یا عیسای گۆتیێ: «كوڕێ تە یێ ساخە.» ئەڤجا وی و خەلكێ مالا وی هەمیان باوەری پێ ئینا.
ئەڤە نیشانا دوویێ بوو عیسای كری، پشتی دەركەفتنا وی ژ یەهودیایێ بۆ جەلیل.
پشتی هنگی جەژنەكا جوهیان هەبوو، ئینا عیسا بەرەڤ ئورشەلیمێ سەركەفت.
ل نك دەرگەهێ پەزی ل ئورشەلیمێ، بركەك هەبوو ب عیبرانی دگۆتنێ بێت‌حەسدا، وێ پێنج ئەیوان هەبوون.
گەلەك نەساخێن كۆرە و لەنگ و فاڵنجی خۆ ل وان ئەیوانان درێژ كربوو، ل هیڤیا شلقاندنا ئاڤێ بوون.
چنكو جار جارە فریشتەیەك خواردكەفتە بركێ و ئاڤ دشلقاند. ئەوێ بەراهیێ دچوو تێدا پشتی شلقینا ئاڤێ، دا ژ هەر ئێشەكا لێ هەی ساخ بیت.
مرۆڤەك ل وێرێ هەبوو، ئەو سی‍‌ھ و هەشت ساڵ بوو یێ نەساخ.
عیسای ئەو دیت یێ درێژ كریە و زانی كو ئەڤە دەمەكێ درێژە ئەو د ڤێ رەوشێ دا، ئینا ژێ پرسی: «تە دڤێت تۆ ساخ ببی؟»
نەساخی بەرسڤا وی دا: «ئەزبەنی، من كەس نینە، دەمێ كو ئاڤ دشلقیت، من بكەتە د بركێ دا، لێ دەمێ ئەز دهێم، ئێكێ دی بەری من دچیتە تێدا.»
عیسای گۆتێ: «رابە و نڤینێن خۆ هەلگرە و بڕێڤە هەڕە.»
د گاڤێ دا ئەو مرۆڤ ساخ بوو و نڤینێن خۆ هەلگرتن و بڕێڤە چوو. ئەو رۆژ ژی شەمبی بوو.
ئینا جوهیان گۆتە ئەوێ ساخ بووی: «ئەڤرۆ شەمبیە ، نە رەوایە تۆ نڤینێن خۆ هەلگری.»
ئەوی بەرسڤا وان دا: «ئەوێ ئەز ساخ كریم گۆتە من: نڤینێن خۆ هەلگرە و بڕێڤە هەڕە.»
وان پرسیار ژێ كر: «ئەو مرۆڤ كیە یێ گۆتیە تە نڤینێن خۆ هەلگرە و بڕێڤە هەڕە؟»
ئەو نەساخێ ساخ بووی نەدزانی ئەو كیە، چنكو گەلەك مرۆڤ ل وێرێ بوون و عیسای خۆ د ناڤ وان دا بەرزە كربوو.
پشتی هنگی عیسای ئەو ل پەرستگەهێ دیت و گۆتێ: «بەرێ خۆ بدێ، ئەڤە تۆ ساخ بووی، ئێدی گونەهان نەكە، دا یا خرابتر ب سەرێ تە نەهێت.»
ئینا ئەو مرۆڤ چوو و گۆتە جوهیان كو عیسای ئەوێ ساخ كری.
ژ بەر ڤێ چەندێ جوهیان دەست ب تەنگاڤكرنا عیسای كر، چنكو وی ئەڤ تشتە ل شەمبیێ دكرن.
عیسای بەرسڤا وان دا: «بابێ من تا نوكە یێ كار دكەت، و ئەز ژی یێ كار دكەم.»
ژ بەر ڤێ چەندێ جوهیان پتر بزاڤا كوشتنا عیسای دكر، چنكو وی نە ب تنێ سەرپێچیا دەستوورێ رۆژا شەمبیێ دكر، لێ وی دگۆت ژی كو خودێ بابێ ویە، هۆسا ئەوی خۆ دئینا رێزا خودێ.
ئینا عیسای بەرسڤا وان دا و گۆتێ: «ب راستی ب راستی دبێژمە هەوە: كوڕ نەشێت چ تشتان ژ نك خۆ بكەت، لێ ئەو وێ دكەت یا كو دبینیت باب دكەت. هەر تشتەكێ باب بكەت، كوڕ ژی دكەت.
چنكو باب حەز ژ كوڕی دكەت و هەمی كارێن خۆ نیشا وی ددەت و دێ كارێن ژ ڤێ مەزنتر ژی نیشا وی دەت، دا هوین مەندەهۆش بن.
كا چەوا باب مریان رادكەتەڤە و زیندی دكەت، هەروەسا كوڕ ژی یێ وی بڤێت، زیندی دكەت.
زێدەباری ڤێ چەندێ، باب كەسێ دادگە‍‌ھ ناكەت، لێ هەمی دەستهەلاتا دادگەهكرنێ یا دایە كوڕی،
دا هەمی رێزێ ل كوڕی بگرن، هەروەكو رێزێ ل بابی دگرن. یێ رێزێ ل كوڕی نەگریت، ئەو رێزێ ل بابێ كوڕ هنارتی ژی ناگریت.
ب راستی ب راستی دبێژمە هەوە: هەر كەسێ گو‍‌ھ بدەتە پەیڤا من و باوەریێ ب وی بینیت یێ ئەز هنارتیم، وی ژیانا هەروهەر یا هەی. ئەو ناهێتە گونەهباركرن، لێ ئەو ژ مرنێ دەربازی ژیانێ بوویە.
ب راستی ب راستی دبێژمە هەوە: دێ دەمەك هێت، كو نوكەیە، مری دێ دەنگێ كوڕێ خودێ بهیسن و یێن دبهیسن دێ زیندی بن.
چنكو هەروەكو بابی ژیان د خۆ دا هەی، وی دایە كوڕی ژی كو ژیان د خۆ دا هەبیت.
دەستهەلات یا دایێ دادگەهكرنێ ژی بكەت، چنكو ئەو كوڕێ مرۆڤە.
ژ ڤێ چەندێ مەندەهۆش نەبن، چنكو دەمەك دێ هێت، ئەوێن د ناڤ گۆڕان دا، هەمی دێ دەنگێ وی بهیسن
و دێ دەركەڤن. ئەوێن كارێن باش كرین، دێ بۆ ژیانێ رابن و ئەوێن كارێن خراب كرین، دێ بۆ سزادانێ رابن.
ئەز ژ نك خۆ نەشێم تشتەكی بكەم. چەوا كو ئەز دبهیسم، وەسا دادگەهكرنێ دكەم و دادگەهكرنا من ژی یا دادوەرانەیە، چنكو ئەز بزاڤێ بۆ حەزا خۆ ناكەم، لێ بۆ حەزا وی دكەم یێ ئەز هنارتیم.»
«ئەگەر ئەز شاهدەییێ بۆ خۆ بدەم، شاهدەییا من نە یا راستە.
لێ ئێكێ دی شاهدەییێ بۆ من ددەت و ئەز دزانم شاهدەییا وی بۆ من یا راستە.
هەوە هندەك هنارتنە نك یوحەننای و ئەوی بۆ راستیێ شاهدەیی دا.
من هەوجەیی ب شاهدەییا مرۆڤان نینە، لێ ئەز ڤان تشتان دبێژم دا هوین قورتال ببن.
یوحەننا چرایەكێ هەل و روهن بوو، هوین رازی بوون بۆ دەمەكی ل بەر رۆناهیا وی خۆشیێ ببەن.
لێ من شاهدەییەكا مەزنتر ژ شاهدەییا یوحەننای یا هەی. ئەو كارێن بابی داینە من دا ئەنجام بدەم، ئەوێن ئەز نوكە دكەم، ئەو ب خۆ شاهدەییێ بۆ من ددەن كو بابی ئەز یێ هنارتیم.
ئەو بابێ ئەز هنارتیم، ئەو ب خۆ ژی بۆ من شاهدەییێ ددەت. هەوە چ جاران نە دەنگێ وی بهیستیە و نە خولكێ وی ژی دیتیە
و پەیڤا وی د دلێ هەوە دا، خۆج‍‌ھ نابیت، چنكو هوین باوەریێ ب وی كەسی نائینن، ئەوێ بابی ئەو هنارتی.
هوین لێگەڕیانێ د نڤیسارێن پیرۆز دا دكەن، چنكو هوین هزر دكەن، ژیانا هەروهەر بۆ هەوە ب رێكا وان یا هەی و ئەو نڤیسار ب خۆ بۆ من شاهدەییێ ددەن.
لێ هەوە نەڤێت بهێنە نك من، كو هەوە ژیان هەبیت.
من هەوجەیی ب وێ مەزناهیێ نینە یا ژ مرۆڤان دهێت،
لێ من هوین نیاسین، كو حەزژێكرنا خودێ د دلێ هەوە دا نینە.
ئەز ب ناڤێ بابێ خۆ هاتم، لێ هەوە ئەز قەبیل نەكرم. ئەگەر ئێكێ دی ب ناڤێ خۆ بهێت، هوین دێ وی قەبیل كەن.
هوین دێ چەوا شێن باوەریێ ئینن، مادەم هوین مەزناهیێ ژ ئێكودوو وەردگرن و بزاڤێ بۆ وێ مەزناهیێ ناكەن، یا ژ خودایێ ئێكانە دهێت؟
هزر نەكەن ئەز دێ ل نك بابی هەوە تاوانبار كەم. یێ هەوە تاوانبار دكەت مووسایە، ئەوێ هەوە هیڤیێن خۆ پێڤە گرێ داین.
ئەگەر هەوە باوەر ژ مووسای كربا، دا هوین باوەر ژ من ژی كەن، چنكو وی دەربارەی من یا نڤیسی.
ئەڤجا ئەگەر هوین باوەر ژ نڤیسارێن وی نەكەن، پا دێ چەوا باوەر ژ ئاخفتنێن من كەن؟»
پشتی وێ چەندێ، عیسا ژ دەریاكا جەلیل، كو دبێژنێ دەریاكا تەبەریە، دەرباز بوو.
گەلەك خەلك ب دویڤ كەفتن، چنكو وان ئەو نیشان دیتن، ئەوێن وی ژ بۆ نەساخان دكرن.
عیسا سەركەفتە چیای و ل وێرێ ل گەل شاگردێن خۆ روینشت.
جەژنا دەربازبوونێ یا جوهیان ژی نێزیك ببوو.
دەمێ عیسای سەرێ خۆ بلند كری و كۆمەكا مەزن یا مرۆڤان دیتی یا بەرەڤ وی ڤە دهێت، گۆتە فیلیپۆسی: «ئەم ژ كیڤە نانی بكڕین، دا ئەڤ مرۆڤە بخۆن؟»
وی ئەڤە گۆت، دا فیلیپۆسی تاقی بكەت، چنكو عیسای دزانی دێ چ كەت.
فیلیپۆسی بەرسڤا وی دا: «بهایێ دوو سەد دیناران ژی نان تێرا وان ناكەت، كو هەر ئێكی ژ وان پرتەكا بچویك ژی بگەهیتێ!»
ئینا ئێك ژ شاگردێن وی، كو ئەو ژی ئەندراوسێ برایێ شەمعون پەترۆسی بوو، گۆتێ:
«كوڕكەك یێ ل ڤێرێ پێنج نانێن جەهی و دوو ماسی یێن ڤێ هەین، لێ پا ئەڤە چیە بۆ ڤێ كۆما هندا مەزن؟»
عیسای گۆت: «وە بكەن كو خەلك ل ئەردی بڕویننە خوارێ!» ل وێرێ گەلەك گیا هەبوو. ئینا زەڵام روینشتن و ژمارەیا وان نێزیكی پێنج هزاران بوو.
پاشی عیسای نان وەرگرتن و سوپاسیا خودێ كر، پاشی ل سەر ئەوێن روینشتی بەڵاڤ كر، هەروەسا ماسی ژی، هندی وان ڤیای.
دەمێ تێر بووین، گۆتە شاگردێن خۆ: «بەرمایكان خڕڤە كەن، دا تشتەك ب هەروە نەچیت.»
ئینا وان خڕڤە كرن و ژ بەرمایكێن هەر پێنج نانێن جەهی، ئەوێن وان مرۆڤان ژێ خواری، دوازدە سەڵكێن پرتان پڕ كرن.
دەمێ وان مرۆڤان ئەو نیشانا عیسای كری دیتی، گۆتن: «راستە، ئەڤەیە ئەو پێغەمبەرێ كو دێ هێتە جیهانێ.»
هنگی عیسا جارەكا دی ب تنێ ڤەگەڕیا چیای، چنكو وی زانی كو وان ل بەرە بهێن و ب خورتی وی ببەن و بكەنە پاشا.
دەمێ رۆژ ئاڤا بووی، شاگردێن وی خواركەفتنە دەریاكێ،
ل بەلەمەكێ سیار بوون و ب رێ كەفتن، دا بچنە كەفەرناحومێ ل لایێ دی یێ دەریاكێ. تاری ب سەر وان دا هات و هێشتا عیسا نەگەهشتبوو نك وان.
باڕۆڤەیەكا ب هێز هات و پێل رابوون.
دەمێ شاگرد نێزیكی پێنج شەش كیلۆمەتران پێشڤە چووین، دیت عیسا یێ ل سەر ئاڤێ بڕێڤە دچیت و نێزیكی بەلەمێ دبیت، ئینا ترسیان.
لێ وی گۆتە وان: «ئەزم، نەترسن!»
ئەڤجا ئەو دلخۆش بوون كو وی ل بەلەمێ سیار بكەن، ئینا ئێكسەر بەلەم گەهشتە وی جهێ ئەو دچوونێ.
ل رۆژا پاشتر، ژ بۆ وی خەلكێ مایە ل رەخێ دی یێ دەریاكێ یا ئاشكرا بوو، كو بەلەمەك ب تنێ ل وێرێ هەبوو، ئەوا شاگردێن وی لێ سیار بووین، عیسا ژی ل گەل وان ل بەلەمێ سیار نەببوو، لێ شاگردێن وی ب تنێ چووبوون.
هندەك بەلەمێن دی ژ تەبەریە هاتنە نێزیكی وی جهی، ئەوێ خەلكی نان لێ خواری، پشتی كو خودانی سوپاسیا خودێ كری.
ئەڤجا دەمێ خەلكی دیتی، كو نە عیسا ل وێرێیە و نە شاگردێن وی، ل وان بەلەمان سیار بوون و چوونە كەفەرناحومێ، ل عیسای دگەڕیان.
دەمێ ئەو ل رەخێ دی یێ دەریاكێ دیتی، گۆتنێ: «رابی ، تۆ كەنگی گەهشتیە ڤێرێ؟»
عیسای بەرسڤا وان دا: «ب راستی ب راستی دبێژمە هەوە: هوین ل من دگەڕیێن، نە ژ بەر كو هەوە نیشان دیتن، لێ چنكو هەوە ژ وی نانی خوار و هوین تێر بوون.
ژ بۆ وێ خوارنا درزیت كار نەكەن، لێ ژ بۆ وێ خوارنێ كار بكەن، ئەوا بۆ ژیانا هەروهەر دمینیت، ئەو خوارنا كوڕێ مرۆڤ دێ دەتە هەوە، چنكو خودایێ باب ئەو یێ موهر كری.»
ئینا وان پرسیار ژێ كر: «ئەم چ بكەین، دا كارێن خودێ ب ج‍‌ھ بینین؟»
عیسای بەرسڤا وان دا و گۆت: «كارێ خودێ ئەڤەیە: هوین باوەریێ ب وی بینن، ئەوێ كو وی هنارتی.»
ئەڤجا وان گۆتێ: «ئەگەر وەسایە، چ نیشانە تۆ دێ كەی، دا ئەم ببینین و باوەر ژ تە بكەین؟ تۆ دێ چ كەی؟
بابێن مە ل بیابانێ مەننا یا خواری، هەروەكو هاتیە نڤیسین: ‹ژ ئەسمانی نان دا وان، دا بخۆن!›»
ئینا عیسای گۆتە وان: «ب راستی ب راستی دبێژمە هەوە: ئەو نە مووسا بوو یێ كو نان ژ ئەسمانی دایە هەوە، لێ بابێ من بوو. نوكە ژی ئەو نانێ راستەقینە ژ ئەسمانی ددەتە هەوە.
چنكو نانێ خودێ ئەوە یێ ژ ئەسمانی دهێتە خوارێ و ژیانێ ددەتە جیهانێ.»
ئینا وان گۆتێ: «ئەزبەنی، ل هەمی دەمان ڤی نانی بدە مە.»
عیسای بەرسڤا وان دا: «ئەزم نانێ ژیانێ، ئەوێ بهێتە نك من چ جاران برسی نابیت و ئەوێ باوەریێ ب من بینیت، چ جاران تێهنی نابیت.
لێ من گۆتە هەوە: هەوە ئەز دیتم، لێ هوین هێشتا باوەریێ نائینن.
هەمیێن كو باب ددەتە من، دێ هێنە نك من و هەر كەسێ بهێتە نك من، ئەز چ جاران وی دەرنائێخم.
چنكو ئەز ژ ئەسمانی هاتیمە خوارێ، نە دا ئەز ل دویڤ حەزا خۆ بكەم، لێ ل دویڤ حەزا ئەوێ ئەز هنارتیم.
حەزا وی یێ ئەز هنارتیم ئەوە، كو هەمی كەسێن وی داینە من، ئەز كەسێ ژێ ژ دەست نەدەم، لێ ل رۆژا دویماهیێ وان ژ مرنێ راكەم.
چنكو حەزا بابێ من ئەوە، كو هەر كەسێ كوڕی ببینیت و باوەریێ پێ بینیت، دێ ژیانا هەروهەر بۆ وی بیت و ل رۆژا دویماهیێ ئەز دێ وی ژ مرنێ راكەم.»
ئەڤجا جوهیان پتەپت دەربارەی عیسای كر، چنكو وی گۆت: «ئەزم ئەو نانێ ژ ئەسمانی هاتیە خوار.»
وان گۆت: «ئەرێ ئەڤە نە عیسایێ كوڕێ یوسڤیە، ئەوێ ئەم دایك و بابێن وی دنیاسین؟ ئەو چەوا دبێژیت: ئەز یێ ژ ئەسمانی هاتیمە خوارێ؟»
عیسای بەرسڤا وان دا: «د ناڤبەرا خۆ دا پتەپتێ نەكەن.
كەس نەشێت بهێتە نك من، ئەگەر باب، ئەوێ ئەز هنارتیم، وی رانەكێشیت، ئەز ژی دێ ل رۆژا دویماهیێ وی ژ مرنێ راكەم.
د نڤیسارێن پێغەمبەران دا هاتیە نڤیسین: ‹هەمی دێ ژ لایێ خودێ ڤە هێنە فێركرن.› هەر كەسەكێ ژ بابی ببهیسیت و ژێ فێر ببیت، دهێتە نك من.
رامانا ڤێ نە ئەوە كو ئێكی باب یێ دیتی: كەسێ نەدیتیە، ژبلی وی یێ كو ژ خودێیە، ب تنێ وی باب یێ دیتی.
ب راستی ب راستی دبێژمە هەوە: ئەوێ باوەریێ ب من بینیت، وی ژیانا هەروهەر هەیە.
ئەزم نانێ ژیانێ.
بابێن هەوە مەننا ل بیابانێ خوارن و مرن.
لێ ئەڤە ئەو نانە، یێ ژ ئەسمانی هاتیە خوارێ، دا مرۆڤ ژێ بخۆت و نەمریت.
ئەزم نانێ ژیانێ، یێ كو ژ ئەسمانی هاتیە خوار. ئەگەر ئێكی ژ ڤی نانی خوار، دێ هەتا هەتایێ ژیت. ئەو نانێ كو ئەز دێ بۆ ژیانا جیهانێ دەم، لەشێ منە.»
ئەڤجا شەڕەدەڤەك د ناڤبەرا جوهیان دا چێبوو و گۆتن: «ئەڤە چەوا دشێت لەشێ خۆ بدەتە مە، كو بخۆین؟»
ئینا عیسای گۆتە وان: «ب راستی ب راستی دبێژمە هەوە: ئەگەر هوین لەشێ كوڕێ مرۆڤ نەخۆن و خوینا وی ڤەنەخۆن، هەوە ژیان د ناخێ خۆ دا نینە.
ئەوێ لەشێ من بخۆت و خوینا من ڤەخۆت، وی ژیانا هەروهەر هەیە و ئەز دێ وی ل رۆژا دویماهیێ ژ مرنێ راكەم.
چنكو لەشێ من خوارنا راستەقینەیە و خوینا من ڤەخوارنا راستەقینەیە.
هەر كەسێ لەشێ من بخۆت و خوینا من ڤەخۆت، ئەو د ناڤ من دا یێ بنەجهە و ئەز د ناڤ وی دا.
كا چەوا بابی، یێ كو سەرەكانیا ژیانێیە، ئەز هنارتم و ئەز ب وی دژیم، هۆسا ئەوێ من بخۆت، دێ ب من ژیت.
ئەڤەیە ئەو نانێ ژ ئەسمانی هاتیە خوار، ئەو نە وەكو وێ مەننایێیە، ئەوا بابكالێن هەوە خواری و مرین، لێ هەر كەسێ ژ ڤی نانی بخۆت، دێ هەروهەر ژیت.»
عیسای ئەڤە ل كنیشتەیێ گۆت، دەمێ وی ل كەفەرناحومێ فێركرن دكر.
گەلەك ژ شاگردێن وی، دەمێ ئەڤ چەندە بهیستی، گۆتن: «ئەڤ گۆتنە یا ب زەحمەتە! كی دشێت گوهێ خۆ بدەتێ؟»
عیسای زانی كو شاگردێن وی یێ پتەپتێ ل سەر ڤێ چەندێ دكەن، ئینا گۆتە وان: «ما ئەڤ چەندە دلێ هەوە سار دكەت؟
پا دێ چ بێژن، ئەگەر هوین كوڕێ مرۆڤ ببینن یێ ب سەر دكەڤیتە وی جهێ كو بەرێ لێ بوو؟
ئەوێ ژیانێ ددەت گیانێ پیرۆزە، لێ لەش چ مفای نادەت. ئەو ئاخفتنێن من بۆ هەوە گۆتین، ئەو ژ گیانێ خودێنە و ژیانێ ددەن.
لێ هندەك ژ هەوە هەنە باوەریێ نائینن!» چنكو عیسای ژ دەستپێكێ دزانی ئەو كینە باوەریێ پێ نائینن و ئەو كیە دێ بێبەختیێ لێ كەت.
پاشی گۆت: «ژ بەر وێ چەندێ من گۆتە هەوە: كەسەك نەشێت بهێتە نك من، ئەگەر باب دەستویریێ نەدەتێ.»
ژ بەر ڤێ چەندێ گەلەك ژ شاگردێن وی زڤڕین و ئێدی ل گەل وی نەدگەڕیان.
ئینا عیسای گۆتە هەر دوازدە شاگردان: «ما هوین ژی حەز دكەن بچن؟»
شەمعون پەترۆسی بەرسڤا وی دا: «خودان، ئەم دێ چینە نك كێ؟ پەیڤێن ژیانا هەروهەر یێ ل نك تە،
مە ژی باوەری ئینا و زانی كو تۆی پیرۆزێ خودێ!»
عیسای بەرسڤا وان دا: «ما من هوین هەر دوازدە هەلنەبژارتن؟ لێ ئێك ژ هەوە ئبلیسە!»
وی بەحسێ یەهودایێ كوڕێ شەمعونێ ئەسخەریوتی بوو، چنكو ئەو دێ بێبەختیێ ل عیسای كەت، هەر چەندە ئێك ژ دوازدان بوو.
پشتی هنگی عیسا ل دەڤەرا جەلیل دگەڕیا و نەدڤیا ل دەڤەرا یەهودیایێ بگەڕیێت، چنكو سەرۆكێن جوهیان بزاڤ دكر وی بكوژن.
دەمێ جەژنا كەپرەشینان یا جوهیان نێزیك بووی،
برایێن وی گۆتێ: «ڤێرێ بهێلە و هەڕە یەهودیایێ، دا ئەو كارێن تۆ دكەی شاگردێن تە ژی ببینن!
چنكو ئەو كەسێ دڤێت ناڤدار ببیت، كارەكی ب نەپەنی ڤە ناكەت. مادەم تۆ ڤان كریاران دكەی، خۆ بۆ جیهانێ دیار بكە.»
چنكو برایێن وی ژی باوەری پێ نەدئینا.
عیسای بەرسڤا وان دا: «هێشتا دەمێ من نەهاتیە، لێ بۆ هەوە هەمی گاڤان دەم یێ گونجایە.
جیهان نەشێت كەربێن خۆ ژ هەوە ڤەكەت، لێ ئەو كەربێن خۆ ژ من ڤەدكەت، چنكو ئەز شاهدەییێ ل سەر وێ ددەم كو كارێن وێ د خرابن.
هوین ب خۆ هەڕنە جەژنێ، لێ ئەز ب خۆ نوكە ناهێمە ڤێ جەژنێ، چنكو دەمێ من هێشتا نەهاتیە.»
ئەڤە گۆتە وان و ل جەلیل ما.
پشتی برایێن وی چووینە جەژنێ، ئەو ژی چوو جەژنێ، لێ نە ب ئاشكرایی، ب نەپەنی.
ل جەژنێ جوهی ل وی دگەڕیان و دگۆتن: «كانێیە ئەو؟»
د ناڤبەرا جەماوەری دا گەلەك پستەپست دەربارەی وی هەبوو، هندەكان دگۆت: «ئەو یێ باشە» و هندەكێن دی دگۆت: «نە! ئەو مللەتی د سەردا دبەت.»
لێ كەس ژ وان ژ ترسا جوهیان نەدوێریا ب ئاشكرایی بەحسێ وی بكەت.
دەمێ جەژن ب نیڤی بووی، عیسا سەركەفتە پەرستگەهێ و دەست ب فێركرنێ كر.
جوهی مەندەهۆش بوون و گۆتن: «ئەو چەوا هند ژ نڤیسارێن پیرۆز دزانیت و ئەو نەهاتیە فێركرن؟»
عیسای بەرسڤا وان دا و گۆت: «فێركرنا من نە ژ نك منە، لێ ژ نك ویە یێ ئەز هنارتیم.
هەر كەسێ دڤێت ب حەزا خودێ بكەت، دێ زانیت كا فێركرنا من ژ نك خودێ یە، یان ئەز ژ نك خۆ دئاخڤم.
ئەوێ ژ نك خۆ بئاخڤیت، بۆ خۆ ل مەزناهیێ دگەڕیێت، لێ ئەوێ بۆ وی ل مەزناهیێ بگەڕیێت یێ ئەو هنارتی، ئەو یێ راستە و چ خرابی ل نك وی نینە.
ما مووسای دەستوور نەدابوو هەوە؟ لێ كەس ژ هەوە دەستووری ب ج‍‌ھ نائینیت! بۆچی هوین بزاڤێ دكەن من بكوژن؟»
جەماوەری بەرسڤا وی دا: «ئەجنەیەكی تۆ یێ هنگافتی! كی بزاڤا كوشتنا تە دكەت؟»
عیسای بەرسڤا وان دا و گۆت: «من كارەكێ ب تنێ كر، هوین هەمی مەندەهۆش بوون.
مووسای سونەتكرن دا هەوە (نەكو ئەو ژ نك مووسای بوو، لێ ژ نك بابكالان بوو)، ئەڤجا ل رۆژا شەمبیێ ژی هوین مرۆڤی سونەت دكەن.
مادەم ل رۆژا شەمبیێ مرۆڤ دهێتە سونەتكرن دا دەستوورێ مووسای نەهێتە شكاندن، پا بۆچی هوین ژ من تۆڕە دبن چنكو من مرۆڤەك ب تەمامی ل رۆژا شەمبیێ ساخ كر؟
ل دویڤ دیتنا سەرڤە سەرڤە دادكرنێ نەكەن، لێ دادكرنەكا دادپەروەرانە بكەن.»
وی دەمی هندەك ژ خەلكێ ئورشەلیمێ دگۆت: «ئەرێ ما ئەڤە نە ئەوە یێ ئەو بزاڤا كوشتنا وی دكەن؟
ئەڤە ب ئاشكرایی ئەو یێ دئاخڤیت و ئەو چ نابێژنێ! ما سەرۆكێن مە قاییل بووینە كو ئەو ب راستی مەسیحە؟
لێ ئەم دزانین ئەڤ كەسە خەلكێ كیرێیە ، و دەمێ مەسیح دهێت، كەس نزانیت خەلكێ كیرێیە.»
ئینا عیسای، دەمێ فێركرن د حەوشا پەرستگەهێ دا دكر، دەنگێ خۆ بلند كر و گۆت: «هوین من دنیاسن و هوین دزانن ئەز خەلكێ كیرێمە. ئەز ژ نك خۆ نەهاتیمە، لێ ئەوێ ئەز هنارتیم یێ راستە، ئەوێ كو هوین وی نانیاسن،
لێ ئەز وی دنیاسم، چنكو ئەز ژ ویمە و ئەوی ئەز یێ هنارتیم.»
وی دەمی وان بزاڤ كر كو وی دەستەسەر بكەن، لێ كەسەكی دەستێ خۆ درێژ نەكرێ، چنكو هێشتا دەمێ وی نەهاتبوو.
لێ گەلەك ژ جەماوەری باوەری پێ ئینا و گۆتن: «ما دەمێ مەسیح بهێت، ئەو دێ پتر نیشانان كەت ژ یێن ڤی زەڵامی كرین؟»
فەریسیان پستەپستا جەماوەری بهیست، ئەوا ل سەر وی دهاتە كرن. ئەڤجا وان و سەرۆكێن كاهنان هندەك زێرەڤان هنارتن دا وی بگرن.
ئینا عیسای گۆت: «ئەز دێ دەمەكێ كێم ل گەل هەوە مینم، پاشی دێ چمە نك وی یێ ئەز هنارتیم.
هنگی هوین دێ ل من گەڕیێن، لێ هوین من نابینن و ئەو جهێ ئەز لێ، هوین نەشێن بهێنە وێرێ.»
ئەڤجا جوهیان د ناڤبەرا خۆ دا گۆت: «وی ل بەرە كیڤە بچیت كو ئەم نەبینین؟ ئەرێ دێ چیتە باژێڕێن یونانیان، ئەوێن جوهی لێ بەڵاڤ بووین و یونانیان فێر كەت؟
رامانا ئاخفتنا وی چیە دەمێ گۆتی: ‹هوین دێ ل من گەڕیێن، لێ هوین من نابینن› و ‹ئەو جهێ ئەز لێ، هوین نەشێن بهێنە وێرێ›؟»
ل رۆژا دویماهیێ ژ جەژنێ، كو ئەو مەزنترین رۆژێن وێیە، عیسا راوەستیا و ب دەنگەكێ بلند گۆت: «ئەگەر ئێك یێ تێهنی بیت، بلا بهێتە نك من و ڤەخۆت.
هەر كەسێ باوەریێ ب من بینیت ‹دێ رویبارێن ئاڤا ژیانێ ژ ناڤ دلێ وی دەركەڤن،› هەروەكو نڤیسار دبێژیت.»
عیسای ئەڤ چەندە دەربارەی گیانێ پیرۆز گۆت، كو دێ ئەو كەس وەرگرن، یێن باوەری ب عیسای ئیناین. هێشتا گیانێ پیرۆز نەهاتبوو دان، چنكو هێشتا عیسا نەهاتبوو مەزنكرن.
دەمێ جەماوەری گو‍‌ھ ل ڤێ ئاخفتنێ بووی، هندەك ژ وان گۆت: «ب راستی ئەڤە ئەو پێغەمبەرە.»
هندەكێن دی گۆت: «ئەڤە مەسیحە.» هندەكان ژی پرسیار كر: «ما مەسیح دێ خەلكێ جەلیلێ بیت؟
ئەرێ ما نڤیسارێ نەگۆتیە كو مەسیح دێ ژ دویندەها داوودی و ژ بێت‌لەحم بیت ، ئەو گوندێ داوود لێ ژیای؟»
ئەڤجا ژ بەر وی، دووبەرەكی د ناڤ جەماوەری دا چێبوو.
هندەك ژ وان ڤیا وی بگرن، لێ كەسەكی دەستێ خۆ درێژ نەكرێ.
پشتی هنگی زێرەڤانێن پەرستگەهێ زڤڕینە نك سەرۆكێن كاهنان و فەریسیان. وان پرسیار ژ زێرەڤانان كر: «بۆچی هەوە ئەو نەئینا؟»
زێرەڤانان بەرسڤ دا: «چ جاران كەس وەكو ڤی مرۆڤی نەئاخفتیە.»
فەریسیان بەرسڤا وان دا: «ما هوین ژی د سەردا چووینە؟
ما كەسەكی ژ سەرۆكان یان ژ فەریسیان باوەری پێ ئینایە؟
لێ ئەڤ خەلكێ كو دەستووری نزانن، د نفرین لێ كرینە.»
نیكودیمۆسی، ئەوێ بەری هنگی هاتبوو نك عیسای و ئەو ئێكە ژ فەریسیان، گۆتە وان:
«ئەرێ دەستوورێ مە ئێكی داد دكەت تاكو ل بەراهیێ گو‍‌ھ نەدەتێ و بزانیت وی چ كریە؟»
وان بەرسڤا وی دا و گۆتن: «ئەرێ تۆ ژی خەلكێ جەلیلێی؟ لێڤەكۆلە، دێ بینی كو چ پێغەمبەر ژ جەلیلێ رانابن!»
پاشی هەر كەسەك ژ وان چوو مالا خۆ.
لێ عیسا چوو چیایێ زەیتوونان.
ل ئەلندێ زڤڕی پەرستگەهێ. هەمی خەلك هاتنە نك وی، ئەو ژی روینشت و دەست ب فێركرنا وان كر.
مامۆستایێن دەستووری و فەریسیان ژنكەك ئینا نك وی، كو ل سەر دەهمەنپیسیێ هاتبوو گرتن، وان ئەو ژنك ل ناڤەندێ راوەستاند
و گۆتە عیسای: «مامۆستا، ئەڤ ژنكە ل دەمێ كریارا دەهمەنپیسیێ هاتیە گرتن.
د دەستووری دا مووسای فەرمان ل مە كریە كو ژنكێن هۆسا بەرباران بكەین. ئەڤجا تۆ چ دبێژی؟»
وان ئەڤ تشتە گۆت دا وی تاقی بكەن و تشتەك هەبیت وی پێ تاوانبار بكەن. لێ عیسای پشتا خۆ چەماند و ب تبلا خۆ ل سەر ئەردی دنڤیسی.
دەمێ وان هەر پرسیار ژێ دكر، ئەوی پشتا خۆ راست كرەڤە و گۆتە وان: «كی ژ هەوە یێ بێگونەهە، بلا ل بەراهیێ ئەو بەرەكی تێوەركەت.»
جارەكا دی پشتا خۆ چەماند و ل سەر ئەردی دنڤیسی.
دەمێ وان ئەڤ ئاخفتنە بهیستی، ژ یێن پیر بگرە پاشی یێن دی، ئێك ل دویڤ ئێك ژ وێرێ چوون، تاكو ب تنێ عیسا ل وێرێ مای و ئەو ژنك د جهێ خۆ دا یا راوەستیای بوو.
عیسای پشتا خۆ راست كرەڤە و گۆتە وێ: «خانم، كانێنە ئەو؟ ما كەسێ تۆ گونەهبار نەكری؟»
وێ بەرسڤ دا: «نەخێر، ئەزبەنی.» عیسای گۆتێ: «ئەز ژی تە گونەهبار ناكەم. هەڕە و ئێدی گونەهان نەكە.»
عیسا جارەكا دی ل گەل وان ئاخفت و گۆت: «ئەزم رۆناهیا جیهانێ. یێ ل دویڤ من بهێت، د تاریاتیێ دا ناچیت، لێ دێ رۆناهیا ژیانێ بۆ وی بیت.»
ئینا فەریسیان گۆتێ: «تۆ شاهدەییێ بۆ خۆ ددەی، شاهدەییا تە نە یا راستە.»
ئینا عیسای بەرسڤا وان دا و گۆت: «ئەگەر ئەز شاهدەییێ بۆ خۆ ژی بدەم، شاهدەییا من راستە، چنكو ئەز دزانم ئەز ژ كیرێ یێ هاتیم و دێ چمە كیرێ. لێ هوین نزانن كا ئەز ژ كیرێ هاتیمە و دێ چمە كیرێ.
هوین ل دویڤ پیڤەرێن مرۆڤان دادكرنێ دكەن، لێ ئەز كەسێ داد ناكەم.
ئەگەر ئەز دادكرنێ بكەم ژی، دادكرنا من یا راستە، چنكو د دادكرنێ دا ئەز نە یێ ب تنێمە، لێ ئەزم و بابێ كو ئەز هنارتیم.
د دەستوورێ هەوە دا یا نڤیسیە كو شاهدەییا دوو كەسان یا راستە.
ئەز شاهدەییێ بۆ خۆ ددەم و ئەو بابێ ئەز هنارتیم ژی شاهدەییێ بۆ من ددەت.»
ئینا وان پرسیار ژێ كر: «كا بابێ تە؟» عیسای بەرسڤ دا: «هوین نە من دنیاسن، نە ژی بابێ من دنیاسن. ئەگەر هەوە ئەز نیاسیبام، دا بابێ من ژی نیاسن.»
عیسای ئەڤ ئاخفتنە ل نێزیكی سندوقێن بەخشینان، دەمێ وی فێركرن ل پەرستگەهێ دكر، گۆت. لێ كەسێ ئەو دەستەسەر نەكر، چنكو دەمێ وی هێشتا نەهاتبوو.
عیسای دیسان گۆتە وان: «ئەز دێ چم و هوین دێ ل من گەڕیێن و دێ د گونەهێن خۆ دا مرن. ئەو جهێ ئەز دچمێ، هوین نەشێن بهێنە وێرێ.»
ئەڤجا جوهیان گۆت: «ئایا دەمێ ئەو دبێژیت: ‹ئەو جهێ ئەز دچمێ، هوین نەشێن بهێنە وێرێ،› مەبەستا وی ئەوە ئەو دێ خۆ كوژیت؟»
وی گۆتە وان: «هوین ژ خوارێنە، ئەز ژ سڵالم. هوین ژ ڤێ جیهانێنە، ئەز نە ژ ڤێ جیهانێمە.
ژ بەر هندێ من گۆتە هەوە: هوین دێ د گونەهێن خۆ دا مرن، چنكو ئەگەر هوین باوەریێ نەئینن كو ئەز ئەوم، دێ د گونەهێن خۆ دا مرن.»
ئینا وان پرسیار ژێ كر: «تۆ كی؟» عیسای بەرسڤا وان دا: «ئەز ئەوم یێ ژ دەستپێكێ من گۆتیە هەوە ئەز چمە.
من گەلەك تشت هەنە كو د دەرهەقا هەوە دا بێژم و هەوە پێ داد بكەم. لێ ئەوێ ئەز هنارتیم یێ راستە و ئەوا من ژ وی بهیستی ئەز وێ دبێژمە جیهانێ.»
لێ ئەو تێنەگەهشتن، كو وی بۆ وان بەحسێ بابی دكر.
ئینا عیسای گۆتە وان: «دەمێ هەوە كوڕێ مرۆڤ بلند كر، هنگی دێ زانن كو ئەز ئەوم و ئەز چ تشتی ژ نك خۆ ناكەم، لێ كا چەوا بابی ئەز فێر كریمە، ئەز وێ دبێژم.
ئەوێ ئەز هنارتیم ل گەل منە و وی ئەز نەهێلایمە ب تنێ، چنكو ئەز هەردەم وان تشتان دكەم یێن ئەو پێ رازی دبیت.»
دەمێ عیسای ئەڤ ئاخفتنە دگۆتن، گەلەك كەسان باوەری پێ ئینا.
ئینا عیسای گۆتە وان جوهیێن باوەری پێ ئینای: «ئەگەر هەوە خۆ ل سەر پەیڤا من راگرت، هوین ب راستی شاگردێن منن
و هوین دێ راستیێ زانن و راستی دێ هەوە ئازاد كەت.»
جوهیان بەرسڤا وی دا: «ئەم ژ دویندەها ئیبراهیمینە و چ جاران بەنیێن كەسێ نەبووین! تۆ چەوا دبێژیە مە: ‹هوین دێ ئازاد بن›؟»
عیسای بەرسڤا وان دا: «ب راستی ب راستی دبێژمە هەوە: هەر كەسێ گونەهێ دكەت، ئەو بەنیێ گونەهێیە.
بەنی ژی هەروهەر د مالا خودانێ خۆ دا نامینیت، لێ كوڕ هەروهەر تێدا دمینیت.
لەوما ئەگەر كوڕ هەوە ئازاد بكەت، هوین دێ ب راستی ئازاد بن.
ئەز دزانم هوین ژ دویندەها ئیبراهیمینە، لێ هوین ل دویڤ كوشتنا من دگەڕیێن، چنكو پەیڤا من چ ج‍‌ھ د دلێ هەوە دا نینە.
ئەز وێ دبێژم یا من ل نك بابێ خۆ دیتی، هوین ژی وێ دكەن یا هەوە ژ بابێ خۆ بهیستی.»
ئینا وان بەرسڤ دا و گۆت: «بابێ مە ئیبراهیمە.» عیسای گۆتە وان: «ئەگەر هوین كوڕێن ئیبراهیمی بان، دا كارێن ئیبراهیمی كەن.
لێ نوكە هوین یێ ل كوشتنا من دگەڕیێن و ئەز كەسەكم كو من ئەو راستی بۆ هەوە گۆتیە یا من ژ خودێ بهیستی. ئەڤ چەندە ئیبراهیمی نەكریە.
هوین كارێن بابێ خۆ دكەن.» وان گۆتێ: «ئەم ژ دەهمەنپیسیێ نەبووینە! مە بابەكێ ب تنێ یێ هەی، ئەو ژی خودێ یە.»
عیسای گۆتە وان: «ئەگەر خودێ بابێ هەوە با، دا هوین حەز ژ من كەن، چنكو ئەز ژ نك خودێ یێ دەركەفتیم و هاتیم. ئەز ژ نك خۆ نەهاتیمە، لێ ئەوی ئەز یێ هنارتیم.
بۆچی هوین د ئاخفتنا من ناگەهن؟ چنكو هوین نەشێن پەیڤا من ببهیسن.
هوین ژ بابێ خۆ ئبلیسینە و هەوە دڤێت حەزێن بابێ خۆ ب ج‍‌ھ بینن. ئەو ل دەستپێكێ مێركوژ بوو و چ جاران لایەنگرێ راستیێ نەبوو، چنكو راستی د وی دا نینە. دەمێ ئەو درەوێ دكەت، ئەو ل گۆر سرۆشتێ خۆ دئاخڤیت، چنكو ئەو درەوینە و بابێ درەوێیە.
لێ چنكو ئەز راستیێ دبێژم، هوین باوەر ژ من ناكەن.
كی ژ هەوە دشێت گونەهەكێ ل سەر من بسەلمینیت؟ ئەڤجا ئەگەر ئەز راستیێ دبێژم، بۆچی هوین باوەر ژ من ناكەن؟
ئەوێ ژ خودێ بیت، دێ گوهێ خۆ دەتە پەیڤا خودێ. هوین نە ژ خودێ نە، لەوما هوین گوهێ خۆ نادەنێ.»
ئینا جوهیان بەرسڤ دا و گۆتێ: «ما ئەم راست نابێژین كو تۆ سامەری و ئەجنەیەكی تۆ یێ هنگافتی؟»
عیسای بەرسڤ دا: «ئەجنەی ئەز نە هنگافتیمە، لێ ئەز رێزێ ل بابێ خۆ دگرم و هوین من بێڕێز دكەن.
ئەز بۆ خۆ ل مەزناهیێ ناگەڕیێم، لێ ئێكێ هەی بۆ من لێ دگەڕیێت و ئەوە دادوەر.
ب راستی ب راستی دبێژمە هەوە: یێ پەیڤا من ب ج‍‌ھ بینیت، چ جاران مرنێ نابینیت.»
جوهیان گۆتێ: «نوكە ئەم پشتڕاست بووین كو ئەجنەیەكی تۆ یێ هنگافتی! ئیبراهیم مر و پێغەمبەر مرن، و تۆ دبێژی: ‹یێ پەیڤا من ب ج‍‌ھ بینیت تام ناكەتە مرنێ.›
ئەرێ تۆ ژ بابێ مە ئیبراهیمی مەزنتری؟ ئەو مر، پێغەمبەر ژی مرن. تۆ خۆ چ ددانی؟»
عیسای بەرسڤ دا: «ئەگەر ئەز خۆ مەزن بكەم، مەزناهیا من یا بێ بهایە. بابێ من ئەوێ هوین دبێژن: ‹ئەو خودایێ مەیە،› ئەوە من مەزن دكەت.
هوین وی نانیاسن، لێ ئەز وی دنیاسم. ئەگەر من گۆتبا ئەز وی نانیاسم، دا ئەز ژی وەكو هەوە درەوین بم. لێ ئەز وی دنیاسم و پەیڤا وی ب ج‍‌ھ دئینم.
بابێ هەوە ئیبراهیم یێ دلشاد بوو كو دێ رۆژا من بینیت، وی دیت و كەیفخۆش بوو.»
ئینا جوهیان گۆتێ: «هێشتا ژیێ تە نەبوویە پێنجی ساڵ و تە ئیبراهیم دیتیە؟»
عیسای گۆتە وان: «ب راستی ب راستی دبێژمە هەوە: بەری ئیبراهیم ببیت، ئەز هەمە.»
ئینا وان بەر هەلگرتن، دا وی بەرباران بكەن، لێ وی خۆ ڤەشارت و ژ پەرستگەهێ دەركەفت.
دەمێ عیسا دەرباز دبوو، مرۆڤەك دیت ژ زكماكی یێ كۆرە بوو.
ئینا شاگردێن وی پرسیار ژێ كر: «رابی ، كێ گونە‍‌ھ كریە: ئەڤی یان دایك و بابێن وی، كو یێ ژ دایك بووی كۆرە؟»
عیسای بەرسڤ دا: «نە ئەوی گونە‍‌ھ كریە و نە دایك و بابێن وی، لێ ئەڤ چەندە چێبوو دا كارێن خودێ د وی دا دیار ببن.
پێدڤیە ل سەر مە، هێشتا كو رۆژ، ئەم كارێن وی ب ج‍‌ھ بینین یێ ئەز هنارتیم. شەڤ دێ هێت و هنگی كەس نەشێت چ كاران بكەت.
هندی كو ئەز ل جیهانێمە، ئەز رۆناهیا جیهانێمە.»
ئەڤ چەندە گۆت و تف كرە ناڤ ئاخێ، ژ تفێ هەڕیەك چێكر و د چاڤێن وی كەسی دا
و گۆتێ: «هەڕە و خۆ د بركا سیلوامێ دا بشوو» (وەرگێڕانا ‹سیلوام›ێ ‹هنارتی›یە). ئینا ئەو چوو و خۆ شویشت و ب چاڤ ڤەكری ڤەگەڕیا.
ئینا هەڤسوی و ئەوێن پێشتر ئەو ددیت كو خوازۆكی دكر، گۆتن: «ئەرێ ئەڤە نە ئەو مرۆڤە یێ دروینشت و خوازۆكی دكر؟»
هندەكان گۆت: «ئەڤە ئەوە» و هندەكێن دی گۆت: «نەخێر، لێ ئێكێ وەكو ویە.» لێ وی ب خۆ دگۆت: «ئەز ئەوم!»
ئینا وان گۆتێ: «چەوا چاڤێن تە ڤەبوون؟»
وی بەرسڤ دا: «ئەو زەڵامێ دبێژنێ عیسا هەڕیەك چێكر و د چاڤێن من دا و گۆتە من: ‹هەڕە بركا سیلوامێ و خۆ تێدا بشوو.› ئەز ژی چووم و من خۆ شویشت و چاڤێن من ڤەبوون.»
ئینا وان پرسیار ژێ كر: «ئەو زەڵام ل كیرێیە؟» وی گۆت: «ئەز نزانم.»
وان ئەو مرۆڤێ بەری هنگی كۆرە ئینا نك فەریسیان.
ئەو رۆژا عیسای هەڕی چێكری و چاڤێن كۆرەی ڤەكرین، شەمبی بوو.
ئینا فەریسیان ژی پرسیار ژێ كر كا چەوا چاڤێن وی ڤەبوون. ئەوی گۆتە وان: «هەڕی د چاڤێن من دا و من خۆ شویشت و نوكە ئەز یێ دبینم!»
ئینا هندەك فەریسیان گۆت: «ئەڤ مرۆڤە نە ژ نك خودێیە، چنكو ئەو پێگیریێ ب شەمبیێ ناكەت.» لێ هندەكێن دی گۆت: «چەوا زەڵامەكێ گونەهكار دشێت ڤان نیشانان بكەت؟» هۆسا د ناڤبەرا وان دا دووبەرەكی هەبوو.
وان دیسان پرسیار ژ ئەڤێ كۆرە كر: «تۆ دەربارەی وی، ئەوێ چاڤێن تە ڤەكرین، چ دبێژی؟» ئەوی ژی گۆت: «ئەو پێغەمبەرە.»
جوهیان باوەر نەكر كو ئەو یێ كۆرە بوو و چاڤێن وی یێن ڤەبووین، تاكو گازی كریە دایك و بابێن وی یێ چاڤێن وی ڤەبووین
و پرسیار ژێ كری: «ئایا ئەڤەیە ئەو كوڕێ هەوە، ئەوێ هوین دبێژن ژ زكماكی یێ كۆرە بوو؟ پا چەوا ئەو نوكە دبینیت؟»
دایك و بابێن وی بەرسڤ دا: «ئەم دزانین ئەڤە كوڕێ مەیە و ژ زكماكی یێ كۆرە بوو،
لێ ئەم نزانین چەوا نوكە دبینیت و نزانین كێ چاڤێن وی ڤەكرینە. ئەو یێ مەزنە، پرسیارێ ژێ بكەن، ئەو دێ بەرسڤا هەوە دەت.»
دایك و بابێن وی ژ ترسا جوهیان ئەڤ چەندە گۆت، چنكو جوهی رێككەفتبوون كو هەر ئێكێ دانپێدانێ بكەت كو عیسا مەسیحە، ژ جڤاتا كنیشتەیێ بهێتە دەرئێخستن.
لەوما دایك و بابێن وی گۆت: «ئەو یێ مەزنە، پرسیارێ ژێ بكەن.»
ئەڤجا وان بۆ جارا دوویێ گازی وی مرۆڤێ بەری هنگی كۆرە كر و گۆتنێ: «ل بەرامبەری خودێ سویند بخۆ كو دێ راستیێ بێژی! ئەم دزانین ئەو مرۆڤ یێ گونەهكارە.»
ئینا وی بەرسڤ دا: «ئەز نزانم ئەو یێ گونەهكارە یان نە، ئەز تشتەكێ ب تنێ دزانم: ئەز یێ كۆرە بووم و نوكە دبینم.»
ئینا وان گۆتێ: «ئەوی چ ل تە كر؟ چەوا چاڤێن تە ڤەكرن؟»
وی بەرسڤا وان دا: «من نوكە گۆتە هەوە، لێ هەوە گوهێ خۆ نەدایێ. بۆچی هەوە دڤێت جارەكا دی ببهیسن؟ ما هەوە ژی دڤێت ببنە شاگردێن وی؟»
ئینا وان ئاخفتنێن كرێت لێ باراندن و گۆتێ: «تۆی شاگردێ وی! لێ ئەم شاگردێن مووساینە.
ئەم دزانین خودێ ل گەل مووسای ئاخفتییە، لێ ئەم نزانین ئەڤە ژ كیڤە هاتیە.»
ئینا وی مرۆڤی بەرسڤا وان دا: «ئەڤە تشتەكێ سەیرە! هوین نزانن ئەو ژ كیڤە هاتیە، لێ ئەوی چاڤێن من ڤەكرن.
ئەم دزانین خودێ گوهێ خۆ نادەتە گونەهكاران، لێ گوهێ خۆ ددەتە وی كەسی یێ ژ خودێ ترس بیت و حەزا وی ب ج‍‌ھ بینیت.
چ جاران كەسێ نەبهیستیە كو ئێكی چاڤێن كەسەكێ ژ زكماك یێ كۆرە ڤەكربن.
ئەگەر ئەڤ كەسە ژ خودێ نەبا، ئەو نەدشیا چ بكەت.»
ئینا وان بەرسڤا وی دا و گۆتێ: «تۆ ب تەمامی د گونەهێ دا یێ ژ دایك بووی. ما تۆ مە فێر دكەی؟» پاشی ئەو دەرئێخستە ژ دەرڤە.
عیسای بهیست كو وان ئەو كەس یێ دەرئێخستیە ژ دەرڤە، ئینا لێگەڕیا و دیت و گۆتێ: «ئەرێ تۆ باوەریێ ب كوڕێ مرۆڤ دئینی؟»
ئەوی بەرسڤ دا و گۆت: «ئەزبەنی، ئەو كیە، دا ئەز باوەریێ پێ بینم؟»
ئینا عیسای گۆتێ: «تە ئەو یێ دیتی و ئەوە یێ ل گەل تە دئاخڤیت.»
ئینا وی گۆت: «خودان، ئەز باوەریێ دئینم» و سوجدە بۆ بر.
عیسای گۆت: «ئەز بۆ دادكرنێ یێ هاتیمە ڤێ جیهانێ، داكو ئەوێن نابینن ببینن و یێن دبینن كۆرە ببن.»
هندەك فەریسیان، كو ل نك وی بوون، دەمێ ئەڤ چەندە بهیستی، گۆتێ: «ما ئەم ژی د كۆرەینە؟!»
عیسای گۆتە وان: «ئەگەر هوین د كۆرە بان، هەوە گونە‍‌ھ نەدبوو، لێ هوین دبێژن ‹ئەم دبینین،› ئەڤجا گونەها هەوە دمینیت.»
«ب راستی ب راستی دبێژمە هەوە: ئەوێ د دەرگەهی را نەچیتە د كۆتانا پەزی ڤە، لێ د رێكەكا دی را سەربكەڤیت، ئەو دز و رێگرە.
لێ ئەوێ د دەرگەهی را دچیتە ژۆر، ئەو شڤانێ پەزیە.
بۆ وی دەرگەهڤان دەرگەهی ڤەدكەت و پەز گوهێ خۆ ددەنە دەنگێ وی، ب ناڤ گازی پەزێن خۆ دكەت و دئینیتە ژ دەرڤە.
دەمێ هەمی پەزێ خۆ ئینا ژ دەرڤە، ب پێش وان دكەڤیت و ئەو ددەنە دویڤ، چنكو دەنگێ وی دنیاسن.
ئەو چ جاران ل دویڤ یێ بیانی ناچن، لێ ژێ دڕەڤن، چنكو ئەو دەنگێ بیانیان نانیاسن.»
عیسای ئەڤ نموونە بۆ وان ئینا، لێ ئەو د رامانا ئاخفتنا وی نەگەهشتن.
لەوما دیسان عیسای گۆتە وان: «ب راستی ب راستی دبێژمە هەوە: ئەزم دەرگەهێ پەزی.
هەمی ئەوێن بەری من هاتین دز و رێگر بوون ، لێ پەزی گوهێ خۆ نەدا وان.
ئەزم دەرگە‍‌ھ. هەر كەسێ ب رێكا من ب ژۆر دكەڤیت، دێ قورتال بیت. ئەو دێ هێتە ژۆر و دەركەڤیت و چەروانی بینیت.
دز ناهێت ئەگەر بۆ دزینێ و كوشتنێ و ژناڤبرنێ نەبیت، لێ ئەز یێ هاتیم دا وان ژیان هەبیت، ژیانەكا پڕ هەبیت.
ئەزم شڤانێ باش. شڤانێ باش ژی ژیانا خۆ گۆری پەزێ خۆ دكەت.
یێ ب كرێ هاتیە گرتن، كو نە شڤانە و پەز نە ملكێ ویە، دەمێ ئەو دبینیت گورگ یێ دهێت، پەزی دهێلیت و دڕەڤیت، ئەڤجا گورگ هێرشێ دكەتە پەزی و بەڵاڤ دكەت.
ئەو دڕەڤیت، چنكو ئەو ب كرێ هاتیە گرتن و خەما پەزی ناخۆت.
ئەزم شڤانێ باش. ئەز پەزێ خۆ دنیاسم و پەزێ من ژی من دنیاسیت،
هەروەكو باب من دنیاسیت و ئەز وی دنیاسم. ئەز ژیانا خۆ گۆری پەزێ خۆ دكەم.
من پەزێن دی ژی یێن هەین، كو نە ژ ڤێ كۆتانێنە، دڤێت ئەز وان ژی بینم و ئەو دێ گوهێ خۆ دەنە دەنگێ من و دێ بنە ئێك كەرێ پەزی ل گەل ئێك شڤان.
لەوما باب حەز ژ من دكەت، چنكو ئەز ژیانا خۆ دكەمە گۆری، دا جارەكا دی وێ ب دەست خۆ ڤە بینم.
كەس ژیانا من ژ من ناستینیت، لێ ئەز ژ نك خۆ دكەمە گۆری. من دەستهەلاتا هەی بكەمە گۆری و من دەستهەلاتا هەی جارەكا دی ب دەست خۆ ڤە بینم. ئەڤ فەرمانە من ژ بابێ خۆ یا وەرگرتی.»
ب ڤێ گۆتنێ، جارەكا دی دووبەرەكی كەفتە د ناڤ جوهیان دا.
گەلەك ژ وان دگۆت: «ئەجنەیەك یێ د وی دا و یێ دینە! ئەڤجا بۆچی هوین گوهێ خۆ ددەنە وی؟»
هندەكێن دی دگۆت: «ئەڤە نە ئاخفتنا مرۆڤەكیە ئەجنەی ئەو هنگافت بیت. ما ئەجنە دشێن چاڤێن كۆرەیان ڤەكەن؟»
جەژنا پیرۆزكرنا پەرستگەهێ ل ئورشەلیمێ دەست پێ كربوو و زڤستان بوو،
عیسا ل پەرستگەهێ د ناڤ ئەیوانا سلێمانی دا دگەڕیا.
جوهی ل دۆر وی كۆم بوون و پرسیار ژێ كر: «هەتا كەنگی دێ مە هێلیە هەلاویستی؟ ئەگەر تۆی مەسیح، ب ئاشكرایی بێژە مە.»
عیسای بەرسڤا وان دا: «من گۆتە هەوە، لێ هەوە باوەر نەكر. ئەو كارێن ئەز ب ناڤێ بابێ خۆ دكەم، ئەو بۆ من شاهدەییێ ددەن،
لێ هەوە باوەر نەكر، چنكو هوین نە ژ پەزێ منن.
پەزێ من گوهێ خۆ ددەتە دەنگێ من و ئەز وان دنیاسم و ئەو ل دویڤ من دهێن.
ئەز ژیانا هەروهەر ددەمێ و ئەو قەت ژ ناڤ ناچن، كەس ژی وان ژ دەستێ من دەرنائێخیت.
بابێ من یێ كو ئەو داینە من، ژ هەمیان مەزنترە و كەس نەشێت وان ژ دەستێ بابی دەربئێخیت.
ئەز و باب ئێكین.»
جارەكا دی جوهیان بەر راكرن دا وی بەرباران بكەن.
عیسای گۆتە وان: «من گەلەك كارێن باش ژ لایێ بابی ڤە نیشا هەوە دان. ژ بەر كیژان كاری ژ وان هوین دێ من بەرباران كەن؟»
جوهیان بەرسڤا وی دا: «ئەم نە ژ بەر كارەكێ باش دێ تە بەرباران كەین، لێ ژ بەر كوفریێ، چنكو تۆ مرۆڤی و خۆ دكەیە خودێ.»
عیسای بەرسڤا وان دا: «ما د دەستوورێ هەوە دا نە نڤیسیە: ‹من یێ گۆتی هوین خوداوەندن›؟
ئەگەر وی گۆتبیتە وان یێن پەیڤا خودێ بۆ هاتی: ‹خوداوەند›، نڤیسار ژی ناهێتە ژ كارئێخستن،
ئەڤجا ئەوێ بابی پیرۆز كری و بۆ جیهانێ هنارتی، هوین چەوا دبێژنە وی: ‹تۆ كوفریان دكەی،› چنكو من گۆت: ‹ئەز كوڕێ خودێمە›؟
ئەگەر ئەز كارێن بابێ خۆ ناكەم، باوەر ژ من نەكەن.
لێ ئەگەر ئەز كارێن وی دكەم، خۆ ئەگەر هوین باوەر ژ من ژی نەكەن، باوەر ژ وان كاران بكەن، دا هوین بزانن و تێبگەهن كو باب یێ د ناڤ من دا و ئەز یێ د ناڤ وی دا.»
ئینا وان بزاڤ كرەڤە كو وی بگرن، لێ ئەو ژ دەستێن وان دەركەفت.
ئەڤجا عیسا جارەكا دی چوو لایێ دی یێ رویبارێ ئوردن و ل وێرێ ما، ل وی جهێ یوحەننای بەری هنگی تافیركرن لێ دكر.
ئینا گەلەك كەس هاتنە نك وی و وان دگۆت: «یوحەننای چ نیشان نەكرن، لێ هەر تشتێ وی دەربارەی ڤی زەڵامی گۆتی، راست بوو.»
ل وێرێ گەلەكان باوەری ب وی ئینا.
مرۆڤەك هەبوو ناڤێ وی لەعازەر بوو، ئەو نەساخ بوو. لەعازەر ژ بێت‌عەنیا بوو، گوندێ مەریەمێ و مەرتایا خویشكا وێ.
ئەڤ مەریەمە، ئەو بوو یا پێیێن خودانی ب گولاڤێ روین كرین و ب پرچا خۆ پاقژ كرین، لەعازەرێ نەساخ برایێ وێ بوو.
هەردوو خویشكان هنارتە ب دویڤ عیسای را و گۆتنێ: «خودان، ئەڤە ئەوێ تۆ حەز ژێ دكەی، یێ نەساخە.»
دەمێ عیسای ئەڤ چەندە بهیستی، گۆت: «ئەڤ نەساخیە نە بۆ مرنێیە، لێ بۆ مەزناهیا خودێیە، دا ب رێیا وێ نەساخیێ كوڕێ خودێ بهێتە مەزنكرن.»
عیسای حەز ژ مەرتایێ و خویشكا وێ و لەعازەری دكر.
لێ دەمێ وی بهیستی كو لەعازەرێ نەساخە، ئەو دوو رۆژێن دی ژی ل وی جهێ ما یێ كو لێ بوو.
پشتی هنگی گۆتە شاگردێن خۆ: «دا بزڤڕینە دەڤەرا یەهودیایێ.»
شاگردان گۆتێ: «رابی ، بەری چەند رۆژان جوهیان دڤیا تە بەرباران بكەن. دێ زڤڕیە یەهودیایێ؟»
عیسای بەرسڤ دا: «ما رۆژ نە دوازدە دەمژمێرن؟ ئەڤجا ئەگەر ئێك ب رۆژێ بگەڕیێت، ناهەلنگڤیت، چنكو رۆناهیا ڤێ جیهانێ دبینیت.
لێ ئەوێ ب شەڤێ بگەڕیێت، دێ هەلنگڤیت، چنكو رۆناهی ل گەل وی نینە.»
پشتی ڤێ ئاخفتنێ، عیسای گۆتە وان: «خۆشتڤیێ مە لەعازەر یێ نڤستی، لێ ئەز دێ چم دا وی ژ خەو راكەم.»
ئینا شاگردان گۆتێ: «خودان، ئەگەر ئەو نڤستبیت، دێ چێبیتەڤە.»
عیسای بەحسێ مرنا وی دكر، لێ وان هزر دكر كو ئەو یێ بەحسێ نڤستنا ئاسایی دكەت.
د وی دەمی دا عیسای ب ئاشكرایی گۆتە وان: «لەعازەر یێ مری
و ژ بەر هەوە ئەز یێ دلخۆشم كو ئەز ل وێرێ نەبووم، دا هوین باوەریێ بینن. لێ دا رابین بچینە نك وی.»
توماس ئەوێ ب دێدیمۆس دهاتە بناڤكرن، گۆتە هەڤالێن خۆ یێن شاگرد: «بلا ئەم ژی بچین، دا ل گەل وی بمرین.»
دەمێ عیسا گەهشتی، ئەو چوار رۆژ بوو لەعازەر د گۆڕی دا.
بێت‌عەنیا نێزیكی سێ كیلۆمەتران ژ ئورشەلیمێ یا دویر بوو.
گەلەك جوهی هاتبوونە نك مەرتایێ و مەریەمێ، دا ژ بەر برایێ وان سەرەخۆشیێ لێ بكەن.
دەمێ مەرتایێ بهیستی كو عیسا یێ دهێت، چوو پێشوازیا وی، لێ مەریەم ل مال ما.
ئینا مەرتایێ گۆتە عیسای: «خودان، ئەگەر تۆ ل ڤێرێ بای، برایێ من نەدمر.
لێ نوكە ژی ئەز دزانم كو هەر تشتێ تۆ ژ خودێ بخوازی، ئەو دێ دەتە تە.»
عیسای گۆتێ: «برایێ تە دێ رابیتەڤە.»
مەرتایێ گۆتێ: «ئەز دزانم ئەو دێ ل رابوونێ د رۆژا دویماهیێ دا رابیتەڤە.»
عیسای گۆتێ: «ئەزم رابوون و ژیان. یێ باوەری ب من هەبیت، ئەگەر بمریت ژی، دێ زیندی بیتەڤە
و هەر كەسێ دژیت و باوەری ب من هەی، ئەو ئێكجار نامریت. تە باوەری ب ڤێ چەندێ هەیە؟»
وێ گۆتێ: «بەلێ خودان، من باوەریا ئینای كو تۆ مەسیحێ كوڕێ خودێی، ئەوێ دهێتە جیهانێ.»
پشتی ئەڤە گۆتی، چوو گازی خویشكا خۆ مەریەمێ كر و ب دزی ڤە گۆتێ: «مامۆستا یێ ل ڤێرێ و داخوازا تە دكەت.»
دەمێ وێ ئەڤ چەندە بهیستی، ب لەز رابوو و چوو نك وی.
هێشتا عیسا نەگەهشتبوو ناڤ گوندی، لێ ل وی جهی مابوو یێ مەرتایێ پێشوازی لێ كری.
ئەو جوهیێن ل گەل وێ ل مال و سەرەخۆشی لێ دكر، دەمێ وان دیتی مەریەم ب لەز رابوو و دەركەفت، ب دویڤ را چوون، وان هزر دكر ئەو یا قەستا گۆڕی دكەت دا ل وێرێ بكەتە گری.
دەمێ مەریەم گەهشتیە وی جهێ عیسا لێ و ئەو دیتی، خۆ هاڤێتە بەر پێیێن وی و گۆتێ: «خودان، ئەگەر تۆ ل ڤێرێ بای، برایێ من نەدمر.»
دەمێ عیسای ئەو دیتی یا دكەتە گری و جوهیێن ل گەل وێ ژی دكەنە گری، ب گیانی دەگری و گەلەك دلتەنگ بوو.
ئینا پرسیار كر: «هەوە ل كیرێ ڤەشارتیە؟» وان گۆتێ: «خودان، وەرە و ببینە.»
عیسای كرە گری.
ئەڤجا جوهیان گۆت: «بنێڕن، چەند حەز ژێ دكر!»
لێ هندەك ژ وان گۆت: «ما ئەڤێ چاڤێن كۆرەی ڤەكرین، نەدشیا تشتەكی بكەت كو ئەڤ مرۆڤە ژی نەمربا؟»
عیسا دیسان د ناخێ خۆ دا دەگری و هاتە سەر گۆڕی، ئەو ژی شكەفتەك بوو و بەرەكێ مەزن ب دەرگەهێ وێ ڤەنابوو.
عیسای گۆت: «بەری راكەن.» مەرتایێ، خویشكا یێ مری، گۆتێ: «خودان، یێ گەنی بووی، چنكو ئەڤە چوار رۆژە ئەو مری.»
عیسای گۆتێ: «ما من نەگۆتە تە: ئەگەر تۆ باوەریێ بینی، دێ مەزناهیا خودێ بینی؟»
ئەڤجا وان بەر راكر. عیسای ژی بەرێ خۆ دا ئەسمانی و گۆت: «باب، ئەز سوپاسیا تە دكەم، كو تە گو‍‌ھ ل من بوو.
ئەز دزانم كو تە هەردەم گو‍‌ھ ل من هەیە، لێ ژ بەر ڤی جەماوەرێ ل ڤێرێ راوەستیای، من ئەڤ تشتە گۆت، دا ئەو باوەریێ بینن كو تە ئەز یێ هنارتیم.»
پشتی ئەڤ چەندە گۆتی، ب دەنگەكێ بلند گازی كر: «لەعازەر، وەرە ژ دەرڤە!»
ئینا مری دەركەفت و دەست و پێیێن وی ب كفنی د پێچای بوون و سەروچاڤێن وی ب دەستمالەكێ د گرێدای بوون. عیسای گۆتە وان: «ڤەكەن و بهێلن بچیت.»
ئەڤجا گەلەك ژ جوهیێن هاتینە نك مەریەمێ، دەمێ وان دیتی كا عیسای چ كر، باوەری ب وی ئینا.
لێ هندەك ژ وان چوونە نك فەریسیان و ئەو تشتێن عیسای كرین گۆتنە وان.
ئەڤجا سەرۆكێن كاهنان و فەریسیان كۆمبوونەكا جڤاتا بلند گرێ دا و گۆتن: «ئەم چ بكەین؟ ئەڤ مرۆڤە یێ گەلەك نیشانان دكەت.
ئەگەر ئەم وی هۆسا بهێلین، دێ هەمی باوەریێ پێ ئینن و رۆمایی ژی دێ هێن، پەرستگە‍‌ھ و مللەتێ مە وێران كەن.»
ئێك ژ وان، ئەو ژی قەیافا بوو، كو ل وێ ساڵێ سەرۆككاهن بوو، گۆت: «هوین چ نزانن!
تێناگەهن ژی كو بۆ هەوە باشترە مرۆڤەك سەخمەراتی مللەتی بمریت، نەكو مللەت هەمی ژ ناڤ بچیت.»
وی ئەڤ ئاخفتنە ژ نك خۆ نەگۆت، لێ چنكو ئەو ل وێ ساڵێ سەرۆككاهن بوو، ئاخفتنا وی دەربڕین بوو ژ پەیاما خودێ كو عیسا دێ سەخمەراتی مللەتی مریت،
نە ب تنێ سەخمەراتی مللەتی، لێ دا زاڕۆكێن خودێ یێن بژاڵە خڕڤە كەت و بكەتە ئێك.
ئەڤجا ژ وێ رۆژێ وەرە، ئەو بۆ كوشتنا وی ل پیلانەكێ دگەڕیان.
لەوما عیسا ب ئاشكرایی د ناڤ جوهیان دا نەدگەڕیا، لێ ژ وێرێ چوو دەڤەرەكا نێزیكی چۆلی، بۆ باژێڕەكی دگۆتنێ ئەفراییم، ل گەل شاگردێن خۆ ل وێرێ ما.
جەژنا دەربازبوونێ یا جوهیان نێزیك بوو و گەلەك كەس ژ دەڤەرێن دەوروبەر، بەری جەژنێ، سەركەفتنە ئورشەلیمێ دا ل گۆر داب و نەریتان خۆ پاك بكەن.
ئەو ل وێرێ ل عیسای دگەڕیان و دەمێ ئەو ل پەرستگەهێ د راوەستیای بوون، وان پرسیار ژ ئێكودوو دكر: «هوین چ دبێژن؟ ما ئەو ب ئێكجاری ناهێتە جەژنێ؟»
سەرۆكێن كاهنان و فەریسیان ژی فەرمانەك دابوو، كو هەر كەسێ بزانیت ئەو ل كیرێیە، بلا وان ئاگەهدار بكەت، داكو وی بگرن.
بەری جەژنا دەربازبوونێ ب شەش رۆژان، عیسا هاتە بێت‌عەنیا، كو لەعازەر، ئەوێ عیسای ئەو ژ ناڤ مریان راكری، ئاكنجیێ وێرێ بوو.
ل وێرێ شیڤەك بۆ وی چێكر و مەرتایێ خزمەت دكر، لەعازەر ژی ئێك ژ وان بوو یێن ل گەل وی روینشتی.
مەریەمێ لیترەك ژ روینێ بێهنخۆش یێ بهاگران ژ جۆرێ ناردینا خۆڕستی هەلگرت و پێیێن عیسای پێ ڤەمالین و ب پرچا خۆ پێیێن وی زوها كرن. مال ژ بێهنا خۆش تژی بوو.
ئینا ئێك ژ شاگردێن وی، كو یەهودایێ ئەسخەریوتی بوو، ئەوێ دێ پاشی بێبەختیێ لێ كەت، گۆت:
«بۆچی ئەڤ گولاڤە ب سێ سەد دیناران نەهاتە فرۆتن و بهایێ وێ دابا هەژاران؟»
وی ئەڤ چەندە گۆت، نە چنكو دلێ وی ب هەژاران ڤە بوو، لێ چنكو ئەو دز بوو، ئەو بەرپرسێ سندوقكا پارەیان بوو و وی ژ پارەیێ دهاتە تێدا، ددزی.
ئەڤجا عیسای گۆت: «بهێلە، وێ ئەڤ گولاڤە بۆ رۆژا ڤەشارتنا من یا ل نك خۆ هەلگرتی.
هەژار هەمی دەمان یێن ل نك هەوە هەین، لێ ئەز هەمی دەمان ل نك هەوە نابم.»
دەمێ جەماوەرەكێ مەزن ژ جوهیان زانی كو ئەو یێ ل وێرێ، ئەو هاتن، نە ب تنێ ژ بەر عیسای، لێ دا لەعازەرێ ژی، ئەوێ ژ ناڤ مریان راكری، ببینن.
ئەڤجا سەرۆكێن كاهنان پیلان دانا كو لەعازەری ژی بكوژن،
چنكو گەلەك ژ جوهیان ژ بەر وی دچوون و باوەری ب عیسای دئینا.
ل رۆژا پاشتر، ئەو جەماوەرێ زۆر یێ هاتیە جەژنێ، بهیست كو عیسا دێ هێتە ئورشەلیمێ.
ئینا ئەوان چەقێن دارقەسپێ هەلگرتن و دەركەفتنە پێشوازیا وی و كرنە هەوار: «هۆساننا! ‹یێ بەرەكەتدارە ئەوێ ب ناڤێ خودانی دهێت!› پاشایێ ئیسرائیلێ یێ بەرەكەتدارە!»
عیسای جانەكەرەك دیت و لێ سیار بوو، هەروەكو هاتیە نڤیسین:
«نەترسە سییۆنا كچ ، ئها ئەڤە پاشایێ تە یێ دهێت، ل جانەكەرەكی یێ سیارە.»
(ل دەستپێكێ شاگردێن وی د ڤان تشتان نەگەهشتن، لێ دەمێ عیسا هاتیە مەزنكرن، بیرا وان هات كو ئەڤ تشتە دەربارەی وی یێن هاتینە نڤیسین و وان ژ بۆ وی ئەڤ تشتە كر.)
ئەو جەماوەرێ ل گەل وی، دەمێ وی گازی لەعازەری كری كو ژ گۆڕی دەركەڤیت و ئەو ژ ناڤ مریان راكری، شاهدەیی ل سەر ڤێ چەندێ ددا.
لەوما خەلك چوو پێشوازیا وی، چنكو وان بهیستبوو كو وی ئەو نیشان یا كری.
ئەڤجا فەریسیان گۆتە ئێكودوو: «هوین دبینن، تشتەك ژ دەستێ مە ناهێت! ئەڤە هەمی جیهان ب دویڤ وی كەفت!»
د ناڤ وان دا یێن سەركەفتینە ئورشەلیمێ، دا د جەژنێ دا پەرستنێ بكەن، هندەكێن یونانی هەبوون.
ئەو هاتنە نك فیلیپۆسێ خەلكێ بێت‌سایدایا دەڤەرا جەلیلێ و گۆتێ: «ئەزبەنی، مە دڤێت عیسای ببینین.»
فیلیپۆس چوو و گۆتە ئەندراوسی، پاشی ئەندراوس و فیلیپۆس چوون و گۆتنە عیسای.
عیسای بەرسڤا وان دا و گۆت: «دەم هات كو كوڕێ مرۆڤ بهێتە مەزنكرن.
ب راستی ب راستی دبێژمە هەوە: ئەگەر دندكا گەنمی نەكەڤیتە د ناڤ ئەردی دا و نەمریت، دێ مینیتە ب تنێ، لێ ئەگەر مر، دێ گەلەك بەرهەمی دەت.
هەر كەسێ حەز ژ ژیانا خۆ بكەت، دێ وێ ژ دەست دەت و هەر كەسێ كەرب ژ ژیانا خۆ ل ڤێ جیهانێ ڤەببن، دێ وێ بۆ ژیانا هەروهەر هەلگریت.
هەر كەسێ بڤێت خزمەتا من بكەت، بلا ب دویڤ من بكەڤیت، ئەز ل كیرێ بم، خزمەتكارێ من ژی دێ ل وێرێ بیت. هەر كەسێ خزمەتا من بكەت، باب دێ رێزێ ل وی گریت.
نوكە گەلەكێ دلتەنگم. ئەز چ بێژم؟ ‹باب، من ژ ڤێ دەمژمێرێ قورتال بكە›؟ نەخێر! ژ بەر ڤێ ئەگەرێ ئەز یێ گەهشتیمە ڤێ دەمژمێرێ.
باب، ناڤێ خۆ مەزن بكە!» پاشی دەنگەكی ژ ئەسمانی بەرسڤ دا: «من یێ مەزن كری و دێ هێشتا مەزن كەم.»
ئەو جەماوەرێ ل وێرێ یێ راوەستیای و ئەو بهیستی گۆت: «گڕگڕا عەوران بوو!» هندەكێن دی گۆت: «فریشتەیەك ل گەل وی ئاخفت!»
عیسای بەرسڤ دا و گۆت: «ئەڤ دەنگە نە ژ بەر من چێبوو، لێ ژ بەر هەوە.
نوكە دەمێ دادكرنێیە ل سەر ڤێ جیهانێ، نوكە سەرۆكێ ڤێ جیهانێ دێ بۆ ژ دەرڤە هێتە دەرئێخستن.
دەمێ ئەز ژ ئەردی هاتمە بلندكرن، دێ هەمی مرۆڤان بۆ خۆ راكێشم.»
ب ڤێ گۆتنێ ئەوی ئاماژە دكر كا دێ ب مرنەكا چەوا مریت.
ئینا جەماوەری بەرسڤا وی دا: «مە ژ دەستووری یا بهیستی كو مەسیح دێ هەتا هەتایێ مینیت. ئەڤجا چەوا تۆ دبێژی كو پێدڤیە كوڕێ مرۆڤ بهێتە بلند كرن؟ ئەڤ كوڕێ مرۆڤ كیە؟»
عیسای گۆتە وان: «رۆناهی بۆ دەمەكێ دی ژی یێ كورت دێ ل گەل هەوە مینیت. ئەڤجا هندی رۆناهی ل گەل هەوەیە بڕێڤە هەڕن، نەكو تاری ب سەر هەوە دا بهێت. ئەوێ ل تاریاتیێ بڕێڤە دچیت، ئەو نزانیت كیڤە دچیت.
هندی رۆناهی ل گەل هەوەیە، باوەریێ ب رۆناهیێ بینن، دا ببنە كوڕێن رۆناهیێ.» پشتی عیسای ئەڤ چەندە گۆتی، چوو و خۆ ژ وان ڤەشارت.
سەرەڕای كو وی ل بەرامبەری وان ئەڤ هەمی نیشانە كرن، وان باوەری ب وی نەئینا،
دا گۆتنا ئیشایا پێغەمبەری ب ج‍‌ھ بهێت: «خودان، كێ باوەر ژ پەیاما مە كر؟ زەندێ خودانی بۆ كێ دیار بوو؟»
لەوما ئەو نەشیان باوەریێ بینن، چنكو ئیشایای ئەڤە ژی یا گۆتی:
«وی چاڤێن وان كۆرە كرینە و مەژیێ وان هشك كریە، دا ب چاڤێن خۆ نەبینن و ب مەژیێ خۆ تێنەگەهن و بۆ من ڤەنەگەڕن، دا ئەز وان ساخ بكەم.»
ئیشایای ئەڤ چەندە گۆت، چنكو مەزناهیا مەسیحی دیت و بەحسێ وی كر.
سەرەڕای وێ چەندێ ژی گەلەك ژ سەرۆكێن جوهیان ژی باوەری ب عیسای ئینا، لێ وان ژ بەر فەریسیان دانپێدان نەكر، دا ژ كنیشتەیێ نەهێنە دەرئێخستن،
چنكو وان حەز ژ وێ مەزناهیێ كر یا ژ نك مرۆڤان دهێت، پتر ژ وێ مەزناهیێ یا ژ نك خودێ دهێت.
ئینا عیسای ب دەنگەكێ بلند گۆت: «هەر كەسێ باوەریێ ب من بینیت، ئەو باوەریێ ب وی دئینیت یێ ئەز هنارتیم، نە ب من
و هەر كەسێ من دبینیت، وی دبینیت یێ ئەز هنارتیم.
ئەز وەكو رۆناهی هاتیمە جیهانێ، دا هەر كەسێ باوەریێ ب من بینیت، د تاریاتیێ دا نەمینیت.
ئەگەر ئێكی گۆتنا من بهیست و ب ج‍‌ھ نەئینا، ئەز وی داد ناكەم، چنكو ئەز نەهاتیمە جیهانێ داد بكەم، لێ جیهانێ قورتال بكەم.
ئەوێ من رەت بكەت و گۆتنێن من قەبیل نەكەت، ئێك یێ هەی وی داد بكەت، ئەو گۆتنا من گۆتی، دێ ل رۆژا دویماهیێ وی داد كەت.
چنكو ئەز ژ نك خۆ نە ئاخفتیمە، لێ ئەو بابێ ئەز هنارتیم، وی فەرمانا ل من كری كا دێ چ بێژم و چ ئاخڤم.
ئەز دزانم فەرمانا وی ژیانا هەروهەرە. ئەڤجا ئەو ئاخفتنا ئەز دبێژم، ئەز وەسا دبێژم هەروەكو بابی گۆتیە من.»
بەری جەژنا دەربازبوونێ، عیسای دزانی كو دەمێ وی هات دا ژ ڤێ جیهانێ بار كەت و بچیتە نك بابی. ئەوی كو حەز ژ كەسێن خۆ یێن ل ڤێ جیهانێ كربوو، ب تەمامی حەز ژ وان كر.
شیڤ خوارنێ دەست پێ كربوو، ئبلیسی كربوو د دلێ یەهودایێ كوڕێ شەمعونێ ئەسخەریوتی دا، بێبەختیێ ل عیسای بكەت،
عیسای دزانی كو بابی هەمی تشت یێن كرینە د دەستێن وی دا و ئەو ژ نك خودێ یێ دەركەفتی و بۆ خودێ دێ ڤەگەڕیتە ڤە،
ژ سەر شیڤێ رابوو و كوركێ خۆ ژ بەر خۆ كر و خاولیەك ل ناڤتەنگا خۆ شداند،
پاشی ئاڤ كرە تەشتەكێ و دەست پێ كر پێیێن شاگردان شویشتن و ب وێ خاولیا ل ناڤتەنگا خۆ شداندی زوها كرن.
دەمێ گەهشتیە شەمعون پەترۆسی، ئەڤی گۆتێ: «خودان، تۆ پێیێن من دشووی؟»
عیسای بەرسڤ دا و گۆتێ: «تۆ نوكە تێناگەهی ئەز چ دكەم، لێ پاشی دێ تێگەهی.»
پەترۆسی گۆتێ: «تۆ چ جاران پێیێن من ناشووی!» عیسای بەرسڤا وی دا: «ئەگەر ئەز تە نەشووم، تە چ بەهر ل گەل من نینە!»
شەمعون پەترۆسی گۆتێ: «خودان، نە ب تنێ پێیێن من، لێ دەست و سەرێ من ژی!»
عیسای گۆتێ: «ئەوێ خۆ شویشتی، ژبلی پێیان نە یێ پێدڤی شویشتنێیە، لێ ئەو هەمی یێ پاقژە. هوین ژی د پاقژن، لێ نە هوین هەمی.»
چنكو وی دزانی كی دێ بێبەختیێ لێ كەت، ژ بەر هندێ گۆت: «نە هوین هەمی د پاقژن.»
پشتی پێیێن وان شویشتین، كوركێ خۆ كرە بەر خۆ و جارەكا دی ل سەر سفرێ روینشت، پرسیار ژ وان كر: «ئایا هەوە زانی من بۆ هەوە چ كر؟
هوین دبێژنە من مامۆستا و خودان، هوین راست دبێژن، چنكو ئەز ئەوم.
ئەڤجا ئەگەر ئەز خودان و مامۆستا بم و من پێیێن هەوە شویشتبن، پێدڤیە هوین ژی پێیێن ئێكودوو بشوون.
من نموونەیەك نیشا هەوە دا، دا ئەوا من بۆ هەوە كری، هوین ژی وێ بكەن.
ب راستی ب راستی دبێژمە هەوە: بەنی ژ خودانێ خۆ مەزنتر نینە، هنارتی ژی ژ وی مەزنتر نینە یێ ئەو هنارتی.
ئەگەر هەوە ئەڤ چەندە زانی، خوزیكێن هەوە ئەگەر هوین ب ج‍‌ھ بینن.
ئەز بەحسێ هەوە هەمیان ناكەم، ئەز وان دنیاسم یێن من هەلبژارتین، لێ دڤێت ئەڤ نڤیسارە ب ج‍‌ھ بهێت: ‹ئەوێ ژ نانێ من خواری، پەحنیا خۆ ل دژی من راكر.›
ئەز نوكە دبێژمە هەوە، بەری روی بدەت، داكو دەمێ روی ددەت، هوین باوەر بكەن كو ئەز ئەوم.
ب راستی ب راستی دبێژمە هەوە: ئەوێ وی قەبیل بكەت یێ ئەز دهنێرم، ئەڤە وی ئەز قەبیل كرم و ئەوێ من قەبیل بكەت، ئەوی ئەو قەبیل كر یێ ئەز هنارتیم.»
دەمێ عیسای ئەڤ چەندە گۆتی، گەلەك یێ دلتەنگ بوو، وی دیار كر و گۆت: «ب راستی ب راستی دبێژمە هەوە: ئێك ژ هەوە دێ بێبەختیێ ل من كەت.»
شاگردان ب مەندەهۆشی ڤە بەرێ خۆ ددا ئێكودوو و وان نەدزانی بەحسێ كێ دكەت.
ئێك ژ شاگردان، ئەوێ كو عیسای حەز ژێ دكر، ل بەر سینگێ عیسای پالڤە دابوو.
ئەڤجا شەمعون پەترۆسی ئاماژەیەك دایێ كو پرسیار بكەت، كا ئەو بەحسێ كێ دكەت.
ئەوی ژی سەرێ خۆ ب سنگێ عیسای ڤەنا و پرسیار ژێ كر: «خودان، ئەو كیە؟»
عیسای بەرسڤ دا: «ئەوە یێ ئەز ڤی پاری د سێنیكێ دهەلینم و ددەمێ.» پاشی پاری تێ هەلاند و دا یەهودایێ كوڕێ شەمعونێ ئەسخەریوتی.
پشتی وی پاری وەرگرتی، ئبلیس كەفتە دلێ وی. ئەڤجا عیسای گۆتێ: «ئەوا تە ل بەرە بكەی، ب لەز وێ بكە.»
كەس ژ ئەوێن ل سەر سفرێ دروینشتی، تێنەگەهشت كا وی بۆچی ئەڤ چەندە گۆتێ.
لێ چنكو ئەو بەرپرسێ سندوقكا پارەیان بوو، هندەك ژ وان هزر كر كو عیسا یێ دبێژیتێ: «پێدڤیێن مە یێن جەژنێ بكڕە،» یان تشتەكی بدەتە هەژاران.
ئەوی ژی پشتی پاری وەرگرتی، ئێكسەر دەركەفتە ژ دەرڤە. دەم ژی شەڤ بوو.
دەمێ یەهودا دەركەفتیە ژ دەرڤە، عیسای گۆت: «نوكە كوڕێ مرۆڤ هاتە مەزن كرن و خودێ ژی ل گەل وی هاتە مەزن كرن.
ئەڤجا ئەگەر خودێ ل گەل وی هاتە مەزن كرن، خودێ ژی دێ وی ل گەل خۆ مەزن كەت و ئێكسەر دێ وی مەزن كەت.
گەلی زاڕۆكان، ئەز دێ ب تنێ بۆ دەمەكێ دی ژی یێ كورت ل گەل هەوە مینم. هوین دێ ل من گەڕیێن، لێ هەروەكو من گۆتیە جوهیان، نوكە دبێژمە هەوە ژی: ئەو جهێ ئەز دچمێ، هوین نەشێن بهێنە وێرێ.
ئەز دێ فەرمانەكا نوی ل هەوە كەم: حەز ژ ئێكودوو بكەن. هەروەكو من حەز ژ هەوە كری، دڤێت هوین ژی حەز ژ ئێكودوو بكەن.
ب ڤێ چەندێ هەمی دێ زانن كو هوین شاگردێن منن: ئەگەر هوین حەز ژ ئێكودوو بكەن.»
ئینا شەمعون پەترۆسی گۆتێ: «خودان، دێ كیڤە چی؟» عیسای بەرسڤا وی دا: «ئەو جهێ ئەز دچمێ، نوكە تۆ نەشێی ل دویڤ من بهێیە وێرێ، لێ پاشی دێ ل دویڤ من هێی.»
پەترۆسی گۆتێ: «خودان، بۆچی نوكە ئەز نەشێم ل دویڤ تە بهێم؟ ئەز دێ ژیانا خۆ گۆری تە كەم.»
عیسای بەرسڤ دا: «تۆ دێ ژیانا خۆ گۆری من كەی؟ ب راستی ب راستی دبێژمە تە: بەری دیكل بانگ بدەت، تۆ دێ سێ جاران من ماندەل كەی.»
«دلتەنگ نەبن. پشتا خۆ ب خودێ راست كەن، هەروەسا پشتا خۆ ب من ژی راست كەن.
ل مالا بابێ من، گەلەك جهێن ئاكنجیبوونێ یێن هەین. ئەگەر وەسا نەبا، ئەرێ ئەز دا بێژمە هەوە كو ئەز دێ چم دا بۆ هەوە جهەكی ئامادە بكەم؟
پشتی ئەز دچم و بۆ هەوە جهی ئامادە دكەم، دێ جارەكا دی هێمەڤە و هەوە بەمە نك خۆ، دا ئەو جهێ ئەز لێ، هوین ژی لێ بن.
هوین ژی رێكا وی جهی دزانن یێ ئەز دچمێ.»
توماسی گۆتێ: «خودان، ئەم نزانین تۆ دێ كیڤە چی، ئەڤجا ئەم چەوا دێ شێین رێكێ زانین؟»
ئینا عیسای بەرسڤ دا: «ئەزم رێك و راستی و ژیان. كەس ناهێتە نك بابی، ئەگەر ب رێیا من نەبیت.
ئەگەر هەوە ئەز نیاسیبم، هەوە بابێ من ژی یێ نیاسی. ئەڤجا ژ نوكە و پێڤە هوین وی دنیاسن و هەوە یێ دیتی.»
فیلیپۆسی گۆتێ: «خودان، كا بابی نیشا مە بدە و ئەو بەسی مەیە.»
عیسای بەرسڤا وی دا: «فیلیپۆس، ئەڤ دەمێ هندە درێژ ئەز ل گەل هەوە و هێشتا تە ئەز نەنیاسیمە؟ ئەوێ ئەز دیتیم، وی باب ژی یێ دیتی. چەوا تۆ دبێژیە من: ‹بابی نیشا مە بدە؟›
ئایا تۆ باوەر ناكەی كو ئەز یێ د ناڤ بابی دا و باب یێ د ناڤ من دا؟ ئەو ئاخفتنێن ئەز دبێژمە هەوە، ئەز ژ نك خۆ نابێژم، لێ ئەو بابێ د ناڤ من دا یێ بنەجهە، كارێن خۆ دكەت.
باوەر ژ من بكەن كو ئەز یێ د ناڤ بابی دا و باب یێ د ناڤ من دا. ئەگەر نە، ژ بەر وان كاران ب خۆ باوەر بكەن.
ب راستی ب راستی دبێژمە هەوە: یێ باوەریێ ب من بینیت، دێ وان كاران كەت یێن ئەز دكەم و دێ كارێن ژ وان مەزنتر ژی كەت، چنكو ئەز دێ چمە نك بابی.
هوین ب ناڤێ من چ بخوازن، ئەز دێ ب ج‍‌ھ ئینم، دا باب ب رێكا كوڕی بهێتە مەزنكرن.
ئەگەر هوین ب ناڤێ من تشتەكی بخوازن، ئەز دێ ب ج‍‌ھ ئینم.»
«ئەگەر هوین حەز ژ من دكەن، هوین دێ فەرمانێن من ب ج‍‌ھ ئینن.
ئەز ژی دێ ژ بابی خوازم كو هاریكارەكێ دی بدەتە هەوە، دا هەتا هەتایێ ل گەل هەوە بمینیت،
ئەو ژی گیانێ راستیێیە، یێ كو جیهان نەشێت وی قەبیل بكەت، چنكو جیهان نە وی دبینیت، نە ژی دنیاسیت. لێ هوین وی دنیاسن، چنكو ل گەل هەوە یێ بنەجهە و دێ د ناڤ هەوە دا بیت.
ئەز هەوە ئێتیم و سێوی ناهێلم، دێ ڤەگەڕمە نك هەوە.
پشتی چەندەكا دی، ئێدی جیهان من نابینیت، لێ هوین دێ من بینن. چنكو ئەز دژیم، هوین ژی دێ ژین.
د وێ رۆژێ دا، هوین دێ زانن كو ئەز یێ د ناڤ بابێ خۆ دا و هوین یێ د ناڤ من دا و ئەز یێ د ناڤ هەوە دا.
ئەوێ فەرمانێن من دزانیت و ب ج‍‌ھ دئینیت، ئەوە یێ حەز ژ من دكەت. ئەوێ حەز ژ من دكەت، بابێ من ژی دێ حەز ژ وی كەت و ئەز ژی دێ حەز ژ وی كەم و خۆ بۆ وی ئاشكرا كەم.»
ئینا یەهودای، نە یێ ئەسخەریوتی، پرسیار ژێ كر: «خودان، چەوا دبیت كو تۆ خۆ بۆ مە ئاشكرا بكەی، لێ نە بۆ جیهانێ؟»
عیسای بەرسڤ دا: «هەر كەسێ حەز ژ من بكەت، دێ پەیڤا من ب ج‍‌ھ ئینیت و بابێ من ژی دێ حەز ژ وی كەت، دێ هێینە نك وی كەسی و ل نك وی ئاكنجی بین.
ئەوێ حەز ژ من نەكەت، پەیڤێن من ژی ب ج‍‌ھ نائینیت. ئەڤ پەیڤا هوین دبهیسن، نە ژ نك منە، لێ ژ نك بابیە، ئەوێ ئەز هنارتیم.
هێشتا ئەز ل نك هەوە، من ئەڤ تشتە گۆتنە هەوە،
لێ هاریكار، گیانێ پیرۆز، ئەوێ كو باب دێ ب ناڤێ من هنێریت، ئەو دێ هەوە فێری هەمی تشتان كەت و هەمی تشتێن من گۆتینە هەوە، ئەو دێ ئینیتە بیرا هەوە.
ئەز ئاشتیێ بۆ هەوە دهێلم، ئاشتیا خۆ ددەمە هەوە. ئەز وەسا نادەمە هەوە هەروەكو جیهان ددەت. دلتەنگ نەبن و نەترسن.
هەوە بهیست كو من گۆتە هەوە: ئەز دێ چم و پاشی دێ ڤەگەڕم. ئەڤجا ئەگەر هەوە حەز ژ من كربا، هوین دا دلخۆش بن كو ئەز دێ چمە نك بابی، چنكو باب ژ من مەزنترە.
نوكە من ئەڤ تشتە بەری روی بدەت گۆتە هەوە، دا دەمێ روی ددەت، هوین باوەریێ بینن.
ئێدی ئەز ل گەل هەوە گەلەك نائاخڤم، چنكو سەرۆكێ ڤێ جیهانێ یێ دهێت. ئەوی چ ل سەر من نینە.
لێ ئەز وێ دكەم یا بابی فەرمان پێ دای، دا جیهان بزانیت كو ئەز حەز ژ بابی دكەم. رابن، دا ژ ڤێرێ بچین!»
«ئەزم مێوا راستەقینە و بابێ من رەزڤانە.
هەر چەقەكێ من یێ بەرهەمی نەدەت، رادكەت. لێ هەر چەقەكێ بەرهەمی بدەت، دكەزێخیت و پاقژ دكەت، دا پتر بەرهەمی بدەت.
هوین نوكە ژ بەر وێ پەیڤا من بۆ هەوە گۆتی د پاقژن.
د ناڤ من دا بنەج‍‌ھ ببن و ئەز د ناڤ هەوە دا. كا چەوا چەق ب خۆ نەشێت بەرهەمی بدەت ئەگەر د مێوێ دا یا بنەج‍‌ھ نەبیت، هوین ژی هەروەسا نەشێن ئەگەر د ناڤ من دا د بنەج‍‌ھ نەبن.
ئەزم مێو و هوین چەقن. ئەوێ د ناڤ من دا یێ بنەج‍‌ھ بیت و ئەز د ناڤ وی دا، ئەو دێ بەرهەمەكێ زۆر دەت، چنكو بێی من هوین نەشێن تشتەكی بكەن.
هەر كەسێ د ناڤ من دا بنەج‍‌ھ نەبیت، وەكو چەقی بۆ ژ دەرڤە دهێتە هاڤێتن، ئەڤجا هشك دبیت و كۆم دكەن، پاشی دهاڤێژنە ناڤ ئاگری و دهێتە سۆتن.
ئەگەر هوین د ناڤ من دا بنەج‍‌ھ ببن و ئاخفتنێن من د ناڤ هەوە دا بنەج‍‌ھ ببن، هەوە چ دڤێت بخوازن، دێ بۆ هەوە ب ج‍‌ھ هێت.
ب ڤێ چەندێ بابێ من دهێتە مەزنكرن: هوین گەلەك بەرهەمی بدەن و ببنە شاگردێن من.
كا چەوا بابی حەز ژ من كر، من ژی وەسا حەز ژ هەوە كر. ئەڤجا د ناڤ حەزژێكرنا من دا بنەج‍‌ھ ببن.
ئەگەر هوین فەرمانێن من ب ج‍‌ھ بینن، دێ د ناڤ حەزژێكرنا من دا بنەج‍‌ھ بن، هەروەكو من فەرمانێن بابێ خۆ ب ج‍‌ھ ئیناین و د ناڤ حەزژێكرنا وی دا بنەج‍‌ھ دبم.
من ئەڤ تشتە گۆتنە هەوە، دا دلخۆشیا من د ناڤ هەوە دا بیت و دلخۆشیا هەوە یا تەمام بیت.
فەرمانا من ئەڤەیە: هوین حەز ژ ئێكودوو بكەن، هەروەكو من حەز ژ هەوە كری.
كەسێ حەزژێكرنەكا ژ ڤێ مەزنتر نینە، كو ئێك ژیانا خۆ گۆری خۆشتڤیێن خۆ بكەت.
هوین خۆشتڤیێن منن، ئەگەر هوین فەرمانێن من ب ج‍‌ھ بینن.
ئێدی ئەز نابێژمە هەوە ‹بەنی›، چنكو بەنی نزانیت خودانێ وی چ دكەت. لێ من گۆتە هەوە ‹خۆشتڤی›، چنكو هەر تشتێ من ژ بابێ خۆ بهیستی، من هوین تێگەهاندن.
هەوە ئەز هەلنەبژارتم، لێ من هوین هەلبژارتن و دەستنیشان كرن كو هوین بچن بەرهەمی بدەن و بەرهەمێ هەوە بمینیت، داكو هەر تشتێ هوین ب ناڤێ من ژ بابی بخوازن، ئەو بدەتە هەوە.
ئەز ڤێ فەرمانێ ل هەوە دكەم: هوین حەز ژ ئێكودوو بكەن.»
«ئەگەر جیهانێ كەرب ژ هەوە ڤەببن، هوین بزانن كو بەری هەوە وێ كەرب ژ من ڤەببوون.
ئەگەر هوین ژ جیهانێ بان، دا جیهان وەكو خەلكێ خۆ حەز ژ هەوە كەت. لێ چنكو هوین نە ژ جیهانێنە، بەلكو من هوین ژ جیهانێ هەلبژارتن، لەوما جیهانێ كەرب ژ هەوە ڤەدبن.
بیرا خۆ بیننە وێ پەیڤا من گۆتیە هەوە: بەنی ژ خودانێ خۆ مەزنتر نینە. ئەگەر وان ئەز تەپەسەر كربم، دێ هەوە ژی تەپەسەر كەن و ئەگەر وان پەیڤا من ب ج‍‌ھ ئینابیت، دێ پەیڤا هەوە ژی ب ج‍‌ھ ئینن.
لێ ئەو دێ ڤان هەمی تشتان ژ بەر ناڤێ من ب سەرێ هەوە ئینن، چنكو ئەو وی نانیاسن یێ ئەز هنارتیم.
ئەگەر ئەز نەهاتبام و ل گەل وان نەئاخفتبام، دا د بێگونە‍‌ھ بن، لێ نوكە وان چ بەهانە بۆ گونەهێن خۆ نینە.
ئەوێ كەرب ژ من ڤەببن، وی كەرب ژ بابێ من ژی ڤەدبن.
ئەگەر من ئەو كار د ناڤبەرا وان دا نەكربان، یێن ژبلی من كەسێ نەكرین، دا د بێگونە‍‌ھ بن، لێ نوكە وان دیتن و كەرب ژ من و ژ بابێ من ژی ڤەبوون.
لێ ئەڤ چەندە چێبوو دا ئەو پەیڤا د دەستوورێ وان دا هاتیە نڤیسین، ب ج‍‌ھ بهێت: ‹وان بێی ئەگەر كەرب ژ من ڤەبوون.›
دەمێ ئەو هاریكار دهێت، یێ ئەز دێ ژ نك بابی بۆ هەوە هنێرم، گیانێ راستیێ، ئەوێ ژ نك بابی دەردكەڤیت، دێ بۆ من شاهدەییێ دەت.
هوین ژی دێ بۆ من شاهدەییێ دەن، چنكو هەر ژ دەستپێكێ هوین ل گەل من بوون.»
«من ئەڤ چەندە گۆتە هەوە، دا هوین نەهەلنگڤن.
دێ هەوە ژ كنیشتەیان دەرئێخن. دەمەك ژی دێ هێت، تێدا هەر كەسێ هەوە بكوژیت، دێ هزر كەت ئەو یێ خزمەتەكێ پێشكێشی خودێ دكەت.
دێ ڤان تشتان كەن، چنكو ئەو نە بابی دنیاسن و نە ژی من دنیاسن.
لێ من ئەڤ چەندە بۆ هەوە گۆت، داكو گاڤا ئەو دەم دهێت، ل بیرا هەوە بیت كو من یێ گۆتیە هەوە. من ئەڤ تشتە ژ دەستپێكێ نەگۆتنە هەوە، چنكو ئەز ل گەل هەوە بووم.
لێ نوكە ئەز دێ چمە نك وی یێ ئەز هنارتیم، كەس ژ هەوە ژی پرسیارێ ژ من ناكەت: ‹دێ كیڤە چی؟›
چنكو من ئەڤ چەندە گۆتنە هەوە، كۆڤانان دلێ هەوە تژی كر.
لێ ئەز راستیێ دبێژمە هەوە: بۆ هەوە باشترە كو ئەز بچم، چنكو ئەگەر ئەز نەچم، هاریكار بۆ هەوە ناهێت. لێ ئەگەر ئەز بچم، دێ بۆ هەوە هنێرم.
دەمێ ئەو دهێت، دێ شاشبوونا جیهانێ دەربارەی گونەهێ و راستداریێ و دادكرنێ دانیتە بەر رویێ وێ:
دەربارەی گونەهێ، چنكو ئەو باوەریێ ب من نائینن.
دەربارەی راستداریێ، چنكو ئەز دێ چمە نك بابی و ئێدی هوین من نابینن.
دەربارەی دادكرنێ، چنكو سەرۆكێ ڤێ جیهانێ هاتە گونەهباركرن.
من گەلەك تشتێن دی ژی یێن هەین كو بۆ هەوە بێژم، لێ نوكە هوین نەشێن خۆ ل بەر بگرن.
ئەڤجا دەمێ ئەو، گیانێ راستیێ، هات، دێ هەوە گەهینیتە هەمی راستیێ، چنكو ئەو ژ نك خۆ نائاخڤیت، لێ یا ئەو دبهیسیت، دێ وێ بێژیت و دێ تشتێن هێشتا روی نەداین بۆ هەوە راگەهینیت.
ئەو دێ من مەزن كەت، چنكو ئەو دێ ژ من وەرگریت و بۆ هەوە راگەهینیت.
هەمیێن كو بابی هەین، یێن منن، لەو من گۆتە هەوە: ئەو دێ ژ من وەرگریت و بۆ هەوە راگەهینیت.
پشتی دەمەكێ كورت، ئێدی هوین من نابینن و پشتی هنگی ب دەمەكێ كورت دێ من بیننەڤە.»
ئینا هندەك ژ شاگردێن وی گۆتە ئێكودوو: «مەبەستا وی چیە ب ڤێ ئاخفتنا ئەو دبێژیتە مە: ‹پشتی دەمەكێ كورت هوین من نابینن و پشتی هنگی ب دەمەكێ كورت دێ من بیننەڤە،› هەروەسا: ‹چنكو دێ چمە نك بابی›؟»
ئەڤجا وان گۆت: «ئەو چ دەمێ كورتە، یێ كو ئەو بەحس ژێ دكەت؟ ئەم تێناگەهین چ دبێژیت.»
عیسای زانی كو ئەوان دڤیا پرسیارێ ژێ بكەن، ئینا گۆتە وان: «ئایا دەربارەی وێ چەندێ هوین پرسیارێ ژ ئێكودوو دكەن كو من گۆت: ‹پشتی دەمەكێ كورت هوین من نابینن و پشتی هنگی ب دەمەكێ كورت دێ من بیننەڤە›؟
ب راستی ب راستی دبێژمە هەوە: هوین دێ گرین و شینیێ دانن، لێ جیهان دێ شادیێ كەت. هوین دێ خەمگین بن، لێ خەمگینیا هەوە دێ بیتە شادی.
دەمێ ژنك دكەڤیتە بەر زاڕۆكبوونێ، تەنگاڤ دبیت، چنكو دەمێ وێ هات. لێ دەمێ وێ زاڕۆك بوو، ئێدی ژ بەر شادیێ، تەنگاڤی ناهێتە بیرا وێ، چنكو مرۆڤەك هاتە جیهانێ.
هوین ژی وەسا، نوكە د خەمگینن، لێ ئەز دێ هەوە بینمەڤە و دلێ هەوە دێ شاد بیت و كەس وێ شادیێ ژ هەوە ناستینیت.
د وێ رۆژێ دا، هوین پرسیارا چ تشتی ژ من ناكەن. ب راستی ب راستی دبێژمە هەوە: هەر تشتێ هوین ب ناڤێ من ژ بابی بخوازن، دێ دەتە هەوە.
تا نوكە هەوە چ تشت ب ناڤێ من نەخواستیە. بخوازن دێ وەرگرن، دا دلخۆشیا هەوە یا تەمام بیت.
من ئەڤ تشتە بۆ هەوە ب نموونەیان گۆتن. دەمەك دێ هێت، ئێدی ئەز بۆ هەوە ب نموونەیان نائاخڤم، لێ دێ ب ئاشكرایی بۆ هەوە بەحسێ بابی كەم.
د وێ رۆژێ دا، هوین دێ ب ناڤێ من خوازن. ئەز نابێژمە هەوە كو ئەز دێ بۆ هەوە ژ بابی خوازم،
ژ بەر كو باب ب خۆ حەز ژ هەوە دكەت، چنكو هەوە حەز ژ من كر و باوەری ئینا كو ئەز ژ نك خودێ هاتیمە.
ئەز ژ نك بابی دەركەفتم و هاتمە جیهانێ، ئەز دێ جیهانێ هێلم و جارەكا دی چمە نك بابی.»
ئینا شاگردێن وی گۆتێ: «ئها ئەڤە تۆ ب ئاشكرایی یێ ل گەل مە دئاخڤی، نە ب نموونەیان.
نوكە ئەم دزانین تۆ هەمی تشتی دزانی و تۆ نە یێ پێدڤی كەس پرسیارێ ژ تە بكەت. ژ بەر ڤێ چەندێ ئەم باوەریێ دئینین كو تۆ یێ ژ نك خودێ هاتی.»
ئینا عیسای بەرسڤا وان دا: «ئایا هوین نوكە باوەریێ دئینن؟
ئەڤە دەمەك دێ هێت و نوكە یێ هاتی ژی، كو هوین دێ بەڵاڤ بن، هەر ئێك دێ چیتە مالا خۆ و دێ من ب تنێ هێلن. لێ ئەز نە یێ ب تنێمە، چنكو باب یێ ل گەل من.
من ئەڤ تشتە بۆ هەوە گۆتن، دا هەوە ئاشتی د ناڤ من دا هەبیت. د جیهانێ دا هوین دێ د تەنگاڤیێ دا بن. لێ د وێرەك بن: من سەركەفتن ل سەر جیهانێ ئینا.»
دەمێ عیسای ئەڤ ئاخفتنە گۆتین، بەرێ خۆ دا ئەسمانی و گۆت: «باب، دەم هات. كوڕێ خۆ مەزن كە، دا كوڕێ تە ژی تە مەزن كەت،
چنكو تە دەستهەلات ل سەر هەمی مرۆڤان یا دایێ، دا ژیانا هەروهەر بدەتە هەمی ئەو كەسێن تە داینە وی.
ژیانا هەروهەر ژی ئەڤەیە: ئەو تە، ئانكو خودایێ راستەقینە یێ ئێكانە، و عیسایێ مەسیح یێ تە هنارتی، بنیاسن.
من تۆ ل سەر ئەردی مەزن كری، ب رێكا بجهئینانا ئەو كارێ تە دایە من كو بكەم.
باب، نوكە من ل نك خۆ مەزن بكە، ب وێ مەزناهیا من بەری هەبوونا جیهانێ ل نك تە هەبوو.
من ناڤێ تە بۆ وان مرۆڤان دیار كر، یێن تە ژ جیهانێ داینە من. ئەو یێن تە بوون و تە دانە من و وان پەیڤا تە ب ج‍‌ھ ئینا.
نوكە ئەو دزانن كو هەمی تشتێن تە داینە من، ئەو ژ تەنە،
چنكو ئەو پەیڤێن تە داینە من، من دانە وان و وان وەرگرتن و ب راستی زانی كو ئەز یێ ژ نك تە هاتیم و وان باوەری ئینا كو تە ئەز یێ هنارتیم.
ئەز ژ پێخەمەت وان نڤێژێ دكەم. ئەز پێخەمەت جیهانێ نڤێژێ ناكەم، لێ ژ پێخەمەت وان یێن تە داینە من، چنكو یێن تەنە.
هەر تشتەكێ من، یێ تەیە و هەر تشتەكێ تە، یێ منە و ئەز ب وان هاتیمە مەزنكرن.
ئێدی ئەز د جیهانێ دا نینم، لێ ئەو یێ د جیهانێ دا و ئەز دێ هێمە نك تە. بابێ پیرۆز، وان ب ناڤێ خۆ یێ تە دایە من بپارێزە، دا ببنە ئێك هەروەكو ئەز و تۆ ئێك.
دەمێ ئەز ل گەل وان بووم، من ئەو ب ناڤێ تە دپاراستن، ب وی ناڤێ تە دایە من، من چاڤێ خۆ دایێ. كەس ژ وان ژ ناڤ نەچوو، ژبلی كوڕێ ژناڤچوونێ ، داكو نڤیسار ب ج‍‌ھ بهێت.
لێ نوكە ئەز دێ هێمە نك تە و ڤان تشتان ل جیهانێ دبێژم، دا دلخۆشیا من د وان دا یا تەمام بیت.
من پەیڤا تە گەهاندە وان و جیهانێ كەرب ژ وان ڤەبوون، چنكو ئەو نە ژ جیهانێنە هەروەكو ئەز نە ژ جیهانێ.
ئەز داخوازێ ناكەم كو تۆ وان ژ جیهانێ ببەی، لێ تۆ وان ژ خرابكاری بپارێزی.
ئەو نە ژ جیهانێنە، هەروەكو ئەز نە ژ جیهانێ.
وان ب راستیێ پیرۆز بكە ، پەیڤا تەیە راستی.
هەروەكو تە ئەز هنارتیمە جیهانێ، من ژی ئەو هنارتنە جیهانێ.
ژ پێخەمەت وان ئەز خۆ پیرۆز دكەم، دا ئەو ژی ب راستیێ بهێنە پیرۆز كرن.
ئەز داخوازێ دكەم، نە ب تنێ ژ پێخەمەت ڤان، لێ ژ پێخەمەت وان ژی یێن ب رێكا پەیڤا ڤان، باوەریێ ب من بینن،
داكو هەمی ببنە ئێك. باب، هەروەكو تۆ د ناڤ من دا و ئەز د ناڤ تە دا، بلا ئەو ژی د ناڤ مە دا بن، دا جیهان باوەریێ بینیت كو تە ئەز یێ هنارتیم.
ئەو مەزناهیا تە دایە من، من ژی دا وان، دا ئەو ببنە ئێك هەروەكو ئەز و تۆ ئێكین.
ئەز یێ د ناڤ وان دا و تۆ یێ د ناڤ من دا، داكو ئێكبوونا وان یا تەمام بیت، دا جیهان بزانیت كو تە ئەز یێ هنارتیم و تە حەز ژ وان كر هەروەكو تە حەز ژ من كری.
باب، من دڤێت كو ئەوێن تە داینە من، ل گەل من بن، ل وی جهێ ئەز لێ بم، دا وێ مەزناهیا تە دایە من ببینن، چنكو بەری دامەزراندنا جیهانێ تە حەز ژ من كر.
بابێ راستدار، جیهان تە نانیاسیت، لێ ئەز تە دنیاسم و ئەڤە دزانن كو تە ئەز یێ هنارتیم.
من ناڤێ تە بۆ وان دا نیاسین و دێ بۆ وان دەمە نیاسین، داكو ئەو حەزژێكرنا تە پێ حەز ژ من كری، د ناڤ وان دا بیت و ئەز ژی د ناڤ وان دا بم.»
پشتی عیسای ئەڤ ئاخفتنە گۆتین، ل گەل شاگردێن خۆ دەركەفت و ژ نهالا قیدرۆن دەرباز بوون. ل وێرێ باغچەیەك هەبوو، ئینا ئەو و شاگردێن خۆ چوونە د ناڤ دا.
یەهودای ژی، ئەوێ بێبەختی لێ كری، ب وی جهی دزانی، چنكو گەلەك جاران عیسا ل گەل شاگردێن خۆ ل وێرێ كۆم دبوو.
ئینا یەهودای كۆمەكا سەربازان و زێرەڤانێن ژ لایێ سەرۆكێن كاهنان و فەریسیان ڤە ل گەل خۆ ئینان و ب چرا و خەتیرە و ب چەك ڤە هاتە وێرێ.
عیسای ب هەمی تشتێن كو دێ ب سەرێ وی هێن دزانی، ئەڤجا بەرەڤ وان چوو و گۆت: «هوین ل كێ دگەڕن؟»
وان بەرسڤ دا: «عیسایێ ناسیرەیی.» ئینا وی گۆتە وان: «ئەز ئەوم.» یەهودا ژی، ئەوێ بێبەختی لێ كری، ل گەل وان یێ راوەستیای بوو.
دەمێ وی گۆتیە وان «ئەز ئەوم،» پاشڤە زڤڕین و كەفتنە ئەردی.
عیسای جارەكا دی پرسیار ژ وان كر: «هوین ل كێ دگەڕن؟» وان بەرسڤ دا: «عیسایێ ناسیرەیی.»
عیسای بەرسڤ دا: «من گۆتە هەوە: ئەز ئەوم. ئەڤجا ئەگەر هوین ل من دگەڕن، بهێلن ئەڤە بچن.»
ئەڤێ روی دا، داكو ئەو پەیڤا وی گۆتی ب ج‍‌ھ بهێت: «ئەوێن تە داینە من، من كەس ژ وان ژ دەست نەدا.»
پاشی شەمعون پەترۆسی، ئەوێ كو شیرەك ڤێ بوو، شیر ئینا دەرێ و ڤەوەشاندە بەنیێ سەرۆككاهنی و گوهێ وی یێ راستێ ژێڤە كر. ناڤێ وی بەنی مەلخۆس بوو.
ئینا عیسای گۆتە پەترۆسی: «شیرێ خۆ بكە د كاڤلانی دا! ما ئەو پەرداغا بابی دایە من ڤەنەخۆم؟»
ئەڤجا تیپا سەربازان و سەرۆكێن وان و زێرەڤانێن جوهیان عیسا گرت و گرێ دا،
ل بەراهیێ ئەو برە نك حەننانی، كو خەزویرێ قەیافای بوو، ئەوێ كو ل وێ ساڵێ سەرۆككاهن بوو.
قەیافا ئەو بوو یێ شیرەت ل جوهیان كری كو چێترە كەسەك ژ پێخەمەتی مللەتی بمریت.
شەمعون پەترۆس و شاگردەكێ دی ل دویڤ عیسای دچوون. ئەو شاگرد ل نك سەرۆككاهنی یێ نیاس بوو، لەوما ئەو ل گەل عیسای چوو د حەوشا سەرۆككاهنی ڤە،
لێ پەترۆس ل نك دەرگەهی ژ دەرڤە ما راوەستیای. پاشی ئەو شاگردێ دی یێ سەرۆككاهنی دنیاسی، دەركەفت و ل گەل دەرگەهڤانێ ئاخفت و پەترۆس برە د ژۆرڤە.
كچكا دەرگەهڤان پرسیار ژ پەترۆسی كر و گۆتێ: «نەكو تۆ ژی ئێك ژ شاگردێن ڤی مرۆڤی بی؟» ئەوی بەرسڤ دا: «نەخێر.»
ژ بەر سەرمایێ، بەنی و زێرەڤانان ئاگرەك هەلكربوو و راوەستیابوون و خۆ گەرم دكر، پەترۆس ژی ل گەل وان یێ راوەستیای بوو خۆ گەرم دكر.
سەرۆككاهنی دەربارەی شاگردێن وی و فێركرنا وی پرسیار ژ عیسای كر.
عیسای بەرسڤ دا: «ئەز ب ئاشكرایی بۆ جیهانێ ئاخفتم و من هەردەم ل كنیشتەیان و ل پەرستگەهێ، ئەو جهێ هەمی جوهی لێ كۆم دبن، فێركرن دكر و من چ تشت ب دزی ڤە نەدگۆت.
ئەڤجا بۆچی تۆ پرسیارێ ژ من دكەی؟ پرسیارێ ژ وان بكە یێن ئەو ئاخفتن بهیستی یا من بۆ وان گۆتی، ئەو دزانن كا من چ گۆتیە.»
دەمێ عیسای ئەڤە گۆتی، ئێك ژ زێرەڤانان كو ل نێزیك وی یێ راوەستیای بوو، زللەهەك ل عیسای دا و گۆت: «ما هۆسا تۆ بەرسڤا سەرۆككاهنی ددەی؟»
عیسای بەرسڤا وی دا: «ئەگەر ئەز شاش ئاخفتبم، شاشیا من بسەلمینە، لێ ئەگەر راست بیت، تۆ بۆچی زللەهێ ل من ددەی؟»
ئەڤجا حەننانی ب گرێدایی ئەو هنارتە نك قەیافایێ سەرۆككاهن.
هێشتا شەمعون پەترۆس ل وێرێ یێ راوەستیای بوو خۆ گەرم دكر. وان پرسیار ژێ كر: «نەكو تۆ ژی ئێك ژ شاگردێن وی بی؟» ئەوی ماندەل كر و گۆت: «ئەز نە ژ وانم.»
ئینا ئێك ژ بەنیێن سەرۆككاهنی، كو خزمێ وی بەنی بوو یێ پەترۆسی گوهێ وی ژێڤە كری، گۆتێ: «ما من تۆ ل گەل وی د ناڤ باغچەی دا نەدیتی؟»
پەترۆسی جارەكا دی ماندەل كر، ئینا د ج‍‌ھ دا دیكلی بانگ دا.
جوهیان عیسا ژ مالا قەیافای برە كۆچكا حوكمڕانیێ، دەم ژی بەری سپێدێ بوو. ئەو ب خۆ نەچوونە د كۆچكا حوكمڕانیێ ڤە، دا نەهەڕمن و بشێن ژ شیڤا جەژنا دەربازبوونێ بخۆن.
ئینا پیلاتۆس بۆ وان دەركەفتە ژ دەرڤە و گۆت: «هوین ڤی زەڵامی ب چ گونەهبار دكەن؟»
وان بەرسڤا وی دا: «ئەگەر گونەهبار نەبا، مە رادەستی تە نەدكر.»
پیلاتۆسی گۆتە وان: «هوین ب خۆ ببەن و ل دویڤ دەستوورێ خۆ وی داد بكەن.» جوهیان بەرسڤا وی دا: «مە دەستهەلات نینە، ئەم كەسێ بكوژین.»
ئەڤە چێبوو داكو ئاخفتنا عیسای ب ج‍‌ھ بهێت، ئەوا ئاماژە پێ كریە وێ مرنا كو دێ پێ مریت.
پیلاتۆس دیسان چوو د ژۆرڤە و گازی عیسای كر و گۆتێ: «ئەرێ تۆ پاشایێ جوهیانی؟»
عیسای بەرسڤ دا: «تۆ ڤی تشتی ژ نك خۆ دبێژی یان هندەكێن دی بەحسێ من بۆ تە كریە؟»
پیلاتۆسی گۆت: «ما ئەز جوهیمە؟ مللەتێ تە و سەرۆكێن كاهنان تۆ یێ رادەستی من كری. تە چ كریە؟»
عیسای بەرسڤ دا: «پاشایەتیا من نە ژ ڤێ جیهانێیە. ئەگەر پاشایەتیا من ژ ڤێ جیهانێ با، دا خزمەتكارێن من شەڕی كەن، دا ئەز رادەستی جوهیان نەهێمە كرن. لێ پاشایەتیا من نە ژ ڤێرێیە.»
ئینا پیلاتۆسی گۆتێ: «ئانكو تۆ پاشای؟» عیسای بەرسڤا وی دا: «تە ب خۆ گۆت كو ئەز پاشامە. ئەز بۆ ڤێ چەندێ یێ ژ دایك بوویم و بۆ ڤێ چەندێ یێ هاتیمە جیهانێ، دا شاهدەییێ بۆ راستیێ بدەم. هەر كەسێ ژ راستیێ بیت، دێ گوهێ خۆ دەتە دەنگێ من.»
پیلاتۆسی گۆتێ: «راستی چیە؟» پشتی ئەڤ چەندە گۆتی، جارەكا دی بۆ جوهیان دەركەفتە ژ دەرڤە و گۆت: «ئەز چ ئەگەران بۆ گونەهباركرنا وی نابینم،
لێ هەوە نەریتەكێ هەی، كو ئەز ل جەژنا دەربازبوونێ بۆ هەوە گرتیەكی بەرددەم. ئەڤجا هەوە دڤێت ئەز بۆ هەوە پاشایێ جوهیان بەردەم؟»
د بەرسڤێ دا وان كرە قێڕی و گۆت: «نە ئەڤی، لێ باراباسی بەردە.» باراباس ژی قاچاخ بوو.
وی دەمی پیلاتۆسی فەرمان دا كو عیسای ببەن و قامچی دەن.
سەربازان ژی تانجەك ژ ستریان ڤەهاند و دانا سەر سەرێ وی و كوركەكێ بنەفشی كرە بەر
و دچوونە پێشیا وی و دگۆتێ: «بژی پاشایێ جوهیان!» و زللە‍‌ھ لێددان.
پیلاتۆس جارەكا دی دەركەفتە ژ دەرڤە و گۆتە جوهیان: «ئەڤە ئەز دێ وی بۆ هەوە ئینمە ژ دەرڤە، دا هوین بزانن كو ئەز چ ئەگەران بۆ گونەهباركرنا وی نابینم.»
ئینا عیسا دەركەفتە ژ دەرڤە و تانجا ستری ل سەر سەرێ وی بوو و كوركێ بنەفشی ل بەر بوو. پیلاتۆسی گۆتە وان: «ئها ئەڤە ئەو مرۆڤە!»
دەمێ سەرۆكێن كاهنان و زێرەڤانان ئەو دیتی، كرنە قێڕی و گۆتن: «ل خاچێ بدە! ل خاچێ بدە!» پیلاتۆسی گۆتە وان: «هوین وی ببەن و خاچ بدەن، چنكو ئەز چ ئەگەران بۆ گونەهباركرنا وی نابینم.»
جوهیان بەرسڤا وی دا: «مە دەستوورەكێ هەی و ل دویڤ وی دەستووری دڤێت ئەو بمریت، چنكو وی یێ خۆ كریە كوڕێ خودێ.»
دەمێ پیلاتۆسی ئەڤ ئاخفتنە بهیستی، ترسا وی پتر لێ هات.
ئەو دیسان چوو د كۆچكێ ڤە و پرسیار ژ عیسای كر: «تۆ ژ كیڤە هاتیە؟» لێ عیسای چ بەرسڤ نەدان.
ئینا پیلاتۆسی گۆتێ: «ئایا تۆ بۆ من نائاخڤی؟ ما تۆ نزانی كو من دەستهەلاتا هەی تە ئازاد بكەم و من دەستهەلاتا هەی تە خاچ بدەم؟»
عیسای بەرسڤا وی دا: «تە چ دەستهەلات ل سەر من نەدبوو، ئەگەر ژ ژۆری بۆ تە نەهاتبا دان. لەوما ئەوێ ئەز رادەستی تە كریم، گونەها وی هێشتا مەزنترە.»
پشتی ڤێ چەندێ پیلاتۆسی بزاڤ دكر كو وی ئازاد بكەت، لێ جوهیان كرە گازی و گۆت: «ئەگەر تۆ ڤی ئازاد بكەی، تۆ نە ژ هەڤالێن قەیسەری. هەر كەسێ خۆ بكەتە پاشا، ئەو ل دژی قەیسەری رادبیت.»
دەمێ پیلاتۆسی ئەڤ ئاخفتنە بهیستی، عیسا ئینا ژ دەرڤە و ل سەر كورسیكا دادوەریێ روینشتە خوار، ل جهەكی دگۆتنێ ‹گۆڕەپانا ب بەری رائێخستی› و ب عیبرانی ‹گاباتا›.
رۆژا ئامادەكرنا شیڤا دەربازبوونێ بوو، دەمژمێر دوازدەی نیڤرۆ بوو. ئینا پیلاتۆسی گۆتە جوهیان: «ئەڤەیە پاشایێ هەوە!»
وان كرە گازی: «ببە! ببە! وی ل خاچێ بدە!» پیلاتۆسی پرسیار ژ وان كر: «پاشایێ هەوە ل خاچێ بدەم؟» سەرۆكێن كاهنان بەرسڤا وی دا: «ژبلی قەیسەری، مە چ پاشا نینن.»
وی دەمی پیلاتۆسی ئەو رادەستی وان كر داكو بهێتە خاچدان. ئەوان ژی عیسا بر.
ئینا وی ب خۆ خاچا خۆ هەلگرت و دەركەفتە جهەكی دبێژنێ كلۆخ، ب عیبرانی دبێژنێ گۆلگۆتە.
ل وێرێ ئەو ل گەل دوو كەسێن دی ل خاچێ دان، هەر ئێك ل رەخەكی و عیسا د نیڤەكێ دا.
هەروەسا پیلاتۆسی ل سەر دەپەكی نڤیسی و ب خاچێ ڤە كر، ل سەر نڤیسی بوو: «عیسایێ ناسیرەیی، پاشایێ جوهیان.»
گەلەك ژ جوهیان ئەو نڤیسین خواند، چنكو ئەو جهێ عیسا لێ خاچ دای، یێ نێزیكی باژێڕی بوو و ئەو پارچەیا داری ب عیبرانی و لاتینی و یونانی نڤیسی بوو.
ئینا سەرۆكێن كاهنێن جوهیان گۆتە پیلاتۆسی: «نە نڤیسە: ‹پاشایێ جوهیان،› لێ بنڤیسە: ‹ڤی مرۆڤی یێ گۆتی ئەز پاشایێ جوهیانم.›»
پیلاتۆسی بەرسڤا وان دا: «ئەوا من نڤیسی، من نڤیسیە.»
دەمێ سەربازان عیسا ل خاچێ دای، جلكێن وی برن و كرنە چوار پارچە و هەر سەربازەكی پارچەیەك بر و كراسێ وی ژی برن. كراسێ وی هەمی ئێك پارچە بوو، بێ دوریار هاتبوو راچاندن.
ئینا سەربازان گۆتە ئێكودوو: «بهێلن ئەم ڤی نەدڕینین، لێ دا بهاڤێژینە پشكێ، كا دێ بۆ كێ كەڤیت.» ئەڤ چەندە روی دا، دا ئەوا د نڤیسارێ دا هاتی ب ج‍‌ھ بهێت: جلكێن من د ناڤبەرا خۆ دا لێكڤە كرن و كراسێ من هاڤێتە پشكێ. ئەڤە بوو ئەوا سەربازان كری.
ل نێزیكی خاچا عیسای، مەریەما دایكا وی و خالەتا وی و مەریەما ژنا كلوپاسی و مەریەما مەجدەلی د راوەستیای بوون.
دەمێ عیسای دایكا خۆ دیتی و ئەو شاگردێ حەز ژێ دكر یێ نێزیكی وێ راوەستیای بوو، گۆتە دایكا خۆ: «خانم، ئەڤە كوڕێ تەیە!»
پاشی گۆتە شاگردی: «ئەڤە دایكا تەیە!» هەر ژ وی دەمی شاگردی ئەو برە نك خۆ.
پشتی ڤێ چەندێ، عیسای دزانی كو هەمی تشت تەمام بوون، ئەڤجا دا نڤیسار ب ج‍‌ھ بهێت، گۆت: «ئەز یێ تێهنیمە.»
ل وێرێ جەڕەكێ پڕی شەرابا ترش هەبوو، ئینا وان ئیسفەنجەك د شەرابێ هەلاند و دانا سەر چەقەكێ زوفایێ و دانا سەر دەڤێ عیسای.
دەمێ عیسای تام كریە سهكێ، گۆت: «تەمام بوو!» سەرێ خۆ چەماند و گیانێ خۆ ژ دەست دا.
ئەو رۆژ رۆژا ئامادەكرنێ بوو، ئەڤجا دا تەرم بۆ شەمبیێ ل سەر خاچێ نەمینن، چنكو ئەو شەمبی رۆژەكا گرنگ بوو، جوهیان داخواز ژ پیلاتۆسی كر كو لنگێن خاچدایان بشكێنن و تەرمێن وان ژ وێرێ راكەن.
ئەڤجا سەرباز هاتن و ل بەراهیێ لنگێن یێ ئێكێ شكاندن و پاشی لنگێن یێ دی، ئەوێن ل گەل عیسای هاتینە خاچدان.
لێ دەمێ گەهشتینە عیسای و دیتی كو یێ مریە، لنگێن وی نەشكاندن.
لێ ئێك ژ سەربازان رمەك ل كێلەكا وی دا و د گاڤێ دا خوین و ئاڤ دەركەفتن.
یێ كو ئەڤە دیتی، وی شاهدەیی دایە، (شاهدەییا وی ژی یا دروستە و ئەو دزانیت كو ئەو یێ راستیێ دبێژیت،) دا هوین ژی باوەریێ بینن.
ئەڤێ چەندێ روی دا، دا نڤیسار ب ج‍‌ھ بهێت: چ هەستیێن وی ناهێنە شكاندن.
هەروەسا نڤیسارەكا دی دبێژیت: دێ بەرێ خۆ دەنە وی یێ وان رم لێ دای.
پشتی ڤێ چەندێ یوسڤێ ئاریمەتیایی ، كو شاگردێ عیسای بوو، لێ ب نهێنی، چنكو ئەو ژ جوهیان دترسیا، داخواز ژ پیلاتۆسی كر كو بهێلیت ئەو تەرمێ عیسای ببەت. پیلاتۆسی ژی دەستویری دایێ، ئینا ئەو هات و تەرمێ عیسای بر.
نیكودیمۆس ژی هات، ئەوێ بەری هنگی ب شەڤێ هاتیە نك عیسای، ئەوی نێزیكی سەد لیترێن موڕێ یێن تێكهەل ل گەل عودی ئینان.
ئینا وان تەرمێ عیسای بر و ل دویڤ داب و نەریتێن جوهیان یێن كفنكرنێ، بێهنێن خۆش لێ كرن و ب پارچەیێن كتانی پێچا.
ل وی جهی یێ عیسا لێ ل خاچێ دای، باغچەیەك هەبوو، د باغچەی دا گۆڕەكێ نوی هەبوو و كەسەك تێدا نەهاتبوو ڤەشارتن.
وان عیسا د وی گۆڕی دا ڤەشارت، چنكو رۆژا ئامادەكرنێ یا جوهیان بوو، گۆڕ ژی یێ نێزیك بوو.
ل رۆژا ئێكێ ژ حەفتیێ ، بەری سپێدێ كو هێشتا تاری بوو، مەریەما مەجدەلی هاتە سەر گۆڕێ عیسای، وێ دیت كو بەرێ د دەرێ گۆڕی دا یێ هاتیە لادان.
ئینا ب غار چوو نك شەمعون پەترۆسی و شاگردێ دی، ئەوێ عیسای حەز ژێ دكر و گۆتە وان: «خودان یێ ژ گۆڕی بری و ئەم نزانین دانایە كیرێ.»
ئینا پەترۆس و شاگردێ دی دەركەفتن و بەرەڤ گۆڕی چوون.
هەردوویان پێكڤە دكرە غار، لێ شاگردێ دی د بەراهیا پەترۆسی راكر و بەری وی گەهشتە سەر گۆڕی.
وی خۆ چەماند و پارچەیێن كتانی دیتن ل وێرێ دداناینە، لێ نە چوو د ژۆرڤە.
پاشی شەمعون پەترۆس د دویڤ دا گەهشتە گۆڕی و چوو ژۆر و ئەوی ژی پارچەیێن كتانی دیتن ل وێرێ دداناینە
و ئەو دەرسۆكا د سەرێ عیسای هاتیە ئالاندن، نە ل نك پارچەیێن كتانیە، لێ یا ڤەدەرە ل جهەكێ دی هاتیە پێچان.
وی دەمی شاگردێ دی ژی، ئەوێ ل بەراهیێ گەهشتیە سەر گۆڕی، هاتە ژۆر. ئەڤ چەندە دیت و باوەری ئینا،
هێشتا ئەو د نڤیسارێ نەگەهشتبوون كو پێدڤیە ئەو ژ ناڤ مریان راببیت.
پاشی هەردوو شاگرد ڤەگەڕیانە جهێن خۆ.
لێ مەریەم ژ دەرڤەی گۆڕی ما راوەستیای و دگریا. دەمێ وێ دكرە گری، خۆ بەرەڤ گۆڕی چەماند،
ئینا وێ دوو فریشتە ب جلكێن سپی دیتن، ل وی جهی یێ تەرمێ عیسای لێ هاتیە دانان د روینشتی بوون، ئێك ل جهێ سەرێ وی و یێ دی ل جهێ پێیێن وی.
ئینا ئەوان پرسیار ژێ كر: «خانم، تۆ بۆچی دكەیە گری؟» وێ بەرسڤا وان دا: «وان خودانێ من بر و ئەز نزانم دانایە كیرێ!»
دەمێ وێ ئەڤ چەندە گۆتی، ل پشت خۆ زڤڕی و عیسا دیت یێ راوەستیای بوو، لێ نەزانی ئەو عیسایە.
ئینا عیسای پرسیار ژێ كر: «خانم، تۆ بۆچی دكەیە گری؟ تۆ ل كێ دگەڕیێی؟» وێ هزر كر ئەو باغچەڤانە، ئینا گۆتێ: «ئەزبەنی، ئەگەر تە بریە، بێژە من تە دانایە كیرێ، دا ئەز ببەم.»
عیسای گۆتێ: «مەریەم!» ئینا ئەو ل خۆ زڤڕی و ب عیبرانی گۆتێ: «رابۆنی!» ئانكو «مامۆستا.»
عیسای گۆتێ: «من نەگرە، چنكو هێشتا ئەز بلند نەبوویمە نك بابی. لێ هەڕە نك برایێن من و بێژە وان كو ئەز دێ بلند بمە نك بابێ خۆ و بابێ هەوە، نك خودایێ خۆ و خودایێ هەوە.»
ئینا مەریەما مەجدەلی ڤەگەڕیا نك شاگردان و گۆت: «من خودان دیت!» و تشتێن وی گۆتینە وێ، گەهاندنە وان.
ل ئێڤاریا وێ رۆژێ، كو ئێكەمین رۆژا حەفتیێ بوو، شاگرد ل مالەكێ كۆم ببوون و ژ ترسا جوهیان ، دەرگە‍‌ھ ل خۆ دائێخستبوون. عیسا هات و د ناڤەڕاستا وان دا راوەستیا و گۆتێ: «ئاشتی بۆ هەوە بیت!»
پشتی ئەو چەند گۆتی، دەستێن خۆ و كێلەكا خۆ نیشا وان دان. ئینا شاگرد گەلەك دلخۆش بوون، چنكو وان خودان دیت.
دیسان گۆتە وان: «ئاشتی بۆ هەوە بیت! كا چەوا بابی ئەز هنارتم، وەسا ئەز ژی هەوە دهنێرم.»
دەمێ وی ئەڤ چەندە گۆتی، پف كرە وان و گۆتێ: «گیانێ پیرۆز وەرگرن.
هوین ل گونەهێن كێ ببورن، دێ لێ هێتە بورین و یێ هوین لێ نەبورن، ل وی ناهێتە بورین.»
لێ توماس، كو ئێك ژ هەر دوازدە شاگردان بوو، ب ناڤێ ‹دێدیمۆس› یێ ناڤدار بوو، دەمێ عیسا هاتی، ئەو ل گەل شاگردان نەبوو.
ئینا شاگردێن دی گۆتێ: «مە خودان دیت!» لێ وی بەرسڤا وان دا: «ئەگەر ئەز جهێ بزماران ل سەر دەستێن وی نەبینم و تبلا خۆ نەكەمە د جهێ بزماران را و دەستێ خۆ نەكەمە د كێلەكا وی را، ئەز ئێكجار باوەر ناكەم.»
پشتی هەشت رۆژان، شاگردێن وی جارەكا دی ل مالەكێ بوون و توماس ژی ل گەل وان بوو. هەر چەندە دەرگە‍‌ھ د دائێخستی بوون، لێ عیسا هات و د ناڤەڕاستا وان دا راوەستیا و گۆت: «ئاشتی بۆ هەوە بیت!»
پاشی گۆتە توماسی: «تبلا خۆ بینە ڤێرێ و بەرێ خۆ بدە دەستێن من و دەستێ خۆ بینە و بكە د كێلەكا من را و یێ بێباوەر نەبە، لێ یێ ب باوەر بە.»
ئینا توماسی بەرسڤا وی دا و گۆت: «خودانێ من و خودایێ من!»
عیسای گۆتێ: «چنكو تە ئەز دیتم، تە باوەری ئینا؟ خوزیكێن وان كەسان یێن نەدیتی و باوەری ئینای.»
عیسای ل پێش چاڤێن شاگردێن خۆ گەلەك نیشانێن دی كرن، كو د ڤێ پەرتووكێ دا نەهاتینە نڤیسین،
لێ ئەڤە هاتنە نڤیسین دا هوین باوەریێ بینن كو عیسایە مەسیحێ كوڕێ خودێ و هەوە ب رێكا وێ باوەریێ ژیان ب ناڤێ وی هەبیت.
پشتی ڤێ چەندێ، عیسای جارەكا دی خۆ بۆ شاگردێن خۆ ل بەر لێڤا دەریاكا تەبەریە دیار كر. وی هۆسا خۆ دیار كر:
شەمعون پەترۆس، توماس یێ دگۆتنێ دێدیمۆس، ناتانائێل یێ كو ژ قانایا جەلیلێ بوو، هەردوو كوڕێن زەبەدی و دوو شاگردێن دی ل گەل ئێك بوون.
ئینا شەمعون پەترۆسی گۆتە وان: «ئەز دێ چم ماسیان گرم.» وان گۆتێ: «ئەم ژی دێ ل گەل تە هێین.» چوون و ل بەلەمێ سیار بوون، لێ د وێ شەڤێ دا وان چ ماسی نەگرتن.
دەمێ بوویە سپێدە، عیسا ل سەر كناری راوەستیا، لێ شاگردان نەزانی كو ئەو عیسایە.
عیسای پرسیار ژ وان كر: «لاوكینۆ، هەوە چ ماسی نەگرتینە؟» وان بەرسڤا وی دا: «نەخێر.»
ئینا گۆتە وان: «تۆڕێ بهاڤێژنە رەخێ راستێ یێ بەلەمێ، دێ گرن.» ئەڤجا وان هاڤێت و ئێدی ژ بەر گەلەكیا ماسیان، ئەو نەشیان تۆڕێ بهەلكێشن.
ئەو شاگردێ عیسای حەز ژێ دكر گۆتە پەترۆسی: «ئەو خودانە!» دەمێ شەمعون پەترۆسی بهیستی كو ئەو خودانە، كوركێ خۆ د خۆ وەركر، چنكو یێ رویس بوو و خۆ هاڤێتە د دەریاكێ دا.
لێ شاگردێن دی ب بەلەمێ هاتن و وان تۆڕ ب ماسی ڤە رادكێشا، چنكو گەلەك ژ هشكاتیێ د دویر نەبوون، ب تنێ سەد گەزان.
دەمێ دەركەفتینە هشكاتیێ، وان ل وێرێ پەل دیتن و ماسی ل سەر بوون و نان ژی هەبوو.
عیسای گۆتە وان: «هندەك ژ وان ماسیان بینن یێن هەوە نوكە گرتین!»
ئینا شەمعون پەترۆس ب سەركەفتە بەلەمێ و تۆڕ راكێشا سەر هشكاتیێ، یا تژی ماسیێن مەزن بوو، سەد و پێنجی و سێ بوون. سەرەڕای كو ماسی گەلەك بوون، لێ تۆڕ نەدڕیا.
عیسای گۆتە وان: «وەرن تێشتێ بخۆن.» كەس ژ شاگردان نەوێریا پرسیارێ ژێ بكەت: «تۆ كی؟» چنكو وان دزانی كو ئەو خودانە.
ئینا عیسا هات، نان هەلگرت و دا وان، هەروەسا ماسی ژی.
ئەڤە جارا سێیێ بوو عیسا بۆ شاگردێن خۆ دیار دبیت، پشتی ژ ناڤ مریان رابووی.
پشتی وان تێشت خواری، عیسای پرسیار ژ شەمعون پەترۆسی كر: «شەمعونێ كوڕێ یوحەننای، تۆ ژ ئەڤان پتر حەز ژ من دكەی؟» وی بەرسڤ دا: «بەلێ خودان، تۆ دزانی ئەز حەز ژ تە دكەم.» عیسای گۆتێ: «بەرخێن من بچەرینە.»
عیسای جارەكا دی پرسیار ژێ كر: «شەمعونێ كوڕێ یوحەننای، تۆ حەز ژ من دكەی؟» وی بەرسڤ دا: «بەلێ خودان، تۆ دزانی ئەز حەز ژ تە دكەم.» عیسای گۆتێ: «شڤانیێ ل پەزێ من بكە.»
عیسای بۆ جارا سێیێ پرسیار ژێ كر: «شەمعونێ كوڕێ یوحەننای، تۆ حەز ژ من دكەی؟» پەترۆس خەمگین بوو، چنكو جارا سێیێ گۆتێ «تۆ حەز ژ من دكەی؟» ئینا گۆتێ: «خودان، تۆ هەمی تشتان دزانی، تۆ دزانی ئەز حەز ژ تە دكەم.» عیسای گۆتێ: «پەزێ من بچەرینە.
ب راستی ب راستی دبێژمە تە: دەمێ تۆ یێ گەنج، تە كەمەرا خۆ گرێ ددا و هەر جهێ تە دڤیا تۆ دچوویێ. لێ دەمێ تۆ پیر دبی، دێ دەستێن خۆ درێژ كەی و ئێك دێ كەمەرا تە گرێ دەت و دێ تە بەتە وی جهی یێ تە نەڤێت بچیێ.»
عیسای ئەڤ چەندە گۆت و وی ئاماژە دكرە وێ مرنێ، ئەوا كو دێ پەترۆس مەزناهیا خودێ پێ دیار كەت. پشتی ئەڤ چەندە گۆتی، گۆتە وی: «ل دویڤ من وەرە!»
پەترۆس ل پشت خۆ زڤڕی، دیت كو ئەو شاگردێ عیسای حەز ژێ دكر یێ ل دویڤ وان دچیت، ئەڤە هەر ئەوە یێ ل سەر شیڤێ خۆ خواركریە بەر سینگێ عیسای و گۆتیێ: «خودان، ئەو كیە دێ بێبەختیێ ل تە كەت؟»
ئەڤجا دەمێ پەترۆسی ئەو دیتی، پرسیار ژ عیسای كر: «خودان، دێ چ ل ڤی هێت؟»
عیسای بەرسڤا وی دا: «ئەگەر من بڤێت ئەو بمینیتە ساخ تاكو ئەز ڤەگەڕیێم، ما تە چ ژێیە؟ تۆ ل دویڤ من وەرە!»
ئەڤجا ئەڤ گۆتنە د ناڤ خویشك و برایان دا بەڵاڤ بوو كو ئەو شاگرد نامریت. لێ عیسای نەگۆتبوو كو ئەو نامریت، لێ گۆتبوو: «ئەگەر من بڤێت ئەو بمینیتە ساخ تاكو ئەز ڤەگەڕیێم، ما تە چ ژێیە؟»
ئەو شاگرد ژی ئەوە یێ شاهدەییێ ل سەر ڤان تشتان ددەت و ئەڤە نڤیسین و ئەم دزانین كو شاهدەییا وی راستە.
گەلەك تشتێن دی ژی یێن هەین كو عیسای یێن كرین. ئەگەر ئێك ئێكە هاتبانە نڤیسین، ئەز یێ ل وێ باوەریێ كو جیهانێ هەمیێ تێرا وان پەرتووكێن نڤیسی نەدكر.
بەڕێز تیوفیلۆس، د نڤیسارا خۆ یا ئێكێ دا ، من بۆ تە دەربارەی وان هەمی تشتان نڤیسی یێن كو عیسای كرین و فێركرن پێ كری، هەر ژ دەمێ وی دەست ب كارێ خۆ كری،
تا وێ رۆژا ئەو بۆ ئەسمانان هاتیە بلندكرن، پشتی ب گیانێ پیرۆز شیرەتێن خۆ بۆ وان هنارتیێن وی هەلبژارتین پێشكێش كرین.
پشتی وی ئازار كێشاین، ئەوی ب گەلەك بەلگەیان خۆ نیشا وان دا كو یێ ساخە. بۆ ماوێ چل رۆژان بۆ وان دیار بوو و دەربارەی پاشایەتیا خودێ ئاخفت.
جارەكێ دەمێ ئەو ل گەل وان بوو، فەرمان ل وان كر و گۆتێ: «ئورشەلیمێ ب ج‍‌ھ نەهێلن، لێ چاڤەڕێی سۆزا بابی بن، ئەوا هەوە ژ من بهیستی.
یوحەننای خەلك ب ئاڤێ تافیر دكر، لێ هوین پشتی چەند رۆژەكێن دی، دێ ب گیانێ پیرۆز هێنە تافیركرن.»
ئەڤجا دەمێ هنارتی ل نك وی كۆمبووین، پرسیار ژێ كر: «خودان، ما ئەڤە ئەو دەمە یێ تۆ دێ پاشایەتیێ بۆ مللەتێ ئیسرائیلێ ڤەگەڕینی؟»
بەرسڤا وان دا: «ئەو نە كارێ هەوەیە، هوین دەم و ژڤانێن بابی ب دەستهەلاتا خۆ داناین، بزانن.
لێ دەمێ گیانێ پیرۆز ب سەر هەوە دا دهێت، دێ هوین هێزێ وەرگرن و دێ ل ئورشەلیمێ و هەمی یەهودیایێ و سامەریایێ تاكو هەر چوار كوژیێن جیهانێ بنە شاهدێن من.»
دەمێ عیسای ئەڤ ئاخفتنە گۆتین، ل بەر چاڤێن وان بۆ ئەسمانان هاتە بلندكرن، پاشی عەورەكی ئەو ژ بەر چاڤێن وان بەرزەكر.
دەمێ وان بەرێ خۆ ددا چوونا وی بۆ ئەسمانان، ژ نشكەكێ ڤە دوو زەڵامێن جلك سپی ب رەخ وان ڤە ژ پێرڤە دیار بوون
و گۆتنێ: «گەلی جەلیلیان، بۆچی هوین د راوەستیاینە و بەرێ هەوە ل ئەسمانانە؟ ئەڤە ئەو عیسایە، ئەوێ بۆ ئەسمانان هاتیە بلندكرن، دێ هۆسا ڤەگەڕیتەڤە، هەروەكو هەوە دیتی دچوو.»
پاشی ژ چیایێ دگۆتنێ چیایێ زەیتوونان، ڤەگەڕیانە ئورشەلیمێ، كو رێیا رۆژەكا شەمبی ژ ئورشەلیمێ یێ دویر بوو.
دەمێ ئەو ب ژۆر كەفتینە باژێڕی، چوونە وێ ژۆرا سەری یا پەترۆس، یوحەننا، یەعقوب، ئەندراوس، فیلیپۆس، توماس، بەرتولماوس، مەتتا، یەعقوبێ كوڕێ حەلفی، شەمعونێ وەڵاتپەروەر و یەهودایێ كوڕێ یەعقوبی تێدا دمان.
ئەڤە هەمی، ل گەل هندەك ژنكان و مەریەما دایكا عیسای و برایێن وی، ب ئێك دل ل سەر نڤێژان د بەردەوام بوون.
د وان رۆژان دا، پەترۆس د ناڤ باوەرداران دا، كو ژمارەیا وان نێزیكی سەد و بیست كەسان بوو، رابوو و گۆت:
«گەلی برایان، پێدڤی بوو ئەو نڤیسار ب ج‍‌ھ هاتبا، ئەوا پێشوەخت گیانێ پیرۆز ل سەر ئەزمانێ داوود پێغەمبەری، سەبارەت یەهودای گۆتی، ئەوێ بوویە رێبەرێ وان كەسێن عیسا گرتی.
ئەو ئێك ژ مە دهاتە هژمارتن و بەهر د ڤێ خزمەتێ دا هەبوو.»
(ب پارەیێ خرابیا خۆ زەڤیەك كڕیبوو، ئینا ل وێ زەڤیێ كەفتە سەر دەڤێ خۆ و زكێ وی شەق بوو و هناڤێن وی هاتنە دەرێ
و هەمی خەلكێ ئورشەلیمێ ب ڤێ رویدانێ زانی، كو ئەو زەڤی ب زمانێ وان ب ‹هاكلدەمەخ› هاتە بناڤكرن، ئانكو ‹زەڤیا خوینێ.› )
پەترۆس بەردەوام بوو و گۆت: «چنكو د پەرتووكا زەبوورێ دا هاتیە نڤیسین: ‹بلا مالا وی كاڤل ببیت و كەس تێدا نەمینیت.› هەروەسا: ‹بلا ئێكێ دی ب ئەركێ وی راببیت.›
ئەڤجا وان دوو كەس پێشنیار كرن، ئێك ژ وان یوسڤ بوو، ئەوێ دگۆتنێ بارساباس و ب ‹یوستۆس› یێ ناڤدار بوو و یێ دی مەتیاس بوو.
وان نڤێژ كر و گۆت: «هەی خودان تۆ دلێ هەر مرۆڤەكی دزانی، بۆ مە دیار بكە، كا تە كی ژ ڤان هەردوو زەڵامان هەلبژارتیە،
دا جهێ یەهودای د ڤێ خزمەت و هنارتیبوونێ دا بگریت، ئەوا یەهودای ژێ لادای داكو بچیتە جهێ هەژی خۆ.»
پشك هاڤێت و ناڤێ مەتیاسی دەركەفت و مەتیاس ئێك ل گەل هەر یازدە هنارتیان هاتە هژمارتن.
دەمێ جەژنا رۆژا پێنجیێ هاتی، ئەو هەمی پێكڤە ل جهەكی بوون.
ژ نشكەكێ ڤە دەنگەك ژ ئەسمانان هات هەروەكو دەنگێ هڕوبایەكی و ئەو مالا لێ روینشتین ژ دەنگێ هڕوبای تژی بوو.
ئەڤجا بۆ وان ئەزمانێن وەكو گوڕیا ئاگری دیار بوون، بەڵاڤ بوون و هەر ئەزمانەكی دادا سەر ئێك ژ وان،
هەمی ژ گیانێ پیرۆز پڕ بوون و ب زمانێن دی دەست ب ئاخفتنێ كرن، هەروەكو گیانێ پیرۆز شیان دایە وان.
ل وی دەمی جوهیێن ژ خودێ ترس، یێن ژ هەمی وەڵاتێن جیهانێ هاتین، ل ئورشەلیمێ بوون.
دەمێ ئەو دەنگ هاتی، خەلك ل وان خڕڤە بوون و مەندەهۆش بوون، چنكو هەر كەسەكی ژ وان گو‍‌ھ لێ دبوو كو ئەو یێ ب زمانێ وی دئاخڤن،
حێبەتی بوون و گۆتن: «ئەرێ ئەڤێن دئاخڤن نە خەلكێ جەلیلن؟
پا چەوا هەر ئێك ژ مە، ب زمانێ وی باژێڕێ لێ پەیدا بووی، دبهیسیت؟
هندەك ژ مە ئەشكانینە، میدینە، ئیلامینە، هندەك ژ ئاكنجیێن مێزۆپۆتامیا، دەڤەرا یەهودیایێ، هەرێمێن كەپەدۆكیا، پۆنتۆس، ئاسیا ،
فریگیا و پامفیلیا، مسرێ و دەڤەرێن لیبیا ئەوێن نێزیكی قەیرەوانێ و گەلەك مێڤانێن رۆمایی ژی یێن د ناڤ مە دا،
جوهی و ئەوێن بووینە جوهی، هەروەسا كریتی و عەرەب ژی. ئەم دبهیسین ئەڤە یێ ب زمانێن مە، ل سەر كارێن مەزن یێن خودێ، دئاخڤن.»
هەمی حێبەتی بوون و هزرێن وان ئالۆز بوون و پرسیار ژ ئێكودوو كرن: «رامانا ڤێ چەندێ چیە؟»
لێ هندەكان ب سڤكاتی ڤە گۆتن: «ئەو دسەرخۆشن!»
پەترۆس ل گەل هەر یازدە هنارتیان راوەستیا و ب دەنگەكێ بلند گۆت: «گەلی جوهیان و هەمی ئاكنجیێن ئورشەلیمێ، گو‍‌ھ بدەنە ئاخفتنا من، دا ئەز بۆ هەوە ڤێ چەندێ روهن بكەم.
ئەڤە نە دسەرخۆشن هەروەكو هوین هزر دكەن، چنكو هێشتا دەمژمێر نەهێ سپێدێیە.
لێ ئەڤەیە ئەوا ل سەر زارێ یۆئێل پێغەمبەری هاتیە گۆتن:
‹خودێ دبێژیت ئەز د ڤان رۆژێن دویماهیێ دا، دێ ژ گیانێ خۆ داڕێژمە سەر هەمی مرۆڤان و كچ و كوڕێن هەوە دێ پەیامان گەهینن و خۆرتێن هەوە دێ بینینان بینن و پیرەمێرێن هەوە دێ خەونان بینن.
خۆ ل سەر بەنیێن خۆ ژی ژ ژنك و زەڵامان، ل وان رۆژان ئەز دێ گیانێ خۆ داڕێژم و ئەو دێ پەیامێ گەهینن.
ئەز دێ ل ژۆری، ل ئەسمانی، مەندەهۆشیان دیار كەم و ل ژێری، ل ئەردی، نیشانان، خوین و ئاگر و دویكێلەكا زۆر پەیدا كەم.
بەری رۆژا خودانی یا گراڤی و بەركەفتی بهێت، چاڤێ رۆژێ دێ تاری بیت و هەیڤ ژی دێ وەكو خوینێ سۆر بیت
و هەر كەسەكێ هەوارا خۆ بگەهینیتە ناڤێ خودانی، دێ قورتال بیت.›
گەلی ئیسرائیلیان، گوهێ خۆ بدەنە ڤێ ئاخفتنێ: عیسایێ ناسیرەیی مرۆڤەكە ژ لایێ خودێ ڤە بۆ هەوە هاتیە پەسەندكرن. هەروەكو هوین دزانن، خودێ ل سەر دەستێ وی گەلەك حنێر و مەندەهۆشی و نیشان د ناڤ هەوە دا یێن كرین.
ئەو، ل دویڤ نەخشەیێ ڤەبڕ و زانینا پێشوەخت یا خودێ، رادەستی هەوە هاتە كرن و هەوە ب دەستێن خودێنەنیاسان خاچ دا و كوشت،
لێ خودێ ژ مرنێ راكرەڤە و ژ ئێشانێن مرنێ ئازاد كر، چنكو مرن نەشیا وی دەستەسەر بكەت.
داوود دەربارەی وی دبێژیت: ‹من هەردەم ل بەرامبەری خۆ خودان ددیت، ئەو دەستێ من یێ راستێیە، ئەز نالقیێم.
ژ بەر وێ چەندێ دلێ من پڕ خۆش بوو و ئەزمانێ من گەلەك شاد بوو و دێ لەشێ من د هیڤیان دا ژیت.
چنكو تۆ دەروونێ من ناهێلییە د وارێ مریان دا و تۆ ناهێلی وەفادارێ تە تووشی رزیبوونێ ببیت.
تە رێكێن ژیانێ بۆ من دانە نیاسین و دێ ب دیدارا خۆ من پڕ شادی كەی.›
گەلی برایان، دێ ب ئاشكرایی بێژمە هەوە، كو بابێ مە داوود یێ مری و یێ هاتیە ڤەشارتن و گۆڕێ وی تا ئەڤرۆ یێ مایە ل نك مە.
ئەڤجا، ژ بەر كو داوود پێغەمبەر بوو، دزانی خودێ سویند یا بۆ خواری، كو ئێك دێ ژ دویندەها وی هێت و دێ ل سەر تەختێ وی روینیت.
ئەوی پێشوەخت دیت و ل سەر رابوونا مەسیحی ئاخفت و گۆتبوو ئەو د وارێ مریان دا نەهاتە هێلان و لەشێ وی تووشی رزیبوونێ نەبوو.
خودێ ئەڤ عیسایە ژ مرنێ ساخ كرەڤە و ئەم هەمی بۆ وێ راستیێ شاهدین.
ئەڤجا عیسا بۆ دەستێ راستێ یێ خودێ هاتە بلندكرن و سۆز كو گیانێ پیرۆزە ژ بابی وەرگرت و ئەو سۆزا دایێ ئەڤا نوكە هوین دبینن و دبهیسن، ئەوا ب سەر مە دا رشتی.
داوود نە بلند ببوو ئەسمانان و ئەو ب خۆ دبێژیت: ‹خودانی گۆتە خودانێ من: ل دەستێ من یێ راستێ روینە،
تاكو ئەز دوژمنێن تە بكەمە تەختەپێ بۆ پێیێن تە.›
بلا هەمی خەلكێ ئیسرائیلێ پشتڕاست بزانن، كو عیسا ئەوێ هەوە ب خاچێ ڤە هەلاویستی، خودێ یێ كریە خودان و مەسیح ژی!»
دەمێ ئامادەبوویان گو‍‌ھ ل ڤێ ئاخفتنێ بووی، هەروەكو تیرەك ب دلێ وان كەفتی و پرسیار ژ پەترۆس و هنارتیێن دی كرن و گۆتن: «گەلی برایان، ئەم چ بكەین؟»
پەترۆسی بەرسڤا وان دا و گۆت: «ل خۆ بزڤڕن و بلا هەر كەسەك ژ هەوە بۆ لێبورینا گونەهان ب ناڤێ عیسایێ مەسیح بهێتە تافیركرن و دێ دیاریا گیانێ پیرۆز وەرگریت،
چنكو سۆز بۆ هەوە و زاڕۆكێن هەوەیە و بۆ وان هەمی كەسێن دویرە، ئەوێن خودان خودایێ مە دێ گازی كەتێ.»
پەترۆسی گەلەك شیرەتێن دی بۆ ئامادەبوویان گۆتن: «خۆ ژ ڤی نفشێ ڤاڕێ قورتال بكەن!»
ئەو كەسێن ئاخفتنا وی ب دلەكێ فرە‍‌ھ وەرگرتی، هاتنە تافیركرن و ل وێ رۆژێ نێزیكی سێ هزار مرۆڤان گەهشتنە جڤاتا وان.
ئەوان خۆ بۆ گوهداریا فێركرنێن هنارتیان، ژیانا هەڤپشكیێ، كەركرنا نانی و نڤێژان تەرخان دكر.
گەلەك مەندەهۆشی و نیشان ل سەر دەستێ هنارتیان هاتنە كرن و ترس كەفتە د ناڤ دلێ هەمی مرۆڤان دا،
هەمی باوەردار د ئێكگرتی بوون و ئەو د هەمی تشتێ وان هەیی دا د هەڤپشك بوون.
مال و ملكێن خۆ دفرۆتن و بهایێ وان ل دویڤ پێدڤی یا هەر ئێكی ل سەر خۆ لێكڤەدكر.
ئەو هەر رۆژ ب ئێك دل ل سەر كۆمبوونێ د حەوشا پەرستگەهێ دا د بەردەوام بوون و د مالان دا نان كەر دكر و ب شادی و دلساخی خوارن پێكڤە دخوار.
پەسنا خودێ دكرن و جهێ رەزامەندیا هەمیان بوون و خودانی رۆژانە ئەوێن قورتال دبوون زێدە دكرن.
رۆژەكێ پەترۆس و یوحەننا ل دەمژمێر سێیێ پشتی نیڤرۆ ل دەمێ نڤێژێ سەردكەفتنە پەرستگەهێ.
ل دەرگەهێ پەرستگەهێ یێ كو دگۆتنێ ‹دەرگەهێ جوان›، زەڵامەك هەبوو هەر ژ زكماكی یێ فاڵنجی بوو، هەر رۆژ دهاتە هەلگرتن و ل وێرێ ددانا، دا خێران ژ ئەوێن دهێنە پەرستگەهێ بخوازیت.
دەمێ دیتی پەترۆس و یوحەننای ل بەرە ب ژۆر بكەڤن، خێر ژ وان خواست.
پەترۆسی و یوحەننای ب هویری بەرێ خۆ دایێ و پەترۆسی گۆتێ: «بەرێ خۆ بدە مە.»
چاڤێ وی زل ما ل وان و ل هیڤیێ بوو، كو خێرەكێ ل گەل بكەن.
ئینا پەترۆسی گۆت: «نە من زیڤ هەیە و نە زێڕ، لێ ئەز دێ وی دەمە تە یێ من هەی: ب ناڤێ عیسایێ مەسیحێ ناسیرەیی رابە و بڕێڤە هەڕە.»
ب دەستێ راستێ گرت و راوەستاند و د ج‍‌ھ دا هێز كەفتە پێ و گۆزەكێن وی،
خۆ هەڵاڤێت و راوەستیا و دەست ب بڕێڤەچوونێ كر و ل گەل وان چوو د حەوشا پەرستگەهێ دا و د ناڤ دا دگەڕیا، خۆ دهەڵاڤێت و پەسنا خودێ دكر.
هەمیێن ئامادە بووی دیت ئەو یێ بڕێڤە دچیت و پەسنا خودێ دكەت،
نیاسی كو ئەو خوازۆكە یێ ل بەر ‹دەرگەهێ جوان› یێ پەرستگەهێ دروینشت، ژ بەر ڤێ رویدانێ حێبەتی و مەندەهۆش بوون.
ئەوێ بەری نوكە فاڵنجی پەترۆس و یوحەننا گرتن و بەرنەددان، وی دەمی گەلەك خەلك ب لەز و حێبەتی ل دەوروبەرێن وان د ناڤ ئەیوانا پەرستگەهێ دا، ئەوا ب ‹ئەیوانا سلێمان› ناڤدار، خڕڤە بوون.
دەمێ پەترۆسی ئەڤ چەندە دیتی، گۆتە وان: «گەلی ئیسرائیلیان، بۆچی هوین ب ڤێ چەندا رویدای حێبەتی دبن؟ و بۆچی هوین وەسا بەرێ خۆ ددەنە مە، هەروەكو مە ب شیان و خودێترسیا خۆ وە كربیت، كو ئەڤ زەڵامە بڕێڤە بچیت؟
خودایێ ئیبراهیمی و خودایێ ئیسحاقی و خودایێ یەعقوبی، خودایێ بابكالێن مە، خزمەتكارێ خۆ عیسا پایەبەرز كر، یێ كو هەوە دایە دەستێ پیلاتۆسی و ماندەل كری، دەمێ وی دڤیا عیسای ئازاد بكەت.
هەوە یێ راست و پیرۆز ماندەل كر و داخواز كر مێركوژەك بۆ هەوە بهێتە ئازادكرن.
هەوە ژیاندەر كوشت، لێ خودێ ژ ناڤ مریان راكر. ئەم ل سەر ڤێ چەندێ شاهدین.
ژ ئەگەرێ باوەریێ ب ناڤێ وی، ئەڤ كەسێ هوین دبینن و دنیاسن ب هێز كەفت. ناڤێ عیسای ئەو بهێز ئێخست. باوەری ئینانێ ب وی ئەڤ ساخلەمیە ل بەر چاڤێن هەوە هەمیان دایێ.
گەلی برایان، ئەز دزانم هەوە و سەرۆكێن هەوە ب نەزانین ئەڤ كریارە ل گەل عیسای كر،
لێ خودێ ئەو چەندا پێشوەخت ل سەر ئەزمانێ هەمی پێغەمبەرێن خۆ راگەهاندی ب ج‍‌ھ ئینا، كو مەسیح دێ ئازارێ كێشیت.
ئەڤجا ل خۆ بزڤڕن و بۆ خودێ ڤەگەڕنەڤە دا ل گونەهێن هەوە بهێتە بورین،
دا دەمێن ڤەگەشبوونێ ژ دەڤ خودانی بهێن و مەسیحی بۆ هەوە بهنێریت، ئەوێ ژ بەرێ وەرە بۆ هەوە هاتیە دانان، كو عیسایە.
فەرە ئەو ل ئەسمانان بهێتە وەرگرتن، تا دەمێ نویكرنا هەمی تشتان، هەروەكو خودێ ل سەر ئەزمانێ پێغەمبەرێن خۆ یێن پیرۆز ژ كەڤن دا گۆتی.
مووسای گۆت: ‹خودان خودایێ هەوە، دێ ژ ناڤ برایێن هەوە پێغەمبەرەكێ وەكو من بۆ هەوە هنێریت. ب هەمی تشتێن دبێژیتە هەوە، گوهداریا وی بكەن.
هەر كەسێ گوهداریا وی نەكەت، دێ ژ ناڤ مللەتی هێتە ڤەقەتاندن و ژناڤبرن.›
هۆسا هەمی پێغەمبەران ژ ساموئێلی بگرە تا وان كەسێن ل دویڤ وی هاتین، پێشوەخت هاتنا ڤان رۆژان راگەهاند.
هوین میراتگرێن پێغەمبەران و وێ پەیمانێنە، ئەوا خودێ ل گەل بابكالێن مە گرێ دای دەمێ گۆتیە ئیبراهیمی: ‹ب دویندەها تە، هەمی مللەتێن ئەردی دێ هێنە بەرەكەتدار كرن.›
خودێ خزمەتكارێ خۆ ژ ناڤ مریان راكر و ل بەراهیێ بۆ هەوە هنارت، داكو هەر ئێك ژ هەوە ژ كارێن وی یێن نەباش ڤەگەڕینیت و هۆسا هەوە بەرەكەتدار بكەت.»
دەمێ پەترۆس و یوحەننا بۆ ئامادەبوویان دئاخفتن، هندەك كاهن و سەرۆكێ زێرەڤانێن پەرستگەهێ و سەدوقی هاتنە نك
و گەلەك پێ دلگران بوون، چنكو خەلك فێر دكرن و ئاگەهدار دكرن، كو رابوونا مریان راستیەكە ب رێكا رابوونا عیسای هاتیە سەلماندن.
ئینا هەردوو گرتن و هەتا رۆژا پاشتر هاڤێتنە د زیندانێ دا، چنكو دەم ئێڤار بوو.
لێ گەلەك ژ وان ئەوێن گو‍‌ھ ل پەیڤێ بووین، باوەری پێ ئینان و ژمارەیا باوەرداران گەهشتە نێزیكی پێنج هزار زەڵامان.
ل رۆژا پاشتر ل ئورشەلیمێ سەرۆكێن جوهیان و ریهسپی و مامۆستایێن دەستووری كۆم بوون،
حەننانێ سەرۆككاهن، قەیافا، یوحەننا، ئەسكەندەر و هەمی كەسێن ژ بنەمالا سەرۆكێن كاهنان ل گەل وان بوون،
پەترۆس و یوحەننا ل ناڤەندێ راوەستاندن و پرسیار ژێ كرن: «هەوە ب هێز و ناڤێ كێ ئەڤ كارە كر؟»
هنگی پەترۆس ژ گیانێ پیرۆز پڕ بوو و بەرسڤا وان دا: «گەلی سەرۆكێن مللەتی، گەلی ریهسپیان،
ئەگەر ئەڤرۆ لێپرسین ل گەل مە بهێتە كرن ژ بەر وێ چاكیا ل مرۆڤێ نەساخ هاتیە كرن، كا ب چ ساخ بوویە،
بلا هوین هەمی و گشت مللەتێ ئیسرائیلێ ژی بزانن، كو ب ناڤێ عیسایێ مەسیح یێ ناسیرەیی، ئەوێ هەوە خاچ دای و ئەوێ خودێ ژ ناڤ مریان راكری، ئەڤ زەڵامە ل بەرامبەری هەوە ساخلەم راوەستیاییە.
ئەڤە ئەو بەرە، ئەوێ ژ لایێ هەوە هۆستایان ڤە هاتیە رەتكرن، یێ بوویە بەرێ بنیاتی.
قورتالكرن ژ وی پێڤەتر ب دەستێ كەسەكێ دی نینە، چنكو چ ناڤێن دی د بن ئەسمانی ڤە بۆ مرۆڤان نەهاتینە دان، كو دڤێت ئەم پێ قورتال ببین.»
دەمێ ئەوێن كۆم بووی، وێرەكیا پەترۆسی و یوحەننای دیتی و تێ ئینایە دەر كو ئەو د نەخواندەوار و ئاسایینە، حێبەتی بوون و وان زانی كو ئەو ل گەل عیسای بوون.
لێ ژ بەر كو وان ئەو مرۆڤێ ساخ بووی دیت ل گەل پەترۆس و یوحەننای یێ راوەستیای، وان چ تشت نەبوو پێ بەرسڤێ بدەن.
ئەڤجا فەرمان ل وان كر كو ژ جڤاتێ دەركەڤن، دا پرسیارا خۆ ب ئێكودوو بكەن.
گۆتن: «ئەم چ ل ڤان هەردوو مرۆڤان بكەین؟ چنكو بۆ هەمی خەلكێ ئورشەلیمێ یا دیارە، كو نیشانەكا مەزن ل سەر دەستێ وان یا هاتیە كرن و ئەم نەشێین ماندەل بكەین!
لێ دا ئەڤ تشتە د ناڤ مللەتی دا پتر بەڵاڤ نەبیت، دا گەفا لێ بكەین، داكو ژ ئەڤرۆ پێڤە بەحسێ ڤی ناڤی ل نك چ كەسان نەكەن.»
ئەڤجا گازی وان كرن و فەرمان ل وان كر كو چێنابیت ئەو ب ناڤێ عیسای بئاخڤن و خەلكی فێر بكەن،
لێ پەترۆسی و یوحەننای گۆتێ: «ما ل بەرامبەری خودێ كیژ دروستترە، ئەم گوهداریا هەوە، یان یا خودێ بكەین؟ هوین بڕیارێ بدەن،
چنكو ئەم نەشێین ئەو تشتێن مە دیتین و گو‍‌ھ لێ بووین نەبێژین.»
پشتی كو پتر گەف لێ كرین، ئەو بەردان. ژ بەر خەلكی چ رێ نەدیتن سزا بدەن، چنكو هەمیان ژ بەر تشتێ چێبووی پەسنا خودێ دكر،
ژ بەر كو ئەو زەڵامێ نیشانا ساخلەمیێ لێ دیار بووی ژ چل ساڵیێ بوری بوو.
دەمێ پەترۆس و یوحەننا ئازاد كرین، ڤەگەڕیانە نك هەڤالێن خۆ و ئەو ئاخفتنێن سەرۆكێن كاهنان و ریهسپیان گۆتینێ بۆ وان گۆتن.
دەمێ وان ئەڤە بهیستی، ب ئێك دل داخواز ژ خودێ كرن و گۆتن: «هەی خودانێ باڵادەست، چێكەرێ ئەرد و ئەسمان و دەریایێ و هەمی تشتێن د وان دا،
هەی ئەوێ تە ب گیانێ پیرۆز ل سەر ئەزمانێ بابێ مە داوودێ خزمەتكارێ خۆ گۆتی: ‹بۆچی مللەت هار دبن و گەل پیلانێن خرش دگێڕن؟
پاشایێن ئەردی رادبن و سەرۆك پێكڤە كۆم دبن ل دژی خودانی و مەسیحێ وی.›
چنكو ب راستی هێرودێس و پیلاتۆسێ پونتی د ڤی باژێڕی دا ل گەل مللەتان و خەلكێ ئیسرائیلێ، دژی خزمەتكارێ تە یێ پیرۆز عیسای ئەوێ تە زەیت كری راوەستیان،
داكو وان هەمی تشتان بكەن یێن ژ بەری نوكە دەستێ تە و حەزا تە نەخشێ وان دانای كو روی بدەن.
خودان، نوكە بەرێ خۆ بدە گەفێن وان و شیانێ بدە بەنیێن خۆ، دا ئەم ئاخفتنا تە ب وێرەكی بەڵاڤ بكەین.
دەستێ خۆ درێژ بكە، دا ب ناڤێ خزمەتكارێ تە یێ پیرۆز عیسای، خەلك ژ نەخۆشیان ساخ ببن و نیشان و مەندەهۆشی بهێنە كرن.»
پشتی وان نڤێژ كری، جهێ ئەو لێ كۆم بووین هەژیا و هەمی ژ گیانێ پیرۆز پڕ بوون و ب وێرەكی پەیڤا خودێ رادگەهاند.
كۆمەڵا باوەرداران ئێك دەروون بوون و كەسەكێ ژ وان نەدگۆت، كو ئەو تشتێن وی هەین بۆ وی ب تنێنە، لێ د هەمی تشتان دا د هەڤپشك بوون.
هنارتیان ب هێزەكا مەزن بۆ رابوونا خودان عیسای شاهدەیی ددا و كەرەمەكا مەزن ب سەر وان دا هاتبوو.
كەسەكێ پێدڤی د ناڤ وان دا نەبوو، چنكو هەر ئێكێ زەڤیەك یان خانیەك هەبا دفرۆت و بهایێ وێ دئینا
و ددانا بەر پێیێن هنارتیان و ل سەر هەمی كەسێن پێدڤی و ل دویڤ پێدڤیان بەڵاڤ دكر.
یوسڤی ژی، ئەوێ هنارتیان دگۆتنێ بارناباس ئانكو ‹هاندەر›، كو لێڤییەكێ خەلكێ قوبرسێ بوو،
زەڤیەك هەبوو فرۆت و بهایێ وێ ئینا و دانا بەر پێیێن هنارتیان.
لێ زەڵامەكی ناڤێ وی حەنانیا بوو، ل گەل هەڤژینا خۆ سەفیرایێ، زەڤیەك فرۆت
و هندەك ژ بهایێ زەڤیێ ب ئاگەهداریا وێ بۆ خۆ هەلگرتن و ئەوێ مای ژی ئینا و دانا بەر پێیێن هنارتیان.
ئینا پەترۆسی گۆتە حەنانیای: «تە بۆچی هێلا ئبلیس دلێ تە تژی بكەت، دا تۆ درەوێ ل گیانێ پیرۆز بكەی و هندەك پارەیێن زەڤیێ بۆ خۆ هەلگری؟
بەری فرۆتنا وێ زەڤیێ، ما ئەو نە یا تە بوو؟ و پشتی فرۆتنا وێ، ما بهایێ وێ نە د دەستێ تە دا بوو؟ بۆچی تە د دلێ خۆ دا ڤیا ڤێ چەندێ بكەی؟ تە درەو ل خەلكی نەكر، لێ تە ل خودێ كر!»
گاڤا حەنانیای گو‍‌ھ ل ڤێ ئاخفتنێ بووی، كەفتە ئەردی و مر، ترسەكا مەزن ب سەر وان هەمیان دا هات، ئەوێن ئەڤ تشتە بهیستی.
هندەك گەنجان حەنانیا كفن كر و برە ژ دەرڤە و ڤەشارت.
پشتی سێ دەمژمێران هەڤژینا حەنانیای هات و وێ نەدزانی چ رویدایە.
پەترۆسی پرسیار ژێ كر: «ئەرێ بێژە من هەوە زەڤی ب ڤی بهای فرۆتیە؟» ئینا بەرسڤ دا: «بەلێ، ب ڤی بهای.»
پەترۆسی گۆتێ: «بۆچی هوین ل سەر تاقیكرنا گیانێ خودانی ل گەل ئێك رێككەفتن؟ ئها ئەڤە پێژنا ئەوێن هەڤژینێ تە ڤەشارتی یا ل بەر دەرگەهی دهێت، دێ تە ژی هەلگرن و بەنە ژ دەرڤە!»
د گاڤێ دا ئەو ژی كەفتە بەرپێیێن پەترۆسی و مر. دەمێ گەنج ب ژۆر كەفتین و دیتی یا مری، ئەو ژی هەلگرت و ب رەخ هەڤژینێ وێ ڤە ڤەشارت.
ترسەكا مەزن ب سەر هەمی جڤاكا باوەردارێن مەسیحی و هەمی ئەوێن ئەڤ نوچە گو‍‌ھ لێ بووین دا هات.
ل سەر دەستێ هنارتیان گەلەك نیشان و مەندەهۆشی د ناڤ مللەتی دا دهاتنە كرن. ئەو هەمی ب ئێك دل ل ئەیوانا سلێمانی كۆم دبوون
و كەسەكی ژ ئەوێن دی وێرەكی نەبوو بگەهیتە وان، لێ خەلكی رێز لێ دگرت
و ژمارەیا ئەوێن باوەری ب خودانی دئینا، هێشتا زێدەتر لێ دهات، ژنك و زەڵام كۆم ب كۆم دهاتن،
هەتا خەلكی نەساخێن خۆ دئینانە كۆلان و جادەیان و ددانانە سەر تەخت و نڤینان داكو دەمێ پەترۆس دبوریت، ب كێماسی سیبەرا وی ب هندەك ژ وان بكەڤیت.
خەلك ژ باژێڕێن دەوروبەرێن ئورشەلیمێ ژی خڕڤە دبوون، نەساخ و ئەوێن ژ لایێ گیانێن پیس ڤە دهاتنە ئازاردان دئینان و هەمی ساخ دبوون.
ئینا سەرۆككاهنی و ئەو كەسێن د گەل دا، كو ژ لایەنگرێن سەدوقیان بوون، ژ چاڤپێڕانەبوونێ تژی بوون.
هنارتی گرتن و هاڤێتنە د زیندانا گشتی دا،
لێ ب شەڤێ فریشتەیەكێ خودانی دەرگەهێن زیندانێ ڤەكرن و بەردان و گۆتە وان:
«هەڕن، د حەوشا پەرستگەهێ دا راوەستن و هەمی پەیاما ڤێ ژیانا نوی بۆ خەلكی ڤەگێڕن.»
ئینا وان گوهداری كر و ل گەل ئەلندێ چوونە پەرستگەهێ و دەست ب فێركرنا خەلكی كر. ب داخوازا سەرۆككاهنی و ئەوێن د گەل دا، جڤاتێ كۆمبوونەك گرێ دا، هەمی ریهسپیێن گەلێ ئیسرائیل لێ ئامادە بوون و فەرمان دا كو هنارتیان ژ زیندانێ بۆ بینن،
لێ دەمێ زێرەڤان چووینێ، د زیندانێ دا نەدیتن، ئینا زڤڕینەڤە و ئەڤ چەندە راگەهاند.
گۆتن: «مە دیت دەرگەهێن زیندانێ ب موكمی د گرتینە، زێرەڤان ژی ل بەر دەرگەهان د راوەستیاینە، لێ گاڤا مە ڤەكرین، مە كەسەك د ژۆرڤە نەدیت.»
دەمێ سەرۆكێ زێرەڤانێن پەرستگەهێ و سەرۆكێن كاهنان گو‍‌ھ ل ڤێ ئاخفتنێ بووی، ل دۆر ڤێ چەندێ هزرێن وان ئالۆز بوون، كا دویماهیا ڤێ چەندێ دێ چ بیت!
پاشی زەڵامەك هاتە جڤاتێ و گۆت: «ئەو زەڵامێن هەوە كرینە د زیندانێ دا، ئها نوكە د حەوشا پەرستگەهێ دا د راوەستیاینە و یێ خەلكی فێر دكەن!»
ئینا سەرۆكێ زێرەڤانان و زەڵامێن خۆ چوون و هنارتی ئینان بێی كو هێزێ ل گەل ب كار بینن، ژ ترسێن مللەتی نەكو بەرباران بكەن.
دەمێ ل وێرێ ئامادە كرین، ل بەرسینگێ جڤاتێ راوەستاندن و سەرۆككاهنی پرسیار ژێ كر
و گۆت: «مە فەرمانەكا دژوار ل هەوە كر، كو هوین ب ڤی ناڤی فێركرنێ نەكەن، لێ ئەڤە هەوە ئورشەلیم ب فێركرنا خۆ تژی كر و هەوە دڤێت مە ب رشتنا خوینا وی گونەهبار بكەن!»
پەترۆس و هنارتیان بەرسڤ دا: «پێدڤیە گوهداریا خودێ بهێتە كرن نە یا مرۆڤان!
خودایێ بابكالێن مە عیسا راكرەڤە، ئەوێ هەوە ب داری ڤە هەلاویستی و كوشتی
لێ خودێ ل دەستێ خۆ یێ راستێ دانا و كرە سەرۆك و قورتالكەر، دا ئیسرائیلیان ژ گونەهێن وان ڤەگەڕینیت و لێ ببوریت
و ئەم شاهدەییێ ل سەر ڤێ چەندێ ددەین، هەروەسا گیانێ پیرۆز ژی یێ كو خودێ دایە وان كەسێن گوهداریا وی دكەن شاهدەییێ ددەت.»
دەمێ كۆمبوویان گو‍‌ھ ل ڤێ ئاخفتنێ بووی، تۆڕە بوون و بڕیار دا هنارتیان بكوژن.
لێ ئێك ژ ئەندامێن جڤاتێ ناڤێ وی گەمالائیل بوو، هەمی خەلكی رێز لێ دگرت و مامۆستایێ دەستووری بوو و ژ لایەنگرێن فەریسیان بوو، رابوو ژ پێرڤە و فەرمان دا كو هنارتیان بۆ دەمەكی ببەنە ژ دەرڤە.
گۆتە كۆمبوویان: «گەلی ئیسرائیلیان، هشیار بن ل سەر وی كارێ هەوە ل بەرە ل گەل ڤان كەسان بكەن.
بەری دەمەكێ كێم توداس رابوو و گۆتی ئەز مرۆڤەكێ مەزنم، ئینا چوار سەد زەڵام ب دویڤ كەفتن، لێ هاتە كوشتن و دیڤەلانكێن وی بەڵاڤ بوون و بزاڤا وان نەما.
پشتی هنگی، ل دەمێ سەرژمێركرنێ، یەهودایێ جەلیلی رابوو و گەلەك مرۆڤ د سەردا برن و ب دویڤ خۆ ئێخستن، لێ ئەو ژی ژ ناڤ چوو و دیڤەلانكێن وی بەڵاڤ بوون.
ئەڤجا نوكە ئەز هەوە ئاگەهدار دكەم، كو هوین خۆ ژ ڤان مرۆڤان بدەنە پاش و بهێلنە ب تنێ. ئەگەر ئەو بیر و باوەری یان ئەڤ كارە ژ لایێ مرۆڤان ڤە بیت، دێ هێتە هەڕفاندن.
لێ ئەگەر ژ لایێ خودێ ڤە بیت، هوین نەشێن ل بەرامبەر راوەستن، نەكو هوین خۆ ببینن، یێ دژی خودێ شەڕی دكەن.» ئینا ئەندامێن جڤاتێ ب ئاخفتنا وی قاییل بوون
و هنارتی ئینان و قامچی دان و فەرمان لێ كر، كو ب ناڤێ عیسای فێربوونێ نەكەن و پاشی ئازاد كرن.
ئەڤجا هنارتی ب دلخۆشی ژ جڤاتێ دەركەفتن، چنكو ئەو ل وێ باوەریێ بوون، كو بۆ وان شانازیە ژ بەر ناڤێ عیسای بهێنە بێڕێزكرن.
ئەوان هەر رۆژ ل پەرستگەهێ و ل مالان خەلك فێر دكر و بێ راوەستیان مزگینی ددا كو مەسیح، عیسایە.
ل وان رۆژان، دەمێ شاگرد مشە دبوون، جوهیێن یونانی نەرازیبوونا خۆ ل سەر عیبرانیان دیار كر، چنكو بیژنێن وان د هاریكاریێن رۆژانە دا دهاتنە پشت گو‍‌ھ ڤە ئێخستن.
ئینا هەر دوازدە هنارتیان گازی كۆما شاگردان كر و گۆتنێ: «یا باش نینە، ئەم پەیڤا خودێ بهێلین داكو هاریكاریان بەڵاڤ بكەین.
ئەڤجا گەلی برایان، د ناڤ خۆ دا حەفت زەڵامان هەلبژێرن كو ناڤودەنگێن وان یێ باش بیت و دپڕ بن ژ گیانێ پیرۆز و ئاقلمەندیێ، دا وان دانینە سەر ڤی كاری.
لێ ئەم دێ ل سەر نڤێژان و خزمەتا پەیڤێ د بەردەوام بین.»
ئەڤ پێشنیارە ب دلێ هەمی جەماوەری بوو، وان ژی: ستیڤانۆس، زەڵامەكێ پڕی باوەریێ و گیانێ پیرۆز، هەروەسا فیلیپۆس، پروخورس، نیكانور، تیمون، پەرمیناس و نیقولاوسێ ئەنتاكیایی ئەوێ بوویە جوهی، هەلبژارتن.
جەماوەری ئەڤ هەر حەفتە ل بەرامبەر هنارتیان راوەستاندن، هنارتیان ژی نڤێژ كرن و دەستێن خۆ دانانە سەر وان.
ئینا پەیڤا خودێ پتر بەڵاڤ دبوو و ژمارەیا شاگردان ل ئورشەلیمێ گەلەك زێدە دبوو، هەروەسا گەلەك ژ كاهنان ملكەچی باوەریێ بوون.
ستیڤانۆسێ پڕ ژ كەرەم و هێزێ، مەندەهۆشی و نیشانێن مەزن ل ناڤ مللەتی دكرن،
لێ هندەك جوهیێن ‹كنیشتەیا ئازادكریان› ژ قەیرەوانێ و ئەسكەندەریێ، ل گەل هندەكێن دی ژ هەرێمێن كیلیكیا و ئاسیا رابوون و گەنگەشە ل گەل ستیڤانۆسی كر.
لێ ئەو نەشیان ل بەر ئاقلمەندیا وی و ئەو گیانێ پێ دئاخفت راوەستن.
ئەڤجا وان هندەك زەڵام بەرتیل كرن دا ببێژن: «مە گو‍‌ھ ل ستیڤانۆسی بوو دەربارەی مووسای و خودێ كوفری دكرن.»
هۆسا وان مللەت، ریهسپی و مامۆستایێن دەستووری ل ستیڤانۆسی ئاراندن. ئەڤجا گرت و ئینا جڤاتێ
و هندەك شاهدێن درەوین ئینان و گۆتن: «ئەڤە بەردەوام ئاخفتنا دژی پەرستگەهێ و دەستوورێ مووسای دبێژیت،
چنكو مە گو‍‌ھ لێ بوو یێ دبێژیت، كو عیسایێ ناسیرەیی دێ ڤێ پەرستگەهێ هەڕفینیت و ئەو داب و نەریتێن مە ژ مووسای وەرگرتین دێ گوهۆڕیت.»
دەمێ ئەوێن ل جڤاتێ روینشتی بەرێ خۆ دایە دێمێ وی، دیتن هەروەكو دێمێ فریشتەیانە.
ئینا سەرۆككاهنی پرسیار ژ ستیڤانۆسی كر: «ئەرێ ئەڤ چەندە راستە؟»
بەرسڤا وی دا: «گەلی باب و برایان، گوهێ خۆ بدەنە من: دەمێ بابێ مە ئیبراهیم ل مێزۆپۆتامیا، بەری بچیتە حەڕانێ و لێ بژیت، خودایێ مەزن بۆ وی دیار بوو
و گۆتێ: ‹ئەرد و كەسوكارێن خۆ بهێلە و هەڕە وی ئەردێ ئەز دێ نیشا تە دەم.›
ئینا ئەو ژ ئەردێ كلدانیان دەركەفت و ل حەڕانێ ئاكنجی بوو، ما ل وێرێ هەتا بابێ وی مری و خودێ ئینایە ڤی ئەردێ هوین نوكە لێ دژین.
خودێ ل وێرێ چ میرات نەدایێ، خۆ جهێ پێیەكی ژی. ل وی دەمی یێ بێ كوڕ بوو و خودێ پەیمان دایێ، كو دێ ڤی ئەردی دەتە وی و وێ دویندەها ل پشتی وی دهێت.
خودێ گۆت كو دویندەها وی دێ ل وەڵاتەكێ بیانی ئاوارە بن و ئەو خەلك دێ وان كەنە بەنی و بۆ دەمێ چوار سەد ساڵان تەپەسەر كەن.
هەروەسا گۆت: ‹لێ ئەز دێ وی مللەتی سزا دەم، ئەوێ وان دكەتە بەنیێن خۆ، پشتی هنگی دێ دەركەڤن و دێ هێن ل ڤی جهی من پەرێسن.›
ئینا خودێ پەیمانا سونەتكرنێ دا ئیبراهیمی، ئەڤجا دەمێ ئیسحاق ژێبووی، ل رۆژا هەشتێ ژ ژیێ وی سونەت كر، ئیسحاقی ژی یەعقوب ژێبوو و یەعقوبی ژی هەر دوازدە بابكال.
بابكالان چاڤ ب یوسڤی رانەبوون و فرۆت و ل مسرێ بوو بەنی، لێ خودێ د گەل دا بوو
و ژ هەمی نەخۆشیێن ب سەری هاتین قورتال كر و ئاقلمەندی و چاكی ل نك فیرعەونێ پاشایێ مسرێ دانێ، فیرعەونی ژی ئەو ل سەر مسرێ و هەمی سامانێ خۆ كرە دەستهەلاتدار.
پشتی هنگی كولب كەفتە د مسرێ و كەنعانێ دا، تەنگاڤیەكا مەزن ب سەر هەمیان دا هات و بابكالێن مە نەشیان خوارنێ پەیدا بكەن.
دەمێ یەعقوبی بهیستی، كو ل مسرێ گەنمێ هەی، وی بۆ جارا ئێكێ بابكالێن مە هنارتنە وێرێ.
دەمێ بۆ جارا دوویێ هنارتین، یوسڤی خۆ بۆ وان دا نیاسین و بنیاتێ یوسڤی بۆ فیرعەونی دیار بوو،
هنگی یوسڤی هنارتە ب دویڤ بابێ خۆ یەعقوبی و بنەمالا وی را، كو ئەو حەفتێ و پێنج كەس بوون.
ئینا یەعقوب خواركەفتە مسرێ و ل وێرێ ئەو و بابكالێن مە مرن.
پاشی ڤەگوهاستنە شەخەمێ و ل وی گۆڕی هاتنە ڤەشارتن، ئەوێ ئیبراهیمی ژ كوڕێن حەمۆری ل شەخەمێ ب كۆژمەكێ پارەی كڕی.
دەمێ بجههاتنا سۆزا خودێ دایە ئیبراهیمی نێزیك دبوو، خەلك ل مسرێ بەرەڤ زێدەبوونێ ڤە دچوون.
پاشی پاشایەكێ نوی ل مسرێ رابوو، ئەوی چ ژ یوسڤی نەدزانی،
ئینا بێبەختی ل گەلێ مە كر و بابێن مە ئێشاندن تا نەچار كرین، كو دەست ژ زاڕۆكێن خۆ بەردەن، دا بمرن.
ل وی دەمی مووسا ژ دایك بوو و گەلەك ژ لایێ خودێ ڤە یێ بەركەفتی بوو و دایك و بابێن وی بۆ دەمێ سێ هەیڤان ل مالا خۆ ب خودان دكر،
لێ ل دویماهیێ ئەو نەچار بوون، كو بهێلن. كچا فیرعەونی ئەو قورتال كر و هەروەكو كوڕێ خۆ ب خودان كر.
مووسا فێری هەمی زانین و ئاقلمەندیێن مسرێ بوو و د كار و ئاخفتنێن خۆ دا، مرۆڤەكێ ژێهاتی بوو.
دەمێ ژیێ وی بوویە چل ساڵ، دلێ وی گۆتێ سەرەدانا برایێن خۆ، مللەتێ ئیسرائیل، بكە.
دیت ستەم یا ل ئێكی دهێتە كرن، ئینا بەڕەڤانی ژێ كر و تۆلا وی ستاند و ئەوێ مسری كوشت.
مووسا د وێ هیڤیێ دا بوو، كو برایێن وی تێبگەهن، دێ خودێ وان ل سەر دەستێن وی قورتال كەت، لێ ئەو تێنەگەهشتن
و ل رۆژا پاشتر مووسای دوو ژ وان دیتن یێ شەڕی دكەن، وی بزاڤ كر وان پێك بینیت و گۆت: ‹هوین برانە، بۆچی هوین زۆرداریێ ل ئێكودوو دكەن؟›
لێ ئەوێ زۆرداری ل هەڤمللەتێ خۆ دكر، مووسا پالدا رەخەكی و گۆتێ: ‹كێ تۆ ل سەر مە كریە سەرۆك و دادوەر؟
تە دڤێت من ژی بكوژی هەروەكو تە دوهی ئەوێ مسری كوشتی؟›
دەمێ مووسای ئەڤە بهیستی، رەڤی و چوو دەڤەرا مەدیەنێ و وەكو بیانیەك ل وێرێ ژیا و دوو كوڕ بوون.
پشتی چل ساڵ بورین، دەمێ مووسا ل بیابانا چیایێ سینا، فریشتەیەك بۆ وی د ناڤ گوڕیا ئاگرێ تڕاشەكێ را دیار بوو،
دەمێ مووسای ئەڤ دیمەنە دیتی، حێبەتی بوو و خۆ نێزیك كر دا بزانیت كا ئەو چیە، وی گو‍‌ھ لێ بوو دەنگێ خودانی یێ گازی دكەتێ:
‹ئەز خودایێ بابكالێن تەمە، خودایێ ئیبراهیمی و ئیسحاقی و یەعقوبی،› ئەڤجا مووسا لەرزی و نەوێریا بەرێ خۆ بدەتێ.
وی دەمی خودانی گۆتێ: ‹پێلاڤێن خۆ ژ پێیێن خۆ بئێخە، چنكو ئەو جهێ تۆ لێ راوەستیای ئەردەكێ پیرۆزە،
من باش تەپەسەریا گەلێ خۆ د مسرێ دا دیت و گو‍‌ھ ل نالینێن وان بوو، ئینا ئەز هاتمە خوار، دا وان رزگار بكەم. ئەڤجا نوكە وەرە، دا ئەز تە بهنێرمە مسرێ.›
ئەڤە ئەو مووسایە ئەوێ وان رەتكری و گۆتیێ: ‹كێ تۆ ل سەر مە كریە سەرۆك و دادوەر؟› هەر ئەوە یێ خودێ وەك سەرۆك و رزگاركەر هنارتی، ب رێكا فریشتەیێ بۆ وی د ناڤ تڕاشێ را دیار بووی.
ئەوی گەلێ خۆ ژ مسرێ ئینا دەر، ل مسرێ و ل دەریایا سۆر و چل ساڵان ل بیابانێ نیشان و مەندەهۆشی دكرن.
ئەڤە ئەو مووسایە ئەوێ گۆتیە ئیسرائیلیان: ‹خودێ دێ پێغەمبەرەكێ وەكو من ژ ناڤ برایێن هەوە هنێریت›
و ئەڤە ئەو بوو ئەوێ د جڤاتێ دا ل بیابانێ، فریشتە ل سەر چیایێ سینا ل گەل وی ئاخفتی و ل گەل بابێن مە بوو، ئەوێ پەیڤێن ژیاندار وەرگرتین، داكو بگەهینیتە مە.
بابێن مە نەدڤیا گوهداریا وی بكەن، لێ ئەوان ئەو لادا و دلێ وان دچوویێ بۆ مسرێ ڤەگەڕنەڤە.
گۆتنە هارونی: ‹بۆ مە هندەك خوداوەندان چێكە، داكو ل پێشیا مە بچن، چنكو ئەم نزانین چ ل مووسای هاتیە، ئەوێ ئەم ژ ئەردێ مسرێ دەرئێخستین!›
ل وان رۆژان ئەوان پووتەكێ ل سەر شێوەیێ گۆلكی چێكر و قوربانەك بۆ پێشكێش كر و ئاهەنگەكا بێتۆرەیێ بۆ كارێ دەستێن خۆ گێڕا.
ئەڤجا خودێ پشتا خۆ دا وان و هێلا ستێرێن ئەسمانی بپەرێسن، هەروەكو د پەرتووكا پێغەمبەران دا هاتیە نڤیسین: ‹هەی بنەمالا ئیسرائیل، ئەرێ هەوە ب درێژاهیا چل ساڵان ل بیابانێ قوربان و پێشكێشی بۆ من داینە؟
نەخێر، لێ هەوە خیڤەتا مۆلەخی و ستێرا خوداوەندێ خۆ رایفانی هەلگرتن، ئەو پەیكەرێن هەوە چێكرین داكو بپەرێسن، لەوما ئەز دێ هەوە بۆ وێڤەتر ژ بابل دویر ئێخم.›
خیڤەتا شاهدەییێ ژی ل بیابانێ ل گەل بابێن مە بوو. ئەو وەسا هاتبوو چێكرن، هەروەكو خودێ فەرمان ل مووسای كری، كو ل دویڤ وێ نموونەیا وی دیتی چێكەت.
ئەڤجا ئەو بۆ بابێن مە ما و وان ل گەل یەشوعی برە د ناڤ ئەردێ وان مللەتان دا، ئەوێن خودێ ل بەر سینگێ بابێن مە دەرئێخستین. ئەو تا سەردەمێ داوودی ل وێرێ ما.
داوود جهێ رەزامەندیا خودێ بوو و وی دەستویری خواست كو ئەو جهەكێ ئاكنجیبوونێ بۆ خودایێ یەعقوبی پەیدا بكەت.
لێ یێ خانیەك بۆ خودێ ئاڤاكری سلێمان بوو.
هەر چەندە ئەوێ هەری بلند ل خانیێن دەستێن مرۆڤان ئاڤاكری ئاكنجی نابیت، هەروەكو پێغەمبەری گۆتی:
‹خودان دبێژیت: ئەسمان تەختێ منە، و ئەرد تەختەپێیێ منە. ئەڤجا ئەو چ خانییە دێ بۆ من ئاڤا كەن؟ یان ئەو چ جهە بۆ بێهنڤەدانا من؟
ئەرێ ما نە دەستێن من ئەڤ تشتە هەمی چێكرینە؟› »
پاشی ستیڤانۆسی گۆت: «گەلی سەرهشكان، هەی دل و گوهێن سونەتنەكری! هوین هەروەكو بابێن خۆنە، هەمی دەمان بەرهنگارێن گیانێ پیرۆزن!
ما بابێن هەوە كیژ پێغەمبەر تەپەسەر نەكریە؟ وان ئەو كوشتن یێن پێشوەخت هاتنا یێ راست و دروست راگەهاندی، ئەو راست و دروستێ هوین نوكە بووینە بێبەخت و كوژەكێن وی!
هوین ئەون یێن كو دەستوور ژ دەستێن فریشتەیان وەرگرتی و ب ج‍‌ھ نەئینای.»
دەمێ كۆمبوویان گو‍‌ھ ل ئاخفتنا ستیڤانۆسی بووی، ژ دل تۆڕە بوون و ددانێن خۆ هوسین.
لێ ستیڤانۆس ژ گیانێ پیرۆز یێ پڕ بوو، ئەوی بەرێ خۆ دا ئەسمانان و مەزناهیا خودێ دیت و دیت كو عیسا ل دەستێ خودێ یێ راستێ یێ راوەستیایە.
گۆت: «ئەڤە ئەز یێ ئەسمانی ڤەكری دبینم و كوڕێ مرۆڤ یێ ل دەستێ خودێ یێ راستێ راوەستیایە!»
ئەڤجا ئەوان ب دەنگەكێ بلند گازی كر و گوهێن خۆ گرتن و پێكڤە هێرشەك ئینانە سەر
و دەرئێخستە ژ دەرڤەی باژێڕی و دەست هاڤێتنە بەربارانكرنا وی و شاهدان جلكێن خۆ ل بەر پێیێن گەنجەكی دانان، ناڤێ وی شائوول بوو.
ل دەمێ ئەوان ستیڤانۆس بەرباران دكر، ئەوی گازی دكر «خودان عیسا، گیانێ من وەرگرە.»
پاشی چۆكڤەدان و ب دەنگەكێ بلند كرە گازی: «خودان، ئەڤێ گونەهێ ل سەر وان نەگرە!» ئەڤە گۆت و نڤست.
شائوول ژی ل سەر كوشتنا ستیڤانۆسی یێ رازی بوو. هەر د وێ رۆژێ دا جڤاكا باوەرداران ل ئورشەلیمێ تووشی تەپەسەریەكا دژوار بوو. ژبلی هنارتیان هەمی باوەردار ل دەڤەرێن یەهودیایێ و سامەریایێ بەڵاڤ بوون.
هندەك زەڵامێن ژ خودێ ترس ستیڤانۆس ڤەشارت و گەلەك بۆ وی گریان.
شائوولی بزاڤ دكر كو جڤاكێ ژ ناڤ ببەت. ئەو مال ب مال دگەڕیا، ژنك و زەڵام رادكێشان و دهاڤێتنە د زیندانێ دا.
ئەوێن بەڵاڤ بووین ژ جهەكی دچوونە جهەكی و مزگینی ب پەیڤێ ددان،
فیلیپۆس ژی خواركەفتە باژێڕەكی ل دەڤەرا سامەریایێ و بۆ خەلكێ وێ مزگینی ب مەسیحی رادگەهاند.
دەمێ جەماوەری ئەو نیشانێن وی دكرن بهیستین و دیتین، هەمیان ب ئێك دل گوهێ خۆ ددا گۆتنێن وی.
چنكو گیانێن پیس، ب قێڕیێن بلند ڤە، ژ گەلەك كەسان دەردكەفتن و گەلەكێن فاڵنجی و لەنگ هاتنە ساخكرن.
ئینا دلخۆشی ل باژێڕی بەڵاڤ بوو.
ل وی باژێڕی زەڵامەك هەبوو ناڤێ وی شەمعون بوو، ئەوی ژمێژە وەرە جادووگەری دكر و خەلكێ سامەریایێ مەندەهۆش دكر و دگۆت: ئەز زەڵامەكێ مەزنم.
هەمیان ژ بچویكی تا مەزنی گوهداریا وی دكر و دگۆتن: «ئەڤ زەڵامە هێزا مەزن یا خودێیە.»
ئەوان گوهێ خۆ ددایێ، چنكو بۆ دەمەكێ درێژ ئەو ب كارێن جادووگەریێ دهاتنە مەندەهۆشكرن.
لێ دەمێ ئەوان باوەری ب ئاخفتنا فیلیپۆسی ئینای، ئەوێ مزگینیا پاشایەتیا خودێ و ناڤێ عیسایێ مەسیح دایێ، ژنك و زەڵام دهاتنە تافیركرن.
شەمعونی ژی باوەری ئینا و هاتە تافیركرن و هەمی دەمان ل گەل فیلیپۆسی بوو. وی ئەو نیشان و حنێرێن مەزن دیتن، ئەوێن كو ل سەر دەستێ فیلیپۆسی هاتینە كرن، ئەڤجا مەندەهۆش بوو.
دەمێ هنارتیان ل ئورشەلیمێ بهیستی كو خەلكێ سامەریایێ پەیڤا خودێ یا وەرگرتی، پەترۆس و یوحەننا بۆ هنارتن.
دەمێ خواركەفتین، هەردوویان نڤێژ بۆ خەلكێ سامەریایێ كرن، دا گیانێ پیرۆز وەرگرن.
چنكو گیانێ پیرۆز هێشتا بۆ كەسەكێ ژ وان نەهاتبوو، ب تنێ ئەو ب ناڤێ خودان عیسای هاتبوونە تافیركرن.
پاشی پەترۆس و یوحەننای دەستێن خۆ دانانە سەر وان و ئەوان گیانێ پیرۆز وەرگرت.
دەمێ شەمعونی دیتی گیانێ پیرۆز ب رێكا دەست ل سەر دانانێ ژ هنارتیان گەهشتە باوەرداران، وی پارە پێشكێشی پەترۆس و یوحەننای كرن
و گۆتێ: «ڤێ شیانێ بدەنە من ژی، داكو هەر كەسەكێ ئەز دەستێ خۆ ب سەر دا بینم، گیانێ پیرۆز وەرگریت.»
لێ پەترۆسی گۆتێ: «بلا زیڤێ تە ل گەل تە وێران ببیت، چنكو تە هزر دكر كو تۆ دێ خەلاتێ خودێ ب پارەیێ خۆ كڕی!
تە چ بەهر د ڤێ چەندێ دا نینە، چنكو دلێ تە بەرامبەر خودێ نە یێ راستە.
ئەڤجا ژ خرابیێن خۆ ڤەگەڕە و داخوازێ ژ خودانی بكە، بەلكو ل مەرەما دلێ تە ببوریت،
چنكو ئەز دبینم تۆ یێ د تەحلاتیا زكڕەشیێ و خەفكا گونەهان دا!»
ئینا شەمعونی بەرسڤ دا: «ژ بەر من داخوازێ ژ خودانی بكەن، دا چ تشتێ هەوە گۆتی ب سەر من دا نەهێت.»
دەمێ پەترۆس و یوحەننای شاهدە دای و ب پەیڤا خودانی ئاخفتین، ڤەگەڕیانە ئورشەلیمێ و مزگینی دا گەلەك گوندێن سامەریان.
لێ ڤێ گاڤێ فریشتەیەكێ خودانی ل گەل فیلیپۆسی ئاخفت و گۆت: «رابە و بەرەڤ باشووری هەڕە، ل سەر وێ رێكا ژ ئورشەلیم خواركەڤیتە غەززە.» كو ئەو جهەكێ چۆلە.
ئینا رابوو و چوو و د رێكا خۆ دا زەڵامەكێ حەبەشی یێ خەساندی دیت، وەزیرێ گەنجینێ بوو ل نك كەنداكا شاژنا حەبەشیان. ئەو بۆ پەرستنێ هاتبوو ئورشەلیمێ.
د رێكا خۆ دا بۆ حەبەشە د ناڤ گالیسكەیا خۆ دا یێ روینشتی بوو و پەرتووكا ئیشایا پێغەمبەری دخواند،
ئینا گیانێ پیرۆز گۆتە فیلیپۆسی: «پێشكەڤە و ل گەل ڤێ گالیسكەیێ بە!»
فیلیپۆس ب لەز چوو نك گالیسكەیێ و گو‍‌ھ ل ئەوێ خەساندی بوو، یێ پەرتووكا ئیشایای دخوینیت و ژێ پرسی: «ئەرێ ئەوا تۆ دخوینی تۆ تێدگەهی؟»
ئینا بەرسڤ دا: «ئەز دێ چەوا تێگەهم، ئەگەر كەس بۆ من شڕۆڤە نەكەت؟» و داخواز ژ فیلیپۆسی كر كو ل گالیسكەیێ سیار بیت و ل گەل روینیت.
خەساندی گەهشت بوو وێ پشكا نڤیسارێ ئەوا دبێژیت: «وەكو پەزەكی بۆ ڤەكوشتنێ هاتە برن و وەكو بەرخەكێ بێدەنگ د ناڤ دەستێن وی كەسی دا یێ هریێ دبڕیت، وی دەڤێ خۆ ڤەنەكر.
ئەو هاتە كرێتكرن و مافێ وی ژێ هاتە ستاندن. كی دێ دەربارەی دویندەها وی ئاخڤیت؟ چنكو ژیانا وی ل سەر ئەردی یا ژێ هاتیە ستاندن.»
خەساندی پرسیار ژ فیلیپۆسی كر: «بێژە من ئەو كیە، پێغەمبەر دەربارەی وی دئاخڤیت؟ ئەو دەربارەی خۆ یان مرۆڤەكێ دی دئاخڤیت؟»
ئەڤجا فیلیپۆس ئاخفت و ژ ڤێ پشكا نڤیسارێ دەست پێ كر و مزگینیا عیسای دایێ.
دەمێ گالیسكە ب رێكێ دچوو، گەهشتنە جهەكێ ب ئاڤ، یێ خەساندی گۆت: «ئەڤە ئاڤ! ئەو چیە ناهێلیت ئەز بهێمە تافیركرن؟»
فیلیپۆسی بەرسڤا وی دا: «ئەڤ چەندە چێدبیت، ئەگەر تۆ ژ هەمی دلێ خۆ باوەریێ بینی.» خەساندی گۆت: «ئەز باوەریێ دئینم، كو عیسایێ مەسیح كوڕێ خودێیە.»
فەرمان دا كو گالیسكە بڕاوەستیت و پێكڤە چوونە سەر ئاڤێ و فیلیپۆسی خەساندی تافیركر
و چەوا ژ ئاڤێ دەركەفتن گیانێ خودانی فیلیپۆس بر و یێ خەساندی ئەو نەدیت و ب دلخۆشی ب رێكا خۆ چوو.
لێ فیلیپۆس ل ئەشدۆدێ هاتە دیتن و ب بەردەوامی مزگینی دگەهاندە هەمی باژێڕان هەتا گەهشتیە قەیسەریێ.
لێ شائوولی هێشتا گەف ل شاگردێن خودانی دكرن كو وان بدەتە كوشتن. ئەڤجا ئەو چوو نك سەرۆككاهنی
و داخوازا نامەیان ژێ كر بۆ كنیشتەیێن دیمەشقێ، داكو ئەگەر كەسەك دیت ل سەر ڤێ رێبازێ دچیت، زەڵام بیت یان ژنك، ب گرێدایی بینیتە ئورشەلیمێ.
دەمێ ئەو بڕێڤە بەرەڤ دیمەشقێ دچوو و نێزیك بووی، ژ نشكەكێ ڤە شەوقا رۆناهیەكێ ژ ئەسمانی دەوروبەرێن وی روهن كر،
ئینا كەفتە ئەردی و گو‍‌ھ ل دەنگەكی بوو یێ دبێژیتێ: «شائوول! شائوول! بۆچی تۆ من تەپەسەر دكەی؟»
ئینا وی گۆت: «تۆ كی ئەزبەنی؟» دەنگی گۆتێ: «ئەز عیسامە، ئەوێ تۆ وی تەپەسەر دكەی.
نوكە رابە و هەڕە باژێڕی، دێ بۆ تە هێتە گۆتن كا دێ چ كەی.»
رێڤنگێن ل گەل شائوولی بێدەنگ راوەستیان، چنكو گو‍‌ھ ل دەنگی بوو، لێ وان كەسەك نەدیت.
شائوول ژ ئەردی رابوو، لێ دەمێ چاڤێن خۆ ڤەكرین، ئەوی چ نەدیت، ئینا ئەوان دەستێ وی گرت و برە دیمەشقێ.
سێ رۆژان ل وێرێ ما، نەددیت و نەدخوار و نەڤەدخوار.
ل دیمەشقێ شاگردەكێ خودانی هەبوو، ناڤێ وی حەنانیا بوو، خودانی د بینینەكێ دا گازی كرێ: «حەنانیا!» وی گۆت: «بەلێ، خودان.»
خودانی گۆتێ: «هەڕە وێ جادەیا دبێژنێ راست و ل مالا یەهودای پرسیارا زەڵامەكێ ژ تەرسۆسێ بكە، ناڤێ وی شائوولە، ئەو ڤێ گاڤێ ل وێرێ یێ نڤێژێ دكەت.
شائوولی د بینینەكێ دا زەڵامەك دیت، ناڤێ وی حەنانیا بوو دهاتە د ژۆرڤە و دەستێ خۆ ددانا سەر وی، دا بیناهیێ بكەتەڤە.»
ئینا حەنانیای گۆتە خودانی: «خودان، دەربارەی ڤی زەڵامی، من ژ گەلەك كەسان بهیستیە، كا وی چەند خرابی ب سەرێ پیرۆزكریێن تە ل ئورشەلیمێ ئیناینە
و ل ڤێرێ وی ژ سەرۆكێن كاهنان دەستهەلاتا هەی، كو هەمیێن هەوارا خۆ دگەهیننە ناڤێ تە، ئەو بگریت.»
لێ خودانی گۆتێ: «تۆ هەڕە! چنكو ئەو بۆ من ئامانەكێ هەلبژارتیە، كو ناڤێ من بۆ مللەتێن نەجوهی و پاشایان و گەلێ ئیسرائیلێ هەلگریت.
ئەز دێ نیشا دەم، كا فەرە ژ بەر ناڤێ من چەند ئازارێ بكێشیت!»
پاشی حەنانیا چوو مالا یەهودای و دەستێن خۆ دانانە سەر شائوولی و گۆت: «برایێ شائوول، خودانی ئانكو عیسای ئەوێ د وێ رێكێ دا بۆ تە دیار بووی، ئەوا تۆ پێ هاتی، ئەز هنارتم دا تۆ بیناهیێ بكەیەڤە و ژ گیانێ پیرۆز پڕ ببی.»
د گاڤێ دا تشتەكێ وەكو تیڤلكی ژ سەر چاڤێن شائوولی رابوو و جارەكا دی بیناهی كر و رابوو و هاتە تافیركرن.
هندەك خوارن خوار و هاتە سەر هێزا خۆ. چەندین رۆژان ل گەل شاگردان ل دیمەشقێ ما.
وی ئێكسەر ل كنیشتەیان دەست ب مزگینیدانێ كر، كو عیسا كوڕێ خودێیە.
هەمی ئەوێن گو‍‌ھ لێ بووی گوهشین و گۆتن: «ما ئەڤە نە ئەوە، یێ ل ئورشەلیمێ ئەو كەس ژ ناڤ دبرن یێن هەوارا خۆ دگەهاندە ڤی ناڤی؟ ما ئەو نەهاتیە ڤێرێ، دا وان بگریت و ب گرێدایی ببەتە نك سەرۆكێن كاهنان؟»
لێ شائوول ب هێزتر لێ دهات و جوهیێن ئاكنجیێن دیمەشقێ حێبەتی دكرن، ژ بەر كو وی دسەلماند كو عیسا ب خۆ مەسیحە.
پشتی بورینا گەلەك رۆژان، جوهیان پیلانەك دانا، دا وی بكوژن،
لێ شائوولی ب پیلانا وان زانی. ب شەڤ و رۆژ چاڤێ وان ل دەرگەهێن باژێڕی بوو، دا وی بكوژن.
لێ هندەك شاگردێن وی ب شەڤێ ئەو ژ شویرها باژێڕی د سەڤیەكێ دا داهێلا خوارێ.
دەمێ شائوول گەهشتیە ئورشەلیمێ، بزاڤ كر خۆ بگەهینیتە شاگردان، لێ هەمی ژێ دترسیان، چنكو وان باوەر نەدكر كو ئەو یێ بوویە شاگرد.
لێ بارناباسی ئەو بر و ئینا نك هنارتیان و بۆ وان ڤەگێڕا كا چەوا وی د رێكێ دا خودان دیتیە و خودان ل گەل وی ئاخفتییە و كا چەوا ل دیمەشقێ ب وێرەكانە مزگینی ب ناڤێ عیسای دایە.
ئەڤجا شائوول ل ئورشەلیمێ ل گەل وان دهات و دچوو و ب وێرەكانە مزگینی ب ناڤێ خودانی ددا.
وی دانوستاندن و گەنگەشە ل گەل جوهیێن یونانی دكر، وان ژی بزاڤ دكر وی بكوژن.
دەمێ برایان ب ڤێ چەندێ زانی، ئەو برە قەیسەریێ و ژ وێرێ هنارتە تەرسۆسێ.
پشتی هنگی جڤاكا باوەرداران ل سەرانسەری یەهودیایێ و جەلیلێ و سامەریایێ د ئاشتیێ دا بوو و ئاڤا دبوو و د ترسا خودانی دا پێشڤە دچوو و ب پشتەڤانیا گیانێ پیرۆز زێدە دبوو.
دەمێ پەترۆس ل هەمی دەڤەران دگەڕیا، سەرەدانا وان پیرۆزكریان ژی كر، ئەوێن ل لودە د ئاكنجی.
ل وێرێ مرۆڤەكێ فاڵنجی دیت، ناڤێ وی ئینیاس بوو، ئەو هەشت ساڵ بوو د ناڤ نڤینان دا.
پەترۆسی گۆتێ: «ئینیاس، عیسایێ مەسیح تە ساخ دكەت، رابە نڤینێن خۆ بپێچە!» ئینا ئەو ئێكسەر رابوو.
هەمی ئاكنجیێن باژێڕێ لودە و دەشتا شارۆنێ ئینیاس دیت، ئینا بۆ خودانی ڤەگەڕیان.
ل باژێڕێ یافا شاگردەك هەبوو ناڤێ وێ تابیتا بوو و ب یونانی دگۆتنێ دۆركاس ، هەردەم چاكی دكرن و هاریكاریا هەژاران دكر.
د وان رۆژان دا، ئەو نەساخ بوو و مر، ئەڤجا وان ئەو شویشت و دانا د ژۆرەكا سەری ڤە.
ژ بەر كو لودە ل نێزیكی یافا بوو، دەمێ شاگردان بهیستی كو پەترۆس یێ ل لودە، وان دوو زەڵام هنارتنە ب دویڤ را كو ببێژنێ: «بێی گیرۆبوون وەرە نك مە.»
پەترۆس رابوو و ل گەل وان چوو. دەمێ گەهشتی، ئەو ب سەرئێخستە ژۆرا سڵال. هەمی بیژن ل دەوروبەرێن وی راوەستیان و دگریان و ئەو كراس و جلك نیشا ددان، یێن دۆركاسێ ب ساخیا خۆ بۆ وان چێكربوون.
پەترۆسی هەمی دەرئێخستنە ژ دەرڤە و چۆكڤەدان و نڤێژ كر، پاشی بەرێ خۆ دا كەلەخی و گۆت: «تابیتا، رابە.» ئینا چاڤێن خۆ ڤەكرن و دەمێ وێ پەترۆس دیتی، روینشت.
وی دەستێ خۆ داڤێ و راكرە سەر پێیان، پاشی وی گازی پیرۆزكری و بیژنان كر و ب ساخی پێشكێشی وان كر.
ئەڤ چەندە ل هەمی یافا بەڵاڤ بوو و گەلەكان باوەری ب خودانی ئینا.
پەترۆس چەندین رۆژان ل یافایێ ما، ل نك كەڤلڤانەكی ناڤێ وی شەمعون بوو.
زەڵامەك ل قەیسەریێ هەبوو ناڤێ وی كورنیلیۆس بوو، سەرلەشكەرەكێ سوپایێ ئیتالیا بوو.
ئەو و هەمی بنەمالا وی ژ خودێ ترس و خودێپەرێس بوون، گەلەك هاریكاریا هەژارێن گەلێ خودێ دكر و هەردەم نڤێژ بۆ خودێ دكرن.
رۆژەكێ ل نێزیكی دەمژمێر سێیێ پشتی نیڤرۆ د بینینەكێ دا، ب ئاشكرایی دیت فریشتەیەكێ خودێ هاتە نك و گۆتێ: «كورنیلیۆس!»
وی ب ترس بەرێ خۆ دا فریشتەی و گۆت: «بەلێ ئەزبەنی؟» ئینا فریشتەی بەرسڤا وی دا: «نڤێژ و هاریكاریێن تە بۆ هەژاران كرین وەك بیرەوەری بلند بوونە بەرامبەر خودێ
و ڤێ گاڤێ هندەك زەڵامان بهنێرە یافا و گازی شەمعونێ ناڤدار ب پەترۆس بكە.
ئەو مێڤانە ل نك شەمعونێ كەڤلڤان، ئەوێ مالا وی ل نك دەریایێ.»
دەمێ ئەو فریشتەیێ ل گەل دئاخفت چووی، كورنیلیۆسی گازی كرە دوو خزمەتكارێن خۆ و سەربازەكێ ژ خودێ ترس یێ هەردەم ل گەل.
ئەوی هەمی تشتێن چێبووین گۆتنە وان و هنارتنە یافا.
ل رۆژا پاشتر ل دەمژمێر دوازدەی نیڤرۆ، دەمێ هەر سێ زەڵام ب رێكێ ڤە و نێزیكی باژێڕێ یافا دبوون، پەترۆس چوو سەربانی دا نڤێژێ بكەت.
پشتی هنگی برسی بوو و ڤیا تشتەكی بخۆت. دەمێ خوارن بۆ دهاتە ئامادەكرن، بێهش بوو.
دیت ئەسمانێ ڤەكریە و تشتەكێ وەكو چارچەڤەكا مەزن یێ داددەت، ژ هەر چوار كوژیان ڤە یێ گرتییە و یێ شۆڕ دبیتە سەر ئەردی.
هەمی جۆرێن گیانەوەرێن چوار پێ و خشۆكێن سەر ئەردی و باڵندەیێن ئەسمانی تێدا بوون.
ئینا دەنگەكی گۆتێ: «پەترۆس، رابە، ڤەكوژە و بخۆ!»
لێ پەترۆسی بەرسڤ دا: «حاشا، خودان! من چ جاران تشتێن هەڕمی و حەرام نەخوارینە.»
دەنگی جارەكا دی گۆتێ: «ئەو تشتێ خودێ پاقژ كری نەبێژە یێ هەڕمیە.»
ئەڤ چەندە سێبارە بوو و ئەو تشتێ وەكو چارچەڤێ ڤەگەڕیاڤە ئەسمانی.
دەمێ هزرێن پەترۆسی ئالۆز بووین، كا رامانا وێ بینینا دیتی چیە، هەر د وی دەمی دا، ئەو زەڵامێن ژ لایێ كورنیلیۆسی ڤە هاتینە هنارتن، ئەو ب پرسیاران ب مالا شەمعونی كەفتبوون و ل بەر دەری د راوەستیای بوون
و پرسیار كر: «ئەرێ شەمعونێ ناڤدار ب پەترۆس ل ڤێرێیە؟»
د وی دەمی دا هێشتا پەترۆسی هزر د رامانا وێ بینینێ دا دكر، ئینا گیانی گۆتێ: «سێ زەڵام یێ داخوازا تە دكەن،
ئەڤجا رابە و هەڕە خوارێ و ل گەل وان هەڕە و خۆ دوودل نەكە، چنكو من ئەوێن هنارتین.»
پەترۆس چوو خوارێ و گۆتە وان زەڵامان: «ئەزم ئەوێ هوین لێدگەڕن، هوین بۆ چ هاتینە؟»
ئینا وان گۆت: «كورنیلیۆسێ سەرلەشكەر، مرۆڤەكێ راستدار و ژ خودێ ترسە و ناڤودەنگەكێ باش د ناڤ هەمی مللەتێ جوهیان دا هەیە و وی فەرمان ژ فریشتەیەكێ پیرۆز وەرگرتییە، كو تە گازی بكەتە مالا خۆ، دا گوهێ خۆ بدەتێ، كا تە چ ئاخفتن هەنە.»
ئەڤجا پەترۆسی ئەو داخواز كرنە مالێ و مێڤان كرن. ل رۆژا پاشتر پەترۆس رابوو و ل گەل وان چوو و هندەك كەس ژ برایان كو خەلكێ یافایێ بوون، ل گەل چوون.
ل رۆژا پاشتر گەهشتنە قەیسەریێ و كورنیلیۆس ل چاڤەڕێیا وان بوو و ئەوی مرۆڤ و هەڤالێن خۆ یێن نێزیك داخواز كربوون.
دەمێ پەترۆس ب ژۆر كەفتی، كورنیلیۆسی خۆ چەماندە بەر پێیێن وی و سوجدە بۆ بر،
ئینا پەترۆسی راكرەڤە و گۆتێ: «رابە، ئەز ژی مرۆڤم!»
پاشی پەترۆس ب ژۆر كەفت و ئەو ل گەل دئاخفت و دیت گەلەك مرۆڤێن خڕڤەبووین.
گۆتە وان: «هوین دزانن كو بۆ مرۆڤێ جوهی حەرامە، تێكهەلیێ ل گەل بیانیەكی بكەت یان ژی سەرەدانا وی بكەت، لێ خودێ یێ نیشا من دای، كو ئەز دەربارەی مرۆڤەكی نەبێژم ئەو یێ حەرامە یان یێ هەڕمییە.
لەوما بێی نەرازیبوون ئەز ل دویڤ داخوازا هەوە یێ هاتیم، ئەڤجا ئەز دشێم پرسیار بكەم، بۆچی هەوە ئەز داخواز كرم؟»
كورنیلیۆسی بەرسڤ دا: «ژ بەری چوار رۆژان وەكو ڤی دەمی ل دەمژمێر سێیێ، ئەز ل مالا خۆ بووم و من نڤێژ دكر، ژ نشكەكێ ڤە زەڵامەكێ جلك تەیسی ل بەرامبەری من راوەستیا
و گۆتە من: ‹كورنیلیۆس، خودێ گو‍‌ھ ل نڤێژا تە بوو و هاریكاریێن تە بۆ هەژاران كرین ل بیرا وینە،
ئەڤجا هندەك زەڵامان بهنێرە یافایێ و گازی شەمعونی بكە ئەوێ دبێژنێ پەترۆس، ئەو ل مالا شەمعونێ كەڤلڤان ل نك دەریایێ مێڤانە.›
ئەڤجا د ج‍‌ھ دا من هنارتە ب دویڤ تە را و تە باش كر تۆ هاتی و ئەم هەمی نوكە ل بەرامبەر خودێ د ئامادەینە، دا مە گو‍‌ھ ل هەمی تشتان ببیت، یێن خودانی فەرمان ل تە كری كو تۆ بێژیە مە.»
پەترۆسی دەست ب ئاخفتنێ كر و گۆت: «ب راستی، ئەز تێگەهشتم كو خودێ لایەنگریا كەسێ ناكەت،
لێ د ناڤ هەر مللەتەكی دا، یێ ژ خودێ ترس بیت و راستداریێ بكەت، ئەو ل نك خودێ یێ قەبیلكریە.
هوین پەیاما وی دزانن ئەوا بۆ مللەتێ ئیسرائیلێ هنارتی. ئەو مزگینیدانا ئاشتیێیە ژ دەولەتسەرێ عیسایێ مەسیح، ئەوێ كو خودانێ هەمیانە.
هەروەسا هوین وی تشتی دزانن ئەوێ ل سەرانسەری یەهودیایێ رویدای، پشتی وێ تافیركرنا یوحەننای بانگەواز بۆ كری، ل جەلیلێ دەست پێ كر،
كا چەوا خودێ عیسایێ ناسیرەیی ب گیانێ پیرۆز و ب هێزێ زەیت كر ، ئەڤجا عیسا ژ جهەكی دچوو جهەكی و چاكی دكرن و هەمی ئەوێن ئبلیسی ئێخستینە بن هێزا خۆ، ساخ دكرن، چنكو خودێ د گەل وی دا بوو.
ئەم شاهدین ل سەر هەمی تشتێن وی ل دەڤەرا جوهیان و ئورشەلیمێ كرین. ئەوان عیسا ب دارەكی ڤە هەلاویست و كوشت.
لێ خودێ ئەو ل رۆژا سێیێ راكرەڤە و رێ دا كو دیار ببیت،
نە بۆ هەمی خەلكی، لێ ب تنێ بۆ وان شاهدێن بەری هنگی ژ لایێ خودێ ڤە هاتینە هەلبژارتن، ئانكو بۆ مە ئەوێن پشتی رابوونا وی ژ ناڤ مریان ل گەل وی خواری و ڤەخواری.
وی فەرمان ل مە كر، ئەم خەلكی ئاگەهدار بكەین و شاهدەییێ بدەین، كو ئەڤە ئەوە یێ خودێ وەكو دادوەر بۆ مریان و زیندیان دەستنیشان كری.
هەمی پێغەمبەر شاهدەییێ بۆ ددەن، كو هەر كەسێ باوەریێ ب وی بینیت، دێ لێبورینا گونەهان ب ناڤێ وی وەرگریت.»
دەمێ هێشتا پەترۆس دئاخفت، گیانێ پیرۆز ب سەر وان هەمیان دا هات، ئەوێن ئەو ئاخفتن دبهیست.
ئینا باوەردارێن سونەتكری ، یێن ل گەل پەترۆسی هاتین حێبەتی بوون، چنكو دیاریا گیانێ پیرۆز ب سەر مللەتان ژی دا هات.
چنكو گو‍‌ھ ل وان بوو یێ ب زمانێن دی دئاخڤن و پەسنا خودێ دكەن. ئەڤجا پەترۆسی گۆت:
«ئایا ئێك دشێت ئاڤێ قەدەغە بكەت، دا ئەڤێن وەكو مە گیانێ پیرۆز وەرگرتی نەهێنە تافیركرن؟»
ئینا فەرمان دا كو ئەو ب ناڤێ عیسایێ مەسیح بهێنە تافیركرن، پاشی داخواز ژ پەترۆسی كر، كو چەند رۆژەكان ل نك وان بمینیت.
هنارتی و برایان ل یەهودیایێ بهیست كو مللەتێن نەجوهی ژی پەیڤا خودێ یا وەرگرتی.
دەمێ پەترۆس سەركەفتیە ئورشەلیمێ، باوەردارێن سونەتكری رەخنە لێ گرت
و گۆتن: «تۆ چوویە مالا زەڵامێن سونەتنەكری و تە ل گەل وان خوار!»
پەترۆسی دەست پێ كر بۆ وان ئێك ل دویڤ ئێكێ شڕۆڤە كر و گۆت:
«من ل باژێڕێ یافا نڤێژ دكر و د بێهشیێ دا من بینینەك دیت كو تشتەكێ وەكو چارچەڤەكا مەزن داددا، ژ هەر چوار كوژیان ڤە ژ ئەسمانی دهاتە شۆڕكرن و نێزیكی من بوو.
دەمێ من باش بەرێ خۆ دایێ و هزر تێدا كری، من گیانەوەرێن چوارپێ یێن ئەردی و دڕندە و خشۆك و باڵندەیێن ئەسمانی دیتن.
هنگی من گو‍‌ھ ل دەنگەكی بوو، گۆتە من: ‹پەترۆس، رابە، ڤەكوژە و بخۆ.›
ئینا من بەرسڤ دا: ‹حاشا، خودان! تشتێ هەڕمی یان حەرام چ جاران نەچوویە د دەڤێ من دا.›
ئینا ئەوی دەنگی دووبارە ژ ئەسمانی بەرسڤا من دا: ‹ئەو تشتێ خودێ پاقژ كری، نەبێژە یێ هەڕمیە.›
ئەڤ تشتە سێبارە بوو و پاشی هەمی بۆ ئەسمانی هەلكێشانەڤە.
هەر د وی دەمی دا، سێ زەڵام ل بەر دەرگەهێ وێ مالێ راوەستیان یا ئەم لێ مێڤان، كو ژ قەیسەریێ هنارتبوونە ب دویڤ من را.
ئینا گیانی فەرمان ل من كر كو بێ دوودلی ل گەل وان بچم. ئەڤ هەر شەش برایە ل گەل من هاتن و ئەم چووینە د مالا وی زەڵامی ڤە یێ ئەو هنارتینە ب دویڤ من را.
وی ژی بۆ مە ڤەگێڕا كا چەوا وی فریشتە دیت د مالا وی ڤە یێ راوەستیایە و دبێژیتە وی: ‹هندەكان بهنێرە یافایێ و گازی شەمعونی بكە، ئەوێ دبێژنێ پەترۆس.
ئەو دێ پەیامەكێ گەهینیتە تە، تۆ و هەمی خەلكێ مالا تە دێ پێ قورتال بن.›
دەمێ من دەست ب ئاخفتنێ كری، گیانێ پیرۆز ب سەر وان دا هات، هەروەكو ل دەستپێكێ ب سەر مە دا هاتی.
ئینا گۆتنا خودانی هاتە بیرا من، كو گۆتبوو: ‹یوحەننای ب ئاڤێ تافیر كر، لێ هوین دێ ب گیانێ پیرۆز هێنە تافیركرن.›
ئەڤجا ئەگەر خودێ ئەو دیاری دابیتە وان وەكو یا دایە مە، دەمێ مە باوەری ب خودان عیسایێ مەسیح ئینای، ما ئەز كیمە دا بشێم بەرهنگاریا خودێ بكەم؟»
دەمێ وان گو‍‌ھ ل ڤێ چەندێ بووی، بێدەنگ بوون. ئەوان پەسنا خودێ كر و گۆتن: «ئانكو خودێ لخۆزڤڕین ژ بۆ ژیانێ یا دایە مللەتێن نەجوهی ژی.»
ئەڤجا ئەوێن ژ ئەگەرێ وێ تەپەسەریا پشتی كوشتنا ستیڤانۆسی بەڵاڤبووین، چوونە فینیقیا و قوبرس و ئەنتاكیایێ و وان بەحسێ مزگینیێ بۆ كەسێ نەدكر، ژبلی جوهیان.
لێ هندەك ژ وان هەبوون، خەلكێ قوبرس و قەیرەوانێ بوون، دەمێ گەهشتینە ئەنتاكیایێ، بۆ یونانیان ژی دئاخفتن و مزگینیا خودان عیسای ددایێ.
دەستێ خودانی ل گەل وان بوو و ژمارەیەكا زۆر باوەری ئینا و بۆ خودانی زڤڕین.
ئەڤ نوچە گەهشتە جڤاكا باوەرداران ل ئورشەلیمێ، ئینا ئەوان بارناباس هنارتە ئەنتاكیایێ.
دەمێ گەهشتی و كەرەما خودێ دیتی، گەلەك كەیفخۆش بوو و هەمی هاندان كو ژ دل ل گەل خودانی بمینن.
ئەو مرۆڤەكێ باش بوو و ژ گیانێ پیرۆز و باوەریێ یێ پڕ بوو. گەلەك كەس ژی گەهشتنە خودانی.
بارناباس چوو تەرسۆسێ دا ل شائوولی بگەڕیێت،
دەمێ دیتی، وی ئەو ئینا ئەنتاكیایێ. ساڵەكا تەمام ئەو پێكڤە ل گەل جڤاكا باوەرداران كۆم دبوون و گەلەك كەس فێر دكرن. ل ئەنتاكیایێ بوو كو شاگرد بۆ جارا ئێكێ ب ‹مەسیحی› هاتنە بناڤكرن.
ل وان رۆژان هندەك پێغەمبەر ژ ئورشەلیمێ ژۆردا هاتنە ئەنتاكیایێ.
ئێك ژ وان ناڤێ وی ئاگابۆس بوو و د كۆمبوونەكێ دا رابوو ژ پێرڤە و ب رێكا گیانی دیار كر كو نێزیكە دێ كولبەكا مەزن ل هەمی جیهانێ چێبیت. (ئەڤ كولبە ل سەر دەمێ قەیسەر كلودیۆسی چێبوو.)
ئینا شاگردان ل ئەنتاكیایێ بڕیار دا، كو هەر ئێك ل دویڤ پێچێبوونا خۆ هاریكاریێ بۆ برایێن ل یەهودیایێ بهنێریت.
وان ئەڤ چەندە كر و ب دەستێ بارناباسی و شائوولی بۆ ریهسپیان هنارت.
ل وی دەمی هێرودێس پاشای دەستێ خۆ بۆ ئازاردانا هندەك كەسێن جڤاكا باوەرداران درێژ كر،
ئەڤجا یەعقوبێ برایێ یوحەننای ب شیری كوشت.
دەمێ دیتی ئەڤ چەندە ب دلێ جوهیانە، رابوو پەترۆس ژی دا گرتنێ و ئەڤێ ل جەژنا نانێ شكەڤا رویدا.
پشتی گرتی، هاڤێتە د زیندانێ دا ل ژێر زێرەڤانیا چوار كۆمێن زێرەڤانان، هەر كۆمەك ژ چوار سەربازان پێكدهات. وی دڤیا پشتی جەژنا دەربازبوونێ ل بەرامبەری خەلكی وی دادگە‍‌ھ بكەت.
ئێدی پەترۆس د زیندانێ دا ل بن زێرەڤانیێ بوو، لێ جڤاكا باوەرداران پێخەمەت وی ب گەرمی نڤێژ بۆ خودێ دكرن.
دەمێ هێرودێسی ل بەر بوو پەترۆسی بینیتە بەرامبەری خەلكی، وێ شەڤێ پەترۆس د ناڤبەرا دوو سەربازان دا یێ نڤستی بوو و ب دوو زنجیران یێ گرێدایی بوو، ل بەر دەرگەهی ژی هندەك زێرەڤانان زێرەڤانی ل زیندانێ دكر.
ژ نشكەكێ ڤە فریشتەیەكێ خودانی دیار بوو، رۆناهیێ شەوق دا ژۆرێ و فریشتەی دەستێ خۆ ل كێلەكا پەترۆسی دا و هشیار كر و گۆتێ: «زوی رابە!» ئینا زنجیر ژ دەستێن وی كەفتن.
فریشتەی گۆتێ: «قایشا خۆ گرێ بدە و پێلاڤێن خۆ بكە پێ خۆ!» وی وە كر. پاشی فریشتەی گۆتێ: «كوركێ خۆ بكە بەر خۆ و ل دویڤ من وەرە!»
ئەو ل دویڤ فریشتەی دەركەفت و نەدزانی ئەو تشتێ ب رێكا فریشتەی چێبووی راستیە، لێ هزر دكر ئەو یێ بینینەكێ دبینیت.
ئەو ژ خالا زێرەڤانیێ یا ئێكێ و دوویێ دەرباز بوون و گەهشتنە دەرگەهێ زیندانێ یێ ئاسنی، ئەوێ دچیتە باژێڕی، ئینا ئەو ب خۆ بۆ وان ڤەبوو. ئەو دەركەفتن و ژ كۆلانەكێ دەربازبوون، ئێكسەر فریشتەی ئەو هێلا.
هنگی پەترۆس هاتە سەر هشێن خۆ و گۆت: «نوكە پشتڕاست من زانی كو خودانی فریشتەیێ خۆ یێ هنارتی و ئەز ژ دەستێ هێرودێسی و ژ وان هەمی تشتان ئەوێن خەلكێ جوهی ل هیڤیێ بوون، قورتال كرم!»
پشتی كو د ڤێ چەندێ گەهشتی، چوو مالا مەریەما دایكا یوحەننای ئەوێ دگۆتنێ مەرقۆس و ژمارەیەكا مەزن ژ باوەرداران د كۆمبووی بوون و نڤێژ دكرن.
دەمێ دەرگەهێ ژ دەرڤە قوتای، كچكەكا خزمەتكار ب ناڤێ رۆدا هات، دا گوهێ خۆ بدەتە دەرگەهی.
دەمێ دەنگێ پەترۆسی نیاسی، دەرگە‍‌ھ ژ كەیفان دا ڤەنەكر، ب غار چوو ژۆر و گۆتە وان كو پەترۆس یێ ل بەر دەرگەهی.
وان گۆتێ: «تۆ یا دین بووی!» لێ ئەو ل سەر ئاخفتنا خۆ یا رژد بوو. وان گۆت: «ئەو فریشتەیێ ویە!»
لێ پەترۆس ل سەر دەرگە‍‌ھ قوتانێ یێ بەردەوام بوو تا بۆ وی ڤەكری و دەمێ وان ئەو دیتی، گوهشین.
پەترۆسی ب دەستێ خۆ ئاماژە كر، كو بێدەنگ بن و بۆ وان ڤەگێڕا كا چەوا خودانی ئەو ژ زیندانێ دەرئێخست و گۆت: «ڤێ چەندێ بێژنە یەعقوبی و برایان،» پاشی دەركەفت و چوو جهەكێ دی.
دەمێ بوویە سپێدە، تێكچوونەكا نە بچویك كەفتە د ناڤ سەربازان دا و پرسیار كرن: «ئایا چ ل پەترۆسی هات؟»
هێرودێسی فەرمانا لێ گەڕیانا وی دا، لێ دەمێ نەدیتی، لێپرسین ل گەل زێرەڤانان كر و فەرمان ب كوشتنا وان دا. پاشی هێرودێس ژ دەڤەرا یەهودیایێ خواركەفتە قەیسەریێ و ل وێرێ ما.
هێرودێس ژ خەلكێ سور و سایدا یێ تۆڕە بوو، ئینا خەلكێ وان باژێڕان پێكڤە بۆ دیتنا پاشای هاتن. وان بلاستۆسێ سەرپەرشتێ مالا پاشای قاییل كر و داخوازا ئاشتیێ گەهاندە پاشای، چنكو دەڤەرا وان خۆراكێ خۆ ژ دەڤەرا پاشایەتیا هێرودێسی دئینا.
د رۆژا دەستنیشان كری دا هێرودێسی جلكێن خۆ یێن پاشایەتیێ كرنە بەر خۆ و ل سەر تەختی روینشت و گۆتارەك پێشكێشی وان كر.
مللەتی گازی كر: «ئەڤە دەنگێ خوداوەندەكیە، نە دەنگێ مرۆڤانە!»
د گاڤێ دا فریشتەیەكێ خودانی دربەك لێدا، چنكو وی مەزناهی بۆ خودێ نەدانا، ئینا كرمان ئەو خوار و مر!
لێ پەیڤا خودێ گەشە بوو و پتر بەڵاڤ دبوو.
بارناباس و شائوولی كارێ خۆ ب دویماهی ئینا و ژ ئورشەلیمێ ڤەگەڕیانەڤە و یوحەننایێ ناڤدار ب ‹مەرقۆس› ل گەل وان بوو.
د جڤاكا باوەردارێن مەسیحی دا ل ئەنتاكیایێ چەندین پێغەمبەر و مامۆستا هەبوون: بارناباس، شەمعونێ كو دبێژنێ نیگەر ، لوكیۆس ژ قەیرەوانێ، مەنایینێ كو هەر ژ زاڕۆكینی ل گەل هێرودێسێ دەستهەلاتدار مەزن بووی و شائوول.
ل دەمێ ئەو ب رۆژی و خودان دپەرست، گیانێ پیرۆز گۆتێ: «بۆ من بارناباسی و شائوولی بۆ وی كارێ من داخوازا وان كری تەرخان بكەن.»
ئەڤجا وان رۆژی گرتن و نڤێژ كرن و دەستێن خۆ دانانە سەر، پاشی ئەو ب رێ ئێخستن.
دەمێ گیانێ پیرۆز ئەو هنارتین، ژۆردا چوونە سەلوكیایێ و ب گەمیێ دەربازی قوبرسێ بوون.
دەمێ گەهشتینە سەلامیس ، پەیڤا خودێ د كنیشتەیێن جوهیان دا راگەهاند و یوحەننا ژی بۆ هاریكاریێ ل گەل وان بوو.
ئەو ل هەمی گزیرتەیێ گەڕیان هەتا گەهشتینە پافۆس و ل وێرێ جادووگەرەكێ جوهی دیت، ئەو پێغەمبەرەكێ درەوین بوو، ناڤێ وی باریەشوع بوو.
نیاسێ سەرجیۆس پاولۆسێ حوكمڕان بوو، سەرجیۆس پاولۆس زەڵامەكێ ژیر بوو. گازی بارناباسی و شائوولی كر و داخواز ژ وان كر كو پەیڤا خودێ بۆ وی بێژن.
لێ ئێلوماسێ جادووگەر، كو وەرگێڕانا ناڤێ ویە، بەرهنگاریا وان كر، داكو بەرێ حوكمڕانی ژ باوەریێ بگوهۆڕیت.
لێ شائوولێ كو دبێژنێ پاولۆس، ژ گیانێ پیرۆز پڕ بوو و بەرێ خۆ دا جادووگەری و گۆت:
«هەی ئەوێ تژی ژ هەمی سەختەیێ و هەمی فێلبازیێ، هەی كوڕێ ئبلیسی، هەی دوژمنێ هەمی باشیێ! ما تۆ دەست ژ خواركرنا رێكێن خودانی یێن راست بەرنادەی؟
ئها ئەڤە دەستێ خودانی ل هنداڤی تەیە و دێ كۆرە بی و تا دەمەكی رۆناهیا رۆژێ نابینی.» د ج‍‌ھ دا مژ و دومان كەفتە سەر چاڤێن وی، ئەڤجا ل واران گەڕیا داخواز دكر كو ئێك دەستێ وی بگریت و بڕێڤە ببەت.
دەمێ حوكمڕانی ئەڤ چەندە دیتی، باوەری ئینا و ژ بەر فێركرنا خودانی گوهشی.
پاولۆس و هەڤالێن خۆ د دەریایێ دا ژ پافۆس بەرەڤ پەرگەیا پامفیلیایێ چوون. ل وێرێ یوحەننای ئەو هێلان و ڤەگەڕیا ئورشەلیمێ.
ئەو ژی ژ پەرگەیێ چوونە ئەنتاكیا پیسیدیایێ، ل رۆژا شەمبیێ چوونە كنیشتەیێ و روینشتنە خوارێ.
پشتی خواندنا هندەكێ ژ دەستووری و نڤیسارێن پێغەمبەران، سەرۆكێن كنیشتەیێ هنارتە دویڤ وان را و گۆتنێ: «گەلی برایان، ئەگەر هەوە پەیڤەك بۆ شیرەتكرنا كۆمبوویان هەبیت، بێژن.»
پاولۆس رابوو ژ پێرڤە و ب دەستی ئاماژە كر و گۆت: «گەلی ئیسرائیلیان و ئەوێن دی یێن ژ خودێ دترسن، گوهێ خۆ بدەنێ:
خودایێ ڤی مللەتی ئانكو ئیسرائیل، بابكالێن مە هەلبژارتن و مللەتێ مە، دەمێ ئەو ل ئاوارەیێ ل ئەردێ مسرێ، مەزن كر، پاشی ب زەندەكێ هێزدار ژ وێرێ ئینانە دەر.
نێزیكی چل ساڵان ل بیابانێ بێهنا خۆ ل وان فرە‍‌ھ كر،
پاشی حەفت مللەت ل ئەردێ كەنعان وێران كرن و ئەردێ وان وەكو میرات دا گەلێ خۆ.
ئەڤێ هەمیێ نێزیكی چوار سەد و پێنجی ساڵان ڤەكێشا. پشتی هنگی خودێ دادوەر بۆ وان راكرن، هەتا هاتنا ساموئێل پێغەمبەری.
ئینا وان داخوازا پاشایەكی كر، خودێ ژی شائوولێ كوڕێ قیشی ژ هۆزا بنیامین دا وان، بۆ چل ساڵان وی پاشایەتی ل وان كر.
پاشی خودێ ئەو لادا و داوود كرە پاشایێ وان، ئەوێ خودێ شاهدەیی ژی بۆ دای و گۆتێ: ‹من داوودێ كوڕێ یێشای دیت، زەڵامەكێ ب دلێ من، ئەوێ دێ هەمی حەزێن من ب ج‍‌ھ ئینیت.›
ژ دویندەها وی، خودێ ل گۆر سۆزا خۆ، قورتالكەرەك بۆ ئیسرائیلیان ئینا، ئەو ژی عیسایە.
بەری هاتنا وی، یوحەننای بۆ هەمی مللەتێ ئیسرائیل راگەهاند، كو ل خۆ بزڤڕن و بهێنە تافیركرن.
دەمێ یوحەننای كارێ خۆ ب دویماهی دئینا، گۆت: ‹هوین هزر دكەن ئەز كیمە؟ ئەز نە ئەوم، لێ ئەڤە ئەو دێ پشتی من هێت، ئەوێ ئەز نە هەژیمە بەندكێ پێلاڤا وی ڤەكەم.›
گەلی برایان، كوڕێن دویندەها ئیبراهیمی و ئەوێن دی یێن د ناڤ هەوە دا ژ خودێ دترسن، پەیڤا ڤێ قورتالبوونێ بۆ مە یا هاتیە هنارتن.
ژ بەر كو خەلكێ ئورشەلیمێ و سەرۆكێن وان ئەو نەنیاسی، لەوما وان ئەو داد كر و هۆسا وان پەیڤێن پێغەمبەران، یێن هەمی رۆژێن شەمبی دهێنە خواندن، ب ج‍‌ھ ئینان.
وان ئەگەرەكێ هەژی كوشتنێ ل سەر وی نەدیت، لێ د سەر هندێ را وان داخواز ژ پیلاتۆسی كر وی بكوژیت.
پشتی هەمی تشتێ ل سەر هاتیە نڤیسین، ب ج‍‌ھ ئیناین، ژ خاچێ ئینا خوارێ و دانا د گۆڕی دا.
لێ خودێ ژ ناڤ مریان راكر
و گەلەك رۆژان بۆ وان دیار بوو، یێن ژ دەڤەرا جەلیل ل گەل وی هاتبوونە ئورشەلیمێ و نوكە ئەو ل بەرامبەری خەلكی شاهدێن وینە.
ئەڤە ئەم ژی بۆ هەوە مزگینیێ رادگەهینین، كو ئەو سۆزا خودێ دایە بابكالێن مە،
وی بۆ مە، كوڕێن وان، ب ج‍‌ھ ئینا، دەمێ عیسا ژ مرنێ راكری. هەروەكو د زەبوورا دوویێ دا هاتیە نڤیسین: ‹تۆ كوڕێ منی، ئەڤرۆ من تۆ بووی.›
دەربارەی راكرنا وی یا ژ ناڤ مریان، كو ئێدی ئەو ناڤەگەڕیتە رزیبوونێ، خودێ هۆسا گۆتیە: ‹ئەز دێ وان بەرەكەتێن پیرۆز و مسۆگەر دەمە هەوە، ئەوێن من سۆز پێ دایە داوودی.›
لەوما ل پشكەكا دی یا زەبوورێ دبێژیت: ‹تۆ ناهێلی وەفادارێ تە تووشی رزیبوونێ ببیت.›
چنكو پشتی داوودی د دەمێ خۆ دا ل دویڤ حەزكرنا خودێ خزمەت كری، مر و گەهشتە بابكالێن خۆ و تووشی رزیبوونێ بوو،
لێ ئەوێ خودێ راكری، رزیبوون نەدیت.
ئەڤجا هشیار بن، داكو ئەو تشتێ پێغەمبەران گۆتی ب سەرێ هەوە نەهێت:
‹بەرێ خۆ بدەنێ، گەلی تڕانەكەران! بگوهشن و بنبڕ ببن، چنكو ئەز دێ ل سەردەمێ هەوە كارەكی كەم، كو ئەگەر ئێك بۆ هەوە بەحس بكەت، هوین ئێكجار باوەر نەكەن!› »
دەمێ پاولۆس و بارناباس دەردكەفتن، خەلكی داخواز ژ وان كر، كو شەمبیا بهێت ژی دەربارەی ڤی تشتی، بۆ وان بئاخڤن.
پشتی كۆمبوون ب دویماهی هاتی، گەلەك ژ جوهی و ئەوێن هاتبوونە سەر باوەریا جوهیان ل دویڤ پاولۆسی و بارناباسی چوون. ئەو ژی بۆ وان ئاخفتن و هاندان كو د كەرەما خودێ دا بمینن.
د شەمبیا دی دا، نێزیكی هەمی خەلكێ باژێڕی كۆمبوون، دا گوهێ خۆ بدەنە پەیڤا خودانی.
دەمێ جوهیان ئەو جەماوەر دیتی، ژ چاڤپێڕانەبوونێ پڕ بوون و ب جڤینان بەرهنگاریا ئاخفتنا پاولۆسی كر.
هنگی پاولۆسی و بارناباسی ب وێرەكی گۆت: «پێدڤی بوو ل بەراهیێ پەیڤا خودێ بۆ هەوە هاتبا گۆتن، لێ چنكو هەوە رەتكر و دیار كر كو هوین نە هەژی ژیانا هەروهەرن، ئەڤە ئەم یێ قەستا مللەتێن نەجوهی دكەین.
چنكو خودانی هۆسا فەرمان یا ل مە كری: ‹من تۆ كریە رۆناهی بۆ مللەتێن دی، دا تۆ قورتالبوونێ بگەهینییە هەر چوار كوژیێن جیهانێ.› »
دەمێ یێن نەجوهی ئەڤ چەندە بهیستی، دلخۆش بوون و پەسنا پەیڤا خودانی كرن و هەمیێن ژ بۆ ژیانا هەروهەر هاتینە دەستنیشانكرن، باوەری ئینا.
ئێدی پەیڤا خودانی ل هەمی دەڤەرێ بەڵاڤ بوو،
لێ جوهیان ژنكێن قەدرگران یێن كو هاتبوونە سەر باوەریا جوهیان و ریهسپیێن باژێڕی هاندان و تەپەسەریەك دژی پاولۆسی و بارناباسی ئاراند و ئەو ژ دەڤەرا خۆ دەرئێخستن.
ئەوان ژی تۆزا پێیێن خۆ ل سەر وان داقوتا و چوونە باژێڕێ كۆنیایێ.
ئەڤجا شاگرد ژ دلخۆشی و ژ گیانێ پیرۆز پڕ دبوون.
ل كۆنیایێ ژی هەمان تشت چێبوو، پاولۆس و بارناباس چوونە د كنیشتەیا جوهیان ڤە و دەست ب ئاخفتنێ كر، تاكو گەلەك جوهیان و یونانیان باوەری ئینای.
لێ ئەو جوهیێن باوەری نەئینای، مێشكێ نەجوهیان د سەردا بر و دژی برایان ئاراندن،
لەوما ئەو بۆ دەمەكێ درێژ مانە ل وێرێ و بێ ترس مزگینی دەربارەی خودانی ددا، خودانی ژی ب نیشان و مەندەهۆشیێن ل سەر دەستێ وان كرین، پەیڤا كەرەما خۆ دسەلماند.
خەلكێ كۆنیایێ ژی بوونە دوو پشك: هندەك ل گەل جوهیان بوون، هندەك ژی ل گەل هەردوو هنارتیان بوون.
هنگی هندەكێن نەجوهی و جوهیان ل گەل سەرۆكێن خۆ بڕیار دا كو هنارتیان كرێت و بەرباران بكەن،
ئینا وان ب وێ چەندێ زانی و رەڤینە باژێڕێن هەرێما لوكاونیایێ: لیسترا و دەربە و دەوروبەرێن وان.
ل وێرێ دەست ب گەهاندنا مزگینیێ كر.
ل لیسترا، زەڵامەك هەبوو، هەر ژ ژدایكبوونا خۆ یێ فاڵنجی بوو، چ جاران بڕێڤە نەچووبوو.
ئەو یێ روینشتی بوو و گوهێ خۆ ددا ئاخفتنا پاولۆسی. پاولۆسی بەرێ خۆ دایێ و دیت كو وی باوەری یا هەی ساخ ببیت،
ب دەنگەكێ بلند گۆتێ: «رابە، ل سەر پێیێن خۆ راوەستە!» ئەو زەڵام راست رابوو ژ پێرڤە و دەست ب بڕێڤەچوونێ كر.
دەمێ ئامادەبوویان دیتی كا پاولۆسی چ كر، ب زمانێ لوكاونیایی كرنە گازی و گۆتن: «خوداوەند ل سەر شێوەیێ مرۆڤان بۆ مە هاتنە خوارێ.»
گۆتنە بارناباسی زەیۆس و گۆتنە پاولۆسی هەرمس ، چنكو ئەو ئاخفتنكەرێ سەرەكی بوو.
كاهنێ زەیۆسی ژی، ئەوێ كو پەرستگەها وی ب رەخ باژێڕی ڤە، دەستكێن گولان و گا ئینانە د دەرگەهان دا، وی دڤیا ل گەل خەلكی بۆ هنارتیان بكەتە قوربان،
لێ دەمێ هەردوو هنارتیان، بارناباسی و پاولۆسی، گو‍‌ھ ل ڤێ چەندێ بووی، جلكێن خۆ دڕاندن و ب لەز چوونە نك كۆمبوویان و گازی كر
و گۆتن: «گەلی جوامێران، بۆچی هوین ڤێ دكەن؟ ئەم ژی وەكو هەوە مرۆڤین، مزگینیێ دگەهینینە هەوە، كو هوین ڤان تشتێن پویچ بهێلن و بۆ خودایێ زیندی ڤەگەڕن، ئەوێ ئەرد و ئەسمان و دەریا و هەمی تشتێن تێدا چێكرین،
ئەوێ ل سەردەمێن بوری هێلای كو هەر مللەتەك ل سەر رێیا خۆ بچیت،
لێ ئەوی خۆ بێ شاهد نەهێلا: چاكی كر و ژ ئەسمانی باران باراند و وەرزێن بەرهەمدار دانە هەوە، دلێ هەوە ژ خوارن و خۆشیێ تێر كر.»
ب ڤێ ئاخفتنێ و ل گەل هەوڵدانەكا زۆر، ئەو شیان وە ل خەلكی بكەن كو قوربانان بۆ وان پێشكێش نەكەن.
پاشی هندەك جوهی ژ ئەنتاكیایێ و كۆنیایێ هاتن و خەلك قاییل كر و پاولۆس بەرباران كر تاكو وان هزر كری یێ مری و خڕاندە ژ دەرڤەی باژێڕی.
لێ دەمێ شاگرد لێ كۆم بووین، رابوو و ڤەگەڕیا باژێڕی و ل رۆژا د دویڤ دا، ل گەل بارناباسی چوو باژێڕێ دەربە.
پشتی مزگینی گەهاندیە خەلكێ دەربە و گەلەك ژ وان كرینە شاگرد، ڤەگەڕیانە لیسترا و ژ وێرێ بۆ كۆنیایێ و پاشی بۆ ئەنتاكیایێ،
وان دلێ شاگردان خورت دكر و ئەو هانددان كو د باوەریێ دا د خۆڕاگر بن و گۆتە وان: «دڤێت ئەم د گەلەك تەنگاڤیان را دەرباز ببین، دا بچینە د پاشایەتیا خودێ دا.»
بۆ وان ل هەر جڤاكەكا باوەرداران ریهسپی دانان و ل گەل رۆژی گرتنێ نڤێژ كرن و هەمی دانە دەستێ خودانی، یێ كو وان باوەری پێ ئینابوو.
پاشی د دەڤەرا پیسیدیایێ را دەرباز بوون و گەهشتنە هەرێما پامفیلیایێ
و ل باژێڕێ پەرگەیێ مزگینیا پەیڤا خودێ راگەهاند و چوونە ئەنتالیایێ.
ژ وێرێ ب گەمیێ ڤەگەڕیانە ئەنتاكیایێ، ئەو جهێ كو ل وێرێ رادەستی كەرەما خودێ هاتبوونە كرن، بۆ وی كارێ وان ئەنجامدای.
دەمێ گەهشتین، وان جڤاكا باوەرداران كۆم كر و بەحسێ وان هەمی تشتان كر، ئەوێن خودێ ل سەر دەستێ وان كرین و كا چەوا وی دەرگەهێ باوەریێ بۆ نەجوهیان ژی ڤەكر
و بۆ دەمەكێ درێژ ل گەل شاگردان ل وێرێ مان.
هندەك كەس ژ دەڤەرا یەهودیایێ خواركەفتنە ئەنتاكیایێ و دەست ب فێركرنا برایان كر و گۆتن: «ئەگەر هوین ل دویڤ داب و نەریتێن مووسای نیشا هەوە داین نەهێنە سونەتكرن، هوین نەشێن قورتال ببن.»
لێ د ناڤبەرا وان و پاولۆسی و بارناباسی دا، گەنگەشە و دانوستاندنەكا دژوار چێبوو، پشتی هنگی پاولۆس و بارناباس ل گەل هندەك باوەردارێن دی هاتنە دەستنیشانكرن، كو سەربكەڤنە ئورشەلیمێ و ل دۆر ڤی بابەتی چاڤپێكەفتنێ ل گەل هنارتی و ریهسپیان بكەن.
ئەڤجا پشتی جڤاكا باوەرداران ئەو ب رێ ئێخستین، ئەو د دەڤەرێن فینیقیا و سامەریایێ را دەرباز دبوون و رادگەهاند كو نەجوهیان ژی باوەری ب مەسیحی ئینا، وان دلخۆشكرنەكا مەزن بۆ هەمی برایان پەیدا كر.
دەمێ گەهشتینە ئورشەلیمێ، جڤاكا باوەرداران و هنارتی و ریهسپیان بخێرهاتن لێ كر، وان ژی بەحسێ ئەوان تشتان كر، یێن خودێ ل سەر دەستێ وان كرین.
لێ هندەكێن كو ژ رێبازا فەریسیان بوون و باوەری ب عیسای ژی ئینابوو، رابوون و گۆتن: «دڤێت ئەو بهێنە سونەتكرن و فەرمان ل وان بهێتە كرن كو دەستوورێ مووسای ب ج‍‌ھ بینن.»
ئینا هنارتی و ریهسپی كۆمبوون، دا دانوستاندنێ دەربارەی ڤێ چەندێ بكەن.
پشتی گەنگەشەیەكا درێژ، پەترۆس رابوو و گۆتە وان: «گەلی برایان، هەروەكو هوین دزانن ژ بەری دەمەكێ درێژ، خودێ د ناڤبەرا هەوە دا ئەز هەلبژارتم، كو مللەتێن نەجوهی پەیڤا مزگینیێ ژ دەڤێ من ببهیسن و باوەریێ بینن.
خودێ، ئەوێ دزانیت كا د دلان دا چ هەیە، وەك نیشانا رازیبوونێ ژ وان، گیانێ پیرۆز دا وان ژی، هەروەكو دایە مە.
ئەوی ب باوەریێ دلێ وان پاقژ كر و هۆسا چ جوداهی نەئێخستە د ناڤبەرا مە و وان دا.
ئەڤجا بۆچی هوین خودێ تاقی دكەن، كو نیركی دداننە سەر ستۆیێ شاگردان، ئەو نیركێ بابێن مە نەشیاین و مە ژی نەشیای هەلگرین؟
لێ مە باوەری هەیە، كو ئەم و ئەو ژی، دێ ب كەرەما خودان عیسای قورتال بین.»
هنگی هەمی ئامادەبووی بێدەنگ بوون و گوهێ خۆ دانە بارناباسی و پاولۆسی، ئەوێن نیشان و مەندەهۆشی، یێن كو خودێ ل سەر دەستێ وان د ناڤ مللەتێن نەجوهی دا كرین، ڤەدگێڕان.
پشتی ژ ئاخفتنێ ب دویماهی هاتین، یەعقوبی بەرسڤ دا و گۆت: «گەلی برایان، گوهێ خۆ بدەنە من:
شەمعونی دیار كر، كا چەوا ژ بۆ جارا ئێكێ، خودێ پویتە ب مللەتێن نەجوهی دا، داكو ژ وان خەلكەكی بۆ ناڤێ خۆ پەیدا بكەت.
ئەڤ چەندە ل گەل گۆتنێن پێغەمبەران ژی یا رێككەفتیە، هەروەكو هاتیە نڤیسین:
‹پشتی ڤێ ئەز دێ ڤەگەڕم و خیڤەتا داوودی یا كەفتی ڤەدەمەڤە، كاڤلێن وێ دێ ئاڤا كەمەڤە و نویژەن كەم،
داكو مرۆڤێن مایی و هەمی نەجوهیێن ناڤێ من ل سەر وان، قەستا خودانی بكەن. ئەڤە ئاخفتنا خودانیە، ئەوێ ڤان تشتان دكەت
یێن كو هەر ژ كەڤن دا هاتینە زانین. ›
لەوما ئەز ب فەر دبینم كو ئەم گرانیێ نەئێخینە سەر ملێ ئەو كەسێن ژ نەجوهیان بۆ خودێ ڤەدگەڕن،
لێ ئەم بۆ وان نامەیەكێ بنڤیسین كو ئەو خۆ ژ هەڕماتیێن پووتان و دەهمەنپیسیێ و گیانەوەرێن خەندقاندی و خوینێ دویر بئێخن.
چنكو هەر ژ كەڤن دا، ل هەر باژێڕەكی، دەستوورێ مووسای دهێتە راگەهاندن و ل هەمی شەمبیان د ناڤ كنیشتەیان دا دهێتە خواندن.»
هنگی هنارتی و ریهسپیان ل گەل هەمی جڤاكا باوەرداران بڕیار دا، كو چەند زەڵامان ژ ناڤ خۆ هەلبژێرن، دا ل گەل پاولۆس و بارناباسی بهنێرنە ئەنتاكیایێ. ئینا یەهودا یێ كو دبێژنێ بارساباس و سیلاس هەلبژارتن، كو د ناڤ برایان دا د رێزدار بوون.
ئەڤ نامەیە ب دەستێ وان هنارت: «ژ برایێن هەوە هنارتی و ریهسپیان، بۆ برایێن باوەردار ژ مللەتێن نەجوهی ل ئەنتاكیا، سوریا و كیلیكیایێ: سڵاڤ.
مە یێ بهیستی كو هندەك كەس ژ مە، بێی كو ئەم وان بهنێرین، یێن هاتینە نك هەوە و ب گۆتنێن خۆ هوین دلتەنگ كرینە و هزرێن هەوە ئالۆز كرینە.
ئەڤجا مە هەمیان پێكڤە بڕیار دا، كو چەند زەڵامان هەلبژێرین و ل گەل هەڤالێن مە یێن خۆشتڤی بارناباسی و پاولۆسی بهنێرینە نك هەوە،
ئەوێن ژ بۆ ناڤێ خودانێ مە عیسایێ مەسیح ژیانا خۆ ئێخستییە د مەترسیێ دا.
ئەڤجا مە یەهودا و سیلاس هنارتن، دا هەمان تشتی ب دەڤێ خۆ ژی بێژنە هەوە،
چنكو گیانێ پیرۆز و مە ژی ب باش دیت، كو ئەم بارەكێ گرانتر نەدانینە سەر ملێن هەوە، ژبلی ڤان تشتێن پێدڤی:
هوین خۆ ژ خوارنێن بۆ پووتان هاتینە پێشكێشكرن، خوینێ، گیانەوەرێن خەندقاندی و دەهمەنپیسیێ دویر بئێخن. ئەگەر هوین خۆ ژ ڤان تشتان بپارێزن، هوین دێ باش كەن. بخێر بمینن.»
ئەو هاتنە ب رێ ئێخستن و خواركەفتنە ئەنتاكیایێ، وان هەمی باوەردار كۆمكرن و نامە گەهاندە وان.
دەمێ وان خواندی، ژ بەر هاندانا تێدا هاتی، دلخۆش بوون.
یەهودا و سیلاسی، كو ئەو ب خۆ ژی پێغەمبەر بوون، گەلەك بۆ وان ئاخفتن و ب ڤی شێوەی هاندانا برایان كر و ب هێز ئێخستن.
پشتی دەمەكی ل وێرێ ماین، برایان ب ئاشتیانە ئەو ب رێ ئێخستنە نك ئەوێن كو ئەو هنارتبوون.
لێ سیلاسی دیت كو باشترە ئەو ل وێرێ بمینیت.
پاولۆس و بارناباس ژی ل ئەنتاكیایێ مان و ل گەل گەلەكێن دی پەیڤا خودانی ددا فێركرن و رادگەهاند.
پشتی چەند رۆژان، پاولۆسی گۆتە بارناباسی: «دا ڤەگەڕین و سەرەدانا خویشك و برایان بكەین ل هەر باژێڕەكێ مە مزگینیا پەیڤا خودانی لێ راگەهاندی، دا بزانین كا ئەو د چەوانن.»
بارناباسی حەز كر كو یوحەننایێ دبێژنێ مەرقۆس ل گەل خۆ ببەن،
لێ پاولۆس یێ رژد بوو وی ل گەل خۆ نەبەن، یێ كو ل پامفیلیایێ ژ وان ڤەقەتیای و ل گەل وان نەچوویە كاری.
ناكۆكیەكا وەسا د ناڤبەرا وان دا چێبوو، تا ژ ئێك جودا بووین. ئەڤجا بارناباسی مەرقۆس بر و ب گەمیێ چوو قوبرسێ.
پاولۆسی ژی سیلاس هەلبژارت و ب رێ كەفت، پشتی برایان ئەو رادەستی كەرەما خودانی كری.
د ناڤ سوریا و كیلیكیایێ دا دگەڕیا و جڤاكێن باوەرداران قاییم دكرن.
پاشی پاولۆس گەهشتە دەربە، پشتی هنگی گەهشتە لیسترا، ل وێرێ شاگردەك ب ناڤێ تیمۆتاوس هەبوو، دایكا وی جوهی بوو و باوەری ب مەسیحی هەبوو، لێ بابێ وی یونانی بوو.
تیمۆتاوسی د ناڤ برایێن باژێڕێ لیسترا و كۆنیایێ دا ناڤودەنگەكێ باش هەبوو.
پاولۆسی حەز دكر وی ل گەل خۆ ببەت، ئینا ژ بەر جوهیێن وێ دەڤەرێ سونەت كر، چنكو هەمیان دزانی بابێ وی یونانیە.
ئەو ژ باژێڕەكی بۆ باژێڕەكی دگەڕیان و بڕیارێن ریهسپی و هنارتیان ل ئورشەلیمێ داین، بۆ وان رادگەهاندن، دا ئەو پێگیریێ پێ بكەن.
ب ڤی ئاوایی جڤاكێن باوەرداران د باوەریێ دا موكمتر لێ دهاتن و رۆژ بۆ رۆژێ ژمارەیا باوەرداران پتر لێ دهات.
ئەو د ناڤبەرا هەرێمێن فریگیە و گالاتیا را دەرباز بوون، چنكو گیانێ پیرۆز وەنەكر پەیڤێ ل هەرێما ئاسیا بەڵاڤ بكەن.
دەمێ گەهشتینە هەرێما میسیا، وان هەوڵدا بچنە د هەرێما بیتینیایێ دا، لێ گیانێ عیسای نەهێلا.
د میسیا را چوون و گەهشتنە باژێڕێ ترویاس.
ب شەڤێ بینینەك بۆ پاولۆسی دیار بوو، تێدا مرۆڤەكێ مەقدۆنی یێ راوەستیای بوو، ژ دل هیڤی ژێ دكرن و دگۆتێ: «دەربازی مەقدۆنیا ببە و هاریكاریا مە بكە.»
پشتی وی ئەو بینین دیتی، ئێكسەر مە خۆ ئامادە كر بچینە مەقدۆنیایێ، چنكو مە تێ ئینا دەر كو خودێ گازی مە كر، دا مزگینیێ بدەینە خەلكێ وێ دەڤەرێ.
ئەم ژ ترویاس ب گەمیێ راست چووینە ساموتراكیێ، ل رۆژا پاشتر چووینە نیاپۆلیس.
ژ وێرێ ئەم چووینە باژێڕێ فیلیپی، كو باژێڕەكێ دەڤەرا ئێكێ یا مەقدۆنیایێ بوو و كۆلۆنیەكا رۆمایی بوو و بۆ چەند رۆژان ئەم ل وێرێ ماین.
ل رۆژا شەمبیێ ئەم ژ دەرگەهێ باژێڕی دەركەفتین و چووینە جهەكی ل سەر رویباری، ئەم د وێ باوەریێ دا بووین كو وێرێ جهێ نڤێژێ بوو، ئەڤجا ئەم روینشتین و ل گەل وان ژنكێن كۆم بووی ئاخفتین.
ژنكەكا خودێپەرێس گوهداریا مە دكر، ناڤێ وێ لیدیا بوو، خەلكا باژێڕێ تیاتیرا بوو، وێ بازرگانی ب پەڕوكێ بنەفشی دكر، خودانی دلێ وێ ڤەكربوو داكو گوهداریا ئاخفتنێن پاولۆسی بكەت.
پشتی ل گەل خێزانا خۆ هاتیە تافیركرن، هیڤی ژ مە كر و گۆت: «ئەگەر هوین وەكو باوەردارەكا خودانی من بهژمێرن، وەرنە مالا من و ل وێرێ بمینن.» ئەڤجا وێ ئەم نەچار كرین.
رۆژەكێ ئەم دچووینە جهێ نڤێژكرنێ، كچكەكا خزمەتكار یا گیانێ خێڤزانكیێ تێدا، كەفتە راستا مە، وێ ب كارێ خێڤزانكیێ مفایەكێ مەزن دگەهاندە خودانێن خۆ.
ئەو ب دویڤ پاولۆسی و مە كەفت و گازی دكر: «ئەڤ مرۆڤە بەنیێن خودایێ هەری بلندن، بۆ هەوە رێكا قورتالبوونێ ددەنە نیاسین.»
ئەوێ ئەڤ چەندە بۆ گەلەك رۆژان دووبارە دكر، ئەڤجا پاولۆس بێزار بوو و گۆتە گیانی: «ب ناڤێ عیسایێ مەسیح، فەرمانێ ل تە دكەم، كو ژێ دەركەڤی.» ئێكسەر ژێ دەركەفت.
دەمێ خودانێن وێ دیتی، كو ئێدی ئەو مفای ژ وێ وەرناگرن، پاولۆس و سیلاس گرتن و راكێشانە بەر سینگێ دەستهەلاتداران ل گۆڕەپانا باژێڕی.
دەمێ ئیناینە نك دادوەران، گۆتن: «ئەڤ زەڵامە جوهینە و یێ باژێڕێ مە تێك ددەن
و فێری هندەك داب و نەریتان دكەن، كو نابیت ئەم رۆمایی پێ رازی ببین و پێگیریێ پێ بكەین.»
ئەڤجا خەلكی پێكڤە هێرش كرە سەر وان، دادوەران ژی جلكێن وان د بەر دا ئینان و فەرمان كر كو ب داران بهێنە قوتان.
پشتی ئەو گەلەك قوتاین، هاڤێتنە د زیندانێ دا و فەرمان ل ئەفسەرێ زیندانێ كر، كو باش نوبەداریێ لێ بگریت.
ئەوی ژی دەمێ ئەڤ فەرمانە وەرگرتی، ئەو هاڤێتنە د ئاسێترین ژۆرا زیندانێ دا و پێیێن وان بەند كرن.
ل نێزیكی نیڤا شەڤێ، پاولۆس و سیلاسی نڤێژ دكرن و ستران ب مەزناهیا خودێ دگۆتن و زیندانیان گوهێ خۆ ددایێ.
ژ نشكەكێ ڤە بیڤەلەرزەكا دژوار بنیاتێن زیندانێ تێك هەژاندن، ئێكسەر هەمی دەرگە‍‌ھ ڤەبوون و بەندێن هەمی زیندانیان كەفتن.
ئەفسەرێ زیندانێ هشیار بوو، دەمێ دیتی دەرگەهێن زیندانێ د ڤەكرینە، هزركر كو هەمی گرتی یێن رەڤین، ئێكسەر شیرێ خۆ هەلكێشا و چ نەمابوو خۆ بكوژیت،
لێ پاولۆسی ب دەنگەكێ بلند لێ كرە هەوار: «چ زیانێ نەگەهینە خۆ، ئەم هەمی یێ ل ڤێرێ!»
ئینا ئەفسەری داخوازا رۆناهیەكێ كر و ب لەز ب ژۆر كەفت و ژ ترسا دا دلەرزی و خۆ هاڤێتە بەر پێیێن پاولۆس و سیلاسی.
پاشی ئەو برنە ژ دەرڤە و پرسیار ژ وان كر: «ئەزبەنی، پێدڤیە ئەز چ بكەم، دا قورتال ببم؟»
وان بەرسڤ دا: «باوەریێ ب خودان عیسای بینە، تۆ و خێزانا خۆ دێ قورتال بن!»
پاشی مزگینیا پەیڤا خودانی گەهاندە وی و هەمیێن ل مالا وی.
هەر د وی دەمێ شەڤێ دا ئەفسەرێ زیندانێ ئەو برن و برینێن وان شویشتن. ئێكسەر ئەو و هەمی خێزانا وی هاتنە تافیركرن.
پاشی برنە مالا خۆ و سفرە دانا بەر وان، ئینا ئەو و هەمی خێزانا وی گەلەك دلخۆش بوون، چنكو باوەری ب خودێ ئینا.
دەمێ بوویە سپێدە، دادوەران هندەك سەربازێن خۆ هنارتنە نك ئەفسەرێ زیندانێ و گۆتنێ: «وان هەردوو كەسان بەردە.»
ئەڤجا ئەفسەری گۆتە پاولۆسی: «دادوەران فەرمان یا هنارتی كو هوین بهێنە بەردان، ئەڤجا نوكە وەرنە ژ دەرڤە و ب خێر بچن!»
لێ پاولۆسی گۆتە وان: «ئەم بێ دادگەهكرن، ل پێش چاڤێن خەلكی داینە بەر داران، هەر چەندە ئەم هەڤوەڵاتیێن رۆمایینە و ئەم كرینە د زیندانێ دا، نوكە چەوا ب دزی ڤە دێ مە دەرئێخن؟ نەخێر! بلا ئەو ب خۆ بهێن و مە بەردەن!»
سەربازان ئەڤ چەندە گەهاندە دادوەران، ئەڤجا دەمێ زانی كو هەردوو رۆمایینە، ئەو ترسیان،
ئینا هاتن و داخوازا لێبورینێ ژێ كر و هەردوو دەرئێخستن و داخواز ژێ كر كو ژ باژێڕی دەركەڤن.
ئەڤجا ئەو ژ زیندانێ دەركەفتن و چوونە مالا لیدیایێ. ئینا ل وێرێ خویشك و برا دیتن و ئەو هاندان و ژ باژێڕی دەركەفتن.
پاولۆس و سیلاس د ئەمفیپۆلیس و ئەپولونیایێ را بورین و گەهشتنە سالونیكی. ل وێرێ كنیشتەیەكا جوهیان هەبوو.
ئینا پاولۆس، وەكو هەر جار، چوو د كنیشتێ ڤە و د سێ رۆژێن شەمبی دا ب بەلگەیێن نڤیسارێن پیرۆز دانوستاندن ل گەل وان دكر.
وی بۆ وان شڕۆڤە دكر و دسەلماند كو پێدڤی بوو مەسیح ئازارێ بكێشیت و ژ ناڤ مریان راببیت و گۆت: «ئەڤ عیسایێ كو ئەز بۆ هەوە ددەمە نیاسین، ئەو مەسیحە.»
هندەك ژ ئامادەبوویان قاییل بوون و خۆ دانە ل گەل پاولۆسی و سیلاسی، ل گەل جەماوەرەكێ مەزن ژ یونانیێن خودێپەرێس و ژمارەیەكا نە یا كێم ژ ژنكێن قەدرگران.
لێ چاڤێن جوهیان پێ رانەبوون و ژ كەسێن بكێرنەهاتی یێن بازاڕی هندەك مرۆڤێن خراب ئینان، جەماوەرەك كۆم كر و تێكدان د باژێڕی دا پەیدا كر. پاشی وان هێرش كرە سەر مالا یاسونی، دا پاولۆس و سیلاسی راكێشنە بەر دەستێ خەلكی.
دەمێ هەردوو ل وێرێ نەدیتین، یاسون و هندەك برایێن دی راكێشانە بەر دەستێ دەستهەلاتدارێن باژێڕی و دكرنە گازی: «ئەڤ كەسێن جیهان سەروبن كری، هاتنە ڤێرێ ژی،
یاسونی ئەو یێن مێڤان كرین. رەفتارا وان هەمیان دژی فەرمانێن قەیسەریە، كو دبێژن پاشایەكێ دی هەیە ناڤێ وی عیسایە.»
ئەوان ب ڤێ گۆتنێ خەلك و دەستهەلاتدارێن باژێڕی ئازراندن.
ئینا پارە وەك گەرەو ژ یاسونی و یێن د گەل دا ستاندن، پاشی بەردان.
هەر وێ شەڤێ، برایان پاولۆس و سیلاس بۆ بیرییە ب رێ ئێخستن. دەمێ ئەو گەهشتینە وێرێ، چوونە د كنیشتەیا جوهیان ڤە.
ئەڤ جوهییە ژ یێن ل سالونیكی جوامێرتر بوون، وان پەیڤا خودێ گەلەك ب گەرمی وەرگرت و رۆژانە نڤیسار دخواندن، دا بزانن كا فێركرنا پاولۆس و سیلاسی یا راست بوو یان نە.
ئەڤجا گەلەك ژ وان باوەری ئینا، هەروەسا ژمارەیەكا نە یا كێم ژ ژنكێن یونانی یێن قەدرگران و زەڵامان ژی.
دەمێ جوهیێن سالونیكی زانی كو پاولۆس یێ مزگینیا پەیڤا خودێ ل بیرییە ژی بەڵاڤ دكەت، هاتن و ل وێرێ ژی خەلك ئازراند و تێكدان پەیدا كر.
هەر د وی دەمی دا برایان پاولۆس بەرەڤ دەریایێ ب رێ ئێخست، لێ سیلاس و تیمۆتاوس ل وێرێ مان.
ئەوێن پاولۆس دگەهاند، هەتا ئەسینا ل گەل چوون و پشتی فەرمانەك بۆ سیلاسی و تیمۆتاوسی ژ وی وەرگرتی، كو ب زویترین دەم بهێنە نك وی، ئەو ڤەگەڕیان.
دەمێ پاولۆسی ل ئەسینا چاڤەڕێیا وان دكر، گەلەك دلتەنگ بوو، چنكو وی دیت باژێڕ ژ پووتان یێ پڕە.
ئینا ل كنیشتەیێ دانوستاندن دكر ل گەل جوهیان و ئەوێن هاتینە سەر باوەریا جوهیان، هەروەسا وی رۆژانە دانوستاندن ل گەل وان كەسان دكر، ئەوێن ل بازاڕی دكەفتنە رێیا وی.
ئەڤجا هندەك فەیلەسوفێن ئەپیقوری و رەواقی ل گەل وی كەفتنە گەنگەشەیێ و هندەك ژ وان گۆت: «ئەڤی پڕبێژی دڤێت چ ببێژیت؟» هندەكێن دی گۆتن: «یا دیارە ئەڤە راگەهاندنێ بۆ خوداوەندێن بیانی دكەت.» چنكو وی مزگینی دەربارەی عیسای و رابوونا مریان ددا وان.
ئەڤجا ئەو بر و چوونە ئەریوپاگۆسێ و گۆتنێ: «ئەرێ ئەم دشێین بزانین ئەو فێركرنێن نوی یێن تۆ رادگەهینی چنە؟
ئەم یێ تشتێن سەیر ژ تە دبهیسین، مە دڤێت بزانین رامانا وان چیە؟»
چنكو هەمی خەلكێ ئەسینا و بیانیێن ل وێرێ د ئاكنجی، د دەمێ خۆ یێ ڤاڵا دا خۆ ب چڤە مژویل نەدكر، ژبلی گۆتن و بهیستنا هزر و بیرێن نوی.
ئینا پاولۆس ل نیڤا ئەریوپاگۆسێ راوەستیا و گۆت: «گەلی خەلكێ ئەسینا، ئەز یێ دبینم هوین ژ هەمی لایان ڤە، گەلەك د ئاییندارن،
چنكو دەمێ ئەز دگەڕیام و من باش بەرێ خۆ ددا تشتێن هوین دپەرێسن، من قوربانگەهەك دیت، ل سەر نڤیسی بوو: ‹بۆ خودایەكێ نەنیاس.› ئەڤجا ئەڤ خودایێ هوین دپەرێسن و نانیاسن، ئەز وی بۆ هەوە ددەمە نیاسین.
ئەو خودایێ جیهان و هەر تشتێ تێدا چێكرین، ئەو خودانێ ئەرد و ئەسمانیە و د پەرستگەهێن دەستكردێن مرۆڤان دا ئاكنجی نابیت.
ب دەستێن مرۆڤان ژی ناهێتە خزمەت كرن، هەروەكو وی پێدڤی ب تشتەكی هەبیت، چنكو ئەو ب خۆ ژیانێ و هەناسەیێ و هەر تشتەكی ددەتە هەمیان.
وی هەمی مللەتێن جیهانێ ژ ئێك كەس چێكرن، كو ل سەر رویێ ئەردی هەمیێ ئاكنجی ببن و دەم و سنوورێن ئاكنجیبوونا وان دانان،
دا ل خودێ بگەڕن، بەلكو ب لەپەقوتێ ڤێ بكەڤن، هەر چەندە ب راستی ئەو ژ هەر ئێك ژ مە نە یێ دویرە.
چنكو ‹ب وی ئەم دژین و دلڤین و یێن هەین ،› هەروەكو هندەك هەلبەستڤانێن هەوە ژی گۆتی: ‹ئەم ژی ژ دویندەها وینە.›
ئەڤجا، ژ بەر كو ئەم دویندەها خودێینە، پێدڤیە ئەم هزر نەكەین كو خودینی وەكو زێڕی، یان زیڤی، یان بەرییە، كو ب شارەزایی و هونەرێ مرۆڤەكی هاتبیتە نەخشكرن!
خودێ بەرێ خۆ ل سەردەمێن نەزانینێ گرت، لێ نوكە ئەو فەرمانێ ل هەمی مرۆڤان ل هەر جهەكی دكەت، ل خۆ بزڤڕن.
چنكو وی رۆژەكا دانای كو هەمی جیهانێ دادپەروەرانە داد بكەت ل سەر دەستێ زەڵامەكێ وی دەستنیشانكری. خودێ بەلگە ژی دایە هەمیان، دەمێ ئەو ژ ناڤ مریان راكری.»
دەمێ ئامادەبوویان گو‍‌ھ ل رابوونا مریان بووی، هندەك ژ وان سڤكاتی پێ كر، لێ هندەكێن دی گۆتێ: «ل دۆر ڤی بابەتی، دێ ل دەمەكێ دی گوهێ خۆ دەینە تە.»
ئەڤجا پاولۆس ژ ناڤ وان دەركەفت.
لێ هندەك كەس گەهشتنێ و باوەری ئینا، ژ وان دیونیسیۆس ئەوێ ئەندام د جڤاتا ئەریوپاگۆسێ دا و ژنكەك ناڤێ وێ داماریس بوو و هندەكێن دی ژی ل گەل وان.
پشتی هنگی پاولۆسی ئەسینا هێلا و چوو باژێڕێ كورنتۆس.
ل وێرێ جوهیەك دیت ناڤێ وی ئەكیلا بوو، ژ دایكبوویێ پۆنتۆسێ بوو، ژ نوی ل گەل هەڤژینا خۆ پریسكیلایێ ژ ئیتالیا هاتبوو، چنكو كلودیۆسێ قەیسەر فەرمانا دەرئێخستنا جوهیان ژ رۆمایێ دابوو. پاولۆسی قەستا وان كر،
ل نك وان ما و ل گەل وان كار كر، چنكو هەڤپیشەیێ وان بوو، كو ئەو د كارێ خۆ دا خیڤەتڤان بوون.
پاولۆسی هەمی شەمبیان ل كنیشتەیێ دانوستاندن دكر و بزاڤ دكر جوهی و یونانیان قاییل بكەت.
دەمێ سیلاس و تیمۆتاوس ژ هەرێما مەقدۆنیا گەهشتین، پاولۆسی هەمی دەمێ خۆ بۆ مزگینیێ تەرخان كر. وی شاهدەیی بۆ جوهیان ددا كو مەسیح، عیسایە.
لێ دەمێ وان دژایەتیا وی كری و جڤین داینێ، وی كراسێ خۆ داقوتا و گۆتە وان: «خوینا هەوە د ستۆیێ هەوە. ئەز یێ بێ تاوانم! ژ نوكە پێڤە ئەز دێ قەستا مللەتێن نەجوهی كەم.»
ئەڤجا پاولۆس ژ وێرێ دەركەفت و چوو مالا زەڵامەكی هاتبوو سەر باوەریا جوهیان ناڤێ وی تیتۆس یوستۆس بوو، مالا وی ب تەنشت كنیشتەیێ ڤە بوو.
كریسپۆسێ سەرۆكێ كنیشتەیێ ل گەل هەمی كەسێن مالا خۆ باوەری ب خودانی ئینا. گەلەك خەلكێ كورنتۆسێ ژی، یێن كو ئاخفتنا پاولۆسی دبهیست، باوەری ئینا و هاتنە تافیركرن.
شەڤەكێ خودانی د بینینەكێ دا گۆتە پاولۆسی: «نەترسە، لێ بئاخڤە و بێدەنگ نەبە،
چنكو ئەز یێ ل گەل تە و كەس دەستێ خۆ درێژ ناكەتە تە، كو تە بئێشینیت، ژ بەر كو من گەلەك مرۆڤ ل ڤی باژێڕی یێن هەین.»
ئێدی ساڵەك و شەش هەیڤان ل وێرێ ما و ئەو فێری پەیڤا خودێ دكرن.
دەمێ گالیونی حوكمڕانی ل سەر هەرێما ئەخایا دكر، جوهی ب ئێك دەست دژی پاولۆسی رابوون و ئەو برە دادگەهێ.
وان گۆت: «ئەڤ زەڵامە مرۆڤان قاییل دكەت، كو ب ئاوایەكی بەروڤاژی دەستووری خودێ بپەرێسن.»
دەمێ پاولۆس دا دەست ب ئاخفتنێ كەت، گالیونی گۆتە جوهیان: «گەلی جوهیان، ئەگەر بابەت گونە‍‌ھ یان تاوانەك با، دا ئەگەر هەبیت كو ئەز بێهنا خۆ ل هەوە فرە‍‌ھ كەم.
لێ ئەگەر بابەت دەربارەی پەیڤ و ناڤ و دەستوورێ هەوەیە، هوین ب خۆ چارەسەر بكەن، من نەڤێت ببمە دادوەرێ ڤان تشتان!»
ئینا وی ئەو ژ دادگەهێ دەرئێخستن.
ئەڤجا وان هەمیان سوستانیسێ سەرۆكێ كنیشتەیێ گرت و ل بەر دەرگەهێ دادگەهێ قوتا. لێ گالیونی چ پویتە ب ڤێ چەندێ نەكر.
پاولۆس گەلەك رۆژێن دی ژی ل كورنتۆسێ ما، پاشی خاترا خۆ ژ برایان خواست و ب گەمیێ بەرەڤ سوریا چوو، پریسكیلا و ئەكیلا ژی د گەل دا بوون. ئەوی ل باژێڕێ كەنخریا سەرێ خۆ تراشی، چنكو نەزرەك ل سەر بوو.
دەمێ گەهشتینە ئەفەسۆسێ، پاولۆسی ئەو ل وێرێ هێلان و چوو د كنیشتەیا جوهیان ڤە و دانوستاندن ل گەل وان كر،
ئەوان ژی داخواز ژێ كر كو دەمەكێ درێژتر ل نك وان بمینیت، لێ ئەو رازی نەبوو.
وی خاترا خۆ ژێ خواست و گۆت: «ب ئانەهیا خودێ دێ ڤەگەڕمە نك هەوە!» و ب گەمیێ ژ ئەفەسۆسێ چوو.
دەمێ ل قەیسەریێ پەیا بووی، سەركەفتە ئورشەلیمێ و سڵاڤ ل جڤاكا باوەرداران كر، پاشی خواركەفتە باژێڕێ ئەنتاكیایێ.
پشتی دەمەكی ل وێرێ مای، كەفتە رێ و ج‍‌ھ ب ج‍‌ھ ل سەر هەرێمێن گالاتیا و فریگیە گەڕیا و هەمی شاگرد بهێز ئێخستن.
جوهیەك هاتە ئەفەسۆس، ناڤێ وی ئەپولۆس بوو و ژدایكبوویێ ئەسكەندەریێ بوو، یێ زمان رەهوان و د نڤیسارێن پیرۆز دا شارەزا بوو،
ل سەر رێبازا خودانی هاتبوو فێركرن و ب گەرمی دئاخفت و ب دروستی دەربارەی عیسای فێركرن دكر، هەر چەندە ب تنێ تافیركرنا یوحەننای دزانی.
ئەوی دەست ب ئاخفتنا وێرەكانە كر د كنیشتەیێ ڤە. دەمێ پریسكیلایێ و ئەكیلای گو‍‌ھ لێ بووی، ئەو برە نك خۆ و رێیا خودێ بۆ وی دروستتر شڕۆڤەكر.
دەمێ وی بڕیار دای بچیتە هەرێما ئەخایایێ، برایان ئەو هاندا و نامەیەك بۆ وی نڤیسی، دا شاگرد وی وەرگرن. دەمێ گەهشتیە وێرێ، هاریكاریەكا مەزن بۆ وان كر، یێن ب رێكا كەرەمێ باوەری ئیناین،
چنكو ب هێز و ب ئاشكرایی وی دەنگێ جوهیان دبڕی و ب رێكا نڤیساران دسەلماند كو مەسیح، عیسایە.
دەمێ ئەپولۆس ل كورنتۆسێ، پاولۆس د ناڤ دەڤەرێن ناڤخۆیی دا دەرباز بوو و گەهشتە ئەفەسۆسێ. ل وێرێ هندەك شاگرد دیتن
و گۆتە وان: «ئایا دەمێ هەوە باوەری ئینای، هەوە گیانێ پیرۆز وەرگرت؟» وان بەرسڤ دا: «نەخێر! خۆ مە گو‍‌ھ ل هەبوونا گیانێ پیرۆز ژی نەبوویە.»
ئەڤجا وی گۆت: «پا هوین ب چ هاتینە تافیركرن؟» وان بەرسڤ دا: «ب تافیركرنا یوحەننای!»
پاولۆسی گۆت: «تافیركرنا یوحەننای، تافیركرنا لخۆزڤڕینێ بوو و دگۆتە خەلكی كو فەرە باوەریێ ب وی كەسی بینن، ئەوێ دێ پشتی وی هێت، كو ئەو ژی عیسایە.»
دەمێ وان ئەڤ چەندە بهیستی، ب ناڤێ خودان عیسای هاتنە تافیركرن.
گاڤا پاولۆسی دەستێن خۆ داناینە سەر وان، گیانێ پیرۆز ب سەر وان دا هات و ب زمانێن دی ئاخفتن و وان پەیام ژ خودێ وەرگرتن و دەربڕین ژێ كر.
ئەو هەمی نێزیكی دوازدە زەڵامان بوون.
پاشی پاولۆس چوو د كنیشتەیێ ڤە. بۆ ماوێ سێ هەیڤان دچوو وێرێ و ب وێرەكی دئاخفت و گەنگەشە دكر و دەربارەی پاشایەتیا خودێ خەلك قاییل دكر.
دەمێ هندەكان ركمانێ كری و نەڤیای باوەریێ بینن و ل بەرامبەر ئامادەبوویان جڤین داینە رێبازێ ، پاولۆسی ئەو هێلان و شاگرد ل گەل خۆ برن و هەر رۆژ ل فێرگەها تیرانۆسی دانوستاندن دكر.
ئەڤ رەوشە دوو ساڵان یا بەردەوام بوو، تاكو هەمی ئاكنجیێن هەرێما ئاسیا ژ جوهی و یونانیان، پەیڤا خودانی بهیستی.
خودێ حنێرێن مەزن ل سەر دەستێن پاولۆسی ئەنجام ددان،
هەتا كو دەستمال و بەركۆشێن دگەهشتنە لەشێ پاولۆسی، دئینان و ددانانە سەر نەساخان، نەساخی ل نك وان نەدمان و گیانێن پیس ژێ دەردكەفتن.
هندەك جوهیێن گەڕۆك هەبوون، ئەوێن كارێ وان دەرئێخستنا گیانێن پیس بوو، ئەوان تاقی كر كو ناڤێ خودان عیسای ل سەر ئەوێن گیانێن پیس تێدا ب كار بینن، وان دگۆت: «ئەز ب ناڤێ عیسایێ كو پاولۆس مزگینیێ پێ ددەت، فەرمانێ ل هەوە دكەم، هوین دەركەڤن!»
ئەڤ چەندە حەفت كوڕێن سكێوای، كو سەرۆككاهنەكێ جوهیان بوو، دكر.
گیانێ پیس بەرسڤا وان دا و گۆت: «ئەز عیسای دنیاسم و دەربارەی پاولۆسی ژی دزانم، لێ هوین كینە؟»
ئینا ئەو زەڵامێ گیانێ پیس تێدا، هێرش كرە وان و ل سەر هەمیان زاڵ بوو و شیا وان، تاكو ب رویسی و برینداری ژ وێ مالێ رەڤین.
ئەڤ چەندە ل ناڤ هەمی جوهی و یونانیێن ئاكنجی ل ئەفەسۆس بەڵاڤ بوو، ترس ب سەر هەمیان دا هات و ناڤێ خودان عیسای بلند دبوو
و گەلەك ژ ئەوێن باوەری ئینای، دهاتن و دانپێدان ب گونەهێن خۆ دكر و كریارێن خۆ ئاشكرا دكرن.
ژمارەیەكێ ژ ئەوێن جادووگەری كری پەرتووكێن خۆ كۆم كرن و ل بەر چاڤێن خەلكی هەمیێ سۆتن. بهایێ وان پەرتووكان هژمارت، دیار بوو كو پێنجی هزار پارچەیێن زیڤینە.
هۆسا پەیڤا خودانی بەڵاڤ دبوو و ب هێز دكەفت.
پشتی ئەڤان تشتان رویدای، پاولۆسی بڕیار دا د هەرێما مەقدۆنیا و ئەخایا را دەرباز ببیت و بچیتە ئورشەلیمێ و گۆت: «پشتی كو ئەز دچمە وێرێ، پێدڤیە رۆمایێ ژی ببینم.»
وی دوو ژ ئەوێن هاریكاریا وی دكر، تیمۆتاوس و ئەراستۆس، هنارتنە مەقدۆنیا و ئەو ب خۆ دەمەكی ل هەرێما ئاسیا ما.
ل وی دەمی ژ ئەگەرێ رێبازا خودانی تێكچوونەكا ب ترس پەیدا بوو.
زیڤنگرەك هەبوو، ناڤێ وی دیمیتریۆس بوو، وی ژ زیڤی نموونەیێن بچویك یێن پەرستگەها خوداوەند ئارتەمیسێ چێدكرن و ڤێ چەندێ مفایەكێ نە یێ كێم دگەهاندە پیشەكاران.
وی ئەو پیشەكار و هەڤپیشەیێن وان كۆمكرن و گۆت: «گەلی جوامێران، هەروەكو هوین دزانن، ئەم ژ ڤی كاری دەولەمەندیێ پەیدا دكەین،
هەوە دیت ژی و گو‍‌ھ لێ بوو، كو ڤی پاولۆسی، نە ب تنێ ل ئەفەسۆسێ، لێ ل هەمی هەرێما ئاسیا، ژمارەیەكا مەزن ژ خەلكی قاییل كرینە و ژ رێ دەرئێخستینە. ئەو دبێژیت كو ئەو تشتێن ب دەستی هاتینە چێكرن نە خودێنە.
مەترسیا ڤێ چەندێ ژی نە ب تنێ ئەوە كو كارێ مە د چاڤێن خەلكی دا بێڕێز ببیت، لێ پەرستگەها خوداوەندا مەزن ئارتەمیسێ ژی دێ رسوا بیت و دێ مەزناهیا وێ خوداوەندێ ژ دەست چیت، ئەوا هەمی هەرێما ئاسیا و جیهان دپەرێسن!»
دەمێ وان ئەڤ ئاخفتنە بهیستی، تۆڕەبوون و قێڕی راهێلان: «مەزناهی بۆ ئارتەمیسا ئەفەسۆسیان!»
ئینا تێكدانێ هەمی باژێڕ ڤەگرت و خەلك پێكڤە بەزینە شانویێ و گایۆس و ئەرستارخۆس یێن مەقدۆنی، كو هەردوو هەڤال رێیێن پاولۆسی بوون، ل گەل خۆ راكێشان.
پاولۆسی ژی ڤیا بچیتە د ناڤ وی خەلكی دا، لێ شاگردان نەهێلا.
هەروەسا هندەك دەستهەلاتدارێن هەرێما ئاسیا ژی، كو هەڤالێن وی بوون، مرۆڤ هنارتنە نك وی و هیڤی ژێ كرن كو نەچیتە شانویێ.
وی دەمی هندەكان تشتەك دقیڕاند و هندەكان تشتەكێ دی، چنكو كۆمبوون تێكچوو بوو و بەهرا پتر ژ وان نەدزانی بۆچی كۆم ببوون.
ئینا وان ئەسكەندەر ژ ناڤ جەماوەری برە پێش، چنكو جوهیان ئەو بۆ پێشڤە پالددا، ئەڤجا ئەسكەندەری ب دەستی ئاماژە كر، وی دڤیا ل بەرامبەر خەلكی بەڕەڤانیێ ژ جوهیان بكەت.
دەمێ وان زانی كو ئەو جوهییە، وان نێزیكی دوو دەمژمێران ب ئێك دەنگ دقیڕاند: «مەزناهی بۆ ئارتەمیسا ئەفەسۆسیان!»
پاشی نڤیسكارێ باژێڕی شیا خەلكی تەنا بكەت و گۆت: «گەلی ئەفەسۆسیان، كی هەیە نەزانیت كو باژێڕێ ئەفەسۆس چاڤدێرێ پەرستگەها ئارتەمیسا مەزن و پەیكەرێ وێ یێ كەڤرینە ئەوێ ژ ئەسمانی كەفتیە خوارێ؟
ژ بەر كو كەس نەشێت بێژیت ئەڤ تشتە نەڕاستن، لەوما پێدڤیە هوین ل سەر خۆ بن و تشتەكی ب سەر گەرمی نەكەن.
ئەڤ هەردوو زەڵامێن هەوە ئیناین، نە دزیكەرێن پەرستگەهێنە و نە ژی كوفری دەربارەی خوداوەندا مە كرینە.
ئەڤجا ئەگەر دیمیتریۆس و پیشەكارێن ل گەل وی گازندە ل سەر كەسەكی هەبن، دادگە‍‌ھ و دادوەر یێن هەین، بلا ل وێرێ سكالایێ ل ئێك و دوو بكەن.
لێ ئەگەر داخوازا هەوە ژ بەر تشتەكێ دییە، ئەو دێ د روینشتنەكا یاسایی دا هێتە چارەسەركرن.
چنكو مەترسی هەیە كو ئەم ژ بەر رویدانێن ئەڤرۆ، ب تێكدانێ بهێینە تاوانباركرن و مە چ بەهانە بۆ ڤێ تێكچوونێ نینن!»
پشتی ئەڤە گۆتی، خەلك بەڵاڤ كر.
پشتی تێكدان ب دویماهی هاتی، پاولۆسی شاگرد گازی كرن، ئەو هاندان و خاترا خۆ ژێ خواست و ب رێ كەفت، دا بچیتە مەقدۆنیایێ.
ئەو د ناڤ وان دەڤەران دا گەڕیا و وی ب گەلەك پەیڤان شاگرد هاندان، پاشی گەهشتە یونانێ.
سێ هەیڤ ل وێرێ بوراندن و دەمێ وی خۆ بۆ وەغەرا سوریایێ ب گەمیێ بەرهەڤ دكر، جوهیان پیلانەك بۆ كوشتنا وی دانا، ئینا بڕیار دا ب رێكا مەقدۆنیایێ ڤەگەڕیتەڤە.
سوپاترۆسێ كوڕێ پیڕۆسی ژ بیرییە، ئەرستارخۆس و سكوندۆس ژ سالونیكی، گایۆس ژ دەربە، تیمۆتاوس، ژ هەرێما ئاسیایێ ژی تیخیكۆس و تروفیمۆس ل گەل وی چوون.
ئەو بەری مە چوون و ل ترویاسێ ل هیڤیا مە مان.
ئەم ژی پشتی جەژنا نانێ شكەڤا، ب گەمیێ ژ فیلیپی چووین و پشتی پێنج رۆژان ل ترویاسێ گەهشتینە وان و ئەم حەفت رۆژان ل وێرێ ماین.
ل رۆژا ئێكێ ژ حەفتیێ، دەمێ شاگرد بۆ كەركرنا نانی كۆمبووین، پاولۆسی دانوستاندن ل گەل وان كر و ژ بەر كو وی دڤیا ل رۆژا پاشتر بچیت، ئەوی ئاخفتن تا نیڤ شەڤ درێژ كر.
ل وێ ژۆرا سەری یا مە كۆمبوون تێدا دكر، گەلەك چرا د هەلبوون.
گەنجەكی ناڤێ وی یوتیخۆس بوو، ئەو د پەنجەرێ دا یێ روینشتی بوو. دەمێ پاولۆسی ئاخفتنا خۆ درێژ كری، خەوەكا گران ل سەر وی زاڵ دبوو و نڤست و ژ قاتێ سێیێ كەفت و ب مریاتی هاتە هەلگرتن.
پاولۆس هاتە خوارێ و خۆ ب سەر كەلەخێ وی دادا و هەمبێزكر و گۆت: «خۆ تێك نەدەن، چنكو گیانێ وی یێ تێدا!»
پاشی ب سەركەفت و نان كەركر و خوار و تا سپێدێ گەلەك ل گەل وان ئاخفت، پشتی هنگی ئەو دەركەفت و چوو.
وان ئەو گەنج ب ساخی ژ وێرێ بر و بۆ وان هاندانەكا مەزن بوو.
ئەم ل گەمیێ سیار بووین و بەرەڤ ئاسۆسێ ب رێ كەفتین. مەرەما مە ئەو بوو كو ئەم ژ وێرێ پاولۆسی ب گەمیێ ببەین، چنكو وی نەخشە وەسا دانابوو كو ئەو ب پێیان بچیتە وێرێ.
دەمێ ل ئاسۆس گەهشتیە مە، مە ئەو ل گەل خۆ سیار كر و چووینە میتیلینی،
ئەم ژ وێرێ چووین و ل رۆژا پاشتر گەهشتینە بەرامبەری گزیرتەیا خیۆس و ل رۆژا سێیێ ئەم دەرباز بووینە سامۆس، ل رۆژا چوارێ ئەم گەهشتینە میلیتۆس،
چنكو پاولۆسی بڕیار دابوو، ب گەمیێ بێ راوەستیان د بەر ئەفەسۆس را دەرباز ببیت، دا ل هەرێما ئاسیا گیرۆ نەبیت، چنكو ئەو ب لەز دچوو داكو ئەگەر بشێت، ل جەژنا رۆژا پێنجیێ ل ئورشەلیمێ بیت.
پاولۆسی ژ میلیتۆس هنارتە ب دویڤ ریهسپیێن جڤاكا باوەرداران را ل ئەفەسۆس.
دەمێ هاتینە نك وی، گۆتە وان: «هوین دزانن كو هەر ژ رۆژا ئێكێ یا پێ من كەفتیە د هەرێما ئاسیایێ دا، ئەز ب درێژاهیا دەمی، ل گەل هەوە یێ چەوا بووم.
من د ناڤ وان تاقیكرنان دا، یێن كو ژ پیلانێن جوهیان ب سەرێ من هاتین، ب هەمی خۆشكاندن و ب گەلەك رۆندكان خزمەتا خودانی دكر.
من خۆ ژ راگەهاندنا تشتەكی نەدایە پاش كو د مفایێ هەوە دا بیت، لێ من ل جهێن گشتی و مال ب مال هوین فێر دكرن.
من جوهی و نەجوهی ئاگەهدار كرینە، كو فەرە بۆ خودێ ل خۆ بزڤڕن و باوەریێ ب خودانێ مە عیسای بینن.
ئەڤە ئەز یێ قەیدكری ژ لایێ گیانی ڤە، دچمە ئورشەلیمێ و نزانم ل وێرێ دێ چ هێتە سەرێ من.
لێ گیان ل هەر باژێڕەكی شاهدەییێ بۆ من ددەت و دبێژیت كو گرتن و تەنگاڤی ل هیڤیا منن.
لێ ئەز چ پویتەی ب ژیانا خۆ نادەم، ب تنێ ئارمانجا من ئەوە كو ئەز ئەركێ خۆ، ئانكو ئەو خزمەتا من ژ خودان عیسای وەرگرتی، ب دویماهی بینم، كو شاهدەییێ بۆ مزگینیا كەرەما خودێ بدەم.
ئەڤە ئەز دزانم، هوین هەمی، ئەوێن ئەز د ناڤ هەوە دا گەڕیایم و من مزگینیا پاشایەتیا خودێ راگەهاندی، ئێدی هوین رویێ من نابیننەڤە.
ژ بەر هندێ ئەڤرۆ بۆ هەوە شاهدەییێ ددەم، كو ئەز ژ خوینا هەوە هەمیان یێ بێگونەهم،
چنكو من خۆ نەدایە پاش كو بۆ هەوە هەمی حەزا خودێ دیار بكەم.
ئەڤجا هشیاری خۆ و هەمی كەرێ پەزی بن، ئەوێ گیانێ پیرۆز هوین وەكو چاڤدێر د ناڤ دا داناین، دا شڤانیێ ل جڤاكا گازیكریێن خودێ بكەن، ئەوا وی ب خوینا خۆ كڕی.
ئەز دزانم پشتی چوونا من، گورگێن هار دێ هێنە د ناڤ هەوە دا و دلۆڤانیێ ب كەرێ پەزی نابەن.
ژ ناڤ هەوە ژی دێ هندەك كەس رابن و تشتێن خواروڤیچ بێژن، داكو شاگردان ل دویڤ خۆ رابكێشن.
ژ بەر ڤێ چەندێ د هشیار بن، ل بیرا هەوە بیت كو سێ ساڵان ب شەڤ و رۆژ، بێ راوەستیان، ب رۆندكان من هوین شیرەت كرینە.
نوكە ژی ئەز هەوە دهێلمە ب هیڤیا خودێ و پەیڤا كەرەما وی ڤە، ئەو پەیڤا شیان هەی كو هەوە ئاڤاكەت و میراتەكی ل گەل هەمی پیرۆزكریان بدەتە هەوە.
من دلێ خۆ نەبریە زیڤ، یان زێڕ، یان جلكێ كەسەكی.
هوین ب خۆ دزانن كو من ب ڤان دەستان كار كریە و پێدڤیێن من و یێن د گەل من دا دابین كرینە،
د هەمی تشتان دا، من نیشا هەوە دا، كو فەرە هوین هۆسا خۆ بۆ هاریكاریا بێهێزان بوەستینن، پەیڤێن خودان عیسای ل بیرا هەوە بن، كو گۆتیە: ‹بەختەوەریا دانێ ژ یا وەرگرتنێ پترە.›»
پشتی ئەڤە گۆتی، ل گەل هەمیان چۆكڤەدان و نڤێژ كر.
هەمی گەلەك گریان و وان خۆ د سەر و ستۆیێ پاولۆسی وەركر و ماچی كر.
گەلەك خەمبار بوون، ب تایبەت ژ وێ پەیڤا وی گۆتی: «هوین رویێ من نابیننەڤە.» پاشی ل گەل وی تا گەمیێ چوون.
پشتی ئەم ژ وان جودا بووین، ب گەمیێ ئەم ب رێ كەفتین و راست چووینە كۆس، ل رۆژا پاشتر گەهشتینە رودۆس، ژ وێرێ ژی چووینە پاتارا،
ل وێرێ مە گەمیەك دیت دچوو فینیقیا، ئەم لێ سیار بووین و ب رێ كەفتین.
پشتی قوبرس بۆ مە دیار بووی و مە ئەو ژ لایێ خۆ یێ چەپێ ڤە هێلای، مە قەستا سوریایێ كر. ئەم ل باژێڕێ سور راوەستیاین، چنكو گەمی دا بارێ خۆ ل وێرێ دانیت.
مە شاگرد دیتن و بۆ حەفت رۆژان ل نك وان ماین، ئەوان ب رێكا گیانی دگۆتە پاولۆسی كو سەرنەكەڤیتە ئورشەلیمێ.
دەمێ رۆژێن مە ل وێرێ ب دویماهی هاتین، ئەم ب رێ كەفتین و ئەو هەمی ب ژن و زاڕۆكێن خۆ ڤە، ل گەل مە هاتنە ژ دەرڤەی باژێڕی. ل بەر لێڤا دەریایێ مە چۆكڤەدان و نڤێژ كرن.
پاشی مە خاترا خۆ ژ ئێكودوو خواست و ل گەمیێ سیاربووین، ئەو ژی بۆ مالێن خۆ زڤڕین.
دەمێ مە رێڤنگیا خۆ ژ سور ب دویماهی ئینای، ئەم گەهشتینە پتولەمایس، مە سڵاڤ ل خویشك و برایان كر و رۆژەكێ ل نك وان ماین.
رۆژا پاشتر ئەم ژ وێرێ ب رێ كەفتین و هاتینە قەیسەریێ و چووینە مالا فیلیپۆسێ مزگینیدەر، كو ئێك ژ حەفتان بوو و ئەم ل نك وی ماین.
وی چوار كچێن پاكیزە هەبوون پەیام ژ خودێ وەردگرتن و رادگەهاندن.
پشتی ئەم چەندین رۆژان ل وێرێ ماین، پێغەمبەرەك ژ یەهودیایێ هات، ناڤێ وی ئاگابۆس بوو.
ئەو هاتە نك مە و قایشا پاولۆسی هەلگرت و دەست و پێیێن خۆ گرێ دان و گۆت: «گیانێ پیرۆز ڤێ دبێژیت: جوهیێن ئورشەلیمێ دێ خودانێ ڤێ قایشێ هۆسا گرێ دەن و دەنە دەستێ نەجوهیان.»
دەمێ مە ئەڤ چەندە بهیستی، مە و ئەوێن ل وێرێ، هیڤی ژ پاولۆسی كرن كو سەرنەكەڤیتە ئورشەلیمێ.
لێ وی بەرسڤ دا و گۆت: «بۆچی هوین دكەنە گری و دلێ من دشكێنن؟ ئەز یێ ئامادەمە ژ پێخەمەت ناڤێ خودان عیسای ل ئورشەلیمێ نە ب تنێ بهێمە گرێدان، لێ بمرم ژی!»
دەمێ ئەو قاییل نەبووی، مە دەست ژێ بەردان و مە گۆت: «بلا حەزا خودانی ب ج‍‌ھ بهێت.»
پشتی وان رۆژان، مە خۆ بۆ وەغەرێ ئامادە كر و بەرەڤ ئورشەلیمێ سەركەفتین.
هندەك شاگرد ژی، كو خەلكێ قەیسەریێ بوون، ل گەل مە هاتن و ئەم برینە نك شاگردەكێ كەڤن ناڤێ وی مەناسون بوو، كو كەسەكێ قوبرسی بوو، دا ل دەڤ وی بمینین.
دەمێ ئەم گەهشتینە ئورشەلیمێ، برایان ب گەرمی پێشوازی ل مە كر.
ل رۆژا پاشتر، پاولۆس ل گەل مە هاتە نك یەعقوبی ، هەمی ریهسپی ژی د ئامادە بوون.
پشتی پاولۆسی سڵاڤ ل وان كری، هەمی ئەو تشتێن خودێ ب رێیا خزمەتا وی د ناڤ نەجوهیان دا كرین، بۆ وان ئێك ئێكە دیار كرن.
دەمێ وان ئەڤە بهیستی، وان پەسنا خودێ كر و گۆتە پاولۆسی: «برا، تۆ یێ دبینی چەند هزاران ژ جوهیان باوەری ئینایە و ئەو هەمی بۆ دەستوورێ مووسای د دلگەرمن.
وان یێ بهیستی، كو تۆ هەمی جوهیێن د ناڤ مللەتان دا فێر دكەی، كو ژ مووسای ڤاڕێ ببن و تۆ دبێژیە وان كو كوڕێن خۆ سونەت نەكەن و ل دویڤ داب و نەریتێن جوهیاتیێ نەچن.
ئەڤجا چارە چیە؟ چنكو بێگۆمان ئەو دێ بهیسن كو تۆ یێ هاتی.
ئەڤجا وێ بكە یا ئەم دبێژینە تە: چوار زەڵام یێن ل نك مە، نەزر یێ ل سەر وان،
وان ببە و ل گەل وان بكەڤە بن داب و نەریتێن پاككرنێ و پارەی ل وان بمەزێخە، دا ئەو بشێن سەرێ خۆ بتراشن، هۆسا هەمی دێ زانن كو ئەو تشتێن دەربارەی تە بهیستین نە د دروست بوون، لێ تۆ ژی ل سەر رێكا دەستووری دچی.
ئەڤجا دەربارەی وان نەجوهیێن باوەری ئینای، مە بڕیارا خۆ بۆ وان نڤیسیە كو خۆ ژ خوارنێن بۆ پووتان هاتینە پێشكێشكرن، خوینێ، گیانەوەرێن خەندقاندی و دەهمەنپیسیێ بپارێزن.»
ئینا ل رۆژا پاشتر پاولۆسی هەر چوار زەڵام برن و ل گەل وان كەفتە د بن داب و نەریتێن پاككرنێ ڤە، چوو پەرستگەهێ و راگەهاند كا رۆژێن پاكبوونا وان دێ كەنگی ب دویماهی هێن، دا ل شوینا هەر ئێك ژ وان پێشكێشیێ وی بهێتە دان.
دەمێ چ نەمایی كو ئەو حەفت رۆژ ب دویماهی بهێن، جوهیێن ژ هەرێما ئاسیایێ، پاولۆس ل پەرستگەهێ دیت، ئینا هەمی جەماوەر دژی وی ئاراند و ئەو گرت
و دكرنە گازی: «هەوار، گەلی ئیسرائیلیان! ئەڤە ئەو كەسە، یێ كو ل هەمی جهان، هەمی مرۆڤان ل دژی مللەتێ مە، دەستوورێ مە و ڤی جهی فێر دكەت، د سەر ڤێ چەندێ را، وی یونانی ژی یێن ئیناینە د حەوشێن ناڤخۆیی یێن پەرستگەهێ دا و ئەڤ جهێ پیرۆز یێ هەڕماندی!»
چنكو ئەوان بەری هنگی تروفیمۆسێ ئەفەسۆسی ل گەل وی دیتبوو و وان هزر دكر كو پاولۆسی ئەو یێ ئینایە د حەوشێن ناڤخۆیی یێن پەرستگەهێ دا.
هەمی باژێڕ ئاریا و خەلك ب لەز كۆمبوو، پاولۆس گرت و راكێشا ژ دەرڤەی پەرستگەهێ و ئێكسەر دەرگە‍‌ھ گرتن.
دەمێ وان هەوڵ ددا وی بكوژن، پێزانین گەهشتنە فەرماندێ سوپای كو ئورشەلیم هەمی یا د ئالۆزیێ دا،
وی ئێكسەر سەرباز و سەرلەشكەر برن و ب غار چوونە نك وان. دەمێ وان فەرماندە و سەرباز دیتین، ئێدی ژ لێدانا پاولۆسی راوەستیان.
وی دەمی فەرماندە نێزیكی وی بوو، ئەو گرت و فەرمان دا، كو ب دوو زنجیران بهێتە قەیدكرن، پاشی پرسیار كر كا ئەو كیە و چ كریە.
هندەكان تشتەك دقیڕاند و هندەكان تشتەكێ دی، ئێدی وی ژ ئەگەرێ قەرقەشەیێ نەشیا راستیێ بزانیت، فەرمان دا كو وی ببەنە سەربازگەهێ.
دەمێ پاولۆس گەهشتیە پەیسكێ، سەربازان ژ بەر دژواریا جەماوەری ئەو هەلگرت.
چنكو جەماوەر ل دویڤ وی دچوو و گازی دكر: «وی بكوژن!»
بەری پاولۆس بچیتە د سەربازگەهێ ڤە، گۆتە فەرماندەی «دەستویری هەیە بۆ تە تشتەكی بێژم؟» ئینا فەرماندەی گۆتێ: «تۆ یونانی دزانی؟
ما تۆ نە ئەو مسری، ئەوێ بەری دەمەكی سەرهەلدان كری و چوار هزار زەڵامێن كوژەك ل گەل خۆ برینە چۆلی؟»
پاولۆسی گۆت: «ئەز جوهیمە و هەڤوەڵاتیێ تەرسۆسا كیلیكیایێمە، نەكو باژێڕەكێ نە گرنگە، هیڤی ژ تە دكەم، دەستویریێ بدەیە من، كو ل گەل خەلكی بئاخڤم.»
دەمێ وی دەستویری دایێ، پاولۆس ل سەر پەیسكێ راوەستیا و ب دەستی ئاماژە دا خەلكی، دەمێ بێدەنگ بووین، ئەو ب زمانێ عیبرانی ئاخفت و گۆت:
«گەلی باب و برایان، نوكە گوهێ خۆ بدەنە وێ بەڕەڤانیێ، یا ل بەرامبەر هەوە ئەز ژ خۆ دكەم.»
دەمێ وان بهیستی یێ بۆ وان ب زمانێ عیبرانی دئاخڤیت، ئەو پتر بێدەنگ بوون. وی گۆت:
«ئەز جوهیمە، ل تەرسۆسا كیلیكیایێ ژ دایك بوویمە، لێ ئەز ل ڤی باژێڕی یێ مەزن بوویم و ل بەر دەستێ گەمالائیلی، ل دویڤ دەستوورێ بابكالێن مە، قاییم یێ پەروەردە بوویم و وەكو هەوە هەمیان ل ئەڤرۆ، بۆ خودێ یێ دلگەرم بووم.
من ئەڤ رێبازە تا مرنێ تەپەسەر دكر و ژنك و زەڵام دگرتن و دهاڤێتنە د زیندانێ دا،
هەروەكو سەرۆككاهن و هەمی جڤاتا ریهسپیان دشێن شاهدەییێ بۆ من بدەن. من نامە ژی ژ وان وەرگرتن بۆ برایێن ل دیمەشقێ، ئەز دچووم دا ئەوێن ل وێرێ ژی ب گرێدایی بینمە ئورشەلیمێ، دا بهێنە سزادان.
دەمێ ئەز بڕێڤە و نێزیكی دیمەشقێ بوویم، نێزیكی نیڤرۆ ژ نشكەكێ ڤە رۆناهیەكا گەش ژ ئەسمانی دەوروبەرێن من روهن كرن،
ئەز كەفتمە ئەردی و من دەنگەك بهیست، گۆتە من: ‹شائوول، شائوول، تۆ بۆچی من تەپەسەر دكەی؟›
من بەرسڤ دا: ‹تۆ كی ئەزبەنی؟› گۆت: ‹ئەز عیسایێ ناسیرەییمە، ئەوێ تۆ تەپەسەر دكەی.›
ئەوێن ل گەل من ژی، ئەو رۆناهی دیت، لێ وان ئەو دەنگ نەبهیست، ئەوێ ل گەل من دئاخفت،
من پرسیار كر: ‹ئەز چ بكەم، خودان؟› خودانی بەرسڤا من دا: ‹رابە هەڕە دیمەشقێ و ل وێرێ هەمی ئەوا بۆ تە هاتیە دانان كو بكەی، دێ بۆ تە هێتە گۆتن.›
ژ بەر شەوقا وێ رۆناهیێ من چ نەددیت، ئەڤجا ئەوێن ل گەل من، دەستێ من گرت و ئەز گەهاندمە دیمەشقێ.
ل وێرێ زەڵامەك ب ناڤێ حەنانیا هەبوو، ل دویڤ دەستووری یێ ژ خودێ ترس بوو، وی ناڤودەنگەكێ باش د ناڤ هەمی جوهیێن وێرێ دا هەبوو،
ئەو هاتە نك من راوەستیا و گۆتە من: ‹برایێ من شائوول، بیناهیێ بكە.› ئێكسەر من بیناهی كر و ئەو دیت.
وی گۆت: ‹خودایێ بابكالێن مە تۆ یێ هەلبژارتی، دا تۆ حەزا وی بزانی و یێ راستدار ببینی و ئاخفتنێ ژ دەڤێ وی ببهیسی،
چنكو تۆ دێ بیە شاهد بۆ وی بەرامبەر هەمی مرۆڤان ب وی تشتێ تە دیتی و بهیستی.
نوكە تۆ بۆچی خۆ گیرۆ دكەی؟ رابە و ب گازیكرنا ناڤێ وی، وەرە تافیركرن و خۆ ژ گونەهێن خۆ بشوو.›
گاڤا ئەز ڤەگەڕیایمە ئورشەلیمێ و ل پەرستگەهێ من نڤێژ دكر، ئەز دلگرتی بووم
و من عیسا دیت و دگۆتە من: ‹لەزێ بكە و زوی ژ ئورشەلیمێ دەركەڤە، چنكو ئەو ب شاهدەییا تە سەبارەت من رازی نابن.›
من گۆت: ‹خودان، ئەو دزانن كو د هەمی كنیشتەیان ڤە، من ئەوێن باوەری ب تە هەی، زیندان دكرن و دقوتان.
دەمێ خوینا ستیڤانۆسێ شاهدێ تە هاتیە رشتن، ئەز ل وێرێ یێ راوەستیایی بووم و رازی بووم و من جلكێن بكوژێن وی دپاراستن،›
لێ وی گۆتە من: ‹هەڕە، ئەز دێ تە دویر هنێرم بۆ مللەتێن نەجوهی.›»
تا ڤێ گۆتنێ، ئەو جەماوەر ل سەر گوهدانێ یێ بەردەوام بوو، پاشی ب دەنگەكێ بلند گۆتن «بلا زەڵامەكێ هۆسا ل سەر ئەردی نەمینیت، چنكو ئەو نە هەژی ژیانێیە!»
دەمێ وان دكرە هەوار و جلكێن خۆ ژ بەر خۆ دهاڤێتن و تۆز دهەڵاڤێتە ئەسمانی،
فەرماندەی فەرمان دا، كو پاولۆسی ببەنە د سەربازگەهێ ڤە و ب قامچیدانێ ڤەكۆلینێ ل گەل بكەن، دا بزانیت كا بۆچی جوهیان ل دژی پاولۆسی دكرە هەوار.
لێ دەمێ سەربازان ئەو بۆ قامچیدانێ گرێ دای، پاولۆسی گۆتە سەرلەشكەرێ ل نك وی راوەستیایی: «ئەرێ رەوایە، هوین هەڤوەڵاتیەكێ رۆمایی قامچی بدەن، بەری بهێتە دادگەهكرن؟»
دەمێ سەرلەشكەری گو‍‌ھ ل ڤێ چەندێ بووی، چوو نك فەرماندەی و گۆتێ: «ئەڤە تۆ دێ چ كەی؟ ئەڤ مرۆڤە هەڤوەڵاتیەكێ رۆماییە.»
فەرماندە هاتە نك پاولۆسی و گۆتێ: «بێژە من، ئەرێ تۆ هەڤوەڵاتیەكێ رۆمایی؟» ئەوی بەرسڤ دا: «بەلێ.»
ئینا فەرماندەی گۆت «من ب پارەیەكێ زۆر ئەڤ هەڤوەڵاتیبوونە ب دەست خۆ ڤە ئینایە.» ئینا پاولۆسی گۆت: «لێ ئەز هەر ژ دایكبوونا خۆ هەڤوەڵاتیمە.»
ئێكسەر ئەوێن ل بەر بوو ڤەكۆلینێ ل گەل بكەن، خۆ ژێ دویر ئێخستن و فەرماندە ژی ترسیا، دەمێ زانی كو پاولۆس هەڤوەڵاتیەكێ رۆماییە، چنكو وی ئەو گرێ دابوو.
ل رۆژا پاشتر، فەرماندەی حەز دكر راستیێ بزانیت، كا بۆچی پاولۆس ژ لایێ جوهیان ڤە دهێتە تاوانباركرن. ئینا قەیدێن وی ڤەكرن و فەرمان دا كو سەرۆكێن كاهنان و هەمی ئەندامێن جڤاتا بلند كۆم ببن. وی پاولۆس ئینا و ل بەرامبەری وان راوەستاند.
پاولۆسی بەرێ خۆ دا جڤاتێ و گۆت «گەلی برایان، ئەز بۆ خودێ ب وژدانەكا باش تا ڤێ رۆژێ دژیام.»
ئینا حەنانیایێ سەرۆككاهن فەرمان دا، كو ئەو كەسێن ل نێزیك پاولۆسی راوەستیای، ل دەڤێ وی بدەن،
ئینا پاولۆسی گۆتە وی: «خودێ دێ ل تە دەت، هەی دیوارێ گێچكری! ئایا تۆ یێ روینشتی، دا من ل دویڤ دەستووری داد بكەی و تۆ بەروڤاژی دەستووری فەرمانا لێدانا من ددەی؟»
ئەوێن ل نێزیك پاولۆسی د راوەستیای بوون، گۆتن: «ئەرێ تۆ سەرۆككاهنێ خودێ بێ رێز دكەی؟»
پاولۆسی بەرسڤ دا: «گەلی برایان، من نە دزانی ئەڤە سەرۆككاهنە، چنكو یا هاتیە نڤیسین: ‹ب خرابی بەحسێ رێبەرێ مللەتێ خۆ نەكە.› »
دەمێ پاولۆسی زانی كو هندەك ژ ئەندامێن جڤاتێ سەدوقینە و هندەكێن دی فەریسی، ب دەنگەكێ بلند گۆتە جڤاتێ: «گەلی برایان، ئەز فەریسی كوڕێ فەریسیمە. ژ بەر باوەریا من كو مری دێ رابن، دهێمە دادگەهكرن.»
دەمێ ئەڤ چەندە گۆتی، ناكۆكی كەفتە د ناڤبەرا سەدوقی و فەریسیان دا و دووبەرەكی كەفتە جڤاتێ.
چنكو سەدوقی دبێژن كو رابوونا مریان و فریشتە و گیان نینن، لێ فەریسیان باوەری ب ڤان هەر سێیان هەیە.
وی دەمی قێڕ قێڕەكا مەزن چێبوو و هندەك ژ مامۆستایێن دەستووری یێن فەریسی رابوون و ب دژواری گەنگەشە كر و گۆتن: «ئەم چ گونەهان ل سەر ڤی زەڵامی نابینین! چێدبیت گیانەك یان فریشتەیەك ل گەل وی ئاخفتبیت.»
دەمێ ناكۆكی مەزن بووی، فەرماندە ترسیا كو ئەو پاولۆسی پارچە پارچە بكەن، ئینا فەرمان دا سەربازان كو بچن و وی ژ ناڤ وان بڕەڤینن و ببەنە سەربازگەهێ.
شەڤا پاشتر خودان ل نك پاولۆسی راوەستیا و گۆتێ «وێرەكیا خۆ بپارێزە، كا چەوا تە شاهدەیی بۆ من ل ئورشەلیمێ دایە، هۆسا پێدڤیە تۆ بۆ من ل رۆمایێ ژی بدەی».
دەمێ بوویە سپێدە، هندەك جوهیان پیلانەك دانا و سویند خوار كو ئەو نەخۆن و نەڤەخۆن، تا ئەو پاولۆسی نەكوژن.
ئەوێن ئەڤ پیلانە داڕشتی، ژ چل كەسان پتر بوون.
ئەو چوونە نك سەرۆكێن كاهنان و ریهسپیان و گۆتن: «مە سویند خوارییە كو ئەم تام نەكەینە تشتەكی، تاكو پاولۆسی نەكوژین.
ئەڤجا هوین ل گەل جڤاتێ ب بەهانەیا كو دێ هویرتر ڤەكۆلینێ ل سەر بابەتێ وی كەن، داخوازێ ژ فەرماندەی بكەن كو وی بینیتە نك هەوە و بەری ئەو بگەهیت، ئەم بۆ كوشتنا وی د ئامادەینە.»
لێ خوارزایێ پاولۆسی گو‍‌ھ ل ڤێ بویسەیێ بوو، ئەو هات و ب ژۆر كەفتە د سەربازگەهێ ڤە و ئەڤ چەندە گۆتە پاولۆسی.
ئەڤجا پاولۆسی گازی ئێك ژ سەرلەشكەران كر و گۆتێ: «ڤی گەنجی ببە نك فەرماندەی، چنكو وی تشتەكێ هەی دا بێژیتێ.»
ئینا وی ئەو برە نك فەرماندەی و گۆت: «پاولۆسێ زیندانی گازی من كر و داخواز كر، كو ئەز ڤی گەنجی بینمە نك تە، چنكو وی تشتەكێ هەی دا بێژیتە تە.»
فەرماندەی دەستێ وی گەنجی گرت و برە رەخەكی و پرسیار ژێ كر: «تە چ هەیە بۆ من بێژی؟»
وی گۆت: «جوهی یێن رێككەفتین كو داخوازێ ژ تە بكەن، تۆ سوبەهی پاولۆسی ببەیە جڤاتێ، ب بەهانەیا كو ئەو هویرتر ڤەكۆلینێ ل سەر بابەتێ وی بكەن.
لێ تۆ گوهێ خۆ نەدە وان، چنكو پتر ژ چل زەڵامێن وان بویسەیەك یا بۆ ڤەدای، ئەوان یا سویند خواری كو ئەو نەخۆن و نەڤەخۆن تا وی نەكوژن. نوكە ئەو د ئامادەنە و ل هیڤیا بڕیارا تەنە.»
فەرماندەی ئەو گەنج ب رێ ئێخست و فەرمان لێ كر و گۆتێ: «نە بێژە كەسێ كو تە ئەڤ چەندە یا گۆتیە من.»
ئەڤجا فەرماندەی گازی دوو ژ سەرلەشكەران كر و گۆت: «دوو سەد سەربازان ل گەل حەفتێ سیاران و دوو سەد رم هەلگران ئامادە بكەن، دا ئەڤ شەڤە ل دەمژمێر نەهێ، بچنە قەیسەریێ،
هەروەسا دەواران ئامادە بكەن، دا پاولۆسی لێ سیار كەن و ب ساخلەمی بگەهیننە نك فیلیكسێ والی.»
نامەیەك نڤیسی و تێدا دگۆت:
«ژ كلودیۆس لسیاس بۆ بەڕێز والیێ فیلیكس، سڵاڤ:
ئەڤ زەڵامە ژ لایێ جوهیان ڤە هاتبوو گرتن و چ نەما بوو وی بكوژن، لێ دەمێ من زانی ئەو هەڤوەڵاتیەكێ رۆماییە، ئەز ل گەل هندەك سەربازان گەهشتمێ و من قورتال كر.
ئەڤجا من دڤیا بزانم كا ب چ گونە‍‌ھ هاتیە تاوانباركرن، من ئەو برە جڤاتا وان.
بۆ من دیار بوو، كو ئەو ژ بەر هندەك بابەتێن گرێدای دەستوورێ خۆ، وی تاوانبار دكەن، لێ چ تشتێ وەسا ل سەر نینە، كو ئەو هەژی كوشتنێ یان زیندانكرنێ بیت.
پاشی دەمێ پێزانین بۆ من هاتین كو پیلانەك ل دژی وی یا دهێتە گێڕان، ئێكسەر من ئەو هنارتە نك تە و فەرمان ژی ل سكالاكەران كر، كو بهێنە نك تە و كا چ هەیە ل دژی وی بێژن.»
ئەڤجا سەربازان ژی ل دویڤ وێ فەرمانا لێ هاتیە كرن، پاولۆس بر و ب شەڤ گەهاندە ئەنتیپاتریس.
ل رۆژا پاشتر وان سیار هێلان كو ل گەل پاولۆسی بچن و ئەو ڤەگەڕیانە سەربازگەهێ.
دەمێ سیار گەهشتینە قەیسەریێ و نامە دایە دەستێ والی، وان پاولۆس ژی ل نك وی ئامادە كر.
وی نامە خواند و پرسیار كر كا پاولۆس خەلكێ كیژ هەرێمێیە، دەمێ زانی كو ئەو خەلكێ هەرێما كیلیكیایێیە،
گۆت: «دەمێ ئەوێن تۆ تاوانبار كری ژی دگەهن، هنگی ئەز دێ گوهێ خۆ دەمە كێشا تە» و فەرمان دا كو ئەو د كۆچكا هێرودێسی دا ل ژێر زێرەڤانیێ بیت.
پشتی پێنج رۆژان، حەنانیایێ سەرۆككاهن ل گەل هندەك ریهسپیان و گۆتاربێژەكی ناڤێ وی تەرتولۆس بوو، خواركەفتنە قەیسەریێ. وان سكالا ل دژی پاولۆسی ل نك والی كر.
دەمێ پاولۆس هاتیە گازیكرن، تەرتولۆسی دەست ب تاوانباركرنا وی كر و گۆت: «فیلیكسێ بەڕێز، ژ دەولەتسەرێ تە، ئەڤە دەمەكێ درێژە، ئەم د ئاشتیێ دا دژین و ب دویربینیا تە چاكسازی د ناڤ ڤی مللەتی دا چێبووینە،
ئەم بۆ وێ چەندێ، ل هەر دەمەكی و ل هەر جهەكی، ب سوپاسیەكا مەزن ڤە شاهدەییێ ددەین.
لێ دا پتر سەرێ تە گێژ نەكەم، هیڤیدارم تۆ ژ كەرەما خۆ پیچەكێ گوهداریا مە بكەی.
مە دیت ئەڤ زەڵامە مرۆڤەكێ تێكدەرە و ل سەرانسەری جیهانێ د ناڤ هەمی جوهیان دا تێكدانێ دكەت و ئەو سەركێشێ تایێ ناسیرەییانە.
وی بزاڤ ژی كر پەرستگەها مە بهەڕمینیت، ئینا مە ئەو گرت و مە حەزكر ل دویڤ دەستوورێ خۆ داد بكەین،
لێ فەرماندە لسیاس هات و ب خورتی ژ ناڤ دەستێن مە ئینا دەرێ.
پاشی فەرمان ل سكالاكەران كر كو بهێنە نك تە. ئەگەر تۆ لێپرسینێ ل گەل وی بكەی، تۆ ب خۆ دشێی راستیا وان هەمی تشتان بزانی، یێن ئەم وی پێ تاوانبار دكەین!»
جوهیان ژی پشتەڤانیا ڤێ تاوانباركرنێ كر و گۆتن كو ئەڤە هەمی وەسایە.
دەمێ والی ئاماژە دایە پاولۆسی كو بئاخڤیت، پاولۆسی بەرسڤ دا: «ئەز دزانم، ئەڤە گەلەك ساڵن تۆ دادوەرێ ڤی مللەتی، لەوما ب كەیفخۆشی ئەز بەڕەڤانیێ ژ خۆ دكەم.
تۆ دشێی راستیێ بزانی، كو ئەڤە نەپترە ژ دوازدە رۆژان، ئەز بۆ پەرستنێ هاتیمە ئورشەلیمێ.
ڤان كەسان جارەكێ ژی ئەز نەدیتیمە كو د پەرستگەهێ دا گەنگەشەیێ ل گەل كەسەكی دكەم، یان د كنیشتەیان دا، یان ژی د باژێڕی دا، خەلكی دئارینم.
ئەو نەشێن ژی وان تشتان بۆ تە بسەلمینن، یێن نوكە من پێ تاوانبار دكەن.
لێ ئەز بەرامبەری تە دانپێدانێ ب هندێ دكەم، كو ل دویڤ وێ رێبازا ئەو دبێژنێ رێبازا خڕیای، ئەز خودایێ باب و باپیرێن خۆ دپەرێسم و باوەریێ ب وان هەمی تشتان دئینم یێن د دەستووری و نڤیسارێن پێغەمبەران دا هاتین.
هیڤیا من ب خودێیە، ئەوا ئەڤ كەسە ب خۆ ژی چاڤەڕێیا وێ دكەن، كو دێ رابوونا مریان بۆ یێن باش و یێن نەباش هەبیت،
ژ بەر ڤێ چەندێ ژی ئەز بزاڤێ دكەم، دا هەردەم من وژدانەكا پاقژ بەرامبەری خودێ و مرۆڤان هەبیت.
پشتی چەندین ساڵان، ئەز یێ ڤەگەڕیایم، دا هندەك هاریكاریێ بۆ هەژارێن مللەتێ خۆ بینم و قوربانان پێشكێش بكەم.
دەمێ من ئەڤ چەندە دكر، وان ئەز د حەوشا پەرستگەهێ دا دیتم كو من خۆ پاك كربوو، ئەز د ناڤ چ خڕڤەبوون و تێكدانان دا نەبووم.
لێ هندەك جوهیێن هەرێما ئاسیایێ ل وێرێ بوون، ئەگەر وان بەلگەیەك دژی من هەبا، پێدڤی بوو ئەو هاتبانە بەرامبەری تە و سكالا ل من كربا.
یان ژی بلا ئەڤە ب خۆ بێژن، كا دەمێ ئەز ل بەرامبەری جڤاتا بلند یا جوهیان راوەستیایم، وان چ گونە‍‌ھ ل سەر من دیت،
ژبلی ئەوا من ل بەرامبەری وان دیار كری، دەمێ من ب دەنگەكێ بلند گۆتی: ‹ژ بەر باوەریا من ب رابوونا مریان، ئەز ئەڤرۆ ژ لایێ هەوە ڤە یێ دهێمە دادگەهكرن.›»
هنگی فیلیكسی، ئەوێ پێزانینێن باش ل دۆر رێبازێ هەین، روینشتن ب دویماهی ئینا و گۆت: «دەمێ لسیاسێ فەرماندە دهێت، دێ بڕیارێ ل سەر كێشا هەوە دەم.»
پاشی فەرمان ل سەرلەشكەری كر، كو پاولۆس بهێتە زێرەڤانیكرن، لێ وی هندەك ئازادی هەبیت و رێ ل هەڤالێن وی نەهێتە گرتن كو بهێن خزمەتا وی بكەن.
پشتی چەند رۆژەكان، فیلیكس ل گەل هەڤژینا خۆ دروسیلایێ هات، ئەو ژنك جوهی بوو. وی هنارتە ب دویڤ پاولۆسی را و دەربارەی باوەریێ ب مەسیح عیسای، گوهێ خۆ دایێ.
دەمێ پاولۆس ل سەر راستداری و لخۆزاڵبوونێ و رۆژا دادكرنا كو دێ هێت دئاخفت، فیلیكس ترسیا و گۆت: «نوكە تۆ هەڕە و دەمێ من دەلیڤە هەبوو، دێ گازی تە كەمەڤە.»
هەروەسا وی هیڤیەك ژی هەبوو، كو پاولۆس هندەك پارەیان بدەتێ، لەوما گەلەك جاران دهنارتە ب دویڤ وی را و ل گەل دئاخفت.
پشتی دوو ساڵ بورین، پوركیۆس فێستۆس هاتە جهێ فیلیكسی، فیلیكسی ژی دڤیا جوهیان رازی بكەت، ئینا پاولۆس هێلا د زیندانێ دا.
سێ رۆژان پشتی فێستۆس گەهشتیە هەرێمێ، ئەو ژ قەیسەریێ سەركەفتە ئورشەلیمێ.
ل وێرێ سەرۆكێن كاهنان و ریهسپیێن جوهیان، كێشا خۆ دژی پاولۆسی پێشكێش كر.
وان هیڤی ژێ كرن و قەنجیەك ژێ خواست كو پاولۆسی ل ئورشەلیمێ ئامادە بكەت، چنكو وان بویسەیەك بۆ وی دروست دكر، دا د رێكێ دا بكوژن.
فێستۆسی بەرسڤ دا، كو پاولۆس ل قەیسەریێ یێ گرتییە و ئەوی ب خۆ ژی ل بەرە هەر زوی بچیتە وێرێ.
پاشی وی گۆت: «ئەڤجا بلا سەركێشێن هەوە ل گەل من بهێن و ئەگەر ڤی زەڵامی تاوانەك كربیت، بلا سكالایێ لێ بكەن!»
پشتی ئەو دەمەكێ نەپتر ژ هەشت تا دە‍‌ھ رۆژان ل گەل وان مایی، خواركەفتە قەیسەریێ. ل رۆژا پاشتر، ل سەر كورسیكا دادوەریێ روینشت و فەرمان دا كو پاولۆسی بینن.
دەمێ ئەو هاتی، جوهیێن كو ژ ئورشەلیمێ خواركەفتبوون، دەوروبەرێن وی گرتن و ئەو ب گەلەك تاوانێن گران تاوانبار كر، لێ نەشیان بسەلمینن.
پاولۆسی بەڕەڤانی ژ خۆ كر و گۆت: «من ل دژی دەستوورێ جوهیان، یان دژی پەرستگەهێ، یان دژی قەیسەری چ گونە‍‌ھ نەكرینە.»
لێ فێستۆسی دڤیا جوهیان رازی بكەت، ئینا پرسیار ژ پاولۆسی كر: «ما تە دڤێت سەربكەڤیە ئورشەلیمێ و ل وێرێ ل سەر ڤان تاوانان، دادگەهكرنا تە ژ لایێ من ڤە بهێتە كرن؟»
پاولۆسی گۆت: «ئەز ل بەرامبەر كورسیكا دادوەریا قەیسەری یێ راوەستیایمە، ل وی جهێ كو پێدڤیە بهێمە دادگەهكرن. من چ خرابی ل جوهیان نەكرینە، هەروەكو تۆ ژی باش دزانی.
ئەگەر ئەز خرابكار بم و من تشتەك كربیت كو ئەز یێ هەژی كوشتنێ بم، ئەز ژ مرنێ ناڕەڤم، لێ ئەگەر ئەو تاوانێن ئەڤە ب دویڤ من ڤە دنن، د بێ بنیات بن، كەس نەشێت من رادەستی وان بكەت. ئەز كێشا خۆ بۆ قەیسەری بلند دكەم!»
وی دەمی فێستۆس ل گەل شیرەتكارێن خۆ ئاخفت و بەرسڤ دا: «تە كێشا خۆ بۆ قەیسەری بلند كر، دێ چیە نك قەیسەری!»
پشتی چەند رۆژەك دەرباز بووین، ئەگریپاس پاشا ل گەل بەرنیكایێ هاتنە قەیسەریێ، دا پیرۆزباهیێ ل فێستۆسی بكەن.
چەند رۆژەك ل وێرێ بوراندن. فێستۆسی كێشا پاولۆسی بۆ پاشای ڤەگێڕا و گۆتێ: «ل ڤێرێ زەڵامەك یێ هەی، فیلیكسی یێ هێلایە د زیندانێ دا.
دەمێ ئەز ل ئورشەلیمێ، سەرۆكێن كاهنان و ریهسپیێن جوهیان سكالایێن خۆ ل سەر وی پێشكێشی من كرن و داخواز ژ من كر كو وی داد بكەم.
من گۆتە وان كو نە ژ داب و نەریتێن رۆماییانە كەسەكی رادەستی سزادانێ بكەن، بەری كو وی و سكالاكەرێن وی روی ب روی ئێك نەكەن، دا دەلیڤە هەبیت كو ل بەرامبەر سكالایێ بەڕەڤانیێ ژ خۆ بكەت.
ئەڤجا دەمێ ئەو هاتینە ڤێرێ، من گیرۆ نەكر، ل رۆژا پاشتر ئەز ل سەر كورسیكا دادوەریێ روینشتم و من فەرمان دا كو وی زەڵامی بینن.
دەمێ سكالاكەر ل بەرامبەری وی راوەستیاین، وان ئەو ب چ خرابیێن وەسا تاوانبار نەكر، ژ ئەوێن من هزر ژێ دكر،
لێ وان هندەك كێشە ل سەر وی هەبوون، دەربارەی ئایینێ وان و دەربارەی زەڵامەكی ناڤێ وی عیسایە و یێ مری، لێ پاولۆس دبێژیت یێ زیندیە.
ژ بەر كو ئەز یێ پشتڕاست نەبووم، كا چەوا دەربارەی ڤێ كێشێ ڤەكۆلینێ بكەم، من پرسیار ژێ كر كا وی دڤێت سەركەڤیتە ئورشەلیمێ و ل وێرێ ل سەر ڤان تاوانان بهێتە دادگەهكرن.
لێ دەمێ پاولۆسی داخواز كری كو دەستەسەركری بمینیت و كێشا وی بۆ قەیسەری بهێتە بلند كرن، دا ئەو بڕیارێ ل سەر بدەت، من فەرمان دا، پاولۆس یێ دەستەسەركری بیت، تا ئەز وی بهنێرمە نك قەیسەری.»
ئینا ئەگریپاسی گۆتە فێستۆسی: «من ژی حەز دكر، من گو‍‌ھ ل وی زەڵامی ببا.» بەرسڤا وی دا: «سوبەهی دێ تە گو‍‌ھ لێ بیت.»
ل رۆژا پاشتر ئەگریپاس و بەرنیكا ب ئاهەنگەكا مەزن ڤە هاتن، ئەو ل گەل فەرماندەیێن لەشكەری و زەڵامێن پایەبەرزێن باژێڕی چوونە د هۆلا گوهدانێ ڤە. فێستۆسی فەرمان دا و پاولۆس ئینا د ژۆرڤە،
ئینا فێستۆسی گۆت: «ئەگریپاس پاشا و هەمی هێژایێن ل گەل مە د ئامادە: ئەڤ زەڵامێ هوین دبینن، ئەوە یێ هەمی مللەتێ جوهی، ل ئورشەلیمێ و ل ڤێرێ، داخواز ژ من كری و دقیڕاند كو پێدڤیە ئێدی نەمینیتە ساخ،
لێ بۆ من دیار بوو، وی چ نەكریە كو هەژی ژناڤبرنێ بیت. دەمێ وی كێشا خۆ بۆ قەیسەرێ هێژا بلند كری، من بڕیار دا وی بهنێرم.
لێ من دەربارەی وی تشتەك نینە، ئەز ژێ یێ پشتڕاست بم كو بۆ قەیسەری بنڤیسم، ژ بەر هندێ من بەرامبەری هەوە یێ ئامادەكری، ب تایبەتی بەرامبەری تە ئەگریپاس پاشا، داكو ژ ئەنجامێ ڤەكۆلینێ من تشتەك هەبیت بنڤیسم،
چنكو ئەز دبینم نە یا بەرئاقلە زیندانیەكی بهنێرم، بێی كو تاوانێن ل سەر وی دیار بكەم!»
ئینا ئەگریپاسی گۆتە پاولۆسی: «تۆ یێ دەستویردایی بەڕەڤانیێ ژ خۆ بكەی.» وی دەمی پاولۆسی ب دەستێ خۆ ئاماژە كر و بەڕەڤانی ژ خۆ كر و گۆت:
«ئەگریپاس پاشا، ئەز خۆ ب بەختەوەر دزانم، كو ئەڤرۆ ل بەرامبەری تە بەڕەڤانیێ ژ خۆ بكەم، دەربارەی هەمی تشتێن جوهی من پێ تاوانبار دكەن،
نەخاسمە كو تۆ هەمی داب و نەریت و ناكۆكیێن وان دزانی، لەوما هیڤی دكەم ب بێهنفرەهی گوهێ خۆ بدەیە من.
هەمی جوهی شێوازێ ژیانا من هەر ژ گەنجاتیێ وەرە دزانن، كا چەوا ئەز ژ دەستپێكێ وەرە، د ناڤ مللەتێ خۆ دا و ل ئورشەلیمێ دژیام،
ئەو ژ مێژە وەرە من دنیاسن و ئەگەر حەز بكەن، ئەو دشێن شاهدەییێ بدەن، كو ئەز فەریسی بووم و ل دویڤ ڤێ رێبازا ژ هەمیان توندتر د ئایینێ مە دا دژیام.
نوكە ژی ژ بەر هیڤیا من ب وێ سۆزا خودێ دایە بابكالێن مە، ئەز یێ راوەستیایمە دهێمە دادگەهكرن،
ئەو سۆزا هەر دوازدە هۆزێن مللەتێ مە هیڤی دكەن كو ب دەست خۆ ڤە بینن، دەمێ ب شەڤ و رۆژ ژ دل پەرستنێ دكەن. پاشایێ بەڕێز، ژ بەر ڤێ هیڤیێ، ئەز ژ لایێ جوهیان ڤە دهێمە تاوانبار كرن.
بۆچی باوەریا هەوە پێ ناهێت، كو خودێ مریان رادكەتەڤە؟
من ب خۆ ژی هزر دكر، كو پێدڤیە ئەز گەلەك تشتان ل دژی ناڤێ عیسایێ ناسیرەیی بكەم.
ئەڤ چەندە ژی من ل ئورشەلیمێ كر و ب وێ دەستهەلاتا من ژ سەرۆكێن كاهنان وەرگرتی، من گەلەك ژ مرۆڤێن پیرۆز هاڤێتنە د زیندانێ دا و دەمێ بڕیارا كوشتنا وان دهاتە دان، من ژی دەنگێ خۆ ل دژی وان ددا.
ل هەمی كنیشتەیان من ئەو گەلەك جاران یێن سزا داین و یێن نەچار كرین كو دەست ژ باوەریا خۆ بەردەن. كەرب و كینا من ل سەر وان هند زێدە ببوو، كو ئەز ل دویڤ وان بچمە باژێڕێن بیانی ژی.
هۆسا ب دەستهەلات و دەستویریا سەرۆكێن كاهنان، ئەز دچوومە دیمەشقێ.
پاشایێ هێژا، نیڤرۆ ل سەر رێكێ، من رۆناهیەك دیت ژ رۆناهیا رۆژێ ب شەوقتر بوو، دەوروبەرێن من و ئەوێن ل گەل من روهن كر.
ئەم هەمی كەفتینە ئەردی و من گو‍‌ھ ل دەنگەكی بوو ب زمانێ عیبرانی دگۆتە من: ‹شائوول، شائوول، تۆ بۆچی من تەپەسەر دكەی؟ یا ب زەحمەتە تۆ زیچكان دانیە چیخنان.›
من پرسیار كر: ‹ئەزبەنی، تۆ كی؟› خودانی گۆت: ‹ئەز عیسامە، ئەوێ تۆ تەپەسەر دكەی.
لێ رابە و ل سەر پێیێن خۆ راوەستە، چنكو ئەز بۆ تە یێ دیار بوویم، دا تە بكەمە خزمەتكار و شاهد ل سەر بینینێن تە دیتین و ئەوێن دێ تێدا بۆ تە دیار بم.
دێ تە ژ گەلێ تە و مللەتێن نەجوهی قورتال كەم، ئەوێن ئەز تە بۆ وان دهنێرم،
دا چاڤێن وان ڤەكەی كو ئەو ژ تاریاتیێ بۆ رۆناهیێ و ژ دەستهەلاتداریا ئبلیسی بۆ خودێ بزڤڕن، دا ئەو لێبورینا گونەهان وەربگرن و بەهرەك هەبیت ل گەل ئەو كەسێن ب رێكا باوەری ئینانێ ب من هاتینە پیرۆزكرن.›
ئەگریپاس پاشا، ئێدی من ركمانێ دەربارەی دیتنا ئەسمانی نەكریە،
لێ من ل دەستپێكێ بۆ یێن ل دیمەشقێ، پاشی ل ئورشەلیمێ و هەمی دەڤەرێن یەهودیایێ، پاشی بۆ مللەتێن نەجوهی ژی راگەهاند، كو ل خۆ بزڤڕن و بۆ خودێ ڤەگەڕن و كریارێن هەژی لخۆزڤڕینێ بكەن.
ژ بەر ڤێ چەندێ، جوهیان ئەز ل پەرستگەهێ گرتم و بزاڤ كر من بكوژن،
لێ من هاریكاری ژ خودێ وەرگرت، لەوما هەتا ئەڤرۆ ئەز راوەستیایمە و شاهدەییێ ددەمە بچویكی و مەزنی. ئەز چ دی نابێژم، ژبلی وان تشتێن مووسای و پێغەمبەران گۆتی كو دێ روی دەن:
پێدڤیە مەسیح بئێشیت و ئێكەمین كەس بیت ژ ناڤ مریان راببیت و رۆناهیێ بۆ مللەتێ مە و بۆ مللەتێن نەجوهی ژی رابگەهینیت.»
دەمێ پاولۆسی ب ڤان گۆتنان بەڕەڤانی ژ خۆ دكر، فێستۆسی ب دەنگەكێ بلند گۆت: «پاولۆس، تۆ یێ دین بووی! گەلەك خواندن تە دین دكەت.»
پاولۆسی گۆت: «بەڕێز فێستۆس، ئەز نە یێ دینم، ئەز یێ پەیڤێن راست و بەرئاقل دبێژم.
پاشا ڤان تشتان دزانیت، لەوما ئەز سەربەست ل گەل وی دئاخڤم. ئەز باوەر ناكەم تشتەك ژ ڤان ل وی هاتبیتە ڤەشارتن، چنكو ئەڤێ چەندێ ل قولاچكەكێ نەرویدایە!
ئەگریپاس پاشا، ئەرێ تۆ باوەر ژ پێغەمبەران دكەی؟ ئەز دزانم كو تۆ باوەر ژێ دكەی.»
ئەگریپاسی گۆتە پاولۆسی: «تۆ دبێژی د ڤی دەمێ كورت دا، دێ بۆ من باوەریێ چێكەی كو ببمە مەسیحی؟!»
پاولۆسی گۆت: «چ كورت یان درێژ، ئەز هیڤی ژ خودێ دكەم، نە ب تنێ تۆ، لێ هەمیێن ئەڤرۆ من دبهیسن، وەكو من لێ بهێن، ژبلی ڤان قەیدان!»
وی دەمی پاشا رابوو، والی و بەرنیكا و ئەوێن ل گەل وان دروینشتی ژی رابوون.
ئەو دەردكەفتن و دگۆتە ئێكودوو: «ئەڤی مرۆڤی تشتەك نەكریە كو یێ هەژی كوشتنێ یان زیندان كرنێ بیت.»
ئینا ئەگریپاسی گۆتە فێستۆسی: «ئەگەر ڤی مرۆڤی كێشا خۆ بۆ قەیسەری بلند نەكربا، د شیان دا بوو بهێتە بەردان.»
دەمێ بڕیار هاتیە دان كو ئەم ب گەمیێ بچینە ئیتالیا، پاولۆس و هندەك گرتیێن دی رادەستی سەرلەشكەرەكێ سوپایێ ئیمپراتۆری كرن، ناڤێ وی یولیۆس بوو.
ئەم ل گەمیەكێ ژ باژێڕێ ئەدرەمیتێ سیار بووین، كو ل بەر بوو بچیتە هندەك جهان ل كنارێن هەرێما ئاسیایێ، ئەم ب رێ كەفتین و ئەرستارخۆس ژ باژێڕێ سالونیكی ژ هەرێما مەقدۆنیا ل گەل مە هات.
ل رۆژا پاشتر ئەم گەهشتینە سایدا. یولیۆسی رەفتارەكا باش ل گەل پاولۆسی كر و دەستویری دایێ كو سەرەدانا هەڤالێن خۆ بكەت، دا پێدڤیێن خۆ ژ وان وەرگریت.
پاشی ئەم ژ وێرێ ب گەمیێ ب رێ كەفتین و د پشت قوبرس را چووین، چنكو با دژی مە دهات.
دەمێ ئەم د نیڤا وێ دەریایا بەرامبەری هەرێمێن كیلیكیا و پامفیلیایێ را دەربازبووین، ئەم ل بەندەرێ میرا ل هەرێما لیكیایێ پەیا بووین.
ل وێرێ سەرلەشكەری گەمیەك دیت یا باژێڕێ ئەسكەندەریێ بوو بەرەڤ ئیتالیا دچوو، ئەم لێ سیار كرین.
گەمیێ ئەم هێدی هێدی ب گەلەك رۆژان برین و ب زۆری ئەم گەهشتینە نێزیكی كنیدۆسێ. بای نەهێلا ئەم پتر بچین، لەوما ئەم د پشت گزیرتەیا كریت را ل نێزیكی سەلمۆنی دەرباز بووین.
ب زۆری ئەم گەهشتینە جهەكی دبێژنێ «بەندەرێن جوان» كو ل نێزیكی باژێڕێ لاسەیایێ بوو.
دەمەكێ درێژ ب سەرڤە چووبوو و وەغەركرن ب رێكا دەریایێ ب مەترسی كەفتبوو، ئێدی رۆژیگرتن ژی دەرباز ببوو، لەوما پاولۆسی شیرەت ل وان كر
و گۆت: «گەلی زەڵامان، ئەز دبینم ئەڤ وەغەرە دێ یا ب زەحمەت و زیانەكا مەزن بیت، نە ب تنێ ل سەر باری و گەمیێ، لێ ل سەر ژیانا مە ب خۆ ژی،»
لێ سەرلەشكەری پتر گوهداریا سەرۆكێ گەمیڤانان و خودانێ گەمیێ دكر ژ گۆتنا پاولۆسی.
بەندەر ب كێر دەربازكرنا وەرزێ زڤستانێ نەدهات، لەوما پڕانیا وان بڕیار دا ژ وێرێ بچن، ب وێ هیڤیێ كو ئەو بشێن خۆ بگەهیننە فینكس و زڤستانێ ل وێرێ ببورینن، كو ئەو بەندەرەكە ل كریت، بەرێ وێ یێ ل باشوورێ رۆژئاڤا و باكوورێ رۆژئاڤا.
دەمێ بایەكێ هێدی ژ باشووری ڤە هاتی، وان هزركر ئەو گەهشتنە مەبەستا خۆ، ئینا لەنگەر راكر و ژ نێزیك ڤە د بەر كریت را دەرباز دبوون،
لێ پشتی دەمەكێ كورت، هڕوبایەكێ دژوار هات، دبێژنێ ‹ئوراكیلون›
وی ل گەمیێ دا و ئێدی گەمی نەشیا روی ب روی بای بچیت، ئەڤجا مە دەست ژێ بەردان و باڕۆڤەیێ ئەم برین.
دەمێ ئەم د پشت گزیرتەیەكا بچویك را دەرباز دبووین، ناڤێ وێ كاودا بوو، ب زۆری مە شیا دەستێ خۆ دانینە سەر بەلەمێ.
پشتی ئەو بلند كریە د گەمیێ دا، گەمیڤانان نیڤا گەمیێ ب وەریسان شداند. ئەو دترسیان ل ‹سیرتس› بنێ گەمیێ ژ ئەردی بگریت، لەوما وان باگرێن گەمیێ ئینانە خوار و هۆسا گەمی دهاتە هاژوتن.
ژ بەر دژواریا باڕۆڤەیێ ل سەر مە، وان ل رۆژا پاشتر دەست ب هاڤێتنا بارێ گەمیێ كر.
ل رۆژا سێیێ وان ب دەستێن خۆ كەلوپەلێن گەمیێ هاڤێتن.
گەلەك رۆژان مە رۆژ و ستێر نەدیتن و باڕۆڤە ل سەر مە هەر یا دژوار بوو، ئێدی هەمی هیڤیێن قورتالبوونا مە هاتنە بڕین.
دەمەكێ درێژ بوو وان خوارن نە خواری، ئینا پاولۆس د ناڤ وان دا رابوو و گۆت: «گەلی زەڵامان، پێدڤی بوو هەوە گوهێ خۆ دابا من و ژ كریت نەدابا رێ، هوین دا خۆ ژ ڤێ زەحمەت و زیانێ پارێزن.
نوكە ئەز هیڤیێ ژ هەوە دكەم بێ ئومێد نەبن، چنكو كەس ژ هەوە ژیانا خۆ ژ دەست نادەت، ب تنێ گەمی دێ تێك شكێت،
چنكو شڤێدی فریشتەیەكێ وی خودایێ ئەز یێ ویمە و خزمەتا وی دكەم، ل نك من راوەستیا
و گۆت: ‹پاولۆس، نەترسە! دڤێت تۆ ل بەرامبەری قەیسەری راوەستی و ئەڤە ل سەر خاترا تە، خودێ دێ ژیانا هەمی رێڤنگێن ل گەل تە پارێزیت!›
ئەڤجا گەلی زەڵامان، د پشتڕاست بن، چنكو من باوەریا ب خودێ هەی، كو دێ وەسا چێبیت، هەروەكو بۆ من هاتیە گۆتن.
لێ دڤێت گەمی ب ئەردێ گزیرتەیەكێ بكەڤیت.»
ل شەڤا چواردێ، كو هێشتا ئەم د دەریا ئەدریاتیك دا دهاتینە هاژوتن، ل نیڤا شەڤێ گەمیڤانان هزر كر كو ئەو یێن نێزیكی هشكاتیێ بووین.
وان كویراتیا ئاڤێ پیڤا، دیت كو بیست بەژنە، پشتی پیچەكێ پێشڤە چووین، جارەكا دی پیڤا، دیت كو پازدە بەژنە.
ئەو دترسیان كو ئەم ب جهەكێ كەڤرین بكەڤین، لەوما چوار لەنگەر ژ پاشیا گەمیێ بەردان و نڤێژ دكر كو رۆژ ل وان بهەلێت.
لێ دەمێ گەمیڤانان بزاڤ كری ژ گەمیێ بڕەڤن و بەلەم داهێلایە دەریایێ، ب وێ بەهانەیێ كو وان دڤێت ژ پێشیا گەمیێ لەنگەران بەردەنە خوارێ،
پاولۆسی گۆتە سەرلەشكەری و سەربازان: «ئەگەر ئەڤ گەمیڤانە نەمیننە د گەمیێ دا، هوین نەشێن قورتال ببن.»
ئینا سەربازان وەریسێن بەلەمێ بڕین و هێلا بكەڤیتە د ئاڤێ دا.
بەری سپێدێ، پاولۆسی هیڤی ژ هەمیان كر كو تشتەكی بخۆن و گۆت: «ئەڤە رۆژا چواردێیە هوین د بن فشارێ ڤەنە و برسی ماینە و هەوە چ نەخوارییە.
ژ بەر هندێ هیڤی ژ هەوە دكەم، هوین تشتەكی بخۆن، چنكو ئەڤە بۆ قورتالبوونا هەوەیە و مویەك ژ سەرێ كەسێ ژ هەوە ناكەڤیت.»
پشتی وی ئەڤە گۆتی، نانەك هەلگرت و ل بەرامبەر هەمیان سوپاسیا خودێ كر، كەركر و دەست ب خوارنێ كر.
وی دەمی هەمی ب ئومێد كەفتن و وان ژی خوارن خوار.
ئەم هەمی ئەوێن د گەمیێ دا، دوو سەد و حەفتێ و شەش كەس بووین.
پشتی ژ خوارنێ تێر بووین، گەنم هاڤێتە د دەریایێ دا، دا گەمیێ سڤك بكەن.
دەمێ بوویە سپێدە، ئەوان نەدزانی كا ئەو گەهشتینە كیژ ئەردی، لێ وان كەنداڤەك دیت، كنارێ وێ خیز بوو. ئینا بڕیار دا، ئەگەر بشێن، گەمیێ بهاژونە وێرێ.
وان لەنگەر قەتاندن و هێلانە د دەریایێ دا و وەریسێن ب دەستكێن ئاراستەكرنا گەمیێ ڤە سست كرن و باگرا پێشیێ ل بەر بای بلند كر و قەستا كناری كر.
لێ گەمی كەفتە د ناڤ پێلێن دژوار دا و بنێ وێ ب گرەكی كەفت كو یێ بن ئاڤ بوو، ئەڤجا پێشیا وێ تێڕا چكلی و د ج‍‌ھ دا ما، لێ ژ بەر دژواریا پێلان پاشیا وێ تێك دشكەست.
نەخشەیێ سەربازان ئەو بوو كو گرتیان بكوژن، دا كەس مەلەڤانیا نەكەت و بڕەڤیت.
لێ سەرلەشكەری ڤیا پاولۆسی قورتال كەت، ئینا نەهێلا ئەو نەخشەیێ خۆ ب ج‍‌ھ بینن و فەرمان داكو ئەوێن دشێن مەلەڤانیا بكەن، ل بەراهیێ خۆ بهاڤێژنە ئاڤێ و دەركەڤنە هشكاتیێ.
ئەوێن ماین ژی، ب دویڤ وان را، هندەك ل سەر دەپان و هندەك ل سەر پارچەیێن گەمیێ بچن. هۆسا هەمی ب سلامەتی گەهشتنە هشكاتیێ.
پشتی ئەم قورتال بووین، مە زانی كو ناڤێ گزیرتەیێ ماڵتایە.
خەلكێ وێ جوامێریەكا كێم وێنە ل گەل مە كر، وان بخێرهاتنا مە كر و ئاگر هەلكر، چنكو بارانێ دەست پێ كربوو و سەرما بوو.
دەمێ پاولۆسی بەرملەكێ داران كۆمكری و هاڤێتیە د ئاگری دا، ژ بەر گەرمایێ، كورەمارەك دەركەفت و دەڤێ خۆ هاڤێتە دەستێ وی و گرت.
دەمێ خەلكی دیتی كورەمار ب دەستێ وی ڤە دهەژیا، گۆتە ئێكودوو: «بێگۆمان ئەڤ كەسە مێركوژە! سەرەڕای كو ئەو ژ دەریایێ قورتال بوو، ‹دادپەروەری ›ێ نەهێلا ئەو بژیت.»
لێ پاولۆسی ئەو گیانەوەر ڤەهەژاندە د ئاگری دا و چ زیان ب وی ب خۆ نەكەفتن.
ئەوان چاڤەڕێ دكر كو بوەرمیت یان ژ نشكەكێ ڤە بكەڤیت و بمریت، لێ پشتی دەمەكێ درێژ چاڤەڕێ ماین و دیتی چ لێ نەهات، ئەو ژ هزرا خۆ لێڤەبوون و گۆتن: «ئەڤە خوداوەندەكە!»
ل دەوروبەرێن وی جهی، رەز و باغێن كەسەكی بوون كو مەزنێ گزیرتەیێ بوو، ناڤێ وی پوپلیۆس بوو، ئەوی بخێرهاتنا مە كر و ب خۆشحالی ڤە بۆ سێ رۆژان ئەم مێڤان كرین.
بابێ پوپلیۆسی ژ بەر تایێ و زكچوونێ د ناڤ نڤینكان دا یێ نەساخ بوو. پاولۆس چوو نك وی و نڤێژ كر و دەستێن خۆ دانانە سەر و ساخ كر.
دەمێ ڤێ چەندێ روی دای، نەساخێن دی ژی یێن گزیرتەیێ دهاتنە نك وی و ساخ دبوون.
وان گەلەك رێز ل مە گرت و دەمێ ئەم ب رێ كەفتین، تشتێن پێدڤی بۆ مە داگرتن.
پشتی سێ هەیڤان، ب گەمیەكا باژێڕێ ئەسكەندەریێ كو پەیكەرێ ‹جێمك ›ی ل سەر بوو، ئەم ب رێ كەفتین، وێ گەمیێ زڤستان ل گزیرتەیێ بوراندبوو.
ئەم گەهشتینە باژێڕێ سیراكوسا و سێ رۆژان ل وێرێ ماین.
پاشی ئەم ژ وێرێ چووین و گەهشتینە باژێڕێ رێگیومێ. رۆژا پاشتر بایەك ژ باشووری ڤە رابوو و ل رۆژا ب دویڤ دا، ئەم گەهشتینە باژێڕێ پوتیولی.
ل وێرێ مە هندەك خویشك و برا دیتن و داخواز ژ مە كر كو حەفت رۆژان ل نك وان بمینین. هۆسا ئەم گەهشتینە رۆمایێ.
ل وێرێ، دەمێ خویشك و برایان گەهشتنا مە بهیستی، هەتا ‹گۆڕەپانا ئەپیۆس› و ‹سێ خانە ›یێ بۆ پێشوازیكرنا مە دەركەفتن. گاڤا پاولۆسی ئەو دیتین، سوپاسیا خودێ كر و هاتە هاندان.
دەمێ ئەم هاتینە رۆمایێ، دەستویری بۆ پاولۆسی هاتە دان، ل گەل وی سەربازێ زێرەڤانیێ لێ دكەت، ب تنێ ئاكنجی ببیت.
پشتی سێ رۆژان پاولۆسی داخوازا مەزنێن جوهیان كر، دەمێ كۆم بووین، گۆتە وان: «گەلی برایان، سەرەڕای كو من چ تشت دژی مللەتی یان داب و نەریتێن بابكالێن مە ئەنجام نەداینە، لێ ل ئورشەلیمێ ئەز هاتمە گرتن و رادەستی رۆماییان هاتمە كرن.
وان لێپرسین ل گەل من كر و حەز دكر من بەردەن، چنكو وان چ ئەگەرێن هەژی كوشتنێ ل سەر من نەدیتن.
لێ دەمێ جوهی نەرازیبووین، ئەز نەچاربووم گازندەیا خۆ بگەهینمە قەیسەری، نە ژ بەر هندێ كو من سكالایا ل سەر مللەتێ خۆ هەی.
لەوما من هوین داخواز كرن كو هەوە ببینم و ل گەل هەوە بئاخڤم، چنكو ژ بەر هیڤیا ئیسرائیلێ، ئەز ب ڤێ زنجیرێ یێ گرێدایمە.»
وان بەرسڤ دا: «دەربارەی تە، مە چ نامە ژ یەهودیایێ وەرنەگرتینە، هەروەسا ژ برایێن مە ژی كەسەك نەهاتیە، كو ب خرابی دەنگوباسەكێ تە گەهاندبیتە مە یان بەحسێ تە كربیت،
لێ ئەم حەز دكەین ژ تە ببهیسین كا بۆچوونێن تە چنە، چنكو ئەم دزانین ل هەمی جهان ئاخفتن ل دژی ڤێ رێبازێ دهێنە گۆتن.»
رۆژەك بۆ وی دەستنیشان كر، ئینا گەلەك كەس هاتنە جهێ ئاكنجیبوونا وی. ئەوی ژی هەر ژ سپێدێ تا ئێڤاری وەكو شاهدەك پاشایەتیا خودێ بۆ وان شڕۆڤە دكر. ئەوی بزاڤ دكر ب رێكا دەستوورێ مووسای و نڤیسارێن پێغەمبەران، وان قاییل بكەت كو عیسا ب خۆ مەسیحە.
هندەك ب ئاخفتنێن وی قاییل بوون و هندەكان ژی باوەری نەئینا.
بیروڕایێن وان ئێك نەبوون و بەری دەركەڤن پاولۆسی ئەڤ ئاخفتنا دویماهیێ گۆتێ: «گیانێ پیرۆز یێ راست بوو دەمێ ل سەر زارێ ئیشایا پێغەمبەری گۆتیە بابكالێن هەوە:
‹هەڕە نك ڤی مللەتی و بێژێ: هوین دێ گو‍‌ھ ڤەكری بهیسن و تێناگەهن، دێ چاڤ ڤەكری لێ نێڕن و نابینن.
چنكو ئەڤ مللەتە یێ سەرهشك بووی و گوهێن وان یێن گران بووین و چاڤێن خۆ یێن نقاندین، نەكو ب چاڤێن خۆ ببینن و ب گوهێن خۆ ببهیسن و ب مەژیێ خۆ تێبگەهن و بزڤڕن، دا ساخ بكەم!›
ئەڤجا بزانن، خودێ قورتالبوونا خۆ بۆ مللەتێن نەجوهی هنارت و ئەو دێ گوهداریا وی كەن!»
دەمێ ئەڤ ئاخفتنە گۆتی، جوهی ژ وێرێ دەركەفتن و گەنگەشەیەكا دژوار ل گەل ئێكودوو دكر.
پاولۆس دوو ساڵێن تەمام د وی خانی ڤە ما یێ بۆ خۆ ب كرێ گرتی، بخێرهاتنا وان هەمی كەسان دكر، یێن دهاتنە نك وی.
ئەوی ب وێرەكی و بێی كو كەس ئاستەنگان بۆ وی چێكەت مزگینیا پاشایەتیا خودێ رادگەهاند و دەربارەی خودان عیسایێ مەسیح فێركرن دكر.
ژ من، پاولۆس، بەنیێ مەسیح عیسای، ئەوێ هاتیە گازیكرن دا ببیتە هنارتی و بۆ مزگینیا خودێ هاتیە تەرخانكرن،
ئەوا كو پێشتر د نڤیسارێن پیرۆز دا، ب رێیا پێغەمبەرێن خۆ، سۆز پێ دابوو.
ئەڤ مزگینیە دەربارەی كوڕێ ویە، ئەوێ ل دویڤ لەشی ژ دویندەها داوودی هاتی
و ل گۆر گیانێ پیرۆزیێ، ب رابوونا وی ژ ناڤ مریان، ب هێزێ وەكو كوڕێ خودێ هاتیە دیاركرن. ئەو خودانێ مە عیسایێ مەسیحە.
ب وی مە كەرەم و هنارتیاتی وەرگرت، داكو ئەم سەخمەراتی ناڤێ وی گازی هەمی مللەتان بكەین كو باوەریێ پێ بینن و گوهداریا وی بكەن.
هوین ژی د ناڤ وان دانە یێن هاتینە گازیكرن كو یێن عیسایێ مەسیح بن.
بۆ هەمی خۆشتڤیێن خودێ یێن ل رۆمایێ، ئەوێن هاتینە گازیكرن دا ببنە پیرۆزكریێن خودێ: كەرەم و ئاشتی ژ بابێ مە خودێ و خودان عیسایێ مەسیح ل سەر هەوە بن.
بەری هەر تشتی، ئەز ب رێیا عیسایێ مەسیح ژ بۆ هەوە هەمیان سوپاسیا خودایێ خۆ دكەم، چنكو باوەریا هەوە ل سەرانسەری جیهانێ یا دەنگ ڤەدای.
چنكو ئەز گەلەك حەز دكەم هەوە ببینم، داكو ژ بۆ موكمبوونا هەوە بەهرەیەكا روحانی بدەمە هەوە،
ئانكو ئەم پێكڤە ب باوەریا ئێكودوو، یا هەوە و یا من، بهێینە هاندان.
من نەڤێت هوین ژ ڤێ چەندێ د بێ ئاگە‍‌ھ بن، گەلی خویشك و برایان، كو گەلەك جاران من ل بەر بوو بهێمە نك هەوە، دا من د ناڤ هەوە ژی دا بەرهەمەك هەبیت، وەك د ناڤ مللەتێن دی دا، لێ هەتا نوكە ئاستەنگ بۆ من چێدبوون.
خودێ قەرەك كریە ستۆیێ من كو بدەمە یونانی و بەربەران ، زانا و نەزانان.
ژ بەر هندێ، ئەز ب دل و گیانێ خۆ یێ ئامادەمە مزگینیێ بدەمە هەوە ژی، هوین ئەوێن ل رۆمایێ.
ئەز مزگینیێ ب شەرم نابینم، ژ بەر كو ئەو هێزا خودێیە بۆ قورتالبوونێ ژ بۆ هەر كەسێ باوەریێ پێ دئینیت، ل بەراهیێ ژ بۆ یێ جوهی و پاشی ژ بۆ یێ نەجوهی.
چنكو د مزگینیێ دا راستداریا خودێ ئاشكرا دبیت. ئەڤ راستداریە ژ دەستپێكێ هەتا دویماهیێ ب باوەریێیە، هەروەكو هاتیە نڤیسین: «یێ راستدار دێ ب باوەریێ ژیت.»
ژ ئەسمانی تۆڕەییا خودێ دهێتە ئاشكرا كرن، دژی هەمی خودێنەنیاسی و خرابیا وان مرۆڤێن ب خرابیێن خۆ بۆ راستیێ دبنە ئاستەنگ،
ژ بەر كو ئەو تشتێن مرۆڤ بشێن ژ خودێ بزانن، بۆ وان د دیارن، چنكو خودێ بۆ وان یێن ئاشكرا كرین.
چنكو سالۆخەتێن وی یێن نەهێنە دیتن، ئانكو هێزا وی یا هەروهەر و خودینیا وی، هەر ژ ئافراندنا جیهانێ د دیارن، ب رێیا تشتێن دەستكرد دهێنە تێگەهشتن، ژ بەر هندێ وان بەهانە نینە.
سەرەڕای كو وان خودێ نیاسی، وان ئەو وەك خودێ مەزن نەكر و سوپاسیا وی نەكر، لێ هزرێن وان دخرش بوون و تاریاتیێ ب سەر مێشكێ وان یێ كۆرەفام دا گرت.
دەمێ وان دگۆت: «ئەم د ئاقلمەندین،» ئەو بوونە دەبەنگ
و مەزناهیا خودایێ نەمر ب وێنە و پەیكەرێن وەكو مرۆڤێ مربار ، باڵندە، گیانەوەرێن چوارپێ و خشۆكان گوهۆڕی.
ژ بەر ڤێ چەندێ، خودێ ل دویڤ حەزێن دلێ وان، ئەو رادەستی پویچاتیێ كرن، دا ل گەل ئێك لەشێ خۆ فهێت بكەن.
وان راستیا خودێ ب درەوێ گوهۆڕی. یێ ئافراندی پەرست و خزمەتا وی كر، ل شوینا ئافرێندەری، ئەوێ هەروهەر پیرۆز. ئامین.
ژ بەر ڤێ چەندێ خودێ ئەو رادەستی گڕێن شەرمزاریێ كرن. خۆ ژنكێن وان ژی پەیوەندیا سرۆشتی ب یا بەروڤاژی سرۆشتی گوهۆڕی.
هەروەسا زەڵامان ژی پەیوەندیا سرۆشتی یا ل گەل ژنكێ هێلا و گڕی گرتن بۆ ئێكودوو. زەڵامان ل گەل زەڵامان فهێتی كر و سزایێ د سەرداچوونا خۆ، د خۆ دا وەرگرت.
كا چەوا وان ب باش نەدیت خودێ د زانینا خۆ دا هەلگرن، وەسا خودێ ئەو رادەستی زێهنەكێ خراب كرن، كو ئەو كریارێن نەژێهاتی بكەن.
ئەو ژ هەمی نەڕاستی، خرابی، چاڤبرساتی و بەدكاریێ دپڕن و ب زكڕەشی، كوشتن، هەڤڕكی، فێلبازی و زیانخوازیێ د داگرتینە. نەكامیكەرن ،
بوهتانكارن ، كیندارێن خودێنە، بێشەرمن، دفنبلند و خۆ مەزنكەرن، داهێنەرێن خرابیێنە و گوهدارێن دایك و بابێن خۆ نینن،
د كۆرە فامن، بێ سۆزن، دلڕەق و نە د دلۆڤانن.
هەر چەندە ئەوان ئاگە‍‌ھ ژ فەرمانا خودێ یا دادپەروەرانە هەیە، كو یێن تشتێن هۆسا دكەن، ژ هەژی مرنێنە، لێ نە ب تنێ ئەو ڤان تشتان دكەن، كەیفا وان ب یێن دكەن ژی دهێت.
ژ بەر هندێ، هەی مرۆڤ، تۆ ئەوێ دادكرنێ دكەی، یێ بێ بەهانەی. دەمێ تۆ خەلكی داد دكەی، تۆ خۆ ژی گونەهبار دكەی، چنكو تۆ ئەوێ دادكرنێ دكەی، هەمان كریارێن وان دكەی.
ئەم دزانین كو ل دویڤ راستیێیە، دەمێ خودێ وان كەسان داد دكەت، ئەوێن كریارێن هۆسا دكەن.
تۆ هزر دكەی، هەی مرۆڤ، ئەوێ تۆ كەسێن كریارێن وەسا دكەن داد دكەی و تۆ ب خۆ ژی هەمان كریاران دكەی، دێ ژ دادكرنا خودێ قورتال بی؟
یان تۆ سڤكاتیێ ب دەولەمەندیا قەنجی و بێهنفرەهی و هەداریا وی دكەی؟ ما تۆ نزانی كو قەنجیا خودێ تە بەرەڤ لخۆزڤڕینێ دبەت؟
لێ تۆ سەخمەراتی سەرڕەقیا خۆ و دلێ خۆ یێ نەتۆبەدار، بۆ رۆژا تۆڕەییێ و ئاشكرابوونا دادكرنا خودێ یا دادپەروەرانە، تۆڕەییێ بۆ خۆ كۆم دكەی.
ئەو دێ ل دویڤ كریارێن هەر كەسی دەتێ.
دێ ژیانا هەروهەر دەتە وان، یێن ب رێكا بەردەوامبوونێ ل سەر كریارێن باش بزاڤێ دكەن كو مەزناهیێ و سەربلندیێ و نەمریێ وەكو خەلات ژ نك خودێ وەرگرن.
لێ دێ تۆڕەیی و كەربێ ل وان بارینیت، یێن خۆپەرێس و گوهداریا راستیێ ناكەن، لێ گوهداریا خرابیێ دكەن.
هەر مرۆڤەكێ خرابیێ دكەت، دێ نەخۆشیێ و تەنگاڤیێ كێشیت، ل پێشیێ یێ جوهی پاشی یێ یونانی.
لێ مەزناهی و سەربلندی و ئاشتی، دێ بۆ هەر كەسی هێنە دان، یێ چاكیێ دكەت، ل پێشیێ یێ جوهی پاشی یێ یونانی.
چنكو ل نك خودێ لایەنگری نینە.
هەمی ئەوێن دەستوور نەی و گونە‍‌ھ كری، دێ بێ دەستوور ژ ناڤ چن و هەمی ئەوێن دەستوور هەی و گونە‍‌ھ كری، دێ ب دەستووری هێنە دادكرن.
چنكو ل نك خودێ، نە ئەوێن دەستووری دبهیسن د بێگونەهن، لێ ئەوێن دەستووری ب ج‍‌ھ دئینن، دێ راستدار دەركەڤن.
چنكو نەجوهی، كو د بێ دەستوورن، گاڤا ب سرۆشتێ خۆ وێ ب ج‍‌ھ بینن یا دەستووری فەرمان پێ دای، ئەو ژ بۆ خۆ دەستوورن، هەر چەندە وان دەستوور ژی نینە.
ئەو دیار دكەن كو ناڤەرۆكا دەستووری د دلێ وان دا یا نڤیسیە. وژدانا وان ژی شاهدەییێ ل سەر ڤێ چەندێ ددەت و هزرێن وان جار وان تاوانبار دكەن جار ژی بەرگریێ ژێ دكەن.
ل دویڤ مزگینیا ئەز ددەم، ئەڤە هەمی دێ ل وێ رۆژێ چێبن دەمێ خودێ دادكرنا نهێنیێن مرۆڤان ب مەسیح عیسای دكەت.
ئەڤجا تۆ، ئەگەر وەكو جوهی دهێیە نیاسین و پشتا خۆ ب دەستووری گەرم دكەی و شانازیێ ب خودێ دبەی،
ئەگەر تۆ حەزا خودێ دزانی و تۆ دشێی باشی و خرابیێ ژ ئێك ڤاڤێری، چنكو تۆ ژ دەستووری یێ فێر بووی،
ئەگەر تۆ ژ خۆ یێ پشتڕاستی كو تۆ رێبەرێ كۆرەیانی و رۆناهی ژ بۆ ئەوێن د تاریاتیێ دا
و تۆ پەروەردەكەرێ سادەیان و مامۆستایێ نەزانانی، چنكو تۆ د دەستووری دا خودانێ هەمی زانین و راستیێی،
ئەڤجا تۆ ئەوێ كەسێن دی فێر دكەی، ما تۆ خۆ فێر ناكەی؟ تۆ یێ دژی دزیێ دئاخڤی، ما تۆ دزیێ دكەی؟
تۆ یێ دبێژی: «دەهمەنپیسیێ نەكەن»، ما تۆ ب خۆ دەهمەنپیسیێ دكەی؟ تۆ كەربێ ژ پووتان رادكەی، ما تۆ پەرستگەهێن وان تالان دكەی؟
تۆ یێ شانازیێ ب دەستووری دبەی، ما تۆ ب زێدەگاڤیێ ل سەر دەستووری، خودێ بێڕومەت دكەی؟
هەروەكو هاتیە نڤیسین: «ناڤێ خودێ ژ بەر هەوە د ناڤ مللەتان دا دهێتە كرێت كرن.»
ئەڤجا سونەتكرن یا ب مفایە ئەگەر تۆ دەستووری ب ج‍‌ھ بینی، لێ ئەگەر تۆ زێدەگاڤیێ ل سەر دەستووری دكەی، سونەتكرنا تە بوو سونەتنەكرن.
هەروەسا ئەگەر یێ سونەتنەكری فەرمانێن دەستووری ب ج‍‌ھ بینیت، ما سونەتنەكرنا وی ب سونەتكرن ناهێتە هژمارتن؟
و ئەوێ ب لەشی نەهاتیە سونەتكرن و دەستووری ب ج‍‌ھ دئینیت، دێ تە گونەهبار كەت، چنكو پیتێن دەستووری و سونەتكرن ل نك تەنە، لێ تۆ زێدەگاڤیێ ل سەر دەستووری دكەی.
چنكو جوهی نە ئەوە یێ ژ سەر ڤە جوهی بیت، نە ژی سونەتكرن ئەوە كو ژ سەر ڤە د لەشی دا بهێتە كرن،
لێ جوهی ئەوە كو د ناخێ خۆ دا جوهی بیت، سونەتكرن ژی سونەتكرنا دلیە، ب گیانی نە ب پیتێن دەستووری. یێ وەسا پەسنێ ژ خودێ وەردگریت، نە ژ مرۆڤان.
مادەم هۆسایە، چ تایبەتیا جوهیان هەیە؟ یان مفایێ سونەتكرنێ چیە؟
ژ هەمی لایان ڤە گەلەكە، یا ئێكێ خودێ ئەو كرنە ئەمیندارێن پەیڤێن خۆ.
ما چیە ئەگەر هندەك ژ وان بێسۆز دەركەفتبن؟ ئایا بێسۆزیا وان دێ سۆزداریا خودێ ژ كار ئێخیت؟
حاشا! خودێ یێ راستگۆیە، ئەگەر هەمی مرۆڤ ددرەوین بن ژی. هەروەكو هاتیە نڤیسین: «داكو تۆ د گۆتنێن خۆ دا راستدار دەركەڤی و د دادكرنێ دا تۆ ب سەر بكەڤی.»
لێ ئەگەر نەڕاستیا مە راستداریا خودێ دیار دكەت، ئەم چ بێژین؟ ل ڤێرێ ئەز وەكو مرۆڤەكێ سادە دپرسم: ما خودێ یێ ستەمكارە دەمێ ئەو تۆڕەییا خۆ دبارینیت؟
حاشا! پا ئەگەر وەسا بیت، خودێ چەوا دێ جیهانێ داد كەت؟
لێ ئەگەر راستیا خودێ ب درەوا من ئاشكراتر لێ هات و د ئەنجام دا مەزناهیا خودێ پتر دیار بوو، ئێدی بۆچی ئەز وەك گونەهكارەكی دهێمە گونەهباركرن؟
ئەڤ پرسیارە ژی هەروەكو هندەك كەس بوهتانێ ل مە دكەن كو ئەم دبێژین: «بلا ئەم خرابیێ بكەین، دا باشی ژێ پەیدا ببیت.» سزادانا وان كەسان یا دادپەروەرانەیە.
ئەڤجا چ؟ ما ئەم جوهی د چێترین؟ نەخێر، ئێكجار! چنكو مە بەری نوكە دیار كر كو جوهی و یونانی ، هەمی پێكڤە د بن هێزا گونەهێ دانە.
هەروەكو هاتیە نڤیسین: «كەسەكێ راستدار نینە، خۆ ئێك ژی.
كەسەك نینە تێبگەهیت، كەسەك نینە قەستا خودێ بكەت.
هەمی ڤاڕێ بوون، و پێكڤە بێوەج بوون. كەسەك نینە قەنجیێ بكەت، خۆ ئێك ژی نینە.
گەوریا وان گۆڕەكێ ڤەكریە، ب ئەزمانێ خۆ خاپاندنێ دكەن. ژەهرا ماران د بن لێڤێن وان دایە.
دەڤێ وان ژ نفرین و تەحلاتیێ یێ پڕە.
پێیێن وان ژ بۆ خوینڕشتنێ ب لەز دكەڤن.
د شووپا وان دا وێرانكرن و پەریشانی یا هەی،
و ئەوان رێكا ئاشتیێ نەزانیە.
ترسا خودێ ل بەر چاڤێن وان نینە. »
ئەڤجا ئەم دزانین هەر تشتێ دەستوور دبێژیت، بۆ وان مرۆڤان دبێژیت یێن كو د بن دەستهەلاتا دەستووری دا، داكو هەمی دەڤ بهێنە گرتن و جیهان هەمی بكەڤیتە د بن لێپرسینا خودێ ڤە.
چنكو ب ئەنجامدانا دەستووری چ كەس ل بەر خودێ راستدار دەرناكەڤن، ژ بەر كو ب دەستووری گونە‍‌ھ دهێتە نیاسین.
لێ نوكە راستداریا خودێ، جودا ژ دەستووری، ئاشكرا بوویە، دەستوور و پەرتووكێن پێغەمبەران ژی شاهدەییێ بۆ ڤێ چەندێ ددەن.
ئەڤ راستداریا خودێ، یا ب رێكا باوەریئینانا ب عیسایێ مەسیح دهێت، بۆ وان هەمیانە یێن باوەریێ دئینن، چنكو چ جوداهی د ناڤبەرا مرۆڤان دا نینە.
ژ بەر كو هەمیان گونە‍‌ھ كر و نەگەهشتنە مەزناهیا خودێ،
لێ ئەوێن باوەریێ دئینن، ب كەرەما خودێ بێ بەرامبەر بێگونە‍‌ھ دهێنە هژمارتن، ب رێیا رزگاركرنا ب مەسیح عیسای هاتی.
خودێ ئەو وەكو كەفارەتەك ب خوینا وی پێشكێش كر، بۆ ئەوێن باوەریێ پێ بینن. وی ژ بۆ دیاركرنا راستداریا خۆ ئەڤە كر، چنكو وی ب بێهنفرەهیا خۆ چاڤپووشی ژ گونەهێن بوری كر.
وی ژ بۆ دیاركرنا راستداریا خۆ د دەمێ نوكە دا ئەڤە كر، دا ئەو یێ دادپەروەر بیت و یێ باوەریێ ب عیسای بینیت بێگونە‍‌ھ دەربئێخیت.
ئەڤجا چ مایە ئەم شانازیێ پێ ببەین؟ چ نەما. ب چ یاسا نەما؟ ئایا ب یاسایا كریاران؟ نەخێر، لێ ب یاسایا باوەریێ.
چنكو ئەم یێن گەهشتینە وێ پشتڕاستیێ كو مرۆڤ ب باوەریێ راستدار دەردكەڤیت، جودا ژ كریارێن دەستووری.
ما خودێ یێ جوهیان ب تنێیە؟ ما ئەو نە یێ مللەتێن دی ژییە؟ بەلێ، ئەو یێ مللەتێن دی ژییە،
چنكو خودێ ئێكە و ئەو دێ یێن سونەتكری ژ بەر باوەریا وان و یێن سونەتنەكری ژی ب باوەریێ راستدار دەرئێخیت.
ئەگەر هۆسا بیت، ما ئەم ب باوەریێ دەستووری ژ كار دئێخین؟ حاشا! لێ ئەم دەستووری دسەلمینین.
ئێدی ئەم دەربارەی ئیبراهیمێ بابكالێ مە ل دویڤ لەشی چ بێژین، ئەوی چ دیت؟
ئەگەر ئیبراهیم ژ بەر كریارێن خۆ راستدار دەركەفتبا، هنگی ئەو دشیا شانازیێ ببەت، لێ نە ل نك خودێ.
ما نڤیسار چ دبێژیت؟ «ئیبراهیمی باوەر ژ خودێ كر، ئەڤە ژی بۆ وی وەكو راستداری هاتە هژمارتن.»
ئەوێ كار دكەت، كرێیا وی نە وەكو دیاری، لێ وەكو ماف دهێتە هژمارتن.
لێ ئەوێ كار نەكەت و باوەری ب وی هەبیت، یێ كەسێ بەدكار بێگونە‍‌ھ دەردئێخیت، باوەریا وی وەكو راستداری دهێتە هژمارتن.
هەروەكو داوود ژی دەربارەی بەختەوەریا وی مرۆڤێ كو خودێ وی بێی كریار راستدار دهژمێریت، دبێژیت:
«خوزیكێن وان یێن ل سەرپێچیێن وان هاتیە بورین و گونەهێن وان هاتینە نخافتن.
خوزیكێن وی مرۆڤی یێ خودان گونەهان ل سەر وی ناهژمێریت!»
ما ئەڤ بەختەوەریە ب تنێ ژ بۆ یێن سونەتكریە یان یێن سونەتنەكری ژی ڤەدگریت؟ ئەم دبێژین كو «باوەریا ئیبراهیمی بۆ وی وەكو راستداری هاتە هژمارتن.»
ئەڤجا كەنگی هاتە هژمارتن؟ ما ئەڤە پشتی سونەتكرنا وی یان بەری سونەتكرنا وی بوو؟ ئەڤە نە پشتی سونەتكرنا وی بوو، لێ بەری سونەتكرنێ بوو.
پاشی ئەو هاتە سونەتكرن وەكو نیشان و بەلگە كو ئەو ژ بەر باوەریا خۆ، بەری سونەتكرنێ، راستدار هاتە هژمارتن. هۆسا ئیبراهیم بوو بابێ وان هەمیێن سونەتنەكری و باوەریێ دئینن، داكو ئەو ژی راستدار بهێنە هژمارتن،
هەروەسا بوو بابێ سونەتكریێن نە ب تنێ هاتینە سونەتكرن، لێ هەروەسا ل دویڤ دەوسا باوەریا بابێ مە ئیبراهیمی دچن، یا بەری سونەتكرنێ.
ئەو سۆزا بۆ ئیبراهیمی و دویندەها وی هاتیە دان، كو ئەو دێ بیتە میراتگرێ جیهانێ، ب رێیا دەستووری نەبوو، لێ ب رێیا راستداریا باوەریێ بوو.
ئەگەر میراتگر ئەو بن یێن ل دویڤ دەستووری دچن، هنگی باوەری بێ مفا بوو و سۆز ژی ژ كار كەفت.
چنكو دەستوور تۆڕەبوونێ پەیدا دكەت. جهێ دەستوور لێ نەبیت، زێدەگاڤی ژی لێ نینە.
ژ بەر ڤێ چەندێ سۆز گرێدای باوەریێیە، دا ل دویڤ كەرەمێ بیت و ژ بۆ هەمی دویندەها ئیبراهیمی یا مسۆگەر بیت. نە ب تنێ ژ بۆ وان یێن ل دویڤ دەستووری دچن، لێ ژ بۆ وان ژی یێن باوەریا وان وەكو باوەریا ئیبراهیمی، ئەوێ كو بابێ مە هەمیانە.
هەروەكو هاتیە نڤیسین: «من تۆ یێ كریە بابێ گەلەك مللەتان.» ئەو بابێ مەیە ل بەرامبەر خودایێ ئیبراهیمی باوەر ژێ كری، ئەوێ مریان ڤەدژینیت و گازی تشتێن نەیی دكەت، دا هەبن.
ئەوی ل دەمێ كو هیڤی نەمابوو، ب هیڤیێ باوەر ژ خودێ كر، دا ببیتە «بابێ گەلەك مللەتان»، ل دویڤ ئەوا هاتیە گۆتن: «دویندەها تە دێ یا هۆسا بیت.»
ئەو د باوەریێ دا لاواز نەبوو، هەر چەندە وی دزانی لەشێ وی هەروەكو یێ مری بیت، ژ بەر كو ژیێ وی نێزیكی سەد ساڵان بوو، و مالبچویكێ سارایێ ژی یێ مریە.
ئەو ب بێباوەریێ ل سەر سۆزا خودێ دوودل نەبوو، لێ د باوەریێ دا بهێز كەفت و هۆسا مەزناهی دا خودێ.
ئەو پشتڕاست بوو كو ئەوا خودێ سۆز پێ دای، دشێت ب ج‍‌ھ ژی بینیت.
ژ بەر ڤێ چەندێ باوەریا وی «بۆ وی وەكو راستداری هاتە هژمارتن.»
ئەڤجا گۆتنا پەرتووكێ «بۆ وی هاتە هژمارتن» نە ب تنێ ژ بۆ ئیبراهیمی هاتیە نڤیسین،
لێ ژ بۆ مە ژی هاتیە نڤیسین. بۆ مە ژی دێ هێتە هژمارتن، ئەم یێن مە باوەری ب وی هەی، یێ خودانێ مە عیسا ژ ناڤ مریان راكری،
ئەوێ ژ بەر گونەهێن مە رادەستی مرنێ هاتیە كرن و ژ بۆ بێگونە‍‌ھ دەرئێخستنا مە هاتیە راكرن.
ئەڤجا ژ بەر كو ئەم ب باوەریێ بێگونە‍‌ھ هاتینە دەرئێخستن، ئەم ل گەل خودێ كەفتینە ئاشتیێ، ژ دەولەتسەرێ خودانێ خۆ عیسایێ مەسیح.
ب رێكا وی دەستویری بۆ مە هاتە دان، ب باوەریێ ئەم بچینە د ڤێ كەرەمێ ڤە، یا ئەم تێدا ئاكنجی، و شانازیێ ب وێ هیڤیێ دبەین، كو دێ مە پشكداری د مەزناهیا خودێ دا هەبیت.
نە ب تنێ ب ڤێ، لێ ئەم شانازیێ ب تەنگاڤیێن خۆ ژی دبەین، چنكو ئەم دزانین تەنگاڤی خۆڕاگرتنێ پەیدا دكەت،
خۆڕاگرتن ژی پەسەندكرنێ، پەسەندكرن ژی هیڤیێ،
هیڤی ژی مە شەرمزار ناكەت، چنكو حەزژێكرنا خودێ ب رێیا گیانێ پیرۆز، ئەوێ وی دایە مە، رژیایە دلێ مە.
ژ بەر كو هێشتا ئەم د بێ هێز بووین، مەسیح د دەمێ دەستنیشانكری دا ژ بۆ بەدكاران مر.
كێم جاران ئێك رازی دبیت ژ بۆ مرۆڤەكێ راستدار بمریت. دبیت ئێك بوێریت ژ بۆ مرۆڤەكێ چاك بمریت،
لێ خودێ حەزژێكرنا خۆ بۆ مە هۆسا دیار كر: هێشتا ئەم د گونەهكار بووین، مەسیح ژ بۆ مە مر.
ئەڤجا نوكە، پشتی ئەم ب خوینا وی بێگونە‍‌ھ هاتینە دەرئێخستن، چەند مسۆگەرتر ب رێیا وی دێ ژ تۆڕەبوونا خودێ قورتال بین.
ئەگەر دەمێ ئەم دوژمنێن وی بووین، خودێ ب مرنا كوڕێ خۆ ل گەل مە ئاشت بوو، نوكە پشتی ئەم ل گەل وی د ئاشت، چەند مسۆگەرتر ب ژیانا كوڕێ وی دێ قورتال بین.
و نە ب تنێ ئەڤە، لێ ئەم ب رێیا خودانێ خۆ عیسایێ مەسیح شانازیێ ژی ب خودێ دبەین، كو ب رێیا وی ئاشتبوون نوكە ب دەست مە ڤە هات.
ب رێیا مرۆڤەكی گونە‍‌ھ هاتە د جیهانێ دا و ب گونەهێ ژی مرن هات، هۆسا مرنێ هەمی مرۆڤ ڤەگرتن، چنكو هەمیان گونە‍‌ھ كرن.
بەری هاتنا دەستووری، گونە‍‌ھ د جیهانێ دا هەبوو، لێ گونە‍‌ھ ناهێتە هژمارتن ئەگەر دەستوور نەبیت.
لێ ژ دەمێ ئادەمی تاكو دەمێ مووسای، مرنێ دەستهەلاتی دكر، خۆ ل سەر ئەوان ژی یێن گونەهێن وان نە وەكو زێدەگاڤیا ئادەمی بوون. ئادەم وێنەیەك بوو ژ وی كەسی یێ كو دا د دویڤ وی دا هێت.
لێ جوداهیەكا مەزن د ناڤبەرا دانا خودێ و گونەها ئادەمی دا هەیە، چنكو ئەگەر گەلەك ژ بەر گونەها ئێكی مربن، كەرەما خودێ و دیاریا ب كەرەما مرۆڤەكی، ئانكو عیسایێ مەسیح، ژ بۆ گەلەكان هێشتا پتر زێدە بوو.
هەروەسا جوداهیەكا مەزن د ناڤبەرا دیاریێ و ئەنجامێ گونەها مرۆڤەكی دا هەیە، چنكو دادكرن ل سەر گونەهەكێ گونەهباری ئینا، لێ كەرەما خودێ یا پشتی گەلەك گونەهان، بێگونەهی ئینا.
چنكو ئەگەر مرنێ ژ بەر گونەها مرۆڤەكی و ب رێیا وی دەستهەلاتی كربیت، پا ئەوێن كەرەما خودێ یا زێدە و دیاریا راستداریێ وەردگرن، ب رێیا ئێكی، ئانكو ب عیسایێ مەسیح، دێ د ژیانێ دا چەند پتر دەستهەلاتێ كەن!
ئەڤجا كا چەوا ب گونەها مرۆڤەكی، هەمی مرۆڤ گونەهبار بوون، هۆسا ژی ب كارەكێ راست یێ ئێكی، هەمی مرۆڤ بێگونە‍‌ھ دبن و ژیانێ وەردگرن.
كا چەوا ب نەگوهداریا مرۆڤەكی، گەلەك بوونە گونەهكار، هۆسا ژی ب گوهداریا ئێكی، گەلەك دێ راستدار هێنە هژمارتن.
لێ دەستوور پەیدا بوو دا گونە‍‌ھ زێدە ببیت، لێ ل وی جهێ گونە‍‌ھ زێدە بووی، كەرەم هێشتا پتر زێدە بوو،
داكو، كا چەوا گونەهێ ب مرنێ دەستهەلاتی كر، هۆسا كەرەم ژی ب رێیا راستداریێ دەستهەلاتێ بكەت و ب رێیا خودانێ مە عیسایێ مەسیح، مە ببەتە ژیانا هەروهەر.
ئەڤجا ئەم چ بێژین؟ ئایا ئەم د ناڤ گونەهێ دا بەردەوام بین، داكو كەرەم پتر لێ بهێت؟
حاشا! ئەم ئەوێن دەربارەی گونەهێ مرین، چەوا دشێین ئێدی د ناڤ گونەهێ دا بژین؟
ما هوین نزانن، ئەم هەمی یێن كو بۆ ئێكبوونێ ل گەل مەسیح عیسای هاتینە تافیركرن ، ئەم د مرنا وی دا هاتینە تافیركرن؟
ئەڤجا ب تافیركرنێ ئەم بووینە هەڤپشكێن مرنا وی و ل گەل وی هاتینە ڤەشارتن، داكو كا چەوا مەسیح ب مەزناهیا بابی ژ ناڤ مریان هاتیە راكرن، هۆسا ئەم ژی د ژیانا نویبووی دا بژین.
چنكو ئەگەر ئەم د مرنەكا وەكو مرنا وی دا ل گەل وی بووینە ئێك، مسۆگەر دێ د ڤەژینا وی دا ژی ل گەل وی بینە ئێك.
ئەم دزانین ئەو مرۆڤێ كەڤن ، كو ئەم بووین ل دەمێ بەرێ، ل گەل وی هاتە خاچدان، دا لەشێ مە یێ گونەهكار ژ كار بكەڤیت و ئێدی بەنیاتیێ بۆ گونەهێ نەكەین.
چنكو ئەوێ مر، ئەو ژ گونەهێ یێ ئازاد بووی.
ئەگەر ئەم ل گەل مەسیحی مربین، ئەم باوەر دكەین كو ئەم دێ ل گەل وی ژین ژی.
ئەم دزانین پشتی مەسیح ژ ناڤ مریان هاتیە راكرن، ئێدی ئەو نامریت و مرنێ دەستهەلات ل سەر وی نینە.
ب وێ مرنا ئەو مری، دەربارەی گونەهێ ئەو ب ئێكجاری مر، لێ ب وێ ژیانا ئەو دژیت، ئەو بۆ خودێ دژیت.
هۆسا هوین ژی دەربارەی گونەهێ، خۆ ب مری بهژمێرن، لێ ب مەسیح عیسای ژ بۆ خودێ، ب زیندی بهژمێرن.
ئەڤجا نەهێلن گونە‍‌ھ د لەشێ هەوە یێ مربار دا دەستهەلاتێ بكەت، دا هوین ملكەچی حەزێن وی نەبن.
ئەندامێن لەشێ خۆ ژی وەك چەكێن خرابیێ پێشكێشی گونەهێ نەكەن. لێ خۆ وەك یێن ژ ناڤ مریان رابووین پێشكێشی خودێ بكەن، ئەندامێن لەشێ خۆ ژی وەك چەكێن راستداریێ پێشكێشی خودێ بكەن.
گونە‍‌ھ دەستهەلاتێ ل سەر هەوە ناكەت، چنكو هوین نە د بن دەستووری دانە، لێ هوین یێن د بن كەرەمێ دا.
ئێدی چ؟ ما ئەم گونەهێ بكەین، چنكو ئەم نە د بن دەستووری داینە، لێ د بن كەرەمێ داینە؟ حاشا!
ما هوین نزانن كو ئەوێ هوین ژ بۆ بەنیاتیێ خۆ ب دەست وی ڤە بەرددەن و گوهداریا وی دكەن، دبنە بەنیێن وی یێ هوین گوهداریا وی دكەن؟ یان بەنیێن گونەهێ كو مرۆڤی بەرەڤ مرنێ دبەت، یان ژی بەنیێن گوهداریێ كو مرۆڤی بەرەڤ راستداریێ دبەت.
لێ سوپاس بۆ خودێ كو هەر چەندە هوین بەنیێن گونەهێ بوون، لێ هەوە ژ هەمی دلێ خۆ گوهداریا وێ فێركرنێ كر، ئەوا هەوە وەرگرتی.
هوین ژ گونەهێ هاتنە ئازادكرن و بوونە بەنیێن راستداریێ.
من نموونەیا بەنیاتیێ وەكو هێما ب كار ئینا، دا هاری هەوە بكەم هوین د ڤان تشتان بگەهن، چنكو شیانێن هەوە وەكو مرۆڤ د سنووردارن. كا چەوا هەوە ئەندامێن لەشێ خۆ وەك بەنی پێشكێشی پویچاتیێ و خرابیێ دكرن كو ئەنجامێ وێ خرابی بوو، هۆسا ژی نوكە ئەندامێن لەشێ خۆ وەك بەنی پێشكێشی راستداریێ بكەن كو ئەنجامێ وێ پیرۆزیە.
چنكو دەمێ هوین بەنیێن گونەهێ، هوین ژ راستداریێ د ئازاد بوون.
ئەڤجا وی دەمی هەوە چ بەرهەم ژ وان تشتێن هوین نوكە شەرم ژێ دكەن ب دەست خۆ ڤە ئینا؟ كو ئەنجامێ وان تشتان مرنە.
لێ نوكە كو هوین ژ گونەهێ هاتینە ئازادكرن و بووینە بەنیێن خودێ، هوین بەرهەمی بۆ پیرۆزیێ ب دەست خۆ ڤە دئینن، ئەنجام ژی ژیانا هەروهەرە.
چنكو كرێیا گونەهێ مرنە، لێ دیاریا خودێ، ژ دەولەتسەرێ خودانێ مە مەسیح عیسای، ژیانا هەروهەرە.
گەلی خویشك و برایان، ئەز بۆ كەسێن زانین ل دۆر دەستووری هەی دئاخڤم: ما هوین نزانن كو دەستووری دەستهەلات ل سەر مرۆڤی هەیە هندی ئەو یێ زیندی؟
بۆ نموونە، ژن ب رێكا دەستووری ب مێرێ خۆ ڤە دهێتە گرێدان هندی مێرێ وێ یێ زیندی بیت، لێ ئەگەر مێرێ وێ بمریت، ئەو ژ دەستوورێ شویكرنێ ئازاد دبیت.
ئەڤجا ئەگەر ئەو شوی ب زەڵامەكێ دی بكەت و هێشتا مێرێ وێ یێ زیندی بیت، ئەو ب دەهمەنپیس دهێتە نیاسین. لێ ئەگەر مێرێ وێ مر، ئەو ژ وی دەستووری ئازاد دبیت، ئەڤجا ئەو نە یا دەهمەنپیسە، خۆ ئەو شوی ب زەڵامەكێ دی ژی بكەت.
هۆسا هوین ژی خویشك و برایێن من، ب رێكا لەشێ مەسیحی دەربارەی دەستووری مرن، داكو هوین بۆ ئێكێ دی بن، بۆ ئەوێ ژ ناڤ مریان هاتیە راكرن، دا ئەم ژ بۆ خودێ بەرهەمی بدەین.
چنكو دەمێ ئەم ل دویڤ لەشی دژیاین، حەزێن گونەهێ یێن كو دەستووری ئازراندین، د ئەندامێن لەشێ مە دا كار دكر، دا ژ بۆ مرنێ بەرهەمی بدەین.
لێ نوكە ئەم ژ دەستووری ئازاد بووین، چنكو ئەم دەربارەی وی تشتێ پێ هاتینە گرێدان، مرین، دا ب رێیا نوی یا گیانی خزمەتێ بكەین، نە ب رێیا كەڤن یا پیتێ.
ئەڤجا ئەم چ بێژین؟ ئایا دەستوور گونەهە؟ حاشا! لێ ئەگەر دەستوور نەبا، من نەدزانی گونە‍‌ھ چیە. بۆ نموونە ئەگەر دەستووری نەگۆتبا: «دلچوونا خراب نەكە» ، من نەدزانی دلچوون چیە.
لێ گونەهێ ب رێیا فەرمانێ دەرفەت دیت و هەمی جۆرێن دلچوونێ د دلێ من دا پەیدا كرن. چنكو بێی دەستووری گونە‍‌ھ یا مریە.
ئەز ژی دەمەكی بێی دەستوور دژیام، لێ دەمێ فەرمان هاتی، گونە‍‌ھ ژیا و ئەز مرم.
من دیت كو ئەو فەرمانا پێدڤی بوو ژیانێ بدەت، ئەنجامێ وێ بۆ من مرن بوو.
چنكو گونەهێ ب رێیا فەرمانێ دەرفەت دیت، ئەز خاپاندم و ب رێیا وێ ئەز كوشتم.
ئەڤجا دەستوور یێ پیرۆزە و فەرمان یا پیرۆز و دادپەروەر و باشە.
ئایا ما تشتێ باش مرن بۆ من ئینا؟ حاشا! لێ گونەهێ ئەڤ چەندە كر، دا ئاشكرا ببیت كو گونەهە، وێ ب رێكا تشتێ باش مرن بۆ من ئینا، داكو ب رێیا فەرمانێ بهێتە دیتن كو گونە‍‌ھ ب تەمامی یا خرابە.
چنكو ئەم دزانین دەستوور یێ روحانیە، لێ ئەز لەشكانیمە و وەكو بەنی بۆ گونەهێ هاتیمە فرۆتن.
ئەز تێناگەهم كا ئەز چ دكەم، ئەو تشتێ من دڤێت، ئەز ناكەم، لێ ئەو تشتێ من كەرب ژێ ڤەدبن، ئەز دكەم.
ئەگەر ئەز وی تشتی بكەم یێ من نەڤێت، ئەز پەسەند دكەم كو دەستوور یێ باشە.
ئەڤجا ب راستی، یێ ڤی تشتی دكەت نە ئەزم، لێ ئەو گونەهە یا د من دا ئاكنجی.
ئەز دزانم تشتەكێ باش د من دا، ئانكو د سرۆشتێ من یێ لەشكانی دا، یێ ئاكنجی نینە. چنكو حەزا كرنا باشیێ د من دا هەیە، لێ شیانا باشیێ د من دا نینە.
چنكو ئەز وێ باشیێ ناكەم یا من دڤێت، لێ وێ خرابیێ دكەم یا من نەڤێت.
ئەگەر ئەز وی تشتی دكەم یێ من نەڤێت، ئێدی یێ ڤی تشتی دكەت نە ئەزم، لێ ئەو گونەهە یا د من دا ئاكنجی.
هۆسا ئەڤ یاسایە بۆ من ئاشكرا بوو: دەمێ من دڤێت ئەز باشیێ بكەم، خرابی ل نك من یا ئامادەیە.
چنكو د ناخێ خۆ دا، ئەز ب دەستوورێ خودێ دلشاد دبم،
لێ د ئەندامێن لەشێ خۆ دا، ئەز یاسایەكا دی دبینم، كو بەرهنگاریا یاسایا زێهنێ من دكەت و من دكەتە دیلێ وێ یاسایا گونەهێ، ئەوا د ئەندامێن لەشێ من دا.
ئەز چەند مرۆڤەكێ پەریشانم! كی دێ من رزگار كەت ژ ڤی لەشێ من بەرەڤ مرنێ دبەت؟
سوپاس بۆ خودێ، ئەوێ ڤێ رزگاركرنێ ب رێیا خودانێ مە عیسایێ مەسیح ددەتە مە! ئەڤجا ئەز ب خۆ ب زێهنێ خۆ بەنیاتیا دەستوورێ خودێ دكەم، لێ ب لەشی بەنیاتیا یاسایا گونەهێ.
لەوما، ژ نوكە و پێڤە گونەهباركرن بۆ وان نینە یێن ل گەل مەسیح عیسای بووینە ئێك.
چنكو یاسایا گیانێ ب رێیا مەسیح عیسای ژیانێ ددەت، تۆ ژ یاسایا گونە‍‌ھ و مرنێ ئازاد كری.
ئەو تشتێ دەستووری ژ بەر لاوازیا سرۆشتێ لەشكانی یێ مرۆڤی نەشیای بكەت، خودێ ئەو كر: وی كوڕێ خۆ ب لەشەكێ وەكو لەشێ مە یێ گونەهكار هنارت بۆ كەفارەتا گونەهان، هۆسا وی گونە‍‌ھ د لەشی دا گونەهبار كر،
داكو رێسایێن دادپەروەرانە یێن دەستووری د مە دا بهێنە بجهئینان، ئەم یێن كو ل دویڤ لەشی ناژین، لێ ل دویڤ گیانێ پیرۆز دژین.
چنكو ئەوێن ل دویڤ لەشی دژین، گرنگیێ ددەنە تشتێن لەشی و ئەوێن ل دویڤ گیانێ پیرۆز دژین، گرنگیێ ددەنە تشتێن گیانێ پیرۆز.
دویماهیا وی زێهنێ گرنگیێ ب لەشی ددەت، مرنە، لێ دویماهیا وی زێهنێ گرنگیێ ب گیانی ددەت، ژیان و ئاشتیە.
ژ بەر كو ئەو زێهنێ گرنگیێ ب لەشی ددەت، دوژمناتیا خودێ دكەت، ئەو خۆ ملكەچی دەستوورێ خودێ ناكەت و نەشێت ژی خۆ ملكەچ بكەت.
ئەوێن ل دویڤ لەشی دژین، نەشێن خودێ رازی بكەن.
لێ هوین ل دویڤ لەشی ناژین، هوین ل دویڤ گیانێ پیرۆز دژین، ئەگەر ب راستی گیانێ خودێ د هەوە دا یێ ئاكنجی بیت. هەر كەسێ گیانێ مەسیحی تێدا نەبیت، ئەو نە یێ ویە،
لێ ئەگەر مەسیح د هەوە دایە، لەشێ هەوە ژ بەر گونەهێ یێ مریە، لێ گیانێ خودێ ژیانێ ددەتە هەوە، ژ بەر كو هوین هاتنە بێگونەهكرن.
ئەگەر گیانێ وی یێ عیسا ژ ناڤ مریان راكری، د هەوە دا یێ ئاكنجیە، ئەوێ كو مەسیح ژ ناڤ مریان راكری، دێ ب گیانێ خۆ یێ د هەوە دا ئاكنجی، لەشێن هەوە یێن مربار ژی ڤەژینیت.
لەوما، گەلی خویشك و برایان، قەرەك د ستۆیێ مە دایە، لێ نە قەرێ لەشیە، داكو ل دویڤ لەشی بژین.
چنكو ئەگەر هوین ل دویڤ لەشی بژین، دێ مرن، لێ ئەگەر هوین ب گیانێ پیرۆز كریارێن لەشی بمرینن، هوین دێ ژین.
هەمی یێن كو ب گیانێ خودێ دهێنە بڕێڤەبرن، ئەون كوڕێن خودێ.
چنكو هەوە گیانێ بەنیاتیێ وەرنەگرتیە كو هەوە بۆ ترسێ بزڤڕینیت، لێ هەوە ئەو گیان وەرگرتییە یێ هەوە دكەتە زاڕۆكێن خودێ، ب رێكا وی گیانی ئەم دكەینە گازی: «ئابا ، بابۆ!».
گیانێ پیرۆز ب خۆ ژی ل گەل گیانێ مە شاهدەییێ ددەت، كو ئەم زاڕۆكێن خودێینە.
ئەڤجا ئەگەر ئەم زاڕۆكێن وی بین، ئەم میراتگرین ژی، میراتگرێن خودێ و هەڤپشكێن مەسیحینە د میراتی دا، لێ پێدڤیە ئەم ل گەل وی د ئازاران دا پشكدار ببین، داكو د مەزناهیا وی ژی دا پشكدار ببین.
ئەز دبینم كو ئازارێن مە ل ڤی سەردەمی ل گەل وێ مەزناهیا كو دێ بۆ مە هێتە ئاشكراكرن، ناهێنە هەڤبەركرن.
ئافرندە ب گەرمی چاڤەڕێیا دیاربوونا كوڕێن خودێ دكەن.
ژ بەر كو ئافرندە كەفتنە دبن دەستێ پویچبوونێ ڤە، نە ب حەزا خۆ، لێ ب حەزا وی یێ ئەو بندەست كرین، ب وێ هیڤیێ
كو ئافرندە ب خۆ ژی دێ ژ بەنیاتیا رزیبوونێ هێنە ئازادكرن، بەرەڤ ئازادیا ب مەزناهی یا زاڕۆكێن خودێ.
ئەم دزانین، تا نوكە هەمی ئافرندە پێكڤە دنالن و ژانێن وەكو یێن زاڕۆكبوونێ دهێنێ.
نە ب تنێ ئافرندە، لێ ئەم ب خۆ ژی، یێن كو مە گیانێ پیرۆز وەكو خێڤە وەرگرتی، د ناخێ خۆ دا دنالین و د چاڤەڕێی وێ رۆژێینە كو مافێن خۆ یێن كوڕێن خودێ وەرگرین و لەشێ مە رزگار ببیت.
چنكو ئەم ب هیڤیێ قورتال بووین، لێ ئەو هیڤیا بەرچاڤ، نە هیڤیە. ما تشتێ مرۆڤ دبینیت، دێ چەوا هیڤیا وی تشتی هەبیت؟
لێ ئەگەر مە هیڤیا تشتەكی هەبیت كو ئەم نابینین، ئەم ب هەدارێ ل چاڤەڕێ دمینین.
هۆسا گیانێ پیرۆز ژی د هەوارا لاوازیا مە دهێت، چنكو ئەم نزانین كا پێدڤیە د نڤێژێ دا چ بێژین. لێ گیان ب خۆ، ب نالینێن كو نەهێنە دەربڕین، مەهدەریێ بۆ مە دكەت.
ئەوێ كو دلان دپشكنیت ژی، دزانیت كا هزرێن گیانێ پیرۆز چنە، چنكو گیان ل گۆر حەزا خودێ مەهدەریێ بۆ پیرۆزكریان دكەت.
ئەم دزانین كو خودێ وە دكەت هەمی تشت پێكڤە كار بكەن ژ بۆ باشیا وان یێن حەز ژ خودێ دكەن و ل دویڤ مەبەستا وی هاتینە گازیكرن.
چنكو ئەوێن خودێ ئەو پێشوەخت هەلبژارتین، وی ئەو پێشوەخت ژی دەستنیشان كرن، دا وەكو وێنەیێ كوڕێ وی لێ بهێن، دا كوڕ د ناڤ گەلەك خویشك و برایێن خۆ دا یێ نەخری بیت.
ئەوێن خودێ پێشوەخت دەستنیشان كرین، وی ئەو گازی كرن ژی، ئەوێن وی گازی كرین، وی ئەو بێگونەهكرن ژی، ئەوێن وی بێگونە‍‌ھ كرین، وی ئەو مەزنكرن ژی.
ئەڤجا ئەم دەربارەی ڤان تشتان چ بێژین؟ ئەگەر خودێ ل گەل مە بیت، كی دشێت ل دژی مە بیت؟
ئەوێ دەستێ خۆ ژ كوڕێ خۆ ڤەنەگرتی، لێ ژ پێخەمەتی مە هەمیان ئەو رادەستی مرنێ كر، ئێدی چەوا ئەو هەمی تشتی ل گەل وی بێ بەرامبەر نادەتە مە؟
كی دێ هەلبژارتیێن خودێ تاوانبار كەت؟ خودێیە یێ وان بێگونە‍‌ھ دكەت،
كی دشێت وان گونەهبار بكەت؟ مەسیح عیسایە یێ كو مری، لێ ئەوە یێ ژ ناڤ مریان رابووی ژی و هەر ئەوە یێ ل دەستێ راستێ یێ خودێ بۆ مە مەهدەریێ دكەت.
كی دێ حەزژێكرنا مەسیحی ژ مە ڤەكەت؟ ئایا دژواری، تەنگاڤی، تەپەسەری، كولب، رویساتی، مەترسی یان شیر؟
هەروەكو هاتیە نڤیسین: «رۆژێ هەمیێ ژ پێخەمەتی تە ئەم یێ ل بەر كوشتنێ، وەكو پەزێن سەرژێكرنێ دهێینە هژمارتن.»
لێ ب رێكا وی یێ حەز ژ مە دكەت، ئەم د ڤان هەمی تشتان دا، هێشتا پتر سەركەفتنێ ب دەست خۆ ڤە دئینین.
چنكو ئەز یێ پشتڕاستم كو نە مرن، نە ژیان، نە فریشتە، نە سەروەر، نە تشتێن هەیی، نە تشتێن دێ هێن، نە هێز،
نە بلنداهی، نە كویراتی و نە ژی تشتەكێ دی یێ هاتیە ئافراندن دێ شێت حەزژێكرنا خودێ ژ مە ڤەكەت، ئەوا ب رێیا خودانێ مە مەسیح عیسای دهێت.
مەسیح شاهدە كو ئەز راستیێ دبێژم و درەوان ناكەم و وژدانا من ژی ب رێیا گیانێ پیرۆز شاهدەییێ بۆ ڤێ چەندێ ددەت كو
خەمەكا گران و كۆڤانەكا بێ راوەستیان یا د دلێ من دا.
خوزی نفرین ل من هاتبانە كرن و ئەز ژ مەسیحی بێبەهر ببام، ژ پێخەمەت برایێن من، هەڤمللەتێن من ل دویڤ لەشی،
كو ئەو ژی ئیسرائیلینە. مافێن كوڕێن خودێ، مەزناهی، هەمی پەیمان، وەرگرتنا دەستووری، پەرستن و هەمی سۆز یێن وانن.
بابكال یێن وانن و مەسیح ژی ل دویڤ لەشی ژ وان هاتیە، ئەوێ كو د سەر هەمی تشتان دایە و خودایێ هەروهەر هەژی پەسنێیە. ئامین.
لێ نە ب وێ رامانێ كو خودێ یێ ژ سۆزا خۆ لێڤەبووی، چنكو هەمی یێن ژ دویندەها ئیسرائیلی، نە ئیسرائیلینە.
خۆ ئەو ژ دویندەها ئیبراهیمی ژی بن، ئەو هەمی نە زاڕۆكێن وینە، لێ: «دویندەها تە دێ ژ ئیسحاقی هێتە هژمارتن.»
ئانكو زاڕۆكێن خودێ، نە زاڕۆكێن لەشینە، لێ زاڕۆكێن سۆزێنە یێن ب دویندە‍‌ھ دهێنە هژمارتن.
چنكو پەیڤێن سۆزا خودێ ئەڤەنە: «ل ساڵا بهێت، ل ڤی دەمی ئەز دێ زڤڕمە نك تە و هنگی دێ سارایێ كوڕەك هەبیت.»
نە ب تنێ ئەڤە، لێ رەبەكا ژی ژ مێرەكی ب دوو گیان كەفت، ژ بابێ مە ئیسحاقی.
هەروەكو هاتیە نڤیسین: «من حەز ژ یەعقوبی كر، لێ من كەرب ژ عیسۆی ڤەبوون.»
ئەڤجا ئەم چ بێژین؟ ما بێدادی ل نك خودێ هەیە؟ حاشا!
چنكو ئەو دبێژیتە مووسای: «ئەز دلۆڤانیێ ب وی دبەم، یێ ئەز دلۆڤانیێ پێ دبەم و دلێ خۆ ب وی دسوژم، یێ ئەز دلێ خۆ پێ دسوژم.»
ئەڤجا ئەڤ چەندە نە ب حەز و نە ژی ب بزاڤا مرۆڤیە، لێ ژ خودێیە ئەوێ دلۆڤانیێ دبەت.
چنكو نڤیسارا پیرۆز دبێژیتە فیرعەونی: «من بۆ ڤێ چەندێ تۆ پایەبەرز كری، دا هێزا خۆ ل سەر تە بدەمە ئاشكراكرن و دا ناڤێ من ل سەرانسەری جیهانێ بهێتە راگەهاندن.»
هۆسا ئەو دلۆڤانیێ ب وی دبەت یێ وی بڤێت و وی سەرڕەق دكەت یێ وی بڤێت.
ئەڤجا تۆ دێ بێژییە من: «ئێدی بۆچی خودێ گازندەیێ ژ مرۆڤی دكەت؟ ما كی دشێت بەرهنگاریا حەزا وی بكەت؟»
لێ تۆ كی، هەی مرۆڤ، كو تۆ گەنگەشەیێ ل گەل خودێ دكەی؟ ما تشتێ ژ هەڕیێ هاتیە چێكرن دبێژیتە چێكەرێ خۆ: «تە بۆچی ئەز هۆسا چێكرم؟»
ما گۆزكڤانی دەستهەلات ل سەر هەڕیێ نینە، كو ژ هەمان هەڕی ئامانەكی بۆ كارێن بەڕێز و ئامانەكی بۆ یێن بێڕێز چێكەت؟
ئەڤجا ما چیە ئەگەر خودێ، ژ بەر كو وی دڤێت تۆڕەبوونا خۆ ئاشكرا بكەت و هێزا خۆ دیار بكەت، ب بێهنفرەهیەكا درێژ هەدارا خۆ ل گەل وان ئامانێن هەژی تۆڕەبوونێ كێشا، یێن بۆ ژناڤچوونێ هاتینە ئامادەكرن؟
ما چیە ئەگەر وی ئەڤ چەندە كر؟ دا دەولەمەندەیا مەزناهیا خۆ ل سەر وان ئامانان دیار بكەت، یێن كو دلۆڤانیێ وەردگرن، ئەوێن پێشوەخت بۆ مەزناهیێ ئامادە كرین،
خۆ ئەم ژی ئەوین، یێن وی گازی كرین، نە ب تنێ ژ ناڤ جوهیان، لێ ژ ناڤ مللەتێن دی ژی.
هەروەكو ئەو د پەرتووكا هۆشێیەع پێغەمبەری دا دبێژیت: «ئەوێن نە گەلێ من، ئەز دێ بێژمێ: ‹گەلێ من›» و ئەوا نە خۆشتڤیا من، دێ بێژمێ: ‹خۆشتڤیا من.›
«و ل وی جهێ بۆ وان هاتیە گۆتن: ‹هوین نە گەلێ منن›، ل وێرێ دێ ب: ‹كوڕێن خودایێ زیندی› هێنە بناڤكرن.»
ئیشایا پێغەمبەر ژی هۆسا دەربارەی ئیسرائیلێ دكەتە گازی: «ئەگەر ژمارەیا زاڕۆكێن ئیسرائیل هندی خیزێ دەریایێ ژی بیت، ب تنێ هندەك ژ وان دێ قورتال بن.
چنكو خودان دێ زوی و ئێكجاركی بڕیارا خۆ یا سزادانێ ل سەر رویێ ئەردی ب ج‍‌ھ ئینیت.»
هەروەكو ئیشایای پێشوەخت گۆتی: «ئەگەر خودانێ لەشكەران بۆ مە دویندەهەك نەهێلابا، ئەم دا وەكو سەدۆمێ لێ هێین و وەكو عەمۆرایێ بین.»
ئەڤجا ئەم چ بێژین؟ ئەو مللەتێن ل دویڤ راستداریێ نەچووین، گەهشتنە راستداریێ، ئەو راستداریا ژ باوەریێ دهێت.
لێ گەلێ ئیسرائیل، ئەوێ ل دویڤ دەستووری بۆ راستداریێ بزاڤ دكر، نەگەهشتنە وێ چەندێ.
بۆچی؟ چنكو ئەوان ئەڤ چەندە نە ب باوەریێ كر، لێ هەروەكو ب وان كریاران بیت یێن دەستوور دسەپینیت، ئەڤجا ئەو د بەرێ هەلنگفتنێ هەلنگفتن.
هەروەكو هاتیە نڤیسین: «ئەڤە ئەز یێ ل سییۆنێ بەرەكێ هەلنگفتنێ و كەڤرەكێ كەفتنێ ددانم. لێ یێ باوەریێ ب وی بینیت، شەرمزار نابیت.»
گەلی خویشك و برایان، حەزا دلێ من و هیڤیا من ژ خودێ ژ پێخەمەت ئیسرائیلیان، قورتالبوونا وانە.
ئەز ژ بۆ وان شاهدەییێ ددەم كو ئەو گەلەك ب گەرمی حەز ژ خودێ دكەن، لێ ئەڤ دلگەرمیە نە ل گۆر زانینێیە.
چنكو ئەو دەربارەی راستداریا ژ خودێ دهێت، د نەزان بوون و بزاڤ دكر كو ئەو ب خۆ راستداریێ پێكبینن، ئەڤجا ملكەچی راستداریا خودێ نەبوون.
چنكو ب مەسیحی ئارمانجا دەستووری ب ج‍‌ھ هات، داكو هەر كەسێ باوەریێ بینیت، راستداریێ وەرگریت.
مووسا دەربارەی راستداریا ژ دەستووری دهێت، هۆسا دنڤیسیت: «هەر كەسێ ڤان تشتان ب ج‍‌ھ بینیت، دێ پێ ژیت.»
لێ راستداریا ژ باوەریێ دهێت ڤێ دبێژیت: «د دلێ خۆ دا نەبێژە: كی دێ سەركەڤیتە ئەسمانی؟» (ئانكو دا مەسیحی بینیتە خوارێ،)
یان ژی: «كی دێ داكەڤیتە ناڤ چاڵا بێ بن ؟» (دا مەسیحی ژ ناڤ مریان سەربئێخیت.)
لێ چ دبێژیت؟ «پەیڤ یا نێزیكی تەیە، ل سەر ئەزمانێ تەیە و د دلێ تە دایە» (ئانكو پەیڤا باوەریێ یا ئەم رادگەهینین.)
چنكو ئەگەر تۆ ب دەڤێ خۆ دانپێدانێ بكەی كو عیسا خودانە و ب دلێ خۆ باوەریێ بینی كو خودێ ئەو ژ ناڤ مریان راكریە، تۆ دێ قورتال بی.
مرۆڤ ب دلی باوەریێ دئینیت و راستدار دهێتە دەرئێخستن، ب دەڤی ژی دانپێدانێ دكەت و قورتال دبیت.
هەروەكو نڤیسارا پیرۆز دبێژیت: «هەر كەسێ باوەریێ پێ بینیت، ناهێتە شەرمزاركرن.»
ژ بەر كو چ جوداهی د ناڤبەرا یێ جوهی و یێ نەجوهی دا نینە، هەمان خودان خودانێ هەمیانە، یێ مەردە بۆ هەمیێن هەوارا خۆ دگەهیننە ناڤێ وی.
چنكو: «هەر كەسەكێ هەوارا خۆ بگەهینیتە ناڤێ خودانی، دێ قورتال بیت.»
لێ ئەو دێ چەوا هەوارا خۆ گەهیننە وی یێ وان باوەری پێ نەئینای؟ و چەوا دێ باوەریێ ب وی ئینن، یێ دەربارەی وی چ نەبهیستی؟ و چەوا دێ بهیسن بێی كو كەس بۆ وان رابگەهینیت؟
و ئەو دێ چەوا راگەهاندنێ كەن، ئەگەر نەهێنە هنارتن؟ هەروەكو هاتیە نڤیسین: «پێیێن وان یێن مزگینیا خێرێ دئینن، چەند د جوانن!»
لێ هەمیان گوهداریا مزگینیێ نەكر، چنكو ئیشایا دبێژیت: «خودان، كێ باوەر ژ پەیاما مە كر؟»
ئەڤجا باوەری ژ بهیستنێ دهێت و بهیستن ژی ب رێكا پەیاما مەسیحی دهێت.
لێ ئەز دبێژم: ما وان نەبهیست؟ بەلێ، وان بهیست، چنكو: «دەنگێ وان ل هەمی ئەردی چوو و ئاخفتنێن وان گەهشتنە هەر چوار كوژیێن جیهانێ.»
ئەز دیسان دبێژم: ما ئیسرائیل د ڤێ چەندێ نەگەهشت؟ ل بەراهیێ مووسا دبێژیت: «ئەز دێ چاڤپێڕانەبوونا هەوە ب رێكا وان یێن كو نەمللەتن ئازرینم و دێ هەوە ب مللەتەكێ كۆرەفام تۆڕە كەم.»
پاشی ئیشایا ب وێرەكی دبێژیت: «ئەز ژ لایێ وان ڤە هاتمە دیتن یێن كو ل من نەدگەڕیان، من خۆ بۆ وان دیار كر یێن پرسیارا من نەدكر.»
لێ دەربارەی ئیسرائیل ئەو دبێژیت: «ب درێژاهیا رۆژێ من دەستێن خۆ بۆ مللەتەكێ نەگوهدار و سەرهشك درێژ كرن.»
ئەڤجا ئەز دبێژم: ئایا خودێ گەلێ خۆ رەت كریە؟ حاشا! ئەز ب خۆ ژی ئیسرائیلیمە، ژ دویندەها ئیبراهیمی و ژ هۆزا بنیامینیمە.
خودێ گەلێ خۆ یێ پێشوەخت هەلبژارتی، رەت نەكر. ما هوین نزانن نڤیسارا پیرۆز دەربارەی ئلیاسی چ دبێژیت، دەمێ ل بەرامبەر خودێ گازندە ژ ئیسرائیل كرین؟
ئەوی گۆت: «خودان، وان پێغەمبەرێن تە كوشتن و قوربانگەهێن تە هەڕفاندن، ئەز ب تنێ یێ مایم و ئەو ل كوشتنا من ژی دگەڕن.»
لێ بەرسڤا خودایی بۆ وی چ بوو؟ «من حەفت هزار زەڵام بۆ خۆ هێلاینە یێن چۆكڤەدان بۆ بەعلی نەبری.»
د ڤی دەمی ژی دا هندەك یێن هەین كو ب رێكا كەرەمێ هاتینە هەلبژارتن.
ئەڤجا ئەگەر ب كەرەمێ بیت، ئێدی ب كریاران نینە. ئەگەر ب كریاران با، ئێدی كەرەم نەدبوو كەرەم.
ئەڤجا چ؟ ئەو تشتێ گەلێ ئیسرائیل بزاڤ بۆ دكر، ب دەست ڤە نەهات، لێ بدەست هەلبژارتیانڤە هات، ئەوێن دی ژی د سەرڕەق بوون.
هەروەكو هاتیە نڤیسین: «خودێ ئەو كرنە د خەوەكا كویر دا و چاڤێن كو نەبینن و گوهێن كو نەبهیسن دانە وان، ئەو تا ئەڤرۆ ژی د وەسانە.»
داوود ژی دبێژیت: «بلا سفرا وان ژ بۆ وان خەفك و داڤ و بەرێ هەلنگفتنێ و سزا بیت.
بلا چاڤێن وان تاری ببن، دا نەبینن، هەردەم پشتێن وان د چەماندی بن.»
ئەڤجا ئەز دبێژم: ئایا ئەو هەلنگفتن دا وەسا بكەڤن كو نەشێن راببنەڤە؟ حاشا! لێ ب رێكا هەلنگفتنا وان، قورتالبوون بۆ نەجوهیان هات، دا چاڤپێڕانەبوونا جوهیان بهێتە ئازراندن.
ئەگەر هەلنگفتنا وان بۆ جیهانێ دەولەمەندی بیت و شكەستنا وان بۆ مللەتێن نەجوهی دەولەمەندی بیت، ئەڤجا ب قورتالبوونا وان دێ دەولەمەندی چەند پتر بیت!
ئەز بۆ هەوە نەجوهیان دبێژم: مادەم كو ئەز هنارتیێ نەجوهیانم، ئەز هەمیان ب مەزناهیا خزمەتا خۆ ئاگەهدار دكەم،
بەلكو ب ڤێ چەندێ ئەز چاڤپێڕانەبوونا مللەتێ خۆ بئازرینم و هندەكان ژ وان قورتال بكەم.
چنكو ئەگەر رەتكرنا وان ژ لایێ خودێ ڤە بۆ جیهانێ ئاشتكرن بیت، هنگی قەبیلكرنا وان ژ لایێ خودێ ڤە دێ چ بیت، ئەگەر ڤەژینا مریان نەبیت؟
ئەگەر نانا ئێكێ، ئەوا دهێتە پێشكێشكرن ، یا پیرۆز بیت، ئەو هەڤیر هەمیێ پیرۆزە و ئەگەر رە‍‌ھ یا پیرۆز بیت، چەق ژی د پیرۆزن.
لێ ئەگەر هندەك چەق هاتنە بڕین و تۆ ژی دارزەیتوونەكا خۆڕستی بی و پێڤە هاتیە پەترومەكرن و بوویە پشكدارێ رە‍‌ھ و قەلەویا دارزەیتوونێ،
ل بەرامبەری وان چەقێن هاتینە بڕین، شانازیێ ب خۆ نەبە. ئەگەر تە شانازی ب خۆ بر، ژ بیر نەكە كو تۆ رەهێ هەلناگری، لێ رە‍‌ھ تە هەلدگریت.
ئەڤجا تۆ دێ بێژی: «چەق هاتنە بڕین داكو ئەز بهێمە پەترومەكرن.»
راستە، ئەو ژ بەر بێباوەریێ هاتنە بڕین و تۆ ب باوەریێ جهگیر بووی. ئەڤجا خۆ دفنبلند نەكە، لێ بترسە.
چنكو ئەگەر دلێ خودێ نەمابیتە ب چەقێن خۆمالی ڤە، دلێ وی نامینیتە ب تە ژی ڤە.
ئەڤجا قەنجی و توندیا خودێ ببینە: توندی بۆ وانە یێن كەفتین ، قەنجی ژی بۆ تەیە، ئەگەر تۆ د قەنجیا وی دا بمینی. ئەگەر نە، تۆ ژی دێ هێیە بڕین.
ئیسرائیلی ژی ئەگەر د بێباوەریێ دا نەمینن، دێ هێنە پەترومەكرن، چنكو خودێ دشێت وان پەترومە بكەت و جارەكا دی ب دارێ ڤە كەت.
چنكو ئەگەر تۆ ژ دارزەیتوونەكا خۆڕستی هاتیە بڕین و بەروڤاژی سرۆشتی ب دارزەیتوونەكا خۆمالیڤە هاتیە پەترومەكرن، چەند پتر چەقێن رەسەن یێن دارا خۆمالی دێ ب دارزەیتوونا خۆ ڤە هێنە پەترومەكرن!
ئەز حەز ناكەم، گەلی خویشك و برایان، هوین ئاگەهداری ڤێ نهێنیێ نەبن، داكو هوین خۆ ئاقلدار نەهژمێرن. نهێنی ئەوە كو سەرڕەقیێ پشكەكا گەلێ ئیسرائیل یا گرتی، تاكو ژمارەیا نەجوهیێن دێ قورتال بن، تەمام ببیت.
هۆسا هەمی گەلێ ئیسرائیل دێ قورتال بیت، هەروەكو هاتیە نڤیسین: «قورتالكەر دێ ژ سییۆنێ هێت، ئەو دێ خودێنەنیاسیێ ژ دویندەها یەعقوبی دویر ئێخیت.
ئەڤە پەیمانا منە ل گەل وان، دەمێ كو ئەز گونەهێن وان رادكەم.»
سەبارەت مزگینیێ ئەو ژ پێخەمەت هەوە دوژمنن ، لێ سەبارەت هەلبژارتنا خودێ ئەو ژ پێخەمەت بابكالان خۆشتڤینە.
چنكو خودێ ژ بەرەكەتداركرن و هەلبژارتنا كەسەكی پەشیمان نابیت.
كا چەوا دەمەكی هەوە گوهداریا خودێ نەكر، لێ نوكە ژ ئەنجامێ نەگوهداریا وان دلۆڤانی ب هەوە هاتە برن،
هۆسا ئەو ژی نوكە بوونە نەگوهدار، دا ژ ئەنجامێ وێ دلۆڤانیا ب هەوە هاتیە برن، دلۆڤانی ب وان ژی بهێتە برن.
چنكو خودێ هەمی كرنە گرتیێن نەگوهداریێ، داكو دلۆڤانیێ ب هەمیان ببەت.
چەند د كویرن دەولەمەندی، ئاقلمەندی و زانینا خودێ! چەند د دویرن بڕیارێن وی ژ تێگەهشتنێ و رێكێن وی ژ راڤەكرنێ!
چنكو «ما كێ هزرێن خودانی زانینە؟ یان كی بوویە شیرەتكارێ وی؟»
«ما كێ تشتەك دایە وی، كو لێ بهێتە ڤەگەڕاندن؟»
چنكو هەمی تشت ژ وینە و ب وینە و ژ بۆ وینە، مەزناهی هەروهەر بۆ وی بیت. ئامین.
ئەڤجا ئەز هیڤیێ ژ هەوە دكەم، گەلی خویشك و برایان، كو هوین ژ بەر دلۆڤانیا خودێ لەشێ خۆ وەك قوربانەكێ زیندی یێ پیرۆز و جهێ رازیبوونا خودێ پێشكێش بكەن. ئەڤەیە پەرستنا هەوە یا راستەقینە.
هوین وەكو خەلكێ ڤێ جیهانێ نەبن، لێ ب نویكرنا زێهنێ خۆ وەرنە گوهۆڕین، دا هوین بزانن كا حەزا خودێ یا باش و جهێ رازیبوونێ و بێكێماسی چیە.
ئەز ب وێ كەرەما بۆ من هاتیە دان، دبێژمە هەر ئێكی ژ هەوە: بلا كەس خۆ بلندتر ژ یا دروست نەهەلسەنگینیت، لێ بلا ل دۆر خۆ ب شێوازەكێ بەرئاقل هەلسەنگاندنێ بكەت، ل دویڤ وی قەبارەیێ باوەریێ یێ خودێ ل سەر هەر كەسەكی لێكڤە كری.
چنكو كا چەوا د لەشێ مە دا گەلەك ئەندام هەنە و كارێ هەمی ئەندامان ئێك نینە،
هۆسا ئەم ژی یێن كو گەلەكین، د ئێكبوونا ل گەل مەسیحی دا لەشەكین و هەر ئێك ژ مە ئەندامێ یێن دییە.
ئەڤجا مە بەهرەیێن ژ ئێك جودا هەنە، ل دویڤ وێ كەرەما بۆ مە هاتیە دان. ئەگەر بەهرە گەهاندنا پەیامێ بیت، بلا ل دویڤ رێژەیا باوەریێ بكەت.
ئەگەر خزمەت بیت، بلا خزمەتێ بكەت. ئەگەر فێركرن بیت، بلا فێركرنێ بكەت.
ئەگەر هاندان بیت، بلا هاندانێ بكەت. ئەوێ هاریكاریێ بكەت، بلا ب مەردینی بكەت. ئەوێ سەروەریێ بكەت، بلا ب دلگەرمی بكەت و ئەوێ دلۆڤانیێ دبەت، بلا ب دلخۆشی وە بكەت.
بلا حەزژێكرن یا بێ دووڕویاتی بیت، كەربێ ژ خرابیێ راكەن، خۆ ب باشیێڤە بگرن.
وەكو برا ژ دل حەز ژ ئێكودوو بكەن، د رێزگرتنێ دا ئێكودوو ب پێش خۆ بئێخن.
د دلگەرمیێ دا سست نەبن، ب گیانەكێ ئاگرینی خزمەتا خودانی بكەن.
د هیڤیێ دا د دلخۆش بن، د تەنگاڤیێ دا د خۆڕاگر بن، ل سەر نڤێژكرنێ د بەردەوام بن.
بۆ پێدڤیێن پیرۆزكریان د هاریكار بن، د مێڤان حەوین بن.
بەرەكەتێ بۆ وان بخوازن یێن هەوە تەپەسەر دكەن، بەرەكەتێ بۆ بخوازن و نفرینان لێ نەكەن.
ل گەل دلخۆشان د دلخۆش بن و ل گەل ئەوێن دگریێن بكەنە گری.
ل گەل ئێكودوو د هەڤهزر بن. د دفنبلند نەبن، لێ تێكهەلیا پایەنزمان بكەن، خۆ ئاقلمەند نەدانن.
خرابیێ ل وی ڤەنەگەڕینن یێ خرابیێ ل هەوە دكەت، لێ گرنگیێ ب وان تشتان بدەن یێن ب دیتنا هەمی مرۆڤان د باش.
ئەگەر د شیان دا بیت، هندی ژ هەوە بهێت ب ئاشتی ل گەل هەمی مرۆڤان بژین.
تۆلڤەكرنێ نەكەن گەلی خۆشتڤیان، لێ رێكێ بدەنە تۆڕەبوونا خودێ، چنكو یا هاتیە نڤیسین: «یا منە تۆلڤەكرن، ئەز دێ سزایێ دروست دەم، خودان دبێژیت.»
لێ: «ئەگەر دوژمنێ تە یێ برسی بیت، خوارنێ بدێ و ئەگەر یێ تێهنی بیت، ئاڤێ بدێ، چنكو ب ڤێ كریارێ، تۆ دێ پەلان ل سەر سەرێ وی كۆم كەی.»
خرابی ب سەر تە نەكەڤیت، لێ تۆ ب باشیێ ب سەر خرابیێ بكەڤە.
بلا هەر كەسەك ملكەچی دەستهەلاتدارێن حكومەتێ بیت، چنكو چ دەستهەلاتدار نینن ژ لایێ خودێ ڤە نەبن، ئەڤجا ئەوێن هەین ژی ژ لایێ خودێ ڤە هاتینە دانان.
لەوما یێ بەرهنگاریا دەستهەلاتداران بكەت، ئەو بەرهنگاریا دانانا خودێ دكەت و ئەوێن بەرهنگاریێ دكەن، دێ دادكرنێ ب سەرێ خۆ دا ئینن.
چنكو حوكمڕان نە ژ بۆ كارێ باش، لێ ژ بۆ كارێ خراب جهێ ترسێنە. ما تە دڤێت ژ دەستهەلاتداری نەترسی؟ تشتێ باش بكە، دێ ژ لایێ وێ ڤە هێیە پەسنكرن.
چنكو ئەو خزمەتكارێ خودێیە ژ بۆ باشیا تە. لێ ئەگەر تۆ خرابیێ بكەی، بترسە، ژ بەر كو ئەو ژ قەستا شیری هەلناگریت. ئەو خزمەتكارێ خودێیە، دا تۆڕەبوونێ ب سەرێ خرابكاران دا بینیت.
لەوما پێدڤیە ملكەچ بن، نە ب تنێ ژ بەر تۆڕەبوونێ، لێ ژ بەر وژدانا خۆ ژی.
ژ بەر ڤێ چەندێ هوین خویكێ ژی ددەن، چنكو ئەو خزمەتكارێن خودێنە و بەردەوام ڤی كاری دكەن.
مافێ هەمی كەسان بدەنێ: ئەوێ مافێ خویكێ هەی، خویكێ بدەنێ. ئەوێ مافێ باجێ هەی، باجێ بدەنێ. ئەوێ مافێ ترسێ هەی، ترسێ بدەنێ و ئەوێ مافێ رێزگرتنێ هەی، رێزێ لێ بگرن.
ژبلی كو هوین حەز ژ ئێكودوو بكەن، ب چ تشتی قەردارێن كەسێ نەبن، چنكو یێ حەز ژ مرۆڤێن دی بكەت، ئەوی دەستوور ب ج‍‌ھ ئینا.
ئەو فەرمانێن دبێژن: «دەهمەنپیسیێ نەكە»، «كوشتنێ نەكە»، «دزیێ نەكە»، «دلچوونا خراب نەكە » و هەر فەرمانەكا دی هەبیت، د ناڤ ڤێ گۆتنێ دا كۆمڤە دبن: «حەز ژ نێزیكێ خۆ بكە، وەك چەوا تۆ حەز ژ خۆ دكەی.»
حەزژێكرن خرابیێ ل یێ نێزیك ناكەت، لەوما حەزژێكرن بجهئینانا دەستووریە.
ڤێ چەندێ بكەن، چنكو هوین دزانن چ دەمە. ئەڤە دەمژمێر هات كو هوین ژ خەوێ هشیار ببن، ژ بەر كو قورتالبوونا مە، نوكە نێزیكترە ژ وی دەمێ مە باوەری ئینای.
گەلەك ژ شەڤێ چوویە و رۆژ نێزیك بوویە، ئەڤجا دا كارێن تاریاتیێ ژ بەر خۆ بكەین و چەكێن رۆناهیێ بكەینە بەر خۆ.
بلا رەفتارێن مە د بەڕێز بن، هەروەكو رۆژ بیت: نە ب ئاهەنگێن بێتۆرەیێ و سەرخۆشیێ، نە ب دەهمەنپیسیێ و بێدەلنگیێ، نە ب هەڤڕكیێ و چاڤپێنەڕابوونێ.
لێ خۆ ب خودان عیسایێ مەسیح راپێچن و چ هزرێ بۆ تێركرنا داخوازێن سرۆشتێ خۆ یێ لەشكانی نەكەن.
ئەوێ د باوەریێ دا لاواز، قەبیل بكەن، لێ نە ب مەبەستا دادكرنا بۆچوونێن ئێكودوو.
ئێكی باوەریا هەی كو هەمی تشتان بخۆت، لێ یێ لاواز ب تنێ كەسكاتیان دخۆت.
بلا یێ دخۆت، سڤكاتیێ ب یێ نەخۆت نەكەت، یێ نەخۆت ژی بلا یێ دخۆت گونەهبار نەكەت، چنكو خودێ ئەو یێ قەبیل كری.
تۆ كی دا خزمەتكارێ ئێكێ دی داد بكەی؟ هەلسەنگاندن بۆ خودانێ ویە كا ئەو یێ سەركەفتیە یان سەرنەكەفتیە. ئەو دێ سەركەڤیت ژی، چنكو خودان دشێت وی سەربئێخیت.
كەسەك هزر دكەت رۆژەك ژ رۆژەكا دی پیرۆزترە، ئێكێ دی هزر دكەت هەمی رۆژ وەكو ئێكن. بلا هەر ئێك خۆ ژ بۆچوونا خۆ پشتڕاست بكەت.
ئەوێ گرنگیێ ب رۆژێ ددەت، بۆ خودانی ئەو گرنگیێ پێ ددەت. ئەوێ دخۆت ژی، بۆ خودانی ئەو دخۆت، چنكو ئەو سوپاسیا خودێ دكەت، ئەوێ نەخۆت ژی، بۆ خودانی ئەو ناخۆت و سوپاسیا خودێ دكەت.
كەسەك ژ مە بۆ خۆ ناژیت، كەسەك ژی بۆ خۆ نامریت.
ئەگەر ئەم بژین، بۆ خودانی دژین و ئەگەر ئەم بمرین، بۆ خودانی دمرین. ئەڤجا ئەم بژین یان ئەم بمرین، ئەم یێن خودانینە.
چنكو مەسیح بۆ ڤێ مەبەستێ مر و زیندی بووڤە، داكو سەروەریێ ل سەر مریان و زیندیان ژی بكەت.
ئەڤجا تۆ بۆچی برایێ خۆ داد دكەی؟ یان تۆ بۆچی سڤكاتیێ ب برایێ خۆ دكەی؟ ئەم هەمی دێ ل بەر كورسیكا دادوەریێ یا خودێ راوەستین.
چنكو یا هاتیە نڤیسین: «خودان دبێژیت: ئەز ب هەبوونا خۆ كەم، بۆ من هەمی چۆك دێ چەمیێن و هەمی زمان دێ دانپێدانێ كەن كو ئەز خودێمە.»
ئەڤجا هەر ئێك ژ مە دێ ل سەر خۆ بەرسڤدانێ ل بەرامبەری خودێ دەت.
لەوما ئێدی ئەم ئێكودوو داد نەكەین، لێ یا باشتر ئەوە هوین بڕیارێ بدەن كو ئاستەنگ و بەرپێكان بۆ برایێ خۆ نەدانن.
ئەز دزانم و پشتا خۆ ب خودان عیسای راست دكەم، كو چ خوارن ب خۆ د حەرام نینن، لێ بۆ وی كەسی د حەرامن، ئەوێ هزر دكەت ئەو خوارن د حەرامن.
ئەڤجا ئەگەر برایێ تە ژ بەر تشتێ تۆ دخۆی دلتەنگ ببیت، ئێدی تۆ ل دویڤ حەزژێكرنێ رەفتارێ ناكەی. ب خوارنا تۆ دخۆی وی نەهەڕفینە یێ كو مەسیح ژ پێخەمەتی وی مری.
ئەڤجا نەهێلن تشتەك كو ب دیتنا هەوە یێ باشە، ب خرابی بەحسێ وی بهێتە كرن.
چنكو بابەتێ پاشایەتیا خودێ نە خوارن و ڤەخوارنن، لێ راستداری، ئاشتی و دلخۆشینە ب گیانێ پیرۆز.
ئەوێ هۆسا خزمەتا مەسیحی بكەت، جهێ رازیبوونا خودێیە و ژ لایێ خەلكی ڤە یێ پەسەندكریە.
ئەڤجا دا بزاڤێ بۆ وان تشتان بكەین یێن ئاشتی و ئاڤاكرنا هەڤپشك ژێ چێدبن.
كارێ خودێ ژ بۆ خوارنێ نەهەڕفینە. هەمی تشت د حەلالن، لێ یێ ب خوارنا وان تشتان دبیتە ئەگەرێ هەلنگفتنا هندەكێن دی، ئەو خرابیێ دكەت.
یا باش ئەوە تۆ گۆشتی نەخۆی، شەرابێ ڤەنەخۆی و تشتەكی نەكەی كو برایێ تە پێ بهەلنگڤیت.
بیر و باوەریێن تە چ بن، بلا د ناڤبەرا تە و خودێ دا بمینن. خوزیكێن وی یێ خۆ گونەهبار نەكەت ب رێكا وی تشتی یێ ئەو دبینیت یێ باشە.
لێ یێ گۆمان هەبیت ل سەر وی تشتێ دخۆت، ئەگەر خوار ئەو گونەهبار دبیت، چنكو ئەو ژ باوەریێ وی تشتی ناكەت. هەر تشتێ نە ژ باوەریێ بیت، ئەو گونەهە.
پێدڤیە ئەم یێن ب هێز، خۆ ل بەر لاوازیێن بێهێزان بگرین و ل رازیكرنا خۆ نەگەڕیێین.
بلا هەر ئێك ژ مە ژ بۆ باشیێ ل رازیكرنا نێزیكێ خۆ بگەڕیێت، ژ پێخەمەت ئاڤاكرنا وی.
چنكو مەسیح ژی ل رازیكرنا خۆ نەگەڕیا، لێ هەروەكو هاتیە نڤیسین: «ئاخفتنێن كرێت ژ لایێ وان ڤە یێن تە كرێت دكەن، كەفتینە سەر من.»
چنكو هەمی تشتێن ژ كەڤن دا هاتینە نڤیسین، ئەو بۆ فێركرنا مە هاتبوونە نڤیسین، دا مە ب رێكا هەدار و هاندانا ژ نڤیسارێن پیرۆز دهێت هیڤی هەبیت.
بلا خودایێ هەدار و هاندانێ وێ چەندێ بدەتە هەوە، كو هوین د ناڤ خۆ دا د رێككەفتی بن، ل گۆر نموونەیا مەسیح عیسای،
دا هوین ب ئێك دل و ئێك دەنگ پەسنا خودێ، بابێ خودانێ مە عیسایێ مەسیح، بكەن.
لەوما ژ بۆ مەزناهیا خودێ ئێكودوو قەبیل بكەن، هەروەكو مەسیحی هوین قەبیل كرین.
ئەز دبێژمە هەوە: مەسیح ژ پێخەمەت دیاركرنا راستگۆیا خودێ، بوو خزمەتكارێ سونەتكریان ، دا ئەو سۆزێن بۆ بابكالان هاتینە دان، دووپات كەت
و مللەتێن دی ژ بەر دلۆڤانیا خودێ پەسنا وی بكەن. هەروەكو هاتیە نڤیسین: «ژ بەر ڤێ چەندێ ئەز دێ د ناڤ مللەتێن نەجوهی دا پەسنا تە كەم، سترانێن پەسنكرنێ بۆ ناڤێ تە بێژم.»
دیسان ئەو دبێژیت: «گەلی نەجوهیان، شادیێ ل گەل مللەتێ خودێ بكەن.»
هەروەسا دبێژیت: «پەسنا خودانی بكەن، هەی هەمی مللەتێن نەجوهی، بلا هەمی نەتەوە پەسنا وی بكەن.»
ئیشایا پێغەمبەر ژی دبێژیت: «تایەك دێ ژ رەها یێشای دەركەڤیت، ئەوێ بۆ حوكمداریێ ل سەر مللەتێن نەجوهی رادبیت، مللەت دێ هیڤیا خۆ ب وی ڤە گرێ دەن.»
ئەڤجا بلا خودایێ هیڤیێ، ب رێكا باوەریێ هەوە تژی هەمی شادی و ئاشتی بكەت، دا هیڤیا هەوە ب هێزا گیانێ پیرۆز د سەردا بڕژیێت.
ئەز ب خۆ ژ هەوە یێ پشتڕاستم خویشك و برایێن من، كو هوین ب خۆ ژ باشیێ دپڕن، ژ هەمی زانینێ د پڕكرینە و دشێن شیرەتان ل ئێكودوو بكەن.
لێ من دەربارەی هندەك خالان، وەكو بیرئینان، ب وێرەكیەكا زێدە بۆ هەوە نڤیسیە، ژ بەر وێ كەرەما بۆ من ژ لایێ خودێ ڤە هاتیە دان،
كو ل نك مللەتێن نەجوهی خزمەتكارێ مەسیح عیسای بم، وەكو كاهن خزمەتا مزگینیا خودێ بكەم، دا یێن نەجوهی پێشكێشیەكێ قەبیلكری بن، ب گیانێ پیرۆز دپیرۆزكری بن.
لەوما ژ دەولەتسەرێ مەسیح عیسای، ئەز ب خزمەتا خۆ یا كو بۆ خودێیە، شانازیێ دبەم.
چنكو ئەز نەوێرم ل سەر تشتەكی بئاخڤم، ژبلی ئەوێن مەسیحی ب رێیا من ئەنجام داین، ژ بۆ بدەستڤەئینانا گوهداریا نەجوهیان بۆ خودێ، ب گۆتن و كریار،
ب هێزا نیشان و مەندەهۆشیان، ب هێزا گیانێ خودێ. هۆسا ژ ئورشەلیمێ تا ئەلیریكومێ ئەز گەڕیام و من مزگینیا مەسیحی ب تەمامی راگەهاند.
ئارمانجا من ئەوە كو ئەز مزگینیێ ل وان جهان بدەم یێن ناڤێ مەسیحی لێ نەهاتیە بهیستن، دا ل سەر بنیاتێ كەسەكێ دی دانای ئاڤا نەكەم.
لێ هەروەكو هاتیە نڤیسین: «ئەوێن بەحسێ وی بۆ نەهاتیە كرن، دێ بینن، ئەوێن نەبهیستی، دێ تێگەهن.»
ژ بەر ڤێ چەندێ، گەلەك جاران ئاستەنگ دكەفتنە رێكا من كو سەرەدانا هەوە بكەم.
لێ نوكە، ژ بەر كو ئێدی جهێ من ل ڤان دەڤەران نەما و ئەڤە چەندین ساڵە ئەز حەز دكەم بهێمە نك هەوە،
دەمێ دچمە ئیسپانیایێ. ئەز هیڤیدارم د رێكا خۆ دا هەوە ببینم و هوین هاریكاریا من بكەن بۆ ژ وێرێ وێڤە، پشتی ئەز دەمەكی چاڤێن خۆ ژ دیتنا هەوە روهن دكەم.
لێ نوكە ئەز یێ دچمە ئورشەلیمێ، دا خزمەتا پیرۆزكریێن وێرێ بكەم.
چنكو باوەردارێن مەقدۆنیا و ئەخایایێ پێخۆش بوو، كو هاریكاریەكێ بدەنە پیرۆزكریێن هەژار، ئەوێن ل ئورشەلیمێ.
وان پێخۆش بوو و ب راستی ژی ئەو قەردارێن وانن، چنكو ئەگەر نەجوهی بووینە هەڤپشك د تشتێن روحانی یێن جوهیان دا، پێدڤیە ژی ئەو ب تشتێن ماددی خزمەتا وان بكەن.
ئەڤجا دەمێ من ئەڤ كارە ب دویماهی ئینا و ئەڤ هاریكاریا هاتیە كۆمكرن گەهاندە دەستێ وان، ئەز دێ د رێكا خۆ دا بۆ ئیسپانیا سەرەدانا هەوە كەم.
ئەز دزانم كو دەمێ ئەز بهێمە نك هەوە، ئەز دێ ب دەولەمەندیا بەرەكەتا مەسیحی ڤە هێم.
گەلی خویشك و برایان، ئەز ب خودانێ مە عیسایێ مەسیح و ب حەزژێكرنا گیانێ پیرۆز هیڤی ژ هەوە دكەم كو هوین ل گەل من بزاڤێ بكەن، ب رێكا نڤێژان بۆ خودێ ژ پێخەمەت من،
كو ئەز ژ وان بێباوەران ئەوێن د یەهودیایێ دا بهێمە قورتالكرن و خزمەتا من بۆ ئورشەلیمێ ژ لایێ پیرۆزكریان ڤە یا قەبیلكری بیت،
داكو ب حەزا خودێ، ئەز ب شادی بهێمە نك هەوە و ل گەل هەوە بێهنا خۆ ڤەدەم.
خودایێ ئاشتیێ ل گەل هەوە هەمیان بیت. ئامین.
ئەز خویشكا مە فیبیێ بۆ هەوە پەسەند دكەم، ئەوا كو خزمەتكارە ل جڤاكا باوەرداران ل كەنخریایێ.
ب ناڤێ خودانی وێ ب شێوەیەكێ وەسا قەبیل بكەن كو ئەو شێوە بۆ پیرۆزكریان یێ گونجای بیت و د هەر تشتەكی دا وێ پێدڤی ب هەوە هەبیت، هاریكاریا وێ بكەن، چنكو هاریكاری بۆ گەلەك كەسان و بۆ من ب خۆ ژی كریە.
سڵاڤان ل پریسكیلایێ و ئەكیلای بكەن، كو د خزمەتا مەسیح عیسای دا هەڤكارێن منن.
ئەوان ژ پێخەمەت ژیانا من سەرێ خۆ دانا بەر مرنێ. نە ب تنێ ئەز، لێ هەمی جڤاكێن باوەردارێن نەجوهی ژی، سوپاسدارێن وانین.
سڵاڤان ل وێ جڤاكا باوەرداران ژی بكەن، ئەوا ل مالا وان كۆم دبیت. سڵاڤان ل خۆشتڤیێ من ئەپاینەتۆسی بكەن، كو ئەو كەسێ ئێكێیە ل هەرێما ئاسیایێ باوەری ب مەسیحی ئینای.
سڵاڤان ل مەریەمێ بكەن، ئەوا ژ بۆ هەوە خۆ گەلەك وەستاندی.
سڵاڤان ل ئەندرونیكۆسی و ل یونیاسێ بكەن، كو مرۆڤێن منن و هەڤالێن من یێن زیندانێ بوون، ئەو د ناڤ هنارتیان دا د ناڤدارن و وان بەری من باوەری ب مەسیحی ئینایە.
سڵاڤان ل ئەمپلیاتۆسی بكەن، كو ژ بەر خودانی خۆشتڤیێ منە.
سڵاڤان ل ئوربانۆسی بكەن، هەڤكارێ مە د خزمەتا مەسیحی دا، هەروەسا ل خۆشتڤیێ من ستاخیسی ژی.
سڵاڤان ل ئەپەلیسی بكەن، ئەوێ باوەریا خۆ ب مەسیحی سەلماندی. سڵاڤان ل خەلكێ مالا ئەریستوپولۆسی بكەن.
سڵاڤان ل مرۆڤێ من هیرودیونی بكەن. سڵاڤان ل خەلكێ مالا ناركیسۆسی بكەن، ئەوێن باوەری ب خودانی هەی.
سڵاڤان ل تریفانایێ و تریفۆسایێ بكەن، ئەوێن خۆ د خزمەتا خودانی دا دوەستینن. سڵاڤان ل پەرسیسا خۆشتڤی بكەن، ئەوا گەلەك خۆ د خزمەتا خودانی دا وەستاندی.
سڵاڤان ل هەلبژارتیێ خودانی روفۆسی بكەن، هەروەسا دایكا وی ژی كو بۆ من وەكو دایكەكێیە.
سڵاڤان ل ئەسینكریتۆس، فلێگون، هێرمیس، پەتروباس، هێرماس و خویشك و برایێن ل گەل وان بكەن.
سڵاڤان ل فیلولوگۆس، یولیا، نیریۆس و خویشكا وی، ل ئۆلومپاس و هەمی پیرۆزكریێن ل گەل وان بكەن.
ب ماچەكا پیرۆز ژ لایێ من ڤە سڵاڤان ل ئێكودوو بكەن. هەمی جڤاكێن باوەرداران كو مەسیح خودانێ وانە سڵاڤان ل هەوە دكەن.
ئەڤجا، گەلی خویشك و برایان، ئەز هیڤی ژ هەوە دكەم كو هوین هشیاری وان مرۆڤان بن، یێن بەروڤاژی وێ فێركرنا هەوە وەرگرتی، ناكۆكی و هەلنگفتنێ دروست دكەن. خۆ ژ وان دویر بئێخن.
چنكو كەسێن هۆسا، خزمەتێ بۆ خودانێ مە مەسیحی ناكەن، لێ بۆ زكێ خۆ دكەن. ب خۆشخۆشك و سالویسیێ دلێ كەسێن سادە دخاپینن.
گوهداریا هەوە گەهشتە گوهێن هەمیان، لەوما ئەز ب هەوە دلخۆشم. لێ من دڤێت هوین ل سەر باشیێ د هشیار بن و ل سەر خرابیێ د بێگونە‍‌ھ بن.
خودایێ ئاشتیێ د دەمەكێ نێزیك دا دێ ئبلیسی د بن پێیێن هەوە ڤە هەڕشینیت. كەرەما خودانێ مە عیسای ل سەر هەوە بیت.
هەڤكارێ من تیمۆتاوس و مرۆڤێن من لوكیۆس، یاسون و سوسیپاترۆس سڵاڤان ل هەوە دكەن.
ئەز تەرتیۆس، یێ ئەڤ نامەیە نڤیسی، وەكو خزمەتكارەكێ خودانی سڵاڤان ل هەوە دكەم.
گایۆسێ مێڤاندارێ من و هەمی جڤاكا باوەرداران سڵاڤان ل هەوە دكەت. خەزنەدارێ باژێڕی ئەراستۆس و برایێ مە كوارتۆس سڵاڤان ل هەوە دكەن.
كەرەما خودانێ مە عیسایێ مەسیح ل سەر هەوە هەمیان بیت. ئامین.
ئەڤجا مەزناهی بۆ وی بیت، یێ دشێت هەوە د باوەریێ دا موكم كەت، ل دویڤ وێ مزگینیا كو ئەز ژ بۆ عیسایێ مەسیح رادگەهینم، ل دویڤ ئاشكراكرنا وێ نهێنیا كو هەر ژ كەڤن دا یا ڤەشارتی بوو،
لێ نوكە ل دویڤ فەرمانا خودایێ هەروهەر هەی، ب رێكا نڤیسارێن پێغەمبەران، ئاشكرا بوو، دا هەمی مللەت باوەریێ پێ بینن و گوهداریا وی بكەن،
بۆ خودایێ ئێكانە كو ب تنێ ئەو یێ ئاقلمەندە، بۆ وی ب رێكا عیسایێ مەسیح، هەروهەر مەزناهی بیت! ئامین.
ژ من، پاولۆس، یێ كو خودێ ب حەزا خۆ گازی كری، دا ببیتە هنارتیێ مەسیح عیسای، ژ برایێ مە سوستانیسی ژی،
بۆ جڤاكا گازیكریێن خودێ ل كورنتۆسێ، ئەو كەسێن خودێ ب مەسیح عیسای پیرۆز كرین و گازی كرین، دا ببنە پیرۆزكریێن خودێ، ل گەل وان هەمیان یێن ل هەر جهەكی هەوارا خۆ دگەهیننە ناڤێ خودانێ مە عیسایێ مەسیح، ئەو خودانێ وان و یێ مەیە:
كەرەم و ئاشتی ژ بابێ مە خودێ و ژ خودان عیسایێ مەسیح ل سەر هەوە بن.
ئەز دەربارەی هەوە هەردەم سوپاسیا خودایێ خۆ دكەم، ژ بەر كەرەما خودێ یا ب مەسیح عیسای بۆ هەوە هاتیە دان،
چنكو ب وی هوین د هەر تشتەكی دا، د هەر جۆرەكێ ئاخفتن و زانینێ دا، دەولەمەند بوون،
شاهدەیی دەربارەی مەسیحی وەسا د ناڤ هەوە دا خۆ ج‍‌ھ بوو،
كو هەوە كێماسی د چ بەهرەیێن روحانی دا نینە، ل ڤی دەمی یێ هوین د چاڤەڕێیا دیاربوونا خودانێ مە عیسایێ مەسیح دا.
ئەو ژی دێ هەوە هەتا دویماهیێ موكم كەت، دا د رۆژا خودانێ مە عیسایێ مەسیح دا چ گازندە ل سەر هەوە نەبن.
دلسۆزە ئەو خودایێ هوین گازی كرینە پشكداربوونێ ل گەل كوڕێ وی، خودانێ مە عیسایێ مەسیح.
ئەڤجا ئەز ب ناڤێ خودانێ مە عیسایێ مەسیح هیڤی ژ هەوە دكەم، گەلی خویشك و برایان، كو هوین هەمی د رێككەفتی بن و دووبەرەكی د ناڤ هەوە دا نەبن، لێ ل سەر هەمان هزر و هەمان مەبەست د ئێكگرتی بن،
چنكو من ژ خەلكێ مالا خلۆیێ زانی، گەلی خویشك و برایان، كو هەڤڕكی د ناڤ هەوە دا هەنە.
مەبەستا من ئەڤەیە: هەر ئێك ژ هەوە تشتەكی دبێژیت. ئێك دبێژیت: «ئەز لایەنگرێ پاولۆسیمە.» ئێكێ دی دبێژیت: «ئەز لایەنگرێ ئەپولۆسیمە،» یان «ئەز لایەنگرێ كیفاسیمە ،» یان ژی «ئەز لایەنگرێ مەسیحیمە.»
ما مەسیح هاتیە پارچەكرن؟ ما پاولۆس ژ بۆ هەوە هاتیە خاچكرن؟ یان ژی هوین ب ناڤێ پاولۆسی هاتینە تافیركرن؟
ئەز سوپاسیا خودێ دكەم، كو من ژ كریسپۆس و گایۆسی پێڤەتر كەس ژ هەوە تافیر نەكریە،
دا كەس نەشێت بێژیت كو هوین ب ناڤێ من یێن هاتینە تافیركرن.
هەروەسا من خەلكێ مالا ستیفاناسی ژی تافیركرینە، ژ ڤان پێڤەتر، بیرا من ناهێت كو من كەسەكێ دی تافیر كربیت.
چنكو مەسیحی بۆ تافیركرنێ ئەز نەهنارتم، لێ بۆ مزگینیدانێ، نە ب شارەزاییا ئاخفتنێ، دا خاچا مەسیحی ژ هێزا خۆ نەهێتە ڤاڵاكرن.
راستە، پەیام دەربارەی خاچێ بۆ وان یێن ژ ناڤ دچن بێئاقلیە، لێ بۆ مە یێن دهێینە قورتالكرن، ئەو هێزا خودێیە.
هەروەكو هاتیە نڤیسین: «ئەز دێ ئاقلمەندیا ئاقلمەندان ژناڤبەم و رێكێ ل ژیریا ژیرمەندان گرم.»
كانێ یێ ئاقلمەند؟ كانێ مامۆستایێ دەستووری؟ كانێ كەسێن ب دەڤ و ئەزمانێن ڤی سەردەمی؟ ما خودێ ئاقلمەندیا جیهانێ نەكرە بێئاقلی؟
بەلێ، چنكو مادەم خودێ ب ئاقلمەندیا خۆ نەهێلا كو جیهان ب ئاقلمەندیا خۆ وی بنیاسیت، جهێ دلخۆشیا خودێ بوو كو وان یێن باوەریێ دئینن قورتال بكەت، ب وێ مزگینیێ یا خەلكەكی ددیت كو بێئاقلیە.
جوهی نیشانان دخوازن و یونانی بزاڤێ بۆ ئاقلمەندیێ دكەن،
لێ ئەم مەسیحێ هاتیە خاچكرن ددەینە نیاسین، ئەڤە ژی بۆ جوهیان ئەگەرێ هەلنگفتنێیە و بۆ مللەتێن نەجوهی بێئاقلیە،
لێ بۆ وان یێن خودێ گازی كرین، چ جوهی بن یان ژی یونانی، ئەو مەسیح هێزا خودێ و ئاقلمەندیا خودێیە.
چنكو خۆ كریارێن خودێ ژی یێن بۆ مرۆڤان وەكو بێئاقلی دهێنە دیتن، ئەو د سەر ئاقلمەندیا مرۆڤان رانە، ئەوا مرۆڤ دبینن كو لاوازیە ل نك خودێ، ئەو ژی د سەر هێزا مرۆڤان رایە.
ئەڤجا هزرا خۆ بكەن، گەلی خویشك و برایان، هوین د چەوا بوون، دەمێ خودێ گازی هەوە كری، گەلەك ژ هەوە ل گۆر جیهانێ د ئاقلمەند نەبوون، گەلەك ژ هەوە د هێزدار نەبوون و گەلەك ژ هەوە ژ مالێن مەزن نەبوون.
لێ خودێ ئەو تشت هەلبژارتن، یێن جیهان ب بێئاقل دزانیت، دا ئاقلمەندان شەرمزار بكەت، وی ئەو تشت هەلبژارتن، یێن جیهان ب لاواز دزانیت، دا هێزداران شەرمزار بكەت،
وی ئەو تشت یێن جیهان دبینیت نزم و یێن بێ رێز، تا یێن نەیی ژی هەلبژارتن، دا تشتێن هەیی پویچ بكەت.
داكو ل نك خودێ چ خوین و گۆشت شانازیێ ب خۆ نەبەن.
هەر ئەوە ئەگەرێ ئێكبوونا هەوە ل گەل مەسیح عیسای، ئەو مەسیحێ بۆ مە بوویە ئاقلمەندی ژ نك خودێ، راستداری ، پیرۆزی و رزگاری،
دا هەروەكو هاتیە نڤیسین: «ئەوێ شانازیێ دبەت، بلا شانازیێ ب خودانی ببەت.»
ئەز ژی، گەلی خویشك و برایان، دەمێ هاتیمە نك هەوە و نهێنیا خودێ بۆ هەوە رادگەهاند، من ب رەهوانیا ئاخفتنێ یان ئاقلمەندیێ نەدكر.
چنكو من بڕیار دا، دەمێ ئەز د ناڤ هەوە دا، فێركرنێ ل دۆر تشتەكێ دی نەكەم ، ژبلی عیسایێ مەسیح، ئەو ژی ب خاچدایی.
ل نك هەوە، ئەز یێ لاواز و د ترس و لەرزەكا مەزن دا بووم،
ئاخفتن و مزگینیدانا من نە ب ئاخفتنێن ئاقلمەندیا مرۆڤكانی یێن قاییلكەر بوو، لێ ب نیشانێن هێزا گیانێ پیرۆز بوو،
دا باوەریا هەوە نە ل سەر ئاقلمەندیا مرۆڤان یا ئاڤاكری بیت، لێ ل سەر هێزا خودێ بیت.
لێ د ناڤ یێن پێگەهشتی دا، ئەم ئاقلمەندیێ دبێژین، هەر چەندە ئەڤ ئاقلمەندیە نە یا ڤێ جیهانێیە، نە ژی یا سەرۆكێن ڤێ جیهانێیە، ئەو سەرۆكێن ژ ناڤ دچن.
لێ یا خودێیە ئەو ئاقلمەندیا نهێنی و ڤەشارتی یا ئەم دبێژین، ئەوا خودێ بەری دەستپێكا ئافراندنێ ژ بۆ مەزناهیا مە دەستنیشانكری،
ئەوا چ سەرۆكێن ڤێ جیهانێ تێنەگەهشتین، چنكو ئەگەر ئەو تێگەهشتبان، ئەوان خودانێ مەزناهیێ خاچ نەددا.
لێ هەروەكو هاتیە نڤیسین: «ئەو تشتێن چ چاڤان نەدیتین و چ گوهان نەبهیستین و نەهاتینە سەر هزرا چ مرۆڤان، ئەوێن خودێ ژ بۆ حەزژێكەرێن خۆ ئامادە كرین…»
بۆ مە خودێ ب گیانێ خۆ ئەو دیار كرن. چنكو گیان لێگەڕیانێ و ڤەكۆلینێ بۆ هەمی تشتان دكەت، خۆ كویراتیا ناخێ خودێ ژی.
ما كی تشتێن مرۆڤی دزانیت، ژبلی گیانێ مرۆڤی، ئەوێ د مرۆڤی دا؟ هۆسا ژی تشتێن خودێ كەس نزانیت، ژبلی گیانێ خودێ.
ئەڤجا مە نە گیانێ جیهانێ، لێ گیانێ كو ژ خودێ دهێت، یێ وەرگرتی، دا وان تشتان بزانین یێن خودێ ژ كەرەما خۆ داینە مە.
ئەم وان تشتان ژی دبێژین، نە ب پەیڤێن كو ئەم ژ ئاقلمەندیەكا مرۆڤكانی فێر بووین، لێ ب پەیڤێن كو ئەم ژ گیانێ پیرۆز فێر بووین، هۆسا ئەم تشتێن روحانی بۆ كەسێن روحانی شڕۆڤە دكەین.
لێ مرۆڤێ سرۆشتی ، تشتێن گیانێ خودێ قەبیل ناكەت، چنكو ئەو تشت بۆ وی بێئاقلینە و نەشێت تێبگەهیت، ژ بەر كو ب رێكا روحانی دهێنە هەلسەنگاندن.
مرۆڤێ روحانی هەمی تشتان دهەلسەنگینیت و ئەو ژ لایێ كەسێ ڤە ناهێتە هەلسەنگاندن.
هەروەكو هاتیە نڤیسین: «ما كێ هزرێن خودانی زانینە، دا ئەو خودانی فێر بكەت؟» لێ مە هزرێن مەسیحی یێن هەین.
ئەڤجا ئەز، گەلی خویشك و برایان، نەشیام ل گەل هەوە وەكو مرۆڤێن روحانی بئاخڤم، لێ وەكو مرۆڤێن لەشكانی ، وەكو زاڕۆك د باوەریا مەسیحی دا.
من شیر دایە هەوە، نە خوارن، چنكو هێشتا هوین نەدشیان خوارنێ بخۆن، هەروەسا نوكە ژی هوین نەشێن،
چنكو هێشتا هوین لەشكانینە. مادەم د ناڤ هەوە دا چاڤپێنەڕابوون و هەڤڕكی هەنە، ما نە هوین لەشكانینە و وەكو مرۆڤێن سرۆشتی دژین؟
دەمێ ئێك دبێژیت: «ئەز لایەنگرێ پاولۆسیمە» و ئێكێ دی دبێژیت: «ئەز لایەنگرێ ئەپولۆسیمە»، ما نە هنگی هوین وەكو مرۆڤێن سرۆشتینە؟
ئەڤجا ئەپولۆس كیە؟ پاولۆس كیە؟ ئەو خزمەتكارن، هەوە ل سەر دەستێ وان باوەری ئینایە، هەروەكو خودانی ئەڤ ئەركە دایە هەر ئێك ژ وان.
من چاند و ئەپولۆسی ئاڤدا؛ لێ خودێ وەرار دایێ.
ئەڤجا نە یێ چاندی یێ گرنگە و نە ژی یێ ئاڤدای، لێ ئەوێ وەرارێ ددەت یێ گرنگە، كو ئەو خودێیە.
یێ چاندی و یێ ئاڤدای وەكو ئێكن، هەر ئێك ژ وان دێ ل دویڤ رەنجا خۆ كرێیا خۆ وەرگریت.
چنكو ئەم پێكڤە بۆ خودێ كار دكەین، هوین ژی زەڤیا خودێنە و ئاڤاهیێ خودێنە.
ل دویڤ وێ كەرەمێ یا خودێ دایە من، وەكو هۆستایەكێ شارەزا من بنیاتەك دانا و ئێكێ دی ل سەر ئاڤا دكەت. ئەڤجا بلا هەر ئێك یێ هشیار بیت، كا چەوا ل سەر ئاڤا دكەت،
چنكو كەس نەشێت بنیاتەكێ دی دانیت، ژبلی وی یێ هاتیە دانان، كو ئەو ژی عیسایێ مەسیحە.
ئەڤجا ئەگەر ئێك ل سەر ڤی بنیاتی زێڕی، زیڤی، بەرێن بهاگران، داری، ریسیان یان كایێ ئاڤا بكەت،
كارێ هەر كەسەكی دێ بەرچاڤ بیت. ئەو رۆژ دێ وی ئاشكرا كەت، چنكو ئەو دێ ل گەل ئاگری دیار بیت، ئاگر ژی دێ كارێ هەر كەسەكی تاقی كەت، كا یێ چەوایە.
ئەگەر كارێ ئێكی بمینیت، یێ كو ل سەر وی بنیاتی ئاڤا كری، ئەو دێ خەلاتەكی وەرگریت.
ئەگەر كارێ ئێكی بسوژیت، دێ زیانێ كەت. ئەو ب خۆ دێ قورتال بیت، لێ وەكو وی یێ د ئاگری را دەرباز بووی.
ما هوین نزانن، كو هوین پەرستگەها خودێنە و گیانێ خودێ د هەوە دا یێ ئاكنجیە؟
ئەگەر كەسەك پەرستگەها خودێ وێران بكەت، خودێ ژی دێ وی وێران كەت، چنكو پەرستگەها خودێ یا پیرۆزە، ئەو پەرستگە‍‌ھ ژی هوینن.
بلا كەس خۆ نەخاپینیت. ئەگەر ئێك ژ هەوە هزر دكەت، كو ئەو ل دویڤ پیڤەرێن ڤێ جیهانێ ئاقلمەندە، بلا بێئاقل ببیت، دا ببیتە ئاقلمەند.
چنكو ئاقلمەندیا ڤێ جیهانێ ل نك خودێ بێئاقلیە. هەروەكو هاتیە نڤیسین: «ئەو ئاقلمەندان د فێلبازیێن وان دا دگریت.»
دیسان هاتیە نڤیسین: «خودان هزرێن ئاقلمەندان دزانیت، كو د خرشن.»
لەوما بلا كەس شانازیێ ب مرۆڤان نەبەت، چنكو هەمی تشت یێن هەوەنە:
پاولۆس بیت، یان ئەپولۆس، یان كیفاس ، یان جیهان، یان ژیان، یان مرن، یان تشتێن ڤی دەمی، یان ژی یێن پاشەڕۆژێ بن، هەمی تشت یێن هەوەنە
و هوین یێن مەسیحینە و مەسیح ژی یێ خودێیە.
بلا مرۆڤ مە ب ڤی شێوەی ببینن كو ئەم خزمەتكارێن مەسیحی و بریكارێن نهێنیێن خودێینە.
یا ژ بریكاران دهێتە خواستن ژی ئەوە كو مرۆڤێن دلسۆز بن.
بۆ من نە تشتەكێ گرنگە كو ئەز ژ لایێ هەوە ڤە یان ژ لایێ دادگەهەكا مرۆڤكانی ڤە بهێمە دادكرن، لێ ئەز ب خۆ ژی خۆ داد ناكەم.
وژدانا من یا تەنایە، لێ ئەڤ چەندە من بێگونە‍‌ھ دەرنائێخیت، چنكو دادوەرێ من خودانە.
لەوما پێشوەخت دادكرنێ ل سەر تشتەكی نەكەن، تاكو خودان بهێت، ئەوێ دێ تشتێن د تاریاتیێ دا ڤەشارتی ئێخیتە بەر رۆناهی و نیازێن دلان ئاشكرا كەت. هنگی پەسنكرنا هەر كەسەكی دێ ژ لایێ خودێ ڤە بیت.
من ژ بۆ باشیا هەوە، گەلی خویشك و برایان، ئەڤ تشتە ل سەر خۆ و ل سەر ئەپولۆسی وەكو نموونە ئینان، دا هوین ژ مە فێری ڤێ چەندێ ببن: «ژ یا هاتیە نڤیسین دەرنەكەڤن» و هۆسا چ كەس ژ هەوە خۆ ب ئێكی ل دژی ئێكێ دی مەزن نەكەت.
كی تە ژ ئێكێ دی جودا دكەت؟ ما تە چ هەیە كو تە ژ خودێ وەرنەگرتی؟ مادەم تە وەرگرتیە، پا بۆچی شانازیێ دبەی هەروەكو تە وەرنەگرتبیت؟
هوین نوكە یێن تێر بووین! نوكە یێن دەولەمەند بووین! بێی مە یێ پاشایەتیێ دكەن! خوزی هوین ب راستی ببانە پاشا، دا مە ژی ل گەل هەوە پاشایەتی كربا!
چنكو ئەز هزر دكەم كو خودێ ئەم، ئەوێن هنارتی، وەكو پاشبەند یێن نیشاداین ، وەكو كەسێن بڕیارا كوشتنێ ل سەر دەركەفتی، چنكو ئەم بۆ هەمی گەردوونێ، ئانكو بۆ فریشتەیان و بۆ مرۆڤان ژی بووینە تەماشە.
ئەم ژ بەر مەسیحی د بێئاقلین، لێ هوین د ئێكبوونا ل گەل مەسیحی دا د ئاقلمەندن. ئەم د بێهێزین، لێ هوین بهێزن. هوین د بەڕێزن، لێ ئەم د بێڕێزین.
تا نوكە ئەم د برسی و تێهنی و رویسین، دهێینە قوتان و د بێمالین.
ب دەستێن خۆ كار دكەین و رەنجێ دكێشین. دەمێ ئاخفتنێن كرێت دبێژنە مە، ئەم بەرەكەتێ بۆ دخوازین. دەمێ مە تەپەسەر دكەن، ئەم بێهنا خۆ فرە‍‌ھ دكەین.
دەمێ بوهتانان ل مە دكەن، ئەم ب نەرمی بەرسڤێ ددەین. تا نوكە ئەم وەكو گلێشێ جیهانێ، قڕێژا هەمی تشتان، یێن لێ هاتین.
ئەز ڤان تشتان نانڤیسم دا هەوە شەرمزار بكەم، لێ دا وەكو زاڕۆكێن خۆ یێن خۆشتڤی، هەوە ئاگەهدار بكەم.
چنكو ئەگەر هەوە د باوەریا مەسیحی دا دە‍‌ھ هزار كەس ژی هەبن هەوە پەروەردە بكەن، لێ هەوە بابەك ب تنێ هەیە، ئەز ب مزگینیێ د باوەریا مەسیح عیسای دا بوومە بابێ هەوە.
لەوما هیڤی ژ هەوە دكەم، هوین چاڤ ل من بكەن.
ژ بەر ڤێ چەندێ من تیمۆتاوس هنارتە نك هەوە، كو ئەو زاڕۆكێ منێ خۆشتڤی و دلسۆزە د ئێكبوونا ل گەل خودانی دا، ئەو دێ رێكێن من د باوەریا مەسیح عیسای دا ئینیتە بیرا هەوە، كا چەوا ئەز ل هەر جڤاكەكا باوەرداران، ل هەر جهەكی، فێركرنێ دكەم.
هندەك ژ هەوە دفنبلند بوون، هەروەكو ئەو هزر دكەن ئەز ناهێمە نك هەوە،
لێ ئەگەر خودان حەز بكەت، ئەز دێ د دەمەكێ نێزیك دا هێمە نك هەوە، هنگی نە ب تنێ ئەز دێ ئاخفتنێن وان دفنبلندبوویان زانم، لێ هێزا وان ژی،
چنكو پاشایەتیا خودێ نە ب ئاخفتنێیە، لێ ب هێزێیە.
هەوە چ دڤێت؟ ئەز ب دارێ قوتانێ بهێمە نك هەوە، یان ژی ب حەزژێكرن و گیانێ دلنەرمیێ؟
جهێ داخێیە كو دهێتە گۆتن دەهمەنپیسی د ناڤ هەوە دا هەیە، دەهمەنپیسیەكا وەسا كو د ناڤ پووتپەرێسان ژی دا نینە: زەڵامەك ژ هەوە دەهمەنپیسیێ ل گەل ژنبابا خۆ دكەت!
ئەڤجا هوین دفنبلند بووینە! ما نە یا فەر بوو هەوە شینی دانابا؟ بلا ئەوێ ئەڤ كریارە كری ژ ناڤ هەوە بهێتە دەرئێخستن.
هەر چەندە ئەز ب لەشی یێ ئامادە نینم، لێ ب گیانی ئەز یێ ئامادەمە، ئەڤجا هەروەكو ئەز یێ ئامادە، من حوكم دانا سەر وی كەسی یێ وە كری:
ب ناڤێ خودانێ مە عیسای، دەمێ هوین د كۆمبوونێ دا بن، گیانێ من ژی ل گەل هەوە یێ ئامادە بیت، ل گەل هێزا خودانێ مە عیسای،
ڤی كەسێ هۆسا رادەستی ئبلیسی بكەن، بۆ وێرانكرنا لەشێ وی، دا د رۆژا خودانی دا گیانێ وی قورتال ببیت.
شانازی بخۆبرنا هەوە تشتەكێ نەباشە! ما هوین نزانن كو پیچەكا هەڤیرترشی، هەمی هەڤیری ترش دكەت؟
خۆ ژ هەڤیرترشێ كەڤن پاقژ بكەن، دا هوین ببنە هەڤیرەكێ نوی یێ بێ هەڤیرترش، كا چەوا ب راستی هوین د وەسانە. چنكو بەرخێ مە یێ جەژنا دەربازبوونێ ، كو مەسیحە، یێ هاتیە سەرژێكرن.
ئەڤجا دا جەژنێ بكەین، نە ب هەڤیرترشێ كەڤن، هەڤیرترشێ بەدكاری و خرابیێ، لێ ب نانێ شكەڤا یێ دلپاكی و راستیێ.
من د نامەیا خۆ دا بۆ هەوە نڤیسی بوو، كو هوین تێكهەلیا دەهمەنپیسان نەكەن،
ب ئێكجاری مەبەستا من پێ دەهمەنپیسێن ڤێ جیهانێ نەبوو، یان چاڤبرس، یان تالانكەر، یان پووتپەرێس، ئەگەر مەبەستا من ئەڤە با، دڤیا هوین ژ ڤێ جیهانێ دەركەفتبان!
لێ من بۆ هەوە نڤیسی كو ئەگەر كەسەك وەكو برا دهێتە نیاسین، لێ دەهمەنپیسە، یان چاڤبرسیە، یان پووتپەرێسە، یان ئەزمانڕەشە، یان سەرخۆشە یان تالانكەرە، تێكهەلیا وی نەكەن، خۆ خوارنێ ژی ل گەل ئێكێ هۆسا نەخۆن.
ما چ كارێ من ب دادكرنا یێن ژ دەرڤە هەیە؟ ما نە پێدڤیە دادكرنا یێن د ژۆرڤە، هوین بكەن؟
دادكرنا یێن ژ دەرڤە، خودێ دێ كەت. «مرۆڤێ خراب ژ ناڤ خۆ دەربئێخن.»
ما ئێك ژ هەوە، یێ دۆزەك ل دژی ئێكێ دی هەی، دوێریت بۆ دادكرنێ بچیتە نك گونەهكاران، نە نك پیرۆزكریان؟
ما هوین نزانن كو پیرۆزكری دێ دادكرنا جیهانێ كەن؟ ئەڤجا ئەگەر جیهان ب دەستێ هەوە بهێتە دادكرن، ما هوین بكێر ناهێن دادكرنێ ل سەر تشتێن بچویك ژی بكەن؟
ما هوین نزانن ئەم دێ دادكرنا فریشتەیان كەین؟ پا چەوا ئەم دادكرنێ ل سەر دۆزێن ڤێ ژیانێ ناكەین؟
ئەڤجا ئەگەر هەوە دۆز ل سەر كاروبارێن ڤێ ژیانێ هەبن، ما هوین دێ وان كەنە دادوەر یێن ژ لایێ جڤاكا باوەرداران ڤە ب كێم دهێنە دیتن؟
ئەز ڤێ دبێژم دا هوین شەرم ژ خۆ بكەن. ما ئێكێ ئاقلمەند د ناڤ هەوە دا نینە، بشێت دادڤانیێ د ناڤبەرا برایێن خۆ دا بكەت؟
لێ برا ل دژی برای دۆزەكێ ڤەدكەت و د سەر هندێ را ل نك بێباوەران!
ب راستی دۆزڤەكرنا هەوە ل دژی ئێكودوو، بۆ هەوە دۆڕاندنەكا رەهایە. ما باشتر نەبوو هەوە ستەم ل سەر خۆ قەبیل كربا؟ ما باشتر نەبوو هەوە شەلاندن ل سەر خۆ قەبیل كربا؟
لێ هوین ب خۆ ستەمێ و شەلاندنێ دكەن و د سەر هندێ را ل خویشك و برایێن خۆ.
ما هوین نزانن كو كەسێن خرابكار نابنە میراتگرێن پاشایەتیا خودێ؟ نەهێنە خاپاندن: بێنامویس، پووتپەرێس ، دەهمەنپیس، ڵۆتی، نێرباز،
دز، چاڤبرسی، سەرخۆش، ئەزمانڕەش یان ژی تالانكەر، نابنە میراتگرێن پاشایەتیا خودێ.
هندەك ژ هەوە ژی د وەسا بوون. لێ هوین ب ناڤێ خودان عیسایێ مەسیح و ب گیانێ خودایێ مە هاتنە شویشتن، هوین هاتنە پیرۆزكرن، هوین هاتنە بێگونەهكرن.
دبێژن: «هەمی تشت بۆ من د حەلالن»، لێ هەمی تشت ب مفا نینن. «هەمی تشت بۆ من د حەلالن»، لێ ئەز ناهێلم چ تشت ل سەر من زاڵ ببیت.
دبێژن: «خوارن بۆ زكیە، زك ژی بۆ خوارنێیە» و خودێ دێ هەردوویان ژ ناڤ بەت. لێ لەش نە بۆ دەهمەنپیسیێیە، لەش بۆ خودانیە و خودان ژی بۆ لەشیە.
خودێ، خودان ژ ناڤ مریان راكر و دێ مە ژی ب هێزا خۆ راكەت.
ما هوین نزانن، كو لەشێن هەوە ئەندامێن لەشێ مەسیحینە؟ ما ئەز ئەندامێن مەسیحی ببەم و بكەمە ئەندامێن لەشفرۆشەكێ؟ حاشا!
ما هوین نزانن یێ ب لەشفرۆشەكێ ڤە بنویسیێت، ل گەل وێ دبیتە ئێك لەش؟ نڤیسار دبێژیت: «هەردوو دێ بنە ئێك لەش.»
لێ یێ ب خودانی ڤە بنویسیێت، ل گەل وی دبیتە گیانەك.
ژ دەهمەنپیسیێ بڕەڤن! هەر گونەهەكا مرۆڤ بكەت، ژ دەرڤەی لەشیە، لێ یێ دەهمەنپیسیێ دكەت، گونەهێ د دەرهەقا لەشێ خۆ دا دكەت.
یان ژی ما هوین نزانن كو لەشێ هەوە پەرستگەها گیانێ پیرۆزە، ئەوێ كو د ناڤ هەوە دایە، ئەوێ هەوە ژ خودێ وەرگرتی؟ هوین نە یێن خۆنە،
چنكو هوین ب بهایەكێ گران یێن هاتینە كڕین. ژ بەر ڤێ چەندێ وە بكەن كو ب لەشێ هەوە مەزناهیا خودێ دیار ببیت.
نوكە دەربارەی وان تشتێن هەوە بۆ من نڤیسین: «بۆ زەڵامی باشە، دەست نەكەتە ژنكەكێ.»
لێ دا دەهمەنپیسی نەبیت، بلا هەر زەڵامەكی پەیوەندی ل گەل ژنا خۆ و هەر ژنەكێ پەیوەندی ل گەل مێرێ خۆ هەبیت.
پێدڤیە مێر مافێ ژنا خۆ بدەتێ، هەروەسا ژن ژی مافێ مێرێ خۆ بدەتێ.
ژنێ دەستهەلات ل سەر لەشێ خۆ نینە، لێ مێری یا هەی. هەروەسا مێری ژی دەستهەلات ل سەر لەشێ خۆ نینە، لێ ژنێ یا هەی.
خۆ ژ ئێكودوو بێبەهر نەكەن، ب تنێ ئەگەر ب رێككەفتنا هەردوویان بیت بۆ دەمەكێ دیاركری، دا هوین وی دەمی بۆ نڤێژكرنێ تەرخان بكەن. پشتی هنگی بزڤڕنەڤە ژیانا هەڤژینیێ، دا ژ بەر خۆنەڕاگرتنا هەوە، ئبلیس هەوە تاقی نەكەت.
ئەز ڤێ چەندێ وەكو دەستویری، نە وەكو فەرمان، دبێژم.
ئەز حەز دكەم هەمی كەس وەكو من بن، لێ هەر ئێكی دیاریا خۆ یا تایبەت ژ خودێ هەیە، یا ئێكی ب ڤی شێوەیە و یا ئێكێ دی ب شێوەیەكێ دیە.
نوكە بۆ بێ هەڤژین و بیژنان ئەز دبێژم: بۆ وان باشە ئەگەر ئەو وەكو من بمینن.
لێ ئەگەر نەشێن خۆ بگرن، بلا هەڤژینیێ پێك بینن، چنكو هەڤژینیكرن باشترە ژ گڕگرتنێ.
بۆ یێن ب هەڤژین ژی، ئەز فەرمانێ ل وان دكەم، نە ئەز لێ خودان، كو ژن مێرێ خۆ نەهێلیت ،
ئەگەر وێ مێرێ خۆ هێلا ژی، بلا بێ مێر بمینیت یان ژی ل گەل مێرێ خۆ ئاشت ببیتەڤە. زەڵام ژی بلا ژنا خۆ بەرنەدەت.
لێ بۆ یێن دی ئەز دبێژم، نەكو خودان دبێژیت: ئەگەر برایەكی ژنەكا نەباوەردار هەبیت و ژن یا رازی بیت ل گەل وی بژیت، بلا وێ بەرنەدەت.
ئەگەر ژنەكێ ژی مێرەكێ نەباوەردار هەبیت و مێر یێ رازی بیت ل گەل وێ بژیت، بلا وی نەهێلیت،
چنكو مێرێ نەباوەردار ب ژنا خۆ پیرۆز دبیت، ژنا نەباوەردار ژی ب مێرێ خۆ یێ باوەردار پیرۆز دبیت، ئەگەر هۆسا نەبا دا زاڕۆكێن هەوە د هەڕمی بن، لێ ب راستی ئەو د پیرۆزن.
لێ ئەگەر نەباوەردار خۆ جودا بكەت، بلا جودا ببیت. خویشك یان برا د رەوشەكا هۆسا دا نە د گرێداینە. خودێ بۆ ئاشتیێ یێ گازی هەوە كری.
تۆ چ دزانی، هەی ژنێ، بەلكو تۆ مێرێ خۆ قورتال بكەی؟ یان تۆ چ دزانی، هەی زەڵام، بەلكو تۆ ژنا خۆ قورتال بكەی؟
سەرەڕای ڤێ چەندێ، هەر ئێك ل دویڤ وێ بەهرێ یا خودانی بۆ وی دانای، هەروەكو خودێ گازی هەر ئێكی كری، بلا وەسا بژیت. ئەز ڤێ فەرمانێ ل هەمی جڤاكێن باوەرداران دكەم.
ئەگەر ئێكێ سونەتكری هاتە گازیكرن، بلا سونەتبوونا خۆ نە گوهۆڕیت. ئەگەر ئێكێ سونەتنەكری ژی هاتە گازیكرن، بلا خۆ سونەت نەكەت.
سونەتبوون نە یا گرنگە و سونەتنەبوون ژی نە یا گرنگە، لێ یا گرنگ بجهئینانا فەرمانێن خودێیە.
بلا هەر كەسەك د وێ رەوشێ دا بمینیت، یا تێدا هاتیە گازیكرن.
ئەگەر دەمێ تۆ هاتیە گازیكرن، تۆ بەنی بووی، خەمێ نەخۆ. لێ ئەگەر تۆ بشێی ئازاد ببی، دەرفەتێ ژ دەست خۆ نەكە.
چنكو ئەو بەنیێ كو ژ لایێ خودانی ڤە هاتیە گازیكرن، ئەو ئازادكریێ خودانیە. هەروەسا یێ ئازاد ژی، ئەوێ هاتیە گازیكرن، ئەو بەنیێ مەسیحیە.
هوین ب بهایەكێ گران هاتنە كڕین، ئەڤجا نەبنە بەنیێن مرۆڤان.
هەر ئێك ژ هەوە، گەلی خویشك و برایان، د چ رەوشێ دا هاتیە گازیكرن، بلا د وێ رەوشێ دا ل گەل خودێ بمینیت.
نوكە دەربارەی كوڕ و كچان ، من چ فەرمان ژ نك خودانی نینن، لێ ئەز، وەكو ئێكێ خودانی دلۆڤانی پێ بری، داكو جهێ باوەریێ بیت، دێ بۆچوونەكێ بێژم.
ژ بەر تەنگاڤیا ڤی دەمی، ئەز دبینم كو بۆ مرۆڤی باشە د رەوشا خۆ دا بمینیت.
ئەگەر تۆ یێ ب ژن بی، داخوازا جودابوونێ نەكە. ئەگەر تۆ یێ بێ ژن بی، داخوازا ژنێ نەكە.
لێ ئەگەر تۆ ژنێ بینی، تۆ گونەهێ ناكەی. ئەگەر كچەك شوی بكەت، گونەهێ ناكەت، لێ وان دێ د ڤێ ژیانێ دا تەنگاڤی هەبن، من ژی دڤێت هەوە ژێ بپارێزم.
مەبەستا من ئەوە، گەلی خویشك و برایان، كو دەم یێ كورت بووی، دا ژ نوكە پێڤە یێن ژن هەی، د وەسا بن هەروەكو وان ژن نەی،
ئەوێن شینیێ دكەن، د وەسا بن هەروەكو ئەو شینیێ نەكەن، ئەوێن شادیێ دكەن، د وەسا بن هەروەكو ئەو شادیێ نەكەن، ئەوێن دكڕن، د وەسا بن هەروەكو د بێ ملك،
ئەوێن ڤێ جیهانێ ب كار دئینن، پێڤە نەهێنە گرێدان، چنكو ئەڤ شێوازێ ژیانێ ل سەر ڤێ جیهانێ بەرەڤ نەمانێ دچیت.
من دڤێت هوین د بێ خەم بن. ئەوێ ژن نەئینای، پویتەی ددەتە كاروبارێن خودانی، كا دێ چەوا خودانی رازی كەت،
لێ یێ ژن ئینای، پویتەی ددەتە كاروبارێن جیهانێ، كا دێ چەوا ژنا خۆ رازی كەت،
هۆسا ئەو ژ دوو لایان ڤە دهێتە كێشان. ئەڤجا ژنا بێ مێر و كچك، پویتەی ددەنە كاروبارێن خودانی، كا دێ چەوا، ژ لایێ لەشی و گیانی ڤە، د پیرۆز بن. لێ ژنا ب مێر، پویتەی ددەتە كاروبارێن جیهانێ، كا دێ چەوا مێرێ خۆ رازی كەت.
ئەز بۆ باشیا هەوە ڤێ دبێژم، نەكو دا دەست و پێیێن هەوە گرێ دەم، لێ ژ پێخەمەت رێكوپێكی و خۆتەرخانكرنێیە بۆ خودانی، بێی كو هزرێن هەوە بەربەڵاڤ ببن.
لێ ئەگەر ئێك هزر دكەت كو ئەو باشیێ د دەرهەقا كچا خۆ دا ناكەت، ئەگەر كچا وی بەرەڤ قەیرەبوونێ ڤە دچیت و پێدڤیە ئەو شوی بكەت، بلا وێ بكەت یا وی دڤێت، ئەو گونەهێ ناكەت، بلا ئەو كچ و دەزگرێ خۆ هەڤژینیێ پێك بینن.
لێ ئەگەر ئێك ژ دلێ خۆ یێ قاییل بیت و یێ نەچار نەبیت، لێ وی دەستهەلات ل سەر حەزا خۆ هەبیت، ئەو بڕیارا وی ژ دلێ خۆ دای بۆ هندێ بیت كو كچا خۆ نەدەتە شوی، هنگی ئەوی باش كر.
ئەڤجا یێ كچا خۆ بدەتە شوی، ئەوی باش كر و یێ نەدەتە شوی، ئەوی باشتر كر.
ژن گرێدای مێرێ خۆیە، هندی یێ ساخ بیت. لێ ئەگەر مێر مر ، ئەو یا ئازادە شوی ب وی بكەت یێ وێ دڤێت، ب مەرجەكی كو وی كەسی باوەری ب خودانی هەبیت.
لێ ئەو ژن دێ یا بەختەوەرتر بیت، ئەگەر وەكو خۆ بمینیت، ئەڤە بۆچوونا منە و ئەز هزر دكەم گیانێ خودێ من ژی بڕێڤە دبەت.
نوكە ژی دەربارەی قوربانێن بۆ پووتان دهێنە پێشكێشكرن: ئەم دزانین، كو مە هەمیان زانین هەیە. زانین دفنبلندیێ پەیدا دكەت، لێ حەزژێكرن ئاڤا دكەت.
ئەگەر ئێك هزر بكەت، كو ئەو تشتەكی دزانیت، هێشتا ئەو چ نزانیت، هەروەكو پێدڤیە ئەو بزانیت.
لێ ئەگەر ئێك حەز ژ خودێ دكەت، ئەو ل نك خودێ یێ نیاسە.
ئەڤجا سەبارەت خوارنا قوربانێن بۆ پووتان دهێنە پێشكێشكرن: ئەم دزانین پووتان هەبوونا خۆ یا راستەقینە ل جیهانێ نینە و ژبلی ئێكی چ خودێیێن دی نینن.
خۆ ئەگەر هندەك هەبن ب خودێ بهێنە بناڤكرن ژی، چ ل ئەردی و چ ل ئەسمانی، وەك چەوا گەلەك خوداوەند و گەلەك خودان ژی هەنە،
لێ ژ بۆ مە ب تنێ خودێیەك هەیە: باب، سەرەكانیا هەمی تشتانە و ئەم ژی بۆ وی یێن هەین. مە ب تنێ خودانەك ژی هەیە: عیسایێ مەسیح، ئەوێ هەمی تشت ب وی پەیدا بووینە و ئەم ژی ب وی یێن هەین.
لێ ئەڤ زانینە ل نك هەمی كەسان نینە. هندەك هیبووینە پووتان و هەتا نوكە گۆشتی دخۆن هەروەكو ئەو گۆشت بۆ پووتان هاتبیتە پێشكێشكرن، ئەڤجا وژدانا وان یا لاواز دهەڕمیت.
خوارن مە نێزیكی خودێ ناكەت. ئەگەر ئەم نەخۆین چ ژ مە كێم نابیت، ئەگەر بخۆین ژی چ زێدە نابیت.
لێ د هشیار بن، دا ئەڤ ئازادیا هەوە نەبیتە ئەگەرێ هەلنگفتنا لاوازان.
ئەگەر تۆ خودانێ وێ زانینێی و كەسەكێ وژدانا وی یا لاواز تە ببینیت كو تۆ ل پەرستگەها پووتان ل سەر سفرێ یێ روینشتی، ما ئەو ناهێتە هاندان كو ژ قوربانێن بۆ پووتان دهێنە پێشكێشكرن بخۆت؟
ئەڤجا ب رێكا زانینا تە، ئەوێ لاواز، ئەو برایێ كو مەسیح ژ بەر وی مری، دهێتە وێرانكرن.
هۆسا، دەمێ هوین د دەرهەقا برایان دا گونەهێ دكەن و وژدانا وان یا لاواز بریندار دكەن، هوین د دەرهەقا مەسیحی دا گونەهێ دكەن.
لەوما ئەگەر خوارن ببیتە ئەگەرێ هەلنگفتنا برایێ من، ئەز چ جاران گۆشتی ناخۆم، دا ئەز برایێ خۆ نەهەلنگێڤم.
ما ئەز نە یێ ئازادم؟ ما ئەز نە هنارتیمە؟ ما من خودانێ مە عیسا نەدیتیە؟ ما هوین نە بەرهەمێ وی كارینە یێ ئەز بۆ خودانی دكەم؟
خۆ ئەگەر ئەز بۆ هندەكێن دی هنارتی نەبم ژی، بێگۆمان بۆ هەوە ئەز هنارتیمە، چنكو هوین موهرا منن كو ئەز هنارتیێ خودانیمە.
بۆ ئەوێن لێپرسینێ ل گەل من دكەن، ئەڤە بەڕەڤانیا منە:
ما مە ماف نینە كو ئەم بخۆین و ڤەخۆین؟
ما مە ماف نینە، وەكو هنارتیێن دی و برایێن خودانی و كیفاسی ، ببینە خودان هەڤژینەكا باوەردار و ل گەل خۆ ببەین دەمێ دگەڕیێین؟
یان ب تنێ ئەز و بارناباس ئەوین یێن پێدڤیە بۆ نانێ خۆ یێ رۆژانە كار بكەن؟
كی ل سەر كیستێ خۆ لەشكەریێ دكەت؟ كی رەزەكی ددانیت و ژ بەرهەمێ وی ناخۆت؟ یان كی شڤانیێ ل كەرەكێ پەزی دكەت و ژ شیرێ وی پەزی ڤەناخۆت؟
ما ئەز ڤان تشتان ژ نك خۆ دبێژم؟ ما دەستوور ژی ڤان تشتان نابێژیت؟
چنكو د دەستوورێ مووسای دا هاتیە نڤیسین: «دەڤێ گای گرێ نەدە، دەمێ گێرێ دكەت.» ئایا خودێ خەما گای دخۆت؟
یان ڤێ چەندێ ب تەمامی بۆ مە نابێژیت؟ بەلێ، ئەڤە بۆ مە هاتیە نڤیسین، چنكو یێ جۆتی دكەت، دڤێت ب هیڤی ڤە جۆتی بكەت و یێ گێرێ دكەت، دڤێت ب وێ هیڤیێ گێرێ بكەت، كو هەر ئێك دێ بەهرا خۆ ژێ هەلگریت.
ئەگەر مە تشتێن روحانی د هەوە دا چاندبن، ما تشتەكێ مەزنە كو ئەم تشتێن ماددی ژ هەوە بدروین؟
ئەگەر هندەكێن دی ماف هەبیت كو هاریكاریێن ماددی ژ هەوە وەرگرن، ما مە پتر ماف نینە؟ لێ مە ئەڤ مافە ب كار نەئینا، بەلكو ئەم خۆ ل بەر هەر تشتەكی دگرین، دا چ ئاستەنگان بۆ مزگینیا مەسیحی چێنەكەین.
ما هوین نزانن، ئەوێن د پەرستگەهێ دا كار دكەن، خوارنا خۆ ژ پەرستگەهێ پەیدا دكەن و یێن خزمەتا قوربانگەهێ دكەن، بەهرا خۆ ژ قوربانگەهێ دبەن؟
ب هەمان شێوەی ژی، خودانی فەرمان دا كو ئەوێن مزگینیێ رادگەهینن، ژیارا وان ل سەر مزگینیێیە.
لێ من چ ژ ڤان مافان ب كار نەئینان و ئەز ڤان تشتان نانڤیسم دا بۆ من بهێنە كرن، چنكو بۆ من مرن باشترە ژ وێ چەندێ كو ئێك من ژ ڤێ شانازیێ بێبەهر بكەت.
ئەگەر ئەز مزگینیێ رابگەهینم، بۆ من نە جهێ شانازیێیە، چنكو ئەو فەراتیەكە ل سەر ملێ من هاتیە دانان. نەخوزیكێن من ئەگەر مزگینیێ رانەگەهینم!
و ئەگەر من ئەڤ چەندە ب حەزا خۆ كربا، دا من خەلات هەبیت، لێ ئەگەر نە ب حەزا خۆ دكەم، ئەڤە بریكاری ب من هاتیە دان.
ئێدی خەلاتێ من چیە؟ خەلاتێ من ئەوە كو دەمێ ئەز مزگینیێ رادگەهینم، ئەز مزگینیێ بێ بەرامبەر بدەم، بێی كو مافێ خۆ یێ د مزگینیێ دا ب كار بینم.
ئەز ژ لایێ هەمی كەسان ڤە یێ ئازادم، لێ من خۆ كرە بەنیێ هەمی كەسان، دا ئەز هێشتا پتر مرۆڤان قازانج بكەم.
ل گەل جوهیان من خۆ وەكو جوهیان لێ كر، دا جوهیان قازانج بكەم. ل گەل ئەوێن د بن دەستهەلاتا دەستووری دا، هەر چەندە ئەز ب خۆ د بن دەستهەلاتا دەستووری دا نینم، لێ من خۆ وەكو وان لێ كر یێن د بن دەستهەلاتا دەستووری دا، دا ئەوێن د بن دەستهەلاتا دەستووری دا قازانج بكەم.
ل گەل ئەوێن بێ دەستوور، هەر چەندە ئەز یێ بێ دەستوورێ خودێ نینم و ئەز یێ د بن دەستهەلاتا دەستوورێ مەسیحی دا، لێ من خۆ وەكو یێن بێ دەستوور لێ كر، دا ئەوێن بێ دەستوور قازانج بكەم.
ل گەل لاوازان من خۆ لاواز كر، دا ئەز یێن لاواز قازانج بكەم. ئەز بۆ هەمی كەسان یێ بوویمە هەمی تشت، دا ب هەر شێوەیەكێ هەبیت بشێم هندەكان قورتال بكەم.
ئەز ڤان هەمی تشتان ژ پێخەمەت مزگینیێ دكەم، دا د بەرەكەتێن وێ دا پشكدار بم.
ما هوین نزانن ئەوێن ل یاریگەهێ غاردانێ دكەن، هەمی دكەنە غار، لێ ب تنێ ئێك خەلاتی وەردگریت؟ هوین ژی هۆسا بكەنە غار، دا خەلاتی وەربگرن.
هەر وەرزشڤانەك، د هەمی بیاڤان دا خۆ دئێخیتە بن راهێنانەكا دژوار. ئەو ڤێ چەندێ دكەن داكو تانجەكا ژ ناڤ دچیت ب دەست ڤە بینن، لێ ئەم وێ چەندێ دكەین داكو تانجەكا ژ ناڤ نەچیت ب دەست ڤە بینین.
لەوما ئەز وەكو ئێكێ بێ ئارمانج ناكەمە غار، كولمانێ ژی وەكو وی ناكەم یێ ل بای ددەت.
ئەز دژواریێ ل لەشێ خۆ دكەم و وی دكەمە بەنی، دا پشتی من ئامۆژگاری ل هندەكێن دی كری، ئەز ب خۆ ژ یاریێ نەهێمە دەرئێخستن.
من نەڤێت هوین، گەلی خویشك و برایان، د بێ ئاگە‍‌ھ بن كو بابكالێن مە هەمی د بن عەوری دا بوون و هەمی ژ دەریایێ دەرباز بوون،
هەمی د عەوری و د دەریایێ دا هاتنە تافیركرن و هۆسا ب مووسای ڤە هاتنە گرێدان،
هەمیان هەمان خوارنا روحانی خوار،
هەمیان ژی هەمان ڤەخوارنا روحانی ڤەخوار. چنكو ژ وی كەڤرێ روحانی ڤەدخوار ، یێ ل گەل وان دهات، ئەو كەڤر ژی مەسیح بوو.
لێ خودێ ژ پڕانیا وان یێ رازی نەبوو، ئەڤجا تەرمێن وان ل بیابانێ بەڵاڤە بوون.
ئەڤان تشتان بۆ مە وەكو نموونە روی دا، دا دلێ مە نەچیتە تشتێن خراب، هەروەكو دلێ وان چوویێ.
نەبنە پووتپەرێس ژی هەروەكو هندەك ژ وان بووینێ، كا چەوا هاتیە نڤیسین: «مللەت بۆ خوارن و ڤەخوارنێ روینشت، پاشی بۆ كەیفكرنێ رابوو.»
پێدڤیە ئەم دەهمەنپیسیێ ژی نەكەین، هەروەكو هندەك ژ وان دەهمەنپیسی كری، ئینا د رۆژەكێ دا بیست و سێ هزار كەس مرن.
مەسیحی تاقی نەكەین ژی هەروەكو هندەك ژ وان تاقی كری، ئینا ژ لایێ ماران ڤە هاتنە ژناڤبرن.
پتەپتێ ژی نەكەن هەروەكو هندەك ژ وان پتەپت كری، ئینا ژ لایێ فریشتەیێ وێرانكەر ڤە هاتنە ژناڤبرن.
ئەڤ هەمی تشتە وەكو نموونە ب سەرێ وان هاتن و ئەو هاتینە نڤیسین داكو بۆ مە، ئەوێن دویماهیا سەردەمان ب سەرێ وان هاتی، ببنە ئاگەهداری.
ئەڤجا یێ هزر دكەت ئەو قاییم یێ راوەستیایە، بلا هشیار بیت كو نەكەڤیت.
چ تاقیكرن ب سەرێ هەوە نەهاتینە، ژبلی یێن ب سەرێ هەمی مرۆڤان دهێن. خودێ یێ دلسۆزە: ئەو ناهێلیت هوین زێدەتر ژ شیانا هەوە بهێنە تاقیكرن، ئەو دێ ل گەل تاقیكرنێ دەرگەهەكێ خۆ رزگاركرنێ ژی ڤەكەت، دا هوین بشێن خۆ ل بەر بگرن.
ژ بەر ڤێ چەندێ، خۆشتڤیێن من، ژ پووتپەرێسیێ بڕەڤن.
ئەز وەسا دئاخڤم هەروەكو ئاخفتنا من بۆ كەسێن ئاقلمەند بیت. هوین ب خۆ ئاخفتنا من بهەلسەنگینن.
پەرداغا سوپاسیكرنێ یا ئەم ژ بەر وێ سوپاسیێ دكەین، ما نە پشكداریە د خوینا مەسیحی دا؟ ئەو نانێ ئەم كەر دكەین، ما نە پشكداریە د لەشێ مەسیحی دا؟
ئەڤجا ئەم، سەرەڕای گەلەكیا خۆ لەشەكین، چنكو ب تنێ نانەك یا هەی و ئەم هەمی د خوارنا وێ نانێ دا د پشكدارین.
ل گەلێ ئیسرائیل بنێڕن: ما ئەوێن قوربانان دخۆن نە پشكدارێن قوربانگەهێنە؟
ئەڤجا مەبەستا من چیە؟ ما قوربانێ بۆ پووتان دهێتە پێشكێشكرن تشتەكێ گرنگە؟ ما پووت تشتەكێ گرنگە؟
نەخێر! لێ مەبەستا من ئەوە كو تشتێن پووتپەرێس پێشكێش دكەن، ئەو بۆ ئەجنەیان پێشكێش دكەن، نەكو بۆ خودێ. من ژی نەڤێت هوین ل گەل ئەجنەیان د پشكدار بن.
هوین نەشێن ژ پەرداغا خودانی و ژ پەرداغا ئەجنەیان ژی ڤەخۆن، هەروەسا هوین نەشێن پشكدارێن سفرا خودانی و سفرا ئەجنەیان ژی بن.
ما مە دڤێت ئیرەییا خودانی بئازرینین؟ ما ئەم ژ وی بهێزترین؟
دبێژن: «هەمی تشت د حەلالن»، لێ هەمی تشت ب مفا نینن. «هەمی تشت د حەلالن»، لێ هەمی تشت ئاڤەدانیێ ناكەن.
بلا هەر كەس نە ل بەرژەوەندیا خۆ، لێ ل بەرژەوەندیا یێن دی بگەڕیێت.
هەر تشتەكێ ل گۆشتفرۆشیێ دهێتە فرۆتن بخۆن، بێی كو هوین ژ پێخەمەت وژدانێ پرسیارێ ل دۆر وی گۆشتی بكەن،
چنكو «ئەرد و هەمی تشتێن تێدا، یێن خودانینە.»
ئەگەر نەباوەردارەك هەوە داخواز بكەت و هەوە بڤێت بچن، هەر تشتێ دانیتە بەر هەوە بخۆن، بێی كو هوین ژ پێخەمەت وژدانێ پرسیارێ ل دۆر وێ خوارنێ بكەن.
لێ ئەگەر ئێك بێژیتە هەوە: «ئەڤە گۆشتێ قوربانیە»، ژ پێخەمەت وی یێ ئەڤ چەندە گۆتیە هەوە و ژ پێخەمەت وژدانێ نەخۆن.
مەبەستا من نە وژدانا هەوەیە، لێ وژدانا یێ دیە. چنكو ما بۆچی ئازادیا من ژ لایێ وژدانا كەسەكێ دی ڤە بهێتە سنووردان؟
ئەگەر ئەز د خوارنەكێ دا یێ پشكدار بم و سوپاسیا خودێ بكەم، ئەڤجا بۆچی ئەز ژ بەر تشتێ من بۆ وی سوپاسی كری بهێمە تاوانبار كرن؟
ئەڤجا ئەگەر هوین بخۆن، یان ڤەخۆن، یان چ تشتێ بكەن، هەمی تشتان بۆ مەزناهیا خودێ بكەن.
نە بۆ جوهیان، نە بۆ مللەتێن دی و نە ژی بۆ جڤاكا گازیكریێن خودێ، نەبنە ئاستەنگ،
هەروەكو ئەز ژی هەوڵ ددەم د هەر تشتی دا هەمیان رازی بكەم، ئەز ل مفایێ خۆ ناگەڕیێم، لێ ئەز ل مفایێ گەلەكان دگەڕیێم، دا ئەو قورتال ببن.
چاڤ ل من بكەن، هەروەكو ئەز چاڤ ل مەسیحی دكەم.
ئەز پەسنا هەوە دكەم، كو د هەمی تشتان دا هوین من دئیننە بیرا خۆ و نەریتێن من داینە هەوە، ب ج‍‌ھ دئینن.
لێ من دڤێت هوین بزانن كو سەرێ هەر زەڵامەكی مەسیحە، سەرێ ژنێ مێرە و سەرێ مەسیحی ژی خودێیە.
هەر زەڵامەكێ نڤێژێ بكەت یان پەیاما خودێ رابگەهینیت و سەرێ وی یێ نخافتی بیت، ئەو سەرێ خۆ شەرمزار دكەت.
لێ هەر ژنكەكا نڤێژێ بكەت یان ژی پەیاما خودێ رابگەهینیت و یا سەركۆل بیت، ئەو سەرێ خۆ شەرمزار دكەت، چنكو ئەو هەمان تشتە هەروەكو سەرێ وێ هاتیە حووچكرن.
ئەگەر ژنك سەرێ خۆ نەنخێڤیت، بلا پرچا خۆ بتراشیت! لێ ئەگەر بۆ ژنكێ شەرمزاری بیت كو سەرێ خۆ بتراشیت یان حووچ بكەت، بلا سەرێ خۆ بنخێڤیت.
نابیت زەڵام سەرێ خۆ بنخێڤیت، چنكو ئەو وێنە و مەزناهیا خودێیە. لێ ژن مەزناهیا زەڵامیە.
چنكو زەڵام ژ ژنێ چێنەبوو، لێ ژن ژ زەڵامی چێبوو.
هەروەسا زەڵام بۆ ژنێ نەهاتە ئافراندن، لێ ژن بۆ زەڵامی هاتە ئافراندن.
لەوما پێدڤیە ژنكێ دەستهەلات ل سەر سەرێ خۆ هەبیت، ژ بەر فریشتەیان.
سەرەڕای ڤێ چەندێ، ل نك خودانی نە ژن ژ زەڵامی یا سەربخۆیە، نە ژی زەڵام ژ ژنێ یێ سەربخۆیە.
چنكو كا چەوا ژن ژ زەڵامی چێبوو، زەڵام ژی وەسا ب ژنێ ژ دایك دبیت، لێ هەمی تشت ژ خودێنە.
هوین ب خۆ بهەلسەنگینن: ما د جهێ خۆ دایە، ژنك نڤێژێ بۆ خودێ بكەت و یا سەركۆل بیت؟
ما سرۆشت ب خۆ هەوە فێر ناكەت، كو زەڵام ئەگەر پرچا خۆ درێژ بكەت، بۆ وی شەرمزاریە،
لێ ئەگەر ژنكێ پرچەكا درێژ هەبیت، بۆ وێ شانازیە؟ چنكو پرچا وێ بۆ نخافتنێ ب وێ هاتیە دان.
لێ ئەگەر ئێكی بڤێت گەنگەشەیێ ل سەر بكەت، مە نەریتەكێ دی نینە، هەروەسا جڤاكێن گازیكریێن خودێ ژی نینە.
لێ ئەز ب ڤان راسپاردەیان پەسنا هەوە ناكەم، چنكو دەمێ هوین كۆمبوونێ دكەن، زیان ژ قازانجی پترە.
یا ئێكێ، ئەز دبهیسم كو دەمێ هوین وەكو جڤاكا باوەرداران كۆمبوونێ دكەن، دووبەرەكی د ناڤبەرا هەوە دا هەنە و تا رادەیەكی ئەز باوەر ژ ڤێ چەندێ دكەم.
بێگۆمان دڤێت د ناڤ هەوە دا دووبەرەكی هەبن، دا دیار ببیت كا د ناڤ هەوە دا كینە ژ لایێ خودێ ڤە د پەسەندن.
ئەڤجا دەمێ هوین كۆمبوونێ دكەن، ئەو نە شیڤا خودانیە هوین دخۆن،
چنكو ل سەر خوارنێ هەر ئێك بێی كو خۆ ل هیڤیا كەسێ بگریت شیڤا خۆ دخۆت، ئەڤجا ئێك برسی دمینیت و ئێكێ دی سەرخۆش دبیت.
ما هەوە مال نینن كو هوین تێدا بخۆن و ڤەخۆن؟ یان هوین سڤكاتیێ ب جڤاكا گازیكریێن خودێ دكەن و دەستكورتان ددەنە شەرمێ؟ ئەڤجا ئەز چ بێژمە هەوە؟ ئایا ئەز پەسنا هەوە بكەم؟ نەخێر، ئەز ل سەر ڤێ چەندێ پەسنا هەوە ناكەم!
ئەڤ تشتێ من دایە هەوە، من ژ خودانی وەرگرتیە: ل وێ شەڤا خودان عیسا هاتیە رادەستكرن، وی نان هەلگرت
و پشتی سوپاسی كری، نان كەر كر و گۆت: «ئەڤە لەشێ منە، یێ كو بۆ هەوەیە. هوین ڤێ چەندێ بۆ بیرئینانا من بكەن.»
هەروەسا پشتی شیڤێ پەرداغ ژی هەلگرت و گۆت: «ئەڤ پەرداغە پەیمانا نویە ب خوینا من. ڤێ چەندێ بۆ بیرئینانا من بكەن، هەر جارەكا هوین ڤەخۆن.»
هەر جارەكا هوین ڤی نانی بخۆن و ڤێ پەرداغێ ڤەخۆن، هوین مرنا خودانی ددەنە زانین، تاكو ئەو دهێت.
لەوما هەر كەسێ ب شێوەیەكێ نەهێژا ڤی نانی بخۆت یان پەرداغا خودانی ڤەخۆت، ئەو دێ د دەرهەقا لەش و خوینا خودانی دا یێ گونەهبار بیت.
ئەڤجا بلا مرۆڤ خۆ تاقی بكەت، پاشی ژ نانی بخۆت و ژ پەرداغێ ڤەخۆت.
چنكو هەر ئێكێ بخۆت و ڤەخۆت، ئەگەر لەشێ خودانی ل بەر چاڤ وەرنەگریت، ئەو بۆ گونەهباركرنا خۆ دخۆت و ڤەدخۆت.
ژ بەر ڤێ چەندێ، گەلەك لاواز و نەساخ د ناڤ هەوە دا هەنە، هندەكێن نڤستی ژی.
لێ ئەگەر مە دادوەری ل سەر خۆ كربا، ئەم نەدهاتینە دادكرن.
لێ دەمێ ئەم ژ لایێ خودانی ڤە بهێینە دادكرن، ئەو مە تەمبی دكەت، دا ل گەل جیهانێ نەهێینە گونەهبار كرن.
ئەڤجا گەلی خویشك و برایان، دەمێ هوین بۆ خوارنێ كۆم دبن، ل هیڤیا ئێكودوو بمینن.
ئەگەر ئێكێ برسی بیت، بلا ل مالا خۆ بخۆت، دا كۆمبوونا هەوە نەبیتە ئەگەرێ گونەهباركرنا هەوە. دەربارەی تشتێن ماین ژی، دەمێ ئەز بهێمە نك هەوە، دێ رێك ئێخم.
نوكە ژی دەربارەی بەهرەیێن روحانی، گەلی خویشك و برایان، من نەڤێت هوین نەزان بمینن.
هوین دزانن كو دەمێ هوین پووتپەرێس بوون، دلێ هەوە بەرەڤ پووتێن لال ڤە دهاتە برن و هوین دهاتنە د سەر دا برن.
لەوما من دڤێت هوین تێبگەهن: كەسەك كو ب رێكا گیانێ خودێ دئاخڤیت نابێژیت: «نفرین ل عیسای بن!» كەس ژی نەشێت بێژیت: «عیسا خودانە» ئەگەر ب رێكا گیانێ پیرۆز نەبیت.
ئەڤجا جۆرێن بەهرەیێن روحانی هەنە، لێ هەمان گیانە.
جۆرێن خزمەتێ هەنە، لێ هەمان خودانە.
جۆرێن كاران هەنە، لێ هەمان خودێیە، ئەوێ وان هەمی كاران د هەمیان دا ئەنجام ددەت.
لێ دیاربوونا گیانی ژ پێخەمەت مفایێ گشتی بۆ هەر كەسەكی دهێتە دان.
ئەڤجا بۆ ئێكی ب رێكا گیانی پەیاما ئاقلمەندیێ دهێتە دان و بۆ ئێكێ دی ب رێكا هەمان گیانی پەیاما زانینێ،
بۆ ئێكی ب هەمان گیانی باوەری و بۆ ئێكێ دی ب هەمان گیانی بەهرەیێن ساخكرنا نەخۆشان دهێتە دان،
بۆ ئێكی شیان كو حنێران بكەت، بۆ ئێكی راگەهاندنا پەیاما خودێ، بۆ ئێكی شیانا ڤاڤارتنا گیانان، بۆ ئێكی ئاخفتن ب زمانێن جۆراوجۆر و بۆ ئێكێ دی وەرگێڕانا زمانان دهێتە دان.
ئەڤە هەمی كارێ ئێك گیان و هەمان گیانە، ئەوێ ل دویڤ حەزا خۆ وان ل سەر هەر ئێكی ب تایبەتی لێكڤە دكەت.
كا چەوا لەش ئێكە و گەلەك ئەندام هەنە، هەروەسا سەرەڕای كو ئەندامێن لەشی گەلەكن، لێ ئەو هەمی ئێك لەشن، مەسیح ژی یێ وەسایە.
چنكو ئەم هەمی ب گیانەكی هاتینە تافیركرن، دا ببینە لەشەك، چ جوهی بین یان یونانی، بەنی بین یان ئازاد، خودێ ئەم هەمی ژ هەمان گیان داینە ڤەخوارنێ.
هەروەسا لەش نە ب تنێ ئەندامەكە، لێ گەلەك ئەندامن.
ئەگەر پێ بێژیت: «چنكو ئەز نە دەستم، ئەز نە ژ لەشیمە»، ب ڤێ چەندێ ئەو نە ژ دەرڤەی لەشیە.
ئەگەر گو‍‌ھ بێژیت: «چنكو ئەز نە چاڤم، ئەز نە ژ لەشیمە»، ب ڤێ چەندێ ئەو نە ژ دەرڤەی لەشیە.
ئەگەر هەمی لەش چاڤ با، ئایا كا بهیستن؟ ئەگەر هەمی گو‍‌ھ با، ئایا كا بێهنكرن؟
لێ ب راستی خودێ هەر ئێك ژ ئەندامان ل دویڤ حەزا خۆ د لەشی دا دانا.
ئەگەر هەمی ئەندامەك با، ئایا كا لەش؟
لێ ب راستی ئەندام گەلەكن و لەش ئێكە.
چاڤ نەشێت بێژیتە دەستی: «من پێدڤی ب تە نینە!» سەر ژی نەشێت بێژیتە پێیان: «من پێدڤی ب هەوە نینە!»
ب تەمامی بەروڤاژی ڤێ چەندێ، ئەندامێن لەشی یێن مرۆڤ هزر دكەن د لاوازن، ئەو گەلەك د پێدڤینە.
ئەندامێن لەشی یێن ئەم هزر دكەین د بێڕێزن، ئەم رێزەكا باشتر ددەینێ. ئەندامێن مە یێن جهێ شەرمێ، پتر ب خەمخۆری دهێنە نخافتن،
لێ ئەندامێن مە یێن نە جهێ شەرمێ، پێدڤی ب ڤێ چەندێ نینە. لێ خودێ هۆسا لەش پێك ئینا، وی رێزەكا باشتر دا یێ كێم رێز،
دا دووبەرەكی د لەشی دا نەبیت، لێ ئەندام هەمان پویتەی ب ئێكودوو بدەن.
ئەگەر ئەندامەك بئێشیت، هەمی ئەندام ل گەل وی دئێشن. ئەگەر رێز ل ئەندامەكی بهێتە گرتن، هەمی ئەندام ل گەل وی دلخۆش دبن.
ئەڤجا هوین لەشێ مەسیحینە و هەر ئێك ژ هەوە ئەندامەكێ ویە.
خودێ د ناڤ جڤاكا باوەرداران دا ئەڤە دانان: یێن ئێكێ هنارتی، یێن دوویێ پێغەمبەر، یێن سێیێ مامۆستا، پاشی یێن بەهرەیا حنێران هەی، پاشی یێن بەهرەیێن ساخكرنا نەخۆشان، هاریكاریكرنێ، بڕێڤەبرنێ و ئاخفتنێ ب زمانێن جۆراوجۆر هەی.
ما هەمی هنارتینە؟ ما هەمی پێغەمبەرن؟ ما هەمی مامۆستانە؟ ما هەمی حنێران دكەن؟
ما هەمیان بەهرەیا ساخكرنا نەخۆشان هەیە؟ ما هەمی ب زمانێن دی دئاخڤن؟ ما هەمی زمانێن دی وەردگێڕن؟
ئەڤجا مەرەقدارێن بەهرەیێن مەزنتر بن. نوكە ئەز ژی دێ رێكەكا گەلەك باشتر ژ هەمیان نیشا هەوە دەم.
ئەگەر ئەز ب زمانێن مرۆڤ و فریشتەیان بئاخڤم، لێ من حەزژێكرن نەبیت، ئەو ئەز وەكو وێ سێلا سفری لێ هاتم، ئەوا ب قوتانێ تنگە تنگێ دكەت یان ژی زەنگلەكێ زنگە زنگێ دكەت.
ئەگەر من بەهرەیا راگەهاندنا پەیاما خودێ هەبیت و هەمی نهێنیان و هەمی زانینێ بزانم و ئەگەر من باوەریەكا تەمام هەبیت، كو چیایان پێ ڤەگوهێزم، لێ من حەزژێكرن نەبیت، ئەو ئەز چ نینم.
ئەگەر ئەز هەمی مالێ خۆ ل سەر بەلەنگازان بەڵاڤە بكەم و لەشێ خۆ بۆ سۆتنێ دانم، لێ من حەزژێكرن نەبیت، ئەڤە من چ قازانج نەكر.
حەزژێكرن یا بێهنفرەهە، حەزژێكرن یا دلنازكە. حەزژێكرن چاڤپێڕانەبوونێ ناكەت، شانازیێ ب خۆ نابەت، دفنا خۆ بلند ناكەت،
رەفتارێن كرێت ناكەت، بزاڤێ بۆ بەرژەوەندیا خۆ ناكەت، زوی تۆڕە نابیت، شاشیێن كەسێن دی د دلێ خۆ دا هەلناگریت،
ل سەر خرابیێ دلخۆش نابیت، لێ ل سەر راستیێ دلخۆش دبیت،
خۆ ل بەر هەمی تشتان دگریت، باوەر ژ هەمی تشتان دكەت، دەربارەی هەمی تشتان دەست ژ هیڤیێ بەرنادەت، بێهنا خۆ ل سەر هەمی تشتان فرە‍‌ھ دكەت.
حەزژێكرن چ جاران ب دویماهی ناهێت. لێ بەهرەیا پەیام راگەهاندنێ دێ ژ كار كەڤیت، بەهرەیا ئاخفتنێ ب زمانێن دی دێ ب دویماهی هێت و بەهرەیا زانینێ دێ ژ كار كەڤیت،
چنكو زانینا مە نە یا كاملە و پەیام راگەهاندنا مە ژی نە یا كاملە.
لێ دەمێ تشتێ كامل بهێت، ئەوێ نەكامل دێ ژ كار كەڤیت.
دەمێ ئەز زاڕۆك بووم، ئەز وەكو زاڕۆكان دئاخفتم، من وەكو زاڕۆكان هزر دكر، ئەز وەكو زاڕۆكان د تشتان دگەهشتم. دەمێ ئەز بوویمە زەڵام، من دەست ژ تشتێن زاڕۆكینیێ بەردا.
ئەڤجا نوكە د خۆدیكێ را، ئەم شێلی دبینین، لێ وی دەمی ئەم دێ روی ب روی بینین. نوكە زانینا من نە یا كاملە، لێ وی دەمی ئەز دێ ب كاملی نیاسم، هەروەكو ئەز ب كاملی هاتیمە نیاسین.
ئەڤجا ئەڤ هەر سێیە دمینن: باوەری، هیڤی و حەزژێكرن و یا ژ هەمیان مەزنتر حەزژێكرنە.
ب دویڤ حەزژێكرنێ بكەڤن و مەرەقدارێن بەهرەیێن روحانی بن، ب تایبەتی ژی هوین پەیاما خودێ رابگەهینن.
ئەوێ ب زمانەكێ دی دئاخڤیت، ئەو بۆ مرۆڤان نائاخڤیت، لێ بۆ خودێ، چنكو كەس تێناگەهیت، لێ ئەو ب هێزا گیانی تشتێن نهێنی دبێژیت.
لێ ئەوێ پەیامێ رادگەهینیت، ئەو بۆ مرۆڤان دئاخڤیت، بۆ ئاڤاكرن و هاندان و ئارامكرنا دلێ وان.
ئەوێ ب زمانەكێ دی دئاخڤیت، ئەو خۆ ئاڤا دكەت. لێ ئەوێ پەیامێ رادگەهینیت، ئەو جڤاكا باوەرداران ئاڤا دكەت.
ئەز حەز دكەم هوین هەمی ب زمانێن دی بئاخڤن، لێ ئەز هێشتا پتر حەز دكەم كو هوین پەیاما خودێ رابگەهینن. ئەوێ پەیامێ رادگەهینیت ژ وی مەزنترە یێ ب زمانێن دی دئاخڤیت، ژبلی كو ئەگەر ئەو وەرگێڕانێ بكەت دا جڤاكا باوەرداران ئاڤا ببیت.
ئەڤجا گەلی خویشك و برایان، ئەگەر ئەز بهێمە نك هەوە و ب زمانێن دی بئاخڤم، دێ چ مفای ل هەوە كەم، ئەگەر ئەز ب سرۆش ، یان ب زانین، یان ب پەیام راگەهاندن، یان ژی ب فێركرنەكێ بۆ هەوە نەئاخفتم؟
ئەگەر تشتێن نە زیندی یێن دەنگی دەردئێخن، وەكو بلوورێ یان ژی قیسارەیێ، نۆتەیێن موزیكێ یێن ژ ئێك جودا نەدەن، چەوا بهێتە زانین ئەوا كو دهێتە ژەنین چ ئاوازە؟
ئەگەر بۆڕیزان ژی دەنگەكێ نەزەڵال دەربئێخیت، كی دێ بۆ شەڕی خۆ ئامادە كەت؟
هوین ژی وەسا، ئەگەر هوین ب ئەزمانێ خۆ گۆتنەكێ بێژن كو نەهێتە تێگەهشتن، خەلك دێ چەوا زانن هوین چ دبێژن؟ هەروەكو هوین بۆ بای دئاخڤن!
بێگۆمان گەلەك زمانێن جۆراوجۆر ل جیهانێ هەنە، چ ژ وان ژی د بێ رامان نینن.
ئەڤجا ئەگەر ئەز د زمانەكی نەگەهم، ئەز دێ بۆ یێ دئاخڤیت وەكو كەسەكێ بیانی بم، یێ دئاخڤیت ژی دێ بۆ من وەكو كەسەكێ بیانی بیت.
هەروەسا هوین ژی، مادەم هەوە مەرەقا بەهرەیێن روحانی هەیە، بزاڤێ بكەن دا د ناڤ وان بەهرەیان دا بۆ ئاڤاكرنا جڤاكا باوەرداران هێشتا پتر پێشبكەڤن.
لەوما ئەوێ ب زمانەكێ دی دئاخڤیت، بلا ژ خودێ بخوازیت كو بشێت وەرگێڕیت.
چنكو ئەگەر ئەز ب زمانەكێ دی نڤێژێ بكەم، گیانێ من نڤێژێ دكەت، لێ زێهنێ من چ مفای ژێ ناكەت.
ئەڤجا ئەز چ بكەم؟ ئەز دێ ب گیانێ خۆ نڤێژێ كەم و ب زێهنێ خۆ ژی دێ نڤێژێ كەم. ئەز دێ ب گیانێ خۆ سروودان بێژم و ب زێهنێ خۆ ژی دێ سروودان بێژم.
چنكو ئەگەر تۆ ب گیانێ خۆ سوپاسیا خودێ بكەی، ئەوێ د زمانێ تە نەگەهیت، ژ بەر كو نزانیت تۆ چ دبێژی، دێ چەوا بۆ سوپاسیكرنا تە بێژیت: «ئامین»؟
بەلكو تۆ باش سوپاسیێ دكەی، لێ یێ دی ناهێتە ئاڤاكرن.
ئەز سوپاسیا خودێ دكەم، كو ئەز ژ هەوە هەمیان پتر ب زمانێن دی دئاخڤم.
لێ د كۆمبوونا جڤاكا باوەرداران دا، ئەز دبینم باشترە پێنج پەیڤێن جهێ تێگەهشتنێ بێژم، دا یێن دی ژی فێر بكەم، نەكو دە‍‌ھ هزار پەیڤان ب زمانەكێ دی بێژم.
گەلی خویشك و برایان، د هزركرنێ دا وەكو زاڕۆكان نەبن. د خرابیێ دا وەكو زاڕۆكان بن، لێ د هزركرنێ دا د پێگەهشتی بن.
د دەستووری دا هاتیە نڤیسین: «خودان دبێژیت: ئەز دێ ب یێن ب زمانێن دی دئاخڤن و ب دەڤێ بیانیان بۆ ڤی گەلی ئاخڤم، سەرەڕای هندێ ئەو هەر گوهداریا من ناكەن. »
هۆسا زمانێن دی نیشانە، نە بۆ باوەرداران، لێ بۆ نەباوەرداران. راگەهاندنا پەیاما خودێ ژی نە بۆ نەباوەرداران، لێ بۆ باوەرداران نیشانە.
ئەڤجا ئەگەر هەمی جڤاكا باوەرداران پێكڤە كۆم ببیت و هەمی ب زمانێن دی بئاخڤن و كەسێن فێرنەبووی یان ژی یێن نەباوەردار ب ژۆر بكەڤن، ما ئەو نابێژن كو هوین یێن دین بووین؟
لێ ئەگەر هەمی پەیامێ رابگەهینن و نەباوەردارەك یان ژی ئێكێ فێرنەبووی بهێتە ژۆر، دێ ژ لایێ هەمیان ڤە هێتە پاشڤەبرن و دادكرن،
نهێنیێن دلێ وی دێ ئاشكرا بن، ئەڤجا دێ خۆ دەڤ و دەڤ هاڤێتە ئەردی و خودێ پەرێسیت و دانپێدانێ كەت كو ب راستی خودێ د ناڤ هەوە دایە.
ئەڤجا گەلی خویشك و برایان، دڤێت چەوا بیت؟ دەمێ هوین كۆم دبن، هەر ئێكی سروودەكا هەی، یان فێركرنەكا هەی، یان سرۆشەكا هەی، یان زمانەكێ دی یێ هەی، یان وەرگێڕانەكا هەی. بلا هەمی تشت بۆ ئاڤاكرنێ بن.
ئەگەر هندەك كەس ب زمانەكێ دی بئاخڤن، بلا ژ دوو یان ژی ب زێدەیی سێ كەسان پتر نەبن، ئێك ل دویڤ ئێكی بئاخڤیت، كەسەك ژی وەرگێڕیت.
لێ ئەگەر كەسەك نەبیت ئاخفتنا وان وەرگێڕیت، بلا ئەو د كۆمبوونا جڤاكا باوەرداران دا بێدەنگ بمینن، بلا ئەو د دلێ خۆ دا و بۆ خودێ بئاخڤن.
بلا دوو یان سێ پێغەمبەر بئاخڤن، یێن دی ژی گۆتنێن وان بهەلسەنگینن.
لێ ئەگەر بۆ ئێكێ دی یێ روینشتی سرۆشەك هات، بلا یێ ئێكێ بێدەنگ ببیت.
چنكو هوین هەمی ژی دشێن پەیامێ رابگەهینن، ئێك ل دویڤ ئێكی، دا هەمی فێر ببن و بهێنە هاندان.
گیانێ پێغەمبەران ل ژێر دەستێ پێغەمبەرانە ،
چنكو خودێ نە خودایێ ئالۆزیێیە، لێ یێ ئارامیێیە. وەكو د هەمی جڤاكێن پیرۆزكریان دا،
بلا ژنك د كۆمبوونان دا بێدەنگ بمینن، چنكو بۆ وان دەستویریا ئاخفتنێ نینە، لێ وەكو دەستوور ژی دبێژیت، بلا ملكەچ بن.
ئەگەر حەز بكەن تشتەكی فێر ببن، بلا ل مال پرسیارێ ژ مێرێ خۆ بكەن، چنكو د كۆمبوونێ دا ئاخفتن ژ بۆ ژنێ شەرمە.
ما پەیڤا خودێ ژ نك هەوە دەركەفتیە؟ ما پەیڤا خودێ گەهشتیە هەوە ب تنێ؟
ئەگەر ئێك هزر بكەت كو ئەو پێغەمبەرە یان ژی مرۆڤەكێ روحانیە، بلا بزانیت كو ئەو تشتێ من بۆ هەوە نڤیسی فەرمانا خودانیە.
لێ یێ ڤی تشتی ب پشت گو‍‌ھ ڤە بهاڤێژیت، دێ ب پشت گو‍‌ھ ڤە هێتە هاڤێتن.
ژ بەر ڤێ چەندێ گەلی خویشك و برایان، بلا بۆ هەوە مەرەق بیت كو پەیامێ ژ خودێ وەرگرن و رابگەهینن و رێكێ ل ئاخفتنكرنێ ب زمانێن دی نەگرن.
لێ بلا هەر تشت ل جهێ خۆ و ب رێكوپێكی بیت.
نوكە ئەز دێ وێ مزگینیێ ئینمە بیرا هەوە، گەلی خویشك و برایان، ئەوا من دایە هەوە و هەوە ژی قەبیل كری و خۆ پێڤە گرێ دای.
هوین ب وێ قورتال دبن ژی، ئەگەر هوین وێ پەیامێ یا من بۆ هەوە راگەهاندی قاییم بگرن. ژبلی ئەگەر هەوە ژ قەستا باوەری ئینابیت.
چنكو من بەری هەر تشتەكی ئەو بۆ هەوە راگەهاند یا من ژی وەرگرتی: كو مەسیح ژ پێخەمەت گونەهێن مە مر، هەروەكو بەری هنگی د نڤیسارێن پیرۆز دا هاتبوو نڤیسین.
ئەو هاتە ڤەشارتن و ل رۆژا سێیێ رابوو، هەروەكو بەری هنگی د نڤیسارێن پیرۆز دا هاتبوو نڤیسین.
ئەو بۆ كیفاسی ، پاشی بۆ هەر دوازدان دیار بوو،
پشتی هنگی بۆ پتر ژ پێنج سەد برایان ب جارەكێ دیار بوو، پڕانیا وان تا نوكە یێن ماین، لێ هندەك یێن نڤستین ،
پاشی بۆ یەعقوبی دیار بوو و پشتی هنگی بۆ هەمی هنارتیان،
ل دویماهیا هەمیان بۆ من ژی دیار بوو، هەروەكو ئەز ژ دایكبوویەكێ نە د دەمێ خۆ دا بم،
چنكو ئەز كێمترین هنارتیمە، نە هەژیمە وەكو هنارتی بهێمە بناڤكرن، چنكو من جڤاكا گازیكریێن خودێ تەپەسەر كربوو.
لێ ئەز چ بم، ئەز ب كەرەما خودێ ئەوم و كەرەما وی یا بۆ من هاتیە دان یا ژ قەستا نەبوو، ب راستی من ژ وان هەمیان پتر كار كر. لێ نە من كار دكر، كەرەما خودێ، ئەوا ل گەل من، كار دكر.
ئەڤجا چ ئەز بم یان ئەو، ئەم هۆسا رادگەهینین و هەوە ژی هۆسا باوەر كریە.
مادەم ئەم هەمی رادگەهینین كو مەسیح ژ ناڤ مریان رابوویە، چەوا هندەك ژ هەوە دبێژن: «رابوونا مریان نینە»!
ئەگەر رابوونا مریان نەبیت، مەسیح ژی نەهاتیە راكرن.
ئەڤجا ئەگەر مەسیح رانەبوویە، هنگی راگەهاندنا مە یا ژ قەستایە و باوەریا هەوە ژی یا ژ قەستایە.
ئەم ژی دێ د دەرهەقا خودێ دا دەركەڤین شاهدێن درەوین، چنكو مە بۆ خودێ شاهدەیی دا كو وی مەسیح ژ ناڤ مریان راكر، لێ ئەگەر ب راستی مری ناهێنە راكرن، هنگی وی ئەو رانەكریە.
چنكو ئەگەر مری رانابن، مەسیح ژی رانەبوویە.
ئەگەر مەسیح رانەببیت، باوەریا هەوە یا بێ مفایە، هوین هێشتا یێن د ناڤ گونەهێن خۆ دا.
وی دەمی، ئەوێن ل سەر باوەریێ ب مەسیحی نڤستین ژی یێن ژناڤچووین.
ئەگەر هیڤیا مە ب مەسیحی ب تنێ بۆ ڤێ ژیانێ بیت، هنگی ئەم ژ هەمی مرۆڤان پەریشانترین.
لێ راستی ئەوە كو مەسیح ژ ناڤ مریان رابوویە و ئەو خێڤەیێ نڤستیانە.
مادەم مرن ب رێكا مرۆڤەكی هاتیە، رابوونا مریان ژی ب رێكا مرۆڤەكی هات.
كا چەوا هەمیێن ژ ئادەمی بووین دمرن، هۆسا هەمیێن ژ مەسیحی بووین دێ هێنە ڤەژاندن.
لێ هەر كەس ب دۆرا خۆ: ل بەراهیێ مەسیح كو خێڤەیە، پاشی د دەمێ هاتنا وی دا، ئەوێن كو یێن وینە.
پشتی هنگی دویماهی دێ هێت، دەمێ مەسیح پاشایەتیێ ددەتە دەستێ خودایێ باب، پشتی كو هەمی سەروەری و دەستهەلات و هێزان ژ ناڤ دبەت.
چنكو دڤێت مەسیح دەستهەلاتداریێ بكەت، تا ئەو هەمی دوژمنێن خۆ بكەتە دبن پێیێن خۆ ڤە.
دوژمنێ دویماهیێ یێ كو دهێتە ژناڤبرن، مرنە.
چنكو خودێ «هەمی تشت ئێخستنە د بن پێیێن وی ڤە،» هەروەكو د نڤیساران دا هاتی. لێ دەمێ دبێژیت «هەمی تشت» ملكەچی وی كرن، یا ئاشكرایە كو ژ خودێ ب خۆ ناگریت، ئەوێ هەمی تشت ملكەچی مەسیحی كرین.
دەمێ هەمی تشت ملكەچی وی هاتنە كرن، هنگی كوڕ ب خۆ ژی دێ ملكەچی وی بیت، یێ هەمی تشت ملكەچی وی كرین، داكو خودێ هەمی تشت بیت د هەر تشتەكی دا.
ئەگەر نە، ئەوێن ژ پێخەمەت مریان دهێنە تافیركرن، دێ چ كەن؟ ئەگەر مری ب ئێكجاری رانابن، ئەڤجا ئەو بۆچی ژ پێخەمەت وان دهێنە تافیركرن؟
و بۆچی ئەم هەردەم خۆ دئێخینە د مەترسیێ دا؟
ئەز ب وێ شانازیێ سویند دخۆم، یا من ب هەوە هەی ل نك مەسیح عیسایێ خودانێ مە، گەلی خویشك و برایان، ئەز هەر رۆژ دمرم.
ئەگەر ل ئەفەسۆسی من شەڕ ل گەل هندەكان كر بیت، ئەوێن مرۆڤ دشێت بێژیتە وان گیانەوەرێن دڕندە، چ مفای دگەهینیتە من؟ ئەگەر مری رانابن، ئەڤجا «دا بخۆین و ڤەخۆین، چنكو ئەم سوبەهی دێ مرین.»
نەهێنە خاپاندن: «هەڤالینیا خراب رەوشتێ جوان پویچ دكەت.»
وەرنە سەر هشێ خۆ یێ دروست و ئێدی گونەهێ نەكەن، چنكو دەربارەی خودێ هندەك ژ هەوە د نەزانن. ئەز ڤێ دبێژم دا هوین شەرم ژ خۆ بكەن.
لێ دبیت ئێك بێژیت: «مری چەوا رادبن؟ لەشێ وان دێ یێ چەوا بیت؟»
هەی نەزان! ئەو تشتێ تۆ دچینی شین نابیت تاكو نەمریت.
تشتێ تۆ دچینی، تۆ وی لەشی ناچینی یێ كو دێ پاشی بیتێ، لێ دندكەكا رویتە، دبیت ژ گەنمی بیت یان ژی ژ دانەكێ دی بیت.
لێ خودێ هەروەكو وی ڤیای لەشەكی ددەتێ و هەر دندكەكێ لەشەكێ تایبەت ددەتێ.
پێكهاتەیا هەمی لەشان وەكو ئێك نینە: پێكهاتەیا لەشێ مرۆڤان یا جودایە، پێكهاتەیا لەشێ گیانەوەران یا جودایە، پێكهاتەیا لەشێ باڵندەیان یا جودایە و پێكهاتەیا لەشێ ماسیان یا جودایە.
لەشێن ل ئەسمانی هەنە و لەشێن ل ئەردی ژی هەنە، لێ رەونەقیا لەشێن ل ئەسمانی یا جودایە و رەونەقیا یێن ل ئەردی ژی یا جودایە.
رۆژێ رەونەقەكا جودا، هەیڤێ رەونەقەكا جودا و ستێران ژی رەونەقەكا جودا هەیە. د رەونەقیێ دا ستێر ژی ژ ستێرێ یا جودایە.
رابوونا مریان ژی یا وەسایە. ئەو لەشێ دهێتە چاندن رزی دبیت، ئەوێ دهێتە راكرن رزی نابیت.
دەمێ دهێتە چاندن یێ كرێتە و دەمێ دهێتە راكرن یێ ب رەونەقە. دەمێ دهێتە چاندن یێ لاوازە و دەمێ دهێتە راكرن یێ هێزدارە.
لەشەكێ سرۆشتی دهێتە چاندن، لەشەكێ روحانی دهێتە راكرن. كا چەوا لەشێ سرۆشتی هەیە، وەسا ژی لەشێ روحانی هەیە.
هۆسا ژی یا هاتیە نڤیسین: «مرۆڤێ ئێكێ، ئادەم، بوو هەبوویەكێ ژیاندار.» لێ ئادەمێ دویماهیێ بوو گیانەكێ ژیاندەر.
لێ یێ روحانی نە یێ ئێكێیە، یێ سرۆشتی یێ ئێكێیە و پاشی یێ روحانی.
مرۆڤێ ئێكێ ژ ئەردی بوو، ژ ئاخێ هاتبوو چێكرن. مرۆڤێ دوویێ ژ ئەسمانی.
یێ ژ ئاخێ یێ چەوا بیت، ئەوێن ژ ئاخێ ژی د وەسانە، یێ ئەسمانی یێ چەوا بیت، ئەوێن ئەسمانی ژی د وەسانە.
كا چەوا وێنەیێ مرۆڤێ ژ ئاخێ ل بەر مە بوو، وێنەیێ مرۆڤێ ئەسمانی ژی دێ ل بەر مە بیت.
ئەز ڤێ دبێژم، گەلی خویشك و برایان: خوین و گۆشت نەشێن ببنە میراتگرێن پاشایەتیا خودێ، نە ژی یێ درزیت دبیتە میراتگرێ یێ نارزیت.
چنكو دڤێت ئەڤێ درزیت رزینەبوونێ ل بەر خۆ بكەت و ئەڤێ دمریت نەمریێ ل بەر خۆ بكەت.
دەمێ ئەڤێ درزیت رزینەبوونێ و ئەڤێ دمریت نەمریێ ل بەر خۆ بكەت، هنگی ئەڤ گۆتنا نڤیسارێ دێ ب ج‍‌ھ هێت: «مرن د سەركەفتنێ دا هاتیە داعویران.»
«هەی مرن، كانێ سەركەفتنا تە؟ هەی مرن، كانێ پێڤەدانا تە؟»
پێڤەدانا مرنێ گونەهە، هێزا گونەهێ ژی دەستوورە.
لێ سوپاس بۆ خودێ، ئەوێ ب رێكا خودانێ مە عیسایێ مەسیح سەركەفتنێ ددەتە مە.
ژ بەر ڤێ چەندێ، هەی خویشك و برایێن من یێن خۆشتڤی، د قاییم بن، د نەلڤ بن، د كارێ خودانی دا هەردەم د پڕ بزاڤ بن، چنكو هوین دزانن رەنجا هەوە بۆ خودانی یا ژ قەستا نینە.
نوكە ژی دەربارەی كۆمكرنا هاریكاریێ بۆ پیرۆزكریان، كا من چەوا جڤاكێن باوەرداران ل گالاتیایێ راسپاردن، هوین ژی وە بكەن.
ل رۆژا ئێكێ ژ هەر حەفتیەكێ ، بلا هەر ئێك ژ هەوە ل دویڤ داهاتێ خۆ هندەك پارەی دانیتە لایەكی و ل نك خۆ هەلگریت، نەكو دەمێ ئەز بهێمە نك هەوە ژ نوی كۆم كەن.
دەمێ ئەز بهێم، دێ ئەو كەسێن هوین پەسەند دكەن، ل گەل نامەیان هنێرم، دا هاریكاریا هەوە بگەهیننە ئورشەلیمێ.
ئەگەر یا گونجای بیت كو ئەز ژی بچم، ئەڤە ئەو دێ ل گەل من هێن.
دەمێ ئەز د مەقدۆنیایێ را دەرباز ببم، ئەز دێ هێمە نك هەوە، چنكو ئەز دێ د مەقدۆنیایێ را دەرباز بم.
بەلكو ئەز ل نك هەوە بمینم یان زڤستانێ ژی ل نك هەوە دەرباز بكەم، دا من ب رێ بئێخنە هەر جهەكێ كو ئەز بچمێ.
من نەڤێت نوكە سەرپێ هەوە ببینم، ئەز هیڤی دكەم دەمەكێ درێژتر ل نك هەوە بمینم، ئەگەر خودان دەستویریێ بدەت.
لێ تا جەژنا رۆژا پێنجیێ ئەز دێ ل ئەفەسۆسێ مینم.
چنكو دەرگەهەكێ فرە‍‌ھ بۆ كارەكێ ب بەرهەم بۆ من ڤەبوویە و گەلەك بەرهنگار ژی یێن هەین.
ئەگەر تیمۆتاوس هات، وە بكەن كو ئەو ل نك هەوە یێ بێ ترس بیت، چنكو ئەو ژی وەكو من كارێ خودانی دكەت.
ئەڤجا بلا كەس سڤكاتیێ پێ نەكەت، لێ ب سلامەتی ب رێ بئێخن دا بهێتە نك من، چنكو ئەز ل گەل برایان چاڤەڕێی ویمە.
سەبارەت برایێ مە ئەپولۆسی ژی، من گەلەك داخواز ژێ كر كو ل گەل برایان بهێتە نك هەوە، لێ ئەو ب ئێكجاری رازی نەبوو نوكە بهێت. ئەو دێ هێت، دەمێ وی دەرفەت هەبیت.
بمیننە هشیار، د باوەریێ دا د خۆڕاگر بن، د مێر بن و د هێزدار بن.
بلا هەمی كریارێن هەوە ب حەزژێكرنێ بهێنە كرن.
هوین دزانن كو مالا ستیفاناسی خێڤەیێ هەرێما ئەخایایێیە ، ئەوان خۆ بۆ خزمەتكرنا پیرۆزكریان تەرخان كریە، ئەڤجا ئەز داخوازێ ژ هەوە دكەم، گەلی خویشك و برایان،
كو هوین ملكەچی كەسێن وەسا بن و هەر ئێكێ د ڤی كاری دا پشكداریێ دكەت و تێدا دوەستیێت.
ئەز ب هاتنا ستیفاناس، فۆرتوناتۆس و ئاخایكۆسی دلخۆش بووم، چنكو وان جهێ هەوە یێ ڤاڵا تژی كر.
ئەوان گیانێ من گەش كر و یێ هەوە ژی، ئەڤجا رێزێ ل یێن هۆسا بگرن.
جڤاكێن باوەردارێن هەرێما ئاسیایێ سڵاڤان ل هەوە دكەن. هەروەسا ئەكیلا و پریسكیلا ل گەل جڤاكا باوەرداران یا ل مالا وان كۆم دبیت، ب ناڤێ خودانی گەلەك سڵاڤان ل هەوە دكەن.
هەمی خویشك و برا سڵاڤان ل هەوە دكەن. ب ماچەكا پیرۆز ژ لایێ من ڤە سڵاڤان ل ئێكودوو بكەن.
ئەز، پاولۆس، ڤێ سڵاڤێ ب دەستێ خۆ دنڤیسم.
ئەگەر ئێك حەز ژ خودانی نەكەت، نفرین ل وی بن. ماراناتا!
كەرەما خودان عیسای ل سەر هەوە بیت.
حەزژێكرنا من، ژ دەولەتسەرێ مەسیح عیسای، ل گەل هەوە هەمیان بیت. ئامین.
ژ من، پاولۆس، هنارتیێ مەسیح عیسای ب حەزا خودێ، ژ برایێ مە تیمۆتاوسی ژی، بۆ جڤاكا گازیكریێن خودێ ل كورنتۆسێ و بۆ هەمی پیرۆزكریێن ل سەرانسەری ئەخایایێ:
كەرەم و ئاشتی ژ بابێ مە خودێ و ژ خودان عیسایێ مەسیح ل سەر هەوە بن.
مەزناهی بۆ خودێ، بابێ خودانێ مە عیسایێ مەسیح، بابێ دلۆڤانیێ و خودایێ هەمی هاندانێ،
ئەوێ مە د هەمی تەنگاڤیێن مە دا هانددەت، دا بشێین ب وێ هاندانێ یا ئەم ب خۆ ژ لایێ خودێ ڤە پێ دهێینە هاندان، وان كەسان هانبدەین یێن د هەر تەنگاڤیەكێ دا.
چنكو كا چەوا ئازارێن مەسیحی د ژیانا مە دا گەلەكن، هۆسا هاندانا مە ژی ب رێكا مەسیحی گەلەكە.
ئەگەر ئەم تووشی تەنگاڤیان دبین، ئەو بۆ هاندان و قورتالبوونا هەوەیە. ئەگەر ئەم دهێینە هاندان، ئەو بۆ هاندانا هەوەیە، ئەوا شیانێ ددەتە هەوە كو خۆ ل بەر وان ئازاران بگرن یێن ئەم ژی دكێشین.
دەربارەی هەوە هیڤیا مە یا موكمە، چنكو ئەم دزانین كا چەوا هوین پشكدارێن ئازارێن مەنە، وەسا هوین پشكدارێن هاندانا مەنە ژی.
مە نەڤێت، گەلی خویشك و برایان، كو هوین دەربارەی تەنگاڤیێن مە، ئەوێن ل هەرێما ئاسیایێ ب سەرێ مە هاتین، د بێ ئاگە‍‌ھ بن، بارێ مە زێدە ژ شیانا مە گران بوو، تا ئەم ژ ژیانێ ژی بێ ئومێد بووین.
ب راستی، مە هەست كر كو حوكمێ مرنێ ل سەر مە یێ هاتیە دان، لێ ئەڤ تشتە چێبوو داكو ئەم پشتگەرمێن خۆ نەبین، لێ پشتگەرمێن خودێ بین، ئەوێ مریان رادكەتەڤە.
ئەوێ ئەم ژ مرنەكا هندە دژوار رزگار كرین و دێ مە رزگار كەت. مە هیڤیا خۆ ب وی ڤە گرێ دایە كو ئەو دێ ب بەردەوامی مە رزگار كەت،
هوین ژی دشێن ب نڤێژێن خۆ هاریكاریا مە بكەن، داكو ژ پێخەمەت وێ كەرەما ب رێكا نڤێژێن گەلەكان ل گەل مە هاتیە كرن، گەلەك كەس ژ بەر مە سوپاسیا خودێ بكەن.
شانازیا مە ئەڤەیە: وژدانا مە شاهدەییێ ددەت كو رەفتارا مە د جیهانێ دا، ب تایبەت دەربارەی هەوە، ب سادەیی و نیازپاكیەكا خودایی بوو، نە ب ئاقلمەندیەكا مرۆڤكانی، لێ ب كەرەما خودێ بوو.
ئەڤجا ب ڤێ پشتڕاستیێ نیازا من ئەو بوو كو ل بەراهیێ بهێمە نك هەوە، دا هەوە دوو جاران كەرەم وەرگرتبا.
من دڤیا د رێكا خۆ دا بەرەڤ مەقدۆنیایێ من سەرەدانا هەوە كربا، پاشی دەمێ ئەز ژ مەقدۆنیایێ دزڤڕیم ژی، هاتبامە نك هەوە و هەوە ئەز بەرەڤ یەهودیایێ ب رێ ئێخستبام.
دەمێ من ئەڤ بڕیارە دای، ما من ب سڤكی وەرگرت؟ یان ژی ئەز بڕیارێن خۆ ل دویڤ هزرا مرۆڤكانی ددەم، كو ئاخفتنا من یا شەڤ و رۆژان وەكو ئێك نەبیت، جار بێژم «بەلێ، بەلێ» و جار ژی بێژم «نە، نە»؟
لێ خودایێ دلسۆز شاهدە كو گۆتنا مە بۆ هەوە «بەلێ» و «نە» نەبوو.
كوڕێ خودێ، عیسایێ مەسیح، ئەوێ من و سیلاسی و تیمۆتاوسی د ناڤ هەوە دا دایە نیاسین، «بەلێ» و «نە» نەبوو، لێ د ئێكبوونا ل گەل وی دا ب تنێ «بەلێ» یا هەی.
چنكو ب وی هەمی سۆزێن خودێ «بەلێ»نە، لەوما ئەم ب رێكا وی دبێژین «ئامین» بۆ مەزناهیا خودێ.
خودێیە یێ مە ل گەل هەوە د ئێكبوونا ل گەل مەسیحی دا موكم دكەت. وی ئەم زەیت كرین
و موهر كرین و گیانێ پیرۆز وەكو دەستبەع كرە د دلێ مە دا.
ئەز خودێ ل سەر خۆ دكەمە شاهد كو دلێ من ب هەوە ڤە بوو، لەوما ئەز نەهاتمە كورنتۆسێ.
مەبەستا من نە ئەوە كو ئەم زاڵدەستیێ ل سەر باوەریا هەوە بكەین، چنكو هوین د باوەریێ دا دموكمن، لێ ئەم هەڤكارێن دلخۆشیا هەوەینە.
لەوما من ژ لایێ خۆ ڤە بڕیار دا، ئەز جارەكا دی نەهێم هەوە خەمگین بكەم.
چنكو ئەگەر ئەز هەوە خەمگین بكەم، ما كی ژبلی وی یێ من خەمگین كری، دێ من دلخۆش كەت؟
من ئەو تشت د نامەیا خۆ دا وەسا نڤیسی، داكو دەمێ ئەز بهێم، ژ وان خەمگین نەبم یێن كو پێدڤیە من دلخۆش بكەن. ئەز ژ هەوە هەمیان پشتڕاستم كو دلخۆشیا من دلخۆشیا هەوە هەمیانە.
من بۆ هەوە ژ خەمەكا گران و دلتەنگی و ب گەلەك رۆندكان نڤیسی، نەكو دا هوین خەمگین ببن، لێ دا هوین بزانن حەزژێكرنا من بۆ هەوە چەندا زێدەیە.
ئەز بابەتی مەزن ناكەم دەمێ دبێژم: ئەو كەسێ بوویە ئەگەرێ خەمگینیێ، ئەوی نە ب تنێ ئەز یێ خەمگین كریم، لێ وی هوین هەمی یێن خەمگین كرین.
ئەو سزایێ ژ لایێ پڕانیا هەوە ڤە هاتیە دان، تێرا كەسەكێ هۆسا هەیە.
ئەڤجا بەروڤاژی ڤێ چەندێ، دڤێت هوین ل وی ببورن و هانبدەن، دا ئەو ژ لایێ خەما زێدە ڤە نەهێتە داعویران.
لەوما ئەز هیڤی ژ هەوە دكەم كو هوین حەزژێكرنا خۆ بۆ وی پەسەند بكەنەڤە.
ئارمانجا من ژ نڤیسینێ ئەو بوو كو ئەز هەوە تاقی بكەم و بزانم كا هوین د هەمی تشتان دا گوهداریا من دكەن یان نە.
ئەوێ هوین د تشتەكی دا لێ ببورن، ئەز ژی لێ دبورم. ئەو تشتێ ئەز لێ بوریم، ئەگەر ئەز ل تشتەكی بوریبم، ئەز ژ پێخەمەت هەوە ل بەرامبەر مەسیحی لێ بوریم،
دا ئبلیس كەیسێ خۆ د مە را نەبینیت، چنكو ئەم ژ پیلانێن وی د بێ ئاگە‍‌ھ نینین.
دەمێ ئەز هاتیمە ترویاسێ دا مزگینیا مەسیحی رابگەهینم، دەرگەهەك بۆ من ژ لایێ خودانی ڤە هاتە ڤەكرن،
لێ ژ بەر كو من برایێ خۆ تیتۆس نەدیت، دلێ من تەنا نەبوو. لەوما من خاترخواستن ژ وان كر و ئەز چوومە مەقدۆنیایێ.
لێ سوپاس بۆ خودێ، ئەوێ هەردەم د نمایشا سەركەفتنا خۆ دا ب مەسیحی مە پێشڤە دبەت ، ب رێكا مە بێهنا خۆش یا نیاسینا خۆ ل هەمی جهان بەڵاڤ دكەت.
چنكو ئەم بێهنا مەسیحی یا خۆشین بۆ خودێ، د ناڤ وان دا یێن قورتال دبن و د ناڤ وان دا یێن ژ ناڤ دچن.
بۆ یێن ژ ناڤ دچن، ئەم بێهنا مرنێینە، كو وان بەرەڤ مرنێ ڤە دبەت و بۆ یێن قورتال دبن ژی، بێهنا ژیانێینە، كو وان بەرەڤ ژیانێ ڤە دبەت. ما شیانێن كێ تێرا ڤان تشتان هەنە؟
ئەم وەكو گەلەك كەسان نینین بازرگانیێ ب پەیڤا خودێ بكەین، لێ ئەم وەكو مرۆڤێن ژ لایێ خودێ ڤە هاتینە هنارتن، ل بەرامبەری خودێ ل دویڤ حەزا مەسیحی ب نیازپاكی دئاخڤین.
ما ئەم دیسان دەست ب پەسەندكرنا خۆ دكەین؟ یان ما وەكو هندەك كەسان ئەم د پێدڤی نامەیێن پەسەندكرنێینە بۆ هەوە، یان ژ هەوە؟
نامەیا مە هوینن، د دلێ مە دا هاتیە نڤیسین، ژ لایێ هەمی مرۆڤان ڤە دهێتە زانین و خواندن.
دیارە كو هوین نامەیەكا مەسیحینە، ئەوا ب دەستێ مە هاتیە ئامادەكرن، نە ب حبری، لێ ب گیانێ خودایێ زیندی هاتیە نڤیسین، نە ل سەر تەختەبەران، لێ ل سەر تەختێ دلێ مرۆڤان.
مە پشتڕاستیەكا وەسا ب رێكا مەسیحی ل نك خودێ یا هەی،
نەكو شیانێن مە ب خۆ تێرا دكەن كو ئەم هزر بكەین تشتەكە ژ مە ب خۆیە، لێ ئەو شیانا ل نك مە هەی ژ خودێیە.
ئەوێ شیان دایە مە، دا تێرا هندێ بكەین كو ببینە خزمەتكارێن پەیمانا نوی، نە پەیمانا پیتێ ، لێ پەیمانا گیانێ پیرۆز. چنكو پیت دكوژیت، لێ گیان ژیانێ ددەت.
ئەڤجا ئەگەر ئەو خزمەتا مرن ئینای، ئەوا ب پیتان ل سەر تەختەبەران هاتیە نكراندن، هند ب رەونەق ڤە هاتبیت كو ئیسرائیلی نەشیان رك و رك بەرێ خۆ بدەنە دێمێ مووسای، ژ بەر رەونەقیا دێمێ وی یا بەرەڤ نەمانێ دچوو،
ئێدی ما خزمەتا گیانێ پیرۆز پتر یا ب رەونەق نابیت؟
چنكو ئەگەر ئەو خزمەتا مرۆڤان گونەهبار دكەت، یا ب رەونەق بیت، ئەڤجا خزمەتا بێگونەهكرنێ چەند جاركی زێدەتر دێ یا ب رەونەق بیت!
تشتێ كو یێ ب رەونەق بوو، ئێدی ب هەڤبەركرن ل گەل تشتێ گەلەك ژ وی ب رەونەقتر، رەونەقی نینە.
ئەگەر تشتێ كو بەرەڤ نەمانێ دچوو ب رەونەق ڤە هاتبیت، ئەڤجا چەند پتر تشتێ دمینیت دێ رەونەق هەبیت!
ئەڤجا مادەم مە هیڤیەكا هۆسا هەیە، ئەم ب وێرەكیەكا مەزن رەفتارێ دكەین،
نە وەكو مووسای، ئەوێ پێچە هاڤێتیە سەر دێمێ خۆ دا ئیسرائیلی بەرێ خۆ نەدەنە دویماهیا تشتێ ب دویماهی دهێت.
لێ زێهنێ وان هاتە گرتن، تا ئەڤرۆ ژی ل دەمێ پەیمانا كەڤن دهێتە خواندن، هەمان ئەو پێچە یا مای نەهاتیە راكرن، چنكو ئەو ب تنێ ب مەسیحی دهێتە ژناڤبرن.
بەلێ، تا ئەڤرۆ، دەمێ پەرتووكا مووسای دهێتە خواندن، پێچە یا ل سەر دلێ وان هەی.
لێ دەمێ كەسەك بۆ خودانی دزڤڕیت، ئەو پێچە دهێتە راكرن.
خودان گیان ب خۆیە و گیانێ خودانی ل كیرێ بیت، ل وێرێ ئازادی هەیە.
ئەم هەمی ژی ب دێمەكێ بێ پێچە رەونەقیا خودانی رەنگڤەددەین، ژ رەونەقەكێ بۆ رەونەقەكا دی بەرەڤ وێنەیێ وی دهێینە گوهۆڕین، ئەڤ چەندە ژی ژ خودانیە، ئەوێ كو گیان ب خۆیە.
لەوما، ژ بەر كو خودێ دلۆڤانی ل گەل مە كریە كو مە ئەڤ خزمەتە هەیە، ئەم بێ ئومێد نابین.
مە كریارێن ڤەشارتی یێن ب شەرم ژی رەت كرن، ئەم فێلبازیێ ناكەین و دەستكاریێ د پەیڤا خودێ دا ناكەین. لێ ئەم راستیێ دیار دكەین و ب ڤی ئاوایی ل پێشیا خودێ بۆ وژدانا هەر مرۆڤەكی خۆ پەسەند دكەین.
لێ ئەگەر مزگینیا مە یا نخافتی ژی بیت، ژ بۆ یێن ژ ناڤ دچن یا نخافتیە.
چنكو خوداوەندێ ڤێ جیهانێ زێهنێ بێباوەران كۆرە كریە، داكو رۆناهیا مزگینیا رەونەقیا مەسیحێ كو وێنەیێ خودێیە، نەبینن.
ئەم خۆ نادەینە نیاسین، لێ ئەم عیسایێ مەسیح ددەینە نیاسین كو ئەو خودانە و ئەم ژ پێخەمەت عیسای بەنیێن هەوەینە.
چنكو ئەو خودایێ گۆتی: «بلا رۆناهی ژ تاریاتیێ شەوقێ بدەت» ، ئەوە یێ د دلێ مە دا شەوق دای، دا ئەم ب رێكا وێ شەوقا ژ دێمێ عیسایێ مەسیحی دەردكەڤیت، رەونەقیا خودێ بنیاسین.
لێ ئەو گەنجینەیا مە هەی، یا د ئامانێن گلی دا، دا دیار ببیت كو هێزا هەری زێدە ژ خودێیە، نە ژ مەیە.
ئەم ژ هەمی لایان ڤە تەنگاڤ دبین، لێ ناهەڕشین. ئەم ئالۆز دبین، لێ بێ ئومێد نابین.
تەپەسەر دبین، لێ پشت بەردای نابین. ئەم دگەڤزین، لێ ژ ناڤ ناچین.
هەردەم مرنا عیسای د لەشێ خۆ دا هەلدگرین، دا ژیانا عیسای ژی د لەشێ مە دا بهێتە دیاركرن.
ئەم، ئەوێن زیندی، سەخمەراتی عیسای، هەردەم رادەستی مرنێ دهێینە كرن دا ژیانا عیسای د لەشێ مە یێ مربار دا بهێتە دیاركرن.
ئەڤجا مرن د مە دا كار دكەت، لێ ژیان د هەوە دا.
هەروەكو هاتیە نڤیسین: «من باوەری هەبوو، لەوما ئەز ئاخفتم،» مە هەمان گیانێ باوەریێ هەیە، ئەڤجا ئەم ژی باوەر دكەین، لەوما ئەم ژی دئاخڤین.
چنكو ئەم دزانین ئەوێ خودان عیسا راكری، دێ مە ژی ل گەل عیسای راكەت و ل گەل هەوە ل پێشیا خۆ ئامادە كەت.
ئەرێ، ئەڤ هەمی تشتە ژ پێخەمەت هەوەنە، داكو كەرەم د ناڤ گەلەكێن دی دا بەڵاڤ ببیت و ژ بۆ مەزناهیا خودێ سوپاسیكرنێ زێدەتر لێ بكەت.
لەوما ئەم بێ ئومێد نابین. لێ سەرەڕای كو ئەم ژ سەرڤە ژ ناڤ دچین، د ناخێ خۆ دا ئەم رۆژ بۆ رۆژێ دهێینە نویكرن.
چنكو تەنگاڤیێن مە یێن سڤك و دەمكی، مەزناهیەكا گران یا هەتا هەتایی بۆ مە ئامادە دكەن، كو ل گەل چ تشتان ناهێتە هەڤبەركرن.
ئەڤجا ئەم ل وان تشتان نانێڕین یێن دهێنە دیتن، لێ ل یێن ناهێنە دیتن. چنكو ئەوێن دهێنە دیتن د دەمكینە، لێ یێن ناهێنە دیتن د هەتا هەتایینە.
چنكو ئەم دزانین ئەگەر خیڤەتا مە هەڕفت، كو جهێ ئاكنجیبوونا مە یا سەر ئەردیە، مە ئاڤاهیەك ژ نك خودێ هەیە، مالەكا ب دەستان نەهاتیە چێكرن، هەتا هەتایێ یا ل ئەسمانان.
تا وی دەمی، ئەم د ڤێ خیڤەتێ ڤە دنالینین و بیریا وێ چەندێ دكەین كو مالا خۆ یا ئەسمانی وەكو جلك بكەینە بەر خۆ.
هۆسا دەمێ ئەم وێ بكەینە بەر خۆ، ئەم رویس نامینین.
هندی ئەم د بن ڤێ خیڤەتێ ڤە بین، دێ ژ بارگرانی نالینین. نەكو مە دڤێت ئەم ژ بەر خۆ بكەین، لێ مە دڤێت د سەر دا ل بەر مە بیت، دا تشتێ مربار ژ لایێ ژیانێ ڤە بهێتە داعویران.
ئەوێ ب تەمامی بۆ ڤێ مەبەستێ ئەم ئامادە كرین، خودێیە، یێ گیانێ پیرۆز وەكو دەستبەع دایە مە.
لەوما هەرگاڤ د پشتڕاستین و دزانین كو هندی ئەم د لەشی دا د ئاكنجی بین، ئەم ژ خودانی د دویرین.
چنكو ئەم ب باوەریێ بڕێڤە دچین، نە ب دیتنا چاڤان.
بەلێ، ئەم د پشتڕاستین و ب باشتر دزانین كو ژ لەشی د دویر بین و ل نك خودانی د ئاكنجی بین.
لەوما ئەم ل نك خودانی د ئاكنجی بین یان ژی ل دویر بین، ئارمانجا مە ئەوە كو جهێ رازیبوونا وی بین.
چنكو دڤێت ئەم هەمی ل بەر كورسیكا مەسیحی یا دادوەریێ راوەستین، دا هەر كەس ل دویڤ تشتێن وی كرین، دەمێ ئەو د لەشی دا، چ د باش بن یان ژی د خراب، وەرگریت.
ئەڤجا، ژ بەر كو ئەم دزانین ترسا ژ خودانی یا چەوایە، بزاڤێ دكەین مرۆڤان قاییل كەین. ئەم بۆ خودێ د ئاشكراینە و هیڤی دكەم د وژدانا هەوە ژی دا د ئاشكرا بین.
ئەم ژ نوی خۆ بۆ هەوە پەسەند ناكەین، لێ ئەم دەرفەتێ ددەینە هەوە كو هوین شانازیێ ب مە ببەن، دا هەوە بەرسڤەك بۆ وان هەبیت، یێن شانازیێ ب تشتێن سەرڤە دبەن، نە تشتێن د دلی دا.
ئەگەر ئاقلێ مە یێ تێكچووی بیت، ئەڤە ئەو بۆ خودێیە، ئەگەر ئاقلێ مە یێ دروست بیت ژی، ئەڤە ئەو بۆ هەوەیە.
حەزژێكرنا مەسیحی مە نەچار دكەت وێ چەندێ بكەین، چنكو ئەم گەهشتینە وی ئەنجامی كو ئێك ژ پێخەمەت هەمیان مر، لەوما هەمی مرن.
ئەو ژ پێخەمەت هەمیان مر، دا ئێدی یێن دژین، نە ژ بۆ خۆ، لێ ژ بۆ وی بژین یێ ژ پێخەمەت وان مری و رابوویە.
ژ نوكە و پێڤە ئەم ب دیتنەكا مرۆڤكانی ل كەسێ نانێڕین. هەر چەندە مە ب دیتنەكا مرۆڤكانی ل مەسیحی نێڕیە، لێ ئێدی ئەم وەسا ل وی نانێڕین.
ئەڤجا ئەگەر كەسەك د ئێكبوونا ل گەل مەسیحی دا بیت، ئەو ئافرندەیەكێ نویە: تشتێن كەڤن بورین و نەمان، ئەڤە یێن نوی چێبوون.
ئەڤە هەمی ژ خودێیە، ئەوێ ئەم ب رێكا مەسیحی ل گەل خۆ ئاشت كرین و خزمەتا ئاشتكرنێ دایە مە.
ئانكو خودێ د كەسایەتیا مەسیحی دا جیهان ل گەل خۆ ئاشت دكر، گونەهێن وان ل سەر نەهژمارتن و پەیاما ئاشتكرنێ ب مە سپارد.
ئەڤجا ئەم بالیۆزێن مەسیحینە، هەروەكو خودێ ب رێكا مە داخوازێ دكەت. ئەم وەكو نوینەرێن مەسیحی هیڤی دكەین: ل گەل خودێ ئاشت ببن.
ئەوێ كو ئێكجار گونە‍‌ھ نەكری، خودێ ژ پێخەمەت مە ئەو كرە قوربانیێ گونەهێ، دا ئەم ب رێكا ئێكبوونا مە ل گەل وی ل نك خودێ راستدار دەركەڤین.
ئەم وەك یێن كو ل گەل خودێ كار دكەین، هیڤی ژ هەوە دكەین كو وەرگرتنا كەرەما وی ژ لایێ هەوە ڤە یا ژ قەستا نەبیت.
چنكو خودێ دبێژیت: «من د دەمێ كەرەما خۆ دا گوهداریا تە كر و د رۆژا قورتالبوونێ دا هاریكاریا تە كر.» ئها دەمێ گونجای نوكەیە، ئها رۆژا قورتالبوونێ نوكەیە.
ئەم د چ تشتی دا بۆ كەسێ ئاستەنگان نادانین، دا گازندە ژ خزمەتێ نەهێنە كرن.
لێ د هەمی تشتان دا، ئەم خۆ وەكو خزمەتكارێن خودێ پەسەند دكەین: د گەلەك خۆڕاگرتنێ دا، د تەنگاڤیان دا، د بن فشاران ڤە، د دژواریان دا،
د قوتانان دا، د زیندانكرنان دا، د تێكدانان دا، د رەنجكێشانان دا، د بێ خەویێ دا، د برسێ دا،
د دلپاكیێ دا، د زانینێ دا، د بێهنفرەهیێ دا، د قەنجیێ دا، د گیانێ پیرۆز دا، د حەزژێكرنا بێ دووڕویاتی دا،
د گۆتنا راستیێ دا، د هێزا خودێ دا، ب چەكێن راستداریێ یێن دەستێ راستێ و یێن دەستێ چەپێ،
ب رێزگرتنێ و بێڕێزكرنێ، ب ناڤودەنگەكێ باش یان یێ خراب. ئەم وەك خاپینۆك دهێینە هژمارتن، لێ ئەم د راستین.
وەك نەنیاس، لێ د ناڤدارین. وەك یێن ل بەر مرنێ، لێ ئها ئەم د ساخین. وەك یێن سزادایی، لێ نەهاتینە كوشتن.
وەك كۆڤاندار، لێ هەردەم د دلخۆشین. وەك هەژار، لێ گەلەكان دەولەمەند دكەین. وەك مە چ نەبیت، لێ ئەم خودانێن هەمی تشتاینە.
ئەم ب ئاشكرایی ل گەل هەوە ئاخڤتین، گەلی كورنتۆسیان! دلێ مە ژی بۆ هەوە یێ ڤەكریە.
ڤیانا مە بۆ هەوە نەهاتیە بەرتەنگكرن، لێ ڤیانا هەوە بۆ مە یا بەرتەنگە.
ئەز وەسا دبێژمە هەوە، هەروەكو ئەز دبێژمە زاڕۆكێن خۆ: كا چەوا مە دلێ خۆ بۆ هەوە ڤەكریە، هوین ژی وەسا دلێ خۆ بۆ مە ڤەكەن.
ل گەل بێباوەران د بن ئێك نیرك ڤە نەبن. چ هەڤپشكی د ناڤبەرا راستداریێ و خرابیێ دا هەیە؟ رۆناهیێ چ پشكداری ل گەل تاریاتیێ هەیە؟
چ رێككەفتن د ناڤبەرا مەسیحی و بەلیعاری دا هەیە؟ یان یێ باوەردار چ بەهر ل گەل یێ بێباوەر هەیە؟
ما چ رێككەفتن د ناڤبەرا پەرستگەها خودێ و پووتان دا هەیە؟ چنكو ئەم پەرستگەها خودایێ زیندینە، هەروەكو خودێ گۆتی: «ئەز دێ د ناڤ وان دا ئاكنجی بم و د ناڤبەرا وان دا گەڕیێم. ئەز دێ خودایێ وان بم و ئەو دێ گەلێ من بن.»
لەوما «خودان دبێژیت: ژ ناڤ وان دەركەڤن و خۆ ڤەدەر كەن، دەست نەكەنە تشتەكێ هەڕمی، ئەڤجا ئەز دێ هەوە قەبیل كەم.
ئەز دێ بمە بابێ هەوە و هوین دێ بنە كوڕ و كچێن من. خودان، هێزدارێ هەر تشتی ڤێ دبێژیت.»
ئەڤجا، مادەم ئەم خودانێن ڤان سۆزاینە، گەلی خۆشتڤیان، بلا ئەم خۆ ژ هەر جۆرەكێ پیساتیا لەشی و گیانی پاك بكەین و ژ بەر ترسا خودێ ب تەمامی پیرۆز ببین.
جهێ مە د دلێ خۆ دا بكەن. مە زێدەگاڤی ل سەر مافێ كەسێ نەكریە. مە زیان ل كەسێ نەكریە. مە كەیسێ خۆ ل كەسێ نەكریە.
ئەز ڤێ نابێژم دا هەوە گونەهبار بكەم، چنكو من بەری نوكە یێ گۆتی كو هوین یێ د دلێ مە دا، دا ئەم پێكڤە بمرین و پێكڤە بژین.
ئەز گەلەك ژ هەوە یێ پشتڕاستم و گەلەك شانازیێ ب هەوە دبەم. سەرەڕای هەمی تەنگاڤیێن مە، ئەز ژ هاندانێ یێ پڕ بوویم و ژ دلخۆشیێ د سەر دا دچم.
خۆ دەمێ ئەم هاتینە مەقدۆنیایێ ژی ، مە هەر بێهنڤەدان نەدیت، لێ ژ هەمی لایان ڤە ئەم تووشی تەنگاڤیان دبووین: ژ دەرڤە ناكۆكی و ژ ناڤ دا ترس.
لێ خودێ، ئەوێ دلشكەستیان هان ددەت، ب هاتنا تیتۆسی ئەم هان داین.
نە ب تنێ ب هاتنا وی، لێ ب وێ هاندانێ ژی یا وی ژ هەوە وەرگرتی. وی گۆتە مە كا چەوا هوین بیریا من دكەن و چەند كۆڤاندارن و بۆ من چەند دلگەرمن، ئەڤجا ئەز زێدەتر دلخۆش بووم.
چنكو ئەگەر من ب نامەیا خۆ هوین خەمبار كربن ژی، ئەز نە یێ پەشیمانم، هەر چەندە ئەز پەشیمان ببووم، چنكو بۆ من دیار بوو كو وێ نامەیێ هوین خەمبار كرن، لێ ب تنێ بۆ دەمەكێ كورت.
نوكە ئەز یێ دلخۆشم، نە چنكو هوین خەمبار بوون، لێ چنكو خەمباریا هەوە بەرێ هەوە دا لخۆزڤڕینێ. هوین ل دویڤ حەزا خودێ خەمبار بوون و هۆسا هەوە چ زیان ژ مە نەدیت.
چنكو خەمباریا ل دویڤ حەزا خودێ، لخۆزڤڕینەكێ بەرهەم دئینیت كو قورتالبوونەكا بێ پەشیمانی پێڤە بهێت. لێ خەمباریا ژ جیهانێ، مرنێ بەرهەم دئینیت.
بەرێ خۆ بدەنێ، هەر وێ خەمباریا ل دویڤ حەزا خودێ د هەوە دا چەند بەرهەم ئینایە: چەند خەمخۆری، چەند حەز كو هوین خۆ روی سپی دەرئێخن، چەند تۆڕەبوون ژ بەر نەڕاستیێ، چەند سەهم، چەند بیریكرن، چەند دلگەرمی، چەند بجهئینانا دادپەروەریێ! د هەمی تشتان دا هەوە سەلماند كو هوین د ڤێ بابەتی دا د بێگونەهن.
ئانكو من ئەو نامەیە بۆ هەوە نڤیسی، نە ژ پێخەمەت وی بوو یێ زێدەگاڤی كری، نە ژی ژ پێخەمەت وی بوو یێ زێدەگاڤی د دەرهەقا وی دا هاتیە كرن، لێ دا دلگەرمیا هەوە ل سەر مە، ل بەرامبەر خودێ، بۆ هەوە دیار ببیت.
لەوما ئەم هاتینە هاندان. د سەر ڤێ هاندانێ را، ئەم ژ بەر دلخۆشیا تیتۆسی گەلەك پتر دلخۆش بووین، چنكو دلێ وی ژ لایێ هەوە هەمیان ڤە هاتە تەناكرن.
من شانازیا خۆ ب هەوە بۆ وی دیار كر و ئەز شەرمزار دەرنەكەفتم، لێ كا چەوا هەر تشتێ مە گۆتیە هەوە راست بوو، وەسا ئەو شانازیا مە بۆ تیتۆسی دەربارەی هەوە دیار كری، راست دەركەفت.
حەزژێكرنا وی بۆ هەوە هێشتا زێدەتر لێ دهێت، هەر دەمێ بیرئینانا گوهداریا هەوە دكەت، كا چەوا هەوە ئەو ب ترس و لەرز قەبیل كر.
ئەز یێ دلخۆشم، چنكو د هەمی تشتان دا ژ هەوە یێ پشتڕاستم.
ئەم حەز دكەین نوكە بۆ هەوە، گەلی خویشك و برایان، وێ كەرەما خودێ بدەینە نیاسین یا بۆ جڤاكێن باوەردارێن مەقدۆنیایێ هاتیە دان.
سەرەڕای تاقیكرنەكا دژوار ب رێكا تەنگاڤیان، شادیا وان یا زێدە و هەژاریا وان یا دژوار ب دەولەمەندیا مەردینیێ د سەر دا چوو.
ئەز شاهدەییێ ددەم كو وان ل دویڤ شیانێ، بەلكو ژ شیانا خۆ زێدەتر ژی، ب حەزا خۆ هاریكاری دان.
گەلەك هیڤی ژ مە كرن كو ئەم شەرەفمەندیا پشكداریێ د هاریكاریكرنا پیرۆزكریان دا بدەینە وان.
وان ژ وێ یا مە چاڤەڕێ دكر بوراند، ل بەراهیێ وان خۆ رادەستی خودانی كر و پاشی ب حەزا خودێ خۆ رادەستی مە ژی كر.
ئەڤجا مە هیڤی ژ تیتۆسی كرن، كا چەوا وی دەست ب ڤێ كەرەمێ كریە، ئەو د ناڤ هەوە دا تەمام ژی بكەت.
كا چەوا هوین د هەر تشتەكی دا د پێشكەفتینە: د باوەریێ دا، د ئاخفتنێ دا، د زانینێ دا، د هەمی دلگەرمیێ دا و د حەزژێكرنا هەوە دا بۆ مە، وەسا د ڤێ كەرەما بەخشینێ ژی دا پێش بكەڤن.
ئەز ڤێ چەندێ وەكو فەرمان نابێژم، لێ ئەز راستیا حەزژێكرنا هەوە ب هەڤبەركرنێ ل گەل دلگەرمیا كەسێن دی تاقی دكەم.
چنكو هوین كەرەما خودانێ مە عیسایێ مەسیح دزانن: كو هەر چەندە ئەو یێ دەولەمەند بوو، لێ ئەو ژ پێخەمەت هەوە بوو هەژار، دا هوین ب هەژاریا وی دەولەمەند ببن.
ئەز ل دۆر ڤێ چەندێ ئامۆژگاریەكێ ل هەوە دكەم: بۆ هەوە مفایە، هوین یێن هەر ژ ساڵا پار ل بەراهیێ دەست پێ كری، نە ب تنێ ب كرنێ، لێ ب حەزكرنێ ژی.
نوكە ڤی كاری تەمام بكەن، داكو ل دویڤ شیانا هەوە، تەمامكرنا وی كاری یا هند بیت، هندی هەوە ژ دل حەز دكر وی كاری بكەن.
چنكو ئەگەر دلگەرمی هەبیت، بەخشین یا پەسەندە، ل دویڤ وی تشتێ مرۆڤی هەی، نە ل دویڤ وی تشتێ مرۆڤی نەی.
مەبەست نە ئەوە كو هندەكێن دی بكەڤنە بەرفرەهیێ و هوین بكەڤنە تەنگاڤیێ، لێ بلا وەكهەڤی هەبیت.
د دەمێ نوكە دا زێدەییا ل بەر دەستێ هەوە بۆ هەوجەییا وان بیت، دا ل پاشەڕۆژێ زێدەییا ل بەر دەستێ وان ژی بۆ هەوجەییا هەوە بیت، هۆسا دێ وەكهەڤی هەبیت.
هەروەكو هاتیە نڤیسین: «یێ گەلەك كۆم كری، چ ژ وی زێدە نەبوو و یێ كێم كۆم كری، چ ژ وی كێم نەبوو.»
سوپاس بۆ خودێ، ئەوێ هەمان دلگەرمیا من بۆ هەوە هەی، كریە د دلێ تیتۆسی دا.
چنكو تیتۆسی نە ب تنێ داخوازا مە قەبیل كر، لێ وی ب دلگەرمیەكا زێدەتر ڤیایە و قەستا هەوە دكەت.
ل گەل وی ئەم وی برای دهنێرین، یێ ژ بەر كارێ وی د مزگینیدانێ دا هەمی جڤاكێن باوەرداران پەسنا وی دكەن.
نە ب تنێ ئەڤ چەندە، لێ ئەو ژ لایێ جڤاكێن باوەرداران ڤە هاتیە هەلبژارتن ژی، دا هەڤالێ مە یێ رێڤنگیێ بیت، ل دەمێ ئەم ڤێ كەرەمێ هەلدگرین و دابەش دكەین ژ بۆ مەزناهیا خودانی و دا دیار ببیت كو نیازا مە هاریكاریە.
ئەم ڤێ چەندێ دكەین دا كەس دەربارەی وێ بەخشینا مەزن یا ئەم خزمەتا وێ دكەین، گازندەیان ژ مە نەكەت.
چنكو نیازا مە ئەوە ئەم وی تشتی بكەین یێ راست، نە ب تنێ د چاڤێن خودانی دا، لێ د چاڤێن مرۆڤان ژی دا.
ل گەل وان هەردوویان، ئەم وی برایێ خۆ ژی دهنێرین، ئەوێ مە گەلەك جاران د گەلەك تشتان دا تاقی كری و مە دیت یێ دلگەرمە، نوكە ئەو هێشتا پتر یێ دلگەرمە، چنكو ئەو گەلەك ژ هەوە یێ پشتڕاستە.
دەربارەی تیتۆسی، ئەو هەڤپشكێ منە و بۆ هەوە هەڤكارێ منە. دەربارەی هەردوو برایێن مە یێن دی ژی، ئەو هنارتیێن جڤاكێن باوەردارانە و ژ بەر وان مەسیح دهێتە مەزنكرن.
ئەڤجا ل پێش چاڤێن جڤاكێن باوەرداران بەلگەیێ حەزژێكرنا خۆ و هۆكارێ شانازیا مە ب هەوە نیشا وان بدەن.
پێدڤی ناكەت ئەز بۆ هەوە سەبارەت خزمەتا هاریكاریكرنا پیرۆزكریان بنڤیسم،
چنكو ئەز حەزا دلێ هەوە بۆ هاریكاریكرنێ دزانم، ل نك مەقدۆنیان ئەز شانازیێ پێ دبەم و دبێژمە وان كو هەرێما ئەخایایێ ژ پار وەرە یا ئامادەیە. دلگەرمیا هەوە گەلەك ژ وان بۆ هاریكاریكرنێ هاندان.
لێ ئەز برایان دهنێرمە نك هەوە، دا ل دۆر ڤێ چەندێ شانازیا مە ب هەوە ڤاڵا دەرنەكەڤیت و دا هوین د ئامادە بن، هەروەكو من گۆتی.
چنكو ئەگەر هندەك مەقدۆنی ل گەل من بهێن و ببینن هوین نە د ئامادەنە، ئەم دێ شەرمزار بین، ژ بەر كو ئەم ژ هەوە د پشتڕاست بووین. هوین ژی دێ شەرمزار بن، لێ نەهەوجەیە ئەز ڤێ بێژم.
لەوما من ب فەر دیت كو ئەز هیڤیێ ژ برایان بكەم، دا ئەو بەری من بهێنە نك هەوە و وێ بەخشینێ پێشوەخت ئامادە بكەن یا هەوە بەری نوكە سۆز پێ دای، داكو ئەو وەسا یا ئامادە بیت، هەروەكو ئەو بەخشینەكا مەردانە بیت، نە ژ نەچاری بیت.
ڤێ چەندێ ژی بزانن: یێ پیچەكێ بچینیت، پیچەكێ ددوریت ژی و یێ گەلەكێ بچینیت، گەلەكێ ددوریت ژی.
بلا هەر ئێك ل دویڤ بڕیارا دلێ خۆ بدەت، نە ژ بێدلی یان ژ نەچاری. چنكو خودێ حەز ژ وی دكەت، یێ ب دلخۆشی بدەت.
خودێ دشێت هەر كەرەمەكێ ب سەر هەوە دا بڕێژیت، دا هەوە د هەمی تشتان دا و ل هەمی دەمان ب تەمامی تێرا خۆ هەبیت و وەسا هوین ب هەمی كارێن باش د سەر دا بڕژن.
هەروەكو هاتیە نڤیسین: «وی ب مەردینی ل سەر هەژاران بەڵاڤ كریە، راستداریا وی هەروهەر دمینیت.»
ئەوێ تۆڤی بۆ تۆڤچینی و نانی بۆ خوارنێ پەیدا دكەت، دێ تۆڤی بۆ هەوە پەیدا كەت و چەند جاركی زێدە كەت و دێ وەرارێ ئێخیتە بەرهەمێ راستداریا هەوە.
هوین دێ د هەر تشتی دا هێنە دەولەمەندكرن، دا هوین هەردەم د مەرد بن و ب رێكا مە مەردینیا هەوە سوپاسیكرنێ بۆ خودێ بەرهەم بینیت،
چنكو ئەنجامدانا ڤێ خزمەتێ، نە ب تنێ هەوجەییێن پیرۆزكریان دقەتینیت، لێ ژ بەر وێ سوپاسیكرن ژی بۆ خودێ د سەر دا درێژیت.
ئەڤ خزمەتە بەلگەیە ل سەر باوەریا هەوە، ئەڤجا گەلەك مرۆڤ ژ بەر ملكەچیا هەوە بۆ دانپێدانێ ب مزگینیا مەسیحی و ژ بەر مەردینیا هەوە د هاریكاریكرنا وان و هەمی كەسێن دی دا، دێ پەسنا خودێ كەن
و دێ نڤێژان بۆ هەوە كەن و بیریا هەوە كەن، ژ بەر وێ كەرەما خودێ یا زێدە مەزن، ئەوا بۆ هەوە هاتیە دان.
سوپاس بۆ خودێ، ژ بەر دیاریا وی یا ناهێتە سالۆخدان!
ئەز، پاولۆس، ئەوێ دهێتە گۆتن كو یێ دەروونبچویكم د روی ب روی بوونا هەوە دا و یێ وێرەكم دەمێ ژ هەوە دویر، ئەز ب نەرمی و نازكیا مەسیحی داخوازێ ژ هەوە دكەم.
هیڤی دكەم دەمێ ئەز بهێمە نك هەوە، پێدڤی وێ وێرەكیێ نەبم یا كو ئەز دبینم دێ ل دژی هندەك كەسان ب كار ئینم، یێن هزر دكەن ئەم ل دویڤ پیڤەرێن مرۆڤان دژین.
راستە ئەم د لەشەكێ مرۆڤكانی دا دژین، لێ ئەم ل دویڤ پیڤەرێن مرۆڤان جەنگێ ناكەین.
چنكو چەكێن مە یێن جەنگێ نە د لەشكانینە، لێ هێزەكا خودایی هەیە كو كەلهەیان هەلوەشینن.
هەر بیردۆزەك و هەر بیرۆكەكا دفنبلند یا سەرێ خۆ ل بەر زانینا خودێ رادكەت، ئەم وێ دهەلوەشینین و هەمی هزران دكەینە دیلێن گوهداریا مەسیحی
و پشتی هوین گوهداریا خۆ تەمام بكەن، ئەم د ئامادەینە هەر كریارەكا نەگوهداریێ سزا بدەین.
هوین ل تشتێن ل بەر چاڤ دنێڕن. ئەگەر ئێك یێ پشتڕاستە كو ئەو یێ مەسیحیە، بلا ل دۆر ڤێ چەندێ جارەكا دی هزر بكەت و بزانیت، كا چەوا ئەو یێ مەسیحیە، ئەم ژی وەسا یێن مەسیحینە.
چنكو ئەگەر ئەز پیچەكێ زێدە شانازیێ ب وێ دەستهەلاتا مە بكەم ژی، ئەوا خودانی دایە مە بۆ ئاڤاكرنا هەوە، نە بۆ هەڕفاندنا هەوە، ئەز ب شەرم نابینم.
من نەڤێت وەسا دیار ببم كو ئەز یێ هەوڵ ددەم ب نامەیێن خۆ هەوە بترسینم.
چنكو هندەك دبێژن: «نامەیێن وی ب سەنگ و ب هێزن، لێ دەمێ ئەو ئامادە دبیت، كەسایەتیا وی یا لاوازە و ئاخفتنێن وی نە د كاریگەرن.»
كەسەكێ هۆسا، بلا تێبگەهیت كا دەمێ ئەم نە د ئامادە، ب گۆتنێ ب رێكا نامەیان د چەوانین، ل دەمێ ئامادەبوونێ ئەم ب كریارێ ژی د وەساینە.
ئەم نەوێرین خۆ ژ هندەكان بهژمێرین، نە ژی خۆ ل گەل وان هەڤبەر بكەین، یێن خۆ پەسەند دكەن. لێ ئەوێن خۆ ب ئێكودوو دهەلسەنگینن و خۆ ب ئێكودوو هەڤبەر دكەن، نە د تێگەهشتینە.
هندی ئەمین، ئەم زێدەتر ژ رادەی شانازیێ ب خۆ نابەین، لێ د چارچوڤەیێ سنوورێ كارێ خۆ دا، یێ خودێ بۆ مە دانای كو تا نك هەوە ژی دگەهیت، شانازیێ دبەین.
ئەم ژ سنوورێ خۆ دەرباز نابین، هەروەكو تا نك هەوە نەگەهشتبین، چنكو ئەم بووین مزگینیا مەسیحی گەهاندیە هەوە.
ئەم زێدەگاڤیێ ل سەر وی سنووری ناكەین و شانازیێ ب رەنجا كەسێن دی ببەین، لێ هیڤیدارین، ل گەل وەرارا باوەریا هەوە، سنوورێ كارێ مە د ناڤ هەوە دا زێدەتر بەرفرە‍‌ھ ببیت،
دا ئەم مزگینیێ د دەڤەرێن ژ هەوە وێڤەتر دا رابگەهینین. چنكو مە نەڤێت شانازیێ ب كارێ كەسێن دی ببەین، ئەوێ وان د ناڤ سنوورێ خۆ دا كری.
لێ «ئەوێ شانازیێ دبەت، بلا شانازیێ ب خودانی ببەت.»
چنكو یێ خودان وی پەسەند دكەت، ئەو دهێتە قەبیلكرن، نە یێ ئەو خۆ پەسەند دكەت.
خوزی هەوە بێهنا خۆ ل سەر من فرە‍‌ھ كربا كو ئەز پیچەك بێئاقلانە بئاخڤم! بەلێ، بێهنا خۆ ل من فرە‍‌ھ بكەن!
ئەز ب ئیرەییەكا خودایانە ئیرەییێ ب هەوە دبەم، چنكو من بۆ ئێك زەڵام نیشانی ب هەوە ڤەكریە، ئەو ژی مەسیحە، دا هەوە وەكو كچكەكا دەهمەنپاك پێشكێشی وی بكەم.
لێ ئەز دترسم، كا چەوا ماری ب فێلبازیا خۆ حەوا خاپاند، وەسا زێهنێ هەوە ژ دلسۆزیا زەڵال و پاك یا هەوە بۆ مەسیحی هەی بهێتە خڕاندن.
چنكو ئەگەر ئێك بهێتە نك هەوە و عیسایەكێ دی رابگەهینیت، ژبلی وی یێ مە راگەهاندی، یان گیانەكێ دی وەرگرن، ژبلی گیانێ پیرۆز یێ هەوە وەرگرتی، یان مزگینیەكا دی قەبیل بكەن، ژبلی وێ یا هەوە قەبیل كری، هوین باش بێهنا خۆ ل وی فرە‍‌ھ دكەن!
لێ ب هزرا من، ئەز چ ژ وان كێمتر نینم یێن هندەك ژ هەوە دبینن كو ‹هنارتیێن بژارە›نە.
ئەگەر د ئاخفتنێ دا ئەز نە یێ شارەزا بم، د زانینێ دا ئەز یێ شارەزامە. ب راستی ژی ئەڤ چەندە مە بۆ هەوە ژ هەمی لایان ڤە و د هەمی تشتان دا ئاشكرا كر.
من بێ بەرامبەر مزگینیا خودێ بۆ هەوە راگەهاند. ما من گونە‍‌ھ كر دەمێ من هۆسا خۆ شكاندی، دا هوین بلند ببن؟
من جڤاكێن دی یێن باوەرداران شەلاندن، دەمێ من پارە ژ وان وەرگرتین، دا خزمەتا هەوە بكەم
و دەمێ ئەز د ناڤ هەوە دا و ئەز هەوجە بوویم، من بارێ كەسێ ژ هەوە گران نەكر، چنكو ئەو برایێن ژ مەقدۆنیایێ هاتین هەوجەییا من قەتاند. وەسا من د هەر تشتەكی دا خۆ راگرت كو بۆ هەوە نەبمە بارگرانی و دێ خۆ راگرم ژی.
ب وێ راستیا مەسیحی یا د من دا، كەس ل دەڤەرێن ئەخایایێ نەشێت من ل سەر شانازی ب خۆ برنێ مت بكەت.
بۆچی؟ ئایا چنكو ئەز حەز ژ هەوە ناكەم؟ خودێ دزانیت كو ئەز حەز ژ هەوە دكەم.
ئەو تشتێ ئەز دكەم، ل سەر وی دێ یێ بەردەوام بم، دا دەرفەتێ ل وان ببڕم یێن ل دەرفەتەكێ دگەڕیێن، دا شانازیێ ببەن كو كارێ وان یەكسانە ل گەل كارێ مە.
چنكو كەسێن وەسا هنارتیێن سەختەنە، پالەیێن خاپینۆكن، وێنەیێ خۆ دگوهۆڕن كو وەكو هنارتیێن مەسیحی لێ بهێن.
ئەڤە ژی نە تشتەكێ سەیرە، چنكو ئبلیس ب خۆ ژی وێنەیێ خۆ دگوهۆڕیت كو وەكو فریشتەیێ رۆناهیێ لێ بهێت.
ئەڤجا نە تشتەكێ مەزنە كو خزمەتكارێن وی ژی وێنەیێ خۆ بگوهۆڕن كو وەكو خزمەتكارێن راستداریێ لێ بهێن. دویماهیا وان دێ ل دویڤ كریارێن وان بیت.
ئەز دیسان دبێژم: بلا كەس من بێئاقل نەهژمێریت. لێ ئەگەر هوین من وەسا بدانن ژی، من وەكو بێئاقل قەبیل بكەن، دا ئەز ژی پیچەكێ شانازیێ ببەم.
ئەڤ تشتێ ئەز دبێژم، راستە نە ب دلێ خودانیە، لێ ئەز وەكو بێئاقلەك دبێژم كو ب پشتڕاستی شانازیێ ب خۆ دبەت.
مادەم گەلەك ل دویڤ پیڤەرێن مرۆڤان شانازیێ دبەن، ئەز ژی دێ شانازیێ بەم.
هوین د ئاقلمەندن! لەوما هوین ب دلخۆشی بێهنا خۆ ل بێئاقلان فرە‍‌ھ دكەن.
بەلێ، ئەگەر ئێك هەوە بكەتە بەنی، یان ئەگەر ئێك مالێ هەوە بخۆت، یان ئەگەر ئێك كەیسێ خۆ د هەوە را ببینیت، یان ئەگەر ئێك دفنا خۆ ل هەوە بلند بكەت، یان ئەگەر ئێك زللەهەكێ ل هەوە بدەت، هوین بێهنا خۆ ل وی فرە‍‌ھ دكەن.
ئەز ب شەرمی ڤە دانپێدانێ دكەم كو بۆ كرنا ڤان تشتان ئەم د لاواز بووین! لێ ئەگەر ئێك بوێریت د تشتەكی دا شانازیێ ب خۆ ببەت (ئەز ب بێئاقلی دبێژم): ئەز ژی دوێرم شانازیێ ب خۆ ببەم.
ئەگەر ئەو عیبرانینە، ئەز ژی عیبرانیمە. ئەگەر ئەو ئیسرائیلینە، ئەز ژی ئیسرائیلیمە. ئەگەر ئەو ژ دویندەها ئیبراهیمینە، ئەز ژی ژ دویندەها ئیبراهیمیمە.
ئەگەر ئەو خزمەتكارێن مەسیحینە، (ئەز وەكو ئێكێ دین دبێژم) ئەز ژ وان باشترم: من زێدەتر رەنجا بری، پتر یێ هاتیمە زیندانكرن، پتر لێدان ب من كەفتیە، گەلەك جاران روی ب روی مرنێ بوویمە.
من ژ دەستێ جوهیان پێنج جاران چل كێم ئێك قامچی خوارینە.
ئەز سێ جاران هاتیمە داردان؛ جارەكێ هاتیمە بەربارانكرن؛ سێ جاران گەمیا ئەز تێدا تێكشكەستیە؛ ئەز شەڤەك و رۆژەكان د نیڤا دەریایێ دا مایمە.
من گەلەك رێڤنگی كرن و ئەز تووشی مەترسیێن رویباران بوویمە، مەترسیێن رێگران، مەترسیێن ژ مللەتێ من چێبووین، مەترسیێن ژ مللەتێن دی چێبووین، مەترسیێن د باژێڕان دا، مەترسیێن د چۆلی دا، مەترسیێن د دەریایێ دا، مەترسیێن ژ برایێن سەختە چێبووین.
من رەنج و وەستیان كێشان، ئەز گەلەك مایمە بێ خەو، برسی و تێهنی بوویمە، گەلەك مایمە بێ خوارن، سەرما و رویساتی ب سەرێ من هاتینە.
ژبلی تشتێن دی، هەر رۆژ بارێ خەمخۆریێ ژ هەمی جڤاكێن باوەرداران دكەڤیتە سەر ملێ من.
ئەگەر ئێك بێهێز ببیت، ئەز ژی ژ بەر وی بێهێز دبم و ئەگەر ئێك بهێتە هەلنگافتن، ژ بەر وی ئاگر دكەڤیتە دلێ من.
ئەگەر یا پێدڤی بیت ئەز شانازیێ ب خۆ ببەم، ئەز دێ شانازیێ ب وان تشتان بەم، یێن لاوازیا من دیار دكەن.
خودێ، بابێ خودان عیسای، ئەوێ هەروهەر هەژی پەسنكرنێ ، دزانیت كو ئەز درەوان ناكەم.
ل دیمەشقێ، والیێ بریكارێ ئارێتاس پاشای ژ پێخەمەت گرتنا من زێرەڤان دانابوونە بەر دەرگەهێن باژێڕێ دیمەشقێ،
ئینا ئەز د پەنجەرەكا شویرهێ دا ب سەڤیەكێ هاتمە داهێلان و ژ دەستێن وی رزگار بووم.
یا فەرە شانازیێ ب خۆ ببەم. هەر چەندە یا بێ مفایە، لێ ئەز دێ هێمە سەر بینین و پەیامێن خودانی بۆ من ئاشكرا كرین.
ئەز مرۆڤەكی دنیاسم، باوەردارە ب مەسیحی، بەری چواردە ساڵان ئەو تا ئەسمانێ سێیێ هاتە رەڤاندن. ئایا ب لەش ڤە بوو یان ژ دەرڤەی لەشی بوو، ئەز نزانم، خودێ دزانیت.
ئەز دێ شانازیێ ب ئێكێ هۆسا بەم، لێ ژ لاوازیا خۆ پێڤە، ئەز شانازیێ ب خۆ نابەم.
ئەگەر من بڤێت شانازیێ ببەم ژی، ئەز یێ بێئاقل نابم، چنكو ئەز راستیێ دبێژم. لێ ئەز خۆ ددەمە پاش دا كەس چ هزرێن باشتر بۆ من نەكەت، پتر ژ ئەو تشتێ وی ژ من دیتی یان ژ من بهیستی.
داكو ئەز ژ بەر مەزنیا تشتێن بۆ من هاتینە ئاشكراكرن دفنبلند نەبم، د لەشێ من دا ستریەك بۆ من هاتە دان ، هنارتیەكێ ئبلیسیە من ئازار ددەت، دا دفنبلند نەبم.
بۆ ڤێ چەندێ ژی من سێ جاران هیڤی ژ خودانی كر كو ژ من دویر بئێخیت،
لێ وی گۆتە من: «كەرەما من تێرا تە هەیە. چنكو هێزا من د لاوازیا مرۆڤی دا ب كاملی كار دكەت.» ئەڤجا ب هەمی دلخۆشی ئەز دێ شانازیێ ب لاوازیێن خۆ بەم، دا هێزا مەسیحی د من دا ئاكنجی ببیت.
لەوما ئەز ب لاوازیان، كرێتكرنان، نەخۆشیان، تەپەسەركرنان و تەنگاڤیان ژ پێخەمەت مەسیحی كەیفخۆش دبم، چنكو دەمێ ئەز یێ لاواز، هنگی ئەز یێ ب هێزم.
من خۆ بێئاقل كر، لێ هەوە ئەز نەچار كرم. پێدڤی بوو ئەز ژ لایێ هەوە ڤە بهێمە پەسەندكرن، چنكو ئەز چ ژ ‹هنارتیێن بژارە› كێمتر نینم، هەر چەندە ئەز چ نینم.
نیشانێن هنارتیەكێ راستەقینە، نیشان و مەندەهۆشی و حنێر ب هەمی خۆڕاگرتن د ناڤ هەوە دا هاتنە ئەنجامدان.
ما هوین چ ژ جڤاكێن دی یێن باوەرداران كێمتر بوون، ژبلی كو من بارێ هەوە گران نەكر؟ ل من ببورن كو من ئەڤ مافێ هەوە خواری!
ئەڤە ئەز یێ ئامادەمە بۆ جارا سێیێ بهێمە نك هەوە و ئەز بارێ هەوە گران ناكەم. چنكو من مالێ هەوە نەڤێت، لێ من هوین دڤێن. نە یا فەرە زاڕۆك بۆ دایك و بابان مالی كۆم بكەن، لێ دایك و باب بۆ زاڕۆكان.
ئەز دێ ب هەمی دلخۆشی مالێ خۆ و گیانێ خۆ ژی بۆ هەوە مەزێخم. ئەگەر ئەز زێدەتر حەز ژ هەوە بكەم، ما هوین دێ كێمتر حەز ژ من كەن؟
ئەڤجا مگرتی ئەز بۆ هەوە بارگرانی نەبووم. لێ ئەز فێلبازم، من ب خاپاندنێ هوین یێن ب دەست خۆ ئێخستین!
ئایا ب رێكا ئەوێن من هنارتینە نك هەوە، من مالێ هەوە خواریە؟
من هیڤی ژ تیتۆسی كر و ئەو برا ل گەل هنارت. ما تیتۆسی مالێ هەوە خوار؟ ما مە ب هەمان گیانی كار نەكر؟ ما ل سەر هەمان رێكێ نەچووین؟
ما هوین هزر دكەن، ب درێژاهیا ڤێ نامەیێ، ئەم هەوڵ ددەین رویێن خۆ ل نك هەوە سپی بكەین؟ نەخێر، ل بەرامبەری خودێ ئەم ل دویڤ حەزا مەسیحی بۆ هەوە دئاخڤین، هەر تشتێ ئەم بكەین ژی، گەلی خۆشتڤیان، بۆ ئاڤاكرنا هەوەیە.
ئەز دترسم دەمێ بهێم، ئەز هەوە وەسا نەبینم هەروەكو من دڤێت و هوین من وەسا نەبینن هەروەكو هەوە دڤێت. دترسم هەڤڕكی، چاڤپێنەڕابوون، تۆڕەیی، جوداخوازی، بوهتان ، نەكامی ، خۆمەزنكرن و تێكڤەدان د ناڤ هەوە دا هەبن.
ئەز دترسم دەمێ جارەكا دی بهێمە نك هەوە، خودایێ من ل نك هەوە من شەرمزار بكەت و بۆ گەلەكان شینیێ بكەم، ئەوێن پێشتر گونە‍‌ھ كرین و ژ پویچاتی، دەهمەنپیسی و بێدەلنگیا وان كری ل خۆ نەزڤڕین.
ئەڤە سێیەمین جارە ئەز دهێمە نك هەوە. «دڤێت هەر تاوانەك ب دەڤێ دوو یان سێ شاهدان بهێتە سەلماندن.»
بەری نوكە، دەمێ ئەز جارا دوویێ ل نك هەوە، من گۆتبوو و نوكە ژی، دەمێ ئەز نە ل نك هەوە، دبێژمە وان یێن بەری نوكە گونە‍‌ھ كرین و هەمیێن دی: دەمێ ئەز جارەكا دی بهێمە نك هەوە، ئەز یێ دلۆڤان نابم،
مادەم هوین داخوازا بەلگەیان دكەن كو مەسیح ب دەڤێ من دئاخڤیت. ئەو د سەرەدەریێ دا ل گەل هەوە نە یێ لاوازە، لێ د ناڤ هەوە دا یێ بهێزە.
راستە ئەو ژ لاوازی هاتە خاچدان، لێ ئەو ب هێزا خودێ یێ زیندیە. ئەم ژی د ئێكبوونا ل گەل وی دا د لاوازین، لێ ب هێزا خودێ ئەم د سەرەدەریا خۆ دا ل گەل هەوە دێ ل گەل وی زیندی بین.
نە من، لێ خۆ بپشكنن، دا بزانن كا هوین د باوەریێ دانە یان نە. نە من، لێ خۆ تاقی بكەن. یان هوین تێناگەهن كو عیسایێ مەسیح د ناخێ هەوە دایە؟ ژبلی ئەگەر هوین د پشكنینێ دا سەرنەكەڤن.
ئەز هیڤیدارم هوین تێبگەهن كو ئەم د سەرنەكەفتی نینین.
زێدەباری هندێ ئەم ژ خودێ دخوازین كو هوین چ خرابیان نەكەن، مەبەستا مە نە ئەوە كو ئەم د تاقیكرنێ دا سەركەفتی دیار ببین، لێ مەبەست ئەوە كو هوین باشیێ بكەن، خۆ ئەگەر ئەم وەكو سەرنەكەفتی ژی دیار ببین.
چنكو ئەم نەشێین تشتەكی ل دژی راستیێ بكەین، لێ ب تنێ دشێین خزمەتا راستیێ بكەین.
ئەم دلخۆش دبین، دەمێ ئەم لاواز دبین و هوین بهێز بن. ئەوا ئەم ژ خودێ دخوازین: راستڤەكرنا هەوەیە.
لەوما ئەز ڤان تشتان دنڤیسم و ئەز نە ل نك هەوە، داكو دەمێ ل نك هەوە ئامادە ببم، رەفتارەكا دژوار ل گەل هەوە نەكەم، ل دویڤ وێ دەستهەلاتا خودانی بۆ ئاڤاكرنێ دایە من، نە بۆ هەڕفاندنێ.
ل دویماهیێ گەلی خویشك و برایان، د دلخۆش بن، خۆ راستڤە كەن، ئێكودوو هان بدەن، هەڤهزر بن، ب ئاشتیێ بژین، ئەڤجا خودایێ حەزژێكرنێ و ئاشتیێ دێ ل گەل هەوە بیت.
ب ماچەكا پیرۆز ژ لایێ من ڤە سڵاڤان ل ئێكودوو بكەن.
هەمی پیرۆزكری سڵاڤان ل هەوە دكەن.
كەرەما خودان عیسایێ مەسیح و حەزژێكرنا خودێ و هەڤپشكیا گیانێ پیرۆز ل گەل هەوە هەمیان بن.
ژ من، پاولۆس، هنارتیێ نە ژ نك مرۆڤان و نە ب دەستێ مرۆڤان، لێ ب دەستێ عیسایێ مەسیح و خودایێ باب ئەوێ ئەو ژ ناڤ مریان راكری،
ژ هەمی برایێن ل گەل من ژی، بۆ جڤاكێن باوەردارێن گالاتیایێ:
كەرەم و ئاشتی ل سەر هەوە بن، ژ بابێ مە خودێ و خودان عیسایێ مەسیح،
ئەوێ خۆ گۆری گونەهێن مە كری، دا مە ل دویڤ حەزا خودێ و بابێ مە ژ جیهانا نوكە یا خراب قورتال بكەت.
هەتا هەتایێ مەزناهی بۆ خودێ بیت. ئامین.
ئەز یێ حێبەتیمە كو هوین هۆسا ب لەز دەست ژ خودێ یێ ب كەرەما مەسیحی گازی هەوە كری بەرددەن و بۆ مزگینیەكا دی دزڤڕن.
ب راستی چ مزگینیێن دی نینن، لێ هندەك كەسێن هەین، هزرێن هەوە ئالۆز دكەن و وان دڤێت پەیاما مزگینیا مەسیحی بگوهۆڕن.
لێ خۆ ئەگەر ئەم یان ژی فریشتەیەكێ ژ ئەسمانی مزگینیەكا دی بۆ هەوە رابگەهینیت، ژبلی وێ مزگینیا مە بۆ هەوە راگەهاندی، بلا نفرین ل وی بن!
هەروەكو مە بەری نوكە گۆتی و نوكە ژی دبێژمەڤە: ئەگەر كەسەك مزگینیەكا دی بۆ هەوە رابگەهینیت، ژبلی ئەوا هەوە وەرگرتی، بلا نفرین ل وی بن!
ما هوین هزر دكەن ئەز نوكە ل رازیبوونا مرۆڤان دگەڕیێم، یان یا خودێ؟ ما ئەز بزاڤێ دكەم دا دلێ مرۆڤان خۆش بكەم؟ نەخێر! ئەگەر من هەر ڤیابا دلێ مرۆڤان خۆش كەم، ئەز بەنیێ مەسیحی نەدبووم.
گەلی خویشك و برایان، من دڤێت هوین بزانن، ئەو مزگینیا ژ لایێ من ڤە دهێتە راگەهاندن، نە ژ مرۆڤانە،
من ئەو ژ چ مرۆڤان وەرنەگرتیە و كەسێ ژی ئەز فێر نەكریمێ، لێ ب پەیاما عیسایێ مەسیح من وەرگرتییە.
هەوە ل سەر ژیانا من یا بەرێ د ئایینێ جوهیاتیێ دا یا بهیستی، من جڤاكا گازیكریێن خودێ گەلەك زێدە تەنگاڤ دكر و بزاڤ دكر وێ وێران بكەم.
د ئایینێ جوهیاتیێ دا ئەز ژ گەلەك مرۆڤێن هەڤتەمەنێن خۆ، د ناڤ مللەتێ خۆ دا، پتر پێشڤە چووبووم و بۆ داب و نەریتێن بابكالێن خۆ، ئەز گەلەك ژ وان خوینگەرمتر بووم.
لێ دەمێ خودێ، ئەوێ ئەز هەلبژارتیم كو هێشتا ئەز د زكێ دایكا خۆ دا بووم و ب كەرەما خۆ گازی من كری، پێ دلخۆش بووی
كو كوڕێ خۆ بۆ من ئاشكرا بكەت، دا وی د ناڤ مللەتێن نەجوهی دا بدەمە نیاسین، هنگی من شیرەتا خۆ ب چ مرۆڤان نەكر،
ئەز سەرنەكەفتمە ئورشەلیمێ ژی، كو بچمە نك وان یێن بەری من بووینە هنارتی، لێ ئێكسەر ئەز چوومە وەڵاتێ عەرەبان و پشتی هنگی ئەز زڤڕیمە دیمەشقێ.
پاشی، پشتی سێ ساڵان ئەز سەركەفتمە ئورشەلیمێ، دا كیفاسی بنیاسم و ئەز پازدە رۆژان ل نك وی مام.
لێ ژبلی یەعقوبێ برایێ خودانی، من كەس ژ هنارتیێن دی نەدیت.
ئەوا ئەز بۆ هەوە ل ڤێرێ دنڤیسم، ئەڤە ل بەرامبەری خودێ، ئەز درەوان تێدا ناكەم.
پشتی هنگی ئەز چوومە هەرێمێن سوریا و كیلیكیایێ،
لێ ژ لایێ جڤاكێن باوەردارێن مەسیحی ڤە یێن ل یەهودیایێ، ئەز روی ب روی نەدهاتمە نیاسین.
وان ب تنێ بهیستبوو، كو: «ئەوێ بەری نوكە ئەم تەنگاڤ دكرین، نوكە ئەو یێ مزگینیا وێ باوەریێ بەڵاڤ دكەت، ئەوا بەری نوكە وی بزاڤ دكر كو وێران بكەت.»
ئەڤجا ئەوان ژ بەر من پەسنا خودێ دكر.
پشتی چواردە ساڵان، ئەز جارەكا دی ل گەل بارناباسی سەركەفتمە ئورشەلیمێ، من تیتۆس ژی ل گەل خۆ بر.
ئەز ل دویڤ سرۆشا خودێ سەركەفتمە وێرێ، ئەو مزگینیا ئەز د ناڤ مللەتێن نەجوهی دا رادگەهینم، من دانا بەر وان، لێ ب تنێ من دانا بەر پایەبەرزان ، دا بزاڤا من كری و ئەز دكەم، ب ئاڤێ دا نەچووبیت.
لێ خۆ تیتۆس ژی، ئەوێ ل گەل من، هەر چەندە كو یونانی بوو، نەچار نەبوو كو بهێتە سونەت كرن.
ئەڤ چەندا بوری ژ بەر هندەك برایێن درەوین چێبوو، یێن ب دزی ڤە ئیناینە د ناڤ مە دا، ئەو ب نهێنی هاتبوون، دا سیخوڕیێ ل سەر ئازادیا مە بكەن، ئەوا مە ب رێكا مەسیح عیسای وەرگرتی و هۆسا مە بكەنە بەنی،
لێ مە دەمژمێرەكا ب تنێ ژی خۆ نەدا دەستێ وان، داكو راستیا مزگینیێ ل گەل هەوە بمینیت.
لێ ئەوێن ب پایەبەرز دهێنە نیاسین، (ئەو ب راستی چ بن، بۆ من نە گرنگە، خودێ بەرێ خۆ نادەتە پایەبەرزیا مرۆڤان) ئەوان كەسان چ ل من زێدە نەكر.
لێ بەروڤاژی ڤێ چەندێ، ئەو وەسا تێگەهشتن كو بەرپرسیاری بۆ من یا هاتیە دان، دا ئەز مزگینیێ بدەمە ئەوێن سونەتنەكری ، هەروەكو بۆ پەترۆسی هاتیە دان كو مزگینیێ بدەتە ئەوێن سونەتكری.
چنكو خودێ ئەوێ كو پەترۆس وەك هنارتی بۆ خەلكێ سونەتكری ب كار ئینای، ئەز ژی بۆ مللەتێن نەجوهی ب كار ئینام.
دەمێ یەعقوب، كیفاس و یوحەننای ئەوێن كو ب ‹ستوین› دهاتنە نیاسین، زانی كو ئەڤ كەرەمە بۆ من یا هاتیە دان، هنگی ئەوان دەستێ خۆ یێ راستێ بۆ من و بارناباسی درێژ كر، وەك نیشانا پشكداریێ، داكو ئەم بچینە ناڤ مللەتێن نەجوهی و ئەو بچنە ناڤ سونەتكریان.
ب تنێ وان هیڤیەك ژ مە هەبوو كو هەژاران ژ بیر نەكەین ، ئەڤە ژی هەر ئەو تشت بوو یێ من ب خۆ دڤیا ئەز بكەم.
لێ دەمێ كیفاس هاتیە باژێڕێ ئەنتاكیایێ، ئەز بەرهنگاری وی بووم، ژ بەر كو یێ گونەهبار بوو،
چنكو بەری هندەك ژ نك یەعقوبی بهێن، پەترۆسی خوارن ل گەل نەجوهیان دخوار، لێ دەمێ ئەو هاتین، ژ ترسا لایەنگرێن سونەتكرنێ وی خۆ دا پاش و خۆ ژ نەجوهیان جودا كر.
باوەردارێن دی یێن جوهی ژی ل گەل وی دووڕویاتی دكر، خۆ بارناباس ژی كەفتە بن كارتێكرنا دووڕویاتیا وان.
لێ دەمێ من دیتی ئەو ب دروستی ل دویڤ راستیا مزگینیێ ناچن، ل پێش چاڤێن هەمی ئامادەبوویان من گۆتە كیفاسی: «ئەگەر تۆ جوهی بی و شێوازێ ژیانا تە نە وەكو جوهیان بیت، لێ وەكو مللەتێن نەجوهی بیت، ئەڤجا چەوا تۆ دشێی مللەتێن نەجوهی نەچار كەی كو وەكو جوهیان بژین؟»
ئەم یێن كو د بنیات دا جوهینە و نە ژ مللەتێن گونەهكارین ،
دزانین كو مرۆڤ ب كارێن دەستووری بێگونە‍‌ھ دەرناكەڤیت، لێ ب تنێ ب رێكا باوەریێ ب عیسایێ مەسیح، لەوما مە ژی باوەری ب عیسایێ مەسیح ئینا، داكو ب رێكا باوەریێ ب مەسیحی، نە ب كارێن دەستووری، بێگونە‍‌ھ دەركەڤین. چنكو كەس ب كارێن دەستووری بێگونە‍‌ھ دەرناكەڤیت.
لێ ئەگەر ئەم ژی یێن بزاڤێ دكەین كو ب رێكا مەسیحی بێگونە‍‌ھ دەركەڤین، هاتینە دیتن كو گونەهكارین، ئەرێ ما مەسیح خزمەتكارێ گونەهێیە؟ حاشا!
ئەگەر ئەوێن من هەڕفاندین ئاڤا بكەمەڤە، ئەز دسەلمینم كو ئەز سەرپێچكارم،
چنكو ب رێكا دەستووری ئەز بەرامبەر دەستووری یێ مریم، دا بۆ خودێ بژیم. ل گەل مەسیحی هاتیمە خاچدان،
ئێدی نە ئەزم یێ دژیت، لێ مەسیحە د ناخێ من دا دژیت. ئەو ژیانا نوكە ئەز ب لەشی دژیم، ئەز ب باوەریێ ب كوڕێ خودێ دژیم، ئەوێ حەز ژ من كری و خۆ گۆری من كری.
ئەز پشتا خۆ نادەمە كەرەما خودێ، چنكو ئەگەر راستداری ب رێكا دەستووری با، دا مرنا مەسیحی یا ژ قەستا بیت.
گەلی گالاتیایی یێن بێئاقل، كێ سەرێ هەوە تژی كریە؟ چنكو مرنا عیسایێ مەسیح بۆ هەوە هند ب زەڵالی هاتیە راگەهاندن، هەروەكو هەوە ب چاڤێن خۆ دیتبیت كو ئەو یێ ل خاچێ دای.
من دڤێت ئەز ڤی تشتی ب تنێ ژ هەوە بزانم: ئایا هەوە گیانێ خودێ ب رێكا كریارێن دەستووری وەرگرتییە یان ژی ب رێكا باوەریئینانێ ب وێ مزگینیا هەوە بهیستی؟
تا ڤی رادەی هوین د بێئاقلن؟ ئایا پشتی هەوە ب گیانێ خودێ دەست پێ كری، ئێدی دێ ب هێزا خۆ تەمام كەن؟
ئایا ئەو هەمی ئازار هەوە ژ قەستا كێشان؟ ئەگەر ب راستی ژ قەستا بن!
ئەوێ گیانێ پیرۆز ددەتە هەوە و حنێران د ناڤ هەوە دا دكەت، ما ڤێ چەندێ ژ ئەنجامێ كریارێن دەستووری یان ژی ژ ئەنجامێ بهیستن و باوەریێ دكەت؟
وەكو ئیبراهیمی «باوەر ژ خودێ كر، ئەڤە ژی بۆ وی وەكو راستداری هاتە هژمارتن.»
ئەڤجا بزانن كو ئەوێن باوەریێ دئینن، ئەون كوڕێن ئیبراهیمی.
نڤیسارا پیرۆز هەر ژ كەڤن دا دیتبوو كو خودێ دێ مللەتێن نەجوهی ب باوەریێ راستدار هژمێریت و وێ پێشوەخت مزگینی دا ئیبراهیمی و گۆتێ: «هەمی مللەت ب رێكا تە دێ هێنە بەرەكەتدار كرن.»
ژ بەر هندێ ئەوێن باوەریێ دئینن، ل گەل ئیبراهیمێ باوەردار دهێنە بەرەكەتداركرن.
هەمی ئەوێن پشتا خۆ ب كارێن دەستووری گەرم دكەن، د نفرین لێكرینە، چنكو یا هاتیە نڤیسین: «نفرین لێ كریە یێ بێكێماسی هەمی تشتێن د پەرتووكا دەستووری دا هاتینە نڤیسین ب ج‍‌ھ نەئینیت و كار پێ نەكەت.»
ئاشكرایە كو كەسەك ل نك خودێ ب دەستووری ناهێتە راستداركرن ، چنكو «یێ راستدار دێ ب باوەریێ ژیت.»
دەستوور نە ب باوەریێیە، لێ «هەر كەسێ ڤان تشتان ب ج‍‌ھ بینیت، دێ پێ ژیت.»
مەسیح پێخەمەت مە كەفتە بن نفرینێ و هۆسا ئەم ژ نفرینا دەستووری رزگار كرین، چنكو یا هاتیە نڤیسین: «نفرین لێ كریە، هەر كەسێ ل سەر دارەكی بهێتە هەلاویستن.»
ئەڤ چەندە چێبوو، دا ب رێكا مەسیح عیسای بەرەكەتا ئیبراهیمی بگەهیتە مللەتێن نەجوهی، كو ب رێكا باوەریێ ئەم گیانێ پیرۆز یێ سۆزپێدای وەرگرین.
گەلی خویشك و برایان، ئەز دێ نموونەیەكێ ژ ژیانا رۆژانە بۆ هەوە ئینم: ئەگەر پەیمانا مرۆڤەكی یا پەسەندكری بیت، كەس نەشێت وێ ژ كار بئێخیت یان ژی ل سەر زێدە بكەت.
ئەڤجا سۆز بۆ ئیبراهیمی و دویندەها وی هاتنە دان. نابێژیت: «و بۆ دویندەهێن تە» هەروەكو بۆ گەلەكان بیت، لێ بۆ ئێكی: «و بۆ دویندەها تە» ، كو ئەو ژی مەسیحە.
مەبەستا من ئەڤەیە: دەستوورێ پشتی چوار سەد و سی‍‌ھ ساڵان هاتیە دانان ، پەیمانا خودێ یا ژ بەرێ وەرە پەسەندكری ژ كار نائێخیت، داكو سۆزێ بهەلوەشینیت،
چنكو ئەگەر میرات گرێدایی دەستووری با، ئەو گرێدای سۆزێ نەدبوو، لێ خودێ ب رێكا سۆزێ ژ كەرەما خۆ دایە ئیبراهیمی.
ئەڤجا بۆچی دەستوور هاتە دانان؟ ئەو ژ بۆ دیاركرنا سەرپێچیان هاتە زێدەكرن، تاكو ئەو دویندە‍‌ھ بهێت یا خودێ سۆز دایێ. دەستوور ب رێكا فریشتەیان و ل سەر دەستێ ناڤبەینكارەكی هاتیە دانان.
لێ ناڤبەینكارەك نە پێدڤیە، ئەگەر پەیمان ژ لایێ ئێكێ ب تنێ ڤە دهێتە دان، ل ڤێرێ ئەو ئێكێ پەیمان دای خودێیە.
پا دەستوور دژی سۆزێن خودێیە؟ حاشا! چنكو ئەگەر دەستوورەك هاتبا دانان كو بشێت ژیانێ بدەت، دا ب دروستی راستداری ل دویڤ دەستووری بیت.
لێ نڤیسارا پیرۆز هەمی تشت ل بن دەستهەلاتا گونەهێ كرینە دیل، داكو باوەردار ژ بەر باوەریا خۆ ب عیسایێ مەسیح، سۆزێ وەرگرن.
بەری هاتنا ڤێ باوەریێ، ئەم ل بن دەستێ دەستووری د گرێدای بووین، د دەستەسەر بووین هەتا دیاربوونا وێ باوەریا كو دا هێت.
هۆسا دەستووری ئەم پەروەردە دكرین هەتا عیسایێ مەسیح هاتی، دا ب رێكا باوەریێ، راستدار بهێینە هژمارتن.
لێ پشتی باوەری هاتی، ئێدی ئەم نە ل بن دەستێ پەروەردەكەرینە.
د ئێكبوونا ل گەل مەسیح عیسای دا، هوین هەمی ب رێكا باوەریێ كوڕێن خودێنە،
چنكو هەوە هەمیان، یێن ب رێكا تافیركرنێ ل گەل مەسیحی بووینە ئێك، مەسیح كریە بەر خۆ.
ئێدی چ جوداهی د ناڤبەرا جوهیەكی و یونانیەكی، یان بەنیەكی و ئازادەكی، یان نێرەكی و مێیەكێ دا نینە، چنكو هوین هەمی د ئێكبوونا ل گەل مەسیح عیسای دا ئێكن،
ئەڤجا ئەگەر هوین یێن مەسیحی بن، هۆسا هوین دویندەها ئیبراهیمینە و ل گۆر سۆزێ میراتگرن.
مەبەستا من ئەڤەیە: هندی میراتگر هێشتا زاڕۆك بیت، چ جوداهی د ناڤبەرا وی و بەنی دا نینە، هەر چەندە ئەو خودانێ هەمی تشتانە.
لێ دێ ل بن سەرپەرشتیا سەرپەرشتكار و بریكاران بیت، تا ئەو دەم دهێت یێ بابێ وی دەستنیشانكری.
هەروەسا ئەم ژی: دەمێ ئەم هێشتا ژ لایێ روحانی ڤە وەكو زاڕۆكان بووین، ئەم ل بن دەستێ هێزێن سرۆشتی یێن جیهانێ بەنی بووین.
لێ گاڤا دەمێ دەستنیشانكری هاتی، خودێ كوڕێ خۆ هنارت، ئەو ژ ژنەكێ ژ دایك بوو و ل بن دەستهەلاتا دەستووری ژ دایك بوو،
داكو مە، ئەوێن ل بن دەستهەلاتا دەستووری، رزگار كەت و خودێ مە بكەتە كوڕێن خۆ.
ژ بەر كو هوین كوڕێن وینە، خودێ گیانێ كوڕێ خۆ هنارتە د ناڤ دلێ مە دا، كو گازی خودێ دكەت: «ئابا! بابۆ!».
ئەڤجا ئێدی تۆ نە بەنی، لێ تۆ كوڕی و مادەم تۆ كوڕی، خودێ تۆ كریە میراتگر ژی.
بەری هنگی، دەمێ هەوە خودێ نەدنیاسی، هەوە بۆ یێن كو ب راستی نە خودێ بوون، بەنیاتی دكر،
لێ نوكە پشتی كو هەوە خودێ نیاسی، ئانكو هێشتا دروستتر: هوین ژ لایێ خودێ ڤە هاتنە نیاسین، ئەڤجا چەوا دێ بۆ هێزێن سرۆشتی یێن لاواز و بەلەنگاز زڤڕنەڤە؟ چەوا هەوە دڤێت هوین دیسان بەنیاتیێ بۆ وان بكەن؟!
هوین گرنگیەكا تایبەت ب هندەك رۆژان و هەیڤان و دەمان و ساڵان ددەن.
ئەز ژ بەر هەوە دترسم كو وەستیانا من ژ پێخەمەت هەوە یا ژ قەستا بیت.
ئەز هیڤی ژ هەوە دكەم گەلی خویشك و برایان، كو هوین وەكو من بن، چنكو ئەز ب خۆ ژی وەكو هەوە بووم. هەوە چ مافێ من نەخوار.
هوین دزانن، ژ بەر نەساخیێ بوو، ل جارا ئێكێ من مزگینی دایە هەوە.
هەر چەندە نەساخیا من بۆ هەوە تاقیكرن بوو، لێ هەوە ئەز بێڕێز نەكرم و پشتا خۆ نەدا من، هەوە وەكو فریشتەیەكێ خودێ یان وەكو مەسیح عیسای ئەز قەبیل كرم.
چ ل وێ دلخۆشیا هەوە هات؟ ئەز شاهدەییێ ددەم كو ئەگەر هەوە شیابا، هوین دا چاڤێن خۆ ئیننە دەرێ و دەنە من.
ئایا نوكە، چنكو ئەز راستیێ دبێژمە هەوە، ئەز بوومە دوژمنێ هەوە؟
ئەو كەس گەلەك گرنگیێ ب هەوە ددەن، لێ نە بۆ مەبەستەكا باش، وان دڤێت هەوە ژ من ڤەدەر بكەن، دا هوین گرنگیێ ب وان بدەن.
گرنگیدان تشتەكێ باشە، ئەگەر بۆ مەبەستەكا باش بیت و بۆ هەمی دەمان بیت، نە ب تنێ دەمێ ئەز ل نك هەوە یێ ئامادە بم.
گەلی زاڕۆكێن من، یێن ئەز ب وان جارەكا دی ژانێن زاڕۆكبوونێ دكێشم، تاكو وێنەیێ مەسیحی د هەوە دا ئاڤا ببیت.
من دڤیا ئەز نوكە ل نك هەوە یێ ئامادە بام و ب شێوازەكێ دی ل گەل هەوە ئاخفتبام، چنكو دەربارەی هەوە ئەز یێ شەپرزەمە.
گەلی ئەوێن هەوە دڤێت د بن دەستووری دا بن، بێژنە من: ما هوین دەستووری نابهیسن؟
یا هاتیە نڤیسین كو ئیبراهیمی دوو كوڕ هەبوون، ئێك ژ كەنیزەیێ و یێ دی ژ ژنا ئازاد.
كوڕێ كەنیزەیێ ل دویڤ لەشی ژ دایك بوو، لێ كوڕێ یا ئازاد ب رێكا سۆزا خودێ.
ئەڤە هەمی هێمانە: ئەڤ ژنە دوو پەیمانن. ئێك ژ وان پەیمانان ژ چیایێ سینایە و زاڕۆكان ژ بۆ بەنیاتیێ دئینیت: ئەو هاجەرە.
هاجەر هێمایا چیایێ سینایە ل عەرەبستانێ، هەروەسا هاجەر ل هەمبەر ئورشەلیما نوكەیە، كو ئەو ل گەل زاڕۆكێن خۆ یا د بەنیاتیێ دا.
لێ یا ئازاد وەكو ئورشەلیما ئەسمانیە، كو ئەو ژی دایكا مەیە.
چنكو یا هاتیە نڤیسین: «دلخۆش بە، هەی خرشێ، ئەوا زاڕۆك نەبووین، ژ خۆشیان ب دەنگێ بلند تلیلیان ڤەدە، هەی ئەوا ژانێن زاڕۆكبوونێ نەدیتین، چنكو زاڕۆكێن ژنا هاتیە هێلان، پترن ژ زاڕۆكێن ژنا ل گەل مێری.»
ئەڤجا هوین، گەلی خویشك و برایان، وەكو ئیسحاقی زاڕۆكێن سۆزێنە.
لێ كا چەوا وی دەمی، ئەوێ ل دویڤ لەشی بووی، یێ ل دویڤ گیانی بووی تەپەسەر دكر، نوكە ژی وەسایە.
لێ نڤیسار چ دبێژیت؟ «كەنیزەیێ و كوڕێ وێ دەربئێخە، چنكو كوڕێ كەنیزەیێ نابیتە میراتگر ل گەل كوڕێ یا ئازاد.»
ئەڤجا، گەلی خویشك و برایان، ئەم نە كوڕێن كەنیزەیێینە، لێ كوڕێن یا ئازادین.
مەسیحی ئەم یێن ئازاد كرین، دا د ئازاد بین. ئەڤجا خۆ تێدا راگرن و جارەكا دی نەكەڤنە بن نیركێ بەنیاتیێ.
گوهداریێ بكەن، ئەز پاولۆس دبێژمە هەوە: ئەگەر هوین بهێنە سونەتكرن، ئێدی مەسیح چ مفای ناگەهینیتە هەوە.
ئەز جارەكا دی، بۆ هەر مرۆڤەكێ بهێتە سونەتكرن، شاهدەییێ ددەم، كو پێدڤیە ئەو هەمی دەستووری ب ج‍‌ھ بینیت.
هەی ئەوێن هەوە دڤێت ب رێكا دەستووری راستدار دەركەڤن، هوین ژ مەسیحی ڤەقەتیان و ژ كەرەمێ كەفتن.
لێ ئەم ژ دەولەتسەرێ گیانێ پیرۆز ب رێكا باوەریێ د چاڤەڕێینە خودێ مە راستدار دەربئێخیت، كو هیڤیا مە ئەوە.
چنكو د ئێكبوونا ل گەل مەسیح عیسای دا، سونەتبوون و سونەتنەبوون هەردوو د بێ مفانە، لێ ب تنێ ئەو باوەریا ب حەزژێكرنێ كار دكەت، یا ب مفایە.
هوین د غاردانێ دا باش پێشڤە دچوون. كێ بۆ هەوە ئاستەنگ دانان، كو هوین گوهداریا راستیێ نەكەن؟
ئەڤ خۆشخۆشكێن بووینە ئاستەنگ نە ژ وینە یێ گازی هەوە كری.
پیچەكا هەڤیرترشی، هەمی هەڤیری ترش دكەت.
لێ دەربارەی هەوە، ئەز پشتا خۆ ب خودانی گەرم دكەم، كو هوین چ هزروبیرێن دی ناگرن. لێ ئەوێ هزرێن هەوە ئالۆز دكەت، ئەو كی بیت، دێ سزایێ خۆ وەرگریت.
لێ ئەز، گەلی خویشك و برایان، ئەگەر هێشتا راگەهاندنێ بۆ سونەتكرنێ دكەم، پا بۆچی هێشتا دهێمە تەپەسەر كرن؟ ئەگەر وەسا با، هنگی دا ئاستەنگا خاچێ یا راكری بیت.
خوزی ئەوێن هزرێن هەوە ئالۆز دكەن، خۆ خەساندبان!
هوین گەلی خویشك و برایان، ژ بۆ ئازادیێ یێن هاتینە گازی كرن، لێ وێ ئازادیێ نەكەنە بەهانە بۆ حەزێن لەشی، بەلكو ب حەزژێكرنێ خزمەتا ئێكودوو بكەن.
چنكو هەمی دەستوور د گۆتنەكێ دا دهێتە كۆمكرن: «حەز ژ نێزیكێ خۆ بكە، وەك چەوا تۆ حەز ژ خۆ دكەی.»
ئەڤجا ئەگەر هوین لەقان ل ئێكودوو بدەن و ئێكودوو بخۆن، هشیار بن، ئێكودوو نەبرینن.
ئەڤجا ئەز دبێژم: ل دویڤ گیانێ پیرۆز بڕێڤە هەڕن، هۆسا هوین چ جاران حەزێن لەشی تێر ناكەن،
چنكو حەزا لەشی دژی گیانێ پیرۆزە و حەزا گیانێ پیرۆز دژی لەشیە. ئەڤ هەردوویە بەرهنگاریا ئێكودوو دكەن، لەوما هوین نەشێن هەر حەزەكا هەوە بڤێت، ب ج‍‌ھ بینن.
لێ ئەگەر هوین ژ لایێ گیانێ پیرۆز ڤە دهێنە بڕێڤەبرن، هوین نە د بن دەستهەلاتا دەستووری دانە.
كارێن لەشی د ئاشكرانە، ئەو ژی ئەڤەنە: دەهمەنپیسی، پویچاتی، بێدەلنگی،
پووتپەرێسی ، جادووگەری، دوژمناتی، هەڤڕكی، چاڤپێنەڕابوون، كینداری، خۆپەرێسی، دووبەرەكی، جوداخوازی،
زكڕەشی، سەرخۆشی، ئاهەنگێن بێتۆرەیێ و تشتێن وەكو ڤان. ئەز هەوە ئاگەهدار دكەم، هەروەكو من بەری نوكە ژی گۆتی: ئەو كەسێن تشتێن هۆسا دكەن، نابنە میراتگرێن پاشایەتیا خودێ.
لێ بەرهەمێ گیانێ پیرۆز ئەڤەیە: حەزژێكرن، دلخۆشی، ئاشتی، بێهنفرەهی، جوامێری، چاكی، دلسۆزی،
دلنەرمی و لخۆزاڵبوون. چ دەستوور نینن دژی ڤان تشتان بن.
ئەو كەس ژی كو یێن مەسیح عیساینە، ئەوان لەش ل گەل حەز و ڤیانێن د لەشی دا یێن ل خاچێ داین.
مادەم ئەم ب گیانێ پیرۆز دژین، بلا ل دویڤ گیانێ پیرۆز بڕێڤە ژی بچین.
بلا ئەم د دفنبلند نەبین، ئێكودوو نەئازرینین و ل گەل ئێكودوو د زكڕەش نەبین.
گەلی خویشك و برایان، ئەگەر ئێك ل سەر گونەهەكێ بهێتە گرتن، هوین یێن كو ل بن رێبەریا گیانێ پیرۆز دچن، ب دەروونبچویكیێ وی كەسی راستڤە بكەن، لێ تۆ ژی هشیاری خۆ بە، داكو نەهێیە تاقی كرن.
بارێن ئێكودوو هەلگرن، هۆسا دێ دەستوورێ مەسیحی ب ج‍‌ھ ئینن.
ئەگەر ئێك خۆ دبینیت كو تشتەكە و ئەو ب خۆ چ نینە، ئەو خۆ دخاپینیت.
بلا هەر ئێك كارێ خۆ تاقی بكەت، وی دەمی ئەو دێ ب كارێ خۆ ب تنێ، نە ب كارێ كەسێن دی، شانازیێ بەت.
چنكو هەر ئێك دێ بارێ خۆ هەلگریت.
ئەوێ فێری پەیڤێ دبیت، بلا پشكەكێ ژ هەمی تشتێن خۆ یێن باش، بكەتە بەهرا مامۆستایێ خۆ.
نەهێنە خاپاندن! تڕانە ب خودێ ناهێنە كرن. چنكو مرۆڤ چ دچینیت، هەر دێ وی هەلینیت.
ئەوێ بۆ لەشێ خۆ بچینیت، دێ ژ لەشی رزیبوونێ هەلینیت، لێ ئەوێ بۆ گیانی بچینیت، دێ ژ گیانی ژیانا هەروهەر هەلینیت.
بلا ئەم ژ كرنا چاكیێ دلسار نەبین، چنكو ئەگەر ئەم دەست ژێ بەرنەدەین، ئەم دێ د دەمێ گونجای دا هەلینین.
ئەڤجا هندی مە دەلیڤە هەبیت، بلا ئەم چاكیێ ل گەل هەمیان بكەین، ب تایبەتی ل گەل خویشك و برایێن مە د باوەرداریێ دا.
بەرێ خۆ بدەنێ، ئەز پیتێن چەند مەزن ب دەستێ خۆ بۆ هەوە دنڤیسم!
ئەوێن حەز دكەن ب لەشی دیمەنەكێ باش ل بەر چاڤێن خەلكی بدەنە دیاركرن، بزاڤێ دكەن هەوە نەچار بكەن كو هوین بهێنە سونەتكرن، ب تنێ دا ئەو ژ بەر خاچا مەسیحی نەهێنە تەپەسەركرن.
خۆ ئەوێن هاتینە سونەتكرن ژی، دەستووری ب ج‍‌ھ نائینن، لێ ئەو حەز دكەن هوین بهێنە سونەتكرن، دا ئەو شانازیێ ب لەشێ هەوە ببەن.
لێ ژ لایێ من ڤە، حاشا، كو ئەز شانازیێ ب تشتەكی ببەم، ژبلی خاچا خودانێ مە عیسایێ مەسیح. ب رێكا وێ جیهان دەربارەی من هاتیە خاچدان و ئەز ژی دەربارەی جیهانێ هاتیمە خاچدان.
چنكو سونەتبوونێ و سونەتنەبوونێ ژی مفا بۆ مرۆڤی نینە، ب تنێ یا مفای دگەهینیتە وی ئەوە كو ببیتە ئافرندەیەكێ نوی.
ئاشتی و دلۆڤانی ل سەر وان هەمیان بیت، یێن ل گۆر ڤی بنەمای دچن، هەروەسا ل سەر ئیسرائیلا خودێ ژی.
ژ نوكە و پێڤە بلا كەس نەخۆشیێ بۆ من چێنەكەت، چنكو شوین برینێن عیسای، یێن ل سەر لەشێ من هەین.
گەلی خویشك و برایان، بلا كەرەما خودانێ مە عیسایێ مەسیح ل گەل گیانێ هەوە بیت. ئامین.
ژ من، پاولۆس، هنارتیێ مەسیح عیسای، ب حەزا خودێ، بۆ پیرۆزكریێن ل ئەفەسۆسێ، ئەوێن ب مەسیح عیسای د دلسۆزن:
كەرەم و ئاشتی ژ بابێ مە خودێ و خودان عیسایێ مەسیح ل سەر هەوە بن.
مەزناهی بۆ خودێ، بابێ خودانێ مە عیسایێ مەسیح، كو وی ب ئێكبوونا ل گەل مەسیحی، ب هەر بەرەكەتەكا روحانی د جهێن ئەسمانی دا، ئەم بەرەكەتدار كرین.
وی ژ بەری دامەزراندنا جیهانێ، ب ئێكبوونا مە ل گەل مەسیحی ئەم هەلبژارتین، دا ئەم ل بەرامبەری وی د حەزژێكرنێ دا د پیرۆز بین و گازندە ژ مە نەبن.
وی ل دویڤ كەیف و حەزا خۆ، ئەم پێشوەخت دەستنیشان كرین، دا مە ب رێیا عیسایێ مەسیح بكەتە كوڕێن خۆ،
ژ بۆ پەسنكرنا مەزناهیا كەرەما وی، ئەوا ب رێیا خۆشتڤیێ خۆ بۆ مە كریە خەلات.
ژ دەولەتسەرێ وی، مە ب خوینا وی رزگاری وەرگرت، ئانكو مە لێبورینا گونەهان هەیە. ئەڤ چەندە ل دویڤ كەرەما خودێ یا دەولەمەندە ،
ئەوا وی ب هەمی ئاقلمەندی و تێگەهشتن، ب مەردینی ب سەر مە دا باراندی.
وی نهێنیا حەزا خۆ بۆ مە ئاشكرا كر، ئەوا وەكو وی ڤیای نەخشە كری كو ب رێیا مەسیحی ب ج‍‌ھ بینیت.
نەخشەیێ وی ژی ئەوە كو د تەمامكرنا دەمان دا، ئەو دێ هەمی تشتان، یێن ل سەر ئەردی و یێن ل ئەسمانی ژی، پێكڤە كۆم كەت و ئێخیتە د بن سەروەریا مەسیحی دا.
ل دویڤ مەبەستا وی، ئەوێ هەر تشتی ل دویڤ بڕیار و حەزا خۆ ساز دكەت، ئەم پێشوەخت هاتینە دەستنیشانكرن و ب مەسیحی هاتینە هەلبژارتن،
دا ئەم ژ بۆ پەسنكرنا مەزناهیا وی بین، ئەم ئەوێن ل بەراهیێ هیڤیا خۆ ب مەسیحی ڤە گرێ دای.
دەمێ هەوە پەیڤا راستیێ، ئانكو مزگینیا قورتالبوونا خۆ، بهیستی و باوەری ب مەسیحی ئینای، هوین ژی ب گیانێ پیرۆزێ سۆزپێدای، ژ بەر ئێكبوونا هەوە ل گەل مەسیحی هاتنە موهركرن.
گیانێ پیرۆز دەستبەعێ میراتێ مەیە تا دەمێ خودێ گەلێ خۆ رزگار دكەت، ژ بۆ پەسنكرنا مەزناهیا خۆ.
ژ بەر هندێ، گاڤا من باوەریا هەوە ب خودان عیسای و حەزژێكرنا هەوە بۆ هەمی پیرۆزكریان بهیستی،
ژ هنگی وەرە ئەز بێ راوەستیان بۆ هەوە سوپاسیا خودێ دكەم. ب بەردەوامی د نڤێژێن خۆ دا هەوە دئینمە بیرا خۆ
و داخواز دكەم كو خودایێ خودانێ مە عیسایێ مەسیح، بابێ مەزناهیێ، گیانێ ئاقلمەندیێ و تێگەهشتنا ئاشكراكرنا خودێ بدەتە هەوە، دا هوین وی هێشتا باشتر بنیاسن.
بلا چاڤێن زێهنێ هەوە ڤەكەت، دا بزانن كا ئەو هیڤیا هوین بۆ وێ هاتینە گازیكرن چ تشتە و كا میراتێ وی چەند یێ مەزن و دەولەمەندە بۆ پیرۆزكریان
و كا مەزناهیا هێزا وی یا بێ سنوور چیە، یا ژ بۆ مە یێن باوەردار ل دویڤ هێز و شیانا وی كار دكەت.
ئەڤ هێزە ئەوە یا خودێ د مەسیحی دا ئێخستیە كاری، دەمێ ژ ناڤ مریان راكری و ل دەستێ خۆ یێ راستێ ل جهێن ئەسمانی روینشتاندی،
ئەو هاتە دانان ل سەر هەر سەروەری، دەستهەلاتی، هێز، خودانەتی و هەر ناڤەكێ دی یێ هەبیت، نە ب تنێ د ڤێ جیهانێ دا، لێ د جیهانا دی ژی دا.
خودێ هەمی تشت ئێخستنە بن پێیێن وی و ئەو د سەر هەر تشتەكی دا كرە سەر بۆ جڤاكا باوەرداران.
ئەو جڤاك لەشێ ویە، ئانكو تژیاتیا ویە یێ كو هەمی تشتان ب تەمامی تژی دكەت.
هوین ژی ژ بەر سەرپێچی و گونەهێن خۆ د مری بوون،
دەمێ هەوە ژیانا خۆ ل دویڤ چەرخا ڤێ جیهانێ بڕێڤە دبر، ل دویڤ سەروەرێ دەستهەلاتا بەرگەبای ، ئەو گیانێ نوكە د ناڤ مرۆڤێن نەگوهدار دا كار دكەت.
دەمەكی مە هەمیان ژی د ناڤ وان دا ب ئارەزوویێن لەشێ خۆ دكر و حەزێن لەش و هزرێن خۆ ب ج‍‌ھ دئینان. ئەم ژی وەكو یێن دی، ب سرۆشتێ خۆ د هەژی تۆڕەبوونا خودێ بووین.
لێ خودایێ كو ب دلۆڤانیێ دەولەمەند، ژ پێخەمەت حەزژێكرنا خۆ یا مەزن، ئەوا پێ حەز ژ مە كری،
دەمێ ئەم ژ بەر گونەهێن خۆ هێشتا د مری بووین، ئەم ل گەل مەسیحی ڤەژاندین. ب كەرەمێیە كو هوین قورتال بووین.
ژ بەر ئێكبوونا مە ل گەل مەسیح عیسای، خودێ ئەم ل گەل وی ژ مرنێ راكرین و ل گەل وی ل جهێن ئەسمانی روینشتاندین.
خودێ ئەڤە كر، دا د سەردەمێن بهێن دا، دەولەمەندیا كەرەما خۆ یا بێ سنوور دیار بكەت، ب رێكا وێ قەنجیا وی، د ئێكبوونا مە ل گەل مەسیح عیسای دا، ل گەل مە كری.
چنكو هوین ب كەرەما خودێ قورتال بوون، ئەو ژی ب رێكا باوەریێ بوو و ئەڤ چەندە نە ژ هەوەیە، لێ دیاریا خودێیە.
ئەڤە نە ئەنجامێ كریارێن هەوەیە، دا چ كەس شانازیێ ب خۆ نەبەت.
چنكو ئەم چێكریێن خودێینە، د ئێكبوونا ل گەل مەسیح عیسای دا هاتینە ئافراندن، دا ئەم د ڤان كریارێن باش دا، یێن خودێ پێشوەخت ئامادە كرین، بڕێڤە بچین.
لێ نوكە د ئێكبوونا ل گەل مەسیح عیسای دا، هوین یێن كو ل دەمەكی د دویر بوون، ب رێكا خوینا مەسیحی هاتنە نێزیك كرن.
چنكو مەسیح ب خۆ ئەو ئاشتیە یا د ناڤبەرا مە دا. وی جوهی و نەجوهی كرنە ئێك و ب لەشێ خۆ دیوارێ ناڤبڕێ، ئانكو دوژمناتی، هەلوەشاند.
وی دەستوور ب فەرمان و رێسایێن وی ڤە ژ كار ئێخست، دا ب ئێكبوونا ل گەل خۆ، ژ هەردوویان مرۆڤەكێ نوی بئافرینیت و ب ڤی شێوەی ئاشتیێ چێكەت
و ب خاچا خۆ هەردوویان د ئێك لەش دا ل گەل خودێ ئاشت بكەت، هۆسا وی دوژمناتی كوشت.
ئەو هات و مزگینیا ئاشتیێ بۆ هەوە یێن دویر و یێن نێزیك ژی ئینا.
چنكو ب رێكا مەسیحی، مە هەردوویان دەستویریا هەی، ب ئێك گیان خۆ نێزیكی بابی بكەین.
ئەڤجا ئێدی هوین نە خەلك و بیانینە، لێ هوین ل گەل پیرۆزكریان هەڤوەڵاتینە و ئەندامێن مالا خودێنە.
هوین ل سەر بنیاتێ هنارتی و پێغەمبەران د ئاڤاكرینە و مەسیح عیسا ب خۆ بەرێ بنیاتیە.
ب وی هەمی ئاڤاهی خۆ پێكڤە دگریت و مەزن دبیت، دا بۆ خودانی ببیتە پەرستگەهەكا پیرۆز.
ب وی هوین ژی پێكڤە دهێنە ئاڤاكرن، دا ببنە خانیەك كو خودێ ب رێكا گیانێ خۆ تێدا ئاكنجی ببیت.
ژ بەر ڤێ چەندێ ئەز، پاولۆس، یێ ژ پێخەمەت هەوە یێن نەجوهی ژ بەر مەسیح عیسای زیندانیمە…
بێگۆمان هەوە بهیستیە، كو ئەڤ ئەركێ بڕێڤەبرنا كەرەما خودێ، ژ پێخەمەت هەوە بۆ من هاتیە دان،
كو ئەو نهێنی ب رێكا سرۆشێ بۆ من ئاشكرا كریە، هەروەكو پێشتر من ب كورتی نڤیسی.
گاڤا هوین وێ بخوینن، هوین دێ شێن د زانینا من ل دۆر نهێنیا مەسیحی گەهن.
ئەو نهێنی د دەمێ بەرەبابێن دی دا بۆ مرۆڤان ئاشكرا نەكربوو، لێ نوكە ب گیانێ پیرۆز بۆ هنارتی و پێغەمبەرێن وی یێن پیرۆز هاتە ئاشكرا كرن.
نهێنی ژی ئەڤەیە، كو مللەتێن نەجوهی ب رێیا مزگینیێ، د ئێكبوونا ل گەل مەسیح عیسای دا، ل گەل جوهیان هەڤمیراتن و هەڤلەشن و هەڤپشكێن سۆزێنە.
ئەز ل دویڤ دیاریا كەرەما خودێ یا ب كاركرنا هێزا وی بۆ من هاتیە دان، بوومە خزمەتكارێ ڤێ مزگینیێ.
هەر چەندە د ناڤ هەمی پیرۆزكریان دا ئەز ژ یێ هەری كێم كێمترم، لێ ئەڤ كەرەمە بۆ من هاتیە دان، دا مزگینیێ د ناڤ مللەتێن نەجوهی دا بەڵاڤ بكەم دەربارەی دەولەمەندیا مەسیحی یا بێ سنوور
و نەخشەیێ نهێنیێ بۆ هەمیان روهن بكەم، ئەو نهێنیا ب درێژاهیا سەردەمێن بەرێ، ل نك خودێ یێ هەمی تشت ئافراندین، مایە ڤەشارتی،
دا نوكە ئاقلمەندیا خودێ یا هەمەجۆر، ب رێكا جڤاكا باوەرداران ، ل نك سەروەر و دەستهەلاتدارێن ل جهێن ئەسمانی بهێتە زانین.
ئەڤ چەندە ل دویڤ مەرەما خودێ یا هەردەمی بوو، ئەوا وی ب دەستێ خودانێ مە مەسیح عیسای ب ج‍‌ھ ئینای.
ب ئێكبوونێ ل گەل مەسیحی و ب رێكا باوەری ئینانێ ب وی، مە دەستویریا خۆ نێزیككرنێ ژ خودێ، ب وێرەكی و پشتڕاستی، یا هەی.
لەوما ئەز هیڤی ژ هەوە دكەم كو هوین بێ ئومێد نەبن ژ بەر ئازارێن ئەز بۆ هەوە دكێشم، ئەو بۆ هەوە مەزناهینە.
ژ بەر ڤێ چەندێ، ئەز چۆكڤەدانێ بۆ بابی دبەم،
ئەوێ هەر بابكەكی ل سەر ئەردی و ل ئەسمانان ناڤ ژێ وەرگرتی ،
ئەز هیڤی ژێ دكەم كو ئەو ل دویڤ دەولەمەندیا مەزناهیا خۆ هێزێ بدەتە هەوە، كو هوین ب گیانێ وی د ناخێ خۆ دا خورت ببن،
ب رێكا باوەریێ مەسیح د دلێ هەوە دا ئاكنجی ببیت و هوین د حەزژێكرنێ دا ب رە‍‌ھ و ب بنیات بن،
دا هەوە ل گەل هەمی پیرۆزكریان شیان هەبیت د فرەهی، درێژاهی، بلنداهی و كویراتیا حەزژێكرنا مەسیحی بگەهن
و هوین حەزژێكرنا وی یا بلندتر ژ ئاستێ زانینا مرۆڤی بزانن، هۆسا هوین ب هەمی تژیاتیا خودێ تژی ببن.
مەزناهی بۆ وی بیت، یێ ب هێزا خۆ یا د مە دا كار دكەت، دشێت گەلەك پتر ژ وێ هەمیێ بكەت یا ئەم دخوازین یان هزر دكەین.
مەزناهی بۆ وی بیت، د جڤاكا باوەرداران و مەسیح عیسای دا، ب درێژاهیا هەمی بەرەبابان بۆ هەتا هەتایێ. ئامین.
ئەڤجا ئەز، كو ژ بەر خودانی هاتیمە زیندانكرن، هیڤی ژ هەوە دكەم كو هوین ب شێوەیەكی بژین، یا هەژی وێ گازیكرنێ بیت، ئەوا هوین بۆ هاتینە گازیكرن.
ب هەمی دەروونبچویكی و نەرمی و بێهنفرەهی ئێكودوو د حەزژێكرنێ دا رابگرن.
هەمی بزاڤان بكەن كو هوین ئێكەتیا گیانی ب بەندكێ ئاشتیێ بپارێزن.
ئێكە لەش و ئێكە گیان، هەروەكو خودێ بۆ ئێك هیڤی هوین گازی كرین.
ئێكە خودان، ئێكە باوەری، ئێكە تافیركرن ،
ئێكە خودێ كو بابێ هەمیانە، ئەوێ د سەر هەمیان را، ب رێكا هەمیان و د ناڤ هەمیان دا.
لێ بۆ هەر ئێك ژ مە، ل دویڤ پیڤانا دیاریا مەسیحی، كەرەم هاتیە دان.
ژ بەر هندێ دبێژیت: «گاڤا سەركەفتیە سڵال، گەلەك دیل ل دویڤ خۆ برن و دیاری دانە مرۆڤان.»
ئەڤ «سەركەفتنا سڵال» چ رامان ددەت؟ وی دڤێت بێژیت كو ئەو ل پێشیێ خواركەفتبوو جهێن نزم ئانكو ئەردی.
ئەوێ خواركەفتی هەر ئەوە یێ سەركەفتیە سەر هەمی ئەسمانان، دا هەمی تشتان ب ئامادەبوونا خۆ تژی بكەت.
هەر ئەوە یێ دیاری دای كو هندەك ببنە هنارتی، هندەك ببنە پێغەمبەر ، هندەك ببنە مزگینیدەر، هندەك ژی ببنە شڤان و مامۆستا،
بۆ ئامادەكرنا پیرۆزكریان بۆ كارێ خزمەتێ ژ پێخەمەت ئاڤاكرنا لەشێ مەسیحی،
تاكو ئەم هەمی بگەهینە ئێكەتیا باوەریێ و نیاسینا كوڕێ خودێ، هەروەسا ئەم ببینە مرۆڤەكێ پێگەهشتی، بگەهینە ئاستێ تەمامێ بەژنا مەسیحی.
هۆسا ئەم ئێدی وەكو زاڕۆكان نابین، ل بەر پێلان هێڤە و وێڤە بهێینە هاڤێتن و ب درەوێن مرۆڤان ل بەر بایێ هەر فێركرنەكێ بهێینە ئینان و برن، ئەو مرۆڤێن كو ب فێلبازیان دخاپینن و د سەر دا دبەن.
لێ ئەم راستیێ ب حەزژێكرن ببێژین، دا د هەر تشتەكی دا وەرارێ بكەین بەرەڤ وی ڤە یێ كو سەرە، ئەو ژی مەسیحە.
ژ ویە هەمی لەش خۆ پێكڤە دگریت و ب هاریكاریا هەر گەهەكێ دهێتە گرێدان و دەمێ هەر ئەندامەك كارێ خۆ دكەت، لەش وەرارێ دكەت و د حەزژێكرنێ دا خۆ ئاڤا دكەت.
لەوما ئەز ڤێ دبێژم و ب ناڤێ خودانی دووپات دكەم كو ئێدی هوین وەسا نەژین هەروەكو مللەتێن نەجوهی دژین، هزرێن وان دخرشن.
تاریاتیا ب سەر تێگەهشتنا وان دا هاتی، ئەو ژ بەر وێ نەزانینا د ناخێ وان دا و سەرهشكیا وان، ژ ژیانا خودێ د بیانینە.
ئەوان شەرم نەمایە و خۆ رادەستی بێدەلنگیێ كریە كو هەمی جۆرێن پویچاتیێ بكەن و ژێ تێر نابن.
لێ هوین هۆسا فێری مەسیحی نەبوون.
بێگۆمان هەوە ل دۆر وی بهیستیە و ل گۆر وێ راستیا د عیسای دا، هوین دەربارەی وی هاتینە فێركرن.
هوین هاتینە فێركرن كو ژ لایێ رەفتارا هەوە یا بەرێ ڤە، مرۆڤێ كەڤن ژ بەر خۆ بكەن، ئەوێ ب حەزێن خاپینۆك گەنی دبیت
و د گیانێ زێهنێ خۆ دا نوی ببن
و مرۆڤێ نوی بكەنە بەر خۆ، ئەوێ ل گۆر خودێ د راستداری و پیرۆزیا راستیێ دا هاتیە ئافراندن.
لەوما درەوێ ژ خۆ دویر بئێخن و بلا هەر ئێك ژ هەوە ل گەل نێزیكێ خۆ یێ راستگۆ بیت، چنكو ئەم ئەندامێن ئێكودووینە.
«تۆڕە ببن، لێ گونەهێ نەكەن». نەهێلن رۆژ ل سەر تۆڕەییا هەوە ئاڤا ببیت،
نە ژی رێكێ بدەنە ئبلیسی.
بلا دزیكەر ئێدی دزیێ نەكەت، لێ بلا بوەستیێت و ب دەستێ خۆ كارەكێ حەلال بكەت، دا وی تشتەك هەبیت بدەتە یێ هەوجە ژی.
بلا گۆتنەكا خراب ژ دەڤێ هەوە دەرنەكەڤیت، لێ ب تنێ ئەوێ بێژن یا كو ل دویڤ رەوشێ بكێر ئاڤاكرنێ دهێت، دا مفایەكی بگەهینیتە گوهداران.
گیانێ خودێ یێ پیرۆز خەمبار نەكەن، ئەوێ هوین ب وی بۆ رۆژا رزگاربوونێ هاتینە موهركرن.
هەمی تەحلاتی، كەرب، تۆڕەبوون، قێڕ قێڕ، بوهتان و هەمی كینێ ژ ناڤ خۆ راكەن.
ل گەل ئێكودوو د دلنازك و دلۆڤان بن، ل ئێكودوو ببورن، هەروەكو خودێ ژی ب رێیا مەسیحی ل هەوە بوری.
ژ بەر ڤێ چەندێ، وەكو زاڕۆكێن خۆشتڤی، چاڤلێكرنا خودێ بكەن.
د حەزژێكرنێ دا بژین، هەروەكو مەسیحی ژی حەز ژ مە كری و خۆ گۆری مە كری، ژ پێخەمەت مە بوویە پێشكێشی و قوربانیەكێ بێهنخۆش بۆ خودێ.
لێ بلا دەهمەنپیسی و هەمی جۆرێن پویچاتیێ یان چاڤبرساتی ب ئێكجاری د ناڤ هەوە دا نەبن، چنكو ئەو نە ژ هەژی پیرۆزكریانە.
هەروەسا بلا ئاخفتنێن بێشەرم و دەبەنگانە، یان تڕانەیێن بێتۆرە یێن بكێرنەهاتی نەبن، لێ ل شوینا وان بلا سوپاسیكرنا خودێ هەبیت.
ڤێ چەندێ باش بزانن: چ مرۆڤێن دەهمەنپیس، یان نەپاك، یان چاڤبرس (ئانكو كەسەكێ پووتپەرێس )، وان د پاشایەتیا مەسیحی و خودێ دا میرات نینە.
نەهێلن چ كەس هەوە ب ئاخفتنێن ڤاڵا بخاپینیت، چنكو ژ بەر ڤان تشتان تۆڕەبوونا خودێ ب سەر مرۆڤێن نەگوهدار دا دهێت.
لەوما هوین نەبنە پشكدارێن وان.
چنكو دەمەكی هوین تاری بوون، لێ نوكە هوین ب ئێكبوونا ل گەل خودانی رۆناهینە. ئەڤجا وەكو زاڕۆكێن رۆناهیێ بژین
(ژ بەر كو بەرهەمێ رۆناهیێ هەمی جۆرێن باشی و راستی و دروستیێنە)
و بزاڤێ بكەن كو بزانن كا چ تشت خودانی رازی دكەت.
پشكداریێ د كارێن تاریاتیێ یێن بێبەرهەم دا نەكەن، لێ وان بەرچاڤ بكەن.
چنكو كارێن ئەو ب نهێنی دكەن، شەرمە كو بهێنە بەحسكرن ژی.
لێ هەر تشتێ ب رۆناهیێ بهێتە بەرچاڤكرن، ئەو ئاشكرا دبیت.
چنكو هەر تشتێ ئاشكرا ببیت، دبیتە رۆناهی. لەوما دهێتە گۆتن: «هەی نڤستی، هشیار ببە! ژ ناڤ مریان رابە و مەسیح دێ رۆناهیێ دەتە تە.»
ژ بەر هندێ ب هشیاری لێ بنێڕن كا هوین چەوا دژین، نە وەكو نەزانان، لێ وەكو ئاقلمەندان.
دەرفەتا ڤی دەمی ژ دەست نەدەن، چنكو رۆژ د بەدكارن.
لەوما خۆ مەژی هشك نەكەن، لێ تێبگەهن كا حەزا خودانی چیە.
ب شەرابێ سەرخۆش نەبن، چنكو سەربەردان یا تێدا، لێ ب گیانێ پیرۆز پڕ ببن.
بۆ ئێكودوو زەبوور، سروود و سترانێن روحانی بێژن، ژ دلێ خۆ بۆ خودانی بسترن و موزیكێ بژەنن.
هەردەم بۆ هەمی تشتان، ب ناڤێ خودانێ مە عیسایێ مەسیح، سوپاسیا خودایێ باب بكەن.
ژ بەر ترسا خۆ ژ مەسیحی ملكەچی ئێكودوو بن.
گەلی ژنان، هەر ئێك ژ هەوە ملكەچی مێرێ خۆ بیت، كا چەوا هوین ملكەچی خودانی دبن.
چنكو مێر سەرێ ژنێیە، كا چەوا مەسیح سەرێ جڤاكا باوەردارانە و ئەو ب خۆ قورتالكەرێ لەشیە.
ئەڤجا كا چەوا جڤاك ملكەچی مەسیحیە، وەسا ژن ژی د هەمی تشتان دا ملكەچی مێرێ خۆ بیت.
گەلی مێران، هەر ئێك ژ هەوە حەز ژ ژنا خۆ بكەت، كا چەوا مەسیحی حەز ژ جڤاكێ كر و خۆ گۆری وێ كر،
دا وێ ب شویشتنێ ب ئاڤێ ئانكو ب پەیڤێ پاقژ بكەت و هۆسا وێ پیرۆز بكەت،
دا وێ وەكو جڤاكەكا شۆخ و شەنگ پێشكێشی خۆ بكەت، یا بێ پنی و بێ قورمچین و هەر تشتەكێ هۆسا بیت، لێ یا پیرۆز و بێكێماسی بیت.
ب ڤی شێوەی، دڤێت مێر وەكو لەشێ خۆ حەز ژ ژنا خۆ بكەن. ئەوێ حەز ژ ژنا خۆ بكەت، ئەو حەز ژ خۆ دكەت.
چنكو چ جاران كەسێ كەرب ژ لەشێ خۆ ڤەنەبوویە، لێ ئەو لەشێ خۆ ب خودان دكەت و چاڤێ خۆ ددەتێ، هەروەكو مەسیح ژی ل گەل جڤاكا باوەرداران دكەت.
چنكو ئەم ئەندامێن لەشێ وینە.
«ژ بەر ڤێ چەندێ زەڵام دێ دایك و بابێن خۆ هێلیت و ب ژنا خۆ ڤە نویسیێت و دێ هەردوو بنە ئێك لەش.»
ئەڤە نهێنیەكا كویرە و مەبەستا من پێ مەسیح و جڤاكا باوەردارانە.
لێ پێدڤیە هەر ئێك ژ هەوە ژی حەز ژ ژنا خۆ بكەت، هەروەكو حەز ژ خۆ دكەت و پێدڤیە ژن رێزێ ل مێرێ خۆ بگریت.
گەلی زاڕۆكان، ژ بەر خودانی گوهداریا دایك و بابێن خۆ بكەن، چنكو ئەڤ چەندە یا دروستە.
«رێزێ ل دایك و بابێن خۆ بگرە.» ئەڤە ئێكەم فەرمانە كو سۆزەك پێڤە هاتیە گرێدان:
«دا باشی بهێتە رێیا تە و ل سەر ئەردی ژیێ تە درێژ ببیت.»
هوین ژی، گەلی بابان، زاڕۆكێن خۆ تۆڕە نەكەن، لێ ب پەروەردە و شیرەتێن خودانی وان ب خودان بكەن.
گەلی بەنیان، گوهداریا خودانێن خۆ یێن ل سەر ئەردی ب ترس و لەرز و ب دلەكێ پاقژ بكەن، كا چەوا هوین گوهداریا مەسیحی دكەن،
نە ب وێ خزمەتێ یا ل بەر چاڤان دهێتە كرن، ب تنێ بۆ رازیكرنا مرۆڤان، لێ وە بكەن هەروەكو بەنیێن مەسیحی ژ دل حەزا خودێ ب ج‍‌ھ دئینن.
ژ هەمی دلێ خۆ خزمەتێ بكەن، هەروەكو بۆ خودانی بیت، نە بۆ مرۆڤان.
چنكو هوین دزانن هەر كەسێ، بەنی بیت یان ئازاد، چ باشیێ بكەت، دێ هەمان تشت ژ خودانی وەرگریت.
هوین ژی، گەلی خودانان، هەمان تشتان بۆ وان بكەن و دەست ژ گەفلێكرنێ بەردەن، چنكو هوین دزانن كو خودانێ وان و هەوە هەمیان ل ئەسمانیە و ل نك وی لایەنگری نینە.
ل دویماهیێ، ب خودانی و ب هێزا وی یا مەزن، خۆ ب هێز بئێخن.
خۆ ب هەمی چەكێن خودێ چەكدار بكەن، دا هوین بشێن ل بەرامبەری پیلانێن ئبلیسی خۆ راگرن.
چنكو جەنگا مە نە دژی مرۆڤانە ، لێ دژی سەروەرانە، دژی دەستهەلاتدارانە، دژی حوكمدارێن تاریاتیێیە كو د ڤی سەردەمی دا حوكمی ل جیهانێ دكەن، دژی لەشكەرێن روحانی یێن خرابیێیە ل جهێن ئەسمانی.
ژ بەر ڤێ چەندێ هەمی چەكێن خودێ هەلگرن، دا بشێن ل رۆژا خراب بەرهنگاریێ بكەن و پشتی هوین هەمی تشتان تەمام دكەن، خۆ راگرن.
هۆسا خۆ راگرن، ناڤتەنگا خۆ ب راستیێ بپێچن و زریێ راستداریێ بكەنە بەر خۆ.
بلا پێلاڤ ل پێ كرنا هەوە ئامادەبوون بیت بۆ راگەهاندنا مزگینیا ئاشتیێ.
د سەر ڤان تشتان را، مەتاڵێ باوەریێ د دەستێ هەوە دا یێ هەلگرتی بیت، ئەوێ كو ب وی هوین دشێن وان تیرێن ئاگرینی ڤەمرینن یێن خرابكار د هەوە وەردكەت.
كومزریێ قورتالبوونێ بكەنە سەرێ خۆ و شیرێ گیانێ پیرۆز، كو پەیڤا خودێیە، هەلگرن.
ب رێكا هەمی داخواز و هیڤیكرنان، هەردەم نڤێژان د گیانێ پیرۆز دا بكەن. بۆ ڤێ چەندێ د هشیار بن و ل سەر نڤێژان ژ پێخەمەت هەمی پیرۆزكریان د بەردەوام بن
و بۆ من ژی بكەن، داكو دەمێ ئەز بئاخڤم، ئاخفتن بۆ من بهێتە دان، دا ئەز ب وێرەكی نهێنیا مزگینیێ رابگەهینم،
ئەو مزگینیا كو ئەز ژ پێخەمەت وێ، بالیۆزەكێ زنجیركریمە. نڤێژان بكەن كو ئەز ب وێرەكی راگەهاندنێ بۆ وێ بكەم، كا چەوا پێدڤیە ئەز بێژم.
تیخیكۆس، برایێ خۆشتڤی و خزمەتكارێ دلسۆز ب ئێكبوونا ل گەل خودانی، دێ هەمی تشتان بۆ هەوە بێژیت، دا هوین ژی بزانن كا رەوشا من یا چەوایە و ئەز چ دكەم.
من ژ بۆ ڤێ چەندێ ئەو هنارتە نك هەوە، دا هوین رەوشا مە بزانن و ئەو هەوە هانبدەت.
ئاشتی بۆ خویشك و برایان بیت و حەزژێكرن ل گەل باوەریێ ژی ژ خودایێ باب و خودان عیسایێ مەسیح.
كەرەم بۆ وان هەمیان بیت، ئەوێن ب حەزژێكرنەكا نەمر حەز ژ خودانێ مە عیسایێ مەسیح دكەن.
ژ مە، پاولۆس و تیمۆتاوسی، بەنیێن مەسیح عیسای، بۆ وان هەمیێن ل فیلیپی، ئەوێن ب رێیا مەسیح عیسای هاتینە پیرۆزكرن، ل گەل چاڤدێر و خزمەتكاران:
كەرەم و ئاشتی ژ بابێ مە خودێ و ژ خودان عیسایێ مەسیح ل سەر هەوە بن.
ئەز سوپاسیا خودایێ خۆ دكەم، هەر گاڤا ئەز هەوە دئینمە بیرا خۆ.
هەردەم د هەمی نڤێژێن خۆ دا، ئەز ب دلخۆشی داخوازیان بۆ هەوە هەمیان دكەم،
ژ بەر پشكداریا هەوە د مزگینیدانێ دا، هەر ژ رۆژا ئێكێ تا نوكە.
ئەز یێ پشتڕاستم، كو ئەوێ كارەكێ باش د دلێ هەوە دا دەست پێ كری، دێ یێ بەردەوام بیت تا ل رۆژا مەسیح عیسای تەمام دبیت.
بۆ من دروستە كو ئەز ڤێ هزرێ دەربارەی هەوە هەمیان بكەم، چنكو هوین یێ د دلێ من دا. هوین هەمی د كەرەما خودێ دا هەڤپشكێن منن، د گرتنا من دا، هەروەسا د بەرگریكرن و سەلماندنا مزگینیێ دا.
خودێ شاهدێ منە كا چەند ب دلنەرمیا مەسیح عیسای، ئەز بیریا هەوە هەمیان دكەم.
داخوازا من ژی ژ خودێ ئەوە كو حەزژێكرنا هەوە پتر و هێشتا پتر ل گەل زانین و هەمی تێگەهشتنێ زێدە ببیت،
داكو هوین یا باشترین بهەلبژێرن، ئەڤجا د رۆژا مەسیحی دا د دلپاك و بێكێماسی بن
و دپڕ بن ژ بەرهەمێ راستداریێ ، ئەوێ كو ژ دەولەتسەرێ عیسایێ مەسیحە، ژ بۆ مەزناهی و پەسنا خودێ.
من دڤێت هوین بزانن، گەلی خویشك و برایان، كو ئەو تشتێن هاتینە سەرێ من، زێدەتر هاریكاریا پێشڤەچوونا مزگینیێ كر،
تاكو بۆ هەمی زێرەڤانێن كۆچكێ و هەمیێن دی ژی ئاشكرا بوو كو گرتنا من ژ پێخەمەت مەسیحیە.
گرتنا من باوەریا پڕانیا برایان ب خودانی قاییم كر، ئەڤجا ئەو نوكە گەلەك زێدەتر دوێرن پەیڤێ بێ ترس رابگەهینن.
راستە، هندەك ژ چاڤپێڕانەبوون و هەڤڕكیێ مەسیحی ددەنە نیاسین، لێ هندەك ژی ب نیازەكا باش.
ئەڤە ژ حەزژێكرنێ وێ چەندێ دكەن، چنكو ئەو دزانن ئەز ژ بۆ بەرگریكرنێ ژ مزگینیێ ل ڤێرێ هاتیمە دانان.
لێ ئەوێن دی ژ هەڤڕكیێ مەسیحی ددەنە نیاسین، نە ب نیازەكا پاقژ. ئەو هزر دكەن دێ رەوشا من د زیندانێ دا نەخۆشتر لێ كەن.
ئێدی قەیدی نینە! چ ب نیازەكا پیس بیت یان ژی ب نیازەكا پاقژ، ب هەر شێوەیەكی بیت بانگەوازی بۆ مەسیحی دهێتە كرن و ئەز ب ڤێ چەندێ یێ دلخۆشم. بەلێ، دێ ل سەر دلخۆشیێ یێ بەردەوام بم ژی،
چنكو ئەز دزانم، ب نڤێژێن هەوە و ب هاریكاریا گیانێ عیسایێ مەسیح، دێ دویماهیا ڤێ چەندێ قورتالبوونا من بیت.
هیڤی و چاڤەڕێیا من ئەوە كو ئەز د چ تشتی دا نەهێمە شەرمزاركرن، لێ ب هەمی وێرەكی، نوكە ژی وەكو هەر جار، مەزناهیا مەسیحی ب رێكا لەشێ من دیار ببیت، چ ب ژیانا من بیت یان ژی ب مرنا من.
چنكو بۆ من ژیان مەسیحە و مرن ژی قازانجە.
ئەگەر ئەز ب ژیانا لەشی یێ بەردەوام بم، رامانا وێ بۆ من ئەوە كو ئەز پتر كارێ ب بەرهەم بكەم، ئەڤجا ئەز نزانم كی ژ وان هەلبژێرم.
د ناڤبەرا هەردوویان دا ئەز ل بەر بڕیارەكا دژوارم: ئەز حەز دكەم بچم و ل گەل مەسیحی بم، ئەڤە گەلەك چێترە.
لێ مانا من د ڤی لەشی دا ، بۆ هەوە پێدڤیترە.
ئەز ژ ڤێ چەندێ یێ پشتڕاستم، لەوما دزانم كو دێ مینم و ل گەل هەوە هەمیان دێ یێ بەردەوام بم، ژ پێخەمەت پێشڤەچوون و دلخۆشیا هەوە د باوەریێ دا،
داكو دەمێ ئەز جارەكا دی دهێمە نك هەوە، هەوە ب من پتر ئەگەرێن شانازیبرنێ ب مەسیح عیسای هەبن.
لێ یا گرنگ ئەوە كو هوین ب شێوەیەكێ هەژی مزگینیا مەسیحی بژین، داكو ئەگەر ئەز بهێم و هەوە ببینم، یان ژی نەهێم و ب تنێ ببهیسم، ئەز بزانم كو هوین د ئێك گیان دا قاییم ماینە، پێكڤە ب ئێك دل خەباتێ دكەن بۆ وێ باوەریێ یا ل سەر مزگینیێ هاتیە ئاڤاكرن
و هوین ب چ شێوەی ژ وان یێن بەرهنگاریا هەوە دكەن، ناترسن. ئەڤە بۆ وان بەلگەیێ وێرانبوونا وانە، لێ یێ قورتالبوونا هەوەیە و ئەڤە ژی ژ لایێ خودێ ڤەیە.
چنكو وی كەرەم ل گەل هەوە كریە كو هوین نە ب تنێ باوەریێ ب مەسیحی بینن، لێ دا ئازارێ ژی ژ پێخەمەت وی بكێشن.
نوكە هوین ژی د هەمان جەنگێ دانە، ئەوا هەوە ژ من دیتی و نوكە ژی هوین دبهیسن كو ئەز هێشتا یێ تێدا.
ئەگەر مەسیح هەوە هانددەت، ئەگەر ڤیانا وی دلێ هەوە ئارام دكەت، ئەگەر ب گیانێ پیرۆز هەوە هەڤپشكی ل گەل ئێكودوو هەیە، ئەگەر هەوە دلسۆزی و دلۆڤانی هەیە،
هۆسا شادیا من تەمام بكەن: بلا هوین ل سەر هەمان هزر بن، هەوە هەمان ڤیان هەبیت و هوین ئێك دل و ئێك مەبەست بن.
چ تشتی ب هەڤڕكیێ یان ب خۆپەرێسیێ نەكەن، لێ ب دەروونبچویكیێ كەسێن دی ژ خۆ باشتر بزانن.
بلا هەر ئێك ژ هەوە، نە ب تنێ ل بەرژەوەندیا خۆ، لێ ل بەرژەوەندیا كەسێن دی ژی بنێڕیت.
بلا هزركرنا هەوە وەكو هزركرنا عیسایێ مەسیح بیت:
عیسایێ مەسیح د بنیاتێ خۆ دا، خودێ بوو، وی نەڤیا یەكسانیا خۆ ل گەل خودێ بۆ بەرژەوەندیا خۆ ب كار بینیت،
لێ وی دەست ژ هەمی تشتی بەردا، شێوەیێ بەنیان وەرگرت و وەك مرۆڤان لێ هات. ئەو ب خولكێ مرۆڤان دیار بوو
و وی خۆ نزم كر و تا مرنێ ژی یێ گوهدار بوو، خۆ مرنەكا ل سەر خاچێ ژی.
لەوما خودێ ئەو گەلەك بلند كر و ناڤێ ژ هەمی ناڤان بلندتر دایێ،
دا بۆ ناڤێ عیسای هەمی چۆك بچەمیێن چ ل ئەسمانی، یان ل سەر ئەردی، یان ل بن ئەردی بن
و هەمی ئەزمان دانپێدانێ بكەن كو عیسایێ مەسیح خودانە، ژ بۆ مەزناهیا خودایێ باب.
ئەڤجا گەلی خۆشتڤیێن من، كا چەوا هەوە هەرگاڤ گوهداری كریە، نە ب تنێ دەمێ ئەز ل نك هەوە، لێ نوكە هێشتا پتر، دەمێ كو ئەز نە ل نك هەوە، قورتالبوونا خۆ ب ترس و لەرز پێشڤە ببەن،
چنكو خودێیە ئەوێ د دلێ هەوە دا كار دكەت، حەز و هێزێ ددەتە هەوە كو وێ بكەن یا ئەو پێ رازی دبیت.
هەمی تشتان بێ پتەپت و گۆمانكرن بكەن،
دا گازندە ل سەر هەوە نەبن و هوین د بێگونە‍‌ھ بن، د ناڤ ڤی نفشێ خوار و خڕیای دا زاڕۆكێن خودێ یێن بێكێماسی بن، د ناڤ وان دا وەكو ستێران د جیهانێ دا ببرسقن.
خۆ موكم ب پەیڤا ژیانێ ڤە بگرن، دا د رۆژا مەسیحی دا شانازیێ ببەم، كو بەزین و رەنجكێشانا من ب ئاڤێ دا نەچوویە.
لێ ئەگەر وەكو پێشكێشیێ رژاندنێ ل سەر قوربانی و خزمەتا باوەریا هەوە بهێمە رشتن ژی، ئەز دلخۆش دبم و ل گەل هەوە هەمیان كەیفخۆش دبم.
ب هەمان شێوەی هوین ژی دلخۆش ببن و ل گەل من كەیفخۆش ببن.
من هیڤی ب خودان عیسای هەیە، كو د دەمەكێ نێزیك دا، دێ تیمۆتاوسی هنێرمە نك هەوە، داكو دلێ من ب زانینا رەوشا هەوە تەنا ببیت.
چنكو من كەسەكێ دی یێ وەكو وی نینە، كو ژ دل و دەروون خەمێ ژ كاروبارێن هەوە بخۆت،
هەمیێن دی ل بەرژەوەندیێن خۆ، نە ل یێن عیسایێ مەسیح دگەڕن.
لێ هوین دزانن كو تیمۆتاوسی خۆ یێ سەلماندی، چنكو كا چەوا كوڕ ل گەل بابێ خۆ خزمەتێ دكەت، وی وەسا ل گەل من د كارێ مزگینیێ دا خزمەت كریە.
ئەڤجا ئەز هیڤی دكەم كو ئەز ئێكسەر وی بهنێرم، هەر دەمێ ئەز تشتەكی ژ چارەنڤیسێ خۆ بزانم
و من باوەری ب خودانی هەیە كو ئەز ب خۆ ژی دێ د دەمەكێ نێزیك دا هێمە نك هەوە.
لێ من دیت كو پێدڤیە ئەز ئێپافرۆدیتۆسی، برا و هەڤكارێ من، ئەوێ ئەم پێكڤە سەرباز و هەوە هنارتی دا خزمەتا پێدڤیێن من بكەت، بهنێرمە نك هەوە.
چنكو وی بیریا هەوە هەمیان دكر و یێ دلتەنگ بوو، ژ بەر كو هەوە بهیستبوو كو ئەو یێ نەساخ بوو.
ب راستی ئەو هند نەساخ بوو، هاتە بەر مرنێ، لێ خودێ دلۆڤانی پێ بر، نە ب تنێ ب وی بر، لێ ب من ژی بر، داكو بۆ من كۆڤانا ل سەر كۆڤانێ نەبیت.
ژ بەر هندێ من هێشتا پتر ڤیا ئەز وی بهنێرمە نك هەوە، داكو دەمێ هوین وی ببینن، دلخۆش ببن و كۆڤانا من ژی كێمتر لێ بهێت.
ئەڤجا ژ بەر خاترا خودانی وی ب شادیەكا مەزن قەبیل بكەن. رێزێ ژی ل یێن وەكو وی بگرن،
چنكو ئەو ژ بەر كارێ مەسیحی هاتە بەر مرنێ، وی ژیانا خۆ ئێخستە د مەترسیێ دا، داكو ئەو خزمەتا هوین نەشیاین بۆ من بكەن، ئەو ل جهێ هەوە بكەت.
ل دویماهیێ گەلی خویشك و برایان، ب خودانی دلخۆش ببن. بۆ من بارگرانی نینە ئەز دووبارە ئەڤان تشتان بۆ هەوە بنڤیسم و بۆ هەوە ئێمناهیە.
هشیاری سەیان بن، هشیاری بەدكاران بن و هشیاری وان بن یێن لەشی دبڕن.
چنكو سونەتكریێن دروست ئەمین، یێن ب گیانێ خودێ پەرستنێ دكەین و شانازیێ ب مەسیح عیسای دبەین و پشتا خۆ ب لەشی گەرم ناكەین،
هەر چەندە من ئەگەر یا هەی كو پشتگەرمێ لەشی ژی بم. ئەگەر ئێكێ دی هزر بكەت كو وی ئەگەر یا هەی پشتگەرمێ لەشی بیت، من ژ وی پتر ئەگەر یا هەی:
ئەز ل رۆژا هەشتێ هاتیمە سونەتكرن، ئەز ژ گەلێ ئیسرائیل و ژ هۆزا بنیامینیمە، ئەز عیبرانی كوڕێ عیبرانیمە. سەبارەت دەستووری، فەریسی بووم.
سەبارەت دلگەرمیێ، تەپەسەركەرێ جڤاكا باوەردارێن مەسیح عیسای بووم. سەبارەت راستداریا د دەستووری دا، ئەز یێ بێكێماسی بووم.
لێ ئەو تشتێن ب چاڤێن من قازانج بوون، من ئەو ژ پێخەمەت مەسیحی ب زیان یێن دیتین.
هێشتا ژ وێ زێدەتر، ئەز هەمی تشتان ب زیان ددانم، ل هەمبەری بهاگرانیا بێ سنوور یا نیاسینا مەسیح عیسایێ خودانێ من، ئەوێ ژ پێخەمەت وی من هەمی تشت زیانكرین و ئەز وان تشتان وەكو گلێش دبینم، دا مەسیحی قازانج بكەم
و ل گەل وی ببمە ئێك و راستدار بهێمە دیتن، نە ب رێكا دەستووری، لێ ب رێكا باوەریێ ب مەسیحی، ل دویڤ وێ راستداریا خودێ ب رێكا باوەریێ ددەت.
من دڤێت مەسیحی بنیاسم و هێزا رابوونا وی ژ ناڤ مریان بزانم و پشكدارێ ئازارێن وی بم و وەكو وی لێ بهێم د مرنا وی دا،
داكو ب هەر رێكەكا هەبیت ئەز بگەهمە رابوونا ژ ناڤ مریان.
ئەز نابێژم كو ئەز گەهشتمە ئارمانجێ، یان كامل بووم، لێ ئەز بزاڤێ دكەم، دا وێ چەندێ ب دەست خۆ ڤە بینم، ئەوا ژ پێخەمەت وێ مەسیح عیسای ئەز ب دەست خۆ ڤە بریم.
گەلی خویشك و برایان، ئەز وەسا ناهژمێرم كو من ئارمانج ب دەست خۆ ڤە ئینا، لێ ئەز تشتەكێ ب تنێ دكەم: تشتێن چووی ژ بیر دكەم و خەباتێ بۆ تشتێن ل پێشیا خۆ دكەم.
ئەز بزاڤێ بۆ ئارمانجێ دكەم، دا خەلاتی قازانج بكەم، ئەوێ ب رێكا مەسیح عیسای، خودێ ئەز بۆ وی گازی كریمە سڵال.
ئەڤجا پێدڤیە ئەم هەمیێن پێگەهشتی هۆسا هزر بكەین و ئەگەر هەوە هزرەكا دی هەبیت، خودێ دێ وێ ژی بۆ هەوە ئاشكرا كەت.
ب تنێ، بلا ل دویڤ وی ئاستێ ئەم گەهشتینێ، بژین.
پێكڤە چاڤ ل من بكەن، گەلی خویشك و برایان، هەروەسا بەرێ خۆ بدەنە وان یێن ب ڤی شێوەی ل دویڤ نموونەیا مە دژین.
چنكو هەروەكو من گەلەك جاران بۆ هەوە گۆتی و نوكە ژی ب گری ڤە دبێژم، كو گەلەك كەس هەنە ب شێوازێ ژیانا خۆ دوژمنێن خاچا مەسیحینە.
دویماهیا ڤان كەسان وێرانبوونە، خودایێ وان زكێ وانە و شانازیێ ب تشتێن جهێ شەرمێ دبەن، هزرا وان ل سەر تشتێن ڤێ جیهانێیە.
لێ ئەم هەڤوەڵاتیێن ئەسماناینە، كو ئەم د چاڤەڕێینە قورتالكەرەك ژ وێرێ بهێت، ئەو ژی خودان عیسایێ مەسیحە.
ب هێزا خۆ یا دشێت هەر تشتەكی بندەستی خۆ بكەت، ئەو دێ لەشێ مە یێ لاواز و مربار گوهۆڕیت و وەكو لەشێ خۆ یێ ب روومەت لێ كەت.
ئەڤجا گەلی خویشك و برایێن من یێن خۆشتڤی، ئەوێن ئەز بیریا هەوە دكەم و هوین شادی و تانجا منن، خۆشتڤیێن من ب ڤی شێوەی د ئێكبوونا ل گەل خودانی دا قاییم بمینن.
ئەز هیڤی ژ ئەیۆدیایێ و ژ سنتیخایێ دكەم، كو د ئێكبوونا ل گەل خودانی دا هەڤهزر ببن.
بەلێ، ئەز داخوازێ ژ تە ژی دكەم، هەی هەڤكارێ من یێ دلسۆز، هاریكاریا وان ژنان بكە، د خەباتا مزگینیێ دا ئەوان ل گەل من بزاڤ كریە، هەروەسا ل گەل كلیمەنتۆسی و هەڤكارێن من یێن دی ژی، ئەوێن ناڤێن وان د پەرتووكا ژیانێ دا.
هەرگاڤ ب خودانی دلخۆش ببن. دیسان ئەز دبێژمە هەوە: دلخۆش ببن!
بلا سەرنەرمیا هەوە ل نك هەمی مرۆڤان یا بەرنیاس بیت. خودان یێ نێزیكە.
ژ بەر چ تشتی نیگەران نەبن، لێ دەربارەی هەمی تشتان ب نڤێژ و هیڤیخوازیێ ل گەل سوپاسیكرنێ، داخوازێن خۆ ئاراستەی خودێ بكەن.
هۆسا ئاشتیا خودێ ژی، ئەوا د سەر هەر تێگەهشتنەكێ را، دێ دلێ هەوە و زێهنێ هەوە د ئێكبوونا ل گەل مەسیح عیسای دا پارێزیت.
ل دویماهیێ گەلی خویشك و برایان، هەر تشتێ راستی، هەر تشتێ بڕێز، هەر تشتێ دادپەروەر، هەر تشتێ پاك، هەر تشتێ دلڤەكەر، هەر تشتێ ناڤودەنگەكێ باش هەی، چ ئەو تشت قەنجی بیت، یان ژی تشتەكێ هەژی پەسنێ بیت، هزرێ تێدا بكەن.
ئەو تشتێن هوین ژ من فێر بووین، هەوە ژ من وەرگرتین، ژ من بهیستین و د ژیانا من دا دیتین، بكەن و خودایێ ئاشتیێ دێ ل گەل هەوە بیت.
ئەز ب خودانی گەلەك دلخۆش بووم، كو نوكە بۆ جارەكا دی خەمخۆریا هەوە بۆ من بشكڤیڤە. ب راستی هەوە هەر خەما من د خوار، لێ هەوە دەلیڤە نەبوو كو هاریكاریا من بكەن.
ئەز ڤێ گۆتنێ نابێژم كو ئەز یێ پێدڤی بووم، چنكو ئەز یێ فێر بوویم د هەر رەوشەكا ئەز تێدا بم، یێ رازی بم.
ئەز دزانم هەژاری چیە، هەروەسا دزانم بەرفرەهی ژی چیە. ئەز یێ ب سەر وێ نهێنیێ هەلبوویم، كو د هەمی رەوش و كاودانان دا، چ یێ تێر بم یان یێ برسی، یێ هەیی بم یان یێ نەدار، ئەز هەر یێ رازی بم.
ئەز دشێم هەمی تشتان بكەم، ب رێكا وی یێ من بهێز دئێخیت.
سەرەڕای هندێ هەوە باش كر، كو هوین د تەنگاڤیا من دا پشكدار بوون.
هوین ژی دزانن، گەلی فیلیپیان، كو د دەستپێكا دانا مزگینیێ دا، گاڤا ئەز ژ مەقدۆنیایێ دەركەفتیم، چ جڤاكێن باوەرداران ژ هەوە پێڤە، سەبارەت هاریكاریا دارایی، پشكداریا من نەكر.
دەمێ ئەز ل سالونیكی ژی، هەوە پتر ژ جارەكێ تشتێن من پێدڤی پێ هەی، بۆ من هنارتن.
نەكو چاڤێ من ل دیاریانە، لێ من دڤێت قازانج ل سەر سەرمایێ هەوە ل نك خودێ زێدە ببیت.
ئێدی من تێرا هەمی پێدڤیێن خۆ یێ هەی و زێدەتر ژی. ئەز كەفتمە د بەرفرەهیێ دا، پشتی من ئەو تشت وەرگرتین، یێن ئێپافرۆدیتۆسی بۆ من ژ نك هەوە ئیناین، كو پێشكێشیەكێ بێهنخۆش و قوربانەكێ قەبیلكری و جهێ رازیبوونا خودێیە.
خودایێ من ژی دێ ل دویڤ دەولەمەندیا خۆ یا مەزن، ب رێكا مەسیح عیسای، هەمی پێدڤیێن هەوە دابین كەت.
هەتا هەتایێ مەزناهی بۆ بابێ مە خودێ بیت! ئامین.
سڵاڤان ل هەر پیرۆزكریەكێ مەسیح عیسای بكەن. ئەو برایێن ل گەل من، سڵاڤان ل هەوە دكەن.
هەمی پیرۆزكری، ب تایبەت ئەوێن ژ كۆچكا قەیسەری، سڵاڤان ل هەوە دكەن.
كەرەما خودان عیسایێ مەسیح ل گەل گیانێ هەوە بیت.
ژ من، پاولۆس، هنارتیێ مەسیح عیسای ب حەزا خودێ، ژ برایێ مە تیمۆتاوسی ژی،
بۆ خویشك و برایێن پیرۆز و دلسۆز د ئێكبوونا ل گەل مەسیحی دا، ئەوێن ل كۆلۆسی: كەرەم و ئاشتی ژ بابێ مە خودێ ل سەر هەوە بن.
د نڤێژێن خۆ دا بۆ هەوە، ئەم هەردەم سوپاسیا خودێ، بابێ خودانێ مە عیسایێ مەسیح دكەین،
چنكو مە دەربارەی باوەریا هەوە ب مەسیح عیسای و حەزژێكرنا هەوە بۆ هەمی پیرۆزكریان بهیست.
هوین ژ هەڤبەنیێ مە یێ خۆشتڤی ئێپافراسی فێری وێ مزگینیێ بوون، ئەوێ كو بۆ هەوە خزمەتكارەكێ مەسیحی یێ دلسۆزە.
ئەوی ئەو حەزژێكرن بۆ مە دیار كر، یا هەوە ب رێكا گیانێ پیرۆز هەی.
ژ بەر ڤێ چەندێ ژی، هەر ژ رۆژا مە ئەڤە بهیستی، مە دەست ژ نڤێژكرنێ و داخوازكرنێ بۆ هەوە بەرنەدایە، كو هوین ژ زانینا حەزا خودێ، ب هەمی ئاقلمەندی و تێگەهشتنا روحانی، پڕ ببن،
دا ب شێوەیەكی بژین كو هەژی خودانی بیت و ژ هەمی لایان ڤە جهێ رازیبوونا وی بن، د هەر كارەكێ باش دا د بەرهەمدار بن و د نیاسینا خودێ دا وەرارێ بكەن،
ئەوی ئەم ژ دەستهەلاتا تاریاتیێ قورتال كرین و بۆ پاشایەتیا كوڕێ خۆ یێ خۆشتڤی ڤەگوهاستین،
ئەوێ ب وی مە رزگاركرن، ئانكو لێبورینا گونەهان، هەی.
ئەو وێنەیێ وی خودێیە یێ كو ناهێتە دیتن، نەخریە، سەرۆكێ هەمی تشتێن ئافراندیە.
چنكو ب وی هەمی تشت هاتنە ئافراندن: یێن ل ئەردی و یێن ل ئەسمانان، یێن دهێنە دیتن و یێن ناهێنە دیتن، چ تەخت بن یان خودانەتی، چ سەروەر بن یان دەستهەلاتدار، هەمی ب وی و بۆ وی هاتنە ئافراندن.
ئەو هەبوو بەری هەمی تشت بهێنە ئافراندن و ب وی هەمی پێكڤە د گرێداینە.
ئەو سەرێ لەشیە، ئانكو سەرێ جڤاكا باوەردارانە ، ئەو دەستپێكە، نەخریێ ژ ناڤ مریانە ، دا ئەوی د هەر تشتی دا جهێ ئێكێ هەبیت.
چنكو خودێ پێ خۆش بوو كو هەمی تژیاتیا وی د كەسایەتیا مەسیحی دا ئاكنجی ببیت
و ب رێكا خوینا وی یا ل سەر خاچێ هاتیە رشتن، ئاشتیێ چێكەت، هۆسا ب رێكا وی هەمی تشتان ل گەل خۆ ئاشت بكەت، چ ل سەر ئەردی بیت، یان ژی ل ئەسمانان بیت.
هوین ژی دەمەكی ب كریارێن خۆ یێن خراب، ژ خودێ دویركەفتبوون و ب هزرێن خۆ دوژمنێن خودێ بوون،
لێ نوكە خودێ ب لەشێ مەسیحی یێ مرۆڤكانی، ب رێكا مرنا وی هوین ل گەل خۆ ئاشت كرن، دا هەوە پیرۆز و بێكێماسی و بێگازندە ل نك خۆ ئامادە بكەت،
ب تنێ ئەگەر هوین د باوەریێ دا د بەردەوام بن، دموكم و قاییم بن و خۆ ژ هیڤیا مزگینیا هەوە بهیستی لانەدەن، ئەوا بۆ هەمی ئافراندیێن د بن ئەسمانی دا هاتیە راگەهاندن، ئەوا ئەز، پاولۆس، بوویمە خزمەتكارێ وێ.
نوكە ئەز دلخۆش دبم ب ئازارێن ئەز ژ پێخەمەت هەوە دكێشم و د لەشێ خۆ دا وان تەنگاڤیێن مەسیحی یێن ماین، ژ پێخەمەت لەشێ وی كو جڤاكا باوەردارانە، تەمام دكەم.
ل دویڤ وی ئەركی یێ خودێ ژ پێخەمەت هەوە ئێخستیە ستۆیێ من، ئەز بۆ جڤاكێ بوومە خزمەتكار، دا ب تەمامی پەیڤا خودێ رابگەهینم،
ئانكو وێ نهێنیێ رابگەهینم یا ب درێژاهیا هەمی سەردەمێن بەرێ و ژ هەمی بەرەبابان هاتیە ڤەشارتن، لێ نوكە بۆ پیرۆزكریێن وی هاتیە ئاشكراكرن.
خودێ بڕیار دا بۆ پیرۆزكریێن خۆ بدەتە زانین كا دەولەمەندیا مەزناهیا ڤێ نهێنیێ د ناڤ مللەتێن نەجوهی دا چەندا مەزنە. نهێنی ژی ئەوە كو مەسیح د ناخێ هەوە دایە و ژ بەر هندێ مسۆگەرە كو هوین دێ د مەزناهیا وی دا پشكدار بن.
ئەم وی ددەینە نیاسین، هەر كەسەكی پێ ئاگەهدار دكەین و ب هەمی ئاقلمەندی هەر كەسەكی فێر دكەین، دا ئەم هەر كەسەكی پێگەهشتی د ئێكبوونا ل گەل مەسیحی دا پێشكێش بكەین.
ژ بۆ ڤێ چەندێ، ئەز رەنجێ دكێشم، ل دویڤ هێزا وی یا د من دا بهێز كار دكەت، بزاڤێ دكەم.
من دڤێت هوین بزانن، كو ئەز چەند ژ پێخەمەت هەوە و یێن ل لاودیكیایێ و هەمیێن روی ب روی ئەز نەدیتیم، بزاڤێ دكەم.
ئارمانجا من ئەوە كو ئەو بهێنە هاندان و د حەزژێكرنێ دا د ئێكگرتی بن، ب مەرەما هەمی دەولەمەندیا تێگەهشتنا تەمام، دا نهێنیا خودێ بزانن، كو مەسیحە،
ئەوێ د وی دا هەمی گەنجینەیێن ئاقلمەندی و زانینێ دڤەشارتینە.
ئەز ڤێ چەندێ دبێژم، دا كەس ب گۆتنێن خۆش هەوە نەخاپینیت.
چنكو ئەگەر ب لەشی ئەز ل نك هەوە یێ ئامادە نەبم، لێ ب گیانی ئەز ل گەل هەوەمە، ب دیتنا رێكوپێكی و موكمیا باوەریا هەوە ب مەسیحی، دلخۆش دبم.
ئەڤجا كا چەوا هەوە خودان مەسیح عیسا قەبیل كریە، هۆسا ل گەل وی گرێدای بژین،
ب وی ڤە رە‍‌ھ داهێلای و د ئاڤاكری بن و د باوەریێ دا د موكم بن هەروەكو هوین هاتینە فێركرن و بلا هوین ژ سوپاسیكرنێ د سەر دا بڕژن.
هشیار بن، دا كەس ب فەلسەفەیەكا خاپینۆك و درەو، ل دویڤ تیتالێن مرۆڤان، ل دویڤ هێزێن سرۆشتی یێن ڤێ جیهانێ، نە ل دویڤ مەسیحی، هەوە دیل نەكەت.
چنكو هەمی تژیاتیا خودایەتی، د مەسیحی دا یا ئاكنجیە، ب شێوەیەكێ لەشكانی.
هوین ژی د ئێكبوونا ل گەل وی دا د كاملن، ئەوێ كو سەرێ هەمی سەروەر و دەستهەلاتدارانە.
هەروەسا د ئێكبوونا ل گەل وی دا هوین هاتینە سونەتكرن، سونەتكرنا نە ب دەستێ مرۆڤان، لێ ب ژێڤەكرنا حەزێن لەشی بۆ گونەهێ، ئەڤەیە سونەتكرن ژ لایێ مەسیحی ڤە.
ب تافیركرنێ هوین ل گەل وی هاتینە ڤەشارتن و هەر ب وێ هوین ل گەل وی هاتینە راكرن ژی، چنكو هەوە باوەری ب شیانا خودێ یێ ئەو ژ ناڤ مریان راكری، ئینا.
هوین ژ بەر گونەهێ و سونەتنەكرنا لەشێ خۆ د مری بوون، لێ خودێ هوین ل گەل وی ڤەژاندن، دەمێ ل هەمی گونەهێن مە بوری.
وی تۆمارا قەرێن مە ژێ بر، ئەوا ل گۆر رێسایێن دەستووری ل دژی مە هاتیە نڤیسین. وی ئەو تۆمار ب خاچێ ڤە بزماردا و هۆسا راكر.
سەروەر و دەستهەلاتدار ژ چەك كرن و ل بەر چاڤێن هەمیان شەرمزار كرن، ب رێكا خاچێ سەركەفتن ل سەر وان ئینا.
لەوما بلا كەس ل سەر خوارن، یان ڤەخوارن، یان ژی جەژنان، یان هەیڤێن نوی، یان شەمبیان رەخنەیێ ل هەوە نەگریت.
ئەڤێن هەنێ ب تنێ سیتافكن بۆ تشتێن پاشەڕۆژێ، لێ یێ راستەقینە مەسیحە.
بلا كەس هەوە ژ خەلاتێ هەوە بێبەهر نەكەت، كەسەكێ وەسا كو حەز ژ خۆنزمكرنێ و پەرستنا فریشتەیان دكەت و بەردەوام بەحسێ بینینێن خۆ دكەت كو بێ بنیات یێ پفدایە ژ لایێ زێهنێ خۆ یێ لەشكانی ڤە
و خۆ ب سەری ڤە نەگرتیە. ژ وی سەری، هەمی لەش ب رێكا گە‍‌ھ و رەهان، دهێتە پشتەڤانیكرن و پێكڤە دهێتە گرێدان، وەسا لەش وەرارێ دكەت، وەراركرنەكا ژ لایێ خودێ ڤە.
مادەم هوین ل گەل مەسیحی مرینە و ژ هێزێن سرۆشتی یێن ڤێ جیهانێ ئازاد بووینە، ئێدی بۆچی هوین وەسا دژین، هەروەكو هوین یێن ڤێ جیهانێ بن؟ بۆچی هوین ملكەچی ڤان رێسایان دبن:
«دەست ڤە نەدەی! تام نەكێ! دەست نەكێ!»
رێسایێن هۆسا هەمی فەرمان و فێركرنێن مرۆڤانە، دەربارەی تشتێن ژ ناڤ دچن دەمێ دهێنە بكارئینان،
وان رێسایان سەبارەت ئایینداریەكا دەستكرد و خۆنزمكرنێ و دژواریێ ل گەل لەشی، ژ سەرڤە دیمەنەكێ ئاقلمەندیێ یێ هەی، لێ د رێگریێ دا ل بەرامبەر تێركرنا ئارەزوویێن لەشكانی، چ مفایێ خۆ نینە.
ئەڤجا ئەگەر هوین ل گەل مەسیحی ژ مرنێ هاتینە راكرن، بزاڤێ بۆ تشتێن ل سڵال بكەن، ل وی جهی یێ مەسیح لێ، كو ل دەستێ راستێ یێ خودێ یێ روینشتیە.
بلا هزرا هەوە ل سەر تشتێن ل سڵال بیت، نە یێن ل سەر ئەردی.
چنكو هوین مرین، ژیانا هەوە ژی ل گەل مەسیحی ل نك خودێ هاتیە هەلگرتن.
دەمێ مەسیح، ئەوێ كو ژیانا هەوەیە، دیار دبیت، هنگی هوین ژی دێ ل گەل وی د مەزناهیێ دا دیار بن.
ژ بەر هندێ حەزێن خۆ یێن ڤێ جیهانێ بمرینن: دەهمەنپیسی، پویچاتی، گڕ ، حەزێن خراب و چاڤبرساتی كو پووتپەرێسیە ،
ژ بەر وان تشتان تۆڕەبوونا خودێ یا ب سەر مرۆڤێن نەگوهدار دا دهێت.
هەوە ژی دەمەكی ئەو تشت دكرن، دەمێ هوین د ناڤ وان تشتان دا دژیان.
لێ نوكە ڤان هەمی تشتان ژ نك خۆ بهاڤێژن: كەرب، تۆڕەبوون، كین، بوهتان و ئاخفتنێن كرێت ئەوێن ژ دەڤێ هەوە دەردكەڤن.
درەوان ل ئێكودوو نەكەن، چنكو هەوە مرۆڤێ كەڤن ب كریارێن وی ڤە ژ بەر خۆ كریە
و مرۆڤێ نوی كریە بەر خۆ، ئەوێ دهێتە نویكرن ل گۆر وێنەیێ ئافرێندەرێ خۆ، دا ب دروستی ئافرێندەری بنیاسیت.
د وێ نویكرنێ دا چ جوداهی د ناڤبەرا نەجوهی و جوهی، سونەتكری و سونەتنەكری، بەربەر و سكێت ، بەنی و ئازاد دا نینە، لێ مەسیح هەمی تشتە و د ناڤ مە هەمیان دایە.
ئەڤجا هوین ئەوێن خودێ ئەو هەلبژارتین و پیرۆز كرین و حەز ژێ دكەت: دلۆڤانی، قەنجی، دەروونبچویكی، دلنەرمی و بێهنفرەهیێ بكەنە بەر خۆ.
ل گەل ئێكودوو د بێهنفرە‍‌ھ بن، ئەگەر ئێكی گازندە ل سەر ئێكێ دی هەبن، ل ئێكودوو ببورن. هەروەكو خودان ل هەوە بوری، هوین ژی وەسا ل ئێكودوو ببورن.
د سەر ڤان هەمیان را، حەزژێكرنێ بكەنە بەر خۆ، كو د كاملیێ دا هەمی تشتان پێكڤە گرێ ددەت.
بلا د دلێ هەوە دا ئاشتیا مەسیحی حوكمداریێ بكەت، ئەو ئاشتیا هوین بۆ وێ هاتینە گازیكرن، كو ببنە ئێك لەش، هەروەسا د سوپاسدار ژی بن.
بلا پەیڤا مەسیحی ب دەولەمەندیا خۆ د دلێ هەوە دا ئاكنجی ببیت، هوین ژی ب هەمی ئاقلمەندی ئێكودوو فێر بكەن و ئاگەهدار بكەن، زەبووران و سروود و سترانێن روحانی، ب سوپاسداری ژ دلێ خۆ بۆ خودێ بسترن.
هەر تشتێ هوین بكەن، ب گۆتن یان كریار، ب ناڤێ خودان عیسای بكەن و ب رێكا وی سوپاسیا خودایێ باب بكەن.
گەلی ژنان، كا چەوا هەژی خودانیە، هەر ئێك ژ هەوە ملكەچی مێرێ خۆ بیت.
گەلی مێران، هەر ئێك ژ هەوە حەز ژ ژنا خۆ بكەت و ل گەل وان د توند نەبن.
گەلی زاڕۆكان، د هەمی تشتان دا گوهداریا دایك و بابێن خۆ بكەن، چنكو ئەڤە جهێ رازیبوونا خودانیە.
گەلی بابان، زاڕۆكێن خۆ تۆڕە نەكەن، دا بێ ئومێد نەبن.
گەلی بەنیان، د هەمی تشتان دا گوهداریا خودانێن خۆ یێن ڤێ جیهانێ بكەن، نە ب وێ خزمەتێ یا ل بەر چاڤان دهێتە كرن، ب تنێ بۆ رازیكرنا مرۆڤان، لێ ب دلساخی و ترسا خودانی گوهداریێ بكەن.
هەر تشتەكێ هوین بكەن، وەسا ژ دل بكەن، هەروەكو بۆ خودانی بیت، نە بۆ مرۆڤان،
چنكو هوین دزانن دێ پاداشتی كو میراتە ژ خودانی وەرگرن، ژ بەر كو هوین خزمەتا خودان مەسیحی دكەن.
لێ یێ نەڕاستیێ بكەت دێ سزایێ نەڕاستیا خۆ وەرگریت و لایەنگری نینە.
گەلی خودانان، ب دادپەروەری و یەكسانی سەرەدەریێ ل گەل بەنیێن خۆ بكەن، چنكو هوین دزانن كو هەوە ژی خودانەكێ ل ئەسمانی هەی.
ل سەر نڤێژكرنێ د بەردەوام بن و تێدا ب سوپاسیكرنێ هشیار بمینن.
د هەمان دەم دا، بۆ مە ژی نڤێژان بكەن، دا خودێ ژ پێخەمەت پەیاما خۆ دەرگەهەكی بۆ مە ڤەكەت، داكو ئەم نهێنیا مەسیحی رابگەهینین، ئەوا ئەز ژ بەر وێ هاتیمە زیندانكرن.
نڤێژان بكەن، كو ئەز ڤێ نهێنیێ ب زەڵالی رابگەهینم، هەروەكو پێدڤیە ئەز بێژم.
ل بەرامبەری وان یێن كو ژ دەرڤەی باوەریێنە، ب ئاقلمەندی سەرەدەریێ بكەن و دەرفەتا ڤی دەمی ژ دەست نەدەن.
بلا ئاخفتنا هەوە هەردەم یا شرین و یا ب خوێ بیت ، دا بزانن كا چەوا پێدڤیە هوین بەرسڤا هەر كەسەكی بدەن.
تیخیكۆس، برایێ خۆشتڤی و خزمەتكارێ دلسۆز و هەڤبەنیێ مە د ئێكبوونا ل گەل خودانی دا، دێ هەمی تشتان دەربارەی رەوشا من گەهینیتە هەوە.
من ئەو بۆ ڤێ مەبەستێ یێ هنارتیە نك هەوە، دا هوین رەوشا مە بزانن و ئەو دلێ هەوە هانبدەت.
من ئەو یێ ل گەل ئۆنیسیمۆسی، برایێ دلسۆز و خۆشتڤی، كو ئێك ژ هەوەیە، یێ هنارتی. ئەو هەردوو دێ هەر تشتەكێ ل ڤێرێ روی ددەت بۆ هەوە بێژن.
ئەرستارخۆس، ئەوێ ل گەل من د زیندانێ دا سڵاڤان ل هەوە دكەت، هەروەسا مەرقۆسێ پسمامێ بارناباسی ژی، ئەوێ دەربارەی وی هەوە راسپاردە وەرگرتی كو ئەگەر هاتە نك هەوە، وی قەبیل بكەن.
عیسا ژی ئەوێ دبێژنێ یوستۆس سڵاڤان ل هەوە دكەت. د ناڤ ئەوێن ل گەل من بۆ پاشایەتیا خودێ كار دكەن، ب تنێ ئەو ژ سونەتكریانە و ئەو یێن بووینە هاندەرێن من.
ئێپافراس ژی سڵاڤان ل هەوە دكەت، ئەو ژی ئێك ژ هەوەیە و بەنیێ مەسیح عیسایە، ئەو هەردەم ب نڤێژان ژ پێخەمەت هەوە خەباتێ دكەت، دا هوین ب كاملی و پشتڕاست ژ هەمی حەزا خودێ د خۆڕاگر بن.
ئەز بۆ وی شاهدەییێ ددەم، كو ئەو بۆ هەوە و بۆ ئەوێن ل لاودیكیایێ و ئەوێن ل هیێراپۆلیسێ، گەلەك دوەستیێت.
نۆژدارێ خۆشتڤی لوقا و دیماس ژی سڵاڤان ل هەوە دكەن.
سڵاڤان ل خویشك و برایێن ل لاودیكیایێ، ل نیمفایێ و جڤاكا باوەرداران یا ل مالا وێ كۆم دبیت، بكەن.
پشتی ئەڤ نامەیە د ناڤ هەوە دا دهێتە خواندن، وە بكەن كو ل جڤاكا باوەردارێن لاودیكیایێ ژی بهێتە خواندن، هەروەسا نامەیا ژ لاودیكیایێ ژی، هوین بخوینن.
بێژنە ئارخیپۆسی: «خەمخۆرێ وێ خزمەتێ بە یا تە ژ خودانی وەرگرتی، دا وێ ب ج‍‌ھ بینی.»
ئەز پاولۆس، ڤێ سڵاڤێ ب دەستێ خۆ دنڤیسم. قەیدا من بیننە بیرا خۆ. كەرەما خودێ ل سەر هەوە بیت.
ژ پاولۆس، سیلاس و تیمۆتاوسی، بۆ جڤاكا باوەردارێن سالونیكیێ، یا خودایێ باب و خودان عیسایێ مەسیح: كەرەم و ئاشتی ل سەر هەوە بن.
ئەم هەردەم ژ پێخەمەت هەوە هەمیان سوپاسیا خودێ دكەین و بەردەوام د نڤێژێن خۆ دا هەوە دئینینە بیرا خۆ.
ل بەرامبەر خودێ، بابێ مە، بێی دابڕین كریارێن هەوە یێن ژ باوەریێ و رەنجا هەوە یا ژ حەزژێكرنێ و خۆڕاگریا هەوە یا ژ وێ هیڤیێ دزێت یا هەوە ب خودانێ مە عیسایێ مەسیح هەی، دئینینە بیرا خۆ.
ئەم دزانین، گەلی خویشك و برایان، خۆشتڤیێن خودێ، كو وی هوین یێن هەلبژارتین،
چنكو مزگینیا مە نە ب تنێ ب پەیڤان، لێ ب هێزێ ژی و ب گیانێ پیرۆز و ب پشتڕاستیەكا تەمام گەهشتیە هەوە. هوین دزانن كا ئەم د ناڤ هەوە دا ژ پێخەمەت هەوە چ جۆرە كەس بووین.
هەوە ژی چاڤ ل مە و خودانی كر، د ناڤ گەلەك تەنگاڤیان دا، ب دلخۆشیا ژ گیانێ پیرۆز، پەیڤ قەبیل كر،
تاكو هوین بۆ هەمی باوەردارێن ل مەقدۆنیایێ و ئەخایایێ بووینە نموونە.
چنكو دەنگێ پەیڤا خودانی ژ نك هەوە بەڵاڤ بوویە، نە ب تنێ گەهشتیە مەقدۆنیایێ و ئەخایایێ، لێ دەنگوباسێ باوەریا هەوە ب خودێ ل هەمی جهان بەڵاڤ بوویە و ئێدی پێدڤی نینە كو ئەم ئاخفتنەكێ ل سەر بێژین.
چنكو خەلكێ وان دەڤەران بەحس دكەن، كا سەرەدانا مە بۆ هەوە چ كارتێكرن هەبوو و كا چەوا هوین ژ پووتان بۆ خودێ ڤەگەڕیان، دا خودایێ زیندی یێ راستەقینە بپەرێسن
و چاڤەڕێی كوڕێ وی بن كو دێ ژ ئەسمانان هێت، ئەوێ وی ژ ناڤ مریان راكری، عیسا، ئەوێ مە ژ تۆڕەبوونا دێ هێت قورتال دكەت.
هوین ب خۆ دزانن، گەلی خویشك و برایان، كو هاتنا مە بۆ لایێ هەوە یا بێ مفا نەبوو،
لێ هەروەكو هوین دزانن، ل پێشیێ ل فیلیپی ئەم هاتینە ئازاردان و كرێتكرن، سەرەڕای هندێ مە ب خودایێ خۆ وێرەكی هەبوو كو د ناڤ بەرهنگاریەكا دژوار دا، مزگینیا خودێ بۆ هەوە رابگەهینین.
ئەو هیڤیخوازیا ئەم دكەین، نە ژ شاشیێ و نە ژ نەپاكیێ دهێت و نە ب فێلبازیێیە،
لێ كا چەوا خودێ ئەم پەسەند كرین كو مزگینیێ ب مە بسپێریت، ئەم وەسا دئاخڤین، نە دا خەلكی رازی كەین، لێ دا خودێ رازی كەین، ئەوێ دلێ مە تاقی دكەت.
خودێ شاهدە كو مە چ جاران د گۆتنێن خۆ دا سالویسی نەكریە، هەروەكو هوین دزانن، نە ژی ب دویڤ چاڤبرساتیەكا نخافتی كەفتینە،
نە ژی مە بزاڤ كریە كو ژ لایێ مرۆڤان ڤە بهێینە مەزنكرن، نە ژ لایێ هەوە ڤە و نە ژ لایێ كەسێن دی ڤە،
هەر چەندە مە ماف هەبوو وەكو هنارتیێن مەسیحی بارگرانی بین ل سەر هەوە، لێ ئەم ل گەل هەوە د دلنازك بووین، وەكو دایكەك چاڤدانا ساڤایێن خۆ دكەت.
ئەم هۆسا شەیدایێن هەوە بووین كو مە حەز دكر نە ب تنێ مزگینیا خودێ بدەینە هەوە، لێ ژیانا خۆ ژی، چنكو هوین بوونە خۆشتڤیێن مە.
رەنج و وەستیانا مە یا ل بیرا هەوە، گەلی خویشك و برایان، دەمێ مە مزگینیا خودێ بۆ هەوە رادگەهاند، مە ب شەڤ و رۆژ كار دكر دا بۆ كەسێ ژ هەوە نەبینە بارگرانی.
هوین شاهدن و خودێ ژی شاهدە، كا سەرەدەریا مە ل گەل هەوەیێن باوەردار چەند یا پاك و راست و بێ گازندە بوو.
هەروەكو هوین دزانن، ئەم بۆ هەر ئێك ژ هەوە د وەسا بووین، وەكو بابەكی بۆ زاڕۆكێن خۆ،
مە هوین هاندان و ل بەر دلێ هەوە دا و ل سەر ژیانا هەوە راوەستیاین، كو ب شێوەیەكی بیت یا هەژی وی خودای بیت، ئەوێ هوین بۆ پاشایەتی و مەزناهیا خۆ گازی كرین.
هەروەسا ئەم بێی دابڕین سوپاسیا خودێ دكەین، چنكو دەمێ هەوە پەیڤا خودێ ژ مە بهیستی، هەوە قەبیل كر نە هەروەكو ئەو پەیڤا مرۆڤان بیت، لێ هەروەكو ئەو پەیڤا خودێ بیت، ب راستی ژی ئەو پەیڤا خودێیە كو د هەوەیێن باوەردار دا كار دكەت.
چنكو هوین ژی گەلی خویشك و برایان، كەفتنە هەمان دەردێ جڤاكێن گازیكریێن خودێ یێن ل یەهودیایێ، ئەوێن ل گەل مەسیح عیسای بووینە ئێك، هەوە ژی ل سەر دەستێ هەڤوەڵاتیێن خۆ هەمان ئازار كێشان، وەكو وان ل سەر دەستێ جوهیان ئازار كێشاین،
ئەوێن خودان عیسا و پێغەمبەر كوشتین و ئەم ژی تەپەسەر كرین. ئەو جهێ رازیبوونا خودێ نینن و دژی هەمی مرۆڤانە.
ئەو رێ نادەن كو ل گەل مللەتێن دی بئاخڤین دا قورتال ببن. ب ڤێ چەندێ ژی ئەو وەكو هەر جار چانتكێ خۆ یێ گونەهان تژی دكەن و ل دویماهیێ تۆڕەبوونا خودێ هاتە سەر وان.
گەلی خویشك و برایان، ئەم بۆ دەمەكێ كورت ژ هەوە هاتینە ڤەقەتاندن، نە دلێ مە، لێ رویێ مە ژ ئێكودوو دویر كەفت. وی دەمی مە گەلەك بزاڤ دكر، ب دلخوازیەكا مەزن، كو هەوە روی ب روی ببینین.
لەوما مە ڤیا بهێینە نك هەوە و من ب خۆ وەكو پاولۆس چەندین جاران بزاڤ بۆ هندێ كر، لێ ئبلیسی رێ ل مە گرت.
چنكو ما هیڤی، یان دلخۆشی، یان تانجا مە یا شانازیێ ل پێشیا خودانێ مە عیسای د رۆژا هاتنا وی دا چیە؟ ما نە هوینن؟
بەلێ، مەزناهی و دلخۆشیا مە هوینن.
لەوما دەمێ مە نەشیای پتر خۆ بگرین، مە دیت كو باشترە ئەم ب تنێ بمینینە ل ئەسینایێ
و مە تیمۆتاوس هنارت، كو برا و هەڤكارێ مەیە بۆ خودێ د مزگینیا مەسیحی دا، داكو هەوە د باوەریا هەوە دا قاییم بكەت و هانبدەت،
دا د ڤان تەنگاڤیان دا كەس ژ هەوە نەلقیێت. هوین ب خۆ دزانن كو ئەم بۆ ڤان تشتان یێن هاتینە دەستنیشانكرن،
چنكو دەمێ ئەم ل نك هەوە بووین، مە پێشتر دگۆتە هەوە كو ئەم دێ تووشی تەنگاڤیان بین و هەروەكو هوین دزانن وەسا چێبوو.
لەوما دەمێ من نەشیای خۆ پتر بگرم ژی، من ئەو هنارت دا رەوشا باوەریا هەوە بزانم، نەكو تاقیكەری هوین تاقی كربن و رەنجا مە ب ئاڤێ دا چوو بیت.
لێ نوكە تیمۆتاوس ژ نك هەوە زڤڕی نك مە و مزگینیا باوەری و حەزژێكرنا هەوە دایە مە. وی گۆتە مە كو هوین هەردەم مە ب باشی دئیننە بیرا خۆ و شەیدایێن دیتنا مە نە، هەروەكو ئەم ژی شەیدایێن دیتنا هەوە.
لەوما گەلی خویشك و برایان، سەرەڕای هەمی نەخۆشی و تەنگاڤیێن مە، ب رێكا باوەریا هەوە، دلێ مە دەربارەی هەوە ئارام بوو.
مادەم هوین د ئێكبوونا ل گەل خودانی دا دموكمن، ئێدی ژیانا مە گەش دبیت.
ئەڤجا ئەم دێ شێین ژ پێخەمەت هەوە ب چ شێواز سوپاسیا خودێ كەین، ژ بەر وێ هەمی دلخۆشیا مە ب رێكا هەوە ل پێشیا خودایێ خۆ هەی؟
ئەم شەڤ و رۆژ ب گەرمی نڤێژان دكەین، كو ئەم رویێ هەوە ببینین و كێماسیێن باوەریا هەوە تەمام بكەین.
بلا بابێ مە خودێ ب خۆ و خودانێ مە عیسا بەرێ رێكا مە بدەتە هەوە.
بلا خودان وە بكەت كو حەزژێكرنا هەوە بۆ ئێكودوو و بۆ هەمیان وەرارێ بكەت و زێدە ببیت، هەروەكو حەزژێكرنا مە بۆ هەوە زێدە دبیت،
دا دلێ هەوە بێی كێماسی د پیرۆزیێ دا قاییم بكەت ل پێشیا بابێ مە خودێ، دەمێ خودانێ مە عیسا ل گەل هەمی پیرۆزكریێن خۆ دهێت.
ل دویماهیێ گەلی خویشك و برایان، وەكو هوین ژ مە فێر بووین كا دڤێت هوین چەوا بژین، دا هوین خودێ رازی بكەن و ب راستی ژی هوین وە دكەن، ئەم ب ناڤێ خودان عیسای داخوازێ ژ هەوە دكەین و هیڤی دكەین كو هوین هێشتا پێشڤە بچن،
چنكو هوین دزانن مە ب دەستهەلاتا خودان عیسای چ راسپاردە داینە هەوە.
حەزا خودێ ژی ئەوە كو هوین د پیرۆز بن، ئانكو خۆ ژ دەهمەنپیسیێ بدەنە پاش.
بلا هەر ئێك ژ هەوە بزانیت كا دێ چەوا ل سەر لەشێ خۆ زاڵ بیت و د پیرۆزی و سەربلندیێ دا ژیت،
نە د حەز و ئارەزوویێن لەشی دا وەكو مللەتێن خودێنەنیاس.
د ڤێ چەندێ دا بلا كەس زێدەگاڤیێ یان سەرپێچیێ ل سەر نامویسا خویشكا خۆ یان برایێ خۆ نەكەت، چنكو خودان تۆلڤەكەرێ ئەڤان هەمی تشتانە، هەروەكو مە بەری نوكە گۆتیە هەوە و مە هوین ب رژدی تەمبی كرین.
چنكو خودێ ئەم بۆ پویچاتیێ گازی نەكرینە، لێ بۆ پیرۆزیێ.
ئەڤجا یێ ڤێ چەندێ رەت بكەت، ئەو مرۆڤەكی رەت ناكەت، لێ خودایێ كو گیانێ خۆ یێ پیرۆز ددەتە هەوە، رەت دكەت.
دەربارەی حەزژێكرنا برایانە ژی، هوین نە د پێدڤینە ئەم بۆ هەوە بنڤیسین، چنكو هوین ب خۆ ژ لایێ خودێ ڤە هاتینە فێركرن، كو حەز ژ ئێكودوو بكەن.
ب راستی ژی هوین ڤێ چەندێ بۆ هەمی برایێن ل سەرانسەری مەقدۆنیایێ دكەن. لێ ئەم هیڤی ژ هەوە دكەین، گەلی خویشك و برایان، كو هوین ڤێ چەندێ هێشتا زێدەتر بكەن.
بزاڤێ بكەن كو ب ئارامی بژین و مژویلی كاروبارێن خۆ بن و ب دەستێن خۆ كار بكەن، هەروەكو مە هوین راسپاردین،
دا رەفتارا هەوە ل گەل یێن ژ دەرڤە ب شێوەیەكێ سەرفەراز بیت و هوین هەوجەیی كەسێ نەبن.
مە نەڤێت هوین دەربارەی نڤستیان د بێ ئاگە‍‌ھ بن، گەلی خویشك و برایان، دا خۆ خەمگین نەكەن وەكو یێن دی یێن كو چ هیڤی نینن.
مادەم مە باوەری هەیە كو عیسا مر و رابوو، وەسا ژی خودێ دێ وان یێن ل سەر باوەریێ ب عیسای نڤستین ل گەل وی ئینیت.
ئەم ڤێ چەندێ ب پەیڤا خودانی بۆ هەوە دبێژین: ئەم یێن زیندی كو تا هاتنا خودانی بمینین، ئێكجار د بەراهیا یێن نڤستی را ناكەین.
چنكو خودان ب خۆ ب گازیەكا ب فەرمان، ب دەنگێ سەرۆكێ فریشتەیان و بۆڕیزانا خودێ، دێ ژ ئەسمانی هێتە خوار، ل بەراهیێ دێ یێن ل سەر باوەریێ ب مەسیحی مرین، رابنەڤە.
پاشی، ئەم یێن زیندی یێن كو ماین، دێ ل گەل وان د عەوران دا هێینە رەڤاندن، دا ل گەل خودانی د بەرگەبای دا بگەهینە ئێك، هۆسا ئەم دێ هەردەم ل گەل خودانی بین.
ئەڤجا ب ڤان گۆتنان هاندانا ئێكودوو بكەن.
دەربارەی دەم و ژڤانان ژی، گەلی خویشك و برایان، هوین پێدڤی نینن كەس بۆ هەوە بنڤیسیت.
چنكو هوین ب خۆ باش دزانن، كو رۆژا خودانی وەكو دزێ شەڤێ دهێت.
دەمێ خەلك دبێژن: «ئاشتی و تەناهیە»، هنگی وێران دێ ژ نشكەكێ ڤە ب سەر وان دا هێت، هەروەكو ژان دهێنە دووگیانەكێ، ئەڤجا ئەو نەشێن ژێ بڕەڤن.
لێ هوین گەلی خویشك و برایان، نە د تاریاتیێ دانە، كو ئەو رۆژ وەكو دزەكی ب سەر هەوە دا بهێت.
چنكو هوین هەمی زاڕۆكێن رۆناهیێ و زاڕۆكێن رۆژێنە. ئەم نە یێن شەڤێ و نە ژی یێن تاریاتیێینە.
ئەڤجا ئەم نەنڤین وەكو یێن دی، لێ بلا ئەم د هشیار و ل سەر هشێن خۆ بین.
چنكو ئەوێن دنڤن، ب شەڤێ دنڤن و ئەوێن سەرخۆش دبن، ب شەڤێ سەرخۆش دبن.
لێ ژ بەر كو ئەم یێن رۆژێینە، دڤێت ل سەر هشێن خۆ بین و زریێ باوەریێ و حەزژێكرنێ بكەینە بەر خۆ و كومزریێ هیڤیا قورتالبوونێ بكەینە سەرێ خۆ.
چنكو خودێ ئەم نە ژ بۆ تۆڕەبوونا خۆ یێن دەستنیشان كرین، لێ دا بگەهینە قورتالبوونێ، ب رێیا خودانێ مە عیسایێ مەسیح،
ئەوێ ژ پێخەمەت مە مری، داكو ئەگەر ئەم د هشیار بین یان ژی د نڤستی ، ئەم ل گەل وی بژین.
لەوما هاندانا ئێكودوو بكەن و ئێكودوو ئاڤا بكەن، هەروەكو هوین نوكە دكەن.
ئەڤجا ئەم هیڤی ژ هەوە دكەین، گەلی خویشك و برایان، كو هوین رێزێ ل وان بگرن، یێن د ناڤ هەوە دا خۆ دوەستینن و د باوەریا خودانی دا رێبەریا هەوە دكەن و شیرەتان ل هەوە دكەن.
ژ بەر كارێ وان، حەز ژ وان بكەن و ل نك هەوە گەلەك د بهاگران بن. ب ئاشتی ل گەل ئێكودوو بژین.
ئەم هیڤی ژ هەوە دكەین، گەلی خویشك و برایان، ئاگەهداریێ بدەنە تەمبەلان، هاندانا دلساران بكەن، پشتەڤانیا لاوازان بكەن و ل گەل هەمیان د بێهنفرە‍‌ھ بن.
هشیار بن كەس ژ ئەنجامێ خرابیێ، خرابیێ ل كەسێ نەكەت، لێ هەرگاڤ ل گەل ئێكودوو و ل گەل هەمیان ل دویڤ باشیێ هەڕن.
هەرگاڤ د دلخۆش بن،
ل سەر نڤێژان د بەردەوام بن،
د هەمی رەوشان دا سوپاسیا خودێ بكەن، چنكو ئەڤە حەزا خودێیە بۆ هەوە د ئێكبوونا ل گەل مەسیح عیسای دا.
گیانێ پیرۆز نەڤەمرینن.
سڤكاتیێ ب پەیامێن پێغەمبەران نەكەن.
هەمی تشتان تاقی بكەن و خۆ ب یێ باش ڤە بگرن.
خۆ ژ هەمی جۆرێن خرابیێ دویر بئێخن.
بلا خودایێ ئاشتیێ ب خۆ هەوە ب تەمامی پیرۆز بكەت و هەمی گیان و دەروون و لەشێ هەوە بپارێزیت، داكو ل دەمێ هاتنا خودانێ مە عیسایێ مەسیح د بێكێماسی بن.
ئەوێ گازی هەوە دكەت یێ دلسۆزە و ئەو دێ وێ چەندێ كەت ژی.
گەلی خویشك و برایان، بۆ مە نڤێژان بكەن.
ب ماچەكا پیرۆز سڵاڤان ل هەمی خویشك و برایان بكەن.
ئەز هەوە ب خودانی ددەمە سویندێ كو ئەڤ نامەیە بۆ هەمی خویشك و برایان بهێتە خواندن.
كەرەما خودانێ مە عیسایێ مەسیح ل سەر هەوە بیت.
ژ پاولۆس، سیلاس و تیمۆتاوسی، بۆ جڤاكا باوەردارێن سالونیكیێ، یا بابێ مە خودێ و خودان عیسایێ مەسیح:
كەرەم و ئاشتی ژ بابێ مە خودێ و ژ خودان عیسایێ مەسیح ل سەر هەوە بن.
پێدڤیە ئەم هەرگاڤ ژ پێخەمەت هەوە، گەلی خویشك و برایان، سوپاسیا خودێ بكەین. سوپاسیكرن ژی د جهێ خۆ دایە، چنكو باوەریا هەوە گەلەك وەرارێ دكەت و حەزژێكرنا هەر ئێك ژ هەوە بۆ ئێكودوو زێدە دبیت.
لەوما ئەم ب خۆ د ناڤ جڤاكێن گازیكریێن خودێ دا شانازیێ ب هەوە دبەین، ژ پێخەمەت خۆڕاگری و باوەریا هەوە د وان هەمی تەپەسەری و تەنگاڤیان دا یێن هوین خۆ ل بەر رادگرن.
ئەڤ چەندە بەلگەیە ل سەر دادكرنا خودێ یا دادپەروەرانە، داكو هوین هەژی پاشایەتیا خودێ بن، ئەوا هوین ژ بەر وێ ئازارێ ژی دكێشن.
ل نك خودێ دادپەروەریە كو تەنگاڤیێ ل وان ڤەگەڕینیت یێن هەوە تەنگاڤ دكەن،
بەرفرەهیێ ژی بدەتە هەوە، ئەوێن هوین د تەنگاڤیێ دا، هەروەسا بدەتە مە ژی، دەمێ خودان عیسا ل گەل فریشتەیێن خۆ یێن بهێز ژ ئەسمانی دیار دبیت
و ئەو د ئاگرەكێ ب گوڕی دا تۆلێ ژ وان ڤەكەت یێن خودێ نانیاسن و گوهداریا مزگینیا خودانێ مە عیسای ناكەن.
سزایێ وان دێ وێرانبوونا هەتا هەتایی بیت، دویر ژ رویێ خودانی و ژ مەزناهیا هێزا وی.
دەمێ ئەو دهێت دا ل وێ رۆژێ د ناڤ پیرۆزكریێن خۆ دا بهێتە مەزنكرن و ببیتە جهێ مەندەهۆشیا هەمی باوەرداران، هوین ژی دێ د ناڤ وان دا بن، چنكو هەوە باوەری ب شاهدەییا مە ئینا.
بۆ ڤێ مەبەستێ ژی ئەم هەردەم ژ بۆ هەوە نڤێژان دكەین، كو خودایێ مە وە ل هەوە بكەت، هوین هەژی وێ گازیكرنێ بن یا وی هوین بۆ وێ گازی كرین و هەمی نیازێن هەوە یێن چاكیێ و كریارێن هەوە یێن ب باوەریێ دهێنە كرن، ب هێزا خۆ تەمام بكەت،
دا ب كەرەما خودایێ مە و خودان عیسایێ مەسیح، ناڤێ خودانێ مە عیسایێ مەسیح ب هەوە بهێتە مەزنكرن و هوین ژی ب وی بهێنە مەزنكرن.
ئەڤجا دەربارەی هاتنا خودانێ مە عیسایێ مەسیح و خڕڤەبوونا مە ل نك وی، ئەم هیڤی ژ هەوە دكەین، گەلی خویشك و برایان،
كو د هزرێن خۆ دا زوی نەلقیێن و نەڤەجنقن، ب رێكا گیانەكی ، یان گۆتنەكێ، یان ژی نامەیەكێ هەروەكو ژ نك مە هاتبیت و بێژیت كو رۆژا خودانی یا هاتی.
بلا ب چ رێكان كەس هەوە نەخاپینیت، چنكو ئەو رۆژ ناهێت، ئەگەر بەری وێ یاخیبوون چێنەبیت و مرۆڤێ یاسانەنیاس، كو كوڕێ ژناڤچوونێیە ، دیار نەبیت.
ئەو دێ دژایەتیا هەر تشتەكی كەت كو دبێژنێ خوداوەند یان ژی دهێتە پەرستن و دێ خۆ ژ وان بلندتر دانیت، تاكو ئەو دێ د پەرستگەها خودێ ژی ڤە روینیت و دێ خۆ وەكو خودێ دەتە نیاسین.
ما ل بیرا هەوە نینە دەمێ ئەز ل نك هەوە، من ئەڤ تشتە بۆ هەوە دگۆتن؟
هوین دزانن ژی نوكە چ تشت ئاستەنگە كو ئەو كەس دیار نەبیت، تاكو دەمێ وی نەهێت.
چنكو نهێنیا یاسانەنیاسیێ یا كار دكەت، لێ ئەوێ نوكە دبیتە ئاستەنگ دێ یێ بەردەوام بیت تاكو ژ رێكێ دهێتە راكرن.
هنگی دێ یێ یاسانەنیاس دیار بیت، ئەوێ دێ خودان عیسا ب پفا دەڤێ خۆ وی كوژیت و دێ ب شەوقا هاتنا خۆ وی ب دویماهی ئینیت.
هاتنا یێ یاسانەنیاس دێ ل دویڤ چالاكیا ئبلیسی، ل گەل هەمی حنێر ، نیشان و مەندەهۆشیێن درەوین بیت ،
هەروەسا ل گەل هەر جۆرەكێ خرابیێ بۆ خاپاندنا یێن ژ ناڤ دچن، چنكو وان حەزژێكرنا راستیێ رەتكر، ئەوا دا وان قورتال كەت.
لەوما خودێ دێ دسەرداچوونەكا بهێز ب سەر وان دا هنێریت، داكو ئەو باوەر ژ وێ درەوێ بكەن،
داكو ئەو هەمیێن باوەری ب راستیێ نەئینای، لێ كەیفا وان ب خرابیێ هاتی، بهێنە دادكرن.
لێ پێدڤیە ئەم هەردەم ژ پێخەمەت هەوە، گەلی خویشك و برایێن خۆشتڤی ژ لایێ خودانی ڤە، سوپاسیا خودێ بكەین، چنكو هەر ژ دەستپێكێ خودێ هوین ژ بۆ قورتالبوونێ ب رێكا پیرۆزكرنێ ژ لایێ گیانێ پیرۆز ڤە و باوەری ئینان ب راستیێ، هەلبژارتن.
وی بۆ وێ مەبەستێ هوین ب رێكا مزگینیا مە گازی كرن، دا هوین مەزناهیا خودانێ مە عیسایێ مەسیح ب دەست خۆ ڤە بینن.
ئەڤجا گەلی خویشك و برایان، خۆ راگرن و پێگیریێ ب وان فێركرنان بكەن یێن هوین ب گۆتن یان ژی ب نامە ژ مە فێربووین.
بلا خودانێ مە عیسایێ مەسیح ب خۆ و بابێ مە خودێ، ئەوێ حەز ژ مە كری و هاندانا هەروهەر و هیڤیا باش ب كەرەمێ داینە مە،
دلێن هەوە هان بدەت و د هەمی ئاخفتن و كارێن باش دا موكم بكەت.
ل دویماهیێ گەلی خویشك و برایان، نڤێژان ژ بۆ مە بكەن، داكو پەیڤا خودانی ب لەز بەڵاڤ ببیت و بهێتە مەزنكرن، هەروەكو د ناڤ هەوە ژی دا چێبووی.
نڤێژان بكەن، داكو ئەم ژ مرۆڤێن بەدكار و خراب بهێینە قورتالكرن، چنكو نە هەمی مرۆڤ باوەردارن.
لێ خودان جهێ باوەریێیە، ئەو دێ هەوە موكم كەت و ژ خرابكاری پارێزیت.
ژ دەولەتسەرێ خودانی ئەم ژ هەوە د پشتڕاستین، كو ئەو راسپاردەیێن مە داینە هەوە، هوین ب ج‍‌ھ دئینن و دێ ب ج‍‌ھ ئینن ژی.
ئەڤجا بلا خودان بەرێ دلێ هەوە بدەتە حەزژێكرنا خودێ و خۆڕاگریا مەسیحی.
ئەڤجا گەلی خویشك و برایان، ئەم ب ناڤێ خودانێ خۆ عیسایێ مەسیح فەرمانێ ل هەوە دكەین، كو هوین خۆ دویر بئێخن ژ هەمی برایێن ب تەمبەلی دژین و ل دویڤ وێ فێركرنێ ناژین یا وان ژ مە وەرگرتی.
هوین ب خۆ دزانن كو دڤێت هوین چاڤ ل مە بكەن، چنكو ئەم د تەمبەل نەبووین دەمێ ئەم د ناڤ هەوە دا.
مە بێ بەرامبەر نانێ چ كەسێ نەخوار، لێ شەڤ و رۆژ مە ب رەنج و وەستیان كار دكر، دا بۆ كەسێ ژ هەوە نەبینە بارگرانی.
نە چنكو مە ماف نەبوو، لێ دا ئەم خۆ بۆ هەوە بكەینە نموونە، دا هوین چاڤ ل مە بكەن.
چنكو دەمێ ئەم ل نك هەوە بووین، مە ئەڤ راسپاردە ل هەوە دكر: «ئەگەر ئێكی نەڤێت كار بكەت، بلا نەخۆت ژی.»
ئەم ڤێ دبێژین، چنكو ئەم دبهیسین كو هندەك د ناڤ هەوە دا هەنە ب تەمبەلی دژین، چ كاری ناكەن، لێ ب تنێ ئەو مایێ خۆ د كارێ كەسێن دی دكەن.
ئەم ب ناڤێ خودان عیسایێ مەسیح فەرمانێ ل كەسێن هۆسا دكەین و هیڤی ژێ دكەین، كو ئەو ب ئارامی كار بكەن و نانێ دەستێ خۆ بخۆن.
لێ هوین، گەلی خویشك و برایان، ژ كرنا باشیێ بێزار نەبن.
ئەگەر ئێك گوهداریا گۆتنێن مە یێن د ڤێ نامەیێ دا نەكەت، وی دەستنیشان بكەن و تێكهەلیێ ل گەل نەكەن، دا شەرمێ ژ خۆ بكەت.
وی وەكو دوژمن نەهژمێرن، لێ وەكو برا شیرەتان لێ بكەن.
ئەڤجا بلا خودانێ ئاشتیێ ب خۆ، هەرگاڤ و ب هەمی شێوەیان، ئاشتیێ بدەتە هەوە. خودان ل گەل هەوە هەمیان بیت.
ئەز پاولۆس، ڤێ سڵاڤێ ب دەستێ خۆ دنڤیسم، كو نیشانە د هەر نامەیەكا من دا، ئەز هۆسا دنڤیسم.
كەرەما خودانێ مە عیسایێ مەسیح ل سەر هەوە هەمیان بیت.
ژ من، پاولۆس، هنارتیێ مەسیح عیسای، ل دویڤ فەرمانا قورتالكەرێ مە خودێ و هیڤیا مە مەسیح عیسای.
بۆ تیمۆتاوسی، كوڕێ من یێ راستەقینە د باوەریێ دا: كەرەم و دلۆڤانی و ئاشتی ژ خودایێ باب و ژ خودانێ مە مەسیح عیسای ل سەر تە بن.
هەروەكو من ژ دل داخواز ژ تە كری، دەمێ ئەز دچوومە مەقدۆنیایێ، تۆ ل ئەفەسۆسێ بمینە، دا هندەك كەسان راسپێری كو فێركرنەكا دی نەكەن،
هەروەسا ئەو خۆ ب چیڤانۆك و نەژادنامەیێن بێ دویماهی ڤە مژویل نەكەن، ئەڤ چەندە دبنە ئەگەرێ بگروڤەكێشێ ل شوینا بجهئینانا نەخشەیێ خودێ یێ كو ب رێكا باوەریێیە.
لێ ئارمانجا ڤێ راسپاردەیێ حەزژێكرنەكا ژ دلەكێ پاك و ژ وژدانەكا باش و ژ باوەریەكا بێ دووڕویاتیە.
هندەك مرۆڤ ژ ڤان تشتان ڤاڕێبوون و ب دویڤ گۆتنێن ڤاڵا كەفتن.
ئەوان دڤێت ببنە مامۆستایێن دەستووری، لێ ئەو نە د وی تشتی دگەهن یێ دبێژن، نە ژی یێ داكۆكیێ ل سەر دكەن.
ئەم دزانین دەستوور یێ باشە، ئەگەر كەسەك ب شێوەیەكێ دروست ب كار بینیت،
هەروەسا ئەم دزانین دەستوور بۆ یێن راستدار نەهاتیە دانان، لێ بۆ سەرپێچكار و یاخیبوویان، بۆ بەدكار و گونەهكاران، بۆ یێن نەپیرۆز و هەڕمیان، بۆ بابكوژ و دایكوژان، بۆ مێركوژان،
بۆ دەهمەنپیسان، نێربازان، مرۆڤ دزان ، درەوینان، یێن ژ درەو سویند دخۆن و بۆ هەر تشتەكێ دژی فێركرنا ساخلەم بیت، هاتیە دانان.
فێركرنا ساخلەم ئەوە یا گونجای ل گەل وێ مزگینیێ یا بۆ من هاتیە سپاردن، مزگینیا ب روومەت یا خودایێ پیرۆز.
سوپاسیا مەسیح عیسایێ خودانێ مە دكەم، یێ ئەز ب هێز ئێخستیم، چنكو وی ئەز ب دلسۆز هژمارتم و بۆ ڤێ خزمەتكرنێ دەستنیشان كرم،
هەر چەندە بەرێ ئەز كوفریكەر و تەپەسەركەر و مرۆڤەكێ توند بووم. لێ خودێ دلۆڤانی ب من بر، چنكو من د بێباوەریێ دا ب نەزانین رەفتار دكر.
كەرەما خودانێ مە ژی بۆ من گەلەك ب سەر دا چوو، ل گەل باوەری و حەزژێكرنا د ئێكبوونا ل گەل مەسیح عیسای دا.
ئەڤ گۆتنە جهێ پشتڕاستیێ و هەژی قەبیلكرنا تەمامە: «مەسیح عیسا هاتە جیهانێ، دا گونەهكاران قورتال بكەت.» ئەز ژی ژ وان هەمیان گونەهكارترم،
لێ ژ بۆ ڤێ چەندێ دلۆڤانی ب من هاتە برن: دا مەسیح عیسا هەمی بێهنفرەهیا خۆ د من دا، ئەز یێ ژ هەمیان خرابتر، دیار بكەت و من بكەتە نموونە بۆ ئەوێن باوەریێ ب وی دئینن و ژیانا هەروهەر وەردگرن.
هەتا هەتایێ رێز و مەزناهی بۆ پاشایێ سەردەمان یێ نەمر و نەهێتە دیتن، بۆ خودایێ ئێكانە بیت! ئامین.
ئەز ڤێ راسپاردەیێ ددانمە نك تە، كوڕێ من تیمۆتاوس، ل دویڤ پەیامێن ل دەمێ بوری ب سرۆشێ خودێ ل سەر تە هاتینە گۆتن، داكو تۆ ب رێكا وان پەیامان جەنگا باش بكەی،
ب رێكا قاییم گرتنا باوەری و وژدانەكا باش. هندەكان ئەو وژدان رەتكر، ئینا ئەو ژ لایێ باوەریێ ڤە ژ بن چوون،
ژ وان هیمەنایۆس و ئەسكەندەر، ئەوێن من رادەستی ئبلیسی كرین، دا فێر ببن كو كوفریان نەكەن.
ئەڤجا بەری هەمی تشتان، ئەز هیڤی دكەم كو داخوازی و نڤێژ و مەهدەری و سوپاسیكرن ژ پێخەمەت هەمی مرۆڤان بهێنە كرن،
بۆ پاشایان و هەمی دەستهەلاتداران ژی، دا ئەم ژیانەكا تەنا و ئارام، ب هەمی خودێترسی و رێز، بڕێڤە ببەین.
ئەڤ چەندە یا باشە و جهێ دلخۆشیێیە ل نك قورتالكەرێ مە خودێ.
ئەوی دڤێت هەمی مرۆڤ قورتال ببن و بگەهنە زانینا راستیێ.
چنكو ئێك خودێ هەیە و ئێك ناڤبەینكار د ناڤبەرا خودێ و مرۆڤان دا هەیە، ئەو ژی مەسیح عیسایێ مرۆڤە.
ئەوی خۆ وەكو نرخێ ئازادیا هەمی مرۆڤان بەخش كر. ئەڤەیە شاهدەییا د دەمێ وێ یێ گونجای دا هاتیە دان.
بۆ وێ شاهدەییێ ئەز یێ كریمە راگەهێنەرێ پەیامێ و هنارتی و مامۆستایێ مللەتان یێ باوەری و راستیێ، دەربارەی ڤێ چەندێ ئەز راستیێ دبێژم و درەوان ناكەم.
ئەڤجا من دڤێت ل هەر جهەكێ هوین كۆم دبن، زەڵام نڤێژان بكەن. بلا دەستێن خۆ، بێی تۆڕەبوون و گەنگەشە، ب پیرۆزی بلند بكەن.
هەروەسا من دڤێت ژنك ب جلكێن بكێرهاتی، ب تۆرە و بەرئاقلی خۆ بخەملینن، نە ب ڤەهاندنا پرچا خۆ، یان زێڕ، یان مراری ، یان ژی جلكێن بهاگران،
لێ ب كریارێن باش، كو بكێر وان ژنكان بهێن یێن ب ئاشكرایی دبێژن ئەم خودێترسین.
بلا ژنك ب بێدەنگی و هەمی ملكەچی فێركرنێ وەربگرن.
ئەز دەستویریێ نادەم كو ژنك فێركرنێ بدەتە زەڵامی و ل سەر زاڵ ببیت، لێ بلا یا بێدەنگ بیت،
چنكو ل بەراهیێ ئادەم هاتە چێكرن پاشی حەوا
و ئادەم نەهاتە خاپاندن، لێ ژن هاتە خاپاندن و سەرپێچی كر.
لێ ب زاڕۆكئینانێ دێ قورتال بیت، ئەگەر ئەو ب خۆڕاگری د باوەری و حەزژێكرن و پیرۆزی دا بمینن.
ئەڤ گۆتنە جهێ پشتڕاستیێیە: ئەگەر دلێ ئێكی ل سەر چاڤدێریێ بیت، ئەو حەز ژ كارەكێ باش دكەت.
ئەڤجا پێدڤیە چاڤدێر: گازندە ل سەر نەبیت، مێرێ ئێك ژن بیت، ل سەر خۆ یێ زاڵ بیت، خودان رەفتارەكا ئاقلانە بیت، یێ رێزدار بیت، یێ مێڤاندار بیت و بشێت فێركرنێ بكەت،
مەی ڤەخۆر نەبیت و توند نەبیت، لێ یێ دلنەرم بیت، شەڕفرۆش نەبیت و حەزژێكەرێ پارەی نەبیت.
ب باشی رێڤەبەریا مالا خۆ بكەت و وە بكەت كو زاڕۆكێن وی ب هەمی رێزگرتن ملكەچی وی بن.
ما ئەگەر كەسەك نەزانیت رێڤەبەریا مالا خۆ بكەت، دێ چەوا چاڤێ خۆ دەتە جڤاكا گازیكریێن خودێ ؟
پێدڤیە ئەو باوەردارەكێ نوی نەبیت، دا دفنبلند نەبیت و نەكەڤیتە د دادكرنا ئبلیسی دا.
هەروەسا پێدڤیە ناڤودەنگەكێ باش د ناڤ یێن ژ دەرڤە دا هەبیت، دا نەكەڤیتە شەرمزاریێ و خەفكا ئبلیسی.
هەروەسا پێدڤیە خزمەتكار ژی رێزدار بن، خودان ئێك ئاخفتن بن، گەلەك مەیێ ڤەنەخۆن، چاڤێ وان ل مفایێ حەرام نەبیت،
راستیا باوەریێ ب وژدانەكا پاقژ بپارێزن.
بلا ئەو ل بەراهیێ بهێنە تاقیكرن، پاشی ئەگەر گازندە ل سەر نەبن، بلا وەكو خزمەتكار خزمەتێ بكەن.
هەروەسا ژن ژی پێدڤیە بڕێز بن، بوهتانكار نەبن، ل سەر خۆ د زاڵ بن و د هەمی تشتان دا د دلسۆز بن.
پێدڤیە خزمەتكار مێرێ ئێك ژن بیت و ب باشی رێڤەبەریا زاڕۆكێن خۆ و مالا خۆ بكەت.
چنكو ئەوێن ب باشی خزمەتكاریێ دكەن، پلەیەكا باش و پشتڕاستیەكا مەزن د وێ باوەریێ دا ب دەست خۆ ڤە دئینن، ئەوا ب مەسیح عیسای.
ئەز هیڤیدارم ل دەمەكێ نێزیك بهێمە نك تە، لێ ئەز ڤان تشتان بۆ تە دنڤیسم،
دا ئەگەر ئەز گیرۆ ببم، تۆ بزانی كا پێدڤیە ئێك چەوا د مالا خودێ دا رەفتارێ بكەت. ئەو مال جڤاكا گازیكریێن خودایێ زیندیە، ستوین و شەنگستەیێ راستیێیە.
بێگۆمان، نهێنیا خودێپەرێسیا راستەقینە یا مەزنە: ئەو ب لەشی دیار بوو ، ژ لایێ گیانێ پیرۆز ڤە راستدار هاتە دەرئێخستن، ژ لایێ فریشتەیان ڤە هاتە دیتن، مزگینیا وی د ناڤ مللەتان دا هاتە راگەهاندن، د جیهانێ دا باوەری پێ هاتە ئینان و د مەزناهیێ دا هاتە بلندكرن.
گیان ب ئاشكرایی دبێژیت، كو د دەمێن دویماهیێ دا، هندەك دێ ژ باوەریێ پاشگەز بن، دێ ب دویڤ گیانێن خاپینۆك و فێركرنێن ئەجنەیان كەڤن،
ب رێكا دووڕویاتیا درەوینان، ئەوێن وژدانا وان هاتیە داخكرن.
ئەو هەڤژینیێ قەدەغە دكەن و فەرمانا خۆ دویرئێخستنێ ژ هندەك خوارنان ددەن كو خودێ یێن ئافراندین، دا ب سوپاسیكرن ڤە ژ لایێ باوەردار و راستی نیاسان ڤە بهێنە خوارن.
چنكو هەر تشتێ خودێ ئافراندی یێ باشە. پێدڤیە چ تشت نەهێتە رەتكرن، ئەگەر ب سوپاسیكرن ڤە بهێتە وەرگرتن،
ژ بەر كو پەیڤا خودێ و نڤێژ وی تشتی پیرۆز دكەن.
ئەگەر تۆ خویشك و برایان فێری ڤان تشتان بكەی، دێ خزمەتكارەكێ باش یێ مەسیح عیسای بی، خزمەتكارەكێ پەروەردەبووی ل سەر پەیڤێن باوەریێ و فێركرنا باش یا تۆ ل دویڤ دچی.
خۆ ژ چیڤانۆكێن نەپیرۆز و چیڕۆكێن پیرەژنان بدە پاش، لێ راهێنانێ ل سەر خودێترسیێ بكە.
چنكو وەرزشا لەشی مفایێ هەی بۆ هندەك تشتان، لێ ژ خودێترسیێ مفایێ هەی بۆ هەمی تشتان، ژ بەر كو خودێترسیێ سۆز بۆ ژیانا ڤێ جیهانێ و جیهانا دی هەیە.
ئەڤ گۆتنە جهێ پشتڕاستیێیە و هەژیە ب تەمامی بهێتە قەبیلكرن.
ژ بۆ ڤێ چەندێ ئەم رەنجێ دكێشین و خەباتێ دكەین، چنكو مە هیڤیا خۆ ب خودایێ زیندی ڤە گرێ دایە، ئەوێ كو قورتالكەرێ هەمی مرۆڤانە، ب تایبەت یێ باوەردارانە.
ڤان تشتان راسپێرە و فێری وان بكە.
بلا كەس سڤكاتیێ ب گەنجاتیا تە نەكەت، لێ د ئاخفتنێ دا، د رەفتارێ دا، د حەزژێكرنێ دا، د باوەریێ دا، د دەهمەنپاكیێ دا بۆ باوەرداران ببە نموونە.
تا كو ئەز دهێم، خۆ بۆ خواندن و هاندان و فێركرنێ تەرخان بكە.
خەمساریێ نەكە د وێ بەهرەیا روحانی یا د تە دا، ئەوا ب سرۆشێ خودێ بۆ تە هاتیە دان، دەمێ جڤاتا ریهسپیان دەستێن خۆ داناینە سەر تە.
خەمێ ژ وان تشتان بخۆ و ل سەر بمینە، دا پێشكەفتنا تە بۆ هەمی كەسان یا دیار بیت.
چاڤێ تە ل تە و فێركرنا تە بیت و ل سەر بەردەوام ببە، چنكو ئەگەر تۆ وە بكەی، دێ خۆ و ئەوێن تە دبهیسن ژی قورتال كەی.
ل زەڵامێ پیر نەحەیتینە ، لێ هان بدە، هەروەكو ئەو بابێ تە، رەفتارێ ل گەل گەنجان ژی بكە هەروەكو برایێن تە،
ل گەل پیرەژنان ژی هەروەكو دایكا تە، ل گەل كچ و ژنێن گەنج ژی ب هەمی دەهمەنپاكی هەروەكو خویشكێن تە.
رێزێ ل وان بیژنان بگرە یێن كو ب دروستی بیژنن.
لێ ئەگەر بیژنەكێ زاڕۆك یان نەڤی هەبن، بلا ئەو ل بەراهیێ فێر ببن كو ئایینداریا خۆ ل گەل خەلكێ مالا خۆ ب ج‍‌ھ بینن و قەنجیێن دایك و بابێن خۆ ل سەر خۆ راكەن، چنكو ئەڤ چەندە جهێ دلخۆشیا خودێیە.
بیژنا ب دروستی ئەوە یا بێ سەمیان، ئەوا هیڤیا خۆ ب خودێ ڤە گرێ دای و ب شەڤ و رۆژ ب نڤێژ و هیڤیكرنێ ڤە دمینیت.
لێ ئەوا خۆ رادەستی خۆشیێن دلی دكەت، ئەو ب زیندی یا مریە.
وان ب ڤان تشتان راسپێرە، دا د بێگازندە بن.
لێ ئەگەر ئێك چاڤێ خۆ نادەتە مرۆڤێن خۆ، ب تایبەتی خەلكێ مالا خۆ، ئەڤە وی باوەری ماندەل كریە و ئەو ژ بێباوەران خرابترە.
بلا ناڤێ بیژنێ د تۆمارا بیژنان دا بیت، ئەگەر ژیێ وێ ژ شێست ساڵان كێمتر نەبیت و ب تنێ شویەك كربیت
و ل سەر كریارێن چاك شاهدەیی بۆ بهێتە دان: ئەگەر زاڕۆكێن خۆ بخودان كربن، مێڤان حەواندبن، پێیێن پیرۆزكریان شویشتبن ، هاریكاریا كەسێن د تەنگاڤیێ دا كربیت و ل دویڤ هەر كارەكێ باش چووبیت.
لێ بلا ناڤێن بیژنێن گەنج د تۆمارێ دا نەبن، چنكو دەمێ ئارەزوویێن لەشی رێكا وان ژ مەسیحی ڤەدگوهێزن، ئەو حەز دكەن شوی بكەن.
ب ڤی ئاوایی ئەو دادكرنێ دئیننە سەر خۆ، چنكو ئەو سۆزا خۆ یا پێشیێ دشكێنن.
ل گەل هندێ، ئەو فێری تەمبەلیێ دبن و ژ ڤێ مالێ دچنە ڤێ مالێ. نە ب تنێ تەمبەلیێ، لێ نەكامیێ و مایتێكرنێ دكەن و تشتێن نەژێهاتی ژی دبێژن.
لەوما من دڤێت بیژنێن گەنج شوی بكەن، زاڕۆك ببن و د مالدار بن، دەرفەتێ نەدەنە نەیاری كو بوهتانان ب دویڤ مە ڤەنیت.
چنكو ئەڤە هندەك ڤاڕێ بووینە و ب دویڤ ئبلیسی كەفتینە.
ئەگەر باوەردارەكێ بیژن هەبن، بلا هاریكاریا وان بكەت و بارێ جڤاكا باوەرداران گران نەكەت، دا جڤاك هاریكاریا وان بكەت یێن ب دروستی بیژنن.
ئەو ریهسپیێن ب باشی رێڤەبەریێ دكەن، بلا بهێنە دیتن كو ژ هەژی رێزگرتنەكا دووجاركینە، ب تایبەت ئەوێن د پەیڤێ و فێركرنێ دا وەستیانێ دكێشن.
چنكو نڤیسار دبێژیت: «دەڤێ گای گرێ نەدە، دەمێ گێرێ دكەت» و «پالە هەژی كرێیا خۆیە.»
سكالایێ ل سەر چ ریهسپیان قەبیل نەكە، ئەگەر دوو یان سێ شاهد نەبن.
ئەوێن ل سەر گونەهكرنێ ماین، ل بەر چاڤێن هەمیان پاشڤە ببە، دا یێن دی ژی بترسن.
ئەز ل بەرامبەر خودێ و مەسیح عیسای و فریشتەیێن هەلبژارتی فەرمانێ ل تە دكەم، كو تۆ وان تشتان بێی حوكمێ پێشوەخت ب ج‍‌ھ بینی و تشتەكی ب لایەنگری نەكەی.
دەستێ خۆ ب لەز نەدانە سەر چ كەسی، پشكدار ژی نەبە د گونەهێن كەسێن دی دا. خۆ ب پاكی راگرە.
ئێدی ئاڤێ ب تنێ ڤەنەخۆ، لێ پیچەك شەرابێ ژی ب كار بینە، ژ بەر ئاشكێ خۆ و ژ بەر نەساخیێن خۆ یێن گەلەك جاران دووبارە دبن.
گونەهێن هندەك مرۆڤان د دیارن و بۆ دادكرنێ ب پێش وان دكەڤن، لێ گونەهێن هندەكان ب دویڤ وان را دچن.
هەروەسا كریارێن باش د دیارن، یێن نە د دیار ژی د شیان دا نینە بهێنە ڤەشارتن.
هەمی یێن كو د بن نیركێ بەنیاتیێ دا، بلا خودانێن خۆ هەژی هەمی رێزگرتنێ ببینن، دا ب خرابی بەحسێ ناڤێ خودێ و فێركرنا مە نەهێتە كرن.
ئەوێن خودانێن وان د باوەردار، بلا ژ بەر برایینیێ رێزگرتنا وان كێم نەكەن، لێ بلا پتر خزمەتا وان بكەن، چنكو ئەوێن مفای ژ خزمەتا وان وەردگرن، باوەردار و خۆشتڤینە. فێركرنێ و هاندانێ ب وان هەمی تشتان بكە.
ئەگەر ئێك فێركرنەكا دی فێری خەلكی دكەت و ل گەل پەیڤێن ساخلەم یێن خودانێ مە عیسایێ مەسیح و فێركرنا ل دویڤ خودێترسیێ رێك ناكەڤیت،
ئەڤە ئەو كەسەكێ دفنبلندە و تشتەكی تێناگەهیت. ئەو نەساخێ گەنگەشەیێ و شەڕەدەڤێیە، كو دبنە ئەگەرێ زكڕەشی، هەڤڕكی، بوهتان، گۆمانێن خراب
و گەنگەشەیێن بێ دویماهی، ئەڤ هەمی تشتە ژ مرۆڤێن زێهنێ وان پویچ بووی و راستی ل نك نەمای پەیدا دبن. ئەو هزر دكەن خودێترسی رێكە بۆ قازانجكرنێ.
راستە، خودێترسی قازانجەكێ مەزنە، ئەگەر مرۆڤ ل سەر تشتێ وی هەی یێ رازی بیت،
چنكو مە تشتەك نەئینایە جیهانێ و ئەم نەشێن تشتەكی ژێ ببەین.
ئەڤجا ئەگەر مە خوارن و جلك هەبن، بلا ئەم ب وان د رازی بین.
لێ ئەوێن دڤێن دەولەمەند ببن، ئەو دكەڤنە تاقیكرنێ و خەفكێ و گەلەك ئارەزوویێن بێئاقلانە و زیانبەخش، یێن مرۆڤی د وێرانكرنێ و ژناڤچوونێ دا نقووم دكەن،
چنكو حەزژێكرنا پارەی رەها هەمی خرابیانە. ژ ڤێ حەزژێكرنێ هندەكان خۆ تێ وەركر و ژ باوەریێ ڤاڕێبوون و گەلەك برین ل خۆ كرن.
لێ تۆ، هەی مرۆڤێ خودێ، ژ ڤان تشتان بڕەڤە و بكەڤە دویڤ راستداریێ، خودێترسیێ، دلسۆزیێ، حەزژێكرنێ، خۆڕاگریێ و دلنەرمیێ.
د خەباتا باش یا باوەریێ دا خۆ بوەستینە و خۆ ب ژیانا هەروهەر ڤە بگرە، ئەوا تۆ بۆ وێ هاتیە گازیكرن و تە ل بەرامبەر گەلەك شاهدان شاهدەییا باش بۆ وێ دای.
ل بەرامبەر خودێ، ئەوێ ژیانێ ددەتە هەمیان و ل بەرامبەر مەسیح عیسای، ئەوێ ل بەرامبەر پیلاتۆسێ پونتی شاهدەییا باش دای، تە رادسپێرم
كو تۆ ڤێ فەرمانێ بێكێماسی و بێگازندە ب ج‍‌ھ بینی، تا دیاربوونا خودانێ مە عیسایێ مەسیح.
خودێ دێ دیاربوونا وی د دەمێ خۆ یێ دەستنیشانكری دا ئاشكرا كەت، ئەو خودایێ هەژی پەسنێ و سەروەرێ ئێكانە، پاشایێ پاشایان و خودانێ خودانان،
ئەوێ ب تنێ وی نەمری هەی، د رۆناهیەكێ دا ئاكنجیە كو كەس نەشێت خۆ نێزیك بكەت، ئەوێ كەسێ نەدیتی و كەس نەشێت ببینیت، رێز و سەروەریا هەروهەر بۆ وی بن! ئامین.
دەولەمەندێن ڤێ جیهانێ راسپێرە، كو د دفنبلند نەبن و هیڤیا خۆ ب دەولەمەندیا نە مسۆگەر ڤە گرێ نەدەن، لێ هیڤیا خۆ ب خودێ ڤە گرێ بدەن، یێ هەمی تشتان ب زێدەیی ددەتە مە، دا خۆشیێ ژێ وەرگرین.
وان راسپێرە كو باشیێ بكەن، ب كریارێن باش د دەولەمەند بن، د مەرد بن و بۆ پشكداریێ ژ مالێ خۆ ل گەل كەسێن دی د ئامادە بن.
هۆسا دێ بۆ خۆ گەنجینەیەكێ عومبار كەن كو بۆ پاشەڕۆژێ بنیاتەكێ باش بیت، دا ژیانا راستەقینە ب دەست خۆ ڤە بینن.
هەی تیمۆتاوس! ئەو تشتێ ب تە هاتیە راسپاردن بپارێزە، خۆ ژ پڕبێژیێن نەپیرۆز و هەڤدژیێن ناڤێ ‹زانین› ب درەو ل سەر هاتینە دانان، دویر بئێخە،
ئەوا هندەك ب دویڤ كەفتین و ژ باوەریێ ڤاڕێ بووین. كەرەم ل سەر هەوە بیت.
ژ من، پاولۆس، هنارتیێ مەسیح عیسای ب حەزا خودێ، ژ پێخەمەت وێ سۆزا ژیانێ ئەوا د ئێكبوونا ل گەل مەسیح عیسای دا هەی.
بۆ كوڕێ من یێ خۆشتڤی تیمۆتاوسی: كەرەم و دلۆڤانی و ئاشتی ژ خودایێ باب و ژ خودانێ مە مەسیح عیسای ل سەر تە بن.
ئەز سوپاسیا خودێ دكەم، ئەوێ ئەز ب وژدانەكا پاقژ د پەرێسم، هەروەكو بابكالێن من پەرستی، دەمێ ب شەڤ و رۆژ د نڤێژێن خۆ دا بێی راوەستیان تە دئینمە بیرا خۆ.
رۆندكێن تە دهێنە بیرا من و گەلەك حەز دكەم تە ببینم، دا ژ دلخۆشیێ پڕ ببم.
باوەریا تە یا بێ دووڕویاتی دئینمە بیرا خۆ، ئەوا ل بەراهیێ د دلێ داپیرا تە لۆئیسێ دا و د دلێ دایكا تە ئەونیكێ دا ئاكنجی و ئەز یێ پشتڕاستم كو ئەو د دلێ تە ژی دا یا ئاكنجیە.
ژ بەر ڤێ چەندێ ئەز بیرا تە دئینم كو تۆ دیاریا خودێ بشارینی، ئەوا وی دایە تە ب رێكا دەستدانانا من ل سەر تە.
چنكو خودێ گیانێ ترسنۆكیێ نەدایە مە، لێ گیانێ هێزێ و حەزژێكرنێ و لخۆزاڵبوونێ دایە مە.
ئەڤجا شەرم نەكە كو شاهدەییێ بۆ خودانێ مە بدەی، هەروەسا شەرم ب من ژی نەكە كو ئەز زیندانكریێ ویمە، لێ ب پشتگەرمی ب هێزا خودێ، ژ پێخەمەت مزگینیێ ل گەل من ئازارێ بكێشە.
خودێیە یێ ئەم قورتال كرین و بۆ گازیكرنەكا پیرۆز ئەم گازی كرین، نە ل دویڤ كریارێن مە، لێ ل دویڤ مەبەست و كەرەما خۆ یا بەری دەستپێكا ئافراندنێ ب رێكا مەسیح عیسای بۆ مە هاتیە دان
و نوكە ب دیاربوونا قورتالكەرێ مە مەسیح عیسای ئاشكرا بوو، ئەوێ مرن ژ ناڤ بری و ب رێكا مزگینیێ ژیان و نەمری داناینە بەر رۆناهیێ.
بۆ ڤێ مزگینیێ ئەز وەكو راگەهێنەر و هنارتی و مامۆستا هاتیمە دانان.
ژ بەر ڤێ ئەگەرێ ژی ئەز ڤان ئازاران دكێشم. لێ شەرم پێ ناكەم، چنكو دزانم من باوەری ب كێ ئینایە و پشتڕاستم كو ئەو دشێت وی تشتی یێ بۆ من هاتیە سپاردن تا وێ رۆژێ بپارێزیت.
وان پەیڤێن ساخلەم یێن تە ژ من بهیستین بۆ خۆ بكە نموونە، وێ چەندێ ب رێكا باوەریێ و وێ حەزژێكرنێ یا مە د ئێكبوونا ل گەل مەسیح عیسای دا هەی، بكە.
وی تشتێ چاك یێ بۆ تە هاتیە سپاردن، ب هاریكاریا گیانێ پیرۆز یێ د مە دا ئاكنجی بپارێزە.
تۆ دزانی كو هەمی ئەوێن ل هەرێما ئاسیایێ پشتا خۆ دایە من، ژ وان فووگەلۆس و هێرمۆگێنیس ژی.
بلا خودان دلۆڤانیێ ب مالا ئۆنیسیفورۆسی ببەت، چنكو وی گەلەك جاران بێهنا من فرە‍‌ھ كر و شەرم ب قەیدێن من نەكر،
لێ دەمێ هاتیە رۆمایێ، ب گەرمی ل من گەڕیا تاكو ئەز دیتیم.
(بلا خودان وێ كەرەمێ ل گەل وی بكەت كو ئەو د وێ رۆژێ دا دلۆڤانیێ ژ خودانی ببینیت!) تۆ باش دزانی ئەو خزمەتا وی ل ئەفەسۆسێ كری چەندە.
ئەڤجا كوڕێ من، ب وێ كەرەما د مەسیح عیسای دا، یێ بهێز بە
و ئەو تشتێن ب ئامادەبوونا گەلەك شاهدان تە ژ من بهیستین، ب كەسێن دلسۆز راسپێرە، كو بشێن هندەكێن دی ژی فێر بكەن.
وەكو سەربازەكێ باش یێ مەسیح عیسای، پشكداریێ د ئازاركێشانێ دا بكە.
ئەوێ سەربازیێ دكەت، خۆ ب كاروبارێن ژیانێ ڤە مژویل ناكەت، چنكو وی دڤێت فەرماندەیێ خۆ رازی بكەت.
وەرزشڤان ژی تانجا سەركەفتنێ نابەت، ئەگەر ل دویڤ یاسایێ بەریكانێ نەكەت.
دڤێت جۆتیارێ رێنجبەر ئێكەم كەس بیت بەهرا خۆ ژ بەرهەمی ببەت.
هزرا خۆ ل سەر گۆتنێن من بكە، چنكو خودان دێ تێگەهشتنێ بۆ هەمی تشتان دەتە تە.
عیسایێ مەسیح بینە بیرا خۆ، ئەوێ ژ ناڤ مریان هاتیە راكرن و ئەو ژ دویندەها داوودیە، ل گۆر وێ مزگینیا ئەز رادگەهینم،
ئەوا ژ بەر وێ ئەز ئازارێ دكێشم، تاكو وی رادەی هاتیمە قەیدكرن وەكو تاوانبارەكی. لێ پەیڤا خودێ نەهاتیە قەیدكرن.
لەوما ژ پێخەمەت هەلبژارتیان ئەز خۆ ل بەر هەمی تشتان دگرم، دا ئەو ژی قورتالبوونا ب رێكا مەسیح عیسای دهێت ل گەل مەزناهیا هەروهەر وەرگرن.
ئەڤ گۆتنە جهێ پشتڕاستیێیە: ئەگەر ئەم ل گەل وی مربین دێ ل گەل وی ژین ژی.
ئەگەر ئەم خۆ راگرین، دێ ل گەل وی پاشایەتیێ ژی كەین. ئەگەر ئەم وی ماندەل بكەین، ئەو ژی دێ مە ماندەل كەت.
ئەگەر ئەم د دلسۆز نەبین، ئەو دێ دلسۆز مینیت، چنكو ئەو نەشێت خۆ ماندەل بكەت.
ئەڤان تشتان بینە بیرا وان و ل بەرامبەر خودێ وان راسپێرە كو ل سەر پەیڤان شەڕەدەڤێ نەكەن، چنكو چ مفا تێدا نینن، لێ گوهداران دهەڕفینیت.
هەمی بزاڤان بكە كو تۆ وەكو پالەیەكێ جهێ رازیبوونێ، خۆ بۆ خودێ پێشكێش بكەی، پالەیەكێ جهێ شەرمێ د كارێ وی دا نینە، ئەو پەیڤا راستیێ دروست شڕۆڤە دكەت.
خۆ ژ پڕبێژیێن نەپیرۆز دویر بئێخە، چنكو ئەو دێ پتر و پتر بەرێ مرۆڤی دەنە خودێنەنیاسیێ.
ئاخفتنێن وان وەكو پەنجەشێرێ دێ بەڵاڤ بن. هیمەنایۆس و فلیتۆس ژی ژ وان كەسانن،
ئەوێن ژ راستیێ ڤاڕێ بووین و دبێژن كو رۆژا رابوونێ یا روی دای. هۆسا باوەریا هندەكان سەروبن دكەن.
لێ بنیاتێ قاییم یێ خودێ دانای یێ خۆجهە، ئەڤ موهرە ل سەرە: «خودان، یێن خۆ دنیاسیت» و «هەر ئێكێ دانپێدانێ ب ناڤێ خودانی بكەت، فەرە خۆ ژ خرابیێ دویر بئێخیت.»
د مالەكا مەزن دا، نە ب تنێ ئامانێن زێڕی و زیڤی هەنە، لێ یێن داری و گلی ژی هەنە، هندەك بۆ تشتێن بڕێزن و هندەك بۆ تشتێن بێڕێزن.
ئەڤجا ئەگەر ئێك خۆ ژ ڤان تشتان پاقژ بكەت، دێ بیتە ئامانەكێ بڕێز، یێ پیرۆزكری، یێ بكێرهاتی بۆ خودانێ خۆ و یێ ئامادە بۆ هەمی كارێن باش.
ژ حەزێن گەنجاتیێ بڕەڤە، هەروەسا بزاڤێ بۆ راستداری و باوەری و حەزژێكرن و ئاشتیێ بكە ل گەل وان كەسان یێن ب دلەكێ پاقژ هەوارا خۆ دگەهیننە خودانی.
خۆ ژ گەنگەشەیێن دەبەنگ و نەزانانە بدە پاش، چنكو تۆ دزانی كو شەڕ ژێ پەیدا دبیت.
دڤێت بەنیێ خودانی شەڕی نەكەت، لێ ل گەل هەمیان یێ دلنەرم بیت، بۆ فێركرنێ یێ شارەزا بیت و یێ بێهنفرە‍‌ھ بیت
و ب جوامێری بەرهنگارێن خۆ راستڤە بكەت، بەلكو خودێ لخۆزڤڕینێ بدەتێ، دا راستیێ بزانن
و ڤەگەڕنە سەر هشێن خۆ و ژ خەفكا ئبلیسی، ئەوێ ب سەر وان دا گرتی كو ب حەزا وی بكەن، قورتال ببن.
لێ ڤێ چەندێ بزانە: د رۆژێن دویماهیێ دا دەمێن دژوار دێ هێن.
خەلك دێ حەزژێكەرێن خۆ بن، حەزژێكەرێن پارەی، پەسنكارێن خۆ، د دفنبلند، د ئەزمانڕەش، نەگوهدارێن دایك و بابێن خۆ، نە د سوپاسدار، نەپیرۆز،
د دلڕەق، لێبورینێ ناكەن، د بوهتانكەر ، د سەربەردای، د دڕندە، نەحەزێن چاكیێ،
د بێبەخت، د سەرگەرم، ژ خۆ د رازی، دێ حەزژێكەرێن خۆشیێ بن نەكو حەزژێكەرێن خودێ.
وان دیمەنێ سەرڤە یێ خودێترسیێ یێ هەی، لێ ئەو هێزا وێ رەت دكەن. ئەڤجا خۆ ژ یێن وەسا دویر بئێخە.
چنكو هندەك ژ وان ئەون یێن ل مالان دگەڕیێن و ژنكێن لاواز یێن باركری ژ گونەهان، یێن ژ لایێ ئارەزوویێن هەمەجۆر ڤە دهێنە هاژوتن، دئێخنە بن كارتێكرنا خۆ.
ئەو ژنك هەردەم فێركرنێ وەردگرن، لێ چ جاران نەشێن بگەهنە زانینا راستیێ.
كا چەوا یانیسی و یامبریسی بەرهنگاریا مووسای كر، ئەڤە ژی وەسا بەرهنگاریا راستیێ دكەن. ئەو كەسێن مێشك گەنینە و وەكو باوەردار هاتینە رەتكرن.
لێ ئەو گەلەك پێشڤە ناچن، چنكو بێئاقلیا وان دێ بۆ هەمیان ئاشكرا بیت، هەروەكو بێئاقلیا وان هەردوویان ژی ئاشكرا بووی.
لێ هندی تۆی، تە ژ نێزیك ئاگە‍‌ھ ژ فێركرنا من، رەفتارا من، مەبەستا من، باوەریا من، بێهنفرەهیا من، حەزژێكرنا من، خۆڕاگریا من،
تەپەسەری و ئازارێن من، ئەوێن ل ئەنتاكیا و كۆنیا و لیسترایێ ب سەرێ من هاتین، هەیە. من خۆ ل بەر چەندین تەپەسەریێن وەسا گرت! لێ خودانی ئەز ژ هەمیان رزگار كرم.
بەلێ، هەمی ئەوێن دڤێن د ئێكبوونا ل گەل مەسیح عیسای دا ب خودێترسی بژین، دێ هێنە تەپەسەركرن.
مرۆڤێن خراب و فێلباز ژی دێ د خرابیێ دا پێشكەڤن، دێ خاپاندنێ كەن و هێنە خاپاندن.
لێ تۆ ل سەر وان تشتێن فێربوویێ و ژێ پشتڕاست بووی بەردەوام بە، چنكو تۆ دزانی تۆ ژ كیژان كەسان فێر بوویە،
هەروەسا تۆ ژ ساڤایەتیێ وەرە ژ نڤیسارێن پیرۆز دزانی، ئەوێن دشێن تە ئاقلدار بكەن، كو تۆ ب رێكا باوەریا ب مەسیح عیسای قورتال ببی.
هەمی نڤیسارێن پیرۆز ژ سرۆشێ خودێنە و بۆ فێركرنێ و پاشڤەبرنێ و راستڤەكرنێ و پەروەردەكرنێ ل سەر راستداریێ د مفادارن،
دا مرۆڤێ خودێ یێ بێكێماسی بیت و بۆ هەر كارەكێ باش یێ ئامادە بیت.
ئەڤجا ئەز ل بەرامبەر خودێ و مەسیح عیسای، ئەوێ دێ دادكرنا مری و زیندیان كەت و ژ بەر دیاربوونا وی و پاشایەتیا وی، فەرمانێ ل تە دكەم:
پەیڤێ رابگەهینە، ل دەمێ گونجای و نە گونجای یێ ئامادە بە. خەلكی پاشڤە ببە، ل وان بحەیتینە و هاندانا وان بكە، ب هەمی بێهنفرەهی وان فێر بكە.
چنكو دەمەك دێ هێت، خۆ ل بەر فێركرنا ساخلەم ناگرن، لێ ل دویڤ ئارەزوویێن خۆ دێ مامۆستایان ل دۆرێن خۆ كۆم كەن كو تشتێ خۆش بۆ گوهێ وان بێژن
و دێ ژ گوهدانا راستیێ لادەن و قەستا ئەفسانەیان كەن.
لێ تۆ د هەمی تشتان دا یێ هشیار بە، خۆ ل بەر ئازاران بگرە، ب كارێ مزگینیدەری راببە، خزمەتا خۆ تەمام بكە.
چنكو ئەڤە ئەز وەكو پێشكێشیەكێ رژاندنێ دهێمە رشتن، دەمێ وەغەركرنا من یێ هاتی.
ئەز د خەباتا باش دا خەبتیم، من بەریكانا خۆ تەمام كر، باوەری پاراست.
ژ نوكە و پێڤە تانجا راستداریێ ب ژڤانێ منە، ئەوا دێ خودان، دادوەرێ دادپەروەر، د وێ رۆژێ دا دەتە من، نە ب تنێ من، لێ وان هەمیان ژی یێن حەز ژ دیاربوونا وی كری.
بزاڤێ بكە ب لەز بهێیە نك من،
چنكو دیماسی ژ بەر حەزژێكرنا خۆ بۆ ڤێ جیهانێ ئەز هێلام و چوو سالونیكیێ. كرەسكیس ژی چوو گالاتیایێ و تیتۆس چوو دالمەتیایێ.
ب تنێ لوقا ل نك منە. هەڕە ب دویڤ مەرقۆسی را و ل گەل خۆ بینە، چنكو د ڤێ خزمەتێ دا ئەو ب كێر من دهێت.
من تیخیكۆس یێ هنارتیە ئەفەسۆسێ.
دەمێ تۆ دهێی، ئەو قاپیتێ من هێلایە ل ترویاسێ ل نك كارپۆسی، ل گەل خۆ بینە، پەرتووكان ژی و ب تایبەت یێن ل سەر كەڤلی هاتینە نڤیسین.
ئەسكەندەرێ سفرگر گەلەك خرابی ل من كر. خودان دێ ل دویڤ كریارێن وی دەتێ.
تۆ ژی خۆ ژێ بپارێزە، چنكو ب توندی بەرهنگاریا پەیاما مە كر.
د بەرگریكرنا خۆ یا ئێكێ دا ل بەرامبەر دادگەهێ، كەس نەهات پشتەڤانیا من بكەت، لێ هەمیان ئەز هێلام. خودێ ل سەر وان نەهژمێریت.
لێ خودان ل گەل من راوەستیا و ئەز بهێز ئێخستم، دا ب رێكا من مزگینی ب تەمامی بهێتە راگەهاندن و هەمی مللەت ببهیسن، وەسا ئەز ژ دەڤێ شێری هاتمە رزگاركرن.
خودان دێ من ژ هەمی كریارێن خراب رزگار كەت و ب سلامەتی گەهینیتە پاشایەتیا خۆ یا ئەسمانی. هەتا هەتایێ مەزناهی بۆ وی بیت. ئامین.
سڵاڤان ل پریسكیلایێ و ئەكیلای بكە و ل مالا ئۆنیسیفورۆسی ژی.
ئەراستۆس ما ل كورنتۆسێ و من تروفیمۆس ب نەساخی هێلا ل میلیتۆسێ.
بزاڤێ بكە بەری زڤستانێ بهێی. ئەوبولۆس، پودێس، لینۆس، كلاودیا و هەمی خویشك و برا سڵاڤان ل تە دكەن.
خودان ل گەل گیانێ تە بیت. كەرەم ل سەر هەوە بیت.
ژ من، پاولۆس، بەنیێ خودێ و هنارتیێ عیسایێ مەسیح. ئەز كریمە هنارتی دا بەرێ وان یێن خودێ هەلبژارتین بدەمە باوەریێ و زانینا وێ راستیێ یا مرۆڤی بەرەڤ خودێترسیێ دبەت.
ئەو راستی پشتڕاستیێ ددەتە وان كو ژیانا هەروهەر وەربگرن، ئەو ژیان یا خودایێ كو چ جاران درەوان ناكەت، بەری دەستپێكا ئافراندنێ، سۆزا وێ دای
و نوكە د دەمێ نەخشەكری دا ئەوی ئەو پەیام ئاشكرا كر، ب رێكا وێ راگەهاندنێ، یا ئەركێ وێ ل دویڤ فەرمانا قورتالكەرێ مە خودێ، بۆ من هاتیە سپاردن.
بۆ تیتۆسی، كوڕێ من یێ راستەقینە د باوەریا مە یا هەڤپشك دا: كەرەم و ئاشتی ژ خودایێ باب و ژ قورتالكەرێ مە مەسیح عیسای ل سەر تە بن.
من تۆ بۆ وێ ئەگەرێ هێلایە ل كریتێ، كو تۆ ئەو كاروبارێن ماینە نیڤەرۆ رێك بئێخی و ل هەر باژێڕەكی ریهسپیان دەستنیشان بكەی، هەروەكو من تۆ راسپاردی.
دڤێت ریهسپی جهێ گازندەیێ نەبیت، مێرێ ئێك ژن بیت، زاڕۆكێن وی د باوەردار بن و ل سەر بەرەڵایێ و یاخیبوونێ جهێ تاوانباركرنێ نەبن.
چنكو دڤێت چاڤدێر: جهێ گازندەیێ نەبیت، وەكو بریكارێ خودێ. خۆسەپاندن ل نك نەبیت، زوی تۆڕە نەبیت، مەی ڤەخۆر نەبیت ، توند نەبیت، چاڤبرسیێ قازانجی نەبیت،
لێ دڤێت یێ مێڤاندار بیت، حەز ژ باشیێ بكەت، خودان رەفتارەكا ئاقلانە بیت، یێ راست و دروست بیت، یێ پیرۆز و ل سەر خۆ یێ زاڵ بیت.
دڤێت خۆ ب پەیاما جهێ باوەریێ ڤە بگریت، هەروەكو ئەو هاتیە فێركرن، دا بشێت هاندانێ ب فێركرنا ساخلەم بكەت و شاشیێن بەرهنگارێن وێ فێركرنێ دیار بكەت.
چنكو گەلەكێن یاخیبووی هەنە، یێن ئاخفتن ڤاڵا و خاپینۆك، ب تایبەت لایەنگرێن سونەتكرنێ ،
یێن كو دڤێت دەڤێ وان بهێتە گرتن، چنكو ئەو ژ پێخەمەت چاڤبرساتیا قازانجی، فێركرنێن وەسا ددەن یێن كو نابیت بهێنە دان، هۆسا خێزانان هەمیان د سەر دا دبەن.
خۆ ئێك ژ كریتیان ژی، كو فەیلەسوفەكێ وانە ، گۆت: «خەلكێ كریتێ هەرگاڤ د درەوینن، هۆڤێن دڕندەنە و خۆرەیێن تەمبەلن.»
ئەڤە شاهدەییەكا راستە. ژ بەر ڤێ ئەگەرێ، وان ب توندی پاشڤە ببە، دا د باوەریێ دا د ساخلەم بن
و گو‍‌ھ نەدەنە ئەفسانەیێن جوهیان و فەرمانێن وان مرۆڤان یێن راستیێ رەت دكەن.
بۆ كەسێن پاك هەمی تشت د پاكن، لێ بۆ هەڕمیان و بێباوەران تشتەكێ پاك نینە. ب راستی، مەژیێ وان و وژدانا وان ژی یێن هەڕمین.
ئەو دبێژن كو ئەو خودێ دنیاسن، لێ ب كریارێن خۆ وی ماندەل دكەن. ئەو جهێ دلڕەشیێنە، نەگوهدارن، ب كێر هیچ كارەكێ باش ناهێن.
لێ تۆ، وان تشتان بێژە یێن گونجای ل گەل فێركرنا ساخلەم.
بلا پیرەمێر ل سەر خۆ د زاڵ بن، خودان رێز بن، خودان رەفتارەكا ئاقلانە بن، د باوەریێ و حەزژێكرنێ و خۆڕاگریێ دا د ساخلەم بن.
هەروەسا بلا پیرەژن ژی رەفتارا وان ل گەل پیرۆزیێ یا گونجای بیت، د بوهتانكار نەبن، دیلێن مەی ڤەخوارنێ نەبن، فێركەرێن باشیێ بن،
دا ژنێن گەنج پەروەردە بكەن كو حەز ژ مێرێن خۆ و حەز ژ زاڕۆكێن خۆ بكەن،
خودان رەفتارەكا ئاقلانە بن، د دەهمەنپاك بن، د مالدار بن، د باش بن، د ملكەچی مێرێن خۆ بن، دا ب خرابی بەحسێ پەیڤا خودێ نەهێتە كرن.
هۆسا شیرەتان ل زەڵامێن گەنج ژی بكە، كو خودان رەفتارەكا ئاقلانە بن.
ژ هەمی لایان ڤە تۆ بۆ وان ببە نموونەیا كریارێن باش، د فێركرنا خۆ دا یێ بێسەختە و سەنگین بە،
ئاخفتنێن ساخلەم و گازندە ل سەر نەبن ب كار بینە، دا هەر ئێكێ بەرهنگاریێ بكەت شەرمزار ببیت، چنكو ئەوی تشتەكێ خراب نینە ل دژی مە بێژیت.
بلا بەنی ژی د هەمی تشتان دا ملكەچی خودانێن خۆ بن، وان رازی كەن و یێ ئەزمان درێژ نەبیت.
دەستدرێژیێ نەكەنە سەر مالێ وان، لێ دەستپاكیەكا تەمام بۆ وان دیار بكەن، دا فێركرنا قورتالكەرێ مە خودێ ژ هەمی لایان ڤە بخەملینن.
چنكو كەرەما خودێ، ئەوا قورتالبوونێ بۆ هەمی مرۆڤان دئینیت، یا دیار بووی.
ئەو كەرەم مە پەروەردە دكەت كو خودێنەنیاسیێ و حەزێن ڤێ جیهانێ رەت بكەین و ب ئاقلداری و راستداری و خودێترسیێ د ڤی سەردەمی دا بژین
و چاڤەڕێی وێ رۆژا بەختەوەر بین یا ئەم ل هیڤیێ، كو دیاربوونا روومەتا خودایێ مەزن، قورتالكەرێ مە عیسایێ مەسیحە.
ئەوێ خۆ گۆری مە كری، دا مە ژ هەمی گونەهان رزگار بكەت و پاك بكەت و بكەتە خەلكێ خۆ یێ تایبەت یێ دلگەرم بۆ كریارێن باش.
ڤان تشتان ب هەمی دەستهەلاتی بێژە، ئاگەهدار بكە و پاشڤە ببە. بلا كەس سڤكاتیێ ب تە نەكەت.
بیرا وان بینە كو ملكەچی سەروەر و دەستهەلاتداران بن، گوهداریا وان بكەن و بۆ هەر كارەكێ باش د ئامادە بن.
ب خرابی بەحسێ كەسێ نەكەن، د شەڕفرۆش نەبن، لێ د دلنەرم بن، ب رێزگرتن سەرەدەریێ ل گەل هەمی خەلكی بكەن،
چنكو ئەم ب خۆ ژی ل دەمەكی د كۆرەفام، نەگوهدار و سەردابری بووین، بەنیێن حەز و ئارەزوویێن جۆراوجۆر بووین، د كین و زكڕەشیێ دا دژیاین، جهێ كەربێ بووین، هەر ئێكی كەرب ژ یێ دی ڤەدبوو.
لێ دەمێ دلنازكی و چاكیا قورتالكەرێ مە خودێ دیار بووین،
وی ئەم قورتال كرین. نە ژ بەر كارێن راستداریێ یێن مە كرین، لێ وی ئەڤ چەندە ل دویڤ دلۆڤانیا خۆ كر، ب شویشتنا ژدایكبوونا دوویێ و نویكرنێ ب گیانێ پیرۆز،
ئەو گیان یێ خودێ ب رێكا قورتالكەرێ مە عیسایێ مەسیح، ب زێدەیی ب سەر مە دا رشتی،
دا ب كەرەما وی، راستدار بهێینە هژمارتن و ببینە میراتگر ل هیڤیا ژیانا هەروهەر.
ئەڤ گۆتنە جهێ پشتڕاستیێیە. من دڤێت تۆ ل سەر ڤان تشتان یێ رژد بی، دا ئەوێن باوەری ب خودێ ئینای پویتەی ب كرنا كارێن باش بدەن. ئەو تشت د باش و مفادارن بۆ مرۆڤان.
لێ خۆ ژ گەنگەشەیێن بێئاقلانە، دانوستاندن ل دۆر نەژادنامەیان ، هەڤڕكی و شەڕەدەڤێن ل سەر دەستووری بدە پاش، چنكو ئەو د بێمفا و ژ قەستانە.
ئەوێ دووبەرەكیێ دكەت، جارەكێ و دوو جاران ئاگەهدار بكە، پشتی هنگی خۆ ژێ دویر بئێخە.
تۆ دزانی كو ئێكێ وەسا یێ ڤاڕێ بووی و گونەهكارە، وی ب خۆ خۆ گونەهبار كریە.
دەمێ ئەز ئەرتیماسی یان تیخیكۆسی دهنێرمە نك تە، بزاڤێ بكە بهێیە نك من ل نیكۆپۆلیسێ، چنكو من بڕیارا دای زڤستانێ ل وێرێ دەرباز كەم.
بزاڤێ بكە هاریكاریا زیناسێ پارێزەر و ئەپولۆسی بۆ گەشتا وان بكەی، كو بڕێڤە هەوجەیی تشتەكی نەبن.
پێدڤیە خەلكێ مە یێ باوەردار ژی فێر ببن كو پویتەی ب كریارێن باش بدەن، داكو پێدڤیێن فەر بۆ كەسێن دی دابین بكەن، هۆسا ئەو د بێبەرهەم نابن.
هەمی ئەوێن ل گەل من سڵاڤان ل تە دكەن. سڵاڤان ل وان بكە یێن د باوەریێ دا حەز ژ مە دكەن. كەرەم ل سەر هەوە هەمیان بیت.
ژ من، پاولۆسێ زیندانكری ژ پێخەمەت مەسیح عیسای، ژ برایێ مە تیمۆتاوسی ژی، بۆ هەڤكارێ مە یێ خۆشتڤی فلیمونی،
بۆ خویشكا مە ئاپفیایێ، بۆ ئارخیپۆسێ ل گەل مە سەرباز و بۆ جڤاكا باوەرداران یا ل مالا هەوە كۆم دبیت:
ژ بابێ مە خودێ و ژ خودان عیسایێ مەسیح، كەرەم و ئاشتی ل سەر هەوە بن.
ئەز هەردەم سوپاسیا خودایێ خۆ دكەم، دەمێ تە د نڤێژێن خۆ دا دئینمە بیرا خۆ،
چنكو ئەز حەزژێكرنا تە بۆ هەمی پیرۆزكریان و باوەریا تە ب خودان عیسای دبهیسم.
ئەز د نڤێژان دا داخواز دكەم كو پشكداریا تە د باوەریێ دا یا كاریگەر بیت، دا تۆ كویرتر د هەمی تشتێن باش بگەهی، یێن مە ژ پێخەمەت مەسیحی هەین.
ئەز ژ بەر حەزژێكرنا تە گەلەك دلخۆش بووم و هاتمە هاندان، چنكو دلێ پیرۆزكریان ب تە، هەی برا، گەش بوویە.
لەوما، هەر چەندە من ب مەسیحی هەمی بستەهیا هەی كو دەربارەی وی تشتێ پێدڤیە بكەی، فەرمانێ ل تە بكەم،
لێ بۆ من خۆشترە كو ئەز ب حەزژێكرنێ هیڤیێ ژ تە بكەم. ئەز، پاولۆسێ پیرەمێر و نوكە ژی یێ زیندانكری ژ پێخەمەت مەسیح عیسای،
دەربارەی كوڕێ خۆ ئۆنیسیمۆسی هیڤی ژ تە دكەم، ئەوێ ئەز د قەیدێ دا بۆ وی بوویمە باب.
دەمەكی ئەو بۆ تە یێ بكێرنەهاتی بوو، لێ نوكە ئەو بۆ تە و بۆ من ژی یێ بكێرهاتیە.
ئەز وی، ئانكو جەگەرا خۆ، بۆ تە دهنێرمەڤە.
من حەز دكر وی ل نك خۆ بهێلم، دا دەمێ ئەز ژ پێخەمەت مزگینیێ د قەیدێ دا، ل شوینا تە خزمەتا من بكەت،
لێ من نەڤیا ئەز بێی دلێ تە تشتەكی بكەم، دا ئەڤ چاكیا تە ژ نەچاری نەبیت، لێ ژ دل بیت.
بەلكو ژ بەر وێ چەندێ ئەو بۆ دەمەكێ كورت ژ تە جودا بوو، دا تۆ بۆ هەتا هەتایێ وی وەرگریەڤە،
ئێدی نەوەكو بەنی، لێ ژ بەنیەكی زێدەتر، وەكو برایەكێ خۆشتڤی، ب تایبەت بۆ من، ئەڤجا بۆ تە هێشتا پتر، كو ئەو د لەشی دا بەنیێ تەیە و د ئێكبوونا ل گەل خودانی دا برایە.
ئەڤجا ئەگەر تۆ من ب هەڤپشكێ خۆ ددانی، وی قەبیل بكە هەروەكو تۆ من قەبیل دكەی.
ئەگەر وی د تشتەكی دا زیان ل تە كربیت یان قەرەكێ تە ل سەر بیت، ل سەر من بنڤیسە.
ئەز پاولۆس، ڤێ ب دەستێ خۆ دنڤیسم: ئەز دێ وی قەری ل تە ڤەگەڕینم. من نەڤێت بێژمە تە كو تۆ ب ژیانا خۆ قەردارێ منی.
بەلێ، برایێ من! بلا ل سەر خاترا خودانی ئەز مفایەكی ژ تە ببینم، من د ئێكبوونا ل گەل مەسیحی دا دلگەش بكە.
ئەز ژ گوهداریا تە یێ پشتڕاستم، لەوما من بۆ تە نڤیسی، دزانم كو تۆ دێ پتر ژ وێ كەی یا ئەز دبێژم.
ل گەل ڤێ چەندێ، ژۆرەكێ بۆ مێڤانكرنا من ئامادە بكە، چنكو ئەز هیڤیدارم ب نڤێژێن هەوە، بۆ هەوە بهێمە بەخشین.
ئێپافراس، ئەوێ ژ پێخەمەت مەسیح عیسای ل گەل من د زیندانێ دا، سڵاڤان ل تە دكەت.
هەڤكارێن من مەرقۆس، ئەرستارخۆس، دیماس و لوقا ژی سڵاڤان ل تە دكەن.
كەرەما خودان عیسایێ مەسیح ل گەل گیانێ هەوە بیت.
د سەردەمێن كەڤن دا خودێ ب گەلەك رێك و گەلەك شێوازان ب رێكا پێغەمبەران ل گەل بابكالێن مە ئاخفت،
لێ د ڤان رۆژێن دویماهیێ دا، ب رێكا كوڕێ خۆ ل گەل مە ئاخفت، ئەوێ وی كریە میراتگرێ هەمی تشتان و ئەوێ ب وی گەردوون ئافراندی.
ئەو تیڕێژا مەزناهیا خودێیە و دەق و دەق وێنەیێ گەوهەرێ ویە، هەمی تشتێن د گەردوونێ دا ب پەیڤا خۆ یا هێزدار رێك دئێخیت. پشتی وی پاقژكرن بۆ گونەهێن مرۆڤان ئامادە كری، ل دەستێ راستێ یێ مەزناهیێ ل بلنداهیان روینشت.
لەوما كا چەند ناڤەكێ بلندتر ژ ناڤێن فریشتەیان ب میراتی وەرگرت، ئەو هند ژ وان پایەبەرزتر لێ هات.
چنكو، ما خودێ جارەكێ گۆتیە فریشتەیەكی: «تۆ كوڕێ منی، ئەڤرۆ من تۆ بووی» ؟ یان ژی: «ئەز دێ بمە بابێ وی و ئەو دێ بیتە كوڕێ من» ؟
هەروەسا دەمێ كوڕێ خۆ یێ نەخری دئینیتە جیهانێ، دبێژیت: «بلا هەمی فریشتەیێن خودێ سوجدێ بۆ ببەن!»
دەربارەی فریشتەیان ژی دبێژیت: «فریشتەیێن خۆ دكەتە با و خزمەتكارێن خۆ دكەتە گوڕیا ئاگری!»
لێ دەربارەی كوڕی دبێژیت: «تەختێ تە، هەی خودێ، بۆ هەتا هەتایێیە و سەوڵەجانێ پاشایەتیا تە، سەوڵەجانێ دادپەروەریێیە.
تە حەز ژ راستداریێ كر و كەربێن تە ژ خرابیێ ڤەبوون. لەوما، خودێ، خودایێ تە، تۆ ب زەیتا شادیێ زەیت كری، هۆسا تۆ ژ هەڤالێن تە بلندتر لێ كری.»
هەروەسا دبێژیت: «هەی خودان، ل دەستپێكێ تە بنیاتێ ئەردی دانا و ئەسمان چێكریێن دەستێن تەنە.
ئەو دێ ژ ناڤ چن، لێ تۆ دێ مینی. ئەو هەمی وەكو جلكان دێ كەڤن بن،
تۆ دێ وان وەكو قاپیتی پێچی و ئەو دێ وەكو جلكان هێنە گوهۆڕین. لێ تۆ هەر وەكو خۆی و ساڵێن تە ب دویماهی ناهێن.»
ما خودێ جارەكێ گۆتیە فریشتەیەكی: «ل دەستێ من یێ راستێ روینە، تاكو ئەز دوژمنێن تە بكەمە تەختەپێ بۆ پێیێن تە.» ؟
ما هەمی فریشتە گیانێن خزمەتكار نینن، ژ پێخەمەت خزمەتكرنا وان دهێنە هنارتن، یێن كو دێ قورتالبوونێ وەكو میرات وەرگرن؟
لەوما پێدڤیە ئەم پتر پێگیریێ ب وان تشتان بكەین یێن مە بهیستین، نەكو ژێ ڤاڕێ ببین.
چنكو ئەگەر ئەو پەیڤا ب رێكا فریشتەیان هاتیە گۆتن خۆج‍‌ھ بوو و هەر زێدەگاڤی و نەگوهداریەكێ سزایێ دادپەروەرانە وەرگرت،
ئەگەر ئەم قورتالبوونەكا هندە مەزن پشت گو‍‌ھ ڤە بهاڤێژین، دێ مە چ رێكا رەڤێ هەبیت؟ ئەڤ قورتالبوونە ل دەستپێكێ ب رێكا خودانی هاتیە راگەهاندن، پاشی ژ لایێ وان ڤە یێن بهیستی بۆ مە هاتیە سەلماندن،
خودێ ژی پشتەڤانیا شاهدەییا وان دكر ب رێكا نیشان و مەندەهۆشی و حنێرێن جۆراوجۆر، هەروەسا ب بەهرەیێن گیانێ پیرۆز یێن ب حەزا خۆ دابەش دكەت.
خودێ ئەو جیهانا دێ هێت، ئەوا ئەم بەحسێ وێ دكەین، نەئێخستە د بن فەرمانا فریشتەیان ڤە.
لێ د نڤیسارێن پیرۆز دا كەسەكی ل جهەكی شاهدەیی دایە: «مرۆڤ چیە كو تۆ هزرا وی بكەی، كوڕێن ئادەمی چنە كو تۆ پویتەی پێ بدەی؟
تە ئەو بۆ دەمەكێ كورت ژ فریشتەیان نزمتر دانا، تانجا مەزناهی و سەربلندیێ كرە سەرێ وی،
هەمی تشت ئێخستنە د بن پێیێن وی ڤە.» ئەڤجا مادەم خودێ هەمی تشت ملكەچی وی كرینە، ئەوی تشتەك نەهێلایە كو ملكەچی وی نەبیت. لێ نوكە ئەم هێشتا نابینین كو هەمی تشت د ملكەچی وی بن.
لێ ئەم عیسای دبینین كو بۆ دەمەكێ كورت ژ فریشتەیان نزمتر هاتبوو دانان، نوكە تانجا مەزناهی و سەربلندیێ یا د سەرێ وی، ژ بەر كو وی ئازارا مرنێ كێشا، دا ژ كەرەما خودێ ژ پێخەمەت هەر مرۆڤەكی تام كەتە مرنێ.
بەلێ، د جهێ خۆ دا بوو كو خودێ، ئەوێ هەمی تشتان بۆ وی و هەمی تشتان ژ بەر وی هەبوون هەی، دەمێ ڤیای گەلەكان بكەتە كوڕێن خۆ كو بینیتە د مەزناهیا خۆ دا، داهێنەرێ قورتالیا وان ب ئازاران كامل بكەت.
چنكو ئەوێ پیرۆزكرنێ دكەت و ئەوێن دهێنە پیرۆزكرن، هەمی ژ ئێك بنیاتن، ژ بەر ڤێ ئەگەرێ ئەو شەرم ناكەت كو بێژیتە وان برا.
ئەو دبێژیت: «ئەز دێ ناڤێ تە بۆ برایێن خۆ راگەهینم، د ناڤ جڤاتێ دا دێ پەسنا تە كەم.»
هەروەسا دبێژیت: «ئەز دێ پشتا خۆ ب وی گەرم كەم.» دیسان دبێژیت: «ئەڤە ئەز و ئەو زاڕۆكێن خودێ داینە من.»
ئەڤجا مادەم زاڕۆك خوین و گۆشتن، عیسا ژی ب هەمان تشتان ل گەل وان بوو پشكدار، داكو ب مرنا خۆ وی یێ هێزا مرنێ د دەستی دا، ئانكو ئبلیسی، ژ ناڤ ببەت
و ئەوان ئازاد بكەت، یێن د هەمی ژیانا خۆ دا، ژ ترسا مرنێ، ل بن زۆرداریا بەنیاتیێ بوون.
بێگۆمان ئەو نەهاتیە دا هاریكاریا فریشتەیان بكەت، لێ دا هاریكاریا دویندەها ئیبراهیمی بكەت.
لەوما پێدڤی بوو ئەو د هەمی تشتان دا وەكو برایێن خۆ لێ بهێت، دا د خزمەتكرنا خودێ دا سەرۆككاهنەكێ دلۆڤان و دلسۆز بیت و هۆسا بشێت كەفارەتا گونەهێن گەلی بدەت.
ئەو دشێت هاریكاریا وان كەسان بكەت یێن دهێنە تاقیكرن، چنكو ئەوی ب خۆ، دەمێ هاتیە تاقیكرن، ئازار كێشان.
ئەڤجا گەلی خویشك و برایێن پیرۆز، پشكدارێن وێ گازیا ئەم پێ بۆ ئەسمانی گازی كرین، هزرێ د عیسای دا بكەن، یێ ئەم دانپێدانێ دكەین كو هنارتی و سەرۆككاهنێ مەیە.
ئەو یێ دلسۆز بوو بۆ وی یێ ئەو دەستنیشانكری، كا چەوا مووسا ژی د هەمی مالا وی دا یێ دلسۆز بوو.
لێ عیسا ژ هەژی مەزناهیەكا پترە ژ یا مووسای، كا چەوا ئاڤاكەرێ خانی رێزگرتنەكا پتر هەیە ژ خانی ب خۆ.
(یا دیارە هەر خانیەك ب دەستێ كەسەكی دهێتە ئاڤاكرن، لێ یێ هەمی تشت ئاڤا كرین، خودێیە.)
مووسا وەكو خزمەتكارەك د هەمی مالا خودێ دا یێ دلسۆز بوو، دا شاهدەییێ ل سەر وان تشتان بدەت، یێن كو خودێ دا د پاشەڕۆژێ دا بێژیت.
لێ مەسیح وەكو كوڕ ل سەر مالا خودێ یێ دلسۆزە. ئەو مال ژی ئەمین، ئەگەر ئەم پشتڕاستیا خۆ و شانازیبرن ب وێ هیڤیا مە هەی ژ دەست نەدەین.
لەوما هەروەكو گیانێ پیرۆز دبێژیت: «ئەڤرۆ، ئەگەر هوین دەنگێ وی ببهیسن،
خۆ سەرهشك نەكەن، وەكو دەمێ یاخیبوونێ، د رۆژا تاقیكرنێ دا ل بیابانێ.
ل وێرێ بابكالێن هەوە چل ساڵان ئەز تاقی كرم و ئەزموون ب من كر، سەرەڕای كو وان كارێن من ددیتن.
لەوما ئەز ژ وی بەرەبابی تۆڕە بووم و من گۆت: ‹ئەو د دلێ خۆ دا هەردەم ڤاڕێ دبن و رێكا من نەنیاسیە›.
ئینا من د تۆڕەبوونا خۆ دا سویند خوار: ‹ئەو قەت ب ژۆر ناكەڤنە د ناڤ بێهنڤەدانا من دا.›»
د هشیار بن، گەلی خویشك و برایان، كو كەس ژ هەوە دلەكێ خراب و بێباوەر تێدا نەبیت كو ژ خودایێ زیندی پاشگەز ببیت،
لێ هەر رۆژ ئێكودوو هان بدەن، هندی ناڤێ ‹ئەڤرۆ› ل سەر بیت، دا ژ بەر فێلبازیا گونەهێ كەس ژ هەوە سەرهشك نەبیت.
چنكو ئەم بووینە هەڤپشكێن مەسیحی، ئەگەر مە تا دویماهیێ خۆ ب وێ پشتڕاستیێ ڤە گرت یا مە ل دەستپێكێ هەی.
هەروەكو بەری نوكە هاتیە گۆتن: «ئەڤرۆ، ئەگەر هوین دەنگێ وی ببهیسن، خۆ سەرهشك نەكەن، وەكو دەمێ یاخیبوونێ.»
ئەڤجا ئەو كینە یێن دەنگێ وی بهیستی و یاخیبووین؟ ئەرێ هەمی ئەو نەبوون یێن كو ب سەركێشیا مووسای ژ مسرێ دەركەفتین؟
خودێ بۆ دەمێ چل ساڵان ژ كێ یێ تۆڕە بوو؟ ما ئەو نەبوون یێن گونە‍‌ھ كرین و تەرمێن وان ل بیابانێ كەفتین؟
بۆ كێ سویند خوار كو قەت نەهێنە د ناڤ بێهنڤەدانا وی دا؟ ما نە بۆ وان بوو یێن گوهداریا وی نەكری؟
ئەم دبینین كو ئەو ژ ئەگەرێ بێباوەریێ نەشیان ب ژۆر بكەڤنە د ناڤ دا.
لەوما بلا ئەم بترسین، نەكو سەرەڕای دەرفەتا سۆزا ب ژۆركەفتنا د ناڤ بێهنڤەدانا وی دا هێشتا یا مای، ئێك ژ هەوە ب وێ سۆزێ را نەگەهیت.
چنكو مزگینی بۆ مە ژی وەكو وان هاتە راگەهاندن، لێ ئەو پەیاما وان بهیستی چ مفا بۆ وان نەبوو، ژ بەر كو ئەو خەلك ل گەل وان یێن ب باوەری بهیستی ، د ئێكگرتی نەبوون.
لێ ئەم یێن باوەری ئینای ب ژۆر دكەڤینە د وێ بێهنڤەدانێ دا، هەروەكو وی گۆتی: «ئینا من د تۆڕەبوونا خۆ دا سویند خوار: ‹ئەو قەت ب ژۆر ناكەڤنە د ناڤ بێهنڤەدانا من دا.›» هەر چەندە ژ دەمێ دامەزراندنا جیهانێ كارێن وی تەمام بووینە.
چنكو ئەو ل جهەكی ژ پەرتووكا پیرۆز سەبارەت رۆژا حەفتێ هۆسا دبێژیت: «ل رۆژا حەفتێ خودێ ژ هەمی كارێن خۆ بێهنا خۆ ڤەدا.»
هەروەسا د جهێ دی دا دبێژیت: «ئەو قەت ب ژۆر ناكەڤنە د ناڤ بێهنڤەدانا من دا.»
مادەم هێشتا دەرفەت مایە كو هندەك ب ژۆر بكەڤن و یێن بەری هنگی مزگینی بۆ وان هاتیە راگەهاندن، ژ بەر نەگوهداریێ ب ژۆر نەكەفتن،
لەوما خودێ رۆژەكا دی دەستنیشان دكەت، ئەو رۆژ ژی ‹ئەڤرۆ›یە. وی ئەڤ چەندە ب رێكا داوودی پشتی دەمەكێ درێژ دیار كر، هەروەكو بەری نوكە هاتیە گۆتن: «ئەڤرۆ، ئەگەر هوین دەنگێ وی ببهیسن، خۆ سەرهشك نەكەن.»
چنكو ئەگەر یەشوعی ئەو ئینابانە د بێهنڤەدانێ دا ، پشتی هنگی خودێ بەحسێ رۆژەكا دی نەدكر.
لەوما بێهنڤەدانەك بۆ گەلێ خودێ یا مای وەكو بێهنڤەدانا خودێیە ل رۆژا حەفتێ.
ئەوێ ب ژۆر كەفتیە د بێهنڤەدانا وی دا ژی، ژ كارێن خۆ بێهنڤەدان كریە، كا چەوا خودێ ژ كارێن خۆ بێهنڤەدان كریە.
لەوما بلا ئەم بزاڤێ بكەین كو ب ژۆر بكەڤینە د وێ بێهنڤەدانێ دا، دا كەس ژ ئەنجامدانا هەمان نموونەیا نەگوهداریێ ژ ناڤ نەچیت.
پەیڤا خودێ یا زیندی و كاریگەرە، ژ هەر شیرەكێ دوودەڤ تیژترە، ئەو هەتا د ناڤبەرا دەروون و گیانی دا و گە‍‌ھ و مەژیێ هەستی دا دبڕیت، دشێت هزر و نیازێن دلی یێن باش و خراب ژ ئێك جودا بكەت.
چ ئافراندی ژ خودێ د ڤەشارتی نینن، لێ هەمی تشت د رویت و ئاشكرانە ل بەر چاڤێن وی یێ ئەم دێ حسابێ دەینێ.
مادەم مە سەرۆككاهنەكێ مەزن هەیە، ئەوێ ژ ئەسمانان دەرباز بووی، كو عیسایێ كوڕێ خودێیە، بلا ئەم قاییم خۆ ب دانپێدانا خۆ ڤە بگرین.
سەرۆككاهنێ مە یێ وەسا نینە كو دلێ وی بۆ لاوازیێن مە نەسوژیت، لێ ئەو ژی وەكو مە د هەمی تشتان دا هاتیە تاقیكرن، بێی كو گونەهێ بكەت.
ئەڤجا بلا ئەم ب پشتڕاستی خۆ نێزیكی تەختێ كەرەمێ بكەین، دا دلۆڤانیێ وەرگرین و كەرەمێ ب دەست ڤە بینین كو هاریكاری بیت ل دەمێ پێدڤی.
هەر سەرۆككاهنەك ژ ناڤ مرۆڤان دهێتە هەلبژارتن و دهێتە دانان كو ل شوینا مرۆڤان ب كاروبارێن خودێ راببیت، دا پێشكێشی و قوربانیێن گونەهان پێشكێش بكەت.
ئەو دشێت ب نەرمی سەرەدەریێ ل گەل نەزان و ڤاڕێبوویان بكەت، چنكو ئەو ب خۆ ژی بندەستێ لاوازیێیە.
ژ بەر وێ چەندێ فەرە ل سەر وی، كا چەوا قوربانیێ پاقژبوونێ ژ گونەهێ ژ پێخەمەت خەلكی پێشكێش دكەت، وەسا ژ پێخەمەت خۆ ژی.
كەس ژی ڤێ شەرەفمەندیێ بۆ خۆ ناستینیت، ب تنێ ئەو كەس وەردگریت یێ خودێ گازی كریێ، وەكو هارونی.
هەروەسا مەسیحی ژی خۆ بۆ وێ پلەیا مەزناهیێ بلند نەكریە، كو ببیتە سەرۆككاهن، لێ وی بلند كریە یێ گۆتیێ: «تۆ كوڕێ منی، ئەڤرۆ من تۆ بووی.»
هەروەكو ل جهەكێ دی ژی دبێژیت: «تۆ هەتا هەتایێ كاهنی ژ جۆرێ مەلكیسادقی.»
مەسیحی د رۆژێن ژیانا خۆ یا لەشكانی دا، داخواز و هیڤی ب قێڕی و رۆندكان پێشكێشی وی كرن، یێ شیان هەین كو وی ژ مرنێ رزگار بكەت و ژ بەر خودێترسیا وی، داخوازا وی هاتە قەبیلكرن.
هەر چەندە ئەو كوڕێ خودێ بوو، لێ ب رێكا ئازارێن وی كێشاین، فێری گوهداریێ بوو.
دەمێ ب ڤێ رێكێ هاتیە كاملكرن، بۆ هەمی یێن گوهداریا وی دكەن بوو ژێدەرێ قورتالبوونا هەتا هەتایی
و ژ لایێ خودێ ڤە ب سەرۆككاهن ژ جۆرێ مەلكیسادقی هاتە بناڤكرن.
ل دۆر ڤێ چەندێ ، گەلەك ئاخفتن یا هەی مە دڤێت بێژین، لێ شڕۆڤەكرنا وێ یا گرانە، چنكو گوهێن هەوە یێن گران بووین.
پێدڤی بوو هەتا نوكە هوین ببانە مامۆستا، لێ هوین د پێدڤینە كو ئێك دووبارە بنەمایێن دەستپێكی یێن پەیڤا خودێ نیشا هەوە بدەت. هوین ڤەگەڕیان هەوجەیی شیری ببن، نە خوارنەكا گران.
هەر كەسێ شیرخۆر بیت، ئەو د فێركرنا دەربارەی راستداریێ دا یێ نەشارەزایە، چنكو ئەو یێ ساڤایە.
لێ خوارنا گران بۆ وانە یێن پێگەهشتی، ئەوێن هەستێن وان ژ ئەگەرێ راهێنانێ ل سەر ژ ئێكڤاڤارتنا باشی و خرابیێ راهاتین.
لەوما، بلا ئەم ژ فێركرنێن دەستپێكی یێن دەربارەی مەسیحی دەرباز ببین و بەرەڤ پێگەهشتنێ پێشڤە بچین، بێی كو جارەكا دی وی بنیاتی دانین یێ پێكهاتی ژ: لخۆزڤڕینێ ژ كریارێن مرۆڤی بەرەڤ مرنێ دبەن و باوەری ئینان ب خودێ
و فێركرنێ دەربارەی تافیركرنان، دەست ل سەر دانان، رابوونا مریان و دادكرنا هەتا هەتایی.
ئەم دێ ڤێ چەندێ كەین ژی، ئەگەر خودێ دەستویریێ بدەت.
چنكو ئەوێن جارەكێ رۆناهیا راستیا خودێ دیتی و تام كریە دیاریا ئەسمانی و بووینە هەڤپشك د گیانێ پیرۆز دا
و تام كریە پەیڤا خودێ یا چاك و حنێرێن سەردەمێ داهاتی
و د سەر هندێ را پاشگەز ببن، ڤەگەڕاندنا وان بۆ لخۆزڤڕینێ مەحالە، چنكو ئەو بۆ خۆ دووبارە كوڕێ خودێ خاچ ددەن و تووشی رسوابوونێ دكەن.
چنكو ئەو ئەردێ ژ وێ بارانێ ڤەخواری یا چەندین جاران ل سەر باری و شینكاتیەك بەرهەم ئینای یێ بكێرهاتی بۆ یێن ژ بەر وان هاتیە چاندن، بەرەكەتا خودێ دهێتە سەر.
لێ ئەگەر ستری و قیڤار دان، ئەو یێ بكێرنەهاتیە و نێزیكە نفرین لێ ببارن، كو دویماهیا وی سۆتنە.
هەر چەندە ئەم ب ڤی ئاوایی دئاخڤین، لێ دەربارەی هەوە، گەلی خۆشتڤیان، ئەم ژ بەرهەمێن باش یێن هەوە د پشتڕاستین، بەرهەمێن كو ب قورتالبوونێ ڤە د گرێداینە.
چنكو خودێ نە یێ زۆردارە كو كارێ هەوە و حەزژێكرنا هەوە بۆ ناڤێ وی دیار كری ژ بیر بكەت، ژ بەر كو هەوە خزمەتا پیرۆزكریان كریە و دكەن.
لێ ئەم گەلەك حەز دكەین كو هەر ئێك ژ هەوە، هەتا دویماهیێ، هەمان دلگەرمیێ بۆ بجهئینانا هیڤیێ دیار بكەن.
دا هوین تەمبەل نەبن، لێ چاڤ ل وان بكەن یێن ب باوەری و بێهنفرەهیێ بووینە میراتگرێن سۆزێن خودێ.
دەمێ خودێ سۆز دایە ئیبراهیمی، سویند ب خۆ خوار، چنكو كەسەكێ مەزنتر ژ وی نەبوو كو سویندێ پێ بخۆت
و گۆت: «بێگۆمان ئەز دێ تە گەلەك بەرەكەتدار كەم و گەلەك ب دویندە‍‌ھ ئێخم.»
ب ڤی ئاوایی، پشتی ئیبراهیمی بێهنا خۆ فرە‍‌ھ كری، سۆز ب دەست ڤە ئینا.
خەلك سویندێ ب تشتەكێ ژ خۆ مەزنتر دخۆت و سویند ئاخفتنا وان پەسەند دكەت و هەر شەڕەدەڤەكێ د ناڤ وان دا ب دویماهی دئینیت.
هەروەسا، دەمێ خودێ ڤیای نەگوهۆڕیا حەزا خۆ بۆ میراتگرێن سۆزێ زێدەتر دیار بكەت، وی سۆزا خۆ ب سویندێ مسۆگەر كر.
دا ب دوو تشتێن نەگوهۆڕ ، یێن كو مەحالە خودێ تێدا درەوێ بكەت، مە هاندانەكا ب هێز هەبیت، ئەم ئەوێن پەنا بریە نك وی، دا خۆ ب وێ هیڤیێ ڤە بگرین، یا ل پێشیا مە هاتیە دانان.
ئەڤ هیڤیە بۆ دەروونێ مە وەكو لەنگەرەكا نەلڤ و پەیتە، دەرباز دبیتە پشت پەردەی ،
وی جهی یێ عیسا وەكو پێشەنگ ژ پێخەمەت مە ب ژۆر كەفتی و بۆ هەتا هەتایێ بوویە سەرۆككاهن ژ جۆرێ مەلكیسادقی.
ئەڤ مەلكیسادقە پاشایێ باژێڕێ شالیم بوو، كاهنێ خودایێ هەری بلند بوو. دەمێ ئیبراهیم ژ تێكشكاندنا پاشایان ڤەگەڕیای، مەلكیسادق دەركەفتە پێشوازیا وی و ئەو بەرەكەتدار كر،
ئەوێ ئیبراهیمی دەهێكا هەمی تشتان بۆ وی ڤەدەر كری. ل پێشیێ وەرگێڕانا ناڤێ وی ‹پاشایێ راستداریێ›یە، ب دویڤ را ئەو ‹پاشایێ شالیم›ە ئانكو ‹پاشایێ ئاشتیێ›.
ئەو یێ بێ باب، بێ دایك و بێ بنیاتە. نە دەستپێكا رۆژێن وی، نە ژی دویماهیا ژیانێ هەیە، لێ ئەو وەكو كوڕێ خودێیە و هەتا هەتایێ دمینیت كاهن.
هزرێ تێدا بكەن چەندێ مەزن بوو، خۆ ئیبراهیم ژی، كو بابكالێ مەزنە، دەهێكا تالانێ خۆ دایێ.
ئەوێن ژ دویندەها لێڤی، یێن كاهنایەتیێ وەردگرن، ل گۆر دەستووری فەرمان یا هەی كو دەهێكێ ژ گەلێ ئیسرائیل، ئانكو برایێن خۆ، وەرگرن، هەر چەندە كو ئەو ژی ژ دویندەها ئیبراهیمینە،
لێ مەلكیسادق، ئەوێ نە ژ دویندەها لێڤیە، دەهێك ژ ئیبراهیمی وەرگرت و ئەوێ سۆز بۆ هاتیە دان بەرەكەتدار كر.
جهێ گۆمانێ نینە كو یێ بچویكتر ژ لایێ یێ مەزنتر ڤە دهێتە بەرەكەتداركرن.
ل لایەكی كاهن كو مرۆڤێن مربارن دەهێكێ وەردگرن، لێ ل لایێ دی مەلكیسادق وەردگریت، ئەوێ نڤیسار شاهدەییێ بۆ ددەن كو یێ زیندیە.
ئەم دشێین بێژین كو: خۆ لێڤی ژی، ئەوێ دەهێكێ وەردگریت، ب رێكا ئیبراهیمی دەهێك یا دای،
چنكو هنگی لێڤی هێشتا د پشتا بابێ خۆ ئیبراهیمی دا بوو، دەمێ مەلكیسادق هاتیە پێشوازیا وی.
ئەگەر كاملبوون ب رێكا كاهنایەتیا لێڤیان با، كو گەلێ ئیسرائیل ل سەر بنگەهێ وێ دەستوور وەرگرت، دا چ هەوجەیی ب وێ چەندێ بیت كو كاهنەكێ دی ژ جۆرێ مەلكیسادقی پەیدا ببیت، نە ل سەر شێوازێ هارونی؟
چنكو ئەگەر كاهنایەتی بهێتە گوهۆڕین، پێدڤیە دەستوور ژی بهێتە گوهۆڕین.
ئەوێ ئەڤ تشتە ل سەر وی دهێتە بەحس كرن، ئەو ژ هۆزەكا دی بوو، كو كەسەكی ژ ڤێ هۆزێ خزمەتا قوربانگەهێ نەكریە.
یا ئاشكرایە كو خودانێ مە ژ هۆزا یەهودای پەیدا بوو، ئەوا دەربارەی وێ مووسای چ بەحسێ كاهنان نەكری.
ب هاتنا كاهنەكێ دی یێ ژ جۆرێ مەلكیسادقی، ئێدی ئەوا ئەم دبێژین هێشتا پتر یا روهنە.
ئەو نە ل دویڤ دەستوورێ فەرمانا لەشكانی ، لێ ل دویڤ هێزا ژیانەكا ژ ناڤ ناچیت بوویە كاهن.
چنكو نڤیسار شاهدەییێ ددەت: «تۆ هەتا هەتایێ كاهنی ژ جۆرێ مەلكیسادقی.»
ل لایەكی فەرمانەكا پێشین، ژ بەر لاوازی و بێمفاییا وێ، هاتە لابرن،
چنكو دەستووری تشتەك كامل نەكر. ل لایێ دی، ئومێدەكا هێشتا باشتر پەیدا بوو، كو ب رێكا وێ نێزیكی خودێ دبین.
ئەڤە ژی یا بێ سویند نەبوو. ئەوێن دی بێ سویند ببوونە كاهن،
لێ ئەڤە ب سویندێ بوو كاهن، ژ لایێ خودێ ڤە ئەوێ گۆتیێ: «خودانی سویند یا خواری و لێڤە نابیت: ‹تۆ هەتا هەتایێ كاهنی.›»
ژ بەر وێ سویندێ، ئەو بوو دەستەبەر بۆ پەیمانەكا باشتر، كو ئەو ژی عیسایە.
زێدەباری هندێ كاهنێن بەرێ گەلەك بوون، چنكو مرن رێگر بوو كو ئەو د بەردەوام بن.
لێ عیسای كاهنایەتیەكا نەگوهۆڕ یا هەی، چنكو ئەو هەتا هەتایێ دمینیت.
ژ بەر هندێ ئەو دشێت وان ب تەمامی قورتال بكەت، یێن كو ب رێكا وی خۆ نێزیكی خودێ دكەن، چنكو ئەو هەردەم یێ زیندیە، دا مەهدەریێ بۆ وان بكەت.
سەرۆككاهنەكێ وەسا بۆ مە یێ پێدڤی بوو، یێ پیرۆز و بێگونە‍‌ھ و بێكێماسی، یێ ژ گونەهكاران جودا كری و ژ ئەسمانان بلندتر لێ كری.
ئەو یێ پێدڤی نینە، وەكو سەرۆككاهنێن دی، هەر رۆژ قوربانان پێشكێش بكەت، ل پێشیێ ژ بەر گونەهێن خۆ و پاشی ژ بەر گونەهێن خەلكی، چنكو ئەوی ب جارەكێ ئەڤ چەندە كر، دەمێ خۆ وەكو قوربان پێشكێش كری.
دەستوور مرۆڤان دكەتە سەرۆككاهن كو خودان لاوازینە، لێ سویندا خودێ، ئەوا پشتی دەستووری هاتی، كوڕی دكەتە سەرۆككاهن، كو بۆ هەتا هەتایێ یێ هاتیە كاملكرن.
خالا سەرەكی ژ وان تشتێن مە گۆتین ئەڤەیە: مە سەرۆككاهنەكێ هۆسا یێ هەی، ئەوێ ل ئەسمانان ل رەخێ راستێ یێ تەختێ مەزناهیێ روینشتی،
خزمەتكارێ پیرۆزگەهێ و خیڤەتا رەسەن، ئەوا خودانی ڤەدای، نە مرۆڤان.
هەر سەرۆككاهنەكێ هاتیە دانان، دا پێشكێشی و قوربانان پێشكێش بكەت. لەوما پێدڤیە ئەڤی ژی تشتەك بۆ پێشكێشكرنێ هەبیت.
ئەگەر ئەو ل سەر ئەردی با، ئەو قەت نەدبوو كاهن، چنكو ئەو كاهنێن ل گۆر دەستووری پێشكێشیان پێشكێش دكەن، یێن هەین.
ئەو خزمەتا خۆ یا پەرستنێ ب وان تشتان دكەت یێن كو لبەرچێكری و سیتافكا تشتێن ل ئەسمانانە، كا چەوا دەمێ مووسای ل بەر بوو خیڤەتێ چێكەت، ژ لایێ خودێ ڤە هاتە هایداركرن: «لێ بنێڕە كو هەمی تشتان وەسا چێكەی، ل دویڤ وێ نموونەیا ل سەر چیای بۆ تە هاتیە نیشا دان.»
لێ نوكە عیسای خزمەتەكا گەلەك باشتر ژ خزمەتا وان وەرگرت، ب هەمان پیڤانا كو پەیمانا ئەو ناڤبەینكاریێ بۆ دكەت باشترە ژی، ئەوا ل سەر سۆزێن باشتر هاتیە دانان.
چنكو ئەگەر پەیمانا ئێكەمین یا بێكێماسی با، هەوجەیی یا دوویێ نەدبوو.
لێ خودێ كێماسیێ ل نك گەلێ خۆ دبینیت و دبێژیت: «ئەڤە رۆژ دێ هێن، خودان دبێژیت، ئەز دێ ل گەل بنەمالا ئیسرائیلی و بنەمالا یەهودای پەیمانەكا نوی گرێ دەم،
وەكو وێ پەیمانێ نابیت یا من ل گەل بابكالێن وان گرێ دای، رۆژا من دەستێ وان گرتی، دا وان ژ ئەردێ مسرێ دەربئێخم. وان ئەڤ پەیمانا من شكاند، ئەڤجا من ئەو پشت گو‍‌ھ ڤە هاڤێتن، خودان دبێژیت.
لێ ئەو پەیمانا ئەز دێ پشتی وان رۆژان ل گەل بنەمالا ئیسرائیلی گرێ دەم ئەڤەیە، خودان دبێژیت، ئەز دێ دەستوورێ خۆ كەمە د زێهنێ وان دا و دێ ل سەر دلێ وان نڤیسم، ئەز دێ بمە خودایێ وان و ئەو دێ بنە گەلێ من.
ئێدی كەس هەڤوەڵاتیێ خۆ فێر ناكەت و كەس برایێ خۆ فێر ناكەت و بێژیتێ: ‹خودانی بنیاسە.› چنكو هەمی دێ من نیاسن، ژ بچویكێ وان تاكو مەزنێ وان.
ئەز دێ ل بەرامبەر خرابیێن وان یێ دلۆڤان بم و ئێدی ب ئێكجاری گونەهێن وان نائینمە بیرا خۆ.»
دەمێ خودێ دبێژیت: «پەیمانا نوی»، ئەڤە وی یا پێشیێ كەڤن كر. ئەو تشتێ كەڤن و پیر دبیت، ئەو نێزیكی ژناڤچوونێیە.
د پەیمانا پێشین دا رێورەسمێن پەرستنێ و پیرۆزگەها ئەردی هەبوون.
خیڤەت هاتبوو ڤەدان، د ژۆرا ئێكێ ڤە كو دگۆتنێ ‹پیرۆزگە‍‌ھ› چرادانك و مێز و نانێ پێشكێشیێ هەبوون.
ل پشت پەردەی، ئانكو ل ژۆرا دوویێ كو دگۆتنێ ‹جهێ هەری پیرۆز›،
قوربانگەها زێڕین یا بخویرێ و سندوقا پەیمانێ، كو ژ هەمی لایان ڤە ب زێڕی یا داپووشی بوو هەبوون، د وێ سندوقێ دا ئامانێ زێڕی، ئەوێ مەننا تێدا هەبوو، ل گەل گۆپالێ هارونی كو بشكۆژ دابوون، هەروەسا تەختەبەرێن پەیمانێ.
ل سەر سندوقێ ژی خەڕۆبێن مەزناهیا خودانی هەبوون و سیبەر ل قەپاغا كەفارەتێ دكر. ل ڤێرێ نەشێین ب هویری بەحسێ ڤان تشتان بكەین.
پشتی ئەڤ تشتە ب ڤی شێوەی هاتینە رێكخستن، كاهن هەمی دەمان دچنە د ژۆرا ئێكێ ڤە و ب رێورەسمێن پەرستنێ رادبن.
لێ یا دوویێ ب تنێ سەرۆككاهن ساڵێ جارەكێ دچیتە د ژۆرڤە و بێ خوین ناچیت، كو بۆ خۆ و بۆ گونەهێن خەلكی ژ نەزانین كرین، پێشكێش دكەت.
ب ڤێ چەندێ گیانێ پیرۆز ئاماژەی ددەت، كو رێكا جهێ هەری پیرۆز هێشتا نەهاتیە ڤەكرن، هندی پەرستگەها ئێكێ مابیت.
ئەڤە ژی هێمایەكە بۆ وی سەردەمی، ئەوێ تێدا پێشكێشی و قوربان دهێنە پێشكێشكرن، ئەوێن كو نەشێن وژدانا وی كەسی پاقژ بكەن یێ پەرستنێ دكەت.
ئەڤە ب تنێ گرێدای خوارن و ڤەخوارن و شویشتنێن جودا جودانە، رێورەسمێن لەشكانینە، هاتینە دانان تاكو دەمێ چاكسازیێ بهێت.
لێ نوكە مەسیح یێ هاتی وەكو سەرۆككاهنێ تشتێن باش یێن پاشەڕۆژێ. ئەو چوو د خیڤەتا مەزنتر و كاملتر ڤە، ئەوا نە ب دەستان هاتیە چێكرن، ئانكو ئەوا نە ژ ڤێ جیهانێ.
ئەو نە ب خوینا نێری و جانەگایان، لێ ب خوینا خۆ، جارەكێ و بۆ هەروهەر چوو د جهێ هەری پیرۆز ڤە و رزگاركرنا هەتا هەتایی بۆ مە ب دەست ڤە ئینا.
ئەگەر خوینا نێری و گایان و خولیا نێهگۆنكەكێ كو ب سەر هەڕمیان دا درەشینن، وان بۆ پاقژكرنا لەشی پیرۆز دكەت،
پا چەند پتر خوینا مەسیحی، ئەوێ خۆ بێكێماسی ب هێزا گیانێ پیرۆزێ هەروهەر بۆ خودێ پێشكێش كری، دێ وژدانا مە ژ وان كریاران پاقژ كەت یێن مرۆڤی بەرەڤ مرنێ دبەن، دا پەرستنا خودایێ زیندی بكەین.
ژ بەر ڤێ چەندێ ئەو ناڤبەینكارێ پەیمانەكا نویە، داكو یێن گازیكری میراتێ هەتا هەتایی یێ سۆز پێ هاتیە دان وەرگرن، چنكو مرنەكێ روی دا، ئەو ژ گونەهێن د پەیمانا پێشین دا هاتینە كرن رزگار كرن.
ئەگەر وەسیەت هەبیت، پێدڤیە مرنا وەسیەتكەری بهێتە پشتڕاستكرن،
چنكو وەسیەت ل گەل مرنێ دكەڤیتە كاری، وێ چ هێز ژی نینە هندی وەسیەتكەر یێ ساخ بیت.
ژ بەر ڤێ ئەگەرێ پەیمانا پێشین ژی بێ خوین نە ئێخستیە كاری.
چنكو مووسای، پشتی كو هەر فەرمانەكا ل گۆر دەستووری بۆ هەمی گەلی راگەهاندی، خوینا جانەگا و نێریان ئینا ل گەل ئاڤێ و هریا سۆر و زوفایێ ب سەر پەرتووك و هەمی گەلی دا رەشاند.
گۆت: «ئەڤە خوینا وێ پەیمانێیە یا كو خودێ فەرمان پێ كری.»
هەروەسا ئەو خوین ب سەر خیڤەتێ و هەمی ئامانێن بۆ پەرستنێ دهاتنە ب كار ئینان رەشاند.
ل گۆر دەستووری پڕانیا تشتان ب خوینێ پاقژ دبن و لێبورینا گونەهێ ژی بێی رشتنا خوینێ نابیت.
لەوما دڤیا لبەرچێكریێن تشتێن ئەسمانی ب ڤان رێورەسمان بهێتە پاقژكرن، لێ تشتێن ئەسمانی ب خۆ ب قوربانیێن باشتر ژ ڤان رێورەسمان بهێنە پاقژكرن.
چنكو مەسیح نەچوویە پیرۆزگەها دەستكرد كو ل بەر یا رەسەن هاتیە چێكرن، لێ چوویە د ئەسمانی ب خۆ دا، دا نوكە ژ پێخەمەت مە ل بەرامبەری خودێ ئامادە بیت.
نە چنكو ئەو دێ چەندین جاران خۆ پێشكێش كەت، هەروەكو سەرۆككاهن هەر ساڵ جارەكێ ب خوینەكێ كو نە یا ویە دچیتە د جهێ هەری پیرۆز ڤە.
ئەگەر وەسا با، پێدڤی بوو مەسیحی هەر ژ دامەزراندنا جیهانێ گەلەك جاران ئازار كێشابان. لێ نوكە ل دویماهیا سەردەمان ئەو جارەكێ و بۆ هەروهەر دیار بوو، دا ب خۆگۆریكرنا خۆ گونەهێ راكەت.
كا چەوا بۆ مرۆڤان هاتیە دانان كو ب تنێ جارەكێ بمرن و پشتی هنگی دادكرنە،
وەسا مەسیح ژی ژ بەر راكرنا گونەهێن گەلەكان ب تنێ جارەكێ هاتە پێشكێش كرن. ئەو دێ بۆ جارا دوویێ دیار بیت، نە ژ بەر راكرنا گونەهان، لێ ژ بەر قورتالكرنا وان یێن چاڤەڕێیا وی دكەن.
دەستوور سیتافكا تشتێن باش یێن پاشەڕۆژێیە، لێ نە دەق و دەق وێنەیێ وان تشتان ب خۆیە. لەوما ئەو ب هەمان قوربانێن ساڵ ب ساڵ ب بەردەوامی دهێنە پێشكێشكرن، قەت نەشێت وان كەسان كامل بكەت یێن بۆ پەرستنێ دهێن.
ئەگەر شیابا، ما ژ پێشكێشكرنێ نەرادوەستیان؟ چنكو دا پەرستڤان جارەكێ بۆ هەتا هەتایێ پاقژ بن و ئێدی هەستكرن ب گونەهێ نەدما.
لێ ئەڤ قوربانە ساڵ ب ساڵ گونەهێن وان دئیننە بیرا وان.
چنكو خوینا گا و نێریان مەحالە گونەهان راكەت.
لەوما دەمێ مەسیح هاتیە د جیهانێ دا گۆت: «تە قوربان و پێشكێشی نەڤیان، لێ تە لەشەك بۆ من ئامادەكر.
تۆ ب قوربانیێن سۆتنێ و قوربانیێن پاقژبوونێ ژ گونەهێ دلخۆش نەبووی.
هنگی من گۆت: ‹ئەڤە ئەز هاتم، هەی خودێ، دا حەزا تە ب ج‍‌ھ بینم، كا چەوا د پەرتووكێ دا دەربارەی من هاتیە نڤیسین.›»
ئەوی ل سڵال گۆت: «تە قوربان و پێشكێشی و قوربانیێ سۆتنێ و قوربانیێن ژ بەر گونەهێ دهێنە دان نەڤیان، نە ژی پێ دلخۆش بووی،» (ئەوێن ل دویڤ دەستووری دهێنە پێشكێشكرن.)
پاشی دبێژیت: «ئەڤە ئەز هاتم، دا حەزا تە ب ج‍‌ھ بینم.» یا ئێكێ لاددەت، دا یا دوویێ بنەج‍‌ھ بكەت.
هۆسا عیسایێ مەسیح حەزا خودێ ب ج‍‌ھ ئینا، كو جارەكێ و بۆ هەروهەر لەشێ خۆ پێشكێش كر، ب ڤی چەندێ ئەم هاتینە پیرۆزكرن.
هەر كاهنەك رۆژ ب رۆژ رادبیت خزمەتێ دكەت و ب دووبارەكرنا بەردەوام هەمان قوربانان پێشكێش دكەت، ئەوێن قەت نەشێن گونەهان راكەن.
لێ دەمێ ڤی كاهنی ب تنێ ئێك قوربانی ژ بەر گونەهان بۆ هەتا هەتایێ پێشكێش كری، ل دەستێ راستێ یێ خودێ روینشت.
ژ هنگی وەرە ئەو یێ چاڤەڕێیە تاكو دوژمنێن وی وەكو تەختەپێ بۆ پێیێن وی بهێنە دانان.
چنكو وی ب قوربانەكی هەتا هەتایێ ئەو كامل كرن یێن دهێنە پیرۆزكرن.
گیانێ پیرۆز ژی بۆ مە شاهدەییێ ددەت. ل پێشیێ دبێژیت:
«ئەڤەیە ئەو پەیمانا ئەز دێ پشتی وان رۆژان ل گەل وان گرێ دەم، خودان دبێژیت، ئەز دێ دەستوورێ خۆ كەمە د دلێ وان دا و دێ ل سەر زێهنێ وان نڤیسم.»
پاشی دبێژیت: «ئەز ئێدی ب ئێكجاری گونە‍‌ھ و سەرپێچیێن وان نائینمە بیرا خۆ.»
ل كیرێ لێبورینا وان تشتان هەبیت، ئێدی قوربانی ژ بەر گونەهێ نابیت.
لەوما گەلی خویشك و برایان، مادەم مە پشتڕاستی یا هەی كو ئەم ب خوینا مەسیحی دشێین بچینە د جهێ هەری پیرۆز ڤە،
ب رێكەكا نوی و زیندی د پەردەی را، ئانكو د لەشێ خۆ را، وی بۆ مە یا ڤەكری،
هەروەسا مادەم مە كاهنەكێ مەزن ل سەر مالا خودێ هەیە،
بلا ئەم ل گەل دلەكێ راست ب باوەریەكا كامل، دلێن مە ب رەشاندنێ د پاقژكری ژ وژدانەكا خراب و لەشێن مە د شویشتی ب ئاڤەكا پاقژ، نێزیكی خودێ ببین.
بلا ئەم بێی دوودلی خۆ قاییم ب دانپێدانا هیڤیا خۆ ڤە بگرین، چنكو ئەوێ سۆز دای جهێ باوەریێیە.
هەروەسا بلا هزرا خۆ د هندێ دا بكەین كا چەوا ئێكودوو هانبدەین بۆ حەزژێكرنێ و كارێن چاك.
بلا دەست ژ كۆمبوونێ ل گەل ئێكودوو بەرنەدەین، هەروەكو بوویە نەریتێ هندەكان، لێ ئێكودوو هانبدەین و هندی هوین ببینن كو رۆژا خودانی یا نێزیك دبیت پتر وە بكەن.
چنكو ئەگەر ئەم ب ئەنقەستی ل سەر گونەهكرنێ بەردەوام ببین، پشتی كو مە راستی نیاسی، ئێدی چ قوربانی نینن گونەهان راكەن،
لێ ب تنێ چاڤەڕێكرنەكا ب ترس یا هەی ژ بەر دادكرنێ و ئاگرەكێ دژوار كو دێ دوژمنێن خودێ داعویریت.
هەر كەسێ سەرپێچیا دەستوورێ مووسای كربا و دوو یان سێ كەسان شاهدەیی ل سەر دابا، ئەو بێی دلۆڤانی دهاتە كوشتن.
ئەڤجا ب دیتنا هەوە، ئەوێ كوڕێ خودێ بێڕێز كری و خوینا پەیمانێ یا ئەو پێ هاتیە پیرۆزكرن وەكو تشتەكێ هەڕمی دیتی و سڤكاتی ب گیانێ كەرەمێ كری، هەژی سزایەكێ چەند دژوارترە؟
چنكو ئەم وی دنیاسین یێ گۆتی: «یا منە تۆلڤەكرن، ئەز دێ سزایێ دروست دەم.» هەروەسا گۆتیە: «خودان دێ گەلێ خۆ داد كەت.»
تشتەكێ ب ترسە كو مرۆڤ بكەڤیتە دەستێ خودایێ زیندی.
رۆژێن بەرێ بیننە بیرا خۆ، پشتی هوین هاتینە رۆناهیكرن، دەمێ هەوە خۆ ل بەر هەڤڕكیەكا دژوار یا پڕی ئازار گرتی.
هوین ژ لایەكی ڤە ب ئاشكرایی تووشی ئاخفتنێن كرێت و تەنگاڤیان بوون و ژ لایەكێ دی ڤە بوونە هەڤپشكێن وان كەسان یێن هەمان تشت ب سەری هاتی.
هوین بوونە هەڤپشكێن دەردێ وان یێن د زیندانێ دا و هەوە ب دلشادی قەبیل كر دەمێ مالێ هەوە هاتیە تالانكرن، چنكو هەوە دزانی كو مالەكێ باشتر یێ ژ ناڤ ناچیت، هەوە یێ ل ئەسمانان هەی.
لەوما دەست ژ پشتڕاستیا خۆ بەرنەدەن، چنكو وێ خەلاتەكێ مەزن یێ هەی.
هوین د پێدڤی خۆڕاگریێنە، داكو پشتی هوین حەزا خودێ ب ج‍‌ھ دئینن، ئەوا سۆز پێ هاتیە دان وەرگرن.
هەروەكو هاتیە نڤیسین: «پشتی دەمەكێ گەلەك كورت، ئەوێ دهێت، دێ هێت و گیرۆ نابیت.
لێ راستدارێ من، دێ ب باوەریێ ژیت و ئەگەر خۆ پاشڤە كێشا، دلێ من ب وی خۆش نابیت.»
لێ ئەم نە ژ وانین یێن خۆ پاشڤە دكێشن و د ئەنجام دا ژ ناڤ دچن، ئەم ژ وانین یێن باوەری هەی و د ئەنجام دا خۆ دپارێزن.
باوەری پشتڕاستیە ژ وان تشتێن مرۆڤی هیڤی پێ هەی و بێگۆمانیە ژ وان تشتێن ناهێنە دیتن.
ب باوەریێ بابكال ژ لایێ خودێ ڤە هاتنە پەسەندكرن.
ب باوەریێ ئەم تێدگەهین كو جیهان ب پەیڤا خودێ هاتیە ئافراندن، ئەڤجا تشتێن دهێنە دیتن ژ تشتێن نەهێنە دیتن چێبووینە.
ب باوەریێ هابیلی پێشكێشیەكێ باشتر ژ یێ قایینی پێشكێشی خودێ كر. هەر ب وێ باوەریێ شاهدەیی بۆ هاتە دان كو یێ راستدارە، دەمێ خودێ رازیبوونا خۆ ل سەر قوربانێن وی دیار كری. ب باوەریێ ئەو هێشتا دئاخڤیت، هەر چەندە یێ مری.
ب باوەریێ حەنۆخ بۆ ئەسمانی هاتە ڤەگوهاستن ، دا مرنێ نەبینیت، ئێدی ئەو نەهاتە دیتن، چنكو خودێ ئەو ڤەگوهاست. بەری ڤەگوهاستنا وی شاهدەیی بۆ هاتە دان كو ئەوی خودێ رازی كر.
بێی باوەریێ ژی مەحالە مرۆڤ خودێ رازی بكەت، چنكو پێدڤیە ئەوێ خۆ نێزیكی خودێ بكەت، باوەری هەبیت كو خودێ یێ هەی و خەلاتی ددەتە وان یێن قەستا وی دكەن.
ب باوەریێ نوحی ژ ترسا خودێ گەمیەك ژ بۆ قورتالكرنا مالا خۆ چێكر، دەمێ دەربارەی رویدانێن هێشتا نەهاتینە دیتن هاتیە ئاگەهداركرن. ب وێ باوەریێ جیهان گونەهبار كر و بوو میراتگرێ راستداریا كو ب باوەریێ دهێت.
ب باوەریێ ئیبراهیمی گوهداری كر، دەمێ هاتیە گازیكرن كو دەركەڤیتە وی جهی یێ ل بەر بوو ب میرات وەرگریت، ئەو دەركەفت و نەدزانی بۆ كیڤە دچیت.
ب باوەریێ ئەو مشەختبوو ئەردێ سۆزپێدای، ئەو هەروەكو ل ئەردەكێ بیانی بیت د بن خیڤەتان ڤە ئاكنجی بوو، ل گەل ئیسحاقی و یەعقوبی، هەڤمیراتێن وی د هەمان سۆزێ دا.
چنكو ئەو چاڤەڕێی وی باژێڕی بوو یێ بنیاتەكێ قاییم هەی، كو ئەندازیار و ئاڤاكەرێ وی خودێیە.
ب باوەریێ ئیبراهیمی هێز بۆ زاڕۆكئینانێ وەرگرت، هەر چەندە ئەو یێ پیر بوو و سارا ب خۆ ژی یا خرش بوو ، چنكو ئەو یێ پشتڕاست بوو كو ئەوێ سۆز دای جهێ باوەریێیە.
لەوما ژ كەسەكێ وەكو ئێكێ مری دویندەهەك پەیدا بوو، ژمارەیا وان تەمەت ستێرێن ئەسمانی و تەمەت خیزێ ل سەر كنارێ دەریایێ ناهێتە هژمارتن.
ئەو هەمی د باوەریێ دا مرن و سۆز ب دەست خۆ ڤە نەئینا، لێ ژ دویر ڤە دیتن و بخێرهاتنا وان كر و دانپێدان كر كو ئەو ل سەر ئەردی د هاڤی و بیانینە.
ئەوێن تشتێن هۆسا دبێژن، ئاشكرا دكەن كو بۆ خۆ ل وەڵاتەكی دگەڕیێن.
ئەگەر ئەوان بیریا وی جهێ ژێ دەركەفتین كربا، دا وان دەلیڤە بۆ ڤەگەڕیانێ هەبیت.
لێ ل شوینا وێ چەندێ مەرەقا وان وەڵاتەكێ باشتر بوو، ئانكو وەڵاتەكێ ئەسمانی. لەوما خودێ ب شەرم نابینیت كو ب خودایێ وان بهێتە بناڤكرن، چنكو وی بۆ وان باژێڕەك ئامادە كریە.
ب باوەریێ ئیبراهیمی ئیسحاق وەكو قوربان پێشكێش كر، دەمێ خودێ ئەو ئێخستیە د تاقیكرنێ دا. ئەوێ سۆز بۆ وی هاتینە دان ئێكانەیێ خۆ پێشكێش كر،
سەبارەت وی خودێ گۆتیە: «دویندەها تە دێ ژ ئیسحاقی هێتە هژمارتن.»
ئیبراهیمی د دلێ خۆ دا دگۆت كو خودێ دشێت مریان راكەتەڤە. ب شێوەیەكێ هێماكی كوڕێ خۆ، وەكو ئێكێ ژ ناڤ مریان رابووی، وەرگرتەڤە.
ب باوەریێ ئیسحاقی داخوازا بەرەكەتێ، دەربارەی رویدانێن پاشەڕۆژێ، بۆ یەعقوب و عیسۆی كر.
ب باوەریێ یەعقوبی، دەمێ ل بەر مرنێ، داخوازا بەرەكەتێ بۆ هەر ئێك ژ كوڕێن یوسڤی كر و خۆ خواركرە سەر دەستكێ گۆپالێ خۆ و سەرێ خۆ بۆ خودێ چەماند.
ب باوەریێ یوسڤی دەمێ ل بەر مرنێ بەحسێ دەركەفتنا گەلێ ئیسرائیل كر و دەربارەی هەستیێن خۆ ئەو راسپاردن.
ب باوەریێ مووسا دەمێ ژ دایك بووی، سێ هەیڤان ژ لایێ دای و بابێن وی ڤە هاتە ڤەشارتن، چنكو وان دیت كو زاڕۆك یێ جوانە و ژ فەرمانا پاشای نەترسیان.
ب باوەریێ مووسا، دەمێ مەزن بووی، رازی نەبوو كو ب كوڕێ كچا فیرعەونی بهێتە بناڤكرن.
وی ب باشتر دیت كو ل گەل گەلێ خودێ سڤكاتی پێ بهێتە كرن، نەكو خۆشیا گونەهێ یا دەمكی هەبیت.
وی ئەڤ شەرمزاریا ژ پێخەمەت مەسیحی ب سامانەكێ مەزنتر ژ گەنجینەیێن مسرێ دانا، چنكو چاڤێ وی ل خەلاتی بوو.
ب باوەریێ وی مسر هێلا، بێی كو ژ تۆڕەبوونا پاشای بترسیت. وی خۆڕاگری كر، هەروەكو وی ببینیت یێ كو ناهێتە دیتن.
ب باوەریێ وی جەژنا دەربازبوونێ كر و خوینا وێ رەشاند، داكو ئەوێ نەخری دكوشتن، وان نەهنگێڤیت.
ب باوەریێ ئیسرائیلی د دەریایا سۆر را دەرباز بوون، هەروەكو ل سەر هشكاتیێ، لێ دەمێ مسریان بزاڤ كری ژێ دەرباز ببن، خەندقین.
ب باوەریێ شویرهێن ئەریحا هەڕفتن، پشتی ئەو حەفت رۆژان ل دۆر وێ زڤڕین.
ب باوەریێ راحابا لەشفرۆش ل گەل نەگوهداران ژ ناڤ نەچوو، چنكو ب ئاشتیانە بخێرهاتن ل سیخوڕان كر.
چ دی بێژم؟ من دەم نینە بەحسێ گدعۆن و باراق و شەمشون و یەفتاح و داوود و ساموئێل و پێغەمبەران بكەم.
ئەوان ب باوەریێ پاشایەتی بندەست كرن، دادپەروەری ب ج‍‌ھ ئینا، سۆز ب دەست خۆ ڤە ئینان، دەڤێ شێران گرێ دا،
هێزا ئاگری ڤەمراند، ژ دەڤێ شیری رزگار بوون، د ناڤ لاوازیێ دا هێز ب دەست خۆ ڤە ئینا، د شەڕی دا بوونە هێزدار، لەشكەرێن بیانیان راتەقاندن،
ژنكان مریێن خۆ ب ساخی وەرگرتنەڤە. هندەكێن دی ژی هاتنە ئەشكەنجەدان و قەبیل نەكر بهێنە ئازاد كرن، داكو ل رۆژا رابوونێ بگەهنە ژیانەكا باشتر.
هندەكێن دی كەفتنە د تاقیكرنا سڤكاتیپێكرنێ و قامچیلێدانێ دا، هەروەسا زنجیركرن و زیندانكرنێ.
هاتنە بەربارانكرن، ب مشاری هاتنە قەدكرن، ب دربێ شیری هاتنە كوشتن، د پیستێ پەز و بزنان دا گەڕیان، ب هەژاری، تەپەسەركری و ستەملێكری.
جیهان نە یا هەژی وان بوو. ئەو دەربەدەری بیابان و چیا و شكەفت و كونێن بن ئەردی بوون.
ئەڤ هەمی مرۆڤە، سەرەڕای كو ژ ئەگەرێ باوەریا وان هاتنە پەسەندكرن، لێ وان سۆز ب دەست خۆ ڤە نەئینا،
چنكو خودێ پێشوەخت تشتەكێ باشتر بۆ مە ئامادە كریە، داكو ئەو بێی مە نەهێنە كاملكرن.
لەوما، مادەم ئەم ب جەماوەرەكێ هۆسا مەزن یێ شاهدان د دەور داینە، دا هەر بارەكی و گونەهێن ب ساناهی د مە دئالیێن، بهاڤێژین و د وێ غاردانێ دا یا ل بەر مە هاتیە دانان، ب خۆڕاگری بكەینە غار.
بەرێ مە ل عیسای بیت، داهێنەر و تەمامكەرێ باوەریا مە، ئەوێ ژ پێخەمەت دلشادیا ل بەر وی هاتیە دانان، خۆ ل بەر خاچێ گرتی و شەرمزاریا وێ ب پشت گو‍‌ھ ڤە هاڤێتی، ئەڤجا ل رەخێ راستێ یێ تەختێ خودێ روینشتی.
هزرێ د وی دا بكەن یێ خۆ ل بەر ڤێ هەمی دژایەتیا گونەهكاران گرتی، داكو هوین نەوەستیێن و دلسار نەبن.
د خەباتا دژی گونەهێ دا، هێشتا هەوە تا خوینێ بەرخۆدان نەكریە.
هەوە ئەو هاندان ژ بیر كریە یا هەوە رادسپێریت، كو هەوە ب ‹كوڕ› ب ناڤ دكەت: «كوڕێ من، سڤكاتیێ ب تەمبیكرنا خودانی نەكە، دەمێ تە پاشڤە دبەت دلسار نەبە،
چنكو ئەوێ خودان حەز ژێ دكەت، تەمبی دكەت، هەر ئێكێ خودان وی وەكو كوڕێ خۆ قەبیل دكەت، قامچی ددەت.»
ئەڤجا خۆ ل بەر تەمبیكرنێ بگرن، خودێ وەكو كوڕێن خۆ سەرەدەریێ ل گەل هەوە دكەت. ما كیژان كوڕە بابێ وی، وی تەمبی ناكەت؟
لێ ئەگەر هوین ژ وێ تەمبیكرنێ د بێبەهر بن، ئەوا هەمی كوڕ تێدا پشكدار دبن، هنگی هوین بیژینە، نە كوڕێن وینە.
زێدەباری ڤێ چەندێ، مە بابێن لەشكانی هەنە، ئەم تەمبی دكرین و مە رێز ل وان دگرت. ما ئەم هێشتا گەلەك پتر ملكەچی بابێ خۆ یێ روحانی نابین، داكو بژین؟
ئەوان بۆ دەمەكێ كورت، ل دویڤ یا وان دیتی كو باشە، ئەم تەمبی كرین، لێ خودێ بۆ مفایێ مە ب تەمبیكرنا مە رادبیت، دا ئەم پیرۆز ببین، هەروەكو ئەو یێ پیرۆزە.
هەر تەمبیكرنەك دەمێ دهێتە كرن یا خۆش نینە، لێ یا ب ژانە. سەرەڕای وێ چەندێ ل دویماهیێ بەرهەمێ ئاشتیانە كو راستداریە، ددەتە وان كەسان یێن پێ هاتینە مەشقدان.
ئەڤجا دەستێن خۆ یێن سستبووی و چۆكێن خۆ یێن خاڤبووی پەیت بكەن،
بۆ پێیێن خۆ رێكێن راست چێكەن، داكو پارچەیا لەنگ ژ ج‍‌ھ نەچیت، لێ ساخ ببیت.
بۆ ئاشتیێ ل گەل هەمی كەسان بزاڤێ بكەن، هەروەسا بۆ پیرۆزیێ، ئەوا بێی وێ كەس خودانی نابینیت.
هەوە های ژێ هەبیت نەكو كەسەك ب كەرەما خودێ را نەگەهیت و رەهەكا تەحل د ناخێ هەوە دا وەرارێ نەكەت، كو ببیتە ئەگەرێ ئارێشەیێ و ب رێكا وێ رەهێ گەلەك كەس بهەڕمن،
نەكو ئێك ببیتە كەسەكێ دەهمەنپیس یان رێزێ ل پیرۆزیێ ناگریت وەكو عیسۆی، ئەوێ ژ پێخەمەت خوارنەكا ب تنێ نەخریبوونا خۆ فرۆتی.
هوین دزانن پشتی هنگی، دەمێ وی ڤیای ببیتە میراتگرێ بەرەكەتێ، ئەو هاتە رەتكرن، چنكو دەلیڤە بۆ لخۆزڤڕینێ نەدیت، هەر چەندە وی ب رۆندكان داخواز كر.
هوین نەهاتنە نك چیایەكی كو هوین دشێن دەست بكەنێ، ئاگرەكێ ب گوڕی، تاریاتیێ، مژ و موورانێ، باڕۆڤەیێ،
دەنگێ بۆڕیزانێ و دەنگێ ئێكێ دئاخڤیت كو یێن ئەو بهیستی، هیڤی كرین ئێدی ئاخفتنەكا دی بۆ وان نەهێتە گۆتن.
چنكو ئەو نەشیان خۆ ل بەر وی تشتی بگرن یێ فەرمان پێ هاتی: «خۆ ئەگەر گیانەوەرەك ژی دەستێ خۆ بكەتە چیای، دڤێت بهێتە بەربارانكرن.»
ئەو دیمەن هند یێ ب ترس بوو، تاكو مووسای گۆت: «ئەز یێ بەهتیمە و دلەرزم.»
لێ هوین هاتنە نك چیایێ سییۆنێ، باژێڕێ خودایێ زیندی، ئورشەلیما ئەسمانی، نك ئاهەنگەكێ كو فریشتەیێن بێ هژمار خڕڤەكرین،
نك جڤاكا نەخریێن تۆماركری د ئەسمانان دا، نك خودێ، دادوەرێ هەمیان، نك گیانێ راستدارێن هاتینە كاملكرن،
نك عیسای، ناڤبەینكارێ پەیمانا نوی و نك خوینا رەشاندی كو تشتەكێ باشتر ژ گۆتنا خوینا هابیلی دبێژیت.
هشیار بن ئەوێ دئاخڤیت رەت نەكەن. چنكو مادەم ئەو قورتال نەبوون یێن ئەو رەتكری یێ كو ئاگەهداری ل سەر ئەردی داینە وان، ئەڤجا چەند مسۆگەرترە كو ئەم رزگار نابین، ئەگەر ئەم پشتا خۆ بدەینە وی یێ ژ ئەسمانی مە ئاگەهدار دكەت؟
هنگی دەنگێ وی ئەرد هەژاند، لێ نوكە سۆز یا دای و دبێژیت: «جارا بهێت ئەز دێ ب ئێكجاری، نە ب تنێ ئەردی، لێ ئەسمانی ژی هەژینم.»
گۆتنا «جارا بهێت ب ئێكجاری» دیار دكەت كو تشتێن دهێنە هەژاندن، ئانكو تشتێن چێكری، ژ ناڤ دچن، دا ب تنێ ئەو بمینن یێن ناهێنە هەژاندن.
لەوما، ژ بەر كو ئەم پاشایەتیەكا ناهێتە هەژاندن وەردگرین، بلا ئەم سوپاسیا خودێ بكەین و وەسا وی بپەرێسین، ب شێوازەكی كو جهێ رەزامەندیا وی بیت، ئەو شێواز یێ ب خودێترسی و سەهمگرتن بیت.
چنكو «خودایێ مە ئاگرەكێ خۆرەكە.»
بلا حەزژێكرنا برایانە یا بەردەوام بیت.
مێڤانداریا بیانیان ژ بیر نەكەن، چنكو ب ڤێ چەندێ هندەك كەسان فریشتە مێڤان كرینە، بێی كو بزانن.
زیندانكریان بیننە بیرا خۆ، هەروەكو هوین ل گەل وان د زیندانكری بن، ستەملێكریان ژی بیننە بیرا خۆ، هەروەكو ستەم ل هەوە بهێتە كرن.
بلا هەڤژینیێ ل نك هەر ئێكی رێز هەبیت، نڤینێن هەڤژینیێ د هەڕمی نەبن. چنكو خودێ دێ كەسێن بێنامویس و دەهمەنپیسان سزا دەت.
بلا شێوازێ ژیانا هەوە یا بێ حەزژێكرنا پارەی بیت. ب وی تشتێ هەوە هەی د رازی بن، چنكو خودێ گۆتیە: «ئەز چ جاران دەستان ژ تە بەرنادەم، ئەز چ جاران تە ناهێلم.»
لەوما ئەم دشێین ب پشتڕاستی ڤە بێژین: «خودان هاریكارێ منە، لەوما ئەز ناترسم. ما مرۆڤ دشێن چ ل من بكەن؟»
رێبەرێن خۆ بیننە بیرا خۆ، ئەوێن پەیڤا خودێ بۆ هەوە گۆتی. ل ئەنجامێ شێوازێ ژیانا وان بنێڕن و چاڤ ل باوەریا وان بكەن.
عیسایێ مەسیح، دوهی و ئەڤرۆ و هەتا هەتایێ، وەكو خۆیە.
بلا فێركرنێن جۆرا و جۆر و بیانی هەوە ڤاڕێ نەكەن. باشە دل ب كەرەمێ بهێتە قاییم كرن، نە ب خوارنێن تایبەت، یێن كو مفای ناگەهیننە وان یێن ل سەر دچن.
مە قوربانگەهەكا هەی، ئەوێن خزمەتا پەرستگەهێ دكەن، ماف نینە ژێ بخۆن.
ئەو گیانەوەرێن خوینا وان ب دەستێ سەرۆككاهنی، وەكو قوربانیێ گونەهان، دهێتە د پیرۆزگەهێ ڤە، لەشێ وان ژ دەرڤەی خیڤەتگەهێ دهێتە سۆتن.
لەوما عیسای ژی ژ دەرڤەی دەرگەهێ باژێڕی ئازار كێشا، داكو گەلێ خۆ ب خوینا خۆ پیرۆز بكەت.
ئەڤجا دا بچینە نك وی، ژ دەرڤەی خیڤەتگەهێ و شەرمزاریا وی هەلگرین.
چنكو ل ڤێرێ مە باژێڕەك نینە كو بمینیت، لێ ئەم د هزرەتا باژێڕێ پاشەڕۆژێ داینە.
ئەڤجا دا ب رێكا عیسای، قوربانێ كو پەسنە هەردەم پێشكێشی خودێ بكەین، ئانكو بەرهەمێ وان لێڤان یێن دانپێدانێ ب ناڤێ وی دكەن.
هەروەسا كرنا قەنجیێ و دانا تشتێن هەوە هەین بۆ یێن هەوجە پشت گو‍‌ھ ڤە نەهاڤێژن، چنكو قوربانێن هۆسا خودێ دلخۆش دكەن.
گوهداریا رێبەرێن خۆ بكەن و ملكەچی وان بن، چنكو ئەو وەكو ئێكێ دێ حساب ل گەل هێتە كرن چاڤدێریێ ل گیانێ هەوە دكەن. هوین وێ چەندێ بكەن، دا ئەو ب كەیفخۆشی ب كارێ خۆ راببن، نە ب بێزاری، چنكو ئەگەر هوین وان بێزار بكەن، بۆ هەوە یا بێ مفایە.
نڤێژان بۆ مە بكەن. ئەم د پشتڕاستین كو مە وژدانەكا پاقژ یا هەی، حەز دكەین د هەمی تشتان دا رەفتارا مە یا باش بیت.
ئەز پتر داخوازێ ژ هەوە دكەم كو هوین نڤێژان بكەن، داكو زویتر ڤەگەڕمە نك هەوە.
بلا خودایێ ئاشتیێ، یێ خودانێ مە عیسا كو ب خوینا پەیمانا هەتا هەتایی شڤانێ مەزن یێ پەزیە، ژ ناڤ مریان راكریەڤە،
هەوە ب هەر تشتەكێ باش ئامادە بكەت، دا هوین حەزا وی ب ج‍‌ھ بینن. بلا كارێ ب دلێ خۆ ب رێیا عیسایێ مەسیح د مە دا بكەت، هەتا هەتایێ مەزناهی بۆ وی بیت. ئامین.
داخوازێ ژ هەوە دكەم، گەلی خویشك و برایان، كو هوین ب بێهنفرەهی گو‍‌ھ بدەنە ڤان گۆتنێن هاندانێ، چنكو من بۆ هەوە ب كورتی نڤیسینە.
بزانن كو برایێ مە تیمۆتاوس یێ هاتیە ئازادكرن. ئەگەر زوی هات، ئەز دێ ل گەل وی سەرەدانا هەوە كەم.
سڵاڤان ل هەمی رێبەرێن خۆ و ل هەمی پیرۆزكریان بكەن. ئەوێن ل ئیتالیا سڵاڤان ل هەوە دكەن.
كەرەم ل سەر هەوە هەمیان بیت.
ژ من، یەعقوب، بەنیێ خودێ و خودان عیسایێ مەسیح، بۆ هەر دوازدە هۆزێن دەربەدەر، سڵاڤ.
خویشك و برایێن من، دەمێ هوین دكەڤنە د تاقیكرنێن جۆراوجۆر دا، وێ چەندێ ب تەمامی وەكو دلخۆشی بهژمێرن،
چنكو هوین دزانن تاقیكرنا باوەریا هەوە، خۆڕاگرتن پێڤە دهێت.
بلا خۆڕاگرتنێ ژی كارتێكرنا خۆ یا تەمام ل سەر هەوە هەبیت، دا هوین د پێگەهشتی و كامل بن، چ كێماسی ل هەوە نەبن.
ئەگەر ئێك ژ هەوە ئاقلمەندی یا ژێ كێم بیت، بلا ژ خودێ بخوازیت و دێ بۆ وی هێتە دان. خودێ ب مەردینی و بێ گازندە ددەتە هەمیان.
لێ بلا ب باوەری بخوازیت بێی كو گۆمان د دلی دا بیت، چنكو یێ گۆمان د دلی دا بیت، وەكو پێلەكا دەریایێیە، با دئینیت و دبەت.
مرۆڤەكێ وەسا، بلا هزر نەكەت كو ئەو دێ تشتەكی ژ خودانی وەرگریت.
ئەو مرۆڤەكێ دوودلە و د هەمی كارێن خۆ دا یێ لقلقۆكە.
بلا برایێ هەژار شانازیێ ب جهێ خۆ یێ بلند ببەت،
یێ دەولەمەند ژی بلا شانازیێ ب جهێ خۆ یێ نزم ببەت، چنكو ئەو دێ وەكو كولیلكا گیای ژ ناڤ چیت.
ژ بەر كو رۆژ ب گەرما خۆ یا سوژەك دهەلێت و گیای هشك دكەت، ئەڤجا كولیلكا وێ دوەریێت و جوانیا وێ نامینیت. ب هەمان شێوە ئەوێ دەولەمەند ژی دێ د ناڤ چالاكیێن خۆ دا چرمسیت.
خوزیكێن وی كەسی یێ د تاقیكرنێ دا خۆ رادگریت، چنكو دەمێ ئەو سەرفەراز دەردكەڤیت، دێ تانجا ژیانێ وەرگریت، ئەوا خودێ سۆزا وێ دایە حەزژێكەرێن خۆ.
دەمێ كەسەك دكەڤیتە د تاقیكرنەكێ دا، بلا نەبێژیت: «ئەز ژ لایێ خودێ ڤە یێ دهێمە تاقیكرن،» چنكو خودێ ب خرابیێ ناهێتە تاقیكرن و ئەو ب خۆ كەسێ ب خرابیێ تاقی ناكەت.
لێ هەر كەسەك ژ لایێ حەزێن خۆ ڤە دهێتە راكێشان و راخڕاندن و هۆسا ئەو دهێتە تاقیكرن.
پشتی هنگی، دەمێ حەز ب دووگیان دكەڤیت، گونە‍‌ھ ژێ دبیت، گونە‍‌ھ ژی دەمێ پێدگەهیت، مرن ژێ دبیت.
خویشك و برایێن من یێن خۆشتڤی، نەهێنە خاپاندن.
هەر دانەكا باش و هەر دیاریەكا بێكێماسی ژ سڵالە، ژ نك بابێ رۆناهیان خوار دكەڤیت، ئەوێ ناهێتە گوهۆڕین، خۆ بچویكترین سیبەرا گوهۆڕینێ ژی نینە.
ل دویڤ حەزا خۆ ب رێكا پەیڤا راستیێ وی ئەم بووین ، داكو ببینە خێڤەیێ ئافراندیێن وی.
خویشك و برایێن من یێن خۆشتڤی، ڤێ چەندێ باش بزانن: بلا هەر مرۆڤەك یێ لەزگین بیت بۆ بهیستنێ، یێ لەزگین نەبیت بۆ ئاخفتنێ، یێ لەزگین نەبیت بۆ تۆڕەبوونێ،
چنكو تۆڕەبوونا مرۆڤی راستداریا خودێ ئەنجام نائینیت.
لەوما هەر پیساتی و خرابیەكا د ناخێ هەوە دا گەشە كری بهاڤێژن و ئەو پەیڤا د ناخێ هەوە دا دهێتە چاندن، ئەوا دشێت گیانێ هەوە قورتال بكەت، ب دەروونبچویكی قەبیل بكەن.
ئەو بن یێن پەیڤێ ب ج‍‌ھ دئینن، نە ئەو بن یێن ب تنێ وێ دبهیسن و هۆسا خۆ دخاپینن.
ئەگەر كەسەك پەیڤێ ببهیسیت و ب ج‍‌ھ نەئینیت، ئەو وەكو وی كەسیە یێ د خۆدیكێ را ل سەروچاڤێن خۆ دنێڕیت،
ئەو ل خۆ دنێڕیت و دچیت و د ج‍‌ھ دا ژ بیرێ دچیت كا یێ چەوایە.
لێ ئەوێ ب هویری ل دەستوورێ بێكێماسی، دەستوورێ ئازادیێ ، دنێڕیت و خۆ ل سەر رادگریت، نەبیتە كەسەك كو دبهیسیت و ژ بیر دكەت، لێ ببیتە كارپێكەرێ وی دەستووری، ئەو دێ د كارێن خۆ دا یێ بەختەوەر بیت.
ئەگەر ئێك خۆ ئاییندار بهژمێریت و ئەزمانێ خۆ لغاڤ نەكەت، ئەو خۆ دخاپینیت و ئایینداریا وی یا ژ قەستایە.
ئایینداریا پاقژ و بژوین ل نك خودایێ باب ئەوە كو مرۆڤ چاڤێ خۆ بدەتە ئێتیم و بیژنان د تەنگاڤیێن وان دا و خۆ ژ هەڕماتیا جیهانێ بپارێزیت.
خویشك و برایێن من، مادەم هوین باوەریێ ب خودانێ مە عیسایێ مەسیح، خودانێ مەزناهیێ، دئینن، جوداهیێ نەئێخنە د ناڤبەرا مرۆڤان دا.
ئەگەر ئێك هاتە د كۆمبوونا هەوە دا، گوستیرەكا زێڕی د تبلێ بیت و جلكێن پڕبها ل بەر بن، هەروەسا ئێكێ هەژار كو كنجڕ ل بەر بن ب ژۆر كەفت،
ئەڤجا هەوە پویتە ب خودانێ جلكێن پڕبها دا و گۆتێ: «كەرەم كە، ل ڤێرێ ل سەرێ ژۆری روینە» و گۆتە یێ هەژار: «تۆ ل وێرێ راوەستە» یان «ل بەر پێیێن من روینە،»
ما هەوە د ناڤبەرا خۆ دا جوداهی نەكر؟ ما هوین نەبوونە دادوەرێن هزر خراب؟
خویشك و برایێن من یێن خۆشتڤی، گوهێ خۆ بدەنێ: ما خودێ هەژارێن ڤێ جیهانێ هەلنەبژارتینە كو ب باوەریێ د دەولەمەند بن و میراتگرێن وێ پاشایەتیێ بن، ئەوا وی سۆزا وێ دایە وان یێن حەز ژ وی دكەن؟
لێ هەوە یێ هەژار بێڕێز كر. ما نە دەولەمەندن یێن زۆرداریێ ل هەوە دكەن؟ ما نە ئەون هەوە رادكێشنە دادگەهان؟
ما نە ئەون یێن كوفریان ب وی ناڤێ باش دكەن، ئەوێ هوین پێ هاتینە بناڤكرن؟
ئەگەر هوین دەستوورێ پاشایانە ب ج‍‌ھ بینن، ئەوێ د نڤیسارێ دا هاتی كو دبێژیت: «حەز ژ نێزیكێ خۆ بكە، وەك چەوا تۆ حەز ژ خۆ دكەی،» هوین باش دكەن.
لێ ئەگەر هوین جوداهیێ بئێخنە د ناڤبەرا مرۆڤان دا، هوین گونەهێ دكەن و ژ لایێ دەستووری ڤە ل هەوە وەكو سەرپێچكار دهێتە حەیتاندن.
ئەوێ هەمی دەستووری ب ج‍‌ھ بینیت، لێ د خالەكا ب تنێ دا بهەلنگڤیت، ئەڤە ئەو د هەمیێ دا یێ گونەهبارە.
ژ بەر كو ئەوێ گۆتی: «دەهمەنپیسیێ نەكە»، هەروەسا یێ گۆتی: «كوشتنێ نەكە». ئەڤجا ئەگەر تە دەهمەنپیسی نەكر، لێ كوشتن كر، ئەڤە تۆ بوویە سەرپێچكار ل سەر دەستووری.
هۆسا بئاخڤن و هۆسا كار بكەن وەكو وان یێن كو دێ ب دەستوورێ ئازادیێ هێنە دادكرن.
چنكو دادكرن یا بێ دلۆڤانیە بۆ وی یێ دلۆڤانی نەبری، لێ دلۆڤانی ب سەر دادكرنێ دكەڤیت.
چ مفا تێدایە، خویشك و برایێن من، ئەگەر ئێك بێژیت كو وی باوەریا هەی، لێ وی كریار نینن، ئایا باوەری دشێت وی قورتال بكەت؟
ئەگەر برایەك یان خویشكەك رویس ما و نانێ رۆژانە نەبیت
و ئێك ژ هەوە بێژیتە وان: «ب خێر بچن، خۆ گەرم كەن و تێر بخۆن»، لێ هەوە هەوجەییێن وان یێن لەشی نەدانێ، چ مفا تێدایە؟
ب هەمان شێوە باوەریا ب تنێ ژی، ئەگەر یا بێ كریار بیت، ئەو یا مریە.
دبیت ئێك ببێژیت: «تە باوەریا هەی و من كریار یێن هەین.» لێ ئەز دێ بێژم: كا باوەریا خۆ بێی كریار نیشا من بدە و ئەز دێ ب كریارێن خۆ باوەریا خۆ نیشا تە دەم.
تۆ باوەر دكەی كو خودێ ئێكە، تۆ باش دكەی. خۆ ئەجنە ژی باوەر دكەن و دلەرزن.
ما تە بەلگە دڤێن، هەی مرۆڤێ بێئاقل، كو باوەری بێی كریار یا بێمفایە؟
ما بابێ مە ئیبراهیم ب كریاران راستدار نەهاتە دەرئێخستن، دەمێ كوڕێ خۆ ئیسحاق ل سەر قوربانگەهێ پێشكێش كری؟
تۆ دبینی كو باوەریێ ل گەل كریارێن وی كار دكر و ب كریاران باوەری هاتە تەمام كرن.
هۆسا گۆتنا نڤیسارێ ب ج‍‌ھ هات: «ئیبراهیمی باوەر ژ خودێ كر، ئەڤە ژی بۆ وی وەكو راستداری هاتە هژمارتن» و ب دۆستێ خودێ هاتە بناڤكرن.
هوین دبینن كو مرۆڤ ب كریاران دهێتە راستدار كرن، نە ب تنێ ب باوەریێ.
ب هەمان شێوە ژی راحابا لەشفرۆش، ما ب كریاران راستدار نەهاتە هژمارتن، دەمێ هنارتی قەبیل كرین و د رێكەكا دی را ب رێ ئێخستین؟
ئەڤجا كا چەوا لەش بێی گیان یێ مریە، وەسا باوەری ژی بێی كریار یا مریە.
بلا گەلەك ژ هەوە نەبنە مامۆستا، خویشك و برایێن من، چنكو هوین دزانن ئەم مامۆستا دێ دادكرنەكا مەزنتر وەرگرین.
ئەم هەمی د گەلەك تشتان دا شاشیان دكەین. ئەگەر ئێك د ئاخفتنا خۆ دا شاش نەبیت، ئەو مرۆڤەكێ كاملە، دشێت لەشێ خۆ هەمیێ ژی لغاڤ بكەت.
ئەگەر ئەم دەڤێ هەسپان لغاڤ كەین دا ب حەزا مە بكەن، ئەم دشێین بەرێ هەمی لەشێ وان ژی بدەینە وی لایێ مە بڤێت.
هەروەسا ل گەمیان ژی بنێڕن: سەرەڕای كو ئەو هند د مەزنن و ب بایێن ب هێز دهێنە هاژوتن، لێ گەمیڤان ب دەستكەكێ بچویك یێ ئاراستەكرنێ بەرێ وان ددەتە وی لایێ وی بڤێت.
ب ڤی شێوەی ئەزمان ژی ئەندامەكێ بچویكە، لێ شانازیێ ب كارتێكرنا خۆ یا مەزن دبەت. بنێڕن ئاگرەكێ بچویك، دارستانەكا چەندا مەزن دسوژیت!
ئەزمان ژی ئاگرە. ئەزمان د ناڤ ئەندامێن لەشێ مە دا وەكو جیهانەكا خرابیێ هاتیە دانان، هەمی لەشی دهەڕمینیت و ئاگری بەرددەتە هەمی ژیانا مرۆڤی و ئاگرێ وی ب خۆ ژی ژ دۆزەخێ بەردبیتێ.
هەر جۆرەكێ گیانەوەرێن چوار پێ و باڵندە و خشۆك و یێن ئاڤی ژ لایێ مرۆڤی ڤە زاڵبوون ل سەر دهێتە كرن و هاتیە كرن.
لێ چ مرۆڤ نەشێن ل سەر ئەزمانی زاڵ ببن. ئەزمان خرابیەكا هارە، یێ پڕە ژ ژەهرا كوژەك.
ب وی ئەم پەسنا خودانێ باب دكەین و ب وی ژی ئەم نفرینان ل مرۆڤان دكەین، ئەوێن ل سەر وێنەیێ خودێ هاتینە چێكرن.
ژ هەمان دەڤ پەسن و نفرین دەردكەڤن. خویشك و برایێن من، دڤێت ئەڤ چەندە ژی یا هۆسا نەبیت.
ما ژ هەمان كانی ئاڤا شرین و ئاڤا تەحل دزێت؟
خویشك و برایێن من، ما دارهژیر دشێت زەیتوونان بدەت، یان ژی مێو دشێت هژیران بدەت؟ وەسا ژی ژ كانیا ئاڤا سویر ئاڤا شرین نازێت.
د ناڤ هەوە دا كی یێ ئاقلمەند و تێگەهشتیە؟ بلا ب رەفتارا باش نیشان بدەت كو كریارێن وی ل دویڤ دەروونبچویكیا ئاقلمەندیێ دهێنە كرن.
لێ ئەگەر زكڕەشیەكا تەحل و خۆپەرێسی د دلێ هەوە دا هەبیت، شانازیێ ب خۆ نەبەن و هۆسا درەوان ل راستیێ بكەن.
ئاقلمەندیەكا هۆسا ژ ئەسمانی ناهێت، لێ یا ئەردكانیە ، یا مرۆڤكانیە و یا ئبلیسكانیە.
چنكو ل كیرێ زكڕەشی و خۆپەرێسی هەبن، ل وێرێ تێكدان و هەمی خرابكاری یێن هەین.
لێ ئەو ئاقلمەندیا ژ سڵال، ئەو بەری هەر تشتی یا پاكە، پاشی یا ئاشتیخوازە، دلنەرمە، سەرنەرمە، پڕی دلۆڤانی و بەرهەمێ چاكە، لایەنگر نینە و بێ دووڕویاتیە.
چێكەرێن ئاشتیێ تۆڤێ ئاشتیێ دچینن و راستداریێ ژێ دهەلینن.
شەڕ و هەڤڕكیێن د ناڤ هەوە دا ژ كیڤە دهێن؟ ما نە ژ حەزێن هەوە دهێن، یێن د ناخێ هەوە دا دجەنگن؟
حەزا هەوە ل سەر تشتەكیە، لێ هوین ژێ د بێ بەهرن، ئەڤجا هوین كوشتنێ دكەن. دلچوونێ دكەن و نەشێن ب دەست خۆ ڤە بینن، ئەڤجا هەڤڕكیێ و شەڕی دكەن. هوین ژێ د بێ بەهرن، چنكو ژ خودێ ناخوازن.
هوین دخوازن، لێ وەرناگرن، چنكو ب نیازەكا شاش دخوازن، دا ل حەزێن خۆ بمەزێخن.
گەلی دەهمەنپیسان! ما هوین نزانن هەڤالینی ل گەل جیهانێ، دوژمناتیە ل گەل خودێ؟ لەوما یێ دڤێت ببیتە هەڤالێ جیهانێ، ئەو خۆ دكەتە دوژمنێ خودێ.
ما هوین هزر دكەن كو نڤیسار ژ قەستا دبێژیت: ‹خودێ ب ئیرەیی بیریا وی گیانی دكەت یێ د مە دا ئاكنجی كری›؟
لێ ئەو كەرەمەكا مەزنتر ددەت، لەوما دبێژیت: «خودێ بەرهنگاریا دفنبلندان دكەت، لێ كەرەمێ ددەتە دەروونبچویكان.»
لەوما ملكەچی خودێ ببن. دژی ئبلیسی راوەستن و ئەو دێ ژ بەر هەوە رەڤیت.
خۆ نێزیكی خودێ بكەن، ئەو ژی دێ خۆ نێزیكی هەوە كەت. دەستێن خۆ پاقژ بكەن، گەلی گونەهكاران. دلێ خۆ پاك بكەن، گەلی دوودلان.
خەمگین ببن، شینیێ دانن و بگریێن. بلا كەنیا هەوە ببیتە شینی، شادیا هەوە ژی ببیتە خەم.
خۆ ل بەرامبەر خودانی بشكێنن و ئەو دێ هەوە بلند كەت.
ب خرابی بەحسێ ئێكودوو نەكەن، خویشك و برایێن من. یێ ب خرابی بەحسێ برایێ خۆ بكەت و برایێ خۆ داد بكەت، ئەو ب خرابی بەحسێ دەستووری دكەت و دەستووری داد دكەت. ئەڤجا ئەگەر تۆ دەستووری داد بكەی، ئەو تۆ كارپێكەرێ دەستووری نینی، لێ تۆ دادوەری ل سەر دەستووری.
ب تنێ ئێك دەستووردانەر و دادوەر هەیە، ئەوە یێ دشێت قورتال بكەت و ژ ناڤ ببەت. ئەڤجا تۆ كی دا نێزیكێ خۆ داد بكەی؟
وەرن، گەلی ئەوێن دبێژن: «ئەڤرۆ یان سوبەهی دێ چینە فلان یان بێڤان باژێڕی و دێ ساڵەكێ ل وێرێ مینین و بازرگانیێ كەین و قازانج كەین،»
هوین چ ژ سوبەهی نزانن. ما ژیانا هەوە چیە؟ هەلمەكە كو دەمەكێ كورت دیار دبیت، پاشی نامینیت.
ل شوینا وێ دڤێت هوین بێژن: «ئەگەر خودان حەز بكەت، ئەم دێ ژین و فلان یان بێڤان كاری كەین.»
لێ نوكە هوین ب دفنبلندی شانازیێ ب خۆ دبەن. هەر شانازیەكا هۆسا یا خرابە.
ئەڤجا یێ بزانیت باشیێ بكەت و نەكەت، ئەو بۆ وی گونەهە.
وەرن گەلی دەولەمەندان، ژ بەر وان دەردەسەریێن دێ ب سەرێ هەوە هێن، بگریێن و قێڕیان راهێلن.
سامانێ هەوە یێ گەنی بووی و خویركان جلكێن هەوە خوارینە،
زێڕ و زیڤێن هەوە یێن ژەنگی بووین، ژەنگا وان دێ شاهدەییێ ل سەر هەوە دەت و وەكو ئاگری دێ گۆشتێ هەوە خۆت. هەوە د رۆژێن دویماهیێ دا گەنجینە كۆم كر.
ئەڤە ئەو كرێیا هەوە نەدایە وان پالەیان یێن زەڤیێن هەوە دروین، دكەتە قێژی. هەوارا یێن دروین كری یا گەهشتیە گوهێن خودانێ لەشكەران.
هەوە ل جیهانێ ژیانەكا شاهانە و ب كەیف دەرباز كر و دلێ خۆ بۆ رۆژا سەرژێكرنێ ربیتە كر.
هەوە یێ بێگونە‍‌ھ گونەهبار كر و كوشت، هەر چەندە ئەو بەرهنگاریا هەوە ناكەت.
ئەڤجا گەلی خویشك و برایان، تا هاتنا خودانی بێهنا خۆ فرە‍‌ھ كەن. بەرێ خۆ بدەنێ كا چەوا جۆتیار چاڤەڕێی بەرهەمێ پڕبها یێ ئەردی دكەت، بێهنا خۆ لێ فرە‍‌ھ دكەت تاكو بارانێن پاییز و بهارێ لێ دبارن.
هوین ژی بێهنا خۆ فرە‍‌ھ كەن و دلێ خۆ موكم كەن، چنكو هاتنا خودانی یا نێزیكە.
پتەپتێ ل سەر ئێكودوو نەكەن گەلی خویشك و برایان، دا هوین نەهێنە دادكرن. ئەڤە دادوەر ل بەر دەرگەهیە!
گەلی خویشك و برایان، بۆ خۆ پێغەمبەرێن ب ناڤێ خودانی ئاخفتین بكەنە نموونەیا بێهنفرەهیێ د ئازاركێشانێ دا.
ئەڤە ئەم خوزیێ ب وان رادهێلین یێن خۆڕاگرتی. هەوە خۆڕاگرتنا ئەیوبی بهیستیە و هەوە دیت كا ل دویماهیێ خودانی بۆ وی چ كر. چنكو خودان گەلەك یێ دلنازك و دلۆڤانە.
لێ بەری هەر تشتەكی، خویشك و برایێن من، سویند نەخۆن: نە ب ئەسمانی و نە ب ئەردی و نە ژی ب تشتەكێ دی. بلا ‹بەلێ› یا هەوە ‹بەلێ› بیت و ‹نە› یا هەوە ‹نە› بیت، دا نەهێنە دادكرن.
ما ئێك د ناڤ هەوە دا هەیە د نەخۆشیێ دا بیت؟ بلا نڤێژێ بكەت. ما ئێكێ دلخۆش هەیە؟ بلا سترانێن پەسنكرنا خودێ بێژیت.
ما ئێك د ناڤ هەوە دا هەیە یێ نەساخ بیت؟ بلا ریهسپیێن جڤاكا باوەرداران داخواز كەت و ئەو نڤێژێ ل سەر بكەن و ب ناڤێ خودانی وی زەیت كەن.
نڤێژا ب باوەری دێ نەساخی ساخ كەت و خودان دێ وی راكەتەڤە و ئەگەر وی گونەهەك كربیت، دێ لێ هێتە بورین.
لەوما بۆ ئێكودوو دانپێدانێ ب گونەهێن خۆ بكەن و بۆ ئێكودوو نڤێژان بكەن، دا هوین ساخ ببن. نڤێژا مرۆڤێ راستدار گەلەك یا ب هێز و كاریگەرە.
ئلیاس ژی مرۆڤەكێ وەكو مە بوو. وی ب گەرمی نڤێژ كر كو باران نەباریت، ئەڤجا سێ ساڵ و شەش هەیڤان باران ل سەر رویێ ئەردی نەباری.
پاشی وی دیسان نڤێژ كر، ئەڤجا ئەسمانی باران باراند و ئەردی بەرهەمێ خۆ دەرئێخست.
گەلی خویشك و برایێن من، ئەگەر ئێك ژ هەوە ژ راستیێ ڤاڕێ بوو و ئێكی ئەو ڤەگەڕاند،
بلا بزانیت كو ئەوێ گونەهكارەكی ژ رێكا وی یا ڤاڕێ ڤەگەڕینیت، ئەو دێ كەسەكی ژ مرنێ قورتال كەت و گەلەك گونەهان نخێڤیت.
ژ من، پەترۆس، هنارتیێ عیسایێ مەسیح، بۆ كۆچبەرێن بەڵاڤبووی ل هەرێمێن پۆنتۆس، گالاتیا، كەپەدۆكیا، ئاسیا و بیتینیایێ،
ئەوێن ل دویڤ زانینا پێشوەخت یا خودایێ باب هاتینە هەلبژارتن و ب گیانێ پیرۆز هاتینە تەرخانكرن، دا گوهداریا عیسایێ مەسیح بكەن و ب خوینا وی بهێنە رەشاندن: كەرەم و ئاشتی ل سەر هەوە زێدە ببن.
مەزناهی بۆ خودێ، بابێ خودانێ مە عیسایێ مەسیح، ئەوێ ل دویڤ دلۆڤانیا خۆ یا زێدە ب رێكا رابوونا عیسایێ مەسیح ژ ناڤ مریان، ژدایكبوونەكا نوی دایە مە و هۆسا مە هیڤیەكا زیندی
و میراتەكێ پویچ نابیت و ناهەڕمیت و ناچرمسیت هەیە. ئەو بۆ هەوە ل ئەسمانان هاتیە هەلگرتن.
هوین ئەون یێن ب رێكا باوەریێ ژ لایێ هێزا خودێ ڤە دهێنە پاراستن، بۆ وێ قورتالبوونێ كو یا ئامادەیە د دەمێ دویماهیێ دا بهێتە ئاشكراكرن.
هوین ب وێ چەندێ دلخۆش دبن، سەرەڕای كو نوكە دڤێت هوین بۆ دەمەكێ كورت ژ بەر تاقیكرنێن جۆراوجۆر تووشی خەمگینیێ ببن،
دا بەلگەیێ باوەریا هەوە، ئەوێ ب بهاتر ژ زێڕێ ژ ناڤ دچیت، یێ كو ب ئاگری دهێتە تاقیكرن، ببیتە جهێ پەسن و مەزناهی و سەربلندیێ ل دەمێ دیاربوونا عیسایێ مەسیح.
سەرەڕای كو هەوە ئەو نەدیتیە، لێ هوین حەز ژ وی دكەن و سەرەڕای كو نوكە هوین وی نابینن، لێ هوین باوەریێ پێ دئینن، ب دلخۆشیەكا پڕی مەزناهی و ناهێتە سالۆخدان دلخۆش دبن.
چنكو هوین ئەنجامێ باوەریا خۆ وەردگرن، ئەو ژی قورتالبوونا گیانێن هەوەیە.
دەربارەی ڤێ قورتالبوونێ، پێغەمبەرێن پەیاما خودێ راگەهاندی ل دۆر وێ كەرەما خودێ بۆ هەوە ئامادە كربوو، لێگەڕیان و ڤەكۆلین كرن.
گیانێ مەسیحی یێ د وان دا، پێشوەخت بۆ وان شاهدەیی ددا ل سەر ئازارێن مەسیحی و مەزناهیێن پشتی هنگی دێ هێن، وان ژی بزاڤ دكر كو بزانن كا كەنگی و د رەوشەكا چەوا دا دێ ئەڤ چەندە روی دەت.
بۆ وان هاتە دیاركرن، كو وان نە بۆ خۆ، لێ بۆ هەوە خزمەت دكر، دەمێ بەحسێ وان تشتان دكر یێن نوكە بۆ هەوە هاتینە راگەهاندن، ب رێكا وان یێن ب هێزا گیانێ پیرۆز، ئەوێ ژ ئەسمانی هاتیە هنارتن، مزگینی دایە هەوە. فریشتە ژی گەلەك حەز دكەن ل وان تشتان بنێڕن.
لەوما مێشكێ خۆ بۆ كاری ئامادە بكەن و ل سەر هشێن خۆ بن، ب تەمامی هیڤیا خۆ ب وێ كەرەمێ ڤە گرێ بدەن، ئەوا ل دەمێ دیاربوونا عیسایێ مەسیح دێ بۆ هەوە هێتە ئینان.
وەكو زاڕۆكێن گوهدار، خۆ ل گەل ئارەزوویێن بەرێ یێن دەمێ نەزانینا خۆ نەگونجینن،
لێ كا چەوا خودێ، ئەوێ گازی هەوە كری، یێ پیرۆزە، هوین ژی د هەمی رەفتارێن خۆ دا د پیرۆز بن.
چنكو یا هاتیە نڤیسین: «د پیرۆز بن، چنكو ئەز یێ پیرۆزم.»
ئەگەر هوین دبێژنە وی ‹باب›، یێ ل دویڤ كارێ هەر كەسەكی، بێی لایەنگری حوكمی ددەت، دەمێ خۆ یێ كۆچبەریێ د ترسا وی دا دەرباز بكەن.
چنكو هوین دزانن كو هوین نە ب تشتێن ژ ناڤ دچن، وەكو زێڕ یان زیڤ، ژ وێ ژیانا بێمفا یا هەوە ژ باب و باپیرێن خۆ وەرگرتی، هاتینە ئازاد كرن،
لێ ب خوینەكا بهاگران، هەروەكو یا بەرخەكێ بێكێماسی و بێپنی بیت، هاتینە ئازاد كرن، ئەو ژی خوینا مەسیحیە.
ئەو بەری دامەزراندنا جیهانێ هاتە دەستنیشانكرن، لێ ژ پێخەمەت هەوە د ڤان سەردەمێن دویماهیێ دا هاتە دیار كرن.
ب رێكا وی هەوە باوەری ب خودێ هەیە، ئەو خودایێ ئەو ژ ناڤ مریان راكری و مەزناهی دایێ، لەوما باوەری و هیڤیا هەوە ب خودێیە.
هەوە دەروونێ خۆ ب ملكەچبوونا راستیێ پاك كریە و هۆسا حەزژێكرنا هەوە یا برایانە یا بێ دووڕویاتیە، ئەڤجا ژ نیڤا دلی ب گەرمی حەز ژ ئێكودوو بكەن.
هوین ب رێكا پەیڤا خودێ یا زیندی یا دمینیت ژ دایك بووینەڤە، نە ژ تۆڤەكێ كو پویچ دبیت، لێ ژ یێ پویچ نابیت.
چنكو: «هەمی مرۆڤ وەكو گیاینە و هەمی مەزناهیا وی وەكو كولیلكا گیایە. گیا هشك دبیت و كولیلك دوەریێت.
لێ پەیڤا خودانی هەتا هەتایێ دمینیت.» ئەڤە ئەو پەیڤە یا بۆ هەوە وەكو مزگینی هاتیە راگەهاندن.
ئەڤجا هەر كینێ، هەر فێلبازیێ، دووڕویاتیێ، زكڕەشیێ و هەر جۆرەكێ بوهتانێ ژ دلێ خۆ بهاڤێژن.
هوین خۆ نێزیكی وی دكەن، یێ كو بەرەكێ زیندی یێ رەتكریە ژ لایێ مرۆڤان ڤە، لێ یێ هەلبژارتی و بهاگرانە ژ لایێ خودێ ڤە،
ئەڤجا هوین ژی وەكو بەرێن زیندی بۆ خانیەكێ روحانی دهێنە بەستن، دا ببنە كاهنێن پیرۆز و ب رێكا عیسایێ مەسیح قوربانێن روحانی یێن جهێ رازیبوونا خودێ پێشكێش بكەن.
چنكو د نڤیسارێن پیرۆز دا دبێژیت: «ئەڤە ئەز یێ ل سییۆنێ بەرەكێ بنیاتی، یێ هەلبژارتی و بهاگران، ددانم. ئەوێ باوەریێ پێ بینیت، ئێكجار شەرمزار نابیت.»
ئەڤجا ژ بۆ هەوە باوەرداران، ئەو یێ بهاگرانە، لێ ژ بۆ یێن نەباوەردار، «ئەو بەرێ هۆستایان رەتكری، یێ بوویە بەرێ بنیاتی،»
و «بەرێ هەلنگفتنێ و كەڤرێ ئەگەرێ كەفتنا وان.» ئەو دهەلنگڤن، چنكو گوهداریا پەیڤێ ناكەن، بۆ ڤێ چەندێ ژی ئەو یێن هاتینە دەستنیشانكرن.
لێ هوین دویندەهەكا هەلبژارتینە، كاهنێن پاشایانەنە، مللەتەكێ پیرۆزن و گەلێ تایبەت یێ خودێنە، دا هوین چاكیێن وی یێ هوین ژ تاریاتیێ گازی كرینە رۆناهیا خۆ یا سەیر، رابگەهینن.
دەمەكی هوین نە گەل بوون، لێ نوكە هوین گەلێ خودێنە. دەمەكی دلۆڤانی ب هەوە نەدهاتە برن، لێ نوكە دلۆڤانی ب هەوە هاتیە برن.
گەلی خۆشتڤیان، ئەز هیڤی ژ هەوە دكەم، هوین وەكو بیانی و رێڤنگ ل ڤێ جیهانێ، خۆ ژ ئارەزوویێن لەشی یێن دژی دەروونی شەڕی دكەن، دویر بئێخن.
بلا د ناڤ مللەتان دا رەفتارێن هەوە د باش بن، دا سەرەڕای كو ئەو نەكامیا هەوە دكەن كو هوین خرابكارن، كریارێن هەوە یێن باش ببینن و پەسنا خودێ بكەن د رۆژا هاتنا وی دا.
ژ بەر خاترا خودانی، خۆ ملكەچی هەر دەستهەلاتەكا مرۆڤكانی بكەن: چ بۆ پاشای، وەكو سەروەرێ ژ هەمیان بلندتر،
یان بۆ والیان، وەكو هنارتیێن وی دا خرابكاران سزا بدەن و پەسنا بكەرێن كارێ باش بكەن.
چنكو حەزا خودێ ئەڤەیە: ب كرنا باشیێ دەنگێ نەزانینا كەسێن دەبەنگ مت كەن.
وەكو مرۆڤێن ئازاد بژین، لێ ئازادیێ نەكەنە پەردەیا ڤەشارتنا خرابكاریێ، بەلكو وەكو بەنیێن خودێ بژین.
رێزێ ل هەمی مرۆڤان بگرن، حەز ژ برایەتیا باوەرداران بكەن، ژ خودێ بترسن، رێزێ ل پاشای بگرن.
گەلی بەنیان، ب هەمی رێزگرتن ملكەچی خودانێن خۆ بن، نە ب تنێ بۆ یێن باش و دلنەرم، لێ بۆ یێن دلڕەق ژی.
چنكو جهێ رازیبوونێیە ئەگەر كەسەك ژ بەر وژدانا خۆ ل بەرامبەر خودێ، خۆ ل بەر ژانا ئازاردانەكا بێداد بگریت.
ما ئەگەر هوین خرابیەكێ بكەن و ژ بەر وێ قوتانێ بخۆن و خۆ راگرن، چ شانازی تێدا هەیە؟ لێ ئەگەر هوین ل سەر كرنا باشیێ بهێنە ئازاردان و خۆ راگرن، ئەو تشت جهێ رازیبوونا خودێیە.
بۆ وی تشتی هوین یێن هاتینە گازیكرن، چنكو مەسیحی ژی ژ پێخەمەت هەوە ئازار كێشان و هۆسا نموونەیەك بۆ هەوە ب ج‍‌ھ هێلا، دا ل دویڤ شووپا وی بچن،
«ئەوێ چ گونە‍‌ھ نەكرین و چ فێلبازی د دەڤی دا نەبوون.»
دەمێ ئاخفتنێن كرێت دهاتنێ، وی ئاخفتنێن كرێت ل وان ڤەنەدگەڕاندن. دەمێ دهاتە ئازاردان، وی گەف نەدكرن، لێ خۆ رادەستی وی دكر یێ دادوەرانە حوكمی ددەت.
وی ب خۆ ل سەر خاچێ گونەهێن مە د لەشێ خۆ دا هەلگرتن، دا ئەم دەربارەی گونەهان بمرین و بۆ راستیێ بژین. ب برینێن وی هوین ساخ بوون.
چنكو هوین وەكو پەزێ بەرزەبووی بوون، لێ نوكە هوین ل شڤان و چاڤدێرێ گیانێ خۆ زڤڕین.
ب هەمان شێوە گەلی ژنان، ملكەچی مێرێن خۆ بن، دا خۆ ئەگەر هندەك ژ وان گوهداریا پەیڤێ ژی نەكەن، بێی گۆتنا پەیڤەكێ ژ رەوشتێ ژنان بهێنە قاییل كرن،
دەمێ ئەو خودێترسیێ و پاكیێ د رەوشتێ هەوە دا دبینن.
بلا خەملا هەوە یا ب سەرڤە نەبیت، ب ڤەهاندنا پرچێ و بخۆڤەكرنا زێڕی و لبەركرنا جلكێن جوان،
لێ بلا خەملا هەوە ناڤخۆیا دلێ هەوە بیت، بلا گیانەكێ نەرم و ئارام بیت، ئەڤەیە ئەو جوانیا پویچ نابیت و ل نك خودێ یا بهاگرانە.
چنكو ب ڤی شێوەی ژنكێن پیرۆز ژی، ئەوێن هیڤیا خۆ ب خودێ ڤە گرێ داین، د سەردەمێن كەڤن دا خۆ ب ملكەچی مێرێن خۆ دخەملاند،
هەروەكو سارایێ گوهداریا ئیبراهیمی دكر و دگۆتێ: «ئەزبەنی». ئەڤجا ئەگەر هوین باشیێ بكەن و ژ چ تشتی نەترسن، هوین كچێن وێنە.
ب هەمان شێوەی گەلی مێران، ل گەل ژنێن خۆ ب تێگەهشتن بژین، چنكو ئەو رەگەزێ نازكترن و رێزێ لێ بگرن وەكو هەڤمیراتێن كەرەما ژیانێ، دا ئاستەنگ بۆ نڤێژێن هەوە چێنەبن.
ب كورتی، هوین هەمی هەڤهزر بن، هەڤسۆز بن، وەكو برا حەز ژ ئێكودوو بكەن، دلۆڤان و دەروونبچویك بن.
خرابیێ ب خرابیێ و ئاخفتنێن كرێت ب ئاخفتنێن كرێت ڤەنەگێڕن، لێ بەروڤاژی هندێ بەرەكەتێ بۆ وان بخوازن، ژ بەر كو هوین بۆ وێ چەندێ یێن هاتینە گازیكرن، كو ببنە میراتگرێن بەرەكەتێ.
چنكو: «ئەوێ بڤێت خۆشیێ ژ ژیانا خۆ وەرگریت و رۆژێن خۆش ببینیت، بلا ئەزمانێ خۆ ژ خرابیێ بپارێزیت و دەڤێ خۆ ژ گۆتنا فێلبازیێ.
بلا خۆ ژ خرابیێ دویر بئێخیت و باشیێ بكەت، بلا ل ئاشتیێ بگەڕیێت و بزاڤێ بۆ بكەت.
چنكو خودان چاڤێ خۆ ددەتە راستداران و گوهێ خۆ ددەتە داخوازا وان. لێ خودان دژی وانە یێن خرابیێ دكەن.»
ئەڤجا، كی دێ زیانێ ل هەوە كەت، ئەگەر هوین بۆ كرنا باشیێ د دلگەرم بن؟
لێ ئەگەر هوین ژ پێخەمەت راستداریێ هاتنە ئازاردان ژی، ئەو خوزیكێن هەوە. ژ وان كەسان نەترسن و تێكنەچن،
لێ مەسیحی وەكو خودان د دلێ خۆ دا پیرۆز راگرن و هەمی دەمان د ئامادە بن، دا بەرسڤا هەر كەسەكی بدەن كو دەربارەی ئەگەرێ وێ هیڤیا د هەوە دا پرسیارێ ژ هەوە دكەت،
لێ وێ چەندێ ب نەرمی و رێزگرتن بكەن. وژدانا خۆ پاقژ بپارێزن، داكو ئەوێن ب خرابی بەحسێ رەوشتێ هەوە یێ باش د ئێكبوونا ل گەل مەسیحی دا دكەن، د بوهتانێن خۆ دا شەرمزار ببن.
بۆ مرۆڤی باشترە، ئازارێ ل سەر كرنا باشیێ بكێشیت، ئەگەر حەزا خودێ یا وەسا بیت، نەكو ل سەر كرنا خرابیێ.
چنكو مەسیح ژی جارەكێ و بۆ هەروهەر ژ پێخەمەت گونەهان هاتە ئازاردان، یێ راستدار ژ پێخەمەت نەڕاستداران، دا هەوە بگەهینیتە خودێ. ئەو د لەشی دا هاتە كوشتن، لێ ژ لایێ گیانی ڤە هاتە ڤەژاندن.
ئەو ب گیانی چوو و بۆ گیانێن زیندانكری پەیام راگەهاند.
ئەو گیان ژ كەڤن دا د نەگوهدار بوون، دەمێ ل سەردەمێ نوحی خودێ ب درێژی بێهنا خۆ فرە‍‌ھ كری، گاڤا گەمی دهاتە چێكرن، د وێ گەمیێ دا هندەك كەس، ئانكو هەشت، د ئاڤێ را قورتال بوون.
ئەڤە ژی هێمایێ وێ تافیركرنێیە یا نوكە هەوە قورتال دكەت. تافیركرن پاقژكرنا قڕێژا لەشی نینە، لێ داخوازكرنا وژدانەكا باشە ل نك خودێ، ب رێكا رابوونا عیسایێ مەسیح ژ ناڤ مریان،
ئەوێ چوویە ئەسمانی و ل دەستێ راستێ یێ خودێیە، فریشتە و دەستهەلاتدار و هێز ملكەچێن وینە.
ئەڤجا مادەم مەسیحی د لەشی دا ئازار كێشا، هوین ژی ب وێ نیازێ خۆ چەكدار بكەن، چنكو یێ د لەشی دا ئازار كێشای، دەست ژ گونەهێ بەردایە،
داكو ئەو ژیێ وی ئەوێ د لەشی دا مای، نە ل دویڤ حەزێن مرۆڤكانی، لێ ل دویڤ حەزا خودێ بژیت.
ئێدی بەسە ئەو دەمێ هەوە بوراندی ل دویڤ حەزێن مللەتێن خودێنەنیاس، یێن كو رێكا بێدەلنگی، گوهنێلی ، سەرخۆشی، ئاهەنگێن بەرەڵایی، ئاهەنگێن مەی ڤەخوارنێ و پووتپەرێسیا حەرام دگرن.
ئەو مەندەهۆش دمینن، كو ئێدی هوین ل گەل وان ل دویڤ هەمان بەرەڵایی و سەربەردانێ نابەزن، ئەڤجا ئەو هەوە رسوا دكەن.
لێ ئەو دێ حسابێ دەنە وی یێ كو ئامادەیە دادكرنا مری و زیندیان بكەت.
لەوما مزگینی بۆ مریان ژی هاتیە دان، داكو هەر چەندە ئەو د لەشی دا وەكو مرۆڤان هاتینە دادكرن، لێ د گیانی دا ل دویڤ خودێ بژین.
دویماهیا هەر تشتی یا نێزیك بووی، لەوما ل سەر خۆ د زاڵ بن و د هشیار بن ژ بۆ نڤێژكرنێ.
بەری هەر تشتەكی، بلا حەزژێكرنا هەوە بۆ ئێكودوو یا گەرم بیت، چنكو حەزژێكرن گونەهێن گەلەك ژی دنخێڤیت.
بێی پتەپت مێڤانداریا ئێكودوو بكەن.
هەر ئێك ژ هەوە، ل دویڤ وێ بەهرەیا روحانی یا وی وەرگرتی، خزمەتا ئێكودوو پێ بكەن، وەكو بریكارێن چاك ل سەر كەرەمێن خودێ یێن جۆراوجۆر.
ئەگەر ئێك دئاخڤیت، بلا وەكو ئێكێ پەیڤێن خودێ دبێژیت بئاخڤیت. ئەگەر ئێك خزمەتێ دكەت، بلا ب وێ هێزێ بكەت یا خودێ دایێ، دا خودێ د هەر تشتی دا بهێتە مەزنكرن، ب رێیا عیسایێ مەسیح، ئەوێ مەزناهی و سەروەری هەروهەر یێن وینە. ئامین.
گەلی خۆشتڤیان، ژ بەر وان تەنگاڤیێن سوژەك یێن بۆ تاقیكرنێ هوین تووش دبنێ، حێبەتی نەبن، هەروەكو تشتەكێ سەیر هاتبیتە سەرێ هەوە،
لێ دلخۆش ببن كو هوین بووینە پشكدارێن ئازارێن مەسیحی، دا دەمێ مەزناهیا وی دیار دبیت ژی، هوین دلخۆش و دلشاد ببن.
ئەگەر ژ پێخەمەت ناڤێ مەسیحی هوین بهێنە فهێتكرن، هنگی خوزیكێن هەوە، چنكو گیانێ مەزناهیێ، كو گیانێ خودێیە، ل سەر هەوەیە.
بلا كەس ژ هەوە وەكو مێركوژەكی، یان دزەكی، یان خرابكارەكی، یان ژی وەكو مایتێكەرەكی ئازارێ نەكێشیت،
لێ ئەگەر ئێك ژ هەوە وەكو مەسیحیەك ئازارێ بكێشیت، بلا شەرم نەكەت، لێ بلا پەسنا خودێ بكەت، ژ بەر كو هەلگرێ ڤی ناڤیە.
دەم هاتیە كو دادكرن ژ مالا خودێ دەست پێ بكەت. ئەڤجا ئەگەر ژ مە دەست پێ بكەت، دویماهیا وان یێن گوهداریا مزگینیا خودێ ناكەن، دێ چ بیت؟
و: «ئەگەر یێ راستدار ب زەحمەت قورتال ببیت، پا دێ چ ب سەرێ كەسێ بەدكار و گونەهكار هێت؟»
لەوما ئەوێن ل دویڤ حەزا خودێ ئازارێ دكێشن، بلا ل سەر كرنا چاكیێ د بەردەوام بن و خۆ رادەستی ئافرێندەری بكەن، یێ كو هەر جار سۆزێن خۆ ب ج‍‌ھ دئینیت.
ئەز هیڤی ژ ریهسپیێن د ناڤ هەوە دا دكەم، كو ئەز وەكو هەوە ریهسپیمە و شاهدم ل سەر ئازارێن مەسیحی و هەڤپشكێ وێ مەزناهیێمە یا كو ل نێزیك دێ دیار بیت:
شڤانیا پەزێ خودێ یێ د ناڤ هەوە دا بكەن ، نە ژ نەچاری، لێ ژ دل، وەسا چاڤدێریێ بكەن، هەروەكو خودێ دڤێت، نە ژ بەر دەستكەفتەكێ حەرام، لێ ب دلگەرمی.
خۆ ل سەر وان یێن ل ژێر چاڤدێریا هەوە نەسەپینن، لێ بۆ پەزی ببنە نموونە.
دەمێ سەرۆكشڤان دیار دبیت، هوین دێ تانجا مەزناهیێ وەرگرن، ئەوا برسقینا وێ ئێكجار ل كێمیێ نادەت.
ب هەمان شێوە گەلی گەنجان، ملكەچی ریهسپیان بن و هوین هەمی بۆ ئێكودوو كراسێ دەروونبچویكیێ ل خۆ بپێچن ، چنكو: «خودێ بەرهنگاریا دفنبلندان دكەت، لێ كەرەمێ ددەتە دەروونبچویكان.»
ئەڤجا خۆ ل بن دەستێ هێزدار یێ خودێ دەروونبچویك بكەن، دا د دەمێ دەستنیشانكری دا هەوە بلند بكەت.
هەمی خەمێن خۆ بهاڤێژنە سەر وی، چنكو ئەو پویتەی ب هەوە ددەت.
هەوە های ژ خۆ هەبیت و هشیار بمینن. نەیارێ هەوە ئبلیس، وەكو شێرەكێ نڕنڕی دگەڕیێت دا ئێكی بخۆت.
موكم د باوەریێ دا بەرهنگاریا وی بكەن، چنكو هوین دزانن كو خویشك و برایێن هەوە ل سەرانسەری جیهانێ هەمان ئەڤێ ئازارێ دكێشن.
خودایێ هەمی كەرەمێ ژی، ئەوێ هوین ب مەسیح عیسای گازی كرینە مەزناهیا خۆ یا هەتا هەتایی، پشتی كو هەوە بۆ دەمەكێ كورت ئازار كێشای، ئەو ب خۆ دێ هەوە كامل كەت و موكم كەت و بهێز ئێخیت و خۆج‍‌ھ كەت.
سەروەری هەروهەر بۆ وی بیت. ئامین.
من ب دەستێ سیلاسی ئەڤ نامەیا كورت بۆ هەوە نڤیسی، كو ئەز وی ب برایەكێ دلسۆز دهژمێرم، دا هەوە هان بدەم و شاهدەییێ بدەم، كو كەرەما خودێ یا راستەقینە ئەڤەیە. تێدا موكم بمینن.
یا ل بابلێ ، ئەوا وەكو هەوە هاتیە هەلبژارتن، سڵاڤان ل هەوە دكەت، هەروەسا كوڕێ من مەرقۆس ژی.
ب ماچا حەزژێكرنێ ژ لایێ من ڤە سڵاڤان ل ئێكودوو بكەن. ئاشتی ل سەر هەوە هەمیێن گرێدای مەسیحی بیت.
ژ من، شەمعون پەترۆس، بەنی و هنارتیێ عیسایێ مەسیح، بۆ وان یێن ب راستداریا خودێ، قورتالكەرێ مە عیسایێ مەسیح، باوەریەكا بهاگران یا وەكو یا مە وەرگرتی:
ب نیاسینا خودێ و عیسایێ خودانێ مە، كەرەم و ئاشتی ب زێدەیی ل سەر هەوە بن.
هێزا وی یا خودایی هەمی تشتێن پێدڤی بۆ ژیانێ و خودێترسیێ داینە مە، ب رێكا نیاسینا وی یێ ئەم ب مەزناهی و چاكیا خۆ گازی كرین.
وی ب ڤان تشتان سۆزێن گەلەك مەزن و بهاگران داینە مە، دا هوین ب وان ژ وێ پویچاتیێ، ئەوا ژ حەزێن جیهانێ دهێت، بڕەڤن و ببنە پشكدارێن سرۆشتێ خودایی.
ئها ژ بەر ڤێ چەندێ، هەمی رەنجێ بكێشن دا هوین ل سەر باوەریا خۆ، چاكیێ زێدە بكەن و ل سەر چاكیێ زانینێ
و ل سەر زانینێ لخۆزاڵبوونێ و ل سەر لخۆزاڵبوونێ خۆڕاگرتنێ و ل سەر خۆڕاگرتنێ خودێترسیێ
و ل سەر خودێترسیێ ڤیانەكا برایینی و ل سەر ڤیانا برایینیێ ژی حەزژێكرنێ،
چنكو ئەگەر ئەڤ تشتە ل نك هەوە هەبن و زێدە ببن، دێ هەوە كەتە مرۆڤێن بكێرهاتی و بەرهەمدار د نیاسینا خودانێ مە عیسایێ مەسیح دا.
لێ یێ ئەڤ تشتە ل نك نەبن، یێ كورتبین و كۆرەیە، وی یا ژ بیر كری كو ئەو یێ پاقژ بووی ژ گونەهێن خۆ یێن بەرێ.
ژ بەر ڤێ چەندێ گەلی خویشك و برایان، زێدەتر بزاڤێ بكەن دا دووپات بكەن كو خودێ هوین یێن گازی كرین و هەلبژارتین، چنكو ئەگەر هوین ڤان تشتان بكەن، هوین چ جاران ناهەلنگڤن.
ب ڤی شێوەی دەرگە‍‌ھ دێ ب فرەهی ل بەر هەوە ڤەبیت دا هوین ژۆر بكەڤنە پاشایەتیا هەروهەر یا خودان و قورتالكەرێ مە عیسایێ مەسیح.
ژ بەر ڤێ چەندێ ئەز دێ هەردەم بیرا هەوە ل ڤان تشتان ئینم، هەر چەندە هوین ڤان تشتان دزانن و د ڤێ راستیا ل نك هەوە دا د خۆجهن.
هندی ئەز د ڤێ خیڤەتێ دا بم، ئەز ڤێ چەندێ راست دبینم كو ئەز هەوە ب ڤێ بیرئینانێ بشارینم.
چنكو ئەز دزانم كو نێزیكە دێ ژ ڤێ خیڤەتا خۆ بار كەم، هەروەكو خودانێ مە عیسایێ مەسیح بۆ من دیار كری.
ئەڤجا ئەز دێ بزاڤێ كەم دا پشتی باركرنا من هوین هەردەم ڤان تشتان بیننە بیرا خۆ.
چنكو دەمێ مە هاتنا ب هێز یا خودانێ مە عیسایێ مەسیح ب هەوە دایە زانین، ئەم نەكەفتینە دویڤ ئەفسانەیێن ب ژیری هاتینە چێكرن، لێ مە ب چاڤێن خۆ مەزناهیا وی دیت.
وی ژ خودایێ باب رێز و مەزناهی وەرگرت، دەمێ دەنگەك ژ مەزناهیا سەنگین بۆ هاتی و گۆتی: «ئەڤەیە كوڕێ من یێ خۆشتڤی، ئەوێ دلێ من پێ خۆش بووی.»
مە ب خۆ ئەڤ دەنگە بهیست، دەمێ ژ ئەسمانی هاتی، چنكو ئەم ل گەل وی بووین ل سەرێ چیایێ پیرۆز.
پەیاما پێغەمبەران ژی ل نك مە پتر هاتە سەلماندن. هوین باش دكەن ئەگەر بەرێ خۆ بدەنێ، وەكو هوین بەرێ خۆ ددەنە چرایەكێ د جهەكێ تاری دا رۆناهیێ ددەت، تاكو ئەلند دیار دبیت و ستێرا سپێدێ د دلێ هەوە دا دهەلێت.
بەری هەر تشتەكی بزانن كو چ پەیامێن د نڤیسارێن پیرۆز دا ڤەڕێژا شڕۆڤەكرنا پێغەمبەران نەبوون،
چنكو پەیام چ جاران ب حەزا مرۆڤی نەهاتینە، لێ هندەك مرۆڤ ب رێڤەبەریا گیانێ پیرۆز ژ لایێ خودێ ڤە ئاخفتینە.
لێ كا چەوا پێغەمبەرێن درەوین د ناڤ گەلی دا پەیدا بوون، هەروەسا د ناڤ هەوە ژی دا دێ مامۆستایێن درەوین پەیدا بن. ئەو دێ ب نهێنی فێركرنێن وێرانكەر ئیننە د ناڤ هەوە دا، خۆ ئەو دێ وی خودانی ماندەل كەن یێ ئەو كڕین ، هۆسا ئەو دێ ژناڤچوونەكا ب لەز ئیننە سەرێ خۆ.
دێ گەلەك مرۆڤ ب دویڤ بێنامویسیا وان كەڤن و ژ بەر وان دێ ب خرابی بەحسێ رێبازا راستیێ هێتە كرن.
ئەو دێ ژ بەر چاڤبرساتیا خۆ ب گۆتنا چیڕۆكێن چێكری بازرگانیێ ب هەوە كەن. ئەو حوكمێ ژ كەڤن وەرە ل سەر هاتیە دان، ژ كار نەكەفتیە و ژناڤبرنا وان نە یا نڤستیە.
چنكو ئەگەر خودێ دلۆڤانی ب وان فریشتەیان نەبربیت یێن گونە‍‌ھ كرین، لێ هاڤێتبنە د دۆزەخێ دا، كو ئەو د كویراتیا تاریاتیێ دا بۆ رۆژا دادكرنێ د زنجیركری بن
و ئەگەر دلۆڤانی ب جیهانا كەڤنار نەبربیت، لێ نوح كو راستداری بۆ خەلكی رادگەهاند ل گەل حەفتێن دی پاراستبن، دەمێ تووفان ب سەر جیهانا بەدكاران دا ئینای
و ئەگەر حوكمێ وێرانكرنێ ل سەر باژێڕێن سەدۆم و عەمۆرا دانابیت و كربنە خولی، كربنە نموونە بۆ بەدكارێن پشتی وان بهێن
و ڵۆتێ راستدار قورتال كربیت، ئەوێ ژ ژیانا بێنامویسیێ یا بەدكاران دلتەنگ بووی،
چنكو ئەو مرۆڤێ راستدار، ئەوێ د ناڤ وان دا دژیا، ژ بەر كریارێن وان یێن خراب یێن وی ددیتن و دبهیستن، رۆژ بۆ رۆژێ گیانێ وی یێ راستدار ئازار دكێشا،
ئەڤجا خودان دزانیت كا چەوا خودێترسان ژ تاقیكرنێ قورتال بكەت و خرابكاران بگریت و بهێلیتە ل بن دەستێ خۆ تاكو دەمێ سزادانا وان دهێت ل رۆژا دادكرنێ،
نەخاسمە ئەوێن ب دویڤ حەزێن هەڕمی یێن لەشی دكەڤن و سڤكاتیێ ب سەروەریێ دكەن. ئەو د رویقاییمن و خۆ دسەپینن، ناترسن كو ب خرابی بەحسێ خودانێن مەزناهیێ بكەن.
خۆ فریشتە، هەر چەندە ژ وان ب هێزتر و شیانترن، لێ ل نك خودانی ب ئاخفتنەكا كرێت وان گونەهبار ناكەن.
لێ ئەو كەس وەكو گیانەوەرێن بێ مەژینە، یێن ب خۆرسكێ دهێنە بڕێڤەبرن، ژ بۆ نێچیركرنێ و كوشتنێ چێبووینە، دەربارەی تشتێن وان پێزانین ل سەر نەی كوفریان دكەن، ئەڤجا ئەو دێ وەكو وان گیانەوەران ژ ناڤ چن
و ل شوینا زیانا وان كری، ئەو دێ زیانێ وەرگرن. دهژمێرن خۆشیە كو ل رۆژا نیڤرۆ ب دویڤ كەیفا دلێ خۆ بكەڤن. ئەو خالەكا رەشن و شەرمزارینە، تامێ ژ فێلبازیێن خۆ وەردگرن دەمێ د ئاهەنگان دا ل گەل هەوە پشكدار دبن.
چاڤێن وان د تژی دەهمەنپیسینە، ژ گونەهكرنێ تێر نابن، دەروونێن لاواز دخاپینن. دلێ وان ل سەر چاڤبرساتیێ یێ مەشقدایە. نفرین ل سەر وانە!
وان ژ رێكا راست لادا، ئەڤجا ئەو د سەر دا چوون و رێكا بەلعامێ كوڕێ بەعۆری گرت، ئەوێ حەز ژ كرێیا خرابیێ كری.
لێ ئەو ژ بەر سەرپێچیا وی كری هاتە پاشڤەبرن، دەمێ كەرێ بێ زمان ب زمان كەفتی و رێ ل دیناتیا پێغەمبەری گرتی.
ئەڤ كەسە كانیێن بێ ئاڤن، مژن ب باڕۆڤەیێ دهێنە هاژوتن. بۆ وان كویرترین تاریستان هاتیە تەرخان كرن.
چنكو گۆتنێن مەزن و ڤاڵا دبێژن، هۆسا ب ئارەزوویێن لەشی یێن بێدەلنگیێ وان كەسان د سەر دا دبەن یێن ژ نوی رزگار بووین ژ ناڤ وان كەسێن د شاشیێ دا دژین.
سۆزا ئازادیێ ددەنە وان، هەر چەندە ئەو ب خۆ بەنیێن پویچاتیێنە، چنكو ئەو تشتێ ل سەر مرۆڤی زاڵ دبیت، مرۆڤ دبیتە بەنیێ وی.
ئەگەر ئەو ب نیاسینا خودان و قورتالكەرێ مە عیسایێ مەسیح ژ هەڕماتیێن جیهانێ رزگار ببن و پشتی هنگی كەفتبنە د تەڤنێ وان دا و بندەست ببنەڤە، ئەڤە دویماهیا وان ژ دەستپێكا وان كمباخترە.
بۆ وان باشتر بوو كو رێكا راستداریێ نەنیاسیبا، نەكو ئەوان نیاسیبا و پشتی هنگی ژ فەرمانا پیرۆز یا بۆ وان هاتیە دان، پاشگەز ببان.
ئەڤ پەندە ب دروستی ل سەر وان دهێت: «سە ل دلڕابوونا خۆ ڤەدگەڕیێت» و: «بەرازا شویشتی، ڤەدگەڕیێت خۆ د ناڤ هەڕیێ دا دگەڤزینیت.»
گەلی خۆشتڤیان، ئەڤە دووەمین نامەیە ئەز بۆ هەوە دنڤیسم، د وان دا ئەز ب رێكا بیرئینانێ، هزرێن هەوە یێن پاقژ هشیار دكەم،
دا بیرا هەوە بهێتە پەیڤێن پێغەمبەرێن پیرۆز و فەرمانێن خودان و قورتالكەری یێن هنارتیێن هەوە هوین پێ ئاگەهدار كرین.
بەری هەر تشتەكی ڤێ چەندێ بزانن: د رۆژێن دویماهی دا، دێ هندەك تڕانەكەرێن چڤێل دەركەڤن، یێن كو ل دویڤ ئارەزوویێن خۆ یێن خراب بڕێڤە دچن.
دێ بێژن: «كا سۆزا هاتنا وی؟ چنكو ژ دەمێ نڤستنا بابكالان، هەمی تشت ژ دەستپێكا ئافراندنێ وەرە وەكو خۆ ماینە.»
ئەو ب مەبەست ڤێ راستیێ ب پشت گو‍‌ھ ڤە دهاڤێژن كو ب پەیڤا خودێ هەر ژ كەڤن دا ئەسمان هەبوون و ئەرد ژی ژ ئاڤێ و د ئاڤێ را چێبوویە.
ب وان ژی، ئاڤ ل سەر جیهانا بەرێ رابوو و ئەو ژ ناڤ چوو.
لێ ئەرد و ئەسمانێن نوكە هەین، ب هەمان پەیڤێ بۆ ئاگری د هەلگرتینە، تا رۆژا دادكرن و ژناڤبرنا بەدكاران دهێنە هێلان.
لێ بلا ئەڤ تشتە ژ بیرا هەوە نەچیت، گەلی خۆشتڤیان: ل نك خودانی رۆژەك وەكو هزار ساڵانە و هزار ساڵ ژی وەكو رۆژەكێنە.
خودان بجهئینانا سۆزا خۆ گیرۆ ناكەت، هەروەكو هندەك كەس ب گیرۆبوون دزانن، لێ ئەو بێهنا خۆ ل هەوە فرە‍‌ھ دكەت، چنكو وی نەڤێت كەس ژ ناڤ بچیت، لێ بەرێ هەمیان بكەڤیتە لخۆزڤڕینێ.
لێ رۆژا خودانی دێ وەكو دزەكی هێت ، كو تێدا ئەسمان دێ ب گورمێنەكا مەزن ژ ناڤ چیت و توخم ب سۆتنێ دێ حەلیێن و ئەرد و هەمی كارێن تێدا هاتینە كرن، نامینن.
لێ ئەم ل گۆر سۆزا وی، چاڤەڕێی ئەسمانێن نوی و ئەردەكێ نوی دكەین، كو راستداری تێدا یا خۆجهە.
لەوما گەلی خۆشتڤیان، مادەم كو هوین ل چاڤەڕێی ڤان تشتانە، بزاڤێ بكەن كو ئەو هەوە هۆسا ببینیت، هوین یێن د ئاشتیێ دا د بێكێماسینە و گازندە ل سەر هەوە نینن.
بهژمێرن كو بێهنفرەهیا خودانێ مە دەرفەتەكە بۆ قورتالبوونێ، كا چەوا برایێ مە یێ خۆشتڤی پاولۆسی ژی ل دویڤ وێ ئاقلمەندیا بۆ وی هاتیە دان بۆ هەوە نڤیسی،
هەروەكو د هەمی نامەیێن خۆ دا، بەحسێ ڤان تشتان دكەت. د وان دا هندەك تشتێن ب زەحمەت بۆ تێگەهشتنێ یێن هەین كو مرۆڤێن نەزان و لقلقۆك شاش شڕۆڤە دكەن، هەروەكو نڤیسارێن پیرۆز یێن دی شاش شڕۆڤە دكەن، ب ڤێ چەندێ ژی ئەو ژناڤچوونێ ب سەرێ خۆ دا دئینن.
لەوما گەلی خۆشتڤیان، مادەم هوین پێشوەخت هاتینە ئاگەهداركرن، د هشیار بن نەكو ب شاشیا بەدكاران بهێنە خڕاندن و خۆڕاگریا خۆ ژ دەست بدەن.
لێ د كەرەم و نیاسینا خودان و قورتالكەرێ مە عیسایێ مەسیح دا وەرارێ بكەن. مەزناهی بۆ وی بیت، نوكە و هەتا هەتایێ. ئامین.
ئەوێ كو ل دەستپێكێ هەبوو، ئەوێ مە بهیستی، ئەوێ مە ب چاڤێن خۆ دیتی، ئەوێ مە لێ نێڕی و مە دەستێ خۆ كریێ، ئەوە یا ئەم بۆ هەوە رادگەهینین كو پەیڤا ژیانێیە.
ژیان دیار بوو، مە ئەو دیتیە و شاهدەییێ بۆ ددەین و وێ ژیانا هەتا هەتایی بۆ هەوە رادگەهینین، ئەوا ل گەل بابی بوو و بۆ مە دیار بووی.
ئەوا مە دیتی و بهیستی بۆ هەوە رادگەهینین، دا هەوە ژی هەڤپشكی ل گەل مە هەبیت. هەڤپشكیا مە ژی ل گەل بابی و ل گەل كوڕێ وی عیسایێ مەسیحە.
ئەم بۆ هەوە ڤان تشتان دنڤیسین، دا دلخۆشیا مە یا تەمام بیت.
ئەڤەیە ئەو پەیاما مە ژ عیسایێ مەسیح بهیستی و بۆ هەوە رادگەهینین: خودێ رۆناهیە و چ تاریاتی تێدا نینە.
ئەگەر بێژین كو مە هەڤپشكی یا ل گەل خودێ هەی و ئەم د تاریاتیێ دا بڕێڤە بچین، ئەم درەوان دكەین و ل دویڤ راستیێ ناچین.
لێ ئەگەر ئەم د رۆناهیێ دا بڕێڤە بچین، هەروەكو ئەو د رۆناهیێ دا، مە هەڤپشكی یا ل گەل ئێكودوو هەی و خوینا كوڕێ وی، عیسای، مە ژ هەمی گونەهان پاقژ دكەت.
ئەگەر ئەم بێژین كو مە گونە‍‌ھ نینن، ئەم خۆ دخاپینین و راستی د دلێ مە دا نینە.
ئەگەر ئەم دانپێدانێ ب گونەهێن خۆ بكەین، ئەو یێ دلسۆز و راستدارە، لەوما دێ ل گونەهێن مە بوریت و مە ژ هەمی خرابیان پاقژ كەت.
ئەگەر ئەم بێژین كو مە گونە‍‌ھ نەكریە، ئەم وی درەوین دەردئێخین و پەیڤا وی د دلێ مە دا نینە.
گەلی زاڕۆكێن من، ئەز بۆ هەوە ڤان تشتان دنڤیسم، دا هوین گونەهان نەكەن. لێ ئەگەر كەسەك گونەهێ بكەت، مە ل نك بابی هاریكارەكێ هەی، كو عیسایێ مەسیحێ راستدارە.
ئەوە كەفارەت بۆ گونەهێن مە، نە ب تنێ بۆ گونەهێن مە، لێ بۆ گونەهێن هەمی جیهانێ ژی.
ئەم ب وێ چەندێ دزانین كو ئەم وی دنیاسین، ئەگەر ئەم فەرمانێن وی ب ج‍‌ھ بینین.
ئەوێ دبێژیت: «ئەز وی دنیاسم» و فەرمانێن وی ب ج‍‌ھ نەئینیت، ئەو درەوینە و راستی د دلێ وی دا نینە.
لێ یێ پەیڤا وی ب ج‍‌ھ بینیت، ئەڤە ب راستی حەزژێكرنا خودێ د دلێ وی دا یا كامل بووی. ب ڤێ چەندێ ئەم دزانین ئەم د ئێكبوونا ل گەل وی داینە:
ئەوێ دبێژیت: «ئەز د ناڤ وی دا یێ بنەجهم،» پێدڤیە وەسا بژیت، هەروەكو عیسا ژیای.
گەلی خۆشتڤیان، ئەز فەرمانەكا نوی بۆ هەوە نانڤیسم، لێ فەرمانەكا كەڤن، كو هەوە ژ دەستپێكێ هەبوو. فەرمانا كەڤن ئەو پەیڤە یا هەوە بهیستی.
سەرەڕای هندێ ژی، ئەز فەرمانەكا نوی بۆ هەوە دنڤیسم، كو راستیا وێ د وی دا و د هەوە ژی دا هەیە، چنكو تاریاتی بەرەڤ نەمانێ دچیت و رۆناهیا راستەقینە نوكە شەوقێ ددەت.
ئەوێ دبێژیت: «ئەز یێ د رۆناهیێ دا» و كەربێن وی ژ خویشك یان برایێ وی ڤەدبن، ئەو هێشتا یێ د تاریاتیێ دا.
یێ حەز ژ خویشك و برایێن خۆ دكەت، ئەو د رۆناهیێ دا یێ بنەجهە و چ ئەگەرێن هەلنگفتنێ بۆ وی نینن.
لێ یێ كەربێن وی ژ خویشكا وی یان برایێ وی ڤەدبن، ئەو یێ د تاریاتیێ دا و د تاریاتیێ دا دژیت و نزانیت كیڤە دچیت، چنكو تاریاتیێ چاڤێن وی یێن كۆرە كرین.
ئەز بۆ هەوە دنڤیسم، گەلی زاڕۆكان، چنكو ل سەر خاترا ناڤێ وی ل گونەهێن هەوە هاتیە بورین.
ئەز بۆ هەوە دنڤیسم، گەلی بابان، چنكو هوین وی دنیاسن، ئەوێ ژ دەستپێكێ هەی. ئەز بۆ هەوە دنڤیسم، گەلی خۆرتان، چنكو هوین ل سەر یێ خرابكار ب سەر كەفتن. من بۆ هەوە نڤیسی، گەلی زاڕۆكان، چنكو هوین خودایێ باب دنیاسن.
من بۆ هەوە نڤیسی، گەلی بابان، چنكو هوین وی دنیاسن، ئەوێ ژ دەستپێكێ هەی. من بۆ هەوە نڤیسی گەلی گەنجان، چنكو هوین ب هێزن. پەیڤا خودێ د هەوە دا یا بنەجهە و هوین ل سەر یێ خرابكار ب سەر كەفتن.
نە حەز ژ جیهانێ بكەن، نە ژی تشتێن د جیهانێ دا. ئەگەر كەسەك حەز ژ جیهانێ بكەت، حەزژێكرنا بابی د دلێ وی دا نینە.
چنكو هەمی تشتێن د جیهانێ دا، ئارەزوویا لەشی و ئارەزوویا چاڤان و شانازیبرن ب ملك و مالێ ژیانێ، نە ژ بابینە، لێ ژ جیهانێنە.
جیهان دچیت و ئارەزوویێن وێ ژی، لێ یێ حەزا خودێ ب ج‍‌ھ دئینیت، ئەو دێ هەتا هەتایێ مینیت.
گەلی زاڕۆكان، ئەڤە دەمژمێرا دویماهیێیە. هەروەكو هەوە بهیستی كو دژەمەسیح دێ هێت، نوكە گەلەك دژەمەسیح یێن دەركەفتین. ژ ڤێ چەندێ ئەم دزانین دەمژمێرا دویماهیێیە.
ئەو ژ ناڤ مە دەركەفتن، لێ ئەو ژ مە نەبوون، چنكو ئەگەر ئەو ژ مە بان، دا ل گەل مە مینن. لێ ئەو دەركەفتن، دا دیار ببیت كو ئەو هەمی نە ژ مەنە.
لێ هوین ژ لایێ یێ پیرۆز ڤە هاتینە زەیتكرن و هوین هەمی ژی راستیێ دزانن.
من بۆ هەوە نڤیسی، نە چنكو هوین راستیێ نزانن، لێ چنكو هوین راستیێ دزانن و دزانن كو چ درەو ژ راستیێ نینن.
درەوین كیە؟ ما نە ئەوە یێ ماندەل دكەت كو عیسا ب خۆ مەسیحە. ئها ئەو دژەمەسیحە، ئەوێ بابی و كوڕی ماندەل دكەت.
هەر كەسێ كوڕی ماندەل بكەت، وی بەهر د بابی دا نینە، لێ یێ دانپێدانێ ب كوڕی بكەت، بەهر د بابی ژی دا هەیە.
بلا ئەو تشتێ هەوە ژ دەستپێكێ بهیستی، د ناڤ دلێ هەوە دا یێ بنەج‍‌ھ بیت. ئەگەر ئەو تشتێ هەوە ژ دەستپێكێ بهیستی د ناڤ دلێ هەوە دا بنەج‍‌ھ ببیت، هوین ژی دێ د ناڤ كوڕی و د ناڤ بابی دا بنەج‍‌ھ بن.
ئەڤەیە ئەو سۆزا وی ب خۆ دایە مە، ئەو ژی ژیانا هەتا هەتاییە.
من ئەڤ تشتە بۆ هەوە نڤیسین، دەربارەی وان كەسان یێن بزاڤێ دكەن هەوە د سەر دا ببەن.
لێ هندی هوینن، ئەو زەیتكرنا هەوە ژ وی وەرگرتی د دلێ هەوە دا یا بنەجهە و هوین د پێدڤی نینن كو كەسەك هەوە فێر بكەت. ئەڤجا د ناڤ مەسیحی دا بنەج‍‌ھ ببن، مادەم زەیتكرنا وی هەوە فێر دكەتە هەمی تشتان و ئەو راستە و نە درەوە، وەكو وێ زەیتكرنێ هوین فێر كرین ژی.
نوكە ژی، گەلی زاڕۆكان، د ناڤ وی دا بنەج‍‌ھ ببن، داكو دەمێ ئەو دیار ببیت، مە پشتڕاستی هەبیت و د هاتنا وی دا شەرم ژێ نەكەین.
ئەگەر هوین بزانن كو ئەو یێ راستدارە، هوین دزانن كو هەر كەسێ راستداریێ بكەت، یێ ژ وی بووی.
بەرێ خۆ بدەنێ، چ حەزژێكرنە بابی دایە مە، داكو ب زاڕۆكێن خودێ بهێینە بناڤكرن! ب راستی ژی ئەم ئەوین. ژ بەر هندێ جیهان مە نانیاسیت، چنكو ئەو نەنیاسی.
گەلی خۆشتڤیان، نوكە ئەم زاڕۆكێن خودێینە و هێشتا دیار نەبوویە كا دێ بینە چ. لێ ئەم دزانین كو دەمێ ئەو دیار دبیت، ئەم ژی دێ وەكو وی بین، چنكو كا ئەو یێ چەوایە، دێ وی وەسا بینین.
هەر كەسێ ئەڤ هیڤیە ب وی هەبیت، خۆ پاك دكەت، كا چەوا مەسیح یێ پاكە.
هەر كەسێ گونەهێ بكەت، سەرپێچیێ ژی دكەت، چنكو گونە‍‌ھ سەرپێچیە.
هوین دزانن كو مەسیح یێ دیار بووی، دا گونەهان راكەت. گونە‍‌ھ د وی دا نینە.
هەر كەسێ د ناڤ وی دا یێ بنەج‍‌ھ بیت، گونەهێ ناكەت. هەر كەسێ گونەهێ بكەت، نە ئەو دیتیە و نە ژی ئەو نیاسیە.
گەلی زاڕۆكان، بلا كەس هەوە د سەر دا نەبەت. یێ راستداریێ دكەت، ئەو یێ راستدارە، كا چەوا مەسیح یێ راستدارە.
یێ گونەهان دكەت، ئەو ژ ئبلیسیە، چنكو ئبلیس هەر ژ دەستپێكێ وەرە گونەهێ دكەت. كوڕێ خودێ ژ بەر هندێ یێ دیار بووی، دا كارێن ئبلیسی ژ ناڤ ببەت.
هەر كەسێ ژ خودێ بووی، گونەهێ ناكەت، چنكو بنیاتێ خودێ د وی دا یێ بنەجهە. ئەو نەشێت گونەهێ بكەت، چنكو ئەو یێ ژ خودێ بووی.
ب ڤێ چەندێ زاڕۆكێن خودێ و زاڕۆكێن ئبلیسی ژ ئێك دیار دبن: هەر كەسێ راستداریێ نەكەت، ئەو نە ژ خودێیە، هەروەسا یێ حەز ژ خویشك یان برایێ خۆ نەكەت.
ئەو پەیاما هەوە ژ دەستپێكێ بهیستی ئەوە كو ئەم حەز ژ ئێكودوو بكەین.
ئەم وەكو قایینی نەبین، ئەوێ كو ژ خرابكاری بوو و برایێ خۆ كوشتی. بۆچی ئەو كوشت؟ چنكو كریارێن وی ب خۆ د خراب بوون و یێن برایێ وی د راستدار بوون.
مەندەهۆش نەبن، گەلی خویشك و برایان، ئەگەر جیهانێ كەرب ژ هەوە ڤەببن.
ئەم دزانین كو ئەم ژ مرنێ دەرباز بووینە ژیانێ، چنكو ئەم حەز ژ خویشك و برایان دكەین. ئەوێ حەزژێكرنێ نەكەت، ئەو د مرنێ دا بنەج‍‌ھ دبیت.
هەر كەسێ كەرب ژ خویشك یان برایێ خۆ ڤەببن، ئەو مێركوژە. هوین دزانن ژی كو چ مێركوژان ژیانا هەتا هەتایی، ئەوا بنەج‍‌ھ د ناڤ وی دا، نینە.
ئەم ب ڤێ چەندێ حەزژێكرنێ دزانین: عیسای ژیانا خۆ ژ پێخەمەت مە دانا. ئەڤجا پێدڤیە ئەم ژی ژیانا خۆ ژ پێخەمەت خویشك و برایان بدانین.
لێ ئەگەر كەسەكی مالێ جیهانێ هەبیت و دیت كو خویشك یان برایێ وی د هەوجەیێ دایە و دلێ خۆ پێ نەسوژیت، چەوا حەزژێكرنا خودێ د ناڤ وی دا بنەج‍‌ھ دبیت؟
گەلی زاڕۆكان، بلا ئەم حەزژێكرنێ بكەین، نە ب پەیڤێ و ئەزمانی، لێ ب كریار و راستیێ.
ب ڤێ چەندێ ئەم دێ زانین كو ئەم ژ راستیێینە و دێ دلێ خۆ ل بەرامبەری خودێ ئارام كەین
دەمێ دلێ مە، مە گونەهبار دكەت، چنكو خودێ مەزنترە ژ دلێ مە و ئەو هەمی تشتان دزانیت.
گەلی خۆشتڤیان، ئەگەر دلێ مە، مە گونەهبار نەكەت، مە ل نك خودێ پشتڕاستی یا هەی
و ئەم چ ژێ بخوازین، ئەم ژێ وەردگرین، چنكو ئەم فەرمانێن وی ب ج‍‌ھ دئینین و تشتێن ب دلێ وی دكەین.
فەرمانا وی ژی ئەڤەیە: ئەم باوەریێ ب ناڤێ كوڕێ وی، عیسایێ مەسیح، بینین و ئەم حەز ژ ئێكودوو بكەین، كا چەوا وی فەرمان ل مە كریە.
یێن فەرمانێن وی ب ج‍‌ھ دئینن، د ناڤ وی دا د بنەجهن و ئەو ژی د ناڤ وان دا یێ بنەجهە. ئەم ژ ڤێ چەندێ دزانین كو ئەو د ناڤ مە دا یێ بنەجهە: ب وی گیانی یێ وی دایە مە.
گەلی خۆشتڤیان، باوەر ژ هەر گیانەكی نەكەن، لێ گیانان تاقی بكەن، كا ئەو ژ خودێنە یان نە، چنكو گەلەك پێغەمبەرێن درەوین یێن دەركەفتینە جیهانێ.
هوین ب ڤێ چەندێ دێ گیانێ خودێ نیاسن: هەر گیانەكێ دانپێدانێ بكەت كو عیسایێ مەسیح ب لەشی یێ هاتی، ئەو گیان ژ خودێیە،
لێ هەر گیانەكێ دانپێدانێ نەكەت كو عیسایێ مەسیح ب لەشی یێ هاتی، ئەو گیان نە ژ خودێیە. ئەو گیانێ دژەمەسیحیە، ئەو گیانێ هەوە بهیستی كو دێ هێت و نوكە ئەو د جیهانێ دایە.
هوین ژ خودێنە گەلی زاڕۆكان و هوین ل سەر پێغەمبەرێن درەوین ب سەركەفتن، چنكو گیانێ پیرۆز یێ د هەوە دا مەزنترە ژ گیانێ ئبلیسی یێ د جیهانێ دا.
ئەو ژ جیهانێنە، لەوما ل دویڤ دیتنا جیهانێ دئاخڤن و جیهان گوهێ خۆ ددەتێ.
ئەم ژ خودێینە. ئەوێ خودێ دنیاسیت گوهێ خۆ ددەتە مە و ئەوێ نە ژ خودێیە، گوهێ خۆ نادەتە مە. ژ بەر وێ چەندێ ئەم گیانێ راستیێ و گیانێ شاشیێ ژ ئێك جودا دكەین.
گەلی خۆشتڤیان، بلا ئەم حەز ژ ئێكودوو بكەین، چنكو حەزژێكرن ژ خودێیە. هەر كەسێ حەزژێكرنێ دكەت، ئەو یێ ژ خودێ بووی و خودێ دنیاسیت.
ئەوێ حەزژێكرنێ ناكەت، خودێ نانیاسیت، چنكو خودێ حەزژێكرنە.
هۆسا حەزژێكرنا خودێ د ناڤ مە دا دیار بوو: خودێ كوڕێ خۆ یێ ئێكانە هنارتە جیهانێ، داكو ئەم ب وی بژین.
حەزژێكرن ئەڤەیە: نە كو مە حەز ژ خودێ كریە، لێ وی حەز ژ مە كر و كوڕێ خۆ هنارت دا ببیتە كەفارەتا گونەهێن مە.
گەلی خۆشتڤیان، مادەم خودێ هۆسا حەز ژ مە كر، پێدڤیە ئەم ژی حەز ژ ئێكودوو بكەین.
چ جاران كەسێ خودێ نەدیتیە. ئەگەر ئەم حەز ژ ئێكودوو بكەین، خودێ د ناڤ مە دا بنەج‍‌ھ دبیت و حەزژێكرنا وی د مە دا كامل دبیت.
ئەم ب ڤێ چەندێ دزانین كو ئەم د ناڤ خودێ دا د بنەجهین و خودێ ژی د ناڤ مە دا یێ بنەجهە، چنكو وی ژ گیانێ خۆ دایە مە.
مە دیتیە و ئەم شاهدەییێ ددەین كو بابی كوڕێ خۆ هنارت دا ببیتە قورتالكەرێ جیهانێ.
ئەوێ دانپێدانێ دكەت كو عیسا كوڕێ خودێیە، خودێ د ناڤ وی دا یێ بنەجهە و ئەو ژی د ناڤ خودێ دا.
ئەڤجا ئەم وێ حەزژێكرنا خودێ بۆ مە هەی دزانین و باوەر ژێ دكەین. خودێ حەزژێكرنە. ئەوێ د ناڤ حەزژێكرنێ دا بنەج‍‌ھ دبیت، د ناڤ خودێ دا یێ بنەجهە و خودێ د ناڤ وی دا.
ب وێ چەندێ حەزژێكرن د ناڤ مە دا دهێتە كاملكرن، دا د رۆژا دادكرنێ دا دپشتڕاست بین، چنكو مەسیح یێ چەوایە، ئەم ژی ل ڤێ جیهانێ د وەساینە.
د حەزژێكرنێ دا ترس نینە، لێ حەزژێكرنا كامل ترسێ ژ دلی دەردئێخیت، چنكو ترس گرێدای سزایە. ئەوێ دترسیت، ئەو د حەزژێكرنێ دا كامل نەبوویە.
ئەم حەزژێكرنێ دكەین، چنكو ل بەراهیێ وی حەز ژ مە كر.
ئەگەر ئێك ببێژیت: «ئەز حەز ژ خودێ دكەم» و كەربێن وی ژ خویشك یان برایێ وی ڤەببن، ئەو یێ درەوینە. چنكو ئەو كەسێ حەز ژ خویشك یان برایێ خۆ نەكەت یێ كو دبینیت، ئەو نەشێت حەز ژ خودێ بكەت یێ كو نابینیت.
مە ئەڤ فەرمانە ژ وی وەرگرتیە: ئەوێ حەز ژ خودێ دكەت، پێدڤیە حەز ژ خویشك و برایێن خۆ ژی بكەت.
هەر كەسێ باوەر دكەت كو عیسا مەسیحە ، ئەو كەس یێ ژ خودێ بووی. هەر كەسێ حەز ژ بابی دكەت ژی، حەز ژ وی ژی دكەت یێ ژ بابی بووی.
ئەم ب ڤێ چەندێ دزانین كو ئەم حەز ژ زاڕۆكێن خودێ دكەین، دەمێ ئەم حەز ژ خودێ دكەین و فەرمانێن وی ب ج‍‌ھ دئینین.
چنكو حەزژێكرنا مە بۆ خودێ ئەڤەیە، كو ئەم فەرمانێن وی ب ج‍‌ھ بینین. فەرمانێن وی ژی نە بارگرانینە.
ژ بەر كو هەر كەسێ ژ خودێ بووی، ل سەر جیهانێ ب سەر دكەڤیت. ئەڤ سەركەفتنا ل سەر جیهانێ ژی ئەڤەیە: باوەریا مەیە.
كی سەركەفتنێ ل سەر جیهانێ دئینیت؟ ب تنێ ئەوێ باوەر دكەت كو عیسا كوڕێ خودێیە.
ئەڤەیە ئەوێ ب ئاڤێ و خوینێ هاتی، عیسایێ مەسیح. نە ب ئاڤێ ب تنێ، لێ ب ئاڤێ و خوینێ یێ هاتی. گیانێ پیرۆزە یێ شاهدەییێ ددەت ژی، چنكو گیانێ پیرۆز راستیە.
یێن شاهدەییێ ددەن سێنە:
گیان و ئاڤ و خوین. ئەڤ هەر سێیە هەمان شاهدەیی ددەن.
ئەگەر ئەم شاهدەییا مرۆڤان قەبیل بكەین، شاهدەییا خودێ مەزنترە، چنكو ئەڤە شاهدەییا خودێیە، ئەوا وی دەربارەی كوڕێ خۆ دای.
ئەوێ باوەریێ ب كوڕێ خودێ دئینیت، ئەڤ شاهدەییە د ناخێ وی ب خۆ دا هەیە. ئەوێ باوەر ژ خودێ نەكەت، ئەو خودێ ب درەوین دەردئێخیت، چنكو وی باوەری ب وێ شاهدەییێ نەئینایە، ئەوا خودێ دەربارەی كوڕێ خۆ دای.
شاهدەیی ژی ئەڤەیە: خودێ ژیانا هەروهەر دایە مە و ئەڤ ژیانە د ناڤ كوڕێ وی دایە.
ئەوێ بەهر د كوڕێ خودێ دا هەی، ژیان ژی یا هەی، ئەوێ بەهر د كوڕێ خودێ دا نەی، ژیان ژی نینە.
من ئەڤە بۆ هەوە یێن باوەریێ ب ناڤێ كوڕێ خودێ هەی، نڤیسین، دا بزانن كو هەوە ژیانا هەروهەر یا هەی.
ئەو پشتڕاستیا مە ل نك خودێ هەی ژی ئەڤەیە: ئەگەر ئەم ل دویڤ حەزا وی تشتەكی بخوازین، ئەو دێ گوهێ خۆ دەتە مە.
ئەگەر ئەم بزانین ژی كو ئەم چ بخوازین ئەو گوهێ خۆ ددەتە مە، هنگی ئەم دزانین كو ئەو تشتێن مە ژێ خواستین، مە یێن وەرگرتین.
ئەگەر ئێك ببینیت كو خویشكا وی یان برایێ وی گونەهەكێ دكەت، لێ نە گونەهەك بیت كو بەرێ مرۆڤی ددەتە مرنێ، بلا ئەو ژ خودێ بخوازیت و خودێ دێ ژیانێ دەتە وی كەسی یێ گونەهەك كری كو بەرێ وی نەدەتە مرنێ. گونە‍‌ھ یا هەی مرنێ دئینیت. ئەز نابێژم بلا ئەو بۆ ڤێ گونەهێ داخوازێ بكەت.
هەر كارەكێ خراب گونەهە، لێ گونە‍‌ھ یا هەی مرنێ نائینیت.
ئەم دزانین كو هەر كەسێ ژ خودێ بووی گونەهێ ناكەت ، چنكو نەخریێ خودێ وی دپارێزیت و خرابكار دەستێ خۆ ناكەتێ.
ئەم دزانین كو ئەم ژ خودێینە و هەمی جیهان ل بن دەستهەلاتا خرابكاریە.
دزانین ژی كو كوڕێ خودێ هاتیە و تێگەهشتن دایە مە، دا یێ راستەقینە بنیاسین. ئەم د ناڤ یێ راستەقینە داینە، د ناڤ كوڕێ خودێ عیسایێ مەسیح دا. ئەوە خودایێ راستەقینە و ژیانا هەروهەر.
گەلی زاڕۆكان، خۆ ژ پووتان بپارێزن.
ژ من یێ ریهسپی، بۆ خانما هەلبژارتی و زاڕۆكێن وێ، ئەوێن ئەز د راستیێ دا حەز ژێ دكەم، نە ب تنێ ئەز، لێ ئەو هەمی ژی، یێن راستیێ دزانن،
ژ بەر وێ راستیا د ناڤ مە دا بنەج‍‌ھ و دێ هەتا هەتایێ ل گەل مە بیت:
كەرەم و دلۆڤانی و ئاشتی، ژ خودایێ باب و ژ عیسایێ مەسیح، كوڕێ بابی، ب رێكا راستیێ و حەزژێكرنێ دێ ل گەل مە بن.
ئەز گەلەك دلخۆش بووم دەمێ من دیتی كو هندەك زاڕۆكێن تە، ب وی شێوەیێ بابی فەرمان ل مە كری، ل سەر راستیێ دچن.
نوكە ژی هەی خانم، ئەز داخوازێ ژ تە دكەم كو ئەم حەز ژ ئێكودوو بكەین و ئەڤە نە فەرمانەكا نویە بۆ تە دنڤیسم، لێ ئەوە یا مە ژ دەستپێكێ هەبوو.
حەزژێكرن ژی ئەڤەیە: ئەم ل دویڤ فەرمانێن وی بچین. فەرمان ژی ئەڤەیە: كا چەوا هەوە ژ دەستپێكێ بهیستیە، وەسا ل سەر رێكا حەزژێكرنێ بچن.
گەلەك كەسێن خاپینۆك ل جیهانێ بەڵاڤ بووینە، دانپێدانێ ناكەن كو عیسایێ مەسیح ب لەشی یێ هاتی. ئەڤەنە خاپینۆك و دژەمەسیح.
د هشیاری خۆ بن، نەكو ئەو تشتێ هەوە بزاڤ بۆ كری، ژ دەست بدەن، لێ خەلاتەكێ تەمام وەربگرن.
هەر كەسێ پێنگاڤێن زێدە بهاڤێژیت و د فێركرنا مەسیحی دا بنەج‍‌ھ نەبیت، وی بەهر د خودێ دا نینە. ئەوێ د وێ فێركرنێ دا بنەج‍‌ھ ببیت، وی بەهر یا د بابی دا و د كوڕی ژی دا هەی.
ئەگەر ئێك بهێتە نك هەوە و وێ فێركرنێ نەئینیت، د مالێن خۆ دا نەحەوینن و سڵاڤ نەكەنێ،
چنكو ئەوێ سڵاڤ بكەتێ، پشكداریێ د كارێن وی یێن خراب دا دكەت.
هێشتا من گەلەك تشتێن هەین بۆ هەوە بنڤیسم، من نەڤێت ب كاغەزێ و حبری بیت. لێ ئەز هیڤیدارم بهێمە نك هەوە و روی ب روی بئاخڤم، دا دلخۆشیا مە یا تەمام بیت.
زاڕۆكێن خویشكا تە یا هەلبژارتی سڵاڤان ل تە دكەن.
ژ من یێ ریهسپی، بۆ گایۆسێ خۆشتڤی، ئەوێ ئەز د راستیێ دا حەز ژێ دكەم.
هەی خۆشتڤی، ئەز نڤێژێ دكەم كو تۆ د هەمی تشتان دا یێ سەركەفتی و ساخلەم بی، هەروەكو گیانێ تە یێ سەركەفتی.
ئەز گەلەك دلخۆش بووم دەمێ هندەك برا هاتین و دەربارەی پێگیریا تە ب راستیێ شاهدەیی دای، كا چەوا تۆ ل سەر راستیێ دچی.
من دلخۆشیەكا ژ ڤێ مەزنتر نینە كو ئەز ببهیسم زاڕۆكێن من ل سەر راستیێ دچن.
هەی خۆشتڤی، تۆ یێ دلسۆزی د كارێن خۆ دا، یێن تۆ بۆ برایان دكەی، هەر چەندە د بیانینە.
وان ل بەرامبەر جڤاكا باوەرداران شاهدەیی ل سەر حەزژێكرنا تە دا. تۆ دێ كارەكێ باش كەی، دەمێ تۆ ب شێوەیەكێ هەژی خودێ وان ب رێ بئێخی.
چنكو ئەو ژ پێخەمەت ناڤی دەركەفتینە و تشتەك ژ مللەتان وەرنەگرتیە.
لەوما پێدڤیە ئەم پشتەڤانیا كەسێن وەسا بكەین، دا هەڤكارێن وان بین بۆ راستیێ.
من تشتەك بۆ جڤاكا باوەرداران نڤیسی، لێ دیۆتریفس، ئەوێ دڤێت د ناڤ وان دا كەسێ ئێكێ بیت، مە قەبیل ناكەت.
لەوما ئەگەر ئەز هاتم، دێ سەرنجا هەوە راكێشمە سەر كارێن ئەو دكەت، كا چەوا ب گۆتنێن خراب نەكامیا مە دكەت. ئەو ب ڤێ چەندێ ژی بەس ناكەت، لێ برایان ژی قەبیل ناكەت و هەر ئێكێ دڤێت برایان قەبیل بكەت، ئەو رێكێ لێ دگریت و ژ جڤاكا باوەرداران دەردئێخیت.
هەی خۆشتڤی، چاڤ ل خرابیێ نەكە، لێ ل باشیێ بكە. هەر ئێكێ باشیێ دكەت، ئەو ژ خودێیە و یێ خرابیێ دكەت، ئەوی خودێ نەدیتیە.
سەبارەت دیمیتریۆسی، هەمی كەس بۆ باشیا وی شاهدەییێ ددەن، خۆ پەیاما راستیێ ب خۆ ژی شاهدەییێ بۆ ددەت. ئەم ژی شاهدەییێ بۆ ددەین و هوین دزانن كو شاهدەییا مە یا راستە.
من گەلەك تشت هەبوون بۆ تە بنڤیسم، لێ من نەڤێت ب حبری و پێنڤیسی بیت.
ئەز هیڤیدارم ل دەمەكێ نێزیك تە ببینم و دێ روی ب روی ئاخڤین.
ئاشتی ل سەر تە بیت. هەڤال سڵاڤان ل تە دكەن. ناڤ ب ناڤ سڵاڤان ل هەڤالان بكە.
ژ من، یەهودا، بەنیێ عیسایێ مەسیح و برایێ یەعقوبی، بۆ گازیكریێن خۆشتڤی ژ لایێ خودایێ باب ڤە و پاراستی ژ لایێ عیسایێ مەسیح ڤە:
دلۆڤانی، ئاشتی و حەزژێكرن ب زێدەیی ل سەر هەوە بن.
گەلی خۆشتڤیان، هەر چەندە من ب مەرەق دڤیا دەربارەی قورتالبوونا مە یا هەڤپشك بۆ هەوە بنڤیسم، لێ من ب فەر دیت كو ئەز بۆ هەوە نامەیەكێ بنڤیسم، تێدا هیڤی ژ هەوە بكەم كو هوین ژ پێخەمەت وێ باوەریێ خەباتێ بكەن، ئەوا ب جارەكێ و بۆ هەروهەر بۆ پیرۆزكریان هاتیە دان.
چنكو هندەك كەس ب دزی ڤە هاتینە د ناڤ هەوە دا، ئەوێن ژ كەڤن دا سزایێ وان ل سەر هاتیە نڤیسین، كەسێن بەدكارن، كەرەما خودایێ مە دكەنە بەهانە بۆ بێدەلنگیێ، هەروەسا عیسایێ مەسیح، كو سەروەر و خودانێ مە یێ ئێكانەیە، ماندەل دكەن.
ئەڤجا من دڤێت بیرا هەوە بینم، هەر چەندە هوین ڤان هەمی تشتان دزانن، كو پشتی خودانی گەلێ خۆ ژ ئەردێ مسرێ رزگار كری، ئەوێن باوەری نەئینای ژ ناڤ برن.
هەروەسا وی، ئەو فریشتەیێن پێگەهێ خۆ نەپاراستی و جهێ خۆ هێلای، ل بن تاریاتیێ ب قەیدێن هەروهەری بۆ دادكرنا رۆژا مەزن هێلان.
ب هەمان شێوەی سەدۆم و عەمۆرا و باژێڕێن ل دەوروبەرێن وان ژی وەكو وان دەهمەنپیسی كر و ب دویڤ گوهنێلیا نە سرۆشتی كەفتن. ئەو ب كێشانا سزایێ ئاگرینی یێ هەروهەر بوونە نموونە.
هەروەسا ئەڤە ژی، ئەوێن ب دویڤ خەونێن خۆ دكەڤن، لەشی دهەڕمینن و سڤكاتیێ ب سەروەریێ دكەن و ب خرابی بەحسێ خودانێن مەزناهیێ دكەن.
لێ خۆ میكائیلێ سەرۆكێ فریشتەیان ژی، دەمێ ل گەل ئبلیسی ب هەڤڕكی هاتی و دەربارەی تەرمێ مووسای گەنگەشە ل گەل كری، بستە‍‌ھ نەكر ب ئاخفتنەكا كرێت وی گونەهبار بكەت، لێ گۆتێ: «بلا خودان تە پاشڤە ببەت!»
لێ ئەڤ كەسە، دەربارەی تشتێن ئەو تێنەگەهن كوفریان دكەن، ئەو تشتێن ئەو تێدگەهن ژی وان ژ ناڤ دبەن، چنكو ئەو وەكو گیانەوەرێن بێئاقل ب تنێ ل دویڤ سرۆشتێ خۆ دچن.
نەخوزیكێن وان! چنكو ئەوان رێكا قایینی گرتیە و وەكو بەلعامی ژ پێخەمەت قازانجی د سەر دا چوون و یاخیبوونا وان وەكو یاخیبوونا قۆرەحیە و ئەو دێ وەكو وی ژ ناڤ چن.
ئەو د ئاهەنگێن هەوە یێن برایینیێ دا خالەكا رەشن، بێ ترس خوارنێ ل گەل هەوە دخۆن، ب تنێ خۆ دچەرینن. ئەو عەورێن بێ بارانن یێن با ل گەل خۆ دبەت. دارێن پاییزی یێن بێ بەرهەمن، دووجاركی د مرینە، ژ رەهان د هەلكێشاینە.
ئەو وەكو پێلێن هار یێن دەریایێنە، شەرمزاریا خۆ بەڵاڤ دكەن كا چەوا پێل كەفێ دهاڤێژن. ئەو ستێرن یێن رێكا خۆ بەرزە كری ئەوێن هەتا هەتایێ بۆ وان كویرترین تاریستان هاتیە تەرخان كرن.
حەنۆخی ژی، كو پشتی ئادەمی بابكێ حەفتێ بوو، پەیاما خودێ دەربارەی ڤان كەسان راگەهاندیە و گۆتیە: «ئەڤە خودان د ناڤ هزارەهان پیرۆزكریێن خۆ دا یێ دهێت،
دا حوكمی ل سەر هەمیان بدەت و هەمی بەدكاران ل سەر هەمی كریارێن بەدكاریێ یێن وان كرین و ل سەر هەمی پەیڤێن دژوار یێن گونەهكارێن بەدكار د دەرهەقا وی دا گۆتین، گونەهبار بكەت.»
ئەو كەس د پتپتی و دەڤ ب گازندەنە، ل گۆر ئارەزوویێن خۆ دژین و مەزن دئاخڤن، ژ پێخەمەت بەرژەوەندیێن خۆ سالویسیێ بۆ كەسان دكەن.
لێ هوین، گەلی خۆشتڤیان، بیرا خۆ بیننە وان ئاخفتنان یێن پێشوەخت هنارتیێن خودانێ مە عیسایێ مەسیح گۆتین.
ئەوان دگۆتە هەوە: «د دەمێ دویماهیێ دا، دێ هندەك تڕانەكەر پەیدا بن، ل دویڤ ئارەزوویێن خۆ یێن بەدكاریێ بڕێڤە دچن.»
ئەڤە ئەو كەسن یێن دووبەرەكیێ چێدكەن، ب تنێ ل دویڤ خۆرسكێن لەشكانی دچن، ژ گیانێ پیرۆز د بێ بەهرن.
لێ هوین، گەلی خۆشتڤیان، خۆ ل سەر باوەریا خۆ یا هەری پیرۆز ئاڤا بكەن، ب گیانێ پیرۆز نڤێژێ بكەن،
هۆسا خۆ د حەزژێكرنا خودێ دا راگرن، دەمێ هوین ژ بۆ ژیانا هەروهەری چاڤەڕێیا دلۆڤانیا خودانێ مە عیسایێ مەسیح دكەن.
دلۆڤانیێ ب یێن دوودل ببەن،
هندەكێن دی ژ ئاگری بڕەڤینن و قورتال بكەن، دلۆڤانیێ ب یێن ماین ببەن، لێ ب هشیاری و بلا كەربێن هەوە خۆ ژ وان جلكان ژی ڤەببن یێن ب لەشێ ڤان هەڕمین.
بۆ وی یێ شیان هەین هەوە ژ هەلنگفتنێ بپارێزیت و هەوە بێ كێماسی ل پێشیا مەزناهیا خۆ ب دلخۆشیەكا مەزن راوەستینیت،
بۆ خودایێ ئێكانە، قورتالكەرێ مە، ب رێكا عیسایێ مەسیحێ خودانێ مە، قەدرگرانی و مەزناهی و سەروەری و دەستهەلات بۆ وی بن، ژ بەری هەمی سەردەمان و نوكە و هەتا هەتایێ. ئامین.
ئەڤە ئاشكراكرنا عیسایێ مەسیحە، ئەوا خودێ دایە وی، دا تشتێن كو پێدڤیە د دەمێ نێزیك دا روی بدەن نیشا بەنیێن خۆ بدەت. عیسای ژی فریشتەیێ خۆ هنارت دا بۆ بەنیێ وی یوحەننای بدەتە زانین.
یوحەننای ژی ل دۆر هەمی تشتێن وی دیتین شاهدەیی دا، ئانكو بۆ پەیڤا خودێ و شاهدەییا عیسایێ مەسیح.
خوزیكێن وی یێ پەیڤێن ڤێ پەیامێ دخوینیت و خوزیكێن وان یێن دبهیسن و ئەوا تێدا هاتیە نڤیسین ب ج‍‌ھ دئینن، چنكو دەم یێ نێزیكە.
ژ یوحەننای، بۆ هەر حەفت جڤاكێن باوەرداران یێن ل هەرێما ئاسیایێ: كەرەم و ئاشتی ل سەر هەوە بن، ژ وی یێ هەی و یێ هەبوو و یێ دێ هێت و ژ حەفت گیانێن ل پێشیا تەختێ وی
و ژ عیسایێ مەسیح، شاهدێ دلسۆز، نەخریێ ژ ناڤ مریان و سەرۆكێ پاشایێن ئەردی. ئەوێ حەز ژ مە دكەت و ئەم ب خوینا خۆ ژ گونەهێن مە ئازاد كرین
و ئەم كرینە پاشایەتی و كاهنێن بابێ خۆ خودێ: مەزناهی و سەروەری هەروهەر بۆ وی بن. ئامین.
ئەڤە ئەو یێ ل گەل عەوران دهێت، هەمی چاڤ دێ وی بینن، خۆ ئەوێن رم ل وی دای ژی. هەمی هۆزێن جیهانێ ژ بەر وی دێ ب خەم كەڤن. بەلێ. ئامین.
خودان خودێ دبێژیت: «ئەز ئەلفا و ئۆمێگامە ، ئەوێ هەی و ئەوێ هەبوو و ئەوێ دێ هێت، هێزدارێ هەر تشتی.»
ئەز برایێ هەوە یوحەننا مە، كو د ئێكبوونا ل گەل عیسای دا هەڤپشكێ هەوەمە د تەنگاڤی و پاشایەتی و خۆڕاگرتنێ دا. ئەز ژ بەر پەیڤا خودێ و شاهدەییدانێ بۆ عیسای، ل وێ گزیرتەیێ بووم، ئەوا دبێژنێ پاتمۆس.
د رۆژا خودانی دا، ئەز د گیانێ پیرۆز دا بووم ، ل پشت خۆ من دەنگەكێ بلند یێ وەكو دەنگێ بۆڕیزانێ بهیست،
وی دگۆت: «تشتێ تۆ دبینی د پەرتووكەكێ دا بنڤیسە و بۆ هەر حەفت جڤاكان بهنێرە: بۆ ئەفەسۆسێ و بۆ سمیرنایێ و بۆ پەرگامایێ و بۆ تیاتیرایێ و بۆ ساردیسێ و بۆ فیلادەلفیایێ و بۆ لاودیكیایێ.»
ئەز ل پشت خۆ زڤڕیم، دا خودانێ وی دەنگی ببینم یێ ل گەل من دئاخفت. دەمێ ئەز زڤڕیم، من حەفت چرادانكێن زێڕین دیتن
و د ناڤەڕاستا چرادانكان دا، ئێكێ وەكو كوڕێ مرۆڤ بوو، جلكەكێ شۆڕ تا بەر پێیان ل بەر بوو و سینگێ وی ب قایشەكا زێڕین یێ پێچای بوو.
پرچا سەرێ وی یا سپی بوو وەكو هریێ، یا سپی بوو وەكو بەفرێ. چاڤێن وی ژی وەكو گوڕیا ئاگری بوون.
پێیێن وی وەكو برۆنزێ تەیساندی بوون، هەروەكو ئەو برۆنز د ئێتوینێ دا هاتیە سۆركرن. دەنگێ وی ژی وەكو دەنگێ گەلەك ئاڤان بوو.
د دەستێ وی یێ راستێ دا حەفت ستێر هەبوون و ژ دەڤێ وی شیرەكێ دوو دەڤ یێ تیژ دەردكەفت و دێمێ وی وەكو رۆژێ بوو، ئەوا ب هەمی هێزا خۆ شەوقێ ددەت.
دەمێ من ئەو دیتی، ئەز وەكو ئێكێ مری كەفتمە بەر پێیێن وی. ئینا وی دەستێ خۆ یێ راستێ دانا سەر من و گۆت: «نەترسە، ئەزم یێ ئێكێ و یێ دویماهیێ
و یێ زیندی. ئەز یێ مری بووم و ئەڤە ئەز بۆ هەتا هەتایێ یێ زیندیمە. كلیلێن مرنێ و یێن وارێ مریان ل دەڤ منن.
ئەڤجا ئەو تشتێن تە دیتین و ئەوێن نوكە هەین و ئەوێن ل بەرە پشتی ڤان چێببن، بنڤیسە.
نهێنیا حەفت ستێرێن تە د دەستێ من یێ راستێ دا دیتین و حەفت چرادانكێن زێڕین ئەڤەیە: حەفت ستێر، فریشتەیێن هەر حەفت جڤاكانە و حەفت چرادانك، هەر حەفت جڤاكن.»
«بۆ فریشتەیێ جڤاكا باوەرداران ل ئەفەسۆسێ بنڤیسە: ‹ئەوێ حەفت ستێران د دەستێ خۆ یێ راستێ دا دگریت و د ناڤەڕاستا حەفت چرادانكێن زێڕین دا بڕێڤە دچیت، ڤان تشتان دبێژیت:
من های ژ كریار و رەنج و خۆڕاگرتنا تە هەیە و دزانم تۆ نەشێی بێهنا خۆ ل سەر كەسێن خراب فرە‍‌ھ كەی. تە ئەو تاقی كرن یێن دبێژن ئەم هنارتینە، لێ ئەو نە هنارتینە، تە دیت ئەو درەوین دەركەفتن.
ئەز دزانم ژی تۆ یێ خۆڕاگری و تە رەنج ژ پێخەمەت ناڤێ من كێشا و نەوەستیای.
لێ من ئەڤ تشتە یێ ل سەر تە هەی: تە دەست ژ حەزژێكرنا خۆ یا دەستپێكێ بەردا.
ئەڤجا بینە بیرا خۆ كا تۆ ژ كیرێ كەفتی! ل خۆ بزڤڕە و كریارێن دەستپێكێ بكە. ئەگەر نە، ئەز دێ هێمە تە و چرادانكا تە ژ جهێ وێ راكەم ، ژبلی ئەگەر تۆ ل خۆ بزڤڕی.
لێ تە ئەڤ تشتێ باش هەیە: كەربێن تە ژ كریارێن نیقولایتیان ڤەدبن، ئەو كریارێن كەربێن من ژی ژێ ڤەدبن.
ئەوێ گو‍‌ھ هەبن، بلا ببهیسیت كا گیانێ پیرۆز چ بۆ جڤاكێن باوەرداران دبێژیت. هەر ئێكێ سەركەفتنێ بینیت، دێ دەستویریێ دەمێ كو ژ دارا ژیانێ بخۆت، ئەوا د بەهەشتا خودێ دا.›»
«بۆ فریشتەیێ جڤاكا باوەرداران ل سمیرنایێ بنڤیسە: ‹ئەوێ ئێكێ و دویماهیێ، ئەوێ مری و زیندی بووی، ڤان تشتان دبێژیت:
من های ژ تەنگاڤی و هەژاریا تە هەیە، لێ تۆ یێ دەولەمەندی. هەروەسا من های ژ بوهتانێن وان كەسان هەیە یێن دبێژن ئەم جوهینە. ئەو نە جوهینە، لێ ئەو كنیشتەیا ئبلیسینە.
ژ وان ئازاران قەت نەترسە یێن ل بەرە بهێنە سەرێ تە. ئەڤە ئبلیسی ل بەرە هندەك ژ هەوە بهاڤێژیتە د زیندانێ دا، داكو هوین بهێنە تاقیكرن و دە‍‌ھ رۆژان دێ د تەنگاڤیێ دا بن. تا مرنێ یێ دلسۆز بە و ئەز دێ تانجا ژیانێ دەمە تە.
ئەوێ گو‍‌ھ هەبن، بلا ببهیسیت كا گیانێ پیرۆز چ بۆ جڤاكێن باوەرداران دبێژیت. هەر ئێكێ سەركەفتنێ بینیت، مرنا دوویێ قەت زیانێ لێ ناكەت.›»
«بۆ فریشتەیێ جڤاكا باوەرداران ل پەرگامایێ بنڤیسە: ‹ئەوێ شیرێ تیژ یێ دوودەڤ هەی، ڤان تشتان دبێژیت:
من های ژێ هەیە تۆ ل كیرێ یێ ئاكنجی، ل وی جهی یێ تەختێ ئبلیسی لێ. سەرەڕای هندێ تۆ ناڤێ من قاییم دگری و تە باوەریا خۆ ب من ماندەل نەكر، خۆ د وان رۆژان دا، یێن ئەنتیپاس، شاهدێ من یێ دلسۆز ل نك هەوە هاتیە كوشتن، ل وی جهی یێ ئبلیس لێ ئاكنجی.
لێ من چەند تشتەك ل سەر تە هەنە: ل وێرێ تە هندەك كەسێن هەین، ل دویڤ فێركرنا بەلعامی دچن، ئەوێ بالاق فێر دكر كو ئەگەرەكی بۆ هەلنگفتنێ ل بەر ئیسرائیلیان دانیت، دا ژ قوربانێن بۆ پووتان هاتینە پێشكێشكرن بخۆن و دەهمەنپیسیێ بكەن.
ب هەمان شێوە، تە هندەك ژی هەنە، ل دویڤ فێركرنا نیقولایتیان دچن.
ئەڤجا ل خۆ بزڤڕە. ئەگەر نە، ئەز دێ زوی هێمە نك تە و شەڕێ وان ب شیرێ دەڤێ خۆ كەم.
ئەوێ گو‍‌ھ هەبن، بلا ببهیسیت كا گیانێ پیرۆز چ بۆ جڤاكێن باوەرداران دبێژیت. هەر ئێكێ سەركەفتنێ بینیت، ئەز دێ ژ مەننایا ڤەشارتی دەمێ و ئەز دێ بەركەكێ سپی دەمێ، ناڤەكێ نوی یێ ل سەر نڤیسیە، كو كەس نەزانیت ژبلی وی یێ وەردگریت.›»
«بۆ فریشتەیێ جڤاكا باوەرداران ل تیاتیرایێ بنڤیسە: ‹كوڕێ خودێ، ئەوێ چاڤێن وی وەكو گوڕیا ئاگری و پێیێن وی وەكو برۆنزێ تەیساندی، ڤان تشتان دبێژیت:
من های ژ كریارێن تە، ئانكو حەزژێكرن و باوەری و خزمەت و خۆڕاگرتنا تە، هەیە. هەروەسا دزانم كو كریارێن تە یێن ڤێ دویماهیێ ژ یێن دەستپێكێ پترن.
لێ من ئەڤ تشتە یێ ل سەر تە هەی: تۆ بێهنا خۆ ل وێ ژنكێ، ئیزابێلێ ، فرە‍‌ھ دكەی، ئەوا دبێژیت ئەز پێغەمبەرم و بەنیێن من د سەر دا دبەت و فێر دكەت كو دەهمەنپیسیێ بكەن و قوربانێن بۆ پووتان هاتینە پێشكێشكرن بخۆن.
من دەم دایێ داكو ئەو ل خۆ بزڤڕیت، لێ وێ نەڤێت ژ دەهمەنپیسیا خۆ ل خۆ بزڤڕیت.
ئەڤە ئەز دێ نەخۆشیەكا گران دەمێ و هاڤێژمە د ناڤ نڤینان را و ئەوێن ل گەل وێ بێنامویسیێ دكەن ئێخمە د تەنگاڤیەكا گران دا، ژبلی ئەگەر ژ كریارێن وێ ل خۆ بزڤڕن.
ئەز دێ ل زاڕۆكێن وێ ژی دەم و كوژم. ئەڤجا هەمی جڤاكێن باوەرداران دێ زانن كو ئەزم یێ زێهن و دلان دپشكنیت و ئەز دێ ل دویڤ كریارێن هەوە دەمە هەر ئێكی ژ هەوە.
لێ ئەز بۆ هەوە یێن دی ل تیاتیرایێ، ئەوێن ب دویڤ ڤێ فێركرنێ نەكەفتین، ئەوێن ئەو تشت نەزانین یێن هندەك دبێژنێ ‹تشتێن كویر یێن ئبلیسی›، دبێژم: ئەز بارەكێ دی نادانمە سەر ملێ هەوە،
هەما ئەو تشتێ هەوە هەی قاییم بگرن، هەتا ئەز بهێم.
ئەوێ گو‍‌ھ هەبن، بلا ببهیسیت كا گیانێ پیرۆز چ بۆ جڤاكێن باوەرداران دبێژیت.›»
«بۆ فریشتەیێ جڤاكا باوەرداران ل ساردیسێ بنڤیسە: ‹ئەوێ حەفت گیانێن خودێ و حەفت ستێر هەین، ڤان تشتان دبێژیت: من های ژ كریارێن تە هەیە، تۆ ب ناڤی یێ زیندی، لێ تۆ یێ مری.
هشیار بە و تشتێن ماین كو ل بەر مرنێنە قاییم بكە، چنكو من كریارێن تە ل بەرامبەر خودایێ خۆ كاملبووی نەدیتن.
دێ بینە بیرا خۆ كا تە چ وەرگرتیە و بهیستیە، وی تشتی ب ج‍‌ھ بینە و ل خۆ بزڤڕە. ئەگەر تۆ هشیار نەبی، دێ وەكو دزەكی هێم و تۆ قەت نزانی كیژان دەمژمێرێ دێ هێمە تە.
لێ تە چەند كەسەك ل ساردیسێ یێن هەین، جلكێن خۆ پیس نەكرینە، ئەو دێ ب جلكێن سپی ل گەل من گەڕیێن، چنكو د هەژینە.
هەر ئێكێ سەركەفتنێ بینیت، وەسا دێ جلكێن سپی ل بەر بن و ئەز قەت ناڤێ وی ژ پەرتووكا ژیانێ نابەم و دێ ل پێشیا بابێ خۆ و ل پێشیا فریشتەیێن وی دانپێدانێ ب ناڤێ وی كەم.
ئەوێ گو‍‌ھ هەبن، بلا ببهیسیت كا گیانێ پیرۆز چ بۆ جڤاكێن باوەرداران دبێژیت.›»
«بۆ فریشتەیێ جڤاكا باوەرداران ل فیلادەلفیایێ بنڤیسە: ‹یێ پیرۆز، یێ راست، ئەوێ كلیلا داوودی هەی، ئەوێ ڤەدكەت و كەس ناگریت، ئەوێ دگریت و كەس ڤەناكەت ، ڤان تشتان دبێژیت:
من های ژ كریارێن تە هەیە. ئەڤە من دەرگەهەكێ ڤەكری دانا بەر تە، كو كەس نەشێت بگریت. ئەز دزانم تە هێزەكا كێم هەیە، لێ سەرەڕای هندێ تە پەیڤا من ب ج‍‌ھ ئینا و ناڤێ من ماندەل نەكر.
ئەڤە ئەز دێ وە ل وان كەم یێن ژ كنیشتەیا ئبلیسی، ئەوێن دبێژن ئەم جوهینە، لێ نە وەسایە، ئەو درەوان دكەن، ئەڤە ئەز دێ وە لێ كەم كو بهێن و ل بەر پێیێن تە سوجدێ ببەن و بزانن كو من یێ حەز ژ تە كری.
مادەم تە پەیڤا من ل دۆر خۆڕاگریێ ب ج‍‌ھ ئینا، ئەز ژی دێ تە ژ دەمژمێرا تاقیكرنێ پارێزم، ئەوا كو نێزیكە بهێتە سەر هەمی جیهانێ، دا ئاكنجیێن ل سەر ئەردی تاقی بكەت.
ئەز دێ زوی هێم. ئەڤجا ئەو تشتێ تە هەی قاییم بگرە، دا كەس تانجا تە نەبەت.
هەر ئێكێ سەركەفتنێ بینیت، دێ وی كەمە ستوینەك د پەرستگەها خودایێ خۆ دا و ئێدی ئەو چ جاران ژێ دەرناكەڤیت. دێ ناڤێ خودایێ خۆ و ناڤێ باژێڕێ خودایێ خۆ، ئورشەلیما نوی، ئەوا ژ ئەسمانی ژ نك خودایێ من دهێتە خوارێ، ل سەر وی كەسی نڤیسم. دێ ناڤێ خۆ یێ نوی ژی ل سەر وی نڤیسم.
ئەوێ گو‍‌ھ هەبن، بلا ببهیسیت كا گیانێ پیرۆز چ بۆ جڤاكێن باوەرداران دبێژیت.›»
«بۆ فریشتەیێ جڤاكا باوەرداران ل لاودیكیایێ بنڤیسە: ‹ئەوێ ب "ئامین" هاتیە بناڤكرن، شاهدێ دلسۆز و راست، سەرەكانیا ئافراندیێن خودێ، ڤان تشتان دبێژیت:
من های ژ كریارێن تە هەیە، تۆ نە یێ ساری و نە ژی یێ گەرمی. خوزی یێ سار یان یێ گەرم بای!
لێ چنكو تۆ یێ تێنشیری، نە یێ ساری و نە ژی یێ گەرمی، من ل بەرە تە ژ دەڤێ خۆ ڤەڕشینم.
تۆ دبێژی: ‹ئەز یێ دەولەمەندم، ئەز گەلەك یێ دەولەمەند بوویم و من پێدڤی ب چ نینە،› لێ تۆ نزانی كو تۆ یێ پەریشانی و رەبەنی و بەلەنگازی و كۆرەیی و رویسی.
ئەز شیرەتێ ل تە دكەم كو تۆ زێڕێ ب ئاگری هاتیە پارزناندن ژ من بكڕی، دا دەولەمەند ببی، جلكێن سپی ژی، دا بكەیە بەر خۆ و شەرما رویسبوونا تە دیار نەبیت، هەروەسا ملحەمەكا چاڤان بۆ چاڤێن خۆ، دا بیناهیێ بكەی.
هەر ئێكێ ئەز حەز ژێ دكەم ئەز وی پاشڤە دبەم و تەمبی دكەم، لەوما یێ دلگەرم بە و ل خۆ بزڤڕە.
ئەڤە ئەز یێ ل بەر دەرگەهی راوەستیایمە و دەرگەهی دقوتم. ئەگەر ئێك دەنگێ من ببهیسیت و دەرگەهی ڤەكەت، ئەز دێ ب ژۆر كەڤمە نك وی و خوارنێ ل گەل خۆم و ئەو ل گەل من.
هەر ئێكێ سەركەفتنێ بینیت، دێ دەستویریێ دەمێ كو ل گەل من ل سەر تەختێ من روینیت، هەروەكو من ژی سەركەفتن ئینای و ل گەل بابێ خۆ ل سەر تەختێ وی روینشتیم.
ئەوێ گو‍‌ھ هەبن، بلا ببهیسیت كا گیانێ پیرۆز چ بۆ جڤاكێن باوەرداران دبێژیت.›»
پشتی ڤان تشتان، من بەرێ خۆ دایێ، ئەڤە دەرگەهەك ل ئەسمانی یێ ڤەكری بوو! ئەو دەنگێ من ل بەراهیێ بهیستی یێ وەكو دەنگێ بۆڕیزانێ ل گەل من ئاخفتی، گۆت: «سەر بكەڤە ڤێرێ و ئەز دێ وان تشتان نیشا تە دەم یێن كو دڤێت پشتی ڤان تشتان روی بدەن.»
ئێكسەر ئەز كەفتمە د گیانێ پیرۆز دا و ئەڤە تەختەك ل ئەسمانی یێ دانای بوو و ئێك ل سەر تەختی یێ روینشتی بوو!
ئەوێ روینشتی خولكێ وی وەكو بەرێ یەشپ و یاقوتێ سۆر بوو، كەسكوسۆرەك ل دۆرێن تەختی هەبوو وەكو زەمروودی دبرسقی.
ل دۆرێن تەختی بیست و چوار تەخت هەبوون، ل سەر وان تەختان بیست و چوار ریهسپی د روینشتی بوون، جلكێن سپی ل بەر بوون و تانجێن زێڕی ل سەر سەرێ وان بوون.
ژ تەختی برویسی و دەنگەدەنگ و گڕگڕا عەوران دەردكەفتن. ل پێشیا تەختی حەفت خەتیرەیێن هەل هەبوون، كو هەر حەفت گیانێن خودێنە.
هەروەسا ل پێشیا تەختی تشتەكێ وەكو دەریایەكا شویشەی هەبوو، وەكو كریستالی. ل دۆرێن تەختی و ژ هەمی لایان ڤە، چوار ئافراندیێن زیندی هەبوون، ل پێش و ل پاش د پڕی چاڤ بوون.
ئافراندیێ زیندی یێ ئێكێ وەكو شێری بوو، یێ دوویێ وەكو جانەگای بوو، یێ سێیێ دێمەكێ وەكو یێ مرۆڤی هەبوو و یێ چوارێ وەكو ئەلهۆیەكی بوو، كو د فڕینێ دایە.
هەر چوار ئافراندیێن زیندی، هەر ئێكی شەش چەنگ هەبوون، سەرڤەیا وان و بن چەنگێن وان ب چاڤان د پڕ بوون، ب شەڤ و رۆژ، بێی راوەستیان دگۆتن: «یێ پیرۆزە، یێ پیرۆزە، یێ پیرۆزە، خودان خودێ، هێزدارێ هەر تشتی، ئەوێ هەبوو و ئەوێ هەی و ئەوێ دێ هێت.»
هەر دەمێ ئافراندیێن زیندی مەزناهی و رێز و سوپاسیا وی دكر، یێ روینشتی ل سەر تەختی، ئەوێ هەروهەر دژیت،
وی دەمی هەر بیست و چوار ریهسپی ل پێشیا ئەوێ روینشتی ل سەر تەختی خۆ دهاڤێتە ئەردی و سوجدە بۆ وی دبر، یێ هەروهەر دژیت. تانجێن خۆ ژی دهاڤێتنە پێشیا تەختی و دگۆت:
«تۆ یێ هەژی، هەی خودان و خودایێ مە، كو مەزناهی و رێز و هێزێ وەرگری، چنكو تە هەمی تشت ئافراندن و ئەو ب حەزا تە هاتنە ئافراندن و هەنە.»
پشتی هنگی، من پەرتووكەكا پێچای دیت د دەستێ راستێ یێ وی دا بوو، ئەوێ ل سەر تەختی روینشتی، ئەو پەرتووك ژ هەردوو لایان ڤە یا نڤیسای بوو، ب حەفت موهران یا موهركری بوو.
من فریشتەیەكێ ب هێز ژی دیت، ب دەنگەكێ بلند گازی دكر: «كی یێ هەژییە پەرتووكا پێچای ڤەكەت و موهرێن وێ راكەت؟»
لێ كەسەك نەشیا، نە ل ئەسمانی، نە ل ئەردی و نە ژی ل بن ئەردی، وێ پەرتووكێ ڤەكەت و ل ناڤەرۆكا وێ بنێڕیت.
ئەز گەلەك دگریام، چنكو كەسەك نەهاتە دیتن كو یێ هەژی هندێ بیت، وێ پەرتووكێ ڤەكەت و ل ناڤەرۆكا وێ بنێڕیت.
ئینا ئێك ژ ریهسپیان گۆتە من: «نەكە گری. ئەڤە شێرێ ژ هۆزا یەهودای، رەها داوودی، سەركەفتن یا ب دەستڤە ئینای، دا پەرتووكێ و حەفت موهرێن وێ ڤەكەت.»
پشتی هنگی د ناڤبەرا تەختی و هەر چوار ئافراندیێن زیندی دا، د ناڤەڕاستا ریهسپیان دا، من بەرخەكێ راوەستیای دیت هەروەكو یێ ڤەكوشتی بیت. وی حەفت شاخ هەبوون و حەفت چاڤ ژی كو حەفت گیانێن خودێنە یێن بۆ هەمی ئەردی هاتینە هنارتن.
ئەو هات و پەرتووك ژ دەستێ راستێ یێ ئەوێ ل سەر تەختی روینشتی، وەرگرت.
دەمێ پەرتووك وەرگرتی، هەر چوار ئافراندیێن زیندی و هەر بیست و چوار ریهسپیان ل بەرامبەر بەرخی دەڤ و دەڤ خۆ هاڤێتە ئەردی. هەر ئێك ژ وان قیسارەیەك و ترارێن زێڕی یێن تژی بخویر ڤێ بوون. ئەو بخویر نڤێژێن پیرۆزكریانە.
ئەوان سروودەكا نوی دستراند و دگۆت: «تۆ یێ هەژی كو پەرتووكێ وەرگری و موهرێن وێ ڤەكەی، چنكو تۆ هاتیە ڤەكوشتن و تە ب خوینا خۆ مرۆڤ بۆ خودێ كڕین، ژ هەمی هۆز و زمان و گەل و مللەتان.
تە ئەو بۆ خودایێ مە كرنە پاشایەتی و كاهن، ئەو دێ پاشایەتیێ ل سەر ئەردی كەن.»
پشتی هنگی من بەرێ خۆ دایێ و من دەنگێ گەلەك فریشتەیان بهیست. ئەو ل دۆرێن تەختی و دۆرێن هەر چوار ئافراندیێن زیندی و ریهسپیان بوون، ژمارەیا وان ب دەهان هزار دە‍‌ھ هزار و هزارەهان هزار بوون.
ب دەنگەكێ بلند دگۆت: «یێ هەژییە ئەو بەرخێ هاتبوو ڤەكوشتن، كو هێزێ و دەولەمەندیێ و ئاقلمەندیێ و شیانێ و رێزێ و مەزناهیێ و پەسنێ وەرگریت.»
هنگی من بهیست، هەمی ئافراندیان، ل ئەسمانی و ل سەر ئەردی و ل بن ئەردی و د دەریایێ دا و هەمیێن د وان دا، دگۆت: «پەسن و رێز و مەزناهی و سەروەری هەروهەر بۆ ئەوێ ل سەر تەختی روینشتی و بۆ بەرخی بن.»
هەر چوار ئافراندیێن زیندی ژی دگۆت: «ئامین» و ریهسپیان خۆ هاڤێتە ئەردی و سوجدە بر.
پشتی هنگی من دیت بەرخی ئێك ژ هەر حەفت موهران ڤەكر و من بهیست ئێك ژ هەر چوار ئافراندیێن زیندی ب دەنگەكێ وەكو گڕگڕا عەوران دگۆت: «وەرە!»
من بەرێ خۆ دایێ، ئەڤە هەسپەكێ سپی یێ ل وێرێ! سیارێ وی كڤانەك ڤێ بوو، تانجەك بۆ وی هاتە دان، ئەو وەكو قەهرەمانەكی دەركەفت، دا سەركەفتنێ بینیت.
دەمێ بەرخی موهرا دوویێ ڤەكری، من بهیست ئافراندیێ زیندی یێ دوویێ گۆت: «وەرە!»
ئینا هەسپەكێ دی دەركەفت، یێ سۆر بوو. دەستهەلات بۆ سیارێ وی هاتە دان دا كو ئاشتیێ ژ جیهانێ راكەت، دا مرۆڤ ئێكودوو بكوژن. شیرەكێ مەزن ژی بۆ وی هاتە دان.
دەمێ بەرخی موهرا سێیێ ڤەكری، من بهیست ئافراندیێ زیندی یێ سێیێ گۆت: «وەرە!» ئینا من بەرێ خۆ دایێ، ئەڤە هەسپەكێ رەش یێ ل وێرێ! تەرازیەك د دەستێ سیارێ وی دا بوو.
من تشتەكێ وەكو دەنگی ژ ناڤەندا هەر چوار ئافراندیێن زیندی بهیست، دگۆت: «كوودەكێ گەنمی ب دینارەكێ و سێ كوودێن جەهی ب دینارەكێ. لێ زیانێ نەگەهینە زەیتێ و شەرابێ!»
دەمێ بەرخی موهرا چوارێ ڤەكری، من دەنگێ ئافراندیێ زیندی یێ چوارێ بهیست دگۆت: «وەرە!»
من بەرێ خۆ دایێ، ئەڤە هەسپەكێ رەنگ پێتی یێ ل وێرێ! ناڤێ سیارێ وی ‹مرن› بوو و وارێ مریان ب دویڤ وی ڤە بوو. دەستهەلات ل سەر چوارێكا جیهانێ بۆ وان هاتە دان، كو ب شیری و ب برسێ و ب دەردی و ب دڕندەیێن ئەردی كوشتنێ بكەن.
دەمێ بەرخی موهرا پێنجێ ڤەكری، من د بن قوربانگەهێ ڤە گیانێن وان دیتن یێن ژ پێخەمەت پەیڤا خودێ و ژ پێخەمەت شاهدەییا وان دای، هاتبوونە ڤەكوشتن.
ئەوان ب دەنگەكێ بلند گازی كر و گۆت: «هەی خودانێ باڵادەست یێ پیرۆز و راست! تا كەنگی تۆ ئاكنجیێن جیهانێ داد ناكەی و تۆلا خوینا مە ژ وان ڤەناكەی؟»
هنگی بۆ هەر ئێك ژ وان كراسەكێ سپی هاتە دان و بۆ وان هاتە گۆتن كو دەمەكێ كورت بێهنا خۆ ڤەدەن تاكو ژمارەیا هەڤبەنیێن وان و خویشك و برایێن وان، ئەوێن دێ وەكو وان هێنە كوشتن، تەمام ببیت.
پشتی هنگی من دیت، دەمێ بەرخی موهرا شەشێ ڤەكری، بیڤەلەرزەكا مەزن روی دا و رۆژ وەكو خراری رەش بوو و هەیڤ هەمی وەكو خوینێ لێ هات.
ستێرێن ئەسمانی كەفتنە ئەردی، كا چەوا دارهژیر، دەمێ بایەكێ بهێز دهێت، بەرهەمێ خۆ یێ نەگەهشتی دوەرینیت.
ئەسمان وەكو پەرتووكەكا دهێتە پێچاندن دیار نەما، هەمی چیا و گزیرتە ژ جهێ خۆ چوون.
هنگی پاشایێن ئەردی و مەزنێن وێ و فەرماندەیێن وێ و دەولەمەندێن وێ و هێزدارێن وێ و هەمی بەنی و ئازادان خۆ د شكەفتان ڤە و د ناڤ كەڤرێن چیایان دا ڤەشارت
و دگۆتە چیا و كەڤران: «ب سەر مە دا بكەڤن و مە ژ رویێ وی یێ ل سەر تەختی روینشتی و ژ تۆڕەبوونا بەرخی ڤەشێرن،
چنكو رۆژا مەزن یا تۆڕەبوونا وان هات و كی دشێت خۆ رابگریت؟»
پشتی وێ چەندێ من چوار فریشتەیێن راوەستیای ل سەر هەر چوار كوژیێن ئەردی دیتن، وان هەر چوار بایێن ئەردی دگرتن، دا چ با ل سەر ئەردی، نە ل سەر دەریایێ، نە ژی ل سەر چ داران نەهێن.
من فریشتەیەكێ دی ژی دیت، ژ رۆژهەلاتێ دەردكەفت، موهرا خودایێ زیندی ڤێ بوو. ب دەنگەكێ بلند گازی وان هەر چوار فریشتەیان كر، ئەوێن دەستهەلاتی بۆ هاتیە دان كو زیانێ ل ئەردی و دەریایێ بكەن.
وی فریشتەی گۆت: «زیانێ ل ئەردی و دەریایێ و داران نەكەن، تاكو ئەم ئەنیا بەنیێن خودایێ خۆ موهر نەكەین.»
وی دەمی من بهیست ژمارەیا ئەوێن هاتبوونە موهركرن، سەد و چل و چوار هزار بوون، ژ هەمی هۆزێن كوڕێن ئیسرائیلی هاتبوونە موهركرن:
ژ هۆزا یەهودای دوازدە هزار هاتبوونە موهركرن، ژ هۆزا رووبێنی دوازدە هزار، ژ هۆزا گادی دوازدە هزار،
ژ هۆزا ئاشێری دوازدە هزار، ژ هۆزا نەفتالی دوازدە هزار، ژ هۆزا مناشەی دوازدە هزار،
ژ هۆزا شەمعونی دوازدە هزار، ژ هۆزا لێڤی دوازدە هزار، ژ هۆزا ئیساخاری دوازدە هزار،
ژ هۆزا زەبولونی دوازدە هزار، ژ هۆزا یوسڤی دوازدە هزار، ژ هۆزا بنیامینی دوازدە هزار هاتبوونە موهركرن.
پشتی ڤان تشتان من بەرێ خۆ دایێ، ئەڤە جەماوەرەكێ مەزن، كەس نەدشیا بهژمێریت، ژ هەمی مللەت و هۆز و گەل و زمانان، ل بەرامبەر تەختی و ل بەرامبەر بەرخی د راوەستیای بوون، جلكێن سپی ل بەر وان بوون و تایێن دارقەسپێ د دەستی وان دا بوون.
وان ب دەنگەكێ بلند گازی دكر و دگۆت: «قورتالبوون ب دەستێ خودایێ مەیە، ئەوێ ل سەر تەختی روینشتی و ب دەستێ بەرخیە.»
هەمی فریشتە ل دۆرێن تەختی و ریهسپی و هەر چوار ئافراندیێن زیندی د راوەستیای بوون، ئەوان ل بەرامبەر تەختی دەڤ و دەڤ خۆ هاڤێتە ئەردی و سوجدە بۆ خودێ بر
و دگۆت: «ئامین! پەسن و مەزناهی و ئاقلمەندی و سوپاسی و رێز و شیان و هێز، هەروهەر بۆ خودایێ مە بن! ئامین.»
ئێك ژ وان ریهسپیان ئاخفت و گۆتە من: «ئەڤێن جلكێن سپی ل بەر، كینە و ژ كیرێ هاتینە؟»
من گۆتێ: «ئەزبەنی، تۆ دزانی.» هنگی وی گۆتە من: «ئەڤە ئەون یێن ژ تەنگاڤیا مەزن هاتین و جلكێن خۆ ب خوینا بەرخی شویشتین و سپی كرین.
لەوما ئەو ل بەرامبەر تەختێ خودێنە، د پەرستگەها وی ڤە، ب شەڤ و رۆژ وی دپەرێسن. ئەوێ ل سەر تەختی روینشتی ب خیڤەتا خۆ دێ وان پارێزیت.
ئێدی ئەو نە برسی دبن و نە تێهنی دبن، نە تاڤ ل وان ددەت، نە ژی گەرما سوژەك.
چنكو ئەو بەرخێ ل ناڤەڕاستا تەختی، دێ شڤانیێ ل وان كەت و دێ وان بەتە سەر كانیێن ئاڤا ژیانێ و خودێ دێ هەمی رۆندكان ژ چاڤێن وان ڤەمالیت.»
دەمێ بەرخی موهرا حەفتێ ڤەكری، نێزیكی نیڤ دەمژمێرێ بێدەنگێەكێ ئەسمان گرت.
من هەر حەفت فریشتەیێن راوەستیای ل پێشیا خودێ دیتن و حەفت بۆڕیزان بۆ وان هاتنە دان.
فریشتەیەكێ دی هات و ل نك قوربانگەهێ راوەستیا، بخویردانكەكا زێڕین ڤێ بوو. گەلەك بخویر بۆ وی هاتە دان، دا ل گەل نڤێژێن هەمی پیرۆزكریان، ل سەر قوربانگەها زێڕین، ئەوا ل پێشیا تەختی، پێشكێش بكەت.
ئەڤجا دویكێلا بخویرێ ل گەل نڤێژێن پیرۆزكریان ژ دەستێ فریشتەی بلند بوو پێشیا خودێ.
پشتی هنگی فریشتەی بخویردانك بر و ژ ئاگرێ قوربانگەهێ پڕ كر و هاڤێتە سەر ئەردی، ئینا گڕگڕا عەوران، دەنگەدەنگ، برویسی و بیڤەلەرز چێبوون.
هنگی هەر حەفت فریشتەیان، ئەوێن حەفت بۆڕیزان ڤێ، خۆ ئامادە كر دا وان لێ بدەن.
یێ ئێكێ لێ دا، ئینا تەرگ و ئاگرێن تێكهەلی خوینێ چێبوون و بۆ سەر ئەردی هاتنە هاڤێتن. ئەڤجا سێئێكا ئەردی سۆت و سێئێكا داران سۆت و هەمی گیایێ كەسك سۆت.
فریشتەیێ دوویێ لێ دا، ئینا تشتەكێ وەكو چیایەكێ مەزن یێ ب ئاگری هەل، بۆ ناڤ دەریایێ هاتە هاڤێتن. ئەڤجا سێئێكا دەریایێ بوو خوین
و سێئێكا ئافراندیێن د دەریایێ دا دژین مرن و سێئێكا گەمیان ژ ناڤ چوون.
فریشتەیێ سێیێ لێ دا، ئینا ستێرەكا مەزن یا وەكو خەتیرەیا هەل ژ ئەسمانی كەفتە سەر سێئێكا رویباران و سەر كانیێن ئاڤێ.
(ناڤێ ستێرێ تەحلیشكە.) ئینا سێئێكا ئاڤان تەحل بوو و ژ بەر وان ئاڤان گەلەك مرۆڤ مرن، چنكو تەحل ببوو.
فریشتەیێ چوارێ لێ دا، ئینا ل سێئێكا رۆژێ، سێئێكا هەیڤێ و سێئێكا ستێران هاتە دان، ئەڤجا سێئێكا وان تاری بوو و سێئێكا رۆژێ رۆناهی نەدا، هەروەسا شەڤێ ژی.
هنگی من بەرێ خۆ دایێ و دەنگێ ئەلهۆیەكی ل ناڤەڕاستا ئەسمانی دفڕی بهیست، ب دەنگەكێ بلند دگۆت: «نەخوزیكێن، نەخوزیكێن، نەخوزیكێن ئاكنجیبوویێن ل سەر ئەردی، ژ بەر دەنگێ بۆڕیزانێن ماین یێن سێ فریشتەیێن دی كو ل بەرە لێ بدەن.»
فریشتەیێ پێنجێ ل بۆڕیزانێ دا و من ستێرەك دیت ژ ئەسمانی كەفتبوو سەر ئەردی و كلیلا دەرگەهێ چاڵا بێ بن بۆ ستێرێ هاتە دان.
دەمێ وێ دەرگەهێ چاڵا بێ بن ڤەكری، دویكێلەكا وەكو دویكێلا ئێتوینەكا مەزن ژێ دەركەفت، ئینا رۆژ و با ژ بەر دویكێلا چاڵێ تاری بوون.
ژ وێ دویكێلێ كولی دەركەفتنە سەر ئەردی و شیانەكا وەكو شیانا دویپشكێن ئەردی بۆ وان هاتە دان
و بۆ هاتە گۆتن كو زیانێ ل گیایێ ئەردی نەدەن، نە ژی كەسكاتی و نە ژی داران، ب تنێ وان مرۆڤان یێن موهرا خودێ ل سەر ئەنیا وان نینە.
دەستویری بۆ كولیان نەهاتە دان، كو وان بكوژن، لێ پێنج هەیڤان وان ئازار بدەن. ئەو ئازارا وەكو ئازارا دویپشكیە دەمێ ب مرۆڤی ڤەددەت.
د وان رۆژان دا، مرۆڤ دێ ل مرنێ گەڕیێن، لێ قەت نابینن، ئەو دێ حەز كەن بمرن، لێ مرن دێ ژ وان رەڤیت.
شێوەیێ كولیان وەكو یێ وان هەسپان بوو یێن ئامادەكری بۆ جەنگێ. ل سەر سەرێ وان تشتەكێ وەكو تانجێن زێڕی بوو و دێمێ وان وەكو دێمێ مرۆڤان بوو،
پرچەكا وەكو پرچا ژنان هەبوو و ددانێن وان وەكو ددانێن شێران بوون،
زریێن وان وەكو زریێن ئاسنی بوون و دەنگێ چەنگێن وان وەكو دەنگێ گەلەك گالیسكەیان بوو یێن هەسپ دكێشن و بۆ جەنگێ دكەنە غار.
كوری و دمدریشك هەبوون وەكو یێن دویپشكان و شیانا وان یا كو پێنج هەیڤان زیانێ ل مرۆڤان بدەن د كوریێن وان دا بوو.
فریشتەیێ چاڵا بێ بن پاشا بوو ل سەر وان، ناڤێ وی ب عیبرانی ‹ئابادۆن›ە و ب یونانی ‹ئاپۆلیۆن›ە.
خولیسەریا ئێكێ دەرباز بوو، ئەڤە دوو خولیسەریێن دی ژی پشتی وان تشتان دێ هێن.
فریشتەیێ شەشێ ل بۆڕیزانێ دا و من دەنگەك ژ چوار شاخێن قوربانگەها زێڕین یا ل پێشیا خودێ بهیست،
دەنگی گۆتە فریشتەیێ شەشێ، ئەوێ بۆڕیزان ڤێ: «وان هەر چوار فریشتەیێن ل نك رویبارێ مەزن فوراتی گرێدای، بەردە.»
ئینا هەر چوار فریشتەیێن هاتبوونە ئامادەكرن بۆ ڤێ دەمژمێرێ و رۆژێ و هەیڤێ و ساڵێ هاتنە بەردان، دا سێئێكا مرۆڤان بكوژن.
من ژمارەیا وان بهیست، ژمارەیا لەشكەرێن سیار دوو سەد هزار هزار بوون.
من هۆسا هەسپ و سیارێن وان د بینینێ دا دیتن: زریێن سیاران وەكو رەنگێ ئاگری و یاقوتێ شین و كپریتێ بوون. سەرێ هەسپان وەكو سەرێ شێران بوو، ژ دەڤێ وان ئاگر و دویكێل و كپریت دەردكەفتن.
ب ڤان سێ دربان، سێئێكا مرۆڤان ب ئاگری و دویكێلێ و كپریتا ژ دەڤێ وان دەردكەفت، هاتنە كوشتن،
چنكو شیانا هەسپان د دەڤ و كوریا وان دایە، كوریێن وان وەك مارانە، ب سەرن و زیانێ پێ دكەن.
ئەو مرۆڤێن دی یێن ب ڤان دربان نەهاتینە كوشتن، ژ كریارێن دەستێ خۆ ل خۆ نەزڤڕین، دەست ژ پەرستنا ئەجنە و پووتێن زێڕی و زیڤی و برۆنزی و بەری و داری بەرنەدا، ئەو پووتێن نەشێن ببینن، نە ژی ببهیسن و نە ژی بڕێڤە بچن.
هەروەسا ژ كوشتن و جادووگەری و دەهمەنپیسی و دزیكرنا خۆ ژی ل خۆ نەزڤڕین.
هنگی من فریشتەیەكێ دی یێ بهێز دیت، ژ ئەسمانی دهاتە خوارێ، عەورەك د وی یێ پێچای بوو و كەسكوسۆرەك ل هنداڤی سەرێ وی بوو و دێمێ وی وەكو رۆژێ بوو و پێیێن وی وەكو ستوینێن ئاگری بوون.
پەرتووكەكا بچویك یا ڤەكری د دەستێ وی دا بوو. پێیێ خۆ یێ راستێ دانا سەر دەریایێ و یێ چەپێ دانا سەر ئەردی
و ب دەنگەكێ بلند كرە گازی، هەروەكو شێر دنڕیت. دەمێ وی كریە گازی، هەر حەفت گڕگڕێن عەوران ب دەنگێ خۆ ئاخفتن.
دەمێ هەر حەفت گڕگڕێن عەوران ب دەنگێ خۆ ئاخفتین، من ل بەر بوو دەست ب نڤیسینێ بكەم، لێ من دەنگەك ژ ئەسمانی بهیست دگۆت: «ئەوا حەفت گڕگڕێن عەوران گۆتی، موهر بكە و نە نڤیسە.»
ئەو فریشتەیێ من دیتی ل سەر دەریایێ و ئەردی یێ راوەستیای، دەستێ خۆ یێ راستێ بەرەڤ ئەسمانی ڤە بلند كر
و سویند ب وی خوار یێ هەروهەر زیندی، ئەوێ ئەسمان و یێن تێدا، ئەرد و یێن تێدا، دەریا و یێن تێدا ئافراندین: «ئێدی گیرۆبوون نابیت!
لێ د وان رۆژان دا یێن كو فریشتەیێ حەفتێ ل بەرە ل بۆڕیزانێ بدەت، دێ نهێنیا خودێ ب ج‍‌ھ هێت، هەروەكو وی بۆ بەنیێن خۆ یێن پێغەمبەر راگەهاندی.»
ئەو دەنگێ من ژ ئەسمانی بهیستی، جارەكا دی ل گەل من ئاخفت و گۆت: «هەڕە پەرتووكا ڤەكری، ئەوا د دەستێ فریشتەیێ راوەستیای دا ل سەر دەریایێ و ئەردی، ببە.»
ئینا ئەز چوومە نك فریشتەی و من گۆتێ: «كا وێ پەرتووكا بچویك بدە من.» ئەوی گۆتە من: «ببە و بخۆ، ئەو دێ زكێ تە تەحل كەت، لێ د دەڤێ تە دا، دێ وەكو هنگڤینی یا شرین بیت.»
من پەرتووكا بچویك ژ دەستێ فریشتەی وەرگرت و خوار، ئەو د دەڤێ من دا وەكو هنگڤینی یا شرین بوو، لێ پشتی من خواری، زكێ من تەحل بوو.
ئینا بۆ من هاتە گۆتن: «دڤێت تۆ دیسان دەربارەی گەلەك گەل و مللەت و زمان و پاشایان پەیامێ رابگەهینی.»
پشتی هنگی لەڤەنەكێ وەكو دارێ پیڤانێ بۆ من هاتە دان و هاتە گۆتن: «رابە، پەرستگەها خودێ و قوربانگەهێ بپیڤە و ئەوێن تێدا پەرستنێ دكەن بهژمێرە.
لێ حەوشا پەرستگەهێ یا دەرڤە بهێلە و نەپیڤە، چنكو ئەو بۆ مللەتێن نەجوهی هاتیە دان و ئەو دێ چل و دوو هەیڤان باژێڕێ پیرۆز بنپێ كەن.
ئەز ژی دێ دەستهەلاتێ دەمە هەردوو شاهدێن خۆ و ئەو دێ ب جلكێن ژ خراری هزار و دوو سەد و شێست رۆژان پەیامێ راگەهینن.»
ئەو هەردوو شاهد هەردوو دارزەیتوون و هەردوو چرادانكن یێن ل بەرامبەر خودانێ ئەردی راوەستیای.
ئەگەر ئێكی بڤێت زیانێ بگەهینیتە وان، ئاگر ژ دەڤێ وان دەردكەڤیت و دوژمنێن وان دخۆت. ئەگەر ئێكی بڤێت زیانێ بگەهینیتە وان، دڤێت ئەو ب ڤی شێوەی بهێتە كوشتن.
ئەڤان دەستهەلاتا هەی دەرگەهێن ئەسمانی بگرن، داكو د رۆژێن پەیام راگەهاندنا وان دا باران نەباریت، هەروەسا وان دەستهەلاتا ل سەر ئاڤێ هەی كو وێ بكەنە خوین و ب هەر دربەكی ل ئەردی بدەن، هەر گاڤا وان بڤێت.
دەمێ ئەو شاهدەییا خۆ تەمام بكەن، دڕندەیێ ژ چاڵا بێ بن دەردكەڤیت دێ جەنگێ ل سەر وان كەت و ب سەر وان كەڤیت و وان كوژیت.
تەرمێن وان دێ ل سەر گۆڕەپانا باژێڕێ مەزن بن، ئەوا وەكو هێما دبێژنێ سەدۆم و مسر، وی جهی یێ خودانێ وان لێ هاتیە خاچدان.
مرۆڤ ژ هەمی گەل و هۆز و زمان و مللەتان بۆ سێ رۆژ و نیڤان دێ ل تەرمێن وان نێڕن و ناهێلن د گۆڕان دا بهێنە ڤەشارتن.
ئاكنجیێن ل سەر ئەردی دێ ل سەر وان دلهوین بن و دلخۆش بن و دیاریان بۆ ئێكودوو هنێرن، چنكو ڤان هەردوو پێغەمبەران، ئاكنجیێن ل سەر ئەردی ئازار دابوون.
لێ پشتی سێ رۆژ و نیڤان، هەناسەیا ژیانێ ژ لایێ خودێ ڤە چوو د وان دا و ئەو رابوونە سەر پێیێن خۆ. ئینا ترسەكا مەزن كەفتە سەر ئەوێن ل وان دنێڕی.
هنگی وان هەردوویان دەنگەكێ مەزن ژ ئەسمانی بهیست، دگۆتە وان: «سەركەڤنە ڤێرێ!» ئینا ئەو د عەوری دا سەركەفتنە ئەسمانی و دوژمنێن وان بەرێ خۆ ددایێ.
د وێ دەمژمێرێ دا، بیڤەلەرزەكا مەزن چێبوو، ئینا دەهێكا باژێڕی هەڕفت و حەفت هزار مرۆڤ ب وێ بیڤەلەرزێ مرن، یێن ماین ترسیان و مەزناهی دا خودایێ ئەسمانی.
خولیسەریا دوویێ دەرباز بوو، ئەڤە خولیسەریا سێیێ زوی یا دهێت.
فریشتەیێ حەفتێ ل بۆڕیزانێ دا و دەنگێن مەزن ژ ئەسمانی هاتن، دگۆتن: «پاشایەتیا جیهانێ یا بوویە یا خودانێ مە و مەسیحێ وی، ئەو دێ هەتا هەتایێ پاشایەتیێ كەت.»
ئینا هەر بیست و چوار ریهسپیێن ل سەر تەختێن خۆ ل بەرامبەر خودێ دروینشتی، دەڤ و دەڤ خۆ هاڤێتە ئەردی و سوجدە بۆ خودێ بر
و گۆتن: «ئەم سوپاسیا تە دكەین، هەی خودان خودێ، هێزدارێ هەر تشتی، ئەوێ هەی و ئەوێ هەبوو، چنكو تە هێزا خۆ یا مەزن دیار كر و دەست ب پاشایەتیێ كر.
مللەت تۆڕە بوون، لێ تۆڕەبوونا تە هات و دەمێ دادكرنا مریان هات و دەمێ خەلاتكرنا بەنیێن تە یێن پێغەمبەر و پیرۆزكریان و یێن ژ ناڤێ تە دترسن، چ یێن بچویك و چ یێن مەزن، هات و دەمێ ژناڤبرنا وان یێن جیهانێ ژ ناڤ دبەن هات.»
هنگی پەرستگەها خودێ یا ل ئەسمانی ڤەبوو و سندوقا پەیمانا وی د پەرستگەهێڤە دیار بوو. ئینا بوونە برویسی و دەنگەدەنگ و گڕگڕا عەوران و بیڤەلەرز و تەرگا مەزن.
پشتی هنگی نیشانەكا مەزن ل ئەسمانی دیار بوو: ئەو ژی ژنكەك بوو، رۆژ وەكو كراسەكی ل بەر بوو و هەیڤ ل بن پێیێن وێ بوو و تانجەكا ژ دوازدە ستێران ل سەر سەرێ وێ بوو،
ئەو یا دووگیان بوو و دكرە قێژی ژ بەر ژان و ئازارێن زاڕۆكبوونێ.
نیشانەكا دی ژی ل ئەسمانی دیار بوو: ئەڤە ئەژدەهایەكێ سۆر یێ مەزن، یێ ب حەفت سەر و دە‍‌ھ شاخان و حەفت تانج ل سەر سەرێن وی.
كوریا وی سێئێكا ستێرێن ئەسمانی رامالین و هاڤێتنە سەر ئەردی. پاشی ئەژدەها ل پێشیا ژنكا ل بەر زاڕۆكبوونێ بوو راوەستیا، داكو زاڕۆكێ وێ داعویریت، دەمێ دبیت.
ژنكێ زاڕۆكەكێ نێر بوو، ئەوێ كو دێ ب گۆپالەكێ ئاسنی حوكمداریێ ل هەمی مللەتان كەت، لێ كوڕێ وێ بۆ نك خودێ و بۆ نك تەختێ وی هاتە رەڤاندن.
ئەو ژنك رەڤی چۆلی، بۆ جهەكی كو خودێ بۆ وێ ئامادە كربوو، داكو هزار و دوو سەد و شێست رۆژان بهێتە حەواندن.
هنگی جەنگەك ل ئەسمانی چێبوو، میكائیلی و فریشتەیێن وی شەڕ ل دژی ئەژدەهای كر، ئەژدەهای و فریشتەیێن وی ژی شەڕ كر،
لێ ئەژدەها ب سەر نەكەفت، ئێدی وان چ ج‍‌ھ ل ئەسمانی نەما.
ئەژدەهایێ مەزن، ئەو مارێ كەڤنە یێ كو دبێژنێ ئبلیس و ساتان ، ئەوێ هەمی جیهانێ دخاپینیت ، ئەو بۆ ئەردی هاتە هاڤێتن و فریشتەیێن وی ژی ل گەل وی هاتنە هاڤێتن.
هنگی من دەنگەكێ بلند بهیست ژ ئەسمانی دگۆت: «نوكە قورتالبوون و هێز و پاشایەتیا خودایێ مە و دەستهەلاتا مەسیحێ وی یێن هاتین، چنكو سكالاكەرێ دژی خویشك و برایێن مە، ئەوێ ب شەڤ و رۆژ ل پێشیا خودایێ مە سكالایێ ل وان دكەت، بۆ ئەردی هاتە هاڤێتن.
ئەو ب خوینا بەرخی و ب پەیڤا شاهدەییا خۆ ل سەر وی ب سەركەفتن و وان حەز ژ ژیانا خۆ نەكر، خۆ ل بەرامبەر مرنێ ژی.
ژ بەر ڤێ چەندێ دلخۆش ببن، هەی ئەسمانان و یێن تێدا ئاكنجی. لێ نەخوزیكێن ئەردی و دەریایێ، چنكو ئبلیس بۆ هەوە ب تۆڕەبوونەكا مەزن هاتیە خوارێ، ژ بەر كو ئەو دزانیت دەمێ وی یێ كێمە.»
گاڤا ئەژدەهای دیتی، كو ئەو بۆ ئەردی یێ هاتیە هاڤێتن، كەفتە دویڤ وێ ژنكا زاڕۆكێ نێر بووی.
لێ دوو چەنگێن ئەلهۆیێ مەزن بۆ ژنكێ هاتنە دان، داكو ژ ماری بڕەڤیت و بفڕیتە چۆلی، جهێ وێ یێ كو دێ دەم و دوو دەم و نیڤان لێ هێتە حەواندن.
ئینا ماری ئاڤەكا وەكو رویباری ژ دەڤێ خۆ ب دویڤ ژنكێ را هاڤێت، دا ئاڤ وێ ببەت.
لێ ئەردی هاریكاریا ژنكێ كر، ئەوی دەڤێ خۆ ڤەكر و ئەو رویبار داعویرا، یێ ئەژدەهای ژ دەڤێ خۆ هاڤێتی.
ئینا ئەژدەها ژ ژنكێ تۆڕە بوو و چوو دا جەنگێ ل دژی دویندەها وێ یا مای بكەت، ئەوێن فەرمانێن خودێ ب ج‍‌ھ دئینن و شاهدەییێ بۆ عیسایێ مەسیح ددەن.
ئەژدەها ل سەر خیزێ كنارێ دەریایێ راوەستیا.
ئینا من دڕندەیەك دیت ژ دەریایێ دەردكەفت، حەفت سەر و دە‍‌ھ شاخ هەبوون، ل سەر شاخێن وی دە‍‌ھ تانج هەبوون و ل سەر سەرێن وی ناڤێ كوفریان هەبوو.
ئەو دڕندەیێ من دیتی، وەكو پلنگی بوو، پێیێن وی وەكو پێیێن هرچێ بوون و دەڤێ وی وەكو دەڤێ شێری بوو. ئەژدەهای هێزا خۆ و تەختێ خۆ و دەستهەلاتەكا مەزن دانێ.
ئێك ژ سەرێن دڕندەی یێ وەسا بوو هەروەكو بۆ مرنێ هاتبیتە برینداركرن، لێ برینا وی یا كوژەك هاتبوو ساخكرن. هەمی جیهان حێبەتی مان و ب دویڤ دڕندەی كەفتن
و سوجدە بۆ ئەژدەهای بر، چنكو وی دەستهەلاتا خۆ دا دڕندەی. وان سوجدە بۆ دڕندەی بر و گۆتن: «ما كی وەكو ڤی دڕندەیە؟ و كی دشێت ل دژی وی بجەنگیت؟»
ئەزمانەك بۆ وی دڕندەی هاتە دان، كو تشتێن مەزن و گۆتنێن كوفری بێژیت و دەستهەلات بۆ وی هاتە دان كو چل و دوو هەیڤان چ دڤێت بكەت.
ئەوی دەڤێ خۆ ڤەكر و كوفری ل دژی خودێ كرن، كوفری ل دژی ناڤێ وی و ل دژی خیڤەتا وی و ل دژی ئاكنجیێن ل ئەسمانی كرن.
دەستویری بۆ وی هاتە دان، كو ل دژی پیرۆزكریان بجەنگیت و ل سەر وان سەر بكەڤیت. هەروەسا دەستهەلات ل سەر هەمی هۆز و گەل و زمان و مللەتان بۆ وی هاتە دان.
هەمی ئاكنجیێن ل سەر ئەردی، ئەوێن ناڤێن وان هەر ژ دامەزراندنا جیهانێ د پەرتووكا ژیانێ یا بەرخێ ڤەكوشتی دا نەهاتینە نڤیسین، دێ سوجدێ بۆ دڕندەی بەن.
ئەوێ گو‍‌ھ هەبن، بلا ببهیسیت:
ئەگەر بۆ ئێكی هاتیە نڤیسین ببیتە دیل، دێ بەرەڤ دیلاتیێ ڤە چیت. ئەگەر بۆ ئێكی هاتیە نڤیسین ب شیری بهێتە كوشتن، دێ ب شیری هێتە كوشتن. ل ڤێرێ خۆڕاگرتن و دلسۆزیا پیرۆزكریان یا فەرە.
ئینا من دڕندەیەكێ دی دیت ژ ئەردی دەردكەفت، وی دوو شاخێن وەكو شاخێن بەرخی هەبوون و وەكو ئەژدەهای دئاخفت.
ئەو ژ پێش دڕندەیێ ئێكێ ڤە، هەمی دەستهەلاتا وی دگێڕیت و وە ل ئەردی و ئاكنجیێن وێ دكەت كو سوجدێ بۆ دڕندەیێ ئێكێ ببەن یێ برینا وی یا كوژەك هاتبوو ساخكرن.
ئەو نیشانێن مەزن دكەت، خۆ ئەو وە دكەت كو ل بەر چاڤێن مرۆڤان ئاگر ژ ئەسمانی بهێتە سەر ئەردی
و ب وان نیشانێن بۆ وی هاتینە دان كو ژ پێش دڕندەیێ ئێكێ ڤە بكەت، ئەو خەلكی دخاپینیت و دبێژیتە ئاكنجیێن ل سەر ئەردی وێنەیەكی بۆ وی دڕندەی چێكەن یێ ب شیری هاتیە برینداركرن و ژیای.
دەستهەلات ژی بۆ وی هاتە دان كو هەناسەیێ بدەتە وێنەیێ دڕندەیێ ئێكێ، داكو وێنەیێ دڕندەی بئاخڤیت و بشێت وان بدەتە كوشتن یێن سوجدێ بۆ وێنەیێ دڕندەی نەبەن.
ئەوی وە كر كو نیشانەك ل سەر دەستێ راستێ یان ئەنیا هەمی بچویك و مەزنان، دەولەمەند و هەژاران، ئازاد و بەنیان بهێتە كرن،
دا كەس نەشێت كڕینێ یان فرۆتنێ بكەت، ئەگەر نیشان ل سەر نەبیت، چ ناڤێ دڕندەی یان ژمارەیا ناڤێ وی بیت.
ل ڤێرێ ئاقلمەندی یا فەرە، ئەوێ زێهن هەبیت، بلا ژمارەیا دڕندەی بهژمێریت، چنكو ئەو ژمارەیا مرۆڤیە و ژمارەیا وی شەش سەد و شێست و شەشە.
پشتی هنگی من بەرێ خۆ دایێ، ئەڤە بەرخ ل سەر چیایێ سییۆنێ یێ راوەستیای بوو و سەد و چل و چوار هزار مرۆڤ ل گەل وی بوون، ئەوێن ناڤێ بەرخی و ناڤێ بابێ وی ل سەر ئەنیا وان نڤیسای بوو.
من دەنگەك ژ ئەسمانی بهیست، وەكو دەنگێ گەلەك ئاڤان و وەكو دەنگێ گڕگڕەكا مەزن یا عەوران بوو. ئەو دەنگێ من بهیستی، وەكو دەنگێ لێدەرێن قیسارەیێ بوو دەمێ ل قیسارەیێن خۆ ددەن.
ئەوان ل پێشیا تەختی و ل پێشیا هەر چوار ئافراندیێن زیندی و ریهسپیان سروودەكا نوی دستراند. كەس نەدشیا فێری وێ سروودێ ببیت ژبلی وان سەد و چل و چوار هزار مرۆڤێن ژ ئەردی هاتینە كڕین.
ئەڤە ئەون یێن ل گەل ژنكان نەهەڕمین، وان كوڕینیا خۆ پاك پاراستیە. ئەڤە ئەون یێن بەرخ كیڤە بچیت ئەو ب دویڤ دكەڤن. ئەو ژ ناڤ مرۆڤان هاتینە كڕین ، وەكو خێڤە بۆ خودێ و بەرخی.
چ درەو ژ دەڤێ وان دەرنەكەفتینە، ئەو د بێكێماسینە.
پشتی هنگی من فریشتەیەكێ دی دیت، ل ناڤەندا ئەسمانی دفڕی، مزگینیا هەروهەری هەبوو، دا وێ بۆ ئاكنجیێن ئەردی ژ هەمی مللەت و هۆز و زمان و گەلان رابگەهینیت،
ب دەنگەكێ بلند دگۆت: «ژ خودێ بترسن و پەسنا وی بكەن، چنكو دەمژمێرا دادكرنا وی یا هاتی. سوجدێ بۆ وی ببەن یێ ئەرد و ئەسمان و دەریا و كانیێن ئاڤێ چێكرین.»
فریشتەیەكێ دی، یێ دوویێ، ب دویڤ وی را هات و دگۆت: «كەفت! بابلا مەزن كەفت، ئەوا شەرابا هار یا دەهمەنپیسیا خۆ ب هەمی مللەتان دایە ڤەخوارن.»
فریشتەیەكێ دی، یێ سێیێ، ب دویڤ وان را هات و ب دەنگەكێ بلند دگۆت: «ئەگەر ئێك سوجدێ بۆ دڕندەی و وێنەیێ وی ببەت و نیشانا وی ل سەر ئەنیا خۆ یان ل سەر دەستێ خۆ قەبیل كەت،
ئەو ژی دێ ژ شەرابا تۆڕەبوونا خودێ یا دژوار ڤەخۆت، ئەوا چ تشت ل گەل نەهاتینە تێكهەلكرن و پەرداغا تۆڕەبوونا خودێ ژێ هاتیە داگرتن، هەروەسا دێ ب ئاگری و كپریتێ ل پێشیا فریشتەیێن پیرۆز و ل پێشیا بەرخی هێتە ئەشكەنجەدان
و دویكێلا ئەشكەنجەدانا وان دێ بۆ هەتا هەتایێ بلند بیت. بۆ ئەوێن سوجدێ بۆ دڕندەی و وێنەیێ وی دبەن، یان ئەوێن نیشانا ناڤێ وی قەبیل دكەن، ب شەڤ و رۆژ بێهنڤەدان نینە.»
ل ڤێرێ خۆڕاگرتنا پیرۆزكریان یا فەرە، ئەوێن فەرمانێن خودێ ب ج‍‌ھ دئینن و دلسۆزیا خۆ ب عیسای دپارێزن.
پشتی هنگی من دەنگەك ژ ئەسمانی بهیست دگۆت: «بنڤیسە: خوزیكێن وان مریان، ئەوێن ژ نوكە و پێڤە ل سەر باوەریێ ب خودانی دمرن.» گیانێ پیرۆز دبێژیت: «بەلێ! دا ژ وەستیانا خۆ بێهنا خۆ ڤەدەن، چنكو كریارێن وان دێ ل گەل وان چن.»
پاشی من بەرێ خۆ دایێ، ئەڤە عەورەكێ سپی و ل سەر عەوری ئێكێ وەكو كوڕێ مرۆڤ یێ روینشتی بوو! تانجەكا زێڕین ل سەر سەرێ وی بوو و شالۆكەكا تیژ د دەستی دا بوو.
فریشتەیەكێ دی ژ پەرستگەهێ دەركەفت، ب دەنگەكێ بلند گازی ئەوێ ل سەر عەوری روینشتی دكر و دگۆت: «شالۆكا خۆ هەلگرە و دروینێ بكە، چنكو دەمژمێرا دروینێ هات و بەرهەمێ ئەردی یێ گەهشتی.»
ئینا ئەوێ ل سەر عەوری روینشتی شالۆكا خۆ دا رویێ ئەردی و ئەرد هاتە دروین.
پاشی فریشتەیەكێ دی ژ پەرستگەها ل ئەسمانی دەركەفت، وی ژی شالۆكەكا تیژ ڤێ بوو.
پشتی هنگی فریشتەیەكێ دی، ئەوێ دەستهەلات ل سەر ئاگری هەی، ژ قوربانگەهێ دەركەفت و ب دەنگەكێ بلند گازی كرە فریشتەیێ شالۆكا تیژ ڤێ و گۆتێ: «شالۆكا خۆ هەلگرە و ئیشیێن مێوێن ئەردی كۆم بكە، چنكو تریێ وێ یێ گەهشتی.»
فریشتەی شالۆكا خۆ دا رویێ ئەردی و تریێ ئەردی كۆم كر و هاڤێتە د ئویسلەیا مەزن یا تۆڕەبوونا خودێ دا.
ئینا ئویسلە ژ دەرڤەی باژێڕی ب پێیان هاتە گڤاشتن و خوین ژێ دەركەفت، تاكو گەهشتیە هەفسارێ هەسپان، فرەهیا هزار و شەش سەد ستادیان.
پشتی هنگی من نیشانەكا دی یا مەزن و سەیر ل ئەسمانی دیت: حەفت فریشتەیان حەفت درب ڤێ بوون، ئەو درب یێن دویماهیێنە، چنكو ب وان تۆڕەبوونا خودێ تەمام دبیت.
پاشی من تشتەكێ وەكو دەریایا شویشەی یا تێكهەل ل گەل ئاگری دیت و ئەوێن سەركەفتن ل سەر دڕندەی و وێنەیێ وی و ژمارەیا ناڤێ وی ئینای، ل سەر دەریایا شویشەی د راوەستیای بوون و قیسارەیێن خودێ ڤێ بوون
و سروودا مووسای بەنیێ خودێ و سروودا بەرخی دستراند: «كارێن تە د مەزن و سەیرن، هەی خودان خودێ، هێزدارێ هەر تشتی. رێكێن تە د دادپەروەر و راستن، هەی پاشایێ مللەتان.
كی ژ تە ناترسیت و ناڤێ تە مەزن ناكەت، هەی خودان؟ چنكو تۆ ب تنێ یێ پیرۆزی. هەمی مللەت دێ هێن و ل بەرامبەری تە سوجدێ بەن، چنكو كارێن تە یێن دادپەروەرانە ئاشكرا بوون.»
پشتی ڤان تشتان من بەرێ خۆ دایێ، ل ئەسمانی پەرستگە‍‌ھ، كو خیڤەتا شاهدەیێیە، ڤەبوو،
حەفت فریشتەیێن حەفت درب ڤێ، ژ پەرستگەهێ دەركەفتن. كتانێ پاقژ و تەیسی ل بەر وان بوو و سینگێ وان ب قایشێن زێڕین د پێچای بوون.
ئێك ژ چوار ئافراندیێن زیندی حەفت ترارێن زێڕین، یێن تژی ژ تۆڕەبوونا خودایێ هەروهەر زیندی، دانە هەر حەفت فریشتەیان.
پەرستگە‍‌ھ ژ دویكێلا مەزناهیا خودێ و هێزا وی تژی بوو و چ كەس نەشیا بچیتە د پەرستگەهێ ڤە، تاكو هەر حەفت دربێن حەفت فریشتەیان تەمام بووین.
پشتی هنگی من دەنگەكێ بلند ژ پەرستگەهێ بهیست دگۆتە هەر حەفت فریشتەیان: «هەڕن هەر حەفت ترارێن تۆڕەبوونا خودێ ب سەر ئەردی دا بڕێژن.»
ئەڤجا یێ ئێكێ چوو و ترارێ خۆ ب سەر ئەردی دا رشت و كولكێن پیس و ژاندار ل وی خەلكی هاتن یێن نیشانا دڕندەی ل سەر وان و سوجدێ بۆ وێنەیێ وی دبەن.
پاشی فریشتەیێ دوویێ ترارێ خۆ ب سەر دەریایێ دا رشت و دەریا بوونە خوین، وەكو خوینا مریان. ئینا هەمی گیانەوەرێن د دەریایێ دا مرن.
فریشتەیێ سێیێ ترارێ خۆ ب سەر رویباران و سەرەكانیێن ئاڤێ دا رشت و ئەو بوونە خوین.
هنگی من بهیست فریشتەیێ ئاڤان دگۆت: «تۆ یێ دادپەروەری، ئەی ئەوێ هەی و ئەوێ هەبوو، ئەوێ پیرۆز، چنكو تە وەسا حوكم دایە.
ژ بەر كو وان خوینا پیرۆزكریان و پێغەمبەران یا رشتی، تە ژی خوین بۆ ڤەخوارنێ دایە وان. ئەو د هەژینە.»
ئینا من دەنگێ قوربانگەهێ بهیست دگۆت: «بەلێ، هەی خودان خودێ، هێزدارێ هەر تشتی، حوكمێن تە د راست و دادپەروەرن.»
پاشی فریشتەیێ چوارێ ترارێ خۆ ب سەر رۆژێ دا رشت و دەستهەلات بۆ وێ هاتە دان كو مرۆڤان ب ئاگری بسوژیت.
ئینا مرۆڤ ب گەرمەكا مەزن سۆتن و جڤین دانە ناڤێ خودێ ئەوێ دەستهەلات ل سەر ڤان دربان هەی. لێ ئەو ل خۆ نەزڤڕین كو پەسنا خودێ بكەن.
فریشتەیێ پێنجێ ترارێ خۆ ب سەر تەختێ دڕندەی دا رشت و پاشایەتیا وی تاری بوو و ژ بەر ئێشانێ مرۆڤان لەق ل ئەزمانێ خۆ ددان
و ژ بەر ئێشان و كولكێن خۆ، جڤین دانە خودایێ ئەسمانی. لێ ژ كارێن خۆ ل خۆ نەزڤڕین.
پاشی فریشتەیێ شەشێ ترارێ خۆ ب سەر رویبارێ مەزن فوراتی دا رشت و ئاڤا وی هشك بوو، دا رێك بۆ پاشایێن ژ رۆژهەلاتێ ئامادە ببیت.
هنگی من سێ گیانێن پیس یێن وەكو بەقان دیتن، ژ دەڤێ ئەژدەهای و ژ دەڤێ دڕندەی و ژ دەڤێ پێغەمبەرێ درەوین دەردكەفتن.
ئەو گیانێن ئەجنەیان بوون یێن نیشانێن حنێرانە دكەن و دچنە نك پاشایێن هەمی جیهانێ، دا وان بۆ جەنگا ل رۆژا خودێ، هێزدارێ هەر تشتی، كۆم بكەن.
«ئەڤە ئەز وەكو دزەكی دهێم! خوزیكێن وی یێ هشیار دمینیت و جلكێن خۆ دپارێزیت، دا رویس نەگەڕیێت و شەرمەجهێن وی نەهێنە دیتن.»
ئینا وان ئەو ل وی جهی كۆم كرن یێ ب عیبرانی دبێژنێ هارمەگەدۆن.
فریشتەیێ حەفتێ ترارێ خۆ ب سەر بای دا رشت و دەنگەكێ بلند ژ پەرستگەها ئەسمانی ژ تەختی هات دگۆت: «ب ج‍‌ھ هات!»
هنگی برویسی و دەنگەدەنگ و گڕگڕا عەوران چێبوون و بیڤەلەرزەكا مەزن روی دا. چ بیڤەلەرزێن وەكو وێ روی نەدابوون هەر ژ دەمێ مرۆڤ كەفتیە سەر رویێ ئەردی، بیڤەلەرزەكا هند یا مەزن بوو!
باژێڕێ مەزن، بابل، بوو سێ پارچە و باژێڕێن مللەتان كەفتن. ئەڤجا خودێ بابلا مەزن ئینا بیرا خۆ، دا پەرداغا شەرابا تۆڕەبوونا خۆ یا دژوار بدەتێ.
هەمی گزیرتە رەڤین و چیا نەهاتنە دیتن
و تەرگەكا مەزن، گرانیا هەر دندكەكێ تالانتەك بوو، ژ ئەسمانی ب سەر مرۆڤان دا باری. ئینا مرۆڤان ژ بەر دربێ تەرگێ جڤین دانە خودێ، چنكو دربێ وێ گەلەك یێ مەزن بوو.
پاشی ئێك ژ وان حەفت فریشتەیێن حەفت ترار ڤێ بوون هات و ل گەل من ئاخفت و گۆت: «وەرە، ئەز دێ سزایێ لەشفرۆشا مەزن، ئەوا ل سەر گەلەك ئاڤان روینشتی، نیشا تە دەم،
ئەوا پاشایێن ئەردی دەهمەنپیسی ل گەل كری و ئاكنجیێن ئەردی ب شەرابا دەهمەنپیسیا وێ هاتینە سەرخۆشكرن.»
ئینا فریشتەی ب رێكا گیانێ پیرۆز ئەز برمە چۆلی و من ژنكەك دیت ل سەر دڕندەیەكێ سۆر یا روینشتی بوو، ژ هەمی لایان ڤە ناڤێن كوفریان ل سەر وی دڕندەی بوون و وی حەفت سەر و دە‍‌ھ شاخ هەبوون.
ژنكێ جلكێن بنەفشی و سۆر ل بەر بوون و ب زێڕی و ب بەرێن بهاگران و مراریان یا خەملاندی بوو و پەرداغەكا زێڕین یا پڕی تشتێن جهێ دلڕەشیێ و پیساتیا دەهمەنپیسیا وێ د دەستی دا بوو.
ل سەر ئەنیا وێ ناڤەكێ نهێنی یێ نڤیسی بوو: «بابلا مەزن، دایكا لەشفرۆش و تشتێن جهێ دلڕەشیێ ل سەر ئەردی.»
من دیت ئەو ژنك ب خوینا پیرۆزكریان و خوینا شاهدێن عیسای یا سەرخۆش بوو. دەمێ من ئەو دیتی، ئەز گەلەك مەندەهۆش بووم.
هنگی فریشتەی گۆتە من: «بۆچی تۆ یێ مەندەهۆشی؟ ئەز دێ نهێنیا ژنكێ و دڕندەیێ ئەو هەلگرتی، ئەوێ حەفت سەر و دە‍‌ھ شاخ هەین، بۆ تە بێژم.
ئەو دڕندەیێ تە دیتی، ئەو هەبوو لێ نوكە نینە و نێزیكە ئەو دەركەڤیتە چاڵا بێ بن و بچیتە وێرانبوونێ. ئاكنجیێن ئەردی، ئەوێن هەر ژ دامەزراندنا جیهانێ، ناڤێن وان د پەرتووكا ژیانێ دا نەهاتینە نڤیسین، دەمێ دڕندەی دبینن دێ مەندەهۆش بن، چنكو ئەو هەبوو لێ نوكە نینە و دێ هێت.
ل ڤێرێ زێهنێ ئاقلمەندی هەی یێ فەرە، ئەو حەفت سەر، حەفت چیانە كو ژنك ل سەر روینشتیە. حەفت پاشانە ژی،
پێنج ژ وان كەفتینە، ئێك یێ هەی، یێ دی هێشتا نەهاتیە و هەر دەمێ هات، پێدڤیە بۆ دەمەكێ كورت بمینیت.
ئەو دڕندەیێ هەبوو لێ نوكە نینە، یێ هەشتێیە، لێ ئەو ژ حەفتانە و یێ دچیتە وێرانبوونێ.
ئەو دە‍‌ھ شاخێن تە دیتین، دە‍‌ھ پاشانە هێشتا پاشایەتی وەرنەگرتیە، لێ دێ دەستهەلاتێ وەكو پاشا بۆ دەمەكێ گەلەك كورت ل گەل دڕندەی وەرگرن.
ئەوان ئێك مەبەستا هەی، كو ئەو دێ هێز و دەستهەلاتا خۆ دەنە دڕندەی.
ئەو دێ ل دژی بەرخی كەڤنە جەنگێ و بەرخ دێ ل سەر وان ب سەر كەڤیت، چنكو ئەو خودانێ خودانانە و پاشایێ پاشایانە. گازیكری و هەلبژارتی و دلسۆزێن وی دێ ل گەل وی بن.»
پاشی فریشتەی گۆتە من: «ئەو ئاڤێن تە دیتین، كو لەشفرۆش ل سەر یا روینشتیە، گەل و جەماوەر و مللەت و زمانن.
ئەو دە‍‌ھ شاخێن تە دیتین و دڕندە، دێ كەربێن خۆ ژ لەشفرۆشێ ڤەكەن. دێ وێ وێران و رویس كەن و دێ گۆشتێ وێ خۆن و وێ ب ئاگری سوژن،
چنكو خودێ یا كریە د دلێ وان دا، كو مەبەستا وی ب ج‍‌ھ بینن و ئێك مەبەست هەبیت و پاشایەتیا خۆ بدەنە دڕندەی، تاكو پەیڤێن خودێ ب ج‍‌ھ بهێن.
ئەو ژنكا تە دیتی، ئەو باژێڕێ مەزنە یێ پاشایەتیێ ل سەر پاشایێن ئەردی دكەت.»
پشتی ڤان تشتان، من فریشتەیەكێ دی دیت، ژ ئەسمانی هاتە خوارێ. وی دەستهەلاتەكا مەزن هەبوو و ئەرد ژ بەر مەزناهیا وی روهن بوو.
وی ب دەنگەكێ بلند كرە گازی و گۆت: «كەفت! بابلا مەزن كەفت! یا بوویە جهێ ئاكنجیبوونا ئەجنەیان و جهێ خۆجهبوونا هەمی گیانێن پیس، جهێ خۆجهبوونا هەمی باڵندەیێن پیس و مرار.
چنكو هەمی مللەتان ژ شەرابا هار یا دەهمەنپیسیا وێ ڤەخوار و پاشایێن ئەردی دەهمەنپیسی ل گەل وێ كریە و بازرگانێن ئەردی ژ زێدەییا حالخۆشیا وێ دەولەمەند بوون.»
پشتی هنگی من دەنگەكێ دی ژ ئەسمانی بهیست، دگۆت: «ژ وێ دەركەڤن، هەی گەلێ من، دا نەبنە پشكدارێن گونەهێن وێ و دربێن دهێنە وێ، ژ هەوە نەگرن.
چنكو گونەهێن وێ كەفتنە سەر ئێك تا ئەسمانی و خودێ خرابیێن وێ ئینانە بیرا خۆ.
كا وێ چ ل كەسێن دی كریە، هوین ژی وەسا ل وێ بكەن و دووجاركی ل دویڤ كریارێن وێ بدەنێ؛ د وێ پەرداغێ دا یا وێ تێكهەل كری، دووجاركی بۆ وێ تێكهەل بكەن.
كا چەند خۆ مەزن كریە و ب حالخۆشی ژیایە، هند ئەشكەنجە و كۆڤانان بدەنێ، چنكو د دلێ خۆ دا دبێژیت: ‹ئەز وەكو شاژنێ روینشتیمە، ئەز نە بیژنم ژی، ئەز ئێكجار كۆڤانداریێ نابینم.›
لەوما دربێن وێ دێ د رۆژەكێ دا هێن، دەرد و كۆڤانداری و كولب، ئەو دێ ب ئاگری هێتە سۆتن ژی، چنكو خودان خودایێ دادكرنا وێ دكەت یێ هێزدارە.»
دەمێ پاشایێن ئەردی یێن دەهمەنپیسی ل گەل وێ كرین و ب حالخۆشی ل گەل وێ ژیاین، دویكێلا سۆتنا وێ دبینن، دێ بۆ وێ كەنە گری و شینیێ دانن.
ژ ترسا ئەشكەنجەیا ب وێ دكەڤیت، دێ ل دویر راوەستن و بێژن: «ئاخ، ئاخ، هەی باژێڕێ مەزن! بابل، باژێڕێ هێزدار! سزادانا تە د دەمەكێ گەلەك كورت دا هات.»
بازرگانێن ئەردی ل سەر وێ دكەنە گری و شینیێ ددانن، چنكو ئێدی كەس متایێن وان ناكڕیت:
متایێن زێڕ، زیڤ، بەرێن بهاگران، مراری، كتانێ نازك، پەڕوكێ بنەفشی، ئارمیش و پەڕوكێ سۆر، هەمی دارێن بێهنخۆش، هەمی تشتێن ژ عاجی هاتینە چێكرن، هەمی تشتێن ژ دارێن بهاگران هاتینە چێكرن، برۆنز، ئاسن، مەرمەر،
دارچین، بوهارات، بخویر، موڕ ، لبان ، شەراب، زەیتا زەیتوونان، ئارێ سفر، گەنم، دەوار، پەز، هەسپ، گالیسكە و مرۆڤێن وەكو بەنی دهێنە فرۆتن.
ئەو بازرگان دبێژن: «ئەو بەرهەمێ دلێ تە چوویێ ژ تە دەركەفت و هەمی حالخۆشی و رەونەقیێن تە ل نك تە نەمان و ئێدی چ جاران ناهێنە دیتن.»
بازرگانێن ڤان تشتان، ئەوێن ژ بابلێ دەولەمەند بووین، ژ ترسا ئەشكەنجەیا ب وێ دكەڤیت، دێ ل دویر راوەستن و كەنە گری و شینیێ دانن
و بێژن: «ئاخ، ئاخ، هەی باژێڕێ مەزن! یێ كتانێ نازك و پەڕوكێ بنەفشی و سۆر كریە بەر خۆ و ب زێڕی و بەرێن بهاگران و مراریان خۆ خەملاندی!
د دەمەكێ گەلەك كورت دا ئەڤ دەولەمەندیا مەزن وێران بوو!» هەمی سەرۆكێن گەمیڤانان و هەمی رێڤنگ و گەمیڤان و هەر ئێكێ ژیارا خۆ ژ دەریایێ پەیدا دكەت ژ دویر ڤە راوەستیان
و دەمێ دویكێلا سۆتنا وێ ددیت دكرنە گازی و دگۆت: «كیژان باژێڕ وەكو ڤی باژێڕێ مەزن بوو!»
وان خولی ب سەرێ خۆ وەركر و ب دەنگەكێ بلند كرە گری و شینی دانا، دگۆت: «ئاخ، ئاخ، هەی باژێڕێ مەزن! ئەوا ژ دەولەمەندیا وێ، هەمی ئەوێن گەمی د دەریایێ دا هەین، دەولەمەند بووین! د دەمەكێ گەلەك كورت دا ئەو وێران بوو.»
هەی ئەسمان ژ بەر وی باژێڕی دلخۆش ببە! هەروەسا هوین ژی گەلی پیرۆزكریان و هنارتیان و پێغەمبەران! چنكو خودێ تۆلا هەوە ژ وێ ڤەكر.
هنگی فریشتەیەكێ هێزدار بەرەكێ وەكو بەرئاشەكێ مەزن راكر و هاڤێتە د دەریایێ دا و گۆت: «هۆسا بابل، باژێڕێ مەزن، دێ ب توندی هێتە هاڤێتن و ئێدی چ جاران ناهێتە دیتن.
ئێدی دەنگێ قیسارەژەنان و موزیكژەنان و بلوورڤانان و لێدەرێن بۆڕیزانان، چ جاران د ناڤ تە دا ناهێتە بهیستن. ئێدی پیشەسازێ هەر پیشەسازیەكێ ژی، چ جاران د ناڤ تە دا ناهێتە دیتن. ئێدی دەنگێ ئاشی ژی، چ جاران د ناڤ تە دا ناهێتە بهیستن.
ئێدی رۆناهیا چرایەكێ ژی، چ جاران د ناڤ تە دا شەوقێ نادەت. ئێدی دەنگێ زاڤا و بویكەكێ ژی، چ جاران د ناڤ تە دا ناهێتە بهیستن. بازرگانێن تە مەزنێن ئەردی بوون و ب جادووگەریا تە هەمی مللەت هاتنە خاپاندن.
د ناڤ وێ دا، خوینا پێغەمبەر و پیرۆزكری و هەمیێن ل سەر ئەردی هاتینە كوشتن، هاتیە دیتن.»
پشتی ڤان تشتان، من دەنگەك بهیست وەكو دەنگەكێ بلند یێ جەماوەرەكێ مەزن ل ئەسمانی بوو، دگۆت: «هەلێلوویا! قورتالبوون و مەزناهی و هێز یێن خودایێ مەنە،
چنكو حوكمێن وی د راست و دادپەروەرن. ژ بەر كو وی لەشفرۆشا مەزن سزا دا، ئەوا ب دەهمەنپیسیا خۆ ئەرد گەنی كری، هەروەسا وی تۆلا خوینا بەنیێن خۆ ژێ ڤەكر.»
جارەكا دی وان گۆت: «هەلێلوویا! دویكێلا وێ هەروهەر بلند دبیت.»
هەر بیست و چوار ریهسپی و هەر چوار ئافراندیێن زیندی خۆ هاڤێتە ئەردی و بۆ خودایێ روینشتی ل سەر تەختی سوجدە بر و گۆت: «ئامین! هەلێلوویا!»
هنگی دەنگەك ژ تەختی هات و گۆت: «پەسنا خودایێ مە بكەن، هەی هەمی بەنیێن وی، ئەوێن ژ وی دترسن، ژ مەزن و بچویكان.»
پاشی من دەنگەك بهیست، وەكو دەنگێ جەماوەرەكێ مەزن و وەكو دەنگێ گەلەك ئاڤان و وەكو دەنگێ گڕگڕێن بهێز یێن عەوران بوو، دگۆت: «هەلێلوویا! چنكو خودان خودایێ مە، هێزدارێ هەر تشتی، پاشایەتیێ دكەت.
بلا ئەم دلخۆش و دلشاد ببین و مەزناهیێ بدەینێ! چنكو داوەتا بەرخی هات و بویكا وی خۆ ئامادە كریە.
دەستهەلات بۆ وێ هاتە دان كو كتانەكێ نازك یێ شەوقدار و پاقژ بكەتە بەر خۆ.» ئەو كتانێ نازك كارێن راستدار یێن پیرۆزكریانە.
پاشی فریشتەی گۆتە من: «بنڤیسە: ‹خوزیكێن وان یێن بۆ مێڤانداریا داوەتا بەرخی هاتینە داخواز كرن!›» و گۆتە من: «ئەو پەیڤێن خودێ یێن راستن.»
ئینا من خۆ هاڤێتە بەر پێیێن وی، دا سوجدێ بۆ ببەم، لێ وی گۆتە من: «وە نەكە! ئەز بەنیمە ل گەل تە و برایێن تە یێن شاهدەییێ بۆ عیسایێ مەسیح ددەن. سوجدێ بۆ خودێ ببە! چنكو شاهدەیی بۆ عیسای كاكلكا پەیاما خودێیە.»
پشتی هنگی من بەرێ خۆ دایێ ئەسمان ڤەبوو و ئەڤە هەسپەكێ سپی یێ ل وێرێ! سیارێ وی ب ‹دلسۆز› و ‹یێ راست› دهێتە بناڤكرن و ئەو ب دادپەروەری حوكمی دكەت و دجەنگیت.
چاڤێن وی وەكو گوڕیا ئاگرینە و گەلەك تانج ل سەر سەرێ وینە. وی ناڤەكێ نڤیسای یێ هەی، كەس وی ناڤی نزانیت ژبلی وی.
ب كوركەكێ د خوینێ هەلاندی یێ راپێچای بوو و ب ‹پەیڤا خودێ› هاتیە بناڤكرن.
لەشكەرێن ل ئەسمانی یێن راپێچای ب كتانێ نازك یێ سپی و پاقژ ل سەر هەسپێن سپی ب دویڤ وی دكەفتن.
ژ دەڤێ وی شیرەكێ تیژ دەردكەڤیت، دا ب وی ل مللەتان بدەت و ‹ئەو دێ ب گۆپالەكێ ئاسنی حوكمداریێ ل سەر وان كەت.› ئەو ب خۆ دێ ئویسلەیا شەرابا تۆڕەبوونا خودێ یا دژوار، هێزدارێ هەر تشتی، ب پێیان گڤێشیت.
ل سەر كوركێ وی و ل سەر رانێ وی ناڤەك یێ نڤیسای بوو: ‹پاشایێ پاشایان و خودانێ خودانان.›
پشتی هنگی من فریشتەیەك دیت د چاڤێ رۆژێ دا یێ راوەستیای بوو، ب دەنگەكێ بلند كرە گازی و گۆتە هەمی باڵندەیێن د ناڤەڕاستا ئەسمانی دا دفڕن: «وەرن، ل سەر سفرا مەزن یا خودێ كۆم ببن،
دا گۆشتێ پاشایان، گۆشتێ فەرماندەیان، گۆشتێ هێزداران، گۆشتێ هەسپان و سیارێن وان و گۆشتێ هەمیان، یێن ئازاد و یێن بەنی، یێن بچویك و یێن مەزن، بخۆن!»
پاشی من دیت، دڕندە و پاشایێن ئەردی و لەشكەرێن وان كۆم ببوون، دا ل دژی سیارێ هەسپی و لەشكەرێ وی بجەنگن.
ئینا دڕندە و پێغەمبەرێ درەوین ل گەل وی هاتنە گرتن، ئەو پێغەمبەرێ درەوین یێ ژ پێش دڕندەی ڤە نیشانێن حنێرانە دكرن و ب رێكا وان نیشانان ئەو خاپاندن یێن نیشانا دڕندەی قەبیل كری و یێن سوجدە بۆ وێنەیێ وی بری. دڕندە و پێغەمبەرێ درەوین هەردوو ب ساخی بۆ دەریاكا ئاگری یا ب كپریتێ هەل هاتنە هاڤێتن.
یێن ماین ب شیرێ ژ دەڤێ سیارێ هەسپی دەردكەفت هاتنە كوشتن و هەمی باڵندە ژ گۆشتێ وان تێر بوون.
پشتی هنگی من فریشتەیەك دیت، ژ ئەسمانی دهاتە خوارێ و كلیلا چاڵا بێ بن و زنجیرەكا مەزن د دەستێ وی دا بوون.
ئەوی ئەژدەها، ئانكو مارێ كەڤنار، كو ئبلیسە و ساتانە ، گرت و بۆ هزار ساڵان گرێ دا
و هاڤێتە د چاڵا بێ بن دا و دەرگەهێ وێ ل سەر وی گرت و موهر كر، دا ئەو ئێدی مللەتان نە خاپینیت، تاكو هزار ساڵ تەمام ببن. پشتی ڤان تشتان، پێدڤیە ئەو بۆ دەمەكێ كورت بهێتە بەردان.
پاشی من تەخت و یێن ل سەر روینشتی دیتن، ئەوێن دەستهەلاتا دادكرنێ بۆ وان هاتبوو دان. هەروەسا من گیانێن وان دیتن یێن ژ پێخەمەت شاهدەییێ بۆ عیسای و بۆ پەیڤا خودێ هاتینە ڤەكوشتن، ئەوێن سوجدە بۆ دڕندەی و وێنەیێ وی نەبری و نیشانا وی ل سەر ئەنیا خۆ و دەستێ خۆ قەبیل نەكری. ئەو زیندی بوونەڤە و بۆ هزار ساڵان ل گەل مەسیحی پاشایەتی كر.
(ئەو مریێن ماین، زیندی نەبوونەڤە تاكو ئەو هزار ساڵ تەمام بووین.) ئەڤە رابوونا مریان یا ئێكێیە.
چەند یێ بەختەوەر و پیرۆزە ئەوێ بەهر د رابوونا مریان یا ئێكێ دا هەی. مرنا دوویێ دەستهەلات ل سەر وان نینە، لێ ئەو دێ بنە كاهنێن خودێ و مەسیحی و دێ ل گەل وی بۆ هزار ساڵان پاشایەتیێ كەن.
دەمێ هزار ساڵ تەمام دبن، ئبلیس دێ ژ زیندانا وی هێتە بەردان.
ئەو دێ دەركەڤیت دا مللەتێن ل هەر چوار كوژیێن ئەردی، ئانكو گۆگ و ماگۆگ، بخاپینیت، دا وان بۆ جەنگێ كۆم بكەت. ژمارەیا وان وەكو خیزێ دەریایە.
ئەو ل سەر هەمی ئەردی بەڵاڤ بوون و سەربازگەها پیرۆزكریان و باژێڕێ خۆشتڤی دۆرپێچ كر. لێ ئاگر ژ ئەسمانی هاتە خوارێ و ئەو خوارن
و ئەو ئبلیسێ ئەو خاپاندین، بۆ ناڤ دەریاكا ئاگری و كپریتێ هاتە هاڤێتن، بۆ وی جهێ دڕندە و پێغەمبەرێ درەوین تێدا. ئەو دێ ب شەڤ و رۆژ، بۆ هەتا هەتایێ هێنە ئەشكەنجە دان.
پشتی هنگی من تەختەكێ مەزن یێ سپی دیت و ئەوێ ل سەر روینشتی ژی، یێ كو ئەرد و ئەسمان ژ بەر رویێ وی رەڤین و جهەك بۆ وان نەبوو.
پاشی من مری دیتن، یێن مەزن و یێن بچویك، ل بەرامبەری تەختی د راوەستیای بوون و پەرتووك ڤەبوون. پەرتووكەكا دی ژی ڤەبوو، كو پەرتووكا ژیانێ بوو. مری ب تشتێن نڤیسی د پەرتووكان دا، ل دویڤ كریارێن وان، هاتنە دادكرن.
دەریایێ مریێن د ناڤ خۆ دا رادەست كرن و مرنێ و وارێ مریان ژی مریێن د ناڤ خۆ دا رادەست كرن. هەر ئێك ل دویڤ كریارێن خۆ هاتە دادكرن.
پشتی هنگی مرن و وارێ مریان بۆ دەریاكا ئاگری هاتنە هاڤێتن. ئەڤ دەریاكا ئاگری مرنا دوویێیە.
هەر كەسێ ناڤێ وی تۆماركری د پەرتووكا ژیانێ دا نەهاتە دیتن، ئەو بۆ دەریاكا ئاگری هاتە هاڤێتن.
پشتی هنگی من ئەردەكێ نوی و ئەسمانەكێ نوی دیتن، چنكو ئەسمانێ ئێكێ و ئەردێ ئێكێ دەرباز بوون و ئێدی دەریا ژی نەما.
من دیت باژێڕێ پیرۆز، ئورشەلیما نوی، یا ئامادەبووی وەكو بویكەكا خەملاندی بۆ زاڤایێ خۆ، ژ ئەسمانی، ژ نك خودێ دهاتە خوارێ.
من ژ تەختی دەنگەكێ بلند بهیست، دگۆت: «ئها ئەڤەیە، خیڤەتا خودێ د ناڤ مرۆڤان دا! ئەو دێ ل گەل وان ئاكنجی بیت و ئەو دێ بنە گەلێ وی و خودێ ب خۆ دێ ل گەل وان بیت و بیتە خودایێ وان.
ئەو دێ هەمی رۆندكان ژ چاڤێن وان پاقژ كەت و ئێدی مرن نابیت، نە شینی و نە گری و نە ئێشان ژی، چنكو تشتێن بەرێ دەرباز بوون.»
پاشی یێ روینشتی ل سەر تەختی گۆت: «ئها ئەڤە ئەز هەر تشتەكی نوی دكەم!» پشتی هنگی گۆت: «بنڤیسە، چنكو ئەڤ پەیڤە جهێ باوەریێنە و د راستن.»
هەروەسا گۆتە من: «ب ج‍‌ھ هات! ئەز ئەلفا و ئۆمێگامە ، دەستپێك و دویماهیك. ئەز دێ بێ بەرامبەر ژ كانیا ئاڤا ژیانێ دەمە یێ تێهنی.
هەر ئێكێ سەركەفتنێ بینیت، دێ بیتە میراتگرێ ڤان تشتان و ئەز دێ بمە خودایێ وی و ئەو دێ بیتە كوڕێ من.
لێ یێن ترسنۆك و یێن بێبەخت و یێن جهێ دلڕەشیێ و یێن مێركوژ و یێن دەهمەنپیس و یێن جادووگەر و یێن پووتپەرێس و هەمیێن درەوین، دێ بەهرا وان دەریاكا هەل ب ئاگری و كپریتێ بیت. ئەڤە مرنا دوویێیە.»
پشتی هنگی ئێك ژ وان حەفت فریشتەیێن حەفت ترارێن تژی ژ حەفت دربێن دویماهیێ ڤێ بوون هات و ل گەل من ئاخفت و گۆت: «وەرە، ئەز دێ بویكێ، ئانكو ژنا بەرخی، نیشا تە دەم.»
ئینا ب رێكا گیانێ پیرۆز ئەز برمە سەر چیایەكێ مەزن و بلند. وی ئورشەلیم، باژێڕێ پیرۆز، نیشا من دا، ژ ئەسمانی، ژ نك خودێ، دهاتە خوارێ.
مەزناهیا خودێ د ناڤ وی دا بوو و شەوقا وی وەكو بهاگرانترین بەر، وەكو بەرێ یەشپ، زەڵال وەكو كریستالی بوو.
شویرهەكا مەزن و بلند هەبوو، دوازدە دەرگە‍‌ھ هەبوون و ل بەر وان دەرگەهان دوازدە فریشتە هەبوون. ناڤێ هەر دوازدە هۆزێن كوڕێن ئیسرائیلی ل سەر وان دەرگەهان یێ نڤیسای بوو.
ل رۆژهەلاتی سێ دەرگە‍‌ھ و ل باكووری سێ دەرگە‍‌ھ و ل باشووری سێ دەرگە‍‌ھ و ل رۆژئاڤایی سێ دەرگە‍‌ھ هەبوون.
شویرها باژێڕی دوازدە بنیات هەبوون و دوازدە ناڤێن دوازدە هنارتیێن بەرخی ل سەر بوون.
ئەوێ ل گەل من دئاخفت، لەڤەنەكێ پیڤانێ یێ زێڕین ڤێ بوو، دا باژێڕی و دەرگەهێن وی و شویرها وی بپیڤیت.
باژێڕ ب چوارگۆشەیی هاتبوو دانان، درێژاهیا وی هندی فرەهیێ بوو. ئینا باژێڕ ب لەڤەنی پیڤا، دوازدە هزار ستادی بوون. درێژی و فرەهی و بلندی تەمەت ئێك بوون.
شویرها وی ژی پیڤا، سەد و چل و چوار نیڤگەز بوون ، ل دویڤ پیڤانا مرۆڤان، كو فریشتەی ژی ب كار دئینا.
شویرهە ژ بەرێ یەشپ هاتبوو ئاڤاكرن و باژێڕ زێڕێ پاقژ بوو وەكو شویشەیێ پاقژ.
بنیاتێن شویرها باژێڕی ب هەمی بەرێن بهاگران د خەملاندی بوون. بنیاتێ ئێكێ بەرێ یەشپ بوو، یێ دوویێ یاقوتێ شین بوو، یێ سێیێ بەرێ ئاشقبەند یێ سپی بوو، یێ چوارێ زەمروود بوو،
یێ پێنجێ بەرێ ئاشقبەندێ سۆر یێ تاری بوو، یێ شەشێ بەرێ ئاشقبەندێ سۆر بوو، یێ حەفتێ یاقوتێ زەیتوونی بوو، یێ هەشتێ زەمروودێ كەسك بوو، یێ نەهێ یاقوتێ زەر بوو، یێ دەهێ بەرێ ئاشقبەندێ كەسك بوو، یێ یازدێ یاقوتێ مۆر بوو و یێ دوازدێ یاقوتێ بنەفشی بوو.
هەر دوازدە دەرگە‍‌ھ، دوازدە مراری بوون، هەر دەرگەهەك ژ مراریەكێ بوو. جادەیا باژێڕی زێڕێ پاقژ بوو وەكو شویشەیێ زەڵال.
من چ پەرستگە‍‌ھ د باژێڕی دا نەدیتن، چنكو خودان خودێ، هێزدارێ هەر تشتی، ئەو و بەرخ پەرستگەها وینە.
باژێڕ نە یێ پێدڤی رۆژێ و هەیڤێ بوو كو رۆناهیێ بدەنێ، چنكو مەزناهیا خودێ رۆناهی دابوویێ و چرایێ وی بەرخ بوو.
مللەت دێ ب رۆناهیا باژێڕی بڕێڤە چن و پاشایێن ئەردی دێ مەزناهیا خۆ ئیننە ناڤ وی باژێڕی.
دەرگەهێن وی چ جاران ناهێنە گرتن، چنكو ل وێرێ هەمی دەمان دێ رۆژ بیت، شەڤ نینە.
دێ مەزناهی و رێزا مللەتان ئیننە ناڤ وی.
قەت تشتەكێ هەڕمی ناچیتە ناڤ وی، نە ژی كەسەك ژ ئەوێن تشتێن جهێ دلڕەشیێ و درەوێ دكەن، لێ ب تنێ ئەو دێ چن یێن ناڤێن وان د پەرتووكا ژیانێ یا بەرخی دا هاتینە نڤیسین.
پشتی هنگی فریشتەی رویبارێ ئاڤا ژیانێ یێ شەوقدار وەكو كریستالی نیشا من دا، ژ تەختێ خودێ و بەرخی دەردكەفت
و د ناڤ ناڤەندا جادەیا باژێڕی دا دبوری. ل هەردوو رەخێن رویباری، دارا ژیانێ هەبوو، دوازدە جۆرێن بەرهەمی ددا، هەر هەیڤێ بەرهەمەك. بەلگێن دارێ بۆ ساخبوونا مللەتان ژ نەساخیان بوو.
ئێدی تشتێ نفرین لێ كری ل وێرێ نابیت. تەختێ خودێ و بەرخی دێ د ناڤ باژێڕی دا بیت و بەنیێن وی دێ وی پەرێسن
و دێ دێمێ وی بینن و ناڤێ وی دێ ل سەر ئەنیا وان بیت.
ئێدی نابیتە شەڤ. ئەوان پێدڤی ب رۆناهیا چرای و رۆناهیا رۆژێ نابیت، چنكو خودان خودێ دێ رۆناهیێ ل وان كەت و ئەو دێ هەتا هەتایێ پاشایەتیێ كەن.
پاشی فریشتەی گۆتە من: «ئەڤ پەیڤە جهێ باوەریێنە و راستن. خودانی، خودایێ سرۆشێ ددەتە پێغەمبەران، فریشتەیێ خۆ هنارت داكو وان تشتان نیشا بەنیێن خۆ بدەت، یێن كو پێدڤیە زوی روی بدەن.»
«ئەڤە ئەز دێ زوی هێم! خوزیكێن وی یێ پەیڤێن پەیاما ڤێ پەرتووكێ ب ج‍‌ھ دئینیت.»
ئەز یوحەننامە، ئەوێ ئەڤ تشتە بهیستین و دیتین. دەمێ من بهیستی و دیتی، من خۆ هاڤێتە ئەردی، دا ل بەر پێیێن فریشتەیێ ئەڤ تشتە نیشا من داین، سوجدێ ببەم،
لێ وی گۆتە من: «وە نەكە! ئەز بەنیمە ل گەل تە و برایێن تە یێن پێغەمبەر و ئەوێن پەیڤێن ڤێ پەرتووكێ ب ج‍‌ھ دئینن. سوجدێ بۆ خودێ ببە.»
هەروەسا گۆتە من: «پەیڤێن پەیاما ڤێ پەرتووكێ ب موهرێ نەگرە، چنكو دەم یێ نێزیكە.
ئەوێ خرابیێ دكەت، بلا هەر خرابیێ بكەت. یێ پیس ژی، بلا هەر یێ پیس بیت. یێ راستدار ژی، بلا هەر راستداریێ بكەت. یێ پیرۆز ژی، بلا هەر پیرۆز بمینیت.»
«ئەڤە ئەز دێ زوی هێم. خەلاتێ من ل گەل منە، دا ل دویڤ كریارێن هەر ئێكی بدەمێ.
ئەز ئەلفا و ئۆمێگامە، یێ ئێكێ و یێ داویێ، دەستپێك و دویماهیك.»
خوزیكێن وان یێن جلكێن خۆ دشوون، دا وان ماف هەبیت ژ دارا ژیانێ بخۆن و د دەرگەهان را بچنە د باژێڕی ڤە.
سە و جادووگەر و دەهمەنپیس و مێركوژ و پووتپەرێس و هەر ئێكێ حەز ژ درەوان دكەت و درەوان دكەت دێ ژ دەرڤە بن.
«ئەز عیسامە، ئەوێ فریشتەیێ خۆ هنارتی، دا ئەز بۆ هەوە شاهدەییێ دەربارەی ڤان تشتان بۆ جڤاكێن باوەرداران بدەم. ئەز رە‍‌ھ و دویندەها داوودیمە، ستێرا سپێدێ یا گەشم.»
گیانێ پیرۆز و بویك دبێژن: «وەرە!» و یێ دبهیسیت بلا بێژیت: «وەرە!» و یێ تێهنی بلا بهێت و یێ دڤێت بلا بێ بەرامبەر ئاڤا ژیانێ وەرگریت.
ئەز شاهدەییێ بۆ هەر كەسەكێ كو پەیڤێن پەیاما ڤێ پەرتووكێ دبهیسیت ددەم: ئەگەر كەسەك تشتەكی ل سەر ڤان تشتان زێدە بكەت، خودێ دێ دربێن د ڤێ پەرتووكێ دا نڤیسای ل سەر وی زێدە كەت.
هەروەسا ئەگەر كەسەك تشتەكی ژ پەیڤێن پەرتووكا ڤێ پەیامێ ژێ ببەت، خودێ دێ بەهرا وی ژ دارا ژیانێ و ژ باژێڕێ پیرۆز یێن نڤیسای د ڤێ پەرتووكێ دا ژێ بەت.
ئەوێ شاهدەییێ بۆ ڤان تشتان ددەت، دبێژیت: «بەلێ، ئەز دێ زوی هێم.» ئامین. وەرە، هەی خودان عیسا!
كەرەما خودان عیسای ل سەر هەمیان بیت.