Agege Obaŋa oketo polo kede lobo. Lobo onwoŋo orubere atata kun ginnoro mom iye, colpiny onwoŋo owumo pii atut oko; Cuny Obaŋa olyero i wi pii. Obaŋa te kobo ni, “Lero myero bed tye”; lero daŋ te bedo tye. Obaŋa te neno ni ber; te poko akina lero kede colpiny. Obaŋa te cako nyiŋ lero ni Iceŋ, te cako nyiŋ colpiny ni lwor Otyeno piny te yuto dok piny te ru, mannono te bedo nino me agege. Obaŋa te kobo ni, “Gin opette myero bed tye malo ame poko pii kede pii.” Obaŋa te tiyo gin opette, te poko pii ame tye piny i te gin opette kede en ame tye malo i wi gin opette, eka te timere amannono. Obaŋa te cako nyiŋ gin opette ni Polo. Otyeno piny te yuto dok piny te ru, mannono te bedo nino ame aryo. Obaŋa te kobo ni, “Pii ame tye piny i te polo myero cokere poŋ karacel i kabedo acel, me piny otwo nen”; eka te timere amannono. Obaŋa te cako nyiŋ piny otwo ni Lobo, te cako nyiŋ pii ocokere opoŋ karacel ni Nam; Obaŋa te neno ni ber. Obaŋa te kobo ni, “Lum kede ginapita ame kotigi tye, kede yen adoŋo a nyako nyiggi ame kotigi tye i yigi, acalo eponegi tye i wi lobo, myero tu i lobo”; eka te timere amannono. Lum kede ginapita ame kotigi tye i yigi, kede yen adoŋo a nyako nyiggi, ame kotigi tye i yigi, acalo eponegi tye, te tu i lobo; Obaŋa te neno ni ber. Otyeno piny te yuto dok piny te ru, mannono te bedo nino me adek. Obaŋa te kobo ni, “Gigi mogo aryeny myero bed tye i gin opette i polo me poko Iceŋ kede lwor; me gin bed gin me anena ame cimo kare kede nino kede mwaka, dok me gin bed gin aryeny i gin opette i polo menyo piny”; eka te timere amanono. Obaŋa te tiyo gin aryeny aryo adoŋo, en adwoŋŋere me loyo dyeceŋ, en atidi mere me loyo dyewor; te tiyo daŋ acer. Obaŋa te cibogi i kom gin opette i polo me menyo piny, kede me loyo dyeceŋ kede dyewor, kede me poko lero kede colpiny; Obaŋa te neno ni ber. Otyeno piny te yuto dok piny te ru, mannono te bedo nino me aŋwen. Obaŋa te kobo ni, “Gin ame tye kede kwo myero corre, nya i pii; kede winy ame twarre malo i wi lobo i nyim gin opette i polo.” Obaŋa te keto nyaŋ adoŋo me nam, kede ginnoro ducu ame tye i kwo, ame mol corre, nya i pii acalo eponegi tye, kede kit winy luŋ ame tye kede bwomgi acalo eponegi tye; Obaŋa te neno ni ber. Obaŋa te miyogi winyo kun kobo ni, “Nywal, imedde, ipoŋ wunu pii me nam, wun winy daŋ medde wunu i wi lobo.” Otyeno piny te yuto dok piny te ru, mano te bedo nino me kany. Obaŋa te kobo ni, “Lobo myero nywal gin akwo acalo eponegi tye: leyi me paci, kede gin ame lak alaka, kede leyi me tim acalo eponegi tye”; eka te timere amannono. Obaŋa te tiyo leyi me tim acalo eponegi tye, kede leyi me paco acalo eponegi tye, kede gin ame lak alaka piny acalo eponegi tye; Obaŋa te neno ni ber. Obaŋa te kobo ni, “Oti wunu dano ame cal kedwa, me gin lo rec me nam, kede winy a twarre malo, kede leyi me paco, kede wi lobo luŋ, kede gin ducu ame lak alaka piny i lobo.” Eka Obaŋa te keto dano i callere, oketogi co kede mon. Obaŋa te miyogi winyo kun kobo ni, “Nywal, imdede, ipoŋ wunu lobo, ilo wunu daŋ; dok ilo wunu daŋ rec me nam, kede winy ame twarre malo, kede gin ducu akwo ame tye i wi lobo,” Obaŋa te kobbegi ni, “Nen, atyeko miyowu ginapita ducu me wi lobo luŋ ame kotigi tye, kede yen adoŋo ducu ame nyako nyiggi ame kotigi tye i yigi; gin luŋ bino bedo camwu. Dok leyi ducu me tim kede winy ducu ame twarre malo, kede gin ducu ame lak alaka i wi lobo, ame tye kede kwo, atyeko miyogi pot jami ducu me bedo camgi”; eka te daŋ timere amannono Obaŋa te neno jami ducu ame en otio, nen, onwoŋo ber meicel. Otyeno piny te yuto dok piny te ru, mannono te bedo nino me kanyape. Polo kede lobo rik oketo otum kite-nono, kede jami ducu ame tye iye. Obaŋa ogiko ticcere ame rik otio i nino me abiro, eka te weo i nino me abiro i tic ducu ame rik en otio. Obaŋa te miyo nino me abiro gum, omio obedo acil, pien i nino-nono en Obaŋa rik owe iye i ticcere ducu ame en obedo tiyo i keto lobo. Man en kite ame polo kede lobo ocakere kede i kare ame oketogi iye. I nino ame Rwot Obaŋa rik otio iye polo kede lobo, yattoro me tim onwoŋo mom ru tye i lobo, kit lummoro daŋ onwoŋo mom ru otu; pien Rwot Obaŋa onwoŋo mom ru omio kot ocwe i lobo, dano ame puro lobo daŋ onwoŋo pwod pe, ento ekuna te cako duny malo, bido wi lobo ducu. Rwot te cweyo dano kede apua me lobo, okuta yamo me kwo i wume, dano te doko gin ame tye kede kwo. Rwot Obaŋa te yiko poto i Eden tuŋ kide, te keto iye dano ame en ocweo. Eka Rwot Obaŋa te miyo kwon yen ducu abeco me anena kede me acama tu i lobo, kede yat me kwo daŋ i dye poto, kede yat me poko gin aber kede gin arac. Kulo ame onwoŋo mol ya iyi Eden kelo pii i poto, yie te, pokere i kuno, te doko kulo aŋwen. Me agege omano lobo Kavila ducu, kan ame tye iye jabu, nyiŋe Picon. Jabu me lobo-nu beco; odok yat ame olwoŋo ni bedola onwoŋo tye iye, kede gweŋ onik. Kulo me aryo, omano lobo Kuc luŋ, nyiŋe Gikon. Kulo me adek ame mol dok tuŋ kide me Acuria, Tigiric. Kulo me aŋwen, nyiŋe Efurate. Rwot Obaŋa okwanyo dano te keto i poto me Eden, me en pur dok gwoki, Rwot Obaŋa te ciko dano ni, “Yen ducu ame tye i poto itwero camo giri aboŋo lworo, cite yat me poko gin aber kede gin arac, kur icam, pien i nino ame ibino camo iye, ibino to.” Rwot Obaŋa te dok kobo ni, “Pe ber dano ibedo kene; abino tiyo ŋat ame konye ame oporre pire.” Rwot Obaŋa te cweyo leyi ducu me tim kede winy ducu a twarre malo kun cweo kede lobo. Eka te kelogi baŋ dano me nen kite ame ebino cako kede nyiŋgi; doŋ nyiŋŋoro ducu ame dano ocakki gin akwo acel acel, doko doŋ nyiŋe. Dano ocako nyiŋ leyi ducu me paco, kede winy a twarre malo, kede leyi me tim; cite ŋat ame myero kony dano ame oporre pire onwoŋo pwod pe. Rwot Obaŋa te miyo nino mako waŋ dano atek meicel; i kare ame en onino, Rwot Obaŋa te kwanyo amara mere acel oko, te mwono kakare kede riŋo. Amara mere ame Rwot Obaŋa okwanyo-nono, otio odoko dako, te kelo baŋ dano. Dano te kobo ni, “Man en cogo ame oya i cogona, kede riŋo me riŋo koma. Obino lwoŋe ni Dako, pien okwanye i kom Ico.” Man en gin omio dano weko pappere kede tottere, te moko i kom dako mere, gin aryo ote doko kom acel. I karenaca ico kede dako mere onwoŋo tye onoro, lewic gire onwoŋo mom makogi. Twol rik onwoŋo ryek ame okato leyi ducu ame Rwot Obaŋa otio. En openyo dako ni, “Mom Obaŋa okobo ni kur icam wunu yattoro ame tye i poto?” Dako okobbi twol ni, “Otwero camo nyig yen ducu i poto-ni, cite Obaŋa okobo ni kur ocam nyig yat i dye poto, kur ogud kome, me kur oto.” Twol te kobbi dako ni, “Pe ibino to wunu gire, Obaŋa ŋeo ni ka icamo wunu, waŋwu bino yabere, ibino doko wunu calo Obaŋa kun iŋeo poko wunu gin aber kede gin arac.” Ka dako oneno ni yattono ber me acama, dok kao waŋ, dok yattono mitte, pien mio dano doko ryek, opwono nyige, te camo; te miyo mogo baŋ cware, te camo. Gin aryo ducu waŋgi te yabere oko, ote ŋeyo ni otye onoro; gin te kwoyo pot olam karacel me aruka i pyergi. Tuŋ otyeno ame piny okwe, gin te winyo dwon Rwot Obaŋa kun woto i poto, eka dano kede dako mere te pono oko i nyim Rwot Obaŋa i akina yen ame tye i poto. Rwot Obaŋa te lwoŋo dano kun kobbe ni, “Itye kwene?” En te gamo ni, “Awinyi ka iwoto i poto, lworo te maka, pien atye gira onoro, ate pono gira oko.” Dok te penye ni, “Ŋa okobbi ni itye onoro? Icamo ce yat ame aciki ni kur icam?” Dano te gamo ni, “Dako ame imio ni bed keda, en omia nyig yat, ate camo.” Rwot Obaŋa te penyo dako ni, “Man ŋo ame yin, itimo-ni?” Dako te gamo ni, “Twol obwola, ate camo.” Rwot Obaŋa te kobbi twol ni, “Pien itimo tim man, oceni akato i akina leyi ducu me paco, kede i akina leyi ducu me tim. Ibino mol kede yii, dok ibino camo apua nino ducu me kwoni, Abino keto amone i akina yin kede dako, kede i akina ikwai kede ikwae. Akware bino goyo wii, yin ibino toŋo opuny tyene.” Baŋ dako te kobo ni, “Abino medo rem i kom atek kare me yac; ibino nywalo itino kede rem. Ento mitti bino bedo tye i kom cwari, dok en bino loyi.” Baŋ Adam te kobo ni, “Pien yin iwinyo kop a cegi, icamo nying yat ame an aciki in kur icam, oceno lobo, oko piri; ibino camo gin ame ya iye kede aroma nino ducu me kwoni. Bino nyayo okuto kede ocokocok, ibino camo pot dek me tim. Ibino camo kwon pi kwok olworo nyim, ituno ka idok i lobo, pien akwanyi iye. Yin apua, ibino dok iyi apua.” Dano te cako nyiŋ dako mere ni Kawa, pien en tota a jo ducu ame kwo. Rwot Obaŋa te yiko lao, te miyo Adam kede cege me aruka. Rwot Obaŋa te kobo ni, “Nen, dano doŋ odoko cal kedwa, kun ŋeo poko gin aber kede gin arac. Aman doŋ pe dok omi rye ciŋe pwon nyig yat me kwo, ocam, mio doŋ bino perakino atwal.” Man omio Rwot Obaŋa oryeme oko i poto i Eden, me wot puro lobo ame rik okwanye iye. En oryemo dano oko; te keto okerubi kede pala romo ame lyel mac, wirre tuŋŋi kede tuŋŋi, i yo tuŋ kide me poto Eden, me gwoko yo ame woto i yat me kwo. Adam rik te ŋeye gin kede dako mere Kawa, te yac nywalo Kain kun kobo ni, “Rwot okonya omio anwoŋo atin ico.” Dok te nywalo ominnere Abel. Abel te bedo akwarommi, Kain apur-poto. A doŋ otyeko kare, Kain okelo cammogo ame ocek i poto mere, omio baŋ Rwot. Abel te kelo mege itino rommi me kao kede dwolgi. Rwot te neno Abel kede mottere i yomcuny. Cuny Kain te waŋ atek, waŋe te bale oko. Rwot te penyo Kain ni, “Cunyi owaŋ piŋo? Dok waŋi oballe piŋo? Ka ce itimo ber, mom obino pwoyi? Ka ce mom itimo ber, bal buta i doggola, cunye pyepyeta i komi, cite myero iloe.” Kain te kobbi ominnere Abel ni, “Owot i poto.” Ame doŋ gin tye i poto, Kain ocako romo ominnere, te neko oko. Obaŋa te kobbi Kain ni “Kara Abel tye kwene?” En te gamo ni, “Pe aŋeo; an abedo agwok ominna bo?” Obaŋa te kobbi Kain ni, “Ŋo ame itimo? Nen, remo ominni ame oony tye a koko i lobo kun winyere baŋa. Aman doŋ oceni oko i lobo ame oŋamo doge te gamo remo ominni ame yin ionyo. Lobo mom dok bino cekki cam ka ipuro; ibino bedo aloŋ-piny kun iwowota atata i wi lobo.” Kain te kobbi Rwot ni, “Can ame imia pek meicel ame mom aromo yeyo. Nen tin doŋ iryema oko i poto, mom abino dok nen i nyimi; abino bedo aloŋpiny kun awowota atata i lobo, ame ŋattoro keken ka onwoŋa bino neka oko.” Rwot te dok kobbe ni, “Mom amannono gire! Ka ŋattoro oneko Kain, abino culo kwor i kome tyen abiro. Rwot te keto anen i kom Kain, me ŋattoro ka onwoŋe kur neke.” Kain te ya oko i nyim Rwot, te wot bedo i lobo Nod, tuŋ kide me Eden. Kain rik te ŋeye gin kede dako mere; oyac te nywalo Enoka. Te gero boma, te cako nyiŋ boma-nono ni Enoka bala nyiŋ wode. Enoka te nywalo Irad; Irad te nywalo Mekujael; Mekujael te nywalo Metucael; Metucael te nywalo Lamek. Lamek te nyomo mon aryo; acel nyiŋe Ada, acel nyiŋe Jilla. Ada onywalo Jabal ame rik obedo kwaro a jo ducu ame bedo i kema, kun okwao lim. Ominnere nyiŋe Jubal, ame rik obedo kwaro a jo ducu ame goo naŋa opuk kede ame kuto nyamulere. Jilla daŋ te nywalo Jubal-kain, atet jami tic ducu me mola kede nyonyo. Amin a Tubal-kain obedo Naama, Lamek te kobbi monnere ni, “Yin Ada kede Jilla winy wunu koppa; wun mon a Lamek cik yitwu i gin ame akobo. Pien aneko dano pi waŋa, acobo awobi ame ogoa, Ka ce obino culo kwor a Kain tyen abiro, Lamek obino culo kworrere tyen pyerabiro wie abiro twal.” Adam rik dok te ŋeye gin kede dako mere, eka dako te nywalo awobi, te cako nyiŋe Ceji, pien okobo ni. “Obaŋa doŋ oye miya atin okene me leyo ka Abel ame Kain oneko.” Ceji daŋ te nywalo atin awobi, ote cako nyiŋe Enoci. I karenono jo te cako lwoŋo nyiŋ Rwot. Man en coc ame nyuto ikwae Adam, I kare ame Obaŋa keto dano, ocweo dano i callere. Oketogi co kede mon, omiogi gum, dok te cako nyiŋgi ni Dano i nino ame oketogi iye-nono. Kare ame Adam doŋ ori oromo mwaka mia acel kede pyeradek, onywalo awobi ame cal kede en ikome; te cako nyiŋe Ceji. Mwaka Adam i kare ame en doŋ otyeko nywalo Ceji rik oromo mia aboro, dok rik daŋ omedo nywalo awobe kede anyira. Pi mannono, mwaka Adam luŋ ame ori kede i lobo te doŋ to, romo mia aboŋwen kede pyeradek. Kare ame Ceji doŋ ori oromo mwaka mia acel kede abic, onywalo Enoci. I ŋe nywalo Enoci, Ceji ori mwaka mia aboro kede abiro, dok rik daŋ omedo nywalo awobe kede anyira. Pi mannono, mwaka a Ceji luŋ ame ori kede i lobo te to, romo mia aboŋwen kede apar wie aryo. Kare ame Enoci doŋ ori oromo mwaka pyeraboŋwen, onywalo Kenan. I ŋe nywalo Kenan, Enoci ori mwaka mia aboro kede apar wie abic, dok rik daŋ omedo nywalo awobe kede anyira. Pi mannono mwaka Enoci luŋ ame ori kede i lobo te to, romo mia aboŋwen kede abic. Kare ame Kenan ori oromo mwaka pyerabiro, onywalo Maalalel. I ŋe nywalo Maalalel, Kenan ori mwaka mia aboro kede pyeraŋwen, dok rik daŋ omedo nywalo awobe kede anyira. Pi mannono mwaka a Kenan luŋ ame ori kede i lobo te to, romo mia aboŋwen kede apar. Kare ame Maalalel doŋ ori oromo mwaka pyerabicel wie abic, onywalo Jared. I ŋe nywalo Jared, Maalalel ori mwaka mia aboro kede pyeradek, dok rik daŋ omedo nywalo awo be kede anyira. Pi mannono mwaka a Maalalel luŋ ame ori kede i lobo te to, romo mia aboro kede pyeraboŋwen wie abic. Kare ame Jared doŋ ori oromo mwaka mia acel kede pyerabicel wie aryo, onywalo Enoka. I ŋe nywalo Enoka, Jared ori mwaka mia aboro, dok rik daŋ omedo nywalo awobe kede anyira. Pi mannono mwaka a Jared luŋ ame ori kede i lobo te to, romo mia aboŋwen kede pyerabicel wie aryo. Kare ame Enoka doŋ ori mwaka pyerabicel wie abic, onywalo Metucela. I ŋe nywalo Metucela, Enoka obedo tiyo gin ame Obaŋa mito pi mwaka mia adek, dok rik daŋ omedo nywalo awobe kede anyira. Pi mannono mwaka Enoka luŋ ame ori kede i lobo romo mia adek kede pyerabicel wie abic. Enoka obedo tiyo gin ame Obaŋa mito; eka te rwenyo atwal, pien Obaŋa otere oko. Kare ame Metucela doŋ ori oromo mwaka mia acel kede pyeraboro wie abiro, onywalo Lamek. I ŋe nywalo Lamek, Metucela ori mwaka mia abiro kede pyeraboro wie aryo, dok rik daŋ omedo nywalo awobe kede anyira. Pi mannono mwaka a Metucela luŋ ame ori kede i lobo te to, romo mia aboŋwen kede pyerabicel wie aboŋwen. Kare ame Lamek doŋ ori oromo mwaka mia acel kede pyeraboro wie aryo, onywalo wode, ame te cako nyiŋe Nua, kun kobo ni, “Man bino kelliwa weo i tic me ciŋwa ame ocanne iye, i lobo ame Rwot oceno.” I ŋe nywalo Nua, Lameki ori mwaka mia abic kede pyeraboŋwen wie abic, dok rik daŋ omedo nywalo awobe kede anyira. Pi mannono mwaka a Lamek luŋ ame ori kede i lobo te to, romo mia abiro kede pyeraboro wie abiro. Kare ame Nua doŋ ori mwaka mia abic onywalo Cem, Kam, kede Yafeci. Kare ame dano ocako medde i lobo, kun daŋ onywalo anyira, awobe Obaŋa ocako neno ni anyira a dano beco. Gin ocako yero mogo i akinagi, ote nyomo me bedo mongi. Rwot te kobo ni, “Cunya mom bino ri i kom dano nakanaka, pien en obedo kom nono, ento en bino ri pi mwaka mia acel kede pyeraryo keken.” Jo Nepili onwoŋo tye i lobo i kare-nono; icennere doki, i kare ame awobe Obaŋa odonyo baŋ anyira a dano, te nywalligi itino, onwoŋo gin daŋ tye. Magi gin twoni jo otego me kare-naca, ame nyingi rwo meicel. Rwot te neno ni bal ajo dwoŋ i lobo, dok pargi ducu me cuny opoŋ ka i paro pi timo gin arac keken. Cuny Rwot mom te bedo ayom pi tiyo dano i lobo, te cwero cunye meicel. Rwot te kobo ni, “Abino jwero dano ame rik aketo i lobo oko; dano kede leyi kede gin ame lak alaka, kede winy ame twarre malo; pien cunya doŋ mom yom pi ketogi.” Cite Rwot te pwoyo Nua. Man ikwae a Nua. Nua rik onwoŋo obedo dano a kite atira, ame ballere moro mom i akina jo me kare mere; Nua obedo tiyo gin ame Obaŋa mito. Nua rik tye kede awobe adek: Cem, Kam, kede Yafeci. Lobo onwoŋo doŋ oballe oko i nyim Obaŋa, lobo onwoŋo olunyo poŋ i byemi. Obaŋa te neno lobo, onwoŋo doŋ oballe oko, pien ginnoro ducu ame onwoŋo tye kede kom onwoŋo oballe oko i kite ame gin bedo kede i lobo. Obaŋa te kobbi Nua ni, “Doŋ atyeko moko oko me tyeko ginnoro ducu ame tye kede kom, karacel kede lobo daŋ; pien lobo doŋ opoŋ i byemi pirgi. Paa yeeni adwoŋ i yat gofer, pok icika i yie, ite mwono yie kede yo ŋec ducu kede odok. Man en kite ame myero iti kede: bor a yee myero bed yadi mia acel kede pyerabic, eka borrere me malo te bedo futi pyeraŋwen wie kany. Tuc wan dirica i ye kun iweko malo odoŋ futi acel kede nucu. Ket doggola i laŋet yee, eka ite poko yie adek, kabedo i pinnyere, kabedo me aryo mere kede kabedo me adekkere. Pien abino coro abwal pii adwoŋ meicel i lobo, me tyek ginnoro ducu i te polo, ame tye kede kom, ame tye kede weo me kwo, me gin luŋ ame tye i lobo, to oko. Ento an abino cikere kedi; ibino donyo i yee, yin karacel kede itinoni kede dakoni, kede mon itinoni. Dok daŋ i kom ginnoro ducu ame tye kede kwo, ame tye kede kom, kwany aryo aryo i kom epone acel acel, ite cwayogi i yee, me gin bed kwo karacel kedi; twon kede mine. Winy acalo eponegi tye, leyi acalo oponegi tye, gin ame lak alaka piny acalo eponegi tye, gin bino bino baŋi aryo aryo i kom epone acel acel, me gi bed kwo, Dok ter daŋ epone cam ducu ame ocamo, ite gwoko; mannono bino konyowu karacel kede gin, me acamawu.” Nua daŋ te timo kittono; otio ginnoro ducu ame Obaŋa ocike tiyo. Rwot te kobbi Nua ni, “Dony doŋ i yee, yin karacel kede jo me odi ducu, pien atyeko doŋ neno ni yin kiteni atira i nyima i akina jo me kare man. Ter leyi ame ocamo abiro abiro, twonnere kede mine; kede leyi a mom ocamo aryo aryo, twonnere kede mine. Ter daŋ winy ame twarre malo abiro abiro, co kede mon me gwoko eponegi bed kwo i lobo ducu. Pien odoŋ doŋ nino abiro, abino miyo kot cwe i lobo pi nino pyeraŋwen, dyeceŋ kede dyewor; ginnoro luŋ ame kwo ame rik atio, abino rweyogi oko i lobo.” Nua te tiyo ginnoro luŋ ame Obaŋa ocike tiyo. I kare ame twon abwal pii ocorre i lobo, Nua onwoŋo doŋ oromo mwaka mia abicel me dittere. Eka Nua kede dako mere, kede awobe mere te donyo i yee me bwot i twon abwal pii, Leyi ducu ame ocamo kede a mom ocamo, kede winy, kede gin ame lak alaka piny, gin ducu odonyo iyi yee karacel kede Nua, kun odonyo aryo aryo, en ico kede en a dako, kite ame Obaŋa rik ociko kede Nua. I ŋe nino abiro, twon abwal pii te corre i lobo. I mwaka me mia abicel me dit a Nua, i dwe me aryo, nino dwe apar wie abiro, i nino-nono waŋ pii atut luŋ ame tye piny te tutuca oko, polo daŋ te tutuca oko. Kot te corre i lobo nino pyeraŋwen, dyeceŋ kede dyewor benebene. I nino-nono ikome, Nua kede awobe mere Cem, Kam kede Yafeci, kede dako mere en Nua, karacel kede mon awobe mere adek, odonyo iyi yee, gin karacel kede leyi ducu me tim acalo eponegi tye, kede leyi ducu me paco acalo eponegi tye, kede ginnoro luŋ ame lak alaka acalo eponegi tye, kede winy ducu acalo eponegi tye, winy ducu ame papat. Kom ducu ametye kede weo me kwo odonyo iyi yee aryo aryo karacel kede Nua. Co kede mon me kit ginnoro ducu ame odonyo iyi yee, odonyo i kite ame Obaŋa ociko kede Nua; eka Rwot tecegogi oko iyiyee. Twon abwal pii te bedo corre i lobo pi nino pyeraŋwen. Pii omedde poŋ, te tiŋo yee malo ame bor abora kede lobo. Pii te cerre, te medde poŋ adwoŋ meicel i lobo; eka yee te bedo lyero alyera i wii pii. Pii te cerre atek meicel i lobo, ame te wumo kiddi adoŋo ducu ame tye piny i te polo. Pii te medde cerre malo i wi kiddi adoŋo kun kato kiddi adoŋo yadi abiro kede nucu twal. Ginnoro ducu ame onwoŋo tye kede kom, ame onwoŋo woto i lobo te to oko: winy, leyi me paco kede leyi me tim, kede ginnoro ducu ame nya corre i lobo, karacel kede dano daŋ, gin ducu oto oko. Ginnoro ducu ame onwoŋo tye kede kwo, ame bedo i wi tela oto oko. Obaŋa orweo ginnoro ducu ame tye kede kwo, ame onwoŋo tye i lobo, dano, kede leyi, gin ame lak alaka kede winy ame twarre malo; gin luŋ orweogi oko i lobo. Nua keken kede jo ame rik tye kede iyi yee en ame odoŋ. Pii te ri i lobo pi nino mia acel kede pyerabic twal. Obaŋa te po ni Nua karacel kede leyi ducu me tim, kede leyi ducu me paco, ame onwoŋo tye karacel kede iyi yee. Obaŋa omio yamo okodo i lobo eka pii te ero dwono oko. Pii atut ame tye piny, kede kan otutuca i polo, te cegere oko, kot ame onwoŋo corre i polo te cok oko, pii i lobo te medde dwono. I agikki me nino mia acel kede pyerabic, pii onwoŋo doŋ owaye odok piny. I dwe me abiro, nino mere apar wie abiro, yee te gem oko i wi kidi adwoŋ me Ararat. Pii omedde dwono naka i dwe me apar. I dwe me apar, wi kiddi aboco mege te cako nen oko. Kare ame nino pyeraŋwen doŋ akato, Nua oyabo waŋ dirica a rik etuco i yee, te cwayo agak oko. Agak te bedo twarre kun wirre tuŋŋi i tuŋŋi tuno waŋ ame pii otwo oko i wi lobo. Nua dok te cwayo amam me wot neno ka pii odwono oko i wi lobo. Ento amam mom te nwoŋo kakannoro ame etwero cibo iye tyene, te dok gire oko iyi yee baŋ Nua; pien onwoŋo pii pwod tye okwaŋ i wi lobo luŋ. Nua te ryeyo ciŋe, make dwoke iyi yee baŋe. Nua dok te kuro nino pyeraŋwen ocele, te cwayo amam oko doki iyi yee. Amam te dok baŋe a doŋ piny oyuto, kun otiŋo pot jeituni adyaka i doge. Mannono omio Nua oniaŋ ni pii doŋ odwono oko i wi lobo. Nua dok te medo kuro pi nino abiro ocele, te dok cwayo amam, cite naka mom omedo i dwogo baŋe atwal. I mwaka me mia abicel kede acel me dit a Nua, i dwe me agege, nino dwe acel, onwoŋo pii doŋ otyeko dwono oko i wi lobo. Nua te cako puto wi yee oko, te neno piny, oneno wi lobo doŋ otwo oko. I dwe me aryo, nino dwe pyeraryo wie abiro, ame onwoŋo lobo doŋ otwo oko, Obaŋa okobbi Nua ni, “Ya doŋ iyi yee oko, yin kede cegi kede awobeni kede mongi. Kel jami ducu ame kwo ame tye baŋi, winy, leyi me paco kede ginnoro ducu ame lak alaka i lobo, me gin nya, medde, dok onywal ocorre apipim i wi lobo.” Mannono te miyo Nua donyo oko kede awobe mere, kede dako mere, kede mon awobe mere; kede leyi ducu, kede ginnoro luŋ ame lak alaka, kede winy luŋ. Gin jami nono luŋ ame woto i wi lobo, te ya oko iyi yee, ote ciro donyo oko kun olubere eponegi. Nua te cano keno me miyo lam baŋ Rwot eka te yero leyi kede winy ame ocamo, te waŋogi i kom keno me lam, yalo Rwot. Ka Rwot oŋweo gin a ŋwece kur, okobo i cunye kene ni, “Mom dok abino medo ceno lobo pi dano ame tammere ogom oko i rac cakere i tino mere; mom dok abino medo neko gin akwo luŋ kite ame doŋ atyeko timo. Ka lobo pwod bino bedo tye, kare me coc kede kare me kac, kare me koyo kede kare me lyeto, kare me oro kede kare me iporo, dyeceŋ kede dyewor mom bino gik.” Obaŋa omio Nua kede awobe mege winyo kun kobo ni, “Nywal, imedde, ipon wunu lobo. Leyi ducu me tim kede winy a twarre malo bino lworowu i myelkom, karacel kede ginnoro luŋ ame lak alaka, kede en ame mol amola i wi lobo, kede rec luŋ me nam; gin luŋ otyeko miyogi i ciŋwu. Gin akwo luŋ ame woto, bino bedo me acamawu; acalo rik amiowu pot dek, amiowu doŋ jami ducu. Kadi amonnono, mom myero icam wunu riŋo ame remo pwod tye iye, pien remo en kwo mere. Ka ce oonyo remowu, an abino pido pire; abino pido pire baŋ lee moro keken kede baŋ dano. Ŋat ame okwanyo Olev. Lodo kwo a ŋat ocele, an daŋ abino mito kwo mere. Ŋattoro ducu ame oonyo remo a dano, obino miyo dano daŋ onyo remo mere, pien Obaŋa ocweo dano i callere ikome. Wun nywal, inya, imedde wunu i wi lobo.” Obaŋa dok te kobbi Nua karacel kede awobe mere ni, “Nen, an ikoma amoko cikerena kedwu karacel kede ikwaewu ame bino lubowu, kede ginnoro akwo luŋ ame tye baŋwu; winy a twarre malo, leyi me paco kede me tim, kede ginnoro ducu ame tye kede kwo ame idonyo karacel kedgi iyi yee. Amoko doŋ cikerena kedwu, me mom dok medde tyeko jami ducu ame tye kede kom kun atyeko kede twon abwal pii. Pii mom dok bino medde poŋ, ame balo lobo luŋ.” Obaŋa dok te kobo ni, “Man en gin anyuto cikerena ame acikere kede kedwu, kede ginnoro akwo luŋ ame tye baŋwu. Cikere ame bino ri atwal pi lwagi jo me kare luŋ ame tye i nyim. Atyeko keto etaloka i pol ame bino nyuto cikerena kede lobo. Ka ce abino miyo polo wumere oko i pol, etaloka bino nen i pol, mannono bino poyo wia i cikerena ame tye i akina an kede wun, kede gin akwo ducu, kede ginnoro luŋ ame tye kede kom i lobo. Pii mom dok bino wukere ame romo tyeko lobo. Etaloka bino bedo i pol, ame ka an aneno abino poyo cikere ame bino bedo nakanaka i akina an kede gin akwo luŋ ame tye kede kom i wi lobo.” Obaŋa te kobbi Nua ni, “Man en gin a nyuto cikere ame amoko i akina an kede ginnoro luŋ ame kwo i wi lobo.” Itino a Nua ame oya iyi yee onwoŋo Cem, Kam kede Yafeci, Kam en ame rik obedo papa a Kanaan. I kom itino a Nua adek-ki en ame lwak luŋ me wi lobo oya i komgi. Nua rik en ogeo bedo apur. En opito poto olok, te mato koŋo olokkere, te mer oko, eka te buto onoro i kema mere. Kam, papa a Kanaan, te neno pappere onoro, eka te titti omego mere aryo ame onwoŋo tye oko. Cem kede Yafecite kwanyo boŋo keto i wi gwokgi gin aryo luŋ, ote wot kun ojer i ŋegi, ote wumo papagi oko ame onwoŋo tye onoro; kun gin gigi mom oneno papagi onoro pien waŋgi onwoŋo oneno teŋe. Ka Nua oco kun koŋo oket oko i kome, te niaŋ gin ame wode me cogo otimo i kome, okobo ni, “Kanaan oceno oko; en bino bedo opii meicel i akina opii omego mere.” Dok te kobo ni, “Ama Rwot, mi winyo koma Cem; mi Kanaan bed opii mere. ‘Obaŋa nyayi Yafeci kabedo, me en bed i kema a Cem; Kanaan bed daŋ opii mere.’ ” A doŋ abwal pii ame ocorre i lobo ogik oko, Nua dok omedde ri i lobo pi mwakki mia adek kede pyerabic. Mwaka a Nua luŋ ame ori kede i lobo te to, romo mia aboŋwen kede pyerabic nono. Ikwae a Cem, Kam kede Yafeci itino a Nua ame gin onywalo ame doŋ twon pii abwal ogik oko, gin ene: Itino a Yafeci ame awobe mege obedo: Gomer, Magog, Madai, Yavan, Tubal, Mecek kede Tirac. Itino a Gomer ene: Acikenaj, Repa kede Togarma. Itino a Yavan ene: Elica, Tarcic, Kittim kede Dodanim. Rok me dog nam onya i kom jo-ni. Magi gin itino a Yafeci ame awobe kede lobogi, kun acel acel kobo lebgi pat, acalo itekeregi kede rokgi tye kede. Itino a Kam ene: Kuc, Miciri, Put, Kanaan, Itino a Kuc ene: Seba, Kavila, Cabta, Raama, kede Cabteka, Itino a Rama ene: Ceba kede Dedan, Kuc onywalo Nimulodi, ame en dano ame ogeo bedo twon lo moro atek me wi lobo, I nyim Rwot daŋ en rik obedo twon adwarroro ame oken; en omio okobo ni, “Calo Nimulodi ame twon adwar oken i nyim Rwot.” Loccere rik ogeye i Babel, Erek, Akkad kede Kalne, ame gin tye i lobo me Cinar. Ya i lobo-nono, en dok okato Acuria, te gero Nineve, Rekobot-Ir, Kalak, kede Recen, ame tye i akina Nineve kede Kalak; mannono en ame boma adittere, Miciri onywalo jo Lud, jo Anam, jo Lekab, jo Naptuk, jo Patruc, jo Kacluk kede jo Kator, ame jo Piriciti oya i komgi. Kanaan onywalo Cidon, ame obedo atinnere me kao, Ket te lubo, kede jo Jebuc, jo Amor, jo Girgac, jo Kivi, jo Ark i, jo Cin, jo Arvad, jo Cemar, kede jo Kemat. Icennere atekere a jo Kanaan te cako ket oko, Waŋ lobo a jo Kanaan ocakere i Cidon dok kede naka i yo adok tutuŋ Gergar, tuno naka i Gaja; kede dok iyo ame dok tutuŋ Codoma kede Gomora, kede Adma, kede Jeboim, tuno naka i Laca. Magi gin itino a Kam awobe kun lubo kite ame itekeregi, lebgi lobogi kede rokgi tye kede. Cem ame obedo omin a Yafeci adittere, en ame obedo kwaro itino Eber luŋ, en daŋ onywalo itino, Itino a Cem ame awobe mege obedo, Accur, Arpakcad, Lud, Aram. Itino Aram ene: Uc, Kul, Geter kede Mac, Arpakcad onywalo Cela, Cela onywalo Eber, Eber onywalo itino awobe aryo; ŋat acel rik olwoŋo ni Peleg, pien i kare mere en ame rik opoko iye lobo, kede ominnere rik nyiŋe Yokotani, Yokotani onywalo Almodad, Celep, Kacarmavet, Yera, Adoram, Ujal, Dikla, Obal, Abimael, Ceba, Opir, Kavila, kede Yobab; magi luŋ obedo itino a Yokotani ame awobe. Lobo ame gin obedo iye, waŋe ocakere i Meca, te dok kede i yo ame dok tutuŋ Cepar tuno kede i lobo obedo kidi kidi ame tye tutuŋ kide. Magi gin itino a Cem ame awobe mege kun lubo kite ame itekeregi, lebgi, lobogi kede rokgi tye kede. Man en itekere me itino a Nua, kite ame nywalogi obedo lubere kede i rokgi; cakere i komgi, rok ocako ket romo lobo luŋ kun cakere a doŋ twon abwal pii ame ocorre i lobo ogik oko. Jo wi lobo luŋ rik onwoŋo kobo ka leb acel keken ame kop a gin kobo onwoŋo mom ru pol wok. Kare ame gin obedo dak kun odok tutuŋ kide, gin rik te nwoŋo lobo obedo babar i lobo Cinar, gin doŋ te bedo kuno. Gin te kop gigi kengi kengi ni, “Biye wunu, me ogo wunu matafali ote waŋo wunu aber.” Gin te tic i matafali me gedo akaka gweŋ, kede odok lam acalo gin ame ribo akina matafali. Dok ote kobo ni, “Biye wunu, me ogeru boma karacel kede gedo abor ame wie gudo polo, me omi wunu nyiŋwa rwo, me kur oket wunu oko i wi lobo ducu.” Kare ame Rwot oyito piny me neno boma karacel kede gedo abor ame dano ogero. Rwot okobo ni, “Nen, gin obedo rok acel kun okobo leb daŋ acel; man pwod en ageyi me gin a gin bino timo; cakere amanni wot kede anyim, mom tye ginnoro ame timo bino loyogi. Biye wunu me oyit wunu piny, me owot orurubo wunu lebgi oko, me dano acel kur niaŋ kop a ŋat ocele.” Mannono te miyo Rwot ketogi oko i kuno, ote lal romo wi lobo luŋ; ote doŋ weko gero boma-nono oko. Mannono omio nyiŋ boma-nono ocako ni Babel, pien kannono en ame Rwot orurubo iye leb me wi lobo luŋ, dok daŋ kannono en ame Rwot okeketogi iye, ote lal romo wi lobo luŋ. Magi gin ikwae a Cem. Kare ame Cem doŋ oromo mwaka mia acel me dittere, onywalo Arpakcad a doŋ mwaka aryo okato ame twon pii abwal ame ocorre i wi lobo ogik. A doŋ en onywalo Arpakcad oko, ori mwaka mia abic, dok rik daŋ omedo nywalo awobe kede anyira. Ka Arpakcad doŋ otyeko ri mwaka pyeradek wie abic me dittere, onywalo Cela, Arpakcad ori mwaka mia aŋwen kede adek a doŋ otyeko nywalo Cela, dok rik daŋ omedo nywalo awobe kede anyira. Ka Cela doŋ otyeko ri mwaka pyeradek me dittere, onywalo Eber. Cela ori mwaka mia aŋwen kede adek a doŋ otyeko nywalo Eber, dok rik daŋ te medde nywalo awobe kede anyira. Ka Eber doŋ otyeko ri mwaka pyeradek wie aŋwen me dittere, onywalo Peleg. Eber ori mwaka mia aŋwen kede pyeradek a doŋ otyeko nywalo Peleg, dok rik daŋ te medde nywalo awobe kede anyira. Ka Peleg doŋ otyeko ri mwaka pyeradek me dittere, onywalo Reu. Peleg ori mwaka mia aryo kede aboŋwen a doŋ otyeko nywalo Reu, dok rik daŋ te medde nywalo awobe kede anyira. Ka Reu doŋ otyeko mwaka pyeradek wie aryo me dittere, onywalo Cerug. Reu ori mwaka mia aryo kede abiro a doŋ otyeko nywalo Cerug, dok rik daŋ te medde nywalo awobe kede anyira. Ka Cerug doŋ otyeko ri mwaka pyeradek me dittere, onywalo Nakor. Cerug ori mwaka mia aryo a doŋ otyeko nywalo Nakor, dok rik daŋ te medde nywalo awobe kede anyira. Ka Nakor doŋ otyeko mwaka pyeraryo wie aboŋwen me dittere, onywalo Tera. Nakor ori mwaka mia acel kede apar wie aboŋwen a doŋ otyeko nywalo Tera, dok rik daŋ te medde nywalo awobe kede anyira. Ka Tera doŋ otyeko ri mwaka pyerabiro me dittere, onywalo Abram, Nakor kede Aran. Magi gin ikwae a Tera. Tera onywalo Abram, Nakor kede Aran; Aran oywalo Lot. Aran en ate geyo toyi pappere Tera i lobo ame rik onywale iye, i paco me Ur ame paco ajo Kaldaya. Abram kede Nakor te nyomo mongi; dako Abram nyiŋe Carai aco dako a Nakor nyiŋe Mirika, ame en nyaka Aran pappa Mirika kede Icika. Carai rik oraŋa, atiŋŋere moro onwoŋo gire pe. Tera te tero wode Abram, kede akware Lot wot a Aran, kede ci-wode Carai, dako a Abram; gin luŋ rik ote wot karacel kun oya i Ur ame paco a jo Kaldaya me wot i lobo me Kanaan; ento ka gin otuno i Karan, koŋ ote bedo gigi kannono. Mwaka a Tera luŋ ame ori kede i lobo oromo mia aryo kede abic; Tera te to i Karan. Rwot okobbi Abram ni, “Ya oko i lobo turwu, i akina jowu, kede i ot a pappi, iwot i lobo ame an abino nyutti. An abino miyi idoko rok adwoŋ meicel, dok daŋ abino miyi winyo kun amio nyiŋi rwo meicel; mano bino miyo ibedo akel winyo. Abino miyo winyo i kom jo a lammi winyo, aco jo ame ceni acena, an daŋ abino cenogi; dok atekere me wi podo luŋ bino nwoŋo winyo piri.” Abram te cako wot amannono, kit ame Rwot okobbe kede, kun Lot daŋ woto karacel kede. Abram onwoŋo doŋ mwaka me dittere oromo pyerabiro wie abic i kare ame en ya i lobo Karan. Abram owoto karacel i dako mere Carai, kede Lot atin ominnere, kede limgi luŋ, kede jogi luŋ ame gin onwoŋo i Karan. Gin te ero wotgi me wot i lobo Kanaan; ote tuno daŋ anaka i Kanaan. Abram oŋolle i dye lobo, obino naka i kabedo ame tye i Cekem, tuno anaka ite kworo me More. I kare-nono onwoŋo jo Kanaan pwod bedo i lobo-nono. Rwot te nen baŋ Abram kun kobbe ni, “Abino miyo lobo man baŋ ikwai.” En te cano keno me miyo lam baŋ Rwot ame onen baŋe kuno. En dok te dak oko i kuno, jer i lobo obedo kidi kidi ame tye tuŋ kide me Betel. En te guro kema mere kuno oweko Betel tye tuŋ to, eka Ai te bedo tuŋ kide. En te cano keno lam kuno, te kwayo Rwot. Abram dok te medde i wottere i nyim tutuŋ Negeb. Kec rik onwoŋo opoto i lobo; keccono rik onwoŋo gwa atek, ormo Abram owoto piny i Miciri eka te bedo koŋ kuno pi kare moro. Kare ame en doŋ ceggi donyo i Miciri, en te kobbi dako mere Cerai ni, “Nen, ba, an aŋeo ni yin ibedo dako amwonya meicel; jo Miciri ka bino neni, gin bino kobo ni, ‘Man dako mere’; gin obino neka ote weki yin bedo kwo. Doŋ yin myero ikob ni ibedo aminna, mano bino miyo gin bedo keda aber, dok mom obino neka piri.” Ka Abram odonyo i Miciri, jo Miciri oneno dako mere mwonya atek meicel. Kare ame otic a Parao adoŋo mege onene, opwoc meicel baŋ adwoŋgi Parao, te miyo tero Carai i ot a Parao. Mannono omio Parao te bedo kede Abram aber pire; Abram te nwoŋo twoni, romi, kede twoni kana, opii kede aŋeca ecipan, kede megi kana, kede inaga apipim. Ento Rwot te wuno Parao kede jo me ode etak i twoni too mogo a mom kobere pi Carai dako Abram. Omio Parao te lwoŋo Abram baŋe, te penye ni, “Itima aman piŋo? Piŋo rik mom ititta atira ni en dakoni? Piŋo dok ikobo ni, ‘En aminna’ ame omio an atere obedo dakona? Aman doŋ cegi en ba! Game iwot giri doŋ oko.” Parao te ciko jo mere pire, ni myero gin lwoke ewoti karacel i cege kede jami mere a rik tye baŋe luŋ. Abram te ya i Miciri gin i cege kede jami luŋ a rik tye baŋe me wot i Negeb; Lot daŋ onwoŋo tye karacel kede. I kare-nono onwoŋo Abram doŋ olony atek i dok, kede ryal, kede jabu daŋ, En obedo medde iwottere kun ya i Negeb, dak i Betel, kan ame en rik koŋ ogeo guro iye kema mere, ame tye i akina Betel kede Ai, kan ame en rik koŋ ocano iye keno me lam con. Abram te kwayo Rwot kuno. Lot ame onwoŋo woto karacel Abram; rik onwoŋo daŋ tye i lim akwo adoŋo kede atino mege karacel kede kema daŋ apol ata. Lobo rik doŋ onwoŋo mom romogi kwat ka gin aryo luŋ obedo karacel pien gin luŋ rik limgi bup meicel a mom rommigi bedo karacel. Okwa-lim Abram kede okwa-lim a Lot onwoŋo doŋ da meicel. I kare-nono onwoŋo jo Kanaan kede jo Periji en ame obedo i lobo-nono. Mannono omio Abram okobbi Lot ni, “Mom amito ni daa moro bed tye i akinawa kede i akina okwatwa, pien wan luŋ obedo jo me ot acel. Lobo mom gire tye omoo ata ame myero iyer moro iye? Wan myero doŋ opokere oko; ka ce yin iyero ni idok tutuŋ cam an abino dok gira tutuŋ cem, aco ka yin iyero dok tutuŋ cem, an abino dok tutuŋ cam.” Lot te tiŋo waŋe malo niyo lobo luŋ ame ceggi i kulo Jordan, en te neno ni pii opoŋ iye luŋ aber meicel tuno anaka i Joar kun calo bala poto a Rwot, ame calli lobo me Miciri. Man otimere ame Rwot mom ru ojwero Codom kede Gomora. Lot te doŋ yero gire kene lobo luŋ ame ceggi i kulo Jordan, en te wot oko tuŋ kide; gin te pokere oko kengi kengi. Abram odoŋ i lobo me Kanaan, ento Lot obedo i akina boma luŋ ame ceggi i kulo Jordan, eka dok te kobo kema mere tuno naka Codoma. Jo me Codoma rik onwoŋo jo areco, balgi rik dwoŋ okato kare i nyim Rwot. A doŋ Abram opokere oko kede Lot, Rwot okobbe ni, “Tiŋ waŋi malo iŋiŋio piny naka kan ame waŋi twero gik iye kun icuŋ i kakari-nono, nen tuŋ anyarodi kede tuŋ anyarolum, tuŋ kide kede tuŋ to; pien lobo ame inenonono luŋ abino miyo oko baŋi kede baŋ ikwai atwal. Abino miyo ikwai bedo apol bala apua me lobo; me wek kwano ikwai mom twerre baŋ ŋattoro bala kwano apua me lobo. Koŋ i ya iwot iloŋ lobo-ni, inen borrere kede laccere, pien abino miyo oko baŋi.” Pi mannono Abram te kobo kema mere, dak oko naka i ŋet kworo me Mamre ame ceggi kede Kebron. En dok te cano keno me miyo lam baŋ Rwot kuno. Kare Amrapel rwot me Cinar, kede Ariok rwot me Ellacar, kede Kedor-loamer rwot me Elam, kede Tidal rwot me Goim, rwode magi luŋ rik ote notte me lweny i kom Bera, rwot me Codom, kede Birca rwot me Gomora, kede Cinad rwot me Adma, kede Comeber rwot me Jeboim, kede rwot me Bela (ame en Joar). Jo-ni luŋ rik ote notte me lweny i luŋ me Ciddim (ame en Nam me kado). Gin-ni luŋ rik obedo i te loc a Kedor-laomer mwakki apar wie aryo, ento ote jem oko i mwaka me apar wie adekkere. I mwaka me apar wie aŋwennere, Kedor-loamer karacel kede rwode ame onwoŋo rik onotte kede, te dok bino ero lweny, ote loyo jo Repa i Acitero-Karnaim kede jo me Julin i Kam, kede jo Emin i Ceve-Kariataim, kede jo me Kori i kidigi me Cer, tuno naka i El-paran i waŋ apokki ame ceggi i tim. Kare ame man otum, gin te lokere dwogo cen, ote wot naka i En-minipat (ame en Kadec), gin te loyo lobo ducu me a jo Amalek, kede jo me Amor daŋ, ame bedo i Kajajon-tamar. Icennere doki rwot me Codoma, kede rwot me Gomora, kede rwot me Adma, kede rwot me Jeboim, kede rwot me Bela (ame en Joar), ote wot ero lweny i luŋ me Ciddin, Oero i kom Kedor-laomer rwot me Alam, kede Tidal rwot me Goim, kede Amrapel rwot me Cinar, kede Ariok rwot me Ellacar; rwode magi aŋwen onotte karacel me lweny i kom rwode abic. Luŋ me Ciddim onwoŋo rik tye iye burrogo me odok acol. Kare ame rwode me Codoma kede Gomora oriŋo oko, jogi ocele mege te rette i bure-nono, jo odoŋŋege te riŋo laro wi kidi. Okwor te yako jo Codoma kede Gomora ducu karacel kede camgi, ote ciro wot gigi kede. Rik ote mako daŋ Lot ame obedo atin omin Abram ame rik bedo i Codoma kun oyako daŋ jami mere luŋ owoto kede. Cite dano moro acel ame obwot, te riŋo kelo kop man baŋ Abram ame en dano me Eburania a rik bedo i ŋet kworo me Mamre; lo a rik obedo dano me Amor, ominna Ecikol kede Aner, jonnono luŋ rik owoto ocikere me notte kede Abram. Ka Abram owinyo ni atin ominnere mony omako otero oko, en obelo monnyere, te telo wi jo ame onywalo i paco mere ame opwonyo i lweny, jo ame romo mia adek kede apar wie aboro ote lubo yorgi naka i Dan. Abram kede monnyere te cobogi dyewor kun ogurogi tuŋŋi kede tuŋŋi, ote twarogi, ryemogi tuno naka i Koba ame tye tuŋ cam me Damaciko. Gin te yako limgi luŋ dwogo kede, ote mayo daŋ Lot atin omin Abram oko kede jami mere luŋ, kede mon, kede jo ocele daŋ. A doŋ Abram odwogo i kan ame en oloo iye Kador-laomer kede rwode luŋ ame rik onotte kede, rwot me Codoma rik te wot me rwatte kede i luŋ me waŋa yo i luŋ me Cave (ame en luŋ abaka) kan ame Melkijedek rwot me Calem okelo iye ogati kede koŋo olok; en rik onwoŋo alamdog Obaŋa Amalo Meicel. Rik en te lammi Abram winyo kun kobo ni, “Obaŋa Amalo Meicel ame oketo polo kede lobo myero mi Abram winyo! Myero pwo Obaŋa Amalo Meicel, ame omio okwor i ciŋi!” Abram te miye acel me apar me jami eyako luŋ i baŋ okwor. Rwot me Codoma te dok kobo ni, “An luny miya ka jo ame imao, yin giriter jami luŋ bed megi.” Ento Abram te dok iye ni, “An doŋ atyeko kwoŋ oko baŋ Rwot Obaŋa Amalo Meicel, ame oketo polo kede lobo, ni mom dok abino gamo ginnoro dwogo baŋa, kadi atin uci del amukkoro, me kur ibed kobo ni, ‘Amio Abram olony.’ Mom dok abino medo gamo ginnoro pira kono ka gin ame jona ocamo, kede dul lim ame apokki jo ame owoto keda-ni; wek Aner, kede Ecikol kede Mamre ter meggi.” A doŋ man otum, Rwot dok te nyuto baŋ Abram koppere kun kobo ni, “Kur ilwor, Abram, an abino bedo kwotti, abino miyi mot adwoŋ meicel.” Ento Abram te gamo ni, “Ama Rwot Obaŋa, ŋo kara ame ibino miya? Nen anaka atinna moro daŋ pwod pe, ale oda bino bedo Eliezer me Damaciko.” Abram te dok medo ni, “Nen, yin mom ru imia atinnoro; amiro ame onywalo i oda en ame bino leyo oda.” Kop a Rwot te bino baŋe ni, “Mom dano-ni gire en ame bino leyo, ento wodi ikome en ame bino leyo odi.” Te kelo Abram oko, te kobbe ni, “Koŋ inen polo, kwan wel acer, nen ka iromo kwano welgi ityeko!” Te medo kobbe ni, “Ikwai daŋ bino bedo apol amannono.” Abram te medde kede iyee mere i kom Rwot; omio ote kwane ni kite atira. Dok te kobbe ni, “An a Rwot ame okeli i boma me Ur ame tye i lobo a jo Kaldaya, me miyi loboni bed megi.” Abram ogamo ni, “Ama Rwot Obaŋa, kara atwero ŋeyo nino ni lobo-ni bino bedo mega?” Okobbe ni, “Kella atin roa moro me mwaka adek, kede akale dyelloro me mwaka adek, kede nyok romo me mwaka adek, kede atin awele, kede amam.” En te ke lo jami-nono luŋ baŋe, te nununo yigi oko aryo kun poko acel atira i dul aryo, eka te canogi kun dul acel acel tenne kede awottere, ento winy mom te nuno yigi. Ka acut obino me camogi, Abram ryemogi oko. Otyeno ame cen doŋ ceggi donyo, nino te mako waŋ Abram atek meicel. Lworo omake twon pinnyoro acol icuc te wume oko. Rwot te kobbe ni, “Myero iŋe ateni ni, ikwai bino bedo wele i lobo a mom meggi; dok obino miyogi odoko opii kuno eka ote wunogi pi mwakki mia aŋwen. Cite an abino ŋolo kop i kom rok ame bino wunoginono, icennere gin bino ya wot oko i kuno kun otye i lwak lim apipim. Aco yin giri ibino buto karacel i kwarini i kuc, obino yiki ame doŋ iteggo aber abera. Ikwai ame obino nywalo, ame gin lwagi me aŋwennere, gin bino dwogo kan, pien bal a jo Amor mom ru romma ke to can i komgi.” Otyeno ame ceŋ doŋ opo to, piny doŋ odoko acol oko, gulu ame yito aduny iye kede mac ame alyel i rao te bea i dye riŋo ame onununo ca, Ninonono en ame Rwot oketo iye cikere mere kede Abram, kun kobo ni, “Amio lobo man baŋ ikwai, cakere i kulo me Miciri tuno anaka i kulo adwoŋ ame en kulo me Efurat. Lobo a jo Keni, kede jo Keniji, kede jo Kadmon, kede jo Kitti, jo Periji kede jo Repa, kede jo Amor, kede jo Kanaan, kede jo Girgac, kede jo Jebuc.” Carai dako Abram onwoŋo mom onywalle atinnoro. En rik onwoŋo tye kede aŋeca mere ame nyiŋe Agar, nyako me Miciri. Carai rik te kobbi Abram ni, “Nen, an Rwot mom omia anywalo atinnoro, yin myero iwot idony baŋ aŋecana, me atot ya nywalliwa atinnoro.” Abram daŋ te ye kop ame cege akobo, Carai dako Abram te tero aŋeca mere Agar, nyako me Miciri, te miyo baŋ cware Abram me bed dako mere. Man otimere i kare ame Abram doŋ onwoŋo obedo mwaka apar i Kanaan. Abram daŋ te cako bedo kede Agar, eka te yac oko. A doŋ en oneno ni etye kede yic, te ero acae oko i kom dako adwoŋ Carai kun ŋe ŋe i wan arac, Eka Carai te kobbi Abram ni, “Rac ame otimere i koma bed gire i wii. An rik amio aŋecana i kori, aman ka en doŋ oneno ni eyac, te ero caya kun ŋe na i waŋ arac. Rwot doŋ ŋol kop i akina an kede yin.” Abram te gamo dog Carai ni, “Nen ba, aŋecani tye i te locci, yin giri tim gin ame yii mito I kome.” Carai te bedo wuno aŋeca atek meicel, omio te riŋo oko. Amalaika a Rwot te nwoŋe i ŋet waŋ pii ame tye i tim, en waŋ pii ame tye i yo ame woto i Cur. Eka te penye ni, “Agar we, aŋeca a Carai, kara iya i kwene? Iwot kwene?” En te gamo ni, “An kom ariŋo Carai, dako ame onwoŋo loa, ame abedo baŋe.” Amalaika a Rwot te kobbe ni, “Yin dok baŋ dako ame loi-nono, miye ite loccere. Abino miyo ikwai nya, doko apol meicel, ame kwanogi bino loyo jo oko, pi polgi. Nen ba, yin iyac, ibino nywalo atin awobi, ibino cako nyiŋe Icmael; pien Rwot doŋ ociko yite i kom canni. En bino bedo acalli kana me tim. En bino bedo ager ame ryeo ciŋe i kom dano ducu, dok jo luŋ bino ryeyo ciŋgi i kome. En bino bedo kun dagere omego mere ducu.” Agar te cako nyiŋ Obaŋa ame okobo kede kuno ni, “Yin Obaŋa ame neno;” pien okobo ni, “An kara ateteni aneno Obaŋa ame ŋe na kare luŋ.” Mannono omio ocako nyiŋ waŋ pii-nono ni Beer-lakairoi, tye i akina Kadec kede Bered. Agar te nywalli Abram atin awobi. Abram te cako nyiŋ wode ame Agar onywalo ni Icmael. Abram onwoŋo doŋ mwaka me dittere oromo pyeraboro wie abicel i kare ame Agar onywalo iye atin baŋ Abram. A doŋ Abram oromo mwaka pyeraboŋwen wie aboŋwen me dittere, Rwot dok te nen baŋ Abram, te kobbe ni, “An Obaŋa ame Won Twer Ducu. Wot i nyima aboŋo balloro, cite abino keto cikerena wan kedi, dok abino miyi inya meicel.” Abram oryebere piny eka Obaŋa te kobbe ni, “Nen ba, cikerena kedi bino bedo kit man, yin ibino doko kwaro a rok apol meicel. Cakere tin nyiŋi doŋ mom bino bedo Abram, ento bino bedo Iburaim, pien doŋ aketi me doko kwaro a rok apol. Abino miyo ikwai nya atek meicel, dok abino miyo idoko rok apol, rwode adoŋodoŋo daŋ bino ya i komi. Abino moko cikerena wan kedi, karacel kede ikwai ame bino lubi icennere, kede ikwaegi daŋ luŋ nakanaka, me bed cikere ame perakino atwal, me an abed Obaŋawu, yin kede ikwai ame bino lubi. Dok lobo ame ibedo iye acalo welo-ni, ame en lobo Kanaan luŋ, abino miyo baŋi kede baŋ ikwai ame bino lubi, me bed meggi atwal; dok an abino bedo Obaŋagi.” Obaŋa dok te kobbi Iburaim ni, “Aco yin ba, myero igwok cikerena, yin kede ikwai ame bino lubi luŋ aluŋa. Cikerena ame ibino gwoko, ame bino bedo i akina wan kedi, kede ikwai ame bino lubi, en ene: Itino awobe luŋ ame tye i akinawu obino lirogi oko. Obino liro del komgi me co, me bed gin ame nyuto cikerena ame tye i akina an kede wun. Atin ame ico ka oromo nino aboro obino liro del kome me co; co ducu i akina ikwai obino lirogi. Cakere i kom itino ame onywalo i odi, tuno kede i kom itino ame iwilo awila kede lim i baŋ rok ocele, ame mom onywalogi i akina ikwai. Gin luŋ obino lirogi, co ame onywalo i odi, anaka en ame iwilo awila kede lim; me cikerena bed i del komwu me co nakanaka. Ico moro ame mom oliro del kome me co waŋe bino rwenyo oko i akina jo me turgi, pien onwoŋo en oturo cikerena.” Obaŋa dok te kobbi Iburaim ni, “Aco dakoni Carai nyiŋe mom dok bino bedo Carai, ento nyiŋe doŋ bino bedo Cara. An abino miye winyo, dok abino miyo nywalli atin awobi. Abino miye winyo, en bino doko tota a rok apol meicel, rwode adoŋodoŋo me rok apol daŋ bino ya i kome.” Cite Iburaim oryebere piny i nyime te nyero kun kobo i cunye ni, “Dano ame mwaka me dittere doŋ romo mia acel twal, dok pwod bino nywalo atin awobi? Cara daŋ mwaka me dittere doŋ oromo pyeraboŋwen twal, dok pwod twero nywalo atin?” Mannono omio Iburaim okobo baŋ Obaŋa ni, “Icmael gire en a doa myero bed kwo i nyimi!” Obaŋa te dokke iye ni, “Pe gire amannono, ento dakoni Cara en ame bino nywalo atin ico, dok ibino cako nyiŋe Icaka, dok abino moko cikerena kede me bed cikere ame bino ri nakanaka baŋ ikwae luŋ ame bino lube. Aco kwacci pi Icmael, atyeko winyo, nen ba, abino miye winyo, abino miyo en nywal, nya apol meicel. Abino miyo en nywalo oloc apar wie aryo, dok daŋ abino miyo en bedo rok adwoŋ. Ento abino moko cikerena kede Icaka, atin ame Cara en abino nywalli i kodi kare acalo man mwaka a bino.” Kare ame doŋ otyeko kop kede, Obaŋa te ya gire oko i baŋ Iburaim, te dok malo. Iburaim te tero Icmael karacel kede lwak opii luŋ ame onywalo i ode, kede ame owilo awila i lim; itino a co luŋ ame tye i akina itino ame tye i ot Iburaim, te liro del komgi me co oko i nino-nono ikome, kite acalo Obaŋa ocike kede. Iburaim oliro del kome me co i kare ame mwaka me dittere doŋ oromo pyeraboŋwen wie aboŋwen. Aco wode Icmael onwoŋo doŋ mwaka me dittere tye apar wie adek i kare ame oliro del kome me co. Iburaim kede wode Icmael oliro del komgi i nino-nono ikome, karacel kede jo luŋ a rik tye i ode. Itino ame onywalo i ode kede jo ame owilo awila kede lim i baŋ rok ocele, gin daŋ olirogi karacel kede. Rwot dok te nen baŋ Iburaim i te kworo ame tye i Mamre kun onwoŋo en obedo i dog kema mere i kare ame piny lyet. Iburaim otiŋo waŋe malo te neno jo adek tye ocuŋ i nyime. Ka onenogi oriŋo kun ya i dog kema mere, te wot rwatte kedgi, te ryebere piny, kun kobo ni, “Adwoŋŋa, ka ce doŋ berra onen i nyimi, myero kur doŋ ikat an amironi akata. Koŋ iwek kelliwu pii moro atitidi me ilwok wunu i tyenwu, eka ite koŋ we wunu i te yat man. Awot koŋ kelliwu ogati moro me idwok wunu i lao ite kato giwu; kite a doŋ ibino wunu baŋ amirowu-ni.” Gin te gamo doge ni, “Wot itim kite ame ikobo-nono.” Iburaim te ru wot oko baŋ Cara i kema, te kobbe ni, “Juk moko apwottere ame romo dita adek, ijeb, me ited kede capattoro atitino.” Eka Iburaim te riŋo iyi awi, te kwanyo atin twon etobayit ame riŋo mere pwod yom dok mit, te miyo baŋ awo be mere, awobe mere te ru yiko oko oyotoyot. Iburaim te tero cak awac kede en alepa, kede riŋo ame doŋ otedo oko, eka te ke to i nyimgi; en te cuŋ i laŋetgi ite kworo kuno pi konyogi, kun gin tye acem. Gin te penye ni, “Dakoni Cara kara tye kwene?” En ogamo ni, “En tye i kema.” En te kobo ni, “Abino dwogo baŋi i kare me cwir, dakoni Cara te nywalo wode.” Cara onwoŋo tye i ŋec i dog kema kun awinyo kopgi. I karenono onwoŋo doŋ mwaka Iburaim kede Cara me ditogi dwoŋ; dok Cara daŋ onwoŋo mom doŋ two two me dwe bala mon wadgi. Man omio Cara onyere kene kene kun kobo ni, “En ame doŋ ati rom man-ni, kara pwod dok abino nwoŋo yomcuny?” Rwot te kobbi Iburaim ni, “Cara kara onyero piŋo kun kobo ni, ‘An kara dok abino nywalo atin aman doŋ ati oko-ni?’ Tye ginnoro ame loo Rwot? Ka kare oromo, an abino dwogo dok kan i cwir. Cara te nywalo wode.” Cite Cara te kwero oko pi lworo kun kobo ni, “An gira mom anyero.” Ogamo doge ni, “Pe, me nyero inyero gire.” Kare ame jo-nono ocako ya oko i kuno, gin otiko yo a dok tutuŋ Codoma, eka Iburaim te lwokogi iyo, Rwot te tamo ni, “An myero amuŋŋi Iburaim gin ame awot tiyo oko? Aco kun en Iburaim bino doko rok adwoŋ atek, ame rok luŋ me wi lobo bino nwoŋo winyo pire. Pe gire, an doŋ atyeko yere oko, pi mannono, myero en doŋ pwony itino mere kede jo me ode ame bino lube, me bedo jo a wapo yo a Rwot kun otio gin atye atira dok daŋ oŋolo kop atira; me wek icennere Rwot cob gin a rik ociko baŋ Iburaim.” Rwot doŋ te kobbi Iburaim ni, “Koko i kom Codoma kede Gomora doŋ akato kare oko, dok balgi doŋ dwon atek; abino wot kuno me awot anen ka ce kit koko ame awinyo i komgi-ni tye ka timere ateni; amito ŋeyo.” Jo-naca doŋ te cako wotgi i Codoma, ento Iburaim omedde cun i nyim Rwot. Icennere Iburaim te noko ceggi, te kobo ni, “Yin ateni ibino tyeko jo a kitegi atira karacel i jo areco? Ka kono jo a kitegi atira bino nwoŋere i boma-nono pyerabic, ibino tyekoboma-nono oko, mom ibino wekoboma-nono pi jo pyerabic ame kitegi atira a tye iye-nono? Pe amannono gire! Yin pe myero itim kittono, neko jo a kitegi atira karacel obalo kun imio jo a kitegi atira bedo rom aroma i jo obalo. Pe amannono! Aŋolkop me lobo luŋ mom doŋ bino ŋolo kop atira bo?” Rwot te gamo ni, “Ka ce abino nwoŋo jo a kitegi atira pyerabic i Codoma, ame bedo i bomanono, abino weko kabedo-nono luŋ pirgi.” Iburaim dok te gamo ni, “Nen, an kom a pua kede buru keken-ni, ento amiye gira doŋ oko me kop kedi yin Rwot. Ka kono bino rem jo abic kono me romo pyerabic? Ibino tyekoboma-nono oko pi abic ame orem-mi?” Ogamo ni, “An mom abino tyeko ka kono anwoŋo jo pyeraŋwen wie abic tye kuno.” Dok omedo penyo ni, “Ka kono inwoŋo jo pyeraŋwen keken kono?” Ogamo ni, “Pi jo pyeraŋwen-ni, mom abino timo ginnoro iye.” Dok omedo kobo ni, “Akemo kur maki ba, Rwot, an pwod amedo kop kedi. Ka kono i bino nwoŋo jo pyeradek kono?” En ogamo ni, “Ka abino nwoŋo jo pyeradek kuno; mom abino timo ginnoro.” Iburaim dok okobo ni, “Nen an amiye gira doŋ me kop kedi, yin Rwot. Ka kono ibino nwoŋo jo pyeraryo kuno kono?” Ogamo ni, “Pi jo pyeraryo-nu, mom abino tyekobomanono.” Iburaim dok okobo ni, “Akemo kur maki ba, Rwot, an doŋ akop kedi tyen acel keken. Ka kono ibino nwoŋo jo apar keken kono kuno?” Rwot ogamo ni, “Pi jo aparrono mom abino tyekoboma-nono.” A doŋ Rwot otyeko kop oko gin Iburaim, te wot oko; Iburaim daŋ te dok i kabedo mere. Omalaika aryo otuno Codoma otyeno adoŋ piny oyuto oko, gin onwoŋo Lot obedo piny i dog boma me Codoma. Kare ame Lot onenogi, oya malo te wot jologi, te ryebere piny worogi. Okobo ni, “Odoŋena, tim wunu ber ibin wunu i oda an amirowu, ibut wunu iye, ilwok tyenwu; odiko ite medde giwu i wotwu.” Gin te kwero oko kun okobo ni, “Pe gire amannono; wan piny bino ruyiwa i dye boma kan.” Lot te diyogi atek meicel, omio gin te ye, ote donyo i ode. En te teddigi arama, kede ogati ame mom orubo i tobi, eka gin te camo. Cite ame mom ru gin obu to, co me Codoma ecipan, awobe kede jo adoŋo daŋ, te gwarre luŋ aluŋa bino guro ot a Lot oko. Gin te penyo Lot ni, “Jo ame obino baŋi otyeno ni tye kwene? Kelgi oko baŋwa kan me obut kedgi.” Lot te donyo baŋgi oko, te lokere cego doggola oko, te kobbigi ni, “Omegona, akwaowu, kur itim wunu tim araccono. Nen an atye kede anyirana aryo ame mom ru oribere kede ico moro, wek aluny kelogi baŋwu me itimgi wunu kite a yiwu amito; cite kur itim wunu ginnoro i kom jo man, pien gin doŋ odonyo oko i oda.” Gin odok iye ni, “Jer teŋe lo-ni!” Dok ote medo kobo ni, “Lo-ni obino kan acalo welo, en dok mito doko aŋolkop bo! Ŋit imio otimi rac ak atogi.” Gin luŋ ote nyiggo baŋ Lot ikome, ote diye atek kun otorre karacel ame omito turo-kika me doggola oko. Cite omalaika te cwayo ciŋgi wayo Lot oko ke lo baŋgi i ot, eka ote ce go doggola oko. Gin te miyo waŋ jo i doggola luŋ to oko, jo adoŋo kede awo be daŋ, waŋgi te to oko. Gin te bedo babaŋa ababaŋ me yenyo doggola, ote ol oko. Omalaika te kobbi Lot ni, “Tye dok wati moro ocele kan? Cog anyirani, itinoni awobe kede anyira, onyo nauoro ame tye i paco kan, ya kedgi oko i kabedo man. Wan doŋ oyikere me tyek o boma man oko, pien jo iye, koko i komgi doŋ dwoŋ okato kare i nyim Rwot. Rwot doŋ ocwaowa me tyeko oko.” Man omio Lot owoto olwoŋo awobe ame rik anyomo anyira mere kun kobbigi ni, “Ya wunu oko i kabedo man, pien Rwot atyekoboma man oko.” Cite jo-nono otamo ni en arate kedgi arata. Kare ame piny doŋ oru, omalaika odio Lot kun kobo ni “Ya malo, iter dakoni kede anyirani aryo ame tye kan, me gin kur to i can ame aketo i kom boma man.” Cite en te bedo gal, ento Rwot obedo kede kica i komgi, omio amalaika te mako ciŋgi, en kede dako mere kede anyira mere aryo, te peyogi, kelogi naka i ŋe boma oko, Adoŋ gin okelogi oko, ocikogi ni, “Riŋ wunu me ilar wunu kwowu; ŋattoro myero kur lokere nen ŋec ba, daŋ kur igik wunu kannoro i luŋ-ŋi, ento riŋ ilar wunu wi kidi, me kur ito wunu.” Lot te gamo ni, “Pe amannono odoŋena! Nen, berra an amironi doŋ onen i nyimi, yin daŋ doŋ itima kica meicel pi laro kwena. Ento mom myero alar wi kidi, mio gin arac-ci dok maka te neka oko. Nen boma ame ceggi ca tye loka tuŋ ca, boma-nono daŋ gire titidi, bino miyo abwot.” Omalaika te dok iye ni, “Nen ba, kwaeci-nono doŋ aye, mom doŋ abino rero boma ame ikobo-nono. Cite myero iru riŋo ilar kuno, pien mom atwero limo ginnoro ka yin mom ru ituno kuno.” Mannono en omio ocako nyiŋ paco-nono ni Joar. Lot te tuno i Joar odiko ame ceŋ doŋ adonyo. Rwot te onyo mac kede gweŋ calufa ame mac olio, kun ya i polo, te miyo corre i Codoma kede Gomora, eka te reto boma-nono ducu kede luŋ ducu ame tye iye, anaka jo kede ginapita luŋ ame onwoŋo tye iye. Ento dako a Lot ame rik onwoŋo odoŋ ceŋ i ŋe, olokere te neno yo ŋe, omio te makere doko kado, te cuŋ oko ikiŋ. Iburaim te dilo odiko con, te wot kan a rik ecuŋ iye i nyim Rwot. En te neno tutuŋ Codoma kede Gomora kede lobo luŋ ame tye i luŋ kuno, en te neno yito tye aduny kuno balo yito mac arum. Kare ame Obaŋa Teloboma ducu ame tye i luŋ, en opo pi Iburaim, eka te laro Lot i kare ame en tye areto boma luŋ ame rik Lot bedo iye. Lot rik te bino ya oko i Joar, te wot bedo i wi kidi kede anyira mere aryo, pien onwoŋo lworo bedo i Joar. En obedo i gorogoro kidi karacel kede anyira mere aryo ca. Nyare me kao te kobbi aminnere atidi ni, “Papawa doŋ oti oko, lonnoro daŋ doŋ mom i lobo ame kono ribere kedwa acalo kite me lobo tye. Biye, omi papawa mat koŋo olok, me ote miye buto kedwa, wek en papawa miwa onywal itino.” Gin daŋ ote miyo papagi mato koŋo olok dyeworrono. Nyako me kao en ate miyo pappere geyo buto kede, ento kun pappere mom oŋeo kare ame en obuto kede i laŋete kede kare me ya mere. Odiko ocele nyako me kao te kobbi en atidi ni, “Nen ba, an aworo be amio pappa obuto keda dyewor; tin dok omie koŋo olok me yin daŋ imie ebut kedi, me wek en papawa nywal kedwa wan aryo ducu.” Dyeworrono, gin dok te miyo papagi koŋo olok, eka nyako atidi daŋ te wot miyo pappere buto kede, ento kun pappere daŋ mom oŋeo kare ame en obuto kede i laŋete kede kare me ya mere. Anyira a Lot aryo-nu te yac oko i papagi. Nyako adwoŋŋere te nywalo wode, ame te cako nyiŋe ni Moab, ame en kwaro a jo Moab naka tin Nyako atidi daŋ te nywalo awobi, te cako nyiŋe Ben-ammi, ame en kwaro ajo Ammon naka atot tin. Iburaim oya i kuno te wot tutuŋ Negeb, te bedo i akina Kadec kede Cur, te bedo koŋ pi mwakki mogo i Gerar. Iburaim te cako kop i kom Cara ame onwoŋo cege ni, “En aminna”; pi mannono Abimereki ame onwoŋo rwot me Gerar omio okelo Cara baŋe. Ento i dyeworrono Obaŋa te bino baŋ Abimereki i waŋ lek, te kobbe ni, “Nen ba, yin doŋ i dano ame ito oko pi dako ame ikelo-ni, pien cware tye.” Kare-nono onwoŋo Abimereki mom ru oribere kede, omio en te kobo ni, “Rwot, ibino neko jo a mom i balloro? Nen, en ikome okobo ni ‘En aminna’. Dako daŋ okobo ni, ‘En ominna.’ Man an gira atimo kun yia cil, ciŋa daŋ balloro mom iye.” Obaŋa te dokke iye i lek ni, “An aŋeo ni itimo man kun yi gire cil, an daŋ ageni oko me kur itim balloro baŋa: man en gin omio mom aye igude kadi acel. Aman doŋ dwok dako-nono oko baŋ cware. Dano-nono obedo adwarpiny, en bino kwaya piri me wek ibwot i to. Ento ka ce yin mom idwoko dakonono, yin karacel kede joni luŋ ibino to wunu oko.” Mannono omio Abimereki odilo odiko con te lwoŋo omiro mere luŋ, eka te tittigi kop ducu. Gin luŋ ote bedo i lworo atek meicel. Abimereki olwoŋo Iburaim te penye ni, “Omio itimowa aman kono? Aballi ŋo kara, omio yin ite kelo bal adwoŋ rom man i koma kede i kom locca? Gin ame yin itimo i koma mom romo atima kadi acelloro.” Abimereki te medo kobo ni, “Rik kara onwoŋo itamo ŋo omio ite timo man?” Iburaim te gamo ni, “Gin omio atimo amannono, pien onwoŋo an atamo ni jo me kabedo man mom lworo Obaŋa, gin bino neka oko pi dakona. Kono ateni mere, en obedo aminna, wan kede papo acel, ento totowa mom acel, ento en odoko cega. Kare ame Obaŋa doŋ omio aya oko i ot a pappa ate cako loŋo piny, an akobbe ni, ‘Man en yo ame itwero nyuto kede mari i koma, i kabedo luŋ ame wan obino wot iye, yin myero ikob ni an abedo ominni.’ ” Abimereki te miyo Iburaim rommi, dok, opii ame co kede ame mon, me mot; te daŋ dwoko dako mere Cara. Abimereki te kobo ni, “Lobona obedo gire megi ame itwero yero kannoro keken iye, ite bedo kan ame yii mito.” Te kobbi Cara ni, “Nen, amio doŋ ominni cekel me ryal ame romo tutumia, me culo kit cannoro luŋ ame otimere i komi; cite yin giri naka mom itimo balloro.” Iburaim te kwayo Obaŋa, Obaŋa te cano Abimereki kede dako mere, karacel kede aŋeca mege luŋ, te miyogi nywalo itino. Rwot onwoŋo omio dako acel acel ame tye i ot Abimereki omwato oko pi Cara dako Iburaim. Rwot dok te limo Cara acalo rik en okobo, Rwot daŋ te timo Cara acalo rik ociko. Cara oyac te nywalli Iburaim atin ico kun onwoŋo en rik doŋ oti oko, kite a rik Obaŋa ocike kede-ni. Iburaim te cako nyiŋ wode ame onywalo ni Icaka. Kare ame Icaka doŋ oromo nino aboro me dittere, Iburaim olire oko kite a rik Obaŋa ocike kede. Mwaka Iburaim me dittere onwoŋo doŋ oromo mia acel i kare ame en nywalo wode Icaka. Cara te kobo ni, “Obaŋa omio anyero, anaka ŋat ame bino winyo daŋ bino nyera. Ŋa ame yam koŋ okobbi Iburaim ni Cara waŋŋoro doto atin? Nen ka doŋ onywalli Iburaim atin awobi ame doŋ en oti oko-ni.” Atin odoŋo eka ote ryemo oko i cak. Iburaim rik te tedo arama adwoŋ meicel i nino me ryemo Icaka i cak. Cara ka oneno wot a Agar, nya jo Miciri ame rik Iburaim onywal kede tye atuko atinnere Icaka, en okobbi Iburaim ni, “Ryem aŋeca-ni wot karacel i wode, pien wot aŋeca-ni mom bino leyo jamiwa karacel i woda Icaka.” Kop man owaŋo cuny Iburaim atek, pi wode. Ento Obaŋa te kobbi Iburaim ni “Cunyi kur waŋ pi atinni kede aŋecani; ginnoro luŋ ame Cara okobo, yin lubi i kite ame en okobo kede, pien itino Icaka en ame obino cwano ni ikwaeni. Wot aŋeca daŋ abino miyo doko rok, pien en daŋ obedo atinni.” Iburaim te dilo odiko con, kwanyo kwon kede pii ame opiko iyi opoko, omio Agar, eka te lwoke, tere iyo; ocibo jami kede atin i wi gwok Agar, te doŋ cike. Agar te wot bedo loŋo tim me Beer-ceba. Kare ame doŋ pii a rik tye i opoko otum oko, Agar opyelo atinnere piny i te yat, te weko gire kannono, te wot bedo kannabor i nyim, ya i baŋ atin tuno kan ame en obedo iye borrere rom i kan ame dano twero bayo atero te gik iye; pien en onwoŋo okobo ni, “Mom myero anen kite ame atinna ato kede.” En gire te bedo i nyim kan ame ebedo iye pinnyaca, ento atin te ero delle oko i koko, Obaŋa te winyo koko atin, amalaika a Rwot te lwoŋo Agar i polo kun kobbe ni, “Agar we, kara ŋo awuni? Wek lworo bedi, pien Obaŋa doŋ otyeko winyo koko atin i kan ame ipyelo iye. Myero doŋ iya malo, i wot itin atiŋ, kwake aber i ciŋi, pien abino miyo en doko rok adwoŋ.” Obaŋa te yabo waŋ Agar, en te neno akoŋ, te wot twomo pii piko iyi opoko poŋ kwic, te miyo wode mato. Obaŋa te bedo kede atinnono; en te doŋo, te bedo gire i tim, te doko twon adwarroro ame dwaro kede atero. Obedo i tim me Paran; tottere te nyomme nya jo Miciri. I kare-nono Abimlereki kede Pikol adwoŋ me monnyere okobbi Iburaim ni, “Obaŋa tye kedi i ginnoro luŋ ame yin itio. Pi mannono, aman myero ikwoŋ i nyim Obaŋa ni mano mom ibino dwala kadi acelloro, kadi atinna, onyo ikwaa. Kite acalo an atimo ber baŋi, yin daŋ tim ber baŋa karacel kede lobona ame ibedo iye-ni.” Iburaim te gamo ni, “Abino kwoŋ.” Iburaim te nyuto koko mere baŋ Abimereki pi akoŋŋoro ame onwoŋo omiro mere omao oko, Abimereki te gamo ni, “An naka gira mom aŋeo ni ŋattoro otimo kittono, yin daŋ mom ititta. Tin tyen me agege an me winyo kop man.” Iburaim te kwanyo rommi kede twoni miyo baŋ Abimereki, eka gin aryo luŋ ote keto cikere i akinagi. Iburaim te yero akale rommi abiro keto pat. Abimereki te penyo Iburaim ni, “Kara piŋo iketo akale rommi abiro ca pat?” Iburaim ogamo ni, “Akale rommi abiro-ni ame ibino gamo i ciŋa, ibino terogi me bedo cadenna ame nyuto ni an en a rik akunyo akoŋ man.” Man en omio kabedo-nono olwoŋo ni Beer-ceba, pien gin aryo luŋ okwoŋo kwoŋgi iye. Rik gin obin oketo cikeregi i Beer-ceba kittono. Abimereki gin kede Pitol adwoŋ me mony, te doŋ ya dok i lobo a jo me Piriciti. Iburaim te pito anaŋa i Beer-ceba, te lwoŋo iye nyiŋ Rwot, ame en Obaŋa ame Perakino Atwal. Iburaim te ri i lobo a jo Piriciti kare alac. A doŋ kop man otum, Obaŋa oomo cuny Iburaim. En olwoŋe ni. “Iburaim!” Iburaim te gamo ni. “An ene.” Okobbeni, “Ter wodi Icaka, ame en wodi acel keken ame imaro, wot kede i lobo me Moria, me iwot iŋole oko kuno, iwaŋ me yala kede, i wi kidi moro ame abino nyutti.” Iburaim te dilo odiko con, tweyo gi-bedo mere i ŋe kana, te kwanyo awobe mere aryo wot kedgi karacel kede wode Icaka; otoŋo yen me waŋo gin oŋolo me yalo Obaŋa, te cako wottere i kabedo kan ame Obaŋa otitte. I nino me adekkere, Iburaim te tiŋo waŋe neno kabedonaca i kannabor. Iburaim te kobbi awobe mere aryo ni, “Wun bed wunu koŋ kan karacel kede kana, an karacel kede atin-ni owot loka ca, owot owor Obaŋa, ote dwogo baŋwu.” Iburaim te tiŋo yen cibo i wi wode kaka, en te mako mac kede pala i ciŋe; gin te cako wotgi karacel. Icaka te lwoŋo pappere Iburaim ni, “Apap!” Iburaim te gamo ni, “An en woda.” Icaka te penye ni, “Nen, yen kede mac tye, kara romo ame owot waŋo me yalo Obaŋa tye kwene?” Iburaim ogamo ni, “Obaŋa en ame bino miyowa romo me awaŋa, atinna.” Gin gigi ote medde i wotgi anyim. I kare ame gin otuno i kabedo ame Obaŋa onwoŋo ociko, Iburaim ocano keno lam, te daŋ cano yen i wie, te tweyo wode Icaka pyelo, buto i wi yen. Iburaim te cwayo ciŋe kwanyo pala me neko wode oko. Amalaika a Rwot te lwoŋe i po lo ni, “Iburaim! Iburaim!” En te gamo ni, “An ene.” Okobbe ni, “Kur igud atinnono, kur itim ginnoro i kome kadi acel; tin doŋ atyeko niaŋ ateni ni yin kara ilworo Obaŋa, pien pe itwonna wodi, ento imia, aco kono en acel keken.” Iburaim te tiŋo waŋe malo, te neno nyok romo tye i laŋete kun tuŋe omoko iyi agaba; Iburaim te wot kelo nyok romo-nono ŋolo me yalo Obaŋa akaka wode. Iburaim te cako nyiŋ kabedonono ni, Rwot en abino miyo; kite a jo kobo kede naka atot onyoni, ni, “Obino nwoŋo i wi kidi a Rwot.” Amalaika a Rwot dok te lwoŋo Iburaim tyen me aryo mere, kun kobo ni, “Rwot okobo ni, Doŋ atyeko kwoŋ oko i nyiŋa kena kena ni, pi tim man ame itimo, me mom twonna wodi, aco kono en wodi acel keken, abino miyi winyo ateteni. Abino miyo ikwai nya, medde apol a cal i lwak acer apipim ame tye i polo, dok a rom i kwoyo me dog nam. Ikwai en ame bino loyo okworgi. Rok luŋ ame tye i wi lobo bino nwoŋo winyo i kom ikwai pien yin iwinyo doga.” Iburaim doŋ te dok cen baŋ awobe mere; te ya i kuno karacel kedgi anaka i Beer-ceba, te bedo kuno. Kare ame kop man doŋ otum, otero kop baŋ Iburaim ni, “Nen Mirika doŋ otyeko nywali ominwu Nakor itino; Atin kao obedo Uj, omego mere Buji, Kemuel papa Aram, Keced, Kaja, Pildac, Yidlap kede Betuel.” Betuel te nywalo Lebeka, Mirika onywali Nakor omin Iburaim itino magi aboro. Dako a Nakor ame aŋeca daŋ, ame nyiŋe Reuma, onywalo Tebak, Gakam, Takac kede Maaka. Cara ori i lobo mwakki mia acel kede pyeraryo wie aboro. Man en mwaka ame Cara operakino kede i lobo. Cara oto i Kiriat-arba, ame en Kebron, ame tye i lobo Kanaan. Iburaim te kwero cola kun koko Cara kede pig waŋe. Iburaim te ya oko i nyim dako mere oto, te wot kobbi jo Kitti ni, “An arok ame abedo i akainwu acalo welo. Mia wunu ba dullobo moro baŋwu kan me bed mega me yiko jo; me ayik iye kom dakona ame oto oko ca, me kur doŋ abed neno kome.” Jo Kitti te gamo dog Iburaim ni, “Winy ba, adwoŋwa, yin aloc adwoŋ meicel i ikinawa kan. Yik giri kom dakoni i lyelloro aber ame yin iyero i akina lyellewa ecipan ame tye kan-ni. Mom tye ŋattoro i akinawa ame bino twoni lyellere, onyo ame bino kwero ni kur iyik kom dakoni iye.” Iburaim te ya malo, oryebere i nyim jo Kitti ame gin obedo wegi lobo-nono, kun kobo ni, “Ka imito wunu ni ayik kom atona, me kur dok abed neno kome, winy wunu koppa, ikwaya wunu Epron ame wot a Joar, me en ye miya gorogoro kidi mere ame tye i Makpela, ame obedo mere ame tye iyi agikki poto mere. Me en ŋolla wellere ame romo, me awil, en te miya i nyimwu, me bed mega me yik.” I kare-nono onwoŋo Epron tye obedo i akina jo Kitti; Epron ame en dano me Kitti te gamo dog Iburaim kun jo Kitti luŋ karacel i jo luŋ ame donyo i dog boma me Kitti daŋ tye awinyo. Okobo ni, “Adwoŋ, mom amannono gire, yin winy koppa. An amii poto, dok amii daŋ gorogoro kidi ame tye iye-nono. Amii giri nono i nyim itino a jona luŋ. Yin yik iye kom dakoni.” Iburaim dok te ryebere i nyim wegi lobo-nono, te kobbi Epron ame wegi lobo-nono luŋ tye awinyo, ni, “Pe gire, ka twerre ye koppa. Myero yin iye an aculli limmoro pi lobo ame imia. Ye gamo lim i ciŋa me ayik kom atona kuno.” Epron te gamo ni, “Adwoŋ, winy doga, poto-nu romo cekel me ryal mia aŋwen keken, kara mannono ŋo i tuŋ baŋi kede baŋa? Yin yik giri kom atoni.” Iburaim te ye kop Epron, te pimo ryal ame okobo i nyim jo Kitti, ame romo cekel mia aŋwen, kun pimo i kidi mijan ame ocat wil tio kede. Mannono te miyo poto a Epron ame tye i Makpela, ame rik tye tutuŋ kide me Mamre, te doko me Iburaim. Poto karacel kede gorogoro kidi a rik tye i poto-nono, ote moko luŋ, i nyim jo Kitti kede jo luŋ ame donyo i dog boma me Kitti. A doŋ man otum, Iburaim te yiko kom cege Cara i gorogoro kidi ame tye i poto me Makpela, i yo tutuŋ kide me Mamre, ame en Kebron, ame tye i lobo a jo Kanaan. Jo me Kiti te moko i poto-nono karacel kede gorogoro kidi a rik tye iye, myero bed me Iburaim me yik. I kare ame Iburaim doŋ oti oko, ame mwaka me dittere doŋ bup, dok Obaŋa daŋ doŋ otyeko miye winyo i jami luŋ. Iburaim okobbi amiro mere ame rik bedo baŋe kun loo jami mere luŋ, ni, “Rwak ciŋi i te amuruna, me ami ikwoŋ i nyiŋ Rwot Obaŋa me polo kede lobo, ni mannono mom ibino nyommi woda nyannoro ame tye i akina anyira me Kanaan, ame an abedo i akinagi-ni. Ento ibino wot i lobo me turwa, baŋ atekerewa, me iwot i nyommi woda Icaka dako mere i kuno.” Amiro mere te gamo ni, “Kara ka dako mom bino ye bino keda i lobo-ni kono? Myero an adwokwodi i lobo me turwu, ame rik ibino iye?” Iburaim te kobbe ni, “Nen aber ni mom iwoto i woda idwoko kuno. Rwot Obaŋa me polo ame rik okwanya i ot a pappa, i lobo ame onywala iye, ame okobo keda kun kwoŋo ni, ‘Abino miyo lobo man baŋ ikwai’, en bino cwayo amalaika mere i nyimi, bino miyo i nyommi woda dako i kuno. Cite ka dako en ame okwero bino kedi, kwoŋŋa-ni mom bino maki giri; cite woda en a mom myero i dok kede kuno.” Amiro-nono daŋ te rwako ciŋe i te amuru adwoŋŋere Iburaim, te kwoŋ baŋe i koppono. Amiro te kwanyo inaga adwoŋŋere ame romo apar nono, te cako wottere kun tero daŋ jami ocele abeco apapat me mot oya ibaŋ adwoŋŋere. En te wot i Mecapotamia i paco a Nakor. Otyeno ame mon ciro twomo pii-ni, en omio inaga mere luŋ orumo coŋgi piny i dog akoŋ ame tye i boma. En te kwayo Obaŋa kit man ni, “Ama Rwot Obaŋa adwoŋŋa Iburaim, mi kop luŋ aluŋa tin cobere baŋa aber. Nyut marri a mom lokere i kom adwoŋŋa Iburaim. Nen, an abino cuŋ i dog akoŋ kan kun mon me boma-ni bino me twomo pii; mi nyan ame abino kwayo pii me amata ni, ‘Ama koŋ icib ba guluni piny imia pii amati,’ en bino dok iye ni, ‘Mati, me ami inagani daŋ mati,’ en abed nyan iyero pi amironi Icaka. Mannono bino miyo aŋeo ni yin doŋ inyuto marri a mom lokere baŋ adwoŋŋa.” Ame en mom ru otyeko koppere, nen Lebeka nyaka Betuel wot a Mirika, dako a Nakor ame obedo omin Iburaim te bino oko i dog akoŋ kun oketo gulu pii i wii gwoke. Nyannono onwoŋo mwonya atek, dok daŋ onwoŋo mom ru oŋeye i lo moro. En owoto okato i akoŋ, te twomo pii mere poŋ gulu, te yeye dwogo kede. Amiro Iburaim te riŋo ŋolle i kome, te kobbe ni “Tima ber imia ba koŋ pii i guluni-nono a mati?” Nyannono te gamo ni, “Mat adwoŋŋa”; en te ru tiŋo gulu pii mere oko i ciŋe, te miye mato. Kare ame en doŋ otyeko mato, nyannono te kobo gire kene ni, “Abino twomo pii amio inagani daŋ, naka ka gin omato oromogi.” Oyotoyot en te ru onyo pii i weer, te riŋo dok me omo pii iyi akoŋ, en te bedo twomo pii, naka oromo inaga ducu. Amiro Iburaim onwoŋo oliŋ mot kun tye aneno nya-nu, me eniaŋ ka ce Rwot doŋ omio wottere ocobere oko aber, onyo pe. Ame inaga luŋ doŋ otyeko mato pii oko, amiro Iburaim te kwannyi nyannono atem me jabu, me um, ame pekkere romo nucu cekel, kede atem ocele aryo me jabu daŋ, mannono me ŋut ciŋ, ame pekgi romo cekel apar, kun penye ni, “Yin i nyaka ŋa? Kabuto moro twero nwoŋere turwu pirwa?” En te gamo ni, “An a nyaka Betuel ame obedo wot a Mirika ame onywalli Nakor.” Dok te kobo ni, “Reŋ kal tye adwoŋ ata kede cam ocele ame romo daŋ inagani; kabuto daŋ twero nwoŋere pirwu.” Amiro Iburaim te kulo wie piny woro Rwot, kun kobo ni, “Rwot ame en Obaŋa adwoŋŋa Iburaim, myero pwoc, pien mom oweko mar mere a mom lokere kede gennere i kom adwoŋŋa. An daŋ Rwot doŋ otyeko tela naka i ot atekere adwoŋŋa ikome.” Nyako te riŋo tito kop ame otimere luŋ baŋ jo ame tye i ot a tottere. Lebeka rik tye kede ominnere ame nyiŋe Laban. Laban oriŋo baŋ danonono i dog akoŋ. Ka oneno atem me um kede me ŋut ciŋ baŋ aminnere, eka dok te winyo kop aminnere Lebeka ni, “Lonnono okobba kit man,” en owoto baŋ lonnono, te nwoŋo ocuŋ ceggi kede inaga mege i dog akoŋ. Te kobbe ni, “Biye, yin ame Rwot otyeko miyi winyo, piŋo dok icuŋ i ŋe boma? Pien doŋ atyeko yiko ot kede kabuto daŋ.” Dano-nono te bino donyo i ot; Laban te gonyo del oko i kom inaga luŋ, te miyogi reŋ kal kede cam ocele; te daŋ kelo pii me lwoko tyen amiro Iburaim karacel kede jo owoto kede. A doŋ okelo cam ocibo i nyime ni en cam, en okobo ni, “An pwod pe acem ka mom ru atito kop ame oora pire.” Laban te gamo ni, “Koŋ doŋ ikob do.” En te kobo kit man ni, “An abedo amiro Iburaim, Rwot otyeko miyo winyo adwoŋ meicel baŋ adwoŋŋa, omio en onwoŋo lim akwo atino kede adoŋo mege, tye i ryal kede jabu, opii kede aŋeca apipim, inaga kede kana daŋ ecipan. Dok Cara dako adwoŋŋa otyeko nywalle atin awobi; Iburaim te miyo jami mere luŋ baŋ wode-nono. Adwoŋŋa te miya kwoŋ kit man ni, ‘Mom ibino yerri woda nyannoro i akina anyira me Kanaan ame an abedo i akinagi-ni. Ento ibino wot i ot a pappa, i akina atekerewa, en ame ibino nyommi woda dako iye.’ An rik abin agamo dog adwoŋŋa ni, ‘Kara ka dako mom bino ye bino keda i lobo-ni kono?’ En te gamo ni, ‘Rwot ame tela i wotta bino cwalo amalaika mere nywako yo karacel kedi, bino miyo wotti cobere aber; bino miyo inyommi woda dako i ot a pappa ikome. Kwoŋŋa-ni mom bino bedo i wii ka ce yin giri iwoto i ot a pappa eka gin en ate kwero miyi nyako.’ I kare ame atuno i dog akoŋ tin, akwao Obaŋa ni, ‘Ama Rwot Obaŋa, ame yin Obaŋa adwoŋŋa Iburaim, ka ibino miyo wotta-ni cobere aber, nen, an en doŋ acuŋ i dog akoŋ kan; nyan ame bino twomo pii, an abino kobbe ni, “Tim ber imia ba pii iyi guluni-nono, me amati,” nyannono bino gamo ni, “Mati, me ami inagani daŋ mati,” mi nyannono bed dako ame Rwot oyero me bedo dako a wot adwoŋŋa Iburaim.’ “I kare ame mom ru akobo kop i cunya otum, Lebeka obino oko kun oketo gulu pii mere i wi gwoke, te wot twomo pi i iyi akoŋ. An ate kwaye ni, ‘Mia ba pii amati!’ En te ru tiŋo gulu pii mere oko i wi gwoke, te kobo ni, ‘Mati, me ami inagani daŋ mati.’ Dok ate penye ni, ‘Yin kara i nyaka a ŋa?’ En te gamo ni, ‘An a nyaka a Betuel ame wot a Nakor, totta Mirika!’ An doŋ ate keto atem me jabu oko i ume kede i ŋut ciŋe ryoryo, ate kulo wia piny woro Rwot Obaŋa, ame en Obaŋa adwoŋŋa Iburaim, ame otela aber i yo, te miya nwoŋo nyako omin adwoŋŋa me atera baŋ wode. Doŋ aman titta wunu ka ce ibino nyuto wunu mar kede ateni baŋ adwoŋŋa; ka pe, daŋ ititta wunu me adok tuŋ ocele.” Laban kede Betuel te gamo ni, “Kop man oya i baŋ Rwot, wan giwa mom otye i kopporo iye. Nen, en Lebeka en tye i nyimi-nono, yin tere iwot wunu kede, me en wot bed ci-wot adwoŋŋi kite ame Rwot otyeko kobo.” Kare ame amiro Iburaim doŋ owinyo kopginono, oryebere piny i lobo i nyim Rwot. Okwanyo atem me ryal kede jabu ecipan, kede boŋŋi, te miyo baŋ Lebeka; te dok miyo daŋ mottogo me wel baŋ ominnere kede tottere. En karacel kede jo ame tye baŋe te doŋ cako cem kede mat; gin te buto nino acel kuno. Odiko gin te ya kwayogi ni, “Lwoka wunu doŋ adok baŋ adwoŋŋa.” Omin a Lebeka kede tottere te gamo ni, “Koŋ iwek ba nyako bed kedwa pi nino aparroro keken, te wot gire.” En ogamo okobo ni, “Kur dok imia wunu agal ba, kite acalo Rwot doŋ omio wotta ocobere oko-ni; weka wunu doŋ awoti, adok baŋ adwoŋŋa.” Gin te gamo ni, “Koŋ iwek olwoŋe en nyako openye.” Kare ame olwoŋo Lebeka, openye kun okobo ni, “Iye wot wun i dano-ni?” En te gamo ni, “Awot.” Gin doŋ te cako lwoŋo nyargi Lebeka karacel kede apidi mere, kede amiro Iburaim, kede jo mere daŋ. Gin te lammi Lebeka winyo kun okobbe ni, “Aminwa bed totta jo tutumia tyen tutumia apar, dok ikwae myero lo okworgi.” Ka man otum, Lebeka kede aŋeca mere, te ya cako wotgi; gin oyito, ote bedo i wi inaga kun olubo yo amiro Iburaim. Man en kit ame amiro Iburaim otero kede Lebeka. Icaka onwoŋo rik bedo i Negeb, ame i kare-naca onwoŋo ceggi kede Beer-lakai-roi. Otyeno moro acel Icaka onwoŋo owoto lat i dye bar, oyotoyot en te tiŋo waŋe malo, te neno inaga mogo tye abino. Ka Lebeka daŋ otiŋo waŋe malo, oneno Icaka, te yito oko piny i wi inaga. Openyo amiro Iburaim ni, “Maca kara lonnene ame abino i loka tuŋ ca, me bino rwatte kedwa cae?” Amiro te gamo ni, “Adwoŋŋa-ni ennono.” Lebeka te kwanyo boŋo wumo oko i wie. Amiro te titti Icaka kop ducu ame otimere. Icaka te kelo Lebeka i kema, me bedo dako mere kun daŋ mare. Omio cuny kaka te kwe oko pi to a tot tere. Iburaim dok te nyomo dako ocele a nyiŋe Ketula, te nywalo Jimram, Jokocan, Medan, Midian, Icibak kede Cuak, Jokocan te nywalo Ceba kede jo Dedan. Dedan te nywalo jo Acurim, jo Letuc, kede jo Leummin. Aco awobe a Midian rik te bedo: Epa, Eper, Kanok, Abida kede Eldaa. Gin luŋ rik obedo itino a Ketula. Iburaim te miyo jami mere luŋ baŋ Icaka. Ento Iburaim daŋ te poko mot baŋ itino ame aŋeca onywalo kun en pwod kwo, te cwayogi oko teŋe i laŋet wode Icaka; gin te wot tuŋ kide. Mwaka Iburaim me dittere ame obedo kede i lobo, rik oromo mia acel i pyerabiro wie abic. Iburaim oto ame mwaka mere doŋ bup, a doŋ oteggo atek; en te wot nywako kabedo kede kwari mere, Awobe mere, Icaka kede Icmael te yike i gorogoro kidi ame tye i Makpela, i poto Epron wot a Cokar, dano me Kitti, ame tye tuŋ kide me Mamre, ame en poto ame rik Iburaim owilo i baŋ jo Kitti. Oyiko Iburaim kuno karacel kede dako mere Cara, A doŋ Iburaim oto, Obaŋa te miyo wode Icaka winyo. Icaka te bedo i Beer-lakai-roi. Man en nyiŋ ikwae Icmael ame wot Iburaim, ame Agar nya jo Miciri, a rik obedo aŋeca a Cara, onywalli Iburaim: Nebayot, en obedo atin kao, jo olube te bedo Kedar, Adbeel, Miboam, Micima, Duma, Macca, Kadad, Tema, Jetur, Napic, kede Kedema. Man nyiŋ oloc apar wie aryo mea jo Icmael kun lubere atekeregi kede kabedogi. Mwaka Icmael me dittere ame ori kede i lobo rik oromo mia acel kede pyeradek wie abiro, en te to oko, te wot nywako kabedo i kwari mere. Lobo a jo Icmael rik ocakere i Kavila te tuno naka i Acuria ame tye tutuŋ waŋ apokki me Miciri. En rik obedo nyim omego mere luŋ. Man en ikwae Icaka wot Iburaim: Iburaim onywalo Icaka. Icaka te nyomo dako mere Lebeka kun onwoŋo mwaka me dittere tye pyeraŋwen; Lebeka rik obedo nyaka a Betuel, ame en dano me Aram, ame tye i lobo me Padan-aram, am in a Laban me Aram. Icaka rik te kwayo Obaŋa pi dako mere ame onwoŋo oraŋa: RWOT te winyo kwaccere, te miyo Lebeka yac. Itino te bedo twotwoma kengi kengi i yie, omio en te kobo ni, “Piŋo kara man tye atimere i koma?” En te wot penyo pire baŋ Rwot. Rwot te kobbe ni, “Rok aryo tye iyii, jo aryo-nono bino cako pokere oko iyii; acel bino bedo atek kato awottere oko; atin atidi bino loyo atin kao.” Ka kare me nywallere oromo, en onywalo rude. Atinnere ame ogeo donyo, onywalo ame kome rema, dok kome luŋ obedo yeyer bala boŋo yer; omio ocako nyiŋe ni Ecau. Icennere ominnere dok te donyo kun omako opuny tyen Ecau, omio ote cako nyiŋe ni Yakobo. Kare ame onywalo itinonono onwoŋo mwaka kaka me dittere doŋ oromo pyerabicel nono. I kare ame awobe-nono odoŋo, Ecau obedo twon okennoro atek i dwar i tim; Yakobo obedo amwol kun bedo mot i kema. Icaka rik maro Ecau pi camo riŋo ame en odwaro, ento Lebeka rik maro Yakobo. I kare ame Yakobo rik onwoŋo tye atedo ŋor, Ecau odwogo i tim ame kec oneko atek meciel. Ecau te kwayo Yakobo ni, “Mia ba dekki arema wokkono acam, kec aneka meicel!” Koppono omio olwoŋo Ecau ni Edom. Ento Yakobo te kobbe ni, “Koŋ ige catta ditti me kao.” Ecau te gamo ni, “Nen an aceggi to oko, dit me bedo kao kara konnyere ŋo?” Yakobo ogamo ni, “Koŋ ige kwoŋ baŋa.” Ecau daŋ te kwoŋ baŋe, te cato dittere me kao oko baŋ Yakobo. Yakobo te miye kwoŋ kede dek ŋor; en ocamo te mato pii i wie, te ya malo wot gire oko. Mannono en kite ame Ecau ocao kede dittere me bedo atin kao. Kare ame kec doŋ opoto i lobo, kec ame pat i maca a rik pot i kare Iburaim, Icaka owoto i Gerar baŋ Abimereki, rwot a jo Piriciti. Rwot te nen baŋe kun kobbe ni, “Kur iwot i Miciri, ento myero ibed i lobo ame an abino titti. Koŋ ibed i lobo-ni tutuno, an abino bedo kedi, dok daŋ abino miyi winyo, pien lobo man luŋ abino miyo baŋ i kede baŋ ikwai. Abino cobo kwoŋ ame rik akwoŋo baŋ pappi Iburaim. Abino miyo ikwai nya bedo apol bala acer apipim ame tye i polo, abino miyo ikwai lobo man luŋ; dok rok luŋ me wi lobo bino nwoŋo winyogi i komgi; pien Iburaim yam owinyo doga te cobo jami luŋ ame aciko me wora kun mako icwilla kede cikka.” Icaka te bedo i Gera. Ka jo kuno openye kop i kom dako mere, en ogamo ni, “En aminna.” En onwoŋo olworo kobo ni, “Dakona,” pien onwoŋo tamo ni, “Me wegi lobo-ni kur neka pi Lebeka,” pien en rik dako amwonya meicel. Kare ame en doŋ ori kuno kare alalac, Abimereki rwot a jo Piriciti oroo waŋe i dirica, te neno Icaka kun tye atuko kede dako mere Lebeka. Abimereki te lwoŋo Icaka kobbe ni, “Nen, man dakoni, piŋo yin rik ikobo ni en aminni?” Icaka te dokke iye ni, “Pien onwoŋo atamo ni, ‘Me kur neka oko pire’.” Abimereki ogamo ni, “Kara itimowa aman piŋo ba? Nen kono rik dano moro obuto i dakoni, kono ikelo bal i komwa nono.” Abimereki te kwenyoro jo mere luŋ, kun kobo ni, “Ŋat ame bino gudo dano-ni onyo dako mere obino neko aneka.” Icaka rik te coyo koti i poto i lobo-nono, te cek atek meicel i mwakanono, nyige acel acel oya iye nyige ocele mia acel. Rwot omie winyo, Icaka te doko twon alonyo moro a mom kobere, jami mere te bedo nya, medde kare ducu, omio en te doko twon alonyo moro a mom kobere. Lim akwo rik te bedo abup meicel i ciŋe, en atino kede adoŋo mege, kun jo me ode daŋ welgi bup atek. Man omio nyeko omako jo me Piriciti i kome. I kare-ni onwoŋo doŋ jo Piriciti oculo waŋ akoŋ luŋ ame rik pappere Iburaim okunyo i kare mere, gin otoro oko i lobo, Abimereki te kobbi Icaka ni, “Ya oko i baŋwa iwoti, pien yin doŋ idoko atek meicel iloowa oko.” Icaka te ya oko, te wot guro kema mere i luŋ me Gerar, te bedo kuno. Icaka doŋ te cako wado waŋ pii akoŋ ame rik okunyo i kare a pappere Iburaim; ame onwoŋo rik jo Piriciti obin otoro oko i kare ame Iburaim oto. En dok te lwoŋo akoŋŋogo i nyiŋ a rik pappere ocakkigi. Ento i kare ame omiro Icaka tye akunyo akoŋ i luŋ me Gerar, gin onwoŋo akoŋŋoro ame pii mere mol kun mit atek. Okwat a jo me Gerar te ero da iye kede okwat Icaka, kun gin kobo ni, “Pi i-ni gire megwa.” Daa-nono te miyo Icaka cako nyiŋ pii-nono Ecek, pien obedo da kede iye. Gin dok te kunyo akoŋ ocele, mannono daŋ dok ote ero da iye; omio Icaka dok te cako mannono ni Citna. Icaka doŋ te weko macinaca oko, te dok kunyo en ocele. Mannono da moro mom doŋ te bedo tye iye; omio en te cako nyiŋ mannono ni Rekobot, kun kobo ni, “Pien tin doŋ Rwot oyabbiwa kabedo alac, wan doŋ obino nya i lobo-ni.” Icaka te ya oko i Gerar, te dak i Beer-ceba. Rwot dok te medo nen baŋe i dyeworrono kun kobbe ni, “An Obaŋa a pappi Iburaim; kur ilwor, pien an atye kedi, an abino miyi winyo, ikwai bino nya apol meicel pi amirona Iburaim.” En te cano keno me miyo lam baŋ Rwot kuno, te lwoŋo iye nyiŋ Rwot. En oguro kema mere kuno, omiro mere dok te kunyo akoŋ kuno. Abimereki rik te wot baŋ Icaka kun oya i Gerar, owoto karacel kede Akugat ami-tam, kede Pikol ame obedo adwoŋ me mony. Icaka te kobbigi ni, “Ibino wunu baŋa kara pi kop aŋo ba, aco kun idaga wunu, dok daŋ iryema wunu oko i lobowu?” Gin te gamo ni, “Wan otyeko niaŋ atira ni Obaŋa tye kedi, en omio wan obino ni myero kwoŋ bed tye i akina yin kede wan me oket cikere kedi, me kur ibin itimwa rac, kite acalo wan daŋ rik giwa mom ogudo komi, mom daŋ otimo ginnoro arac i komi, ento otimo gin abeco keken, dok daŋ oryemi iya i akinawa kede kuc. Aman doŋ Rwot omii winyo.” Icaka te teddigi arama, gin ote cam dok daŋ ote mate. Gin te ya idiko con, ote kwoŋo kwoŋ i akinagi. Icaka te lwokogi me dok turgi, gin te pokere i kuc. I nino-nono i kome, omiro Icaka obino baŋ te titte pi pii ocele ame gin okunyo, kun okobbe ni, “Wan otyeko nwoŋo pii.” Icaka te cako nyiŋ pii nono ni Ciba, mannono en omio olwoŋo nyiŋ boma-nono ni Beer-ceba atot onyoni. Kare ame mwaka Ecau me dittere doŋ oromo pyeraŋwen, en onyomo Judit nyaka a Beeri, ame en dano me Kitti, kede Bacemat nyaka a Elon, ame daŋ dano me Kitti. Gin te miyo Icaka kede Lebeka waŋcuny meicel. Kare ame Icaka doŋ oti, waŋe doŋ ocoro oko, ame mom doŋ neno piny, olwoŋo atinnere me kao Ecau te kobbe ni, “Atinna.” Ecau te gamo ni, “An ene.” Okobbe ni, “Nen ba, an doŋ ati oko, mom aŋeo nino ame ato iye. Kwany jami me dwarri kede cao atero kede akud ateroni, wot i tim, me iwot idwarra lee, ibin icella riŋo akur kite ame amito kede, ikella acam, me alammi winyo a mom ru ato.” Kare ame Icaka onwoŋo tye akop i wode Ecau, Lebeka onwoŋo tye awinyo. Kare ame Ecau doŋ owoto oko i dwaro lee me kelli pappere, Lebeka te kobbi wode Yakobo ni, “An aya winyo pappi kun akobbi wode Ecau ni, ‘Wot ikella riŋo, me ibin icella akur, ikella acami me alammi winyo i nyim Rwot ame mom ru ato.’ Pi mannono atinna, tim ber iwiny koppa, iti gin aciki iye amanni. Wot ikella akale dyegi aryo amwonya i akina dyegi kuca, me ateddi pappi akur, a yomoro cunye, me yin ibin iterri pappi cam, me lammi winyo ame en mom ru oto.” Ento Yakobo ogamo dog tottere Lebeka kun kobbe ni, “Nen ba, ominna Ecau kome obedo yeyer, aco an mega mom obedo yeyer. Kare ocele pappa twero boboŋo koma, man bino miyo nen calo an awoto nyware anywara, bino miyo en cena acena, mom te lamma winyo.” Tottere te gamo doge kun kobbe ni, “Cen ame obino ceni kede myero bed i wia, atinna; yin ti gin ame akobbi. Tim ber iwot ikellagi.” En owoto okelo akale dyegi aryo baŋ tottere, tottere te celo riŋo akur kite ame pappere maro ikome. Lebeka te kwanyo boŋo aber meicel, boŋo a wode Ecau me kao, ame rik onwoŋo tye i ot baŋ tottere, te miyo Yakobo wode atidi ruko. Eka te tweyo lao dyegi aryo-nu luŋ i bad Yakobo, kede i ŋute kan ame yer onwoŋo mom iye; te doŋ tiŋo riŋo ame en ocelo akur, kede kwon ame omyeno, te miyo wode Yakobo. Yakobo te wot kede i nyim pappere, te kobbe ni, “Apap”; en te ye ni, “An ene; yin iŋa, atinna?” Yakobo te gamo dog pappere ni, “An Ecau atin kaoni. Atyeko doŋ tiyo gin ame woki ititta ca, cukere doŋ iya malo me icam riŋo ame adwaro akelli, me ilamma winy.” Ento Icaka te kobbi wode ni, “Atinna, inwoŋo riŋo oyotoyot aman-ni i yore aŋo ba?” Yakobo te gamo ni, “Rwot Obaŋani omio yora obedo aber.” Icaka dok te kobbi Yakobo ni, “Koŋ inoka aceggi kan, me aboŋ komi atinna, aniaŋ ka yin atinna Ecau ennono ateni onyo mom.” Yakobo te noko pappere ceggi, pappere oboŋo kome te kobo ni, “Dwoni cal i mea Yakobo, ento badi mea Ecau.” Mannono omio naka en gire mom oŋee, pien bade onwoŋo yeyer bala bad ominnere Ecau. Omio en te lamme gire winyo oko. Openye ni, “Yin i woda Ecau ateni?” Yakobo ogamo ni, “An ennono ta,” Pappere doŋ te kobo ni, “Aco doŋ kel riŋo-nono baŋa kan woda me acam ate lammi winyo.” En te keto cam i nyime. Kare ame en doŋ otyeko camo, te kelle daŋ koŋo olok, te mato, Pappere Icaka doŋ te kobo ni, “Nyiggo baŋa kan, me inot lema, atinna.” En te nyiko a ceggi baŋe, te noto leme; Icaka te ŋweyo ŋwec ruk a Yakobo, te lamme winyo kun kobo ni, “Nen, ŋwec kom woda kur, calo ŋwec poto ame Rwot omio winyo! Obaŋa myero mii toyo ame luk kun ya i polo, kede lobo ame ceko cam abup; mi kaili kede olokki cek abup, Lwak jo apipim myero bed omironi rok apol daŋ ryebere piny i nyimi. Yin en ibed rwot ame loo omegoni luŋ. Itino a totti luŋ daŋ myero ryebere i nyimi. Cen myero bed i wi jo luŋ ame ceni, jo luŋ a lammi winyo, winyo myero bed i komgi.” A doŋ Icaka otyeko lammi Yakobo winyo, kun en pwod ojer anok anoka iya i baŋ pappere, ominnere Ecau daŋ te dwogo oko i ka dwarrere. En te celo riŋo akur, te tero baŋ pappere. En te kobbi pappere ni, “Apap, cukere me iya malo icam riŋo ame atinni okelo, me ilamma winyo.” Pappere Icaka te penyo ni, “Yin iŋa-nono dok i?” En te gamo ni, “An Ecau wodi me kao ennono.” Kom Icaka te cako myel oko atek ateka kun kobo ni, “Ŋa a woki koŋ odwaro lee, te kela nie? Ame mom ru ŋin idwogo an acamo cammere, ate daŋ lamme-gu winyo oko. Amie doŋ gum luŋ oko.” Ecau tekki winyo kop a pappere, omwoco koko malo amala kun kabo ni, “Apap, lamma an daŋ winyo ba!” Ento pappere okobbe ni, “Ominni Yakobo obino kan obwola, en gire doŋ otero gum a kono amii oko.” Ecau te kobo ni, “Ocako ni Yakobo kakare, pien en doŋ aman omao gumma odoko iryo twal. Yam koŋ ogeo i me bedo atin kao, tin dok omedo tero gumma oko. Apap doŋ mom ikanna moro aduno?” Icaka ogamo kop a wode Ecau ni, “Nen ba atinna, an doŋ atyeko kete oko me bedo rwotti, omego mere luŋ daŋ atyeko miyogi oko me bedo omiro mere, kal kede koŋo luŋ amio oko me pite. Kara gin aŋo a myero dok amii?” Ecau dok te kobbi pappere ni, “Apap wee, doŋ winyo moro acel keken daŋ mom odoŋŋa? Lamma an daŋ winyo, apap!” Ecau te mwoco koko oko. Pappere Icaka te doŋ kobbe, ni “Nen ba, paconi bino bedo abor i lobo a ceko cam, dok daŋ abedo abor i toyo ame luk ya i polo, Ibino kwo i pala romoni, ibino bedo i te loc ominni. Ento ka ce ibino jem i kome i kare moro, ibino turo loccere oko i ŋuti.” Ecau te cako dago ominnere Yakobo oko pi winyo ame pappere olammi ominere. Omio en te kobo i cunye ni, “Kare me to a pappa doŋ ceggi, kare-nono en ame abino neko iye ominna Yakobo daŋ oko.” Ento rik ote titti Lebeka oko, kop ame wode me kao Ecau okobo; omio en te cwayo dano wot lwoŋo Yakobo wode atidi, te kobbe ni, “Nen ba, ominni Ecau oyikere me neki oko. Pi mannono, yin myero iti gin akobbi; yin myero ilwi, iriŋ oko i Karan, baŋ ominna Laban. Koŋ iwot ibed baŋe kuno naka waŋ ame akemo ominni okwe, Ka akemo mere doŋ okwe, ame wie doŋ owil oko i gin ame yin itimo i kome, an abino cwayo dano omi i kuno. Mom ber wun aryo luŋ irwenyo wunu i waŋa ni no acel.” Lebeka te kobbi Icaka ni, “An gira kite anyira a jo Kitti doŋ oola oko. Ka Yakobo daŋ dok bino nyomo nya jo Kitti, ame rom aroma i mon ocele me lobo man, kwona doŋ konnyere bino bedo mom.” Icaka te lwoŋo Yakobo lamme winyo, eka te doŋ cike ni, “Yin doŋ myero kur dok inyom nyannoro i akina anyira me Kanaan. Wot i Paddan-aram i ot a kwarowu Betuel, ame en papa a totti, iwot inyom nyako omin totti. Obaŋa Won Twer Ducu myero mii winyo, mi ikwai nya bed apipim, me idok lwak jo apol, dok mi yin kede ikwai ibed wunu bala Iburaim, me ilo lobo ame ibedo iye acalo welo-ni, lobo ame rik Obaŋa omio baŋ Iburaim.” Icaka te cwayo Yakobo wot oko i Paddan-aram baŋ Laban wot a Betuel me Aram, ame obedo omin a Lebeka tota a Yakobo kede Ecau. Ecau oneno ni Icaka doŋ otyeko lammi Yakobo winyo, dok daŋ ocwao oko i Paddan-aram, me wot nyomo nyako me kuno, dok daŋ olamme winyo ocike ni myero mom nyom nyako moro me Kanaan, dok Yakobo daŋ owinyo kop a pappere kede tottere, te wot oko i Paddan-aram. Ecau ka onenno ni kite anyira me Kanaan mom yomoro cuny pappere Icaka, en daŋ te wot baŋ Icmael, te wot nyom iye, medo i kom monne acon ca. Onyomo Makalat, nyaki Icmael wot Iburaim, amin a Nebayot. Yakobo oya i Beer-ceba te dok tutuŋ Karan. A doŋ piny oyuto, en otuno i kabedo moro te buto kuno dyeworrono. En okwanyo gweŋŋoro acel te keto me teno wie, te buta i kabedo-nono. Lek te bino i wie ame omie oneno acoge ame ocuŋ piny kun wie ogudo polo. Omalaika Obaŋa onwoŋo tye a lolle iye kun oyito malo, odwogo piny. En te neno Rwot kun tye ocuŋ tuŋ wie kun kobo ni, “An a Rwot Obaŋa a kwarowu Iburaim, kede Obaŋa Icaka; abino miyi loba ame ibuto iye-ni, abino miyo baŋi kede baŋ ikwai. Ikwai bino bedo apol bala apua me lobo, dok daŋ ibino nya imedde wunu tuŋ to kede tuŋ kide, tuŋ anyarodi kede tuŋ anyarolum. Dok rok luŋ me wi lobo bino nwoŋo winyo i komi kede i kom ikwai. Nen ba, an atye kedi, abino gwoki i kabedo luŋ ame yin ibino wot iye, dok abino dwoggo yin cen naka i lobo man. Mom abino boli kadi acelloro tuno wan ame acobo gin ame akobbi luŋ.” A doŋ Yakobo oco i waŋ nino, okobo ni, “Ateni, Rwot kara tye i kabedo man, an onwoŋo mom aŋeo.” Lworo te make atek kun en kobo ni, “Kabedo man kara iyiliyili kit man! Man gire ot Obaŋa ikome, man doggola me polo.” Yakobo oya odiko con, te tiŋo gweŋ ame eteno i wie, te cibo cuŋ atira, eka te onyo moo i wi gweŋŋono. En te cako nyiŋ kabedo-nono ni Betel, ento nyiŋ kabedo-nono yam koŋ obedo Luj. Yakobo te kwoŋ ni, “Ka ce Obaŋa bino bedo keda, kun gwoka i wotta-ni, dok bino miya cam me acama, kede boŋo me aruka, dok bino miya adwogo i ot a pappa i kuc, Rwot doŋ bino bedo Obaŋana. Gweŋ ame acibo ocuŋ atira kan-ni, bino doko ot Obaŋa, dok daŋ abino dwoko baŋi acel me apar me jami luŋ ame ibino miya.” Yakobo dok te medde i wottere naka i lobo a jo ame tye tuŋ kide. Kare ame en obedo neneno piny, oneno akoŋŋoro i dye bar, rommi onwoŋo tye obuto piny kuno i dul adek apapat i ŋet akoŋŋono, pien rommi rik mato pii kannono. Dog akoŋŋono rik onwoŋo ocego i twon gweŋŋoro. Kare i kare ka rommi doŋ ocokere kuno, okwat cokere te loro gweŋ oko i dog akoŋ, eka daŋ dok ote dwoko kakare ka rommi doŋ otyeko mato pii. Yakobo te kobbi jo a rik tye kuno ni, “Omegona, kara iya wunu i kwene?” Gin te gamo ni, “Wan oya i Karan.” Yakobo te penyogi ni, “Iŋeo wunu Laban wot a Nakor?” Gin te gamo ni, “Wan oŋee.” En dok te penyogi ni, “En tye aber?” Gin te gamo ni, “En gire tye aber. Neno nyare Lakeri ca bino i rommi ca!” En te kobo ni, “Kara ceŋ pwod tye do, caa mom ru oromo me coko lim akwo karacel. Mi wunu rommi mat pii me iwot ikwagi wunu doki.” Cite gin te dokke iye ni, “Pe otwero miyogi ituno ka lim akwo ocokere karacel, gweŋ daŋ doŋ ocoro oko teŋe i dog akoŋ, en amio ote miyogi mato pii.” A kun Yakobo pwod tye akop kedgi, Lakeri te pello kun okelo rommi a pappere, pien onwoŋo rik en a kwaogi. Yakobo ka oneno Lakeri nya nero mere Laban kede rommi a nero mere Laban, en owoto, te coro gweŋ oko i dog akoŋ, te miyo rommi pii mato. Yakobo te noto lem Lakeri kun cunye yom atek. Yakobo te titti Lakeri ni en obedo omaro mere ikome, tottere Lebeka. Lakeri te riŋo paco wot kobbi pappere. Kare ame Laban owinyo pi atin aminnere, oriŋo te wot jole, okwako kore kun noto leme, eka te tere i ode. Yakobo te titti Laban kop luŋ ame otimere. Laban te kobbe ni, “Yin kom cogona kede riŋo koma!” En te bedo baŋe dwe acel. Laban te kobbi Yakobo ni, “Kadi yin ibedo okeona, myero iti baŋa aboŋo culloro? Yin myero ikobba gin ame imito ni kono amii pi ticci.” Laban onwoŋo tye anyira mere aryo, nyare adittere nyiŋe onwoŋo Lea, eka en atidi mere te bedo Lakeri. Lea rik nyako a waŋe obedo dimidimi, ento Lakeri onwoŋo mwonya atek meicel, ame ber me anena. Yakobo onwoŋo maro Lakeri, en omio en te kobbi Laban ni, “Abino tic mwaka abiro pi Lakeri nyari atidi.” Laban te gamo ni, “Bedo ber ka amie baŋi kato ame amie baŋ ŋattoro ocele; yin bed baŋa.” Yakobo te tic mwakki abiro pi Lakeri, ento mwakki-nono luŋ obedo kom aduno aduna i baŋ Yakobo pien en rik onwoŋo maro Lakeri atek. Yakobo te doŋ kobbi Laban ni, “Mia ba doŋ dakona me abed kede, pien kare a rik omoko doŋ otum oko,” Laban te tedo arama, te lwoŋo iye jo luŋ a rik tye i kabedo-nono. Otyeno en te kelo nyare Lea baŋ Yakobo, Yakobo te cako buta kede acalo cege. Laban te daŋ miyo aŋeca mere Jilpa baŋ nyare Lea, me kony Lea. Cite odiko ka piny oru, Yakobo onwoŋo ni dok elunyo nyomere i Lea. Omio en te penyo Laban ni, “Kara omio dok itima aman kono? An rik mom onwoŋo abedo tic gira pi Lakeri? Ibwola kara piŋo, nera?” Laban ogamo ni, “Turwa kan mom otimo amannono. Mom ogeo miyo nyako atidi nyomere kun en adwoŋ adoŋ i ot. Yin koŋ ityek cabit me nyomerewu-ni oko, ate dok bino miyo Lakeri daŋ baŋi pi tic ame ibino tiyo pi mwakki abiro ocele.” Yakobo daŋ te ye tyeko cabit acel me nyomeregi, eka Laban te miye dok nyomo Lakeri. Te miyo aŋeca mere Bila baŋ Lakeri, me kony Lakeri. Yakobo te cako buta daŋ i Lakeri acalo cege kun maro Lakeri kato Lea. En dok te medde tic pi mwakki abiro ocele. Ka Rwot oneno ni Lea mom omaro, oyabo ot nyodo mere kun Lakeri pwod oraŋa. Lea oyac eka te nywalo atin awobi, te cako nyiŋe Reuben, kun kobo ni, “Pien Rwot oneno canna, man doŋ bino miyo cwara mara.” En dok te yac, te nywalo atin awobi, te cako nyiŋe Cimeon, kun kobo ni, “Pien Rwot owinyo ni an odaga, omio en dok omedo miya atin-ni.” Dok te medo yac, te nywalo atin awobi, te kobo ni, “Aa, man doŋ bino miyo cwara dwogo i koma, pien doŋ anywale awobe odoko adek twal.” Omio en te cako nyiŋ atinnono ni Levi, Dok te medo yac te nywalo atin awobi, te kobo ni, “Man doŋ abino pako Rwot.” Omio en te cako nyiŋ atinnono ni Juda. I ŋe man, en koŋ dok te cuŋ oko. Ka Lakeri oneno ni mom enywalo atinnoro baŋ Yakobo, nyeko ocako make i kom aminnere. En te kobbi Yakobo ni, “Mia an daŋ itino, ce ka mom itwero miya itino, an adeye gira oko.” Yakobo yie te waŋ oko i kome, te kobo ni, “An adoko Obaŋa bo? Obaŋa gire en ame ogeŋi nywal.” Lakeri te kobo ni “Kara po aŋecana Bila eneo, yin doŋ donnye me en nywal atinnoro i coŋa, me atot ya an daŋ anwoŋ itino pire.” En te miyo aŋeca mere Bila baŋ Yakobo, te gamo acalo cege. Bila oyac, te nywalli Yakobo atin awobi. Lakeri te kobo ni, “Obaŋa doŋ otyeko ŋolo kop aber baŋa, owinyo daŋ kwacca, omia atin awobi.” En te cako nyiŋe ni Dan. Bila, aŋeca a Lakeri dok te yac, te nywalli Yakobo atin awobi. Lakeri te kobo ni, “Aromo atek meicel wan aminna, ento doŋ aloc.” Omio en te cako nyiŋ atinnono ni Naputali. Ka Lea doŋ oneno ni etyeko cuŋ doŋ oko, kun mom dok enywalo atinnoro, en daŋ omio aŋeca mere Jilpa baŋ Yakobo wek bed cege. Aŋeca a Lea daŋ te nywalli Yakobo atin awobi. Lea te kobo ni, “An yora i gum ba.” Omio en te cako nyiŋ atinnono ni Gad. Jilpa aŋeca a Lea dok te nywalli Yakobo atin awobi me aryo. Lea te kobo ni, “An winyona tye, pien mon bino lwoŋa ni, A kome iwinyo!” Omio en te cako nyiŋ atinnono ni Acer. I kare me kayo ŋano, Reuben owoto i poto te nwoŋo iye yat nyodo te kwanyo kelo baŋ tottere Lea. Lakeri te kobbi Lea ni, “Ama nyeka, duta ba yat nyodo a wodi aduno.” Ento Lea te dokke ni, “Cwara ame imao-nono mom doŋ rommi? Imito dok tero daŋ yat nyodo a woda?” Lakeri ogamo ni, “Aco ka amanno ba, en tin doŋ bino buto baŋi dyewor me imia yat a wodi.” Otyeno ame Yakobo onwoŋo tye abino kun oya i poto, Lea owoto ojole i waŋa yo, te kobbe ni, “Myero tin yin doŋ idony i oda, pien atyeko wili oko i yat nyodo a woda.” Yakobo te buta baŋ Lea dyeworrono. Obaŋa owinyo kwac a Lea, omio oyac, te nywalli Yakobo atin awobi me abiccere. Lea te kobo ni, “Obaŋa doŋ oculo waŋ miyo aŋecana baŋ cwara oko.” Omio en te cako nyiŋ atinnono ni Icakar. Lea te dok yac, te nywalli Yakobo atin me abicellere. Lea te kobo ni, “Obaŋa doŋ omia mot aber i nyomere, aman doŋ cwara bino mara, pien doŋ onywalo otino abicel twal wan kede.” Omio en te cako nyiŋ atinnono ni Jabulon. Icennere dok te nywalo nyare, te cako nyiŋe ni Dina. Obaŋa te dok cako paro pi Lakeri, te winyo kwaccere, te yabo ot nyodo mere. Lakeri te yac, te nywalo atin awobi, te kobo ni, “Obaŋa doŋ otyeko kwanyo lewic i koma,” En te cako nyiŋ atinnono ni Yucepu, kun kobo ni, “Myero Obaŋa omedda dok atin awobi ocele.” A doŋ Lakeri onywalo Yucepu oko, Yakobo okobbi Laban ni, “Amito doŋ iweka adok i lobowa. Mia monna kede itinona ame an atio pirgi atia baŋi, me iweka doŋ awoti; pien yin iŋeo kit ame atio kede baŋi.” Laban te gamo ni, “Ka ce ber an ikobo, atyeko tyeto aniaŋ ateni ni Rwot omia winyo piri. Doŋ ba, yin myero ititta gin ame imito ami baŋi me ocarani, an abino miyi.” Yakobo odokke ni, “Yin ikomi iŋeo kite ame atio kede baŋi, kite ame agwoko kede limmi Limmi rik nok atek, koŋ inen kite ame doŋ omedde kede wok; Rwot obedo miyi winyo kannoro luŋ ame an alokere iye. Kara doŋ aman an abino nwoŋo lim pi jona awene?” Laban te penye ni, “Kara doŋ myero amii ŋo ba?” Yakobo te gamo ni, “Ginnoro ame yin ibino miya mom tye; ento ka ce iye, mia dok amedde kwayo limmi. Yeya tin abebea i dye limmi akwo luŋ, ayer rommi luŋ agiragira onyo en apecel, kede itino rommi acollege, karacel kede dyegi luŋ ame obedo agiragira onyo en apecel; magi-nono bino bedo me ocarana. Kittono, cil a cunya bino nen icen ka ce yin ibino ŋiyo ocarana. Dyelloro ame ibino nwoŋo tye baŋa ame mom agiragira onyo apecel kede romo moro a mom col, gin luŋ ibino tero ni akwalo akwala.” Laban te kobo ni, “Koŋ doŋ bed kit ame ikobo-nono.” I ninonono Laban te yero nyogi dyegi luŋ ame obedo agiragira onyo apecel, kede akale dyegi luŋ agiragira onyo apecel, dyegi luŋ ame tye kede tonnoro atar i komgi; kede itino rommi luŋ acol, te miyogi baŋ awobe mere, te daŋ poko akinagi oko i Yakobo kun borrere romo wot me nino adek twal. Yakobo doŋ te kwayo lim ame adoŋ baŋ Laban. Yakobo te jako jaŋ yago kede yao, kede ogali, te liliŋo kun dadano pokgi, weko kome kan atar doŋ olaŋara. En te pyelo jaŋ yen elilino-nono i nyim rommi kede dyegi i weer ame pii mol iye, ame lim akwo mato iye pii, pien nyogi kwaro en a monnege ka gin abino mato pii. Megi dyegi kede megi rommi ame okwaro i nyim jaŋ yen aliŋalina-nono, jo-nono nywalo itino agiragira onyo apecel kede aliŋaliŋa. Yakobo te poko itino rommi-ni pat. En te leleko megi dyegi kede megi rommi dwoko i mea Laban agiragira. Kare luŋ ka nyogi dyegi kede rommi atekkege kwaro megi dyegi kede megi rommi, Yakobo wie mom wil iketo jaŋ yennere ame aliŋaliŋa ca, i pii ame amol i nyimgi, me gin yac i akina jaŋ yennerenono. Ento en mom keto jaŋ yennerenono i nyim en agorogoro mege; mannono te miyo en agorogoro mege bedo mea Laban, cite en a komgi yot te bedo mea Yakobo. Mannono te miyo Yakobo doko twon alonyo moro a mom kobere, kun odurre i lim akwo, aŋeca, opii, inaga kede kane. Yakobo te bedo winyo awobe a Laban kun kobo ni, “Yakobo doŋ omao lim a papa wa luŋ, aman en doŋ odoko twon alonyo moro a mom kobere kede lim a papawa.” Yakobo te neno Laban mom dok nene i waŋ aber bala a yam con, Rwot te kobbi Yakobo ni, “Dok doŋ i lobo a kwariwu, baŋ jowu, an abino bedo kedi.” Yakobo te lwoŋo Lakeri kede Lea i bar kan a limmere tye iye. Te kobbigi ni, “An doŋ aneno ni papawu mom dok nena i waŋ aber bala a yam con, cite Obaŋa a papawa obedo gwoka gira. Wun daŋ iŋeo wunu kite ame abedo tic kede baŋ papawu kede tek koma luŋ, ento kadi amannono, en obedo bwola abwola kun loloko ocara me ticca tyen apar twal, cite Obaŋa mom oye en timo ginnoro arac i koma. Ka ce en okobo ni, ‘Lim akwo luŋ aliŋaliŋa bino bedo megi’, gin luŋ onywalo aliŋaliŋa. Ka en dok oloko doge ni, ‘Rommi kede dyegi luŋ ame obino nywalo agiragira en ame bino bedo me ocarani’, gin luŋ dok onywalo en agiragira keken. I yore-nono Obaŋa okwanyo lim i ciŋ papawu oko te miyo baŋa. I kare ame rik nyogi tye akwaro megi dyegi kede megi rommi, atiŋo waŋa malo i waŋ lek ate neno nyogi ame atepo obedo agiragira, kede aliŋaliŋa kede apecel. Amalaika Obaŋa te lwoŋa i waŋ lek ni, ‘Yakobo’, an ate gamo ni, ‘An ene.’ Eka te kobba ni, ‘Koŋ itir; waŋi inen nyogi ame atepo, gin luŋ obedo aliŋaliŋa, onyo apecel onyo agiragira, pien doŋ atyeko neno ginnoro ducu ame Laban tye ka timo i komi. An Obaŋa me Betel kan ame rik ionyo iye moo i wi kidi ca, eka ite daŋ kwoŋ baŋa. Amito iru ya oko i lobo-ni idok i lobo ame rik onywali iye’.” Lakeri kede Lea te gamo ni, “Tye dok dul limmoro i ot a papawa? Mom doŋ en nenowa acalo rok ocele? En doŋ otyeko catowa oko, dok daŋ tye acamo lim ame imie pirwa oko. Lim luŋ ame Obaŋa doŋ okwanyo oko baŋ papa wa doŋ megwa kede me itinowa. Doŋ pi mannono ba, gin ame Obaŋa okobo, en a myero doŋ itim.” Yakobo te ya keto awobe mere kede monnere i wi inaga, en te kolo limmere luŋ, kede jami mere ducu ame enwoŋo i Padan-aram, te cako wottere me dok baŋ pappere Icaka i lobo Kanaan. Kare ame Laban owoto mworo yer rommi mere, Lakeri okwalo jogi a pappere ducu i ot. Yakobo obwolo Laban kun mom otitte pi wottere. Mannono omio en olwi oko i jami mere luŋ, te wot ŋolo kulo Efurate, kun dok tutuŋ kidi me Gilead. A doŋ nino okato adek twal, ote titti Laban ni, “Yakobo olwi owoto gire oko.” Laban te mukere i wati mere luŋ, oryemo yorgi niŋa abiro, eka ote nwoŋe i kidi me Gilead. Cite dyewor Obaŋa te bino baŋ Laban, dano me Aram, i wan lek, te kobbe ni, “Gwokere kur iwot ikob ginnoro baŋ Yakobo.” Laban rik te mako Yakobo iyo. En onwoŋo Yakobo doŋ oguro kema mere i akina kiddi, cite Laban kede wati mere te guro megi i wi kidi me Gilead. Laban te penyo Yakobo ni, “Kara piŋo itima kit man ba? Ibwola kit-ti, ite tiŋo anyirana kede jamina lwi kedgi bala imaogi i mony? Ŋo kara okeli lwi i muŋ kun mom ititta? Aco kono onwoŋo rik atwero ciki i yomcuny kun owero wer ajaa kede naŋa opuk. Ŋo kara omoni miya ciko anyirana kun anoto lemgi kede me itinogi? Itimo tim me miŋo meicel. Onwoŋo atwero timi lit, cite Obaŋa a pappi okobo keda tin iwor ni, ‘Gwokere kur iwot ikob kopporo baŋ Yakobo.’ Nen ba, kadi bed yin iya oko me wot pi paro dok i ot a pappi, piŋo kara dok ikwalo cal jogina?” Yakobo ogamo dog Laban ni, “An onwoŋo abedo kede lworo, pien rik an atamo ni yin ibino mayo anyirani oko i baŋa. Doŋ ba, ŋat ame ibino nwoŋo cal jogini i akina jami mere, mom bino bedo kwo. Yin nyut giri moro ame tye baŋa i nyim jowa kan, me ikwany giri.” Yakobo onwoŋo mom ŋeo ni Lakeri okwalo cal jogi. Laban te donyo i kema a Yakobo, kede mea Lea kede mea mon aŋeca aryo luŋ, cite mom naka onwoŋo cal jogi mere. En te ya i kema a Lea te donyo i mea Lakeri. I kare-nono onwoŋo Lakeri orwako cal jogi i te lao ame obedo kede i wi inaga ame onwoŋo obedo kede piny. Laban te ŋiŋio jami luŋ a tye i kema ento naka mom onwoŋogi iye. Lakeri te kobbi pappere ni, “Adwoŋŋa, kur cunyi waŋ ba i koma, pien mom atwero ya malo i nyimi kun atwo twowa me mom.” Laban naka mom te nwoŋo cal jogi mere kadi bed oyenyo atek. Yakobo te ŋo oko, te da i Laban kun penye ni, “Kara doŋ ane gin ame abalo? Abalo ŋo, en ame omio yin iryemo yora atek ateka-ni? Yin doŋ iyenyo jamina luŋ, ka ce tye giri moro ame inwoŋo, kel iket i nyim joni kede jona, me gin ŋol kop i akina wan aryoni. An atyeko baŋi mwakki pyeraryo, ento min romo onyo min dyelloro mom gire yie oony, mom daŋ amwodo nyok romoni moro kadi acel. Limmi luŋ ame lee tim omwodo mom adwoggo baŋi, an en ame alunyo culo waŋe. Mom tye moro ame orwenyo dyeceŋ onyo dyewor ame mom ipenya pire. Ceŋ rik ŋwaŋa dyeceŋ kede koyo daŋ ocira dyewor, nino daŋ obedo remma. Mwakki pyeraryo ame abedo kede i odi, atio baŋi mwakki apar wie aŋwen pi anyirani kede mwakki abicel pi lim, cite i mwakki-nono luŋ ibedo loloko ocarana oromo tyen apar twal. Kono mom Obaŋa a kwarona, Obaŋa Iburaim, kede Obaŋa ame pappa Icaka lworo obedo keda, kono tin icwaa awoto turwa i ciŋa nono. Obaŋa oneno peko ame abeo iye kede tic ame atio gira i ciŋa, omio tin iwor en ojuki.” Laban te gamo dog Yakobo ni, “Anyira mega, itinogi mega, lim luŋ mega, kede jami luŋ ame ineno-ni gin luŋ mega. Kara ŋo ame myero tin atim pi anyirana kede itinona? Biye, me oket cikere moro i akinawa me bedo caden i akina wan kedi.” Yakobo te tiŋo kidi cibo cun atira. Yakobo te kobbi jo mere ni, “Cok wunu gweŋe.” Gin te depo gweŋe coko karacel, eka gin te cem i ŋet gweŋe ocoko karacellono. Laban te cako nyiŋ kabedonono ni Jegar-cakaduta, ento Yakobo te cako mege ni, Gilead. Laban te kobo ni, “Gweŋe ame ocoko karacel-li obedo caden i akina wan kedi.” Mannono en omio ocako nyiŋ kabedo-nono ni Gilead. Kidi ame ocibo ocuŋ atira ocako nyiŋe ni Mijipa, pien okobo ni, “Rwot myero gwok kinwa, ka doŋ opokere oko. Ka ce ibino wuno anyirana onyo ibino nyomo dok mon ocele dodo i komgi, kadi bed amanni ame cadennoro a dano mom i akinawa kan, ento Obaŋa bino bedo caden i akinawa.” Laban dok te kobbi Yakobo ni, “Nen gweŋ ame ocoko karacel-li kede man ocuŋ atira-ni ame otyeko keto i akina wan kedi. Gweŋ ocoko-ni, kede kidi ocuŋ atira-ni, gin caden. An mom dok abino kato gweŋ ame ocokoni kede kidi ocuŋ atira-ni me bino baŋi, yin daŋ mom ibino kato gweŋ ame ocokere-ni me bino baŋa, me bino timo ginnoro arac. Obaŋa Iburaim kede Obaŋa a Nakor kede Obaŋa a pappi obed aŋolkop i akinawa.” Yakobo te kwoŋ i nyiŋ Gat a rik pappere Icaka olworo. Yakobo te ŋolo lee me yalo Obaŋa i wi kidi, te lwoŋo jo mere luŋ bino camo kede. Kare ame gin doŋ ocamo cem otum, gin te buta i kidi kuno dyeworrono. A doŋ piny oru, Laban oya te noto lem ikwae kede me anyira mere, te lammigi winyo; te doŋ pokere kedgi dok paco tuŋe. Yakobo omedde i wottere, omalaika a Rwot te rwatte kede. Ka Yakobo onenogi, okobo ni, “Man mony a Rwot.” Omio en te cako nyiŋ kabedo-nono ni Makanaim. Yakobo te cwayo kwena i nyim baŋ ominnere Ecau, i lobo me Ceir, ame obedo lobo a jo Edom. Opwonyo okwena me kobbi Ecau ni, “Amironi Yakobo obedo bedo baŋ Laban kare luŋ naka tuno i kare-ni. Aman atye i twoni, kana ecipan, kede lim akwo apipim, opii kede aŋeca daŋ ecipan; acwao kwena baŋi yin adwoŋŋa, me aton ya berra nen i nyimi.” Okwena ame ocwao ka odwogo baŋ Yakobo, gin okobbe ni, “Wan otuno naka baŋ ominni Ecau, en tye abino i yo i jo mia aŋwen me bino joli.” Lworo te mako Yakobo atek, koyo daŋ te onyere oko i kome. En te poko jo mere oko i dul aryo, anaka limmere luŋ, dyegi kede rommi, kede dok kede inaga, pien en onwoŋo otamo i cunye ni, “Ka ce Ecau bino lweny i dul acel, te rweyo oko luŋ, dul acel” odoŋŋere bino bwot. Yakobo te kwayo Obaŋa ni, “Ama Rwot Obaŋa a kwarona Iburaim, Obaŋa a pappa Icaka, yin giri ame ikobba ni, ‘Doŋ idok paco turwu baŋ atekerewu, an abino bedo kedi aber.’ An gira mom a myero kadi acelloro i mar meri kede kica meri luŋ a mom lokere ame inyuto baŋ amironi; pien rik abin aŋolo kulo Jordan kun atye kom ka abiro keken i ciŋa, ento aman doŋ apokere dul aryo twal. Akwai me lara i ciŋ ominna, lara i ciŋ Ecau; pien alwore, onyo ca en obino me nekowa oko luŋ, mon karacel kede itinogi. Aco yin rik ikobo ni, ‘Abino bedo kedi aber, abino miyo ikwai bedo acal i kwoyo me dog nam, ame mom romo akwana pi pollere’.” Yakobo te buto kannono i ninonono, te kwanyo dul limmogo cwayo i nyim baŋ ominnere Ecau me mot. Ocwao megi dyegi mia aryo kede nyogi dyegi pyeraryo, megi rommi mia aryo kede nyogi rommi pyeraryo, megi inaga ame onyeto cakgi pyeradek kede itinogi, megi dok pyeraŋwen kede twoni apar, megi kana pyeraryo kede twoni mere apar. Oketo magi luŋ i ciŋ omiro mere, kun dul acel acel bedo papat. Okobbi omiro mere ni, “Wun wot wunu i nyima, myero iwek akinawu lagoro ya i kom dul acel acel.” Okobbi ŋat otelo yo ni, “Ka ominna Ecau orwatte kedi te penyi ni, ‘Yin kara i dano aŋa? Iwot kwene? Lim i nyimi-ni luŋ me aŋa?’ yin myero idokke ni, ‘Man lim amironi Yakobo, gin luŋ obedo mot ame en ocwao baŋ adwoŋŋa Ecau, en daŋ tye alubo yorwa.’ ” Dano me aryo kede me adek, kede jo luŋ ame akolo lim ocikogi luŋ i kop acellono, ni, “Wun daŋ ibino kobo wunu amannono ka ce irwatte wunu kede Ecau, kun imedo wunu daŋ ni, ‘Amironi Yakobo daŋ tye alubo yorwa.’ ” Pien en onwoŋo otamo ni, “Koŋ abino geyo kweyo cunye i mot ame acwao i nyima; wek icennere ka doŋ abino neno waŋe, atoŋ ya twero miye jola aber.” En te miyo mot geyo telo nyime, ento en ikome te buto kan ame oguro iye kema. En te ya oko i dyeworrono, kun woto kede monnere aryo kede aŋeca mege aryo, karacel kede itino mege apar wie acel. Gin te wot ŋolo kulo Jabok. En te tero jo mere ŋolo kulo, karacel, i jami mere luŋ a rik tye baŋe. Kare ame Yakobo odoŋ kene, lo moro te bino wutte kede naka kaibai. Kare ame lonnono oneno ni mom eromo loyo Yakobo, odoŋo awaŋmac a Yakobo, em Yakobo te wil oko oyotoyot, kun pwod tye awutte kede. En lonnono te kobo ni, “Weka doŋ awot ba, nen piny doŋ ceggi ru oko.” Cite Yakobo te gamo ni, “Mom aweki kadi acel tuno ka koŋ ilamma winyo.” Lonnono te gamo ni, “Nyiŋi ce ŋa?” En te gamo ni, “Yakobo.” Lonnono te kobbe ni, “Cakere tin nyiŋi mom doŋ obino lwoŋo ni Yakobo, ento Icrael, pien yin ibedo romo wun Obaŋa, kede dano daŋ naka iloo.” Yakobo te penye ni, “Aco koŋ doŋ itima ber itucca nyiŋi.” En te gamo ni, “Piŋo kara imito ŋeyo nyiŋa?” Lonnono doŋ te lamme winyo kuno. Yakobo te cako nyiŋ kabedo-nono ni Peniel, kun en kobo ni, “Pien atyeko neno Obaŋa waŋ i waŋ, ento pwod amedde bedo kwo.” Ceŋ odonnyo onwoŋo Yakobo pwod tye i Peniel, kun doŋ awot ame akomo akoma pi eme ame onwoŋo owil oko. Man omio atot onyoni jo Icrael mom camo riŋo amuru me awaŋmac, pien lonnaca onwoŋo odoŋo em Yakobo i ler me awaŋmac. Yakobo otiŋo waŋe malo te neno Ecau tye abino i jo mere mia aŋwen. En te cako popoko itino mere baŋ Lea kede Lakeri, kede baŋ aŋeca mere aryo. Aŋeca mere aryo kede itinogi, en te cwayogi i nyim, Lea kede itino mere te lubogi, eka Lakeri kede wode Yucepu te doŋ coko tere, En ikome te ru yutte wot i nyim, i kare ame en doŋ ceggi ominnere, oryebere piny tyen abiro. Cite Ecau ocelo ŋwec, oriŋo me jole. Opoto i kome kun kwako kore, mako daŋ ŋute, eka te noto leme; gin luŋ ote cako koko. Ka Ecau dok otiŋo waŋe malo, oneno mon kede itinogi, te penyo Yakobo ni, “Maka kono jo mene abino cae?” En ogamo ni, “Magi-nono itino ame Obaŋa omio baŋ amironi pi kica mere.” Aŋeca aryo karacel itinogi ka otuno ceggi baŋgi, oryebere piny. Lea daŋ amannono, karacel kede itino mere, ka gin otuno aceggi, oryebere piny. Yucepu kede Lakeri, ame gin en onwoŋo doŋ ogiko te jo, gin daŋ ka otuno ceggi, oryebere piny. Ecau te penye ni, “Kara lwak jo ecipan ame abedo rwatte kedgi-ca te koppere ŋo?” Yakobo ogamo ni, “Gin-nono luŋ me yomoro cuny adwoŋŋa, wek en pwoa.” Ento Ecau te gamo ni, “Ominna, an atye i mega a romma, wek limmono luŋ bed gire megi.” Yakobo ogamo ni, “Pe amannono adwoŋŋa, tim ber igam mot ame an amii-ni ka ce ineno ni ayomoro cunyi, pien iyi ateni, cuny ame ijola kede-ni, omio ka aneno waŋi, rom aroma ame aneno waŋ Obaŋa. Tim ber igam mot ame doŋ atyeko kelo oko baŋi, pien Obaŋa doŋ onyuto kica mere baŋa, dok daŋ atye i mega ame roma.” Yakobo te bedo diye atek i koppono tuno ka en oye, te gamo mottere-nono. Ecau doŋ te kobo ni, “Aco wek doŋ onywak wunu yo karacel kun an atelliwu yo.” Cite Yakobo te kobo ni, “Adwoŋŋa, yin iŋeo aber ni itino pwod tino, dok daŋ atye i rommi kede dok ame itinogi pwod dot; mano bino miyo ka amiogi owoto atek ateka kadi kono pi nino acel keken, gin bino ol te bino miyo limma luŋ to oko. Pi mannono, myero yin iwot itel nyim amironi, kun an alubo yori momot ame rommi lim kede itino wot aboŋo peko moro naka ka atuno baŋi i Ceir.” Ecau te gamo ni, “Wek koŋ aweki jo moro i akina jo ame abino kedginie”. Cite Yakobo te kobo ni, “Piŋo kara adwoŋŋa? Tim ber iwek koŋ doŋ abed amannono.” Ecau gire doŋ te cako wottere oko i nino-nono ikome, me dok i Ceir. Yakobo te wot dok tutuŋ Cukot, te gero ode pire kene kede kabuto a limmere. En omio nyiŋ kabedo-nono olwoŋo ni Cukot. Icennere Yakobo doŋ te tuno gire i kuc i boma me Cekem ame tye i Kanaan, kun onwoŋo oya i Paddan-aram. En te guro kema mere i nyim bomanono. Dul lobo ame en onwoŋo oguro iye kema mere-nono onwoŋo owilo ciliŋ ame romo mia i baŋ itino a Kamor, ame papa a Cekem. En te cano keno me lam kuno, te cako nyiŋe ni El-Eloe-Icrael. Dina nyaka a Lea ame onwoŋo onywalo gin kede Yakobo rik owoto limo monnogo me lobo-nono. Cekem wot a Kamor, dano me Kivi, ame onwoŋo aloc me lobo-nono, ka onene, omake te buto kede tetek, te miye lewic. Mittere i kom Dina nyaka a Yakobo omedde meicel, omio en te mare atek, te kop kede i mwolo meicel. Cekem te doŋ penyo pappere Kamor ni, “Nyomma nyako-ni bed cega.” Yakobo ka owinyo ni obalo nyare Dina, kun i kare-nono onwoŋo awobe mere tye akwat i bar. Yakobo odio cunye, oliŋ gire iti, naka waŋ ame awobe mere odwogo. Kamor papa a Cekem te wot baŋ Yakobo me wot penyo nyom. Awobe a Yakobo ka owinyo koppono, gin te dwogo oko i bar. Akemo onwoŋo omakogi atek miecel, pien timmono onwoŋo mom ber kadi acel me timere i akina Icrael; pi buto i nyaka a Yakobo. Kodi timmono mom ber me atima. Kamor te kop kedgi kun kobo ni, “Woda Cekem omaro nyarwu atek, tim wunu ber, iwek wunu en nyom nyarwu me bed cege, me wan onyomere kedwu. Miwa onyom anyirawu, me wun daŋ inyom wunu anyirawa. Bed wunu kedwa, kun ibedo wunu i lobo ame imito wunu. Bed wunu iye i kuc kun iwoto icato wunu iye wil, me inwoŋ wunu jami.” Cekem daŋ te kobo baŋ papa a Dina kede omego mere ni, “Tima wunu ber i gin ame an atimo; yeya wunu anyom Dina, an abino culo jami luŋ ame ibino wunu ŋolo. Ŋol wunu gin ame imito wunu luŋ me nyom, kede me mot; an abino culo ducu, ento myero iye wunu anyom Dina bed cega.” Awobe a Yakobo te gamo dog Cekem kede pappere kun gin obwologi obwola, pien en onwoŋo obalo amingi Dina. Gin okobbigi ni, “Mannono gin ame wan mom oromo timo ginnoro iye, pien mom otwero miyo aminwa baŋ dano a mom oliro; mano twero kelliwa lewic. Tye gin acel keken ame ka otimere twero miyowa oye, ginnono ene, wun myero iye lirre wunu me idok wunu calo wan. Mano bino miyo wan omiowu anyirawa, wan daŋ obino nyomo anyirawu, dok daŋ obino bedo kedwu; ote doŋ doko rok acel. Aco ka wun ikwero wunu winyo kopwa, mom ilirre wunu, wan obino tero giwa nyarwa, ote ya wot oko.” Kopgi-nono te yomoro cuny Kamor karacel kede wode Cekem. Awobi-nu mom dok ogal, otio gin ame okobo i caa-nono cutu, pien nyaka a Yakobo onwoŋo oyomoro cunye okato kare. En onwoŋo rik dano ame omio kwogo adwoŋ meicel akato jo luŋ me ot a pappere. Kamor kede wode Cekem owoto i dog bomagi te poro kop i jo me bomagi kun okobo ni, “Jo ame bedo kedwa aber, myero wan owek wunugi bed i lobowa, ocat wil iye, pien lobowa gire lac ame romogi; wek wan onyom anyiragi, wan daŋ omigi megwa. Doŋ ba, tye kop acel keken ame twero miyo gin bino ye bedo kedwa, odoko rok acel kedwa, koppono ene: jowa luŋ a co myero lir del komgi me co bala gin. Man mom bino miyo limgi, jamigi kede leyigi luŋ doko megwa? Wan myero oye wunu kopgi me gin bed kedwa.” Jo luŋ ame rik beo i dog bomagi-nono oye kop a Kamor kede wode Cekem, eka co luŋ ame beo i dog boma-nono te lirre oko. I nino me adekkere, ame doŋ bur a jo ame oliro okwok, Cimeon kede Levi, omego a Dina te mako pala me romogi, ote wot donyo i bomagi kun otuogi atua, ote neko co ducu. Kamor kede wode Cekem daŋ ote neko oko i pala romo, ote kwanyo Dina oko i ot a Cekem tero oko. Itino a Yakobo te bino i boma a jo ame oneko, ote yako jamigi pi balo amingi. Oyako rommi, dok kede kane-gu luŋ kede ginnoro luŋ ame gin onwoŋo tye i boma kede i bar. Abargi karacel kede itinogi kede mongi luŋ gin oyako oko, anaka jami ame onwoŋo tye i udigi, ote wot kede oko. Yakobo te kobbi Cimeon kede Levi ni, “Wun doŋ ikelo wunu can oko i koma, ibalo wunu doŋ nyiŋa oko baŋ wegi lobo-ni, jo Kanaan kede jo Periji. Kit acalo an jona nok, ka gin bino notte karacel te cako lweny i koma, gin bino nekowa tyekowa oko.” Gin te dok iye ni, “Yin onwoŋo imito wan owekgi otim aminwa bala alaya?” Obaŋa okobbi Yakobo ni, “Ya iwot ibed i Betel iyik keno lam kuno pira an Obaŋa ame rik anen baŋi i kare ame riŋo ominni Ecau.” Yakobo te kobbi jo ode kede jo luŋ ame bedo baŋe ni, “Bol wunu kit obaŋa luŋ ame obedo mea rok ocele, ilonyere wunu kenwu, ite loko wunu rukwu oko. Ya owot wunu i Betel, owot oyik wunu keno me lam kuno, pi Obaŋa ame rik ogamo doga i kare ame atye i can, dok obedo gwokowa i kabedo luŋ ame owoto iye.” Gin te miyo baŋ Yakobo kit obaŋa luŋ ame obedo mea rok ocele, ame onwoŋo tye baŋgi karacel kede atem luŋ me yitgi. Yakobo te yikogi i te kworo ame onwoŋo tye ceggi i Cekem. Kare ame gin tye iyo, lworo adwoŋ meicel ame oya i baŋ Obaŋa omakoboma luŋ ame onwoŋo doŋ ceggi kedgi, omio mom ote ryemo yo itino a Yakobo, Yakobo kede jo a rik tye baŋe luŋ te bino i Luj, ame en Betel, a rik tye i lobo Kanaan, te cano keno me lam kuno, eka te cako nyiŋ kabedonono ni El-betel; pien kabedo-nono obedo kan ame rik Obaŋa onyutte gire kene baŋ Yakobo i kare ame en riŋo ominnere. Debora apidi a Lebeka te to oko, ote yike i te kworo ame tye tuŋ piny me Betel. Nyiŋ kabedonono ote cako ni Allon-bakut. Obaŋa dok omedo nyutte baŋ Yakobo i kare ame en oya i Padan-aram, te lamme gum. Obaŋa okobbe ni, “Nyiŋi Yakobo, ento mom dok obino lwoŋi ni Yakobo; nyiŋi doŋ bino bedo Icrael.” Obaŋa okobbe ni, “An Obaŋa Won Twer Ducu. Nywal, inya, imedde; rok luŋ bino ya i komi, kede lwak rok ecipan, kede rwode adoŋodoŋo daŋ bino ya i komi. Lobo ame rik amio baŋ Iburaim kede baŋ Icaka abino miyo baŋi, abino miyo baŋ ikwai en lobo-nono.” Obaŋa te ya oko i baŋe i kabedo ame okobo kede iye-nono, te yito malo, Yakobo te cibo kidi cuŋ atira kan ame Obaŋa okobo kede iye-nono, te liyo gi-yalo Obaŋa me amata i kom kidi ame ecibonono, eka te onyo moo i kome. Yakobo te cako nyiŋ kabedo ame Obaŋa okobo kede iye-nono ni Betel. Gin te ya oko i Betel, medde i wot anyim; ame onwoŋo gin mom ru otuno Eparat, kun onwoŋo pwod bobor, rem me nywal te goyo Lakeri oko, nywallere te bedo atetek. Kare ame onwoŋo en tye alolle atek ateka i colle, dako ame onwoŋo acole te kobo ni, “Kur ilwor, pien amanni dok inwoŋo atin awobi ocele.” A doŋ kwo mere cegi tum (pien oto), ocako nyiŋe ni Benoni, ento pappere ocako ni Benjamin. Lakeri oto ote yiko iyo Eparat (ame en Beterekem). Yakobo te cibo kidi cuŋ atira i wi lyellere, kidi ame ocuŋ atira i wi lyella Lakeri-nono pwod tye naka atot tin. Icrael te medde i wottere anyim, oguro ke ma mere i pem me Eder loka tuŋ ca. Icrael te bedo i lobo-nono, Reuben te wot buto aŋeca a pappere Bila, Icrael te winyo timerenono oko. Awobe a Yakobo rik tye gin apar wie aryo. Itino a Lea onwoŋo ene: Reuben ame obedo atin kao a Yakobo, Cimeon, Levi, Juda, Icakar kede Jabulon. Aco mea Lakeri onwoŋo ene: Yucepu kede Benjamin, Itino a Bila aŋeca a Lakeri ene: Dan kede Naputali. Itino a Jilpa aŋeca a Lea te bedo ene: Gad kede Acer. Magi gin itino a Yakobo ame en onywalo i Paddan-aram. Yakobo obino baŋ pappere Icaka ame rik onwoŋo bedo i Mamre, ame en Kiriat-arba kede Kebron, kan ame kwaro mere Iburaim kede Icaka yam obedo iye con, Mwaka Icaka me dittere onwoŋo doŋ oromo mia acel kede pyeraboro kwo Icaka te tum oko, en oto te wot nywako kabedo kede kwari mere, kun onwoŋo mwaka mere doŋ bup, a doŋ oteggo atek. Itino mere Ecau kede Yakobo te yiko kome. Magi gin ikwae Ecau (ame en Edom). Ecau onyomo anyira a jo Kanaan: Ada nyaka Elon, dano me Kitti, Olibama, nyaka Ana wot a Jibeon, dano me Kivi, kede Bacemat nyaka Icmael, amina Nebayot. Ada onywalli Ecau Elifaji, Bacemat onywalo Rewel, Olibama onywalo Jeuc, Jalam, kede Kora. Magi gin itino Ecau ame onywalo i lobo Kanaan. Ecau otero monnere kede itino mere awobe kede anyira, kede jo luŋ me ode, karacel ilimmere, leyi kede jami luŋ ame en onwoŋo i Kanaan, owoto kede i lobo ocele kun pokere oko ominnere Yakobo. Pien limgi a leyi onwoŋo dwoŋ atek ame mom rommigi bedo karacel, lobo ame gin rik onwoŋo bedo iye acalo wele onwoŋo mom romogi me kwat; pien limgi onwoŋo bup. Ecau te wot bedo i Ceir ame en lobo obedo kidikidi. Ecau en ame daŋ olwoŋo ni Edom. Magi gin ikwae Ecau kwaro a jo Edom ame bedo i Ceir, i lobo ame obedo kidikidi. Nyiŋ itino Ecau ene: Erifazi wot Ada, dako Ecau, kede Rewel wot a Bacemat, dako Ecau. Itino Erifazi ene: Teman, Omar, Jepo, Gatam kede Kenaj. Timna rik dako aŋeca Erifazi wot Ecau. En onywalo Amalek baŋ Ecau. Magi-nono gin itino Ada dako Ecau. Aco itino a Rewel ene: Nakat, Jera, Camma, kede Mijja. Magi-nono gin itino a Bacemat dako Ecau. Aco itino Olibama nyaka Ana wot a Jibeon dako Ecau, gin ene: en onywalli Ecau Jeuc, Jalam kede Kora. Magi gin ikwae Ecau ame obedo rwode. Itino awobe meca Erifazi wot Ecau me kao, gin ene: rwot Teman, rwot Omar, rwot Cepo rwot Kenaj, rwot Kora, rwot Gatam kede rwot Amalek; mannono gin itino Erifazi ame obedo rwode i lobo Edom. Gin luŋ obedo itino Ada. Magi gin itino a Rewel wot Ecau obedo rwode: rwot Nakat, rwot Jera, rwot Camma, kede rwot Mijja; mannono gin itino a Rewel ame obedo rwode i lobo Edom. Gin luŋ obedo itino a Bacemat dako Ecau. Magi gin itino Olibama dako Ecau ame obedo rwode: rwot Jeuc, rwot Jalam, kede rwot Kora. Magi gin rwode ame obedo itino Olibama, nyaka Ana, dako Ecau. Magi gin itino Ecau ame en Edom; rwodegi daŋ ennono. Magi gin itino a Ceir ame dano me Kori, ame gin obedo wegi lobo-nono: Lotan, Cobal, Jibeon, Ana, Dicon, Ejer, kede Cican; maginono gin rwode a jo Kori ame tye i lobo Edom, ame gin obedo itino a Ceir, Itino a Lotan ene: Kori kede Eman; amin a Lotan obedo Timma. Itino a Cobal ene: Alvan, Manakat, Ebal, Cepo kede Onamo Itino a Jibeon awobe mege ene: Aiya, kede Ana. Mane en Ana ame rik bin onwoŋo akoŋ akukunya alyet i tim i kare ame en tye akwayo kana a pappere Jibeon. Itino Ana awobe mege ene: Dicon kede nyare Olibama. Itino a Dicon awobe mege ene: Kemdan, Eciban, Itran kede Keran. Itino Ejer ene: Bilan, Javan kede Akan. Itino a Dican ene: Uji kede Aran, Rwode a jo Kori ene: rwot Lotan, rwot Cobal, rwot Jibeon, rwot Ana, rwot Dicon, rwot Ejer kede rwot Dican; magi-nono gin rwode a jo Kori acalo atekeregi tye kede i lobo Ceir. Magi gin rwode ame oloo Edom, ame onwoŋo abaka moro mom ru oloo jo Icrael. Bela wot a Beor onwoŋo loo Edom, nyiŋ boma mere adwoŋ olwoŋo ni Dinkaba. Kare ame Bela oto, Jobab wot a Jera me Bojra oleo tyene. Kare ame Jobab oto, Kucam ame oya i lobo a jo Teman oleo tyene. Kare ame Kucam oto, Kadad wot a Bedad, a rik olwenyo te loyo jo Midian ame tye i Moab, en ate leyo tyene; nyiŋ boma mere adwoŋ rik olwoŋo ni Avit. Kare ame Kadad oto, Camla me Macireka oleo kakare, odoko rwot kakare. Kare ame Camla oto Caul me Rekobot ame tye i ŋet kulo me Efurate, odoko rwot kakare. Kare ame Caul oto, Baal-kenan wot a Akbor oleo kakare, odoko rwot. Kare ame Baal-kenan wot Akbor oto, Adar oleo kakare, odoko rwot; nyiŋ boma mere adwoŋŋere rik Pau. Dako mere nyiŋe rik Meetabel, ame obedo nyaka Matred, Matred, ame nyaka a Mejaab. Magi gin rwode ame oya i baŋ Ecau, kun lubere kede atekeregi kede kabedogi, kede nyiŋgi, rwot Timna, rwot Alwa, rwot Yetet, rwot Olibama, rwot Ela, rwot Pinon, rwot Kenaj, rwot Teman, rwot Mibjar, rwot Magdiel kede rwot Iram. Magi-nono gin rwode me Edom, acalo kabedogi tye kede i lobogi i komgi; mannono en Ecau papa Edom. Yakobo obedo i lobo Kanaan, i lobo ame yam pappere koŋ obedo iye-ni, Man en kop i kom ikwae a Yakobo. Kare ame Yucepu doŋ oromo mwaka apar wie abiro me dittere onwoŋo rik en doŋ kwao lim karacel kede omego mere. En obedo karacel itino awobe a Bila kede Jilpa, ame gin onwoŋo mon a-pappere; Yucepu rik te dotogi baŋ papagi, Icrael onwoŋo maro Yucepu atek kato itino ocele luŋ; pien onywale kun en doŋ oti, te kwoye boŋo abor, dok bade daŋ boco. Omego mere ka oneno ni papagi maro Yucepu katogi oko, gin te cako dage oko; cakere i kare-nono mom doŋ ote kop kede i kuc. Kare ame Yucepu oleko lek, en otito baŋ omego mere, omego mere doŋ te medde ameda i dage. En okobbigi ni, “Winy wunu koŋ kit lek ame aleko: aleko ni onwoŋo otye i poto otweyo ŋano ame okwao, arita ŋanona te ya malo cuŋ atira; arita ŋanowu te cokere gure dyere, eka ote ryebere piny me woro aritana.” Omego mere te gamo ni, “Yin ibino loyowa ateni? Yin en a doŋ ibino bedo adwoŋ ame loowa?” Gin doŋ te medde dage atek ateka pi lekkere-nono kede pi koppere. Yucepu dok te medo leko lek ocele, te daŋ tito baŋ omego mere, kun kobo ni, “Jo-ni omegona, dok aleko lek ocele. Aleko ni ceŋ kede dwe kede acer apar wie acel obedo ryebere piny i nyima.” Kare ame en otito lek man baŋ pappere kede baŋ omego mere, pappere ocoke, te juke atek ateka kun kobbe ni, “Kodi lek aŋo ame ileko amannono-nono. Yin itamo ni an kede totti kede omegoni obino bino ote ryebere piny i nyimi?” Nyeko te mako omego mere atek meicel i kome, ento pappere te kano kop mano luŋ i cunye. Kare ame omego mere onwoŋo owoto kwayo lim a papagi i ŋet Cekem. Icrael okobbi Yucepu ni, “Omegoni mom tye akwat ceggi i Cekem? Biye me aori baŋgi.” En ogamo doge ni, “An ene, adwoŋ.” Pappere te kobbe ni, “Wot koŋ inen ka omegoni kede lim tye aber, me ite dwoggo an kop.” En te cwaye ya i luŋ me Kebron, te wot naka i Cekem. Lonnoro te nwoŋo Yucepu tye awiwira atata i dye bar, te penye ni, “Yin kara iyenyo ŋo?” En ogamo ni, “Ayenyo omegona. Tim ber ba ititta kan ame gin tye akwat iye.” Lonnono te kobbe ni, “Gin doŋ otyeko ya oko i kan, pien awinyo ka gin kobo ni, ‘Owot wunu naka i Docan.’ ” Yucepu te cako wopo yorgi, te nwoŋogi i Docan. Kare ame gin onene i kannabor, kun onwoŋo en mom ru otuno ceggi baŋgi, gin te cako yiko kop me neke oko, kun okobo ni, “Won lek ca bino ca. Biye wunu me tin oneke wunu oko, obole wunu i burroro kan, wan obino kobo ni, ‘Lee moro me tim en omake, te mwode oko’, me koŋ onen kit ame lekkere bino cobere kede.” Kare ame Reuben owinyo yikgi-nono, olare oko i ciŋgi, kun en kobbigi ni, “Mom ber wan ikomwa ikwanyo kwo mere.” Reuben dok te kobbigi ni, “Pe myero wan oony remo mere kadi acel, ento obole wunu i bur ame tye kan-ni; myero ciŋwa kur gude kadi acel.” En onwoŋo oyikere me kwanyo oko i ciŋgi, wek edwok baŋ pappere. Kare ame Yucepu otuno baŋ omego mere, gin opoto i kome, ote gonyo koti mere oko i kome, koti ame onwoŋo en oruko abor dok bade daŋ boco. Gin omake ote tere wot bole i bur. Burrono onwoŋo yie tye nono, pii pe iye. Gin gigi doŋ te bedo piny cem. I kare ame gin otiŋo waŋgi malo, ote neno jo Icmael ame oya i Gilead, karacel kede inaga ecipan ame otino odok, moo yat ecoma, kede murra, kun owoto kede i Miciri. Juda dok te kobbi omego mere ni, “Konyo kara ŋo wan me neko ominwa eka ote wumo remo mere? Biye wunu me ocate wunu baŋ jo Icmael, mom myero wan oneke kede ciŋwa, pien en ominwa, obedo komwa ikokome.” Omego mere te ye koppere-nono. Ocat wil me Midian te bino beo kannono, omego a Yucepu te waye oko i bur, gin te cate baŋ jo Icmael, pi cekel me ryal pyeraryo. Gin te tero Yucepu naka i Miciri. Kare ame Reuben odwogo i bur, oneno Yucepu doŋ mom tye i bur, en te yeco boŋo mere oko, Odok cen baŋ omego mere te kobbigi ni, “Atin ca pe i bur do! Kara man an tin adok kwene ba!” Gin te neko dyel, ote kwanyo koti a Yucepu luto i remo mere. Gin te kelo koti aborrono, dok a bade daŋ bocoboco-nono baŋ papagi kun okobbe ni, “Wan en onwoŋo koti-ni, koŋ inen, ŋi aber ka koti a wodi ennono onyo pe.” Kare ame en doŋ otyeko ŋiyo, okobo ni, “Man kom koti atinna ennono; lee tim doŋ omwodo atinna oko do, ateteni, lee tim doŋ okikilo oko.” Yakobo te yeco boŋo mere oko, te tweyo boŋo cola i pyere, te bedo koko wode pi kare alalac. Awobe mere luŋ kede anyira te ya malo wot kweyo cunye, ento en te kwero oko ni kur kwe cunye, kun kobo ni, “Mom amannono gire; an gira abino lubo yo atinna i koko naka i lyel.” Pappere te bedo koke amannono Jo Midian te cato Yucepu oko i Miciri baŋ Potipar ame en adwoŋ tic a Parao, kun loo ocirikale luŋ ame kuro piny. Kare-nono Juda te ya oko i baŋ omego mere, te dak baŋ lonnoro me dullam ame nyiŋe Kira. A doŋ Juda tye kuno, en oneno nyaka a dano moro me Kanaan a nyiŋe Cua; en onyomo te daŋ cako donyo baŋe. Dako-nono te yac, te nywalo atin awobi, pappere te cako nyiŋe ni Er. Dako dok te yac, te dok nywalo atin awobi, ote cako nyiŋe ni Onan. En dok te nywalo awobi ocele, ote cako nyiŋe ni Cela. Atinnono en onywalo i Kejib. Juda te nyommi wode me kao Er nyako ame nyiŋe Tamali. Ento Er atinnere me kao-nono rik onwoŋo mom ber i nyim Rwot, omio Rwot te neke oko. Juda te kobbi wode Onan ni, “Yin myero ilak amuni, ibed cware, wek inywalli ominni atinnoro.” Ento Onan oŋeo ni atinnono mom bino bedo mere; omio i kare ame en donyo baŋ ci-ominnere, koŋ ogeo onyo koti mere piny me kur enywalli ominnere atin. Gin a en otimo-nono mom onen aber baŋ Rwot, omio Rwot te neke en daŋ oko. Juda te kobo baŋ ci-wode Tamali ni, “Yin myero doŋ ibed i ot baŋ pappi bala dako a cware mom, naka waŋ ame woda Cela odoko dwoŋ”; pien onwoŋo en tye i lworo ni kare ocele en daŋ bino to bala omego mere. Tamali te dok bedo baŋ pappere. Ka kare okato, dako a Juda ame onwoŋo nyaka a Cua-ni te to oko. A doŋ cuny Juda opye, en owoto i Timna, baŋ onyar yer rommi mere. En owoto karacel awottere Kira, dano me Adullam. Kare ame otitti Tamali ni, “Kwaroni owoto i Timna pi nyaro yer rommi mere.” Tamali ogonyo rukkere a nyuto ni cware oto oko, te wumere boyo kome luŋ kede atambala, te wot bedo piny i ŋet yo ame woto Enaim, ame tye i yo Timna; pien oneno ni Cela doŋ odoko dano adwoŋ oko, ento mom olake. Kare ame Juda onene, en otamo ni alaya ennono, pien owumo waŋe oko. Juda owoto baŋe i ŋet yo, te penye ni, “Wek abut ba kedi,” pien onwoŋo en mom oŋeo ni ci-wode ennono. Tamali te penye ni, “Ibino ce miya ŋo ka aye yin ibuto keda?” Juda ogamo ni, “Abino cwayi akale dyel i akina dyegina.” En ogamo ni, “Ibino jeŋo giri moro koŋ iye, tuno ka icwao?” Juda te gamo ni, “Kara ajeŋ ŋo?” Tamali okobbe ni, “Atem ame tye iye ginnoro ame nyuto ni megi, kede tol kede abironi ame tye i ciŋi.” Juda te miye jami-nono luŋ, te buto kede; Tamali te yac oko. En te dok paco wot kwanyo atambala oko i kome, te doŋ dwoko rukere ame nyuto ni en dako ame cware oto. Juda te oro awottere ame dano me Adullam, me tero akale dyel, wek gam jami mere a rik ejeŋo baŋ dako ca dwogo, ento naka mom te nwoŋo dakonono, Dano ame oro te penyo jo kannono ni, “Kara alaya moro ame yam bedo i ŋet yo me Enaim, tye aman kwene?” Gin ogamo ni, “Alaya moro gire yam mom bedo kan.” En te dokwot kobbi Juda ni, “Mom anwoŋe gira, dok daŋ jo me kuno okobo ni, ‘Alaya moro gire yam mom bedo kan’.” Juda te dok iye ni, “Wek en doŋ ter jami-nono bed mere, me kur bed nyerowa. Koŋ inen an acwaye dyel yin mom ite nwoŋe.” Kare ame dwe doŋ okato adek, oterri Juda kop ni, “Ci-wodi Tamali obedo yaya bo waŋe atata, omio aman en doŋ oyac oko pi tar waŋe-nono.” Juda te kobo ni, “Kele wunu, me waŋe oko,” Kare ame onwoŋo otye akele, en ocwao kop baŋ kwaro mere ni, “Won jami magi en oyac keda.” Dok daŋ te medo ciko ni, “Koŋ ŋi, nen won jami magi: atem, tol kede abiro.” Juda oŋio jami-nono, te kobo ni, “En omio kop oloa oko, pien mom amie baŋ woda Cela.” Pe dok te medo buto kede. A doŋ kare mere me nywal oromo, onwoŋo rut tye i yie. A doŋ en tye alolle, atin acel te cwayo bade oko, dako ame acole te tweyo uci arema i ciŋe kun kobo ni, “Mam en ogeo pello.” Ento kare ame mannono odwoko ciŋe oko, nen, ominnere en a dok te geyo pelo, omio okobo ni, “Iyabo yoni tetek piŋo?” Mannono te miyo cako nyiŋe Perej. Ominnere doŋ te pello i cen kun uci arema tye i ciŋe, ote cako nyiŋe ni Jera. Otero Yucepu i Miciri, eka Potipar adwoŋ tic a Parao ame onwoŋo loo ocirikale a kuro piny luŋ, ame en dano me Miciri, te wile oko i baŋ jo Icmael ame otere kuno-ni. Rwot rik onwoŋo tye kede Yucepu, te miyo en doko lo ame kome i gum. En te bedo i ot adwoŋŋere, ame onwoŋo dano me Miciri-nono; adwoŋŋere daŋ te neno oko ni Rwot tye kede, pien Rwot omio ginnono luŋ ame en otio i ciŋe bedo abeco. Mannono omio adwoŋ a Yucepu opwoc kun en tio baŋe; adwoŋŋere te kete bedo alo ode luŋ karacel kedejami mere luŋ. Cakere i kare ame okete kede me loyo ode kede jami mere Rwot omio winyo i ot a dano me Miciri-nono pi Yucepu. Winyo a Rwot obedo i kom jami mere ducu i ot kede i poto. Omio Potipar te jalo jami mere luŋ i te twer a Yucepu; bedo a Yucepu baŋe, omio en mom dok paro pi ginnoro kadi acel kono cam keken ame en camo. Yucepu rik onwoŋo atin awobi amwonya, dok neno ber meicel. Icennere dako adwoŋŋere cunye te cako pyepyeta i kome, omio te penye ni, “But ba keda.” Ento Yucepu te kwero oko, kun kobbi cik a adwoŋŋere ni, “Nen ba, bedona baŋ cwari omio adwoŋŋa mom dok paro pi ginnoro kadi acel ame tye i ot man, dok daŋ en doŋ otyeko jalo jami mere luŋ i te twerra, En mom kata oko i ot man; pe tye dok ginnoro ocele ame en mom omio i te twerra kono ka yin keken, pien yin ibedo dako mere. Kara ka amannono, an dok atwero mukere niŋo me timo twon bal arom man-ni, me balo i nyim Obaŋa twal?” Kadi dako-nono obedo penyo Yucepu piny a ru, piny a ru, Yucepu mom gire oye winyo koppere, mom oye buto kede, kadi bedo kede. Ento i nino moro acel ame onwoŋo Yucepu tye atiyo ticcere i ot kun piny oliŋ iti aboŋo ŋattoro ocele i ot kuno, dako-nu omakoboŋo mere kun kobbe ni, “But keda.” Ento Yucepu te mwomere oko kun wekoboŋo mere i ciŋe, te donyo oko. Ka en oneno ni Yucepu owekobono mere i ciŋe te mwomere okato gire oko, en olwoŋo jo ame bedo i ode, te kobbigi ni, “Koŋ inen wunu adwoŋ man okelo dano me Eburania-ni kan me palowa; nen en kom omito buya tetek ni ebut keda twal, ento an ate redo atek meicel, cite en ka oneno ni an awoto dwona akuku duru, en ojalo rukkere oko baŋa, te mwomere gire oko.” En te kano boŋo a Yucepunono baŋe ituno ka won ot odwogo. En te pore kop acellono kun kobo ni, “Opii ame obedo dano me Eburania ame yin ikelo i akinawa kan-ni, obino i ot baŋa me palla; ento i kare ame an awoto dwona aredo atek, en te jalo rukkere oko baŋa, te mwomere donyo oko.” Adwoŋŋere ka owinyo kop ame dako mere oporre, ni, “Man en kit ame otima kede,” akemo omake atek meicel. Adwoŋ a Yucepu te make kete i buc, i kan ame rik otweo iye obuc abaka; ote tweye en daŋ kuno. Cite Rwot onwoŋo tye kede Yucepu, onyutte marrere a mom lokere, omio agwok abuc opwoc. Agwok obuc dok te miyo Yucepu twer me gwoko obuc luŋ ame rik tye i buc; anaka ginnoro luŋ ame rik otio kuno, en Yucepu a rik tio. Agwok obuc mom dok te bedo i tammoro pi ginnoro luŋ a doŋ etyeko keto i ciŋ Yucepu me gwoko, pien Rwot rik onwoŋo tye kede; doŋ ginnoro luŋ ame en rik tio, Rwot mio iye winyo. Icennere a doŋ man otimere oko, adwoŋ poko koŋo kede adwoŋ tedo ogati abaka me Miciri te timo balloro baŋ adwoŋgi, abaka me Miciri. Akemo te mako Parao i kom oticcere adoŋo aryo-nono: adwoŋ poko koŋo kede me tedo ogati. En te ketogi i ot adwoŋ a loo cirikale ame okur piny, kan ame rik onwoŋo otweo iye Yucepu. Adwoŋ a loo cirikale te miyogi i ciŋ Yucepu, en te gwokogi; gin koŋ te bedo i buc pi kare moro. I dyeworroro acel gin te lek, gin aryo luŋ ame otweogi i buc, apok koŋo kede ated ogati abaka me Miciri, kun ŋat acel acel lekkere pat tere daŋ pat. Odiko ka Yucepu obino baŋgi, onwoŋo gin aryo luŋ waŋgi oballe. En te penyo odoŋe me tic a Parao a rik onwoŋo tye kede i buc, ame oketogi i ot adwoŋere-ni, ni, “Waŋwu kara tin oballe piŋo?” Gin te gamo ni, “Tin wan oleko lek, ento mom tye ŋattoro a twero gonyiwa tere.” Yucepu te gamo ni, “Mom Obaŋa gire en agonyo tere? Koŋ ititta wunu lekwu-nono.” Adwoŋ poko koŋo te cako poro lekkere baŋ Yucepu, kun kobbe ni, “Nen ba, an aleko ni olok onwoŋo tye i nyima, kun jaŋe tye adek. Ame onwoŋo pwod oluro me cako turo, oru nyako nyige oko, te daŋ cek oko. An onwoŋo amako ikopo a Parao i ciŋa; apwono nyig olokkono ate biyo iyi ikopo a Parao, ate miyo ikopo-nono i ciŋ Parao.” Yucepu te kobbe ni, “Lekki-nono te koppere ene: jaŋ olok adek cimo nino adek; odoŋ nino adek Parao bino dwoki i ticci, ite bino miyo Parao ikopo i kite a yam itimo con i kare ame ipoko koŋo mere. Ento myero ipo pira ka doŋ idok idog ticci; tim ber yin daŋ itam pira ba, ititti Parao kop i koma, me en daŋ gonya oko i ot man. Pien an rik okwala akwala i lobo a jo Eburania; aman daŋ dok oketa i buc kan nono kun mom abalo ginnoro.” Ka adwoŋ tedo oneno ni ogonyo lek awottere aber, en daŋ oporri Yucepu mege kun kobo ni, “Nen ba, an daŋ aleko ni onwoŋo adodo ditti me ogati adek i wia. Iya dita i malo mere onwoŋo tye iye kwon ogati apapat pi Parao, cite winy onwoŋo tye dok acamo oko iyi dita ame ayeonono.” Yucepu te gamo ni, “Lekkinono te koppere ene: ditti adek, cimo nino adek; i nino me adekkere, Parao bino toŋo wii ŋuno oko, te ŋabi i kom yat, winyo te camo riŋo me komi.” Kare ame nino me adekkere oromo, ame en nino a rik onywalo iye Parao, Parao otedo arama pi oticcere ducu, en te kelo adwoŋ poko koŋo kede adwoŋ ogati nyim omiro mere. En te dwoko adwoŋ poko koŋo i dog ticcere me poko koŋo: en te miyo ikopo i ciŋ Parao. Ento adwoŋ tedo ogati en te ŋabo malo i kite ame Yucepu ogonyo kede lekkere. Adwoŋ poko koŋo naka mom te po gire pi Yucepu, wie te will oko i kome atwal. A doŋ mwaka aryo twal okato, Parao te lek ni, onwoŋo etye ecuŋ i ŋet kulo Nail, eka ete neno dok abiro ocwe a komgi opipira, oya i kulo Nail kun gin acamo ogada. Dok ocele abiro ame omok, ojony atek ateka daŋ te bino i kulo Nail kun lubo yorgi, ote daŋ bino cuŋ i ŋet dok ame okwoŋo bino, ame tye i ŋet kulo Nail. Dok ame omok, ojony atek ateka-ca te camo dok ocwe a komgi apipira-ca oko. Parao te doŋ co oko i waŋ nino. En dok te nino oko, te dok leko lek me aryo mere. Oleko ni eneno wit kal abiro ame oluŋere ocek abeco i tyen kal acel keken. I ŋegi dok onwoŋo tye iye wit kal ocele abiro ame olot, odoŋo arecoreco, kun yamo alyet me oro onerogi oko; eka wite abiro arecoreco ca te mwonyo maca abeco ca oko. Parao te dok co oko i waŋ nino, te nwoŋo ni dok emedo lek. Odiko ka piny oru, yie te bedo waŋ atek; omio en te cwalo okwena lwoŋo otyet kede oryeko luŋ me Miciri. Parao te tittigi lekkere, ento ŋattoro mom te nen i akinagi ame romo gonyo lek a Parao. Adwoŋ poko koŋo te kobbi Parao ni, “Tima ber adwoŋ, tin apo bala. I kare ame rik Parao cunye waŋ i koma an amiro mere eka te tweya i buc karacel kede adwoŋ tedo ogati, i ot a loo cirikale luŋ ame kuro piny, wan aryo luŋ rik ote lek i dyewor acel, lekwa wan aryo luŋ rik tergi papat. Awobi moro me Eburania onwoŋo tye kedwa. En rik te gonyo lekwa kun gonyo me a ŋat acel acel kite ame lekkere tye kede. Kite ame en rik ogonyo kede lekwa, daŋ obino otimere kittono. An obin odwoka i dog ticca, ento adwoŋ tedo ogati ote ŋabo kome malo.” Parao te cwayo kwena lwoŋo Yucepu, ame daŋ ote ru kelo oko oyotoyot i buc. Yucepu te lyelo wie, te daŋ lokoboŋo mere, te doŋ donyo baŋ Parao. Parao te kobbi Yucepu ni, “An onwoŋo aleko lek ento ŋattoro mom te nwoŋere kadi acelloro ame romo gonnya tere. An abedo winyo kop i komi, ni yin ka iwinyo lekkoro itwero gonyo tere.” Yucepu te gamo dog Parao ni, “Amaa, mom an gira, Obaŋa gire en ame gonnyi Parao lekkere a yomoro cunye.” Parao te doŋ kobbi Yucepu ni, “An aleko ni onwoŋo acuŋ i ŋet kulo Nail, dok abiro ame ocwe a komgi apipira te ya i kulo Nail, ote bedo camo ogada. Dok ocele abiro daŋ te bino lubo yorgi, magi-nono onwoŋo omok, ojony ikokoro, ame kodi dokkono an yam mom ru aneno i Miciri luŋ. Dok ame onwoŋo omok, dok ojony ikokoroni te camo dok abiro ocwe ca oko. Cite akadi i kare ame gin doŋ ocamo dok ocwe ca oko, mom tye ginnoro ame twero cimo ni gin ocamo dok ocwe oko, pien onwoŋo gin pwod ojony ikokoro, bala kite ame onwoŋo gin tye kede con. Ka mannono otum, an doŋ ate co oko i waŋ nino. Nino dok te yuto waŋa oko, ate dok neno wit kal abiro ame doŋo i tyene acel keken, kun obeco meicel. Dok ate neno wit kal ocele abiro arecoreco, ame lyeto yamo me oro onero oko, kun tye olot i ŋet en abeco mege ca. Wit kal arecoreco te mwonyo wit kal abiro abeco ca oko. Aporo lek man baŋ otyet, cite ŋattoro mom onen ame romo gonyo tere.” Yucepu te kobbi Parao ni, “Lek a Parao gire acel keken, Obaŋa onyuto baŋ Parao gin ame ebino tiyo. Dok abiro abeco kede wit kal abiro abeco, gin ducu nyuto mwaka abiro, lekkono tye acel gire. Aco dok abiro omok, ojony atekateka kede wit kal abiro ame yamo a lyet me oro onero oko, gin daŋ cimo mwaka abiro ame kec bino ri kede i lobo. Doŋ ba, bino bedo gire kite ame atitti Parao, Obaŋa doŋ onyutti Parao oko gin ame ebino tiyo. Pi mwakki abiro, cam bino cek abup meicel i lobo Miciri luŋ. Cite i ŋe mannono, mwakki abiro ocele bino lubo ame kec bino bedo tye iye. Wi jo bino wil oko i kom cam abup ame rik ocekkigi i Miciri. Keccono bino balo lobo me Miciri meicel. Twon cam abup ame jo bino bedo kede-ni mom dok obino poyo kadi acel pi kec agwa ame bino lubo, pien keccono bino bedo alyet meicel. Lek a Parao ame eleko iryo twal-li, nyuto ni Obaŋa en omoko kop man, dok Obaŋa bino miyo cobere i kare a mom bor. Omio Parao myero nen ni eyero dano moro aryek, a wie tio me eket loo lobo Miciri luŋ. Dok Parao myero ket odoŋe ame loo lobo, me gin ra acel me abic me cam ame bino cek i lobo Miciri, pi mwakki abiro ame cam bino cek iye abup. Myero gin cok cam i mwakki ame cam bino cek iye abup-pi luŋ, ote gwoko i bomagi i te loc a Parao. Cammono bino bedo me mono pi lobo man, me kuro mwakki abiro ame kec bino poto iye i Miciri, me kec kur nek jo i lobo-ni oko.” Tam man Parao kede oticcere luŋ oneno ni ber. Parao te kobbi omiro mere ni, “Otwero nwoŋo wunu dano ocele acalo man, ame tye i cuny Obaŋa acalo en?” Parao te kobbi Yucepu ni, “Kite acalo Obaŋa doŋ onyutti kop man luŋ, mom dok tye dano moro aryek, a wie tio bala yin. Yin en a doŋ ibino loyo oda, karacel kede jona luŋ, gin luŋ bino tiyo gin ame iciko, an abino loyi pi kom loc ame abedo iye keken.” Parao dok te kobbi Yucepu ni, “Nen ba, doŋ atyeko ketti me loyo lobo Miciri luŋ.” Parao te woto atemmere oko i nyako ciŋe, te rwako i mea Yucepu, te miye ruko boŋŋi camanini abeco, te rwako nyor me jabu abeco i ŋute. Parao te miye ŋwec i gadigadi me aryo kun jo wo i redo i nyime ni, “Rum conwu!” Mannono kite ame okette kede me loyo lobo Miciri luŋ. Parao dok te medde kobbi Yucepu ni, “An Parao, mom tye dano moro ame bino tiŋo ciŋe onyo tyene i lobo Miciri luŋ ka ce yin mom iye.” Parao te cako nyiŋ Yucepu ni Japenat-panea, te miye nyomo Acinaci nyaka a Potipera ame onwoŋo alamdog me On. Yucepu te loyo lobo me Miciri. Mwaka me dit a Yucepu onwoŋo doŋ oromo pyeradek nono i kare ame en donyo i tic a Parao, abaka me Miciri. Yucepu oya oko i nyim Parao te wot loŋo lobo me Miciri luŋ, Cam rik te cek i lobo abup meicel pi mwakki abiro, rik daŋ ote coko cam luŋ ame ocek i lobo Miciri pi mwakki abiro-nu, ote kano i dere me mono i boma luŋ. I boma acel acel rik okano iye cam ame oya i potti luŋ a ceggi ceggi kede. Yucepu te kano cam abup meicel i dere me mono. Cam te bedo-adwoŋ bala kwoyo me dog nam, ame omio ote weko pimo oko pien onwoŋo doŋ mom pimer. Ame mwaka me kec mom ru oromo, Yucepu onwoŋo doŋ tye itino awobe aryo ame Acinaci nyaka a Potipera alamdog me On onywalo. Yucepu ocako nyiŋ atinnere me kao ni Manace, kun kobo ni, “Pien Obaŋa doŋ omio wia owil oko i kom can ducu kede i kom ot a pappa.” Atin me aryo te cako nyiŋe ni Epraim, kun kobo ni, “Pien Obaŋa omia anywal i lobo ame aneno can iye.” Kare ame mwakki a rik cam ocek iye abup wok-k i otum oko, mwakki me kec te doŋ cakere, kite ame Yucepu rik okobo kede. Kec te diyo jo me lobo luŋ, cite i Miciri luŋ cam onwoŋo tye. A doŋ cam otum oko i lobo Miciri luŋ pi kec ame onwoŋo doŋ okur, jo te cako koko baŋ Parao. Parao te kobbi jo Miciri ni, “Wot wunu baŋ Yucepu itimu gin ame en bino kobbiwu.” Kare ame kec doŋ odio jo luŋ me Miciri, Yucepu te cako yabo dog dere me mono luŋ, te cato kal baŋ jo Miciri, pien kec onwoŋo doŋ okur atek meicel i lobo Miciri. Jo me lobo ocele luŋ te cako ciro i Miciri baŋ Yucepu pi wilo kal, pien kec onwoŋo doŋ okur atek meicel i lobo ducu. Ka Yakobo owinyo ni kal tye i Miciri, okobbi awobe mere ni, “Piŋo kara ibedo wunu nenne anena kenwu kenwu?” Eka te kobbigi ni, “Nen, an awinyo ni kal tye i Miciri, wotu iwilliwa wunu kal i kuno, me obed wunu kwo, kec kur nekwa oko.” Omego a Yucepu apar te wot i Miciri me wot wilo kal. Benjamin, omin a Yucepu, Yakobo mom ocwalo owoto karacel omego mere, pien obedo i lworo ni ginnoro arac dok twero timere i kome. Awobe Icrael te wot kittono karacel i jo ocele ame daŋ onwoŋo awot kuno, pien kec onwoŋo rik oromo lobo me Kanaan luŋ. I kare-nono onwoŋo Yucepu odoko aloc i lobo me Miciri; en a rik cato kal baŋ jo me lobo-nono. I kare-nono omego a Yucepu daŋ te bino, gin ote onyere piny i nyime aryeba cuny, kun nyimgi gudo lobo. Yucepu oneno omego mere, te ru ŋeyogi oko, cite te terogi koŋ bala orok, kun kobo kedgi agwa, penyogi ni, “Kara wun iya wunu i kwene?” Gin ogamo ni, “Wan oya i lobo me Kanaan, obino wilo cam.” Yucepu rik te ŋeyo omego mere kittono, cite gin naka mom oŋee. Yucepu te po lek ame rik oleko i komgi, eka te kobbigi ni, “Wun orot piny, ibino wunu neno kannoro a tye nono i lobo-ni!” Gin ogamo ni, “Amaa adwoŋwa, mom amannono gire, wan omironi obino giwa wilo cam. Wan ducu obedo itino a dano acel, yiwa daŋ gire cil, wan mom orot piny.” Yucepu te kobbigi ni, “Pe gire, wun ibino wunu me neno kannoro a tye nono i lobe-ni.” Gin dok te gamo ni, “Adwoŋ, wan gire wan omironi, wan onwoŋo otye wan omego apar wie aryo, wan luŋ obedo itino a dano acel ame tye i lobo Kanaan; awobi atidi odoŋ paco baŋ papawa, acel en ame doŋ mom tye.” Yucepu te kobbigi ni, “An kara akobo kakare, wun ibedo wunu orot piny. Pi mannono, myero koŋ nen ni onenowu aber kit man: Acalo Parao tye kwo-ni, wun mom ibino ya wunu i kan ka ce ominwu me cogo mom obino kan. Wun myero icwal wunu dano moro acel i akinawu me wot kel ominwu-naca, kun nwoŋo wun it ye wunu i buc kan, me koŋ mok ka ce wun ikobo wunu kop ateni. Ka ce man mom otimere, acalo Parao pwod kwo-ni, nwoŋo kara wun orot piny ateteni,” Gin luŋ ote ketogi i ot kol pi nino adek. A doŋ nino adek otum, Yucepu okobbigi ni, “Tim wunu kit man me ikwo wunu, pien an alworo Obaŋa. Ka ce wun jo ame yiwu cil ateni, wek wunu dano acel doŋ i buc kan, jo ocele wot ter kal baŋ jo odoŋ paco, me largi i kec, Gin jonnono wot kel ominwu atidi baŋa kan; mannono bino nyuto ni wun kara onwoŋo ikobo wunu kop ateni, bino miyo ibwot wunu i to.” Gin daŋ te timo amannono. Gin te ero kop kengi kengi ni, “Me ateni, myero oye ni kop oloowa pi ominwa, can ame obino i komwa-ni tye pire, pien kare a rik en bako doge baŋwa, wan oneno can i cunye, ote kwero winyo oko.” Reuben te kobbigi ni, “Rik mom akwenyorowu ni mom itim wunu balloro i kom atin ca? Ento wun ite kwero wunu oko, mannono en omio apido remo mere i komwa-ni.” Gin gigi mom oniaŋ ni Yucepu tye awinyo kopgi-nono, pien dano ame agonyo lebgi en onwoŋo tye i akinagi. Kare ame Yucepu oya oko i baŋgi, okok, te dok baŋgi bedo kedgi. Omako Cimeon i akinagi te tweyo i nyimgi. Yucepu te ciko ni pik kal poŋ iyi icaogi luŋ dok daŋ dwok lim a ŋat acel acel iyi cao mere, myero daŋ migi ginnoro me dwoko lao i yo. Magi-nono luŋ ote timo pirgi. Gin te tweyo kal i ŋe kanegi, ote doŋ wot gigi. Kare ame ŋat acel oyabo dog icao mere kan ame gin obuto iye, me emi kana mere cam, en oneno lim tye oketo i dog icao mere. En te kobbi omego mere ni, “Limma odwoko tye iyi cao, tye iye kan!” Gin ka owinyo, cunygi opoto meicel, ŋat acel acel te lokere baŋ awottere a kome amyel amyela, kun kobo ni, “Obaŋa kara otimowa aman piŋo ba?” Kare ame gin odwogo baŋ papagi Yakobo i lobo me Kanaan, gin otitte gin ducu ame otimere i komgi, kun okobo ni, “Dano ame obedo adwoŋ me lobo ca obedo kop kedwa i gero, olokowa odoko orot piny. Cite wan otitte ni, ‘Wan giwa obedo jo ame yiwa cil, wan mom obedo orot piny kadi acel; wan onwoŋo otye wan omego apar wie aryo ame papawa acel i lobo Kanaan.’ Eka dano-nono ame en adwoŋ a loo lobo-nu te kobbiwa ni, ‘Man en gin ame bino miyo an aniaŋ ni wun ibedo wunu jo ame yiwu cil ateni, wun wek wunu ominwu acel kan, ter wunu kal me koŋ iwot ilar wunu jo me paco i kec. Wot ikelu ominwu atidi baŋa kan, mannono bino miyo aŋeo ni wun kara mom orot piny, ento wun jo a yiwu cil, ate doŋ bino miyowu ominwu, dok ibino wunu doŋ cato wil i lobo man.’ ” Kare ame gin aonyo kal iyi caogi, ŋat acel acel onwoŋo lim ame rik eboo i dog icao mere; kare ame gin karacel kede papagi oneno lim ame oboo, lworo omakogi. Papagi Yakobo te kobo ni, “Ityeko wunu itinona oko do! Yecupu doŋ pe, Cimeon daŋ doŋ pe, dok imito tero wunu Benjamin; man luŋ cannere maka.” Reuben okobbi pappere ni, “Ibino neko itino awobena aryo-ni ka ce ineno ni an mom adwoggo en baŋi.” Yakobo ogamo kun kwero oko ni, “Woda gire mom bino wot karacel kedwu, pien ominnere doŋ oto oko, en kene a doŋ odoŋ. Ka ce ginnoro arac dok bino timere i wotwu-ni, ibino tero wunu lwar wia i lyel i twon cannoro a mom kobere.” Kare ame kec doŋ okur atek i lobo, kun daŋ doŋ gin ocamo kal a rik okelo i Miciri otum oko papagi okobbigi ni, “Dok wunu i Miciri iwot iwilliwa wunu cammoro aduno.” Juda te dok iye ni, “Dano ca rik ocikowa atek ni, ‘Pe ibino wunu neno waŋa ka ominwu atidi mom tye karacel kedwu.’ Doŋ ka iye ni ominwa wot karacel kedwa, wan obino wot; cite ka ce yin ikwero oko, wan giwa mom obino wot, pien dano ca rik ocikowa ni, ‘Pe ibino neno wunu waŋa ka ce ominwu atidi mom tye karacel kedwu.’ ” Icrael te kobo ni, “Kara itima wunu arac aman piŋo, me kobbi wunu dano-naca ni ominwu ocele tye?” Gin te kobbe ni, “Dano ca openyowa i peny apol meicel, i komwa kede i kom atekerewa, kun penyowa ni, ‘Papawu pwod tye kwo? Ominwu ocele tye?’ Wan giwa odokke i pennyere. Wan rik otwero ŋeyo ni en bino kobo ni, ‘Kel ominwu?’ ” Juda te kobbi pappere Icrael ni, “Ye awobi-ni wot keda, me wan oya owoti, me kur oto ento obed kwo, wan karacel kede yin kede itinowa, An amiye me gwoke, yin ibino penya pire. Ka ce an mom abino dwoggo en baŋi ate kete i ciŋi, ballere luŋ bino bedo i wia. Pien kono onwoŋo mom wan dok ogal, kono nyo doŋ odok kuno iryo.” Papagi Icrael te kobbigi ni, “Myero doŋ bed amannono ba, tim wunu kit man: terri wunu dano-nono nyig yennogo ame iyero wunu me mot, rwak iyi icaowu moo yat ecoma aduno kede moo kic daŋ aduno, odok kede murra, kede nyig yen ocele apapat. Ter wunu daŋ lim abup aromo wilo iryo kun idwoko wunu daŋ lim a rik gin orwako i dog caowu, pien kare ocele rik wigi owil awila, Ya iwot wunu doki baŋ dano-naca, iter ominwu daŋ. Obaŋa Won Twer Ducu myero miwu winyo i nyim dano-naca me gony ominwu ocele ca dwog karacel kede Benjamin. Ka ce atinna oto, nwoŋo an daŋ doŋ ato!” Gin te ya wot i Miciri kun otero mot, lim abup a romo wil iryo, kede Benjamin. Gin te wot cuŋ i nyim Yucepu. Ka Yucepu oneno ni Benjamin tye i akinagi, okobbi akan jami mere me ot ni, “Kel jonnono i ot, ite neko lee moro iyiki, pien gin bino cam karacel keda dyeceŋ.” Dano-nono te timo gin ame ocike tiyo; okelo jonnono i ot a Yucepu. Kare ame oterogi i ot a Yucepu, lworo omakogi atek, gin te kobo ni, “Man kop me lim a rik ket i dog icayiwa i kare ame ogeo bino kan, en omio okelowa kan, me enwoŋ kop i komwa, ete makowa doko opii mere kede mayo kanewa luŋ oko.” Koppono te miyogi wot baŋ akan jami me ot a Yucepu, ote wot kop kede i doggola. Gin ote kobbe ni, “Adwoŋ, wan rik obino kan pi wilo cam tyen me agege, ento kare ame wan otuno kan ame obuto iye, ogonyo dog cayiwa ote nwoŋo limwa luŋ tye ame moro mom orwenyo i dog icao a ŋat acel acel, oman daŋ tye odwoggo luŋ. Okelo daŋ dok lim ocele me wilo cam. Pe oŋeo.” En te gamo ni, “We wunu giwu ame cunywu opye, kur ibed wunu kede lworo moro; gwok onyo Obaŋawu kede Obaŋa a papawu en oketo lim iyi icayiwu. An gira rik agamo limwu.” En te kelo Cimeon baŋgi. Dano-nono te terogi i ot a Yucepu te miyogi pii me lwoko tyengi, te daŋ miyo kanegi cam. Gin te yiko motgi me amia baŋ Yucepu ka bino dwogo baŋgi otyeno, pien gin onwoŋo owinyo ni gin ocam kuno. Kare ame Yucepu odwogo paco, gin otero motgi baŋe ote ryebere piny i nyime. Yucepu te penyogi ka ce gin otye aber, kun daŋ medo ni, “Papawu, adwoŋ oti a rik ikobo wunu ca tye aber? Pwod kwo?” Gin te gamo ni, “Amironi ame papawa tye aber, pwod kwo.” Gin te kulo wigi piny, ote ryebere piny i nyime. En te tiŋo waŋe neno ominnere Benjamin, atin tottere, te penyogi ni, “Man ominwu me cogo arik ititta wunu pire-nie? Obaŋa omii winyo atinna!” Yucepu te ru wot oyotoyot oko, pien cunye onwoŋo tye i kom ominnere meicel. Owoto te wot yenyo kan ame myero ekok iye, te donyo iyi icika mere wot kok iye. Ologo waŋe te dwogo baŋgi. Odio cunye te kobo ni, “Tok doŋ cam.” Ote toko cammere pat, me omego mere daŋ pat, kede mea a jo Miciri a rik cemo kede daŋ otoko megi pat, pien jo Miciri rik mom cemo i jo Eburania; pien mano me kwer baŋ jo Miciri. Gin te bedo piny i nyime kun olubere i ditogi me anywalli; gin te bedo nenne kengi kengi kun owuro. Ote pokkigi cam kun otoko i meja a Yucepu, ento mea Benjamin ote toko adwoŋ okato me owote mere oko tyen abic twal. Gin rik ote bedo i Yucepu i yomcuny kun omatte. Yucepu ociko akan jami me ot ni, “Pik cam adwoŋ, poŋ icao a jonnono, ame gin twero yeyo; dok daŋ ket lim a ŋat acel acel i dog icao mere. Ket daŋ ikopona me ryal i dog icao awobi atidi, karacel i limmere me wilo kal.” En otio kit ame Yucepu okobbe kede. Odiko ame piny doŋ oru oko, olwoko jonnono owoto i kanegi. Kare ame gin doŋ oya i boma cite mom ru owoto abor wok, Yucepu okobbi akan jami mere ni, “Lub doŋ yo jo-nu, ka imakogi, kobbigi ni, ‘Piŋo kara iculo wunu gin aber kede gin arac? Piŋo ikwalo wunu ikopo ryalla oko? Mannono mom en ikopo ame rwotta tio kede me mat? Ikopo tyettere daŋ mom ennono? I timo wunu rac me timo wunu gin acalo man.’ ” Kare ame omakogi iyo, okobbigi koppono. Gin ogamo doge ni, “Ŋo omio adwonwa okobo kodi kop man? Wan omironi pe otwero timo tim acalo man! Koŋ inen lim ame rik wan onwoŋo i dog icaowa, rik obin odwogo baŋi i Kanaan twal; wan dok otwero kwalo ryal onyo jabu i ot adwoŋŋi niŋo? Adwoŋ, ka ce ibino nwoŋo tye baŋ amironi moro iyi akinawa kan, myero en to, dok wan daŋ obino bedo opiini.” En ogamo ni, “Wek wunu koŋ doŋ bed kit ame ikobo wunu-nono: ŋat ame abino nwoŋo baŋe, en bino bedo opiina, ento jo ocele balloro gire bino bedo mom i wigi.” Oyotoyot ŋat acel acel te ru cibo cao mere piny, te daŋ ru yabo doge. En te cako yenyo ikopo kun cako i kom awobi adwoŋ dwogo kede piny naka i kom awobi atidi, cite te nwoŋo ikopo i dog icao a Benjamin, Gin te yeyeco boŋnigi, ote tweyo yecgi i ŋe kanegi, ote dok cen i boma. Ka Juda kede omego mere odok cen i ot a Yucepu, gin oŋuke kuno, ote ony ducu ryebere i nyime. Yucepu te kobbigi ni, “Piŋo kara itimo wunu kodi tim acalo man? Mom iŋeo wunu ni dano acalo an-ni ŋeo tyet?” Juda te gamo ni, “Amaa, adwoŋ, kara wan otwero dok kobbi ŋo ba? Gin aŋo ame dok otwero kobo? Otwero kwanyo kop i komwa niŋo? Amaa adwoŋwa, Obaŋa gire doŋ otyeko nwoŋo bal oko i komwa wan omironi, wan luŋ doŋ opiini karacel i ŋat ame onwoŋo ikopo iyi icao mere.” Cite Yucepu te gamo ni, “An gira mom atwero timo amannono kadi acel! Ŋat ame onwoŋo ikopo baŋe, en ame bino bedo opiina, ento wun giwu wot baŋ papawu i kuc.” Juda owoto baŋ Yucepu te kobbe ni, “Adwoŋ, tim ber iye an amironi akob kedi kopporo anonok, cunyi kur waŋ i koma an amironi atek ateka, pien yin i cal i Parao ikome. Adwoŋŋa rik obin openyowa ni, ‘Papawu tye, onyo ominwu?’ Wan ote gamo dogi ni, ‘Papawa tye doŋ oti oko, ominwa daŋ tye obedo atinnere me cogo, ame en onywalo i tio mere; ominnere me toto yam oto oko, en doŋ odoŋ kene, dok pappere mare.’ Rik yin ite kobbiwa ni, ‘Wot ikele wunu baŋa me anene.’ Cite wan ote kobbi ni, ‘Awobi atidi ca mom twero ya i ŋet pappere, ka opokere i pappere, pappere to oko.’ Ento yin rik ite kobbiwa ni, ‘Ka ce ominwu atidi mom obino kan karacel kedwu, mom dok ibino neno wunu waŋa.’ Kare ame wan odok paco baŋ papawa ame en amironi, wan otitte kop ame yin ikobo, adwoŋ. Kare ame papawa okobbiwa ni, ‘Wot dok iwilla wunu cam aduno’, wan okobbe ni, ‘Wan giwa mom odok. Ka iye ominwa atidi owoto karacel kedwa, wan obino dok pien mom obino neno wan dano ca ka ominwa atidi mom tye i akinawa.’ Amironi papawa te kobbiwa ni, ‘Wun iŋeo wunu ni dakona onywalo itino awobe aryo; acel oto oko, an yam doŋ akobo ni, Ateteni lee tim yam doŋ okikilo gire oko, mom dok abino nene atwal. Ka dok ikwanyo wunu man oko i baŋa, eka ginnoro arac te timere i kome, ibino tero wunu lwar wia i lyel i twon cannoro a mom kobere.’ Kwo mere ocuŋ i kom atin awobi-ni, doŋ ka ce abino dok baŋ amironi pappa aboŋo atin awobi-ni i akinawa, ka bino neno ni en mom tye i akinawa, en bino to oko, wan obino tero lwar wi papawa i lyel i twon cannoro a mom kobere. An rik ate miye baŋ pappa me gwoko atin man, kun akobbe ni, ‘Ka ce an mom abino dwoggo en baŋi, ballere bino bedo i wia i nyim pappa pi kare me kwona luŋ.’ Adwoŋ, man en gin omio akwai, tim ber iye an amironi adoŋ kaka awobi man, me an abed opiini; me atin man luny dok paco karacel kede omego mere. Pien atwero dok baŋ pappa paco niŋo ka atin awobi-ni mom tye?” Yucepu onwoŋo mom doŋ romo diyo cunye i nyim lwak jo ame ocuŋ i laŋete: omio en oredo kun kobo ni “Mi jo luŋ ya oko i baŋa wot oko teŋe.” Mannono te miyo ŋattoro mom dok obedo tye i kare ame Yucepu nyutte kene baŋ omego mere. En ogeo kok atek meicel, ame jo Miciri kede jo i paco a Parao daŋ owinyo. Yucepu te doŋ kobbi omego mere ni, “An a Yucepu; pappa pwod tye kwo?” Omego mere te liŋ aliŋa pien koppere opoo komgi atek i nyime. Yucepu te kobbi omego mere ni, “Tim wunu ber inokka wunu aceggi.” Gin te nokke ceggi. Okobbigi ni, “An ominwu Yucepu ame yam icato wunu i Miciri-ni. Kur doŋ ibed wunu i waŋcunnyoro, onyo kede waŋ yiccoro i komwu kenwu kenwu pi cata kan, pien Obaŋa gire a rik ocwaa i nyimwu me alar kwo a joo Pien aman doŋ otyeko mwakki aryo, pwod dok odoŋ mwakki ocele abic ame jo mom bino pur kadi kayo ginnoro. Obaŋa ocwala i nyimwu me gwokowu wun jo ame bino doŋ i wi lobo, pi laro kwo a jo apol ame bino bwot. Pien mom wun en a rik icwaa wunu kan ento Obaŋa gire. Obaŋa doŋ omia adoko pappo baŋ Parao, an adwoŋ ame loo ode kede lobo mere luŋ. Wot wunu oyot, iru wunu dok baŋ papa, ikobbe wunu ni, ‘Wodi Yucepu okobo ni, Obaŋa doŋ otyeko keto me bedo aloc a jo Miciri luŋ ru doŋ bino baŋa kan. Ibin ibed cok keda kan i lobo me Gocen, yin karacel kede itinoni kede ikwai ducu, anaka limmi luŋ kede jamini ducu, An abino piti kuno, pien mwakki me kec pwod odoŋ kany twal i nyim; me yin kede jo me paconi, kede gin ame itye kede luŋ, mom inen wunu can.’ Wun doŋ ineno wunu i waŋwu, ominna Benjamin daŋ doŋ oneno i waŋe ni an en ame akop kedwu-nono ikokome. Wun doŋ myero iwot ititti wunu pappa kit kwogo ame an atye kede i Miciri, kede ginnoro luŋ ame doŋ ineno wunu. Wot wunu oyot, i ru kela wunu pappa kan.” Eka en te kwako ŋut ominnere Benjamin kun kok, ominnere Benjamin daŋ te kwako ŋute kun kok. Yucepu te noto lem omego mere luŋ kun kok, pig waŋe cwer i komgi, eka omego mere te cako kop kede. Kare ame kop man owinyere i ot a Parao ni, “Omego a Yucepu obino,” koppere oyomoro cuny Parao kede omiro mere atek meicel. Parao te kobbi Yucepu ni, “Cik omegoni ni, ‘Tim wunu kit man: twe yecwu i ŋe leyiwu, idok wunu i lobo me Kanaan, wot ikel wunu papawu kede jo me pacowu, ibin wunu baŋa; an abino miyowu jami abeco ame tye i lobo Miciri, ibino camo wunu cam abeco ame tye i lobo-ni.’ Cikgi daŋ dok otim kit man, ‘Ter wunu daŋ gadigadi mogo i Miciri me loro itinowu kede monwu, me ikel wunu papawu, ibin wunu kan, Kur ipar wunu pi jamiwu, pien jami abeco luŋ me Miciri bino bedo megwu’.” Awobe Icrael daŋ te tiyo kittono. Yucepu omiogi gadigadi kite ame abaka ocikogi kede, te daŋ miyogi ginnoro me dwoko lao iyo. Te dok miyo ŋat acel acel boŋŋi abeco me aruka i nino adoŋo; cite Benjamin ote miyo cekel me ryal mia adek kede boŋŋi abeco me nino adoŋo. Te cwayo baŋ pappere jami magi: kane apar ame oyeo jami abeco me Miciri, kede megi kane apar ame oyeo kal kede cam, kede dok cammogo ocele me dwoko lao iyo, pi papagi. Yucepu te doŋ cwayo omego mere wot. A doŋ gin aya, Yucepu te cikogi ni, “Kur ida wunu i yo ba.” Gin te ya oko i Miciri, dwogo baŋ papagi i Kanaan. Gin te titte ni, “Yucepu pwod tye kwo, en aloc me Miciri luŋ.” Tipo kome te riŋo oko, pien onwoŋo mom ru oye kopgi. Cite i kare ame gin doŋ otitte kop luŋ i kom Yucepu, kede kite ame ocikogi kede, kede dok ka oneno gadigadi ame Yucepu ocwao me tiŋe, tipo kom papagi doŋ te cako dwogo. Icrael doŋ te kobo ni, “Doŋ otum, woda Yucepu kara pwod tye kwo; abino wot nene a mom ru ato.” Icrael te cako wot kun tero jami mere luŋ a rik etye kede. Obino i Beer-ceba omio iye gi-tum me yalo Obaŋa a pappere Icaka. Obaŋa te kop Icrael i lek kun lwoŋe ni, “Yakobo, Yakobo.” En te gamo ni, “An ene.” Okobbe ni, “An Obaŋa, Obaŋa a pappi, kur ilwor wot i Miciri, pien abino miyo idoko rok adwoŋ kuno. Abino wot kedi naka i Miciri, dok daŋ abino dwoggo yin; ciŋ Yucepu bino wumo waŋi.” Yakobo te doŋ ya wot oko i Beer-ceba, kun awobe mere tiŋe kede gadigadi a rik Parao ocwao me tiŋe, karacel kede itino atino, kede mon, Gin otero limgi kede jamigi luŋ a rik gin onwoŋo i lobo me Kanaan, owoto kede i Miciri; gin otero Yakobo kede itino mere kede ikwae ducu. Awobe me re kede awobe awobe mere, kede anyira mere, kede anyira awobe mere. Itino mere kede ikwae, gin luŋ rik oterogi i Miciri. Man nyiŋ ikwae Icrael a rik owoto i Miciri, Yakobo kede awobe mere: atin a Yakobo me kao, Reuben. Itino a Reuben ene: Kanok, Pallu, Kejeron, kede Karmi. Itino a Cimeon ene: Jemeul, Jamin, Okad, Jakin, Jokar kede dok Caul, ame obedo awobi a dako me Kanaan. Itino a Levi ene: Gercon, Kokat, kede Merari. Itino a Juda ene: Er, Onan Cela, Perej, kede Jera (ento Er kede Onan te to oko i Kanaan). Itino a Perej ene: Kejeron kede Kamul. Itino Icakar ene: Tola, Puwa, Iob, kede Cimeon. Itino a Jabulon ene: Cered, Elon, kede Jaleel. Magi-nono gin itino awobe ame Lea onywalo baŋ Yakobo i Paddan-aram karacel i nyare Dina; wel itino awobe kede anyira onwoŋo romo pyeradek wie adek. Itino a Gad ene: Jipion, Kaggi, Cuni, Ejibon Eri, Arodi, kede Areli. Itino Acer ene: Imuna, Icva, Icvi, Beria kede amingi Cera. Itino a Beria ene: Keber kede Malkiel. Magi itino a Jilpa, aŋeca ame Laban rik omio baŋ nyare Lea. En onywali Yakobo itino apar wie abicel. Itino a Lakeri dako a Yakobo ene: Yucepu kede Benjamin. Yucepu onywalo Manace kede Epraim i lobo me Miciri, ame Acinaci nyaka a Potipera alamdog me On onywalo. Itino a Benjamin ene: Bela, Beker, Acibel, Gera, Naaman, Eki, Roc, Muppim, Kuppim kede Arud. Magi-nono gin itino ame Lakeri onywalo baŋ Yakobo; itino awobe luŋ apar wie aŋwen. Wot a Dan obedo Kucim. Itino a Naputali ene: Jajeel, Guni, Jejer kede Cillem. Magi gin itino ame Bila onywalo baŋ Yakobo, aŋeca ame Laban rik omio nyare Lakeri. Itino awobe luŋ rik gin abiro. Jo ot a Yakobo luŋ ame rik en owoto kedgi i Miciri, a rik itino mere kede ikwae ikokome, kun mom okwano iye mon itino awobe a Yakobo, gin luŋ rik oromo pyerabicel wie abicel. Itino awobe ame rik Yucepu onywalo i Miciri rik tye aryo. Jo ot a Yakobo a rik owoto i Miciri luŋ rik doŋ oromo pyerabiro. Yakobo ocwao Juda i nyim, baŋ Yucepu, me nyuttigi yo awoto Gocen; gin te tuno i Gocen. Yucepu te yiko gadigadi mere me wot rwatte i pappere i Gocen, eka te wot nyutte kene baŋ pappere, te kwako ŋute pi kare alalac kun kok. Icrael okobbi Yucepu ni, “To gire doŋ bin, pien doŋ aneno waŋi, aniaŋ doŋ ni kara pwod itye kwo.” Yucepu te kobbi omego mere kede jo me ot a pappere ni, “Adok, awot titti Parao, abino kobbe ni, ‘Omegona kede jo me ot a pappa a rik tye i lobo Kanaan, doŋ otyeko bino baŋa. Jonono gin okwat, pien yam gin gigi okwat cakere con, dok aman daŋ gin obino i limgi kede jamigi luŋ.’ Ka Parao bino lwoŋowu, te penyowu ni, ‘Wun itio wunu tic aŋo?’ Wun myero idokke wunu ni, ‘Omironi okwat cakere con i kare me tinowa tuno kede atot onyoni, wan karacel kede kwariwa.’ Man bino miyo ibedo wunu i Gocen; pien jo ame okwat luŋ obedo me kwer baŋ jo Miciri.” Yucepu te wot titti Parao ni, “Pappa kede omegona, karacel i limgi luŋ, gin doŋ obino oko i lobo Kanaan; aman doŋ gin tye i Gocen.” En otero jo abic i akina omego mere, onyutogi baŋ Parao. Parao openyogi ni, “Wun itio wunu tic aŋo?” Gin ogamo ni, “Wan omironi wan okwat gire bala kwariwa.” Gin dok te kobbi Parao ni, “Wan doŋ obino me bedo i lobo-ni pien kan ame omironi myero kwa iye limgi mom tye; kec doŋ onwoŋo okur atek meicel i Kanaan, aman doŋ timwa ber, iwek wan omironi obed i Gocen.” Parao te kobbi Yucepu ni, “Pappi kede omegoni doŋ obino baŋi. Lobo Miciri tye i ciŋi, ket pappi kede omegoni bed i lobo aber akato luŋ; migi obed i Gocen. Ka ce iŋeo jo moro i akinagi ame ryek, migi obed jo ame gwoko limma.” Yucepu dok te kelo pappere i nyim Parao, Yakobo te lammi Parao winyo. Parao te penyo Yakobo ni, “Yin ce doŋ iri i lobo mwakki adi?” Yakobo ogamo ni, “An doŋ a perakino i lobo mwakki mia acel i pyeradek, mwakana luŋ ame abedo kede kwo i lobo pwod nok dok daŋ opoŋ i can; mom rom i mwakki ame kwarina ori kede i lobo kun oloŋo piny.” Yakobo te lammi Parao winyo, te ya oko i nyim Parao. Yucepu te miyo pappere kede omego mere kabedo i lobo Miciri, kan ame ber meicel kato kan ocele, i Ramecec, kite ame Parao ociko, kun miogi lobogi Yucepu te poko cam baŋ pappere, omego mere, kede jo me ot a pappere, kun lubo wel jo ame gin tye kede. I kare-nono onwoŋo cam doŋ mom i lobo luŋ, kec onwoŋo doŋ okur atek meicel, man omio kec onyono jo luŋ me Miciri kede me Kanaan. Yucepu ocoko lim luŋ ame tye i Miciri kede i Kanaan, ame jo obedo wilo i cam, te tero luŋ baŋ Parao. Kare ame lim doŋ otum oko i ciŋ jo Miciri kede Kanaan, jo Miciri luŋ te ciro baŋ Yucepu, te kobbe ni, “Miwa cam; wan otwero to niŋo kun yin inenowa? Pien limwa doŋ otum oko.” Yucepu te gamo ni, “Miwa wunu lim akwo me an aluny miyowu cam, ka centewu doŋ otum oko.” Gin te cako kelo lim akwo baŋ Yucepu, Yucepu te lunyo miyogi cam pi aguraguragi, rommigi, dokgi kede kanegi. Yucepu te miyogi cam i mwakanono, pi limgi luŋ aluŋa. A doŋ mwaka-nono otum, gin dok odwogo baŋe i mwaka a lubo mannono, ote kobbe ni, “Adwoŋwa, wan mom doŋ otwero munŋi kopporo kadi acel, limwa acalo cente doŋ otum oko iweŋ, limwa akwo daŋ doŋ odoko me adwoŋwa oko, ginnoro ame doŋ odoŋ i ciŋwa mom tye kadi acel kono ka komwa kede lobowa. Wan karacel i lobowa myero oto kun yin itye inenowa anena? Yin myero i wilwa i cam karacel kede lobowa daŋ, wan giwa oye bedo opii a Parao. Miwa koti me kur oto ento obed kwo; me lobo kur doŋ nono.” Mannono omio Yucepu owilo lobo me Miciri luŋ obedo mea Parao, pien jo Miciri luŋ ocato pottigi oko, pi kec ame onwoŋo rik okur atek. Lobo luŋ te doko doŋ mea Parao. Jo luŋ doŋ te doko opii, cakere i ŋet lobo tuŋ cel tuno kede tuŋ ocele. Lobo olamdog keken en a rik odoŋ a mom owilo, pien olamdog rik onwoŋo tye i camgi ame Parao en ame mio; gin obedo camo gin ame Parao miogi nono, en omio mom ote cato lobogi. Yucepu dok te kobbi jo ni, “Nen, i kare ni an doŋ awilowu kede lobowu ducu pi Parao. Aman doŋ gam wunu koti icoo wunu. I kare me kac, ibino wunu miyo acel me abic me gin ocek baŋ Parao, aŋwen me abic bino bedo megwu, me koti me acoa i pottiwu, kede me acamawu, wun karacel i jo me udiwu kede itinowu.” Gin te gamo ni, “Adwoŋ, doŋ ilaro kwowa oko, berwa en a doŋ myero nen i nyimi, wan giwa doŋ obino bedo opii a Parao.” Yucepu omio man odoko cik i lobo Miciri naka atot onyoni, Parao pwod tero acel me abic me ginnoro luŋ ocek. Lobo olamdog keken en ame mom odoko mea Parao. Icrael obedo i lobo Miciri, i lobo me Gocen, limmere omedde, onya apol meicel kuno. En obedo kuno mwakki apar wie abiro, mannono omio mwakki a Yakobo luŋ, ame en ori kede i lobo, oromo mia acel kede pyeraŋwen wie abiro. A doŋ kare me to Icrael ceggi, olwoŋo wode Yucepu te kobbe ni, “Ka doŋ berra onen i nyimi, rwak ciŋi i te amurana wek icikere me bedo i gen kede ateni i koma. Kur iyika a Miciri, ento imia abut karacel kede kwarina; tiŋ koma oko i Miciri iwot iyika kan ame oyikogi iye.” Yucepu te gamo ni, “Abino tiyo kit ame ikobo-nono” Icrael dok te kobo ni, “Aco doŋ kwoŋ ba.” Yucepu te kwoŋ, eka Icrael te kulo wie piny i wi tanda mere. Icennere ote titti Yucepu ni, “Nen, pappi kome lit;” en te tero itino mere aryo Manace kede Epraim. Ote kobbi Yakobo ni, “Wodi Yucepu obino baŋi.” Icrael te cukere ya malo bedo i wi tanda. Yakobo te kobbi Yucepu ni, “Obaŋa Won Twer Ducu yam onen baŋa i Luj, i lobo Kanaan, te miya iye winyo, kun kobba ni ‘Nen, abino miyi inya, imedde apol meicel, dok abino miyi idoko lwak rok apol, abino miyo lobo man baŋ ikwai kede baŋ jo ame bino lubi, me bedo megi atwal.’ Doŋ aman, itino awobeni aryo-ni, ame inywalo i Miciri kun an mom ru abino baŋi i Miciri, gin daŋ bino bedo mega; Epraim kede Manace, gin luŋ obino bedo itinona, a rom aroma kom i Reuben kede Cimeon. Itino ame ibino nywalo iŋegi bino bedo megi giri. Gin obino nwoŋo lobo me alea i wi omegogi. Pien i kare ame rik aya i Paddan-aram, cunya obin owaŋ atek pien Lakeri oto oko iyo, kun onwoŋo Eparat pwod bobor, ate yike i yo ame woto Eparat (ame en Beterekem).” Ka Icrael oneno itino awobe a Yucepu, openyo ni, “Man kara jo mene nie?” Yucepu te gamo dog pappere ni, “Magi-nono awobena ame Obaŋa omia kan.” Yakobo te gamo ni, “Kelgi baŋa kan me alammigi winyo.” I kare-nono onwoŋo Icrael doŋ oti, waŋe daŋ doŋ ocoro oko, mom doŋ neno piny. Kare ame Yucepu doŋ okelogi aceggi, en onoto lemgi, kun kwakogi kede bade. Icrael okobo baŋ Yucepu ni, “Onwoŋo yam atamo ni mom dok abino neno waŋi; nen, Obaŋa dok omio aneno anaka waŋ itinoni.” Yucepu te miyogi jer i ŋet coŋe teŋeteŋe, eka en te ryebere piny i nyim Yakobo. Yucepu te mako ciŋgi gin aryo luŋ terogi aceggi i Yakobo, kun Epraim tye i ciŋe tuŋ cem, ame otikere kede ciŋ Icrael tuŋ cam, kede Manace i ciŋe tuŋ cam, ame otikere kede ciŋ Yakobo tuŋ cem. Icrael te tiŋo ciŋe tuŋ cem keto i wi Epraim atin atidi, kede ciŋe tuŋ cam i wi Manace, kun luluco ciŋe aluca, pien Manace en onwoŋo obedo atin kao. Olammi Yucepu winyo kun kobo ni, “Obaŋa ame yam kwariwa Iburaim kede Icaka obedo wot i nyime, Obaŋa ame obedo tela pi kare me kwona luŋ, tuno kede naka atot anyoni, amalaika ame yam olara i gin arac, myero mi awobe-ni winyo; me lwoŋ nyiŋa pirgi, kede nyiŋ kwarona Iburaim kede Icaka; me gin nya atek meicel, odok lwak apipim i wi lobo.” Ka Yucepu oneno ni pappere olunyo keto ciŋe tuŋ cem i wi Epraim, cunye mom obedo yom. En omako ciŋ pappere, me ekwany oko i wi Epraim, eket i wi Manace, En okobbi pappere ni, “Mom amannono adwoŋ, pien man en atin kao, ket ciŋi me tuŋ cem i wie.” Cite pappere te kwero oko, kun kobo ni, “Atinna, an aŋeo; en daŋ bino bedo rok, en daŋ bino doko dwoŋ, cite ominnere atidi bino bedo dwoŋ kate oko, ikwae bino doko lwak rok apol” En te lammigi winyo kun kobo ni, “Jo Icrael bino lamo winyo i nyinwu ni, ‘Obaŋa omi ibed bala Epraim kede Manace’ ”; Yakobo oketo Epraim i nyim Manace kittono. Icrael okobbi Yucepu ni, “Nen ba, an doŋ aceggi to, cite Obaŋa bino bedo kedwu, dok daŋ dwokowu i lobo a kwarowu. Dok atyeko poko kor kidi amio baŋi adwoŋ akato omegoni ducu, ame rik amao i ciŋ jo Amor, i pala lweny kede atero.” Yakobo olwoŋo itino awobe mere te kobbigi ni, “Cokere wunu karacel, me ati tiwu gin ame bino timere i komwu i kare ame tye i nyim. “Cokere wunu iwiny wunu, wun awo be a Yakobo, winy wunu kop a papawu Icrael. Yin Reuben ibedo atin kaona, yin itekona, i nyig tekona me agege, yin iloo pi wakere kede pi twer. Pi corre bala pii, mom ibino loyo pien yin iyito naka i wi kabuto a pappi; itimo-gu tim me kir iye, iyito kom i wi tandana! Cimeon kede Levi gin omego; pala lwenygi en a bino bedo gi-lwenygi. Tipona, kur iribere kedgi i cokeregi, yin cunya daŋ, kur inotte kedgi; pien akemogi omio oneko jo apol meicel, dok daŋ oŋoŋolo-glu odone a twoni me akaka. Akemogi-nono cen oko, pien gwa; akemogi oceno oko, pien ger! Abino popokogi i akina jo a Yakobo, abino keketogi atata i akina jo Icrael. Juda, yin omegoni bino paki; ciŋi bino bedo i ŋut okworri; itino a pappi bino ryebere piny i nyimi. Juda obedo atin eŋatu; atinna, iya mwodo lee, ite yito malo. En onyoŋo piny, obuto calo eŋatu, acalo min eŋatu, na kara a cunye tek me tuge? Abiro me loc mom bino ya i baŋ Juda, abiro loc mom bino ya i akina tyene, ituno ka wonnere bino tuno; en ame rok luŋ bino winyo koppere. En tweo atin kana mere i kom olok, atin twonnere tweo i kom olok aberrere, atin twonnere tweo i kom olok aberrere, en lwoko rukkere i kono olok. Kono olok bino miyo waŋe bok pee, cak bino miyo lake doko tar kia. Jabulon bino bedo i dog nam, en bino doko ka dokoro a mele, wan lobo mere bino bedo Cidon twal. Icakar en kana atek, buto i akina anok rommi; oneno ka weo-nono ber, lobo mere daŋ ber; omio en onyogere me tino yec, odoko opii ame odio i tic atek. Dan bino ŋolo kop i kom jo mere acalo ŋat acel i akina atekere me Icrael. Dan bino bedo twol i ŋet yo, codocodo i dye yo, en bino toŋo opuny aguragura, kun mio ŋat obedo i wie rette ataro, Akuro lari giri, ama Rwot. Oyak jo bino yako Gad, cite Gad daŋ bino ryemogi, te yakogi. Acer bino camo moo, en bino kelo cam ame mit oporre pi aloc. Naputali obedo min atil ame otwaro, en kobo kop amit. Yucepu en jaŋ yat onyak, en jaŋ yat onyak meicel i ŋet akoŋ, jaŋe jany lak i cel. Wegi atero oromo kede romo agwa meicel, gin ocelo en dok daŋ ololle meicel, ento akud atero mere ocuŋ gire mot ikiŋ, omio ciŋe odoko amit oko, pi ciŋ Twon Ateko a Yakobo, pi nyiŋ akwat rommi, ame Kidi Icrael, pi Obaŋa a pappi ame bino konyi pi Obaŋa Won Twer Ducu ame, bino winyo. Winyo ame ya i polo, winyo ame ya i kut atut oyabere i te lobo, winyo ame ya i tuno kede winyo ame ya i yic. Winyo a pappi dwoŋ, loo winyo a kiddi ame parakino nakanaka oko, kede jami abeco a tye i wi tur a ri nakanaka. Gin luŋ bed i wi Yucepu, kede i tur nyime, en ŋat a rik opokere oko i akina omego mere, Benjamin obedo epet ager, camo lee ame oneko odiko, otyeno poko lim ame omao.” Magi-nono gin atekere Icrael apar wie aryo; kop ame papagi okobbigi ennono, i kare ame lammigi winyo, kun lammi ŋat acel acel gummere otike. Yakobo te doŋ cikogi ni, “An doŋ adok nywako kabedo i kwarina, myero iwot iyika wunu baŋ kwarina i gorogoro ame tye i poto a Epron, dano me Kitti, i gorogoro a tye i Makpela tuŋ kide me Mamre, i lobo me Kanaan, a rik Iburaim owilo karacel kede poto, i baŋ Epron, dano me Kitti, te doko mere me yik. Rik oyiko Iburaim kede dako mere Cara kuno. Icaka kede dako mere Lebeka daŋ oyiko kuno, an daŋ ayiko Lea kuno. Poto-nono kede gorogoro a tye iye yam owilo i baŋ jo Kitti.” Kare a Yakobo otyeko ciko awobe mere odolo tyene malo i tanda te omo cunye tyen me agikki mere, te to oko; owoto onywako kabedo i kwari mere. Yucepu te rette i nyim pappere, okok i pig waŋe kun noto leme. Yucepu ociko omiro mege a daktar me wiro kom pappere i yat talo kom; odaktar daŋ te wiro kom Icrael. Wiro kome otyeko nino pyeraŋwen, ame en kit kare a myero wir kede kom dano oto, ka ce awiro i yat me talo kom. Jo Miciri okoke nino pyerabiro. Kare ame nino me kwero cola doŋ otum, Yucepu okobbi jo a Parao ni, “Ka ce berra doŋ onen i nyimwu, tim wunu ber ikobbi wunu Parao ni mano, ‘Papa omio akwoŋo kun akobo ni, An doŋ aceggi to, ibino yiko wunu koma i lyel ame an ikoma rik akunyo i lobo me Kanaan.’ En omio akwai ni itim ber iye awot ayik pappa, eka ate dwogo.” Parao te gamo ni, “Ber, wot iyik pappi, kit acalo en rik omi ikwoŋo akwoŋa-ni,” Yucepu te wot yiko pappere, owoto karacel omiro a Parao ecipan, odoŋe me ot a Parao kede odoŋe me Miciri luŋ, kede jo me ot a Yucepu, kede omego mere, kede jo me ot li pappere luŋ, itino keken kede limgi luŋ en ame odoŋ i Gocen. Owoto i gadigadi ecipan, kede wegi aguragura, karacel kede lwak jo ecipan. Kare ame gin otuno i laro moro me dino kal ame tye i Atad loka Jordan, gin okok kuno kun otye i waŋcuny kede kumo adwoŋ meicel; ote kwero cola nino abiro, Ka wegi lobo-nono, ame gin jo Kanaan oneno kwero colagi i laro moyo kal, ame tye i Atadi, gin okobo ni, “Man kwero cola me waŋcuny meicel baŋ jo me Miciri.” Mannono omio nyiŋ kabedo-nono olwoŋo ni, Abel-micraim; ame tye loka Jordan. Awobe mere te timo jami luŋ kit a rik en ocikogi kede, pien gin otero kome i lobo Kanaan, ote daŋ yiko i gorogoro ame tye i poto i Makpela tuŋ kide me Mamre, ame rik Iburaim owilo i baŋ Epron, dano me Kitti, karacel kede poto, me bed me yik. A doŋ Yucepu otyeko yiko pappere, en odok i Miciri karacel omego mere, kede jo luŋ a rik owoto kedgi me yiko pappere. Ka omego a Yucepu oneno ni papagi doŋ oto oko, gin te tamo ni, “Gwok onyo Yucepu doŋ bino cako dagowa, te culo kwor i komwa pi roccoro luŋ a yam wan otimo i kome.” Omio gin te cwayo kwena baŋ Yucepu kun okobo ni, “Pappi i kare ame mom ru oto ocikowa ni, ‘Kobbi wunu Yucepu tim omego mere kica, timgi kica i bal luŋ ame rik gin otimo i komi, pien gin rik otimmi rac!’ Aman okwai, tim omiro Obaŋa a pappi kica.” Kare ame gin tye a kop kede, Yucepu okok, Omego mere owoto te wot ryebere piny i nyime, ote kobbe ni, “Nen ba, wan giwa doŋ wan omironi,” Cite Yucepu te dokkigi iye ni, “Kur ibed wunu kede lworo moro; an abedo Obaŋa bo? Wun onwoŋo imito wunu ti mo gin arac i koma, cite i tuŋ baŋ Obaŋa, en oyiko timo gin aber, ame omio jo apol obedo kwo, kite acalo gin tye kede-ni, Pi mannono, kur ibed wunu kede lworo moro kadi acel; an abino pitowu karacel kede itinowu luŋ.” Koppono te miyo cunygi dwogo, yigi daŋ doŋ te bedo ayom. Yucepu rik obedo i Miciri kittono, en kede jo ot a pappere. Yucepu ori i lobo mwakki mia acel kede apar. En oneno itino Epraim, tuno nakai kom ikwae me adekkere. Itino a Makir wot a Manace daŋ onywalogi ame Yucepu tye kun gamogi acalo mege. Yucepu okobbi omego mere ni, “An doŋ aceggi to; ento Obaŋa bino limowu, dok bino kwanyowu oko i lobo man, bino dwokowu i lobo ame en rik okwoŋo iye baŋ Iburaim kede icaka kede Yakobo,” Yucepu te miyo awobe Icrael kwoŋ kun okobo ni, “Obaŋa bino limowu, eka ite tero wunu cogona oko i kan.” Yucepu oto ame mwaka me dittere doŋ oromo mia acel kede apar. Owiro kome i yat talo kom, ote pyele i canduk yik i Miciri. Nyiŋ awobe Icrael ame obino i Miciri karacel i Yakobo, kun ŋat acel acel bino i jo ode, gin ene: Reuben, Cimeon, Levi, Juda, Icakar, Jabulon, kede Benjamin, Dan kede Naputali, Gad kede Acer. Itino a Yakobo kede ikwae ikokome luŋ rik romo pyerabiro, kun Yucepu a rik doŋ tye i Miciri day tye iye. Icennere Yucepu kede omego mere luŋ te to oko, karacel kede olwakkigi luŋ. Cite ikwae Icrael onya, omedde atek meicel, ote poŋo lobo oko. Icennere abaka anyen a mom ŋeo Yucepu te cako loyo Miciri. En te kobbi jo mere ni, “Jo-nie, koŋ inenu ba jo Icrael, aman opol dok daŋ otek meicel, oloowa oko. Biye oŋol wunu ryeko moro me tic kedgi, ogeŋ wunu nyagi oko. Pien joni ka monnyoro bino cobowa, gin bino notte okworwa ote romo kedwa, eka gin gigi te ŋwec oko i lobowa.” Mannono omio jo Miciri oketo odoŋe a loo tic, me ronogi i tic atek kun omiogi oyeo yee apek. Gin te gerri Parao boma me Pitom kede Ramecec, me kano cam. Cite ka oketo can i komgi, gin gigi dok omedde ameda inya, me poŋo lobo. Mannono omio jo Miciri omedde dago jo Icrael kede lworogi. Gin ote lido jo Icrael i tic agwa meicel, kun omiogi otio tic apek okato kare, me nyono lobo kede goyo matafali, kede kit tic ocele atek luŋ me poto. I ticcoro luŋ a rik gin tio, rik otio kedgi agwa meicel. Abaka me Miciri dok te ciko ocolmon a jo Eburania aryo, Cipira kede Pua, ni, “Ka it ye wunu ka colo mon a jo Eburania, ŋi wunu kit atin ame onywalo. Ka ce atin awo bi, nek wunu oko, ento ka nyako, wek wunu bed kwo.” Ocolmonnaca onwoŋo rikobedo mon a lworo Obaŋa; gin mom ote tiyo gin ame abaka me Miciri ocikogi iye. Gin gigi mom ote neko itino awobe. Abaka me Miciri te lwoŋo ocolmon, penyogi ni, “Kara piŋo itimo wunu kit man? Nen, wun mom ineko wunu itino a co!” Ocolmon te kobbi Parao ni, “Mon a jo Eburania pat meicel i mon a jo Miciri. Gin cunygi tek meicel, onywal ame ŋat a cologi mom ru otuno.” Obaŋa rik te timo ocol-monnono ber, jo te medde ameda inya bedo apol. Pien ocolmon rik olworo Obaŋa, Obaŋa omiogi gin daŋ onwoŋo jo me pacogi ikokomgi. Parao dok te ciko jo mere luŋ ni, “Atin awobi moro keken ame jo Eburania bino nywalo, myero ibol wunu oko i kulo Nail, cite anyira myero iwek wunu bed kwo.” Lo moro me ot a Levi rik te nyomo nyaka Levi. Nyako-nono oyac, te nywalo atin ico. Ka en oneno ni atinnono ber meicel, okano oko pi dwete adek. A doŋ oneno ni mom romo kanne, en okwanyo ijaŋa ame ocweo alado, te puyo kome odok lam kede odok yat. Otiŋo atin te pyelo i yie, te tero wot royo i dye alugaluga i dog kulo Nail. Aminnere te cuŋ i teŋe me neno ŋo ame bino timere i kom atin. Kare ame nyaka a Parao obino lwok i kulo Nail, anyira ame konye te bedo koŋ loloŋo ŋet kulo. En oneno ijaŋa tye i akina alugaluga, te cwayo aŋeca mere acel omo. En oyabo te nwoŋo atin tye i yie; atin te kok. Kica omake i kom atin, te kobo ni, “Man atin a dano moro me Eburania.” Amin a Muca te penyo nyaka a Parao ni, “Imito awot alwoŋŋi dako moro me Eburania me wot pitti atin man?” Nyaka a Parao te gamo ni, “Apee woti.” Nyannono te wot kelo totta atin ikome, Nyaka Parao te kobbe ni, “Ter atinni iwot ipitta. An abino culi pire.” Dako-nono te tero atin wot gwoko. Kare ame atin doŋ odoŋo, en otero baŋ nyaka Parao, te game acalo wode. Nyannono te cako nyiŋe ni Muca, kun kobo ni, “Pien alabe gira i pii.” Kare a Muca doŋ odoŋo, i nino moro acel en owoto baŋ jo mere, te neno peko a gin tye kede. En oneno lo moro me Miciri tye anomonomo dano me Eburania ame dano acel i akina rokkere. Kare a en onoloro kabedo luŋ mom oneno dano moro, oneko dano me Miciri oko eka te yiko i kwoyo. Odiko ocele en dok owoto, te neno jo Eburania aryo tye aromo kengi, te kobbi lo ame abal ni, “Kara icipocipo ominni adoŋ piŋo?” En ogamo doge ni, “Ŋa kara oketi me bedo aloc kede aŋolkopwa? Imito neka bala dano me Miciri ame ineko?” Lworo omako Muca, te tamo i cunye ni, “Jo kara doŋ oŋeo gin otimere oko ba!” Ka Parao owinyo kop man, omito ni enek Muca oko. Cite Muca gire te lwi oko i baŋ Parao te wot i lobo Midian. En owoto obedo piny i dog akon. Alamdoggoro me Midian onwoŋo rik tye kede anyira mere kany wie aryo. Anyira-nono obino te twomo pii; a doŋ gin otwomo pii opoŋ weer oko me miyo lim a papagi mato. Okwat ocele te bino ryemogi oko, Muca te ya konygi, te miyo dokgi mato pii, Kare a gin odwogo paco, papagi Reuel openyogi ni, “Kara tin idwogo wunu con piŋo?” Gin ogamo ni, “Lo moro me Miciri en olarowa i ciŋ okwat, en a daŋ otwommiwa pii te daŋ miyo limwa mato.” Reuel te penyo anyira mere ni, “Aman en tye kwene? Piŋo kara iweke wunu kuno? Lwoŋe wunu ebin ecem.” Muca rik te ye bedo tuŋ a dano-nono, en te miyo Muca nyomo nyare Jipola. Nyannono te nywalo awobi, Muca te cako nyiŋe Gerecom kun kobo ni, “Pien an doŋ abedo welo i lobo a mom megwa.” Kare te kato alalac, abaka me Miciri te daŋ to oko i kine-nono. Jo Icrael onwoŋo pwod tye ka cur kun okok pi bedogi opii opii; kokoginono te winyere baŋ Obaŋa. Kare ame Obaŋa owinyo cucuragi, opo pi cikere mere baŋ Iburaim, kaka kede Yakobo. Obaŋa te neno jo Icrael i waŋ me kica, te daŋ ŋeyo kit ame gin bedo kede. Kare moro ame onwoŋo Muca rik tye akwayo romi a ore, Yecero papa a cege, alamdog me Midian, en otero romi i tim kan abobor tuŋ to, te wot tuno naka i Koreb, ame obedo kidi Obaŋa, Amalaika a Rwot rik te nen baŋe i leb mac alyel i yat obunere; Muca ociko waŋe iye, pien kadi bed mac rik tye alyel i yat obuŋere-nono, ento ginnoro iye onwoŋo mom awan, Muca te kop i cunye ni, “Mito koŋ aŋi twon ginnoro-ni i ceggi, me aniaŋ gin omono yat obuŋere-ni waŋ.” Ka Rwot oneno ni Muca abino neno, Obaŋa olwoŋe i yat obunere-nono ni, “Muca, Muca.” Muca ogamo ni, “An ene.” Obaŋa te kobbe ni, “Kur ibin aceggi kan. Gony amuk oko i tyeni, pien kan icuŋ iye-nono obedo lobo acil.” Dok te medo ni, “An Obaŋa a kwaroni, Obaŋa Iburaim, Obaŋa Icaka kede, Obaŋa Yakobo.” Muca te wumo waŋe oko, pien onwoŋo alworo neno kom Obaŋa. Rwot te kobo ni, “Atyeko doŋ neno can a jona i Miciri, awinyo kokogi i kom odoŋe a loogi tic; aŋeo canginono, daŋ atye aparo pire, An doŋ abino piny me larogi oko i ciŋ jo Miciri, abino kwanyogi oko i lobo Miciri, ate terogi i lobo aber, alac ata, dok opoŋ i cak kede moo kic. Lobo-nono obedo lobo a jo Kanaan, jo Kitti, jo Amor, jo Periji, jo Kivi kede jo Jebuc, Nen, koko a jo Icrael doŋ owinyere baŋa, atyeko daŋ neno kit a jo Miciri wunogi kede, Aman yin doŋ yikere ibin acwai baŋ Parao. Amito iwot ikwany jona, jo Icrael, ya oko i lobo Miciri.” Muca okobbi Obaŋa ni, “An ana ame atwero wot i nyim Parao, onyo ame aromo kwanyo jo Icrael me ya oko i Miciri?” Obaŋa ogamo ni, “An abino bedo kedi, gin abino nyuto ni an aori ene: kare a doŋ ikwanyo jona oya oko i Miciri, ibino woro Obaŋa i wi kidi man.” Muca te penyo Obaŋa ni, “Kara ka an abino wot baŋ jo Icrael ate kobbigi ni Obaŋa a kwariwu ocwaa baŋwu an abino kobbigi ŋo ka ce gin dok openya ni, ‘Nyiŋe kara ŋa?’ ” Obaŋa te dokki Muca ni, “Atye Gira Acalo Atye. Kobbi jo Icrael ni ‘Atye ocwaa baŋwu.’ Obaŋa dok te kobbi Muca ni, ‘Myero ikobbi jo Icrael ni, “Rwot ”, ame en Obaŋa a kwariwu, Obaŋa Iburaim, Obaŋa Icaka kede Obaŋa Yakobo, ocwaa baŋwu.’ Mannono bino bedo nyiŋa atwal; ibino lwoŋa wunu amannono i ka re ducu, naka ikwaewu daŋ luŋ. Wot icok odoŋe a jo Icrael ite tittigi ni, ‘Rwot ame Obaŋa a kwariwu, Obaŋa Iburaim, Obaŋa Icaka kede Obaŋa Yakobo, onyutte kene baŋa kun kobba ni, An ikoma doŋ atyeko neno gin a jo Miciri tye atimo i komwu, doŋ atyeko moko me kwanyowu oko i lobo me Miciri, kan ame otye ka wunowu iye. Abino terowu i lobo a jo Kanaan, jo Kitti, jo Amor, jo Periji, jo Kivi, kede jo Jebuc, lobo ame opoŋ i cak kede moo kic.’ Odoŋe me Icrael bino gire ye koppi. Yin myero doŋ iwot karacel kedgi baŋ abaka me Miciri ite wot kobbe ni, ‘Wan orwatte kede Rwot, ame obedo Obaŋa a jo Eburania. Tim ber iyewa owot wot me nino adek i tim, me owot omi motwa ame oŋolo me yalo Rwot Obaŋawa.’ Aŋeo ni abaka me Miciri mom bino ye iwoto wunu ka mom odio adia i ciŋ atek, pi mannono, an abino ryeyo ciŋa, abino pwodo jo Miciri i kite kwone taŋo luŋ ame abino tiyo i komgi. Icennere gin bino ye iwoto wunu. Dok abino miyo cuny jo Miciri bedo yom i kom jowu. Mom obino miyo iwoto wunu ciŋwu nono i kare me yawu i Miciri. Dako acel acel bino kwayo dako wadgi, kede dako ame bedo i ode, wel me ryal kede me jabu kede boŋŋi abeco a myero irukki itinowu awobe kede anyira. Man bino miyo iyako wunujami ajo Miciri.” Muca ogamo ni, “Kara abino timo ŋo ka ce jo Icrael mom bino ye winyo kop akobbigi. Kare ocele gin twero kobo ni, ‘Rwot gire mom onyutte baŋi.’ ” Rwot okobo ni, “Mano ŋo imako i ciŋi-nue?” Muca ogamo ni, “Abiro ennono,” Rwot te kobbe ni, “Bol koŋ piny.” Kare ame en obolo piny olokere odoko twol, eka Muca te pye oko teŋe iceny. Cite Rwot okobbi Muca ni, “Koŋ dok irye badi imak yibe.” Muca oryeo ciŋe omako yibe, eka te ru lokere oko doko abiro. Rwot te kobbe ni, “Mano bino miyo gin ye in Rwot ame Obaŋa a kwarigi. Obaŋa Iburaim, Obaŋa kaka kede Obaŋa Yakobo, onyutte baŋi.” Rwot dok okobbe ni, “Koŋ dok irwak ciŋi i kori.” Muca daŋ te rwako ciŋe i kore; kare ame en okwanyo ciŋe i kore, nen, dobo onwoŋo orwatte i ciŋe luŋ atar bala pee. Rwot dok te kobbe ni, “Koŋ dok idwok ciŋi i kori.” Kare ame en odwoko ciŋe i kore te kwanyo oko, nen, ciŋe onwoŋo odoko gire aber kakare. Rwot te kobo ni, “Ka ce gin mom bino ye koppi, dok daŋ mom oye a doŋ inyuttigi anyut me agege oko, anyut me aryo bino miyogi oloko tamgi. Ka ce anyut aryo-ni luŋ mom omiogi oye, dok daŋ okwero winyo koppi, ibino twomo pii i kulo Nail, ionyo i lobo ka otwo; pii ame itwomo i kulo Nail-nono bino lokere doko remo i lobo.” Muca te kobbi Rwot ni, “Ama Rwotta, an gira leba oto oto anaka cene, kadi ame itye ikop keda-ni, pwod gire tye kite acellono. Atye ka omo kop aomo kun atelle kede atela.” Rwot te penye ni, “Ŋa a mio dano kobo? Ŋa kara a dwalo leb dano onyo a mio dano bedo adiŋyit, a mio dano neno aber onyo bedo atowaŋ? Mom an Rwot? Yin myero iwoti, an abino konyi me kop aber, dok abino kobbi gin a myero ikob.” Cite en dok te gamo ni, “Ama Rwotta, tim ber icwa ŋat ocele.” Akemo a Rwot te tugere oko i kom Muca kun kobo ni “Ominni Aron ame jo Levi mom tye kuno? An aŋeo ni en kobo aber meicel. Nen ba, en daŋ doŋ tye abino me rwatte kedi, yie bino bedo yom meicel ka oneni. Yin ibino kop kede kun ititte gin a myero en kobi. An abino konyi me kop aber, dok daŋ abino konye. Wun luŋ, an abino kobbiwu gin a myero iti wunu. En bino kop i lwak kakari. Aron bino bedo ŋat a kobo piri, ento kop Obaŋa ame en bino kobo bino ya i baŋi. Ter abironi iwot kede, pien bino konyi kuno me tiyo taŋo.” Kare ame Muca odok baŋ Yecero, ame papa a dako mere, en okwae ni “Tim ber koŋ iwek adok baŋ omegona ame tye i Miciri, me awot anen ka ce gin pwod tye kwo.” Yecero te gamo ni, “Wot giri i kuc, atinna.” Kare ame Muca rik pwod tye i Midian Rwot okobbe ni, “Dok ceŋ i Miciri: Jo luŋ a rik mito neki doŋ ototoa oko.” Muca te keto dako mere kede awobe mere i wi kana, te cako wottere me dok cen i Miciri kun omako abiro Obaŋa i ciŋe. Rwot okobbi Muca ni “Ka doŋ ityeko dok cen i Miciri, myero inen ni itio taŋo luŋ ame atyeko miyi twer me tiyo i nyim Parao; cite an abino miyo cunye bedo nwaŋ, mom bino ye jo woto. Doŋ ba, yin myero ikobbi Parao ni, ‘Man en kop ame Rwot ikome okobo: Icrael obedo awobina me kao. Atyeko kobbi ni, “Myero iye woda woti, me en wot cob ticcere a myero en ti baŋa”; ento yin ikwero oko; nen, aman an doŋ abino neko wodi me kao oko.’ ” I kare ame gin tye i wotgi, Rwot orwatte kede Muca kan a gin obuto iye kun mito neke oko. Jipola te kwanyo kidi abit, te liro i kom awobe mere, te gudo i tyen Muca kun kobo ni, “Aman doŋ yin i cwara pi remo!” Rwot doŋ te weke. I kare ame dako okobo ni, “Yin i cwara meremo”, onwoŋo okobo pi kop me lirre. Rwot okobbi Aron ni “Wot irwatte i Muca i tim.” En oya, te rwatte kede i wi kidi Obaŋa, te mote kun noto leme. Muca te kobbi Aron kop luŋ a Rwot rik okobbe i kare ame oore kede taŋo luŋ ame Obaŋa ociko ni eti kede. Muca kede Aron te wot i Miciri coko odoŋe a jo Icrael luŋ karacel. Aron te kobbigi kopporo ducu ame Rwot okobo baŋ Muca, te daŋ nyuto taŋo luŋ i nyim lwak. Jo oye koppere; kare ame gin owinyo ni Rwot doŋ olimo jo Icrael, dok daŋ neno can luŋ ame Icrael tye ka neno, gin luŋ ote kulo wigi piny woro Obaŋa. Icennere Muca kede Aron te wot baŋ Parao, ote kobbe ni, “Rwot Obaŋa a jo Icrael okobo ni, ‘Wek jona woti, me gin wot kwer nino adwoŋ i tim me wora.’ ” Parao te gamo ni, “Rwot en ŋa-nono kara? Ŋo a mia awinyo gin a en okobo? Piŋo kara a mio aye Icrael iwot? An gira mom aŋeo Rwottono, daŋ mom abino ye Icrael woto.” Gin dok te kobbe ni, “Wan otyeko rwatte Obaŋa a jo Eburania. Tim ber iwekwa owoti, wot me nino adek i tim, me owot omi mot ame oŋolo me yalo Rwot Obaŋawa; pien ka wan mom owoto, en Rwot bino pwodowa kede two edeke onyo pala lweny.” Cite Parao abaka me Miciri te kobo ni, “Muca kede Aron, piŋo ikwanyo wunu jo oko i dog ticgi? Wun dok wunu i dog ticwu.” Dok te kobo ni, “Nen jo-in doŋ pol meicel, wun dok imito miyogi wunu we i dog ticgi?” I nino-nono Parao te ciko odoŋe a loo tic a lwak, kede onyamparagi, ni, “Kur dok imedde kelligi wunu ocwici me goyo matafali kit a yam itimo wunu con, gin ikomgi en a doŋ myero om-mi. Wel matafali bed kit a yam ogoo kede, kur idwok wunu wellere piny; pien komgi wac, en omio gin kok ni, ‘Wekwa owot omi mot oŋolo me yala Obaŋawa i tim.’ Migi wunu tic atek me ololle kede, me owek winyo kop goba goba bedi.” Odoŋe a loo tic a lwak, kede onyamparagi, te wot kobbi jo ni, “Parao okobo ni, ‘An mom dok abino keliwu ocwici. Wun doŋ myero iwot iyeny wunu ikomwu, kan ame itwero nwoŋo wunu iye; ento ticwu bino bedo kit acon aboŋo dwoko piny kadi acel.’ ” Mannono te miyo jo ket i Miciri luŋ pi coko reŋ kal me ocwici. Odoŋe a loo tic te bedo cunyogi ni, “Ru wunu tyeko ticwu me nino i nino kite a yam con ame itye wunu ocwici.” Odoŋe a loo tic a Parao te bedo pwodo onyampara a jo Icrael ame gin oketo kun openyogi ni “Piŋo tin mom ityeko ticwu me goyo matafali i kite a yam con?” Eka onyampara a jo Icrael te wot kok baŋ Parao ni “Piŋo kara itimo omironi amanne? Nen, ocwici mom doŋ okelligi, aco okobbiwa ni, ‘Go wunu matafali!’ Obedo pwodo-gu omironi apwoda, aco kono bal tye baŋ joni.” Cite Parao ogamo ni, “Wun komwu wac, wun komwu wac; en omio wun ikobo wunu ni, ‘Wekwa owot omi mot oŋolo me yalo Rwot.’ Dok wunu i tic. Ocwici gire mom obino miyowu kadi acel, dok daŋ ibino goyo wunu matafali i wei a yam con aboŋo alokaloka moro.” Onyampara a jo Icrael oneno ni doŋ otye arac meicel i kare ame okobo ni, “Mom obino dwoko wel matafali me nino i nino piny kadi acel.” Gin te rwatei Muca kede Aron a rik onwoŋo tye a kurogi i kare a gin dwogo i baŋ Parao. Gin te kobbigi ni, “Rwot myero nenwu, dok daŋ ŋolliwu kop, pien imio wunu nyiŋwa odoko aŋwe i nyim Parao kede omiro mere, dok imiogi wunu pala lweny me nekowa.” Muca te lokere baŋ Rwot, te kobo ni, “Ama Rwot, itimo jo-ni arac aman piŋo kara ba? Icwaa kan piŋo? Cakere ame abino baŋ Parao, me kop kede i nyiŋi, en te cako timo jo-ni arac meicel, yin mom ru ilaro joni.” Rwot te kobbi Muca ni, “Tin doŋ ibino neno gin ame abino timo i kom Parao; ciŋ atek bino miyo en wekogi owoto oko, kun ryemogi aryema i lobo mere.” Obaŋa okobbi Muca ni, “An a Rwot. Rik anen baŋ Iburaim, baŋ Icaka kede baŋ Yakobo, kun gin ŋeo ni an Obaŋa Won Twer Ducu, cite rik mom amiogi oŋeo ni nyiŋa Rwot. Rik daŋ amoko cikerena kedgi kun acikere me miyogi lobo me Kanaan, ame en lobo a rik gin obedo iye acalo wele. Dok daŋ atyeko winyo ŋuŋura a jo Icrael ame jo Miciri doŋ olokogi odoko opii-ni, daŋ doŋ apo i cikerena. Pi mannono, kob baŋ jo Icrael ni, ‘An a Rwot, abino kwanyowu oko i peko ame jo Miciri oketo i komwu. Abino larowu oko i bedo me opii opii. Abino lakorowu i bada ame aryeo, kede cannogo adoŋo ame abino ŋolo i komgi. Abino terowu ibedo wunu jona, an abedo Obaŋawu. Ibino ŋeyo wunu ni an a Rwot Obaŋawu ame akwanyowu i peko ame jo Miciri oketo i komwu. Eka ate bino kelowu i lobo a rik akwoŋo pire ni abino miyo baŋ Iburaim, kede Icaka, kede Yakobo, abino miyowu me bedo lobowu; an a Rwot’.” Muca te kobo koppono baŋ jo Icrael; ento gin mom te winyo kop a Muca, pien cunygi onwoŋo oballe oko pi tic apek okato kare me opii opii. Rwot dok te kobbi Muca ni, “Dony baŋ Parao abaka me Miciri, iwot ikobbe ewek jo Icrael ya oko i lobo mere.” Ento Muca okobbi Rwot ni, “Nen, jo Icrael okwero winyo koppa oko kara Parao bino winyo koppa nino, an a dano a doga mom cil-li?” Rwot okobo i Muca kede Aron, ocikogi baŋ jo Icrael kede baŋ Parao abaka me Miciri, pi kwanyo jo Icrael oko i lobo Miciri. Magi gin odoŋe me doggola a kwarigi: itino awobe a Reuben ame obedo atin kao Icrael, gin ene; Kanok, Pallu, Kejeron kede Karmi; jo me doggola a Reuben ennono. Itino a Cimeon awobe ene; Jemuel, Jamin, Okad, Jak in, Jokar, kede Caul, awobi a dako me Kanaan; jo doggola a Cimeon ennono, Magi gin nyiŋ itino a Levi awobe, kun lubere i lwakigi: Gercon, Kokat kede Merari; mwaka a Levi me dittere ame ori kede i lobo, rik oromo mia acel i pyeradek wie abiro, Itino a Gercon awobe ene: Libni kede Cimei, kit acalo doggolagi tye kede. Itino a Kokat awobe ene: Amuram, Ijar, Kebron, kede Ujiel; mwaka a Kokat me dittere ame ori kede i lobo oromo mia acel i pyeradek wie adek. Itino a Merari awobe ene: Makali kede Muci. Jo me doggola a Levi ennono kun lubere i lwakigi Amuram onyomere i Yokobedi amin pappere, te nywalo Aron kede Muca; mwaka Amuram me dittere ame ori kede i lobo oromo mia acel i pyeradek wie abiro, Itino a Ijar awobe ene: Kora, Nepeg kede Jikri, Itino a Ujiel awobe ene: Micael, Elijapan kede Citri. Aron onyomo Eliceba nyaka Aminadab, amin a Nacon, te nywalo Nadab, Abiku, Eleajar kede Itamar. Itino a Kora awobe ene: Acir, Erukana kede Abiacap; doggola a Kora ennono. Eleajar wot a Aron, onyomo dako i akina anyira a Putiel, te nywalo Finekaci. Odoŋe me doggola a kwari a jo Levi ennono, kit a doggolagi tye kede. Aron kede Muca ennono, ame Obaŋa okobbigi ni, “Kwany wunu jo Icrael oko i Miciri kun owoto atekere, atekere. Gin en a rik okobo abaka me Miciri pi kwanyo jo Icrael oko i lobo Miciri; Muca kede Aron-nono, gin ennono.” I nino ame Rwot okobo kede baŋ Muca i Miciri, Rwot ociko Muca ni, “Ana a Rwot; kob abaka me Miciri kop ducu ame atitti.” Muca te kobbi Rwot ni, “Nen, an gira doga mom cil; Parao bino winya niŋo?” Rwot te kobbi Muca ni, “Nen ba, an atyeko keti me bedo acalo Obaŋa baŋ Parao, aco ominni Aron bino bedo calo adwarpinnyi. Yin ibino kobo kop luŋ ame aciki iye, eka ominni Aron te kobo baŋ Parao me weko jo Icrael ya oko i lobo mere. Ento abino miyo cuny Parao bedo nwaŋ, abino medde tiyo anyut kede taŋo apopol i lobo Miciri. Ento Parao mom gire bino winyo koppi. Icennere abino keto ciŋa i kom jo Miciri ate kwanyo gira monnya oko, ame gin jona Icrael, abino miyogi ya oko i lobo Miciri kun nwoŋo koŋ cannogo adoŋo ame aŋolo i kom jo Miciri otimere. I kare ame abino ryeyo ciŋa i kom jo Miciri pi kwanyo jo Icrael oko i akinagi, gin bino ŋeyo ni an a Rwot.” Muca kede Aron te tiyo daŋ kite a Rwot ocikogi kede. Muca onwoŋo doŋ tye i mwaka a romo pyreraboro me dittere, aco me Aron onwoŋo tye pyreraboro wie adek i kare ame gin kobo i Parao. Rwot dok te kop i Muca kede Aron ni, “Ka ce Parao okobbiwu ni, ‘Koŋ inyuttiwa wunu taŋo moro me onen ka ikobo wunu kop ateni,’ yin ibino kobbi Aron ni, ‘Kwany abironi ibol piny i nyim Parao, me lokere dok twol.’ ” Muca kede Aron rik te wot baŋ Parao, ote daŋ wot tiyo kit a Rwot ocikogi kede. Aron obolo abiro piny i nyim Parao kede omiro mere, abiro te lokere doko twol. Parao te lwoŋo oryeko ame obedo ojogi ojogi, ame gin rik emuroko me Miciri; gin daŋ ote timo amannono i ryekogi me jojok. Pien dano acel acel i akinagi obolo abiro mere piny te daŋ lokere doko twol, cite abiro Aron te mwonyo megi luŋ. Cuny Parao gire pwod omedde ameda bedo anwaŋ, mom oye winyo kopi, kite ame Rwot onwoŋo okobo. Rwot dok te kobbi Muca ni, “Cuny Parao pwod nwaŋ, okwero weko jo wot oko. Wot baŋe idiko con ame en pwod aya ayaa me wot i kulo; wot ikure i ŋet kulo, mak abironi a rik lokere dok twol ca i ciŋi. Eka ite bino kobbe ni, ‘Rwot ame Obaŋa a jo Eburania ocwaa baŋi kun kobo ni, wek jona woti me gin wot ti pira i tim, koŋ inen yin mom ru iwinyo koppa. Aman Rwot doŋ okobo ni mano. Man en a bino miyo iŋeo ni an a Rwot: abino goyo pii i kulo Nail kede abiro a tye i ciŋa-ni, pii bino lokere doko remo. Rec luŋ i kulo Nail bino to oko, kulo Nail bino doko acoo meicel, yi jo Miciri mom bino mito mato pii i kulo Nail.’ ” Rwot te kobbi Muca ni, “Kob baŋ Aron ni, ‘Kwany abironi ite ryeyo ciŋi i wi pii luŋ me Miciri; i wi kulli, i wi yo pii okukunyo, i wi atapara luŋ kede i wi kabedo luŋ ame pii poŋ iye, me gin luŋ aluŋa lokere dok remo; meremo rom lobo Miciri luŋ, naka i ginnoro luŋ otio i yat onyo i gweŋ ame jolo pii.’ ” Muca kede Aron daŋ te tiyo kit a Rwot ocikogi kede. Aron otiŋo abiro mere malo i nyim Parao kede omiro mere, te goyo pii i kulo Nail, pii luŋ i kulo Nail te lokere doko remo. Kit rec luŋ i kulo Nail te cako to oko, ŋwec kulo daŋ te doko acoo meicel. Mannono te miyo jo Miciri doŋ mom dok romo mato pii i kulo Nail, dok remo daŋ doŋ te romo lobo Miciri luŋ. Emuroko me Miciri daŋ ote timo amannon i ryekogi me jojok; te miyo cuny Parao bedo anwaŋ, mom te ye winyo kopgi, kit ame Rwot onwoŋo okobo. Parao te dok gire tuŋe kun mom daŋ tye aparo gire kop man i cunye. Jo Miciri luŋ te bedo kunyo pii amatagi i ŋet kulo Nail, pien onwoŋo mom doŋ oromo mato pii i kulo Nail. I ŋe nino abiro a doŋ Rwot ogoo kulo Nail. Rwot dok te kobbi Muca ni, “Dony baŋ Parao iwot ikobbe ni, ‘Rwot okobo ni, Wek jona woti, me owot oti pira. Aco ka ce ikwero wekogi wot, nen ba, abino coro ogwalogwal i loboni luŋ. Ogwalogwal bino corre apipim i kulo Nail, te bino naka i udini, naka atot iyi icikani kede i wi tandani; bino wot daŋ atot i udi omironi kede meajoni, naka atot i keno tedogi, kede i tako kwon. Ogwalogwal bino pye-gu anaka i komi kede i kom joni kede omironi.’ ” Rwot te kobbi Muca ni, “Kob baŋ Aron ni, ‘Rye doŋ ciŋi kede abironi i ciŋi i wi kulli, yo pii okukunyo, kede atapara luŋ, me ogwalogwal corre i lobo Miciri apipim!’ ” Aron te daŋ reyeyo ciŋe i wi pii luŋ a tye i lobo Miciri, ogwalogwal te corre apipim wumo lobo Miciri oko, Emuroko me Miciri daŋ ote timo amannono i ryekogi me jojok, gin daŋ te miyo ogwalogwal apipim corre i Miciri. Icennere Parao te lwoŋo Muca kede Aron, te kobo ni, “Kwa wunu Rwot me kwany ogwalogwal oko i koma kede i kom jona, me awek jo wot mi mot oŋolo me yalo Rwot.” Muca te dokki Parao ni, “Mano gire ber; aco yin doŋ myero imia kare ame imito ni akwa iye Rwot piri, kede pi omironi kede joni, me ogwalogwal to oko ducu i komi kede i udini, me doŋ en i kulo Nail keken.” Parao te gamo ni, “Kom diki adika-ni.” Muca te kobo ni “Aco doŋ bed kit ikobo-nono, me yin ine ni mom dok tye ŋattoro ocel a calli Rwot Obaŋawa. Ogwalogwal bino ya oko i komi, kede i udini, kede i kom omironi kede joni; obino weko ka en i kulo Nail keken.” Muca kede Aron te doŋ ya oko i nyim Parao; Muca te kok baŋ Rwot pi ogwalogwal kit acalo onwoŋo eye kede baŋ Parao. Rwot daŋ te timo kit ame Muca okobo kede, ogwalogwal daŋ te totoa oko i udi kede i dyekal kede i potti ducu. Ote cokogi luŋ karacel awu awu, ŋwece te kuto aŋwe i kabedo ducu. Cite Parao ka oneno ni pwod dok cwe, cunye te doko anwaŋ oko, mom oye winyo kopgi, kit ame Rwot onwoŋo okobo. Rwot te dok kobbi Muca ni “Kob Aron ni, ‘Tir abironi malo me igo kede apuwa me lokere dok ober ame bino lal romo lobo Miciri luŋ.’ ” Gin daŋ te timo amannono, Aron te tiro ciŋe malo kun abiro mere tye i ciŋe, te goyo apuwa, ober te wukere bino i kom jo kede i kom leyi ducu. Emuroko daŋ i ryekogi me jojok ote temo ni ober myero bin, cite te loyogi oko. Pi mannono, ober rik te bedo i kom jo kede i kom leyi luŋ. Emuroko te kobbi Parao ni, “Man gire ciŋ Obaŋa.” Cite cuny Parao pwod omedde ameda ibedo nwaŋ, mom oye winyo kopgi, kit ame Rwot onwoŋo okobo. Rwot dok te kobbi Muca ni, “Dil idiko con iwot ikur Parao i kare ame en awot i kulo, i te kobbe ni, ‘Rwot okobo ni mano, Wek jona woti, owot oti pira. Ka ce mom ibino weko jona wot, nen ba, abino coro lwak lwaŋi apipim i komi, i kom omironi kede i kom joni luŋ, bino wot atot i udini; lwak lwaŋi bino ŋinne apipim i udi a jo Miciri daŋ, anaka i lobo ame gin ocuŋ iye. I ninonono abino poko lobo Gocen pat, kan ame jona bedo iye, me lwaŋi kur corre kuno, me iŋe wunu ni an a Rwot a tye i dye lobo luŋ, Abino poko akina jona kede joni kittono. Anyut man bino timere diki.’ ” Rwot daŋ te tiyo kittono; omio lwak lwaŋi apipim ocorre i udi a Parao kede me omiro mere, anaka i lobo Miciri luŋ; lwaŋi apipim-mi te balo gire lobo oko. Icennere Parao te lwoŋo Muca kede Aron, te kobbigi ni, “Wot imi wunu mot oŋolo me yalo Obaŋawu i lobowa kan.” Cite Muca te gamo ni, “Mom gire otwero timo kittono; pien leyi a waŋ obino ŋolo me yalo Obaŋawa obedo me kwer baŋ jo Miciri. Ka ce wan obino ŋolo leyi me yalo Obaŋawa ame obedo me kwer baŋ jo Miciri kun gin aneno i waŋgi, gin mom bino napowa oko i gweŋe? Wan myero owot giwa i tim wot me nino adek, me owot omi mot oŋolo me yalo Rwot Obaŋawa kit a en ocikowa kede.” Omio Parao te kobo ni, “Abino wekowu iwoto wunu i tim me iwot imi wunu mot oŋolo me yalo Obaŋawu, ento mom ibino wot wunu kannabor. Kwa koŋ doŋ pira.” Muca te kobo ni, “Nen an doŋ aya oko i nyimi, awot kwayo Rwot me lwaŋi diki ya oko i komi, kede i kom omironi kede joni, cite Parao myero kur dok bwolwa te kwero ye jo wot miyo mot oŋolo me yalo Rwot.” Muca te ya oko i nyim Parao, te wot kwayo Rwot. Rwot daŋ te tiyo kite a Muca okwao kede, te miyo lwaŋi ya oko i kom Parao kede i kom omiro mere kede jo mere; acelloro mom odoŋ. Cite cuny Parao pwod dok omedde ameda ibedo nwaŋ, mom gire oye jo owoto. Rwot dok te kobbi Muca ni, “Wot ikobbi Parao ni, ‘Rwot ame Obaŋa a jo Eburania okobo ni mano. Wek jona woti me wot ti pira. Ka ce ikwero ni gin kur woti, kun pwod imedde ameda geŋogi, nen ba, Rwot bino ryeyo ciŋe bedo i kom limwu luŋ a tye i bar kun kelo edeke apek i kom aguragura luŋ, inaga luŋ, kana luŋ kede dok, dyegi kede romi, Ento Rwot bino poko lim a jo Icrael kede meajo Miciri, lim ajo Icrael mom bino to kadi acelloro.’ ” Rwot te nyuto kare kun kobo ni, “Rwot bino timo man diki.” Orwo mere Rwot te tiyo kittono; lim a jo Miciri luŋ te to oko, ento lim a jo Icrael mom te to kadi acelloro. Parao te cwayo dano, nen, lim a jo Icrael moro mom oto kadi acelloro. Cite cuny Parao gire pwod omedde ameda ibedo nwaŋ, mom oye jo owoto. Rwot dok te kobbi Muca kede Aron ni, “Job wunu buru i ka waŋo matafali poŋ ciŋwu, mi wunu Muca cor malo tuŋ polo i nyim Parao. Bino lokere doko apuwa ame te duny romo lobo Miciri, luŋ, bino miyo odeke kwokwota atata i kom jo kede i kom leyi luŋ me Miciri.” Gin daŋ ote jobo buru i ka waŋo matafali, ote cuŋ kede i nyim Parao. Muca te coro malo, eka te lokere doko odeke, kom jo luŋ kede leyi te kwokwota atata i two odeke. Emuroko mom doŋ romo cuŋ i nyim Muca, pien odeke onwoŋo okwokwota anaka i komgi kede i kom jo Miciri luŋ. Ento Rwot omio cuny Parao obedo nwaŋ, mom oye kopgi, kit ame Rwot onwoŋo okobo kede baŋ Muca. Rwot dok te kobbi Muca ni, “Dil idiko con iwot icuŋ i nyim Parao, ikobbe ni, ‘Rwot ame Obaŋa a jo Eburania okobo ni mano. Wek jona woti, me owot oti pira. Pien man doŋ abino miyo cunyi cwer atek pi kit can apapat ame abino pwodowu kede, yin kede joni luŋ, me ineni mano mom dok tye ŋattoro ocele i lobo luŋ ame rom keda. Pien kono nyo doŋ aryeo ciŋa agoi oko i too edeke agwa, karacel i lwakki luŋ, kono nyo doŋ i mom wunu i lobo; cite pi kop man omio aweki kwo, me anyutti te kona, nyiŋa te rwo i lobo luŋ. Yin giri pwod itye iyon i kom jona, ikwero wekogi wot oko. Nen ba, diki i kodi caa-ni, abino coro lwak pee apekkege i lobo, pee a yam mom ru onen i lobo Miciri, cakere a jo ocako bedo iye, tuno kede atot onyoni. Pi mannono, aman myero icwa kop me cok limmi luŋ kede jamini ducu ame tye i bar, me kelgi i ot; pien pee bino pwodo jo ducu kede leyi luŋ ame tye oko, bino neko jami ducu a tye i bar.’ ” Jo mogo i akina omiro a Parao ame lworo kop a Rwot, omio opiigi kede limgi oriŋo olaro ot. Ento jo a mom winyo kop a Rwot oweko opiigi kede limgi i bar. Rwot te kobbi Muca ni, “Rye ciŋi malo i polo, me pee corre i lobo me Miciri luŋ, i kom jo, leyi kede ginapita luŋ a tye i lobo Miciri.” Muca te tiŋo abiro mere malo tuŋ polo. Rwot te miyo polo mor, pee te corre i lobo kun orubere kede mac; Rwot te miyo pee oony romo lobo Miciri luŋ. Pee kede mac a meny teretere i dye pee obedo tye i lobo Miciri kit a yam mom ru onen, geye amejo i lobo Miciri odoko rok acel. Pee te pwodo ginnoro duc ame onwoŋo tye i potti i lobo Miciri luŋ karacel i jo kede leyi. Pee te lwero jami luŋ ame opito i potti, te daŋ yeyeco yen i bar ducu. Lobo me Gocen keken, kan ame jo Icrael bedo iye, en ame pee mom ogudo. Parao dok te cwayo kwena lwoŋo Muca kede Aron, te kobbigi ni, “Man dok abalo, kop a Rwot gire tye kakare, ento an kedejona, wan otimo rac. Kwa wunu doŋ Rwot, pien pee kede mor a kot doŋ oromo; abino wekowu iwoto wunu, pe dok ibino medde bedo wunu kan.” Muca te kobo ni, “Amanni tekki abino kato i ŋe boma, abino ryeyo ciŋa malo baŋ Rwot, mor a kot kede pee bino gik oko, me iŋe wunu ni lobo luŋ obedo mea Rwot. An kono aŋeo ni yin kede omironi mom ru ilworo wunu Rwot Obaŋa.” Pee obalo pamba kede cayiri oko, pien cayiri onwoŋo doŋ oŋokoko, pamba daŋ ocako turo oko. Ento ŋano atar kede en arema, pee mom obalo, pien ocoogi icen. Muca te ya oko i baŋ Parao kato oko i ŋe boma, eka te ryeyo ciŋe malo baŋ Rwot; mor a kot kede pee te gik oko, kot mom dok te medde cwe i lobo. Cite ka Parao oneno ni kot kede pee kede mor a kot ogik oko, dok te medde poto oko i bal, en karacel kede omiro mere, cunygi te bedo anwaŋ oko. Parao cunye te bedo anwaŋ kittono, mom oye jo Icrael owoto, kit ame Obaŋa rik omio Muca okobo. Rwot dok te kobbi Muca ni, “Wot baŋ Parao, pien amio cunye dok odoko nwaŋ oko, karacel kede cuny omiro mere daŋ, me wek anyut anyutta magi i akinagi; me yin ibin ititti itinoni kede ikwai kite ame aloko kede jo Miciri obedo gi-tukona kede anyuttogo ame abedo tiyo i akinagi, me ine wunu ni an a Rwot.” Muca kede Aron daŋ ote wot donyo baŋ Parao, ote kobbe ni, “Rwot Obaŋa a jo Eburania okobo ni mano, ‘Yin ibino kwero mwolle i nyima pi kare arom mene? Wek jona woti me owot oti pira. Pien ka ce ikwero ni gin kur woti, nen ba, diki abino miyo lwak bonyo apipim wukere i loboni, te wumo lobo oko ipuk, ŋattoro mom tye ame bino neno lobo; bonyo bino camo ginnoro luŋ ame pee oweko, dok daŋ bino camo yenwu adoŋo i potti. Bonyonono bino daŋ poŋ i udiwu kede me omironi luŋ, naka i me a jo Miciri ducu: mannono bino bedo gin a welo meicel a yam papawu kede kwariwu mom oneno, cakere i nino ame onywalogi iye tuno naka atot tin.’ ” Eka en te lokere ya gire oko i nyim Parao. Cite amiro a Parao te kobbe ni, “Lo-ni kara bino bedo wunowa aman naka awene? Wek jo-ni woti, me owot oti baŋ Rwot Obaŋagi; yin mom ru iŋeo ni Miciri doŋ oballe oko?” Omio ote dwoko Muca kede Aron baŋ Parao, Parao te kobbigi ni, “Wot wunu doŋ, iwot iti wunu baŋ Rwot Obaŋawu, ento kara jo mene ame imito wunu ni woti?” Muca te gamo ni, “Wan luŋ obino wot, karacel itinowa kede odoŋewa, awobe kede anyirawa; obino tero daŋ limwa luŋ, dok kede dyegi kede kit lim ocele luŋ pien myero okwer nino adwoŋ baŋ Rwot.” Parao te gamo ni, “Rwot bed kedwu ka ce abino ye iwoto wunu karacel itinowu! Cite nen ba, wun itye wunu i tammoro arac i yiwu. Pe twere, co keken ame tye i akinawu en abino wot woro Rwot pien mano en ame cunywu tye ka myel iye wok.” Ote ryemogi oko i nyim Parao. Rwot dok te kobbi Muca ni, “Rye ciŋi i wi lobo me bonyo wukere i lobo Miciri, cam ginnoro duc otu i lobo Miciri ame rik pee oweko.” Muca daŋ te tiŋo abiro mere malo i wi lobo me Miciri, Rwot te cwayo yamo pello i tuŋ kide te kodo i lobo dyeceŋnono kede dyeworrere benebene; kare ame piny oru, yamo me tuŋ kidenono onwoŋo okelo bonyo apipim. Bonyo te corre i lobo Miciri luŋ, lwak bonyo owukere apipim ame mom ru onen, dok mom daŋ bino nen. Pien bonyo mere owukere te wumo lobo oko ipuk ame piny te doko acol icuc, gin te camo ginnoro luŋ ame otu i lobo kede nyig yen luŋ ame pee yam oweko; ginnoro adyaka mom te doŋ kadi acel, kadi yat onyo ginnoro keken ame otu i poto moro i lobo me Miciri luŋ. Parao dok te ru lwoŋo Muca kede Aron, te kobbigi ni, “An doŋ abalo gira oko baŋ Rwot Obaŋawu, kede baŋwu. En omio tin akwaowu me tima kica; tima wunu doŋ ber icel-li keken, ikwa wunu Rwot Obaŋawu me kwany to man oko i koma.” Muca te ya oko i nyim Parao, to wot kwayo Rwot. Rwot te miyo yamo kodo atek kun opello i tuŋ to, te joyo bonyo coro i Nam Arema, bonyo moro mom odoŋ i lobo Miciri kadi acel. Cite Rwot dok omio cuny Parao obedo nwaŋ, mom oye jo Icrael owoto. Rwot dok te kobbi Muca kede Aron ni, “Rye ciŋi malo i polo, me piny dok acol oko icuc i lobo me Miciri luŋ, colpiny ame dano twero winyo naka i kome.” Muca te ryeyo bade malo i polo, piny daŋ te doko acol icuc atek ateka pi nino adek kun oromo lobo Miciri luŋ. I kare-nono ŋattoro onwoŋo mom romo neno awottere, dok ŋattoro daŋ mom oya i kakare pi nino adekkono. Ento kan ame jo Icrael bedo iye piny gire onwoŋo tye aler. Parao dok te lwoŋo Muca, te kobbe ni, “Wot iti wunu baŋ Rwot, itinowu daŋ myero wot karacel kedwu; cite limu luŋ, dok, dyegi kede kit lim ocele luŋ myero doŋ,” Muca te gamo ni, “Yin doŋ myero imiwa mot me aŋola kede me awaŋa me yalo Obaŋa, me wan owot oyalli Rwot Obaŋawa. Limwa luŋ myero owot kede, moro acel mom bino doŋ iŋewa, pien myero owot okwany mogo i akinagi me woro Rwot Obaŋawa; pien wan mom oŋeo gin a myero owot oti kede baŋ Rwot, tuno ka doŋ otuno kuno.” Cite Rwot dok te miyo cuny Parao bedo nwaŋ, mom te yegi wot. Parao te gamo ni “Ya oko i nyima, cite myero igwokere ba; kur dok imedde neno waŋa, pien nino ame ibino neno iye waŋa, nino-nono en ame ibino to iye.” Muca te kobo ni, “Ka amannono, an gira mom dok abino neno waŋi.” Rwot okobbi Muca ni, “Pwod odoŋ can acel ame dok abino pwodo kede Parao kede jo Miciri; icennere doŋ bino wekowu iya wunu oko i kan. Kare ame en bino wekowu me wot, en bino ryemowu aryema. Aman yin doŋ myero ikobbi jo ni, ico acel acel myero kwa ico wadgi ame ceggi kede, dako daŋ kwa dako wadgi ame ceggi kede me gin miwu wel me ryal kede me jabu.” Rwot te miyo cuny jo Miciri bedo ayom i komgi. Dok daŋ dano-nono Muca rikobedo twon lo moro adit meicel i nyim omiro a Parao, kede i nyim jo luŋ. Muca te kobo ni, “Rwot okobo ni mano, Tin dyewor ka idiŋ, abino beo i dye Miciri; eka itino kao luŋ ame tye i Miciri te to oko, geye i kom atin kao a Parao ame bedo i wi kommere me loc, tuno kede i kom atin kao aŋeca ame bedo i ŋet kidi rego, anaka itino kao a limgi luŋ. Koko bino bedo dwoŋ meicel i lobo Miciri luŋ i kite a yam mom ru otimere, dok daŋ mom bino timere wannoro. Cite i kom jo Icrael, akadi dano onyo lee, gwokkoro mom bino ŋweyo, me ine wunu ni Rwot kara poko akina a jo Miciri kede jo Icrael. Omironi luŋ bino bino baŋa, obino ryebere i nyima kun okobba ni, ‘Wot giri karacel i jo luŋ a lubi.’ Icennere an doŋ abino wot.” Muca te ya oko i nyim Parao i twon akemo adwoŋ meicel. Rwot dok te kobbi Muca ni, “Parao gire mom bino winyo koppi, me taŋona medde rom lobo Miciri luŋ.” Muca kede Aron te tiyo taŋo-nono luŋ i nyim Parao; ento Rwot omio gire cuny Parao obedo nwaŋ, mom oye jo Icrael oya i lobo mere. Rwot okobo i Muca kede Aron i lobo Miciri ni, “Dwe man bino bedo dwe me agege a geo mwaka. Titti wunu jo Icrael luŋ ni nino dwe apar me dwe man, dano acel acel bino kwanyo atin romo, kit ame doggola a kwarigi tye kede, atin romo acel acel pi ot acel acel. Ka ce ottoroni tidi, ame mom romo tyeko riŋo atin romo luŋ, won ottono kede aŋete, ame ode ceggi i mege, gin bino kwanyo romo ame romo wel jo ame tye baŋgi. Ibino kwanyo wunu atin romo ame romo kit a dano acel acel twero camo kede. Atin romo ame akwanyo myero bed aber, ame roccoro mom i kome, nyok me mwaka acel. Ibino kwanyo wunu i akina romi onyo i akina dyegi. Gwok wunu naka i nino dwe apar wie aŋwen me dwe man, icennere lwak jo Icrael luŋ bino neko romi megi oko otyeno. Dok myero jol remo moro ote kiro i yen doggola ryoryo kede i kom yen aria i malo mere, i udi ame bino camogi iye. Riŋo myero cam oko i dyeworrono kun abula abula; myero cam ogati a tobi mompe iye kede pot dekkogo akec. Kur mwod riŋo moro anumu onyo ame otedo i pii, ento myero butl ducu abula, anaka wie, tyene kede jami yie luŋ. Kur wek ginnoro doŋ tuno idiko; ka ce ginnoro odoŋ ame otuno naka odiko, myero waŋ oko. Ibino camo wunu kit man: ibino wunu tweyo pyerwu, kun iruko wunu amuk i tyenwu, kun abiro daŋ tye i ciŋwu; ibino camo wunu abunyebunye. Mannonoen Kato a Rwot. Pienabino bea i dye lobo Miciri dyeworrono, ate neko itino kao luŋ ame tye i lobo Miciri, mea dano kede mea leyi, kun acobo kop luŋ ame doŋ aŋolo i kom kit obaŋa ocele luŋ me Miciri; an a Rwot. Remo bino bedo gin a nyuto udi ame wun itye wunu iye; ce aneno remo, abino kato gira akata i wiwu malo. Cannoro mom bino poto i komwu ame twero nekowu, i kare ame abino pwodo kede lobo Miciri. “Nino man bino bedo nino me poyo wiwu, ame ibino gwoko wunu bedo nino adwoŋ baŋ Rwot; ibino kwero wunu karacel kede ikwaewu luŋ, me bed cik ame ibino gwoko wunu nakanaka.” Ibino wunu camo ogati a tobi mompe iye pi nino kany wie aryo; i nino me agege, myero ikwany wunu tobi luŋ i ot, iony wunu oko. Ka ce ŋattoro bino camo ogati a tobi tye iye, cakere i nino me agege-nono tuno kede i nino me abiro, dano-nono waŋe bino rwenyo oko i akina jo Icrael. I nino me agege ibino bedo wunu kede cokere acil; i nino me abiro daŋ ibino bedo wunu i cokere acil. I nino-nono luŋ mom ibino wunu tiyo ticcoro; kono ka gin ame jo luŋ camo, en ame itwero wunu yiko. Ibino wunu kwero ecuban me ogati a tobi pe iye, pien nino-nono ikome en a rik akwanyo iye atekerewu luŋ i lobo Miciri; pi mannono, myero ikwer wunu nino-nono obed cik ame ibino gwoko wunu nakanaka, wun karacel kede ikwaewu. I dwe me agege, i nino dwe apar wie aŋwen otyeno, ibino wunu camo ogati a mompe orubu i tobi naka i nino dwe pyeraryo wie acel otyeno. I nino kany wie aryo-nono myero tobi moro kur nwoŋere i udiwu; pien ŋat ame bino camo ginnoro ame tobi tye iye, dano-nono waŋe bino rewnyo oko i akina jo Icrael, kadi en welo onyo dano ame onywalo i lobowu. Mompe ibino wunu camo cemmoro a tobi tye iye; kan ame ibino wunu bedo iye luŋ, ibino wunu camo ogati a tobi mom iye. Muca te lwoŋo odoŋe me Icrael ducu, te kobbigi ni, “Apee wot iyer wunu itino romi acalo doggolawu tye kede, me inek wunu atin romo me Kato. Tur wunu jaŋ ogudo, ite luto wunu i remo ame tye i gwata; kir wunu i kom yen aria i malo mere kede i yen doggola ryoryo. Ŋattoro i akinawu kur donnyo oko i ode tuno ka piny oru. Pien Rwot bino bebea kato pi neko jo Miciri; ka Rwot bino neno remo i kom yen aria me doggola kede i kom yen aryo me doggola, Rwot bino kato i wi doggola malo, mom bino ye anek donyo i udiwu me nekowu. Gwok wunu kop man bed cik ame ibino wunu gwoko karacel kede ikwaewu nakanaka. Ka ibino tuno wunu i lobo ame Rwot bino miyowu kit a rik ociko, myero ibed wunu tiyo tic man pira. Ka ce itinowu bino penyowu ni, ‘Kodi timmi kara te koppere ŋo?’ Wun ibino wunu dokkigi iye ni, ‘Man mot ame oŋolo me yalo Obaŋa pi Kato mere, pien Rwot rik okato akata i malo i wi udi a jo Icrael i lobo Miciri i kare ame nek kede jo Miciri, eka te weko gire udiwa.’ ” Jo te kulo wigi piny woro Obaŋa. Jo Icrael te wot daŋ timo kittono; otimo kite acalo Rwot ociko i Muca kede Aron. I dye idiŋ, Rwot oneko itino kao luŋ me Miciri; ogeo i kom atin kao a Parao ame yam bedo i kommere me loc, tuno kede i kom atin kao opii ame tye i buc, karacel itino kao a leyigu. Parao te ya malo iwor karacel omiro mere luŋ kede jo Miciri luŋ. Koko rik te wo atata i lobo Miciri luŋ pien mom tye ottoro a rik odoŋ a mom dano oto iye. Parao te lwoŋo Muca kede Aron i dyeworrono, te kobbigi ni, “Ya iwot wunu oko i akina jona, wun karacel i jo Icrael luŋ; wot iti wunu baŋ Rwot, acalo rik ikwao wunu. Wotu i limwu luŋ: dok kede dyegi kede kit lim ocele luŋ, kit a rik ikobo wunu kede; wotu, lamma wunu daŋ gum!” Jo Miciri te bedo bunyo jo Icrael abunya, kun omito ni gin ru ya oko i lobogi. Gin obedo kobo ni, “Nen, wan ducu doŋ oto oko.” Pi mannono, omio jo Icrael te kwanyo moko a mom orubo i tobi, kede tako me rubo moko ogati ame onwoŋo gin oboo i gi-wumgi, ote ryoŋo i wi gwokgi. Jo Icrael te tiyo kite a rik Muca ocikogi kede; ote kwayo wei me ryal kede me jabu, kede boŋŋi i baŋ jo Miciri. Rwot te miyo cuny jo Miciri bedo ayom i kom jo Icrael, jo-nono te mimiogi jami ame gin okwao. Gin te yako jo Miciri kittono. Jo Icrael te cako wotgi i Ramecec naka i Cukot; co ame owoto i tyengi romo tutumia mia abicel kun mon kede itino mom okwano iye. Jo ocele apipim ame rokgi papat daŋ owoto kedgi, karacel i lim daŋ ecipan, dyegi kede dok, kede kit lim ocele luŋ. Gin te tedo capat i moko ame ojebo aboŋo tobi i tako me rubo moko ogati, pien obedo bunyogi abunya me ya oko i lobo Miciri, omio gin mom oyiko ginnoro me dwoko lao doggi iyo. Kare ame jo Icrael obedo kede i Miciri oromo mwaka mia aŋwen kede pyeradek. A doŋ mwaka mia aŋwen kede pyeradek otum, i nino me agikki mere ikome, en ame mony a Rwot oya kede i lobo Miciri. Dyeworrono en ame Rwot obedo kuro iye kare me kwanyogi oko i lobo me Miciri. Dyewor acellono daŋ en ame jo Icrael kede ikwaegi pwod kwero pi kuro Rwot. Rwot te kobbi Muca kede Aron ni, “Man en cikkogo ame mako Kato: arokkoro mom bino camo; ento opii luŋ ame yam owilo i lim, gin bino camo ka ce onwoŋo doŋ olirogi. Welo moro onyo apakaca moro mom bino camo. Obino camo i ot acel keken; mom daŋ ibino wunu donnyo i riŋo moro oko kun iya kede i ot, dok mom daŋ obino turo cogo moro iye. Jo Icrael luŋ bino kwero nino man. Ka ce arokkoro ame bedo i akinawu mito kwero Kato baŋ Rwot, myero kon ge liro co luŋ ame tye baŋe, en amio en daŋ doŋ te nyiggo cako kwero; en doŋ bino bedo arom i dano onywalo i lobowu. Cite ŋat a mom oliro, myero mom cam. Cik bino bedo acel keken pi anywalli kede orok ame bedo i akinawu.” Jo Icrael luŋ te daŋ timo kittono; kite acalo Rwot yam ociko i Muca kede Aron, gin otimo kittono. I kom nino-nono ikokome en ame Rwot rik okwanyo iye jo Icrael oko i lobo Miciri, kun owoto olubere atekere atekere. Rwot okobbi Muca ni, “Kwer itino kao luŋ bed mega; dano moro onyo lee moro keken iyi Icrael ame ogeo yabo ot nyodo, ginnono luŋ mega.” Muca okobbi jo ni, “Myero ipo wunu nino man ame iya wunu iye i Miciri, i ot me opii, pien Rwot okwanyowu i kan pi teko me ciŋe. Mom ibino wunu camo ogati ame orubo i tobi. I dweni, ame en dwe me Abic, wun doŋ ibino wot wunu oko, Doŋ ka Rwot bino terowu i lobo a jo Kanaan, jo Kitti, jo Amor, jo Kivi kede jo Jebuc, ame en yam ocikere pire baŋ kwariwu ni ebino miyowu, lobo ame opoŋ i cak kede moo kic, ibino tiyo wunu tic man pira i dwe-ni. Ibino wunu camo ogati a tobi mompe iye pi nino kany wie aryo; eka i nino me abiro mere ite kwero wunu nino adwoŋ baŋ Rwot. Ogati a tobi mompe iye en ame ibino camo wunu pi nino kany wie aryo. Ogati ame orubo itobi, anaka tobi daŋ, mom bino nen baŋwu i lobowu luŋ. I nino-nono ibino kobo wunu baŋ itinowu ni, ‘Man otimere pi gin a rik Rwot otimo pira i kare acon ame aya i lobo me Miciri.’ Doŋ me poyo wiwu i gin otimere-nono, kop man obino coyo te bino bedo acalo anyut i ciŋwu, dok daŋ ibino tweyo wunu i tur nyimwu me ibed wunu kobo cik a Rwot; pien Rwot okwanyowu i Miciri pi ciŋe atek. Pi mannono, gwok wunu cik man mwaka i mwaka i kare ame ociko ikome. “Ka Rwot bino terowu i lobo a jo Kanaan, acalo rik okwoŋo baŋwu kede baŋ kwariwu, te miyowu, ibino miyo wunu itino luŋ ogeo yabo ot nyodo baŋ Rwot. Itino kao a limwu daŋ luŋ ame twoni, bino bedo mea Rwot. Atin kana me kao obino lakoro i nyok romo, onyo ka ce mom olakoro, obino mojoro ŋute oko. Atin awobi me kao acel acel ame tye i akina itinoni, ibino daŋ lakoro. Doŋ ka waŋŋoro anyim atinni bino penyi ni, ‘Man kono kara te koppere ŋo?’ ibino kobbe ni, ‘Rwot rik okwanyowa oko i lobo Miciri i ot me opii i ciŋe atek. Pien i kare a rik Parao okwero oko atek ateka ni wan kur owoti, Rwot oneko itino kao luŋ me Miciri, itino kao mea dano kede mea leyi. Mannono en omio amio baŋ Rwot twoni luŋ ame ogeo yabo ot nyodo; ento awobena me kao luŋ alakoro oko,’ Bino bedo acalo anen i ŋut ciŋi onyo gin ame otweo i tur nyimi; pien Rwot yam okwanyowa oko i Miciri kede ciŋe atek.” Kare a doŋ Parao oweko jo owoto, Obaŋa mom otelogi i yo a dok tutuŋ lobo a jo Piriciti, kadi bed rik yo mere onwoŋo ceggi; pien Obaŋa okobo ni, “Ka jo-ni bino rwatte i mony, cunygi bino bale oko, ote lokere dokoko ceŋ i Miciri.” Ento Rwot otelogi kun mano kedgi piny i yo a dok tutuŋ tim ame otikere i Nam Arema. Jo Icrael rik te ya oko i lobo Miciri kun daŋ oyikere i jami lweny. Muca te kwanyo cogo kom Yucepu te wot kede; pien rik onwoŋo Yucepu omio jo Icrael okwoŋo kwoŋ atek, kun okobo ni, “Obaŋa bino limowu; myero itiŋ wunu cogona oko i kan, iwot wunu kede.” Gin oya i Cukot ote wot guro kemagi i Etam i dog tim. Rwot otelo nyimgi i pagi me pol dyeceŋ ame ocuŋ malo kun nyuttigi yo, eka dyewor te telo nyimgi i mac ame ocuŋ malo me menyo piny; me gin bed wot dyeceŋ kede dyewor; kun pagi me pol telogi icen kede me mac dyewor, ame mom oya i nyim lwak. Rwot dok te kobbi Muca ni, “Kobbi jo Icrael dok ceŋ i ŋegi me owot ogur kemagi i nyim Pikakirotiakina Migdol kede nam, i nyim Baal-jepon, iwot igur kemawu tikere kede, i dog nam, Pien Parao bino kobo kop i kom jo Icrael ni, ‘Neno doŋ otye owiwira atata; tim daŋ tye ocegere oko i nyimgi.’ Abino dok miyo cuny Parao bedo nwaŋ, en bino ryemo yorwu; mano bino miyo anwoŋo kwogo i kom Parao karacel i monnyere luŋ, te miyo jo Miciri ŋeyo ni an a Rwot.” Gin daŋ te timo kittono. Kare ame otitti abaka me Miciri ni jo Icrael doŋ olwi, oriŋo oko, Parao abaka me Miciri kede omiro mere te dok loko cunygi oko i kom jo Icrael, te kobo ni, “Gin aŋo ame wan otimonie, me weko jo Icrael ya oko i dog ticwa, ote wot oko?” Tammono omio en oyiko gadigadi mere me lweny, te telo monnyere. Owoto i gadigadi ame oyero mia abicel, kede dok gadigadi ocele me a jo Miciri kun woto daŋ odoŋe a telogi luŋ. Obaŋa te miyo cuny Parao abaka me Miciri bedo nwaŋ, te ryemo yo jo Icrael ame onwoŋo owoto oko apala apala. Jo Miciri oryemo yorgi kun Parao woto aguragura mere luŋ, kede gadigadi ecipan, karacel i wegi aguragura kede monnyere ducu; gin te mako jo Icrael kan ame gin oguro kemagi iye i ŋet nam, ame ceggi i Pi-kakirot, a tye i nyim Baal-jepon. A doŋ Parao ceggi kedgi, jo Icrael otiŋo waŋgi malo, ote neno jo Miciri tye aciro i ŋegi. Lworo te makogi atek meicel; ote kok atek baŋ Rwot, eka ote kobbi Muca ni, “Pien lyelle me yiko jo onwoŋo mom i Miciri bo, omio yin ikelowa me bino to i tim kan? Kara itimowa aman piŋo ba, me miyowa ya oko i Miciri? Mom rik okobbi i Miciri ni, ‘Wekwa obedi, otiyi jo Miciri’? Tikatika rik oti giwa baŋ jo Miciri, kato ame oto nono i tim ata kan.” Muca te kobbi lwak ni, “Kur ilwor wunu, cuŋ wunu atek, me inen wunu kit ame Rwot bino larowu kede tin; pien jo Miciri ame tin ineno wununi, mom dok ibino neno wunu atwal. Rwot bino lweny pirwu, wun bedu ka mot.” Rwot te penyo Muca ni, “Ikok kara baŋa piŋo? Kobbi jo Icrael wot anyim. Tiŋ abironi malo, ite ryeyo ciŋi i wi nam, me pokere aryo wek jo Icrael be i dye nam otwo. An abino miyo cuny Parao bedo nwaŋ, gin daŋ ote lubo yorwu; man bino miyo anwoŋo kwogo i kom Parao karacel i monnyere, kede gadigadi mere kede wegi aguragura mere. Ka doŋ atyeko nwoŋo kwogo i kom Parao kede gadigadi mere kede wegi aguragura mere, jo Miciri bino ŋeyo ni an a Rwot.” Icennere amalaika a Rwot ame onwoŋo rik telo nyim mony a jo Icrael te ya oko i nyimgi dok i ŋegi karacel i pagi me pol daŋ te dwogo i ŋegi, gin luŋ ote cuŋ i akina mony a jo Miciri kede mea jo Icrael. Pol kede piny acol icuc daŋ te bedo tye. Dyeworrono luŋ monnyoro i akinagi mom onoko wadgi i ceggi naka piny oru. Muca te ryeyo ciŋe i wi nam, Rwot te miyo yamo okodo atek dyewor benebene kun oya i tuŋ kide coro dye nam; te miyo pii i nam dokoko ceŋ, te loko nam doko kan otwo, kun pii opokere tuŋi i tuŋi. Jo Icrael te wot beo gigi kan otwo, kun pii ocuŋ bala cel i ciŋgi tuŋ cem kede tuŋ cam. Jo Miciri daŋ te luba yorgi, ote donyo daŋ i dye nam, karacel aguragura a Parao luŋ, kede gadigadi mere kede wegi aguragura mere. Kare ame onwoŋo gin tye akuro rupiny, Rwot onwoŋo gire tye i pagi me mac kede me pol kun neno mony a jo Miciri. En obabaŋo mony a jo Miciri oko, kun mako tyen gadigadigi, te miyogi doŋ ŋwec nyudunyudu. Jo Miciri te koko ni, “Oriŋ wunu oko i nyim mony a jo Icrael; pien Rwot tye alweny pirgi i kom jo Miciri.” Rwot dok te kobbi Muca ni, “Rye ciŋi i wi nam me pii dwog corre i kom jo Miciri kede i kom gadigadigi, kede wegi aguraguragi.” Muca daŋ te tiŋo ciŋe i wi nam, pii daŋ te cako dokoko kakare ka ibayi-ni. Jo Miciri onwoŋo tye ka ŋwec, Rwot te loro wigi luŋ i dye nam. Pii odwogo te mwonyo gadigadi, wegi aguragura, kede mony a Parao luŋ a rik olubo jo Icrael i nam; ŋattoro acel i akinagi mom gire obwot. Ento jo Icrael owoto gigi kan otwo i dye nam, kun pii odoko celgi ame ocuŋ i ciŋgi tuŋ cem kede tuŋ cam. Rwot rik olaro jo Icrael i ciŋ jo Miciri kittono, i nino-nono, eka jo Icrael te neno kom jo Miciri ame oto oradde i dog nam. Kare ame jo Icrael oneno tic atek ame Rwot otio i kom jo Miciri, gin olworo Rwot; ote daŋ geno Rwot karacel kede amiro mere Muca. Muca karacel i jo Icrael te doŋ wero wer man baŋ Rwot kun okobo ni, “Abino wer baŋ Rwot, pien doŋ otiŋeree malo i kwogo; oonyo aguragura kede wegigi i nam. Rwot en ka ŋwecca kede akonnya, en doŋ Lalar mera Man en Obaŋana ame abino pako, en Obaŋa a kwarona ame abino dworo nyiŋe. Rwot en twon a romo atek meicel, ame nyiŋe Rwot.” “En oonyo gadigadi a Parao karacel i monnyere i nam, twoni ame oyero luŋ omwonyere oko i Nam Arema. Pii atut omwonyogi oko; gin luŋ olwiny oko i te kut bala gweŋ.” “Ciŋi me tuŋ cem tek meicel, ama Rwot, ciŋi me tuŋ cem ŋinyo okwor oko, ama Rwot. Pi dit me kwogoni, omio ireto okwor oko piny; icwao akemoni owawaŋogi oko bala yugi. Ewura me wumi omio pii otiŋere malo, pii amol oyenyo te cuŋ igun; pii atut omakere ocuŋ karacel ikiŋ i cuny nam. Okwor rik onwoŋo kobo ni, ‘Abino ryemo yorgi, amakogi, abino poko lim ayako, te yomoro cunya, abino woto pala romona, ate tyekogi kede oko.’ Yin rik imio yamoni okodo, nam te mwonyogi oko; gin omwonyere i te twon pii adwoŋ bala atyeŋ kidi. Ŋa i akina obaŋa ocele luŋ ame rom kedi, ama Rwot? Ŋa ocele ame tye i kwogo dok daŋ cil bala yin? Gin itio obedo me kwogo kede me awura ame kela myelkom. Rik iryeo ciŋi me tuŋ cem, lobo te mwonyogi oko, Pi marri a mom lokere itelo rok a yam ilaro, pi tekoni igwoko, ite kelogi i kabedoni acil. Jo owinyo pire komgi te myel; rem me lworo doŋ ociro jo Piriciti oko, Kare-nono cuny rwode me Edom oŋabere aŋaba, lworo oonyo koyo oko i kom odoŋe me Moab, jo Kanaan onwoŋo doŋ onyobere luŋ aluŋa. Myelkom me lworo onwoŋo doŋ ocirogi oko, teko me ciŋi omio gin ocuŋ mot bala kidi, tuno ka joni okato oko i ŋetgi, ama Rwot, tuno ka jo ame iwilo doŋ okato. Ibino iterogi ite wot pitogi i wi kidini acalo yat, kan ame iyiko me kabedoni, ama Rwot, kabedo acil ame yam ciŋi omoko. Rwot gire bino bedo abaka nakanaka.” Pien kare ame aguragura a Parao kede gadigadi mere kede wegigi ocako donyo i nam. Rwot oweko pii nam odwogo i komgi; aco jo Icrael obeo kan otwo i dye nam. Eka Miriam am in Aron ame obedo adwarpiny a dako te kwanyo ajaa i ciŋe; mon ocele luŋ te daŋ kwanyo ajaagi joye kede i yore kun omyelo. Miriam te cakkigi wer ni, “Wer wunu baŋ Rwot, pien doŋ otiŋere malo i kwogo; obolo aguragura kede wegigi i nam.” Muca dok otelo jo Icrael kun ya kedgi i Nam Arema, woto kedgi i nyim, eka gin te wot naka i tim me Cur. Gin owoto i timmono wot me nino adek, mom ote nwoŋo pii. Kare ame gin otuno i Mara, mato pi i kuno te loyogi oko, pien pii mere onwoŋo kec akeca; en omio olwoŋo ni Mara. Jo te bedo ŋuŋura i kom Muca, kun okobo ni, “Wan obino mato ŋo?” Muca te kok baŋ Rwot, eka Rwot te nyutte yattoro, en te bolo yatono i pii, eka pii te doko amit. Rwot te miyogi icwil kede cik kuno, eka daŋ te omo yigi kuno, kun kobo ni, “Ka ce ibino wunu winyo kop a Rwot Obaŋawu i cunywu luŋ, kun itio wunu gin a tye atira i nyime, dok daŋ igwoko wunu gin a en ociko kun imako wunu cikkere kede icwillere luŋ, two moro mom bino makowu bala en a rik ami mak jo Miciri; pien an a Rwot, an acaŋo twowu.” Kare ame gin dok otuno Elim, kan ame rik tye iye akoŋ apar wie aryo, kede otit pyerabiro, gin oguro kemagi i ŋet pii-nono. Gin te ya oko i Elim, jo Icrael luŋ te donyo i tim me Cin, ame tye i akina Elim kede Cinai; gin odonyo iye i nino dwe apar wie abic me dwe me aryo mere ame gin oya kede i Miciri. Jo Icrael luŋ te ŋuŋura i kom Muca kede Aron i tim, kun okobbigi ni, “Kono rik Rwot onekowa i Miciri, kan ame rikobedo iye i ŋet weer rinowa, dok daŋ ocamo giwa kwon oyen; ento yin ikelowa kan i tim mene ko wan lwak joni luŋ i kec.” Rwot dok te kobbi Muca ni, “Nen ba, abino cwayiwu kwon i polo kun cwer bino baŋwu bala kot. Jo bino wot coko nino luŋ ame romo me nino acel acel, me koŋ anengi kede kace gin bino gwoko cikka onyo pe. Cite i ceŋ me abicel ka gin bino yiko gin ame ocoko, gin bino coko adwoŋ ame kato me nino ducu tyen aryo.” Muca kede Aron daŋ te kobbi jo kittono, kun okobo ni, “Tin otyeno ibino wunu ŋeyo ni Rwot kara en a yam okelowu iya i Miciri, kede odiko daŋ ibino wunu neno kwogo a Rwot, pien en otyeko winyo ŋuŋurawu ikome. Kara wan odoko na ba, ame iŋuŋura wunu i komwa-ni?” Muca te kobo ni, “Ka Rwot tin bino miyowu riŋo me acama otyeno, dok daŋ bino miyowu kwon ame romo yeŋowu odiko, mano nwoŋo otimere pien Rwot nwoŋo owinyo ŋuŋurawu ame iŋur wunu kede i kome. Wan kara odoko na ba, ame iŋuŋura wunu i komwa-ni? Ŋuŋurawu mom tye i komwa ento i kom Rwot gire.” Muca te kobbi Aron ni, “Kob baŋ lwak jo Icrael luŋ ni, ‘Biye wunu ceggi i nyim Rwot, pien otyeko winyo ŋuŋurawu.’ ” I kare ame rik Aron onwoŋo tye akop i jo Icrael luŋ, gin rik te neno tuŋ tim, cite nen, kwogo a Rwot te nen i pol. Rwot te kobbi Muca ni, “Doŋ atyeko winyo ŋuŋura a jo Icrael. Kobbigi ni, ‘Tin otyeno gin bino camo riŋo, kede diki odiko gin bino camo kwon ote yeŋ, ame bino miyo gin oŋeo ni an a Rwot Obaŋagi.’ ” Wi otyeno aluru te bino ame omwono ka gonygi oko, eka odiko daŋ toyo te luk guro ŋet gonygi oko. Kare ame toyo doŋ oony oko, ginnoro te doŋ piny ame oŋiŋida atitino bala pok rec, kun tye atitino bala bwoo pee ame odoŋ i lobo. Ka jo Icrael oneno, gin okobo kengi kengi ni, “Man kara gin aŋo?” Pien onwoŋo gin rik mom ru oniaŋ kittere. Muca te kobbigi ni, “Man en kwon ame Rwot omiowu me acama. Gin ame Rwot ociko ene: ‘Dano acel acel myero cok mege a romo acama mere; myero job i gwata omer acel pi dano acel acel, ame romo wel jo ame dano acel acel tye kede i kema mere.’ ” Jo Icrael daŋ te timo kittono; jo mogo te coko anonok, jo mogo ocoko adwoŋ adwoŋa. Cite i kare ame oporo iyi omer, ŋat ame ocoko mege abup, moro mom odoŋŋe, ŋat ocoko aduno, moro mom orem, pien ŋat acel acel onwoŋo ocoko ame eromo camo. Muca te kobo baŋgi ni, “Ŋattoro kur wek moro doŋ tuno naka odiko.” Cite gin mom te winyo kop a Muca; jo mogo te weko doŋ tuno naka odiko, eka ote nwoŋo ocako nywalo kudi oko, kun okwok aŋwe meicel; akemo te mako Muca atek i komgi. Gin te bedo coko amannono nino luŋ odiko, kun ŋat acel coko oromo acama mere; cite ka ceŋ odoko alyet, meye gire oko. I nino me abicellere, gin ocoko kwon adwoŋ ame kato me nino luŋ tyen aryo, ame romo gwata omer aryo aryo. Kare ame otelgi luŋ obino otito koppere baŋ Muca. Muca okobbigi ni, Rwot rik onwoŋo ociko ni mano, “Nino a diki-ni, obedo nino me weo mot, en cabit acil a Rwot. Bul wunu gin ame imito wunu bu lo oko, ted wunu daŋ gin ame ibino mito wunu tedo oko; en ame odoŋŋere ite kano wunu, me igwok wunu naka diki odiko.” Gin daŋ te timo amannono; ote kano, gwoko tuno naka odiko kite a Muca ocikogi kede, cite mom gire te kwok aŋwe kun kudi onywal iye. Muca te kobo ni, “Cam wunu tin mannono, pien tin obedo cabit a Rwot; mom tin ibino nwoŋo wunu moro ocele i bar. Ibino wunu coko pi nino abicel keken, ento i nino me abiro, mom bino bedo tye; nino-nono obedo cabit.” I nino me abiro jo ocele owoto ni owot coko, ento mom ote nwoŋo. Rwot te kobbi Muca ni, “Ibino kwero wunu gwoko koppa kede cikka naka awene? Nen ba! Rwot doŋ omiowu ceŋ me cabit; en gin omio i nino me abicel en miowu kwon ame romo acama nino aryo. I nino me abiro, myero dano acel acel bed mot i kabedo mere, ŋattoro kur ya i kabedo mere te wot kan ocele i nino me abiro.” Pi mannono, jo luŋ owe mot i nino me abiro. I kare-nono, jo me ot Icrael te cako nyiŋ kwonnono ni manna; rik onwoŋo cal i ocere atar, kun mit dok lim bala moo kic onwano i nino. Muca dok te kobo ni, “Rwot ociko ni ba, ‘Myero gwok moro ame romo gwata omer acel tuno naka i kare ikwaewu, me gin daŋ bin nen kit kwon ame rik apitowu kede i tim, i kare ame rik akwanyowu oko i lobo Miciri.’ ” Muca te kobbi Aron ni, “Kwany gulu, ite onyo iye manna ame romo gwata omer acel, me iket i nyim Rwot, wek bed me agwoka naka i kare ikwaewu.” Aron daŋ te tiyo kit a Rwot ociko kede Muca, te keto i nyim canduk kop me caden, me bed me agwoka. Jo Icrael te camo manna mwakki pyeraŋwen twal, naka ka gin otuno i lobo ame oromo bedo iye; gin ocamo manna naka i waŋ apokki me lobo Kanaan. (Omer rommi acel me apar me epa.) Jo Icrael luŋ te ya oko i tim me Cinai, kun owoto oko koba kit a Rwot ocikogi kede. Gin te guro kemagi i Repidim, cite pii ame myero jo mat te bedo pe. Mannono te miyo yi jo waŋ i kom Muca, ote kobbe ni, “Miwa pii me amata, loni.” Muca te gamo doggi ni, “Piŋo kara yiwu awan ikoma? Piŋo itye wunu ka omo yi Rwot?” Cite oryo pii te ciro jo atek, jo te bedo ŋuŋura i kom Muca kun okobbe ni, “Piŋo kara rik ikwanyowa oko i Miciri me miyowa to pi oryo pii, karacel itinowa kede limwa?” Omio Muca te kok baŋ Rwot ni, “Abino kara ti mo jo-ni nadi? Nen, gin doŋ oyikere me nanapo an i gweŋ” Rwot te kobbi Muca ni, “Wot i nyim jo, yer odoŋe mogo a jo Icrael iwot kedgi; kwany daŋ abironi ame rik igoo kede kulo Nail, imak i ciŋi, me iwot kede. Nen ba, an abino cuŋ i nyimi, i kom kidi me Koreb; yin ibino goyo kor kidi, eka pii te mollo iye, me jo mali.” Muca daŋ te timo kittono i nyim odoŋe ma Icrael. Nyiŋ kabedo-nono ote cako ni Maca kede Meriba, pien jo Icrael yigi owaŋ ikome dok pien gin oomo yi Rwot kun okobo ni, “Rwot tye i akinawa onyo pe?” Jo Amalek te bino lweny i jo Icrael i Repidim. Muca te kobbi Yocwa ni, “Yer co mogo i akinawu, me iwot ilweny i jo Amalek; diki an abino cuŋ i wi kidi kun abiro Obaŋa tye i ciŋa.” Yocwa daŋ te timo kite ame Muca okobbe, olwenyo i jo Amalek; eka Muca kede Aron kede Kur te yito malo i wi kidi. Ka Muca tye otiŋo ciŋe malo, jo Icrael loo lweny, cite ka en odwoko ciŋe piny, jo Amalek en a loo. A doŋ ciŋ Muca ojony oko, otino kidi, eka ote miyo Muca bedo i wie, Aron kede Kur te tiŋo ciŋe malo, kun ŋat acel tiŋo tuŋ cel, ŋat acel tino tuŋ cel; ciŋ Muca te bedo ame otiŋere kittono naka piny oyuto. Yocwa te jwero Amalek karacel i jo mere luŋ i pala romo. Rwot te kobbi Muca ni, “Co kop man i buk obed me poyo wic, eka ite wot kwano atek i yit Yocwa, ni, An abino miyo wi jo luŋ ame tye piny i te polo wil oko i kom jo Amalek.” Muca te cano keno me lam me miyo mot oŋolo me yalo Obaŋa, te lwoŋo ni, Rwot en benderana, kun kobo ni, “Ciŋwa omako bendera a Rwot! Rwot gire bino lweny i jo Amalek kare luŋ.” Yecero, alamdog a jo Midian, papa a dako a Muca, rik te winyo jami luŋ ame Obaŋa obedo tiyo pi Muca kede jo mere Icrael, kit ame Rwot okwanyo kede jo Icrael i Miciri. Yecero, papa a dako a Muca, onwoŋo ogamo Jipola dako a Muca i kare ame en koŋ onwoŋo ocwae paco, karacel awobe mere aryo. Nyiŋ awobi acel Gerecom, pien onwoŋo rik en okobo ni, “Pien an doŋ abedo welo i lobo a mom megwa.” Nyiŋ awobi ocele Eliejer, pien onwoŋo rik en okobo ni, “Obaŋa a pappa gira en okonya, olara i pala lweny a Parao.” Kare ame Yecero papa a dako a Muca obino baŋ Muca i tim i kidi Obaŋa kan ame onwoŋo gin oguro kemagi iye, kun en onwoŋo obino karacel awobe a Muca aryo kede dako mere, dano moro te wot kobbi Muca ni, “Nen, Yecero papa a cegi kede cegi kede awobeni tye abino baŋi.” Muca te ya wot jolo papa a cege, te ryebere piny i nyime, eka te noto leme; gin doŋ te cako mote kun opepenyo kite a gin obedo bedo kede, ote donyo kede i kema. Muca te titti papa a dako mere jami duc ame Rwot otimo i kom Parao kede jo Miciri pi jo Icrael kede peko ame gin orwatte kede iyo, karacel kede kit a rik Rwot olarogi kede. Cuny Yecero te bedo yom pi jami ducu ame Rwot otimo baŋ jo Icrael, ame olarogi kede i ciŋ jo Miciri. Yecero te kobo ni, “Rwot ame olarowu iciŋ jo Miciri kede iciŋ Parao, myero mi pwoc. Aman doŋ aŋeo ni Rwot dwoŋ atek kato kit obaŋa ocele luŋ, pien olaro jo mere i ciŋ jo Miciri ame yam obedo tic kedgi agwa meicel.” Yecero papa a dako a Muca te miyo mot awaŋa kede kit mot ocele me yalo Obaŋa. Aron kede odoŋe a jo Icrael luŋ te bino cam i nyim Obaŋa karacel i papa a dako a Muca. Orwo mere Muca te bedo ŋolo kop a jo, jo te bedo cuŋ guro Muca cakere odiko naka ceŋ iyul. Ka papa a dako a Muca oneno jami luŋame en obedo timo pi jo, okobo ni, “Yin it ye ka tero jo man niŋo? Piŋo yin ibedo keni kun jo ocuŋ oguri cakere odiko naka ceŋ iyul?” Muca te dokki papa a cege ni, “Pien jo bino baŋa me penyo koppogo baŋ Obaŋa. Ka ce gin tye i kopporo ame olaro, gin bino kede baŋa, an ate ŋolo kop i akinagi kun amiogi oŋeo cik Obaŋa kede gin a en oŋolo.” Papa a cege te kobbe ni, “Gin ame yin itiyo mom kakare. Nen yin kede jo luŋ iol wunu oko pien ticcere onwoŋo pek atekateka ame yin keni mom iromo tyeko. Doŋ akwai me winyo koppa, me amii ryeko, dok Obaŋa bed kedi! Yin ibino bedo akwe na a jo i nyim Obaŋa kede me tero kopgi baŋ Obaŋa. Yin myero ipwonygi cik kede kite me ŋolo kop, kun imiogi oŋeo kite a myero gin ogwokere kede, kede kite a myero gin oti kede. Ento yin yer jo aryek i akina jo, jo ame lworo Obaŋa, ame genne dok ame mom mito lim me wil; wek iket jonono loo lwak, me gin bed jo ame loo jo tutumia kede jo mia, kede jo pyerabic kede jo apar. Wek jo-nono ŋol kop a jo kare luŋ; kun okelo baŋi kop atekkege keken, cite en atitino mere gin myero tyek gigi oko i kuno. Mannono bino miyo gin mii kare me weo dok bino miyo inywako kedgi tic man apekki. Ka ce ibino timo kit man, dok Obaŋa daŋ ociki amannono, bino miyo ikanyo ite miyo jo man tuno i kabedogi i kuc.” Muca te winyo kop a papa a cege, te timo ginnoro luŋ ame en okobbe. Muca te yero jo aryek i akina jo Icrael luŋ, te ketogi me bedo otel a lwak, oketo jo ame loo jo tutumia, kede mia, kede pyerabic kede mea jo apar. Jonnono te bedo ŋolo kop i kare luŋ, kono ka pido mogo atek en ame otero baŋ Muca, aco en atitino mege, gin tyeko oko i kuno. Muca te lwoko papa a cege weko iyo, en doŋ te medde i wot anyim naka paco. I dwe me adekkere cakere kare ame jo Icrael oya kede Miciri, i nino-nono ikokome, gin otuno tim me Cinai. Gin onwoŋo oya i Repidim, ote bino i tim me Cinai, eka gin te guro kemagi i nyim kidi me Cinai. Muca te yito malo i wi kidi baŋ Obaŋa, Rwot te lwoŋe i wi kidi kun kobbe ni, “Wot ikobbi ot a Yakobo, ititti itino Icrael ni, ‘Doŋ ineno wunu gin ame atimo pirwu i kom jo Miciri, kede kite ame atiŋowu kede i bwom cur ate kelowu baŋa. Doŋ ba, ka ibino winyo wunu koppa kun igwoko wunu cikerena, wun ibino bedo wunu jona ikoma i akina rok luŋ, pien lobo luŋ obedo mega. Wun doŋ ibino bedo wunu lwak ame an en aloo, kun ibedo wunu olamdog, dok ibino bedo wunu rok acil.’ Mannono en kop ame ibino ko bo baŋ jo Icrael.” Muca daŋ te timo amannono, olwoŋo odoŋe a loo lwak te kobbigi kop ame Rwot okobo-nono. Jo luŋ te gamo i dwon acel ni, “Ginnoro luŋ ame Rwot okobo, wan obino tiyo.” Muca te dwoko kop a lwak baŋ Rwot. Rwot te kobbi Muca ni, “Nen ba, an abino baŋi ipol oculle acula, me jo winy dwona i kare ame akop kedi, me oye yin doŋ atwal.” Muca te kobbi Rwot kop ame jo okobo. Rwot te ciko Muca ni, “Wot imi jo lonyere tin kede diki, me jo bed acil, dok daŋ olwok rukgi, me nino me adekkere nwongi doŋ oyikere oko, pien i nino me adekkere, Rwot bino yitto bino piny i wi kidi me Cinai i nyim jo luŋ. Dok daŋ myero imi jo ŋe ka kwene a myero gin gik iye tuŋi i tuŋi, kun ikobbigi ni, ‘Gwokere wunu, kur iyit wunu i wi kidi, dok daŋ kur igud wunu kidi, ŋat ame bino gudo kidi, obino neko oko. Ciŋ ŋattoro mom bino gudo kome, obino nape i gweŋ; onyo celo kede atero, kadi dano onyo lee mom bino bedo kwo.’ Ka opel bino kok ame koŋ ri ri, jo bino yito malo i kor kidi.” Muca te yitto piny i wi kidi, te bino baŋ lwak, eka te miyo jo lonyere, ote daŋ lwoko rukgi, Te doŋ kobbi jo ni, “Nino me adekkere myero nwoŋ doŋ iyikere wunu oko, kur ibed wunu ceggi i mon.” I nino me adekkere odiko, piny te bedo momora kun daŋ memenya atata, pol oculle acula te wumo wi kidi oko, opel te kok aloŋo meicel, omio jo luŋ te bedo i gonygi kun komgi amyel amyela. Icennere Muca te kelo jo oko me rwatte Obaŋa; jo te cuŋ piny i te kidi. Yito te wumo kom kidi me Cinai oko ipuk pien Rwot oyitto piny i mac; yito mere onwoŋo duny woto malo bala yito mac me waŋo gulu, kidi daŋ te yeŋere atek. Kare ame dwon opel omedde kok aloŋo, Muca te bedo kop kun Obaŋa gamo doge i mor kot. Rwot te yito piny i wi kidi me Cinai, te lwoŋo Muca i wi kidi malo, eka Muca te wot baŋe kuno, Rwot te kobbi Muca ni, “Yit piny iwot ikwenyoro jo, me kur obed cerre acera pi mito neno Rwot, pien bino miyo jo apol to. Dok anaka olamdog ame obino ceggi baŋ Rwot myero lonyere kengi obed acil, me akemo kur mak Rwot te mukere i komgi.” Muca te gamo ni, “Jo mom bino yito malo i wi kidi Cinai, pien yin ikomi icikowa kun ikobo ni, ‘Myero imi jo ŋe ka kwene a myero gin gik iye i te kidi, eka ite lonyo bedo acil.’ ” Rwot te kobbe ni, “Yit piny, me iwot idwog malo kan wun kede Aron; cite kur imi olamdog kede lwak cerre me bino baŋa, an a Rwot, naka mio cunya waŋ ate mukere i komgi.” Muca daŋ te timo amannono, te yitto piny baŋ lwak wot tittigi kop a Rwot. Obaŋa rik okobo kop man luŋ, kun kobo ni, “An a Rwot Obaŋani, ame rik akwanyi oko i lobo me Miciri, i ot me opii. “Kur dok ibed Obaŋa moro ocele kono ka an keken. “Kur iti cal ginnoro ame ipao piri keni, kadi cal ginnoro ame tye malo i polo, onyo ame tye piny i wi lobo, onyo ame tye i pii ame tye piny i te lobo; kur iryebere piny i nyimgi, kur iworgi; pien an a Rwot Obaŋani, an Obaŋa ame nyek; aketo can i kom ikwae a jo ame daga pi bal a kwarogi naka tuno i kom lwagi me adek kede me aŋwen i kom ikwaegi, ento anyuto marra a mom lokere baŋ jo tutumia kede tutumia ame mara, ame mako cikka. “Kur ilok nyiŋ Rwot Obaŋani odok gi-tuko; pien Rwot bino miyo kop loo ŋat a tuko kede nyiŋe. “Po pi nino me cabit, ikwer bed acil. Ibino tic atek pi nino abicel, kun itio ticci ityeko luŋ; ento nino me abiro en cabit a Rwot Obaŋani Ninonono kur igud ticcoro, kadi yin ikomi, onyo wodi, onyo nyari, kadi opiini onyo aŋecani, kadi dyaŋŋi, onyo arokkoro ame bedo i akinawu; pien Rwot yam otio polo kede lobo, kede nam kede jami ducu ame-tye iye pi nino abicel, ento i nino me abiro owe iye; en omio Rwot omio winyo i kom nino me abiro, te lonyo bedo acil. “Wor pappi kede totti me iperakino i lobo a yam Rwot Obaŋani omii. “Kur inek. “Kur icod cot. “Kur ikwal ginnoro. “Kur ikob kop goba i kom ŋattoro. “Kur ibed paro ot a ŋattoro, kur ipar dako a ŋattoro, kadi opii mere, onyo aŋeca mere, onyo twonnere, onyo kana mere, kadi ginnoro ducu ame tye baŋe.” Kare a doŋ jo oneno piny obedo momora kede memenya atata, opel tye akoko, dok yito daŋ owumo kom kidi oko ipuk, lworo omakogi atek, komgi daŋ te bedo myel amyela. Jo te cuŋ i teŋe kannabor. Ote kobbi Muca ni, “Yin en ikob kedwa, wan obino winyo; ento kur imi Obaŋa en a kob kedwa; bino miyo wan oto oko,” Muca te kobbi jo ni, “Kur ilworu pien Obaŋa obino me temo cunywu, me ibed wunu i lworo i kome, wek kur ibal wunu.” Jo te cuŋ teŋe kannabor, kun Muca en owoto ceggi i pol ocido icuc, kan ame Obaŋa tye iye. Rwot te kobbi Muca ni, “Kobbi jo Icrael ni ba, ‘Doŋ ineno wunu giwu kenwu ni Rwot okobo kedwu kun tye i polo. Mom ibino wunu tiyo obaŋa moro me ryal me nywako kabedo keda, pe daŋ ibino wunu tiyo obaŋa moro me jabu pirwu kenwu Tiya wunu keno me lam kede lobo, ŋolla wunu iye mot awaŋa kede mot me kweyo cuny, romi, kede twonniwu. I kabedo luŋ ame abino miyo jo po iye nyiŋa, abino bino iye me miyowu gum. Ka itio wunu keno me lam pira kun itio wunu i kiddi kur icanu iye kiddi ame opao; pien ka ibino keto iye jami ticci, nwoŋo doŋ ibalo oko. Dok daŋ kur iyit wunu i keno me lamma kede kiddi ame ocano me yito, mio komwu bino nen oko i kare iyito wunu. “Cik ame myero iket wunu i nyim lwak ene: Ka ce iwilo opiini ame obedo dano me Eburania, en bino tic baŋi pi mwakki abicel, i mwaka me abiro mere ibino gonyo woto aboŋo culo limmoro me lakoro en. Ka ce onwoŋo rikobino en kene, en daŋ bino wot kene, aco ka onwoŋo obino ame onyomo, en bino wot i dako mere. Aco ka adwoŋŋere en ame omie dako, eka en te nywalo awobe kede anyira, dako kede itino mere bino doŋ baŋ adwoŋŋere, en bino wot gire kene. Cite ka opii-nono bino kobo kannaler ni, ‘An gira amaro adwoŋŋa, kede dakona, kede itinona; mom daŋ amito ni gonya,’ adwoŋŋere bino tere baŋ Obaŋa, te tere naka i ŋet kika, onyo i kom yat me doggola; eka adwoŋŋere te tuco yite kede atero, en doŋ te tic baŋe nakanaka. “Ka ce dano moro ocato nyare oko acalo aŋeca, nyannono mom obino gonyo bala opii. Ka ce en mom oyomoro cuny adwoŋŋere a rik onwoŋo oyere me bedo mere ikome, en myero ye ŋattoro lakoro kede lim; cite danonono mom bino bedo i twerroro me cate baŋ arokkoro ocele, pien obwole nono. Ka ce onwoŋo en rik oyero nyannono pi wode, en myero gwok nyannono a rom aroma i kite ame en gwoko kede nyare. Ka ce en onyomo dako mere ocele, myero mom jwik cam a nyannono, onyo rukkere, onyo kare ame en bedo kede baŋe. Ka mom bino cobo jami adek-ki, obino gonyo dako-nono aboŋo culo limmoro me lakoro. “Ka ŋattoro ogoo dano, ce oto oko, en daŋ obino neke oko, Cite ka onwoŋo mom obedo kiye akia, ento Obaŋa omio dano-nono opoto i ciŋe, abino yero kabedo moro a myero en riŋ lar, Aco ka dano moro oero lweny me akaka i kom ŋattoro ocele kun tye i cuny me neko oko i ryeko, obino kwanyo dano-nono oko i kom keno me lam ma, ote neko oko. “Ka ŋattoro ogoo pappere onyo tottere, obino neko oko. “Ka ŋattoro okwalo dano, te cato oko baŋ dano ocele onyo onwoŋo gire baŋe, obino neko dano-nono oko. “Ka ce ŋattoro oceno pappere onyo tottere, dano-nono obino neko oko. “Ka ce jo moro obedo da, ce ŋattoro onapo awottere i kidi onyo odoŋo adoŋa i ciŋe mom te to, ento obedo twoye i kabuto, icennere ka dano-nono oya malo ame woto kun komo akoma kede abiro, kop mom bino loyo ŋat ame ogoo-nono ento en bino culo kare mere ame obalo me tic, dok bino miyo dano-nono can aber. “Ka ce ŋattoro ogoo opii mere onyo aŋeca mere kede abiro, ka oto oko i caa-nono, obino keto can i kome. Aco ka opii-nono koŋ dok ori pi nino acel onyo aryo te to, mom obino keto cannoro i kome; pien opii-nono obedo limmere gire. “Ka ce co onwoŋo tye alweny, eka ŋat acel ciŋe te cer i kom dako ame yie doŋ otego oko, ce yie-nono oony oko, kun cannoro ocele mom onen iye, dano ame ogoo dannono bino culo kwor i wel lim ame won dako bino ŋolo, kun culo kit ame aŋolkop omoko. Aco ka ce cannoro onen iye, obino culo kwo kede kwo, waŋ kede waŋ, lak kede lak, ciŋ kede ciŋ, tyen kede tyen, mac kede mac, awano kede awano, apwoda kede apwoda. “Ka ce ŋattoro ogoo waŋ opii mere onyo mea aŋeca mere, ce oloo toŋ waŋe oko, en doŋ bino gonyo opii-nono onyo aŋeca-nono woto oko pi waŋe-nono. Aco ka otwomo lak opii onyo mea aŋeca te muko oko, en bino gonyo opii-nono onyo aŋeca-nono weko woto pi lake-nono. “Ka ce twonnoro ocobo dano moro i tuŋe, onyo dako, ce oneko oko, twonnono obino napo oko i gweŋ, dok riŋo mere mom obino camo ento kop pe bino loyo wonnere. Cite ka twonnono onwoŋo yam maro cobo jo i tuŋe con, dok yam doŋ ociko wonnere oko pire, cite wonnere gire mom te gwoko, ka ce twonnono oneko dano, onyo oneko dako moro, twonnono obino napo oko i gweŋ, wonnere daŋ obino neko oko, Aco ka oŋolle cul, en bino culo lim luŋ ame oŋolle pi lakoro kwo mere, Aco ka ocobo awobi onyo nyaka a lo moro, obino daŋ tic i cik acellono, Aco ka ocobo opii onyo aŋeca moro, wonnere bino miyo cekel me ryal pyreradek baŋ won opii-nono, kun twon onapo oko i gweŋ. “Ka ce ŋattoro oweko wi bur twolo kun mom owumo, onyo ka ŋattoro okunyo bur eka pe te wumo wie oko, ka ce twon onyo kana moro opoto iye, won bur bino culo. En bino culo lim baŋ wonnere, en te tero riŋo lee opoto i bur. “Ka ce twonnoro otwomo twon ocele te neko oko, obino cato twon akwo-ni oko ote poko limmere. Riŋo twon oto daŋ obino poko apoka. Aco ka twonnono onwoŋo yam oŋeo ni en maro twomo twoni wadgi, kun wonnere daŋ mom ogwoko, en bino culo twon kede twon wadgi kun en oto-ni bedo mege. “Ka ce ŋattoro akwalo twonnoro onyo romo moro, ce oneko oko onyo ocato oko, dano-nono bino culo twoni abic pi twon acel, romi aŋwen pi romo acel. En bino culo waŋe. Aco ka gire moro mom, obino cate en ikome oko, me ote culo kede lim ame okwalo. “Ka dok onyo dyegi onyo kit limmoro luŋ akwo ocamo poto a ŋattoro, onyo olokkere, onyo wonnere ogonyo te wot camo poto a ŋattoro, won lim bino culo kede mere abeco ame tye i poto mere kede iyi poto olokkere. “Ka ce maccoro owaŋ eka te ŋamo okuto, te waŋo kai ame onwoŋo ocoko karacel, onyo en ame mom ru okao, onyo owaŋo kai i poto luŋ, ŋat ocwinyo mac bino culo ducu. “Ka ce ŋattoro omio limmere baŋ awottere ni kanne onyo gwokke, eka ote kwalo oko i ot a dano-naca, dok daŋ ote nwoŋo ŋat ekwalo oko, obino culo ginnoro a rom kede tyen aryo. Aco ka mom onwoŋo akwo, won ot bino wot i nyim Obaŋa, pi nyuto ni en gire ciŋe mom ogudo jami awottere. “Ka ce jo moro tye alaro ginnoro i akinagi kadi ginnono obedo twon, onyo kana, onyo romo, onyo boŋo, onyo ginnoro keken ame orwenyo, eka ŋattoro i akinagi te kobo oko ni, ‘Neno wunu en ene,’ kop ame onwoŋo tye i akina jonnono obino tero i nyim Obaŋa. Ŋat ame Obaŋa oŋolo kop oloo bino culo awottere a doko ginnaca tyen aryo. “Ka ce ŋattoro onwoŋo ojoko kana baŋ awottere, onyo twon, onyo romo, nyo kit lee moro ocele, eka te to oko, onyo ogoo agoa onyo oryemo te rwenyo atwal, kun ŋattoro gire mom oneno, ŋat ojokke bino kwoŋ i nyiŋ Rwot me nen ka en ikome ciŋe mom ogudo jami awottere. Ka ce en okwoŋo, won jami myero ye kwonnere-nono, en mom bino culo. Cite ka ekwalo akwala i baŋe, en bino culo won jami. Ka ce lee tim en omwodo, ka en okelo ginnoro ame nyuto, en mom bino culo gin ame lee tim omwodo. “Ka ce ŋattoro onwoŋo oomo dyaŋ, dyel onyo kit limmoro akwo i baŋ awottere, eka te wanne onyo to oko kun wonnere mom tye, dano-nono myero culi. Ka ce onwoŋo wonnere daŋ tye, mom obino culo waŋe; ka rik onwoŋo okelo pi tic me awak cul me awak bino romo. “Ka ce lo moro obedo bibito nyannoro a pwod tidi a mom ru oneye ico, a mom ru daŋ ocako nyomo, eka te buto kede, en myero doŋ cul lim me nyomo obed cege. Aco ka papa a nyako okwero oko i nyare, en bino culo lim ame romo nyomo nyako a mom ru oŋeye i co. “Myero kur wek dako ame ajok bed kwo. “Ŋattoro obu to i lee daŋ myero nek oko. “Ŋat ame oyalo obaŋa moro ocele a mom Rwot, myero nek oko bala gin me kwer. “Kur itim arokkoro ame bedo i akinawu arac, kur daŋ iwune, pien wun daŋ rik ibedo wunu wele i lobo me Miciri. Kur iwun wunu dako moro a cware oto onyo atin kiccoro. Ka ce iwuno wunugi, eka gin te kok baŋa, an gira abino winyo kokogi. Akemo bino maka atek ate nekowu oko i pala lweny, eka monwu daŋ le doko mon a coggi oto, itinowu daŋ te doko itino kice. “Ka ce imio acannoro i akina jona ame bedo baŋi okoporo ginnoro i baŋi, mom ibino tere kite ame omi-banya tero kede jo, mom daŋ ibino mito magoba moro i baŋe. Ka ce awotti ojeŋo boŋo mere baŋi, myero idwokke oko ame ceŋ mom ru opoto; pien mannono gin ame en wum kede eno keken, boŋo ame wumo kome, en bino buto kara i gin aŋo? Ka ce dano moro bino kok baŋa, an abino winyo koko mere, pien an gira akica. “Kur iyet Obaŋa, kadi ceno nattoroame loo lwak. “Kur ibed gal i gin ame ikaa opoŋ deroni karacel i kono olok kede moo ame opon guluni. Mi moro oko oyot me mot baŋa. “Itinoni me kao awobe ibino miyogi baŋa. Twonni kede romini daŋ ibino timo kittono. Gin bino bedo baŋ totogi pi nino kany wie aryo, cite i nino me aboro ibino miyogi baŋa. “Ibino wunu bedo jo acil ame okwero pira; pi mannono kur icam wunu riŋo ame lee tim omwodo; myero ibolli wunu gwogi. “Kur ibed lalo kop anike. Kur iribere i dano arac ame maro kobo goba pi timo jo rac. Kur ilub lwak jo a wot timo gin arac. Kur daŋ iletjere baŋ lwak jo ame apido goba pi balo ŋolo kop kakare. Kur daŋ idwor acan i pido mere. “Ka ce icop i kom twon onyo kana akworri ame orwenyo, myero idwok baŋe. Ka ce ineno kana a lon adagi obuto piny ame yec obwoo kur iweke amannono, myero ikonye me ya malo. “Kur igen acan loyo koppere. Kur ilutte i kopporo me goba. Kur daŋ imi nek ŋattoro aber a mompe i bal, pien an mom abino ye obalo loo kopgi. Kur igam ginnoro me wili, pien kodi willono wumo anaka wan jo ame neno aber, eka te balo pido a jo ame atira. “Kur iwun arokkoro ame bedo i akinawu; yin iŋeo aber kite me bedo arok, pien yin daŋ rik kon ibedo arok i Miciri. “Ibino puro potoni pi mwakki abicel kun ikaa gin ocek iye, cite i mwaka me abiro mere, ibino weko potoni we kun mom opuro. Ginnoro luŋ ame bino cek i potoni i mwaka-nono bino bedo me ocan ame tye i akina joni, eka en adoŋŋere te bedo mea leyi me tim. Cik acellono en ame daŋ ibino lubo pi poto olokki kede poto jeituni meri. “Ibino tiyo tic meri pi nino abicel, ento i nino me abiro mere, ibino weo; me twoni kede kanani daŋ nwon weo, wot aŋecani kede arokkoro ame bedo baŋi daŋ nwon dok teko me komgi. Mak wunu kop luŋ ame atyeko doŋ kobbiwu. Kur ilwon wunu nyiŋ obaŋa moro ocele; kodikoppono myero kur winyere i dogwu kadi acelloro. “Ibino kwero wunu ecuban adoŋo adek i mwaka acel. Ibino kwero wunu ecuban me Ogati a Tobi Mom iye kite a rik acikowu kede. Ibino wunu camo ogati a mom orubo i tobi pi nino kany wie aryo, i kare a rik aciko, i dwe me Abic, pien mannono en kare a rik iya wunu kede i Miciri. Ŋattoro myero kur bin i nyima i ciŋe nono. Ibino daŋ kwero wunu ecuban me wi mwaka kun imio wunu motwu me cam ocek pi ticwu i kom gin onwoŋo icoo wunu i pottiwu. Dok daŋ ibino kwero wunu ecuban me nyono cam i dero i agikki mwaka ame nwoŋo doŋ icoko kit cammoro luŋ ame ipuro i mwakanono. Co luŋ a tye baŋi bino bino i nyim Rwot Obaŋa tyen adek i mwaka acel. “Kur imi remo me gin oŋolo me yala karacel ogati a tobi mom tiye. Dwol leyi ame oŋolo me yala i kare me ecuban, myero kur wek moro ri tuno naka odiko ocele. “Cam me wi mwaka ogeo cek abeco i potoni, myero ikel i ot a Rwot Obaŋani. Kur ited riŋo atin dyel kede cak a tottere. “Nen, abino cwalo amalaika i nyimi me gwoki iyo, dok me teli teri naka i kabedo ame rik ayiko piri. Myero iwore, iwinye, kur daŋ ipyem kede, pien mom bino timmi kica ka ijem. Twerra luŋ tye i ciŋe. “Cite ka ibino winye kede cunyi luŋ, kun itio gin ame en okobbi luŋ, abino bedo akwor okworri dok abino dago jo a dagi. Amalaika bino telo nyimi kun teri baŋ jo Amor, jo Kitti, jo Periji, jo Kanaan, jo Kivi, kede jo Jebuc; eka ate jwerogi oko. Kur iryebere wunu piny i nyim obaŋegi, kur iworgi wunu, kur iti wunu bala gin, ento ibino wunu turo wunugi oko kun imumuko wunu gweŋegi ame ocucuna me awora. Ibino woro wunu Rwot Obaŋawu, cite en bino miyowu winyo, ite nwoŋo wunu cam abup kede pii. Abino miyo two moro bedo mom i akinawu. Lee moro mom bino bwogo dok dako moro daŋ mom bino bedo oraŋa i lobowu. Abino miyo kwo meri cobere aber kakare. Abino miyo jo i nyimi luŋ bedo lwor, dok daŋ abino babano jo luŋ ame bino rwatte kedi. Abino miyo okworri luŋ riŋo oko i nyimi. Abino miyo pipino ager corre i nyimi te ryemo jo Kitti, jo Kanaan, jo Kivi oko i nyimi. Mom abino ryemogi luŋ i nyimi i mwaka acel keken, mio lobo doŋ oko nono, eka leyi me tim tte nya, medde, te yelowu. Abino ryemogi momot, tuno wan ame yin inya iromo lobo. Wan loboni bino ya i Nam Arema tuno naka i Nam a jo Piriciti, cakere i tim naka i kulo Efurate. Abino daŋ miyo wegi lobonono i ciŋwu, yin ibino ryemogi oko i nyimi. Myero kur icikere kedgi, kadi baŋ obaŋegi. Dok gin myero kur bed i loboni, bino miyo yin itimo bal baŋa. Pien woro obaŋagi bino doko kumma me cikowu.” Rwot dok te kobbi Muca ni, “Biye malo baŋa kan wun kede Aron, kede Nadab, kede Abiku karacel kede odoŋe a jo Icrael pyerabiro, bin iwora wunu i kannabor. Muca kene en ame myero nok Rwot ceggi, ento jo Icrael ocele luŋmom myero bin aceggi. Jo myero mom yit karacel kede malo.” Muca te dwogo baŋ jo, te daŋ tittigi kop a Rwot okobo luŋ karacel kede cikkere luŋ. Jo luŋ te gamo i dwongi acel ni, “Wan obino tiyo ginnoro luŋ ame Rwot ociko.” Muca te coyo kop a Rwot luŋ. Orwo mere en te dilo odiko con, te cano keno me lam i te kidi, te daŋ cibo gweŋe apar wie aryo kuno ame oporo wel atekere apar wie aryo me Icrael. En te cwayo awobe Icrael me wot yalo Obaŋa i mot awaŋa alutu kede twoni me mot me kweyo cuny. Icennere Muca te kwanyo nucu meremo leyi oŋolo, te onyo i weer, kede dok nucu mere, te coro i kom keno me lam. Te dok kwanyo buk me cikere kwano baŋ jo. Jo te gamo ni, “Wan obino tiyo ginnoro luŋ ame Rwot ociko, dok daŋ obino winyo koppere.” Muca dok te tino remo coro i kom lwak, kun kobo ni, “Nenu remo me cikere ame Rwot ocikere kedwu, ame rwatte ikop magi luŋ.” Muca, Aron, Nadab, Abiku ka race I kede odoŋe a jo Icrael pyerabiro te wot malo, te neno Obaŋa a jo Icrael. I te tyene piny rik tye iye ginnoro acalli capir ame opeto kun ryeny bala polo ikokome. Cite Obaŋa mom ogudo kom odoŋe me Icrael i ciŋe; gin oneno Obaŋa, ote cam dok daŋ ote mat. Rwot te kobbi Muca ni, “Biye baŋa malo i wi kidi, me ibed ikura kuno. Me abin amii kiddi apada ame acoo iye kede gin aciko me pwonyo lwak.” Muca te ya malo karacel kede Yocwa ame onwoŋo konye. Muca te wot i wi kidi Obaŋa. En okobbi odoŋe ni, “Bed ikura wunu kan, tuno ka an adwogo baŋwu. Nen, aweko Aron kede Kur odoŋ baŋwu, ka ce ŋattoro tye kede kopporo myero wot nengi.” Kare ame Muca doŋ oyito oko malo i wi kidi, pol te wumo kidi oko, Kwogo a Rwot te bedo i kom kidi me Cinai, pol te wumo oko pi nino abicel, cite i nino me abiro, Rwot te lwoŋo Muca i dye pol. I karenono kwogo a Rwot te nen baŋ jo Icrael bala mac arum ame awaŋ alyet i wi kidi. Muca te wot donyo i dye pol, te bedo kuno nino pyeraŋwen, dyeceŋ kede iwor. Rwot te kobbi Muca ni, “Kobbi jo Icrael raya mot; ibino rayo wunu gin ame dano acel acel bino ye miyo i cuny aber. Mot ame ibino wunu rayo i baŋ jo ene: jabu, ryal, mola, uci ame obedo bululu kede amaramar, kede are ma, kede boŋo me camanini aber; yer dyegi, lao nyogi romi ame onyoŋo kede me dyegi; bao me yat okuto alwi; moo me mac tara, gin a ŋwece kur me yiko moo wir kede me odok akur me awaŋa, gweŋe alilia me onik kede en ocele mere me amwona i kom jabu, pi epod kede pi icao kor. Jo myero yikka kabedo acil me abed i akinagi. Ibino yiko wunu kema kede jami luŋ ame bino bedo iye kite ame abino nyuto baŋi. “Obino payo canduk bao okuto alwi; borrere myero bed futi aŋwen, laccere futi aryo, kede borrere me malo futi aryo. Mwon kome oko i jabu ame olio aber, mwon yie kede ŋec; eka ite dolo doge oko i jabu. Ti atem me jabu aŋwen, ite keto i tyene aŋwen luŋ; atem aryo tuŋ cel kede aryo tuŋ ocele. Yik daŋ ludi aryo me yat okuto alwi, ite mwono komgi oko i jabu. Rwak ludi iyi atem luŋ ame tye i ŋet canduk, me tiŋo canduk. Ludinono bino bedo i kom atem ame tye i kom caduknono nakanaka, mom myero kwany kadi acel. Kiddi apada ame ocoo kop me caden i komgi, ame amii-ni, ibino keto iyi canduk ame kop me caden bedo iye. Ibino daŋ dok tiyo kom-me-kica i jabu ame olio aber: borrere myero bed futi aŋwen kede laccere futi aryo. Ti daŋ okerubi me jabu aryo i kom agikki kom-me-kica aryo ducu, kun iteto kede anyul. Ti okerubi acel i agikki mere tuŋ cel kede acel tuŋ cel; mi okeru bi ku bere i kom-me-kica, i agikki mere aryo ducu. Ibino miyo okerubi yaro bwomgi malo kun wumo kom-me-kica; kun waŋ acel acel neno me awottere, ame gin aryo luŋ oneno kom-me-kica. Ibino cibo kom-mekica cuŋ i wi canduk, eka ite keto kop me caden ame abino miyi-ni iyi canduk. An abino rwatte kedi kuno, ate kop kedi malo i wi kcm-me-kica, kede i akina okerubi ame tye malo i wi canduk ame kop me caden bedo iye kun akobo kedi i kom cik luŋ ame abino miyo jo Icrael. “Ti daŋ meja kede bao okuto alwi; borrere myero bed futi adek kede laccere futi acel kede nucu, eka borrere me malo te bedo futi aryo. Mwon kome oko i jabu ame olio aber, dok idol daŋ laŋete luŋ kun imwono oko i jabu, Ket arii mere ame laccere rom aroma i cuny ciŋ; dol daŋ lak arii luŋ i jabu. Ti daŋ atem me jabu aŋwen pire, eka ite mwono atemmono i twoke aŋwen luŋ, i tyene aŋwen. Atem bino buto i kom arii, eka ite rwako iye lut me tino meja. Ludi me tino meja daŋ ti kede bao okuto alwi, ite daŋ mwono komgi oko i jabu; ludi-nono obino tiŋo kede meja. Ti daŋ cani mere kede bakuli mere me keto odok akur; ti daŋ cupa kede tabbi me liyo mot amata ame omio me yalo Obaŋa; ti kede jabu ame olio aber. Ogati me aketa i nyim Rwot ibino cano i wi meja didik. “Ibino daŋ tiyo gi-cibo tara me jabu kun itio i jabu ame olio aber. Tere kede bollere myero tet kede anyul; ikopo mere, ame en wene kede ature, bino kubere kede karacel. Jaŋe bino bedo abicel ame oryeye i ŋete luŋ kun adek tye tuŋ cel kede adek tuŋ cel. Ikopo adek ame otio bala tur yao bino bedo i jane tuŋ cel, kun ikopo acel acel tye kede wene kede ture, tuŋ ocele daŋ bino bedo iye ikopo adek ame otio bala tur yao, kun acel acel tye i wene kede ature. Jane abicel luŋ ame oryeye i ŋet gi-cibo tara gin luŋ bino bedo kittono. I kom gi-cibo tara ikome bino bedo iye ikopo aŋwen, ame daŋ otio bala tur yao, kun otye i wengi kede turgi. I te jaŋe abicel ame oryeye ryoryo bino bedo iye wene ame okubere i kom gi-cibo tara. Wengi kede jaŋgi myero bed okubere karacel kun kome luŋ obedo jabu ame olio aber ote teto kede anyul. Icennere ite doŋ tiyo tara kany wie aryo pire; ibino cibo tara-nono iye, me meny kabedo luŋ i nyime. Makaccere kede cani mere myero bed me jabu ame olio aber. Gi-cibo tara kede jami ticcere luŋ myero ti i jabu ame olio aber, ame pekkere romo ratili mia acel. Nen aber ni itio luŋ kun ilubo kit ame anyutti kede i wi kidi ca. “Dok daŋ ibino tiyo kema, kun itio i cuka tomon me camanini ame owio uci mere abeco, kede uci bululu bululu kede en obedo amaramar kede arema, ibino kwoyo kun ideo i cal okerubi ame oyiko i twon diro. Cuka acel acel borrere myero obed yadi apar wie aŋwen, laccere obed yadi aryo. Gin cuka-nono luŋ bino bedo arorom. Cuka abic obino ribo karacel, kede cuka abic ocele daŋ obino ribo karacel. Ibino kwoyo waŋ jarara kede uci ame obedo bululu bululu i agikki cuka me dul me acel ame ikubo karacel, eka daŋ ite dok kwoyo waŋ jarara i agikki cuka me dul me aryo ame rom aroma i maca ocele ca. Dok ikwo waŋ jarara pyerabic i dog cuka acel a tye i dul me acel, eka ite daŋ dok kwoyo waŋ jarara pyerabic i dog cuka acel ame tye i dul me aryo, kun waŋ jarara acel acel tikere awottere. Ibino tiyo agod jarara pyerabic kun itio i jabu; ibino tiyo mannono me ribo dog cuka acel acel i kom awottere kun agod en a nonotogi, me kema doŋ te bedo ame okubere oko karacel. “Ibino daŋ tiyo cuka me yer dyegi me wumo wi kema; ibino tiyo cuka me yer dyegi apar wie acel. Cuka acel acel borrere bino bedo yadi apar wie abic, kun lacgi tye yadi aryo aryo. Cuka apar wie acel-li luŋ myero bed ame rorom. Ibino noto cuka abic kengi karacel, eka cuka abicel daŋ ite noto kengi pat, kun cuka me abicellere idolo yie aryo i tuŋ nyim kema. Kwo waŋ jarara pyerabic i agikki me dul me acel ame inoto karacel, eka ite daŋ kwoyo en ocele pyerabic i agikki me dul ocele me aryo. “Ibino daŋ dok tiyo agod jarara me mola me arwaka i waŋ jarara me noto kema karacel. Lak cuka ke ma ame odoŋŋere, bino pyelle wumo ke ma i tuŋ ŋec. Lak cuka kema ame odonuono, borrere tuŋ cel futi acel i nucu kede tuŋ cel daŋ acel i nucu, mannono bino pyelle wumo kema ryoryo. Kwo daŋ dok lao romo ame onyoŋo kede lao dyegi, me wumo wi kema. “Ibino tiyo bayi me okuto alwi ame ocuŋ atira, me kema. Bor a bao acel acel myero obed futi apar wie abic, eka lacerre te bedo futi aryo. I kom bao acel acel mi tyene bed tye aryo me kubogi karacel. Bayi me kema ocuŋ atira-nono ibino tiyogi ducu kittono. Ibino tiyo bayi me ke ma pyeraryo me tuŋ anyarolum; dok iti acib tergi me ryal pyreraŋwen pi bao ke ma pyeraryo-nono, kun bao acelacel tye kede acib tere aryo aryo me rwako tyene. Ti daŋ me kema tuŋ ocele, tuŋ anyarodi, bao ocuŋ atira pyeraryo, kede acib tergi me ryal ame romo pyeraŋwen, acib tergi aryo aryo pi bao acel acel. Ti daŋ dok mene kema ame tye tuŋ to, ti me mannono bao abicel. Ti bao aryo me twoke ame tye tuŋ ŋec. Akinagi i tuŋ piny ibino poko oko ento i tuŋ malo ibino ribo doggi i kom atem me agege, gin aryo luŋ bino bedo kittono, twoke bino bedo aryo. Bao ke ma ocuŋ atira bino bedo aboro, kede acib tergi apar wie abicel ame otio kede ryal, kun acib tere aryo aryo tye pi bao atira acel acel. “Dok ibino daŋ tiyo arii me bao kun itio okuto alwi, ibino tiyo abic pi bao me kema tuŋ cel, kede dok arii ocele abic me tuŋ ocele, kede dok abic mene kema i tuŋ to. Arii me dyere, ame ŋolle i kor bayi ame ocuŋ atira, mannono bino ya i kom lake tuŋ cel tuno i lake tuŋ cel. Ibino mwono kom bao kema oko kede jabu. Ibino daŋ tiyo atem me rwako arii, ibino daŋ mwono komgi oko i jabu. Myero igur kema kun ilubo kite a rik onyutti kede i wi kidi. “Ibino kwoyo boŋo icika kede uci bululu bululu, amaramar, kede en arema. Ibino kwoyo i boŋo camanini ame uci mere owio abeco kun odeo i cal okerubi ame oyiko i twon diro. Ibino nabo boŋo icika-nono kede agod me jabu i kom pagi aŋwen me okuto alwi ame omwono komgi oko i jabu, ame ocuŋ i kom acib tergi aŋwen me ryal. Ŋab boŋo icikanono kede agod jarara, eka ite kela canduk ame kop me caden bedo iye keto iyi boŋo icika, eka boŋo me icika te poko akina kabedo acil kede Kabedo Acil Meicel. Eka ite doŋ keto kom-me-kica i wi canduk ame kop me caden bedo iye i Kabedo Acil Meicel. Ket meja oko i ŋe boŋo me icika kun iketo gi-cibo tara tuŋ anyarolum me kema, mi tikere kede meja. Ket meja tuŋ anyarodi. “Kwo cuka me wumo doggola me kema; kwo kede uci obedo bululu bululu, amaramar, kede arema; kwo kede boŋo camanini ame owio uci mere abeco, dok daŋ odeo aber. Ti pagi abic me boŋo me wumo doggola, kede yat okuto alwi, eka ite mwono komgi oko kede jabu. Agodgi bino bedo me jabu kun acib tergi tye abic me mola ame olio alia. “Ibino tiyo keno me lam kun itio i bao me okuto alwi. Borrere myero obed futi abiro kede nucu, eka laccere te bedo daŋ futi abiro kede nucu. Borra keno-nono kede laccere bino bedo arorom, aco borrere me malo myero bed futi aŋwen kede nucu. Ibino tiyo tuŋ i twoke aŋwen luŋ kun tuŋ aŋwennono luŋ kubere kede karacel, kome daŋ ibino mwono oko kede mola. Ibino yiko tako me jobo buru, kede atok buru, becan, gi-cobo riŋo, kede weer; jami ticcono luŋ ibino tiyogi kede mola. Yik daŋ keikei me mola, ket atem aŋwen ame otio i mola i twoke aŋwen luŋ. Ket keikei mola-nono i te arii me keno lam, me wek keikei but i kor keno lam. Ti daŋ ludi me keno lam kun itio i okuto alwi eka ite mwono komgi oko kede mola. Ibino rwako lut iyi atem luŋ me lut riye i kor keno me lam tuŋi kede tuŋi me tiŋo. Keno me lammono ibino tiyo ame yie twolo kun itio kede bao. Ti kite a rik anyutti kede i wi kidi. “Ibino daŋ yiko dyekal me kema. Ibino nabo cuka me camanini ame owio uci mere abeco i dyekal tuŋ cem; borrere tuŋ anyarolum myero bed yadi pyerabic. Pagigi bino bedo pyeraryo, kede acib tergi daŋ pyeraryo, gin ducu myero bed me mola, cite agod pagi kede otacgi luŋ myero bed me ryal. Borrere tuŋ anyarodi myero daŋ bed amannono; ibino daŋ nabo cuka ame borrere romo yadi pyerabic tunnaca. Pagigi daŋ bino bedo pyeraryo kede acib tergi pyeraryo, gin ducu daŋ myero bed me mola, cite agod pagi kede otacgi luŋ myero bed me ryal. Eka i ŋete ame tye tuŋ to, obino daŋ nabo iye cuka ame borrere romo yadi pyeraryo wie abic; pagigi bino bedo tomon kede acib tergi daŋ apar. Aco tuŋ nyime ame tye tuŋ kide, laccere bino bedo yadi pyeraryo wie abic. Ibino daŋ nabo cuka ame borrere romo yadi abiro kede nucu i ŋet dog dyekal tuŋ cel; pagigi bino bedo adek kede acib tergi adek. Tuŋ ocele daŋ ibino nabo iye cuka ame tye yadi abiro kede nucu; pagigi bino bedo adek kede acib tergi daŋ adek. Yo ame donyo i dyekal obino wumo oko kede cuka ame borrere romo yadi apar, boŋo-nono myero bed me camanini ame owio uci mere abeco, dok daŋ odeo aber; pagi mere bino bedo aŋwen kede acib tergi daŋ aŋwen. Pagi luŋ ame oguro i dyekal bino bedo iye otac ame otio kede ryal; agodgi daŋ myero bed me ryal, eka acib tergi te bedo me mola. Bora dyekal bino bedo yadi pyerabic kun laccere tye yadi pyeraryo wie abic, borrere malo futi abiro kede nucu. Obino nabo iye cuka me camanini ame uci mere owio abeco. Acib te pagi bino bedo me mola. Jami me tic luŋ ame tye i kema me konyo tic apapat, karacel kede te ke me guro kema, kede teke ame amano dyekal luŋ, bino bedo me mola. “Ibino ciko jo Icrael luŋ me ke lo moo me jeituni ame oodo, ote liyo acil, me menyo piny, me ony i tara ote weko bedo lyel nino ducu kun mom to. Aron kede awobe mere myero can mac me lyel i nyim Rwot cakere otyeno naka odiko i kema me rwatte, oko i ŋe boŋo icika ame tye i nyim canduk me kop me caden. Man en cik ame jo Icrael bino gwoko nakanaka, naka i kare ikwaegi luŋ. “Kel ominni Aron karacel kede awobe mere ceggi baŋi, gin ya oko i akina jo Icrael, me wek gin oti tic me olamdog baŋa. Jo-nono ene: Aron kede awobe mere Nadab, Abiku, Eleajar kede Itamar. Ibino kwoyo bomji acil pi ominni Aron, boŋi me kwogo dok abeco meicel. Dok ibino kobbi jo luŋ ame akitti, ame amiogi ryeko adwoŋ, ni myero gin kwo boŋo me aruka Aron, ame obino kwere kede i tic me bedo alamdog mera. Boŋi me aruka ame ibino kwoyo gin ene: icao kor, epod, jor abor ilul, kanyi ame oŋweŋweko kome, kede itambara adwala i wie, kede itambara me tweyo pyer; myero kwo boŋi magi me aruka acil pi ominwu Aron kede awobe mere, pi ticgi me bedo olamdogga. “Gin bino gamo jabu, uci obedo bululu bululu, amaramar kede arema, kede boŋo camanini ame owio uci mere abeco. Gin bino kwoyo epod kede jabu kede uci obedo bululu bululu, amaramar kede arema kede boŋo camanini ame owio uci mere abeco, dok daŋ ame okwoo kede twon diro. Gin me wi gwoke bino bedo aryo ame okubo i doge ryoryo, me kubere karacel. Lati me tweyo ame tye i ko me ame otoko i diro, obino tiyo i kite tic acellono kun daŋ otio i kite jami acellono: jabu, uci bululu bululu, amaramar kede arema, kede boŋo camanini ame owio uci mere abeco. Ibino kwanyo gweŋe alilia me onik aryo ite goro iye nyiŋ awobe Icrael, nyiŋ awobe abicel i kom kidi acel, kede mea awobe abicel odoŋŋere i kom ocele mere-ni, kun imiogi lubere i ditogi me anywalli. Ibino goro nyiŋ awobe Icrael i kom kidi aryo-nu, i kite adiro goro kede coc i kom kidi. Ibino mwonogi i kom jabu ame oŋweŋweko kede diro me kwako tere. Eka ite doŋ keto itino kiddi aryonono i kom gin me wi gwok epod, me gin bed kiddi me poyo awobe Icrael. Aron bino tiŋo nyingi-nono i wi gwoke ryoryo me poyo pirgi i nyim Rwot. Ti gin me kwako tere i jabu ame oŋweŋweko kome i diro. Ti daŋ nyor aryo me jabu ame omino calo tol, ti kede jabu olio aber; mwon nyorrono i kom gi-kwako tere. “Ibino daŋ kwoyo icao kor me ŋolo kop, kwo daŋ i diro. Ticcere bino bedo bala me kom epod; ibino tiyo i jabu, kede uci obedo bululu bululu, amaramar, kede arema karacel kede boŋo camanini ame owio uci mere abeco. Ibino dolo yie aryo kun borrere kede laccere rorom kede yi ciŋ. Ibino mwono gweŋe alilia i kom icao-nono kun iryeogi i yore aŋwen. I yore me agege, ibino keto iye cadiuc, tobaj kede kabankel. I yore me aryo, ibino keto iye emeradi, capir kede dayaman. Eka i yore me adekkere, te keto iye jatcint, agat kede ameticito. I yore me aŋwennere, ket iye berul, onik kede jacipa. Ibino mwonogi luŋ i jabu ame oŋweŋweko i diro. Gweŋe alilia-nono luŋ bino bedo gin apar wie aryo kun ogogoro nyiŋ awobe Icrael i komgi, dok gin luŋ bino bedo bala kidi ame ogogoro me atem ciŋ, kun kidi acel acel tye kede nyiŋ ame ogoro i kome ame oporo atekere apar wie aryo. Ti daŋ dok nyor aryo ame omino calo tol, kun itio kede jabu ame olio aber, me tweyo icao kor. Ti daŋ atem me jabu aryo pi icao kor, eka ite keto atem aryo-nono i dog icao kor aryo. Rwak nyor me jabu aryo-nu me dony iyi atem aryo ame tye i kom icao kor. Dog nyor aryo-nono ibino mwono oko i kom gi-kwako tere aryo ame otio i jabu kun oŋweŋweko kede diro-ca, me tweyo icao kor i gin me wi gwok epod tuŋ nyime. Ti dok atem me jabu aryo, ite ketogi i twok icao kor aryo ducu i kom doge ame tye i yie ame ceggi kede epod. Ti dok atem ocele me jabu, eka ite kubogi i gin me wi gwok epod aryo ame tye i nyim i tuŋ tere piny kan ame okubere tuŋ malo i wi lati me epod ame otoko i diro. Icao kor kede atemmere obino tweyo i kom atem me epod kede tol ame bululu bululu, me wek twe pyelle i wi lati me epod ame otoko i diro, me icao kor gonnyere oko i kom epod. Aron otiŋ nyiŋ awobe Icrael iyi cao me ŋolo kop i dog cunye i kare luŋ ame en donyo i kabedo acil, wek bed me po i komgi kare luŋ i nyim Rwot. Ibino keto Urim kede Tumim iyi cao me ŋolo kop, mannono daŋ bino bedo i dog cuny Aron i kare luŋ ame en donyo i nyim Rwot; mannono bino miyo Aron tino nolo kop a jo Icrael i dog cunye i nyim Rwot nino ducu. “Dok daŋ ibino tiyo jor abor ilul me epod ame kome luŋ obedo bululu bululu. Myero mi doge bed tye me rwako wic; ibino cweyo kun idolo doge bala dog boŋo aruka ame odolo doge luŋ, me kur yeci. Ibino luŋo ginnoro a rom okwer anyak i lak boŋo, ibino kwoyo ginnono kede uci obedo bululu bululu, amaramar kede arema. Kwo ginnono i lak jor luŋ kun icuculo i akinagi olan me jabu. Olaŋ jabu kede gin acalli okwer myero rom lak jor ducu irit kun oculle acula. Mannono daŋ Aron bino ruko i dog ticcere cite olaŋŋono bino kok winyere i kare ame en adonyo i nyim Rwot i kabedo acil kede i kare ame en dwogo oko, me en kur to. “Ibino daŋ tiyo ginnoro acalo akwaa kede jabu ame olio aber, eka ite goro akwaa-nono kite ame ogoro kede atem ciŋ, ni, ‘Okwero obedo acil pi Rwot.’ Twe akwaa-nono irid i kom itambara me adwala i wic, kede tol obedo bululu bululu; ket i nyim itambara adwala me wic. Ket cuŋ i tur nyim Aron, mannono bino miyo Aron uno bal me jami acil ame jo Icrael otero me miyo acalo motgi acil; bino cuŋ i tur nyime didik, me Rwot gamgi. “Ibino daŋ dok tiyo kanyi, kun itio i boŋo camanini aber ame oŋweŋweko kome, i te tiyo daŋ itambara me adwala i wic i boŋo camanini aber, kede atambara me tweyo pyer ame odeo aber. “Aco pi awobe Aron ibino kwoyo kanyi kede itambara me tweyo pyer, kede tok atitino. Ibino tiyogi wek gin bed me kwogo dok abeco meicel. Yin ibino ruko ominwu Aron kede awobe mere luŋ kede rukkono; ibino wirogi kede moo eka ite kwerogi, ite ketogi i dog tic acil, me wek gin ti tic me olamdog baŋa. Ibino daŋ dok kwoyigi pale me wumo komgi cakere i pyergi naka iyi amurugi, kun ikwoo kede boŋo camanini, Aron kede awobe mere bino ruko i kare ame gin adonyo i kema me rwatte, i kare ame gin awot ceggi i keno me lam me tic i kabedo acil, me bal kur bed i komgi, te miyogi to oko. Man doŋ bino bedo cik ame en kede ikwae bino gwoko nakanaka. “I kare me kwerogi me tiyo tic me olamdog baŋa, ibino timo kit man. Ibino kwanyo atin twon acel kede nyogi romi aryo ame roccoro mom i komgi, kede ogati a tobi mom iye, kede capat daŋ a tobi mom iye kun orubo kede moo, kede dok capat areppere ame daŋ tobi mom iye kun oweweo moo iye. Magi-nono luŋ yin yikgi kede moko ŋano apwottere. Ketgi luŋ iyi dita acel, eka ite kela ditanono, kede atin twon kede nyogi romi aryo ca. Mi Aron kede awobe mere bin i nyim dog kema me rwatte, eka ite lwoko komgi oko kede pii. Kwany doŋ boŋi me rukogi, ite ruko Aron i kanyi, jor abor me epod, epod, kede icao kor, twe pyere kede lati me epod ame otoko kede diro. Dwal itambara i wie, ite keto tok kwogo acil ocuŋ i wi tambara me adwala. Kwany doŋ moo me wir iony i wie, me iwire kede. Kel dok awobe mere, irukgi kede kanyi, twe pyergi kede itambara, rwak tok atitino ca i wigi; tic me olamdog doŋ bino bedo ticgi. Man doŋ cik ame obino lubo nakanaka. Ibino keto Aron kede awobe mere i dog ticgi kittono. “Ibino dok kelo twon i nyim kema me rwatte, Aron kede awobe mere te keto ciŋgi i wi twonnono. Nek doŋ twonnono i nyim Rwot, i doggola kema me rwatte. Gwel remo twonnono me itotono i tuŋ aŋwen me keno me lam kun itotono kede nyako ciŋ; remo ame adoŋŋere ony i te keno lam. Wawaro dwolo luŋ ame owuwumo amonten, okene, emany kede aŋalura aryo, kede dwolo luŋ i komgi, ite wanogi luŋ i wi keno me lam. Cite riŋo twonnono, kede pyennere, kede wee yie, myero iwaŋ i mac i ŋe gony oko. Mannono bino bedo mot oŋolo me yalo Obaŋa pi bal. “Ka man otum, kwany nyok romo acel, mi Aron kede awobe mere ket ciŋgi i wie, nek doŋ nyok romonono, jol remo mere ite cocoro rom kom keno lam luŋ. Popoko riŋo nyokkono dul i dul, eka ite lwoko jami me yie, tyene ducu; ketgi i kom man ame ipopokoni karacel kede wie. Waŋ oko luŋ iwi keno me lam aboŋo gito moro iye. Mannono obedo mot ame oŋolo ote waŋo alutu baŋ Rwot; en mot a ŋwece kur me kweyo cuny, mot ame oŋolo me yalo Obaŋa ote waŋo oko i mac i nyim Rwot. “Icennere ibino dok kwanyo nyok romo ocele, Aron kede awobe mere te keto ciŋgi i wie. Nek dok nyok romo-nono oko, gwet remo romo-nono aduno ite cwicwinyo i alago yit me tuŋ cem Aron kede me awobe mere, kede i kom twon ciŋgi kede twon tyengi me luŋ cem; cor remo odoŋŋere rom keno me lam luŋ. Dok ikwany remo i kom keno me lammono aduno kede moo wir, eka ite kikiro i kom Aron kede i kom rukkere kede i kom awobe mere kede rukgi; mannono mio en kede rukkere bedo acil karacel kede awo be mere kede rukgi. “Wawaro dwolo i kom nyok romo kede moo yibe kede en owuwumo amonten, okene, aŋaluru aryo karacel kede dwolo ame tye i komgi, kede me amuru mere me tuŋ cem, pien mannono obedo nyok romo me keto dano i dog tic aciŋ, kede ogati acel kede capat daŋ acel ame gin luŋ orubogi kede moo, kede capat arep acel ame okwanyo luŋ i akina ogati a tobi mom iye ame tye i dita i nyim Rwot. Ketgi luŋ i cuny ciŋ Aron kede i cuny ciŋ awobe mere, ote yoko me bed mot ayoka i nyim Rwot. Kwany dokoko i ciŋgi, ite waŋo i kom keno me lam me ameda i kom mol yalo Obaŋa ame oŋolo ote wano alutu, me bed gin a ŋwece kur ame yomoro cuny Rwot. Mannono en mol ame owaŋo i mac baŋ Rwot. “Kwany ogok a nyok romo me kwero Aron pi ticcere ite yoko me bed mol ayoka i nyim Rwot; mannono en ame bino bedo iner a dok baŋi. Ibino daŋ kwero mot ayoka me ogok, kede amuru ame omio me mot pi olamdog, ame doŋ oyoko oko, kun okwanyo i nyok romo me keto jo i dog tic, ote miyo acalo mot ayo ka, pien inerrono me Aron kede awobe mere. Mannono bino bedo iner Aron kede awobe mere ame myero jo Icrael mi baŋgi kare ducu; pien mannono obedo iner ame myero jo Icrael mi baŋ olamdog i kom motgi me kweyo cuny, en motgi baŋ Rwot. “Boŋŋi Aron luŋ acillege bino bedo me ikwae ame bino lube. Gin bino ruko i kare ame owirogi kede moo me ketogi i dog tic. Atin awobi ame bino leyo tyene i tic me alamdog, bino ruko boŋŋi-nono nino kany wie aryo, i kare ame en donyo i kema me rwatte, me tic i kabedo acil. “Wot ited riŋo romo me ketogi i dog tic i kakannoro acil. Aron kede awobe mere myero cam riŋo romo-nono kede ogati ame tye i dita; gin myero cam i doggola kema me rwatte. Gin bino camo gin ame otio kede me kwanyo bal, ame oketogi kede i dog tic i kare me kwerogi; cite ŋattoro ata mom bino camo, pien jami-nono obedo jami acil. Ka ce riŋo moro ame otio kede me ketogi i dog tic Odoŋ, onyo ogati odoŋ te tuno naka odiko, en odoŋŋere myero doŋ waŋ oko i mac. Mom dok reyero cam, pien cil. “Man ibino limo i kom Aron kede i kom awobe mere daŋ amannono, kite ame aciki kede luŋ; ibino tiyo tic me ketogi i dog ticgi nino kany wie aryo. Nino acel acel ibino ŋolo twon acel me yalo Obaŋa pi kwanyo bal. Ibino daŋ miyo mot oŋolo me bal pi keno me lam i kare ame itio tic me lam i kare ame itio tic me kwanyo bal i kome, eka ite wiro kede moo me kwero. Ibino tiyo tic me kwanyo bal i kom keno me lam, ite kwero nino kany wie aryo; man bino miyo keno lam doko acil meicel, eka ginnoro keken ame bino gudo kom keno lam bino doko acil. “Gin ame ibino miyo me mot i wi keno lam ene: nyogi rommi aryo me mwaka acel acel en ame ibino miyo nino ducu. Nyok romo acel ibino miyo odiko, eka acel ite bino miyo otyeno. Ibino miyo daŋ moko kwon apwottere karacel kede romo ame ibino geyo miyo; moko kwon apwottono myero bed a romo gwata acel ame orubo kede moo jeituni ame oodo aoda cupa aryo kede nucu, karacel kede koŋo yino ame romo cupa aryo kede nucu, magi-nono bino bedo me mot amala, Nyok romo ocele ibino miyo otyeno kun imio karacel kede mot me moko kwon, kede mot amala acalo bala me odiko, me bedo gin a ŋwece kur ame yomoro cuny, mot owaŋo i mac baŋ Rwot. Mannono bino bedo mot yalo Obaŋa ame owaŋo i kare ducu, naka i kare ikwaewu luŋ, i dog ke ma me rwatte i nyim Rwot. Abino rwatte kedwu kuno me kop kedwu. Abino rwatte i jo Icrael kuno, eka kwogona te lonyo bedo acil. Abino lonyo kema me rwatte kede keno me lam bedo acil, eka dok ate kwero Aron kede awobe mere pi ticgi me bedo olamdog mera. Dok abino bedo i akina jo Icrael, abino bedo Obaŋagi. Gin bino ŋeyo ni an a Rwot Obaŋagi, a rik akwanyogi oko i lobo me Miciri, wek abed i akinagi, an a Rwot Obaŋagi. “Ibino tiyo keno lam me waŋo odok akur; ibino tiyo i bao okuto alwi. Borrere myero bed futi acel kede nucu, laccere daŋ futi acel kede nucu; borrere kede laccere myero bed a rorom. Borrere me malo myero bed futi adek; kun tye i tuŋ aŋwen ame okubere kede karacel. Mwon kome oko kede jabu ame olio aber; mwon wie kede laŋete luŋ kede tuŋ aŋwen luŋ; eka ite dolo doge oko i jabu. Ti atem me jabu aryo pire. Ket atemmono piny i te doge ame idolo-ni, kun atem acel acel otikere awottere ame tye tuŋ ocele; gin bino bedo me rwako ludi me tiŋo. Ti ludi kede yat okuto alwi, mwon komgi oko kede jabu. Ket i nyim boŋo me icika ame owumo canduk ame kop me caden bedo iye, i nyim kom-me-kica, kan ame abino rwatte kedi iye. Aron bino waŋo odok a ŋwece kur kuno. Nino luŋ ka en ayiko mac tara odiko, en bino waŋo; dok ka Aron keto tara malo otyeno, daŋ bino waŋo. Obino waŋo odok akur kittono nino ducu i nyim Rwot, naka i kare ikwaewu luŋ, Mom obino miyo iye mottoro me kit odokkoro ocele, kadi mot awaŋa, kadi mot me moko kwon; dok daŋ kur iony iye mot amata. Aron myero ti gin me kwanyo bal i kome i tuŋ aŋwen luŋ i mwaka acel tyen acel. En bino tiyo tic me kwanyo bal i kome kede remo me mot oŋolo me kwanyo bal i mwaka acel tyen acel naka i kare ikwaewu luŋ. Mannono en gin acil meicel baŋ Rwot.” Rwot okobbi Muca ni “Ka icako kwano wet jo Icrael, ŋat acel acel bino miyo ginnoro baŋ Rwot me lakoro kwo mere i kare ame ikwanogi, me cannoro arac kur pot i komgi i kare ame ikwanogi. Ŋat acel acel ame okwano bino miyo jami-ni: nucu cekel me kabedo acil (cekel acel rom kede gera pyeraryo); nucu cekellono bino bedo me mot baŋ Rwot. Jo luŋ aluŋa ame doŋ okwano welgi, cakere i kom jo ame mwaka me ditogi doŋ oromo pyeraryo wot kede malo, gin luŋ bino miyo mot baŋ Rwot. Ŋat olony mom bino miyo adwoŋ akato nucu cekel, acan daŋ mom bino miyo an ok i te nucu cekel, i kare me miyo mot baŋ Rwot me kwanyo bal i komwu. Ibino gamo lim me kwanyo bal i kom jo Icrael; limmono luŋ bino bedo me konyo tic me kema me rwatte, me bed me po pi jo Icrael i nyim Rwot pi kwanyo bal i komgi.” Rwot okobbi Muca ni, “Ibino daŋ tiyo tako me mola, kede akwak tere daŋ me mola, me bed me lwokere. Cib cuŋ i akina kema me rwatte kede keno me lam; ony doŋ iye pii. Kannono en ame Aron kede awobe mere bino lwoko iye ciŋgi kede tyengi. I kare ame gin woto i kema me rwatte, onyo owoto ceggi i keno me lam me tic iye, me waŋo mot ame owaŋo i nyim Rwot, gin koŋ bino geyo lwok kede pii, me pe oto. Gin bino lwoko ciŋgi kede tyengi me mom oto. Man bino bedo cik baŋwu nakanaka, baŋ Aron kede baŋ ikwae naka i kare ikwaegi luŋ.” Rwot dok te medde kobo baŋ Muca ni, “Kwany gin a ŋwece kur meicel: murra ame olio acil ame pekkere romo cekel mia abic, cinamon ame ŋwece ŋweye amit, a romo cekel mia aryo kede pyerabic, ame mannono en nucu mere, lum ame ŋwece kur ame romo cekel mia aryo kede pyerabic, kacia cinamon cekel mia abic, ame opimo i cekel me kabedo acil, kede moo jeituni ame romo cupa apar. Jami magi en ame ibino yiko kede moo acil me wir ame orubo kite ame orubo kede moo a ŋwece kur; moonono bino bedo moo wir acil. Ibino wiro kede kema me rwatte kede canduk ame kop me caden bedo iye, kede meja, kede jami me ticcere luŋ, kede gicibo tara kede jami ticcere luŋ, kede keno lam me odok akur, kede keno lam me waŋo mot me yalo Obaŋa, kede jami ticcere luŋ, kede tako lwok kede akwak tere. Ibino kwerogi me obed jami acil meicel, ame ginnoro luŋ ame bino gudo kome doko oko acil. Ibino daŋ wiro Aron kede awobe mere, me kwerogi me gin oti baŋa tic me olamdog. Dok ibino kobbi jo Icrael ni, ‘Man bino bedo moona acil me wir, naka i kare ikwaewu luŋ. Mom obino onyo i kom dano moro atata, mom daŋ ibino wunu rubo moro a rom kede; en moo acil, bino bedo acil baŋwu daŋ, Ŋat ame bino rubo moro kittono onyo ŋat ame bino wiro dano moro atata, waŋe bino rwenyo oko i akina jo turgi.’ ” Rwot okobbi Muca ni, “Kwany gin a ŋwece kur, citakte kede onika kede galbani, gin a ŋwece kur kede odok me luban ame olio aber (mi pekgi luŋ bed arorom) eka i te yiko kede odok akur acil ame olio aber, kun orubo kit ame orubo kede gin a ŋwece kur, pwor daŋ iye kado aduno. Cacanyo mogo ilur oko atitino, i te keto mogo i nyim canduk me kop me caden ame tye i kema me rwatte kan ame abino rwatte iye kedi. Mannono bino bedo gin acil meicel baŋwu, Mom dok ibino timo wunu odok akurroro ame orubo kittono pirwu kenwu. I tuŋ baŋwu odokkono bino bedo gin ame okwero obedo acil pi Rwot. Ŋat ame bino rubo ginnoro me anwea kittono, waŋe bino rwenyo oko i akina jo turgi.” Rwot okobbi Muca ni, “Nen, atyeko yero Bejaleri wot a Uri, ame wot a Kur, me itekere a Juda. Atyeko doŋ miyo cuny Obaŋa opoŋ i yie, karacel kede ryeko me tic, kede niaŋ atut, kede ŋec, kede tic luŋ me diro, me roto callogo anyen me tic me diro ame kwongi papat, ame otio i jabu, ryal kede mola; karacel kede ŋoŋolo gweŋe alilia me amwona i kom jabu, kede ryeko me payo bao kede tiyo kit tic ocele luŋ me diro. Nen, atyeko daŋ keto Okoliab ame wot Akicamak, me itekere a Dan, me tic karacel kede. Atyeko daŋ miyo ryeko me tic baŋ jo ame kwiri, me gin ti jami luŋ ame aciki iyeni: kema me rwatte, kede canduk ame kop me caden bedo iye, kede kom-me-kica, ame bedo i wie, kede jami me yi kema luŋ; meja kede jami ticcere, gi-cibo tara me jabu olio aber karacel i jami ticcere luŋ, keno lam me odok akur, keno lam me waŋo mot oŋolo me yalo Obaŋa karacel i jami ticcere luŋ, tako lwok karacel kede akwak tere; boŋŋi aruka ame otio abeco, boŋŋi aruka acil pi Aron alamdog, karacel kede boŋŋi aruka pi awobe mere, pi ticgi me bedo olamdog; moo wir kede odok a ŋwece kur pi kabedo acil. Gin obino tiyo i kite ame doŋ atyeko ciki kede.” Rwot okobbi Muca ni, “Kob baŋ jo Icrael ni, ‘Ibino wunu gwoko cabit mera, pien en gin ame nyuto, ame tye i akina an kede wun naka i kare ikwaewu luŋ, me gin ŋe ni an a Rwot, ame alonyowu ibedo wunu acil. Gwok wunu cabit, pien nino-nono cil baŋwu; ka ce ŋattoro obalo ninonono, myero nek oko, ŋat ame tio ticcoro iye, waŋe bino rwenyo oko i akina jo turgi. Ibino wunu tic pi nino abicel, cite nino me abiro obedo cabit me weo mot, nino acil baŋ Rwot. Ŋat ame tio ticcoro i cabit myero nek oko. Pi mannono, jo Icrael myero gwok cabit naka i kare ikwaegi luŋ, acalo cikere ame ri nakanaka, Mannono anyut ame bino ri atwal ame tye i akina an kede jo Icrael, ni, Rwot rik otio polo kede lobo nino abicel, owe mot i nino me abiro, kome te pye.’ ” Kare ame doŋ otyeko kop kede Muca i wi kidi me Cinai, omie kidi apada aryo me kop me caden, kidi apada aryo ame Obaŋa en ocoo i ciŋe. Kare ame jo oneno ni Muca ori, kun mom dwogo piny i wi kidi, gin ocokere kengi baŋ Aron, ote kobbe ni, “Ya malo itiyiwa obaŋa, ame bino telo nyimwa; pien Muca moro-ni, ame yam okwanyowa i Miciri, wan mom doŋ oŋeo gin ame otimo.” Aron te kobbigi ni, “Gwegweto wunu atem me jabu ame tye i yit monwu kede awobewu kede i mea anyirawu, me ikelgi wunu baŋa.” Jo luŋ daŋ te timo amannono, ogwegweto atem i yitgi oko ote kelo baŋ Aron. En te gamo jabu i baŋgi, te luto kome anyul me tet, eka te tiyo atin twon ame otwako atwaka. Gin te kobo ni, “Jo Icrael we, obaŋawu ennu ame okwanyowu i lobo Miciri!” Ka Aron oneno amannono, ocano keno me lam i nyime; eka te cako rabo kannaler ni, “Dik i obino kwero ecuban a Rwot.” Gin rik ote dilo odiko con, ote miyo mot awaŋa apol atata, eka gin te kelo motgi me kweyo cuny; jo doŋ te bedo piny cam kede mat, ote ya malo me tuko. Rwot okobbi Muca ni, “Wot piny, pien joni a rik ikwanyo i lobo me Miciri oballe doŋ oko. Gin oweko cik a rik acikogi kede oko oyotoyot, olunyo tiyo atin twon ame otwako atwaka pirgi kengi, ocako daŋ doŋ woro oko kun daŋ oyalo gigi, dok daŋ okobo ni, ‘Jo Icrael, neno obaŋawu ame rik okwanyowu i lobo me Miciri!’ ” Rwot te kobo baŋ Muca ni, “An doŋ aneno joni, gin obedo jo ame ŋutgi nwaŋ; pi mannono, koŋ doŋ iweka gira kena, me akemona koŋ yeny i komgi, me ami wigi two oko; cite yin abino miyi idoko rok adit.” Cite Muca te bako doge baŋ Rwot Obaŋa mere kun kobo ni, “Ama Rwot, piŋo akemo omaki atek ateka i kom joni ame yin en ikwanyogi i lobo me Miciri kede te ko adwoŋ i twero me ciŋi. Piŋo omio jo Miciri kobo ni, ‘Oterogi kara pi rac me wot tyekogi oko i akina kiddi kuca, kede miyo wigi two oko i wi lobo.’ Tim ber ilok cunyi i akemoni ager-ri oko, me kur dok itim joni arac. Po i kom Iburaim, Icaka kede Icrael omironi, ame rik yin ikomi ikwonere kede nyiŋi keni keni baŋgi. Rik yin ikobo baŋgi ni, ‘Abino miyo ikwaewu nya apol bala acer me polo, dok daŋ lobo-ni luŋ ame rik acikere pire, abino miyo baŋ ikwaewu, gin bino leyo me bedo megi atwal.’ ” Rwot te jwayo tammere oko me timo gin arac i kom jo mere. Muca te ya i wi kidi dok piny kun omako kiddi apada aryo me kop me caden i ciŋe; kiddi magi onwoŋo ocoo tuŋi kede tuŋi, yigi kede ŋegi, Kiddinono Obaŋa gire en onwoŋo otio, coc iye daŋ Obaŋa en onwoŋo ocoo kun ogoro i kom kiddi. Kare ame Yocwa owinyo dwon lwak ame awo, okobbi Muca ni, “Woo tye adwoŋ meicel i gony bala me lweny.” Cite Muca te gamo ni, “Mannono gire mom woo me loyo lweny, dok daŋ mom koko a jo oloo, ento an awinyo dwon jo a wer awera.” Kare ame en doŋ ceggi i gony, eka te neno atin twon kede myel, akemo alyet te mako Muca atekateka, omio en te reto kiddi apada aryo piny ame onwoŋo en omako i ciŋe, eka te ŋiŋida oko i te kidi me Cinai. Te kwanyo atin twon ame onwoŋo lwak otio-ni, te wot waŋo oko i mac, te rerego oko ayom, onyo i pii, te miyo jo Icrael luŋ mato oko. Muca te penyo Aron ni, “Jo-ni kara otimi niŋo ba, omio yin ikelo bal adwoŋ rom man i komgi-nie?” Aron te gamo ni, “Kur twon akemo alyet nui oko, adwoŋŋa; yin giri iŋeo ni jo-ni cunygi gire mito ka timo gin arac. Pien gin okobba ni, ‘Tiyiwa obaŋa ame bino telo nyimwa; pien Muca moro-ni, ame yam okwanyowa i lobo Miciri, wan mom doŋ oŋeo gin ame otime.’ An ate kobbigi ni, ‘Dano acel acel ame tye kede jabu myero gwet oko.’ Gin te miya, ate onyo i mac, doŋ atin twon-ni oya iye.” Kare ame Muca oneno ni jo doŋ ogak oko, pien Aron en omiogi ogak, kun omio lewic omakogi i akina okworgi, Muca ocuŋ i dog gony, te penyo lwak ni, “Ŋa ame pwod tye tuŋ baŋ Rwot? Dano-nono bin baŋa.” Awobe a Levi te cokere karacel bino baŋe. Muca te kobo baŋgi ni, “Rwot Obaŋa a jo Icrael okobo ni, ‘Dano acel acel myero ket pala romo mere i laŋete, eka te donyo kede i gony kun wiwira kede i dog gony tuŋi kede tuŋi kun mano yie luŋ ame ŋat acel acel neko ominnere, neko awottere, dok neko a laŋete.’ ” Awobe a Levi te tiyo kite a Muca ocikogi kede. Gin te neko jo i nino-nono ame romo tutmia adek. Muca te kobo ni, “Tin wun doŋ ikwerre wunu kenwu me tiyo tic a Rwot, kun ŋat acel acel lokere neko wode kede ominnere, me Rwot tin miwu winyo.” Orwo mere Muca te kobbi jo ni, “Wun itimo wunu bal adwoŋ meicel, aman an awot malo baŋ Rwot, gwok onyo abino timo ginnoro me kwanyo bal i komwu.” Muca daŋ te dok baŋ Rwot, te kobo ni, “Oi do! jo man otimo twon bal adwoŋ meicel, otio obaŋa me jabu pirgi kengi. Cite ka ibino timogi kica i kom balgi amanni, timgi kica; aco ka mom, akwai ni kono doŋ iweo nyiŋa oko ame icoo i bukki.” Cite Rwot te kobbi Muca ni, “Dano ame otimo balloro i nyimna en ame awee nyiŋe oko i bukka, Ento yin wot giri itel jo Icrael, itergi kan ame yam akobbi ca; nen ba, amalaikana bino telo nyimi. Ento tye kare ame abino limogi, kare-nono en ame abino keto kede can i komgi pi balgi-ni.” Rwot te miyo two apek gwaro jo luŋ pi atin twon ame gin omio Aron otio. Rwot okobbi Muca ni, “Ya wunu oko i kan, yin karacel kede jo luŋ ame rik ikwanyogi i lobo Miciri me terogi i lobo ame rik akwoŋo pire baŋ Iburaim, Icaka, kede Yakobo, kun acikogi ni abino miyo baŋ ikwaegi. Dok daŋ abino cwayo amalaikana telo nyimi, cite bino ryemo jo Kanaan oko, kede jo Amor, jo Kitti, jo Periji, jo Kivi, kede jo Jebuc. Wot malo lobo opoŋ i cak kede moo kic; ento an mom abino wot kedwu kuno, me kur ami wiwu two oko iyo, pien wun ibedo wunu jo ame ŋutgi nwaŋ.” Kare ame lwak owinyo kop arac-ci gin okumo; dano moro mom orukere i ruk me kwogo, Pien Rwot onwoŋo okobbi Muca ni, “Kobbi jo Icrael ni, ‘Wun jo ame ŋutwu nwaŋ; ka abino wot kedwu kuno pi kare moro anonok keken, abino miyo wiwu two oko. Aman doŋ myero igony rukwu oko me kwogo i komwu, me anen gin ame abino timowu kede.’ ” Mannono en omio gin ogonyo rukgi oko me kwogo cakere i kom kidi me Koreb wot kede anyim. I kare-nono luŋ Muca obedo tero kema kun guro i ŋe gony kan ame bor i gony, eka te lwoŋo ni kema me rwatte. Doŋ ŋat ame mito ŋeyo kopporo I baŋ Rwot woto oko kan ame kema me rwatte tye iye, ame rik onwoŋo tye i ŋe gony. Kare luŋ ka Muca tye awot i kema me rwatte, jo luŋ ya malo, kun ŋat acel acel cuŋ i dog kema mere, me neno yo Muca tuno waŋ ame doŋ odonyo i kema me rwatte. Ka Muca doŋ odonyo i kema me rwatte, pagi pol dwogo piny te cuŋ i doggola kema me rwatte, eka Rwot te kop i Muca. Jo luŋ ka doŋ oneno pagi pol ogurre i dog kema, gin luŋ oya malo ote woro Obaŋa kun ŋat acel acel tye gire i dog kema mere. Mannono en kit a rik Rwot okobo kede i Muca wan i waŋ, kite acalo dano kobo kede awottere. Kare ame Muca odok i gony, Yocwa wot a Nuni ame rik en awobi ame konye, doŋ i kema me rwatte. Muca te kobbi Rwot ni, “Nen ba, yin onwoŋo rik ikobba ni, ‘Kwany jo-ni oko,’ cite mom ite miya ŋat ame ibino cwayo woto keda. Ento yin ikobo ni ‘Anei kom i nyiŋi, dok daŋ yin iyomoro cunya.’ Doŋ ka an onwoŋo ayomoro cunyi, tim ber inyutta yo meri, me aŋei, ate nwoŋo winyo i baŋi. Dok myero ine ni rok man obedo joni.” Rwot te gamo ni, “An i koma abino wot kedwu, ate bino miyi weo.” Muca dok te kobo ni, “Kace mom yin ikomi ame iwot kedwa, kur giri imiwa oya i kan. Kara doŋ obino ŋeyo niŋo ni an anwoŋo gum i baŋi, an karacel kede lwaki? Mom wot ame iwot kedwa-ni en ame miowa opokere i rok ocele? An karacel kede joni, wan opat apata i rok acele ame tye i wi lobo.” Rwot okobbi Muca ni, “An abino tiyo gin ame ikoko-nono ikome, pien iyomoro cunya, dok daŋ aŋei kom i nyiŋi.” Muca te gamo ni, “Tim ber inyutta kwogoni.” Rwot te gamo ni, “Abino miyo ineno berra luŋ i nyimi, dok abino tuco nyiŋa ni, ‘Rwot,’ i yiti. Abino nyuto berra baŋ ŋat ame abino nyuto berra baŋe, dok abino timo kica baŋ ŋat ame abino timo kica baŋe.” Rwot dok te kobo ni, “Cite mom ibino neno waŋa, pien dano mom twero neno waŋa eka te dok bedo kwo.” Rwot dok te kobo ni, “Nen ba, kabedo moro tye i ŋeta kan i wi kidi, en ame yin ibino cuŋ iye. Kare ame kwogona bino beo kato kannono, abino miyo yin ibedo i akina kidi obarre, eka ate wumi oko i ciŋa tuno ka doŋ atyeko kato oko; ate doŋ kwanyo ciŋa oko, yin doŋ ite neno ka ŋea keken, cite mom ibino neno waŋa.” Rwot okobbi Muca ni, “Tyeŋ kon kiddi apada aryo ame calli maca me agege ca, me aco iye kop a rik acoo i kiddi me agege ca, ame rik ibin ireto ite ŋiŋido oko. Yikere odiko, eka ite bino cuŋ i nyima i wi kidi me Cinai. Ŋattoro ocele kur bin kedi i wi kidi malo, ŋattoro daŋ myero kur nen kakannoro ducu i wi kidi; romi kede dok mom daŋ bino cam i ŋet kidi.” Muca daŋ te tyeŋo kiddi apada aryo ame calli maca me agege ca; en te ya malo idiko con, te yito i wi kidi malo kite a rik Rwot ocike kede; owoto daŋ i kiddi apada kun omako i ciŋe. Rwot te bino piny kede pol, te cuŋ karacel kede kuno, eka te tuco nyiŋ Rwot. Rwot te kato i nyime kun lwoŋo nyiŋe kene ni, “Rwot, Rwot, Obaŋa ame akica, dok a timo jo ber, ame akemo mom mako oyotoyot, Obaŋa ame marrere dwoŋ dok mom lokere, dok ame genne meicel. Obaŋa ame gwoko marrere a mom lokere pi jo tutumia kede tutumia, kun timogi kica i rocgi, i timgi me turo cik, kede i balgi. Ento en gire mom kwanyo kop i kom obalo, cite keto can i kom ikwae kede dok i kom ikwae ikwaegi, pi bal a kwarogi naka i lwagi me adekkere kede me aŋwennere.” Muca te ru kulo wie piny i lobo, te woro Obaŋa, Eka te kobo ni, “Ama Rwot, ka ce aman doŋ ayomoro cunyi, tim ber yin Rwot en iwot kedwa, kadi wan jo ame ŋutwa nwaŋ; itimwa kica i gin a wan oroco dok obalo, miwa obed joni.” Rwot dok te kobo ni, “Nen ba, aketo cikere. Abino tiyo gin me awura apol ata ame mom ru yam otimere i lobo ducu onyo i rokkoro, abino timo i nyim lwakki luŋ; eka jo luŋ ame ibedo wunu i akinagi bino neno tic a Rwot. Gin ame abino tiyo kedwu-nono, bino bedo a mio jo lworo. “Kop ame aciki iye tin-ni myero igwok. Nen abino ryemo jo Amor oko i nyimi karacel kede jo Kanaan, jo Kitti, jo Periji, jo Kivi, kede jo Jebuc. Gwokere ba, kur icikere i jo ame bedo i lobo ame iwot wunu iye-nono, me gin kur dok kumma me cikowu i akinawu. Ento mumuko wunu kenogi me yalo jogi oko, ret wunu kiddigi ame ocibo me awora piny, toŋu Acerimgi oko, (pien mom myero dok iwor wunu obaŋa moro ocele, pien Rwot ame nyiŋe Nyeko, en Obaŋa ame nyek). Kur icikere wunu i jo ame bedo i lobo-nono, pien ka ce gin bino doko alaya pi lubo yo obanagi, eka ote daŋ miyo mot me yalo obaŋagi, mio ŋattoro bino lwoŋowu, ite camo wunu gin ame gin oŋolo oyalo obaŋagi. Dok ka inyommi wunu awobewu anyiragi, ka ce anyiragi odoko alaya pi lubo yo obaŋagi, bino miyo awobewu daŋ doko alaya i lubo yo obaŋagi. “Kur iti obaŋa moro me nyonyo ame itwako piri keni. “Ibino kwero wunu ecuban me Ogati a Tobi mom iye. Ibino camo wunu ogati a tobi mom iye pi nino kany wie aryo i kare a rik aciko, i dwe me Abib, kite a rik acikowu kede; pien rik iya wunu i lobo me Miciri i dwe me Abib. Itino kao luŋ mega, twonini luŋ me kao, mea dok kede me rommi. Kao a kana ibino lakoro atin nyok romo, aco ka mom ilakoro, obino mojo ŋute oko. Itinoni me kao luŋ awobe mege, ibino lakorogi. Dano moro myero kur bin i nyima ciŋe nono. “Ibino tiyo tic meri pi nino abicel, ento i nino me abiro mere ibino weo iye; ibino wunu weo kadi i kare me pur onyo i kare me kac. Ibino wunu daŋ kwero ecuban me cabit abiro, mannono en wi mwaka me kayo ŋano ame ogeo cek, kede dok nino adito me nyono cam i dero i agikki mwaka. Joni ame co luŋ bino bino tyen adek i mwaka acel i nyim Rwot Obaŋa, ame Obaŋa Icrael. Pien abino ryemo rok ocele oko i nyimwu, wan lobo abino miyo bedo alac. Ŋattoro daŋ mom gire bino bedo i mit i lobowu i kare ame ibino wunu wot i nyim Rwot Obaŋawu tyen adek i mwaka acel. “Kur imi remo me gin oŋolo me yala karacel i tobi. Kur iwek gin oŋolo me yala me nino adoŋo me Kato bed naka tuno odiko. Cam me wi mwaka ame ogeo cek i potowu myero ikel i ot a Rwot Obaŋani. Kur ited riŋo atin dyel i cak a tottere.” Rwot dokokobbi Muca ni, “Co kop me cikere magi luŋ, pien doŋ acikere kedwu, yin karacel kede jo Icrael.” Muca ori baŋ Rwot kuno nino pyeraŋwen, icen kede iwor kun mom daŋ camo kadi mato ginnoro. En te coyo kop ame ocike iye-nono i kom kiddi apada, gin cik tomon. Icennere Muca doŋ te yitto oko piny i wi kidi kun omako kiddi ame apada aryo i ciŋe, ame ocoo iye kop me caden. I kare ame en yito piny i wi kidi, Muca onwoŋo mom ŋeo ni tur nyime tye apapara, pien onwoŋo obedo kop gin Obaŋa. Kare ame Aron kede jo Icrael luŋ oneno Muca, nen ba, gin oneno nyime tye apapara apapar jo te lworo noke aceggi oko. Ento Muca te lwoŋogi. Aron karacel kede otel a lwak te cako wot baŋe, Muca te kop kedgi. Icennere jo Icrael luŋ te wot baŋe ceggi. Muca te miyogi cik luŋ ame Rwot otitte i wi kidi me Cinai. Kare ame Muca doŋ otyeko kop kedgi oko, owumo tur nyime kede boŋo. Cite kare luŋ ka Muca woto i nyim Rwot me wot kop kede, en kwanyo boŋo oko i tur nyime, tuno waŋ ame en doŋ adwogo; ka en okato oko, titti jo Icrael kop ame Rwot ocike iye. Jo Icrael ka oneno tur nyim Muca, gin oneno ni del me tur nyim Muca tye apapara apapar, omio Muca dok te wumo tur nyime oko kede boŋo, naka waŋ ame en dok awot kop i Rwot. Muca ocoko jo Icrael luŋ, eka te kobbigi ni, “Man en gin ame Rwot ociko ni itim wunu. Ti wunu ticwu pi nino abicel, ento i nino me abiro mere, bed wunu kede cabit acil me weo mot baŋ Rwot. Dano ame bino tiyo ticcoro i nino-nono obino neko oko. Mom ibino wunu kuto mac i pacciwu luŋ i nino me cabit.” Muca dok te kobo baŋ lwak jo Icrael luŋ ni, “Gin ame Rwot ociko ene: Raa wunu mot me amia baŋ Rwot i akinawu kun ŋat acel acel tero mottere baŋ Rwot i cuny aler: jabu, ryal kede mola, uci bululu bululu kede en amaramar, kede arema mere, kede boŋo camanini ame owio uci mere aber; yer dyegi, kede lao nyogi rommi ame onyoŋo, lao dyegi; bao okuto alwi, moo me mac tara, gin a ŋwece kur me yiko moo wir kede pi odok a ŋwece kur me awaŋa; gweŋe alilia me onik kede gweŋe ocele mege me amwona i kom jabu pi epod kede me icao kor. “Dok jo luŋ i akinawu ame ryek i tic, gin myero bin ti jami ducu ame Rwot ociko ni gin ti: myero gin oti kema, akemmere kede gi-wumo wie, akoddere, tere, ari mere, pagi mere kede acib tere; canduk me cik kede ludi me tiŋo, kom me kica kede boŋo me icika mere; meja kede ludi me tiŋo, kede jami ticcere luŋ kede ogati me aketa i nyim Rwot; gi-cibo mac kede jami ticcere kede tara mere kede moo mere; keno lam me odok kede ludi me tiŋo, kede moo wir, kede odok a ŋwece kur kede cuka me geno doggola kema; keno lam me yalo Obaŋa i mot awaŋa karacel kede keikei me mola kede ludi me tiŋo, kede jami me ticcere luŋ, kede tako lwok kede akwak tere; cuka me aŋaba i dyekal, kede pagi mege kede acib tergi kede cuka me geŋo doggola me dyekal, teke me guro kema kede teke me dyekal kede tollege; boŋŋi aruka me tic ame okwoo abeco me tic i kabedo acil kede boŋŋi aruka acil pi alamdog Aron kede me awobe mere me ticgi me olamdog.” Jo Icrael luŋ te ya oko i nyim Muca. Ŋat acel acel te cako dwogo kede mottere ame en oyero kun daŋ ŋat acel acel bino ame cunye ler; gin te kelo motgi baŋ Rwot me tiyo kema me rwatte kede me ticcere luŋ, kede me boŋŋi aruka acil. Jo-nono te ciro co kede mon; jo luŋ obino ame cunygi ler kun okelo jarara, atem me yit, atem me ciŋ, kede mola ŋut ciŋ, kede kit jabu luŋ kun dano acel acel mio mot me jabu baŋ Rwot. Jo luŋ ame tye kede uci obedo bululu bululu onyo en amaramar onyo en arema, onyo boŋo camanini aber, onyo yer dyegi, onyo lao me nyogi rommi ame onyono, onyo lao dyegi, okelo luŋ baŋ Rwot. Ŋat ame romo kelo mot me ryal, onyo me mola, gin okelo te miyo me mot baŋ Rwot, kede jo luŋ ame tye kede bao me yat okuto alwi ame romo tiyo ticcoro keken, gin daŋ okelo. Mon ame ryek i tic ciŋ luŋ obedo wiyo uci i ciŋgi, ote kelo uci ame gin owio obedo bululu bululu, kede en amaramar, kede en arema, kede boŋo camanini ame owio uci mere aber. Mon ame cunygi omito tic i ryekogi, owio yer dyegi. Otel wi lwak daŋ te kelo gweŋe alilia me onik kede en ocele mege me amwona i jabu, pi epod kede pi icao kor, kede gin a ŋwece kur, kede moo me mac tara, kede me moo wir, kede me odok a ŋwece kur. Jo Icrael luŋ, co kede mon okelo ginnoro me tiyo gin a rik Rwot ociko iye Muca ni ti, kun ŋat acel acel kelo gin ame yie omito baŋ Rwot. Muca te kobo baŋ jo Icrael ni, “Nen, Rwot otyeko lwoŋo nyiŋ Bejaleri wot a Uri, ame wot a Kur, me itekere a Juda. Dok daŋ otyeko miyo cuny Obaŋa opoŋ i yie, karacel kede ryeko me tic, kede niaŋ atut, kede ŋec, kede tic luŋ me diro, me roto callogo anyen me tic diro ame kwongi papat, ame otio i jabu, kede ryal, kede mola; karacel kede ŋoŋolo gweŋe alilia me amwona kom jabu, kede ryeko me payo bao kede tiyo kit tic ocele luŋ me diro. Omie daŋ cuny me pwony, en karacel kede Okoliab wot a Akicamak, me itekere a Dan. En doŋ otyeko miyogi ryeko me tiyo kwone tic luŋ me diro, kede me roto callogo anyen me diro, kede me liliŋo boŋo i uci ame bululu bululu, kede en amaramar, kede arema, kede boŋo camanini ame owio uci mere aber, kede me cweyo boŋo kede me tiyo kwone tic luŋ, kede roto callogo apapat ame otio i diro. “Bejaleri kede Okoliab kede jo aryek i tic, ame Rwot omiogi ryeko me tic kede niaŋ atut, me ŋeyo kede tiyo tic luŋ me kabedo acil, gin bino tiyo kun olubo kite a rik Rwot ociko.” Muca te lwoŋo Bejaleri kede Okoab karacel kede jo luŋ ame ryek i tic, ame Rwot onwoŋo omio yigi opoŋ i ryeko me tic, jo luŋ ame cunygi omito bino i tic. Jo-nono te gamo mot luŋ ame jo Icrael omio me tic i kabedo acil, gin ogamo i baŋ Muca. Jo onwoŋo pwod tye amedde ameda me kelo motgi ame cunygi omito kun okelo didik odiko. Omio oryeko ame tiyo tic i kebado acil obino, kun ŋat acel acel oya i ticcere ame etio, Gin okobbi Muca ni, “Jo doŋ okelo mot adwoŋ meicel ame okato en onwoŋo mitte me tiyo tic a rik Rwot ocikowa ni oti,” Mannono omio Muca te miyo rabo kop romo gony luŋ ni, “Ico onyo dako moro kur doŋ medde timo ginnoro me amia pi kabedo acil.” Eka jo mom dok te kelo; pien ame onwoŋo okelo, onwoŋo doŋ oromo me tiyo tic luŋ te dok doŋ adoŋa. Oryeko me tic ame rik onwoŋo tye i akina otic te tiyo kema kede cuka tomon, kun otio i boŋo me camanini ame uci mere owio abeco, kede uci obedo bululu bululu, kede en amaramar, kede arema mere, kun daŋ odeo i cal okerubi ame oyiko i twon diro. Cuka acel acel borrere onwoŋo tye yadi apar wie aŋwen, eka laccere te bedo yadi aryo. Cuka-nono luŋ onwoŋo rorom. Oribo cuka abic karacel, kede abic ocele daŋ amannouo. Eka ote kwoyo waŋ jarara ame bululu bululu i agikki cuka me acel, ote dok kwoyo daŋ i agikki cuka me dul me aryo ame rom aroma i maca ocele ca. Dok ote kwoyo waŋ jarara pyerabic i dog cuka acel, dok ote daŋ kwoyo i dog cuk a acel ame tye i dul me aryo, kun waŋ jarara acel acel tikere awottere. Dok ote riyo agod jarara me jabu pyerabic, eka gin te ribo dog cuka kede agod jarara-nono, kema doŋ te bedo ame okubere karacel. Dok ote tiyo cuka me yer dyegi me wumo wi kema; gin otio kodi cukanono apar wie acel. Cuka acel acel onwoŋo borrere tye yadi apar wie abic, laccere yadi aryo kun gin apar wie acel luŋ ororom. Eka gin te noto cuka abic kengi karacel, kun abicel ocele ca daŋ onoto kengi pat. Ote kwoyo waŋ jarara pyerabic i agikki cuka me dul me acel, ote dok kwoyo daŋ i agikki cuka me dul me aryo mere. Dok ote tiyo agod jarara me mola pyerabic me ribo dog kema karacel, me bed ame okubere karacel. Dok ote kwoyo lao me nyogi rommi ame onyoŋo, kede lao dyegi, me wumo wi kema. Gin te dok tiyo bayi me okuto alwi ame ocuŋ atira me kema. Bao acel acel borrere onwoŋo tye futi apar wie abic, kun laccere tye futi aryo. Bao acel acel Onwoŋo tye i tere aryo me kubogi karacel. Bayi me kema ocuŋ atira-nono rik gin te tiyo kittono. Gin rik otiogi kit man: bayi me kema pyeraryo tuŋ cem. Dok ote tiyo tergi me ryal pyeraŋwen me kubo bao kema pyeraryo ca, tere aryo aryo tye pi bao kema acel acel. Dok ote tiyo me kema tuŋ ocele ca, me tuŋ cam, otio daŋ bao pyeraryo, kede tergi me ryal pyeraŋwen, kun tyene aryo aryo daŋ tye pi bao kema acel acel. Dok ote tiyo me kema, ame tye tuŋ to, otio bao kema abicel. Ote dok tiyo aryo me twok kema ame tye tuŋ ŋeye. Gin te poko akinagi i tuŋ pinnyere, cite ote noto doggi i tuŋ malo mere, kun onoto i kom atem me agege; gin otio aryo kittono pi twoke daŋ aryo. Bao kema ocuŋ atira rik Onwoŋo tye aboro, kede acib tergi daŋ ame otio i ryal. Acib tergi rik onwoŋo tye apar wie aryo, kun bao kema acel acel tye iye acib tere aryo. Dok ote daŋ tiyo arii me bao abic pi bayi me kema tuŋ cel, kun otio kede okuto alwi, kede arii bayi abic pi bayi me kema tuŋ ocele, kede dok arii bao abic me kema tuŋ neye, ame tye tuŋ to. Te dok tiyo arii bao me dyere ame ya i agikki tuŋ cel tuno i agikki tuŋ ocele, kun ŋolle i kor arii bao ame ocuŋ atira, Eka ote mwono kom bao kema tuŋ cel oko kede jabu, ote dok tiyo atem me jabu me rwako bao iye. Arii me bao daŋ omwono komgi oko i jabu. Dok ote kwoyo boŋo me icika ame uci mere bululu bululu, amaraamar kede arema me boŋo camanini me uci mere owio aber, kun daŋ odeo kede cal okerubi ame oyiko i twon diro. Eka ote tiyo pagi aŋwen me okuto alwi pire, ote mwono komgi oko i jabu, kun agodgi daŋ me jabu; ote liyo ryal tiyo acib tergi aŋwen. Dok ote tiyo cuka boŋo me geŋo dog kema kun otio i cuka ame uci mere bululu bululu, amaramar kede arema, dok uci cukanono daŋ owio abeco, ote daŋ deyo aber meicel. Dok ote tiyo pagi abic karacel kede agodgi, eka ote mwono wigi, kun otac wigi obedo me jabu, ento acib tergi abic obedo me mola. Bejaleri te payo canduk i bao oku to alwi, kun borrere tye futi aŋwen, laccere futi aryo kede borrere malo futi aryo. Te mwono ŋec kede yie oko i jabu ame olio aber, eka te dolo doge oko i jabu. Te tiyo atem me jabu aŋwen me twoke aŋwen luŋ; atem aryo pi tuŋ cel kede aryo tuŋ ocele. Dok ote tiyo daŋ ludi aryo me okuto alwi, ote daŋ mwono komgi oko i jabu, ote rwako ludi iyi atem luŋ ame tye i ŋet canduk, me tiŋo canduk. Dok te tiyo kom-me-kica kun tio i jabu ame olio aber; borrere futi aŋwen kede laccere futi aryo. Te dok tiyo okerubi aryo kun tio i jabu ame oteto anyul, te ketogi i agikki kom-me-kica ryoryo luŋ. Okerubi acel i agikki tuŋ cel kede acel ocele i agik ki tuŋ cel kun gin luŋ okubere i kom-me-kica, i agikki mere ryoryo luŋ, kun okerubi oyaro bwomgi malo i wie, owumo kom-me-kica i bwomgi, dok daŋ wan acel acel neno me awottere. Gin luŋ oneno kom-me-kica. Dok te tiyo meja kede bao okuto alwi; meja ame borrere tye futi adek, laccere futi acel kede nucu, eka borrere me malo te bedo futi aryo. Te mwono kome oko i jabu ame olio aber, eka te dolo daŋ laŋete luŋ kun mwono oko kede jabu. Eka te keto arii mere ame laccere rom aroma i cuny ciŋ, kun dolo daŋ lak arii luŋ i jabu. Te doŋ tiyo atem aŋwen me jabu pire, eka te mwono atem aŋwennono i twoke aŋwen luŋ i kom tyene aŋwen. Atem acel acel oketo ceggi arii me rwako lut tiŋo meja. Dok te tiyo ludi kede bao okuto alwi, te mwono komgi oko i jabu. Otio dok jami me aketa i wi meja kun tio i jabu ame olio aber; otio cani, tabbi me keto odok akur, weer, kede cupa me liyo mot amata. En dok te tiyo gi-cibo mac tara kun tio i jabu ame olio aber. Oteto tere kede bollere ateta kede nyonyo. Ikopo mere ame en wene kede ature luŋ okubere kede karacel. Otio jaŋe abicel kun oryeye i ŋete luŋ, adek tuŋ cel kede adek tuŋ cel. I kom jaŋe tuŋ cel otio iye ikopo adek ame calo tur yao, kun acel acel tye kede ature kede wene. I kom jaŋe tuŋ ocele daŋ otio iye ikopo adek ame calo tur yao, kun acel acel daŋ tye ature kede wene. Jaŋe abicel ame oryeye i ŋet gi-cibo maccono onwoŋo obedo kittono. Eka i kom gi-cibo tara ikokome ote tiyo iye ikopo aŋwen ame calo tur yao, kun tye i wengi kede turgi, kede wene ame okubere i kom gi-cibo tara, i te jaŋe abicel ame oryeyo oromo ŋete tuŋi i tuŋi. Wengi kede jaŋgi okubere karacel, kun kome luŋ me jabu olio aber eka ote teto kede anyul. Icennere doŋ te tiyo tara kany wie aryo pire, kede makaccere, kede cani mere kun tiogi luŋ i jabu ame olio aber Gi-cibo tara kede jami me ticcere luŋ en otio kede jabu ame olio aber ame pekkere romo ratili mia acel. Dok te tiyo keno me waŋo odok akur kun tio i okuto alwi; borrere futi acel i nucu, laccere daŋ futi acel i nucu kun twoke aŋwen luŋ rorom. Borrere me malo tye futi adek kun tye i tuŋ aŋwen ame okubere kede karacel. Kome ducu omwono oko i jabu ame olio aber; wie kede laŋete kede tuŋe luŋ odolo oko eka ote dolo doge oko i jabu. Otio daŋ atem me jabu aryo, ote keto i te doge ame odolo-ni, kun atem acel acel otikere kede awottere, me rwako lut me tiŋo. Eka ote tiyo ludi i bao okuto alwi, ote mwono komgi oko i jabu. Eka ote tiyo moo acil me wir, kede odok a ŋwece kur ame olio daŋ aber, kun orubo kite ame orubo kede gin a ŋwece kur. Dok te tiyo keno lam me yalo Obaŋa i mot awaŋa kun tio i bao me okuto alwi; borrere futi abiro kede nucu, laccere futi abiro kede nucu, ame twoke aŋwen luŋ rorom, borrere me malo te bedo futi aŋwen kede nucu. Otio tuŋ aŋwen i twoke aŋwen luŋ, kun tuŋŋono luŋ okubere karacel kede, dok daŋ omwono komgi oko i mola. Te tiyo daŋ jami me keno me lam luŋ: tako, atok buru, becan, acob riŋo kede weer me waŋo mac. Jami ticcono luŋ otio kede mola. Te yiko daŋ keikei me keno lam; ame bwo mola okakado, te keto buto i kore i te arii mere. Eka te twako mola tiyo atem aŋwen me keikei mola ca, me rwako ludi me tiŋo. Te tiyo ludi kede bao okuto alwi, te mwono komgi oko i mola. Te rwako tol donyo iyi atem ame tye i ŋet keno me lam, wek bed me tiŋo. Otio ame yie twolo kun otio i bao. Dok te tiyo tako me mola kede akwak tere me mola, kun tio kede dabaraŋ mon ame tio tic i doggola kema me rwatte. Te yiko dyekal me kema. Oŋabo cuka me camanini ame uci mere owio abeco i dyekal tuŋ anyarolum borrere onwoŋo tye yadi pyerabic, Pagigi onwoŋo tye pyeraryo kede acib tergi daŋ pyeraryo, kun gin luŋ otio i mola. Ento agod pagi kede otac wigi otio kede ryal. Me tuŋ anyarodi daŋ ote tiyo amannono; otio cuka ame borrere romo yadi pyerabic, kede pagi mere kede acib tergi daŋ pyeraryo ame daŋ otio i mola. Ento pagigi kede otac wigi otio daŋ me ryal. Eka i ŋete tuŋ to ote ŋabo iye boŋo ame borrere tye yadi pyeraryo wie abic, pagi mere tye apar, kede acib tergi daŋ apar. Agod me pagi kede otac wigi otio kede ryal. Aco tuŋ nyime ame tye tuŋ kide ote ŋabo iye cuka ame laccere tye yadi pyeraryo wie abic. Boŋo ame oŋabo i ŋet doggola tuŋ cel onwoŋo tye yadi abiro kede nucu, kun tye i pagi adek kede acib tergi daŋ adek. Ŋete tuŋ ocele daŋ onwoŋo otio amannono, i ŋet dog paco tuŋŋi kede tuŋŋi oŋabo iye cuka ame romo yadi abiro kede nucu, kun tye i pagi adek kede acib tergi daŋ adek. Cuka luŋ ame oŋabo i ŋet paco onwoŋo me camanini owio uci mere abeco. Acib pagi luŋ onwoŋo otio kede mola, cite agod pagi kede otac wigi onwoŋo me ryal, kun daŋ omwono wigi i ryal, karacel i pagi luŋ ame onwoŋo tye i dyekal oketo otac me ryal i wigi. Cuka me geŋo yo ame donyo i dyekal rik odeo kome aber kede uci obedo bululu bululu, amaramar kede arema kun boŋo-nono me camanini ame owio uci mere abeco. Borrere onwoŋo tye yadi apar, eka borrere me malo te bedo futi abiro kede nucu, ame rom aroma i cuka me aŋaba i dyekal. Pagi onwoŋo tye aŋwen kede acib tergi daŋ aŋwen ame otio i mola, cite agodgi me ryal, kun wigi omwono oko i ryal, kun otac wigi daŋ me ryal. Teke me guro kema luŋ kede teke ame omano dyekal luŋ onwoŋo otio i mola. Jami ame otio i kema wellere ene, ame kema me kop me caden, kite a rik okwanogi kede i kare a Muca ociko, pi tic a jo Levi kun adwoŋ ticgi rik Itamar ame obedo wot a Aron ame alamdog. Bejaleri wot a Uri ame wotta Kur, me itekere a Juda, rik otio jami luŋ ame Rwot ociko baŋ Muca. En rik tye karacel kede Okoliab wot Akicamak, me itekere a Dan, lo ame onwoŋo adiro, ame roto kite me tic anyen, dok obedo ŋat a deo jami kede uci bululu bululu, amaramar kede arema, kede boŋo camanini ame owio uci mere abeco. Jabu luŋ ame rik otio kede pi kabedo acil, kede jabu luŋ ame rik oya i mot ame omio, pekkere rik oromo talanta pyeraryo wie aboŋwen, kede cekel mia abiro kede pyeradek, kun onwoŋo opimo i cekel me kabedo acil. Aco ryal ame oya ibaŋ lwak rik okwano ote nwoŋo pekkere romo talanta mia acel kede cekel tutumia acel, kede mia abiro, kede pyerabiro wie abic, kun daŋ nwoŋo opimo i cekel me kabedo acil. Dano acel acel onwoŋo okelo beka acel (mano en nucu cekel me kabedo acil), mano pi dano acel acel ame rik onwoŋo okwano, cakere i kom jo ame mwakagi me dito tye pyeraryo, dok kede malo. Jo tutumia mia abicel kede adek, kede mia abic kede pyerabic. Talanta mia acel me ryal onwoŋo obedo me twako acib pagi me kabedo acil, kede acib pagi me boŋo icika; acib tergi ame romo mia acel oya i kom talanta mia acel, talanta acel pi acib pagi acel acel. Eka cekel tutumia acel kede mia abiro i pyerabiro wie abic, ote tiyo kede agod pagi luŋ, kun omwono daŋ i wigi ducu, eka ote tiyo daŋ otac wigi. Mola ame omio onwoŋo oromo talanta pyerabiro kede cekel tutumia aryo kede mia aŋwen. Mannono otio kede acib pagi me doggola kema me rwatte, kede keno lam me mola, kede keikei me mola, kede jami luŋ me tic i keno lam, kede acib pagi ame omano dyekal, kede acib pagi me dog paco me dyekal, karacel i teke me guro kema kede en omano dyekal. Gin te kwoyo daŋ boŋŋi me aruka abeco kun okwoo kede uci obedo bululu bululu, amaramar, kede arema, me tic i kabedo acil; okwoo boŋŋi acil pi Aron kite a rik Rwot ociko kede Muca. Otio daŋ epod kun tio i jabu kede uci ame obedo bululu bululu, amaramar kede arema, kede boŋo camanini ame owio uci mere abeco. Eka ote papado jabu arep kun odidino anyul, ote liro acalli tol me deyo boŋo karacel kede uci bululu bululu, amaramar, kede arema, me camanini owio uci mere abeco, kun daŋ otio i twon tic me diro. Ote daŋ kwoyo gin me wi gwok epod, kubo i doge ryoryo. Lati mere me tweyo ote cweyo i diro, kun okwoo i kit jami acellono, kede kodi tic acellono daŋ. Otio i jabu, uci obedo bululu bululu, amaramar, kede arema, kede boŋo camanini ame uci mere owio abeco, kite a rik Rwot ociko kede Muca. Gin dok te yiko gweŋe alilia me onik, ote mwomwono i kom jabu ame oŋweŋweko i diro kun doŋ onwoŋo ogogoro nyiŋ awobe Icrael i komgi kite ame adiro goro kede kom kidi. Eka ote mwomwonogi i kom gin me wi gwok epod, me bed kiddi me poyo awobe Icrael, kite a rik Rwot ociko kede Muca. Dok te tiyo icao me kor kun tio daŋ i tic me diro, acalli en a tye i kom epod. Otio kede jabu, uci bululu bululu, amaramar, kede en arema, kede boŋo camanini boŋo camanini ame uci mere owio aber. Twoke onwoŋo tye aŋwen arorom, kun odolo kor i cao-nono aryo; borrere kede laccere te bedo arommi lac ciŋ ame oryeo, ka doŋ odolo yie. Eka ote mwomwono iye gweŋe alilia ame oryeo i yore aŋwen. I yore me agege omwono iye cadiuc, topaj kede kabankel. I yore me aryo mere ote mwono iye emeradi, capir kede dayaman. Eka i yore me adekkere, ote mwono iye jacint, agat kede ameticito. I yore me aŋwennere ote mwono iye berul, onik, kede jacipa. Gin luŋ omwomwonogi kede jabu ame oŋweŋweko kede diro. Gweŋe alilianono onwoŋo tye apar wie aryo, ame oporo nyiŋ awobe Icrael, ocalli i kidi ame ogoro me atem, kun kidi acel acel ogoro iye nyiŋ ame rom aroma atekere apar wie aryo. Dok ote tiyo nyor, kun otio i jabu ame olio aber, omino bala tol. Dok ote tiyo gi-kwako tere aryo, kun daŋ otio i jabu ame oŋweŋweko i diro, kede atem me jabu aryo, eka ote kwoyo atem aryo-nono i dog icao kor aryo daŋ. Eka dok ote rwako tol jabu aryo-nu donyo i atem aryo ame tye i dog icao kor. Dog tol aryo-nono ote mwono luŋ i kom akwak tere aryo ame oŋweŋweko i diro ca, ote tweyo kede i kom gin me wi gwok epod. Dok ote tiyo atem aryo me jabu, ote kwoyo i twok icao kor aryo ducu, i doge ame tye tuŋ yie ame ceggi kede epod. Dok ote timo atem aryo me jabu, ote kubogi i gin me wi gwok epod aryo aryo i tergi tuŋ nyim, kan ame okubere malo i wi lati me epod ame ocweo i diro ca. Eka ote tweyo icao kor kede atemmere i kom atem ame tye i dog tol a bululu bululu, me but pyelle i kom lati me epod ame ocweo i diro ca, me wek icao kor kur gony oko i kom epod, kite a rik Rwot ociko kede Muca. Dok ote tiyo jor me epod ame ocweo kome ducu kede uci a bululu bululu, ote tuco bedo bala me ŋut boŋo me aruka, kun odolo ŋute luŋ me kur yeci. Eka lak jor i piny ote luluŋo iye gin ame cal i okwer ame okwoo kede uci bululu bululu, amaramar, kede arema, kede boŋo camanini ame owio uci mere abeco, Dok ote tiyo olaŋ jabu ame olio aber, ote kwoyo olan kun ocuculo i akina okwer, ame omano lak jor luŋ, kun oculle acula i lak jor aruka me tic, kite a rik Rwot ociko kede Muca. Dok ote tiyo kanyi ame ocweo i boŋo camanini aber, kede pali me boŋo camanini ame owio uci mere abeco pi Aron kede awobe mere, kede itambara me adwala i wic me boŋo camanini aber, kede tok atitino mere me boŋo camanini, kede pali me boŋo camanini ame owio uci mere aber, kede itambara me tweyo pyer me boŋe camanini owio uci mere abeco, kede uci bululu bululu, kede en amaramar kede arema, ame odeo aber meicel, kite a rik Rwot ociko kede Muca. Dok ote tiyo akwaa jabu me tok kwogo acil, kun otio i jabu ame olio acil, eka ote goro kome agora kite ame ogoro kede i kom atem me ciŋ, ni, “Okwero obedo acil pi Rwot.” Eka ote tweyo tol a bululu bululu i kome me rid kede i kom itambara adwala i wic, kite a rik Rwot ociko kede Muca. Rik gin doŋ onwoŋo otyeko tiyo kema oko, ame en kema me rwatte, gin rik otyeko ticcere kittono. Jo Icrael otyeko tic luŋ kite a Rwot ociko kede Muca; gin otio luŋ kittono. Okelo kema baŋ Muca, kema kede jami me ticcere luŋ; okelo akod me bayi mere atira, kede arii mere, pagi mere, kede acib tergi; lao nyogi rommi ame onyoŋo, kede lao dyegi ame okwoo me wumo wi kema, kede boŋo ici ka me geŋo kema; kede canduk ame kop me caden bedo iye, kede ludi me tiŋo, kede kom-me-kica, kede meja karacel i jami me ticcere luŋ, kede ogati me aketa i nyim Obaŋa, kede gi-cibo tara me jabu olio aber, kede tara mere, kun oketo tara malo i wie karacel i jami tici g luŋ, kede moo tara; kede keno lam me jabu, kede moo wir, kede odok a ŋwece kur, kede boŋo me wumo doggola kema; kede keno lam me mola, kede keikei mere me mola, kede ludi me tiŋo, karacel i jami ticcere luŋ, kede tako lwok karacel akwak tere; boŋo cuka ame oŋabo guro dyekal, pagi karacel acib tergi, kede boŋo geŋo dog dyekal, kede toli kede teke daŋ apipim me guro, karacel i jami me tic i kema me rwatte; boŋŋi aruka ame otio abeco me tic i kabedo acil, boŋŋi aruka acil me aruka alamdog Aron karacel kede boŋŋi aruka pi awobe mere, me ticgi me olamdog, Kite a rik Rwot ociko i Muca, jo Icrael otio ticgi luŋ kittono ikome. Muca te neno jami luŋ ame otio, nen, ticcere onwoŋo tic ikokome; kite a rik Rwot ociko ikome, tic luŋ otiye kakare. Muca doŋ te lamo winyo i komgi. Rwot te kobbi Muca ni, “Cak guro kema i dwe me agege ame en kema me rwatte, Ket canduk ame kop me caden bedo iye i yie, eka ite ŋabo boŋo me icika me wumo canduk. Ter doŋ meja iye, ite cano jami luŋ iye yore i yore, dok ite kelo gicibo tara, cibo tara i wie. Ket dok keno me lam me waŋo odok akur, ame otio i jabu, ket i nyim canduk ame kop me caden bedo iye, eka ite nabo boŋo me geŋ dog kema. Ibino keto keno lam me waŋo mot oŋolo me yalo Obaŋa i nyim kema, ame en kema me rwatte. Ket tako me lwok cuŋ i akina kema me rwatte kede keno me lam, eka ite onyo pii i yie. Ŋab dok cuka me dyekal malo ogur dyekal dyere, eka ite ŋabo cuka me geŋo dog dyekal. Kwany moo wir, wir meja kede jami luŋ ame tye iye kun ikwero meja-nono kede jami mere luŋ me bed acil. Wir daŋ dok keno me lam me mot awaŋa, wir kede moo, karacel kede jami me ticcere luŋ. Kwer keno me lam oko, bino doko acil meicel. Wir moo daŋ i kom tako lwok kede akwak tere, eka ite kwerogi. Kel doŋ Aron kede awobe mere i doggola me kema me rwatte, eka ite lwokogi kede pii. Ruk Aron kede rukkere acil, eka ite wire kede moo me kwere me tiyo ticca me alamdog. Kel dok awobe mere, rukgi kede kanyigi, wirgi kede moo kite ame iwiro kede papagi me gin ti ticca me olamdog. Wirogi kede moo bino miyo gin bedo olamdog atwal naka i kare ikwaegi luŋ.” Muca te timo kite a rik Rwot ocike kede-nono, otimo jami luŋ kittono ikome. I dwe me agege, me mwaka me aryo, i nino dwe acel, en ame oguro iye kema. Muca oguro kema, oryeo acib tere, te cibo iye yen, eka te rwako arii iye, te tiŋo malo, Eka te dok peto boŋo i wi kema, te keto awum kema i wie, kite a rik Rwot ocike kede. Dok te tero kop me caden keto iyi canduk, te rwako ludi i kor canduk, te keto kom-me-kica i wi canduk, te tero canduk doŋ i kema. Oŋabo boŋo me icika malo te geŋo kede kom canduk ame kop caden bedo iye oko, kite a rik Rwot ociko kede Muca. Dok te keto meja i kema me rwatte tuŋ cem, kun mio bedo i oko i ŋe boŋo icika ame ogeŋo canduk. Te doŋ cano ogati i nyim Rwot kite a rik Rwot ociko kede Muca. Dok te keto gi-cibo tara i kema me rwatte tuŋ cam, kun otikere i meja, te cibo tara i wie malo i nyim Rwot, kite a rik Rwot ociko kede Muca. Dok te keto keno lam me jabu i kema me rwatte, i nyim boŋo me icika, te waŋo odok a ŋwece kur i wie, kite a rik Rwot ociko kede Muca. Dok te ŋabo boŋo me geŋo dog kema. Eka dok te keto keno lam me waŋo mot awaŋa aceggi i doggola me kema me rwatte, te cako miyo iye mot awaŋa kede me moko kwon, kite a rik Rwot ociko kede Muca. Dok te keto tako lwok i akina kema me rwatte kede keno me lam, te onyo iye pii me lwok; kannono en ame Muca kede Aron kede awobe mere olwoko iye tyengi. Gin doŋ te wot i kema me rwatte, ote daŋ noko doŋ keno me lam, ote lwokere i kite a rik Rwot ociko kede Muca, Oguro dyekal me kema kede keno me lam, te ŋabo boŋo me geŋo dog dyekal. Muca te tyeko ticcere kakare kittono. Icennere pol te bino wumo wi kema me rwatte oko, kwogo a Rwot te poŋ oko i kema. Muca onwoŋo doŋ mom romo donyo i kema me rwatte, pien pol onwoŋo owumo oko, dok kwogo a Rwot onwoŋo opoŋ yi kema oko. I kare me wotgi luŋ, ka pol owarre oko i wi kema, eka jo Icrael te cako wotgi anyim. Aco ka pol mom owarre oko, gin daŋ mom medde i wotgi anyim; gin kuro naka i nino ame pol owarre iye i wi kema. I kare me wotgi luŋ, pol a Rwot wumo wi kema dyeceŋ kede mac bedo iye dyewor. Man luŋ obedo timere kun jo Icrael luŋ neno. Rwot rik olwoŋo Muca te kop kede i kema me rwatte, okobo ni, “Kobbi jo Icrael ni, ‘Ka dano moro i akinawu kela limmere akwo me amia baŋ Rwot, ibino kela wunu motwunono kun ikwanyo wunu i akina dok onyo i akina romi kede dyegi.’ “Ka ce mottere-nono obedo mot awaŋa me yalo Obaŋa ame okwanyo i akina dok, en bino miyo twon ame roccoro mom i kome; en bino kela i doggola kema me rwatte, me wek Rwot ogame; en dano-nono bino keto ciŋe i wi mot awaŋa, eka ote gamo pire, me kwanyo ballere. Icennere, en bino neko twonnono i nyim Rwot, eka awobe Aron, ame gin olamdog, gin bino kelo remo-nono, ote cocoro romo kom keno lam luŋ ame tye i doggola kessssma me rwatte, Dano-nono bino yaŋo mot awaŋa mere-nono, te ŋoŋolo dul i dul. Awobe Aron ame gin olamdog, bino kuto mac i wi keno lam, ote cano yen i maccono i yore yore; awobe Aron ame gin olamdog, bino cano riŋo ame oŋoŋolo dul i dul ca, kede wie kede dwollege i wi yen ame tye i mac i keno lam, kun ketogi i yore i yore; ento amontennege kede tyene luŋ wonnere bino lwoko kede pii, alamdog te waŋo oko luŋ i keno lam, me bed mot awaŋa alutu me yalo Obaŋa, mot ame owaŋo kede mac, gin a ŋwece kur a yomoro cuny Rwot. “Ka ce mottere me awaŋa-nono okwanyo i akina rommi onyo dyegi en bino miyo nyok ame roccoro mom i kome. Bino neko i tuŋ anyarodi me keno lam, eka awobe Aron, ame gin olamdog te cocoro remo mere romo kor keno lam luŋ. Dano-nono bino ŋoŋolo i dul i dul karacel kede wie kede dwollege, alamdog te cano i keno lam kun ketogi i yore i yore, ento amontennege kede tyene luŋ wonnere bino lwoko kede pii, alamdog te miyo luŋ kun waŋo i keno lam Mano en mot awaŋa alutu me yalo Obaŋa, mot awaŋa i mac, gin a ŋwece kur a yomoro cuny Rwot. “Ka ce mottere ame emio baŋ Rwot tono obedo winnyi me mot awaŋa, en myero kel amam onyo itino awele me mottere. Alamdog bino kelo i keno me lam te mojo ŋute oko, te waŋo i wi keno lam; bino dwidwinyo remo mere cwer i ŋet keno lam. En dok bino kwanyo cukuru mere karacel kede yeye, te oonyogi i ŋet keno lam tuŋ kide, kan ame oonyo iye buru. En bino yeco winyo-nono i bwome, cite myero kur pok yie, eka alamdog te waŋo oko i keno lam, kun waŋo i wi yen ame tye i mac. Mano en mot awaŋa alutu me yalo Obaŋa, mot awaŋa i mac, gin a ŋwece kur a yomoro cuny Rwot. “Ka ŋattoro okelo mot me moko kwon me yalo Rwot, mottere myero bed moko kwon apwottere. En bino onyo moo iye, dok te keto iye odok luban, te kela baŋ awobe Aron, ame gin olamdog. Dano acel i akinagi bino juko moko kwon apwot kede moo poŋ ciŋe, karacel odok lubannere luŋ; alamdog bino waŋo man i wi keno lam, wek obed me po i kome, mot me awaŋa i mac, gin a ŋwece kur a yomoro cuny Rwot. Gin ame odoŋ i kom moko kwon me yalo Obaŋa bino bedo me Aron kede awobe mere; mano en dul acil meicel i kom mot awaŋa i mac baŋ Rwot. “Ka ikelo wunu mot me yalo Obaŋa, me moko kwon ame otedo i keno myero bed capat a tobi mom iye, me moko kwon apwottere ame orubo i moo, onyo me capat areppere a tobi mom iye, ame owiro moo i komgi. Dok ka motti obedo me moko kwon ame otedo i tako nyonyo, myero bed me moko kwon apwottere a tobi mom iye, ame orubo kede moo; yin ibino nyinyilo atitino eka ite onyo moo iye; mano me mot me moko kwon. Dok ka motti obedo me moko kwon otedo i cupuria, ibino tedo i moko kwon apwottere karacel kede moo. Ibino kela mot me moko kwon ame otedo kede jami-nono baŋ Rwot; ka doŋ omio oko baŋ alamdog, alamdog bino kela i keno lam. Alamdog bino kwanyo moko kwon me po iye, te waŋo i wi keno lam, me mot awaŋa i mac, gin a ŋwece kur a yomoro cuny Rwot. Gin ame odoŋ i kom moko kwon me yalo Obaŋa bino bedo me Aron kede awobe mere; mano en dul acil meicel i kom mot awaŋa i mac baŋ Rwot. “Mot me moko kwon ame okelo baŋ Rwot, myero mom ted i tobi, pien mom ibino wunu waŋo tobi onyo moo kic me mot awaŋa i mac baŋ Rwot. Aco ka obedo mot me cam ogeo cek i wi mwaka, itwero wunu kelo baŋ Rwot, cite mom myero migi i wi keno lam me bedo gin a ŋwece kur a yomoro cuny. Ibino keto kado i motti me moko kwon luŋ; mom ibino miyo kado me cikere Obaŋani rwenyo i motti me moko kwon; motti luŋ ame ibino miyo, ibino miyo karacel i kado. “Ka ce imio mot me moko kwon me cam me wi mwaka baŋ Rwot, ibino miyo wit kal anyen ame oodo, ote celo i mac, obed mot me moko kwon me cam me wi mwaka. Ibino keto moo iye, kun daŋ iketo iye odok luban; mano en mot me moko kwon. Alamdog bino kwanyo kallogo ame oodo, kede moo karacel kede odok lubanner luŋ, te waŋo me po i kome; mano en mot awaŋa i mac, gin a ŋwece kur a yomoro cuny Rwot. “Ka mot a dano amiyo me yalo Obaŋa obedo mot aŋola me kweyo cuny, ka ce en amiyo mot ame okwanyo i akina dok, twon onyo minne, en bino miyo i nyim Rwot kun roccoro mom i kome. Dano-nono bino keto ciŋe i wi mottere-nono, te neko i doggola kema me rwatte; awobe Aron, ame gin olamdog, bino cocoro re mo mere romo kor keno lam luŋ. I kom mot aŋola me kweyo cuny, en bino miyo me bed mot awaŋa i mac baŋ Rwot; dwol luŋ ame owumo amonten kede dwol luŋ ame tye i kom amonten, kede aŋaluru aryo kede dwol luŋ a tye i pyere, kede okene ame tye i kom emany, en bino kwanyo oko karacel kede aŋaluru aryo. Awobe Aron te waŋogi i wi keno lam i kom mot awaŋa ame nwoŋo tye i wi yen i kom mac. Mano en mot awaŋa i mac, gin a ŋwece kur a yomoro cuny Rwot. “Ka ce mottere me yalo Rwot me kweyo cuny obedo lee ame okwanyo i akina romi, nyok onyo akale en bino miyo ame roccoro mom i kome. Ka ce en amiyo atin romo acalo en bino miyo i nyim Rwot. En te keto ciŋe i wi mottere, te neko oko i nyim kema me rwatte; awobe Aron te cocoro remo mere romo kor keno lam luŋ. Eka i kom mot aŋola me kweyo cuny, en bino miyo jami magi me bed mot awaŋa i mac baŋ Rwot: dwollege kede moo yibe luŋ, ame oŋolo aceggi kede cogo me oguro ŋee, kede dwol luŋ ame owumo amonten kede dwol luŋ ame tye i kom amonten, kede aŋaluru aryo kede dwol luŋ a tye i pyere, kede okene ame tye i kom emany ame en bino kwanyo oko karacel kede aŋaluru aryo, Alamdog te waŋo i wi keno lam me bed cam ame omio i mac baŋ Rwot. “Ka ce mottere me yalo Obaŋa obedo dyel, en bino miyo i nyim Rwot, eka te keto ciŋe i wie, te neko oko i nyim kema me rwatte; awobe Aron te cocoro remo mere romo kor keno me lam luŋ. Dano-nono bino miyo moro iye me mot awaŋa i mac baŋ Rwot, dwol luŋ ame owumo amonten kede dwol luŋ ame tye i kom amonten, kede aŋalura aryo luŋ, kede dwol luŋ a tye i pyere, kede okene a tye i kom emany ame en bino kwanyo oko karacel aŋalura aryo. Alamdog te waŋo i wi keno lam, me bed cam ame omio i mac ame ŋwece kur. Dwol luŋ obedo me a Rwot. Man bino bedo cik atwal, i tuno i kare ikwaewu luŋ, mom ibino camo wunu dwolo onyo remo.” Rwot dok te kobbi Muca ni, “Kob baŋ jo Icrael ni, Ka ce dano moro obalo, kun mom obalo me akaka i kom ginnoro ame Rwot rik ociko ni myero kur tim, ka ce en otimo moro i akinagi, ka ce alamdog ame owiro kede moo en obalo, te kelo bal i wi lwak luŋ pi ballere ame en obalo-nono, myero en yal Rwot kede atin twon etobayit ame roccoro mom i kome, me bed mot me bal. Alamdoggono bino kelo twon i doggola kema me rwatte i nyim Rwot, eka te keto ciŋe i wi twonnono, te neko twonnono i nyim Rwot. Alamdog ame owiro kede moo bino jolo remo twonnono mogo te kelo i kema me rwatte; alamdog te luto nyako ciŋe i remo, te totono remo-nono mogo i nyim Rwot tyen kany wie aryo i nyim boŋo icika me kabedo acil. Alamdog dok te bino totono remo-nono mogo i kom tuŋ aŋwen ame tye i keno waŋo odok akur, ame tye i kema me rwatte i nyim Rwot. Remo twon odoŋŋere luŋ, en bino onyo i te keno lam me mot awaŋa, ame tye i doggola kema me rwatte. En bino wawaro dwol luŋ i kom twon ame omio pi bal, dwol ame owumo amonten, kede dwol luŋ ame tye i kom amonten, kede aŋalura aryo kede dwol luŋ ame tye i pyere, kede okene ame tye i kom emany ame bino kwanyo oko karacel kede aŋalura aryo, kite ame okwanyo kede i kom twon ame oŋolo me mot me kweyo cuny; alamdog bino waŋo i wi keno me mot awaŋa. Ento pyen me twonnono kede riŋo mere luŋ, karacel kede wie kede tyene luŋ kede amontennere, kede wee iye, en bino tero luŋ teŋe i ŋe gony, kan acil, kan ame oonyo iye buru, te waŋo kuno i mac me yen. Obino waŋo kan ame oonyo iye buru. “Ka ce lwak jo Icrael luŋ otimo bal, kun nwoŋo gin otio ginnoro ame Rwot rik ociko ni kur tim, kun mom obalo me akaka, dok lwak jo luŋ mom oŋeo ginnono; kare ame gin doŋ oŋeo balgi, lwak bino yalo Obaŋa kede atin twon etobayit me mot me bal, gin bino kelo i nyim kema me rwatte. Odoŋe a lwak bino keto ciŋgi i wi twonnono i nyim Rwot, eka daŋ ote neko twonnono i nyim Rwot. Alamdog ame owiro kede moo bino tero remo twonnono mogo i kema me rwatte. Alamdog te luto nyako ciŋe i remo, te totono remo-nono mogo i nyim Rwot tyen abiro i nyim boŋo icika. Alamdog dok bino totono remo-nono mogo i kom tuŋ aŋwen ame tye i keno lam, ame tye i kema me rwatte i nyim Rwot. Remo twon odoŋŋere luŋ en bino onyo i te keno lam me mot awaŋa, ame tye i doggola ke ma me rwatte. En bino wawaro dwol luŋ i kome te waŋo i wi keno lam. En bino timo twonnono kittono; kite ame etimo kede i kom twon me yalo Obaŋa pi bal, bino timo daŋ kittono i kom man; alamdog bino tiyo tic me kwanyo bal pirgi, Rwot daŋ bino weko balgi. En doŋ bino tero twonnono i ŋe gony, te waŋo kuno kite ame owaŋo kede twon me agege ca; mano en mot me bal a lwak. “Aco ka aloccoro en obalo i ginnoro acel i kom ginnoro luŋ ame Rwot Obaŋa mere ociko ni kur tim, kun mom obalo me akaka; ka ce ŋattoro omie eŋeo bal ame ebalo-nono, en bino kelo nyok dyel a roccoro mom i kome me bed mottere me yalo Obaŋa, En bino keto ciŋe i wi dyellono, te neko kan ame oneko iye mot awaŋa i nyim Rwot; man en mot me bal. Alamdog bino gweto remo me mot ballono i nyako ciŋe, te totono i kom tuŋ aŋwen ame tye i keno lam me mot awaŋa te onyo remo ame odoŋŋere luŋ i te keno lam me mot awaŋa. Dwollege luŋ obino waŋo i wi keno lam kite ame owaŋo kede dwol me mot aŋola me kweyo cuny; alamdog bino tiyo tic me kwanyo bal i kome, Rwot daŋ bino weko ballere. “Ka dano moro keken i akina jo obalo, ce otio ginnoro acel ame Rwot rik ociko ni kur tim, kun mom obalo me akaka; ka ce ŋattoro omie eŋeo bal ame en obalo-nono, en bino kelo akale dyel a roccoro mom i kome me bed mottere me yalo Obaŋa pi ballere ame etimo, en bino keto ciŋe i wi mot me bal, te neko kan ame oneko iye mot awaŋa. Alamdog bino gweto remo mere mogo kede nyako ciŋe, te totono i tuŋ aŋwen ame tye i keno lam me mot awaŋa, te onyo en odoŋŋere luŋ i te keno lam. En bino wawaro dwollege luŋ kite ame owawaro kede dwol i mot aŋola me kweyo cuny; alamdog te waŋo i wi keno lam me bed gin a ŋwece kur a yomoro cuny RWOT; alamdog bino tiyo tic me kwanyo bal i kome, Rwot daŋ bino weko ballere. “Aco ka ce en okelo atin romo me mottere me yalo Obaŋa pi mot me bal, en bino kelo akale romo a roccoro mom i kome. En bino keto ciŋe i wi mot me bal, te neko kan ame oneko iye mot awaŋa. Alamdog bino gweto remo mogo kede nyako ciŋe i kom mot me ballono, te totono i tun aŋwen ame tye i keno lam me mot awaŋa, te onyo remo odoŋŋere luŋ i te keno lam. En bino wawaro dwollege luŋ kite ame owawaro kede dwol me atin romo ame omio me mot aŋola me kweyo cuny; alamdog te waŋo i keno lam, i kom mot awaŋa i mac baŋ Rwot; alamdog bino tiyo tic me kwanyo bal i kome pi bal ame en otimo, Rwot daŋ bino weko ballere. “Ka ce dano moro obalo i yore magi: ka ce en owinyo alama ame olamo i kom lwak ni jo myero mi caden, kun en daŋ caden ame oneno onyo oniaŋ koppere, eka mom te tuco, ballere bino dok i wie. Onyo ka dano moro ogudo gina me cik ogeŋo, kadi mom lee tim oto, onyo kom lee me paco ame cik ogeŋo, onyo kom ginnoro ame nya corre i lobo ame cik ogeŋo, kun mom oŋeo, ame en te doko ŋat a cik ogeŋo, en nwoŋo oroco. Onyo ka ogudo ginnoro ame cik ogeŋo i kom dano, kadi bed kodi ŋo-nono ame nwoŋo cik ogeŋo ame mio dano doko ŋat a cik ogeŋo, kun en gire mom oŋeo, ka doŋ oniaŋ iye, en nwoŋo oroco. Onyo ka ŋattoro oruye kwoŋo kwoŋŋoro kun mom koŋ otamo tere, pi timo gin arac onyo aber, kite kwoŋŋere-nono, ka en doŋ oniaŋ iye, en nwoŋo oroco, ka ce en otimo moro acel i akina magi. Ka ŋattoro otimo bal i akina magi, myero en tuc bal ame etimo-nono oko, en te kelo mottere me walakino i roc baŋ Rwot pi ballere ame etimo. Bino kelo akale romo onyo akale dyel, me bed mottere me bal; alamdog bino tiyo tic me kwanyo bal a dano-nono i keme. “Ento ka en acan a mom twero nwoŋo romo, en bino kelo baŋ Rwot amam aryo onyo itino awele aryo me mottere me walakino i roc pi ballere ame en otimo; acel bino bedo mot me bal, eka en ocele te bedo mot me awaŋa. En bino kelogi luŋ baŋ alamdog, alamdog bino geyo yalo Rwot i mot me bal. En bino mojoro ŋute oko, cite mom bino ŋuno wie; en bino totono remo mogo me mot me balloro i ŋet keno lam; remo odoŋŋere luŋ en bino dwidwinyo oko kun mio cwer i te keno lam; mano en mot me bal. Icennere alamdog bino yalo Rwot i me aryo mere me mot awaŋa kun waŋo kite ame ociko; alamdog bino tiyo tic me kwanyo bal a dano-nono, pi ballere ame en otimo, Rwot daŋ bino weko ballere. “Ento ka en acan a mom twero nwoŋo amam aryo onyo itino awele aryo, en bino kelo moko kwon apwottere gwata acel me yalo Rwot pi ballere ame etimo, me bed mot me bal; en mom bino onyo moo moro iye, kur daŋ ket iye odok luban, pien mano en mot me bal. En bino kelo baŋ alamdog; eka alamdog te juko poŋ ciŋe acel te waŋo me po i kome i keno lam i kom mot awaŋa i mac baŋ Rwot; mano en mot me bal. Alamdog bino tiyo tic me kwanyo bal a danonono i kome kittono pi balloro ame en otimo i akina magi, Rwot daŋ bino weko ballere. Moko odoŋŋere bino bedo me olamdog, kite ame timere kede i mot me moko kwon.” Rwot okobbi Muca ni, “Ka ce dano moro obwolo Rwot, mom omio ginnoro acil ame myero mi baŋe, kun mom obalo me akaka, en bino kelo baŋ Rwot nyok a roccoro mom i kome ame okwanyo i akina rommi me bed mottere me walakino i roc, ame wellere yin iŋolo i cekel me ryal kun ilubo kit cekel ame otio kede i kabedo acil; mano en mot me walakino i roc. En myero daŋ cul waŋ gin ame en obalo i kom jami acil, kun medo iye acel me abic, eka te miyo baŋ alamdog. Alamdog bino tiyo tic me kwanyo bal i kome i nyok romo me walakino i roc, Rwot daŋ bino weko ballere. “Ka dano moro obalo kun otio ginnoro acel ame Rwot rik ociko ni kur tim, kadi bed mom oŋeo, nwoŋo en oroco, ballere bino dok gire i wie. En bino kelo nyok a roccoro mom i kome baŋ alamdog, nyok ame en okwanyo i akina rommi, ame wellere yin iŋolo, i wel a mot me walakino i roc. Alamdog bino tiyo tic me kwanyo bal i kome, pi bal ame en opoto iye, kun mom otimo me akaka, Rwot daŋ bino weko ballere. Mano en mot me walakino i roc; en nwoŋo oroco i nyim Rwot.” Rwot okobo baŋ Muca ni, “Ka ce dano moro otimo bal me abwole i nyim Rwot, kun obwolo awottere i ginnoro a rikokano baŋe, onyo ojeŋo baŋe, onyo ka omao jami mere onyo oburo awottere, onyo onwoŋo ginnoro ame orwenyo eka te kobo goba iye, kun kwoŋo kwoŋ me goba i kom ginnoro keken ame jo tio, te timo bal iye; ka ŋattoro obalo eka te niaŋ ni eroco, en bino dwoko gin ame onwoŋo emao-nono, onyo gin ame onwoŋo ereboro kede ebure-nono, onyo gin ame onwoŋo okano baŋenono, onyo gin ame orwenyo en te nwoŋo-nono, onyo gin ame en okwoŋo iye kwoŋ me goba-nono; myero en dwok i berrere, dok daŋ bino medo iye acel me abic, eka te miyo baŋ wonnere i nino ame en mio iye mottere me walakino i roc. En bino kelo baŋ Rwot mottere me walakino i roc kun kelo baŋ alamdog nyok ame roccoro mom i kome ame okwanyo i akina rommi, ame yin iŋolo wellere i wel a mot me walakino i roc. Alamdog bino tiyo tic me kwanyo bal i kome i nyim Rwot, Rwot daŋ bino weko ballere i ginnoro ame dano twero tiyo eka te niaŋ ni eroco.” Rwot okobbi Muca ni, “Cik Aron kede awobe mere ni, Man cik a mako mot awaŋa me yalo Obaŋa. Mot awaŋa bino ri i keno lam dyewor benebene tuno naka odiko, kun mac lyel iye nakanaka. Alamdog bino ruko rukkere me boŋo camanini, te daŋ ruko pali mere me camanini i pyere, eka te jobo buru ame mac owaŋo i mot awaŋa i wi keno lam, te keto i ŋet keno lam. En te gonyo rukkere-nono oko, te ruko ruk ocele, te tero buru-nono naka i ŋe gony i kakannoro acil. Mac ame tye i wi keno lam myero mi lyel nakanaka, kur to oko. Alamdog bino waŋo iye yen nino luŋ odiko, dok daŋ bino cano iye mot awaŋa i yore i yore, te waŋo dwol me mot me kweyo cuny i wie. Mac ame tye i wi keno lam myero mi medde lyel nakanaka; kur to oko. “Man en cik a mako moko kwon me yalo Obaŋa. Awobe Aron en a bino miyo i nyim Rwot, i nyim keno lam. Ŋat acel i akinagi bino juko moko kwon apwottere kede moo poŋ ciŋe acel kun juko i kom mot me moko kwon, karacel kede odok lubannere luŋ ame tye i kom mot me moko kwon, te waŋo i wi keno lam, me obed me po i kome, gin a ŋwece kur a yomoro cunyn Rwot. En odoŋŋere luŋ Aron kede awobe mere bino camo; obino camo kun tobi mom iye i kakannoro acil; gin bino camo i dyekal me kema me rwatte. Myero kur ted kede tobi. Atyeko doŋ miyogi acalo dulgi i kom motta ame owaŋo kede mac; mano en gin acil meicel, rom aroma i mot me bal kede mot me walakino i roc, Ikwae Aron luŋ ame co twero camo, acalo cik ame bino ri atwal, i tuno i kare ikwaewu luŋ, i kom mot owaŋo i mac baŋ Rwot; ŋattoro keken ogudo bino doko acil.” Rwot okobo baŋ Muca ni, “Man en mot ame Aron kede awobe mere bino miyo baŋ Rwot i nino ame obino wire iye kede moo: gwata moko kwon acel me moko kwon apwottere, myero obed mot me moko kwon me yalo Obaŋa kare ducu, kun nucu mere omio odiko kede nucu mere otyeno. Obino tedo kede moo i tako nyonyo; ibino kelo kun nwoŋo doŋ orubo oko aber, ame daŋ doŋ oŋiŋido oko atitino bala mot me moko kwon, eka i te yalo Obaŋa, me bed gin a ŋwece kur me yomoro cuny Rwot. Alamdog ame obino kwero me leyo kaka Aron, ame nwoŋo oya i akina itino mere, bino yalo kede Rwot acalo cik ame bino ri atwal; obino waŋo luŋ i berrere. Mot me moko kwon ame alamdog yalo kede Obaŋa, myero waŋ luŋ i berrere; mom myero cam kadi acel.” Rwot okobbi Muca ni, “Kob baŋ Aron kede awobe mere ni, Man en cik a mako mot me bal me yalo Obaŋa. Kan ame oneko iye mot me awaŋa, en ame daŋ obino neko iye mot me bal i nyim Rwot; mano en gin acil meicel. Alamdog ame omio mot me bal, en ame bino camo; obino camo kakannoro acil i dyekal me kema me rwatte. Ginnoro keken ame bino gudo riŋo mere, bino doko acil; ka ce remo mere moro okir i kom ruk, myero lwok boŋo ameremo okir iye-nono i kakannoro acil. Gulu lobo ame otedo kede myero nekoko, aco ka otedo weer me mola, myero rud kome aruda ote lako kede pii. Co luŋ ame gin olamdog twero camo; mano en gin acil meicel. Ento myero kur cam mot me bal ka ce remo mere moro otero i kema me rwatte pi tiyo tic me kwanyo bal i kabedo acil; myero waŋ awaŋa i mac. “Man en cik a mako mot yalo Obaŋa pi walakino i roc. Mano en gin acil meicel; Kan ame oneko iye mot awaŋa, en ame daŋ obino neko iye mot me walakino i roc; ote cocoro remo mere romo kor keno me lam luŋ. Dwollege luŋ obino yalo Obaŋa, moo yibe, dwol luŋ ame owumo amonten, kede aŋalura aryo luŋ, kede dwol luŋ ame tye i pyere, kede okene ame tye i kom emany ame obino kwanyo oko karacel aŋaluru aryo. Alamdog te waŋogi luŋ i keno me lam me mot ame omio kede mac baŋ Rwot; mano en mot me walakino i roc, Co luŋ ame gin olamdog twero camo; gin bino camo kakannoro acil; mano en gin acil meicel. Mot me walakino i roc rom aroma i mot me bal, cikgi tye acel; alamdog ame otio kedgi tic me kwanyo bal, en ame bino tero. Dok daŋ alamdog ame omio mot awaŋa a ŋattoro, en a daŋ bino tero pyen me mot awaŋa ame en omio-nono. Mot me moko kwon luŋ ame otedo i keno kede en ocele mere luŋ ame otedo i cupuria onyo i tako nyonyo bino bedo me alamdog ame omio-nono. Mot me moko kwon luŋ, ame orubo kede moo, kede en a mom orubo bino bedo me awobe Aron luŋ: ŋat man bino tero ame rom aroma i me awottere. “Man en cik a mako mot yalo Obaŋa me kweyo cuny ame dano moro twero miyo baŋ Rwot. Ka ce en amiyo me pwoc, en myero mi capat karacel i mot me pwoc, capat a tobi mom iye ame orubo kede moo, capat arep a tobi mom iye ame oweo moo i komgi, kede dok capat me moko kwon apwottere a tobi mom iye ame orubo aber kede moo. Ka en yalo Obaŋa i mottere me kweyo cuny me miyo pwoc, en myero med iye mottere me capat a tobi mom iye. Doŋ i kodi ennono, en bino miyo capat acel i kom mot acel acel me mot me yalo Rwot; mano bino bedo me alamdog ame ococoro remo me mot me kweyo cuny. Riŋo me gin oŋolo me mottere me kweyo cuny pi miyo pwoc myero cam oko i nino ame omio iye-nono; myero kur wek moro iye doŋ naka tuno odiko. Ento ka gin oŋolo me yalo Obaŋa-nono obedo mot me cobo kwoŋ onyo mottoro me ber a yic, obino camo i nino ame en oŋolo iye gi-yalo Obaŋa-nono, eka en odoŋŋere ote camo orwo mere. Ento riŋo odoŋ i kom gin oŋolo-nono naka i nino me adekkere, myero doŋ waŋ awaŋa i mac, Aco ka ocamo riŋo odoŋ i kom gin oŋolo-nono i nino me adekkere, mom obino pwoyo ŋat omio, dok daŋ mom obino kwano ni en omio ginnoro. Bino bedo gin me kwer, ŋat ame ocamo ballere bino bedo i wie. “Riŋo ame ogudo ginnoro ame cik ogeŋo, myero kur cam; obino waŋo awaŋa kede mac. Jo ame cikkoro mom ogeŋo twero camo riŋo; ento ka ŋattoro ocamo riŋo me gin oŋolo me yalo Obaŋa me mot me kweyo cuny Rwot, kun ginnoro a cik ogeŋo tye i kome, dano-nono obino miyo waŋe rwenyo oko i akina jo me turgi. Dok ka ŋattoro ogudo ginnoro ame cik ogeŋo, kadi dano a tye i ginnoro i kome ame mio cik geŋe onyo lee moro ame cik ogeŋo, onyo kadi ginnoro me kwer ame cik ogeŋo, eka te camo riŋo me gin oŋolo me yalo Obaŋa me mot me kweyo cuny, dano-nono obino miyo waŋe rwenyo oko i akina jo me turgi.” Rwot okobbi Muca ni, “Kob baŋ jo Icrael ni, Myero kur icam wunu kit dwolo moro luŋ, kadi me twon, onyo me romo, onyo me dyel. Dwolo lee oto kene kede dwolo ame lee tim omwodo, otwero tic kede i yore moro keken, cite myero kur cam kadi acel. Pien ŋattoro keken ame bino camo dwolo lee me mot ame owaŋo i mac baŋ Rwot, obino miyo waŋe rwenyo oko i akina jo me turgi. Dok daŋ kur icam wunu remo ginnoro kakannoro keken ame ibedo wunu iye, kadi bed me winyo onyo me lee. Ŋattoro keken ame bino camo kit remo moro, danonono obino miyo waŋe rwenyo oko i akina jo me turgi.” Rwot okobbi Muca ni, “Kob baŋ jo Icrael ni, ŋat ame omio gin oŋolo me yalo Obaŋa me mottere me kweyo cuny, en bino kelo mottere baŋ Rwot. I kom gin oŋolo me yalo Obaŋa me mottere me kweyo cuny, en bino kelo gire kede ciŋe mot ame owaŋo i mac baŋ Rwot. En bino kelo dwollege kede ogok, me yok ogokkono me mot ayoka i nyim Rwot. Alamdog bino waŋo dwollono i wi keno lam, ento ogok bino bedo me Aron kede awobe mere. Amuru mere me tuŋ cem ibino miyo baŋ alamdog me bed mottere ame oya i gin oŋolo me yalo Obaŋa me mot me kweyo cuny; ŋat ame omio remo kede dwolo me mot me kweyo cuny i akina awobe Aron, bino tero amuru me tuŋ cem obed iner mere. Pien ogok ame oyoko kede amuru atyeko doŋ miyo oko me mot alamdog kun ya i kom mot a jo Icrael me kweyo cuny ame gin oŋolo me yalo Obaŋa. Mano doŋ enere ame tye pi Aron kede awobe mere, ame jo Icrael bino miyogi kare ducu. Man en iner ame tye pi Aron kede awobe mere ame oya i kom mot ame owaŋo i mac baŋ Rwot. Rikokwero me bedo megi i nino ame rikokelogi baŋ Rwot me gin oti tic me olamdog baŋ Rwot. Rwot rik onwoŋo ociko i nino ame rik owirogi i moo, ni jo Icrael myero migi man; man bino bedo enere ame gin bino camo nakanaka, tuno naka i kare ikwaegi luŋ.” Man en cik a mako mot awaŋa me yalo Obaŋa, mot moko kwon, mot me bal, mot me walakino i roc, mot me keto alamdog i dog tic, kede mot me kweyo cuny, ame rik Rwot onwoŋo ociko baŋ Muca i wi kidi me Cinai, i nino a rik ociko iye jo Icrael ni kel motgi baŋ Rwot, i tim me Cinai. Rwot okobbi Muca ni, “Ter Aron kede awobe mere, kede boŋŋi me arukagi, kede moo wir, kede twon me aŋola me mot me bal, kede nyogi romi aryo, kede dita ame tye iye ogati a tobi mom iye; eka i te coko jo luŋ karacel i doggola ke ma me rwatte.” Muca daŋ te timo kite ame Rwot ocike kede; ocoko lwak luŋ i doggola kema me rwatte. Muca te kobo baŋ lwak ni, “Man en gin ame Rwot ociko ni myero tim.” Muca te kelo Aron kede awobe mere, te lwoko komgi kede pii. Eka te rwako kanyi i kom Aron, te tweyo pyere kede itambara me tweyo pyer, te dok ruke kede jor, te daŋ keto epod i kome, otweo pyere kede lati me epod ame otoko kede diro, te tweyo, lido kede i kome. Te keto cao kor i kome, te daŋ keto Urim kede Tumim iyi cao kor. Odwalo itambara i wie, eka te dok tweyo akwaa jabu i kom itambara me wic i tuŋ nyime, me bed tok kwogo acil, kite a rik Rwot ociko kede Muca. Muca te kwanyo moo wir, te wiro i kema kede jami luŋ ame tye iye, te kwerogi. Okikiro moo mogo i kom keno lam tyen abiro, te wiro keno lam karacel kede jami me ticcere luŋ kede moo, karacel kede tako lwokere kede akwak tere, me kwerogi. Oonyo moo wir anok i wi Aron, te wire me kwere. Muca dok te kelo awobe Aron aryo, te rukogi kede kanyi, otweo pyergi kede itambara me tweyo pyer, orwako tok atitino i wigi, kite a rik Rwot ociko kede Muca. Icennere doŋ te kelo twon me yalo Obaŋa pi bal, eka Aron kede awobe mere te keto ciŋgi i wi twonnono me yalo Obaŋa pi bal. Muca te neko oko, te jolo remo, gweto kede nyako ciŋe te totono romo tuŋ keno lam aŋwen luŋ, te lonyo keno lam, eka te onyo remo i te keno lam me kwero pi kwanyo bal i kome. Muca dok te wawaro dwol luŋ i kom amonten, kede i kom okene ame tye i kom emany kede aŋaluru, kede dwol luŋ, te waŋogi luŋ i wi keno lam. Ento riŋo twonnono kede pyennere kede wee ame tye i yie, en owaŋo awaŋa kede mac teŋe i ŋe gony, kite a rik Rwot ociko kede Muca. Icennere a doŋ man otum, okelo nyok romo me yalo Obaŋa me mot awaŋa; Aron kede awobe mere te keto ciŋgi i wi nyok romo-nono. Muca te neko oko, te cocoro remo mere romo kor keno lam luŋ. Kare a doŋ otyeko ŋoŋolo riŋo romo-nono dul i dul, Muca te waŋo oko karacel kede wie, kede dwollege. Amontennere kede tyene ducu ote lwoko kede pii, Muca te waŋo nyok romo-nono luŋ i berrere i wi keno lam, me bed mot awaŋa me yalo Obaŋa, gin a ŋwece kur a yomoro cuny, en mot ame owaŋo i mac baŋ Rwot, kite a rik Rwot ociko kede Muca. Icennere doki Muca te kela nyok romo ocele, nyok romo me keto dano i dog tic; Aron kede awobe mere te keto ciŋgi i wi nyok romo-nono. Muca te neko oko, te gweto remo mere mogo cwicwinyo i yit Aron me tuŋ cem kede i twon ciŋe me tuŋ cam, kede daŋ i twon tyene me tuŋ cem. Eka ote kelo awobe Aron, Muca te gweto remo romo mogo, te cwicwinyo i yitgi me tuŋ cem kede twon ciŋgi me tuŋ cem, kede i twon tyengi me tuŋ cem Muca te cocoro remo mere romo kor keno i lam luŋ. Muca te kwanyo dwollege, moo yibe kede dwol luŋ i kom amonten, kede okene ame tye i kom emany, kede aŋaluru aryo luŋ, karacel kede dwolgi, kede amuru mere me tuŋ cem; te kwanyo capat acel a tobi mom iye iyi dita me ogati a tobi mom iye ame onwoŋo tye i nyim Rwot, kede capat acel me ogati oweo moo i kome, kede dok capat acel areppere; te ketogi i wi dwol kede i wi amuru me tuŋ cem. Muca te keto magi-nono i cuny ciŋ Aron kede i cuny ciŋ awobe mere, te yokogi me bedo mot ayoka i nyim Rwot. Icennere en te kwanyogi oko i ciŋgi, te waŋo i wi keno lam karacel i mot awaŋa, me bed mot me keto dano i dog tic, gin a ŋwece kur a yomoro cuny, ame en mot owaŋo i mac baŋ Rwot. Muca te kwanyo ogok, te yoko, me bed mot ayo ka i nyim Rwot; Mano en enere ame Muca camo, ame oya i kom nyok romo me ketogi i dog tic, kite a rik Rwot ociko kede Muca. Muca te kwanyo moo wir kede remo mogo i wi keno lam te kikiro i kom Aron kede i kom rukere, kede i kom awobe mere kede rukgi; Muca te kwero Aron kede rukere, kede awobe mere kede rukgi kittono, gin te doko acil. Muca te kobbi Aron kede awobe mere ni, “Ted wunu riŋo i doggola kema me rwatte, ite camo wunu kuno, karacel kede ogati ame tye iyi dita me mot ketowu i dog tic, kite a rik aciko kede kun akobo ni, ‘Aron kede awobe mere en a myero cam.’ Riŋo kede ogati ame odoŋ myero waŋ awaŋa kede mac. Kur iwot wunu oko i doggola kema me rwatte pi nino abiro, tuno ka kare me ketowu i dog tic ocobe re kakare, pien ketowu i dog tic bino tero nino kany wie aryo. Kite ame obedo tiyo kede tin, yam Rwot onwoŋo ociko ni myero tim me kwanyo bal i komwu. Wun ibino bedo wunu i doggola kema me rwatte dyeceŋ kede dyewor naka tyeko nino kany wie aryo, kun ilubo wunu gin ame Rwot ociko; me kur i to wunu, pien ocika kittono.” Aron kede awobe mere te tiyo ginnoro luŋ ame Rwot rik ociko kun kobo baŋ Muca. I nino me aboro mere Muca olwoŋo Aron kede awobe mere karacel kede odoŋe a jo Icrael, eka te kobo baŋ Aron ni, “Kel atin twon etobayit me yalo Obaŋa me mot me bal, kede nyok romo me mot awaŋa, gin luŋ roccoro myero bed mom i komgi, kelgi i nyim Rwot. Dok daŋ kob baŋ jo Icrael ni, ‘Kel wunu nyok dyel me yalo Obaŋa me mot me bal karacel kede atin twon etobayit kede atin romo me mot awaŋa, gin aryo luŋ myero mwaka me ditogi bed acel acel, kun roccoro daŋ mom i komgi. Kel wunu daŋ twon kede nyok romo me mot kweyo cuny, gin luŋ me aŋola i nyim Rwot, kede mot me moko kwon ame orubo kede moo; pien Rwot bino nen baŋwu tin.’ ” Gin daŋ te kelo gin a Muca ociko i nyim kema me rwatte; lwak luŋ te noko aceggi, te cuŋ i nyim Rwot. Muca te kobo ni, “Man en gin ame Rwot ociko ni myero tim, eka kwogo a Rwot te nen baŋwu.” Muca dok te kobbi Aron ni, “Nok keno lam aceggi, me iyal Obaŋa i mot me bal meri, kede motti me awaŋa, i te tiyo tic me kwanyo bal i komi kede i kom lwak. Yal daŋ Obaŋa i mot a lwak, ti tic me kwanyo bal i komgi kite a rik Rwot ociko kede.” Aron te noko keno lam aceggi, te neko atin twon me mot me bal ame onwoŋo tye pire en i kome. Awobe Aron te miyo remo baŋe, en te luto nyako ciŋe i remo, te totono i tuŋe ame tye i keno lam, eka te onyo remo i te keno lam, Cite dwollege kede aŋaluru aryo kede okene ame tye i kom emany ame onwoŋo okwanyo i mot oŋolo me bal, en owaŋo oko i wi keno lam, kite a rik Rwot ociko kede Muca. Riŋo mere kede pyennere en owaŋo awaŋa kede mac teŋe i ŋe gony. En dok te neko mot awaŋa me yalo Obaŋa, awobe mere te miyo remo baŋe, en te cocoro romo kor keno lam luŋ. Awobe mere te doŋ miyo mot awaŋa baŋe, kun omie dul i dul, karacel kede wie en te waŋogi i wi keno lam. Eka te lwoko amontennere kede tyene luŋ, te waŋogi karacel i mot awaŋa i wi keno lam. Kare ame man otum, en dok te miyo mot a lwak. Okelo dyel ame rik tye pi lwak me yalo Obaŋa pi bal, te neko yalo Obaŋa pi bal, bala mot bal me agege, Eka dok te yalo Obaŋa i mot awaŋa kun lubo cik. Dok te yalo Obaŋa i mot me moko kwon, ojuko poŋ ciŋe, te waŋo i wi keno lam kun medo i kom mot awaŋa me odiko. Dok te neko twon kede nyok romo daŋ, ame gin obedo mot aŋola me kweyo cuny ame rik tye pi lwak. Awobe mere te miyo remo baŋe, en te cocoro romo kor keno lam luŋ, Dok ote miye dwol me twon kede me romo, kede moo yibe, kede dwol ame owumo amonten kede aŋaluru aryo, kede okene ame tye i kom emany. Gin te keto dwollono i wi ogok twon kede me romo, eka ote waŋo dwollono i wi keno lam, Ento ogok kede amuru mere me tuŋ cem Aron oyoko me bedo mot ayoka i nyim Rwot, kite a Muca ociko. Aron dok te tino ciŋe malo tuŋ kun a lwak tye iye, te lammigi winyo; en doŋ te dwogo piny i ka yalo Obaŋa i mot me bal kede mot awaŋa kede mot luŋ me kweyo cuny. Muca kede Aron te doŋ donyo i kema me rwatte; kare ame gin odonyo oko, gin olamo winyo i kom lwak, eka kwogo a Rwot te nen baŋ jo luŋ. Mac te ya i nyim Rwot, te bino waŋo mot awaŋa kede dwol luŋ ame onwoŋo tye i wi keno lam, te tyeko oko luŋ. Kare ame lwak luŋ oneno, gin owo, ote oonyere piny i nyime. Nadab kede Abiku, awobe Aron ŋat acel acel okwanyo tabo mere me waŋo odok akur, te keto iye mac, te daŋ keto iye odok akur, eka ote waŋo i mac i nyim Rwot kun owaŋo i mac a rik mom ocikogi me tic kede. Mac te ya i nyim Rwot, te waŋogi oko, gin te to oko i nyim Rwot. Muca te kobbi Aron ni, “Man en gin ame Rwot okobo, ni, ‘Abino nyutte kena i akina jo ame ceggi keda ni acil, dok daŋ abino mito ni gin ket kwogo i koma i nyim lwak ducu.’ ” Aron te liŋ gire mol. Muca te lwoŋo Micael kede Elijapan, awobe a Ujiel ame obedo omin papa Aron, te kobo baŋgi ni, “Nyiggo wunu ceggi, tin omegowu oko i nyim kabedo acil, tergi wunu oko i ŋe gony.” Gin te nyiggo, ote tiŋogi kede kanyigi, terogi oko i ŋe gony, kite ame Muca okobo. Muca te kobbi Aron kede awobe mere Eleajar kede Itamar ni, “Kur igony yer wiwu iwek wunu ony iyak, kur daŋ iyec wunu rukwu, me kur ito wunu, dok me akemo a Rwot kur kat i kom lwak luŋ. Ento omegowu ame gin luŋ me ot Icrael twero kok pi mac ame Rwot owaŋogi kede. Kur ikat wunu oko i doggola kema me rwatte, me kur ito wunu; pien moo wir a Rwot tye i komwu.” Gin daŋ te tiyo kite ame Muca okobo. Rwot te kobbi Aron ni, “Yin, akadi awobeni ame tye kedi, myero kur imat wunu koŋo olok onyo kit mattoro ocele ame mero jo i kare ame iwot wunu i ke ma me rwatte, me kur ito wunu; mano bino bedo cik atwal naka i kare ikwaewu luŋ. Myero iŋe poko wunu jami acil kede jami ocele, kede kin jami ame cik ogeŋo kede jami a cik oye. Dok daŋ ibino pwonyo wunu jo Icrael cik luŋ ame Rwot ociko kun kobo baŋ Muca.” Muca te kobbi Aron kede awobe mere a rik odoŋ: Eleajar kede Itamar ni, “Kwany wunu moko kwon me yalo Obaŋa ame odoŋ i kom mot ame owaŋo i mac baŋ Rwot, icam wunu i ŋet keno lam kun mom orubo i tobi, pien mano en gin acil meicel. Cam wunu i kakannoro acil, pien mano en gin a myero yin icam kede gin a myero awobeni cam i kom mot ame owaŋo me yalo Rwot; pien rik ocika kittono. Ento ogokkere ame oyoko kede amuru atyeko doŋ miyo oko me mot olamdog ame oya i kom mot me kweyo cuny ame jo Icrael oyalo kede Obaŋa. Mano itwero wunu camo kakannoro acil, yin karacel kede awobeni kede anyirani, pien mano obedo iner ame myero yin icam kede iner ame awobeni myero cam. Amuru ame amio olamdog kede ogokkere ame oyoko me kweyo cuny myero kelgi karacel kede mot awaŋa i mac, ame obedo dwollege, me ayoka i nyim Rwot, eka te bedo megi karacel kede me awobeni; mano en iner ame myero migi kare ducu kite a Rwot rik ociko kede.” Muca te penyo pi dyel me yalo Obaŋa pi bal kun penyo momot, en te nwoŋo ni doŋ owaŋo oko! Akemo te mako Muca atek i kom Eleajar kede Itamar, awobe Aron ame rik onwoŋo odoŋ, te kobo ni, “Piŋo kara mom icamo wunu gin oŋolo oyalo Obaŋa pi bal i kabedo acil? Pien mano en gin acil meicel ame omiowu, me itiŋ wunu bal a lwak, me tiyo tic me kwanyo bal i komgi i nyim Rwot. Koŋ inen remo mere mom doŋ otero i kabedo acil. Rik onwoŋo myero icam wunu i kabedo acil, kite a rik ociko kede.” Aron te gamo dog Muca ni, “Nen ba, tin doŋ gin oyalo Obaŋa i motgi me bal kede motgi me awaŋa i nyim Rwot; kadi amano, gin acalo man opoto i koma. Kono ce onwoŋo tin acamomot me bal, kono Rwot opwoa.” Kare ame Muca owinyo, yie doŋ te kwe. Rwot okobbi Muca kede Aron ni, “Kobbi wunu jo Icrael ni, Magi en gin ame tye kede kwo ame ibino wunu camo i kom leyi luŋ ame tye i wi lobo. Leyi luŋ ame lwet tyengi okaro aryo, kun akina tyengi okaro aryo, dok daŋ omedo nyamo cem a koŋ omwonyo oko i yigi, ame tye i akina leyi, itwero camo wunu. Kadi amanno, i akina leyi ame medo nyamo cem a koŋ omwonyo oko i yigi, onyo ame lwet tyengi okaro aryo, myero kur icam wunu magi: Inaga, pien kadi bed medo nyamo cem a koŋ omwonyo, cite lwet tyene mom okaro aryo, mano cik mom oyewu camo. Anyeri daŋ, en daŋ medo nyamo cem a koŋ omwonyo, cite lwet tyene mom okaro aryo, mano daŋ cik mom oyewu camo. Apwoo daŋ, en daŋ kadi medo nyamo cem a koŋ omwonyo, cite lwet tyene mom okaro aryo, mano daŋ cik mom oyewu camo. Puno daŋ, kadi bed lyet tyene mom okaro aryo kun akina tyene okaro aryo, mom medo nyamo cem a koŋ omwonyo, mano daŋ cik mom oyewu camo. Kur icam wunu rinogi, kur daŋ igud wunu komgi ka ce oto, cik mom oyewu gudo. “I kom gin akwo luŋ a bedo i pii ibino wunu camo magi: Itwero wunu camo gin i pii luŋ ame tye kede icikigir kede pok komgi, en a tye i nam kede en a tye i kulo. Ento gin luŋ ame tye i nam kede i kulo ame mom tye kede icikigir kede pok komgi, i akina gin ame corre nya i pii, kede i akina gin akwo a bedo i pii, gin luŋ obedo me kwer baŋwu. Gin bino bedo me kwer baŋwu nakanaka; mom ibino wunu camo riŋogi, dok daŋ komgi oto obedo me kwer baŋwu. Ginnoro luŋ ame tye i pii ame mom tye kede icikigir kede pok komgi, obedo me kwer baŋwu. “I akina winy, gin ame bino bedo me kwer baŋwu ame mom ibino wunu camo, gin ene ame bino bedo me kwer: cur, acut, ekokom, ogole, ocecu kede eponegi luŋ, kite agak luŋ kede eponegi, udo, ojoro, jigijigijur olwit kede kite epone mere luŋ, tula, alwinyalwiny, adyeladyel. Okumbere, etolo, ewuma, araptela, ogoro kede kite epone mere luŋ, otebakori kede olikolik. “Kite kudi luŋ ame tye kede bwomgi ame woto i tyengi aŋwen, gin luŋ obedo me kwer baŋwu. Kadi bed amannono, i akina kudi ame woto kede tyengi aŋwen, itwero camo wunu en ame tyengi ame opye kede i wi lobo bocoboco. I akinagi itwero camo wunu: bonyo kede kite eponegi luŋ, ocenne kede kite eponegi luŋ, odir kede kite eponegi luŋ, kede otwoŋo kede kite eponegi luŋ, Ento kudi ocele luŋ ame tye kede bwomgi, dok tyengi daŋ tye aŋwen, gin luŋ bino bedo me kwer baŋwu. “Ginnono luŋ, bino miyo idoko wunu jo a cik ogeŋo; ŋattoro ame bino gudo komgi oto, bino doko ŋat a cik ogeŋo tuno otyeno, dok daŋ ŋat ame bino mako kakannoro i komgi, bino lwoko boŋo mere eka te bedo ŋat a cik ogeŋo naka otyeno. Leyi luŋ ame lwet tyengi okaro aryo, ento akina tyengi mom okaro aryo onyo mom omedo nyamo cem a kon omwonyo i yigi, gin luŋ obedo me kwer baŋwu, ŋat ogudo komgi bino bedo ŋat acik ogeŋo. Leyi luŋ daŋ ame woto i wi tyengi, ame tye i akina leyi luŋ ame woto i tyengi aŋwen, gin luŋ cik ogeŋowu oko iye. Ŋat ame bino gudo komgi a doŋ oto, bino bedo ŋat a cik ogeŋo naka otyeno. Dok daŋ ŋattoro keken ame bino tiŋo komgi a doŋ oto, bino lwoko boŋŋi mere te bedo ŋat a cik ogeŋo naka otyeno; gin luŋ obedo gin ame cik ogeŋowu iye oko. “I akina gin a corre nya i wi lobo, magi obedo gin ame cik ogeŋowu iye oko: oculi, oyoo, agwedegwede adoŋo mege kede kite eponegi luŋ, amwomwol, ŋec, agwedegwede, agwedegwede me kwoyo, kede agogo. Magi luŋ obedo gin ame cik ogeŋowu iye oko i akina gin a corre, nya luŋ; ŋattoro keken ame bino gudo komgi ka doŋ oto, bino bedo ŋat a cik ogeŋo naka otyeno. Dok ginnoro keken ame kom moro i akinagi a doŋ oto orette iye, bino bedo gin a cik ogeŋo, kadi bed obedo ginnoro ame otio i yat onyo boŋo aruka, onyo lao, onyo puku, kadi ginnoro keken ame otio kede i yore moro; myero lut i pii, eka te bedo gin a cik ogeŋo naka otyeno; icennere doŋ twero bedo gin a cik oye. Dok ka moro i akinagi orette i kom gin ame otio kede lobo, gin onwoŋo tye iyi ginnono luŋ bino bedo gin a cik ogeŋo, dok obino ne ko ginnono oko. Cammoro ame onwoŋo tye i yie ame romo acama, ame otwero onyo iye pii, bino bedo gin ame cik ogeŋo; kede ginnoro me amata ame onwoŋo tye i kodi jamini ame romo amata, bino bedo gin a cik ogeŋo. Dok ginnoro luŋ ame dulloro keken me kom ginnoro oto ogudo, bino bedo gin a cik ogeŋo; kadi keno onyo tuke keno, obino babaro oko atitino; gin doŋ bino bedo gin a cik ogeŋowu i komgi oko. Kadi bed amanno, waŋ akoŋ onyo bur ame pii poŋ iye bino bedo gin a cik mom ogeŋo; ento ginnoro keken ame bino gudo kodikommono a doŋ oto, bino bedo gin a cik ogeŋo. Ka komgi a doŋ oto orette i kom kotimoro me acoa ame onwoŋo myero co, koti-nono cik mom bino geŋo; ento ka kotinono onwoŋo tye i pii, eka kodikom oto-nono te rette gudo kakannoro i kom koti-nono, bino miyo koti-nono bedo gin a cik ogeŋowu iye oko. “Ka ce lee moro ame icamo wunu oto, ŋat ogudo kome oto-nono bino bedo a cik ogeŋo naka otyeno. Doŋ ŋat ame ocamo riŋo mere oto-nono bino lwoko boŋŋi mere, eka te bedo ŋat a cik ogeŋo naka otyeno. Ŋat a daŋ otiŋso kom oto-nono bino lwoko boŋŋi mere, eka te bedo ŋat a cik ogeŋo naka otyeno. “Ginnoro luŋ ame corre nya i wi lobo obedo gin me kwer baŋwu; mom ibino camo wunu, Ginnoro luŋ ame mol amola kede korgi kede ginnoro luŋ ame wo to i tyengi aŋwen onyo ame tye i tyengi apipim, ginnoro luŋ ame corre nya i wi lobo, mom ibino camo wunu; pien gin obedo gin me kwer baŋwu. Kur ilokere idok wunu gin me kwer kenwu pi gin a corre, nya; dok daŋ kur iballe wunu kenwu kedgi, naka mio idoko wunu gin a cik ogeŋo. Pien an a Rwot Obaŋawu, pi mannono kwerre wunu kenwu ibed wunu acil, pien an daŋ acil. Kur iballe wunu kenwu i ginnoro a corre, nya, ame lak alaka i wi lobo. Pien an a Rwot ame akwanyowu i lobo Miciri, me abed Obaŋawu; pi mannono myero ibed wunu jo acil, pien an daŋ acil.” Man en cik a mako leyi kede winnyi kede gin akwo luŋ ame kwaŋ i pii, kede ginnoro luŋ ame corre, nya i wi lobo, me poko gin a cik ogeŋo kede gin a cik oye, kede gin akwo ame myero cam kede a mom myero cam. Rwot okobbi Muca ni, “Kob baŋ jo Icrael ni, Ka ce dako oyac, te nywalo atin awobi, en bino bedo ŋat a cik ogeŋo pi nino abiro; en bino bedo ŋat a cik ogeŋo calo i kare me twoyo two dwe. I nino me aboro mere obino liro del kom atin me co. Icennere daŋ-nu dok medo bedo pi nino pyeradek wie adek ocele tuno ka doŋ olony i remo mere; en mom bino gudo kom ginnoro acil, daŋ mom bino tuno i ot Obaŋa ituno ka nino me lonyere mere otum. Ento ka ce en onywalo atin a nyako, en bino bedo ŋat a cik ogeŋo pi cabit aryo acalo i kare me two twoyo two dwe; en dok te medo bedo pi nino pyerabicel wie abicel ocele tuno ka doŋ olony i remo mere. “I kare ame nino me lonyere mere doŋ otum, kadi me atin awobi onyo nyako, daŋ-nu bino kelo atin romo a dittere romo mwaka acel kun kelo baŋ alamdog i doggola kema me rwatte me mot awaŋa me yalo Obaŋa, bino kelo daŋ atin awele onyo amam me mot me bal. Alamdog doŋ bino miyo i nyim Rwot, eka te tiyo ticcere me kwanyo bal i kome; dako doŋ te doko ŋat a cik mom ogeŋo pien doŋ olony i kom remo mere ame obedo cwer. Man en cik a mako dako ame onywalo awobi onyo nyako. Cite ka ce en acan a mom twero nwoŋo romo, en bino tero amam aryo onyo itino awele aryo, acel me mot awaŋa, eka en ocele te bedo me mot bal. Alamdog doŋ te tiyo ticcere me kwanyo bal i kome, en doŋ te doko ŋat a cik mom ogeŋo.” Rwot okobbi Muca kede Aron ni, “Ka dano moro del kome okwot, onyo oluro onyo ococola, eka te lokere doko two dobo i del kome, obino kelo dano-nono baŋ Aron, alamdog onyo baŋ dano moro acel i akina awobe mere ame gin daŋ olamdog. Alamdog bino ŋiyo two i del kome-nono; ka yer kome i kan ame ococola-nono olokere odoko atar calo lwar kun kan ame two tye iye-nono nen ame ogolle atut kato kome oko, mano nwoŋo two dobo. Kare ame alamdog doŋ otyeko ŋiyo kome, en bino tuco kannaler ni dano-nono doŋ ŋat a cik ogeŋo. Ento ka kan ococolanono tar ame kato del kome kun daŋ nen ni mom ogolle atut akato kome, dok daŋ yer ame tye kannono mom olokere atar, alamdog bino cego danonono ot pi nino abiro. I nino me abiro mere myero alamdog dok med ŋiyo kome, cite ka en oŋio te neno baŋe ni two-nono mom dok omedde nya i del kome kan ocele, alamdog myero dok medde cego dano-nono i ot pi nino ocele abiro. I nino me abiro mere alamdog myero dok med ŋiyo kome, cite ka en onwoŋo ni two ame ococola i kome-nono doŋ arwenyo arwenya, dok daŋ mom omedde nya i del kome kan ocele, alamdog bino tuco kannaler ni dano-nono gire mom cik ogeŋo; kome gire oluro alura keken. Atwo bino lwoko boŋŋi mere eka te doŋ bedo ŋat a cik mom ogeŋo. Ento ka ce kome odugo-nono onya i del kome kan ocele i ŋe nyutte mere baŋ alamdog pi neno ka ce two mere-nono mom mio cik gene, en dok bin i nyim alamdog. Alamdog dok bino ŋiyo kome; ka ce onwoŋo ni kome odugonono doŋ onya i del kome kan ocele, alamdog bino tuco kannaler ni danonono doŋ ŋat a cik ogeŋo; mano two dobo. “Ka dano moro two dobo omako, myero kel dano-nono baŋ alamdog. Alamdog bino ŋiyo kome; ka alamdog onwoŋo ni tye kan okwot atar i del kome kun oloko yer i kannono odoko atar dok kannono mito lokere doko bur, mano nwoŋo dobo a mom caŋ en a tye i kome-nono. Alamdog myero tuc kannaler ni dano-nono doŋ ŋat a cik ogeŋo; mom bino cego dano-nono i ot pein en dano a cik ogeŋo oko. Aco ka two i kome-nono onwoŋo doŋ ocorre i del kome luŋ, cakere i wie tuno anaka i tyene piny, ame alamdog twero neno, alamdog bino ŋiyo kome. Ka en onwoŋo ni two-nono doŋ oromo kome luŋ, alamdog bino tuco kannaler ni two-nono gire mom mio cik geŋe; pien doŋ olokere odoko atar luŋ aluŋa, en doŋ bedo ŋat a cik mom ogeŋo. Cite ka burroro dok onen i kome, en doŋ bino bedo ŋat a cik ogeŋo. Alamdog bino ŋiyo bur anyennono te tuco kannaler ni en doŋ ŋat a cik ogeŋo; burrono nwoŋo cik ogeŋo, pien mano nwoŋo two dobo. Cite ka burrono dok olokere odoko atar, en myero dok bin baŋ alamdog; alamdog dok bino ŋiyo kome. Ka ce onwoŋo two nono olokere odoko atar, alamdog bino tuco kannaler ni two mere-nono mom gire mio cik geŋe, en doŋ bedo ŋat a cik mom ogeŋo. “Dok ka odeke onwoŋo okwot i kom ŋattoro eka te caŋ oko, icennere doki kaka odeke-nono te kwot atar onyo ococola atar me iremarema, myero onyut baŋ alamdog. Alamdog bino ŋiyo, ento ka onen ni ogolle atut akato del kome, dok daŋ yer i kannono olokere atar, alamdog doŋ bino tuco kannaler ni en doŋ ŋat a cik ogeŋo, mano nwoŋo two dobo ame ocorre kaka odeke. Ento ka ce alamdog oŋio te nwoŋo yer i kannono mom gire tar, dok daŋ kakare mom ogolle atut akato del kome, cite tye arwenyo arwenya, alamdog bino cego dano-nu i ot pi nino abiro. Ka ce omedde nya i del kome, alamdog bino tuco kannaler ni en doŋ dano a cik ogeŋo, pien nwoŋo two. Cite ka kan ococolanono omedde bedo i kabedo acel keken kun mom nya, mano gire nwoŋo waŋ poo me odeke; alamdog bino tuco kannaler ni dano-nono gire mom ŋat a cik ogeŋo. “Onyo ka dano moro mac owaŋo te bwato kome oko, eka waŋ bur me maccono te dok cocola atar me iremarema onyo atar, alamdog bino ŋiyo two-nono. Ka onwoŋo yer ame tye kan ococola-nono olokere odoko atar, kun kakare nen ame ogolle akato del kome oko, mano nwoŋo two dobo. Dobo nwoŋo ocorre kan a mac owaŋo, mano bino miyo alamdog tuco kannaler ni en ŋat a cik ogeŋo; mano nwoŋo two dobo. Cite ka alamdog oŋio, te nwoŋo yer i kan ococola-nono mom olokere atar, dok daŋ mom ogolle atut akato del kome, ento tye arwenyo arwenya, alamdog bino cege i ot pi nino abiro. I nino me abiro mere alamdog dok bino ŋiyo kome; ka ce en onwoŋo tye amedde nya i del kome kan ocele, alamdog bino tuco kannaler ni en dano a cik ogeŋo; mano nwoŋo two dobo. Ento ka kan ococola-nono omedde bedo i kabedo acel kun mom nya i del kome, cite tye arwenyo arwenya, mano nwoŋo okwot gire akwota kan a mac owaŋo. Alamdog bino tuco kannaler ni en gire ŋat a cik mom ogeŋo; pien mano nwoŋo waŋ poo me kan a mac owaŋo. “Ka lo moro onyo dako moro tye kede two i wie onyo i yer tike, alamdog bino ŋiyo two-nono. Ka ce en onwoŋo ni ogolle atut akato del kome kun yer a tye kannono olokere odoko acalo ocokocok dok daŋ ojwerojwer, alamdog bino tuco kannaler ni en ŋat a cik ogeŋo. Mano nwoŋo two akukuc, ame en dobo me wic onyo yer tik. Ka alamdog oŋio two me akukuccono, te nwoŋo ni mom gire ogolle atut akato del kome kun yerroro acol mom iye, alamdog bino cego won two akukuccono i ot pi nino abiro. I nino me abiro mere alamdog bino dok ŋiyo two-nono; ka ce onwoŋo ni akukuccono mom omedde nya, dok daŋ mom tye iye yer ame calo ocokocok, dok akukuccono daŋ mom ogelle atut akato del kome, dano-nono myero lyel wie oko kun mom lyelo kan obedo akukuc. Alamdog myero dok med cego won two akukuccono i ot pi nino ocele abiro. I nino me abiro mere alamdog bino ŋiyo two mere; ka ce onwoŋo ni akukuc mom omedde nya i del kome dok daŋ mom ogolle atut akato del kome, alamdog bino tuco kannaler ni en gire mom ŋat a cik ogeŋo. En bino lwoko boŋŋi mere, te bedo ŋat a cik mom ogeŋo. Cite ka akukuc omedde nya i del kome kun en doŋ odoko ŋat a cik mom ogeŋo, alamdog bino dok ŋiyo kome. Ka onwoŋo akukuc omedde nya i del kome, alamdog mom dok bino yenyo yer acalo ocokocok; en doŋ dano a cik ogeŋo. Ento ka onwoŋo ni akukuc mom omedde nya, dok daŋ yer acol tye alot iye, kun akukuc doŋ ocaŋ oko, dano-nono nwoŋo doŋ ŋat a cik mom ogeŋo; alamdog bino doŋ tuco kannaler ni en gire ŋat a cik mom ogeŋo. “Ka ce del kom ico onyo dako ococola atatar, alamdog bino ŋiyo kom dano-nono. Ka en onwoŋo ni del kome ococola-nono mom tar wok, mano nwoŋo del kome gire odugo aduga; en mom ŋat a cik ogeŋo. “Ka ce yer wi lo moro olwer oko, en odoko lon a wie otal, ento en gire mom bedo ŋat a cik ogeŋo. Dok ka yer wi lo moro olwer oko i tuŋ nyime, en obedo lon a wie otal i tur nyime, cite en gire mom ŋat a cik ogeŋo. Cite ka tye two moro ame ococola atatar me iremarema i wie otallono onyo i tur nyime otallono, mano nwoŋo two dobo en ocorre i wie otallono. Alamdog bino ŋiyo kom dano-nono, cite ka onwoŋo ni two okwokwota i wie onyo i tur nyime otallono obedo atatar me i remarema, kun calo dobo a tye iyedel kom, dano-nono nwoŋo won dobo, en ŋat a cik ogeŋo. Alamdog bino tuco kannaler ni en obedo ŋat a cik ogeŋo. Two mere tye i wie. “Won dobo myero ruk boŋŋi oketoket, gony daŋ yer wie oko, dok myero daŋ wum del doge i malo mere oko te redo ni, ‘An cik ogeŋa oko; an cik ogeŋa oko.’ En bino bedo ŋat cik ogeŋo pi kare luŋ ame two pwod tye i kome; en obedo ŋat a cik ogeŋo. En bino bedo i ode kene teŋe i ŋe gony. “Ka ce two dobo onen i boŋo moro ame oruko, kadi bed boŋo yer romo onyo boŋo camanini, i kom uci oryeye atira tira onyo i kom uci oryeye aria ria me boŋo camanini onyo me yer romo, onyo i kom lao, onyo i kom ginnoro ame otio i lao, ka two-nono nen calo tworo tworo onyo i remarema i kom rukkoro onyo i kom uci oryeye atira tira onyo aria ria, onyo i kom lao, onyo i kom ginnoro ame otio i lao, mano nwoŋo two dobo, myero nyut baŋ alamdog. Alamdog bino ŋiyo two-nono eka te cego gin a two tye iye-nono i ot pi nino abiro. I nino me abiro mere en bino dok ŋiyo two-nono. Ka onwoŋo two omedde nya i rukkono i kom uci atira onyo i kom uci ariye aria, onyo lao me tiyo ticcoro keken, two-nono nwoŋo obedo dobo ame ŋoŋolo jami, ginnono obedo gin a cik ogeŋo. Alamdog bino waŋo rukkono oko, kadi bed two tye i kom uci atira mere onyo i kom uci oriye aria i boŋo yer romo onyo i boŋo camanini, onyo i kom ginnoro ame otio i lao; pien mano two dobo ame ŋoŋolo jami; obino waŋo i mac. “Ka alamdog oŋio te nwoŋo two mom omedde nya i rukkono, i kom uci atira onyo i kom uci oriye aria, boŋo yer romo onyo i boŋo camanini onyo i kom ginnoro ame otio i lao, alamdog myero mi lwok gin a two tye iye-nono, en dok te cego i ot pi nino ocele abiro. Alamdog bino dok ŋiyo gin a two tye iye-nono i ŋe lwoko. Ka en onwoŋo raŋi mere mom olokere i kan ame two tye iye-nono, kadi bed two-nono mom omedde nya, ginnono obedo gin a cik ogeŋo; obino waŋo i mac, kadi two onwoŋo oŋolo yoŋee onyo yie. “Cite ka alamdog oŋio te nwoŋo ni two mom gire nen iye atek kun doŋ olwoko oko, en myero yee kakannono keken i kom rukkono onyo i kom lao, i kom uci atira onyo i kom uci oriye aria. Ka dok two-nono omedo nen i kom rukkono icennere onyo i kom uci atira onyo i kom uci oriye aria onyo i kom ginnoro ame otio i lao, kun medde nya; obino waŋo gin a two tye iye-nono i mac. Ruk a two oya iye oko i kare a doŋ olwoko, kadi i uci atira onyo i uci oriye aria, onyo i ginnoro ame otio i lao, myero dok lwok tyen me aryo, eka te bedo doŋ gin a cik mom ogeŋo.” Man cik a mako two dobo ame tye i kom ruk me boŋo yer romo onyo boŋo camanini, i uci atira mere onyo i uci aria mere, onyo i kom ginnoro ame otio i lao, pi moko ka cik ogeŋo onyo cik mom ogeŋo. Rwot okobo baŋ Muca ni, “Man bino bedo cik a mako won two dobo i nino ame myero en lonyere iye. Obino kele baŋ alamdog; eka alamdog te ya wot oko i ŋe gony, te ŋiyo kome. Ka onwoŋo ni two dobo doŋ ocaŋ oko i kome, alamdog bino miyogi okelo winyo a kwo aryo a cik mom ogeŋo pi ŋat ame omito lonyo karacel kede yat cedar kede uci arema kede yat ogudo. Alamdog bino miyogi otwomo pii amol ote onyo i tako lobo, ote neko winyo acel i wi pii-nono. Alamdog bino mako winyo akwo karacel kede yat, cedar kede uci arema ca kede ogudo, te lutogi luŋ karacel i winyo akwo iyi remo winyo ame oneko malo i wi pii amol. En bino kiro tyen abiro i kom dano ame obino me lonyere i two dobo; alamdog doŋ te tuco kannaler ni en doŋ olony oko, eka en te weko winyo akwo ca twarre wot i tim. Ŋat ame obino me lonyerenono bino doŋ lwoko boŋŋi mere te daŋ lyelo yer luŋ i kome, te lwokere kede pii, en doŋ doko dano olony ame cik mom ogeŋo. I ŋe mano en doŋ twero bino i gony, cite pwod bino buto oko i ŋe kema mere pi nino abiro. I nino me abiro mere, en bino lyelo yer wie ducu kede tike kede yer i del waŋe karacel kede yer i kome luŋ. En dok bino lwoko boŋŋi mere kede kome daŋ i pii, en doŋ te lony. “I nino me aboro, en bino tero itino nyogi rommi aryo ame roccoro mom i komgi kede akale romo ame dittere romo mwaka acel, a daŋ roccoro mom i kome kede mot yalo Obaŋa me moko kwon ame romo gwata adek me moko apwottere orubo kede moo, kede dok moo ame romo cupa acel. Alamdog ame alonyo dano-nono, en ame bino tero dano-nono karacel kede jami mere, te ketogi i nyim Rwot i doggola kema me rwatte. Alamdog bino kwanyo nyok romo acel te yalo Obaŋa me wal akino i roc, karacel i moo cupa acel, bino yokogi me mot ayoka i nyim Rwot. En bino neko atin romo-nono kan ame oneko iye mot me bal kede mot awaŋa, i kan acil; pien mot me walakino i roc rom aroma i mot bal, gin luŋ bedo me alamdog; mano en dul acil meicel. Alamdog bino gweto remo me mot oŋolo me walakino i me te cwicwinyo i yit dano ame alonyo-nono tuŋ cem kede i twon ciŋe tuŋ cem kede i twon tyene tun cem. Alamdog te kwanyo moo ame romo cupa acel ca, te tono aduno i cuny ciŋe tun cem, te luto nyako ciŋe tuŋ cem i moo ame tye i cuny ciŋe tuŋ cam, eka te kikiro moo i nyako ciŋe-nono tyen abiro i nyim Rwot. Moo odoŋ i ciŋe, en bino cwicwinyo i alago yit dano ame olonyo tuŋ cem, kede i twon ciŋe tun cem, kede i twon tyene tuŋ cem, i kom remo mot oŋolo me walakino i roc. Moo ame odoŋ i ciŋ alamdog, en bino weweo i wi ŋat ame alonyo. Alamdog bino tiyo tic me kwanyo bal i kome i nyim Rwot. Alamdog bino yalo Obaŋa i mot me bal, me kwanyo bal i kom dano ame alonyo me mom dok bed ŋat a cik ogeŋo. I ŋe mannono, en doŋ bino neko mot awaŋa, eka alamdog te yalo Obaŋa i mot awaŋa karacel kede mot me moko kwon i wi keno lam. Alamdog bino tiyo tic me kwanyo bal i kome kittono, en doŋ te lony bedo ŋat a cik mom ogeŋo. “Cite ka en acan ame mom romo nwoŋo mannono luŋ, en bino kelo atin nyok romo acel me mottere me walakino i roc, me ayoka me kwanyo bal i kome, kede moko kwon apwottere gwata acel ame orubo kede moo me mot moko kwon, kede moo cupa acel. Dok daŋ bino kelo amam aryo onyo itino awele aryo, kite ame en romo nwoŋo kede; acel bino bedo me mot bal, acel me mot awaŋa. I nino me aboro en bino kelo baŋ alamdog pi lonyere mere i doggola kema me rwatte i nyim Rwot. Alamdog bino tero atin romo me mot walakino i roc karacel kede moo ame romo cupa acel, bino yokogi me ayoka i nyim Rwot. En doŋ te neko atin romo me mot walakino i roc; bino gweto remo mot oŋolo me walakino i roc, te cwicwinyo i alago yit dano ame alonyonono tuŋ cem kede twon ciŋe tuŋ cem, kede i twon tyene tuŋ cem. Alamdog te tono moo aduno i cuny ciŋe tuŋ cem, te kikiro moo i cuny ciŋe-nono i nyako ciŋe me tuŋ cem tyen abiro i nyim Rwot. Alamdog bino cwicwinyo moo mogo i cuny ciŋe-nono i alago yit dano ame alonyo-nono tuŋ cem kede i twon ciŋe tuŋ cem kede i twon tyene tuŋ cem, kan ame ocwicwinyo iye remo mot walakino i roc. Moo ame odoŋŋere luŋ i ciŋ alamdog, en bino weweo i wi dano ame alonyo me kwanyo bal i kome i nyim Rwot. En bino miyo moro acel i kom amam onyo itino awele kite ame en romo nwoŋo, me mot bal, acel me mot awaŋa, karacel kede mot me moko kwon; alamdog bino tiyo tic me kwanyo bal i kom dano ame alonyo-nono i nyim Rwot. Man en cik a mako lon ame two dobo ame mom romo nwoŋo mot me lonyere mere.” Rwot okobo baŋ Muca kede Aron ni, “Ka doŋ ituno wunu i lobo me Kanaan, ame amiowu me bedo megwu, ka ce abino keto two dobo i ottoro i lobo ame ibino wunu gamo-naca, won ot bino wot tito baŋ alamdog kun kobo ni, ‘Two moro nen calo tye i oda.’ Alamdog bino miyo ocoko jami i ottono okelo oko, me ot doŋ yie nono ame en alamdog pwod mom ru odonyo iye me ŋiyo two, me kur tuc kannaler ni jami luŋ i ottono cik ogeŋo oko; icennere alamdog doŋ bino donyo ka ŋiyo ot. En bino ŋiyo two; ka onwoŋo two-nono tye i kor apama a kun obedo tworo tworo, onyo tye arema rema, ka ce onen ni odonyo atut i kor apama, alamdog bino donyo i ottono woto i doggola, te cego dog ottono oko pi nino abiro. I nino me abiro mere alamdog dok bino dwogo neno. Ka onwoŋo two onya omedde i kor apama, alamdog bino miyo omuko matafali gweŋe ame two tye iye-nono oko, ote bolo i ŋe boma kan a mom cil. Dok daŋ bino miyo ocwero kor apama iyi ot luŋ, eka lobo ame ocwero i kor apama ote wot onyo oko i ŋe boma kan a mom cil. Eka ote doŋ kelo matafali me gweŋe ocele, ote keto kan ame okwanyo iye maca, ote daŋ dok kelo lobo ocele puyo kede kor apama-nono luŋ. “Ka two dok obelle i ottono kun onwoŋo doŋ omuko gweŋe ca oko, dok daŋ ocwero kor apama, ote puyo daŋ oko, alamdog dok bino dok wot neno. Ka onwoŋo two onya omedde i ottono, mano nwoŋo two dobo ame ŋoŋolo jami ame tye i ot; ottono doŋ ot ame cik ogeŋo. En bino mumuko ot tu reto oko piny; gweŋe mere, yennere kede lobo ame opuo kede luŋ, obino tero oko i ŋe boma kan a mom cil. Dano ame bino donyo i ot-tu kare ame ocego oko, bino bedo ŋat a cik ogeŋo naka otyeno. Dano ame obuto piny i ot-tu, bino lwoko boŋŋi mere; ŋat ame ocemo i ot-tu, daŋ bino lwoko boŋŋi mere. “Cite ka alamdog obino te ŋiyo ot-tu, eka mom te nwoŋo two onya omedde geye i kare ame opuo kede, alamdog bino tuco kannaler ni ot-tu gire mom cik ogeŋo, pien two iye ocaŋ oko. Doŋ me lonyo ot tu, en bino kelo itino winy aryo karacel kede yat cedar, kede uci arema kede yat acalo ogudo. Alamdog bino miyo otwomo pii amol i tako lobo, ote neko winyo acel malo i wi pii-nono. Alamdog bino mako yat cedar kede ogudo kede uci arema karacel kede winyo akwo, te lutogi luŋ i remo winyo ame oneko malo i wi pii amol, te kikiro i kor apama tyen kany wie aryo. En bino lonyo ot i remo winyo, karacel kede pii amol, kede winyo akwo kede yat cedar, kede yat acalo ogudo kede uci arema kittono, En te weko winyo akwo ca twarre wot i tim i ŋe boma. En bino tiyo tic me kwanyo bal i kom ot kittono, ot te doŋ bedo ame olony.” Man en cik a mako kit two dobo luŋ; two akukuc, two dobo me ruk onyo me ot, onyo me kan okwot, onyo odugo, onyo del kom ococola, me nyuto ka cik ogeŋo onyo mom ogeŋo Man en cik a mako two dobo. Rwot okobo baŋ Muca kede Aron ni, “Kobbi jo Icrael ni, Ka lo moro tut mollo i kome, tut ame mollo-nono mio ebedo ŋat a cik ogeŋo. Doŋ man en cik a mako ŋat a cik ogeŋo pi cwer a tut, kadi tutu mollo i kome onyo tut ame mollo i kome doŋ ogikoko; mano mio cik geŋe. Itanda moro keken ame ŋat a tut mollo i kome obuto iye, bino doko itanda ame cik ogeŋo, kede ginnoro luŋ a en obedo iye, bino doko gin a cik ogeŋo. Ŋat ame bino gudo itanda mere, bino lwoko boŋŋi mere, te lwoko kome daŋ kede pii, eka te bedo ŋat a cik ogeŋo tuno naka otyeno. Ŋat ame obedo i ginnoro ame ŋat a tut mollo i kome obedo iye, bino lwoko boŋŋi mere, te lwoko daŋ kome kede i pii, eka te bedo ŋat a cik ogeŋo tuno naka otyeno. Ŋat ame ogudo kom ŋat a kome mollo tut, bino lwoko boŋŋi mere, te lwoko daŋ kome eka te bedo ŋat a cik ogeŋo tuno naka otyeno. Ka ŋat ame tut mollo i kome oŋulo lao i kom dano moro ame cikkoro mom ogeŋo, danonono bino lwoko boŋŋi mere, te lwoko daŋ kome kede pii, eka te bedo ŋat a cik ogeŋo tuno naka otyeno. Kommoro ame obedo kede i wi inaga ame ŋat a kome mollo tut obedo iye, bino bedo gin a cik ogeŋo. Ŋat ame ogudo ginnoro ame en obedo iye, onyo obuto iye, bino bedo ŋat a cik ogeŋo tuno naka otyeno; kede ŋat ame otiŋo kodi ginnono, bino lwoko boŋŋi mere, te lwoko daŋ kome kede pii, eka te bedo ŋat a cik ogeŋo tuno naka otyeno. Ka dano a tut mollo i kome ogudo kom dano moro kun mom ologo ciŋe kede pii, dano ame ogudo bino lwoko boŋŋi mere, te lwoko daŋ kome kede pii, eka te bedo ŋat a cik ogeŋo tuno naka otyeno. Ka dano a kome mollo tut ogudo gulu lobo moro, obino neko gulu lobo-nono oko; ginnoro me amaka luŋ ame otio kede yat, obino lwoko komgi kede pii. “Ka dano moro ame tut mollo i kome doŋ olony oko, en bino kwano nino kany wie aryo me lonyere mere pire kene, te lwoko boŋŋi mere, te lwoko daŋ kome i pii ame mol, te doŋ bedo ŋat a cik mom ogeŋo. I nino me aboro mere en bino tero amam aryo onyo itno awele aryo, te bino i nyim Rwot i doggola kema me rwatte, te miyogi baŋ alamdog. Alamdog miogi kun mio acel me mot bal, acel me mot awaŋa, alamdog bino tiyo tic me kwanyo bal i kome kittono i nyim Rwot, pi tut ame onwoŋo obedo mollo i kome. “Ka remo a lo moro me co oony i kome, en bino lwoko kome luŋ kede pii, te bedo ŋat a cik ogeŋo tuno naka otyeno. Rukkoro onyo pyennoro ameremo me co omol iye, obino lwoko kede pii, te bedo gin a cik ogeŋo tuno naka otyeno. Ka ico obuto kede dako eka remo mere me co te ŋolle ony oko i komgi, gin aryo luŋ bino lwokere kede pii, gin te bedo jo a cik ogeŋo tuno naka otyeno. “Ka ce remo me kwer me two dwe ocwer i kom dako i kite me nino ducu, en bino bedo nino kany wie aryo pi kwerrere-nono, ŋat ame ogudo kome bino bedo ŋat a cik ogeŋo tuno naka otyeno. Ginnoro keken ame en obuto iye i kare ame en tye ikwer, bino bedo gin a cik ogeŋo, dok ginnoro luŋ ame en obedo iye, gin luŋ bino bedo jami a cik ogeŋo. Ŋat ogudo itanda mere myero lwok boŋŋi mere, te lwoko daŋ kome kede pii, eka te bedo ŋat a cik ogeŋo tuno naka otyeno. Ŋat ogudo kom gin ame en obedo iye, bino lwoko boŋŋi mere, te lwoko daŋ kome kede pii, eka te bedo ŋat a cik ogeŋo tuno naka otyeno. Kadi itanda onyo ginnoro ame en obedo iye, ŋat ogudo bino bedo ŋat a cik ogeŋo tuno naka otyeno. Ka lo moro obuto kede, eka remo two mere te gudo kome, en bino bedo ŋat a cik ogeŋo nino abiro, dok itanda moro keken ame en obuto iye, bino bedo gin a cik ogeŋo. “Ka ce remo obedo cwer i kom dako moro pi kare alac kun mom cwer i kare me two dwe keken, onyo ka ce remo mere me kwer cwer kare alac alaca, dannono bino medde bedo ŋat a cik ogeŋo i kare luŋ ameremo mere tye ka cwer i kome bala i kare ame two too dwe. Itanda moro keken ame en obuto iye i kare ameremo mere tye ka cwer, bino bedo baŋe acalo itanda me twoyo two kwerrere, dok ginnoro luŋ ame en obedo iye, bino bedo gin a cik ogeŋo kite ame cik geŋe kede i kare me two dwe. Ŋat ogudo jami magi bino bedo ŋat a cik ogeŋo; bino lwoko boŋŋi mere te lwoko daŋ kome kede pii, eka te bedo ŋat a cik ogeŋo tuno naka otyeno. Cite ka dako ameremo kwer cwer i kome doŋ olwoko two mere oko en bino kwano nino abiro me lonyere mere pire kene, icennere en bino bedo dako a cik mom ogeŋo. I nino me aboro mere en bino tero amam aryo onyo awele aryo, te kelo baŋ alamdog i doggola kema me rwatte. Alamdog bino miyo acel me mot me bal, acel me mot awaŋa; alamdog bino tiyo tic me kwanyo bal i kome kittono i nyim Rwot pi remo ame obedo cwer i kome te miyo en bedo ŋat a cik ogeŋo. “Ibino poko wunu jo Icrael ame cik ogeŋo kittono, me gin kur to kun cik pwod ogenogi pi balo kemana ame tye i akinagi.” Man en cik a mako ico ame tut mollo i kome kede ico ameremo mere me co oony i kome te miyo en doko ŋat a cik ogeŋo, kede dako ame two too me kwer. Man en cik a mako ŋattoro keken, ico onyo dako, ame tut mollo i kome onyo remo cwer i kome, kede ico ame obuto i dako ame cik ogeŋo. Rwot okobo baŋ Muca i kare ame awobe Aron aryo doŋ oto oko, pien i kare a rik gin onwoŋo onoko nyim Rwot aceggi, gin rik te to oko. Rwot te kobbi Muca ni, “Kobbi ominni Aron ni myero kur ebed donyo i kabedo acil i kare luŋ, kan ame boŋo icika owumo i nyim kom-me-kica ame tye i wi canduk me kur eto; pien abino nen i pol i wi kom-me-kica. Ento en bino donyo i kabedo acil i jami magi: atin twon me mot me bal kede nyok romo me mot awaŋa. En bino ruko kanyi acil me boŋo camanini, kun daŋ oruko pali me boŋo camanini i kome, te tweyo pyere kede itambara me boŋo camanini, dok daŋ otweo wie itambara adwala i wie. Magi-nono gin boŋŋi me aruka acil; en bino lwoko kome kede pii eka te rukogi. En bino daŋ gamo i baŋ lwak jo Icrael nyogi dyegi aryo me mot bal kede nyok romo acel me mot awaŋa. Aron bino yalo Obaŋa i twon me bed mot me ballere en ikome, kun tio tic me kwanyo bal i kome kede i kom jo me ode. En dok bino kelo dyegi aryo-ca, te keto i nyim Rwot i doggola kema me rwatte. En bino bolo kwir i kom dyegi aryo-nono, kwir acel me a Rwot kede ocele me Ajajal. Dyel ame kwir a Rwot opoto i kome, Aron bino kela te yalo Obaŋa me bed mot me bal. Cite dyel ame kwir Ajajel opoto i kome obino tero akwo i nyim Rwot me ti tic me kwanyo bal i kome, eka ote cwaye wot oko i tim baŋ Ajajel. “Aron bino yalo Obaŋa i twon me mot me ballere en ikome, kun tio tic me kwanyo bal i kome kede i kom jo me ode. En bino neko twon me bed mot me ballere en ikome. En bino kwanyo tabo me waŋo odok akur ame lodi mac tye iye poŋ kun kwanyo i wi keno lam ame tye i nyim Rwot, dok daŋ bino juko odok akur ame ocacanyo oluro atitino poŋ ciŋe aryo, eka te kelogi i tyelo kan ame boŋo icika owumo. En bino onyo odok akur i mac i nyim Rwot me yitto odok akurrono adwoŋŋere duny mwon kom kom-me-kica oko, ame bedo i wi canduk me kop me caden, me kur eto. En dok bino tero remo twonnono mogo, te totono i nyako ciŋe i kom kom-me-kica tuŋ nyime, te dok totono remo-nono i nyako ciŋe tyen kany wie aryo kun totono piny i nyim kom-mekica. “Kare ame man otum, en bino neko dyel ame rik tye pi lwak me yalo Obaŋa pi bal, te tero remo mere i tyelo kan ame boŋo icika owumo, eka te tic i remo-nono kite ame otimo kede i kom remo twon. En bino totono remo-nono i wi kom-me-kica kede i nyim kom-mekica, Aron bino tiyo tic me kwanyo bal i kom kabedo acil kittono, pi gigi mogo ame mio jo Icrael bedo jo a me mom olony ame cik ogeŋo, kede pi timgi mogo areco kede kit balgi ocele luŋ. Dok bino daŋ timo amannono i kema me rwatte ame bedo i akinagi kede i dyegi gin luŋ miogi obedo jo ame mom olony ame cik geno. I kare ame en donyo i kabedo acil pi tiyo tic me kwanyo bal, ŋattoro myero kur bed i kema me rwatte ituno ka en doŋ otyeko donyo oko kun doŋ otyeko tiyo tic me kwanyo ballere en ikome kede bal i kom jo me ode kede i kom jo Icrael luŋ ame ocokere. En te wot i nyim keno lam ame tye i nyim Rwot, te tiyo tic me kwanyo bal i kom keno lam. En bino kwanyo remo twon mogo, kede remo dyel te cwicwinyo i tuŋ aŋwen ame tye i keno lam, bino cwicwinyo romo komgi luŋ. En dok bino totono remo iye tyen kany wie aryo kun lonyo, kwero doko acil kun kwanyo gigi mogo luŋ ame mio jo Icrael bedo jo a mom olony ame cik ogeŋo. “Kare ame en doŋ otyeko tiyo tic me kwanyo bal i kom kabedo acil, kede i kom kema me rwatte, kede keno lam, en bino kelo dyel akwo; eka Aron te keto ciŋe ryoryo luŋ i wi dyel akwo, kun tuco bal luŋ ame jo Icrael otimo, kede timgi mogo areco kede kit bal luŋ ame gin otimo. En bino ketogi luŋ i wi dyellono, te cwayogi wot oko i tim, kun dano ame oyero en ame tero. Dyel bino tiŋo balgi i kome, woto kede i tim ata; dano otero-nono bino gonyo dyel woto gire i tim. “Aron dok bino donyo i kema me rwatte, te gonyo boŋŋi camanini ame onwoŋo en oruko i kare ame donyo i kabedo acil, te weko oko kuno. En bino lwoko kome kede pii i kakannoro acil te ruko boŋŋi mere i kome, eka te doŋ donyo oko yalo Obaŋa i mot awaŋa ame tye pire, kede mot awaŋa ame tye pi lwak, kun tio tic me kwanyo bal i keme kede i kom lwak. Dwol me mot awaŋa en bino waŋo i wi keno lam. Ŋat otero dyel te wot cwayo baŋ Ajajel bino lwoko boŋŋi mere, tec lwoko daŋ kome kede pii, i ŋe mano en doŋ twero bino i gony. Twon kede dyel me yalo Obaŋa pi bal ame onwoŋo otero remogi i kabedo acil me tiyo tic me kwanyo bal, obino tero i ŋe gony; pyengi kede riŋogi kede weegi obino waŋo i mac. Ŋat owaŋo bino lwoko boŋŋi mere, te lwoko daŋ kome kede pii, i ŋe mano en doŋ twero donyo i gony. “Man bino bedo cik baŋwu nakanaka ni, dwe me kany wie aryo nino dwe tomon, ibino bedo wunu kede kumo kun cunywu cwer. Kur igud wunu ticcoro, kadi anywali me lobo, kadi arokkoro ame bedo i akinawu. Pien i nino-nono en ame abino tiyo iye tic me kwanyo bal i komwu me ibed ame ilony wunu. Myero ibed ame ilonyere wunu i kom balwu luŋ i nyim Rwot. Nino-nono bino bedo cabit me weowu mot, ibino wunu bedo i kumo kun cunywu cwer. Man en cik ame bino bedo atwal. Alamdog ame obino wiro kede moo i kare me kete i dog ticcere me alamdog kun leo kaka pappere, en bino tiyo tic me kwanyo bal kun oruko boŋŋi acil me camanini. En bino tiyo ticcere me kwanyo bal i kom kabedo acil, dok te tiyo tic me kwanyo bal i kom kema me rwatte i kom keno lam. Eka dok te tiyo tic me kwanyo bal i kom olamdog kede i kom jo luŋ ocokere. Man bino bedo cik baŋwu ame perakino atwal ni myero ti tic me kwanyo bal i kom jo Icrael mwaka acel icel, pi balgi luŋ.” Muca daŋ te limo kite a Rwot ocike kede. Rwot okobo baŋ Muca ni, “Kobbi Aron kede awobe mere kede jo Icrael luŋ ni, Man en gin a Rwot ociko. Ka ce dano moro me ot Icrael oneko twon onyo atin romo onyo dyel i gony onyo oneko i ŋe gony oko, kun mom okelo i doggola kema me rwatte me mot baŋ Rwot i nyim kema a Rwot, remo me roc a dano-nono bino bedo gire i wie. Dano-nono waŋe bino rwenyo oko i akina jo me turgi pien oonyo remo, Man ociko me jo Icrael kel leyi aŋolagi ame obedo neko i dye bar, gin kelgi baŋ Rwot, baŋ alamdog i doggola kema me rwatte, me aneka me mot me kweyo cuny baŋ Rwot. Alamdog bino kikiro remo mere i keno lam a Rwot i doggola kema me rwatte, bino waŋo dwolo obed gin a ŋwece kur a yomoro cuny Rwot. Kite-nono gin mom dok obino miyo mot me yalo jogi me tim ame gin otimo, tim me coco baŋgi kun olubo yorgi. Man bino bedo cik baŋgi atwal tuno naka i kare i kwaegi luŋ. “Ibino kobbigi ni, Dano moro me doggola Icrael, onyo i akina orok ame bedo i akinagi, ame oyalo Obaŋa i mot awaŋa, onyo mottoro ame oŋolo, kun mom okelo i doggola kema me rwatte me aŋola baŋ Rwot, dano-nono abino miyo waŋe rwenyo oko i akina jo turgi. “Ka dano moro me doggola Icrael, onyo i akina orok ame bedo i akinagi, ocamo remo, abino ciko waŋa i kom dano ocamo remo-nono, dok daŋ obino miyo waŋe rwenyo oko i akina jo turgi. Pien kwo a riŋo tye i remo, an doŋ atyeko miyo oko pirwu i wi keno lam me kwanyo bal i kom tipowu; pien remo obedo gin ame kwanyo bal, pi kwo ame tye iye-nono. En omio akobo baŋ jo Icrael ni. Dano moro i akinawu myero kur cam remo, arokkoro ame bedo i akinawu daŋ myero kur cam remo. Dok dano moro i akina jo Icrael onyo i akina orok ame bedo i akinagi, ame omako lee onyo winyo moro ame ocamo, kare ame en owoto i dwar, bino onyo remo mere i lobo, te wumo oko kede kwoyo. “Pien kwo a gin Obaŋa oketo luŋ en remo mere; en omio aciko jo Icrael luŋ ni, Myero kur icam wunu remo me ginnoro luŋ ame Obaŋa oketo, pien kwogi en remogi; ŋat ame ocamo, abino miyo waŋe rwenyo oko. Dok dano moro keken ame ocamo gin ame oto kene, onyo lee ame ŋuu omwodo, kadi bed ŋat onywalo i lobowu-nono, onyo arokkoro ame bedo i akinawu, bino lwoko boŋŋi mere, te lwoko daŋ kome kede pii eka te bedo ŋat a cik ogeŋo tuno naka otyeno; te doŋ bedo ŋat olony. Ento ka mom olwoko, onyo mom olwoko daŋ kome kede pii, ballere bino bedo gire i wie.” Rwot okobbi Muca ni “Kobbi jo Icrael ni, An a Rwot Obaŋawu. Mom ibino timo wunu kite ame otimo kede i lobo me Miciri a rik ibedo wunu iye; dok daŋ mom ibino timo wunu kite ame otimo i lobo me Kanaan kan ame aterowu iye-ni. Mom ibino lubo wunu cikgi. Ibino wunu tiyo gin ame aciko kun igwoko wunu icwilla, dok daŋ ilubo wunu. An a Rwot Obaŋawu. Pi mannono ibino wunu gwoko icwilla kede gin ame aciko. Timo kittono bino miyo dano kwo; An a Rwot. “Dano moro i akinawu mom bino noko laŋet wattere me buto kede; an a Rwot. Mom ibino buto i totti, pappi gire en a buto kede; mano obedo totti, yin mom ibino buto kede. Mom ibino buto i ci-pappi, pappi gire en a buto kede. Mom ibino buto aminni ame obedo nyaka a pappi onyo nyaka a totti, kadi onywalo paco onyo onywalo kun ocele. Mom ibino buto i nyaka a wodi onyo nyaka a nyari, pien komgi obedo komi yin i komi. Mom ibino buto i nyaka ci-pappi, ame pappi en onywalo, pien en obedo aminni. Mom ibino buto amin pappi, pien en obedo wat a pappi. Mom ibino buto amin totti, pien en obedo wat a totti. Mom ibino buto i dako omin a pappi, kur inok laŋet cege, pien en obedo dako omin pappi. Mom ibino buto i dako a wodi, pien en obedo ci-wodi; mom ibino buta kede. Mom ibino buto i dako ominni, pien ominni gire en a buto kede. Mom ibino buto i dako moro eka dokite buto daŋ i nyare; mom daŋ ibino tero nyaka wode kadi nyaka a nyare me wot buto kede. Gin gire obedo watini; mano tim me ipyeda. Mom ibino nyomo amuni me bedo nyek aminnere, kun ibuto kede ame aminnere pwod kwo. “Mom ibino noko laŋet dako me buto kede i kare ame en tye kede two dwe, kun mom ru olony. Mom daŋ ibino buto i dako awotti, bino miyo iballe oko. Mom ibino miyo atinni moro me awŋa i mac baŋ Molek, me pyedo nyiŋ Obaŋani; an a Rwot. Mom ibino buto ico wadwu bala ibuto i dako; mano tim me kwer. Mom daŋ ibino balle keni pi buto kede lee moro; dako moro daŋ myero kur mi lee but kede; mano tim me ipyeda. “Kur iballe wunu kenwu i ginnoro i kom jami magi pien rok luŋ ame atyeko ryemogi oko i nyimwu-ni, gin obedo balle kengi i kodi timmono, te miyo lobo balle, te miya keto can i kome pi ballere, eka lobo te noko jo a bedo iye oko. Ento wun myero igwok wunu icwilla kede cikka, kun mom itimo wunu ginnoro me kwer i kom jami magi luŋ, kadi ŋat onywalo i lobowu, onyo welo onyo arokkoro ame bedo i akinawu. Pien jami me kwerrono luŋ wegi lobo-nono obedo tiyo, ame gin jo a yam otelo nyimwu; mano te miyo lobo balle oko. Kur itim wunu timmoro ame balo lobo, naka mio lobo ŋokowu oko, kite ame onoko kede rok ame otelo nyimwu. Ŋat ame bino timo ginnoro i kom jami magi me kwer, ŋat otimo-nono obino miyo waŋe rwenyo oko i akina jo me turgi. Doŋ ba, myero igwok wunu gin ame aciko, kur iti wunu ticcoro me kwer ame yam obedo timo i nyimwu, kur iballe wunu kenwu kedgi; an a Rwot Obaŋawu.” Rwot dok te kobbi Muca ni, “Kobbi lwak jo Icrael ni, Bed wunu jo acil, pie an abedo Rwot Obaŋawu ame acil. Ŋat acel acel i akinawu myer wor tottere kede pappere, dok myero gwok cabitta luŋ; an a Rwot Obaŋawu. Kur ilokere idok wunu baŋ cal jogi, ite tiyo wunu obaŋa mogo me nyonyo ame itwako wunu atwaka pirwu kenwu; an a Rwot Obaŋawu. “Ka iyalo wunu Rwot i motwu me kweyo cuny, ibino wunu miyo i yore ame mio Obaŋa ye gamowu. Myero cam oko i nino ame oŋolo iye-nono, onyo orwo mere; en odoŋŋere naka i nino me adekkere, obino waŋo awaŋa kede mac. Ka ce dok ocamo i nino me adekkere, bino doŋ doko gin me kwer; Obaŋa mom dok bino ye gamo. Ŋat ame ocamo-nono ballere gire bino dok i wie, pien opyedo gi a Rwot ame cil; dano-nono obino miyo waŋe rwenyo oko i akina jo me turgi. “Ka ikaa wunu cam ame oceki lobowu, myero kur ika wunu yi poto luŋ aluŋa tuno naka i laŋaete; dok daŋ kur irarao wunu en obwoto wanwu luŋ aluŋa i tyene, dok kur idep wunu nyig olok opoto piny i poto olok; ibino weko wunu magi-nono me konyo ocan kede orok ame bedo i akinawu; an a Rwot Obaŋawu. “Kur ikwal wunu ginnoro, kadi timo tim me goba goba, onyo bwolle wunu kenwu kenwu. Kur ikwoŋ wunu kwoŋ me goba kede nyiŋa, ame mio ipyedo nyiŋ Obaŋani; an a Rwot. “Kur ibur awotti, dok daŋ kur ima jami mere. Kur imi ocara apakaca ri baŋi tuno naka odiko. Myero daŋ kur iyet adiŋyittoro, kur daŋ iri dulloro i nyim atowaŋ, ento myero ilwor Obaŋani, an a Rwot. “Kur ileŋere wunu i ŋolo kop; kur daŋ idwor wunu ocan i pido mere, kadi lo moro adit, ento ŋol kop atira i kom awotti. Kur ibed rimo piny i akina jo turwu me yeyeto jo kur daŋ ikel kopporo pi neko awotti; an a Rwot. “Kur idag ominni i cuny, ento juk awotti ajuka, me ballere kur bed i wii. Kur icul kwor, kur daŋ ibed akemo moro i cunyi i kom jo me turwu; ento mar dano wadwu acalo imarre keni; an a Rwot. “Ibino gwoko wunu icwilla. Mom ibino miyo wunu limwu akwo nywal i kit lee moro ocele a mom epone mere; mom daŋ ibino wunu coyo koti aryo apapat i poto acel; dok daŋ kur iruk wunu boŋo moro ame ocweo i kit uci aryo apapat. “Kacelo moro obuto i nyannoro ame obedo aŋeca, ame doŋ onwoŋo otyeko moko me miyo baŋ ŋat ocele, kun nyannono mom ru oculo limmoro me lakoro onyo ogonyo, obino poro koppere apora. Mom obino nekogi pien nyannono onwoŋo mom loye kene. En lonnono bino tero mottere me walakino i roc baŋ Rwot, i doggola kema me rwatte, bino tero nyok romo me mot me walakino i roc. Alamdog bino tiyo tic me kwanyo bal i kome i nyim Rwot kun tio i nyok romo me mot walakino i roc, pi bal ame etimonono; Rwot daŋ bino weko ballere. “Ka doŋ ituno wunu i lobo-naca, eka ite pito wunu iye kwone yen luŋ me acama, ibino wunu koŋ geyo tero wunu nyiggi acalo gin ogeŋo ni kur cam; ogeŋowu camo nyiggi oko pi mwakki adek, myero kur icam wunu. I mwaka me aŋwennere, nyiggi luŋ bino bedo gin acil, mot ame omio me pako Rwot. Cite i mwaka me kannyape, itwero wunu doŋ camo nyiggi, me nyiggi nyak abup pirwu; an a Rwot Obaŋawu. “Kur icam wunu riŋo moro kun remo tye iye. Mom daŋ ibino wunu tyet, mom ibino wunu lamo amuk. Kur ilyel wunu te wiwu, kur daŋ ilyel wunu laŋet tikwu. Mom daŋ ibino ŋoŋolo wunu komwu pi kwero cola a jo oto, kadi kekedo komwu; a Rwot. “Kur imi anyirawu dok ipyeda pi bedo alaya, mio lobo balle oko i tim me, ipyeda. Gwok wunu cabit mera, wor wunu daŋ kabedona acil; an a Rwot. “Kur ilokere idok wunu baŋ okor tipo onyo emuroko; kur iyenygi wunu; mio iballe wunu oko pirgi, an a Rwot Obaŋawu. “Ibino wunu ya malo i nyim dano a wie obuko lwar; dok myero iwor wunu ŋat oti; lwor wunu daŋ Obaŋawu; an a Rwot. “Ka ce arokkoro bedo i akinawu, mom ibino wunu timo ginnoro arac i kome. Arok me bedo i akinawu, ibino bedo kede calo anywalli me lobowu, ibino wunu mare acalo imarre kenwu; pien wun daŋ yam ibedo wunu orok i lobo me Miciri; an a Rwot Obaŋawu. “Kur itim wunu ginnoro arac i ŋolo kop, i pimo bor a ginnoro, onyo pek a ginnoro, onyo dit a ginnoro. Myero ibed wunu i mijan ame pimo jami kakare, kede ratili abeco, kede dita me pimo kal aber, kede tabo me pimo moo aber; an a Rwot Obaŋawu ame rik akwanyowu i lobo Miciri. Myero igwok wunu icwilla luŋ, kede gin ame aciko luŋ; dok daŋ icob wunugi; an a Rwot.” Rwot okobo baŋ Muca ni, “Kobbi jo Icrael ni, Dano moro i akina jo Icrael onyo arok ame bedo i akina jo Icrael ame omio atinnere baŋ Molek, obino neko oko; lwak bino nanapo ananap kede gweŋe. An ikoma abino ciko waŋa i kom dano-nono, abino miyo waŋe rwenyo oko i akina jo me turgi, pien omio atinnere baŋ Molek, kun balo i kabedona acil, dok pyedo daŋ nyiŋa acil. Ka ce lwak mom ociko waŋgi i kom dano-nono kun en mio atinnere baŋ Molek, eka mom daŋ ote neko gigi dano-nono, an ikoma abino ciko waŋa i kom dano-nono kede i kom jo me doggola mere, abino miyo waŋe rwenyo oko i akina jo me turgi, en karacel kede jo luŋ ame lube i timo tim me coco baŋ Molek. “Ka cedano moro olokere odoko baŋ okor tipo kede baŋ emuroko kun timo tim me coco dok lubogi daŋ, abino ciko waŋa i kom dano-nono, abino miyo waŋe rwenyo oko i akina jo me turgi. Kwerre wunu kenwu ibed wunu jo acil, pien an a Rwot, Obaŋawu. Gwok wunu i cwilla luŋ kun daŋ icobo wunu, pien an a Rwot, an ame alonyowu idoko wunu acil. Pi mannono dano moro ame bino ceno tottere onyo pappere, obino neko oko; pien nwoŋo en oceno pappere onyo tottere, remo mere gire bino bedo i wie. “Ka lo moro ocodo dako awottere, ico kede dako ame ocode-nono obino neko oko. Dano ame obuto i ci-pappaere, nwoŋo okelo lewic i kom pappere, obino neko gin aryo luŋ, remogi bino dok i wigi. Ka ce lo moro obuto i ci-wode, obino neko gin aryo luŋ; gin nwoŋo otimo tim me kwer, remogi bino dok i wigi. Ka lo moro obuto ico wadgi acalo dako, gin aryo luŋ nwoŋo otimo tim me kwer, gin aryo luŋ obino nekogi oko, remogi bino dok i wigi. Ka lo moro onyomo dako eka dok te buto i totta a dako mere, manno nwoŋo otimo tim me kwer; obino waŋogi luŋ kede mac, ico kede mon aryo-nono luŋ, me wek timmoro me kwer kur timere i akinawu. Ka ce dano moro obuto kede lee obino neko oko; lee daŋ obino neko oko. Ka dako moro onoko laŋet lee te miyo buto kede, obino neko dako-nono oko karacel kede lee daŋ; obino nekogi oko, remogi bino bedo i wigi. “Ka ce lo moro otero aminnere ame obedo nyakka a pappere onyo nyakka a tottere, ce en oneno kome me mon, nyako daŋ te neno mege me co, gin nwoŋo otimo tim me lewic, obino nekogi kun jo me turgi tye anene. Pien en obuto aminnere, ballere gire bino bedo i wie. Ka ce lo moro obuto i dako ame tye kede two dwe, en nwoŋo mom oworo remo ame acwer i kom dako-nono, dako daŋ lewic mom omako i remo mere ame onwoŋo cwer; gin aryo luŋ waŋgi bino rwenyo oko i akina jo me turgi. Kur ibut amin totti onyo amin pappi; mannono nwoŋo ibuto i wattini; balgi bino bedo i wigi. Ka ce lo moro obuto i dako omin pappere, mannono nwoŋo obuto i dako omin pappere ame omin pappere gire en ame buto kede; balgi bino dok i wigi, gin bino to aboŋo atinnoro. Ka lo moro obuto i ci-ominnere, nwoŋo otimo tim me kwer; nwoŋo obuto i dako ame ominnere gire en ame buto kede, gin daŋ bino to aboŋo atinnoro. “Pi mannono myero igwok wunu i cwilla luŋ kede gin ame aciko ducu, myero icob wunugi, me lobo ame aterowu iye-nono kur ŋokwu oko. Wun myero kur ilub wunu kite a rokkoro ame atye ka ryemo oko i nyimwu-ni; pien gin otimo kodi ginnono luŋ, en omio yia okwerogi oko. Cite atyeko kobo baŋwu ni, ‘Ibino wunu leyo lobogi, an abino miyo baŋwu me bed megwu, lobo ame opoŋ i cak kede moo kic’ An a Rwot Obaŋawu, ame apokowu oko i kom rok ocele. En omio myero wun ipok wunu gin akwo a myero cam kede a mom myero cam, kede winy ame ocamo kede en a mom ocamo. Myero kur iballe wunu idok wunu gin me kwer pi lee moro onyo pi winyo moro onyo pi ginnoro ame nya corre i wi lobo, i akina magi luŋ ame an doŋ atyeko pokogi oko pat pirwu, ni myero gin bed gin a cik ogeŋo. Myero ibed wunu jo acil i nyima, pien an Rwot acil. An doŋ atyek o pokowu oko i kom rok ocele luŋ wek ibed wunu mega. “Ico moro onyo dako moro ame obedo akor tipo onyo emuroko, obino neko oko; obino nanapogi oko kede gweŋe, remogi bino dok i wigi.” Rwot okobbi Muca ni, “Kob baŋ olamdog, awobe Aron, kob baŋgi ni, Ŋattoro i akinagi myero kur balle kene pi gudo kom ŋat oto i akina jo me turgi, kono onyo kom wattoro keken ame ceggi kedgi, acalo pappere onyo tottere, wode, nyare, ominnere, onyo aminnere a mom ru oŋeye kede ico moro. En nwoŋo pwod wattere aceggi, pien cware pwod mom; en twero balle pire te doko ŋat a cik ogeŋo. Kadi bed en doŋ tye acalo won paco i akina jo turgi, myero en kur balle kene, te miyo en pyedde kene. Myero gin kur lyel dye wigi; kur daŋ olyel laŋet yer tikgi, mom daŋ oŋolo komgi. Gin bino bedo jo acil baŋ Obaŋagi, kun mom opyedo nyiŋ Obaŋagi, pien gin obedo jo ame mio mot owaŋo i mac baŋ Rwot, ame en cam Obaŋagi; pi mannono myero gin bed jo acil. Gin myero mom nyom dako ame alaya, onyo dannoro ame doŋ ŋat ocele obalo oko; mom daŋ obino nyomo dako a cware oryemo; pien alamdog obedo ŋat acil baŋ Obaŋa mere. Ibino gwoke wunu ebed acil, pien en mio cam Obaŋani; en bino bedo acil baŋi, pien an a Rwot ame alonyowu ibedo wunu acil, an daŋ acil. Ka ce nyaka alamdoggoro odoko ipyeda pi timo tim me coco, nwoŋo opyedo pappere; obino waŋo nyannono oko kede mac. “Alamdog ame adwoŋ i akina omego mere, ame otyeko daŋ kwero oko i kare ame okete i dog ticcere, wek oruk boŋŋi acillege mom bino gonyo yer wie ony iyak ata, dok daŋ mom bino yeco rukkere; mom daŋ bino donyo i ot ame kom dano oto tye iye, mom bino balle kene, kadi pi pappere onyo tottere. Mom bino donyo oko i kabedo acil, mom bino pyedo kabedo Obaŋa mere ame cil, pien moo wir a rikokwere kede baŋ Obaŋa mere tye i kome, an a Rwot. En bino nyomo nyako a mom ru oŋeye kede lo moro. Myero kur nyom dako a cware oto, onyo dako a cware oryemo, onyo dako moro a doŋ lon ocele obalo oko, onyo dako ame alaya; en myero nyom nyako me turgi a mom ru oŋeye kede lo moro, me wek en kur pyed itino mere i akina jo me turgi, pien an a Rwot ame alonye ebedo acil.” Rwot dok te kobbi Muca ni, “Kobbi Aron ni, Dano moro i akinawu a roccoro tye i kome mom bino noko Rwot aceggi me miyo cam Obaŋa mere naka i kare ikwaewu luŋ. Pien dano a roccoro tye i kome mom bino noke aceggi, dano acalo atowaŋ, aŋwalo, onyo ŋattoro ame poo tye i waŋe, onyo ame tyene onyo bade tuncel bor okato kare, onyo lon a tyene otur, onyo a bade otur, onyo lon a kore ogunakino, onyo lon acek meicel, onyo lon ame two moro obalo oko, onyo ame two too gwenyo onyo oŋoloŋol, onyo ginnoro owaŋo mane. Dano moro i akina ikwae Aron ame roccoro tye i kome mom bino noko Rwot aceggi, me miyo mot awaŋa i mac baŋ Rwot; ka ce roccoro tye i kome, mom bino noko Rwot accegi me miyo cam Obaŋa mere. En twero camo cam Obaŋa mere aryo luŋ, en acillere meicel kede jami acillere; cite myero kur nok boŋo icika aceggi, kur daŋ bin cok i keno lam, pien roc tye i kome; me en kur pyed kabedona acil, pien an a Rwot ame alonyogi obedo acil.” Muca daŋ te kobo kittono baŋ Aron kede awobe mere kede baŋ jo Icrael luŋ. Rwot dok te kobbi Muca ni, “Titti Aron kede awobe mere ni myero gin ogwokere i kom jami a jo Icrael acil ame gin doŋ okwero oko pira, me wek gin kur opyed nyiŋa acil; an a Rwot. Kobbigi ni, ‘I kare ikwaewu luŋ ka ce ŋattoro i akinawu onoko ginnoro acil ame jo Icrael doŋ okwero pi Rwot, kun dano-nono tye kede ginnoro i kome ame mio en bedo ŋat a cik ogeŋo, wan dano-nono bino rwenyo oko i nyima; an a Rwot.’ Ŋattoro ame i akina ikwae Aron ame won dobo onyo ame tut mollo i kome, myero kur cam ginnoro acil tuno ka kome olony. Ŋat ame bino gudo ginnoro a cik ogeŋo pi gudo kom dano oto, onyo lo ameremo mere me co oony i kome, onyo ŋat ame ogudo ginnoro ame lak alaka ame twero miyo en doko ŋat a cik ogeŋo, onyo ŋat ogudo dano ame cik ogeŋo ame twero miyo en daŋ doko ŋat a cik ogeŋo, onyo kit ginnoro keken ame twero miyo en doko ŋat a cik ogeŋo, ŋat ame ogudo kodi ginnono bino bedo ŋat a cik ogeŋo tuno naka otyeno, dok daŋ mom bino camo ginnoro acil ka mom ru olwoko kome kede pii. En bino doko ŋat a cik mom ogeŋo ka cen doŋ opoto, icennere en doŋ twero camo gin acil, pien kodi cemmono mere. Dano-nono myero kur cam lee oto kene onyo ame lee tim omwodo, me en kur balle kede kene; an a Rwot. Pi mannono myero gin gwok gin ame aciko me bal kur bed i wigi, te miyogi to oko ka ce gin opyedde i kome; an a Rwot ame alonyogi obedo acil. “Ŋattoro ata myero kur cam ginnoro acil. Ŋat a bedo baŋ alamdog onyo apakaca mere myero kur cam gin acil. Ento ka alamdog onwoŋo owilo opii kede limmere, ame dok te doko calo jami mere ikome, en opiinono twero camo; opii ame onywalo i ode daŋ twero camo. Ka ce lo moro ata onyomo nyaka alamdog, nyare-nono myero kur cam gin acil ame oyalo Obaŋa. Cite ka nyaka alamdoggono cware doŋ oto oko, onyo oryemo oko kun mom ru onywalo atinnoro, eka en te dwogo tuŋ a pappere kite a rik en obedo kede iye i kare ame pwod tidi, en doŋ twero camo cam a pappere, cite ŋattoro myero kur cam. “Ka ce ŋattoro ocamo gin acil kun mom ocamo me akaka, en bino culo waŋ gin ame ecamo-nono kun medo acel me abic iye, te doŋ dwoko gin acillono baŋ alamdog. Olamdog myero kur pyed jami a jo Icrael acil ame gin doŋ otyeko miyo baŋ Rwot, me bal kede roccere kur bed i wigi pi camo cemgi acil; pien an a Rwot ame alonyogi obedo acil.” Rwot dok te kobbi Muca ni, “Kobbi Aron kede awobe mere, karacel kede jo Icrael luŋ ni, Ka ce ŋattoro me doggola Icrael onyo ŋattoro ame bedo iyi Icrael, omio mottere me yalo Obaŋa, kadi bed omio me cobo kwon, onyo me ber a yic kun mio baŋ Rwot me mot awaŋa. Rwot bino gamo ka ikelo wunu mot a roccoro mom i kome, kadi bed ikwanyo wunu i akina dok onyo romi onyo akina dyegi. Kur ikel wunu ginnoro a roccoro tye i kome, pien Rwot gire mom bino gamo pirwu. Dok ka dano moro omio mot baŋ Rwot me kweyo cuny, pi cobo kwoŋ onyo me ber a yic, kun okwanyo mottere-nono i akina dok onyo i akina romi onyo dyegi, Rwot bino gamo en ame balloro mom i komgi; myero roccoro kur bed i komgi. Lee ame waŋe oto onyo ame tyene otur onyo oŋol oko, onyo ame tut mollo i kome, onyo oŋoloŋol omako, onyo kannoro odugo tye i kome, mom myero imi wunu baŋ Rwot; kur imi wunu me mot owaŋo i mac baŋ Rwot i wi keno lam. Twon onyo romo ame dul kome moro bor atek onyo cek atek itwero wunu miyo me mot me ber a yic; ento ka me mot me cobo kwoŋ, Rwot mom bino gamo. Kur iyal wunu Rwot kede lee moro ame odino mane oko, onyo ame oroo oko, onyo ame okao mane akaa, onyo ame oŋolo mane oko, kur iyal wunu Rwot i kodi mannono i lobowu. Dok daŋ kur iyal wunu Rwot i kodi lee-nono ame iwilo wunu i baŋ a rokkoro me cam Obaŋawu, Rwot gire mom bino gamo pirwu, pien komgi roc tye iye pi bal ame onwoŋo tye iye-nono.” Rwot dokokobo baŋ Muca ni, “Ka onywalo atin twon onyo romo onyo dyel, myero koŋ bed baŋ tottere pi nino abiro; cakere i nino me aboro nwoŋo doŋ otwero gamo me bedo mot owaŋo i mac baŋ Rwot. Kadi tottere obedo min dyan onyo min romo, myero kur nekgi luŋ nino acel, tottere kede atinnere. Ka iyalo wunu Rwot i mot me pwoc, myero itim wunu i yore ame mio Rwot twero pwoyowu. Myero cam i nino ame omio iyenono; myero kur wek moro iye doŋ tuno naka odiko; an a Rwot. “Pi mannono myero igwok wunu icwilla luŋ, dok daŋ icob wunugi; an a Rwot. Kur ipyed wunu nyiŋa ame cil, jo Icrael myero ŋe ni an acil; an a Rwot ame lonyowu ite bedo wunu acil, ame rik akwanyowu i lobo Miciri, me an abed Obaŋawu; an a Rwot.” Rwot okobbi Muca ni, “Kobbi jo Icrael ni, Ecuban a Rwot ame ociko pirgi ame ibino wunu rabo ni myero obed cokere acil, ecuban ame ociko pirgi gin ene. Ibino wunu tiyo ticwu pi nino abicel, ento i nino me abiro mere en cabit me weo mot, en nino me cokere acil. Mom ibino wunu tiyo ticcoro; mano en cabit a Rwot kan ame ibino wunu bedo iye luŋ. “Magi gin ecuban ame Rwot ociko, gin cokere acil ame ibino wunu rabo pirgi i kare ame Rwot ociko. I dwe me agege, i nino dwe apar wie aŋwen otyeno, mano en Kato a Rwot. I nino dwe apar wie abic me dwe acellono en nino a Rwot me ecuban me Ogati a Tobi Mom iye; ibino wunu camo ogati a tobi mom iye pi nino abiro. I nino me agege mere myero ibed wunu i cokere acil; mom ibino wunu tiyo ticcoro ame tek. Ento ibino wunu yalo Obaŋa i mot ame owaŋo i mac baŋ Rwot pi nino abiro; i nino me abiro mere myero ibed wunu i cokere acil, kur iti wunu iye ticcoro atek.” Rwot dok te kobbi Muca ni, “Kobbi jo Icrael ni, Ka doŋ ituno wunu i lobo ame abino miyowu, ka ce ikaa wunu iye cam, ibino kelo wunu arita me gin ogeo cek me wi mwaka baŋ alamdog. Alamdog bino yoko arita-nono i nyim Rwot, me en ye gamowu; en bino yoko i nino ame lubo cabit. I nino ame oyoko iyenono, en ame daŋ ibino wunu tero iye atin romo ame dittere romo mwaka acel, ame roccoro mom i kome, me obed mot awaŋa baŋ Rwot. Mot yala Obaŋa me moko kwon ame oyalo kede Obaŋa karacel i nyok romo, myero bed me moko kwon apwottere ame romo gwata aryo ame orubo kede moo, ame obino yalo i Rwot kun owaŋo i mac baŋ Rwot me bed gin a ŋwece kur ame yomoro cuny. Mot amata mere bino bedo vino ame romo cupa aryo kede nucu, Kur icam wunu ogatimoro, dok daŋ kur imwod wunu nyig belloro ame ocelo onyo a mom ocelo tuno naka i nino-naca ikokome, tuno ka ikelo wunu mot me yalo Obaŋawu. Mano bino bedo cik atwal tuno naka i kare ikwaewu luŋ, i kabedo luŋ ame ibino bedo wunu iye. “Ibino kwano wunu kun icako wunu i nino ame lubo cabit, en nino ame imio wunu iye arita me mot ayoka baŋ Rwot; bino bedo cabit abiro twal, kun ikwano wunu nino pyerabic tuno i nino ame lubo cabit me abiro mere. Eka doŋ ite cako kelo wunu baŋ Rwot motwu me moko kwon kal anyen. Ibino kelo wunu ogati aryo i kan ame ibedo wunu iye, ame otedo i moko a romo gwata aryo me bed me ayoka; obino tedogi i moko kwon apwottere ame orubo i tobi, obed cam me wi mwaka ame omio baŋ Rwot. Dok daŋ ibino wunu kelo itino rommi kany wie aryo ame mwaka me ditogi tye acel acel, dok roccoro daŋ mom i komgi, kun ikelo wunugi karacel ogati-nono, kede atin twon acel, kede nyogi romi aryo, ame bino bedo me mot oŋolo me awaŋa baŋ Rwot, karacel kede mot memoko kwon kede mot amata; gin luŋ mot ame owaŋo i mac, gin a ŋwece kur a yomoro cuny Rwot. Dok ibino wunu daŋ miyo nyok dyel acel me mot aŋola pi bal, kede itino nyogi romi aryo ame mwaka me ditogi tye acel acel me mot aŋola me kweyo cuny. Alamdog bino yokogi karacel kede ogati me wi mwaka, me gin bed mot ayoka i nyim Rwot, karacel kede itino nyogi romi aryo-nono; gin bino bedo gi a Rwot acil pi alamdog. Ibino wunu rabo koppere kannaler i nino-nono ikokome; ibino bedo wunu kede cokere acil. Mom ibino wunu gudo ticcoro atek, mannono bino bedo cik atwal tuno naka i kare ikwaewu luŋ, i kabedo luŋ ame ibino bedo wunu iye. “Ka ikaa wunu cam ame oceki lobowu, myero kur ika wunu yi poto luŋ aluŋa tuno naka i laŋete, dok daŋ kur irarao wunu en obwoto waŋwu i kare me kac. Magi-nono ibino wunu weko me konyo ocan kede orok; an a Rwot Obaŋawu.” Rwot okobbi Muca ni, “Kob baŋ jo Icrael ni, I dwe me abiro, nino dwe acel, ibino kwero wunu iye nino me weo mot, nino me po ame ibino wunu rabo pire i koko opel, nino me cokere acil. Mom ibino wunu gudo ticcoro atek, dok ibino miyo wunu iye mot ame owaŋo i mac baŋ Rwot.” Rwot dokokobbi Muca ni, “I nino dwe apar me dwe abiro-ni, en ame bino bedo nino me kwanyo bal. Myero obed nino me cokere acil baŋwu; ibino kumo wunu kun cunywu cwer, dok ibino miyo wunu iye mot ame owaŋo i mac baŋ Rwot. Kur igud wunu ticcoro i nino-nono, pien nino-nono obedo nino me kwanyo bal, me tiyo tic me kwanyo bal i komwu i nyim Rwot Obaŋawu. Ŋat ame mom bino kumo kun cunye cwer i nino-nono, waŋe bino rwenyo oko i akina jo turgi. Ŋat ame bino gudo ticcoro i nino-nono ikokome, abino neko dano-nono oko me kur bed i akina jo turgi. Mom ibino wunu gudo ticcoro; mano bino bedo cik atwal tuno naka i kare ikwaewu luŋ, i kabedo luŋ ame ibino bedo wunu iye. Nino-nono en ame bino bedo cabit me weowu mot, ibino kumo wunu iye kun cunywu cwer. Ibino gwoko wunu cabitwu-nono cakere i nino dwe aboŋwen otyeno tuno naka orwo mere otyeno.” Rwot dok te kobo baŋ Muca ni, “Kob baŋ jo Icrael ni; I nino dwe apar wie abic me dwe me abiro-ni en ame ecuban me gonye a Rwot bino bedo iye, tyeko naka nino abiro. I nino me agege myero bed iye cokere acil, mom ibino gudo wunu ticcoro atek. Myero imi wunu mot ame owaŋo i mac baŋ Rwot pi nino abiro. I nino me aboro mere, ibino bedo wunu kede cokere acil, en ame ibino miyo wunu iye mot ame owaŋo i mac baŋ Rwot; mano en cokerewu me woro, mom ibino gudo wunu ticcoro atek iye. “Magi-nono en ecuban ame Rwot ociko, ame ibino wunu rabo pirgi ni gin aye kare me cokere acil, me miyo mot ame owaŋo i mac baŋ Rwot, mot awaŋa, mot me moko kwon, mot aŋola kede mot amata, kun acel acel iye tye kede nino mere. Dok daŋ imedo wunu cabit a Rwot ocele mege, kede motwu ocele mege, kede motwu ocele luŋ me cobo kwoŋ, kede motwu ocele luŋ me ber a yic ame imio wunu baŋ Rwot. “I nino dwe apar wie abic me dwe me abiro, ka doŋ ikao wunu gin ame oceki lobo, ibino wunu kwero ecuban a Rwot pi nino abiro; nino me agege bino bedo nino me weo mot, kede nino me abor mere daŋ bino bedo nino me weo mot. I nino me agege ame ibino wunu coko iye nyig yen abeco mere, kede jaŋ otit, kede jaŋ yat obuŋere, kede ŋet me dog kulo; eka ite bedo wunu i yomcuny i nyim Rwot Obaŋawu pi nino abiro. Ibino kwero wunu me bed ecuban a Rwot pi nino abiro mwaka i mwaka; mannono bino bedo cik atwal tuno naka i kare ikwaewu luŋ; ibino wunu kwero i dwe me abiro. Ibino wunu bedo i gonye pi nino abiro jo luŋ ame gin jo Icrael bino bedo i gonye, me ikwaewu ŋe ni rik amio jo Icrael obedo i gonye i kare ame akwanyogi oko i lobo Miciri; an a Rwot Obaŋawu.” Muca daŋ te tito baŋ jo Icrael kittono, pi ecuban luŋ ame Rwot ociko. Rwot okobbi Muca ni, “Cik jo Icrael kel baŋi moo jeituni ame oodo, ote liyo acil, me ony i tara ote weko bedo lyel nino ducu kun mom to. Aron ocan mac olyel i nyim Rwot didik cakere otyeno naka odiko, kun ocano i kema me rwatte, oko i ŋe boŋo icika ame tye i nyim canduk me kop caden; mano en cik atwal tuno naka i kare ikwaewu ducu. En bino cano tara kakare i wi gi-cibo tara me jabu ame olio acil i nyim Rwot kare luŋ. “Ibino dok juko moko apwottere, ite tedo kede ogati apar wie aryo, kun ogati acel acel donyo iye moko gwata aryo. Ibino canogi yore aryo, kun iryeogi abicel abicel i wi meja me jabu olio acil. Ket odok luban ame olio acil i yore acel acel, me bed karacel ogati acalo gin me po ame owaŋo i mac baŋ Rwot. I nino me cabit luŋ Aron bino ryeyogi kare luŋ i nyim Rwot pi po Icrael; en gin me cikere ame ri nakanaka. Mano bino bedo pi Aron kede awobe mere; gin bino camo kakannoro acil, pien mano en gin acil meicel ame omie i kom mot ame owaŋo i mac baŋ Rwot, ame myero mi baŋe didik.” Doŋ nino moro wot a dako moro ame obedo nyaka lo moro me Icrael, ame pappere onwoŋo dano moro me Miciri, owoto i akina jo Icrael; eka en wot a dako moro ame obedo nyaka lo moro me Icraellono te ero da i gony gin i dano moro me Icrael. Wot a dako ame nyaka lo moro me Icraellono te cako yeto nyiŋ Obaŋa, kun daŋ ceno-gu. Awobi-nono rik ote tero baŋ Muca. Nyiŋ tottere onwoŋo Celomit, nyaka Dibri me atekere a Dan. Gin rik te kete i buc, tuno waŋ ame onyuto baŋgi gin a Rwot mito. Rwot te kobo baŋ Muca ni, “Ter lon ame oceno cen ca oko i ŋe gony, mi jo luŋ ame rik owinyo koppere ket ciŋgi i wie, eka ite weko lwak luŋ nanapo en oko i gweŋe, Yin doŋ kobbi jo Icrael ni, Ŋat oceno Obaŋa mere, ballere bino bedo gire i wie. Ŋat oyeto nyiŋ Rwot obino neko oko; lwak luŋ bino nanapo en i gweŋe. Arok karacel kede anywalli, ka oyeto nyiŋ Obaŋa obino neko oko. Ŋat oneko dano, obino daŋ neke oko. Ŋat oneko lee bino culo waŋe acula; obino culo kwo kede kwo. Ka ce ŋattoro obalo dul kom awottere, en daŋ obino time kittono; ka oturo cogo obino daŋ culo i turo cogo, wan kede waŋ, lak kede lak; kite acalo en obalo kede dul kom awottere en daŋ obino balo mege. Ŋat oneko lee bino culo waŋe acula; ŋat ame oneko dano obino daŋ neko oko, Cik bino bedo acel pi arok kede anywalli; pien an a Rwot Obaŋawu.” Muca daŋ te cako kop baŋ jo Icrael; gin te tero lon oceno Obaŋanono oko i ŋe gony, ote nanapo oko i gweŋe. Jo Icrael daŋ otimo kittono, kite ame Rwot ociko kede Muca. Rwot rikokobo baŋ Muca i wi kidi me Cinai ni, “Kobbi jo Icrael ni, Ka doŋ ituno wunu i lobo ame abino miyowu, lobo myero gwok cabit a Rwot. Ibino wunu coyo pottiwu pi mwakki abicel, ibino wunu daŋ ŋolo jaŋ olokwu pi mwakki abicel kun icoko wunu nyige, ento i mwaka me abiro mere en ame bino bedo cabit ame lobo bino weo iye mot, en cabit a Rwot; mom ibino coyo wunu ginnoro i pottiwu, dok daŋ mom ibino ŋolo wunu jaŋ olokwu. Gin otu kene iyi okoŋ mom ibino kayo wunu, mom ibino coko wunu nyig olokwu a mom oŋolo jaŋgi; mwakanono bino bedo mwaka ame lobo bino weo iye mot. Cabit a lobo-nono bino miyowu cam, bino miyo piri kede pi opiini kede aŋecani, kede opakacani, kede arok ame bedo baŋi; pi limwu luŋ akwo kede leyi me tim ame tye i lobowu, gin a cek iye luŋ bino bedo me acamagi. “Dok daŋ ibino kwano wunu cabit abiro me mwakki, mwakki abiro tyen abiro; kare-nono me cabit abiro-nono me mwakki, bino bedo baŋi mwakki pyeraŋwen wie aboŋwen. I mwakanono ibino miyo apel kok aloŋo i nino dwe apar me dwe me abiro; i nino me kwanyo bal ibino miyo apel kok winyere i lobowu luŋ. Ibino kwero wunu mwaka me pyerabiccere obed acil, kun irabo wunu i lobowu luŋ ni kuc tye pi jo luŋ ame bedo iye. Mano en ame bino bedo kare me jubiliwu, kare ame dano acel acel bino dok gire i dul lobo mere, dok ŋat acel acel daŋ bino dok baŋ jo me doggola mere. Mwaka me pyerabiccere en ame bino bedo kare me jubiliwu; mom ibino coyo wunu koti, mom ibino kayo ginnoro otu kene, dok daŋ mom ibino coko wunu nyig olok ame mom iŋolo wunu jaŋgi. Pien kare nono obedo kare me jubili, kare-nono bino bedo acil baŋwu; ibino camo wunu gin ame oya i poto. “I mwaka me jubili-nono, ŋat acel acel bino dok i dul lobo mere. Ka ce icato lobo baŋ awotti onyo iwilo ginnoro i baŋe, myero kur itim balloro i akinawu kenwu kenwu. Yin ibino wilo lobo ibaŋ awotti kun wellere lubo wel mwaka a lubo jubili, dok daŋ en bino cato baŋi kun lubo wel mwaka ame ibino nwoŋo iye cam. Ka mwakki pwod odoŋ abup, ibino medo wel ame iculo, ka mwakki odoŋ anok, ibino dwoko wel ame iculo piny, pien gin ame en cato baŋi en aye mwakki ame cam bino cek iye. Mom ibino timo wunu balloro i akinawu kenwu kenwu, ento ibino lworo wunu Obaŋawu; pien an a Rwot Obaŋawu. “Pi mannono ibino wunu tic icwilla, kun igwoko wunu gin ame ociko luŋ dok daŋ icobo wunu, me ibed wunu i lobo kun okwe mot. Pien lobo bino ceko cem, ibino camo iyeŋ wunu kede, ite bedo wunu iye kun okwe mot. Ka ce ikobo wunu ni, ‘Obino camo ŋo i mwaka me abiro, ka mom ocoo koti dok daŋ mom okao kac?’ an abino ciko gum mera poto i komwu i mwaka me abicellere, me wek cam cek a romo mwaka adek twal. I kare ame icoo wunu koti i pottiwu i mwaka me aboro mere, nwoŋo pwod itye icamo wunu cam aconnere, tuno naka i mwaka me aboŋwen; i kare ame cam doŋ ocek, ote kayo, nwoŋo pwod icamo wunu en aconnere. Lobo mom obino cato me atera atwal, pien lobo mega gira; pien wun ibedo wunu wele, dok daŋ wun orok iye. I lobo luŋ ame ibino bedo wunu iye, ibino miyo wunu olakoro lobo. “Ka ominwu moro can omako, te cato dul lobo mere moro, wattere moro aceggi kede en ame bino wot lakoro lobo ame ominnere ocato-nono. Ka ce dano-nono mom tye i wattere moro ame twero lakoro, ka ce en ikome dok olony te nwoŋo yo moro ame rome lakoro, en myero kwan wel mwaka kun geo i kare ame en ocato iye, en te culli dano a rik owilo-nono wel ame pwod odoŋ, lobo mere te doŋ dok i ciŋe. Cite ka yo moro mom tye ame romo miyo en ikome dwoko lobo mere i ciŋe, poto-nono bino medde bedo me a ŋat owilo naka ka mwaka me jubili oromo; i kare me jubili obino weko poto mere doŋ dok i ciŋe. “Ka ŋattoro ocato ode ame tye i boma ame ocelo i cel, en twero lakoro oko a mom ru mwaka acel okato. En bino bedo i twer pi mwaka luŋ me lakoro. Ka ce mom olakoro ame mwaka acel mom ru okato, obino doŋ moko ni ot ame tye i boma ame ocelo i cellono doŋ me a ŋat owilo, mege doŋ atwal naka i kare ikwae luŋ; mom dok otwero dwoko i ciŋ wonnere i kare me jubili. Ento udi ocele mege ame tye iyi caro ame mom ocelo i celloro, obino tero a rom aroma i potti ame tye iyi caro; otwero lakoro dok daŋ myero dwok i kare me jubili. Kadi amannono, boma a jo Levi, udi ame omiogi me bedo megi, jo Levi twero lakoro kare ducu, Ka ce dano moro i akina jo Levi mom olakoro ode obino cato ottono i boma moro ame omiogi me bedo megi, obino dwoko ottono i kare me jubili baŋ wonnere, pien udi ame tye i boma a jo Levi, magi-nono obedo jamigi ame omiogi i akina jo Icrael. Ento barroro me kwat ame omano bomagi mom obino cato; mannono doŋ lobogi atwal. “Ka ce ominni moro i laŋeti odoko acan ame mom romo konyere kene, yin ibino konye; en bino bedo baŋi acalo welo onyoarok ame bedo i akinawu. Mom ibino gamo magoba moro i baŋe, dok daŋ mom ibino medo wi baŋya mere, ento myero ilwor Obaŋani, me ominni bed kwo i laŋeti. Mom ibino miyo en koporo limmoro i baŋi pi mito nwoŋo magoba, kur daŋ imie cam kun imito ni en dwoggo kun nwoŋo koŋ omedo moro iye. An a Rwot Obaŋawu ame rik akwanyowu i lobo me Miciri me wek amiwu lobo me Kanaan, an ate bedo Obaŋawu. “Ka ce ominni moro i laŋeti odoko acan, te catte kene baŋi, mom ibino miyo en tio baŋi acalo opii, En bino bedo baŋi acalo apakaca onyo arok. En bino tic baŋi naka i mwaka me jubili; i ŋe eno en doŋ bino ya oko i baŋi karacel kede itino mere, bino dok baŋ jo me doggola mere i kome, i lobo a kwari mere. Pien gin obedo omirona ame rik akwanyogi i lobo me Miciri, mom obino catogi me bedo opii. Mom ibino loye i loc agwa, ento myero ilwor Obaŋani. Aco kop i kom opiini kede aŋecani ame ibino bedo kedgi: itwero wilo opii kede aŋeca i baŋ orok ame omano laŋetwu-ni. Itwero wilo wunu daŋ i akina orok ame bedo baŋwu, kede i akina jo me doggolagi ame bedo baŋwu, ame onywalo i lobowu; gin twero doko acalo jamiwu. Itwero miyo wunu baŋ itino awobewu ame bino lubowu, me bed acalo gin ame gin leo atwal. Itwero wunu miyogi obedo opiiwu, cite omegowu ame obedo jo Icrael mom ibino loyo wunu kittono, ame ŋat man loo wadgi i loc agwa. “Ka welo moro onyo arokkoro ame bedo baŋwu odoko alonyo, kun ominwu moro ame bedo i laŋete odoko acan, eka te catte gire kene baŋ welo onyo arok ame tye baŋi-nono, onyo ocate baŋ wattoro me doggola a welonono, ka en doŋ otyeko catte oko, otwero lakoro; ŋattoro i akina omego mere twero lakoro en oko. Omin pappere onyo atin omin pappere twero lakoro en, onyo watgi moro me doggolagi twero lakoro en; onyo ka en ikome odoko alonyo, twero lakere gire kene. En bino kwano wel kun kwano i ŋat a rik owile-nono; bino cako kwano i mwaka ame rik owile iye tuno naka i jubili; wel me gonye bino lubo wel mwaka. Kare ame en obedo kede baŋ lon owile obino kwano acalo kare apakaca. Ka ce mwaka odoŋ pwod bup, en bino culo lim me lakere mere kun poro i wel mwaka, kun kwanyo i kom lim ame rik owile kede. Ka ce mwaka odoŋ anok me tuno i jabuli en bino kwano wel karacel i dano a rik owile-nono, te culo lim me lakere mere kun poro wel mwaka me ticcere ame pwod odoŋ. En bino bedo baŋe acalo apakaca ame oculo mwaka i mwaka; mom obino loye i loc agwa kun yin ineno. Ka ce mom olakoro en i yore acalo magi, obino gonye oko i mwaka me jubili, en karacel kede itino mere. Pien jo Icrael obedo omiro mera; gin obedo omirona ame rik akwanyo i lobo Miciri; an a Rwot Obaŋawu. “Mom ibino tiyo wunu cal obaŋa moro pirwu kenwu, dok daŋ kur icib wunu cal ginnoro ame opao apaa cuŋ i lobowu onyo kidi moro ame ocibo me awora, kadi kidi moro ame ogoro cal i kome, eka ite ryebere wunu piny i nyimgi, pien an a Rwot Obaŋawu. Myero igwok wunu cabit mera, iwor wunu daŋ kabedona acil; an a Rwot. “Ka ibino gwoko wunu icwilla luŋ kede gin ame aciko ducu, kun daŋ icobo wunu, an abino miyowu kot ame cwe i kare mere, lobo bino ceko cem, yen i potti daŋ bino nyako nyiggi. Kare me dino kalwu bino ri naka i kare me pwono olok, kare me pwono olok bino ri naka i kare me coyo koti. Ibino wunu camo cam romowu, ite bedo wunu i lobo kun okwe mot. Abino miyo kuc bedo i lobo, pala romo moro mom bino beo i lobowu. Ibino ryemo wunu okworwu luŋ, pala lwenywu bino miyogi oto i nyimwu. Jowu abic keken bino ryemo jo mia twal, jowu mia bino ryemo jo tutumia apar; pala romowu bino miyo okworwu to i nyimwu. Abino paro pirwu abino miyowu inywal, inya wunu, dok daŋ abino mo ko cikerena kedwu. Ibino camo wunu camwu acon ame ikano wunu pi kare alac, ite onyo wunu aonya me wekki en anyen kabedo. Abino yiko kabedona i akinawu, yia daŋ mom bino kwerowu. Abino wowota i akinawu, abino bedo Obaŋawu, wun daŋ ibino wunu bedo jo mera. An a Rwot Obaŋawu ame rik akwanyowu i lobo me Miciri, me kur ibed wunu opiigi; an doŋ atuturo bayi loc ame oririo i ŋutwu, amio doŋ iwoto wunu atira. “Ento ka mom ibino winyo wunu koppa, dok daŋ mom i ibino cobo wunu gin ame aciko-ni luŋ, ka ce ibino cayo wunu icwilla, dok ka ce yiwu okwero cikka mom ite cobo wunu gin ame aciko-ni luŋ, ento ituro wunu cikerena, abino timowu kit man: abino miyo lworo aŋolle aŋola makowu, kede aola owio, kede aburu ame cocoro waŋ jo kun balo komwu oko. Dok daŋ ibino wunu yelle coyo koti nono, pien okworwu gire en ame bino camo. Abino ciko waŋa i komwu, obino pwodowu i nyim okworwu. Jo ame dagowu en ame bino loyowu; dok daŋ ibino ŋwec wunu kun ŋattoro gire mom aryemo yorwu. Ka atimo mano luŋ mom daŋ ite winyo wunu koppa, abino medde goyowu tyen abiro pi balwu. Abino turo teko me awakawu oko, abino miyo polowu luŋ bedo atek calo nyonyo, lobowu daŋ te bedo atek calo mola. Tek komwu bino to nono, pien lobowu mom gire bino ceko cem, yen me lobowu daŋ mom bino nyako nyiggi. “Ka ce dok pwod imedde wunu pyem keda, kun mom iwinyo wunu koppa, abino medde coro two mogo apek i komwu, kun pol bala balwu tyen abiro. Dok daŋ abino cwayo leyi me tim areco mege i akinawu, ame bino mamako itinowu, tyeko limwu akwo oko i ciŋwu, eka te miyo welwu jwik doko anonok, yowu te yuggo oko. “Ka ce cannono mom omio idwogo wunu baŋa, ka ce pwod imedde wunu pyem keda, an daŋ abino pyem kedwu, an ikoma ate pwodowu tyen abiro pi balwu. Abino kelo pala romo ikomwu me culo kwor pi cikerena. Ka icokere wunu i dye bomawu luŋ, abino cwayo too edeke agwa i akinawu, ote miyowu i ciŋ okworwu. Abino miyo cam ame ikwo wunu kede rwenyo oko, mon apar bino tedo ogatiwu i keno acel, dok daŋ gin bino pokkiwu ogati kun opimo apima; ibino camo wunu cite mom ibino yeŋowu. “Ka ce daŋ dok atimo man, ento mom daŋ ite winyo wunu koppa, kun imedde wunu pyem keda, an daŋ abino pyem kedwu agwa meicel, an ikoma ate pwodowu tyen abiro pi balwu. Ibino wunu camo riŋo kom awobewu, dok daŋ i ibino wunu camo riŋo kom anyirawu. Abino turo ka woro jogiwu ame tye i wi kiddi malo, ate totoŋo keno lamwu me lamo odok akur oko, kun abolo komwu oto i kom obaŋewu a mom ikwo. Yia doŋ bino kwerowu oko. Abino miyo bomawu doko wi obur, kabedowu acil daŋ bino doŋ nono, mom daŋ doŋ abino ŋweyo giwu a ŋwece kur a yomoro cuny. Abino balo lobowu odoco, me wekokworwu ame bino bedo iye bed kede wur pire. Abino ketowu atata i akina rok ocele, ate woto pala romo iyi akure me ryemowu, lobowu doŋ te doŋ nono, bomawu luŋ daŋ te doko wi obur. “I kare-nono lobo koŋ te gwoko cabittere luŋ pi kare luŋ ame pwod tye nono, kun wun nwoŋo itye wunu i lobo okworwu: lobo koŋ bino we kun gwoko cabittere luŋ. Pi kare luŋ ame lobo pwod tye nono, lobo koŋ bino we, weo ame yam mom ru obilo i cabitwu luŋ i kare ame pwod onwoŋo ibedo wunu iye. Aco jo mogo i akinawu ame bino doŋ, abino cwayigi lworo i cunygi i lobo okworgi luŋ, ame bino miyo oriŋo ka pot yat ame yamo oyeŋo. Gin bino riŋo bala lon a riŋo pala romo, ote rette piny kun ŋattoro gire mom aryemo yorgi. Gin bino twomere kengi kengi, ŋat man i kom awottere, calo jo a riŋo leb pala romo, kadi bed ŋattoro gire nwoŋo mom aryemo yorgi; mom ibino bedo wunu i tekcunyoro me cuŋ i nyim okworwu. Ibino to wunu luŋ i akina orok, lobo okworwu bino camo komwu luŋ. Jo mogo i akinawu ame bino doŋ komgi bino gobere oko i lobo okworgi pi balgi; dok daŋ pi bal a kwarigi, komgi bino gobere oko calo gin. “Cite ka gin bino tuco balgi kede bal a kwarigi pi timgi areco i koma, kede pi pyem keda, te miyo an daŋ pyem kedgi, ate kelogi i lobo okworgi; ka ce jo-nono ame lirregi rik mom ru odonyo i cunygi doŋ odoko amwol, ote timo gin a culo balgi. Bino miyo doŋ apo i kom cikerena wan i Yakobo, abino po i cikerena wan Icaka, dok daŋ abino po i cikerena wan Iburaim, dok abino po pi lobowu daŋ. Cite gin bino weko lobo doŋ nono kun gwoko cabittere luŋ ame nwoŋo gire pwod odoŋ nono kun gin mom tye iye. Eka gin te timo gin a culo balgi, pien gin rik ocao gin ame aciko, dok daŋ yigi okwero icwilla. Cite kadi amannono, kare a gin tye i lobo orok mom abino cayogi, yia daŋ mom bino kwerogi atek ateka ame romo miyo aturo cikerena kedgi, pien an a Rwot Obaŋagi. Pirgi abino po pi cikerena a rik acikere kede i kwarigi ame rik akwanyo i lobo Miciri kun rok luŋ neno, me wek abed Obaŋagi; an a Rwot.” Magi en icwil luŋ kede gin a Rwot ociko, kede cik ame en oketo i akina en kede jo Icrael i wi kidi me Cinai, kun kobo baŋ Muca. Rwot okobo baŋ Muca ni, “Kob baŋ jo Icrael ni, Ka dano moro okwoijo kwoŋ a pire tek baŋ Rwot ame otiko kom dano, kun lubo wel ame yin iŋolo, wel ame iŋolo ame mako ico moro ame mwaka me dittere romo pyeraryo tuno kede naka i pyerabicel, wel ame iŋolo bino bedo cekel me ryal pyerabic, kun lubo cekel me kabedo acil. Ka ce dano-nono obedo dako, ibino ŋolo cekel pyeradek. Ka ce danonono mwaka me dittere romo abic tuno naka i pyeraryo, pi atin awobi ibino ŋolo cekel pyeraryo, me a nyako apar. Ka ce dano-nono obedo atin me dwe acel tuno kede i mwaka abic, ibinonolo cekel me ryal abic pi atin awobi, me atin a nyako cekel me ryal adek. Ka ce dano-nono mwaka me dittere romo pyerabicel dok kede malo, ibino ŋolo cekel apar wie abic pi ico, me a dako apar. Ka dano moro acan okato kare ame mom twero nwoŋo wel ame iŋolle, en bino tero dano ame okwoŋo pirenono i nyim alamdog, alamdog doŋ en a bino ŋolle wel, kun lubo gin ame dano okwoŋo-nono twero nwoŋo. “Ka ce kwoŋŋono otiko lee ame omio baŋ Rwot, lee moro keken ame ŋattoro omio baŋ Rwot, lee-nono myero bed acil. En mom bino loko dok i ginnoro ocele onyo keto moro ocele kakare kadi bed emito keto en aberrere akaka en araccere onyo en araccere akaka en aberrere; ka ce en loko lee moro kede lee wadgi, gin aryo luŋ ame olokogi-nono myero bed acil. Ka ce onwoŋo obedo lee moro ame cik ogeŋo, a mom otwero miyo me yalo Rwot, dano-nono bino tero lee-nono i nyim alamdog. Alamdog bino ŋolo wellere ka lee-nono ber onyo rac; wellere bino bedo kite ame yin alamdog iŋolo kede. Cite ka en mito lakoro, en bino medo acel me abic iye. “Ka ce ŋattoro ojalo ode me bedo acil baŋ Rwot, alamdog en abino ŋolo wellere, ka ber onyo rac; wellere bino bedo kite ame alamdog oŋolo kede. Ka ce ŋat ame omio ode-nono omito lakoro oko, en bino medo acel me abic iye, ode te bedo doŋ mege. “Ka ce ŋattoro ojalo dullobo mere baŋ Rwot, kun mio i kom lobo ame en oleo i baŋ kwari mere, ibino ŋolo wellere kun lubo kit koti ame obino coyo iye; ka koti-nono romo coyo koti cayiri puku adek, wellere bino bedo cekel me ryal pyerabic. Ka ce en omio poto mere i mwaka me jubili, wellere bino cuŋ i wel ame iŋolo-nono. Cite ka omio poto mere iceŋ a doŋ jubili okato oko, alamdog bino ŋolo wel lim a myero en cul pire kun poro i wel mwaka ame pwod odoŋ me tuno i mwaka me jubili, ote dwoko wel a yam iŋolo piny. Ka lon ame omio poto-nono mito lakoro oko, en bino medo acel me abic i kom wellere, poto mere doŋ te bedo mege. Cite ka en mom mito lakoro poto-nono, onyo ka otyeko cato poto oko baŋ ŋat ocele, mom doŋ obino lakoro atwal. Poto-nono ka ogonyo oko i kare me jubili, bino doŋ bedo acil baŋ Rwot, acalo poto ame doŋ ojalo oko atwal, alamdog en ame doŋ bino bedo wonnere. “Ka ce en ojalo baŋ Rwot poto moro ame onwoŋo owilo awila, kun mom obedo dul lobo ame en oleo alea i baŋ kwari mere, alamdog bino ŋolo wellere tuno naka i mwaka me jubili, dano-nono te culo wel ame oŋolo i ninonono me bed gin acil baŋ Rwot. I mwaka me jubili poto-nono bino dok i ciŋ ŋat a rik owilo i baŋe, ŋat ame poto-nono obedo mege ame eleo i baŋ kwari mere. Wel luŋ ame oŋolo bino lubo wel cekel me kabedo acil, kun cekel acel romo gera pyeraryo. “Ento itino kao me leyi mom obino jalo baŋ Rwot, pien itino kao luŋ obedo me a Rwot con; kadi twon onyo romo, obedo gire me a Rwot. Ka ce lee a cik ogeŋo, en bino wilo i baŋi i wel ame yin iŋolo, kun medo iye acel me abic, aco ka mom olakoro, yin ibino cato acata kun icato i wel ame yin iŋolo. “Ento gin ame dano ojalo baŋ Rwot i kom ginnoro ame tye baŋe, kadi dano onyo lee onyo poto ame oleo i baŋ kwari mere, mom ibino cato, dok daŋ mom obino lakoro; ginnoro luŋ ame ojalo baŋ Rwot nwoŋo en gin acil meicel baŋ Rwot. Ŋattoro ame ojalo baŋ Rwot me aneka, mom dok obino lakoro, obino neko gire aneka. “Acel me apar luŋ ame oya i lobo, kadi gin ame oceki poto onyo nyig yen onyak, mannono luŋ jami a Rwot, gin acil baŋ Rwot. Ka ce dano moro mito lakoro ginnoro i kom acel me apar, en bino medo acel me abic iye, Acel me apar me dok kede romi kede dyegi luŋ, acel me apar me leyi luŋ akato i te abiro akwat, gin luŋ bino bedo acil baŋ Rwot. Wonnere mom bino penyo ka ber onyo rac, dok daŋ mom bino loko i moro ocele; ka ce en aloko, gin aryo luŋ ame olokogi-nono myero bed acil; mom obino lakoro.” Magi en cik a rik Rwot ociko kede Muca i wi kidi me Cinai pi jo Icrael. I nino me agege me dwe me aryo, i mwaka me aryo ame jo Icrael oya kede i Miciri, Rwot rik okobo i Muca i kema me rwatte, i tim me Cinai, kun kobbe ni, “Kwan wel jo Icrael luŋ kun ilubo i doggola a kwarigi, dok daŋ co nyiŋ co luŋ acel acel, cakere i kom jo ame mwaka me ditogi oromo pyeraryo dok kede malo, jo Icrael luŋ a romo lweny. Ibino kwanogi wunu kede Aron kun ikwano wunugi eryoŋet eryoŋet. Dano acel ame oya iyi atekere acel acel bino konyowu, kun dano-nono bedo acalo adwoŋ a loo doggola a kwarogi. Nyiŋ jo ame bino konyowunono ene: Jo a Reuben, Elijur wot a Edeur; jo a Cimeon, Celumiel wot a Juricadai; jo a Juda, Nacon wot a Aminadab; jo Icakar, Netanel wot a Juar; jo a Jabulon, Eliab wot a Kelon; eka iyi awobe a Yucepu te bedo Elicama wot a Amikud pi jo Epraim, kede Gamaliel wot a Pedajur pi jo Manace; jo a Benjamin, Abidan wot a Gideon; jo a Dan, Akiejer wot Amicadai; jo Acer, Pagiel wot Okaran; jo a Gad, Eliacap wot a Deuel; jo a Naputali, Akira wot Enan.” Magi-nono gin jo ame oyero i akina lwak, gin obedo otel ame loo atekere a kwarogi kede odoŋe atekere me a jo Icrael. Muca kede Aron te kwanyo jo ame otuco nyiŋgi-nono, eka i nino me agege me dwe me aryo, gin te coko jo luŋ karacel; gin te bedo coye kengi kun olubo doggola a kwarigi dok daŋ olubo kite ame nyiŋ co luŋ ocoye kede acel acel, cakere i kom jo ame mwaka me ditogi oromo pyeraryo, dok kede malo, kite a Rwot rik ociko kede Muca. En okwanogi kittono i tim Cinai. Jo a Reuben, atin kao Icrael, ikwae mere ikokome kun lubere i doggola a kwarigi kite ame nyiŋ co ocoye kede acel acel, cakere i kom jo ame mwaka me ditogi oromo pyeraryo wot kede malo, jo luŋ ame romo wot i lweny, wel jo me atekere a Reuben oromo tutumia pyeraŋwen wie abicel kede mia abic nono. Jo a Cimeon, ikwae mere ikokome ame lubere i doggola a kwarigi kite ame nyiŋ co ocoye kede acel acel, cakere i kom jo ame mwaka me ditogi oromo pyeraryo wot kede malo, jo luŋ ame romo wot i lweny, wel jo me atekere a Cimeon oromo tutumia pyerabic wie aboŋwen kede mia adek nono. Jo a Gad, ikwae mere ikokome kun lubere i doggola a kwarigi kite ame nyiŋ co ocoye kede acel acel, cakere i kom jo ame mwaka me ditogi oromo pyeraryo wot kede malo, jo luŋ ame romo wot i lweny, wel jo me atekere a Gad oromo tutumia pyeraŋwen wie abic kede pyerabic nono. Jo a Juda, ikwae mere ikokome kun lubere i doggola a kwarigi kite ame nyiŋ co ocoye kede acel acel, cakere i kom jo ame mwaka me ditogi oromo pyeraryo wot kede malo, jo luŋ ame romo wot i lweny, wei jo me atekere a Juda oromo tutumia pyerabiro wie aŋwen kede mia abicel nono. Jo Icakar, ikwae mere ikokome kun lubere i doggola a kwarigi, kite ame nyiŋ ocoye kede acel acel, cakere i kom jo ame mwaka me ditogi oromo pyeraryo wot kede malo jo luŋ ame romo wot i lweny; wel jo me atekere Icakar oromo tutumia pyerabic wie aŋwen kede mia aŋwen nono. Jo a Jabulon, ikwae mere ikokome kun lubere i doggola a kwarigi kite ame nyiŋ co ocoye kede acel acel, cakere i kom jo ame mwaka me ditogi oromo pyeraryo wot kede malo, jo luŋ ame romo wot i lweny, wel jo me atekere a Jabulon oromo tutumia pyerabic wie abiro kede mia aŋwen nono. Jo a Yeeepu, ame obedo jo Epraim, ikwae mere ikokome kun lubere i doggola a kwarigi kile ame nyiŋ co ocoye kede, acel acel, cakere i komjo ame mwaka me ditogi oromo pyeraryo wot kede malo, jo luŋ ame romo wot i lweny, wel jo me atekere Epraim oromo tutumia pyeraŋwen nono kede mia abic nono. Jo a Manace, ikwae mere ikokome kun lubere i doggola a kwarigi kite ame nyiŋ co ocoye kede acel acel, cakere i kom jo ame mwaka me ditogi oromo pyeraryo wot kede malo, jo luŋ ame romo wot i lweny, wei jo me atekere a Manace oromo tutumia pyeradek wie aryo kede mia aryo nono. Jo a Benjamin, ikwae mere ikokome kun lubere i doggola a kwarigi kite ame nyiŋ ocoye kede acel acel, cakere i kom jo ame mwaka me ditogi oromo pyeraryo wot kede malo, jo luŋ ame romo wot i lweny, wei jo me atekere a Benjamin oromo tutumia pyeradek wie abic kede mia aŋwen nono. Jo a Dan, ikwae mere ikokome kun lubere i doggola a kwarigi kite ame nyiŋ co ocoye kede acel acel, cakere i kom jo ame mwaka me ditogi oromo pyeraryo wot kede malo, jo luŋ ame romo wot i lweny, wel jo me atekere a Dan oromo tutumia pyerabicel wie aryo kede mia abiro. Jo Acer, ikwae mere ikokome kun lubere i doggola a kwarigi, kite ame nyiŋ co ocoye kede acel acel, cakere i kom jo ame mwaka me ditogi oromo pyeraryo wot kede malo, jo luŋ ame romo wot i lweny, wel jo me atekere Acer oromo tutumia pyeraŋwen wie acel kede mia abic nono. Jo a Naputali, ikwae mere ikokome kun lubere i doggola a kwarigi, kite ame nyiŋ co ocoye kede acel acel, cakere i kom jo ame mwaka me ditogi oromo pyeraryo wot kede malo, jo luŋ ame romo wot i lweny, wel jo me atekere a Naputali oromo tutumia pyerabic wie adek kede mia aŋwen nono. Magi gin jo ame okwano welgi, ame rik Muca kede Aron okwano, kun otel a jo Icrael konyogi, jo apar wie aryo ame ŋat acel acel ocuŋ pi doggola a kwarogi. Mannono omio wei jo Icrael luŋ ame okwano kun lubere i doggola a kwarigi, cakere i kom jo ame mwaka me ditogi oromo pyeraryo wot kede malo, jo Icrael luŋ ame romo wot i lweny, welgi luŋ oromo tutumia mia abicel kede adek, kede mia abic pyerabic nono. Ento jo a Levi mom ibino kwano wunu welgi karacel kedgi kun lubere atekere a kwarigi. Pien Rwot onwoŋo okobbi Muca ni, “Atekere a Levi keken en a mom ibino kwano welgi i akina jo ocele ca. Ento myero iketgi obedo olo kema me kop me caden; gin lo jami mere luŋ anaka ginnoro luŋ ame tye iye. Gin en ame bino tiŋo kema kede jami ame tye iye luŋ, gin bino tic iye; gonygi bino guro ke ma dyere. Kare ame kema me kop caden mito cako wot, gin jo a Levi en ame bino puto; dok ka omito guro kema, jo a Levi daŋ en ame bino guro. Ka ce ŋattoro ocele ata onoko ke ma aceggi, dano-nono obino neko oko. Jo Icrael bino guro kemagi eryoŋet eryoŋet, kun dano acel acel i gonnyere, dok ŋat acel acel bedo ite bendera atekere mere. Ento jo a Levi bino guro megi guro kema me kop caden dyere, me wek akemo moro kur pot i kom jo Icrael.” Jo Levi bino gwoko kema me kop caden, Jo Icrael rik daŋ te timo kittono; gin otio ginnoro luŋ ame Rwot ociko kede Muca. Rwot okobbi Muca kede Aron ni, “Jo Icrael bino guro kemagi, ŋat acel acel bino guro i te bendera atekeregi, kun gin tye kede anennoro me doggola a kwarigi. Gin bino guro mano kema me rwatte amano kun nyim kemagi tikere i kema me rwatte. Jo ame bino guro kemagi tuŋ kide, tuŋ ame ceŋ donnyo iye, bino bedo jo ame tye i te bendera a Juda kun oguro eryoŋet eryoŋet; atel a jo Nacon obedo wot Aminadab, ame jo mere okwa no oromo tutumia pyerabiro wie aŋwen kede mia abicel nono. Jo ame bino guro kemagi aceggi jo Icakar kede jo Jabulon bino bedo jo me atekere Icakar; atel obedo Natanel wot a Juar, ame jo mere okwano oromo tutumia pyerabicel wie aŋwen kede mia aŋwen nono. Eka dok atekere a Jabulon; atelgi obedo Eliab wot a Kelon, ame jo mere okwano oromo tutumia pyerabic wie abiro kede mia aŋwen nono. Wel jo luŋ onwoŋo tye i gony a Juda, kun lubere eryoŋetgi, oromo tutumia mia acel kede pyeraboro wie abicel kede mia aŋwen nono. Ka wot ocakere, jonnono bino telo yo. “Jo a Reuben en ame bino bedo i te benderagi tuŋ anyarolum, kun oguro eryoŋet eryoŋet; atel a jo Reuben obedo Elijur wot a Cedeur, ame jo mere okwano oromo tutumia pyeraŋwen wie abicel kede mia abic nono. Jo ame bino guro kemagi aceggi kedgi bino bedo jo me atekere a Cimeon; atel a jo Cimeon obedo Celumiel wot a Juricadia, ame jo mere okwano oromo tutumia pyerabic wie aboŋwen kede mia adek nono. Eka dok atekere a Gad; atel a jo Gad obedo Eliacap wot a Reuel, ame jo mere okwano oromo tutumia pyeraŋwen wie abic kede mia abicel i pyerabic nono. Wel jo luŋ onwoŋo tye i gony a Reuben, kun lubere eryoŋetgi, oromo tutumia mia acel kede pyerabic wie acel kede mia aŋwen i pyerabic nono. Ka wot ocakere, jonnono en ame bino ciro aryo i wot. “Eka kema me rwatte te doŋ cako wot karacel i jo me gony a jo Levi ame onwoŋo tye i dyere; kite ame onwoŋo rik gin oguro kede gonygi, en ame daŋ obino wot kede, kun ŋat acel acel bedo i kabedo mere ikome, ame daŋ olubere i bendera i bendera. Jo Epraim en ame bino bedo i te benderagi tuŋ to kun oguro eryoŋet eryoŋet; atel a jo Epraim obedo Elimaca wot Amikud, ame jo mere okwano oromo tutumia pyeraŋwen nono kede mia abic nono. Jo ame bino bino guro kemagi aceggi kedgi bino bedo jo me atekere a Manace; atel a Manace obedo Gamaliel wot a Pedajur, ame jo mere okwano oromo tutumia pyeradek wie aryo kede mia aryo nono. Eka dok atekere a Benjamin; atel a jo Benjamin obedo Abidan wot a Gideoni, ame jo mere okwano oromo tutumia pyeradek wie abic kede mia aŋwen. Wel jo luŋ onwoŋo tye i gony Epraim, kun lubere eryoŋetgi, oromo tututmia mia acel kede aboro kede mia acel nono. Gin bino ciro me adek i wot. “Eka jo a Dan te bedo i te benderagi tuŋ anyarodi kun oguro eryoŋet eryoŋet; atelgi obedo Akiejer wot Amacadai, ame jo mere okwano oromo tutumia pyerabicel wie aryo kede mia abiro nono. Jo ame bino guro kemagi aceggi kedgi bino bedo jo me atekere Acer; atel a jo Acer obedo Pagiel wot Okaran, ame okwano jo mere oromo tutumia pyeraŋwen wie acel kede mia abic nono. Eka dok atekere a Naputali; atel a jo Naputali obedo Akira wot Enan, ame jo mere okwano oromo tutumia pyerabic wie adek kede mia aŋwen nono. Wel jo luŋ onwoŋo tye i gony a jo a Dan, kun lubere eryoŋetgi, oromo tutumia mia acel kede pyerabic wie abiro kede mia abicel nono. Gin bino ciro icen kun olubere i bendera i bendera. “Magi gin jo Icrael, kite ame okwanogi kede kun lubere i doggola a kwarigi; jo luŋ onwoŋo tye i gony ame okwano eryoŋet eryoŋet rik oromo tutumia mia abicel kede adek kede mia abic i pyerabic nono. Ento jo a Levi rik mom okwano i kom jo Icrael, kite a rik Rwot ociko kede Muca. “Jo Icrael rik daŋ otimo kittono. Kit a Rwot rik ociko kede Muca luŋ, gin oguro daŋ kemagi kittono kun oguro i te benderagi; gin luŋ daŋ ote cako wot kun ociro kittono ŋat acel acel kede doggola mere, kite a doggola a kwarigi tye kede.” Magi gin ikwae Aron kede Muca i kare ame Rwot obedo kop i Muca i wi kidi me Cinai. Nyiŋ awobe Aron ene: Nadab atinnere me kao, kede Abiku, Eleajar kede Itamar; maginono nyiŋ awobe Aron, gin obedo olamdog ame owiro kede moo, ame rik oketogi i dog ticgi me bedo olamdog. Cite Nadab kede Abiku rik obin oto oko i nyim Rwot i kare a gin otio i mac a rik mom ocikogi me tic kede i nyim Rwot i tim me Cinai; gin rik onwoŋo pwod pe itino moro. Mano en omio Eleajar kede Itamar otio tic me olamdog kun papagi pwod kwo. Rwot okobbi Muca ni, “Kel atekere a Levi ceggi, ibin iketgi i nyim alamdog Aron me gin ti baŋe. Gin bino tiyo tic apapat pire kede pi lwak luŋ i nyim ke ma me rwatte, kare ame gin tio ticgi i kema, Gin en ame bino gwoko jami luŋ ame tye i kema me rwatte, dok daŋ otio tic pi jo Icrael i kare ame otio ticgi i kema. Ibino miyo jo a Levi baŋ Aron kede awobe mere; gin doŋ atyeko miyogi atwal baŋe kun akwanyogi oko i akina jo Icrael. Dok ibino keto Aron kede awobe mere, eka gin te tiyo ticgi me olamdog; cite ka ŋattoro ocele onoko aceggi, obino neko dano nono oko.” Rwot dok te kobbi Muca ni, “Nen, doŋ atyeko kwanyo jo a Levi i akina jo Icrael akaka itino kao luŋ ame ogeo yabo ot nyodo i akina jo Icrael. Jo a Levi bino bedo jona, pien itino kao luŋ mera. I nino ame rik aneko iye itino kao luŋ i Miciri ca, en ame daŋ rik akwero iye itino kao luŋ ame tye iyi Icrael me bedo mega, pien itino leyi kede me a dano, gin luŋ bino bedo mega; an a Rwot.” “Rwot okobo baŋ Muca i tim me Cinai ni, Kwan wel awobe a Levi luŋ kun ilubo i doggolagi kede doggola a kwarigi, cakere i kom co ame ditogi doŋ oromo dwe acel wot kede malo,” Muca daŋ te kwano welgi kite a Rwot okobo-nono, kite a yam ociko. Nyiŋ itino a Levi-nono ene: Gercon, Kokat kede Merari. Nyiŋ awobe a Gercon kun lubere i doggolagi ene: Libini kede Cimei. Awobe a Kokat kun lubere i doggolagi ene: Amuram, Ijar, Kebron kede Ujiel, Awobe a Merari kun lubere i doggolagi ene: Makali kede Muci. Magi gin doggola a Levi, kun lubo doggola a kwarigi. Jo a Gercon obedo jo me doggola a Libuni kede jo me doggola a Cemei; magi-nono gin jo a Gercon. Wel co iye ame okwano, cakere i kom jo ame ditogi oromo dwe acel wot kede malo oromo tutumia abiro kede mia abic nono. Jo doggola a Gercon rik oguro kemagi i ŋe kema a Rwot ame dok tutuŋ to, kun atel a jo Gercon obedo Eliacap wot a Lael. Tic awobe a Jo Gercon i kema me rwatte obedo tic me gwoko kema, akemmere kede gi-wumo wie, cuka me wumo doggola kema me rwatte, cuka aŋaba i dyekal, cuka wumo doggola me dyekal ame oguro kema kede keno me lam, kede tollege; kede dok tic ocele luŋ ame mitte i jami magi luŋ. Jo a Kokat obedo jo me doggola Amuram kede doggola a jo Ijar, kede doggola a jo Kobron, kede doggola a jo Ujiel; magi-nono gin doggola a jo Kokat. Wel jo iye ame okwano, cakere i kom jo ame mwaka me ditogi oromo dwe acel wot kede malo oromo tutumia aboro kede mia abicel nono, ame gin rik tio ticgi i kabedo acil. Jo doggola a Kokat rik oguro kemagi i ŋe kema ame dok tutuŋ anyarolum, kun atel a jo Kokat obedo Eliajapan wot a Ujiel. Ticgi rik obedo me gwoko canduk, meja, akara mac, keno lam, jami luŋ ame bedo i kabedo acil ame alamdog tio kedgi ducu kede boŋo me icika; kede dok tic ocele luŋ ame mitte i jami magi luŋ. Eleajar wot Aron, alamdog en ame bino bedo adwoŋ ame loo otel a jo Levi, dok en daŋ ame bino neno jo ame gwoko kabedo acil. Jo Merari obedo jo me doggola a Makali, kede doggola a Muci; maginono gin jo me doggola a Merari. Wel co iye ame okwano cakere i kom jo ame ditogi oromo dwe acel wot kede malo oromo tutumia abicel kede mia aryo nono, Atel a jo Merari obedo Juriel wot Abikail. Gin rik oguro kemagi i yo tutuŋ anyarodi me kema a Rwot. Tic ame omio baŋ awobe a Merari rik obedo tic me gwoko bayi luŋ me kema, arii mege luŋ, pagi mege luŋ, acib tergi luŋ kede ginnoro luŋ otiko ticcere; kede dok tic ocele luŋ ame mitte i jami magi luŋ; karacel kede pagi luŋ i dyekal, kede acib tergi kede teke luŋ ame gurogi, kede tollege. Jo ame rik oguro kemagi i nyim kema tuŋ kide, i nyim kema me rwatte kun ame ceŋ donnyo iye, rik obedo Muca, Aron kede awobe mere. Gin onwoŋo otyeko ketogi me gwoko tic ducu ame mitte i kabedo acil, me tiyo tic luŋ ame mitte pi jo Icrael. Ka ce ŋattoro ocele ata onoko aceggi, danonono obino neko oko. Jo luŋ ame rik okwano welgi i kom jo Levi, ame Muca kede Aron okwano welgi pi lubo cik a Rwot, kun lubo kite a doggolagi tye kede, co luŋ ame ditogi oromo dwe acel wot kede malo oromo tutumia pyeraryo wie aryo. Rwot okobo baŋ Muca ni, “Kwan wel itino kao luŋ, ame co a tye i akina jo Icrael, cakere i kom itino ame ditogi doŋ oromo dwe acel wot kede malo; kwan welgi kun ilubo i nyiŋgi. Ibino tero jo a Levi bed mega, an a Rwot, akaka itino luŋ ame tye i akina jo Icrael, ter daŋ lim a jo Levi luŋ akwo akaka itino kao luŋ me lim akwo me a jo Icrael.” Muca daŋ te kwano wel itino kao luŋ ame tye i akina jo Icrael kite a Rwot ociko kede. Wel itino a co luŋ ame okwano kun lubo kite ame nyiŋgi ocoye kede cakere i kom en ame ditogi oromo dwe acel dok kede malo oromo tutumia pyeraryo wie aryo, kede mia aryo i pyerabiro wie adek. Rwot okobo baŋ Muca ni, “Mi jo a Levi bed akaka itino kao luŋ ame tye i akina jo Icrael, ter daŋ lim a jo Levi luŋ akwo akaka limgi; jo a Levi bino bedo jona; an a Rwot. Pi lakoro itino kao a jo Icrael mia aryo kede pyerabiro wie adek ame odoŋ ame co a jo Levi orem oko pirgi ibino gamo cekel abic pi dano acel acel; ibino gamo kun ilubo cekel me kabedo acil, ame cekel acel acel romo gero pyeraryo. Lim ame olakoro i jo ame odoŋŋono ibino miyo baŋ Aron kede awobe mere.” Mano en omio Muca rik te gamo lim me lakere i baŋ jo a rik odoŋ, ame wel a jo Levi mom oromo me lakorogi. En rik te gamo lim me ryal ibaŋ itino kao a jo Icrael ame romo cekel tutumia acel kede mia adek kede pyerabicel wie abic, kun lubo cekel me kabedo acil. Muca te miyo lim me lakere-nono baŋ Aron kede awobe mere, kite ame Rwot ociko kede Muca. Rwot okobo baŋ Muca kede Aron ni, “Kwan wel awobe a Kokat i akina jo Levi kun ilubo doggolagi kede doggola a kwarigi cakere i kom jo ame mwaka me ditogi oromo pyeradek naka i kom jo ame mwaka me ditogi oromo pyerabic, jo luŋ ame romo donyo i tiyo tic ame tye i kema me rwatte. Tic ame awobe a Kokat bino tiyo i kema me rwatte ene; gin bino tic i kom jami acil meicel. Kare ame kema doŋ bino cako wot. Aron kede awobe mere en ame bino donyo i kema me gonyo boŋo me gera: Nyiŋ lim me kare-nono icika kede wumo canduk me kop me caden. Gin bino dok lutogi iyi cao ame okwoo i lao dyegi eka ote peto boŋo ame kome luŋ obedo bululu bululu i kom mannono, gin doŋ te rwako ludi iye. Gin bino peto boŋo obedo bululu bululu i kom meja me ogati me aketa i nyim Rwot, gin doŋ te keto cani i wie, kede tabo me odok akur, kede weer, kede cupa me liyo mot amata; ogati me nino luŋ daŋ myero bed i wie. Eka ote doŋ peto boŋo arema i wie, ote dok luto i cao ame okwoo i lao dyegi, ote doŋ rwako ludi iye. Obino dok kwanyo boŋo obedo bululu bululu ote wumo i gicibo mac tara, karacel kede tara mere, kede makaccere, kede cani mere, kede tabo moo luŋ. Gin bino boyo oko karacel kede jami ticcere luŋ kun tye iyi cao okwo i lao dyegi ote doŋ keto i wi ludi me tiŋo. Obino peto boŋo obedo bululu bululu i kom keno lam me jabu, eka ote luto oko iyi cao ame okwo i lao dyegi, ote doŋ rwako ludi mere iye. Gin bino kwanyo jami ame otio kedgi i kabedo acil luŋ, te ketogi luŋ i boŋo ame obedo bululu bululu, ote dok wumo oko i lao dyel, ote doŋ pyelo i wi ludi me tiŋogi. Gin te jobo buru i keno me lam oko, ote peto boŋo ame obedo amaramar i wie; ote daŋ keto iye jami tic i keno lam luŋ, jami ame otio kede, weer me waŋo mac, acob riŋo, atok buru kede becen, jami tic i keno me lam luŋ; ote dok wumo oko i lao dyel, ote doŋ rwako ludi mere. Kare ame Aron kede awobe mere doŋ otyeko wumo kabedo acil karacel i jami luŋ me kabedo acil i kare ame gin kobo gonygi oko, awobe a Kokat doŋ bino bino me tino, cite gin myero kur gudde i kom jami luŋ acil, me gin kur to. Maginono en jami me kema me rwatte ame awobe a Kokat bino tiŋo. “Eleajar wot Aron alamdog en ame bino loyo moo tara, odok akur, kede mot moko kwon me yalo Obaŋa nino ducu, kede moo wir, kun daŋ dok loo kom kema luŋ kede jami luŋ a bedo iye, kabedo acil kede jami luŋ ame otio kede.” Rwot dok te kobo baŋ Muca kede Aron ni, “Kur iwek: atekere me doggola a jo Kokat to tum oko i akina jo Levi, ento myero itimgi kit man me wek gin bed kwo, kun mom oto i kare ame gin bino noko jami acil meicel aceggi: Aron kede awobe mere en ame bino donyo te wot nyutti ŋat acel acel ticcere kede yeccere ame en bino tiŋo. Ento gin myero kur dony iye me wot neno kom jami acil kadi acel, me gin kur to.” Rwot dok te kobo baŋ Muca ni, “Kwan daŋ wel awobe a Gercon, kun ilubo i doggolagi kede doggola a kwarigi; cakere i kom jo ame mwaka me ditogi romo pyeradek naka i kom jo ame mwaka me ditogi romo pyerabic, jo luŋ ame romo donyo i tiyo tic ame tye i kema me rwatte. Tic ame jo doggola a Gercon bino tiyo ene, tic me atia kede tic me tino yec, Gin bino tiŋo cuka me kema, kede ke ma me rwatte kede gi-wumo wie, kede lao dyegi okwoo me wumo wie malo, kede cuka me geŋo doggola ke ma me rwatte, kede cuka me aŋaba me dyekal, kede cuka me geŋo doggola me dyekal ame oguro kema kede keno lam, kede lollege, kede me tic luŋ ame otio kede iye; gin bino tiyo tic luŋ ame mitte i kom jami-nono. Awobe a Gercon bino tiyo ticgi luŋ kite ame Aron kede awobe mere ocikogi kede i kom jami luŋ ame gin bino tiŋo, kede ginnoro luŋ ame gin bino tiyo; dok daŋ yin en ame ibino poko yecgi luŋ ame gin bino gwoko. Man en tic ame jo me doggola a Gercon bino tiyo i kema me rwatte; dok Itamar wot Aron alamdog, en ame bino loyo ticgi. “Awobe a Merari daŋ ibino kwano welgi kun ilubo i doggolagi doggola kede doggola a kwarigi; cakere i kom jo ame mwaka me ditogi oromo pyeradek naka i kom jo ame mwaka me ditogi oromo pyerabic, jo luŋ ame romo donyo i tiyo tic ame tye i kema me rwatte. Man en gin ame gin bino tiyo, acalo ticgi luŋ i kema me rwatte; bayi me kema luŋ, kede arii mege luŋ, pagi mege luŋ, acib tergi luŋ, kede pagi luŋ ame oguro dyekal, kede acib tergi luŋ, kede leke luŋ me gurogi, kede tollege, kede jami me tic luŋ ame otio kede iye, kede ginnoro ocele luŋ ame otio i tic ducu. Yin ibino pokkigi jami ame omito ni gin tiŋ kun inyutogi i nyiŋgi. Man en tic ame jo me doggola a Merari bino tiyo i kema me rwatte; dok Itamar wot alamdog Aron, en a bino loyo ticgi.” Muca kede Aron karacel kede otel a lwak okwano wel a jo Kokat kun lubo i doggolagi, kede doggola a kwarigi, cakere i kom jo ame mwaka me ditogi oromo pyeradek naka i kom jo ame mwaka me ditogi oromo pyerabic, jo luŋ ame romo donyo i tiyo tic ame tye i kema me rwatte; welgi luŋ ame okwano kun olubo i doggola i doggola oromo tutumia aryo kede mia abiro kede pyerabic nono. Man en wel a jo me doggola a Kokat luŋ ame tio tic i kema me rwatte, ame Muca kede Aron okwano welgi, kite a Rwot rik ociko kun kobo baŋ Muca. Wel awobe a jo me doggola a Gercon kun lubere i doggolagi kede doggola a kwarigi, cakere i kom jo ame mwaka me ditogi oromo pyeradek naka i kom jo ame mwaka me ditogi oromo pyerabic, jo luŋ ame romo donyo i tiyo tic ame tye i kema me rwatte, welgi luŋ ame okwano kun olubo i doggola i doggola oromo tutumia aryo kede mia abicel kede pyeradek nono. Man en wel a jo doggola a Gercon luŋ ame tio tic i kema me rwatte, ame Muca kede Aron okwano welgi, kite a Rwot ociko kun kobo baŋ Muca. Wel awobe a jo me doggola a Merari kun lubere i doggolagi kede doggola a kwarigi, cakere i kom jo ame mwaka me ditogi oromo pyeradek naka i kom jo ame mwaka me ditogi oromo pyerabic, jo luŋ ame romo donyo i tiyo tic ame tye i kema me rwatte, welgi luŋ ame okwano kun olubo i doggola i doggola oromo tutumia adek kede mia aryo nono. Man en wel jo me doggola a Merari luŋ ame tio tic i kema me rwatte ame Muca kede Aron okwano welgi, kite a Rwot rik ociko kun kobo baŋ Muca. Jo luŋ ame okwano i akina jo Levi, ame rik Muca kede Aron karacel kede otel a jo Icrael okwano, kun lubere i doggolagi kede doggola a kwarigi, cakere i kom jo ame mwaka me ditogi oromo pyeradek naka i kom jo ame mwaka me ditogi oromo pyerabic, jo luŋ ame romo donyo i tiyo tic ame tye i kema me rwatte, jo ame okwano i akinagi, welgi oromo tutumia aboro kede mia abic kede pyeraboro nono. Rik ore poko tic kite a Rwot ociko kun kobo baŋ Muca, ŋat acel acel ote miyo ticcere ame en tio onyo jami ame en tiŋo. Muca rik te kwano welgi kittono, kite a Rwot rik ocike kede. Rwot dok te kobo baŋ Muca ni, “Cik jo Icrael mi odobo ya oko i gony, kede ŋat acel acel ame tut mollo i kome kede ŋat acel acel ame odoko ŋat a cik ogeŋo pi gudo kom dano oto. Cwalgi owot oko, kadi co onyo mon, kun imiogi oya oko i gony, me gin kur bal gonygi ame an abedo iye i akinawunie.” Jo Icrael daŋ te timo kittono, gin te ryemogi oko i gony; kite a rik Rwot ociko kede Muca, gin otimo kittono. Rwot dok okobbi Muca ni, “Kobbi jo Icrael ni, Ka ce ico moro onyo dako moro otimo balloro ame jo balo kun gin oturo kede cik a Rwot, danonono nwoŋo oroco. En bino tuco bal ame etimo-nono; dok daŋ bino culo gin arac ame etimo-nono kun medo iye acel me abic, te miyo baŋ dano ame etimo gin arac baŋe-nono. Cite ka dano-nono mom tye i wattere moro ame myero cul waŋ gin arac ame otimo baŋe, obino doŋ culo waŋ gin arac ame otimo-nono baŋ Rwot pi alamdog, kun ogamo omedo i kom nyok romo me kwanyo bal ame otio i tic me kwanyo bal i kome. Mot luŋ onyo jami luŋ acil ame jo Icrael kelo baŋ alamdog bino bedo me alamdog. Jami luŋ acil ame dano acel acel mio, bino bedo mege; ginnoro luŋ ame dano-moro omio baŋ alamdog, bino bedo mege.” Rwot dok okobo baŋ Muca ni, “Kobbi jo Icrael ni, Ka ce dako a lo moro ogak oko eka te timo timmoro ame turo cik me abor i nyim cware, ka omio lo moro obuto kede eka te bedo kun cware mom ŋeo, dok ŋattoro oneno daŋ gire mom kadi bed en oballe kene, acadennoro ame moko kop i kom dako-nono daŋ mom, pien ŋattoro onwoŋe iye mom tye; ka ce cunnyoro me nyeko te mako ico, kun nyeko make i kom cege ame oballe kene-nono, onyo ka cunnyoro me nyeko omako ico i kom dako mere kun kono dako gire mom oballe. Ico bino tero dako mere baŋ alamdog, kun tero daŋ mot me yalo Obaŋa ame mitte pi dako mere-nono. En bino tero moko kwon gwata acel me moko cayiri; mom bino onyo moo iye, mom daŋ bino keto odok luban iye, pien mano mot me moko kwon ame omio me nyeko, en obedo mot moko kwon ame omio me poyo ballono. “Alamdog bino tero dannono aceggi, te keto i nyim Rwot. Alamdog dok bi no tero pii acil i gulu ame ocweo i lobo, eka te juko apua moro i piny i dye kema, te onyo i pii. Alamdog bino keto dako-nono i nyim Rwot, bino gonyo yer wi dako-nono weko ony iyak, te keto mot me moko kwon me me po i ciŋe, ame obedo mot moko kwon ame omio pi nyeko. Alamdog bino mako pii akec me ceno jo i ciŋe. Alamdog te miyo dako-nono kwon kun kobo ni, ‘Ka ce lo moro mom obuto kedi, ka ce mom igak oko ite bale keni kun yin itye i te loc a cwari, Obaŋa myero kur ye ginnoro arac timere i komi pi pii akec me ceno jo-ni. Cite ka ce onwoŋo igak oko kun pwod itye i te loc a cwari, ka ce iballe keni, ite miyo ico ocele a mom obedo cwari obuto kedi, (alamdog bino miyo dako-nono kwoŋo kwoŋ kun cenne kene, eka te kobbi dako-nono ni,) Rwot myero mi idok ŋat ame jo turwu tio kede nyiŋ i ka gin kwoŋere, i kare ame Rwot bino miyo amuruni twil oko kun yii daŋ deŋ; wek pii me ceno jo-ni odony naka iyi amontenni, omi yii deŋ, eka te twilo amuruni oko.’ Dako te gamo ni ‘Amen, Amen.’ “Alamdog doŋ te coyo kop me kwoŋŋono i buk, te lwoko yino mere oko i pii akec ca, eka te miyo dakonono mato pii akeccono, pii ame oceno i jo, te donyo naka i yie, te miye twon rem a mom kobere. Alamdog dok te kwanyo mot moko kwon ame omio pi nyeko i ciŋ dako-nono, te yoko mot moko kwonnono i nyim Rwot, te doŋ tero i keno lam. Alamdog te juko moko kwonnono poŋ ciŋe acel, te waŋo i keno lam, obed me po i kome, en dok te miyo dako-nono mato pii. A doŋ otyeko miye mato pii oko, ka ce onwoŋo en otyeko bale kene kun otimo timmoro ame turo cik me abor i nyim cware, pii me ceno jo-nono bi no donyo iyi amontennere te miye twon rem a mom kobere; yie te den oko, anaka amuru mere daŋ te twil oko, dako-nono te doko ŋat ame jo tio kede nyiŋe i kwoŋere i akina jo me turgi. Cite ka dannono gire onwoŋo mom otimo bal, ginnoro arac mom bino timere i kome, dok daŋ bino nywalo itino.” Man en cik a mako kop me nyeko, ka ce dako ame pwod tye i te loc a cware, ogak oko kun balle kene, onyo ka ce cunnyoro me nyeko omako ico, kun make i kom dako mere, en bino keto dako i nyim Rwot, alamdog bino tic i kom dako kun lubo cik man luŋ. Ico gire mom bino bedo i balloro, ento bal bino dok i wi dako ka ce onwoŋo obalo. Rwot dok okobo baŋ Muca ni, “Kobbi jo Icrael ni, Ka ce lo moro onyo dako moro okwoŋo kwoŋ a pire tek, kwoŋ me bedo dano akwera, ŋat ame opokere kene oko baŋ Rwot, en myero daŋ pokere oko i koŋo kede kit mat ocele luŋ ame mero dano; en myero kur mat koŋo olok awac onyo kit koŋo moro ocele ame mero dano, mom daŋ bino mato pig olok, akadi camo nyige adyaka onyo otwo. Pi kare luŋ ame nwoŋo en opokere kene baŋ Rwot, en mom bino camo ginnoro ame oya i kom olok, akadi nyige atitino mere i yie onyo poke. “Pi kare luŋ ame nwoŋo en pwod tye i kwonere me pokere kene baŋ Rwot, mom bino gudo wie, tuno ka kare me kwoŋŋere-nono doŋ otum, en gire bino bedo dano acil; bino weko yer wie yuggo ibim. “Pi kare luŋ ame nwoŋo en opokere kene baŋ Rwot, en mom bino noko kom dano oto ceggi. En mom bino bale te doko ŋat a cik ogeŋo kadi kom pi pappere, onyo tottere, onyo ominnere, onyo aminnere, ka ce gin oto, pien pokere mere kene baŋ Rwot nwoŋo pwod tye i wie. Pi kare luŋ ame nwoŋo en pwod opokere kene, nwoŋo en obedo dano acil baŋ Rwot. “Ka ce ŋattoro otulle atula i laŋete, ame te miyo en balo wie ame okwero, en bino lyelo wie oko i nino me lonyere mere; bino lyelo i nino me abiro. I nino me aboro mere en bino tero amam aryo onyo itino awele aryo baŋ alamdog i doggola kema me rwatte. Alamdog bino miyo acel pi mot me bal kede acel me mot awaŋa, kun tio tic me kwanyo bal i kom dano-nono, pien nwoŋo obalo pi gudo kom dano oto. En dok bino cako kwero wie i nino-nono ikome, te dok pokere pire kene me bedo dano a Rwot pi kare luŋ ame nwoŋo en pwod opokere, bino daŋ kelo atin nyok romo ame dittere oromo mwaka acel me bed mot yalo Obaŋa me walakino i roc; cite kare mere me agege ca nwoŋo doŋ oballe oko, pien en odoko ŋat a cik ogeŋo, pien pokere mere kene nwoŋo rik oballe oko. “Man en cik a mako dano akwera ame kare mere me pokere kene doŋ otum. Obino kelo i doggola kema me rwatte, en bino yalo Rwot i mottere, atin nyok romo acel ame dittere oromo mwaka acel me mot me bal kede nyok romo acel kun roccoro daŋ mom ikome, mano bino bedo mot awaŋa; kede akale acel kede nyok romo acel romo a roccoro mom i kome, me mot kweyo cuny, karacel i dita me ogati a mom orubo i tobi, capat me moko kwon apwottere ame orubo kede moo, kede capat areppere ame mom orubo i tobi, ame oweo moo i komgi, kede mot me moko kwon kede motgi me amata. Alamdog bino terogi i nyim Rwot te miyo mot me ballere kede mot awaŋa, eka dok te miyo nyok romo me bed mot me kweyo cuny Rwot, karacel kede dita ogati a mom orubo i tobi. Alamdog dok te miyo mot me moko kwon kede mot amata. Dano okwero-nono bino lyelo yer wie ame onwoŋo okwero-nono i doggola kema me rwatte, te coko yer wie-nono keto i mac ame tye i te mot me kweyo cuny. Alamdog bino kwanyo bad nyok romo a doŋ otedo oko, kede capat acel a mom orubo i tobi iyi dita me ogati a tobi mom iye, kede capat areppere acel a mom orubo i tobi, te ketogi luŋ i cuny ciŋ dano akwera, kare ame nwoŋo doŋ olyelo yer wie me akwera oko. Alamdog bino yokogi luŋ me bedo mot ayoka i nyim Rwot; magi-nono iner alamdog acillege, karacel kede ogok ame oyoko, kede amuru ame omio; dano akwera doŋ twero mato koŋo olok. “Man en cik a mako dano akwera ame okwoŋo kwoŋ. En bino miyo mottere baŋ Rwot ame oporo kwoŋŋere ame en onwoŋo okwoŋo me bedo dano akwera, karacel kede gin ame en romo nwoŋo; en bino timo kun lubo cik me pokere mere acalo dano akwera kun daŋ lubere i kwoŋŋere.” Rwot okobbi Muca ni, “Kobbi Aron kede awobe mere ni, Ibino wunu lamo gum i kom jo Icrael kit man: ibino wunu kobo baŋgi ni, Rwot myero omiwu gum, dok daŋ ogwokwu; Rwot omi waŋe oryeny i komwu, otimwu ber; Rwot otiŋ waŋe i komwu, omiwu kuc. “Gin bino keto nyiŋa kittono i kom j Icrael, an abino miyogi winyo.” I nino ame rik Muca otyeko guro iye kema, owiro kede moo, dok daŋ okwero oko karacel kede jami mere luŋ. I kare-nono otel a jo Icrael ame gin odoŋe me doggola a kwarigi, otel me atekere ame loo jo ame okwano welgi, gin omio motgi ote kelo i nyim Rwot. Gin omio gadigadi abicel ame tye kede awum wigi, kede twoni apar wie aryo; otel aryo aryo omio gadigadi acel acel, kun ŋat acel acel mio twon acel acel; gin omio mano luŋ i nyim kema. Rwot te kobbi Muca ni, “Gam jamigi-nono luŋ i baŋgi me ti kedgi pi tic ame tye i kema me rwatte; mi jami-nono luŋ baŋ jo Levi, kun imio baŋ ŋat acel acel kite a ticcere tye kede.” Mano en omio Muca te gamo gadigadi luŋ kede twoni, te miyo baŋ jo Levi. Omio gadigadi aryo kede twoni aŋwen baŋ awobe Gercon ame oporo ticgi; dok te miyo gadigadi aŋwen kede twoni aboro baŋ awobe a Merari, ame oporo ticgi, kun gin luŋ tye i loc Itamar wot Aron alamdog. Ento mom omio moro baŋ awobe a Kokat, pien gin rik onwoŋo oketogi i tic me gwoko jami acil ame myero gin tiŋgi i wi gwokgi. Otel te miyo mot kwero keno lam i nino ame owiro kede moo-nono; otel omio motgi i nyim keno me lam. Rwot dok te kobo baŋ Muca ni, “Gin bino miyo motgi kun atel wic acel acel mio mere i nino mere kene, me kwero keno lam.” Ŋat a rik te geyo miyo mottere i nino me agege obedo Nacon wot Aminadab, me atekere a Juda. En omio cani ryal ame pekkere romo cekel mia acel kede pyeradek, kede becan ryal acel ame pekkere romo cekel pyerabiro, ka oporo i cekel me kabedo acil; gin aryo luŋ onwoŋo moko kwon apwottere ame orubo kede moo, tye opoŋ yigi, me mot me moko kwon. Dok te miyo daŋ tabo jabu acel ame pekere romo cekel apar, ame odok akur opoŋ yie; kede atin twon acel, nyok romo acel, kede atin nyok romo acel ame mwaka me dittere doŋ oromo acel, me mot awaŋa kede dok nyok dyel acel me mot me bal. En te daŋ dok miyo twoni aryo, nyogi romi abic, nyogi dyegi abic, kede itino nyogi romi abic ame mwaka me ditogi oromo acel acel pi mot me kweyo cuny. Man en mot ame rik Nakucon wot Aminadab omio. I nino me aryo mere, Netanel wot a Juar ame obedo atel a jo Icakar en ate miyo mege. En rik te miyo me mottere, cani ryal acel ame pekkere romo cekel mia acel kede pyeradek, kede becen ryal acel ame pekkere romo cekel pyerabiro, kun nwoŋo oporo kede cekel me kabedo acil; gin aryo luŋ onwoŋo moko kwon apwottere ame orubo kede moo tye opoŋ yigi, me mot me moko kwon, Dok te miyo daŋ tabo jabu acel ame pekkere romo cekel apar ame odok akur opoŋ yie; kede atin twon acel, nyok romo acel, kede atin nyok romo acel ame mwaka me dittere doŋ oromo acel, me mot awaŋa; kede dok nyok dyel acel me mot me bal. En te daŋ dok miyo twoni aryo, nyogi rommi abic, nyogi dyegi abic kede itino nyogi romi abic, ame mwaka me ditogi doŋ oromo acel acel, pi mot me kweyo cuny. Magi gin, mot ame rik Netanel wot a Juar omio. I nino me adekkere, Eliab wot a Kelon ame obedo atel a jo Jabulon te miyo mege. En rik te miyo mottere cani ryal acel ame pekkere romo cekel mia acel kede pyeradek, kede becen ryal acel ame pekkere romo cekel pyerabiro, kun nwoŋo oporo i cekel me kabedo acil; gin aryo luŋ onwoŋo moko kwon apwottere ame orubo kede moo tye opoŋ yigi, me mot me moko kwon. Dok te miyo daŋ tabo jabu acel ame pekkere romo cekel apar, ame odok akur opoŋ yie; kede atin twon acel, nyok romo acel, kede atin nyok romo acel ame mwaka me dittere doŋ oromo acel, me mot awaŋa; kede dok nyok dyel acel me mot me bal. En daŋ dok te miyo twoni aryo, nyogi romi abic, nyogi dyegi abic, kede itino nyogi romi abic ame mwaka me ditogi doŋ oromo acel acel, pi mot me kweyo cuny. Magi gin mot ame rik Eliab wot a Kelon omio. I nino me aŋwennere, Elijur wot a Cedeur ame obedo atel a jo Reuben te miyo mege, En rik te miyo mottere cani ryal acel ame pekkere romo cekel mia acel kede pyeradek, kede becen ryal acel ame pekkere romo cekel pyerabiro, kun nwoŋo oporo i cekel me kabedo acil; gin aryo luŋ nwoŋo moko kwon apwottere ame orubo kede moo tye opoŋ yigi, me mot me moko kwon. Dok te miyo daŋ tabo jabu acel ame pekkere romo cekel apar, ame odok akur opoŋ yie; kede atin twon acel, kede nyok romo acel, kede atin nyok romo acel ame mwaka me dittere doŋ oromo acel, me mot awaŋa; kede dok nyok dyel acel me mot me bal. En te daŋ dok miyo twoni abic, nyogi romi abic, nyogi dyegi abic kede itino nyogi romi abic ame mwaka me ditogi doŋ oromo acel acel, pi mot me kweyo cuny. Magi en mot ame rik Elijur wot a Cedeur omio. I nino me abiccere, Celumiel wot a Jericadai ame obedo atel a jo Cimeon, te miyo mege. En rik te miyo cani ryal acel ame pekkere romo cekel mia acel kede pyeradek, kede becen ryal acel ame pekkere romo cekel pyerabiro, kun nwoŋo oporo i cekel me kabedo acil; gin aryo luŋ onwoŋo moko kwon apwottere ame orubo kede moo tye opoŋ yigi, me mot me moko kwon. Dok te miyo daŋ tabo jabu acel ame pekkere romo cekel apar, ame odok akur opoŋ yie; kede atin twon acel, kede nyok romo acel, kede atin nyok romo acel ame mwaka me dittere doŋ oromo acel, me mot awaŋa kede dok nyok dyel acel me mot me bal. En te dok miyo twoni aryo, nyogi romi abic, nyogi dyegi abic kede itino nyogi romi abic ame mwaka me ditogi doŋ oromo acel acel, pi mot me kweyo cuny. Magi en mot ame rik Celumiel wot a Jericadai omio. I nino me abiccellere Eliacap wot a Deuel ame obedo atel a jo Gad te miyo mege, En rik te miyo cani ryal acel ame pekkere romo cekel mia acel kede pyeradek, kede becen ryal acel ame pekkere rom cekel pyerabiro, kun nwoŋo oporo i cekel me kabedo acil; gin aryo luŋ onwoŋo moko kwon apwottere ame orubo kede moo tye opoŋ yigi, me mot me moko kwon. Dok te miyo daŋ tabo jabu acel ame pekkere romo cekel apar, ame odok akur opoŋ yie; kede atin twon acel, nyok romo acel, kede atin nyok romo acel ame mwaka me dittere doŋ oromo acel, me mot awaŋa; kede dok nyok dyel acel me mot me bal. En te daŋ dok miyo twoni aryo, nyogi romi abic, nyogi dyegi abic kede itino nyogi rommi abic ame mwaka me ditogi doŋ oromo acel acel, pi mot me kweyo cuny. Magi en mot ame rik Eliacap wot a Deuel omio. I nino me kany wie aryo mere, Elicama wot a Amikud ame obedo atel a jo Epraim te miyo mege. En rik te miyo cani ryal acel ame pekkere romo cekel mia acel kede pyeradek, kede becen ryal acel ame pekkere romo cekel pyerabiro, kun nwoŋo oporo i cekel me kabedo acil; gin aryo luŋ onwoŋo moko kwon apwottere ame orubo kede moo tye opoŋ yigi, me mot me moko kwon. Dok te miyo daŋ tabo jabu acel ame pekkere romo cekel apar, ame odok akur opoŋ yie; kede atin twon acel, nyok romo acel, kede atin nyok romo acel ame mwaka me dittere doŋ oromo acel, me mot awaŋa; kede dok nyok dyel acel me mot me bal. En te daŋ dok miyo twoni aryo, nyogi romi abic, nyogi dyegi abic kede itino nyogi romi abic ame mwaka me ditogi doŋ oromo acel acel, pi mot me kweyo cuny. Magi gin mot ame rik Elicama wot Amikud omio. I nino me kany wie adekkere Gamaliel wot a Pedajur ame obedo atel a jo Manace te miyo mege. En rik te miyo cani ryal acel ame pekkere romo cekel mia acel kede pyeradek, kede becen ryal acel ame pekkere romo cekel pyerabiro, kun nwoŋo olubo cekel me kabedo acil; gin aryo luŋ onwoŋo moko kwon apwottere ame orubo kede moo tye opon yigi. Dok te miyo daŋ tabo jabu acel ame pekkere romo cekel apar, ame odok akur opoŋ yie; kede atin twon acel, nyok romo acel, me mot awaŋa; romo acel ame mwaka me dittere doŋ oromo acel, me mot awaŋa; kede dok nyok dyel acel me mot me bal. En te daŋ dok miyo twoni aryo nyogi romi abic, nyogi dyegi abic kede itino nyogi romi abic ame mwaka me ditogi doŋ oromo acel acel, pi mot me kweyo cuny. Magi en mot ame rik Gamaliel wot a Pedajur omio. I nino me kany wie aŋwennere, Abidan wot a Gideoni ame obedo atel a jo Benjamin te miyo mege, En rik te miyo cani ryal acel ame pekkere romo cekel mia acel kede pyeradek, kede becen acel ame pekkere romo cekel pyerabiro, kun nwoŋo oporo kede cekel me kabedo acil; gin aryo luŋ onwoŋo moko kwon apwottere ame orubo kede moo tye opoŋ yigi, me mot me moko kwon. Dok te miyo daŋ tabo jabu acel ame pekkere romo cekel apar, ame odok akur opoŋ yie; kede atin twon acel, nyok romo acel kede atin nyok romo acel ame mwaka me dittere doŋ oromo mwaka acel, me mot awaŋa; kede dok nyok dyel acel me mot me bal. En te daŋ miyo twoni aryo, nyogi romi abic, nyogi dyegi abic kede itino nyogi romi abic ame mwaka me ditogi doŋ oromo acel acel, pi mot me kweyo cuny. Magi en mot ame rik Abidan wot a Gideoni omio. I nino me tomonnere, Akiejer wot Amicadai ame obedo atel a jo Dan te miyo mege. En rik te miyo cani ryal acel ame pekkere romo cekel mia acel kede pyeradek, kede becen ryal acel ame pekkere romo cekel pyerabiro, kun nwoŋo oporo kede cekel me kabedo acil; gin aryo luŋ onwoŋo moko kwon apwottere ame orubo kede moo tye opoŋ yigi, me mot me moko kwon. Dok te miyo daŋ tabo acel ame pekkere romo cekel apar, ame odok akur opoŋ yie; kede atin twon acel, nyok romo acel, kede atin nyok romo acel ame mwaka me dittere doŋ oromo acel, me mot awaŋa; kede dok nyok dyel acel me mot me bal. En te daŋ dok miyo twoni abic, nyogi romi abic, nyogi dyegi abic kede itino nyogi romi abic ame mwaka me ditogi doŋ oromo acel acel, pi mot me kweyo cuny. Magi en mot ame rik Akiejer wot Amicadai omio. I nino me apar wie acellere, Pagiel wot Okoran ame obedo atel a jo Acer te miyo mege. En rik te miyo cani ryal acel ame pekkere romo cekel mia acel kede pyeradek, kede becen ryal acel ame pekkere romo cekel pyerabiro, kun nwoŋo oporo i cekel me kabedo acil; gin aryo luŋ onwoŋo moko kwon apwottere ame orubo kede moo tye opoŋ yigi, me mot me moko kwon. Dok te miyo daŋ tabo jabu acel ame pekkere romo cekel apar, ame odok opoŋ yie; kede atin twon acel, nyok romo acel, kede atin nyok romo acel ame mwaka me dittere doŋ oromo acel, me mot awaŋa; kede dok nyok dyel acel me mot me bal. En te daŋ dok miyo twoni aryo, nyogi romi abic, nyogi dyegi abic, kede itino nyogi romi abic ame mwaka me ditogi doŋ oromo mwaka acel acel, pi mot me kweyo cuny. Magi gin mot ame rik Pagiel wot a Okoran omio. I nino me apar wie aryo mere, Akira wot Enan ame obedo atel a jo Naputali te miyo mege. En rik te miyo cani ryal acel ame pekkere romo cekel mia acel kede pyeradek, kede becen ryal ame pekkere romo cekel pyerabiro, kun nwoŋo oporo kede cekel me kabedo acil; gin aryo luŋ onwoŋo moko kwon apwottere ame orubo kede moo tye opoŋ yigi, me mot me moko kwon. Dok te miyo daŋ tabo jabu acel ame pekkere romo cekel apar, ame odok akur opoŋ yie; kede atin twon acel, nyok romo acel, kede atin nyok romo acel ame mwaka me dittere doŋ oromo acel, me mot awaŋa; kede dok nyok dyel acel me mot me bal. En te daŋ dok miyo twoni aryo, nyogi romi abic nyogi dyegi abic kede itino nyogi romi abic ame mwaka me ditogi doŋ oromo acel acel, pi mot me kweyo cuny. Magi en mot ame rik Akira wot Enan omio. Magi en mot me kwero keno lam ame rik omio i nino ame owiro iye keno lam kede moo, ame otel a jo Icrael omio: cani ryal apar wie aryo, becen me ryal apar wie aryo, tabo jabu apar wie aryo, kun cani me ryal acel acel pekkere romo cekel mia acel kede pyeradek, kede becen acel acel pekkere romo cekel pyerabiro nono. Pek a ryal me jami-nono luŋ te romo cekel tutumia aryo kede mia aŋwen kun nwoŋo oporo kede cekel me kabedo acil. Tabo me jabu onwoŋo tye apar wie aryo ame odok akur opon yigi, kun acel acel pekkere romo cekel apar apar kun nwoŋo oporo i cekel me kabedo acil. Pek a jabu me tabo luŋ te romo cekel mia acel kede pyeraryo nono. Lim akwo luŋ me mot awaŋa te romo twoni apar wie aryo, nyogi romi apar wie aryo, kede itino nyogi romi apar wie aryo ame mwaka me ditogi doŋ oromo acel acel karacel i motgi me moko kwon; kede nyogi dyegi apar aryo, me mot me bal. Lim akwo luŋ me mot me kweyo cuny te romo twoni pyeraryo wie aŋwen, nyogi romi pyerabicel, nyogi dyegi pyerabicel, kede itino nyogi romi pyerabicel ame mwaka me ditogi doŋ oromo acel acel. Magi-nono en mot me kwero keno lam ame omio a doŋ otyeko wiro keno lam oko kede moo. I kare ame Muca owoto i kema me rwatte me kop i Rwot, en owinyo dwonnoro ame onwoŋo tye akop kede kun ya i malo i wi kom-me-kica ame onwoŋo ocibo ocuŋ i wi canduk me kop me caden, kun kobo kede winyere i akina okerubi aryo. Rwot okobbi Muca ni, “Kobbi Aron ni, Ka icibo tara malo, tara abiro bino lyel menyo nyim gi-cibo tara.” Aron daŋ te timo kittono; en ocwinyo tara te cibogi malo wek meny kan a tye i nyim gi-cibo tara, kite a rik Rwot ociko kede Muca, Man en kite ame otio kede gi-cibo tara. Rik otio i jabu ame oteto anyul; cakere i tere tuno kede naka iyi ature mere, onwoŋo oteto ateta kede anyul. Otio kun olubo cal a rik Rwot onyuto baŋ Muca. Rwot dok te kobbi Muca ni, “Kwany jo Levi oko i akina jo Icrael, eka te lonyogi. Kare ame doŋ ilonyogi, tim kit man: kirgi i pii me lwoko bal, migi olyel komgi oko luŋ i lyedi, olwok daŋ boŋŋigi oko, ote lonyere kengi. Migi okwany atin twon ocele karacel kede mot me moko kwoŋŋere me moko apwottere ame orubo kede moo, eka dok ite kwanyo atin twon ocele me mot bal. Ibino tero jo Levi i nyim kema me rwatte, kun lwak jo Icrael luŋ ocokere karacel. Ka imio jo Levi me mot baŋ Rwot jo Icrael bino keto ciŋgi i wi jo Levi, eka Aron te miyo jo Levi i nyim Rwot me gin bed me mot ayoka ame oya i baŋ jo Icrael, me gin doŋ bed itiyo tic a Rwot. Jo Levi dok te keto ciŋgi i wi twoni, ote miyo acel me mot me bal, kede acel me mot awaŋa baŋ Rwot, me kwanyo bal i kom jo Levi. Ibino tero jo Levi i nyim Aron kede awobe mere, ite miyogi me mot, me gin bed acalo mot ayoka baŋ Rwot. “Ibino poko jo Levi i akina jo Icrael kittono, jo Levi doŋ bino bedo jo mera. Jo Levi doŋ bino donyo i tiyo tic ame tye i kema me rwatte ame nwoŋo doŋ ityeko lonyogi oko, dok daŋ imiyogi oko acalo mot ayoka. Pien otyeko miyogi oko baŋa i akina jo Icrael, kun omiogi akaka itino kao a jo Icrael luŋ ame ogeo yabo ot nyodo, an doŋ agamogi me bedo mega. Pien itino kao luŋ i akina jo Icrael, me a dano kede me leyi luŋ obedo mega, rik akwerogi oko me bedo mega i nino ame rik anek iye itino kao luŋ i Miciri. Atyeko doŋ kwanyo jo Levi me leyo kakargi, gin itino kao luŋ i akina jo Icrael. Dok daŋ atyeko miyo jo Levi baŋ Aron kede awobe mere acalo mot, kun gin doŋ ya oko i akina jo Icrael me tiyo tic pi jo Icrael i kema me rwatte, kede dok pi kwanyo bal i kom jo Icrael, me two moro arac kur pot i kom jo Icrael, pi noko kabedo acil aceggi.” Muca kede Aron karacel kede jo Icrael rik daŋ te timo kittono i kom jo Levi; kite ame Rwot rik ociko kede Muca luŋ i kop a dok i kom jo Levi, jo Icrael daŋ otimo kittono i komgi, Jo Levi te lonyere kengi kengi i kom balgi, ote daŋ lwoko boŋŋigi; Aron te miyogi acalo mot ayoka i nyim Rwot, Aron te tiyo tic me kwanyo bal i komgi me wek gin bed ame olony. Jo Levi te donyo i tiyo ticgi ame tye i kema me rwatte, kun okonyo Aron kede awobe mere kite a rik Rwot ociko kede Muca i kom jo Levi; gin daŋ rik te timo kittono. Rwot dok te kobo baŋ Muca ni, “Man en kop a mako jo Levi. Jo ame mwaka me ditogi oromo pyeraryo wie abic dok kede malo, jo-nono bino donyo i tiyo tic ame tye i kema me rwatte. Ka mwaka me ditogi oromo pyerabic, gin bino weko ticgi-nono oko, mom dok obino medde i ticgi atwal. Ento gin bino konyo omegogi ame tio i kema me rwatte me cobo ticgi kakare, cite mom obino tiyo tic ikome. Ibino timo jo Levi kittono i kom kop a mako ticgi.” Rwot rik okobbi i Muca i tim me Cinai i dwe me agege me mwaka me aryo ame onwoŋo gin doŋ oya oko i lobo me Miciri kun kobbe ni, “Jo Icrael myero kwer ecuban me Kato i kare ame aciko. I nino dwe apar wie aŋwen me dwe man otyeno, ibino kwero wunu i kare ame ociko. Ibino kwero wunu kun ilubo wunu icwillere luŋ kede gin ame ociko luŋ.” Eka Muca daŋ rik te titti jo Icrael ni myero gin kwer Kato. Gin rik te kwero ecuban me Kato i dwe me agege, i nino dwe apar wie aŋwen otyeno i tim me Cinai; kite a rik Rwot ociko kede Muca luŋ, jo Icrael daŋ otimo kittono. Rik onwoŋo tye jo mogo ame cik onwoŋo ogeŋogi pi gudo kom dano oto, jo-nono rik mom twero kwero Kato i nino-nono. Gin rik te wot baŋ Muca kede Aron i ninonono, ote kobbe ni, “Wan giwa doŋ odoko jo a cik ogeŋo oko pi gudo kom dano oto, kara piŋo ogeŋowa miyo mot a Rwot karacel i jo Icrael i nino ame ociko?” Muca rik te kobo baŋgi ni, “Koŋ ikur wunu, me koŋ awiny gin ame Rwot bino ciko i komwu.” Rwot te kobbi Muca ni, “Ka ce ŋattoro i akinawu onyo i akina ikwaewu odoko ŋat a cik ogeŋo pi gudo kom dano oto onyo onwoŋo owoto kannoro abor, en gire pwod bino kwero ecuban me Kato a Rwot. Gin bino kwero i dwe me aryo i nino dwe apar wie aŋwen otyeno; gin bino camo ogati a tobi mom iye kede pot dekkoro akec, Kur iwek wunu ginnoro doŋ tuno naka odiko, kur daŋ tur cogo mere moro; obino kwero kun olubo icwil luŋ a mako Kato. Cite dano ame cikkoro mom ogeŋo, dok daŋ mom owoto kannoro abor, ento mom dok te kwero ecuban me Kato, dano-nono waŋe bino rwenyo oko i akina jo turgi, pien mom omio mot a Rwot i kare mere ame ociko, ballere gire bino bedo i wie. Ka ce arokkoro ame bedo i akinawu, mito daŋ kwero ecuban me Kato a Rwot, en twero kwero kun lubo icwil me Kato kede gin ame ociko. Cik bino bedo acel keken pi arok kede pi anywalli me lobo.” I nino ame oguro iye kema a Rwot, en ame pol daŋ bino wumo iye kom kema oko, ame en kema me kop me caden; bino wumo wi kema oko otyeno kun nen calo mac naka odiko. Eka te bedo gire amanno didik, kun pol wumo wi kema dyeceŋ eka gin acalo mac te wumo dyewor. Ka pol owarre oko i wi kema, jo Icrael cako wotgi anyim, kan ame pol ocuŋ iye, jo Icrael guro kemagi kannono. Jo Icrael obedo cako wotgi kun olubo cik a Rwot dok daŋ obedo guro kemagi kun olubo cik a Rwot; ka ce pol pwod owumo wi kema a Rwot oko, gin omedde bedo gigi i gonygi. Kadi bed pol obedo wumo wi kemagi kare alac, gin jo Icrael daŋ medde gwoko gin a Rwot ociko, kun mom oya i kannono. Kare ocele pol wumo wi kema pi nino anonok meicel, cite pi gwoko gin a Rwot ociko, gin daŋ obedo i gonygi, eka dok pi lubo cik a Rwot, gin oya oko i kannono. Kare ocele pol twero wumo wi kema cakere otyeno naka odiko, te warre oko, gin daŋ ote cako wot oko, onyo ka ce dok omedde pi nino ocele acel, kadi iwor acel, kare ame pol owarre kede keken, en ame gin daŋ cako wot iye. Kadi bed ori i wi ke ma pi nino aryo, onyo dwe acel, onyo pi kare moro alalac ka ce pol pwod omedde wumo wi kema, kun bedo iye kannono, jo Icrael daŋ koŋ bedo i gonygi kun mom oya i kannono. Gin oguro kemagi pi lubo gin a Rwot ociko, dok daŋ ocako wotgi pi lubo gin a Rwot ociko, kun ogwoko gin a Rwot ociko kite a rik ociko Muca. Rwot dok te kobo baŋ Muca ni, “Ti apel me ryal aryo, tetgi ateta kede anyul: ticgi bino bedo me lwoŋo lwak i cokere kede me miyo lwak cako wot. Ka okuto apel aryo luŋ, lwak luŋ bino cokere baŋi i doggola kema me rwatte. Ento ka okuto apel acel keken, otel wic ame gin odoŋe ame tye i atekere luŋ me Icrael bino cokere baŋi. Aco ka okuto dwone okok icel keken idwon me cukkoro cuny mony, gony luŋ ame tye tutuŋ kide bino cako wot. Ka dok omedo kuto tyen me aryo, gony luŋ ame tye tutuŋ anyarolum bino cako wot. Obino kuto apel kok i dwon me cukkoro cuny mony ka ce jo acako wot. Cite ka imito lwoŋo jo karacel, obino kuto, ento myero kur mi kok i dwon me cukkoro cuny mony. Awobe Aron ame gin olamdog en ame bino kuto apel. Cik me kuto apel bino bedo cik atwal, ituno i kare ikwaewu luŋ. Ka onwoŋo iwot wunu lweny okworwu ame odiowu i lobowu, ibino goyo wunu duru kun apel luŋ kok, me wek po pirwu i nyim Rwot Obaŋawu, eka ote larowu oko i baŋ okworwu. I nino ame cunywu yom iye daŋ, kede iyi ecuban ame ocikowu pirgi, kede i kare me cako dwewu anyen, ibino kuto wunu apel i wi mot awaijawu kede i wi motwu me kweyo cuny; apel bi no kok me miyo po pirwu i nyim Obaŋawu; an a Rwot Obaŋawu.” I mwaka me aryo, nino dwe pyeraryo nono, me dwe me aryo pol te cako warre oko i wi kema me kop me caden, jo Icrael te cako wot me ya oko i tim me Cinai kun okokoba akokob; pol rik te geyo cuŋ i tim me Paran. Man en tyen me agege ame gin ocako wot pi cik a Rwot ame Muca okobbigi, Bendera a jo Juda en ame otelo yo kun woto eryoŋet eryoŋet; kun Nakucon wot Aminadab en obedo atel wi monygi, Atel wi mony a jo Icakar obedo Natanel wot a Juar, kede atel wi mony me atekere a Jabulon te bedo Eliab wot a Kelon. Kare ame doŋ oputo kema oko, awobe a Gercon kede awobe a Merari, ame gin otiŋ kema, gin te cako wot. Bendera me gony a Reuben daŋ te cako wot eryoŋet eryoŋet, kun atel wi monygi obedo Elijur wot a Cedeur. Atel wi mony me atekere a Cimeon obedo Calamiel wot a Juricadai. Atel wi mony me atekere a Gad te bedo Eliacap wot a Deuel. Jo Kokat te dok cako wot, kun otiŋo jami acil luŋ; rik oguro kema oko kun gin mom ru otuno. Eka bendera me gony a Epraim te cako wot eryoŋet eryoŋet kun atel monygi Elicama wot Amikud. Atel wi mony me atekere a Manace te bedo Gamaliel wot a Pedajur. Atel wi mony me atekere a jo Benjamin te bedo Abidan wot a Gideoni. Eka icennere dok bendera me gony a jo Dan te cako wot luŋ eryoŋet eryoŋet, kun gin en a doŋ coko te gonye luŋ kun atel wi monygi Akiejer wot Amicadai. Atel wi mony me atekere a jo Acer te bedo Pagiel wot Okoran. Atel wi mony me atekere a Naputali te bedo Akira wot Enan. Man en kite a rik jo Icrael owoto kede, kun lubere eryoŋet eryoŋet i kare ame gin ciro me cako wotgi. Muca rik te kobo baŋ Kobab wot a Rewel, or Muca ame rik dano me Midian ni, “Wan doŋ ocako wotwa me wot i kabedo ame Rwot okobo pire ni, ‘Abino miyo baŋwu.’ Doŋ ba, myero iwot kedwa, wan obino timi ber, pien Rwot doŋ ociko oko ni ebino timo Icrael ber.” Ento en te kobo ni, “An gira mom abino wot, an abino dok turwa, baŋ jowa.” Ento jo te kobbigi ni, “Tim ber kur iwekwa, pien yin iŋeo ni wan obino guro kemawa i tim, yin ibino konyowa acalo waŋwa. Dok daŋ ka ce ibino wot karacel kedwa, ginnoro luŋ aber ame Rwot bino timo i komwa, wan daŋ obino timo baŋi kittono.” Gin rik te cako ya oko i nyim kidi a Rwot, i wot me nino adek; adekkono onwoŋo canduk me cikere a Rwot en a woto telo nyimgi kun yenyo kede ka weogi, kun pol a Rwot woto i wigi malo dyeceŋ, i kare luŋ ame gin ocako ya i gonygi. Kare luŋ ka canduk cako wot, Muca kobo ni, “Ya doŋ malo ama Rwot, me imi okworri keketa atata; dok me jo a dagi riŋ oko i nyimi.” Ento ka canduk cuŋ me weo, Muca kobo ni, “Dwog doŋ ceŋ ama Rwot, baŋ jo Icrael tutumia i tutumia.” Jo Icrael rik te bedo ŋuŋura pi cangi kun Rwot winyo; kare ame Rwot doŋ owinyo, akemo omake, eka mac a Rwot rik te lyel i akinagi, te waŋo kakamogo oko i ŋet gonygi. Lwak te kok baŋ Muca, eka Muca te kwayo Rwot, mac ame onwoŋo alyel doŋ te cako to. Mano en omio ote cako nyiŋ kabedo-nono ni, Tabera pien mac a Rwot rik olyel i akinagi. I kare-nono jo ocele ame rokgi papat ame onwoŋo tye i akinagi rik obedo jo a cunygi pupuka meicel, omio jo Icrael daŋ dok te ero koko, kun okobo ni, “Koŋ inen ba, kono obedo giwa i riŋo me acamawa! Pwod opoyo rec a rik ocamo me nono i Miciri, kede okwer, kede okono, atungulu aboco mege kede en atino mege karacel kede en a tikkege; aco aman i kare-ni yiwa doŋ otwo imek, ginnoro doŋ mom tye kadi acelloro, kono ka manna ame orio neno-ni.” Manna rik onwoŋo cal i koti bel, dok daŋ nen calo odok yat olwoŋo ni bedola, Jo rik coko ote rego kede kidi, onyo odo aoda kede apany, eka ote tedo i gulu, ote tedo i capat; capattere ka icamo, mittere calo capat otedo kede moo. Rik ka toyo oluk i gony dyewor, manna daŋ onwoŋo obino kede. Muca rik te winyo jo me doggola acel acel tye akoko, kun ŋat acel acel tye i dog kema mere; akemo rik te mako Rwot atek meicel, yi Muca mom te bedo yom. Muca te kobo baŋ Rwot ni, “Piŋo kara itimo amironi arac kit man? Dok piŋo kara mom anwoŋo pwoccoro i nyimi ame omio yin doŋ iyimo yec a lwak magi luŋ i wia? An abedo totogi gin luŋ bo? An en anywalogi, omio yin ikobba ni, ‘Tiŋgi i kori kite ame apidi tiŋo kede atin ame dot, i lobo ame rik ikwoŋo ni ibino miyo baŋ kwarigi.’ Kara riŋo ame aromo miyo baŋ jo man luŋ abino nwoŋo kwene? Pien gin obedo kok i nyima kun okobo ni, ‘Miwa riŋo me ocam.’ An gira mom aromo yeyo lwak man luŋ pira kena, yeccere pek okato kare oko baŋa. Ka pwod ibino bedo timo kit man, tika doŋ iru neka gira oko, ka ce anwoŋo pwoccoro i nyimi, me kur doŋ abed neno canna.” Rwot okobo baŋ Muca ni, “Cok ka jo pyerabiro i akina odoŋe a jo Icrael, ame yin iŋeo ni gin obedo odoŋe a lwak ame loogi; kelgi i kema me rwatte, migi ocuŋ kuno karacel kedi. An abino piny me kop kedwu kuno, abino kwanyo cunnyoro i komi, eka ate keto i komgi; gin bino konyi yeyo peko a lwak, me yin kur dok ibed yeyo keni. Kobbi lwak ni, ‘Lonyere wunu pi diki, ibino camo wunu riŋo; pien ibedo kok wunu kun Rwot winyo, ni, “Ŋa kara abino miyowa riŋo me acama? Pien wan giwa rik otye aber i Miciri.” Pi mannono Rwot bino miyowu riŋo, ibino wunu camo. Mom ibino wunu camo nino acel keken, onyo nino abic, onyo nino apar, onyo nino pyeraryo, ento pi dwe acel twal, tuno ka riŋo doŋ pello i wumwu, dok daŋ yiwu doŋ okwero oko, pien ikwero wunu Rwot ame bedo i akinawu, kun ikok wunu i nyime ni, “Piŋo kara rik oya oko i Miciri?” ’ ” Cite Muca te kobo ni, “Jo ame an abedo i akinagi ame woto i tyengi, welgi romo tutumia mia abicel; ento yin ikobo ni, ‘Abino miyowu me icam wunu pi dwe acel twal!’ Obino nekkigi dok kede dyegi wek romgi? Onyo obino cokkigi rece luŋ me nam me wek romgi?” Rwot ogamo dog Muca ni, “Ciŋ Rwot doŋ odoko acek oko bo? Ibino neno aman ka ce koppa bino cobere kakare baŋi onyo pe.” Muca te wot oko, te wot tito kop a Rwot okobo baŋ jo; eka te coko jo pyerabiro i akina odoŋe me Icrael te canogi mano kema. Rwot rik te yitto piny i pol, eka te kop kedgi; te kwanyo cunnyogo ame onwoŋo tye i kom Muca, te keto i kom odoŋe pyerabiro-nono. Kare ame cuny opoto i komgi, gin ocako rabo kop Obaŋa acalo odwarpiny. Cite gin mom dok te medde timo kittono. Jo aryo rik onwoŋo odoŋ i gony, acel nyiŋe Eldad, en ocele nyiŋe Medad, cuny rik daŋ te poto i komgi. Gin daŋ onwoŋo rik tye i akina jo ame ocoo nyiŋgi, cite gin gigi rik mom onwoŋo owoto i kema, mannono omio gin obedo rabo kop acalo odwarpiny i gony. Atin awobi moro te riŋo wot kobbi Muca ni, “Eldad gin kede Medad tye i gony arabo kop Obaŋa acalo odwarpiny.” Eka Yocwa wot a Nun, akony Muca, ame en ŋat acel i akina jo a rik oyero, te kobo ni, “Adwoŋŋa Muca, jukgi oko.” Cite Muca te kobbe ni, “Yin nyeko omaki pira ce? Kono jo a Rwot luŋ onwoŋo obedo odwarpiny, kono ber, ame Rwot te onyo cuny i komgi!” Muca kede odoŋe a jo Icrael te doŋ dok i gony. Yamo moro te kodo kun oya i baŋ Rwot, te kelo aluru apipim i nam, te corre piny i ŋet gony, kan ame oony iye laccere romo wot me nino acel tuŋ cel kede dok wot me nino acel tuŋ ocele, kun omano gony amana, ame opoŋ malo futi adek twal ya i piny. I nino-nono luŋ kede dyewor benebene, kede orwo mere daŋ, lwak obedo depo aluru. Ŋat odepo anok, mege oromo puku pyeradek; gin te moyo mano gony luŋ, me akannagi. I kare ame riŋo aluru pwod tye omomoka i lakgi, kun gin mom ru ocamo otum, akemo te mako Rwot i kom lwak, Rwot te goyogi kede too edeke agwa meicel. En omio nyiŋ kabedo nono olwoŋo ni, Kibrot-atava, pien oyiko iye kom jo a rik keo riŋo omako. Jo te ya i Kibrot-atava wot a Kajerot; gin te bedo i Kajerot. Miriam kede Aron te cako kobo kop arac i kom Muca pi dako mere nyaka a jo Kuc, ame onwoŋo en onyomo, pien onwoŋo rik en onyomo nyaka a jo Kuc. Gin obedo kobo ni, “Rwot obedo miyo Muca keken en ame kobo koppere bo? Mom obedo miyowa miyowa daŋ kobo koppere?” Rwot te winyo koppono oko. Muca rik onwoŋo dano a mwol meicel, ame kato jo luŋ ame rik onwoŋo tye i wi lobo. Oyot Rwot te ru kobbi Muca kede Aron kede Miriam ni, “Wun adek ducu, wot wunu i kema me rwatte.” Gin adek luŋ daŋ ote wot. Rwot rik te yitto piny i pagi me pol, te cuŋ i doggola kema, eka te lwoŋo Aron kede Miriam; gin aryo luŋ ote kato anyim. Rwot te kobo ni, “Winy wunu koppa. Ka ce tye adwarpinnyoro i akinawu, an Rwot anyutte kena baŋe i anyut, akobo kede i wan lek. Mom atimo kittono baŋ amirona Muca; atyeko miyo oda luŋ i ciŋe. Akobo kede dog i dog, kun akobo atira, mom dok i kop a mom atira; dok en neno kite a Rwot cal kede. Piŋo kara mom ibedo wunu lworo me kobo kop arac i kom amirona Muca?” Akemo omako Rwot i komgi, te wot oko. Kare ame pol owarre oko i wi kema, nen ba, dobo orwatte i kom Miriam atar calo pee. Aron te lokere baŋ Miriam, nen ba, dobo orwatte oko i kome. Aron te kobo baŋ Muca ni, “Ama adwoŋŋa, kur iket can i komwa pien wan otimo tim me miŋo, daŋ doŋ obalo. Kur imi en bed calo atin ame oto iyi totere, ko me te cako top oko kun mom ru onywalo.” Muca te kok baŋ Rwot ni, “Caŋe ba, ama Rwot, abako doga baŋi.” Cite Rwot te kobbi Muca ni, “Kono pappere rik onwoŋo oŋulo lao i waŋe, kono mom en obedo i lewic pi nino abiro? Myero koŋ cege i ot pi nino abiro; i ne mannono ote kele doŋ i gony.” Rik daŋ ote cego Miriam i ot i ŋe gony pi nino abiro; jo Icrael mom omedde i wotgi tuno waŋ ame odwoggo Miriam i gony. I ŋe mannono, jo Icrael doŋ te cako wotgi kun oya oko i Kejerot, ote wot guro kemagi i tim me Padan. Rwot okobbi Muca ni, “Cwa jo wot rot lobo me Kanaan ame abino miyo baŋ jo Icrael. I kom jo ame icwayo, dano bino ya i atekere a kwarigi luŋ, kun ŋat acel acel nwoŋo atel acel i akinagi.” Mannono omio Muca ocwaogi iya i tim me Padan, kite a Rwot ociko kede; gin luŋ onwoŋo obedo odoŋe a loo lwak jo Icrael. Nyiŋgi ene: Iyi atekere a Reuben rik oya iye Camma wot a Jakur; i atekere me a Cimeon te ya iye Capat wot a Kori; iyi atekere a Juda oya iye Kaleb wot a Jepune; iyi atekere Icakar oya iye Igal wot a Yucepu; iyi atekere Epraim oya iye Kocea wot a Nuni; iyi atekere a Benjamin oya iye Paloti wot a Rapu; iyi atekere a Jabulon oya iye Gadiel wot a Codi; iyi atekere a Yucepu ame obedo atekere a Manace, oya oye Gaddi wot a Cuci; iyi atekere a Dan oya iye Amiel wot a Gemali; iyi atekere Acer oya iye Cetur wot a Mikael; iyi atekere a Naputal i oya iye Nabi wot a Vopci; iyi atekere a Gad oya iye Rewel wot a Maki. Mannono en jo ame Muca ocwao me roto lobo. Muca ocako nyiŋ Kocea wot a Nuni ni, Yocwa. Muca ocwaogi me wot roto lobo me Kanaan kun kobbigi ni, “Wot wunu naka i Negeb kuca, ite kato wunu malo i lobo obedo kidikidi, me inen wunu kite ame lobo-nono tye kede, ka ce jo ame bedo i lobo-nono obedo jo atek onyo jo agoro, ka ce ononok onyo opol, ka lobo ame gin obedo iye-nono ber onyo rac, ka ce pacci ame gin bedo iye obedo gonye gonye onyo pacci ame ocecelo oko i cel atek, ka ce lobo mere ceko cam onyo mom gire ceko cam, ka ce yen tye i lobo-nono onyo mom gire tye. Bed wunu jo ame cunywu nwaŋ, ikel wunu nyig yennogo me lobo-nono.” Pien kare-nono onwoŋo en kare ame nyig olok geo cek iye. Mannono omio gin owoto oroto piny kun ocako i tim me Jin tuno naka i Rekob, ame ceggi i dog yo me Kamat. Gin owoto naka i Negeb, ote tuno naka i Kebron; Akiman, Cecai kede Talmai ikwae Anak onwoŋo tye kuno, (Kebron rik onwoŋo ogero te ri mwaka abiro twal kun mom ru ogero Joan ame tye i Miciri.) Orot-piny te tuno naka i luŋ me Ecikol, gin rik ote ŋolo etak acel me jan olok ame onyak onugo anuga, ame jo aryo i akinagi te dyelo adyela kede yat; ote daŋ kelo nyig yat e okwer pomegranat kede nyig oduro. Kabedo-nono rik olwoŋo ni luŋ me Ecikol pien jo Icrael oŋolo iye etak acel i jan olok onyak onugo anuga. Kare ame nino pyeraŋwen doŋ okato, gin ocako dwogo oko i roto piny i lobo-nono. Gin odwogo baŋ Muca kede Aron ame onwoŋo tye i tim me Padan i Kadec; gin okelligi kop i kom lobo-naca, baŋ lwak jo Icrael luŋ, dok daŋ ote nyuttigi gin ame ocek i lobo-naca. Gin otittigi ni, “Wan otuno i lobo ame rik icwaowa iye; cak kede moo kic mol amola iye, kit gin ocek iye ene. Aco kono jo ame bedo iye obedo jo atek, paccigi luŋ daŋ ocecelo oko atek kun daŋ doŋodoŋo; medo i kom ennono, oneno daŋ ikwae Anak kuno. Jo Amalek bedo i lobo me Negeb; aco jo Kitti, jo Jebuc, kede jo Amor, gin obedo i lobo obedo kidikidi; jo Kanaan te bedo i lobo ame omano dog nan, kede en ame omano dog Jordan.” Ento Kaleb te juko jo liŋ i nyim Muca, te kobo ni, “Wan myero oru wot kuno me owot ogam wunu oko; pien wan giwa oromo loyogi oko oyot.” Jo ame rik owoto kede kuno te gamo ni, “Wan kom mom oromo wot lweny i kom jo-nono; pien gin tek katowa oko.” Mannono omio gin okelo kop arac baŋ jo Icrael i kom lobo ame gin oroto, kun okobo ni, “Lobo ame wan obe bea i yie me roto, lobo-naca rac neko jo ame bedo iye; dok jo luŋ ame wan oneno iye, obedo jo ame komgi pek atek. Oneno daŋ jo Nepili kuno (ame gin ikwae Anak, ame oya i baŋ jo Nepili); ame wan ikomwa doŋ onen ocalo ocenne; gin daŋ onenowa ocal kittono.” Lwak luŋ te cako redo i koko; jo te kok dyeworrono luŋ. Jo Icrael te cako ŋuŋura i kom Muca kede Aron; lwak luŋ te kobbigi ni, “Kono rik giwa oto i lobo Miciri! Onyo kono rik giwa oto i tim. Piŋo kara Rwot okelowa i lobo man, me miyowa to i pala lweny? Monwa kede itinowa doŋ bino doko jo ame okworwa bino yako; onwoŋo mom twero bedo ber wan me dok ceŋ i Miciri?” Gin te cako kop kengi kengi ni, “Oyer wunu ŋat ame telowa, me odok wunu cen i Miciri.” Muca kede Aron te ryebere piny i nyim jo Icrael luŋ ame ocokere. Yocwa wot a Nuni kede Kaleb wot a Japune ame rik gin tye i akina jo ame oroto lobo-naca, gin oyeyecoboŋŋigi oko, kun okobbi lwak jo Icrael luŋ ni, “Lobo ame wan obe bea i yie me roto, lobo-nono onwoŋo ber odoco. Ka ce Rwot obedo i yomcuny i komwa, en bino terowa i lobo man, te miyo i ciŋwa, lobo ame cak kede moo kic mol amola iye. Jem i kom Rwot en a myero iwek wunu bedi; dok kur daŋ ilwor wunu jo me lobo-naca, pien gin obedo ogati me acanawa. Gin a geno negi doŋ mom, dok Rwot gire tye kedwa; kur ilwor wunugi.” Cite lwak luŋ te kobo ni nanapogi oko i gweŋe. Kwogo a Rwot te nen i kema me rwatte i nyim jo Icrael luŋ. Rwot te kobo baŋ Muca ni, “Jo-ni kara bino bedo caya pi kare a rom mene? Obino kara kwero ye an pi kare a rom mene, kadi bed abedo tiyo anyut apol rom man i akinagi? Abino goyogi kede too edeke, dok daŋ abino twonogi lobo ame kono onwoŋo amigi me bedo megi, ate miyi yin doko rok adwoŋ dok daŋ atek a katogi oko.” Ento Muca te kobo ni. “Jo Miciri bino winyo, pien rik ikwanyo jo-ni kede tekoni i akinagi, gin bino tito koppere baŋ jo ame bedo i lobo man. Gin doŋ otyeko winyo ni yin Rwot itye i akina jo man; pien jo-ni obedo neni waŋ i waŋ kun pol meri bedo cuŋ i wigi malo. Yin Rwot ibedo telo nyimgi i pagi me pol dyeceŋ kede i pagi me mac dyewor. Doŋ aman ka ce yin ibino neko jo-ni luŋ awaŋe acel, rok ocele ame rik nyiŋi orwo owinyere baŋgi bino kobo ni, ‘Pien tero jo man oloo Rwot oko i lobo ame rik ekwoŋo ni ebino miyogi, en gin omio en doŋ onekogi oko i tim.’ Aman doŋ tim ber, wek onen ni tekoni dwoŋ, ama Rwot kite a rik iciko kun ikobo ni, ‘Rwot gire akemo mom mako oyotoyot, marrere mom lokere, kun timo kica i bal kede i tim me turo cik, cite mom gire kwanyo kop i kom jo obalo, cite keto can i kom ikwae kede dok i kom ikwae ikwaegi, pi bal a kwarogi naka i lwagi me adekkere kede me aŋwennere.’ Tim ber i tim jo-ni kica i balgi, kite acalo mar meri a mom lokere dwoŋ kede, dok kite ame ibedo timo kede jo man kica cakere i Miciri tuno kede naka atot i kare man.” Rwot te gamo ni, “Doŋ atyeko timogi kica kite ame ikobo. Cite ateni, kite acalo an atye kwe-ni, dok kite acalo kwogo a Rwot bino poŋo lobo luŋ oko-ni, i kom jo ame oneno kwogona mede anyut ame rik atio i Miciri kede i tim, eka gin dok te bedo omo yia, ame man doŋ odoko tyen me tomonnere twal, kun daŋ mom owinyo koppa, mom tye moro i akinagi, ame bino ne no lobo ame rik akwoŋo ni abino miyo baŋ kwarigi; mom tye ŋattoro i akina jo luŋ ame ocaa ame bino neno lobo-naca. Ento amirona Kaleb, pien en obedo i cuny apat, dok daŋ obedo luba i yore ducu, abino tere i lobo ame en rik owoto iye-nono, eka ikwae te gamo lobo-nono. Doŋ aman ba, kite acalo jo Amalek kede jo Kanaan bedo i luŋ ducu, diki myero wun dok icak lokere wunu iwot wunu tuŋ tim i yo ame woto i Nam Arema.” Rwot dok te kobo baŋ Muca kede Aron ni, “Lwak jo areco-ni kara bi no bedo ŋuŋura i koma naka awene? Atyeko doŋ winyo ŋuŋura a jo Icrael luŋ ame gin obedo ŋuŋura kede i koma. Kob baŋgi ni, ‘Kite acalo an atye kwo-ni, gin ame doŋ ikobo wunu, ame yita owinyo, abino ti mo i komwu. Komwu ame oto bino radde ata i tim; wun jo luŋ ame welwu rik okwano, cakere i kom jo ame mwaka me ditogi oromo pyeraryo wot kede malo, gin luŋ ame obedo ŋuŋura i koma; moro acel iye mom bino tuno i lobo ame rik akwoŋo ni abino miyowu ibedo wunu iye, kwanyo ka Kaleb wot a Jepune kede Yocwa wot a Nuni, gin en ame bino tuno kuno. Ento itinowu ame wun ikobo wunu ni bino doko jo me ayaka okworwu, gin en ame abino tero kuno, gin te ŋeyo lobo ame wun icao wunu. Aco wun, komwu ame oto bino radde ata i tim kano Dok itinowu koŋ bino bedo okwat i tim pi mwaka pyeraŋwen, kun oneno can pi kite ame wun ibedo wunu turo cik a Rwot, tuno ka kom dano oto me agikki i akinawu doŋ odoŋ i tim kano Ibino neno wunu can pi mwaka pyeraŋwen, ame oporo wei ni no ame rik iroto wunu kede lobo, nino pyeraŋwen, mwaka acel pi nino acel acel, ite ŋeyo wunu kite ame cunya ocwer kede.’ An Rwot doŋ akobo; ateteni abino timo man i kom lwak jo areco-ni luŋ ame ocokere karacel me pyem keda; gin luŋ biŋo tum i tim kan, gin bi no to kuno.” Jo ame rik Muca ocwaogi me roto lobo, ame rik te dwogo miyo lwak luŋ ŋuŋura i kom Muca pi kela kop arac i kom lobo-naca, gin jo a rik okelo kop arac i kom lobo-naca, too edeke te nekogi oko i nyim Rwot. Ento Yocwa wot a Nuni kede Kaleb wot a Jepune odoŋ gigi akwo, i kom jo a rik owoto oroto lobo. Muca rik te kobo koppono luŋ baŋ jo Icrael, jo te kok meicel. Gin rik te dilo ibayi, ote wot kwaro lobo obedo kidikidi, kun okobo ni, “Koŋ inen doŋ wan otye kan, wan doŋ obino wot i lobo ame Rwot rik ociko pire; pien wan doŋ obalo.” Cite Muca te kobbigi ni, “Piŋo kara aman dok ituro wunu cik a Rwot? Pien mano gire mom bino twerre. Kur iwot wunu kuno, naka mio obino timowu lit i nyim okworwu, pien Rwot gire mom tye i akinawu. Jo Amalek kede jo Kanaan tye i nyimwu kuno, pala lwenygi bino tyekowu oko; pien ikwero wunu lubo Rwot, Rwot gire mom bino bedo kedwa.” Ento gin ote nwette ni owot kwaro lobo obedo kidikidi, akadi kono canduk cikere a Rwot kede Muca mom oya i gony. Eka jo Amalek kede jo Kanaan ame bedo i lobo obedo kidikidi kuno, te yitto piny, ote loyogi oko kun oryemogi naka i Korma. Rwot okobbi Muca ni, “Kobbi jo Icrael ni, Ka doŋ ituno wunu i lobo ame ibino wunu bedo iye, ame amiowu, ce imiyo wunu mot baŋ Rwot kun imiyo wunu dyaŋ onyo romo me mot owaŋo i mac onyo mot awaŋa, onyo mot aŋola, me cobo kwon onyo me ber a yic onyo i kare me ecubanwu ame ociko, me timo gin a ŋwece kur a yomoro cuny Rwot, ŋat ame okelo mottere myero mi baŋ Rwot moko kwon apwottere a romo gwata acel ame orubo kede moo ame romo cupa aryo kede nucu, me bed mot me moko kwon. Dok daŋ ibino wunu yiko vino me mot amata pi mot awaŋa onyo mot ocele, ame romo cupa aryo kede nucu pi romo acel acel. Onyo ka pi nyok romo, ibino yiko moko kwon apwottere ame romo gwata aryo ame orubo kede moo ame romo cupa adek me mot me moko kwon. Pi mot amata ibino miyo vino ame romo cupa adek, me bed gin a ŋwece kur a yomoro cuny Rwot. Aco ka iyiko twon me yalo Rwot me mot awaŋa, onyo me mot ocele ame oŋolo, onyo me cobo kwoŋ, onyo me kweyo cuny, mot me moko kwon a myero mi karacel i twon en moko kwon apwottere ame romo gwata adek ame orubo kede moo ame romo cupa abic, me bed mot me moko kwon; ibino miyo vino ame romo cupa abic me mot amata, me bed mot ame owaŋo i mac, gin a ŋwece kur a yomoro cuny Rwot. “Obino timo kittono i kom twon acel acel, atin nyok romo onyo atin nyok dyel acel acel. Ibino wunu tiyo kun ilubo wunu wel leyi ame iyiko wunu; ibino timo wunu kittono i kom lee acel acel kite ame welgi tye kede. Jo ame gin obedo anywalli me lobo luŋ bino timo kittono ka gin mio mot ame owaŋo i mac, gin a ŋwece kur a yomoro cuny Rwot. Ka ce arokkoro odoko ŋat ame bedo i akinawu onyo ŋattoro keken ame bedo i akinawu, naka i kare ikwaewu luŋ, ka ce en mito miyo mot ame owaŋo i mac, gin a ŋwece kur a yomoro cuny Rwot, en daŋ bino timo kite ame wun itimo wunu kede. Cik bino bedo acel pi lwak ocokere, pirwu, kede pi arok ame bedo i akinawu; mannono bino bedo cik atwal, tuno i kare ikwaewu luŋ; arok ame bedo i akinawu bino bedo a rom kedwu i nyim Rwot. Cik bino bedo acel, icwil daŋ acel, pi wun kede arok ame bedo i akinawu.” Rwot okobo baŋ Muca ni, “Kob baŋ jo Icrael ni, Kare ame ibino tuno wunu i lobo ame aterowu iye-ni, ka doŋ icamo wunu cam me lobo-naca, ibino miyo wunu mot baŋ Rwot. I kom moko ogati ame igeo rubo wunu, ibino wunu miyo capat acel obed acalo mot me yalo Obaŋa, ibino miyo wunu kite ame omio kede mot ame oya i laro dino kal. Ibino wunu miyo mot baŋ Rwot i kom moko ogati ame ogeo rubo naka i kare ikwaewu luŋ. “Aco ka ce iroco wunu, kun mom igwoko wunu cik magi ame Rwot rik okobo baŋ Muca, ginnoro luŋ ame Rwot rik ocikowu iye kun kobo baŋ Muca, cakere i nino ame Rwot rik omio kede cik, wot kede anyim naka i kare ikwaewu luŋ, ka ce ŋat oroco mom otimo me akaka, kun lwak mom oŋeo, lwak luŋ bino yalo Obaŋa atin twon etobayit acel me mot awaŋa, gin a ŋwece kur a yomoro cuny Rwot, karacel i mottere me moko kwon kede mot amata kun olubo cik, karacel kede nyok dyel acel me mot me bal. Alamdog bino tiyo tic me kwanyo bal i kom lwak jo Icrael luŋ, Rwot daŋ bino weko balgi, pien nwoŋo gin mom obalo me akaka, dok gin otyeko kelo motgi, mot ame owaŋo i mac baŋ Rwot, dok okelo daŋ motgi me bal i nyim Rwot, pi balgi ame gin mom otimo me akaka, Obino weko bal a jo Icrael luŋ, karacel kede me orok ame bedo i akinagi, pien bal ame mom otimo me akaka-nono omako jo ducu. “Ka ce dano moro acel en obalo kun mom obalo me akaka, en bino kelo akale dyel acel ame dittere romo mwaka acel, me mot me bal. Alamdog bino tiyo tic me kwanyo bal i kome i nyim Rwot pi bal ame en opoto iye kun mom otimo me akaka, me kwanyo bal i kome; Rwot daŋ bino weko ballere. Cik bino bedo acel pi dano otimo bal kun mom otimo me akaka kadi bed dano-nono anywalli me Icrael, onyo arokoro ame bedo i akinagi. Ento ka ce dano moro otimo bal me akaka, kadi bed en anywalli me lobo onyo arok, nwoŋo oyeto Rwot, dano-nono waŋe bino rwenyo oko i akina jo me turgi. Pien ocao kop a Rwot, dok daŋ oturo cikkere, dano-nono wane bi no rwenyo odoco; ballere bino dok i wie.” I kare ame jo Icrael tye i tim, gin onwoŋo dano moro ame onwoŋo tye amwodo yen i ceŋ cabit. Jo a rik onwoŋo en tye amwodo yen te kele baŋ Muca kede Aron, kede baŋ lwak luŋ. Gin te kete koŋ i buc, pien onwoŋo Rwot mom ru onyuto baŋgi gin a myero tim i kome. Rwot te kobbi Muca ni, “Dano-nono obino neko oko; lwak luŋ bino nanapo en kede gweŋe oko i ŋe gony.” Lwak luŋ te tere oko i ŋe gony, ote nanapo en kede gweŋe ote neke oko, kite ame Rwot ociko kede Muca. Rwot okobo baŋ Muca ni, “Kobbi jo Icrael kun icikogi ni okwo awula i dog bomŋigi, tuno naka i kare ikwaegi luŋ, dok daŋ oket tol obedo bululu bululu i kom awula acel acel ame tye i lak boŋo. Awula-nono bino bedo me anenawu, me poyo wiwu i cik a Rwot luŋ, me icob wunu, mom ilubo wunu tamwu kenwu kede gin ame waŋwu oneno, ame imaro wunu lobo pi mitwu kenwu. Ibino wunu po cikka ducu kun daŋ icobo wunu kittono, ite bedo wunu jo acil pi Obaŋawu. An a Rwot Obaŋawu ame akwanyowu i lobo me Miciri, me bedo Obaŋawu: an a Rwot Obaŋawu.” Kora wot a Ijar, ame obedo wot a Kokat, wot a Levi, karacel kede Datan kede Abiram, awobe Eliab, kede On wot a Palet, awobe a Reuben, gin otero jo; gin te cako ayela i kom Muca, karacel kede jo mogo apopol i akina jo Icrael, otel a lwak mia aryo kede pyerabic ame oyero i akina jo ocokere ame gin jo a ŋeye meicel. Gin ocokere luŋ karacel i kom: Muca kede i kom Aron, ote kobbigi ni, “Iwoto wunu dok atut okato kare oko! Pien lwak luŋ cil, gin luŋ aluŋa, Rwot daŋ tye i akinagi. Kara piŋo wun dok ikette wunu malo amala ikato lwak a Rwot?” Kare ame Muca owinyo, oryebere piny; eka te kobo baŋ Kora kede lwakkere ni, “Diki odiko Rwot en ame bino nyuto dano mere, kede dano ame cil; bino miyo noke aceggi; ŋat ame en bino yero, en bino miyo noke aceggi. Doŋ gin a myero itim wunu ene: kwany wunu tabo me waŋo odok akur, Kora kede lwakkere luŋ. Ket wunu mac i yigi, ite daŋ keto wunu odok akur iye i nyim Rwot diki; doŋ ŋat ame Rwot bino yero, en bino bedo ŋat acil. Iwoto wunu dok atut okato kare, wun awobe a Levi!” Muca dok te kobo baŋ Kora ni, “Koŋ iwiny wunu, wun awobe a Levi: Wun ibwono wunu ni obedo ginnoro atidi moro Rwot a jo Icrael me pokowa i kom jo Icrael, te miyowu bino aceggi baŋe, me tiyo tic i kema a Rwot, kun icuŋ wunu i nyim lwak, itio wunu pirgi? Dok ni en daŋ okelli aceggi baŋe, yin karacel kede omegoni luŋ ame gin obedo awobe a Levi? Aman doŋ dok iyenyo wunu yo me doko olamdog? Man wun ijem wunu i kom Rwot, en omio yin karacel kede lwakki icokere wunu karacel. Aron kara gin aŋo ba ame iŋuŋura wunu i kome-ni?” Muca dok te cwalo dano lwoŋo Datan kede Abiram ame gin awobe a Eliab; gin te kobbe ni, “Wan giwa mom obino wot. Pwod ibwono ni obedo ginnoro atitidi, yin me kwanyowa oko i lobo me Miciri, i lobo ame cak kede moo kic mol amola iye, me neko wa i tim? Myero yin dok ikette keni me bedo aloc me loyowa? Dok daŋ mom ru ikelowa i lobo ame cak kede moo kic mol amola iye, akadi miyowa poto moro, onyo potti olok me bedo megwa. Yin ibino wumo waŋ jo-ni oko? Wan giwa mom obino tuno kuno.” Akemo te mako Muca atek meicel, te kobo baŋ Rwot ni, “Kur igam motgi. An mom ru agamo kana moro kadi acel i baŋgi, daŋ mom atimo ginnoro arac i kom dano moro i akinagi.” Muca dok te kobbi Kora ni, “Yin karacel kede lwakki myero ibin wunu i nyim Rwot diki, yin kede gin, karacel kede Aron; kun nwoŋo ŋat acel acel i akinawu omako tabo mere me waŋo odok akur. Ket wunu odok akur i yigi, eka ŋat acel acel te kelo tabo mere me waŋo odok akur i nyim Rwot, tabo mia aryo kede pyerabic; yin daŋ karacel kede Aron, ŋat man myero bin kede tabo mere.” Ŋat acel acel te kwanyo tabo mere, te keto mac iye, ote dok keto iye odok akur, gin te doŋ cuŋ i dog kema me rwatte, karacel kede Muca kede Aron. Kora ocoko lwak luŋ i komgi kittono, i dog kema me rwatte, eka kwogo a Rwot te nen baŋ lwak luŋ. Rwot dok te kobo baŋ Muca kede Aron ni, “Wun pokere wunu oko i akina lwak man, me wek aru tyekogi oko aman.” Gin te ryebere piny kun okobo ni, “Ama Obaŋa, Obaŋa ame won tipo a jo luŋ, bal a dano acel mio akemo maki i kom lwak luŋ?” Rwot te kobo baŋ Muca ni, “Kobbi lwak luŋ ni, ‘Ya wunu oko i kan ame jo a Kora bedo iye, kede Datan, kede Abiram.’ ” Muca te ya wot baŋ Datan kede Abiram, odoŋe a jo Icrael daŋ te lubo yore, En te kobbi lwak ni, “Tim wunu ber iya wunu oko i kema a jo areco-ni, kur igud wunu gigi moro, naka mio wun daŋ oweowu oko karacel kedgi ibalgi luŋ.” Omio lwak te ya oko i kan ame jo a Kora kede Datan kede Abiram tye iye; eka Datan kede Abiram te kato oko, ote cuŋ i dog kemagi, karacel kede mongi, kede awobegi kede itinogi atino. Muca te kobo ni, “Man en gin ame bino miyo iŋeo wunu ni Rwot Obaŋa kara ocwaa me tiyo tic man ducu, dok mom abedo tiyo pira kena. Ka ce jo man bino to kite a jo luŋ to kede me nino ducu, onyo ka ce cannoro a poto i kom jo luŋ en ame opoto i komgi, mom nwoŋo Rwot en oora. Ento ka Rwot bino keto ginnoro ocele anyen, eka lobo te ŋamo doge mwonyogi oko, karacel i jamigi luŋ, eka gin te donyo akwo i lyel me Ceol, ibino ŋeyo wunu ni jo-ni kara obedo cayo Rwot.” Kare ame Muca doŋ otyeko kobo kop man ducu, lobo ame gin onwoŋo ocuŋ iye, te barre, yabere oko, lobo te ŋamo doge mwonyogi oko karacel kede jo me udigi, kede lwak a Kora luŋ, kede jamigi luŋ. Gin karacel kede jogi luŋ kede jamigi luŋ te donyo akwo i lyel me Ceol kittono; lobo te wumogi oko, gin doŋ te rwenyo oko i akina lwak. Jo Icrael luŋ ame rik omanogi te belle i rjwec pi winyo kokogi; pien gin obedo kobo ni, “Naka mio wan daŋ lobo mwonyowa oko!” Mac daŋ dok te ya ibaŋ Rwot, te tyeko jo mia aryo i pyerabic ca oko, ame onwoŋo tye awaŋo odok akur. Rwot dok te kobbi Muca ni, “Kobbi Eleajar wot Aron alamdog, okwany tabbi me waŋo odok akur oko i mac a lyel, eka te oonyo mac i yigi oko kun keketo atata. Pien gin obedo gin acil, magi-nono obedo tabbi a jo ame balgi okelligi to. Pi mannono, myero papadogi oko arep kun odidinogi anyul, me gin bed gi-wumo wi keno lam; pien rik gin doŋ omio oko baŋ Rwot, mannono mio gin bedo jami acil. Mannono bino miyo gin bedo anyut baŋ jo Icrael.” Eleajar alamdog daŋ te kwanyo tabbi me mola kittono, ame rik jo ame mac owaŋo otyeko miyo baŋ Rwot, gin te papado me wumo wi keno lam, me bed gin me poyo wi jo Icrael, wek ŋattoro a mom obedo alamdog, ame mom obedo ikwae Aron, kur bin cok me waŋo odok akur i nyim Rwot, me gin daŋ kur bed bala Kora onyo acalo lwakkere, kite a Rwot omio Muca okobo kede baŋ Eleajar. Ento orwo mere lwak jo Icrael luŋ te dok ŋuŋura i kom Muca kede i kom Aron, kun okobo ni, “Wun ineko wunu jo a Rwot.” Kare ame lwak doŋ ocokere me pyem i Muca kede Aron, gin olokere tutuŋ kema me rwatte; nen ba, pol onwoŋo owumo kome oko, kwogo a Rwot te nen. Muca kede Aron te wot i nyim kema me rwatte, Rwot te kobbi Muca ni, “Ya oko i akina lwak man, me wek aru tyekogi oko aman.” Gin te ryebere piny. Muca te kobbi Aron ni, “Kwany taboni me waŋo odok akur me iket iye mac ame itoko i keno lam, eka ite keto iye odok akur, tin, ite ru tero baŋ lwak, iwot iti tic me kwanyo bal i komgi, pien akemo ame oya i baŋ Rwot doŋ obino oko, to edeke daŋ doŋ acakere oko.” Aron daŋ te kwanyo kittono, kite ame Muca okobbe, te riŋo i akina lwak. En te keto odok akur i tabo, te tiyo tic me kwanyo bal i kom lwak. En te cuŋ i akina jo oto kede akwo, to edeke te gik oko. Jo ame to edeke oneko obedo tutumia apar wie aŋwen, kede mia abiro, kun nwoŋo mom oribo iye jo ame oto pi tim a Kora, Kare ame too edeke ogik, Aron odok ceŋ baŋ Muca, i dog kema me rwatte. Rwot okobbi Muca ni, “Kobbi i jo Icrael, ite gamo abiro i baŋgi, kun igamo abiro acel i ot a kwarogi acel acel, i baŋ otelgi luŋ, kun lubo doggola a kwarigi, gin luŋ abiro apar wie aryo. Co nyiŋ dano acel acel i kom abiro mere, eka ite coyo nyiŋ Aron i kom abiro a jo Levi; pien adwoŋ acel acel a loo doggola me ot a kwarogi bino bedo kede abiro mere. Yin ibino ketogi iyi kema me rwatte i nyim canduk me kop caden, kan ame arwatte kedwu iye. Doŋ abiro a ŋat ame abino yero, bino lot; mannono bino miyo agiko ŋuŋura a jo Icrael i komwu.” Muca daŋ te kobo baŋ jo Icrael; otelgi luŋ te miye abiro, kun atel acel acel mio abiro acel kun lubo doggola a kwarigi, gin luŋ abiro apar wie aryo; abiro Aron daŋ onwoŋo tye i akina megi. Muca te keto abiro luŋ i nyim Rwot i kema me kop me caden. Orwo mere Muca te donyo i kema me kop caden; nen ba, abiro Aron ame onwoŋo ocuŋ pi ot a jo Levi onwoŋo olot oko, onok, daŋ te keto ture, te nyak, te daŋ cek. Muca te kelo abiro luŋ ame onwoŋo tye i nyim Rwot oko, te tero baŋ jo Icrael, gin te neno, eka ŋat acel acel te kwanyo abiro mere, Rwot te kobo baŋ Muca ni, “Dwok abiro Aron kakare i nyim canduk me kop me caden, me gwok bed me anyut pi jo ame ojem, me ijuk ŋuŋuragi i koma, gik oko, me kur oto.” Muca daŋ te timo kittono, kite ame Rwot ocike kede, en te timo kittono. Jo Icrael te kobo baŋ Muca ni, “Nen ba, wan doŋ oto otum oko, wan luŋ doŋ otum oko, Ŋat acel acel ame noko ceggi, ame noko ceggi i ŋet kema a Rwot, to oko. Omito ni wan oto otum oko iweŋ bo?” Rwot rik te kobo baŋ Aron ni, “Bal luŋ ame otiko kabedo acil bino bedo i wii kede i wi awobeni karacel kede i wi jo me doggola a kwaroni; dok daŋ bal luŋ ame otiko ticwu me olamdog bino bedo i wi kede i wi awobeni. Yin kel daŋ omegoni me atekere a Levi bin karacel kedi, jo me atekere a pappi, me gin notte kedi, okonyi, kun nwoŋo yin karacel kede awobeni itye wunu i nyim kema me kop me caden. Gin bino konyi kun otio tic luŋ ame mitte i kema; cite gin mom bino noko jami me kabedo acil onyo ame tye i keno lam, me wek yin karacel kede gin kur ito wunu. Gin bino notte kedi ote konyo tic i kema me rwatte, kun otio tic ducu i kema; ŋattoro ata myero kur nokwu aceggi. Wun ibino wunu konyo tic i kabedo acil kede i keno lam me akemo kur dok medde bedo tye i kom jo Icrael. Nen ba, an doŋ akwanyo omegowu, ame gin jo Levi, i akina jo Icrael; gin doŋ tye acalo mot ame omiowu, ame omio baŋ Rwot, me tiyo tic i kema me rwatte. Yin karacel kede awobeni ibino tiyo wunu ticwu me olamdog i kop ame mako keno lam, kede tyelo kan ame boŋo me icika owumo; ite tiyo ticwu. Amiowu ticwu me bedo olamdog acalo motwu; ka ce ŋatt ata onoko aceggi, obino neko oko.” Rwot dok te kobbi Aron ni, “Nen ba, doŋ atyeko miyi jami luŋ ame okano i kom mot ame amia kede, ame en jami acil luŋ ame jo Icrael okelo; atyeko miyogi oko me bedo iner ame dok baŋi, kede baŋ awobeni, me bedo iner ame myero mi baŋi kare ducu. Magi-nono bino bedo meri i kom mot acil meicel ame okano i kom mot ame owaŋo i mac; motgi luŋ me moko kwon, motgi luŋ me bal, kede motgi luŋ me walakino i roc, ame gin mio baŋa, ibino tero wunu acalo gin acil meicel baŋi kede baŋ awobeni. Ibino camo wunu kakannoro acil meicel; co luŋ twero camo; mannono gire cil baŋwu. Medo i kom magi-nono, motgi luŋ ame gin omio, ame obedo mot ayoka ame jo Icrael omio; atyeko doŋ miyo oko baŋi, kede baŋ awo beni kede anyirani acalo iner ame ibino camo wunu nakanaka. Jo luŋ i odi, ame cikkoro mom ogeŋo twero camo. Moo abeco mere luŋ, kono olok amittege, kede kal abeco luŋ, motgi me wi mwaka luŋ, ame gin mio baŋ Rwot, atyeko doŋ miyo oko baŋi. “Cam luŋ a tye i lobogi ame ogeo cek, ame gin kelo baŋ Rwot bino bedo meri, jo luŋ ame tye i odi ame cikkoro mom ogeno twero camo. Ginnoro luŋ ame jo Icrael ojalo baŋ Rwot bino bedo meri. Atin ginnoro luŋ ame tye kede kwo, ame ogeo yabo ot nyodo, kadi mea dano onyo mea lee, ame omio baŋ Rwot, bino bedo meri. Kadi bed amannono, itino kao luŋ me dano obino lakoro alakara, karacel kede itino kao me leyi a cik ogeŋo, gin daŋ obino lakoro oko. Obino lakoro i kare ame mwaka me ditogi doŋ oromo acel. Wel me i lakoro ibino miyo bedo cekel me ryal abic, kun lubo cekel me kabedo acil, ame cekel acel acel romo gera pyeraryo. Cite atin kao a dyaŋ, onyo atin kao a romo, onyo atin kao a dyel mom obino lakoro; gin cil. Ibino kikiro remogi i kom keno me lam, dok daŋ i bino waŋo dwolgi me bed mot ame owaŋo i mac, gin a ŋwece kur a yomoro cuny Rwot. Riŋogi bino bedo meri, acalo ogok ame oyoko kede amuru me tuŋ cem luŋ meri. Mot acil luŋ ame jo Icrael omio baŋ Rwot doŋ atyeko miyo oko baŋi, kede baŋ awobeni kede anyirani, me bed iner ame ibino camo wunu nakanaka. Man en cikere ame omoko doŋ oko atwal i kado, i nyim Rwot piri kede pi ikwae.” Rwot dok te kobo baŋ Aron ni, “Yin mom ibino nwoŋo lobo moro me bedo megi i lobogi, mom daŋ ibino bedo kede dulloro i akinagi. An en ame abedo dul ame meri kede gin ame inwoŋo me bedo meri i akina jo Icrael. “Atyeko miyo acel me apar luŋ i kom jami a jo Icrael baŋ jo Levi me bedo megi, me culo ticgi ame gin otio, ticgi i kema me rwatte. Dok cakere tin, jo Icrael mom bino noko kema me rwatte aceggi, naka mio bal dok i wigi ote to oko. Jo Levi keken en ame bino tiyo tic ame tye i kema me rwatte, ballere bino bedo i wigi. Man bino bedo cik atwal naka i kare ikwaegi; gin mom obino nwoŋo lobo moro me bedo megi i akina jo Icrael. Pien acel me apar mea jo Icrael ame gin mio me mot baŋ Rwot, atyeko doŋ miyo oko baŋ jo Levi me bedo megi; en omio akobo ni gin mom bino nwoŋo lobo moro me bedo megi i akina jo Icrael.” Rwot dok te kobo baŋ Muca ni, “Kob baŋ jo Levi ni, ‘Ka igamo wunu acel me apar i baŋ jo Icrael, ame atyeko doŋ miyo baŋwu me bedo megwu kun ya baŋgi, wun daŋ dok ibino miyo wunu baŋ Rwot acel me apar i kom acel me apar ame igamo wunu. Motwu-nono obino kwano i wiwu acalo kal ame oya i larowu me dino kal, dok acalo oya i bur biyo olokwu. Wun daŋ ibino wunu miyo mot baŋ Rwot kittono, i kom acel me apar luŋ ame ibino gamo wunu i baŋ jo Icrael; ibino wunu kwanyo mot a Rwot iye, ite miyo wunu baŋ Aron alamdog, Mot luŋ ame omio baŋwu, en ame ibino kwanyo wunu iye mot ame tye pi Rwot. Ibino kwanyo wunu i kom mot abeco mere luŋ kun imio wunu en ame doŋ olonyo odoko acil.’ Pi mannono, yin ibino kobo baŋgi ni, ‘Ka doŋ ityeko miyo wunu en abeco mere oko, en odoŋnege doŋ bino bedo mea jo Levi, acalo gin ame oya i larogi me dino kal kede i bur olokgi me biyo olok. Itwero camo wunu i kabedo moro keken, wun karacel kede jo me odwu; pien mannono en gin ame oculowu kede pi ticwu i kema me rwatte, Balloro gire mom bino bedo i wiwu pirgi, ka ce onwoŋo doŋ imio wunu en abeco mere oko me mot. Myero kur ipyed wunu jami a jo Icrael acil, me kur ito wunu.’ ” Rwot dok te kobo baŋ Muca kede Aron ni, “Man en icwil ame Rwot ociko: Kobbi jo Icrael kelli roya arema, ame kakannoro i kome mom oballe, ame roccoro daŋ mom i kome, dok ame lodi moro mom ru ogudo ŋute, Ibino miyo wunu baŋ Eleajar alamdog, eka ote tero wot neko oko i ŋe gony i nyim Eleajar. Eleajar alamdog bino gweto remo mere mogo i nyako ciŋe, te kikiro remo mo go tutuŋ nyim kema me rwate tyen abiro. Eka ote doŋ waŋo riŋo roya-nono i nyime; obino waŋo pyennere, riŋo mere, remo mere kede wee mere. Alamdog bino kwanyo yat cedar kede jaŋ yat acalo ogudo kede anyero kede uci arema, te bologi i dye mac ame awaŋo riŋo roya. Eka alamdog te lwoko boŋŋi mere, te daŋ lwoko kome kede pii, icennere, en doŋ te dwogu i gony; alamdog te bedo ŋat a cik ogeŋo naka otyeno. Ŋat owaŋo roa daŋ bino lwoko boŋŋi mere i pii karacel kede kome, te daŋ bedo ŋat a cik ogeno naka otyeno. Ŋattoro olony, a cikkoro mom ogeŋo, en ame bino jobo buru roa-nono, eka te onyo oko i ŋe gony i kabedo moro acil; obino gwoko pi lwak jo Icrael, me yiko pi me lwoko kwer, pi lwoko bal. Ŋat ojobo buru daŋ bino lwoko boŋŋi mere te bedo ŋat a cik ogeŋo naka otyeno. Man doŋ cik i ame jo Icrael kede orok ame bedo i akinagi bino lubo nakanaka. “Ŋat ame ogudo kom dano moro oto bino bedo ŋat a cik ogeŋo nino abiro. Bino lonyere kene kede piinono i nino me adekkere kede i nino me kany wie aryo mere, eka te bedo doŋ ŋat olony. Cite ka en mom olonyere kene i nino me adekkere kede i nino me kany wie aryo mere, en mom bino doko ŋat olony. Dano moro keken ame ogudo kom dano oto, kom ŋattoro keken ame oto, eka mom te lonyere kenekene, dano-nono balo kema a Rwot, dok dano-nono waŋe bino rwenyo oko i akina jo Icrael. En bino bedo ŋat a cik ogeŋo, pien pii me lwoko kwer mom oonyo i kome; cik ame ogene nwoŋo pwod omake. “Man cik ame mako dano ame oto i kema: ŋat acel acel ame donyo i kema-nono, kede ŋat acel acel ame onwoŋo tye i kema-nono, bino bedo ŋat a cik ogeŋo pi nino abiro. Dok tabo onyo kodi ginnoro ducu ame wie onwoŋo twolo, ame ginnoro owumo i wie mom tye, bino bedo gin a cik ogeŋo. Ka ce dano moro ame onwoŋo tye i dye tim ogudo kom dano ame oneko i pala lweny onyo dano moro ame oto, onyo cogo dano, onyo lyel a dano moro, dano-nono bino bedo ŋat a cik ogeŋo nino abiro. Pi lonyo gin a cik ogeŋo, obino juko buru ame owaŋo i mot me bal, ote keto i tabo kun omedo iye pii ame mol. Dano moro ame olony ame cikkoro mom ogeŋo bino kwanyo jaŋ ogudo, te luto i pii, te kikiro i kom kema-nono, kede i kom jami luŋ ame tye iye, kede i kom jo luŋ ame onwoŋo tye kannono, kede i kom ŋat ame ogudo cogo-nono, onyo kom ŋat ame oneko onyo kom ŋat oto, i kom lyellaca. Ŋat olony, ame cikkoro mom ogeno bino dok kiro pii i kem dano a cik ogeŋo i nino me adekkere kede i nino me kany wie aryo mere; en bino lonyo dano ame cik ogeŋo kittono i nino me kany wie aryo, dok dano-nono bino lwoko boŋŋi mere, te lwoko daŋ kome kede pii, otyeno en doŋ te doko ŋat olony. “Ento dano moro ame onwoŋo cik ogeŋo, eka mom te lonyere kenekene, dano-nono waŋe bino rwenyo oko i dye lwak ocokere, pien nwoŋo obalo kabedo a Rwot acil; en nwoŋo, ŋat a cik ogeŋo, pien pii me lwoko kwer mom oonyo i kome. Mannono bino bedo cik ame gin bino lubo nakanaka. Ŋat ame okiro pii me lwoko kwer bino lwoko boŋŋi mere; kede ŋat ame ogudo pii me lwoko kwer bino bedo ŋat a cik ogeŋo naka otyeno. Ginnoro ducu ame dano ame cik ogeŋo-nono ogudo, bino bedo gin a cik ogeŋo i ŋat ame ogudo daŋ bino bedo ŋat a cik ogeŋo naka otyeno.” Jo Icrael, lwakgi luŋ rik otuno i tim me Jin i dwe me agege, ote koŋ wot bedo i Kadec. Miriam rik te to kuno, ote daŋ yiko kuno. Pii ame myero jo mat te bedo pe; lwak luŋ te cokere karacel i kom Muca kede Aron. Jo te pyem i Muca, ote kobbe ni, “Kono rik giwa oto oko i kare ame omegowa to i nyim Rwot! Piŋo kara ikelo lwak a Rwot itim kan, me wek wan karacel kede limwa oto oko? Dok piŋo imiowa oya oko i Miciri, ite kelowa i kabedo arac-ci? Kabedo a mom ceko cam, akadi otit, onyo olok, onyo okwer pomegranat; pii moro me amata-gu daŋ mom iye.” Muca kede Aron te ya oko i nyim jo ame ocokere, ote wot naka i doggola kema me rwatte, ote ryebere piny; eka kwogo a Rwot te nen baŋgi. Rwot te kobbi Muca ni, “Kwany abiro ite coko lwak karacel, yin kede ominni Aron, ite kobbi kidi i nyimgi ducu ni mi pii mere mollo oko. Ibino miyo pii i kidi mollo pirgi kittono; ibino miyo lwak kede limgi pii amata kittono.” Muca te kwanyo abiro oko i kan a tye iye i nyim Rwot, kite ame ocike kede. Muca kede Aron te dok coko lwak karacel i nyim kidi, Muca te kobo baŋgi ni, “Aman kon doŋ iwiny wunu, wun jo ame maro jem ajema-ni. Imito wunu ni omi pii mollo i kidi man pirwu?” Muca te tiŋo ciŋe malo, te goyo kidi kede abiro mere tyen aryo twal; pii te wukere oko adwoŋ meicel, lwak karacel kede limgi te mato. Rwot te kobbi Muca kede Aron ni, “Pien wun mom iye wunu an, mom inyuto wunu i nyim jo Icrael ni an acil, pi mannono, wun mom doŋ ibino wunu tero lwak man i lobo ame amiogi.” Pii me Meriba ennono, kan ame rik jo Icrael opyem i Rwot iye, en te nyutte kene i akinagi ni ecil. Muca ocwao kwena baŋ abaka me Edom iya i Kadec kun kobbe ni, “Omini Icrael okobo ni mannono, Yin iŋeo can luŋ ame opoto i komwa: kite a rik kwariwa owoto kede i Miciri, eka ote bedo i Miciri pi kare alac, jo Miciri te wunowa atek meicel karacel kede kwariwa. Kare ame rik okok baŋ Rwot, en owinyo kokowa, te cwayo amalaika kwanyowa oko i Miciri; aman doŋ wan otye kan i Kadec, i boma ame doŋ ceggi i waŋ loboni. Myero doŋ itimwa ber obe i loboni. Wan giwa mom obino beo i poto moro, onyo i poto olok, akadi mato pii moro me akoŋ. Wan obino lubo ka yo abaka adittere, mom obino gak tuŋ cem onyo tuŋ cam, tuno ka okato giwa waŋ loboni.” Ento Edom te kobbe ni, “Mom gire ibino beo, naka mio abino i komi i pala lweny.” Jo Icrael te kobbe ni, “Wan giwa obino lubo yo adittere; ka ce waŋ kede limwa omato piini moro, obino culo waŋe. Tim ber imi abe ka i tyena keken, aboŋo mito ginnoro ocele.” Cite en te kobo ni, “Mom gire ibino beo.” Edom te bino oko i komgi i lwak jo apol, ame daŋ tek meicel. Edom rik te kwero miyo jo Icrael beo i lobo mere kittono; Icrael doŋ te lunyo beo tuŋ ocele. Lwak jo Icrael luŋ rik te ya oko i Kadec, ote wot ite kidi me Kor. Rwot te kobbi Muca kede Aron i te kidi me Kor, i waŋ lobo me Edom, ni, “Aron en ame doŋ bino to oko, te wot nywako kabedo kede kwari mere; pien en mom bino donyo i lobo ame rik amio baŋ jo Icrael, pien wun rik ijem wunu i kom cikka i dog pii me Meriba. Ter Aron kede wode Eleajar, ikelgi i wi kidi me Kor. Gony boŋŋi Aron luŋ i kome, rwakgi i kom wode Eleajar, pien Aron doŋ awot to oko kuno, awot nywako kabedo i kwari mere.” Muca daŋ te timo kite ame Rwot ociko; gin owoto malo i wi kidi me Kor kun lwak luŋ anene. Muca te gonyo boŋŋi aruka Aron oko luŋ, te rwako i kom wode Eleajar. Aron te to oko i wi Kidi kuno. Icennere Muca kede Eleajar te yitto oko i wi kidi. Kare ame lwak doŋ oneno ni Aron doŋ oto oko, jo ot Icrael luŋ te koko Aron nino pyeradek. Rik onwoŋo tye abaka moro me Arad, ame dano me Kanaan, ame bedo i Negeb. Kare ame en owinyo ni jo Icrael tye abino kun olubo yo me Atarim, en olwenyo i kom jo Icrael, te mako jo ocele i akinagi. Icrael te kwon baŋ Rwot kun kobo ni, “Ka ce ibino miyo jo man i ciŋa, an abino jalo bomagi luŋ bed me ajwera acalo gin me kwer.” Rwot rik te winyo Icrael, te miyo jo Kanaan baŋgi, gin te jwero oko luŋ pire acalo gin me kwer. Mannono en omio ote cako nyiŋ kabedo-nono ni Korma. Gin rik te ya i te kidi me Kor, ote beo i yo me Nam Arema, kun omano lobo me Edom amana; cuny jo rik te bale oko iyo. Jo rik te kobo kop arac i kom Obaŋa kede i kom Muca, kun okobo ni, “Piŋo kara ikwanyowa wunu oko i Miciri me to i tim? Pien cam pe, pii-gu daŋ pe, cam a konnyere mom-mi doŋ okwero yiwa oko,” Rwot te cwayo twole mogo a kwirgi rac meicel i akina lwak, gin te totoŋo jo, ame te miyo jo Icrael to adwoŋ meicel. Jo te bino baŋ Muca kun okobo ni, “Wan obalo, pien okobo kop arac i kom Rwot Obaŋa kede i komi. Kwa Rwot me kwany twole oko i baŋwa.” Muca rik daŋ te kwayo Rwot pi lwak. Rwot te kobbi Muca ni, “Ti cal twol a kwirrere rac, ite ŋabo malo i kom pagi, me wek ŋat a twol otono, ka ce oneno, bedo kwo.” Mannono te miyo Muca tiyo twol mola, te ŋabo malo i wi pagi; doŋ ka twol mola-nono otoŋo ŋattoro, ka ce en oŋao wane malo oneno twolmola-nono en bedo kwo. Jo Icrael dok te cako wot, ote wot guro gonygi i Obot. Gin dok te ya i Obot, ote wot guro gonygi i. Iyeabarim, i tim ame otikere i Moab, ame tye tutuŋ kide. Gin te ya i kuno, ote wot guro gonygi i luŋ me Jered. Gin dok te ya i kuno, ote wot guro gonygi i kulo me Amon tuŋ ca, ame tye i dye tim, ame oya i waŋ lobo me ajo Amor; pien Amon obedo waŋ lobo a jo Moab ame tye i akina Moab kede jo Amor. Man en kan ame okobo iye i Buk me lweny a Rwot, ni, “Wakeb ame tye i Cupa, kede luŋ me Amon ducu, kede lula me luŋ apol ame okato naka i kabedo me Ar, te jeŋere i waŋ loba me Moab.” Gin oya i kuno, ote bino i Beer. Mannono en akoŋ ame Rwot okobo iye baŋ Muca ni, “Cok jo karacel, an abino miyogi pii.” Jo Icrael rik te wero wer man: “Yin akoŋ yeye malo! Owerre wunu wer! Akoŋ ame oloc yam okunyo, ame jo adoŋo i lwak en oŋolo, kede abiro loc kede ludigi.” Gin dok te ya i tim, ote wot Matana. Eka i Matana ote wot Nakaliel, eka i Nakaliel ote wot Bamot. Eka i Bamot gin te wot i luŋ ame tye i loba me Moab, ame ceggi atenni kidi me Piciga, kan ame otwero bolo waŋgi ote neno tim ame tye piny. Icrael te cwayo okwena baŋ Cikon, abaka ajo Amor, kun kobo ni, “Myero itimwa ber obe i loboni. Wan giwa mom obino beo i poto moro, onyo i poto olok, mom daŋ obino mato pii moro me akoŋ. Waŋ obino lubo ka yo abaka adittere, tuno ka okato giwa waŋ loboni.” Ento Cikon mom te ye ni Icrael be i lobo mere. En te coko jo mere luŋ karacel, te wot lweny i kom Icrael i tim. Obino i Jakaj, te lweny i kom Icrael. Icrael te nekogi i pala lweny, te mayo lobogi oko, cakere i Amon tuno naka i kulo Jabok, tuno naka i waŋ lobo a jo Ammon pien onwoŋo loba me Jajer en obedo waŋ lobo a jo Ammon, Icrael te mayo boma-nono luŋ, ote bedo i boma a jo Amor luŋ, i Kecbon kede pacci ame tye i ŋete ducu. Pien Kecbon onwoŋo obedo boma adwoŋ me Cikon, abaka a jo Amor, ame rik koŋ onwoŋo olwenyo i kom abaka a jo Moab occonnere eka te mayo loba mere luŋ i ciŋe, tuno naka i Amon. En omio odiro me cako wer te wer ni, “Biye wunu i Kecbon, me ger boma abaka Cikon, me yik cuni okon. Pien mac opello i tuŋ Kecbon, leb mac oya i boma a Cikon. Owaŋo Ar ame tye i Moab, oweo rwode me wi kidi me Amon oko, Ineno can meicel, yin Moab! Ito, itum wunu oko, wun jo a Kemoc! En omio awobe mere oriŋo olaro komgi, anyira mere ote yako oko, ote tero baŋ Cikon, abaka a jo Amor. Ikwaegi oneko otyeko kittono, cakere i Kecbon naka i Dibon, Obalo lobo-nono oko, tuno ka mac omedde naka i Medeba.” Jo Icrael rik obedo i lobo a jo Amor kittono. Muca dok te cwayo dano roto Jajer. Gin rik te mayo pacci iye oko, ote ryemo jo Amor oko iye. Gin dok te lokere dok malo i yo a woto Bacan; eka Og, abaka me Bacan, te bino lweny i komgi, en karacel kede lwakkere luŋ, ote lweny i Edrei. Cite Rwot te kobo baŋ Muca ni, “Kur ilwore, pien atyeko doŋ miye oko i ciŋi, karacel kede lwakkere luŋ, kede loba mere. Ibino time kite a rik itimo kede Cikon, abaka a jo Amor, ame rik bedo i Kecbon.” Rik ote neke kittono, karacel kede awobe mere, kede lwakkere tuno waŋ ame ŋattoro acel iye mom odoŋ baŋe akwo ame obwot; gin te mayo loba mere bedo megi. Jo Icrael dok te cako wot, ote wot guro gonygi i bar me Moab, ame tye loka Jordan i Jeriko. Balak wot a Jippor oneno ginnoro luŋ ame jo Icrael otimo i kom jo Amor. Jo Moab te bedo i twon lworo adwoŋ meicel i komgi; pien gin rikopol. Lworo jo Icrael onwoŋo doŋ onyobo kom jo Moab oko. Jo Moab te kobbi odoŋe me Midian ni, “Lwak man abino cido ginnoro luŋ ame omanowa, kite ame twon cido kede lum i bar.” Mannono omio Balak wot a Jippor, ame rik onwoŋo obedo abaka me Moab i kare Balak nono, ocwao kwena baŋ Balaam wot a Peor i Petor, ame ceggi i kulo me Eufrate, i lobo me Amau, me wot lwoŋe, kun kobo ni, “Nen ba, rokkoro obino i Miciri, owumo lobo oko, aman gin obedo otikere keda. Tim ber ibin icen jo man oko pira, pien gin otek okata oko. Gwok onyo bino miyo aloogi, ate ryemogi oko i lobo-ni pien an aŋeo ni ŋat ame yin ilamme winyo, bedo daŋ awinyo, dok ŋat ame iceno nwoŋo daŋ doŋ oceno.” Odoŋe me Moab karacel kede odoŋe me Midian te cako wotgi kittono kun daŋ otero lim me tyet. Gin owoto baŋ Balaam, ote titte kop ame Balak ocwaogi pire, En te kobbigi ni, “Aco doŋ tin koŋ ibut wunu kan, an abino dwoggiwu kop kite ame Rwot okobo kede baŋa.” Oloc me Moab daŋ te bedo baŋ Balaam kittono. Obaŋa te bino baŋ Balaam, te penye ni, “lo mene kara a tye baŋi nie?” Balaam te kobbi Obaŋa ni, Balak wot a Jippor, ame obedo abaka me Moab, en ame ocwao kop baŋa kun kobo ni, “Nen ba, rokkoro obino i Miciri, owumo lobo oko. Tim ber ibin icen jo-nono oko pira. Gwok onyo bino miyo alwenyo kedgi, ate ryemogi oko.” Obaŋa te kobbi Balaam ni, “Yin gire mom ibino wot kedgi, mom daŋ ibino ceno jo-nono, pien gin obedo jo ame doŋ amio winyo oko.” Balaam rik te ya oko odiko con, te kobbi oloc a Balak ni, “Dok wunu i lobowu; pien Rwot mom oye ni an awot kedwu.” Mannono te miyo oloc me Moab ya oko wot baŋ Balak, ote kobbe ni, “Balaam gire okwero bino kedwa oko.” Balak dok te medo cwayo rwode ocele apol, dok ame obedo jo me awora kato maca me agege ca oko. Gin owoto baŋ Balaam, ote kobbe ni, “Balak wot a Jippor okobo ni, kur imi ginnoro geŋ i bino baŋa; pien iyi ateni, abino twon kwogo adwoŋ meicel i komi, dok keto daŋ ginnoro luŋ ame ibino kobba, abino tiyo. Bye icenna jo man oko.” Ento Balaam te dok iye kun kobbi jo ame Balak ooro ni, “Kadi bed Balak onwoŋo omia ode ame opoŋ i ryal kede jabu, onwoŋo mom atwero timo ginnoro a mom Rwot Obaŋana ociko, akadi i ginnoro ame titidi onyo i ginnoro ame dwoŋ, Tim wunu ber tin koŋ dok ibut wunu kaŋ, me koŋ dok amed ŋeyo gin ame Rwot bino kobo baŋa.” Obaŋa te bino baŋ Balaam dyewor, te kobbe ni, “Ka ce jo man obino me lwoŋi, ya iwot kedgi; ento ibino tiyo ka gin ame an aciko keken.” Mannono te miyo Balaam dilo odiko, te tweyo gi-bedo mere i ŋe kana, te wot karacel kede rwode me Moab. Cite akemo te mako Obaŋa pi wottere-nono; amalaika a Rwot te cuŋ oko i yo acalo akworrere. En onwoŋo rik tye i wi kana karacel kede omiro mere aryo. Kana rik te neno amalaika a Rwot ocuŋ oko i dye yo, kun omako pala lweny i ciŋe. Kana te wirre weko yo oko, te coro lum. Balaam te goyo kana me dwog iyo. Amalaika a Rwot dok te cuŋ i dye yo kan adiŋ i akina poto olok ame ogeŋo oko i cel tuŋŋi kede tuŋŋi. Kare ame kana oneno amalaika a Rwot, odiye i kom cel, te miyo cel gwaro tyen Balaam; Balaam dok te medo goye. Amalaika a Rwot te dok medde wot anyim, te dok wot cuŋ kakannoro adiŋ, kan ame mom dok tye yo tuŋŋoro me lokere, akadi tuŋ cem onyo tuŋ cam. Kare ame kana oneno amalaika a Rwot, obuto oko piny kun Balaam tye i wie; akemo te mako Balaam oko, te goyo kana i lut. Rwot te yabo dog kana, kana te kobbi Balaam ni, “Atimi kara ŋo ba omio igoa odoko tyen adek twal-li?” Balaam te kobbi kana ni, “Pien ibedo nywara, kono woki onwoŋo at ye i pala i ciŋa, kono aneki kede oko.” Kana te kobbi Balaam ni, “An mom a kanani ame ibedo ŋwec kede kare luŋ tuno kede naka tin? Yam koŋ ineno abedo timere kittono baŋi?” En te gamo ni, “Pe gire.” Rwot doŋ te yabo waŋ Balaam, en te neno amalaika a Rwot kun tye ocuŋ i yo kun omako pala lweny i ciŋe; en te kulo wie, te ryebere piny. Amalaika a Rwot te kobbe ni, “Piŋo kara igoo kanani tyen adek twal? Nen ba, an abino me juki, pien woti-nono mom oyomoro cunya, Tyen adek-ki luŋ kana onwoŋo obedo nena, en omio te wirre weko yo oko. Kono en mom owirre oweko yo oko i nyima, kono nyo doŋ aneki oko, ate lunyo weke en akwo.” Balaam te kobbi amalaika a Rwot ni, “An doŋ abalo, pien onwoŋo mom aŋeo ni yin icuŋ i yo me lweny keda. Doŋ ba, ka ce wota ni rac i nyimi, an abino dok gira cen.” Amalaika a Rwot ogamo dog Balaam ni, “Wot doŋ i jo-nono; ento ibino kobo kop ame an aciko keken.” Balaam doŋ te medde wot karaceli rwode a Balak. Kare ame Balak owinyo ni Balaam obino, en owoto me wot rwatte kede i boma me Moab, i waŋ lobo ame boma ame kulo Amon opoko, i waŋ apokki ikokome. Balak te kobbi Balaam ni, “An mom rik koŋ acwao jo me lwoŋi? Ŋo kara a rik ogeŋi bino baŋa? Itamo ni an mom aromo miyi kwogo?” Balaam te gamo ni, “En doŋ abino oko baŋi ni! Itamo ni aman an atye i twer me kobo ginnoro? Kop ame Obaŋa oketo i doga, en ame myero akobi.” Balaam te wot gin kede Balak, gin te wot naka i Kiriat-kujot. Balak te ŋolo twoni kede rommi te poko rinogi cwayo baŋ Balaam kede rwode a rik onwoŋo tye baŋe. Orwo mere Balak te tero Balaam naka i Bamot-baal, Balaam te neno jo Icrael mogo ame onwoŋo tye ceggi i kaci-naca. Balaam te kobbi Balak ni, “Canna keno lam abiro kan, ite daŋ kella twoni abiro kede romi abiro kan.” Balak daŋ te timo kite ame Balaam okobe; eka Balak kede Balaam te bedo yalo Obaŋa i twon kede romo i wi keno lam acel acel. Balaam te kobbi Balak ni, “Cuŋ i ŋet mot awaŋani, me an koŋ awoti; gwok onyo Rwot twero bino me rwatte keda. Doŋ ginnoro luŋ ame en bino nyutta, an abino titti.” Balaam te wot malo i wi kidi. Obaŋa daŋ te rwatte i Balaam. Balaam te kobbe ni, “Doŋ atyeko yiko keno me lam abiro doŋ daŋ atyeko waŋo i wi keno lam acel acel mot me twon acel kede nyok romo acel.” Rwot te keto kop i dog Balaam, eka te kobbe ni, “Aco doŋ dok baŋ Balak, iwot ikobbe kit man,” Balaam te dok baŋ Balak, en te nwoŋo Balak kede rwode me Moab luŋ tye ocuŋ i ŋet mot awaŋa mere. Balaam te cako wero koppere, ni, “Balak okela i Aram, abaka me Moab olwoŋa i kiddi ame tye tuŋ kide: ‘Bin icenna Yakobo, bin ilucoro Icrael!’ Atwero ceno ŋat Obaŋa mom oceno niŋo? Alucoro niŋo ka Rwot mom olucoro? Pien anene kun atye i wi kidi, anene kun atye malo i wi atenni kidi, koŋ inen ba, jo abedo gigi kengi, jo a mom kwanne kengi i akina orok! Ŋa ce a twero kwano apuwa a Yakobo? Onyo a twero kwano acel me aŋwen me Icrael? Weka gira ata kite a dano a kite atira to kede! Wek agikki kwona bed calo mege!” Balak te kobbi Balaam ni, “Ŋo kara ame yin itimo pira? An ateri me wot ceno okwora yin dok ilunyo lammigi winyo.” Balaam te gamo ni, “Mom myero agwokere ikobo gin ame Rwot oketo i doga bo?” Balak dok te kobo ni, “Koŋ dok ibin ateri i kabedo ocele, kan ame iromo nenogi. Mom ibino nenogi luŋ, ibino neno ka jo ame tye ceggi keken; eka ite cennagi oko i kuno.” En rik te tere i poto me Jopim, naka i wi kidi me Piciga, eka ote cano keno lam abiro kuno, ote daŋ ŋolo mot me twon acel kede nyok romo acel i wi keno lam acel acel. Balaam te kobo baŋ Balak ni, “Cuŋ i ŋet mot awaŋa-ni kan, me an koŋ arwatte i Rwot kuca,” Rwot daŋ rik te rwatte i Balaam, te keto kop i doge, eka te kobbe ni, “Dok doŋ baŋ Balak, iwot ikobbe kit man.” Balaam te dok baŋ Balak, te nwoŋo Balak ocuŋ i ŋet mot awaŋa mere, kun daŋ rwode me Moab tye karacel kede. Balak te penyo Balaam ni, “Rwot okobo kop aŋo.” Balaam te cako kobo koppere ni, “Balak, ya malo me iwiny, winy koppa, yin wot a Jippor; Obaŋa gire mom obedo dano, me kobo kop goba, en mom obedo wot a dano, ame twero loko tammere. Gin a en dok okobo, itamo mom bino cobo? Onyo kite a en doŋ okobo, itamo ni mom bino cobo koppere-nono? Nen ba, an onwoŋo ocika me lamo winyo; en doŋ otyeko miyo winyo oko, an mom dok atwero dwoko ceŋ. Cannoro mom nen i kom Yakobo, akadi ayela moro i kom Icrael. Rwot Obanagi tye gire kedgi, gin oredo me pwoye acalo abakagi. Obaŋa okwanyogi i Miciri, en tye i akinagi acalo tuŋ jobi ager. Pien mom tye cannoro ame omio i kom Yakobo Ŋattoro daŋ mom tye ame twero logoro Icrael. Aman doŋ abino kobo kop i kom Yakobo kede Icrael ni, ‘Man twon ŋo ame Obaŋa otimo nie?’ Koŋ inen jo-nono! Oya malo calo min eŋatu kite acalo eŋatu tirre kede malo; mom buto piny tuno waŋ omwodo lee ame omako, eka te mato remo a gin ame eneko.” Balak ociko Balaam ni, “Kur doŋ icengi, kur daŋ ilammigi winyo.” Cite Balaam te dok iye ni, “Rik mom akobbi ni. ‘Ginnoro luŋ ame Rwot okobo, an abino tiyo atia’?” Balak dok te kobbi Balaam ni, “Koŋ dok ibin ateri kan ocele; gwoko onyo Obaŋa bino ye ni icennagi i kuno,” Balak dok te tero Balaam malo i wi atenni kidi me Peor, kan ame itwero neno tim ame tye i tere piny. Balaam te kobbi Balak ni, “Canna dok keno lam abiro kan, ite kela twoni abiro kede nyogi romi abiro kan.” Balak daŋ te timo kite ame Balaam okobo, eka ote bedo ŋolo mot yalo Obaŋa me twon acel kede nyok acel i wi keno lam acel acel. Ka Balaam oneno ni Rwot mito miyo Icrael winyo, en mom owoto i tyet kite ame obedo timo i kare ocele ca, ento olunyo wiro waŋe neno tim. Balaam te tiro waŋe malo, te neno jo Icrael kun oguro kemagi atekere atekere. Cuny Obaŋa rik te bino i kome, en te cako wero koppere ni, “Man kop a Balaam wot a Beor, kop a dano a waŋe doŋ oyabere, dano ame winyo kop ame Obaŋa kobo, dano ame neno anyut ame Won Twer nyuto, dano amerette piny, cite mom gire mio waŋe: Kemani luŋ mwonya meicel, Yakobo, gony Icrael luŋ daŋ mwonya kittono. Nen acalli i luŋ ame opette kuka kuka, calo potti ame tye i dog kulo; calo elwa ame Rwot opito, calo yen cedar ame oradde i dog pii. Pii bino bedo mollo i gulu mere, koti mere bino durre i ŋet kulli apipim, abaka mere bino bedo dit akato Agag oko, loccere bino bedo malo meicel. Obaŋa okwanye i Miciri, en tye i akinagi acalo tuŋ jobi ager. En bino camo orok ame okworrere oko, bino tuturo cogogi ŋido atitino, te celogi pel kede atero mere. En onyoŋo piny, obuto calo eŋatu, acalo min eŋatu; ŋa kara a cunye tek me tuge? Gum myero bed i kom jo luŋ ame lammi winyo dok jo luŋ ame ceni, ceŋ, myero bed i wigi.” Akemo te mako Balak atek i kom Balaam, omio en te bapo ciŋe, te kobo baŋ Balaam ni, “An onwoŋo alwoŋi me ceno okwora, koŋ doŋ inen, aman yin dok ilunyo lammigi winyo odoko tyen adek twal. Pi mannono, yin doŋ myero iriŋ oko, idok i kabedoni. Rik an akobo ni, ‘Ateni, abino keto kwogo i komi’, cite Rwot gire ogeŋi limo kwogo-nono.” Balaam te kobbi Balak ni, “Kara rik mom akobo baŋ okwena ame icwao baŋa ni, ‘Kadi bed Balak onwoŋo omia ode ame opoŋ i ryal kede jabu, onwoŋo mom atwero timo ginnoro a mom Rwot Obaŋana ociko, kun atimo gin aber onyo arac ame an amito; gin ame Rwot bino kobo, en ame an daŋ abino kobo?’ ” Nen ba, an doŋ awot oko baŋ jo me turwa, bye koŋ, me abin ami iŋe gin ame jo man bino timo i kom jo meri i kare ame tye i nyim, Balaam te cako wero koppere ni, “Man kop a Balaam wot a Beor, kop a dano a waŋe doŋ oyabere, dano ame winyo kop ame Obaŋa okobo, dano ame ŋeo gin ame Ŋat Amalo Meicel ŋeo dano ame neno anyut ame Won Twer tio, dano amerette piny cite, mom gire mio waŋe An anene, cite mom aman; anene, cite mom tye kan aceggi: acerroro waŋŋoro abino, ame bino ya i Yakobo, abiro loc bino ya iyi Icrael; bino tutuco tur nyim jo Moab, te tyeko teko awobe a Ceti luŋ, Lobo Edom obino mayo oko, jo Ceir ame okworrere, en bino mayo lobogi oko, kun Icrael tye ka lweny i tek meicel. Yakobo bino loyo loc jo ame obwot i boma Ar obino neko oko!” Eka te dok lokere neno Amalek, te cako wero koppere ni, “Amalek yam obedo rok me agege, cite i agikki obino tyeko oko luŋ.” Te dok lokere neno jo Keni, te cako kobo koppere ni, “Iri wunu kare alac i kabedowu, ogero pacowu i wi lela; ento jo a Kain obino yako iweŋ, Acur aterowu i opii pi kare a rom mene?” Balaam te dok cako wer ni, “Oi do, jo ame oya i tuŋ anyarodi! Mel apol bino tuno kun oya i Kittim, bino yelo Acur kede Eber atek; en daŋ obino neke oko.” Balaam doŋ te ya oko dok ceŋ i kabedo mere, Balak doŋ te wot oko. I kare ame jo Icrael bino i Cittim, jo rik te cako timo tim me abor i kom anyira me Moab. Gin te bedo lwoŋo jo kan ame gin oyalo iye obaŋegi, jo daŋ te cam, ote daŋ ryebere piny i nyim obaŋegi. Icrael te miye me woro Baal Peor kittono. Akemo te mako Rwot atek meicel i kom Icrael. Rwot te kobbi Muca ni, “Kwany rwode luŋ i akina lwak, iwot iŋabgi i ceŋ i nyim Rwot me wek, Rwot lok cunye akemo mere ager i kom jo Icrael.” Muca te kobbi oŋolkop me Icrael ni, “Ŋat acel acel i akinawu myero nek jo mere ame omiye me woro Baal me Peor pirgi kengi.” Nen ba, dano moro me Icrael te bino kun okelo nyannoro me Midian, te tero i ode, ame Muca karacel kede lwak jo Aron, Icrael luŋ tye aneno. Lwak onwoŋo tye akok i doggola kema me rwatte. Pinekaci wot Eleajar, ame obedo wot Aron, alamdog, ka oneno, oya malo i baŋ lwak, te mako toŋ i ciŋe, te wot lubo yo dano me Icrael ca, naka iyi icika i tyelo, te wot cocobo gin aryo luŋ, dano me Icrael kede dako-naca, kun cocobo yie. Mannono te miyo too edeke ya oko i akina jo Icrael. Cite onwoŋo doŋ jo ame too edeke oneko romo tutumia pyeraryo wie aŋwen. Rwot te kobo baŋ Muca ni, “Pinekaci wot Eleajar ame obedo wot Aron alamdog otyeko doŋ miyo akemona dok oko ceŋ i kom jo Icrael, pien nyeko ame onwoŋo omaka, onwoŋo daŋ omaka i akinagi, omio mom doŋ ate tyeko jo Icrael oko pi nyekona. Pi mannono, yin doŋ kob ni, ‘Nen ba, atyeko doŋ miye cikerena me bedo i kuc, cikere-nono bino bedo baŋe, kede baŋ ikwae ame bino lube, cikere me bedo doŋ nakanaka i tic me olamdog, pien nyeko rik omake pi Obaŋa mere, eka te tiyo tic me kwanyo bal oko i kom jo Icrael.’ ” Nyiŋ dano me Icrael ame oneko, ame rik oneko karacel kede nyako me Midian, onwoŋo obedo Jimri wot a Calu, ame obedo ŋat ame loo ot a kwarogi i akina jo Cimeon. Nyiŋ nyako me Midian ame rik oneko-nono onwoŋo Kojibi nyaka a Jur ame onwoŋo obedo ŋat ame loo ot a kwarogi i akina jo Midian. Rwot te kobo baŋ Muca ni, “Cuny wot agwa i kom jo Midian, me iwot ilweny kedgi; pien gin daŋ opoto agwa i kom bwolowu me poto i bal i kop i kom Peor, kede kop i kom Kojibi, nyaka aloc me Midian, ame obedo amingi a rik oneko i kare ame too edeke opoto pi kop i kom Peor.” Kare a doŋ too edeke okato, Rwot okobbi Muca kede Eleajar alamdog, wot Aron, ni, “Kwan wunu wel lwak jo Icrael luŋ, cakere i kom jo ame mwaka me ditogi oromo pyeraryo dok kede malo kun ilubo i doggola a kwarigi, jo Icrael luŋ a romo lweny.” Muca kede Eleajar alamdog te kop kedgi i bar me Moab, ame tye ceggi i Jordan i Jeriko, okobbigi ni, “Kwan wunu wel jo, cakere i kom jo ame mwaka me ditogi oromo pyeraryo dok kede malo”, kite a Rwot ociko kede Muca. Jo Icrael ame rik obino kun oya i lobo Miciri gin ene: Reuben obedo atin kao Icrael; ikwae a Reuben ene: jo Kanok, ame gin obedo jo me doggola a Kanok; jo a Pallu ame gin obedo jo me doggola a Pallu; jo a Kejeron, ame gin obedo jo me doggola a Kejeron; jo a Karmi, ame gin obedo jo me doggola a Karmi; Magi gin doggola a Reuben, welgi ducu rik oromo tutumia pyeraŋwen wie adek kede mia abiro i pyeradek nono, Ikwae a Pallu te bedo: Eliab, Itino Eliab te bedo Nemuel, Datan, kede Abiram. Magi gin Datan kede Abiram ame rik oyero i akina lwak ame ojem i kom Muca kede Aron ame rik tye i akina lwak i Kora, i kare ame gin ojem i kom Rwot, eka lobo te ŋamo doge mnwonyogi oko karacel kede Kora. I kare-naca lwakgi naca rik oto oko, i kare ame mac tyeko jo mia aryo kede pyerabic; eka gin te doko gin a kwenyoro jo. Itino a Kora rik gire mom obin oto i akinagi. Ikwae a Cimeon ene, kun lubere i doggolagi ene: jo a Nemuel, ame gin obedo jo me doggola a Nemuel; jo a Jamin, ame gin obedo jo me doggola Jamin; jo a Jakin, ame gin obedo jo me doggola Jakin; jo a Jera, ame gin obedo jo me doggola a Jera; jo a Caul, ame gin obedo jo me doggola a Caul; magi gin doggola a Cimeon, welgi oromo jo tutumia pyeraryo wie aryo kede mia aryo nono. Ikwae a Gad kun lubere i doggolagi ene: jo a Jepon, ame gin obedo jo me doggola a Jepon; jo a Kaggi, ame gin jo me doggola a Kaggi; jo a Cuni, ame gin obedo jo doggola a Cuni; jo Ojini, ame gin obedo jo me doggola Ojini; jo a Eri, ame gin obedo jo coggola a Eri; jo Arod, ame gin obedo jo me doggola Arod; me Areli, ame gin obedo jo me doggola Areli. Magi gin jo me doggola a Gad kun lubo kite ame nyiŋgi tye kede acel acel, welgi oromo tutumia pyeraŋwen kede mia abic nono. Awobe a Juda obedo Er kede Onan; gin luŋ Er kede Onan obin oto oko i Kanaan. Ikwae a Juda kun lubere i doggolagi ene: jo a Cela, ame gin obedo jo me doggola a Cela; jo a Perej, ame gin obedo jo me doggola a Perej; jo a Jera ame gin obedo jo me doggola Jera. Itino a Perej awobe ene: jo a Kejeron, ame gin obedo jo me doggola a Kejeron; jo a Kamul, ame gin obedo jo me doggola a Kamul; Magi gin jo me doggola a Juda kun lubo kite ame nyiŋgi ocoye kede acel acel, welgi oromo tutumia pyerabiro wie abicel kede mia abic-nono. Ikwae Icakar ene, kun lubere i doggolagi: jo a Tola, ame gin obedo jo me doggola a Tola; jo a Pua ame gin obedo jo me doggola a Pua, jo a Jacub, ame gin obedo jo me doggola a Jacub; jo a Cimron, ame gin obedo jo me doggola a Cimron. Magi gin jo me doggola Icakar kun lubo kite ame nyiŋgi ocoye kede acel acel, welgi oromo tutumia pyerabicel wie aŋwen kede mia adek nono. Ikwae a Jabulon ene, kun lubere i doggolagi: jo Cered, ame gin obedo jo me doggola a Cered; jo Elon, ame gin obedo jo me doggola a Elon; jo a Jaleel, ame gin obedo jo me doggola a Jaleel. Magi gin jo me doggola a Jabulon kun lubo kite ame nyiŋgi ocoye kede acel acel, welgi oromo tutumia pyerabicel kede mia abic nono. Ikwae a Yucepu ene, kun lubere i doggolagi: jo a Manace kede Epraim. Awobe a Manace ene: jo a Makir, ame gin obedo jo me doggola a Makir; dok Makir rik daŋ obedo pappa a Gilead; jo a Gilead ame gin obedo jo me doggola a Gilead. Awobe a Gilead ene: Joa, Yejer, ame gin obedo jo me doggola a Yejer; jo a Kelek, ame gin obedo jo me doggola a Kelek; kede jo a Aciriel, ame gin obedo jo me doggola a Aciriel; kede jo a Cekem, ame gin obedo jo me doggola a Cekem; kede jo a Cemida, ame gin obedo jo me doggola a Cemida; kede jo a Keper, ame gin obedo jo me doggola Keper. Jelopekad wot a Keper onwoŋo rik mom tye kede awobe mere, kono ka anyira keken, ame anyira mere-nono nyiŋgi ene: Makla, Noa, Kogla, Mirika, kede Tirja. Magi gin ikwae a Manace; welgi rik oromo tutumia pyerabic wie aryo kede mia abiro nono. Awobe Epraim ene, kun lubere i doggolagi; jo a Cutela, ame gin obedo jo me doggola a Cutela; jo a Becer, ame gin obedo jo me doggola a Becer; jo Taan, ame gin obedo jo me doggola a Taan. Magi gin ikwea a Cutela: jo a Eran ame gin obedo jo me doggola a Eran. Magi gin ikwae awobe Epraim kun lubo kite ame nyiŋgi ocoye kede acel acel, wei gi oromo tutumia pyeradek wie aryo kede mia abic nono. Magi gin ikwae Yucepu kun lubere i doggolagi. Ikwae a Benjamin ene, kun lubere i doggolagi: jo a Bela, ame gin obedo jo me doggola a Bela; jo Acibel ame gin obedo jo me doggola Acibel; jo Airam, ame gin obedo jo me doggola Airam; jo Cepupam, ame gin obedo jo me doggola a Cepupam; jo a Kupam, ame gin obedo jo me doggola Kupam. Awobe a Bela onwoŋo Arud kede Naaman: jo Arud ame gin obedo jo me doggola Arud; jo a Naaman, ame gin obedo jo me doggola a Naaman. Magi gin ikwae a Benjamin kun lubere i doggolagi; welgi rik oromo tutumia pyeraŋwen wie abic kede mia abicel nono. Magi gin ikwae a Dan kun lubere kede doggolagi: Cukam, ame gin jo me doggola a Cukam. Magi gin ikwae a Dan kun lubere kede doggolagi. Jo doggola a Cukam luŋ kun lubo kite ame nyiŋgi ocoye kede acel acel, rik gin oromo tutumia pyerabicel wie aŋwen kede mia aŋwen. Ikwae Acer ene, kun lubere i doggolagi: jo Imuna ame gin obedo jo me doggola a Imuna; jo a Icivi, ame gin obedo jo me doggola Icivi; jo a Beria, ame gin obedo jo me doggola a Beria. Ikwae a Beria ene: jo a Keber, ame gin obedo jo me doggola a Keber; jo a Malkiel, ame gin obedo jo me doggola a Malkiel. Nyiŋ nyaka Acer onwoŋo Cera. Magi gin jo me doggola Acer kun lubo kite ame nyiŋgi ocoye kede acel acel, welgi oromo tutumia pyerabic wie adek kede mia adek nono. Ikwae a Naputali ene kun lubere i doggolagi: jo a Jajeel, ame gin obedo jo me doggola a Jajeel; jo a Guni, ame gin obedo jo me doggola a Guni; jo a Jejer, ame gin obedo jo me doggola a Jejer; jo a Cillem, ame gin obedo jo me doggola a Cillem. Magi gin ikwae a Naputali kun lubere i doggolagi; welgi oromo tutumia pyeraŋwen wie abic kede mia aŋwen nono. Man en wel jo Icrael luŋ, jo tutumia mia abicel kede acel, kede mia abiro i pyeradek nono. Rwot okobo baŋ Muca ni, “Obino poko lobo baŋ jo-ni me bedo megi kun olubo kite ame nyiŋ ocoye kede. Atekere ame jo mere pol, ibino pokkigi lobo alac me bedo megi. Atekere ame wel jo mere nok, ibino pokkigi lobo anok, atekere ducu obino pokkigi lobo ame oporo welgi. Cite lobo obino poko kede kwir; gin bino nwoŋo lobo me bedo megi kun lubo kite ame nyiŋ atekere ocoye kede ame lubere i kwarigi. Lobogi ame gin bino nwoŋo me bedo megi obino poko i akina atekere adoŋo mege kede atino mege kun olubo kede kwir.” Magi gin jo Levi kite ame okwanogi kede kun lubere i doggolagi: jo Gercon, ame gin obedo jo me doggola a Gercon; jo Kokat ame gin obedo jo me doggola a Kokat, jo Merari, ame gin obedo jo me doggola a Marari. Magi gin jo me doggola a Levi: jo Libini ame gin obedo jo me doggola a Libini; jo Kebron ame gin obedo jo doggola a Kebron, jo dogola a Makali, jo me doggola a Muci, jo me doggola a Kora, Kokat rik obedo papa Amuram. Nyiŋ dako Amuram rik obedo Yokobedi, ame obedo nyaka Levi, ame rik Levi onywalo i Miciri; en rik te nywalli Amuram Aron kede Muca karacel kede amingi Miriam, Eka Aron te nywalo Nadab, Abiku, Eleajar kede Itamar. Ento Nadab kede Abiku rik te to oko i nyim Rwot i kare ame gin oyalo Rwot i mac a mom ociko ni ti kede, Jo Levi a rik okwano te doŋ romo tutumia pyeraryo wie adek, co luŋ ame mwaka me ditogi oromo dwe acel dok kede malo; pien gin rik mom okwanogi i akina jo Icrael, pien gin rik mom opokkigi lobo moro me bedo megi i akina jo Icrael. Magi gin jo ame rik Muca kede Eleajar alamdog okwano, ame gin okwano jo Icrael i bar me Moab ame ceggi i Jordan i Jeriko. Cite i akina jo-nono mom tye moro iye ame rik tye i akina jo ame Muca kede Aron alamdog okwano, i kare ame gin rik okwano jo i tim me Cinai. Pien Rwot rik okobo i komgi ni, “Gin bino to i tim.” Dano moro rik mom tye ame odoŋ i akinagi, kono ka Kaleb wot a Jepune kede Yocwa wot a Nuni. I kare-nono anyira a Jelopekad te bino ceggi. Jelopekad obedo wot a Keper, wot a Gilead, wot a Macir, wot a Manace, ame gin oya i doggola a Manace wot a Yucepu. Nyiŋ anyira mere-nono rik: Malka, Noa, Kogla, Mirika kede Tirja. Gin ocuŋ i nyim Muca kede i nyim Eleajar alamdog, kede i nyim otel wic, karacel kede i nyim lwak luŋ i doggola kema me rwatte, kun gin okobo ni, “Pappawa rik obin oto oko i tim; en gire rik mom tye i akina lwak a Kora, ame rik bin cokere karacel i kom Rwot, ento en oto gire pi bale re kene kun onwoŋo mom onywalo awobi moro. Piŋo kara omio okwanyo nyiŋ papawa oko i doggola mere, pien en rik mom onywalo awobe bo? Miwa wan daŋ onwoŋ lobo i akina omego a papawa.” Muca rik te kelo kopgi i nyim Rwot. Rwot te kobbi Muca ni, “Kop anyira a Jelopekad tye ateni, ibino miyogi onwoŋo lobo me bedo megi i akina omego a papagi, mano bino miyo lobo ame kono obed me a papagi bedo megi. Yin ibino kobo baŋ jo Icrael ni, ‘Ka ce ŋattoro oto kun mom tye kede atin awobi, obino miyo lobo ame myero bed mege baŋ nyare. Ka ce nyare moro daŋ mom, obino miyo lobo mere baŋ omego mere, Ka ce ominnere moro daŋ mom, obino miyo lobo mere baŋ omego a pappere. Ka ce omin pappere daŋ mom, obino miyo lobo moro baŋ wattere aceggi meicel me doggolagi, en bino tero lobo-nono bedo mege. Man bino bedo icwil kede cik baŋ jo Icrael kite ame Rwot rik ociko kede Muca.’ ” Rwot okobo baŋ Yocwa ni, “Wot malo i wi kidi man me Abarim, me iwot inen lobo ame amio baŋ jo Icrael. Ka doŋ ityeko neno, yin daŋ doŋ ibino to, ite wot nywako kabedo i kwarini kite ame ominni Aron rik daŋ owoto kede, pien opyem keda yin daŋ rik mom iwinyo koppa i tim me Jin i kare ame lwak rik mom inyutta i nyimgi i dog pii ni anacil.” (Man en pii me Meriba me Kadec ame rik tye i tim me Jin.) Muca te kobbi Rwot ni, “Myero Obaŋa ame loo tipo a jo luŋ oket dano moro me loyo lwak, ame bino terogi i lweny dok daŋ bino dwoggogi paco, me wek lwak a Rwot kur bed calo romi ame akwatgi mom.” Rwot te kobbi Muca ni, “Kwany Yocwa wot a Nuni, ame en dano ame tye kede Cuny Obaŋa, me iket ciŋi i kome. Mie ecuŋ i nyim Eleajar alamdog, i nyim lwak luŋ, eka ite miye ticcere i nyimgi. Ibino daŋ miye twerri mogo, me wek lwak luŋ me Icrael bed i winy baŋe. En bino cuŋ i nyim Eleajar alamdog te penyo pire i nyim Rwot gin ame Urim oŋolo; jo bino wot oko kun olubo gin gin a en ociko, dok daŋ jo bino dwogo kun olubo gin a en ociko, en karacel kede jo Icrael luŋ, lwak luŋ me Icrael.” Muca daŋ te tiyo kite ame Rwot ociko. En otero Yocwa, te miye cuŋ i nyim Eleajar alamdog, i nyim lwak luŋ, eka te ke to ciŋe i kome, te miye ticcere kite ame Rwot okobo kede baŋ Muca. Rwotokobo baŋ Mucani, “Cik jo Icrael kun ikobbigi ni, Myero ikella wunu motta i kare ame aciko i kome, ame en cam ame owaŋo awaŋa kede mac, gin a ŋwece kur a yomoro cuny. Dok daŋ kobbigi ni, Gin ame ibino wunu waŋo i mac me mot baŋ Rwot ene: nyogi romi aryo me mwaka acel acel, ame roccoro mom i komgi, en ame ibino miyo wunu me mot owaŋo awaŋa kede mac nino ducu. Nyok romo acel ibino miyo wunu odiko, eka acel ite miyo wunu otyeno. Ibino miyo daŋ moko kwon apwottere karacel kede romo-nono; moko kwonnono myero bed ame romo gwata acel ame orubo kede moo jeituni ame oodo aoda cupa aryo kede nucu, obed mot me moko kwon. Man en mot awaŋa me nino ducu ame rik ociko pire i wi kidi me Cinai, me bed gin a ŋwece kur, me mot awaŋa i mac baŋ Rwot; karacel kede mot amata a romo cupa aryo kede nucu pi nyok romo acel acel; ibino onyo mot amata me vino akeccere i kabedo acil baŋ Rwot. Nyok romo ocele ibino miyo otyeno, kun imio kite ame imio kede mot moko kwon me odiko karacel kede mot amata; ibino miyo acalo mot ame owaŋo i mac, gin a ŋwece kur a yomoro cuny Rwot. “I ceŋ cabit obino miyo nyogi romi aryo ame mwaka me ditogi oromo acel acel, ame roccoro mom i komgi, kede moko kwon apwottere ame romo gwata aryo, ame orubo kede moo jeituni, mot me moko kwon karacel kede mot amata mere. Man en mot awaŋa me ceŋ cabit acel acel, medo i kom mot awaŋa me nino ducu karacel kede mot amata ame ociko. “Iyi acakki dwewu, ibino miyo wunu mot awaŋa baŋ Rwot ibino miyo wunu itino twoni aryo, nyok romo acel kede itino nyogi romi abiro ame mwaka me ditogi oromo acel acel, ame roccoro mom i komgi; karacel kede moko kwon apwottere ame orubo kede moo jeituni ame romo gwata adek pi mot me moko kwon pi twon acel acel; moko kwon apwottere ame orubo kede moo jeituni ame romo gwata aryo pi mot moko kwon pi nyok romo acel acel; kede dok moko kwon apwottere ame orubo kede moo jeituni ame romo gwata acel pi mot me moko kwon pi atin nyok romo acel acel; bino bedo mot awaŋa a ŋwece kur a yomoro cuny, mot ame owaŋo i mac baŋ Rwot. Mot amata ame ociko bino bedo vino ame romo cupa abic pi twon, cupa adek pi nyok romo, kede cupa aryo kede nucu pi atin romo. Man en mot awaŋa pi dwe acel acel, naka tyeko dwete luŋ ame tye i mwaka. Ibino daŋ miyo nyok dyel acel me mot me bal baŋ Rwot; ibino miyo mannono karacel kede mot awaŋa me nino ducu kede mot amata mere.” I dwe me agege, i nino dwe apar wie aŋwen, mano en Kato a Rwot. I nino dwe apar wie abic me dwe me acellono, en nino a Rwot, me ceuban me Ogati a Tobi Mom iye, ibino camo wunu ogati a tobi mom iye pi nino abiro. I nino me agege mere, myero ibed wunu kede cokere acil; mom ibino wunu tiyo ticcoro ame tek. Ento myero iyal wunu Obaŋa i mot ame owaŋo i mac, mot ame owaŋo baŋ Rwot; ibino miyo wunu itino twoni aryo, nyok romo acel, kede itino nyogi romi abiro ame mwaka me ditogi romo acel acel; myero inen wunu ni roccoro mom i komgi. Mot yalo Obaŋa me moko kwon apwottere ame orubo kede moo jeituni, ame tye pirgi ene: myero mi gwata adek pi twon acel acel gwata aryo pi nyok romo; dok daŋ mi gwata acel pi atin romo acel acel. Ibino daŋ miyo wunu nyok dyel acel me mot me bal, me kwanyo bal i komwu. Ibino miyo wunu karacel kede mot awaŋa me odiko, ame obedo mot awaŋa me nino ducu. Ibino miyo wunu cam ame owaŋo i mac kittono pi nino abiro, gin a ŋwece kur a yomoro cuny Rwot; ibino miyo wunu karacel i mot awaŋa me nino ducu kede mot amata ame ociko. I nino me abiro mere, myero ibed wunu kede cokere acil; kur iti wunu iye ticcoro atek. I nino me miyo camwu me wi mwaka ogeo cek, ame ikelo wunu iye motwu baŋ Rwot, mot me moko kwon kal anyen, iyi ecubanwu me cabit abiro, ibino bedo wunu kede cokere acil; kur iti wunu iye ticcoro atek, ento myero imi wunu mot awaŋa, gin a ŋwece kur a yomoro cuny Rwot. Ibino miyo wunu itino twoni aryo, nyok romo acel kede itino nyogi romi abiro ame mwaka me ditogi oromo acel acel, karacel kede moko kwon apwottere, ame orubo kede moo jeituni ame romo gwata adek pi twon acel acel, gwata aryo pi nyok romo, kede gwata acel pi atin nyok romo acel acel; Okaracel kede nyok dyel acel me mot me bal, me tiyo tic me kwanyo bal i komwu, Ibino miyogi wunu karacel i mot amata ame ociko, kun imedo wunu i kom mot awaŋa me nino ducu kede mot me moko kwoŋŋere. Myero inen wunu ni roccoro mom i komgi. I dwe me kany wie aryo, nino dwe acel, ibino bedo wunu kede cokere acil; mom ibino tiyo wunu ticcoro atek. Ibino miyo wunu apel kok i nino-nono, dok daŋ ibino miyo wunu mot owaŋo awaŋa, gin a ŋwece kur a yomoro cuny Rwot. Ibino miyo wunu atin twon acel kede nyok romo acel kede itino nyogi romi abiro ame mwaka me ditogi oromo acel acel, ame roccoro mom i komgi; kun imio karacel kede moko kwon a pwottere ame orubo kede moo jeituni ame romo gwata adek pi twon, gwata aryo pi nyok romo, kede gwata acel pi atin nyok romo acel acel, karacel kede nyok dyel acel me mot me bal, me tiyo tic me kwanyo bal i komwu. Ibino miyo wunu kun imedo wunu i kom mot ame owaŋo awaŋa me por a dwe kede mot me moko kwon ame ociko, kede mot awaŋa me nino ducu, karacel kede mot amata ame ociko kun ilubo wunu cikgi, obed gin a ŋwece kur a yomoro cuny, mot ame owaŋo i mac baŋ Rwot. “I dwe me abiro, nino dwe tomon, ibino bedo wunu kede cokere acil; ibino bedo wunu kede kumo kun cunywu cwer; mom ibino tiyo wunu ticcoro iye; ento ibino miyo wunu mot awaŋa baŋ Rwot, gin a ŋwece kur a yomoro cuny. Ibino miyo wunu twon acel, nyok romo acel, itino nyogi romi abiro ame mwaka me ditogi romo acel acel; myero inen wunu ni roccoro mom i komgi. Ibino miyogi wunu karacel kede moko kwon apwottere ame orubo kede moo jeituni ame romo gwata adek pi twon, gwata aryo pi nyok romo, kede gwata acel pi atin nyok romo acel acel karacel kede nyok dyel acel me mot me bal, ame omedo i kom mot me kwanyo bal kede mot moko kwon kede mot amata ame ociko. “I nino dwe apar wie abic, me dwe me abiro, ibino wunu bedo kede cokere acil; kur iti wunu iye ticcoro atek. Ibino wunu kwero ecuban a Rwot pi nino abiro, dok daŋ ibino miyo wunu mot yalo Obaŋa ame owaŋo i mac, gin a ŋwece kur a yomoro cuny Rwot. Ibino miyo wunu itino twoni apar wie adek, nyogi romi aryo, itino nyogi romi apar wie aŋwen ame mwaka me ditogi oromo acel acel, ame roccoro mom i komgi. Ibino miyo wunu karacel i moko kwon apwottere ame orubo kede moo jeituni ame romo gwata adek pi twon acel acel, gwata aryo pi nyok romo acel acel, kede gwata acel pi atin nyok romo acel acel. Ibino miyo daŋ nyok dyel acel me mot me bal, ame omedo i kom mot awaŋa me nino ducu, kede mot me moko kwon, kede mot amata ame ociko. “I nino me aryo mere obino miyo itino twoni apar wie aryo, nyogi romi aryo, itino nyogi romi apar wie aŋwen ame mwaka me ditogo oromo acel acel, ame roccoro mom i komgi, Ibino miyo wunu karacel kede mot moko kwon, kede mot amata pi twoni, pi nyogi romi, kede pi itino nyogi romi, kun lubo welgi kede kite a cik tye kede. Ibino miyo daŋ nyok dyel acel me mot me bal ame omedo i kom mot awaŋa me nino ducu, kede mot me moko kwon, kede mot amata mere ame ociko. “I nino me adekkere obino miyo itino twoni apar wie acel, nyogi romi aryo, kede itino nyogi romi apar wie aŋwen ame mwaka me ditogi oromo acel acel, ame roccoro mom i komgi. Ibino miyo wunu karacel kede mot me moko kwon, kede mot amata pi twoni, pi nyogi romi kede pi itino nyogi romi, kun lubo welgi kede kite a cik tye kede. Ibino miyo daŋ nyok dyel acel me bal ame omio karacel kede mot awaŋa me nino ducu, kede mot me moko kwon kede mot amata ame ociko. “I nino me aŋwennere obino miyo itino twoni tomon, nyogi romi aryo kede itino nyogi romi apar wie aŋwen ame mwaka me ditogi oromo acel acel, ame roccoro mom i komgi. Ibino miyo wunu karacel kede mot me moko kwon, kede mot amata pi twoni, pi nyogi romi kede pi itino nyogi romi, kun lubo welgi kede kite a cik tye kede, Ibino miyo daŋ nyok dyel acel me mot me bal ame omedo i kom mot awaŋa me nino ducu, kede mot moko kwon kede mot amata ame ociko. “I nino me kannyere, obino miyo itino twoni aboŋwen, nyogi romi aryo kede itino nyogi romi apar wie aŋwen ame mwaka me ditogi oromo acel acel, ame roccoro mom i komgi. Ibino miyo wunu karacel kede mot me moko kwon, kede mot amata pi twoni, pi nyogi romi kede pi itino nyogi romi, kun lubo welgi kede kite a cik tye kede. Ibino miyo wunu daŋ nyok dyel acel me mot me bal ame omio karacel kede mot awaŋa me nino ducu, kede mot moko kwon kede mot amata ame ociko. “I nino me kanyape mere obino miyo twoni kany wie adek nyogi romi aryo, kede itino nyogi romi apar wie aŋwen ame mwaka me ditogi oromo acel acel, ame roccoro mom i komgi. Ibino miyo wunu karacel kede mot me moko kwon, kede mot amata pi twoni, pi nyogi rommi kede pi itino nyogi romi, kun lubo welgi kede kite a cik tye kede. Ibino miyo wun daŋ nyok dyel acel me mot me bal ame omio karacel kede mot awaŋa me nino ducu, kede mot moko kwon kede mot amata ame ociko. “I nino me kany wie aryo obino miyo itino twoni abiro, nyogi romi aryo, kede itino romi apar wie aŋwen ame mwaka me ditogi oromo acel acel, ame roccoro mom i komgi. Ibino miyo wunu karacel kede mot moko kwon, kede mot amata pi twoni, pi nyogi romi kede pi itino nyogi romi kun lubo welgi kede kite a cik tye kede. Ibino miyo wunu daŋ nyok dyel acel me mot me bal ame omedo i kom mot awaŋa me nino ducu, kede mot moko kwon kede mot amata ame ociko. “I nino me kany wie adek mere ibino bedo wunu kede cokere acil; kur iti wunu iye ticcoro atek. Ento myero imi wunu iye mot yalo Obaŋa ame owaŋo i mac, gin a ŋwece kur a yomoro cuny Rwot. Ibino miyo wunu twon acel, nyok romo acel kede itino romi abiro ame mwaka me ditogi oromo acel acel, ame roccoro mom i komgi. Ibino miyo wunu karacel kede mot me moko kwon kede mot amata pi twon, pi nyok romo kede pi itino nyogi romi acel acel kun lubo welgi kede kite a cik tye kede. Ibino miyo wunu daŋ nyok dyel acel me mot me bal, ame omedo i kom mot awaŋa me nino ducu, kede mot me moko kwon kede mot amata ame ociko. “Ibino miyo wunu mot magi baŋ Rwot i kare me ecubanwu ame ociko, kun imedo wunu iye motwu me cobo kwoŋ, kede motwu ocele luŋ me ber a yic, motwu me awaŋa, kede motwu me me moko kwon, kede dok motwu me amata kede motwu me kweyo cuny.” Muca te titti lwak jo Icrael ginnoro luŋ, kite a rik Rwot ociko kede Muca. Muca okobo baŋ otel a loo itekere a jo Icrael ni, “Gin ame Rwot ociko ene: Ka ce lo moro okwoŋo baŋ Rwot onyo okwoŋo kwoŋŋoro ame mio cikere twee oko, en mom bino turo gin ame ekwoŋonono; myero en cob luŋ kun lubo kop ame oya i doge. Onyo ka dannoro okwoŋo baŋ Rwot, ame mio cikere twee oko, kun nwoŋo en pwod tye i ot a pappere, i kare mere me nyako, eka pappere te winyo pi kwoŋŋere-nono kede pi cikere ame en otweye kede, eka mom gire te kobbe ginnoro; kwoŋŋere luŋ bino moko kite ame en okwoŋo kede dok cikere ame twee bino daŋ bedo kite ame en ociko. Ento ka pappere okobe ni mom emoko kwoŋŋere-nono i nino ame en owinyo iye, kwoŋŋere-nono mom bino moko, gin a en ociko ame twee daŋ mom bino moko; Rwot daŋ bino weke, pien pappere mom oye. Dok ka nyannoro onyomere oko kun kwoŋŋere pwod tye i kome onyo okobo kopporo a mom koŋ otamo tere i kom gin ame en otweye kede kene, eka cware te winyo, mom te kobo iye ginnoro i nino ame cwinyo iye-nono; kwoŋŋere-nono bino moko kite ame en okwoŋo kede. Aco ka cware okobo kopporo ame nyuto ni en mom emoko ame en owinyo iye pire, cware bino miyo kwoŋŋere-nono mom moko i kome, kede kop ame onwoŋo en okwoŋo aboŋo tamo tere, ame otweye kede kene. Rwot daŋ bino weke. Ento ka dako moro a cware oto, onyo dako ame cware oryemo oko okwoŋo, ginnoro luŋ ame en otweye kede kene bino moko i kome atwal. Ka ce en okwoŋo kun pwod tye i ot a cware onyo okwoŋo kwoŋŋoro ame mio cikere twee, ka cware owinyo mom te kobbe ginnoro iye, kun daŋ mom okwero, kwoŋŋere-nono bino moko i kome kite ame en okwoŋo kede, dok cikere luŋ ame en otweye kede kene bino moko kite ame en ociko. Aco ka cware okwero oko i nino ame en owinyo iye pire, kopporo luŋ ame onwoŋo odonnyo i doge ame mako kwoŋ onyo gin ame en ociko, mom bino moko i kome, pien cware nwoŋo ogeŋo oko; Rwot daŋ bino weke. Kit kwoŋŋoro luŋ ame en okwoŋo kede kite cikkoro luŋ ame en otweye kede kene, cware twero moko, dok daŋ cware twero kwero. Ento ka cware mom okobo kopporo iye, kun obedo liŋ aliŋa cakere i nino-nono, en doŋ moko kwoŋ a dako mere luŋ ame nwoŋo tye i kome, pien mom okobo kopporo iye i nino ame owinyo iye pire. Aco ka cware okwero oko kun kare ame en owinyo koppere iye doŋ okato oko, bal a dako mere bino dok i wie.” Magi en icwil ame Rwot ociko kede Muca ame mako ico kede dako mere, papa a nyako kede nyare i kare ame en pwod tidi, ame nwoŋo pwod tye i ot a pappere. Rwot okobbi Muca ni, “Cul kwor ajo Icrael i komjo Midian; eka ite doŋ to, wot nywako kabedo i kwarini.” Muca te kobbi lwak ni, “Mi wunu jo me mony ame tye akinawu rukere i jami lwenygi, me gin wot lweny i kom jo Midian, me cul kwor a Rwot i kom jo Midian. Cwal wunu jo tutumia acel acel i kom atekere acel acel me Icrael, me gin wot i lweny.” Mannono omio i kom lwak tutumia i tutumia me Icrael, oya iye jo tutumia apar wie aryo ame orukere i jami lweny, kun iyi atekere acel acel ya iye tutumia acel acel. Muca rik te cwayogi i lweny, jo tutumia acel acel ame oya i atekere acel acel, kun owoto karacel kede Finekaci wot Eleajar alamdog, ame otero jami me kabedo acil, kun daŋ omako apel me kwenyoro jo i ciŋe. Gin rik te lweny i kom jo Midian kite ame Rwot ociko kede Muca, ote neko co luŋ iye. Oneko obakki me Midian karacel kede jo ocele; obakki abic me Midian ame onekogi, gin ene: Evi, Rekem, Jur, Kur kede Rebe, Oneko daŋ Balaam wot a Boer oko i pala lweny, Jo Icrael te yako mon a jo Midian karacel kede itinogi, ote daŋ mayo limgi akwo luŋ, karacel kede jamigi luŋ. Gin te waŋo daŋ bomagi luŋ i kan a gin bedo iye, karacel kede gonyegi. Gin te tero ginnoro luŋ ame gin oyako karacel kede en ame gin omao, dano karacel kede leyi. Gin rik te tero jo ame gin oyako kede jami ame gin omao, kede ame gin oyako, ote kelo baŋ Muca kede Eleajar alamdog, kede baŋ lwak jo Icrael, i gonygi ame onwoŋo tye i bar me Moab i Jeriko i ŋet Jordan. Muca kede Eleajar alamdog, karacel kede otel a lwak luŋ, te wot me wot rwatte kedgi i ŋe gony. Akemo rik te mako Muca i kom otel wi mony, ame loo jo tutumia kede ame loo jo mia, ame onwoŋo odwogo i mony. Muca okobbigi ni, “Iweko wunu mon luŋ akwo? Nen ba, mon magi en ame olubo tam a Balaam, ame te miyo jo Icrael oturo cik a Rwot i kop i kom Peor, ame te miyo too edeke poto i kom lwak a Rwot. Aco doŋ nek wunu itino aco luŋ ame tye i akina itinogi, nek wunu daŋ mon luŋ ame oŋeye ico, ame obuto kedgi. Ento anyira luŋ ame mom ru oŋeye kede co, a mom ru obuto kedgi, wek wunu bed kwo me gin bed megwu. Koŋ ibut wunu oko i ŋe gony pi nino abiro; jo luŋ i akinawu ame oneko dano kede jo luŋ ame ogudo kom jo oto, myero lonnyere kengi kengi i nino me adekkere kede i nino me kany wie aryo mere, karacel kede jo luŋ ame iyako wunu. Lony wunu ruk luŋ, ginnoro luŋ ame otio i lao, ginnoro luŋ ame otio i yer dyegi karacel kede ginnoro luŋ ame otio i yat.” Eleajar alamdog, rik te kobo baŋ lwak a rik onwoŋol owoto i mony ni, “Man en cik ame oketo, ame yam Rwot ociko kede Muca: jami ame obedo jabu, onyo ryal, onyo mola, onyo nyonyo, kede kit nyonyo ocele acalo abati kede ricac keken, ginnoro luŋ ame mac mom obalo, ibino cwayo wunu beo i mac, eka te lony oko. Cite kadi bed amannono, pwod dok ibino medo lonyo wunu i pii me lwoko kwer; doŋ ginnoro luŋ ame mac twero balo oko, ibino cwayo wunu beo i pii. Myero ilwok wunu boŋŋiwu i nino me kany wie aryo mere, ite doŋ doko wunu jo olony; i ŋe ennono doŋ itwero dok wunu i gony.” Rwot okobo baŋ Muca ni, “Kwan doŋ wel jami ame oyako i mony, dano karacel kede leyi, yin karacel kede Eleajar alamdog kede odoŋe atekere me doggola a kwarigi ame tye i akina lwak; eka ite poko gin oyako i mony i dul aryo, acel bed me a jo ame owoto i mony, eka tuŋ ocele te bedo me a lwak luŋ, Eka ite miyo jo olwenyo kwanyo ocoro a Rwot i kom megi kun okwanyo acel me mia abic i kom dano, twoni, kana, kede romi onyo dyegi; kwany i kom nucugi imi baŋ Eleajar alamdog acalo mot ame omio baŋ Rwot: Eka ite daŋ miyo jo Icrael kwanyo ocoro a Rwot i kom megi kun okwanyo acel me pyerabic i kom dano, twoni, kana, kede romi onyo dyegi, kede kit lim akwo ocele luŋ; magi-nono mi baŋ jo Levi ame gwoko kane a Rwot.” Eka Muca kede Eleajar te daŋ timo kite ame Rwot ociko kede Muca. Jami ame jo olwenyo oyako, ame odoŋŋere obedo romi tutumia mia abicel kede pyerabiro wie abic, kede dok tutumia pyerabiro wie aryo, kede kane tutumia pyerabicel wie acel, kede jo tutumia pyeradek wie aryo, ame gin mon ame mom ru oŋeye kede co. Nucu mere ame opoko baŋ jo ame rik owoto i mony obedo romi tutumia mia kede pyeradek wie abiro, kede mia abic nono; eka romi ame omio me ocoro a Rwot te romo tutumia abicel kede pyerabiro wie abic. Aco dok te romo tutumia pyeradek wie abicel; en ame omio me ocoro a Rwot te romo pyerabiro wie aryo. Kane te romo tutumia pyeradek kede mia abic nono, en ame omio me ocoro a Rwot te romo pyerabicel wie acel. Jo te romo tutumia apar wie abicel; jo ame omio me ocoro a Rwot te romo pyeradek wie aryo. Muca te miyo gin ame omio me ocoro a Rwot baŋ Eleajar alamdog, kite a Rwot ociko kede Muca. Nucu mere ame omio jo Icrael, ame Muca opoko i kom nucu ame jo owoto i mony otero; nucu a lwak kono rik te bedo daŋ romi tutumia mia adek kede pyeradek wie abiro kede mia abic nono; eka dok te bedo daŋ tutumia pyeradek wie abicel, kede kana tutumia pyeradek kede mia abic nono, kede jo daŋ tutumia apar wie abicel. Muca rik te miyo jo Icrael kwanyo acel me pyerabic i kom nucu ame opokkigi, i kom dano, kede i kom leyi, te miyogi baŋ jo Levi ame gin onwoŋo gwoko kema a Rwot, kite ame Rwot rik ociko kede Muca. Eka otel wi mony ame loo jo me lweny tutumia i tutumia, jo ame loo jo tutumia kede jo ame loo jo mia te bino ceggi baŋ Muca. Ote kobbi Muca ni, “Wan omironi otyeko kwano wel olweny ame tye i te locwa oko, onwoŋo ni mom gire tye ŋattoro i akinawa ame orwenyo. Wan doŋ okelo mot a Rwot, gin ame dano acel acel onwoŋo, okelo jabu, mola bat, mola ŋut ciŋ, atem, atem me yit, tigo ŋut, me kwanyo bal i komwa i nyim Rwot.” Muca kede Eleajar alamdog te gamo jabu-nono i baŋgi; gin luŋ onwoŋo obedo jami ame otio atia. Jabu luŋ ame omio me mot baŋ Rwot ame oya i baŋ otel ame loo jo tutumia kede ame loo jo mia, gin luŋ pekgi oromo cekel tutumia apar wie abicel kede mia abiro i pyerabic nono. (Jo olwenyo onwoŋo oyako jami kun ŋat acel acel yako mere kene.) Muca kede Eleajar alamdog te gamo jabu i baŋ odoŋe ame loo jo tutumia kede i baŋ odoŋe ame loo jo mia, gin te tero i kema me rwatte, me wek bed gin me po i kom jo Icrael i nyim Rwot. I Jo Reuben kede jo Gad rik onwoŋo tye i lwak lim akwo apipim. Gin rik te neno lobo me Jajer kede lobo me Gilead, lobo mere onwoŋo ber me kwat, Omio jo Reuben kede jo Gad te wot baŋ Muca kede baŋ Eleajar alamdog, kede baŋ otel a lwak, eka gin te kobbigi ni, “Atarot, Dibon, Jajer Nimra, Kecibon, Eleale, Cebam, Nebo kede Beon, ame gin lobo ame rik Rwot en omao i nyim lwak jo Icrael, lobe-nono obedo lobo aber me gwoko lim akwo; wan omironi daŋ otye kede lim akwo.” Gin te dok medde i kopgi ni, “Ka ce berwa onen i nyimi, wek omironi ter lobo man bed megi, kur dok iterwa imiwa oŋol Jordan.” Ento Muca te kobbi jo Gad kede jo Reuben ni, “Omegowu bino wot lweny kun wun ibedo wunu kan? Piŋo kara imito wunu balo cuny jo Icrael me wot loka i loba ame rik Rwot omiogi? Kwarowu rik daŋ koŋ otimo kittono, i kare ame rik ocwaogi i Kadec-barnea me neno lobo. Pien i kare ame gin owoto naka i luŋ me Ecikol, ote neno lobo, gin obalo cuny jo Icrael me wot i lobo ame Rwot omio baŋgi. I nino-naca akemo te mako Rwot meicel i komgi, te kwoŋ kun kobo ni, ‘Ateteni, mom tye ŋattoro i akina jo-ni ame yam oya i lobo Miciri, cakere i kom jo ame mwaka me ditogi doŋ oromo pyeraryo dok kede malo, ame bino neno lobo ame rik akwoŋo pire ni abino miyo baŋ Iburaim, kede Icaka kede Yakobo, pien gin mom obedo luba i yore ducu. Ŋattoro i akinagi mom bino neno, kono ka Kaleb wot a Jepune ame obedo jo Keniji kede Yocwa wot a Nuni, pien gin en obedo lubo Rwot i yore ducu.’ Akemo rik te mako Rwot i kom Icrael, eka te miyogi bedo wiwira i tim pi mwakki pyeraŋwen twal, naka waŋ ame lwagi jo luŋ a nwaŋ otimo bal i nyim Rwot otum oko luŋ. Koŋ dok inen wunu ba, wun daŋ dok icako timere wunu bala kwariwu, wun itino obalo, imito wunu medo akemo a Rwot me bed agwa i kom jo Icrael! Pien ka ce iweko wunu lube oko, en dok bino lwak ata i tim kan; mano dok bino miyo imio wunu jo man to tum oko.” Gin dok ote noke aceggi ote kobbe ni, “Wan obino celo ka-gwoko limwa kede boma me bedo itinowa, cite wan obino ruko jami lwenywa kun oyikere pi telo wi jo Icrael anyim, tuno ka doŋ oterogi i kabedogi, kun itinowa bedo i boma ame ocecelo atek pi okwor ame bedo i lobo-nono. Wan mom obino dwogo ceŋ i pacowa tuno ka doŋ jo Icrael onwoŋo lobogi me bedo megi, kun ŋat acel acel nwoŋo mege. Pien wan giwa mom obino nwoŋo lobo karacel kedgi i loka Jordan kuno, pien wan doŋ otyeko nwoŋo lobowa i ŋe Jordan kan, tuŋ kide.” Mannono te miyo Muca kobbigi ni, “Ka ce ibino timo wunu man, ka ce ibino ruko wunu jami lwenywu ite telo wunu nyim Rwot pi lweny, kun ŋat acel acel i akinawu ame orukere i jami lweny bino kato i ŋe Jordan tuŋ ca, i nyim Rwot, tuno waŋ ame en oryemo okworrere oko i nyime, kun Rwot doŋ oloo lobo-nono oko; i ŋe mannono, wun giwu doŋ ite dwogo wunu bedo, kun mom doŋ itye wunu kede banya moro baŋ Rwot onyo baŋ jo Icrael, lobo man doŋ bino bedo megwu i nyim Rwot. Cite ka mom itimo wunu kittono, nen ba, nwoŋo itimo wunu bal i nyim Rwot; myero iŋe wunu ni balwu bino miyo itiŋo wunu megwu oromowu oko. Ger wunu boma itino kede ka-gwoko limwu akwo, ite timo wunu doŋ kite ame ikobo wunu-nono.” Jo Gad kede jo Reuben te doŋ ye baŋ Muca ni, “Wan omironi obino timo kite ame yin adwoŋwa iciko, Itinowa kede monwa kede romiwa kede limwa akwo luŋ bino doŋ i boma ame tye i Gilead. Cite omironi bino kato loka ca, jo luŋ ame orukere me lweny, kun owoto i mony i nyim Rwot, kite ame adwoŋwa ociko kede.” Mannono omio Muca omio cik ame makogi baŋ Eleajar alamdog kede baŋ Yocwa wot a Nuni, kede baŋ odoŋe a loo doggola a kwarigi ame tye iyi atekere luŋ me a jo Icrael. Muca okobo baŋgi ni, “Ka jo Gad kede jo Reuben, jogi luŋ ame orukere me lweny i nyim Rwot, bino kato kedwu loka Jordan, eka Rwot te miyowu loyo lobo-nono, ibino miyo wunu lobo me Gilead bedo megi. Cite ka gin mom bino ruko jami lweny te kato karacel, gin bino nwoŋo lobo megi karacel kedwu i lobo me Kanaan.” Jo Gad kede jo Reuben te dok iye ni, “Wan obino timo kite ame Rwot okobo baŋ omiro mere-nono. Wan obino kato loka ca, naka i lobo Kanaan, i nyim Rwot kun oruko jami lweny, kun lobo ame wan onwoŋo me bedo megwa doŋ i ciŋwa i ŋe Jordan kan.” Muca te miyo baŋ jo Gad kede baŋ jo Reuben kede baŋ nucu a jo Manace wot a Yucepu, lobo ame Cikon abaka a jo Amor yam loo, kede lobo ame Og, abaka me Bacan yam loo, omiogi lobo-nono luŋ kede boma luŋ ame tye i lobo-nono. Jo a Gad te gero Dibon, Atarot, Aroer, Atrot-Copan, Jajer, Jogbeka, Bet-nimara kede Bet-karan, ame gin boma ame ocecelo atek kede anok me gwoko romi. Jo a Reuben ogero Kecbon Eleala, Kiriataim, Nebo kede Baalmeon (nyiŋgi obino loko oko), kede Cibima; gin te cako nyiŋ boma ame ogero-nono apat. Jo a Makir wot a Manace te wot i lobo Gilead, ote mayo oko, ote ryemo jo Amor ame onwoŋo bedo iye oko, Muca te miyo Gilead baŋ Makir wot a Manace, en te cako bedo iye. Jair te wot mayo boma atitino luŋ, te cako nyiŋgi ni, Kavotjair. Noba te wot mayo Kenat kede paco atino luŋ a tye i ŋete, te cako nyiŋgi ni Noba, bala nyiŋe en ikome. Man en kite ame jo Icrael rik obedo kokoba kede wotgi i kare ame gin oya i lobo me Miciri, owoto atekere atekere, kun Muca kede Aron telo wigi, Muca rik obedo coyo nyiŋ kan ame gin ya iye kun omedde i wotgi, kite ame Rwot ocikogi kede. Man en kite ame gin obedo medde kede i wotgi, kun lubere i kabedo luŋ ame gin obedo ya iye. Gin oya i Ramecec i nino dwe apar wie abic me dwe me agegi i kom nino ame lubo nino me Kato, en ame jo Icrael ocako wotgi iye kun owoto wot me loc, i nyim jo Miciri luŋ. Jo Miciri onwoŋo tye ayiko itino kaogi, ame Rwot obedo neneko ikinagi: Rwot daŋ oŋolo kop i kom obaŋegi luŋ. Jo Icrael rik te ya i Ramecec kittono, ote guro kemagi i Cukot. Gin oya i Cukot, ote wot guro kemagi i Etam, ame tye i pet tim. Gin oya i Etam, ote dok wirre dok cen i Pi-kakirot ame tye i tuŋ to me Baal-jepon; ote wot guro kemagi i nyim Migdol. Gin te ya oko i nyim Kakirot ote beo i dye nam, ote tuno i tim. Gin owoto wot me nino adek i dye tim me Etam, ote wot guro kemagi i Mara. Gin oya i Mara, ote bino i Elim. Iyi Elim rik ote nwoŋo iye waŋ akoŋ apar wie aryo, kede otit pyerabiro, gin te guro kemagi kuno, Gin oya i Elim ote wot guro kemagi i Nam Arema. Gin oya i ŋet nam Arema, ote wot guro kemagi i ŋet tim i Cin. Gin oya i tim me Cin, ote wot guro kemagi i Dopika. Gin oya i Dopika, ote wot guro kemagi i Aluc. Gin oya i Aluc, ote wot guro kemagi i Repidim kan ame pii me amata a jo obedo mom iye. Gin oya i Ripidim, ote wot guro kemagi i tim me Cinai. Gin dok te ya i tim me Cinai, ote wot guro kemagi i Kibrot-atava. Gin oya i Kibrot-atava, ote wot guro kemagi i Kajerot. Gin te ya i Kajerot, ote wot guro kemagi i Ritma. Gin te ya i Ritma, ote wot guro kemagi i Rimmonperej. Gin oya i Rimmonperej, ote wot guro kemagi i Libini. Gin oya i Libna, ote wotguro kemagi i Ricca. Gin oya i Ricca, ote wot guro kemagi i Kekelata. Gin oya i Kekelata, ote wot guro kemagi i kidi me Ceper. Gin oya i kidi me Ceper ote wot guro kemagi i Karada. Gin oya i Karada, ote wot guro kemagi i Makelot. Gin oya i Makelot, ote wot guro kemagi i Takat. Gin oya i Takat, ote wot guro kemagi i Tera. Gin oya i Tera, ote wot guro kemagi i Mitka. Gin oya i Mitka, ote wot guro kemagi i Kacmona. Gin oya i Kacmona, ote wot guro kemagi i Mocerot. Gin oya i Mocerot, ote wot guro kemagi i Bene-jaakan. Gin oya i Bene-jaakan, ote wot guro kemagi i Koraggidgad. Gin oya i Koraggidgad, ote wot guro kemagi i Jotbata. Gin oya i Jotbata, ote wot guro kemagi i Abrona. Gin oya i Abrona, ote wot guro kemagi i Ejiongeber. Gin oya i Ejiongeber, ote wot guro kemagi i tim me Jin (ame en Kadec). Gin oya i Kadec, ote wot guro kemagi i ŋet waŋ lobo me Edom. Aron alamdog te yitto malo i wi kidi me Kor kite ame Rwot onwoŋo ociko, te wot to oko kuno, i mwaka me pyeraŋwennere ame jo Icrael oya kede i Miciri, i nino dwe acel, me dwe me abic, Mwaka me dit Aron onwoŋo doŋ oromo mia acel kede pyeraryo wie adek i kare ame en to i wi kidi. Abaka Arad, ame en dano me Kanaan ame onwoŋo bedo i Negeb i lobo me Kanaan, te winyo pi bino a jo Icrael. Gin dok te ya ite kidi me Kor, ote wot guro kemagi Jalmona. Gin oya i Jalmona, ote wot guro kemagi i Punon. Gin oya i Punon, ote wot guro kemagi i Obot. Gin oya i Obot, ote wot guro kemagi Iyeabarim i lobo me Moab. Gin oya iyim, ote wot guro kemagi i Dibon-gad. Gin oya i Dibon-gad, ote wot guro kemagi i Almon-diblataim. Gin oya i Almondiblataim, ote wot guro kemagi i kidi me Abarim, ame tye i nyim Nebo, Gin te ya i lobo obedo kidikidi me Abarim, ote wot guro kemagi i bar me Moab i ŋet Jordan i Jeriko. Gin oguro kemagi i ŋet Jordan cakere i Bet-jecimot tuno naka i Abel-citim ame tye i bar me Moab. Rwot te kobbi Muca i bar me Moab i ŋet Jordan ame otikere Jeriko ni, “Kobbi jo Icrael ni, ‘Ka idokoro wunu Jordan, ikato wunu i lobo me Kanaan, ibino wunu ryemo jo ame bedo i lobo-nono oko luŋ i nyimwu; ibino babalo wunu kidigi luŋ ogogoro cal i komgi, kede jogigi luŋ ame otwako atwaka ibino wunu daŋ mumuko ka woro jogigi me awora ame tye i wi kiddi. Lobo-nono doŋ te bedo megwu, ibino bedo wunu iye. Atyeko doŋ miyo lobo-nono oko me bedo megwu. Ibino poko wunu lobo-nono i kwir kun lubo kite ame doggolawu tye kede. Atekere ame jo mere pol bino nwoŋo lobo alac me bedo megi, eka atekere ame jo mere nok, te daŋ nwoŋo lobo anok me bedo megi; kan ame kwir opoto iye i kom dano moro, mannono bino bedo mege. Ibino nwoŋo wunu lobo kun lubo doggola a kwariwu. Cite ka mom iryemo wunu jo ame bedo i lobo-nono oko i nyimwu, jo ame wun iweko wunu odoŋŋono bino bedo calo gin acobo waŋwu dok acalo okuto ame cobo laŋetwu, gin bino yelowu i lobo ame ibedo wunu iye. Gin ame onwoŋo amito timo i komgi, en ame abino timo i komwu.’ ” Rwot okobbi Muca ni, “Cik jo Icrael kun ikobbigi ni, Ka idonyo wunu i lobo me Kanaan (man en lobo ame ibino nwoŋo wunu me bedo megwu, ame en lobo me Kanaan naka i waŋ apoki mere luŋ), waŋ apoki me lobowu i tutuŋ anyarolum bino cakere i tim me Jin ame omano ŋet Edom. Wan lobowu ikokome i tutuŋ anyarolum bino ya i tuŋ agikki nam me Kado ame tye tuŋ kide; eka waŋ lobo te dok wirre kun dok tutuŋ anyarolum, kun wirre i tur ame woto i Akarabim, eka te dok kato i Jin, te wot gik i Kadec-barnea tutuŋ anyarolum. Dok te wot medde kede naka i Kajaradar, te kato i Ajimon. Waŋ lobo dok te cako wirre iyi Ajimon, wot i Kulo me Miciri; eka te wot gik i dog nam. “Waŋ lobo ame oya i tutuŋ kide bino bedo i Nam Adwoŋ; nammono bino bedo waŋ lobowu i tutuŋ kide. “Man en ame bino bedo waŋ apoki i tutuŋ anyarodi; waŋ apoki bino ya i Nam Adwoŋ, ibino yeco wunu waŋ lobo woto naka i kidi me Kor. Eka cakere i kidi me Kor, ibino yeco wunu waŋ lobo naka i yo ame woto i Kamat, eka waŋ lobo te gik i Jedad. Waŋ lobo dok bino medde anyim naka i Jiporon, te wot gik i Kajar-enan. Man en ame bino bedo waŋ lobowu i tutuŋ anyarodi. “Waŋ lobo i tutuŋ kide ibino yeco wunu cakere i Kajar-enan, te tuno naka i Cepam. Waŋ lobo te dok lunere piny kun cakere i Cepam woto naka i Ribula ame tye i ŋet Ain, i yo ame tye tutuŋ kide. I kakannono wan lobo dok te luŋere piny wot naka i kor kidi me nam me Kineret, ame tye i yo tutuŋ kide, Waŋ lobo te dok lunere piny naka i Jordan, te wot gik i nam me Kado. Man en ame bi no bedo lobowu, kede waŋ apoki mere luŋ ame omane.” Muca te ciko jo Icrael kun kobo ni, “Man en lobo ame bino bedo megwu kun ipoko wunu kede kwir, ame rik Rwot ociko ni mi atekere aboŋwen kede nucu; pien atekere a jo Reuben, kede mea jo Gad gin otyeko nwoŋo lobogi oko kun lubo doggola me ot a kwarigi karacel kede nucu me atekere a Manace. Atekere aryo-nono kede nucu me atekere a Manace, gin otyeko nwoŋo lobogi me bedo megi loka Jordan ame otikere i Jeriko i yo tutuŋ kide, tuŋ ame ceŋ donyo iye.” Rwot dok te kobo baŋ Muca ni, “Man en nyiŋ jo ame bino pokkiwu lobo me bedo megwu: Eleajar alamdog, kede Yocwa wot a Nuni. Ibino kwanyo jo me konyo tic me poko lobo i atekere acel acel dano acel. Nyiŋ jo-nono ene: Iyi atekere a Juda, ibino kwanyo Kaleb wot a Japune. Iyi atekere a Cimeon, ibino kwanyo Cemuel wot Amikud. Iyi atekere a Benjamin, ibino kwanyo Elidad wot a Ciclon. Iyi atekere a Dan, ibino kwanyo Bukki wot a Jogli. I kom awobe a Yucepu: i kom atekere ikwae a Manace, atel bino bedo Kanniel wot Epod. I kom ikwae Epraim, atel bino bedo Kemuel wot a Ciptan. Iyi atekere ikwae Jabulon, atel bino bedo Elijapan wot a Parnac, Iyi atekere ikwae Icakar, atel bino bedo Paltiel wot Ajan. Eka iyi atekere ikwae Acer, atel bino bedo Akiud wot a Celomi. Iyi atekere ikwae a Naputali, atel bino bedo Pedael wot Amikud. Magi gin lwak jo ame Rwot ociko ni pok lobo baŋ jo Icrael i lobo Kanaan.” Rwot okobbi Muca i bar me Moab ame tye i ŋet Jordan ame otikere i Jeriko ni, “Cik jo Icrael me mi jo Levi boma mogo, i kom lobo ame gin onwoŋo me bedo megi; eka ite miyo jo Levi barroro me kwat ame tye i ŋet boma-nogo. Boma ame bino bedo me a jo Levi me bedo kede bar ame bino bedo me kwayo dokgi kede limgi akwo karacel kede kit leyigi ocele luŋ. Bar luŋ ame imio wunu jo Levi, ame tye i ŋet bomagi, cakere i kom cel me bomagi, obino poro borrere bedo yadi mia abic, mano boma luŋ. Eka i oko i ŋe boma, obino poro ŋete ame tye tuŋ kide bedo yadi tutumia acel, eka laŋete me tutuŋ anyarolum yadi tutumia acel, kun nwoŋo boma tye i dyere; mannono bino bedo megi me kwat, pi bomagi luŋ. Boma ame ibino miyo baŋ jo Levi, bino bedo boma abicel me larre a jo ame oneko nek kan ame ibino yeyi wunu jo ame oneko nek riŋo laro, i bino daŋ medo miyo wunu boma ocele pyeraŋwen wie aryo i kom magi-nono. Boma luŋ ame ibino miyo wunu baŋ jo Levi, bino bedo pyerŋwen wie aboro, karacel kede bar me kwatgi. Ibino miyo wunu bomagi kun ikwanyo wunu i kom lobo ame omio jo Icrael me bedo megi; i baŋ atekere ame jo mere pol ibino kwanyo wunu abup, eka i baŋ atekere ame jo mere nok ite kwanyo wunu daŋ anok, kun atekere acel acel mio boma mere mogo baŋ jo Levi, kun mio ame poro kite ame gin omiogi kede lobo me bedo megi.” Rwot dok te kobo baŋ Muca ni. “Kobbi jo Icrael ni, Ka doŋ iŋolo wunu Jordan i kato wunu i Kanaan, ibino yero wunu boma mogo me bed me larre a jo oneko nek, me wek jo ame oneko owotegi kun mom oneko me akaka, twero riŋo laro kuno. Boma-nogo bino bedo ka larrewu i ciŋ ocul kwor meremo, me wek ŋat ame oneko ŋattoro kur to tuno ka koŋ ocuŋ i nyim lwak pi ŋolo koppere. I kom boma ame ibino miyo wunuginono, abicel iye bino bedo megwu me laro jo oneko nek. Mi wunu bomanogo adek bed loka Jordan, eka adek te bedo i lobo me Kanaan, gin bino bedo boma me larre a jo oneko nek. Boma abicellono bino bedo me larre a jo Icrael kede pi arok kede wele ame bedo i akinagi, me wek dano ame oneko ŋattoro kun mom oneko me akaka, myero riŋ lar kuno. “Cite ka ce ogoo dano i nyonyo, oreto piny te daŋ to oko, dano-nono nwoŋo anek; anek, obino neko oko. Aco ka ocelo dano i kidi ame onwoŋo omako i ciŋe, kidi ame onwoŋo romo neko dano, eka te celo neko oko, dano-nono daŋ anek, anek obino neko oko. Onyo ka ce ogoo ŋattoro kede yat ame onwoŋo omako i ciŋe, yat ame onwoŋo romo neko dano, danonono te to oko, mannono daŋ nwoŋo anek; anek, obino neko oko. Dano ame culo kwor meremo ata en ikome ame bino neko ŋat oneko danonaca; ka orwatte kede myero neke oko. Ka ce ocobo dano moro pi adagadaga moro, onyo ocele acela, kun nwoŋo okie akia, eka dano-nono te to oko, onyo odoŋe adoŋa kede ciŋe pi adagadaga moro ame onwoŋo tye i akinagi, eka dano-nono te to oko, ŋat ame odoŋe-nono obino neko oko; dano-nono anek. Ŋat ame culo kwor meremo ata ikome, en ikome ame bino neke ka ce orwatte kede. “Ento ka ce ocobe oyotoyot kun onwoŋo amone moro gire mom, onyo ka ocele i ginnoro kun mom okie akia, onyo ocele i gweŋŋoro ame onwoŋo romo neko dano, kun mom oneno, eka dano nono te to oko, ka yam en mom akworrere, dok daŋ onwoŋo mom oyiko kopporo arac i kome; lwak bino ŋolo kop i akina ŋat oneko nek kede acul kwor meremo kun olubo cik megi. Lwak bino laro ŋat oneko nek i ciŋ acul kwor meremo ato. Lwak bino dwoke i boma ame en rik onwoŋo oriŋo olaro. En bino bedo kuno atwal, tuno waŋ ame alamdog adwoŋ ame owiro kede moo oto. Ento ka ce i nino moro anek oya oko i boma ame onwoŋo elaro te kato wan apokki me boma-nono, ka ce acul kwor meremo a ŋat a rik oto oneko dano man, roccoro meremo mom bino bedo i wie. Pien dano-nono myero bed i boma me larre tuno waŋ ame alamdog adwoŋ oto; i ŋe to alamdog adwoŋ, anek doŋ twero dok ceŋ i lobo ame rik onwoŋo obedo lobo mere me anywalli. “Magi luŋ doŋ bino bedo cik baŋwu kede kop ame doŋ otyeko ŋolo naka i kare ikwaewu luŋ i kabedo ame ibino bedo wunu iye luŋ. Ka ce ŋattoro oneko dano, obino neko ŋat oneko dano-nono kun nwoŋo ocuŋ i kop ocaden, cite mom obino neko dano moro pi kop acaden acel. Dok mom obino gamo limmoro me kokoro ŋat oneko dano ka ce balere onwoŋo romo to; obino neko dano-nono aneka. Dok daŋ myero kur gam limmoro me lakoro dano ame oriŋo olaro boma me larre, me wek kur ye en dwog i lobo mere kun alamdog adwoŋ pwod kwo. Mom ibino wunu balo lobo ame ibedo wunu iye; pien remo balo lobo, dok mom tye ginnoro ame twero kwanyo bal i lobo pi remo ame nwoŋo oony iye, kono ka remo a ŋat oneko dano-nono keken en ame twero kwanyo. Kur ibal wunu lobo ame ibedo wunu iye kun an daŋ abedo iye i akinawu; pien an a Rwot ame abedo i akina a jo Icrael.” Odoŋe a loo doggola a kwarigi ame tye i kwae awobe a Gilead wot a Makir ame obedo wot a Manace, ame tye i doggola me ot itino a Yucepu, gin onoko Muca aceggi ote kop i nyime kede i nyim odoŋe a loo doggola a kwari a jo Icrael. Gin okobo ni, “Rwot rik ociko adwoŋwa me pokki jo Icrael lobo me bedo megi kun opoko i kwir; dok Rwot rik ociko adwoŋwa me miyo lobo ame obedo me ominwa Jelopekad baŋ anyira mere. Cite ka ce gin onyomere awobe ame tye i akina atekere ocele me Icrael, obino kwanyo lobogi oko, i kom lobo a yam gin oleo me bedo megi i kom mea kwarogi, ote poko oko, medo i kom lobo atekere ame gin doŋ tye iye; obino kwanyo oko i kom me a kwarowa ote poko k ittono. Dok ka kare me jubili a jo Icrael oromo, lobo ame onwoŋo obedo megi, obino medo i kom me atekere ame gin doŋ otye iye-nono. Obino kwanyo oko i kom me kwarowa ote poko kittono.” Muca rik te ciko jo Icrael kun lubo kop a Rwot okobo, kun kobo ni, “Kop i kom itekere ame obedo ikwae a Yucepu tye kakare. Mannono en gin ame Rwot ociko ame mako anyira a Jelopekad, en okobo ni, ‘Wekgi onyomere i ŋat ame gin otamo ni ber, cite gin myero nyomere i doggola ame tye i atekere a kwarogi. Lobo ame opoko baŋ jo Icrael, mom dok obino kokobo me ya i atekere man cwalo i atekere ocele; pien dano acel acel ame tye i akina jo Icrael bino moko doŋ atwal i lobo ame opokigi me bedo megi, ame tye i atekere a kwarogi. Dok ka ce nyako moro oleo lobo mere i akina atekere moro me Icrael, en doŋ bino bedo dako a dano moro i akina doggola me atekere a pappere me wek dano acel acel i akina jo Icrael le lobo a kwaro mere. Pi mannono, mom obino bedo kokobo lobo ame opoko me ya i atekere man, cwalo i atekere ocele; pien atekere acel acel me Icrael bino moko doŋ i lobogi ame gin oleo atwal.’ ” Anyira a Jelopekad daŋ te timo kite ame Muca ocikogi kede; pien Malka Tirija, Kogla, Mirika kede Noa, ame gin obedo anyira a Jelopekad, gin luŋ onyomere kede awobe omego papagi. Onyomogi luŋ i doggola ikwae a Manace wot a Yucepu, lobo ame rikopokigi te bedo iyi atekere me doggola a papagi. Magi en cik kede icwil ame Rwot ociko kun mio Muca kobo baŋ jo Icrael i bar me Moab ame tye i ŋet Jordan ame otikere i Jeriko. Man en kop a Muca rik otito baŋ jo Icrael luŋ iŋe Jordan i tim, iyi Araba ame otikere i Cup, ame tye i akina Paran kede Topel, Laban, Kajerot kede Di-jaab, Ya i Koreb wot i Kadecbarnea ka ilubo yo abeo i lobo obedo kidikidi me Ceir, onwoŋe romo wot me nino apar wie acel. I nino dwe acel me dwe me apar wie acel me mwaka me pyeraŋwennere, en ame Muca otitti jo Icrael cik luŋ ame Rwot rik ociko ni ekobbigi, Man en okobo i kare ame doŋ otyeko loyo Cikon abaka a jo Amor ame rik tye onwoŋo bedo i Kecbon, karacel kede Og abaka me Bacan ame rik onwoŋo bedo i Aciterot, kun loogi i lweny ame obedo i Edrei. I Moab loka Jordan, Muca omiye me gonyo te cik man kun kobo ni, “Rwot Obaŋawa rik okobo kedwa i Koreb ni ‘Doŋ ityeko bedo wunu ite kidi man pi kare alac meicel; lokere wunu, icak wunu wotwu, idok wunu tutuŋ lobo obedo kidikidi mea jo Amor, kede jo luŋ ame ceggi kedgi, ame tye i Araba, i lobo otiŋere malo kede en a tye i te kidi, i Negeb kede i lobo ame omano dog nam, i lobo ajo Kanaan kede i Lebanon, tuno naka i kulo adwoŋ, ame en kulo Eufrate. Nen ba, doŋ atyeko keto lobo ame Rwot rik okwoŋo baŋ kwariwu Iburaim, Icaka, kede Yakobo, ni ebino miyo baŋ ikwae ame bino lubo ŋegi.’ “I kare-naca rik okobbiwu ni, ‘An gira mom aromo yeyo pekowu an kena; Rwot obaŋawu doŋ omiowu inya wunu atek, ame omiowu aman doŋ ipol wunu calo acer ame tye i polo. Myero doŋ Rwot ame obedo Obaŋa a kwarowu, omi imedde wunu apol kite a rik ociko kede. Kara doŋ atwero yeyo pekowu kena niŋo kun doŋ idoko wunu yec apek meicel, karacel kede pyem ame tye i akinawu? Yer wunu jo aryek, jo aniaŋ, dok ame tye i ŋec aromo, kun lubo kite ame atekerewu tye kede, an abino ketogi bedo odoŋe ame loowu.’ Wun rikite dokka wunu iye ni, ‘Gin ame ikobo ni wan oti-nono gire ber, myero oti.’ Rik daŋ ate kwanyo odoŋe a loo itekerewu, jo a ryek a dok daŋ tye i ŋec oromo, ate ketogi me loyowu, odoŋe ame loo jo tutumia, odoŋe ame loo jo mia, odoŋe ame loo jo pyerabic kede odoŋe a loo jo tomon, karacel kede kite otel ocele i atekerewu luŋ. I kare-nono rik ate ciko oŋolkopwu ni, ‘Winy wunu pido ame tye i akina omegowu, eka ite daŋ ŋolo wunu atira i akina dano kede ominnere, onyo kede arokkoro ame bedo baŋe. Kur ileŋere wunu i ŋolokop; ibino winyo wunu kop a ŋat atidi kede me a ŋat adwoŋ daŋ; mom ibino wunu lworo waŋ ŋattoro, pien ŋolo kop obedo me Obaŋa. Ka ce inwoŋo wunu ni kopporo tekkiwu, ibino kela wunu baŋa, an abino winyo.’ I kare-naca rik acikowu i ginnoro luŋ ame myero i tim wunu. “Doŋ kite a rik Rwot Obaŋawa ocikowa kede, omio wan ocako wotwa me ya oko i Koreb, ote wot coro yi dye twon tim alac kod iyiliyili ame rik ineno wunu, ame owoto i lobo a jo Amor ame obedo kidikidi, eka ote tuno i Kadec-barnea. An rik ate kobbiwu ni, ‘Wun doŋ ituno wunu i lobo a jo Amor ame obedo kidikidi, ame Rwot Obaŋawa amiyowa. Nen ba, Rwot Obaŋawu doŋ otyeko keto lobonono oko i nyimwu; wot wunu iye me iwot igam wunu bed megwu. Kite ame Rwot okobbiwu, Rwot ame obedo Obaŋa a kwarowu. Kur ilwor wunu dok cunywu daŋ kur poti.’ Wun luŋ rik inoka wunu ceggi, eka ite kobo wunu ni, ‘Wek ocwa wunu jo wot i nyimwa, me wek gin wot rottiwa lobo-naca, eka gin te dwoggiwa kop i kom yo a myero olub me wot malo kuno, kede i kom boma ame obino bebea iye.’ An rik ate neno ni tammono ber, omio rik ate kwanyo jo apar wie aryo i akinawu, kun akwanyo dano acel i atekere acel acel. Jo-nono rik te ya wot malo i lobo obedo kidikidi, ote tuno naka i luŋ me Ecikol, ote roto lobo-nono luŋ. Gin rik ote kwanyo nyig yennogo me lobo-naca ote mako i ciŋgi, ote kela naka baŋwa, ote daŋ dwoggiwa kop kun okobo ni, ‘Lobo ame Rwot Obaŋawa amiyowa-nono obedo lobo aber.’ “Cite wun rik mom iye wunu wot malo kuno, kun ijem wunu i kom gin ame Rwot Obaŋawu ociko, Rik daŋ ite ŋuŋura i kemawu kun ikobo wunu ni, ‘Pien Rwot dagowa, en omio en okwanyowa i lobo me Miciri, me wek ebin emiwa i ciŋ jo Amor, me tyekowa oko. Kara doŋ kit lobo aŋo ame wan owot iye? Omegowa rikomio koyo onyere i komwa pi kobo ni, “Jo-nono doŋodoŋo, dok obocoboco okatowa oko; bomagi daŋ doŋodoŋo kun daŋ ocecelo oko atek, ame wigi tye malo naka i polo twal; dok daŋ oneno jo Anak kuno”.’ An rik ate kobbiwu ni, ‘Kur inyobere wunu, akadi bedo i lworo moro i komgi. Rwot Obaŋawu ame tye ka telo nyimwu en ame bino lweny pirwu, kite en obedo lweny kede pirwu i Miciri kun ineno wunu, karacel kede i tim daŋ, kan ame ineno wunu iye kite ame Rwot Obaŋawu otiŋowu kede, kite ame dano tiŋo kede wode, obedo timo kittono i kabedo luŋ ame iwoto wunu iye, naka tuno kede i kabedo man,’ Cite kadi bed rik akobbiwu kittono wun giwu ikwero wunu geno Rwot Obaŋawu, ame onwoŋo obedo telowu i yo me yenyo kan a myero igur wunu kemawu iye. En obedo telowu i mac dyewor kede pol dyeceŋ, me nyuttiwu yo me wotwu. “Kare ame Rwot rik owinyo kop ame ikobo wunu, akemo omako, omio te kwoŋ ni, ‘Mom tye ŋattoro i akina lwagi jo man areco-ni ame bino neno lobo aber ame rik akwoŋo ni abino miyo baŋ kwariwu, kono ka Kaleb wot a Jepune keken. En bino neno, dok daŋ abino miyo lobo ame yam tyene onyono baŋe kede baŋ itino mere, pien en obedo lubo Rwot iyore ducu.’ Akemo rik daŋ te mako Rwot naka i koma pirwu, eka te kobo ni, ‘Akadi yin daŋ mom ibino tuno i lobo-naca. Yocwa wot a Nuni ame konyi bino tuno iye; yin myero imi cunye bed tek, pien en bino miyo jo Icrael gamo lobo-naca me bedo megi. Itino ame wun ikobo wunu ni bino doko gin ame okworwu bino yako, itino ame aman mom romo poko gin aber kede gin arac, gin en ame bino wot kuno; abino miyo lobo-naca baŋgi, eka te bedo megi. Aco wun, lokere iwot wunu i dye tim tutuŋ Nam Arema.’ “Wun rikite gamo wunu doga ni, ‘Wan doŋ otyeko balo baŋ Rwot, obino wot lweny kite ame Rwot Obaŋawa ocikowa kede.’ Ŋat acel acel rik te tweye i jami mere me lweny kun tamo ni bedo yot me wot kwaro lobo obedo kidikidi. Ento Rwot rik te kobbe ni, ‘Kob baŋgi ni, Mom ibino wot wunu kuno, dok daŋ mom ibino lweny wunu, pien an mom abino wot kedwu i akinawu; mannono bino miyo okworwu loowu oko. Man en gin ame rik akobbiwu, cite wun giwu rikite jem wunu, kun ikwero wunu winyo gin ame Rwot ociko oko; rikite nwette wunu wot kwaro lobo obedo kidikidi. Jo Amor ame onwoŋo bedo i lobo obedo kidikidi kuno te bino i komwu, ote ryemowu calo kic, ote keketowu oko i Ceir tuno kede naka i Korma. Rik ibin idwogo wunu, ite bino kok wunu i nyim Rwot; cite Rwot mom daŋ te winyo kokowu, te daŋ kwero ciko yite oko i kopwu. Mannono te miyowu bedo ri i Kadec pi kare alac meicel. “Wan rik ote cako wotwa i tim kun odok tutuŋ Nam Arema, kite a rik Rwot onwoŋo ocika kede; rik ote bedo rorona i lobo me Ceir ame obedo kidikidi pi kare alac meicel. Rwot te dok kobba ni, ‘Ibedo wunu doŋ rorona i lobo obedo kidikidi-ni pi kare alac meicel, doŋ oromowu oko; wirre wunu doŋ odok wunu tutuŋ anyarodi. Cik lwak ni, Nen doŋ iceggi beo wunu i lobo omegowu ame obedo ikwae Ecau, ame gin bedo i Ceir; gin bino bedo i lworo i komwu, doŋ myero igwokere wunu meicel. Kur ilweny wunu i komgi, pien mom abino miyowu dul lobogi moro kadi acel, akadi dul lobo moro aduno ame dano romo cuŋ iye keken, pien doŋ atyeko miyo lobo obedo kidikidi me Ceir baŋ Ecau me bedo mere. Itwero nwoŋo wunu cam kede pii baŋgi, cite ibino wilo wunu awila. Pien Rwot Obaŋawu otyeko miyowu winyo i kom ginnoro luŋ ame ciŋwu ogudo; en kite ame iwoto wunu kede i dye twon tim alac-ci. I mwaka pyeraŋwen-ni luŋ Rwot Obaŋawu obedo bedo kedwu omio mom tye ginnoro ame oremowu.’ Mannono omio wan okato oweko omegowa ame obedo ikwae Ecau, ame onwoŋo bedo i Ceir, mom obeo i yo me Araba, ame ya i Elat kede i Ejion-geber. “Eka dok ote wot tutuŋ tim me Moab. Rwot dok te kobba ni, ‘Kur iwot agwa i kom jo Moab, kur daŋ ilweny i komgi, pien mom abino miyi dul lobogi moro me bedo meri, pien doŋ atyeko miyo Ar baŋ ikwae a Lot me bedo megi.’ (Jo Emim en a rik ogeo bedo kuno; gin obedo rok adwoŋ dok jo mere pol atek kun obocoboco calo Anak. Jo man daŋ rik okwanogi i kom jo Repa calo jo Anak, ento jo Moab lwoŋogi ni, jo Emim. Jo Kori rik con daŋ koŋ obedo i Ceir, ento ikwae Ecau rik te mayo lobogi oko bedo megi, gin te tyekogi oko i nyimgi, eka te leyo kabedogi kite a rik jo Icrael otimo i kom lobo ame odoko megi, ame Rwot rikomiogi.) ‘Doŋ ba, ya wunu oko aman, iwot iŋol wunu luŋ me Jered’. Wan daŋ rik ote wot ŋolo luŋ me Jered, Cakere i kare ame oya kede i Kadec-barnea tuno wan ame oŋolo luŋ me Jered, onwoŋo doŋ oromo mwakki pyeradek wie aboro. I kare-nono onwoŋo doŋ lwak luŋ ame romo lweny ototoa oko kite ame Rwot rik okwoŋo kede. Pien ciŋ Rwot rik onwoŋo tye i komgi, me tyekogi oko i gonygi, tuno waŋ ame gin otum iweŋ. “Mannono omio i kare ame jo luŋ ame onwoŋo romo lweny otum oko i akina lwak. Rwot okobba ni, Tin doŋ ibino beo i kato i waŋ lobo me Moab kede Ar. Kare a doŋ i ceggi i jo Ammon, kur iwot agwa i komgi, kur daŋ ilweny i komgi, pien mom abino miyo dul lobo a jo Amon moro me bedo meri, pien doŋ a tyeko miyo baŋ ikwae a Lot me bedo megi. Mannono daŋ obino lwoŋo ni lobo a jo Repa rik koŋ obedo kannono, jo Ammon rik lwoŋogi ni, jo Jamjum. Gin rik obedo rok adwoŋ dok jo mere pol atek kun obocoboco calo Anak, ento Rwot rik obino otyekogi luŋ i nyimgi, ote ryemogi oko, eka gin te leyo kabedogi, kite ame rik otimo kede pi ikwae Ecau ame bedo i Ceir, i kare ame otyeko jo Kori oko i nyimgi, eka ikwae Ecau te mayo lobogi oko, ote leyo kabedogi; gin pwod bedo kuno naka atot onyoni. Dok jo Avim daŋ ame rik onwoŋo bedo i pacci gi tuno naka i Gaja, jo Kaputor ame rik obino i Kaputor, en ame oryemogi, te leyo kaoedogi oko. ‘Ya wunu doŋ iwot iŋol wunu luŋ me Arnon. Nen ba, atyeko doŋ miyo i ciŋwu Cikon abaka a jo Amor, abaka me Kecbon, karacel kede lobo mere; cak wunu gamo lobo mere bed megwu kun ilwenyo wunu i kome. Tin abino cako miyo koyo onyere i kom rok luŋ ame tye piny i te polo kun olworowu. Ka gin bino winyo kop i komwu, komgi bino myel, kun cunygi ton atek pirwu.’ “En omio acwao kwena i tim me Kedemot baŋ Cikon abaka me Kecbon kede kop me kuc, kun akobbe ni, ‘Tim ber imia abe i loboni. Abino bea kun alubo ka yo keken, mom gira abino gak akadi tuŋ cem onyo tuŋ cam. Cam ame abino camo kede pi i ame abino mato, ibino miya awilo awila. Wek abe kom ka i tyena, kite ame ikwae Ecau ame bedo i Ceir kede Moab ame bedo i Ar rik otimo kede, tuno waŋ ame aŋolo Jordan akato naka i lobo ame Rwot Obaŋawa bino miyowa.’ Ento Cikon abaka me Kecbon mom oye ni wan obe i lobo mere; pien Rwot Obaŋawu omie tekcuny, cunye te bedo nwaŋ, me wek emie i ciŋwu, acalo lobo mere pwod tye i ciŋwa naka tin. Rwot te kobba ni, ‘Nen doŋ acako miyo Cikon kede lobo mere oko i ciŋi; cak doŋ gamo lobo mere bed megi, me ibed i lobo mere’. Cikon karacel kede jo mere te mukere lweny i komwa i Jakaj, Rwot Obaŋawa te miye i ciŋwa wan ote loye oko karacel kede awobe mere kede lwakkere luŋ. I kare-nono wan omao boma mere luŋ, ote jwero jo i bomagi luŋ, co kede mon kede itino; mom oweko ŋattoro odoŋ. Wan ote tero lim akwo keken ame oyako me doko megwa, karacel kede jami ocele ame oyako i boma luŋ ame omao. Mom tye boma moro atek a rik ogero malo i wi kidi ame mayo oloowa, cakere i Areor ame tye i ŋet luŋ me Arnon kede dok cakere i boma ame tye i luŋ, tuno kede naka i Gilgal, Rwot Obaŋawa omiogi luŋ i ciŋwa. Kadi bed amannono, lobo a jo Ammon rik mom inoko wunu ceggi, kadi en ame tye i dog kulo me Jabok onyo bomagi moro ame tye i lobo obedo kidikidi, kede kan ame Rwot Obaŋawa ogenowa iye luŋ. “Wan rik ote lokere dok malo i yo a woto Bacan; eka Og abaka me Bacan karacel kede jo mere luŋ te mukere bino lweny i komwa i Edrei. Cite Rwot te kobba ni, ‘Kur ilwore, pien atyeko doŋ miye oko i ciŋi, karacel kede jo mere luŋ kede lobo mere; ibino time kite ame rik itimo kede Cikon abaka me a jo Amor, ame rik bedo i Kecbon.’ Rwot Obaŋawa rik daŋ te miyo Og abaka me Bacan i ciŋwa kittono, karacel kede jo mere; rik ote nekogi tuno waŋ ame ŋattoro acel mom odoŋ baŋe akwo. I kare-nono wan omao boma mere luŋ, mom tye boma moro ame odoŋ ame mom omao i baŋgi, boma pyerabicel twal, lobo me Argob luŋ ame yam tye i te loc a Og, i Bacan. Boma magi luŋ rik onwoŋo ocelo i cellogo atek ame ocuŋ oguŋ naka malo, kun tye kede aceg dogcel karacel kede arii mege, medo kede lwak pacci atitino apol ata ame mom ocecelo. Wan rik ote jwero jo iye luŋ kite ame rik otimo kede Cikon abaka me Kecbon; ojwero jo i boma luŋ, co kede mon kede itino. Ento lim akwo ame oyako i boma apapat, wan otero odoko megwa. I kare-naca rik ote kwanyo lobo-nono oko kittono, i ciŋ obakki aryo me a jo Amor ame rik otye loka Jordan, cakere i luŋ me Arnon wot tuno kede naka i kidi me Kermon. (Jo Cidon lwoŋo Kermon ni Cirion, cite jo Amor olwoŋo ni Cenir). Rik ote mayo boma luŋ ame tye i lobo otiŋere opette, kede lobo Gilead luŋ kede Bacan tuno kede naka i Caleka kede Edrei, ame gin pacci a rik tye i te loc a Og i lobo Bacan. (Pien Og abaka me Bacan en ame rik onwoŋo odoŋ kene i akina jo me Repa a rik odoŋ. Nen ba, itanda mere rik onwoŋo obedo itanda nyonyo, pwod tye i Rabba a jo Ammon. Borrere onwoŋo romo futi apar wie adek kede nucu, eka laccere te bedo futi abicel ka opimo i futi me nino ducu.) “Kare ame doŋ lobo man odoko megwa i kare-nono, amio baŋ jo Reuben, kede jo Gad lobo ame ocakere i Areor, ame tye i dog luŋ me Arnon, karacel kede nucu lobo Gilead ame obedo kidikidi kede boma adoŋo luŋ ame tye iye. Eka lobo Gilead odoŋere, kede lobo me Bacan luŋ ame onwoŋo tye i te loc a Og, ame obedo lobo me Argod luŋ, ote miyo baŋ nucu atekere a Manace. (Lobo me Bacan-nono luŋ olwoŋo ni lobo a jo Repa. Jair ame obedo jo a Manace rik te tero lobo luŋ me Argob, ame en Bacan, tuno naka i waŋ apokki a jo Gecur kede me a jo Maacat, te cako nyiŋ pacci atino i nyiŋe kene ni Kavotjair, kite a pwod tye kede naka tin.) Eka ate miyo lobo me Gilead baŋ Makir, eka baŋ jo Reuben kede jo Gad rik ate miyo lobo ame ocakere i Gilead te wot naka i luŋ me Arnon, kun luŋ en ame obedo waŋ apokki mere tuno naka i kulo Jabok, ame obedo waŋ lobo a jo Ammon. Rik te miye daŋ Araba, kun Jordan en ame obedo waŋ apokki mere, cakere i nam me Kineret, tuno kede naka i nam me Araba, ame en Nam me Kado, en lobo ame tye i kor kidi me Piciga, ame tye tutuŋ kide. “Dok rik acikowu i kare-nono kun akobo ni, ‘Rwot Obaŋawu doŋ otyeko miyowu lobo man oko me bed megwu. Jowu luŋ a tek i lweny bino ruko jami lwenygi kato kede loka ca i nyim omegowu, ame gin jo Icrael. Cite monwu kede itinowu atino kede limwu akwo, (pien aŋeo ni itye wunu i lwak lim apipim), gin bino doŋ i boma ame doŋ aminowu-ni, tuno wan a Rwot doŋ omio omegowu ka weo, kite ame omiowu kede ka weo-ni, ame gin daŋ doŋ onwoŋo lobogi ame Rwot Obaŋawu bino miyogi loka Jordan; icennere wun doŋ ibino dwogo wunu kun ŋat acel acel dwogo i lobo mere a doŋ amiowu-ni.’ I kare-naca rik aciko Yocwa ni, ‘Yin doŋ ityeko neno i waŋi ginnoro luŋ ame Rwot Obaŋawu otyeko tiyo i kom obakki aryo ca; Rwot dok bino timo kittono i kom loc luŋ ame ibino tuno wunu iye ka ikato wunu loka ca. Kur ilwor wunugi, pien Rwot Obaŋawu en ame tye ka lweny pirwu.’ “I kare-naca rik abin abako doga baŋ Rwot kun akobo ni, ‘Rwot Obaŋawa, nen yin pwod icako nyuto ditti kede twer me ciŋi acaka baŋ amironi. Mom tye Obaŋa moro i polo onyo i lobo ame twero tiyo tic apek meicel acalo magi! Tima kica iwek awot loka awot anen lobo ame tye loka Jordan, lobo obedo kidikidi aber wok ca, karacel kede Lebanon.’ Ento rik akemo te mako Rwot i koma pirwu, mom te ye winyo koppa. Rwot te kobba ni ‘Mano doŋ romo; kur imed kobo koppono baŋa. Wot iyit malo i wi kidi me Piciga, me itiŋ waŋi inen tutuŋ to kede i tutuŋ anyorodi, kede i tutuŋ anyarolum, kede i tutuŋ kide, me inen lobo-nono, icik Yocwa, icukoro cunye kun imie teko: pien en aye bino kato loka ca kun telo wi lwak man en bino miyogi oleo lobo ame ibino neno-nono.’ Mannono en omio wan obedo i luŋ ame otikere i Bet-peor. “Aman doŋ ba, wun jo Icrael, gwok wunu icwil luŋ kede gin luŋ ame ociko, ame atye ka pwonyowu kede; myero icob wunugi me ibed wunu kwo, iwot ile wunu lobo ame Rwot Obaŋa a kwariwu tye amiyowu. Kur imed wunu kopporo i kom kop ame acikowu kede-ni, dok daŋ kur ibol wunu moro oko iye. Gwok wunu cik a Rwot Obaŋawu luŋ kite ame amio kede baŋwu. Rik ineno i waŋwu gin ame Rwot otimo i Baal-peor. Rwot Obaŋawu rik obino oneko jo luŋ ame woro Baal i Peor i akina lwak. Cite wun luŋ ame imedde wunu moko i kom Rwot Obaŋawu, en pwod itye wunu kwo luŋ naka atot tin. Nen ba, doŋ atyeko pwonyowu icwil luŋ kede gin ame Rwot Obaŋawu ocika kede, me icob wunugi i lobo ame iceggi wunu leyo me bedo megwu. Gwok wunu dok daŋ icob wunu, pien mano en ame bino bedo ryekowu kede ŋec a wun itye wunu kede i nyim rok ocele, ame ka gin owinyo icwil magi luŋ, gin bino kobo ni, ‘Ateni, twon rok adwoŋ wok-ki kara ryek ba, dok daŋ gin jo a ŋeo piny.’ Pien mom dok tye twon rokkoro ocele adwoŋ ame obaŋagi bedo ceggi kedgi kite acalo Rwot Obaŋawa bedo ceggi kedwa i kare luŋ ame okok baŋe. Dok mom daŋ tye twon rokkoro adwoŋ ame tye kede icwil kede gin ame ociko baŋgi atira a rom i cik ame tin aketo i nyimwu-ni. “Ento nen aber ni igwokere wunu atek, Kur imi wii wil i kom gin ame ineno wunu. Kur imigi rweny oko i cunywu pi kare me kwowu luŋ. Tit wunu pire baŋ itinowu kede baŋ ikwaewu me gin daŋ ŋe, kite ame rik icuŋ wunu kede i nyim Rwot Obaŋawu i Koreb, i nino ame Rwot rik okobba iye ni, ‘Cok lwak luŋ i nyima, me amigi owiny koppa, me opwony lwora i kare luŋ ame gin obino bedo kede kwo i wi lobo, me wek gin daŋ pwony kede itinogi. Rik i te bino wunu cuŋ aceggi i te kidi, kun mac tye awaŋ i kidi, leb mac otuno malo i polo, i piny acol icuc, kede pol ocule acula ikuna.’ Rwot rik te kop kedwu i dye mac. Rikite winyo wunu dwon keken kun mom ineno wunu ginnoro; dwon keken en ame owinyere. En rik te tittiwu ni, cikere mere ame en ociko ni myero icob wunu, ame en cik apar en ocoogi i kiddi apada aryo. I kare-nono Rwot rik te cika ni apwonywu kede cik luŋ kede gin ame ociko luŋ, me wek iwot igwok wunu i lobo ame iwot wunu gamo ca me bedo megwu. “Myero igwokere wunu atek ba, Kite acalo rik mom ineno wunu cal ginnoro i kare ame Rwot rik kobo kedwu i dye mac a lyel, pi mannono, myero kur ikel wunu cannoro i komwu kenwu pi tiyo wunu cal ginnoro ame ipao wunu apaa pirwu kenwu, kadi kit callogo ame iporo wunu i cal kom ginnoro keken, ico onyo dako. Onyo ame iporo wunu i lee moro ame tye i wi lobo, onyo winyo moro ame twarre i bwome malo i yamo, onyo ginnoro ame lak alaka i lobo, onyo reccoro ame bedo i pii ame tye i te lobo. Ka ce itiŋo waŋwu malo ite neno wunu ceŋ kede dwe kede lwak acer apipim, ame gin luŋ obedo mony me polo, kur imi waa tamwu terwu wot ryebere piny i nyimgi worogi, Rwot Obaŋawu opokogi baŋ rok luŋ ame tye i te polo acalo jami me awora, ento Rwot rik oyerowu te kwanyowu oko i Miciri, ame rik cal i ot alyet ame oteto iye nyonyo, me ibed wunu jo mere ikome, kite ame itye wunu kede i kare man. Dok daŋ rik akemo omako Rwot ikoma pirwu, te kwon ni an mom abino ŋolo kulo Jordan, mom abino tuno i lobo aber ame Rwot Obaŋawu tye ka miyowu me bedo megwu. An ata i lobo man kun mom aŋolo kulo Jordan, ento wun ibino wot wunu loka, i lobo aber ca i te gamo wunu bedo megwu. Gwokere wunu ba, me wiwu kur wil oko i cikere a Rwot Obaŋawu ame en rik ocikere kede kedwu. Kur iti wunu cal ginnoro ame opao apaa ame cal i kom ginnoro ame yam Rwot Obaŋawu ociko ni kur itim wunu. Pien Rwot Obaŋawu en mac ame waŋo piny, en Obaŋa ame nyek. “Ka doŋ iri wunu kuno ame inywalo wunu itinowu kede ikwaewu, ka ce iballe wunu pi tiyo calloro ame opao apaa ame cal i ginnoro, kede timo ginnoro ame nen arac i nyim Rwot Obaŋawu, me iroke wek akemo make; an tin alwoŋo polo kede lobo me bedo cadenna i komwu, ni ibino ru to wunu luŋ i lobo ame iwot wunu ŋolo Jordan me wot leyo bedo megwu. Mom ibino ri wunu iye kare alac, ento obino ru jwerowu oko iye. Dok Rwot bino keketowu oko atata i akina rok papat, welwu ame bino doŋ i akina orok kan ame Rwot aryemowu iwot wunu iye, bino dok piny. Ibino woro wunu kit obaŋe apol atata kuno, obaŋe ame otio i yen kede kiddi, gin ame otio i ciŋ, a mom neno, a mom winyo kop, a mom daŋ cemo, akadi ŋweyo ginnoro. Ibino doŋ yenyo wunu Rwot Obaŋawu, ibino nwoŋe wunu daŋ ka ce iyenyo wunu kede cunywu luŋ kede tipowu luŋ. I cennere doŋ ka piny oloowu kun jami magi luŋ doŋ otimere i komwu, ibino lokere wunu dwogo cen baŋ Rwot Obaŋawu, ite daŋ winyo wunu koppere. En mom bino wekowu, dok daŋ mom bino tyekowu oko. Wie mom bino wil i cikere mere ame rik ocikere kede baŋ kwariwu, ame rik ekwoŋo baŋgi, Pien Rwot Obaŋawu, en Obaŋa ame akica. “Koŋ ipeny wunu pire i kare a doŋ okato oko i ŋec, kare ame rik mom ru onywalowu, cakere i kare Obaŋa oketo iye dano i wi lobo; cak penyo pire i agikki piny tuŋ cel tuno kede tuŋ ocele; inen ka ce yam koŋ twon ginnoro adwoŋ calo man otimere, onyo yam koŋ owinyo pire. Tye rokkoro ame yam koŋ owinyo dwon obaŋagi kun kobo i dye mac, acalo wun ame yam koŋ iwinyo wunu eka dok te bedo kow? Onyo yam koŋ tye obaŋa moro ame otemo kwanyo rokkoro me bedo mege kene i akina rok ocele kun temo cuny rokkono i yore apol, kede anyuttogo, kede taŋo mogo me awura, kede lweny kede ciŋ atek, kede bad ame oryeo, kede twon lworo adwoŋ, ame rom i gin ame Rwot Obaŋawu otimo i kom lobo Miciri kun waŋ oneno kede waŋwa? Magi luŋ rik onyuto baŋwu wek iŋe wunu ni Rwot en Obaŋa; mom dok tye Obaŋa moro ocele. En omio wun iwinyo wunu dwone i polo me epwonywu wek eyik kitewu; dok daŋ onyuttiwu maccere adwoŋ i lobo, dokite winyo wunu daŋ koppere i dye mac. Pien en rikomaro kwariwu eka te yero ikwaegi, ame gin onywalo, rik te kwanyogi oko i lobo Miciri pi teko mere adwoŋ kun en ikome tye kedwu, kun ryemo i nyimwu rok adoŋo dok atek a katowu oko me wek ekelwu i lobogi, me emiwu lobogi bed megwu, kite ame tye kede naka atot tin. Myero doŋ tin iŋe wunu dok iketo wunu cunywu ni Rwot en Obaŋa malo i polo kede piny i lobo; mom dok tye Obaŋa moro ocele. Pi mannono myero imak wunu icwillere, kede gin ame en ociko luŋ ame tin an acikowu kede, me wek nyimwu kede me itinowu ame bino lubo ŋewu bed acil, me iperakino wunu kare alac i lobo ame Rwot Obaŋawu tye ka miyowu me bed megwu atwal.” I kare-nono Muca te poko boma adek i yo tutuŋ kide, loka Jordan, me wek ŋat oneko nek riŋ lar kuno; me wek ŋat a mom oneko awottere me akaka, kun onwoŋo amone moro gire mom i akinagi i kare okato, wek ka en oriŋo i boma moro i akinamagi, en bino laro kwo mere: Gin boma-nogo rik obedo Bejer ame tye i tim, i lobo opette, pi jo Reuben, Ramot i Gilead pi jo Gad, kede Golan i Bacan pi jo Manace. Man en cik ame rik Muca oketo i nyim jo Icrael. Magi gin kop me caden, icwil, kede kop ame rik ociko ducu, ame Muca okobo baŋ jo Icrael i kare a doŋ gin oya oko i Miciri, a doŋ otye loka Jordan, i luŋ ame otikere i Bet-peor, i lobo Cikon abaka a jo Amor ame rik bedo i Kecbon ame rik Muca kede Icrael oloo i kare ame gin doŋ oya oko i Miciri, Gin rik otero lobo-nono obedo megi karacel kede lobo a Og abaka me Bacan. Magi gin obakki aryo me a jo Amor ame rik onwoŋo bedo loka Jordan tuŋ kide. Lobo-nono rik obedo lobo luŋ ame ocakere i Areor ame tye i ŋet luŋ me Arnon, tuno kede i kidi me Cirion (ame en Kermon), karacel kede Araba luŋ ame tye i kor kidi me Piciga. Muca olwoŋo jo Icrael te kobbigi ni, “Wun jo Icrael, winy wunu cik ducu kede gin ame ociko ducu ame akobo tin kun iwinyo wunu. Pwony wunu dok daŋ igwokere wunu me cobogi. Rwot Obaŋawa rik ocikere kedwa i Koreb. Rwot rik mom oketo cikere man kede kwariwa, ento ocikere kedwa, wan luŋ ame pwod tin otye kan kun okwo-ni. Rwot rik okobo kedwu waŋ i waŋ i te kidi, i dye mac. An rik onwoŋo acuŋ i akina Rwot kede wun i kare-naca, omio mom ite yito wunu malo i wi kidi.” En rik okobo ni, “An a Rwot Obaŋani ame rik akwanyi oko i lobo me Miciri, i ot me opii. “Kur dok ibed Obaŋa moro ocele kono an keken. “Kur iti cal ginnoro ame ipao piri keni, kadi cal ginnoro ame tye malo i polo, onyo ame tye piny i wi lobo, onyo ame tye i pii ame tye piny i te lobo; kur iryebere piny i nyimgi, kur iworgi; pien an a Rwot Obaŋani, an Obaŋa ame anyek; aketo can i kom ikwae a jo ame daga pi bal a kwarogi naka tuno i kom lwagi me adek kede me aŋwen i kom ikwaegi, ento anyuto marra a mom lokere baŋ jo tutumia kede tutumia ame mara, ame mako cikka. “Kur ilwoŋ nyiŋ Rwot Obaŋani nononono; pien Rwot bino miyo kop loo ŋat alwoŋo nyiŋe nononono. “Po pi nino me cabit, ikwer bed acil, kite a rik Rwot Obaŋani ociki kede. I tic tic atek pi nino abicel, kun itio ticci ityeko luŋ; ento nino me abiro en cabit a Rwot Obaŋani. Nino-nono kur igud ticcoro, kadi yin ikomi, onyo wodi, onyo nyari, kadi opiini onyo aŋecani, onyo twonni onyo kanani, onyo dyaŋŋi moro, onyo arokkoro ame bedo i akinawu; wekopiini kede aŋecani owe daŋ bala yin. Myeroipo ni yin daŋ yam ibedo opii i lobo Miciri, Rwot Obaŋani en a rik obin okwanyi oko i kuno ni igwok nino me cabit. “Wor pappi kede totti, kite a Rwot Obaŋani ociki kede, me iperakino i lobo, dok ibed kun nyimi cil, i lobo ame Rwot Obaŋani bino miyi. “Kur inek. “Kur daŋ icod cot. “Kur daŋ ikwal ginnoro. “Kur daŋ ikob kop goba i kom ŋattoro. “Kur daŋ ibed paro dako a ŋattoro, kur ipar ot a ŋattoro kadi poto mere, onyo aŋeca mere, onyo twonnere, onyo kana mere, onyo kadi ginnoro ducu ame tye baŋe. “Rwot rik oko bo magi luŋ baŋwu wun luŋ kun icokere wunu karacel i te kidi. En rik okobo i dwon aloŋo i dye mac, kede pol, kede pol oculle acula ekuna, mom dok te medo iye kopporo ocele. Rik en te coyo kop man luŋ i kom kiddi apada aryo, te miyogi baŋa. “Kare ame rik iwinyo wunu dwon ame opelo i dye piny acol kun mac tye ka waŋ i kidi, otel me atekerewu kede odoŋewu te bino baŋa. Gin rik te kobo ni, ‘Nen ba, Rwot Obaŋawa doŋ onyuttiwa kwogo mere kede dittere, dok daŋ otyeko winyo dwone i dye mac. Tin doŋ wan oŋeo ni Obaŋa twero kop kede dano, eka dano-nono pwod dok te medde bedo kwo. Doŋ piŋo myero omiye me to oko aman, pien twon mac adwoŋ ca amito waŋowa oko? Ateni, abino to oko ka ce omedde winyo dwon Rwot Obaŋawu kun kobo kedwa tyen me aryo, pien mom tye ŋattoro ame tye kede kom ame yam koŋ owinyo dwon Obaŋa akwo kun kobo i dye mac eka, pwod dok te medde bedo kwo, kite a wan owinyo kede. Yin wot aceggi me iwiny kop luŋ ame Rwot Obaŋawa bino kobo; yin ite kobbiwa kop luŋ ame Rwot Obaŋawa bino kobbi; wan obino winyo ote daŋ tiyo’. “Rwot rik te winyo kop ame wun ikobo wunu baŋa, Rwot te kobba ni, ‘Atyeko winyo kop ame lwak okobo baŋi. Kop ame gin okobo luŋ, gin okobo kakare. Kono kom gin omedde bedo kede kodi cunnyono kare ducu, cuny me lwora kede me gwoko cikka luŋ, kono ber; i nyimgi kede me itinogi kono obedo acil nakanaka, Wot ikobbigi ni, “Dok wunu doŋ i kemawu.” Ento yin cuŋ i ŋeta kan, an abino titti cik luŋ kede icwil, karacel kede gin aciko luŋ, ame yin ibino pwonyogi kede, me gin wot cobgi i lobo ame amiyogi me bedo meggi’. Pi mannono, gwokere wunu icobogi kite ame Rwot Obaŋawu ociko kede, kur igak wunu i ciŋwu tuŋ cem onyo tuŋ cam. Lub wunu ka yo luŋ ame Rwot Obaŋawu ocikowu ni ilub wunu; me ibed wunu kwo, dok nyimwu daŋ bed acil, dok iperakino wunu i lobo ame ibino wunu gamo me bedo megwu. “Magi en cik, icwil kede gin ame Rwot Obaŋawu ociko ni apwonywu kede, me iwot icob i lobo ame iwot wunu gamo me bedo megwu loka ca. Pi kare me kwowu luŋ, wun karacel kede itinowu kede ikwaewu, ibino lworo wunu Rwot Obaŋawu, kun igwoko wunu icwillere luŋ kede cikere ame acikowu kede. Mannono bino miyo iperakino wunu kare alac. Pi mannono winy ba, yin icrael, gwokere me cobogi, me nyimi bed acil, dok daŋ inya apol meicel, kite ame rik Rwot Obaŋa a kwariwu rik ociki kede, i lobo ame cak kede moo kic mol amola iye. “Winy ba, yin Icrael. Rwot Obaŋawa en Rwot acel. Mar Rwot Obaŋani kede cunyi ducu, kede tiponi luŋ kede tekoni luŋ. Cik magi luŋ aciki kede tin-ni, myero imi bed i cunyi; dok daŋ ibino pwonyo itinoni atek meicel. Kop kop i komgi ka itye paco, ka itye iwot iyo, ka ibuto kede ka iya doŋ malo i kabuto, Twegi i ŋut ciŋi, obed me anen; twe daŋ i tur nyimi. Cogi daŋ i kom yen me doggola odi, kede i dogcel. “Rwot Obaŋawu bino kelowu i lobo ame rik okwoŋo pire baŋ kwariwu Iburaim, kede Icaka kede Yakobo ni ebino miyowu, lobo ame tye iye boma abeco meicel ame wun mom igero wunu; gedo iye luŋ opoŋ iye jami abeco meicel ame mom wun en iketogi wunu iye. Akoŋ apipim daŋ tye iye ame doŋ okunyo oko ame wun mom ikunyo wunu, potti olok kede me jeituni daŋ tye iye apipim ame wun mom ipito wunu. Doŋ ba, ka ce ibino camo wunu ite yeŋ wunu, myero igwokere wunu, wiwu kur wil oko i kom Rwot ame okwanyowu i lobo Miciri, i ot me opii. Lwor wunu Rwot Obaŋawu, ti wunu ticcere, ti wunu kede nyiŋe ka ce ikwoŋo wunu kwoŋoro. Kur ilub wunu Obaŋa mogo ocele, ame obedo me a rok luŋ omano laŋetwu. Ka ce ibino timo wunu kittono, akemo bino mako Rwot Obaŋawu i komwu, te tyekowu oko i wi lobo. Pien Rwot Obaŋawu ame tye i akinawu, en. “Kur iom wunu yi Rwot Obaŋawu, Obaŋa ame nyek kite a rik iomo wunu kede yie i Maca. Ketto cunywu meicel igwoko cik a Rwot Obaŋawu luŋ kede koppere me caden, kede icwil luŋ, ame en ocikowu kede. Ti wunu gin ame tye ateni dok daŋ ame ber i nyim Rwot, me nyimwu bed cil, me iwot idony wunu i lobo aber ame Rwot Obaŋawu okwoŋo pire ni ebino miyo baŋ kwariwu, iwot igam wunu bed megwu. En bino ryemo okworwu oko i nyimwu, kite ame Rwot okobo. “I kare i nyim ka atinni bino penyi ni, ‘Kara kop me caden te koppere ŋo, karacel kede icwil luŋ kede gin ame ociko ame Rwot Obaŋawu ocikowu iye-ni?’ Yin ibino kobbe ni, ‘Wan rik obedo opii a Parao i Miciri, Rwot rik te kwanyowa oko i kuno kede ciŋe atek. Rwot rik onyuto anyuttogo kede taŋo mogo me awura, ame doŋodoŋo dok alit meicel i kom jo Miciri kede i kom Parao kede i kom jo ode luŋ kun wan oneno kede waŋwa. En rik te kwanyowa oko i kuno, me kelowa kan, wek emiwa lobo ame rik ekwoŋo pire ni emiyo baŋ kwariwa. Rwot rik ocikowa ni myero wan ocob icwil magi luŋ, myero daŋ olwor Rwot Obaŋawa me obed aber nakanaka, me en gwokwa obed kwo, kite ame otye kede-ni. Ka ce ogwokere icobo cik magi luŋ i nyim Rwot Obaŋawa, kite ame en ocikowa kede, obino bedo jo ame kitewa atira’. “Ka doŋ Rwot Obaŋawu bino kelowu i lobo ame idonyo wunu iye, me wot gamo wunu bedo megwu, kun ryemo rok apol oko i nyimwu, jo Kitti, jo Girgac, jo Amor, jo Kanaan, jo Kivi, kede jo Jebuc, gin luŋ rok kany wie aryo adoŋodoŋo, dok ame otek okatowa oko, ka ce Rwot Obaŋawu bino miyogi i ciŋwu, ite loyo wunugi, myero ijwergi wunu luŋ acalo gin me kwer. Kur icikere wunu kedgi, kur daŋ ibed wunu kede kica moro baŋgi, Kur inyomere wunu kedgi, kur imi anyirawu baŋ awobegi, dok kur daŋ inyommi wunu awobewu anyiragi. Pien gin bino balo wi awobewu oko iluba, ote lunyo woro obaŋa mogo ocele; mannono bino miyo akemo mako Rwot te ru tyekowu oko. Ento myero itimgi wunu kit man: mumuko wunu keno me yalo jogigi oko, ret wunu kiddigi ame ocibo me awora piny, toŋu Acerimgi oko, waŋ wunu calgi ame opao apaa oko kede mac. “Pien wunu ibedo wunu jo acil; wun ibedo wunu jo a Rwot Obaŋawu. Rwot Obaŋawu otyeko yerowu i akina rok luŋ ame tye i lobo me ibed wunu jo mere en ikome. Mar a Rwot rikomoko i komwu, te yerowu, mom pi welwu ame pol kato me a rok ocele, wun en ame onwoŋo doŋ inok wunu meicel i kom rok ocele luŋ. Ento pien Rwot Obaŋawu rikomarowu, te gwoko kwoŋŋere a rik ekwoŋo baŋ kwariwu, en omio en okwanyowu kede teko me ciŋe, te lakorowu oko i ot me opii i ciŋ Parao, abaka me Miciri, Myero doŋ iŋe wunu ni Rwot Obaŋawu, en Obaŋa ame genne, ame gwoko cikere mere, dok daŋ gwoko marrere a mom lokere baŋ lwagi jo tutumia ame mare, dok daŋ mako cikkere luŋ. Ento culo kwor i kom jo ame dage, kun nekogi oko. En mom bino weko ŋat a dage, en bino culo kwor i kome. Pi mannono myero igwokere wunu i cobo cikkere, kede icwillere, kede gin ame ociko, ame acikowu kede tin. “Ka ce iwinyo wunu cik magi, ite mako wunu kun daŋ icobo wunu, Rwot Obaŋawu daŋ bino gwoko cikere mere, karacel kede marrere a mom lokere ame rik ekwoŋo pire baŋ kwariwu. En bino marowu dok bino miyowu gum, bino miyo welwu medde, dok daŋ bino miyo gum i kom itinowu ame ibino nywalo kede i kom gin ame bino cek i pottiwu, i kom kalwu, kono olok, kede moowu; karacel kede i kom itino dok kede i kom itino rommi, i lobo ame rik en okwoŋo pire baŋ kwariwu ni ebino miyowu. Obino miyowu gum ame kato rok ocele ducu; ico moro onyo dako moro mom bino bedo oraŋa i akinawu, onyo i akina limwu akwo. Rwot bino kwanyo kit two luŋ i akinawu. Two moro arac mom bino poto i komwu acalli me Miciri ame rik ikanyo wunu. Rwot bino miyo kodi two-nono poto i kom jo luŋ ame dagowu. Nek wunu jo luŋ ame Rwot Obaŋawu bino miyo i ciŋwu. Kica kur makwu i komgi, dok daŋ kur ilwor wunu obaŋegi; pien gin bino doko kumma me cikowu. “Aco ka ce yam ibedo paro i cunyi ni, ‘Rok magi doŋodoŋo katowa oko; atwero ryemogi niŋo?’ Kur ibed i lworo moro i komgi, ento wii myero kur wil i kom gin ame Rwot Obaŋawu yam otimo i kom Parao kede i kom jo Miciri luŋ, Poyo kite ame otemogi kede kun wun ineno wunu kede waŋwu, karacel anyuttogo kede taŋo me awura, kede teko me ciŋ kede bade ame oryeo, ame Rwot Obaŋawu yam okwanyowu kede i kuno. Rwot Obaŋa bino timo kittono i kom rok luŋ ame ilworogi-nono. Dok daŋ Rwot Obaŋawu bino coro lwak pipino apipim i akinagi, tuno waŋ ame otyeko jo ame onwoŋo odoŋ, ame oponniwu oko. Kur imi wunu koyo onyere i komwu, pien Rwot Obaŋawu tye i akinawu, en twon Obaŋa adwoŋ meicel. Rwot Obaŋawu bino ryemo rok magi i nyimwu momot; mom itwero tyekogi wunu oyotoyot, naka mio leyi me tim nya apol meicel te yelowu. Ento Rwot Obaŋawu bino miyo rok magi luŋ i ciŋwu, bino babanogi oko, tuno waŋ ame ityekogi wunu. Bino daŋ miyo obakkigi i ciŋwu, eka ite miyo wunu nyingi rwenyo oko i wi lobo. Mom tye moro i akinagi ame bino cuŋ i nyimwu; tuno ka ityekogi wunu ducu. Waŋ wunu cal obaŋegi oko ame opao apaa i mac. Kur ipar wunu pi ryal kede jabu ame tye i komgi, kur daŋ iter wunu me miyo doko megwu, naka mio gin doko kumma me mokowu; pien mannono obedo gin me kwer baŋ Rwot Obaŋawu. Kur ikel wunu ginnoro me kwer i udiwu, ame mio idoko wunu jo oceno calo gin. Myero ikwer wunu oko, cunywu daŋ ca oko atwal, pien gin obedo gin ame myero jwer oko ducu. “Gwokere wunu, icob wunu cik luŋ ame amiyowu tin, me ibed wunu kwo dok inya wunu, iwot idony wunu i lobo ame Rwot rik okwoŋo ni ebino miyo baŋ kwariwu, igam wunu bed megwu. Poyo wunu twon wot abor ame Rwot Obaŋawu otelowu iye pi mwakki pyeraŋwen ame tin otum okoni. En onwoŋo tye amiyowu idoko wunu jo amwol, kun etemowu, me ene gin ame tye i cunywu, ka ce ibino wunu mako cikkere onyo pe. En om idoko wunu jo ame mwol kittono, en te miyo kec nekowu, te miyowu camo manna ame mom rik iŋeo wunu, akadi kwariwu daŋ rik mom ŋeo. En otimo mannono me iŋe wunu ni dano mom bino bedo kwo ka i kwon keken, kono ka i kop ducu ame ya i dog Obaŋa. Rukwu rik mom oyeyeca i komwu, tyenwu daŋ mom gire okwokwota, i mwakki pyeraŋwen luŋ ame ibedo wunu kede i tim. Ŋe wunu ni kite acalo apap pwonyo wode, amannono daŋ Rwot Obaŋawu pwonyowu. Pi mannono, myero igwok wunu cik a Rwot Obaŋawu luŋ kun ilubo wunu yo mere dok daŋ ilwore wunu. Pien Rwot Obaŋawu tye aterowu aber, lobo ame opoŋ i kulli me pii amol, akoŋ apipim, kede pi i akukunya mollo i luŋ kede i kor kiddi, lobo ame ceko ŋano cayiri, olok kede oduro kede okwer pomegranat, lobo ame moo jeituni kede moo kic dwoŋ iye ata, lobo ame ibino wunu camo iye cam adwoŋ aboŋo ginnoro ame remowu. En lobo ame gweŋe iye obedo nyonyo, ame okunyo iye mola, i lobo ame obedo kidikidi. Ibino cem wunu ite yeŋ wunu, ite poyo wunu Rwot Obaŋawu, pi lobo aber ame en omiowu. “Gwokere wunu ba, me wiwu kur wil oko i kom Rwot Obaŋawu, kun mom imako wunu cikkere, kede gin ame en ociko, kede icwillere ame acikowu kede tin, naka mio ka doŋ iyeŋ wunu, kun daŋ doŋ igero wunu udi abeco ame ibedo wunu iye; kare ame dokwu kede rommiwu doŋ onya apol, karacel kede ryalwu kede jabuwu ame nwoŋo doŋ bup meicel, dok jami luŋ ame tye i ciŋwu doŋ dwoŋ atata, cunywu te cako yeyea, wiwu te wil oko i kom Rwot Obaŋawu ame rik okwanyowu i lobo Miciri, i ot me opii. Obaŋawu ame rik otelowu i dye twon tim alac dok iyiliyili, ame twole a kwiri rac kede yit rik tye iye apipim; i lobo ame oryo pii onwoŋo dwoŋ iye meicel. Rwot Obaŋawu ame rik te miyo pii mollo pirwu kun ya i lela; en a daŋ rikomiowu manna me acama, cam ame kwariwu rik mom oŋeo. En otimo mannono me wek emiwu idok wunu jo amwol, etem cunywu, me wek i agikki mere etimwu ber. Gwokere wunu ba, naka mio ikobo wunu i cunywu ni, ‘Tekona kede twer me ciŋa en omio anwoŋo lonyo man.’ Myero ipo wunu i kom Rwot Obaŋawu, pien en omii teko me nwoŋo lonyo, me wek emok cikere mere ame rik ekwoŋo baŋ kwariwu, kite ame tye kede atot tin. Ka ce wiwu bino wil oko i kom Rwot Obaŋawu, ite cako wunu lubo kite obaŋe mogo ocele, kun itiyigi wunu dok daŋ iworogi wunu, akobbiwu kannaler ni, ibino wunu to itum wunu ducu. Ibino to itum wunu oko calo rok ame Rwot tye ka tyeko oko i nyimwu, pien mom iwinyo wunu kop a Rwot Obaŋawu. “Winy wunu ba, wun jo Icrael. Tin ibino wunu kato loka Jordan, me wot ryemo rok adoŋodoŋo dok atek katowu oko, i bomagi luŋ a daŋ doŋodoŋo kun ocecelo atek naka malo i polo, rok adwoŋ dok ame jo mere bocoboco, ame gin jo Anak ame iŋeo wunu, ame yam daŋ doŋ iwinyo wunu pirgi oko ni, ‘Ŋa kara atwero cuŋ i nyim ikwae Anak?’ Pi mannono, myero tin doŋ iŋe wunu ni, ŋat ame tye awot inyimwu acalo mac ame waŋo piny, en Rwot Obaŋawu; en ikome bino tyekogi oko, te loyogi oko i i nyimwu; mannono bino miyo iryemogi wunu oko, ite miyogi wunu ru to oko, kite a Rwot ocikowu kede. “Ka doŋ Rwot Obaŋawu otyeko ryemogi oko i nyimwu, kur ikob wunu i cunywu ni, ‘Pien pi kita an ikoma ame obedo atira, en omio Rwot okela me gamo lobo man bedo mera’, kun kono pi ballogo areco ame rok ocel ca obedo tiyo, en omio Rwot tye aryemogi oko i nyimwu. Mom pi kitewu atira onyo pi cunygi ame cil en omio iwot wunu gamo lobo-naca me bedo megwu, cite pi ballogo areco ame rokkaca luŋ obedo timo en omio Rwot Obaŋawu tye ka ryemogi oko i nyimwu, dok daŋ me emok gin ame ekwoŋo baŋ kwariwu Iburaim, kede baŋ Icaka, kede baŋ Yakobo. “Pi mannono, myero iŋe wunu ni, Rwot Obaŋawu mom amiyowu lobo man aber-ri, me bedo megwu pi kitewu atira; pien wun ibedo wunu jo ame ŋutwu nwaŋ. Myero ipoyo wunu, dok daŋ wiwu kur wil i kom kite ame ibedo miyo wunu akemo mako kede Rwot Obaŋawu i tim. Cakere i nino ame iya wunu kede i Miciri naka tuno kede i kabedo man, ibedo wunu jem i kom Rwot. Kadi naka i Koreb, imio wunu akemo omako Rwot, ame te miyo yi Rwot waŋ meicel i komwu, ame te tamo pi tyekowu oko. Kare ame an rik awoto malo i wi kidi me wot gamo kiddi apada, kiddi apada me cikere ame rik Rwot ocikere kede kedwu, an rik ate ri i wi kidi pi nino pyeraŋwen, i ceŋ kede iwor kun mom acamo kadi mato ginnoro. Rwot rik te miya kidi apada aryo ame Obaŋa en ocoo i ciŋe, kun ocoo i komgi kop luŋ ame rik Rwot obedo kobo i wi kidi kede i dye mac, i nino ame rik lwak ocokere iye. Kare ame doŋ nino pyeraŋwen otyeko tum, iwor kede iceŋ. Rwot rik te miya kiddi apada aryo, ame gin obedo kiddi me cikere. Rwot te doŋ kobba ni, ‘Ya i kan oko, iru wot piny, pien joni a rik ikwanyo i lobo me Miciri oballe doŋ oko. Gin oweko cik a rik acikogi kede oko oyotoyot, olunyo tiyo atin twon ame otwako atwaka pirgi kengi’. “Rwot dok te medde kobba ni, ‘An doŋ atyeko neno jo man, nen ba, gin obedo jo ame ŋutgi nwaŋ. Koŋ doŋ iweka gira kena, me atyekgi oko, awe nyiŋgi oko i wi lobo, an abino miyi idoko rok atek dok adit akatogi oko.’ An rik ate ya oko i wi kidi, ate lokere bino piny kun mac tye alyel i kidi, kiddi apada aryo me cikere onwoŋo tye amako i ciŋa. Kare ame abolo waŋa, aneno itye wunu itimo wunu bal i nyim Rwot Obaŋawu; anwoŋo itio wunu cal atin twon ame otwako atwaka, kun iweko wunu oyotoyot cik a rik ocikowu kede. Mannono omio amako kiddi apada aryo i ciŋa aryo luŋ, ate retogi piny, ŋinido oko kun ineno wunu, An ate buta aryeba cuny i nyim Rwot nino pyeraŋwen iceŋ kede iwor kite a rik koŋ atimo con ca, kun mom acamo kadi mato ginnoro, pi bal luŋ ame onwoŋo itimo wunu, kun itimo wunu gin a nen arac i nyim Rwot Obaŋawu, ame omio akemo omake. Pien lworo onwoŋo omaka pi akemo a Rwot kede twon cwercuny ame onwoŋo en tye kede i komwu, ame en tamo pi tyekowu oko. Cite Rwot rik dok te winya i karenono, Akemo daŋ rikomako Rwot i kom Aron, te daŋ yikere me neke oko, ento an rik atedaŋ kwayo pi Aron i kare-naca. Rik daŋ ate kwanyo gi-timo balwu oko, waŋo i mac, ame en atin twon a rik itio wunu. Rik ate odo rerego oko ayom, tuno ka doŋ calo apua; ate onyo apua mere nono i pii ame mollo i wi kidi. “Medo i kom mannono, rik daŋ imio wunu akemo omako Rwot i Tabera kede i Maca kede i Kibirotatava, Kare ame rik Rwot ocwaowu kun iya wunu i Kadec-barnea kun kobo ni, ‘Wot wunu malo iwot igam wunu lobo ame atyeko miyowu me bedo megwu’, wun rikitejem wunu oko i kom gin a Rwot Obaŋawu ociko, mom ibedo wunu igen i kome, mom daŋ iwinyo wunu koppere. Ibedo wunu jem i kom Rwot cakere i nino ame rik aŋeowu iye. “Mannono omio rik abuto piny aryeba cuny i nyim Rwot nino pyeraŋwen, iceŋ kede iwor, pien Rwot rik okobo ni emito doŋ tyekowu oko. Rik ate kwayo Rwot ni, ‘Tim ber, ama Rwot, kur ityek joni oko; pien gin obedo megi. Yin rik ilakorogi kede tekoni, ite kwanyogi i lobo me Miciri kede twero me ciŋi, Po i kom omironi Iburaim, Icaka kede Yakobo; kur ipar pi nwaŋ ŋut a rok man, onyo pi timgi areco onyo pi balgi, me wek jo i lobo ame ikwanyowa iye kur obed kobo ni, “Pien Rwot onwoŋo mom romo terogi i lobo ame rik ociko me miyogi, dok daŋ onwoŋo rik en dagogi, en omio en okwanyogi me wot nekogi oko i tim.” Pien gin obedo joni, gin megi yin i komi, ame doŋ ityeko kwanyo oko i teko adwoŋ karacel kede badi ame iryeo’. “I kare-nono Rwot te kobbi Muca ni, ‘Muk dok kiddi apada aryo, tyeŋgi obed ame calli mega me agege ca, ite bino baŋa malo i wi kidi. Ti daŋ canduk me bao. Abino coyo i komgi kop ame rik koŋ aco i kom kiddi apada me agege ca, ame rik iŋiŋido oko ca, eka ite ketogi i canduk.’ An daŋ rik ate tiyo canduk, kun atio i bao okuto alwii, ate daŋ muko kiddi apada aryo, ate daŋ tyeŋo ame rom aroma i maca acon ca, ate doŋ yito malo i wi kidi kun amakogi i ciŋa. Rwot te coyo kiddi apada aryo-nono, kite a rik koŋ ogeo coyo kede, gin cik apar ame rik en okobo baŋwu; Rwot rik te miyogi baŋa. I ŋe mannono, an doŋ ate dwogo oko piny i wi kidi, ate keto kiddi apada aryo i canduk ame rik atio ca, kite ame Rwot onwoŋo ocika kede; gin tye iye kuno.” (Jo Icrael rik te ya oko i Beerot bene-jakan, ote tuno Mocera. Aron rik te to kuno, ote yiko daŋ kuno; wode Eleajar te leyo kakare i tiyo tic me alamdog. Gin te ya i kuno, ote wot tuno i Gudgoda, ote wot Jotbata, ame en lobo ame tye iye kulo apipim ame pii opoŋ yigi. I kare-nono en ame Rwot rik te cako poko iye atekere a jo Levi pat, gin te bedo otiŋ canduk me cikere a Rwot, kun ocuŋ i nyim Rwot me tiyo tic a Rwot, kede lamo gum kun otio kede nyiŋe, kite ame tye kede naka i kare man. Man en gin omio jo Levi mom tye kede dul lobo moro ame obedo megi i akina omegogi; Rwot en ame obedo gin ame gin onwoŋo me bedo megi kite ame Rwot Obaŋawu rik ociko baŋgi.) “An rik ate ri i wi kidi pi nino pyeraŋwen, iceŋ kede iwor, kite ame abedo kede i me agege ca, Rwot rik daŋ te dok winyo kwacca i kare-nono, Rwot doŋ te weko tam me tyekowu oko. Rwot te kobba ni, ‘Ya doŋ oko, imedde wunu i wotwu kun yin itelo nyim lwak, me gin wot dony i lobo ame rik akwoŋo pire baŋ kwarigi ni abino miyogi, owot ogam bed megi’. “Aman doŋ ba, yin Icrael, ŋo kara ame Rwot Obaŋani mito i baŋi? Man keken ni, Myero ilwor Rwot Obaŋani, ilub yo mere luŋ, imare, kun itio baŋ Rwot Obaŋani i cunyi ducu kede tiponi ducu, dok daŋ imako cikkere kede icwillere luŋ, ame tin acikowu kede, me wek ibed wunu aber. Nen ba, polo luŋ aluŋa me a Rwot Obaŋawu, karacel kede lobo, kede jami ducu a tye iye. Kadi bed amannono, en rik oketo cunye i kom kwariwu, omarogi, te yero ikwaegi ame olubo ŋegi, ame gin obedo wun, i akina rok luŋ, kite ame itye wunu kede naka tin. Pi mannono, wek wunu doŋ bedo jo ame ŋutgi nwaŋ, lirre wunu doŋ i cunywu, imak wunu cikere mere luŋ. Pien Rwot Obaŋawu en Obaŋa ame loo kit obaŋe ocele luŋ, en Rwot a rwode ducu, en Obaŋa ame dwon, ame tek dok daŋ iyiliyili meicel; Obaŋa a mom leŋere i ŋolo koppere, a mom owilo kede lim. En ŋolo kop atira i kom atin kic kede i kom dako a cware oto; dok en nyuto marrere baŋ arok dok mie daŋ cam kede ruk. Wun daŋ myero imar wunu orok ame bedo i akinawu, pien wun daŋ rik ibedo wunu orok i Miciri. “Myero ilwor Rwot Obaŋani, iti baŋe, dok imok daŋ i kome, kun ikwoŋo daŋ kede nyiŋe keken. En Obaŋa ame myero ipak wunu, pien en a rik otimo pirwu twoni jami mogo adoŋodoŋo, dok daŋ iyiliyili, ame ineno wunu kede waŋwu. Kwariwu rik welgi romo ka pyerabiro keken i kare ame gin woto i Miciri, cite aman Rwot Obaŋawu doŋ omio ipol wunu meicel acalo lwak acer apipim ame tye i polo. “Pi mannono, myero imar Rwot Obaŋani, ilub gin a en ociko, icwillere kede cikkere luŋ i kare ducu. Koŋ tin doŋ itam wunu pwony ame Rwot Obaŋawu opwonyowu kede, pien an mom atye ka kop itinowu ame yam mom oŋeo dok daŋ mom oneno. Tam wunu pi dittere, ciŋe atek, kede bade ame en oryeo. Wun rik ineno wunu anyut luŋ kede ginnoro luŋ ame en rik otio i Miciri i kom Parao abaka me Miciri karacel kede i kom lobo mere luŋ. Gin aŋo a rik en otimo i kom mony a jo Miciri, i kom aguraguragi kede i kom gadigadigi. Rwot rikomio gin luŋ omwonyere oko i Nam arema i kare ame gin ryemo yorwu te miyogi tum oko atwal naka tin. Tam wunu koŋ gin ame en otimo i komwu i tim, tuno waŋ ame ituno wunu i kabedo man, kede gin a en otimo i kom Datan, kede Abiram, itino Eliab, wot a Reuben; kite ame lobo oŋamo kede doge kun jo Icrael luŋ neno, te mwonyogi oko, karacel kede jo me doggolagi, kede kemagi kede jo luŋ a rik owinyo kopgi. Wun i komwu rik ineno wunu ticcogo adoŋodoŋo luŋ ame Rwot obedo tiyo. “Pi mannono, myero imak wunu cik luŋ ame acikowu kede tin, me ibed wunu atek, iwot idony wunu i lobo ame iwot wunu iye loka, me gamo bedo megwu; dok me iperakino wunu kare alac i lobo ame rik okwoŋo pire baŋ kwariwu ni ebino miyogi kede baŋ ikwaegi, lobo ame cak kede moo kic mol amola iye. Pien lobo ame iwot donyo wunu iye me gamo bedo megwu mom rom i lobo me Miciri ame iya wunu iye, ame ka icoo kotini koŋ dok ionyo pii iye i tyenwu, acalo poto dek. Ento lobo man ame iwot wunu iye loka me wot gamo bedo megwu, en lobo ame obedo kidikidi, dok daŋ luŋ pol iye, ame mato pii me kot a cwe i polo. En lobo ame Rwot Obaŋawu gwoko. Waŋ Rwot Obaŋawu kare ducu tye iye, cakere iyi ageyi mwaka tuno kede naka iyi agikki mwaka. “Doŋ ka ce ibino wunu bedo i winy i cik luŋ ame acikowu kede tin, imaro wunu Rwot Obaŋawu, kun itio wunu baŋe kede cunywu luŋ kede tipowu luŋ, en bino miyo kot cwe i lobowu i kare luŋ ame kot mitte iye, kot me cwir kede kot me iporo, me inwoŋ wunu kal, kono olok kede moo. En bino miyo lum bedo tye iyi eletwu pi dokwu, ibino wunu cam ite yeŋ wunu. Cite myero igwokere wunu me kur bwolwu, ite lokere wunu teŋe tiyi obaŋe mogo ocele kun daŋ iworo wunugi. Ka ce itimo wunu kittono, akemo bino mako Rwot Obaŋawu i komwu, eka te cego dog polo oko, kot doŋ te bedo mom. Lobo mom te ceko cem, wun ite ru to wunu oko i lobo aber ame Rwot amiyowu. “Doŋ pi mannono ba, myero imi wunu koppa-ni luŋ bed i tamwu kede i cunywu, twegi i ŋut ciŋwu, obedo me anen, twe wunu daŋ i tur nyimwu. Pwony kede itinowu, kob kop i komgi ka itye paco, ka itye ka wot i yo, ka ibuto, kede ka iya malo i kabuto. Cogi daŋ i kom yen me doggola odi kede i dog cel me boma, me wun karacel kede itinowu iperakino wunu kare alac i lobo ame Rwot rik okwoŋo me miyo baŋ kwariwu, pi kare luŋ ame polo bino bedo kede malo i wi lobo. Pien ka ibino gwokere wunu me lubo cik magi luŋ ame atye amiyowu, imaro wunu Rwot Obaŋawu, kun ilubo wunu yo mere, dok daŋ imoko wunu i kome, mannono bino miyo Rwot ryemo i nyimwu rok magi adoŋodoŋo dok atek katowu oko, wunu ite gamo wunu lobogi bedo megwu. Kakannoro luŋ ame tyenwu bino nyono, bino bedo megwu; wan lobowu bino cakere i tim tuno naka i Lebanon, kede dok cakere i kulo ame en kulo Epurate, tuno naka i nam ame tye tuŋ to. Mom tye lomoro ame bino cuŋ i nyimwu: Rwot Obaŋawu bino miyo lworowu nyobo jo luŋ i lobo ame ibino wunu nyono, kite a en rik ocikowu kede. “Nen ba, an tin aketo i nyimwu gum kede cen. Ibino nwoŋo wunu gum ka ibedo wunu owinyo cik a Rwot Obaŋawu, ame acikowu kede tin-ni. Obino ceno wu ka ce mom iwinyo wunu cik a Rwot Obaŋawu, ento igak wunu oko i yo ame acikowu iye tin-ni, kun ilubo wunu yo obaŋe mogo ocele ame yam mom iŋeo wunu. I kare ame Rwot Obaŋawu bino kelowu i lobo ame iwot wunu donyo iye me gamo doko megwu, myero iket wunu gum i wi kidi me Gerijim, aco cen ter wunu i kom kidi me Ebal. Kidi magi luŋ tye loka Jordan i ŋet yo tutuŋ to, tuŋ ame ceŋ poto iye, i lobo a jo Kanaan ame bedo i Araba, ame otikere kede Gilgal, kun ceggi i kworo me More. Pien wun iwot wunu ŋolo Jordan, ite donyo wunu gamo loba ame Rwot Obaŋawu amiyowu me bedo megwu. Ka doŋ lobo-nono odoko megwu, ame doŋ ibedo wunu iye, myero igwokere wunu me cobo icwil luŋ kede gin ame ociko ame aketo i nyimwu tin. “Magi icwil kede gin ociko ame myero ibin igwokere wunu me cobo i lobo ame Rwot, ame obedo Obaŋa a kwariwu, omiowu me bedo megwu, pi kare luŋ ame ibino bedo wunu kwo i lobo. Ateteni, myero inen wunu ni imumuko wunu kabedo luŋ a yam orok ame iryemo wunu i lobogi woro iye obaŋegi, ame tye malo i wi kidi abocoboco, kede i kabedo luŋ obedo kidikidi, kede i te yen luŋ obuŋere. Mumuko wunu keno me yalo jogigi oko, ŋininyo wunu kiddigi ame ocibo me awora oko, waŋ wunu Acerimgi oko kede mac, toŋu cal obaŋegi ame opao apaa oko, mi wunu nyingi rweny oko i kabedo-nono. Mom ibino timo wunu kittono baŋ Rwot Obaŋawu. Rwot Obaŋawu ikome bino yero kabedo moro i akina atekerewu luŋ kan ame en bino keto iye nyiŋe, eka te loko kuno doko kabedo mere; kuno keken en ame ibino wunu wot penyo Rwot Obaŋawu iye. Ibino tero wunu motwu me awaŋa kuno, kede kite motwu ocele mege luŋ, ame oŋolo me yalo Obaŋa, kede motwu me acel me apar, kede motwu ame imio wunu, acalo bala mot me cobo kwoŋ, kede mot me ler a yic, kede itino kao me dokwu kede rommiwu. Ibino camo wunu kuno i nyim Rwot Obaŋawu, eka yin karacel kede jo me odi ite lelo wunu pi ginnoro luŋ ame ciŋwu ogudo, ame Rwot Obaŋawu onwoŋo omio iyegum. “Mom ibino timo wunu kite ame wan otye ka timo wunu kanni, ame dano acel acel tye ka timo gin ame en neno ni ber baŋe. Pien mom ru ituno wunu ka weowu, i loba ame Rwot Obaŋawu amiyowu me bedo megwu. Ento Rwot Obaŋawu amiyowu me alea, dok ka en doŋ omiowu weo, i kom okworwu ame omanowu luŋ, ame doŋ te miyowu bedo i kuc, myero ikel wunu jami luŋ ame acikowu iye i kabedo kan ame Rwot Obaŋawu bino yero me keto iye nyiŋe. Kel wunu iye motwu me awaŋa, kede kite motwu ocele luŋ ame oŋolo me yalo Obaŋa, acel me apar, kede motwu ocele ame imio wunu, kede motwu luŋ ame cobo kwoŋ ame ikwoŋo wunu baŋ Rwot. Ibino bedo wunu kede lelo i nyim Rwot Obaŋawu, wun karacel kede itinowu awobe kede anyira, kede opiiwu, kede aŋecawu, karacel kede jo Levi ame tye i bomawu luŋ, kite acalo gin mom otye i dul lobo moro onyo lobo moro ame gin oleo me bedo meggi karacel kedwu. Gwokere wunu ba, kur imi wunu motwu me awaŋa i kabedo moro kekename waŋwu oneno; myero imi wunu motwu me awaŋa, dok daŋ iti wunu ginnoro luŋ ame acikowu iye, i kabedo ame Rwot bino yero keken i akina atekerewu moro acel. “Kadi bed amannono, itwero wunu neko leyi me acama i bomawu moro kite ame imito wunu, kun lubo winyo ame Rwot Obaŋawu omiowu. Jo a cik ogeŋo kede jo a mom cik ogeŋo twero camo riŋo-nono, bala riŋo amor onyo amyem. Cite remo myero kur cam, myero ony oko piny bala pii. Cite acel me apar me cam ocek, onyo me koŋo olokwu, motwu moro me cobo kwoŋ ame ikwoŋo wunu, onyo motwu me ler a yic, onyo motwu moro ocele ame imio wunu, myero kur icam wunu i bomawu. Magi luŋ myero icam wunu kan ame Rwot oyero keken, i nyim Rwot Obaŋawu. Wun karacel kede itinowu awobe kede anyira, opiiwu kede aŋecawu, kede jo Levi luŋ ame bedo i bomawu, myero icam wunu kuno. Ibino bedo wunu kede lelo i nyim Rwot Obaŋawu pi ginnoro luŋ ame ciŋwu ogudo. Pi kare ame ibedo wunu i lobowu, myero igwokere wunu, kur iwek wunu jo Levi. “Ka Rwot Obaŋawu onyao lobowu obedo adwoŋ kite a rik en ociko, eka ite kobo ni, Abino camo riŋo pien cunya mito camo riŋo, itwero camo kite ame yii mito. Ka ce kan ame Rwot Obaŋawu oyero me keto iye nyiŋe bor kedi, itwero neko dyaŋi moro onyo romo moro ame Rwot omii, kite ame acikowu kede; itwero daŋ camo kannoro keken i bomawu, kite ame yii mito. Itwero camo riŋo-nono kite ame onwoŋo itwero camo kede amor onyo amyem; jo a cik ogeŋo twero camo. Cite myero inen ni mom icamo wunu remo; pien en kwo a dano, doŋ mom ibino camo wunu kwo karacel kede riŋo. Kur icam wunu, ento myero iony wunu piny bala pii. Kur icam wunu; me nyimwu karacel kede me itinowu ame bino lubowu bed aber ka ce itimo wunu gin a tye atira i nyim Rwot. Cite jamiwu luŋ acillege kede motwu luŋ me cobo kwoŋ, ibino kelo wunu kan ame Rwot bino yero. Motwu me awaŋa riŋo kede remo, myero imi wunu i wi keno lam a Rwot Obaŋawu. Remo me motwu ame oŋolo me yalo Obaŋa, myero ony i kom keno lam a Rwot Obaŋawu, cite riŋo mere itwero camo wunu. Myero igwokere wunu i kop magi luŋ ame cikowu iye, me nyimwu karacel kede me itinowu ame bino lubowu bed aber nakanaka, kun itimo wunu gin aber dok a tye atira i nyim Rwot Obaŋawu. “Ka Rwotbino tyeko rok i nyimwu ame iwot wunu leyo lobogi, ka doŋ iryemo wunugi oko, ite bedo wunu i lobogi, myero igwokere wunu, kur imak wunu i kumma, ilub wunu kitegi. Ka doŋ otyekogi oko, kur ipeny wunu kopporo i kom obaŋegi ni, ‘Jo-ni kara woro obaŋegi niŋo, me an daŋ awor kite ame gin woro kede?’ Kur iwor wunu Rwot Obaŋawuiiyore ame gin woro kede megi; pien ginnoro luŋ me kwer ame Rwot dag, gin otimo baŋ obaŋegi. Gin waŋo anaka itinogi awobe kede anyira i mac me yalo obaŋegi. “Ginnoro luŋ ame acikowu iye, myero igwokere wunu icobo; kur imed wunu moro iye, kur daŋ ibol wunu moro oko iye. “Ka ce adwarpinyoro oya i akinawu onyo ŋattoro ame leko lek, eka te nyuttiwu anyuttoro onyo taŋo moro me awura, icennere anyuttono onyo taŋo-nono te daŋ timere, eka en te kobo ni, ‘Biye wunu, me olub wunu obaŋe mogo ocele ame yam mom iŋeo wunu, me ocak wunu doŋ worogi’; kur iye wunu kop odwarpinnyono onyo kop a won lek kono. Mannono nwoŋo Rwot Obaŋawu tye atemowu, me ŋeyo ka ce imaro wunu Rwot Obaŋawu i cunywu ducu kede tipowu ducu. Ibino lubo wunu Rwot Obaŋawu kun ilwore wunu, imako wunu cikkere dok iwinyo wunu daŋ koppere, ibino tiye wunu, dok daŋ ibino moko wunu i kome. Ento adwarpiny ca onyo alek lekkaca ibino neko oko, pien en opwonyo kop me jem i kom Rwot Obaŋawu ame okwanyowu i lobo me Miciri, te lakorowu i ot me opii; en mito miyowu weko yo ame Rwot Obaŋawu ocikowu ni myero ilub wunu. Myero iwe wunu bal man i akinawu kit man. “Ka ce ominni moro ame totowu kede acel, onyo wodi onyo nyari, onyo dakoni ikokome, onyo awoti moro ame lit i cunyi meicel, obiti i muŋ kun kobo ni, ‘Owot ba oti baŋ obaŋe mogo ocele’, ame yin, akadi kwarini yam mom ŋeo, obaŋe mogo ame tye i akina obaŋe a jo ame omano ŋetwu-ni, akadi tye kan aceggi onyo kannabor kedwu, i agikki piny tuŋ cel tuno kede i agikki piny tuŋ ocele; kur iye, kur daŋ iwiny koppere. Kur inene i waŋ me kica, kur iweke, kur daŋ ikan koppere. Cite myero ineke oko; ciŋi en ame bed me agege i kome, ka doŋ ineke, eka icennere ciŋ jo ocele te doŋ onyere i kome. Ibino neke wunu kun inanapo en wunu kede gweŋe, pien onwoŋo obedo yenyo yo me kwanyi oko i baŋ Rwot ame okwanyowu i lobo me Miciri, i ot me opii. Jo Icrael luŋ twero winyo pire ote bedo kede lworo mom dok ote medo timo kodi ballono i akinawu. “Ka ce i boma moro ame Rwot Obaŋawu bino miyowu me bedowu ibino winyo wunu iye ni, jo mogo ame kitegi reco omio jo me boma luŋ ogak oko, kun gin okobo ni, ‘Owot ba oti wunu baŋ jo mogo ocele’, ame wun yam mom ru iŋeo wunu. Ka ce iwinyo wunu koppi, myero ipeny wunu koppere kun i iyenyo wunu tere aber meicel. Ka ce iniaŋ wunu, dok daŋ imoko wunu itmmoro me kwer otimere ateni i akinawu, myero inek wunu jo i boma-nono luŋ i pala lweny, kun ijwero wunu luŋ, ame ineko wunu jo luŋ a tye iye kede dokgi daŋ i pala lweny. Ibino coko wunu jami luŋ ame iyako wunu iye i dye boma kannaler, eka ite waŋo wunu boma oko karacel kede jami-nono luŋ, acalo mot ame owaŋo alutu baŋ Rwot Obaŋawu; kannono bino bedo wi obur nakanaka, mom doŋ obino gero boma-nono atwal. Kur iwek wunu ginnoro ame ojalo baŋ Rwot doŋ i ciŋwu, me akemo a Rwot kwe oko, otimwu kica, te nyuto daŋ cuny me kica i komwu, te miyowu nya kite a rik en okwoŋo baŋ kwariwu. En bino timo man ka ce wun iwinyo wunu kop a Rwot Obaŋawu, imako wunu cikkere ame acikowu kede tin, kun itimo wunu gin aber i nyim Rwot Obaŋawu. “Wun ibedo wunu itino a Rwot Obaŋawu, myero kur iŋoŋolo wunu komwu, kur daŋ ilyel wunu yer me tur nyimwu pi kwero cola a jo oto, Pien wun ibedo wunu jo acil baŋ Rwot Obaŋawu; Rwot otyeko yerowu i akina rok ocele luŋ ame tye i wi podo, me ibed wunu jo mere. “Kur icam wunu ginnoro ame kwer. Leyi ame myero icam wunu ene: dyel, romo, dyaŋ, amor, amyem, emalet, dyel ame bedo i tim, alop, akal, kede rommi ame bedo i wi kidi. Leyi luŋ ame lwet tyengi okaro aryo, kun akina tyengi okaro aryo, dok daŋ omedo nyamo cem a koŋ omwonyo oko i yigi, ame tye i akina leyi, itwero camo wunu. Kadi amannono, i akina leyi ame medo nyamo cem a koŋ omwonyo oko i yigi, onyo ame tyengi okaro aryo, myero kur icam wunu magi: inaga, apwo, anyeri; gin medo nyamo cem a koŋ omwonyo oko i yigi, cite lwet tyengi mom okaro aryo, cik mom oyewu camogi. Puno daŋ kadi bed lwet tyene okaro aryo cite mom medo nyamo cem a koŋ omwonyo; mano daŋ cik mom oyewu camo. Kur icam wunu riŋogi, kur daŋ igud wunu komgi oto. “I kom gin a kwo luŋ ame bedo i pii ibino camo wunu magi: itwero camo wunu gin i pii luŋ ame tye kede icikigir kede pok komgi. Aco en ame mom tye kede icikigir kede pok komgi, mom ibino wunu camo; magi-nono cik mom oyewu camo. “Itwero camo wunu winy luŋ ame cik mom ogeŋo. Cite magi en winy ame mom ibin wunu camo: Cur, acut, ekekom, ekulukulu, ogole kede eponegi; kite agak luŋ kede eponegi; udo, ojoro, jigijigigur, olwit kede eponegi, itukere atino kede etukere adoŋo, okumbere, etolo ewuma kede alwinyalwiny, araptela ogoro kede kite eponegi luŋ, otebakori kede olik. Kudi luŋ ame tye kede bwomgi; gin luŋ obedo gin me kwer baŋwu; mom ibino wunu camo, Ginnoro luŋ a cik mom ogeŋo ame tye kede bwomgi, ibino wunu camo. “Mom ibino wunu camo ginnoro ame oto kene; itwero miyo wunu arokkoro ame bedo i bomawu me en cam; onyo itwero cato wunu baŋ welo moro; pien wun ibedo wunu jo acil baŋ Rwot Obaŋawu. “Kur ited wunu riŋo atin dyel kede cak a tottere. “Ibino miyo wunu acel me apar me gin ocek i pottiwu, ame ya i pottiwu mwaka i mwaka. Dok daŋ ibino wunu camo acel me apar me kalwu kede me koŋo olokwu, kede me moowu kede itino kao a dok kede rommi, i nyim Rwot Obaŋawu kan ame en bino yero me keto iye nyiŋe, me ipwony wunu lworo Rwot Obaŋawu kare luŋ. Ka ce kan ame Rwot Obaŋawu oyero me keto iye nyiŋe bor meicel, ame wot iye tero kare alac, ame mio tero acel me apar kuno tek meicel baŋi, ka ce Rwot onwoŋo omii winyo, cat acel me apar oko me ilok dok cente, ite doŋ mako i ciŋi tero kan ame Rwot Obaŋawu oyero. Limmono, wil kede gin ame yii omito, twon onyo romo onyo koŋo olok onyo kit mattoro akeccere, ginnoro keken ame cunyi okwanyo. Cam gin ame iwilo-nono i nyim Rwot Obaŋani kuno, bed kede lelo, yin karacel kede jo odi, Dok daŋ myero kur iwek jo Levi ame bedo i bomawu luŋ, pien gin mom tye kede dul lobo moro ame gin oleo me bedo meggi karacel kedwu. “Iyi agikki me mwaka adek adek ibino kela wunu acel me apar me gin ocek baŋwu ducu i mwaka-nono, ite kano wunu i dye bomawu, me jo Levi bin cam, pien gin mom tye kede dul lobo moro onyo lobo moro ame gin oleo me bedo meggi karacel kedwu, kede dok arokkoro ame bedo i akinawu, kede itino kic, kede mon a coggi oto, ame gin bedo i bomawu, gin luŋ obin ocam, oyeŋ; me Rwot Obaŋawu miwu gum i kom ticwu luŋ ame itio wunu. “I agikki me mwaka abiro abiro, ibino jalo wunu bannyiwu oko. Kite me jalo bannyi bino bedo kit man: ŋat acel acel ame yam omio banya baŋ awottere ame obedo dano me Icrael, en bino jalo oko luŋ. Mom dok bino medde pido banya i baŋ awottere ame obedo dano me Icrael wadgi, pien Rwot en a doŋ otito pi jalo bannyi-nono oko, Itwero pido banyani baŋ arok, cite banya ame tye baŋ dano me Icrael wadwu, myero ijal oko. Kadi bed amannono, acannono gire mom bino nen i akinawu, pien Rwot bino miyowu winyo i lobo ame Rwot Obaŋawu bino miyowu me bedo megwu, ka ce wun ibino wunu winyo kop a Rwot Obaŋawu kun igwokere wunu atek icobo cik ame an acikowu kede tin-ni, Pien Rwot Obaŋawu bino miyowu winyo kite ame en rik ocikowu kede. Ibino miyo wunu rok apol koporo banya baŋwu, cite wun mom ibino kopporo wunu ginnoro i baŋgi. Wun ibino loyo wunu rok apol, cite gin mom bino loyowu. “Ka ce ominwu moro tye i akinawu ame acan, i boma moro ame tye i lobowu ame Rwot Obaŋawu amiyowu, mom ibino miyo wunu cunywu bedo nwaŋ, onyo kur idwok ciŋi i ŋei i kom ominni ame acannono, ento myero iyare ciŋi imi en kopporo ginnoro keken ame en omito, ame romo cobo mittere. Gwokere ba, me tammoro arac kur bed i cunyi, eka te miyi kobo ni, ‘Mwaka me abiro doŋ ceggi acega, ame en mwaka me jalo bannyi’, eka ite miyo waŋi balle i kom ominni ame acan, mom ite miye ginnoro. En bino kok i komi i nyim Rwot, eka te lunyo doko bal i komi. Gin ame imiyo ominni myero imie i cunyi acil kun daŋ mom dok it ye kede gulloro i cunyi; pien mannono bino miyo Rwot Obaŋawu mii winyo i ticci luŋ kede i ginnoro luŋ ame ciŋi ogudo. Pien jo ame ocan mom bino rwenyo i lobowu. Mannono omio acikowu, ni, ‘Myero iyab wunu ciŋwu alac baŋ omegowu ame tye i lobowu, kede baŋ ocan ame mito ginnoro i baŋwu. “Ka ce ocato baŋi ominni moro ame obedo dano me Eburania onyo aminni moro ame obedo nya jo Eburania wadwu en bino tic baŋi pi mwakki kanyape, eka i mwaka me kany wie aryo mere ite weko wot oko aboŋo culloro, Cite myero kur icwalle i ciŋe nono i kare ame en doŋ aya oko i baŋi. Ibino miyo en woto i jami mogo i kom rommini onyo dyegini, kede i kom jamini ame ikwanyo i dero, kede en ame ikwanyo i bur biyo olok; ibino miye kun ilubo kite ame Rwot omii kede winyo. Myero ipo ni wun daŋ yam koŋ ibedo wunu opii i lobo Miciri, eka Rwot Obaŋawu te lakorowu, mannono en omio an acikowu tin. Aco ka en bino kobo ni, ‘An gira mom abino ya i baŋi’, pien en mari karacel kede jo me odi, pi kite ame ibedo tic kede aber, ibino kwanyo atero ite wot tuco kede yite i doggola en doŋ te bedo opiini nakanaka. Opiini a dako daŋ ibino timo kittono. Ka iweko en owoto aboŋo culloro, mom ibino miyo cunyi bedo nwaŋ, pien obedo tic baŋi pi mwakki abicel kun ticcere kato me apakaca tye aryo twal. Rwot Obaŋawu bino miyi winyo i gin ame itiyo luŋ pi mannono. “Itino kao luŋ ame limmi akwo onywalo, itino twoni onyo itino nyogi rommi kede me a dyegi, ibino kwero wunugi pi Rwot Obaŋawu. Mom ibino miyo twonini me kao tio ticcoro, dok daŋ mom ibino nyaro yer kom nyogi rommini a kao mege. Yin karacel kede jo me odi, ibino camo wunu rinogi i nyim Rwot Obaŋawu mwaka i mwaka, kan ame Rwot bino yero. Ento ka balloro tye i kome, ka oŋwalo onyo waŋe oto, onyo balloro ocele arac tye i kome, mom ibino ŋolo wunu me yalo Rwot Obaŋawu. Ibino camo wunu kodi mannono i bomawu, jo a cik ogeŋo kede jo a cikkoro mom ogeŋo twero camo kite ame ocamo kede riŋo amor onyo riŋo amyem. Cite remo mere myero kur cam, myero ony oko piny calo pii. “Gwok wunu dwe me Abib, dok daŋ ikwer wunu Kato a Rwot Obaŋawu; pien i dwe me Abib Rwot Obaŋawu rik okwanyowu i lobo me Miciri dyewor. Ibino yalo wunu Rwot Obaŋawu i leyiwu ame oŋolo me Kato, ame ikwanyo wunu i akina rommi kede dok, i kabedo kan ame Rwot Obaŋawu bino yero me keto iye nyiŋe. Kur icam wunu kede ogati ame orubo i tobi, ento myero icam wunu kede ogati ame tobi mom iye pi nino abiro, ame en ogati me can ame ineno wunu; pien rik iya wunu i lobo Miciri kun iruye wunu arua. Man bino poyo wiwu i kom nino ame iya wunu kede i Miciri pi kare luŋ me kwowu. Tobi moro myero kur nen baŋwu i lobowu pi nino abiro; akadi riŋo moro ame oŋolo me yalla otyeno me nino me agege, myero daŋ kur wek bed naka tuno odiko. Myero kur iŋol wunu lee me Kato i boma moro ame Rwot Obaŋawu bino miyowu, kono ka i kabedo moro ame Rwot Obaŋawu bino yero me keto nyiŋe iye. Yal wunu Obaŋa i leyiwu ame oŋolo me Kato kunnu, ŋol wunu otyeno ame ceŋ adonyo, ame en kare a rik iya wunu kede i Miciri. Ted wunu ite camo wunu kan ame Rwot Obaŋawu bino yero, eka odiko ite lokere wunu dok wunu i kemawu. Cam wunu ogati a mom orubo i tobi pi nino abicel; eka nino me kany wie aryo ite bedo wunu kede cokere acil i nyim Rwot Obaŋawu; i nino-nono mom ibino gudo wunu ticcoro. “Ibino kwano wunu cabit abiro kun icako kwano wunu i nino ame icako wunu kac iye. Kwer wunu koŋ ecuban me cabit abiro kite ame Rwot Obaŋawu mito kun ikelo wunu motwu me ber a yic a lubere kede kite ame Rwot Obaŋawu omiowu. Yin karacel kede wodi, kede nyari, opiini kede aŋecani kede Alevi moro ame bedo i bomawu, arokkoro ame bedo i akinawu kede atin kic kede dako a cware oto ame bedo i akinawu, ibino lelo wunu i nyim Rwot Obaŋawu i kabedo kan ame Rwot Obaŋawu bino yero me keto iye nyiŋe. Myero ipo wunu ni yam wun daŋ ibedo wunu opii i lobo me Miciri; dok daŋ myero igwokere wunu igwoko icwil magi luŋ. “Ibino kwero wunu ecuban me gonye nino abiro, i kare a doŋ ityeko coko wunu camwu oko i laro me dino kal kede i bur me biyo olok. Yin karacel kede nyari, opiini kede aŋecani, kede Alevi moro, kede arokkoro ame bedo i akinawu, atin kic kede dako a cware oto ame bedo i bomawu moro, ibino kwero wunu ecubannono kede lelo. Kwer wunu ecubannono pi nino abiro kite ame Rwot Obaŋawu mito i kabedo ame Rwot Obaŋawu bino yero. Ibino bedo wunu kede lelo ka Rwot Obaŋawu bino miyowu winyo i kom ticwu luŋ ame itio wunu. “Co luŋ i akinawu bino tuno i nyim Rwot Obaŋawu i kabedo ame en bino yero tyen adek i mwaka acel acel, i kare me ecuban me Ogati a Tobi Mom iye, kede ecuban me Cabit Abiro, kede i kare me ecuban me Gonye. Myero gin kur bin i nyim Rwot ciŋgi nono; ŋat acel acel myero kel mottere ame eromo kela kun lubo kite a Rwot Obaŋawu omie kede winyo. “Ibino keto wunu oŋolkop kede odoŋe a loo lwak i boma ducu ame Rwot Obaŋawu amiyowu, kun ilubo wunu itekerewu. Gin bino ŋolli jo kop kakare. Myero kur ibal wunu pido, kur daŋ ileŋere wunu i pido, kur daŋ igam wunu limmoro me wil, pien lim me wil wumo waŋ jo a ryek, dok daŋ balo pido a jo a kitegi atira. Tam pi ŋolo kop atira keken, me ibed kwo, igam lobo ame Rwot Obaŋawu omiowu me bedo megwu. “Mom ibino pito wunu yattoro me bed Acera i ŋet keno lam a Rwot Obaŋawu, ame ibino wunu camo. Kur daŋ icib wunu gweŋŋoro ocuŋ atira me awora ame Rwot Obaŋawu dag. “Kur iyal wunu Rwot Obaŋawu kede twon, romo onyo dyelloro ame kit roccoro keken tye i kome, pien mannono obedo gin me kwer baŋ Rwot Obaŋawu. “Ka ce ibino nwoŋo wunu dano moro i akinawu, ame tye i boma moro ame Rwot Obaŋawu omiowu, ico onyo dako, ame timo ginnoro arac i nyim Rwot Obaŋawu, ame turo kede cikere a Rwot, eka te wot tic baŋ obaŋe mogo ocele kun worogi, onyo woro ceŋ, onyo dwe, onyo ginnoro keken i kom lwak mony apipim ame tye i polo, ame atyeko geŋo kede gin ame aciko, ka ce iwinyo wunu kop man, myero ipeny wunu koppere kun iyenyo wunu tere aber meicel. Ka ce iniaŋ wunu, dok daŋ imoko wunu ni timmoro me kwer otimere ateni iyi Icrael, kel wunu lonnono onyo dano-nono ame otimo gin araccono i dog cel me boma, ite neko wunu lonnono onyo dako-nono oko kun inanapo wunu kede gweŋe. Obino neko dano-nono pi kop ocaden aryo onyo adek, cite mom obino neko ŋattoro pi kop a caden acel. Ciŋ ocaden en ame bino geyo tuno i kome ka doŋ aneke, eka icennere ciŋ jo ocele te doŋ onyere i kome. Myero iwe wunu bal man i akinawu kittono. “Ka ce i bomawu moro pido moro obino i nyimwu ame tek, ibino wunu tero pido-nono i kabedo ame Rwot Obaŋawu bino yero; pido acalo me poko kit nek apapat onyo kit pido mogo ocele onyo me kit lweny apapat. Ibino wot wunu baŋ olamdog ame gin obedo jo Levi, kede baŋ aŋolkop ame onwoŋo tye i tic i kare-nono, ite wot penyo wunugi. Gin bino tittiwu kite ame oŋolo kede, eka ite daŋ timo wunu kite ame gin otitiwu kede i kabedo-naca, kan ame Rwot Obaŋawu bino yero. Myero igwokere wunu me cobo wunu kite ame gin okobbiwu kede; kite ame gin opwonyowu kede, kede kite ame gin oŋolo kede, wun myero itim wunu kittono; myero kur dok igak wunu oko i kom gin ame gin oŋolo, kur igak wunu tuŋ cem onyo tuŋ cam. Lon ame apala, ame okwero winyo kop alamdog ame onwoŋo tye ka tiyo tic a Rwot Obaŋawu, onyo me aŋolkop, dano-nono myero nek oko. Myero iwe wunu bal man i kom jo Icrael kittono. Jo luŋ bino winyo te bedo kede lworo, mom dok ote medde bedo opala. “Ka doŋ ituno wunu i lobo ame Rwot Obaŋawu amiyowu, ame ibino wunu gamo me bedo megwu, ite bedo wunu iye, eka ite kobo wunu ni, ‘Oket wunu abaka me loyowa, kite ame rok ocele luŋ ame omannowa tye ka timo kede’; itwero keto wunu abaka me loyowu, cite myero iket wunu ŋat ame Rwot Obaŋawu en oyero. Ŋat ame iketo wunu-nono myero bed dano me Icrael; myero kur iket wunu arokkoro me loyowu, ame mom obedo dano me Icrael. En dano-nono myero kur dok med wel aguragura mere dok apipim, dok daŋ myero kur dok dwok jo Icrael i Miciri kun tye kede cuny me medo wel aguragura mere. Rwot dokokobbiwu oko ni mom dok ibino wunu dok cen kuno. Myero kur daŋ dur mon apol apola, naka mio bino balo tammere; myero daŋ kur dok obed twon alonyo i ryal kede jabu. “I kare ame en doŋ obedo i wi kom me loccere, en myero co cik man i bukkoro pire, kun okwanyo koppere i buk ame olamdog ame gin jo Levi en agwoko. Buk cikkono bino bedo baŋe, en bino kwano pi kare me kwo mere luŋ, me en pwony lworo Rwot Obaŋa mere, i mako koppere ame tye i cik man, kede icwil magi, kun daŋ ketogi i tic, me en kur yiye me bedo twon lomoro a tye malo meicel i wi omego mere, eka te gak weko cik oko, te gak i ciŋe tuŋ cem onyo tuŋ cam; me en perakino i loccere iyi Icrael, en karacel kede itino mere. “Olamdog ame gin obedo jo Levi, ame gin jo me atekere a Levi luŋ, gin mom bino bedo kede dulloro onyo lobo moro ame obedo megi karacel i jo Icrael; gin bino camo mot ame owaŋo i mac baŋ Rwot, kede ginnoro luŋ ame myero mi baŋe. Gin mom bino bedo kede lobo moro ame obedo megi i akina omegogi, Rwot en ame obedo gin ame gin onwoŋo me bedo megi, kite a en ocikogi kede. Man en ame bino bedo iner olamdog ame gin onwoŋo i baŋ lwak i baŋ jo ame mio motgi me yalo Obaŋa, kadi bed omio twon onyo romo; gin bino miyo baŋ olamdog bade, kede leme ryoryo, kede amonten luŋ. Kal kede koŋo olok kede moogi me wi mwaka kede yer romogi ame ogeo mworo, ibino miyo wunu baŋ olamdog. Pien Rwot Obaŋawu otyeko yerogi i akina itekere me Icrael, me wek gin karacel kede ikwaegi obedo jo ame tio i nyim Rwot atwal. “Doŋ ka ce dano moro me Levi oya i bomawu moro ame tye iyi Icrael luŋ, kan ame onwoŋo en bedo iye, en twero bino kan ame Rwot bino yero, ka ce cunye mito. Ook en daŋ twero tic i nyim Rwot Obaŋa mere bala omego mere ame obedo jo Levi ame tio i nyim Rwot kuno. Iner ame gin bino camo, bino bedo a rom i meggi, medo i kom gin ame en onwoŋo i kom jami a kwaro mere ame en ocato. “Ka doŋ ituno wunu i lobo ame Rwot Obaŋawu amiyowu, myero kur ipwony wunu lubo kite timmogo me kwer ame orok a tye kuno timo. Ŋattoro i akinawu myero kur waŋ wode onyo nyare acalo mot me yalo Obaŋa, ŋattoro kur daŋ dok ajoka ame tyeto tyet kede ajaa, onyo ŋat ame ŋio yi dyel, onyo atim timmogo me jojok, onyo akor tipo, onyo alam amuk, onyo emuru, onyo ajok onyo ayeny tipo. Pien ŋat ame timo kodi timmono, dano-nono Rwot bino kwero oko. Pi timo kodi tim me kwerrono, omio Rwot Obaŋawu tye aryemo rok ocele oko i nyimwu, Rwot Obaŋawu mito ni ibed wunu aboŋo balloro i nyime. Pien rok ame iceggi wunu gamo lobogi me bedo megwu, gin keto cunygi i kop a jo atyeto kede ajaa kede kite ajoka ocele mege, ento wun Rwot Obaŋawu mom mito ni itim wunu kodi timmono. “Rwot Obaŋawu bino miyowu adwarpinnyoro ame bino ya i akina omegowu, ame cal keda; myero iwinye wunu. Man en bino timo me cobo kwacwu a rik ikwao wunu kede Rwot Obaŋawu i kare ame icokere wunu i Koreb. I kare-naca rik ikobo wunu ni, ‘Kur dok imedde miya winyo dwon Rwot Obaŋana, akadi neno twon maccere adwoŋ wok ca, naka mio ato oko.’ Rwot rik te kobba ni, ‘Kop luŋ ame gin okobo, okobo kakare. Abino miyogi adwarpinnyoro acal kedi, ame bino ya i akina omegogi; an abino keto koppa i doge, en bino kobbigi kop luŋ ame an acike iye. Doŋ ŋat ame mom bino winyo koppa ame en bino kobo i nyina, an ikoma en ame abino penye pire. Cite adwarpiny ame bino poro doga nono kun nwoŋo an mom acike onyo ame kobo koppere i nyiŋ obaŋe mogo ocele, adwarpinnyoro bino to oko.’ Gwok onyo ibino kobo i cunyi ni, ‘Kara obino ŋeyo kop a Rwot mom okobo ni’, ka ce adwarpiny okobo kopporo i nyiŋ Rwot, eka kop ame en okobo-nono mom te timere, onyo mom te cobere, mannono nwoŋo kop ame Rwot mom okobo. Adwarpinnyono nwoŋo obedo kobo kop ame en oporo apora kede wie kene, myero kur ilwore wunu. “Ka Rwot Obaŋawu doŋ otyeko rok ame lobogi Rwot Obaŋawu awot miyowu, me bedo megwu, ite bedo wunu i bomagi kede i udigi, ibino poko wunu boma adek pat pirwu i lobo ame Rwot Obaŋawu amiyowu-nono. Ibino pupuro wunu yo iye, eka ite poko wunu yie adek, en loba ame Rwot Obaŋawu amiyowunono, me wek ŋat oneko nek riŋ lar kuno. “Man en kop a mako ŋat oneko nek, ame ka ce oriŋo olaro kuno, twero laro kwo mere: ka ce ŋattoro oneko awottere kun mom oneko me akaka, dok amone moro onwoŋo daŋ mom i akinagi i kare okato, me anennere, ka ce ŋattoro onwoŋo owoto toŋo yen gin kede awottere iyi buŋ, eka lee ame onwoŋo etono kede yen te wotte oko i purrere, te wot goyo awottere neko oko; dano-nono twero riŋo i boma moro i akina magi, te laro kwo mere. Ka ce mom itimo wunu amannono, bino miyo aculculo kwor i twon akemo mere ame nwoŋo en tye kede, twero ryemo anek, te mako neko oko, pien yo nwoŋo bor, aco kun nwoŋo bal a dano-nono mom romme to, pien amone moro onwoŋo mom i akinagi i kare okato. Pi mannono, omio acikowu ni, Myero ipok wunu boma adek pat. Dok ka ce Rwot Obaŋawu bino nyayo waŋ lobowu kite a rik okwoŋo kede baŋ kwariwu, eka te miyowu lobo luŋ ame rik en ociko baŋ kwariwu ni ebino miyowu. Myero imed wunu boma adek ocele i kom magi adek-ki. En bino miyowu ka ce wun igwokere wunu, imako wunu gin a en ociko luŋ, ame acikowu kede aman-ni, imaro wunu Rwot Obaŋawu, dok daŋ ilubo wunu yo mere kare ducu, me remo a mom i bal kur cwer i lobo ame Rwot Obaŋawu amiyowu me bedo megwu, wek bal me remo ame oony kur bed i wiwu. “Ento ka ce dano moro onwoŋo dago awottere, eka te bedo kiye, te ero lweny i kome, ame te cobo neko oko, eka dano-nono te riŋo laro boma acel i akina magi. Odoŋe me boma mere bino cwayo kop, ote ome oko i kuno, ote miye i ciŋ acul kwor me remo, me en daŋ neke oko. Kica myero kur makwu i kome, cite myero ilwok wunu bal me remo a mom i bal oko iyi Icrael, me nyimwu bed aber. “Ilobowu ame ibino leyo wunu, ame Rwot Obaŋawu amiyowu me bedo megwu, mom ibino wunu kobo waŋ kiŋa ame opoko lobo awotti, ame yam odoŋe otyeko poko oko. “Kop mom bino loyo dano moro pi kop acaden acel, pi kit timmoro arac onyo balloro arac ame en obalo. Myero ŋol kop pi kop ocaden aryo onyo adek. Ka ce acadennoro ame cunye rac opido ni ŋattoro ni otimo bal, jo aryo-nono luŋ ame tye i pyem i akinagi, gin luŋ bino cuŋ i nyim Rwot kede i nyim olamdog kede oŋolkop ame onwoŋo tye i tic i kare-nono, oŋolkop te yenyo te koppere aber meicel, ka ce gin onwoŋo ni acaden obedo ŋat ame agoba, dok daŋ okelo pido me goba i kom ominnere, ibino keto wunu can i kome, can ame rom i can ame en onwoŋo mito timo i kom ominnere. Myero iwe wunu bal man i akinawu kittono. Jo ocele bino winyo pire ote bedo i lworo, mom dok te medde timo balloro i akinawu. Kica myero kur makwu; kwo myero cul i kwo, waŋ kede waŋ, lak kede lak, ciŋ kede ciŋ, tyen kede tyen. “Ka ce iwoto wunu me wot lweny i kom okworwu, eka ite neno wunu aguragura kede gadigadi me lweny apipim karacel kede mony adwoŋ akato megwu oko, kur ibed wunu i lworo moro i komgi, pien Rwot Obaŋawu tye kedwu, Obaŋa ame rik okwanyowu i lobo me Miciri. Kare a doŋ ituno wunu ceggi i ka lweny, alamdog bino kato anyim, eka te kop i lwak. En bino kobbi lwak ni, ‘Winy wunu ba, wun jo Icrael; nen tin doŋ iceggi lweny wunu i kom okworwu, myero kur tipo komwu riŋ oko; kur daŋ ibed wunu kede lworo; komwu daŋ kur gire myel, dok kur daŋ inyobere wunu oko pirgi; pien Rwot Obaŋawu en ame tye awot kedwu, me wot lweny pirwu i kom okworwu, me miyowu loyogi oko.’ Eka odoŋe a loo lwak te kobbi lwak ni, ‘Tye ŋattoro ame ogero ode pwod nyen ento mom ru oyabo me donyo i yie? Myero en dok i ode, naka ŋit mio en woto to oko i lweny, eka ŋat ocele en ate lunyo yabo ode. Tye ŋattoro ame opito olokkere ame mom ru ogeo camo nyige? Myero en daŋ dok tuŋe, naka ŋit en to oko i lweny eka ŋat ocele en ate lunyo camo nyig olokkere. Tye ŋatoro ame ocikere me nyomere i nyannoro ento mom ru oŋeye kede? Myero en dok paco, naka ŋit en woto to oko i lweny, eka ŋat ocele en ate lunyo nyomo nyannono.’ Odoŋe a loo lwak dok te bino medo kobbi lwak ni, ‘Tye ŋattoro ame alworo, ame koyo doŋ oonyere oko i kome? Myero en dok paco pien bino miyo koyo daŋ oonyere i kom owote mere bala mege.’ Kare ame odoŋe a loo lwak doŋ otyeko kop baŋ lwak, obino keto otel wi mony i ticgi me telo mony. “Kare a doŋ ituno wunu ceggi iboma ame iwot cobo wunu mony i kome koŋ icak cwayo wunu dwon me mito kuc iye. Ka ce gin oye pi kac, eka daŋ ote yabbiwu dogcel, jo luŋ ame inwoŋo wunu i boma-nono bino bedo opiiwu kun otio tic atek. Ka ce gin mom oye bedo kedwu i kuc, ento gin ocako lweny i komwu, monywu bino guro bomanono oko, Ka Rwot Obaŋawu omio boma-nono i ciŋwu, myero inek wunu co luŋ iye i pala lweny. Ento mon kede itino, dok kede jami ocele luŋ ame tye i bomanono, jami ayaka iye luŋ, myero iyak wunu, iter wunu me bedo megwu; yomoro wunu cunywu i jami okworwu ame Rwot Obaŋawu omiowu. Man en gin ame ibino timo wunu i kom boma luŋ ame tye kannabor kedwu, ame mom obedo boma a rokkoro ame tye ceggi kedwu kan. Ento boma a jo man ame Rwot Obaŋa amiyowu me bedo megwu, mom ibino weko wunu ginnoro iye ame we doŋ akwo. Ento myero ijwer wunu ducu acalo gin me kwer, jo Kitti, jo Amor, jo Kanaan, jo Periji, jo Kivi, kede jo Jebuc, kite ame Rwot Obaŋawu ociko kede. Tim wunu man me gin kur pwonywu tiyo timgi me kwer ame nwoŋo gin otimo i woro obaŋegi; eka te miyowu balo i nyim Rwot Obaŋawu. “Ka ce iguro wunu boma moro kare alac, kun ilwenyo wunu pi mito ni myero ima wunu, myero kur ibabalo wunu yen i ŋete kun itoŋo wunu kede lee. Itwero camo wunu nyig yen i ŋete, ento myero kur iret wunu tyene piny. Yen daŋ odoko dano bo, ame mio wun dok imedo wunu i kom gin iguro wunu? Kono ka yen ame iŋeo wunu ni mom ocamo nyiggi, en ame itwero balo wunu, itwero toŋo wunu me celoboma ame ilweny wunu i kome, tuno waŋ ame imako wunu boma-nono. “I lobo ame Rwot Obaŋawu amiyowu me bedo megwu, ka ce obino nwoŋo kom ŋattoro ame oneko iye, kun tye obuto piny kan a ŋattoro mom iye, kun mom oŋeo ŋat oneko, odoŋe kede oŋolkop bino wot kuno, te pimo bor a piny, ya i kom dano ame oneko-nono tuno i boma acel acel ame omano ŋet ato. Odoŋe ame bomagi ceggi kede ato bino kela roa ame mom ru otio ticcoro, dok daŋ mom ru oowao kweri dyaŋ. Gin bino kelo roa-nono i luŋŋoro ame pii mere mol, ame mom ru opuro, akadi coyo koti moro iye. Gin bino mojoro ŋut roa-nono oko i luŋŋono. Olamdog ame obedo ikwae a jo Levi myero daŋ bed tye, pien Rwot Obaŋawu otyeko yerogi me tiyo tic baŋe kede lamo winyo kun otio i nyiŋ Rwot; pyemmoro luŋ myero ŋol kun olubo kopgi. Odoŋe luŋ ame bomagi ceggi i kom ato bino lwoko ciŋgi i kom roa ame omojoro ŋute i luŋ; kun okobo ni, ‘Ciŋwa gire mom en oonyo remo man, waŋwa daŋ mom gire oneno ka oonyo remo man. Ama Rwot, tim jo Icrael kica, ame gin obedo joni a yam ilakoro, kur imi bal me remo a mom i bal bed i akina joni Icrael; cite myero tim kica i kom bal me remo man.’ Mannono bino miyo iweo wunu bal me remo a mom i bal i akinawu, ka ce itimo wunu man kakare kite ame Rwot mito. “Ka iwoto wunu lweny i kom okworwu, Rwot Obaŋawu te miyogi i ciŋwu, ite terogi wunu me bedo opiiwu, ka ce ineno dako moro aber i akina opii, eka cunyi te teri i kome, kun imito iter obed dakoni, itwero tero dako-nono tuŋi. Ka en doŋ olyelo wie oko, okepo daŋ lwete oko, dok daŋ ogonyo boŋo mere me opii oko, en bino bedo i paco ni kun koko pappere kede tottere pi kare me dwe acel luŋ. I ŋe ennono, yin doŋ itwero wot bedo kede, ite doŋ bedo cware kun en bedo dak oni. Ka ce en mom oyomoro cunyi, ibino wek o en woto gire kan ame cunye mito. Yin mom dok ibino ca te onyo tic kede acalo opii pien yin doŋ ilane oko. “Ka ce lomoro tye i mon aryo, ame gin luŋ onywalle itino awobe, kun dako acel omaro, acel mom omaro, cite wode me kao obedo me a dako a mom omaro; i kare ame en bino poko iye limmere baŋ awobe mere acalo gin a myero gin ole, en myero kur ter wot a dako ame emaro acalo wode me kao akaka wot a dako a mom omaro, ame obedo wode me kao ikokome. Ento myero nyut ni wode me kao kun dodo gin ame apokke iryo i kom jami luŋ a en tye kede, kadi bed totteere mom omaro, pien en obedo wode ame teko mere me agege ogeo miyo poto, twer me bedo atin kao nwoŋo gire mege. “Ka ce lomoro tye kede wode ame apala, ame maro jem, a mom winyo kop a pappere onyo kop a tottere, akadi gin goe, en gire mom winyogi, pappere kede tottere myero make te kele i dogcel me boma baŋ odoŋe me boma a en bedo iye. Gin bino kobo baŋ odoŋe ni, ‘Atinwa-ni obedo awobi ame apala, ame maro jem, kun kare luŋ en mom winyowa, owor meicel dok daŋ amero.’ Jo luŋ me boma-nono bino neke oko kun onanapo en kede gweŋe. Mannono bino miyo iweo wunu bal i akinawu. Jo Icrael luŋ bino winyo pire, te bedo kede lworo. “Ka ce dano moro otimo balloro ame cannere romo to, eka daŋ ote neke, ote ŋabo kome i kom yat, mom obino weko kome bedo i kom yat i dyewor luŋ. Myero yik kome oko i nino-nono; pien ŋat ame oŋabo kome i kom yat nwoŋo obedo dano ame Obaŋa oceno. Myero kur ibal lobowu ame Obaŋa amiyowu me bedo megwu. “Ka ce ineno twon ominni onyo romo mere ame orwenyo, myero kur ikwer miyo kony i komgi. Dwokgi cen baŋ ominni. Ka wonnere mom bedo kan aceggi kedi onyo mom iŋec, myero iter lee mere-nono i paconi me koŋ bed baŋi, tuno waŋ ame wonnere oyenyo; eka ite dwoko baŋe. Ibino daŋ timo kittono ka ce inwoŋo kana mere, boŋo mere, onyo kit ginnoro keken ame orwenyo i baŋ ominni, yin ite nwoŋo; myero kur ikwer miyo iye kony. Ka ce ineno kana a ŋattoro onyo twonnere orette oko piny i ŋet yo, myero kur ikwer miyo kony i komgi. Konye tiŋo ya malo. “Dako myero kur rukere bala ico, akadi ico daŋ myero kur ruk boŋŋi a mon; pien ŋat ame timo kodi ginnono, doko gin me kwer baŋ Rwot Obaŋawu. “Ka ce icop i ot winyo moro ame tye i yat onyo i lobo piny, ame tye iye itino onyo toŋe kun totogi daŋ tye obuto iye, mom ibino mako itero karacel kede itino mere. Myero iwek totogi woti, ento itino itwero tero; me nyimi bed acil, dok daŋ iperakino. “Ka igero ot anyen, myero imi apama i wi ot kat malo, pien ka mom itimo kittono, ka ŋattoro orette iye, bino miyo bal me remo bedo i odi. “Mom ibino coyo kit koti aryo apapat i poto olokki. Ka ce itimo, ibino miyo gin ame ocek iye luŋ otero oko i kabedo acil, me koti icoo kede nyig olok daŋ, Kur itwe twon karacel kede kana i kweri dyan. Mom ibino ruko boŋo moro ame orubere aruba, yer romo kede camanini. Ibino kwoyo awula aŋwen i lak boŋo ame iwumere kede. “Ka ce lo moro onyomo cege, eka te cako ribere kede, icennere dok te kwerre oko, kun pide pido me lewic dok daŋ balo nyiŋe kun kobo ni, ‘An anyomo dako man, cite i kare ame acako ribere kede, mom anwoŋo ginnoro ame cimo ni en mom ru oŋeye kede ŋattoro.’ Papa a nyako-nono kede tottere bino kwanyo ginnoro a nyuto ni en gire mom ru oŋeye kede lo moro, gin te kelo baŋ odoŋe me boma i ka ŋolo kop. Papa a nyako te kobo ni, ‘An onwoŋo amio nyara baŋ lo-ni me bedo dako mere, cite en gire dokokwero oko. Koŋ inen wunu, en dokopide pido me lewic, kun kobo ni, “An mom anwoŋo ginnoro ame cimo ni nyari mom ru oŋeye kede ico.” Aco kono ka bedo amannono, gin ame cimo ni nyara mom ru oŋeye kede ico ene’. Gin bino yaro boŋo-nono i nyim odoŋe me boma-nono. Odoŋe me boma-nono bino tero lonnono ote wot pwode. Ote daŋ taŋe, miye culo cekel me ryal mia acel, eka ote miyo baŋ papa a nyannono, pien obalo nyiŋ nyaka a jo Icrael. Nyannono bino bedo cege atwal kun mom dok eryemo. Ento ka ce obedo kop ateni, kun mom tye ginnoro ame cimo ni nyannono mom ru oŋeye kede lo moro, obino tero nyannono i dog ot a pappere, jo me boma-nono te neko oko kun onanapo kede gweŋe, pien otimo gin a mom myero iyi Icrael pi cako cot kun pwod onwoŋo tye i ot a pappere. Myero iwe wunu bal i akinawu kittono. “Ka ce onwoŋo lo moro tye abuto i dako a ŋat ocele, gin aryo luŋ obino nekogi oko; lon ame obuto i dako karacel kede en dako. Myero iwe wunu bal i akina jo Icrael kittono. “Ka ce nyannoro a mom ŋeo ico, ame ocako nyomere oko gin ico ocele, ka ŋattoro orwatte kede i boma te mako buto kede, gin aryo luŋ obino kelogi i dogcel me boma ote nekogi oko kun onanapogi kede gweŋe. Nyako obino neko pien en mom okuko duro kun en rik onwoŋo tye i dye boma; ico obino neko pien omako dako awottere tetek. Myero iwe wunu bal i akinawu kittono. “Ento ka ce ŋattoro orwatte kede nyannoro i dye tim ata, nyako a mom ru oŋeye kede lo moro, ame onwoŋo doŋ ocako nyomere oko kede lo moro, ka ce lonnono omako te buta kede, obino neko ka ico keken. Ento nyako mom obino timo ginnoro i kome, pien mom tye balloro ame nyako otimo ame romme to. Bal man rom aroma kede me a ŋat ame olwenyo awottere te neko oko; pien lo-ni orwatte kede nyako i dye tim ata akadi nyako ame onwoŋo ocako nyomere oko-ni kuk duro, lon ame twero lare onwoŋo mom tye. “Ka ce lo moro orwatte kede nyannoro a mom ru oŋeye kede ico, a mom ru daŋ ocako nyomo, eka en te mako buto kede, ote daŋ nwoŋogi, lon ame obuto kede-nono bino miyo baŋ papa a nyako cekel me ryal pyerabic. Nyannono doŋ bino bedo dako mere atwal kun mom ryemo, pien omake tetek. “Lo moro mom bino nyomo ci-pappere; akadi buto i ci-pappere, pappere gire en ame buto kede. “Ŋat ame odino mane oko onyo lon ame oŋolo keme me co oko mom bino donyo i cokere a Rwot. “Atinnoro ame onywalo i nyom ame cik ogeŋo mom bino donyo icokere a Rwot, akadi naka iyi ikwae a tye i lwagi me apar, moro iye mom bino donyo i cokere a Rwot. “Jo Amon kede jo Moab mom bino donyo i cokere a Rwot; akadi moro i akina ikwaegi, tuno naka i lwagi ikwaegi me apar, mom bino donyo kadi acel i cokere a Rwot, pien gin rik mom ojolowu i yo i kwon kede i pii, i kare ame ibino wunu i Miciri, dok daŋ rik obino opaŋo Balaam wot a Beor me Petor i Mecopotamia, me bino cenowu. Cite Rwot Obaŋawu rik mom owinyo Balaam, ento Rwot Obaŋawu rik te lunyo loko ceŋ doko gum pirwu, pein Rwot Obaŋawu onwoŋo marowu. Kur itim wunu ginnoro i kare luŋ me kwowu, ame twero miyogi obedo i kuc onyo obedo aber. “Ento kur ikwer wunu dano moro me Edom, pien en obedo ominwu; kur daŋ ikwer wunu dano moro me Miciri, pien rik ibedo wunu i lobogi, Ikwaegi ame onywalo baŋgi, ame obedo lwagi me adekkere twero donyo i cokere a Rwot. “Ka iwoto wunu lweny i kom okworwu, kun ibedo wunu i gony, myero igwokere wunu atek i kom gin arac ducu. “Ka ce dano moro i akinawu odoko ŋat a cik ogeŋo pi ginnoro ame onwoŋo otimere baŋe dyewor, en myero ya oko i gony, kur daŋ dok dwog i gony. Cite i kare a doŋ piny oyuto, en bino lwoko kome kede pii, me wek i kare ame cen doŋ opoto oko, en te dwogo i gony. “Ibino yiko wunu kakannoro oko i ŋe gony me konyere. I kare ame iwoto konyere, kuny bur i lut me kunyo bur ame nwoŋo tye i ciŋi karacel i jami lweny meri, ite lokere wumo coronni oko. Pien Rwot Obaŋawu bedo wiwira i gonywu, me larowu kede miyo okworwu i ciŋwu. Pi mannono myero gonywu bed acil, me en kur dok nen ginnoro me lewic, ame te miyo en wekowu oko. “Ka opii moro olwi oko te riŋo laro baŋi, myero kur idwok baŋ wonnere. Ento myero bed i lobowu i boma moro ame en oyero. Yin kur dokidiye i yo moro. “Anyira a jo Icrael mom bino bedo alaya pi woro cal jogi akadi awobe a jo Icrael myero daŋ kur tim timmoro me alaya pi woro cal jogi. Lim ame onwoŋo pi tim me alaya onyo timmoro me carocaro acalo gwok, myero kur kel i ot a Rwot Obaŋawu, me amia me cobo kwoŋ. Pien kodi timmono, gin aryo luŋ obedo me kwer baŋ Rwot obaŋawu. “Mom ibino miyo ominni moro kopporo ginnoro i baŋi pi mito agoba, mom ibino mito agoba i kom lim, i kom cam, onyo i kom ginnoro ocele ame oculo iye agoba. Itwero miyo arok kopporo banya baŋi pi mito agoba, ento ominni mom ibino miyo kopporo baŋ ya pi mito agoba; wek Rwot Obaŋani omi gum i kom ticcoro ducu ame ciŋi ogudo i lobo ame iwot donyo iye me bedo megwu. “Ka ce ikwoŋo kwoŋŋoro baŋ Rwot Obaŋani, myero iru cobo; pien Rwot Obaŋani bino penyi pire, eka te doko bal baŋi. Ento ka ibedo aboŋo kwoŋo kwoŋŋoro, bal mom bino bedo i komi. Myero igwokere meicel icobo gin ame oya i dogi, pien yin giri ikwoŋo piri keni baŋ Rwot Obaŋani, i gin ame iciko giri i dogi. “Ka ce iwoto i poto olok awotti, itwero camo giri nyige abup acalo itwero, ento myero kur icok mogo i ony i ditani. Dok daŋ ka iwoto i poto kal awotti ame ocek kun mom ru akao, itwero jako wite moro kede ciŋi, cite myero kur imi alwete gud ŋut kal awotti ame ocek, ocuŋ i dye poto. “Ka ce lo moro otero dako, eka te nyomo bedo cege; ka ce icennere en te nwoŋo ni mom oyomoro cunye pien ginnoro me lewic tye i kome, en myero coye waraga me keto nyom, te miyo i ciŋe eka te ryeme kede oko i tuŋe, dako-nono doŋ te ya oko i paco mere. Ka ce en owoto te doko wot nwoŋo cware ocele, ka ce cware-naca te ryeme oko i tuŋe, onyo ka cware ame dok onyome-naca oto oko, cware ame rik ogeo nyome myero dok kur bed kede acalo cege, pien en doŋ oballe oko. Kodi timmono obedo gin me lewic i nyim Rwot, dok myero kur dok ikel bal i lobo ame Rwot Obaŋani amiyowu me bedo megwu. “Ka ce lo moro pwod onyomere nyen, en myero kur wot i lweny dok daŋ myero kur mie ticcoro; en myero bed paco tuŋe mwaka acel, ocob mittere gin kede dako mere ame enyomo. “Ŋattoro myero kur jeŋ kidi rego onyo anya kidi, pien mannono rom ame ojeŋo kwo a dano. “Ka ce onwoŋo dano moro tye amako ominnere ame obedo dano me Icrael me acata acalo opii, kun tere acalo opii onyo doŋ ocato oko akwonono myero nek oko. Mannono bino miyo iweo wunu bal i akinawu. “Gwokere atek i kom two dobo; myero igwokere wunu atek kun itio wunu ginnoro ducu kite ame olamdog ame gin jo Levi otittiwu. Kite ame an acikowu kede, en ame wun daŋ ibino gwokere wunu iye atek me cobo. Koŋ ipoyo wunu i kom gin ame Rwot Obaŋawu otimo i kom Miriam iyo, i kare ame iya wunu i Miciri. “Ka ce imio awotti moro okoporo banya baŋi, mom ibino wot donyo i ode omo gin ame en ojeŋo baŋi. Yin myero iwot icuŋ i oko, eka ŋat ame yin imio okoporo banya-nono en ame te kelo gin ejeŋo baŋi. Dok ka ce dano-nono acan, gin ame en ojeŋo myero kur but baŋi. Ka ceŋ doŋ ceggi poto oko, myero kur idwok gin ame en ojeŋo oko baŋe me en but iye, eka te lammi winyo. Ka ce itimo kittono, Rwot Obaŋani bino neni acalo dano a kite atira. “Kur ibur apakaca ame acan, ame mito akonya, kadi bed en obedo ominni moro me Icrael onyo arokkoro ame bedo i boma moro ame tye i lobowu. Myero imie ocara mere me nino acel acel me en cam oko kun ceŋ mom ru opoto, pien en acan, mannono nwoŋo obedo gin ame en ageno; naka mio en kok i komi i nyim Rwot, eka te doko bal baŋi. “Mom obino neko apap pi bal itino, dok daŋ mom obino neko itino pi bal apap; obino neko ŋat acel acel pi ballere kene. “Mom ibino balo pido arokkoro onyo atin kiccoro; dok daŋ myero kur ikwany boŋo a dako moro a cware oto acalo gin ame ojeŋo baŋi. Ento myero ipo ni wun daŋ yam koŋ ibedo wunu opii i lobo Miciri, eka Rwot Obaŋawu te lakorowu i kuno; mannono en omio aciko ni myero itim wunu man. “I kare me kayo kac i potoni, ka ce wii owil arita moro i poto, myero kur dok iwot iom; mannono doŋ bino bedo me arokkoro ame bedo i akinawu, onyo me atin kic, kede me a dako a cware oto; mannono bino miyo Rwot Obaŋa mio winyo i kom ticcoro luŋ ame ciŋi ogudo. Ka doŋ ityeko pwono nyig jeitunini oko, myero kur dok imed yenyo en obwottege; mannono doŋ bino bedo me arok ame bedo i akinawu me atin kic kede me a dako a cware oto. Ka doŋ ityeko coko nyig olokki oko, myero kur dok imed depo en obwottege; mannono doŋ bino bedo me a rok, me atin kic kede me a dako a cware oto. Myero ipo ni wun daŋ yam koŋ ibedo wunu opii i lobo me Miciri; mannono en omio aciko ni myero itim wunu man. “Ka ce jo moro onwoŋo tye kede pyem i akinagi, eka gin te wot kede i nyim aŋolkop, aŋolkop te poko kingi, kun tuco ŋat ame balloro mom i kome, eka te ŋolo kop loyo ŋat a bal tye i kome. Ka ce aŋolkop mito ni pwod ŋat ame oroco-nono, en bino miyo dano-nono buto piny i nyime, ote pwode i wel lut ame oŋolo, ame romo ballere. Myero pwode kede lut a mom kato pyeraŋwen; naka mio ka obedo pwode atek ateka ame okato wel lut man oko, mio dok lano ominwu alana i nyimwu. “Kur itwe dog twon ka adino kal. “Ka ce i kom omego ame bedo karacel, ŋat acel i akinagi te to oko kun mom oweko wode moro, dako ato mom bino nyomere i lo moro ocele ame obedo welo, a mom obedo dano me doggolagi; omina cware en ame bino donyo baŋe, te lake bedo cege, eka te cobo tic me bedo cware akaka ominnere. Wode ame ebino geyo nywalo, obino cako nyiŋe i nyiŋ ato, me nyiŋe kur rweny oko iyi Icrael. Ka ce omin ato mom mito lako ci-ominnere, dako bino wot i dogcel me boma baŋ odoŋe, te wot kobo ni, ‘Amuna mom gire tye atimo ginnoro me miyo nyiŋ ominnere bedo tye iyi Icrael; en okwero cobo tic a yam ominnere cobo i koma acalo cwara.’ Odoŋe me bomagi-nono bino cwane baŋgi, te kop kede. Ka ce en omedde kwero gire kun kobo ni ‘An gira mom aye lako dako-nono’, ciominnere-nono bino wot baŋe i nyim odoŋe, te wot woto amuk i tyene tuŋ cel oko, te ŋulo daŋ lao i waŋe; eka dako te kobo ni, ‘Lon ame okwero miyo ot ominnere cuŋ obino timo kittono.’ Nyiŋ ode iyi Icrael obino lwoŋo ni, ‘Ot a lon ame owoto amuk i tyene tuŋ cel oko-ni.’ “Ka ce jo mogo onwoŋo tye aromo, eka dako a ŋat acel i akinagi te wot baŋgi me wot laro cware i ciŋ ŋat ame onwoŋo tye aromo kede, ka ce en ocwao ciŋe te mako kom lonnaca me co, myero ŋol ciŋ dako-nono oko; kica kur makwu i kome. “Myero kur ibed wunu i mijan me pimo jami a kite aryo iyi cao-ni; en apekkere kede en ayottere. Mom ibino bedo daŋ i gwata pimo jami a kite aryo i odi, en adwoŋŋere kede en atidi mere. Myero ibed i kidi pimo jami a tye aber, ame pimo jami kakare, me iperakino i lobo ame Rwot Obaŋani omiowu. Pien jo luŋ ame timo kodi tim man, kede jo luŋ ame tiyo gin a mom atira, gin obedo gin me kwer baŋ Rwot Obaŋawu. “Koŋ ipoyo gin ame Amalek rik otimo i komwu i yo i kare ame iya wunu i Miciri, kite ame en olwenyo kede i komwu iyo, i kare a rik iol wunu meicel, a teko moro doŋ mom i komwu; ame gin te ŋolo jo a rik odoŋ cen i ŋewu, kun mom daŋ olworo Obaŋa. Pi mannono ba, ka ce Rwot Obaŋawu doŋ omiowu iwe wunu oko i lweny i kom okworwu ame omanowu, i lobo ame Rwot Obaŋawu amiyowu me bedo megwu, ibino jwerogi wunu oko me wi jo luŋ i te polo kur dok poyo jo Amalek; myero wii kur wil i kop man. “Ka doŋ ituno wunu i lobo ame Rwot Obaŋawu amiyowu me bedo megwu, ame daŋ doŋ igamo wunu oko, i te bedo wunu iye, ibino tero wunu cammogo i kom cam luŋ ame ogeo cek me wi mwaka, ame ikaa wunu i lobowu ame Rwot Obaŋawu amiyowu; ibino kwanyo ite keto i dita, ite tero i kabedo kan ame Rwot Obaŋawu bino yero. Ibino wot baŋ alamdog ame onwoŋo tye atic i kare-nono, ite kobbe ni, ‘Tin doŋ atuco oko kannaler baŋ Rwot Obaŋani ni, doŋ otyeko tuno i lobo ame ric Rwot okwoŋo baŋ kwariwu ni ebino miyo baŋwa’. Alamdog bino gamo dita oko i ciŋi, te keto piny i nyim keno lam a Rwot Obaŋani. “Eka yin ite dok iye kit man i nyim Rwot Obaŋani ni, ‘Kwarona rik obedo dano me Aram, ame rik obedo aloŋpiny meicel; en rik obin owoto i Miciri, te wot bedo kuno, kun welgi gire nonok; i kuno en te doko twon rokkoro adwoŋ, atek, dok ame jo mere onya apol meicel. Jo Miciri rik te tic kedwa agwa meicel, owunowa, ote miyowa tiyo tic apek me opii opii. Wan rik ote kok baŋ Rwot Obaŋa a kwariwa, Rwot daŋ rik te winyo kokowa, te daŋ neno kite ame owunowa kede, kede aroma me tic ame oketo i komwa, kede kite ame odiowa kede. Eka Rwot te kwanyowa oko i Miciri kede ciŋe atek, kede bade ame oryeo, kede twon lworo adwoŋ, kede anyuttogo, kede taŋo mogo me awura. En rik te kelowa kan, te miyowa lobo man, lobo ame cak kede moo kic dwoŋ iye meicel. Nen ba, an en doŋ akelo cam ame ogeo cek me wi mwaka, ame oya i lobo ame yin giri, Ama Rwot, en imia’. Ka doŋ ite keto piny i nyim Rwot Obaŋani, ite wore; eka yin karacel kede Olevi kede orok ame bedo i akinawu, ite yomoro wunu cunywu i gin abeco ame Rwot Obaŋawu omio baŋi kede baŋ jo me odi. “Ka doŋ ityeko miyo acel me apar me ginnoro luŋ ame oya i poto, ame omio i ŋe mwaka adek adek, ame obedo mwaka me miyo acel me apar, me amia baŋ Olevi, orok, otino kic, kede mon a coggi oto, me gin cam i dye bomawu, ote yeŋ, ibino daŋ kobo i nyim Rwot Obaŋani ni, ‘Atyeko doŋ kwanyo jami acil oko i oda, atyeko daŋ doŋ miyo oko baŋ jo Levi, baŋ orok ame bedo i akinawa, otino kic, kede mon a coggi oto, kun alubo cik luŋ ame icika kede. Mom tye cikki moro ame mom alubo kakare, dok daŋ mom tye moro ame wia owil iye. I kare ame atye ka kwero cola, mom gira acamo acel me apar, akadi kwanyo moro iye me yalo tipo a ŋat oto; an gira awinyo kop a Rwot Obanana, atio ginnoro ducu ame icika iye. Kul waŋi piny i polo, i kabedoni acil, me inen piny, imi winyo baŋ joni Icrael kede lobo ame imiowa, lobo ame cak kede moo kic dwoŋ iye meicel, kite ame rik ikwoŋo kede baŋ kwariwa’. “Tin Rwot Obaŋawu ocikowu me cobo icwil magi kede gin ame en ociko luŋ; pi mannono, myero igwokere atek me cobogi luŋ kede cunyi ducu kede tiponi ducu. Tin yin giri doŋ ituco kop i kom Rwot ni en obedo Obaŋani, dok daŋ yin ibino lubo yo mere kun imako icwillere, kede cikkere, karacel kede gin ame en ociko luŋ, dok daŋ ni ibino winyo koppere. Rwot daŋ tin doŋ otuco kop i komwu ni wun doŋ idoko wunu rok ame obedo mere en ikome, kite a rik ocikowu kede, dok daŋ ni wun myero imak wunu cikkere luŋ, dok daŋ ni en ebino miyowu ibedo wunu rok amalo akato rok ocele luŋ ame en eketo; jo bino pake pirwu, dok daŋ ni wun ibino bedo wunu jo aci ame obedo jo a Rwot Obaŋawu ikokome kite a rik ekobo kede.” Muca kede odoŋe me Icrael rik te ciko lwak ni, “Mak wunu cik luŋ ame acikowu kede tin. I nino ame ibino wunu ŋolo Jordan idonyo wunu i lobo ame Rwot Obaŋawu amiyowu ibino cibo wunu twoni gweŋe mogo adoŋo kuno, ite puyo wunu komgi oko kede coka. Co i komgi kop luŋ me cik man, ka ikato wunu loka idonyo wunu i lobo ame Rwot Obaŋawu amiyowu, lobo ame cak kede moo kic dwon iye meicel, kite ame Rwot, ame en Obaŋa a kwariwu, rik ocikowu kede. Ka doŋ iŋolo wunu Jordan, ibino cibo wunu gweŋe magi ame acikowu pirgi tin-ni, ibino cibo wunu i kor kidi me Ebal, eka ite puyo wunu komgi oko kede coka. Ibino wunu daŋ cano keno me lam kuno, pi Rwot Obaŋawu, keno lam me kiddi; mom ibino wunu tiŋo nyonyo moro me payogi. Ibino canni wunu Rwot Obaŋawu keno lam, keno lam me kiddi a mom opao; ite miyo wunu iye mot awaŋa me yalo Rwot Obaŋawu; ite ŋolo wunu daŋ iye motwu me kweyo cuny, ite camo wunu oko kuno, ite lelo wunu i nyim Rwot Obaŋawu. Co wunu kop luŋ me cik man i kom k iddi-nono. Co wunu aber meicel ame kwano yot.” Muca kede olamdog ame gin jo Levi, te kobbi jo Icrael luŋ ni, “Liŋ wunu mot, me iwiny wunu kop, wun jo Icrael: Tin doŋ wun idoko wunu jo a Rwot Obaŋawu. Pi mannono myero doŋ iwiny wunu kop a Rwot Obaŋawu, kun imako wunu cikkere kede icwillere luŋ, ame acikowu kede tin.” I nino-nono ikome Muca rik te ciko jo kit man ni, “Ka doŋ ityeko kato wunu loka Jordan, jo me atekere magi bino cuŋ i wi kidi me Gerijim me lammi jo winyo: Cimeon, Levi, Juda, Icakar, Yucepu, kede Benjamin. Eka jo me atekere man te cuŋ i wi kidi me Ebal pi ceno jo: Reuben, Gad, Acer, Jabulon, Dan kede Naputali. Jo Levi bino kobbi jo Icrael luŋ kop man kun oredo kede i dwon aloŋo ni: “Ŋat ame bino tiyo cal jokkoro ame opao apaa onyo ame otwako atwaka, ame gin obedo gin me kwer baŋ Rwot, gin ame adiro otio kede ciŋe, te keto me awora, cen myero mak oko! Lwak luŋ bino gamo ni, ‘Amen.’ “ ‘Ŋat a mom woro pappere kede tottere, cen myero mak oko.’ Lwak luŋ bino gamo ni, ‘Amen.’ “ ‘Ŋat ame bino kobo waŋ kina me poko waŋ lobo awottere cen myero mak oko.’ Lwak luŋ bino gamo ni, ‘Amen.’ “ ‘Ŋat ame bino miyo atowaŋ lubo yo apat, cen myero mak oko.’ Lwak luŋ bino gamo ni, ‘Amen.’ “ ‘Ŋat ame balo pido arokkoro, atin kic kede me a dako a cware oto, cen myero mak oko.’ Lwak bino gamo ni, ‘Amen.’ “ ‘Ŋat ame bino buto i ci-pappere, cen myero mak oko, pien en obuto dako a pappere gire en ame bu to kede,’ i Lwak luŋ bino gamo ni, ‘Amen.’ “ ‘Ŋat ame bino buto kede lee, cen myero mak oko.’ Lwak luŋ bino gamo ni, ‘Amen.’ “ ‘Ŋat ame bino buto aminnere, kadi aminnere me papo onyo me toto, cen myero mak oko.’ Lwak luŋ bino gamo ni, ‘Amen.’ “ ‘Ŋat ame bino buto i tota a dako mere, cen myero mak oko.’ Lwak luŋ bino gamo ni, ‘Amen.’ “ ‘Ŋat ame bino neko awottere i muŋ, cen myero mak oko.’ Lwak luŋ bino gamo ni, ‘Amen.’ “ ‘Ŋat ame bino gamo lim i muŋ me wile me enek ŋat a mom iballoro, cen myero mak oko.’ Lwak luŋ bino gamo ni, ‘Amen.’ “ ‘Ŋat amom bino moko kop ame tye i cik man i tic, cen myero mak oko.’ Lwak luŋ bino gamo ni, ‘Amen.’ “Ka ce ibino winyo wunu kop a Rwot Obaŋawu kun igwokere wunu i cobo cik luŋ ame acikowu kede tin, Rwot Obaŋawu bino miyowu ibedo wunu rok amalo akato rok ocele luŋ ame tye i lobo. Ka ce iwinyo wunu kop a Rwot Obaŋawu, gum magi luŋ bino bedo megwu. Gum bino makowu i boma, gum bino bedo i komwu i poto. Gum bino bedo i kom itinowu ame ibino nywalo wunu, kede i kom gin ame bino cek i pottiwu, winyo bino bedo i kom limwu luŋ akwo; dokwu bino nya kede itino rommiwu kede dyegiwu. Gum bino bedo i kom ditawu kede i kom takowu me kwon. “Ibino bedo wunu kede gum i kare ame idonyo wunu i ot, dok daŋ ibino bedo wunu kede winyo i kare ame ikato wunu oko. “Rwot bino miyo iloo wunu okworwu ame bino lweny i komwu; gin bino ciro me bino i komwu i yo acel keken, cite gin obino riŋowu kun opokere i yo abiro apapat. Rwot bino miyo gum bedo i derewu kede i ginnoro luŋ ame ciŋwu otio, dok en bino miyowu gum i lobo ame Rwot Obaŋawu bino miyowu. Ka ce imako wunu cik a Rwot Obaŋawu luŋ kun ilubo wunu yo mere luŋ, Rwot bino miyo ibedo wunu jo acil ame obedo jo mere en ikokome, kite a rik en okwoŋo kede baŋ baŋwu. Jo luŋ me wi lobo bino neno ni wun olwoŋowu i nyiŋ Rwot; gin te bedo kede lworo i komwu. Rwot bino miyo jami nya baijwu, bino miyo itino ame inywalo wunu nya, limwu akwo daŋ bino nya atek, cem bino cek abup i pottiwu, i lobo ame Rwot rik okwoŋo pire baŋ kwariwu me miyowu. Rwot bino yabbiwu polo ame en kano iye lonyo mere amalo meicel, me miyo kot cwe i pottiwu i kare mere i kome kede miyo gum i kom tic luŋ ame ciŋwu ogudo. Mannono bino miyo imio wunu rok apol kopporo banya baŋwu, cite wun mom myero ikoporo wunu ginnoro i baŋgi. Rwot bino miyo kare ducu wun en ame itelo wunu wi jo, ento mom wun en ame icoko wunu; kare luŋ wun ibino medde wunu ameda anyim kun mom idok wunu cen; ka ce iwinyo wunu cik a Rwot Obaŋawu luŋ ame acikowu kede tin-ni, kun igwokere wunu me cobogi, dok ka ce mom igaka wunu i ciŋwi tuŋ cem onyo tuŋ cam i kom kopporo acel ame acikowu kede tin-ni, kun mom ilubo wunu obaŋe mogo ocele mom daŋ iworogi wunu. “Ento ka ce mom iwinyo wunu kop a Rwot Obaŋawu, onyo mom igwokere wunu icobo cikere luŋ kede icwillere ame acikowu kede tin-ni, cen magi bino makowu: Cen bino makowu kakannoro luŋ ame itye wunu iye, i boma kede i poto. Cen bino bedo i kom ditawu kede i kom takowu me kwon. Cen bino bedo i kom itinowu ame ibino nywalo kede i kom camwu ame cek i pottiwu, i kom limwu akwo ame nya kede i kom itino rommiwu. Cen bino makowu i kare ame idonyo wunu i ot kede i kare ame ikato wun oko. “Rwot bino cwalo cen i komwu, ibino bedo wunu ababaŋ i ginnoro luŋ ame itio wunu, kun komwu nyoŋere oko, ituno waŋ ame ito wunu, iru tum wunu oko pi timwu areco, dok pien iweka wunu oko. Rwot bino miyo too edeke agwa makowu tuno waŋ ame onekowu oko luŋ i lobo ame iwot donyo wunu iye me gamo bedo megwu. Rwot bino pwodowu i two me aola owio, kede aburu kede two ame wawaŋo kom jo, kede twon lyeto adwoŋ meicel; kun kot mom cwe, yamo oro kodo alyet meicel, dok daŋ bino miyo wit kal ner oko onyo mwato oko. Can magi luŋ bino lubo yorwu tuno waŋ ame ito wunu oko. Polo ame tye i wiwu malo bino bedo atek calo mola, kede lobo ame tye i te tyenwu piny bino bedo atek calo nyonyo. Rwot bino miyo aburu kede apua en ame cwe i lobowu akaka kot; gin bino ya i polo corre i komwu tuno waŋ ame ito, itum wunu ducu. “Rwot bino miyo okworwu loowu; ibino ciro wunu me wot i komgi i yo acel keken, ite riŋogi wunu kun ipokere wunu i yo abiro apapat. Jo me lobo luŋ ame tye i wi podo bino bedo i twon lworo adwoŋ meicel pi gin ame otimere i komwu. Komwu ame oto bino bedo cam a winy kede me a leyi me tim, kun ŋattoro a ryemogi mom. Rwot bino pwodowu kede edeke me Miciri kede bur adola, kede nyac, kede gwenyo ame caŋo bino loyowu oko. Rwot bino pwodowu i too me apoa, kede towan kun daŋ babano tamwu oko. Ibino tyamere wunu atyama i cuny dyeceŋ, kite ame atowaŋ tyamere kede ka piny col, mom ibino bedo wunu kede gum i yo moro ducu ame ibino wunu lubo. Jo bino diyowu kun daŋ oyakowu kare luŋ, ento ŋattoro a konyowu bino bedo pe. Ibino cikere me nyomere wun kede nyannoro, cite lo ocele en ame bino buto kede; ibino gero ot, cite mom ibino bedo iye; ibino pito poto olokki, cite mom ibino bilo nyige. Obino neko twonni kun ineno, cite mom ibino bilo riŋo mere; obino mayo kanani tetek, otero oko i nyimi, cite mom dok obino dwogo baŋi; obino miyo rommini baŋ okworri, cite ŋattoro a konyi bino bedo pe. Awobeni kede anyirani obino miyo baŋ rok ocele kun yin ineno, ibino parogi cen iyul, cite ginnoro i tim i komgi bino loyi oko, pien mom ibino bedo kede twerroro me geŋogi wot. Rok ame yam mom iŋeo en ame bino camo gin ame ocek i pottiwu, ginnoro luŋ ame iyele atek i ticcere; gin bino diyi kun owuni kare luŋ. Kodi gin ame waŋi bino bedo neno-nono, bino miyo wii balle oko. Rwot bino miyo twoni odeke mogo alit meicel kwokwota i coŋi kede i tyeŋi ame caŋo bino loyi oko, cakere it yeni piny tuno kede i taddi wii malo. “Wun karacel kede abakawu ame ibino keto wunu me loyowu Rwot bino terowu baŋ rok ame yam wun kede kwariwu mom iŋeo wunu, kan ame ibino woro wunu iye obaŋe mogo ocele ame otio i kiddi kede yen. Ibino doko wunu gin ame kelli jo lworo, gi-ciŋa kede gi-aboka i akina rok luŋ ame Rwot bino terowu iye. Ibino coro wunu koti adwoŋ meicel i pottiwu, cite ibino depo wunu aduno morome dwoggo paco, pien bonyo bino camo oko. Ibino pito wunu poto olokwu, ite daŋ gwoko wunu aber, cite mom ibino wunu mato koŋo mere, akadi coko nyiggi, pien kudi bino camo oko luŋ. Jeituni bino durre ata i lobowu luŋ, cite mom ibino wir wunu kede moo mege, pien nyiggi bino ony oko, Ibino nywalo wunu awobe kede anyira, cite gin luŋ mom bino bedo megwu; pien obino terogi oko iyi opii. Yen luŋ kede cam luŋ ame ocek i pottiwu bino bedo me a bonyo. Orok ame bedo i akinawu bino doko dano a malo meicel kun wun idoko wunu jo a piny meicel. Ibino koporo wunu banya i baŋgi kun gin mom koporo ginnoro i baŋwu. Gin en ame bino telo wiwu kun wun en ame icoko wunu tere. Cen magi luŋ bino poto i komwu, bino ryemo yorwu, te makowu, tuno waŋ ame itum wunu ducu, pien ikwero winyo wunu kop a Rwot Obaŋawu, mom imako wunu cikkere kede i icwillere ame en rik ocikowu kede, Gin bino bedo acalo anyut kede gin me awura i komwu kede i kom ikwaewu nakanaka. “Pien rik mom itio wunu baŋ Rwot Obaŋawu kun ilelo kede yomcuny pi lwak jami ame onya baŋwu wok-ki, mannono omio ibino tic wunu baŋ okworwu ame Rwot bino cwayo i komwu kun kec nekowu, oryo pii cirowu, iwoto wunu onoro dok daŋ jami ducu remowu, Rwot bino riyo lodi nyonyo i nutwu tuno ka onekowu ducu. Rwot bino kelo rok i kannabor me lweny i komwu iyi agikki lobo, rok adwir calo cur otwarre, ame mom iwinyo wunu lebgi, rok ame wangi tek, ame mom bino paro pi jo oti, akadi bedo i kica moro i kom itino. Gin bino cam itino limwu akwo kede cam ame ocek i pottiwu, tuno waŋ ame obalo limwu luŋ; mom obino wekkiwu kal, kono olok, onyo moo, itino dokwu ame onywalo onyo itino rommiwu kede me dyegiwu; ituno waŋ ame gin omiowu ito wunu. Gin bino gurowu i bomawu luŋ, tuno waŋ ame celwu ocuŋ malo iguŋ orette luŋ piny, gin cel me bomawu ame igeno wunu, gin bino gurowu i bomawu luŋ i lobo ame Rwot Obaŋawu omiowu. Dok daŋ ibino lokere wunu icamo itinowu ame wun ikomwu inywalo wunu, riŋo kom awobewu kede riŋo kom anyirawu, ame Rwot Obaŋawu omiowu i kare ame ogurowu i bomawu, ame nwoŋo doŋ itye wunu i twon can adwoŋ ame okworwu oketo i komwu. Ŋat a yom okato kare, ame onwoŋo rik ogwoko atek ateka i akinawu, waŋe bino balle oko i cammere, te twono ominnere, dako mere ame emaro naka atinnere me cogo ame pwod tye i ot baŋe. En mom bino nywako riŋo kom atinnere ame ecamo kede ŋattoro i akina jo-nono, pien nwoŋo alworo ni cam mom bino doŋe i kare ame okwor ogurowu, ame itye wunu i twon can adwoŋ, can adwoŋ ame okworwu bino keto i komwu i bomawu luŋ. Dok dako a yom okato kare, ame onwoŋo rik ogwoko atek ateka, ame mom dio cunye me nyono piny atek pien cunye goro meicel dok daŋ yom okato kare, waŋe bino balle oko i cammere, te twono cware ame emaro, wode kede nyare. En bino twonogi byero ame okato i akina eme kede atin ame enywalo, pien en bino camogi i muŋ pi can jami luŋ ame bino bedo tye i kare ame okworwu bino gurowu ame nwoŋo itye wunu i twon can adwoŋ ame okworwu bino keto i komwu i bomawu luŋ. “Ka ce mom igwokere wunu me cobo kop ducu me cik man ame ocoo i buk-ki me ibed wunu i lworo i nyiŋ man me Rwot, ame en nyiŋ Obaŋawu obedo nyiŋ me kwogo, dok me alwora, bino kelo twon cannoro apat i me kare luŋ i komwu kede i kom itinowu, can arac, agwa okato kare, ame ri nakanaka, karacel kede two mogo alit meicel ame caŋo tek meicel. Edeke luŋ me Miciri ame rik ilworo wunu ca, en bino kela i komwu, te kacakino lake i komwu atwal. Rwot daŋ dok bino medo kelo i komwu kit too ocele mege kede cannogo ocele ame mom ocoo i buk man me cik, tuno waŋ ame otyekowu oko. Akadi kono rik ipol wunu acalo acer ame tye malo i polo, welwu bino doŋ anok meicel, pien mom iwinyo wunu kop a Rwot Obaŋawu. Doŋ kite acalo rik Rwot yie obedo yom me miyowu nya apol, kittono daŋ yie bino bedo yom me babalowu oko, kede tyekowu. Obino puto lwitwu oko i lobo ame iwot wunu iye me wot gamo wunu bedo megwu. Dok Rwot bino keketowu oko atata i akina rok apapat, cakere iyi agikki piny tuŋ cel tuno kede iyi tuŋ ocele; kun ame ibino woro wunu iye obaŋe ocele, ame otio i yen kede kiddi, ame yam wunu karacel kede kwariwu mom iŋeo wunu. I kare luŋ ame it ye wunu i akina rokkono, mom ibino wunu nwoŋo aride moro me weo; kare luŋ ibino bedo wot wunu awota; i kuno, Rwot bino miyo cunywu myel amyela, waŋwu bino rwobere oko, tipo komwu bino bedo ya aya. Kare luŋ ibino bedo wunu ame cunywu oŋabere aŋaba pi kwowu me anyim; twon lworo adwoŋ bino makowu dyewor kede dyeceŋ kun mom itye wunu kede gennoro pi kwowu. Pi lworo ame bino miyo tipo komwu bedo popoa kede gin ame waŋwu bedo neno bino miyo idiko ikobo wunu ni, ‘Kono wok iman otyeno, do ber’, eka otyeno dokite kobo wunu ni, ‘Kono wok imanodiko, do ber.’ Rwot dok bino dwokowu cen i Miciri kun terowu kede mel, kadi bed atyeko kwoŋ ni mom dok ibino dok wunu kuno, cen i Miciri. Kare ame itye wunu wun i komwu ibino miye wunu kenwu baŋ okworwu ni kono ocatowu oko acalo opii kede aŋeca, cite mom tye ŋattoro ame bino wilowu.” Magi en kop ducu ame mako cikere i jo Icrael i lobo Moab, ame Rwot ociko kede Muca, medo i kom en ame Rwot rik ocikere kedgi i Koreb. Muca olwoŋo jo Icrael te kobbigi ni, “Wun doŋ ineno wunu ginnoro ducu ame Rwot otimo i kom Parao kede i kom oticcere, kede i kom lobo mere luŋ kun ineno wunu kede waŋwu. Twon aoma cuny adoŋo meicel kede anyut ame ineno wunu kede waŋwu, kede twoni taŋo mogo me awura; entu tuno naka tin-ni Rwot mom ru omiowu cuny me niaŋ iye, onyo me neno, akadi yit me winyo. An atelowu i tim mwakki pyeraŋwen twal; boŋŋiwu mom oyeyeca i komwu, amukewu daŋ mom oyeyeca i tyenwu; mom daŋ icamo wunu ogati, mom daŋ imato wunu koŋo olok, akadi kit koŋo moro ocele a mero dano me iŋe wunu ni an abedo Rwot Obaŋawu. Kare ame ituno wunu kan, Cikon abaka me Kecbon kede Og abaka me Bacan obino lweny i komwa, cite rik ote loyogi oko. Wan rik ote gamo lobogi oko, ote miyo bedo mea a jo Reuben, jo Gad, kede nucu me atekere a Manace. Pi mannono myero igwokere wunu icobo kop luŋ me cikere man me nyimwu bed a myero i jami luŋ ame itio wunu. “Wun luŋ tin icuŋ wunu i nyim Rwot Obaŋawu, odoŋe a loo itekerewu, odoŋewu, kede odoŋe ame loo lwak, kede jo Icrael luŋ, itinowu atino, monwu kede orok ame bedo i gonywu, ŋat ame mwoddiwu yen kede ŋat ame twommiwu pii, me wek wun ducu ikwoŋ wunu kwoŋ me cikere a Rwot Obaŋawu, ame Rwot Obaŋawu aketo kedwu tin, me tin en miwu idok wunu jo mere, en bed Obaŋawu, kite ame en rik ocikowu kede, kede kite a rik okwoŋo kede baŋ kwariwu, baŋ Iburaim, baŋ Icaka, kede baŋ Yakobo. Kwoŋ man me cikere, an mom acikere ka i jo ame tye kan keken, cite acikere naka i jo a mom ocuŋ kedwa kan, karacel kede jo ame ocuŋ kedwa kan aman i nyim Rwot Obaŋawa. “Iŋeo wunu aber kite ame wan obedo kede i lobo me Miciri kede kite ame obedo beo kede i dye rok apapat ame obeo wunu i akinagi. Ineno wunu jami mogo me kwer ame tye baŋgi, cal jogi me yen kede kiddi, me ryal kede me jabu ame onwoŋo tye i akinagi. Gwokere wunu ba, naka mio lo moro, onyo dako moro, onyo jo me doggola moro, onyo me atekere moro ame tye i akinawu, ame cunye tin ca olokere oko i kom woro Rwot Obaŋawu, me wot gire woro obaŋe a rokkaca; naka mio lwit yattoro a nywalo kwir ame nyige kec i akinawu. Ŋat ame ka owinyo kop ame okwoŋo i cikere man, lamo winyo i kome kene kun ko bo i cunye ni, ‘An gira ginnoro mom bino timere i koma, kadi cunya bed nwaŋ’. Mannono bino miyo ajwero jo luŋ oko, jo abeco kede areco. Rwot mom bino time kica; akaka ennono akemo a Rwot kede nyeko ame en tye kede, bino duny i kom dano-nono, te miyo cen luŋ ame ocoo i buk man bedo i kome, Rwot te jwayo nyiŋe oko piny i te polo. Rwot bino yero dano-nono oko i akina atekere luŋ me a jo Icrael, me eket can apek i kome en kene, kun lubo kit cen luŋ ame tye i cikere, ame ocoo i buk man me cik. Eka ikwaewu ame bino lubowu kede itinowu ame tye i newu, kede orok ame bino ya i lobo mogo ame tye kannabor, bino neno twoni can luŋ ame opoto i lobo-nono kede two mogo apek ame Rwot omio omako lobo-nono. Lobo-nono obino balo oko kede mac kede kado, kun odoŋ iye gwen calufa ame mac olio, lobo a mom ocoo iye ginnoro, a ginnoro mom odoŋo iye akadi lum daŋ mom otu iye. Lobo ame oballe atek, ame rom aroma i Codoma kede Gomora, kede Adma kede Jeboim, ame Rwot rik obalo atek i kare ame iniga kede akemo omake. Rok luŋ bino kobo ni, ‘Pino kara Rwot otimo lobo-ni kit man? Twon akemo arom man kara ŋit otimere pino ba?’ Jo bino gamo ni, ‘Otimo pien jo-nono okwero lubo cikere a Rwot ame obedo Obaŋa a kwarigi rikomoko kedgi i kare ame okwanyogi i lobo me Miciri, eka gin ote lunyo wot woro obaŋe mogo ocele kun daŋ oryebere i nyimgi, obaŋe mogo ame yam gin mom oŋeo dok daŋ mom rikomiogi me awora. Mannono en omio akemo omako Rwot i kom lobo man, te kela iye cen luŋ ame ocoo i buk man. Rwot te puto lwitgi oko i lobogi kun iniga, cwercuny kede twon akemo adwoŋ meicel omako, te bologi oko i lobo ocele, kite ame tye kede anaka atot tin.’ “Rwot Obaŋawa tye kede muŋŋere ame obedo mege en keken, cite gin ame doŋ oyabo oko, nwoŋo doŋ megwa atwal, kede me ikwaewa me wan ocob kop luŋ ame tye i cik man. “Doŋ ka ce gum magi luŋ kede cen ame atyeko keto i nyimwu-ni bino timere i komwu, ka ce ipoo wunu iye i kare ame itye wunu i akina rok luŋ apapat, kan ame Rwot Obaŋawu bino ryemowu, terowu iye, ka ce ibino ŋut wunu, ite dwogo wunu baŋ Rwot Obaŋawu, wun karacel kede ikwaewu, ite winye wunu i kop luŋ ame acikowu iye tin, kun iwinye wunu i cunywu luŋ kede tipowu luŋ. Kica bino mako Rwot Obaŋawu i komwu, te dwoggo gumwu baŋwu; en bino dok cokowu luŋ i akina rok luŋ ame en rik okeketowu iye. Jowu luŋ ame onwoŋo odwiro kagimogo abor meicel, Rwot Obaŋa bino cokogi oko i kuno; en bino omogi gire oko i kuno. Rwot Obaŋawu bino kelowu i lobo a rik kwariwu ogamo obedo megi, me wun igam wunu bed megwu. Rwot bino miyo jami apipim nya baŋwu kun daŋ welwu bup kato me a kwariwu oko. Rwot bino miyo ibedo wunu jo olirre i cunygi karacel kede ikwaewu, ame bino miyo imaro wunu Rwot Obaŋawu kede cunywu ducu kede tipowu ducu, me ibed wunu kwo. Rwot Obaŋawu bino miyo cen magi luŋ mako okworwu kede jo ame wunowu. Wun dok ibino winyo wunu kop a Rwot, ite mako wunu cikere luŋ ame acikowu kede tin. Rwot Obaŋawu bino miyo jami apipim nya baŋwu i ginnoro ame ciŋwu ogudo, itino ame inywalo wunu, kede itino limwu akwo kede cam ame cek i pottiwu, pien yi Rwot dok bino bedo ayom me miyo jami nya baŋwu, kite a rik yie obedo kede ayom i kom kwariwu, ka ce iwinyo wunu koppere dok daŋ imako wunu cikkere luŋ karacel kede icwillere luŋ ame ocoo i buk man me cik, ka ce iŋut wunu, ite dok wunu baŋ Rwot Obaŋawu kede cunywu ducu kede tipowu ducu. “Pien cik ame acikowu kede tin-ni, mom gire tek wok, dok daŋ mom tye kannabor wok i baŋwu. Mom gire tye i polo twal, ame kono mi ikob wunu ni, ‘Ŋa kara ame bino wot malo i polo me wot ommiwa, me owiny ote daŋ cobo?’ Mom daŋ gire tye loka tuŋ ca twal, ame kono mi ikob wunu ni, ‘Ŋa kara ame bino ŋolo nam kato tuŋ ca, me wot kelliwa, me owiny ote daŋ cobo?’ Ento koppono kom ceggi acega kedwu, koppono gire tye i dogwu kede i cunywu, ame mio itwero wunu cobo gire. “Nen ba, tin doŋ atyeko keto i nyimwu kwo, kede gin aber, to kede gin arac. Ka ce ibedo wunu owiny cik a Rwot Obaŋawu luŋ ame acikowu kede tin-ni, imare wunu dok daŋ ilubo wunu yo ame en mito kun daŋ imako wunu cikkere luŋ kede icwillere luŋ kede gin ame en ociko luŋ; ibino bedo wunu kwo kun welwu nya medde ameda. Rwot Obaŋawu bino miyowu winyo i lobo ame iwot wunu donyo iye me gamo bedo megwu. Ento ka ce cunywu olokere oko teŋe, eka mom ite winyo wunu, ento ite lokere wunu ryebere i nyim obaŋe mogo ocele kun iworogi wunu, tin doŋ atucciwu oko ni, ibino wunu to oko; mom ibino perakino wunu kare alac i lobo ame iwot wunu iye loka Jordan, ame iwot donyo wunu iye me wot gamo bedo megwu. Tin alwoŋo polo kede lobo me bedo caden i komwu, me moko ni an doŋ aketo i nyimwu kwo kede to, gum kede cen; pi mannono myero iyer wunu kwo wek wun karacel kede ikwaewu ibed wunu kwo, kun imaro wunu Rwot Obaŋawu, iwinyo wunu koppere, dok daŋ imoko wunu i kome, mannono bino miyo ibedo wunu kwo dok daŋ iperakino wunu i lobo, ame rik Rwot okwoŋo pire baŋ kwariwu Iburaim, Icaka kede Yakobo, ni abino miyogi.” Muca rik te medde kobo kop magi baŋ jo Icrael. En okobbigi ni, “An mwaka me ditta tin doŋ oromo mia acel kede pyeraryo nono; an gira mom doŋ aromo telowu. Rwot doŋ otyeko kobba ni, ‘Yin mom dok ibino ŋolo Jordan ikato tuŋ ca’. Rwot Obaŋawu i kome en ame bino wot telo nyimwu; en bino tyeko rok magi luŋ oko i nyimwu me ile wunu lobogi bed megwu. Yocwa en ame bino wot kedwu acalo atelwu, kite ame Rwot rik okobo kede. Rwot bino timogi kite ame rik otimo kede Cikon kede Og, obakki a jo Amor karacel kede lobogi, i kare ame en rik otyekogi iye. Rwot bino miyogi i ciŋwu, wun ibino timogi wunu kun ilubo wunu cik luŋ ame atyeko cikowu kede. Myero icuŋ wunu atek ame cunywu nwaŋ. Kur ilworgi wunu, cunywu daŋ kur poti pirgi, pien Rwot Obaŋawu tye kedwu i kabedo luŋ ame ibino wot wunu iye. En mom bino bolowu, dok daŋ mom bino wekowu.” Muca rik te lwoŋo Yocwa bino kobbe i nyim lwak luŋ ni, “Yin myero icuŋ atek ame cunyi nwaŋ; pien yin ibino tero jo man i lobo ame Rwot rik okwoŋo pire baŋ kwarigi ni, ebino miyogi, yin ibino miyogi ogamo lobonaca bedo meggi. Rwot ikome en ame bino telo nyimi; en bino gwok i, mom bino boli, dok daŋ mom bino weki ata. Kur ibed alwor, cunyi daŋ kur poti.” Muca te coyo cik man, te miyo baŋ olamdog ame gin obedo ikwae a Levi, ame tino canduk me cikere a Rwot, karacel kede baŋ odoŋe a jo Icrael. Muca te cikogi ni, “Iyi agikki me mwaka abiro abiro, i kare me kwero ecuban me gonye, i mwaka ame ociko me jalo bannyi, ka jo Icrael luŋ obino me woro Rwot Obaŋawu i kabedo moro ame en bino yero, ibino kwano wunu cik man kun jo Icrael luŋ winyo. Mi jo Icrael luŋ cokere karacel, co, mon, itino atino kede orok ame bedo i akinawu, i bomawu luŋ, me wek gin owiny cik a Rwot, dok daŋ opwony lworo Rwot Obaŋawu, dok ogwokere daŋ me cobo kop luŋ ame tye i cik man, me ikwaegi ame yam mom ŋeo daŋ winy, ote pwonyo lworo Rwot Obaŋawu pi kare luŋ ame ibino bedo wunu kede i lobo ame iwot wunu iye loka Jordan, me wot gamo bedo megwu.” Rwot dok te kobbi Muca ni, “Nen ba, nino me toni doŋ ceggi acega; lwoŋ Yocwa, me icuŋ wunu i kema me rwatte, me acike.” Eka Muca kede Yocwa te wot cuŋ i kema me rwatte. Rwot rik te nen i kema me rwatte kun nen i pagi me pol; pagi me polloro te cuŋ i ŋet doggola me kema. Rwot te kobbi Muca ni, “Nen ba, yin doŋ iceggi wot weo karacel kede kwarini; i ŋe ennono, rok man bino doko alaya pi woro obaŋe mogo ocele ame kun otimo tim me alaya baŋgi, i lobo ame gin owot bedo iye i akinagi, eka ote weka oko, ote turo cikere ame rik acikere kede kedgi. Mannono bino miyo akemo maka i komgi i kare-naca, an daŋ ate wekogi oko, mom dok ote medde neno waŋa, ate daŋ nekogi oko ducu. Ayela kede can bino bedo dwoŋ meicel i komgi, ame bino miyo gin kobo i kare-naca ni, ‘Ayela magi luŋ obino i komwa pien Obaŋawa mom tye i akinawa.’ Ateteni abino kanne gira oko i kare-naca, ame gin mom dok obino neno waŋa pien gin otimo tim areco, gin olunyo lokere baŋ obaŋe mogo ocele. Pi mannono ba, aman co wer man, me ipwony kede jo Icrael; migi omak wer man, me bed cadenna i kom jo Icrael. Pien i kare ame abino terogi i lobo ame cak kede moo kic dwoŋ iye meicel, ame rik akwoŋo me miyo baŋ kwarigi, gin obino camo cem iye ote yeŋ, ote daŋ cwe, gin obino lokere woro obaŋe mogo ocele, ote lunyo caya kun daŋ oturo cikerena. Eka i kare ame ayela kede can opo to i komgi, wer man bino bedo caden i nyimgi pien ikwaegi bino bedo wero wer man kun mom rwenyo. An doŋ onwoŋo aŋeo gin ame tye i cunygi kun mom ru oterogi i lobo ame rik akwoŋo me miyogi.” Muca rik daŋ te coyo wer man i nino-naca ikome, te daŋ cako pwonyo i jo Icrael. Rwot doŋ te ciko Yocwa wot a Nuni kun kobo ni, “Cuŋ atek ame cunyi nwaŋ, pien yin ibino tero jo Icrael i lobo ame rik akwoŋo me miyogi; an abino bedo kedi.” Kare ame Muca doŋ otyeko coyo kop luŋ me cik man i buk naka iyi agikki mere, Muca rik te ciko jo Levi ame gin otiŋ canduk me cikere a Rwot ni, “Gam wunu buk man me cik, wot iket wunu iŋet canduk me cikere a Rwot Obaŋawu, me bed kuno acalo caden i komwu. Pien an aŋeo jemwu kede nwaŋ a ŋutwu; koŋ inen i kare ame an pwod atye kwo, wun ibedo wunu jem i kom Rwot, kara doŋ jemwu bino bedo adwoŋ rom mene i kare ame an doŋ ato oko? Mi odoŋe luŋ me atekerewu ducu cokere karacel baŋa, kede otel a lwak, me akob kop magi kun gin awinyo, me alwoŋ polo kede lobo caden i komgi. Pien aŋea ni ka doŋ ato oko, wun ibino balle wunu oko, kun igak wunu, iweko wunu yo ame acikowu iye oko. Eka icennere, ayelayela bino cako poto i komwu, pien nwoŋo i bedo timo wunu ginnoro arac i nyim Rwot, kun tic ame itio wunu mio akemo make.” Muca rik te kobo kop ame tye i wer man naka tyeko ducu, kun lwak jo Icrael luŋ ame ocokere karacel winyo. “Cik wunu yitwu, wun polo luŋ ka akobo kedwu; wun lobo daŋ winy wunu kop ame aya i doga. Pwony mera myero ony calo kot, koppa myero ton calo toyo, acalo kot ame cwe i kom lum alyabu, dok acalo kot ame aŋido i kom modo, Pien abino rabo nyiŋ Rwot, abino tito dit Obaŋawa.” “En Kidi ame ticcere luŋ roccoro mom iye, pien i yo mere luŋ, en ŋolo kop atira, En Obaŋa ame genne, a mom i balloro, Obaŋa ame kite atira, a mom leŋere, Gin doŋ oballe oko i nyime, gin doŋ mom itino mere pi roc a tye i komgi; gin doŋ jo ogom ame kitegi oballe oko, Wun iculo wunu Rwot kittono, wun jo amiŋ ame ryekogi pe? Mom en obedo papawu ame oketowu? Mom en a rik ocweowu, te miyowu bedo tye? Koŋ ipoyo wunu kop me kare acon, tam wunu gin otimere i mwakkinaca luŋ; peny wunu papawu me titiwu, kede odoŋewu ame gin daŋ kobbiwu. Kare ame En Amalo Meicel omio lobogi baŋ rok apapat, kare ame en popoko jo luŋ, en opoko wan lobo a rok ducu, kun lubo wel itino Obaŋa. Ento dula Rwot ame en opoko obedo jo mere; me re ame en opoko pire en ikokome obedo Yakobo.” “Ento rik onwoŋe i tim, kakannoro arac, a ŋattoro daŋ mom iye; ogure dyere, te gwoke, kun litte calo ton waŋe. Kite ame cur cukoro kede cuny itino mere i ode, teteŋo bwome malo i wigi, yaro bwome, makogi kede, te tinogi i bwome. Rwot kene en a rik obedo telle iyo, obaŋa a rokkoro ocele onwoŋo mom tye baŋe, Omio en oyito malo i lobo kan obedo kidikidi en te camo gin ocek i poto; te miye daŋ doto moo kic i lela, kede moo ame mollo i lela atek; cak dok awac kede cak dyegi, dwolo itino rommi kede me a nyogi rommi, dok me Bacan kede dyegi, karacel kede ŋano aber meicel kede pig olok aber ame imato kono mere.” “Ento Jecurun ocwe atek, te ero gweyo oko; icwe atek ame komi pek, icamo atek; eka ite weko Obaŋa ame oketi oko, ite daŋ cayo kidi ame olari oko. Gin te bedo miyo nyeko make pi obaŋe mogo a wele kun oroke i timmogo me kwer, omio akemo make. Oyalo jogi ame mom obedo obaŋa, obaŋe mogo ame yam gin mom oŋeo, obaŋe mogo anyen ame obino icen, a rik mom opoto cuny kwarigi. Wiwu owil oko i kom Kidi ame obedo papawu, mom daŋ ipo wunu i kom Obaŋa ame omiowu kwo. Kare ame Rwot rik oneno man, cunye ocaogi oko, pien awobe mere kede anyira obedo roke, Omio en te kobo ni, ‘Abino wumo waŋa oko mom dok oneno, me koŋ anen gin ame bino timere i komgi, pien gin obedo lwagi jo ame oballe oko, itino ame mom ogen. Gin omio nyeko omaka pi woro gigi mogo a mom obaŋa, gin obedo roka pi gigi mogo a konygi pe. Pi mannono an doŋ abino miyo nyeko makogi pi yero rok a mom rok ikome, abino miyo rokkoro amiŋ en arokogi. Pien akemona doŋ ocwinyo mac oko, maccono bino waŋ naka i te Cŋol piny, kun waŋo lobo kede ginnoro luŋ a tye iye, dok daŋ bino cwinyo mac i te acakki kiddi luŋ.’ ” “ ‘Abino coko kit raccoro luŋ ayido i komgi, aterona luŋ bino tum i komgi. Kare a doŋ kec omiogi odoko goro, ame doŋ lyeto me two otyekogi oko, karacel kede edeke moro ame kwirrere gwa, abino doŋ cwayo leyi me tim mwodogi oko, karacel kede leyi ame lak alaka ame kwirgi tye. Ka gin tye oko, pala romo bino nekogi, ka otye i ot, lworo bino cirogi oko, awobe kede anyira bino tum oko, itino ame dot kede odoŋe a wigi i lwar. Kono akobo ni, Abino keketogi oko kannabor, abino miyo nyingi rwenyo oko i akina jo, ento alworo ni okwor bino bedo roka, ka ce gin odwanyo gin otimere kun okobo ni, Wan gire en ame oloo, mom Rwot, Rwot gire mom otimo ginnoro kadi acel’.” “Pien gin obedo orok ame ryekogi rwenyo oko, ame niaŋ i te kop loogi oko, Kono gin onwoŋo ryek, kono gin oniaŋ te kop man, kono gin oŋeo gin ame bino timere i komgi. Dano acel twero ryemo jo tutumia i yore aŋo, onyo jo aryo twero miyo jo tutumia apar riŋo i yore aŋo, ka ce Kidigi mom owekogi oko, dok Rwot mom ojalogi i ciŋgi? Pien kidigi mom rom i Kidiwa, akadi okworwa daŋ twero ye amannono. Pien olokgi okelo i Codoma, kun daŋ oya i potti olok me Gomora; piggi tye iye kwir, etakgi daŋ kec; koŋogi obedo kwir twol, kwir a codocodo ager meicel. Magi-nono luŋ mom en gin ame akano baŋa, kun omwomwono oko i ka kano limma? Twer me culo kwor kede culogi pi balgi tye i wia, kuro ka kare ame tyengi bino cer iye; pien nino ame can abino kede i komgi doŋ ceggi acega, cangi-nono abino oyotoyot. Pien Rwot bino miyo jo mere loo kop, dok kica bino make i kom omiro mere, ka oneno ni tekogi moro doŋ mom, ame ŋattoro mom doŋ odoŋ, ame opii onyo a mom opii. En bino kobo ni, ‘Obaŋagi kara tye kwene, kede kidi ame yam gin oriŋo olaro, ame camo dwolgi me mot oŋolo, dok ame mato yino me mot amatagi? Myero gin oya malo me okonywu, myero gin ogwokwu.’ ‘Tin doŋ myero iŋe wunu ni, an kena en ame abedo Obaŋa, mom dok tye obaŋa moro ocele kono ka an keken. An en aneko nek, dok an en a mio kwo; an en a wano dano, dok an en a daŋ a caŋo; gin a doŋ tye i ciŋa, mom tye ŋat a dok twero laro. Pien an atiŋo ciŋa malo i polo, eka ate kwoŋ ni, Kite ame an abedo kede kwo nakanaka-ni, ka apako pala romona me meny, eka ate ryeyo ciŋa me cobo kop ame aŋolo, abino culo kwor i kom okworra, dok abino keto can i kom jo ame daga. Abino miyo aterona mer kede remo pala romona bino camo riŋo, remo a jo ame oneko, kede ame omako kede riŋo kom okwor ame yer wigi olot aboco.’ ” “Pak wunu jo mere, wun rok ducu; pien en bino culo kwor me remo omiro mere, en bino culo kwor i kom okworrere, kun kwanyo kede bal i kom lobo a jo mere.” Muca rik te bino kobo kop ame tye i wer magi luŋ kun kwano ame lwak luŋ awinyo, en karacel kede Yocwa wot a Nuni. Kare ame Muca doŋ otyeko kobo kop magi luŋ baŋ jo Icrael luŋ, en okobbigi ni, “Keto wunu cunywu imako kop magi luŋ, kop ame tin amoko kedwu-ni, me icik wunu itinowu daŋ i kop man, me gin daŋ gwokere me cobo kop luŋ ame tye i cik man. Pien man mom obedo kopporo a konyere mom baŋwu, pien otiko kwowa i kome, ame bino miyo iperakino wunu i lobo ame iwot wunu iye loka Jordan, me wot gamo bedo megwu.” I nino-nono ikome, Rwot rik te kobbi Muca ni, “Yit i wi kidi man me Abarim, kidi me Nebo, ame tye i lobo me Moab, ame otemere kede Jeriko, me inen lobo me Kanaan ame amiyo baŋ jo Icrael me bedo megi. Ibino to doŋ i wi kidi ame iyito-nono, ite wot nywako kabedo kede kwariwu; kite ame ominni Aron oto kede i wi kidi me Kor, te wot nywako kabedo kede kwari mere; pien ituro cikka oko, i nyim jo Icrael i dog pii me Meriba i Kadec i tim me yin, ikwero nyuta i nyim jo Icrael ni an acil, Pien ibino neno lobo-nono i kannabor, cite mom ibino wot donyo i lobo ame abino miyo baŋ jo Icrael.” Kare ame Muca dano Obaŋa mom ru oto, en olammi jo Icrael winyo, kun kobo ni, “Rwot rik obino kun ya i wi Cinai, kun ya i Ceir naka i komwa; kun caro wi kidi me Paran calo ceŋ ame adonyo, obino i joacil tutumia i tutumia, kun leb mac tye alyel i ciŋe tuŋ cem, Ateteni, en rik, onwoŋo maro jo mere, en onwoŋo gwoko jo mere acil luŋ i ciŋe; mannono en omio gin bedo lubo yori, kun yin ipwonyogi, kare ame Muca omio cik pirwa, me bedo gi-alwak a Yakobo. Mannono rik te miyo Rwot doko abaka i Jecurun, kare ame ocoko otel a lwak karacel, kede atekere luŋ me Icrael.” “Obaŋa myero omi Reuben bed kwo, kurto, myero kur mi wel jo mere jwik oko,” Gin ame en okobo i kom Juda ene: “Ama Rwot, winydwon Juda, kele paco baŋ jo mere. Yin ikomi lweny pire, konye lweny i kom okworrere.” Aco i kom Levi en okobo ni, “Mi baŋ Levi Tumim meri, kede Urim meri baŋ ŋat ame lwori, ame yin rik iomo cunye i Maca, en ŋat arik ipyem kede i dog pii me Meriba. En ŋat a rik okobo kop i kom pappere kede tottere ni, ‘Mom aparogira pirgi’; pien okwero daŋ omego mere, itine mere ikome daŋ cunye ocao oko, Gin bino pwonyo Yakobo i gin ame iciko, kun daŋ pwonyo Icrael kede cikki; gin bino waŋo odok akur i nyimi, kede mot aŋola ame owaŋo alutu i wi kenoni me lam, Ama Rwot, mi gum i kom jo mere, dok daŋ igam gin ame en otio, nyon pyer okworrere piny, karacel kede jo a dage, me gin kur dok ya malo.” Aco i kom Benjamin en okobo ni, “Ŋat ame Rwot maro, en bedo i laŋete kun bedo kede kuc; Rwot gwoke kare ducu, kun bedo i akina kiddi mere.” Aco i kom Yucepu en te kobo ni, “Myero Rwot mi gum i lobo mere, kede mot abeco ame ya i polo, kede en ame bino pi pii atut ame opoŋ ite lobo piny, kede gigi mogo abeco ame cek pi ceŋ kede gigi mogo abeco ame cek pi dwe acel acel, kede cammogo abeco ame cek i wi kiddi mogo ame operakino kede jami acek abup i wi tur a ri nakanaka, kede mot abeco ame oya i lobo kede jami luŋ iye, kede winyo a ŋat a rik obedo i yat obuŋere, Rwot myero mi gummono luŋ joye i wi Yucepu kede i ataddi wi ŋat ame oyero i akina omego mere, Atin twonnere me kao tye kede kwogo tuŋe calli me a twon jobi me tim, en bedo coro rok luŋ i tuŋe-nono, tuno kedgi luŋ i agikki me lobo; jo-nono gin jo Epraim tutumia apar, jo-nono gin jo a Manace tutumia i tutumia.” Aco i kom Jabulon en te kobo ni, “Cunyi myero bed yom, yin Jabulon, ka iwot oko; kede yin Icakar daŋ i kemani, Gin bino lwoŋo rok ocele i wi kidigi, kan ame gin mio iye mot oŋolo ame tye kakare, pien gin bino coko lim i nam oko, kede kit lonyo luŋ ame okanne i kwoyo.” Aco i kom Gad en te kobo ni, “Rwot myero mi winyo bed i kom ŋat a nyao waŋ lobo a Gad Gad buta piny calo eŋatu, kun kikilo bad lee kede wie. En oyero lobo aberrere pire kene, i kan ame onwoŋo owekke iye lobo atel me mony; en te wot baŋ otel wi lwak kun notte karacel Icrael me cobo kop a Rwot oŋolo.” Aco i kom Dan en te kobo ni, “Dan obedo atin eŋatu, ame kirre i ŋwec kun ya i Bacan.” Aco i kom Naputali en te kobo ni, “Naputali wee, Rwot omii gum, me ibed twon alonyo me winyo a Rwot nam daŋ myero bed megi giri kede lobo me tuŋ anyarodi.” Aco i kom Acer en te kobo ni, “Rwot myero mi Acer bed atin a kome gum kato itino ducu en bed ŋat omaro meicel i akina omego mere en bed ŋat a lwoko tyene kede moo, Acer, dogcel me paconi myero obed nyonyo kede mola, tek komi myero medde ameda ito.” “Yin Jecurun, ŋattoro be mom acalo Obaŋa, ame ŋweco baro polo me bino konyi, kun beo i kwogo mere i dye pol. Obaŋa ame rik tye con i con-ni en ame kabedoni, kare luŋ ciŋe tye piny me tiŋi malo, En oryemo okwor oko i nyimi, kun kobo ni, ‘Tyekgi oko,’ Mannono omio Icrael obedo i kuc, ikwae a Yakobo te bedo gigi aboŋo ayela moro, lobo ame kal kede koŋo olok dwoŋ iye ata; kan ame toyo totona i polo bido lobo. Yin Icrael, ŋa kara a yie yom calo yin, yin rok ame Rwot rik olaro Rwot en obedo kwot me geŋereni, kede pala romoni ame omii iloo piny, Okwori bino miye kengi baŋi, tyeni bino nyono kabedogi luŋ, ame tye i wi atenni kiddi.” Muca rik te ya i bar me Moab, wot i wi kidi me Nebo, i wi atenni me Piciga malo, ame otikere kede Jeriko. Rwot te nyutte lobo luŋ, cakere i Gilead tuno naka i Dan, kede Naputali luŋ, kede lobo Epraim kede Manace, lobo me Juda luŋ tuno kede naka i nam me tuŋ to, Negeb kede lobo ame obedo bar, ame en aye luŋ me Jeriko, ame obedo boma me otit, tuno kede naka i Joar. Rwot te kobbi Muca ni, “Man en lobo ame rik akwoŋo pire baŋ Iburaim, baŋ Icaka, kede baŋ Yakobo, ni abino miyo baŋ ikwaegi. An doŋ amii ineno kede waŋi, cite yin mom ibino tuno iye kuno,” Muca ame obedo amiro a Rwot, rik te to kuno i lobo me Moab, kun lubo gin ame Rwot onwoŋo okobo; rik ote yike kuno i luŋ ame tye i lobo Moab ame otikere i Ber-peor, cite mom tye ŋattoro ame ŋeo kan ame oyike iye-nono naka atot tin. Kare ame en to, onwoŋo doŋ mwaka me dittere romo mia acel kede pyeraryo; waŋe onwoŋo mom ru ocoro, dok daŋ onwoŋo pwod twon lomoro ame teko mere mom ru odok cen. Jo Icrael rik te koke i bar me Moab pi nino pyeradek; eka nino me koke kede kumo pire rik doŋ te tum. Pien Muca rik onwoŋo oketo ciŋe i kom Yocwa wot a Nuni omio cuny me ryeko rik te poŋ i kome; mannono te miyo jo Icrael bedo winye, te daŋ bedo tic kite a Rwot rik ociko kede Muca. Cakere i kare-naca mom dok tye adwarpinnyoro ame oya i akina jo Icrael ame rom kede Muca, ame Rwot rik ŋeye kede waŋ i waŋ. Mom tye ŋattoro a dok cal kede ka itamo pi anyut, taŋo me awura ame Rwot rikomio en obedo tiyo i Miciri, baŋ Parao kede omiro mere luŋ kede lobo mere luŋ, kede dok ka itamo pi twoni gigi mogo adoŋodoŋo, dok daŋ iyiliyili, ame en obedo tiyo kun jo Icrael luŋ neno kede waŋgi. I ŋe to a Muca ame obedo amiro a Rwot, Rwot okobbi Yocwa wot a Nuni, amiro a Muca ni, “Amirona Muca doŋ oto oko; pi mannono yin aman doŋ ya iwot Jordan-ni, yin karacel kede jo man luŋ, me idony wunu i lobo ame an amiyogi, gin jo Icrael. Kabedo acel acel ame tyenwu bino nyono nwoŋo doŋ atyeko miyowu oko kite a rik aciko kede baŋ Muca, Cakere i tim kede i Lebanon kan, tuno naka i twoŋ kulo adwoŋ me kulo Efurate, lobo a jo Kitti luŋ naka dok kede i Nam Adwoŋ ame tye tutuŋ to, mano luŋ bino bedo lobowu. Mom gire tye ŋattoro kadi acel ame bino cuŋ i nyimi pi kare me kwo meri luŋ. Abino bedo kedi arom aroma i kite a rik abedo kede Muca; mom abino boli, dok mom abino weki ata. Cuŋ atek ame cunyi nwaŋ pien yin ibino miyo jo man leo lobo ame rik akwoŋo pire baŋ kwarigi ni abino miyogi. Yin myero ka icuŋ atek ame cunyi nwaŋ meicel, kun daŋ igwokere i cobo cik luŋ kite a rik amirona Muca ociki iye; kur igak iye oko i te dok i ciŋi tuŋ cem onyo tuŋ cam, me wek nyimi bed a myero i jami luŋ i kabedo luŋ ame iwoto iye. Buk cik-ki koppere mom bino rwenyo i dogi, ento bino bedo i cunyi dyeceŋ kede dyewor, me wek igwokere icobo kop luŋ kite ame ocoo kede i yie. Mannono bino miyo yori bedo aber, eka nyimi te bedo a myero i jami luŋ. Mom aciki? Yin cuŋ atek ame cunyi nwaŋ. Kur ibed alwor, cunyi daŋ kur poti, pien Rwot Obaŋani tye kedi i kabedo luŋ ame ibino wot iye.” Yocwa te ciko otel a lwak ni, “Bebea wunu i dye gony, icik wunu jo ni, ‘Yik wunu pekewu me dwoko lao iyo, pien odoŋ i nino adek keken ibino wunu ŋolo Jordan, me iwot i gam wunu lobo ame Rwot Obaŋawu omiowu me bedo megwu.’ ” Yocwa te kobo baŋ jo a Reuben, jo a Gad kede nucu atekere a Manace, ni mano, “Poyo wunu kop ame rik Muca amiro a Rwot ocikowu kede ni, ‘Rwot Obaŋawu bino miyowu ka weo, dok bino miyowu lobo man.’ Monwu, itinowu kede limwu luŋ bino doŋ i lobo ame Muca rik omiowu i ŋe Jordan, ento co luŋ i akinawu ame tek i romo bino kato loka kun omako jami lweny otelo kede nyim omegowu, me wot konyogi; naka waŋ ame Rwot omio weo baŋ omegowu, bala wun, dok gin daŋ ogamo lobo ame Rwot Obaŋawu amiyogi. Wun ite doŋ dwogo wunu i lobo ame omiowu, ite bedo wunu iye, en lobo ame Muca amiro a Rwot omiowu i ŋe Jordan tuŋ kide. Gin te dokki Yocwa ni, ‘Ginnoro luŋ ame icikowa iye, wan obino tiyo; dok kannoro luŋ ame ibino cwalowa iye, wan obino wot. Kite a rik owinyo kede Muca i kopporo luŋ, obino daŋ winyo megi kittono; Rwot Obaŋani en a myero ka bed kedi, kite a rik obedo i Muca.’ Ŋattoro keken ame bino jem i gin iciko eka mom te winyo koppi, i ginnoro luŋ ame icike iye, dano-nono obino neko aneka. Yin myero ka icuŋ atek ame cunyi nwaŋ.” Yocwa wot a Nuni te oro jo aryo i muŋ wot roto piny kun gin oya i Cittim, ocikogi ni, “Wot irot wunu lobo, cite akato mere Jeriko.” Gin owoto eka ote tuno i ot alaya moro a nyiŋe Rakab, gin te buta kuno. Jo te kobbi rwot me Jeriko ni, “Nen ba, jo mogo me Icrael obino kan tin dyewor me roto lobo.” Rwot me Jeriko te cwayo kwena baŋ Rakab kun kobo ni, “Kel jo ame obino baŋi, ame odonyo i odi, pien gin obino me roto lobo luŋ.” Ento dako-naca onwoŋo otero jo aryo-nu te kanogi oko; eka en te dok iye ni, “Ateni, co mogo onwoŋo obino baŋa, cite an onwoŋo mom aŋeo kan ame gin oya iye. I kare ame onwoŋo doŋ oceggi cego dogcel me boma ame piny doŋ iribiribi, jo-nono te kato oko, mom dok aŋeo kan ame gin owoto iye. Ryem wunu yorgi oyotoyot, ibino wunu makogi oko.” En onwoŋo oterogi malo i wi ot, te wumogi kede tole nino ame ocano acaŋa malo i iw ot. Jo-nono te ryemo yorgi iyo a dok tutuŋ Jordan, naka i pi i acecep. I kare ame jo oryemo yorgi okato oko, ote ru cego dogcel oko. Kare ame gin mom ru obuto, dano-nu te bino baŋgi i wi ot, te kobo baŋ jo-nono ni, “An aŋeo ni Rwot doŋ omiowu lobo man, dok daŋ lworo doŋ omakowa i komwu, jo luŋ ame tye i lobo-ni komgi doŋ oonyo koyo oko pirwu, Pien wan owinyo kite ame Rwot odwono kede pii me Nam arema i nyimwu, i kare ame iya wunu i lobo Miciri, karacel kede gin ame itimo wunu i kom obakki aryo me a jo Amor ame onwoŋo tye i ŋe Jordan, Cikon kede Og, ame ijwero wunu kom luŋ aluŋa. Tekki owinyo, koyo te ru oonyere oko i komwa, ame ŋattoro mom odoŋ kadi acel ame cunye onwoŋo tek. Mano kom otimere pirwu, pien Rwot Obaŋawu en Obaŋa ame tye malo i polo kede piny i lobo. Aman doŋ ba, kwoŋ wunu baŋa i nyim Rwot ni, kite acalo an atimowu ber, wun daŋ ibino timo wunu ot a pappa ber, kun imio wunu anennoro ame moko kwoŋwu, me igwok wunu kwo a pappa kede totta kede omegona kede amegona kede jo luŋ ame tye baŋgi, ilarwa wunu kur oto.” Jo-nu te dokke iye ni, “Twara kwowa en arweny akaka megwu! Ka ce mom ikobo wunu kopporo i kopwa-ni, wan obino terowu aber dok i gen i kare ame Rwot bino miyowa lobo man.” En doŋ te cwayogi piny iwaŋ dirica kun cwaogi kede tol; pien ode onwoŋo okubere i cel me boma, en onwoŋo bedo iyi cel. Ocikogi ni, “Koŋ iwot wunu i wi kiddi, me jo a ryemo yorwu kur cop i komwu; pon wunu kuno nino adek, ituno ka jo oryemo yorwu odwogo, eka ite doŋ wot wunu giwu.” Jo-nu te dokke iye ni, “Wan mom obino bedo i balloro i kwoŋ ame imiowa okwoŋo ka ce mom itimo man. Nen ba, i kare ame wan obino bino i lobo man, myero inen ni itweo tol arema i waŋ dirica kan ame icwaowa iye-ni, dok daŋ myero imi jo-ni luŋ bed i ot baŋi: pappi, totti, omegoni, amegoni, kede jo luŋ ame tye i ot a pappi. Ka ce dano moro odonyo oko i odi eka te wot i waŋayo, remo mere obino bedo gire i wie, wan giwa mom obino bedo i balloro; ento ka ciŋ ŋattoro ogudo dano moro ame tye i ot baŋi, remo mere bino bedo i wiwa. Ento ka ikobo kopporo i kopwa-ni, wan giwa mom obino bedo i balloro i kwoŋ ame imiowa okwoŋo.” En te dok iye ni, “Koŋ doŋ bed kite ame ikobo wunu.” Ocikogi, eka gin te wot; en te tweyo tol arema iwaŋ dirica. Gin oya i kuno ote wot i wi kiddi. Gin te bedo kuno nino adek, naka waŋ ame jo oryemo yorgi odok cen, pien jo ame oryemo yorgi onwoŋo obedo yenyogi i yo luŋ, mom ote nwoŋogi. Jo aryo-nu te doŋ dwogo piny i wi kiddi, ote ŋolo kulo, bi no baŋ Yocwa wot a Nuni; gin te titte kop luŋ ame otimere i komgi. Gin okobbi Yocwa ni, “Ateni, Rwot otyeko miyo lobo luŋ i ciŋwa, dok daŋ medo kede manno, jo luŋ ame bedo i lobonono cunygi doŋ oto oko pirwa.” Yocwa opuk ka ibayi te ya oko i Cittim karacel kede jo Icrael luŋ. Gin obino i Jordan ote buto kuno kun mom ru oŋolo kulo. Kare ame nino adek doŋ okato otel a lwak te bebea i gony, kun gin cikogi ni, “Ka ineno wunu canduk cikere a Rwot Obaŋawu ame olamdog ame gin jo Levi tye adyelo, ya wunu oko i kabedowu ite lubo wunu yore, me iŋe wunu yo ame ilubo wunu, pien yam mom ru ibeo wunu kan con. Kadi amanno, myero akinawu kede canduk cikere lagoro.” Yocwa dok te ciko jo ni, “Lonyere wunu kenwu, pien diki Rwot bino tiyo tic me awura i akinawu.” Yocwa dok te ciko daŋ olamdog ni, “Tiŋ wunu canduk cikere, me ikat wunu i nyim lwak.” Gin daŋ ote tiŋo canduk cikere, ote telo kede nyim lwak. Rwot te kobbi Yocwa ni, “Tin abino cako miyi dit i nyim lwak jo Icrael, me gin ŋe ni, kite a rik abedo i Muca, abino bedo kedi daŋ kittono. Ibino ciko olamdog ame otiŋo canduk cikere ni, ‘Ka ituno wunu i ŋet pii me Jordan, myero koŋi cuŋ wunu i kulo Jordan.’ ” Yocwa te ciko lwak jo Icrael ni, “Bye wunu kan me ibin iwiny wunu kop a Rwot Obaŋawu.” Yocwa dok te tittigi ni, “Man bino miyo iŋeo wunu ni Obaŋa akwo tye i akinawa, dok daŋ mom bino weko ryemo yo jo Kanaan i nyimwu, kede jo Kitti, jo Kivi, jo Periji kede jo Girgac, jo Amor karacel kede jo Jebuc. Nen wunu ba, canduk cikere a Rwot me wi podo luŋ bino telo nyimwu i ŋolo kulo Jordan. Pi mannono, aman yer wunu jo apar wie aryo i kom atekere apar wie aryo me Icrael, kun iyi atekere acel acel ya iye dano acel. Doŋ i kare ame tyen olamdog ame otiŋo canduk cikere a Rwot, ame en Rwot me wi podo luŋ, bi no cuŋ i pii me Jordan, pii me Jordan bino cuŋ oko kun mol, eka pii ame onwoŋo amol abino i malo te cokere karacel.” Eka lwak te ya i kemagi me ŋolo kulo Jordan kun olamdog tiŋo canduk cikere telo nyim lwak. Kare ame olamdog otiŋo canduk cikere otuno i kulo Jordan, eka tyengi te lutte i pii i ŋet kulo, pien kulo Jordan onwoŋo poŋ lapakino atata kare luŋ naka i kare ame jo tye akayo kal-gu, pii ame onwoŋo amollo abino i malo te cuŋ oko, te cokere karacel i bim malo kanabor i Adam, ame en boma a tye i ŋet Caretan, kede pii ame onwoŋo amol adok piny tutuŋ Nam me Araba, ame en Nam me kado, ginnoro luŋ te cot oko; jo doŋ te ŋolo i kan otemere i Jeriko. Kare ame jo Icrael luŋ onwoŋo aŋolo kulo kun owoto gigi kan otwo, olamdog ame otiŋo canduk cikere a Rwot onwoŋo ocuŋ kan otwo i dye Jordan, naka ka rok luŋ doŋ oŋolo Jordan. Kare ame rokgi-nono luŋ doŋ oŋolo Jordan, Rwot te kobbi Yocwa ni, “Yer jo apar wie aryo i akina lwak, kun iyi atekere acel acel ya iye dano acel, myero icikgi ni, ‘Kwany wunu gweŋe apar wie aryo i dye Jordan kan, i kakan ame tyen olamdog ocuŋ iye ikokome, ye wunu iwot wunu kede loka, wot iket wunu kan ame tin ibino buto wunu iye.’ ” Yocwa te lwoŋo jo apar wie aryo i kom lwak jo Icrael ame onwoŋo yam en oyero con, dano acel acel i atekere acel acel; te dok kobbigi ni, “Kat wunu i nyim canduk cikere a Rwot Obaŋawu i dye Jordan. Ŋat acel acel myero tiŋ gweŋ acel i wi gwoke, kun lubo kite ame wel atekere a jo Icrael tye kede, me wek man bed anen i akinawu. Ka itinowu bino penyowu i kare i nyim ni, ‘Kara gweŋe-nu te koppere ŋo baŋwu? Wun ibino tittigi ni, pii me Jordan rik obin ocot oko i nyim canduk a Rwot, kare ame wan oŋolo Jordan, pii me Jordan ocot oko. Pi mannono gweŋe-nu bino bedo me poyo wi jo Icrael nakanaka.’ ” Jo Icrael te daŋ tiyo kite ame Yocwa okobbigi; gin te kwanyo gweŋe apar wie aryo i dye Jordan kite acalo wel atekere a jo Icrael tye kede, kite a Rwot ociko kede Yocwa. Gin oyeo ote wot kede loka kan ame gin obuto iye, eka ote cibogi piny kuno. Yocwa te cano gweŋe apar wie aryo-nono cuŋ i dye Jordan kakan ame tyen olamdog ame otiŋo canduk cikere onwoŋo ocuŋ iye. Gweŋe-nono tye kuno naka atot tin. Pien olamdog ame rik otiŋo canduk cikere rik ocuŋ i dye Jordan naka ka lwak doŋ ocobo gin ducu ame rik Rwot ociko Yocwa ni kobbigi otim, kun lubo kop luŋ a rik Muca ociko kede Yocwa. Jo te ru kato oko loka. Kare ame jo luŋ doŋ okato loka oko, canduk cikere a Rwot kede olamdog te kato doŋ i nyim lwak. Jo Reuben, jo Gad kede nucu atekere a Manace te kato loka i nyim jo Icrael kun gin omako jami lweny kite a rik Muca ocikogi kede. Jo onwoŋo ceggi romo tutumia pyeraŋwen ame okato loka i i nyim Rwot kun oyikere i jami lweny me wot lweny i bar me Jeriko. Nino-nono Rwot omio Yocwa dit i nyim jo Icrael luŋ, gin daŋ, ote lwore kite a rik gin olworo kede Muca pi kare luŋ me kwo mere. Rwot dok te kobo baŋ Yocwa ni, “Cik olamdog ame otiŋo canduk cikere me ya oko i Jordan.” Yocwa te ciko olamdog ni, “Biye wunu, iya wunu oko i Jordan.” Olamdog te tiŋo canduk cikere a Rwot te ya oko i Jordan; kare ame tyen olamdog onyono kan otwo, pii me Jordan te dok gire kakare, te poŋ lapakino atata kite a yam con. Jo rik te ya oko i Jordan i nino dwe apar me dwe me agege, gin te bedo koŋ i gonygi i Gilgal, i waŋ apokki me Jeriko i tuŋ kide. Yocwa te cano gweŋe apar wie aryo arik okwanyo i Jordan ca i Gilgal. Eka te kobbi jo Icrael ni, “Ka waŋŋoro ikwaewu bino penyo pappigi ni, ‘Kara gweŋe-nu te koppere no?’ Wun ibino wunu miyogi oŋeo ni, ‘Icrael rik obin oŋolo Jordan man ame otwo.’ Pien Rwot Obaŋwu rik omio pii me Jordan odwono pirwu naka wun ikato wunu loka, kite a Rwot Obaŋawu rik otimo i kom Nam Arema, ame daŋ obin odwono oko pirwu naka ka wun ikato wunu loka, me rok luŋ me wi podo ŋe ni, Rwot ciŋe tek meicel; me gin obed i lworo baŋ Rwot Obaŋawu nakanaka.” Kare ame rwode luŋ me jo Amor rik tye i ŋe Jordan tuŋ to, karacel kede rwode a jo Kanaan luŋ rik tye i dog nam, owinyo ni Rwot omio pii me Jordan odwono pi jo Icrael naka ka gin okato loka, komgi doŋ te onyo koyo oko, mom doŋ ote bedo i tekcunyoro pi lworo jo Icrael. I kare-nono Rwot te kobbi Yocwa ni, “Yik pala gweŋ, me dok imed liro jo Icrael tyen me aryo.” Yocwa te rabo pala me gweŋ, te liro kede jo Icrael i Gibea-kaaralot. Gin omio Yocwa dok omedo lirogi ene: pien co luŋ ame onwoŋo oya i Miciri, ame onwoŋo romo lweny, gin luŋ rik oto oko iyo, i tim, kun gin doŋ onwoŋo oya oko i Miciri. Kadi bed rik jo luŋ ame oya i Miciri rik olirogi, cite jo luŋ mom onywalo i yo i itim, i kare ame gin oya oko i Miciri, mom onwoŋo olirogi. Pien jo Icrael obedo wowota i tim pi mwakki pyeraŋwen, tuno waŋ ame rok luŋ, co luŋ ame romo lweny, oto oko pi kwero winyo dog Rwot. Rwot rik onwoŋo okwoŋo baŋgi ni mom ebino ye gin neno lobo ame en rik ekwoŋo pire baŋ kwarigi ni ebino miyowa; lobo ame opoŋ i cak kede moo kic dwoŋ iye meicel. Doŋ itinogi ame en omio me leyo kakargi, en ame Yocwa rik olirogi, pien rik onwoŋo mom ru olirogi, rik mom olirogi iyo. Kare ame liro rokkono luŋ doŋ otum, gin te bedo i gonygi kannono tuno wan ame jo ocaŋ. Rwot te kobbi Yocwa ni, “Tin doŋ akwanyo lewic me Miciri oko i komwu.” Mannono te miyo olwoŋo nyiŋ kabedo-nono ni Gilgal naka atot tin. I kare ame jo Icrael pwod tye i Gilgal, gin okwero ecuban me Kato, i nino dwe apar wie aŋwen otyeno, i bar me Jeriko. Orwo mere a doŋ otyeko kwero ecuban me Kato, i nino-nono ikoome, gin te cako bilo gin ame ocek i lobo-nono, ogati a tobi mom iye kede kai ame ocelo. I kare ame gin doŋ ocamo gin ame ocek i lobo-nono, odiko mere ocele manna te gik oko; jo Icrael mom dok te medde nwoŋo manna, i mwaka-nono gin doŋ te camo cam ocek i lobo Kanaan. Kare ame Yocwa onwoŋo tye ceggi i Jeriko, otiŋo waŋe malo te neno dano moro ame onwoŋo omako pala lweny i ciŋe kun tye ocuŋ i nyime. Yocwa te wot naka atot baŋe, te penye ni, “Yin itye tuŋ baŋwa onyo ca tuŋ baŋ okworwa?” En te dok iye ni, “Pe gire; cite aman abino acalo atel wi mony a Rwot.” Yocwa te ryebere piny, te wore, te penye ni, “Kara Rwotta mito ciko amiro mere niŋo?” Atel-wi mony a Rwot te kobbi Yocwa ni, “Gony amuk i tyeni oko, pien kan i cuŋ iye-nono obedo kan acil.” Yocwa daŋ te timo kittono. I kare-nono onwoŋo rik ocego Jeriko atek meicel, anaka oko mere, me ŋattoro kur donyo oko dok dano daŋ kur dony i yie. Rwot te kobbi Yocwa ni, “Nen, doŋ amio Jeriko oko ciŋi, karacel kede rwottere kede jo luŋ atek i lweny. Jo luŋ ame romo lweny bino dorre mano boma man tyen acel; ibino bedo timo wunu kittono pi nino abicel. Olamdog abiro bino mako apel abiro me tuŋ rommi kun owoto kede i nyim canduk. I nino me abiro mere ibino dorre imanno wunu boma man tyen abiro kun olamdog kuto apel. Kare ame gin okuto tuŋ romo kun ri nakanaka, oyot ka iwinyo wunu opel kun kok kittono, lwak luŋ bino putte i woo kun owo i twon dwonnogo aloŋo; cel me Jeriko bino ŋoye piny luŋ, jo luŋ bino wot iye kun ŋat acel acel tiko nyime atir.” Yocwa wot a Nuni te lwoŋo olamdog, te kobbigi ni, “Tiŋ wunu canduk cikere, olamdog abiro mak apel abiro me tuŋ nyogi rommi owot kede i nyim canduk cikere a Rwot.” Dok te kobbi lwak ni, “Dorre wunu iwot wunu anyim, iwot iman wunu boma kun jo ame omako jami lweny telo nyim canduk a Rwot.” Olamdog abiro te mako apel abiro me tuŋ nyogi rommi telo kede nyim Rwot kun okuto owoto kede anyim, karacel kede canduk cikere a Rwot ame alubo yorgi, kite a rik Yocwa ociko kede lwak. Jo ame omako jami lweny onwoŋo otelo nyim olamdog ame tye akuto apel eka jo ame odoŋ cen te lubo ŋe canduk kun apel kok nakanaka. Ento Yocwa dok te ciko lwak ni, “Mom ibino wo wunu, dwonwu daŋ mom myero winyere kadi acel, dok daŋ mom ibino wunu kop kadi acel, tuno i nino ame abino cikowu iye ni doŋ iwo wunu, en amio ite doŋ wo wunu.” En doŋ te miyo canduk a Rwot cako mano boma, kun mano tyen acel keken, eka gin gigi te dok i gonygi buto iye. Yocwa dok te dilo i bayi, olamdog te tiŋo canduk a Rwot. Olamdog abiro te mako apel abiro me tuŋ rommi telo kede nyim canduk a Rwot kun okuto apel nakanaka owoto kede anyim; jo ame omako jami lweny onwoŋo otelo nyimgi, eka jo ame odoŋ cen te lubo canduk a Rwot, kun apel kok nakanaka. I nino me aryo daŋ gin te dorre mano boma tyen acel keken, gin gigi te dok i gonygi. Gin te bedo mano boma kittono pi nino abicel. I nino me abiro mere gin te dilo con atek ame piny pwod awalakino; gin te bedo dorre mano boma i kite acellaca tyen abiro. I nino-nono keken en ame gin omano iye boma tyen abiro. Tyen me abiro mere, i kare ame olamdog doŋ okuto apel. Yocwa te kobbi jo ni, “Wo wunu doŋ, pien Rwot doŋ omiowa boma oko. Boma kede jami luŋ a tye iye obino jalo luŋ baŋ Rwot me aneka. Rakab ame alaya keken, kede jo luŋ a tye i ot baŋe, en ame bino bedo kwo; pien en a rik okano jo ame ocwao me roto piny. Ento wun myero igwokere wunu i kom jami ame doŋ otyeko jalo me aneka, kur dok ikwany wunu ginnoro i kom jami ame doŋ ijalo wunu oko me aneka pi Obaŋa, naka mio gony a jo Icrael doko me aneka luŋ, te kela ayela i komwu. Ento ryal, kede jabu kede jami luŋ me mola kede me nyonyo, gin luŋ gi-a Rwot acil gin luŋ obino tero i ka kano lim a Rwot.” Jo doŋ te wo, opel te kok. Tekki jo winyo apel okok, jo luŋ te putte i woo kun owo i twon dwonnogo aloŋo, eka cel te ŋoye piny luŋ, jo luŋ te donyo i boma kun ŋat acel acel tiko nyime atir, gin te gamo boma-nono oko, Gin te neko jami luŋ ame tye i boma anaka co kede mon, itino kede odoŋe, dok kede rommi kede kana, gin luŋ ote tyekogi oko i pala lweny. Yocwa te kobbi jo aryo a rik oroto lobo ni, “Wot wunu naka i ot alaya ca, iwot ikel wunu dako-nono oko, kede jo luŋ ame tye baŋe.” Awobe aryo a rik oroto piny te daŋ wot kittono i ot alaya, ote donyo iye, kelo Rakab kede pappere, kede tottere, kede omego mere kede jami mere luŋ a rik tye baŋe; gin okelo wati mere luŋ ote ketogi oko i ŋe gony a jo Icrael. Eka ote waŋo boma-nono oko i mac, karacel kede jami luŋ ame tye iye; ryal, jabu, kede jami me mola kede nyonyo keken en ame gin oketo i ka kano lim me ot a Rwot. Yocwa te gwoko kwo a Rakab ame alaya, kede jo me ot a pappere kede jo luŋ a rik tye baŋe. Dako-nono gire te bedo iyi Icrael naka atot tin, pien en okano orot piny ame rik Yocwa ocwao me roto Jeriko. Yocwa rik te miyogi kwoŋ i karenaca kun okobo ni, “Dano moro ame bino ya te dok gero boma man me Jeriko, myero cen oko i nyim Rwot. “Bino cano acakki tere kun nwoŋo wode me kao koŋ oto, aco dog cellere en bino guro nwoŋo cogo mere koŋ oto.” Rwot rik obedo i Yocwa kittono, nyiŋe orwo i lobo nono luŋ. Ento jo Icrael mom obedo ogen i kom jami a rik doŋ otyeko jalo pi Rwot, pien Akan wot a Karmi, wot a Jabdi, wot a Jera, me atekere a Juda, obin okwanyo jami mogo ame rik doŋ ojalo oko; omio akemo omako Rwot atek i kom jo Icrael. Kare ame Yocwa tye i Jeriko ocwao jo me wot Ai, ame ceggi kede Bet-awen, ame tye tuŋ kide me Betel, ocikogi ni, “Wot irot wunu piny.” Jo-nu rik te roto Ai. Kare ame gin odwogo baŋ Yocwa, gin okobbe ni, “Myero kur imi jowa luŋ wot kuno, mi ka jo a romo tutumia aryo onyo tutumia adek en ame wot lweny i kom jo Ai. Kur iwek jowa luŋ lolle me wot kuno, pien jo-nono mom pol wok.” Mannono te miyo jo ame ceggi romo tutumia adek oya i akina lwak te wot kuno, cite gin te wot riŋo oko i nyim jo Ai. Jo Ai rik te neko jo mogo i akinagi ame ceggi romo pyeradek wie abicel; dok daŋ ote ryemogi cakere i dog cel naka tuno i Cebarim, eka ote nekogi oko i luŋ. Koyo te onnyere atek i cuny jo, kom jo te kwil bala pii. Yocwa te ye yeco boŋŋi mere oko, te rette piny aryeba cuny i nyim canduk a Rwot, te ri kannono naka otyeno, en karacel kede otel a jo Icrael, kun daŋ oonyo apua i wigi. Yocwa te kobo ni, “Aman Rwot OBAŊA, piŋo kara ikelo jo man kan i ŋe Jordan, me bino miyowa i ciŋ jo Amor me tyekwa oko? Kono rik giwa oye bedo loka i ŋe Jordan! Ama Rwot, kara doŋ akob ŋo ba, kun doŋ jo Icrael oloko ŋegi oko baŋ okworgi! Pien ka jo Kanaan kede jo luŋ ame bedo i lobo man bino winyo, gin bino gurowa, eka ote miyo nyiŋwa rwenyo oko i wi lobo; kara yin doŋ ibino tamo gin aŋo pi twon nyiŋi ame dwoŋ wok-ki?” Rwot te kobbi Yocwa ni, “Ya malo, piŋo kara irette piny aryeba cuny? Icrael otimo bal; gin oturo cikka ame acikogi kede, gin okwanyo jami mogo i kom jami ame rik doŋ ojalo oko baŋa. Gin okwalo kwo, okobo kop me goba, eka ote keto jami-nono i akina jamigi. Pi mannono Icrael mom twero cuŋ kadi acel i nyim okworgi; gin oloko ŋegi baŋ okworgi pien gin doŋ olokere odoko gin ame myero jal me aneka. Mom abino medde bedo kedwu, ka mom ikwanyo wunu gin ame ojalo baŋa oko i akinawu. Ya doŋ malo imi jo lonyere, ite kobbigi ni, ‘Lonyere wunu kenwu pi diki, pien Rwot Obaŋa me Icrael okobo ni, “Jami ame ojalo baŋa tye i akinawu, wun jo Icrael. Mom itwero cuŋ i nyim okworwu tuno waŋ ame ikwanyo wunu jami ame rik ojalo baŋa oko i akinawu.” Pi mannono, diki odiko obino kelowu ceggi kun ibino wunu atekere atekere; doŋ atekere ame Rwot okwanyo bino bino ceggi kun obino i doggola i doggola; eka doggola a dok Rwot okwanyo te bino ceggi kun obino i ot i ot; ot a dok Rwot okwanyo te bino ceggi kun obino dano acel acel. Ŋat ame Rwot okwanyo ame tye kede jami ame onwoŋo ojalo baŋa, obino waŋo awaŋa kede mac, kun owaŋe karacel kede jami luŋ ame en tye kede, pien en oturo cik a Rwot, dok en otyeko timo tim me lewic iyi Icrael.’ ” Yocwa rik daŋ te dilo ibayi te kelo jo Icrael ceggi kun kelogi atekere atekere; rik ote kwanyo atekere a Juda. Yocwa dok te kelo jo me atekere a Juda, eka ote kwanyo doggola a Jera, ote dok kelo doggola a Jera ceggi, kun okelogi acel acel, eka ote kwanyo Jabdi. Dok ote kela jo me doggola a Jabdi acel acel, ote kwanyo Akan wot a Kamri, wot a Jabdi, wot a Jera ame tye i atekere a Juda. Yocwa te kobbi Akan ni, “Woda, mi kwogo baŋ Obaŋa a jo Icrael, dok daŋ ipake, me ititta amanni gin ame doŋ itio; kur imuŋa.” Akan te kobbi Yocwa ni, “Me ateni, an abalo baŋ Rwot Obaŋa a jo Icrael; gin ame rik atimo ene; i kare ame rik aneno boŋo moro aber ame oya i Cinar kun tye i akina jami ame oyako, kede cekel me ryal mia aryo, kede jabu moro ame pekkere romo cekel pyerabic, ate cako bedo i miti komgi, omio ate kwanyogi oko. Nen ba, tye ayikogi piny i lobo i kemana, ryal daŋ tye i tergi piny kuno.” Yocwa doŋ te cwayo kwena, gin te ŋwec i kema mere; nen ba, gin te nwoŋo tye okano i kema mere, kun ryal tye i tere piny. Gin te kwanyo oko i kema, ote ke lo baŋ Yocwa kede baŋ jo Icrael luŋ, gin te keto piny i nyim Rwot. Yocwa kede jo Icrael luŋ te tero Akan wot a Jera kede ryal, kede boŋo kede jabu kede itino awobe kede anyira, kede twoni kane kede rommi, kema mere kede jami mere ducu, ote tero i luŋ me Akor. Yocwa te kobo ni, “Piŋo kara ikelo can i komwa? Rwot bino keto can i komi tin.” Jo Icrael luŋ te na napo en kede gweŋe. Gin te coko gweŋe apipim yido i kome ame pwod tye naka atot tin. Twon akemo ame rik onwoŋo omako Rwot te kwe oko. Mannono omio ote lwoŋo nyiŋ kabedo-nono ni, “Luŋ me Akor”, naka atot tin. Rwot okobbi Yocwa ni, “Kur ilwor, cunyi daŋ kur poti, ya, iwot Ai, ter jo luŋ a romo lweny. Nen ba, atyeko doŋ miyo Rwot me Ai i ciŋi karacel kede jo mere luŋ kede boma mere kede lobo mere. Gin ame ibino timo i kom Ai kede rwottere, bino bedo a rom aroma i en ame itimo i kom Jeriko kede rwottere; ento jami mere ame iyako wunu kede limmere akwo ibino tero wunu me bedo megwu. Wot ikan wunu jo mogo imi pon i ŋe boma.” Yocwa te ya karacel kede jo luŋ me romo, me wot Ai. Rik te yero jo atek i lweny tutumia pyeradek, te cwayogi wot dyewor. Ocikogi ni, “Nen ba, wun ibino pono wunu i ŋe boma, myero kur ibed wunu abor meicel i boma. Wun luŋ myero ibed ame iyikere wunu. Aco an karacel kede jo luŋ ame tye baŋa, wan obino wot aceggi acega i boma. Ka ce gin bino donyo me lweny kedwa bala riki, wan obino ŋwec oko i nyimgi. Gin bino donyo me ryemowa, pien gin bino kobo ni, ‘Gin dok tye ariŋowa bala riki.’ Wan obino riŋogi kittono, wun doŋ ite ya wunu i kan ame ipono wunu iye, ite mako wunu boma oko; pien Rwot Obaŋawu bino miyo boma-nono i ciŋwu. Ka doŋ ityeko mako wunu boma, myero iwaŋ wunu oko, kun itimo wunu kite a Rwot okobo. Nen ba, an doŋ atyeko cikowu.” Yocwa te cwayogi, eka gin te wot kan amyero gin wot pon iye, gin te wot bedo i akina Betel kede Ai kun obedo tuŋ to me Ai, ento Yocwa te buto i akina lwak i dyeworrono. Yocwa rik te dilo i bal, te ŋiyo jo, te doŋ wot i Ai karacel kede odoŋe a jo Icrael kun en telo nyim jo. Jo luŋ a romo lweny a rik tye baŋe owoto; gin rik ote wot a ceggi i boma, ote guro kemagi tuŋ anyarodi me Ai, kun luŋ tye i akinagi kede Ai. En te kwanyo jo aceggi romo tutumia abic, te miyogi pono i akina Betel kede Ai, i tuŋ to me boma. Gin rik te ryeyo mony kittono; mony adwoŋŋere rik te bedo i tuŋ anyarodi, eka mony i cennere te bedo tutuŋ to me boma. Ento Yocwa rik te buto i luŋ i dyeworrono. I kare ame rwot me Ai oneno man, en karacel kede jo mere, ame gin jo me boma-nono, gin rik te ru wot oko odiko con i luŋ ame tye tutuŋ Araba me wot lweny i jo Icrael; cite en mom oŋeo ni okwor tye opono i ŋe boma, Yocwa kede jo Icrael te bwologi calo jo ame oloo, ote riŋo kun odok tutuŋ tim. Jo Ai te lwoŋo jo luŋ i boma me ryemogi; pi ryemo Yocwa omio oterogi teŋe kannabor i boma. Lo moro ame ico rik mom te doŋ i Ai kede i Betel, ame mom owoto ryemo jo Icrael, gin oweko bomagi twolo ote ryemo jo Icrael. Rwot te ciko Yocwa ni, “Rye toŋ aliro ame tye i ciŋi-nu tuŋ Ai, pien abino miyo Ai i ciŋi.” Jo ame opono rik te ru ya oyotoyot i kabedogi; oyot ame Yocwa oryeo ciŋe malo, gin te ru donyo i boma, ote mako oko, ote daŋ ru waŋo oko. Kare ame jo Ai oneno ŋegi, nen yito me boma doŋ tye aduny malo i polo. Ka riŋo te loyogi oko tuŋŋi kede tuŋŋi, pien jo ame rik oriŋo tuŋ tim olokere oko i kom jo ame rik aryemogi. Kare ame Yocwa kede jo Icrael doŋ oneno ni jo ame rik opono doŋ omako boma oko, dok daŋ yito me boma daŋ tye aduny malo, gin te lokere dwogo cen neko jo Ai. Jo ocele daŋ te ya i boma bino i komgi, jo Icrael doŋ te gurogi dyere, man tuŋŋi, jo ocele tuŋ ca. Jo Icrael te nekogi ame moro mom obwot, mom daŋ olwi. Cite Rwot me Ai ote mako akwo tero baŋ Yocwa. Kare ame jo Icrael doŋ otyeko neko jo luŋ me Ai i dye bar kan ame onwoŋo gin oryemogi iye, kun gin luŋ doŋ otum oko i pala lweny ame moro mom obwot, jo Icrael luŋ te dok i Ai, te wot tyekogi oko i pala lweny. Jo luŋ ame onwoŋo bedo i Ai oto i ninonono, co kede mon, welgi rik romo tutumia apar wie aryo. Yocwa mom odwoko ciŋe piny ame rik eryeo malo kun toŋ aliro tye iye, naka ka oneko jo luŋ ame bedo i Ai. Lim akwo keken kede jami luŋ ame oyako i boma-nono en ame jo Icrael otero me bedo megi kun olubo kop a Rwot ame rik eciko kede Yocwa. Yocwa rik daŋ te waŋo Ai kittono, te balo ame te miyo wi odur yido iye atata naka atot tin. Rik en te ŋabo rwot me Ai i kom yat naka otyeno; kare ame ceŋ doŋ amito poto, Yocwa te ciko ni kwany kome doŋ oko i kom yat, me bol kan ame odonyo kede i boma. Gin te coko gweŋe apipim yido i kome, ame pwod tye kuno naka atot tin. Yocwa te canni Rwot Obaŋa me Icrael keno lam i wi kidi me Ebal, kite ame Muca amiro a Rwot rik ociko kede jo Icrael, acalo ocoo i buk me cik a Muca ni, “Keno lam ame oyiko i kidi ame mom opao, ame dano moro daŋ mom otiŋo nyonyo moro me tiyo.” Gin te miyo iye mot awaŋa kede mot me kweyo cuny. Dok daŋ i nyim jo Icrael kuno, en rik te medo coyo cik a Muca. I kom kidi kite a rik Muca ocoo kede ikokome. Jo Icrael luŋ, wele ame bedo i akinagi karacel kede anywali me Icrael, odoŋe, otel kede oŋolkopgi ocuŋ tuŋŋi kede tuŋŋi i ŋet canduk i nyim olamdog ame gin jo Levi ame otiŋo canduk me cikere a Rwot, kun nucugi tye i nyim kidi me Gerijim kede nucugi i nyim kidi me Ebal, kite acalo Muca amiro a Rwot rik ogeo ciko ni myero gin lammi jo Icrael winyo. Icennere ote kwano kop me cikkono luŋ, kop me gum kede kop me ceno jo, kite ame ocoo kede i buk me cik. Mom tye kopporo ame Muca rik ociko a mom Yocwa okwano i nyim cokere a jo Icrael luŋ, karacel kede mon kede itino kede orok ame bedo i akinagi. Kare ame obakki luŋ ame onwoŋo rik tye i ŋe Jordan, lobo ame obedo kidikidi kede lobo ame tye piny i dog Nam Adwoŋ ame otikere kede Lebanon, jo Kitti, jo Amor, jo Kanaan, jo Periji, jo Kivi kede jo Jebuc owinyo, gin ocokere karacel kede cuny acel me lweny i kom Yocwa kede jo Icrael. Ento jo Gibeon ka owinyo, gin ame Yocwa otimo i kom Jeriko kede Ai, gin ote ŋolo megi ryeko. Gin oyiko peke me konyogi iyo, ote keto icao ame oti meicel i wi kanegi, kede opoko koŋo a daŋ oti oko, kun oyec dok daŋ okwo akwoa. Gin te ruko daŋ amuke ame oti i tyengi kun daŋ odadapo, kede boŋŋigi daŋ oti oko; pekegi luŋ onwoŋo otwo dok daŋ opuro atek. Gin rik te wot baŋ Yocwa i gony ame onwoŋo tye i Gilgal, gin te kobbe karacel kede co ocele me Icrael ni, “Wan obino i lobo abor meicel, aman doŋ cikere wunu kedwa kede cikkogo.” Ento jo Icrael te kobbi jo Kivi ni, “Aŋar ca ibedo wunu iyi akinawa, kara enno ote ote cikere kedwu niŋo ba?” Gin te gamo kop a Yocwa ni, “Wan giwa obedo omironi.” Yocwa te penyogi ni, “Kara doŋ ibedo wunu jo mene? Iya wunu ce i tuŋ kwene?” Gin te dokke ni, “Wan omironi oya i kuŋ abor meicel pi nyin Rwot Obaŋawu, pien wan owinyo pire karacel kede ginnoro luŋ ame en otimo i Miciri, karacel kede ginnoro luŋ ame en otimo i kom obakki aryo me a jo Amor a rik onwoŋo tye i ŋe Jordan. Cikon abaka ame bedo Kecbon, kede Og abaka ame bedo i Bacan ame yam bedo i Aciterot. Odoŋe kede jo luŋ ame bedo i lobowa ocikowa ni, ‘Mak wunu peke me iwot wunu iyo, wot irwatte wunu kedgi, kobbigi ni, “Wan omirowu, aman doŋ cikere wunu kedwa kede cikkogo.” ’ Ogatiwa ene; i kare ame okwanyo i udiwa me acamawa iyo, i nino ame wan oya kede i paco, onwoŋo gire pwod lyet; aman koŋ inen, doŋ otwo oko daŋ opuro oko. Opoko koŋwa-ni daŋ onwoŋo pwod nyen i kare ame opiko koŋwa iye; nen aman doŋ ototoa oko; boŋŋiwa kede amuke me tyenwa daŋ doŋ oyeyeca oko pi wot abor meicel.” Jo te camo pekegi kun mom koŋ openyo Rwot. Yocwa te yiko kop me bedo kedgi i kuc, kun daŋ cikere kedgi, me wekogi bedo; otel a lwak te kwoŋ baŋgi. Kare ame nino pwod okato adek keken, a gin doŋ ocikere kedgi oko, jo Icrael te winyo ni gin tye cok kedgi dok daŋ obedo i akinagi. Jo Icrael te cako wot ote tuno i bomagi i nino me adekkere. Bomagi onwoŋo Gibeon, Kepira, Beerot kede Kiriat-yearim, Cite jo Icrael mom te nekogi pien otel a lwak onwoŋo okwoŋo baŋgi i nyiŋ Rwot Obaŋa me Icrael; man omio lwak oŋuŋura i kom otelgi. Otel luŋ te kobbi lwak luŋ ni, “Wan otyeko kwoŋ baŋgi i nyin Rwot Obaŋa me Icrael, doŋ pi man no myero kur igudgi wunu. Gin ame obino timo i komgi ene, wan obino wekogi obedo kwo, me akemo kur pot i komwa pi kwoŋ ame wan okwoŋo baŋgi.” Odoŋe ocikogi ni, “Wek wunugi obed kwo.” Mano te miyo gin doko obar yen kede otwom pii a lwak luŋ, kite ame otel obedo kobo kede i komgi. Yocwa olwoŋogi te kobbigi ni, Piŋo kara ibwola wunu ni, “Wan otye kannabor meicel kedwu,” kun ibedo wunu i akinawa? Pi mannono doŋ ocenowu oko, jo ocele i akinawu bino bedo obar yen, kede otwom pii pi ot Obaŋa. Gin te dokki Yocwa ni, “Pien onwoŋo otitti omironi atira kite ame Rwot Obaŋawu ociko kede amiro mere Muca me miyowu lobo-ni luŋ, kede rwenyo jo luŋ ame bedo i lobo ame tye i nyimwu. Mannono okelliwa lworo meicel i komwa kede i kom kwowa, en omio ote timo kittono. Aman doŋ ba, wan giwa otye i ciŋi; yin doŋ tim kite ame ineno ni ber dok daŋ oporre me atima i komwa.” Gin ame en doŋ te timo ene, en olarogi i ciŋ jo Icrael; gin mom te nekogi. Cite i nino-nono en te miyogi doko omwod yen kede otwom pi i a lwak kede me keno lam a Rwot, tuno naka atot tin, i kabedo ame en oyero. I kare ame Adoni-jedek rwot me Jerucalem owinyo kite ame Yocwa omako kede Ai, eka te neko jo luŋ aluŋa, kun timo Ai kite ame otimo kede Jeriko kede rwottere; kede ka dok owinyo kite ame jo ame bedo i Gibeon oyiko kop me bedo i kuc i jo Icrael, kun gin obedo i akinagi, lworo omakogi meicel. Pien Gibeon rik boma adit ame rom aroma i boma ame Rwot bedo iye, dok daŋ onwoŋo dwoŋ meicel kato Ai oko, dok co iye luŋ daŋ onwoŋo jo atek. Mano te miyo Adoni-jedek rwot me Jerucalem ocwao kwena baŋ Oam rwot me Kebron, Piram rwot me Yarmut, Yapia rwot me Lakic, kede Debir me Eglon kun kobbigi ni, “Biye ikonya wunu, me olweny i kom jo Gibeon, pien gin oyiko kop me bedo i kuc baŋ Yocwa kede jo Icrael.” Eka rwode abic me jo Amor, rwot me Jerucalem, rwot me Kebron, rwot me Yarmut, rwot me Lakic kede me Eglon te cokere karacel, ote wot i monygi luŋ, wot guro Gibeon, lweny i kome. Jo Gibeon te cwayo kwena baŋ Yocwa i gony me Gilgal, kun kobbe ni, “Kur ikwany ciŋi oko i kom omironi, ru bino baŋwa, ilarwa, ikonywa, pien rwode a jo Amor luŋ ame bedo i lobo obedo kidikidi ocokere i komwa.” Yocwa karacel kede jo me lweny te ya i Gilgal i jo luŋ ame tek i lweny. Rwot ociko Yocwa ni, “Kur ilworgi, pien atyeko doŋ miyogi oko i ciŋi; mom tye lo moro ame bino cuŋ i nyimi.” Yocwa te ru bino oko i komgi, kun oya i Gilgal te wot dyewor benebene. Rwot te babaŋogi oko i nyim jo Icrael, gin te nekogi atek i Gibeon, ote ryemogi i yo ame dok malo tutuŋ Bet-koron; gin te nekogi naka i Ajeka kede Makkeda. I kare ame gin tye ariŋo oko i nyim jo Icrael, kun oluŋere i luŋ me Bet-koron, Rwot te cocoro twoni gweŋe mogo adoŋodoŋo i komgi ame oya i polo tuno naka i Ajeka twal, gin te to oko. Wel jo ame pee oneko obedo bup meicel kato en ame jo Icrael oneko i pala lweny. I kare-nono Yocwa te kop i Rwot i nino ame Rwot omio iye jo Amor i ciŋ jo Icrael; en te kop kede kun jo Icrael winyo, ni, “Yin ceŋ koŋ icuŋ i Gebeon, kede yin dwe daŋ cuŋ i luŋ me Aijalon.” Ceŋ daŋ te cuŋ karacel, dwe daŋ olirakino kakare ituno ka rokwa oculo kwor i kom okworgi. Man mom ocoo i buk a Jacar? Ceŋ obir i dye polo, kun mom poto oyotoyot pi nino ame buco romo acel twal. Mom ru onen nino moro a rom i nino-nono cakere con tuno kede naka i kare man, ame Rwot owinyo iye dwon dano; pien Rwot olwenyo pi Icrael. Yocwa te dwogo karacel i jo Icrael luŋ i gony me Gilgal. Rwode abic te riŋo wot pono i gorogoro kidi me Makkeda. Jo te titti Yocwa ni, “Rwode abiccono onwonogi opono i gorogoro kidi i Makkeda.” Yocwa te dok iye ni, “Lor wunu kiddi adoŋo oko i dog gorogoro, ket wunu jo i ŋete me gwokgi. Cite wun kur ibed wunu kuno, wun ryem wunu okworwu, lweny wunu i jo ame odoŋ cen kur imigi odony i bomagi; pien Rwot Obaŋawu otyeko miyogi i ciŋwu.” Kare a doŋ jo Icrael onekogi atek meicel, gin doŋ te tum oko, jo ame obwot i akinagi olaro boma mogo ame ocelo atek. Jo luŋ te dwogo i kuc baŋ Yocwa i gony i Makkeda; mom tye dano moro ame oŋamo doge i kom dano moro me Icrael. Kare ame man doŋ otum, Yocwa te ciko jo ni, “Yab wunu doŋ dog gorogoro kidi, me iwot wunu rwode abiccono oko i gorogoro i kelgi wunu baŋa.” Gin daŋ te timo amannono, ote wotto rwode abic ca oko i gorogoro, ote tero baŋ Yocwa; otero rwot me Jerucalem, rwot me Kebron, rwot me Yarmut, rwot me Lakic kede rwot me Eglon. Kare ame gin doŋ okelo rwode abiccono baŋ Yocwa, Yocwa te lwoŋo co luŋ me Icrael, te ciko otel wi mony a rik owoto kede ni, “Bye wunu kan, me ibin icib wunu tyenwu i ŋut rwode magi.” Gin daŋ te bino cibo tyengi i ŋutgi. Yocwa te kobbigi ni, “Kur ibed wunu alwor, cunywu daŋ kur poti, cuŋ wunu atek kun cunywu nwaŋ, pien Rwot bino timo kittono i kom okworwu luŋ ame ilweny wunu kedgi.” Icennere Yocwa dok te cocobogi nekogi oko, te ŋabo komgi i wi yen abic, komgi te ri i wi yen naka otyeno. Kare ame ceŋ doŋ mito poto, Yocwa te ciko ni myero kwany komgi oko i kom yen, bol i gorogoro kiddi ame rik gin opono iye; ote coko gweŋe adoŋodoŋo yido i dog gorogoro kidi-nono, ame daŋ pwod tye kuno naka onyoni. I nino-nono Yocwa te mayo boma me Makkeda, te neko jo luŋ karacel kede rwottere i pala lweny; ojwero jo luŋ a tye iye ame moro mom obwot. Otimo rwot Makkeda kite a rik otimo kede rwot me Jeriko. Yocwa te ya oko i Makkeda karacel kede jo Icrael luŋ, te kato i Libina te wot lweny i jo Libina. Rwot dok te miyo jo-nono karacel kede rwodegi i ciŋ jo Icrael, gin te nekogi luŋ i pala lweny, moro mom obwot. Otimo rwot me Libina kite ame rik otimo kede abaka me Jeriko. Yocwa te dok ya oko i Libna karacel kede jo Icrael luŋ te kato i Lakic; gin te wot guro oko, ote lweny i komgi. Rwot te miyo Lakic i ciŋ jo Icrael; i nino me aryo gin te mayo Lakic oko. Gin te neko jo iye luŋ i pala lweny, kite ame otimo kede i kom Libna. Oram ame obedo rwot me Gejer te bino konyo jo Lakic, Yocwa te neke oko karacel i jo mere luŋ, naka moro mom obwot. Yocwa dok te kato karacel i jo Icrael luŋ, oya oko i Lakic ote wot Eglon. Gin oguro ote daŋ lweny i komgi. Gin te mako Eglon i ninonono, ote neko jo iye luŋ i pala lweny. I nino-nono ojwero jo luŋ iye, kite ame rik otimo i kom Lakic. Yocwa karacel kede jo Icrael luŋ te ya oko Eglon, te wot i Kebron, ote wot lweny i komgi. Gin ogamo ote jwero jo luŋ i pala lweny, kede rwottere, boma mere luŋ, kede jo mere, moro mom odoŋ, kite ame otimo kede Eglon, ojwero luŋ, anaka jo ame bedo iye. Yocwa te doŋ dwogo cen i Debir karacel i jo Icrael luŋ, te ero lweny kedgi, te gamo oko karacel kede abaka mere, kede boma mere luŋ. Gin te neko jo iye luŋ i pala lweny, ote daŋ jwero jo luŋ ame bedo iye, moro mom obwot kite ame rik otimo i kom Kebron, Libna kede obakki mege, en a daŋ otimo i kom Debir kede rwottere. Yocwa rik te loyo lobo luŋ kittono, lobo obedo kidikidi, kede Negeb, lobo i piny kede lobo otiŋere malo, karacel kede rwodegi luŋ; mom oweko moro odoŋ, ento orweo jami ame iye luŋ aluŋa, kite ame Rwot Obaŋa a jo Icrael onwoŋo ociko. Yocwa oloogi cakere i Kadec-barnea tuno kede naka i Gaja, kede i lobo me Gocen luŋ tuno kede i Gibeon. Yocwa omako rwodegi luŋ karacel kede lobogi daŋ, pien Rwot Obaŋa a jo Icrael olwenyo pi jo Icrael. Icennere Yocwa te dwogo doŋ i gony ame tye i Gilgal karacel i jo Icrael luŋ. Kare ame Jabin rwot me Kacor owinyo, ocwao kwena baŋ Yabab rwot me Madon, kede baŋ rwot me Cimron, kede rwot me Akcap, kede rwode luŋ i lobo obedo kidikidi ame onwoŋo tye tutuŋ anyarodi, kede i Araba tuŋ anyarolum kede Kinerot, i lobo i piny, kede i Naptor-dor tuŋ to, kede baŋ Kanaan ame onwoŋo tye tuŋ kide, kede tuŋ to, jo Amor, jo Kitti, kede jo Periji, karacel kede jo Jebuc ame bedo i lobo obedo kidikidi, kede jo Kivi ame tye i Kermon i lobo me Micpa. Gin te bino i monygi luŋ, twon monnyoro adwoŋ meicel, ame pol calo kwoyo me dog nam, kun otye aguragura kede gadigadi lweny apol ata. Obakki luŋ te cokere karacel, ote bino guro gonygi i ŋet pii me Merom me gin olweny i jo Icrael. Rwot ociko Yocwa ni, “Kur ilworgi, pien diki i kodi cawa-ni abino miyogi luŋ baŋ jo Icrael kun doŋ onekogi oko; ibino wunu ŋoŋolo odoŋe aguraguragi, dok ibino wunu waŋo gadigadi oko i mac.” Yocwa karacel kede jo mere luŋ me lweny te ru bino oko i komgi i ŋet pii me Meron eka ote poto oko i komgi. Rwot te miyogi i ciŋ jo Icrael ame te nekogi, te daŋ ryemogi tuno naka i Cidon Adwoŋ kede i Micerepotmaim, dok tuŋ kide tuno naka i luŋ me Micpa; te neko jo luŋ, moro mom obwot. Yocwa daŋ te timo kite ame Rwot ocike kede; oŋoŋolo odoŋe aguraguragi te daŋ waŋo gadigadigi oko i mac. I kare-nono Yocwa doŋ te dwogo cen, te gamo Kajor, te neko rwottere oko i pala lweny, pien Kajor rik onwoŋo boma adit, kabedo ame rik loo i lobonono luŋ. Gin te neko jo iye luŋ i pala lweny, kun ojwero luŋ aluŋa, ame ŋattoro awe mom odoŋ iye, eka ote waŋo Kajor oko i mac. Yocwa rik te mayo boma a rwode-nogo luŋ, karacel kede rwodegi te nekogi oko i pala lweny kun jwerogi luŋ aluŋa, kite ame Muca amiro a Rwot onwoŋo rik ociko. Cite mom owaŋo boma moro ame onwoŋo ogero i wi tur, kono Kajor keken, en ame Yocwa owaŋo. Jami ayaka luŋ me boma-nono ducu, kede lim akwo, jo Icrael otero me bedo megi. Cite co luŋ gin oneko oko i pala lweny, tuno ka otyekogi, moro awe mom oweko odoŋ. Kite a rik Rwot ociko kede amiro mere Muca, Muca daŋ ociko Yocwa kittono, Yocwa te daŋ tiyo. I kom gin luŋ a Rwot rik ociko i Muca, mom tye moro ame Yocwa oweko a mom ocobo. Yocwa rik te mayo lobo-nono luŋ, lobo ame obedo kidikidi, Negeb luŋ, lobo Gocen, lobo a piny, cakere i kidi Kalak ame otiŋere odok tuŋ Ceir tuno kede i Baal-dag i luŋ me Lebanon i te kidi Kermon. Omako rwode luŋ, ococobogi, te nekogi oko, Yocwa obedo lweny i rwode-nono luŋ pi kare alalac. Boma moro oporo kop me kuc i jo Icrael obedo pe, kono ka Kivi keken ame onwoŋo obedo i Gibeon; omakogi luŋ i lweny. Pien mano rik obedo tic a Rwot me miyo cunygi bedo nwaŋ ibino lweny i kom jo Icrael, me wek jwergi oko luŋ, kur timgi kica, ento tyekgi oko kite a rik Rwot ociko i Muca. I kare-nono Yocwa te bino weyo jo Anak oko i lobo obedo kidikidi i Kebron, Debir, Anab, kede lobo Juda luŋ ame obedo kidikidi, kede lobo Icrael luŋ ame obedo kidikidi. Yocwa ojwerogi luŋ, karacel kede bomagi luŋ. Mom tye ŋattoro ame odoŋ i lobo a jo Icrael i kom jo Anak, gin odoŋ ka i Gaja, i Gat kede i Acidod. Yocwa rik te mayo lobo luŋ kittono, kun lubo kop luŋ ame rik Rwot ociko baŋ Muca. Yocwa te miyo jo Icrael te doko megi kite ame opoko kede atekere atekere. Icennere doŋ lobo te kwe, lweny daŋ doŋ te bedo mom. Magi gin rwode ame rik tye i lobo ame rik jo Icrael oloo, eka ote leyo lobogi i ne Jordan tuŋ kide, anaka i luŋ me Aŋon tuno kede i kidi me Kermon, karacel kede Araba tuŋ kide luŋ: Cikon abaka a jo Amor ame onwoŋo bedo Kecbon, kun loccere cakere i Areor ame tye i dog luŋ me Amnon, kede dok cakere i dye luŋ tuno kede i kulo me Jabok, ame en wan lobo a jo Ammon, man nucu lobo me Gilead, kede dok cakere i Araba tuno i nam me Kinerot tuŋ kide, kede tuŋ Bet-yecimot tuno kede i nam me Araba, ame en Nam me Kado dok kede ŋtutuŋ anyarolum tuno kede i kidi me Piciga. Kede dok abaka me Baca, en ŋat acel i akina jo odoŋ i kom jo Repa, ame bedo i Aciterot kede Edrei, kun loo kidi me Kermon, kede Caleka kede Bacan luŋ tuno kede i waŋ lobo a jo Gecur kede Maaka, kede nucu lobo Gilead tuno kede i waŋ lobo a Cikon abaka ame bedo Kecbon. Muca amiro a Rwot te miyo lobo-nono luŋ baŋ jo Reuben, jo Gad kede nucu atekere a jo Manace, me bedo megi. Magi gin rwode ame lobo-nono ame Yocwa karacel kede jo Icrael oloo i ŋe Jordan tuŋ to, cakere i Baal-gad me Lebanon tuno i kidi me Kalak ame otiŋere odok tuŋ Ceir; doŋ daŋ Yocwa te miyo lobogi-nono baŋ atekere me Icrael, me bedo megi, kun wopo kite ame onwoŋo opokkigi kede, i lobo ame obedo kidikidi, i lobo a piny i Araba, i lobo ame otiŋere, i tim kede i Negeb, lobo a jo Kitti, jo Amor, jo Kanaan, jo Periji, jo Kivi kede jo Jebuc: rwot me Jeriko, rwot me Ai, ame tye i ŋet Betel; rwot me Jerucalem, rwot me Kedron, rwot me Yarmut, rwot me Jerucalem, rwot me Eglon, rwot me Gejer, rwot me Debir, rwot me Geder; rwot me Korma, rwot me Arad; rwot me Libna; rwot me Adullam, rwot me Makkeda, rwot me Betel; rwot me Tappuak, rwot me Keper; rwot me Apek, rwot me Lacaron; rwot me Madon, rwot me Kajor; rwot me Cimron-meron, rwot me Akcap; rwot me Taanak, rwot me Megido; rwot me Kedec, rwot me Yokneam i Karmel; rwot me Dor i Napat-dor, rwot me Goyim i Galilaya; rwot me Tirja: gin luŋ rwode pyeradek wie acel. I kare ame Yocwa doŋ oti, ame mwaka me dittere doŋ bup, Rwot okobbe ni, “Nen ba, yin doŋ iti, dok mwaka me ditti doŋ bup, ento lobo ame myero bed megwu pwod odoŋ abup. Lobo ame pwod odoŋ ene: lobo me Priciti luŋ kede me a jo Gecur luŋ, cakere i kulo me Cikor ame tye tuŋ kide me Miciri, dok kede tuŋ anyarodi, tuno naka i waŋ lobo me Ekron; magi luŋ okwano baŋ jo Kanaan. Rwode a jo Piriciti tye abic, me Gaja, Acidod, Acikelon, Gat, kede Ekron; kede lobo a jo Ayi. Aco i tuŋ anyarolum tye lobo a jo Kanaan luŋ, kede Meara ame obedo me ajo Cidon tuno kede naka i Apek, kato i waŋ lobo a jo Amor, kede lobo a jo Gebal, kede Lebanon luŋ i tuŋ kide, cakere i Baal-gad ame tye i te kidi me Keromon, i dog yo ame woto Kamat; jo luŋ ame bedo i lobo ame obedo kidikidi, cakere i Lebanon wot kede i Micrepot-maim; mano Cidon luŋ. An ikoma abino ryemogi i nyim jo Icrael; ento yin pok lobo baŋ jo Icrael obed megi gin oleo, kite ame aciki kede. Pi mannono, aman yin doŋ myero ipok lobo man baŋ atekere aboŋwen, kede baŋ nucu me atekere a Manace, obed megi.” Jo Reuben kede jo Gad karacel kede nucu me atekere a Manace ocele otyeko nwoŋo lobo ame gin bino leyo me bedo megi ame rik Muca omiogi loka Jordan tuŋ kide, kite a rik Muca amiro a Rwot omiogi: cakere i Areor ame tye i dog luŋ me Amon, kede boma ame tye i dye luŋŋono, karacel kede lobo luŋ me Medeba, ame otiŋere, opette, tuno naka i Dijon; kede boma a Cikon abaka a jo Amor, ame en obedo abaka me Kecbon, tuno i waŋ lobo a jo Ammon; kede Gilead, kede lobo a jo Gecur kede jo Maaka, kede kidi Kermon luŋ, kede Bacan luŋ tuno kede i Caleka; kede lobo abaka Og luŋ ame loo lobo Bacan kun bedo i Aciterot kede Edrei; en kene ame rik odoŋ i akina jo Repa. Muca onwoŋo oloo magi, te daŋ mayo lobogi oko. Cite jo Icrael rik mom oryemo jo Gecur kede jo Maaka. Jo Gecur kede jo Maaka pwod bedo i akina jo Icrael naka atot tin. Atekere a jo Levi keken en ame Muca rik mom omio dul lobo moro me bedo megi; gin ame obedo megi, obedo mot ame owaŋo i mac baŋ Rwot Obaŋa me Icrael, kite ame rik okobbe kede. Muca rik omio lobo me alea baŋ jo Reuben kun lubo doggolagi. Lobogi rik ocakere i Areor ame tye i dog luŋ me Amon, kede boma ame tye i dye luŋ nono kede lobo luŋ i ŋet Medeba, ame otiŋere, opette; karacel kede Kecbon kede boma mere ducu ame tye i lobo otiŋere, opette; Dibon, Bamot-baal, Bet-baal-meon, Yakac, Kedemot, Mapaat, Kiriataim, Cibma kede Yeret-cakar i wi kidi me luŋ nono, kede Bet-peor, kor kidi me Piciga, kede Bet-yecimot, gin boma luŋ me lobo ame otiŋere, opette, kede lobo a Cikon abaka me Amor luŋ ame rik obedo abaka me Kecbon, ame Muca oloo karacel kede otel me Midian, Evi, Rekem, Cur, Kur, kede Repa, ame gin obedo rwode a jo Cikon ame bedo i lobo-nono. Balaam wot a Beor ame obedo emuroko, jo Icrael oneko oko i pala lweny i akina jo ocele luŋ ame oneko. Waŋ lobo a jo Reuben obedo Jordan, mano en onwoŋo waŋ lobogi. Man lobo ame jo Reuben ogamo me bedo megi karacel i bomagi kede paccigi kun lubere i doggolagi. Muca rik omio lobo baŋ jo me atekere a jo Gad me bedo megi, kun lubere i doggolagi. Lobogi rik obedo Yajer, kede boma ducu me lobo Gilead, karacel kede nucu lobo a jo Ammon, tuno i Areor, ame tye tuŋ kide me Rabba, kede cakere i Kecbon tuno i Ramat-micpe kede Betonim, kede dok cakere i Makanaim tuno kede i lobo Debir, kede Bet-aram, Bet-nimra, Cukot kede Japon, ame tye i luŋ a en dul lobo odoŋ luŋ ame Cikon abaka me Kecbon rik loo, kun waŋ lobo mere obedo Jordan, tuno i agikki nam me Kineret i tuŋ pinnyere, ame tye loka Jordan tuŋ kide. Man en lobo ame jo Gad onwoŋo me bedo megi, karacel i bomagi, kede paccigi, kun lubere i doggolagi. Muca rik dok te miyo lobo baŋ nucu atekere a jo Manace me bedo megi; opoko baŋ nucu atekere a jo Manace kun lubere i doggolagi. Lobogi ocakere i Makanaim kun mako Bacan luŋ, kede kan ame Og abaka me Bacan rik loo luŋ, kede boma luŋ me Jair ame tye i Bacan, boma pyerabicel, karacel kede nucu me lobo Gilead, kede Aciterot kede Edrei, ame gin boma ame tye i Bacan i kan ame rik Og loo; magi rik opoko baŋ jo a Makir wot a Manace pi nucu a jo Makir, kun lubere i doggolagi. Magi gin lobo ame Muca opoko i bar me Moab, loka Jordan tuŋ kide me Jeriko. Ento atekere a jo Levi, Muca mom opokigi lobo moro me bedo megi; Rwot Obaŋa me Icrael en gin ame gin rik onwoŋo me bedo megi, kite a rik okobbigi. Magi gin lobo ame jo Icrael onwoŋo i lobo me Kanaan me bedo megi, ame alamdog Eliejer kede Yocwa wot a Nuni, karacel kede odoŋe me doggola a kwarigi me atekere a jo Icrael opoko baŋgi. Gin opoko me bedo megi kun okwanyo kede kwir, kite ame Rwot rik ociko kede Muca, pi atekere aboŋwen kede nucu. Pien onwoŋo rik Muca otyeko miyo lobo baŋ atekere aryo kede nucu loka Jordan me bedo megi; ento mom omio lobo moro i akinagi me bedo me a jo Levi. Pien jo a Yucepu rik obedo atekere aryo, jo Manace kede jo Epraim. Jo Levi rik mom opokkigi lobo me bedo megi, cite omiogi ka boma keken me bedogi kede bar me kwayo dokgi kede kit limgi ocele. Jo Icrael opoko lobo kite ame rik Rwot ociko kede Muca. Icennere jo Juda te bino baŋ Yocwa i Gilgal. Kaleb wot a Jepunne me a jo Keniji okobbe ni, “Iŋeo kop a rik Rwot okobo baŋ Muca dano Obaŋa i Kadec-barnea i komi kede i koma, Rik onwoŋo mwakana tye pyeraŋwen i kare ame amiro a Rwot oora me ya i Kadec-barnea me wot roto piny, eka ate dwogo en kop ame rik tye i cunya. Omegona ame rik owoto kedgi omio koyo oonyere i kom jo; cite an alubo Rwot Obaŋana kede cunya luŋ. I nino-naca rik Muca te kwoŋ kun kobo ni, ‘Ateteni, lobo ame tyeni onyono bino bedo meri ame ibino nwoŋo me bedo megi atwal karacel kede ikwai, pien ilubo Rwot Obaŋana kede cunyi luŋ.’ Aman koŋ doŋ inen, Rwot gire ogwoka pwod atye kwo, kite ame rik okobo, koŋ inen, aman doŋ odoko mwaka pyeraŋwen wie abic cakere i kare ame Rwot okobo kop baŋ Muca, kun Icrael pwod tye awot i tim; aman koŋ doŋ inen, mwakana doŋ oromo pyeraboro wie abic. An pwod atek tuno naka tin, ame tekona pwod rom aroma i tekona i kare ame Muca ooranaca pwod daŋ woto kede kwogo. Aman doŋ mia lobo obedo kidikidi-ni ame Rwot rik okobo pire i nino-naca. Pien rik iwinyo i nino-naca kite ame jo Anak tye kede kuno, kun otye i boma adoŋodoŋo ame ocelo atek. Gwok onyo Rwot bino bedo keda, mio aryemogi oko kite a Rwot okobo.” Yocwa te lamo winyo, i kom Kaleb wot a Japunne, te miyo Kebron me bedo lobo ame en onwoŋo me bedo mege. Kittono daŋ Kebron te doko lobo ame Kaleb wot a Japunne me a jo Keniji onwoŋo me bedo mege tuno naka atot tin, pien en olubo Rwot Obaŋa me Icrael kede cunye ducu. Nyiŋ Kebron rik onwoŋo Kiriat-arba; Arba-ni rik onwoŋo dano moro adwoŋ meicel i akina jo Anak. Lobo doŋ te kwe, lweny daŋ te bedo pe. Lobo ame opokki atekere a Juda kede kwir, kun lubere i doggolagi, ogik tuŋ anyarolum i waŋ lobo me Edom, i agikki tim me Jin tuŋ anyarolum. Waŋ lobogi tuŋ anyarolum ocakere i agikki me nam me Kado, i gul nam ame nen i tun anyarolum. Eka te dok malo tuŋ anyarolum, i tur me Akrabim, te kato Jin, yito kede naka i Kadec-barnea tun anyarolum, i ŋet Kejron, naka i Addar, te dok wirre doŋ tun Karka; te kato Acimon, naka i ŋet kulo me Miciri, te wot gik i nam. Man bino bedo waŋ lobo ame tye tuŋ anyarolum. Wan lobo i tutuŋ kide obedo nam me Kado, naka tuno kede i agikki me Jordan. Waŋ lobo tun anyarodi ocakere i gul nam ame tye i agikki me Jordan; waŋ lobo te kato naka i Bet-kogla, tutuŋ anyarodi me Bet-araba; te wot tuno naka i kiddi a rik Boan wot a Reuben ocibo. Eka dok te wot Debir kun cakere i luŋ me Akor, medde kede tun anyarodi, te dok lokere dok tun Gilgal ame tye i nyim tur me Adummim, i luŋ tutuŋ anyarolum; waŋ lobo te dok kato naka i pi i Encemec te gik i Ecrogel; eka waŋ lobo te dok kato i luŋ me Jerucalem. Waŋ lobo te yito i wi kidi ame otiŋere i luŋ me Kinnom, tuŋ to, tuno kede i agikki me luŋ me Repaim, i tutuŋ anyarodi. Waŋ lobo dok te kato kun cakere i wi kidi tuno kede i akoŋ me Neptoak, i kuno dok te kato naka i boma ame tye i kidi me Epron. Waŋ lobo dok te wirre dok tutuŋ Baala, ame en Kiriat-yearim. Waŋ lobo dok te mano i tuŋ to me Baala te wot tuno i kidi Ceir, kun kato naka i Kir i kidi tuŋ anyarodi me kidi me Yearim, ame en Kecalon, te dok piny tuŋ Bet-cemec, kun beo i ŋet Timna. Waŋ lobo dok te wot i kor kidi tutuŋ anyarodi me Ekron, kun dok manne dok i Cikkeron, te wot tuno i kidi me Baala, kato Yabneel, kun gik i nam. Waŋ lobo i tuŋ to olubo dog Nam Adwoŋ. Man en waŋ lobo ame oguro Juda kun lubo doggola. Kite a rik Rwot ociko kede, Yocwa opokki Kaleb wot a Jepunne lobo mere i akina jo Juda, Kiriat-arba, ame en Kebron; Arba rik obedo pappa Anak. Kaleb oryemo itino Anak adek i kuno, Cecai, Akiman kede Talmai ikwae Anak. Cakere i kuno te wot lweny i kom jo ame bedo i Debir; nyiŋ Debir rik onwoŋo Kiriatceper, Kaleb te kobo ni, “Ŋat ame bino lweny i kom Kiriat-ceper, te mayo, abino miye nyara Akca me bedo dako mere.” Ontiel wot a Kenaj omin a Kaleb te mayo, eka en te miye nyare Akca me bedo dako mere. Ka nyako obino baŋe, en odio cware me kwayo poto baŋ pappere; en te ya i wi kana mere, Kaleb te kobbe ni, “Imito kara ŋo?” En te dok iye ni, “Mia mottoro, kite acalo yin doŋ iketa i lobo me Negeb, mia akoŋŋoro.” Kaleb te miye akoŋ i malo kede en i piny. Man en lobo ame jo Juda onwoŋo me bedo megi, kun lubo doggolagi, Boma a Juda i tuŋ anyarolum agikki mere ceggi i waŋ lobo a jo Edom, gin rik ene: Kabjeel, Eder, Jagur, Kina Dimona, Adada, Kedec, Kajor, Itanan, Jip, Telem, Bealot, Kajorkadata, Keriot-kejeron, ame en Kajor, Amam, Cema, Molada, Kacergadda, Kecmon, Bet-pelet, Kacarcual, Beerceba, Bijiotia, Baala, lim, Ecem, Ettolad, Kecil, Korma, Ciklag, Madmanna, Cancanna, Lebaot, Cilkim, Ain gin kede Rimmon; boma luŋ pyeraryo wie aboŋwen kede pacci ame i ŋetgi. I lobo ame tye tuŋ piny tye Ectaol, Cora, Acna, Jonoa, En-gannim, Tappua, Enam, Jarmut, Adullam, Coko, Ajeka, Caaraim, Aditaim, Gedera, Gederotaim; boma luŋ apar wie aŋwen kede pacci ame tye i ŋetgi. Cenen, Kadaca, Migdalagad, Dilean, Mijpe, Yoktcel, Lakic, Bockat, Eglon, Kabbon, Lakmam, Kitlic, Kederot, Bet-dagon, Naama kede Makkeda; boma luŋ apar wie abicel kede pacci ame tye i ŋetgi. Libina, Eter, Acan, Ipta, Acna, Nejib, Keila, Akijib, kede Mareca; boma luŋ aboŋwen kede pacci ame tye i ŋetgi. Ekron karacel kede boma mege luŋ kede pacci mege; cakere i Ekron wot kede i nam, boma luŋ ame tye i ŋet Acidod kede pacci ame tye i ŋetgi. Acidod karacel kede boma mege luŋ, kede pacci mege; Gaja karacel kede boma mege luŋ kede pacci mege, tuno naka i kulo me Miciri kede i dog Nam Adwoŋ. I lobo ame obedo kidikidi, Camir, Yattir, Coko, Danna, Kiriat-canna, ame en Debir, Anab, Ectemo, Anim, Gocen, Kolon kede Gilo; boma luŋ apar wie acel kede pacci ame tye i ŋetgi. Arab Duma Ecan, Jamim, Bet-tappuak, Apeka, Kumta, Kiriat-arba, ame en Kebron, kede Cior; boma luŋ aboŋwen kede pacci ame tye i ŋetgi. Maon, Karmel, Jip, Yutta, Jejreel, Jokdeam, Janoak, Kain, Gibea kede Timna; boma luŋ apar kede pacci ame tye i ŋetgi. Kalkul, Bet-cur, Gedor, Maarat, Bet-anot kede Eltekon; boma luŋ abicel kede pacci ame tye i ŋetgi. Kiriat-baal, en Kiriat-yearim, kede Rabba; boma luŋ aryo kede pacci ame tye i ŋetgi. Eka i tim te bedo iye, Bet-araba, Middin, Cekaka, Nibcan, boma me Kado kede En-gedi; boma luŋ abicel kede pacci ame tye i ŋetgi. Cite jo Juda onwoŋo mom romo ryemo jo Jebuc, ame gin jo ame bedo i Jerucalem, mannono omio jo Jebuc pwod bedo karacel kede jo Juda i Jerucalem naka atot tin. Lobo ame opoko i baŋ i kwae a Yucepu me bedo megi ocakere i Jordan i ŋet Jeriko, ame tye tuŋ kide me pii me Jeriko, te kato i tim, kun oya i Jeriko owoto naka i lobo obedo kidikidi tuno naka i Betel. Icennere dok te ya i Betel, te wot Luj, kato naka Atarot, ame en lobo a jo Arki. Eka te dok kato piny tuŋ to tuno kede i lobo a jo Japelit, te kato naka i lobo me Bet-koron Tuŋ Piny naka i Gejer, eka te gik i nam. Manace kede Epraim ame gin jo a Yucepu gin onwoŋo lobo me bedo megi. Lobo ame opokki jo Epraim kun lubere i doggolagi, onwoŋo tye kit man: waŋ lobogi i tuŋ kide obedo Ararot-addar wot kede Bet-koron Tuŋ Malo. Cakere i kuno waŋ lobo te wot i nam, kun weko Mikmetat i tuŋ anyarodi; eka i tuŋ kide, wan lobo te dok mano i tuŋ Taanat-cilo, te kato i ŋete tuŋ kide, wot kede i Janoak. Eka i Janoa te kato Atarot kede Naara, tuno naka i Jeriko kun gik i Jordan. Cakere i Tappuak, waŋ lobo te wot tuŋ to tuno i kulo Kana, kun gik i nam. Man en lobo ame jo Epraim onwoŋo me bedo megi, kun lubo doggolagi, karacel kede boma luŋ ame oweko pi jo Epraim i dye lobo ame Manace onwoŋo me bedo megi, boma-nogo luŋ kede paccigi luŋ ame tye i ŋetgi. Cite mom oryemo jo Kaanan ame bedo i Gejer; mannono omio jo Kanaan obedo i akina jo Epraim tuno naka atot tin, cite gin odoko opii kun otio tic apek. Eka dok ote bolo kwir me pokki atekere a Manace lobo, pien en rik onwoŋo obedo atin kao a Yucepu. Eka ote poko Gilead kede Bacan baŋ Makir ame pappa Gilead, atin kao a Manace, pien en rik obedo lo atek i lweny, Eka ote doŋ bolo kwir me poko lobo pi jo me atekere a Manace ame odoŋŋere, kun lubere i doggola i doggola kit man: jo Abiejer, jo Kelek, jo Acriel, jo Cekem, jo Keper, jo Cemiga; magi gin otino a Manace wot a Yucepu ame co mege, kun lubere i doggola i doggola. Jelopekad wot a Keper, wot a Gilead, wot a Makir, wot a Manace, rik onwoŋo mom tye itino awobe, kono ka anyira keken. Nyin anyira mere ene: Malka, Noa, Kogla, Mirika, Tirija. Gin obino baŋ alamdog Elieajar kede Yocwa, wot a Nuni kede otel, ote kobo ni, “Rwot rik ociko Muca ni myero miwa onwoŋo lobowa i akina omegowa.” Rik daŋ ote miyogi nwoŋo lobogi i akina omego a pappagi kite ame Rwot onwoŋo ociko. Kittono kwir rik te miyo Manace nwoŋo lobo apar, medo i kom lobo me Gilead kede Bacan ame onwoŋo tye loka Jordan; pien anyira a Manace daŋ onwoŋo lobogi me bedo megi karacel awobe mere. Lobo me Gilead ote poko baŋ jo a Manace odoŋŋere. Lobo a Manace onwoŋo ocakere i Acer te wot naka i Micmetat ame onwoŋo tye tuŋ kide me Cekem; eka waŋ lobo te dok kato tutuŋ anyarolum baŋ jo ame bedo i En-tapuak. Lobo me Tappuak rik me a jo Epraim. Cakere i kuno waŋ lobo te dok piny tuno naka i kulo me Kana. Boma i kan ame onwoŋo tye tutuŋ anyarolum me kulo i akina boma a Manace luŋ, rik obedo me Epraim. Icennere waŋ lobo a jo Manace te kato tutuŋ anyarodi me kulo kun gik i nam; kun lobo ame tye tutuŋ anyarolum obedo me Epraim eka en ame tye tutuŋ anyarodi te bedo me a Manace, kun nam en ame opokogi; me tutuŋ anayarodi orwatte kede Acer, eka me tutuŋ kide te rwatte i me Icakar. Dok daŋ i lobo a jo Icakar kede Acer, Manace onwoŋo otero Bet-cean kede pacci ame tye i ŋete, Ibleam kede pacci ame tye i ŋete, Ibleam kede pacci ame tye i ŋete karacel kede jo ame bedo Dor kede pacci ame tye i ŋete, jo ame bedo En-dor kede pacci ame tye i ŋete, jo ame bedo Taanak kede pacci ame tye i ŋete, jo ame bedo Meggido kede pacci ame bedo i ŋete, eka me adek te bedo Napat. Cite jo Manace mom oryemo jo i boma magi, pien jo Kanaan ocerre acera i bedo i lobo-nono. Cite i kare ame jo Icrael doŋ odoko atek, gin te miyo jo Kanaan tiyo tic apek me opii opii mom te ryemogi luŋ. Ikwae a Yucepu rik te kobbi Yocwa ni, “Piŋo kara imio an abolo kwir acel keken dok daŋ imia anwoŋo dul lobo acel keken aco kun wan opol meicel, cakere con Rwot omia winyo, naka atot onyoni?” Yocwa te dokkigi iye ni, “Ka ce wun i pol wunu meicel, wot wunu i buŋ me iwot ilwer wunu kabedowu kuno pirwu kenwu, i lobo a jo Periji, kede jo Repa, pien lobo ame obedo kidikidi me Epraim diŋ meicel pirwu.” Ikwae a Yucepu te kobo ni, “Lobo ame obedo kidikidi mom gire romowa, dok jo Kanaan luŋ ame bedo i bar, gin luŋ tye i gadigadi me nyonyo naka jo ame bedo i Bet-cean kede i pacci ame tye i ŋete, karacel kede jo ame bedo i luŋ me Jejreel.” Yocwa te dok baŋ jo doggola a Yucepu, baŋ jo Epraim kede baŋ jo Manace ni, “Wun ipol wunu meicel dok daŋ itek wunu; mom obino pokkiwu lobo i kwir acel keken, ento lobo ame obedo kidikidi bino bedo megwu, pien kadi obedo buŋ, ibino lwero wunu te bedo megwu naka i agikki mere; pien ibino ryemo wunu jo Kanaan oko iye kadi bed gin tye kede gadigadi me onyonyo dok daŋ otek.” Icennere lwak jo Icrael te cokere i Cilo, eka ote guro kema me rwatte kun onwoŋo doŋ oloo lobonono. I kare-nono onwoŋo pwod odoŋ atekere abiro i akina jo Icrael ame mom ru onwoŋo lobo ame opokkigi. Mannono omio Yocwa okobbi jo Icrael ni, “Kara ibino bedo wirre wunu naka awene me wot gamo lobo ame yam Rwot Obaŋa a kwariwu omiowu? Mia wunu jo adek iyi atekere acel acel me an aorgi, owot ololoŋo lobo-ni luŋ kun ocoo kop luŋ i kom dul lobo acel acel kite a myero pok kede, eka gm te dwogo kede baŋa. Gin bino poko lobo-nono i dul abiro, kun Juda medde gire bedo i mege ame tye tutuŋ anyarolum, kede doggola a Yucepu daŋ i megi ame tye tutuŋ anyarodi. Ibino tito wunu kop i kom lobonono i dul abiro, eka ite kelo wunu kop ame icoo wunu iye-nono baŋa kano An doŋ abino bolo kwir pirwu i nyim Rwot Obaŋawu kan. Jo Levi mom tye dul lobo moro i akinawa pien gin ame gin onwoŋo me bedo megi en aye bedo olamdog baŋ Rwot; aco Gad kede Reuben kede nucu me atekere a Manace doŋ otyeko nwoŋo lobogi oko me bedo megi loka Jordan i tutuŋ kide, ame Muca amiro a Rwot rik omiogi.” Jo-naca rik daŋ te cako wotgi; Yocwa te ciko jo-nono ni myero oco kop i kom lobo-nono, kun kobbigi ni, “Wot iloloŋo wunu lobo man, ico wunu kop i kome, eka ite dwogo wunu baŋa. Abino bolo kwir pirwu i Cilo.” Jo-nono daŋ te wot, ote coyo kop i kom lobo-nono i buk, kun ocoo boma i boma i dul abiro; eka gin doŋ te dwogo baŋ Yocwa i gony ame tye i Cilo. Yocwa te kwanyo kwir pirgi i nyim Rwot i Cilo; Yocwa te poko lobo daŋ baŋ jo Icrael kuno, kun mio atekere acel acel dullere. Kwir me atekere a Benjamin te kwanyere kun lubere i doggola i doggola. Lobo ame kwir onwoŋo tye i akina atekere a Juda kede Yucepu. Waŋ lobogi i tuŋ anyarodi ocakere i Jordan, eka te kato i kor kidi i tutuŋ anyarodi me Jeriko, te kato i lobo ame obedo kidikidi i tuŋ to, kun gik i tim me Bet-awen. Eka i kuno waŋ lobo te kato i Luj kun beo i tutuŋ anyarolum naka i kor kidi me Luŋ, ame en Betel; eka waŋ lobo te dok kato i Atarot-addar, i wi kidi ame tye tutuŋ anyarolum me Bet-koron Tuŋ piny. Waŋ lobo te dok lokere, mano i tutuŋ to, te wirre dok i tuŋ anyarolum, kun ya i wi kidi riye aria i tutuŋ kide, ame otikere i Bet-koron, te wot gik i Kiriat-baal ame en Kiriat-jearim, ame obedo boma atekere a Juda. Man obedo tuŋ to, Eka i ŋete tutuŋ anyarolum te cakere i agiki me Kiriatjearim; cakere i kuno te dok kato Epron i akon me Neptoak. Cakere dok i kuno waŋ lobo te wot naka i agikki kidi ame otikere i luŋ a woto Kinnom, i agikki me luŋ me Repaim tutuŋ anyarodi; te dok piny i luŋ me Kinnom, tutuŋ anyarolum me kor kidi a jo Jebuc, te dok medde piny naka i En-rogel, Te wirre i kuno dok tutuŋ anyarodi tuno naka i En-cemec; cakere i kuno te wot Gelimot ame tye i nyim tur me Addumim; te dok wot tuno naka i wi kidi a Boan wot a Reuben ocibo. Eka i kuno te dok kato tutuŋ anyarodi kun mano kor kidi me Betaraba, dok kede piny i Araba. Eka te wot kato tutuŋ anyarodi me kor kidi me Bet-kogla. Waŋ lobo te doŋ gik i gul nam ame tye tutuŋ anyarodi me nam me Kado i agikki Jordan tuŋ anyarolum. Man waŋ lobo me tutuŋ anyarolum. Waŋ lobo mere me tutuŋ kide obedo Jordan. Man en lobo atekere ame jo Benjamin onwoŋo kun lubere i doggola i doggola, kede waŋ lobogi luŋ i yore i yore. Boma luŋ ame obedo me atekere a jo Benjamin kun lubere i doggogola i doggola gin ene: Jeriko, Bet-kogla, Emek-kejiji, Bet-araba, Jemaraim, Betel, Avim, Para, Opra, Keperammoni, Opni, kede Geba; boma luŋ apar wie aryo kede pacci ame tye i ŋetgi. Gibeon, Rama, Beerot, Mijpa, Kepira, Moja, Rekem, Irpeel, Tarala, Cela, Elep, Jebuc, ame en Jerucalem, Gibea kede Kiriat-jearim; boma luŋ apar wie aŋwen kede pacci ame tye i ŋetgi. Magi en lobo ame atekere a jo Benjamin onwoŋo kun lubere i doggola i doggola. Kwir ame obolo me aryo opoto i kom Cimeon, pi jo a Cimeon kun lubo kite ame doggolagi tye kede. Lobogi ame kwir okwanyo onwoŋo tye iye atekere a Juda. Lobo ame kwir okwanyo ame onwoŋo gin obedo i Beer-ceba, Ceba, Molada, Kacar-cula, Bala, Ejem, Eltolad, Betual, Korma; Jaglag, Bet-markebot, Kacar-cuca, Bet-leboat, kede Caruken; boma luŋ apar wie adek kede pacci ame tye i ŋetgi; En-rimmon, Eter kede Acan; boma luŋ aŋwen kede pacci ame tye i ŋetgi: karacel kede pacci ame oguro boma magi tuno naka i Baalat-beer, Rama, ame tye Negeb. Man en lobo ame atekere a Cimeon rik onwoŋo kun lubo kite ame doggolagi tye kede, Lobo ame atekere a Cimeon onwoŋo rik obedo dul lobo a Juda; pien me dul a Juda rik onwoŋo dwoŋ meicel pirgi; pi mannono omio jo Cimeon onwoŋo lobo me bedo megi i akina lobogi. Kwir ame obolo me adek obedo me atekere a Jabulon kun lubo kite ame doggolagi tye kede. Wan lobogi rik owoto naka Carid. Eka i kuno waŋ lobo te dok tutuŋ to, kun kato kede i Mareal tuno naka i Dabbecet kede i kulo ame tye tutuŋ kide me Jokneam; Cakere dok i Carid, odok tutuŋ kide ame woto tuŋ kide tuno naka i waŋ lobo me Kicilot-tabor. Eka te ya i kuno te wot Daberat kato kede naka malo i Japia. Ya i kuno okato tutuŋ kide, tuno kede naka i Gatkeper, kato Et-kajin; te dok kato naka Rimmon, te wirre wot tutuŋ Nea. Eka i kuno, waŋ apokki ame tye tuŋ anyarodi, te dok wirre dwogo cen i Kannaton, te wot gik i luŋ me Iptael, kede i Kattat, Naalal, Cimron, Idala, kede Beterekem; boma luŋ apar wie aryo kede pacci ame tye i ŋetgi. Man en lobo ame atekere a Jabulon onwoŋo kun lubo kite a doggolagi tye kede. Boma magi kede pacci ame tye i ŋetgi. Kwir ame obolo me aŋwen obedo me Icakar, pi atekere Icakar kun lubo kite ame doggolagi tye kede. Lobo mere onwoŋo ogwaro Jejreel, Kecullot, Cunem, Kaparaim, Sion, Anakatat, Rabbit, Kicion, Ebej, Remet, Engannim, Enkadda, Bet-pajej, Waŋ lobo daŋ ogudo Tabor kede Cakajuma, kede Bet-cemec, waŋ lobo mere te gik Jordan; boma luŋ apar wie abicel kede pacci ame tye i ŋetgi. Man en lobo ame atekere Icaka onwoŋo kun lubo kite ame doggolagi tye kede, boma magi kede pacci ame tye i ŋetgi. Kwir ame obolo me abic opoto i kom atekere Acer kun lubo kite ame doggolagi tye kede. Lobo mere onwoŋo ogwaro Kelkat, Kali, Beten, Akcap, Alamelek, Amad, kede Mical. Eka me tutuŋ to te wot gudo Karmel kede Cikor-libnat, te dok wirre tutuŋ kide te wot i Bet-dagon te wot gudo daŋ Jabulon kede luŋ me Ipteal ame tye tuŋ malo me Bet-emek kede Negel, Eka te dok medde tutuŋ anyarodi tuno i Kabul, Ebron, Rekob, Kammon, Kana, kun woto anaka i Cidon Adwoŋ. Waŋ lobo te dok wirre dok Rama kun tuno i boma me Turo ame ocelo atek; waŋ lobo te dok wirre wot Koca, te gik i nam. Makalab, Akjib, Umma, Apek kede Rekob; boma luŋ pyeraryo wie aryo kede pacci ame tye i ŋetgi. Man en boma ame atekere Acer onwoŋo kun lubo kite ame doggolagi tye kede, boma magi kede pacci ame tye i ŋetgi. Kwir ame obolo me abicel opoto i kom atekere a Naputali pi atekere a Naputali kun lubo kite ame doggolagi tye kede. Waŋ lobo mere ocakere i Kelep, kun cakere i kworo me Jaanannim, kede i Adami-nekeb, kede i Jabneel, wot kede anaka i Lak-kum, kun gik i Jordan. Waŋ lobo te wirre i kuno dok tutuŋ to, tuno naka Ajnottabor, eka i kuno te wot i Kukkok, kun gudo Jabulon i tutuŋ anyarolum, i tuŋ to me Acer, eka i tuŋ kide te gudo Juda kan ame otuno Jordan. Boma ame ocelo atek obedo Jiddim, Jer, Kammat, Rakkat, Kineret, Edama, Rama, Kacor, Kadec, Ed-rei, Enkajor, Yiron, Migdalel, Korem, Betanat kede Bet-cemec; boma luŋ apar wie aboŋwen kede pacci ame tye i ŋetgi. Man lobo ame atekere a Naputali onwoŋo kun lubo kite ame doggolagi tye kede, boma kede pacci ame tye i ŋetgi. Kwir ame obolo me abiro opoto i kom atekere a Dan kun lubo kite ame doggolagi tye kede. Waŋ lobo mere onwoŋo ogwaro Jora, Ectaol, Ir-cemec, Car-alabin, Aijalon, Itla, Elon, Timna, Elteke, Gibbeton, Baalat, Jeud, Bene-berak, Gat-rimmon, kede Mejarkon kede Rakkon karacel kede lobo ame tye i nyim Yopa. Kare ame amao lobo a jo Dan oko, gin owoto anyim, ote wot lweny i kom Lecem, kare ame gin doŋ omako, gin oneko jo iye i pala lweny, gin te gamo bedo iye. Gin te cako nyiŋ lobo-nono ni Dan, bala nyiŋ kwarogi Dan. Man en lobo ame atekere a Dan onwoŋo kun lubo kite ame doggolagi tye kede. Boma kede pacci ame tye i ŋetgi. Ka jo Icrael doŋ otyeko poko lobo i dul apapat me bedo megi; gin daŋ ote pokki Yocwa wot a Nuni mege i akinagi. Gin olubo cik a Rwot, omie boma ame en okwao, ame en Timnat-cerak ame tye i lobo a jo Epraim ame obedo kidikidi; gin dok ogero boma-nono ote bedo iye. Magi en lobo ame Eleajar alamdog kede Yocwa wot a Nuni karacel kede odoŋe me doggola atekere a jo Icrael opoko i kwir i Cilo i nyim Rwot, i doggola kema me rwatte. Lobo rik ote poko tum kittono. Rwot ociko Yocwa ni, “Kobbi jo Icrael ni, ‘Yer wunu boma mogo me larre ame rik akobo pirgi baŋwu kun amio Muca kobo, me wek dano ame oneko ŋattoro kun mom oŋeo onyo mom oneko me akaka, en twero riŋo laro kuno. Boma-nogo bino bedo kan ame ibino larre wunu iye i ciŋ ocul kwor me remo. En bino riŋo i boma moro acel i akina magi, te wot cuŋ i doggola me dogcel me boma-nono, eka te tito koppere baŋ odoŋe me bomanono; gin bino tere i boma te wot miye kabedo, en doŋ te bedo kedgi. Ka ce acul kwor me remo oryemo yore, mom obino miyo lon oneko dano-ni baŋe, pien nwoŋo rik mom gire oneko me akaka, pien rik mom onwoŋo dage con. En myero bed i boma-nono tuno waŋ ame en ocuŋ i nyim lwak pi ŋolo koppere, tuno ka alamdog adwoŋ me kare-nono oto. Icennere anek doŋ twero dok i boma mere ame yam eriŋo iye.’ ” Gin rik te poko boma magi: Kadec ame tye Galilaya, i lobo a jo Naputali ame obedo kidikidi, kede Cekem i lobo Epraim ame obedo kidikidi, kede Kiriat-arba ame en Kebroni, i lobo a jo Juda ame obedo k idikidi. Aco i ŋe Jordan loka i tuŋ kide gin te yero Bejer ame tye i tim i lobo otiŋere opette me atekere a Reuben, kede Ramat ame tye i Gilead iyi atekere a Gad, kede Golan ame tye i Bacan iyi atekere a Manace. Magi gin boma ame ociko pi jo Icrael luŋ, kede pi orok ame bedo i akinagi, me wek ka ŋattoro oneko dano kun mom oneko me akaka, twero riŋo iye, me ocul kwor me remo kur neke oko, tuno ka en ocuŋ i nyim lwak. Eka odoŋe ame loo doggola a kwaro a jo Levi te bino baŋ Eleajar alamdog kede Yocwa wot a Nuni kede baŋ odoŋe ame loo doggola a kwari a jo Icrael, gin te kobo baŋgi jo Cilo i lobo Kanaan, ni, “Rwot rik ociko kun omio Muca okobo ni myero miwa boma me bedowa kede bar ame tye i ŋetgi me kwayo dokwa.” Pi mannono, gin a Rwot ociko omio jo Icrael opokki jo a Levi lobo magi i akina megi ame gin onwoŋo. Kwir ame obolo opoto i kom doggola a Kokat. Pi mannono jo Levi ame onwoŋo obedo i kwae Aron alamdog ikokome kwir omiogi onwoŋo boma apar wie adek i baŋ atekere a Juda, Cimeon, kede Benjamin. Aco jo me doggola a Kokat odoŋŋere te nwoŋo boma tomon i baŋ doggola me atekere Epraim, atekere a Dan kede i baŋ nucu atekere a Manace. Kwir omio jo Gercon onwoŋo boma apar wie adek i baŋ doggola me atekere Icakar, atekere Acer, kede atekere a Naputali, kede i baŋ nucu atekere a Manace ame tye i Bacan. Jo Merari kun lubo doggolagi, gin onwoŋo boma apar wie aryo i baŋ atekere a Reuben, atekere a Gad, kede atekere a Jabulon. Boma magi kede bar me kwatgi, jo Icrael omio i kwir baŋ jo Levi, kite ame Rwot ociko kede Muca. I akina atekere a Juda kede atekere a Cimeon gin omio boma magi ame otuco nyiŋgi, ame ikwae Aron en otero, ame obedo doggola acel i akina jo Kokat ame rik jo Levi, pien kwir rik ogeo poto i komgi. Rik omiogi Kiriat-araba, Araba obedo papa Anak, ame en Kebron, i lobo a jo Juda ame obedo kidikidi, karacel kede bar me kwat luŋ ame oguro. Cite potti luŋ ame tye i boma-nono kede pacci ame tye i ŋete onwoŋo omio baŋ Kaleb wot a Japunne me bedo mege. Eka baŋ ikwae Aron alamdog ote miyo Kebron, ame en boma ame anek laro, kede bar me kwattere, Libina kede bar me kwattere. Jattir kede bar me kwattere, Ectemoa kede bar me kwattere, Kolok kede bar me kwattere, Debir kede bar me kwattere, Ain kede bar me kwattere, Jutta kede bar me kwattere, Betceme kede bar me kwattere, boma magi aboŋwen i baŋ atekere aryo. Eka i baŋ Benjamin ote miyo Gibeon kede bar me kwattere. Geba kede bar me kwattere, kede Almon kede bar me kwattere; boma aŋwen. Boma olamdog ame gin ikwae Aron te bedo gin luŋ boma tomon wie adek kede bar me kwatgi. Aco jo Kokat odoŋŋere, ame gin jo me doggola a jo Levi, boma luŋ ame kwir rik omako pirgi rik oya i kom me atekere Epraim. Gin rik omiogi Cekem, boma ame anek laro, kede bar me kwattere i lobo Epraim ame obedo kidikidi, Gejer kede bar me kwattere. Kibjaim kede bar me kwattere, Betkoron kede bar me kwattere, boma aŋwen. Eka i kom me atekere a Dan ote miyo Elteke, kede bar me kwattere. Aijalon kede bar me kwattere, Gatrimmon kede bar me kwattere, Gibbeton kede bar me kwattere, boma luŋ aŋwen, Eka dok i kom me nucu atekere a Manace ote miyo Taanak kede bar me kwattere kede Gat-rimmon kede bar me kwattere, ducu boma aryo. Boma me doggola a jo Kokat odoŋŋere rik te bedo ducu tomon kede bar me kwatgi. Aco boma a jo Gercom, ame obedo doggola acel i akina jo Levi, megi omio i kom me nucu atekere a Manace, omiogi Golen ame tye i Bacan kede bar me kwattere, boma ame anek laro, kede Be-ectera kede bar me kwattere, boma aryo. Eka i kom me atekere Icakar te miyo Kicion kede bar me kwattere, Daberat kede bar me kwattere, Jarmut kede bar me kwattere, En-gannim kede bar me kwattere; boma aŋwen. Eka dok i kom me atekere Acer ote miyo Mical kede bar me kwattere, Abdon kede bar me kwattere, Kelkat kede bar me kwattere, Rekob kede bar me kwattere, boma aŋwen. Eka dok i kom me atekere a Naputali ote miyo Kedec ame tye i Galilaya, kede bar me kwattere, boma ame anek laro, Kammatdor kede bar me kwattere, kede dok Kartan kede bar me kwattere, boma adek. Boma a jo Gercon, kun lubo kite a doggolagi tye kede, te bedo ducu apar wie adek kede bar me kwatgi. Baŋ jo Levi odoŋŋere, ame gin jo me doggola a Merari, gin omiogi i kom me atekere a Jabulon, omiogi Jokneam kede bar me kwattere, Karta kede bar me kwattere, Bimna kede bar me kwattere, Naalal kede bar me kwattere; boma aŋwen. Eka ibaŋ atekere a Reuben ote miyo Bejer kede bar me kwattere, Kedemot kede bar me kwattere, karacel kede Mepat kede bar me kwattere; boma aŋwen. Eka dok i kom me atekere a Gad ote miyo Ramot ame tye i Gilead kede bar me kwattere, boma ame anek laro, Maanaim kede bar me kwattere, Kecbon kede bar me kwattere, Jajer kede bar me kwattere, gin ducu ote bedo boma aŋwen. Aco boma ame omio baŋ jo a Merari, ame en doggola a Levi odoŋŋere, kun lubo kite a doggolagi tye kede, boma luŋ ame kwir omako pirgi obedo apar wie aryo. Boma a jo Levi luŋ ame onwoŋo tye i akina lobo ame obedo me a jo Icrael, gin luŋ rik oromo boma pyeraŋwen wie aboro kede bar me kwatgi, Boma acel acel i kom magi onwoŋo tye kede bar me kwattere i ŋete kannono; mannono onwoŋo tye pi boma magi luŋ. Mano en kite ame Rwot omio kede jo Icrael lobo luŋ ame rik ekwoŋo me miyo baŋ kwarigi; i kare ame gin doŋ ogamo odoko megi, gin obedo iye. Rwot doŋ te miyogi weo tuŋŋi i tuŋŋi kite ame rik okwoŋo kede baŋ kwarigi. Dano moro acel i akina okwor luŋ mom ocuŋ i nyimgi, pien Rwot onwoŋo doŋ omio okworgi luŋ i ciŋgi. I kom cikere luŋ abeco ame Rwot rik ociko baŋ doggola Icrael mom tye dano moro acel iye ame oweko a mom ocobo; gin luŋ obin ocobere. Yocwa ocwano jo Reuben, jo Gad, kede nucu me atekere a Manace, okobbigi ni, “Ityeko wunu doŋ gwoko kop luŋ ame Muca amiro a Rwot rik ocikowu kede, dok daŋ iwinyo wunu koppa luŋ i kom kop luŋ ame acikowu iye. Pi kare magi luŋ mom iweko wunu omegowu, naka tuno i kare-ni, ento ibedo gwokere wunu meicel i lubo gin ame Rwot Obaŋawu ociko. Aman doŋ Rwot Obaŋawu omio weo baŋ omegowu kite ame rik ociko kede; pi mannono, myero doŋ ilokere idok wunu pacowu i lobo ame obedo megwu ame rik Muca amiro a Rwot omiowu loka i ŋe Jordan. Cite myero igwokere wunu atek ilubo kop luŋ ame ociko kede cik ame Muca amiro a Rwot ocikowu kede, ni myero imar wunu Obaŋawu dok imok wunu i kome kun itio wunu baŋe i cunywu luŋ kede tipowu luŋ.” Yocwa olammigi gum, te cwayogi wot; gin te wot i paccigi. I kare-nono onwoŋo Muca doŋ otyeko miyo lobo i i Bacan baŋ nucu atekere a Manace; ento nucu mere ocele, Yocwa en a doŋ omio lobo i ŋet omegogi ame tye tuŋ to me Jordan. Kare ame Yocwa ocwaogi me wot i paccigi, olammigi gum, kun kobbigi ni, “Dok wunu i pacciwu kede lim abup, kede dok ecipan, karacel kede ryal, jabu, mola, nyonyo, kede ruk apipim; pokki wunu omegowu lim ame iyako wunu i baŋ okworwu.” Jo Reuben, jo Gad kede nucu me atekere a Manace te dok i paccigi; gin te pokere oko i baŋ jo Icrael i Cilo ame onwoŋo tye i lobo me Kanaan, kun gin owoto i lobo me Gilead ame obedo lobogi i komgi, ame obedo megi pi cik a Rwot ame emio Muca okobo. Kare ame gin otuno i lobo ame ceggi kede Jordan, ame tye i lobo Kanaan, jo Reuben, kede jo Gad, kede nucu me atekere a Manace te cano keno lam a ceggi i ŋet Jordan, keno lam ame dwoŋ meicel. Kare ame jo Icrael owinyo pire, gin okobo ni, “Koŋ inen wunu, jo Reuben kede jo Gad karacel kede nucu me atekere a Manace doŋ ocano keno lam i waŋ lobo me Kanaan, i lobo ame tye i ŋet Jordan ame dok tutuŋ baŋ jo Icrael.” Ka jo Icrael owinyo, lwak jo Icrael luŋ ocokere karacel i Cilo me wot lweny i komgi. Jo Icrael te koŋ cwalo Finekaci wot Eleajar alamdog baŋ jo Reuben, jo Gad kede nucu atekere a Manace i lobo Gilead, karacel kede rwode apar ame oya i atekere acel acel dano acel kun dano acel ya i atekere acel me Icrael, gin lunnono ŋat acel acel onwoŋo obedo adwon ame loo doggola a kwarigi ame onwoŋo tye i akina atekere Icrael. Gin te bino baŋ jo Reuben, jo Gad kede nucu atekere a Manace i Gilead, eka gin te kobbigi ni, “Lwak a Rwot luŋ okobo ni, ‘Man kara kodi gin aŋo ame itimo wunu me turo cikerewu kede Obaŋa a jo Icrael-li, me lokere wunu tin, dok oko i lubo Rwot, eka ite lunyo cano wunu ke no lamwu kenwu me jem i kom Rwot? Bal ame otimo i Poer mom doŋ oromowa ame daŋ mom ru olonyere iye naka tin, dok ame daŋ omio too edeke opoto i akina lwak a Rwot? Piŋo kara wun tin dok ilokere wunu oko i lubo Rwot? Nen ba, ka ce wun tin ijem wunu i kom Rwot, diki akemo bino mako Rwot i kom lwak luŋ me Icrael. Doŋ ba, amanni ka ce lobowu mom cil, kat wunu loka ca i lobo a Rwot kan ame kema me rwatte ocuŋ iye, me wek iwotinwon wunu lobowu i akina wa; myero mom ka ijem wunu i kom Rwot onyo kur imiwa wunu odok jo ojem pi cano keno lam pirwu kenwu, ame pat dok i keno lam a Rwot Obaŋawa. Akan wot a Jera mom rik okwero bedo agen i kom gin ame ojalo baŋ Rwot, eka te miyo akemo a Rwot poto i kom lwak me Icrael? Mom en keken obin oto pi ballere.’ ” Jo Reuben, jo Gad kede nucu atekere a Manace te dok iye baŋ odoŋe a loo doggola a kwari a jo Icrael ni “Won Twer, Obaŋa Rwot! Won Twer, Obaŋa Rwot! En [ŋeo; en mio jo Icrael daŋ ŋeo: Ka ce] onwoŋo wan ojem onyo oturo cikerewa kede Rwot, myero doŋ kur wekwa tin, pi cano keno lam me lokere oko teŋe kun oweko lubo Rwot; onyo ka ce wan onwoŋo otimo kittono kun oyalo: i mot awaŋa, onyo mot moko kwon onyo mot me kweyo cuny, Rwot ikome myero ocul. Pe gire, wan otimo pien onwoŋo otye i lworo i kare me anyim ikwaewu twero penyo ikwaewa ni, ‘Gin aŋo ame ilaro wunu i baŋ Rwot, ame Obaŋa a jo Icrael? Pien Rwot omio Jordan obedo waŋ lobo ame poko kinwa kede wun, wun jo Reuben, kede jo Gad; wun i mom wunu i ginnoro ame opoko pirwu i Rwot.’ Mano bino miyo ikwaewu mio ikwaewa weko woro Rwot oko. Mano en omio wan okobo ni, ‘Wek ocaŋ keno lam aman, mom me waŋo mot awaŋa onyo me miyo mot oŋolo’, cite me bedo caden i akina wan kede wun, kede dok akina ikwaewa ame bino lubowa, ni wan otio tic a Rwot i nyime kun otio i motwa me awaŋa, kede mot aŋola kede mot kweyo cuny; me wek ikwaewu kur kob baŋ ikwaewa i kare a tye anyim ni, ‘Wun i mom wunu i ginnoro ame opoko pirwu i Rwot.’ Tamwa rik onwoŋo tye ni, ‘Ka ce obino kobo man baŋwa onyo baŋ ikwaewa i kare ame tye i nyim, wan obino kobo ni, Koŋ inen wunu keno lam ame rom aroma i me a Rwot me kwariwa otio, mom me miyo mot awaŋa, onyo mot oŋolo, ento me bedo caden i akina wan kede wun.’ Wan kom mom oromo jem i kom Rwot, eka ote lokere tin kwero lubo Rwot pi cano keno lam me mot awaŋa, mot moko kwon, onyo me mot aŋola, ame pat dok i keno lam a Rwot Obaŋawa ame ocuŋ i nyim kema me rwatte.” I kare ame Finekaci alamdog karacel kede rwode a lwak, kede odoŋe a loo doggola kwari a jo Icrael, ame onwoŋo tye kede owinyo kop a jo Reuben, jo Gad, kede nucu atekere a Manace, oyomoro cunygi aber. Finekaci wot Eleajer alamdog te dokki jo Reuben, kede jo Gad, kede jo Manace ni, “Tin doŋ oniaŋ ni Rwot kara tye i akinawa, pien wun kara mom ituro wunu cikerewu i Rwot, aman doŋ ilaro wunu jo Icrael i ciŋ Rwot.” Finekaci wot Eleajer alamdog kede rwode te ya oko i baŋ jo Reuben, jo Gad ame onwoŋo tye i lobo Gilead, gin te dok i lobo me Kanaan baŋ jo Icrael, gin te dwogo kop baŋgi. Kopgi te yomoro cuny jo Icrael; jo Icrael te pwoyo Obaŋa, mom dok ote medde kobo kopporo me lweny i komgi, me babalo lobo ame jo Reuben jo Gad bedo iye. Jo Reuben kede jo Gad te cako nyiŋ keno lammono ni, Caden, kun gin kobo ni, “Pien obedo caden i akinawa ni Rwot en Obaŋa.” Kare ame doŋ kare okato alalac ame Rwot doŋ otyeko miyo jo Icrael we oko i kom okworgi luŋ ame omanogi, kun Yocwa doŋ otyeko ti oko, mwaka mere doŋ bup. Yocwa olwoŋo jo Icrael luŋ, odoŋegi, odoŋe a loo lwak, oŋolkopgi kede odoŋe tic, eka te kobbigi ni, “An doŋ ati oko, dok mwakana daŋ doŋ bup. Wun doŋ ityeko neno wunu gin ducu ame Rwot Obaŋawu otimo i kom rok magi luŋ, pien Rwot Obaŋawu olwenyo pirwu. Nen doŋ atyeko poko rok odoŋ-ŋi oko kede kwir baŋ atekerewu me bedo megwu, karacel kede rok ocele ame doŋ atyekogi oko, cakere i Jordan tuno kede naka i Nam Adwoŋ tuŋ to, Rwot Obaŋawu bino corogi oko cen i nyimwu, eka te ryemogi oko i waŋwu, wun ibino gamo wunu lobogi, kite a rik Rwot Obaŋawu ocikere kede baŋwu. Pi mannono, myero icuŋ wunu atek meicel me gwoko kede tiyo ginnoro luŋ ame ocoo i buk me cik a Muca, kun mom ilokere wunu iye teŋe i ciŋ tuŋ cem onyo tuŋ cam, me kur irubere wunu oko i rokkogo ame odoŋ i akinawu kan-ni; kur daŋ ilwoŋ wunu nyiŋ obaŋegi, onyo kwon i nyiŋgi, onyo tic baŋgi, kadi ryebere piny i nyimgi. Cite myero imok wunu i kom Rwot Obaŋawu kite ame ibedo wunu timo tuno naka tin. Pien Rwot Obaŋawu oryemo rok adoŋo atek oko i nyimwu, aco wun mom tye ŋattoro ocuŋ i nyimwu tuno naka tin. Dano acel i akinawu ryemo jo tutumia, pien Rwot Obaŋawu en a lwenyo pirwu, kite ame en rik ociko. Pi mannono myero igwokere wunu kenwu, mar wunu Rwot Obaŋawu. Pien ka ce idok wunu cen, eka ite ribere wunu i rok magi ame oweko odoŋ i akinawu, ite nyomere wunu kedgi kun inyomo wunu anyiragi, gin daŋ nyomo anyirawu, myero iŋe wunu ateni ni Rwot Obaŋa mom bino medde ryemo rok magi i nyimwu; ento gin bino doko kumma kede owic me cikowu me goyowu i laŋetwu, kede okuto me cobo wanwu, ituno ka otyekowu oko i lobo man aber-ri ame rik Rwot Obaŋawu omiowu. “Nen ba, an doŋ aceggi wot kan ame lobo luŋ woto iye, wun giwu doŋ iŋeo wunu i cunywu kede i tipowu ni mom tye koporo acel i akina gin abeco ame Rwot Obaŋawu ociko i komwu ame oweko a mom ocobere; gin luŋ ocobere gire oko pirwu, mom tye moro acel i akinagi ame mom ocobere. Doŋ kite acalo Rwot Obaŋa ocobo gin abeco luŋ ame en okobo i komwu, Rwot daŋ bino kelo gin areco luŋ i komwu tuno waŋ ame otyekowu oko iweŋ i lobo man aber ame Rwot Obaŋawu omiowu. Ka ce ibino turo wunu cikere a Rwot ame en ocikowu kede, eka ite wot wunu tic baŋ obane mogo ocele kun iryebere wunu piny iworogi wunu, mano bino miyo Rwot yie waŋ i komwu, eka ite ru to wunu oko i lobo man aber ame en omiowu.” Yocwa rik dok te coko atekere luŋ me Icrael i Cekem, eka te cwano odoŋe, odoŋe a loo lwak, oŋolkop kede odoŋe tic a jo Icrael; gin luŋ ote bino cuŋ i nyim Obaŋa. Yocwa te kobbi jo luŋ ni, “Rwot Obaŋa me Icrael okobo ni, ‘Kwariwu kare acon rik obedo loka kulo Efurate. Tera pappa Iburaim kede Nakor gin obedo tic baŋ obaŋe mogo ocele. An ate kwanyo kwarowu Iburaim i loka Kulo, eka ate tele beo kede i lobo Kanaan luŋ, ate daŋ miyo ikwae nya apol. Rik amie Ica ka; eka ate miyo baŋ Icaka, Yakobo kede Ecau, Ecau rik ate miyo lobo Ceir ame obedo kidikidi me bedo mege, cite Yakobo kede ikwae te wot i Miciri. Rik ate cwayo Muca kede Aron i Miciri, ate ŋolo kop i kom Miciri kede gin luŋ ame rik atimo i akinagi kuno; icennere ate kwanyowu oko i kuno. Rik ate kwanyo kwariwu oko i Miciri, eka ite bino wunu naka i nam; jo Miciri te ryemo kwariwu i gadigadi me romo karacel kede wegi aguragura, tuno naka i Nam Arema. Kare ame gin okok baŋ Rwot, Rwot omio colpiny obedo tye i akinawu kede jo Miciri, eka te miyo pii nam dwono i komgi, te mwonyogi oko. Waŋwu daŋ oneno gin ame atimo i Miciri, eka ite bedo wunu i tim pi kare alac. Rik dok ate kelowu i lobo a jo Amor, ame rik tye i ŋe Jordan tuŋ ocele gin rik te lweny kedwu, cite an rik ate miyogi i ciŋwu, omio ite gamo wunu lobogi oko bedo megwu, ate daŋ lwerogi oko i nyimwu, Balak wot a Jipor abaka me Moab te dok tinere lweny i kom jo Icrael, en te cwayo kwena lwoŋo Balaam wot a Beor me bin cenwu oko, cite an gira mom ate winyo Balaam; omio en te lunyo lammiwu winyo, ate larowu oko i ciŋe. Wun rik ite ŋolo wunu Jordan bino i Jeriko, jo me Jeriko te lweny i komwu karacel kede jo Amor, jo Periji, jo Kanaan, jo Kitti, jo Girgac, jo Kivi kede jo Jebuc; gin luŋ ate miyogi i ciŋwu. Rik dok ate cwayo lwak pipino apipim i nyimwu, ame te ryemogi i nyimwu, obakki aryo me a jo Amor; mannono rik mom otimere pi pala lwenywu onyo pi aterowu. Amiowu lobo ame mom itio wunu ticcoro pire, kede boma luŋ ame mom igero wunu, wun ite bedo wunu kuno; ite camo wunu nyig olok kede me jeituni ame mom gu ipito wunu.’ “Pi mannono, aman doŋ lwor wunu Rwot, eka ite tic wunu baŋe i cunywu acil kede gen; cwa wunu teŋe obaŋe mogo ame kwariwu otio baŋgi loka kulo Efurate i Miciri, eka ite tic wunu baŋ Rwot. Aco ka ce mom iye wunu tic baŋ Rwot, yer wunu doŋ tin-ni ŋat ame wun imito wunu tiye, ka obaŋe ame kwariwu otio baŋgi i kare ame gin pwod tye i lobo ame tye loka kulo Efurate onyo obaŋe a jo Amor ame ibedo wunu i lobogi; ento an kede oda, wan obino tic baŋ Rwot.” Eka jo rik te gamo ni, “Kom mom twerre kadi acel wan iweko Rwot, eka ote tiyi obaŋe mogo ocele; pien Rwot Obaŋawa en ame okwanyowa kede kwariwa me ya i lobo Miciri, i ot me opii, ame rik otimo anyuttogo adoŋo ca i nyimwa, kun gwokowa i yo luŋ ame obeo iye, kede i akina jo luŋ ame obeo i kingi. Rwot rik oryemo jo-nono luŋ i nyimwa, ame gin jo Amor ame rik bedo i lobo-nono, pi mannono wan daŋ obino tic baŋ Rwot pien en obedo Obaŋawa.” Ento Yocwa dok te kobbi jo ni, “Wun mom itwero tiyi wunu Rwot; pien en obedo Obaŋa acil; en Obaŋa ame nyek; en mom bino timowu kica i timwu me turo cik onyo i balwu, Ka ce iweko wunu Rwot eka ite cako wunu tic baŋ obaŋe ocele, bino miyo en lokere te timowu rac, bino tyekowu oko kadi bed yam koŋ otimowu ber.” Lwak te kobbi Yocwa ni, “Pe gire, ento wan giwa obino tiyi i Rwot.” Yocwa dok te kobbi lwak ni, “Wun giwu doŋ ibedo wunu cadenwu kenwu ni wun doŋ ityeko yero wunu Rwot, me tic baŋe.” Lwak dok te gamo ni, “Wan ocaden.” Yocwa te kobbigi ni, “Aco doŋ bol wunu oko kit obaŋa luŋ ame orok ame tye i akinawu, eka ite loko cunywu i kom Rwot Obaŋa me Icrael.” Lwak te gamo dog Yocwa ni, “Wan obino tiyi Rwot Obaŋawa, dok daŋ obino winyo kopere.” Mannono te miyo Yocwa moko cikere i lwak i ninonono, te keto icwil kede cik apol pirgi i Cekem. Yocwa te coyo kop magi i buk me cik Obaŋa; eka te kwanyo twon gweŋŋoro adwoŋ, te cibo cuŋ kuno i te kworo ame tye i kabedo acil ame tye pi Rwot. Yocwa dok te kobbi lwak ni, “Nen wunu ba, gweŋ man en ame bino bedo caden i komwa, pien en owinyo kop a Rwot luŋ ame en okobo i komwa; pi mannono, en bino bedo caden i komwu me kur ibwol wunu Obaŋawu.” Yocwa rik doŋ te ciko lwak, ŋat acel acel te dok i lobo mere ame rik omie. A doŋ magi luŋ otum Yocwa wot a Nuni, amiro a Rwot te doŋ to oko kun onwoŋo mwaka me dittere oromo mia acel kede apar. Gin rik te yike i lobo mere ame rik omie i Timnat-cerak i lobo me Epraim obedo kidikidi, ame tye tuŋ anyarodi me kidi me Gaac. Jo Icrael rik otiyi Rwot i kare a Yocwa luŋ, kede i kare odoŋe luŋ a rik lubo Yocwa, oweko pwod kwo dok daŋ oŋeo ginnoro ame Rwot otio pi Icrael. Cogo kom Yucepu ame rik jo Icrael okelo i Miciri ca, obin oyiko i Cekem i dul lobo ame rik Yakobo owilo i baŋ awobe a Kamor ame obedo pappa Cekem, kun oculo iye lim aromo mia acel; lobo-nono rik te doko me ikwae a Yucepu atwal. Eleajar wot a Aron daŋ te to oko, ote yiko kome i Gibea, ame obedo boma a wode Finekaci, ame rik opokke i lobo me Epraim obedo kidikidi. Kare ame Yocwa doŋ otyeko to, jo Icrael openyo Rwot ni “ŋa ce ame bino geyo twaro lweny pirwa i kom jo Kaanan?” Rwot te gamo ni, “Juda en ame bino geyo wot kuno; nen ba, atyeko doŋ miyo lobo-naca oko i ciŋe.” Juda te kobo baŋ ominnere Cimeon ni, “Biye owot kedi i lobona ame opoka kede kwir, me owot olweny i kom jo Kaanan; an daŋ abino wot kedi i lobo ame rik opokki kede kwir.” Cimeon daŋ te wot kede, Juda rik te wot kuno, eka Rwot te miyo jo Kaanan kede jo Periji i ciŋgi; gin rik te loyo jonaca tutumia tomon i Bejek. Gin orwatte kede Adoni-bejek i Bejek, ote daŋ lweny kede, ote loyo jo me Kaanan kede jo me Periji, Adoni-bejek rik te riŋo oko, ento gin te ryemo yore, ote make ŋolo twoni ciŋe kede twoni tyene oko, Adoni-bejek te kobo ni, “Rik obakki pyerabiro ame aŋolo twoni ciŋgi kede twoni tyengi bedo depo ŋid cam ame oony piny i te mejana; gin ame rik an atimo i komgi, Rwot daŋ oculo kittono i koma.” Gin rik te tere i Jerucalem, te daŋ wot to kuno. Jo me Juda rik olwenyo i kom Jerucalem te mako oko, ote neko jo iye i pala lweny, ote waŋo boma mere oko i mac. Icennere doki, jo Juda dok te wot lweny i kom jo Kaanan ame onwoŋo bedo i lobo obedo kidikidi, kede i Negeb, kede i lobo ame tye piny i te kidi. Jo Juda dok te wot lweny i kom jo Kaanan ame bedo i Kebron, ame nyiŋe rik con onwoo olwoŋo ni Kiriat-arba, gin te loyo Cecai, Akiman kede Talmai. Gin oya i kuno ote wot lweny i kom jo ame bedo i Debir. (Nyiŋ Debir aconnere onwoŋo Kiriat-ceper.) Kaleb te kobo ni, “Ŋat ame bino lweny i kom Kiriat-ceper, te mayo, abino miye nyara Akeca me bedo dako mere.” Otniel wot a Kenaj, ame obedo omin a Kaleb atidi mere, en ame te mayo, eka Kaleb te miye nyare Akeca me bedo dako mere. Kare ame nyako-nono owoto baŋ cware, en odio cware me kwayo poto baŋ pappere; en te ya oko i wi kana mere, Kaleb te penye ni, “Imito kara ŋo ba?” En te gamo ni, “Mia mottoro; kite acalo yin doŋ iketa i lobo me Negeb, mia akoŋŋoro ba.” Kaleb te miye akoŋ ame tye malo kede en ame tye tuŋ piny. Ikwae a dano me Keni, ame onwoŋo obedo or Muca, owoto karacel i jo Juda kun ya i boma me otit naka i tim me Juda, ame tye i Negeb i ŋet Arad. Gin rik te wot bedo kuno karacel kede jo turgi. Juda rik owoto karacel kede ominnere Cimeon, ote wot loyo jo Kaanan ame rik onwoŋo bedo i Jepat, te jwero oko luŋ acalo gin me kwer. Mannono rik te miyo lwoŋo nyiŋ kabedo-nono ni Korma. Juda dok te mako Gaja kede lobo mere, Acikelon kede lobo mere, karacel kede Ekron kede lobo mere. Rwot rik onwoŋo obedo i jo Juda, omiogi omao lobo luŋ obedo kidikidi odoko megi, cite jo ame onwoŋo rik bedo i lobo obedo babar ryemo oloogi oko, pien onwoŋo jo-naca tye i gadigadi lweny me nyonyo. Rik ote miyo Kebron baŋ Kaleb kite ame Muca rik ociko, kede; en rik te ryemo ikwae Anak adek i kuno. Ento jo a Benjamin rik mom oryemo jo Jebuc ame onwoŋo bedo i Jerucalem; mannono en omio jo Jebuc pwod bedo karacel kede jo Benjamin i Jerucalem naka tin. Jo me ot a Yucepu daŋ rik te wot lweny i kom Betel Rwot daŋ rik te bedo kedgi. Jo me ot a Yucepu rik te cwayo kwena roto Betel, (Nyiŋ bomanono rik con onwoŋo olwoŋo ni Luj.) Orot-piny rik te neno dano moro ame bino kun ya i boma, gin te kobbe ni, “Tim ber inyuttiwa yo ame woto i boma, wan daŋ obino timmi ber.” Dano-nono rik te nyuttigi yo ame woto i boma; gin rik te neko jo ame bedo i boma-nono oko i pala lweny, cite ote weko dano-naca kede jo me doggola mere luŋ wot. Lo-naca rik te wot i lobo a jo Kitti, te wot gero paco mere kuno, te cako nyiŋe ni Luj; mannono pwod nyiŋ kabedo-nono naka atot tin. Manace rik mom oryemo jo ame bedo i Bet-cean karacel kede pacci ame tye i ŋete, akadi i Taanak kede pacci ame tye i ŋete, akadi jo ame bedo i Dor kede pacci ame tye i ŋete, akadi jo ame bedo i Ibleam kede pacci ame tye i ŋete, akadi jo ame bedo i Megido kede pacci ame tye i ŋete; ento jo Kaanan ocerre acera me bedo i lobo-nono. Cite i kare a jo Icrael dok odoko atek, gin te miyo jo Kaanan tic atek me opii opii, mom ote ryemogi luŋ. Epraim rik mom oryemo jo Kaanan ame onwoŋo bedo i Gejer; cite jo Kaanan gire omedde bedo i akinagi i Gejer. Jabulon rik mom oryemo jo ame onwoŋo bedo i Kitron, akadi jo ame onwoŋo bedo i Nakalol; ento jo Kaanan obedo i akinagi, ote doko opiigi kun otio tic atek me opii opii. Acer rik mom oryemo jo ame onwoŋo bedo i Akko, akadi jo ame onwoŋo bedo i Cidon, akadi jo Arab, onyo me Akjib, onyo me Kelba, onyo me Apik, onyo me Rekob. Ento jo Acer obedo i akina jo Kaanan ame gin onwoŋo obedo wegi lobo-nono, pien jo Acer rik mom oryemogi. Naputali rik mom oryemo jo ame onwoŋo bedo i Betcemec, akadi jo ame onwoŋo bedo i Bet-anat, ento gin obedo i akina jo Kaanan ame onwoŋo obedo wegi lobo-nono. Kadi amannono, jo ame onwoŋo bedo i Bet-cerec kede i Bet-anat odoko opiigi kun otio tic atek me opii opii. Jo Amor rik te diyo jo a Dan atek, ote dwokogi cen i lobo obedo kidikidi; gin mom oyegi me wot i lobo obedo babar. Jo Amor rik te cerre acera me bedo i kidi me Kerec, i Aijalon, kede i Caalbim, ento jo me ot a Yucepu rik te bedo diyogi atek, ote doko opiigi kun otio tic atek me opii opii. War; lobo a jo Amor te ya i tur ame woto Akarabim, i Cela kun dok kede malo. Amalaika a Rwot rik oya i Gilgal, te wot i Bokim, te kobo ni, “Rik akwanyowu oko i Miciri, ate kelowu naka i lobo ame rik akwoŋo pire ni abino miyo baŋ kwariwu. Rik akobo ni, ‘Mom abino turo cikerena kedwu atwal, wun daŋ myero kur icikere wunu kede jo moro ame bedo i lobo man; myero imumuko wunu kenogi me yalo jogi oko.’ Ento wun giwu mom iwinyo wunu gin ame aciko. Man kara doŋ ŋo ame itimo wunu nie? Mannono omio an doŋ akobo ni, An doŋ mom abino ryemogi i nyimwu; ento gin doŋ bino doko okworwu, obaŋegi bino doko kumma me cikowu.” Kare ame amalaika a Rwot okobo koppono ducu baŋ jo Icrael, jo luŋ te belle oko i koko. Gin te cako nyiŋ kabedo-nono ni Bokim; eka gin te yalo Rwot kuno i gin oŋolo. Kare ame Yocwa rik doŋ otyeko ciko jo Icrael, ŋat acel acel rik te wot, kun ŋat man dok i lobo mere ame eleo, me wot gamo bedo mege. Jo Icrael rik otiyi Rwot i kare a Yocwa luŋ kede i kare odoŋe luŋ ame rik Yocwa oweko pwod kwo, jo ame rik onwoŋo oneno tic adoŋodoŋo luŋ ame Rwot otimo pi Icrael. Yocwa wot a Nuni, amiro a Rwot, oto ame mwaka me dittere romo mia acel kede tomon. Gin rik ote yike i lobo mere ame rikomie i Timnatkerec, i lobo me Epraim obedo kidikidi, ame tye tutuŋ anyarodi me kidi me Gaac. Lwagi jo-nono luŋ rik te to oko, te wot nywako kabedo kede kwarigi; eka lwagi jo ocele te dok pelo lubogi, ame mom rik oŋeo Rwot, akadi tic ame Rwot rik otio pi jo Icrael. Jo Icrael rik dok te cako timo gin a nen arac i nyim Rwot, ote woro gigi Baal, kun oweko gigi woro Rwot ame obedo Obaŋa a kwarigi, ame rik okwanyogi i lobo me Miciri, ote lunyo woro gigi obaŋe ocele i akina obaŋe a jo ame omanogi ote ryebere piny i nyimgi; gin te bedo roko Rwot miyo akemo mako. Gin oweko Rwot oko, ote lunyo woro gigi obaŋe mogo ame olwoŋo ni Baal kede Aciterot. Mannono rik te miyo akemo mako Rwot i kom jo Icrael, eka te jalogi i ciŋ oyak, ame gin te bedo yako jamigi. Rwot te daŋ dok jalogi oko i te twer okworgi ame onwoŋo omanogi, ame te miyogi doko jo a mom dok romo cuŋ i nyim okworgi. Kannoro luŋ ame rik gin owoto iye, ciŋ Rwot mom orwenyo i komgi, me timogi rac, kite ame rik en okwenyooro kede con, kede dok kite a Rwot rik okwoŋo kede baŋgi con. Man omiogi obedo i twon lyeto moro agwa meicel. Rwot rik dok te cako miyogi oŋolkop ame te larogi i ciŋ jo ame onwoŋo obedo yako jamigi. Kadi bed amannono, gin rik mom obedo jo ame winyo kop oŋolkopgi; pien gin gigi omedde timo tim me alaya baŋ obaŋe mogo ocele kun oryebere piny i nyimgi. Gin oweko yo ame rik kwarigi obedo lubo oyotoyot, gin gigi mom obedo winyo cik a Rwot kite ame kwarigi obedo winyo kede. I kare luŋ ame Rwot rik miogi oŋolkop, Rwot bedo konyo oŋolkopgi-nono, eka te bedo larogi i ciŋ okworgi i kare luŋ ame oŋolkopporo-ni oloo kede jo Icrael. Pien kica onwoŋo omako Rwot i komgi pi bedo cucuragi i kom jo ame onwoŋo wunogi kun diogi atek. Cite i kare naca luŋ ka ce oŋolkopgi dok oto oko, gin dok olokere odok cen i timo timmogo areco ame kato me a kwarigi oko, kun olubo obaŋe mogo ocele, oryebere piny i nyimgi, oworogi. Gin rik mom oweko kodi timgi-nono moro, akadi kittoro luŋ ame gin rik obedo lubo pi nwaŋ ŋutgi. Mannono rik te miyo akemo mako Rwot i kom jo Icrael, eka Rwot te kobo ni, “Pien jo man doŋ okalo wi cikere ame rik aciko baŋ kwarigi, dok daŋ okwero-gu winyo koppa oko, mom dok abino medde ryemo rokkoro i nyimgi, i kom rok apapat ame rik Yocwa oweko i kare ame en to, me ati kedgi me temo cuny jo Icrael, anen ka ce gin bino gwokere me lubo yo a Rwot kite ame kwarigi obedo lubo kede onyo mom.” Mannono rik te miyo Rwot weko rok apapattono luŋ doŋ kun mom oryemogi awaŋe acel, dok daŋ mom omiogi i ciŋ Yocwa. Magi gin rok ame Rwot oweko odoŋ me eti kedgi me temo jo Icrael, gin jo Icrael luŋ rik mom ru tye kede ŋeccoro me lwenyoro i Kaanan. En onwoŋo owekogi pi kop man keken, me wek lwagi jo Icrael luŋ ŋe lweny, me epwonygi kede lweny, akato mere jo luŋ ame rik onwoŋo mom ru tye kede ŋeccoro iye. Rokkono gin ene: rwode a jo Piriciti abic, kede jo Kaanan luŋ, kede jo me Cidon, kede jo Kivi ame rik onwoŋo bedo i wi kidi me Lebanon, cakere i kidi me Baalkermon tuno kede naka i dog yo ame woto Kamat. Gin onwoŋo tye me temo jo Icrael, me wek ŋe ka ce jo Icrael twero winyo cik a Rwot ame rik emio Muca ociko baŋ kwarigi. Mannono te miyo jo Icrael bedo i akina jo Kaanan, jo Kitti, jo Amor, jo Periji, jo Kivi, kede jo Jebuc. Jo Icrael rik te cako nyomo anyiragi me bedo mongi, kun gin daŋ omio awobe a jo-nono nyomo anyiragi. Gin te cako woro daŋ obaŋegi. Jo Icrael rik te timo gin anen arac i nyim Rwot, kun wigi wil oko i kom Rwot Obaŋagi, oworo gigi Baal kede Aciterot. Mannono rik te miyo akemo mako Rwot i kom jo Icrael, eka te jalogi oko i ciŋ Kucan-ricataim, abaka me, Mecopotamia. Jo Icrael rik te bedo i te twer a Kucan-ricataim mwakki aboro. Cite i kare ame jo Icrael okok baŋ Rwot, Rwot rik te miyo jo Icrael dano a myero largi, ame rik daŋ te larogi. Dano-nono rik en Otniel wot a Kenaj, ame obedo omin a Kaleb atidi mere. Cuny a Rwot rik obino i kome, en te bedo ŋolo kop a jo Icrael. En rik obin owoto olwenyo i kom Kucan-ricataim, abaka me Mecopotamia, eka Rwot te miye i ciŋe, en te loyo Kucan-ricataim. Mannono rik te miyo lobo we pi mwakki pyeraŋwen. Icennere Otniel wot a Kenaj te to oko. Jo Icrael rik dok te timo gin anen arac i nyim Rwot, Rwot rik te miyo teko baŋ Eglon, abaka me Moab me lweny i kom Icrael, pien gin onwoŋo otimo gin anen arac i nyim Rwot. Eglon rik te coko jo Ammon, kede jo Amalek, te wot lweny i kom jo Icrael loyo oko, gin rik te mayo boma me otit oko. Jo Icrael rik dok te bedo i te twer a Eglon, abaka me Moab pi mwakki apar wie aboro. Ento i kare ame jo Icrael okok baŋ Rwot, Rwot rik te miyo jo Icrael dano a myero largi, ame en Ekud wot a Gera, ame obedo dano me atekere a Benjamin; rik en lo ame acam. Jo Icrael rikomio en otero mot baŋ Eglon abaka me Moab. Ekud rik te tiyo pala lwennyere ame bit ryoryo, ame borrere kato futi acel oko. Ekud rik te rwako pala mere-nono iyi boŋo mere, i eme tuŋ cem, en rik te wot miyo mot baŋ Eglon abaka me Moab. Eglon rik onwoŋo obedo twon lo moro ocwe meicel. Kare ame Ekud rik doŋ onwoŋo otyeko miyo mot oko, en rik te cwayo jo ame onwoŋo oyeo mot teŋe, ento en i kare ame owoto otuno i te kidi ame opao apaa ame rik onwoŋo tye ceggi i Gilgal, en olokere odok cen baŋ abaka, te kobbe ni, “Atye i kopporo me imuŋ ame ocwaa kede baŋi, abaka.” Abaka te juko jo ni “Liŋ wunu.” Odoŋe luŋ ame onwoŋo bedo baŋe te wot oko. Ekud te bino baŋe kun abaka obedo kene iyi icika mere aŋic, ame tye malo i wi ot. Ekud te kobo ni, “An atye kede kwena ame oya i baŋ Obaŋa, ame akelo baŋi.” Abaka te ya oko malo i wi kommere. Ekud te ryeyo ciŋe me tuŋ cem, te woto pala romo mere i eme tuŋ cem, te cobo kede yie, pala te donyo naka i yie, eka moo te mwono lak pala oko, pien en mom onwoŋo owoto pala lweny i yie; cet te mollo oko. Ekud te ya oko i kuno kato oko, te cego doggola me icika a tye malo i wi ot, te daŋ tweyo doggola oko. Kare ame en doŋ owoto oko, amiro abaka te bino; ka gin oneno doggola me icika ame tye malo i wi ot tye ame otweo oko, gin obedo tamo ni, “En tye akonnyere i ot atidi aŋic-ca.” Gin te bedo kuro naka waŋ ame piny oloogi; kare ame gin oneno ni en mom oyabo doggola ot i malo, gin okwanyo agony ote gonyo kede doggola; gin te nwoŋo rwotgi obuto i dye ot kun doŋ oto oko. I kare ame onwoŋo gin pwod tye ka gal ca, Ekud olwi, te riŋo gire oko, te kato naka i ŋe kidi ame opao apaa ca, te riŋo gire wot laro Ceira. Kare ame en doŋ otuno kuno, en okuto apel i lobo me Epraim ame obedo kidikidi, jo Icrael rik te wot kede, kun oya i lobo obedo kidikidi, en telo wigi. En okobbigi ni, “Lub wunu yora, pien Rwot otyeko miyo okworwu, jo Moab i ciŋwu.” Gin owoto karacel kede, ote wot mako waŋ kwaŋ me Jordan oko pi geŋo jo me Moab, mom ote ye ŋattoro ŋolo kulo. Kare-nono gin te neko jo Moab ame buco romo tutumia tomon, ame moro mom obwot, kun gin luŋ obedo twoni jo mogo atek meicel. I nino-nono rik jo Icrael te loyo jo Moab oko kittono, gin te bedo i te loc a jo Icrael, lobo te dok we pi mwakki pyeraboro. Gat ame dok te bino lube, rik te bedo Camgar wot Anat, ame rik oneko jo Piriciti mia abicel kun neko kede ecipet me leko twoni. En daŋ rik olaro jo Icrael. Kare ame Ekud oto oko, jo Icrael dok te timo gin anen arac i nyim Rwot, Rwot rik te miyogi i ciŋ Jabin, abaka me Kaanan, ame rik oloo loccere i Kajor. Atel wi monnyere rik nyiŋe Cicera, ame rik onwoŋo bedo i Karoceta-goyim. Jo Icrael rik dok te kok baŋ Rwot; pien en rik onwoŋo tye kede gadigadi mia aboŋwen me nyonyo, en te bedo wuno jo Icrael meicel pi mwakki pyeraryo twal. I kare-nono dako ame obedo adwarpiny, a nyiŋe Debora ame en rik obedo dako a Lappidot, en a rik onwoŋo aŋolkop a jo Icrael. En rik onwoŋo bedo i te otit a Debora, ame onwoŋo tye i akina Rama kede Betel, i lobo obedo kidikidi me a jo Epraim; jo Icrael rik woto baŋe kuno pi ŋolligi kop. Debora rik te cwayo kwena lwoŋo Barak wot Abinoam ame rik onwoŋo bedo i Kedec i lobo a jo Naputali, eka te kobbe ni, “Rwot Obaŋa a jo Icrael ociki ni, ‘Wot icok joni i Kidi me Tabor, kun ikwanyo jo tutumia apar iyi atekere a Naputali kede iyi atekere a Jabulon. An abino miyo Cicera ame obedo atel mony a Jabin bino rwatte kedi i dog kulo me Kicon, karacel kede gadigadi mere, kede monynyere luŋ; abino miye i ciŋi.’ ” Barak rik te kobbi Debora ni, “Ka ce iwot keda, abino wot, ento ka mom iwot keda, an daŋ mom abino wot.” Debora te dok iye ni, “An abino wot kedi gire; cite myero ineni yo ame iwot iyenono mom ibino nwoŋo iye kwogo moro. Rwot bino miyo Cicera i ciŋ dako.” Debora rik te ya wot gin kede Barak naka i Kadec. Barak te lwoŋo jo Jabulon kede jo Naputali i Kadec; jo tutumia apar rik te lubo yore; Debora daŋ te wot kede. I kare-nono Keber, ame en dano me Keni, onwoŋo opokere oko i jo Keni, ame rik obedo ikwae a Kobab, ame obedo or Muca. En rik onwoŋo oguro kema mere teŋe kannabor ame ceggi kede kworo ame rik tye i Jaanannim, ame ceggi i Kadec. Kare ame otitti Cicera ni Barak wot a Abinoam doŋ otyeko wot oko i kidi me Tabor, Cicera rik te cwano wegi gadigadi nyonyo mere luŋ, ame gin rik romo tutumia abonwen, kede jo luŋ ame rik onwoŋo tye baŋe, cakere i Karoceta-goyim naka i kulo Kicon. Debora te kobbi Barak ni, “Ya doŋ malo, pien tin en nino ame Rwot omio iye Cicera i ciŋi. Rwot en ame bino telo nyimi.” Mannono te miyo Barak cako yitto piny i wi kidi me Tabor karacel kede jo tutumia apar ame onwoŋo lubo yore. Rwot rik te babaŋo Cicera oko i nyim Barak, karacel kede wegi gadigadi mere luŋ, kede monynyere daŋ luŋ, te miyo nekogi oko luŋ i pala lweny; cite Cicera rik te pye oko i wi gadigadi mere, te riŋo i tyene. Barak te ryemo yo gadigadi kede monygi naka i Karoceta-goyim; mony a Cicera luŋ rik ote neko oko i pala lweny, ŋattoro acel i akinagi mom odoŋ. Ento Cicera te riŋo kede tyene naka i kema a Yayeri, ame obedo dako a Keber, dano me Keni; pien onwoŋo kuc tye i akina Jabin, abaka me Kajor kede jo me ot a Keber, ame obedo dano me Keni. Yayeri te kato oko me jolle, te kobbe ni, “Adwoŋ, wirre ilar baŋa kan, kur ilwor.” Cicera daŋ te wirre wot baŋe i kema mere, en te wumo kome oko kede boŋo moro. Cicera te kwaye ni, “Tim ber koŋ imia pii moro amati, pien oryo pii obwoa oko.” Yayeri te yabo dog ocoe me cak, te miye mato, eka te wumo kome oko. Cicera te kobbe ni, Cuŋ i dog ke ma, Ka ce ŋattoro obino te penyi ni, “Dano moro tye kan? Yin kobbe ni, ‘Pe gire’.” Cite Yayeri, dako a Keber te kwanyo teke guro kema, te kwanyo daŋ anyul mako i ciŋe, te cedde momot wot baŋe, te wot goyo teke i nyime tuŋ cel, naka teke odonyo, piny i lobo, pien onwoŋo Cicera onino meicel pi olo. Cicera te to oko kittono. Cite nen ba, i kare ame Barak onwoŋo tye aryemo yo Cicera, Yayeri odonyo oko me wot jolle, eka te kobbe ni, “Biye, me anyutti ŋat ame iyenyonono.” Barak daŋ te wot iyi kema, te nwoŋo kom Cicera tye obuto piny i kema kannono, ame oto kun teke tye ogurre i nyime. Mannono kite ame Obaŋa rik oloo kede Jabin, abaka me Kanaan i nino-nono i nyim jo Icrael. Jo Icrael rik te medde diyo Jabin, abaka me Kanaan atek ateka, tuno waŋ ame gin otyeko oko iweŋ. Debora gin kede Barak wot Abinoam rik te mwoco wer oko i nino-nono ni, “Otel mony otelo wi Icrael, jo omiye gigi kengi kengi; pwo wunu Rwot! “Winy wunu ba, wun obakki, ter wunu yitwu ba, wun oloc; an abino wer baŋ Rwot, abino mwoco wer i dwon amit baŋ Rwot Obaŋa a jo Icrael. “Rwot, i kare ame rik ibino i Ceir, i kare ame iya i lobo me Edom, lobo rik oyeŋere, kot daŋ ocwe i polo, ee ta, kot ocwe i pol. Kiddi luŋ oyeŋere i nyim Rwot Cinai i tuŋ ca daŋ oyeŋere i nyim Rwot Obaŋa me Icrael. “I kare a Cangar wot Anat, kede i kare a Yayeri, gudo oliŋ aboŋo jo awoto iye, jo dok lunyo ciro i yo atitino. Jo abedo i caro mom bino bedo tye iyi Icrael, tuno waŋ ame yin Debora ibino, yin ibino acalo toto iyi Icrael. I kare ame oyero obaŋe mogo anyen, aco lweny doŋ onwoŋo ceggi acega, Kwottoro onyo toŋŋoro rik onwoŋo nen ateni, i akina jo Icrael tutumia pyeraŋwen? Tamma te ŋwec i kom otel wi mony me Icrael, ame omiye gigi kengi kengi i akina jo Icrael. Pwo wunu Rwot. “Wer wunu koppere ba, wun jo ame bedo i wi kana arema, wun jo ame bedo i kom opar me wel, kede wun jo ame woto i dye yo. Dwon ower i ka twomo pii gin otye ka pako kede loc a Rwot kuno, gin opako loc a jo obedo i caro i kom okworgi iyi Icrael. I nino-nono jo a Rwot omol oluŋere piny naka i dogcel me boma. “Debora wee, co oko, co oko! Co oko, co oko, me icak wer! Ya malo Barak me itel wi opiini ame iyako, ya malo yin wot Abinoam. I kare-nono, jo a ŋeye ame odoŋ te cako mol; jo a Rwot omol me wot lweny pire i kom jo atek. Jo Epraim oya te wot bedo i luŋ, kun olubo yori yin Benjamin kede watini; otel wi mony me Makir ociro owoto piny, omak abiro loc oya i megi i Jabulon. Oloc a jo Icakar obino karacel kede Debora, kede jo Icakar ame geno Barak, gin ogwarre i yore luŋ. Ento jo me atekere a Reuben, cunygi mom obedo yom iye. Piŋo kara rik ibedo iyi anok rommi, me winyo nyamulere ame okuto iyo rommi? jo me atekere a Reuben cunygi mom obedo ayom iye. Gilead rik odoŋ loka Jordan; kara piŋo Dan rik obedo mere i mel? Acer te bedo mere mot i dog nam, kun otworo toke i waŋ kwaŋŋere. Jabulon obedo lwak ame ojalo kwogi i to; Naputali daŋ amannono, i bar obedo tutur. “Obakki rik obino, ote lweny; obakki me Kanaan olwenyo, i Taanak, kede i ŋet pii me Megido mom ote nwoŋo ryalloro me ayaka. Acer me polo daŋ olwenyo, gin olwenyo i kom Cicera, kun olubo kite a gin wirre kede. Kulo me Kicon ager-ri oterogi oko, i wi biamwonyi ager, Kicon ager-ri. Wot kede teko yin tipona! “Ogweŋ tyen aguraguragio moro piny kun opye okirre malo, aguraguragi pye kirre malo. “Amalaika a Rwot te kobo ni, ‘Cen Meroj oko, cen jo a bedo iye atek meicel, pien gin okwero riŋo i duru a Rwot me konyo Rwot i komjo atek.’ “Yayer i myero mi winyo adwoŋ meicel. Yayeri dako a Keber, ame obedo dano me Keni, kome i winyo a kato mon luŋ a bedo i kema. Okwae pii, en olunyo miye cak, okele cak opoto i gwata moro me kwogo. Ciŋe omako teke me guro kema, ciŋe tuŋcem te tiŋo anyul atic; te goyo wi Cicera tuco pel. Oŋoye, te rette oko piny, obuto piny ilwe ka tyene, te ŋoye, rette piny i ka tyene, kan ame en oŋoye iye-nono te daŋ rette iye piny to oko. “Dako oroo waŋe i waŋ dirica, tota a Cicera ociko waŋe kun neno i waŋ ot. Piŋo kara gadigadi mere oru meicel? Piŋo kara agruagura mere ogal meicel me mor bino? Monnere adito, aryek i ŋete ogamo doge, en daŋ te nwoŋo pire kene ni, ‘Mom opoko jami ame oyako? dano acel acel tero nyako acel onyo aryo; boŋo ame ŋwaŋwara ame oyako pi Cicera, boŋo ame ŋwaŋwara, ame okekedo, boŋŋi aryo ame okekedo me abola i ŋuta acalo gin oyako.’ “Ama Rwot, kono okworri luŋ otum kittono! Cite jo ame mari bed calo ceŋ ame pello i lyeto mere.” Lobo rik koŋ dok te we pi mwakki pyeraŋwen. Jo Icrael rik dok te cako timo gin anen arac i nyim Rwot, Rwot dok te miyogi i ciŋ jo Midian pi mwakki abiro. Ciŋ jo Midian rik te cirogi oko, ame te miyogi yiko ka ponogi iyi aduyi ame onwoŋo tye i akina kiddi kede gorogoro, kede i kabedo mogo ame ogeŋo atek pi lworo jo Midian. Pien i kare luŋ ka jo Icrael ocoo kotigi doŋ piny, jo Midian kede jo Amalek, kede jo tuŋ kide, gin luŋ omukere, obino olwenyo i komgi. Gin obino ote guro gonygi i ŋet jo Icrael, ote bedo balo cam i pottigi tuno naka i Gaja ame ceggi kedgi, kun mom oweko cammoro doŋ me konyo jo Icrael, akadi romo, onyo twon, onyo kana. Pien gin ka obino, obino kede limgi akwo, kede kemagi, kun obino apipim calo bonyo a mom romo kwanne, karacel kede inagagi; gin ka obino, obalo lobo oko. Jo Midian rik te miyo jo Icrael bedo jo moro a piny meicel kittono; jo Icrael rik te kok baŋ Rwot. I kare ame jo Icrael okok baŋ Rwot pi peko a jo Midian, Rwot rik te cwayo adwarpiny baŋ jo Icrael. Adwarpiny te kobbigi ni, “Rwot Obaŋa a jo Icrael okobo ni, yam atelowu me ya i Miciri, ate kwanyowu oko i ot me opii. Rik, alarowu i ciŋ jo Miciri, karacel kede i ciŋ rok luŋ ame obedo wunowu ate daŋ ryemogi oko i, nyimwu, ate lunyo miyowu lobogi. Rik ate kobbiwu ni ‘An a Rwot Obaŋawu; myero kur iwor wunu obaŋe a jo Amor, ame ibedo wunu i lobogi.’ Cite wun ikwero wunu winyo koppa oko.” I kare-nono amalaika a Rwot rik te bino bedo i te kworo ame tye i Opra, ame onwoŋo obedo mea a Yowaci ame obedo dano a jo Abiejer, kun onwoŋo rik wode Gideon tye adino ŋano i ka biyo olok, me ekan oko pi lworo jo Midian. Amalaika a Rwot rik te nen baŋe, te kobbe ni, “Rwot tye kedi, yin twon lo atek me lweny.” Gideon te kobbe ni, “Adwoŋ, koŋ akwai ba, kara ka Rwot tye kedwa, piŋo kop magi luŋ dok opoto i komwa? Kara ticcoro me awura ame kwariwa bedo tittiwa pire-ni tye kwene? Gin okobo ni, Rwot en ame rik okwanyowa i lobo me Miciri. Ento aman doŋ Rwot obolowa oko, omiowa doŋ i ciŋ jo Midian.” Rwot te lokere baŋe kobbe ni, “Wot ilar jo Icrael i ciŋ jo Midian i twon teko meri adwoŋ wokkono. Mom aori bo?” En te kobbe ni, “Tim ber, Rwot, an atwero laro jo Icrael i yore aŋo? Nen ba, atekerena en ame doŋ goro okato kare i akina jo Manace, dok an abedo cogo i doggolawa.” Rwot te kobbe ni, “Ento an abino bedo kedi, ibino neko jo Midian calo ineko dano acel keken.” Gideon te kobo ni, “Aco ka doŋ ayomoro cunyi, koŋ inyutta doŋ ginnoro ame nyuto ni yin en ikobo kedanono, Tim ber kur iya i kan, tuno waŋ ame abino baŋi, akelo motta aketo i nyimi.” En te gamo ni, “Abino kuri tuno waŋ ame idwogo.” Gideon odok i ode, te wot tedo atin dyel, kede capat a tobi mom iye ame otedo i moko kwon a romo gwata adek. Eka te keto riŋo i dita, te onyo pige i tabo, te tero i te kworo, keto i nyime. Amalaika Obaŋa te kobbe ni, “Kwany riŋo kede capat a tobi mom iye, me iketgi i wi lela man, ite onyo pig riŋo i komgi.” Gideon daŋ te timo kittono. Amalaika a Rwot te cwayo abiro mere ame onwoŋo tye i ciŋe, te miyo wie gudo riŋo kede capat a tobi mom iye, mac te ya i kom lela-nono, te waŋo riŋo kede capat a tobi mom iye oko. Amalaika a Rwot te doŋ rwenyo oko i baŋe, Gideon te niaŋ ni mannono kara onwoŋo obedo amalaika a Rwot; en doŋ te kobo ni, “Ama Rwot Obaŋa, ato oko omayin! Pien aman doŋ aneno amalaika a Rwot waŋ i waŋ.” Cite Rwot te kobbe ni, “Kuc obed baŋi, kur ilwor, mom gire ibino to.” Gideon te cano keno lam kuno pi Rwot, te cako nyiŋe ni, Rwot en kuc, keno lammaca pwod tye ocuŋ i Opra, ame obedo me ajo Abiejer naka atot tin. I dyeworrono Rwot rik te kobbe ni, “Kwany twon a pappi, twon me aryo mere ame mwaka me dittere doŋ oromo abiro, muk keno lam a pappi me yalo Baal oko, toŋ daŋ yat Acera oko ame tye i ŋete. Eka i te cano keno lam a Rwot Obaŋani i ka pononi kan, kun icano i gweŋe ame ocano i yore. Kwany twon me aryo-ca ite ŋolo me mot awaŋa, kun iwaŋo i yen ame ocicibo i ka woro jok a dako ame olwoŋo ni Acera, ame ibino toŋo.” Gideon daŋ te timo kittono, otero jo apar i akina omiro mere, te wot timo kite ame Rwot ocike kede; cite pi lworo jo turgi karacel kede jo me paco-nono, omio en mom oti mo dyeceŋ, ento otimo dyewor. Kare ame jo me paco-nono odonyo oko odiko con, nen ba, gin onwoŋo keno lam a Baal omukere oko, kede Acera ame onwoŋo tye i ŋete daŋ otoŋo oko, dok daŋ owaŋo twon twon me aryo i keno lam ame ocano kuno. Gin te bedo penyere kengi kengi ni, “Man ŋa kara ame otimo gin-ni?” I kare ame gin obedo yenyo kun opepenyo, gin doŋ te kobo ni, “Gideon wot a Yowaci en ame otimo gin-ni.” Jo me paco-nono te kobbi Yowaci ni, “Kel wodi oko kan me onek oko, pien en otyeko muko keno lam a Baal oko, dok daŋ otoŋo jo a dako ame olwoŋo ni Acera ame onwoŋo tye i ŋete oko piny.” Ento Yowaci te kobo baŋ jo luŋ ame onwoŋo oryeye me lweny i kome ni, “Wun ibino wunu me lweny pi Baal bo? Wun icuŋ wunu pire? Ŋat ame bino lweny pire obino neko oko odiko-ni. Ka ce en obedo obaŋa, wek en lweny pire kene, pien keno lammere doŋ otyeko muko oko.” Mannono omio ocako nyiŋ Gideon i nino-nono ni, Jerubaal, ame te koppere ni, “Wek Baal en ame lweny i kome,” pien omuko keno lammere oko. Jo me Midian kede jo Amalek karacel kede jo me tuŋ kide, ote bino karacel ŋolo kulo Jordan, ote bino guro kemagi i luŋ me Jejreel. Cuny a Rwot rik te bino i kom Gideon, en te cako kuto apel, te lwoŋo jo Abiejer bino lube. En dok te cwayo kwena baŋ jo Manace luŋ, gin daŋ ote lwoŋogi bino lube. Dok te cwayo kwena baŋ jo Acer, kede jo Jabulon kede Naputali; gin daŋ te wot kuno me wot rwatte kede. Gideon te kobbi Obaŋa ni, “Ka ce ibino laro jo Icrael kede ciŋa kite a rik ikobo. Nen ba, an aketo lao romo piny i laro me dino kal; ka ce toyo bino luk ka i kom yer romo keken kun piny luŋ otwo atwoa, mannono bino miya aŋeo ni yin ibino laro jo Icrael kede ciŋa, kite a rik ikobo.” Rik daŋ te timere kittono. Kare ame en oya ibayi, odwidwinyo toyo i kom yer romo, toyo mere te poŋ yi bakuli, Gideon dok te kobbi Obaŋa ni, “Kur imi akemo maki i koma. Tima kica akob doŋ icel keken. Koŋ iwek dok amed temo icel i kom lao romo-ni. Tim ber dok imi yer romo keken en ame bed otwo atwoa, cite kabedo luŋ ame en tye iyeni, toyo luk iye.” Obaŋa dok te timo kittono dyeworrono. Pien toyo onwoŋo oluk i kabedo luŋ ame yer romo tye iye, cite lao keken en onwoŋo otwo. Eka Jerubaal, ame en Gideon, karacel kede jo a rik tye tye baŋe, te dilo i bayi, ote wot guro gonygi i ŋet pii me Karod. Gony a jo Midian onwoŋo tye i ŋetgi tutuŋ anyarodi, i luŋ ame tye i ŋet kidi More. Rwot te kobo baŋ Gideon ni, jo ame tye baŋi-ni pol meicel, ame ka abino miyo jo Midian i ciŋe kede lwak jo-ni luŋ, bino miyo jo Icrael wakere i koma, ni mannono, “Ciŋa gira en olara.” Pi manono, kobbi lwak ni, “Ŋat ame lwor dok ame kome amyel, myero en dok gire paco.” Gideon daŋ te temogi kittono, eka jo tutumia pyeraryo wie aryo rik te dok paco, te doŋ jo tutumia apar. Rwot te kobo baŋ Gideon ni, “Jo pol meicel; tergi i pii, me awot atemgi koŋ kuno. Ŋat ame an abino kobbi ni, ‘Dano man bino wot kedi’, bino daŋ wot kedi; cite ŋat ame abino kobbi ni, ‘Dano man mom bino wot kedi’;” En te tero lwak kan apii tye iye eka Rwot te kobbe ni, “Ŋat ame bino gamoro pii kede lebe ka amato, kite ame gwok gamoro kede ka ama to pii, dano-nono ibino poko pat; ibino daŋ timo kittono i kom dano acel acel ame bino rumo piny me mato pii.” Wel jo ame te mato pii i ciŋgi kun ogamoro kede lebgi bala gwok, te romo mia adek, cite jo ocele mege luŋ te rumo aruma me mato pii. Rwot te kobbi Gideon ni, “Abino larogi kede jo mia adek ame omato pii kun gamoro i lebgi bala gwok, ate miyo jo Midian i ciŋwu. Mi jo ocele mege-ni luŋ dok gigi pacogi.” Gideon te gamo opoko pii oko i ciŋ lwak karacel kede apelgi; eka te cwayo jo Icrael ocele mege-ni luŋ dok oko i gony kun ŋat acel acel dok i kema mere, jo mia adek keken en ame te doŋ baŋe. Gony a jo Midian onwoŋo tye piny i luŋ. I dyeworrono Rwot te kobbi Gideon ni, “Ya malo iwot ilweny i kom jo i gony, pien atyeko miyogi oko i ciŋi. Aco ka ilworo me wot piny baŋgi kuno, wot i gonygi wun amironi Pura. Ibino winyo gin ame gin akobo, mannono bino miyo inwoŋo tekcuny me cobogi i gonygi.” Gideon daŋ te wot gin kede amiro mere Pura naka i dog gony a jo Midian tuncel, kan ame olwenygi buto iye. Jo Midian kede jo Amalek kede jo luŋ ame oya i tuŋ kide oryeo kemagi i luŋ kun opette calo bonyo a mom kwanne. Inagagi daŋ onwoŋo mom kwanne, calo kwoyo me dog nam. Kare ame Gideon otuno kuno, lomoro onwoŋo tye atitto lekkere baŋ awottere, kun titte ni, “Nen ba, an aleko lekkoro ni aneno aŋina ogati moro me cayiri opoto i gony me Midian eka te bedo lor bino i kema, te napo reto oko piny kun loko yie ataro.” Awottere te dokke iye ni, “Man gire pala lweny a Gideon wot a Yowaci, dano me Icrael; en gire ennono i kome. Obaŋa gire doŋ otyeko miyo jo Midian karacel kede monnyere luŋ i ciŋe.” Kare ame Gideon doŋ otyeko winyo kite ame otito kede lek, kede kite ame ogonyo kede te koppere, en oworo Obaŋa. En te lokere dwogo cen i gony ajo Icrael, te kobo ni, “Ya wunu malo, pien Rwot doŋ otyeko miyo mony a jo Midian luŋ i ciŋwu.” Gideon te poko jo mia adekkono i dul adek, te keto apel i ciŋgi gin luŋ karacel kede opoko pii mogo ame yigi nono, kun mac rao tye i yigi luŋ, En te kobbigi ni, “Nen wunu, ite timo wunu daŋ gin ame an atimo. Kare ame an doŋ atuno ceggi i ŋet gony, tim wunu gin ame an ati mo. Ka an akuto apel karacel kede jo ame tye baŋa, wun kut wunu apel i twok gony luŋ kun daŋ iredo wunu ni, ‘Pi Rwot kede pi Gideon.’ ” Gideon karacel kede jo mia a rik onwoŋo tye baŋe te wot aceggi i ŋet gony i cuny dyewor ame jo ca pwod aketo okur-piny aketa, gin te cako kuto apelgi oko kun oneneko opokki ame onwoŋo tye i ciŋgi. Eryoŋet adek luŋ te daŋ kuto apelgi kun daŋ oneneko opokki oko, kun omako mac rao i ciŋgi tuŋcam, eka i ciŋgi tuŋcem te bedo iye apel me akuta, ote daŋ wo kun oredo ni, “Pala lweny pi Rwot kede pi Gideon!” Gin luŋ ote cuŋ oko karacel kun ŋat man cuŋ kakare i ŋe gony. Mon ame onwoŋo tye i gony te ero ŋwec kun okok. Kare ame okuto apel mia adek luŋ. Rwot omio mony a jo Midian oloko pala lwenygi i kom owotegi kede i kom monygi luŋ. Mony rik te riŋo naka i Bet-cita, ame tye i yo tutuŋ Jejera, tuno kede naka i waŋ lobo me Abel-mekola, ame tye i ŋet Tabat. Eka rik ote lwoŋo jo Icrael i Naputali, kede i Acer, kede i Manace luŋ, gin te bino ryemo yo jo Midian. Gideon te cwayo kwena i lobo me Epraim luŋ obedo kidikidi kun kobo ni, “Biye wunu, me ibin ilweny wunu i kom jo Midian, ikurgi wunu i waŋ kwaŋ luŋ tuno kede naka i Bet-bara, kede i Jordan.” Rik daŋ ote lwoŋo jo luŋ me Epraim, gin te bino mako waŋ kwaŋ luŋ, tuno kede naka i Bet-bara, kede i Jordan. Gin rik te mako rwode a jo Midian aryo, Oreb kede Jeeb. Gin te neko Oreb i kidi me Oreb, eka Jeeb gin te neko i ka biyo olok a Jeeb. Man gin otimo i kare ame gin ryemo jo Midian. Gin rik te kela wi Oreb kede wi Jeeb baŋ Gideon loka Jordan. Jo Epraim te kobbi Gideon ni, “Itimowa kara kit man piŋo ba? Nen yin mom ilwoŋowa i kare ame iwoto i lweny i kom jo Midian.” Gin te da i wie atek meicel. Gideon te kobbigi ni, “Kara aman an atimo ŋo ame otwero poro kedwu? Mom rayo olok a jo Epraim obedo ber ame kato en ame Abiejer opwono oko? Nen, Obaŋa omio rwode me Midian i ciŋwu, Oreb kede Jeeb. Kara doŋ gin aŋo ame an atwero timo ame otwero poro kedwu?” I kare ame en okobo man, akemogi doŋ te cako kwe oko. Gideon te kato loka Jordan, en karacel kede jo mia adek ame onwoŋo tye baŋe, kun onwoŋo gin ool meicel, cite onwoŋo pwod otye oryemo yo jo Midian. Omio en te kobbi jo Cukot ni, “Tim wunu ber imi wunu ogati baŋ jona-nie, pien gin ool meicel, dok atye aryemo yo Jeba kede Jalmuna, ame gin rwode me Midian.” Rwode me Cukot te gamo ni, “Jeba kede Jalmuna doŋ imako oko bo, ame miowa omio ogati baŋ monnyi-nie?” Gideon te gamo ni, “Aco doŋ do, cite ka Rwot bino miyo Jeba kede Jalmuna i ciŋa, abino pwopwodo komwu kede okuto alal me tim kede okuto laŋo.” En rik te kato oko i kuno te kato naka i Panuel, te daŋ kwayogi kite acellono. Jo me Panuel daŋ te kobbe kite ame jo me Cukot onwoŋo okobbe. En te kobbi jo Panuel ni, “Inino ame abino dwogo kan i kuc, abino muko twon gedo moro ocuŋ kan i guŋ-ŋi oko.” I kare-nono onwoŋo Jeba kede Jalmuna tye i Karkor, karacel kede monygi ame welgi romo tutumia apar wie abic. Man jo ame onwoŋo odoŋ i kom mony luŋ ame onwoŋo oya i tutuŋ kide; pien jogi onwoŋo doŋ oneko oko ame romo tutumia acel kede pyeraryo, ame rik gin onwoŋo jo me lweny. Gideon te wot lubo yo ame jo a bedo i kema lubo ame tye tutuŋ kide me Noba kede Jogbeka, en te wot lweny i monygi, pien monygi onwoŋo obedo otworo tokgi ata aboŋo jo moro ame kuro piny. Jeba kede Jalmuna rik te riŋo oko, eka en te ryemo yorgi, te mako rwode aryo me Midiannono oko, Jeba kede Jalmuna, te miyo monygi luŋ bedo ame komgi doŋ oto oko. Gideon wot a Yowaci te doŋ dwogo i lweny kun lubo yo i tutuŋ malo ame woto i Kerec. En te mako atin awobi moro me Cukot, te pepenyo en, awobi-nono te coye nyiŋ rwode kede odoŋe luŋ me Cukot, ame gin luŋ oromo pyerabiro wie abiro. Gideon te wot baŋ jo Cukot, te kobbigi ni, “Neno wunu doŋ Jeba kede Jalmuna ame rik iŋala wunu pirgi-nie, kun ikobo wunu ni, ‘Jeba kede Jalmuna doŋ imako oko bo, ame miowa omio ogati baŋ joni ame ool wokkono?’ ” Gideon te mako odoŋe me bomanono, te jako okuto alal kede me laŋo, te bedo pwodo kede jo me Cukot. Dok te muko daŋ twon gedogi ame onwoŋo ocuŋ i guŋ i Penuel, te daŋ neko jo me boma-nono oko. Gideon te kobbi Jeba kede Jalmuna ni, “Ane kara jo ame rik ineko wunu i Tabor?” Gin te gamo ni, “Kite ame yin ibedo kede-nono, en kite ame gin daŋ rik otye kede; rik ocalli itino abaka moro.” Gideon te dok iye ni, “Jonnaca rik obedo omegona ame onywako kedgi toto; daŋ kite a Rwot tye kede kwo-ni, kono rik mom inekogi, kono an daŋ mom anekowu.” Gideon te kobbi Jeter wode me kao ni, “Ya malo inekgi oko.” Ento atin awobi ca mom gire te woto pala mere; pien en onwoŋo alworo, kite acalo rik en pwod atin awobi. Jeba kede Jalmuna te kobbi Gideon ni, “Yin doŋ ya ikomi inekwa oko, pien kite ame ico tye kede, teko me kome daŋ tye kittono.” Gideon te ya neko Jeba kede Jalmuna oko, te gonyo mola me cal dwe ame rik onwoŋo tye i ŋut inagagi. Jo Icrael doŋ te kobbi Gideon ni, “Yin doŋ bed alocwa, yin karacel kede wodi kede ikwai, pien yin ilarowa i ciŋ jo me Midian.” Gideon te kobbigi ni, “An gira mom abino bedo alocwu, woda daŋ mom bino bedo alocwu; Rwot en ame bino bedo alocwu.” Gideon te kobbigi ni, “Koŋ akwawu ba, ŋat acel acel myero otim ber omia mola yit ame eyako.” (Pien okworgi ame gin olwenyo i komgi onwoŋo rik tye kede jabu ame gin oruko i yitgi, pien gin rik obedo jo Icmael.) Gin te gamo ni, “Wan oye miyi gire.” Gin te peto boŋo piny, ŋat acel acel te bolo iye mola me yit ame eyako. Pek a jabu me yit ame ekwao-naca te romo cekel tutumia acel kede mia abiro-nono kun nwoŋo mom oribo iye mola me cal dwe, kede mola aruka ame ryeny aryenya kede boŋŋi ame obedo amaramar ame rik onwoŋo rwode me Midian ruko, dok daŋ mom oribo iye mola ame onwoŋo gin tweo i nut inagagi. Gideon rik te twakogi me epod, te keto i paco mere i Opra; jo Icrael rik te bedo timo tim me alaya kuno, eka te lokere doko kumma me ciko Gideon kede ode luŋ. Obaŋa rik te loyo jo Midian kittono i nyim jo Icrael, naka mom dok ote medde tiŋo wigi atwal. Lobo rik dok te we pi mwakki pyeraŋwen i kare a Gideon. Jerubaal wot a Yowaci rik te wot bedo i ode. Gideon rik onwoŋo tye kede itino awobe pyerabiro, ame obedo itino mere ikokome, pien monne rik pol. En daŋ onwoŋo tye kede dako ame obedo aŋeca, ame rik bedo i Cekem; dako-naca rik te nywalle atin awobi, ame en te cako nyiŋe ni Abimeriki. Gideon wot a Yowaci rik doŋ te to oko ame doŋ onwoŋo oteggo aber abera, eka ote yike i lyel a pappere Yowaci, ame onwoŋo tye i Opra, me a jo Abiejer. Kare ame Gideon doŋ oto, jo Icrael rik dok te lokere oko i timo tim me alaya baŋ Baal, ote miyo Baal-berit bedo obaŋagi. Jo Icrael mom dok te po i kom Rwot Obaŋagi ame rik olarogi i ciŋ okworgi tuŋŋi i tuŋŋi. Gin daŋ mom ote nyuto cunnyoro me mar i kom otino a Jerubaal (ame en Gideon) pi ginnoro luŋ aber ame en rik otimo i kom jo Icrael. I kare-nono Abimeriki wot a Jerubaal rik te wot i Cekem baŋ ŋeo mere, te wot kobbigi luŋ karacel kede jo luŋ me doggola a tottere, ni, “Kob wunu kop kun jo Cekem luŋ awinyo, ni, ‘Mene ame ber i tuŋ baŋwu, ka itino a Jerubaal luŋ en ame oloowu onyo ŋat acel en ame oloowu?’ Myero daŋ ipo wunu ni an abedo atin meremowu ikome.” Neo mere te kobo kop magi luŋ pire kun jo me Cekem luŋ awinyo. Cuny jonnaca rik te lokere oko me lubo Abimeriki pien gin okobo ni, “En obedo ominwa.” Gin te miyo Abimeriki lim me ryal a romo pyerabiro-nono, ame okwanyo i ot Baal-berit; en te bedo wilo i jo a konygi pe, ame kitegi obedo atata, me wek gin bed jo a lube. En rik te dok paco i ot a pappere ame tye i Opra, te neko omego mere oko, ame obedo itino a Jerubaal, oneko gin pyerabiro luŋ i kom gweŋ acel keken; ento awobi a Jerubaal atidi mere Yocam, rik te bwot, pien en onwoŋo opono gire oko. Jo luŋ me Cekem rik te wot cokere karacel, kede jo me Bet-millo luŋ, ote wot keto Abemiriki me bedo abaka i Cekem i ŋet kworo ame kidi ocibo me awora tye i ŋete. I kare ame okobbi Yocam kop man, en owoto, te wot cuŋ malo i wi kidi me Gerijim, te redo atek kun kobbigi ni, “Wun jo me Cekem, koŋ iwinya wunu, me Obaŋa winy kwacwu. I nino moro yen ociro me wot wiro ŋattoro i akinagi me bedo abakagi. Gin rik te kobo baŋ jeituni ni, ‘Lowa ba.’ Cite jeituni rik te gamo ni, ‘Abino weko twon moo i koma-ni oko, ame oworo kede obaŋe kede dano, eka ate wot yeŋere i wi yen malo?’ Yen dok te kobbi oduro ni, ‘Yin giri bin ilowa.’ Cite oduro te kobbigi ni, ‘Kite ame alim kede wok-ki awek oko, kede nyigga abeco wok-ki, ate wot bedo yeŋere i wi yen malo kuca?’ Yen dok te kobbi olok ni, ‘Yin giri bin ilowa.’ Cite olok te kobbigi ni, ‘Awek piga ame yomoro cuny Obaŋa kede dano-ni oko, eka ate wot bedo yeŋere i wi yen malo kuca?’ Yen luŋ te doŋ kobbi abelwinyo ni, ‘Yin giri bin ilowa.’ Abelwinyo te kobbigi ni, ‘Ka ce iwira wunu i moo me loc, me wek abed abakawu i cuny me ateni, bye inwoŋ wunu ka larre i tipona; aco ka ce mom amannono, mac myero ya i kom abelwinyo owan yen cedar luŋ me Lebanon.’ “Doŋ pi mannono ba, ka rik itimo wunu kede cuny me gen cunywu daŋ cil i kare ame iketo wunu Abimeriki me bedo abakawu, dok daŋ ka rik itimo wunu tim aber i kom Jerubaal karacel kede ode, ame itio wunu gin ame romo tic a rik en otio ca, pien pappa rik olwenyo pirwu, ojalo kwo mere te larowu i ciŋ jo Midian, nen, am an tin wun itwarre wunu me lweny i kom ot a pappa, ineko wunu itino mere pyerabiro i wi gweŋ acel, eka ite keto wunu Abimeriki ame obedo atin a dako aŋeca, me bedo abaka ame loo jo i Cekem, pien en obedo okeowu, ka ce tin wun iŋeo wunu ni rik itimo wunu kede cuny me gen kun cunywu daŋ cil i kom Jerubaal karacel kede jo me ode, myero ibed wunu kede lelo i kom Abimeriki, en daŋ bed kede lelo i komwu. Aco ka ce mom amannono, myero mac ya i kom jo Cekem kede jo me Bet-millo me wan Abimeriki oko.” Yocam rik te ŋwec gire oko, laro kome, te wot naka i Beer, te wot bedo kuno pi lworo ominnere Abimeriki. Abimeriki te loyo jo Icrael mwakki adek. Icennere Obaŋa te cwayo cuny arac i akina Abimeriki kede jo Cekem, te cako timo timmogo me apala i kom Abimeriki, me wek tim me gero ame en rik otimo i kom itino a Jerubaal pyerabiro ca obed i wi Abimeriki, me tim me romo omego mere odok gire i wie pi nekogi, kede i wi jo Cekem, pien gin en ame omeddi Abimeriki teko me neko omego mere. Jo Cekem rik te keto jo mogo buto i yo me kure i wi kidi. Jo-nono rik te yako jo ame bedo i yo-nono, rik ote kobbi Abimeriki koppere oko. I kare-nono Gaal wot Ebed rik te dak i Cekem karacel i wati mere; jo me Cekem rik dok te cako keto gengi i kome. I nino moro gin rik te wot i poto, ote wot pwono nyig olokgi i poto, ote nyono, biyo, ote yiko ecuban. Gin ote wot i ot obaŋagi, ote cem, ote mate daŋ kun oyeto Abimeriki. Gaal wot Ebed te kobo ni, “Abimeriki en ŋa? Wan jo Cekem kono wan obedo jo aŋo, ame mio wan obedo tic pire? Wot a Jerubaal kede Jebul ame rik obedo awaŋe mom gin obedo tic baŋ jo Kamor ame obedo kwaro it jo Cekem? Ŋo ame mio wan dok obedo tiye? Kono ce jo man onwoŋo tye i ciŋa, kono akwanyo Abimeriki oko. Kono onwoŋo akobbe ni, ‘Med monnyi me obin onenne kedi.’ ” I kare ame Jebul, ame rik en obedo rwot me boma-nono owinyo kop a Gaal wot Ebed, akemo omako meicel. En te cwayo kwena baŋ Abimeriki i Aruma kun kobbe ni, “Nen ba, Gaal wot Ebed karacel kede wati mere obino kan i Cekem; aman gin ocako tugo lwak me kan me lweny i komi. Pi mannono ba, yin karacel kede jo ame tye baŋi, myero iwot wunu dyewor, iwot ibut wunu, ikur wunugi i yo poto. Eka odiko con ame ceŋ pwod adonnyo adonya yin myero iya con, me iwot ilweny i kom boma-nono. Kare ame en karacel kede jo ame tye baŋe obino me lweny kedi, yin doŋ itwero timogi kite ame ineno.” Abimeriki te ya dyewor karacel kede jo ame onwoŋo tye baŋe, gin te wot buto kuro jo me Cekem kun opoko monygi aŋwen. Gaal wot Ebed rik te wot cuŋ i dogcel me boma-nono, Abimeriki karacel kede jo ame onwoŋo tye baŋe, te ya i kan ame rik gin opono iye. Kare ame Gaal onenogi, okobbi Jebul ni, “Neno koŋ jo ka aciro i wi kiddi malo!” Jebul te gamo ni, “Yin dok iloko tipo me kiddi doko jo.” Gaal dok te medo kobo ni, “Koŋ inen, koŋ inen jo tye aciro i dyere me lobo i malo ca, kun mony ocele ciro bino i tutuŋ yo me te kworo Atyet ca.” Jebul te daŋ kobbe ni, “Kara dogi ame iduro-nono tin tye kwene? Yin ame ikobo ni, ‘Abimeriki odoko ŋanono omiowa obedo tiye? Mannono mom jo ame yin icao-ni?’ Aco koŋ doŋ iwot ilweny kedgi.” Gaal rik te wot kun otelo wi mony me Cekem, te wot lweny i kom Abimeriki. Abimeriki te cako ryeme, en te riŋo oko laro kome. Jo apol te bedo rereta kun owawano jo apol ata naka i dogcel me donyo i boma. Abimeriki te bedo i Aruma, Jebul te ryemo Gaal kede wati mere oko, mom dok te miyogi bedo i Cekem. Orwo mere ocele jo te wot i poto, ote daŋ bino titto koppere baŋ Abimeriki, Abimeriki te tero jo mere, te pokogi i dul adek, gin te wot buto kuro jo i potti. En te neno jo tye abino adonyo i boma, en te ya lweny i komgi, te nekogi oko. Abimeriki karacel kede dul mony ame rik onwoŋo tye baŋe, te mwomere anyim i ŋwec naka i dogcel me donyo i boma-naca kun dul mony aryo ocele mwomere i megi dok kede i kom jo ame onwoŋo tye i potti, eka ote nekogi oko. I nino-nono luŋ Abimeriki te bedo lweny i kom jo i boma, en te mayo boma-nono oko, te neko jo iye oko, te daŋ mumuko udi iye oko luŋ, te onyo kado iye. Kare ame jo ame bedo i gedo me Cekem ocuŋ iguŋ malo owinyo koppere, gin te donyo iyi icika ame ogolle i te ot jok El-berit. Eka rik ote titti Abimeriki ni jo luŋ ame bedo i gedo me Cekem ame ocuŋ iguŋ malo, tye ocokere karacel. Abimeriki rik te wot i wi kidi me Jalmon, karacel kede jo luŋ ame onwoŋo tye baŋe. Abimeriki te mako lee me toŋo yen i ciŋe, te cako totoŋo rido ryoŋo i wi gwoke, te wot kobbi jo ame rik tye baŋe ni, “Gin ame ineno wunu an atio, wun daŋ ru timo wunu kittono.” Mannono te miyo ŋat acel acel i akinagi lwero riddo mere lubo kede yo Abimeriki. Gin te wot yido riddogi-nono i wi icika ame onwoŋo ogolo ite ot jok El-berit, ote waŋo i cika-nono oko kede mac; mannono te miyo jo luŋ ame onwoŋo bedo i gedo me Cekem ocuŋ iguŋ cato oko, co kede mon ame ceggi romo tutumia acel. Abimeriki dok te wot lweny i kom Tebej, te guro gonnyere kun otiko kede Tebej, ote daŋ mako oko, Twon gedo moro atek, ame ocuŋ malo iguŋ rik onwoŋo tye i dye boma-nono, co kede mon rik te riŋo laro kuno, ote cegere gigi oko i yie. Gin te wot naka malo i wi gedo-nono. Abimeriki te wot i gedo ocuŋ mali i gunnono, te wot lweny iye. Dako moro te boyo twon anya-kidi rego, te napo i wi Abimeriki tuco cogo me adammere oko. Abimeriki te ru lwoŋo awobi ame onwoŋo otiŋo jami lwennyere ni, “Kom dako keken en oneke.” A wobi mere te cobbe pelo apela, te to oko. Kare ame jo Icrael oneno ni Abimeriki doŋ oto oko, gin daŋ te ket oko, kun ŋat acel acel dok i paco mere. Obaŋa te culo bal ame Abimeriki otimo i kom pappere kittono, pi neko omego mere pyerabiro. Obaŋa te daŋ dwoko tim a jo Cekem areco luŋ i wigi, koppa a Yocam wot a Jerubaal ame rik ocenogi kede te cobere kakare i komgi. Icennere, ŋat ame dok Obaŋa te miyo ya me laro jo Icrael i ŋe Abimeriki te bedo Tola wot a Pua, ame obedo wot a Dodo, dano me Icakar. En onwoŋo rik bedo i Camir, i lobo obedo kidikidi me Epraim. En rik te ŋolo kop a jo Icrael pi mwakki pyeraryo wie adek. En te to oko, ote yike i Camir. Jair ame obedo dano me Gilead te dok lube. En rik te ŋolo kop a jo Icrael pi mwakki pyeraryo wie aryo. En onwoŋo rik tye awobe pyeradek, ame gin luŋ oriŋo i kanegi pyeradek. Gin onwoŋo daŋ tye i paccigi ame romo pyeradek, ame olwoŋo ni Kavot-jair tuno kede naka atot tin. Paccigi-nono onwoŋo tye i lobo me Gilead. Jair rik te to oko, ote yiko kome i Kamon. Jo Icrael dok te medo timo tim ame nen arac i nyim Rwot, ote cako woro Baal kede Aciterot, ame obedo obaŋe a jo Curia, jo Cidon, jo Moab, jo Ammon, kede me a jo Piriciti. Gin gigi ote weko woro Rwot oko. Mannono te miyo akemo mako Rwot i kom jo Icrael, te jalogi oko i ciŋ jo Piriciti kede jo Ammon. I mwaka-nono jo-nono rik te bedo ŋinyo jo Icrael kun owunogi atek. Jo-nono rik te bedo wuno jo Icrael pi mwakki apar wie aboro twal, jo Icrael luŋ ame onwoŋo tye loka Jordan, i lobo a jo Amor ame onwoŋo tye i Gilead. Jo Ammon rik te ŋolo Jordan me wot lweny i kom Juda, kede Benjamin, kede i kom jo me doggola Epraim; mannono rik te miyo jo Icrael bedo i twon cannoro a mom kobere. Jo Icrael rik dok te kok baŋ Rwot kun okobo ni, “Wan doŋ otyeko balo baŋi, pien wan oweko Obaŋawa oko, ote lunyo woro Baal.” Rwot te kobbi jo Icrael ni, “Rik mom alarowu i ciŋ jo Miciri, kede i baŋ jo Amor, jo Ammon, kede jo Piriciti? Cidon kede jo Amalek, kede jo Moab daŋ rik owunowu, i kare ame ikok wunu baŋa, alarowu i ciŋgi. Kadi bed amannono, wun giwu iweka wunu oko, ite lunyo woro wunu obaŋe mogo ocele; pi mannono mom dok abino medde larowu kadi acel. Wun doŋ ter kokowu baŋ obaŋe ame rik iyero wunu-naca; gin myero larwu i kare ame itye wunu i can.” Jo Icrael te kobbi Rwot ni, “Wan giwa doŋ otyeko balo, yin myero itim ginnoro keken ame ineno ni ber baŋi ento myero itim ber ilarwa tin.” Gin rik te bolo kite obaŋe ocele luŋ ame onwoŋo rik tye baŋgi, ame obedo me orok, ote cako woro Rwot, eka Rwot yie te waŋ atek pi can a jo Icrael. Jo Ammon rik dok te lwoŋere, ote wot ruko jami lwenygi, ote wot guro gonygi i Gilead, jo Icrael daŋ te cokere, ote wot guro gonygi i Mijipa. Otel a jo Gilead te kop i akinagi kengi kengi ni, “ŋa ce ame bino cako ero lweny i kom jo Ammon? Danonono bino doko aloc ame loo jo ame bedo i Gilead luŋ.” I kare-nono onwoŋo Jeputa ame obedo dano me Gilead, onwoŋo twon lo moro atek meicel i lweny, cite en onwoŋo obedo atin a dako ame alaya Papa a Jeputa onwoŋo i Gilead. Dako a Gilead daŋ te nywalle itino awobe. Kare ame awobe a dako-nono odoŋo, gin te ryemo Jeputa oko, kun okobbe ni, “Yin mom ibino leyo ginnoro i ot a papawa me bedo megi, pien yin ibedo atin a dako ocele.” Jeputa oriŋo te wot gire oko i lobo me Tob pi lworo omego mere. Jo mogo ame rik kitegi mom beco te cokere baŋ Jeputa, en te wot kedgi yako jami a jo ocele. Ame kare pwod okato anonokkoro keken, jo Ammon te ero lweny i kom jo Icrael oko. Kare ame jo Ammon ocako lweny i kom jo Icrael, odoŋe me Gilead te wot i lobo me Tob, me wot kela Jeputa. Gin okobbi Jeputa ni, “Bye ibed atel wi monywa me owot olweny i kom jo Ammon.” Cite Jeputa te kobbi odoŋe me Gilead ni, “Rik mom idaga wunu ite ryema wunu oko i ot a papawu? Kara piŋo tin dok ibino wunu baŋa kun itye wunu kede peko?” Odoŋe te kobo baŋ Jeputa ni, “Mannono en gin omio tin dok olokere obino baŋi, me iwot kedwa, me owot olweny i kom jo Ammon, me ibed ŋat ame loo jo ame bedo i Gilead luŋ.” Jeputa te kobbi odoŋe a me Gilead ni, “Ka ce idwoka wunu paco pi lweny i kom jo Ammon, ka ce Rwot omiogi i ciŋa, an abino bedo adwoŋ ame loowu.” Odoŋe me Gilead te kobbi Jeputa ni, “Rwot bino bedo acaden i akinawa; wan obino timo kite ame ikobo-nono ikome.” Jeputa rik daŋ te cako wot kede odoŋe me Gilead, lwak te kete bedo ŋat ame loogi kede atel wi monygi. Jeputa rik te kobo koppere luŋ i nyim Rwot i Mijipa. Jeputa te cwayo kwena baŋ abaka a jo Ammon kun kobo ni, “Kara abalo ŋo baŋi ba, omio yin ibino me lweny i kom lobona nie?” Abaka a jo Ammon rik te gamo kop okwena a Jeputa ni, “Pien i kare ame jo Icrael bino i lobo me Miciri, gin rik omao lobona oko, cakere i Arnon tuno anaka i kulo me Jabok kato kede a naka i Jordan; tin doŋ myero idwokka lobona kede kuc.” Jeputa dok te cwayo kwena baŋ abaka a jo Ammon, kun kobo ni, “Jeputa okobo ni, ‘Icrael gire rik mom omao lobo a jo Moab, kadi lobo a jo Ammon, ento gin gigi i kare ame rik obino i Miciri, gin rik obedo i dye tim tuno naka i nam Arema, eka gin te kato i Kadec, Icrael rik te cwayo kwena baŋ Edom kun kobo ni, “Tim ber imiwa obe i loboni.” Cite abaka me Edom rik gire te kwero oko. Gin dok te cwayo kwena baŋ abaka me Moab, en daŋ mom te ye. Mannono rik te miyo Icrael bedo gire i Kadec. Gin rik te dupo doŋ beo i dye tim kun omano lobo me Edom kede Moab amana, gin te tuno tutuŋ kide me lobo Edom. Gin te wot guro kemagi loka kulo Arnon tuŋcel. Cite gin gigi rik mom odonyo i lobo me Moab. Jo Icrael rik dok te cwayo kwena baŋ Cikon abaka a jo Amor, ame rik paco mere tye i Kecbon, kun kobbe ni, “Tim ber imiwa obe i loboni”. Ento Cikon rik mom te bedo kede gennoro i kom jo Icrael me miyogi beo i lobo mere, Cikon rik te coko jo mere luŋ karacel, ote wot guro kemagi i Jakaj, te lweny i kom jo Icrael. Obaŋa a jo Icrael te miyo Cikon karacel kede Lwakkere luŋ i ciŋ jo Icrael, omio ote loyogi oko. Mannono te miyo jo Icrael gamo lobo a jo Amor luŋ bedo megi, ame gin obedo jo a rik onwoŋo bedo i lobo-nono. Gin te gamo lobo a jo Amor luŋ, cakere i kulo me Arnon tuno anaka i kulo Jabok kede dok cakere i tim tuno naka i Jordan. Rwot Obaŋa rik te ryemo jo Amor kittono, kun ryemogi i nyim jo Icrael. Aman wun jo Ammon imito wunu gamo lobogi-nono me bedo megwu? Wun mom ibino wunu gamo wunu lobo ame obaŋawu Kemoc omiowu me bedo megwu? Pi mannono, lobo luŋ ame Rwot Obaŋawa oryemo jo iye i nyimwa, wan obino gamo bedo megwa. Aman wun itamo wunu ni ikato wunu Balak wot a Jipor, abaka me Moab? Rik en koŋ otubere i jo Icrael? Aŋar onyo rik olwenyo kedgi? I kare ame rik Icrael bedo i Kecbon kede i pacci luŋ omano laŋete, karacel kede i Aroer kede pacci luŋ omano laŋete, karcael kede pacci luŋ ame onwoŋo tye i dog kulo me Arnon pi mwakki mia adek twal, piŋo kara rik mom imao wunu i kare-naca? Pi mannono, an gira mom atimo balloro baŋi, yin en ame itimo rac me ero lweny i koma. Rwot en ame Aŋolkop, myero en tin ŋol kop ame tye i akina Icrael kede Ammon.’ ” Cite abaka a jo Ammon mom gire te keto cunye i kwena ame Jeputa ocwaye. Cuny a Rwot rik te bino i kom Jeputa, en te wot beo i dye Gilead kede i Manace, te kato i Mijipa me Gilead, ote ya i Mijipa me Gilead kato anaka i kom jo Ammon. Jeputa rik te kwon baŋ Rwot kun kobo ni, “Ka ce ibino miyo jo Ammon i ciŋa, ŋat ame bino donnyo i doggola moro me oda me bino rwatte keda i kare ame adwogo a kun doŋ aloo jo Ammon, dano-nono bino bedo mea Rwot, abino miyo dano-nono me mot awaŋa.” Jeputa rik dok te kato loka baŋ jo Ammon me wot lweny kedgi, Rwot daŋ te miyogi i ciŋe. En rik te nekogi cakere i Aroer tuno kede i lobo ame ceggi kede Minit, pacci adito mege pyeraryo, tuno kede anaka i Abelkeramim kun nekogi atek meicel. Obaŋa rik te miyo jo Icrael loyo jo Ammon kittono. Jeputa rik doŋ te dok cen i paco mere i Mijipa. Nen ba, i kare ame en abino, nyare obino me rwatte kede kun amyel ame ayeŋo ajaa. Nyare-nono onwoŋo tye en kene aboŋo ominnere moro, akadi aminnere. Kare ame en oneno nyare, oyeco boŋŋi mere kenekene, kun kobo ni, “Oido, nyara! Idwoka piny meicel, man yin doŋ idoko gin ame okelo peko adwoŋ meicel i koma. Nen an onwoŋo doŋ atuco doga oko baŋ Rwot, ame mom dok atwero loko gin ame akwoŋo.” Nyare te kobbe ni, “Apap wee, ka doŋ ityeko tuco dogi oko baŋ Rwot, myero doŋ itim i koma gin ame dogi otyeko kobo, pien Rwot doŋ otyeko cuŋ kwor i kom jo Ammon ame gin okworri.” Dok te medo kobbi pappere ni, “Koŋ imi gin man timere pira, koŋ iweka pi dwete aryo, me koŋ awot aloloŋo wi kiddi, awot akok, akum pi tidina, an karacel kede anyira wadwa.” Pappere te gamo ni, “Wot giri.” En te cwayo nyare wot pi dwete aryo. Nyare kede owote mere te wot kok atek i wi kiddi kun okumo pi tidi mere. Kare ame dwete aryo doŋ otum oko, en odwogo paco baŋ pappere, pappere te time kite ame rik okwoŋo kede. Nyannono onwoŋo mom ru oŋeye kede ico moro kadi acel. Mannono doŋ te lokere doko kit gin ame otimo iyi Icrael; anyira a jo Icrael doŋ woto mwaka i mwaka me wot kumo pi nyaka a Jeputa, ame obedo dano me Gilead. Gin rik kumo nino aŋwen i mwaka acel acel. Jo Epraim rik te lwoŋere, ote wot ruko jami lwenygi, ote kato loka Jordan, naka i Japon, ote wot kobbi Jeputa ni, “Piŋo kara iwoto me wot lweny i kom jo Ammon kun mom ilwoŋowa owoto karacel kedi? Wan owaŋi oko i odi.” Jeputa te gamo doggi ni, “An karacel kede jona yam onwoŋo odagere atek kede jo Ammon; kare ame an alwoŋowu, wun mom ilarowa wunu i ciŋgi. Kare ame aneno ni mom itwero wunu lara, an rik doŋ ate jalo koma, ate kato loka ca i kom jo Ammon, eka Rwot te miyogi i ciŋa. Kara piŋo tin dok ibino wunu baŋa me romo keda?” Jeputa rik te coko jo Gilead luŋ, te lweny i kom jo Epraim; jo Gilead te loyo jo Epraim oko, pien onwoŋo jo Epraim okobo ni, “Wun jo Gilead ame ibedo wunu i akina jo Epraim kede Manace, wun ibedo wunu jo Epraim ame rik iriŋo wunu ilaro wunu komwu.” En omio jo Gilead te mako dog kulo Jordan oko, me geŋo jo Epraim. Doŋ ka ŋattoro i kom jo Epraim ame ariŋo oko okobo ni, “Weka wunu awot leka-ca”, jo Gilead penye ni, “Yin i dano me Epraim?” Ka en ogamo ni “Pe gire”, gin kobo ni, “Aco koŋ ikob ni Sibolet”, en daŋ te kobo ni “Cibolet”, pien en mom twero lwoŋo kakare. Gin omake ote neke oko i dog kulo me Jordan. Jo Epraim rik te to i nino-nono ame romo tutumia pyeraŋwen wie aryo. Jeputa obedo aŋol kop a jo Icrael pi mwakki abicel. Kare ame Jeputa ame obedo dano me Gilead oto, oyike i paco mere i Gilead. Icennere aŋol kop a jo Icrael te bedo Ibijan ame en dano me Beterekem, En rik onwoŋo tye kede awobe mere pyeradek, kede anyira mere daŋ pyeradek, ame en rikomio onyomogi luŋ iyi atekere ocele. Awobe mere daŋ te nyommigi anyira me atekere ocele. En rik oŋolo kop iyi Icrael pi mwakki abiro. Kare ame Ibijan oto, oyike i Beterekem. Ŋat a rik dok te lube acalo aŋol kop a jo Icrael te bedo Elon ame obedo dano me Jabulon. En oŋolo kop a jo Icrael mwakki tomon. Kare ame Elon dano me Icrael oto, oyike i Aijalon i lobo a jo Jabulon. Icennere, aŋol kop a jo Icrael te bedo Abudon wot a Kilel ame obedo dano me Piraton. En rik onwoŋo tye kede awobe mere pyeraŋwen kede ikwae pyeradek, ame gin luŋ rik oriŋo kede kanegi pyerabiro. En rik te ŋolo kop a jo Icrael pi mwakki aboro, Abudon wot a Kilel ame obedo dano me Piraton dok te to oko, ote yike i Piraton, i lobo a jo Epraim, i lobo a jo Amalek ame obedo kidikidi. Jo Icrael rik dok te medo timo gin anen arac i nyim Rwot, Rwot rik te miyogi i ciŋ jo Piriciti pi mwakki pyeraŋwen. Lo moro rik onwoŋo tye i Jora, ame en dano me atekere a Dan ame nyiŋe Manoa. Dako mere rik onwoŋo oraŋa, onwoŋo mom tye kede atinnoro. Amalaika a Rwot onen baŋ dakonono te kobbe ni, “Nen ba, yin ibedo oraŋa ame mom itye kede atinni moro, ento ibino yac, ibino nywalo atin awobi. Pi mannono, myero igwokere kur imat koŋo olok, akadi kit kono moro ame mero dano, kur daŋ icam ginnoro ame cik ogeŋo, pien ibino yac, ibino nywalo atin awobi. Lyedi mom biŋo gudo wie pien en bi no bedo atin akwera ame tye pi Obaŋa cakere i yic, en dok bino cako laro jo Icrael i ciŋ jo Piriciti.” Dako-nono te wot titto koppono baŋ cware ni, “Dano Obaŋa obino baŋa kun waŋe nen calo waŋ amalaika Obaŋa, iyiliyili meicel. Mom apenyo kan ame en oya iye dok daŋ mom otuca nyiŋe; cite en okobba ni, ‘Nen ba, ibino yac, ibino nywalo atin awobi, pi mannono, kur imat koŋo olok, akadi kit koŋo moro ocele ame mero dano, pien atinnono bino bedo atin akwera ame tye pi Obaŋa cakere i yic tuno kede i nino me to mere.’ ” Manoa rik te kwayo Rwot kun kobo ni, “Ama Rwot, tim ber imi dano Obaŋa ame rik icwao ca dwog baŋwa, me bin pwonywa i gin a myero oti i kom awobi ame wan obino nywalo.” Obaŋa rik daŋ te winyo kwac a Manoa, amalaika mere te dok dwogo baŋ dako a Manoa i poto, kun cware onwoŋo mom tye kede kuno. Dako te riŋo oyotoyot baŋ cware, te wot kobbe ni, “Dano ame rik koŋ obino baŋa ca, aman dok onen baŋa.” Manoa te ya wot lubo dako mere, kare ame otuno baŋ dano-nono, openye ni, “Yin ibedo dano ame rik okobo kede dako man?” En te gamo ni, “An ennono.” Manoa te kobo ni, “Ka kop ame ikobo bino cobere kakare, atinnono myero bed kede kit kwo aŋo dok daŋ en myero ti tic aŋo?” Amalaika a Rwot te kobbi Manoa ni, “Myero dako gwokere i ginnoro luŋ ame doŋ atyeko kobo baŋe. En myero kur cam ginnoro ame oya i kom olok, kur daŋ mat koŋo olok, akadi kit koŋo moro ocele ame mero dano, onyo ginnoro ame cik ogeŋo. En myero lub ginnoro luŋ ame rik acike iye.” Manoa te kobbi amalaika a Rwot, ni, “Tim ber, koŋ amii igal anonok ba, anekki koŋ atin dyelloro.” Cite amalaika a Rwot te kobbi Manoa ni, “Kad i bed imia agal, cite mom abino camo cemwu. Aco ka ce iyiko motoro me awaŋa, myero imi baŋ Rwot.” (Pien Manoa onwoŋo rik mom ŋeo ni en obedo amalaika a Rwot.) Manoa te penyo amalaika a Rwot ni, “Nyiŋi kara ŋa ba, me wek ka kop ame ikobo ocobere kakare, omi kwogo baŋi?” Amalaika a Rwot te kobbe ni, “Pino kara ipenyo nyiŋa, aco kun nyiŋa obedo me awura meicel?” Manoa rik te tero atin dyel karacel kede mot me moko kwon, te wot yalo i Rwot i wi lela, baŋ Rwot ame tio gin awura. Kare ame leb mac olyel owikino malo i polo kun ya i kom keno lam, amalaika a Rwot te yito malo i kom mac i keno lammono, kun Manoa kede dako mere tye aneno. Gin te rette piny aryeba cuny. Amalaika a Rwot mom dok te nen baŋ Manoa kede dako mere. Mannono en ame te miyo Manoa niaŋ ni en kara onwoŋo obedo amalaika a Rwot. Manoa te kobo baŋ dako mere ni, “Ateni, wan gire oto oko, pien wan oneno Obaŋa.” Cite dako mere te kobo ni, “Kono onwoŋo Rwot oyikere me nekowa, kono gire mom ogamo mot awaŋawa kede mot me moko kwon ame omie, dok daŋ kono mom onyuttiwa kop magi luŋ, akadi tucciwa kop acalo magi.” Kare ame dako-nono onywalo wode, ocako nyiŋe Camcon. Awobi-nono rik te doŋo kun Rwot mie winyo. Cuny a Rwot rik te cako tic oko i kome i Gony a Dan ame onwoŋo rik tye i akina Jora kede Ecitaol. Camcon rik te wot naka i Timna, te wot neno nyako moro kuno ame obedo nya jo Piriciti. Kare ame en odwogo paco, otitto koppere baŋ pappere kede tottere ni, “Aneno nyako moro i Timna ame obedo nya jo Piriciti; nyomma wunu en me bed dakona.” Cite pappere kede tottere te kobbe ni, “Nyannoro doŋ mom bo i akina anyira a wattini, onyo i akina rokwa luŋ, ame mio yin dok iwoto nyomo dakoni i baŋ jo Piriciti a mom lirre-nono?” Ento Camcon te kobbi pappere ni, “Nyomma gira nyannono, pien oyomoro cunya meicel.” Pappere kede tottere onwoŋo mom oŋeo ni koppere oya i baŋ Rwot, kun onwoŋo tye ka yenyo kare moro me lweny i kom jo Piriciti, ame gin en a rik i kare-nono obedo loyo jo me Icrael. Camcon rik te wot i Timna karacel kede pappere kede tottere. Kare ame gin otuno i potti olok ame onwoŋo tye i Timna, atin eŋatu moro te mor i kome. Cuny a Rwot te bino i kome kede tek, te miyo en yeyeco atin eŋatunono oko kite ame dano yeyeco kede atin dyel, kun onwoŋo gire mom omako ginnoro i ciŋe. En rik mom te tucci pappere onyo tottere gin ame etimo. I kare ame gin tye kuno, en olato baŋ nyannaca, ame te yomoro yi Camcon meicel. I ŋe kare anonok, en te dok baŋ nyannaca me wot moko nyomgi, en koŋ te gak me wot neno kom eŋatu a rik ca, cite nen ba, kic apipim onwoŋo tye oŋinne i kom eŋatu-nono kun moo kic daŋ tye iye. En te toto moro mako i ciŋe, te wot kede kun camo. Kare ame en otuno baŋ pappere kede tottere, en omiogi daŋ moro aduno, gin daŋ te camo; cite en mom okobbigi ni etoto i kom eŋatu ame oto. Papa a Camcon te wot doŋ baŋ nyako-naca, Camcon te tedo arama kuno, pien mannono en gin ame rik awobe timo. Kare ame lwak me kuno onene, gin okelo jo ocele pyeradek me bino galo waŋe. Camcon okobo baŋgi ni, “Koŋ apenywu i kocca moro ni ba; ka ce itwero gonnya wunu tere a mom ru nino abiro me arama-ni otum, kun ŋat ogonyo-nono ogonyo kakare, abino miyowu boŋŋi camanini pyeradek kede boŋŋi abeco me aruka i nino adoŋo daŋ ame romo pyeradek. Cite ka gonyo tere oloowu oko, wun ibino miya wunu boŋŋi camanini pyeradek, kede boŋŋi abeco me aruka i nino adoŋo daŋ ame romo pyeradek.” Gin te kobbe ni, “Aco koŋ doŋ i kob koccinono wan owiny.” En te kobbigi ni, “I kom amwod jo oya iye cam. I kom atekom oya iye twon ginnoro alim.” Gin te tyeko nino adek kun mom oromo gonyo tyen koc a Camcon. I nino me aŋwennere gin te kobbi nyako ame Camcon anyomo ni, “Bibito cwari me tucciwa tyen koccono, me kur owaŋ i oko kede mac, yin karacel kede ot a pappi. Ilwoŋowa wunu kan me bino yako wunu jamiwa bo?” Nyako ame onwoŋo Camcon anyomo te wot kok i nyim Camcon kun kobo ni, “Yin gire idaga, mom imara kadi acel; koŋ inen yin ikobbi jo me turwa koc, aco kono mom itucca tere.” En te kobbe ni, “Nen ba, an mom akobbi pappa kede totta, itamo ni atwero titti?” En te bedo kok i nyime pi nino kany wie aryo ame aramagi ori kede. I nino me kany wie aryo mere, en te titte tere oko, pien en onwoŋo doŋ odie meicel. Nyannono te wot kobbi jo me turgi koccono oko. I nino me abiro, jo me boma-nono rik doŋ te kobo baŋ Camcon kun ceŋ mom ru opoto ni, “Ŋo a dok lim kato moo kic? Ŋo a kome tek kato eŋatu?” Camcon te kobbigi ni, “Kono mom ibedo pur wunu iroana, kono mom igonyo wunu te kocca.” Cuny a Rwot rik te bino i kome kede tek. En te wot i Acikelon, te wot neko jo pyeradek, te yako jamigi, te miyo boŋŋigi abeco me aruka i nino adoŋo baŋ jo ame ogonyo te koccere; en te doŋ dok paco i ot a pappere kun akemo ociro oko, Aco nyako ame Camcon rik onwoŋo anyomo ote lunyo miyo baŋ awottere ame onwoŋo olwoke. Ame kare pwod okato anokkoro keken, kare me kayo ŋano, Camcon owoto me wot limo nyako ame enyomo kun otero daŋ atin dyel. En okobo ni, “Abino donyo baŋ dakona iyi icika.” Cite pappa a nyako mom te ye ni en dony. Papa a nyako te kobo ni, “An onwoŋo doŋ atamo ni yin ikwerre oko, omio an ate miye baŋ awotti oko, ame rik onwoŋo olwoki. Aminnere atidi ber kate oko, tim ber iluny doŋ tero akakare.” Camcon te kobbigi ni, “Man doŋ balloro gire mom bi no bedo i wia ka ce atimo ginnoro arac i kom jo Piriciti.” Camcon te wot mako ekwe mia adek, te daŋ kwanyo rao; en te bedo lolokogi kun mio yib man tikere kede me awottere, te tweyo rao i yibgi kun gin luŋ doŋ otweogi aryo aryo. Camcon te cwinyo mac i kom rao, te weko ekwe riŋo kede i potti ŋano a jo Piriciti ame mom ru okakao. Mac te wano arita luŋ ame onwoŋo otwetweo kede ŋano luŋ ame onwoŋo mom ru okao, anaka potti olok-gi kede me jeituni. Jo Piriciti te kobo ni, “Ŋa kara otimo man?” Jo te kobo ni, “Camcon, ame obedo or lo moro me Timna, pien en omio nyako ame rik onwoŋo en anyomo baŋ awottere ame onwoŋo rik olwoke.” Mannono te miyo jo Piriciti bino waŋo nyannono oko kede mac karacel kede pappere. Cite Camcon te kobbigi ni, “Ka ce gin itimo wunu ene, akwoŋo akwoŋa ni abino culo kwor i komwu, en amio cunya te cayo koppere.” En te cocobogi oko, te nekogi meicel, en te wot bedo i akina lela me Etam ame obarre. Jo Piriciti rik te bino guro kemagi i Juda, gin te cako lweny i Leki. Jo Juda te kobo ni, “Piŋo kara ibino wunu me lweny i komwa?” Gin te gamo ni, “Wan obino tweyo Camcon, me wek wan daŋ otime kite ame otimowa kede.” Jo Juda tutumia adek te wot i lela me Etam ame obarre, ote kobbi Camcon ni, “Yin mom iŋeo ni jo Piriciti en ame tye ka loyowa? Kara man ŋo ame yin itimo i komwa-nie?” Camcon te gamo doggi ni, “Kite ame gin rik otima kede, en ame an daŋ atimogi kede.” Gin te kobbe ni, “Wan obino tweyi, miyi i ciŋ jo Piriciti.” Camcon te kobbigi ni, “Koŋ ige kwoŋ wunu baŋa ni mom wun en ibino neka wunu.” Gin te gamo ni, “Pe gire; wan otweyi atwea keken, owot miyi i ciŋgi.” Gin te tweye kede tol aryo anyen, ote kele oko i lela. Kare ame en otuno i Leki, jo Piricitite bino me bino rwatte kede kun owoo i redo. Cuny a Rwot rik te bino i kome kede tek, tol ame onwoŋo rik otweo i ciŋe te doko calo tol tworo ame mac owaŋo, te cako cocota oko i ciŋe. En te cop i cogo moro me itinyo kana ame mom ru operakino wok, te cwayo ciŋe kwanyo, eka te neko i jo tutumia twal. Camcon te kobo ni, “Cogo itinyo kana, omio kom jo oradde awu awu, cogo itinyo kana, omia aneko jo tutumia.” Kare ame en doŋ otyeko kobo koppere, obolo cogo itinyo kana i ciŋe piny; te cako nyiŋ kabedo-nono ni Ramat-leki. Oryo pii te cako cire atek meicel, en te cako bako doge baŋ Rwot kun kobo ni, “Nen, yin doŋ ityeko miyo ciŋ amironi oloo twon lweny adwoŋ kit man; doŋ myero oryo pii en amia ato, kun mia apoto i ciŋ jo ame mom oliro?” Obaŋa te miyo wan kan atwolo yabere i kom kidi ame tye i Leki, pii te mollo iye. Kare ame en doŋ otyeko mato, cunye doŋ te dwogo, te dok limo teko. Mannono omio ocako nyiŋ kabedo-nono ni, En-akore, pwod tye amannono naka atot tin. Camcon obedo aŋolkop a jo Icrael pi mwakki pyeraryo, i kare a jo Piriciti. Nino moro Camcon owoto i Gaja, en te wot neno alaya moro kuno, te wot buto baŋe. Kop man rik te winyere oko baŋ jo me Gaja, ni, “Camcon obino kan.” Jo Gaja te guro kabedo-nono oko, ote bedo ki ye dyewor benebene i dogcel me boma. Gin obedo liŋ aliŋa dyeworrono luŋ kun omuno amuŋa ni, “Koŋ okur wunu piny ru, ote doŋ neke.” Cite Camcon te buto gire kuno naka i cuny dyewor, te ya oko i kuno, te wot mako dogcel me boma-nono kede pagi mere aryo luŋ, te telo puto oko luŋ naka kede arii me cego, te yeyo i wi gwoke, tero naka i wi kidi ame tye i nyim Kebron. I ŋe man en dok te cako mito dako moro ame onwoŋo tye i luŋ me Corek, ame nyiŋe Delila. Rwode a jo Piriciti te bino baŋ dako-nono, ote kobbe ni, “Tim ber ibwolliwa lonnono, me inen kan ame teko mere adwoŋ wok-ki tye iye, kede yo aŋo a myero oloc kede, ame twero miyo wan otwee ote loye oko, Wan luŋ ŋat acel acel bi no miyi ryal tutumia acel kede mia acel.” Delila te cako kobbi Camcon ni, “Tim ber imia aŋe kan ame tekoni adwoŋ wok-ki tye iye kede yo aŋo ame otwero tweyi kede eka ote loyi oko.” Camcon te kobbe ni, “Ka ce otwea kede toli anyen kany wie aryo, ame mom ru otwo, abino doko agoro calo dano moro keken.” Rwode a jo Piriciti te kelle toli anyen me atera kany wie aryo, amom ru otwo, Delila te tweyo kede Camcon. I kare-nono onwoŋo en tye kede jo ame en omio opono iyi icika mere me kiye. En te kobbi Camcon ni, “Camcon, neno jo Piriciti obino oko i komi!” Cite en gire te codo toli oko luŋ bala uci boŋo ka mac ogudo. Mannono mom te miyo kan ame teko mere tye iye ŋeye. Delila te kobbi Camcon ni, “Koŋ inen doŋ kite ame ituko kede, ikobba giri kop me goba. Tim ber ikobba kite ame myero tweyi kede.” En dok te kobbi Delila ni, “Ka ce otwea i toli anyen ame mom ru otio kedgi, abino doko goro acalo dano moro keken.” Delila dok te kwanyo tol anyen, te tweye kede, eka te kobbe ni, “Camcon, neno jo Piriciti obino oko i komi!” Jo onwoŋo tye opono icika mere me kiye. En te codo toli oko i bade bala uci. Delila dok te kobbi Camcon ni, “Koŋ inen pwod imedde giri tuko kede atuka naka aman, ikobba giri dok kop me goba. Tim ber ikobba kite ame myero twei kede.” Camcon te kobbe ni, “Ka ce imako dog yer wia abiro-ni, ikedo i kom boŋo ame it ye ka cweyonono, ite rido kede yat, abino doko goro calo dano moro keken.” Mannono omio i kare ame en onino, Delila omako dog yer wie abiro ca, te kedo oko i kom boŋo ame onwoŋo en tye ka cweyo. En te kobbi Camcon ni, “Camcon neno jo Piriciti tye abino i komi!” Camcon te co oko i wan nino, te putogi luŋ karacel kede yer wie ame onwoŋo okedo karacel kede i wi boŋo ame onwoŋo nyannono obedo cweyo. Delila dok te kobo ni, “Kara doŋ itwero kobo nino, ni, ‘Amari’, kun iyi ateni cunyi mom gire i koma? Nen aman doŋ ibedo tuko keda atuka odoko tyen adek twal kun mom ikobba kan ame twon tekoni adwoŋ wok-ki tye iye.” Kare ame nya-nu obedo didde nino i nino kun die atek meicel, omio cunye daŋ te mito to. En doŋ te yabbi Delila kop i cunye ducu, te kobbe ni, “Lyedi mom ru ogudo wia; pien an abedo dano akwera ame tye pi Obaŋa cakere iyi totta. Doŋ ka kono lyel yer wia, te kona ya oko i koma, ate doŋ doko ŋat agoro, ate doko calo dano moro keken.” Kare ame Delila doŋ oneno ni en otyeko yabbe kop i cunye luŋ, en ocwao kwena olwoŋo rwode a jo Piriciti kun kobbigi ni, “Koŋ dok ibin wunu tyen acel keken, pien doŋ otyeko yabba kop luŋ i cunye.” Rwode a jo Piriciti daŋ te bino i limgi i ciŋgi. Delila te miyo Camcon nino i tyene, te lwoŋo lo moro bino lyelo dog yer wie abiro ca oko. Delila te cako ti mo bala wuwuno en, teko mere te ya oko i kome. Delila te kobbe ni, “Camcon, neno jo Piriciti tye abino i komi.” Camcon te co oko i wan nino kun tye atamo ni, “Abino donyo oko kite a yam abedo timo, ate tenogi oko teŋe.” En onwoŋo mom ŋeo ni Rwot doŋ otyeko we ke oko. Jo Piriciti te make, ote kokolo waŋe oko, ote tere naka i Gaja. Gin te tweye kede jegere me mola. En te bedo rego kai i buc. Yer wie ame rik olyelo cate cako lot. I kare-nono rwode me Piriciti te cokere karacel me miyo motgi baŋ Dagon, ame obedo obaŋagi, kede dok me bedo kade lelo i nyime. Pien gin onwoŋo okobo ni, “Obaŋawa doŋ omio akworwa Camcon i ciŋwa.” Ka lwak jo Piriciti onene, opako obaŋagi kun kobo ni, “Obaŋawu doŋ omio akworwa Camcon i ciŋwa, lo ame onwoŋo obalo lobowa oko, oneko jowa apol meicel.” Kare ame cunygi doŋ yom atek, gin te kobo ni, “Lwoŋ Camcon me bin tuk tuko moro i nyimwa ogal kede waŋwa.” Rik daŋ ote lwoŋo Camcon i ot buc, en te bedo tuko i nyimgi. Gin te weke cuŋ i akina pagi aryo. Camcon te kobbi awobi ame onwoŋo apeye ni, “Koŋ iwek ciŋa me aboŋ pagi ame teko a ot ocuŋ i komgini, me koŋ ajeŋere i komgi.” I cawanono onwoŋo jo pol atek i ot, co kede mon; rwode a jo Piriciti luŋ onwoŋo rik daŋ tye kuno, aco i wi ot malo onwoŋo tye iye co kede mon ame romo tutumia adek, ame onwoŋo tye aneno tuko ame Camcon atuko. Camcon rik te kok baŋ Rwot kun kobo ni, “Ama Rwot Obaŋa, tim ber ipo pira, tim ber imia tekkom tyen acel-li doŋ keken, ama Obaŋa, me acul kwor i kom jo Piriciti pi waŋa acel keken.” Camcon te mako pagi aryo ame onwoŋo tye i dye ot, ame teko me ot luŋ ocuŋ i komgi, te luŋo teko mere luŋ i komgi kun ciŋe tuŋcam omako pagi acel, eka me tuŋcem te mako pagi ocele. Camcon te kobo ni, “Wek doŋ ato karacel kede jo Piriciti.” En doŋ te telle i teko mere luŋ, ot te rette oko piny i kom rwode luŋ kede jo luŋ ame rik tye iye. Man te miyo jo ame en oneko i kare me to mere obedo abup ame kato jo ame en oneko con i kare me kwo mere. Omego mere kede jo me doggolagi luŋ te bino kwanyo kome, ote tero wot yiko i akina Jora kede Ecitaol, i lyel a pappere Manoa. En rik obedo aŋolkop a jo Icrael pi mwakki pyeraryo nono. Rik tye lo moro i lobo obedo kidikidi me Epraim, nyiŋe Mika. En rik okobbi tottere ni, “Cekel me ryal tutumia acel kede mia acel ame rik okwalo i baŋi ca, ame rik ikobo ni iceno dano pire ca kun ikobo ame an awinyo, limmono tye baŋa, an en onwoŋo akwanyo.” Tottere te kobbe ni, “Rwot omii winyo, woda,” En te dwoko cekel me ryal tutumia acel kede mia acel ca baŋ tottere. Tottere te kobo ni, “An doŋ atyeko jalo ryal man oko baŋ Rwot kun amie pi woda, gin ame oya i ciŋa, me tiyo cal apaa kede cal atwaka. Pi mannono ba, aman doŋ an abino dwoko oko baŋi.” Mannono omio i kare ame en odwoko limmono baŋ tottere, tottere okwanyo ryal ame romo cekel mia aryo, te miyo baŋ atet ryal, ame te tiyo kede cal apaa kede cal atwaka. Callono te bedo i ot a Mika. Mika rik onwoŋo tye kede ot me woro obaŋa, en te tiyo epod kede terapim, te daŋ keto wode acel me bedo alamdoggere. I kare-nono onwoŋo jo Icrael mom tye kede abaka moro; dano acel acel onwoŋo timo gin ame en oneno ni ber baŋe. I kare-nono onwoŋo tye atin awobi moro me Beterekem i Juda, ame en dano me atekere a Juda, ame en rik Alevi; en daŋ onwoŋo rik bedo kuno. Dano-nono rik te ya oko i Beterekem i Juda, me wot bedo kannoro ame ebino nwoŋo iye kabedo. I kare ame en owoto, otuno i lobo obedo kidkidi me Epraim, i ot a Mika. Mika te penye ni, “Kara yin iya i kwene?” En te dokke ni, “An abedo Alevi me Beterekem i Juda, doŋ an atye awot kannoro keken ame abino nwoŋo iye kabedo.” Mika te kobbe ni, “Yin doŋ bed keda kan, yin ibino bedo pappa kede alamdogga, an abino miyi ryal aromo cekel apar mwaka i mwaka, kede boŋŋi me arukani; dok daŋ abino gwoki.” Dano-nono te ye bedo baŋ Mika; atin awobi-nono te doŋ doko calo ŋat acel i akina awobe mere. Mika te keto dano me atekere Alevi-nono me bedo alamdoggere, en doŋ te bedo i ode. I kare-nono Mika te kobo ni, “Aman doŋ aŋeo ni Rwot bino bedo keda aber, pien dano ame Alevi en a doŋ obedo alamdogga.” I kare-nono onwoŋo jo Icrael mom tye kede abaka; dok daŋ i kare-nono onwoŋo atekere a jo Dan tye ka yenyo lobo me alea me bedo megi, me obedo iye, pien gin onwoŋo rik mom ru onwoŋo lobo moro me bedo megi i akina jo Icrael. Mannono rik te miyo jo Dan cwayo jo abic aryek i akina atekeregi luŋ, jo ame oya i Jora kede jo ame oya i Ecitaol, me wot roto lobo kede ŋiyo aber. Gin te kobbigi ni, “Wot irot wunu lobo.” Gin te wot i lo bo a jo Epraim ame obedo kidkidi i ot a Mika ote wot buto kuno. I kare ame gin tye i ot a Mika, gin oŋeo dwon Alevi atidi ca oko; gin olokore baŋe ote kobbe ni, “Yin kara ŋa okelli kan? Ŋo kara ame yin itimo kan? Tic aŋo ame yin itio kan?” En te kobbigi ginnoro luŋ ame Mika otimo baŋe i yore i yore, kun kobo ni, “En aye cula kun an atio baŋe acalo alamdog.” Gin te kobbe ni, “Tim ber koŋ doŋ ipeny Obaŋa, me oŋe ka wotwa-ni bino cobere aber.” Alamdog te kobbigi ni, “Wot giwu kede kuc. Rwot gire tye aciko waŋe i wotwu-nono.” Jo abiccono te ya wot oko, ote tuno i Laic, ote neno jo ame onwoŋo tye kuno, kite ame gin bedo kede mot bala jo me Cidon ame bedo gigi mot, kun wigi owil oko i ginnoro luŋ, dok daŋ mom tye ginnoro me lobo ameremogi, gin olonyo atek; gin onwoŋo tye kannabor i jo Cidon, dok mom daŋ onotte i jo moro ocele. Kare ame gin otuno baŋ omegogi i Jora kede i Ecitaol, omegogi openyogi ni, “Idwogo wunu kede amut aŋo?” Gin te dok iye ni, “Ya wunu oko me owot wunu i komgi pien wan oneno lobo ca, nen ba, lobo mere mwonya meicel. Mom ibino timo wunu ginnoro pire? Kur daŋ dok iŋiŋinya wunu me wot kuno, me iwot idony wunu iye, igam wunu bed lobowa. Ka iwoto wunu kuno, ibino nwoŋo wunu jo moro kuno ame bedo kun wigi owil oko i ginnoro luŋ. Lobo mere lac; Obaŋa otyeko miyo lobo-nono oko i ciŋwu, kan ame ginnoro luŋ ame tye i lobo tye iye.” Eka jo Dan mia abicel ame orukere i jami lweny te ya oko i Jora kede i Ecitaol, ote wot, wot guro gonygi i Kiriat-jearim i Juda. Pi kop man omio nyiŋ kabedo-nono olwoŋo ni Gony a Dan naka atot tin. Nen ba, kabedonono tye i ŋet Kiriat-jearim tutuŋ to. Gin te kato oko i kuno, ote wot i lobo a jo Epraim obedo kidkidi, ote tuno i ot a Mika. Jo kany a rik owoto roto lobo me Laic ca te kobbi omegogi ni, “Wun iŋeo wunu ni epod, terapim, cal ame opao apaa kede ame otwako atwaka tye i udi man? Pi mannono, aman koŋ doŋ itam wunu gin ame ibino timo wunu.” Gin te gak wot kuno, ote tuno i ot Alevi moro ame onwoŋo tye i paco a Mika, gin te penye ka ce en tye aber. Jo Dan mia abicel ca ame orukere oko i jami lwenygi ca, onwoŋo tye ocuŋ i dogcel me paco a Mika; kun jo kany a rik owoto oroto lo bo ca okato malo, ote wot kwanyo cal ame opao apaa, epod, terapim, kede cal ame otwako atwaka. Alamdog onwoŋo tye ocuŋ i dogcel me paconono karacel kede jo mia abicel ame orukere i jami lwenygi, Kare ame jo-ni owoto i ot a Mika, ote wot kwanyo cal ame opao apaa, epod, terapim karacel kede cal ame otwako atwaka, alamdog openyogi ni, “Kara mannono ŋo ame itimo wunu-nono?” Gin te kobbe ni, “Liŋ iti, wum dogi oko kede ciŋi, me ibin iwot kedwa, me iwot ibed acalo pappawa kede alamdogwa. Itamo ni ber yin ibedo alamdog i ot a dano acel, onyo ka ibedo alamdog a doggola acel luŋ ame tye iyi atekere moro me Icrael?” Cuny alamdog te doko ayom oko; te kwanyo epod, terapim, kede cal ame opao apaa te wot oko kedgi kun en tye i dye lwak. Gin rik olokore ote cako wotgi kittono, kun omio itinogi, kede limgi akwo karacel kede jamigi luŋ telo nyimgi, Kare ame gin doŋ owoto abobor i ot a Mika, jo ame onwoŋo udigi ceggi kede me a Mika oriŋo kede duru, ote ryemo jo Dan mako oko iyo, Gin te redo baŋ jo Dan, eka jo Dan te dok lokere kobbi Mika ni, “Ŋo kara atimmi, omio ibino i lwak jo arom man?” En te gamo ni, “Nen wun ikwanyo wunu obaŋana ame atio, itero wunu daŋ alamdogga oko, ite wot wunu kedgi oko, kara an doŋ adoŋ i gin aŋo ba? Ŋo kara ame omio wun dok ipenya wunu ni, ‘Ŋo kara atimmi!’ ” Cite jo Dan te gamo ni, “Kur be imi dwoni winyere i akinawa kan, naka mio wegi akemo mogo ŋit mukere i komwu, eka te neki oko karacel kede jo me odi luŋ.” Jo Dan gigi te medde iwotgi anyim. Kare ame Mika oneno ni jo Dan tek meicel kate oko, en olokere odok cen i paco mere. Jo Dan te wot oko i jami ame Mika onwoŋo otio, karacel kede alamdoggere, naka i Laic, baŋ jo ame onwoŋo bedo gigi mot, kun wigi owil oko i ginnoro luŋ, ote wot nekogi oko i pala lweny, ote waŋo daŋ bomagi oko. Jo moro a kono riŋo me larogi te bedo mom, pien gin onwoŋo bor i jo Cidon dok daŋ onwoŋo mom onotte kede jo moro ocele. Gin onwoŋo tye i luŋ ame ceggi kede Bet-rekob. Jo Dan dok te gero boma-nono i wi en acon, ote bedo iye, ote cako nyiŋe ni Dan, bala nyiŋ kwarogi Dan, ame rik Icrael onywalo. Cite nyiŋ boma-nono aconnere onwoŋo Laic. Jo Dan rik te miyo cal apaa-naca bedo meggi kengi; Yonacan akwar Gercom, ame obedo wot a Muca, karacel kede ikwae, gin te bedo olamdog i atekere a Dan, tuno naka i kare ame otero iye jo me lobonono iyi opii. Cal apaa ame Mika rik otio-naca rik ote cibo bedo kuno pi kare luŋ ame onwoŋo ot Obaŋa tye i Cilo. I kare-nono onwoŋo Icrael mom ru tye kede abaka moro. Alevi moro ame onwoŋo rik bedo kannoro a tye teŋe i lobo a jo Epraim obedo kidikidi, rik onwoŋo otiŋo nyannoro me Beterekem i Juda. Kare ame dako mere otubere kede, oya oko i baŋe, te dok i ot a pappere i Beterekem i Juda, te wot rik kuno pi dwete aŋwen, cware te wot wopo yore kuno, me ewot ekob kede mot edwoggo paco. En owoto karacel kede omiro mere kede kane aryo, ote tuno paco a papa a cege. Kare ame papa a dako onene, obino me jole kun cunye yom. Ore, ame obedo papa a dako mere, te miye bedo kuno nino adek. I kare-nono luŋ gin te bedo cam kede mat kun daŋ en buto kuno. I nino me aŋwennere, gin te dilo ibayi, ote yikere me wot, ento papa a nyako te kobbi cwar nyare ni, “Koŋ icut wunu kwonnoro aduno me medo teko, eka ite cako wotwu.” Jo aryonono te bedo cam kun daŋ omatte, papa a nyako te dok kobbi dano-nono ni, “Tim ber tin dok ibut koŋ kan me iyomoro cunyi.” Kare ame dano-nono oya malo me wot, papa a cege te bedo diye, te miyo en dok buto kuno. I nino me kannyere, en doŋ te dilo ibayi me cako wot, ento papa a cege te kobo ni, “Koŋ ibed inwoŋ teko, ikur koŋ cem kwe.” Gin aryo luŋ dok ote bedo cam. Kare ame dano man kede cege kede amiro mere oya malo me wot, ore ame obedo papa a cege te kobbe ni, “Koŋ inen piny doŋ ceggi yuto, tim ber dok ibut wunu kan. Koŋ inen piny doŋ owumere oko, but kan me iyomoro cunyi, diki doŋ ite ya ibayi me wot paco.” Cite wode-nono mom dok te ye buto kuno, en oya te cako wot oko, te tuno kan ame otikere kede Jebuc (ame en Jerucalem). En onwoŋo tye kede kane mere aryo ame otweo gi-bedo i wigi, dako mere daŋ onwoŋo tye baŋe. Kare ame gin doŋ ceggi kede Jebuc, piny doŋ onwoŋo ocako wumere oko, amiro te kobbi adwoŋere ni, “Biye owirre i boma a jo Jebuc kan, me obut iye.” Cite adwoŋere te gamo ni, “Wan gire mom obino wirre i boma orok, ame gin mom obedo jo Icrael, wan obino wot atir naka i Gibea.” En te kobbi amiro mere ni, “Biye owot i kabedo moro i akina magi, me owot obut i Gibea onyo i Rama.” Gin rik te kato i wotgi, ceŋ te poto oko a doŋ gin ceggi i Gibea, ame obedo me a jo Benjamin, Gin rik te wirre kuno, ote buto i Gibea. Gin te donyo i boma-nono, ote wot bedo piny i dye boma kuno, pien ŋattoro mom oterogi i ode me wot buto iye. Nen ba, adwoŋoro te bino kun onwoŋo adwogo i tic i poto mere otyeno. Dano-nono onwoŋo tuŋe tye i lo bo Epraim ame obedo kidikidi; en onwoŋo bedo i Gibea, kun wegi lobonono i kome obedo jo Benjamin. En otino waŋe malo te neno lonnaca obedo piny i dye boma kannaler. Adwoŋŋono te penye ni, “Iwot kara kwene?” En te dok iye ni, “Wan oya i Beterekem i Juda, odok cen i lobo Epraim obedo kidikidi, ame tye teŋe kannabor, kan ame an onwoŋo aya iye. Rik awoto i Beterekem i Juda, aman doŋ adok tuna; doŋ mom tye ŋattoro ame otera i ode. Wan otye kede reŋ kal kede cam a kanewa, karacel kede ogati me koŋo ame romowa, an kede aŋecani kede atin awobi ame tye kedwa-ni, mom dok tye ginnoro ocele ame wan omito.” Adwoŋŋaca te gamo ni, “Kuc obed kedwu, an abino miyowu gin ame imito wunu luŋ, cite myero kur ibut wunu i dye boma kan.” En doŋ te terogi i ode, te wot miyo kane cam. Gin te lwoko tyengi, ote cam, ote mat. I kare ame gin tye ayomoro cunygi, nen ba, jo mogo ame gin jo areco me boma-nono, te guro ot oko romo irit; gin te cako go yo doggola kun okobbi adwoŋ ca, ame obedo won ot, ni, “Kel lo ame obino i odi-nono oko me obut kede.” Won ot te kato baŋgi oko, te kobbigi ni, “Pe amannono, omegona, myero kur itim wunu tim araccono, pien dano man doŋ odonyo oko i oda, myero kur itim wunu tim araccono i kome. Nen ba, nyara ame mom ru oŋeye kede ico en tye kan karacel keda kede aŋeca mere, wek acwaiwugi oko kan aman-ni. Wagi wunu me itimgi kite ame wun ineno wunu ni ber baŋwu, aco dano man myero kur itim wunu tim arac wok-ki i kome.” Cite jonnono gire te kwero winyo koppere oko. Alevi te waya aŋeca mere cwayo baŋgi oko, gin te buta kede kun oloke odoko gi-tukogi naka piny oru. I kare ame piny doŋ owalakino oko, gin te weke, ote wot gigi oko. I kare ame ceŋ doŋ amito donyo, dako-nono te wot rette i doggola adwoŋ ca, ame cware onwoŋo tye i ode, te buto kannono naka odiko. Cware te ya odiko, te yabo doggola me ottono, kun mito cako wottere. I cawa-nono en te neno kom dako mere tye obuto piny i doggola me ottono, kun ciŋe tye opoto i doggola. En te kobbe ni, “Ya malo, me owoti.” Cite mom te winyo kopporo ame odokke. En te tiŋe kete i wi kana, te cako wot oko me dok i paco mere, Kare ame en odonyo i ode, en okwanyo pala, te ŋiŋido kom dako mere oto-nono, te poko i dul apar wir aryo, te cwayo i lobo a jo Icrael luŋ. Jo luŋ ame oneno okobo ni, “Kodi gin acalo man yam mom ru otimere, dok yam mom ru onen, cakere i kare ame jo Icrael oya kede i Miciri, tuno kede naka tin; myero koŋ tam koppere, por, ote kobo ginnoro iye.” Jo luŋ me Icrael te kato oko, kun oya i Dan, tuno naka i Beerceba, medo kede lobo me Gilead. Lwak luŋ te cokere i Mijipa baŋ Rwot kun otye kede cuny acel. Rwode a lwak luŋ me atekere luŋ ame obedo me a jo Icrael, ocuŋ i akina lwak Obaŋa ame ocokere. Jo luŋ onwoŋo romo co tutumia aŋwen, jo ame lwenyo i pala romo kun gin luŋ obedo olweny ame woto i tyengi. Jo Benjamin onwoŋo owinyo oko ni jo Icrael owoto i Mijipa. Jo Icrael rik te kobo ni, “Koŋ iporriwa wunu kite ame tim man arac wok-ki otimere kede.” Alevi ame onwoŋo oneko cege-nono te kobo ni, “I nino moro onwoŋo awoto i Gibea ame obedo boma a jo Benjamin, an karacel kede cega, me wot buto kuno. Jo moro ame gin obedo jo me Gibea te bino i koma, ote guro ot ame onwoŋo an atye iye dyeworrono kun onwoŋo gin mito neka oko; gin te wayo dakona tetek, naka te to i ciŋgi. An ate kela kom dakona ame oto-nono, ate ŋiŋido oko, ate cwayo dul kome-nono romo lobo luŋ ame jo Icrael oleo me bedo megi; pien gin onwoŋo otimo tim me ipyeda kede me coco iyi Icrael. Nen wunu ba, wun jo Icrael, wun luŋ mi tamwu iye dok ipor wunu koppere i kan.” Lwak luŋ te twarre a waŋe acel kun kobo ni, “Wan luŋ ŋattoro mom bi no wot i kema mere, ŋattoro daŋ mom bino dok tuŋe. Gin ame aman wan obino timo i kom jo Gibea ene: wan obino wot me lweny i komgi, kun okwanyo jo kede kwir, obino kwanyo jo apar i kom mia acel i kom atekere me Icrael luŋ, kede jo mia i kom jo tutumia acel acel, kede jo tutumia i kom jo tutumia apar apar, me gin wot kelli lwak cam, me gin ka obino, obin ocul kwor i kom Gibea a jo Benjamin, pi bal luŋ areco ame gin otimo i kom Icrael.” Jo Icrael luŋ rik te cokere me lweny i kom boma-nono kittono, kun gin luŋ oribere i cunygi acel keken. Atekere luŋ me Icrael te cwayo jo romo lobo atekere a jo Benjamin luŋ kun okobo ni, “Kodi tim arac aŋo ame otimere i akinawu-nie? Aman myero wun imi wunu jonnono i ciŋwa, jo me Gibea otimo tim arac wokkono, me onekgi oko, omi gin arac ya oko i akina jo Icrael.” Cite jo Benjamin mom te winyo kop omegogi, ame gin jo Icrael. Jo Benjamin te ya oko i bomagi ote bino cokere i Gibea, me wot lweny i kom jo Icrael. I nino-nono jo Benjamin te kwano jo ame oya i bomagi, ame omako pala me romo, jo te romo tutumia pyeraryo wie abicel, kun nwoŋo mom omedo iye jo ame bedo i Gibea ikome, ame welgi okwano oromo mia abiro, ame oyero jo mere ayera. I kom magi luŋ onwoŋo tye iye jo mia abiro ame oyero, ame gin luŋ obedo ojaracam. Ŋat acel acel i akinagi onwoŋo ciŋe iwac meicel ame mom bao gweŋ te celo piny nono. Aco jo Icrael luŋ kun nwoŋo mom okwano iye jo Benjamin, welgi oromo tutumia mia aŋwen, ame omako pala lweny. Gin luŋ rik obedo jo ame onwoŋo doŋ ona oko i lweny. Jo Icrael rik te ya oko wot i Betel, ote wot penyo Obaŋa ni, “Ŋa i akinawa ame myero ge wot lweny i kom Benjamin?” Rwot te gamo ni, “Myero Juda en a ge wot.” Jo Icrael te ya idiko te wot guro kemagi i Gibea. Jo Icrael te wot lweny i kom jo Benjamin. Jo Icrael te ryeye i tyen me lweny i komgi i Gibea. Jo Benjamin te katto oko i Gibea, i nino-nono gin te neko jo Icrael ame romo tutumia pyeraryo wie aryo. Ento jo Icrael cunygi obedo tek, ote dok ryeye i tyen me lweny kakan ame rik gin koŋ oryeye iye i nino me agege ca. Jo Icrael te wot malo ote wot kok i nyim Rwot naka otyeno; ote dok penyo Rwot ni, “Odok owot olweny i kom omegowa, ame gin jo Benjamin?” Rwot te kobo ni, “Wot ilweny wunu i komgi.” Jo Icrael te noko jo Benjamin aceggi inino me aryo mere. Jo Benjamin te katto oko i Gibea i nino me aryo mere, gin dok te neko jo tutumia apar wie aboro i kom jo Icrael, kun gin luŋ obedo jo ame lwenyo kede pala, Mony a jo Icrael luŋ dok te wot i Betel, ote wot kok iye. Gin te bedo piny kuno i nyim Rwot. I nino-nono gin te ri kec naka otyeno ote yalo Rwot i mot awaŋa kede mot me kweyo cuny. Jo Icrael te dok medo penyo Rwot, pien canduk me cikere a Rwot onwoŋo tye kuno i kare-nono, kun Finekaci wot Eleajar, ame obedo wot Aron tio i nyime i kare-nono. Gin dok te penyo Rwot ni, “Dok omedde wot lweny i kom omegowa, jo Benjamin, onyo owek doŋ lweny oko?” Rwot dok te kobo ni, “Wot wunu, pien diki abino miyogi i ciŋwu.” Jo Icrael te wot miyo jogi pono oko, kun oguro Gibea oko. Gin dok te wot lweny i kom jo Benjamin i nino me adekkere; gin oyikere me lweny i kom Gibea kite ame gin obedo yikere kede tyen me acel kede me aryo ca. Jo Benjamin te dok katto oko i kom jo Icrael, ote wot kedgi teŋe naka i ŋe boma, kun lubere i kite acon ca; gin dok te cako neko jo mogo i waŋayo, i yo ame woto i Betel kede i en ocele ame woto i Gibea, naka i bar daŋ. Jo Icrael ame oto te romo pyeradek. Jo Benjamin te kobo ni, “Gin omukere i ŋwec oko i nyimwa kite acon ca.” Ento jo Icrael te kobo ni, “Koŋ oriŋ wunu oko, me otergi kannabor i boma, i yo kuka,” Jo Icrael luŋ te doŋ ya oko i kabedogi, ote ryeye oko i Baaltamar; eka jo Icrael ame onwoŋo opono mege te twarre oko i kabedogi ame onwoŋo tye i ŋet Geba tuŋ to. Jo tutumia apar ame onwoŋo oyero ayera i kom jo Icrael luŋ te bino i kom Gibea, lweny te kur a mom kobere; cite jo Benjamin onwoŋo mom ŋeo ni twon cannoro adwoŋ meicel doŋ ceggi acega me tuno i komgi. Rwot te mi yo Icrael loyo jo Benjamin oko I nino-nono jo Icrael te neko jo Benjamin ame romo tutumia pyeraryo wie abic kede mia acel nono, kun gin luŋ obedo jo ame lwenyo kede pala. Jo Benjamin te neno ni doŋ otyeko loyogi gire oko. Jo Icrael rik te jer teŋe wekki jo Benjamin kabedo, pien gin onwoŋo geno jo ame onwoŋo opono, ame onwoŋo gin oketo me kuro Gibea. Jo ame onwoŋo opono-naca te cunyere bino oko i kom Gibea. Jo ame onwoŋo opono te wot neko jo ame rik tye i boma luŋ kede pala lweny. Jo Icrael kede jo ame onwoŋo opono, onwoŋo omoko i akinagi anyut, anyutgi-nono onwoŋo tye ni mannono, ka yito me mac oduny owikino malo i boma. Jo Icrael myero doŋ dwog cen me bino lweny i kom jo Benjamin. Jo Benjamin te cako lweny, ote neko jo Icrael pyeradek, kun okobo ni, “Ateni, nen otye ka nekogi i nyimwa kite ame obedo timogi kede i lweny me agege.” Cite i kare ame gin a rik omoko ocako nen i boma, i kare ame yito doŋ owikino malo calo pagi, jo Benjamin olokere te neno ŋegi, gin te neno yito tye owikino malo i polo i boma luŋ, Jo Icrael te doŋ lokere dwogo cen, kun koyo doŋ onwoŋo oonyere atek i kom jo Benjamin, pien gin oneno ni twon can a adwoŋ doŋ tye ceggi acega me tuno i komgi. Mannono te miyogi lokki jo Icrael ŋegi oko, kun oriŋo tuŋ tim, lweny doŋ te loyogi oko, jo Icrael ame onwoŋo adwogo i bomagi te nekogi oko. Gin te jwero Benjamin reto oko piny kun komgi oto doŋ oradde atata, cakere i Noka wot kede naka kan ame otikere i Gibea i tuŋ to. Jo Benjamin tutumia apar wie aboro twal, ame gin luŋ obedo jo ame tek i lweny, gin luŋ rik ote nekogi oko. Jo ame odoŋ te lokere riŋo tuŋ tim, tuno naka i kidi Rimon, jo tutumia abic i akinagi rik dok ote neko oko i waŋayo. Jo Icrael te ryemo yogi atek naka i Gidom, ote dok ne ko jo tutumia aryo. Mannono te miyo jo Benjamin luŋ ame oneko i nino-nono te romo tutumia pyeraryo wie abic, ame gin jo onwoŋo lwenyo i pala i akina jo luŋ atek i lweny. Cite jo mia abicel te lokere riŋo gigi tuŋ tim ata naka i wi kidi me Rimon, gin te bedo i wi kidi me Rimon pi dwete aŋwen. Jo Icrael doŋ te lokere dwogo cen i kom jo Benjamin, ote nekogi i pala lweny, jo kede leyi kede jami luŋ ame onen i nyimgi. Boma luŋ ame gin onwoŋo, gin owaŋo oko kede mac. Jo Icrael rik onwoŋo okwoŋo i Mijipa ni, “Dano moro i akinawa mom bi no miyo dano moro me Benjamin nyomo nyare.” Lwak rik te bino i Betel, ote bedo kuno i nyim Obaŋa naka otyeno. Gin te cwayo dwongi baŋ Obaŋa kun okok atek, okobo ni, “Ama Rwot Obaŋa a jo Icrael, piŋo kop man otimere iyi Icrael, ame tin omio ateke re acel orwenyo oko iyi Icrael?” Orwo mere lwak te ya ibayi, te cano keno lam kuno, ote miyo iye mot awaŋa kede mot me kweyo cuny. Lwak jo Icrael te kobo ni, “Atekere mene iyi Icrael ame rik mom owoto i kare ame wan ocokere baŋ Rwot?” Pien gin rik onwoŋo okwoŋo kwoŋ adwoŋ meicel i nyim Rwot i kom dano ame rik mom owoto i nyim Rwot, i Mijipa, kun gin okobo ni, “Obino neko dano-nono oko.” Kica rik te mako jo Icrael i kom omingi Benjamin, ote kobo ni, “Atekere acel me Icrael waŋe doŋ orwenyo oko i akina jo Icrael i kare man. Kara ŋo ame myero otim wunu me wek onwoŋ mon pi jo odoŋ, kite acalo wan doŋ yam okwoŋo oko i nyim Rwot ni, mom obino miyogi onyomo nyarwa moro-ni?” Gin te kobo ni, “Atekere mene ame rik mom owoto i nyim Rwot i Mijipa?” Pien tye dano moro ame rik onwoŋo mom owoto i cokere i gony, ame oya i Jabec-gilead. Pien i kare ame okwano jo, mom onwoŋo dano moro ame oya i baŋ jo ame bedo i Jabec-gilead. Mannono te miyo lwak cwayo twoni co atek i lweny tutumia apar wie aryo kuno, kun ocikogi ni, “Wot inek wunu jo ame bedo i Jabec-gilead oko kede pala romo, anaka mongi kede itinogi. Gin ame ibino timo wunu ene: mon luŋ ame doŋ oŋeye kede co kede co luŋ oŋeye kede mon, ibino neko wunu oko acalo gin me kwer.” Gin rik te nwoŋo anyira ame romo mia aŋwen a mom ru oŋeye kede co i akina jo ame bedo i Jabec-gilead. Gin te ke lo anyira-nono i gony i Cilo, onwoŋo tye i lobo a jo Kanaan. Lwak te cwayo kwena baŋ jo Benjamin ame onwoŋo bedo i wi kidi me Rimon, ote wot rabbigi pi kop me kuc. Jo Benjamin te dwogo i kare-nono, ote miyogi anyira ame rik mom oneko i akina mon me Jabec-gilead; cite mannono mom te romogi ducu. Kica omako lwak i kom jo Benjamin, pien Rwot onwoŋo otio gin ame mio atekere acel me Icrael rwenyo oko. Odoŋe a lwak te kobo ni, “Gin aŋo ame myero otim wunu pi jo ame mon oremo, kite ame oneko kede mon me Benjamin oko-ni?” Gin te kobo ni, “Gi-alea moro myero bed tye pi jo Benjamin ame obwot, me mom jwa nyiŋ atekere moro oko iyi Icrael. Cite wan mom otwero miyogi anyirawa me bedo mongi.” Pien jo Icrael rik onwoŋo okwoŋo ni, “Cen myero mak ŋat ame omio nyare baŋ dano moro me Benjamin.” Mannono te miyogi kobo ni, “Neno wunu ba, ecuban a Rwot ame bedo mwaka i mwaka tye i Cilo, ame tye tutuŋ anyarodi me Betel, kun Cilo nwoŋo tye tutuŋ to me yo agera ame ya i Betel woto i Cekem, kede tutuŋ anyarolum me Lebona.” Gin te ciko jo Benjamin kun okobo ni, “Wot ipon wunu i potti olok, ikur wunu kuno, dok daŋ ikio wunu piny; ka ibino neno wunu anyira me Cilo obino me wot i myel, ŋat acel acel myero ya te mako dako mere i akina anyira me Cilo, eka te wot kede i lobo Benjamin. Ka ce papagi onyo omegogi okelo kokogi baŋwa, wan obino kobbigi ni, ‘Tim wunu ber, imigi wunu doŋ baŋwa, pien wan rik mom okelo mon ame romogi i kare me lweny, wun daŋ mom imiogi wunu; ame kono omio tin wun daŋ ibedo wunu kede roc.’ ” Jo Benjamin rik daŋ te timo kittono, ote tero mongi ame oromogi aroma, ame gin omako i akina anyira ame onwoŋo gin omyel. Gin te wot dok cen i lobo ame obedo meggi, ote dok gegero bomagi, ote bedo iye. Jo Icrael te doŋya oko i kuno i kare-naca, kun ŋat acel acel dok iyi atekere mere kede i doggola mere. Gin te ya oko i kuno kun ŋat acel acel dok i lobo mere. Jo Icrael rik onwoŋo mom ru tye kede abaka moro i kare-nono, dano acel acel onwoŋo gire timo gin ame en oneno ni ber baŋe. I kare moro ame onwoŋo oŋolkop en a loo jo Icrael, kec rik onwoŋo opoto i lobogi, lo moro me Beterekem i Juda rik te wot oko i lobo me Moab, te wot bedo kuno, en kede dako mere, kede awobe mere aryo. Nyiŋ dano-nono rik Elimereki, nyiŋ dako mere Naume, eka nyiŋ awobe mere aryo-nono te bedo Malon kede Kilion. Gin rik onwoŋo obedo jo me Eprata; turgi rik tye i Beterekem, ame tye i Juda. Gin rik owoto i lobo me Moab ote wot bedo kuno. Ento Elimeleki ame obedo cwar Naume rik te to oko, Naume te doŋ awobe mere aryo. Awobe mere-nono rik te nyomo anyira me Moab; nyiŋ ŋat acel rik Orupa, nyiŋ ŋat ocele Luci. Gin rik te bedo kuno mwaka ame buco romo tomon; eka Malon kede Kilion te to oko gin aryo luŋ, man te miyo Naume doŋ kene aboŋo awobe mere kede cware. Naume rik te cako ya oko i lobo me Moab karacel i mon awobe mere aryo, me dok cen, pien i Moab kuno, en onwoŋo owinyo ni Rwot olimo jo mere, omiogi cam. Mannono te miyo en ya oko i kabedo ame onwoŋo rik en tye iye, kun ya i mon awobe mere aryo-ca; gin rik ote cako wotgi kun olubo yo ame woto i lobo me Juda. Ento Naume rik te kobbi mon awobe mere aryo-ca ni, “Wun wot wunu giwu, ŋat acel acel myero dok baŋ tottere. Rwot myero timwu ber, kite ame wun daŋ itimo wunu i kom jona oto-ca kede i koma, Rwot myero miwu inwoŋ wunu ka weo, ŋat acel acel i ot a cware!” En te motogi kede amot me mar kun noto lemgi, gin luŋ ote mwoco koko oko i dwon aloŋo; ote kobbi Naume ni, “Pe gire amannono, wan myero odok kedi baŋ joni.” Cite Naume dok te kobo ni, “Dok wunu cen anyirana, kara iwot wunu keda piŋo ba? Dok atye kede itino awobe moro i yia bo, ame bino doko cogwu? Dok wunu cen anyirana, tim ber iwot wunu, pien an doŋ gira ati oko, ame mom dok aromo nwoŋo ico. Akadi kono onwoŋo akob ni atwero nwoŋo ico, ate daŋ nwoŋo moro dyewor atin-ni, ate nywalo itino awobe, itwero kuro wunu naka ka gin odoko jo adoŋo? Ibino bedo wunu aboŋo nyomere? Pe amannono anyirana, nen ba, abedo i keckom meicel pirwu, pi kite ame ciŋ Rwot opwoda kede-ni. Gin luŋ dok ote medo mwoco koko i dwon aloŋo; eka Orupa te doŋ moto tattere kede amot me mar kun noto leme me cike, ento Luci ocerre i yore atwal.” Naume te kobbi Luci ni, “Nen nyeki doŋ odok gire cen baŋ jo mere kede baŋ obaŋe ame en woro; yin daŋ dok cen iwot ilub nyeki.” Cite Luci te kobbe ni, “Tim ber kur ibed kobba ni kono apokere kedi, onyo ni adok cen, kur alub yori; pien kan ame yin iwot iye, an daŋ abino wot iye; kan ame ibino buto iye, an daŋ abino buto iye; joni en ame daŋ bino bedo jona; dok Obaŋani en ame daŋ bino bedo Obaŋana. Kan ame ibino to iye, en ame an daŋ abino to iye, obino daŋ yika kuno. Myero Rwot mi ginnoro arac meicel timere ikoma ka ce aweki, to keken en a myero pok kinwa kedi.” Kare ame Naume oneno Luci doŋ omoko tammere me wot kede, mom dok omedo kobbe ginnoro. Mannono omio gin aryo luŋ owoto naka ka otuno i Beterekem. Kare ame gin doŋ otuno i Beterekem, jo i paco-nono luŋ owoo i kop i komgi; kun mon kobo ni, “Man Naume ene?” Naume te kobbigi ni, “Kur dok ilwoŋa wunu ni Naume, lwoŋa wunu doŋ ni Mara, pien Won Twer Ducu otimo i koma tim me keckom okato kare. I Kare ame awoto onwoŋo apek, ento Rwot en odwogo an ciŋa nono. Kara ŋo ame mio dok ilwoŋa wunu ni Naume, ame kun Rwot owuna wok-ki, Won Twer oyimo twon cannoro apek i koma?” Naume rik odok turgi kittono, gin kede ci-wode Luci, nyako me Moab, i kare ame rik en dok turgi, kun ya i lobo me Moab. Gin rik otuno i Beterekem i kare ame ocako kayo cayiri. Naume rik onwoŋo tye kede wat a cware ame rik en lo alonyo me doggola Abimeleki a nyiŋe Boaj. Luci nya jo Moab rik te kobbi Naume ni, “Wek awot i poto, awot ararao cayiri i yo dano moro ame bino paro pira.” En te dokke ni, “Woti nyara.” En daŋ rik te wot rarao cayiri i yo ne jo akac; en rik te cop i poto a Boaj ame obedo dano me doggola Elimereki. Cite nen ba, i kare ame Boaj obino kun oya i Beterekem, okobbi jo akac ni, “Rwot obed kedwu!” Gin te dok iye ni, “Rwot omi gum.” Boaj te penyo aticcere ame onwoŋo adwoŋ kac ni, “Kara man nyaka a ŋa nie?” Adwoŋ a loo tic me kac te gamo ni, “Man nya jo Moab, ame obino i Naume i lobo me Moab. En onwoŋo okwaa ni, ‘Tim ber, iweka ararao cayiri kun adedepo i yo ŋe okac i akina arita. Mannono en omio en obino, te cako ibayi tuno koni, kun mom daŋ owe kadi acelloro.’ ” Boaj te kobbi Luci ni, “Koŋ iwiny ba nyara, kur dok iwot ira cayiri i poto moro ocele, kur iwek poto-ni, ento myero ibed ceggi anyirana. Mi waŋi mok i poto ame gin tye akayo-ni, yin lub yorgi. An doŋ atyeko ciko awobe ni myero kur gudi. Ka ce oryo pii ociri, wot imat pii i gulli ame awobe otwomo.” Luci te ryebere kun kulo wie piny, te kobbe ni, “Piŋo kara ibedo i cuny me kica i koma, ame omio yin iparo pira, kun an abedo arok ata?” Cite Boaj te dokke ni, “Ginnoro luŋ ame ibedo timo baŋ tatti, cakere i kare ame cwari oto iye, otitta luŋ, kede kite ame iweko kede pappi kede totti, karacel kede lobo ame onywalli iye, eka ite bino i rok ame yam mom iŋeo. Rwot Obaŋa a jo Icrael ame yin ibino ilaro te bwome, myero oculli pi gin ame itio, Rwot omi inwoŋ giri motti ame oromi!” Luci te gamo ni, “Ibedo kede twon kica moro meicel i koma, rwotta; pien ikweo doŋ cunya ikobo kop me kica baŋ anecaŋi, kadi kono an gira mom onwoŋo abedo ŋat acel i akina anecaŋi.” I cawa me cam, Boaj olwoŋo Luci ni, “Bye kan, ibin icem, ilut ogatini i koŋo olok.” Mannono omio en owoto, te wot bedo i ŋet jo okao kac; Boaj te cwaye cayit i ame ocelo acela. En te camo naka oyeŋ, te weko mogo doŋ adoŋa. I kare ame en oya me wot rarao cayiri, Boaj ociko awobe mere ni, “Wek wunu en ra naka en ame tye i akina arita, kur ijuke wunu. Kwanye wunu mogo daŋ i kom en ame doŋ otweo oko, ite jalle wunu me ara mere, kur ijuke wunu.” Luci rik te rayo cayiri naka ceŋ iyul. Kare ame en odino cayiri ame en orao, obuco romo debe aryo twal. En rik te ye yo dok kede paco; te nyutti tattere cayiri ame erao, te daŋ miye cam ame ekelo, ame onwoŋo ecamo te loye oko, Tattere te penye ni, “Tin kara irao cayiri kwene ba? Itio tin kwene? Gum obed i kom ŋat ame oparo piri-nono.” En te titti tattere ŋat ame etio baŋe, kun kobbe ni, “Lo ame atio baŋe tin, nyiŋe Boaj.” Naume te dokki ci-wode ni, “Rwot ame kica mere tye pi jo akwo kede jo oto, myero mi dano-nono winyo!” Naume dok te kobbe ni, “Dano-nono obedo watwa aceggi meicel.” Eka Luci, nya jo Moab te kobbi Naume ni, “Medo dok i kom mannono, en okobba ni, ‘Yin ibino bedo i ŋet oticca, tuno ka okao cayirina otum.’ ” Naume te kobbe ni, “Mannono ber, nyara, myero ibed wot anyira mere, me ŋattoro kur gud komi i poto ocele.” Mannono te miyo Luci bedo kede anyira a Boaj kun rarao cayiri, tuno ka kayo cayiri kede ŋano otum kun bedo baŋ tattere. Tattere Naume dok te kobbe ni, “Nyara, mom myero anwoni odi, me wek ibed aber? Boaj ame onwoŋo ibedo anyira mere-ca, mom bedo watwa? Tin otyeno en bino pyeto cayiri mere i laro dino kal. Pi mannono, yin myero ilwokere, ite wirre kede moo, ite ruko boŋŋini abeco mege, me iwot i laro kuno; ento kur imi en neni tuno ka en doŋ otyeko cam kede mat. Ento i kare ame en doŋ otyeko bu to oko, yin myero inen kan ame en obuto iye, yin iwot kuno ite wot elo boŋo ituŋ tyene, eka yin ite buto piny kaci-naca; en bino titti gin a myero iti.” Luci te gamo ni, “Abino timo gin ame ikobo-nono luŋ.” Luci rik daŋ te wot i laro me dino kal, te wot timo daŋ kite ame tattere otitte kede-nono. Kare ame Boaj doŋ ocemo oko, omate daŋ oko, ame doŋ yie yom, en obuto piny i ŋet cayiri ame ocoko karacel. Luci te libere wot elo boŋo i tuŋ tyene, te buto piny. I cuny dyewor ico te po, te lokere, te nwoŋo dako moro tye obuto piny tuŋ tyene! En openye ni, “Yin iŋa?” En te dok iye ni, “An aŋecani Luci ennnono; yar ba lak boŋoni iwum kede aŋecani, pien yin ibedo wat a cwara aceggi.” Boaj te kobbe ni, “Rwot myero omi gum, nyara; kica ame doŋ inyuto baŋa me agikki-ni pire tek meicel kato me agege oko, pien yin mom iyero dano moro i akina awobe atino, akadi ame acan onyo alonyo. Doŋ ba, nyara, tin kur doŋ ibed kede lworo moro, gin ame ipenyo, abino timogi luŋ piri, pien owotena luŋ i pacowa, gin luŋ ŋeo ni yin ibedo twon dako moro aber meicel. Iyi ateni, an abedo wat a cwari ame ceggi, cite tye ŋat ocele ame dok ceggi meicel kata oko. Koŋ yin doŋ ibut kannono dyewor man, cite diki odiko, ka ce en dano-nono bino laki, kopporo pe, en laki, aco ka mom oye laki, acalo Rwot tye kwo-ni, an abino laki. But piny naka ka piny oru.” Mannono omio Luci obuto piny tuŋ tyene naka odiko, cite te dilo odiko con, ame piny pwod ribiribi. Boaj te cike ni, “Myero ŋattoro kur ne ni dako obino i laro kan.” Te kobbe ni, “Kel boŋo ame iruko-nono, iyar yie.” Luci daŋ te yaro yie, Boaj te juko cayiri i gwata pimo moko tyen abicel, te cibo i wie, en te wot kede paco. Kare ame en otuno paco baŋ tattere, tattere openye ni, “Dwari obedo nino, nyara?” En te titte jami luŋ ame Boaj otimo baŋe, kun kobbe ni, “Cayiri man ame romo gwata pimo moko abicel, en omio baŋa, pien en okobo ni, ‘Mom myero idok baŋ tatti ciŋi-nono.’ ” Tattere te kobbe ni, “Nyara, kon doŋ ikur, wek inen kite ame kop man bino wot kede, pien dano-naca mom bino bedo mot, en bino tyeko koppono oko tin.” Boaj rik te ya wot i dogcel me boma, te wot bedo kuno. Nen ba, watgi ame onwoŋo ceggi meicel i cwar Luci kate ca, ame onwoŋo en okobo pire baŋ Luci, te bino beo kato akata. Boaj te kobbe ni, “Omina, bye ibed piny kan koŋ,” en daŋ te bino bedo piny. En te yero odoŋe apar me bomagi-nono, te kobbigi ni, “bed wunu piny kan,” gin daŋ te bedo piny. En te kobbi wattere ame ceggi i cwar Luci kate-ni, ni, “Naume ame odwogo i lobo me Moab ca tye acato dul lobo moro ame yam obedo me ominwa Elimereki. Mannono omio an atamo ni myero koŋ atitti, kun akobo ni, Yin myero iwil, kun jo ame obedo kan-ni tye, karacel kede odoŋewa-ni. Ka ce ilakoro, myero ilakoro; ento ka ce mom ibino lakoro, yin myero ititta, me aŋe, pien mom dok tye dano moro ocele i nyimi ame myero lakoro kono ka yin, eka an ate lubi.” En te ye ni ebino lakoro. Boaj dok te kobo ni, “I nino ame ibino wilo iye poto i baŋ Naume-nono, en ame daŋ ibino lako iye Luci, nya jo Moab, ame obedo dako alyel, me wek imi nyiŋe cuŋ i dul lobo mere a en rik oleo.” Wattere-naca te dok iye ni, “An mom atwero lako pira, mio abino balo dul lobona ame aleo oko. Yin doŋ lakoro, an doŋ ajalli twerra me lako.” Man en gin ame rik otimo i kare acon iyi Icrael a mako lakoro dul lobo onyo loko dul lobo i en ocele: me moko kop, dano acel gonyo amukkere oko, te miyo baŋ ŋat ocele; mannono en ame rik obedo caden iyi Icrael. Man omio i kare ame dano aceggi i cwar Luci-ca okobbi Boaj ni, “Yin wil,” en ogonyo amukkere oko, Boaj te kobbi odoŋe karacel kede lwak luŋ ni, “Wun doŋ tin ibedo wunu caden ame moko ni an doŋ tin atyeko wilo jami luŋ ibaŋ Naume ame onwoŋo yam obedo me Elimereki kede mea Kilion, kede mea Malon. Luci, nya jo Moab ame onwoŋo dako alyel Malon, daŋ doŋ atyeko lako oko me bedo dakona, me wek ami nyiŋ ata cuŋ i kom dul lobo mere, me kur we nyiŋ ata oko i akina omego mere, kede i paco ame rik onywale iye. Wun doŋ tin idoko wunu caden.” Eka jo luŋ ame onwoŋo tye i dogcel me boma, karacel kede odoŋe, te kobo ni, “Wan ocaden, Rwot myero mi dako ame abino i odi-nono obed bala Lakeri kede Lea, ame gin aryo keken otiŋo wi ot Icrael malo. Rwot myero mi ibed atek i Eprata, dok mi nyiŋi rwo i Beterekem, odi daŋ bed a rom i ot Perej, ame rik Tamali onywalo baŋ Juda, pi itino ame Rwot bino miyi i dako man ame pwod tidi-ni.” Boaj rik doŋ te tero Luci wot bedo dako mere, te bedo kede, Rwot te miyo en gamo yic, eka te nywalo wode. Mon te kobbi Naume ni, “Tin myero pwo Rwot ame mom oweko yin ibedo aboŋo watti ame ceggi kedi. Nyiŋe myero mi rwo iyi Icrael! En bino bedo ŋat ame dwoggo cunyi dok daŋ bino gwoki i kare me tio; pien ci-wodi ame mari, ame pire litti akato awobe abiro, en onywalo.” Naume te tiŋo atinnono, te pyelo i kore, eka te doko apidi mere. Mon wadgi te cako nyiŋe kun okobo ni, “Onywalli Naume atin ico.” Gin te cako nyiŋe ni Obed. En ame obin obedo papa a Yece, ame obedo papa a Daudi. Ikwae a Perej ene: Perej onywalo Kejeron, Kejeron te nywalo Aram, Aram te nywalo Aminadab, Aminadab te nywalo Nacon, Nacon te nywalo Calamon, Calamon te nywalo Boaj, Boaj te nywalo Obed, Obed te nywalo Yece, eka Yece te nywalo Daudi. Rik onwoŋo tye lo moro Ramataim-jopim i lobo Epraim ame obedo kidikidi, nyiŋe Erukana wot a Jerokam, wot Eliku, wot a Toku, ame obedo wot a Jupi ame obedo jo Epraim, Dano-nono rik onwoŋo tye kede mon aryo; nyiŋ ŋat acel Anna, eka en ocele nyiŋe te bedo Penina. Penina rik tye kede itino, cite Anna rik mom tye kede atinnoro. Dano man rik ya i paco mere woto i Cilo mwaka i mwaka me wot woro Rwot me mony kede yale i mot aŋola. Kuno rik onwoŋo tye iye awobe a Eli aryo, Kopuni kede Finekaci, ame gin rik onwoŋo tio tic me olamdog, Kare luŋ ka Erukana rik yalo Rwot kede mottere, en pokki dako mere Penina mere kede me awobe mere kede anyira mere daŋ. Kadi bed en rik onwoŋo maro Anna, cite i kare me poko mot, en mio Anna mege en kene, pien Rwot onwoŋo otweo ot nyodo mere oko, mom onwoŋo nywal. Nyeke rik i kare luŋ onwoŋo bedo roko doge meicel kun mie cwercuny pien Rwot onwoŋo otweo ot nyodo mere oko, mom onwoŋo nywal. Mannono rik te bedo timere mwaka i mwaka; i kare luŋ ame Anna woto malo i ot a Rwot, nyeke bedo roko doge. Mannono rik te bedo miyo Anna kok, kun mom daŋ cemo, Nino-moro acel cware Erukana te penye ni, “Anna, kara ibedo kok piŋo ba? Piŋo kara ikwero cem? Dok piŋo kara cunyi mom yom? An mom akato itino awobe apar oko i tuŋ baŋi?” Kare moro ame gin doŋ otyeko cam kede mat i Cilo, Anna te ya oko malo. I kare-nono onwoŋo Eli alamdog tye obedo i wi kommere i ŋet akara me doggola ot a Rwot. Anna onwoŋo cunye tye awaŋ atek, en te cako kwayo Obaŋa kun kok atek meicel. En te kwoŋ kun kobo ni, “Ama Rwot me mony, ka ce ibino ye neno can ame aŋecani tye kede, eka ite po pira, kun wii mom wil i koma, ite miya atiŋ awobi, an abino dwoke gira iciŋ Rwot pi kare luŋ me kwo mere, dok lyedi daŋ mom bino gudo yer wie.” Kare ame en pwod tye amedde kede kwaccere i nyim Rwot, Eli obedo neno doge. Anna onwoŋo rik tye akwayo Obaŋa i cunye kun del doge en ame yeŋere, cite dwone onwoŋo mom winyere; omio Eli te tamo ni en onwoŋo obedo dako ame onwoŋo omer. Eli te kobbe ni, “Ibino mer pi kare a rom mene? Wek ba mero me koŋo gik oko.” Cite Anna te gamo koppere ni, “Ama adwoŋŋa, pe gire amannono, an a dako ame cwercuny ocira oko. An gira mom amato koŋo olok, akadi kit koŋo moro ocele ame mero jo. An atye ayabo kop i cunya i nyim Rwot. Kur itam ni an abedo dako ame kite rac, pien pi kare man luŋ an abedo kobo gin ame cunya paro kede cwercuny ame atye kede.” Eli te kobo ni, “Wot giri kede kuc, Obaŋa me Icrael oye kwacci ame iketo i nyime.” Anna te gamo ni, “Obaŋa myero omi itam pira i cuny me kica kare ducu.” En doŋ te ya wot oko, te cako cam, te daŋ doŋ cako bedo kede yomcuny. Gin rik ote ya ibayi, ote woro Rwot, ote doŋ lokere dok cen i pacogi i Rama. Erukana te ribere kede dako mere Anna, Rwot te po pi Anna. Ame kare mom ru okato abor, Anna oyac, te nywalo atiŋ awobi, eka te cako nyiŋe ni Camwiri pien en okobo ni, “Akwae gira ibaŋ Rwot.” Erukana kede ode luŋ rik dok te wot malo i Cilo, me wot miyo motgi me mwaka i mwaka baŋ Rwot, kede cobo kwoŋŋere. Cite Anna mom gire te wot, pien en okobo baŋ cware ni, “Kare ame doŋ aryemo atiŋ oko i cak, abino ru tere oko, me en wot nen i nyim Rwot, te bedo kuno doŋ atwal.” Cware Erukana te kobbe ni, “Tim gin ame ineno ni ber, koŋ ikur kare ame doŋ iryeme oko icak, Rwot gire en a myero mii koppere cobere kakare.” Mannono rik te miyo Anna doŋ gwoko atinnere, tuno waŋ ame en oryeme i cak. Kare a doŋ otyeko ryeme i cak, otere malo i Cilo, kun tero daŋ twon me mwaka adek, kede moko kwon ame romo gwata adek, kede koŋo olok iyi opoko. En otere i ot a Rwot i Cilo, kun atiŋ pwod tidi. Gin te wot neko twonnaca oko, ote kelo atiŋ baŋ Eli. Anna te kobo ni, “Rwotta we! Acalo pwod itye kwo-ni, an abedo dako ame rik bin cuŋ i nyimi kan kun akwao Rwot. Pien atiŋ man akwao akwaa i baŋ Rwot; en doŋ otyeko winyo kwacca ame rik aketo i nyime. Pi mannono, an doŋ atyeko jale oko baŋ Rwot, pi kare luŋ ame en bino bedo kede kwo, atyeko doŋ jale oko baŋ Rwot.” Gin rik te woro Rwot kuno. Anna daŋ rik te kwayo Obaŋa kun wero ni, “Cunya yom atek i kom Rwot; tekona doŋ dwoŋ meicel i kom Rwot. Kop aŋale doŋ donnyo i doga i kom okworra, pien cunya doŋ yom i larre meri. “Mom tye ŋattoro a dok cil calo Rwot, ŋattoro gire mom, kono yin keni; kidi moro mom tye ame rom Obaŋawa. Kur dok imedde wunu kop i twon awaka kopporo me awaka myero kur dok donnyo i dogwu pien Rwot obedo Obaŋa Won ŋec, en ame pimo ginnoro luŋ ame dano tio. Akud atero ajo tek doŋ oturo oko, jo agoro en a dok olunyo rukere kede teko, Jo a yam yeŋ odoko jo ame tio pi nwoŋo cam, aco jo a yam kec neko, kec mom dok nekogi. Oraŋa onywalo itino abiro, wegi itino apol doŋ onyobere oko, Rwot en ame neko, dok daŋ en ame dwoggo kwo i kom dano en ame tero bino naka i Ceol, dok en adaŋ dwoggo kwo, Rwot en ame mio can, dok daŋ en ame mio lonyo, en ame dwoko dano piny, en a daŋ tiŋo dano malo. Rwot kwanyo acan oko iyi apua; kwanyo ŋat a piny oloo oko i wi odur, te miyogi bedo karacel oloc, ote leyo daŋ kom me loc. Pien pagi luŋ ame tiŋo lobo obedo me a Rwot, en ocibo polo ocuŋ i wigi, En gwoko tyeŋ jo ame kitegi atira, ento jo ame kitegi reco, en bino weko oko i piny acol; pien dano mom loo loc pi twerrere, Jo ame lwenyo i kom Rwot obino ŋiŋido atitino, en bino mor i komgi calo kot i wi polo, Rwot bino ŋolli lobo luŋ aluŋa kop, en bino miyo teko baŋ abaka mere, bino medo teko aloccere ame owiro kede moo.” Erukana te doŋ dok i paco mere i Rama. Wode te doŋ i Cilo me tic i nyim Rwot, kun Eli alamdog en ame nene. I kare-nono onwoŋo awobe a Eli obedo jo a mom beco; gin onwoŋo mom paro gigi pi Rwot. I kare-naca olamdog onwoŋo rik tio i lwak kit man: Ka ce ŋattoro omio mottere ame oŋolo baŋ Rwot, i kare ame riŋo nwoŋo pwod tye awalo i keno, amiro alamdog bino kun omako acob riŋo i ciŋe, ame lake okaro adek. En rwako acob riŋonono i tako, onyo i tabo, onyo i cupulia, onyo i gulu, doŋ riŋo luŋ ame acob riŋo bino cobo, te woto kelo oko, bino bedo me alamdog. Gin rik te bedo timo kittono i Cilo i kom jo Icrael luŋ ame woto kuno. Medo i kom mannono, kare ame mom ru owaŋo dwol amiro alamdog bino baŋ ŋat ame ayalo Obaŋa i mot aŋola, te kobo ni, “Mia riŋo alamdog me abula, pien en mom bino gamo riŋo ame otedo i baŋi, kono ka en ame numo keken.” Ka ce danonono okobbe ni, “Koŋ iwek owaŋ dwol oko, eka ite tero giri adwoŋ acalo imito,” en kobo ni, “Pe gire amannono, yin myero imia oko aman; ka ce yin ikwero, abino kwanyo tetek.” Mannono te miyo bal awobe a Eli-nono bedo adwoŋ meicel i nyim Rwot. Pien gin obedo tero mot ame oyalo kede Rwot calo gin a mom pire dit. Camwiri obedo tic i nyim Rwot kun onwoŋo pwod tidi; rik en tweo epod me camanini i pyere. Tottere rik onwoŋo kwoye kanyi atidi mwaka i mwaka, te tero baŋe i kare me wot yalo Obaŋa i mot aŋola me mwaka i mwaka kun woto karacel kede cware Erukana. Eli kare luŋ rik lamo winyo i kom Erukana kede cege, kun kobo ni, “Obaŋa omi inwoŋ dok itino ocele i kom dako man pi atiŋ ame en ojalo baŋ Rwot”; eka gin doŋ te dok paco turgi. Rwot rik dok te limo Anna, te yac, te nywalo itino awobe adek kede anyira aryo. Wode Camwiri te doŋo mere i nyim Rwot. I kare-nono rik doŋ onwoŋo Eli oteggo atek meicel. En obedo winyo gin ame awobe mere onwoŋo bedo tiyo i kom jo Icrael luŋ, karacel kede kite ame rik gin obedo buta kede mon ame tio i dog kema me rwatte. En rik te kobbigi ni, “Piŋo kara ibedo timo wunu kodi tim man? Pien an abedo winyo i baŋ lwak luŋ gin arac ame ibedo wunu timo. Wek wunu kodi timmono bedi itinona. Kop ame jo a Rwot obedo lalo romo kabedo luŋŋono, mom obedo kop aber. Ka ce dano obalo baŋ dano wadgi, Obaŋa bino poko akinagi, ento ka dano obalo baŋ Rwot, ŋa ame dok bino bako doge pire?” Cite gin gigi mom ote winyo kop a papagi; pien Rwot onwoŋo doŋ mito ni enekgi oko. Camwiri rik te medde doŋo, kun Rwot pwoc, jo daŋ pwoc. Dano Obaŋa moro rik te bino baŋ Eli te kobbe ni, “Rwot okobo ni mannono, ‘An rik anyutte kena baŋ jo me ot a kwarowu i kare ame gin onwoŋo tye i Miciri, kun gin onwoŋo opii i ot a Parao. Rik ate yere iyi akina atekere luŋ me Icrael me en bed alamdogga, me wot waŋo odok akur i kom keno lamma, kun ruko epod i nyima. Rik ate miyo baŋ ot a kwarowu motta luŋ ame owaŋo i mac, ame ya i baŋ jo Icrael. Kara piŋo dok mot ame oŋolo me yala, mot ame omia ame rik aciko pire, wun dok iparo wunu ni kono gin luŋ obedo megwu? Kara pi ŋo yin Eli dok iworo itinoni akata oko, kun imiogi ocwe i dul i dul ame mwonya meicel ame ya i kom mot a jona Icrael?’ Pi mannono ba, Rwot Obaŋa a jo Icrael okobo ni, ‘Rik aciko ni jo me odi kede me ot a kwarowu Aron bino tiyo ticgi i nyima nakanaka,’ cite aman Rwot otuco ni, ‘Mannono doŋ awuko gira oko, pien jo ame mia kwogo, an daŋ abino miyogi kwogo, aco jo a mom bino keto kwogo i koma, an daŋ mom abino keto cunya i komgi. Nen ba, kare tye abino, ame abino turo iye tekoni kede teko me ot a kwaroni, ame te miyo adwoŋŋoro oti mom te nen i odi. Kare ame can doŋ opoto i komi, nyeko bino maki i kom jo Icrael pi lonyo luŋ ame gin bino nwoŋo, kun dano moro oti mom bino nen i odi atwal. Danoni moro ame abino weko doŋ i ŋet keno me lam, koko bino miyo waŋe coro oko, kun cunye ton atek; karacel kede jo luŋ ame obino nywalo i odi, obino neko oko i pala lweny. Ka ce itinoni aryo luŋ Kopuni kede Finekaci bino to i nino acel, mannono en ame bino nyutti ni mannono luŋ bino timere. Dok an abino keto alamdogga ame genne, ame bino tiyo ticcere kun cobo tamma kede mitta ducu. An abino miyo doggola mere cuŋ atek kun tio nakanaka i nyim abakana ame ayero, Dok jo luŋ ame bino doŋ i odi, bino bino baŋe me bako doggi pi cente moro, onyo kwoŋŋoro, kun okobo ni, “Tim ber, iketwa i kabedo me olamdog, me onwoŋ kwonnoro me acama.” ’ ” I kare-nono Camwiri onwoŋo tio tic a Rwot i te loc a Eli. Kop a Rwot onwoŋo mom doŋ winyere wok i kare-nono, anyuttogo acalo lek onwoŋo mom doŋ timere atata. I kare-nono waŋ Eli onwoŋo doŋ ocako coro oko, mom doŋ neno piny aber. En onwoŋo rik tye obuto piny i kan ame en rik onwoŋo buto iye kare ducu, kun tara Obaŋa pwod tye a lyel, Camwiri onwoŋo tye obuto piny i ot a Rwot kan ame rik canduk Obaŋa bedo iye. Rwot te lwoŋo ni, “Camwiri! Camwiri! Camwiri!” en te gamo ni, “An atye ene!” En te riŋo baŋ Eli, te kobbe ni, “An ene, adwoŋ, pien ilwoŋa.” Ento Eli te kobo ni. “An gira mom alwoŋi, koŋ dok iwot ibuti.” Camwiri daŋ te dok wot buto. Rwot dok te medo lwoŋo ni, “Camwiri! Camwiri!” en dok te ya wot baŋ Eli, te kobo ni, “An ene, adwoŋ, pien ilwoŋa.” Ento Eli dok te kobo ni, “An gira mom alwoŋi, atinna; koŋ dok iwot ibuti.” I kare-nono Camwiri onwoŋo mom ru ŋeo Rwot, dok daŋ kop a Rwot onwoŋo mom ru oyabere baŋe. Rwot dok te medo lwoŋo Camwiri tyeŋ me adekkere. En dok te ya wot baŋ Eli, te kobo ni, “An ene, adwoŋ, pien ilwoŋa.” Eli doŋ te niaŋ ni Rwot doŋ onwoŋo tye alwoŋo awobi-nono. Omio Eli te kobbe ni, “Wot ibuti, ka ce en dok olwoŋo, yin gam ni, ‘Kob keda Rwot, pien an amironi atye awinyo’.” Camwiri daŋ te dok wot buto piny i kakare. Rwot te bino cuŋ i laŋete, te lwoŋo kite ame en koŋ obedo lwoŋo kede con ca, ni, “Camwiri! Camwiri!” Camwiri doŋ te gamo ni, “Kobbi, pien amironi tye awinyo.” Rwot te kobbi Camwiri ni, “Nen ba, an aceggi timo ginnoro iyi Icrael ame bino miyo jo luŋ ame bino winyo, komgi bino to oko inoŋ. I kare-nono abino cobo ginnoro luŋ ame rik akobo i kom ot a Eli, cakere iyi ageyi mere naka iyi agikki mere, An doŋ atyeko kobbe ni aceggi keto can i kom ode atwal, pien itino mere obedo yeto Obaŋa, cite en gire mom ojukogi. Pi mannono, an doŋ atyeko kwoŋ baŋ jo me ot a Eli ni mom tye mottoro ame obino ŋollo me yala, ame bino kwanyo bal i kom ot a Eli atwal.” Camwiri te buto tuno naka odiko, eka te cako yabo doggola me ot a Rwot, Camwiri onwoŋo lworo tito gin ame onyutte-nono baŋ Eli, Cite Eli olwoŋo Camwiri te kobbe ni, “Camwiri atinna.” En te gamo ni, “An ene, adwoŋŋa.” Eli te penye ni, “En otitti kop aŋo? Kur imuŋŋa kop ame en okobbi. Obaŋa myero mi koppere pot i komi, kede akato mannono oko, ka ce imuŋo kopporo acel i kom kop luŋ ame Obaŋa otito baŋi.” Camwiri daŋ te titte kop luŋ kun mom muŋŋe moro. Eli te gamo ni, “Mannono gire kop a Rwot, myero en tim gin ame en oneno ni ber baŋe.” Camwiri rik te medde doŋo kun Rwot tye kede, dok mom tye koppere moro ame mom ocobere. Jo Icrael luŋ, cakere i Dan tuno naka i Beer-ceba, rik te ŋeyo ni Camwiri doŋ otyeko moko me bedo adwarpiny a Rwot. Rwot rik dok te medde nen i Cilo, pien en rik onyutte gire kene baŋ Camwiri i Cilo, kun kobbe kop a Rwot. Kop a Camwiri rik te bino baŋ jo Icrael luŋ. I kare-nono jo Icrael rik te wot lweny i jo Piriciti. Jo Icrael rik te guro gonygi i Eben-ejer, kun jo Piriciti guro gonygi i Apek. Jo Piriciti te ryeye i tyeŋ me lweny i jo Icrael. Kare ame lweny doŋ okur, jo Piriciti rik te loyo jo Icrael oko, ote neko jo ame ceggi romo tutumia aŋwen i bar me lweny. Kare ame mony doŋ otyeko dwogo cen i gonygi, odoŋe a jo Icrael te kobo ni, “Piŋo kara Rwot omio jo Piriciti tin oloowa? Myero owot okel wunu canduk me cikere a Rwot i i Cilo baŋwa kan, me en bed i akinawa, olarwa i ciŋ okworwa-ni.” Lwak rik te cwayo jo i Cilo me wot kelo canduk me cikere a Rwot me mony i kuno, Rwot ame bedo i wi lukerubi. Awobe a Eli aryo, Kopuni kede Finekaci, onwoŋo rik daŋ owoto kuno karacel kede canduk me cikere Obaŋa. I kare ame canduk me cikere a Rwot otuno i gony, jo Icrael luŋ te wo atek meicel, ame te miyo lobo daŋ mor. Kare ame jo Piriciti owinyo dwon jo ame awo, gin te kobo ni, “Kara woo a tye i gony a jo Eburania ca dokkono?” Kare ame gin oŋeo ni okelo canduk me cikere a Rwot i gony, lworo omakogi meicel, pien gin obedo kobo ni, “Obaŋagi obino i gonygi.” Gin te ero koko ni, “Oneno can doi! Pien kodi gin acalo man mom ru yam otimere, Oneno can doi! Ŋa ame bino larowa iciŋ obaŋa mogo atek wok-ki? Magi gin obaŋe ame rik ouno jo Miciri i lwak can a kitegi papat i tim. Di wunu cunywu, nyon wunu piny atek calo co, wun jo me Piriciti, me kur idok wunu opii a jo Eburania, kite ame gin yam daŋ obedo kede opiiwu. Nyon wunu piny atek calo co me ilweny wunu kedgi.” Jo Piriciti rik daŋ te lweny, ote loyo jo Icrael oko jo Icrael te riŋo oko kun ŋat acel acel riŋo naka i paco mere. Rik oneko jo apol meicel i lwennyono, pien oneko jo Icrael iye tutumia pyeradek twal, ame gin jo ame onwoŋo woto i tyengi. Canduk me cikere Obaŋa daŋ omao oko; awobe a Eli aryo, Kopuni kede Finekaci, daŋ oneko oko. Lo moro ame obedo dano me Benjamin rik te riŋo oko i lweny naka i Cilo i nino-nono, kun en oyeyeco boŋŋi mere oko, ojuko wie daŋ i lobo. Kare ame en otuno kuno, onwoŋo Eli obedo i wi kom i ŋet yo, kun waŋe neno yo, pien cunye onwoŋo tye ka poto apota pi canduk Obaŋa. Dano-nono otuno i boma otitti Eli gin otimere, jo luŋ i boma te wo i koko. Kare ame Eli owinyo koko-nono, en okobo ni, “Wo ca dok kono?” Dano-nono te ru kato oyotoyot baŋe, te titte gin otimere. Eli onwoŋo doŋ mwaka me dittere oromo pyerabonwen wie aboro, waŋe daŋ onwoŋo doŋ ocoro oko, ame mom doŋ romo neno piny. Dano-nono te kobbi Eli ni, “An a dano ame oya i ka lweny kuca; an ariŋo i ka lweny tin.” Eli te penye ni, “Kara obedo niŋo i kuno, atinna?” Ŋat okelo kop te gamo ni, “Jo Icrael otyeko ŋwec oko i nyim jo Piriciti, dok daŋ oneko jo atek meicel; awobeni aryo, Kopuni kede Finekaci daŋ oto oko, dok canduk me cikere Obaŋa daŋ omao oko.” Kare ame dano-nono okobo kop i kom canduk me cikere Obaŋa, Eli orette ataro i wi kom ame onwoŋo en obedo iye i ŋet dogcel me boma; ŋut Eli te tur oko, te daŋ to oko, pien onwoŋo doŋ en dano oteggo kun kome pek. En obedo aŋolkop a jo Icrael pi mwakki pyeraŋwen. Ci-wode, ame obedo dako a Finekaci, onwoŋo rik yac ame onwoŋo doŋ ceggi nywal. Kare ame en owinyo ni canduk Obaŋa doŋ omao oko, dok ni kwaro mere kede cware daŋ oto oko; en onyono piny te nywal oko, pien rem onwoŋo ogoe i cawa-nono, I kare ame en doŋ ceggi to, mon ame onwoŋo tye i ŋete kuno okobbe ni, “Kur ilwor, pien inywalo atiŋ awobi.” Cite en mom ogamo doggi, mom daŋ oketo cunye iye. En te cako nyiŋ atiŋ ni, Ikabod, kun kobo ni, “Kwogo doŋ otyeko ya oko i baŋ jo Icrael!” pien canduk Obaŋa doŋ omao oko kede dok pi kwaro mere kede cware. Dok te kobo ni, “Kwogo doŋ otyeko ya oko i baŋ jo Icrael, pien canduk Obaŋa doŋ omao oko.” Kare ame jo Piriciti doŋ otyeko mayo canduk Obaŋa, gin otiŋo i Eben-ejer, ote tero naka i Acidod. Icennere dok ote kobo oko i kuno, ote tero naka i ot me cal jokgi Dagon, ote wot cibo i ŋet cal Dagon. Orwo mere, i kare ame jo Acidod oya odiko con, gin onwoŋo cal Dagon orette aryeba cuny i nyim canduk a Rwot. Gin te tiŋo cal Dagon dwoko kakare. Cite i kare ame gin dok oya odiko ocele, gin onwoŋo cal Dagon orette dok aryeba cuny i nyim canduk a Rwot, kun wie kede bade ryoryo oŋun oko, opoto piny i doggola; Dagon doŋ tye odoŋ ka i dul kome ocele mege keken. Man en gin omio olamdog a Dagon karacel kede jo lung ame donyo i ot a Dagon, mom nyono arii me doggola a Dagon ame tye Acidod, naka atot tin. Ciŋ Rwot rik te bedo apek meicel i kom jo Acidod, te miyogi twon lworo adwoŋ meicel, te daŋ goyo Acidod kede lobo mere luŋ i too ame kwokwoto kom jo. Kare ame Acidod oneno kite ame piny tye kede, gin te kobo ni, “Canduk Obaŋa myero kur bed i akinawa kan, pien ciŋe pek meicel i komwa kede i kom Dagon ame obedo obaŋawa.” Mannono omio ote cwayo okwena me coko rwode me Piriciti luŋ karacel kun okobo ni, “Kara obino timo wunu gin aŋo i kom canduk Obaŋa a jo Icrael?” Gin te kobo ni, “Myero ter canduk Obaŋa a jo Icrael i Gat.” Rik ote daŋ tero canduk Obaŋa a jo Icrael kuno. I kare ame gin doŋ otyeko tero kuno, ciŋ Rwot dok te cako poto i kom jo me boma-nono, te miyogi doko jo ababaŋ. Rwot te wuno jo me boma-nono meicel i too me akwota kom i kom itino kede i kom jo adoŋo. Mannono rik te miyogi dok cwayo canduk Obaŋa iyi Ekron. Cite i kare ame canduk Obaŋa otuno i Ekron, jo me kuno te ero koko ni, “Nen koŋ gin dok odwoggo canduk Obaŋa a jo Icrael baŋwa kan me neko wa karacel kede jowa.” Gin te cwayo okwena me coko rwode a jo Piriciti luŋ karacel, kun okobo ni, “Cwa canduk Obaŋa a jo Icrael oko, me odwok kakare, me kur bed nekowa karacel kede jowa luŋ.” Pien lworo me kare luŋ onwoŋo doŋ obabaŋo jo i boma-nono luŋ. Ciŋ Rwot onwoŋo obedo pek atek kuno, jo a mom oto, obedo goyogi kede too ame kwokwoto kom jo, koko a jo me boma nono rik te tuno naka malo i polo. Canduk Obaŋa obedo i lobo a jo Piriciti dwe abiro. Icennere jo Piriciti te lwoŋo olamdog kede otyet, te kobbigi ni, “Kara obino timo wunu gin aŋo i kom canduk a Rwot? Tittiwa wunu gin a myero odwok kede canduk a Rwot kakare.” Gin te kobo ni, “Ka ce idwoko wunu canduk Obaŋa a jo Icrael, myero kur icwa wunu nono, cite myero inen ni idwoko wunu kede mottoro me kwanyo balwu. Mannono bino miyo icaŋ wunu, ite ŋeyo wunu gin omio en mom okwanyo ciŋe i komwu.” Gin te penyo ni, “Kit aŋo a myero odwok kede me mot?” Gin te dok iye ni, “Cal akwota kom abic ame otio i jabu, kede cal oyoo kany ame oporo wel rwode a jo Piriciti, pien kit two acellono onwoŋo omakowu luŋ karacel kede rwodewu. Doŋ pi mannono, myero iti wunu cal akwota kom kede cal oyoo ame tye ka tyeko lobowu oko-ni, ite miyo wunu kwogo baŋ Obaŋa me Icrael; atot onyo bino miyo en jwiko teko me ciŋe i komwu kede i kom obaŋewu. Piŋo kara imio wunu cunywu bedo anwaŋ bala rik jo Miciri kede Parao ame rik omio cunygi obedo nwaŋ? Kare ame Rwot olokogi odoko gi-tuko mere, gin mom oweko jo Icrael owoto, eka gin te ya gigi oko? Aman doŋ iwot ikwany wunu, i yik wunu gadigadi anyen kede megi dok aryo ame ociro, a mom ru orio kol i ŋutgi, ite tweyogi wunu i nyim gadigadi, me wagi. Cite roce myero iter wunu paco, kur obed karacel kede totogi. Kwany wunu canduk a Rwot, ite keto wunu i wi gadigadi; ket wunu cal ame otio i jabu i canduk ocele ame tye i ŋete, ame ibino dwoko wunu baŋe me mot me kwanyo balwu. Cwa wunu doŋ wot oko. Koŋ ibed neno wunu yore. Ka ce owoto atira i lobogi naka i Bet-cemec, nwoŋo Obaŋagi en a rik okelo twon can adwoŋ wok-ki i komwa; aco ka mom otimere amannono, obino ŋeyo ni mom ciŋe gire en ame obedo pwodowa, ento otimere i komwa pi gum arac.” Jo-nono daŋ te timo kittono, gin okwanyo megi dok aryo ame onwoŋo pwod ociro, ote tweyo miyo waya gadigadi, kun ocego itinogi oko i ot. Gin te cibo canduk a Rwot i wi gadigadi, ame oketo iye canduk ocele kede cal oyoo kede cal akwato kom. Dok te wot atira i yo ame dok tutuŋ Bet-cemec, kun olubo gudo adwoŋŋere keken. Gin owoto kun okok, naka mom gigi ogak tuŋ cem onyo tuŋ cam; rwode me a jo Piriciti te bedo lubo yorgi naka i waŋ apokki me Bet-cemec. Onwoŋo jo Bet-cemec tye akayo ŋanogi i luŋ. I kare ame gin otiŋo wangi malo, gin oneno canduk, cunygi te bedo ayom meicel. Gadigadi rik te bino naka i poto a Yocwa me Bet-cemec, te cuŋ iye kuno. Twon kidi moro adwoŋ onwoŋo tye kuno; gin te babaro gadigadi oko me yen, ote yalo Rwot i dok me mot awaŋa. Jo Levi rik te tiŋo canduk a Rwot kede en ocele ame onwoŋo tye i ŋete, ame rik cal jabu tye i yie, ote cibogi i wi twon kidi adwoŋŋono. Jo Bet-cemec te yalo Obaŋa i mot awaŋa kede mot ocele i nino-nono. A doŋ rwode me Piriciti kany ca oneno, gin odok cen naka paco i Ekron i nino-nono. Magi gin cal akwota kom ame otio i jabu ame jo Piriciti odwoko acalo motgi me kwanyo balgi baŋ Rwot: acel pi Acidod kede acel pi Gaja, acel pi Acikelon, acel pi Gat, kede acel, pi Ekron. Gin ocwalo daŋ cal ame otio kede jabu, kun poro wel boma a jo Piriciti luŋ ame rwode kany ca onwoŋo loo, boma luŋ ame ocelo atek kede pacci a mom ocelo. Twon kidi adwoŋ ame ocibo iye canduk Obaŋa, tye kuno acalo caden i poto a Yocwa me Bet-cemec naka atot tin. Rwot rik te neko jo me Bet-cemec mogo oko, pi ŋiyo yi canduki a Rwot. En oneko jo pyerabiro i akinagi, jo te bedo kede kumo, pien Rwot oneko jo atek meicel. Jo me Bet-cemec te kobo ni, “Ŋa kara ame twero cuŋ i nyim Obaŋa ame cil-li? Kara en bino ya i baŋwa te wot baŋ ŋa?” Gin rik te cwayo kwena baŋ jo me Kiriat-jearim, kun okobo ni, “Jo Piriciti doŋ odwoggo canduk a Rwot oko. Biye iom wunu me iter wunu baŋwu kuno.” Jo me Kiriat-jearim te bino omo canduk a Rwot, ote tero i ot Abinadab ame onwoŋo tye i wi kidi. Gin te kwero wode Eleajar, me bedo ŋat ame gwoko canduk a Rwot. Cakere i kare ame canduk a Rwot ocako bedo kede i Kiriat-jearim, kare koŋ dok te kato alalac, mwakki ame buco romo pyeraryo twal, jo Icrael te cako dwogo baŋ Rwot kede kumo. Camwiri dok te kobbi jo luŋ me ot Icrael ni, “Ka ce doŋ idwogo wunu baŋ Rwot kede cunywu luŋ, bol wunu doŋ obaŋe orok oko ame tye baŋwu karacel kede cal Acera ducu, ite keto wunu cunywu doŋ i kom Rwot, kun iwore wunu en keken, bino miyo en larowu oko i ciŋ jo me Piriciti.” Mannono te miyo jo Icrael bolo cal Baal luŋ karacel kede cal Acera luŋ, ote doŋ woro ka Rwot keken. Camwiri dok te kobbigi ni, “Cok wunu jo Icrael luŋ karacel i Mijipa, an abino kwayo Rwot pirwu.” Gin daŋ te cokere i Mijipa, ote twomo pii onyo piny i nyim Rwot, gin te kanyo kec i nino-nono kuno kun okobo ni, “Wan doŋ otyeko balo i nyim Rwot.” Camwiri te ŋolli jo Icrael kop i Mijipa. Kare ame jo Piriciti owinyo ni jo Icrael ocokere i Mijipa, rwode a jo Piriciti te wot lweny i kom jo Icrael. Jo Icrael ka owinyo koppere, gin obedo kede lworo i kom jo Piriciti. Jo Icrael te kobbi Camwiri ni, “Kur iwek koko pirwa i nyim Rwot Obaŋawa, me en larwa i ciŋ jo me Piriciti.” Camwiri te kwanyo atiŋ romo ame pwod dot, te yalo kede Rwot acalo mot ame owaŋo alutu. I Kare ame Camwiri tye ka miyo mottono baŋ Rwot, jo Piriciti te nokogi aceggi acega me cako lweny i kom jo Icrael. Cite i nino-nono Rwot te miyo polo mwoc atek meicel i kom jo Piriciti, ame te miyogi odoko aba baŋ, te miyo jo Icrael ryemogi oko i nyimgi. Jo Icrael te ya oko i Mijipa, ote wot ryemo yo jo Piriciti, ote nekogi atek naka i Bet-kar. Camwiri te kwanyo kidi, te cibo cuŋ i akina Mijipa kede Jecana, te cako nyiŋe ni, Eben-ejer, pien en okobo ni, “Rwot obedo konyowa naka kan”. Gin te loyo jo Piriciti oko kittono, jo Piriciti mom dok te medde donyo i lobo ajo Icrael. Rwot rik te bedo lweny i kom jo Piriciti i kare a Camwiri luŋ. Boma luŋ ame rik onwoŋo jo Piriciti omao oko i baŋ jo Icrael, odwokogi luŋ baŋ jo Icrael, cakere i Ekron tuno kede naka i Gat. Jo Icrael rik te laro lobogi oko i ciŋ jo Piriciti. I kare-nono kuc daŋ onwoŋo tye i akina jo Icrael kede jo Amor. Camwiri rik te bedo aŋolkop a jo Icrael pi kare me kwo mere luŋ. En rik onwoŋo bedo wowota i akina Betel, kede Gilgal karacel kede Mijipa mwaka i mwaka, kun ŋolli jo Icrael kop i kabedo-nono luŋ. I kare luŋ en rik dok cen i Rama, pien tuŋe onwoŋo tye kuno. En daŋ rik ŋolo kop a jo Icrael kuno; dok daŋ rik ocano keno lam me yalo Rwot i Rama. I kare ame Camwiri doŋ oti oko, en oketo awobe mere me bedo oŋolkop a jo Icrael. Wode me kao rik nyiŋe Joel, me aryo nyiŋe Abija. Gin rik ŋolo kop i Beer-ceba. Cite kite awobe mere rik te pokere oko kede mege, gin ote lunyo gak i meggi i yo me mito lim, omio gin bedo mito ka lim keken kun mom oŋolo kop kakare. Odoŋe me Icrael te cokere karacel, ote wot baŋ Camwiri i Rama, ote kobbe ni, “Nen ba, yin doŋ iti giri oko, cite kite awobeni dok opokere oko kede megi; tim ber doŋ ikettiwa abaka ame bino Joyowa calo rok ocele.” Cito kopgi-nono mom te yomoro cuny Camwiri i kare ame gin okobo ni, “Miwa abaka me loyowa.” Camwiri rik te kwayo Rwot. Rwot te kobbi Camwiri ni, “Winy kop a lwak i ginnoro luŋ ame gin okobbi; pien gin mom okweri, gin olunyo kwera an ikoma me bedo abakagi. Cakere i nino ame akwanyogi kede i Miciri, tuno kede atot tin, gin obedo kwera kun oworo gigi obaŋe mogo ocele, gin otye ka timo daŋ kittono i komi kun lubo ginnoro luŋ ame gin obedo timo i koma. Aman doŋ ba, yin winy kopgi, gin acel a myero inen ni itimo ene, myero ikwenyorogi kun inyuttigi kite ame abaka ame bino loyogi bino bedo kede.” Camwiri rik te kobo kop a Rwot luŋ baŋ jo ame onwoŋo tye akwaye ni migi abaka. En okobbigi ni, “Man en kite ame abaka ame aloyowu-nono bino bedo kede. En bino tero awobewu te wot ketogi i wi gadigadi mere me lweny kede me bedo wegi aguragura mere, kun oriŋo i nyim gadigadi mere. Dok en bino keto odoŋe mere me mony, ame loo jo tutumia kede ame loo jo pyerabic, kede jo ocele mere me puro poto mere kede kayo kaccere, kede otet jami lweny, kede jami me kom gadigadi mere. En bino tero anyirawu me wot bedo orub moo a ŋwece kur, oted cam kede oted ogati. Pottiwu abeco mege, kede potti olok, kede me jeituni, en bino miyo baŋ omiro mere. En bino gamo acel me apar me kalwu kede me olokwu, te miyo baŋ odoŋe ame loo ticcere kede baŋ omiro mere. En bino gamo omirowu kede aŋecawu kede dokwu, kede kanewu abeco mege, bino miyogi obedo oti tic i baŋe. En bino tero acel me apar me rommiwu, kede me dyegiwu, wun daŋ ibino bedo wunu opii mere. I kare-naca ibino kok wunu i kom abakawu ame wun en iketo wunu pirwu kenwu, cite Rwot mom bino winyo kokowu i kare-naca.” Jo gire te kwero winyo kop a Camwiri oko kun okobo ni, “Pe amannono! Wan gire myero obed kede abaka ame loowa, me wan daŋ obed acalli rok ocele. Wek abaka gire en a loowa, kun en kato i nyimwa me telowa, dok daŋ me en lweny pirwa.” I kare ame Camwiri doŋ otyeko winyo kop luŋ ame lwak oko bo, en odwogo koppere baŋ Rwot. Rwot dok te medo kobbi Camwiri ni, “Winy kopgi, kettigi abaka.” Camwiri doŋ te kobbi lwak ni, “Wot wunu doŋ, kun ŋat acel acel dok cen i boma mere.” Rik onwoŋo tye lo moro me Benjamin ame nyiŋe Kic, ame obedo wot a Abiel ame wot a Jeror, wot a Bekorat, wot Apia, ame onwoŋo en dano me Benjamin ame twon alonyo meicel. Dano-nono rik tye kede wode ame nyiŋe Caulo, awobi ame odoŋo amwonya meicel. Ŋattoro onwoŋo mom dok tye i akina jo Icrael ame onwoŋo mwonya akato en. Dok en onwoŋo odoŋo lanyo jo ducu, cakere i wi gwoke dok kede malo. Doŋ i kare moro ame onwoŋo kane a Kic papa a Caulo orwenyo. Kic okobbi wode Caulo ni, “Kwany amiro acel, iya iwot wunu kede, iwot iyeny wunu kane.” Gin rik te wot beo i lobo a jo Epraim ame obedo kidikidi, ote beo daŋ i lobo Calica, cite mom ote nwoŋogi kuno. Kare ame gin otuno i lobo me Jup, Caulo te kobbi amiro mere ame onwoŋo tye baŋe ni, “Biye odok doŋ cen paco, naka mio pappa weko paro kana oko, te dok cako parowa.” Amiro merenono te kobbe ni, “Nen ba, dano Obaŋa moro tye i boma man, en obedo dano ame jo woro meicel, gin ame en kobo luŋ cobere kakare. Koŋ owot kuno, kare ocele en twero kobbiwa kop i kom wotwa-ni”. Caulo te kobbi amiro mere ni, “Cite ka wan owoto kuno obino terre ŋo? Pien ogati ame onwoŋo tye i caowa doŋ otum oko, mottoro ocele mom tye a myero oter baŋe. Ŋo ce ame wan doŋ otye kede?” Amiro-nono te dokki Caulo ni, “Cente moro anonok odoŋ baŋa kan an abino miyo baŋ dano Obaŋa, me en nyuttiwa yo”. (Iyi Icrael i kare aconnaca, ka dano woto penyo kop i baŋ Obaŋa, en kobo ni, “Biye owot baŋ ŋat aneno”; pien ŋat ame aman wan olwoŋo ni adwarpiny, gin onwoŋo olwoŋo ni ŋat aneno.) Caulo te kobbi amiro mere ni, “Ikobo kop aber, biye owoti.” Gin te wot i boma kan ame dano Obaŋa bedo iye. I kare ame gin tye akwaro tur me wot i boma, gin orwatte kede itino anyira ame onwoŋo awot twomo pii, ote penyogi ni, “Ŋat aneno tye kan?” Anyira-nono te kobbigi ni, “En tye; nen ba, en ca tye i nyimwu. Ru wot wunu, en pwod obino i boma aman-ni, pien tin jo ayalo Obaŋa i mot aŋola i wi kidi. Kare ame ibino donyo wunu i boma, ibino ru nwoŋe wunu oko oyotoyot, kun nwoŋo en mom ru owoto i wi kidi me wot cam; pien jo mom bino cam tuno ka en doŋ otuno pien en myero koŋ kwa winyo i kom mot yalo Obaŋa, eka jo ame olwoŋo te doŋ cako camo. Wun wot wunu malo, ibino nwoŋe wunu oyotoyot.” Caulogi te medde i wotgi naka i boma, Ame gin doŋ tye adonyo i boma, gin te neno Camwiri oko kun tye abino i nyimgi, awot i wi kidi. I kare ame rik onwoŋo pwod odoŋ nino acel me bino a Caulo, Rwot onyuto tammere baŋ Camwiri kun kobo ni, “Diki i kodi cawa-ni, abino cwayo dano moro ame oya i lobo me Benjamin, yin ibino wire kede moo me bedo aloc a jo Icrael. En bino laro jona i ciŋ jo Piriciti; pien doŋ atyeko neno can a jona oko, kokogi doŋ otuno baŋa.” I kare ame Camwiri oneno Caulo, Rwot okobbe ni, “Dano ame onwoŋo akobbi pire-nono ene! En aye bino loyo jona.” Caulo te wot baŋ Camwiri i dogcel me boma, te kobo ni, “Nyutta ba ot a ŋat aneno?” Camwiri te kobbe ni, “An a ŋat aneno; tel yo me wot i wi kidi malo, pien tin yin ibino cam karacel keda, eka odiko ate doŋ weki wot kun daŋ atitti kop luŋ ame tye i cunya. Aco kop i kom kanewu ame onwoŋo orwenyo i nino adek a doŋ okato, kur doŋ imedde paro pirgi, pien doŋ onwoŋogi gire oko. Kara gin aŋo ame jo Icrael amito wok-ki? Mom ginnono luŋ megi giri karacel kede jo me ot a pappi?” Caulo te dok iye ni, “An gira a dano me Benjamin, ame atekerewa en a doŋ coko i kom atekere luŋ me Icrael. Dok doggolawa daŋ kom aduno moro i kom doggola luŋ ame tye iyi atekerewa. Kara omio yin dok ikobo keda kittono kono?” Camwiri te tero Caulo, kede amiro mere naka i ot cam, te miyogi kabedo me dito i nyim jo ame olwoŋo, ame onwoŋo romo jo pyeradek nono. Camwiri te kobbi ŋat a rik atedo ni, “Kel iner ame woki amii ca, ame akobbi ni iket pat ca.” Atedo te kwanyo amuru kede epurukuc, te cibo i nyim Caulo. Camwiri te kobo ni, “Nen koŋ gin ame woki agwoko oketo oko i nyimi; cami, pien woki onwoŋo ogwoko piri naka ka caa ame ociko oromo, me icam karacel kede wele.” Caulo te cam karacel kede Camwiri i nino-nono, Kare ame gin doŋ oya oko i wi kidi odwogo i boma, kabuto onwoŋo tye ame oyiko oko pi Caulo i wi ot, Caulo te buto ni no oko, Kare ame piny pwod yabere ayaba, Camwiri te wot baŋ Caulo malo i wi ot, te lwoŋe kun kobo ni, “Ya malo, me alwoki iwoti.” Caulo daŋ te ya malo, gin aryo luŋ ote wot iyo, en karacel kede Camwiri. Kare ame gin onwoŋo tye aluŋere piny i luŋ, ame gin doŋ otuno iyi agikki me boma, Camwiri okobbi Caulo ni, “Koŋ ikobbi amironi kat anyim. Ame amiro doŋ otyeko wot oko anyim, yin koŋ icuŋ kan anonok, me ami iŋe kop Obaŋa.” Camwiri te kwanyo adomo me moo, te onyo i wi Caulo, te noto leme kun kobo ni, “Rwot doŋ otyeko kwerri me ibed aloc ame loo jo mere Icrael. Yin ibino loyo jo a Rwot, ibino larogi i ciŋ okworgi ame omano ŋetgi. Man en gin ame bino nyutti ni Rwot doŋ otyeko kwerri me bedo aloc ame loo jo ame obedo jo mere: kare ame yin ibino pokere keda tin, ibino rwatte kede jo aryo i ŋet lyel a Lakeri, ame tye i lobo a jo Benjamin, i Jelija. Gin bino kobbi ni, ‘Kane ame ibedo yenyo-nono doŋ onwoŋogi oko, aman doŋ pappi mom dok tye aparo pi kane, tye doŋ aparowu, kun kobo ni, “Abino timo kara gin aŋo ba pi woda?” ’ Ibino medde wunu i wotwu i kannono tuno naka i te kworo me Tabor, eka co adek ame awot i Betel ka woro Obaŋa te rwatte kedwu kuno, kun ŋat acel otiŋo itino dyegi adek, ŋat acel omako ogati adek, ŋat acel oyeo opoko koŋo olok, Gin bino moti te miyi ogati aryo, ame yin daŋ ibino gamo i baŋgi. I ŋe mannono, ibino tuno i Gibea-eloim, kan ame cel a mony me Piriciti tye iye; eka i kuno, i kare ame doŋ idonyo wunu i boma, ibino rwatte kede lwak odwarpiny ame bino i nyimi kun oya i wi kidi, ogoyo naŋa, ajaa, nyamulere kede opuk, otelo kede nyimgi, kun daŋ orabo kop Obaŋa. Cuny a Rwot te bino kede tek i komi, eka yin daŋ ite cako rabo kop karacel kedgi, ite lokere doko dano apat. Doŋ ba, ka anyut man luŋ bino timere i komi, yin doŋ tim ginnoro luŋ ame orwatte i nyimi, pien nwoŋo Obaŋa doŋ tye kedi. Yin ibino telo nyima me bino i Gilgal; winy ba, an abino bino baŋi me miyo mot awaŋa kede mot me kweyo cuny. Ibino kuro nino abiro, tuno waŋ ame abino tuno baŋi me nyutti gin a myero iti.” Kare ame en olokere me pokere i Camwiri, Obaŋa omie cuny apat; anyuttono luŋ te timere i nino-nono. Kare ame gin otuno i Gibea, nen ba, en orwatte kede lwak odwarpiny ecipan; cuny Obaŋa te bino i kome kede tek, en te cako rabo kop Obaŋa i akinagi. Jo ame onwoŋo rik ŋee ka oneno kite ame en tye ka rabo kede kop Obaŋa karacel odwarpiny, gin ocako kop i akinagi kengi kengi ni, “Ŋo kara a dok otimere i kom wot a Kic? Caulo daŋ doŋ odoko ŋat acel i akina odwarpiny bo?” Dano moro me kuno te kobo ni, “Papagi kara ŋa?” Man doŋ te doko carakop ni, “Caulo daŋ doŋ odoko ŋat acel i akina odwarpiny bo?” Kare ame en doŋ otyeko rabo kop acalo adwarpiny, owoto ka woro Obaŋa malo i wi kidi. Omin papa a Caulo te penyo Caulo kede amiro mere ni, “Iwoto wunu kwene?” En te kobo ni, “Onwoŋo owoto yenyo kane. Kare ame oneno ni mom otwero nwoŋogi, wan ote wot baŋ Camwiri.” Omin papa a Caulo dok te kobo ni, “Tim ber ititta gin ame en okobbiwu.” Caulo te kobbi omin pappere ni, “En otittiwa aboŋo akalakala moro ni kane doŋ otyeko nwoŋo oko.” Aco kop ame mako loc ame Camwiri onwoŋo okobo, en mom okobo kopporo iye. Camwiri rik te miyo jo luŋ cokere baŋ Rwot i Mijipa. En te kobbi jo Icrael ni, “Rwot Obaŋa a jo Icrael okobo ni mano, ‘Rik akwanyo jo Icrael i lobo Miciri, alarogi i ciŋ jo Miciri kede i ciŋ oloc ocele luŋ ame rik onwoŋo obedo wunowu. Cite wun tin ityeko kwero wunu Obaŋawu ame larowu i can kede kit ayelayela luŋ; wun doŋ ikobo wunu ni, “Pe amannono gire! Kettiwa abaka me loyowa.” Aco biye doŋ icuŋ wunu i nyim Rwot, kun iryeye wunu atekere atekere, doggola i doggola.’ ” Camwiri te kela atekere luŋ me Icrael aceggi, kwir te kwanyo atekere a Benjamin. En dok te kelo atekere a Benjamin aceggi kun kelogi doggola i doggola, kwir dok te kwanyo doggola a Matri. En dok te kela jo me doggola a Matri, kun miogi obino acel acel, eka kwir te kwanyo Caulo wot a Kic. I kare ame obedo yenye, mom ote nwoŋe. Mannono omio ote penyo Rwot ni, “Dano-nono onwoŋo obino kan ateni?” Rwot te gamo ni, “Nen ba, en tye opono i akina jami.” Gin te riŋo ome i kuno. Kare ame en ocuŋ i akina lwak, nen ba, dano mere onwoŋo odoŋo meicel ame lanyo jo luŋ, cakere i wi gwoke dok kede malo. Camwiri te kobbi lwak luŋ ni, “Ineno wunu doŋ ŋat ame Rwot oyerriwu? Mom tye ŋattoro ame cal kede i akina jo luŋ. Jo luŋ te wo i redo ni, ‘Kom abaka bed ayot nakanaka.’ ” Camwiri te titti lwak twer abaka kede kite ame en bino loyogi kede. En te coyo koppono luŋ i buk, te keto i nyim Rwot. Camwiri doŋ te cwayo lwak luŋ wot oko kun ŋat acel acel dok paco mere. Caulo daŋ te dok tuŋe i Gibea. Jo mogo ame tek meicel i lweny ame Obaŋa onwoŋo ogudo cunygi te wot karacel kedgi. Cite jo mogo ame kitegi mom beco te kobo ni, “Lo-ni twero larowa i yore aŋo?” Gin te bedo caye, mom daŋ ote tero mottoro baŋe. Cite Caulo gire te medde bedo mere i kuc. Kare ame dwe acel doŋ okato, Nakac ame atekere mere obedo jo Ammon, owoto karacel kede monnyere, te wot guro boma me Jabec-gilead oko; eka jo luŋ ame onwoŋo bedo i Jabuc te kobo ni, “Tim ber icikere kedwa, wan ote doko omironi.” Cite Nakac ame atekere mere obedo jo Ammon te gamo ni, “An aye cikere kedwu kit man, ni abino kolo waŋwu wun luŋ me tuŋ cem, me aket lewic i kom jo Icrael luŋ.” Odoŋe me Jabec te gamo ni, “Koŋ imiwa kare me nino abiro, me ocwal okwena i lobo me Icrael luŋ. Ka ce ŋattoro ame twero larowa mom tye, wan obino miye giwa i ciŋi.” I kare ame okwena otuno i Gibea i paco a Caulo, gin otito koppono kun lwak winyo, jo luŋ te wo i koko. I kare-nono onwoŋo Caulo tye adwogo i poto kun lubo twoni mere me pur. Caulo te kobo ni, “Ŋo kara ame otimere? Piŋo jo akoko?” Ote titte kop i kom jo me Jabec. I kare ame en owinyo koppono, Cuny Obaŋa te bino i kome kede tek, te miyo twon akemo moro adwoŋ meicel make. En te kwanyo twoni me purrere aryo, te totoŋo, ŋiŋido atitino, te miyo okwena wot bebea kede i lobo me Icrael luŋ, kun kobo ni, “Dano ame mom bino lubo yo Caulo kede Camwiri, obino timo twoni purrere kittono!” Twon lworo adwoŋ meicel te mako jo pi Rwot, te miyo jo luŋ bino i cuny acel. Caulo te kwano jo i Bejek, jo Icrael luŋ te romo tutumia adek, jo Juda tutumia pyeradek. Gin te kobbi okwena ame onwoŋo obino ni, “Wot ikob wunu baŋ jo me Jabec ni, ‘Diki ka ceŋ doŋ odoko alyet, obino larowu.’ ” Kare ame okwena owoto te tito kop man baŋ Jabec, yigi obedo yom atek. Mannono te miyo jo me Jabec kobo ni, “Dik i wan giwa doŋ obino miye kenwa i ciŋwu, wun doŋ ite timo wunu gin ame ineno wunu ni ber i komwa.” Orwo mere Caulo te poko mony i dul adek; gin te ciro wot i dye gony a jo Ammon ibayi, ote cako neko jo Ammon naka dyeceŋ. Jo ame obwot te ket atata kun mom itwero nwoŋo jo aryo ame odoŋ tye karacel. Kare ame man otum, jo te kobbi Camwiri ni, “Jo mene ame yam okobo ni, ‘Caulo en ame bino loyowa?’ Kel jonnono me onekgi oko.” Cite Caulo te gamo ni, “Tin mom obino neko dano moro, pien Rwot tin olaro jo Icrael.” Camwiri te kobbi lwak ni, “Biye owot wunu i Gilgal me owot omok wunu doŋ abakawa odoco.” Jo luŋ te ciro wot i Gilgal. Gin te yalo Obaŋa kede mot me kweyo cuny kuno. Caulo kede jo Icrael luŋ te bedo kede twonyomcuny adwoŋ meicel kuno. Camwiri te kobbi jo Icrael luŋ ni, “Nen ba, an doŋ atyeko winyo kopwu ducu i ginnoro luŋ ame ikobba wunu; atyeko doŋ kettiwu abaka me loyowu. Doŋ ba, nen wunu abaka tye ka telo wiwu; an doŋ ati oko, wia daŋ doŋ obuko lwar; dok daŋ nen wunu awobena tye karacel kedwu. An abedo tic kedwu cakere i kare me tinona naka atot tin. An doŋ en atye-ni, kob wunu ginnoro arac ame atimo i nyim Rwot kede i nyim aloccere ame en okwero. Agamo twon aŋa? Onyo kana aŋa ame agamo? Onyo tye ŋattoro ame yam acero? Onyo tye ŋattoro ame yam abedo buro? Onyo tye ŋattoro ame yam agamo limmoro i baŋe i muŋ me wumo wana, me kur aŋolkop kakare? Kob wunu kopporo ducu i koma, an abino dok iye baŋwu.” Gin te gamo ni, “Yin giri yam mom icero ŋattoro i akinawa, mom daŋ iburo ŋattoro dok daŋ mom gire i gamo gi-a ŋattoro.” En te kobbigi ni, “Rwot gire en ame obedo caden i komwu, karacel kede aloccere ame en okwero, ame moko ni, tin wun mom inwoŋo wunu ginnoro i ciŋa.” Gin te gamo ni, “En obedo acaden.” Camwiri dok te kobbi lwak ni, “Rwot ame rik oyero Muca kede Aron, te kwanyo kwariwa oko i lobo Miciri, en ame obedo acaden. Pi mannono myero doŋ icuŋ wunu mot aman, me apid kedwu i nyim Rwot i kom ginnoro luŋ ame Rwot otimo pirwu kede pi kwariwu pi larowu i can apapat. I kare ame Yakobo owoto i Miciri, jo Miciri te bedo wunogi; kwariwu rik te kok baŋ Rwot, Rwot te cwayo Muca kede Aron, ame gin te wot kwanyowu oko i Miciri, te miyogi bedo i kabedo man. Cite gin rik wigi te wil oko i kom Rwot Obaŋawu; en te jalogi oko i ciŋ Cicera ame onwoŋo obedo atel mony a Jabin, abaka me Kajor, kede i ciŋ jo Piriciti, kede i ciŋ abaka me Moab; ame te lweny i komgi. Gin te kok baŋ Rwot kun okobo ni, ‘Wan doŋ otyeko balo, pien wan oweko Rwot oko, ote lunyo woro Baal kede Acera-gu. Cite aman myero doŋ ilarwa i ciŋ okworwa, wan doŋ obino wori, yin keken.’ Rwot rik dok te cwayo Jerubaal, kede Barak, kede Jeputa, kede Camwiri, te larowu iciŋ okworwu tuŋŋi kede tuŋŋi; wun dok ite bedo wunu aboŋo ayela moro. I kare ame wun dok ineno wunu ni Nakac abaka a jo Ammon obino me lweny i komwu, ikobba wunu ni, ‘Pe gire amannono! Abaka myero bed tye ame loowa, kun nwoŋo Rwot Obaŋawa en ame obedo abakawu.’ Doŋ ba, aman wun doŋ nen wunu abakawu ame iyero wunu, ame onwoŋo ipenyo wunu pire. Rwot en doŋ otyeko cwayo abaka me loyowu, Ka ce ibino lworo wunu Rwot kun iwore wunu, iwinyo wunu koppere, ame mom ŋem wunu i kom cik a Rwot; dok ka ce wun karacel kede abakawu ame loowu bino lubo yo Rwot Obaŋawu, ibino bedo wunu aber. Cite ka mom iwinyo wunu kop a Rwot, ilunyo jem wunu i kom cik a Rwot, ciŋ Rwot mom bino rwenyo i komwu kede i kom abakawu me timowu rac. Pi mannono ba, aman doŋ cuŋ wunu mot, me inen wunu gin adwoŋ ame Rwot bino timo kun ineno wunu kede waŋwu. Man mom kare me kayo ŋano? An abino kwayo Rwot me cwa kot ocwe kun mwomwoca; mannono bino miyo iŋeo wunu dok ineno wunu kite ame balwu dwoŋ kede, bal ame itimo wunu i nyim Rwot me kwayo abaka pirwu kenwu.” Camwiri daŋ te kwayo Rwot, Rwot te cwayo kot cwe kun mwomowca i nino-nono. Jo luŋ te bedo i twon lworo adwoŋ meicel i kom Rwot kede i kom Camwiri. Lwak luŋ te kobbi Camwiri ni, “Kwa pi omironi baŋ Rwot Obaŋani, me kur oto, pien gin arac ame otimo-ni, me kwayo pi abaka pirwa kenwa, omio omedo balwa ameda.” Camwiri te kobbi lwak ni, “Kur ilwor wunu; bal magi luŋ wun doŋ itimo wunu oko, cite myero kur iwek wunu lubo Rwot, cite myero iwor wunu Rwot kede cunywu ducu. Kur ilokere wunu, ilub wunu gigi mogo atata ame mom konyo, a mom daŋ twero laro ŋattoro, pien gin obedo gigi mogo a konygi pe. Pien Rwot mom bino bolo jo mere ata, pi nyiŋe adwoŋ keken, pien Rwot gire en a rik oneno ni ber emiwu ibed wunu jo mere. Kadi amannono, an gira mom abino timo balloro i nyim Rwot me kwero kwaye pirwu; dok daŋ abino pwonyowu me lubo yo aber, ame tye atira. Myero ilwor wunu Rwot, kun iwore wunu kede cunywu ducu kun mom ileŋere wunu; myero itam wunu pi twoni gigi mogo adoŋo ame en otimo pirwu. Aco ka imedde wunu timo gin arac, en bino miyo oweowu luŋ aluŋa, wun karacel kede abakawu.” Mwaka a Caulo me dittere onwoŋo rik doŋ oromo… i kare ame en cako loc; en te loyo jo Icrael pi mwakki… kede aryo. Caulo rik te yero jo Icrael tutumia adek; jo tutumia aryo te bedo baŋ Caulo i Mikmac i lobo me Betel ame obedo kidikidi, jo tutumia acel te bedo baŋ Yonacan i Gibea i lobo a jo Benjamin. Yonacan rik te loyo jo Piriciti i cel a mony me Piriciti ame rik tye i Geba; jo Icrael te winyo pire. Caulo te kuto apel romo lobo luŋ kun kobo ni, “Wek jo Eburania winy.” Jo Icrael luŋ owinyo ka okobo ni Caulo oloo mony a jo Piriciti ame rik onwoŋo tye iyi celgi, dok daŋ nyiŋ jo Icrael doŋ odoko a ŋwe meicel baŋ jo Piriciti. Gin rik te lwoŋo lwak me wot baŋ Caulo i Gilgal. Jo Piriciti te cokere me wot lweny i kom jo Icrael, gadigadigi onwoŋo tye tutumia pyeradek, wegi aguragura tutumia kanyape, kede mony ame pol calo kwoo me dog nam. Gin obino ote wot guro gonygi i Mikmac, i yo tutuŋ kide me Bet-awen. Kare ame jo Icrael doŋ oneno ni doŋ oridogi kan adiŋ, pien onwoŋo doŋ odiogi meicel, jo te doŋ popona oko i gorogoro kede iyi acoc, kede iyi akina gweŋe, anaka i lyele-gu kede i burrogo me pii. Jo mogo te ŋolo kulo Jordan, ote wot i lobo Gad kede Gilead. Caulo onwoŋo rik pwod tye i Gilgal, jo luŋ te wot baŋe kuno kun komgi amyel amyela. En okuro pi nino abiro, ame en kare a rik Camwiri ociko; cite Camwiri rik gire mom owoto i Gilgal, lwak te cako wot baŋ Caulo. Mannono te miyo Caulo kobo ni, “Kel wunu mot awaŋa kede mot kweyo cuny baŋa kan.” En ikome te yalo Obaŋa i mot awaŋa. Tekki en tyeko ticcere me yalo Obaŋa i mot awaŋa, nen ba Camwiri te pelo oko; Caulo te wot rwatte kede, te daŋ mote. Camwiri te penye ni, “Ŋo ame yin itimo?” Caulo te gamo ni, “Kare ame aneno ni jo doŋ ocako ket oko i baŋa, dok yin daŋ mom ibino i nino ame rik onwoŋo iciko, kun jo Piriciti tye ocokere i Mikmac, omio an ate tamo ni, ‘Jo Piriciti bino cako lweny i koma i Gilgal kan, kun mom ru ataŋo ciŋa akwao Rwot.’ Mannono te miya diye miyo mot awaŋa.” Camwiri te kobbi Caulo ni, “Nen, itimo tim me miŋo. Mom igwoko cik a Rwot Obaŋani ame en ociki kede. Pien kono tin Obaŋa omoko locci me loyo jo Icrael nakanaka. Ento locci mom dok bino cuŋ; Obaŋa doŋ otyeko yero ŋat ame bino timo gin ame cunye mito. Rwot doŋ otyeko keto dano-nono me bedo aloc ame loo jo mere, pien yin mom igwoko gin ame Rwot ociki iye.” Camwiri te ya oko i Gilgal, te wot Gibea ame tye i lobo a jo Benjamin. Caulo te kwano jo ame rik onwoŋo odoŋ baŋe, te romo jo mia abicel. Caulo kede wode Yonacan, karacel kede jo ame rik onwoŋo tye baŋe, te bedo i Geda ame tye i lobo a jo Benjamin; cite jo Piriciti rik onwoŋo oguro kemagi i Mikmac. Oyak te bino i gony a jo Piriciti kun obino i dul adek, dul acel odonyo i yo tutuŋ Opra, ame woto i lobo me Cual, dul ocele odonyo i tutuŋ Bet-koron, eka dul ocele te dok tutuŋ waŋ lobo ame neno luŋ me Jeboim, piny i yo ame woto i tim. I kare-nono onwoŋo mom tye ŋattoro ame atet i lobo me Icrael luŋ, pien jo Piriciti onwoŋo okobo ni, “Naka mio jo Eburania teto pala me romo, onyo toŋigi pirgi kengi.” Ento ŋat acel acel i akina jo Icrael rik woto baŋ jo Piriciti me wot rabo lak kweri dyaŋ, onyo kidima onyo lee, onyo pala me kac. Rik oŋolligi aryo me adek me cekel pi rabo kweri dyaŋ kede kidima, eka dok acel me adek pi rabo lee kede pi como toŋ ecipet. Mannono te miyo i kare me lweny, pala me romo onyo toŋ mom nen i ciŋ ŋattoro ame onwoŋo tye baŋ Caulo kede Yonacan. Cite Caulo kede wode Yonacan onwoŋo tye kede meggi. Jo a rik onwoŋo tye i cel a mony a jo Piriciti te ciro naka i luŋ kan ame yo beo iye ŋet Mikmac. I nino moro acel Yonacan wot a Caulo te kobbi atin awobi ame onwoŋo rik tiŋo jami me lwennyere ni, “Biye, me owot loka ca i kom mony ame tye i cel a jo Piriciti.” Cite en gire onwoŋo mom okobbi pappere. Caulo onwoŋo rik bedo iyi agikki paco me Gibea i te okwer pomegranat ame rik onwoŋo tye i Migron. Jo ame rik onwoŋo tye karacel kede, onwoŋo tye mia abicel, karacel kede Akija wot Akitub, omin a Ikabod, wot a Finekaci, ame obedo wot a Eli, ame rik onwoŋo en alamdog a Rwot i Cilo, ame ruko epod. Lwak daŋ onwoŋo mom oŋeo ni Yonacan owoto oko. I yo moro adiŋ ame beo i akina kiddi, kan ame Yonacan obedo yenyo iye yo me kato kede i kom mony a jo Piriciti, onwoŋo tye iye kidi ame ocegere tuŋ cel kede en ocele ame ocegere tuŋ ocele. Nyiŋ kidi acel rik olwoŋo ni Bojej, kede nyiŋ en ocele Cene. Kidi acel tye tuŋ cam i nyim Mikmac, en ocele onwoŋo tye tuŋ cem i nyim Geba. Yonacan te kobbi atin awobi ame onwoŋo otiŋo jami lwennyere ni, “Biye, me owot i kom mony a jo a mom olirre-ni, gwok onyo Rwot twero tiyo ginnoro pirwa kuno, pien mom tye ginnoro ame geŋo Rwot laro jo, kadi kede jo apol onyo anok.” Atiŋ jami lwennyere te kobo ni, “Tim ginnoro luŋ ame cunyi okwanyo; nen ba, an atye karacel kedi, gin ame cunyi okwanyo nwoŋo mega daŋ doŋ tye kittono.” Yonacan te dok kobo ni, “Nen ba, wan obino wot naka baŋ jo ca, ote wot nyutte kenwa baŋgi. Ka ce gin bino kobbiwa ni, ‘Koŋ ikur wunu, naka ka wan obino baŋwu’, wan obino cuŋ mot kan ame otye iye, mom obino wot malo baŋgi. Cite ka gin bino kobo ni, ‘Biye wunu malo baŋwa kan’, wan daŋ obino wot malo kuno, pien nwoŋo Rwot doŋ otyeko miyogi oko i ciŋwa. Mannono en ame bino bedo gin ame nyuttiwa.” Gin aryo luŋ rik ote nyutte kengi baŋ mony a jo Piriciti ame onwoŋo tye i cel, jo Piriciti te kobo ni, “Neno wunu koŋ, jo Eburania ca tye abino ca, otye odonyo iyi aduu ame yam gin opono iye.” Jo ame onwoŋo tye i cel te lwoŋo Yonacan kede atiŋ jami lwennyere kun okobo ni, “Biye wunu malo kan, me obin onyuttiwu ginnoro kan.” Yonacan te kobbi atiŋ jami lwennyere ni, “Biye ilub yora, pien Rwot doŋ otyeko miyogi oko i ciŋ jo Icrael.” Yonacan te daŋ cako yito malo kun kokoba i ciŋe kede tyene, atiŋ jami lwennyere daŋ lubo yore. Jo Piriciti te bino rette piny i nyim Yonacan kun atiŋ jami dopogi lubo kede yore. Man en nek me agege ame Yonacan kede atiŋ jami lwennyere oneko kede jo Piriciti, gin oneko jo pyeraryo bala dano ame opuro poto mere i kweri dyaŋ yore acel keken i poto me eka acel. Twon lworo adwoŋ meicel rik te mako jo Piriciti ame onwoŋo tye i gony, kedejo ame onwoŋo tye i dye bar, karacel kede mony ame onwoŋo tye i cel, anaka oyak daŋ komgi omyel. Lobo daŋ rik te yenere, jo te bedo i twon lworo adwoŋ meicel. Okurpiny a Caulo ame onwoŋo rik tye i Gibea, ame onwoŋo tye i lobo a jo Benjamin te nenogi oko; nen ba, lwak jo Piriciti onwoŋo tye aloloka atata kun odok tuŋŋi kede tuŋŋi. Caulo te kobbi jo ame rik onwoŋo tye baŋe ni, “Kwan wunu jo me onen na ame oya oko i baŋwa.” Kare ame okwano jo, ote nwoŋo ni Yonacan karacel kede atiŋ jami lwennyere mom tye. Caulo te kobo baŋ Akija ni, “Kel canduk Obaŋa kan.” Pien i kare-naca canduk Obaŋa onwoŋo woto karacel i jo Icrael. I kare ame Caulo tye akop kede alamdog, woo onwoŋo tye amedde ameda i gony a jo Piriciti, omio Caulo te kobbi alamdog ni, “Koŋ iwek doŋ bedi.” Eka Caulo karacel kede jo ame onwoŋo tye baŋe te cokere karacel wot i mony. Nen ba, dano acel acel i akina jo Piriciti te cako cobo awottere i pala lwennyere, kun jo luŋ odoko ababaŋ. Jo Eburania ame rik onwoŋo tye baŋ jo Piriciti con, ame rik onwoŋo owoto kedgi i gonygi, gin daŋ ote lokere dwogo cen baŋ jo Icrael ame rik onwoŋo tye baŋ Caulo kede Yonacan. Jo Icrael ame rik onwoŋo opono i akina kiddi ame tye i lobo a jo Epraim daŋ ote timo kittono. Kare ame gin daŋ owinyo ni jo Piriciti tye ka riŋo oko, gin daŋ oryemo yorgi atek meicel kun olwenyo kedgi. Rwot rik te laro jo Icrael i nino-nono; lweny rik te kato naka i Bet-aven. I nino-nono jo Icrael rik te bedo arac meicel, pien Caulo okwoŋo kwoŋ i kom jo kun kobo ni, “Cen myero mak ŋat ame bino cem kun piny mom ru oyuto, ame nwoŋo an pwod atye aculo kwor i kom okworra.” Mannono rik te miyo jo bedo a mom obilo ginnoro i doggi. Jo luŋ te ciro i buŋ, gin te nwoŋo moo kic tye kuno. I kare ame jo doŋ otuno i buŋ kuno, gin te nwoŋo moo kic tye aton piny. Cite ŋattoro mom te gudo, pien jo onwoŋo obedo lworo kwon ame Caulo okwono. Cite Yonacan onwoŋo mom owinyo i kare ame pappere ciko jo kun kwoŋo akwoŋa, mannono omio en te cwayo abiro mere ame onwoŋo tye i ciŋe, te rwako i pedo kic, te tero i doge kede ciŋe; waŋe te doko atek oko. Ŋat acel i akina lwak te kobo ni, “Pappi onwoŋo ociko jo atek meicel kun kwoŋo akwoŋa ni, ‘Cen myero mak ŋat ame ocemo i nino a tin.’ ” Kec onwoŋo doŋ ociro jo oko. Yonacan te gamo ni, “Pappa okelo ayela oko i lobo. Nen kite ame waŋa doŋ odoko atek kede pi bilo ka moo kic aduno. Mom onwoŋo twero bedo ber akato, kono ka ce tin jo onwoŋo ocamo gin ame gin oyako i baŋ okworgi kite ame yigi mito? Koŋ inen aman mom ru oneko jo Piriciti apol.” I nino-nono ote neko jo Piriciti cakere i Mikmac tuno kede i Aijalon. I kare-nono kec onwoŋo doŋ ociro jo oko, jo te cako mwomere i kom lim ame oyako, ote mako rommi, twoni, kede roce, ote nekogi oko, jo te cako mwodo oko anumu kun ocamo anakaremo mere. Jo te kobbi Caulo ni, “Nen ba, jo tye aturo cik a Rwot, pi mwodo riŋo anumu kun omedo kede remo.” Caulo te gamo ni, “Ituro wunu cik, cor wunu twon kidi adwoŋŋere baŋa kan.” Caulo dok te kobo ni, “Keketa wunu iyi akina jo, iwot ikobbigi wunu ni, ‘Ŋat acel acel myero kel twonnere kede romo mere, bin nek kan, te camo. Kur dok itim wunu bal i turo cik a Rwot pi mwodo riŋo medo kede remo.’ ” Mannono te miyo dano acel acel i akina lwak, bino kun kela twonnere dyeworrono, te bino neko kuno. Caulo te cano keno lam pi Rwot; mannono rik obedo keno lam me agege ame en ocano pi Rwot. Caulo te kobo ni, “Olub wunu yo jo Piriciti dyewor-ri me owot oyakgi wunu ka piny oru. Kur owek wunu ŋattoro i akinagi doŋ.” Gin te gamo ni, “Yin tim gin ame ineno ni ber.” Cite alamdog te kobo ni, “Koŋ onok wunu Obaŋa aceggi.” Caulo te cako penyo kop i baŋ Rwot ni, “Myero alub yo jo Piriciti? Ibino miyogi i ciŋ jo Icrael?” Cite i nino-nono Obaŋa mom odokke iye kadi acel. Caulo te kobbi otel wic lwak ni, “Wun otel a lwak luŋ, biye wunu kan, me iŋe wunu dok daŋ inen wunu kite ame bal tin obino kede. Pien kite ame Rwot bedo kede kwoni, Rwot ame laro jo Icrael, kadi ka bal man tye i kom woda Yonacan, en myero to gire.” Cite ŋattoro i akina lwak mom te dok i koppere-nono. En te kobbi jo Icrael luŋ ni, “Wun ibino bedo wunu tuŋcel eka an kede woda Yonacan ote bedo tuŋcel.” Lwak te kobbi Caulo ni, “Yin tim gin ame ineno ni ber.” Caulo te kobo ni, “Ama Rwot Obaŋa me Icrael, piŋo kara tin mom igamo dog amironi? Ka ce roc man tye i koma onyo i kom woda Yonacan, mi Urim. Aco ka bal man tye i kom joni Icrael, mi Tumim.” Kwir rik te mako Yonacan kede Caulo, kun lwak mom iye, Caulo dok te kobo ni, “Dok ibol kwir i kom an kede woda Yonacan.” Kwir te doŋ mako Yonacan. Caulo te kobbi Yonacan ni, “Kobba gin ame itimo.” Yonacan te cako titte kun kobo ni, “An abilo moo kic aduno kun agweto kede abiro ame onwoŋo tye i ciŋa. An gira doŋ ene, an abino to.” Caulo te kobo ni, “Obaŋa myero otim ginnoro arac meicel i koma, yin gire myero ito, Yonacan.” Lwak te kobbi Caulo ni, “Yonacan ato oko ateteni, en ame en okelo twon loc adwoŋ rom man iyi Icrael-li? Mom gire bino timere kittono. Kite ame Rwot tye kwo-ni, yer wie moro acel keken mom gire bino poto piny, pien obedo tic karacel Obaŋa i kare man.” Lwak rik te bino laro Yonacan kittono, naka omio mom te to, Caulo rik mom doŋ te ryemo yo jo Piriciti te dok cen; jo Piriciti daŋ te dok i kabedogi. Kare ame Caulo doŋ odoko abaka ame loo jo Icrael, en obedo lweny i kom okworrere luŋ ame omano ŋete tuŋŋi kede tuŋŋi. Olwenyo i jo Moab, jo Ammon, jo Edom kede i kom obakki me Joba, karacel kede i kom jo Piriciti. Tuŋ a en olokere iye keken, en loo okworrere oko, En dok te bedo lweny atek meicel, te loyo jo Amalek, eka te laro jo Icrael oko i ciŋ jo ame onwoŋo bedo yakogi. Itino a Caulo awobe onwoŋo tye Yonacan, Icwi kede Malkicua; eka anyira mere aryo te bedo Merab ame en nyako me agege kede Mikal ame en nyako atidi. Nyiŋ dako mere onwoŋo Akinoam, ame obedo nyaka Akimaj. Eka nyiŋ adwoŋ ame telo wi monyere te bedo Abuneri wot a Ner, ame obedo papa a Caulo. Kic papa a Caulo kede Ner papa Abuneri, onwoŋo obedo awobe Abiel. Lweny rik obedo agwa meicel i kom jo Piriciti i kare a Caulo luŋ. Caulo rik ka oneno dano moro ame kome tek onyo ame tek i lweny, en kelo danonono bedo baŋe. Camwiri rik te kobbi Caulo ni, “Rwot rik obin ocwaa me wiri kede moo, me ibed abaka ame loo jo mere Icrael; pi mannono myero tin iwiny kop a Rwot. Rwot me mony okobo ni, ‘Abino keto can i kom Amalek pi gin ame yam gin otimo i kom Icrael, pien yam gin ocako lweny i kom Icrael i kare ame gin oya i Miciri. Wot ilweny i kom jo Amalek, ilwergi oko acalo gin me kwer karacel kede jamigi luŋ. Kica kur maki i komgi, nek co kede mon, itino atino karacel kede en apwod dottege, twoni kede rommi, inaga kede kane.’ ” Caulo te lwoŋo jo, te kwanogi i Telaim. Jo ame onwoŋo woto i tyengi oromo tutumia mia aryo kede jo me Juda tutumia apar. Caulo rik te wot i boma a jo Amalek, te wot kiyogi i luŋ. Caulo te kobbi jo me Keni ni, “Ya wunu oko i akina jo Amalek, iwot wunu piny, me kur atyekwu karacel, kedgi, pien rik inyuto wunu cuny me kica baŋ jo Icrael luŋ i kare ame gin oya i Miciri.” Mannono te miyo jo Keni ya oko i akina jo Amalek. Caulo te loyo jo Amalek cakere i Kavila tuno Cur, ame tye tutuŋ kide me Miciri. En te mako Agag, abaka me Amalek tero akwo, ento jo luŋ en te jwerogi oko i pala romo acalo gin me kwer. Ento Caulo karacel kede lwak mom te ye neko Agag, kede romi kede twoni abeco mege, kede kit lim ocele ame ocwe, kede itino rommi. Gin te lunyo jwero ka gigi ame ocao kede en ame konygi mom. Kop a Rwot te bino baŋ Camwiri ni, “Cunya ocwer meicel pi miyo Caulo bedo abaka, pien en doŋ odoko oko cen, mom dok tye ka luba, dok daŋ mom ocobo cikka.” Akemo te mako Camwiri atek, en te kok baŋ Rwot dyewor benebene, Camwiri te dilo ibayi me rwatte kede Caulo odiko. Jo te kobbi Camwiri ni, “Caulo obino i Karmel, te cibo ginnoro me po pire kuno, eka te lokere kato anyim, te wot i Gilgal.” Kare ame Camwiri obino baŋ Caulo, Caulo okobbe ni, “Rwot omii winyo; an atyeko co bo cik a Rwot.” Camwiri te penye ni, “Kara koko rommi kede me a twoni a dok awinyo-ni kono?” Caulo te gamo ni, “Okelogi i baŋ jo Amalek, pien jo oweko rommi abeco kede twoni me aŋola me yalo Rwot Obaŋani; cite en ocele mege luŋ ojwero oko acalo gin me kwer.” Camwiri te kobbi Caulo ni, “Aco liŋ! Abino titti gin ame Rwot okobba tin dyewor.” Caulo te gamo ni “Titta do.” Camwiri te kobbe ni, “Kadi bed yin inene keni acalo ŋat atidi, cite mom yin ilo atekere luŋ me Icrael? Rwot oyerri me bedo abaka a jo Icrael. Rwot rik te cwayi i ticcere kun kobbi ni, ‘Wot ijwer obalo luŋ me Amalek acalo gin me kwer, ilweny kedgi tuno waŋ ame ityekogi oko iweŋ.’ Piŋo kara dok ikwero winyo kop a Rwot? Piŋo imwomere i jami ayaka, ite timo gin arac i nyim Rwot?” Caulo te kobbi Camwiri ni, “An gira awinyo kop a Rwot, awoto i tic ame Rwot ocwaa iye, akelo Agag, abaka a jo Amalek, dok daŋ ajwero jo Amalek acalo gin me kwer. Ento lwak otero jami ame oyako, rommi kede twoni, kede jami abeco mege ame onwoŋo ojalo me aneka, gin otero me bed gin me aŋolo me yalo Rwot Obaŋani i Gilgal.” Camwiri te kobo ni, “Rwot mito mot awaŋa kede me aŋola akato kite ame en mito ni jo winy kede gin a en ociko? Nen ba, winyo kop a Rwot ociko kato mot aŋola oko; ciko yit i koppere kato dwol rommi oko. Pien jem rom aroma i bal me tyet, dok nwan a ŋut rom aroma i turo cik kede woro jogi. Pien yin ikwero winyo kop a Rwot, en daŋ doŋ okweri oko me bedo abaka.” Caulo te kobbi Camwiri ni, “An doŋ abalo; aturo cik a Rwot kede koppi, pien an alunyo lworo lwak dok daŋ awinyo kopgi. Doŋ pi mannono ba, tim ber, i tima kica i balla, me odok kedi, awot awor Rwot.” Camwiri te kobbi Caulo ni, “An gira mom abino dok cen karacel kedi, pien yin ityeko kwero kop a Rwot, omio Rwot daŋ doŋ okweri oko me bedo abaka ame loo jo Icrael.” Camwiri te doŋ lokere me cako wottere oko, Caulo te yoro lak iorrere i kome, eka te yec oko. Camwiri te kobbe ni, “Rwot tin doŋ oyeco loc a jo Icrael oko i baŋi, omio baŋ awotti ame en dano aber kati oko. Pien Won Kwogo me Icrael mom kobo goba, mom daŋ loko tamere, pien en mom obedo dano ame mio en dok loko tamere.” Caulo te kobo ni, “An doŋ abalo, cite myero aman imia woro i nyim odoŋe a jona, kede i nyim jo Icrael, me idok cen karacel keda, me awot awor Rwot Obaŋani.” Camwiri te lokere lubo Caulo, Caulo te woro Rwot. Camwiri te kobo ni, “Kel Agag, abaka a jo Amalek baŋa kan.” Agag te bino baŋe kun kome oto inoŋ. Agag te kobo ni, “Ateteni, lit ato doŋ gire okato oko.” Camwiri te kobo ni, “Kite acalo jami lwennyi rik omio mon odoŋ korgi nono, totti daŋ kore bino doŋ nono i akina mon.” Camwiri te totoŋo Agag, ninido oko i nyim Rwot i Gilgal. Camwiri te doŋ dok cen i Rama, aco Caulo te wot i paco mere i Gibea. Camwiri mom dok te neno Caulo naka Caulo oto. Cite Camwiri rik te kumo pire i kare ame en doŋ oto. Rwot cunye te cwer atek pi miyo Caulo bedo abaka ame loo jo Icrael. Rwot okobbi Camwiri ni, “Kara ibino bedo kumo pi Caulo kare arom mene, kun an doŋ atyeko kwere oko me bedo abaka ame loo jo Icrael? Pik moo i adomo, me iwoti. Abino ori baŋ Yece ame obedo dano me Beterekem, pien doŋ atyeko nwoŋo abaka i akina awobe mere.” Camwiri te gamo ni, “Kara atwero wot niŋo ba? Ka ce Caulo bino winyo, en bino neka oko.” Rwot dok te kobbe ni, “Ter roa, ite wot kobo ni, ‘An abino yalo Rwot kede mot aŋola.’ Lwoŋ Yece daŋ bin i yalo Rwot, an abino nyutti ŋo a myero iti. Ibino wiro ŋat ame an abino tuco nyiŋe baŋi.” Camwiri rik daŋ te tiyo gin ame Rwot ociko, owoto i Beterekem. Odoŋe me boma-nono te bino rwatte kede kun komgi myel, ote penye ni, “Binoni-ni ber onyo rac?” Camwiri te gamo ni, “Ber gire; abino yalo Rwot; lonyere wunu kenwu, me ibin iwot wunu keda i ka yalo Rwot.” En Camwiri ikome te lonyo Yece kede awobe mere, te lwoŋogi bino i ka yalo Obaŋa. Kare ame gin doŋ obino, Camwiri oneno Eliab, te tamo ni, “Ateteni, ŋat ame Rwot bino kwero me bedo abaka doŋ tye i nyime.” Cite Rwot te kobbi Camwiri ni, “Yin kur inen ber a kome onyo borrere, pien atyeko kwere oko. Rwot gire mom neno kite ame dano neno kede; pien dano neno kom ame nen i oko, ento Rwot neno mere cuny dano.” Yece dok te lwoŋo Abinadab te miye beo i nyim Camwiri, Camwiri te kobo ni, “Akadi man daŋ Rwot gire mom oyero.” Yece dok te miyo Cama beo i nyim Camwiri, Camwiri dok te kobo ni, “Akadi man daŋ Rwot gire mom oyero.” Yece te miyo awobe mere abiro beo i nyim Camwiri. Camwiri te kobbi Yece ni, “Rwot gire mom oyero moro i akina magi.” Camwiri te penyo Yece ni, “Itinoni, awobe luŋ tye kan?” Yece te gamo ni, “Pwod odoŋ moro acel ame en cogo en tye akwayo rommi.” Camwiri te kobbi Yece ni, “cwa dano wot kele; pien wan mom obino bedo piny naka waŋ ame en obino kan.” En te cwayo dano me wot kele. En onwoŋo obedo awobi amerema, kun waŋe nen aber, dok daŋ mwonya meicel. Rwot te kobo ni, “Ya doŋ iwire kede moo, pien man doŋ en ennono.” Camwiri te kwanyo adomo ame moo tye i yie, eka te wirre i nyim omego mere; Cuny a Rwot te bino i kom Daudi kede teko, cakere i nino-nono wot kede anyim. Camwiri te ya oko i Rama. I kare-nono Cuny a Rwot te doŋ ya oko i kom Caulo eka cen arac ame oya i baŋ Rwot te cako yele. Amiro mere te kobbe ni, “Nen ba, cen arac ame oya i baŋ Obaŋa ayeli meicel. Adwoŋwa, myero imi wan omironi ame otye i nyimi i caa-ni, owot oyeny lo moro ame adiro i goyo naŋa; me wek i kare ame cen arac ame oya i baŋ Obaŋa tye i komi, en bino goyo naŋa te miyi bedo aber.” Caulo te kobbi omiro mere ni, “Aco doŋ yenya wunu ŋat ame adiro i goyo naŋa, ikel wunu baŋa.” Ŋat acel i akina awobe-nono te kobo ni, “Nen ba, an aneno wot a Yece ame obedo dano me Beterekem, ame en adiro meicel i goyo naŋa; en dano ame kome tek, a ŋeo lweny, ryek i kop, dok daŋ en dano anen amwonya meicel, Rwot daŋ tye kede.” Koppono te miyo Caulo oro jo baŋ Yece, kun okobbe ni, “Cwa wodi Daudi baŋa, ame en akwat romi.” Yece te kwanyo kana ame oyeo ogati kede opoko koŋo olok, kede atin dyel, te miyo wode Daudi terogi baŋ Caulo. Daudi te bino baŋ Caulo, te daŋ cako ticcere oko. Caulo rik te mare atek meicel, en te doko atiŋ jami lwennyere. Caulo te cwayo kop baŋ Yece kun kobbe ni, “Wek Daudi doŋ bed i ticcere baŋa kan, pien aneno ticcere oyomo cunya.” Doŋ kare luŋ ka cen arac ame ya i baŋ Obaŋa tye i kom Caulo, Daudi kwanyo naŋa te goyo kede ciŋe: eka Caulo te doko aber, ame kome yot, kun cen arac oya oko i kome. I kare-nono jo Piriciti te coko monygi karacel me lweny; gin ocokere i Coko, i lobo a jo Juda, ote guro kemagi i akina Coko kede Ajeka, i Epec-dammim. Caulo karacel kede jo Icrael te cokere, wot guro kemagi i luŋ me Ela. Gin te ryeye i tyeŋ me lweny i kom jo Piriciti. Jo Piriciti te cuŋ i wi kidi tuŋ cel kun jo Icrael daŋ cuŋ i wi kidi ame tye tuŋ ocele, eka luŋ te poko akinagi. Lo moro atek te donyo i gony a jo Piriciti ame nyiŋe Goliac, dano me Gat, ame en onwoŋo dano odoŋo malo, borrere romo futi aboŋwen kede nucu. En onwoŋo oruko tok mola i wie, kun koti mola ame ororopo aropa tye i kore; koti mola-nono onwoŋo pekkere mito romo ratili mia acel kede pyerabic. Eka iyi abela tyene te ruko iye mola, kun daŋ okakaca i toŋ aliro me mola i wi gwoke. Bol toŋŋere mito rom aroma kede yat me cweyo boŋo; aco leb toŋŋere romo ratili apar wie aboŋwen; kun ŋat omako kwottere telo yo. En ocuŋ te redo i wi mony a jo Icrael ame onwoŋo oryeye i tyeŋ ni, “Piŋo ibino wunu me romo kun iryeye wunu i tyeŋ? An mom abedo dano me Piriciti? Wun mom ibedo wunu omiro a Caulo? Yer wunu danowu acel, me en bin baŋa kan. Ka ce en twero lweny keda te neka, wan obino bedo omirowu; aco ka an aloc ate neke oko, wun ibino bedo wunu omirowa, ibino tic wunu pirwa.” Dano me Piriciti-nono te kobo ni, “An tin acao mony a jo Icrael oko, koŋ imia wunu dano me alweny kede.” Kare ame Caulo kede jo Icrael luŋ owinyo kop man tipo komgi te po meicel, ote bedo kede twon lworo adwoŋ a mom kobere. Daudi rik onwoŋo obedo wot a lo moro me Eprata i Beterekem, ame nyiŋe Yece, ame onwoŋo tye kede awobe mere aboro. I kare a Caulo onwoŋo en doŋ oti oko, mwaka me dittere onwoŋo doŋ bup. Awobe a Yece adek adito mege onwoŋo owoto i lweny karacel kede Caulo; nyiŋ awobe mere adek adito ame onwoŋo owoto i lweny ene: Eliab, ame obedo atiŋ kao, ŋat olube te bedo Abinadab, eka me adekkere te bedo Cama. Daudi en onwoŋo obedo cogo. Jo adek adito mege onwoŋo olubo Caulo, ento Daudi onwoŋo bedo wirre woto baŋ Caulo, dok paco i Beterekem me wot kwayo rommi a pappere. Dano me Piriciti-nono onwoŋo obedo cuŋ i nyim kittono odiko kede otyeno pi nino pyeraŋwen twal. Yece te kobbi wode Daudi ni, “Kwany debe aryo me ŋano ame oceloni karacel kede ogati apar-ri pi omegoni, iru terogi baŋ omegoni i gony. Ter daŋ cak omakere aluluŋ tomon baŋ atel wi monygi me jo tutumia. Nengi ka otye aber, ite kelo ginnoro i baŋgi ame nyuto.” I kare-nono onwoŋo Caulo kede omego mere-naca karacel kede jo Icrael luŋ onwoŋo tye i luŋ me Eka, kun otye olweny i jo me Piriciti. Daudi te dilo ibayi, te weko rommi baŋ ŋattoro me gwokogi, okwanyo jami, te wot kite ame Yece ocike kede. En te tuno i gony i kare ame jo tye awot ryeye i tyeŋ me lweny, kun owo woo me lweny. Jo Icrael kede jo Piriciti te ryeye i tyeŋ, kun mony man gaye i mony wadgi. Daudi rik te weko jami i ciŋ agwok jami, en daŋ te kato wot ryeye i tyeŋ, te moto omego mere. I kare ame en pwod tye akop omego mere, nen, lo atek me Piriciti, ame obedo dano me Gat, a nyiŋe Goliac, te kato dok i nyim mony a jo Piriciti, te kobo kop ame ebedo ko bo con ca. Daudi te winyo koppere-nono. Jo luŋ me Icrael ka oneno danonono, gin oriŋo oko i nyime, ote bedo kede twon lworo adwoŋ meicel. Jo Icrael te kobo ni, “Ineno wunu dano ame obino-ni? En obino me cayo jo Icrael. Ŋat ame bino neko dano-nono, abaka bino miyo lwak lim abup meicel, te daŋ dok miye nyare, kun mio daŋ pappere kede jo me ode luŋ mom dok gelo ocolo iyi Icrael.” Daudi te penyo jo ame onwoŋo tye ocuŋ iŋete ni, “Gin aŋo ame obino timo i kom dano ame bino neko dano me Piriciti-ni, te kwanyo lewic oko i kom jo Icrael? Dano me Piriciti a mom oliro-ni kara obedo na, ame mio en cao mony Obaŋa ame kwo?” Jo te dokke i kite acellono ni, “Obino timo kittono i kom ŋat ame bino neke.” Eliab ame obedo ominnere adwoŋ owinyo ka Daudi tye akop i jo-nono, akemo te make atek i kom Daudi, te kobbi Daudi ni, “ŋo kara okelli kan? Rommi anonok ca iweko i tim baŋ ŋa? An aŋeo ni yin ayia, dok cunyi daŋ opoŋ i tam areco pien yin ibino kan me neno lweny.” Daudi te gamo ni, “Ŋo kara ame aman an dok atimo arac? Mom akobo kop keken?” En te weko ominnere oko, te lokere baŋ ŋat ocele, te kop kede daŋ kittono, jo daŋ te dok dokke kite ame koŋ odokke kede con. Jo ame owinyo kop a Daudi-nono te dok kobo koppono baŋ Caulo. Caulo te cwayo kwena lwoŋe. Daudi te kobbi Caulo ni, “Adwoŋŋa, myero cuny ŋattoro kur poti pira, an amironi abino wot lweny i dano me Piriciti.” Caulo te kobbi Daudi ni, “Yin gire mom iromo wot lweny i dano me Piriciti, pien yin pwod ibedo awobi, aco en doŋ olwenyo bor, cakere i kare me tidi mere.” Daudi te kobbi Caulo ni, “An amironi, abedo akwarommi a pappa, yam ka eŋatu onyo nu moro ager obino te mako atiŋ romo moro i akina rommi, aryemo yore ate neko oko, ate laro romo-nono oko kun akwanyo i doge. Ka ce otirre me lweny keda, amako yer tike, ate goyo neko oko. Amironi doŋ otyeko neko eŋatu kede ŋuu ager; dano me Piriciti a mom oliro-ni daŋ bino bedo calo moro i akinagi, pien ocao mony Obaŋa ame kwo, Rwot ame rik olara i ciŋ eŋatu kede i ciŋ ŋuu ager, bino daŋ lara i ciŋ dano me Piriciti-ni.” Caulo doŋ te kobbi Daudi ni, “Woti, Rwot obed kedi!” Caulo te rukki Daudi jami me lwennyere; orwako tok me mola i wie, te daŋ rwako koti mola ame ororopo aropa i kome. Daudi te tweyo pala me romo i pyere, i kom rukkere me mola, te temo wot, wot te bedo tek, pien onwoŋo en mom oporo con. Daudi te kobbi Caulo ni, “Mom atwero wot i jami magi, pien mom aporo con.” Daudi te gonyogi oko i kome. En te kwanyo abiro mere mako i ciŋe, te wot depo atyeŋ abic alilia i kulo, te ketogi iyi cao mere me kwat ame onwoŋo tye baŋe. Atindio daŋ onwoŋo tye i ciŋe, en te wot noko dano me Piriciti ca aceggi. Dano me Piriciti daŋ te nyigo baŋ Daudi, kun lo atiŋo kwottere otelo yo, Kare ame dano me Piriciti obolo waŋe oneno Daudi, obwone oko; pien onwoŋo en gire pwod awobi ame komerema, dok nen amwonya meicel. Dano me Piriciti-nono te kobbi Daudi ni, “An adoko gwok bo, omio yin ibino baŋa kede abiro?” En dok te ceno Daudi kede nyiŋ jogi mere. Te kobbi Daudi ni, “Koŋ ibin baŋa, me ami komi baŋ winy a twarre malo kede leyi me tim.” Daudi te kobbi dano me Piriciti-nono ni, “Yin ibino baŋa kede pala lweny kede toŋ, kede toŋ aliro; cite an abino baŋi kede nyiŋ Rwot me mony, Obaŋa me mony a jo Icrael, ame yin doŋ ityeko cayo. Tin Rwot bino miyi i ciŋa, abino goyi ate ŋolo ŋuti oko, ate daŋ miyo kom jo oto me mony a jo Piriciti baŋ winy a twarre malo kede leyi me tim, me lobo luŋ ŋe ni Obaŋa kara tye iyi Icrael, dok me jo luŋ ame ocokere kan-ni ŋe ni Rwot kara mom laro jo kede pala lweny onyo kede toŋ; pien lweny man obedo gire me a Rwot, en bino miyowu i ciŋwa.” Kare ame dano me Piriciti-nono oya obino baŋ Daudi, ame en doŋ ceggi me rwatte kede, Daudi oriŋo oyotoyot i ka rwattegi me lweny, me wot rwatte i dano me Piriciti-nono. Orwako ciŋe iyi icao mere, te kwanyo atyeŋ, te keto iyi atiŋdio, te bayo, te celo nyim dano me Piriciti-nono. Atyeŋ te donyo oko i tur nyime, en te rette aryeba cuny. Mannono te miyo Daudi loyo dano me Piriciti-nono oko, kun loc kede atindio karacel kede atyeŋ. En oloo i dano me Piriciti, te neko oko, pala lweny onwoŋo gire pe i ciŋ Daudi. Daudi oriŋo te wot cuŋ i kom dano me Piriciti-nono, te kwanyo pala lwennyere, te woto oko iyi akure, te ŋolo kede ŋute, neke oko. Kare ame jo me Piriciti oneno ni danogi atek oto oko, gin te cako riŋo oko. Lwak jo Icrael karacel kede Juda te twarre kede woo kun oryemo kede jo Piriciti naka tuno i Gat, kede i dogcel me Ekron. Jo Piriciti ame owawano te rereta i yo cakere i Caraim tuno naka i Gat kede i Ekron, Jo Icrael rik te doŋ dwogo cen i yo ryemo jo Piriciti, gin te yako gony a jo Piriciti, Daudi te kwanyo wi dano-nono kelo i Jerucalem; cite jami me lwennyere, en te keto i kema mere. I kare ame rik Caulo oneno Daudi kun woto lweny i dano me Piriciti, en openyo Abuneri, a loo mony ni, “Abuneri wee, atin awobi-nu obedo wot aŋa?” Abuneri te gamo ni, “Kite ame itye kwo-ni ama abaka, mom aŋeo gire.” Abaka te kobbe ni, “Koŋ ipeny nyiŋ papa awobi-nono.” Kare ame Daudi doŋ odwogo i neko Goliac. Abuneri otere i nyim Caulo, kun en omako wi Goliac i ciŋe. Caulo te penye ni, “Awobi nie, nyiŋ papi ŋa?” Daudi te gamo ni, “An abedo wot amironi Yece, ame en dano me Beterekem.” Kare ame Daudi otyeko doŋ kop i Caulo, Yonacan te cako bedo i mar adwoŋ i cunye i kom Daudi, Daudi daŋ te cako mare oko; Yonacan te marre doŋ atek ateka, kite ame en mare kede kene. I nino-nono Caulo te tero Daudi, mom doŋ te ye ni en dok cen i ot a pappere. Yonacan te cikere gin kede Daudi, pien onwoŋo mare atek meicel, kite ame en mare kede kene, Yonacan te gonyo jor i kome, te miyo baŋ Daudi, karacel kede jami lwenyere, naka pala me romo mere kede akud atero, kede del me pyere, Kannoro luŋ ame Caulo rik ocwao iye Daudi, en woto, dok daŋ en cobo ticcere ducu kakare; mannono te miyo Caulo kete i tic me loyo cirikale me mony. Kete i tic me loyo cirikale te yomoro cuny lwak luŋ karacel kede omiro a Caulo daŋ. I kare ame onwoŋo gin adwogo paco, kun Daudi doŋ odwogo oko i neko dano me Piriciti, mon i boma me Icrael luŋ, te ciro bino i wer kede myel, me jolo abaka Caulo, kun oyeŋo ajaa, dok daŋ owero werrogo me yomcuny, ogoo daŋ i tummogo apapat. Mon te myel kun oleo wer alea ni, “Caulo neko mere jo tutumia, aco Daudi oneko mere jo tutumia apar.” Akemo te mako Caulo atek meicel, pien werrono onwoŋo mom oyomoro cunye, en te kobo ni, “Daudi omio tutumia apar twal, aco an ote miya tutumia acel keken; kara man ŋo a doŋ odoŋ, mom doŋ gamo loc keken?” Cakere i nino-nono, Caulo te doŋ cako neno Daudi i waŋ arac meicel. Orwo mere cen arac ame oya i baŋ Obaŋa te bino oko i kom Caulo awaŋe acel. En te bedo po i kop apoa i ode kun Daudi gire go naŋa i kite me nino ducu. I kare-nono Caulo onwoŋo omako toŋŋere i ciŋe, en te bayo Daudi kede toŋ, pien onwoŋo otamo ni, “Acobo adiyo i kor apama.” Ento Daudi te wirre oko teŋe tyeŋ aryo twal. Caulo te bedo lworo Daudi, pien Rwot onwoŋo tye kede, kun doŋ oweke en Caulo oko, Mannono te miyo Caulo kwanye oko i nyime, te miye bedo atel wi mony ame loo jo tutumia; en te bedo telo lwakkere kan ame ore iye luŋ, ginnoro luŋ ame en otio cobere kakare, pien Rwot onwoŋo tye kede. Kare ame Caulo oneno ni en tye ka cobo ticcere aber meicel, Caulo te donyo lwore oko. Ento jo Icrael karacel kede jo Juda luŋ onwoŋo maro Daudi, pien gin oneno kite ame en woto kede i lweny dwogo kede cen. Caulo dok te kobbi Daudi ni, “Nyara adwoŋŋere Merab ene, abino miyi me bedo cegi; yin myero ka ibed atek pira, ilweny lweny a Rwot luŋ.” Pien Caulo onwoŋo otamo ni, “Ciŋa gira mom myero gude, myero en gire to i ciŋ jo Piriciti.” Daudi te gamo dog Caulo ni, “An adoko ŋa, adwoŋ, kede kwarina, karacel kede jo me doggola a pappa iyi Icrael, ame mio an adoko cwar nyaka abaka twal?” Cite kare ame kono mi iye Merab nyaka a Caulo baŋ Daudi, ote dok lunyo miyo Adriel nyomo, ame en dano me Mekola. I kare-nono Mikal nyaka a Caulo onwoŋo maro Daudi, kopgi-nono te winyere oko baŋ Caulo, te daŋ yomoro cunye. Caulo te tamo i cunye ni, “Wek amie, me en bed kumma me cike, me en to gire i ciŋ jo Piriciti.” Mannono te miyo Caulo kobo baŋ Daudi tyen me aryo ni, “Tin doŋ ibino doko cwar nyara.” Caulo te ci ko omiro mere ni, “Kobbi wunu Daudi imuŋ ni, ‘Cuny abaka yom i komi meicel. Omiro mere luŋ daŋ mari. Yin doŋ myero inyom nyaka abaka,’ ” Omiro abaka te daŋ kobo koppono luŋ baŋ Daudi. Daudi te kobbigi ni, “Wun itamo wunu ni nyomo nyaka abaka obedo gin ayot, aco kun ineno wunu ni an acan, dok mom-gu aŋeye.” Omiro a Caulo te dwoki Caulo kop ni, “Daudi okobo kit man, kit man,” Caulo te kobbigi ni, “Wun ibino kobbi wunu Daudi ni, ‘Abaka gire mom amito limmoro me nyom, kono ka del kom co a jo Piriciti mia acel keken me culo kwor i kom okworrere.’ ” Caulo onwoŋo otamo ni jo Piriciti bino neko Daudi oko. Kare ame omiro mere otito kop man baŋ Daudi, koppere daŋ te yomoro cuny Daudi me bedo cwar nyaka abaka. Ame kare ame ociko mom ru oromo, Daudi oya, te wot i jo mere, te wot neko jo Piriciti mia aryo, Daudi te kelo del komgi me co, te wot miyo baŋ abaka kun moro mom orem, me edok cwar nyaka abaka. Caulo te miyo Daudi nyomo nyare Mikal. Kare ame Caulo oneno, oniaŋ ni Rwot kara tye i Daudi, dok daŋ ni lwak luŋ me Icrael mare, Caulo te medde ameda i lworo Daudi. Mannono te miyo Caulo bedo akwor a Daudi i kare ducu, Doŋ kare ducu ka rwode a jo Piriciti obino i lweny i kom jo Icrael, Daudi en ame makogi ame loo omiro a Caulo oko. Mannono te miyo nyiŋ Daudi rwo meicel. Caulo te kobo baŋ wode Yonacan karacel kede baŋ omiro mere luŋ ni myero gin onek Daudi oko. Cite Yonacan wot a Caulo onwoŋo rik maro Daudi meicel. Yonacan te kobbi Daudi ni, “Pappa Caulo mito neki oko; pi mannono myero igwokere ba odiko myero ipon kakannoro adiŋ. An abino wot cuŋ i ŋet pappa i poto kan ame yin itye iye; abino kop kede piri, ka ce abino niaŋ ginnoro, abino titti.” Yonacan te kobo kop aber i kom Daudi baŋ pappere Caulo, kun kobbe ni, “Yin myero kur itim balloro i kom amironi Daudi, pien en mom ru obalo ginnoro baŋi, dok pien gin ame en otio okonyi atek meicel. Koŋ inen en ojalo kwo mere te neko dano me Piriciti, omio Rwot okelo loc adwoŋ meicel baŋ jo Icrael luŋ. Yin rik ineno i waŋi, cunyi daŋ te bedo ayom iye. Piŋo kara dok imito timo bal i kom dano ame mom i bal, me neko Daudi aboŋo tere?” Caulo mom te winyo kop a Yonacan, te kwoŋ ni, “Kite acalo Rwot tye kwo-ni, mom abino neke,” Yonacan te lwoŋo Daudi, te titte kopporo luŋ. En te dok kelo Daudi baŋ Caulo, te bedo i nyime kite a yam con. Lweny rik dok te cakere, Daudi te wot lweny i jo Piriciti, te neko jo apol meicel i akinagi; ame mannono te miyogi riŋo oko i nyime. Cen arac ame oya i baŋ Rwot te dok dwogo i kom Caulo, i kare ame en onwoŋo obedo i ode, kun omako toŋŋere i ciŋe, Daudi onwoŋo tye agoyo naŋa. Caulo dok te bedo i tam me cobo Daudi i toŋŋere diyo i kor apama, cite Daudi te ŋeyo gin ame en atamo oko, omio Caulo te cobo kor apama nono. Daudi te riŋo rwenyo oko i nyime. I dyeworrono Caulo te cwayo okwena me wot kuro Daudi i ode, me ebin enek oko odiko. Cite Mikal dako a Daudi te titte ni, “Ka ce yin mom igwoko kwo meri dyewor atin-ni, diki obino neki oko.” Mikal te cwayo Daudi i waŋ dirica, Daudi te riŋo rwenyo oko. Mikal te kwanyo cal Obaŋa ame opao apaa, te pyelo i wi tanda a Daudi, te keto aten wic me yer dyegi, teno kede wie, ame te wumo oko kede boŋo. I kare ame Caulo ocwao kwena me omo Daudi, Mikal te kobbigi ni, “Kome lit.” Caulo dok te cwayo okwena me omo Daudi, kun cikogi ni, “Wot itiŋe wunu kede itanda mere ikele wunu baŋa kan, me aneke oko.” I kare ame okwena obino, gin onwoŋo ni cal ame opao apaa en ame tye i wi tanda kun aten wic me yer dyegi en ame oketo i ka wie, Caulo te penyo Mikal ni, “Piŋo kara ibwola kit man, ite weko akwora wot, rwenyo oko?” Mikal te dokki Caulo ni, “En okoba ni, ‘Weka awoti, me kur aneki.’ ” Daudi oriŋo te bwot oko kittono, en owoto baŋ Camwiri i Rama, te titte ginnoro luŋ ame Caulo otimo i kome. Eka en Daudi kede Camwiri ote wot bedo i Nayot. Jo te titti Caulo ni, “Daudi tye i Nayot i Rama.” Caulo dok te cwayo kwena me wot omo Daudi, cite gin te neno lwak odwarpiny ame tye arabo kop Obaŋa kun Camwiri en ame onwoŋo tye acalo atelgi, cuny Obaŋa rik te bino daŋ i kom okwena a Caulo, gin daŋ te cako rabo kop Obaŋa acalo odwarpiny. Kare ame otitti Caulo kop man, en dok te cwayo okwena ocele; gin daŋ ote cako rabo kop Obaŋa acalo odwarpiny. Caulo dok te cwayo okwena tyeŋ me adekkere; gin daŋ dok te cako rabo kop Obaŋa acalo odwarpiny. Icennere, en ikome doŋ te wot, i Rama, te tuno i twon akoŋŋoro atut meicel, ame tye i Ceku, te penyo ni, “Camwiri kede Daudi tye kwene?” Ŋattoro te kobbe ni, “Gin tye i Nayot i Rama.” En te ya i kuno, te wot naka i Nayot i Rama; cuny Obaŋa daŋ rik te bino i kome, en te cako rabo kop acalo adwarpiny kun woto, naka en otuno kede i Nayot i Rama. En daŋ te gonyo boŋo mere oko i kome, te doŋ cako rabo kop Obaŋa acalo adwarpiny i nyim Camwiri, te buto onoro i nino-nono luŋ kede dyewor daŋ. En omio jo okobo ni, “Caulo daŋ tye i akina odwarpiny bo?” Daudi rik te riŋo oko i Nayot i Rama, te bino kobbi Yonacan ni, “An kara atimo gin aŋo? Gin aŋo ce ame aroco iye? Dok gin aŋo ame abalo i nyim pappi, ame omio en mito neka?” Yonacan te kobbe ni, “Mom gire twero timere. Yin gire mom ibino to. Nen ba, pappa mom timo ginnoro kadi acel a mom oko ba, kadi dwoŋ onyo tidi moro, kara ŋo omio pappa dok omuŋŋa kop man? Mom gire tye amannono.” Daudi te kobbe ni, “Pappi ŋeo aber ni an doŋ ayomoro cunyi oko; mannono omio en tamo ni, ‘Myero Yonacan kur ŋe kop man, naka mio cunye bino waŋ.’ Ento kop me ateni, kite a Rwot tye kwo-ni, dok yin daŋ itye kwo-ni, akina an kede to doŋ odoŋ aduno moro keken.” Yonacan te kobbi Daudi ni, “Ginnoro luŋ ame yin ibino kobba, an abino timo piri.” Daudi te kobbi Yonacan ni, “Nen ba, diki dwe bino por, doŋ bedo i ŋet abaka i dog cam myero kur loa; cite myero koŋ awot apon i bar naka tuno i nino me adekkere otyeno. Ka ce pappi openya, yin ibino kobbe ni, ‘Daudi okwaa atek ni myero koŋ ewot i pacogi i Beterekem; pien kare me yalo Obaŋa i mot aŋola ame doggolagi timo mwaka i mwaka bino bedo kuno.’ Ka ce en bino gamo ni, ‘Ber gire’, an abino bedo ame cunya okwe; cite ka ineno ni akemo omako, ibino ŋeyo ni en doŋ otyeko moko oko i cunye me timo gin arac. Doŋ pi mannono ba, myero itera aber, pien yin doŋ ityeko cikere keda i nyiŋ Rwot. Cite ka ce tye balloro ame ati mo, yin ikomi myero ineka. Kara piŋo omio yin dok itera baŋ pappi?” Yonacan te kobo ni, “Ginnoro gire mom twero timere i komi! Kono onwoŋo rik an aŋeo ni pappa otyeko moko tammere me timo gin arac i komi, kono rik mom akobbi?” Daudi te kobbi Yonacan ni, “Ŋa ame bino miya aŋeo ka pappi odokki kop agwa?” Yonacan te kobo ni, “Koŋ ibiye owot i bar kuca.” Gin aryo luŋ ote wot i bar. Yonacan te kobbi Daudi ni, “Rwot Obaŋa me Icrael myero bed caden! Nen ba, diki i kodi caa-ni onyo i nino me adekkere, ka doŋ atyeko ŋeyo tam a pappa, abino cwayo kop amii iŋeo ka ce tammere tye aber i komi. Ento ka aniaŋ ni pappa mito timi rac, ce mom amii iŋeo, mom acwai iwoto i kuc, Rwot myero doŋ otima kittono onyo ame kato mannono oko. Rwot obed kedi kite ame yam obedo i pappa. Ka ce pwod akwo, myero inyut mar a Rwot a mom lokere i koma. Mar meri kom jo me oda myero kur cot kadi acel, ento obed nakanaka, i kare ame Rwot bino jwero okwor a Daudi oko i lobo, myero kur mi nyiŋ Yonacan rweny oko i ot a Daudi.” Yonacan te miyo Daudi kwon tyeŋ me aryo i kite ame en omare kede; pien en onwoŋo rik mare atek kite ame en marre kede kene. Yonacan te kobbe ni, “Diki dwe apor, pappa bino penyo jo piri, pien kommi bino doŋ nono. Aco i nino me adekkere, en bino penyo jo piri atek meicel; yin wot ibed i kabedo ame rik ipono iye i kare ame olaro kop man; wot ibed kuno i ŋet gweŋe ame ocoko karacel ca. An abino bayo atero i ŋete kuno tyen adek bala ŋat ame acelo ginnoro. I ŋe mannono an abino cwayo atiŋ awobi kun akobbe ni, ‘Wot iyeny atero’, ka ce iwinyo akobbi awobi-nono ni, ‘Neno atero tye i ŋeti tuŋŋi, kwanyi’, yin myero ibin, pien kite a Rwot tye kwo-ni, nwoŋo ginnoro arac mom bino timere i komi. Cite ka iwinyo akobo ni, ‘Neno atero tye i nyimi kuca’, yin myero iwot oko, pien nwoŋo Rwot doŋ otyeko cwayi ni iwot tene. Aco i kom kop luŋ ame wan doŋ otyeko kobo kedi, Rwot gire tye i akinawa nakanaka.” Daudi rik daŋ te pono i bar, i kare ame dwe doŋ opor oko, abaka obedo i dog cam, Abaka obedo i kommere kite ame en onwoŋo bedo kede kare ducu, i kom ame ceggi apama; Yonacan te bedo i nyime, kun Abuneri obedo i ŋet abaka, ento kabedo a Daudi te doŋ nono. Caulo gire mom te kobo ginnoro i nino-nono, pien en onwoŋo tye atamo ni, “Ginnoro myero timere i kom Daudi, en gire mom cil, ateteni, en gire mom cil.” Cite i nino me aryo mere, ame en nino ame lubo nino ame dwe opor iye, kabedo a Daudi dok te doŋ nono. Caulo te penyo wode Yonacan ni, “Piŋo kara wot a Yece mom obino i ka cam a woro kede tin?” Yonacan te gamo ni, “Daudi okwa atek meicel ni myero koŋ ewot turgi i Beterekem. En okobo ni, ‘Myero koŋ awoti, pien jo me odwa bino yalo Obaŋa i mot aŋola turwa kuno, doŋ omegona ociko ni myero an daŋ abed tye kuno. Doŋ ka an ayomoro cunyi, myero iyeya awoti, me awot anen omegona.’ Mannono en gin omio en mom obino me bino cam karacel abaka.” Akemo te mako Caulo meicel i kom Yonacan, te kobbe ni, “Yin ibed atin a dako ame wie rac, dako ame ajem. An mom doŋ atyeko ŋeyo ni yin doŋ iyero wot a Yece me kela lewic i komi keni kede i kom totti? Pien ka ce wot a Yece pwod tye kwo i lobo, yin karacel kede locci mom bino moko kadi acel. Pi mannono, yin myero icwal dano wot kele baŋa kan, pien en gire myero to oko.” Yonacan te kobbi pappere Caulo ni, “Ŋo kara ame omio aneke? Gin aŋo ame en otimo?” Caulo te baye kede toŋ kun mito ni ecobe oko; mannono te miyo Yonacan ŋeyo ni pappere doŋ otyeko moko tammere me neko Daudi oko, Yonacan te ya oko i dog cam kun okudo twon akemo agwa meicel, en mom te camo cammoro i nino me aryo me dwe-nono, pien pappere omie lewic. Orwo mere, Yonacan te wot i bar kan ame onwoŋo en rik ocikere gin kede Daudi iye, kun woto karacel kede atin awobi. En te kobbi awo bi mere ni, “Riŋ iwot ikwany atero ame abayoni.” Kare ame awobi oŋweco, en te bayo atero i nyime, kare ame awobi otuno kan ame Yonacan onwoŋo obao iye atero, Yonacan olwoŋo awobi te kobbe ni, “Atero gire tye i nyimi kuno.” Yonacan dok te lwoŋo awobi kobbe ni, “Ru wot, buny abunya, kur igal ba.” Awobi a Yonacan te puto atero dwogo kede baŋ adwoŋŋere. Cite awobinono mom oŋeo ginnoro kadi acel; Yonacan kede Daudi keken en ame oŋeo kopgi-nono, Yonacan te miyo jami mere baŋ awobi, te kobbe ni, “Dwokgi doŋ paco.” Kare ame awobi doŋ owoto oko, Daudi te ru wotte i ŋet gweŋ ame onwoŋo ocoko karacel, te ryebere piny tyen adek; gin te motte kun onoto lemgi kengi kengi, gin luŋ ote mwoco koko oko, tuno ka Daudi doŋ oliŋ kene. Yonacan te kobbi Daudi ni, “Wot giri kede kuc, pien wan aryo ducu onwoŋo okwoŋo i nyiŋ Rwot kun okobo ni, ‘Rwot bino bedo i akinawa wan kedi, kede i akina ikwaa kede ikwai nakanka’.” Daudi te ya wot, Yonacan te dok i boma. Daudi te wot tuno i Nob, baŋ Akimereki alamdog; Akimereki te bino me jolo Daudi kun kome amyel amyela, eka te penye ni, “Piŋo kara itye keni aboŋo ŋattoro?” Daudi te kobbi Akimeleki alamdog ni, “Tye kop ame abaka ocika iye kun kobba ni, ‘Myero ŋattoro kur ŋe kop ame acwayi iye-ni kede kop ame atyeko ciki iye.’ An atyeko cikere me rwatte kede awobe kannonyo. Kara aman ŋo ame tye i ciŋi i caa-ni? Mia ogati abic onyo ginnoro keken ame tye kan.” Alamdog te kobbi Daudi ni, “Ogati me nino ducu-ni, mom tye moro ame odoŋ i ciŋa i caa-ni, ogati acil keken en ame tye; ka ce awo benono mom obuto i mon.” Daudi te kobo ni, “Me ateni, mon kare ducu pokere kedwa oko ka ce wan owot kannoro; awobe gwoko komgi bedo acil, kadi bed wan otye i wot me kare ducu; kara mom tin doŋ komgi myero bed acil meicel?” Mannono te miyo alamdog miye ogati acil; pien ogati moro ocele onwoŋo mom tye kuno, kono ka ogati me aketa i nyim Obaŋa keken, en ame didik okwanyo i nyim Rwot, me ote leyo kakare i en alyettere i nino ame okwanyo iye-nono. Dano moro onwoŋo tye kuno i nino-nono, ame en dano acel i akina omiro a Caulo, ame cikgi me kwer pwod diye me bedo i nyim Rwot; nyiŋe onwoŋo Doeg, ame en dano me Edom, adwoŋ ame loo okwat a Caulo. Daudi dok te kobbi Akimeleki ni, “Toŋŋoro onyo pala moro mom tye baŋi kan? Pien an mom akelo pala romona, naka jami me lwennya luŋ, pien tic abaka onwoŋo mitte me oyot.” Alamdog te kobo ni, “Pala romo a Goliac, ame obedo dano me Piriciti a rik inek i luŋ me Ela ca, tye kan kun oboo kome oko kede bono, oketo i ne epod. En ennu, ka imito tero, teri; pien moro ocele doŋ mom, mannono keken en ame tye baŋa kan.” Daudi dok te kobo ni, “Moro acalli mannono doŋ mom tye; aco mia.” Daudi te ya i nino-nono, te lwi wot oko i baŋ Caulo, te wot baŋ Akic, rwot me Gat. Omiro Akic te kobbe ni, “Man mom Daudi ame obedo abaka me lobo-ni? Yam mom owere kun oleo werrere alea, omyelo kede ni, ‘Caulo neko mere jo tutumia, aco Daudi oneko mere jo tutumia apar.’ ” Daudi rik te kano kopgi-nono i cunye, eka te bedo i twon lworo adwoŋ meicel i kom Akic abaka me Gat. Lworo te miye loko kite mere oko i nyimgi, te doko ababaŋ acalo apoa i ciŋgi, te bedo cicio kika me dogcel, kun lao doge tye amol i tike. Akic te kobbi omiro mere ni, “Koŋ inen wunu ba, wun ityeko neno wunu ni dano man gire opo oko; kara omio dok ikele wunu baŋa kono? Pien jo opo mom baŋa bo, en omio wun ikelo wunu man ni bin nyut apoa mere i nyima? En dano-ni daŋ bino donyo naka i oda?” Daudi te ya oko i kuno, te lwi wot i gorogoro me Abullam. Kare ame omego mere kede jo luŋ me ot a pappere owinyo, gin owoto baŋe kuno, karacel kede jo luŋ ame onwoŋo rik can orido, jo ame onwoŋo tye kede bannyi, kede jo luŋ ame onwoŋo rik tye kede cwercuny, gin luŋ ocokere baŋe; en te doko atel wigi. Co ame rik onwoŋo tye baŋe buco romo mia aŋwen. Daudi te ya i kuno wot i Mijipe me Moab. En te wot kobbi abaka me Moab ni, “Tim ber iye pappa kede totta bed baŋi tuno ka abino ŋeyo ŋo ame Obaŋa bino timo pira.” En te weko pappere kede tottere baŋ abaka me Moab, gin rik te bedo baŋe pi kare luŋ ame Daudi obedo i ka-pono mere i akina kiddi. Adwarpiny Gad rik te kobbi Daudi ni, “Kur ibed kan ame ipono iye-nono, ya oko me iwot i lobo me Juda.” Mannono te miyo Daudi wot i buŋ me Keret. I kare-nono Caulo te winyo ni onwoŋo Daudi karacel kede jo ame tye baŋe. Caulo onwoŋo tye obedo i te yat Gibea, i kabedo ame otiŋere malo, kun omako toŋŋere i ciŋe, kun omiro mere luŋ tye ocuŋ i laŋete. Caulo te kobbi omiro mere ame onwoŋo tye Ocuŋ i laŋete-nono ni, “Wun jo me Benjamin, koŋ iwiny wunu ba koppa, wun itamo wunu ni wot a Yece bino miyo ŋat acel acel i akinawu potti kede poto olok? En bino miyo wun luŋ idoko wunu otel a jo tutumia kede otel a jo mia, en omio wun luŋ iporo wunu kop i komani? Mom tye ŋattoro i akinawu ame otucca ni woda otyeko cikere kede wot a Yece. Dok mom daŋ tye ŋattoro i akinawu ame cunye waŋ pira, onyo ame otucca ni woda otyeko tugo omirona me timo ginnoro arac i koma, ni myero gin liba, kite ame tye ka timere kede i kare-ni.” Eka Doeg, dano me Edom ame onwoŋo tye ocuŋ i ŋet omiro mere, te dokke iye ni, “An rik aneno wot a Yece ka bino i Nob, baŋ Akimeleki wot Akitub, Akimeleki rik te penyo Rwot pire, te miye cam, dok te miye daŋ pala romo a Goliac, ame obedo dano me Piriciti.” Abaka rik te cwayo dano wot lwoŋo Akimeleki, alamdog, wot Akitub karacel kede jo me ot a pappere luŋ, ame gin olamdog me Nob. Gin luŋ rik daŋ ote bino baŋ Caulo. Caulo te kobo ni, “Yin wot Akitub, koŋ iwiny ba.” Akimeleki te gamo ni, “An ene, adwoŋŋa.” Caulo te penye ni, “Piŋo kara iporo wunu kop i koma, yin karacel kede wot a Yece, eka ite miye daŋ cam kede pala me romo, ite daŋ penyo-gu Rwot pire, ame omio en doŋ obino me lweny i koma, tye ka liba, kite ame tye ka timere kede i kare-ni?” Akimeleki te gamo ni, “Adwoŋ, ŋa kara i akina omironi ame agen calo Daudi, cwar nyaka abaka, dok atel wi jo me gwoko kwoni, ame en dano me awora i odi? Man tin tyen me agege an me penyo Obaŋa pire bo? Pe gire amannono Abaka myero kur bed i tammoro iye i koma onyo i kom jo luŋ me ot a pappa; pien an gira mom aŋeo kopporo kadi acel i kom kop man,” Abaka te kobo ni, “Ateteni, yin Akimeleki ibino to, karacel kede jo me ot a pappi luŋ.” Abaka te ciko jo ame gwoke, ame onwoŋo tye ocuŋ i laŋete ni, “Lokere inek wunu olamdog a Rwot oko; pien gin oribere i Daudi. Gin onwoŋo ŋeo ni Daudi doŋ olwi oko, cite gin mom otucca.” Ento omiro abaka mom te ryeyo ciŋgi me neko olamdog a Rwot. Caulo te kobbi Doeg ni, “Yin lokere i kom olamdog inekgi oko.” Doeg ame obedo dano me Edom, te lokere i kom olamdog, nekogi oko; ka ame Caulo oneko i nino-nono oromo pyeraboro wie abic, ame gin luŋ onwoŋo oruko epod me camanini. Boma olamdog ame onwoŋo tye i Nob, en te neko jo iye luŋ i pala lweny; co kede mon, jo atino kede en a pwod dottege, twoni, kane, kede romi, onekogi luŋ i pala lweny. Ento dano acel i akina awobe Akimeleki wot Akitub, ame nyiŋe Abiatar, rik te lwi lubo yo Daudi, En te wot kobbi Daudi ni, “Caulo otyeko neko olamdog a Rwot oko.” Daudi te kobbi Abiatar ni, “An rik onwoŋo aŋeo oko i i nino-naca, i kare ame aneno Doeg ame obedo dano me Edom tye kuno, aniaŋ oko ni bino titti Caulo. An en ame akelo to man i kom jo me doggola a kwarowu, Doŋ yin myero ibed keda kan, kur ilwor; pien ŋat ame mito neka nwoŋo daŋ mito neki; ka ibedo baŋa kan ibino bedo aber.” I kare-nono rik ote kelo kop baŋ Daudi ni, “Neno jo Piriciti tye alweny i kom jo Keila, gin otye oyako kal i laro.” Daudi te penyo Rwot ni, “Awot alweny i kom jo Piriciti?” Rwot te kobbi Daudi ni, “Wot ilweny i kom jo Piriciti, ilar jo Keila.” Ento jo a Daudi te kobbe ni, “Nen ba, wan otye kede lworo i Juda kan; mom twero bedo rac meicel ka owoto me wot lweny i kom jo Piriciti i Keila?” Daudi dok te medo penyo Rwot tyen me aryo. Rwot te kobbe ni, “Ya iwot naka i Keila, pien abino miyo jo Piriciti i Ciŋi.” Daudi kede jo mere te wot i Keila. Gin te wot lweny i jo Piriciti, ote neko jo meicel, ote mayo dokgi dwogo kede. Daudi rik te laro jo ame bedo i Keila kittono. I kare ame Abiatar wot Akimeleki oriŋo baŋ Daudi i Keila, en obino kede epod i ciŋe, Kare ame Caulo owinyo ni Daudi tye i Keila, en okobo ni, “Obaŋa doŋ omie i ciŋa; pien en doŋ odonyo i boma ame tye kede aceg doge atek karacel kede arii mere kun daŋ ocelo oko atek.” Caulo te lwoŋo jo luŋ me lweny, me wot i Keila, owot ogur Daudi oko karacel kede jo mere. Daudi onwoŋo ŋeo ni Caulo tye ka piro kop arac i kome, omio en te kobo baŋ Abiatar alamdog ni, “Kel epod baŋa kan.” Daudi te cako kwayo Obaŋa ni, “Ama Rwot Obaŋa me Icrael, an atyeko winyo ni Caulo doŋ otyeko moko tammere me bino i Keila, me bino tyeko boma man oko pira. Jo me Keila bino miya i ciŋe? Caulo tye abino kan ateni kite ame awinyo kede nie? Ama Rwot Obaŋa me Icrael, tim ber imia aŋe.” Rwot te kobbi Daudi ni, “En tye abino ateni?” Daudi dok te penyo ni, “Jo me Keila bino miya i ciŋ Caulo karacel kede jona?” Rwot te gamo dog Daudi ni, “Gin bino miyi baŋe.” Man te miyo Daudi ya oko i Keila karacel kede jo mere ame buco romo mia abicel. Gin te wot kan ame oromo wot iye. Ote kobbi Caulo ni Daudi otyeko lwi oko i Keila, omio Caulo mom dok te wot kuno, Daudi te bedo pono i akina kiddi i kabedo apapat i tim, i lobo ame obedo kidikidi, i tim me Jip. Caulo te bedo yenye nino ducu, cite Obaŋa mom te miye i ciŋe. Daudi onwoŋo pwod tye kede lworo, pien Caulo doŋ obino oko me neke. I kare-nono Daudi onwoŋo tye i tim i Korec, i tim me Jip. Yonacan wot a Caulo te ya wot baŋ Daudi Korec, te wot jiŋo cunye i nyiŋ Obaŋa. Yonacan okobbe ni, “Kur ilwor, pien ciŋ pappa Caulo mom gire bino gudi. Yin ibino bedo abaka ame loo jo Icrael, an abino lubi; pappa Caulo doŋ ŋeo kop man.” Gin aryo luŋ ote dok cikere i nyim Rwot. Daudi te doŋ gire i Korec, Yonacan te dok paco. Jo me Jip rik te wot baŋ Caulo i Gibea, ote kobbe ni, “Daudi gire tye pono iyi akina kiddi mogo ame tye i Korec, i wi kidi me Keila, ame tye i ŋet Yecimon tutuŋ anyarolum. Kite ame itye kede mit me bino kuno-ni, cob mitti-nono, adwoŋ. Wan obino miyo Daudi ciŋi.” Caulo te kobo ni, “Rwot myero miwu winyo, pien kica omakowu i koma. Wot wunu, koŋ dok imed niaŋ wunu iye odoco. Wot iŋe wunu ka pono mere, dok daŋ inen wunu, kede ŋat ame onene kuno; pien otyeko kobba ni en ryek meicel. Doŋ pi mannono ba, wot ikie wunu, inen wunu ka-pono mere luŋ ame en pono iye, ite doŋ dwogo wunu baŋa i kop luŋ me ateni. An doŋ ate bino wot karacel kedwu; ka ce en onwoŋo tye i lobo-nono, abino yenye i kabedo luŋ i akina atekere luŋ ame tye i Juda.” Gin te ya wot i Jip kun otelo nyim Caulo. I kare-nono Daudi kede jo mere onwoŋo tye i tim me Maon, i luŋŋoro otwo, i ŋet Yecimon tutuŋ anyarolum. Caulo kede jo mere te wot me wot yenye. Daudi te winyo oko, en te wot oko piny i kidi, i tim me Maon. Kare ame Caulo owinyo, oryemo yo Daudi, tim me Maon. Caulo te manno ŋet kidi tuncel, kun Daudi kede jo mere manno ŋet kidi-nono i tuŋ ocele. Daudi onwoŋo tye acunyo wot oyotoyot me erweny gire oko i baŋ Caulo. I kare ame Caulo kede jo mere onwoŋo tye aguro Daudi kede jo mere me emakgi, dano moro te bino baŋ Caulo, te kobbe ni, “Ru bino oyot, pien jo Piriciti doŋ tye ocako yako lobowa oko.” Caulo te dok oko cen i ryemo yo Daudi, te wot lweny i kom jo Piriciti; mannono te miyo jo cako nyiŋ kabedonono ni, kidi me pokere. Daudi te doŋ ya oko i kuno, te wot pono i kidi me En-gedi. Kare ame Caulo doŋ odwogo oko i ryemo yo jo Piriciti, otitte ni, “Daudi tye i tim me En-gedi.” Caulo te yero jo tutumia adek i akina jo me Icrael luŋ, te wot kedgi me wot yenyo Daudi karacel kede jo mere i nyim Kidi me dyegi tim. Caulo rik te tuno kan ame onwoŋo tye iye gorogoro kun anok rommi tye i ŋet yo. En te wot donyo i gorogoro-nono me wot konyere kun Daudi karacel kede jo mere daŋ onwoŋo tye i tyelo iyie kuno. Jo a Daudi te kobbi Daudi ni, “Tin en nino ame rik Rwot okobo pire baŋi ni, ‘Nen ba, abino miyo akworri i ciŋi, ibino time kite ame yin ineno ni ber baŋi.’ ” Daudi te ya malo, te libere wot ŋolo lak jor a Caulo. Icennere cuny Daudi te cwer atek pi ŋolo lak jor a Caulo. Daudi te ko bo baŋ jo mere ni, “Rwot mom ye ni atim kodi tim man i kom adwoŋŋa, ame Rwot oyero me bedo abaka, me ryeyo ciŋa i kome, kun en obedo ŋat a Rwot oyero.” Daudi te juko jo mere kun kobbigi kittono, mom te yegi cako lweny i kom Caulo. Caulo te ya i gorogoro, te wot gire oko. I ŋe ennono, Daudi daŋ te ya i gorogoro, kato oko, te lwoŋo Caulo ni, “Adwoŋŋa, abaka wee!” Kare ame Caulo obolo waŋe i ŋee, Daudi oryebere piny, owore. Daudi te kobbi Caulo ni, “Piŋo kara ibedo winyo kop a jo ame kobo ni, ‘Neno Daudi yenyi me timi rac?’ Tin doŋ yin ineno kite ame Rwot onwoŋo omii kede i ciŋa i gorogoro; jo mogo okobo ni aneki oko, cite an ate weki mom aneki. An akobo ni, ‘An gira mom abino ryeyo ciŋa i kom adwoŋŋa, pien en obedo dano ame Rwot oyero.’ Koŋ inen ba, pappa, nen lak jori i ciŋa. Kite ame aŋolo kede lak jori, cite mom ate neki, myero doŋ iŋe dok daŋ inen ni an mom atye kede tammoro arac i komi i cunya. An gira mom abalo ginnoro baŋi, kadi bed yin imito neka. Rwot myero ŋol kop i kin an kede yin, Rwot myero ocul kwora i komi, cite an gira ciŋa mom bino gudo komi. Kite acalo carakop a jo acon kobo kede ni, ‘Gin arac ya i baŋ jo areco’; cite an gira ciŋa mom bino gudo komi. Kara abaka me Icrael tye ayenyo ŋa ba? Kara iryemo yo ŋa? Iryemo yo gwok oto bo onyo me a kiridep? Pi mannono, Rwot myero ŋol kop i kin an kede yin, onen, opid pira, olara i ciŋi.” Kare ame Daudi doŋ otyeko kobo kop magi luŋ baŋ Caulo, Caulo ogamo ni, “Man dwoni ene, woda Daudi?” Caulo te mwoco koko oko. Eka te kobbi Daudi ni, “Yin kiteni atira kata oko; nen yin idwoko aber baŋa, aco kun an adwoko arac baŋi. Tin yin doŋ inyuto kannaler kite ame ibedo tima kede ber kun mom ineka i kare ame Rwot omia kede i ciŋi. Pien dano ka onwoŋo akworrere, twero weko en woto aboŋo timo ginnoro i kome ateni? Pi mannono, Rwot myero gire oculli kede gin aber, pi gin ame itimo i koma tin. Aman doŋ aniaŋ ni yin ibino bedo abaka, dok loc a jo Icrael bino moko atek i kare me locci. Doŋ pi mannono ba, yin myero ikwoŋ baŋa i nyiŋ Rwot ni mom ibino tyeko ikwaena ame bino luba, dok daŋ ni mom ibino jwayo nyiŋa oko i ot a pappa.” Daudi daŋ rik te kwoŋ kittono daŋ Caulo. Caulo doŋ te lokere dok paco, Daudi kede jo mere te dok gigi i ka-ponogi i kidi. Camwiri rik te to oko, jo Icrael luŋ te cokere kumo pire, ote yike i ode i Rama. Daudi dok te ya wot i tim me Paran. Lo moro rik onwoŋo tye i Maon kuno, ame onwoŋo tye kede ticcere i Karmel. Dano-nono onwoŋo rik olony atek; onwoŋo tye kede rommi tutumia adek kede dyegi tutumia acel. En rik bedo mworo yer rommi mere i Karmel. Nyiŋ dano-nono rik Nabal, eka nyiŋ cege te bedo Abigail. Dako mere-nono rik ryek atek, dok daŋ mwonya meicel, aco cware onwoŋo ger, kun kwo mere daŋ rac; en onwoŋo obedo dano me doggola a jo Kaleb. Daudi rik te winyo ni Nabal tye amworo yer rommi mere. Daudi te cwayo awobe apar baŋe kun cikogi ni, “Wot wunu i Karmel, iwot wunu baŋ Nabal, iwot ikobbe wunu ni, an amote. Ibino moto wunu dyera-nono ni, ‘Kuc obed i komi dyera, kuc obed i kom odi, kuc obed i kom joni luŋ. Awinyo ni itye kede jo ame mworo yer rommi. I kare-ni okwatti yam onwoŋo tye baŋwa, wan giwa mom otimo ginnnoro arac i komgi, ginnoro daŋ mom oremogi i kare luŋ ame gin obedo i Karmel. Yin koŋ ipeny awobeni, gin bino titti. Doŋ pi mannono ba, awobena myero nwoŋ winyo i nyimi, pien gin obino i nino me ecuban. Tim ber imi gin ame it ye kede baŋ omironi kede baŋ atinni Daudi’.” I kare ame awobe a Daudi otuno kuno, gin okobo kop magi luŋ baŋ Nabal i nyiŋ Daudi, gin te liŋ kuro koppere. Nabal te kobbi omiro a Daudi ni, “Daudi kara en ŋannono ba? Wot a Yece kono obedo ŋannono? I kare man tye omiro apol meicel ame tye ka ya tetek i baŋ odonegi, Myero en akwany ogati kede pii kede riŋo ame aneko pi omwor yer rommina, eka ate miyo baŋ jo ame mom aŋeo kan ame gin oya iye?” Awobe a Daudi te lokere dok oko cen, ote wot titti Daudi kop man ducu. Daudi te kobbi jo mere ni, “Ŋat acel acel omyero twe pala mere i pyere.” Daudi daŋ te tweyo pala mere i pyere, eka jo ame romo mia aŋwen te lubo yo Daudi kun jo mia aryo doŋ kuro jamigi. Ento ŋat acel i akina awobe okobbi Abigail dako a Nabal ni, “Nen ba, Daudi onwoŋo ooro okwena i tim me bino moto adwoŋwa, ento en te da i wigi. Aco jo-naca rik otimowa ber meicel, omio wan mom obedo kede peko moro, ginnoro daŋ rik mom orwenyo i baŋwa, i kare ame onwoŋo wan otye i bar, i kare luŋ ame wan obedo wot kedgi. Gin rik obedo celwa dyewor kede dyeceŋ, i kare luŋ ame wan obedo kedgi kun okwao rommi. Doŋ pi mannono ba, yin myero iŋe kop man, itam gin a myero i tim iye, pien Daudi doŋ omoko tammere me timo gin arac i kom adwoŋwa kede i kom jo me ode luŋ, pien en kwo mere mom ber, ame dano moro mom twero kop kede.” Abigail te ru kwanyo ogati mia aryo kede opoko koŋo olok aryo, kede riŋo rommi abic ame doŋ otedo oko, kede bel ame ocelo ame romo dita abic, kede etak olok otwo ame romo mia acel kede aŋina oduro ame romo mia aryo, te cano jami-nono luŋ i wi kane, Abigail te kobbi awobe mere ni, “Wun tel wunu yo, an abino lubowu icen.” Cite en mom okobbi cware Nabal. I kare ame en oyito i wi i kana mere te wot, en otuno kaa ame yo ogogona iye kun beo i te kidi. Daudi daŋ onwoŋo tye abino i nyime kede jo mere; Abigail te rwatte kedgi. Daudi te kobo ni, “Ateni, an kom ate gwoko jami a dano mannono i tim, kun daŋ moro i akinagi mom orwenyo, cite en te culla i rac pi gin aber. Obaŋa myero otima kittono onyo akato mannono oko, ka ce diki odiko aweko ico moro acel odoŋ i kom jo luŋ ame tye baŋe.” A doŋ Abigail oneno Daudi, en te ru pye oko piny i wi kana mere, te ryebere piny i nyim Daudi kun kulo wie piny. Oryebere piny i ka tyene, te kobo ni, “Adwoŋŋa, wek bal man obed i wia an kena; tim ber iye aŋecani kob kedi kun iwinyo koppere. Adwoŋŋa, myero cunyi kur bed i parroro i kom Nabal ame obedo dano ame kwo mere mom ber ca; pien kite ame nyiŋe tye kede, en daŋ tye amannono. Nyiŋe Nabal, miŋo doŋ buto baŋe. An rik mom aneno awobe ame yin icwalo. Doŋ ba, adwoŋŋa, kite a Rwot tye kede kwo-ni, dok yin daŋ itye kwo-ni, kite acalo ineno ni Rwot ogeni me mom bedo kede roccoro me onyo remo, iwek culo kworri i ciŋi yin ikomi; myero okworri kede jo luŋ ame mito timo gin arac i komi obed calo Nabal. Aman doŋ myero igam mot ame an aŋecani akeli, me wek mi baŋ awo beni. Tim ber itima kica i kom balla, pien Rwot bino miyi ot atek ateteni, pien yin it ye ka romo i lweny a Rwot; balloro gire mom obino nwoŋo i komi i kare me kwoni luŋ. Ka ce jo obino me lubo yori kun omito neki, kwoni gire obino kano oko karacel i kwo a jo akwo kun Rwot Obaŋani en agwoko; aco kwo okworri, Obaŋa bino bayo oko kannabor kite ame obao kede atindio. Ka Rwot otyeko timo ginnoro luŋ aber i komi kite ame en rik okobo i komi dok daŋ doŋ otyeko keti me bedo aloc ame loo jo Icrael, mom dok tye ginnoro ame bino kelli cwercuny, akadi peko me tam arac me onyo remo aboŋo te kop onyo culo kworri yin i komi. Adwoŋŋa, ka Rwot doŋ otyeko timi ber, myero ipo pira.” Daudi te gamo dog Abigail ni, “Myero pwo Rwot Obaŋa me Icrael ame ocwali me rwatte keda tin. Myero pwo Rwot pi ryekoni, gum obed i komi, pien tin yin igwoka me kur abed kede roccoro me onyo remo kede culo kwor an i koma kun aculo kwor an i koma. Ateteni, kite acalo Rwot Obaŋa me Icrael tye kwo-ni, ame ogena timo gin arac, ame kono onwoŋo yin mom iru yutte bino rwatte keda, kono diki odiko ico moro acel keken mom odoŋ baŋ Nabal.” Daudi doŋ te gamo jami ame onwoŋo Abigail okelo baŋe, eka te kobbe ni, “Wot giri tuŋi kede kuc; nen ba, an doŋ atyeko winyo koppi, aye kwacci.” Abigail te bino baŋ Nabal; nen ba, Nabal onwoŋo tye acamo arama i ode, arama ame calo me abaka. Cuny Nabal onwoŋo yom meicel, pien onwoŋo omer atek; mannono te miyo Abigail mom te kobbe ginnoro tuno naka odiko. Odiko ame koŋo doŋ oket oko i wi Nabal, dako mere te doŋ titte koppono luŋ, cuny ico te to inoŋ, te doko acalo kidi. I ŋe nino apar, Rwot te goyo Nabal neko oko. Kare ame Daudi owinyo ni Nabal doŋ otyeko to oko, en okobo ni, “Rwot myero pwo pi culo waŋ apala ame Nabal opala kede, dok daŋ ogena me mom timo balloro. Rwot doŋ odwoko gin arac ame Nabal otimo i wie kene. Daudi te cwayo okwena me wot yamo Abigail, me dok dako mere.” Kare ame omiro a Daudi obino i Karmel baŋ Abigail, gin okobbe ni, “Daudi oorowa baŋi, ni myero oteri baŋe, me iwot ibed dako mere.” En oya malo te ryebere piny, te kobo ni, “Nen ba, an aŋecani, an alwok tyen omiro adwoŋŋa ducu.” Abigail te ru ya oko, te yito i wi kana mere cako wot kun aŋeca mere abic daŋ woto karacel kede; en te lubo yo okwena a Daudi, te doko dako a Daudi. Daudi te nyomo daŋ Akinoam me Jejreel, gin aryo luŋ ote doko monne. Caulo onwoŋo doŋ otyeko miyo nyare Mikal baŋ Paloti wot a Laic, dano me Galliam; nyare ame rik koŋ obedo dako a Daudi. Jo me Jip rik te bino baŋ Caulo, ote kobbe ni, “Daudi tye opono i wi kidi me Kakila, ame tye i ŋet Yecimon tutuŋ kide.” Mannono te miyo Caulo ya wot i tim me Jip karacel kede jo me Icrael ame oyero tutumia adek, me wot yenyo Daudi. Caulo rik te wot guro gonnyere i wi kidi me Kakila ame tye i ŋet yo tuŋ kide me Yecimon; ento Daudi gire te medde i bedo mere i tim, Daudi te cwayo orot, gin te niaŋ ni Caulo onwoŋo obino ateni. Daudi te ya bino kan ame Caulo oguro iye gonnyere, te neno kan ame Caulo onwoŋo obuto iye gin kede Abuneri wot a Neri, ame rik en atel mony a Caulo, Caulo onwoŋo rik tye obuto i dye gony kan ame ogeno, kun mony obuto ogure dyere. Daudi te penyo Akimereki dano me Kitti karacel kede Abicai ame obedo omin a Joab, wot a Jerua ni, “Ŋa ame bino wot keda naka i gony a Caulo?” Abicai te dok iye ni, “An abino wot kedi kuno.” Daudi te wot baŋ mony kuno dyewor gin kede Abicai. En te nwoŋo Caulo tye obuto onino oko i kabuto mere kun toŋŋere tye ogure piny tuŋ wie. Abuneri kede lwak onwoŋo tye obuto ogure dyere. Abicai te kobbi Daudi ni, “Tiŋ doŋ Obaŋa omio akworri oko i ciŋi; wek doŋ atuce i toŋ pelo naka i lobo tyen acel keken, mom dok abino nwoyo me aryo mere.” Ento Daudi te kobbi Abicai ni, “Kur ineke; pien ŋa kara ame twero ryeyo ciŋe me gudo ŋat ame Rwot oyero, eka balloro mom te bedo i kome?” Daudi te kobo ni, “Kite a Rwot tye kede kwo-ni, Rwot gire en ame bino goye, onyo nino mere me to bino tuno, onyo en bino wot ilweny, te wot to iye. Rwot mom ye ni ciŋa myero gud ŋat a Rwot oyero; ento yin myero iput toŋ ame tye tuŋ wie-nu, kwany daŋ opoko pii mere, me wan owot giwa.” Daudi te tero toŋ kede opoko pii ame onwoŋo tye tutuŋ wi Caulo, gin te wot gigi oko. Mom tye ŋattoro ame onenogi, akadi ŋeyo, ŋattoro daŋ mom omedo i co i waŋ nino; gin luŋ onwoŋo onino oko, pien Rwot onwoŋo omiogi onino atek meicel. Daudi rik te wot naka loka tuŋ ca, te wot nyedde tene i wi kidi, kun akinagi olagoro atek ateka. Daudi te redo kun lwoŋo mony kede Abuneri wot a Neri kun kobo ni, “Abuneri, yin mom igamo doga bo?” Abuneri te gamo ni, “Yin iŋa ame ilwoŋo abaka-ni?” Daudi te kobbi Abuneri ni, “Yin mom itwon ico? Ŋa kara dok ame rom kedi iyi Icrael? Kara ŋo ame dok ogeŋi gwoko adwoŋŋi abaka? Pien dano moro obino naka baŋwu kuno me neko abaka, ame obedo adwoŋŋi-nono. Kodi tim ame itimo-nono mom ber. Kite a Rwot tye kede kwe-ni, wun luŋ iporre wunu to oko, pien mom igwoko wunu adwoŋwu, ame Rwot oyero. Aco aman koŋ inen kan ame toŋ abaka kede opoko pii mere tye iye, ame onwoŋo tye tuŋ wie.” Caulo te niaŋ i dwon Daudi oko, te kobo ni, “Man dwoni ene, woda Daudi?” Daudi te dok iye ni, “Dwona ennono adwoŋŋa.” En te kobo ni, “Piŋo kara adwoŋŋa tye ka ryemo yora? Ŋo ce ame atimo ba? Ciŋa kara otimo bal aŋo? Aman doŋ ba, adwoŋŋa, myero iwiny koppa an amironi. Ka ce Rwot en ame otugo cuny me lweny i koma, myero doŋ eye gamo mot; aco ka ce jo en otimo, myero cen makgi oko i nyim Rwot, pien gin i kare man otyeko ryema oko ni an kur anwoŋ ginnoro i kom gin a Rwot poko, kun okobo ni, ‘Wot iwor obaŋe mo go ocele. Aman doŋ remona myero kur ony piny teŋe kannabor i Rwot; pien abaka me Icrael obino me neka calo ŋat ame dwaro atakara i wi kidi.’ ” Caulo te kobo ni, “An doŋ atimo bal, dwog doŋ, ama woda Daudi, pien mom dok abino timo ginnoro arac i komi, pien tin yin imio kwona obedo ginnoro me wel i nyimi; nen ba, an atimo tim me mino, arwenyo meicel.” Daudi te gamo ni “Toŋŋi ene, ama abaka! Mi ŋattoro acel i akina awobeni bin om. Rwot gire culo ŋat acel acel kun lubo kite mere atira ame genne; pien Rwot onwoŋo doŋ tin omii oko i ciŋa, cite an mom aye ryeyo ciŋa i kom ŋat a Rwot oyero. Nen ba, kite acalo kwoni obedo ginnoro me wei i nyima tin kwona myero daŋ bed me wei kittono i nyim Rwot, myero en lara i kom cannoro ducu.” Caulo dok te gamo dog Daudi ni, “Gum obed i komi, woda Daudi! Yin ibino tiyo jami apol kun daŋ icobogi kakare.” Daudi doŋ te wot oko, Caulo te lokere dok i kabedo mere. Daudi okobo i cunye ni, “Waŋŋoro ol apoto i ciŋ Caulo te neka oko; mom tye ginnoro ocele aber ame myero atim ame kato lwi wot bedo i lobo a jo Piriciti, me cuny Caulo doŋ ya oko i koma, kur dok medde yenya i lobo me Icrael, mannono bino miyo abwot i ciŋe.” Daudi te ya oko, te wot ŋolo waŋ lobo, en karacel kede jo mere mia abicel ame onwoŋo tye baŋe, gin te wot baŋ Akic wot a Maok, Rwot me Gat. Daudi karacel kede jo mere te bedo baŋ Akic i Gat, kun ŋat acel acel bedo i jo me ode; Daudi onwoŋo tye kede monne aryo, Akinoam me Jejreel, kede Abigail me Karmel, ame obedo dako a lyel Nabal. Kare ame otitti Caulo ni Daudi doŋ oriŋo oko i Gat, en mom dok omedde yenye. Daudi te kobbi Akic ni, “Ka ce ineno ni ayomoro cunyi, tim ber imia kannoro, i boma moro acel ame tye i loboni, me abed iye. Piŋo kara an amironi dok abedo i boma ame yin ibedo iye?” Mannono rik te miyo Akic miye Jiklag i nino-nono. Mannono omio cakere i kare-naca tuno i kare-ni Jiklag tye i ciŋ abaka me Juda. Daudi rik te bedo i lobo a jo Piriciti pi kare ame romo mwaka acel kede dwete aŋwen. I kare-nono Daudi kede jo mere te wot yako lobo a jo Gecur, jo Giriji kede me a jo Amalek, pien jo-ni en onwoŋo obedo wegi lobo-naca cakere con. Gin te wot tuno naka i Cur i waŋ lobo me Miciri. Daudi te neko jo me lobo-nono oko kun mom weko moro akwo, akadi ico onyo dako. En te tero rommi, twoni, kane, inaga kede ruk apol, te dok kede baŋ Akic. Kare ducu ka Akic openye ni, “Man jo mene ame iyako tin-ni?” Daudi gamo ni, “Ayako jo Negeb me Juda,” onyo ni, “Ayako Negeb ame obedo me a jo Jerameel,” onyo ni, “Ayako Negeb ame obedo me a jo Ken.” Daudi mom te weko lo moro onyo dako moro akwo i Gat, pien onwoŋo otamo ni, “Naka mio gin bino kobo kop i komwa, kun okobo ni, ‘Daudi otimo kit man.’ ” Mannono doŋ onwoŋo odoko kite pi kare luŋ ame en obedo kede i lobo a jo Piriciti, Akic te bedo geno Daudi kun tamo ni, “En doŋ omio jo turgi dage atek, mannono bino miyo en doŋ bedo amirona nakanaka.” I kare-nono jo Piriciti te coko monygi me wot lweny i kom jo Icrael. Akic te kobbi Daudi ni, “Myero iŋe ni yin karacel kede joni luŋ ibino wot karacel keda i mony.” Daudi te kobbi Akic ni, “Ber atek, yin ibino ŋeyo gin ame an amironi twero tiyo.” Akic dok te kobbi Daudi ni, “Ber atek, yin ibino bedo agwok kwona pi kare me kwoni luŋ.” Camwiri onwoŋo doŋ oto oko, jo Icrael luŋ te kumo pire, ote yike i Rama, ame obedo paco mere. Caulo onwoŋo doŋ otyeko ryemo ajoka luŋ i lobo mere. Jo Piriciti rik te cokere bino guro gonygi i Cunem; Caulo daŋ te coko jo Icrael luŋ, ote wot guro gonygi i Gilboa. Kare ame Caulo oneno mony a jo Piriciti, lworo te make oko, cunye te cako myel atek ateka. Kare ame Caulo openyo Rwot, Rwot mom odokke ginnoro, akadi i lek, onyo kede i Urim, onyo kede kop odwarpiny. Caulo te kobbi omiro mere ni, “Yenya wunu dako moro ame obedo ajoka, me awot baŋe, awot kon apenye.” Omiro mere te kobbe ni, “Nen ba, ajoka moro tye i En-dor.” Caulo te wot ruko boŋo mere apat, te wot kede jo mere aryo, kun doŋ olokere apat, Gin te tuno baŋ dako-naca dyewor. Caulo te kobbe ni, “Mi koŋ tiponi lwoŋa ŋat ame abino tucci nyiŋe.” Dako-nono te kobbe ni, “Yin iniaŋ aber gin ame Caulo otimo, kite ame en oryemo kede kit ajoka luŋ i lobo mere. Piŋo yin dok it ye ka ciko kwona kede kumma, me kella to?” Ento Caulo te kwoŋ baŋ dako-nono i nyiŋ Rwot kun kobo ni, “Kite a Rwot tye kwo-ni, cannoro mom bino poto i komi pi kop man.” Dako-nono te penye ni, “Kara ŋa ame imito ni alwoŋi?” En te gamo ni, “Lwoŋŋa Camwiri.” Kare ame dako oneno Camwiri, oredo i dwon aloŋo kun kobbi Caulo ni, “Piŋo kara ibwola? Yin kara ibedo Caulo.” Abaka Caulo te kobbe ni, “Kur ilwor; ineno no?” Dako-nono te kobbi Caulo ni, “Aneno obaŋa moro tye adonnyo i piny.” Caulo dok te penye ni, “Callere kono cal nadi?” En te gamo ni, “Dano moro oti tye abino kun adonnyo i piny ame owumere kedejor.” Caulo te ŋeyo ni Camwiri ennono; en te ryebere piny te wore. Camwiri te kobbi Caulo ni, “Piŋo kara ilola me dwoggo an dok oko?” Caulo te gamo ni, “Atye kede twon can adwoŋ meicel, pien jo Piriciti okelo mony me bino lweny i koma, Obaŋa daŋ oweka oko, pe doŋ dokka i kopporo kadi acel, kadi i kop odwarpiny onyo i lek. Mannono en gin omio alwoŋi me titta gin a myero atim.” Camwiri te kobbe ni, “Kara piŋo dok ipenya kun Rwot doŋ oweki oko, odoko doŋ akworri? Rwot doŋ otimo i komi gin ame rik en omio akobbi; Rwot doŋ otyeko yeco loc oko i ciŋi, omio oko baŋ awotti Daudi, Pien yin mom iwinyo kop a Rwot, mom imio akemo mere agwo ocobere i kom jo Amalek; mannono en omio Rwot tin otimo kop man i komi. Medo i mannono, Rwot bino miyo jo Icrael karacel kede yin i ciŋ jo Piriciti. Yin karacel kede awobeni, diki ibino bedo wunu baŋa; dok Rwot bino miyo mony a jo Icrael i ciŋ jo Piriciti.” Caulo te ru rette oko piny, te buto piny ilada, kun lworo ociro oko, pi kop ame Camwiri okobbe. I caa-nono teko moro onwoŋo doŋ mom i kome, pien en onwoŋo mom ocamo ginnoro dyeceŋ kede dyewor. Ajoka te bino baŋ Caulo, kare ame en oneno ni lworo omio kome oto oko, te kobbe ni, “Nen ba aŋecani awinyo koppi, ate keto kwona i ciŋa, ate winyo kop ame ikobo baŋa. Aman yin daŋ tim ber iwiny koppa, adwoŋ, me aket kwonnoro aduno i nyimi, me icam inwoŋ teko me wot iyo.” En te kwero oko kun kobo ni, “Mom abino cam.” Ento omiro mere karacel kede dako nono te diye atek; en te winyo doŋ kopgi. En doŋ te ya piny bedo i wi tanda. Dakonono onwoŋo rik tye kede roa ocwe atek i ot; en te ru neko oko oyotoyot, te juko moko, te rubo tedo kede ogati a tobi mom iye. En oketo i nyim Caulo karacel kede omiro mere, gin te camo. Gin te ya wot oko dyeworrono. Jo Piriciti te coko monygi karacel i Apek. Aco jo Icrael onwoŋo oguro gonygi i ŋet akoŋ me Jejreel. I kare ame rwode a jo Piriciti tye ka ciro kun owoto jo mia kede tutumia, Daudi kede jo mere onwoŋo ocoko tere karacel kede Akic. Otel mony a jo Piriciti te penyo ni, “Jo me Eburania-ni atimo kara ŋo kan?” Akic te dokki otel mony a jo Piriciti ni, “Man en Daudi amiro a Caulo abaka a jo Icrael, ame aman doŋ otyeko bedo baŋa kan pi kare alac. Cakere i kare ame en opoto iye i kora tuno naka atot tin, mom ru anwoŋo balloro baŋe.” Ento akemo te mako otel a jo Piriciti i kome, gin te kobbe ni, “Cwa dano-nono dok cen, me en dok i lobo ame rik imie; en mom bino wot karacel kedwa i mony, naka mio i dye lweny kuno, en lokere doko akworwa. Pien dano man dok twero ribere adwoŋŋere i yore aŋo? Mom wi jowa ame tye kan-ni en ame en twero tic kede? Mom man en Daudi ame owero kun oleo werrere alea ni, ‘Caulo oneko mere jo tutumia. Aco Daudi oneko mere jo tutumia apar.’ ” Akic te lwoŋo Daudi kobbe ni, “Kite a Rwot tye kwo-ni, yin ibedo dano ame an ageno, ame an i tuŋ baŋa onwoŋo ber ka yin iwoto keda i mony dok daŋ idwogo karacel keda, pien mom anwoŋo ginnoro arac tuŋ baŋi cakere i kare ame ibino iye baŋa tuno naka tin. Cite rwode mom oye ni iwoti. Pi mannono, yin doŋ dok cen; wot giri kede kuc, me cuny rwode na kur waŋ i komi.” Cite Daudi te penyo Akic ni, “Kara ŋo kono ame an atimo? Bal aŋo ame inwoŋo i koma cakere i nino ame an ageo kede tic baŋi tuno naka tin, ame geŋa wot lweny i kom okworri, adwoŋŋa?” Akic te dok iye ni, “An aŋeo aber ni yin mom itye kede balloro i nyima, yin iromi amala ika Obaŋa; kadi bed amannono, otel mony a jo Piriciti okobo ni, ‘En mom bino wot kedwa i lweny’. Aman doŋ yin ya odiko-ni, karacel kede joni ame iloo, ame ibino kedi; ge wunu wot odiko con ame ceŋ pwod adonnyo adonya.” Mannono te miyo Daudi ya odiko con karacel kede jo mere, me dok cen i lobo a jo Piriciti. Ento jo Piriciti te wot naka i Jejreel. I kare ame Daudi otuno i Jiklag i nino me adekkere, onwoŋo jo Amalek oyako Negeb ote kato Jiklag. En onwoŋo gin oloo Jiklag oko, ote waŋo oko kede mac. Gin onwoŋo oyako mon luŋ ote tero akwo, mon adoŋo kede atino. Mom oneko moro kadi acel, gin te wot gigi oko. I kare ame Daudi karacel kede jo mere otuno i boma, gin onwoŋo doŋ owaŋo oko kede mac, dok daŋ oyako mongi kede itinogi awobe kede anyira, otero oko acalo opii. Daudi karacel kede jo ame onwoŋo tye baŋe, ote mwoco koko oko, ote kok nakanaka waŋ ame doŋ ool atek ame mom doŋ oromo koko, Mon a Daudi aryo ca onwoŋo daŋ otero oko acalo opii, Akinoam me Jejreel, kede Abigail dako a lyel Nabal me Karmel. Daudi te doŋ bedo i twon can adwoŋ meicel; pien lwak onwoŋo tye ame amito nape oko kede gweŋ pi cwer cuny ame onwoŋo ŋat acel acel tye kede pi awobe mere kede anyira mere. Ento Daudi te nwoŋo tekcuny i baŋ Rwot Obaŋa mere. Daudi te kobbi Abiatar alamdog, wot Akimeleki ni, “Kella epod kan.” Abiatar te kela epod baŋ Daudi. Daudi te penyo Rwot ni, “Aryem yo mony man? Atwero makogi i yo?” Rwot te dokke ni, “Ryem yorgi, ibino makogi oko iyo, dok daŋ ibino laro joni oko,” Daudi te ya wot kede jo mia abicel ame onwoŋo rik tye baŋe. Gin te tuno i acalo me Becor, kan ame jo mia aryo odoŋ iye; jo ame onwoŋo ool atek ame mom doŋ oromo ŋolo kulo me Becor. Ento Daudi kede jo mia aŋwen te medde ryemo yo jo-nono. Gin te nwoŋo dano moro me Miciri i tim, ote kele baŋ Daudi; gin te miye ogati camo, ote daŋ miye pii mato, ote daŋ miye oduro ame otwo aduno kede etak olok otwo aryo. Kare ame en doŋ atyeko camo, cunye doŋ te dwogo, pien onwoŋo en mom ocamo ginnoro akadi mato ginnoro pi nino adek kede dyewor adek. Daudi te penye ni, “Yin ibedo dano aŋa? Dok iya kara i kwene?” En te gamo ni, “An awobi me Miciri, abedo amiro a dano me Amalek; adwoŋŋa oweka oko kan, pien two onwoŋo omaka nino adek okato aŋec. Wan onwoŋo oyako Negeb a jo Kereb kede me a jo Juda, kede Negeb a jo Kaleb, dok daŋ owaŋo Jiklag oko i mac.” Daudi te penye dok ni, “Itwero tera baŋ monnyaca?” Dano-nono te kobo ni, “Yin myero ikwoŋ baŋa i nyiŋ Obaŋa, ni mom ibino neka dok daŋ mom ibino miya i ciŋ adwoŋŋa, an ate teri baŋ monnyaca.” I kare ame en otere kuno, gin onwonogi oket atata i lobogi-nono luŋ, kun ocam, omatte dok daŋ omyel, pi yomcuny me lwak jami ame onwoŋo gin oyako i lobo a jo Piriciti kede i lobo a jo Juda. Daudi te nekogi atek cakere otyeno ka na abeo-nu, tuno naka orwo mere otyeno. Ŋattoro acel keken i akinagi mom obwot kono ka awobe mia aŋwen ame oyito i wi kanagi te riŋo oko. Daudi te mayo ginnoro luŋ ame onwoŋo jo Amalek oyako, karacel kede monne aryo. Ginnoro mom orwenyo kadi acel, akadi awobi moro onyo nyako moro i ginnoro luŋ a rik oyako moro mom orwenyo, Daudi odwoggogi luŋ. Daudi daŋ te mayo aŋa ka dyegi kede rommi kede dokgi luŋ; jo te cwayo dokkono i nyime kun oryemo, okobo ni, “Man en jami ame Daudi oyako.” Daudi te tuno baŋ jo mia aryo ca ame rik ool atek ca, ame mom doŋ oromo lubo yo Daudi, ame onwoŋo owekogi i kulo me Becor; gin jo-nono rik ote wot me wot rwatte i Daudi karacel kede jo ame onwoŋo tye baŋe. Kare ame Daudi doŋ onokogi aceggi, en omotogi. Eka jo luŋ a kitegi reco karacel kede jo mogo ame konygi mom ame onwoŋo tye i akina jo ame owoto i Daudi, te kobo ni, “Pien jo-nono mom owoto kedwa, mom obino miyogi ginnoro i kom gin ame wan oyako, ŋat acel acel i akinagi myero ter ka dako mere kede itino mere owot kede.” Cite Daudi te kobo ni, “Mom myero itim wunu amannono, omegona, man obedo gin ame Rwot omiowa, dok en daŋ a rik ogwokowa, te miyo mony ame onwoŋo obino i komwa i ciŋwa. Ŋa ame twero ye tamwu-nono i kop man? Pien jo ame mom owoto i lweny, ame odoŋ ka gwoko jami bino nwoŋo jami arom aroma i ŋat owoto.” Cakere i kare nono Daudi te miyo mannono doko cik atwal, ame jo Icrael lubo naka atot tin. I kare ame Daudi otuno i Jiklag, en ocwao jami mogo ame eyako baŋ owote mere, ame gin odoŋe me Juda, kun kobbigi ni, “Man en mot ame acwayiwu ame oya i kom gin ame oyako i baŋ okwor a Rwot.” En ocwao baŋ odoŋe ame bedo i Betel, i Ramot ame tye i Negeb, i Yattir, i Aroer, i Cipmot, Ectemoa, Rakal, i boma luŋ me a jo Jerakmeel, i boma a jo Keni luŋ, Korma, Boracan, Atak, Kebron karacel kede i kabedo luŋ ame yam Daudi kede jo mere maro wot iye. I kare-nono jo Piriciti te lweny i kom jo Icrael; jo Icrael rik te mukere i ŋwec oko i nyim jo Piriciti, kun kom jo ame oneko oradde atata i kidi me Gilboa. Jo Piriciti te ryemo yo Caulo kede awobe mere, ote neko Yonacan kede Abinadab, kede Malkicua, ame gin obedo awobe a Caulo. Lweny onwoŋ odio Caulo atek meicel, wegi atero mogo rik te nwoŋe, gin te cele wawano en atek meicel kede atero, Caulo te kobbi atiŋ jami lwennyere ni, “Wot pala romoni ituca kede pelo, me jo-ni a mom oliro komgi me co-ni kur bin coba, ote loka doko gi-anywaragi.” Cite atiŋ jami lwennyere mom te ye, pien onwoŋo tye kede lworo. Mannono te miyo Caulo kwanyo pala lwennyere, te rette iye en kene. Kare ame atiŋ jami lwennyere oneno ni Caulo doŋ oto oko, en daŋ te rette i kom pala lwennyere, te to oko karacel kede. Mannono en kite ame Caulo oto kede karacel kede awobe mere adek kede atiŋ jami lwennyere, kede jo mere, gin luŋ oto i nino acellono. I kare ame jo Icrael a rik tye i ŋe luŋ tuŋ ca karacel kede jo ocele ame onwoŋo tye i loka Jordan, kare ame gin luŋ oneno ni jo Icrael oriŋo oko, dok Caulo kede awobe mere daŋ oto oko, gin oya i bomagi luŋ ote riŋo oko. Jo Piriciti te bino bedo iye. Orwo mere ocele, i kare ame jo Piriciti obino me gonyo ruk a jo ame oneko, gin onwoŋo Caulo kede awobe mere adek oto i kidi me Gilboa. Gin te toŋo wi Caulo oko, ote gonyo daŋ jami lwennyere oko, ote cwayo okwena rabo koppere baŋ jogi luŋ karacel kede baŋ jo luŋ ame tye i lobo me Piriciti. Gin te keto jami lwennyere i ot jok Aciterot, gin te guro kom Caulo i cel me Betcen. Ento i kare ame jo me Jabec-Gilead owinyo gin ame jo Piriciti otimo i kom Caulo, jo luŋ ame tek i lweny, oya ote wot dyeworrono benebene, ote kwanyo kom Caulo kede kom awobe mere oko i kor cel me Betcan, gin te dwoggo i Jabec, ote waŋo komgi kuno. Gin te kwanyo cogo komgi, ote yiko i te yat i Jabec, eka ote kanyo kec pi nino abiro. Kare ame Caulo doŋ oto oko, ame Daudi doŋ oloo jo Amalek, te dwogo tyeko nino aryo i Ciklag. Orwo mere lo moro te bino ame oya i gony a Caulo, kun boŋo mere oyeyeca, dok daŋ ojujuko wie kede lobo. Kare ame en otuno baŋ Daudi, en oryebere piny i nyime pi wore, Daudi te penye ni, “Yin kara iya i kwene ba?” En te dok iye ni, “An kom abwot abwota i gony a jo Icrael.” Daudi dok te penye ni, “Koŋ doŋ ititta gin ame otimere kuno; obedo ni ŋo ba?” En te gamo ni, “Monywa ogweo ŋwec oko i lweny, cite oneko daŋ jo apol meicel; Caulo kede wode Yonacan daŋ oto oko.” Daudi dok te penyo awobi-nono ni, “Kara yin iŋeo niŋo ni Caulo kede wode Yonacan oto oko?” Awobi-nono te gamo ni, “An onwoŋo atye i wi kidi me Gilboa, ate neno Caulo kun tye ojeŋere i kom toŋŋere, kun gadigadi lweny kede wegi aguragura ame aryemo yore doŋ ceggi acega. Kare ame Caulo obolo waŋe i ŋee, en onena, te lwoŋa. An ate gamo ni, ‘An ene.’ En te penya ni, ‘Kara yin iŋa?’ An ate gamo ni, ‘An a dano me Amalek.’ En te kobba ni, ‘Tim ber ibin idopa oko, pien rem ociro oko kun kwona pwod tye.’ Mannono te miya wot doppe oko, pien onwoŋo doŋ aniaŋ ni mom twero kwo, kite ame onwoŋo doŋ otyeko rette piny oko-ni. An doŋ ate kwanyo tokkere me kwogo ame onwoŋo tye iwie, kede ogul ame tye i bade, en akelogi baŋi kan, adwoŋŋa?” Daudi te mako boŋŋi mere, te yeyeco oko; jo a rik tye baŋe, te daŋ timo kittono. Gin te kumo kun okok, dok daŋ ori kec pi Caulo, kede wode Yonacan, tuno naka otyeno kede pi jo Icrael, ame gin obedo lwak a Rwot, pien jo apol meicel i akinagi onwoŋo oneko oko i lweny. Daudi te dok penyo awobi ame okelle kop ni, “Yin kara iya ikwene ba?” En te gamo ni, “An atin arokkoro ame bedo i akinawu, ame abedo dano me Amalek.” Daudi te kobbe ni, “Piŋo yin mom ibedo kede lworo me ryeyo ciŋi neko ŋat ame Rwot oyero?” Daudi te lwoŋo ŋat acel i akina awobe mere, te kobbe ni, “Nek lo-nu oko.” Awobinono te cobe, te neke oko. Daudi te kobbi ato ni, “Remoni bed giri i wii; pien yin iŋolo kop i komi keni, pi kobo ni, ‘Atyeko neko ŋat ame Rwot owiro kede moo’.” Daudi te cako wero wer man kun koko kede Caulo kede wode Yonacan, dok daŋ te ciko ni myero pwony kede jo Juda. Kop man ote coyo i buk a Yacar. Werrere-nono woto kit man: “Ama wun jo Icrael, kwogowu oneko i wi kidi malo! Twoni jo atek meicel doŋ obuto oko piny! “Myero kur tit pire i Gat, myero daŋ kur lal koppere i dye boma me Acikelon, me anyira me Piriciti kur lel, kede anyira a jo a mom woro Obaŋa daŋ kur lel, Obaŋa myero kur mi kot kede toyo gud kidi me Gilboa pii a tye piny i te lobo daŋ kur kato oko, Pien kwot a jo atek opoto piny kuno i lewic, kwot a Caulo doŋ okwor atek, mom oweo i moo. “Akud atero a Yonacan onwoŋo lyet calo mac apoka, pala lweny a Caulo yam onwoŋo gwa meicel, gin luŋ yam mom dwogo nono aboŋo remo i komgi, dwol twoni jo atek yam mom rwenyo i komgi. “Caulo kede Yanacan yam twon jo moro ba! kite ame yam amarogi kede! Gin yam onywako kwo karacel, tuno naka i to, Jo mere yam dwir kato cur oko, dok otek okato eŋatu oko. “Mon me Icrael, kok wunu Caulo! ame yam omiowu irukere wunu meicel i dok odeo rukwu kede jabu. “Twoni co atek i lweny obuto oko piny, i dye lweny ba! “Yonacan oneko, obuto piny i wi kidi malo. Cunya owaŋ meicel piri, ominna Yonacan; onwoŋo yam iyomoro cunya meicel; kite onwoŋo imara kede, koba tek, kato kite a man mar kede jabu. “Twoni co atek i lweny obuto oko piny ba! Jami lwenygi te doŋ kun oket atata!” I kare ame man doŋ otum, Daudi te penyo Rwot ni “Awot abed i boma moro me Juda?” Rwot te kobbe ni, “Ee, woti.” Daudi dok te penyo ni, “Awot i boma mene?” Rwot te kobbe ni, “Wot i Kebron.” Mannono te miyo Daudi wot malo kuno karacel i monne aryo, Akinoam me Jejreel, kede Abigail ame rik koŋ obedo dako a lyel Nabal me Karmel. Daudi otero daŋ jo mere ame rik onwoŋo tye baŋe, kun tero ŋat acel acel kede jo me ode; gin te bedo i paco moro ame tye i Kebron. Jo me Juda te bino kuno, te wiro Daudi kede moo me bedo abaka a jo me ot a Juda. Kare ame Daudi owinyo ni jo me Jabec, i Gilead, en a rik oyiko Caulo. Daudi ocwao okwena baŋgi kun kobbigi ni, “Rwot myero miwu winyo, pien inyuto wunu woro i kom adwoŋwu. Caulo, iyike wunu! Aman myero Rwot doŋ nyut marrere a mom lokere kede gen i komwu! An daŋ abino timowu ber pi gin ame itimo wunu. Aman doŋ ba, myero imi ciŋwu bed iwac, ibed wunu jo atek, pien adwoŋwu Caulo doŋ oto oko; jo me ot a Juda doŋ owira kede moo me bedo abakagi.” Abuneri wot a Neri, ame onwoŋo obedo atel wi mony a Caulo, onwoŋo otero Ic-bocet wot a Caulo oko owoto kede naka loka i Makanaim. Eka i kuno, te ke te me bedo abaka ame loo Gilead, jo Acur, Jejreel, Epraim, kede Benjamin, naka Icrael luŋ. Ic-bocet wot a Caulo, onwoŋo rik mwaka me dittere doŋ oromo pyeraŋwen, i kare ame en doko abaka ame loo Icrael, en rik te loc pi mwakki aryo. Cite atekere a Juda onwoŋo gigi lubo Daudi. Kare ame Daudi rik obedo kede abaka ame loo atekere a Juda i Kebron, onwoŋo oromo mwakki abiro kede dwete kanyape. Abuneri wot a Neri kede omiro Ic-bocet wot a Caulo te wot i Gibeon kun oya i Makanaim. Eka Yoab wot a Cerua kede omiro a Daudi te daŋ wot rwatte kedgi kuno, ote obedo oko piny ŋat acel i ŋete eka ŋat ocele daŋ te bedo i ŋet atapara tuŋ ocele. Abuneri te kobbi Yoab ni, “Mi awobe atino ya malo, me otuk i nyimwa.” Yoab te gamo ni, “Migi oya malo do.” Gin te ya malo, ote kato tuŋ ca kun okwanogi, jo apar wie aryo te kato pi Benjamin kede Ic-bocet wot a Caulo, kede jo apar wie aryo i amiro a Daudi. Ŋat acel acel te mako wi akwottere, te cobo akwottere-nono oko i laŋete kede pala lweny, eka gin aryo luŋ ote rette piny awaŋe acel. Mannono te miyo cako nyiŋ kabedo-nono ni Poto ame onekere iye ame tye i Gibeon. Lweny rik te bedo agwa meicel i nino-nono; omiro a Daudi te loyo Abuneri oko, karacel kede jo Icrael. Awobe a Cerua adek onwoŋo tye kuno, Yoab, Abicai, kede Acael. Acael onwoŋo dwir atek calo amor me tim. En rik te ryemo yo Abuneri atek; i kare ame en oryemo yore-nono, mom gire ogak kadi acel, tuŋ cem onyo tuŋ cam. Abuneri te lokere neno ŋee, te kobbe ni, “Man yin, Acael?” En te gamo ni, “An ennono do.” Abuneri te kobbe ni, “Aco koŋ doŋ igak tuŋ cem onyo tuŋ cam, me imak ŋat acel i akina awobe, ima jami mere oko.” Cite Acael mom te ye gak kadi acel i lubo yo Abuneri. Abuneri te dok medo kobbi Acael ni, “Wek lubo yora bedi, gak oko teŋe; piŋo kara omio imito ni aneki? Abino tiŋo waŋa malo me neno ominni Yoab i yore aŋo ba?” Cite en gire te kwero oko; mannono te miyo Abuneri cobo yie pelo apela kun cobo i ecipet me toŋŋere. Acael te rette piny kuno, te daŋ to oko kannono. Doŋ ŋat acel acel ame otuno kan ame onwoŋo en oto iye, koŋ cuŋ oko mot. Eka Yoab kede Abicai te ryemo yo Abuneri. I kare ame ceŋ doŋ onwoŋo ceggi acega i poto, gin te tuno i tur me Amma, ame onwoŋo tye i nyim Gia, i yo ame woto dok i tim me Gibeon. Jo me Benjamin te cokere karacel baŋ Abuneri, ote ribere oko acalo mony acel, gin te cuŋ karacel malo i wi turroro. Abuneri te redo baŋ Yoab ni, “Myero wan obed lweny nakanaka bo? Mom iŋeo ni agiki mere bedo arac meicel? Ibino kara juko joni awene, me owek ryemo omegogi?” Yoab te kobbe ni, “Acalo Obaŋa tye kow-ni, kono mom ikobo, kono jona gire omedde ryemo yo omegogi naka odiko.” Mannono te miyo Yoab kuto apel, jo luŋ te cuŋ oko; mom dok ote medde ryemo yo jo Icrael akadi lweny kedgi. Abuneri kede jo mere luŋ te wot dyeworrono benebene, kun obeo i dye Araba, ote ŋolo Jordan, gin te bedo wot otyeno nono luŋ, ote tuno naka i Makanaim. Yoab te dok cen i ryemo yo Abuneri; eka ikare ame en doŋ ocoko jo luŋ karacel, en te nwoŋo ni omiro a Daudi apar wie aboŋwen mom tye, medo i kom Acael. Cite jo a Daudi onwoŋo oneko jo Abuneri mia adek kede pyerabicel, ame gin obedo jo Benjamin. Yoab kede jo mere te tiŋo kom Acael, ote wot yiko i lyel a pappere ame onwoŋo tye i Beterekem. Gin doŋ te bedo wot dyewor benebene, piny te wot ruyigi i Kebron. Lweny rik te ri kare alac meicel i akina jo me ot a Caulo kede jo me ot a Daudi; Daudi te bedo medde ameda ibedo atek kun jo me ot a Caulo mede ameda idoko agoro. Daudi rik te nywalo awobe magi i Kebron: wode me kao rik te bedo Amunon ame tottere rik Akinoam me Jejreel; awobi olube te bedo Kileab, ame obedo wot a Abigail, ame koŋ obedo dako a lyel Nabal me Karmel; wode me adekkere te bedo Abicalom, ame tottere onwoŋo Maaka nyaka a Talmai, abaka me Gecur; wode me anwennere te bedo Adonia ame tottere obedo Kagit; me abiccere te bedo Cepatia, ame tottere obedo Abiatal; eka me kanyape te bedo Itream, ame tottere obedo Elga, dako a Daudi. Itino awobe-ni luŋ Daudi onywalogi i Kebron. I kare ame lweny onwoŋo pwod tye i akina jo me ot a Caulo kede jo me ot a Daudi, Abuneri onwoŋo tye awot medde bedo lo ateka meicel i akina jo a Caulo, Nino moro acel Ic-bocet, wot a Caulo, openyo Abuneri ni piŋo obuto aŋeca, ame onwoŋo obedo ci-pappere Caulo, a nyiŋe Ricpa, nyaka Aya. Akemo te mako Abuneri meicel pi peny a Ic-bocet, omio te kobbe ni, “Yin itamo ni an abedo wi gwok bo i ot a Juda? I kare-ni luŋ an abedo kede woro baŋ jo me ot a Caulo ame obedo pappi, kede baŋ omego mere, naka baŋ owote mere, dok mom amiowu i ciŋ Daudi; ento yin tin icako kelo kop i koma pi dako. Obaŋa myero mi ginnoro tima, ka ce mom acobo gin a yam Rwot okwono pire baŋ Daudi, me kwanyo loc oko i ot a Caulo, te miyo kom me loc baŋ Daudi, me loyo Icrael kede Juda, cakere i Dan tuno kede i Beer-ceba.” Ic-bocet onwoŋo mom dok twero kobbe kopporo kadi acel, pien onwoŋo lwore. Abuneri te cwayo kwena baŋ Daudi i Kebron kun kobo ni, “Ŋa kara ame bi no loyo lobo man? Yin myero iye cikere keda me an akonyi, ami Icrael luŋ dwog i te locci.” Daudi te kobo ni, “Mannono gire ber, an gire abino cikere kedi, cite i kare ame ibino nena myero inen ni ikelo Mikal nyaka a Caulo baŋa, en omio ite nena.” Daudi te cwayo okwena baŋ Ic-bocet wot a Caulo kun kobbe ni, “Mia cega Mikal ame rik anyomo i del kom co a jo Piriciti mia acel.” Mannono te miyo Ic-bocet cwayo jo wot game oko i baŋ cware Palutiel wot a Laaie. Cite cware Palutiel rik daŋ te wot kede karacel kun kok naka Bakurim. Abuneri te kobbe ni, “Yin doŋ myero inen ni idok cen.” En doŋ te dok oko cen. Abuneri rik te poro kop odoŋe me Icrael, kun kobbigi ni, “I kare okato wun ibedo mito wunu Daudi ni myero bed abakawu, Aman doŋ myero itim wunu, pien Rwot doŋ otyeko kwon baŋ Daudi kun kobo ni, ‘Abino miyo amirona Daudi en ame laro jona i ciŋ jo Piriciti kede i ciŋ okworgi luŋ’.” Abuneri dok te kop i jo Benjamin, eka te doŋ wot i Kebron me wot kobbi Daudi ginnoro luŋ ame jo Benjamin kede jo Icrael oye timo. Abuneri te wot i jo pyeraryo baŋ Daudi i Kebron, Daudi te yiko arama pi Abuneri karacel kede jo ame onwoŋo tye baŋe, Abuneri te kobo baŋ Daudi ni, “An doŋ aya awot, abino wot coko jo Icrael luŋ karacel akelo baŋi yin adwoŋŋa, Daudi. Gin bino cikere kedi me bedo abakagi. Mannono bino miyo doŋ iloo ginnoro luŋ ame onwoŋo cunyi mito.” Daudi doŋ te cwayo Abuneri wot; en te wot gire i kuc. Icennere omiro a Daudi karacel kede Yoab te dwogo kun oya i ka yako rok ocele, ame okelo jami apol meicel a gin oyako. Ento Abuneri onwoŋo mom tye baŋ Daudi i Kebron, pien onwoŋo Daudi ocwao Abuneri owoto gire oko kun omie owoto gire i kuc. I kare ame Yoab karacel kede mony a rik tye baŋe odwogo, jo te kobbi Yoab ni, “Abuneri wot a Neri obino baŋ abaka, eka abaka te weke wot kun daŋ mie gire woto kede kuc.” Yoab te wot baŋ abaka, te kobbe ni, “Gin aŋo kara ame yin itimo? Koŋ inen, Abuneri obino baŋi; piŋo kara yin dok iweko en owoto? Aman en doŋ owoto gire oko. Yin iŋeo ni Abuneri wot a Neri obino baŋi me bino bwoli, me eŋe kite ame yin iwiwira kede tuŋŋi kede tunni, kede ginnoro luŋ ame yin itio.” Kare ame Yoab doŋ oya i nyim Daudi, en ocwao jo me wot omo Abuneri; gin te dwogo en cen i ŋet bur pii me Cira, ento Daudi onwoŋo mom oŋeo ginnoro iye. I kare ame Abuneri odwogo i Kebron, Yoab otere teŋe i ŋet cel me wot kop kede i muŋ. En te wot cobo yie oko kuno, te neke oko, pi remo ominnere Acael. I kare ame Daudi owinyo kop man icennere, en okobo ni, “An karacel kede locca mom gire obino bedo kede balloro nakanaka i nyim Rwot pi remo Abuneri wot a Neri. Remo mere gire myero dok i wi Yoab, kede i wi jo me ot a pappere luŋ; ŋattoro myero kur rweny i ot a Yoab ame two remo omako, onyo dobo, onyo ame abwoc, onyo ame oneko i pala lweny, onyo ame kec en oneko, man myero bed timere i ode kare ducu.” Yoab kede ominnere Abicai te neko Abuneri oko kittono, pien onwoŋo rik oneko omingi i lweny ame obedo i Gibeon. Daudi te kobbi Yoab kede jo luŋ ame rik onwoŋo tye baŋ Yoab ni, “Yeyeco wunu boŋŋiwu oko, ruk wunu boŋŋi me cola, me ikok wunu Abuneri.” Abaka Daudi te wot kun lubo canduk ame oketo iye kom ato. Gin te yiko kom Abuneri i Kebron; abaka Daudi te mwoco koko oko i dog lyel Abuneri, jo luŋ daŋ te kok oko. Abaka Daudi okoko Abuneri kun kobo ni, “Piŋo kara Abuneri oto calo lo amiŋ? Koŋ inen ciŋi-gu mom gire otweo, tyeni daŋ mom gire otweo kede jegere; nen yin giri ito calo lo ame poto i nyim otim tim areco.” Jo luŋ dok te medde kok pi Abuneri. Jo luŋ te wot baŋ Daudi me cuko cunye ni myero en ocam cem kun cen mom ru opoto, cite Daudi te kwoŋ akwoŋa kun kobo ni, “Obaŋa myero mii ginnoro timere i koma, ka ce abilo ogati onyo ginnoro keken kun cen mom ru opoto.” Jo luŋ oneno gin ame otimere-nono, te daŋ yomoro cunygi; kite ame ginnoro luŋ ame abaka timo yomoro kede cuny jo luŋ. Mannono omio jo luŋ oniaŋ i nino-nono ni abaka gire onwoŋo mom omito ni nek Abuneri wot a Neri. Abaka te kobo baŋ omiro mere ni, “Wun iŋeo wunu ni aloc kede twon lo moro adwoŋ meicel tin oto iyi Icrael? An tin agoro, kadi bed owira kede moo me bedo abaka; jo mago ame gin obedo itino a Ceruya, otye agwa meicel i koma. Rwot gire myero cul Yoab pi tim arac kun lubo ballere.” Kare ame Ic-bocet wot a Caulo owinyo ni Abuneri otyeko to oko i Kebron, lworo omake atek, jo Icrael luŋ te bedo ame cunygi oŋabere aŋaba. Ic-bocet onwoŋo rik tye kede jo aryo ame telo wi eryoŋet aryo ame woto i yak; ŋat acel nyiŋe Baana, ŋat ocele nyiŋe Rekab, awobe a Rimmon, dano me Benjamin ame turgi tye i Beerot, pien Beerot daŋ okwano baŋ jo Benjamin. Jo Beerot onwoŋo oriŋo i Gittaim, gin te bedo gigi kuno naka atot tin. Yonacan wot a Caulo onwoŋo tye kede wode ame komo akoma. I kare ame okelo kop me to a pappere kede Caulo kun okelo i Jejreel, onwoŋo en doŋ tye i mwaka abic me dittere. Apidi mere te tiŋe ŋwec kede oko; i kare ame apidi onwoŋo tye aŋwec i myelkom, te weke rette oko piny, te doŋ doko aŋwalo. Nyine Mepibocet. Awobe a Rimmon me Beerot, Rekab kede Baana, gin ocako wot ote tuno i ot a Ic-bocet a ceŋ lyet atek, ote onwoŋo Ic-bocet tye pwod aryeye i kabuto mere dyeceŋ. Nen ba, icaanono onwoŋo dako ame tye apyeto ŋano nino omako waŋe oko, te daŋ nino gire oko; Rekab kede ominnere Baana te cedde donyo i ot. Kare ame gin odonyo baŋ Ic-bocet i ot, kan ame onwoŋo en obuto iye i wi tanda mere i ot buto, gin te cobe neke oko, ote ŋolo ŋute oko. Gin otiŋo wie ote wot kede dyewor benebene, kun olubo yo me Araba. Gin te kela wi Ic-bocet baŋ Daudi i Kebron. Gin te kobbi abaka Daudi ni, “Man en wi Ic-bocet wot a Caulo, akworri ame onwoŋo mito neki, Rwot tin doŋ oculo kwor adwoŋwa, abaka, i kom Caulo kede itino mere.” Cite Daudi te kobbi Rekab kede ominnere Baana, ame gin obedo itino a Rimmon me Beerot ni, “Kite a Rwot tye kwo-ni, Rwot ame olara i cannoro luŋ, i kare ame rik lo moro okobba ni, ‘Nen ba, Caulo doŋ oto oko,’ kun tamo ni ekela amut aber, an amake, ate neke oko i Ciklag; maci-naca en ame rik obedo mot ame an amie pi kop ame en okelo. Kara doŋ jo areco ame neko dano ame kite atira i ode kono, i wi tanda mere-gu, mom abino mito remowu, ate nekowu oko i wi lobo?” Daudi te kobbi awobe mere ni nekgi oko, ote daŋ nekogi oko, ote ŋolo ciŋgi kede tyengi, ote ŋabogi i ŋet atapara me Kebron. Cite gin te wot yiko wi Ic-bocet i lyel Abuneri i Kebron. I kare-nono atekere me Icrael luŋ te bino baŋ Daudi i Kebron, ote bino kobbe ni, “Nen ba, wan acel kedi.” I kare okato Caulo onwoŋo abakawa; yin en a rik itelo jo Icrael me wot i lweny, dok daŋ idwoggogi paco; Rwot rik te kobbi ni, “Yin ibino kwayo jona Icrael dok daŋ ibino bedo aloc a jo Icrael.” Mannono en omio odoŋe luŋ me Icrael obino baŋ abaka i Kebron. Abaka Daudi te cikere kedgi i Kebron i nyim Rwot, gin te daŋ wiro Daudi kede moo me bedo abaka me Icrael. Daudi onwoŋo doŋ mwaka me dittere oromo pyeradek i kare ame en doko abaka, en te bedo aloc pi mwakki pyeraŋwen. Oloo jo Juda i Kebron mwakki abiro kede dwete kanyape, te dok loyo jo Icrael medo i Juda ducu pi mwakki pyeradek wie adek, kun en bedo i Jerucalem. I kare-nono abaka Daudi kede jo mere te ya me wot lweny i Jerucalem i kom jo me Jebuc, ame gin rik obedo wegi lobo-naca. Jo Jebuc otamo ni Daudi gire mom romo loyo bomagi, omio gin te kobo ni, “Yin gire mom itwero kato kan, otowaŋ kede oŋwalo romo gire ryemi oko.” Cite Daudi te mayo Cion oko, ame obedo ka ponogi atek, paco-nono te doŋ doko Gony a Daudi. I nino-naca Daudi okobbi jo mere ni, “Tye ŋattoro iyi akinawu ame cunye dag jo Jebuc bala an? Ŋat amito loyogi myero lub yo me bur pii, me wot lweny i kom otowaŋ kede oŋwalo.” Mannono en omio okobo ni, “Otowaŋ kede oŋwalo mom bino donyo i ot a Rwot.” Daudi te bedo i ka ponogi atekkono, te cako nyiŋe ni, Gony a Daudi. Daudi te gero boma-nono i cel mano amana, cakere i Millo dok kede i yie. Daudi te doŋ medde ameda ibedo twon lo moro adit, pien Rwot Obaŋa me mony obedo bedo kede. Kiram abaka me Turo te cwayo kwena baŋ Daudi, kun miogi otero bao cedar, kede opac, kede opaa kidi me gedo, ame gin te geri Daudi ot. Daudi te niaŋ ni Rwot doŋ otyeko moke me bedo abaka me Icrael, dok daŋ ni doŋ omio loccere obedo malo meicel pi jo mere Icrael. I kare ame Daudi oya i Kebron te wot i Jerucalem, en omedde coko mon ocele, mon anyoma kede en aŋeca mege; te daŋ medde nywalo awobe kede anyira. Nyiŋ itino ame en onywalo i Jerucalem ene: Cammua, Cobab, Natan, Culeman, Ibkar, Elicua, Nepeg, Yapia, Elicama, Eliada kede Elipelet. Kare ame jo Piriciti otyeko winyo ni otyeko wiro Daudi kede moo me bedo abaka me Icrael, gin luŋ ote ciro wot malo kuno me wot yenyo Daudi; cite Daudi rik te winyo oko, te wot i ka-pono ame ogero atek. I kare-nono jo Piriciti obino te keketa i lula me Repaim. Daudi te penyo Rwot ni, “Awot alweny i kom jo Piriciti? Ibino miyogi i ciŋa?” Rwot te kobbi Daudi ni, “Woti; pien an abino miyo jo Piriciti i ciŋi, ateteni.” Daudi te wot i Baal-peracim, te daŋ wot loyogi oko kuno. Daudi te kobo ni, “Rwot doŋ oemo dye okworra i nyima, kite ame pii mol yeco kede yore.” Omio ote cako nyiŋ kabedo-nono ni Baal-peracim. Jo Piriciti rik te weko cal jogigi kuno, eka Daudi kede jo mere te terogi oko. Jo Piriciti dok te dwogo tyen me aryo mere, ote dok keketa i lula me Repaim. Kare ame Daudi openyo Rwot, Rwot okobbe ni, “Kur iwot malo kuno, yin man amana, iwot i ŋegi, me ilokere wunu i komgi awulo kan ame abata pol iye. Ka ibino winyo tyen jo awot amor awinyere malo i wi abata, myero inyutte wunu, pien Rwot nwoŋo doŋ otelo nyimi oko me wot neneko mony a jo Piriciti oko.” Daudi te timo kite ame Rwot onwoŋo ocike kede, te neko jo Piriciti, cakere i Geba tuno naka Gejer. Daudi dok te coko jo Icrael luŋ ame oyero, jo tutumia pyeradek. Daudi te ya karacel kede jo luŋ ame onwoŋo tye, kun oya i Baal-juda, me wot kelo canduk Obaŋa i kuno, canduk ame olwoŋo i nyiŋ Rwot me mony, ame bedo malo i wi okerubi. Gin te cibo canduk i gadigdai anyen, kun okwanyo i ot a Abinadab, ame onwoŋo bedo i wi tur malo; Ujja kede Akic, ame gin obedo awobe a Abinadab, gin te loro gadigadi anyen aŋwen ame onwoŋo canduk Obaŋa tye iye, kun Akic en ame telo yo i nyim canduk. Daudi kede jo luŋ me ot Icrael te tuko atek meicel i nyim Rwot, kun owero ogoo opuk, naŋa, bul, ajaa kede mola me agoa. Kare ame gin otuno i ŋet laro a Nakon, Ujja oryeo ciŋe i kom canduk Obaŋa, eka te kwako kede ciŋe, pien twoni onwoŋo ogatte. Akemo te mako Rwot i kom Ujja, eka te neke oko kuno, pien oryeo ciŋe i kom canduk Obaŋa; Ujja te to i ŋet canduk Obaŋa, Cuny Daudi te waŋ, pien Rwot oneko Ujja akemo; mannono te miyo lwoŋo nyiŋ kabedo-nono ni Perej-ujja, tuno naka atot tin. I nino-nono lworo omako Daudi atek i kom Rwot. Omio en okobo ni, “Kara canduk a Rwot bino bedo baŋa i yore aŋo ba?” Omio Daudi obedo kede lworo me tero canduk a Rwot i gony a Daudi; en te lunyo tero teŋe i ot Obed-edom ame obedo dano me Gat. Canduk a Rwot te ri i ot Obed-edom me Gat dwete adek; Rwot te miyo winyo i kom Obededom karacel kede jo luŋ me ode. Rik ote kobbi abaka Daudi ni, “Rwot doŋ omio winyo i kom jo me ot Obed-edom kede jami mere luŋ, pi canduk Obaŋa.” Omio Daudi te omo canduk Obaŋa oko i ot Obed-edom, te kelo i gony a Daudi i yomcuny. Kare ame jo oyeo canduk a Rwot ocako wotgi, kun pwod obolo tyengi tyen kanyape keken, Daudi oyalo Rwot i twon ocwe. Dok te myel i nyim Rwot atek meicel; Daudi onwoŋo otweo ka epod me camanini i pyere. Mannono en kite ame Daudi karacel kede jo luŋ me Icrael otero kede canduk a Rwot kun owo, okuto tuŋ rommi. Kare ame canduk a Rwot otuno i gony a Rwot, Mikal nyaka a Caulo oroo waŋe i dirica, te neno Daudi tye akirre i myel i nyim Rwot; en te caye i cunye. Gin te cwayo canduk a Rwot i ot, ote keto kakare iyi kema ame onwoŋo Daudi rik oguro pire. Daudi te yalo Rwot kede mot awaŋa, kede mot me kweyo cuny i nyim Rwot kuno. Kare ame Daudi doŋ otyeko yalo Rwot i mot awaŋa kede mot me kweyo cuny, en olamo winyo i kom lwak i nyim Rwot me mony. En te poko baŋ ŋat acel acel ogati acel, dul riŋo aduno, kede aŋina olok otwo acel, en opoko baŋ jo luŋ, co kede mon me Icrael luŋ. Eka jo doŋ te keketa kun ŋat acel acel dok i ode. Daudi te dwogo paco, me bino lamo gum i jo me ode. Cite Mikal nyaka a Caulo te ŋolle i kome, te kobbe ni, “Abaka me Icrael tin oketo kwogo i kome kene be! Tin en ogonyo boŋo i kome oko i nyim aŋeca omiro mere, kun lanne, weko kome nono i nyim jo calo dano moro ame wie oballe.” Daudi te kobbi Mikal ni, “An onwoŋo amyel gira i nyim Rwot ame oyera me leyo kaka pappi kede jo me ode ducu, me keta bedo aloc a jo mere Icrael. Mannono omio an gira pwod abino medde myel i nyim Rwot. Abino medde bedo lo moro ayot meicel ame kato man oko, yin giri ibino medde caya, cite aŋeca ame yin ikobo pirgi-nono, gin bino keto kwogo i koma.” Mikal nyaka a Caulo mom te nywalo atinnoro naka oto. I kare ame Daudi doŋ obedo i ode kun Rwot doŋ otyeko miye weo oko i kom okworrere ame onwoŋo omanne dyere, en okobo baŋ adwarpiny Natan ni, “Nen ba, an atye abedo i ot ame ogero i bao cedar, cite canduk tye bedo i kema.” Nacan te kobbi abaka ni, “Wot iti giri ginnoro luŋ ame tye i cunyi, pien Rwot gire tye kedi.” Cite i dyeworrono ikokome, kop a Rwot te bino baŋ Natan kun kobbe ni, “Wot ikobbi amirona Daudi ni, ‘Rwot okobo ni, Yin imito gera ot me bedona? Cakere i kare ame akwanyo jo me Icrael i lobo Miciri, tuno naka tin, an mom ru abedo gira i ottoro; abedo kobere gira akoba kun abedo i kema. I kabedo luŋ ame abedo wot iye i jona Icrael, mom gira apenyo atelloro ame onwoŋo aketo me telogi ni kono ogerra ot me bao cedar.’ Aman doŋ yin myero ikobbi amirona Daudi ni, ‘Rwot me mony okobo ni, Rik an akwanyi iyi elet kun yin akwa rommi, me idok aloc a jona Icrael. Abedo bedo kedi i kabedo luŋ ame ibedo wowowta iye, atyeko okworri-gu luŋ i nyimi; dok daŋ abino miyo nyiŋi rwo meicel, ame rom aroma i nyiŋ jo adito me lobo. Abino yero kabedo a jona Icrael, ate miyogi bedo kuno kun mom dok oyelogi; jo moro areco daŋ mom dok bino bedo wunogi bala kite a yam con. Cakere i kare ame aketo aŋolkop me loyo jona Icrael, jo a kitegi reco obedo wunogi nakanaka, cite man mom dok bi no timere i komgi; abino miyogi doŋ owe oko i kom okworgi luŋ. Medo i mannono, Rwot dok okobo ni, ebino miyo ikwai bedo adwoŋ meicel. Ka kare me bedoni i lobo doŋ otum, yin ibino nywako kabedo karacel kede kwarini, an dok abino miyo wodi moro ame yin inywalo ya, te lubi; an abino moko loccere. En wodi-nono bino gero ot pi nyiŋa, abino moko kom loccere bedo atwal. An abino bedo pappere kun en bedo woda. Ka ce en obalo ginnoro, an abino pwode kite ame apap goo kede wode kede can ame abino keto i kome bino bedo arom aroma i can a jo keto i kom itinogi, cite mom abino kwanyo mara a mom lokere i kome, kite ame rik akwanyo kede i kom Caulo, ame rik abin akwanyo i nyimi. Odi kede locci bino cuŋ atek i nyima i kare luŋ; locci bino moko atwal.’ ” Natan te kobo kop magi luŋ baŋ Daudi kede ginnoro luŋ ame onyuto baŋe. Daudi doŋ te wot bedo i nyim Rwot, te kobo ni, “An kara abedo ŋa ba, Ama Rwot Obaŋa, jo me oda obedo ŋo, ame omio yin itiŋa malo kit man-ni? Aco kadi bed amannono, man kom pwod ginnoro atitidi moro baŋi. Ama Rwot Obaŋa; nen yin doŋ ityeko kobo kop i komjo me ot amironi, jo me kare a pwod lac ata ame tye i nyim, inyutta-gu lwagi jona ame tye i nyim, ama Rwot Obaŋa. Kara ŋo me dok atwero kobo baŋi ba? Pien yin giri iŋeo amironi, Ama Rwot Obaŋa! Pien pi gin ame yin giri iciko, ame lubere kede gin oya i cunyi keni, omio yin itimo twoni jami magi adoŋodoŋo, me amironi ŋe. Pi mannono ba, yin giri idwoŋ meicel, Ama Rwot Obaŋa; pien mom dok tye ŋattoro ocele a cal kedi, dok mom daŋ tye obaŋa moro ocele kono yin keken, ka oporo kede gin ame wan owinyo kede yitwa. Kara rokkene dok ame tye i wi lobo ame calo joni Icrael, ame yin Obaŋa iwoto baŋgi me wot lakorogi, me gin bed joni? Yin giri imio nyiŋi orwo atek, itio twoni jami mogo adoŋodoŋo dok ame iyiliyili meicel pirgi, kun iryemo rok ocele oko i nyimgi karacel kede obaŋegi. Yin giri pi mitti keni Ama Rwot, imoko joni Icrael me bedo joni atwal; eka yin ite doko Obaŋagi. Doŋ ba Ama Rwot Obaŋa, aman yin doŋ myero imok atwal kop ame ikobo i kom amironi kede i kom jo me ode, eka ite timo kite ame ikobo-nono. Jo gire bino medde dworo nyiŋi nakanaka kun okobo ni, ‘Rwot me momy en Obaŋa me Icrael.’ Ot amironi Daudi bino moko gire i nyimi. Dok daŋ Ama Rwot me mony, Obaŋa a jo Icrael, yin giri doŋ inyutta an amironi kop man oko, kun ikobo ni, ‘Abino gero ot piri’; omio an amironi anwoŋo tek cuny me keto kwac man i nyimi. Doŋ aman ba, Ama Rwot Obaŋa, yin giri ibedo Obaŋa, dok daŋ kop ame ikobo bedo ateni, yin doŋ iciko pi gin aber ri baŋ amironi, Aman doŋ tim ber, Ama Rwot Obaŋa imi gum i ot amironi Daudi, me medde bedo atwal i nyimi; pien yin giri doŋ ikobo oko, gum ame yin imio, bino miyo gum bedo i ot amironi Daudi nakanaka.” Ame man doŋ otum oko, Daudi oloo jo Piriciti i lweny, te cako daŋ doŋ loyogi, te miyo twergi gik oko i lobo-nono. Daudi dok te loyo jo Moab i lweny, en te miyogi buto piny i lobo, te pimogi kede tol, eka te neko aryo me adek oko i komgi, te weko ka acel me adek i komgi. Jo Moab te doŋ cako bedo i te loccere kun daŋ oculo ocoro baŋe. Daudi dok te loyo abaka me Coba, ame nyiŋe Adadejer wot a Rekob, i kare ame en woto dwoggo loccere i ciŋe, me loyo lobo ame tye i ŋet kulo me Eufrate, Daudi rik te mayo i baŋe wegi aguragura tutumia acel kede mia abiro, kede cirikale a woto i tyengi tutumia pyeraryo. Daudi te ŋoŋolo odoŋe aguragura luŋ ame onwoŋo wao gadigadi lweny, cite te weko ame romo wayo gadigadi lweny mia acel keken. Kare ame jo Curia me Damaciko obino me konyo Adadejer, abaka me Coba, Daudi te neko jogi tutumia pyeraryo wie aryo. Daudi rik te keto cel a mony i lobogi, iŋet Damaciko jo Curia doŋ te bedo ite loc a Daudi, kun daŋ omio ocoro baŋe. Rwot te bedo miyo Daudi loyo lobo luŋ ame en cobo mony i komgi. Daudi te mayo lwak kwot apipim ame otio i jabu ame onwoŋo tye baŋ omiro abaka Adadejer, te terogi luŋ i Jerucalem. Abaka Daudi daŋ omao lwak mola adwoŋ meicel i boma me Belak kede me Berotai, ame gin obedo boma ame onwoŋo tye ite loc abaka Adadejer. Kare ame Toi abaka me Kamat owinyo ni Daudi oloo mony a Adadejer luŋ, en ocwao wode Yoram baŋ abaka Daudi, me wot mote, dok daŋ pwoc pi lweny loyo Adadejer oko; pien Adadejer yam onwoŋo obedo lweny gin kede Toi tyen apol meicel. Yoram te wot kun tero jami ame otio i ryal, i jabu kede mola, Jami-nono luŋ Daudi te jalo baŋ Rwot, anaka ryal, kede jabu ame oya i baŋ rok ocele luŋ ame en oloo, ame oya Edom, Moab, i baŋ jo Ammon, jo Piriciti, jo Amalek, karacel kede jami ame oyako i baŋ Adadejer wot a Rekob, abaka me Coba. Daudi omio nyiŋe orwo. Kare ame en odwogo, oneko jo Edom tutumia apar wie aboro i luŋ me Kado. Oketo cel me mony oromo lobo me Edom luŋ, jo Edom luŋ te doŋ bedo i te loccere. Rwot te bedo miyo Daudi loyo lobo luŋ ame en cobo mony i komgi. Mannono te miyo Daudi loyo Icrael luŋ; obedo ŋolo kop atira kun daŋ neno ni jo luŋ otye ka tic kedgi aber. Yoab wot a Ceruya onwoŋo obedo atel wi monyere; Yekocafati wot Akilud te bedo aco kop i kom ginnoro luŋ ame otimere; Jadok wot Akitud kede Akimelek i wot Abiatar te bedo olamdog; Ceraya te bedo arannere; Benaya wot a Yekoyadi te bedo adwoŋ ame loo jo Keret kede jo Pelet; eka awobe a Daudi te bedo daŋ olamdog. Daudi te penyo jo ni, “Tye ŋattoro ame pwod adoŋ kwo, ame obedo dano me doggola a Caulo, me wek atime kica pi Yonacan?” I kare-nono onwoŋo rik tye amiro moro ame obedo dano moro me doggola a Caulo, nyiŋe Jiba, rik ote lwoŋo dano-nono bino baŋ Daudi, abaka te penye ni, “Yin i Jiba?” En te gamo ni, “Ee adwoŋ, an ennono.” Abaka te dok penye ni, “Mom dok tye ŋattoro me doggola a Caulo ame odoŋ, me anyut kica Obaŋa baŋe?” Jiba te kobbi abaka ni, “Wot a Yonacan gire pwod tye kwo; ame obedo dano ame oŋwalo i tyene.” Abaka te dok penye ni, “Kara aman en tye kwene?” Jiba te kobbi abaka ni, “En bedo i ot a Makir wot a Ammiel, i Lo-debar.” Abaka te cwayo okwena, te wot kele oko i ot a Makir wot a Ammiel, i Lo-debar, Mepibocet wot a Yonacan, wot a Caulo, te bino baŋ Daudi, te ryebere piny wore. Daudi te lwoŋe ni, “Mepibocet.” En te ye ni, “Nen, an amironi ene.” Daudi te kobbe ni, “Kur ibed kede lworo; pien abino timi kica pi pappi Yonacan; abino dwoko potti luŋ ame yam obedo mea kwaroni Caulo baŋi; dok daŋ ibino cam keda i meja acel nino ducu.” Mepibocet te dok ryebere piny, te ko bo ni, “Kara an abedo gin aŋo, ama adwoŋŋa, an ame arom i gwok oto-ni, daŋ dok iporre paro pira?” Abaka dok te lwoŋo Jiba ame rik obedo amiro a Caulo, te kobbe ni, “Jami luŋ ame rik onwoŋo mea Caulo kede mea jo me doggola mere luŋ, amiogi luŋ baŋ adwoŋŋi Mepibocet. Doŋ yin karacel kede itinoni kede omironi, ibino purre potti mere-nono; gin ame ocek i yigi ibino kelo baŋe, me wot adwoŋŋi onwoŋ ginnoro me acama; cite Mepibocet wot adwoŋŋi bino cam keda i meja acel nino ducu.” Jiba rik onwoŋo tye kede itino mere awobe apar wie abic, kede omiro mere pyeraryo nono. Jiba te dokki abaka ni, “An amironi, abino tiyo ginnoro luŋ ame yin abaka ityeko cika iye.” Mannono daŋ te miyo Mepibocet bedo cam i meja abaka, acalo ŋat i akina itino abaka. Mepibocet onwoŋo rik tye kede atinnere ame onwoŋo pwod tidi, ame nyiŋe Mika. Jo luŋ ame onwoŋo bedo i ot a Jiba te doko omiro a Mepibocet. Mepibocet te bedo i Jerucalem pien onwoŋo cemo i meja abaka nino ducu. En onwoŋo oŋwalo i tyene ryoryo. Ame man doŋ otum oko, abaka a jo Ammon te to oko, wode Kanun te doko abaka, leyo kakare. Daudi te kobo ni, “An abino bedo aber wan i Kanun wot a Nakac, kite ame yam pappere daŋ obedo keda aber.” Daudi te cwayo omiro mere baŋe me wot kweyo cunye; omiro a Daudi te wot i lobo a jo Ammon. Ento odoŋe a jo Ammon te kobo baŋ adwoŋgi Kanun ni, “Yin itamo ni Daudi ocwao okwena me kweyo cunyi ateni, me miyo pappi kwogo. Daudi mom ocwao omiro mere me bino roto kede ŋiŋio bomawa, me wek ema oko?” Mannono te miyo Kanun mako omiro a Daudi, te lyelo yer tikgi tun cel oko, daŋ te ŋoŋolo boŋŋigi oko i kwon dudgi, eka te doŋ cwayogi wot. I kare ame kop man owinyere baŋ Daudi, en ocwao jo me wot rwatte kedgi, pien lewic onwoŋo omako omiro merenono meicel. Abaka okobbigi ni, “Koŋ doŋ ibed wunu i Jeriko, tuno waŋ ame yer tikwu olot, eka ite doŋ dwogo wunu.” Kare ame jo Ammon oneno ni nyingi doŋ ŋwe aŋwea baŋ Daudi, gin ocwao okwena me wot paŋo jo lweny me Curia ame bedo Bet-rekob kede jo Curia ame bedo Joba, ote paŋo cirikale awot i tyengi pyeraryo, abaka me Maaka kede jo mere tutumia acel, kede jo me Tob tutumia apar wie aryo. Kare ame Daudi owinyo kop man, en ocwao Yoab kede monyere luŋ ame onwoŋo tek meicel i lweny. Jo Ammon te dorre wot oko, ote wot ryeye i tyeŋ me lweny i nyim dogcel me donyo i boma. Aco jo Curia me Joba kede me Rekob, kede jo Tob, kede jo me Maaka onwoŋo tye gigi kengi i bar kannaler. Kare ame Yoab oneno ni mony tye i nyime kede i ŋee, en okwanyo ocirikale mogo me Icrael abeco meicel, te canogi i, nyim jo Curia. Jo odoŋŋere luŋ te miyogi i ciŋ ominnere Abicai, ame te canogi i nyim jo Ammon. En te kobbi ominnere ni, “Ka ce ineno ni jo Curia amito loya oko, yin myero ibin ikonya; cite ka an abino neno ni jo Ammon amito loyi oko, an abino bino me konyi. Yin myero ka ibed ame cunyi nwaŋ, me onyut cowa pi rokwa kede pi boma Obaŋawa; Rwot gire myero otim gin ame en oneno ni ber baŋe.” Yoab karacel i jo ame onwoŋo tye baŋe te doŋ wot anyim me wot lweny i kom jo Curia; jo Curia te mukere oko i ŋwec i nyimgi. Kare ame jo Ammon oneno ni jo Curia oriŋo oko, gin daŋ ote mukere gigi oko i ŋwec i nyim Abicai, ote donyo oko iyi boma. Yoab te dwogo doŋ oko cen i ka lweny i kom jo Ammon, te wot i Jerucalem. Cite i kare ame jo Curia oneno ni jo Icrael oloogi oko, gin luŋ ote cokere karacel. Abaka Adadejer te cwayo okwena wot kelo jo Curia ame onwoŋo tye loka i ŋe kulo Eufrate; gin rik te wot Kelam kun Cobak, atel wi mony abaka Adadejer, en ame telo nyimgi. I kare ame kop man owinyere baŋ Daudi, en ocoko jo Icrael luŋ karacel, te wot ŋolo kulo Jordan, te wot Kelam. Jo Curia te canne kuno, i tyen i nyime, me lweny kede; lweny daŋ te doŋ ere oko. Jo Curia te dok mukere oko i ŋwec i nyim jo Icrael; Daudi te neko jo Curia mia abiro ame riŋo i gadigadi kede wegi aguragura tutumia pyeraŋwen, te cobo daŋ Cobak, atel wi monygi oko, ame te to daŋ oko kuno. Kare ame obakki luŋ ame onwoŋo tye doŋ i te loc abaka Adadejer oneno jo Icrael ologi oko, gin doŋ te cako poro kop me bedo i kuc i jo Icrael. Gin doŋ te bedo ite locgi. Mannono te miyo jo Curia bedo i lworo me medde konyo jo Ammon. I kare ame oro geye agea, ame kare ame obakki maro ero iye lweny, Daudi ocawo Yoab, kun woto omiro mere, kede jo Icrael luŋ; gin te wot yako jo Ammon, ote daŋ mako boma me Rabba oko, Daudi onwoŋo odoŋ i Jerucalem. I nino moro acel otyeno, i kare ame Daudi oya i kabuto mere, te bedo wowota i wi ot abaka, en obolo waŋe i wi ot kuno te neno dako moro ame onwoŋo tye alwoko kome; dako-naca onwoŋo mwonya meicel. Daudi te cwayo lo moro me wot koŋ niaŋ i kom dako-nono. Lo moro te kobo ni, “Mannono gire Batceba nyaka a Eliam, dako a Uria, ame obedo dano me atekere a jo Kitti.” Daudi to oro okwena, ame te wot kwanye oko i kuno, ote kele baŋe, en te buto kede. Eka Batceba te dok tuŋe. I kare-nono dako onwoŋo pwod olwoko two dwe mere alwoka, Icennere dako oniaŋ ni eyac, en te cwayo kop baŋ Daudi ni yie tye. Daudi te cwayo kop baŋ Yoab ni, “Koŋ icwal Uria me Kitti bin baŋa.” Yoab daŋ te cwayo Uria baŋ Daudi. Kare ame Uria obino baŋe, Daudi open ye ka ce Yoab tye aber, kede karacel kede kite ame lwak tye kede, kede kite ame lweny tye ka wot kede. En doŋ te kobbi Uria, ni “Koŋ iwot iwe paco tuŋi.” Uria daŋ te ya oko lot abaka. Daudi te cwayo mot lubo yore. Cite Uria gire te buta i doggola me ot abaka kun buto karacel omiro adwoŋŋere luŋ; mom naka gire te tuno tuŋe. Kare ame okobbi Daudi ni, “Uria gire mom owoto tuŋe.” Daudi okobbi Uria ni, “Koŋ inen yin pwod idwogo adwoga i kannabor; piŋo kara mom iwoto tuŋi?” Uria te kobbi Daudi ni, “Jo Icrael kede jo Juda tye teŋe i lweny, kun canduk a Rwot daŋ tye baŋgi kuno; adwoŋŋa Yoab kede omiro mere tye ka buta oko i bar; kara atwero wot nino tuŋa, ate wot cam, mate, kun abuto daŋ kede cega? Kite ame itye kede kwo-ni, dok kwoni daŋ pwod tye-ni, mom abino timo kodi tim man.” Daudi te kobbi Uria ni, “Tin koŋ doŋ ibed kan iwe iye, eka diki ate bino cwayi dok cen.” Uria te ri i Jerucalem i nino-nono kede orwo mere. Daudi olwoŋe, te wot cem kede, te pite daŋ i koŋo atek, cite en gire odok i kabuto mere baŋ omiro abaka; mom gire owoto tuŋe. Odiko mere, Daudi te coyo waraga baŋ Yoab, te miyo Uria tero. Kop ame en ocoo iyi waraga ene: “Ket Uria kan ame lweny tye alyet iye, eka yin ite dwogo giri oko cen me cobe neke oko.” Doŋ i kare ame Yoab tye ka guro boma, en te keto Uria kan ame en niaŋ ni okwor iye tek i lweny. Jo me boma-nono te kato lweny i kom Yoab, ote neko omiro a Daudi mogo oko; Uria ame obedo dano me Kitti daŋ ote neko oko. Yoab te cwayi Daudi kop kun titte kite ame lweny owoto kede; en okobbi akwena ame en ocwao ni, “Ka doŋ ityeko titti abaka kop ducu i kom lweny, ka ce abaka yie owaŋ te penyi ni, ‘Piŋo kara omio iwoto wunu ceggi acega i boma me wot lweny iye? Wun onwoŋo mom iŋeo wunu ni gin twero celowu i wi cel malo? Ŋa ame rik obin oneko Abimeleki wot a Jerubecet? Mom dako moro keken en a rik obao twon anya kidi moro adit i wi cel malo te cele kede, ame te miyo en to i Tebej? Piŋo kara omio wun iwoto wunu aceggi acega i cel?’ Yin myero doŋ ikobbe ni, ‘Amironi Uria, dano me Kitti, daŋ oto oko’.” Akwena-nono doŋ te wot titti Daudi kop ducu ame Yoab ore kede. Akwena te kobbi Daudi ni, “Okwor olwenyo i komwa atek meicel, gin obino i komwa i dye bar, wan dok ote dwokogi i ŋwec naka i dogcelgi. I kuno wegi atero te cako cecelo omironi kun obao aterogi i wi cel malo; mannono te miyo neko omironi mogo oko; amironi Uria daŋ ote neko oko.” Daudi te kobbi akwena ni, “Myero iwot ikobbi Yoab ni, ‘Kur dok ibed paro gin ame otimere-nono, pien pala lweny gire mom yero, poto tuŋŋi kede tuŋŋi, yin myero imedde lweny i kom boma-nono, tuno waŋ ame imao oko.’ Cukoro cunye ba.” Kare ame dako a Uria owinyo ni cware doŋ oneko oko, en okoko cware. Ame en doŋ otyeko kare mere me kwero cola, Daudi te cwayo okwena, te wot kele doŋ i ode, te doŋ doko dako mere; dako-nono te nywale atin awobi. Cite gin ame onwoŋo Daudi otimo-nono mom oyomoro cuny Rwot. Rwot rik te cwayo Natan baŋ Daudi. Natan obino baŋe te kobbe ni, “Yam tye jo moro aryo ame gin luŋ bedo i boma acel, acel onwoŋo alonyo, acel onwoŋo acan. Alonyo onwoŋo tye kede lwak rommi, dyegi kede dok apipim; cite acan onwoŋo mom tye kede ginnoro, kono ka akale romo keken, ame onwoŋo daŋ en owilo awila. En owilo te kelo tuŋe, te pito doŋo i ciŋe kun bedo karacel itino mere. Romo mere-nono onwoŋo camo ŋid cammere, mato pii i kopo mere, buto-gu i kore; onwoŋo doŋ tye acalo nyare. I kare moro welo moro te coro alonyo, alonyo mom te ye kwanyo lee moro i akina limmere me tedo welo mere; akaka mege en dok te wot omo romo acan-ca, en ame te neki welo mere.” Akemo te mako Daudi meicel i kom dano ame okobo kop i komenono, en te kobbi Natan ni, “Kite ame Rwot tye kede kwo-ni, kodi dano ame otimo timmono porre to! En myero cul waŋ gin ame etero-nono tyen aŋwen twal, pien otimo kittono kun kica mom daŋ mako.” Natan te kobbi Daudi, ni “Yin ibedo dano-nono. Rwot Obaŋa me Icrael okobo ni, ‘An ayeri me bedo abaka ame loo Icrael, alari i ciŋ Caulo; an ate lunyo miyi ot adwoŋŋi i ciŋi, mon adwoŋŋi daŋ amiogi luŋ baŋi, ate daŋ miyo jo Icrael kede jo Juda. Ka ce man onwoŋo pwod nok anoka baŋi onwoŋo pwod dok atwero meddi en apol a rom mannono. Piŋo kara yin doŋ icao kop a Rwot, ite timo tim arac i nyime? Koŋ inen yin ineko Uria dano me Kitti, i pala lweny, yin ite tero dako mere bedo cegi, kun yin imio pala lweny a jo Ammon oneke oko. Nen ba, aman pala romo mom doŋ bino rwenyo i odi, pien yin icaa, ikwanyo dako a Uria, dano me Kitti, me bedo cegi.’ Mannono omio Rwot okobo ni, ‘Nen ba, abino doŋ miyo timmogo areco bino i komi kun amio ya gire i odi; abino kwanyo monni oko i baŋi kun yin daŋ ineno, ate lunyo miyo baŋ awotti, en bino buto kede monni i waŋ ceŋ. Pien yin rik itimo man imun, cite an abino miyo man timere iwaŋ cen i nyim jo Icrael luŋ.’ ” Daudi te kobbi Natan ni, “An doŋ atyeko timo bal i kom Rwot.” Natan te kobbi Daudi ni, “Rwot doŋ otyeko jwayo balli oko; mom doŋ ibino to. Kadi bed amannono, pi tim man ame yin itimo, ame cimo atira ni yin doŋ icao giri Rwot oko, atin ame onywalo-nono bino to oko.” Natan te wot gire oko tuŋe. Rwot te goyo atin ame dako a Uria onywalo baŋ Daudi, two te mako oko. Daudi te bedo bako doge baŋ Rwot pi atinnono, te kanyo kec; odonyo icika mere te wot buto piny i dye ot naka piny oru. Adwoŋ ame loo ode obino te cuŋ i laŋete kun mito ni en ya malo; cite mom otwerre, naka en daŋ mom ocamo ginnoro karacel kedgi. I nino me abiro mere, atin te doŋ to oko. Omiro a Daudi te bedo kede lworo me titte ni atin doŋ otyeko to oko; pien gin onwoŋo okobo ni, “Koŋ inen i kare ame atin onwoŋo pwod kwo, wan okobo kede, cite mom oye winyo kopwa; kara wan dok otwero kobbe nino ni atin doŋ oto oko? Naka mio en twero timo ginnoro arac i kome kene.” Kare ame Daudi oneno ni omiro mere tye amuŋo kengi kengi, en oniaŋ ni atin doŋ oto oko; en te penyo omiro mere ni, “Atin doŋ otyeko to oko?” Gin te gamo ni, “Oto oko.” Daudi doŋ te ya oko malo i dye ot, te lwoko kome, wiro kede moo, te loko ruk onwoŋo tye i kome oko. En oya te wot i ot a Rwot, te wore; oya i kuno te wot doŋ atira naka i ode. En openyo cem, ote miye camo. Omiro mere te penye ni, “Man dok kodi gin aŋo ame yin itimo nie? Ikoko atin kun ikanyo kec i kare ame en pwod tye kwo, cite i kare ame atin oto, yin ite ya malo cako cem.” Daudi te kobo ni, “Kare ame onwoŋo atin pwod kwo, akoke kun daŋ akanyo kec; pien onwoŋo akobo ni, ‘Ŋa kara aŋeo ka Rwot onwoŋo mom twero tima kica, te weko atin bedo kwo?’ Cite aman en doŋ oto oko; ŋo ame omio dok amedde kanyo kec? Atwero dok miyo en dwogo cen? An en ame abino lube kuno, cite en mom dok bino dwogo cen baŋa.” Daudi te doŋ cako kweyo cuny dako mere Batceba; en odonyo baŋe, te wot buto kede; Batceba te nywalo atin awobi, Daudi te cako nyiŋe Culeman, Rwot te bedo kede mar i kom atinnono. Rwot te cwayo kop baŋ adwarpiny Natan, te wot cako nyiŋ atinnono ni Jedidia, pien Rwot omare. I kare-nono Yoab te bedo lweny i kom Rabba, ame en boma a jo Ammon, en te mayo boma adwoŋ ame abakagi onwoŋo bedo iye. Yoab te cwayo kwena baŋ Daudi kun kobo ni, “Atyeko lweny i kom Rabba, amao daŋ boma me pii oko, Yin myero doŋ icok jo ame odoŋ luŋ karacel, me ibin igur boma-nono, imak oko; naka mio an en ame amako boma-nono, ote doŋ lwoŋo kede nyiŋa.” Mannono te miyo Daudi coko lwakkere, te wot i Rabba, te wot lweny i kome, mako oko. En te kwanyo tok kwogo abakagi me jabu oko i wie; pekkere onwoŋo romo ratili mia acel; gweŋŋoro me wel onwoŋo tye i yie. Tokkono ote keto i wi Daudi. Daudi te daŋ kelo jami ame oyako i boma-nono adwoŋ meicel. Dok te daŋ kelo jo me kuno, te ketogi i tic, kun otio kede ocumeno, cururu me nyonyo, lee me nyonyo, dok daŋ otio tic atek me goyo matafali. Daudi obedo timo kittono i kom boma a jo Ammon luŋ. En doŋ te dwogo cen i Jerucalem karacel kede lwakkere. Abicalom wot a Daudi onwoŋo rik tye kede aminnere ame mwonya meicel, nyiŋe Tamali; wot a Daudi ocele a nyiŋe Amunon rik te cako bedo kede mit i kome. Mit adwoŋ meicel ame onwoŋo en tye kede i kom aminnere Tamali omio en oŋoye oko i kabuto ni kome lit; pien Tamali onwoŋo rik mom ru oŋeye kede lo moro, ame mio buto kede bedo tek meicel baŋ Amunon. Cite Amunon onwoŋo rik tye kede awottere ame nyiŋe Jonadab, wot a Cimea, ame obedo omin a Daudi. Jonadab onwoŋo obedo lo moro ame ryek meicel. En openyo Amunon ni, “Ama wot abaka piŋo kara yin nino ducu odiko, inen calo dano a kome mom yot? Piŋo kara mom ikobba?” Amunon te kobbe ni, “Mit en ame odia i kom Tamali, ame obedo amin ominna Abicalom.” Jonadab te kobbe ni, “Yin myero ibut oko piny i wi tandani ite bedo acalo ŋat a kome lit; doŋ ka pappi obino, me bino neni, yin myero ikobbe ni, ‘Mi aminna Tamali bin mia ogati moro me acama, en bin yik cammono baŋa kan, ate camo kun en omako i ciŋe. Amunon te daŋ buta piny, te bedo acalo ŋat a kome lit. Kare ame abaka obino me nene, Amunon okwao pappere ni, “Tim ber imi aminna Tamali bin teda capattoro baŋa kan, me acam kun en mako i ciŋe.” Daudi te cwayo kop baŋ Tamali kun kobo ni, “Wot i ot ominni Amunon, iwot iyike ginnoro me acama kuno.” Mannono te miyo Tamali daŋ te wot naka i ot ominnere Amunon, kan ame onwoŋo en obuto iye. Tamali te juko moko, te tedo kede capat baŋe kuno. En otedo ogati, te toko tero baŋe, cite en gire te kwero camo oko. Amunon te kobbe ni, “Koŋ imi jo luŋ ya oko i baŋa, owot oko.” Jo daŋ te ya gigi oko i baŋe. Amunon te doŋ kobbi Tamali ni, “Aco kella doŋ cam tyelo kan, me acam kun yin imako i ciŋi.” Tamali te tero capat ame etedonono naka iyi cika tyelo baŋ ominnere Amunon. Cite i kare ame en doŋ okelo baŋe aceggi, me en cam, Amunon oyoro ciŋe te kobbe ni, “Biye, abut kedi aminna.” Tamali te kobbe ni, “Pe amannono ominna, kur imaka tetek; pien kodi tim man mom gire timere iyi Icrael. Kur itim tim me miŋe-ni ba ominna.” Kara an abino yeyo kodi lewicci adok kede tuŋ kwene ba? Nen, yin daŋ ibino bedo ŋat acel i akina omiŋo ame tye i Icrael. Tim ber ipeny abaka pira, aniaŋ ni en gire bino miya baŋi.’ ” Cite Amunon mom oye winyo koppere kadi acel; kite acalo en onwoŋo tek kato Tamali oko, omake tetek, te buto kede. Amunon dok te cako doŋ dago Tamali atek meicel; kite ame en odage kede kato kite ame onwoŋo en rik koŋ okwoŋo mare kede oko. Amunon te kobo ni, “Aco doŋ cuny ya, iwot oko.” Cite Tamali te gamo ni, “Pe amannono ominna; pien tim man arac, me cwaya oko tetek, rac kato en ame doŋ itimo oko i koma.” Cite Amunon mom oye winyo koppere kadi acel. En olwoŋo awobi mere ame onwoŋo tio baŋe, te kobbe ni, “Cwa dako-ni i nyima teŋe, ite cego doggola oko.” I kare-nono onwoŋo en oruko twon gomici moro abor naka piny kun daŋ bade boco, pien mannono en kit ruk a rik anyira abaka a mom ru oŋeye kede co ruko. Mannono daŋ te miyo amiro Amunon cwaye oko, te cego doggola oko. Tamali te juko wie kede buru, te yeyeco ruk i kome oko, okwako wie, te wot kun akoko. Ominnere Abicalom te penye ni, “Ominni Amunon ce obuto kedi? Aco doŋ lin giri, aminna; en obedo ominni; kur doŋ ibed i parroro i gin a en otimo.” Mannono te miyo Tamali bedo kene aboŋo cware i ot ominnere Abicalom. Kare ame abaka Daudi owinyo kop magi ducu, akemo omako meicel. Cite Abicalom mom te kobo kopporo baŋ Amunon, kadi aber onyo arac; pien Abicalom onwoŋo doŋ ocako dago ominnere Amunon pi buto aminnere Tamali tetek. Kare ame mwaka aryo doŋ okato, Abicalom obedo i jo ame mworo yer i kom rommi i Baal-kajor, ame ceggi kede Epraim; en olwoŋo awobe abaka luŋ me wot kuno. Abicalom owoto baŋ abaka, te wot kobbe ni, “Nen ba adwoŋ, an amironi atye kede omwor yer rommina. Tim ber, yin abaka karacel kede omironi, ibin wunu kuno.” Cite abaka te kobbe ni, “Pe amannono atinna, ka wan luŋ owoto, obino miyi peko.” Abicalom te medo diye atek, cite en mom te ye wot, ento te lunyo lamme ka winyo. Abicalom te dok medo kwayo ni, “Tim ber, ka yin mom iwot, imi ominna Amunon doŋ wot kedwa.” Abaka te penye ni, “Kara omio yin imito ni en wot kedwu kono?” Cite Abicalom te medo diye, omio en te miyo Amunon kede awobe abaka luŋ wot karacel kede. Abicalom te ciko omiro mere ni, “Nenu ka Amunon omato koŋo ame cunye doŋ yom; ka akobbiwu ni, ‘Cobe wunu’, kur ilwor wunu, neke wunu oko; wun ti wunu gin ame aciko. Di wunu cunywu, bed wunu atek.” Omiro Abicalom te timo Amunon kite ame Abicalom ocikogi kede. Awobe abaka luŋ te ya oko malo, ŋat acel acel te yito i wi kana mere ŋwec oko. Ame gin mom ru otuno paco, kop te tuno baŋ Daudi oko, ni “Abicalom oneko awobe abaka luŋ, ame moro i akinagi mom obwot.” Abaka oya malo, te yeyeoo ruk i ko me oko, te buto piny i lobo; awobe mere ame onwoŋo tye baŋe kuno, te daŋ yeyeco ruk i komgi oko. Cite Jonadab, wot a Cimea ame obedo ominna Daudi, te kobo ni, “Adwoŋŋa myero kur tam ni doŋ otyeko neko awobe mere luŋ, pien Amunon gire keken en ame oto. Man en gin ame onwoŋo Abicalom oyiko con, cakere i kare ame Amunon obuto aminnere Tamali tetek. Doŋ ba, adwoŋŋa abaka, myero kur dok ibed paro ni awobe ni luŋ doŋ oto oko; pien Amunon gire kene en ame oto.” Abicalom te ŋwec gire oko. Awobi ame onwoŋo tye akuro piny te tiŋo waŋe malo, te neno jo apol meicel tye aciro abino i tutuŋ yo ame woto Koronaim, ame tye i ŋet kidi. Jonadab te kobbi abaka ni, “Gin ame amironi okobo, ocobere gire oko, awobeni obino doŋ oko.” Oyotoyot ame en doŋ otyeko kop, awobe abaka te tuno oko; gin luŋ ote mwoco koko oko. Abaka karacel kede omiro mere luŋ te daŋ kok atek meicel. Abicalom te riŋo naka baŋ Talmai wot Amikud, ame abaka me Gecur, Daudi te bedo kumo pi wode pi kare alac meicel. Mannono kite ame Abicalom oriŋo kede i Gecur, te wot bedo kuno pi mwakki ame romo adek. Icennere abaka te cako bedo kede mit me wot baŋ wode Abicalom; pien cunye onwoŋo doŋ okwe oko pi Amunon, kite ame onwoŋo doŋ oto kede oko-ni. Yoab wot a Jeruya rik te niaŋ oko ni abaka doŋ ocako paro pi Abicalom. Yoab te cwayo kwena i Tekoa, ote wot kelo dako moro i kuno ame onwoŋo ryek atek, en te kobbe ni, “Por bedo acalo dano moro ame tye i twon kumo moro adwoŋ meicel, ruk boŋo me cola i komi; kur daŋ iwirre kede moo moro. Myero ibed kom acalo dako moro ame okumo pi dano mere oto pi kare alac meicel. Wot kittono i nyim abaka, iwot ikobbe kit man.” Yoab doŋ te cako porre kop ame emito ni en wot kobbi. Kare ame dako me Tekoa-nono owoto baŋ abaka, en oryebere, te buto piny aryeba cuny i nyim abaka, te woro abaka, kun kobbe ni, “Konya ba, Ama abaka.” Abaka te penye ni, “Peko aŋo ame itye kede?” En te gamo ni, “An abedo dako to, adwoŋŋa, cwara oto oko. Nen ba, an onwoŋo atye kede awobe aryo, doŋ nino moro acel gin te cako da kengi i poto, kun ŋattoro ame dwekgi mom tye; aŋat acel te goyo awottere neko oko. Aman dok wattina luŋ owiro wigi i koma kun okobba ni, ‘Miwa wodi ame oneko ominnere ca me wan daŋ oneke oko pi kwo ominnere ame en oneko’. Aco mannono bino miyo gin oneko ŋat a kono le jami oko, ame en doŋ tol acel keken ame alego kede; cwara daŋ te doŋ nono aboŋo nyiŋe, akadi ŋattoro mere moro ame odoŋ i wi lobo.” Abaka te kobbi dako-nono ni, “Aco yin doŋ dok giri paco tuŋi, an abino cwayo cik ame mako kop i komi.” Dako me Tekoa-nono te dok kobbi abaka ni, “Ama adwoŋŋa, abaka, bal me ginnoro luŋ ame ibino timo, myero bed gire i wia kede i wi jo me doggola a pappa; balloro myero gire kur gud abaka kede kom me loccere.” Abaka te gamo ni, “Ka ce ŋattoro otemo yelli, myero ikelle baŋa: abino miyo caco kakari atwal.” Dakonono dok te kobo ni, “Ama adwoŋŋa, abaka, tim ber ikwon i nyiŋ Rwot Obaŋani, me wek lo aculo kwor meremo owek doŋ culo kwor kede remo, me kur nek woda.” Abaka te gamo ni, “Kite a Rwot tye kwo-ni, yer acelloro keken i wi atinni mom bino poto piny.” Dako te dok kobo ni, “Ama adwoŋŋa, abaka, tima ber doŋ akobbi kopporo acel keken.” Daudi te gamo ni, “Aco kobbi.” Dako-nono te kobbe ni, “Adwoŋ, kara piŋo yin dok ibedo kede tam me timo kodi timono i kom jo a Rwot? Pien kop ame ikobonono, mio abaka ŋolo kop i kome kene, ka ce abaka mom twero ye ŋat ame en oryemo dwogo paco. Wan luŋ gire obino to oko, wan orom aroma kede pii ame ony piny, ame mom dok romo twomere, cite Obaŋa gire mom bino kwanyo kwo a ŋat ame yenyo yo, me wek dano ame oryemo kur bed ŋat ame oryemo atwal. Doŋ ba, adwoŋŋa, an abino me kobo kop man baŋi, pien jo obedo miya bedo ŋat a lwor; an aŋecani ate tamo ni myero abin atit kop man baŋi, gwok onyo itwero ye timo gin ame akwai iye. Pien abaka bino winyo, te lara i ciŋ ŋat ame mito nekowa oko, an kede woda, me ekwanywa oko i lobo ame Obaŋawa omio baŋ jo mere me bedo megi. An amironi, onwoŋo atamo ni kop ame yin adwoŋŋa ibino kobo, bino miya awe; pien yin irom aroma kede amalaika Obaŋa, ipoko gin arac kede gin aber. Rwot Obaŋani, ogwoki, obed kedi!” Abaka te kobbi dako-nono ni, “Tim ber ikob kop ateni i kop ame apenyi iye-ni.” Dako te gamo ni, “Ama adwoŋŋa abaka, penya?” Abaka te penye ni, “Yoab daŋ oribere kedi i kop man ducu?” En te gamo ni, “Adwoŋŋa, abaka, kite ame itye kede kwo-ni, an mom dok atwero witi kop i kom kop ame ipenyo. Amironi Yoab en ame okobo gin ame myero abin ati kede gin ame myero akobbi. Amironi Yoab otimo man wek ekel alokaloka i kop ame otimere. Cite ryeko adwoŋŋa rom aroma i ryeko amalaika Obaŋa, en ŋeo jami luŋ ame timere i wi lobo.” Abaka doŋ te kobbi Yoab ni, “Nen ba, an doŋ aye timo gin ame imito. Wot iom atin Abicalom idwogo paco.” Yoab te ryebere buta piny, aryeba cuny, te woro abaka, te daŋ lamme winyo. Yoab te kobo ni, “Tin doŋ amironi oŋeo ni ipwoe, pien iye winyo kwaccere.” Yoab te doŋ ya wot naka i Gecur, te wot kelo Abicalom i Jerucalem. Abaka te kobo ni, “En myero koŋ bed kene i ode; en myero kur bin i nyima.” Mannono te miyo Abicalom bedo i ode en kene, mom daŋ te wot i nyim abaka. I kare-nono onwoŋo mom tye ŋattoro iyi Icrael luŋ ame opwoo ni kome ber a kato kom Abicalom; Abicalom onwoŋo ber odoco, geye kom i tyene tuno kede anaka i wie malo. Ka ce abaka en a rik olyelo yer wie, en pimo i mijan kun tio i kidi ame abaka omoko ni ti kede; doŋ rik ka onwoŋo yer wie olot atek ame wonnere daŋ winyo ni pek, ka opimo, pekkere romo ratili abic. En rik lyelo wie iyi agikki mwaka acel acel. En onwoŋo tye awobe adek kede nyako acel ame nyiŋe Tamali. Tamali daŋ rik onwoŋo twon nyako moro aber meicel. Abicalom rik te bedo mwaka aryo twal kun mom tuno i nyim abaka kadi acel. Icennere en te cwayo kwena baŋ Yoab, me wot tere i nyim abaka, cite Yoab mom gire te bino baŋe. En dok te medo cwayo kop tyen me aryo, cite Yoab mom daŋ dok te bino. Abicalom doŋ te kobbi omiro mere ni, “Wot iwaŋ wunu poto a Yoab oko, pien tye gire ceggi acega kede mega, aman cayiri tye iye.” Omiro mere te daŋ wot wawaŋo poto-nono oko. Yoab te wot baŋ Abicalom, te donyo naka baŋe i ot, eka te penye ni, “Piŋo kara omironi owaŋo potona?” Abicalom te gamo doge ni, “Koŋ inen, an abedo cwayo kwena baŋi ni myero ibin baŋa kan me acwai baŋ abaka iwot ipenye ni, ‘Ŋo kara omio an aya i Gecur oko ate bino kan? Mom onwoŋo gire twero bedo ber an rik ibedo kuno.’ ” Abicalom dok te medo ni, “Aman doŋ amito ni imia awot i nyim abaka; ka ce balloro tye i koma, en myero neka oko.” Mannono te miyo Yoab wot baŋ abaka te wot titte koppono, abaka te lwoŋo Abicalom. Abicalom te bino baŋ abaka, te ryebere piny i nyime, abaka te mote kun noto leme. A doŋ man okato, Abicalom te nwoŋo gadigadi mere kede aguragura mere ame en ikome loo, kede ocirikale pyerabic ame woto kede kun telo yo. I kare-naca en te bedo ya kare luŋ idiko con woto cuŋ i ŋet yo i dogcel me boma. Ka ce dano moro obino ame mito wot neno abaka pi tero kop me pyemmere moro i nyime, Abicalom lwoŋo dano-nono te penye ni, “Yin kara iya i paco mene?” Dano-nono te kobbe ni, “Adwoŋ, an aya i akina jo Icrael, iyi atekere a ŋadi.” Abicalom kobbe ni, “Nen ba, kokoni tye kakare, cite mom tye ŋattoro ame abaka oketo me winyo koppi.” Abicalom dok te medo kop ni, “Kono kom onwoŋo an aŋol kop a jo Icrael! Kono jo ame tye i koko onyo pido i kom owotegi bino bota, an kono aŋolo kop a jo atira.” Doŋ kare i kare ka ce dano moro obino te ryebere i nyime, en cwalo ciŋe, make, te mote kun noto leme. En te bedo timo amannono baŋ jo luŋ ame bino baŋ abaka ni bin ŋol kopgi; mannono omio en oloo tam a jo apol me Icrael. Kare ame doŋ mwaka aŋwen okato oko, Abicalom okwao abaka ni, “Ti ma ber iweka awot acob kwoŋŋa ame yam akwoŋo baŋ Rwot, i Kebron. Pien i kare ame a tye i Gecur i Aram, rik abin akwoŋo ni, ‘Ka ce Rwot bino miya adok cen i Jerucalem, an abino woro Rwot’.” Abaka te kobbe ni, “Apee wot giri kede kuc.” En te ya wot naka i Kebron. Cite Abicalom te cwayo kwena i muŋ i akina atekere luŋ me Icrael kun kobbigi ni, “Ka ce iwinyo wunu apel okok, wun myero ikob wunu ni, ‘Abicalom doŋ odoko abaka oko i Kebron.’ ” En rik te wot i Kebron i jo mia aryo ame en olwoŋo i Jerucalem me wot bedo acalo wele mere; jo-nono onwoŋo mom otye kede tammoro ocele, daŋ onwoŋo mom otye kede ŋeccoro i kom gin a timere. I kare ame Abicalom onwoŋo tye ka miyo mottere me yalo Obaŋa, en ocwao kwena i Gilo, wot lwoŋo Akitopel, ame obedo ami-tam a Daudi, ame en dano me Gilo. Yik me mayo loc a Daudi te bedo medde doko atek meicel kun wel jo Abicalom medde ameda. Dano moro te kelli Daudi kop kun kobbe ni, “Aman tam a jo luŋ doŋ tye i kom Abicalom.” Daudi te kobbi omiro mere luŋ ame rik onwoŋo tye baŋe i Jerucalem ni, “Ya wunu, me oŋwec, olwi wunu oko; naka mio yo moro bino loyowa oko me bwot i ciŋ Abicalom; ru wot wunu oyotoyot, naka mio en bino makowa i waŋayo, te timo gin arac i komwa, eka te rweyo jo i boma oko i pala lweny.” Omiro abaka te kobbe ni, “Nen ba, omironi doŋ tye ame oyikere oko me tiyo gin ame abaka bino moko.” Abaka doŋ te ya oko, kun woto karacel kede jo me ode luŋ. En oweko monnere ame aŋeca tomon, me gwoko paco. Abaka te wot kun jo luŋ lubo yore; gin te wot cuŋ koŋ i ot me agikki. Omiro mere luŋ te kato kun obeo i ŋete; jo Keret kede jo Pelet luŋ, kede jo mia abicel, ame gin luŋ obedo jo ame oya i turgi Gat te lube, gin daŋ ote kato anyim i nyim abaka. Abaka te penyo Ittai, dano me Gat ni, “Piŋo kara yin daŋ iwot kedwa? Yin dok cen iwot ibed wun abaka, pien yin giri arok, dok daŋ yin ariŋ ayela ame oŋweco aŋweca i lobo mere. Yin pwod en ibino aworo awora ora-ni, ŋo ame mio yin dok icako loŋo piny keda kun daŋ an mom aŋeo kan ame awot iye? Yin dok cen, ter daŋ omegoni, Rwot myero nyut marrere a mom lokere kede gennere i komi.” Cite Ittai te kobbi abaka ni, “Kite a Rwot tye kede kwo-ni, dok yin adwoŋŋa, abaka, daŋ itye kwo-ni, kan ame yin adwoŋŋa, abaka bino bedo iye, ka ito onyo ikwo, an amironi daŋ abino bedo kuno.” Daudi te kobbi Ittai ni, “Aco doŋ wot ikat anyim.” Ittai dano me Gat te kato anyim karacel kede jo mere luŋ anaka itinogi kede mongi. Jo luŋ te mwoco koko oko i dwon aloŋo i kare ame jo a Daudi ciro bea baŋgi, abaka te wot ŋolo luŋ me Kidron, jo luŋ te ciro kato tutuŋ tim. Abiatar obino, Jadok daŋ dok te bino, kun bino karacel jo Levi ame odyelo canduk me cikere Obaŋa; gin te cibo canduk cikere Obaŋa piny, tuno ka jo luŋ doŋ oya oko i boma. Abaka te kobbi Jadok ni, “Dwok canduk me cikere Obaŋa cen i boma. Ka ce Rwot opwoa, en pwod dok bino miya adwogo cen, ate dok neno naka kan ame en bedo iye. Cite ka en okobo ni, An doŋ cunya mom yom i komi, nen ba, an gira doŋ ene, en gire myero tim i koma gin ame en oneno ni ber baŋe.” Abaka te dok kobbi Jadok alamdog ni, “Aco yin doŋ dok cen kede kuc, yin kede Abiatar, karacel kede itino awobewu aryo, wodi Akimac, kede Yonacan wot Abiatar. Nen ba, an pwod abino wot bedo i dog kulo ame tye i ŋet tim, kun akuro kop i baŋwu.” Mannono te miyo Jadok kede Abiatar dyelo canduk Obaŋa dwoko cen naka i Jerucalem; gin daŋ doŋ te bedo kuno. Cite Daudi te wot malo i wi kidi me Jeituni kun kok, tyene nono, dok daŋ owumo wie oko. Jo luŋ ame onwoŋo tye baŋe te daŋ wumo wigi oko, ote medde i wotgi kun gin luŋ okoko. Eka ote miyo Daudi ŋeyo ni Akitopel daŋ onwoŋo tye i akina jo ame oyiko kop i kome kede Abicalom. Daudi te kobo ni, “Ama Rwot, tim ber ilok ryeko ame Akitopel mio odok ŋat amiŋo.” Kare ame Daudi otuno i wi kidi kan ame oworo iye Obaŋa, nen ba, Kucai dano me Arki te bino rwatte kede kun oyeyeco boŋo i kome oko, onyo kwoyo i wie, Daudi te kobo ni, “Ka ce imedde wot keda, ibino doko twon yeccoro apek meicel baŋa. Ento ka idok cen i boma, ite wot kobbi Abicalom ni, ‘An doŋ abino bedo gira amironi kite ame rik koŋ abedo kede amiro a pappi, aman doŋ an megi, mannono bi no miyo ilo tam Akitopel pira.’ Jadok kede Abiatar ame gin olamdog biŋo nwoŋo tye kuno. Yin myero itittigi ginnoro luŋ ame iwinyo i paco abaka. Nen ba, itinogi awobe aryo daŋ tye baŋgi kuno, Akimac wot a Jadok kede Yonacan wot Abiatar; itwero oro awobe-nono me kela kop ducu ame iwinyo.” Mannono te miyo Kucai ame obedo awot a Daudi bino i boma i kare ame Abicalom onwoŋo doŋ adonyo i Jerucalem. Kare ame Daudi pwod okato wi kidi anonok, Jiba ame obedo amiro a Mepibocet orwatte kede kun tye kede kane aryo ame otweo kome me bedo i komgi kun oyeo ogati ame romo mia aryo, etak olok otwo mia acel, nyig yen mia acel kede ocoe me koŋo olok acel. Abaka Daudi te penye ni, “Kara ikelo magi luŋ me ŋo ba?” Jiba te gamo ni, “Kane akelo me wot a jo me ot abaka, aco ogati kede nyig yen akelo me acama awobe kede koŋo me amata a jo ame ol oko i tim.” Abaka te kobo ni, “Kara doŋ Mecibocet akwar adwomŋ Caulo kono tye kwene?” Jiba te gamo ni, “En odoŋ i Jerucalem, pien tye atamo ni tin doŋ jo Icrael bino dwoko loc a kwaro mere Caulo i ciŋe.” Abaka te kobbi Jiba ni, “Nen ba, ginnoro luŋ ame yam mea Mepibocet aman doŋ megi.” Jiba te gamo ni, “An gira abedo amironi, berra myero medde nen i nyim, adwoŋŋa.” Kare ame abaka Daudi otuno i Bakurim, wat a Caulo moro ame nyiŋe Cemei, wot a Gera, obino me bino rwatte kede, kun tye aceno Daudi acena. En te bedo babao-gu Daudi kede omiro mere i gweŋe. Aco kono i caa-nono onwoŋo daŋ jo a Daudi luŋ tye; jo mere atek i lweny daŋ onwoŋo tye ogurre dyere. Cemei obedo cene kun kobo ni, “Wot teŋe lo-ni, wot teŋe lo-ni, yin aony remo a jo, yin lo a konyi pe-ni! Rwot doŋ oculo kwor meremo a jo ot a Caulo luŋ i komi, yin ŋat ame ileo loccere. Rwot aman doŋ otyeko miyo locci oko i ciŋ wodi Abicalom. Can doŋ i wii giri, pi bedo onyo remo a jo.” Abicai wot a Jeruya te kobbi abaka ni, “Adwoŋŋa, piŋo kara ibedo weko gwokkoro oto oko-ni abedo ceni? Wek awot baŋe kuno me awot aŋol nute oko,” Cite abaka Daudi te kobo ni, “Ilaro wunu kara ŋo keda wun itino a Jeruya? Ka ce en tye acena pien Rwot en okobbe ni myero en cena, na doŋ ame twero penye ni, ‘Piŋo kara itye itimo kittono?’ ” Daudi dok te kobbi Abicai kede omiro mere luŋ ni, “Koŋ inen wunu ka woda ame an anywalo mito neka; kara doŋ dano-ni ame obedo dano me Benjamin-ni kono? Weke wunu gire, wek en medde i ticcere me cena, pien Rwot en okobo ni en cena. Gwok onyo Rwot bino neno can ame atye kede te miya gummoro ya akaka cen ame ocena kede tin-ni.” Daudi kede jo mere te medde gigi i wotgi. Cemei daŋ te bedo lubogi kun en beo i kor kidi, ame aceno Daudi, ababaogi i gweŋe dok daŋ kikiro apua tuŋ baŋgi. Abaka Daudi karacel kede jo a rik tye baŋe te tuno i Jordan kun doŋ ool atek; gin te weo koŋ kuno. Abicalom karacel kede jo Icrael luŋ te wot kede i Jerucalem kun Akitopel daŋ tye karacel kedgi. Kare ame Kucai awot a Daudi ame egeno atek, ame en dano me Arki, obino baŋ Abicalom, en okobbi Abicalom ni, “Kom abaka bed ayot! Kom abaka bed ayot!” Abicalom te penye ni, “Man en kite ame yin igeno kede awotti Daudi? Kara pi ŋo mom iwoto wun awotti?” Kucai te gamo ni, “Pe gire amannono. An atye pi ŋat ame Rwot oyero, ame jo man oyero, dok ame jo Icrael luŋ oyero. An abedo me a dano-nono kun abedo baŋe. Dok yin itamo ni myero an dok ati baŋ na? Mom myero an ati baŋ wode? Kite ame abedo tic kede baŋ pappi, abino daŋ tic baŋi kittono.” Abicalom doŋ te penyo Akitepel ni, “Koŋ doŋ imia tammi. Itamo ni myero wan otim gin aŋo?” Akitopel te kobbi Abicalom ni, “Wot ibut i mon a pappi ame oweko me gwoko paco; mannono bino miyo jo Icrael luŋ winyo ni yin doŋ idoko akwor a pappi ateteni, mannono bino miyo jo a lubi medde bedo i tekcuny.” Gin doŋ te guro kema pi Abicalom oko i wi ot abaka. Abicalom te doŋ cako buto i mon a pappere kun jo luŋ aneno. I kare-naca onwoŋo tam ame Akitopel mio, olubo aluba acalo tam ame oya i baŋ Obaŋa. Daudi kede wode Abicalom obedo lubo amannono. Akitopel te dok kobbi abaka ni, “Wek ayer jo tutumia apar wie aryo dyewor-ri, me awot aryem yo Daudi iwor amanni. Abino tuno baŋe nwoŋo en pwod ool dok wie daŋ pwod ocuŋ oko. Lworo bino babaŋo en oko, eka jo mere luŋ te ŋwec oko. An doŋ abino neko ka abaka keken, ate dwogo jo mere luŋ baŋi bala atera ame otero baŋ cware. Dano acel keken ame yin imito neko, jo doŋ te bedo gire kede kuc.” Tammere-nono te yomoro cuny Abicalom kede odoŋe luŋ me Icrael. Abicalom te kobo ni, “Koŋ dok ilwoŋ wunu Kucai dano me Arki, me owiny wunu dok koppere.” Kare ame Kucai otuno, Abicelom okobbe ni, “Man en tam ame Akitopel omiowa, itamo ni myero oti kede? Aco ka pe ber, yin kobbi.” Kucai te kobbi Abicalom ni, “Tam ame tin Akitopel omio-ni mom ber.” Te dok medde kobo ni, “Yin iŋeo aber ni pappi kede jo ame tye baŋe ca, gin obedo jo ame tek meicel i lweny, dok daŋ gin obedo jo ager calo ŋuu ame omako itino mere tim. Dok pappi en ŋat a tye i ŋec adwoŋ meicel i kom lweny; en mom twero buto karacel i lwak dyewor. Aman ca en doŋ tye opono oko i burroro onyo i kabedo moro apat. Doŋ ba, ka ce Daudi bino neko jo moro i lweny me agege, ŋat ame bino winyo keken, bino kobo ni, ‘Oneko jo Abicalom.’ Man bino miyo kadi ŋat atek i lweny, ame cunye ocwiny calo cuny eŋato, bino doko ŋat ame lwor; pien jo Icrael luŋ ŋeo ni pappi obedo twon lo moro atek meicel, dok jo ame tye baŋe obedo jo atek i lweny. Doŋ tam ame an amio ene, ni myero jo Icrael luŋ, cakere i Dan naka i Beer-ceba cokere baŋi, kun doŋ opol acalo kwoyo me dog nam, dok myero yin ikomi iwot kedgi i lweny. Mannono bino miyo wan onwoŋo Daudi kannoro keken ame en tye iye, wan ote corre i kome karacel calo toyo ame corre piny i lobo. Mannono bino miyo en karacel kede jo luŋ ame tye baŋe, moro mom bino bwot. Ka ce en odonyo i boma moro, jo Icrael bino kelo toli, ote wayo kede cel me bomanono reto piny kun mom oweko gweŋŋoro acel doŋ kuno.” Abicalom karacel kede jo Icrael ducu te kobo ni, “Tam a Kucai ber kato me Akitopel oko.” Pien Rwot onwoŋo omoko oko ni mom obino lubo tam aber ame Akitopel omio, me Rwot mi Abicalom en a luny poto i can. Abicai te kobbi Jadok kede Abiatar, ame gin luŋ obedo olamdog, ni, “Akitopel omio tam baŋ Abicalom kede baŋ odoŋe me Icrael kit man, ento an amio tamma kit man.” Aman wun doŋ myero icwal wunu kwena oyot baŋ Daudi kun ikobbe wunu ni, “Tin myero kur ibut i dog kulo tunŋi, myero ikanyakino idokoro tuŋ ca; me kur nek abaka oko karacel kede jo luŋ ame tye baŋe!” Yonacan kede Akimac onwoŋo obedo i En-rogel kun okuro kop, pien gin onwoŋo otye i lworo ni kur myero nengi ka odonyo i boma. Atin nyako moro onwoŋo tye ame bedo tero kop baŋgi, eka gin te wot titti Daudi. Awobi moro rik te nenogi oko, te wot titti Abicalom. Man omio gin aryo luŋ ote ru lwi, yutte oyotoyot, ote wot i ot a lo moro ame tye i Bakurim. Dano-nono onwoŋo tye kede bur pii i dyekallere, gin te wot lutte iyi bur piinono. Dako a lonnono te wot kwanyo awum wi pii te wot wumo i wi bur pii oko, te moyo kal iye, ame ŋattoro mom romo neno. Kare ame omiro Abicalom obino i ottono, gin openyo dako ni, “Akimac kede Yonacan kono?” Dako te gamo ni, “Jonnono odokoro loka tuŋ ca oko.” Kare ame gin oyenyogi kwe, gin odok cen i Jerucalem. Kare ame gin doŋ odok oko, Yonacan-gi te doŋ yitto oko iyi akoŋ, ote wot tito kop luŋ baŋ Daudi. Gin otitte gin ame onwoŋo Akitopel oyiko me timo i kome kun kobbe ni, “Ru ya oko iwot iŋol kulo idokoro tuŋ ca, pien Akitopel otyeko miyo tam kit man.” Daudi kede jo mere te doŋ cako ŋolo kulo Jordan. I kare ame piny ru onwoŋo gin luŋ doŋ odokoro tuŋ ca oko. Kare ame Akitopel oneno ni mom olubo tammere, otweo kom bedo i kom kana mere, te ya dok oko tuŋe, i boma me turgi. I kare ame en doŋ otyeko yiko jami mere ducu aber, odeye, te to daŋ oko. Rik ote yike i lyel a pappere. I kare ame Abicalom karacel kede jo mere tye aŋolo kulo Jordan, onwoŋo Daudi otuno oko i Makanaim. I kare-nono onwoŋo Abicalom oketo Amaca obedo atel mony akaka Yoab. Amaca onwoŋo obedo wot a lo moro ame nyiŋe Itra, dano me Icmael, ame onwoŋo onyomo Abigal nyaka a Nakac, am in a Jeruia, totta Yoab. Jo Icrael kede Abicalom te wot guro gonygi lobo Gilead. Kare ame Daudi doŋ otuno i Makanaim, Cobi wot a Nakac, ame onwoŋo oya i boma me Rabba, i lobo a jo Ammon, kede Makir wot a Ammiel ame onwoŋo oya i Lo-debar, kede Barjillai dano me Gilead, ame onwoŋo oya i Rogelim. Gin okelo gi-buto, wali lwok, kede guli; ote kelo daŋ giacama; ŋano, cayiri, moko bel ocelo, oraŋa, ŋor, moo kic, cak awac, rommi, kede cak dyaŋ opoto. Gin onwoŋo oŋeo ni Daudi kede jo mere kec bino neko, oryo pii bino cirogi dok obino ol iwot i tim. Abaka Daudi rik te kelo jo mere luŋ karacel, te popokogi i dul apapat, en ame tye iye jo tutumia kede en ame tye iye jo mia, kun keto daŋ otelgi. En omio acel me adek obedo i te loc a Yoab, acel me adek i te loc Abicai wot a Jeruia omin a Yoab, kede acel me adek i te loc Ittai me Gat. Abaka te kobo baŋ lwak ni, “An daŋ abino wot kedwu.” Cite lwak te gamo ni, “Yin gire mom ibino wot. Ka ce wan oriŋo onyo gin oneko nucu jowa, oko, gin gire mom bino paro wok. Yin irom kede jo tutumia apar ame tye i akinawa. Pi mannono ba, yin myero idoŋ i boma kan, kun icwalliwa ka kony.” Abaka te kobbigi ni, “An abino timo gin ame wun ineno wunu ni ber.” Daudi doŋ te cuŋ i ŋet dogcel kun monnyere ciro kato mia mia kede tutumia tutumia. En te ciko Yoab kede Abicai kede Ittai ni, “Amito i tim wunu ber pira, kur itim wunu ginnoro i kom woda Abicalom.” Jo luŋ owinyo kare ame Daudi ci ko otel magi luŋ pi Abicalom. Mony a Daudi te doŋ ciro wot i tim me wot lweny i kom jo Icrael. Gin te lweny kedgi i buŋ me Epraim. Mony a Daudi te loyo jo Icrael oko kuno. Lweny obedo arac meicel i nino-nono, oneko iye jo ame romo tutumia pyeraryo twal. Lweny onwoŋo olal oromo lobo-nono luŋ. Jo ame buŋ en oneko obedo adwoŋ akato jo ame oneko i pala lweny. Abicalom te rwatte atura i jo a Daudi. En onwoŋo tye i wi kana mere, kana mere te coro te kworo ame oculle acula, wi Abicalom te moko oko i akina jaŋ kworo, te doŋ kannono kun alyero alyera i dye yamo ata. Kana ame onwoŋo obedo i wie-ni omedde mere kede ŋwec anyim. Dano moro onene te titti Yoab ni, “Aneno Abicalom kun tye alyero alyera i akina jaŋ kworo kuca.” Yoab te gamo kop a danonono, kun penye ni, “Ikop nino? Inene ateteni? Piŋo mom ilebo alyer ireto piny? Yomcunnyere kono omio ami cekel me ryal apar kede del tweyo pyer.” Cite dano-nono te gamo ni, “Kadi bed onwoŋo imia cekel me ryal tutumia, onwoŋo mom aromo ryeyo ciŋa i kom wot abaka. Wan luŋ onwoŋo owinyo ka abaka cikowu wun luŋ, yin kede Abicai kede Ittai ni, ‘Tim wunu ber pira, kur itim wunu ginnoro i kom woda Abicalom.’ Kono onwoŋo an akwero bedo i woro i gin abaka ociko, ate neko Abicalom, abaka kono owinyo koppere oko; pien mom tye ginnoro ame mom abaka winyo. Yin ikomi kono iteno ciŋi iye oko.” Yoab te kobo ni, “Kop kedi abalo kare-nono.” Yoab te kwanyo toŋi adek, te tutuco kede etao Abicalom. Abicalom onwoŋo tye alyero i akina jaŋ kworo kun pwod kwo. Awobe apar ame onwoŋo mako jami lwenye a Yoab te cokere i kom Abicalom dopo gigi oko. Yoab doŋ te kuto apel me juko monnyere, gin doŋ te dwoggo oko cen i ryemo yo jo Icrael. Gin okwanyo kom Abicalom ote bolo i burroro atut, ame onwoŋo tye i buŋ, ote coko gweŋe yido i kome. Jo Icrael luŋ te ŋwec oko, kun ŋat acel acel dok paco mere. I kare ame Abicalom pwod kwo, en onwoŋo ogero ginnoro ame ocuŋ calo pagi me po pire i luŋ ame olwoŋo ni Luŋ abaka, pien onwoŋo en okobo ni, “An mom atye kede woda moro ame twero miyo jo medde poyo nyiŋa.” En te cako nyiŋ pagi me po pire-nono kede nyiŋe, omio naka atot tin pwod olwoŋo pagi mere-nono ni Abicalom. Akimac wot a Jadok te kobbi Yoab ni, “Wek ariŋ ater kop man aber-ri baŋ abaka, me awot akobbe ni Rwot doŋ olarre oko i ciŋ okworrere.” Yoab te gamo ni, “Pe gire; tin mom ibino tero kopporo baŋ abaka. Ibino tero nino ocele, cite mom tin, pien wot abaka oto oko.” En Yoab te kobbi amiro mere ame onwoŋo obedo dano me Eciopia ni, “Yin wot ikobbi abaka gin ame ineno otimere.” Dano-nono te ryebere piny i nyime, te cako ŋwec oko. Akimac wot a Jadok te dok medo penyo Yoab ni, “Gin atimere myero timere, ye wek an daŋ ariŋ alub dano ca.” Yoab te kobbe ni, “Piŋo kara cunyi apupuka meicel me wot atinna. Nen ba, mom tye mottoro ame ibino nwoŋo iye.” Akimac dok te medo kobo ni, “Gin a timere myero gire timere, an myero awotti.” Yoab te doŋ kobbe ni, “Aco ŋweci.” En te cako ŋwec oko kun lubo yo bar ame dok i luŋ me Jordan, en te lanyo dano me Eciopia oko i ŋwec. Ame Akima otuno, onwoŋo Daudi tye obedo piny i dyere me dogcel ame woto i boma, i dyere me dogcel i yie kede en i oko mere. Akurpiny onwoŋo tye malo i wi ot ame tye i wi apama me dogcel. Akurpiny te tiŋo waŋe neno dano moro ame tye ariŋo en kede iyo. Akurpiny olwoŋo abaka te kobbi abaka. Abaka te ko bo ni, “Ka en tye kene, tye amut ame en okelo.” Akimac te medde anyim ame doŋ ceggi acega i boma. Akurpiny te dok neno dano ocele kun daŋ tye ariŋo en kene, en te redo baŋ ŋat akuro dogcel kun kobbe ni, “Neno koŋ dano ocele dok tye ariŋo en kene.” Abaka Daudi te gamo ni, “Mannono daŋ tye kede amut ame en okelo.” Akurpiny te kobo ni, “Lo otelo yo ca ŋweco bala Akimac wot a Jadok.” Abaka te kobo ni, “Akimac dano aber, en okelo amut aber.” Akimac te redo kun kobbi abaka ni, “Jami ducu owoto aber.” En te ryebere piny i nyim abaka kun nyime gudo lobo, te kobo ni, “Pwoo Rwot Obaŋani, ame omio yin abaka iloo jo ame onwoŋo ojem i komi.” Abaka Daudi te penye ni, “Woda Abicalom tye aber?” Akimac te kobo ni, “Kare ame Yoab ora an amironi, awinyo twon wo adwoŋ meicel, cite mom aŋeo ŋo ame otimere.” Abaka te kobbe ni, “Aco koŋ doŋ bin icuŋ kan.” En te wot cuŋ kan ame onyutte. Dano me Eciopia te tuno, en te kobo ni, “An akelo amut aber baŋ adwoŋŋa abaka! Rwot tin doŋ otyeko lari oko i ciŋ jo luŋ ame onwoŋo ojem i komi.” Abaka te penyo dano me Eciopia ni, “Woda Abicalom tye aber?” Dano me Eciopia-nono te gamo ni, “Kono gin ame otimere i kom Abicalom timere i kom okworri luŋ kede jo luŋ ame jem i komi.” Cuny abaka te poto ni luc; te ya yitto oko malo iyi icika ot ame tye i wi apama i dogcel malo, te wot kok kuno. Kare ame en tye akok, okobo ni, “Oidoi, ama woda Abicalom! Woda Abicalom doi! Kono onwoŋo an en alunyo to akaka woda! Woda Abicalom doi!” Yoab rik te winyo ni abaka Daudi tye akoko wode Abicalom, kun kumo atek meicel pire. Man omio i nino-nono yomcuny me locgi olokere odoko kumo baŋ mony a Daudi luŋ, pien lwak onwoŋo owinyo ni abaka tye akoko wode. Jo te libere aliba me dok i boma, kun olibere acalo jo ame olwi alwia i lweny. Abaka owumo wie oko te kok i dwon aloŋo ni, “Oidoi, woda doi! Ama woda Abicalom! Ama woda Abicalom!” Yoab te wot donyo i ot baŋ abaka te kobbe ni, “Tin imio lewic omako omironi luŋ ame olaro kwoni, kede kwo itinoni awobe kede anyira, karacel kede kwo a monni ducu. Yin kare imaro jo ame dagi, ite lunyo dago jo ame mari. Man tin doŋ inyuto giri kannaler ni odoŋe kede omironi luŋ mom kara iparo giri pirgi kadi acel. Aneno oko ni kono woki Abicalom tye kwo kun wan luŋ oto, kono cunyi yom a mom kobere. Doŋ aman ba, myero iwot idwoggo cuny joni, ikob kedi i kica. Ka ce yin mom iwoto, an akwoŋo akwoŋa i nyiŋ Rwot ni, diki odiko, dano moro acel i akina jo-ni mom dok bino nwoŋo tye baŋi. Man doŋ bino bedo twon cannoro adwoŋ meicel ame bino timere i komi ame kato kit cannoro luŋ a yam otimere i komi cakere i kare me tinoni tuno kede naka tin.” Abaka te ya wot bedo i ŋet dogcel me boma. Jo mere luŋ te winyo ni en onwoŋo tye obedo i dogcel, gin luŋ ote, bino baŋe kuno. Jo Icrael onwoŋo oriŋo gigi oko luŋ, kun ŋat acel acel dok paco mere. Atekere me Icrael luŋ onwoŋo doŋ ocako laro kop kengi kengi i kabedo ducu kun okobo ni, “Abaka Daudi en ame rik olarowa i ciŋ okworwa. En a daŋ rik olarowa i ciŋ jo Piriciti. Aco aman en oriŋo oko i lobowa pi riŋo Abicalom. Dok en Abicalom ame rik wan owiro kede moo ni bed abakawa, otyeko neko oko i lweny. Kara doŋ aman ŋo ame geŋowa poro kop me dwoggo abaka Daudi?” Gin ame jo Icrael obedo laro i akinagi te winyere baŋ abaka Daudi; omio en te cwayo kop baŋ olamdog, Jadok kede Abiatar kun kobbigi ni, “Kobbi wunu odoŋe a jo Juda ni, Piŋo kara wun idoŋ wunu cen me timo ginnoro me dwoggo abaka cen i ode? Aco kop a jo Icrael be doŋ otyeko tuno oko baŋ abaka. Wun en ibedo wunu wat abaka aceggi, wun ibedo wunu cogo mere kede riŋo kome ame inywako wunu remo; piŋo kara wun en ame dok idoŋ wunu cen me dwoko abaka cen?” Daudi te tittigi daŋ me kobbi Amaca ni, “Yin mom ibedo wat abaka ame inywako wunu kede remo? En okwoŋo akwoŋa ni, ‘Rwot Obaŋa mere myero mi ginnoro timere i koma ka ce mom eketi ibedo a lo mony akaka Yoab.’ ” Abaka Daudi rik te loyo tam a jo Juda luŋ, gin luŋ ote bedo i cuny acel. Lwak luŋ te doŋ cwayo kop baŋ abaka kun okobo ni, “Dwog giri oŋ, yin karacel kede omironi luŋ.” Mannono te miyo abaka cako dwogo cen naka i Jordan, jo Juda ame oya i Gilgal te wot rwatte kede kuno. Gin onwoŋo obino me bino omo abaka dwoko cen naka loka Jordan. I kare acellono daŋ, Cemei wot a Gera, ame obedo dano me Benjamin, ame oya i Bakurim, owoto oyotoyot karacel i jo Juda i Jordan me wot rwatte abaka Daudi. En obino i jo Benjamin ame romo tutumia acel. Jiba ame obedo amiro a jo me ot a Caulo, obino daŋ awobe mere apar wie abic kede omiro mere pyeraryo; gin luŋ oyutte oyotoyot, ote wot i Jordan naka i nyim Daudi. Gin oŋolo kulo Jordan i kan acecep, me wot omo jo abaka, kede pi tiyo ginnoro luŋ ame abaka bino mito ni gin oti. I kare ame abaka rik doŋ onwoŋo tye ayikere me ŋolo kulo Jordan, Cemei wot a Gera owoto te wot rette i nyime. En te kobbi abaka ni, “Timma ber adwoŋŋa, kur ikan balla i cunyi, kur daŋ ipo i ginnoro luŋ ame atimo arac i komi i kare ame iya i Jerucalem. Kur ikangi luŋ i cunyi, ama adwoŋŋa. An aniaŋ ni atimo bal, man en gin omio tin an en ageo bino baŋi me bino joli i akina jo luŋ me ot a Yucepu.” Abicai wot a Jeruya te gamo ni, “Cimei gire myero nek oko, pien en rik oceno ŋat ame Rwot oyero.” Cite Daudi te kobo ni, “Alaro kara ŋo kedwu ba, wun itino a Jeruya, ame omio tin idoko wunu calo okworra-ni? Tin myero dok nek dano me Icrael? Pien an mom ru aŋeo bo ni an doŋ tin abaka me Icrael?” Abaka Daudi te doŋ kobbi Cimei ni, “Yin gire mom ibino to.” En te kwon akwoŋa baŋ Cemei me moko koppere. Mepibocet, akwar Caulo te daŋ bino me bino jolo abaka. En obino kun mom olwoko tyene, oweko yer tike iyak ata mom daŋ olwoko boŋŋi mere, cakere i kare ame abaka Daudi oriŋo iye tuno ka en odwogo cen i kuc. Doŋ i kare ame en oya i Jerucalem me bino rwatte abaka, abaka openye ni, “Mepibocet we! Kara piŋo rik mom iwoto keda?” En te gamo ni, “Adwoŋ, kite ame iŋeo kede ni an amironi an aŋwalo, amirona en obola i mac. An akobbe ni, ‘Tweya kom i wi kana, me ayit i wi kana awot wan abaka.’ En okobo kop me goba i koma i nyimi, yin adwoŋŋa, aco kun yin icalo amalaika Obaŋa baŋa. Yin giri myero doŋ itim gin ame yin ineno ni ber. Pien jo me ot a pappa luŋ onwoŋo myero yin abaka inek luŋ, cite yin dok ilunyo keta an i akina jo ame cemo i mejani. An mom dok atye kede ginnoro ocele ame myero ayik kede nyiŋa baŋi yin abaka.” Abaka Daudi te gamo ni, “Piŋo pwod dok imedde titta kop i komi? An doŋ atyeko moko oko ni, yin kede Jiba, ibino poko wunu potti a Caulo ame tye luŋ i akinawu.” Mepibocet te gamo ni, “Wek en gire ter luŋ, kite ame yin doŋ ityeko dwogo oko paco i kuc-ci.” Barijillai dano me Gilead daŋ obino kun oya i Rogelin me bino omo abaka tero loka Jordan. Barjillai rik doŋ onwoŋo twon lo moro ame oti meicel, mwaka me dittere onwoŋo doŋ tye pyeraboro. I kare ame abaka onwoŋo tye i Makanaim, en omio abaka cam, pien en rik obedo twon lo moro ame alonyo meicel. Abaka okobbe ni, “Biye iwot keda i Jerucalem, an abino wot gwoki tuŋa kuno.” Cite Barjillai te gamo ni, “Adwoŋ, kara pwod dok adoŋ i mwaka adi me bedo kwo, ame mio dok awoto kedi i Jerucalem? Mwaka me ditta doŋ oromo pyeraboro twal, mom doŋ tye ginnoro ame twero kayo leba. Ginnoro luŋ ame acamo onyo amato, moro mom tye ame kao leba. Winyo wer a jo wero daŋ doŋ loa-gu oko. Mom myero dok awot kuno me wot miyi peko nono. An abino Iwoki anonok keken, ateri loka Jordan. Ŋo kara ame mio yin dok iromo cula kede twon mot ame rom mannono. Tim ber iwek an adok paco me awot ato iŋet lyel a pappa kede mea totta. Nen, amirona Kiman ene; itwero wot kede, me iwot itim baŋe gin ame yin ineno ni ber.” Abaka Daudi te gamo ni, “Kimam bi no wot loka karacel keda; abiŋo timo baŋe gin ame yin ineno ni ber. Dok daŋ ginnoro keken ame yin imito ni atim piri, abino timo.” Daudi kede jo mere luŋ te ŋolo kulo Jordan. En te moto Barjillai kun noto leme, te lamme gum. Barjillai te doŋ dok tuŋe, Abaka te wot naka Gilgal kun Kimam doŋ woto karacel kede; jo Juda luŋ karacel kede nucu a jo Icrael otere naka kuno. Jo Icrael luŋ te wot baŋ abaka Daudi, ote kobbe ni, “Adwoŋ, kara piŋo omio omegowa ame gin jo Juda, okwali ote ŋolo kedi kulo Jordan, yin karacel kede jo me odi kede joni luŋ?” Jo me Juda te gamo ni, “Wan otimo mannono, pien abaka obedo watwa ame ceggi meicel. Piŋo kara omio akemo omakowu i kop man? En owilliwa cam bo, onyo ca omiowa mottoro?” Jo Icrael dok te gamo ni, “I kom abaka wan otye i dul aromo apar twal, i kom Daudi daŋ wan giwa oloowu oko. Piŋo kara omio wun icaowa wunu? Wan mom en arik ocako poro kop me dwogo abakawa paco?” Cite kop a jo Juda te bedo agwa akato kop a jo Icrael. Lo moro ame rik kite rac rik onwoŋo tye kuno, ame nyiŋe Ceba. En rik onwoŋo obedo wot a Bikri dano me atekere a Benjamin. En rik te ero kuto apellere kun redo kede ni, “Wan giwa mom otye kede dulloro ame obedo megwa i kom Daudi. Wan giwa mom obino notte itimo ginnoro pi wot a Yece! Ŋat acel acel myero dok gire i kema mere, wun jo Icrael!” Mannono te miyo jo Icrael luŋ weko Daudi oko, ote wot gigi oko kun olubo Ceba wot a Bikri. Cite jo Juda omedde lubo abakagi aboŋo alokaloka moro i cunygi, cakere i Jordan tuno naka i Jerucalem. Daudi te dok i paco mere i Jerucalem. En te kwanyo mon apar ame rik eweko me kuro paco, te terogi i ottoro ame ogwoko agwoka. En te wekogi bedo kuno pi kare me kwogi luŋ calo mon ame coggi oto kun pokkigi cam kede jami ame gin mito, cite mom omedo buto kedgi acalo monne. Abaka Daudi te kobbi Amaca ni, “Lwon jo Juda bin baŋa kan kun nino adek mom ru okato, yin daŋ myero ibed tye i akinagi.” Amaca te wot lwoŋogi; te gal kuno kun mom ogwoko kare ame rik abaka ociko. Daudi te kobbi Abicai ni, “Ceba wot a Bikri bino yelowa atek akato Abicalom. Yin myero iru kwanyo omirona iryem kede yorgi, me en kur nwoŋ boma moro ame ocelo atek, ame te miyo en bedo yelowa.” Mannono te miyo Yoab, jo Keret, jo Pelet ked jo luŋ ame rik tek i lweny lubo Abicai. Gin oya i Jerucalem, ote ryemo yo Ceba, wot a Bikri. I kare ame gin doŋ otuno i gwen adwoŋ ame tye i Gibeon, Amaca orwatte kedgi. I caa-nono onwoŋo Yoab oruko boŋo me mony ame otweo i del, kun pala lwennyere iyi akure tye i pyere. Kare ame en onwoŋo tye ka wot, pala lwenyere te poto oko i pyere. En Yoab te moto Amaca kun penye ni, “Itye aber ominna?” Yoab te mako yer tik Amaca kede ciŋe tuŋ cem me enot leme. Cite Amaca onwoŋo mom oneno pala lweny ame onwoŋo Yoab omako i ciŋe. Yoab te cobo yie, cin yie te wukere oko. Amaca te to oko kun mom dok omedo cobe iryo. Yoab kede ominnere Abicai te doŋ ryemo yo Ceba. Dano acel i akina jo a Yoab ocuŋ i ŋet kom Amaca te kobo ni, “Ŋat a tye pi Yoab kede Daudi myero lub Yoab.” Kom Amaca onwoŋo obuto i ŋet yo kun apwodde i remo mere. Doŋ jo luŋ ame rik beo kannono, ka oneno kome, cuŋ koŋ oko. Dano a Yoab ka oneno ni jo luŋ ame neno kom Amaca cuŋ oko, otiŋe oko i ŋet yo, te tere teŋe i bar; en te wumo kome oko kede boŋo. Kare ame doŋ otyeko kwanyo kome oko i ŋet yo, jo luŋ doŋ te lubo Yoab kun oryemo yo Ceba wot a Bikri. Ceba onwoŋo obeo ocoro dye lobo atekere me Icrael luŋ, te tuno naka i Abel ame tye i ŋet Bet-maaka. Jo a Bikri luŋ ocokere karacel ote lube. Jo a Yoab otuno kuno te wot guro boma me Abel ame tye i ŋet Bet-maaka, ame onwoŋo Ceba tye iye; gin te cako toro lobo i kom cel me boma-nono kun ocoro kede apama cel boma-nono me mukere oko, Dako moro aryek te cako redo i boma kun kobo ni, “Koŋ iwiny wunu koppa ba! Winy wunu koppa ba! Kobbi wunu Yoab kato kan me abin akob kede koŋ.” Yoab te wot, baŋe. En te penyo Yoab ni, “Yin ennono Yoab?” Yoab te gamo ni, “An ennono.” Te kobbe ni, “Koŋ iwiny koppa an aŋecani ba.” Yoab te gamo ni, “An atye awinyo.” Dako-nono te kobo ni, “Tye caro kopporo acon ame jo rik tio kede ame kobo ni, ‘Koŋ wot peny iyi Abel’; mannono rik te miyo jo poro kop te tum aber. Bomawa-ni obedo boma adwoŋ mecel, en boma ame kuc dwoŋ iye atek dok daŋ genne iyi Icrael; aco koŋ inen ka yin imito boma ame en totta a jo Icrael. Ŋo kara ame omio imito balo lobo a Rwot?” Yoab te gamo ni, “Mannono gire gin ame mom aromo timo. An gira mom atye kede tammoro me balo boma kadi lobo man. Mannono gire mom kop ateni kadi acel. Cite ba, tye lo moro ame oya i lobo obedo kidikidi me Epraim ame nyiŋe Ceba, wot a Bikri en onwoŋo ocako jem i kom abaka Daudi. Wun myero imi wunu dano man baŋa me aya gira oko i boma man.” Dako-nono te kobbi Yoab ni, “Nen ba, wan obino bayo wi danono no baŋi kuno, beo iwi cel malo.” Dako-nu te bebea i akina lwak luŋ i tyeko mere. Gin te ŋolo ŋut Ceba wot a Bikri oko, ote bayo wie i wi cel malo, naka baŋ Yoab. Yoab te kuto apel oko, jo luŋ te ya oko i boma-nono, kun ŋat acel acel dok paco mere. Yoab te dok cen i Jerucalem baŋ abaka Daudi. Yoab onwoŋo obedo atel wi mony luŋ me Icrael; Benaya wot a Yekoyadi te bedo adwoŋ ame loo jo Keret kede jo Pelet. Aduram te bedo a loo tic awak. Yekocafati wot Akilud te bedo aco kop i kom ginnoro luŋ ame otimere. Ceva te bedo arannere. Jadok kede Abiatar te bedo olamdog; kede lo moro me a jo Yair, a nyiŋe Ira, en daŋ onwoŋo obedo alamdog a Daudi. I kare ame Daudi tye i loc kec obedo tye pi mwakki adek twal ame okolle akola. Mannono rik te miyo Daudi penyo Rwot pire. Rwot te kobbe ni, “Bal me onyo remo tye i wi Caulo kede jo me ode, pien gin oneko jo Gibeon.” Mannono te miyo abaka Daudi lwoŋo jo Gibeon. Jo Gibeon onwoŋo rik mom obedo jo Icrael, cite gin onwoŋo obedo jo Amor odoŋŋege ame jo Icrael rik onwoŋo ocikere me mom timo ginnoro i komgi. Cite Caulo pi mittere adwoŋ me gwoko jo Icrael kede Juda omio onekogi oko, Daudi okobbi jo Gibeon ni, “Gin aŋo amyero atim pirwu? Abino culo kwor meremo i yore aŋo, me ilam wunu gum i kom jo a Rwot?” Jo Gibeon te gamo ni, “Kop ame tye i akinawa kede Caulo onyo kede jo ode mom obedo gin amito ryal onyo jabu, dok daŋ wan mom myero onek dano moro me Icrael.” Daudi dok te penyogi ni, “Kara doŋ imito wunu ni atim gin aŋo pirwu?” Gin te gamo ni, “Caulo rik otimowa lit kun mito tyekowa luŋ ame dano moro kadi acel mom odoŋ iyi Icrael. Doŋ pi mannono ba, yin myero imiwa awobe mere abiro me owot odegi i nyim Rwot i Gibeon i wi kidi a Rwot.” Abaka te gamo ni, “Abino miyogi baŋwu.” Cite abaka opo pi kwoŋ ame rik ekwoŋo gin kede Yonacan wot a Caulo i nyim Rwot, omio en oweko Mepibocet wot a Yonacan odoŋ. Abaka Daudi rik te kwanyo awobe aryo ame gin obedo itino a Rijpa nyaka Aya, ame en rik onywalo baŋ Caulo nyiŋgi Armoni kede Mepibocet. Dok te kwanyo awobe abic ame gin obedo itino a Merab nyaka a Caulo, ame en rik onywalo baŋ Adriel, wot a Barjillai ame obedo dano me Mekola. Abaka te miyo jonnono i ciŋ jo Gibeon; gin te deyogi oko i kidi i nyim Rwot. Gin abiro luŋ oto karacel. Onekogi i nino ame rik ogeo iye kac, i kare ame ocako kayo iye cayiri. Rijpa nyaka Aya te kwanyo boŋo kwero cola wot peto i wi kidi kuno pire, en te bedo kuno cakere i kare ame kec ocakkere acaka tuno naka i kare ame kot ocwe i polo, ocorre i komgi. En rik mom oye winyo moro ogudo komgi dyeceŋ, akadi lee moro me tim dyewor. Kare ame Daudi owinyo gin ame Rijpa dako aŋeca a Caulo otio, en owoto te wot omo cogo kom Caulo kede mea wode Yonacan i baŋ jo Jabec-gilead. Jo Jabec-gilead rik akwalo kom Caulogi i dye boma me Bet-can kan ame onwoŋo rik jo Piriciti oŋabogi iye i nino ame gin oneko iye Caulo i kidi me Gilboa. Daudi te kwanyo cogo kom Caulo kede mea wode Yonacan, te daŋ coko cogo kom jo abiro ame onwoŋo odeo. Daudi te yiko cogo kom Caulo kede Yonacan i lyel a Kic papa a Caulo, ame onwoŋo tye i Cela i lobo a jo Benjamin. Ginnoro luŋ ame rik abaka ociko, jo otio. I ŋe mannono Rwot doŋ te ye kwac a jo pi lobogi. Lweny ocele rik te erre i akina jo Piriciti kede jo Icrael. Daudi te wot i jo mere, ote wot lweny i kom jo Piriciti. Daudi te lweny atek meicel i lweny kuno. Twon lo moro ame en dano acel ame oya iyi atekere a jo a komgi pek, ame nyiŋe Icbi-benob, ame onwoŋo tye i toŋ mola ame pekkere romo ratili aboŋwen kede nucu, dok ame onwoŋo tye i pala mere me romo anyen i pyere, te mito neko Daudi oko. Cite Abicai wot a Jeruya te bino konye oko. En olwenyo i dano me Piriciti-nono te neko oko. Jo a Daudi te ciko Daudi kun okwoŋo akwoŋa ni Daudi mom dok bino medo wot kedgi i lweny, pien naka bino miyo en ame obedo tara me Icrael to oko. A doŋ man otum oko, lweny dok te ere i kom jo Piriciti i Gob. Cibecai dano me Kuca te neko twon lo moro ame en dano acel ame oya iyi atekere a jo a komgi pek a nyiŋe Cap. Lweny ocele dok te ere i kom jo Piriciti i Gob, ame Elkanan wot a Jair-oregim ame obedo dano me Beterekem te neko iye Goliac dano me Gat, ame rik bol toŋŋere mito rom aroma i yat cweyo boŋo. Lweny ocele rik dok te bedo tye i Gat, kan ame rik tye iye twon lo moro odoŋo malo kun kome pek. Anyira ciŋe onwoŋo tye kanyape i ciŋe acel acel, anyira tyene daŋ kanyape i tyene acel acel, gin luŋ doŋ te bedo pyeraryo wie aŋwen. En rik dano ame oya iyi atekere a jo ame komgi pek. Kare ame en rik obino, en ocako ŋalo jo Icrael, Yonacan wot a Cemei omin a Daudi te neke oko. Daudi kede jo mere te neko jo a komgi pek aŋwen, ame gin obedo jo ame oya iyi atekere a jo ame komgi pek me Gat. Man en wer ame Daudi owero baŋ Rwot i kare ame Rwot olare i ciŋ okworrere luŋ kede i ciŋ Caulo, En owero kit man: “Rwot en obedo ka larrena atek meicel. Obaŋana en tek kato kidi twon kidi atek meicel ka alaro baŋe ginnoro mom doŋ guda. En geno koma calo kwot; en ka-larrena atek meicel ame ariŋo alaro. En a gire lara, en a daŋ gwoka, en lara i timmogo me byemi. An gira acwalo dwona baŋi yin Rwot, yin en a myero paki, yin ame ilara i ciŋ okworra. “Pien biamwonyi me to onwoŋo doŋ ogura oko dyere, biamwonyi me to onwoŋo doŋ ocorre oko i koma. Tol me Ceol onwoŋo doŋ olida ame ka weo pe, kun owic ata daŋ doŋ tye oterre oko i nyima. “An gira rik acwalo dwona baŋ Rwot i kare ame atye i peko, an gira acwalo dwona baŋ Obaŋana. En owinyo dwona i ode, kokona owinyere i yite. “I kare-nono lobo oyenere te wirre, acakki te polo daŋ oyeŋere kun myel ikikir pien akemo onwoŋo omako Rwot, Yito oduny malo kun donyo i wume, twon maccoro alyet te donyo i doge kede lodi mac okur atek. Odio polo odwoko piny, en te binopiny; kun piny col icuc i te tyene piny. En otwarre obino piny kun obedo i ŋe okerubi; yamo te ru riŋo kede oko piny. En te miyo piny acol wume oko ipuk; eka pol apek obedo pii keken te doko kema mere. Tuŋ nyime onwoŋo ler alera, kun lodi mac okur ya iye. Dwon Rwot te mwoc i polo, dwon Ŋat Amalo Meicel te winyere. Obao atero mere, okworrere te ket atata; omio lutkot owil, co te ket i ŋwec. Pii i dye nam opokere, tere te nen; acakki me te lobo te doŋ olaŋara, i kare ame Rwot juko okworrere, kun weo me wume kuto komgi. “Rwot ocwao bade i polo te mako ciŋa, en te waya oko i twon pii moro atut. En te lara oko i ciŋ jo atek ame daga, i ciŋ okwor ame onwoŋo mom aromo loyo. I kare ame atye kede can, gin ocako lweny i koma, ento Rwot gire te gwoka. Rwot olara, okela kan alac, pien cunye onwoŋo yom i koma. “Rwot omia mot me pwoya a rom aroma i kitena atira, omia winyo pien yia gire ler. An abedo gira lubo gin a Rwot mito; mom ru atimo ginnoro arac ame poka kede Obaŋana. Pien gin ame en ociko luŋ tye i nyima, dok daŋ mom ru akwero lubo icwillere moro. En oneno ni an a mom i balloro, agwokere gira i timo gin arac. Mannono omio Rwot oneno ni kitena atira, pien en oneno ni an yia gire ter. “Yin i Rwot ame inyutte keni baŋ jo a genne ni yin igenne dok daŋ inyutte keni baŋ jo a yigi ler ni yin yi ler. Jo a kitegi beco, yin inyutte baŋgi ni iber, eka baŋ jo a yigi col ite nyutte baŋgi ni itek. Yin giri ilaro jo a mwolle i nyimi, ento iciko waŋi i kom wegi abwone me iwagi idwogogi piny. “Yin giri ibedo tarana ame menya, ama Rwot, Obaŋana gire en amenyo piny acol ame tye iye. Yin en imia teko me loyo okworra kadi ocokere me lweny keda; Obaŋana gire en a mia teko me pye kalo cel. Gin ame Obaŋa-ni timo ber meicel; gin a Rwot ociko cobere kakare. En tye acalo kwot ame geno kom jo luŋ ame riŋo laro baŋe. “Ŋa kara ame dok obedo Obaŋa, mom Rwot keken? Ŋa ame dok tek calo kidi, mom Obaŋawa keken? Obaŋa-ni en ame obedo ka-larrena ame ageno, en a mia awoto i kuc. En mio tyena bedo calo tyen atil, en mia acuŋ atek i wi kiddi malo. En a pwonya i kite me lweny ame mio atwero telo akud atero me mola. Yin doŋ ityeko miya kwot me larre, kony ame imia omio adoko twon lo moro adwoŋ, Imio kakara obedo alac, omio tyena mom ocer. Aryemo okworra ate nekogi oko, akumo i komgi aboŋo weo naka ka gin otum, Aonyogi luŋ piny ame mom dok oromo ya co oradde atata i te tyena piny. Pien yin imia teko me lweny, imia aloo okworra oko. Imio okworra omukere oko i nyima ote lokka ŋegi; joamedaga doŋ atyeko okol weŋ. Otemo yenyo ŋat a myero konygi, cite mom onen, okok-gu baŋ Rwot, cite mom ogamo dwongi. Aŋinyogi apwot calo apua, ajejebogi odoco calo coto ame onyonyono i dye yo. “Yin en a rik ilara i baŋ jo ojem ite gwoka acalo aloc i wi rok apapat; jo a yam mom aŋeo doŋ tye i te locca. Rok ocele bino ryebere piny i nyima, ka owinyo kop i koma, ocako wora. Gin luŋ oonyo tonigi piny, ote wotte i ka-ponogi i myelkom. “Rwot akwo ame en kidi atek me larrena myero pwo! Obaŋana en a gire lara. Myero rab pi dittere! Obaŋana en omia aculo kworra; en omio rok luŋ odok piny i te locca, dok okwanya oko i ciŋ okworra. Yin en a rik itiŋa malo i wi okworra yin a rik ilara i ciŋ obyemi. “Man omio an gira abino pwoyi akina orok, dok abino wero wer me pako nyiŋi ama Rwot. Obaŋa gire mio twon loc adwoŋ meicel baŋ abaka mere; en nyuto mar a mom lokere baŋ ŋat a en oyero, baŋ Daudi kede baŋ ikwae waŋ i waŋ.” Man en kop ame Daudi okobo me agikki. Daudi wot a Yece rik obedo dano ame Obaŋa omoi obedo twon lo moro adwoŋ, en ŋat a rik Obaŋa a Yakobo oyero me bedo abaka; en daŋ a rik obedo lo adiro i cako wer a jo Icrael. Daudi rik okobo ni, “Cuny Obaŋa mia akobo koppere, koppere gire tye I leba. Obaŋa a jo Icrael doŋ otyeko kobo kop oko, Agwok jo Icrael okobba ni. Ŋat ame loo jo kun terogi arorom, ame loo loccere kun lworo Obaŋa, rom aroma i ceŋ ame ryeny odiko ame polloro mom tye kede kot ame mio lum tu i lobo. Mannono mom kite ame ikwaena bino bedo kede i nyim Obaŋa? Pien en otyeko cikere keda i cikere ame perakino atwal, oyiko iye kop ducu aber ame ginnoro mom romo balo. En bino medde konya kun yomoro cunya i gin luŋ ame amito. Cite jo luŋ a mom woro Obaŋa calo okuto ame obolo oko; pien mom oromo kwanyogi ciŋ nono. Ŋat ame gudo komgi myero ti nyonyo onyo bol toŋ; gin luŋ obino wanogi oko kede mac.” Man en nyiŋ jo a Daudi ame rik onwoŋo tek meicel i lweny: Yocebbacebet, dano me Takemon, en rik obedo atel a jo adek. En rik obin olwenyo kom i toŋ keken i kom jo mia aboro, te daŋ nekogi luŋ awaŋe acel. I akina jo adekkaca, ŋat ame lube onwoŋo obedo Eleajar wot a Dodo, wot Akoki. En rik onwoŋo tye baŋ Daudi i kare ame gin oŋalo jo Piriciti ame ocokere karacel me lweny i kom jo Icrael. I kare ame jo Icrael olokere odok cen, en onyono piny atek acalo ico, te lweny i jo Piriciti tuno waŋ ame ciŋe ojony atek, kun ciŋe gire otwo atwoa i kom pala romo mere. Rwot te miyogi loyo jo Piriciti atek meicel i nino-nono. I kare ame Eleajar doŋ otyeko lweny oko, jo Icrael odok kuno me wot doŋ gonyo ka ruk i kom jo ame oneko. Ŋat a rik lubo Eleajar obedo Camma wot Agee, dano me Arar. Jo Piriciti onwoŋo ocokere karacel i Leki, kan ame rik tye iye poto moro me ŋor. Jo Icrael rik te mukere oko i ŋwec i nyimgi. Cite en gire te doŋ i dye poto-nono kun gwoko, eka te neko jo Piriciti oko. Rwot te miye loyo jo Piriciti atek meicel i nino-nono. Ame kare me kac doŋ onwoŋo ceggi, jo adek i akina jo pyeradek adoŋo owoto baŋ Daudi i gorogoro kidi me Adullam, kun onwoŋo mony a jo Piriciti mogo oguro gonygi i luŋ me Repaim. I kare-nono onwoŋo Daudi tye i ka-pono mere ame egeno, kun mony a jo Piriciti mogo tye i Beterekem. Daudi onwoŋo tye kede mit adwoŋ meicel i cunye, omio en okobo ni, “Kono ŋattoro kom twero kella pii amata ame tye iyi akoŋ i dog cel me Beterekem.” Jo adek ca ame onwoŋo gin luŋ obedo jo atek meicel i lweny, ote yeco yogi kengi i dye gony a jo Piriciti, ote wot twomo pii iyi akoŋ i dog cel me Beterekem, ote tero baŋ Daudi. Cite Daudi mom te mato; en te lunyo onyo oko piny i nyim Rwot acalo koŋo olok me yalo Rwot, kun kobo ni, “Ama Rwot, mom gire atwero mato pii man! Ka ce amato, nwoŋo rom aroma ame amato remo a jo man adek ame ojalo kwogi, ote wot.” Mannono omio en gire mom omato pii-nono. Man en gin a rik jo adekkaca otimo. Abicai omin a Yoab wot a Jeruya rik obedo atel a jo pyeradek ca. En daŋ rik olwenyo kom i toŋ keken i kom jo mia adek, te neko oko luŋ; mannono te miyo nyiŋe cako rwo atek i akina jo pyeradek ca. En a doŋ rik obedo twon lo moro a ŋeye akato luŋ i kom jo pyeradek ca. En rik obedo atel wigi, cite en mom otuno i rwom a jo adek ocele ca. Benaya wot a Yekoyadi, dano me Kabjeel, rik obedo twon alwennyoro a ŋeye meicel; en otimo gigi mogo ame pirgi dito meicel. En oneko itino awobe aryo, ame onwoŋo rik obedo twoni jo alwenyo meicel i Moab. Dok en rik odonyo piny i bur i kare me pee, te wot neko iye eŋatu. Dok oneko daŋ twon lo moro me Miciri ame neno onwoŋo ber atek. Dano-naca onwoŋo rik tye kede toŋŋere i ciŋe, cite Benaya te wot baŋe ka i lut keken, te wot yuto toŋŋere i ciŋe-naca oko, ocobe kede te neko oko. Benaya wot a Yekoyadi otimo magi, omio en daŋ obedo twon lo moro a ŋeye meicel ame rom aroma i jo adek ocele ca. En daŋ te bedo twon lo moro ame omio kwogo i akina jo pyeradek ca, cite en mom otuno i rwom a jo adek ocele ca. Daudi okete me loyo ocirikale ame gwoke. Jo ocele ame onwoŋo tye i akina jo pyeradekkaca, nyingi ene: Acael omin a Yoab; Elkanan wot a Dodo me Beterekem; Camma me Karod, Elika me Karod; Kelec me Pelet; Ira wot a Ikec me Tekoa; Abiejer me Anatot, Mebunai me Kuca; Calmon me Akoki, Marai me Netopa; Kaleb wot a Bana me Netopa, Ittai wot a Ribai, me Gibea i lobo a jo Benjamin; Benaya me Piraton, Iddai ame oya i lula me Gaac; Abiolbon me Araba, Ajmawet me Bakurim; Eliakaba me Calbon, awobe a Yacen, kede Yonacan; Camma dano me Arar, Akiam wot a Carar me Arar; Elipelet wot Akacbai me Maaka kede Eliam wot Akitopel me Gilo; Kejro me Karmel, Parai me Arabi; Igal wot a Natan me Joba, Bani me Gad; Jelek a jo Ammon, Nakarai me Beerot, ame obedo amak jami lweny a Yoab wot a Jeruia; Ira me Itri, Gareb me Itri; Uria ame obedo dano me atekere a jo Kitti gin luŋ jo pyeradek wie abiro. Akemo rik dok te mako Rwot i kom jo Icrael, omio te cupo Daudi i komgi. Rwot okobbi Daudi ni, “Wot ikwan wel jo Icrael kede me a jo Juda.” Abaka te kobbi Yoab ame obedo atel wi monnyere ni, “Wot wunu i akina atekere luŋ me Icrael, me iwot ikwan wunu wei jo, cakere i Gad tuno kede naka i Beer-ceba. Amito ŋeyo wel jo ducu.” Cite Yoab te gamo ni, “Adwoŋ, Rwot Obaŋa-ni myero med wel jo ame tye-ni tyen mia acel ocele, kun yin pwod ikwo ame twero neno kede waŋi. Kara pino yin abaka imito kwano wel jo?” Cite abaka te diyo Yoab kede otellere me winyo koppere; gin te ya i nyim abaka oko, me wot kwano wei jo Icrael. Gin oŋolo kulo Jordan ote cako kwano wel jo i Aroer, kede i boma ame tye i dye luŋ, ame otikere kede Gad. I kuno gin te dok tutuŋ Jajer, ote kato naka i Gilead, kede Kadec, i lobo a jo Kitti. Gin te kato i Dan, eka i Dan kuno gin te wirre wot Cidon. Gin te wot tuno i cel atek me Turo naka i boma luŋ ame onwoŋo obedo mea jo Kivi kede mea jo Kanaan, eka ote kato doŋ naka i Negeb me Juda, kun obeo i Beer-ceba. I kare ame gin doŋ otyeko bebea i lobo luŋ, gin doŋ te dok cen i Jerucalem, i ŋe dwete aboŋwen kede nino pyeraryo nono. Yoab te doŋ titti abaka wel jo ame okwano. Wel jo ame romo lweny iyi Icrael onwoŋo oromo tutumia mia aboro, eka me Juda te bedo tutumia mia abic. Kare ame Daudi doŋ otyeko kwano wel jo oko, cunye dok te cako waŋ. En te kobbi Rwot ni, “Atimo bal a mom kobere i gin ame atimo. Tim doŋ ber, ama Rwot, ikwany balla oko, an amironi; pien atimo tim me miŋo meicel.” Kare ame Daudi oya odiko, Rwot okobbi Gad adwarpiny, ame onwoŋo obedo aranpiny a Daudi, ni, “Wot ikobbi Daudi ni, ‘Amie tam adek ame en myero eyer acel i akinagi, me atim.’ ” Gad te wot baŋ Daudi, te titte gin ame Rwot okobo; openye ni, “Imito ni kec en a myero pot i loboni te ri pi mwakki adek? Onyo yin en a myero ibed ŋwec aŋweca pi dwete adek kun iriŋo okworri? Onyo imito ni too edeke en a myero pot i loboni pi nino adek? Aco yin koŋ doŋ itam ite titta kop ame myero adwok baŋ Rwot.” Daudi te kobbi Gad ni, “Atye doŋ i twon cannoro adwoŋ meicel; cite mom aye ni dano en a myero ket can i koma. Rwot gire en a myero ket can i komwa, pien en obedo akica meicel.” Rwot te cwayo too edeke i kom jo Icrael geye odiko tuno kede naka i kare ame rik eciko. Lwak jo aromo tutumia abiro te to, cakere i Dan tuno kede naka i Beer-ceba. Kare ame amalaika a Rwot oryeo ciŋe me balo Jerucalem, Rwot oloko tammere oko me keto can i kom jo, omio te kobbi amalaika ame onwoŋo aneko jo ni, “Wek doŋ bedi! Oromo doŋ.” Amalaika onwoŋo tye i ŋet laro dino kal Arauna, dano me Jebuc. Kare ame Daudi oneno amalaika ame oneko jo, en okobbi Rwot ni, “An gire en ame atimo bal, atimo gin arac. Kara jo man do tye ane no can nono. Tim ber iluny goya an keken kede jo me oda.” I nino-nono ikome Gad owoto baŋ Daudi te wot kobbe ni, “Wot malo kuca, me iwot ican keno lam me yalo Rwot i laro dino kal Arauna.” Daudi owinyo gin ame Rwot omio Gad okobbe, te wot kuno. Kare ame Arauna obolo waŋe, oneno abaka kede omiro mere tye abino baŋe. Arauna owoto baŋe, te wot ryebere piny i nyime wore, Eka te penyo abaka ni, “Adwoŋŋa abaka, kara ibino kan piŋo ba?” Daudi te gamo ni, “Abino wilo laro dino kaili, me acan iye keno lam me yalo Rwot, me too edeke ya oko i kom jo.” Arauna te gamo kop abaka ni, “Yin giri kwany gin ame yii amito keken me iyal i Rwot; nen twoni me yalo Rwot i mot awaŋa ene, apwod me dino kal kede lodi me ŋut twoni itwero tic kedgi akaka yen.” Arauna te miyo jami-nono luŋ baŋ abaka kun kobo ni, “Rwot Obaŋani myero yie bed ayom i kom motti.” Cite abaka Daudi te gamo ni, “Mom amannono gire, an myero acul lim pirgi. An mom abino yalo Rwot Obaŋana kede mot a mom aculo ginnoro pire.” Abaka te wilo laro dino kal kede twoni, i cekel pyerabic me ryal. Daudi te cano keno lam me yalo Rwot kuno, eka te waŋo iye mot awaŋa kede mot kweyo cuny. Rwot doŋ te gamo kwaccere te miyo too edeke gik oko iyi Icrael. Abaka Daudi onwoŋo doŋ oteggo meicel ame mwaka me dittere doŋ bup, ame mom doŋ twero winyo lyeto moro i kome kadi bed wumere kede olaŋgit apol ata. Man omio omiro mere adoŋo okobo ni, “Adwoŋwa abaka, wek oyenyi nyannoro a pwod opoŋ apoŋa me okel baŋi, me en bin bed ŋat a gwoki. En bino buto i laŋeti, atotya koŋ mi komi bed amomor.” Gin rik te bedo yenyo nyannoro amwonya i lobo me Icrael luŋ, ote nwoŋo nyako ame olwoŋo ni Abicaki, ame obedo nya jo Cunam, ote kelo baŋ abaka. Nyannono onwoŋo rik mwonya meicel. En doŋ te bedo agwok abaka kun daŋ konye i tic ducu, cite abaka mom naka oloke odoko dako mere. Adonia wot a Daudi ame Kagit onywalo rik te mukere i wie kene me doko abaka. En oyiko gadigadi mere i wie kene, wegi aguragura karacel kede jo pyerabic ame ŋweco telo nyime. Pappere rik mom ru otimo ginnoro ame waŋo cunye, mom daŋ openye kadi acel i kom gin ame etimo. En kono rik onwoŋo obedo awo bi ame mwonya meicel, dok en obedo awobi ame olubo Abicalom. En oporo kop kede Yoab wot a Jeruya karacel kede Abiatar ame obedo alamdog, gin te ye lube kede konye cobo mittere, Cite jo magi obedo pe i yik Adonia: Jadok alamdog, Benayo wot a Yekoyadi, Natan ame obedo adwarpiny, Cemei, Rei, karacel kede ocirikale ame gwoko Daudi. Adonia rik te ŋolo rommi me yalo Obaŋa, kede twoni, kede leyi ocele ame ocwe, kun timo man i ŋet kidi me Twol, ame onwoŋo tye i ŋet En-rogel. En olwoŋo iye omego mere luŋ ame obedo itino a Daudi kede jo abaka luŋ adoŋo mege me Juda, cite en mom olwoŋo Natan adwarpiny, kede Benayo kede ocirikale ame onwoŋo gwoko Daudi, kede ominnere Culeman. Natan te kobbi Batceba tota a Culeman ni, “Yin ce mom iwinyo wunu ni Adonia wot a Kagit odoko abaka kun adwoŋwa Daudi mom oŋeo ginnoro iye? Aman ba, yin myero ibin me amii ryeko me laro kwoni kede kwo a wodi Culeman. Myero yin iru wot baŋ abaka Daudi, iwot ikobbe ni, ‘Adwoŋŋa abaka, mom rik ikwoŋo baŋa, an aŋecani, ni wodi Culeman en ame bino loc kakari, kun en bedo i wi kommi me loc? Kara piŋo Adonia en ame dok abaka’. Doŋ i kare ame yin pwod itye ikop wun abaka an abino pello baŋe ate moko koppi.” Mannono te miyo Bateba neno abaka iyi icika mere me buto. Abaka onwoŋo doŋ oteggo meicel, kun Abicaki nya jo Cunam, konye i tic ducu. Batceba oryebere piny oworo abaka, abaka te penye ni, “Imito ŋo ba, dakona?” En te gamo ni, “Adwoŋŋa, yin rik ikwoŋo baŋa an aŋecani, i nyim Rwot Obaŋani, kun ikobo ni wodi Culeman bino loc kakari, kun en bedo i kommi me loc. Aco koŋ inen, Adonia doŋ odoko abaka oko, kadi bed yin adwoŋŋa mom iŋeo ginnoro iye. En doŋ aman oŋolo twoni me yalo Obaŋa kede leyi mogo ocwe karacel kede rommi apol ata, dok en olwoŋo iye awobeni luŋ, Abiatar alamdog kede Yoab atel wi mony; cite Culeman en gire mom olwoŋo. Aco aman, yin abaka, wan jo Icrael luŋ doŋ tye i komi me kobbigi ŋat ame bino leyo kakari, ame bino bedo i kom me locci. Naka bino miyo ka kareni doŋ oromo, yin adwoŋŋa, me wot weo karacel i kwarini, an kede woda Culeman ote lokowa doko wegi bal.” Ame en onwoŋo pwod tye akop abaka, Natan adwarpiny te daŋ pello oko baŋgi. I kare ame omio abaka oŋeo ni Natan daŋ obino, Natan okato i nyim abaka, eka te ryebere i nyim abaka kun nyime gudo piny. En te kobbi abaka ni, “Adwoŋŋa abaka, yin en ikobo ni Adonia bino loc kakari kun bedo i kommi me loc? Pien en doŋ owoto gire oko, oŋolo twoni me yalo Obaŋa kede leyi ocele ocwe, karacel kede rommi apol atata, dok daŋ olwoŋo iye awobe abaka ducu, kede Yoab atel wi mony, kede Abiatar alamdog. Aman gin doŋ otye ocem dok daŋ omatte i nyime, kun oredo ni, ‘Kom abaka Adonia bed ayot nakanaka!’ Cite en gire mom olwoŋa an amironi, kede Jadok alamdog, kede Benayo wot a Yekoyadi karacel kede wodi Culeman. Adwoŋ, man yin itimo, en ame mom daŋ ititiwa wan omironi ŋat ame aleyo kakari acalo abaka kun bedo i wi kom me loc?” Abaka Daudi te kobo ni, “Koŋ ilwoŋ wunu Batceba dwog baŋa kan.” Batceba te dwogo, te bino cuŋ i nyim abaka. Abaka Daudi te kwoŋ i nyime kun kobo ni, “Acalo Rwot ame olaro kwona i kit can luŋ tye kwo-ni, kite ame rik doŋ atyeko kwoŋ kede baŋi i nyim Rwot Obaŋa me Icrael, kun akobo ni wodi Culeman bino leyo kakara, dok en bi no bedo i wi kom me loc kakara, tin doŋ abino cobo kwoŋŋanono oko,” Batceba te ryebere piny i nyime kun nyime gudo piny, te woro abaka kun kobo ni, “Myero Obaŋa mi kom adwoŋŋa abaka bed yot nakanaka!” Abaka Daudi te kobo ni, “Lwoŋ wunu Jadok alamdog, Natan adwarpiny, kede Benayo wot a Yekoyadi.” Jo-nono te bino cuŋ i nyim abaka. Abaka te kobbigi ni, “Ter wunu omirona, iwot wunu karacel kedgi, me iwot imi wunu woda Culeman bed i wi kana na i kome, miye wunu eriŋ kede, itere wunu i Gikon. Jadok alamdog kede Natan adwarpiny te wot wirre kede moo me bedo abaka me Icrael kuno; eka ite kuto wunu apel kun ikobo wunu ni, ‘Kom abaka Culeman bed ayot nakanaka!’ Wun doŋ ite ya wunu i kuno dwogo, kun wun ilubo wunu yore, en te bino bedo i wi komma me loc. An doŋ atyeko kete me bedo aloc iyi Icrael kede Juda.” Benayo wot a Yekoyadi te gamo kop abaka ni, “Obed amannono gire! Rwot Obaŋani myero mi mok amannono! Kite a rik obedo kedi, myero daŋ dok bed i Culeman kittaca, mi loccere bed atek akato me adwoŋŋere Daudi.” Eka Jadok alamdog, Natan adwarpiny kede Benayo wot a Yekoyadi, kede jo Keret, kede jo Pelet, te wot kelo Culeman bedo i wi kana a Daudi, te cako riŋo kede. Gin te tere kede naka i Gikon. Kare ame gin otuno kuno, Jadok alamdog te kwanyo moo ame onwoŋo tye i adomo iyi kema a Rwot, te wiro kede Culeman. Gin te kuto apel, jo te wo ni, “Kom abaka Culeman bed ayot nakanaka!” Jo luŋ te ciro lubo yore, kun okuto alete, dok olelo meicel, ame dwongi amor ayeŋo lobo ayeŋa. Woogi te winyere baŋ Adonia kede wele mere, kun gin doŋ otyeko aramagi at yeka. Kare ame Yoab owinyo koko apel, en openyo ni, “Woo a dok awinyere malo amala i boma ca kono?” I kare ame en pwod tye akop, Yonacan wot Abiatar alamdog te tuno oko. Adonia te kobbe ni, “Kato i ot, pien yin gire i dano aber, ikelo amut aber.” Yonacan te gamo kop Adonia ni, “Pe gire, abaka Daudi otyeko keto Culeman me bedo abaka oko. Abaka omio Jadok alamdog, kede Natan adwarpiny, kede Benayo wot a Yekoyadi, jo Keret kede jo Pelet otere i Gikon, kun ŋweco i kana a pappere Daudi. Aman doŋ Jadok alamdog kede Natan adwarpiny otyeko wirre oko kede moo me bedo abaka i Gikon. Gin doŋ oya i Gikon kuno, obino ame alelo meicel, ame omio woo doŋ dwoŋ atek i boma. Woo ame iwinyo wunu ca, megi ennono. Culeman doŋ tye obedo oko i wi kom me loc. Aman omiro abaka luŋ doŋ tye apwoyo Daudi, kun okobbe ni, ‘Obaŋani myero mi nyiŋ Culeman rwo atek akato megi oko.’ Abaka Daudi tye akulo wie piny i wi tanda mere. Dok en okobo daŋ ni, ‘Myero mi pwoc baŋ Rwot Obaŋa me Icrael ame tin omio atinna acel i akina itinona obedo i wi komma me loc kun an ikoma daŋ aneno kede waŋa.’ ” Lworo te ma ko wele Adonia luŋ, ote ya wot oko, kun ŋat acel acel mako yo mere en kene. Adonia daŋ te ya oko i kannono kun lworo ociro oko i kom Culeman, te wot atir mako tuŋ ame tye i keno me lam. Culeman rik te winyo ni Adonia lworo ociro oko i kome, dok daŋ ni tye ame omako tuŋ me keno lam pi laro kwo mere, kun kobo ni, “Abaka Culeman myero koŋ ge kwon baŋa ni mom ebino neka an amiro mere i pala lweny.” Culeman te kobo ni, “Ka ce en onyuto oko kannaler ni en edano aber, yer wie acelloro gire mom bino poto piny, cite ka onwoŋo ni en tye ka timo timmoro a mom ber, en gire bino to.” Abaka Culeman te cwayo jo wot ome i keno lam. En te bino woro abaka Culeman. Culeman te kobbe ni, “Wot giri tuŋssi.” Kare ame abaka Daudi doŋ ceggi to, ociko wode Culeman kun kobbe ni, “An doŋ aceggi wot i wot ame jo luŋ i wi lobo woto kede. Yin myero icuŋ atek acalo ico. Gwok gin a Rwot Obaŋani ociko, kun ilubo gin a en mito, igwoko icwillere, cikkere, kede gin ame en ociko, kede kop ame en okobo luŋ, kite ame ocoo kede i buk cik a Muca, me ibed aber i jami ducu ame itio, i kabedo ducu ame ibino wot iye. Ka ce itimo mannono, Rwot bino gwoko gin ame rik eciko baŋa, kun kobo ni, ‘Ka ce ikwai bino bedo jo a kitegi beco, kun ogenne i tiyo gin ame an amito i cunygi ducu kede tipogi luŋ, aloc me Icrael bino ya i komgi nakanaka.’ “Yin iŋeo aber gin ame rik Yoab wot a Jeruya otimo i koma, gin ame en otimo i kom otel wi mony a jo Icrael aryo, Abuneri wot a Neri kede Amaca wot a Jeter. Yin ipo kite ame en rik obin onekogi kede i kare me kuc, me culo kwor me remo a jo a gin oneko i kare me lweny. En rik oneko jo a mom i bal, ame en te miyo bal me remo a jo-nono guda. Pi mannono ba, yin doŋ myero iti i kome kede ryekoni, cite myero kur iwek two me pyen en a neke. Cite itino a Baŋillai dano me Gilead myero ibed kedgi aber meicel, igwokgi daŋ kun imiogi obedo i akina jo ame cemo i wi mejani; pien gin daŋ rik orwatte keda aber amannono i kare ame ariŋo ominni Abicalom. Cimei wot a Gera, dano me Benjamin, ame oya i Bakurim daŋ pwod tye baŋi. En rik ocena atek meicel i nino ame awoto i Makanaim, cite i kare ame rik en dok orwatte keda i kulo Jordan, ate cikere baŋe i nyiŋ Rwot ni mom abino neke i pala lweny. Cite yin doŋ myero kur iweke ame mom itimo ginnoro i kome. Yin giri iŋeo gin a myero itim i kome, cite myero inen ni en oto.” Daudi te doŋ to oko, te wot weo karacel i kwari mere, ote yiko kome i paco mere. Daudi onwoŋo oloo jo Icrael pi mwakki pyeraŋwen, kun en ogeo loc i Kebron pi mwakki abiro kede pyeradek wie adek i Jerucalem. Culeman doŋ te bedo i wi kom loc a pappere, loccere te medde bedo atek meicel. Adonia wot a Kagit te wot baŋ Batceba tota a Culeman. Batceba te penye ni, “Ibino baŋa i kuc?” En te gamo ni, “Ee, abino i kuc.” Adonia te medo ni, “Tye kopporo ame amito kobo baŋi.” Batceba te gamo ni, “Kop aŋo-nono kara?” En te gamo ni, “Yin iŋeo ni an en a myero rik abed abaka, dok daŋ jo Icrael luŋ onwoŋo agenno ni an en ame abino loyogi. Cite man dok olunyo lokere oluktuke, ominna en ame dok odoko abaka, pien mannono onwoŋo oya ibaŋ Rwot. Doŋ aman an atye i ginnoro acel ame amito kwayo baŋi; tim ber kur ikwer.” Batceba te kobo ni, “Aco kob do.” Adonia te kobo ni, “Tim ber ikwaya abaka Culeman, aŋeo ni en mom bino kwerri; amito ni en mia Abicaki, nya jo Cunam me bed cega.” Batceba te gamo ni, “Mannono gire ber, an abino cwalo kwacci i nyim abaka.” Batceba te wot baŋ abaka Culeman, me wot kop kede abaka Adonia. Abaka ka onene, oya malo jole, te ryebere piny i nyime; eka te dok bedo piny i kom me loccere, te miyo kom ocele pi tottere. Tottere te bedo i laŋete tuŋ cem. Tottere te kobo ni, “Atye kede kwaecoro acel anonok ame amito keto i nyimi; tima ber kur ikwer ba.” Abaka te gamo ni, “Koŋ ikobba awiny do, totta; pe abino kwero.” En te kobo ni, “Tim ber imi Abicaki nya jo Cunam baŋ ominni Adonia me bed dako mere.” Abaka Culeman te gamo kop a tottere ni, “Piŋo kara ikwao Abicaki nya jo Cunam pi Adonia? Kwaye daŋ doŋ loc do, pien en obedo ominna adwoŋ, dok daŋ Abiatar alamdog kede Yoab wot a Jeruya ocwake.” Abaka Culeman te kwoŋ akwoŋa i nyiŋ Rwot ni, “Obaŋa myero mi ginnoro timere i koma ka ce mom amio oneko Adonia pi kwaccere-nono. Pien Rwot doŋ otyeko moka oko me bedo i wi kom loc a pappa Daudi. Dok Rwot ogwoko gin a rik eciko baŋ pappa, te miyo loc i ciŋa kede i ciŋ ikwaena, kite a rik ociko. Doŋ pi mannono, acalo Rwot tye kwoni, obino neko Adonia oko tin.” En te cwayo Benayo wot a Yekoyadi, te wot cobe neke oko. Abaka Culeman te kobbi Abiatar alamdog ni, “Yin myero iwot oko i paconi i Anatot; pien yin onwoŋo myero neki oko. Cite mom abino neki i kare-ni, pien yam ibedo tiŋo canduk a Rwot Obaŋa i nyim pappa Daudi, dok daŋ inywako kede peko mere ducu ame obedo poto i kome.” Culeman te ryemo Abiatar oko i tic me bedo alamdog a Rwot, ame man te miyo kop a Rwot cobere kakare, ame rik ekobo i Cilo i kom jo Eli kede ikwae. I kare ame Yoab owinyo gin ame otimere, kite acalo en rik onwoŋo obedo dano acel ame ocwako Adonia kun mom cwako Culeman, en oŋweco atir i kema a Rwot, te wot mako tuŋ keno lam me elar kwo mere. I kare ame Culeman owinyo ni Yoab oŋweco i kema a Rwot, tye kuno omako tuŋ keno lam pi laro kwo mere, Culeman ocwao Benayo wot a Yekoyadi ni wot cobe neke oko, I kare ame Benayo otuno baŋ Yoab i kema a Rwot, en okobbi Yoab ni, “Abaka ociko ni yin myero iya oko i kannono.” Cite Yoab te gamo ni, “An gira mom aya. An abino gira to kan.” Benayo te dwokki abaka kop kun kobbe gin ame Yoab okobo. Abaka te kobo ni, “Wot itim kit ame en okobo-nono. Cobe ineke oko ite yike. Mannono bino miyo bal me remo a jo ame en oneko aboŋo bal mom dok bedo i wia kede i wi jo me ot a pappa. Rwot bino dwoko bal me remo a jo ame rik eneko naca i wie, pien en rik onekogi kun pappa Daudi mom oŋeo ginnoro iye. En rik oneko jo aryo ame onwoŋo obedo jo abeco a kitegi atira kate oko, adwoŋ Abuneri wot a Neri ame onwoŋo obedo atel wi mony a jo Icrael, kede adwoŋ Amaca wot a Jeter ame onwoŋo atel wi mony a jo Juda. Bal me remo a jo-nono bino dok i wi Yoab kede ikwae luŋ. Cite Daudi kede ikwae kede jo me ode, kede kom me loccere, Rwot bino miyo iye kuc nakanaka.” Benayo te wot i kema a Rwot, te wot cobo Yoab neko oko; eka ote yike i ode ame onwoŋo tye i dye tim. Abaka te keto Benayo bedo atel wi mony akaka Yoab kede Jadok me bedo alamdog akaka Abiatar. Abaka rik te lwoŋo Cemei te kobbe ni, “Yin myero iger odi i Jerucalem kan, dok myero ibed kan kun mom iya iye; kur iwot kannoro ocele kadi acel. Pien i nino ame yin ibino ya iye i kan, eka ite ŋolo luŋ me Kidron, myero iŋe oko i nino-nono ni ibino to; remoni giri bino dok i wi.” Cemei te kobbi abaka ni, “Gin ame ikobo gire ber; an abino tiyo gin ame yin abaka ikobo.” Cemei daŋ te bedo i Jerucalem kannono pi kare alalac. Cite i ŋe mwaka adek, opii a Cemei aryo te lwi riŋo gigi oko naka baŋ Akic wot a Maaka, ame onwoŋo obedo abaka me Gat. I kare ame okobbi Cemei ni opii mere tye i Gat. Cemei oya oko te tweyo kom bedo i wi kar; a mere i kom kana, te wot naka i Gat baŋ Akic, pi wot yenyo opii mere. En te wot nwoŋogi kuno, te dwoggogi paco. I kare ame Culeman owinyo ni Cemei owoto naka i Gat twal te dwogo, abaka ocwao jo baŋe te wot lwoŋe, eka te penye ni, “Rik mom amii ikwoŋo akwoŋa i nyiŋ Rwot ni myero kur iya i Jerucalem, kun aciki atek ni i nino ame ibino ya iye i kan ite wot kannoro ocele, myero iŋe i nino-nono ni ibino to? Dok yin mom rik igamo ni kop ame an akobo tye aber, yin ibino lubo? Kara piŋo mom dok icobo kwonni ame rik ikwoŋo baŋ Rwot kede gin ame an aciki iye?” Abaka dok te medo kobbi Cemei ni, “Yin giri iŋeo atira i cunyi tim areco ame rik ibedo timo baŋ pappa Daudi. Pi mannono ba, Rwot bino miyo timmi-naca luŋ dok gire i wii. Aco an gira Obaŋa bino miya winyo, bino miyo kom loc a Daudi medde gire bedo atek nakanaka i nyime.” Abaka te doŋ miyo Benayo wot a Yekoyadi tere oko, te wot cobe neke oko. Mannono te miyo loc a Culeman medde doŋ bedo atek meicel. Culeman te nyomo nyaka a Parao abaka me Miciri, mannono te miyo en notte oko gin kede abaka me Miciri. En okelo nyannono i paco a Daudi, tuno waŋ ame en ogero ode, kede ot a Rwot, kun daŋ doŋ ogero cel oguro Jerucalem luŋ. Jo rik onwoŋo pwod yalo Obaŋa i wi kiddi malo, pien ottoro rik onwoŋo pwod mom ame ogero pi Rwot. Culeman rik obedo ŋat ame maro Rwot, kun lubo cik a pappere Daudi, cite en rik onwoŋo ŋolo mot me yalo Obaŋa dok daŋ waŋo odok akur, i kabedo me woro Obaŋa ame onwoŋo tye malo i wi kiddi. Kare moro abaka Culeman owoto i Gibeon me wot yalo Obaŋa kuno, pien maci-naca en a rik obedo ka woro Obaŋa adwoŋŋere. Culeman onwoŋo rik yalo Obaŋa i mot awaŋa tutumia acel i wi keno lam kuno. Kare ame en tye i Gibeon kuno, Rwot onen baŋe dyewor i waŋ lek te kobbe ni, “Peny gin ame imito ni myero ami baŋi.” Culeman te gamo ni, “Yin doŋ ityeko nyuto twon mar meri adwoŋ a mom lokere baŋ amironi pappa Daudi, pien en rik obedo ŋat a genne i tiyo gin ame yin imito, dok kite onwoŋo tye atira, kun yie daŋ ler i komi. Dok yin imedde nyutte twon mar adwoŋ a mom lokere-ni, imie-gu wode ame aman en ame tye ka loc kakare. Doŋ ba, ama Rwot Obaŋana, yin doŋ imia an amironi adoko abaka akaka pappa Daudi, kadi bed an pwod atin atidi moro, ame mom ru aŋeo loc. An doŋ atye i akina joni ame yam iyero, ame gin obedo rok adwoŋ meicel, welgi bup atek ame mom romo kwanne pi polgi. Tim ber doŋ imia an amironi cuny me ryeko me loyo lwakki, me aŋe poko gin aber kede gin arac. Kara ŋa ame romo loyo rokki adwoŋ wok-ki?” Kwac a Culeman-ni te yomoro cuny Rwot atek. Obaŋa te gamo ni, “Pien ikwao man, kun mom iparo piri keni ite penyo ni kono ami iperakino kare alac, onyo ni amii lonyo, onyo ni kono aneko okworri oko, ento ilunyo kwayo ni amii cuny me ryeko ame twero miyi iŋeo gin atye atira, an abino timo kittono. Nen ba, amii doŋ ryeko kede diro adwoŋ meicel a kato jo luŋ ame otelo nyimi kede jo luŋ ame bino lubi; mom tye ŋattoro ame bino bedo aryek calo yin. Abino daŋ miyi gin ame mom ikwao: ibino bedo twon alonyo a mom twerre, kun daŋ owori atek, ame mom tye abaka moro ame bino pore kedi pi kare luŋ me kwoni. Dok daŋ ka ibino tiyo gin ame an amito, kun igwoko icwilla, kede cikka, kite ame pappi Daudi obedo timo, abino medo kare me kwoni daŋ bedo abubup.” Culeman te co oko i waŋ nino, te nwoŋo ni eleko. Kare ame en odok i Jerucalem, en owoto te wot cuŋ i nyim canduk me cikere a Rwot, te yalo Obaŋa i mot awaŋa kede mot kweyo cuny; te daŋ tedo arama pi omiro mere luŋ. Mon aryo ame onwoŋo obedo olaya obino te cuŋ i nyim abaka Culeman. Dako acel i akinagi te kobo ni, “Ama adwoŋŋa, an kede dako-ni obedo i ot acel; doŋ i nino acel an ate nywalo atinna kun en tye i ot. I ŋe nino adek ame an doŋ atyeko nywal oko, en daŋ dok te nywal, kun wan onwoŋo otye kenwa i ottono. Ŋattoro ocele gire onwoŋo mom tye, kono wan aryoni keken. Doŋ atin a dako-ni te to oko dyewor pien en onwoŋo obuto i kom atin. En te ya i cuny dyewor ame an anino oko, te kwanyo atinna oko i laŋeta, te wot pyelo i laŋete, en te lunyo kwanyo mege oto ca kelo pyelo i laŋeta. Kare ame aco odiko me doto atinna, anwoŋo atin oto oko; cite amedo ŋiyo atinnono aber ame piny doŋ ler, anwoŋo ni mannono mom obedo atin ame onwoŋo an anywalo.” Ento awottere te gamo ni, “Pe gire, atin akwo-ni gire mera, en oto gire megi.” Dako okwoŋo kop te gamo ni, “Pe gire atin oto en a megi, en akwo-ni gire mera.” Mannono kite ame gin oporo kede kopgi i nyim abaka. Abaka te kobo ni, “Koŋ inen, ŋat acel acel tye akobo ni, ‘Atin akwo-ni mera, en oto ca megi’; kun wun luŋ daŋ dok akwero akwera ni, ‘Pe gire, atinni gire oto oko, mera gire en akwo.’ ” Aco doŋ koŋ ikella wunu pala, “Ote daŋ kelo pala baŋ abaka. Abaka te kobo ni aco bar yi atin akwo-nu oko aryo, mi nucu baŋ ŋat acel kede nucu ocele baŋ ŋat ocele.” Dako ame onwoŋo atinnere kwo te gamo ni, “Pe gire amannono, adwoŋŋa, mi atin akwo-nu baŋ dako-nu, kur inek.” En okobo amannono pien cunye onwoŋo oton atek pi atinnere. Cite ŋat ame mege onwoŋo oto oko te gamo ni, “Ee, wan ducu obino kec, pok yi atinnono gire oko.” Abaka te kobo ni, “Mi atin-nu baŋ dako ame ogeo kop, kur inek, pien dako-nono en toto atin.” Jo Icrael luŋ te winyo kite ame abaka oŋolo kede koppono. Jo luŋ te cako lworo abaka atek meicel, pien gin oniaŋ ni ryeko Obaŋa tye i yie, en omio oŋolo kop kakare. Abaka Culeman onwoŋo obedo abaka ame loo jo Icrael luŋ. Magi en jo onwoŋo loo tic apapat i te loccere. Ajaria wot a Jadok onwoŋo obedo alamdog. Elikorep kede Akija, ame gin luŋ onwoŋo obedo awobe a Cica, onwoŋo obedo orani; eka Yekocafati wot Akilud te bedo aco kop i kom ginnoro luŋ ame otimere. Benayo wot a Yekoyadi te bedo atel wi mony; kun Jadok kede Abiatar te bedo olamdog. Ajaria wot a Natan te bedo amitam baŋ abaka. Akicarte te bedo alo jo ame tio i paco abaka, kun Adoniram wot Abda te bedo alo tic eroni. Culeman oketo daŋ gabuna apar wie aryo me loyo lobo apapat iyi lobo me Icrael luŋ. Omiogi tic me coko cam pi abaka kede jo me ode luŋ, kun ŋat acel acel i akinagi mio cam dwe acel i mwaka acel. Nyiŋ jo-nono ene kede nyiŋ kabedo ame onwoŋo gin loo: Ben-kur ame onwoŋo loo lobo me Epraim obedo kidikidi. Ben-deker ame onwoŋo loo boma magi, Makaj, Calbim, Bet-cemec kede Elon-bet-kanan; Ben-keced ame onwoŋo loo boma me Arubot, Coko kede lobo me Keper luŋ; Ben-abinadab ame onwoŋo onyomo nyaka a Culeman a nyiŋe Tapat, en onwoŋo loo lobo me Dor luŋ. Bana wot Akilud ame onwoŋo loo boma me Tanak, Megiddo, kede lobo luŋ me Bet-cean ame tye i ŋet boma Jaretan ame tye i luŋ me Jejreel, tuno kede naka iyi Abel-mekola kede Jokmeam. Ben-geber onwoŋo loo boma ame obedo me a jo a Jair wot a Manace, kede lobo me Argob ame tye i Bacan ame tye iye pacci adoŋo pyerabicel twal ame ocecelo oko i cel apama ame ogero atek, dok acegi i dogcelgi daŋ obedo me mola. Akinadab wot a Iddo, onwoŋo loo boma me Makanaim. Akinaj rik daŋ onwoŋo onyomo nyaka abaka Culeman ame nyiŋe Bacemat, en onwoŋo loo lobo Naputali, Bana wot a Kucai onwoŋo loo lobo me Acer kede paco me Bealot. Yekocafati me Parua, ame onwoŋo loo lobo me Icakar. Cimei wot a Ela, onwoŋo loo lobo me Benjamin. Geber wot a Uri, onwoŋo loo lobo me Gilead ame rik koŋ Cikon abaka a jo Amor oloo kede Og abaka me Bacan. Ŋat ocele daŋ onwoŋo tye ame loo lobo me Juda luŋ. Jo Juda kede Icrael rik onwoŋo pol atek ame rom kede kwoyo me dog nam. I kare a Culeman gin obedo ame cunygi yom kun ocemo oyeŋ dok daŋ omatte. Culeman omedde mwonyo loc ocele luŋ i te loccere, cakere i kulo me Efurate tuno naka i loba a jo Piriciti, kede naka i waŋ lobo me Miciri. En obedo loyogi kun gin oculo ocolo baŋe pi kare me kwo mere luŋ. Nina acel acel rik omio Culeman moko kwon apwottere ame roma puku mia acel, kede moko kwon ocele puku mia aryo, twoni olobakino apar, dok pyeraryo, rommi mia acel, kun nwoŋo mom okwano iye aderi, atil, apali kede gwen ame opito aber. En onwoŋo loo loba luŋ ame onwoŋo tye tutuŋ anyarodi me kulo Efurate, cakere i Tipica tuno kede naka i Gaja. En onwoŋo loo obakki luŋ ame onwoŋo tye tutuŋ anyarodi, dok daŋ onwoŋo en bedo i kuc i loba luŋ amano loba mere. Jo Juda kede jo Icrael luŋ obedo i kuc i kare me kwo mere luŋ, cakere i Dan tuno kede naka i Beerceba, kun jo me ot acel acel tye olokgi kede odurogi. Culeman rik onwoŋo tye aguragura tutumia pyeraŋwen iyi awi mere pi gadigadi mere, kede cirikale ame riŋo aguragura tutumia apar wie aryo. Gabuna mere apar wie aryo ame rik onwoŋo loo lobo apapat me Icrael obedo miyo cam baŋe, kun ŋat acel acel miyo kit cam luŋ ame omito aboŋo rem, dok mio i dwe mere ame opoke. Ŋat acel acel i akinagi daŋ rik mio cayiri kede reŋ kal ame omito me acama aguragura kan ame omito iye, kede pi aguragura ocele ame otio kedgi. Obaŋa onwoŋo omio Culeman ryeko kede ŋec atut meicel. Tammere onwoŋo malo ame mom roma akoba. Culeman onwoŋo ryek ame ryeko mere kato kit ryeko oryeko luŋ ame onwoŋo tye tuŋ kide kede me oryeko me Miciri luŋ. Ryeko mere onwoŋo kato me a jo luŋ; onwoŋo ryek ame kato Etan dano me Ejira oko, kede Keman, kede Kallol, kede Darda, ame gin luŋ obedo awobe a Makal. Nyiŋe orwo atek i loba luŋ ame rik onwoŋo amano loba mere. En obedo ŋat acel ame ocako carokop ame romo tutumia adek kede wer ame kato tutumia acel oko. En okobo kop i kom yen, kun cako i kom yat cedar ame tye i Lebanon tuno kede i kom ogudo ame tu doŋo i kor apama; okobo daŋ kop i kom leyi me tim, kede i kom winy, kede i kom gin ame lak alaka, naka i kom rec-gu. Obakki me rok apapat me wi podo luŋ owinyo pi ryeko a Culeman, ote cwayo jo me wot winyo kop i kom ryeko mere. Kare ame Kiram abaka me Turo owinyo ni jo Icrael otyeka wiro Culeman kede moo me bedo abaka akaka pappere Daudi, en ocwao kwena baŋe. Man otimere pien Kiram onwoŋo rik maro Daudi con. Culeman te dwokki Kiram kop kit man: “Yin iŋeo aber ni gero at a Rwot Obaŋa obin oloo pappa Daudi oko, pien obedo lweny kare i kare okworrere ame onwoŋo tye i ŋete. En onwoŋo mom romo gero ot tuno waŋ ame Obaŋa omie eloo okworrere luŋ. Cite aman doŋ Rwot Obaŋana otyeko gire miya kuc i kabedo luŋ. Okworra moro doŋ pe, dok daŋ mom atye kede peko moro kadi acel. Mannono omio doŋ atamo ni myero ager at woro Rwot Obaŋana, kite ame Rwot rik ociko kede baŋ pappa Daudi kun koba ni, ‘Wodi ame abino keto me leyo locci en ame bino gero orpira.’ Man omio doŋ akwai me cwayo joni i Lebanon me owot otonna yen cedar. Jona daŋ bino wot tic karacel kedgi, an abino culo ocara a joni kite ame yin ibino moko. Yin iŋeo aber ni mom tye ŋattoro i akina jona ame ŋeo toŋo yen aber acalo jo Cidon.” Kare ame abaka Kiram owinyo kop a Culeman, olelo meicel, te koba ni, “Tin gire myero pwo Rwot pi miyo Daudi awobi aryek-ki me loyo twon rok adwoŋ wok-ki!” Kiram te dwokki Culeman kop kun kobo ni, “Atyeko winyo kwena ame icwao, daŋ doŋ atye ame atere oko me tiyo gin ame ikobo, abino miyi yen cedar kede bao me ciprec. Abino miyo jona kwanyo yennono i Lebanon kelo naka i nam; i dog nam kuno, gin dok bino tweyogi karacel ote keto i nam me kwaŋ i wi pii calo boda naka kan ame ibino mitogi iye. Ka doŋ otuno kuno, jona bino gonyogi oko, eka joni te gamo. Gin ame yin ibino timo pira ene, yin ibino miyo jo me odacam.” Abaka Kiram te cako cwalo bao apipim me yen cedar kede ciprec baŋ abaka Culeman kite ame onwoŋo en amito. Abaka Culeman te cako cwayo ŋano a nyige ame romo puku tutumia pyerabicel me acama a jo mere, kede moo jeituni ame oodo ame romo debe tutumia pyeraŋwen. En obedo miyo man luŋ mwaka i mwaka. Obaŋa te miyo ryeko baŋ Culeman kite ame rik ociko. Kuc obedo tye i akina Kiram kede Culeman, gin te keto cikere i akinagi. Abaka Culeman te cako rayo jo iyi Icrael luŋ pi tiyo tic atek; jo luŋ ame orono te romo tutumia pyeradek. En te cwalogi i Lebanon, kun cwao jo tutumia apar dwe i dwe. En onwoŋo opokogi i dul adek, kun dul man woto bedo kuno dwe acel te dok dwogo bedo i paccigi dwete aryo. En onwoŋo oketo Adoniram me loyo jo ame orono-nono luŋ, Culeman onwoŋo daŋ dok tye i jo ocele ame romo tutumia pyerabiro ame ticgi obedo me yeyo kityec ducu kede jo ocele daŋ tutumia pyeraboro ame ticgi obedo payo kiddi i lobo obedo kidikidi. Medo i kom jo-nono onwoŋo daŋ dok tye jo ocele ame romo tutumia adek kede mia adek ame onwoŋo abaka oketogi me loyo lwak ame onwoŋo tio tic. Jo te muko twoni kiddi adoŋo ame opao aber kite ame onwoŋo abaka ociko, me gero acakki te ot Obaŋa. Mannono en kite ame ogedo a Culeman, kede ogedo me Kiram, karacel kede jo Gebal obedo tiyo kede ticgi me payo bao kede kiddi me gero ot Obaŋa. Culeman rik te cako gero ot a Rwot, i mwaka me aŋwen me loccere ame en onwoŋo loo kede jo Icrael, i dwe me aryo, ame olwoŋo ni Jib. I kare-ni onwoŋo doŋ okato mwaka mia aŋwen kede pyeraboro twal cakere i kare ame jo Icrael onwoŋo oya kede i lobo Miciri. Ot ame abaka Culeman ogero-nono onwoŋo bor me yie romo futi pyeraboŋwen, kun lac me yie tye futi pyeradek, eka borrere me malo te bedo futi pyeraŋwen wie abic. Icika ame tye tutuŋ doggola me donyo, i nyim icika adwoŋŋere, borrere onwoŋo romo futi pyeradek ame rom aroma i lac me icika acil, kede laccere futi apar wie abic. Dirica onwoŋo popol i ottono, kun otio kede purem ame orwakere i kor apama, ame tuŋ a nen i oko diŋ, eka en ame nen iyi ot te bedo alalac. En dok te miyo gero gedo ocele i ŋe ottono kun ogero mannono i dyere, kun icika adwoŋŋere kede icika ame tye tyelo ame en icika acil meicel tye iye. I kom gedo i oko-nono en dok te gero iye icika ocele atitino ame okubere i wi wadgi, kun mom oweko kannono odoŋ ame twolo a mom ogero iye ici ka. Icika i pinyere onwoŋo lacgi tye futi abiro kede nucu pi acel acel; icika i dyere lacgi te bedo futi aboŋwen pi acel acel; eka icika imalo te bedo futi apar kede nucu pi acel acel. Cakere i piny wot malo, obedo jwiko dit a kor apama me wek ot i malo cuŋ i kom apama i piny aboŋo dok rwako arii ocele iyi apama. I kare me gedo, obedo tic i kiddi ame onwoŋo doŋ otyeko yiko oko i ka muko kiddi. Man omio i kare ame otye ka gero ot Obaŋa dwon ginnoro me nyonyo ame otio kede i toŋo onyo i payo jami mom owinyere kuno acalo anyul onyo lee. Doggola me donyo iyi icika atitino i pinnyege onwoŋo tye i tutuŋ anyarodi me ot Obaŋa, kun rwom tye me yito iyi icika i udi i dyere kede dok en ame kato i adekkere ame tye malo. Mannono en kite ame rik en ogero kede ot Obaŋa naka otum. Otio apama me wi ot ame mio ot bedo ŋie, otio apama-nono kede yen ame oririo aria kede bao me cedar ame opeto i wi yen me Cedar. Gedo ocele-naca omano ot luŋ, icika atitino mege ame oryeye i yore adek-ki, en ipiny kede en i dyere kede en i malo, ame bocogi cakere i dye ot piny tuno i wi ot malo romo futi abiro kede nucu pi ot acel acel kun okukuba i kom bao cedar ame oririo aria. I kare-nono Rwot te kobbi Culeman ni, “Kop a mako ot ame igero-ni, ka ce yin ibedo lubo icwilla kun itio gin ame aciko dok daŋ igwoko cikka luŋ, itio daŋ kedgi, abino cobo i komi kop a rik aciko baŋ pappi Daudi. Dok abino bedo baŋ jona Icrael kun mom aya i akina jona Icrael kadi acel.” Culeman rik te gero ot Obaŋa naka tyeko. I kor apama i yi ot en ocacano iye bao cedar cakere i piny naka i kom apama me wi ot ame mio ot bedo aŋic; aco piny i dye ot ote cano iye bao me cipre. Aco icika i tyelo ame olwoŋo ni Kabedo Acil Meicel, en te gero i bao cedar, cakere piny i dye ot naka malo i kom apama me wi ot ame mio ot bedo aŋic; borrere onwoŋo romo futi pyeradek. Aco icika adwoŋŋere ame tye i nyim Kabedo Acil Meicel, borrere onwoŋo romo futi pyerabicel. Bao cedar ame onwoŋo tye i ottono, onwoŋo odedeo komgi kede cal opoko kede cal ature ame ogoro i komgi. Yi ot luŋ onwoŋo ocano iye bao cedar, ame kom kiddi ame ogero i ot mom twero nen. Eka tyelo ote gero iye icika acil me keto canduk me cikere a Rwot. Kabedo acillono onwoŋo borrere tye futi pyeradek kede borrere me malo daŋ futi pyeradek, kun omwono kome oko i jabu ame olio aber. Dok ote tiyo keno lam daŋ i bao me cedar. Culeman omwono yi ot Obaŋa oko i jabu ame olio aber, te ŋolo dye ot i nyor me jabu ame en orio i nyim kabedo acil meicel ame tye tyelo ame onwoŋo daŋ omwono oko i jabu. Yi ot Obaŋa luŋ onwoŋo omwono oko i jabu karacel i keno lam ame onwoŋo tye i kabedo acil ame tye i tyelo. Abaka rik te miyo payo cal okerubi aryo, kun opao i yat jeituni, ote ketogi i kabedo acil meicel ame tye tyelo; okerubi acel acel onwoŋo borrere tye futi apar wie abic. Bwomgi me tuŋ cel keken onwoŋo romo futi abiro kede nucu, tuŋ ocele daŋ abiro kede nucu; mannono omio ya i lanni bwomgi tuŋ cel tuno tuŋ ocele romo futi apar wie abic. Bor okerubi acel acel onwoŋo tye futi apar wie abic, kun bwome daŋ tye futi apar wie abic. Gin aryo luŋ onwoŋo bocogi rorom, komgi daŋ rorom. Bor a ŋat acel acel onwoŋo tye futi apar wie abic. En te cibo okerubi-nono i dye ot ame tye tyelo, kun ŋat acel acel ocuŋ i ŋet awottere ame bwomgi oyarre ayara, bwom ŋat acel acel tuŋ cel ogudo kor apama tuŋ cel kede bwom a ŋat acel tuŋ ocele ogudo kor apama tuŋ ocele, eka lanni bwomgi me dyere te rwatte i dye ot. Kom okerubi onwoŋo omwono oko kede jabu. Kom ot luŋ ote deyo i cal okerubi, kede cal otit kede ature ame ogogoro i kom icika i yie kede icika i oko daŋ. Dok omwono dye ot daŋ oko i jabu, kun otimo man iyi icika ame tye tyelo kede i en ame tye oko daŋ. Kika me doggola me donyo i kabedo acil onwoŋo tye aryo ame otio i bao me yat jeituni, kun arii me doggolanono luŋ kede akaragi, acel acel onwoŋo tye kede twoke abic. Kika aryo luŋ ame otio i bao me yat jeituni-nono onwoŋo odeo komgi kede cal okerubi kede cal otit, kede cal ature ame ogogoro i komgi. Cal ame ogogoro-nono luŋ onwoŋo omwono oko luŋ i jabu. Aco kika me doggola ame donyo iyi icika adwoŋŋere karacel kede akara mere onwoŋo otio i bao me yat jeituni, kun omio twoke tye aŋwen. Dok ote tiyo kika aryo ame twero dolle oko, kun otio magi-nono i bao me yat cipre. Odeo daŋ kome oko i cal okerubi, cal yat otit kede cal ature ame ogogoro i komgi, ote mwono komgi luŋ i jabu ame olilio acil meicel. Dyekal onwoŋo ogero tuŋ nyim ot Obaŋa, ame ote guro oko kede cel ame otio i kiddi ame opao ocano i yore adek, kede bao me yat cedar yore acel. Culeman ocako gero acakki me te ot a Rwot i mwaka me aŋwen me loccere, i dwe me aryo ame olwoŋo ni Jib. Eka i mwaka me apar wie acel, i dwe me aboro, ame olwoŋo ni Bul, en ame tic me ot a Rwot te tum iye, kun otum aber i kite ame rik oyiko ni myero ti kede. Gedo mere otero mwakki abiro. Culeman dok te gero ode en ikome, ame ticcere otero mwakki apar wie adek twal te tum. En ogero ot ocele ame olwoŋo ni Buŋ me Lebanon. Borrere onwoŋo romo futi mia acel kede pyerabic, eka laccere te bedo futi pyerabiro wie abic, borrere me malo te bedo futi pyeraŋwen wie abic. Pagi me ottono onwoŋo tye oryeye i yore adek, ame i yore acel acel tye iye pagi me yat cedar apar wie abic, kun arii me bao cedar obuto i wigi malo. Icika atitino i malo daŋ ogero i yen cedar, ame oririo obuto i wi pagi pyeraŋwen wie abic, ame oryeye i yore adek ca, kun i yore acel acel tye iye pagi apar wie abic. Bao me purem me waŋ dirica daŋ oryeo i yore adek kun dirica acel acel otikere awottere. Doggola luŋ kede dirica luŋ twokgi onwoŋo tye aŋwen aŋwen, kun dirica otikere kede dirica wadgi, ame oryeye daŋ i yore adek. Dok te gero ot ocele ame pagi tye iye apopol; borrere onwoŋo romo futi pyerabiro wie kany, eka laccere te bedo futi pyeraŋwen wie kany, kun i doggola me donyo i tuŋ nyime tye iye ot ocele atidi ame wie obuto i wi pagi. Dok te gero icika ocele ame kommere me loc bedo iye ame olwoŋo daŋ ni Ot ŋolo kop, ame en kan ame Culeman ŋolo iye kop. Ottono daŋ onwoŋo ocano bao cedar me wumo apama mere, cakere i dye ot piny tuno kede naka i kom apama i malo iyi ot. Culeman dok te gero ot ocele me bedo mere. En ogero mannono i kit gedo acellono, kun ogero i dyekal ocele i ŋe ot ŋolo kop. En daŋ dok te gero kit ot acellono pi dako mere, ame obedo nyaka abaka me Miciri, ame rik en onyomo. Udi magi luŋ, anaka ot a Rwot, cakere iyi acakki tergi piny naka i wigi malo, onwoŋo ogerogi luŋ i kiddi mogo ame welgi malo meicel, kun opaogi aber i kite ame onwoŋo rik amito ikokome; ŋegi kede yigi luŋ onwoŋo oyiko aber meicel, kun oyiko kede ocumeno. Iyi acakki te udi onwoŋo ogero i kiddi adoŋo, dok ame oyiko aber meicel, kiddi ocele onwoŋo romo futi apar wie aryo, kede en ocele ame romo futi apar wie abic. I wi kiddi me acakki te ot ote keto iye kiddi ame welgi malo meicel, kun opaogi dokopimo ditogi i kite ame amito ikokome, karacel kede bao me cedar. I cel ame onwoŋo omano dyekal adwoŋ ocano iye kiddi ame opao i yore adek, eka ote tiyo bao cedar i wigi; dyekal me yie ame omano ot a Rwot, kede ot atidi ame tye i doggola me donyo i ot a Rwot daŋ ogero amannono. Abaka Culeman ocwao kwena i Turo, ote kelo lomoro ame nyiŋe Kiram, ame onwoŋo adiro i tic me mola. Pappere onwoŋo rik obedo dano ame oya i Turo, en daŋ onwoŋo rik obedo lo ame adiro meicel i tic me mola, cite i kare-nono onwoŋo doŋ oto oko. Tottere rik onwoŋo oya iyi atekere a Naputali. Kiram rik obedo twon lo moro aryek meicel dok daŋ onwoŋo doŋ ocwiny atek i tiyo jami luŋ ame otio i mola. En oye gamo tic ame Culeman rik olwoŋe pire, tic me loyo tic luŋ ame otio i mola. En otio pagi me mola aryo, kun acel acel borrere romo futi pyeraryo wie abiro, lac a kore te bedo futi apar wie aboro ka opimo i tol; yigi onwoŋo twolo, inoŋŋere onwoŋo buco romo inci adek. En dok te twako tok mola aryo me aketa i wigi, kun acel acel borrere romo futi abiro kede nucu. Dok te tiyo gin obedo bwobwo, ame okedo i nyor; otio gin aryo, acel pi tok me aketa i wi pagi acel kede acel pi en ocele. En te tiyo dok cal okwer pomegranat yore aryo ame omano tok me aketa i wi pagi acel acel kun bedo i wi gin obedo bwobwo ame owumo tok me aketa i wi pagi. Tok me aketa i wi pagi-nono rik onwoŋo odeo luŋ i cal kalaŋweka ame bocogi romo futi abicel abicel. Ginnoro oluŋere bala gulu pii onwoŋo oketo i wi pagi aryo luŋ. Cal okwer pomegranat luŋ onwoŋo tye mia aryo pi pagi acel acel, kun ocanogi i yore aryo i dog obwo nyor i kom tok me aketa i wi pagi. Kiram rik te keto pagi aryo-nono i nyim icika ame tye i doggola ame donyo i ot Obaŋa; oketo acel tuŋ anyarolum te cako nyiŋe ni Jakin, eka te keto en ocele tuŋ anyarodi, te cako nyiŋe ni Boaj. Otio cal kalaŋweka i wi pagi aryo luŋ. Mannono en kite ame rik otyeko kede tic i kom pagi. Kiram dok te tiyo dero pii me mola oluŋere aluŋa ame tuttere romo futi abiro kede nucu, lac me yie futi apar wie abic, ya i doge tuŋ cel tuno naka i doge tuŋ cel; eka laccere mano kore luŋ te bedo futi pyeraŋwen wie abic. I lak doge i piny ote ryeyo iye cal opoko mano amana, ame kan oryeo iye nono romo futi pyeraŋwen wie abic. Cal opoko-nono oryeo i yore aryo. I kare ame otio dero pii me mola, otio daŋ cal opoko i kome cutu. En otero dero gwoko pii-nono te wot cibo i ŋe cal twoni me mola apar wie aryo, kun ocuŋ adek adek: adek oneno tuŋ anyarodi, adek oneno tuŋ anyarolum, adek oneno tuŋ to, kede adek te neno tutuŋ kide, ŋegi luŋ odok i te dero. Inoŋ a kom dero-nono onwoŋo romo inci adek; doge ote tiyo bala dog kopo, ame rom aroma i tur kalaŋweka. Dero gwoko pii-nono onwoŋo twero donyo iye pii ame romo debe tutumia aŋwen. Kiram dok te tiyo gadigadi me mola apar. Gadigadi acel acel onwoŋo borrere romo futi abicel, laccere daŋ futi abicel, eka borrere me malo te bedo futi aŋwen kede nucu. Gadigadinogo rik otio kit man; opeto mola apada arorom i ŋete luŋ, kun gin luŋ okubere kede arii me mola. I kom mola apada-nogo onwoŋo ogogoro i komgi cal eŋatu, kede cal twoni, kede cal okerubi. Arii me mola daŋ onwoŋo odeo doggi i cal nyor ame odwalo malo i wi cal eŋatu kede cal twoni, dok daŋ odwadwalo en ocele i tyengi. Gadigadi acel acel onwoŋo tye kede tyene me mola aŋwen kede arii me mola aryo me notogi aryo aryo. Itwoke aŋwen ducu te bedo iye akwak tako lwok ame tye iyi gadigadi. Akwakkono luŋ onwoŋo odeo komgi i cal nyor ame odwalo i komgi. I doge onwoŋo tye iye ginnoro ame oluŋere aluŋa, kun ocuŋ malo i wi gadigadi ame borrere romo futi acel kede nucu, cakere i kom gadigadi dok kede malo. Doge ogurre agura kun tuttere ya i doge dok i tere piny romo futi aryo. Odeo doge-nono kede callogo ame ogogoro iye. Okot tyengi onwoŋo tye futi aryo ka ocuŋ acuŋa; gin aŋwen luŋ otye i te mola apada kun arii mola okukubogi onotogi kede kom gadigadi. Okot tyengi otio arom aroma okot me gadigadi lweny; jami komgi luŋ obedo mola ame olio alia. Akwak mola onwoŋo tye i te gadigadi acel acel, ame gin luŋ okubere oko kede kom gadigadi. I wi gadigadi acel acel onwoŋo otio iye ginnoro ame oluŋere aluŋa, ame borrere romo inci aboŋwen, dok akwak tako lwok iyi gadigadi kede mola apada luŋ okubere oko i kom gadigadi. I kom akwak luŋ kede mola apada, ogogoro iye cal okerubi kede cal eŋatugu karacel kede cal otit-gu, kannoro ame oneno ni cal romo goye iye, ote daŋ dok dedeo oko kede cal nyor ame odwalo i ŋetgi. Kiram otio kodi gadigadi-nono apar. Gin luŋ onwoŋo ororom dok daŋ ocacal. Kiram daŋ dok te tiyo tako lwok apar, kun acel acel tye pi gadigadi acel acel. Tako lwok acel acel laccere onwoŋo romo futi abicel dok oromo onyo iye pii ameromo debe pyeraboro. En te ryeyo gadigadi abic tutuŋ anyarolum me ot a Rwot, kede abic tutuŋ anyarodi, eka dero me gwoko pii en te miyo cuŋ i gul ot tutuŋ anyarolum ame dok tutuŋ kide. Kiram dok te tiyo tako jobo buru apol, atok buru kede becen lwok. Kiram te tyeko tic abaka luŋ i kom ot a Rwot. Jami ame en otio ene: pagi aryo, tok me aketa i wi pagi daŋ aryo, ame oluŋere calo gulu, kede bwo daŋ aryo me wumo wi tok ame oketo i wi pagi. Cal okwer pomegranat mia aŋwen pi bwo aryo-nu, eka te ryeyogi i lak bwo acel acel kun ryeogi i yore aryo, me wumo wi tok ame oketo i wi pagi aryo ca. Dok te tiyo daŋ gadigadi apar kede tako lwok apar ame oluto iyi gadigadi. Te tiyo daŋ dero gwoko pii acel, kede cal twoni apar wie aryo ame ocibo dero gwoko pii i ŋegi. Jami magi luŋ ame rik Kiram otio pi abaka Culeman, gin luŋ rik otio i mola ame olilio komgi apwot meicel. Abaka rik omio orio: magi luŋ i bar me kulo Jordan kan ame lobo me cweyo gulu tye iye i akina Cukot kede Jaretan. Jami ame otio-nono luŋ Culeman mom omio opimogi pien onwoŋo pol meicel; mannono omio pek a mola ame otiogi kede mom ŋeye. Mannono en kite ame rik Culeman otio kede jami luŋ ame tye i ot a Rwot, gin jami-nono ene: keno lam me jabu, meja me jabu pi ogati aketa i nyim Rwot, acib tara me jabu ame olio aber, ame oryeo i nyim kabedo acil ame tye i tyelo, kun kany tye tutuŋ anyarolum kede kany tutuŋ anyarodi; kede cal ature apipim, karacel kede boi kwanyo mac, ame gin luŋ otiogi i jabu; kede ikopo apopol, makac apopol, tako lwok daŋ apopol, tako me waŋo odok akur kede weer me lodi mac, ame gin luŋ daŋ otiogi i jabu ame olio aber; kede pata me aketa i kika me doggola ame donyo iyi icika i tyelo, ame en kabedo acil meicel, kede me aketa i kika me doggola ame donyo iyi icika adwoŋŋere me ot Obaŋa. Man en kite ame rik tic luŋ ame abaka Culeman otio i kom ot a Rwot otum kede. Culeman te daŋ kelo jami luŋ a rik pappere Daudi ojalo baŋ Rwot iye; okelo ryal, jabu, kede jami ocele acalo tabbi, cupa, kopo, te kanogi luŋ i ot kano lim a Rwot. Culeman rik te lwoŋo odoŋe me Icrael, odoŋ atekere, kede odoŋe ame loo doggola a kwarigi, me bino baŋe i Jerucalem, me bino kwanyo canduk cikere a Rwot ame rik onwoŋo tye i paco a Daudi ame olwoŋo ni Cion. Jo Icrael luŋ te bino cokere baŋ abaka Culeman i kare me kwero ecuban, i dwe me Etanim, ame en dwe me abiro. I kare ame odoŋe luŋ me Icrael obino, olamdog doŋ te tiŋo canduk cikere a Rwot, kun jo Levi konyogi. Gin te tero candukkono kede kema me rwatte karacel kede jami acil luŋ ame rik onwoŋo tye i kema. Abaka Culeman karacel kede jo Icrael luŋ te cokere karacel i nyim canduk kono, kun oŋolo lwak rommi kede twoni apipim, ame welgi mom ŋeye, dok daŋ mom romo kwanne, me yalo Rwot. Olamdog te doŋ tiŋo canduk me cikere a Rwot tero naka i kabedo mere iyi icika acil ame tye i tyelo i ot a Rwot, ame en kabedo acil meicel, ote wot keto piny kuno i te bwom okerubi. Bwom okerubi ame oyarre te wumo candukkono oko karacel kede ludi luŋ me tiŋe. Ludi onwoŋo rik boco meicel, ame ka ŋattoro ocuŋ i kabedo acil i nyim kabedo acil meicel ame tye i tyelo, twero neno wigi, ento pe twero nen i oko; ludi-nono pwod tye kuno naka atot t in. Ginnoro ocele onwoŋo rik mom i candukkono, kono ka kiddi apada ame rik Muca okelo kuno i te kidi me Cinai, kan ame Rwot rik ocikere iye i jo Icrael i kare ame gin oya i Miciri. I kare ame olamdog oya i kabedo acil, pol obino te poŋ ot a Rwot oko. Mannono omio olamdog mom dok romo tiyo ticgi i ot a Rwot pi pollono, pien kwogo a Rwot onwoŋo doŋ opoŋ iyi ot oko. Abaka Culeman te cako kwayo Obaŋa kun kobo ni, “Rwot doŋ okelo cen i polo, ento en oyero gire bedo i pol acol icuc. Agerri doŋ twon ortoro amalo meicel, me bedo kabedoni nakanaka.” Abaka Culeman te doŋ lokere neno lwak, eka te lamo winyo i kom jo Icrael luŋ, kun jo tye ame ocuŋ gigi mot. Abaka te kobo ni, “Pwo wunu Rwot Obaŋa me Icrael! Pien en ikome omio gin a rik eciko i doge baŋ pappa Daudi ocobere, ame en rik okobo ni, ‘Cakere i kare ame akwanyo jona Icrael i lobo Miciri, mom ru ayero boma moro iyi atekere me Icrael luŋ me gero ottoro iye, kan ame amito ni wora iye; ento an ayero Daudi me loyo lwakka Icrael.’ ” Culeman te medde kobo ni, “I kare-naca pappa Daudi obedo kede tam i cunye me gero ot me woro Rwot Obaŋa a jo Icrael. Cite Rwot en ame rik te juko pappa kun kobbe ni, ‘Itimo ber me bedo kede tam me gero ot me wora, ento mom yin en ame ibino gerra ot, wodi ame ibino nywalo en ame bino gero ot me wora.’ Nen Rwot doŋ otyeko miyo gin a rik eciko ocobere oko; pien en omio an aleo kaka pappa Daudi acalo abaka me Icrael, kite ame Rwot ociko-naca, dok daŋ doŋ atyeko ot me woro Rwot Obaŋa me Icrael. Dok daŋ atyeko keto ka gwoko canduk a Rwot i ode-naca, canduk ame tye iye kiddi apada aryo me cikere ame rik Rwot ocikere kede i kwariwa, i kare ame kwanyogi i lobo me Miciri.” Culeman te ya wot cuŋ i nyim keno lam kun lwak jo Icrael luŋ tye aneno, te taŋo ciŋe malo i polo, okwao Rwot kun kobo ni, “Ama Rwot Obaŋa a jo Icrael, mom dok tye Obaŋa moro ocele ame cal kedi, akadi malo i polo onyo piny i wi lobo, ame gwoko cikere mere calo yin, yin ame inyuto marri baŋ omironi luŋ ame lubi kede cunygi luŋ. Ibedo lubo ginnoro luŋ ame rik ititti pappa Daudi; gin ame yin rik ikobo kede dogi, aman doŋ yin ikomi icako miyo cobere oko, dok daŋ tye acobere luŋ kakare. Ama Rwot Obaŋa a jo Icrael doŋ ityeko giri lubo ginnoro luŋ ame rik ikobo baŋ pappa Daudi ni, ‘Mom gire ibino bedo aboŋo akwarri moro i wi kom me loc me Icrael, tekki ikwaeni bino bedo jo ame kitegi beco, kun otio gin ame an amito, kite ame yin ibedo tiyo kede-ni.’ Ama Obaŋa me Icrael, tim ber aman doŋ imed moko koppi-naca ba, ame rik ikobo baŋ pappa Daudi, me bed kit ame rik ikobo kede. “Ento Obaŋa bino bedo piny i lobo kan ateni? En ame kadi polo twal mom daŋ romme-nie, kara doŋ ot ame ogero-ni twero romme niŋo? Kadi amannono ba, tim ber iwiny kwacca, an amironi, abako doga Ama Rwot Obaŋa, tim ber iwiny kokona kede kwacca ame akelo i nyimi tin-ni. Tim ber inen ot man dyewor kede dyeceŋ, kabedo man ame yin iyero me bedo kan ame myero jo wori iye. Tim ber iwiny kwacca ame akelo i nyimi i ot man. Winy kwacca kede kwac a joni Icrael ka ce gin okwao i ot man. Winy ba, Ama Rwot, i kabedoni ame tye malo i polo dok daŋ i timwa kica i kom balwa. “Ka ce ŋattoro otimo balloro baŋ dano wadgi, eka ote kele kan i nyim keno lam me en kwoŋ iye, Ama Rwot, tim ber iwiny i kabedoni i polo ite ŋolo kop iyi akina omironi. Mi can pot i kom abalo, kun imio ŋat a kopporo mom i kome lo kop. “Ka ce okwor a joni Icrael oloogi oko pi balloro ame gin obalo i nyimi, ka ce oŋut ote dwogo baŋi, ote bino paki i ot man, kun obako doggi baŋi, tim ber iwiny kwacgi i kabedoni ame tye malo i wi polo. Tim joni kica i kom balgi ite dwoggogi i lobo a rik imio baŋ kwarigi. “Ka ce joni Icrael otimo balloro baŋi eka ite keto can i komgi, kun itwonogi kot oko, icennere gin te ŋut, ote dwogo kwayi i ot man kun daŋ opako nyiŋi, tim ber iwiny kwacgi i kabedoni ame tye malo i wi polo. Tim ber itim omiro-ni kica i kom balgi ame gin obedo joni Icrael. Pwonygi me bedo i kit kwo ame yin imito, mi kot cwe i loboni, ame rik imio baŋ joni Icrael me bedo lobogi doŋ atwal. “Ka ce kec opoto i lobo onyo two edeke onyo ceŋ alyet otwoo kal oko, onyo oner oko, onyo kit kudi mogo ocele en ocamo; onyo ka okwor oero lweny i kom joni, onyo ka two moro ocele en ame opoto i akinagi, tim ber iwiny kwacgi. Ka ce ŋattoro keken i akina joni Icrael ame cunye ocwer obino ocwalo kwaccere baŋi i ot man, onyo jo Icrael luŋ ocwalo kwacgi baŋi, tim ber iwiny kwacgi. Winy kwacgi i kabedoni ame tye malo i wi polo, timgi kica, ite timo gin ame ineno ni porre pire onyo pirgi, i kom gin ame gin okwao. Yin keni giri iŋeo gin ame tye i cuny dano acel acel; pi mannono, yin timmi ŋat acel acel gin ame ineno ni porre pire, me joni Icrael bed kede lworo i komi i kare luŋ ame gin tye i lobo ame rik imio baŋ kwarigi. “Ka ce arokkoro ame mom obedo dano me Icrael owinyo piri, kede pi gigi mogo adoŋodoŋo ame ibedo timo baŋ joni Icrael, eka te bino i ot man pi bino wori, kun oya i lobo aber, tim ber iwiny kwaccere i kabedoni ame tye malo i wi polo. Tim ber iti gin ame en okwai pire, me jo me wi podo luŋ ŋei ote bedo kede lworo i komi ame rom aroma kede joni Icrael. Mannono bino miyo gin ŋeo ni ot an agero kan piri-ni en ame obedo kan ame myero wori iye. “Ka ce yin iciko joni me wot lweny okworgi, ka ce gin okelo kwacgi i nyimi i kan ame gin tye iye kuno, kun nyimgi oneno kabedo ame yin en iyero, kede ot ame an agero piri-ni, tim ber iwiny kwacgi, i kabedoni ame tye malo i wi polo, ite miyogi loyo okworgi oko. “Ka ce joni Icrael opoto i bal i nyimi, pien mom tye dako moro kadi acel a mom timo bal, eka akemo te maki i komgi, ite miyo okworgi loyogi oko, te daŋ terogi oko acalo opii i lobo moro ocele ame tye kan abor onyo ame tye kan aceggi; cite ka ce i kare ame gin tye kuno cunygi te kolo piny, ote ŋut, ote kwayi kun otuco balgi i nyimi, kun oye ni kitegi oballe oko pi gin arac ame gin obedo timo, tim ber iwiny kwacgi, Ama Rwot. Ka ce i kare ame gin otye i lobo ame oterogi iye acalo opii, gin te ŋut kun oŋut ateteni i cunygi ducu, ote kwayi i kuno kun tuŋ nyimgi oneno lobo man ame yin rik imio baŋ kwarigi, kede kabedo man ame yin giri en iyero, kede ot ame an agero piri-ni, tim ber iwiny kwacgi, i kabedo ni ame tye malo i polo, ite timogi kica i kom balgi. Timgi daŋ kica pi jem i komi, imi jo ame oterogi iyi opii bed kedgi aber. Gin obedo joni ame yin rik ikwanyo i lobo me Miciri, kun iwotogi i kom mac alyet. “Ama Rwot Obaŋa, tim ber i kare ducu iwiny kwacca kede kwac a joni Icrael i kabedo ducu ame gin tye iye, kur iwir waŋi teŋe ka ce gin okok baŋi. Yin yam doŋ iyerogi oko i akina rok ocele me wi podo, me gin bed joni ikome, kite ame rik yin imio amironi Muca okobo i kare ame rik ikwanyo kwarigi i Miciri, Ama Rwot Obaŋa.” I kare ame Culeman doŋ otyeko kwayo Rwot, en oya oko i nyim keno lam, kan ame en onwoŋo orumo iye kun otino ciŋe malo i polo. En oya malo te cako lamo winyo i kom lwak luŋ ame onwoŋo ocokere kaci-naca, kun redo i dwon aloŋo ni, “Myero pwo Rwot ame omio jo mere Icrael kuc, kite ame en rik ociko kede. Kopporo luŋ ame en rik ociko, mom tye moro iye ame mom ocobere kite a rik en okobo baŋ amiro mere Muca. Rwot Obaŋawa myero medde bedo kedwa kite ame en rik obedo kede kwariwa; en myero kur ya i baŋwa onyo wekwa ata; en myero miwa obed jo ame winyo kun otio gin ame en mito, dok daŋ ogwoko cikere kede ginnoro luŋ ame en rik ociko onyo okobo baŋ kwariwa. Dyeceŋ kede dyewor Rwot Obaŋawa myero poyo kwacca ame akelo i nyime-ni luŋ. Myero nino i nino en kony jo Icrael kede abakagi, kun timo gin a mitte. Mannono bino miyo rok luŋ me wi podo ŋeo ni Rwot kene en obedo Obaŋa, Obaŋa moro ocele doŋ pe. Rwot myero miwu ibed wunu jo ame geno Rwot Obaŋawu i cunywu luŋ, kun itio wunu gin ame en mito dok daŋ igwoko wunu cikkere luŋ, kite ame itye wunu ka timo i kare man.” Abaka kede jo Icrael luŋ a rik tye kuno te yalo Rwot. Culeman oyalo Rwot i mot me kweyo cuny, twoni tutumia pyeraryo wie aryo, kede rommi tutumia mia acel i pyeraryo nono. Abaka karacel kede jo Icrael luŋ akwero ot a Rwot kittono. I nino-nono daŋ abaka okwero iye dyekal ame tye i nyim ot Obaŋa. En oyalo Rwot kuno i mot awaŋa, kede mot me moko kwon kede mot me dwol leyi ame oya i kom mot me kweyo cuny, pien keno lam me mola ame onwoŋo tye i nyim ot Obaŋa onwoŋo mom romo yalo mot magi luŋ iye. Culeman kede jo Icrael luŋ te kwero ecuban; gin te bedo i nyim Rwot Obaŋawa nino abiro. Jo Icrael ame onwoŋo okwero ecubannono onwoŋo dwoŋ meicel, jo luŋ ame onwoŋo oya i dog yo ame woto Kamat tuno kede naka i kulo me Miciri. I nino me kany wie adekkere, Culeman te cwayo doŋ lwak dok i paccigi. Jo luŋ te pwoyo abaka, ote wot i paccigi kun cunygi yom atek meicel pi jami abeco luŋ ame Rwot otimo pi amiro mere Daudi kede lwakkere luŋ ame gin jo Icrael. Kare ame Culeman doŋ otyeko gero ot a Rwot, kede ot abaka, kede udi ocele luŋ ame rik en amito, Rwot dok omedo nen baŋe tyen me aryo mere, kite ame rik koŋ onen kede baŋe i Gibeon ca. Rwot okobbe ni, “Atyeko doŋ winyo kwacci luŋ ame ikwao. Atyeko lonyo ot ame igero-ni me bedo kabedo acil kan ame jo bino wora iye nakanaka. Wia mom bino wil iye kadi acel. Aco yin ba, ka ce yin ibino tic baŋa kite ame pappi Daudi obedo timo, kun yii ler dok daŋ atira, ce ibedo tiyo gin ame aciko luŋ, kun igwoko daŋ cikka luŋ, an abino moko locci i Icrael bedo atwal, kun a gwoko gin a rik aciko baŋ pappi Daudi kare ame akobbe ni, ikwae en ame bino loyo jo Icrael nakanaka. Ento ka ce yin onyo ŋattoro iyi akina ikwai ogak oko iyo apat kun mom dok luba dok daŋ mom tio gin ame aciko, mom daŋ mako cikka ducu, eka ite kobo wunu oko baŋ obaŋe ocele kun daŋ dok iworogi wunu, an abino kwanyo jona Icrael oko i lobo ame rik amiogi. Ot man ame doŋ atyeko lonyo obedo acil me wora-ni daŋ abino weko ata, dok abino miyo jona Icrael doko gin ame rok luŋ lolo i doggi, kun oceko kop i komgi. Ot man bino doko twon wi oburroro oyido ibim, ame jo luŋ ame bino beo i ŋete bino wuro awura kun ojwiye kengi kengi okobo ni, ‘Ŋo kara omio Rwot otimo lobo man kede ot man kit man ba?’ Jo ocele bino kobo ni, ‘Pien jo Icrael oweko Rwot Obaŋagi oko ata, ame rik okwanyo kwarigi i lobo me Miciri, gin gigi dok olunyo kobo baŋ obaŋe mogo ocele, kun oworogi dok daŋ otio tic pirgi. Mannono en omio Rwot oketo twon can agwa wok-ki i komgi.’ ” Gero ot Obaŋa kede me abaka oterri Culeman mwakki pyeraryo twal me tumo Abaka Kiram me Turo en obedo miyo Culeman bao me cedar kede bao cipre luŋ karacel kede jabu ame onwoŋo en mito. Kare ame tic me gedo doŋ otum, Culeman omio Kiram pacci ame romo pyeraryo twal i lobo me Galilaya. Cite i kare ame Kiram oya i Turo te bino i pacci-nono, en onwoŋo ni pacci ame omie-nono mom yomore cunye. En te kobbi Culeman ni, “Ominna, man en kit pacci ame yin imia?” Man omio kan ame rik omio Kiram-nono luŋ pwod olwoŋo ni Kabul naka atot tin, ame te koppere ni, “Konygi mom.” Kiram onwoŋo rik ocwayi Culeman jabu ame pekkere romo tan abic ame romo poŋo lori adittere me kare-ni. Abaka Culeman obedo rono jo arona i tic me gero ot Obaŋa kede mere, kede Millo, karacel kede cel me Jerucalem. Otio daŋ amannono i kare ame gero pacci me Kajor, Megido kede me Gejer. Parao abaka me Miciri onwoŋo rik owoto olwenyo i kom boma me Gejer te mako oko, eka te waŋo bomagi-nono oko. Doŋ kare ame Culeman onyomo nyare, en te miyo boma-nono acalo mot ame omio i kare me nyomere, eka Culeman te dok gero. Culeman orono daŋ jo pi gero boma ame olwoŋo ni Bet-Koron Apiny, kede Baalat, kede Tamar, ame tye i tim i lobo me Juda, kede boma luŋ ame rik ogwoko iye cam a Culeman, kede boma luŋ ame ogwoko iye gadigadi me mony kede boma a wegi aguragura, kede kit gedo ocele luŋ ame en rik omito ni ger i Jerucalem, i Lebanon, kede i lobo luŋ ame en onwoŋo loo. Jo ame en obedo rono i tic me gedo obedo jo luŋ ame odoŋ i kin jo Periji, jo Kivi, kede jo Jebuc, ame gin mom obedo jo Icrael. Ikwaegi ame rik jo Icrael mom oneko i kare ame gin gamo lobogi me bedo meggi, gin en ame Culeman obedo rono i tic kite ame pwod otye ka ronogi i tic naka atot tin. Culeman mom otio i jo Icrael ikokome acalo opii; gin obedo ocirikale, odoŋe a loo tic apapat, kede odoŋe me mony, kede odoŋe me gadigadi lweny, kede oŋwec aguragura abaka. Odoŋe ame loo tic apapat me gedo ame rik Culeman oketo rik romo mia abic kede pyerabic. Jo-ni en ame obedo loyo tic luŋ ame Culeman otio. Kare ame dako a Culeman ame obedo nya jo Miciri odak oko i ode ame Culeman ogerre, Culeman te dok gero Millo. Culeman rik te bedo yalo Rwot tyen adek i mwaka acel, kun yalo Rwot i mot awaŋa kede mot me kweyo cuny i wi keno lam ame en ocano me yalo Rwot. En daŋ obedo waŋo mot a ŋwece kur me yalo Rwot. Mannono kite ame en rik otyeko kede tic me gero ot a Rwot. Abaka Culeman daŋ rik otio mel apipim i paco me Ejion-geber ame ceggi kede Elat i dog nam Arema, i lobo Edom. Abaka Kiram rik te cwayo jo mere ame gin odiro i nam, gin te wot tic i mel ame otio-nono kun otio karacel i jo a Culeman. Gin rik te wot i melenogo naka i Opir ote wot kelo jabu i kuno, ame pekkere onwoŋo buco romo tan apar wie abic; romo poŋo lori adito me kare-ni adek gin te kelo jabu-nono luŋ baŋ abaka Culeman. Kare ame abaka a dako me Ceba owinyo nyiŋ Culeman orwo atek, en obino baŋe me bino teme kede pennyere mogo atek meicel. En otuno i Jerucalem kede jo ecipan ame gwoke, kede inaga apipim ame oyeo jami mogo ame ŋwecgi kur, kede jabu adwoŋ atata, kede gweŋe alilia me wel. Kare ame en otuno baŋ Culeman, en otitte kop luŋ ame onwoŋo tye i cunye. Culeman te dok i pennyere luŋ; mom tye moro kadi acel ame tuco oloo abaka. Kare ame en doŋ oneno ryeko a Culeman luŋ, kede ot ame en ogero, kede cam ame obedo tedde, kede lwak jo ame otio baŋe, kede boŋŋi mogo me wel ame omiro mere ruko, kede jo ame mie koŋo olok, karacel kede mot ame en yalo kede Obaŋa, wi abaka me Ceba te cuŋ oko. En te kobbi abaka Culeman ni, “Gin ame abedo winyo i komi kede i kom ryekoni i kare ame pwod atye i lobona, tye kara ateni! Cite an onwoŋo mom aye, tuno ka tin doŋ aneno kede waŋa. Nen ba, kop ame onwoŋo awinyo i komi kara onwoŋo aduno moro; ryekoni kede lonyoni dwon kara atek meicel ame kato kit ame onwoŋo okobba kede oko. Monni komgi i gum okato kare! Omironi luŋ komgi i gum meicel, me cuŋ i nyimi kare luŋ kun owinyo kop me ryeko ame ya i dogi! Rwot Obaŋani myero pwo atek meicel, pien onyuto yomcunye i komi pi keti bedo abaka me Icrael! En gire doŋ omaro jo Icrael atwal, en omio en oketi me bedo abakagi, me yin ilogi aber kun itio gin ame tye atira, dok iŋolo kop kakare.” Abaka a dako me Ceba te miyo Culeman jabu ame pekkere buco romo tan abic, ame romo poŋo lori adittere me kare-ni, kede odokkogo ame ŋwecgi kur apipim, kede gweŋe me wel apipim. Odok a ŋwecgi kur ame abaka a dako me Ceba omio baŋ Culeman onwoŋo dwoŋ atek ame kato en ocele luŋ ame yam abaka Culeman onwoŋo. Medo i kom mannono, mele ame abaka Kiram okelo, kede bao mogo me yat ame olwoŋo ni almug, kede jabu i Opir, karacel kede gweŋe alilia me wel apipim. Bao-nono abaka Culeman te tic kedgi me pagi i ot a Rwot kede i ot abaka. Otio daŋ i naŋa kede naŋa opuk pi jo ame wero. Man en yen abeco meicel ame rik okelo i lobo me Icrael, ame moro mom dok omedo bino atwal naka atot tin. Abaka Culeman te miyo baŋ abaka a dako me Ceba jami luŋ ame en rik omito, omie ginnoro luŋ ame en rikopenyo, kun medo iye gin ame en omio ame lubo lonyo mere. Eka abaka a dako me Ceba kede jo mere te doŋ dok i lobo mere me Ceba. Abaka Culeman rik onwoŋo jabu abup meicel ame kato tan pyeraryo wie abic i mwaka cel acel. Man onwoŋo mom okwano iye en ame bino i baŋ ocatwil me paco kede me lobo a jo a oko, kede en ame ya i baŋ obakki me lobo Arab, kede en ame gabuna mere ame loo lobo apapat mio. Culeman rik daŋ otio kwode adoŋo ame romo mia aryo, kun otiogi luŋ kede jabu ame oteto anyul; kwot acel acel odonyo iye jabu ame pekkere buc romo ratili apyeraryo, En otio daŋ kwode atino ame romo mia adek, kun daŋ otiogi luŋ i jabu, ame kwot acel acel odonyo iye jabu ame pekkere buco romo ratili abicel. Abaka rik te ketogi luŋ i ot olwoŋo ni, Buŋ me Lebanon. Abaka Culeman dok otio daŋ kom loc adwoŋ, i lak lyec, te mwono kome luŋ i jabu ame olio aber. Kom loccono rik tye kede citep abicel, kun i ŋeye tye iye cal wi twon. I ŋeye tuŋŋi i tuŋŋi ote keto iye atenciŋ, kun cal eŋatu aryo ocuŋ i ŋet bad kom me teno ciŋ, dok daŋ tye cal eŋatu ocele apar wie aryo ame ocuŋ i agikki citep abicel ca, tuŋŋi kede tuŋŋi. Pe tye kommoro ame abaka moro otio a cal i kommono. Ikopo abaka luŋ rik otio i jabu keken, kede jami luŋ ame rik otio kedgi i Buŋ me Lebanon, gin luŋ rik otio i jabu ame olio aber meicel. Ginnoro ame otio i ryal mom nen i akinagi kadi acel, pien i kare a Culeman ryal onwoŋo obedo ginnoro a mom otamo pire. Abaka rik daŋ tye i lwak mel ame woto Tarcic karacel kede mel a Kiram. Mel me Tarcic rik onwoŋo dwogo paco i mwaka adek adek, kun okelo jabu kede ryal, kede lak lyec, karacel ayom kede abim. Abaka Culeman rik obedo twon abaka moro ame alonyo dok aryek ame kato obakki ocele luŋ. Jo me wi podo luŋ obedo kede mit me bino baŋe, me bino winyo kit ryeko ame Obaŋa onwoŋo omie. Ŋat acel acel a rik bino baŋe, kelo mot a kitgi papat, acalo, jami ame otio i ryal, kede en ame otio i jabu, kede boŋŋi me aruka, kede odok murra, kede gin a ŋwece kur, aguragura kede kanne adoŋo mege; man rik timere mwaka i mwaka. Culeman rik ocoko gadigadi lweny karacel kede olweny ame riŋo aguragura. En rik onwoŋo doŋ tye i gadigadi lweny ame romo tutumia acel kede mia aŋwen karacel kede wegi aguragura ame romo tutumia par wie aryo. Mogo i akinagi rik bedo i boma apapat ame ogwoko iye gadigadi, kun en ocele bedo baŋ abaka i Jerucalem. I kare me loc a Culeman, ryal rik doŋ odoko ginnoro a pire mom dit i Jerucalem calo gweŋ, kun daŋ bao me cedar dwoŋ atata i Jerucalem calo olam ame tye i bar me Cepela. Culeman rik onwoŋo aguragura mere iya i lobo me Miciri kede i Kue; ocatwil abaka rik gamogi i Kue i wel ame nwoŋo omoko oko. Gadigadi ame ya i Miciri rik acel acel romo cekel me ryal mia abicel, eka aguragura acel acel te bedo cekel me ryal mia acel kede pyerabic. Ocatwil abaka te dok catogi oko baŋ obakki a jo Kitti kede me Curia. Culeman rik te bedo maro anyira a rok ocele apol atata. Medo i kom nyaka abaka me Miciri, en dok obin onyomo anyira a jo Kitti, kede anyira a jo Moab, anyira a jo Edom, kede anyira a jo Ammon, kede anyira a jo Cidon. Kadi bed Rwot rik ociko ni myero jo Icrael kur nyomere i rok ocele, pien bino miyogi ocako woro obaŋe ocele, cite Culeman onyomogi. Culeman rik onyomo anyira obakki mia abiro kede mon aŋeca mia adek. Monnere-nono te miyo abaka lokki Obaŋa ŋee, man omio i kare ame en doŋ oti, mon owae te tere wot woro obaŋe mogo ocele. En mom dok omedde geno Rwot Obaŋa mere kede cunye ducu kite ame pappere Daudi obedo timo. En obedo woro obaŋa a dako me Cidon ame olwoŋo ni Aciterot, kede jok ipyeda ame nyiŋe Milkom me a jo Ammon. En obedo tiyo gin ame Rwot mom mito, kun daŋ mom ocuŋ atira i gin ame etio calo kit ame rik pappere Daudi obedo timo. Culeman rik te gero kabedo moro me woro jok ame ipyeda, ame olwoŋo ni Kemoc ame obedo me a jo Moab; en ogero i wi kidi ame tye tutuŋ to me Jerucalem; kede dok ka woro jok ame nyiŋe Molek ame obedo me a jo Ammon ame ipyeda. En rik te bedo timo amannono baŋ monne luŋ ame enyomo i rok ocele, kun yalo obanegi kede leyi ame oŋolo, dok wannigi odok akur. Akemo te mako Rwot i kom Culeman, pien onwoŋo mom dok geno Rwot Obaŋa a jo Icrael kede cunye ducu, Obaŋa ame rik onen baŋe tyen me aryo twal-li, dok ame rik daŋ ocike kun kobbe ni myero kur lub obaŋa moro ocele, dok en mom omako cik ame Rwot ocike kede-nono. Man omio Rwot okobbi Culeman ni, “Kit acalo tim man doŋ obalo cunyi oko, dok daŋ mom igwoko cikerena kede icwilla, kun daŋ mom ilubo gin ame aciko, amoko doŋ ateteni me gamo loc oko i ciŋi ate miyo baŋ amironi. Kadi bed amannono, pi amironi Daudi, mom abino timo man i kare ame yin pwod itye kwo, cite abino timo i kare ame wodi doŋ tye i loc. Cite mom abino gamo loc luŋ i ciŋe; ento abino weko atekere acel me Icrael doŋ i te loccere, mannono atimo pi amirona Daudi kede pi Jerucalem ame en boma ame doŋ atyeko yero me bedo mega.” Rwot te miyo okwor bino i kom Culeman, ocwao Adad ame en dano me Edom, dok en rik dano ame oya i ot loc me Edom. Pien i kare ame Daudi rik onwoŋo tye i Edom, Joab adwoŋ ame loo mony owoto kuno me wot yiko kom jo ame onekogi i lweny, en rik te neko co luŋ ame onwoŋo tye i Edom. Joab kede jo Icrael ducu rik te bedo kuno dwete abicel tuno ka gin oneko co luŋ ame onwoŋo tye i Edom. Cite Adad rik te ŋwec oko i Miciri, kun ŋweco karacel omiro a pappere mogo ame gin jo Edom. I kare ame en ŋweconaca onwoŋo en pwod tidi. Gin rik oya i Midian, ote wot naka i Paran, kan ame jo mogo te wot karacel kedgi naka i Miciri. Gin te wot naka baŋ Parao abaka me Miciri, abaka te miyo Adad lobo kede ot buto, kun daŋ mie cam. Abaka me Miciri te cako maro Adad atek meicel, ame te miyo Adad nyomo amu mere, ame obedo a min a dako mere adwoŋ ame nyiŋe Tapenec, Dako-nono te nywalle atin awobi ame nyiŋe Genubat, ame Tapenec te miyo doŋo i ot abaka kun bedo karacel awobe abaka me Miciri. Ento i kare ame kop otuno baŋ Adad i Miciri ni Daudi doŋ oto oko, Joab atel wi monnyere daŋ oto oko, en okobbi abaka me Miciri ni, “Weka doŋ adok gira paco i lobowa ikome.” Cite abaka me Miciri te penye ni, “Piŋo kara imito dok paco turwu. Ŋo ce ame mom inwoŋo i kan?” En ogamo ni, “Yin koŋ iweka an awoti.” En doŋ te dok paco turgi. Obaŋa dok te miyo Rejon wot Eliada doko akwor a Culeman. Rejon onwoŋo rik orino ariŋa i baŋ adwoŋŋere ame onwoŋo obedo Adadejer, abaka me Joba, eka te doko atel wi oyak ame en obedo coko. Man otimere i kare ame Daudi oloo Adadejer, te neko jo Curia ame onwoŋo onotte kede. Rejon karacel kede jo mere te wot bedo i Damaciko, eka ote kete bedo abaka me Damaciko. En obedo akwor a jo Icrael pi kare luŋ ame Culeman pwod kwo. Ŋat ocele ame dok odoko akwor a Culeman obedo Jeroboam ame en rik obedo dano acel i akina omiro a Culeman. Jeroboam onwoŋo obedo wot a Nebat ame obedo dano me Jereda i lobo me Epraim. Tottere onwoŋo dako to ame nyiŋe Jerua. En ocako lokere me bedo akwor a Culeman pi kop man. Culeman rik onwoŋo ogero Millo, en te culo dog cel me paco kan atwolo oko. Jeroboam lo ame onwoŋo obedo atic atek, doŋ i kare ame Culeman oneno ni en tye atiyo tic atek meicel, omie dit me loyo tic ame orono iye jo arona i kom jo me ot a Yucepu luŋ, ame gin jo a Manace kede jo Epraim luŋ. I nino moro acel ame onwoŋo Jeroboam tye ka wot kene iyo kun oya i Jerucalem, en orwatte kede adwarpiny ame nyiŋe Akija i dye tim, kun oya i Cilo. Akija onwoŋo oruko boŋo mere anyen. Akija te gonyo boŋo mere anyen oko ikome, te yeyeco oko atitino i dul apar wie aryo. En te kobbi Jeroboam ni, “Gam boŋŋi ame ayeyeco atitino-ni, apar, iter obed meri, pien Rwot okobo ni, ‘Abino gamo loc oko i ciŋ Culeman, ate miyo atekere apar i ciŋi. Culeman bino medde loyo atekere acel, ame man atimo pi po pi amirona Daudi kede pi Jerucalem, ame boma ame ayero me bedo bomana i kom lobo me Icrael luŋ. Atimo man pien Culeman otyeko weka oko, ocako doŋ woro Aciterot, ame obedo jok ame jo Cidon woro, kede jok ame olwoŋo ni Kemoc amejo Moab woro, kedeen ame olwoŋo ni Milkom ame jo Ammon woro. En aman mom doŋ luba dok mom daŋ doŋ tio gin ame an amito, mom daŋ doŋ mako cikka kede icwilla luŋ, kite ame rik amirona Daudi obedo timo. Mom abino kwanyo loc luŋ iciŋ Culeman, dok abino weko en koŋ bedo i kom loc pi kare luŋ me kwo mere pi amirona Daudi ame rik ayero dok ame obedo gwoko cikka kun tio gin ame an amito. Abino kwanyo loc oko i ciŋ wode, ate miyi loyo atekere apar. Abino miyo wot a Culeman doŋ atekere acel, me wek i kare luŋ akwar amirona Daudi obed i kom loc i nyima i Jerucalem, i boma ame ayero me bedo ka wora. “ ‘Abino miyo yin Jeroboam idoko abaka me Icrael, abino miyi iloo lobo ame cunyi mito luŋ. Ka ce ibino winyo cikka, ite tiyo gin ame an amito, kite ame amirona Daudi obedo timo, an bino bedo kedi kare luŋ. Abino miyo yin en iloo jo Icrael dok daŋ abino miyo ikwai en ame bedo i loc kakari kite ame atimo kede baŋ Daudi. Pi bal ame Culeman otimo, abino keto can i kom ikwae a Daudi, cite cannono mom bino ri nakanaka.’ ” Culeman te temo neko Jeroboam oko, ento Jeroboam te lwi riŋo gire oko i Miciri baŋ Cicak, abaka me Miciri, te wot bedo gire kuno naka Culeman oto. Kop ocele luŋ odoŋŋere i kom Culeman kede gin ame en otio a mom ocoo kan, otyeko coyo luŋ i buk me kwo a Culeman. En obedo abaka ame loo jo Icrael luŋ i Jerucalem pi mwakki pyeraŋwen. En oto te wot weo karacel i kwari mere, oyiko kome i paco a pappere Daudi. Wode Rekoboam te cako loc a kakare. Rekoboam rik te wot i Cekem kan ame onwoŋo jo luŋ ocokere iye me kete i kom me bedo abaka. Jeroboam wot a Nebat owinyo pire i kare ame en onwoŋo pwod tye i Miciri, kan ame en rik oŋweco iye pi riŋo abaka Culeman; en oya oko i kuno te dwogo oko. Jo Icrael onwoŋo ocwao kwena me wot lwoŋe, eka Jeroboam karacel kede jo Icrael luŋ ame ocokere te kobbi Rekoboam ni, “Pappi Culeman rik otio kedwa agwa meicel kun mio obedo yeyo yec apek okato kare. Ka ce yin ibino dwoko yec ame en onwoŋo oketo i komwa bedo ayot kun ijwiko tic me opii opii ame adwoŋŋi rik oketo i komwa, wan obino bedo omironi ame winyo dogi.” Rekoboam te gamo ni, “Koŋ idok wunu, iwot ityek wunu nino adek ite dwogo wunu baŋa kan.” Lwak te dok oko cen. Abaka Rekoboam te cako penyo tam i baŋ jo oteggo ame rik obedo tic i pappere acalo omi-tam, kun en penyogi ni, “Tam aŋo ame imia wunu me dok ipeny a lwak?” Gin te kobbe ni, “Ka ce yin iye winyo kop a lwak man tin kun itio gin a twero konyogi, myero imwolle i nyimgi ka idok ipenygi; mannono bino miyogi bedo omironi nakanaka.” Cite Rekoboam mom oketo cunye i tam ame odoŋ oteggo-nono omie. En dok owoto oyenyo jo mere apat me miye tam, owoto baŋ olwagi mere. En openyogi ni, “Tam aŋo ame imia wunu me dok i peny a lwak ame okwaa ni myero ajwik yecgi dok ayot?” Gin te gamo ni, “Yin myero ikobbigi kit man ni, ‘Nyako ciŋa acel dwoŋ kato pyer pappa oko. Pappa rik omiowu yec apek meicel, mega bino bedo apek ame kato me a pappa oko. Pappa rik pwodowu i del, cite an abino pwodowu i gin ame lit bala kwir yib yit’.” I ŋe nino adek, Jeroboam karacel kede jo Icrael te dwogo baŋ abaka Rekoboam, kite ame rik ocikogi kede, kun kobo ni, “Dwog wunu baŋa kan i ne nino adek.” Abaka te cako dok i peny a lwak kede gero, kun mom oye lubo tam ame odoŋe oteggo omie. En okobbi lwak kite ame olwagi mere omie kede tam, kun kobbigi ni, “Pappa rik omiowu iyeo wunu yec apek, an abino medo bedo apek ame kato mege. Pappa rik pwodowu kede del, cite an abino pwodowu i gin ame lit bala kwir yib yit.” En abaka okwero winyo kop a lwak pien Rwot ikome en omio otimere amannono, me wek kop ame rik eciko baŋ Jeroboam cobere kakare, kite ame rik emio Akija dano me Cilo okobo kede baŋ Jeroboam wot a Nebat. I kare ame jo Icrael oneno ni abaka mom oye winyo kokogi, gin luŋ ote redo ni, “Wan giwa mom otye kede dulloro ame obedo megwa i kom Daudi. Wan giwa mom obino nwoŋo ginnoro i baŋ Yece. Dok giwu i kemawu, wun jo Icrael! Nen doŋ odi keni yin Daudi!” Jo Icrael doŋ te cako ket oko, kun ŋat acel acel dok i paco mere. Rekoboam te doŋ loyo Icrael ame onwoŋo bedo i Juda. Abaka Rekoboam te cwayo Adoram, ame onwoŋo rik en adwoŋ ame loo tic me eroni, cite jo Icrael luŋ te nanapo en i gweŋe, ote neke oko. Man omio abaka Rekoboam te ru ya yito oko i wi gadigadi lwennyere, te riŋo oko i Jerucalem. Cakere i kare-nono jo Icrael doŋ te jem oko i kom oloc ame ya i ot a Daudi naka atot tin. Kare ame jo Icrael owinyo ni Jeroboam doŋ otyeko dwogo, gin ocwao kwena te wot lwoŋe, en te bino baŋ jo ame onwoŋo ocokere, eka jo te kete me bedo abaka ame loo jo Icrael ducu. Mom tye ŋattoro ame doŋ omedde lubo jo me ot a Daudi kono ka jo me atekere a Juda keken. Kare ame Rekoboam odwogo i Jerucalem, en ocako coko jo ame oyero ame romo tutumia acel kede pyeraboro iyi atekere a Juda kede Benjamin me wot lweny i kom jo Icrael me dwoggo jo luŋ i te loc a Rekoboam wot a Culeman. Cite kop a Rwot te bino baŋ dano Obaŋa ame nyiŋe Cemayo, kun kobbe ni, “Wot ikobbi abaka Rekoboam me Juda, wot a Culeman, kede jo luŋ me doggola a Juda, kede me doggola a Benjamin, kede baŋ jo ocele luŋ ni, ‘Rwot okobo ni myero kur iwot ilweny wunu i kom omegowu ame gin obedo jo Icrael. Ŋat acel acel myero dok cen i paco mere, pien gin ame otimere-nono. Rwot en ame omio otimere.’ ” Gin luŋ ote winyo kop a Rwot, ote dok oko cen, kun ŋat acel acel dok i paco mere kite ame onwoŋo okobo. Jeroboam te wot bedo i boma me Cekem, i lobo obedo kidikidi me Epraim, en koŋ te wot bedo kuno; te dok ya i kuno te wot bedo i boma me Penuel. Jeroboam te cako lwodo kop i cunye ni, “Loc be bino dok oko i ot a Daudi. Ka ce jo man omedde wot yalo Obaŋa i ot a Rwot i Jerucalem, cuny jo man bino lokere oko i kom adwoŋgi Rekoboam abaka me Juda, gin bino neka oko ote lokere gigi dok baŋ Rekoboam.” Mannono te miyo abaka Jeroboam cako poro kop i jo, te tiyo cal itino twoni aryo me jabu, eka te kobbi lwak ni, “Wot i Jerucalem doŋ ocirowu oko, koŋ inen anaka cene. Nenu wunu doŋ obaŋewu enu, wun jo Icrael, gin en a rik okwanyowu i lobo me Miciri.” Rekoboam te keto cal twon acel i Betel kede en ocele i Dan. Man rik te miyo jo Icrael poto i bal pi wot woro twon ame tye i Betel kede en ame tye i Dan twal. En dok te gero udi me woro Obaŋa i wi kiddi malo, te daŋ keto olamdog kun kwanyogi i akina jo ata, cite mom i akina jo Levi. En te keto nino me ecuban bedo i nino dwe apar wie abic me dwe me aboro ame rom aroma kede en ame tye i Juda. En te cako yalo cal twoni ame en otio te keto i Betel, kun yalogi kede mottere. En te keto daŋ olamdog i kabedo me woro Obaŋa ame en ogero i wi kiddi malo, kun keto mogo daŋ i Betel. En owoto i keno lam ame tye i Betel i nino dwe apar wie abic me dwe me aboro, ame en nino ame onwoŋo cunye oyero me bedo nino me ecuban, en te wot i keno me lam me waŋo odok akur. Dano Obaŋa ame en ocao rik te ya i Juda, te wot naka i Betel, en otuno i kare ame onwoŋo Jeroboam ocuŋ i ŋet keno lam me yalo Obaŋa odok akur. Dano-nono te cako kobo kop Obaŋa agwa i kom keno lam me woro jogi, kun kobo ni, “Yin keno lam, keno lam we, Rwot okobo ni ba, ‘Obino nywalo atinnoro i doggola a Daudi ame nyiŋe Yocia. En ame bino ŋolo olamdog me ka woro jogi ame tye i wi kiddi malo, ame gin jo ame yalo jogi odok akur i komi, en bino ŋologi acalo mot i komi, bino waŋo cogo jo i komi.’ ” En te miyo gin a nyuto daŋ oko i nino-nono, kun kobo ni, “Man en gin a nyuto ni man obedo kop a Rwot; ‘Nen ba, keno lam bino mukere oko, buru ame tye i wie daŋ bino wukere oko piny.’ ” Kare ame abaka owinyo kop a dano Obaŋa, en oryeo ciŋe malo i ŋet keno lam kun kobo ni, “Make wunu oko.” Ciŋ Jeroboam ame onwoŋo eryeo malo te kan oko malo, ame mom dok eromo dolo dwoggo piny. Keno lam te daŋ mukere oko, buru ame onwoŋo tye iye te daŋ wukere oko piny; mannono te miyo anyut a Rwot ame dano Obaŋa okobo pire cobere kakare. Abaka te kobbi dano Obaŋa ni, “Tim ber doŋ ikwa Rwot Obaŋani pira, me en tima kica ye bada dolle dwog piny kakare.” Dano Obaŋa te kwayo Rwot, bad abaka te doŋ dolle dwogo piny kakare, kun bedo kite ame rik tye kede con. Abaka te kobbi dano Obaŋa ni, “Koŋ doŋ ibin owot paco, me koŋ iwot iwe anok kuno, ate miyi mottoro pi tic ame itio.” Dano Obaŋa te gamo dog abaka ni, “Kadi bed imia nucu me lonyo ame itye kede, mom atwero ye donyo i odi wan kedi, mom daŋ atwero ye camo ginnoro onyo mato pii i kabedo man; pien Rwot rik ocika kit man ni, ‘Yin gire mom ibino camo ginnoro kunu kadi mato pii-gu, dok daŋ mom ibino dwogo cen i yo ame iwoto kede.’ ” Mannono omio en mom odok cen i yo ame rik ebino kede i Betel, ento olunyo lubo yo ocele. Adwarpinnyoro rik onwoŋo tye i Betel ame onwoŋo doŋ oti oko. Awobe mere te wot titte jami ducu ame dano Obaŋa otimo i nino-nono i Betel; kop ame en okobo baŋ abaka daŋ gin otito luŋ baŋ papagi. Papagi te penyogi ni, “En dano-nono olubo yo mene?” Awobe mere te nyutte yo ame dano Obaŋa ame oya i Juda olubo me dok paco. En te kobbi awobe mere ni, “Aco koŋ doŋ itweya wunu kom me bedo i wi kana.” Gin daŋ te tweyo kom me bedo i wi kana mere, en te bedo i wi kana. En te cako ryemo yo dano Obaŋa-nono, te nwoŋo en tye obedo i te kworo. Openye ni, “Yin ibedo dano Obaŋa ame oya i Juda-ni?” En te gamo ni, “An ennono!” En te kobbe ni, “Biye koŋ odok kedi cen me koŋ iwot ibil kwonnoro.” En te gamo ni, “An gira mom atwero dok kedi cen, dok daŋ mom atwero donyo i odi, mom daŋ atwero camo ginnoro akadi mato pii-gu kedi i kabedo man; pien Obaŋa onwoŋo okobba ni, ‘Yin gire mom ibino camo ginnoro kuno, akadi mato pii-gu, dok daŋ mom ibino dwogo cen i yo ame iwoto kede.’ ” Adwarpiny me Betel te gamo ni, “An daŋ abedo adwarpiny calo yin, dok amalaika a Rwot en ame okobba ni, ‘Wot idwoggo adwarpiny ca paco, en myero bin karacel kedi naka i odi, me bin cam kwon dok daŋ bin mat pii baŋi.’ ” Man onwoŋo en tye abwolo adwarpiny ca abwola. Adwarpiny me Juda te dok karacel kede, te wot camo kwon i ode, kun mato anaka pii-gu. I kare ame gin tye ka cam, kop a Rwot te bino baŋ adwarpiny me Betel-li; en te cako kop i twon gero meicel baŋ adwarpiny ame onwoŋo oya i Juda-ni, kun kobo ni, “Rwot okobo kit man ni, ‘Pien yin mom ibedo kede woro i kop ame Rwot ociki iye, dok daŋ mom imako cik a Rwot Obaŋani ociki kede, ento iye dwogo cen, dok daŋ ibedo ka cam kun imato pii-gu i kabedo man ame rik aciki ni kur icam ginnoro iye-ni, dok daŋ kur imat pii-gu iye, man omio obino neki oko, komi mom obino yiko i lyel a jo me doggolawu.’ ” Kare ame en doŋ otyeko cam kede mato pii, adwarpiny me Betel te tweyo kom me bedo i kom kana adwarpiny me Juda. Adwarpiny me Juda te doŋ ya me wot gire oko, cite eŋatu moro te rwatte kede i yo, te make neke oko, kome te buto piny i yo kuno, kun kana mere tye ocuŋ i ŋete kuno. Jo te bedo be bea i yo kannono kun okato gigi akata i ŋete, oneno kome ame obuto piny i yo kede eŋatu ame tye ocuŋ i ŋete. Gin te bino tito koppere i paco ame adwarpiny oti ca tye iye. I kare ame adwarpiny oti me Betel ame rik odwogo en cen owinyo, en okobo ni, “Mannono obedo dano Obaŋa ame okwero bedo kede woro i kop ame Rwot ocike iye; mannono omio Rwot omie oko i ciŋ eŋatu, ame okae te neke oko, kite ame Rwot onwoŋo okobo kede baŋe.” En te kobbi awobe mere ni, “Tweya wunu kom me bedo i wi kanana.” Gin daŋ te tweyo kom me bedo i wi kana mere, en te ŋwec kuno, te wot nwoŋo kom adwarpiny tye obuto i dye yo, kun kana kede eŋatu tye ocuŋ i ŋete. Eŋatu daŋ mom omwodo kome, mom daŋ okao kana-gu. Adwarpiny te tiŋo kom dano Obaŋo-nono keto i wi kana mere, en te kelo kome naka i paco mere me gin obin okoke ote yiko kome. Adwarpinnyono te yiko kome i lyellere en ikome, en te bedo koke kun kobo ni, “Twon cannoro adwoŋ meicel opoto oko i komi, ominna!” I kare ame en doŋ otyeko yiko kome, ociko awobe mere ni, “Ka ato, myero iyika wunu i lyel ame ayiko iye dano Obaŋani, ket wunu cogona i ŋet cogo mere. Pien kop a Rwot luŋ ame en okobo i kom keno lam ame tye i Betel kede i kom udi luŋ me woro Obaŋa ame ogegero malo i pacci luŋ ame tye i Camaria, koppere luŋ bino cobere kakare.” I ŋe man, abaka Jeroboam mom oweko timo timmere arac-ci, en gire omedde ameda i keto olamdog me tic i kabedo me woro Obaŋa ame tye i wi kiddi malo, kun daŋ gire kwanyogi i akina jo ata. En ka onwoŋo ŋattoro keken ame mito bedo alamdog, en kwere oko me bedo alamdog, te kete i kabedo me woro Obaŋa ame tye i wi kiddi malo, Tim magi olokere odoko bal i ot a Jeroboam, omio Rwot ojwero jo me doggola mere otyeko oko luŋ. I kare-nono two omako Abija wot a Jeroboam, Jeroboam te kobbi dako mere ni, “Ya malo iruk boŋŋi ocele, me ŋattoro kur ŋe ni yin ibedo dako a Jeroboam. Ya iwot i Cilo, kan ame adwarpiny ame nyiŋe Akija bedo iye, ame en adwarpiny ame rik okobo ni an abino bedo abaka ame loo rok man. Ter ogati apar karacel kede capattogo kede moo kic i tabo, ter jaminono naka baŋe, en bino titti gin ame bino timere i kom atin.” Dako a Jeroboam daŋ te timo kittono; en owoto naka i Cilo, te tuno i paco Akija. Onwoŋo Akija oti ame waŋe doŋ oto oko ame mom doŋ romo neno piny, Rwot te kobbi Akija ni, “Dako a Jeroboam ca bino baŋi ca. En obino me bino penyo kop i kom two a wode baŋi, pien atinnere-nono two meicel. Yin myero ikobbe kit man.” Rwot te kobbe kop a myero kobi. Kare ame dako-nono otuno baŋ Akija, en otemo bedo acalo dako moro ocele. Akija owinyo wottere i kare ame en otuno i doggola, eka te jolle, kun kobo ni, “Donyo ba, ama dako abaka Jeroboam. Piŋo kara ilokere calo dako ame oya i kan ocele? Rwot doŋ otyeko kobba kop apek meicel i komi. Yin wot ikobbi Jeroboam ni, Rwot a jo Icrael okobo ni, ‘An rik adwori, ate yeri miyi dit me loyo jo Icrael ame gin obedo jona. An rik agamo loc oko i ciŋ ikwae a Daudi, ate miyo baŋi, cite yin mom ibedo acalo amirona Daudi, ame rik omako cikka ducu, kun luba i cunye luŋ kun daŋ tio gin ame tye atira keken i nyima. Yin en a doŋ igeo timo bal areco meicel ame kato oloc luŋ ame otelo nyimi. Yin ikwera, itio obaŋe mogo ame otwako atwaka kun iroka kede me akemo maka. Mannono omio abino keto can i kom jo a Jeroboam luŋ, abino neko co luŋ i ode, ame tye i Icrael, opii naka jo ame gin anywalli. Abino weyo jo luŋ me doggola a Jeroboam, kit ame dano ka awaŋo cet dyaŋ waŋo naka waŋ ame mac doŋ omoko i cet dyaŋ luŋ ame mom dok kannoro odoŋ nono aboŋo mac iye. Jo me doggola a Jeroboam luŋ ame bino to i boma, gwogi en ame bino mwodo komgi, ento jo ame bino to i dye tim ata, acut en ame bino camo komgi, pien Rwot en okobo kop man.’ “Yin doŋ ya idok tuŋi. Tekki ituno paco keken, atin bino to oko. Jo Icrael bino kumo pire, ote yiko kome. En kene obino yiko kome i lyel i akina jo a Jeroboam, pien ginnoro onwoŋo tye i kome ame yomoro cuny Rwot Obaŋa me Icrael i akina jo me ot a Jeroboam, Rwot akome en ame dok bino yero dano moro ocele ame bino bedo abaka me Icrael. Dano-nono en ame bino miyo waŋ jo me ot a Jeroboam rwenyo oko i wi lobo tin. Kara ŋo doki i ŋe mannono! Rwot bino keto can i kom jo Icrael tuno waŋ ame komgi doŋ myel amyela calo ogada ame tye akwaŋ i wi pii. En bino kwanyo jo Icrael oko i lobo aber wok-ki ame yam omio baŋ kwarigi, en bino keketogi atata i ŋe kulo Efurate, pien gin omio akemo omako Rwot pi yen ame gin oguguro pi woro jok a dako ame olwoŋo ni Acera. Rwot bino weko jo Icrael ata, pi bal a Jeroboam ame en obalo kede pi bal ame en omio jo Icrael obalo.” Dako a Jeroboam oya te cako wottere me dok i Tirja. Kare ame en pwod otuno atuna i doggola me ode, atinnere te to oko. Jo Icrael luŋ te kumo pire kun okoke, ote yiko kome kite ame Rwot rik omio amiro mere adwarpiny Akija okobo. Kop i kom ginnoro luŋ ame Jeroboam obedo timo, kite ame en olwenyo kede i mony, karacel kede kite ame en oloo kede jo Icrael, gin luŋ tye ocoo i buk me Tekwaro ame tito kop i kom oloc me Icrael. Jeroboam oloo jo Icrael pi mwakki pyeraryo wie aryo. En oto te wot weo karacel i kwari mere. Wode Nadab en ame te leyo kakare. I kare-nono onwoŋo Rekoboam wot a Culeman tye ka loyo jo Juda. En ocako loc ame onwoŋo doŋ tye kede mwakki pyeraŋwen wie acel me dittere. En obedo loc i Jerucalem pi mwakki apar wie abiro, i boma ame rik Rwot oyero i akina atekere luŋ me Icrael ni myero bed kan ame obino wore iye iyi Icrael luŋ. Nyiŋ tottere obedo Naama, ame obedo nya jo Ammon. Jo Juda rik te timo bal a mom nen aber i nyim Rwot, pi balgi-nono omio gin oroko Rwot, ote miyo nyeko mako Rwot, balgi onwoŋo rac kato en ame yam kwarigi obedo timo oko, Pien gin rik ogero-gu pirgi kengi ka woro jogi i wi kiddi, ocibo-gu gweŋe mogo ocuŋ atira i ka woro jogi, oguguro daŋ yen me woro jok a dako ame olwoŋo ni Acera i wi kiddi luŋ ame otiŋere malo anaka i te yen obuŋere-gu. A doŋ onwoŋo rac okato kare, gin onwoŋo tye daŋ kede co mogo i ka woro jogigi kuno ame mio co wadgi buto kedgi kuno. Jo Juda obedo timo tim me ipyeda ame rom aroma kede me a rok apapat ame Rwot rik oryemo oko i nyim jo Icrael i kare ame rik gin obino i lobo-nono. I mwaka me abiccere me loc a Rekoboam, abaka Cicak me Miciri ocobo mony i kom Jerucalem. En rik te yako jami luŋ ame onwoŋo okano i ot kano lim a Rwot, kede en ame onwoŋo tye i ot kano jami abaka. En oyako jami luŋ kun yako anaka kwode-gu, ame rik Culeman otio i jabu. Abaka Rekoboam rik dok te tiyo kwode ocele kaka en ame Cicak oyako; en otio kwode me mola te miyogi i ciŋ odoŋe a jo ame onwoŋo gwoko doggola ot abaka. I kare luŋ ka rik abaka awot i ot a Rwot, jo ame gwoke ŋat acel acel woto i kwot i ciŋe, ote dok dwoko oko kakare i otgi. Kop i kom ginnoro luŋ ame Rekoboam obedo timo a mom ocoo kan, gin luŋ tye ocoo i buk me Tekwaro ame tito kop i kom oloc me Juda. Lweny rik obedo tye i akina Rekoboam kede Jeroboam kare luŋ, Rekoboam oto te wot weo karacel i kwari mere, oyiko kome karacel i kwari mere i paco a Daudi. Nyiŋ tottere rik Naama, ame obedo nya jo Ammon. Wode Abijam en ame te leyo kakare. I mwaka me apar wie aboro me loc a Jeroboam wot a Nebat, en ame Abijam ocako loyo kede jo Juda. En obedo loc i Jerucalem pi mwakki adek. Nyiŋ tottere onwoŋo Maaka, ame obedo nyaka Abicalom. En obedo timo kit bal luŋ ame pappere rik bedo timo, kun mom geno Rwot Obaŋa mere kede cunye ducu kite ame rik kwaro mere Daudi obedo timo, Kadi bed amannono, Rwot Obaŋa mere omie ebedo aloc i Jerucalem, omio wode daŋ en ame oleo kakare pi miyo Jerucalem cuŋ atek pi Daudi, pien Daudi rik obedo timo gin ame tye atira, mom oweko cik a rik Rwot ocike kede pi kare me kwo mere luŋ ento otimo bal ka i kom Uria dano me Kitti. Lweny rik obedo tye i akina Abijam kede Jeroboam pi kare me kwo Abijam luŋ. Kop i kom ginnoro luŋ ame Abijam obedo timo a mom ocoo kan, gin luŋ tye ocoo i buk me Tekwaro ame tito kop i kom oloc me Juda. Lweny rik obedo tye i akina Abijam kede Jeroboam. Abijam oto te wot weo karacel i kwari mere, ote yiko kome i paco a Daudi. Wode Aca en ame te leyo kakare. I mwaka me pyeraryo me loc a Jeroboam abaka me Icrael, en ame ocako loyo kede jo Juda. En obedo loc i Jerucalem pi mwakki pyeraŋwen wie acel. Nyiŋ tattere onwoŋo Maaka, ame obedo nyaka Abicalom. Aca obedo timo gin ame nen atira i nyim Rwot kite ame kwaro mere Daudi rik obedo tiyo. En oryemo mon kede co luŋ ame rik mio co wadgi buto kedgi i ka woro jogigi, te kwanyo daŋ cal jogigi luŋ ame yam kwari mere otio. En okwanyo daŋ tattere Maaka oko i dittere me bedo toto abaka, pien onwoŋo en otimo tim me ipyeda pi tiyo cal jok a dako ame olwoŋo ni Acera. Aca ototoŋo cal jokkono oko te wot waŋo oko i ŋet kulo me Kidron. Kadi bed en pe omukuko ka woro jogi ame tye i wi kiddi malo, cite en omedde keto gennere i kom Rwot pi kare me kwo mere luŋ. En okelo mot a rik pappere otyeko jalo baŋ Rwot karacel kede mege ame en ojalo, acalo jabu, ryal kede jami mogo ame otio i mola, te ketogi i ot a Rwot. Aca abaka me Juda kede Baaca abaka me Icrael obedo lweny i akinagi kengi kengi pi kare luŋ ame gin onwoŋo tye i loc. Baaca abaka me Icrael obin ocobo mony i kom jo Juda, te celo Rama oko, me geŋo jo wot i Juda baŋ abaka Aca kede jo Juda me wot kannoro ocele. Aca te kwanyo ryal kede jabu luŋ ame rik onwoŋo odoŋ i ot kano lim a Rwot, kede jabu ame rik onwoŋo tye i ot kano lim abaka, eka te miyo baŋ omiro mere me tero baŋ Ben-adad wot a Tabrimmon, wot a Kejion, abaka me Curia ame rik onwoŋo bedo i Damaciko, kun cikogi me kobbi Ben-adad ni “Tim ber iye ocikere kedi kite ame rik kwarona kede kwaroni otimo. Ryal kede jabu enu acwayi-nu me mot. Tim ber iwot itur cikereni oko wun i Baaca abaka me Icrael, me en bin kwany monnyere oko i koma.” Ben-adad te winyo gin ame Aca okobbe, en te cako cwalo odoŋe ame telo monnyere me wot ero lweny i kom pacci mogo me Icrael, eka te mayo Ijon, Dan, Abel-Bet-Maaka, kede Kinneret luŋ kede lobo a jo Naputali luŋ. Kare ame abaka Baaca owinyo gin ame otimere, oweko Rama oko, te dok wot bedo i Tiria. Abaka Aca te cwayo kop i lobo me Juda luŋ kun lwoŋo jo luŋ me bino konyo tic me weko gweŋe kede bayi ame rik abaka Baaca obedo tic kedgi me celo Rama, en olwoŋo ni jo luŋ myero bin, ŋattoro kur doŋ. Abaka Aca te cako celo Geba ame en boma ame tye i lobo Benjamin kede Mijipa kun tio kede jami-nono. Kop i kom ginnoro luŋ ame Aca otimo, lweny ame en olwenyo ame nyuto tek cunye kede kite ame en ocecelo kede boma mogo, gin luŋ tye ocoo i buk me Tekwaro, ame tito kop i kom oloc me Juda. Cite i kare ame en doŋ oteggo, two moro omako tyene te ŋwale oko. Aca oto te wot wee karacel i kwari mere, ote yiko kome karacel i kwari mere i boma a Daudi. Wode Yekocafati en ame te leyo kakare. I mwaka me aryo me loc Aca abaka me Juda, en ame Nadab wot a Jeroboam ocako loyo kede jo Icrael eka te loyogi pi mwakki aryo. En obedo timo bal ame nen arac i nyim Rwot omako kit tim a pappere, kede bal ame pappere obalo, dok daŋ omio jo Icrael otimo bal. Baaca wot Akija, dano me doggola Icakar, rik te cako poro kop i jo pi turo loc a Nadab; Baaca te cobo Nadab neko oko i kare ame en karacel kede monyere oguro boma me Gibeton, ame obedo paco a jo Piriciti. Man otimere i mwaka me adek me loc abaka Aca, abaka me Juda, eka en Baaca te leyo kakare. Kare ame Baaca doŋ otyeko doko abaka me Icrael, en ocako neko jo me doggola a Jeroboam luŋ, kun cobo gin ame rik Rwot omio amiro mere Akija me Cilo okobo; en oneko jo me doggola a Jeroboam luŋ, kun mom weko moro kadi acel. Can man opoto i kom jo-ni pi bal ame Jeroboam obalo, kede pi bal ame omio jo Icrael obalo dok en rik omio akemo omako Rwot Obaŋa me Icrael. Kop i kom ginnoro luŋ ame abaka Nadab otimo a mom ocoo kan, gin luŋ tye ocoo i buk me Tekwaro ame tito kop i kom oloc me Icrael. Abaka Aca me Juda kede Nadab me Icrael rik obedo lweny i akinagi kengi kengi i kare luŋ ame gin onwoŋo tye i loc. I mwaka me adek me loc Aca abaka me Juda en ame Baaca wot Akija rik ocako loyo kede jo Icrael. En obedo aloc a jo Icrael pi mwakki pyeraryo wie aŋwen, kun bedo i Tirja. En daŋ obedo timo bal ame nen arac i nyim Rwot calo abaka Jeroboam, dok daŋ omio jo Icrael otimo bal. Kop a Rwot rik te bino baŋ Yeko wot a Kanani kun kobo i kom Baaca ni, “Cakere i kare ame an akwanyi iyi apua ate miyi bedo abaka a jona Icrael, yin ibedo timo bal ame rom aroma kede me a Jeroboam, kun imio jona daŋ timo bal. Man omio akemo omaka pi balgi-nono. Nen ba, an doŋ abino neki oko yin Baaca karacel kede jo me doggolani luŋ, kite ame atimo kede i kom Jeroboam wot a Nebat. Dano moro me doggolani ame oto i boma, gwogi en ame bino camo kome, aco en ame oto i tim ata, acut en ame bino camo kome.” Kop i kom ginnoro luŋ ame Baaca otimo a mom ocoo kan, lweny luŋ ame en olwenyo ame nyuto tek cunye, gin luŋ tye ocoo i buk me Tekwaro ame tito kop i kom oloc me Icrael. Baaca oto te wot weo karacel i kwari mere, ote yiko kome i Tirja. Wode Ela en ame te leyo kakare. Kop a Rwot ame obino baŋ Yeko wot a Kanani i kom Baaca kede jo me doggola mere pi kop aryo; pi bal luŋ anen arac i nyim Rwot ame en obedo timo, kun mio akemo mako Rwot, ame rom aroma i bal a jo me doggola a Jeroboam, dok daŋ pien en oneko jo me doggola a Jeroboam oko. I mwaka me pyeraryo wie abicel me loc Aca abaka me Juda, en ame Ela wot a Baaca ocako loyo kede jo me Icrael, en te bedo loc i Tirja pi mwakki aryo. Dano acel i akina omiro mere adoŋo ame nyiŋe Jimri, ame onwoŋo loo nucu me gadigadi lweny abaka, te cako poro kop i muŋ i kome. Doŋ i nino moro acel abaka onwoŋo tye amero i Tirja, i ot a dano moro ame nyiŋe Arja, ame rik loo jami me ode i Tirja. Jimri te donyo i ot, te cobo Ela te neko oko, en te leyo kakare acalo abaka. Man otimere i mwaka me pyeraryo wie abiro me loc Aca abaka me Juda. Kare ame Jimri ocako loc, en oneko jo me ot a Baaca oko luŋ. Mom oweko wat a Baaca moro odoŋ kadi awottere moro, Man te miyo kop a Rwot ame rik emio adwarpiny Yeko okobo i kom Baaca cobere kakare, kite ame en rik okobo kede. Jimri oneko jo me doggola a Baaca oko luŋ kun mom moro odoŋ. Pien Baaca kede wode Ela onwoŋo omio akemo omako Rwot Obaŋa me Icrael pi balgi me woro cal jogi kede dok pi miyo jo Icrael timo bal. Kop i kom ginnoro luŋ ame Ela otimo gin luŋ tye ocoo i buk me Tekwaro ame tito kop i kom oloc me Icrael. I mwaka me pyeraryo wie abiro me loc Aca abaka me Juda, en ame Jimri obedo kede aloc i Tirja pi nino abiro. I kare-nono onwoŋo mony a jo Icrael tye ka guro boma me Gibeton ame en boma a jo Piriciti, mony te winyo i kan ame gin oguro iye gonygi ni Jimri, otyeko poro kop i muŋ i kom abakagi te daŋ neko oko. Man te miyo mony keto Omri, ame rik obedo atel wi mony me bedo abaka me Icrael. Omri karacel kede monyere te ya oko i Gibeton, ote wot guro boma me Tirja. Kare ame Jimri oneno ni mony doŋ otyeko mako boma oko, en te wot tyelo i ot abaka ame ogero atek, te waŋo oko, en en daŋ te to iye kuno. Man otimere pi bale re ame en onwoŋo otimo baŋ Rwot. En daŋ onwoŋo otimo bal ame rom aroma kede me a Jeroboam; pi bale re en ikome pi miyo jo Icrael timo bal. Kop i kom ginnoro luŋ ame Jimri otimo a mom ocoo kan, medo kede koppere me poro kop i kom abaka imuŋ, gin luŋ tye ocoo i buk me Tekwaro ame tito kop ikom oloc me Icrael. I kare-nono jo Icrael te cako pokere oko idul aryo; jo ocele onwoŋo mito ni myero oket Tibni wot a Ginat en ame bed abaka, eka jo ocele te mito Omri. Cite jo ame onwoŋo mito Omri te loyo jo onwoŋo mito Tibni wot a Ginat oko; Tibni te daŋ to oko, eka Omri te bedo abaka a jo Icrael. Omri doŋ te bedo abaka me Icrael i mwaka me pyeradek wie acel me loc Aca abaka me Juda, en te bedo aloc a jo Icrael pi mwakki apar wie aryo. Pi mwakki abicel me agege en obedo i Tirja. En rik te wilo Camaria i baŋ lo ame olwoŋo ni Cemer, kun culo lim me ryal ame romo tutumia abicel pire. En rik te celo kidi-nono oko atek odoco, te cako nyiŋe ni Camaria, bala nyiŋ Cemer ame rik en won kannono. Bal Omri te bedo adwoŋ atek i nyim Rwot ame kato bal obakki luŋ ame otelo nyime. En daŋ omio akemo omako Rwot Obaŋa me Icrael bala abaka Jeroboam pi ballere en ikome kede pi miyo jo Icrael doko jo ame woro cal jogi, Kop i kom ginnoro luŋ ame Omri otimo a mom coo kan, lweny ame en olwenyo ame nyuto tek cunye, gin luŋ tye ocoo i buk me Tekwaro ame tito kop i kom oloc me Icrael. Omri oto te wot weo karacel i kwari mere, ote yiko kome i Camaria. Wode Akab en ame te leyo kakare. I mwaka me pyeradek wie aboro me loc Aca abaka me Juda, en ame Akab wot Omri ocako loyo kede jo Icrael; en oloogi pi mwakki pyeraryo wie aryo kun bedo i Camaria. Bal Akab wot Omri te bedo adwoŋ meicel i nyim Rwot ame ka to me obakki luŋ ame otelo nyime. En calo oneno ni timo bal ame rom aroma kede me a Jeroboam wot a Nebat mom rome, omio en dok onyomo Jejebel, nyaka Etibaal, abaka me Cidon, te daŋ dok cako woro Baal-gu En ogero ot me woro Baal i Camaria, ogero keno lam a Baal, te keto i ot ame ogero pire. Dok otio cal jok a dako ame olwoŋo ni Acera kun medo timo bal apol areco ame kato obakki luŋ me Icrael, ame mio akemo mako Rwot Obaŋa me Icrael. Dok i kare ame en tye ka loc, en ame Kiel me Betel ogero kede Jeriko doki. Wode me kao ame nyiŋe Abiram rik te to i kare ame en cako gero acakki me Jeriko, eka atinnere me cogo Cegub te to i kare ame en gero dogcel me Jeriko, kite ame rik Rwot omio Yocwa wot a Nuni okobo kede. I kare-nono adwarpinnyoro ame nyiŋe Elia, ame obedo dano me Ticbe ame tye i Gilead, rik te kobbi abaka Akab ni, “Kite acalo Rwot Obaŋa a jo Icrael tye kwoni, ame en Obaŋa ame an aworo, atitti atira ni kot kede toyo bino bedo mom pi mwakki adek abino anyim, tuno waŋ ame an dok akobo.” Rwot rik te kobbi Elia ni, “Ya oko i kan iwot tutuŋ kide, me iwot ipon kuno i ŋet kulo me Kerit, ame tye tutuŋ kide me kulo Jordan. Yin ibino mato pii i kulonono, dok daŋ atyeko ciko agak me kelli cam kuno.” Elia te cako wot kite ame Rwot okobbe kede; en te wot bedo i ŋet kulo me Kerit ame tye tuŋ kide me kulo Jordan. Agakkogo te cako tere cam kuno, kun otero odiko kede otyeno. En onwoŋo mato pii ame ya i kulo me Kerit. Icennere pii i kulonono te dwono oko, pien kot onwoŋo mom doŋ cwe i lobo nono. Rwot te kobbi Elia ni “Ya iwot i Jarepat, ame ceggi i Cidon, me iwot ibed kuno. Nen ba, atyeko ciko dako moro a cware oto ame tye kuno, me miyi cam.” Elia te ya malo wot naka i Jarepat. I kare ame en doŋ ceggi i dogcel me boma, en te neno dako moro a cware oto tye arayo yen. En te kwayo dako-nono ni, “Tim ber ba ikella pii moro i gwata me amati.” I kare ame dako-nono ocako wot me kelo pii. Elia dok te medo kobbe ni, “Tim ber ikella daŋ cammoro aduno.” Dako-nono te gamo kun kwoŋo akwoŋa ni, “Amaa, kite ame Obaŋani tye kwo-ni, ginnoro me acama mom tye baŋa kadi acel. Atye kom ka i moko kwon aduno moro i gulo moko kwon kede moo tedo aduno moro i te tabo. Aman an abino kan rayo yen ni atot ya ayik kede moro aduno ame roma kede woda keken, daŋ mannono doŋ me agikki, eka wan ote kuro giwa ka to.” Elia te gamo ni, “Kur ilwor, dako, yin wot iyik cem kit ame ikobonono, cite myero koŋ ige dolo kwon aduno ikella eka ite doŋ dok yiko megwu. Pien Rwot Obaŋa me Icrael ocika ni, ‘Moko kwon gire mom bino tum i gulu moko kwon, moo daŋ mom bino tum i tabo moo, tuno waŋ ame en Rwot omio kot ocwe i lobo.’ ” En te wot yiko cam kite ame Elia onwoŋo okobbe kede; gin gigi te medde bedo i cam ame romogi pi kare alac, kun moko kwon mom tum i gulu moko kwon, moo daŋ mom tum i tabo moo, kite ame Rwot onwoŋo okobo kede baŋ Elia. I nino moro acel two te mako wot a dako-nono, two-nono te bedo medde ameda, tuno waŋ ame kwo atin te tum oko. Dako-nono te kobbi Elia ni, “Ama dano Obaŋa, kara itimo aman piŋo ba? Yin ibino kan wek ipoyo wi Obaŋa i kom bal acon ame yam abedo timo, me atinna to oko?” Elia te gamo ni, “Tiŋ wodinono ikel baŋa kan.” Elia te gamo atin i ciŋe en te pyelo atin i wi tanda mere. Elia te cako kwayo Rwot ni, “Ama Rwot Obaŋa, yin en a dok ikelo can i kom dako-ni ame an abedo baŋenie, yin en ineko wode?” Elia te cako buto aryeba cuny i kom atin tyen adek kun kwao Rwot ni, “Ama Rwot Obaŋana, tim ber idwoggo kwo atin man baŋe ba.” Rwot te winyo kwac Elia, te miyo kwo atin dwogo cen ikome, te doŋ cako weo. Elia te tiŋo atin iyi icika imalo kuno, te dwogo kede piny baŋ tottere, te miyo baŋ tottere. Elia te kobbe ni, “Nen, wodi doŋ tye kwo.” Dako-nono te kobo baŋ Elia ni, “Aman an doŋ aniaŋ atira ni yin ibedo dano Obaŋa, dok daŋ Rwot gire kobo kedi ateteni.” Icennere a doŋ kare okato alalac, i mwaka me adekkere, Rwot te cako kobbi Elia ni, “Wot inyutte keni baŋ abaka Akab; an doŋ abino cwayo kot i lobo.” Elia te cako wot me wot nyutte kene baŋ Akab. I karenono onwoŋo kec okur atek i Camaria. Akab rik te lwoŋo Obadia ame onwoŋo en adwoŋ ame loo jami me ot abaka. Obadia onwoŋo rik obedo lo ame tye i woro adwoŋ meicel baŋ Rwot. I kare ame rik Jejebel neko iye odwarpiny a Rwot, en otero odwarpiny mia acel te wot kanogi i gorogoro kun kano pyerabic pat kede pyerabic ocele daŋ pat, eka te bedo terrigi cam kede pii. Akab te kobbi Obadia ni, “Owot koŋ owot obe bea i lobo luŋ, kun oŋiŋio kan a pii yam tye iye luŋ, gwok onyo otwero nwoŋo kannoro onyo cuny kulo moro ame tye iye lum, atot ya aguragura kede kanewa kur to, me leyiwa mogo bed kwo.” Gin te poko kabedo ame ŋat acel acel i akinagi bino wot iye, eka ote pokere doŋ, kun Akab dok mero pat, Obadia daŋ mako mere yo apat. I kare ame Obadia doŋ tye iyo, en orwatte gin Elia. Obadia te ŋeyo Elia oko, te ryebere piny i nyime, kun kobbe ni, “Man mom yin adwoŋŋa Elia?” Elia te gamo ni, “Ee an Elia ennono. Wot ikobbi adwoŋŋi abaka ni an atye kan.” Obadia te gamo ni, “Gin aŋo kara ame abalo ba, adwoŋŋa, ame omio yin imito miya i ciŋ abaka Akab ni neka-ni? Akwoŋo akwoŋa i nyimi ni, kite acalo Rwot Obaŋani tye kwo-ni, mom tye lobo moro i wi lobo ame mom abaka Akab ocwao iye dano me wot yenyi. Kare luŋ ka onwoŋo odwoggo kop baŋe ni mom onwoŋo, en pwod mito ni aloc me lobo-naca kono okwoŋo akwoŋa ni mom doŋ otwero nwoŋi i lobo mere. Cite nen yin dok ikobo ni an awot akobbi adwoŋŋa abaka ni yin itye kan. Kara ka kono i kare ame an dok awoto oko eka Cuny a Rwot te kwanyi teri oko teŋe kan ame mom dok oromo nwoŋo kono? koŋ inen, ka onwoŋo an doŋ akobbi abaka Akab ni yin itye kan, eka en mom te bino nwoŋi, mom en bino neka oko? Yin myero ipo ni an abedo ŋat ame woro Rwot cakere i kare me tinona. Yin mom iwinyo ce ni i kare ame Jejebel neko odwarpiny a Rwot, an abin akano odwarpiny mia acel, kun akano pyerabic pat kede pyerabic pat, dok daŋ ate bedo pitogi i cam kede pii me amata? Man mio ka yin dok icwaa baŋ abaka me wot kobbe ni yin itye kan, en bino neka gire oko.” Elia te gamo ni “Kite ame Rwot me mony ame an aworo tye kwo-ni, an ikoma en ame doŋ tin abino nyutte i nyim abaka Akab.” Obadia doŋ te cako wot baŋ abaka Akab, te wot titte, eka Akab te cako wot me wot rwatte gin kede Elia. Kare ame Akab oneno kom Elia, en okobo ni, “Aa, yin enu, ame itye ka kelo ayela iyi Icrael-li?” Elia te gamo ni, “An gira mom atye ka yelo jo Icrael, yin en akel ayela, karacel kede jo me doggola a pappi, pien yin mom itye ka lubo cik a Rwot dok daŋ iworo cal jogi a Baal. Aman yin myero icwa kop baŋ jo Icrael luŋ me gin bin rwatte keda i wi kidi me Karmel. Kel daŋ odwarpiny a Baal mia aŋwen kede pyerabic kuno karacel kede odwarpiny Acera mia aŋwen, ame gin jo ame nwoŋo kony i ciŋ agoŋŋi Jejebel.” Abaka Akab te cwayo kwena lwoŋo jo Icrael luŋ karacel kede odwarpiny i wi kidi me Karmel. Elia te ya wot baŋ lwak, te kobbigi ni, “Kara ibino wunu medde bedo i tam aryo i cunywu naka awene? Ka ce Rwot en Obaŋa, wore wunu, aco ka ce Baal en obedo Obaŋa,” wore wunu, “Cite lwak mom te kobbe ginnoro.” Elia te kobbi lwak ni, “An adwarpiny a Rwot en doŋ adoŋ kan an kena, kun odwarpiny a Baal tye kan mia aŋwen kede pyerabic twal. Koŋ doŋ ikel wunu twoni aryo kan; odwarpiny a Baal yer twon acel me yalo obaŋagi, nek twonnono ote ŋiŋido atitino, gin te cano riŋogi-nono i wi yen, ento mom ote moko mac iye. An daŋ abino neko twon acel odoŋ, ate cano daŋ i wi yen, mom daŋ abino moko mac iye. Odwarpiny a Baal myero kwa obaŋagi, an abino kwayo Rwot; doŋ Obaŋa ame bino dok i kwacwa-nono i cwayo mac i kom riŋo ame ocano ikeno, mannono en ame obedo Obaŋa me ateni.” Lwak te wo ni, “Koppi-nono ber.” Elia te kobbi odwarpiny a Baal ni, “Kite acalo wun ipol wunu, wun ge yero wunu twon acel iyik wunu. Kwa wunu obaŋawu, cite myero kur imok mac i kom yen.” Gin daŋ ote gamo twon ame omiogi ote yiko, ote cako kwayo Baal ca kere odiko naka i cuny dyeceŋ, kun okobo ni, “Ama Baal, gam ba kwacwa-nie!” Cite piny omedde liŋ aliŋa kun mom owinyo dwon ŋattoro ame gamo doggi, akadi dok i kwacgi. Gin te bedo myel kun omano keno lamgi ame ocano-nono, cite ginnoro mom omedo timere. Elia doŋ te cako nyerogi oko caa abicel me dyeceŋ, kun kobbigi ni, “Kwa wunu atek ba! Obaŋa gire ennono! Onyo ca en pwod tye atamo, onyo tye akonyere, onyo pwod olato kannoro, aŋar ca onino oko, doŋ pi mannono myero ired wunu atek me icoe wunu.” Odwarpiny te redo atek me kwayo obaŋagi kun oŋoŋolo-gu komgi i pala bat kede atero-gu acalo kitegi me kare ducu; obedo timo amannono naka remo omedo cwer i komgi. Gin te medde ameda i redo kun daŋ otyeto-gu, tuno naka i caa aboŋwen me otyeno, ame en caa me yalo Rwot, cite piny omedde liŋ aliŋa aboŋo dwonnoro ame winyere, akadi ŋattoro ame gam doggi. Icennere Elia doŋ te kobbi lwak ni, “Biye wunu ceggi baŋa kan.” Lwak luŋ te nyiko baŋe. En te cako yiko keno lam a Rwot ame rik onwoŋo omuko oko. Elia te kwanyo gweŋe apar wie aryo, kun poro wel atekere awobe a Yakobo ame kop a Rwot rik obino baŋe ni, “Nyiŋi doŋ bino bedo Icrael.” En te doŋ cako cano keno lam a Rwot kun tio kede kiddi ame etiŋonono, te kunyo bur mano keno lammono luŋ, ame tut ame romo pii me debe acel twal. Kare ame en doŋ otyeko cano yennere aber i kom keno lam, oŋiŋido riŋo twon, te cano i wi yen. En te kobbi lwak ni, “Twom wunnu pii poŋ gulli aŋwen-ni ite coro wunu luŋ i kom mot ame ayalo kede Rwot kede i kom yen.” Gin daŋ te timo kite ame en okobo. En dok te kobbigi ni, “Dok imed wunu.” Gin daŋ dok ote medo timo kittono. Elia te kobbigi ni, “Dok imed wunu.” Gin dok te medo onyo pii i kom mot tyen me adek. Pii ame gin oonyo-nono te mol romo keno lam luŋ, te daŋ poŋ bur oko. A doŋ caa me otyeno oromo, Elia ame adwarpiny ocuŋ ceggi i ŋet keno lam, te kwayo Rwot kun kobo ni, “Ama Rwot Obaŋa Iburaim, Obaŋa Icaka kede me Icrael, mi doŋ tin ŋeye kannaler ni yin en ame ibedo Obaŋa iyi Icrael, dok ni an abedo amironi ame tio piri, dok atio man luŋ pi lubo kop-pi. Tim ber igam kwacca-ni Ama Rwot, tim ber igam kwacca ba, me lwak man ŋe ni yin gire en ame ibedo Obaŋa yin keni, dok daŋ itye ka dwoggogi cen baŋi.” Rwot te cwayo mac i kom mot me yale, te waŋo mot me yale oko karacel kede yen, kede kiddi ame onwoŋo ocano i keno lam kede kwoyo ame onwoŋo tye kaci-naca, eka pii ame onwoŋo opon bur te daŋ two oko iweŋ. Kare ame lwak luŋ oneno man, gin luŋ ote rette oko piny aryeba cuny, kun okobo ni, “Rwot gire en ame obedo Obaŋa, Rwot gire en ame obedo Obaŋa.” Elia te kobbi lwak ni, “Aco doŋ mak wunu odwarpiny a Baal luŋ, kur iwek wunu moro puti.” Lwak te makogi luŋ, eka Elia te terogi i kulo me Kicon, te wot nekogi luŋ kuno. Elia te kobbi Akab ni, “wot doŋ icem daŋ imat pii, pien dwon kot ame abino cwe doŋ tye aŋur awinyere baŋa.” I kare ame abaka Akab awot cem, Elia te yito malo i wi kidi me Karmel, en te wot rumo kulo wie piny rwako iyi akina coŋe. Elia te kobbi omiro mere ni, “Koŋ iwot inen tutuŋ nam.” Amiro mere daŋ te wot amannono tyen abiro. I tyen me abiro mere, en te dwogo kobbi Elia ni, “Anene pol olyero aduno moro i tuŋ nam ame rom i cuny ciŋ.” Elia, te cwayo amiro mere ni wot kobbi abaka Akab ni yit i wi gadigadi mere ŋwec paco kun kot mom ru oŋoli. Cite piny te ru cido oko oyotoyot, yamo daŋ te cako kodo, eka kot te cako cwe oko atek meicel. Akab te yito i wi gadigadi mere te cako riŋo me dok i Jejreel. Cite teko a Rwot onwoŋo tye i kom Elia, en te tweyo pyere atek, te riŋo telo nyim abaka Akab naka i dogcel me Jejreel. Abaka Akab te titti dako mere Jejebel ginnoro luŋ ame Elia otimo, kede kite ame en oneko kede odwarpiny a Baal luŋ. Jejebel te cwayo kwena baŋ Elia kun kobbe ni, “Obaŋawa myero mi ginnoro timere i koma, ka ce diki i kodi caa-ni onwoŋo mom aneki kite ame yin ineko kede odwarpiny.” Lworo omako Elia te miyo en riŋo oko pi laro kwo mere; en oya karacel kede omiro mere, te wot oko i Beerceba i Juda. En te weko amiro mere kuno, ento en te woto wot me nino acel luŋ, kun woto kene i tim kede tyene. En te wot bedo i te yattoro, te tamo ni kono doŋ eto oko. En te kwayo Rwot ni, “Man doŋ romo! Tim ber Ama Rwot, ikwany doŋ kwona tin oko; pien an giire mom aber ame akato kwarina!” Elia te buto piny nino oko i te yattono. Oyotoyot amalaika a Rwot te ru mule kun kobbe ni, “Ya malo me icem.” Kare ame en otiŋo waŋe tuŋŋi i tuŋŋi oneno capat ame otedo i wi kidi alyet, kede opoko pii tye tuŋ wie. En te cem, te daŋ mato pii-nono, eka te dok buto piny. Amalaika a Rwot te dok dwogo baŋe tyen me aryo, te dok mule, kun kobbe ni, “Elia we, ya malo me icem, pien wot bino loyi oko.” Elia dok te ya malo, te cem, te daŋ mato pii; cammono te medde teko ame te miye woto wot me nino pyeraŋwen, kun woto dyeceŋ kede dyewor, naka i Koreb ame en kidi Obaŋa. I kare ame en doŋ otuno oko kuno, en odonyo i gorogoro, te wot bedo kuno. Oyotoyot Rwot te kobbe ni, “Yin itimo ŋo kan?” En te gamo ni, “Nyeko en ame obedo maka piri, Ama Rwot Obaŋa me mony, pien kare luŋ an abedo woro yin keken, cite jo Icrael oturo cikeregi kedi oko, omumuko keno lam me yali-gu oko, oneko daŋ odwarpiny-nyi oko; an kena a pwod adoŋ, daŋ omito neka-gu oko.” Cite Rwot te kobbe ni, “Wot i wi kidi malo iwot icuŋ i nyima kuno.” Rwot te cako beo i ŋete kuno, te miyo yamo kodo atek meicel, yamo-nono oyeyeŋo kidi dok omio gweŋe obabara atitino, cite Rwot ikome onwoŋo gire mom i yamo-nono. Kare ame yamo oliŋ, oyeyeŋ te cako yeŋo piny, cite Rwot gire onwoŋo mom tye iyi oyeŋonono. Kare ame oyeŋo oliŋ, mac dok te cakere agwa, cite Rwot gire onwoŋo mom tye i maccono. A doŋ mac oto oko, dwonnoro te winyere atitidi. Kare ame Elia owinyo dwonnono owumo waŋe oko kede boŋo mere, te wot cuŋ i dog gorogoro. Dwonnono te kobbe ni, “Elia we, kara yin itimo ŋo kan?” En te gamo ni, “Nyeko en ame obedo maka piri, Ama Rwot Obaŋa me mony, pien kare luŋ an abedo wori yin keken, cite jo Icrael oturo cikeregi oko kedi, omumuko keno lam me yali-gu oko, oneko odwarpinnyi-gu oko; an kena a pwod adoŋ, daŋ omito neka-gu oko.” Rwot te kobbi Elia ni, “Dok cen kun ilubo yo tim. Dok cen i wot i tim ame tye i ŋet Damaciko; ka ituno kuno, wot i boma, iwot iwir Kajael i moo me bedo abaka me Curia. Wot i wir daŋ Yeko wot a Nimci me bedo abaka me Icrael. Wot i wir daŋ Erica wot a Capat, ame en dano me Abel-mekola, me leyo kakari acalo adwarpiny. Pien dano ame bino bwot ame mom Kajael oneko i pala lweny, Yeko en ame bino neko; aco ŋat ame dok bino bwot ame Yeko mom oneko, Erica en ame bino neko. Cite pwod abino weko jo tutumia abiro doŋ iyi Icrael, jo ame mom ru orumo coŋgi i nyim Baal, dok doggi daŋ mom ru ono to lem Baal.” Elia te cako ya oko i kuno, te wot nwoŋo Erica wot a Capat kun tye apur i kweri dyaŋ apar wie aryo; kun jo tye i kweri acel acel, ame gin luŋ otye opur i nyime, en onwoŋo tye apur i kweri me agikki. Elia te wot i ŋete, te kwanyo boŋo mere i kome, te bolo i kom Erica. Erica te ya weko twoni ame onwoŋo etye epur kedgi oko, te mwomere i ŋwec i yo Elia, kun kobo ni, “Koŋ iwek awot acik pappa kede totta, me ate bino wot kedi.” Elia te gamo ru, “Yin dok giri cen, kara ŋo ame atimo i komi?” Erica te dok cen wot gonyo twoni mere aryo oko; en te tedo kun tedo i lodi ŋutgi me yen. En te poko riŋo mere-nono baŋ jo, eka gin te camo. En doŋ te lubo yo Elia, kun tio baŋe acalo ŋat ame konye. Ben-adad abaka me Curia rik te coko monnyere ducu karacel; rwode ocele pyeradek wie aryo rik onwoŋo tye karacel kede kun otye daŋ aguragura kede gadigadi me lweny. En te tero monnyere-nono wot guro Camaria, te cako lweny i kom jo me kuno. En ocwao akwena iyi boma baŋ Akab abaka me Icrael me wot kobbe ni, “Abaka Ben-adad mito ni yin ijalle ryal kede jabu luŋ, kede monni abeco mege karacel kede itinoni atekkege luŋ.” Abaka me Icrael te gamo ni, “Wot ikobbi wunu abaka Ben-adad ni an aye, an karacel kede jami ame atye kede luŋ doŋ odoko gire mege, en doŋ adwoŋwa.” Akwena a Ben-adad te dok dok baŋ Akab tyen me aryo kun kobbe ni, Ben-adad oko bo ni, “An rik acwao akwena baŋi kun akobo ni yin myero ijalla ryal kede jabuni ducu, kede monni abeco mege kede itinoni atekkege. Doŋ ba, diki i kodi caa-ni, abino cwayo omirona adoŋo baŋi, gin bino ŋiyo odi, kede udi omironi adoŋo mege, gin bino kwanyo ginnoro luŋ ame gin oneno ni ber, ote yako bino kede oko.” Akab abaka me Icrael te lwoŋo otel luŋ me lobo mere, te kobbigi ni, “Koŋ inen wunu kite ame dano man tye ka yenyo kede kolo. En ocwao kwena baŋa kan ni an myero amie monna kede itinona kede ryal kede jabu-gu luŋ, ento an mom akwero.” Otel te gamo kop abaka ni, “Mano kop apala, kur itam kadi acel, kur daŋ iye miye ginnoro.” Abaka Akab te kobbi okwena a Ben-adad ni, “Wot ikobbe wunu en adwoŋŋa-naca ni, an akobo ni, gin a rik egeo mito i baŋa an abino tiyo, cite en ame dok ekwao me aryo-ni en a mom twerre.” Okwena te dwoko kop baŋe, ote dok dwoggogi baŋ abaka Akab, kun Ben-adad okobbigi me kobo ni, “Obaŋewu myero mi ginnoro timere i koma ka ce mom akelo lwak jo apipim obalo bomani-nono odoco, ame ŋido jami a gin obalo, kadi okobo ni omako, mom romo cuny ciŋ ŋat acel acel i akinagi.” Abaka Akab te kobbi okwena ni, “Wot ikobbi wunu Ben-adad ni, ‘Kur ikwo abeno a mom ru onyalo atin.’ ” Kop man otuno baŋ abaka Ben-adad i kare ame en karacel kede rwode ocele ame onwoŋo onotte kede otye omato koŋo i gonyegi. En te ciko ni monnyere myero doŋ yikere me wot i lweny, jo daŋ te ryeye oko i tyen, me wot cako lweny oko i kom Camaria. I kare-nono adwarpinyoro te wot baŋ Akab te wot kobbe ni, “Rwot okobo ni myero kur ibed i lworo moro kadi acel i kom mony adwoŋ wok-ki pien tin ebino miyogi luŋ i ciŋi, me yin iŋe ni en ebedo Rwot.” Abaka Akab te penyo adwarpiny ni, “Kara ebino tic i jo mene?” Adwarpiny te gamo ni, “Rwot okobo ni ebino tic awobe ame tye i te loc a gabuna me lobo acel acel.” Abaka dok te penyo ni, “Kara ŋa ame bino bedo atel wi mony.” Adwarpiny te gamo ni, “Yin ikomi.” Mannono te miyo abaka lwoŋo awobe a tye i te loc a gabuna i lobo acel acel ame romo mia aryo kede pyeradek wie aryo me geyo telo wi mony. En te dok lwoŋo mony me Icrael ame romo tutumia abiro. Mony Akab te ciro dyeceŋ me wot lweny. I kare-nono onwoŋo abaka Ben-adad karacel kede rwode pyeradek wie aryo ca onwoŋo obino me konye, tye ka mero i gonyegi. Awobe ame tye i te loc me gabuna me lobo acel acel en ame te geyo telo yo. Orot piny a Ben-adad te dwoko kop baŋe ni, “Jo tye aciro abino kun oya i Camaria.” Abaka te gamo ni, “Mak wunu jonono amaka, kur inekgi wunu, kadi gin obino pi yiko kop me kuc onyo obino me lweny.” Awobe a tye i te loc a gabuna me lobo acel acel en ame te geyo ero lweny kun mony me Icrael daŋ lubo yorgi. Ŋat acel acel i akinagi rik te neko akworrere ame elwenyo kede oko. Jo Curia te mukere oko i ŋwec, jo Icrael daŋ te buto i yorgi i ŋwec, ento Ben-adad abaka me Curia te bwot oko, pien oriŋo oko aguragura mere karacel kede wegi aguragura mogo. Lek me lweny te doŋ i ciŋ abaka me Icrael, en te mako lwak aguragura apipim kede gadigadi, dok te neko jo Curia atek meicel. Adwarpiny te wot baŋ abaka Akab, te kobbe ni, “Dok doŋ paco me iwot iyik monnyi bed atek meicel dok daŋ iyik kite ame ibino lweny kede, pien jo Curia dok bino dwogo me bino lweny i komi i oro abino.” Omio omiro abaka Ben-adad adoŋo te kobbe ni, “Jo Icrael tye kede obaŋe me wi kidi, mannono en omio gin oloowa i lweny. Wan myero dok olweny i jo-ni i dye bar kannaler, mannono bino miyo wan en a doŋ oloogi. Aman myero yin ikwany rwode pyeradek wie aryo ca oko i ticgi, me iket otel wi mony en ame le kakargi. Ka man otum, lwoŋ doŋ mony adwoŋ atek ame rom aroma i jo a rik koŋ bin ŋwec i nyim jo Icrael oko ca, kede aguragura, i gadigadi daŋ a rom aroma i megi-naca. Wan obino wot lweny i jo Icrael i dye bar kannaler. Man doŋ wan en ame obino loyogi.” Abaka Ben-adad rik daŋ te ye tamginaca. I kare me oro en te dok cwano monnyere coko karacel, te wot kedgi naka i Apec me wot cako lweny i kom jo Icrael. Jo Icrael rik daŋ te lwoŋo monygi, jo te yikere oko luŋ i jami ducu me lweny kede cam. Jo Icrael te wot guro gonygi kun otikere i mony me Curia, ento monygi onwoŋo opokere i dul aryo. Monygi onwoŋo nonokkoro cite me a jo Curia onwoŋo dwoŋ atek. Adwarpiny dok te bino kobbi abaka me Icrael ni, “Rwot okobo ni, pien jo me Curia okobo ni an abedo obaŋa me wi kidi pe me dye bar kannaler, abino miyo twon monygi adwoŋ wok-ki i ciŋi, me yin karacel kede joni iŋe ni an abedo Rwot.” Pi nino abiro twal mony aryo luŋ obedo cuŋ i gonygi kun mony man otikere akworrere. I nino me abiro mere gin doŋ te cako lweny, jo Icrael te neko cirikale a jo Curia wegi tyen ame romo tutumia acel i nino-nono. Jo odoŋŋege te mukere oko i ŋwec, ote wot laro boma me Apek; i kuno dok apama cel me boma te rette i kom jo ame romo tutumia pyeraryo wie abiro. Ben-adad daŋ onwoŋo oriŋo i bomanaca, te wot laro icika i tyelo, me ottoro ame onwoŋo tye i boma kuno. Omiro mere adoŋo te wot baŋe kuno, ote kobbe ni, “Nen ba, wan owinyo ni obakki me Icrael okica meicel. Doŋ yin myero iwekwa oruk boŋo cola i pyerwa, kun otweo tol kwero cola daŋ i wiwa, me owot kede baŋ abaka me Icrael, gwok onyo en twero ye timi kica, mom te neki.” Gin te cako tweyo boŋe cola i pyergi kede tol kwero cola i wigi gin te wot kede naka baŋ abaka me Icrael ote wot kobbe ni, “Amironi abaka Ben-adad okwai ni itime kica, kur doŋ ineke.” Abaka me Icrael te gamo ni, “En pwod tye kwo? Mannono ber! En doŋ bino bedo awota.” Jo a Benadad-nono onwoŋo tye ka ŋiyo ginnoro aber ame nyuto, ame gin oniaŋ kite ame piny tye awot kede. Kare ame gin owinyo abaka me Icrael okobo ni, “ ‘Awotta,’ gin te ru gamo oko oyotoyot ni, ‘Ee, Ben-adad en awotti.’ ” Abaka Akab dok te kobo ni, “Aco wot ikele wunu.” Kare ame Ben-adad obino baŋe, abaka me Icrael te lwoŋe yito baŋe i wi gadigadi mere. Ben-adad te kobbe ni, “An abino dwoko boma luŋ ame yam pappa omao i ciŋ pappi, adwokogi luŋ i ciŋi, dok yin daŋ itwero yabo ka cato wil-li i Damaciko kite ame rik pappa obedo kede mege i Camaria.” Akab te kobo ni, “Mom abino timo ginnoro i komi pi kop ame ikobo-nono.” Eka te keto cikere kede, te weke gire wot oreme. Adwarpinnyoro ame onwoŋo tye i akina odwarpiny okobbi awottere ni myero goe atek pien Rwot en okobo ni goe; cite awottere te kwero goye oko. En te kobbi dano-nono ni, “Pien yin ikwero winyo kop a Rwot, aman yin doŋ ityeko ya oko i baŋa kan, eŋatu bino maki neki oko.” I kare ame dano-nono oya oko i baŋe, oyotoyot eŋatu te daŋ mako neko oko. Adwarpinnyono dok te nwoŋo lo moro ocele, te kobbe ni, “Amito igoa atek.” Dano-nono daŋ te cunyu goye oyotoyot atek meicel, ogoe te wane oko. Adwarpinnyono te ya oko i kannono, te wot kuro abaka i ŋet yo, kun otweo waŋe oko kede atambala. Doŋ i kare ame abaka onwoŋo akato, en oredo baŋ abaka kun kobo ni, “An abedo amironi ame rik onwoŋo awoto i lweny, ate wot donyo i kan ame lweny onwoŋo okur iye agwa meicel. Acirikale moro te bino baŋa kun okelo dano moro eka kobba ni, ‘Gwok dano man aber. Ka ce yin iweko dano man orwenyo i baŋi, ŋe ni yin ibino to kakare; ka pe, ibino culo ratili mia acel me ryal.’ Nen ba adwoŋŋa, i kare ame an alolle i tic kun a dok tuŋŋi i tuŋŋi, en gire te wot oko.” Abaka me Icrael te kobbe ni, “Obino ŋolo koppi kite ame yin i komi i ŋolo kede.” Adwarpiny te ru gonyo atambara oko i waŋe. Abaka me Icrael te niaŋ ni en kara dano acel i akina odwarpiny. En te kobbi abaka ni, “Rwot okobo ni, ‘Pien yin iweko dano ame onwoŋo atyeko jalo me aneka owoto i ciŋi, yin en ame doŋ obino kwanyo kwoni kaka kwo mere, obino neko joni akaka jo mere.’ ” Abaka te cako dok paco kun cunye aton atek dok waŋe daŋ doŋ oballe oko, te wot naka i Camaria. Nabot me Jejreel rik onwoŋo tye kede poto olokkere i Jejerel i ŋet paco Akab abaka me Camaria. Abaka Akab te penyo Nabot ni kono omie poto olokkere, odoko mege me pito dek, pien ceggi kede ode, me wek en emi Nabot poto olok ocele kakare, poto ame ber kato mannono oko; onyo ka pe amannono me en doŋ eluny culo lim me wilo. Ento Nabot te gamo dog abaka Akab kun kwero oko, ni mom gire etwero ye, pien Rwot mom twero ye ni emi poto a kwaro mere baŋ abaka Akab. Abaka Akab te lokere dok i ode kun akemo ociro oko dok waŋe daŋ oballe atek pi kop ame Nabot me Jejerel okobo baŋe. Pien Nabot onwoŋo okobo ni mom etwero miye poto ame en eleo i baŋ kwaro mere. Abaka te wot buto piny i kabuto mere, olokki jo ŋee, obuto ame mom daŋ ocamo ginnoro. I kare ame dako mere Jejebel obino baŋe te penye ni, “Ŋo kara awaŋo cunyi cwara, ame omio ikwero cam oko-ni ba?” En te kobbe ni, “Woki an onwoŋo akobo wan kede Nabot kun akwae ni kono omia poto olokkere me an awil awila kede lim onyo amie poto olok ocele kakare, cite en okwero oko ni mom ebino miya poto olokkere.” Dako mere Jejebel te gamo ni, “Aloko ni yin en aman aloc me Icrael. Ya malo me icem, kun cunyi gire yom; an abino miyi poto olok a Nabot me Jejerel.” Jejebel te cako coyo waraga i nyiŋ abaka Akab, te goyo iye citam abaka, te cwayo baŋ odoŋe kede jo ame oworo ame bedo i Nabot i paco mere, En onwoŋo ocoo waraga-nono kit man: “Rabbi wunu jo pi kare me ri kec, ket wunu Nabot obed i wi kom me dito i akina lwak; kel wunu jo aryo a kitegi reco, ibin imi wunu cuŋ i nyime. Mi wunu jo-nono cak dote kun kobo ni, ‘Koŋ inen yin iceno Obaŋa kede abaka.’ Wun doŋ kwanye wunu oko, itere wunu oko, ite wot napo wunu oko kede kiddi tuno waŋ ame oto.” Odoŋe kede jo ame oworo ame bedo i paco mere te daŋ timo kit ame Jejebel otito baŋgi i waraga. Gin te cako rabbi lwak pi kare me ri kec, ote daŋ keto Nabot bedo i wi kom me dito i akina lwak. Jo aryo a kitegi reco te bino cuŋ i nyime, te cako dote kun kobo ni, “Nabot oceno Obaŋa kede abaka.” Gin te kwanye oko i boma ote tere oko, ote wot nanapo en oko kede kiddi tuno waŋ ame en oto. Gin te cwayo kwena baŋ Jejebel me titte ni, “Nabot doŋ otyeko nanapo oko i kiddi, daŋ doŋ oto oko.” Kare ame Jejebel doŋ owinyo ni otyeko nanapo Nabot oko i kiddi, daŋ doŋ oto oko, en okobbi Akab ni, “Ya doŋ malo igam poto olok a Nabot me Jejreel, ame rik ekwero miyi wilo kede lim-mi; Nabot doŋ mom kwo, otyeko doŋ to oko.” Akab ka owinyo ni Nabot doŋ oto oko, oya malo te wot oyotoyot i poto a Nabot me Jejerel me wot gamo. Rwot te kobbi Elia dano me Ticbe ni, “Ru ya malo iwot irwatte Akab abaka me Icrael, ame tye i Camaria; aman en tye i poto olok a Nabot, owoto kuno me wot gamo. Wot ikobbe ni, ‘Rwot okobo ni yin ineko dano dok daŋ igamo anaka poto mere. Dok ikobbe daŋ ni, kan ame gwogi onaŋo iye remo a Nabot, en ame gwogi bino naŋo iye daŋ remoni.’ ” Akab te kobbi Elia ni, “Akworra doŋ onwoŋa oko ba.” Elia te kobbe ni, “Anwoŋi doŋ oko ta, pien yin giri en ame icatte keni itimo gin a mom nen aber baŋ Rwot. Nen ba, abino cwalo can i komi, abino weyi oko luŋ owec, abino neko itinoni awobe luŋ iyi Icrael, opii kede anywalli. Abino timo jo me odi kite ame rik atimo kede jo me ot a Jeroboam wot a Nebat, dok ame rom aroma i ot a Baaca wot Akija, pien yin imio akemo omaka, dok daŋ imio jo Icrael otimo bal. Aco kop i kom Jejebel, Rwot okobo ni, ‘Gwogi en ame bino mwodo kom Jejebel i lobo ame tye i ŋete.’ Wot Akab ame bino to paco, gwogi en ame bino mwodo kome; aco en ame bino to i tim ata, winy en ame bino camo kome.” Mom tye dano moro ame yam koŋ ocato kome kene pi timo gin anen arac baŋ Rwot calo Akab, ame rik dako mere Jejebel odio tetek. En otimo bal me ipyeda arac meicel pi bedo woro jogi, kite ame rik jo Ammon obedo timo; jo ame rik Rwot oryemo i nyim jo Icrael. Kare ame Akab doŋ owinyo kop ame Elia okobbe, oyeyeco boŋŋi mere oko, te daŋ cako ruko boŋo cola oko i kome i caa-nono, te kanyo kec. Akab te bedo wot kun kome doŋ oto oko, Kop a Rwot dok te bino baŋ Elia dano me Ticbe, kun kobbe ni, “Ineno kite ame Akab doŋ omwolle kede i nyima? Pien en doŋ omwolle kene i nyima, mom dok abino kelo can i kare mere, ento abino kelo can i ode i kare ame wode en ame tye i loc.” Jo Curia kede jo Icrael rik te medde bedo mot aboŋo lwennyoro i akinagi pi mwakki ame romo adek twal. Ento i mwaka me adekkere Yekocafati abaka me Juda te wot baŋ abaka me Icrael. Abaka me Icrael te kobbi omiro mere ni, “Wun mom iŋeo wunu ni Ramot-gilead obedo megwa? Wan oliŋ mot kun mom mito gamo oko i ciŋ abaka me Curia.” En dok te lokere penyo Yekocafati ni, “Yin daŋ itwero wot kedwa me wot lweny i kom Ramot-gilead?” Yekocafati te gamo dog abaka me Icrael ni, “Jamina luŋ obedo megi, an amegi kede jona kede aguragurana daŋ.” Yekocafati te kobo baŋ abaka me Icrael ni, “Koŋ ige penyo Rwot, me owiny ŋo ame en bino kobo.” Abaka me Icrael te coko odwarpiny luŋ karacel, ame romo jo mia aŋwen twal, en te kobbigi ni, “Awot lweny i kom Ramot-gilead onyo kur awot kuno?” Odwarpiny te gamo ni, “Woti; pien Rwot bino miyo i ciŋi.” Cite Yekocafati te dok kobo ni, “Adwarpinnyoro ocele ame obedo me a Rwot mom tye kan me koŋ openy?” Abaka me Icrael te gamo ni, “Otye kede lo moro ocele ame olwoŋo ni Mikaya ame otwero penyo kop a Rwot i baŋe, en obedo wota Imla; cite an cunya mom mito dano-nono kadi acel, pien en kom mom ru otyeto kopporo aber pira, kare luŋ tyeto kop a mom ber keken.” Yekocafati te gamo ni, “Pe amannono abaka, wek kur ikob amannono.” Abaka me Icrael te lwoŋo adwoŋŋoro, te kobbe ni, “Wot ilwoŋ Mikaya wota Imla ru bino oyotoyot.” I caa-nono onwoŋo abaka me Icrael kede Yekocafati abaka me Juda tye obedo i wi komgi me loc, kun oruko boŋŋigi me kwogo, ote bedo kede i laro kal ame onwoŋo tye i ŋet dogcel me donyo i boma me Camaria, kun odwarpiny luŋ tye atyet i nyimgi. Jedekia wot a Kanaana otio cal tuŋ lee me nyonyo, te kobo ni, “Rwot okobo ni, ‘Yin ibino coro jo Curia i tuŋ acalo magi tuno waŋ ame ijwerogi ducu.’ ” Odwarpiny luŋ te tyet kittono, kun ŋat acel acel kobo ni, “Woti i Ramotgilead me iwot ilo; Rwot bino miyo gire i ciŋi, yin abaka.” Lo ame onwoŋo owoto lwoŋo Mikaya, obino te kobbi Mikaya ni, “Nen ba, kop odwarpiny luŋ cukoro ka cuny abaka; mi koppi daŋ bed ame rom aroma kede megi ame cukoro cuny abaka.” Mikaya te gamo ni, “Kite a Rwot tye kede kwo-ni, gin ame en bino kobo baŋa, en ame abino kobo.” Kare ame en doŋ obino baŋ abaka, abaka okobbe ni, “Mikaya we, owot olweny i Ramot-gilead, onyo kur owoti?” Mikaya te gamo ni, “Wot kuno me iwot ilo lweny, Rwot bino miyo gire i ciŋe, yin abaka.” Ento abaka dok te kobo ni, “An abino ciki i nyiŋ Obaŋa tyen adi ni myero ikobba kop ateni keken i nyiŋ Rwot?” Mikaya te kobo ni, “Aneno jo Icrael luŋ tye oket atata i wi kidi calo rommi ame akwatgi mom; dok Rwot daŋ okobo ni, Adwoŋ ame loo jo man gire pe tye; wek ŋat acel acel dok gire ipaco mere i kuc.” Abaka me Icrael te kobo baŋ Yekocafati ni, “An mom onwoŋo akobbi ni Mikaya mom twero tyeto kopporo aber i koma kono ka en arac keken?” Mikaya dok te gamo ni, “Koŋ doŋ iwiny kop a Rwot: Aneno Rwot tye obedo i wi kom me loccere, kun mony me wi polo luŋ tye ocuŋ i ŋete tuŋ cam kede tuŋ cem. Eka Rwot te kobo ni, ‘Ŋa ame bino bwobwolo Akab me wot to i Ramot-gilead?’ Jo luŋ te bedo kobo kop apapat. Cuny te bino anyim, te bino cuŋ i nyim Rwot, te kobo ni, ‘An abino bwobwolo en.’ Rwot te penye ni, ‘Ibino bwole i yore aŋo?’ En te gamo ni, ‘Abino wot kuno ate wot miyo cuny arac me goba bedo iyi odwarpinnyere luŋ.’ Rwot te kobo ni, ‘Yin ibino bwobwolo en, ibino cobo ticci gire; wot kuno iwot itim kittono.’ Doŋ aman ba, Rwot doŋ otyeko keto cuny arac me goba iyi odwarpinnyini luŋ; Rwot okobo kop arac i komi.” Jedekia wot a Kenaana owoto baŋ Mikaya, te bapo leme kede ciŋe, kun kobo ni, “Cuny a Rwot oya i baŋa i yore aŋo te kobo baŋi kop kedi?” Mikaya te gamo ni, “Nen ba, ibino neno man i nino ame ibino wot pono iyi icika i tyelo.” Abaka me Icrael te kobo ni, “Mak wunu Mikaya idwok wunu baŋ Amon ame gabuna me boma, kede baŋ Yowaci wot abaka; me iwot ikobbigi wunu ni, ‘Abaka okobo ni, “Ket wunu dano man i buc, mie wunu en cam cem ame obuc camo, kun imie wunu ogati kede pii keken tuno waŋ ame an adwogo paco kede kuc.” ’ ” Mikaya ogamo ni, “Ka ce idwogo paco i kuc, mom Rwot en okobo keda.” Dok te medo ni, “Wun lwak luŋ myero iwiny wunu!” Abaka me Icrael kede Yekocafati abaka me Juda te wot i Ramot-gilead. Abaka me Icrael te kobo baŋ Yekocafati ni, “An abino ruko boŋo apat acalo dano moro ata, ate wot kede i lweny, ento yin myero iruk meri me loc.” Abaka me Icrael te ruko boŋo apat acalo dano moro ata, te wot i lweny. I kare-nono onwoŋo abaka me Curia ociko odoŋe pyeradek wie aryo ame loo gadigadi mere ni, “Kur ilweny wunu i ŋattoro ocele kadi dwoŋ onyo tidi, cite myero ilweny wunu ka abaka me Icrael.” Doŋ i kare ame odoŋe ame loo gadigadi oneno Yekocafati, gin okobo ni, “Abaka me Icrael kom ene.” Gin te cako lweny kede oko; Yekocafati te mwoco koko oko. Kare ame odoŋe ame loo gadigadi oniaŋ ni en mom obedo abaka me Icrael, gin te doŋ weko ryemo yore oko, Ento lo moro te telo atero mere bayo ata, te celo abaka me Icrael; atero mere te poto i akina nyonyo me geŋo kore kede nyonyo ocele me geŋo kome ame onwoŋo calo pok rec. Abaka me Icrael te kobbi lo ame onwoŋo aryemo gadigadi mere ni myero lokere dok kede cen pien owane oko. Lweny rik te bedo agwa meicel i nino-nono, omiro Akab rik te bedo jeŋo adwoŋgi i kom gadigadi kun nyime oneno jo Curia tuno naka otyeno, eka te to doŋ oko. Remo ame ocwer i kan ame ocobo te cwer mol piny i te gadigadi. I kare ame ceŋ doŋ ceggi poto, jo te cako redo malo ame dwon jo te romo bar me lweny, kun oredo ni, “Ŋat acel acel myero dok tuŋe. Dano acel acel odok i lobo mere!” Abaka Akab rik te to kittono, ote kelo kome i Camaria, ote yiko kuno, kelo Gin te cako lwoko gadigadi oko, i kut me kulo Camaria. Gwogi te nano remo mere, otim tim alaya alaya daŋ te lwokere i remo mere kite ame Rwot onwoŋo okobo. Kop i kom ginnoro luŋ ame Akab obedo timo a mom ocoo kan, kede kop i kom ot me kwogo ame rik en ogero i lak lyec, kede pacci apol atata ame en rik ogero, i lak lyec, kede pacci apol atata ame en rik ogero, gin luŋ tye ocoo i buk me Tekwaro ame tito kop i kom oloc me Icrael. Abaka Akab rik te to kittono, en te wot weo karacel i kwari mere. Wode Akajia en ame te leyo kakare. Yekocafati wot Aca odoko abaka me Juda i mwaka me aŋwen me loc Akab abaka me Icrael. Mwaka me dittere onwoŋo doŋ romo pyeradek wie abic kare ame en doko aloc me Juda; en te bedo loc i Jerucalem pi mwakki ame romo pyeradek wie abic. Nyiŋ tottere Ajuba ame obedo nyaka a Cilki. En te bedo lubo kit a pappere Aca luŋ, kun mom ya iye kadi acel; en obedo tiyo gin ame nen aber baŋ Rwot. Cite ka woro jogi ame onwoŋo tye i wi kiddi en mom omuko; jo te medde yalo jogi kuno, kun daŋ owaŋo odok akur. Yekocafati te medde bedo i kuc gin kede abaka me Icrael. Kop i kom ginnoro luŋ ame Yekocafati obedo timo ame mom ocoo kan, teko mere luŋ kede kite ame en olwenyo kede, gin luŋ tye ocoo i buk me Tekwaro ame tito kop i kom oloc me Juda. En ojwero co luŋ ame rik mio co wadgi buto kedgi i ot jogi ame rik onwoŋo pwod odoŋ ame mom ojwero i kare a pappere Aca. I kare-nono onwoŋo abaka pe tye iyi Edom; onwoŋo tye ka dano moro ame oketo me kuro kabedo abaka. Yekocafati rik otio mel me Tarcic me wot omo jabu iyi Opir, ento naka mom owoto pien mel oturigi oko i Ejion-geber. Icennere Akajia wot Akab te kobo baŋ Yekocafati ni, “Wek omirona wot karacel omironi i meli-ni.” Ento Yekocafati te kwero gire oko. Yekocafati te to wot weo karacel kede kwari mere, ote yiko kome karacel i kwari mere i paco a Daudi. Wode Jekoram en ame te leyo kakare. Akajia wot Akab ocako loyo jo Icrael kun bedo i Camaria i mwaka me apar wie abiro me loc a Yekocafati abaka me Juda, en te bedo loyo jo Icrael pi mwakki aryo. En obedo tiyo gin a mom nen aber baŋ Rwot, obedo lubo kit a pappere kede kit a tottere, kede kit a Jeroboam wot a Nebat, ame rik omio jo Icrael otimo bal. En obedo tic baŋ Baal kun woro, en te miyo akemo mako Rwot Obaŋa me Icrael i yore luŋ ame pappere obedo tiyo. I kare ame Akab abaka me Icrael doŋ otyeko to oko, jo me Moab te cako jem oko i kom Icrael. Akajia abaka me Icrael onwoŋo orette piny i waŋ dirica me icika mere i malo i Camaria, eka te wanne atetek. I kare ame en tye ka twoye, en ocwao kwena me wot penyo Baal-jebub, kun kobbigi ni, “Wot ipeny wunu Baal-jebub ame obedo obaŋa a jo Piriciti ame tye i boma me Ekron, me en mia aŋe ka ce abino caŋ i two man onyo pe.” Ento amalaika a Rwot te kobbi Elia, ame obedo adwarpiny, ame onwoŋo obedo dano me Ticibe, ni, “Ya malo i wot irwatte kede okwena abaka me Camaria, iwot ikobbigi ni, ‘Piŋo kara i wot wunu penyo kop i baŋ Baal-jebub, obaŋa me Ekron? Wun itamo wunu ni Obaŋa pe iyi Icrael bo?’ Wot ikobbi wunu abaka ni, Rwot okobo ni, ‘Yin mom ibino caŋ i twoni-nono, ento ibino to gire oko.’ ” Elia daŋ te cako wot kite ame Rwot okobbe kede, okwena te dok cen baŋ abaka. Abaka te penyogi ni, “Piŋo kara idwogo wunu cen?” Gin te gamo ni, “Wan orwatte i dano moro i yo ame te kobbiwa ni Rwot okobo ni wan odwog cen baŋi yin abaka ame i orowa, obin okobbi ni, ‘Piŋo kara icwao okwena me wot penyo Baal-jebub obaŋa me Ekron? Wun itamo wunu ni Obaŋa pe iyi Icrael bo? Pi gin itimonono mom ibino caŋ i twoni-nono, ento ibino to gire oko.’ ” Abaka te dok penyogi ni, “En dano ame irwatte wunu, te kobbiwu koppono, onwoŋo calladi?” Gin te gamo ni, “En onwoŋo oruko boŋo ame obedo yeyer kun otweo pyere kede del.” Abaka te koboni, “Mannono Elia enno, ame obedo dano me Ticibe.” Abaka dok te cwayo adwoŋ ame onwoŋo telo mony ame onwoŋo loo jo pyerabic karacel kede jo mere me wot baŋ Elia. Gin te wot naka baŋ Elia, ote nwoŋe tye obedo i wi kidi, ote kobbe ni, “Dano Obaŋa we, abaka okobo ni myero iwot baŋe.” Ento Elia te gamo dog adwoŋ me mony ame loo jo pyerabic ni, “Ka ce abedo dano Obaŋa wek acik mac ya i polo me waŋwu oko, yin karacel kede joni pyerabic.” Obaŋa daŋ te cwalo mac i polo te waŋogi oko ducu, en karacel kede jo mere pyerabic. Abaka dok te cwalo adwoŋ me mony ocele ame onwoŋo daŋ loo jo pyerabic, te wot daŋ i wi kidi malo baŋ Elia, kun woto karacel i jo mere luŋ, te kobbe ni, “Dano Obaŋa we, abaka okobo ni myero iwot baŋe oyotoyot.” Elia te kobo ni, “Ka ce an abedo dano Obaŋa, wek acik mac ya i polo me waŋwu oko, yin karacel kede joni pyerabic.” Obaŋa daŋ te cwayo mac i polo ame te waŋogi oko gin ducu, en karacel kede jo mere pyerabic. Abaka dok te cwayo adwoŋ me mony me adekkere karacel kede jo mere pyerabic. En te wot naka i wi kidi malo, te wot rumo piny i nyim Elia, te bako doge baŋe ni, “Ama dano Obaŋa we, tim ber kur ineka an karacel kede jona luŋ, mi kwowa bed gin a pire dit i nyimi. Pien odoŋe me mony aryo ame otelo nyima karacel kede jogi pyerabic ame mac oya i polo owaŋogi oko ducu; ento aman akwai tim ber imi kwona bed gin a pire dit i nyimi.” Amalaika a Rwot te kobbi Elia ni, “Wot karacel kede; kur ilwore.” Elia daŋ te ya wot karacel kede naka baŋ abaka, te kobbi abaka ni, “Rwot okobo ni, ‘Pien yin icwao okwena me wot penyo Baal-jebub, obaŋa me Ekron, pien yin onwoŋo itamo ni Obaŋa pe iyi Icrael bo, ame myero ipeny? Pi gin itimo-nono omio mom ibino caŋ i twoni-nono, ento ibino to gire oko.’ ” Abaka Akajia te to oko kit ame Rwot omio Elia okobo kede. Ominnere Jekoram en ame te leyo kakare acalo abaka i mwaka me aryo me loc a Jekoram wot a Yekocafati, abaka me Juda, pien Akajia onwoŋo rik mom tye kede wode moro. Kop ocele luŋ ame odoŋŋere i kom Akajia kede gin ame en otio a mom ocoo kan, gin luŋ tye ocoo i buk me Tekwaro ame tito kop i kom oloc me Icrael. I kare ame Rwot doŋ mito tero Elia oko i polo i yamo ajuru, onwoŋo Elia kede Erica ocako wotgi me wot i Gilgal. Elia te kobbi Erica ni, “Tim ber koŋ ibed kan; pien Rwot okobo ni myero an koŋ awot i Betel.” Ento Erica te gamo ni, “Kite acalo Rwot tye kwo-ni, dok yin daŋ itye kwo-ni, an gire mom abino pokkere kedi.” Gin luŋ doŋ ote wot naka i Betel. Odwarpinnyogo ame onwoŋo rik bedo i Betel kuno, te wot baŋ Erica te penye ni, “Yin iŋeo ni Rwot tin bino kwanyo adwoŋŋi oko i baŋi te tero oko?” En te gamo ni, “Ee, an aŋeo; ento wek wunu kobo koppere bedi.” Elia dok te kobbi Erica ni, “Tim ber koŋ ibed kan; pien Rwot okobo ni an koŋ awot i Jeriko.” Ento Erica te gamo ni, “Kite acalo Rwot tye kwo-ni, dok yin daŋ itye kwo-ni, an gira mom abino pokere kedi.” Gin luŋ doŋ ote wot naka i Jeriko. Odwarpinnyogo ame onwoŋo rik bedo i Jeriko kuno, te wot baŋ Erica te penye ni, “Yin iŋeo ni Rwot tin bino kwanyo adwoŋŋi oko i baŋi, te tero oko?” En te gamo ni, “Ee an aŋeo; ento wek wunu kobo koppere bedi.” Elia dok te kobbi Erica ni, “Tim ber koŋ ibed kan; pien Rwot okobo ni myero an koŋ awot i kulo Jordan.” Ento Erica te gamo ni, “Kite acalo Rwot tye kwo-ni, dok yin daŋ itye kwo-ni, an gira mom abino pokere kedi.” Gin luŋ te wot karacel, kun odwarpiny pyerabic lubo yorgi naka i Jordan. Elia kede Erica te wot cuŋ i dog kulo Jordan, kun odwarpiny pyerabic ca ocuŋ kannabor. Elia te gonyo boŋo i kome oko te dolo goyo kede pii; pii te pokere oko i yie aryo, kun cuŋ tuŋŋi kede tuŋŋi, tuno waŋ ame gin aryo luŋ okato loka tun ca, kun obeo kan otwo. Kare ame gin doŋ otyeko kato loka tuŋ ca, Elia te penyo Erica ni, “Kwa gin ame imito ni myero atim piri, kun mom ru okwanya oko i baŋi.” Erica te gamo ni, “Tim ber imia abed i kodi cuny ame yin itye kede-ni tyen aryo, ame twero miya abedo ŋat ame leo kakari.” Elia te gamo ni, “Ikwao gin atek meicel, cite ka ce ibedo neno yora i kare ame atiŋŋa malo i baŋi, gin ame ikwao-nono bino timere i komi kittono; cite ka mom ibedo neno yora, mom gire bino timere.” I kare ame gin tye awot kun okop, gadigadi moro me mac kede aguragura te poko akinagi oko. Elia te cako wot malo i twon yamo ajuru ame onwoŋo obino adwoŋ wokkono. Erica oneno te cako koko oko ni, “Pappa doi! Pappa doi! Gadigadi lweny a jo Icrael kede wegi aguraguragi!” En mom dok te medo neno atwal. Erica te mako boŋo mere, te yeco yie oko poko aryo. En te kwanyo boŋo Elia ame onwoŋo opoto piny i kome, te dok kede cen, te wot cuŋ i dog kulo Jordan. Okwanyo boŋo Elia ame onwoŋo opoto i kome ca, eka te goyo kede pii kun kobo ni, “Rwot kara tye kwene ba, ame obedo Obaŋa Elia?” En dok te medde goyo pii tyen me aryo, eka pii te pokere oko i yie aryo kun cuŋ tuŋŋi i tuŋŋi. Erica te kato tuŋ ca, kun beo i dyere. Odwarpiny pyerabic ame onwoŋo rik bedo i Jeriko onene ka en bino, eka gin te kobo ni, “Cuny Obaŋa ame yam tye i kom Elia doŋ okobo oko i kom Erica.” Gin te wot me wot rwatte kede, eka gin te ryebere piny i nyime. Gin te kobbe ni, “Nen wan omironi ame otye kan wan jo pyerabic, ame wan luŋ obedo jo ame tek meicel. Tim ber icwalwa owot oyeny adwoŋŋi; onyo ca cuny a Rwot otere oko teŋe te weke oko i wi kidi moro, onyo ca oweke i luŋŋoro.” Erica te gamo ni, “Pe gire abino cwalowu.” Cite gin te bedo diye atek tuno waŋ a lewic omake, en te kobo ni, “Wot wunu.” Odwarpiny pyerabiccono rik te wot; gin te bedo yenye pi nino a romo adek, cite naka mom onwoŋe. Gin te dwogo baŋ Erica, kun onwoŋo en pwod tye i Jeriko. Erica te kobbigi ni, “An mom rik akobbiwu ni kur iwot wunu?” Jo mogo me Jeriko rik te wot baŋ Erica ote kobbe ni, “Kite ame yin ineno kede, yin adwoŋwa, bomawa-ni ogero kan aber meicel, ento pii mere en ame rac, mio yi mon i lobo-ni ony oko.” En te gamo ni, “Onywunu kado i tako kwon anyen ite kelo baŋa.” Gin daŋ te kelo kite ame ocikogi kede. En te wot naka i dog pii me bomanono, te wot onyo iye kado-nono kun kobo ni, “Man en kop ame Rwot okobo: An doŋ atyeko yiko pii man odoko doŋ aber; mom dok bino miyo ŋattoro to, akadi onyo yi dako moro.” Mannono te miyo pii-nono doŋ doko aber tuno naka tin, kite ame rik Erica okobo kede. Erica te ya oko i Jeriko wot i Betel; i kare ame en tye iyo, awobe mogo te bino i boma te cako nywanywaro en kun okobo ni, “Wot oko, lo-ni a wie otal! Wot oko lo-ni a wie otal!” Erica te lokere nenogi, te cenogi oko i nyiŋ Rwot. Megi ŋuu aryo te donyo i buŋ, te mako awobe pyeraŋwen wie aryo i akinagi, kikilo oko. Erica te ya i kuno te wot naka i kidi me Karmel eka te dok cen i Camaria. I mwaka me apar wie aboro me loc a Yekocafati, abaka me Juda, en ame Joram wot Akab ocako loyo kede jo Icrael i Camaria, en te bedo aloc pi mwakki apar wie aryo. En obedo timo bal ame nen arac i nyim Rwot, kadi bed ballere mom obedo a rom i me a pappere kede me a tottere, en omuko kidi ame pappere rik ocibo me woro Baal. Cite en daŋ obedo timo bal ame rom aroma i me a Jeroboam wot a Nebat ame onwoŋo obedo aloc i nyime, ame omio jo Icrael otimo bal. I kare-nono onwoŋo Meca abaka me Moab opito lwak rommi apipim; mwaka i mwaka en rik onwoŋo mio itino rommi tutumia mia acel baŋ abaka me Icrael kede yer rommi ame omworo i kom nyogi rommi tutumia mia acel. Cite i kare ame abaka Akab me Icrael oto, Meca abaka me Moab te cako jem oko i kom abaka me Icrael. Man te miyo abaka Joram ya oko i Camaria oyotoyot, te coko jo Icrael luŋ me lweny. En te cwayo kwena baŋ Yekocafati abaka me Juda kun kobbe ni, “Abaka me Moab otyeko jem oko i koma; yin daŋ itwero wot kedwa me wot lweny i kom jo Moab?” Yekocafati te gamo ni, “Abino wot. Jamina luŋ obedo megi, an a megi kede jona kede aguragurana daŋ.” En dok te penyo Joram ni, “Obino lubo yo mene me wot lweny?” Joram te gamo ni, “Obino lubo yo ame beo i tim me Edom.” Mannono te miyo abaka me Icrael kede abaka me Juda kede me Edom te cako wotgi. I kare ame gin doŋ otyeko woto wot me nino abiro kun ogono piny agona, mom onwoŋo pii moro me amata a mony kede me amata a leyigi ame onwoŋo tye aciro alubo yorgi kun oyeo yec, Abaka me Icrael te kobo ni, “Ama doi! Rwot doŋ okelo wan obakki adek-ki me bino miyowa i ciŋ abaka me Moab.” Yekocafati te kobo ni, “Adwarpiny a Rwot mom tye kan, me koŋ openy kop a Rwot i baŋe?” Dano moro acel i akina omiro abaka me Icrael te gamo ni, “Erica wot a Capat en ame tye kan, en ŋat ame onwoŋo rik konyo Elia.” Yekocafati te kobo ni, “En obedo adwarpiny ateteni ame twero kobo kop a Rwot.” Man te miyo abaka me Icrael kede Yekocafati kede abaka me Edom wot baŋ Erica. Erica te kobbi abaka me Icrael ni, “An kara atwero notte kedi i yore aŋo? Yin wot giri baŋ odwarpiny ame rik pappi kede totti penyo kop i baŋgi.” Cite abaka me Icrael te gamo ni, “Mom gire amannono, pien Rwot en ame olwoŋo obakki adek-ki me bino miyogi i ciŋ jo Moab.” Erica te gamo ni, “Kite acalo Rwot me mony tye kwo-ni, Rwot ame an atito pire-ni, onwoŋo mom atwero timo ginnoro piri, kadi tiŋo waŋa neni, kono mom onwoŋo aparo pi Yekocafati abaka me Juda. Koŋ doŋ ikella wunu lo moro ame adiro i goyo naŋa.” I kare ame ago naŋa ocako goyo naŋa, teko a Rwot te bino i kom Erica, omio en te kobo ni, “Man en kop ame Rwot okobo, ‘Abino miyo pii poŋ i kulo otwo-ni luŋ.’ Pien Rwot okobo ni, ‘Wun mom ibino neno wunu yamo, akadi kot, cuny kulo en ame pii bino poŋ iye, eka wun karacel kede dokwu kede leyiwu luŋ ibino mato wunu pii-nono.’ Man gin ayot meicel baŋ Rwot; en bino miyo jo Moab i ciŋwu. Ibino mayo wunu bomagi abeco wok-ku luŋ ame gin ocecelo i cel atek meicel; ibino totoŋo wunu yengi luŋ ame nyak, ibino toro wunu daŋ waŋ piigi luŋ, ite babalo wunu pottigi abeco ame ceko cam oko, kun icoro wunu gweŋe i pottigi-nono ducu.” Orwo mere odiko, i kare ame omio iye mot me yalo Rwot, pii te cako bino kun mollo i tutuŋ Edom, eka te poŋ i kabedo ducu. I kare ame jo Moab doŋ owinyo ni obakki adek-ki obino me lweny i komgi, gin te lwoŋo jo luŋ ame onwoŋo romo ruko ruk me lweny, cakere i kom awobe a pwod tino tuno kede naka i kom jo adoŋo, ote terogi wot ryeye i waŋ lobo. I kare ame gin oya malo odiko, ceŋ onwoŋo tye aryeny i kom pii, kun mio pii nen arema calo remo. Gin te kobo ni, “Man gire remo, nen calo obakki adek-ki obedo lweny kengi kengi ote nekere oko, Wun jo me Moab owot doŋ oyak wunu jamigi!” Ento i kare ame gin otuno i gony a jo Icrael, jo Icrael te twarre malo cako lweny i komgi, gin te mukere oko i nyimgi i ŋwec; jo Icrael te medde ryemo yorgi kun nekogi meicel. Jo Icrael te mumuko bomagi oko luŋ. Gin te bedo babao gweŋe i pottigi luŋ ame gin obebea iye, tuno wan ame gweŋ doŋ oyiyida atata i potti abeco luŋ; ote daŋ bedo toro waŋ pii ducu, kun daŋ ototoŋo yen abeco ame nyak. Iyi agikki mere doŋ jo Icrael ame lwenyo atiŋdio te guro boma me Kir-karecet, ame en keken onwoŋo doŋ odoŋ, ote cako lweny iye tuno ka doŋ oloo. Kare ame abaka me Moab oneno ni mony doŋ odie atek meicel, en okwanyo jo ame lwenyo i pala ame romo mia abiro, te temo yeco kede yo mere kun beo i akina okwor me enwoŋ yo me riŋo oko baŋ abaka me Curia, cite naka mom otwerre. En te mako wode adwoŋŋere, ame onwoŋo myero bin lee kakare acalo abaka, te yalo obaŋa me Moab acalo mot awaŋa, i cel ame ocelo i boma. Akemo te mako jo Icrael meicel omio gin te ya dok oko i lobogi. I kare-nono dako moro acel ame cware oto, i akina mon odwarpiny obino baŋ Erica te kobbe ni, “Adwoŋ, cwara oto oko! Kite ame yin iŋeo kede, en onwoŋo obedo dano ame lworo Obaŋa, ento aman lo moro ame onwoŋo en tye i banya mere obino te bino tero awobena aryo me wot bed opii mere me culo banya.” Erica te kobbe ni, “Kara myero an doŋ atim gin aŋo ba? Ŋo ame yin itye kede i odi?” En ogamo ni, “Mom atye i ginnoro kadi acel, adwoŋ, kono ka tabo me moo keken en ame tye.” Erica te kobbe ni, “Wot baŋ owoteni me iwot ikwa gulli i baŋgi ame yigi nono apol acalo itwero. Eka yin karacel kede awobeni ite donyo wunu i ot, ite cego wunu doggola oko, cak onyo moo iyi gulli ducu. Gulu ame open, kwany icwal teŋe.” Dako-nono daŋ te wot donyo awobe mere aryo i ot ote cego doggola oko; en te bedo onyo moo iyi gullu kun awobe mere cwaye gulli. Kare ame en doŋ opiko moo opoŋ gulli ducu, en openyo wode ka ce gulu ocele pwod odoŋ. Wode te gamo ni gulu moro mom doŋ tye. Moo te doŋ cuŋ oko kun mom dok mol. En te dok baŋ Erica te wot titte, Erica te kobbe ni, myero en wot cat moo oko me ecul kede banya, me en karacel kede awobe mere okonyere kede en ame odoŋ. I nino moro acel Erica owoto i Cunem, kan ame dako moro ame alonyo onwoŋo bedo iye. Dako-nono rik te cwane me wot cam kede, eka i kare luŋ ame Erica rik beo kuno, en beo cemo iye. Dako-nono te kobbi cware ni, “An aniaŋ ni dano ame bedo beo kan kare ducu-ni obedo gire dano Obaŋa. Wan myero oger atin icika moro i wi ot malo ote keto iye itanda, meja, kom kede mac tara, me wek ka en olimowa, en twero wot bedo iye.” I nino moro acel, Erica owoto kuno, te wot donyo iyi icika weo iye. En okobbi amiro mere Gekaji me wot lwoŋo dako me paco-nono. Dako-nono obino te bino cuŋ i nyime. Okobbi amiro mere ni, “Penye gin a myero otim baŋe pi ayela man luŋ ame en oneno pi gwokowa. Onyo en tye i kopporo ame mito ni awot akob baŋ abaka pire onyo baŋ adwoŋ ame loo mony?” Dako te gamo ni, “An gira abedo i akina jowa.” Erica te penyo Gekaji ni, “Atim ŋo pire?” Gekaji te gamo ni, “Nen en mom tye kede wode moro, cware daŋ doŋ oti oko.” Erica te kobbe ni, “Koŋ doŋ ilwoŋe ebin kan.” I kare ame olwoŋe, en obino te bino cuŋ i doggola, Erica te kobbe ni, “I mwaka abino i kodi kare-ni ibino tiŋo wodi i kori.” En te gamo ni, “Pe amannono adwoŋŋa, myero kur ibwola an aŋecani. Nen yin ibedo dano Obaŋa.” Ento kite ame Erica onwoŋo okobo, dako-nono oyac te daŋ bino nywalo wode oko i mwaka anyen i kodi kare ame onwoŋo okobo ikokome. Kare ame atin doŋ odoko adit, nino moro acel en owoto baŋ pappere i poto, baŋ jo ame akac. En te wot kobbi pappere ni, “Wia abara! Wia abara!” Pappere te kobbi omiro mere ni, “Tiŋ atin-nu iter baŋ tottere.” Amiro-nono te tiŋo awobi-nono tero baŋ tottere, en te wot bedo i tyen tottere naka dyeceŋ, eka te to gire oko. Tottere te tiŋe wot pyele i wi tanda Erica te weke kuno, en te cego doggola oko. En te wot lwoŋo cware te kobbe ni, “Cwa amiro acel bin baŋa kan kede kana, pien amito wot baŋ dano Obaŋa oyotoyot, me ate dwogo.” Cware te gamo ni, “Piŋo kara iwot baŋe tin? Dwe gire mom ru opor, cabit daŋ mom ru oromo.” En te gamo ni, “Bino bedo ber.” En te tweyo kom me bedo i ŋe kana, te kobbi amiro mere ni, “Wek kana riŋ nakanaka kur cuŋ tuno ka an akobbi.” En te ya wot baŋ dano Obaŋa i wi kidi me Karmel. I kare ame Erica onene kun abino, okobbi amiro mere Gekaji ni, “Neno dako me Cunem ca abino ca. Riŋ iwot irwatte kede, ipenye ka ce en tye aber, dok cware kede wode daŋ tye aber.” En te kobbi Gekaji ni etye aber. Ento i kare ame en obino baŋ Erica en oryebere piny owore te mako tyen Erica. Gekaji te mito ni kono ecore teŋe, cite Erica te kobbe ni, “Weke gire, pien tye i twon can adwoŋ meicel i cunye; cite Rwot mom okobba kopporo iye.” Dako te kobbe ni, “Adwoŋŋa, an rik akwai pi atin awobi? Rik mom akobbi ni kur ibwola?” Erica te lokere baŋ Gekaji te kobbe ni, “Ru ya malo me itwe pyeri oyotoyot, ikwany abironi imak i ciŋi me iwoti. Kur icuŋ imot ŋattoro i yo akadi ŋattoro omoti, kur daŋ igam doge. Wot atir naka i ot ite wot pyelo abirona i waŋ atin.” Totta atin dok te kobo ni, “Kite ame Rwot tye kede kwo-ni, dok yin daŋ itye kwo-ni, mom abino pokere kedi.” Gin aryo luŋ ote ya cako wotgi karacel. Gekaji owoto oyotoyot i nyimgi, te wot keto abiro Erica i waŋ atin, cite ginnoro mom te timere kadi acel, kun dwonnoro daŋ mom winyere ame nyuto ni atin kwo. Mannono omio en odok cen me wot rwatte kedgi, eka te kobbigi ni, “Atin gire mom ru ocoo.” Kare ame Erica otuno, en odonyo kene i cika mere, te neno atin obuto i wi tanda mere kun oto oko, Ocego doggola te kwayo Rwot. En te ya malo wot buto i kom atin kun keto doge i dog atin, waŋe i waŋ atin, opyelo daŋ bade i bad atin. I kare ame tye obuto oryeye aryea i kom atin, kom atin te cako doko alyet oko. Erica oya malo i kom atin, te wowota i dye ot kun wirre tuŋŋi i, tuŋŋi te dok wot buto i kom atin. Atin te jiro tyen abiro, te yabo waŋe. Erica te lwoŋo Gekaji te titte ni myero en lwoŋ totta atin. Kare ame tota atin obino, Erica te kobbe ni, “Gam wodi ene.” Dakonono te bino rumo piny i nyime te tiŋo atinnere wot kede. I kare-nono ame kec onwoŋo opoto i lobo, Erica owoto i Gilgal. Kare ame en onwoŋo rik tye apwonyo odwarpiny, en okobbi omiro mere ni myero cib twon gulu moro adwoŋ i keno, me ted cam ame romogi luŋ. Ŋat acel i akinagi te wot i poto me wot ŋwedo dek. En te nwoŋo agaba me tim, te pwono nyige adwoŋ meicel te tero paco. En oŋweŋwero te keto i gulu, kun mom ŋeo kit dekkono. I kare ame otoko dek me jo cam, kare ame gin obilo, gin ocako doŋo korgi kun okobbi Erica ni, “Yin dano Obaŋa, yat gire ennono!” Camo dekkono te loyogi oko. Erica te kobo ni, “Kel wunu moko kwon.” Ote kelo onyo i gulu kun en kobo ni, “Tokk i jo-nu dek me gin cam.” Gin doŋ mom te nwoŋo balloro i kom dek. I kare moro ocele, lo moro obino kun oya i Baal-calica kun okelo moko kwon me wi mwaka baŋ Erica, ogati me cayiri ame ogeo kayo i mwaka-nono, ame romo pyeraryo nono, kede wit kal ame pwod okao akaa. Erica te kobbi amiro mere ni myero mi odwarpiny cam. Ento amiro mere te gamo ni, “Itamo ni man twero romo jo mia acel twal?” Erica dok te kobo ni, “Yin migi ocam, pien Rwot okobo ni gin obino camo te daŋ dok loyogi oko.” Amiro mere te keto cammono i nyingi, gin ocamo te loyogi oko kite ame Rwot onwoŋo okobo. Naaman adwoŋ mony me Curia, rik onwoŋo obedo twon dano adwoŋ meicel i nyim abaka me Curia dok daŋ oworo atek, pien Rwot obedo miyo jo Curia loyo lweny pi Naaman. En rik obedo twon loo moro atek meicel i lweny, ento dobo rik onwoŋo tye i kome. I kare moro ame jo Curia oyako jo Icrael, gin okelo atin nyako moro i lobo a jo Icrael ame te doko aŋeca a dako a Naaman. I nino-moro en te kobbi imattere ni, “Kono adwoŋŋa-ni onwoŋo rik ceggi kede adwarpiny ame tye i Camaria ca, kono ocaŋo two dobo oko i kome.” I kare ame Naaman owinyo kop man, en owoto baŋ abaka te wot kobbi abaka kop ame aŋeca-nono okobo. Abaka me Curia te gamo ni, “Woti, abino coyo waraga iwot kede baŋ abaka me Icrael.” Naaman te cako wot kuno, kun tero ryal ame romo cekel tutumia pyeradek kede jabu ame romo cekel tutumia abicel kede boŋŋi ame oruko i nino adoŋo gin apar. Waraga ame omie rik ocoo kit man; “Waraga man ocoo baŋi me nyuto amirona Naaman baŋi. Tim ber icaŋ two dobo i kome oko.” I kare ame en okelo waraga-nono baŋ abaka me Icrael, te kwano, abaka oyeco boŋo mere i kome oko kun kobo ni, “An adoko Obaŋa bo, ame neko dano dok te cero oko-ni, en ame omio dano-ni ocwalo kop baŋa ni myero acaŋ two me dobo i kom lo-ni oko-nie? Man gire nen kannaler ni en tye aroko kolo baŋa.” Kare ame Erica dano Obaŋa owinyo ni abaka me Icrael oyeco boŋo i kome oko, en ocwao kop baŋ abaka kun kobo ni, “Piŋo kara ibedo kede cwercuny ame omio iyeco boŋo oko i komi? Cwal dano-nono baŋa, me an abin amie eŋe ni adwarpiny kara tye iyi Icrael!” Mannono te miyo Naaman wot baŋ Erica kun woto aguragura mere luŋ kede gadigadi, en te wot cuŋ i doggola me ot Erica. Erica te cwayo kop baŋe kun kobo ni, “Wot ilwokere i Jordan tyen abiro, komi bino roc dok kakare ite caŋ oko i itwo-ni.” Naaman te cako ya i kannono ame akemo ociro oko, te kobo ni, “An onwoŋo atamo ni en bino bino baŋa te kwayo Rwot Obaŋa mere, te weweo ciŋe i koma kan alit, te caŋa oko. Kulo Abana kede kulo Parpar ame tye i Damaciko mom beco atek ame kato pie luŋ ame tye iyi Icrael? Onwoŋo mom atwero lwokere gira kuno eka ate caŋ?” En te ya oko i kuno kun akemo ociro meicel. Ento amiro mere te wot baŋe kuno, te kobbe ni, “Adwoŋŋa, kono rik adwarpiny okobbi ni iwot itim ginnoro atek meicel, kono mom itimo? Kara ŋo ame aman moni wot lwokere me icaŋ giri oko?” Naaman te doŋ wot i kulo Jordan, te wot lutte iye tyen abiro kite ame Erica dano Obaŋa, onwoŋo okobbe, kome daŋ te caŋ gire oko. Del kome te roc doko aber calo me atin okere. En odok cen baŋ Erica karacel i jo mere luŋ te wot kobbe ni, “Aman an doŋ aŋeo ni mom tye obaŋa moro ocele i lobo, kono ka Obaŋa a jo Icrael keken; doŋ yim myero itim ber igam motta, an amironi.” Erica te gamo ni, “Kite acalo Rwot tye kwo-ni, Rwot ame an atio pire-ni, mom gira abino gamo ginnoro i baŋi.” Naaman te bedo diye ni myero en gam, ento Erica te kwero gire oko. Naaman dok te kobbe ni, “Ka ce doŋ ikwero gamo motta oko, tim ber, imia an amironi lobo ame kana romo yeyo, pien cakere tin, an mom dok abino yalo obaŋa moro ocele i mot aŋola onyo i mot awaŋa, kono ka Rwot keken. Pi mannono atamo ni Rwot bino timo an amironi kica ka ce abino wot didik adwoŋŋa, i ot a Rimmon ame obedo obaŋa a jo Curia, me wot wore kuno, kun ojeŋere i bada, dok an daŋ akulo wia piny i ot a Rimmon, Rwot myero tima kica pi kop man.” En te kobbe ni, “Wot giri kede kuc.” Kare ame en mom ru owoto abor wok, Gekaji ame obedo amiro Erica, dano Obaŋa ca, te kobo ni, “Koŋ inen, adwoŋŋa oweko Naaman dano me Curia owoto aboŋo culo ginnoro kadi acel! Piŋo okwero gamo mot ame okelle? Kite acalo Rwot tye kwo-ni, an abino ryemo yore me wek agam ginnoro i baŋe.” Gekaji te cako ryemo yo Naaman. Kare ame Naaman oneno dano tye aryemo yore, en te yito oko piny i wi gadigadi mere me wot mote kun penye ni, “Kopporo tye?” En ogamo ni, “Kopporo gire pe. Adwoŋŋa en ame ocwala me kobbi ni jo aryo i akina odwarpiny ame bedo i lobo kidikidi me Epraim obino amanni, tim ber imigi ryal ame romo cekel tutumia adek kede boŋŋi aryo ame oruko i nino adoŋo.” Naaman te gamo ni, “Gam, tutumia abicel ene.” Naaman dok te medde diye, ote miye ryal ame en te tweyo i cao mere kede boŋŋi aryo ame oruko i nino adoŋo, te miyo omiro mere aryo tero kun otelo nyim Gekaji. I kare ame gin otuno i wi kidi malo, Gekaji te kwanyo jami-nono oko i baŋgi te cwalo i ot. En te cwayo omiro a Naaman dok cen baŋ adwoŋgi. En odonyo i ot adwoŋŋere, Erica te penye ni, “Yin iya ikwene?” En te gamo ni, “Amironi gire mom owoto kannoro kadi acel.” Ento Erica te kobbe ni, “An onwoŋo atye kedi kuno i cuny i kare ame loca ya i wi gadigadi mere me bino rwatte kedi. Man gire mom obedo kare aber me gamo lim onyo boŋŋi me aruka, poto jeituni kede poto olok, rommi onyo dok, opii onyo aŋeca. Mannono omio dobo a Naaman bino kobo i komi kede i kom ikwai nakanaka!” Kare ame Gekaji ya i nyime, kun onwoŋo doŋ dobo orwatte oko i kome, kun del kome tar calo pee. I kare-nono odwarpiny ame rik Erica loo te cako miyo kokogi baŋ Erica ni, “Nen ba, kan ame wan obedo iye-ni diŋ meicel, mom gire romowa. Wan omito ni kono owoto i kulo Jordan owoto otoŋo yen kuno, me oger kede kan ame otwero bedo iye.” Erica te gamo ni, “Ber gire.” Ŋat acel i akinagi te diyo Erica ni myero wot kedgi; Erica daŋ te ye. Erica te cako wot kedgi; kare ame gin otuno i Jordan, gin te cako ticgi me toŋo yen. Cite i kare ame onwoŋo dano moro acel i akinagi atoŋo yat, lee mere te poto lwiny oko i te pii. En te redo kun kobo ni, “Oi doi, adwoŋ Erica, atim aŋo ba? Onwoŋo akwao lee-nono akwaa ibaŋ ŋat ocele.” Erica te penye ni, “Opoto ka kwene?” En te nyutte kakare, Erica te toŋo yattoro bolo i pii kuno, lee te dwogo oko i wi pii malo. Te kobbe ni, “Kwany leeni.” En te cwayo ciŋe kwanyo lee mere oko. I kare moro abaka me Curia onwoŋo tye alweny i jo Icrael. En obedo penyo omiro mere, eka te moko kan a myero egur iye gonygi. Ento Erica dano Obaŋa te cwalo kop baŋ abaka me Icrael, kun kwenyoro en ni kur ewot i kabedo-nono pien jo Curia awot coko mony i komgi kuno. Abaka me Icrael te cwayo jo mere me wot kan ame dano Obaŋa otite-nono. Erica rik obedo konye kittono kun mie elaro kwo mere tyen apopol. Cuny abaka me Curia te bedo waŋ atek pi koppono, omio en te lwoŋo omiro mere baŋe, te penyogi ni, “Ŋa i akinawa ame tye ka cwalo kop i kom yikwa baŋ abaka me Icrael?” Ŋat acel i akina omiro mere te gamo ni, “Ŋattoro gire pe i akinawa, adwoŋ, ento Erica adwarpiny ame tye iyi Icrael-li, en ame tito kop ducu, anaka kop ame yin ikobo iyi icika me butoni baŋ abaka me Icrael.” Abaka te gamo ni, “Wot ipeny wunu kan ame en bedo iye, me acwal dano wot make oko.” Gin te kobbe ni en bedo i Docan. En te cwayo lwak jo apol ata, kun owoto aguragura kede gadigadi me lweny. Gin otuno i boma-naca dyewor, ote guro oko. Orwo mere ibai, amiro Erica te ya malo, te donyo oko, en te neno mony a jo Curia, kun tye aguraguragi kede gadigadi lweny ame oguro boma luŋ irit. En odok cen i ot te wot kobbi Erica ni, “Oto oko adwoŋ! Gin aŋo a myero otim?” Erica te gamo ni, “Kur ilwor, pien jo ame tye tuŋ banwa pol katogi oko.” Erica te cako kwayo Rwot, kun kobo ni, “Tim ber, Ama Rwot, iyab waŋe me enen!” Rwot te gamo kwaccere, te yabo waŋ awobi Erica, en te neno lwak aguragura apipim opoŋ i wi kidi karacel kede gadigadi lweny me mac, kun oguro Erica dyere. Kare ame jo Curia obino me lweny i kome, Erica okwao Rwot kun kobo ni, “Tim ber imi waŋ joni coroko.” Rwot daŋ te miyo wan jo-nono coro oko kit ame Erica okwao kede. Erica te kobbigi ni, “Irwenyo wunu oko, man pe boma ame iyenyo wunu. Luba wunu me aterwu baŋ ŋat ame iyenyo wunu.” En te terogi naka i Camaria. I kare ame gin otuno i Camaria, Erica te kwayo Obaŋa oyotoyot, kun kobo ni, “Ama Rwot, tim ber iyab doŋ wan jo man, me gin doŋ nen piny.” Rwot te yabo waŋgi, gin te neno piny, gin te nwoŋo ni otye doŋ i Camaria. Kare ame abaka me Icrael onenogi, en openyo Erica ni, “Adwoŋ, anekgi oko? Anekgi oko?” Erica te gamo ni, “Yin kur inekgi. Itwero neko jo ame doŋ iyako oko i lweny? Yin migi ginnoro ocam, imigi daŋ ginnoro me amata, me gin dok baŋ abakagi.” Mannono te miyo abaka me Icrael teddigi twon arama adwoŋ meicel; kare ame gin doŋ otyeko cam dok daŋ omatte, en ocwaogi odok cen baŋ abaka me Curia. Cakere i karenono, jo Curia te weko cobo mony i kom jo me Icrael atwal. Ame doŋ otyeko kare alalac, Ben-adad abaka me Curia te coko monyere luŋ, te wot kedgi wot guro boma me Camaria. Guro boma ame gin oguro-nono omio kec orido jo Camaria meicel, ame te miyo wel jami wot malo atek, kun wi kana acel kaken otwero cato cekel me ryal pyeraboro kede toke i gwata atok otwero cato cekel abic twal. I kare ame abaka me Icrael onwoŋo tye awot, kun abeo i wi cel malo, dako moro te redo baŋe, kun kobbe ni, “Ama abaka, konya ba!” Abaka te gamo ni, “Ka Rwot mom romo konyi, an abino nwoŋo gin a myero akonyi kede kwene? Inena atye i kal onyo koŋo olok bo?” Abaka te dok penye ni, “Peko aŋo ame it ye k ede?” Dako-nono te gamo ni, “Dako wadwani okobba ni myero ocam atinna oko, eka ote camo mere odiko ocele. Mannono omio an atedo woda ote camo oko, cite i kare ame akobbi dako wadwa ni miwa wode ocam, en gire te kano wode oko.” Kare ame abaka doŋ otyeko winyo kop a dako-nono, en oyeyeco boŋŋi mere i kome kun en tye i wi cel malo, ame jo luŋ tye anene. Jo te neno boŋo me kwero cola ame onwoŋo oruko i te boŋo mere. En te redo ni, “Myero Obaŋa neka gira oko, ka ce tin piny oyuto ame mom ru oŋolo ŋut Erica wot a Capat.” En te cwayo kwena me wot kelo Erica. I kare-nono onwoŋo Erica tye obedo i ode, kun odoŋe mogo ame olime daŋ tye kuno. I kare ame okwena abaka ocwalo mom ru otuno baŋgi, Erica okobbi odoŋe ni, “Anek jo ca ocwalo dano me bino neka. Ka en otuno kan, ceg wunu doggola oko atek, kur iye wunu en donyo i ot. Abaka daŋ te bino i ŋeye.” I kare ame en pwod tye akop, abaka te tuno oko baŋgi, te penye ni, “Ayela man oya i baŋ Rwot! Piŋo pwod omedde kuro Rwot nakanaka?” Erica te gamo ni, “Koŋ doŋ iwiny kop a Rwot, ame en okobo ni, ‘Diki i kodi caa-ni, doggola cuk me Camaria obino cato iye moko kwon apwottere cekel acel i dita acel, kede cayiri dita aryo pi cekel acel.’ ” Adwoŋ ame loo cirikale ame onwoŋo awot karacel abaka, te kobbi Erica ni, “Mannono gire mom romo timere, kadi bed Rwot ikome yab dirica me polo te miyo cam corre i malo bala kot.” Erica te gamo ni, “Yin ibino neno ka timere, cite mom ibino bilo en cammono.” I kare-nono onwoŋo jo aŋwen ame two too me dobo tye obedo i doggola me boma oko; gin te bedo penyere kengi kengi ni, “Piŋo kara wan omedde bedo kan tuno naka waŋ ame wan oto? Pien kadi kono okob ni odonyo i boma, kec daŋ tye kuno, obino daŋ to oko; ka omedde bedo kan daŋ oto oko. Doŋ pi mannono, wan myero owot wunu i gony a jo Curia; ka gin mom bino nekowa, wan obino kwo, aco ka gin onekowa, kopporo pe.” Gin te cako ya me wot i gony a jo Curia otyeno ka aŋa abeo-nu, cite i kare ame gin otuno kuno, mom ote nwoŋo ŋattoro. Pien Rwot onwoŋo omio jo Curia owinyo dwon ginnoro ame ŋur calo gadigadi me lweny apipim, kede me aguragura daŋ apipim, kede dok me a lwak mony adwoŋ atata, omio gin te bedo kop kengi kengi ni, “Abaka me Icrael doŋ owilo mony a jo Kitti kede me a jo Miciri me bino lweny i komwa.” Mannono omio jo Curia otwarre i ŋwec otyeno ka ŋa abeo-nu, pi laro kwogi, kun oweko kemagi, aguraguragi kede kanegi, dok oweko gonygi ata. Kare ame odobo aŋwennono otuno i ŋet gony, gin odonyo i kema acel, ote camo cem iye, ote daŋ matte eka te jobo ryal kede jabu kede boŋŋi mogo, ote wot kano oko teŋe; ote dok dwogo donyo i kema okene, ote daŋ tino jami a tye iye wot kano oko. Kare ame gin openyere kengi kengi, gin okobo ni, “Gin ame otimo-ni mom ber, wan doŋ otyeko roto amut aber, pe ber wan me liŋ i kop man tuno naka odiko kun mom ru otito koppere, ka man otimere, obino keto can i komwa. Myero wan oya aman owoto oko, owot otit kop man baŋ jo ame tye i paco abaka.” Gin te ya oko i gony a jo Curia, ote wot i bomagi ote wot lwoŋo odoŋe ame kuro dogcel, ote kobbigi ni, “Wan owoto i gony a jo Curia, mom oneno ŋattoro kuno, mom daŋ owinyo dwon dano moro; onwoŋo aguragura kede kane tye apipim ame otweo oko, kema daŋ oweko ata kun mom okwanyo ginnoro iye.” Ogwok dogcel te redo atek kun okobo koppono, omio ote tito koppere baŋ jo ame tye i paco abaka. Abaka te ya malo oko dyeworrono, te kobbi omiro mere ni, “Wek akobbiwu kite ame jo Curia oyikere me lweny kede i komwa. Gin ŋeo aber ni kec oridowa meicel, man omio gin oweko gonygi, ote wot pono gigi teŋe i dye bar. Gin tye atamo ni wan oya oko i boma, gin ote bino makowa akwo, ote mayo bomawa oko.” Amiro moro acel te kobbe ni, “Koŋ icwal jo mogo kede aguragura abic ame odoŋ me wek gin wot nen gin ame otimere-nono; pien jowa ame tye kan-ni doŋ otye ame calli jo ame oto oko, orom aroma i lwak jo Icrael apol atata ame doŋ oto; doŋ pi mannono jowa koŋ wot nen.” Gin te yero jo mogo, abaka te cwalogi wot kun owoto i gadigadi aryo, ame ocikogi me wot neno gin ame otimere i gony a jo Curia. Jo-nono te wot naka i Jordan, ento gin onwoŋo lwak jami apipim ame jo Curia obobolo i yo, pi laro kwogi; gin oboloboŋŋi karacel kede jami ote riŋo gigi oko. Gin odwogo baŋ abaka ote bino titte. Jo te ciro wot i gony a jo Curia, ote wot yako jami iye. Kite ame en Rwot rik onwoŋo okobo kede, moko kwon apwottere poŋ dita acel ote cako cato pi cekel acel kede cayiri poŋ dita aryo ote daŋ cako cato pi cekel acel. I kare-nono onwoŋo abaka me Icrael oketo adwoŋ ame loo ocirikale ame woto karacel kede me gwoko dogcel me boma. Jo rik te nyonyono en i tyengi i dogcel, naka en oto, kite ame Erica dano Obaŋa rik okobo kede baŋ abaka. Pien Erica dano Obaŋa rik okobo baŋ abaka ni, “Dita aryo me cayiri obino wilo cekel acel kede dita acel me moko kwon apwottere obino wilo daŋ cekel acel, diki i kodi caa-ni i dogcel a jo Camaria”, adwoŋ cirikale rik te gamo dog Erica dano Obaŋa ni, “Mannono gire mom romo timere kadi bed Rwot ikome yab waŋ dirica me polo te miyo cam corre i malo bala kot.” Ento Erica rik te gamo ni, “Yin ibino neno anena, cite mom ibino bilo cammono.” Mannono en gin ame otimere ikokome, jo onyonyono en i tyengi i dogcel, en te to oko. I kare-nono Erica onwoŋo okobo baŋ dako ame rik ecero wode ni myero en ya oko i paco karacel kede jo me ode wot bed kan ocele, pien Rwot bi no miyo kec poto i lobo-nono, ame te ri pi mwakki abiro twal. Dako-nono te winyo kop ame Erica dano Obaŋa onwoŋo okobbe, te ya karacel i jo me ode wot bedo i lobo a jo Piriciti pi mwakki abiro. Kare ame mwaka abiro doŋ otum oko, dako-nono te dwogo cen i lobo a jo Icrael, en te wot atir naka baŋ abaka me wot kwaye ni myero mie ode karacel kede lobo mere. En otuno onwoŋo abaka tye akop gin kede Gekaji ame obedo amiro Erica dano Obaŋa, kun abaka penye ni, “Koŋ ititta taŋo adoŋodoŋo luŋ ame Erica doŋ otyeko timo.” I kare ame Gekaji tye akobbi abaka kite ame Erica rik ocero kede dano oto, dako-nu te tuno oko i nyim abaka, kun nyuto koko mere pi ode kede lobo mere. Gekaji te kobbi abaka ni, “Adwoŋŋa, man en dako karacel kede wode ame Erica rik ocero.” Kare ame abaka openyo dako-nono, en omoko gin ame Gekaji obedo titte, omio abaka te lwoŋo dano acel i akina odoŋe mere, te kobbe ni, “Wot idwok jami a dako-nu luŋ baŋe, kun icule pi cam ame obedo cek i poto mere luŋ karacel kede cam ame aman tye ame oya i potti mere, cakere i kare ame en oya kede i lobo mere tuno naka tin.” Erica rik te wot i Damaciko kare ame Ben-adad, abaka me Curia onwoŋo two. Kare ame okobbi abaka ni Erica dano Obaŋa onwoŋo tye kuno, abaka te kobbi Kajael ni, “Kwany mottoro iwot kede, me iwot ijol kede Erica dano Obaŋa, ikwae me en peny Rwot ka ce abino caŋ i two man.” Mannono te miyo Kajael cako wottere me wot jolo Erica, en otero kit mot apapat kede jami ocele abeco ame maro nen i Damaciko, kun inaga pyeraŋwen en ame oyeo yeccono. I kare ame Kajael orwatte gin Erica, okobo ni, “Amironi Ben-adad ame obedo abaka me Curia ocwala baŋi ni myero abin apenyi ka ce ebino caŋ i two mere.” Erica te gamo ni, “Rwot otyeko nyutta ni en gire bino to oko, ento yin myero iwot ikobbe ni ebino caŋ.” Erica te neno Kajael atek meicel, tuno waŋ ame lewic omako Kajael oko. Oyotoyot Erica dano Obaŋa te cako kok oko. Kajael te penyo ni, “Adwoŋŋa kara dok ikok piŋo?” Erica te gamo ni, “Pien aŋeo kite ame ibino wuno kede jo Icrael; ibino waŋo celgi ame ogero atek oko kede mac, ibino neko awobe atino oko luŋ i pala me romo, kun irweo itino luŋ ame okere, dok daŋ ibino ryeko yi mongi ame yac oko.” Kajael te gamo ni, “An amironi ame arom aroma i gwok ata-ni, atwero timo tim adwoŋ rom mannono i yore aŋo?” Erica te gamo ni, “Rwot otyeko nyutta ni yin en ame ibino bedo abaka me Curia.” En te ya oko ibaŋ Erica te dok cen baŋ abaka Ben-adad, abaka te penye ni, “Erica okobbi kop aŋo?” En te gamo ni, “En okobba ni yin ibino caŋ gire.” Orwo mere ocele Kajael te kwanyo olangit, te luto i pii te buro wi abaka tuno ka oto. En te leyo kakare acalo abaka me Curia. I mwaka me abic me loc a Joram wot Akab acalo abaka me Icrael, en ame Jekoram wot a Yekocafati abaka me Juda ocako iye loc, kun mwaka me dittere doŋ oromo pyeradek wie aryo; en te bedo loc i Jerucalem pi mwakki aboro. Dako mere rik obedo nyaka Akab, mannono omio en te bedo timo giname nen arac i nyim Rwot kite ame obakki me Icrael obedo timo, kun lubo gin ame jo me ot Akab obedo timo. Ento Rwot mom te mito tyeko jo Juda ducu, pi cikere ame en rik ocikere kede baŋ amiro mere Daudi ni ebino miyo ikwae en ame bedo i kom me loc nakanaka. I kare me loc a Jekoram en ame jo Edom ojem kede i kom loc me Juda, eka ote keto abakagi kengi. Mannono rik te miyo Jekoram ya wot i Jair, kun woto karacel kede gadigadi lwennyere luŋ, eka mony a jo Edom te wot gure iye dyere. Dyewor, en karacel kede odoŋe ame onwoŋo loo gadigadi me lwennyere te lweny i kom jo Edom ote nwoŋo gigi yo me put riŋo oko, ento dano acel te riŋo dok i paco mere. Cakere i kare-nono tuno kede tin jo Edom doŋ te bedo loye kengi kun ojem ajema i loc i Juda. I kare acellono, en ame boma me Libna daŋ ojem kede iye. Kop ocele luŋ ame odoŋŋere i kom Jekoram kede gin ame en otio a mom ocoo kan, otyeko coyo luŋ i buk me Tekwaro ame tito kop i kom oloc me Juda. Jekoram oto te wot weo karacel i kwari mere, ote yiko kome karacel i kwari mere i paco a Daudi. Wode Akajia en ame te leyo kakare acalo abaka. I mwaka me apar wie aryo me loc a Joram wot Akab, abaka me Icrael, en ame Akajia wot a Jekoram odoko kede abaka me Juda, kun mwaka me dittere doŋ oromo pyeraryo wie aryo; en te bedo loc i Jerucalem pi mwaka acel. Nyiŋ tottere rik onwoŋo Atalia, ame rik obedo akwar Omri abaka me Icrael. Kit acalo wat rik onwoŋo tye i akina Akajia kede abaka Akab, omio en daŋ obalo baŋ Rwot kun lubo kite a jo me ot Akab. Abaka Akajia rik te wot gin kede Joram abaka me Icrael me wot lweny i kom Kajael abaka me Curia. Monygi rik te rwatte i Ramot-gilead, kan ame jo Curia te waŋo iye Joram. Joram te dwogo cen i boma me Jejreel me wot twoye kuno, Akajia wot a Jekoram abaka me Juda rik te wot limo Joram wot Akab i Jejreel. I kare-nono Erica adwarpiny rik te lwoŋo ŋat acel i akina odwarpiny, te kobo ni, “Yikere, itwe pyeri, ikwany adomo moo imak i ciŋi me iwot naka i Ramot-gilead. Ka ituno kuno, yeny Yeko wot a Yekocafati, ame obedo wot a Ninci. Kwany oko i akina owote mere, ite tere iyi icika me imun ame tye tyelo, kwany cupa moo ite oonyo i wie kun ikobo ni, ‘Rwot okobo ni, “An doŋ ayeri me bedo abaka ame loo jo Icrael.” ’ Yab doŋ doggola ite ru ya oko i kuno oyotoyot; kur ibed kuno.” Awobi ame obedo adwarpinnyono te wot i Ramot-gilead. I kare ame en otuno kuno, en onwoŋo odoŋe ame loo mony ocokere karacel kuno i laro kop. En te kobo ni, “Adwoŋ, atye kede kop ame akelo baŋi.” Yeko te gamo ni, “Ŋa i akinawa-ni ame yin ikop kede?” Adwarpiny te gamo ni, “Abino baŋi, adwoŋ.” Gin aryo luŋ ote ya wot i ot; awobi-nu te wot onyo moo i wie, kun kobo ni, “Rwot Obaŋa me Icrael okobo ni, ‘An doŋ ayeri me bedo abaka ame loo lwak a Rwot, me ilo jo Icrael.’ Yin en ame ibino neko jo me ot adwoŋŋi Akab, me wek acul kwor i kom Jejebel pi remo odwarpiny ame obedo omirona kede remo omirona ocele luŋ ame en oonyo. Pien jo me ot Akab bino to oko luŋ; abino neko co oko luŋ i baŋ Akab, opii karacel kede anywalli ame tye i Icrael. Abino miyo ot Akab bedo calo ot a Jeroboam ame obedo wot a Nebat, dok abino miyo bedo acalo ot a Baaca wot Akija. Mom obino yiko kom Jejebel, ento gwogi en ame bino mwodo kome i lobo ame tye i ŋet Jejreel.” En te yabo doggola oko. Kare ame Yeko odok baŋ odoŋe ame loo mony abaka mere gin open ye ni “Gin aŋo kara ame onwoŋo okelo apoa-nono baŋi?” En te gamo ni, “Wun iŋeo wunu lo-nono kede kop ame en maro kobo.” Dok omedo penyo ni, “Wan giwa mom oŋeo; yin myero ikobbiwa gin ame en okobo!” En te kobbigi ni, “Dano-nono okobba ni Rwot doŋ oyera me bedo abaka ame loo jo Icrael.” Oyotoyot ŋat acel acel i akina owote mere te kwanyo boŋo mere peto piny i wi citep me donyo i ot malo me wek Yeko cuŋ iye, gin luŋ ote cako kuto apelgi kun oredo ni, “Yeko doŋ odoko abaka.” Mannono te miyo Yeko wot a Yekocafati ame obedo wot a Nimci cako yiko kop i muŋ i kom abaka Joram, onwoŋo Joram karacel kede jo Icrael ducu rik ogwoko Ramot-gilead i kare ame Kajael abaka me Curia ocobo mony i boma-nono, ento onwoŋo abaka gire pwod odok cen i Jejreel, kan ame rik en owoto me wot twoye iye i kare ame rik onwoŋo owane i lweny i Ramot-gilead. Omio Yeko te kobbi owote mere ni, “Ka ce wun itye wunu tutuŋ baŋa myero inen wunu Ramot-gilead aber me wek dano moro iye kur katto oko, me wot tero kop baŋ jo i Jejreel.” Yeko te cako yito i wi gadigadi mere me lweny, te wot i Jejreel. Pien Joram onwoŋo rik pwod tye a twoye kuno dok Akajia abaka me Juda daŋ rik onwoŋo owoto lime kuno. I kare-nono onwoŋo akurpiny me Jejreel tye malo i kabedo mere me kuro piny, en te neno Yeko karacel kede monnyere kun bino, te kobo ni, “Atye ka neno jo moro kun tye ariŋo kan.” Joram te gamo ni, “Cwal ŋattoro me riŋ aguragura baŋgi me wot niaŋ ka ce gin okwor onyo pe.” Dano acel te yito i wi aguragura te riŋo kede baŋ Yeko, te penye ni, “Abaka mito ŋeyo ka ce yin ibino i kuc.” Yeko te gamo ni, “Pino kara iyelle me penyo pi kuc? Yin lokere iluba keken.” Akur piny ame onwoŋo tye malo te dwoko kop baŋ abaka kun kobo ni, “Akwena otyeko tuno ento mom gire tye adwogo cen.” Dok ote cwayo ŋat ocele ŋwec aguragura baŋgi kuno. I kare ame en otuno baŋgi openyogi ni, “Abaka mito ŋeyo ka ce yin ibino kede kuc.” Yeko te gamo ni, “Piŋo kara iyelle penyo pi kuc? Yin lokere iluba keken.” Akur piny ame onwoŋo tye malo te dwoko kop baŋ abaka kun kobo ni, “Akwena otyeko tuno kuno ento mom gire tye adwogo cen. Cite lo a ŋwec i gadigadi-naca calo Yeko wot a Nimci; pien tye aŋwec atek calo ŋat ame opo.” Joram te kobo ni, “Yikka wunu gadigadina.” Rik daŋ ote yiko gadigadi mere eka en Joram abaka me Icrael kede Akajia abaka me Juda ote cako wotgi, kun ŋat acel acel tye i gadigadi mere, kun owoto me wot rwatte kede Yeko. Gin te rwatte i Yeko i poto a Nabot ame obedo dano me Jejreel. Kare ame Joram oneno Yeko, openye ni, “Kuc tye i binoni-nie?” En te gamo ni, “Kuc dok twero bedo tye i yore aŋo, kun kono totti Jejebel tye ka timo tim me jojok atek meicel dok woro daŋ obaŋe mogo ocele?” Joram te kobo baŋ Akajia ni, “Tim me erupe dok oerre be oko.” En okobo man kun tye ka wiro gadigadi mere me ŋwec oko. Yeko te wayo atero mere i teko mere luŋ te celo kede Joram i ŋee, omio ote cobe pello naka i etao mere. Joram te rette piny i wi gadigadi mere te to oko. Yeko te kobo baŋ Bidkar, ame obedo ŋat a rik konye ni, “Kwany kome me ibol oko i poto a Nabot, ame obedo dano me Jejreel. Po pi kop ame rik Rwot okobo i kome i kare ame an karacel kede yin otye ka ŋwec aguragurawa, kun oryemo kede yo Akab ame obedo papa abaka Joram, en rik okobo kop man i kom Akab ni, ‘Ateteni kite a calo aworo aneno kede remo a Nabot karacel kede remo awobe mere, mannono omio acikere ni abino culo kwor i komi i poto man.’ Man kop a Rwot. Doŋ myero itiŋ kom Joram ibol oko i poto kan kun ilubo kop ame Rwot rik okobo-nono.” I kare ame Akajia abaka me Juda oneno, en ocako ŋwec oko kun dok i yo ame woto i boma me Betagan. Yeko oryemo yore kun kobo ni, “Neke wunu oko.” Jo mere te cobe oko kun en tye aŋwec i gadigadi mere i tur ame woto i Gur ame tye i ŋet Ibleam. Cite en te kanyakino i ŋwec naka te tuno i boma me Megido, kan ame en te to iye. Omiro mere te tiŋo kome i gadigadi dwoko i Jerucalem, ote wot yike i lyellere karacel i kwaro mere i paco a Daudi. Akajia rik ocako bedo abaka me Juda i mwaka me apar wie acel me loc a Joram wot Akab. Yeko otuno i Jejreel, Jejebel te winyo gin ame otimere, en te wiro yat acol i ŋet waŋe tuŋŋi kede tuŋŋi, te kedo yer wie, te cuŋ bedo neno yo, kun roo waŋe i dirica. Kare ame Yeko donyo i dogcel, Jejebel openye ni, “Kuc tye i binoni-nono, yin Jimri, ame ineko rwotti-ni?” Yeko otiŋo waŋe malo oneno dirica te redo ni, “Ŋa ame tye tutuŋ baŋa?” Co aryo onyo adek ame oroo ame onwoŋo gwoke te royo waŋgi i dirica nene, eka Yeko te kobbigi ni, “Bol wunu dako-nono piny kan.” Jo-nono te bolo Jejebel piny oko, remo mere te kikira i kor apama kede i kom aguragura. Yeko te ŋwec i gadigadi mere beo kede i kome. Yeko te donyo i ot te wot cem iye, te daŋ matte iye kuno. En tekobo ni, “Kwany wunu kom dako ame oceno-ni oko, me iyik wunu, pien en obedo nyaka abaka.” Jo ame te wot kunu me wot yiko kome ote nwoŋo ka cogo wie keken, aboŋo riŋo moro iye, kede tyene ryoryo kede opuny ciŋe ryoryo. Kare ame gin odwogo baŋ Yeko ote titte kop man, en ogamo ni, “Mannono gire obedo kop a Rwot ame rik en omio amiro mere Elia dano me Ticibe okobo, kun kobo ni, ‘Gwoggi en ame bino mwodo kom Jejebel i lobo ame tye i ŋet Jejreel. Riŋo kome bino keketa atata calo woyo dyaŋ i poto ame tye i lobo ame tye i ŋet Jejreel ame ŋattoro mom dok romo niaŋ ni mannono obedo kom Jejebel.’ ” Awobe Akab rik onwoŋo tye pyerabiro ame bedo i boma me Camaria. Yeko rik te coyo waraga, cwayo i Camaria baŋ odoŋe ame loo kuno kede baŋ odoŋe ame onwoŋo gwoko awobe Akab, kun kobo ni, “Wun en ame ibedo wunu jo ame gwoko awobe abaka, dok daŋ itye wunu kede gadigadi lweny, kede aguragura, kede jami ocele me lweny, kun bomawu daŋ gire ocelo oko atek. Doŋ ba, ka ce waraga man otuno baŋwu, myero iru yero wunu awobi moro acel aber i kom awobe abaka ame romo loc, me ikete wunu bed abaka le ka pappere wun doŋ ite bedo lweny wunu pire kede pi jo me ot Akab.” Odoŋe me Camaria rik te bedo kede lworo meicel, kun okobo ni, “Kara wan obino cuŋ i nyim Yeko i yore aŋo kun loye rik oloo obakki aryo ca oko?” Man omio odoŋe ame loo paco abaka kede odoŋe ame loo boma, kede jo adoŋo me bomanono, kede odoŋe ame rik gwoko awobe abaka ote cwayo kop baŋ Yeko kun okobo ni, “Wan gire obedo omironi, daŋ otyeko yikere me timo ginnoro luŋ ame yin ibino kobo. Cite wan mom obino keto abaka moro, yin gire myero itim gin ame ineno ni ber baŋi.” Yeko rik dok te coyo waraga ocele, kun kobo ni, “Ka ce wun itye wunu tutuŋ baŋa, dok daŋ iyikere wunu me tiyo gin ame abino kobo, myero diki i kodi caa-ni ikel wunu awobe adwoŋwu i Jejreel baŋa kan.” Awobe abaka ame romo pyerabiro rik onwoŋo bedo baŋ jo mogo me boma-nono, kun gin en ame gwokogi. Kare ame waraga a Yeko otuno baŋgi, odoŋe me Camaria te mako awobe abaka neko oko luŋ, gin luŋ jo pyerabiro, ote coko wigi keto i dita, ote tero naka i Jejreel baŋ Yeko. Kare ame otitti Yeko ni doŋ otyeko kelo wi awobe abaka luŋ, en okobo ni myero wot can wigi i yore aryo i dog cel me boma ame jo donyo kede i boma, ote weko bedo kuno tuno naka odiko. I kare ame en owoto kuno odiko, en okobo baŋ jo ame onwoŋo rik tye kuno ni, “Wun gire mom itye wunu i balloro i kom to abaka. An en ame ayiko kop me neko abaka, daŋ doŋ atyeko neke oko. Cite ŋa ame oneko jo man luŋ? Myero iŋe wunu ateteni ni kop ame Rwot oko bo mom ke nono. Kop luŋ ame rik Rwot okobo i kom jo me ot abaka Akab bino cobere luŋ; pien Rwot otyeko tiyo gin ame rik amiro mere Elia okobo.” Yeko dok te medde neko jo me ot Akab luŋ ame odoŋ ame onwoŋo bedo i Jejreel karacel kede omiro mere adito kede owote mere kede olamdoggere; onekogi luŋ ame moro acel i akinagi mom odoŋ. Yeko te ya i Jejerel wot i Camaria. I kare ame onwoŋo en tye iyo, i kabedo moro ame okwat cokere iye i Beteked, en te rwatte kede jo mogo ame obedo jo me doggola Akajia, abaka me Juda; en te penyogi ni, “Wun ibedo wunu jo mene?” Gin te gamo ni, “Wan obedo jo me doggola Akajia, owot i Jejreel me wot moto itino a Jejebel kede itino abaka ocele mege.” Yeko te kobbi jo mere ni, “Mak wunugi akwo.” Gin te makogi, ote nekogi i ŋet burroro ame onwoŋo tye kuno, i Bet-eked. Gin luŋ onwoŋo romo jo pyeraŋwen wie aryo, onekogi luŋ aboŋo weko moro i akinagi bwot. Yeko te ya i kuno te wot rwatte i Yekonadab wot a Rekab ame onwoŋo tye abino me bino rwatte kede. Yeko omote, te penye ni, “Tammi rom aroma i mega? Ibino ye konya?” Yekonadab te gamo ni, “Abino timo amannono.” Yeko te gamo ni, “Ka ce ibino timo amannono cwa ciŋi baŋa.” Yekonadab te cwayo ciŋe, Yeko te tiŋe i wi gadigadi mere, kun kobo ni, “Bye owot karacel, me inen i waŋi kite ame akemo maka kede pi Rwot.” Gin te wot karacel naka i Camaria. Kare ame gin otuno kuno. Yeko te neko wati Akab luŋ, ame rik odoŋ, kun mom weko moro i akinagi bwot, kite ame rik Rwot okobo baŋ Elia. Yeko rik te lwoŋo jo me Camaria luŋ karacel, te kobbigi ni, “Abaka Akab rik onwoŋo woro Baal wok, an abino woro meicel ame kate oko. Pi mannono myero ilwoŋ wunu odwarpiny a Baal luŋ, kede jo ame woro Baal luŋ karacel kede olamdoggere ducu, ikel wunugi baŋa kan; gin luŋ myero obed tye, ŋattoro i akinagi kur rweny, pien an atye i mot a pire tek meicel ame amito yalo i Baal. Dano ame bino bedo pe i akinagi, mom bino kwo.” Man onwoŋo ryeko ame Yeko otio kede me wek enek jo ame woro Baal ducu, Yeko dok te kobo ni, “Lwoŋ wunu jo pi kwero nino adit me woro Baal.” Rik daŋ ote lwoŋo cokerenono, Yeko rik ocwao kwena oromo yi Icrael luŋ, jo ame woro Baal luŋ te bino ame ŋattoro mom odoŋ kadi acel. Jo doŋ te cako donyo i ot me woro Baal, ame ot me woro Baal te poŋ ibim. Yeko te kobbi odoŋe ame onwoŋo loo boŋŋi me woro ni myero ter boŋŋi wot mi baŋ jo. Ote daŋ kelligi boŋŋi me aruka, Yeko te donyo i ot me woro Baal gin kede Yekonadab wot a Rekab, eka te kobbi jo ame woro Baal ni, “Koŋ iŋi i akinawu, me inen wunu ka ŋattoro ame woro Rwot mom tye i akinawu kono ka jo ame woro Baal keken.” En doŋ te donyo me wot yalo Baal i mot aŋola kede mot awaŋa. En onwoŋo okano jo ame romo pyeraboro oko i ŋe ot me woro Baal kun ocikogi ni, “ŋat ame bino weko dano moro acel i akina jo ame woro Baal bwot, kwo mere en ame bino leyo kaka me a dano-nono.” I kare ame Yeko doŋ otyeko yalo Baal oko i mot awaŋa, en okobbi jo ame gwoke kede odoŋe a loogi ni, “Dony wunu i ot me inekgi wunu oko ducu; ŋattoro i akinagi myero kur bwot.” Gin te donyo i ot ote woto palegi me romo ote nekogi kede oko ducu; ote wayo komgi cwalo oko. Gin dok te kato i cika i tyelo, ote wot kelo kiddi me woro Baal ame onwoŋo tye iye kuno, ote waŋo oko i mac. Ote mumuko kidi me woro Baal kede ot a Baal, ote loko kannono doko ot coron, ame tye kittono naka atot tin. Yeko rik te jwayo woro Baal i lobo a jo Icrael kittono. Ento Yeko mom te weko lubo kit a Jeroboam wot a Nebat, ame rik omio jo Icrael otimo bal, ame en bal me woro otino twoni ame otio i jabu ame rik tye i Betel kede i Dan. Rwot te kobbi Yeko ni, “Pien yin ityeko timo gin a tye atira nyima kun itimo jo me ot Akab i ginnoroluŋ ame onwoŋo an amito, mannono omio ikwai bino bedo i wi kom me loc iyi Icrael naka i kom lwagi me aŋwennere.” Cite Yeko rik mom te bedo gwokere i lubo cik a Rwot Obaŋa me Icrael i cunye ducu; en mom oweko lubo bal a Jeroboam, ame omio jo Icrael otimo bal. I kare-nono Rwot te cako kwanyo lobo mogo oko i kom lobo me Icrael. Abaka Kajael me Curia olwenyo i jo Icrael te loyo lobo me Icrael luŋ, ame rik onwoŋo tye tutuŋ kide me Jordan kun mao iye lobo me Gilead ducu kede lobo a jo Gad, kede me a jo Reuben karacel kede me a jo Manace, cakere i Aroer ame tye i ŋet kulo Amon, omao lobo Gilead kede Bacan luŋ. Kop ocele luŋ i kom Yeko ame mom ocoo kan, ginnoro ducu ame en otio kede teko mere ducu, gin luŋ tye ocoo i buk me Tekwaro, ame tito kop i kom oloc me Icrael. Yeko rik doŋ te to te wot weo karacel i kwari mere, ote yiko kome i Camaria. Wode Yekoyakaji en ame te leyo kakare. Yeko oloo jo Icrael i Camaria mwakki pyeraryo wie aboro. I kare ame Atalia tota abaka Akajia oŋeo ni wode doŋ oto oko, en te neko jo luŋ me ot abaka. Ento wot Akajia ame olwoŋo ni Yowaci keken en ame te bwot. Rik onwoŋo myero neke oko, ento Yekoceba nyaka abaka Joram ame obedo amin Akajia, te kwale oko i akina awobe abaka ame rik onwoŋo otye aneko, te wot kane oko karacel kede apidi mere iyi icika moro me buto. Yekoceba okane kittono, omio Atalia mom onwoŋe, en te bwot a mom oneke. Yekoceba te bedo gwoko Yowaci pi mwakki kanyape kun kano i ot a Rwot, ento i kare-nono Atalia en ame onwoŋo tye acalo abaka a dako. Cite i mwaka me abiro mere Yekoyadi alamdog, te cwayo kwena baŋ odoŋe ame onwoŋo loo mony, ame rik telo jo mia mia me a jo Kari kede okur piny, te miyo terogi i ot a Rwot kan ame en te cikere iye kedgi, kun miogi okwoŋo akwoŋa i ot a Rwot kun, i kare ame en onyuttigi wot abaka. En ocikogi ni, “Gin ame ibino timo wunu ene: Ka kare me ticwu oromo i nino me cabit, acel me adek i komwu bino kuro dog ot abaka; acel me adek i komwu bino kuro doggola me Cur, eka acel me adek i komwu ame odoŋ bino kuro dogcel karacel okur piny ocele. Dul aryo ame bino i dog ticgi i nino me cabit, gin bino kuro ot a Rwot, kun gwoko abaka. Gin bino guro abaka Yowaci dyere kun ŋat acel acel omako jami me lwennyere i ciŋe. Ka ce dano moro obino baŋgi te temo beo i akinagi, dano-nono myero nek oko. Gin bino bedo baŋ abaka i kabedo ducu ame en bino wot iye.” Odoŋe ame telo mony te bino lubo ginnoro luŋ ame Yekoyadi alamdog ocikogi iye; adwoŋ me mony acel acel okelo jo mere baŋe, jo ame bino giko ticgi i ceŋ cabit, kede jo ame bino cako ticgi i nino me cabit. Gin luŋ okelogi baŋ Yekoyadi alamdog. Alamdog te miyo odoŋe ame loo mony toŋi, kede kwode ame rik onwoŋo obedo me abaka Daudi kun ogwoko i ot a Rwot. En te keto okurpiny, omiogi ocuŋ kun ŋat acel acel omako jami lwennyere i ciŋe, kun oguro ot dyere cakere ituŋ anyarolum tuno kede naka tuŋ anyarodi, ame oguro keno me lam kede ot daŋ. Yekoyadi doŋ te cako kelo Yowaci wot abaka, te keto tok me kwogo i wie, ote miye daŋ buk me cik ame mako kop i kom loc acalo abaka. Rik doŋ ote oonyo moo i wie me kwere bedo abaka, ote tuco doŋ kannaler ni en obedo abaka. Jo te redo kun obapo ciŋgi kun okobo ni, “Kom abaka bed ayot nakanaka!” Kare ame Atalia owinyo okur piny karacel kede lwak tye ka wo, en owoto baŋgi kuno i ot a Rwot. Kare ame en obolo waŋe kuno, oneno abaka tye ocuŋ i ŋet pagi, kite ame abaka kare luŋ cuŋ kede, kun odoŋe ame telo mony, kede okut apel oguro abaka. Lwak luŋ onwoŋo tye awo i yomcuny kun okuto apel. Atalia te cako yeco boŋo oko i kome, te mwoco daŋ koko oko kun kobo ni, “Tim me erupe! Tim me erupe!” Yekoyadi alamdog te kobbi odoŋe ame telo mony ni, “Ter wunu dako-nu oko, be wunu kede i akina cirikale, me iwot ineke wunu oko; nek wunu jo ame mito laro kwo mere.” Pien olamdog onwoŋo mom mito ni neke i ot a Rwot. Jo te cako mako dako-nono, ote tere oko kun obeo kede i doggola ame aguragura donyo iye, ote tuno kede naka i ot abaka ote wot neke oko kuno. Yekoyadi te miyo abaka karacel kede lwak cikere i Rwot, kun omoko ni gin obino bedo lwak a Rwot. En omio lwak ocikere daŋ abaka. Lwak luŋ te ya oko i kannono ote ciro wot i ot a Baal, ote wot mumuko, reto oko piny; ote ŋiŋido daŋ keno lam luŋ karacel kede cal jogi ame onwoŋo tye kuno, oŋiŋido luŋ atitino, ote neko daŋ Matan ame rik obedo alamdog a Baal; oneke i nyim keno lam. Yekoyadi te doŋ keto jo me gwoko ot a Rwot. En karacel kede odoŋe ame loo mony, kede jo ame gwoko abaka karacel kede okurpiny; gin luŋ te cako lwoko abaka me tero i paco mere; ya i ot a Rwot kun odorre obeo i doggola okurpiny, ote wot naka i ot abaka. Abaka te wot bedo piny i wi kommere me loc, Mannono omio jo me lobonono luŋ bedo i yomcuny, boma daŋ te kwe mot kare ame doŋ oneko Atalia oko i pala lweny i ot abaka. Yowaci odoko abaka kun mwaka me dittere oromo abiro. I mwaka me abiro me loc a Yeko abaka me Icrael, en ame Yowaci ocako bedo iye abaka me Juda, eka te bedo i loc i Jerucalem pi mwakki pyeraŋwen. Nyiŋ tottere rik onwoŋo Jibia, ame turgi tye Beerceba. I kare me kwo mere luŋ en obedo tiyo gin ame yomoro cuny Rwot, pien Yekoyadi alamdog obedo pwonye. Kadi bed amannono ka woro jogi ame onwoŋo tye i wi kidi onwoŋo mom omumuko, lwak daŋ rik pwod medde yalo jogi kuno daŋ owaŋo odok akur baŋ jogi. Abaka Yowaci te lwoŋo olamdog te kobbigi ni, “Lim luŋ acil ame okelo i ot a Rwot, ame en lim ame ŋat acel acel mio ame onwoŋo oŋolle, lim ame gin okelo kite ame oŋolligi-nono, medo kede lim ame ŋat acel acel mio baŋ Rwot kite ame en mito, alamdog acel acel bino gwoko lim ame en egamo i baŋ jo i kare me ticcere, limmono bino bedo me yiko ot a Rwot, kite ame omito kede.” Cite mwaka me pyeraryo wie adek me loc abaka Yowaci onwoŋo olamdog mom ru oyiko ot a Rwot. Mannono omio abaka olwoŋo Yekoyadi karacel kede olamdog ocele, te penyogi ni, “Piŋo kara pe itye wunu ka yiko ot a Rwot? Cakere aman, wun mom dok ibino gamo wunu lim i baŋ jo i kare me ticwu, lim ame aman tye baŋwu myero imi wunu me cako yiko ot a Rwot.” Olamdog daŋ doŋ te ye ni mom dok obino medde gamo lim i baŋ lwak, dok daŋ mom obino yiko ot a Rwot. Yekoyadi alamdog te kwanyo canduk, te tuco wie me bolo cente, eka te wot keto i ŋet keno lam i tuŋ kide i ŋet doggola me donyo; olamdog te bolo iye lim luŋ ame jo onwoŋo okelo i ot a Rwot. Ka ce lim doŋ odoko adwoŋ meicel i canduk, aran abaka kede alamdog bino te kwano lim ame tye iye, ote tweyo oko i yi cao. Kare ame gin doŋ otyeko ŋeyo wel limmono ducu, gin omio baŋ otic ame loo tic me ot a Rwot; gin doŋ te miyo baŋ opaa bao, kede ogedo ame tio tic i kom ot a Rwot, kede baŋ jo ame gedo i kidi kede baŋ opaa kidi, kun en ocele owilo i bao kede kiddi ame otio kede me yiko ot a Rwot kan oballe, kede culo pi jami okene ducu ame mitte. Limmono rik mom otio kede me tiyo ikopo me ryal, onyo me tiyo makac, becen, apel onyo kit jami ocele ame otio i ryal kede jabu, ame otio kedgi i ot a Rwot. Lim ame okelo i ot a Rwot tono luŋ rik otio kedgi me culo otic ame yiko ot a Rwot. Jo ame loo tic rik obedo jo ame genne i tic i lim ame rik omiogi, mannono omio mom rik dok obedo penyogi i kom lim. Lim ame oya i kom mot me walakino i roc kede me kwanyo bal, rik mom otero i ot a Rwot; mannono rik obedo lim ame omio baŋ olamdog. I kare-nono Kajael, abaka me Curia owoto olwenyo i kom boma me Gat, te daŋ loyo oko. En dok te moko tammere me wot lweny i Jerucalem. Yowaci abaka me Juda rik te kwanyo mot luŋ ame onwoŋo ojalo baŋ Rwot, mot ame kwari mere Yekocafati kede Jekoram kede Akajia rik onwoŋo ojalo baŋ Rwot, kun medo iye mege daŋ a rik ojalo baŋ Rwot, kede jabu adwoŋ ata ame en onwoŋo i ot kano lim ame rik tye i ot a Rwot kede i ot abaka te cwalogi luŋ baŋ Kajael, abaka me Curia. Mannono te miyo Kajael kwanyo monnyere oko, mom ote bino lweny i kom Jerucalem. Kop ocele luŋ i kom Yowaci ame mom ocoo kan, ginnoro luŋ ame en otio, gin luŋ tye ocoo i buk me Tekwaro ame tito kop i kom oloc me Juda. Omiro a Yowaci rik te jem i kome; gin oporo kop i muŋ, ote neke oko i ot ame rik tye i Milo, i ŋet yo ame woto i Cilla. Omiro mere ame oneke-nono obedo Jojakar wot a Cimeat kede Jekojabad wot a Comer. Rik ote yiko kome karacel i kwari mere i paco a Daudi Wode Amajia te leyo kakare. I mwaka me pyeraryo wie adek me loc a Yowaci wot Akajia abaka me Juda, en ame Yekoyakaji wot a Yeko ocako loyo kede jo Icrael kun bedo i Camaria, en te bedo loc pi mwakki apar wie abiro. En obedo timo gin ame nen arac i nyim Rwot, kun timo bal a rom aroma i me a Jeroboam wot a Nebat ame omio jo Icrael otimo bal; en obedo lubo kodi ballaca luŋ. Man omio akemo a Rwot otugere i kom jo Icrael, omio en te bedo miyo Kajael, abaka me Curia kede wode Ben-adad obedo loyogi kare i kare. Icennere Yekoyakaji te kwayo Rwot, Rwot daŋ te winyo kwaccere, pien onwoŋo oneno kite ame abaka me Curia tye awuno kede jo Icrael agwa meicel. Rwot te miyo atel okene baŋ jo Icrael ame te larogi i ciŋ jo Curia. Jo Icrael dok te medde bedo i kuc kite acon, Ento gin mom oweko lubo kit bal ame Jeroboam obedo timo, ame en rik omio jo Icrael otimo bal, gin daŋ obedo lubo kittono; cal jok a dako ame olwoŋo ni Acera daŋ onwoŋo pwod tye i Camaria. Yekoyakaji rik onwoŋo mom doŋ tye kede monnyoro kadi acel, kono ka wegi aguragura pyerabic keken kede gadigadi apar kede ocirikale wegi atyene tutumia apar, pien Rwot onwoŋo omio abaka me Curia onekogi, otyekogi luŋ, omio kom jo ame oto oradde piny calo kwoyo ame jo nyomo i tyengi. Kop ocele luŋ i kom Yekoyakaji ame mom ocoo kan ginnoro luŋ ame en otio, gin luŋ tye ocoo i buk me Tekwaro ame tito kop i kom oloc me Icrael. Yekoyakaji rik te to, wot weo karacel i kwari mere, ote yiko kome i Camaria. Wode Yowaci rik te leyo kakare. I mwaka me pyeradek wie abiro me loc a Yowaci abaka me Juda, en ame Yowaci wot a Yekoyakaji ocako loyo kede jo Icrael, kun bedo i Camaria; en obedo loc pi mwakki apar wie abicel. En daŋ obedo timo gin ame nen arac i nyim Rwot. En obedo timo bal ame rom aroma i me a Jeroboam wot a Nebat ame omio jo Icrael otimo bal; en obedo lubo kodi ballaca luŋ. Kop ocele luŋ i kom Yowaci ame mom ocoo kan ginnoro luŋ ame en otio, kede tek cunye ame en rik olwenyo kede i kom Amajia, abaka me Juda, gin luŋ tye ocoo i buk me Tekwaro ame tito kop i kom oloc me Icrael. Yowaci oto, te wot weo karacel i kwari mere, oyiko kome i Camaria karacel oloc ocele me Icrael. Wode Jeroboam te leyo kakare. Kare ame two onwoŋo ociro Erica, two ame daŋ te neke, Yowaci abaka me Icrael, owoto baŋe me wot lime. En te cako kok baŋe kuno, kun kobo ni, “Pappa doi! Pappa doi! Gadigadi lweny a jo Icrael kede wegi aguragura!” Erica te gamo ni, “Mak akud ateroni kede atero.” Yowaci te kwanyo akud atero kede atero mere. Erica te dok kobbi abaka me Icrael ni, “Aco doŋ tel tol ateroni”; en daŋ te wayo. Erica te cako keto doŋ ciŋe i wi ciŋ abaka, kun kobo ni, “Yab dirica ame tye tutuŋ kide; en daŋ te yabo.” Erica dok te kobo ni, “Ba doŋ atero;” eka te daŋ bayo. Dok te kobo ni, “Atero a Rwot me loc! Atero me loyo jo Curia! Pien ibino lweny i jo Curia i Apek tuno waŋ ame ityekogi oko iweŋ.” Erica te dok kobo ni, “Mak dok ateroni;” en te mako. Dok te kobbi abaka me Icrael ni, “Aco doŋ go koŋ i lobo;” en daŋ te goyo lobo tyen adek, te doŋ weko gik. Erica dano Obaŋa cunye te waŋ i kome, te kobbe ni, “Onwoŋo myero ibed goyo amannono tyen kany onyo tyen kanyape, ame onwoŋo doŋ twero miyo iloo jo Curia atwal; ento yin ilunyo goyo tyen adek keken, ibino daŋ loyo jo Curia tyen adek keken.” Erica te to oko, ote yiko kome i lyel. I kare-nono onwoŋo mony a jo Moab bino kare i kare, i kare me oro me cobo mony i kom jo Icrael. I kare moro ame onwoŋo gin tye ka yiko dano moro, mony a jo ame oyak te tuno oko, omio ote bolo kom dano ame onwoŋo oto-nono oko i lyel Erica. Oyot i kare ame kom dano-nono ogudo cogo Erica, dano-nono te ceroko, te ya cuŋ acuŋa. Abaka Kajael me Curia obedo wuno jo Icrael i kare me loc a Yekoyakaji nakanaka. Cite Rwot obedo nyuto berrere kede kica mere baŋgi. En obedo bedo tuŋ baŋgi, omio mom oye ni jwergi odoco, cite obedo konyogi, pi cikere mere ame rik en ocikere Ibraim kede Icaka kede Yakobo. Man omio wie mom owil i kom jo mere tuno naka tin. Kare ame Kajael abaka me Curia oto, wode Ben-adad te leyo kakare. I kare ame Yowaci abaka me Icrael obedo lweny i kom Ben-adad wot a Kajael, te loye tyen adek twal, en omio boma-mogo ame rik onwoŋo jo Curia omao i baŋ jo Icrael i kare me loc a pappere Yekoyakaji. I mwaka me aryo me loc a Yowaci wot a Yekoyakaji, abaka me Icrael en ame Amajia wot a Yowaci ocako bedo kede abaka me Juda, kun onwoŋo mwaka me dittere tye pyeraryo wie kany; en te bedo loc pi mwakki pyeraryo wie aboŋwen, kun bedo i Jerucalem. Tottere rik nyiŋe Yekoadin, ame turgi tye i Jerucalem. En obedo tiyo gin ame tye atira i nyim Rwot, cite mom obedo a rom aroma i kwaro mere Daudi; ento en obedo tiyo ginnoro luŋ ame pappere Yowaci rik oti mo. En mom omumuko ka woro jogi ame tye i wi kidi, lwak omedde yalo jogi, kun owaŋo odok akur i wi kiddi kan ame oworo iye jogi. I kare ame loccere doŋ omoko, en oneko omiro mere oko ame rik oneko pappere. Cite mom oneko itino a jo a rik oneko pappere, kite ame ocoo kede i buk a Muca, kan ame Rwot rik ociko iye ni, “Papa atin mom obino neko pi bal a wode, atin daŋ mom obino neko pi bal a pappere; ento ŋat acel acel obino neko pi ballere en ikome.” Amajia rik oneko ocirikale a mony a jo Edom ame romo tutumia apar i luŋ me Kado; en te mako boma me Cela i lwennyono, te cako nyiŋ bomanono ni Jokteel, ame pwod olwoŋo kede naka atot tin. Amajia dok te cwayo kwena baŋ Yowaci wot a Yekoyakaji ame obedo wot a Yeko, abaka me Icrael, kun kobbe ni, “Biye, me obino orwatte i lek, me otemere koŋ.” Cite abaka Yowaci te dwoko kop baŋ abaka Amajia, abaka me Juda ni, “Okuto moro ame onwoŋo tye i buŋ me Lebanon rik ocwalo kwena baŋ yat cedar me Lebanon, kun kobbe ni, ‘Mia nyari me anyommi woda.’ Lee moro me Lebanon te beo kuno nyono okuto oko piny. Aman omio yin Amajia, pien ityeko loyo jo Edom, yin doŋ iwakere meicel. Koŋ doŋ ibed i kwogoni-nono ba. Mannono mom doŋ rommi bedo kede paco? Piŋo kara itye ka roko jo nononono me kela can i komi kede i kom joni?” Cite Amajia te kwero winyo koppere-nono oko. Man omio Yowaci abaka me Icrael te ya karacel i jo mere, te wot rwatte gin Amajia i bar lweny me Bet-cemec ame tye i Juda. Ote loyo mony Amajia oko, ŋat acel acel te riŋo oko i paco mere. Yowaci abaka me Icrael te mako Amajia abaka me Juda wot a Yowaci, ame obedo wot a Akajia, i Bet-cemec, en te ya i kannono kato naka i Jerucalem, te wot muko cel me Jerucalem oko, ame borrere romo yadi mia aryo twal, cakere i dogcel me Epraim naka i dogcel ame olwoŋo ni Gul. En te yako jabu kede ryal luŋ ame en onwoŋo i ot a Rwot, karacel kede jami luŋ me ottace, kede en ame onwoŋo tye i ot kano lim i ot abaka, te tero luŋ i Camaria. En omako daŋ jo adoŋo mogo ame otwero lakoro, te tero oko. Kop ocele luŋ i kom Yowaci ame mom ocoo kan, ginnoro luŋ ame en otio, teko mere, kede kite ame en rik olwenyo kede i kom Amajia, abaka me Juda, gin luŋ tye ocoo i buk me Tekwaro ame tito kop i kom oloc me Icrael. Yowaci oto te wot weo karacel i kwari mere, ote yiko kome karacel oloc me Icrael i Camaria. Wode Jeroboam te leyo kakare. Kare ame Yowaci abaka me Icrael doŋ oto oko, Amajia abaka me Juda pwod omedde kwo pi mwakki ame romo apar wie abic twal. Kop i kom Amajia ame odoŋŋere a mom ocoo kan, gin luŋ tye ocoo i buk me Tekwaro ame tito kop i kom oloc me Juda. Jo mogo rik te cako poro kop i muŋ i kom Amajia, kun mito neke oko i Jerucalem, en te lwi, riŋo oko i boma me Lakic, cite okworrere te cwayo dano lubo yore kuno, ame te wot neke oko, Gin te tiŋo kome aguragura kelo bino yiko i Jerucalem karacel i kwari mere, i paco a Daudi. Jo me Juda luŋ te kwero wode Ajaria me bedo abaka kakare, kun mwaka me dittere onwoŋo romo apar wie abicel. I ŋe to a pappere, Ajaria ogero Elat, te dwoko i te loc a jo Juda. I mwaka me apar wie abic me loc Amajia wot a Yowaci abaka me Juda, en ame Jeroboam wot a Yowaci, abaka me Icrael, ocako loc iye, kun bedo i Camaria. En obedo loc pi mwakki a romo pyeraŋwen wie acel, kun bedo tiyo gin ame nen arac i nyim Rwot; en obedo lubo kit bal ame Jeroboam wot a Nebat obedo timo, ame omio jo Icrael otimo bal. En omao boma luŋ ame onwoŋo rik obedo me a jo Icrael con, omio waŋ lobo a jo Icrael te dok kite a rik tye kede con, kun cakere i Kamat naka i nam me Araba, kite ame rik Rwot Obaŋa me Icrael onwoŋo okobo, kun mio amiro mere Yona wot a Amittai en akobo, adwarpiny ame paco mere rik tye i Gat-keper. Rwot onwoŋo oneno twon can apek ame jo Icrael onwoŋo tye kede; pien mom tye ŋattoro kadi acel ame odoŋ kuno ame twero konyogi, opii onyo dano me anywalli, Ento Rwot gire onwoŋo mom oyiko me jwero jo Icrael odoco i te polo piny, en omio te larogi kun tio i Jeroboam wot a Yowaci. Kop i kom Jeroboam odoŋŋere a mom ocoo kan, gin luŋ ame en otio kede teko mere, kite ame rik en olwenyo kede, kede kite ame odwoko kede Damaciko kede Kamat i lobo Icrael ame onwoŋo rik doŋ tye i ciŋ jo Juda, gin luŋ tye ocoo i buk me Tekwaro ame tito kop i kom oloc me Icrael. Jeroboam oto, te wot weo karacel i kwari mere. Wode Jekaria te leyo kakare. I mwaka me pyeraryo wie abiro me loc a Jeroboam abaka me Icrael en ame Ajaria wot Amajia, abaka me Juda ocako loc iye. En ocako loc kun mwaka me dittere romo apar wie abicel, en te bedo loc pi mwakki pyerabic wie aryo kun bedo i Jerucalem. Nyiŋ tottere Yekolia me Jerucalem. En obedo tiyo gin ame nen atira i nyim Rwot, kun lubo gin ame pappere Amajia obedo tiyo. Kadi bed amannono, ka woro jogi ame onwoŋo tye i wi kiddi malo mom omumuko; lwak pwod obedo medde yalo jogi kuno, kun daŋ owaŋo odok a ŋwece kur iye. Rwot te cako pwodo abaka, omio en te doko adobo tuno naka i kare me to mere, kun bedo i ode kene. Wode Yocam en ame rik te bedo loyo ode kun loo daŋ jo me lobo-nono. Kop i kom Ajaria ame odoŋŋere ame mom ocoo kan, kede ginnoro luŋ ame en otio, gin luŋ tye ocooo i buk me Tekwaro ame tito kop i kom oloc me Juda. Ajaria oto te wot weo karacel i kwari mere, oyiko kome karacel i kwari mere i pa co a Daudi. Wode Yocam en ame te leyo kakare. I mwaka me pyeradek wie aboro me loc Ajaria abaka me Juda en ame Jekaria wot a Jeroboam ocako loyo iye jo Icrael, en te bedo loc pi dwete abicel kun bedo i Camaria. En obedo tiyo gin ame nen arac i nyim Rwot, kite ame kwaro mere obedo tiyo. En mom oweko lubo kit bal a Jeroboam wot a Nebat obedo timo, ame omio jo Icrael obedo timo bal. Calum wot a Jabec te cako poro kop i kome i muŋ, eka te cobo i Ibleam, neko oko, en te doŋ leyo kakare. Kop i kom Jekaria odoŋŋere luŋ, gin luŋ tye ocoo i buk me Tekwaro ame tito kop i kom oloc me Icrael. Man en kop ame rik Rwot ociko baŋ Yeko, kun kobo ni, “Ikwai bino bedo i wi kom me loc Icrael tuno naka i lwagi me aŋwennere;” te daŋ timere amannono. Calum wot a Jabec ocako loc i mwaka me pyeradek wie aboŋwen me loc a Ujjia abaka me Juda, te loc pi dwe acel kun bedo i Camaria. Menakem wot a Gad te bino i Camaria kun oya i Tirja, te bino cobo Calum wot a Jabec neko oko, en te leyo kakare. Kop i kom Calum odoŋŋere luŋ, kede kop ame en oporo i muŋ, gin luŋ tye ocoo i buk me Tekwaro, ame tito kop i kom oloc me Icrael. I kare-nono Menakem te jwero boma me Tapauk, kede jo luŋ ame bedo iye, kede lobo luŋ ame tye i ŋete, tuno naka i Tirja; pien gin onwoŋo okwero yabbe doggola oko, mannono en omio en te jwerogi oko kun ryeko yi mon a yac ame onwoŋo tye kuno. I mwaka me pyeradek wie aboŋwen me loc Ajaria abaka me Juda en ame Menakem wot a Gad ocako loyo jo Icrael iye; en obedo loc pi mwakki apar kun bedo i Camaria, En obedo timo gin a nen arac i nyim Rwot, pi kare me kwo mere luŋ; en obedo lubo kit bal ame Jeroboam wot a Nebat obedo timo, ame omio jo Icrael otimo bal. Pul abaka me Acuria rik te bino cobo mony i kom lobo mere; Menakem te miyo Pul ryal ame romo talanta tutumia acel, me wek konye enwoŋ teko me moko loccere bedo atek. Lim ame en omio Pul-nono en orao i baŋ olonyo me Icrael luŋ, kun ŋat acel acel i akinagi mio cekel me ryal pyerabic me amia baŋ abaka me Acuria. Man te miyo abaka me Acuria dok oko cen, mom dok te bedo i lobo mere. Kop i kom Menakem odoŋŋere luŋ a mom ocoo kan, ginnoro luŋ ame en otimo, gin luŋ tye ocoo i buk me Tekwaro ame tito kop i komoloc me Icrael. Menakem oto te wot weo karacel i kwari mere. Wode Pekakia en ame te leyo kakare. I mwaka me pyerabic me loc Ajaria abaka me Juda en ame Pekakia wot a Menakem ocako loyo jo Icrael iye, en te bedo loyo jo Icrael pi mwakki aryo. En obedo timo gin ame nen arac i nyim Rwot, en mom oweko lubo kit bal a Jeroboam wot a Nebat obedo timo, ame omio jo Icrael obedo timo bal. Peka wot a Remalia ame onwoŋo obedo adwoŋ ame loo ocirikale mere te cako poro kop i muŋ i kome, karacel i jo pyerabic me Gilead, eka te neke oko i Camaria, kun onwoŋo en tye iyi icika atek me pono i ot abaka, en te leyo kakare. Kop i kom Pekakia odoŋŋere luŋ, kede gin ame en obedo timo ducu, gin luŋ tye ocoo i buk me Tekwaro ame tito kop i kom oloc me Icrael. I mwaka me pyerabic wie aryo me loc Ajaria abaka me Juda en ame Peka wot a Remalia ocako loyo jo Icrael iye; en te bedo loc pi mwakki pyeraryo nono. En obedo timo gin a nen arac i nyim Rwot, en mom oweko lubo kit bal ame Jeroboam wot a Nebat obedo timo, ame omio jo Icrael obedo timo bal. I kare me loc a Peka abaka me Icrael en ame Tiglak-pilecer abaka me Acuria obino iye te bino mako Ijon, Abel-bet-Maaka, Janoa, Kedec, Kajor, Gilead kede Galilaya ame gin luŋ obedo lobo a jo Naputali; en te yako jo iye terogi oko i opii Acuria. Kocea wot a Ela te poro kop i muŋ i kom Peka wot a Remalia, te bino cobo neko oko, en te leyo kakare i mwaka me pyeraryo me loc a Yocam wot a Ujia. Kop i kom Peka odoŋŋere luŋ, gin ame en otio, ame mom ocoo kan gin luŋ tye ocoo i buk me Tekwaro ame tito kop i kom oloc me Icrael. I mwaka me aryo me loc a Peka wot a Remalia en ame Yocam wot a Ujjia abaka me Juda ocako loc iye. En ocako bedo aloc kun mwaka me dittere tye pyeraryo wie abic, en te bedo loc i Jerucalem pi mwakki apar wie abicel. Nyiŋ tottere Yeruca ame obedo nyaka a Jadok. En obedo tiyo gin ame tye atira i nyim Rwot, kun timo ginnoro luŋ ame pappere Ujia rik obedo timo. Kadi bed amannono en mom omumuko ka woro jogi ame onwoŋo tye i wi kiddi malo; lwak pwod obedo medde yalo jogi i wi kiddi malo kuno, kun daŋ owaŋo odok a ŋwece kur iye. En ogero doggola i malo me ot a Rwot. Kop i kom Yocam odoŋŋere luŋ, ginnoro luŋ ame en otio ame mom ocoo kan, gin luŋ tye ocoo i buk me Tekwaro ame tito kop i kom oloc me Juda. I kare-nono Rwot te cako cwalo Rejin karacel kede Peka wot a Remalia me bino cobo mony i kom Juda. Yocam oto te wot weo karacel i kwari mere, oyiko kome karacel i kwari mere i paco a kwaro mere Daudi. Wode Akaj en ame te leyo kakare. I mwaka me apar wie abiro me loc a Peka wot a Remalia, en ame Akaj wot a Yocam abaka me Juda ocako kede loc iye. En ocako loc kun mwaka me dittere tye pyeraryo nono, te bedo loc i Jerucalem pi mwakki apar wie abicel. En mom obedo timo gin a tye atira i nyim Rwot Obaŋa mere kite ame kwaro mere Daudi rik otimo. Ento en obedo lubo gin ame oloc me Icrael obedo timo. En daŋ owaŋo wode acalo mot me yalo jok kun lubo kit tim me kwer ame rok luŋ ame yam Rwot oryemo i nyim jo Icrael timo. En obedo yalo jogi kun waŋo daŋ odok akur i ka woro jogi ame tye i wi kiddi malo kede i wi tur malo naka atot i te yen obuŋere-gu. Rejin abaka me Curia kede Peka wot a Remalia abaka me Icrael, rik ote twaro monygi i kom Jerucalem, ote wot guro Akaj i dyere ento naka mom ote loyo. I kare-nono abaka me Edom onwoŋo odwoggo Elat i te loc a jo Edom, te ryemo jo Juda oko i Elat; jo Edom te cako bedo i Elat, gin te bedo kuno naka atot tin. Akaj te cwayo kwena baŋ Tiglak-pilecer ame obedo abaka me Acuria kun kobo ni, “An abedo amironi, dok daŋ an a wodi. Bin ilara i ciŋ abaka me Curia kede abaka me Icrael ame gin luŋ otye olweny i koma.” Akaj dok te kwanyo ryal karacel kede jabu ame onwoŋo rik tye i ot a Rwot kede i ot kano lim ame rik tye i ot abaka, te cwayo me mot baŋ abaka me Acuria. Abaka me Acuria owinyo koko mere te gwaro monnyere wot lweny kede i kom jo me Damaciko, en te yako jo ame onwoŋo bedo kuno tero oko i opii i Kir, te neko Rejin oko. Kare ame abaka Akaj owoto i Damaciko me wot jolo Tiglak-pilecer abaka me Acuria, en oneko keno lam ame tye i Damaciko. Abaka Akaj te cwayo cal me keno lammono baŋ alamdog Uria, kede kite ame otio kede kun nyuto luŋ i yore i yore. Alamdog Uria te cako cano keno lam kun tio a cal acala i en ame abaka Akaj onwoŋo ocwaye callere i Damaciko, Man alamdog Uria otimo kun onwoŋo abaka Akaj mom ru odwogo i Damaciko. Kare ame abaka odwogo i Damaciko, en owoto oŋio keno lammono. Kare ame abaka otuno i ŋet keno lam ceggi, en oyito iye, te yalo Rwot i mot awaŋa mere, kede mot me moko kwon, te daŋ onyo iye mot amata, te coro remo me mottere me kweyo cuny i kom keno lam. En te kwanyo keno lam me mola ame onwoŋo tye i nyim Rwot, i ot a Rwot i kabedo ame onwoŋo tye i akina keno lammere kede ot a Rwot te keto tutuŋ anyarodi me keno lammere. Abaka Akaj te ciko alamdog Uria ni, “Mot awaŋa me odiko ibino waŋo i wi keno lam adwoŋ-ni, kede mot me moko kwon me otyeno kede mot me awaŋa ame abaka mio, karacel kede mottere me moko kwon, kede mot awaŋa a lwak karacel i motgi me moko kwon kede motgi me amata. Ibino onyo remo me mot awaŋa luŋ i kom keno lammono kede remo me mot aŋola ocele ducu. Ento keno lam me mola bino bedo mega, me penyo iye kop i baŋ Rwot.” Alamdog Uria te timo luŋ kittono, kite ame abaka Akaj ociko kede. Abaka Akaj oŋoŋolo mola i kom gadigadi atino mege, te kwakwanyo tako daŋ i komgi, te daŋ kwanyo dero gwoko pii i wi cal twoni me mola ame rik ocibo i ŋegi, te keto i kom kiddi ame opepeto piny. Kede yo ame owumo oko ame obeo iye i ceŋ cabit ame onwoŋo rik ogero i paco abaka, en te kwanyo oko luŋ i ot a Rwot, pi abaka me Acuria. Kop i kom Akaj ame odoŋŋere luŋ, ginnoro luŋ ame en otimo ame mom ocoo kan, gin luŋ tye ocoo i buk me Tekwaro ame tito kop i kom oloc me Juda. Akaj oto te weo karacel i kwari mere, ote yiko kome karacel i kwari mere i paco a Daudi. Wode Kejekia te leyo kakare. I mwaka me apar wie aryo me loc Akaj abaka me Juda, en ame Kocea wot a Ela ocako loyo jo Icrael iye kun bedo i Camaria; en obedo loc pi mwakki aboŋwen. En obedo timo gin ame nen arac i nyim Rwot, cite mom obedo ame rom aroma oloc me Icrael ame otelo nyime. Calmanecer abaka me Acuria rik te bino cobo mony i kome; i kare ame Kocea doŋ odoko amiro mere, ocako doŋ onyo ocoro baŋe. Cite icennere abaka me Acuria te niaŋ ni Kocea mito kelo arubaruba; pien en dok ocwao kwena baŋ abaka me Miciri ame nyiŋe So, eka te kwero miyo ocoro oko baŋ abaka me Acuria kite ame en onwoŋo mio kede mwaka i mwaka, man omio abaka me Acuria omake, te tweye oko i buc, Abaka me Acuria te cako lweny i kom lobo ducu te bino kede naka i Camaria, te guro boma me Camaria oko pi mwaka adek twal. Abaka me Acuria te mayo Camaria oko i mwaka me aboŋwen me loc a Kocea, te tero jo Icrael i opii i lobo me Acuria, te wot keketogi i Kalak kede i ŋet Kabor ame obedo kulo ame tye i Gojan, kede i boma a Medi. Man rik otimere kittono pien jo Icrael onwoŋo otimo bal i nyim Obaŋagi ame rik okwanyogi i lobo Miciri, i ciŋ Parao, abaka me Miciri, Gin obedo woro obaŋa mogo ocele, eka ote bedo lubo kit a rok apapat ame rik Rwot oryemo oko i nyim jo Icrael, kede kit ocele ame oloc me Icrael en okelo. Jo Icrael rik te bedo timo gigi mogo a mom atira kun otimo i muŋ i kom Rwot Obaŋagi. Gin rik te bedo gero ka woro jogi kun ogero i wi kiddi i ŋet bomagi ducu, cakere i kom gedo mogo ocuŋ iguŋ malo tuno naka i kom boma ame ocecelo atek. Gin ocicibo jok a dako ame olwoŋo ni Acera i wi kiddi luŋ ame otiŋere malo anaka i te yen obuŋere-gu. Gin obedo waŋo odok akur i keno lam me woro jogigi kite ame orok ame rik oryemo i nyimgi onwoŋo timo. Gin obedo ti mo timmogo areco ame ote miyo akemo mako Rwot. Gin obedo woro cal jogi-gu ame rik Rwot ojukogi iye kun kobo ni, “Mom ibino timo wunu man kadi acel.” Kadi bed amannono, Rwot obedo kwenyoro jo Icrael kun mio adwarpiny acel acel kede aran-piny acel acel, okobbi jo Icrael ni, “Lokere wunu oko i yowu areco, ite cako mako wunu mako cikka kede icwilla, kun ilubo wunu kop luŋ ame rik aciko kede kwariwu, kede en ame abedo cwayo baŋwu kun omirona odwarpiny kelliwu.” Cite gin gigi mom obedo winyo, ento ŋutgi obedo nwaŋ calo kite ame kwarigi rik daŋ obedo timo, kun mom oye kop a Rwot Obaŋagi. Gin obedo cayo icwillere kede gin ame en onwoŋo ociko i kwarigi, kede kwenyakino ame obedo kwenyorogi kede. Gin obedo woro cal jogi ame konygi mom, ame te miyogi daŋ doko jo ame konygi pe; gin obedo lubo kit a rok ame rik omanogi, ame gin rok ame rik Rwot ocikogi iye ni myero gin kur obedu calo gin, kun otimo gin ame gin obedo timo. Gin okwero winyo cik luŋ ame rik Rwot Obaŋagi ocikogi iye; gin ote lunyo tiyo cal atwaka me twoni aryo kun otio pirgi kengi; dok ote payo cal jok a dako ame olwoŋo ni Acera, ote cako woro kit ginnoro luŋ ame tye i polo, kun daŋ oworo Baal. Gin obedo waŋo awobegi kede anyiragi me yalo obaŋegi, gin ote bedo tyet kede ajaa, ote miye kengi me timo gin a nen arac i nyim Rwot, kun omio akemo make. Akemo omako Rwot atek i kom jo Icrael, ote ryemogi oko i nyime; ŋattoro mom odoŋ kadi acel kono ka atekere a Juda keken en ame te doŋ. Jo Juda daŋ rik mom omako cik ame Rwot Obaŋagi ociko, cite obedo lubo kite tim ame jo Icrael okelo. Rwot te cako kwero ikwae Icrael luŋ, eka te cako keto can apek i komgi, omiogi iciŋ oyak, naka te ryemogi luŋ i nyime. Kare ame Rwot doŋ otyeko mayo loc Icrael oko i ciŋ jo me ot a Daudi, jo Icrael te keto Jeroboam wot a Nebat me bedo abaka. Jeroboam te kwanyo jo Icrael oko i lubo Rwot, eka te miyogi timo twon bal adwoŋ meicel. Jo Icrael te bedo timo kit bal ducu ame Jeroboam obedo timo; gin mom oweko timo kadi acel, tuno naka i kare ame oryemo jo Icrael luŋ kite ame en rik onwoŋo okobo kede, kun mio omiro mere odwarpiny en akobo. Mannono rik te miyo kwanyo jo Icrael oko i lobogi ote tero iyi opii i Acuria tuno naka tin. Abaka me Acuria rik te kelo jo Acuria, Kuta, i Aya, i Kamat kede i Ceparvaim te miyogi bedo i boma luŋ i lobo Camaria akaka jo Icrael. Gin doŋ te gamo Camaria doko megi, kun obebeda iye ducu. Cakere i kare ame gin geo bedo i lobo-nono gin gigi mom oworo Rwot, mannono te miyo Rwot cwayo eŋatu i akinagi ame te mwodo jo apol meicel i akinagi. Rik ote kobbi abaka me Acuria kop man ni, “Rok ame itero ite wot miyogi bedo i boma luŋ ame tye i Camaria mom ŋeo cik Obaŋa me lobo-naca; mannono omio Obaŋa me lobo-naca ocwalo lwak eŋatu i akinagi, ame aman tye ka nekogi meicel, pien gin mom oŋeo cikkere.” Abaka me Acuria te ciko ni myero cwal alamdog acel kuno kun okwanyo i akina jo ame rik okelo i kuno me wot bed kuno pwonygi i cik Obaŋa me lobo-naca. Man omio alamdog acel ame rik okwanyo i Camaria te dok wot bedo i Betel, te bedo pwonyogi kite me woro Rwot. Cite rok acel acel pwod obedo tiyo cal obaŋa mere kene, kun oketo i ka woro jogi ame onwoŋo tye i wi kiddi malo, ame rik jo Camaria otio. Rok acel acel obedo keto megi i boma ame gin obedo iye. Jo Babulon rik te tiyo cal jok ame olwoŋo ni Cukotbenot, jo Kut otio cal jok ame olwoŋo ni, Nergal, jo Kamat te ti yo cal jok ame olwoŋo ni Acima; jo Aya otio en ame olwoŋo ni Nibaj kede en ame olwoŋo ni Tartak. Jo Ceparvaim te bedo yalo otinogi kede jogi acalo mot awaŋa, kun oyalo i jogi ame olwoŋo ni Adramelek kede Anamelek. Gin obedo woro Rwot daŋ kun okwanyo i akinagi kit jo ducu me bedo olamdog ame yalo Rwot pirgi i ka woro ame tye i wi kiddi malo. Gin te bedo woro Rwot kun daŋ dok oworo obaŋegi ame gin otio i komgi, kun oworo i kite a rok ocele ame rik okwanyogi i akinagi. Tuno naka i kare-ni gin pwod olubo kite aconnaca. Gin mom obedo lworo Rwot, mom daŋ obedo lubo icwillere kede gin ame en ociko, akadi ame en oketo, akadi cik ame en ociko kede ikwae a Yakobo, ame Rwot rik ocako nyiŋe ni Icrael. Rwot rik ocikere kedgi, te cikogi ni, “Mom ibino woro wunu obaŋe mogo ocele; mom ibino ryebere wunu piny i nyimgi me worogi, mom ibino tic wunu pirgi kadi yalogi kede mottere. Ento ibino bedo wunu kede lworo i kom Rwot ame rik okwanyowu i lobo me Miciri i twon teko adwoŋ kede ciŋe ame oryeo. Ibino woro wunu Obaŋa-nono dok daŋ ibino yalo wunu en keken. Icwil luŋ, kede gin ame en ociko, kede cik luŋ ame en ocoo pirwu, ibino gwokere wunu kare luŋ me lubo kittono. Mom ibino woro wunu kit obaŋe mogo ocele. Wiwu mom bino wil i kom cikere ame doŋ atyeko keto kedwu. Mom ibino woro wunu kit obaŋe mogo ocele. Cite ibino woro wunu Rwot Obaŋawu, en bino larowu i ciŋ okworwu.” Gin gigi rik ote kwero winyo kop ame en okobbigi oko, gin te bedo timo gigi ginnoro luŋ, kun olubo kitegi acon ca. Rok magi rik te bedo woro Rwot kun oworo daŋ obaŋegi mogo ame opao apaa; itinogi daŋ te bedo timo amannono, anaka ikwaegi, kun otimo gin ame kwarigi obedo timo naka atot tin. I mwaka me adek me loc a Kocea wot a Ela abaka me Icrael, en ame Kejekia wot Akaj abaka me Juda ocako loc iye. En ocako loc kun mwaka me dittere doŋ romo pyeraryo wie abic, en te bedo loc pi mwakki pyeraryo wie aboŋwen, kun bedo i Jerucalem. Nyiŋ tottere obedo Abi, ame obedo nyaka a Jekaria. En te bedo timo gin ame nen atira i nyim Rwot, kun lubo ginnoro luŋ ame rik kwaro mere Daudi obedo timo. En omumuko ka woro jogi luŋ ame onwoŋo rik tye i wi kiddi malo, ototoŋo daŋ yen luŋ ame ocicibo i ka woro jok a dako ame olwoŋo ni Acera oko, te daŋ ŋido twol mola ame rik Muca otio oko, pien tuno naka i karenono-onwoŋo jo Icrael pwod yalo twollono odok akur. Gin rik olwoŋo twol mola-nono ni Nekucitan. En obedo keto gennere i kom Rwot Obaŋa me Icrael; man omio mom dok onen aloccoro ocele a cal kede i akina oloc me Juda ame olubo ŋeye, akadi i akina oloc ame ogeo loc i nyime. En olido Rwot odoco, kun mom weko lubo Rwot, ento obedo lubo cik luŋ ame Rwot rik onwoŋo ociko baŋ Muca, Rwot obedo bedo kede i kabedo luŋ ame en woto iye kun mie winyo. En obin ojem oko i kom abaka me Acuria, te kwero bedo i te loccere oko. En oneko jo Piriciti tuno naka i Gaja karacel kede lobo luŋ ame rik tye i ŋete, cakere i gedo mogo ocuŋ iguŋ malo me kuro piny tuno naka i kom boma ame ocecelo atek. I mwaka me aŋwen me loc a Kejekia, ame obedo mwaka me abiro me loc a Kocea wot a Ela, abaka me Icrael, Calmanecer abaka me Acuria obino me bino lweny i kom Camaria, te daŋ guro oko i monnyere. I ŋe mwaka adek, en doŋ te loyo Camaria oko. I mwaka me abicel me loc a Kejekia, ame obedo mwaka me aboŋwen me loc a Kocea abaka me Icrael, en ame oloo iye boma me Camaria. Abaka me Acuria te tero jo Icrael iyi opii i Acuria, te wot miyogi bedo i Kala, kede i ŋet kulo me Kabor, ame obedo kulo ame tye i Gojan, kede i boma a jo Medi; man otimere pien gin okwero winyo kop a Rwot Obaŋagi, okalo wi cikere mere, anaka ginnoro luŋ ame en rik ociko kede Muca amiro mere; gin mom owinyo, mom daŋ olubo kadi acel. I mwaka me apar wie adek me loc abaka Kejekia, Cenakerib abaka me Acuria owoto me wot lweny i kom boma luŋ me Juda ame onwoŋo ocecelo atek meicel, eka te daŋ mako boma-nono luŋ. Kejekia abaka me Juda te cwayo kwena baŋ abaka me Acurai i Lakic kun kobo ni, “Atimo bal; dok giri cen, kur ilweny keda, yeccoro luŋ ame yin ibino cibo i wia abino wute kede.” Abaka me Acuria te ŋolli Kejekia abaka me Juda ni myero culle ryal ame pekkere romo talanta mia adek kede jabu ame pekkere romo talanta pyeradek. Kejekia te miye ryal luŋ ame en onwoŋo tye i ot a Rwot kede en ame onwoŋo i ot kano lim rik tye ot abaka. I karenono Kejekia te mumuko daŋ jabu luŋ ame rik en omwono i kom kika me doggola ot a Rwot, kede jabu ame en rik onwoŋo omwono i kom akara me doggola, te miyo luŋ baŋ abaka me Acuria. Abaka me Acuria te cwayo odoŋe magi ame gin otel wi monnyere, kun cwalogi kede twon mony adwoŋ meicel. Ocwao Tartan, Rabcaric kede Rabcake, kun oya i Lakic owoto baŋ Kejekia i Jerucalem. Gin rik te ciro wot naka i Jerucalem. Kare ame gin otuno kuno, gin ocuŋ i ŋet yo pii ame mol tero pii iyi atapara ame tye tuŋ malo, i yo adwoŋ ame woto i poto Alwok-boŋo. Kare ame gin olwoŋo abaka me bino rwatte kedgi, Eliakim wot a Kilkia, ame rik obedo adwoŋ ame loo ot abaka, kede Cebna, ame onwoŋo obedo aran, kede Joa wot Acap ame rik en aco kop i kom ginnoro luŋ ame otimere, en ame te lunyo bino baŋgi. Rabcake te kobbigi ni, “Kobbi wunu Kejekia, ‘Abaka adwoŋ ame en abaka me Acuria okobo ni, “Gen ame itye kede-ni ocuŋ kara i kom aŋa ba?” ’ ” Itamo ni kop me dog keken rom aroma i ryeko kede teko me lweny bo? Aman ame yin ijem i koma-ni yin igeno ŋa? Nen yin itye ka geno Miciri ame rom aroma imako ogada ame turo yot akaka mako abiro; ogada ame tur cobo ciŋ ŋattoro keken ame ojenere i kome. Parao ame obedo abaka me Miciri daŋ tye kittono baŋ jo luŋ ame keto gengi i kome. Ento ka ikobba ni, “Wan ogeno Rwot Obaŋawa, ‘kara mom en Obaŋa-nono en ame Kejekia rik omuko kabedo mere me abila ame tye malo kede keno lam, kun ciko Juda kede Jerucalem ni myero gin wor Obaŋa i nyim keno man?’ ” Aman doŋ tim ber ijeŋ ginnoro wun adwoŋŋa, abaka me Acuria: An abino miyi aguragura tutumia aryo ka ce yin itwero nwoŋo jo ame twero ŋwec kedgi. Kara yin itwero ryemo adwoŋŋoro i akina otic adwoŋŋa i yore mene akadi en agoro mere ka ce yin pwod igeno Miciri pi gadigadi mere kede jo ame ŋweco aguragura? Medo i kom mannono, yin itamo ni an abino jwero lobo man aboŋo Rwot? Rwot en okobba ni, “Wot ilweny i kom lobo man me ijwer jo iye luŋ!” Eka Eliakim wot a Kilkia kede Cebna, kede Joa te kwayo Rabcake ni, “Tim ber ikob kedwa wan omironi i leb Aram pien wan oniaŋ iye. Kur ikob kedwa i leb jo me Juda ame jo leb Aram pien wan oniaŋ iye. Kur ikob kedwa i leb jo me Juda ame jo ame tye i wi apama me cel twero winyo.” Rabcake te gamo kopgi ni, “Itamo ni adwoŋŋa oora me bino kobo kop man baŋ adwoŋwu kede baŋwu keken, kun mom akobo baŋ jo ame tye i wi apama cel malo ca? Aco kono, wun karacel kede gin jo-ni luŋ doŋ ibedo wunu jo ame bino camo cetewu kede mato lacwu?” Rabcake te putte malo, te redo ni, “Koŋ iwiny wunu kop abaka adwoŋ me Acuria!” En okwenyorowu ni myero kur imi wunu Kejekia bwolwu, pien en gire mom bino larowu. Kur imi wunu Kejekia wir tamwu me jeŋere i kom Rwot kun kobbiwu ni Rwot gire mom bino miyo boma man i ciŋ abaka me Acuria. Kur iwiny wunu kop a Kejekia. Abaka me Acuria okobo ni ŋat acel acel myero katto oko i boma me bin yik kop me kuc kede. En ebino miyo dano acel acel camo nyig olokkere en ikome, kede nyig oduro mere, kun daŋ mato pii mere ame en i kome ojolo; ituno ka abino terowu i lobo ocele ame rom aroma i lobowu, lobo ame ceko cam, koŋo olok dwoŋ iye, lobo ame ogati kede olok tye iye. Lobo ame moo jeituni kede moo kic dwon iye, me ibed wunu ame komwu yot, kun mom ibedo wunu to kare ducu. Gwokere wunu kur iye wunu Kejekia bwolwu ni Rwot bino larowu. Yam koŋ tye Obaŋa arokkoro ame olaro lobo mere i ciŋ abaka me Acuria? Kara gin obaŋe-nogo aman otye kwene? Obaŋa a boma me Kamat kede me Arapad kede obaŋa me Ceparvaim, onyo me Kena kede me Iva? Gin obaŋe-nogo rik olaro Camaria i ciŋa? I kom obaŋe magi luŋ, mene ame yam koŋ olaro lobogi i ciŋa? Kara ŋo ame omio wun itye ka tamo wunu ni Rwot twero laro Jerucalem i ciŋa? Jo te liŋ aliŋa, kite ame onwoŋo abaka ocikogi kede ni myero kur ogam kopporo. Icennere Eliakim wot a Kilkia, ame onwoŋo obedo adwoŋ ame loo ot abaka, kede Cebna ame obedo aran, kede Jo awot Acap, ame onwoŋo obedo aco kop luŋ i kom ginnoro luŋ ame otimere, ote wot baŋ abaka Kejekia kun oyeyeco boŋŋigi oko, ote titte kop ame Rabcake okobbigi. I kare ame abaka Kejekia owinyo, oyeyeco boŋŋi mere, te ruko boŋo cola, te wot i ot a Rwot. En te cwayo Eliakim, adwoŋ ame onwoŋo loo ot abaka, kede Cebna, aran karacel kede olamdog adoŋo mere baŋ Icaya wot Amoj, kun gin luŋ oruko boŋo cola. Gin te wot kobbi Icaya ni, “Man en kop ame Kejekia okobo ni okobbi, ‘Tin en nino me can, me keto can i komwa, dok me cwercuny okato kare. Aman wan orom aroma i dako ame nino me nywallere oromo, cite teko me colo atin mom tye. Gwok onyo Rwot Obaŋani owinyo kop a Rabcake, ame adwoŋŋere abaka me Acuria ocwae kede me bino nalo Obaŋa akwo. Rwot Obaŋani myero ket can i kom jo man ame okobo kop ame en otyeko winyo. Pi mannono ba, yin myero ikwa Rwot pi jo ame odoŋ.’ ” Kare ame omiro abaka Kejekia otuno baŋ kaya, en okobbigi ni, “Wot ikob wunu baŋ adwoŋwu ni, Rwot okobo ni, ‘Myero kur ibed kede lworo moro pi kop ame iwinyo, ame omiro abaka me Acuria oyeta kede. Nen ba, an abino miyo en keto cunye i winyo koppogo me anike, ame bino miyo en dok cen i lobo mere. An abino miyo oneke kede pala romo i lobo mere.’ ” Rabcake te dok oko cen, te wot nwoŋo abaka me Acuria tye ka lweny i kom Libna; pien en onwoŋo doŋ owinyo oko ni abaka otyeko ya oko i Lakic. Abaka rik te winyo kop i kom Tiraka, abaka me Eciopia, ni en onwoŋo tye ka bino me bino lweny i komgi. En rik te cwayo kwena baŋ Kejekia kun kobbe ni, “Wot ikobbi wunu Kejekia abaka me Juda ni, ‘Kur imi Obaŋani ame igeno bwoli ni mom ebino miyo Jerucalem i ciŋ abaka me Acuria. Nen ba, yin doŋ ityeko winyo gin ame abaka me Acuria otyeko timo i kom lobo luŋ, iwinyo kite ame en orweogi kede odoco, kara yin doŋ ibino bwot i yore aŋo ba? Kwarina rik obin orweo boma me Gojan, Karan, Recep, te daŋ neko jo me Eden ame rik onwoŋo bedo i Telaccar, ento obanagi moro mom olarogi. Kara obakki me boma-nogo aman tye kwene? Abaka me Kamat, kede Arpad, kede me Ceparvaim, kede me Ena, karacel kede me Ivva, gin luŋ aman tye kwene?’ ” Kejekia ogamo waraga i ciŋ okwena te kwano. En te wot kede i ot a Rwot, te yaro waraga-nono i nyim Rwot, Eka te cako kwayo Rwot kun kobo ni, “Ama Rwot Obaŋa me Icrael, ame ibedo i wi kommi me kwogo a tye malo i wi okerubi; yin keni gire en ame ibedo Obaŋa, ame iloo kit lobo apapat luŋ me wi podo. Yin en iketo polo kede lobo. Tim ber icik yiti iwinywa, ama Rwot, yab waŋi inenwa, dok daŋ iwiny kop luŋ ame Cenakarib ocwao me ŋalo Obaŋa akwo. Iyi ateni, Ama Rwot, wan oŋeo ni abaka me Acuria ojwero lwak rok apol kun mio lobogi doŋ nono, dok daŋ owawaŋo obaŋegi oko i mac; pien gin mom onwoŋo obedo obaŋa i kome, ento cal apaa me yen kede gweŋe ame jo en atio, mannono en omio orweogi oko, Aman doŋ ba, Ama Rwot Obaŋawa, larwa iciŋ jo Acuria me rok luŋ i wi podo ŋe ni yin giri Rwot ibedo Obaŋa keni.” Icaya wot Amoj te cwayo kwena baŋ abaka Kejekia kun kobbe ni, “Rwot Obaŋa me Icrael okobo ni, ‘An doŋ atyeko winyo kwacci i kom Cenakerib, abaka me Acuria.’ Man en kop ame Rwot otyeko kobo i kome: “Jo me Cion ocai calo nyako ame obwoni; Jo Jerucalem ocai, calo nyako oyeyeno wie i ŋei. “Yin kara iŋalo ŋa, ŋa ame iyeto? Iwoto dwoni i kom ŋa ba, kun iŋao waŋi malo? Mom i kom Ŋat Acil me Icrael! Imio okwenani oŋalo Rwot, dok ikobo ni yin iyito malo i wi kiddi, kun iyito i gadigadi me lweny, ituno naka i wi Lebanon twal; kun iwakere daŋ ni itoŋo yen cedar aboco i kuno oko, kede yen cipre abeco mege oko; dok daŋ ni ituno iyi buŋ kannabor, kan ame yen oculle iye acula. Iwakere-gu ni ikunyo akoŋ, imato daŋ pii orok, dok tyeni omio pii i kulli luŋ me Miciri odwono oko. “Mom onwoŋo iŋeo ni rik ayiko man con? Aman doŋ atye ka cobo acoba, gin ame rik ayiko pire con, ni ibino reto boma luŋ ame ocecelo atek, me imi dok wi obur. Man omio jo ame bedo kuno mom doŋ tye kede teko, cunygi doŋ bedo poto apota, lewic daŋ doŋ ocirogi oko. Orom aroma i lum ame tye i poto, ocalo lum alyabu, onyo orom aroma i doo ame otu i wii ot, ame yamo alyet me oro onero. “Cite an aŋeo kop ducu i komi, aŋeo ginnoro luŋ ame yin itio, kede kabedo luŋ ame yin iwoto iye, karacel kede daani i koma. Atyeko doŋ winyo kop i kom akemoni, awinyo daŋ kop i kom wakereni oko; pi mannono abino rwako golona i umi, abino keto daŋ tol i dogi, abino dwoki cen i yori, kun ibeo i yo ame rik ibino kede.” Icaya te kobbi abaka Kejekia ni, “Man en gin ame bino nyuto gin ame bino timere. I mwaka ni kede i mwaka ame bino lubo man, ibino camo wunu cam ame otu kene, ento i mwaka me adekkere ibino coyo wunu koti, ite daŋ kayo wunu, ibino pito wunu olok, ite daŋ camowunu nyige. Jo ame bino bwot te doŋ i ot a Juda, bino bedo acalo yat ame oguro lwite piny, te nyako nyige. Pien jo bino doŋ i Jerucalem kede i wi kidi me Cion. Man bino timere pien Rwot tye i mit adwoŋ iye. “Man en kop ame Rwot okobo i kom abaka me Acuria: En mom bino donyo i boma man kadi acel, mom daŋ bino bayo atero moro iye. Mom tye ocirikale moro ame omako kwot, ame bino tuno i ŋet boma, mom daŋ obino toro lobo moro me guro. En bino dok cen i ŋee, kun lubo yo ame rik ebino kede, en gire mom bino donyo i boma man. Man en kop a Rwot ikokome. An abino lweny pi boma man ate gwoko me kelo kwogo i koma kede i kom amirona Daudi.” Amalaika a Rwot rik te wot i gony a jo Acuria i dyeworrono, te wot neko ocirikale tutumia mia acel kede pyeraboro wie abic. Orwo mere odiko con, kom jo oto onwoŋo doŋ oradde atata. Cenakarib, abaka me Acuria te dok paco, wot bedo i Nineve. I nino moro ame en rik onwoŋo tye akwac i ot obaŋa mere Nicrok, awobe mere Adramelek kede Carecer te neke oko i pala me romo, gin te Iwi gigi oko i lobo Ararat. Wode Ecar-kaddon te leyo kakare. I kare-nono two onwoŋo omako abaka Kejekia, ame onwoŋo en doŋ ceggi to. Adwarpiny Icaya wot Amoj rik te wot limme, te kobbe ni, “Rwot okobo ni yin doŋ myero icik jo ame bedo baŋi oko i kop me odi, pien mom ibino caŋ, ento ibino to.” Kejekia te loko nyime neno apama, te kwayo Rwot, kun kobo ni, “Tim ber, Ama Rwot, ipo kit ame abedo tic kede baŋi kun ageni icunya ducu, dok atimo gin ame tye atira i nyimi.” En te mwoco koko oko kun cunye cwer meicel. A kun Icaya mom ru oya i dyekal abaka, Rwot dok te medde kobbi Icaya ni, “Wot ikobbi Kejekia ame en abaka ame loo lwakka ni, ‘Rwot Obaŋa a kwarowu Daudi okobo ni, etyeko doŋ winyo kwacci, dok daŋ eneno pig waŋi; nen ba, abino cano twoni oko; i nino me adekkere ibino wot i ot a Rwot. Dok ebino miyo ibedo i lobo pi mwakki apar wie abic. Ebino larri karacel kede boma man i ciŋ abaka me Acuria, dok ebino medde gwoko boma man, pi kelo kwogo i kome kede i kom amiro mere Daudi.’ ” Icaya te kobo ni, “Kella anina oduro otwo, me wot mwon i waŋ odeke abaka me caŋ oko.” Kejekia te penyo Icaya ni, “Kara gin aŋo ame bino nyuto ni Rwot bino caŋa dok daŋ abino wot i ot a Rwot i nino me adekkere?” Icaya te gamo ni, “Man en anen ame bino nyuto ni Rwot bino cobo gin ame eciko: tipo cen myero wot anyim tyen apar onyo dok cen tyen apar i ya i kom gi-poro ceŋ Akab?” Kejekia te dok gamo ni, “Bedo yot ka bor atipo omedde anyim tyen apar;” pe amannono gire, myero odok cen tyen apar iya i kom gi-poro cen Akaj. I kare-nono abaka me Babulon, Merudak-baladan wot a Baladan, owinyo ni abaka Kejekia rik kome lit, en te cwayo okwena me tero waraga baŋe karacel kede mot. Kejekia rik te jolo okwena mere naca kede yomcuny, te nyuttigi lonyo mere kun daŋ miogi oneno ot me limmere, gin oneno jabu, ryal, gigi mogo ame nwecgi kur, moo mogo me wel, ot me kano jami lwennyere luŋ, kede ginnoro luŋ ame onwoŋo tye i ot me kano jami mere. Mom tye ginnoro a en mom onyuto baŋgi ame onwoŋo tye i ode kede i lobo luŋ ame onwoŋo tye i te loccere, Cite adwarpiny Icaya rik te bino baŋ abaka Kejekia, te penye ni, “Jo-ni kara oya i kwene? Dok kop aŋo ame gin okobo?” Kejekia te gamo ni, “Gin oya i lobo abor meicel, oya i Babulon twal.” Icaya dok te penye ni, “Gin aŋo ame gin oneno i odi?” Kejekia te gamo ni, “Gin oneno jami ducu ame tye i oda; mom tye ginnoro ame tye i udi me kano lim ame mom anyuttigi.” Icaya te kobbi abaka Kejekia ni, “Koŋ doŋ iwiny kop ame Rwot okobo. Nen ba, kare tye abino, ame jami ducu ame tye i odi, jami luŋ ame kwarowu yam obedo kano tuno naka tin, obino terogi luŋ i Babulon. Mom tye ginnoro ame bino doŋ kadi acel. Dok itinoni mogo obino tero iyi opii, ote royogi oko, ote wot tic i paco abaka me Babulon.” Abaka Kejekia te niaŋ ni kuc bino bedo i kare mere aboŋo alokaloka moro, omio en te kobbi Icaya ni, “Kop a Rwot ame ekobo-nono gire ber.” Kop i kom Kejekia ame odoŋŋere luŋ, teko mere, kite ame en rik okunyo kede akon kede yo pii, te tero pii i boma, ginnoro luŋ ame mom ocoo kan, gin luŋ tye ocoo i buk me Tekwaro ame tito kop i kom oloc me Juda. Kejekia oto te wot weo karacel i kwari mere. Wode Manace te leyo kakare. Manace ocako loc kun mwaka me dittere romo apar wie aryo, en te bedo loc i Jerucalem pi mwakki pyerabic wie abic. Nyiŋ tottere Kepjiba. En obedo timo gin ame nen arac i nyim Rwot, kun bedo timo tim me kwer ame rok luŋ ame Rwot oryemo oko i nyim jo Icrael rik obedo timo. En daŋ omio ogero ka woro jogi i wi kiddi malo, ame rik pappere Kejekia omio omumuko oko. Ogero keno lam me a Baal, oguro daŋ yat Acera te dok cako woro kit jami apapat ame tye i polo, kun tio pirgi. Ocano daŋ keno lam i ot a Rwot, kan ame rik Rwot okobo iye ni, “Abino miyo Jerucalem bedo kabedo me wora.” En ocano daŋ keno lam apipim me woro jami apapat ame tye i polo, kun canogi i dyekal aryo ame tye i ot a Rwot. Owaŋo daŋ wode acalo mot me yalo jok, kun daŋ tyeto tyet, ŋio yi dyegi, penyo daŋ okor tipo kede ajoka. En obedo timo tim areco apol apola ame nen arac i nyim Rwot, kun mio akemo mako Rwot. Dok cal jok apaa, cal Acera ame obedo jok a dako ame en omio opao otero-gu i ot a Rwot ame rik Rwot ikome okobo pire baŋ Daudi kede baŋ Culeman ni, “I ot man, kede i Jerucalem ame rik an ayero i akina atekere luŋ me Icrael, en ame bino bedo kan ame owora iye nakanaka. Mom dok abino miyo tyen jo Icrael loŋo piny atata kun ya i lobo ame rik an amio baŋ kwarigi, ka ce gin obedo gwokere kun otimo ginnoro luŋ i kite ame rik acikogi kede, dok obedo lubo cik luŋ ame rik amirona Muca ocikogi kede.” Gin gigi rik mom ote winyo kadi acel, dok Manace rik daŋ te miyogi medo timo tim areco ame kato me a rok luŋ ame rik Rwot orweo i nyim jo Icrael. Rwot te cako kop, kun mio omiro mere ame obedo odwarpiny en akobo koppere baŋ jo Icrael ni, “Pien Manace abaka me Juda obedo timo tim magi areco me ipyeda, kun timo gin ame kato en ame jo Amor obedo timo oko, ame gin jo ogeo bedo kuno, dok daŋ omio jo Juda obedo timo bal i cal jogi mere; mannono omio Rwot Obaŋa me Icrael okobo ni, ‘Nen ba, akelo twon timmoro arac meicel i kom Jerucalem kede i kom Juda, ame ŋat acel acel ame bino winyo pire, yite bino mwoc oko. Dok abino ryeyo tol i Jerucalem, tol ame rik koŋ apimo i Camaria, abino neno ka ocuŋ atira i birigi ame rik koŋ apimo kede ot Akab; dok abino weyo Jerucalem odoco kite ame dano weo kede cani, te wumo oko piny. Jona ame odoŋŋege abino bolo oko i ciŋ okworgi, gin bino doko acalo leyi me acama okworgi, kun oyakogi, pien gin obedo timo gin ame nen arac i nyima, kun omio akemo obedo maka cakere i kare a kwarigi oya i Miciri tuno kede naka atot tin.’ ” Medo i kom mannono, Manace obedo onyo remo a jo apol ata ame mom i balloro, cakere i Jerucalem tuŋ cel tuno naka tuŋ ocele. En omedo man i kom bal ame en omio jo Juda obedo timo, en miyogi timo gin ame nen arac i nyim Rwot. Kop i kom Manace odoŋŋere luŋ, ginnoro luŋ ame rik en otio, kede kit bal luŋ ame en otimo ame mom ocoo kan, gin luŋ tye ocoo i buk me Tekwaro ame tito kop i kom oloc, ote yiko kome i poto ame tye i ŋet ode, i poto a Uja. Manace oto te weo karacel i kwari mere, ote yiko kome poto ame tye i ŋet ode, i poto Uja. Wode Amon en ame te leyo kakare. Amon ocako loc ame mwaka me dittere doŋ oromo pyeraryo wie aryo, en obedo loc mwakki aryo kun bedo i Jerucalem. Nyiŋ tottere Meculemet, ame obedo nyaka a Karuj, dano me Jotba. Amon obedo timo gin ame nen arac i nyim Rwot kite ame pappere Manace obedo timo kede. En obedo lubo kite a pappere luŋ, dok obedo woro anaka cal jogi ame rik pappere obedo woro kun tio pirgi. En oweko woro Rwot ame obedo Obaŋa a kwari mere, kun mom daŋ timo gin ame Rwot mito. Omiro mere rik te poro kop i kome i muŋ, ote wot neke oko i ode. Jo me lobo-nono rik te neko jo luŋ ame oporo kop me neko abaka Amon, gin te keto wode Yocia leyo kakare. Kop i kom Amon odoŋŋere ducu, ginnoro luŋ ame rik en otio, ame mom ocoo kan, gin luŋ tye ocoo i buk me Tekwaro ame tito kop i kom oloc me Juda, Oyiko kom Amon i lyel ame tye i poto a Uja. Wode Yocia en ame te leyo kakare. Yocia ocako bedo aloc kun mwaka me dittere oromo aboro, en te bedo loc pi mwakki pyeradek wie acel kun bedo i Jerucalem. Nyiŋ tottere Yedida, ame obedo nyaka Adaya dano me Bojkat, Yocia obedo timo gin ame nen atira i nyim Rwot; en obedo lubo kite a kwaro mere Daudi luŋ kun mom wiwira atata. I mwaka me apar wie aboro me loc abaka Yocia, en ocwao Capan wot Ajalia, ame obedo wot a Meculam, ame arannere i ot a Rwot, kun kobbe ni, “Wot naka baŋ Kilkia ame en alamdog adwoŋ, me en kwan wel jami luŋ ame jo okelo i ot a Rwot, ame okur doggola orao i baŋ jo, me mi limmono luŋ baŋ jo ame loo tic me ot a Rwot, me yiko kan ame oballe, ame gin jonnono obedo opac, kede jo ame gedo i kidi, me gin ti kede me wilo bao, kede wilo kiddi ame opao me yiko ot oballe. Ento myero kur bed penyogi kop i kom lim ame omio jo-naca pien gin jo ame genne i tic i lim ame omiogi.” Kilkia ame obedo alamdog adwoŋ te kobbi Capan aran abaka ni, “Atyeko nwoŋo buk cik i ot a Rwot.” En te miyo bukkono baŋ Capan, eka Capan te kwano. Capan, aran abaka te tero bukkono baŋ abaka, te kobbi abaka ni, “Omironi doŋ okwanyo lim luŋ ame onwoŋo tye i ot a Rwot, ote miyo daŋ oko baŋ jo ame loo tic me ot a Rwot.” En dok te kobbi abaka ni, “Kilkia alamdog adwoŋ omia bukkoro.” Capan te cako kwano bukkono kun abaka a winyo. Kare ame abaka owinyo kop ame okwano i buk me cik, en oyeyeco boŋŋi mere oko. Abaka te ciko Kilkia, alamdog adwoŋ, kede Akikam wot a Capan, kede Akobor wot a Mikaya, Capan aran kede Acaya amiro abaka, kun kobo ni, “Wot ipeny wunu Rwot pira, pi lwak kede pi lobo me Juda luŋ, pi kop i buk man ame onwoŋo-ni; pien akemo a Rwot kara doŋ olyeto meicel i komwa, pien kwariwa mom obedo lubo gin ame tye i buk man, kun otimo kite ame ocoo kede kop i komwa i buk man.” Mannono te miyo Kilkia alamdog adwoŋ, Akikam kede Akobor, Capan, Akaya wot baŋ adwarpiny a dako a nyine Kulda, dako a Calum wot a Tikiva, ame obedo wot a Karkac, agwok boŋŋi abaka, onwoŋo i kare-nono bedo i Jerucalem i kabedo moro i Jerucalem kuno tuŋ ocele. Gin owoto kuno ote wot kop i dako nono, en te kobbigi ni, “Rwot Obaŋa me Icrael okobo ni ikobbi wunu ŋat ame oorowu baŋa ni, Rwot okobo ni ebino keto can i kom kabedo man kede i kom jo luŋ ame bedo iye, pi cobo kop luŋ ame ocoo i buk cik ame abaka me Juda doŋ otyeko kwano. Pien gin doŋ okwera oko, ote bedo waŋo odok akur baŋ cal jogi, kun oroka kede me akemo maka i kom gin ame gin obedo tiyo i ciŋgi; mannono omio akemona doŋ bino lyeto agwa meicel i kom kabedo man ame mom dok romo kwe kadi acel. Aco baŋ abaka me Juda ame oorowu me bino penyo Rwot, wun ibino kobbe wunu ni, Rwot Obaŋa me Icrael okobo ni kop i kom kop ame iwinyo, pien i kare ame yin iwinyo kop ame rik akobo i kom kabedo man kede i kom jo luŋ ame bedo iye, ni bino doŋ nono acalo gin oceno, yin iru ŋut oko i cuny, ite mwolle-gu i nyim Rwot, dok ite yeyeco daŋ boŋŋi i komi oko; mannono omio Rwot daŋ owinyo kwacci, man kop a Rwot ikokome. Nen ba, an abino dwoki iwoto weo karacel i kwarini, ibino to ote yiki daŋ i kuc, waŋi mom bino neno twon tim arac ame abino kelo i kom kabedo man.” Gin doŋ te dwoko kop baŋ abaka. Abaka te cwayo kwena baŋ odoŋe luŋ me Juda kede me Jerucalem, gin luŋ ote cokere baŋe. Abaka te wot malo i ot a Rwot, kun woto i jo luŋ me Juda, kede jo luŋ ame bedo i Jerucalem, olamdog kede odwarpiny, jo luŋ adoŋo kede en atino, en te kwano kop luŋ ame tye i buk cik ame onwoŋo i ot a Rwot. En okwano kun lwak luŋ awinyo, Abaka te wot cuŋ i ŋet pagi te cikere i nyim Rwot ni ebino lubo Rwot, ebino mako cikere luŋ, kede kop me caden luŋ, kede icwillere daŋ luŋ. En ocikere ni ebino lubo magi luŋ i cunye ducu kede tipo mere luŋ, kun etimo jami ducu ame ocoo i buk cik. Jo luŋ te cikere karacel kede. Abaka te ciko Kilkia alamdog adwoŋ, kede olamdog ame tye i dul me aryo, kede okur doggola, me kelo jami tic luŋ ame tye i ot a Rwot ame rik otio pi Baal kede pi Acera, kede pi jami apapat ame tye i polo. En te wano jami-nono luŋ i ŋe Jerucalem, i luŋ ame tye i ŋet kulo me Kidron, te coko buru mere luŋ tero naka i Betel. En te cako ryemo olamdog ame oloc me Juda rik oketo me waŋo odok akur baŋ jogi i ka woro jogi ame tye i kiddi malo i ŋet pacci adoŋo luŋ me Juda, kede en ame omano Jerucalem ducu, karacel kede jo luŋ ame rik waŋo doko akur baŋ Baal, owor cen kede dwe, kede owor jami apapat ame tye i polo. En te kwanyo daŋ Acera oko i ot a Rwot, te tero oko i ŋe Jerucalem, naka i luŋ me Kidron, te wot waŋo oko kuno, te didino oko apwot calo kwoyo, te onyo kan ame oyiko iye kom jo ata. Dok te mumuko daŋ udi a jo ame timo tim me alaya pi woro jogi ame onwoŋo rik tye okubere i kom ot a Rwot, kan ame onwoŋo mon cweo iye boŋo pi Acera. En dok te kwanyo olamdog i boma ocele luŋ me Juda, te babalo daŋ ka waŋo odok akur baŋ jogi luŋ, cakere i Geba, tuno naka i Beerceba. En omumuko ka woro jogi me tim ame onwoŋo rik tye i dogcel me paco a Yocwa, ame rik en adwoŋ ame loo boma me Jerucalem, ame rik onwoŋo tye i dogcel me boma tuŋ cam. Ento olamdog luŋ ame onwoŋo yalo jogi i wi kiddi malo mom obino i nyim keno lam a Rwot ame onwoŋo tye i Jerucalem, ento gin obedo camo ogati ame mom orubo tobi i akina owotegi. En dok obabalo daŋ Topet ame rik tye i luŋ awobe a Kinnom, me ŋattoro kur dok med waŋo iye wode onyo nyare me yalo jok Molek. Abaka te daŋ mumuko cal aguragura luŋ ame yam obakki me Juda ojalo me woro ceŋ, ame onwoŋo rik tye i doggola me donyo i ot a Rwot, i ŋet icika a Natan-melek, lo moro ame rik tio i ot abaka, ame tye i dyekal a Rwot; owaŋo daŋ gadigadi luŋ ame obedo mea ceŋ. Keno lam luŋ ame rik tye i wi icika mogo ame tye malo i wi ot Akaj, ame rik obakki me Juda otio, kede keno lam ame rik Manace ocacano i dyekal aryo me ot a Rwot, en omumukogi luŋ, orereto piny, te ŋiŋinyo oko atino, te jobo kwoyo mere wot onyo i luŋ me Kidron. Abaka te babalo daŋ ka woro jogi luŋ ame rik tye tuŋ kide me Jerucalem, i tutuŋ to me kidi me bal ame rik Culeman abaka me Icrael ogero pi Aciterot, jok ipyeda a jo Cidon, kede pi Kemoc, jok ipyeda a jo Moab, kede pi Milkom, jok ipyeda a jo Ammon. En dok te puputo pagi luŋ me woro jogi kun ŋiŋido atino meicel, te toŋo yen ame ocibo i ka woro jok a dako ame olwoŋo ni Acera, te lunyo kelo cogo kom dano yido kakargi. En omuko daŋ keno lam ame rik onwoŋo tye i Betel, i ka woro jok ame rik Jeroboam wot a Nebat ogero ame rik mio jo Icrael opoto ibal. Yocia te didino kiddi ame rik onwoŋo ocano i keno lammaca oŋinyo apwot calo buru, te waŋo daŋ Acera iye oko. I kare ame Yocia olokere, oneno lyel apipim i wi kidi malo, te miyo wot kwanyo cogo kom jo luŋ ame i lyellaca luŋ, te bino waŋogi oko i wi keno lam babalo oko, kun cobo gin ame dano Obaŋa onwoŋo okobo, ame rik en okobo pire con. Yocia te dok penyo jo ni, “Kidi ame aneno ocuŋ igun malo i nyima ca rik ogero kara me po pi ŋa ba?” Jo me kannono te gamo ni, “Macinaca obedo lyel a dano Obaŋa ame rik obino kan kun oya i Juda te bino rabo pi gin ame yin tin imio ocobere-ni i kom keno lam me Betel.” Yocia te kobo ni, “Wek mannono bedi, ŋattoro kur kwany cogo kome.” Jo daŋ te weko cogo mere bedo, ŋattoro mom te gudo kadi acel, karacel kede cogo kom adwarpiny ame rik oya i Camaria. Yocia te kwanyo daŋ ka woro jogi luŋ ame tye i Camaria, i kabedo ame tye i wi kidi malo, kun oroko kede Rwot omio akemo make, En te neneko daŋ olamdog luŋ me ka woro jogi ame rik onwoŋo tye kuno i wi keno lam me woro jogi, eka te waŋo cogo kom jo i komgi. Abaka Yocia te doŋ dok cen i Jerucalem. Abaka te ciko lwak luŋ kun kobbigi ni, “Kwer wunu ecuban me Kato a Rwot Obaŋawu, kite ame ocoo kede i buk man me cikere.” Pien onwoŋo mom dok rik okwero kodi ecubannono kadi acel cakere i kare oŋolkop ame obedo ŋolli jo Icrael kop, akadi naka i kare obakki me Icrael, kede me obakki me Juda; Cite i mwaka me apar wie aboro me loc a Yocia en ame dok ote kwero iye ecuban me Kato a Rwot i Jerucalem. Medo i kom mannono, Yocia oryemo daŋ okor tipo oko, kede emuroko, terapim, cal jogi ame opao apaa, karacel kede timmoro luŋ me ipyeda ame onwoŋo timere i Juda kede i Jerucalem; mannono en otimo me wek kop ame ocoo i buk ame Kilkia alamdog onwoŋo i ot a Rwot mok kite ame ocoo kede i bukkaca. Mom tye abaka moro ame oporo kede i akina obakki luŋ ame otelo nyime. Mom tye moro i akinagi ame olokere baŋ Rwot i cunye ducu, kede tipo mere ducu, kede teko mere ducu kun lubo cik a Muca luŋ calo en; dok poro kede. Kadi bed amannono, twon akemo a Rwot ame onwoŋo doŋ olyeto agwa meicel-li mom gire odok cen kadi acel, akemo mere ame onwoŋo olyeto i kom jo Juda pien Manace onwoŋo rik obedo roke meicel. Rwot te kobo ni, “Abino miyo Juda daŋ rwenyo oko i waŋa kite ame akwanyo kede Icrael, abino daŋ boloboma man me Jerucalem oko ame rik ayero, karacel kede ot ame rik akobo pire ni bino bedo me wora.” Kop i kom Yocia odoŋŋere ducu, ginnoro luŋ ame yam en otio ame mom ocoo kan, gin luŋ tye ocoo i buk me Tekwaro ame tito kop i kom oloc me Juda, I kare mere en ame Parao Neko, abaka me Miciri, owoto kede baŋ abaka me Acuria naka i dog kulo me Efurate, Abaka Yocia rik te wot me wot rwatte kede; cite i kare ame Parao Neko onene, oneke oko i Megido. Omiro mere te tiŋo kome i Megido, kun otino i gadigadi ote tero i Jerucalem, ote wot yiko kome i lyellere en ikome. Lwak te yero Yekoakaj ame obedo wode en Yocia ote wirre kede moo me bedo abakagi. En doŋ te leyo kaka pappere. Yekoakaj ocako loc kun mwaka me dittere doŋ oromo pyeraryo wie adek, eka te bedo loc i Jerucalem pi dwete adek keken. Nyiŋ tottere Kamutal, ame obedo nyaka a Jeremia me Libna. Yekoakaj obedo timo gin ame nen arac i nyim Rwot, kun lubo kite tim luŋ ame yam kwari mere obedo timo. Parao Neko rik te tweye kede jegere i Ribla i lobo me Kamat, me en kur dok bed loc i Jerucalem en te ŋolo cul me ryal ame pekkere romo ratili tutumia abiro, mia abic kede me jabu ame pekkere romo ratili pyerabiro wie abic. Parao Neko te keto Eliakim wot a Yocia bedo abaka kun leo kaka pappere Yocia, eka te loko nyiŋe oko ni Yekoyakim. Ento Yekoakaj en te tero oko naka i Miciri, te daŋ wot to kuno, Yekoyakim te miyo ryal kede jabu ame oŋolo baŋ Parao, kun onwoŋo orao i baŋ jo me lobo mere kite ame Parao ociko. En orao ryal kede jabu i baŋ jo ame bedo i lobonono, kun ŋat acel acel culo wel ame oŋolle me amia baŋ Neko. Yekoyakim ocako loc ame mwaka me dittere oromo pyeraryo wie abic, en te bedo loc i Jerucalem pi mwakki apar wie acel. Nyiŋ tottere Jebida, ame obedo nyaka a Pedaya me Ruma. En obedo timo gin ame nen arac i nyim Rwot, kun lubo kite tim luŋ ame kwari mere obedo timo. I kare mere en Yekoyakim en ame rik Nebukadnejar, abaka me Babulon, obino kede i kom Juda, eka Yekoyakim te doko amiro mere pi mwakki adek; i ŋe mannono Yekoyakim te jem oko i kome. Rwot te cwayo lwak mony a jo Kaldaya me bino lweny i kom Juda, kede mony a jo Curia, kede mony a jo Moab, kede mony a jo Ammon; Rwot ocwao mony magi luŋ i komgi me bino jwerogi oko luŋ kite ame rik en omio omiro mere odwarpiny okobo. Ateni mony man obino i kom Juda pi cik a Rwot, me miyo waŋgi rwenyo oko i nyime pi bal a Manace, kun lubo kite bal luŋ ame Manace rik obedo timo, dok daŋ pi remo a jo a mom i bal ame en obedo onyo nono; pien en omio remo a jo a mom i bal oony atek meicel i Jerucalem luŋ ame Rwot onwoŋo mom twero timo kica iye. Kop i kom Yekoyakim odoŋŋere ducu, kede ginnoro luŋ ame en rik otimo ame mom ocoo kan, gin luŋ tye ocoo i buk me Tekwaro ame tito kop i kom oloc me Juda. Yekoyakim oto te wot weo karacel i kwari mere. Wode Yekoyakin en ame te leyo kakare. Abaka me Miciri mom dok omedo ya i lobo mere, pien abaka me Babulon onwoŋo doŋ otyeko mayo lobo luŋ ame rik onwoŋo tye i ciŋe, cakere i luŋ me Miciri tuno naka i kulo Eufrate. Yekoyakin ocako loc kun mwaka me dittere oromo apar wie aboro, en te bedo loc i Jerucalem pi dwete adek keken. Nyiŋ tottere Nekocita ame obedo nyaka Elnatan me Jerucalem. En obedo timo gin ame nen arac i nyim Rwot, kun lubo kite tim luŋ ame pappere onwoŋo obedo timo. I kare-nono omiro a Nebukadnejar, abaka me Babulon, obino iye i Jerucalem, eka monnyere te guro boma me Jerucalem oko. Abaka Nebukadnejar me Babulon owoto i Jerucalem i kare ame omiro mere ogure oko, Yekoyakin te ye miye gire kene i ciŋ abaka me Babulon; en kede tottere, kede omiro mere, rwode mere, kede odoŋe ame loo paco mere. Abaka me Babulon te tere oko acalo opii i mwaka me aboro me loccere, te tero daŋ lim luŋ ame onwoŋo tye i ot a Rwot, kede en ame onwoŋo tye i ot kanolim abaka, eka te totoŋo jami ame onwoŋo rik otio i jabu a rik tye i ot a Rwot, oŋido luŋ atino, jami luŋ ame rik Culeman, abaka me Icrael otimo kite ame rik Rwot okobo kede. Otero daŋ luŋ i Jerucalem iyi opii, anaka rwode luŋ, twoni jo atek i lweny ducu; en oyako jo ame romo tutumia apar, kun yako anaka odoŋe me tic apapat, anaka otet-gu ducu. Dano moro mom odoŋ kadi acel, kono ka jo ame can doŋ onwoŋo orido okato kare en ame odoŋ i lobo-nono. En te tero jo magi oko i opii i Babulon: abaka Yekoyakin, tottere, mon abaka, odoŋe abaka ame onwoŋo loo tic apapat, kede rwode ame rik jo me lobo mere; okwanyogi luŋ i Jerucalem te terogi i Babulon. Lwak opii apol ata ame abaka me Babulon otero tye iye twoni jo atek meicel i lweny ame romo tutumia abiro, kede acel, kun gin luŋ obedo jo ame doŋ oteggo ame romo lweny. Abaka me Babulon te dok keto Matania omina a Yekoyakin me bedo abaka, eka te daŋ loko nyiŋe oko ni Jedekia. Jedekia ocako loc ame mwaka me dittere oromo pyeraryo wie acel, en te bedo loc i Jerucalem pi mwakki apar wie acel. Nyiŋ tottere Kamutal, nyaka Jeremia me Libna. En obedo timo gin ame nen arac i nyim Rwot, kun lubo ginnoro luŋ ame Yekoyakin obedo timo. Pien akemo omako Rwot omio otuno kan ame en doŋ mom romo kanyo, Rwot te bolo Jerucalem kede Juda oko tene, kun kwanyogi oko i nyime. Abaka Jedekia rik te cako jem oko i kom abaka me Babulon. I mwaka me aboŋwen me loccere, i dwe me apar, i nino dwe apar, en ame Nebukadnejar abaka me Babulon obino iye ikom Jerucalem, kun bino karacel i monnyere luŋ, te bino guro Jerucalem oko; ote daŋ toro lobo guro oko irit. Boma te bedo ame oguro kittono naka i mwaka me apar wie acel me loc abaka Jedekia. I nino dwe aboŋwen me dwe me aŋwen onwoŋo kec doŋ orido jo atek meicel ame cam mom doŋ romo nen pi jo ame tye i boma. Jo te muko apama cel me boma oko, eka abaka kede monnyere te lwi ciro oko dyewor, kun obeo i dogcel ame tye i akina cel aryo me boma, ame tye i ŋet poto abaka, kadi bed rik jo Kaldaya onwoŋo oguro boma oko. Gin te wot lubo yo ame dok tutuŋ Araba. Cite mony a jo Kaldaya rik te ryemo yo abaka, ote bino make i bar me Jeriko twal, monnyere te ket weke kene. Mony me Kaldaya te make kele naka baŋ abaka me Babulon i Ribla, kan ame ote ŋolle iye kop. Gin te cako neko awobe mere i nyime kun en aneno kede waŋe, ote lokere i kome woto waŋe oko, ote tweye kede jegere tere i Babulon. I dwe me abic me nino dwe abiro, ame obedo mwaka me apar wie aboŋwen me loc a Nebukadnejar, abaka me Babulon, i nino-nono Nabujaradan, adwoŋ ame loo jo ame gwoko abaka me Babulon, owoto i Jerucalem. En te waŋo ot a Rwot oko karacel kede ot abaka, kede udi luŋ ame onwoŋo tye i Jerucalem; en owaŋo udi adoŋo luŋ kede mac. Mony a jo Kaldaya luŋ ame rik onwoŋo tye baŋ adwoŋ a jo ame gwoko abaka, gin omuko apama cel me Jerucalem oko. Nebujaradan, adwoŋ ame loo jo ame gwoko abaka te tero jo luŋ ame onwoŋo rik oweko i Jerucalem, medo kede jo ame rik okwero abaka me Babulon, karacel kede lwak ocele luŋ, gin luŋ oterogi oko acalo opii. Cite en rik te weko jo mogo ame ocan doŋ kuno, me gin bed jo ame gwoko poto olok kede opur i kweri dyan. Jo Kaldaya rik te tuturo pagi aryo luŋ me mola ame rik onwoŋo tye i ot a Rwot, kede gadigadi atitino, kede dero pii me mola ame rik tye i ot a Rwot, gin oturo ote ŋinyo atino, ote tero i Babulon. Gin otero tako jobo buru apol, atok buru, makac, tako me waŋo odok akur, karacel kede jami luŋ ame onwoŋo otio i mola ame rik otio kedgi i ot a Rwot, kede weer me lodi mac, kede becen. En otero jami luŋ me jabu acalo jabu, kede jami luŋ me ryal en otero acalo ryal. Aco kop a mako pagi aryo, kede nam acel, kede gadigadi atitino ame rik Culeman otio me ot a Rwot, mola ame odonyo i komgi dwoŋ meicel ame pekkere mom romo pimmere. Pagi acel acel borrere tye futi pyeraryo wie abiro. I wie malo onwoŋo oketo iye tok me mola ame borrere romo futi anwen kede nucu. I kom tok ote dok keto iye boo kede cal okwer pomegranat, kun gin luŋ otio i mola oguro tok dyere. Pagi me aryo daŋ onwoŋo rom aroma kede awottere, tye daŋ i tokkere kede bwo mere me mola. Adwoŋ ame loo jo ame gwoko abaka otero daŋ Ceraya, ame onwoŋo obedo alamdog, kede alube Jepania, kede okur doggola me ot a Rwot adek. Dok te tero daŋ adwoŋ ame onwoŋo loo mony i dye boma karacel kede jo abic ame obedo omemba me cokere abaka ame rik onwoŋo tye i boma; kede aran adwoŋ me mony ame rik obedo ŋat ame coko jo pi lweny; kede jo pyerabicel ame obedo jo me lobonono ame gin onwoŋo tye i boma. Nebujaradan, adwoŋ ame loo jo ame gwoko abaka, omakogi te terogi naka i Ribla baŋ abaka me Babulon. Abaka me Babulon te nekogi oko luŋ i Ribla i lobo me Kamat. Mannono en kite ame rik okwanyo kede jo Juda i lobogi ote terogi iyi opii. Nebukadnejar, abaka me Babulon rik te keto Gedalia wot Akikam, ame obedo wot a Capan me loyo jo odoŋ i lobo me Juda, jo ame rik en oweko kuno. Kare ame otel wi mony ame tye i kabedo apapat i lobo me Juda luŋ owinyo ni abaka me Babulon otyeko keto Gedalia me bedo aloc, gin obino baŋ Gedalia karacel i jo megi magi i Mijipa: Icimael, wot a Netania, Yokanan wot a Karea, Ceraya wot a Tankumet, dano me Netopa, kede Jaajania wot a Maaka. Gedalia te kwoŋ i nyimgi kede i nyim jogi, kun kobo ni, “Kur ibed wunu kede lworo pi odoŋe ame loo tic ame obedo jo Kaldaya; wun myero ibed wunu i lobo man kun itio wunu pi abaka me Babulon, ibino bedo giwu aber aboŋo peko moro.” Cite i dwe me abiro, Icimael wot a Netania, ame obedo wot a Elicama ame en dano acel me doggola aloc obino i jo, apar te bino cako lweny i kom Gedalia, ote daŋ neko oko, kun oneko Ojudaya kede jo Kaldaya ame onwoŋo rik tye baŋe i Mijipa. Jo luŋ doŋ te ya wot oko i Miciri pi lworo jo me Kaldaya; jo atino kede en adoŋo luŋ owoto oko anaka odoŋe ame telo wi mony. I mwaka me pyeradek wie abiro me bedo a Yekoyakin, abaka me Juda iyi opii i Babulon, i dwe me apar wie aryo, nino dwe pyeraryo wie abiro, en ame Evil-merodak, abaka me Babulon otimo iye kica baŋ Yekoyakin abaka me Juda, te gonyo oko i buc, i mwaka ame en: Evil-merodak ogeo iye loc. En te bedo kop i kica meicel baŋ Yekoyakin, omie twon kommoro adwoŋ meicel ame loo kom obakki luŋ ame rik onwoŋo tye baŋe i Babulon. En omio Yekoyakin ogonyo boŋo me buc oko i kome. En rik te bedo cam nisno i nino karacel abaka pi kare me kwo mere luŋ. Kop a mako ginnoro me konyere mere, abaka rik te bedo miye gi-konyere mere ducu naka ka kwo mere otum. Adam obedo papa a Ceji, Ceji obedo papa a Enoci, Enoci obedo papa a Kenan, Kenan obedo papa a Maalalel, Maalalel obedo papa a Jared, Jared obedo papa a Enoka, ame obedo papa a Metucela, Metucela ame obedo papa a Lameki, ame obedo papa a Nua, Nua onwoŋo tye awobe adek: Cem, Kam kede Yafeci. Awobe a Yafeci obedo Gomer, Magog, Madai, Javan, Tubal, Mecek kede Tirac, Awobe a Gomer obedo: Acikenaj Ripa kede Togarma. Awobe a Javan obedo: Elica, Tarcic, Kittim, kede Dodanim. Awobe a Kam obedo Kuc, Miciri, Put, kede Kanaan, Awobe a Kuc obedo: Seba, Kavila, Cabta, Raama, kede Cabteka. Awobe a Raam obedo: Ceba kede Dedan, Kuc rik te bedo i wode ame nyiŋe Nimolodi, ame en rik dano ame ogeo bedo twon lo moro atek me wi lobo. Miciri te nywalo awobe magi Lud, Anam Lekab, Naptuk, Patruc, Kacluk kede Kaptor (man gin jo ame jo Piriciti oya i komgi.). Kanaan te nywalo awo be magl: Cidon obedo atinnere me kao, Ket te lube, kede Jebuc, Amor kede Girgac, Kivi, Arki, Cin, Arvad, Cemar, kede Kemat (itekere awobeni rikk daŋ olwoŋogi kede nyiŋgi-nono.) Awobe a Cem te bedo Elam, Acur, Arpakcad, Lud, Aram, Kul, Geter, kede Mecek (awobeni daŋ obedo kwaro a jo ame olwoŋo daŋ i nyiŋgi-nono) Arpakcad te nywalo Cela papa Eber, Eber te nywalo awboe aryo: acel nyiŋe Peleg (pien i kare mere jo i wi lobo onwoŋo opokere), nyiŋ ominnere te bedo Yokotani. Ikwae a Yokotani te bedo jo Almodad, Celep, Kacarmavet, Yera, Adoram, Ujal, Dikla, Obal, Abimael, Ceba, Opir, Kavila, kede jo Yobab. Ikwae a Cem tuno kede i kom Abram onwoŋo tye kit man: Cem, Arpakcad, Cela, Eber, Peleg, Reu, Cerug, Nakor, Tera, Abram ame daŋ olwoŋo ni Iburaim. Iburaim onwoŋo tye kede awobe aryo: Icaka kede Icmael. Awobe Icmael rik te doko odoŋ me wi iekere apapat apar wie aryo: Nebayot ame obedo wode me kao, kede Kedar, Adbeel, Mibcam, Micima, Duma, Macca, Kadad, Tema, Jetur, Napic, kede Kedema, Iburaim daŋ onwoŋo tye kede dako aŋeca ocele ame, te nywalle awobe abicel, aŋeca-nono nyiŋe onwoŋo Ketula: Jimran, Yokcan, Medan, Midian, Icibak, kede Cua, Yokocan te nywalo awo be aryo: Ceba kede Dedan, Midian onwoŋo tye awobe abic: Epa, Eber, Kanok, Abida, kede Eldaa. Icaka wot Iburaim onwoŋo tye awobe aryo: Ecau kede Icrael. Awobe Ecau ene: Elifaji, Rewel, Jeuc, Jalam kede Kora, Elifaji obedo kwaro a jo me itekere magi: Teman, Omar, Jepo, Gatam, Kenaj, Timna, kede Amalek. Rewel en kwaro a jo me Itekere magl: Nakat, Jera, Camma, kede Mijja. Ceir rik onywalo awobe magi: Lotan, Cobal, Jibeon, Ana, Dicon, Ejer kede Dican, Lotan onwoŋo tye awobe aryo: Kori kede Komam, Lotan onwoŋo tye kede aminnere a nyiŋ Timna, Cobal onwoŋo onywalo awobe magi: Alvan, Manakat, Ebal, Cepo, kede Onam, Jibeon te nywalo awo be aryo: Aiya kede Ana, Ana obedo papa a Dicon, Dicon te nywalo awobe magi: Kamran, Eciban, Itran, kede Keran, Ecer te bedo papa awobe magi: Bilan, Javan, Jakan, Awobe Dican te bedo Uji kede Aran. Magi gin obakki ame olo lo bo me Edom con i kare ame jo Icrael mom ru obedo kede abaka moro: Bela wot a Beor, ame nyiŋ boma mere adwoŋ onwoŋo olwoŋo ni Dinkaba, Kare ame Bela oto, Jobab wot a Jera me Bojra oleo tyene. Kare ame Jobab oto, Kucam ame oya i lobo a jo Teman oleo tyene. Kare ame Kucam oto, Kadad wot a Bedad, a rik olwenyo te loyo jo Midian ame tye i Moab, en te leyo tyene; nyiŋ boma mere adwoŋ rik olwoŋo ni Avit. Kare ame Kadad oto, Camla me Macireka oleo kaka re, te doko rwot kakare. Kare ame Camla oto, Caul me Rekobat ame tye i ŋet kulo me Epurate, odoko rwot kakare. Kare ame Caulo oto, Baalkanan wot a Akbor oleo kakare, odoko rwot. Kare ame Baal-kanan oto, Kadad oleo kakare, odoko rwot, nyiŋ boma mere adwoŋ onwoŋo olwoŋo ni Pai dako mere onwoŋo nyiŋe Meketabel, ame obedo nyaka Matred, ame nyaka Mejaab. Kare ame Kadad oto, rwode magi en ate loyo lobo me Edom: Timna, Alwa, Yeter, Olibama, Ela, Pinon, Kenaj, Teman, Mibjar, Magdiel, kede Iram. Icrael rik tye kede awo be mere apar wie aryo; Reuben, Cimeon, Levi, Juda, Icakar, Jabulon, Dan, Yucepu, Benjamin, Naputali, Gad kede Acer. Juda onwoŋo rik tye kede awobe mere luŋ abic: Dako mere Bateua, nyako me Kanaan onywalo awobe adek: Er, Onam kede Cela, Awobi mere adwoŋ Er onwoŋo obedo atin a kite rac, omio Rwot te neke oko, Ci-wode Tamali te nywalle awobe aryo: Perej kede Jera. Perej onwoŋo tye awobe aryo; Kejeron kede Kamul. Ominnere Jera rik te nywalo awo be abic; Jimri, Etan, Keman, Kalkol, kede Dara, Wot a Karmi obedo Akar, ame obedo dano obin okelo peko i kom jo Icrael pi turo cik me gin ame rik onwoŋo doŋ otyeko jalo baŋ Rwot; eka wot Etan te bedo Ajalia. Kejeron rik onwoŋo onywalo awobe adek: Jerameel, Ram, kede Kelubai, Jo me ot a Ram, cakere i kome tuno kede i kom Ye ee te bedo kit man: Ram onywalo Amminadab, Amminadab onywalo Nacon, ame obedo twon lo moro a neye meicel i kom atekere a Juda, Nacon te nywalo Calma, Calma te nywalo Boaj, Boaj onywalo Obed, Obed te nywalo Yece, Yece onywalo iti no awo be abiro: Eliab obedo wode me kao, eka joni te lube, Abinadab, Camma, Netanel, Raddai, Ojem, kede Daudi. En rik onywalo daŋ anyira aryo: Jeruja kede Abigail. Jeruja nyaka a Yece te nywalo awobe adek: Abicai, Joab, kede Acael. Eka aminnere Abigail te nywalo Amaca, ame pappere obedo dano me Icrael a nyiŋe Jeter. Kaleb wot a Kejeron rik te nyomo Ajuba, eka gin te nywalo nyako a nyiŋe Jeriot. Itinogi awobe te bedo: Jeeer, Cobab, kede Ardon. Kare ame Ajuba oto, Kaleb te dok nyomo Eprat, eka gin te nywalo awobi ame nyiŋe Kur. Kur te nywalo Uri, eka Uri te nywalo Bejalel. I kare ame Kejeron doŋ oromo mwaka pyerabicel nono, en te nyomo nyaka a Makir, amina a Gilead. Nyannono te nywalle awobi ame nyiŋe Cegub, Cegub te nywalo Jair, ame rik onwoŋo obedo i boma mege ame romo pyeraryo wie adek i lobo me Gilead. Ento Gecur kede Aram rik te mayo boma ame romo pyerabicel twal i kuno kun me Jair kede Kenat daŋ tye iye, karacel kede boma ocele ame onwoŋo tye i ŋetgi. Jo luŋ ame onwoŋo rik bedo kuno onwoŋo rik obedo ikwae a Makir, ame rik obedo papa a Gilead, I kare ame Kejeron doŋ otyeko to, wode Kaleb te lako dako mere Eprat, eka te nywalo awobi ame nyiŋe Acur, ame en nat a rik obin onwoŋo boma me Tekoa. Jerameel, wot a Kejeron me kao rik te nywalo itino awobe kany: Wode me kao nyiije Ram, eka jo ocele te bedo: Buna, Orem, Ojem, kede Akija. Jerameel rik daŋ tye i dako ocele ame nyiŋe Atara, ame obedo toto Onamo Ram wode me kao rik onywalo itino awobe adek: Maaj, Jamin, kede Eker, On am onywalo itino awobe aryo: Cammai kede Juda, eka Cammai daŋ te nywalo awobe aryo: Nadab kede Abicur. Abicur te nyomo dako a nyiŋe Abikail, ame te nywalo Aban kede Molid, Nadab ominna a Abicur te nywalo awobe aryo: Celed kede Appaim, ento Celed te to ame mom ru onywalo atinnoro. Appaim te nywalo Ici, Ici te nywalo Cecan, eka Cecan te nywalo Alai. Jada ominna a Cammai te nywalo awobe aryo: Jeter kede Yonatan, ento Jeter te to ame mom ru onywalo atinnoro, Yonatan te nywalo awobe aryo; Pelet kede Jaja. Joni luŋ obedo ikwae a Jerameel. Cecan rik te nywalo ka anyira keken. En onwoŋo tye kede amiro mere ame obedo dano me Miciri, ame nyiŋe Jara, ame en rik te miyo nyomo nyare acel. Gin te nywalo atin awobi ame nyiŋe Attai. Attai te nywalo Nacan, Nacan te nywalo Jabad, Jabad te nywalo Eplal, eka Eplal te nywalo Obed. Obed te nywalo Yeku, Yeki, te nywalo Ajaria, Ajaria te nywalo Kalej, Kalej te nywalo Eleaca, Eleaca te nywalo Cicmai, Cicmai te nywalo Callum, Callum te nywalo Jekamia, eka Jekamia te nywalo Elicama. Wot a Kaleb me kao, a nyiŋe Meca, ame obedo ominna a Jerameel, rik onywalo Jip, Jip te nywalo Mareca ame obedo papa a Kebron, Kebron te nywalo itino awobe aŋwen: Kora, Tappua, Rekem, kede Cema, Cema onywalo Rakam ame obedo papa a Jorkeam, Bekem ominna a Cema te nywalo Cammai, Cammai ame obedo papa a Maon, Maon ame obedo papa Betjur. Kaleb rik onwoŋo daŋ tye i dako aŋeca nyiŋe Epa, ame rik daŋ te nywalle awobe ocele adek: Karan, Moja kede Gajej, Karan te nywalo wode ame nyiŋe daŋ Gajej. Lo a nyiŋe Jadai rik te nywalo itino awo be abicel: Regem, Jotam, Gecen, Pelet, Epa, kede Caap. Kaleb rik daŋ dok tye i dako aŋeca ocele ame nyiŋe Maaka, ame te nywale awobe ocele aryo: Caap papa a Madmanna, kede Ceva papa a Makbena kede Gibea, Medo i kom itino magi, Kaleb onwoŋo daŋ tye i nyare ame nyiŋe Akeca. Jo-nu luŋ obedo ikwae a Kaleb. Awobi a Kaleb me kao ame dako mere Eprat onywalo obedo Kur. Kur te nywalo Cobal ame obedo papa a Kiriat-jearim, kede Calma papa a Beterekem, kede Kareb papa a Betgader. Cobal papa a Kiriat-jearim onwoŋo daŋ tye kede awobe mere ocele, ame nat acel i akinagi obedo Karoe, ame nucu a jo Menuot oya iye, jo me doggola a Kiriat-jearim ducu obedo jo Itri, jo Put, jo Cumat kede jo Micra. Jo Jora kede jo Ecitoal daŋ oya i komjo man. Calma papa a Beterekem obedo kwaro a jo Netopa, Atrot-bet-joab kede nucu a jo Manakat, kede jo Kora. Jo me doggola a jo ame odiro i tic me araŋ ame obedo boma me Jabej ene: jo Tira, jo Cimea kede jo Cuka. Magi-nono gin jo Keni ame oya i kom Kammat, papa a jo me ot a Rekab. Magi gin itino ame Daudi onywalo i Kebron kun lubere i ditogi: Wode me kao obedo Amunon, ame tottere obedo Akinoam me Jejreel; nat olube te bedo Daniel, ame tottere obedo Abigail me Karmel; me adekkere te bedo Abicalom, ame tottere obedo Maaka nyaka Talmai, abaka me Gecur; me Aŋwennere te bedo Adonia, ame tottere obedo Kagit; me abiccere te bedo Cepatia, ame tottere obedo Abital; me abiccellere te bedo Itream, ame tottere obedo Egla. Itino awo be abiro-ni luŋ Daudi onywalogi i Kebron, kan ame en okwono loc iye pi mwakki abiro kede dwete kanyape. Icennere en te bedo aloc i Jerucalem pi mwakki pyeradek wie adek. En rik te medo nywalo itino apol kuno. Dako mere Batceba ame obedo nyaka Ammiel rik te nywalle itino magi kuno: Cimea, Cobab, Natan, kede Culeman. Man daŋ dok nyiŋ awobe mere aboŋwen ocele: Ibkar, Elicama, Elipelet, Noga, Nepeg, Yapia, Elicama, Eliada, kede Elipelet. Magi gin itino ame mom okwano iye itino a mon aŋeca. En daŋ rik tye i nyare ame nyiŋe Tamali. Ikwae a Culeman ene: Rekoboam Abija, Aca, Jekocapat, Joram, Akajia: Joac, Amajia, Ujjia, Jotam, Akaj, Kejekia, Manace, Amon, kede Jocia. Jocia rik tye kede awobe mere aŋwen: Jonanan, Jekoiakim, Jedekia, kede Callum, Jekoiakim onwoŋo tye kede awobe aryo: Jekonia kede Jedekia. Magi en itino a Jekonia ame rik obin otere iyi opii i Babulon En rik onwoŋo tye kede itino abiro: Cealtiel Malciram, Pedaia, Cenajjar, Jekamia: Kocama, kede Nedabia, Pedaia onwoŋo tye kede awobe aryo: Jerubbabel kede Cimei. Jerubbabel daŋ doŋ te nywalo itino aryo: Mecullam kede Kanania, kede nyare acel ame nyiŋe Celomit. En onwoŋo daŋ dok tye itmo awobe ocele ame romo abic: Kacuba, Okel, Berecia, Kacadia kede Jucab Keced. Kanania onwoŋo tye kede awobe aryo: Pelatia kede Jecaya. Jecaya te bedo papa a Repaya ame rik obedo papa a Arnan, ame obedo papa Obadia, Obadia papa a Cekania Cekania onwoŋo tye kede wode acel ame nyiŋe Cemaya, kede ikwae abic: Kattuc, Igal, Baria, Nearia, kede Capat. Nearia rik te nywalo itino awobe adek: Elioenai, Kijkia, kede Ajrikam. Elioenai onwoŋo tye kede itmo awobe abiro: Kodavia Eliacib Pelaya, Akkub, Jokanan Delaya kede Anani. Magi gin ikwae a Juda: Perej, Kejeron, Karmi, Kur, kede Cobal. Cobal te bedo papa a Reaya, ame obedo papa a Jakat, Jakat ame obedo papa a Akumai kede Lakad, ame gin obedo kwaro a jo ame onwoŋo bedo i Jora, Awobe Etam ene: Jejreel, Icima, kede Idbac, nyiŋ amingi onwoŋo Kajjelelponi. Panuel rik te bedo papa a Gedor, eka Ejer te bedo papa a Kuca, Magi en ame rik obedo itino a Kur, ame obedo atin a Eprata me kao ame obedo dako a Beterekem. Acur ame obedo papa a Tekoa onwoŋo tye kede mon aryo: Kela kede Naara. Dako mere Naara onwoŋo onywalo itino awobe: Akujjam, Keper, Temeni, kede Kaakactari. Dako mere Kela te nywalo awobe adek: Jeret, Ijar, kede Etnan. Koj te bedo papa Anub kede: Jobeba, ame gin obedo kwari a jo ame oya i kom Akarel wot a Karum. Rik onwoŋo tye lo moro ame nyiŋe Jabej, ame en rik dano ame oworo meicel i doggolagi. Tottere onwoŋo rik ocake nyiŋe ni Jabej pien nywalle rik obedo atek meicel. Jabej rik te kwayo Obaŋa me Icrael ni, Mia gum, ama Obaŋa, imia abed i lobo alac. Bed keda kun igwoka i ginnoro luŋ ame twero miya rem. Obaŋa daŋ te miye gin ame ekwao-nono. Kaleb ame onwoŋo obedo ominna Cuka, rik tye i wode acel ame nyiŋe Makir. Makir rik te nywalo Ecton, ame te nywalo itino awobe adek: Betrapa, Pacea, kede Tekinna, ame obedo papa a Nakac. Ikwae a jo man obedo i Reka, Kenaj te nywalo awobe aryo: Otiniel, kede Ceraya, Otiniel daŋ te nywalo awobe aryo: Katat kede Meonotai. Meonotai rik te bedo papa a Opra, Ceraya papa a Joab papa a Geracim, ame onwoŋo olwoŋo kittono pien gin rik obedo jo ame odiro meicel. Kaleb wot a Jepunne rik tye kede rtmo awobe adek: Iru, Ela, kede Naam, Ela rik te bedo papa a Kenaj, Eka lo ame olwoŋo ni Jekallelel rik te bedo kede iti no awo be aŋwen: Jip, Jipa, Tiria, kede Acarel. Ejra daŋ rik te bedo itino awobe awŋen: Jeter, Mered, Eper, kede Jalon, Mered te nyomo Bitia nyaka Parao abaka me Miciri eka gin te nywalo atin a nyako ame nyiŋe Miriam, kede awobe aryo Cammai kede Iciba, ame obedo papa a Ecitemoa. Mered rik daŋ dok te nyomo nyako ocele iyi itekere a Juda ame te nywalo itino awobe adek; Jered ame papa a Gedor, Keber ame obedo papa a Coco, kede Jekutiel ame obedo papa a Janoa. Lo a nyiŋe Kodia te nyomo aminna a Nakam ame rik te bedo papa a Garm dano me Keila, kede Maacat, dano me Ecitemoa, Eka lo ame olwoŋo ni Cimon rik te bedo awobe aŋwen: Amunon, Rinna, Benanan, kede Tilon, Ici te bedo itino awo be aryo: Jeket kede Benjoket. Cela rik obedo dano acel ame oya i akina awobe a Juda. Itino mere awobe rik tye iye Er, ame obedo papa a Leca; Laada papa a Mareca; ame gin obedo jo ame rik gin luŋ ocwe boŋo camanini, ame onwoŋo obedo i boma me Betacibea; kede Jokim, kede jo ame onwoŋo bedo i boma me Cojeba; kede Joac, kede Carap ame rik onyomo nyako me Moab, abaka te bedo kede i Beterekem. Jo man rik te bedo jo ame cweo gulu kun obedo karacel abaka acalo oticcere i boma me Netaim kede Gedera. Cimeon rik onywalo itino awobe abic: Nemuel, Jamin, Jarib, Jera kede Cau!. Caul te nywalo Callum, ame obedo papa a Miocam, ame obedo papa a Micma. Micma te nywalo Kammuel, ame obedo papa Jakur; Jakur ame obedo papa a Cimei, Cemei rik te nywalo awobe abicel kede anyira daŋ abicel, cite omego mere rik mom tye kede itino apol, omio jo me doggola mere daŋ mom te bedo apol bala jo me doggola a Juda. Jo man rik te bedo i boma magi: Beerceba, Molada, Kajarcual, Bila, Ejem, Tolad, Betul, Korma, Jiglak, Betmar cabot, Kajarcucim, Betbiri kede Caaraim, Gin daŋ dok obedo i kabedo ocele kany: Etam, Ain, Rimmon, Tocen, kede i Acan, karacel kede pacci luŋ ame onwoŋo tye i ŋetgi, Man en gin ame gin ogwoko ame mako kop me Tekwaro kede kabedo ame gin obedo iye. Man en nyiŋ odoŋ ame onwoŋo tye acalo otel me doggolagi Mecobab, Jamlek. Joca, wot a Amajia, Joel, Jeku wot a Jocibia, ame rik obedo wot Ceraya, ame obedo wot Aciel. Elioenai, Jaakoba, Jecokaya, Acaya, Adiel, Jocimiel, Benaya. Jija wot a Cipi, ame rik obedo wot a Allon. Allon wot Jedaya, wot a Cimri, kede Cimri wot a Cemaya. Jo me doggola magi rik te medde nya, omio gin te medde wot naka tutuŋ Gedar, ote wot mano Iurj ame tye tutuŋ kide luŋ pi moyo ka-kwatgi. Gin te nwoŋo ka kwayo romigi aber meicel kuno, kan ame lum onwoŋo olot iye atek, lobo mere lac, dok jo moro daŋ mom iye ame twero miyogi obedo kede ayela, Pien jo ame rik ogeo bedo kuno onwoŋo obedo jo me Kam. I kare abaka Kejekia, jo ame ocoo nyiŋgi malo-nu owoto i Gedar, te wot babalo kema kede udi a jo luŋ ame onwoŋo rik bedo kuno, Gin te wot ryemo jo ame rik bedo iye oko, gin doŋ ote bedo kuno, pien ka kwayo romigi onwoŋo lac meicel kuno, Jo ocele ame romo mia kany, ame obedo jo me itekere a Juda, te dok i megi tuturj piny me Edom naka i wi kidi me Ceir, kun jo magi en ame telogi: Pelatia, Nearia, Repaya kede Ujjiel, ame gin luŋ obedo itino a Ici, Gin te neko jo Amalek luij ame rik oriŋo te bwot, eka gin doŋ ote bedo gigi kuno naka atot tin. Magi gin ikwae a Reuben ame obedo atin kao Icrael. Ento pi timo tim me ipyeda me buto i cipappere, omio en orwenyo dittere oko me bedo atin kao, ote lunyo miyo dittere baŋ Lucepu, nyiŋe mom doŋ te donyo i buk me Tekwaro acalo atin kao, Kadi bed itekere a Juda obedo atek meicel ame aloc me Icrael luŋ te ya iye, cite dit me bedo atin kao obedo i wi Lucepu. Reuben ame obedo wot Icrael me kao rik tye kede awobe aŋwen: Kanok, Pallu, Kejeron kede Karmi. Aco awo be a Joel ene, Cemaya, ame wode Gog; Gog ame wode Cimei, Cimei ame wode Mika; Mika ame wode Reaya; Reaya ame wode Baal, Baal ame wode Beera. Abaka me Acuria ame nyiŋe Tiglat-pilecer rik obin omako Beera oko te tero oko iyi opii, kun onwoŋo en ame rik obedo atel a jo Reuben. Wati mere ame lubere i doggola i doggola i kare ame ocoo nyiŋ jo a Reuben piny, gin ene: Jeyel, Jekaria, Bela wot Ajaj, ame papa a Cema, ame oya i doggola a Joel. Atekere man rik obedo i Aroeor i lobo ame tye tutuŋ malo me Nebo kede Baal-meon. Gin rik onwoŋo tye kede lwak lim abup meicel i lobo Gilead, mannono omio gin obedo i lobo luŋ adok tutuŋ tim ame tye tutuŋ kide tuno kede naka i ŋet kulo Epurate. I kare a Caulo gin rik obedo lweny i kom jo Kagrit, ame gin te nekogi oko i lweny; eka gin te cako bedo i lobogi ame tye tutuŋ kide me Gilead. Ikwae a Gad rik obedo i lobo Bacan tuno kede naka i Caleka, kun otenne i jo Reuben. Joel en ame rik ogeo bedo adwoŋgi ame neye, te bedo doŋ i Bacan, Watigi ocele ame olubere i ot i ot ene: Maeulam, Ceba, Jorai, Jaean, Jia kede Eber. Jo man rik obedo ikwae Abikail, wota a Kuri, wot a Jaroa, wot a Gilead, wot a Micael, wot a Jeci, wot a Jado, wot a Buj, Aki wot Abdiel, akwar Guni, en rik atel me atekere man, Gin rik obedo i Gilead, kede i Bacan, i paco luŋ ame tye i ŋetgi kuno, kede i lobo luŋ ame onwoŋo obedo me kwayo limgi i Caron. Man en jo ame rik ocoo nyiŋgi i buk me nyiŋ kwari a jo Icrael i kare me loc abaka Yocam me Juda kede Jeroboam, abaka me Icrael. I kom atekere a Reuben, Gad, kede nucu me atekere Manace ame onwoŋo bedo tuŋ kide, onwoŋo rik tye iye twoni jo atek i lweny, ame opwonyo meicel i tic kede kwot, pala romo kede bayo atero, ame romo tutumia pyeraŋwen wie aŋwen, kede mia abiro kede pyerabicel nono, Gin rik te cako lweny i kom Jetur, Napic, kede Nodab, ame gin luŋ obedo jo me itekere a Kagri. Gin rik obedo jo ame geno Rwot, omio gin ocwao kwacgi baŋ Obaŋa me konyogi i lweny, Obaŋa daŋ te winyo kwacgi, te miyogi loyo jo-nono oko karacel kede jo ame onwoŋo rik oribere kedgi. Gin rik te yako jami magi i baŋ okworgi-nono, inaga ame romo tutumia pyerabic, rommi tutumia mia aryo kede pyerabic, kede kana tutumia aryo. Oyako daŋ cirikale ame romo tutumia mia acel, ote neko daŋ lwak jo apol meicel, pien monygi rik obedo mony a Rwot. Gin rik te bedo i lobo-nono tuno naka i kare ame oterogi kede iyi opii. Jo me Manace ame onwoŋo tye tutuŋ kide te bedo i lobo me Bacan, tuno kede i Baal-kermon, Cenir, kede i kidi me Kermon. Magi nyiŋ jo ame rik obedo odoŋe me atekere me doggola a kwarigi: Eper, Ici, Eliel, Ajriel, Jeremia, Odavia, kede Jadiel. Gin luŋ rik obedo twoni jo ame tek meicel i lweny, ame neye meicel i doggola a kwarigi. Ento jo rik te cako timo bal i kom Obaŋa a kwarogi, kun oweko wore oko ote lunyo woro obane a rok ocele ame obanagi onwoŋo oryemo oko i lobo-nono. Mannono te miyo Obaŋa tugo cuny Pul abaka me Acuria ame olwoŋo daŋ ni Tiglat-pilecer, terogi oko iyi opii. En otero atekere a Reuben, Gad kede atekere a Manace ame onwoŋo tye tuŋ kide, te terogi i Kala, Kabor, Kara, kede i kulo me Gojan, gin te bedo kuno tuno naka atot tin. Levi rik onwoŋo tye kede itino awobe adek: Gercon, Kokat kede Merari. Kokat rik te bedo itino awobe aŋwen; Amuram, Ijar, Kedron, kede Ujiel. Amuram rik te bedo awobe aryo: Aron kede Muca, karacel kede nyako ame nyiŋe Miriam. Aron te nywalo awobe aŋwen: Nadab, Abiku, Elejar kede Itamar. Ikwae Eleajar te bedo lubere kit man: Eleajar onywalo Finekaci, Finekaci te nywalo Abicua, Abicua te nywalo Bukki, Bukki te nywalo Uji, Uji te nywalo Jerakia, Jerakia te nywalo Merayo, Merayo te nywalo Amaria, Amaria te nywalo Akitub, Akitub te nywalo Jadok, Jadok te nywalo Akimaj, Akimaj te nywalo Ajaria, Ajaria te nywalo Yokanan, Yokanan te nywalo Ajaria, ame en nat a rik otio tic Obaŋa i ot Obaŋa ame Culeman ogero i Jerucalem, Ajaria te nywalo Amaria, Akitub, Akitub dok te nywalo Jadok, Jadok te nywalo Callum, Callum te nywalo Kilkia, Kilkia te nywalo Ajaria, Ajaria te nywalo Ceraya, Caraya te nywalo Yekojadak. Abaka Nebukadnejar rik te tero Yekojadak oko iyi opii karacel kede jo ocele me Juda kede Jerucalem, ame Rwot omie me atera iyi opii. Levi rik onwoŋo tye kede itino awo be adek: Gercon, Kokat kede Merari. Ŋat acel acel i akina awobe man rik tye kede itino awo be. Gercon rik obedo papa a Libni kede Cemei. Kokat te bedo papa a Amuram, Jjar, Kebron kede Ujie!. Merari te bedo papa a Makli kede Muci, Ikwae a Gercon ene: Gercom onywalo Libna, Libni te nywalo Jakat, Jakat te nywalo Jima, Jima te nywalo Joa, Joa te nywalo Ido, Ido, te nywalo Jera, Jera te nywalo Jeaterai. Ikwae a Kokat ene: Kokat onywalo Aminadab, Aminadab te nywalo Kora, Kora te nywalo Acir, Acir te nywalo Elkana, Elkana te nywalo Ebiacap. Ebiacap te nywalo Acir, Acir te nywalo Takat, Takat te nywalo Uriel, Uriel te nywalo Ujia, Ujia te nywalo Cau!. Ikwae Elkana: Elkana onywalo awobe aryo: Amacar kede Akimot, Akimot te nywalo Elkana, Elakana te nywalo Jopai, Jopai te nywalo Nakat, Nakat te nywalo Eliab, Eliab te nywalo Jekoram, Jeroram te nywalo Elkana. Camwiri rik onywalo awobe aryo: awobi adwoŋ nyiŋe Joel, eka en atidi te bedo Abija. Ikwae a Merari te bedo e ne: Merari onywalo Makli, Makli te nywalo Libni, Libni te nywalo Cemei, Cemei te nywalo Uja. Uja te nywalo Cimea, Cimea te nywalo Kagia, eka Kagia te nywalo Acaya. Magi gin jo ame Daudi rik oketo me loyo tic me wer i kare me woro i Jerucalem, i kare ame doŋ otyeko tero canduk me cik kuno. I kare ame Culeman mom ru ogero ot woro Obaŋa, gin rik obedo tiyo ticgi kun oleo alea i kema me rwatte, gin obedo tiyo ticgi kun olubo kite ame rik ocikogi kede. Magi gin jo ame obedo tiyo ticcono karacel kede awobegi: Jo ame oya i doggola a Kokat, gin ene: Keman wot a Joer, ame en rik atel wer, Joel wot a Camwiri, Camwiri wot Elkana, Elkana wot a Eliel, Eliel wot a Toa, Toa wot a Jup, Jup wot a Elkana, Elkana wot a Makat, Makat wot a Macai, Macai wot a Elkana, Elkana wot a Joel, Joel wot Ajaria, Ajaria wot a Jepania, Jepania wot a Takat, Takat wot Acir, Acir wot Ebiacap, Ebiacap wot a Kora, Kora wot Ijar, Ijar wot a Kokat, Kokat wot a Levi, eka Levi te bedo wot Icrael. Acap rik obedo atel wer i dul me aryo. Ikwae mere rik tye kit man: Acap obedo wot a Berekia, Berekia te bedo wot a Cimea, Cimea te bedo wot a Micael, Macael te bedo wot a Baceya, Baceya te bedo wot Malcija. Malcija wot Etini, Etini wot a Jera, Jera wot Adaya, Adaya wot Etan, Etan wot Jima, Jima wot a Cimei, Cimei wot a Jakat, Jakat wot a Gercon, Gercon wot a Levi. Etan ame oya iyi doggola a Merari rik te bedo atel wer i dul me adek. Ikwae onwoŋo tye kit man: Etan obedo wot a Kici, Kici wot a Abdi, Abdi wot a Malluk, Malluk wot a Kacabia, Kacabia wot Amajia, Amajia wot a Kilkia, Kilkia wot Amji, Amji wot a Bani, Bani wot a Cemer, Cemer wot a Makli, Makli wot a Muci, Muci wot a Merari, Merari wot a Levi. Omegogi ame obedo jo Levi rik daŋ opokkigi tic apapat i kema ame obedo ot me woro Obaŋa. Ento Aron kede awobe mere, gin en a rik mio mot awaŋa i wi keno lam, dok daŋ owano odok a ŋwece kur i wi keno lam, Gin rik oloo tic luŋ i kabedo Acil Meicel, kede mot ame omio me kwanyo bai i kom jo me Icrael, gin rik otio man luŋ kun olubo gin ame rik Muca amiro Obaŋa ocikogi kede. Awobe Aron ene: Aron onywalo Eleajar ame obedo papa a Finekaci, eka Finekaci te nywalo Abicua, Abicua te nywalo Bukki, Bukki te nywalo Uji, Uji te nywalo Jerakia, Jerakia te nywalo Merayot, Merayot te nywalo Amaria, Amaria te nywalo Akitub, Akitub te nywalo Jadok, eka Jadok te nywalo Akimaj. Man en lobo ame rik omio baŋ ikwae Aron kede kwir, ame opokkigi kun lubere i doggola i doggola. Jo me doggola a Kokat en ame rik ogeo, kun megi tye kit man, Gin rik omio lobo me Kebron ame onwoŋo tye i Juda, karacel kede bar me kwattere. Ento potti luŋ karacel kede pacci luŋ ame onwoŋo tye i ŋet bomagi-nono rik omio luŋ baŋ Kaleb wot a Jepunne. Itino Aron rik ote pokkigi lobo magi, ame obedo lobo me alara onek: Kebron kede bar me kwattere, Jattir kede bar me kwattere, Libna kede bar me kwattere, Ecitemoa kede bar me kwattere, Kilen kede bar me kwattere, Debir kede bar me kwattere, Acan kede bar me kwattere, kede Bet-cemec i bar me kwattere, I lobo a jo Benjamin rik daŋ ote miyogi iye boma magi kede bar me kwat iye: Geba kede bar me kwattere, Alemet kede bar me kwattere, karacel kede Anatot kede bar me kwattere. Man te miyo wel boma ame omiogi luŋ bedo apar wie adek, me bedo a jo me doggolagi luŋ. Aco jo me doggola a Kokat odonere te nwoŋo boma apar ame okwanyo i kwir i kom lobo a nucu atekere a Manace, Aco jo me doggola a Gercom rik ote miyogi boma apar wie adek ame okwanyo iyi akina lobo jo Icakar, Acer, Naputali kede i kom lobo a jo Manace ame tye i Bacan, Rik daŋ ote miyo boma apar wie aryo baŋ jo me doggola Merani, kun okwanyo i akina lobo a jo Reuben, Gad, kede Jabulon. Man en kit a rik jo Icrael omio kede jo Levi pacci me bedogi karacel kede bar me kwatgi ducu. Rik daŋ omiogi boma ocele i lobo a jo Juda, Cimeon, kede Benjamin, kun opokigi kede kwir, Man otimo i kom boma luŋ ame ocoo nyiŋgi malo. Jo me doggola a Kokat ocele mege rik omio boma me bedo gi kede kakwattege i akina lobo a jo Epraim. Omiogi boma magi me larre a jo oneko nek: Cekem kere bar me kwatere ame tye i lobo obedo kidikidi, Gejer, kede bar me kwattere, Jok-meam kede bar me kwattere, Bet-koron kede bar me kakwattere, Aijalon kede bar me kwattere karacel kede Gat-Rimmon kede bar me kwattere. Eka i kom lobo a jo Manace ame onwoŋo bedo tuŋ to ote miyogi boma me Aner kede bar me kwattere karacel kede Bileam kede bar me kwattere. Aco baŋ jo me doggola a Gercom rik ote miyo boma magi kede kakwatgi, I kom lobo a jo Manace ame onwoŋo bedo turj kide omiogi boma magi: Golan ame tye i Bacad kede ka kwattere, kede Acitaron kede bar me kwattere, Eka i kom lo bo ajo Icakar ote miyogi boma magi: Kedec kede ka kwattere, Daberat kede kwattere, Ramot kede bar me kwattere kede Anem kede bar me kwattere. I kom lobo a jo Acer ote miyogi boma magi: Macal kede bar me kwattere, Abdon kede bar me kwattere, Kukok kede bar me kwattere, kede Rekob i bar me kwattere. I kom lobo a jo Naputali ote miyogi boma magi: Kadec ame tye i Galilaya kede bar me kwattere, Kamon kede bar me kwattere, kede Kiriataim kede bar me kwattere, Jo me doggola a Merari ame odonnege rik ote miyo boma magi kede kakwatgi. I lobo ajo Jabulon rik omiogi boma magi: Rimono kede bar me kwattere, kede Tabor kede bar me kwattere, I kom lobo a jo Reuben ame tye tuŋ anyarolum me kulo Jordan ine Jeriko rik omiogi boma magi: Bejer kede bar me kwattere, Jajar kede bar me kwattere, Kedemot kede bar me kwattere, kede Mepat kede bar me kwattere. Aco i kom lobo atekere a Gad ote miyogi boma magi: Ramot ame tye i Gilead kede bar me kwattere, Makanaim kede bar me kwattere, Kecbon kede bar me kwattere karacel kede Jajer i bar me kwattere. Icakar onwoŋo rik tye kede otino awobe aŋwen: Tola, Pua, Jacub, kede Cimron, Tola rik te nywalo otino awobe kanyape: Uji, Repaya, Jeriel, Jakmai, Ibicam, kede Cemuel. Gin rik obedo odon atekere me doggola a jo Tola, dok gin rik obedo twoni jo atek meicel i lweny. I kare abaka Daudi wel ikwaegi onwoŋo romo tutumia pyeraryo wie aryo kede mia kanyape. Uji rik tye awobi acel ame nyiŋe Ijraya, W ode-nono rik te nywalo awobe aŋwen: Micael, Obadia, Joel, kede Icaya, gin daŋ rik obedo odon atekere me doggolagi. Gin rik onwoŋo onyomo mon apol meicel ame omio otinogi daŋ te bedo apol meicel, ame omio wei ikwaegi romo tutumia pyeradek wie kanyape, ame man onwoŋo okwano ka jo ame romo lweny, Wel jo luŋ me doggola Icakar ame ocoo nyingi kun lubere i doggola me ot a kwarrigi, rik oromo tutumia pyeraboro wie abiro, kun nwoŋo okwano ka jo ame romo lweny. Benjamin rik onwoŋo tye kede itino awobe adek: Bela, Becer, kede Jediael. Bela rik te nywalo awobe kany: Egbon, Uji, Ujiel, Jerimot, kede Iri. Gin daŋ rik obedo atekere me doggolagi, kun daŋ obedo twoni jo atek meicel i lweny, I kom ikwaegi rik tye iye jo a romo lweny tutumia pyeraryo wie aryo kede pyeradek wie aŋwen, ame rik ocoo nyingi i buk me nyiŋ kwarigi. Becer rik tye kede awobe aboŋwen: Jemira, Yowaci, Eliejer, Eleoenai, Omri, Jeremot, Abija, Anatot, kede Alemet. Wel ikwaegi luŋ ame ocoo piny tye iye jo ame romo lweny tutumia pyeraryo kede mia aryo. Jedialel rik tye kede wode acel ame nyiŋe Bilan, Bilan te nywalo awobe abiro: Jeuc, Benjamin, Ekud, Cenana, Jetan, Tarcic, kede Akicakar. Gin daŋ rik obedo odon me atekere i doggola dok daŋ obedo twoni jo atek meicel i lweny. I kom ikwaegi rik tye iye jo ame romo lweny ame romo tutumia apar wie abiro kede mia aryo. Cupim kede Kupim rik obedo awobe a Ir, eka Kucim te bedo wot Aker. Naputal rik onwoŋo tye kede awo be aŋwen: Jajel, Guni, Jajer, kede Calum, Gin rik obedo ikwae a Bila. Dako a Manaci ame aŋeca ame obedo nya jo Aram rik onywale otino awobe aryo: Acriel kede Makir. Makir obedo papa a Gilead. Makir rik te nyommi Kupim dako, te daŋ nyommi Cupim mege. Nyiŋ aminnere rik onwoŋo Maaka, Wot a Makir me aryo mere nyiŋe Jelopekad; Jelopekad te nywalo ka anyira keken. Maaka ame obedo dako a Makir rik te nywale awobe aryo, ame ote cako nyiŋgi ni Perec kede Cerec, Perec te nywalo awobe aryo Ulam kede Rakem, Eka Ulam te nywalo wode Bedan, Magi luŋ obedo ikwae a Gilead wot a Makir, akwar Manaci. Amina a Gilead ame nyiŋe Kamolecet ame onywalo awobe adek: Icod, Abiejer, kede Maklak. Cemida rik tye awo be aŋwen Akian, Cekem, Liki, Aniam. Magi gin ikwae Epraim. Epraim onywalo wode Cutela, Cutela te nywalo wode Bered, Bered te nywalo wode Takat, Takat te nywalo wode Eleada, Eleada te nywalo wode Takat, Takat te nywalo wode Jabad, eka Jabad te nywalo wode Cutela, Epraim rik onwoŋo daŋ tye dok awobe ocele aryo, Ejer kede Elead, ame rik obin onekogi oko i kare gin otemo kwale dok a jo ame bedo i Gat. Papagi Epraim rik te bedo kumo pirgi pi kare alac, omego mere te bi no me bino kweyo cunye. Epraim rik dok te medo ribere kede cege, eka te yac nywalo atin awobi, Gin te cako nyiŋe Beria, pi tim arac ame onen i odgi. Epraim rik daŋ onwoŋo tye kede nyare ame nyiŋe Cera, ame en a rik ogero boma me Bet-koron ame tye tuŋ piny kede en ame tye tuŋ malo, karacel kede boma me Ujen-cera. En rik onwoŋo daŋ tye i wode ame nyiŋe Repa, ame ikwae te bedo kit man: Repa onywalo wode Recep, Recep te nywalo wode Tela, Tela te nywalo wode Takan, Takan te nywalo wode Ladan, Ladan te nywalo wode Amikud, Amikudi te nywalo wode Elicama, Elicama te nywalo wode Nuni, Nuni te nywalo wode Yocwa. Lobo ame gin omao me bedogi tye iye Betel kede pacci luŋ i tjete, kede i tutuŋ kide te bedo Naaran, eka tutuŋ to te bedo Gejer kede pacci luŋ i ŋete, Ikwae a Manace rik te gamo boma magi kede pacci luŋ i ŋetgi: boma me Bet-cean, Taanak, Megido, kede boma me Dor, karacel kede pacci luŋ i ŋetgi. Man en kan ame ikwae a Yucepu wot Icrael obedo iye. Magi gin ikwae Acer. En rik onwoŋo tye kede awobe aŋwen: Imna, Iciva, Icivi kede Beria, kede amingi Cera, Beria te nywalo awobe aryo, Keber kede Malciel, Malciel ame obedo papa a Birjait. Keber rik tye kede itino awobe adek: Japlet, Comer, kede Kotam, karacel kede nyako acel ame nyiŋe Cua. Japlet rik daŋ onywalo itino awobe adek: Pacak, Bimal, kede Acivat. Ominnere Comer rik daŋ onywalo awobe adek: Roga, Jekubbak, kede Aram, Omingi Kotam daŋ onwoŋo onywalo itino awobe aŋwen: Jopa, Imna, Celec kede Amal. Aco awobe a Jopa te bedo: Cua, Karneper, Cual, Beri, Imra, Bejer, Kod, Camma, Cilcak, Itiran, kede Beera. Awobe a Jeter te bedo: Jepunne, Picpa, kede Ara, eka awobe a Ulla te bedo: Arak, Kanniel, kede Rijia, Jo man luŋ rik obedo ikwae Acer. Gin rik obedo odoŋe atekere me doggola a kwarigi, kun daŋ gin obedo twoni jo atek meicel i lweny, dok otel a neye meicel. I komgi rik tye iye jo ame romo lweny tutumia pyeraryo wie abicel. Benjamin rik obedo pappi itino awobe kany. Gin ene kun lubere i mwaka me ditogi: Bela, Acibel, Akara, Noka, kede Rapa. Bela te bedo papa awobe man: Adar, Gera, Abikud, Abicua, Naaman, Akoa, Gera, Cepupan, kede Kuram, Magi gin itino awo be a Ekud ame gin obedo jo me doggola a kwarogi, me ajo ame onwoŋo bedo i Geba, ame rik daŋ ote bino terogi oko iyi opii i Manakat. Gin ene: Naaman, Akija kede Gera, ame olwoŋo daŋ ni Keglam, ame rik obedo papa a Ujja kede Akikud, Cakaraim rik obin onywalo itino awobe i lobo me Moab i kare ame en doŋ otyeko ryemo monne aryo oko, Kucim kede Baara, En onyomo Kodec te nywalo kede itino awo be abiro: Jobab, Jibia, Meca, Malkam, Jeuj, Cacia, kede Mirma. Itino mere luŋ rik te bedo odoŋe atekere me doggolagi, En rik daŋ onywalo itino awobe ocele aryo i dako mere Kucim: Abitub kede Elpaal. Elpaal rik te nywalo awobe adek: Eber, Micam, kede Cemed. Cemed en ame rik te gero boma me Ono kede Lod, karacel kede pacci luŋ ame omano ŋetgi. Beria kede Cema rik obedo odoŋe atekere me doggola a kwarogi ame rik obin obedo i boma me Aijalon, eka ite ryemo daŋ jo ame rik bedo i boma me Gat oko, Awobe a Beria rik ene: Akio, Cacak, Jeremot, Jebadia, Arad, Eder, Micael, Icipa, kede Joka. Awobe a Elpaal ene: Jebadia, Mecullam, Kijki, Keber, Icimerai, Ijilia, kede Jobab, Aco awobe a Cemei te bedo: Jakim, Jikiri, Jabdi, Elienai, Jilletai, Eliel, Adaya, Beraya, kede Cimrat. Awobe a Cacak te bedo: Icipan, Eber, Eliel, Abdon, Jikiri, Kanan, Kanania, Elam, Antotija, Ipideya, kede Penuel. Awobe a Jerokam te bedo: Camcerai, Cekaria, Atalia, Jarecia, Elija, kede Jikiri. Magi gin jo ame rik obedo jo adito, odoŋe atekere me doggola a kwarigi. Man gin jo ame rik obedo i Jerucalem. Jeyel rik obin onwoŋo boma me Gibeon te daŋ bedo kuno, Dako mere rik nyiŋe Maaka, eka wode me kao te bedo Abdon. Awobe mere ocele te bedo: Jur, Kic, Baal, Nadab, Gedor, Akio, Jeker, kede Miklot, ame obedo papa a Cimea. Ikwae a joni rik obedo i Jerucalem i ŋet jo ocele me doggola apapat. Papa a Kic obedo Neri, eka Kic te bedo papa a Caulo. Caulo rik onywalo itino awo be aŋwen: Yonacan, Malkicua, Abinadab, kede Ecibaal. Yonacan rik te bedo papa a Meribbaal, ame obedo papa a Mika, Mika rik onywalo awobe aŋwen: Riton, Melek, Tarea, kede Akaj, Akaj rik obedo papa a Jekoadda, ame rik obedo pappi itino awobe adek: Alemet, Ajimavet, kede Jimri. Jimri rik te bedo papa a Moja, eka Moja te bedo papa a Binea, Binea te nywalo wode Rapa, Rapa te nywalo wode Eleaca, Eleaca te nywalo wode Ajel. Ajel rik te nywalo itino kanyape: Ajirikam, Boceru, Icmael, Cearia, Obadia, kede Kanah. Ecek ominna Ajel te nywalo itino awo be adek: Ulam, Jeuc, kede Elipelet. Awobe Ulam rik te bedo twoni jo atek meicel i lweny dok ame odiro meicel i bayo atero, Awobe me re kede ikwae rik onwoŋo pol atek, gin luŋ rik oromo mia cel kede pyerabic, Jo man luŋ rik obedo jo me iterkere a Benjamin. Rik ocoo nyiŋ jo Icrael luŋ i buk me nyiŋ kwaro, kun ocoogi i doggola i doggola, doŋ man en kite ame rik ocoo kede i buk obakki me Icrael. Jo Juda luŋ rik obin otero oko iyi opii i Babulon pi balgi me kwero geno Obaŋa. Doŋ i akina jo ame te geyo dwogo me bino bedo i lobo ame rik opokkigi, obedo jo Icrael, olamdog, jo Levi, kede jo ame tio i ot Obaŋa. Jo mogo me Juda, jo Benjamin, jo Epraim kede jo Manace te wot bedo i Jerucalem. I akinagi rik tye iye Utai wot Ammikud, Ammu wot a Omri, Omri wot a Imri, Imri wot a Bani, ame oya i i kom itino a Perej wot a Juda. Dok i kom jo me Cilo, te bedo iye; Atin kao ame nyiŋe Acaya, kede itino mere. Aco i kom awobe a Jera te bedo iye: Jeuel, kede wati mere. Jo luŋ a rik obedo i Jerucalem rik romo mia abicel kede pyeraborjwen, Aco jo ame oya iyi atekere a Benjamin obedo iye jo magi: Callu wot a Mecullam, ame rik obedo wot a Kodavia, Kodavia ome obedo wot a Kacenua. Ibneya wot a Jerokam. Ela wot a Ujju, ame obedo akwar jo Miciri. Mecullam wot a Cepatia, ame rik obedo wot a Rewel, ame obedo wot a Ibnija, Jo me itekere a Benjamin a rik onwoŋo bedo i Jerucalem rik romo mia aborjwen kede pyerabic wie abicel, kun jo ame nyingi tye kani obedo odoŋe atekere me doggola a kwarigi. Olamdog ame obedo i Jerucalem ene: Jedaya, Jekoyarib, kede Jacin. Ajaria wot a Kilkia ame rik obedo atel adwoŋ me ot a Rwot. Kilkia wot a Mecullam, Mecullam wot a Jadok, Jadok wot a Merayot, Merayot wot Akitub kede en Akitub. Adaya wot a Jerokam, ame obedo wot a Packur, Packur ame obedo wot a Malelia. Maacai wot Adiel, ame obedo wot a Jajera, ame obedo wot a Mecullam, ame obedo wot a Mecillemit, kede Immer ame obedo papa a Mecillemit. Olamdog ame rik obedo otel ame onwoŋo loo tic i ot Obaŋa rik romo tutumia acel, mia abiro kede pyerabicel nono. Jo man rik obedo jo ame tye kede ŋec atut i ticcoro luŋ ame onwoŋo otio i ot Obaŋa. Jo Levi ame obedo i Jerucalem ame Cemaya wot a Kaccub ame obedo wot Ajirikam; Ajirikam wot a Kacabai, ame obedo wot a Merari, kede Bakbakkar, Kerec, Calal, kede Mattatia ame obedo wot Acan. Obadia wot a Cemaya, wot a Gelal ame obedo wot a Jedutun, kede Berakia wot Aca, ame obedo wot a Elkana ame rik bedo i Netopat. Jo ame rik obedo ogwok doggola ene: Callum, Akub, Talmon, Akiman kede watigi. Atelgi rik obedo Callum, gin onwoŋo obedo ogwok doggola abaka me tuŋ kide, naka atot tin, Magi gin ogwok dogcel me gony a jo Levi, Callum wot a Kore, Kore wot a Ebiacap, karacel kede owote mere, ame gin obedo jo me doggola a kwarogi Kora. Gin jo Kora onwoŋo rik gin en ame loo tic me gwoko doggola me kema, kite ame rik kwarogi onwoŋo obedo jo ame loo ke ma a Rwot, ogwok doggola ame donyo i ke ma a Rwot. Kare moro Finekaci wot Eleajar onwoŋo obedo nat ame loogi, Rwot rik obedo bedo kede i kare-naca. Aco Jekaria wot a Mecelemia rik obedo agwok doggola me kema me rwatte. Jo ame rik oyero me gwoko doggola kede dogcel, rik romo mia aryo kede apar wie aryo. Jo man rik ocoo nyiŋgi i buk me Tekwaro kun olubo i paco i paco ame gin onwoŋo bedo iye. Abaka Daudi kede Camwiri anen piny, en ame rik oketo jo man i tic ame mito gen. Mannono omio gin kede ikwae obedo ame loo tic me gwoko dogcel me ot a Rwot, ame en ot me kema, kun gin otye acalo okur piny. Dogcel onwoŋo tye aŋwen, me tuŋ kide, kede tuŋ to, me tuŋ anyarodi kede tuŋ anyarolum, rik onwoŋo oketo dano ame gwoko dogcel acel acel. Ogwok dogcel-li rik watigi ame bedo i akina paco rik konyogi kun oleo alea i ne ni no abiro abiro. Ogwok aŋwen-ni rik bedo kuno i kare luŋ, kun olo icika atino mege, kede ot kano lim Obaŋa. Udi me butogi rik tye i ŋet ot Obaŋa kuno pien gin rik ogwok ot Obaŋa, kun oyabo doggola ni no luŋ odiko. Jo ocele i akina jo Levi rik obedo jo ame gwoko jami me tic, Gin rik kwano kare ducu ka awot tic kedgi kede ka adwogogi, Jo ocele rik oketo i tic me loyo jami me ot Obaŋa, jami tic acil luŋ, moko kwon aprottere, kono olok, moo, odok a ŋwece kur, kede gin a rjwece kur. Ento jo mogp i akina awobe olamdog, en ame rik obedo jo ame rubo gin a ŋwece kur. Alevi moro ame nyiŋe Mattitia, ame obedo wot a Callum me kao, dano me doggola a Kora, en ame rik obedo nat ame loo tic me tedo ogati ame opapado me yalo Obaŋa, pien en rik onwoŋo obedo lo a genne. Watigi ocele ame obedo jo me doggola a Kokat, rik obedo jo ame loo tic me ogati ame oketo i nyim Rwot; gin rik oyiko cabit i cabit. Jo mogo me doggola a jo Levi, rik obedo jo ame ower i ot Obaŋa. Odoŋe ame loo doggola ame wero-nono rik obedo i udi mogo atitino ame tye i ŋet ot Obaŋa, kun mom doŋ omiogi ticcoro ocele, pien gin rik otio kare luŋ dyecen kede dyewor. Jo ame nyingi tye malo-nu, en ame obedo otel me doggola a jo Levi, kun lubo lwakigi. Gin rik obedo otel ame bedo i Jerucalem. Jeyel rik obin onwoŋo boma me Gibeon te daŋ bedo kuno, Dako mere rik nyiŋe Maaka, eka wode me kao te bedo Abdon. Awobe mere ocele te bedo: Jur, Kic, Baal, Nadab, Neri, Gedor, Akio, Jekaria, kede Miklot, ame obedo papa a Cimea. Ikwae a joni rik obedo i Jerucalem i ŋet jo ocele me doggola apapat. Papa a Kic obedo Neri, eka Kic te bedo papa a Caulo. Caulo rik onywalo itino awobe aŋwen: Yonacan, Malkicua, Abinadab, kede Ecibaal. Yonacan rik te bedo papa a Meribaal, ame obedo papa a Mika, Mika rik onywalo awobe aŋwen: Piton, Melek, Tarea, kede Akaj. Akaj rik te bedo papa a Jarak, ame rik onywalo awobe adek: Alemet, Ajimavet kede Jimri. Jimri rik te bedo papa a Moja, eka Moja te bedo papa a Binea, Binea te nywalo wode Rapa, Rapa te nywalo wode Eleaca, Eleaca te nywalo wode Ajel. Ajel rik te nywalo itino kanyape: Ajirikam, Boceru, Icmael, Cearia, Obadia kede Kanan. I kare-nono jo Piriciti te lweny i kom jo Icrael; jo Icrael rik te mukere i ŋwec oko i nyim jo Piriciti, kun kom jo ame oneko oradde atata i kidi me Gilboa. Jo Piriciti te ryemo yo Caulo kede awobe mere, ote neko Yonacan kede Abinadab, kede Malkicua, ame gin obedo awo be a Caulo. Lweny anwoŋo odio Caulo atek meicel, wegi atero mogo rik te nwoŋe, gin te cele wawano en atek meicel kede atero. Caulo te kobbi atin jami lwennyere ni, “Wot pala romoni ituca kede pelo, me jo a mom oliro-ni kur bin coba, ote loka doko gi-anywaragi.” Cite atin jami lwenyere mom te ye, pien onwoŋo tye kede lworo. Mannono te miyo Caulo kwanyo pala lwennyere, te rette iye en kene. Kare ame atin jami lwennyere oneno ni Caulo doŋ oto oko, en daŋ te rette i kom pala lwennyere, te to oko karacel kede. Mannono en kite ame Caulo oto kede karacel kede awobe mere adek, jo me ode oto karacel. I kare ame jo Icrael a rik tye i luŋ tuŋ ca oneno ni monygi orino oko, dok Caulo kede awobe mere daŋ oto oko, gin oya i bomagi luŋ ote riŋo oko, Jo Piriciti te bino bedo iye. Orwo mere ocele, i kare ame jo Piriciti obino me gonyo ruk a jo ame oneko, gin onwoŋo Caulo kede awobe mere adek oto i kidi me Gilboa. Gin te toŋo wi Caulo oko, ote gonyo daŋ jami lwenyere oko ote cwayo okwena rabo koppere baŋ jogi luŋ karacel kede baŋ jo luŋ ame tye i lobo me Piriciti. Gin te keto jami lwennyere i ot jok Aciterot, gin te guro wi Caulo i ot woro jokgi ame olwoŋo ni Dagon. Ento i kare ame jo me Jabec-Gilead owinyo gin ame jo Piriciti otimo i kom Caulo, jo luŋ ame tek i lweny, oya ote wot dyeworrono benebene, ate kwanyo kom Caulo kede kom awobe mere oko ote tero i Jabec. Gin te yiko cogo komgi i te yat i Jabec, eka ote kanyo kec pi nino abiro. Caulo oto pien okwero bedo nat ame genne en onwoŋo mom geno Rwot, dok en otemo wot baŋ okor tipo a jo oto me wot penyo tamgi, kun mom geno Rwot me tele, Mannono omio Rwot oneke oko te miyo loccere i cin Daudi wot a Yece. I kare-nono atekere me Icrael luŋ te bi no baŋ Daudi i Kebron ote bino kobbe ni, “Nen ba, wan acel kedi. I kare okato Caulo onwoŋo abakawa; yin en a rik itelo jo Icrael me wot ilweny, dok daŋ idwogogi paco; Rwot rik te kobo ni, ‘Yin ibino kwayo jona Icrael dok daŋ ibino bedo aloc ajo Icrael.’ ” Mannono en omio odoŋe luŋ me Icrael obino baŋ abaka i Kebron, Abaka Daudi te cikere kedgi i Kebron i nyim Rwot, gin te daŋ wiro Daudi kede moo me bedo abaka me Icrael, kite ame Rwot rik ociko kede baŋ Camwiri. Daudi karacel kede jo mere luŋ rik te wot i Jerucalem, ame en Jebuc, kan ame jo Jebuc onwoŋo bedo iye, Jo me Jebuc te kobbi Daudi ni, “Yin gire mom ibino kato kan.” Kadi bed amannono, Daudi te mayo bomagi atek ame olwoŋo ni Ci on oko ame doŋ olwoŋo i nyiŋe ni, boma a Daudi. Daudi te ko bo ni, “Ŋat ame bino geyo neko dano me Jebuc bino bedo atel wi monya.” Eka Joab wot a Jeruya en ate geyo telo wi mony, omio en te doko atel wi mony. Daudi te bedo i ka-ponogi atekkono, te cako nyiŋe ni, Gony a Daudi. Daudi te gero bomanono manno amana, cakere i M illo dok kede iyie. Joab te doŋ yiko kan ocele ame odon i boma nono. Daudi te doŋ medde ameda ibedo twon lo moro adit pien Rwot Obaŋa me mony obedo bedo kede. Man en nyiŋ jo a Daudi ame rik onwoŋo tek meicel i lweny, Gin karacel kede jo Icrael luŋ, okonye me bedo abaka, kite ame Rwot rik ociko, dok daŋ ote gwoko loccere bedo atek. Dano me acel i akinagi rik obedo Yecebbacebet, dano me Takemon, en rik obedo atel a jo adek. En rik obin olwenyo kom i keken i kom jo mia adek te daŋ nekogi luŋ awane acel. I akina jo adekkaca, nat ame lube onwoŋo obedo Eleajar wot a Dodo, wot Akoki. En rik onwoŋo tye gin i Daudi i Pac-damim i kare ame jo Piriciti ocokere kuno me lweny. I kare ame jo Icrael ca ko ŋwec oko i nyim jo Piriciti en onwoŋo tye i poto kalloro, en te nyono piny atek acalo ico, te lweny i jo Piriciti tuno wan ame ciŋe ojony atek kun ciŋe gire otwo atwoa i kom pala romo mere. Rwot te miyogi loyo jo Piriciti atek meicel. Jo adek i akina jo pyeradek adoŋo owoto baŋ Daudi igorogoro kidi me Adullam, kun onwoŋo mony a jo Piriciti mogo oguro gonygi i luŋ me Repaim. I kare-nono onwoŋo Daudi tye i ka-pono mere ame egeno, kun mony a jo Piriciti mogo tye i Beterekem. Daudi onwoŋo tye kede mit adwoŋ meicel i cunye, omio en te ko bo ni, “Kono nattoro kom twero kella pi amata ame tye i akorj i dog cel me Beterekem.” Jo adek ca ame onwoŋo gin luŋ obedo jo atek meicel i lweny, ote yeco yogi kengi i dye gony a jo Piriciti, ote wot twomo pii iyi akon i dog cel me Beterekem, ote tero baŋ Daudi, Cite Daudi mom te mato; en te lunyo onyo oko piny i nyim Rwot acalo kono olok me yalo Rwot, kun kobo ni, “Ama Obaŋana, mom gire atwero ma to pii man! Ka ee amato, nwoŋo rom aroma ame amato remo a jo man adek ame ojalo kwogi, ote wot.” Mannono omio en gire mom omato pii-nono. Man en gin a rik jo adekkaca otimo. Abicai omin a Yoab wot a Jeruya rik obedo atel a jo pyeradek ca, En daŋ rik olwenyo kom i toŋ keken i kom jo mia adek, te neko oko luŋ; mannono te miyo nyiŋe cako rwo atek i akina jo pyeradek ca, En a doŋ rik obedo twon lo moro a tjeye akato luŋ i kom jo pyeradek ca, en rik te bedo atel wigi, cite mom otuno i rwom a jo adek ocele ca. Benaya wot a Yekoyadi, dano me Kabjeel, rik obedo twon alwennyoro a neye meicel; en otimo gigi mogo ame pirgi dito meicel. En oneko itino awobe aryo, ame onwoŋo rik obedo twoni jo alwenyo meicel i Moab, Dok en rik odonyo piny i bur i kare me pee, te wot neko iye eŋatu, Dok oneko twon lo moro me Miciri ame neno onwoŋo ber atek. Dano-naca onwoŋo rik tye kede tonnere i ciŋe, cite Benaya te wot bane ka i lut keken, te wot yuto tonnere i ciŋe-naca oko, ocobe kede te neke oko. Benaya wot a Yekoyadi otimo magi, Omio en daŋ obedo a rom aroma i jo adek ocele ca, En daŋ te bedo twon lo moro ame omio kwogo i akina jo pyeradek ca, cite en mom otuno i rwom a jo adek ocele ca, Daudi okete me loyo ocirikale ame gwoke. Jo ocele ame onwoŋo tye i akina jo pyeradekkaca nyingi ene: Acael omin a Yoab; Elkanan wot a Dodo me Beterekem; Camma me Karod, Kalec me Pelet; Ira wot a Ikec me Tekoa; Abiejer me Anatot, Mebunai me Kuca, Calmon me Akoki, Marai me Netopa; Kaleb wot a Bana me Netopa, Ittai wot a Ribai, me Gibea i lo bo jo Benjamin; Benaya me Piroton; Iddai ame oya i luŋ me Gaac; Abialon me Araba, Ajmawet me Bakurim; Eliakaba me Calbon, awobe a Yacen, kede Y onacan; Camma dano me Arar, Akiam wot a Carar me Arar; Elipelet wot Akacbai me Maaka kede Eliam wot Akitepel Gilo; Kejro me Karmel, Parai me Arabi; Joel ominna Natan, Mibar wot a Kagri Jelek a jo Ammon, Nakari me Beerot, ame obedo amak jami lweny a Y oab wot a Jerua; Ira me Itri, Gareb me Itri; Uria ame obedo dano me atekere a jo Kitti; Jadad wot a Alai, Adina wot Acija ame rik en atel i atekere a Reuben dok onwoŋo tye kede owote mere ame romo pyeradek, Kanan wot a Maaka, kede Jocapat ame en dano me Mitan, Ujia ame dano me Acitera, Ca ma kede Jeyel awobe a Kotam dano me Aroer, Jediael wot a Cimri, kede Joka ame obedo omina Cimri ame gin jo me Tij, Eliel dano me Makava kede Jeribail, kede Jocavia, ame gin luŋ obedo awobe a Elanaam kede Itama ame obedo dano me Moab, kede Jaciel ame obedo dano me Mejoba. Magi gin jo ame ogeo wot baŋ Daudi i Jiklag i kare ame en mom romo wot kannoro kadi acel i kuc pi Iworo Caulo wot a Kic, Gin tye i akina jo ame onwoŋo ŋeo lweny atek ame obedo konye i kare me weny, gin luŋ obedo jo me atekere a Benjamin, ame obedo atekere a Caulo. Gin rik oneo bayo atero kede kidi me atirjdio, kun oneo bayo i turj cam kede tuŋ cem. Otel rik obedo Akieja kede Yowaci ame obedo awobe a Cemak, ame obedo dano me Gibea; kede dok Jejiel, Pelet, ame obedo awobe a Ajimavet; Beraka, kede Yeko, ame obedo jo me Anatot; Icimaya dano me Gibeon ame en dano acel i akina twoni jo pyeradek ca ame rik onwoŋo ŋeo lweny wok ca, en onwoŋo rik adwoŋ ame loo jo pyeradekkaca; Jeremia, Jakajiel, Yokanan Jabad dano me Gedera, Elujail, Jerimot, Bealia, Cemaria, Cepatia dano me Karup; Elkana, Icia, Ajarel, Joejel kede Jacobeam dano me Kora; kede Joela kede Jebadia ame gin luŋ obedo itino a Jerokam dano me Gedor. Twoni jo ame onwoŋo tek meicel i lweny i akina jo me atekere a Gad owoto baŋ Daudi i ka pono mere atek i tim, gin onwoŋo obedo jo ame ŋeo lweny i kwot kede toŋ, kun waŋgi nen calo waŋ iŋatu dok odwir meicel calo atil ame bedo i wi kidi. Jo-nnono gin ene: Ejer ame en obedo rik atelgi, me aryo te bedo Obadia, me adekere te bedo Eliab, me aŋwennere te bedo Micimana, me kannyere te bedo Jeremia, me kannyape mere te bedo Atai, me abiro mere te bedo Eliel, me aboro mere te bedo Y okanan, me abonwennere te bedo Elijabad, me aparrere te bedo Jeremia, me apar wie acel te bedo Makibanai. Jo ocele i akina jo-ni rik obedo otel wi mony ame lo jo tutumia, kede jo ocele i akinagi ame lo jo mia. Jo-ni en ame rik obin oŋolo kulo Jordan i dwe me agege, i kare ame rik pii onwoŋo opoŋ meicel i kulo Jordan naka i wi tela malo, ote ryemo jo ame rik bedo i dog kulo ducu tuŋ kide kede tuŋ to. Jo mogo me Benjamin kede Juda rik dok te wot baŋ Daudi i ka pono mere. Daudi rik te wot bangi me wot rwatte kedgi, te kobbigi ni, “Ka ee ibino wunu bota acalo owotena me bino konya, abino jolowu i yomcuny; ento ka ee ibino dota wunu baŋ okworra, kadi bed an gira mom at ye kede balloro, Obaŋa a kwarina myero nenwu te jukowu.” Cuny Obaŋa rik te bino i kom Amacai, ame rik obedo atel a jo pyeradek ca, te kobo ni, “Wan giwa obedo joni, ama Daudi; wan giwa obino bedo kedi, yin wot a Yece! Kuc, kuc gire obed kedi, kuc daŋ obed i komjo ame konyi. Pien Obaŋani gire en akonyi!” Daudi te jologi, te miyogi bedo otel me wi monnyere. Jo mogo me atekere a Manaci rik te wirre lubo Daudi i kare ame en obino i jo Piriciti me bino lweny i kom Caulo. Kadi bed amannono en mom te konyo jo Piriciti pien odoŋe a jo Piriciti mogo rik te yiko kop i kome, ote miyo ryeme oko, kun okobo ni, “Ka ce oye en odok cen baŋ adwonnere Caulo, en bino lokere te timowa lit.” Magi gin jo Manace ame rik owirre olubo yore i kare ame en woto i Jiklag: Adna, Jojabad, Jediael, Miceal, Jojabad, Eliku, kede Jilletai, Jo man luŋ rik onwoŋo obedo odoŋe ame telo wi mony ame loo jo tutumia i Manace. Gin rik te konyo Daudi me telo monyere i kare me lweny oyak, pien gin rik obedo twoni jo atek meicel i lweny, Jo rik te bedo bino ni no i nino kun omedde i kom mony a Daudi, mannono te miyo mony a Daudi bedo mony atek meicel. Man en wel lwak mony ame orukere i jami lweny ame rik obino baŋ Daudi i Kebron me konye dwoko loc a Caulo i ciŋe kite ame Rwot rik ociko. Jo Juda ame rik obino kun orukere i jami lweny, kun omako kwot kede toŋ rik romo tutumia abicel kede mia aboro. Jo Cimeon ame rik onwoŋo obedo twoni jo atek meicel i lweny rik oromo tutumia abiro kede mia acel. Jo Levi onwoŋo romo tutumia aŋwen kede mia kanyape. Jo me ot Aron ame olubo Yekoyadi rik oromo jo tutumia adek kede mia abiro, Eka Jadok, awobi ame onwoŋo tek meicel i lweny te bi no otel wi mony ame romo pyeraryo wie aryo, ame oya kedgi ot a pappere ikome. Jo Benjamin ame obedo itekere a Caulo ikome, rik obino iye jo ame romo tutumia adek, jo apol i kom jo me atekere a Benjamin rik omedde cwako Caulo. Jo Epraim ame obino, rik romo tutumia pyeraryo twal kede mia aboro, kun gin luŋ onwoŋo obedo twoni jo ame neye meicel dok ame tek meicel i lweny i atekeregi, Jo Manace arik obino rik romo tutumia apar wie aboro, ame man rik obedo jo ame oyero ayera me wot keto Daudi bedo abaka. Jo Icakar a rik obino rik obedo otel ame romo mia aryo kun atel acel acel tye kede jo mere, Man rik obedo jo ame onwoŋo ŋeo gin ame jo Icrael myero ti kede kare ame myero ti iye. Jo Icrael ame obino rik romo tutumia pyerabic twal, kun gin luŋ obedo jo ame ŋeo lweny meicel, dok opwonyere atek meicel me lweny i jami ducu ame olwenyo kede, dok obino daŋ ame doŋ oruko jami lwenygi oko. Gin rik obino i cunygi acel me konyo Daudi. Jo Naputali ame obino rik tye iye otel ame romo tutumia acel kede jo tutumia pyeradek wie abiro ame orukere oko i jami me lweny, kun omako kwodegi kede tonigi. Jo Dan ame obino rik romo tutumia pyeraryo wie aboro kede mia kanyape, kun gin luŋ obino ame doŋ oyikere oko me lweny, Jo Acer ame obino rik romo tutumia pyeraŋwen, gin daŋ onwoŋo obino ame doŋ oyikere me lweny, Jo Reuben, jo Gad kede nucu me atekere a Manaci ame obino i loka Jordan, rik obino ame romo tutumia mia acel i pyeraryo wie aryo, kun gin luŋ obedo jo ame opwonyo me lweny i jami me lweny luŋ. Ocirikale magi luŋ, ame onwoŋo doŋ oyikere oko me lweny owoto i Kebron, kun otye kede cuny me keto Daudi bedo abaka me Icrael. Jo Icrael odonnege daŋ onwoŋo tye i cuny acellono, gin daŋ onwoŋo omito ni Daudi bed abakagi. Gin rik te bedo baŋ Daudi kuno pi nino adek, kun ocemo dok daŋ omatte, pien omegogi ame onwoŋo rik tye kuno onwoŋo oyikere pirgi. Dok jo ame onwoŋo ceggi kedgi ame oya i atekere a jo leakar, Jabulon kede Naputali gin daŋ onwoŋo obino i lwak cam adwoŋ meicel ame oketo i wi kane, kede inaga, kane adono mege kede twoni, kun okelo daŋ moko kwon adwoŋ meicel anina oduro, kede etak olok otwo, kono olok, kede moo. Okelo daŋ dok kede romi me acama, Man luŋ otimere me nyuto yomcuny ame jo lerael luŋ onwoŋo tye kede i lobogi. Daudi te yiko kop kede odoŋe ame telo wi mony, odoŋe ame loo jo tutumia kede odoŋe ame loo jomia. En te kobbi lwak jo Icrael ducu ni, “Ka ce wun iye wunu, dok daŋ Rwot Obaŋawa oye, myero wan ocwal kwena baŋ omegowa ame tye i lo bo me Icrael luŋ, karacel kede baŋ olamdog kede jo Levi ame bedo i boma a rik omiogi kede bargi me kwat me gin obin ocokere banwa kan, me wek owot okel canduk Obaŋa ame rik obin oweko oko tene i kare ame Caulo tye i loc.” Jo luŋ te ye tammere-nono pien onwoŋo ber. Daudi rik te coko jo Icrael ducu karacel cakere i wan apoki me Miciri i Cikor tuno kede naka i yo ame woto i Kamat. En ocoko joni ducu karacel pi wot kelo canduk Obaŋawa, i Kiriat-jearim. Daudi karacel kede jo Icrael luŋ te wot i boma me Baala, ame daŋ olwoŋo ni Kiriat-jearim, ame tye i Juda me wot omo canduk Obaŋa ame olwoŋo i nyiŋ Rwot ame bedo malo i wi okerubi. Gin te cibo canduk Obaŋa i gadigadi anyen, kun okwanyo i ot Abinadab, ame onwoŋo tye i wi tur malo, Uja kede Akuc te bedo kolo twoni ame awayo, Daudi karacel kede jo Icrael te bedo tuko atek meicel i nyim Rwot, kun owero, ogoo opuk, naŋa, ajaa, mola me agoa kede apel. Kare ame gin otuno i ŋet laro a Kidon, Uja oryeo ciŋe i kom canduk Obaŋa, eka te kwako kede ciŋe, pien twoni onwoŋo ogate. Akemo te mako Rwot i kom Uja te neke oko kuno, pien oryeo ciŋe i kom canduk Obaŋa; en te to oko i ŋet canduk Obaŋa. Cuny Daudi te wan, pien Rwot oneko Uja akemo; mannono te miyo lwoŋo nyiŋ kabedo-nono ni Perec-uja, tuno naka atot tin. I nino-nono lworo omako Daudi atek i kom Rwot. Omio en te kobo ni, “Kara canduk a Rwot bino bedo baŋa i yore ano ba?” Omio Daudi obedo kede lworo me tero canduk a Rwot i paco mere; eka te lunyo tero tene i ot Obededom me Gat. Canduk Obaŋa te ri i ot Obed-edom pi dwete adek; Rwot te miyo winyo i kom Obed-edom karacel kede jo luŋ me ode. I Kiram abaka me Turo te cwayo kwena baŋ Daudi, kun miogi otero bao yat cedar kede opac kede opaa kidi me gedo, gin te geri Daudi ot. Daudi te niaŋ ni Rwot doŋ otyeko moke me bedo abaka me Icrael, dok daŋ ni doŋ omio loccere obedo malo meicel pi jo mere Icrael. Daudi rik dok te medde nyomo mon ocele i Jerucalem; te daŋ mede nywalo awobe kede anyira, Nyiŋ itino ame en onywalo i Jerucalem ene: Cammua, Cobab, Nacan, Culeman, Ibkar, Elicua, Elipelet, Noga, Nepeg, Japia, Elicama, Beliada, kede Elipelet. I kare ame jo Piriciti owinyo ni otyeko wiro Daudi kede moo me bedo abaka me Icrael, gin luŋ te ciro wot malo kuno me wot yenyo Daudi; cite Daudi rik te winyo oko, te wot me wot lweny i komgi. Onwoŋo jo Piriciti obino omao luŋ me Repaim oko, Daudi te penyo Rwot ni, “Awot alweny i kom jo Piriciti? Ibino miyogi i ciŋi.” Rwot te kobbi Daudi ni, “Woti; pien an abino miyo gire jo Piriciti i cini.” Daudi te wot i Baal-perajim, te daŋ wot loyogi oko kuno, Daudi te kobo ni, “Rwot doŋ oemo dye okworra i nyima, kite ame pii mol yeco kede yore.” Omio ote cako nyiŋ nyiŋ kabedo-nono ni Baal-perajim. Jo Piriciti rik te weko cal jogigi kuno, Daudi te ciko ni myero warjgi oko. Jo Piriciti dok te dwogo tyen me aryo mere, ote dok bino mayo luŋ me Repaim oko, Kare ame Daudi doŋ openyo Rwot, Rwot okobbe ni, “Kur iwot malo kuno, yin man amana, iwot i negi, me ilokere wunu i komgi awulo kan ame abata pol iye. Ka ibino winyo tyen jo awot am or awinyere malo i wi abata, myero iyutte wunu, pien Rwot nwoŋo doŋ otelo nyimi oko me wot neneko mony a jo Piriciti oko,” Daudi te timo kite ame Rwot ocike kede, te neko jo Piriciti, cakere i Gibeon tuno kede naka i Gejer, Nyiŋ Daudi te rwo romo lobo ducu, Rwot te miyo lworo ma ko rok luŋ i kom Daudi. Daudi ogero udi mere i paco mere. En te gero daŋ ot ocele me keto canduk Obaŋa te cako guro kema kuno pire. Daudi dok te kobo ni, “Jo me Levi keken en ame bino tiŋo canduk Obaŋa, pien Rwot en oyerogi pi tino candukkere kede pi tic bane atwal.” Daudi te coko jo luŋ i Jerucalem, me kela canduk a Rwot i kabedo mere ame doŋ etyeko yiko, Daudi te coko daŋ ikwae Aron karacel kede jo Levi, Eka i kom jo me doggola a Kokat, Uriel te telo jo ame romo mia acel i pyeraryo, kom jo me doggola a Merari, Acaya te telo jo ame romo mia aryo i pyeraryo. I kom jo me doggola a Gercom, Joel te telo jo ame romo mia acel i pyeradek. I kom jo me doggola Elijapan, Cemaya te telo jo ame romo mia aryo, I kom jo me doggola a Kebron, Eliel te telo jo ame romo mia aboro, I kom jo me doggola a Ujiel, Aminadab te telo telo jo ame romo mia acel apar wie aryo. Daudi te lwoŋo Jadok kede Abiatar ame gin olamdog, kede jo magi ame gin obedo jo me Levi: Uriel, Acaya, Joel, Cemaya, Eliel, kede Aminadab. En te kobbigi ni, “Wun ibedo wunu odoŋe atekere me doggola a kwariwu iyi atekere a jo Levi, Wun myero ilonyere wunu kenwu ibed wunu acil. Wun karacel kede omegowu, me wek ikel wunu canduk me cik a Rwot Obaŋa me Icrael i kabedo ame doŋ atyeko yiko pire. I kare me agege ca, Rwot Obaŋawa rik obin otugere i komwa, pien wun onwoŋo ipe wunu i akinawa me tiŋo candukkere kite ame onwoŋo an amito.” Mannono te miyo olamdog kede jo Levi lonyere kengi pi kela canduk a Rwot Obaŋa me Icrael. Jo Levi te cako tiŋo canduk Obaŋa, kun odyelo i bollere i wi gwokgi, kite ame rik Rwot ociko kede baŋ Muca. Daudi te ci ko odoŋ atekere me doggola a jo Levi me poko tic me wer apapat baŋ omegogi mogo me wek gin wer werrogo me yomcuny kun ogoo naŋa kede opuk, kede mola agoa. Mannono te miyo jo Levi yero Keman wot a Joel; kede ominnere Acap wot a Berekia; kede omegogi. I kom jo me doggola a Merari ote yero jo magi, Etam wot a Kucaya. Ote dok yero jo magi i akina omegogi me konyogi wek gin obed jo me wer i dul me aryo: Jekaria, Jajiel, Cemiramot, Jekiel, Uni, Eliab, Benaya, Maceya, Matitia, Elipeleku kede Mikineya, karacel kede ogwok doggola, Obed-edom kede Jeyel. Ower magi te bedo jo ame go tum ame otio kede mola, Keman, Acap kede Etan; Jekaria, Ajiel, Cemiramot, Jekiel, Uni, Eliab, Maceya kede Benaya; joni rik obedo ogo naŋa kun olubo kite me goc Alamot. Ento Matitia, Elipeleku, Mikneya, Obed-edom Jeyel kede Ajajia te bedo jo ame telo wer kun ogo nana opuk i kite me goc a Ceminit. Rik ote yero Kenania me bedo atel wer a jo Levi, pien en rik obedo dano me adiro meicel i wer. Berekia kede Elkana rik ote miyo tic me gwoko doggola me canduk Obaŋa. Eka olamdog magi ote yero me bedo okut apel i nyim canduk Obaŋa, Cebania, Jocapat, Netanel, Amacai, Jekaria, Benaya kede Eleajar; joni luŋ rik obedo olamdog, Eka Obed-edom kede Jekia te daŋ bedo ogwok doggola me canduk a Rwot. Mannono te miyo Daudi kede odoŋe me Icrael kede otel wi mony ame lo jo tutumia te cako wot me wot omo canduk me cikere a Rwot i ot Obed-edom kun cunygi yom atek. Gin te yalo Rwot i twoni abiro kede nyogi rommi daŋ abiro, pien Rwot Obaŋa onwoŋo tye ka konyo jo Levi ame onwoŋo tye atino canduk cikere a Rwot. Daudi onwoŋo oruko boŋo camanini ame otio aber meicel, kite ame onwoŋo jo Levi ame otiŋo canduk karacel kede ame awer orukere kede, kede atelgi Kennaa, Daudi onwoŋo daŋ otweo pyere kede epod me camanini, Mannono en kite ame Daudi karacel kede jo luŋ me Icrael otero kede canduk cikere a Rwot, kun owo i yomcuny okuto tuŋ rommi kede apel, ogoo daŋ mola agoa, dok owero i dwoŋ aloŋo i nana, kede opuk. I kare ame canduk a Rwot otuno i paco a Daudi Mikal nyaka a Caulo oroo wane i dirica, te neno Daudi tye kirre i myel i nyim Rwot i yomcuny; en te caye i cunye. Gin te cwayo canduk a Rwot i ot, ote ke to kakare iyi kema ame onwoŋo Daudi rik oguro pire, Daudi te yalo Rwot kede mot awaŋa, kede mot me kweyo cuny i nyim Rwot kuno. I kare ame Daudi doŋ otyeko yalo Rwot i mot awaŋa kede mot me kweyo cuny, en olamo winyo i kom lwak i nyim Rwot me mony. En te poko baŋ ŋat acel acel ogati acel, kede dul riŋo aduno, kede anina olok otwo acel; en opoko baŋ co kede mon me Icrael luŋ. Daudi rik te keto jo Levi mogo me bedo otel woro a Rwot Obaŋa me Icrael i nyim canduk cikere Obaŋa kun owero wer me pwoye kede pake. Oketo Acap me bedo adwoŋ ame loogi kun Jekaria lube. Ogo nana kede nana opuk te bedo Jeyel, Cemiramot, Jekiel, Matitia, Eliab, Benaya, Obededom kede Jeyel. Acap te bedo ago tum, eka olamdog aryo te bedo okut apel kun okuto tere i te re i nyim canduk cikere Obaŋa, Benaya kede Jakajiel. Man en nino me agege me Daudi ogeo miyo kede tic me wero wer pwoyo Obaŋa baŋ Acap kede owote mere ame obedo jo Levi. Pwo wunu Rwot, irab wunu nyiŋe; titti wunu rok ducu tic ame en otio! Wer wunu wer me pako Rwot, itit wunu tic me aura ame en otio! Ket wunu kwogo i kom nyiŋe acil; jo ame woro Rwot myero be i yomcuny! Yeny wunu kony i baŋ Rwot, wore wunu nakanaka. Po wunu i kom tic me aura luŋ ame en otio, i kom tic me tano kede kop ame en onolo. Wun ikwae Iburaim, ame ibedo wunu omiro mere, wun ikwae a Yakobo, ame en oyerowu, Rwot en Obaŋawa; gin a en ociko tye pi lobo luŋ, Wie mom wil kadi acel i kom cikere mere, i kom kop ame en ociko i kom jo tutumia i tutumia me kare luŋ. I kom cikere mere ame en ocikere kede Ibraim, i kom kop ame en ociko baŋ Icaka. En rik omoko odoko ocik baŋ Yako bo, cikere ame bino ri nakanaka, En okobo ni, “Abino miyo lo bo me Kanaan banwu, obed megwu ame ileo wunu.” I kare ame rik welgi pwod nok, kun gin pwod orok ame bedo lobo Kanaan, ame gin pwod oloŋ-piny i lobo apapat, kun oya i loc man okobere i en ocele. Obaŋa rik mom oye rokkoro owunogi; ogwokogi kun juko obakki ocele ni, “Kur itim wunu ginnoro i kom jona ame ayero, kur igud wunu odwarpinnya.” Wer wunu baŋ Rwot, wun jo me lobo ducu, rab wunu nino ducu ni en olarowu. Rab wunu pi kwogo mere baŋ rok ducu, kede tic ame en otio me aura baŋ jo luŋ, Rwot dwon meicel, myero pake meicel, myero Iwore akato obane ocele luŋ, Pien obaŋe a rok ocele obedo cal apaa keken, ento Rwot oketo polo. Kwogo kede twer luŋ tye bane, teko kede lelo tye kan ame en bedo iye. Pak wunu Rwot, wun rok ducu ame tye i lobo, pak wunu kwogo mere kede teko mere, Pak wunu nyiŋ Rwot ame obedo me kwogo; kel wunu motwu bane i ot me wore. Wor wunu Rwot i bono acil; komwu myero myel i nyime, wun jo me lobo ducu, lobo gire oketo ocuŋ atek odoco, mom dok romo yenere kadi acel. Lel wunu, wun polo kede lobo; titti wunu rok ducu ni Rwot en abaka. Mor ba, yin nam kede jami luŋ ame tye iyi, yin poto daŋ lel ba kede jami luŋ ame tye iyi, Yen ame tye i buŋ luŋ bino wer i yomcuny, i nyim Rwot i kare ame en abino me ŋolo kop i lobo. Pwo wunu Rwot, pien en ber; marrere a mom lokere perakino atwal. Kobbe wunu ni, “Larwa ba, Ama Obaŋawa ame larowa, cokwa karacel me ilarwa i baŋ orok, me wek omi pwoc baŋi, ote pako nyini acil. Pak wunu Rwot Obaŋa me Icrael! pake wunu waŋ i waŋ!” Iwak luŋ te gamo ni, “Amen,” ote pako Rwot. Daudi rik te miyo Acap karacel kede owote mere ame gin jo Levi me bedo jo ame tio tic i nyim canduk me cikere a Rwot nino ducu i kabedo ame rik oketo iye canduk cikere a Rwot. Obed-edom wot a Jedutun kede owote mere pyeraabicel wie aboro ame gin luŋ obedo jo me doggola mere me bedo jo ame konyogi, kun Obed-edom kede Koca obedo jo ame gwoko doggola. Jadok alamdog karacel kede owote mere ame daŋ obedo olamdog te bedo otel woro i kema a Rwot ame onwoŋo tye malo i wi kidi i Gibeon, gin onwoŋo omio mot awaŋa me yalo Rwot i wi keno lam nino ducu odiko kede otyeno, kun olubo cik ducu ame ocoo i buk me cik a Rwot ame rik ociko baŋ jo Icrael. Jo ocele ame onwoŋo tye kuno daŋ obedo Keman kede Jedutun kede owotegi ame rik oyerogi kun tuco nyingi pi miyo pwoc baŋ Obaŋa; pien marrere a mom lokere perakino nakanaka. Keman kede Jedutun onwoŋo daŋ lo tic me kuto apel kede me goyo wer kun goo i mola agoa apapat, i wer acil. Jo me doggola a Jedutun rik obedo jo ame gwoko doggola ke ma. Lwak luŋ doŋ te ket dok paco, kun ŋat acel acel dok tune, Daudi daŋ te dok tuŋe me wot la mo winyo i kom jo me ode. I kare ame onwoŋo Daudi doŋ bedo i ode, en okobo baŋ adwarpiny Natan ni, “Nen ba, an at ye abedo i ot ame ogero i bao cedar, cite canduk a Rwot tye bedo i kema.” Natan te kobbi Daudi ni, “Wot iti giri ginnoro luŋ ame tye i cunyi, pien Rwot gire tye kedi.” Cite dyeworrono ikokome, kop a Rwot te bino baŋ Natan kun kobbe ni, “Wot ikobbi amirona Daudi ni, ‘Rwot okobo ni, Mom yin en ibino gero ot me bedona. Cakere i kare ame akwanyo jo me Icrael i lobo Miciri tuno naka tin, an mom ru abedo gira i ottoro; abedo kobbere gira akola kun abedo i kema, I kabedo luŋ ame abedo wot iye i jona Icrael, mom gira apeny atelloro ame onwoŋo aketo me telogi ni kono ogera ot me bao cedar.’ “Aman doŋ yin myero ikoba amirona Daudi ni, Rwot me mony okobo ni, ‘Rik an akwanyi i elet kun yin akwa rommi, me idok aloc a jona Icrael. Abedo bedo kedi ikabedo luŋ ame ibedo wowota iye, atyeko okworri-gu luŋ i nyimi; dok daŋ abino miyo nyini rwo meicel, ame rom aroma i nyiŋ jo adito me lobo. Abino yero kabedo a jona Icrael, ate miyogi bedo kuno kun mom dok oyelogi; jo moro areco daŋ mom dok bi no bedo wunogi bala kite a yam con. Cakere i kare ame aketo oŋolkop me loyo jona Icrael, jo a kitegi reco obedo wunogi nakanaka, cite man mom dok bino timere i komgi; abino miyogi doŋ owe oko i kom okworgi luŋ. Medo i mannono, Rwot dok okobo ni ebino miyo ikwai bedo adwoŋ meicel. Ka kare me bedo ni i lobo doŋ otum, yin ibino nywako kabedo karacel kede kwarini, an dok abino miyo wodi moro ame yin inywalo ya, te lubi, an abino moko loccere. En wodi-nono bino gero ot pi nyina, abino moko loccere bedo atwal. An abino bedo pappere kun en bedo woda, Cite mom abino kwanyo mara a mom lokere i kome, kite ame rik akwanyo kede i kom Caulo, ame ami ileo kakare. Odi kede locci bino cuŋ atek i nyima i kare luŋ; locci bino moko atwal.’ ” Natan te kobo kop magi luŋ baŋ Daudi kede ginnoro luŋ ame onyuto bane. Daudi doŋ te wot bedo i nyim Rwot, te kobo ni, “An kara abedo ŋa ba, Ama Rwot Obaŋa, jo me oda obedo ŋo, ame omio yin itiŋa malo kit man-ni? Aco kadi bed amannono, man kom pwod ginnoro atitidi moro bani, Ama Rwot Obaŋa; nen yin doŋ ityeko ko bo kop i kom jo me ot amironi, jo me kare a pwod lac ata ame tye i nyim, inyuta-gu lwagi jona ame tye i nyim, Ama Rwot Obaŋa. Kara ŋo ame dok atwero kobo bani ba! Pien yin giri ineo amironi, Ama Rwot Obaŋa! Pien pi gin ame yin giri ici ko, ame lubere kede gin ame oya i cunyi keni, omio yin itimo twoni jami magi adoŋo doŋo, me amironi ŋe. Pi mannono ba, yin giri idwon meicel. Ama Rwot Obaŋa; pien mom dok tye ŋattoro ocele a cal kedi, dok mom daŋ tye Obaŋa moro ocele kono yin daŋ keken, ka oporo kede gin ame wan owinyo kede yitwa. Kara rokkene ame dok tye i wi lobo ame calo joni Icrael, ame yin Obaŋa iwoto bangi me wot lakorogi, me gin bed joni? Yin giri imio nyirji orwo atek, itio twoni jami mogo adono dono dok ame iyiliyili meicel pirgi, kun iryemo rok ocele oko i nyim joni ame rik i lakaro i Miciri. Yin giri pi mitti keni Ama Rwot, imoko joni Icrael me bedo joni atwal; eka yin ite doko Obaŋagi. “Doŋ ba, Ama Rwot Obaŋa, aman doŋ yin myero imok atwal kop ame ikobo i kom omironi kede i kom jo me ode, eka ite timo kite ame ikobo-nono. Jo gire bino mede dworo nyini nakanaka kun okobo ni, ‘Rwot me mony en Obaŋa me Icrael.’ Ot amironi Daudi bino moko gire i nyimi pi kare luŋ. Dok daŋ yin giri doŋ inyutta an amironi kop man oko, kun ikobo ni, ‘Abino gero ot piri’; omio an amironi anwoŋo tek cuny me keto kwac man i nyimi. Doŋ aman ba, Ama Rwot, yin giri ibedo Obaŋa dok daŋ kop ame ikobo bedo ateni, yin doŋ iciko pi gin aber-ri baŋ amironi. Aman doŋ tim ber, Ama Rwot, imi gum i ot amironi Daudi me medde bedo atwal i nyimi. Pien yin giri doŋ ikobo oko, gum ame yin imio, bino miyo gum bedo i ot amironi Daudi nakanaka.” Ame man doŋ otum oko, Daudi oloo jo Piriciti i lweny, te miyo twergi gik oko i lobo-nono. En te mayo daŋ Gat kede pacci ame tye i ŋele I ciŋ jo Piriciti. Daudi dok te loyo jo Moab i lweny, gin doŋ te cako bedo i te loccere kun daŋ oculo ocoro baŋe. Daudi dok te loyo abaka me Coba, ame nyiŋe Adadejer, ame tye i yo tutuŋ Kamat, i kare ame en owoto cibo kidi me po pire i ŋet kulo me Eufrate. Daudi te mayo i bane gadigadi lweny tutumia acel kede wegi aguragura tutumia abiro, kede ocirikale ame woto i tyengi tutumia pyeraryo. Daudi te ŋoŋolo odoŋe aguragura luŋ ame onwoŋo wao gadigadi lweny, cite te weko ame romo waya gadigadi lweny mia acel keken. I kare ame jo me Curia me Damaciko obino me konyo Adadejer, abaka me Coba, Daudi te neko jogi tutumia pyeraryo wie aryo. Daudi te keto cel a mony i lobogi i ŋet Damaciko, jo Curia doŋ te bedo i te loc a Daudi kun daŋ omio ocoro bane. Rwot te bedo miyo Daudi loyo lobo luŋ ame en co bo mony i komgi. Daudi te mayo lwak kwot apipim ame otio kede jabu ame onwoŋo tye baŋ omiro abaka Adadejer, te terogi luŋ i Jerucalem. Abaka Daudi daŋ omao lwak mola adwoŋ meicel i boma me Tibat kede Kun, ame gin obedo boma ame onwoŋo tye ite loc abaka Adadejer. Magi en mola ame rik Culeman otio i dero pii me mola kede pagi, kede takki mola ame rik otio kedgi i ot Obaŋa. I kare ame Toi abaka me Kamat owinyo ni Daudi oloo mony Adadejer abaka me Coba luŋ, en ocwao wode Yoram baŋ abaka Daudi, me wot mote, dok daŋ me pwoye pi lweny loyo Adadejer oko, pien Adadejer onwoŋo yam obedo lweny kede Toi tyen apol meicel. Yoram te wot kun tero jarm ame otio i ryal, i jabu kede mola. Jami-nono luŋ Daudi te jalo baŋ Rwot, anaka ryal, kede jabu ame oya i baŋ rok ocele luŋ ame en oloo, ame oya Edom, Moab, kede baŋ jo Ammon, jo Piriciti, kede i baŋ jo Amalek. Abicai wot a Jeruya te dok neko jo Edom tutumia apar wie aboro i luŋ me Kado. En te keto cel me mony romo lobo Edom luŋ, jo Edom luŋ te bedo i te loc a Daudi. Rwot te miyo Daudi loyo lobo luŋ ame en cobo mony i komgi. Mannono te miyo Daudi te loyo jo Icrael luŋ; obedo ŋolo kop atira kun daŋ neno ni jo luŋ otye ka tic kedgi aber. Yoab wot a Ceruya onwoŋo obedo atel wi monyere; Yekocafati wot Akilud te bedo aco kop i kom ginnoro luŋ ame otimere; Jadok wot Akitud kede Akimeleki wot Abiatar te bedo olamdog; Cabica te bedo arannere; Benaya wot a Yekoyadi te bedo adwoŋ ame loo jo Keret kede jo Pelet; eka awobe a Daudi te bedo odoŋe ame loo ticcere en abaka. Ame man doŋ otum oko, Nakac abaka a jo Ammon te to oko, wode Kanum te doko abaka, leyo kakare. Daudi te kobe ni, “An abino bedo aber wan i Kanun wot a Nakac, kite ame yam pappere daŋ obedo keda aber.” Daudi te cwayo omiro mere bane me wot kweyo cunye pi to a pappere. I kare ame gin otuno i lobo a jo Ammon baŋ abaka Kanun, odoŋe a jo Ammon te kobo baŋ adwoŋgi Kanun ni, “Yin itamo ni Daudi ocwao kwena me kweyo cunyi ateni, me miyo pappi kwogo. Daudi mom ocwao omiro mere me bino roto kede ŋiŋio bomawa me wek ema oko?” Mannono te miyo Kanun mako omiro a Daudi, te lyelo yer tikgi tuŋ cel oko, te ŋoŋolo boŋŋigi oko i kwon dudgi, eka te doŋ cwayogi wot. I kare ame kop man owinyere baŋ Daudi, en ocwao jo me wot rwatte kedgi, pien lewic onwoŋo omako omiro mere-nono meicel. Abaka okobbigi ni, “Koŋ doŋ ibed wunu i Jeriko, tuno wan ame yer tikwu olot, eka ite dwogo wunu.” I kare ame jo Ammon oneno ni nyiŋgi doŋ ŋwe aŋwea baŋ Daudi, Kanun kede jo Ammon te cwayo lim me ryal ame romo million abiro kede tutumia mia aboro me parjo gadigadi lweny kede wegi aguragura i baŋ jo Mecopotamia, karacel kede en i lobo Aram-maaka, kede i Joba. En rik te paŋo gadigadi lweny tutumia pyeradek wie aryo, abaka me Maaka te daŋ rik bino kede monnyere, ote wot guro gonygi i ŋet Medeba. Jo Ammon daŋ rik te cokere karacel kun oya i bomagi ducu, ote yikere me lweny. I kare ame Daudi owinyo kop man, en ocwao kede Y oab monnyere luŋ ame onwoŋo tek meicel i lweny, Jo Ammon te dorre wot oko, ote wot ryeye i tyen me lweny i nyim dogcel me donyo i boma me Rabba, Aco obakki ocele ame rik obino me konyogi te ryeye kengi i bar kannaler. Kare ame Y oab oneno ni mony tye i nyime kede i ŋee en okwanyo ocirikale mogo me Icrael abeco meicel te canogi i nyim jo Curia. Jo odoŋŋere luŋ te miyogi i cin ominnere Abicai, ame te canogi i nyim jo Ammon. En te kobbi ominnere ni, “Ka ee ineno ni jo Curia armto loya oko, yin myero ibin ikonya; cite ka an abino neno ni jo Ammon amito loyi oko, an abinob ino me konyi. Yin myer o ka ibed ame cunyi nwan, me onyut cowa pi rokwa kede pi boma Obaŋawa, Rwot gire myero tim gin ame en oneno ni ber bane.” Y oab karacel i jo ame onwoŋo tye bane te doŋ wot anyim me wot lweny i kom jo Curia; jo Curia te mukere oko i ŋwec i nyimgi. Kare ame jo Ammon oneno ni jo Curia oriŋo oko, gin daŋ ote mukere gigi oko i ŋwec i nyim Abicai, ote donyo oko iyi boma, Yoab te dwogo doŋ oko cen i ka lweny i kom jo Ammon, te wot i Jerucalem, Cite i kare ame jo Curia one no ni jo Icrael oloogi oko, gin rik te cwayo kwena, wot kelo jo Curia ame onwoŋo tye i ne kulo Eufrate, gin rik te wot kun Cobak, atel wi mony abaka Adadejer en ame telo nyimgi. I kare ame kop man owinyere baŋ Daudi, en ocoko mony me Icrael luŋ karacel ote wot ŋolo kulo Jordan, gin te wot canne i nyimgi kuno, I kare ame Daudi doŋ oryeo monnyere oko i nyim jo Curia lweny daŋ doŋ te ere oko, Jo Curia te dok mukere oko i ŋwec i nyim jo Icrael; Daudi te neko jo Curia tutumia abiro ame riŋo i gadigadi kede wegi at yene tutumia pyeraŋwen, ote neko daŋ Cobat atel wi monygi oko, I kare ame jo ame onwoŋo tye doŋ i te loc abaka Adadejer oneno ni jo Icrael ologi oko, gin doŋ te cako poro kop me bedo i kuc i Daudi, Gin doŋ te bedo i te loccere, Mannono te miyo jo Curia bedo i lworo me medde konyo jo Ammon. I kare ame oro geye agea, ame en kare ame obakki maro ero iye lweny, Yoab otelo wi mony a jo Icrael ote wot cobo mony i lobo a jo Ammon. Dok ote wot guro boma me Rabba daŋ oko ento Daudi onwoŋo odon i Jerucalem. Yoab olwenyo i kom Rabba te loyo oko, Daudi rik te kwanyo tok kwogo me jabu i wi obaŋagi; pekkere onwoŋo romo ratili pyerabiro wie abic, gweŋŋoro me wel onwoŋo daŋ tye i yie ame ote keto i wi Daudi. Daudi daŋ te kela jami ame oyako i boma-nono adwoŋ meicel. Dok te daŋ kelo jo me kuno te ketogi i tic, kun otio kede ocumeno, cururu me nyonyo, kede lee me nyonyo, Daudi obedo timo kittono i kom boma a jo Ammon luŋ. En doŋ te dwogo cen i Jerucalem karacel kede lwakkere. Icennere lweny rik dok te erre i kom jo Piriciti i Gejer. Man en kare ame rik Cibbecai dano me Kuca oneko iye twon lo moro a nyiŋe Cipai, ame en rik dano ame oya i atekere a jo komgi pek. Gin rik te loyo jo Piriciti oko. Lweny ocele rik dok te ere i kom jo Piriciti, Man en kare ame Elkanan wot a Jair oneko iye Lami ame obedo omin a Goliac dano me Gat, ame rik bol tonnere mito rom aroma i yat cweyo boŋo. Lweny ocele rik dok te bedo tye i Gat, kan ame rik tye iye twon lo moro odono malo kun kome pek. Anyira ciŋe onwoŋo tye kanyape i ciŋe acel acel, anyira tyene daŋ kanyape i tyene acel acel, gin luŋ doŋ te bedo pyeraryo wie aŋwen. En rik dano ame oya i atekere a jo ame komgi pek. En rik onalo jo Icrael, Yonacan wot a Cemei omin a Daudi te neke oko. Daudi kede jo mere te neko jo-nono oko, ame gin luŋ obedo jo ame oya i atekere a jo a komgi pek me Gat. Catan rik te mito ke lo can i kom jo Icrael omio te cupo Daudi me kwano wei jo Icrael. Mannono te miyo Daudi kobbi Yoab kede odoŋe luŋ ame onwoŋo telo wi monnyere ni, “Wot i atekere luŋ me Icrael, me iwot ikwan wunu wei jo, cakere i Beer-ceba tuno kede naka i Dan. Amito ŋeyo wei jo ducu.” Cite Yoab te gamo ni, “Adwoŋ, Rwot Obaŋani myero med wei joni ame tye-ni-tyen mia acel ocele, kun yin pwod ikwo ame pwod itwero neno kede waŋi, kite ame gin doŋ dwon wok-ki! Aman gin lwakki luŋ mom megi, mom gin luŋ obedo omironi, Kara piŋo yin abaka imito kwano wei jo doki? Piŋo imito kela bai i kom jo Icrael?” Cite abaka te diyo Yoab me winyo koppere; en te ya oko i nyim abaka, te wot kwano wei jo Icrael kun mano lobo me Icrael ducu, te dwoogo kede cen naka i Jerucalem. Yoab te titti abaka wei jo ame okwano Wei jo ame romo lweny iyi Icrael onwoŋo romo million acel kede tutumia mia acel, eka me Juda te bedo tutumia aŋwen kede pyerabiro. Ento Yoab rik mom okwano wei jo Levi kede jo Benjamin, pien cunye onwoŋo mom yom i kom cik abaka-nono. Ento cuny Obaŋa mom rik te bedo ayom i kom gin ame onwoŋo otimo-nono, omio en te ke to can i kom jo Icrael. Daudi te cako bako doge baŋ Obaŋa kun ko bo ni, “Ati mo twon bai a mom kobere i gin ame atimo. Tim doŋ ber, Ama Rwot ikwany balla oko, an amironi; pien ati mo tim me mino meicel.” Rwot te kobbi adwarpiny Gad, ame onwoŋo obedo araŋ-piny a Daudi ni, “Wot ikobbi Daudi ni, ‘Amie tam adek ame en myero eyer acel i akinagi, en atim.’ ” Gad te wot baŋ Daudi, te titte gin ame Rwot okobo; openye ni, “Imito ni kec en a myero pot i loboni te ri pi mwakki adek? Onyo yin en i bed ŋwec arjweca pi dwete adek kun irino okworri? Onyo imito ni too edeke ame obedo pala lweny a Rwot poti i loboni pi nino adek, kun amalaika a Rwot jwero jo i lobo a jo Icrael. Aco yin doŋ itam ite timo gin ame myero adwok baŋ Rwot.” Daudi te kobbi Gad ni, “At ye i twon cannono adwoŋ meicel; cite mom aye ni dano en amyero ket can i koma. Rwot gire en myero ket can i komwa, pien en obedo akica meicel.” Rwot te cwayo too edeke i kom jo Icrael geye odiko tuno kede naka i kare ame rik ociko. Lwak jo ame romo tutumia pyerabiro twal te to, Obaŋa rik te cwalo amalaika me balo Jerucalem oko ento i ka re ame en doŋ onwoŋo mito balo oko, Rwot te loko tammere oko me keto can i kom jo, omio te kobbi amalaika ame onwoŋo oneko jo ni, “Wek doŋ bedi! Oromo doŋ.” Amalaika onwoŋo tye i ŋet laro dino kai Aruna, dano me Jebuc. Daudi te neno amalaika ame onwoŋo aneko jo tye ocun i akina lobo kede polo, kun omako pala me romo i ciŋe me neko kede jo me Jerucalem. Daudi karacel kede odoŋe me Icrael, ame gin luŋ onwoŋo oruko bono cola, gin luŋ ote ony piny aryeba cuny. Daudi okobbi Obaŋa ni, “Kom an a rik amio cik ni myero kwan wei jo? An gire en ame atimo bai, atimo gin arac. Kara jo man do tye aneno can nono. Tim ber, Ama Rwot Obaŋana, iluny goya an keken karacel kede jo me oda, ento iwek jo man bedi.” I nino-nono ikome amalaika a Rwot te kobbi Gad me wot kobbi Daudi ni, “Wot malo kuca, me iwot ican keno lam me yalo Rwot i laro me dino kai Aruna dano me Jebuc.” Daudi te winyo gin ame Rwot omio Gad okobbe, en te wot kuno. En onwoŋo Aruna kede awobe mere aŋwen tye adino nano. I kare ame Aruna obolo waŋe, oneno amala ika a Rwot, awobe me re aŋwen te riŋo wot pono oko. Kare ame Aruna oneno abaka Daudi tye abino en owoto bane te wot ryebere piny i nyime wore. Daudi te kobbe ni, “Mia laro dino kaili awili, me acan keno lam me yalo Rwot, me too edeke ya oko i kom jo. An abino culli wei ame iŋolo luŋ pire.” Aruna te gamo dog abaka ni, “Yin giri kwany gin ame imito, Ama adwoŋŋa; nen twoni aŋwen me yalo Rwot i mot awaŋa ene, kede apwod me dino kai itwero tic kedgi akaka yen, kede dok nano me mot me moko kwon. An amiogi bani luŋ nono.” Cite abaka Daudi te gamo ni, “Mom amannono gire, an myero acul lim pirgi, Mom abino gamo giri moro me yalo Rwot, an mom abino yalo Rwot Obaŋana kede mot a mom aculo ginnoro pire.” Daudi te wilo laro dino kai kede twoni i baŋ Aruna; kun mie cekel me jabu mia abicel ame opimo. En te cano keno lam me yalo Rwot kuno, eka te wano iye mot awaŋa kede me kweyo cuny. Rwot te gamo kwaccere ame en okwao, kun cwao mac i polo i kom mot awaŋa ame tye i wi keno lam. Rwot te kobbi amala ika me dwoko pala mere i yi akuro. I kare ame Daudi oneno ni Rwot otyeko gamo kwaccere i laro me dino kai Aruna, dano me Jebuc, en te medde yalo Rwot i mottere ducu kuno, Pien kema a Rwot ame rik Muca otio i tim, kede keno lam me mot awaŋa onwoŋo rik pwod tye kabedo me woro Obaŋa malo i wi kidi ame tye i Gibeon; Cite Daudi onwoŋo rik mom romo wot kuno me wot woro Obaŋa iye, pien onwoŋo rik tye ka Iworo pala romo ame amalaika a Rwot onwoŋo amako i ciŋe. Mannono omio Daudi okobo ni, “Ot me woro Rwot Obaŋa bino bedo gire kan. Keno lam me waŋo mot a jo Icrael daŋ bino bedo kan.” Daudi rik te ciko ni myero cok orok ducu ame onwoŋo bedo i lobo me Icrael karacel. En rik te miyogi tic, tic me payo godi, tic me payo kidi abeco me gero ot Obaŋa. En dok te kano daŋ nyonyo apipim me tiyo cumal me goyo kika bao me dogcel, kede me tweyo bao, karacel kede mola daŋ adwoŋ ata ame mom oromo pi mo pekere, Jo Turo kede Cidon te kelli Daudi bao Cedar apipim, ame welgi daŋ mom romo kwane kadi acel pi dworjgi. Pien Daudi onwoŋo obedo tamo ni, “Woda Culeman pwod tidi, ijeccere daŋ pwod nok, doŋ ot ame en bino gero pi Rwot myero bed me kwogo okato kare, ame pire myero rwo atek i wi lobo luŋ. En omio an myero ayikke jami luŋ me gero ottono.” Mannono omio Daudi oyiko jami me gero ot Obaŋa adwoŋ meicel kun mom ru oto. En olwoŋo wode Culeman, te cike me gero ot a Rwot Obaŋa me Icrael. Daudi okobbi wode ni, “Atinna, an onwoŋo abedo lwodo kop i cunya ni kono agero ottoro me woro Rwot Obaŋa. Ento Rwot obino baŋa te kobba ni, ‘Yin doŋ ityeko onyoo remo a jo apol meicel dok daŋ ibedo lweny kare luŋ; pi mannono yin mom ibino gero ottoro me wora pi remo adwoŋ meicel ame inyoo i nyima i lobo. Nen ba yin ibino nywalo atin awo bi, abino miyo en bedo i kuc, pien abino miyo okworrere ame tye i ŋete bedo kede kuc kun mom oyele. Nyiŋ wodenono obino lwoŋo ni Culeman, pien i kare me loccere abino miyo kuc baŋ jo Icrael karacel kede weo. En bi no gero ot me wora. En bino bedo woda, an abino bedo pappere, Abino moko kom me loccere bedo iyi Icrael atwal.’ “Doŋ pi mano ba, atinna, Rwot Obaŋani myero bed kedi, me ityek tic me gero ot a Rwot Obaŋani, kite ame en rik okobo kede baŋa, Rwot Obaŋani myero mi ryeko kede niaŋ atut me ilo jo mere kun ilubo cikere ame en omi i kare ame en doŋ omi dit me loyo jo Icrael. Ka ee igwokere ilubo cik ducu ame Rwot rik ociko baŋ Muca pi jo Icrael, ibino limo winyo. Bed atek ame cunyi nwaŋ. Kur ilwor; cunyi daŋ kur poti. Nen an doŋ atyeko yelle atek meicel, ayiko lwak jami-ni me gero ot a Rwot, ayiko jabu ame romo tan tutumia aŋwen kede ryal ame buco romo tan tutumia pyeraŋwen me gero ot a Rwot. Medo i kom mannono ayiko daŋ mola kede nyonyo ame dwoŋ atata, mom twero pimere kadi acel. Ayiko daŋ bao kede kiddi apipim, ento yin myero daŋ dok imed en ocele i komgi. Jo me ticci gire tye apipim. Tye jo me payo kiddi, jo me gedo, opac kede kit odiro apapat ame welgi mom romo kwanne, ame gin luŋ obedo jo ame kwiri meicel i ticgi, kun otio tic i jabu, ryal, mola, kede nyonyo. Cak doŋ tic oko atinna. Rwot myero bed kedi.” Daudi dok te ciko odoŋe me Icrael luŋ me konyo wode Culeman, kun kobbigi ni, “Myero Rwot Obanawu bed kedwu, omiwu kuc i kabedo ducu. En omio aloo jo ame yam bedo i lobo man luŋ, aman doŋ gin tye i te locwa kede i te loc a Rwot. Aman doŋ myero iketo cunywu me tic baŋ Rwot Obanawu i cunywu ducu kede tipowu ducu, Cak wunu gero ot acil me woro Rwot Obaŋa me iket wunu canduk me cikere a Rwot iye kede jami acil luŋ ame iworo wunu i Rwot.” I kare ame Daudi doŋ onwoŋo oti atek meicel, oketo wode Culeman obedo abaka ame loo jo Icrael. Daudi te coko odoŋe a jo Icrael luŋ kede olamdog karacel kede jo Olevi. En te kwano jo Olevi luŋ ame mwaka me ditogi oromo pyeradek dok kede malo. Welgi luŋ te romo tutumia pyeradek wie aboro. Abaka Daudi te kobo ni, “Jo tutumia pyeraryo wie aŋwen i akinagi bi no bedo jo ame tio tic i ot a Rwot, eka jo tutumia abicel te bedo jo ame gwoko kop i kom gin ame otimere kede oŋolkop. Jo tutumia aŋwen bino bedo ogwok doggola, kede jo tutumia aŋwen bino bedo jo ame wero wer me pako Rwot, kun otio jami luŋ ame onwoŋo otio me wer.” Daudi opokogi i dul adek kun lubo doggola a kwarigi ame obedo awobe a Levi: Gercom, Kokat kede Merari. Gercom rik onwoŋo tye awobe aryo, Ladan kede Cimei. Ladan onwoŋo tye awobe adek, Jekiel ame obedo adwoij ame loogi, Jetam kede Joel. Joni adek-ni en ame rik obedo odoŋe atekere me doggola a Ladan, Cemei rik onwoŋo daŋ tye awo be adek, Celomot, Kajiel, kede Karon. Awobe a Cimei aŋwen te bedo Jakat, Jina, Jeuc kede Beria, Man nyiŋ awobe aŋwen-nono kun lubere i dito me nywalogi. Omio Jakat ame obedo adwoŋ ame loogi eka Jija te lube. Ikwae a Jeuc rik mom te bedo apol mano omio rik okwanogi acalo jo me doggola acel. Kokat rik onwoŋo tye awobe aŋwen, Amuram, Ijar, Kebron kede Ujiel, wode me kao Amuram rik obed papa Aron kede Muca, Aron kede ikwae rik ote miyo tic me kwero jami acil meicel, gin obedo jo ame tio tic me wano odok a ŋwece kur me woro Rwot atwal, kun otio bane, dok olamo winyo i kom lwak i nyiŋe, Ento awobe a Muca, ame obedo dano Obaŋa, rik daŋ okwanogi i kom jo Levi, En rik onwoŋo tye awobe mere aryo, Gercom kede Eliejer. Awobe a Gercom, adwoŋ ame loogi rik obedo Cebuel. Eliejer rik tye ka awobi acel keken ame nyiŋe Rekabia, ento en Rekabia rik te nywalo awobe apol meicel. Ijar wot a Kokat rik tye i wode ame nyiŋe Celumit, en ame rik obedo adwoŋ ame loo doggolagi, Kebron wot a Kokat me adekkere rik onwoŋo tye awobe aŋwen, ame ŋat a rik loogi nyiŋe Jeria, Amaria te lube, eka Jekajiel kede Jekamean, Ujiel wot a Kokat me aŋwennere rik tye awobe aryo Mika gin kede Icaya. Merari rik onywalo awobe aryo, Makali kede Muci, Makali rik daŋ te nywalo awobe aryo, Eleajar kede Kic, ento Eleajar te to kun mom onywalo atin awobi moro kono ka anyira keken. Ento awobe a Kic rik te nyomo anyira mere-nono. Muci wot a Merari ame obedo awobi me aryo rik te nywalo awobe adek, Makali, Eder, kede Jeremot. Magi en ame rik obedo ikwae a Levi kun lubere i doggola me ot a kwarigi, gin aye rik obedo odoŋe atekere me doggola a kwarigi ame ocoo i buk me Tekwaro kun ocoo nyiŋ nat acel acel. Ŋat acel acel i kom ikwae a Levi ame mwaka me dittere oromo pyeraryo dok kede malo onwoŋo doŋ tye kede tic ame en tio i ot me woro Rwot. Daudi rik onwoŋo okobo ni, “Rwot Obaŋa me Icrael doŋ omio kuc baŋ jo mere, en i kome doŋ bino bedo i Jerucalem atwal. Pi mannono, jo Levi mom dok bi no medde tiŋo kema a Rwot, akadi jami ame otio kedgi iye.” Pi kop a Daudi ame eko bo me agikki mere jo Levi rik ocoogi me doko jo ame tio i ot Obaŋa ka mwaka me ditagi doŋ oromo pyeraryo nono. Gin rik okonyo olamdog ame obedo ikwae Aron kede ticgi i ot a Rwot, kun ogwoko daŋ dyekal kede icika atitino ame tye i ŋet ot Obaŋa, olonyo jami luŋ bedo acil dok daŋ otio kit tic ocele ame tye i at Obaŋa. Dok daŋ okonyo tic me ogati ame oketo i nyim Rwot kede moko kwon ame otio kedgi me mot me yalo Obaŋa, kede capat areppere a tobi mom iye, kede moko kwon ame otedo kede ogati i tako nyonyo me yalo Obaŋa, kede mot me moko kwon ame orubo i moo, dok daŋ gin en ame gwoko gi-pimo jami ame oyalo kede Obaŋa i ot a Rwot. Gin rik ocuŋ i nyim Rwot nino ducu odiko kede otyeno kun opake dok daŋ opwoc, kede i kare ducu ame oyalo Rwot i mot awaŋa i cerj cabit, i kare me por a dwe, kede i nino adoŋo dono ame opo pirgi, gin ocuŋ i nyim Rwot kare ducu kittono. Cik rik onwoŋo tye ame nyuto kit wel jo Levi a myero ti i dul acel i kare me woro Obaŋa. Gin daŋ en a rik ogwoko kema me rwatte kede kabedo acil, dok okonyo daŋ omegogi, ame obedo awobe Aron i ticgi i ot a Rwot. Magi en dul ame ikwae Aron oya iye, Aron rik onwoŋo tye awobe aŋwen: Nadab, Abiku, Eliajar, kede Itamar. Ento Nadab kede Abiku rik te to oko con ame pappagi pwod kwo kun daŋ pwod ope kede itino, mannono te miyo omegogi Eliajar kede Itamar doko olamdog. Abaka Daudi rik te poko ikwae Aron dul i dul kun lubo kit tic ame gin otio. Jo ame okonye kede ticcono obedo Jadok ame en dano acel i akina ekwae Eleajar, kede Abimeleki ame obedo akwar Itamar. Ikwae Eleajar rik opoko i dul apar wie abicel, kun ikwae Itamar ote poko i dul aboro; otimo kit man pien odoŋe me atekere me doggola acel acel ame oya i kom ikwae Eleajar rik onwoŋo pol kato me ominnere Itamar oko, Kite acalo rik odoŋe me ot Obaŋa kede odoŋe me telo woro onwoŋo tye i kom ikwae Eleajar kede Itamar, omio opokogi kede bo lo kwir. Cemaya wot a Natanel en ame rik obedo araŋ a jo Levi me coyo nyiŋ, Ocoogi kun joni tye: abaka, rwode adoŋo, Jadok alamdog, kede Ebimereki wot Abiatar, kede odoŋe atekere ame oya i ot a kwarigi ame gin olamdog kede me doggola a jo Levi. Gin rik obedo kwanyo kwir kun oleo alea, ikwae Eleajar yero eka ikwae Itamar te daŋ yero megi. K wir me doggola pyera aryo wie aŋwen luŋ rik te poto kit man: kwir me agege opoto i kom Jekoarib, me aryo te poto i kom Jedaya, me adek te poto i kom Karim, me aŋwen te poto i kom Ceorim; me abic te poto i kom Malkija, me kanyape te poto i kom Mijamin; me abiro te poto i kom Kakoj, me aboro te poto i kom Abija; me aboŋwen te poto i kom Yecua, me apar te poto i kom Cekania; me apar wie acel te poto i kom Eliacab, me apar wie aryo te poto i kom Jakim; me apar wie adekkere te poto i kom Kuppa, me apar wie aŋwen te poto i kom Jecebeab; me apar wie abic te poto i kom Bilga, me apar wie abicel te poto i kom Imer; me apar wie abiro te poto i kom Kejir, me apar wie aboro te poto i kom Kapijej; me apar wie aborjwen te poto i kom Petakia, me pyeraryo te poto i kom Jekejikel; me pyeraryo wie acel te poto i kom Jakin, me pyeraryo wie aryo te poto i kom Gamul; me pyeraryo wie adek te poto i kom Delaya, Eka me pyeraryo wie aŋwen te poto i kom Maajia. Joni rik occogi i tic i ot a Rwot kun lubo cik ame kwarogi Aron rik oketo pirgi, kite ame Rwot Obaŋa me Icrael rik ocike kede. Magi nyiŋ odoŋe atekere me doggola ocele mege ame oya i kom Levi: i kom ikwae Amuram rik oyero Cebuel; i kom i kwae a Cebuel rik oyero Jedeya. I kom ikwae a Rekabia kwir opoti i kom Icaya; i kom ikwae a Ijar kwir te poto i kom Celumot, i kom kwae a Celumot kwir te poto i kom Jakat; i kom ikwae a Kebron ote yero Jeria, kede Amaria, kede Jekajiel kede Jekameam, i kom ikwae a Ujiel ote yero Mika, i kom ikwae a Mika ote yero Camir. Omin a Mika ame en Icaya, i kom ikwae Icaya ote yero Jekaria. I kom ikwae a Merari ote yero Makali kede Muci. I kom ikwae a Jajia ote yero Beno. I kom ikwae a Merari obedo Jajia, Beno, Cokam, Jakur, kede Ibri, I kom ikwae a Mekali ote yero Eleajar ame rik obin onywalo wode moro. I kom ikwae a Kic ote yero Jeramel. I kom ikwae a Muci ote yero Makali, Eder kede Jerimot. Magi gin ikwae a jo Levi kun lubere i goggola a kwarrigi. Joni daŋ en ame rik obedo odoŋe atekere me doggola a kwarigi ame rik obolo kwir karacel kede omegogi atino, kite ame omegogi ame obedo ikwae Aron obolo kede kwir i nyim abaka Daudi, Jadok, Abimelek i, kede odoŋe atekere ame oya i ot a akwarrigi ame gin olamdog kede me doggola a jo Levi. Daudi karacel kede odoŋe atekere a jo Levi te yero jo me doggola a jo magi me bedo otel woro: Acak, Keman kede Jedutun, Rik oyerogi me kobo kop Obaŋa kun otio opuk kede naŋa kede mola me agoa. Nyiŋ jo ame rik oyero i tic man kede ticgi ene: i kom awo be Acap obedo Jakur, Yucepu, Nekania kede Acarela, Acap en ame rik obedo nat a telogi i wer kun ko bo kop Obaŋa ka ee abaka okobbe. I kom awobe a Jedutun obedo Gedalia, Jeri, Jecaya, Cimei, Kacabia, kede Matitia, gin luŋ awobe kanyape. Pappagi en ame rik obedo atelgi kun daŋ kobo kop Obaŋa dok tio kede nana opuk, dok daŋ wero wer me pako kede pwoyo Obaŋa. I kom awo be a Keman obedo Bukia, Matania, Ujiel, Cebuen, Jerimot, Kanania, Kanani, Eliata, Gidalti, Romam-tiejer, Jocebekaca, Maloti, Kotir kede Makajiot. Obaŋa rik omio Keman ame obedo adwarpiny abaka itino awobe apar wie aŋwen kede anyira adek, kite ame en rik ociko kede ni ebino miyo Keman teko. Joni luŋ rik obedo jo ame wero wer i kit tum apapat, kede naŋa kede opuk me konyo woro i ot Obaŋa, kun papagi en ame obedo atelgi. Acap kede Jedutun, kede Keman rik obedo jo ame tio tic kun olubo gin ame abaka ocikogi. Jo man kede omegogi ame obedo jo Levi ame rik onwoŋo opwonyogi i wer i ot a Rwot, gin luŋ rik odiro meicel. Welgi luŋ rik romo mia aryo i pyeraboro wie aboro. Tic a jo man rik opoko kede kwir, kun gin luŋ oterogi a rom aroma, kadi jo atino onyo jo adoŋo, jo ame doŋ opwonyere oko kede jo ame pwod apwonyere apwonya. Kwir me agege rik te poto i kom Yucepu me doggola Acap, me aryo te poto i kom Gedalia, kun daŋ omego mere kede awobe mere tye iye, gin ducu jo apar wie aryo; me adekkere te poto i kom Jakur, kun awobe mere kede omego mere tye iye, gin ducu jo apar wie aryo; me aŋwennere te poto i kom Ijri kun awobe mere kede omego mere tye iye, gin luŋ jo apar wie aryo; me kanyere te poto i kom Netania, kun awobe mere kede omego mere luŋ tye iye, gin luŋ jo apar wie aryo; me abicellere te poto i kom Bukia, kun awobe mere kede omego mere tye iye, gin luŋ jo apar wie aryo; me abiro mere te poto i kom Jacarela, kun awobe mere kede omego mere tye iye, gin luŋ jo par wie aryo; me aboro mere te poto i kom Jecaya, kun awobe mere kede omego mere tye iye, gin luŋ jo apar wie aryo; me aboŋwennere te poto i kom Matania, kun awobe mere kede omego mere tye iye, gin luŋ jo apar wie aryo; me tomon te poto i kom Cimei, kun awo be mere kede omego mere tye iye, gin luŋ jo apar wie aryo; me apar wie acellere te poto i kom Ajarel, kun awobe mere kede omego mere tye iye, gin luŋ jo apar wie aryo; me apar wie aryo mere te poto i kom Kacabia, kun awobe mere kede omego mere tye iye, gin luŋ jo apar wie aryo; me apar wie adekkere te poto i kom Cubael, kun awobe mere kede omego mere tye iye, gin luŋ jo apar wie aryo; me apar wie aŋwennere te poto i kom Matitia, kun awobe mere kede omego mere tye iye, gin luŋ jo apar wie aryo; me apar wie abiccere te poto i kom Jeremot, kun awobe mere kede omego mere tye iye, gin luŋ jo apar wie aryo; me apar wie abicellere te poto i kom Kanania, kun awo be mere kede omego mere tye iye, gin luŋ jo apar wie aryo; me apar wie abiro mere te poto i kom Jocebekaca, kun awobe mere kede omego mere tye iye, gin luŋ jo apar wie aryo; me apar wie aboro mere te poto i kom Kanani, kun awobe mere kede omego mere tye iye, gin luŋ jo apar wie aryo; me apar wie abonwennere te poto i kom Maloti, kun awobe mere kede omego mere tye iye, gin luŋ jo apar wie aryo; me pyeraryo mere te poto i kom Eliata, kun awobe mere kede omego mere tye iye, gin luŋ jo apar wie aryo; me pyeraryo wie ace Here te poto i kom Kotir, kun awo be mere kede omego mere tye iye, gin luŋ jo apar wie aryo; me pyeraryo wie aryo mere te poto i kom Giddalti, kun awobe mere kede omego mere tye iye, gin luŋ jo apar wie aryo; me pyeraryo wie adekkere te poto i kom Makajiot, kun awo be mere kede omego mere tye iye, gin luŋ jo apar wie aryo; me pyeraryo wie aŋwennere te poto i kom Romamtiejer, kun awobe mere kede omego mere tye iye, gin luŋ jo apar wie aryo. Man en kite ame rik opoko kede tic a jo ame gwoko doggola ot Obaŋa. I kom jo me doggola a Kora rik oyero iye Mecelemia wot a Kore, ame obedo dano ame oya i kom ikwae Acap. Mecelemia rik onwoŋo tye kede awobe abiro: Jekaria, Jediael, Jebadia, Jatniel, Elam, Jekokanan, kede Elieko-enai. Rik daŋ onwoŋo tye lo ame olwoŋo ni Obed-edom ame rik Obaŋa omio gum te nywalo awo be abiro: Cemaya, Jekojaba, Joa, Cakar, Netanel, Ammiel, Icakar, kede Peulletai. Wot Obed-edom me kao, Cemaya, rik onwoŋo tye kede awobe mere ame gin luŋ obedo jo a pirgi tek i doggolagi, pien gin luŋ rik onwoŋo obedo jo ame kwirri atek. Nyiŋgi ene: Otini, Repael, Obed, Eljabad, Eliku, kede Cemacia. Awobe aryo ame nyingi ogiko rik onwoŋo dok tye i mot amala me diro ame kato me omegogi luŋ. Jo ame oya i ot Obed-edom rik onwoŋo romo pyerabicel wie aryo, kun gin luŋ obedo jo ame opwonyo aber meicel pi tic man. Aco jo me ot a Mecelemia rik onwoŋo romo apar wie aboro ame opwonyo pi tic man. I kom jo me doggola a Merari, rik oyero Koca ame onwoŋo tye awo be mere aŋwen: Cimri en ame rik papagi oketo me bedo atelgi, kadi bed en rik mom onwoŋo obedo atin kao, Kilika, Tebalia, kede Jekaria. Koca kede awobe mere kede omego mere ame rik oyero me kuro ot Obaŋa, rik oromo apar wie adek. Ogwok doggola ot Obaŋa rik onwoŋo opoko i dul i dul, kun dul acel acel tye kede atelgi, rik opokkigi tic i ot Obaŋa kite ame rik opoko kede baŋ omegogi ame obedo jo Levi ame tio i ot a Rwot. Gin luŋ rik obolo kwir me neyo doggola me ot Obaŋa ame dul acel acel myero kur, kwir rik obolo arorom kun mom opoko ni jo me goggola moro-ni dwon onyo tidi. Kwir me gwoko doggola ame tye tutuŋ kide te poto i kom Celemia. K wir a wode Jekaria, ame en rik ami tam ame kare luŋ mio tam aber, mere rik te poto pi gwoko doggola ame tye tutuŋ anyarolum, Eka kwir Obededom te poto me gwoko doggola ame tye tutuŋ anyarodi. Awobe mere rik ote pokkigi tic me gwoko ot kano jami. Kwir a Cupim kede Koca te poto me gwoko doggola ame tye tutuŋ to, kede doggola ame Celeket ame tye i yo ame dok malo, Tic me gwoko doggola rik onwoŋo opoko baŋ jo i dul i dul, kun wel jo ame gwoko nino acel acel tye kit man: Jo abicel en ame kuro doggola ame tye tuŋ kide i nino acel acel, jo aŋwen en ame rik kuro doggola ame tye tutuŋ anyarolum nino acel acel jo aŋwen en ame rik kuro doggola ame tye tutuŋ anyarodi, jo aryo aryo en ame rik kuro ot kano jami, I ot ame tere peru ame tye tuturj to onwoŋo tye jo aŋwen en ame kuro kun obedo i ŋet yo kede jo aryo ame obedo i ot ame tere peru, Man en kit ame rik opoko kede tic baŋ omego me doggola a Kora kede me doggola a Merari. I akina jo Levi rik oketo Akija me bedo adwoŋ ame gwoko udi me kano lim ame tye i ot Obaŋa, kede udi me kano lim me me mot ame ojalo baŋ Rwot. Laban, ame rik obedo dano me doggola a Gercon, onwoŋo rik obedo kwaro a jo me doggola apol apapat, ame iyi akinagi tye iye jo me doggola a Jekiel. Awobe a Jekiel aryo, Jetam kede ominnere Joel, gin rik obedo odoŋe ame gwoko udi me kano lim ame onwoŋo tye i ot a Rwot kede udi me kano jami, Rik daŋ opoko tic baŋ jo Amuram, jo Ijar, jo a Kebron, kede jo Ujiel. Cebuel ame obedo akwar Gercom wot a Muca en ame rik obedo adwoŋ ame lo tic me gwoko udi me kano lim. Omego mere rik ene: i akina ikwae Eliejer rik tye wode Rekabia ame obedo papa a Jecaya, ame wode Joram, ame obedo pappa Jikri ame wode Celomot. Celomot karacel kede jo me ode luŋ rik gin obedo jo ame gwoko udi kano mot luŋ ame abaka Daudi ojalo baŋ Obaŋa, kede mot ame odoŋe atekere ame loo doggola acel acel ojalo kede en ame otel mony ame loo jo tutumia ojalo kede en ame otel mony ame loo jo mia ojalo karacel kede en ame otel mony adoŋo ojalo. G in rik ojalo mot ame oya i kom gin ame oyako i lweny me yiko ot a Rwot. Celumot karacel kede jo me ode luŋ rik gin obedo jo ame gwoko udi me kano mot luŋ ame ojalo me tic i ot Rwot, medo kede mot ame adwarpiny Camwiri okelo, kede en ame abaka Caulo wot a Kic okelo, kede en ame Abuneri wot a Ner okelo, kede en ame Yoab wot a Jeruya okelo. I kom ikwae Ijar, rik oyero Kanania kede awobe mere me tiyo tic ocele iyi akina jo Icrael, kun gin obedo acalo rwode kede oŋolkop. I kom ikwae a Kebron rik ote yero Kacabia karacel kede wati mere tutumia acel kede mia abiro ame gin luŋ odiro meicel i neno tic a jo Icrael ame tye tutuŋ to me kulo Jordan, kun oneno tic a Rwot kede tic abaka daŋ, Jerija en ame rik obedo adwoŋgi akina ikwae a jo Kebron luŋ. I mwaka me pyeraŋwen nono me loc a Daudi, rik ote bedo yenyo kite ame ikwae a Kebron tye kede, rik ote nwoŋo jo amw odiro meicel i lweny i doggola man ame onwoŋo bedo i Jajer i lobo me Gilead. Daudi te yero Jerija kede jo ame odiro meicel i komgi ame romo tutumia aryo kede mia abiro ame gin luŋ obedo odoŋe atekere ame loo doggola a kwarigi me bedo jo ame ne no tic i lobo a jo Reuben, kede Gad kede me nucu atekere a jo Manace, kun oneno tic Obaŋa kede me abaka. Man en nyiŋ odoŋe atekere me Icrael me doggola a kwarigi, kede odoŋe ame onwoŋo obedo otel me mony, ame loo jo tutumia kede en ame loo jo mia, kede odoŋe ame rik tio baŋ abaka kun oloo kop ducu ame mako jo ame bino baŋ abaka kede en ame ya i bane. I dwe acel acel ame tye i mwaka acel dul apapat ame tye iye jo tutumia pyeroaryo wie aŋwen en ame rik bedo i tic man, kun otye kede atelgi me dwe nono. Magi en nyiŋ jo ame rik obedo otel me dwe acel acel: Jocobeam wot a Jabdiel en ame rik obedo adwoŋ ame loo dul me agege ame onwoŋo daŋ tio i dwe me agege; en rik obedo akwar Perej, kun telo mony ame tio i dwe me agege. Dodai ame obedo akwar Akoki en ame rik obedo adwoŋ ame loo dul mony me aryo, ame tio i dwe me aryo. Benaya wot a Yekoyadi alamdog, en ame rik obedo adwoŋ ame loo dul mony me adek, ame tio i dwe me adek. En ame rik daŋ obedo atel a jo pyeradek ame gin luŋ obedo twoni jo atek meicel, en onwoŋo dano acel i ak inagi. Wode Amijabed en ame rik leo kakare acalo adwoŋ ame loo dullere-nono. Acael ame obedo omin a Yoab, en ame rik obedo adwoŋ ame loo dul mony me aŋwen, ame tio i dwe me aŋwen. Wode Jebadia en ame rik leo kakare acalo adwoŋ ame loo dullere-nono. Camut ame obedo akwar Ijar en ame rik obedo adwoŋ ame loo dul mony me abic, ame tio i dwe me abic, Ira wot Ikec ame obedo dano me Tekoa en ame rik obedo adwoŋ ame loo dul mony me kanyape, ame tio i dwe me kanyape, Kelej ame obedo dano me Epraim, ame oya i Pelet en ame rik obedo adwoŋ ame loo dul mony me abiro, ame tio i dwe me abiro, Cibekai ame obedo dano me doggola a Jera, me atekere a Juda ame oya i boma me Kuca, en ame rik obedo adwoŋ ame rik telo dul mony me aboro, ame tio i dwe me aboro, Abiejer ame obedo dano me atekere a Benjamin ame onwoŋo oya i Anatot en ame rik obedo adwoŋ ame loo dul mony me aboŋwen, ame tio i dwe me aboŋwen. Makarai ame onwoŋo oya i Netopa, dano me doggola a Jera, en ame rik obedo adwoŋ ame loo dul mony me tomon, ame tio i dwe me tomon, Benaya ame obedo dano me atekere Epraim ame onwoŋo oya i Piraton, en onwoŋo obedo adwoŋ ame loo dul mony me apar wie acel, ame tio i dwe me apar wie acel. Keldai ame obedo dano me doggola Otniel ame onwoŋo oya i Netopa en ame rik obedo adwoŋ ame loo dul mony me apar wie aryo, ame tio i dwe me apar wie aryo. Man en nyiŋ jo ame rik loo atekere apapat me Icrael: Eliejer wot a Jikri en ame rik obedo adwoŋ ame loo atekere a jo Reuben; Cepatia wot a Maaka en ame rik obedo adwoŋ ame loo atekere a jo Cimeon; Kacabia wot a Kamuel en ame rik obedo adwoŋ ame loo atekere jo Levi; Jadok en ame rik loo jo Aron; Eliku ame rik nat acel i akina omego a Daudi en ame rik loo atekere ajo Juda; Omri wot a Mikael en ame rik obedo adwoŋ ame loo atekere a jo Icakar; Jeimaya wot Obadia en ame rik obedo adwoŋ ame loo atekere ajo Jabulon; Jeremot wot Ajriel en ame rik obedo adwoŋ ame loo atekere a jo Naputali; Kocea wot Ajajia en ame rik obedo adwoŋ ame loo atekere a jo Epraim; Joel wot a Pedaya en ame rik obedo adwoŋ ame loo nucu atekere a jo Manace; Eddo wot a Jekaria en ame rik obedo adwoŋ ame loo nucu atakere a jo Manace ocele ame onwoŋo tye i Gilead; Jaciel wot Abuneri en ame rik obedo adwoŋ ame loo atekere a jo Benjamin; Ajarel wot a Jerukam en ame rik obedo adwoŋ ame loo atekere a jo Dan: Magi en aye odoŋe ame onwoŋo loo atekere luŋ me Icrael. Daudi rik onwoŋo mom okwano wel jo ame mwaka me ditogi mom ru oromo pyeraryo, pien Rwot rik onwoŋo ociko ni ebino miyo jo Icrael bedo apol meicel acalo acer ame tye i polo. Yoab wot a Jeruya en ame rik ogeo kwano jo Icrael, cite rik mom te tyeko ducu, Obaŋa rik oketo can i kom jo Icrael pi wel jo ame okwano naca, naka omio welgi mom obin ocoo i buk me Tekwaro ame tito kop i kom abaka Daudi. Magi en nyiŋ jo ame rik onwoŋo loo jami abaka: Ajimavet wot Adiel en ame rik loo udi me kano lim abaka; Yonacan wot a Ujjia en ame rik loo udi me kano lim ame tye i akina pacci adoŋo kede en atino kede en ame tye i udi adono ame ocuŋ igun malo; Ejri wot a Kelub en ame rik loo jo ame tio tic me pur i poto; Cimei ame rik obedo dano me Rama en ame rik obedo nat ame loo potti olok; Jabdi ame rik obedo dano me Cipim en ame rik loo kono olok ame okano i udi me kano korjo olok. Baal-kanan ame obedo dano me Geder en ame rik obedo nat ame loo yen Jeituni kede olam ame rik tye i bar me Cepela; eka Yowaci en ame te loyo ot ame okano iye moo jeituni, Citrayi ame obedo dano me Caron en ame rik obedo ŋat ame loo dok ame rik okwao i Caron; Capat wot Adlai en ame rik loo dok luŋ ame okwao i luŋ apapat. Obil ame obedo dano me Icmail en ame rik obedo nat ame loo inaga luŋ; Jedeya ame obedo dano me Meronot en a rik obedo nat ame loo kana luŋ. Jajij me Kagri en ame rik obedo nat ame loo rommi kede dyegi luŋ, Magi en nyiŋ jo luŋ ame rik gwoko jami abaka Daudi. Yonacan ame obedo okeo a Daudi en ame rik obedo ami-tam pien en rik obedo loo ame niannere tut meicel, dok en ame rik obedo araŋ. En kede Jekiel wot a Kakmoni en ame rik loo kop i kom pwonyere awo be abaka. Akitopel rik obedo ami-tam baŋ abaka, eka Kucai me Arki te bedo awot abaka. I kare ame Akitopel oto, Yekoyada wot a Benaya kede Abiatar en ame te leyo kakare, Y oab en ame rik obedo adwoŋ ame loo mony abaka Daudi. Daudi rik ociko odoŋe me Icrael luŋ me cokere karacel i Jerucalem. Mannono te miyo odoŋe ate ke re ducu, odoŋe ame loo tic apapat ame rik otio i te loc abaka, odoŋe ame loo mony, ame loo jo tutumia karacel kede en ame loo jo mia, odoŋe luŋ ame gwoko jami kede lim abaka luŋ kede awobe mere, karacel kede odoŋe ame loo paco abaka, kede twoni jo atek i lweny, karacel kede jo luŋ ame odiro meicel i lweny. Daudi te ya malo, cun i nyimgi, te kobbigi ni, “Wun jo luŋ me lobowa, omegona karacel kede jona, winy wunu koppa, Rik an abedo i tam icunya me gero ot kan ame canduk me cikere a Rwot twero bedo iye, kede kan ame obino keto iye kom me teno tyen Obaŋawa, Atyeko doŋ yiko kite a myero ger kede ot me woro Obaŋa, ento Obaŋa ogeŋa oko kun kobo ni, ‘Yin mom ibino gero ottoro me wora pien yin ibedo alweny ame ityeko onyo re mo a jo adwoŋ meicel. Rwot Obaŋa me Icrael yam oyera karacel kede jo me doggola a kwarona me bedo loyo jo Icrael nakanaka. En yam oyero atekere me Juda me bedo atekere ame loc me Icrael ya iye, eka i kom atekere me Juda, en oyero ot a pappa, iyi akina awobe a pappa en te kwanya me bedo abaka ame loo jo Icrael ducu, En yam omia itino awobe apol meicel, ento i kom awobe nanono en otyeko yero Culeman me bedo i kom me loc a Rwot kun loo jo Icrael. “Rwot okobba ni, ‘Wodi Culeman en ame bino gero ot me wora. An atyeko yere me bedo woda, an abino bedo pappere. Abino miyo loccere moko atwal ka ee en oketo cunye atek me lubo cikka luŋ kede gin ame aciko ducu, kite ame am an en tye ka timo kede i kare-ni.’ ” Doŋ aman ba, an acikowu i nyim jo Icrael ducu kede i nyim Obaŋawa, wun myero igwok wunu dok daŋ ibed yenyo wunu ignnoro luŋ ame Rwot Obaŋawu ocikowa iye, me wek imedde wunu bedo wegi lobo man aber-ri, dok daŋ ibed kobo wunu akoba i cirj ikwaewu ame bi no bulowu acalo gin ame gin oleo i banwu, me wek bed timere amano nakanaka. “Aco yin woda Culeman, aciki ni myero ibed ame ineo Obaŋa a pappi, kun itio bane kede cunyi ducu kede cuny ayom. Pien Rwot nio cuny jo ducu, en rjio ginnoro luŋ ame dano tye ayiko i cunye kede ginnoro luŋ ame en mito. Ka ee yin ibino bane, en gire bino gami; ento ka ee iya oko i bane en bino weki ata nakanaka. Myero ine aber ni Rwot doŋ otyeko yeri me gero ot me wore. Doŋ pi mano myero ibed atek acalo ico ikokome me icak ticcono oko.” Daudi te miyo Culeman cal ame ogoo ame nyuto kite a myero ger kede ot Obaŋa luŋ, ame tye iye cal ot atidi ame tye i doggola me donyo i ot Obaŋa, kede cal udi iye luŋ, kede cal udi kano lim kede cal ici ka amala luŋ, kede cal me udi atitino ducu ame tye iye, karacel kede cal me icika ame kom me kica myero bed iye. Dok te miye cal ame nyuto dyekal luŋ ame tye i ŋet ot a Rwot kite ame rik en otamo kede, icika me udi atino ame omano ot ducu kede udi me kano lim luŋ ame tye i ot Obaŋa karacel kede udi me kano lim me mot ame otyeko jalo baŋ Rwot. Daudi dok te nyutte daŋ kite a myero tic olamdog kede jo Levi bed kede, onyutte kit tic apapat a myero gin ti i ot a Rwot; kede jami luŋ ame gin bino tic kede i ot a Rwot ame myero gin gwoki. Onyutte daŋ k it ame myero pim i jabu kede ryal me tiyo jami me tic luŋ, pek me jabu a myero pim me tiyo gi-cibo tara me jabu acel acel, kede pek me jabu myero pim me tiyo tara me jabu acel acel, kede ryal a myero pim me tiyo gi-cibo tara acel acel kede tara mere kun lubo kite ame otio kede gi-cibo tara acel acel i ot woro Rwot, kede jabu a myero pim me tiyo meja me jabu ame oketo iye ogati i nyim Rwot, kede ryal a myero pim me tiyo meja me ryal acel acel. Dok onyuto daŋ kite a myero pim kede jabu ame olio aber me tiyo acob riŋo, becen acel acel, ikopo acel acel kede bakuli acel acel, kede kite a myero pim kede ryal pi bakuli acel acel, kede kite a myero pim kede jabu ame olio aber me tiyo keno me waŋo odok akur, kede me tiyo gadi gadi okerubi ame bino yaro bwomgi wumo kede canduk me cikere a Rwot. Man luŋ en onyuto kannaler kite ame onwoŋo ocoye kede i buk ame Rwot ocoo i ciŋe, ame nyuto kite ame tic myero tiye kede luŋ. Daudi te kobbi wode Culeman ni, “Bed ico ame cunyi nwan me icak tic oko, Kur ilwor, cunyi kur poti; pien Rwot Obaŋa ame obedo Obaŋana, tye kedi. En mom bino weki ata, en bino bedo kedi tuno ka tic ame myero iti i ot a Rwot otum. Nen ba, olamdog ame atyeko poko dul i dul karacel kede Olevi pi tic a myero gin ti i ot Obaŋa; jo ame odiro i tic apapat ame tye kede miti i cunygi bino nywako ticcono karacel kedi. Lwak luŋ karacel kede odoŋe ame telogi, gin luŋ obino winyo koppi.” Abaka te kobbi lwak luŋ ame ocokere ni, “Woda Culeman en obedo nat ame Obaŋa doŋ otyeko yero, cite en pwod tidi dok mom tye kede ŋec oromo. Ento tic me atia dwon meicel pien paco adwoŋ-ŋi mom bino bedo me a dano ento me a Rwot Obaŋa. Pi mannono, omio an atemo i tekona ducu me yiko jami luŋ pi ot a Rwot Obaŋana. Atyeko yiko jabu me tiyo jami me jabu, ryal me tiyo jami me ryal, mola me tiyo jami me mola, nyonyo me tiyo jami me nyonyo, bao me tiyo jami me bao, kun amedo iye daŋ lwak kiddi me wei apimpim, kede kiddi ocele atitino mege me amwona i kom jabu, kede kiddi gedo mogo apapat me wei, ame mogo i akinagi tar mogo mimila meicel. Medo i kom jami a doŋ otyeko coko-nono pi ot man acil, pi mit adwoŋ meicel ame at ye kede i kom ot Obaŋana, omio amio daŋ jabuna kede ryalla ikoma, a yam akano me gero ot Obaŋa, Amio jabu ame olio acil ame pekkere romo talanta tutumia adek kede ryal ame pekkere talanta tutumia abiro me puyo kor apama me icika ot a Rwot, kede pi jami luŋ ame odiro bino tiyo, jabu me tiyo jami me jabu, kede ryal me tiyo jami me ryal. Aman doŋ, ŋa i akinawu ame oye miyo mot kun mio i yomcuny ame tin en okwerre kene i nyim Rwot kan?” Eka odoŋe atekere ame loo doggola a kwarrigi kede odene atekere ame loo atekeregi kede odoŋe ame telo wi mony me jo tutumia kede en ame telo jo mia karacel kede odoŋe luŋ ame loo tic abaka te ye miyo mot me gero ot Obaŋa, Gin omio jami magi me gero ot Obaŋa, jabu ame romo talanta tutumia abic kede lim ocele me jabu ame romo talanta tutumia apar, kede ryal ame romo talanta tutumia apar kede mola ame romo talanta tutumia apar wie aboro, kede nyonyo ame romo talanta tutumia mia acel. Jo ame onwoŋo tye i kiddi atitino me wei omiogi i ot kano lim ame tye i ot a Rwot, ame Jekiel, Alevi ame obedo dano me doggola a Gercom onwoŋo gwoko. Lwak rik te bedo miyo motgi kite ame yigi mito kun omio daŋ i yomcuny gin ame gin oyero, pien gin omio motgi baŋ Rwot kede cunygi luŋ. Abaka Daudi daŋ cunye te bedo ayom meicel. Daudi rik te pwoyo Rwot i nyim lwak luŋ ame ocokere kuno, kun kobo ni, “Pwoc myero bed bani, yin Rwot Obaŋa a kwarowa Icrael wan i waŋ, Dito kede teko, kwogo kede loc, kede woro obed gire megi, Ama Rwot pien jami luŋ ame tye i polo kede, i lobo, gin luŋ obedo megi, yin gire Ama Rwot, Ama Rwot, yin ame ibedo abaka ame loo jami luŋ aluŋa. Lonyo kede kwogo ya j bani, dok yin en ame iloogi ducu, Twer kede teko, gin luŋ tye i cini, dok yin ame imio dito kede teko baŋ jo luŋ, Aman doŋ wan opwoi, yin Obaŋawa, kun opako nyini me kwogo atek meicel. “Man omio an kede jona mom gire otwero miyi ginnoro, pien jami luŋ obedo mot ame oya i bani, doŋ gin ame wan omio bani obedo gire gin ame onwoŋo oya i cirji, Yin ineo, Ama Rwot ni wan ocalo welo ame bedo wot awota i kare me kwowa i lo bo kite ame rik kwariwa obedo timo. Nino ame wan obedo kede i lo bo calo tipo, mom otye i kabedowa i lobo kan, Ama Rwot Obaŋawa, lwak jami man adwoŋ wok-ki ame wan otyeko miyo me gero ot acil me wori, gin luŋ gire oya i cirji, gin luŋ obedo megi. An aneo ni yin Obaŋana itemo cuny dano acel acel dok ipwoo nat ame cunye ler. An atyeko miyo jami man luŋ bani i cuny aler ateteni, dok daŋ atyeko neno i wana ni jo meri ame ocokere kan-ni omio daŋ motgi i cuny ayom meicel, kun nat acel acel kwanyo gin ame yie omito. Ama Rwot Obaŋa a kwariwa Iburaim kede Icaka kede Yakobo, mi kodi cuny kede tam acalo mannono omedde bedo atek i cuny joni nakanaka, kun imiogi daŋ obedo jo ame ogeni. Dok mi woda Culeman obed i cuny me mako cikki i cunye ducu, kede gin ame iciko, kede icwil, kun tio jami ducu, dok daŋ me en ger ot me wori ame an doŋ atyeko yiko jami pire-ni.” Daudi te kobo baŋ lwak luŋ ame ocokere ni, “Pwo wunu Rwot Obaŋawu.” Lwak ame ocokere luŋ te cako pwoyo Rwot Obaŋa a kwarogi, gin te ryebere pmy, ote woro Rwot kede abaka daŋ. Orwo mere, gin te cako ŋolo motgi me yalo Rwot, ote daŋ yale kede mot awaŋa. Gin oyale i mot me twoni tutumia acel, nyogi rommi tutumia acel, itino rommi tutumia acel kun daŋ omio mot amata ame oyik o pi mot awaŋa acel acel, kede mot ocele apipim ame omio pi jo Icrael luŋ. I nino-nono gin rik te bedo i twon yomcuny adwoŋ meicel i kare ame gin onwoŋo otye ocam dok daŋ omatte i nyim Rwot. Gin te keto Culeman wot Daudi tyen me aryo me bedo abakagi, kun owire kede moo me bedo aloc pi Rwot, ote daŋ wiro Jadok kede moo me bedo alamdog Obaŋa. Culeman doŋ te leyo tic a pappere Daudi, kun bedo i wi kom loc a Rwot. En rik te bedo aloc ame kome i gum atek, kun jo Icrael luŋ winyo koppere. Odoŋe luŋ, twoni jo atek i lweny, karacel kede awobe abaka Daudi luŋ te cikere me woro abaka Culeman. Rwot te miyo nyiŋ Culeman bedo malo meicel baŋ jo Icrael luŋ, dok te miyo Culeman bedo i twon kwogo adwoŋ meicel i loccere ame kato obakki luŋ ame yam onwoŋo oloo jo Icrael. Daudi wot a Yece rik oloo jo Icrael kittono. En rik oloo jo Icrael pi mwakki pyerarjwen twal. En obedo aloc i Kebron pi mwakki abiro, eka te loc i Jerucalem pi mwakki pyeradek wie adek. Daudi oto ame onwoŋo doŋ oteggo atek meicel, kun twon alonyo moro a mom kobere, dokjo woro meicel, eka wode Culeman te leyo kakare acalo abaka. Kop i kom kwo a Daudi cakere i tere naka iyi agikki mere tye ocoo i buk me Tekwaro araŋ-piny Camwiri, kede me adwarpiny Natan, kede i me araŋ-piny Gad. Gin luŋ onyuto kite ame en oloo kede loccere, kede kite ame rik en tek kede, ginnoro luŋ ame otimere i kome, i kom jo Icrael, kede i kom loc me lobo ocele luŋ. Culeman wot a Daudi te moko loccere bedo atek meicel, kun Rwot Obaŋa mere mie winyo ame te miyo en bedo twon lo moro adwoŋ meicel. Culeman rik te kop i jo Icrael luŋ, kun kobo odoŋe ame onwoŋo telo wi mony, odoŋe ame loo jo tutumia kede en ame loo jo mia, oŋolkop kede odoŋe ocele luŋ me Icrael, karacel kede odoŋe me Icrael ame loo doggola a kwarigi, Culeman rik te ciko ni lwak luŋ myero wot kede i ka woro Obaŋa ame tye i wi kidi i Gibeon; pien kema me rwatte Obaŋa, ame Muca amiro Obaŋa rik otio i tim onwoŋo rik pwod tye kuno. Ento Daudi rik onwoŋo okwanyo canduk Obaŋa i Kiriat-jearim, okelo i kabedo ame rik en oyiko pire, pien en rik onwoŋo oguro kema pire i Jerucalem. Medo i mannono daŋ keno lam me mola ame rik Bejajel wot a Uri, ame obedo wot a Kur, rik otio, onwoŋo daŋ pwod tye i Gibeon kuno i nyim kema a Rwot. Culeman karacel kede lwak luŋ rik te wot woro Obaŋa kuno, Culeman rik te wot cuŋ i nyim Rwot kuno i nyim keno lam me mola, ame rik onwoŋo tye i nyim kema me rwatte; en te yalo Obaŋa i mot awaŋa ame romo tutumia acel i wi keno lam kuno, Kare ame en tye i Gibeon kuno, Obaŋa te nen baŋe i dyeworrono te kobbe ni, “Peny gin ame imito ni myero ami baŋi,” Culeman te gamo ni, “Yin doŋ ityeko nyuto twon marri adwoŋ a mom lokere baŋ amironi pappa Daudi, ityeko daŋ doŋ keta me bedo abaka kakare. Ama Obaŋa, mi kop ame rik iciko baŋ pappa Daudi ocobere doŋ oko aman, pien yin doŋ ityeko keta me bedo abaka ame loo rok adwoŋ meicel, ame pol calo apua me lobo. Tim ber tin doŋ imia ryeko kede ŋec, me aŋe loyo rok man, pien ŋa kara ame romo loyo rokki adwoŋ wok-ki?” Obaŋa te gamo ni, “Pien iyero man mom ikwao lim, lonyo kwogo akadi kwayo ni myero mi inek jo ame dagi oko, dok daŋ mom ikwao ni myero ami iperakino kare alac, cite ite lunyo kwayo ka ryeko kede ŋec, me wek ilo jona ame an doŋ atyeko keti me bedo abakagi, ryeko kede ŋec doŋ atyeko miyo oko baŋi. Abino daŋ miyo twon lonyo adwoŋ kede lim adwoŋ a mom twerre, kun daŋ jo wori atek, ame mom tye ŋattoro i akina oloc ame otelo nyimi ame yam koŋ obedo calo yin, dok daŋ mom tye moro i akina oloc ame bino lubi ame bino nwoŋo gin a yin inwoŋo.” Culeman doŋ te ya oko i nyim kema me rwatte, i wi kidi i Gibeon te wot i Jerucalem. En doŋ te bedo loyo jo Icrael. Culeman rik ocoko gadigadi lweny karacel kede olweny ame riŋo aguragura. En rik onwoŋo tye i gadigadi lweny tutumia apar wie aŋwen karacel kede wegi aguragura tutumia apar wie aryo, Mogo i akinagi rik bedo i boma apapat ame ogwoko iye gadigadi, en ocele bedo baŋ abaka i Jerucalem. Abaka rik te miyo ryal kede jabu doko gin a pire mom dit i Jerucalem calo gweŋ, kun bao me cedar dwoŋ atata i Jerucalem calo olam ame tye i bar me Cepela, Culeman rik onwoŋo aguragura mere i ya i lobo me Miciri kede i Kuc; ocatwil abaka rik wilogi i Kuc i wel ame onwoŋo doŋ omoko oko. Gadi gadi ame ya i Miciri rik acel acel romo cekel me ryal abicel, eka aguragura acel acel te bedo me ryal mia acel kede pyerabic. Ocatwil abaka te dok catogi oko baŋ obakki a jo Kitti kede me Curial. Culeman rik te cako tamo pi gero ot me woro Rwot, kede ot abaka. Culeman rik te yero jo ame romo tutumia pyeraboro ame ticgi obedo me payo kiddi i lobo obedo kidikidi, kede jo tutumia adek kede mia abicel ame loo ticgi. Culeman rik te cwayo kop baŋ Kuram, abaka me Turo, kun kobo ni, “Kite ame rik ibedo kede pappa Daudi kun icwaye bao cedar me gero ode, tim ber ibed keda daŋ kittono. Nen ba, an doŋ ayikere me gero ot me woro Rwot Obaŋana ame abinojalo baŋe me yale odok ame orubo i gin a ŋwece kur kede ogati ame obino keto bedo i nyime kare luŋ, kede dok me yale i mot awaŋa odiko kede otyeno, i nino me cabit luŋ, i por dwe kede i nino adoŋo luŋ ame Rwot Obaŋawa oketo, ame rik en ociko pi jo Icrael me agwoka nakanaka. Ot ame abino gero-nono bino bedo twon ot adwoŋ meicel, pien Obaŋawa dwoŋ kato Obaŋa ocele luŋ. Ento ŋa kara ame twero gero ot pi Obaŋa, kun kadi polo ame tye malo meicel, mom twero romme me bedo? Kara doŋ an abedo ŋa ame atwero gero ot pire-ni? Atwero gero ka kan ame myero waŋ iye odok akur i nyime keken. Pi mannono ba, amito icwaya lo ame adiro i tic me jabu, ryal, mola, nyonyo, kede i boŋo ame obedo amaramar kede en arema, kede en abululu bululu, kun daŋ opwonyo i goro kom jami, me en bin ti karacel kede otic ame odiro ame tye baŋa i Juda kede i Jerucalem, ame rik pappa Daudi omiogi baŋa. Cwaya daŋ yen me Lebanon, bao cedar kede cipre, kede bao algum, pien aŋeo ni omironi ŋeo toŋo yen ame tye i Lebanon. Dok daŋ omirona bino bedo karacel kede megi, me wek otoŋŋa bao adwoŋ meicel, pien ot ame agero-ni bino bedo adwoŋ dok me aura meicel. An abino miyo ŋano ame romo puku tutumia pyerabicel kede cayiri ame romo puku tutumia pyerabicel kede koŋo olok debe tutumia pyeraŋwen kede moo jeituni debe tutumia pyeraŋwen me kony joni ame bino toŋo yen.” Kuram abaka me Turo te dok iye i waraga ame ocoo baŋ Culeman kun kobo ni, “Pien Rwot maro jo mere omio oketi me bedo abaka me loyogi.” Kuram dok te kobo ni, “Myero gire pwo Rwot Obaŋa me Icrael, ame rik otio polo kede lobo, ame omio Daudi wode aryek, ame tye kede niaŋ atut kede diro adwoŋ meicel, ame doŋ otyeko yikere me gero ot pi Rwot, karacel kede ode en ikome. “An doŋ acwayi lo ame adiro ame tye kede ŋec atut meicel, nyiŋe Kuramabi, wot a dako oya i atekere me Dan, pappere dano me Turo. En ŋeo tic i jabu, ryal, mola, nyonyo kede kiddi, bao, boŋo amaramar kede en obedo bululu bululu kede en arema, karacel kede boŋo camanini aber. En ŋeo daŋ tic ducu me goro coc i kom jami, twero lubo kit calloro keken me tic ame omie. En myero ti karacel kede joni ame odiro ame obedo tic baŋ adwoŋŋa ame en pappi Daudi. Pi mannono ba, yin doŋ myero icwayiwa ŋano kede cayiri, moo kede koŋo olok ame ityeko doŋ cikere me miyo. Wan obino toŋo kit yen ducu ame yin imito arpe tye i Lebanon. Obino tweyogi luŋ karacel ote bologi i pii me kwakwaŋa i wi pii calo boda naka i Yopa, eka yin doŋ ite omogi tero i Jerucalem.” Culeman te cako kwano wel jo luŋ ame obedo rok ocele ame bedo i lobo me Icrael, ame rom aroma kede en ame pappere Daudi rik koŋ otimo. Rik ote nwoŋo ni welgi romo jo tutumia mia acel kede pyerabic wie adek, kede mia abicel. En oyero jo tutumia pyerabiro i akinagi me bedo jo ame ticgi obedo me yeyo kit yec ducu, kede jo tutumia pyeraboro me muko kiddi i lobo ame obedo kidikidi, kede jo tutumia adek kede mia abicel me bedo odoŋe ame loo tic, me cukoro cuny jo me tiyo ticgi. Culeman rik te cako gero ot a Rwot i Jerucalem i wi kidi me Moria, kan ame rik Rwot onyutte iye baŋ pappere Daudi, kan ame rik Daudi en oyero, i laro dino kal a Oman dano me Jebuc. En ocako gero i dwe me aryo, i mwaka me aŋwen me loccere. Man en kite ame rik en opimo kede ot Obaŋa: bor me yie onwoŋo romo futi pyeraboŋwen kun lac me yie tye pyeradek. Icika ame tye tuŋ tuŋ doggola me donyo, i nyim icika ame tye i dye ot, borrere onwoŋo romo futi pyeradek ame rom aroma i lac me icika acil; borrere me malo te bedo futi mia acel i pyeraboro. Yie ote mwono oko i jabu ame olio aber. I kor apama icika adwoŋŋere en ocacano iye bao cipre, eka te mwono kom bao-nono oko i jabu aber, kun ogogoro iye cal yen otit kede nyor. Yi ot onwoŋo odeo amwonya meicel kede gweŋe alilia me wel ame omwomwono i kom jabu, Jabu mere onwoŋo obedo jabu ame okelo i Parvaim. En omwono yi ot Obaŋa luŋ i jabu, karacel kede arii mege, arii me doggola mere luŋ, kor apama, kede doggola mere luŋ; dok te goro daŋ cal okerubi i kor apama. Culeman te daŋ dok tiyo kabedo acil meicel; borrere romo futi pyeradek ame rom aroma i lac me ot, kede laccere futi pyeradek. Omwono daŋ kome oko kede jabu aber ame pekkere romo talanta mia abicel. Pek me jabu me cumal ame otio kede me mwono jabu i ottono, oromo cekel pyerabic; en te mwono daŋ icika i malo luŋ i jabu. I kabedo acil meicel, en omio oketo iye okerubi aryo ame opao i yat, ote daŋ mwono komgi oko i jabu. Bwom okerubi luŋ ame oyare ayara onwoŋo romo futi pyeradek, acel acel borrere onwoŋo romo futi abiro kede nucu. Wi bwom okerubi acel onwoŋo gudo kor ot, kun bwom acel tuŋ ocele onwoŋo ogudo kor ot tuŋ ocele, wi bwom okerubi i dyere mege onwoŋo ogudo wi bwom okerubi wadgi. Bwom okerubi ocele tuŋ cel ame borrere tye futi abiro kede nucu wie tye ogudo kor ot, kun bwome ocele ame daŋ tye futi abiro i nucuni ogudo me awottere me agege-ca. Bwom okerubi magi ame oyarre ayara onwoŋo borgi romo futi pyeradek. Gin luŋ onwoŋo otye ocuŋ acuŋa i tyengi kun nyimgi oneno icika ot adwoŋŋere. Boŋo me icika ote kwoyo iye boŋo obedo bululu bululu kede en amaramar kede en arema, karacel kede boŋo camanini aber, kun okwogo meicel i cal okerubi. I nyim ot en te tiyo iye pagi aryo ame borgi romo futi pyerabic wie aryo, kun otio i wigi tok ame borgi tye futi abiro kede nucu. En dok te tiyo nyor acalo tigo me ŋut te keto i wi pagi aryo luŋ, te dok tiyo cal okwer pomegranat mia acel, te ketogi i kom nyor. En ocibo pagi man i nyim ot Obaŋa, acel tuŋ cem kede en ocele tuŋ cam. En te cako nyiŋ en ame onwoŋo tye tuŋ anyarolum ni, Jakin, kede en ame onwoŋo tye tuŋ anyarodi te cako nyiŋe ni Boaj. Otio keno lam me mola, ame borrere romo futi pyeradek, laccere daŋ futi pyeradek; borrere me malo futi aparwie abic. Dok te tiyo dero pii me mola oluŋere aluŋa ame tuttere romo futi abiro kede nucu, lac me yie futi apar wie abic, ya i doge tuŋcel tuno naka i doge tuŋ cel, eka laccere mano kore luŋ te bedo futi pyeraŋwen wie abic. I lak doge i piny ote ryeyo cal opoko mano amana ame kan ame oryeo iye-nono romo futi pyeraŋwen wie abic; cal opokonono oryeo i yore aryo. I kare ame otio dero pii me mola, otio daŋ cal opoko i kome cuto. En otero dero gwoko pii-nu te wot cibo i ŋe cal twoni me mola apar wie aryo, kun ocuŋ adek adek: adek oneno tuŋ anyarodi, adek oneno tuŋ to, adek oneno tuŋ anyarolum, kede adek te neno tutuŋ kide, ŋegi luŋ odok i te dero. Inoŋ a kom dero-nono onwoŋo romo inci adek; doge ote tiyo bala dog kopo, ame rom aroma i tur kalaŋweka. Dero gwoko pii-nono onwoŋo twero donyo iye pii ame kato debe tutumia abicel. Dok te tiyo tako lwok apar, oketo abic tutuŋ anyarolum, kede abic tutuŋ anyarodi. Gin onwoŋo obedo me lwoko jami ducu ame otio kedgi i mot awaŋa me yalo Obaŋa; dero pii oketo me lwok olamdog. Dok te tiyo acib tara me jabu apar kite ame onwoŋo ociko te ketogi daŋ i ot Obaŋa, kun keto abic tutuŋ anyarolum, kede abic tutuŋ anyarodi. Dok te tiyo meja apar, oketogi daŋ i ot Obaŋa, oketo abic tuŋ anyarolum, kede abic tuŋ anyarodi, dok te tiyo becen me jabu mia acel. Te daŋ yiko dyekal olamdog, kede dyekal adwoŋŋere, kede kika me dyekal, kun mwono kom kika luŋ kede mola; te keto dero pii cuŋ i gul ot tutuŋ anyarolum ame dok tutuŋ kide. Kuram dok te tiyo ta ko jobo buru apol kede atok buru anaka becen-gu. Mannono en kite ame Kuram otyeko kede tic i kom ot Obaŋa pi abaka Culamen. Otio pagi aryo, tok aryo ame oluŋere aluŋa calo gulu ame ote keto i wi pagi, kede boo aryo me wumo kom tok aryo ame oluŋere aluŋa ame bedo i wii pagi aryo ca. Otio daŋ cal okwer pomegranat mia aŋwen pi boo aryo luŋ, kun cal okwer pomegranat oryeo i yore aryo i kom boo acel acel me wumo wi tok aryo ame oluŋere aluŋa ame bedo i wi pagi aryo ca. Dok otio daŋ gadigadi atitino apar, tako mola apar ame oluto i gadigadi atitino-nono, kededero gwoko pii acel, kede twoni apar wie aryo me bedo i te derogwoko pii. Tako jobo buru kede atok buru, kede acob riŋo kede jami luŋ ame mitte me tic, jami magi ame Kuramabi otiogi pi abaka Culeman, me tic i ot a Rwot onwoŋo obedo me mola ame otio komgi apwot meicel. Abaka rik otio jami magi luŋ i bar me kulo Jordan, kan ame lobo me cweyo gulu tye iye i akina Cukot kede Jereda. Culeman rik otio jami magi apol meicel ame mola ame odonyo i komgi mom opimo pekkere. Mannono en kite amerik Culeman otio kede jami luŋ ame tye i ot Obaŋa: keno lam me jabu, meja me cano ogati ame oketo i nyim Rwot, acib tara, kede tara me jabu ame olio aber apipim ame myero bed lyel i nyim kabedo acil ame tye tyelo kite ame ociko kede; kede cal ature apipim kede tara daŋ apipim kede boi kwanyo mac, gin luŋ otio i jabu ame olio aber Meicel. Otio daŋ makac apopol, becen, tabo me waŋo odok akur kede weer me lodi mac, ame gin luŋ otiogi i jabu ame olio aber; kede pata me aketa i kika me doggola ame donyo iyi kabedo acil meicel ame tye tyelo, kede me aketa i kika me donyo iyi icika adwoŋŋere me ot Obaŋa, gin luŋ daŋ otio i jabu. Man en kite ame rik tic luŋ ame abaka Culeman otio i kom ot a Rwot otum kede. Culeman te daŋ kelo jami luŋ ame rik pappere Daudi ojalo baŋ Rwot iye; okelo ryal, jabu, kede jami ocele luŋ acalo, tabbi, cupa, kopo, te kanogi luŋ i ot kano lim a Rwot. Culeman rik te lwoŋo odoŋe me Icrael, odoŋ atekere kede odoŋe ame loo doggola a kwarigi me bino baŋe i Jerucalem me bino kwanyo canduk cikere a Rwot ame rik onwoŋo tye i paco a Daudi ame olwoŋo ni Cion. Jo Icrael luŋ te bino cokere baŋ abaka Culeman i kare me kwero ecuban, ame onwoŋo poto i dwe me abiro. I kare ame odoŋe luŋ me Icrael obino, Olevi doŋ te tiŋo canduk cikere a Rwot. Gin te tero candukkono kede kema me rwatte karacel kede jami acil luŋ ame rik onwoŋo tye i kema; olamdog kede Olevi te kelogi luŋ. Abaka Culeman karacel kede jo Icrael luŋ te cokere karacel i nyim candukkono, kun oŋolo lwak rommi kede twoni apipim, ame welgi mom ŋeye, dok daŋ mom romo kwanne, me yalo Rwot. Olamdog te doŋ tiŋo canduk me cikere a Rwot tero naka i kabedo mere iyi icika acil ame tye tyelo i ot a Rwot, ame en kabedo acil meicel, ote wot keto piny kuno ite bwom okerubi. Bwom okerubi ame oyarre te wumo candukkono oko karacel kede ludi luŋ me tiŋe. Ludi onwoŋo rik boco meicel ame ka ŋattoro ocuŋ i kabedo acil i nyim kabedo acil meicel ame tye tyelo, twero neno wigi, ento pe twero nen i koo, ludinono pwod tye kuno naka atot tin, Ginnoro ocele onwoŋo rik mom i candukkono, kono ka kiddi apada aryo ame rik Muca oketo kuno i te kidi me Koreb, kan ame Rwot rik ocikere iye i jo Icrael i kare ame gin oya i Miciri. Olamdog ducu ame onwoŋo tye kuno onwoŋo doŋ otyeko lonyere oko, kun mom oparo pi dul ticgi. I kare ame olamdog oya i kabedo acil, jo Levi luŋ ame gin onwoŋo ower wer onwoŋo ocuŋ i ŋet keno lam tutuŋ kide. Acap, Kanan, Jedutun kede awobegi karacel kede omegogi gin luŋ oruko boŋŋi me camanini abeco mege, omako daŋ tum me agoa kede naŋa karacel i naŋa opuk. Olamdog mia acel kede pyeraryo ame okut apel ocuŋ kedgi karacel. Doŋ onwoŋo obedo tic okut apel kede ower, me neno ni dwongi oribere karacel i pako kede pwoyo Rwot, kede ka owero wer i dwoŋ aloŋo, kun okuto apel kede tum karacel kede jami ocele luŋ me wer ame otio kedgi i pako Rwot. Gin te wer ni, “Pien en gire ber, marrere a mom lokere perakino atwal.” I caa-nono pol te bino poŋ ot a Rwot oko, Mannono omio olamdog mom dok romo tiyo ticgi i ot a Rwot pi pollono; pien kwogo a Rwot onwoŋo doŋ opoŋ iyi ot oko. Abaka Culeman te cako kwayo Obaŋa kun kobo ni, “Rwot doŋ oyero gire bedo i pol acol icuc. Agerri doŋ twon ottoro amalo meicel, me bed kabedoni nakanaka.” Abaka te doŋ lokere neno lwak eka te lamo winyo i kom jo Icrael luŋ, kun jo tye ame ocuŋ gigi mot, en te kobo ni, “Pwo wunu Rwot Obaŋa me Icrael! Pien en ikome omio gin a rik eciko baŋ pappa Daudi ocobere, ame en rik okobo ni, ‘Cakere i kare ame akwanyo jona Icrael i lobo Miciri, mom ru ayero boma moro i atekere me Icrael luŋ me gero ottoro iye, kan ame amito ni wora iye, dok mom ayero abaka moro me loyo jona Icrael; ento doŋ atyeko yero Jerucalem me bedo kan ame myero wora iye, dok ayero Daudi me loyo lwakka Icrael. I kare-naca pappa Daudi obedo kede tam i cunye me gero ot me woro Rwot Obaŋa a jo Icrael. Cite Rwot en ame rik te juko pappa kun kobo ni, “Itimo ber me bedo kede tam me gero ot me wora, ento mom yin en ame ibino gerra ot, wodi ame yin ibino nywalo en ame bino gero ot me wora.” Nen Rwot doŋ otyeko miyo gin a rik eciko ocobere oko; pien en omio an aleo kaka pappa Daudi acalo abaka me Icrael, kite ame rik Rwot ociko-naca, dok daŋ doŋ atyeko gero ot me woro Rwot Obaŋa me Icrael. Dok daŋ atyeko keto canduk a Rwot i ode-naca, ame tye iye kidi apada aryo me cikere ame rik Rwot ocikere kede i jo Icrael.’ ” Culeman te ya wot cuŋ i nyim keno lam kun lwak jo Icrael luŋ tye aneno, te taŋo ciŋe malo i polo. Culeman onwoŋo otio tuti me mola ame borrere romo futi abiro kede nucu laccere futi abiro kede nucu, borrere me malo futi aŋwen kede nucu, te cibo i dyekal; en te cuŋ i wie. En dok te rumo coŋe piny i nyim lwak jo Icrael luŋ ame onwoŋo ocokere karacel, te te taŋo ciŋe malo i polo, Okwao Rwot kun kobo ni, “Ama Obaŋa a jo Icrael, mom dok tye Obaŋa moro ocele ame cal kedi, akadi malo i polo onyo piny i wi lobo, ame gwoko cikere mere calo yin, yin ame inyuto marri baŋ omironi luŋ ame lubi kede cunygi luŋ, Ibedo lubo ginnoro luŋ ame rik ititti pappa Daudi; gin ame yin rik ikobo kede dogi, aman doŋ yin i komi icako miyo cobere oko, dok daŋ ocobere luŋ kakare. Ama Rwot Obaŋa a jo Icrael, doŋ ityeko giri lubo ginnoro luŋ ame rik iciko baŋ pappa Daudi ni, ‘Mom gire ibino bedo aboŋo akwarri moro i wi kom loc me Icrael, tekki ikwaeni bino bedo jo a kitegi beco, kun otio gin ame an amito, kite ame yin ibedo tiyo kede-ni.’ Ama Rwot Obaŋa me Icrael, tim ber aman doŋ imed moko koppinaca ba, bed ame rik ikobo baŋ pappa Daudi, me kite ame rik ikobo kede. “Ento Obaŋa bino bedo piny i lobo kan karacel i dano ateni? En ame kadi polo twal daŋ mom rommenie, kara doŋ ot ame agero-ni twero romme ni ŋo? Kadi amannono ba tim ber iwiny kwacca an amironi, abaka doga baŋi, Ama Rwot Obaŋana, tim ber iwiny kokona kede kwacca ame aketa i nyimi tin-ni. Tim ber inen ot man dyewor kede dyeceŋ, kabedo man ame yin iyero me bedo kan ame myero jo wori iye. Tim ber iwiny kwacca ame aketo i nyimi kan i ot man. Winy kwacca karacel kede kwac a joni Icrael ka ce gin okwao kun nyimgi neno ot man, Winy ba, Ama Rwot, i kabedoni ame tye malo i polo, dok daŋ itimwa kica i kom balwa. “Ka ce ŋattoro otimo balloro baŋ dano wadgi, eka ote kele kan i nyim keno lam ni myero en kwoŋ iye, tim ber iwiny i kabedoni i polo ite ŋolo kop i akina omironi. Mi can opot i kom obalo, kun idwoko timere i wie; mi ŋat a kopporo mom i kome lo kop, kun itime ber ame oromo kite atira. “Ka ce okwor a joni Icrael oloogi oko pi balloro ame gin obalo i nyimi, ka ce oŋut ote dwogo baŋi, ote bino paki i ot man kun obako doggi baŋi, tim ber iwiny kwacgi i kabedoni ame tye malo i polo. Tim joni kica i kom balgi, ite dwoggogi i lobo a rik omio baŋ kwarigi. “Ka ce joni Icrael otimo balloro baŋi, eka ite keto can i komgi, kun itwonogi kot oko, icennere gin te ŋut, ote dwogo kwayi kun nyimgi ne no ot man, kun daŋ opako nyiŋi, tim ber iwiny kwacgi i kabedoni ame tye malo i polo. Tim ber itim omironi kica i kom balgi, ame gin obedo joni Icrael. Pwonygi me bedo i kit kwo ame yin imito, mi kot ocwe i loboni, ame rik imio baŋ joni Icrael me bedo lobogi doŋ atwal. “Ka ce kec opoto i lobo, onyo two edeke, onyo ceŋ otwo kai oko, onyo oner oko, onyo bonyo, onyo kit kudi moro ocele en ame ocamo; onyo ka okwor oero lweny i kom joni, te gurogi oko i bomagi, onyo ka two moro ocele ame opoto i akinagi, tim ber iwiny kwacgi. Ka ce ŋattoro keken i akina joni Icrael ame cunye ocwer obino ocwalo kwaccere baŋi, kun nyime one no ot man, onyo jo Icrael luŋ ocwalo kwacgi baŋi, tim ber iwiny kwacgi. Winy kwacgi i kabedoni ame tye malo i polo timgi kica, ite timo gin ame ineno ni porre pire on yo pirgi i kom gin ame gin okwao. Yin keni gire ineo gin ame tye i cuny dano acel acel; pi mannono, yin timmi ŋat acel acel gin ame ineno ni porre pire, me jo Icrael bed kede lworo i komi kare luŋ ame gin tye i lobo ame yin rik imio baŋ kwarigi. “Ka ce arokkoro ame mom dano me Icrael owinyo piri, kede pi gigi mogo adonodono ame yin ibedo ti mo baŋ joni Icrael, eka te bino i ot man pi bino worri kun oya i lobo abor, tim ber iwiny kwaccere i kabedoni ame tye malo i polo. Tim ber iti gin ame en okwao pire, me jo me wi polo luŋ ŋei ote bedo kede lworo i komi ame rom aroma kede joni Icrael. Mannono bino miyo miyo gin ŋeo ni ot ame an agero kan piri-ni en ame obedo kan ame myero wori iye. “Ka ce yin iciko joni me wot lweny okworgi, ka ce gin okelo kwacgi i nyimi i kan ame gin otye iye kuno, kun nyimgi oneno kabedo man ame yin en iyero, kede ot man ame an agero piri-ni, tim ber iwiny kwacgi i kabedoni ame tye malo i polo, ite miyogi loyo okworgi oko. “Ka ce joni Icrael opoto i bal i nyimi, pien mom tye dano moro kadi acel ame mom timo bal, eka akemo te maki i komgi, ite miyo okworgi loyogi oko, te daŋ terogi oko acalo opii, i lobo moro ocele ame tye kannabor onyo ame tye kan aceggi; cite ka i kare ame gin tye kuno cunygi te kolo piny, ote ŋut, ote kwayi kun otuco balgi i nyimi, kun oye ni kitegi oballe oko pi gin areco ame gin obedo timo, tim ber iwiny kwacgi Ama Rwot. Ka ce i kare ame gin tye kuno i lobo ame oterogi iye acalo opii, gin te ŋut, kun oŋut ateteni i cunygi ducu, ote kwayi i kuno kun nyimgi oneno lobo man ame yin rik imio baŋ kwarigi, kede kabedo man ame yin giri en iyero kede ot man ame an agero piri-ni, tim ber iwiny kwacgi i kabedoni ame tye malo i polo, ite timogi kica i kom balgi. Aman doŋ ba, Ama Obaŋa, cik waŋi dok iter daŋ yiti i kwac luŋ ame obino kwayo i kabedo man. Ya doŋ malo, Ama Rwot Obaŋa, me iwot i ka weoni, yin karacel kede canduk me tekoni. Mi olamdog meri Ama Rwot Obaŋa, oruk ruk me larre, mi joni acillel i yomcuny pi berri. Ama Rwot Obaŋa, kur ikwer winyo kop a abakani ame iyero! Po pi marri a mom lokere i kom amironi Daudi.” Kare ame Culeman doŋ otyeko kwaccere, mac oya i polo te bino waŋo mot awaŋa me yalo Obaŋa karacel kede mot ocele luŋ, kwogo a Rwot te poŋ yi ot Obaŋa oko, Mannono te miyo olamdog mom doŋ romo donyo i ot a Rwot, pien kwogo a Rwot onwoŋo doŋ opoŋ yi ot oko, I kare ame jo Icrael luŋ oneno mac ame oya i polo obino piny, kede kwogo a Rwot ame opoŋ iyi ot Obaŋa, gin oryebere piny kun nyimgi gudo lobo i dyekal ame opepeto iye kiddi, ote woro Rwot kun opwoc, okobo ni, “Pien en gire ber, marrere a mom lokere perakino atwal.” Abaka kede lwak luŋ a rik tye kuno te yalo Rwot. Abaka Culeman oyalo Rwot i twoni tutumia pyeraryo wie aryo, kede rommi tutumia acel, i pyeraryo nono. Abaka karacel kede jo Icrael luŋ te kwero ot a Rwot kittono. Olamdog te cuŋ i kabedogi, kede jo Levi, kun omako jami me wergi, me pako Rwot, kite ame rik abaka Daudi oyiko me miyo pwoc baŋ Rwot, pien marrere a mom lokere perakino atwal. Mannono onwoŋo rik obedo timo kare ducu ame Daudi pako iye Obaŋa kun gin okonye i wergi, Lwak jo Icrael luŋ onwoŋo ocuŋ okemere kede olamdog ame akuto apel. Culeman dok te kwero dye dyekal ame tye i nyim ot Obaŋa. En oyalo Rwot i mot awaŋa kuno, kede dwol me mot me kweyo cuny, pien keno lam me mola ame onwoŋo mom romo keto mot awaŋa kede mot me moko kwon kede dwolo me yalo Rwot. I kare-nono Culeman karacel kede jo Icrael luŋ te kwero ecuban, nino abiro. Jo Icrael ame okwero ecuban-nono onwoŋo dwoŋ meicel jo luŋ ame oya i dog yo ame woto Kamat tuno kede naka i kulo me Miciri. I nino me kany wie adekkere, gin te bedo kede cokere adwoŋ; pien gin obedo kwero keno lam nino abiro twal kede ecuban nino abiro daŋ. I nino me pyeraryo wie adek me dwe me abiro en ame rik Culeman ocwao iye lwak me dok i paccigi. Lwak odok i paccigi kun cunygi yom atek meicel pi jami abeco luŋ ame Rwot otimo pi amiro mere Daudi kede Culeman kede lwakkere luŋ ame gin jo Icrael. Mannono en kite a Culeman otyeko kede tic me gero ot a Rwot kede ot abaka; tic luŋ ame rik en oyiko me atia i ot a Rwot kede i ode en ocobo aber meicel. Rwot dok omedo nen baŋe tyen me aryo mere dyewor, kun kobbe ni, “Atyeko doŋ winyo kwacci, atyeko doŋ yero kabedo man pira me bed acalo ot me yala kede mot, Ka ce acego polo oko a kot doŋ mom cwe, onyo ka aciko ni bonyo myero cam cam ame tye i lobo tyek oko, onyo ka ce acwao two edeke i kom lwak ka, ka ce lwakka ame olwoŋogi kede nyiŋa omwolle, eka ote kwaya kun owora dok daŋ oweko timo tim areco, an dok abino winyo kwacgi i polo, ate weko balgi, dok abino kwanyo gin ame tye ka balo lobogi oko. Cakere tin abino ciko waŋa dok abino tero yita me winyo kwac ame obino kwayo i kabedo man, Pien tin doŋ atyeko yero jo man, dok daŋ atyeko lonyo oko bedo acil, me nyiŋa bed iye nakanaka; waŋa kede cunya bino daŋ bedo kuno nakanaka. Aco yin ba, ka ce ibino tic baŋa kite ame pappi Daudi obedo timo, ce ibedo tiyo gin ame aciko luŋ, kun igwoko daŋ cikka luŋ, kede gin ame aciko, an Obaŋani abino moko locci bedo nakanaka kun agwoko gin a rik aciko baŋ pappi Daudi, kare ame akobbe ni, ikwae en ame bino loyo Icrael nakanaka. “Ento ka ce ibino gak wunu oko i yo apat, kun mom dok iluba wunu, dok daŋ mom itio wunu gin ame aciko, eka ite kobo wunu oko baŋ obaŋa moro ocele kun daŋ dok iworogi wunu, an abino kwanyowu oko i lobo ame rik amiowu. Dok mom daŋ abino ciko waŋa i kom ot man ame doŋ atyeko lonyo doko acil me wora-ni; dok abino miyo doko gin ame rok luŋ lolo i doggi, kun oceko kop i kome. Jo luŋ ame bino beo i ŋet ot man adwoŋ wok-ki, obino wuro awura kun ojwiye kengikengi, okobo ni, ‘Do kara omio Rwot otimo lobo man kede ot man kit man ba?’ Jo ocele bino kobo ni, ‘Pien jo Icrael oweko Rwot Obaŋagi oko ata, ame okwanyo kwarigi i lobo me Miciri, gin gigi dok olunyo kobo baŋ obaŋe mogo ocele kun oworogi dok paŋ otio tic pirgi. Mannono en omio Rwot oketo twon can agwa wok-ki i komgi.’ ” Gero ot Obaŋa kede me abaka oteri Culeman mwakki pyeraryo twal me tum. Culeman dok te cako roco boma mogo ame rik abaka Kuram omiogi baŋe, te miyo jo Icrael bedo iye, Culeman dok te wot i Kamat-joba, te wot mayo oko. En dok te gero Tadmor ame tye i tim kede boma luŋ me kano cam ame en ogerogi i Kamat. En ogero daŋ Bet-koron Amalo kede Bet-koron Apiny, te celo boma oko i cel atek, te daŋ keto iye doggola ame ocego atek. Ogero daŋ Baalat, kede boma luŋ me kano cam ame rik en tye kedgi, kede boma me gwoko gadigadi me mony, kede boma a wegi aguragura, kede kit gedo luŋ ame Culeman rik omito gero i Jerucalem, kede i Lebanon, kede i lobo ame en loo luŋ. Jo ame obedo rono i tic me gedo obedo jo luŋ ame odoŋ i kom jo Kitti, jo Amor, jo Periji, jo Kivi, kede jo Jebuc ame gin mom obedo jo Icrael. Ikwaegi ame rik jo Icrael mom oneko i kare ame gin gamo lobogi me bedo meggi, gin en ame Culeman obedo ronogi i tic kite ame pwod otye ka ronogi kede i tic naka atot tin. Ento Culeman mom otio i jo Icrael i kokome acalo opii; gin obedo ocirikale, odoŋe ame loo tic apapat, kede odoŋe me mony odoŋe me gadigadi lweny, kede oŋwec aguragura abaka. Odoŋe ame loo tic apapat me gedo ame rik Culeman oketo rik romo mia aryo kede pyerabic. Jo-ni en ame obedo loyo lwak. Culeman te kwanyo nyaka a Parao i paco a Daudi tero i ot ame en ogero pire, kun kobo ni, “Dakona mom bino bedo i ot a Daudi abaka me Icrael, pien kabedo luŋ ame doŋ canduk a Rwot obedo iye-ni odoko kabedo acil.” Culeman te bedo yalo Rwot i mot awaŋa i wi keno lam ame en ocano me yalo Rwot i nyim icika ot ame tye i doggola, En obedo yalo Rwot i mot kite ame omito me nino acel acel, kun luba cik a Muca i cabit luŋ, kede por dwe, i nino adoŋo adek ame ociko i mwaka acel acel, ame obedo kare me ecuban me Ogati a Tobi Mom iye, kare me ecuban me cabit abiro, kede kare me ecuban me Gonye. Kite ame rik pappere Daudi ociko, en oketo olamdog i dul apapat i dog ticgi, kede Olevi i dog ticgi me pako Obaŋa kede me konyo olamdog, kun lubo tic me nino acel acel. Opoko daŋ tic ogwok doggola luŋ kun pokogi i dul i dul i doggola acel acel, kite ame Daudi dano Obaŋa rik onwoŋo ociko. Gin daŋ obedo lubo cik ame abaka rik ociko kede olamdog kede Olevi, mom oweko moro kadi acel ame mako kopporo luŋ ame ociko kede ame mako kano lim. Culeman rik te tyeko ticcere luŋ kittino, cakere i nino ame oketo iye acakki te ot a Rwot tuno kede i nino ame otum iye. Ot a Rwot rik te tum kittono. Culeman rik dok te wot naka i Ejion-geber ame ceggi kede Elat ame tye i dog nam, i lobo Edom. Abaka kuram rik te cwayo jo mere kede mel baŋ Culeman; en ocwao jo ame odiro i nam, gin te wot naka i Opir karacel kede omiro a Culeman, ote wot kelo jabu i kuno, pekkere onwoŋo buco romo tan apar wie abicel, ote kelo baŋ a baka Culeman. I kare ame abaka adako me Ceba owinyo nyiŋ Culeman orwo atek, en obino baŋe i Jerucalem me bino teme kede penyere mogo atek meicel. En obino kede jo cipan ame gwoke, kede inaga apipim ame oyeo i jami mogo a ŋwecgi kur, kede jabu adwoŋ atata, kede gweŋe alilia me wel. Kare ame en otuno baŋ Culeman, en otitte kop ducu ame onwoŋo tye icunye. Culeman te dok i penyere luŋ; mom tye moro kadi acel ame tuco oloo Culeman. Kare ame en doŋ oneno ryeko a Culeman luŋ, kede ot ame en ogero, kede cam ame obedo tedde, kede kabedo ocele adoŋo doŋe, kede lwak jo ame tio baŋe, kede boŋŋi ame gin ruko me wel, kede jo ame mie koŋo olok, karacel kede mot ame en yalo kede Rwot, wi abaka me Ceba te cuŋ oko. En te kobbi abaka Culeman ni, “Gin ame abedo winyo i komi kede i kom ryekoni i kare ame pwod atye i lobona, tye kara ateni! Cite an onwoŋo mom aye, tuno ka tin doŋ aneno kede waŋa. Nen ba, kop ame onwoŋo awinyo i kom ryekoni adwoŋ kara onwoŋo aduno moro; ryekoni kede lonyoni dwoŋ kara atek meicel ame kato kit ame onwoŋo okobba kede oko. Monni komgi i gum okato kare! Omironi luŋ komgi i gum meicel, me cuŋ i nyimi kare luŋ kun owinyo kop me ryeko ame ya i dogi! Rwot Obaŋani myero pwo atek meicel, pien onyuto yomcunye i komi pi keti me bedo abaka akakare en Rwot Obaŋani! Pien Rwot Obaŋani omaro jo Icrael atwal dok omito ni gin omok atek meicel, en omio en oketi me bedo abakagi, me yin ilogi aber kun itio gin a tye atira, dok iŋolo kop kakare.” Abaka a dako me Ceba te miyo Culeman jabu ame pekkere buco romo tan abic, kede odokkogo ame ŋwecgi kur apipim kede gweŋe alilia me wel apipim. I kare-nono onwoŋo mom tye odokkoro a ŋwece kur ame rom i en ame abaka me Ceba omo baŋ Culeman-nono. Medo i kom mannono, omiro a Kuram kede omiro a Culeman, ame onwoŋo okelo jabu i Opir, okelo daŋ bao mogo me yat ame olwoŋo ni algum, karacel kede gweŋe ame lilia me wel apipim. Bao-nono abaka Culeman te bedo tic kedgi me citep i ot a Rwot kede i ot abaka. Otio daŋ i naŋa kede naŋa opuk pi jo ame wero; ame moro a rom kedgi rik mom ru onen i lobo me Juda luŋ. Abaka Culeman te miyo abaka adako me Ceba jami luŋ ame rik omito; omie ginnoro luŋ ame en openyo, kun omedo iye gin amerrom i gin ame en okelo baŋe. Eka abaka adako me Ceba kede jo mere te doŋ dok i lobo mere me Ceba. Abaka Culeman rik nwoŋo jabu abup meicel ame kato tan pyeraryo wie abic twal i mwaka acel acel. Man nwoŋo mom okwano iye en ame bino i baŋ ocatwil me paco kede me lobo a aoko, kede me en ame ya i baŋ obakki me lo bo Arab, kede en ame gabuna mere ame loo lobo apapat kelo baŋe. Culeman rik daŋ otio kwode adoŋo ame romo mia aryo, kun otio gin luŋ kede jabu ame oteto anyul; ame kwot acel acel odonyo iye jabu ame buco romo ratili pyeraryo. Dok te tiyo daŋ kwode atino mege mia adek kun daŋ otio gin luŋ i jabu, dok daŋ otetogi kede anyul, ame kwot acel acel odonyo iye jabu ame pekkere buco romo ratili apar. Abaka rik te ketogi luŋ i ot ame olwoŋo ni. Buŋ me Lebanon. Abaka Culeman dok otio daŋ kom loc adwoŋ, kun otio i lak lyec, te mwono kome luŋ i jabu ame olio aber. Kom locono rik tye kede citep abicel, kede kom jabu me teno tyen, ame okubo i kom kommono. I ŋete tuni kede tuni ote keto iye atenciŋ, kun cal eŋatu aryo ocuŋ i ŋet bad kom me teno ciŋ, dok daŋ tye iŋatu ocele apar wie aryo ame ocuŋ i agikki citep abicel-ca, tuŋŋi kede tuŋŋi. Mom tye kommoro ame abaka moro otio a cal i kommono. Ikopo abaka luŋ rik otio i jabu keken, kede jami luŋ ame rik otio kedgi i Buŋ me Lebanon, gin luŋ rik otio i jabu ame olio aber meicel. I kare a Culeman ryal onwoŋo obedo ginnoro ame mom otamo pire. Abaka daŋ rik tye i lwak mel ame woto Tarcic karacel kede mel a Kuram. Mel me Tarcic rik onwoŋo dwogo paco i mwaka adek adek kun okelo jabu, ryal, kede lak lyec, karacel ayom kede abim. Abaka Culeman rik obedo twon abaka moro ame alonyo dok ryek ame kato obakki ocele luŋ. Obakki me wi podo luŋ obedo kede mit me bino baŋe, me bino winyo kit ryeko ame Obaŋa onwoŋo omie. Ŋat acel acel ame rik bino baŋe, kelle mot a kitgi papat, acalo jami ame otio i ryal kede en ame olio i jabu, kede boŋŋi me aruka, odok murra kede gin a ŋwece kur, aguragura kede kanne adoŋo mege; man rik timere mwaka i mwaka. Abaka Culeman rik onwoŋo doŋ tye kede aguragura ame romo tutumia aŋwen iyi awi mere, kun tye i gadigadi lweny karacel kede jo ame riŋo kedgi ame romo tutumia apar wie aryo. Mogo i akinagi rik bedo i boma ame ogwoko iye gadigadi kun en ocele bedo baŋ abaka i Jerucalem, En rik oloo obakki luŋ cakere i Efurate tuno kede i lobo a jo Piriciti, kede i waŋ lobo me Miciri. I kare-naca abaka rik omio ryal odoko ginnoro a pire mom dit ame twero nwoŋere baŋ jo luŋ i Jerucalem calo gweŋ, kun daŋ bao cedar dwoŋ atata i Jerucalem calo olam ame tye i bar ame Cepela, Culeman rik onwoŋo aguragura mere i lobo Miciri kede i loba ducu. Kop ocele luŋ odoŋŋere i kom Culeman kede gin ame en otio, cakere i acakki tuno kede i agikki mere, ame mom ocoo kan, otyeko coyo luŋ i buk me Tekwaro ame adwarpiny Natan ocoo, dok daŋ tye i akina kop Obaŋa ame Akija dano me Cilo otyeto, kede i buk ame mako kop i kom gin ame Iddo aran-piny oneno ame mako kop i kom Jeroboam wot a Nebat. Culeman obedo abaka ame loo jo Icrael luŋ i Jerucalem pi mwakki pyeraŋwen. En oto te wot weo karacel i kwari mere, oyiko kome i paco a pappere Daudi. Wode Rekoboam te cako loc kakare. Rekoboam rik te wot i Cekem kan ame jo luŋ ocokere iye me kete i kom me bedo abaka. Jeroboam wot a Nebat owinyo pire i kare ame en onwoŋo pwod tye i Miciri kan ame en rik oriŋo iye pi riŋo abaka Culeman, en te ya oko i kuno te dwogo oko. Jo Icrael onwoŋo ocwao kwena me wot lwoŋe, eka Jeroboam karacel kede jo Icrael luŋ ame ocokere te kobbi Rekoboam ni, “Pappi rik otio kedwa agwa meicel. Aman doŋ ba, yin myero idwok tic apek ame pappi rik omiowa, kede yec apek ame en oketo i komwa, odok piny, wan obino bedo omironi.” Rekoboam te gamo ni, “Koŋ idok wunu iwot ityek wunu nino adek, ite dwogo wunu baŋa kan.” Lwak te dok oko ceŋ. Abaka Rekoboam te cako penyo tam i baŋ jo oteggo ame rik obedo tic i pappere acalo omi-tam, kun en penyogi ni, “Tam aŋo ame imia wunu me dok i peny a lwak?” Gin te kobbe ni, “Ka ce kica bino maki i kom jo man, ite kweyo cunygi kun i kobbigi kop abeco, gin bino bedo omironi nakanaka.” Ento en mom oketo cunye i tam ame jo oteggo-nono omie. En dok te cako penyo tam i baŋ olwagi mere ame onwoŋo bedo kede. En openyogi ni, “Kara tam aŋo ame imia wunu me dok i peny a lwak, ame okwaa ni, myero ajwik yecgi dok ayot?” Gin te gamo ni, “Yin myero ikobbigi kit man ni, ‘Nyako ciŋa acel dwoŋ kato pyer pappa oko. An abino timo kit man: Pappa yam omiowu yec apek meicel, mega bino bedo apek akato me a pappa oko, Pappa rik pwodowu i del, cite an abino pwodowu i gin ame lit bala kwir yib yit.’ ” I ŋe nino adek, Jeroboam karacel kede jo Icrael luŋ te dwogo baŋ abaka Rekoboam, kite ame rik ocikogi kede, kun kobo ni, “Dwog wunu baŋa kan i ŋe nino adek.” Abaka te cako dok i peny a lwak kede gero, kun mom oye lubo tam ame odoŋe oteggo omie. En okobbi lwak kite ame olwagi mere omie kede tam, kun kobbigi ni, “Pappa rik omio iyeo wunu yec apek, an abino medo bedo apek ame kato mege. Pappa rik pwodowu kede del, ento an abino pwodowu i gin ame lit kato kwir yib yit oko.” En abaka rik okwero winyo kop a lwak pien Rwot ikome en omio otimere amannono, me wek kop ame rik eciko baŋ Jeroboam wot a Nebat ocobere kakare kite ame rik emio Akija dano me Cilo okobo kede baŋ Jeroboam wot a Nebat. I kare ame jo Icrael oneno ni abaka mom oye winyo kokogi gin te kobbi abaka ni, “Wan giwa mom otye kede dulloro ame obedo megwa i kom Daudi. Wan giwa mom obino nwoŋo ginnoro i baŋ wot a Yece. Dok giwu i kemawu, wun jo Icrael! Nen doŋ odi keni yin Daudi!” Jo Icrael doŋ te cako ket oko, kun ŋat acel acel dok i paco mere. Rekoboam te doŋ loyo ka jo Icrael ame onwoŋo bedo i Juda. Abaka Rekoboam te cwayo Adoram adwoŋ ame onwoŋo rik loo tic me eroni, cite jo Icrael ote nanapo en i gweŋe ote neke oko. Man omio abaka Rekoboam te ru ya oko yito i wi gadigadi lwennyere, te riŋo naka i Jerucalem, Cakere i karenono jo Icrael te cako jem oko i kom oloc ame ya i ot a Daudi naka atot tin. Kare ame Rekoboam odwogo cen i Jerucalem, en ocako coko jo ame oyero ame romo tutumia acel kede pyeraboro iyi atekere a Juda kede Benjamin me wot lweny i kom jo Icrael me dwoggo jo luŋ i te loc a Rekoboam. Cite kop a Rwot te bino baŋ dano Obaŋa ame nyiŋe Cemaya, kun kobbe ni, “Wot ikobbi Rekoboam wot a Culeman, ame obedo abaka me Juda, kede jo luŋ me doggola a Juda kede me doggola a Benjamin ni, ‘Rwot okobo ni myero kur iwot ilweny wunu i kom omegowu ame gin obedo jo Icrael. Ŋat acel acel myero dok i paco mere, pien gin ame otimere-nono Rwot en ame mio timere.’ ” Gin luŋ ote winyo kop a Rwot ote dok oko cen, kun ŋat acel acel dok i paco mere, Mom dok ote wot lweny i kom Jeroboam. Rekoboam obedo i Jerucalem, ogero boma ame ocecelo me mony i Juda. En ogero Beterekem, Etam, Tekoa, Bet-jur, Coko, Adullam, Gat, Mareca, Jip, Adoraim, Lakic, Ajeka, Jora, Aijalon, kede Kebron, gin luŋ boma ame ocecelo atek ame onwoŋo tye i Juda kede i Benjamin. En oyiko cellere luŋ obedo atek, oketo odoŋe mony i yigi, te kano iye cam, moo kede koŋo olok, Te daŋ keto kwode kede toŋi i boma luŋ, ame te miyogi bedo atek meicel. Mannono kite ame Juda kede Benjamin obedo kede i te loccere. Olamdog kede jo Levi ame rik onwoŋo tye iyi Icrael luŋ, te bino baŋe luŋ, bino bedo i ŋete. Jo Levi onwoŋo oweko bar me kwatgi oko kede kan ame gin onwoŋo obedo iye, ote wot i Juda kede i Jerucalem, pien Jeroboam kede awobe mere onwoŋo oryemogi oko i tic me bedo olamdog a Rwot. Jeroboam te keto olamdoggere ame en oyero me tic i ka woro jogi ame tye malo i wi kiddi, kede me tic baŋ jogi me tim ame calo nyogi dyegi, kede baŋ cal twoni ame en otio, Jo ame rik onwoŋo cunygi tye i woro Rwot Obaŋa a jo Icrael olubo yo olamdog a Rwot, kun oya i atekere luŋ me Icrael, owoto i Jerucalem me wot yalo Rwot ame obedo Obaŋa a kwarigi, Gin te miyo loc me Juda bedo atek meicel, mannono te miyo Rekoboam wot a Culeman bedo atek abono ginnoro ayele pi mwakki adek, pien gin onwoŋo obedo lubo kite a Daudi kede Culeman pi mwakki adekkono. Rekoboam te nyomo Makalat nyaka a Jerimot wot a Daudi. Tota a Makalat obedo Abikairi nyaka Eliab wot a Yece. Makalat te nywalo itino awobe magi baŋ Rekoboam: Jeuc Cemaria, kede Jakam. Icennere dok te nyomo Maaka nyaka Abicalom ame te nywalle Abija, Atai, Jija, kede Celomit. Rekoboam rik onwoŋo maro Maaka nyaka Abicalom kato monnere luŋ karacel kede mon aŋeca. En rik onyomo mon apar wie aboro kede mon aŋeca pyerabicel twal; onywalo awo be pyeraryo wie aboro kede anyira pyerabicel. Rekoboam rik te keto wode Abija ame obedo wot a Maaka me bedo ŋat ame loo omego mere luŋ, pien rik onwoŋo mito kette me bedo abaka. En obedo tic i ryeko, opoko awobe mere mogo i dul lobo apapat ame tye i Juda kede Benjamin; oketogi i boma ame ocecelo atek, kun miogi cam adwoŋ, dok daŋ te nyommigi mon luŋ. I kare ame loc a Rekoboam doŋ omoko aber, kun medde ameda daŋ i bedo atek, en karacel kede jo Icrael luŋ te cako weko lubo cik a Rwot oko, I mwaka me abiccere me loc a Rekoboam, abaka Cicak me Miciri ocobo mony i kom Jerucalem, pien gengi onwoŋo doŋ oya oko i kom Rwot. En obino i gadigadi me lweny ame romo tutumia acel kede mia aryo karacel kede ocirikale ame riŋo aguragura tutumia pyerabicel. Aco jo ame obino kede kun oya i Miciri, welgi onwoŋo mom romo kwanne kadi acel; obino jo Libia, jo Cukkim, kede jo Eciopia. En te mayo boma luŋ ame ocecelo atek me Juda te tuno naka i Jerucalem. Adwarpiny Cemaya te wot baŋ abaka Rekoboam kede rwode me Juda, ame rik onwoŋo ocokere i Jerucalem pi Cicak, te kobbigi ni, “Rwot okobo ni, ‘Wun doŋ ityeko weka wunu oko, mannono omio an daŋ awekowu i ciŋ Cicak.’ ” Rwode me Icrael kede abaka te mwolle kengi, ote kobo ni, “Rwot gire tye kakare.” Kare ame Rwot oneno ni gin omwolle kengi, en te kobbi Cemaya ni, “Pien gin doŋ otyeko mwolle kengi, mom doŋ abino tyekogi. Gin bino bwot abwota; mom doŋ abino onyo akemona luŋ i kom Jerucalem, kun atio kede Cicak. Kadi bed amannono gin bino bedo amiro a Cicak, me oŋe apokapoka a tye i tic baŋa kede tic baŋ oloc me lobo apapat ame tye i wi podo.” Cicak, abaka me Miciri rik te bino cobo mony i kom Jerucalem. En rik te yako jami luŋ ame onwoŋo okano i ot kano jami a Rwot, kede en ame onwoŋo tye i ot kano jami abaka. En oyako jami luŋ, kun yako anaka kwode-gu, ame rik Culeman otio i jabu, Abaka Rekoboam rik dok te tiyo kwode ocele kaka en ame Cicak oyako; en otio kwode me mola, te miyogi i ciŋ odoŋe a jo ame onwoŋo gwoko doggola ot abaka. I kare luŋ ka rik abaka awot i ot a Rwot, jo ame gwoke ŋat acel woto i kwot i ciŋe, ate dok dwoko kakare i otgi. Kare ame en doŋ omwolle kene, akemo a Rwot te doŋ ya oko i kome, ame te miyo mom ote tyeko lobo mere oko; medo i kom mannono, kwo daŋ onwoŋo tye aber i Juda. Mannono te miyo Rekoboam moko loccere atek i Jerucalem, te daŋ bedo loc kuno, Rekoboam ocako loc ame mwaka me dittere doŋ romo pyeraŋwen wie acel; en te bedo loc i Jerucalem, i boma ame rik Rwot oyero i akina atekere luŋ me Icrael ni myero bed kan ame obino wore iye. En obedo loc kuno pi mwakki apar wie abiro. Nyiŋ tottere obedo Naama, ame obedo nya jo Ammon. En rik obedo timo tim arac, pien en mom obedo keto cunye me penyo gin ame Rwot mito ni etim. Kop i kom Rekoboam luŋ, cakere iyi ageyi naka i agikki, gin luŋ tye ocoo i buk me Tekwaro ame adwarpiny Cemaya ocoo, kede en ame Iddo aranpiny ocoo. Lweny rik obedo tye i akina Rekoboam kede Jeroboam kare luŋ. Rekoboam oto te wot weo karacel i kwari mere, oyiko kome i paco a Daudi. Wode Abija en ame te leyo kakare. I mwaka me apar wie aboro me loc a Jeroboam, en ame Abija ocako loyo kede jo Juda, En obedo loc i Jerucalem pi mwakki adek. Nyiŋ tottere onwoŋo Mikaya, ame obedo nyaka Uriel, dano me Gibea. Lweny rik obedo tye i akina Abija kede Jeroboam. Abija rik te wot i lweny kun tye kede jo atek meicel i lweny ame romo tutumia aŋwen ame oyero ayera. Jeroboam rik te ryeyo monyere me lweny kede, kun tye kede jo me lweny ame romo tutumia aboro, ame gin luŋ obedo jo atek meicel i lweny ame daŋ obedo jo ame oyero ayera. Abija te wot cuŋ i jo mere i wi kidi me Jemaraim ame tye i lobo obedo kidikidi me Epraim, te kobo ni, “Yin Jeroboam kede jo Icrael luŋ, winy wunu koppa! Mom ce iŋeo wunu ni Rwot Obaŋa me Icrael onwoŋo otyeko miyo tic me loyo jo Icrael nakanaka i ciŋ Daudi kede ikwae, i cikere ame omoko kede kado? Koŋ inen, Jeroboam wot a Nebat, amiro a Culeman wot a Daudi, rik otimjere me jem i kom adwoŋŋere. Jo mogo a kitegi reco, ocokere baŋe te jem i kom Rekoboam wot a Culeman i kare ame Rekoboam onwoŋo pwod tidi, tammere daŋ onwoŋo pwod goro, ame mom romo kwero tamgi. “Koŋ inen, aman doŋ imito wunu mayo loc a Rwot oko i ciŋ ikwae a Daudi, pien wun ipol wunu meicel, dok daŋ itye wunu i cal twoni me jabu aryo ame Jeroboam otio pirwu me bedo obaŋewu. Mom doŋ iryemo wunu olamdog a Rwot oko, ame obedo ikwae Aron, kede Olevi, eka ite keto wunu olamdog kenwu calo rok ame tye i lobo apapat? Ŋattoro keken ame obino te bino kwerre kene atin twon onyo nyogi romi abiro, dano-nono doko alamdog a gigi-mogo ame mom obedo obaŋa kadi acelloro. Aco wan giwa, Rwot en obedo Obaŋawa, mom ru daŋ oya giwa i baŋe. Wan otye kede olamdog ame tio baŋ Rwot, ame gin obedo ikwae Aron, kede Olevi ame konyogi. Gin oyalo Rwot odiko kede otyeno, kun oyale i mot awaŋa, kede odok a kur, dok daŋ ocano ogati i nyim Rwot i meja ame otio i jabu ame olio aber meicel, ogwoko daŋ acib tara, me wek maccere bed lyel otyeno luŋ, Mannono wan otimo me gwoko cik a Rwot Obaŋawa, cite wun ityeko ya wunu oko i baŋe. Nen ba, Obaŋa gire tye kedwa, kun telo nyimwa, olamdog tye kede apel ame okuto me lwoŋo jo me bino lweny kedwu, Ama, wun ikwae Icrael, myero kur ilweny wunu i Rwot, ame obedo Obaŋa a kwariwu; pien mom gire itwero wunu loye.” Jeroboam onwoŋo otyeko cwayo dul mony ocele owoto opono oko anyim, me lokere i komgi i tuŋ ŋegi. Monnyere rik onwoŋo tye i nyim jo Juda, kun jo ocele tye opono oko i ŋe omony me Juda. I kare ame jo Juda oneno, gin onwoŋo ni okwor tye i nyimgi kede i ŋegi; gin te cako kok baŋ Rwot, kun olamdog kuto apel. Jo Juda te cako wo i redo me lweny. I kare ame gin oredo, Obaŋa te miyo Abija kede jo juda loyo Jeroboam kede jo Icrael! Jo Icrael te cako mukere i ŋwec oko i nyim jo me Juda, Obaŋa te miyogi i ciŋ jo Juda. Abija kede jo mere te nekogi atek meicel; jo Icrael ame te to i akina olweny ame onwoŋo oyero ayera te romo tutumia mia abic. Mannono en kite ame oloo kede jo Icrael i kare-naca, jo me Juda oloogi pien gin onwoŋo ojeŋere i kom Rwot Obaŋa a kwarigi. Abija te ryemo yo Jeroboam, te wot mayo boma a jo Icrael mogo oko i baŋe, omao Betel kede pacci ame tye i ŋete, Jecana kede pacci ame tye i ŋete, Epron kede pacci ame tye i ŋete. I kare Abija luŋ, Jeroboam mom dok onwoŋo teko moro kadi acel ame romme lweny. Rwot ogoe, te to oko, Cite Abija omedde ameda i bedo atek, Onyomo mon apar wie aŋwen; gin te nywalle itino awobe pyeraryo wie aryo, kede anyira apar wie abicel. Kop i kom ginnoro luŋ ame Abija obedo tiyo ame mom ocoo kan gin ame en obedo kobo, gin luŋ tye ocoo i buk adwarpiny Iddo. Abija oto, te wot weo karacel kede kwari mere, ote yiko kome i paco a Daudi. Wode Aca en ame te leyo kakare, I kare mere luŋ lobo koŋ owe kun kuc tye iye pi mwakki apar. Aca rik obedo timo gin ame nen aber kede atira i nyim Rwot Obaŋa mere. En okwanyo keno lam me woro jogi orok oko, dok te mumuko ka woro jogi ame tye i wi kidi, kede gweŋe ame ocibo i ka woro jogi kun daŋ toŋo yen luŋ ame oguguro i ka woro jok a dako ame olwoŋo ni Acera. En te ciko jo Juda ni myero ocak woro Rwot, ame obedo Obaŋa a kwarigi, dok daŋ myero olub cikkere kede gin ame en ociko luŋ. Dok daŋ omumuko ka woro jogi luŋ ame rik tye i boma luŋ i Juda kede keno lam me waŋo odok a kur luŋ. I kare mere daŋ kuc obedo tye i Juda. En te gero boma ame ocecelo i Juda, pien lobo onwoŋo tye kede kuc. En mom olwenyo kadi acel i kare me loccere luŋ, pien Rwot omio kuc obedo tye i kare mere. En okobbi jo Juda ni, “Oger wunu boma magi oko, ote guro wunu oko apama cel, kun daŋ ogero iye udi mogo ame ocuŋ malo iguŋ, ame doggolagi tye kede kika ame ocegogi atek; lobe-ni gire pwod megwa, pien wan obedo timo gin ame obaŋawa mito, kun obino baŋe kare luŋ, omio en omiowa kuc tuŋŋi kede tuŋŋi.” Gin te gero, ote daŋ lony atek meicel. Aca rik onwoŋo tye i mony ame romo tutumia mia adek ame onwoŋo oya i Juda, wegi kwode kede toŋi, kun otye kede ocirikale me mony ame oya i Benjamin, ame romo tutumia mia aryo kede pyeraboro ame tye i kwode kede atero; jo-no luŋ rik onwoŋo obedo jo ame tek meicel i lweny. Jera, dano me Eciopia, obino me obino lweny i komgi, kun tye kede ocirikale me lweny ame romo million acel, kede gadigadi me lweny mia adek; gin te bino naka i Mareca. Aca te wot lweny kede, kun gin doŋ oryeye me lweny oko i luŋ me Jepata i Mareca. Aca te cwayo koko mere baŋ Rwot Obaŋa mere, kun kobo ni, “Ama Rwot, mom tye gire ŋattoro ame rom kedi ame twero konyo jo agoro i lweny i jo atek. Konywa, Ama Rwot Obaŋawa, pien wan ojeŋere i komi, wan obino i nyim jo man adwoŋ wok-ki kede nyiŋi. Ama Rwot, yin gire ibedo Obaŋawa; kur iye dano oloi.” Rwot te miyo Aca kede jo Juda, loyo jo Eciopia oko, jo Eciopia te mukere oko i ŋwec, Aca kede monnyere te ryemo yorgi naka i Gerar; jo Eciopia te to luŋ ame moro mom te doŋ kadi acel, pien onwoŋo doŋ onyobere oko i nyim Rwot kede monnyere, Jo Juda te yeye i lwak jami ayaka apipim. Gin te jwero jo luŋ ame onwoŋo tye i boma luŋ ame tye i ŋet Gerar, pien onwoŋo Rwot omio lworo omako jo i kuno. Gin te yako jami i boma-nogo luŋ, pien jami ayaka onwoŋo dwoŋ atek i yigi. Gin te cobo mony i kom okwattogo ame onwoŋo bedo i kema ame rik tye kede dok, ote tero rommi apipim kede inaga daŋ. Gin doŋ te dok i Jerucalem. Cuny Obaŋa te bino i kom Ajaria wot Obed, omio en te wot rwatte kede Aca, te kobbe ni, “Tim ber iwiny koppa, yin abaka Aca, karacel kede wun jo Juda kede Benjamin luŋ. Rwot bedo kedwu ka ce wun daŋ ibedo wunu baŋe. Ka ce ibedo wunu yenye, ibino nwoŋe wunu, ento ka ce iya wunu oko i baŋe, en daŋ bino kwerowu oko. Jo Icrael obedo aboŋo Obaŋa me ateni pi kare alac, kun olamdog ame pwonygi daŋ mom, dok cikkoro daŋ pe; cite i kare ame gin tye kede peko adwoŋ, ka gin olokere baŋ Rwot, ame obedo Obaŋa me Icrael, kun omito dok baŋe, gin onwoŋe. I kare-nono luŋ onwoŋo ŋattoro i akinagi mom tye kede kuc me wot kannoro onyo me dwogo paco pien ayelayela onwoŋo dwoŋ meicel baŋ jo luŋ ame onwoŋo bedo i lobo luŋ. Apokapoka onwoŋo dwoŋ meicel, rok onwoŋo lwenyo i rok, kun boma man lwenyo i boma ocele, pien Obaŋa onwoŋo obedo yelogi kede kite me can apapat. Ento wun myero ibed wunu kede cuny ame tek! Kur inyobere wunu pien obino culowu pi gin ame itio wunu.” Kare ame Aca owinyo kop luŋ ame adwarpiny Ajaria wot Obed orabo, cunye odoko atek, en te cako kwanyo cal jogi luŋ ame ipyeda ame onwoŋo tye i lobo Juda kede Benjamin, kede i boma luŋ ame onwoŋo en omao i lobo obedo kidikidi me Epraim, te yiko keno lam a Rwot ame rik onwoŋo tye i doggola me donyo i ot a Rwot. En te coko jo Juda kede jo Benjamin luŋ kede jo ame onwoŋo oya i Epraim, Manace, kede Cimeon, ame onwoŋo bedo i akinagi, pien jo apol meicel onwoŋo odak oko baŋe pien gin oneno ni Rwot tye ka tic kede. Gin luŋ ocokere i Jerucalem i dwe me adek, i mwaka me apar wie abic me loc Aca. Gin te yalo Rwot kede mot i ninonono, kun motgi-nono okwanyo i kom jami ame yam gin oyako ote kelo; gin oyale i twoni mia abiro kede nyogi rommi tutumia abiro. Gin dok te cikere i nino-nono me woro Rwot, ame obedo Obaŋa a kwarigi, kun owore i cunygi luŋ, kede tipogi luŋ; dok daŋ ni ŋattoro keken ame mom bino woro Rwot, ame obedo Obaŋa me Icrael, obino neko oko, kadi atin onyo dano adwoŋ, ico onyo dako, Gin te kwoŋ baŋ Rwot kun oredo i dwoŋ aloŋo, ame owo awoa, daŋ okuto apel kede bilo. Jo Juda luŋ cunygi te bedo ayom i kwoŋŋono, pien gin onwoŋo okwoŋo kede cunygi ducu, ote daŋ cako wore kun otye i mit adwoŋ meicel, Rwot daŋ te gamogi, te miyogi, kuc i kabedo luŋ ame omanogi. Abaka Aca te ryemo anaka tottere oko i dittere me bedo tota abaka, pien onwoŋo en otio cal jok ame ipyeda a dako ame olwoŋo ni Acera. Aca ototoŋo cal jokkono oko, te wot waŋo oko i ŋet kulo me Kidron. Kadi bed en mom omumuko ka woro jogi ame tye i wi kiddi malo; cite en omedde keto gennere i kom Rwot pi kare me kwo mere luŋ, En okelo mot a rik pappere otyeko jalo baŋ Rwot karacel kede mege ame en ojalo, acalo jabu, ryal kede jami ocele, te ketogi i ot a Rwot. Lweny te dok koŋ bedo pe tuno kede naka i mwaka me pyeradek wie abic me loccere. I mwaka me pyeradek wie abicel me loc Aca, Baaca abaka a jo Icrael owoto te wot cobo mony i kom jo Juda, en te mako boma me Rama, te daŋ celo oko me geŋo jo wot i Juda baŋ abaka Aca kede jo Juda me wot kannoro ocele, Aca te kwanyo ryal kede jabu ame rik tye i ot kano lim a Rwot, kede en ame onwoŋo tye i ot kano lim abaka, te cwayo baŋ Ben-adad, abaka me Curia, ame rik onwoŋo bedo i Damaciko, kun kobbe ni, “Tim ber iye ocikere kedi, kite ame rik kwarona kede kwaroni otimo, Nen ba, an acwayi ryal kede jabu. Tim ber iwot itur cikereni oko i Baaca abaka me Icrael, me en bin kwany monnyere oko.” Ben-adad daŋ te winyo gin ame Aca okobbe, te cako cwayo odoŋe ame telo monnyere me ero wot lweny i kom pacci mogo me Icrael, eka te mayo Ijon, Dan, Abel-Maim, kede boma luŋ me kano cam i lobo Naputali. Kare ame Baaca owinyo, oweko celo Rama oko, t i ccere te daŋ gik oko, Abaka Aca te wot i jo Juda luŋ, te wot weko gweŋe me Rama kede bayi luŋ, ame Baaca obedo tic kedgi me celo Rama, eka te lunyo celo i Ceba kede Mijipa. I kare-nono Kanani, aran-piny, te bino baŋ Aca abaka me Juda, te kobbe ni, “Pien yin ilunyo keto genni i kom abaka me Curia akaka keto genni i kom Rwot Obaŋani, omio mony abaka me Curia obwot oko i ciŋi. Mony a jo Eciopia kede me a jo Libia mom rik onwoŋo dwoŋ meicel, kun daŋ otye kede gadigadi apipim kede wegi aguragura daŋ? Kadi bed amannono, pien yin ibedo kede gen i kom Rwot, omio Rwot omiogi i ciŋi. Pien Rwot neno kabedo luŋ i wi lobo, me wek elweny pi jo ame mom i balloro i cunygi i kome. Kan doŋ yin itimo tim me miŋo meicel, pien cakere amanni wot kede anyim yin ibino bedo lweny alwenya.” Akemo te mako Aca meicel i kom aranpiny, omake te kete i ot kol kun otweo tyene kede tol, pien cunye onwoŋo owaŋ i kome pi kop man. Dok te keto can i kom jo mogo i akina lwak i kare acellono. Kop i kom ginnoro luŋ ame Aca otimo a mom ocoo kan, cakere iyi ageyi naka i agikki, gin luŋ tye ocoo i buk me Tekwaro ame tito kop i kom oloc me Juda kede Icrael. I mwaka me pyeradek wie aboŋwen me loccere, two moro rik te mako tyene, two-nono te medde atek meicel, kadi amannono, i kare ame en two-nono mom daŋ aporo pi lokere baŋ Rwot ento te wirre ka baŋ daktal. Aca oto te wot weo karacel i kwari mere, en oto i mwaka me pyeraŋwen wie acel me loccere, Oyiko kome i lyel ame rik en i kome okunyo pire kene i paco a Daudi. Gin opyelo kome i gin ame rik oyiko me yike, kun oketo iye kite odok a ŋwecgi kur apapat ame odiro a yiko moo wir oyiko; gin dok te kuto twon mac adwoŋ meicel me nyuto worogi i kome. Wode Yekocafati en ame te leyo kakare en Aca, en te yikere doŋ atek meicel i lweny i jo Icrael. En oketo monnyere luŋ i boma ame ocecelo luŋ ame tye i Juda te daŋ keto mony i kabedo luŋ ame tye i Juda kede i boma luŋ ame tye i lobo me Epraim ame rik pappere Aca omao. Rwot obedo gwoko Yekocafati, pien obedo lubo kite a pappere ame rik koŋ ogeo bedo kede; en gire mom obedo woro Baal, En obedo keto gire gennere i kom Obaŋa a pappere, kun daŋ lubo cikkere luŋ, En mom obedo lubo kite a jo Icrael. Mannono omio Rwot te moko loccere atek meicel, kun jo me Juda luŋ kelo mot baŋ Yekocafati; en te doko twon alonyo meicel, kun daŋ jo wore atek, En obedo lo a cunye tek meicel i lubo gin a Rwot mito; dok daŋ omumuko ka woro jogi luŋ ame onwoŋo tye i wi kiddi, tek kwanyo daŋ jok a dako ame olwoŋo ni Acera oko i Juda. I mwaka me adek me loccere en ocwao rwode mere magi me wot pwony i boma luŋ me Juda: Ben-kail, Obadia, Jekaria, Netanel kede Mikaya; ocwao daŋ Olevi magi owoto karacel kedgi: Cemaya; Netania, Jebadia, Acael, Cemiramot, Yekonatan, Adonija, Tobija, kede Tobadonija, karacel kede olamdog magi: Elicama kede Jekoram. Jo man te bedo pwony i Juda, kun otye i buk me cik a Rwot; gin owowota i boma me Juda luŋ kun opwonyo jo. Loc apapat luŋ ame onwoŋo omano Juda te cako bedo kede lworo oko i kom Rwot, mom dok ote tiŋere me lweny i Yekocafati. Jo mogo me Piriciti te kelli Yekocafati ryal adwoŋ meicel karacel kede mot ocele mege; jo Arab daŋ te kelle nyogi rommi tutumia abiro, i mia abiro kede nyogi dyegi tutumia abiro i mia abiro. Yekocafati te medde ameda i doko twon lo moro adwoŋ meicel. En te gero kabedo ame ocecelo atek kede boma me kano jami i Juda luŋ. En ogero daŋ kagi-mogo ame romo kano jami adwoŋ meicel i Juda. En onwoŋo tye ocirikale atek meicel i lweny i Jerucalem. Welgi ame okwano kun lubere i doggola a kwarigi onwoŋo tye kit man: Otel wi mony ame onwoŋo telo jo tutumia me doggola a Juda onwoŋo obedo: Adna, atel wi mony, kede twoni jo ame tek i lweny ame romotutumia mia adek. Me aryo te bedo Yekokanan, atel wi mony, kede twoni jo atek i lweny ame romo tutumia mia aryo kede pyeraboro nono, Eka me adek te bedo Amacia wot a Jikri, ame omiye kede me tic me ot a Rwot ame onwoŋo daŋ tye kede twoni mere atek i lweny ame romo tutumia mia aryo. Eka i doggola a Benjamin, te bedo Aliada, ame en obedo twon lo moro atek meicel i lweny, kun tye ocirikale ame tek i lweny ame romo tutumia mia aryo, ame gin luŋ otye i kwot kede atero. Me aryo te bedo Yekojabad ame onwoŋo tye ocirikale ame oterre oko i jami lweny, ame romo tutumia mia acel kede pyeraboro nono. Jo magi onwoŋo obedo jo ame tio pi abaka, medo kede i kom mony ame abaka oketo i boma ame ocecelo atek i Juda luŋ. Yekocafati rik onwoŋo tye kede lonyo adwoŋ meicel, kun daŋ jo woro meicel; en te cako yiko kop me nyommi wode nyaka Akab. Kare ame mwaka okato anonok, Yekocafati te wot baŋ Akab i Camaria, Akab rik te jole aber meicel kede jo ame onwoŋo owoto kede; onekke rommi kede twoni apipim, Akab te cako kobbe ni myero owot ocak lweny i kom boma me Ramot-gilead. En te penyo Yekocafati ni, “Ibino wot kedwa me wot lweny i kom Ramot-gilead?” En te gamo ni, “Jamina luŋ obedo megi, an amegi, jona daŋ megi. Wan obino bedo kedwu i lweny.” Yekocafati te kobo baŋ abaka me Icrael ni, “Koŋ ige penyo Rwot, me owiny ŋo ame en bino kobo.” Abaka me Icrael te cako coko odwarpiny luŋ karacel, ame romo jo mia aŋwen twal, te kobbigi ni, “Awot alweny i kom Ramot-gilead onyo kur awot kuno?” Odwarpiny te gamo ni, “Woti; pien Obaŋa bino miyo i ciŋi yin abaka.” Cite Yekocafati te dok kobo ni, “Adwarpinnyoro ocele ame obedo me a Rwot mom tye kan, me koŋ dok openy?” Abaka me Icrael te gamo ni, “Otye kede lo moro ocele ame olwoŋo ni Mikaya ame otwero penyo kop a Rwot i baŋe, en obedo wot a Imla; cite an cunya mom mito dano-nono kadi acel, pien en kom mom ru otyeto kopporo aber pira, kare luŋ tyeto kop a mom ber keken.” Yekocafati te gamo ni, “Pe amannono abaka, wek kur ikob amannono.” Abaka me Icrael te lwoŋo adwoŋŋoro me mony te kobbe ni, “Wot ilwoŋo Mikaya wot a Imla ru bino oyotoyot.” I caa-nono onwoŋo abaka me Icrael kede Yekocafati abaka me Juda tye obedo i wi komgi me loc, kun oruko boŋŋigi me kwogo, ote bedo kede i laro moyo kal ame onwoŋo tye i ŋet dogcel me donyo i boma me Camaria, kun odwarpiny luŋ tye atyet i nyimgi. Jedekia wot a Kenaana otio cal tuŋ lee me nyonyo, te kobo ni, “Rwot okobo ni, ‘Yin ibino coro jo Curia i tuŋ acalo magi tuno waŋ ame ijwerogi ducu.’ ” Odwarpiny luŋ te tyet kittono, kun ŋat acel acel kobo ni, “Woti i Ramot-gilead me iwot ilo; Rwot bino miyo gire i ciŋi, yin abaka.” Lo ame onwoŋo owoto lwoŋo Mikaya, obino te kobbi Mikaya ni, “Nen ba, kop odwarpiny luŋ cukoro ka cuny abaka; mi koppi daŋ bed ame rom aroma kede megi ame cukoro cuny abaka.” Mikaya te gamo ni, “Kite a Rwot tye kede kwo-ni, gin ame Obaŋana bino kobo, en ame an abino kobo.” Kare ame en doŋ obino baŋ abaka, abaka okobbe ni, “Mikaya we, owot olweny i kom jo me Ramot-gilead onyo kur owoti?” Mikaya te gamo ni, “Wot kuno me iwot ilo lweny; obino miyogi i ciŋi.” Ento abaka dok te kobbe ni, “An abino ciki tyen adi ni myero ikobba ka kop ateni keken i nyiŋ Rwot?” Mikaya dok te kobo ni, “Anene jo Icrael tye oket atata i wi kiddi calo rommi ame akwatgi mom; dok Rwot daŋ okobo ni, ‘Adwoŋ ame loo jo man gire mom tye, wek ŋat acel acel odok gire paco mere i kuc’.” Abaka me Icrael te kobo baŋ Yekocafati ni, “An mom onwoŋo akobbi ni Mikaya mom twero tyeto kopporo aber i koma koŋo ka en arac keken?” Mikaya dok te gamo ni, “Koŋ doŋ iwiny kop a Rwot: Aneno Rwot tye obedo i wi kom me loccere kun mony me polo luŋ tye ocuŋ i ciŋe me tuŋ cam kede tuŋ cem, Eka Rwot te kobo ni, ‘Ŋa ame bino bwobwolo Akab abaka me Icrael me wot to i Ramot-gilead?’ Jo luŋ te bedo kobo kop apapat. Cuny Acil te bino anyim, te bino cuŋ i nyim Rwot, te kobo ni, ‘An abino bwobwolo en.’ Rwot te penye ni, ‘Ibino bwolle i yore aŋo?’ En te gamo ni, ‘An abino wot kuno, ate wot miyo cuny arac me goba bed iyi odwarpinnyere luŋ.’ Rwot te kobo ni, ‘Yin ibino bwobwolo en, ibino cobo tici gire; wot doŋ oko kuno, me iwot itim kittono.’ Doŋ aman ba, Rwot doŋ otyeko keto cuny arac me goba iyi odwarpinyi-ni, Rwot okobo kop arac i komi.” Jedekia wot a Kenaana owoto baŋ Mikaya te bapo leme kede ciŋe, kun kobo ni, “Cuny a Rwot oya i baŋa i yore aŋo te kobo baŋi kop kedi?” Mikaya te gamo ni, “Nen ba, ibino neno man i nino ame ibino wot pono iyi icika i tyelo.” Abaka me Icrael te kobo ni, “Mak wunu Mikaya idwok wunu baŋ Amon, ame gabuna me boma kede Yowaci wot abaka; me iwot ikobbigi wunu ni, ‘Abaka okobo ni, Ket wunu dano man i buc, mie wunu ecam cam ame obuc camo, kun imie wunu ogati kede pii keken tuno wan ame an adwogo paco kede kuc.’ ” Mikaya te gamo ni, “Ka ce idwogo paco i kuc, mom Rwot oko bo keda.” Dok te medo ni, “Wun lwak luŋ myero iwiny wunu!” Abaka me Icrael kede Yekocafati abaka me Juda te wot i Ramot-gilead. Abaka me Icrael te kobo baŋ Yekocafati ni, “An aruko boŋo apat acalo dano moro ata, ate wot kede i lweny, ento yin myero iruk rukki me loc.” Abaka me Icrael te ruko boŋo mere apat; gin te wot lweny. Abaka me Curia onwoŋo ociko odoŋe ame loo gadigadi mere ni, “Kur ilweny wunu i kom ŋattoro ocele kadi dwoŋ onyo tidi, cite myero ilweny wunu abaka me Icrael.” Doŋ i kare ame odoŋe aloo gadigadi oneno Yekocafati, gin okobo ni abaka me Icrael ene. Gin te cako lweny kede oko, Yekocafati te mwoco koko oko, Rwot te konye daŋ oko. Obaŋa te miyogi weke oko, pien i kare odoŋe ame loo gadigadi oniaŋ ni en mom obedo abaka me Icrael, gin te doŋ weko ryemo yore oko. Ento lo moro te telo atero mere bayo ata, te celo abaka me Icrael; atero mere te poto i akina nyonyo geŋo kore kede nyonyo ocele me geŋo kome ame onwoŋo calo pok rec. Abaka te kobbi lo ame onwoŋo aryemo gadigadi mere ni myero lokere dok kede cen pien owane oko. Lweny rik te bedo agwa meicel i nino-nono, abaka me Icrael te bedo jeŋere kene i kom gadigadi mere kun nyime oneno jo Curia tuno otyeno; eka te to oko ame ceŋ apoto. Yekocafati abaka me Juda te dok gire aber nak i paco mere i Jerucalem. Yeko wot a Kanani ame obedo aran-piny rik te wot baŋe me wot rwatte kede, te kobbe ni, “Itwero konyo otim tim areco, kun daŋ imaro giri jo ame dago Rwot? Pien yin giri itimo mannono, akemo doŋ omako Rwot oko i komi, Kadi bed amannono, tye gigi mogo abeco ame yin itimo, pien yin ityeko puputo yen ame oguro me woro jok a dako ame olwoŋo ni Acera oko i lobo, dok daŋ itemo keto cunyi itiyo gin ame Obaŋa mito.” Yekocafati onwoŋo bedo i Jerucalem; cite owoto i akina jo, ya i Beerceba wot kede naka i lobo obedo kidikidi me Epraim eka te miyo cuny jo dok i kom Rwot ame obedo Obaŋa a kwarigi. En te keto oŋolkop i boma acel acel ame ocelo atek, en otimo man i lobo me Juda luŋ, eka te kobbi oŋolkop ni, “Myero igwokere wunu i tic ame itio wunu, pien mom iŋolo wunu kop pi dano, ento pi Rwot; en tye karacel kedwu i kare ame nwoŋo iŋolo wunu kop. Doŋ ba, myero ibed wunu kede lworo i kom Rwot, kun iketo wunu cunywu meicel i gin ame itio wunu, pien Rwot Obaŋawa mom mito ni bal ŋolo kop kakare, akadi leŋere i ŋolo kop, onyo gamo lim me wil i muŋ.” Aco i Jerucalem Yekocafati te keto iye Olevi mogo, olamdog kede odoŋe atekere ame loo doggola acel acel iyi Icrael luŋ, me bedo oŋolkop pi Rwot, kede tyeko pyemmogo i akina jo. Jo man luŋ onwoŋo otyeko kopgi i Jerucalem. En te cikogi ni, “Bed wunu i lworo i kom Rwot i dog ticwu, dok daŋ myero iti wunu i cunywu ducu, kun igenne wunu. Ka ce ominwu moro ame bedo i boma moro me Juda okelo pido mere i nyimwu ame mako onyo remo, cik Obaŋa, icwil onyo gin ame Obaŋa ociko, wun myeroipwony wunugi aber, me kur okel balloro i komgi i nyim Rwot, me akemo Obaŋa kur pot i komwu, kede i kom omegowu. Ibino timo wunu amannono me kur ikel wunu roccoro. Nen ba, Amaria ame obedo alamdog adwoŋ en ame bino loyowu i kopporo luŋ ame obedo me a Rwot, Jebadia wot Icmael, gabuna ame loo Juda, en ame bino loyo kopporo luŋ ame mako abaka; aco Olevi bino konyowu acalo orani me coyo kop luŋ ame jo pido. Ti wunu ticwu i tekcuny, Rwot myero bed i jo a cunygi atira.” Icennere jo Moab kede jo Ammon karacel kede jo mogo me Meun te bino ero lweny i kom Yekocafati. Jo mogo owoto baŋ Yekocafati te ero kobbe ni, “Lwak mony ecipan tye aciro loka nam tuŋ ca, kun oya Edom me bino lweny kedi; nen, aman doŋ otuno oko i Kajajon-tamar.” (Man en nyiŋ En-gedi ocele mere.) Lworo omako Yekocafati, eka te ya wot penyo Rwot, en te ciko ni jo myero cak kanyo kec i Juda luŋ. Jo luŋ te cokere karacel, ote kwayo kony i baŋ Rwot. Jo me boma luŋ ame tye i Juda obino me bino kwayo Rwot ni konygi. Yekocafati te ya cuŋ i nyim lwak me Juda kede Jerucalem ame onwoŋo ocokere i ot a Rwot, i nyim dyekal anyen, te cako kwayo Obaŋa ni, “Ama Rwot Obaŋa a kwariwa, mom yin ibedo Obaŋa ame ibedo malo i polo? Mom yin en ame iloo rok luŋ ame tye i te loc apapat ame tye i wi podo? Teko kede twer tye gire i ciŋi, ame mom tye ŋattoro ame romo cuŋ i i nyimi, Mom yin ibedo Obaŋawa ame rik oryemo jo ame onwoŋo bedo i lobo man i nyim joni Icrael, ite miyo me bedo lobo ikwae a dyeri Abram twal? Gin obedo iye, ote gero kabedo me wori iye, kun okobo ni, ‘Ka ce ginnoro arac otimere i komwa, acalo lweny, onyo lweny ame obino me cobo kop ame yin iŋolo i komwa, onyo too edeke onyo kec, wan obino cuŋ i nyimi i nyim ot man, me wori i ot man, kun obako dogwa baŋi pi can ame opoto i komwa, yin ibino winyo ite larowa.’ Aco aman koŋ inen jo Ammon, jo Moab kede jo me kidi Ceir, ame yin rik mom iye ni jo Icrael cob mony i komgi i kare ame gin obino i lobo me Miciri, ame gin daŋ te wekogi doŋ kun mom ojwerogi. Koŋ inen kite ame gin doŋ abino me bino culowa iryemowa i lobo ame obedo megi ame yin Obaŋa ame rik imiowa me bedo megwa, Ama Obaŋawa, mom ibino ŋolligi kop? Pien wan giwa mom otye kede teko me lweny i lwak mony adwoŋ a rom man ame tye ka bino me bino lweny kedwa ca. Wan aman mom oŋeo gin ame myero otim, cite waŋwa tye i komi yin.” Jo me Juda luŋ, karacel kede otinogi kede mongi onwoŋo tye ocuŋ i nyim Rwot. Cuny Obaŋa te bino i kom Alevi moro i nyim lwak kannono, Alevi-nono nyiŋe onwoŋo Jakajiel wot a Jekaria, ame obedo wot a Benayo, wot a Jeyel wot a Mattania en onwoŋo Alevi me doggola Acap, En te kobo ni, koŋ icik wunu yitwu, wun jo luŋ ame bedo i Jerucalem, kede abaka Yekocafati, Rwot okobo ni, “Kur ilwor wunu, cunywu daŋ kur poti i kom twon mony adwoŋ woku, pien lweny gire mom obedo megwu, ento me Obaŋa. Diki wot ilweny wunu kedgi, nen ba, gin abino kun obedo malo i wi tur me Jij; ibino nwoŋo wunugi kan ame luŋ ogik iye, i tutuŋ kide me tim eme Jeruel. Wun mom ibino lweny wunu; wun wot ite wot cuŋ wunu i kabedowu mot, wun inen wunu kite ame Rwot tye ka loyo kede lweny pirwu, wun jo me Juda kede Jerucalem. Kur ilwor wunu, cunywu kur poti; diki myero iwot ilweny wunu kedgi, Rwot gire bino bedo kedwu.” Yekocafati te ryebere piny kun nyime gudo lobo, jo Juda kede Jerucalem luŋ te oonyere piny i nyim Rwot, kun owore, Eka jo Levi me doggola a Kokat kede me doggola a Kora te ya malo pako Rwot Obaŋa me Icrael i dwoŋ aloŋo meicel. Orwo mere, gin te dilo ibayi, ote wot naka i tim me Tekoa, Kare ame gin tye doŋ awot. Yekocafati te cuŋ kun kobo ni, “Wun jo Juda kede Jerucalem, winy wunu koppa! Myero iye wunu Rwot Obaŋawu, bino miyo icuŋ wunu atek; ye wunu kop odwarpinnyere, bino miyo iloo wunu.” I kare ame en doŋ otyeko penyo tam i baŋ lwak, en te yero jo ame myero wer wer me pako Rwot, kun oruko rukgi acil otelo kede nyim mony, ame ower ni, “Pwo wunu Rwot, pien marrere a mom lokere perakino atwal.” Kare ame gin ogeo wero wer me pako Rwot, Rwot omio mony opono me kuro mony a jo Ammon, Moab kede me a jo me Kidi Ceir, ame onwoŋo obino me bino lweny i kom jo Juda, te babaŋogi oko. Pien omio jo Ammon kede jo Moab ocako lweny i kom jo me Kidi Ceir, ote jwerogi oko luŋ. I kare ame gin doŋ otyeko jo me Ceir luŋ, gin dok te cako nekere kengi kengi. Kare ame jo Juda oyito malo kan ocuŋ iguŋ me neno okwor, ame onwoŋo tye i tim, gin obolo waŋgi kun ame mony onwoŋo tye iye apipim; gin te neno kom jo oto tye oradde atata piny i lobo ame moro mom obwot kadi acel. Kare ame Yekocafati kede lwakere obino me bino yako jamigi, gin te nwoŋo dok adwoŋ meicel, kede jami, boŋŋi, gigi mogo me wel, ame gin te bedo coko tuno ka doŋ mom oromo yeyo. Coko jami ayaka oterigi nino adek twal, pien jami onwoŋo dwoŋ okato kare. I nino me aŋwennere, gin te wot cokere i luŋ me Pwoc, gin te bedo pwoyo Rwot kuno; omio nyiŋ kaci-naca pwod olwoŋo ni luŋ me Pwoc naka atot tin. Gin luŋ doŋ ote dok oko cen, jo Juda kede jo Jerucalem luŋ, kun Yekocafati en ame telo yo. Owoto i Jerucalem ame olelo meicel, pien Rwot omiogi olelo pi loyo okworgi. Gin te bino i Jerucalem, kun ogoo naŋa kede naŋa opuk, okuto daŋ apel naka i ot a Rwot. Loc apapat me lobo te bedo i lworo meicel i kom Rwot ka gin owinyo ni Rwot olwenyo okwor a jo Icrael. Mannono te miyo lobo ame tye i te Yekocafati bedo mot aboŋo ayela moro, pien Obaŋa mere omie weo i kabedo luŋ ame omano ŋet lobo mere. Yekocafati rik te loyo lobo Juda kittono. Mwaka me dittere onwoŋo romo pyeradek wie abic kare ame en doko aloc me Juda; en te bedo loc i Jerucalem pi mwakki ame romo pyeraryo wie abic. Nyiŋ tottere Ajuba ame obedo nyaka a Cilki. En te bedo lubo kit a pappere Aca, kun mom ya iye kadi acel, en obedo tiyo gin ame nen aber baŋ Rwot. Ka woro jogi ame onwoŋo tye i wi kiddi malo, mom gire obin omumuko; cuny jo onwoŋo mom ru tye i kom Obaŋa akwarigi. Kop i kom ginnoro luŋ ame Yekocafati obedo timo, cakere i ageyi naka i agikki, gin luŋ tye ocoo i tekwaro a Yeko wot a Kanani, ame tye i buk obakki me Icrael. Icennere Yekocafati abaka me Juda te ribere gin kede Akajia, abaka me Icrael, ame obedo timo timmogo areco. En te ribere kede i payo mellogo ame woto i Tarcic, ote daŋ dok payo mellogo i Ejion-geber. Eliejer wot a Dodavaku me Mareca te rabo kop Obaŋa i kom Yekocafati, kun kobo ni. “Pien iribere wun kede Akajia, Rwot bino rwobo gin ame itio oko.” Mel luŋ te tur oko, ame mom dok oromo wot i Tarcic. Yekocafati te to wot weo karacel i kwari mere, ote yiko kome karacel i kwari mere i paco a Daudi. Wode Jekoram en ame te leyo kakare. En rik onwoŋo tye kede omego mere ame gin luŋ obedo awobe a Yekocafati, abaka me Juda: Ajaria, Jekiel, Jekaria, Ajaria, Mikael, kede Cepatia. Papagi rik omio mot adoŋodoŋo, omiogi ryal, jabu, jami mogo abeco me wel, kede boma mogo ame ocecelo atek i Juda; ento loc te miyo baŋ Jekoram, pien onwoŋo obedo wode me kao. Kare ame Jekoram doŋ oleo kom me loc a pappere, ame loccere daŋ doŋ omoko atek, en oneko omego mere luŋ i pala lweny, karacel kede rwode mogo me Icrael. En ocako loc kun mwaka me dittere doŋ oromo pyeradek wie aryo, en te bedo loc i Jerucalem pi mwakki aboro. Dako mere rik obedo nyaka Akab, mannono omio en te bedo timo gin ame nen arac i nyim Rwot kite ame Obakki me Icrael obedo timo, kun lubo gin ame jo me ot Akab obedo timo. Ento Rwot mom te mito tyeko ot a Daudi pi cikereame rik ecikere kede gin kede Daudi kede dok pien rik doŋ etyeko ciko oko ni ebino miyo ikwae en ame bedo i wi kom me loc nakanaka. I kare mere en ame jo Edom ojem kede i kom loc me Juda, eka ote keto abakagi kengi. Mannono rik te miyo Jekoram ya wot loka karacel kede odoŋe me monnyere, kede odoŋe ame loo gadigadi lwennyere luŋ, eka te ya dyewor cako lweny i kom jo Edom ame onwoŋo ogure oko dyere karacel kede odoŋe ame onwoŋo loo gadigadi me lwennyere. Cakere i kare-nono tuno kede tin, jo Edom te doŋ bedo loye kengi kun ojem ajema i loc me Juda. I kare-nono daŋ boma me Libina daŋ ojem kede i kom loccere, pien onwoŋo en oweko Rwot, ame obedo Obaŋa a kwari mere. Medo i kom mannono, en onwoŋo ogero ka woro jogi i wi kiddi i lobo obedo kidikidi me Juda, eka te miyo jo ame onwoŋo bedo i Jerucalem kwero lubo cik a Rwot, dok te miyo Juda daŋ gak oko. En te nwoŋo waraga ame oya i baŋ adwarpiny Elia, ame ocoye, kun kobo ni, “Rwot Obaŋa a pappi Daudi okobo ni, Pien yin mom ibedo lubo gin ame pappi Yekocafati obedo timo, akadi lubo en ame Aca abaka me Juda obedo lubo, cite yin giri ite bedo lubo kite obakki me Icrael, dok daŋ ite miyo jo Juda kede jo Jerucalem kwero winyo cik a Rwot, kite amejo me ot Akab omio jo Icrael okwero kede winyo cik a Rwot, dok daŋ ineko-gu omegoni i kokome me ot a pappi, ame onwoŋo kitegi beco kati yin oko, nen ba, Rwot bino miyo can apek meicel poto i kom joni, itinoni, monni, kede i kom jamini luŋ, dok yin i komi daŋ two arac meicel bino maki, kun omako naka ciŋ yi luŋ, tuno waŋ ame amontenni luŋ owukere oko pi two-nono ame mom bino weki kare akadi nino moro acel.” Rwot te tugo akemo a jo Piriciti kede me a jo Arab ame ceggi i jo Eciopia, gin te cako lweny i kom Jekoram, Gin te bino lweny i kom Juda, ote daŋ mayo oko, ote yako jami luŋ ame gin onwoŋo i ot abaka, kun oyako daŋ anaka awobe mere kede monnere, ote weko ka wode acel keken doŋ. Yekoyakaji ame obedo wode me cogo. A doŋ magi luŋ otimere, Rwot te goyo Jekoram, omio too arac a mom can opoto i cin yie. Kare ame en obedo yelle i too-nono pi mwakki aryo, two-nono te miyo amontennere wukere oko, te to oko i twon rem adwoŋ meicel. Jo mere mom okuto maccoro i lyellere me nyuto woro baŋe kite ame rik otimo i me a kwari mere. Mwaka me dittere doŋ onwoŋo oromo pyeradek wie aryo i kare ame en cako loc, en te bedo loc i Jerucalem pi mwakki oboro; ŋattoro mom gire oparo to mere. Gin te yiko kome i paco a Daudi, cite mom i lyel ame oyiko iye obakki. Jo ame onwoŋo bedo i Jerucalem te yero Akajia, wode me cogo te bedo abaka kakare; pien mony a jo ame rik obino i gony karacel kede jo Arab rik onwoŋo oneko awobe mere adoŋo luŋ, Mannono te miyo Akajia wot a Jekoram, abaka me Juda doko abaka. Mwaka Akajia me dittere onwoŋo doŋ oromo pyeraŋwen wie aryo i kare ame en ocako loc, en te bedo loc i Jerucalem pi mwaka acel. Nyiŋ tottere rik onwoŋo Atalia, ame rik obedo akwar Omri. En daŋ obedo lubo kite a jo me ot Akab, pien tottere en ame rik obedo miye tam me timo tim areco. En obedo timo gin ame nen arac i nyim Rwot, kite ame jo me ot Akab obedo timo; pien i kare ame pappere oto gin jo me ot Akab en ame te bedo jo ame mie tam naka omie opoto. En owinyo tamgi, te wot gin kede Joram wot Akab, abaka me Icrael me wot lweny i kom Kajael me Curia i Ramot-gilead. Jo Curia te wano Jekoram, Joram te dwogo cen i boma me Jejreel me wot twoye kuno, iyi awano ame owane kede i Rama i kare me lwenyi i Kajael, abaka me Curia. Akajia wot a Jekoram abaka me Juda rik te wot limo Joram wot Akab i Jejreel, pien onwoŋo two. Obaŋa onwoŋo doŋ otyeko yiko ni Akajia myero to i yo wottere me wot limo Joram, Pien i kare ame en otuno kuno, en owoto gin kede Joram me wot rwatte i Yeko wot a Nimci, ame onwoŋo Obaŋa doŋ otyeko miya twer me jwero jo me ot Akab. Doŋ i kare ame Yeko rik onwoŋo tye acobo kop ame Obaŋa oŋolo i kom jo me ot Akab, en orwatte i rwode mogo me Juda kede itino omego Akajia, ame tio baŋ Akajia, eka te nekogi oko. En te bedo yenyo Akajia, eka te wot make i Camaria kan ame rik onwoŋo opono iye, ote kele baŋ Yeko ame te neke oko. Gin ote yiko kome, pien okobo ni, “En obedo akwar Yekocafati, ame rik obedo timo gin ame Rwot mito i cunye ducu.” Mom onwoŋo doŋ tye dano moro me ot Akajia ame onwoŋo romo loc. I kare ame Atalia tota Akajia oŋeo ni wode doŋ oto oko, en te ne ko jo luŋ me ot abaka, ame gin jo me doggola a Juda. Ento wot Akajia ame olwoŋo ni Yowaci en ame te bwot, rik onwoŋo daŋ oneke oko, cite Yekoceba nyaka abaka Jekoram ame amin Akajia te kwale oko i akina awobe abaka ame rik onwoŋo otye aneko, te wot kane oko karacel kede apidi mere iyi ici ka mere me buto. Yekoceba nyaka abaka Jekoram, dako a Yekoyadi alamdog okane kittono, omio Atalia mom te neke, Yekoceba te bedo gwoko Yowaci pi mwakki kanyape, kun kano i ot a Rwot, ento i kare-nono Atalia en onwoŋo tye acalo abaka a dako. Cite i mwaka me abiro mere, Yekoyadi te diyo cunye, te cikere odoŋe ame onwoŋo loo mony, ame rik telo jo mia mia: Ajaria wot a Jekoram, Icmael wot a Yekokanan, Ajaria wot Obed, Maceya wot Adaya, kede Elicapat wot a Jikri. Gin te wot mano lobo Juda luŋ, kun ocoko jo Levi i boma luŋ me Juda, kede odoŋe atekere me Icrael ame loo doggola a kwarigi, gin luŋ te bino i Jerucalem. Lwak luŋ ame ocokere te cikere kede abaka i ot Obaŋa. Yekoyadi te kobbigi ni, “Nen wunu wot abaka! Myero iye wunu en bed aloc kite ame Rwot otyeko kobo i kom ikwae a Daudi. Gin ame ibino timo wunu en: wun olamdog kede Olevi ka kare me ticwu oromo iceŋ cabit, acel me adek i komwu bino kuro dogcel, acel me adek i komwu te kuro dog ot abaka; acel me adek te kuro dogcel ame olwoŋo ni Acakki te ot; jo ocele mere luŋ bino bedo i dyekal me ot a Rwot. Mom ibino ye wunu dano moro donyo i ot a Rwot, koŋo ka olamdog kede Olevi ame tye i dog tic. Gin otwero donyo pien gin obedo jo acil, cite lwak ocele mere luŋ bino lubo gin ame Rwot ociko. Olevi bino guro abaka dyere kun ŋat acel acel omako jami me lwennyere i ciŋe. Dano moro keken ame bino donyo i ot obino neko oko. Ibino bedo wunu baŋ abaka i kabedo luŋ ame en bino wot iye.” Jo Levi kede jo Juda luŋ te lubo ginnoro luŋ ame Yekoyadi alamdog ocikogi iye. Ŋat acel acel i akinagi okelo jo mere baŋe, jo ame bino giko ticgi i ceŋ cabit; kede jo ame bino cako ticgi i nino me cabit, pien Yekoyadi alamdog mom ogonyo jo me ya i dog ticgi. Alamdog Yekoyadi te miyo baŋ odoŋe ame loo mony toŋi, kwode adoŋo, kede en atino ame rik onwoŋe obedo me abaka Daudi, kun ogwoko i ot Obaŋa. En oketo jo ame gwoko abaka, omiogi ocuŋ kun ŋat acel acel mako jami lwennyere i ciŋe, kun oguro ot dyere cakere i tuŋ anyarolum tuno kede naka tuŋ anyarodi, ame oguro keno lam kede ot daŋ. Yekoyadi doŋ te cako kelo Yowaci wot abaka, te keto tok kwogo i wie ote miyo daŋ buk me cik ame mako kop i kom loc acalo abaka, Yekoyadi kede awobe mere te onyo moo i wie me kwere bedo abaka, ote tuco doŋ kannaler ni en obedo abaka. Jo te redo ni, “Kom abaka bed ayot nakanaka!” Kare ame Atalia owinyo woo a jo ame ariŋo, kun opako abaka, en owoto baŋgi kuno i ot a Rwot. Kare ame en obolo waŋe kuno, oneno abaka tye ocuŋ i ŋet pagi, i doggola me donyo, kun odoŋe mony kede okut apel oguro abaka. Lwak luŋ onwoŋo tye awinyo kede yomcuny, kun okuto apel. Atalia te cako yeco boŋo oko i kome, te mwoc koko kun kobo ni, “Tim me erupe! Tim me arupe!” Yekoyadi alamdog te kelo odoŋe mony ame onwoŋo telo mony, te kobbigi ni, “Ter wunu dako-nu okobe wunu kede i akina ocirikale; ka ŋattoro mito laro kwo mere myero inek wunu oko i pala romo. Pien alamdog onwoŋo mom mito ni neke i ot a Rwot.” Jo te cako mako dako-nono, ote tero oko, kun obeo kede i doggola ame aguragura donyo iye, ote tuno kede naka i ot abaka, ote neke oko kuno. Yekoyadi te cikere karacel i lwak luŋ kede abaka ni gin obino bedo jo a Rwot. Lwak luŋ te ya oko i kannono, ote ciro wot i ot a Baal, ote wot mumuko, ote reto oko piny; ote ŋiŋinyo daŋ keno lam luŋ karacel kede cal jogi ame onwoŋo tye kuno, oŋiŋido luŋ atitino, ote neko daŋ Matan ame rik obedo alamdog a Baal; oneke i nyim keno lam a Baal. Yeko yadi te doŋ keto jo me gwoko ot a Rwot, kun miyogi i ciŋ olamdog a jo Levi kede Olevi ame rik Daudi opokkigi tic me gwoko ot a Rwot, kun gin en a waŋo mot awaŋa ame oyalo kede Rwot, kite ame ocoo kede i cik a Muca, kun owero wer i yomcuny kite ame rik Daudi oyiko kede. En te keto okur dogcel me kuro dogcel me ot a Rwot, me neno ni ŋattoro ame mom cil i yore moro mom odonyo. En doŋ te kwanyo odoŋe ame loo mony, rwode, gabuna ame loo lwak karacel kede jo luŋ me lobo-nono; gin luŋ ote cako lwoko abaka me tero i paco mere; oya kede i ot a Rwot, kun odorre obedo kede i dogcel i malo, ote wot naka i ot abaka. Abaka te wot bedo piny i wii kommere me loc. Mannono omio jo me lobo-nono luŋ obedo kede yomcuny, boma daŋ te kwe mot i kare ame oneko Atalia i pala lweny. Yowaci odoko abaka kun mwaka me dittere oromo abiro, eka te bedo loc i Jerucalem pi mwakki pyeraŋwen. Nyiŋ tottere rik onwoŋo Jibia, ame turgi tye i Beerceba. En obedo tiyo gin ame tye atira i nyim Rwot pi kare me kwo alamdog Yekoyadi luŋ, Yekoyadi onyome mon aryo, ame te nywalle itino awobe kede anyira. Icennere Yowaci te moko tammere me yiko ot a Rwot. En te coko olamdog kede jo Levi, te kobbigi ni, “Wot wunu i boma a jo Juda luŋ, iwot ira wunu lim ibaŋ jo Icrael luŋ me yiko ot Obaŋawu mwaka i mwaka; buny wunu ticcere abunya.” Cite Olevi mom te bunyo kite ame okobbigi, Abaka te lwoŋo Yekoyadi alamdog adwoŋ, te penye ni, “Piŋo kara mom imio Olevi orao lim i baŋ jo ame bedo i Juda kede i Jerucalem kite ame rik Muca amiro a Rwot ociko ni myero raa i baŋ jo Icrael me tic me kema me caden?” Pien awobe Atalia, dako ame obedo timo gin arac ca, onwoŋo rik oturo ot Obaŋa; dok otio-gu i jami luŋ ame rik ojalo baŋ Rwot, ame tye i ot a Rwot, i woro Baal. Mannono te miyo abaka ciko ni myero ti canduk me coko lim, ote tiyo keto oko i ŋet doggola me donyo i ot a Rwot. Rik ote rabo koppere romo lobo Juda kede Jerucalem luŋ ni myero kel lim ame omio pi Rwot ame rik Muca amiro a Rwot ocako rayo i baŋ jo i tim. Mannono te yomoro cuny lwak luŋ kede rwodegi, omio gino luŋ ote kelogi limgi bolo i canduk tuno ka jo luŋ omio. Dok kare luŋ ka Olevi okelo canduk lim baŋ otic abaka adoŋo mege, ka ce gin oneno ni lim dwoŋ meicel iye, aran abaka kede atic alamdog adwoŋ kwanyo limmono oko iyi canduk ote dwoko canduk i kakare. Man gin obedo timo nino i nino, omio gin te rayo lim adwoŋ meicel. Abaka kede Yekoyadi rik mio limmono baŋ otic ame loo tic me ot a Rwot, gin te paŋo kede jo ame gedo i kiddi karacel kede opa-bao me yiko ot a Rwot, kun en ocele ogelo i jo ame tio i nyonyo kede mola me yiko ot a Rwot Mannono rik te miyo otic tic atek meicel, naka ote yiko ot a Rwot aber odoco, atek kite ame rik tye kede con. Kare ame gin otyeko tic me yiko ot a Rwot, gin te dwoko lim odoŋ baŋ abaka kede Yekoyadi, ame ote tiyo kede jami me ot a Rwot; otimo jami me tiyo tic apapat kede jami me tic i waŋo mot me yalo Rwot bakuli me waŋo odok akur, kede jami ocele ame otio i jabu kede ryal. Gin doŋ te bedo yalo Rwot i mot awaŋa didik pi kare me kwo a Yekoyadi luŋ. Ento i kare ame Yekoyadi doŋ oti atek, ame mwaka me dittere doŋ oromo mia acel kede pyeradek twal, en te to oko kun doŋ ocato meicel. Oyiko kome i paco a Daudi i kan ame oyiko iye obakki, pien en obedo timo gin aber pi jo Icrael, pi Obaŋa kede pi jo ode. Kare ame Yekoyadi doŋ oto, rwode me Juda obino baŋ abaka, ote ryebere piny wore; abaka te winyo kopgi. Gin te cako kwero Rwot oko, ame obedo Obaŋa a kwarigi, ote lokere woro jok a dako ame olwoŋo ni Acera kede cal jogi. Bal man te miyo akemo mako Rwot i kom Juda kede Jerucalem. Kadi bed amannono, en koŋ te medde cwalo baŋgi odwarpiny me temo dwokogi baŋe, Odwarpiny obedo tucigi balgi, cite gin gigi te kwero winyo oko. Obaŋa te cwayo cunnyere i kom Jekaria wot a Yekoyadi alamdog; en te ya cuŋ i nyim jo, te kobbigi ni, “Obaŋa okobo ni, ‘Piŋo kara ikwero winyo wunu cik a Rwot, ame omio mom itwero nwoŋo wunu gum? Pien ikwero wunu Rwot, omio an daŋ akwerowu oko.’ ” Gin te poro kop i keme, abaka te miyogi nape oko i gweŋ, ote neke oko i dyekal me ot a Rwot. Abaka Yowaci omio oneke, mom opo gire tim aber me kica ame rik Yekoyadi papa a Jekaria otimo baŋe. Kare ame Jekaria ato, okobo ni, “Rwot myero nen gin otimere te culo kworrere.” Iyi agikki mwaka-nono, mony a jo Curia obino me bino lweny i kom abaka Yowaci, Gin obino i Juda kede i Jerucalem ote jwero rwode a lwak luŋ, ote cwalo jami ame gin oyako luŋ baŋ abaka me Damaciko. Kadi bed mony a jo Curia obino olweny anonok, cite Rwot omiogi oloo twon mony adwoŋ meicel, pien jo Icrael onwoŋo okwero Rwot Obaŋa a kwarigi. Mannono en kite ame Rwot oŋolo kede kop i kom Yowaci. Kare ame mony doŋ oya oko i baŋ Yowaci, kun owane atek meicel, omiro mere te poro kop i kome, ote wot neke oko i kabuto mere pi remo a wot a Yekoyadi alamdog, En te to oko, ote yiko kome i paco a Daudi, cite mom oyike i lyel ame oyiko iye obakki. Jo ame oporo kop i kome obedo Jabad ame tottere Cimeat nya jo Ammon, Yekojabad wot a Yowaci, wot a dako a nyiŋe Cimirit, nya jo Moab, Kop i kom awobe a Yowaci, kede kop ame odwarpiny obedo kobo i kome, kede kite ame en oyiko kede ot Obaŋa, gin luŋ tye ocoo i buk ame gonyo kop ame tye i buk obakki. Wode Amajia en ame te leyo kakare. Amajia ocako loc ame mwaka me dittere oromo pyeraryo wie kany en te bedo loc i Jerucalem pi mwakki pyeraryo wie aboŋwen. Tottere rik nyiŋe Yekoadan ame turgi onwoŋo tye i Jerucalem. En obedo timo gin ame tye atira i nyim Rwot, cite mom i cunye ducu. I kare ame loccere doŋ otyeko moko, en oneko omiro mere oko ame rik oneko pappere. Cite mom oneko itino a jo ame rik oneko pappere, kite ame ocoo kede i buk a Muca, kan ame Rwot rik ociko iye ni, “Papa atin mom obino neko pi bal a wode, atin daŋ mom obino neko pi bal a pappere; ento ŋat acel acel obino neko pi ballere en i kome.” Amajia te coko jo me Juda, en te ketogi i doggola, kun lubere i doggola a kwarigi ite loc otel mony ame loo jo tutumia kede mia pi jo Juda kede jo Benjamin luŋ. En okwano jo ame mwaka me ditogi doŋ oromo pyeraryo dok kede malo, en te nwoŋo ni jo ame oyero ame romo lweny, ame romo mako toŋ kede kwot, oromo tutumia mia adek nono. En dok te paŋo daŋ mony ocele ame tek meicel i lweny ame romo tutumia mia acel iyi Icrael, kun paŋogi i ryal, ame pekkere romo tan aŋwen. Cite dano Obaŋa rik te bino baŋe te kobbe ni, “Ama abaka, kur iwot i mony me Icrael, pien Rwot mom tye i jo me Icrael, jo me Epraimmi luŋ. Aco ka yin itamo ni mannono bino miyo ibedo atek i lweny, Obaŋa bino miyo okwori loi oko; pien Rwot tye kede teko ame twero miyo iloo lweny onyo oloi oko,” Amajia te penyo dano Obaŋa ni, “Kara doŋ ryal me tan aŋwen ame atyeko miyo baŋ mony me Icrael-li kono?” Dano Obaŋa te gamo ni, “Rwot twero dok miyi en ocele adwoŋ ame kato mannono oko,” Amajia te miyo mony ame oya Epraim obino baŋe dok oko turgi. Cunygi te waŋ meicel i kom jo Juda, ote dok paco ame akemo ocirogi oko. Amajia rik te diyo cunye tero monnyere, te wot naka i luŋ me Kado, te neko jo me Ceir ame romo tutumia apar. Mony a jo Juda te mako daŋ jo ocele akwo ame romo tutumia apar, ote terogi i wi kidi malo ote corogi piny i wi kidi malo kuno; gin luŋ ote rette ŋinyere oko atitino. Cite omony me Icrael ame Amajia onwoŋo okwero ni kur wot kedgi i lweny, eka te dwogo oko cen, te wot cako lweny i kom boma mogo me Juda, cakere i Camaria tuno kede naka i Bet-koron ote neko jo ame romo tutumia adek, ote daŋ yako jami adwoŋ meicel. A doŋ Amajia odwogo oko i neko jo Edom, en onwoŋo odwogo kede jogi ajo Ceir, te cako worogi acalo obaŋe mere kun yalogi kede mot apapat. Mannono omio akemo omako Rwot i kom Amajia, te cwayo adwarpiny baŋe, ame te kobbe ni, “Piŋo kara omio dok icako woro obaŋe a rok ocele a mom laro jogi i ciŋ-nie?” Cite i kare ame onwoŋo en tye akop kede abaka te juke ni myero liŋ oko, kun penye ni, “Wan oketi me bedo ami-tam baŋ abaka bo? Piŋo kara omio imito ni neki?” Adwarpiny daŋ te liŋ, kun kuŋ okobo ni, “Aŋeo ni Obaŋa doŋ otyeko moko tamere me neki oko pi gin ame itimo-nono kede pi kwero winyo tamma.” Amajia abaka me Juda te dok penyo tam i baŋ jo, eka te cwayo kwena baŋ Yowaci wot a Yekoyakaji, ame obedo wot a Yeko, abaka me Icrael, kun kobbe ni, “Biye me obin orwatte i lek, me otemere koŋ.” Cite abaka Yowaci te dwoko kop baŋ Amajia, abaka me Juda ni, “Okuto moro ame onwoŋo tye i buŋ me Lebanon rik ocwalo kwena baŋ yat cedar me Lebanonon, kun kobbe ni, ‘Mia nyari me anyommi woda.’ Lee moro me Lebanon te beo kuno nyono okuto oko piny. Yin ikobo ni, ‘Nen doŋ atyeko loyo Edom oko’, aman doŋ icako wakere meicel. Ento aman doŋ kono koŋ ibedo paco. Piŋo kara itye ka roko jo ononono me kelo can i komi keni kede i kom joni?” Cite Amajia te kwero winyo koppere-nono oko, pien onwoŋo obedo yik Obaŋa, me wek emigi i ciŋ okworgi, pien gin ocako woro obaŋe a jo Edom. Man omio Yowaci, abaka me Icrael te ya oko karacel i jo mere, te wot rwatte gin Amajia i bar lweny me Betcemec ame tye i Juda. Ote loyo mony Amajia oko, ŋat acel acel te riŋo oko i paco mere, Yowaci abaka me Icrael te mako Amajia abaka me Juda, wot a Yowaci, ame obedo wot Akajia, i Bet-cemec, en te ya i kannono kato naka i Jerucalem, te wot muko cel me Jerucalem oko, ame borrere romo yadi mia aryo twal, cakere i dogcel me Epraim naka i dogcel ame olwoŋo ni Gul. En te yako jabu kede ryal luŋ ame en onwoŋo i ot Obaŋa, karacel kede jami luŋ me ottaca, ame rik ikwae Obededom gwoko; kede en ame onwoŋo tye i ot kano lim abaka, te tero luŋ i Camaria. En omako daŋ jo adoŋo mogo ame otwero lakoro, te tero oko. Kare ame Yowaci wot a Yekoyadi, abaka me Icrael doŋ otyeko to, Amajia wot a Yowaci, abaka me Juda pwod omedde bedo kwo pi mwakki ame romo apar wie abic. Kop ocele luŋ i kom Amajia, gin ame en obedo tiyo, cakere i ageyi naka i agikki, gin luŋ tye ocoo i buk Obakki me Juda kede me Icrael. Cakere i kare ame jo oweko Rwot, jo mogo rik te poro kop i muŋ i kom Amajia, kun omito neke oko i Jerucalem, en te lwi, riŋo oko i boma me Lakic, cite okworrere te cwayo dano lubo yore kuno, ame te wot neke oko. Gin te tiŋo keme aguragura kelo bino yiko i Jerucalem karacel i kwari mere, i paco a Daudi. Jo me Juda luŋ te kwero wode Ujia me bedo abaka kakare, kun mwaka me dittere onwoŋo oromo apar wie abicel. I ŋe to a pappere Ujia ogero Elot te dwoko i te loc a jo Juda. Ujia onwoŋo rik tye i mwaka apar wie abicel i kare ame en cako loc, en te bedo loc pi mwakki pyerabic wie aryo, kun bedo i Jerucalem. Nyiŋ tottere Yekolia me Jerucalem, En obedo tiyo gin ame nen atira i nyim Rwot, kun lubo gin ame pappere Amajia obedo tiyo. En obedo tiyo gin ame Obaŋa mito, pi kare me kwo a Jekaria luŋ, pien rik onwoŋo obedo pwonye i kite me lworo Rwot. Doŋ i kare-nono luŋ ame en obedo tiyo gin ame Rwot mito, Obaŋa obedo miye winyo. En owoto, te wot ero lweny i kom jo Piriciti, te wot turo apama dogcel me Gat, Jabne kede me Acidod; en te gero boma ocele mege i ŋet Acidod kede i kabedo ocele i lobo a jo Piriciti, Obaŋa obedo konye lweny i kom jo Piriciti, kede jo me Arab ame onwoŋo bedo i Gurbaal, kede dok i kom jo Meun. Jo Ammon rik te bedo gelo ocorogi baŋ Ujia, nyiŋe te rwo winyere naka i Miciri twal, pien en onwoŋo doŋ tek meicel. Medo kede mannono, Ujia ogero daŋ gedo mogo ocuŋ iguŋ malo i Jerucalem i ŋet dogcel ame olwoŋo ni Gul, kede dogcel ame olwoŋo ni luŋ, kede i ŋet kona cel, te daŋ celogi luŋ atek meicel. Te daŋ dok gero gedo mogo ocuŋ iguŋ malo i tim, te kunyo daŋ bur pii apol, pien en onwoŋo tye kede lim akwo adwoŋ meicel, i Cepela kede i bar daŋ, dok onwoŋo tye daŋ opur potti kede opur i poto olok i lobo obedo kidikidi kede i lobo ame ceko cam, pien onwoŋo maro pur. Ujia rik daŋ tye kede mony ame ocirikale mere romo lweny kun otye i dul i dul kite ame aran Jeye okwanogi kede kun Maceya, atel mony, ame gin luŋ otye i te loc a Kanania, ame ŋat acel i akina odoŋe ame loo mony abaka. Odoŋe mony ame onwoŋo telo mony me doggola a kwarigi ame gin twoni jo atek meicel i lweny, onwoŋo romo tutumia aryo kede abicel nono. I te locci onwoŋo tye ocirikale ame romo tutumia adek kede abiro, i mia abic nono, ame romo konyo abaka me lweny i okworrere. Ujia rik te tiyo kwode, toŋi, tok, koti nyonyo, akud atero, kede atiŋdio pi ocirikale mere luŋ. Aco i Jerucalem odiro te tiyo gin ame twero baye kede atiŋdio adoŋo mege i gedo ocuŋ i guŋ malo kede i wi apama cel malo i kona ducu. Nyiŋe te rwo atek winyere kannabor meicel; pien Obaŋa obedo konye i yore me awura meicel, ame te miyo en doko atek meicel. Cite i kare ame en doŋ odoko atek, te cako wakere oko ame te miyo en kelo can i kome kene, En odonyo i ot a Rwot me wot waŋe odok akur i wi keno lam me waŋo odok. Ajaria alamdog te lubo yore kuno, kun woto olamdog a Rwot pyeraboro, ame gin luŋ obedo jo atek meicel. Ote juko abaka Ujia cuŋ, ote kobbe ni, “Yin mom itye kede twer me waŋo odok akur baŋ Rwot, mannono obedo tic olamdog ame obedo ikwae Aron, ame okwerogi pi ticcono. Yin myero iya oko i kabedo acil, iwot oko; yin itimo bal, dok Rwot Obaŋa mom bino pwoyi pi gin ame itimo-nono.” Akemo te mako Ujia. En onwoŋo omako tabo me waŋo odok akur i ciŋe, doŋ i kare ame akemo omake i kom olamdog, dobo te cako corre oko i tur nyime i nyim olamdog kannono, i ot a Rwot, i ŋet keno lam me waŋo odok akur. Ajaria alamdog adwoŋ kede olamdog ocele luŋ te neno ni dobo doŋ ocorre oko i tur nyime. Gin te ru core, cwaye teŋe oko. En daŋ te bunyo wot oko oyotoyot, pien Rwot otyeko keto can i kome oko. Abaka Ujia te doŋ bedo adobo naka i to mere; kite acalo en doŋ onwoŋo adobo, en doŋ onwoŋo bedo i ode kene, kun mom dok twero donyo i ot a Rwot, Wode Yocam en ame onwoŋo doŋ loo ode, kun daŋ loo lobo-nono. Doŋ kop ocele luŋ i kom Ujia ame mom ocoo kan, cakere iyi ageyi naka i agikki, adwarpiny Icaya wot Amoj ocoo luŋ. En oto, te weo karacel i kwari mere, ote yiko kome karacel i kwari mere i poto me yiko obakki, pien jo okobo ni, “Pien en obedo adobo.” Wode Yocam en ame te leyo kakare. Yocam ocako loc kun mwka me dittere tye pyeraryo wie abic, en te bedo loc i Jerucalem pi mwakki apar wie abicel. Nyiŋ tottere Yeruca ame obedo nyaka a Jadok, En obedo tiyo gin gin ame tye atira i nyim Rwot, kun timo ginnoro luŋ ame pappere Ujia rik obedo timo; cite en gire mom oturo cik me donyo wot tic i ot a Rwot, Cite lwak pwod omedde timo tim a mom atira. En ogero doggola i malo me ote a Rwot, dok daŋ otio tic atek meicel i gero apama cel i tur ame olwoŋo ni Opel. Medo i mannono, en ogero daŋ boma apapat i lobo obedo kidikidi i Juda, te daŋ gero celloro atek kede gedo ocuŋ i guŋ i wi kiddi kan ame yen ocule iye. En olwenyo abaka a jo Ammon te loyogi oko. Jo Ammon te miye ryal ame romo tan aŋwen, ŋano ame romo puku tutumia pyeradek kede cayiri daŋ puku tutumia pyeradek. Gin te bedo culle kit jami acellono i mwaka ame lubo mannono kede i mwaka me adek. Yocam te doko twon lo moro atek meicel, pien obedo winyo Rwot Obaŋa mere. Kop i kom Yocam odoŋŋere luŋ, lweny ame en olwenyo luŋ, kite ame en obedo kede, ame mom ocoo kan, gin luŋ tyeocoo i buk obakki me Icrael kede Juda. En ocako bedo aloc kun mwaka me dittere tye pyeraryo wie abic, en te bedo loc i Jerucalem pi mwakki apar wie abicel. Yocam oto, te wot weo karacel i kwari mere, ote yiko kome i paco a Daudi. Wode Akaj en ame te leyo kakare. Akaj ocako loc kun mwaka me dittere tye pyeraryo nono, en te bedo loc i Jerucalem pi mwakki apar wie abicel. En mom obedo timo gin a tye atira i nyim Rwot Obaŋa mere kite ame kwaro mere Daudi rik otimo. Ento obedo lubo gin ame oloc me Icrael obedo timo. En otio cal jogi atwaka me a Baal; obedo waŋo daŋ odok akur i luŋ a woto i Kinnom, dok owaŋo daŋ awobe mere acalo mot me yalo jok, kun lubo kit tim me kwer ame rik rok luŋ ame yam Rwot oryemo i nyim jo Icrael obedo timo. En obedo yalo jogi kun waŋo daŋ odok akur i ka woro jogi ame tye i wi kiddi malo kede i wi tur malo anaka atot i te yen obuŋere-gu. Mannono omio Rwot Obaŋa mere omie i ciŋ abaka me Curia, ame te lweny kede loye oko, te yako jo mere apol meicel tero oko acalo opii naka i Damaciko, Rik dok ote miye iciŋ abaka me Icrael ame olwenyo kede daŋ te loye oko, te neko jo mere atek meicel; Peka wot a Remalia oneko mony a jo Juda ame romo tutumia mia acel kede pyeraryo i nino acel keken, kun gin luŋ onwoŋo jo atek meicel i lweny, pien gin onwoŋo okwero woro Rwot Obaŋa a kwarigi. Eka twon lo moto atek meicel i lweny a nyiŋe Jikri, dano me Epraim te neko Maceya wot abaka kede Ajirikam, adwoŋ ame loo paco abaka, kede Elnaka ame obedo adwoŋ ame lubo abaka i loccere. Jo Icrael oyako mon kede itino i baŋ omegogi ame romo tutumia mia aryo, ote terogi oko calo opii naka i Camaria, kun daŋ oyako jami adwoŋ meicel. Adwarpiny a Rwot a nyiŋe Obed ame onwoŋo bedo i Camaria kuno, owoto te wot rwatte i mony ame onwoŋo adwogo i Camaria, te kobbigi ni, “Nen ba, Rwot Obaŋa a kwariwu, akemo onwoŋo omako i kom jo Juda eka te miyogi i ciŋwu, cite wun dok inekogi wunu i twon akemo okato kare. Aman dok imito wunu diyo wunu jo Juda kede Jerucalem, co kede mon, me bedo acalo opiiwu, Wun mom itimo wunu balloro wun i komwu baŋ Rwot Obaŋawu? Aman myero iwiny wunu koppa, iwek wunu jo ame iyako wunu i baŋ omegowu ite kela wunu acalo opii-ni dok cen, pien akemo omako Rwot meicel i komwu.” Rwode aŋwen me a jo Epraim daŋ cunygi ocwer i kom gin ame mony otimo, Ajaria wot a Jekokanan, Berekia wot a Mecilemot, Jekijikia wot a Callum, kede Amaca wot a Kadlai. Gin daŋ okobbigi ni, “Kur ikel wunu jo ame iyako wunu-nono kan, pien iyikere wunu me miyowa tiŋo aliŋa i nyim Rwot medo dok i kom bal wa kede rocwa ame doŋ otye kede-ni. Rocwa doŋ dwoŋ meicel, akemo agwa daŋ doŋ omako Rwot oko i kom Icrael.” Mannono te miyo mony weko jo ame oyako oko karacel kede jami i nyim rwode kede lwak ame onwoŋo ocokere. Eka rwode ame wokki otuco nyiŋgi-ca te bino tero jo ame onwoŋo oyako, jo mogo i akinagi ame onwoŋo tye onoro, gin te miyogi ruko boŋŋi, ame okwanyo i kom jami ame oyako, omiogi oruko boŋo, omiogi amuk, ote daŋ miyogi cam kede ginamata, dok owirogi daŋ kede moo. Gin te tiŋo jo ame onwoŋo goro i akinagi i wi kane, ote terogi naka baŋ jogi i Jeriko, boma ame otit dwoŋ iye. Jo Icrael te doŋ dok i Camaria. I kare-nono abaka Akaj ocwao kwena baŋ abaka me Accuria me bino konye, Pien jo Edom onwoŋo ocobo mony i kom jo Juda, ote loyogi oko, ote yako jo tero oko acalo opii, Aco jo Piriciti daŋ onwoŋo ocobo mony i kom boma me Cepela, kede Negeb me Juda, Gin omao boma me Bet-cemec, Aijalon, Cederot, kede me Coko i pacci luŋ ame onwoŋo tye i ŋete, Timna kede pacci luŋ ame onwoŋo tye i ŋete, karacel kede Gimjo kede pacci luŋ ame onwoŋo tye i ŋete, gin te bedo iye. Akaj abaka me Icrael en omio Rwot odwoko jo Juda piny, pien en obedo timo tim me carocaro i Juda, kun daŋ mom bedo igen i kom Rwot. Tiglat-pilecer, abaka me Accuria te bino lweny kede, te time lit akaka miye kony me medo teko mere. Pien Akaj onwoŋo okwanyo lim i ot a Rwot, kede i ot abaka karacel kede i udi a rwode te miyo abaka me Acuria; ento mom te nwoŋo konyoro iye kadi acel. Kare ame can orido Akaj, gennere i kom Rwot omedde ameda i dok piny. Kom en Akaj acellono! Pien en gire obedo yalo obaŋe a jo Damaciko, ame onwoŋo oloe-nono, kun kobo ni, “Pien obaŋe obakki me Curia okonyogi, an abino bedo yalogi i mot me gin daŋ konya.” Ento olunyo ka kelo can i kome kene kede i kom jo Icrael luŋ. Akaj te coko jami luŋ ame otio kede i ot a Rwot, te ŋinyo jami ame otio kedgi i ot Obaŋa-nono luŋ atitino. Eka te cego doggola ot a Rwot, te tiyo keno lam romo iyi Jerucalem luŋ. I boma ducu me Juda en te tiyo iye ka waŋo odok akur me yalo obaŋe ocele kun mio akemo mako Rwot Obaŋa a kwari mere. Kop ocelle i kom Akaj ame mom ocoo kan, gin ame en obedo timo kede kite ame en obedo bedo kede, cakere i ageyi tuno kede naka i agikki, gin luŋ tye ocoo i buk obakki me Juda kede me Icrael. Akaj oto, te wot weo karacel i kwari mere, gin te yiko kome i boma, i Jerucalem, Gin mom otero kome i lyel ame oyiko iye kom obakki me Icrael. Wode Kejekia te leyo kakare. Kajekia ocako loc kun mwaka me dittere doŋ oromo pyeraryo wie abic, en te bedo loc i Jerucalem pi mwakki pyeraryo wie aboŋwen. Nyiŋ tottere obedo Abija, ame obedo nyaka a Jekaria. En te bedo timo gin ame tye atira i nyim Rwot, kun lubo ginnoro luŋ ame rik kwaro mere Daudi obedo timo. I mwaka me agege me loccere, i dwe me acel, en te yabo doggola me ot a Rwot luŋ, te daŋ yikogi oko. En te kelo olamdog kede jo Levi te cokogi karacel i dyekal tutuŋ kide, te kobbigi ni, “Winy wunu koppa wun jo Levi! Aman myero ilonyere wunu oko, ite lonyo wunu daŋ ot a Rwot Obaŋa a kwariwu, me bed acil, Cok wunu ginnoro luŋ a mom cil i kabedo man acil, iter wunu oko, Pien kwariwa rik mom doŋ geŋo Rwot, eka ote bedo timo gin ame nen arac i nyim Rwot Obaŋawa; gin rik ote weko woro Rwot oko, kun owiro waŋgi teŋe i kabedo ame oworo iye Rwot. Gin ocego daŋ doggola luŋ me donyo i ot a Rwot, ote neko mac tara luŋ iye, kun mom doŋ owaŋo iye odok akur, akadi yalo Rwot Obaŋa me Icrael i mot awaŋa i kabedo acil. Mannono te miyo Rwot oonyo akemo mere i kom jo Juda kede Jerucalem, omiogi doŋ odoko gin ame mio lworo, wur, kede acae, kite ame itye ka neno wunu kede waŋwu nie. Mannono omio obin oneko kwariwa i lweny, monwa kede itinowa, ote mako tero oko acalo opii. Aman an amoko tamma ni myero ocikere wan i Rwot Obaŋa me Icrael, me kur dok medde bedo kede akemo agwa wok-ki i komwa. Itinona, kur dok ibed bedo wunu abeda ba; pien Rwot otyeko yerowu me bedo oticcere ame tio i nyime, kun iwaŋe wunu odok akur.” Jo Levi magi te ya malo, Makat wot a Macai, Joel wot Ajaria, ame obedo jo me doggola a Kokat; jo me doggola a Gercom te ya, Joa wot a Jimma, kede Eden wot a Joa; jo me doggola Elijapan te ya, Cimri kede Jeuel; jo me doggola Acap te ya, Jekaria kede Mattania; jo me doggola a Keman te ya Jekuel kede Cemei, eka jo me doggola a Jedutun te ya, Cemaya kede Ujiel. Gin ocoko omegogi, ote lonyere kengi gin doŋ te cako donyo i ot kite ame onwoŋo abaka ociko kun lubo kop a Rwot, me wot lonyo ot a Rwot. Olamdog te donyo naka iyi icika i tyelo ame tye i ot Rwot me wot lonyo, gin te kelo oko jami luŋ areco a mom cil, ame gin onwoŋo i ot a Rwot; Olevi te yeyo luŋ tero naka i luŋ me kulo Kidron. Gin ocako lonyo ot a Rwot i nino dwe acel me dwe me agege, gin te tyeko i nino dwe aboro me dwe-nono, Ticgi doŋ te tum odoco me yiko ot a Rwot i nino dwe apar wie abicel me dwe acellono kun nwoŋo olonyo naka doggola luŋ me donyo i ot a Rwot. Gin te dwoko kop baŋ abaka Kejekia ni, “Wan doŋ otyeko lonyo ot a Rwot luŋ, olonyo anaka keno lam me waŋo mot me Rwot, jami tic luŋ, meja me keto ogati i nyim Rwot kede jami ticcere luŋ. Dok jami tic luŋ ame rik abaka Akaj obolo oko i kare ame en rik onwoŋo mom geno Rwot i kare me loccere, otyeko yiko dok daŋ olonyo oko luŋ, aman gin luŋ doŋ tye i nyim keno lam me yalo Rwot.” Abaka Kejekia te dilo ibai, te loko odoŋe ame loo boma karacel, te wot kedgi i ot a Rwot. Gin te kelo twoni abiro, nyogi rommi abiro, itino nyogi rommi abiro kede nyogi dyegi abiro me mot me bal ajo me Juda luŋ ame tye i te loc abaka kede me kabedo acil. En te ciko olamdog ame obedo ikwae Aron me cako yalo Rwot i mottono i wi keno lam a Rwot. Gin doŋ te neko twoni oko, olamdog te gamo remogi wot coro i kom keno lam; dok ote neko nyogi rommi, ote coro remogi daŋ i kom keno lam. Eka ote doŋ kelo nyogi dyegi me mot me bal baŋ abaka kede baŋ lwak ame ocokere me woro Rwot, ame gin luŋ ote keto ciŋgi i komgi. Olamdog te nekogi, ote yalo Rwot i remogi pi mot me bal i wi keno me lam pi kwanyo bal a jo Icrael luŋ, pien abaka onwoŋo ociko ni myero yal Rwot i mot awaŋa karacel kede mot me bal pi jo Icrael luŋ. Abaka Kejekia te miyo jo Levi cuŋ i ot a Rwot kun omako ajaa, naŋa kede naŋa opuk, ame olubo cik a Daudi kede me a Dan aran-piny abaka, karacel kede me a a Natan adwarpiny. Cik man onwoŋo obedo cik Obaŋa ame en okobo baŋ odwarpinyere. Jo Levi onwoŋo omako kit tum apapat ame rik Daudi wero kede eka olamdog te cuŋ kuno kun omako apel. Abaka Kejekia te doŋ ciko ni myero cak yalo Rwot i mot awaŋa i wi keno lam. Kare ame ocako yalo Rwot i mot awaŋa, ote daŋ cako wero wer me pako Rwot kun daŋ okuto apel kun daŋ ogoo tummogo me wer ame rik Daudi abaka me Icrael wero kede. Lwak luŋ te cako woro Rwot kun ower tye awer, okut apel daŋ akuto apel, mannono te bedo timere naka ka mot awaŋa me yalo Rwot owaŋ otum. Kare ame yalo Rwot doŋ otum, abaka karacel kede lwak, ame onwoŋo tye baŋe te ryebere piny woro Rwot. Abaka Kejekia karacel kede rwode mere te kobbi Olevi ni myero ocak pako Rwot kede wer ame rik Daudi owero me pako Rwot dok karacel kede wer Acap aran-piny. Gin te cako wer i yomcuny, ote ryebere piny woro Obaŋa. Kejekia te kobbi lwak ni “Aman doŋ ityeko kwerre wunu kenwu me bedo jo a Rwot, biye wunu doŋ ceggi me ikel wunu motwu i ot a Rwot, kun ikelo wunu daŋ motwu me pwoc.” Lwak daŋ te kelo motgi kun omedo daŋ motgi me pwoyo Rwot, jo mogo ame cunygi omito daŋ okelo mot awaŋa me yalo Rwot. Mot awaŋa ame lwak okelo te romo twoni pyerabiro, nyogi rommi mia acel, karacel kede itino nyogi rommi mia aryo; magi luŋ onwoŋo okelo me mot awaŋa me yalo Rwot. Mot ocele ame okelo rik te romo twoni mia abicel kede rommi tutumia adek. Kite acalo wel olamdog rik onwoŋo nok meicel ame mom romo yaŋo mot awaŋa ducu, omio omegogi ame obedo jo Levi obedo konyogi naka ka tic otum, olamdog ocele mege te dok lonyere kengi. Pien i kare-naca jo Levi onwoŋo cunygi atira ame kato olamdog i yore me lonyere kengi, Medo i kom twon mot awaŋa ame rik onwoŋo dwoŋ atek, dwol me mot me kweyo cuny daŋ onwoŋo tye, kede dok koŋo olok me mot awaŋa. Kejekia karacel kede lwak cunygi te lelo meicel pi gin ame Rwot otimo pi lwak. Pien gin ame otimere otimere oyotoyot meicel. Kejekia rik te cwayo kwena baŋ jo Icrael luŋ kede baŋ jo Juda, te daŋ coyo waraga cwayo baŋ jo Epraim kede jo Manace, kun kobbigi ni myero gin luŋ bin i ot a Rwot ame tye i Jerucalem, me obin okwer ecuban me Kato me woro Rwot Obaŋa me Icrael. Abaka kede rwode mere karacel i jo luŋ ame onwoŋo ocokere i Jerucalem onwoŋo otyeko moko tamgi me kwero ecuban me Kato i dwe me aryo, gin onwoŋo rik mom oromo kwero i kare ame ociko pien wel olamdog ame olonyere kengi onwoŋo mom pol, dok lwak daŋ onwoŋo mom ru ocokere i Jerucalem. Abaka kede lwak ame onwoŋo ocokere te neno ni yikgi-nono tye aber. Mannono omio gin te moko me rabo koppere romo lobo Icrael luŋ, cakere i Beerceba tuno naka i Dan ni myero kwer ecuban me kato i Jerucalem me woro Rwot Obaŋa me Icrael pien jo onwoŋo mom obedo kwero nino man kun welgi pol atek kite ame onwoŋo ociko. Mannono te miyo okwena ket romo lobo me Icrael luŋ karacel kede Juda kun otero waraga ame oya i baŋ abaka kede rwode, kite ame abaka ociko kun okobbi lwak ni, “Wun jo Icrael myero idwog wunu cen baŋ Rwot Obaŋa a kwarowu Iburaim, Icaka kede Yakobo, me en dwog baŋ jo ame odoŋ ame obwot i ciŋ obakki me Acuria. Myero kur ibed bala kwariwu kede omegowu ame rik okwero geno Rwot Obaŋa a kwarigi ame te miyo Obaŋa miyo lobogi doko wi obur kite ame itye ka neno wunu kede waŋwu, Aman myero kur dok ibed wunu jo ame ŋutgi nwaŋ kite ame kwariwu rik obedo timo, ento myero imi wunu kwowu i ciŋ Rwot, me ibin wunu i kabedo man acil-li ame en doŋ otyeko lonyo oko atwal, ite woro wunu Rwot Obaŋawu, me ka ce ibino dwogo wunu cen baŋ Rwot Obaŋawu, akemo mere agwa ya oko i komwu. Pien ka ce ibino dwogo wunu ceŋ baŋ Rwot, jo ame otero omegowu kede itinowu iyi opii bino bedo i kica i komgi; gin te dwogo i lobo man, Pien Rwot Obaŋawu ber dok daŋ akica, en gire bino timowu kica ka ce idwogo wunu baŋe.” Okwena te wot rimo boma luŋ ame tye i lobo ajo Epraim kede Manace tuno kede naka i lobo a jo Jabulon; cite jo te bedo nyerogi anyera, kun ocaogi dok daŋ oŋalogi aŋala. Jo anok meicel i lobo a jo Acer, Manace kede i lobo ajo Jabulon en ame rik te ye i mwolo me bino i Jerucalem, Obaŋa onwoŋo obedo tiyo tic i Juda, omio jo onotte i cuny acel ote tiyo gin ame Obaŋa mito ame abaka kede rwodegi okobbigi. Lwak jo apipim te cokere i Jerucalem pi cokere adwoŋ meicel i dwe me aryo me bino kwero ecuban me Ogati a Tobi Mom iye. Gin ocako tic i Jerucalem kuno, ote mumuko keno lam luŋ ame onwoŋo tye kuno, aco keno lam luŋ me waŋo odok akur luŋ ote mumuko wot onyo i luŋ me kulo Kidron. Gin te neko itino rommi me Kato i nino dwe apar wie aŋwen me dwe me aryo, Lewic te mako olamdog kede Olevi ame onwoŋo mom olonyere kengi, gin doŋ te cako lonyere kengi, ote kelo mot awaŋa me yalo Rwot i ot a Rwot. Gin doŋ te cako, tiyo ticgi me kare luŋ kun olubo cik a Muca dano Obaŋa; olamdog te bedo tiyo tic me kikiro remo ame agamo i ciŋ jo Levi. Pien onwoŋo tye jo apol i akina jo ame onwoŋo mom olonyere kengi. Mannono en omio Olevi en oneko itino rommi me Kato pi ŋat acel acel ame onwoŋo mom olonyere me bed acil pi Rwot. Jo apipim iyi akina lwak, akato mere jo oya i lobo a jo Epraim, Manace, Icakar kede Jabulon onwoŋo mom olonyere kengi; cite ote bedo camo cam me ecuban me Kato i yore apat i en ame ociko, Pien abaka Kejekia onwoŋo okwao Obaŋa pirgi kun kobo ni, “Ama Obaŋa aber, tim ŋat acel acel ame omiye i cunye luŋ me woro Obaŋa kica, Rwot ame obedo Obaŋa a kwarigi; kadi bed en mom olubo cik me kabedo acil ame mako lonyere.” Rwot te winyo kwac a Kejekia, mom te timo ginnoro arac i kom lwak. Jo Icrael ame rik onwoŋo tye i Jerucalem kuno te kwero ecuban me Ogati a Tobi Mom iye pi nino abiro, kun cunygi yom atek. Jo Levi kede olamdog obedo pako Rwot nino i nino, kun owero wer me pako Rwot i twergi luŋ, Abaka Kejekia te cukoro cuny jo Levi ame onwoŋo onyuto dirogi i tic me woro Rwot. Jo te camo cam me kwero ecuban pi nino abiro kun daŋ oyalo Rwot i mot me kweyo cuny, dok daŋ opwo Rwot Obaŋa a kwarigi. Lwak luŋ te moko tamgi me medde i kwero ecuban pi nino abiro ocele, eka daŋ ote cobo tamgi-nono kun cunygi yom atek. Kejekia abaka me Juda onwoŋo omio lwak twoni tutumia acel kede rommi tutumia abiro me mot me yalo Rwot, aco rwode onwoŋo omio lwak twoni tutumia acel kede rommi tutumia apar. Olamdog ame olonyere i kare-nono obedo apol meicel. Lwak luŋ me Juda, olamdog, jo Levi kede lwak luŋ ame onwoŋo oya i lobo a jo Icrael, orok ame oya i lobo a jo Icrael karacel kede orok ame onwoŋo bedo i akina jo Juda obedo kede lelo meicel. Mannono te miyo yomcuny bedo adwoŋ meicel i Jerucalem pien cakere i kare a Culeman wot a Daudi abaka me Icrael, ginnoro acalo mannono onwoŋo mom dok otimere i Jerucalem kadi acel. Olamdog kede Olevi te ya lammi lwak gum, dwongi kede kwacgi te winyere baŋ Obaŋa malo i polo. Kare ame man ducu otum, lwak jo Icrael luŋ ame rik onwoŋo tye kuno te ciro wot i boma luŋ ame tye i Juda, ote wot mumuko gweŋe ame ocibo i ka woro jogi, kun daŋ otoŋo yen luŋ ame oguguro i ka woro jok a dako ame olwoŋo ni Acera, ote daŋ mumuko ka woro jogi ame tye malo i wi kiddi kede keno lam i kabedo luŋ ame tye i lobo a jo Juda, Benjamin, Epraim kede me a jo Manace, tuno ka doŋ ojwero luŋ, Jo luŋ ame onwonooya i lobo a, jo Icrael te doŋ dok i bomagi kun ŋat acel acel dok i paco mere ikome. Kejekia te poko doŋ olamdog kede jo Levi dul i dul, kun lubo kit tic ame gin tio. Tic olamdog kede jo Levi onwoŋo obedo me yalo Rwot i mot awaŋa kede mot me kweyo cuny, tic i dogcel me kema a Rwot karacel kede tic me miyo pwoc kede pako Obaŋa. Gin ame abaka omio ame okwanyo i kom jami mere ikome obedo leyi me mot awaŋa me yalo Rwot odiko kede otyeno, kede me yalo Rwot i ceŋ cabit kede i por dwe karacel kede i nino me ecuban adoŋo ame ociko ni kwer, kite ocoo kede i cik a Rwot. Abaka te ciko jo ame bedo i Jerucalem ni myero gin omi dul ame ociko ni myero mi baŋ olamdog kede baŋ Olevi, me gin omiye odoco me cobo gin ame ociko ame tye i cik a Rwot. Tekki gin ame abaka ociko-ni koppere owinyere baŋ jo i kabedo luŋ, jo te miyo jami adwoŋ meicel; omio kal ogeo cek me wi mwaka, koŋo olok, moo, moo kic, kede kit jami luŋ ame oya i pottigi, ote daŋ dok miyo acel me apar me jami luŋ adwoŋ meicel. Jo Icrael kede jo Juda ame bedo i boma luŋ ame tye i lobo me Juda te kelo acel me apar me dok kede rommi karacel kede mot ocele ame onwoŋo gin ojalo oko baŋ Rwot Obaŋagi, ote yidogi karacel dul i dul. Gin ocako coko motgi-nono yido karacel dul i dul i dwe me adek, ote bino tyeko ticcere i dwe me abiro. Kare ame abaka Kejekia kede rwode mere obino te neno jami ame ocoko oyido dul apapat, gin opwoo Rwot, ote daŋ pwoyo jo me Icrael. Abaka Kajekia te penyo olamdog kede Olevi kop i kom mot ame oyido ibimmono. Ajaria alamdog adwoŋ, dano me doggola a Jadok te gamo koppere ni, “Pien cakere i kare ame lwak ocako kelo motgi i ot a Rwot wan obedo nwoŋo cam ame romowa, ocemo oyeŋ, en ame odoŋere daŋ tye dwoŋ ata, man otimere pien Rwot omio jo mere gum, en omio aman wan otye kede jami ame odoŋ dwoŋ rom man.” Abaka Kejekia te ciko ni myero yik icika mogo me gwoko i ot a Rwot, ame daŋ ote ru yiko oko. Gin te weko mottono luŋ kede acel me apar karacel i ginnoro luŋ ame ojalo baŋ Rwot, ote tero wot gwoko aber iyi icika ame oyiko-naca. Adwoŋ ame onwoŋo loogi luŋ onwoŋo obedo Alevi ame nyiŋe Konania, kun ominnere Cimei en ame lube. Jo ame abaka Kejekia, kede Ajaria alamdog adwoŋ ame loo ot a Rwot, onwoŋo oketo me konyo Konania kede alubbe Cimei neno tic, obedo, Jekiel, Ajajia, Nakat, Acael, Jerimot, Jojabad, Eliel, Icimakia, Makat kede Benaya. Kore wot Alevi a nyiŋe Imna, akur dogcel me tutuŋ kide en ame onwoŋo loo mot ame omio baŋ Rwot pi ber a yic, dok daŋ en ame poko mot ame ogwoko pi Rwot kede mot acil meicel. Aco i boma ocele ame olamdog bedo iye, jo magi onwoŋo tye ka konye iye, kun gin luŋ obedo jo a genne meicel i ticgi, gin ene: Eden, Miniamin, Yecua, Cemaya, Amaria, kede Cekania. Gin onwoŋo poko omegogi cam, opoko luŋ arorom baŋ jo adoŋo kede atino, kun olubo dul tic ame gin tio; Gin mom opoko kun olubo kite ame oco kede jo, kun olubo doggola kwarigi kono ka baŋ jo ame ditogi oromo pyeradek dok kede malo, jo luŋ ame donyo i ot a Rwot kite ame ticgi me nino acel acel tye kede me wot ticgi ame opokigi i dulgi, Olamdog rik ocoo kun olubo i doggola a kwarigi, cite me Olevi rik ocako i kom jo ame mwaka me ditogi oromo pyeraryo wot kede malo kun lubo tic ame gin tio i dulgi. Olamdog rik ocoo karacel itinogi ame pwod tino, mongi, awobegi kede anyiragi; kun ocoo lwak luŋ, pien gin rik ogwokere meicel me bedo jo acil. Aco i kom ikwae a Aron, olamdog ame rik bedo i lobogi ocele ame tye i ŋet bomagi; rik oyero jo mogo ayera i boma acel acel gin te bedo opok jami baŋ dano acel acel ame obedo alamdog kede Alevi ame doŋ otyeko coyo nyiŋe oko i buk. Kejekia te bedo timo amano i lobo Juda luŋ; en obedo timo gin aber ame tye atira, kun daŋ geŋo Rwot Obaŋa mere. Ticcoro luŋ ame en otio i kom tic me ot a Rwot ame lubere i cik kede ginnoro luŋ ame ociko en otio i cunye ducu kun woro Obaŋa mere, omio ticcere te daŋ cobere aber meicel. A doŋ man otum kede tic ame Kejekia obedo tiyo ame nyuto gennere i kom Rwot, Cenakerib abaka me Acuria owoto me wot lweny i kom boma luŋ me Juda, monnyere te guro kemagi guro boma ame onwoŋo ocecelo atek meicel kun tamo ni myero elogi obed i te loccere. Kare ame Kejekia oneno ni Cenakerib obino me bino lweny i kom Jerucalem, en oyiko kop i rwode mere kede jo ame tek i lweny, me toro pii akon luŋ ame onwoŋo tye oko i ŋe boma, Gin daŋ ote konye, Lwak jo apol meicel te cokere, ote toro waŋ pii akoŋ kede kulo luŋ ame onwoŋo tye i kabedo luŋ, kun okobo ni, “Piŋo kara omio oweko obakki me Acuria nwoŋo pii adwoŋ adwoŋa ka gin bino tuno kan?” En ocako tic agwa te gero apama cel luŋ ame onwoŋo doŋ orette oko piny, te dok gero gedo mogo ocuŋ iguŋ i wicel malo, te daŋ dok gero cel ocele i ŋeye oko. En te miyo Millo ame tye i paco a Daudi doko kabedo atek meicel. En te daŋ dok tiyo jami lweny kede kwode apipim. Te keto odoŋe mony ocwiny me loyo lwak, ocokogi luŋ karacel i dyekal alac ame tye i dogcel, te cako cukoro cunygi kun kobbigi ni, “Cuŋ wunu atek kun cunywu nwaŋ. Kur ibed wunu alwor, cunywu daŋ kur poti i nyim obakki me Acuria karacel i monnyere luŋ ame tye baŋe; pien ŋat ame kate oko tye baŋwa. Monnyere obedo dano adana ame geŋo tekogi, cite wan Rwot Obaŋawa en ame tye baŋwa me konyo dok me lweny pirwa.” Kop ame Kejekia abaka me Juda okobo-nono omio cuny jo odwogo. Icennere doki Cenakerib abaka me Acuria kede monnyere ame onwoŋo tye aguro boma me Lakic, ocwao okwena i Jerucalem baŋ Kejekia abaka me Juda kede lwak luŋ me Juda ame onwoŋo tye i Jerucalem, kun kobbigi ni, “Cenakerib abaka me Acuria okobo ni, ‘Itye wunu kara ka geno ŋo ba, ame omio pwod igurre giwu agura i Jerucalem?’ Myero i ŋe wunu ni Kejekia tye ka rwenyowu arwenya, kun mito ni kec kede oryo pi nekwu, i koppere ame en tye ka kobbiwu ni, ‘Rwot Obaŋawa bino larowa i ciŋ abaka me Acuria.’ Mom en Kejekia acellono rik omuko kabedo me woro Obaŋa-nono ame tye malo kede keno lam me yale, eka te ciko jo Juda kede Jerucalem ni, ‘Ibino woro wunu Obaŋa i nyim keno lam acel keken, dok daŋ bino waŋo wunu motwu me yalo Obaŋa ye?’ Wun ce mom iŋeo wunu gin ame an kede kwarina otimo i kom rok luŋ me lobo ocele? Ane koŋ rik obaŋe a rok me lobo ocele naca lar lobogi i ciŋa? Kara mene i akina obaŋe a rok ame kwarina rik ojwero odoco, ame obin olaro jo mere i ciŋa? Kara doŋ ŋo ame omio wun itye ka tamo wunu ni Obaŋawu twero larowu i ciŋa? Aman doŋ ba, myero kur imi wunu Kejekia bwolwu onyo rwenywu kittono. Kur iwiny wunu koppere. Mom gire tye obaŋa a rokkoro onyo me aloccoro ame yam koŋ olaro jo i ciŋa onyo i ciŋ kwarina. Doŋ iyi ateni Obaŋawu gire mom romo larowu kadi acel i ciŋa.” Abaka Cenakerib te medde i kop areco i kom Rwot Obaŋa kede i kom amiro mere Kejekia. Cenakerib te coyo waraga kun cao kede Rwot Obaŋa me Icrael, ame kobo kop arac i kome ni, “Obaŋa a Kejekia gire mom bino laro jo mere, bino daŋ bedo ame rom aroma obaŋe a rok apapat me lobo ocele ame mom olaro jogi i ciŋa.” Gin te redo i kop man i dwoŋ aloŋo kun oredo i leb Eburania baŋ jo Jerucalem ame onwoŋo tye i wi cel malo me gin dok alwor ote nyobere oko, me gin te mayo bomagi oko. Gin te bedo kobo kop i kom Obaŋa me Jerucalem i kite ame okobo kede kop i kom obaŋe a rok ocele me wi lobo, ame dano en otiogi. Abaka Kejekia kede adwarpiny Icaya wot Amoj te kwayo Obaŋa kun ocwao kokogi malo i polo, Rwot te cwayo amalaika, ame te bino jwero twoni jo atek i lweny otel wi mony, kede odoŋe ocele luŋ i gony abaka me Acuria, Mannono te miyo en dok cen i lobo mere i twon lewic adwoŋ meicel. En te wot naka i ot obaŋa mere, eka awobe mere mogo akina itino mere te neke oko i pala lweny. Mannono en kite Rwot olaro i Kejekia kede jo ame onwoŋo bedo i Jerucalem i ciŋ Cenakerib abaka me Acuria kede i ciŋ okworgi luŋ, te doŋ miyogi wee tuŋŋi i tuŋŋi. Jo apol meicel te kelo motgi baŋ Rwot i Jerucalem, kede jami mogo me wel baŋ Kejekia abaka me Juda, mannono te miyo en bedo twon lo moro a malo meicel i nyim rok luŋ cakere i kare-nono wot kede anyim. I kare-nono two omako Kejekia ame onwoŋo doŋ ceggi to, en te kwayo Rwot; Rwot te winyo kwaccere, kun mie gin ame nyuto. Cite Kejekia mom te timo ginnoro ame lubere i gin aber ame otimo baŋe, pien en obedo kede awaka i cunye. Mannono te miyo akemo mako Rwot i kome karacel i jo Juda kede jo Jerucalem. Cite Kejekia kede jo me Jerucalem te dok mwolle kengi i kom awaka ame onwoŋo tye i cunygi, mannono te miyo Rwot mom oketo cannoro i komgi i kare a Kejekia luŋ. Kejekia rik onwoŋo doŋ olony atek kun daŋ jo woro atek meicel. En onwoŋo ogero ot me kano limmere, ogero icika me keto ryal, jabu, gweŋe mogo me wel, gigi mogo a ŋwecgi kur, kwode, kede me keto jami tic apapat ame welgi malo meicel. Medo i kom mannono, en ogero daŋ udi gwoko cam, kan ame okano iye kal, koŋo olok, kede moo; ogero daŋ ka gwoko dokkere apol ata kede ka gwoko rommi mere. Pien Obaŋa omie jami adwoŋ meicel, omio en ogero boma mogo ame otike en ikome, kede dok, kede rommi ame tye baŋe apipim. En Kejekia acel-li rik daŋ otoro waŋ pii i tuŋ malo, kan ame pii ame ya i kulo Gikon mol iye, eka te yabo yo pii dok tuŋ to me paco a Daudi. Kejekia rik Obaŋa omio winyo meicel i kom ginnoro luŋ ame en otio. Doŋ kop i kom okwena a rwode me Babulon, ame rik ocwao baŋe me bino penyo kop i kom anyut ame Obaŋa onyuto i lobo mere Obaŋa oweke etimo jami luŋ pire kene me teme, wek eŋe ginnoro luŋ ame tye i cunye. Kop i kom Kejekia ame odoŋŋere luŋ, gin abeco ame en otio ame mom ocoo kan, gin luŋ tye ocoo i kom gin Obaŋa onyuto baŋ Icaya adwarpiny wot Amoj ame tye i buk Obakki me Juda kede Icrael. Kejekia oto te wot weo karacel i kwari mere, ote yiko kome i lyel ame tye malo i wi kidi, i akina ikwae a Daudi. Jo me Juda kede Jerucalem luŋ te nyuto worogi baŋe i kare me to mere. Wode Menace te leyo kakare. Manace ocako loc kun mwaka me dittere oromo apar wie aryo, en te bedo loc i Jerucalem pi mwakki pyerabic wie abic. En obedo timo gin ame nen arac i nyim Rwot, kun bedo timo tim me kwer ame rok luŋ ame Rwot oryemo oko i nyim jo Icrael rik obedo timo. En dok omio ogero ka woro jogi i wi kiddi malo, ame rik pappere Kejekia omio omumuko oko. Ogero daŋ keno lam me woro Baal, te dok cicibo daŋ yen i ka woro jok a dako ame olwoŋo ni Acera, kun daŋ woro ceŋ, dwe kede lwak acer apipim ame tye i polo, dok daŋ tio baŋgi. Ocano daŋ keno mogo me lam i ot a Rwot, kan ame rik Rwot okobo iye ni, “Abino miyo Jerucalem bedo kabedo me wora.” En ocano daŋ keno lam apipim me woro ceŋ, dwe kede lwak acer ame tye malo i polo, kun canogi i dyekal aryo ame tye i ot a Rwot. Owaŋo daŋ wode acalo mot me woro jok i luŋ a wot a Kinnom, kun daŋ tyeto tyet; ŋiyo yi dyegi; penyo okor tipo kede ajoka. En obedo timo tim areco apol apola ame nen arac i nyim Rwot, kun mio akemo mako Rwot. Dok cal jok apaa ame en opao, otero-gu i ot a Rwot ame rik Rwot ikome okobo pire baŋ Daudi kede baŋ Culeman ni, “I ot man kede i Jerucalem ame rik an ayero i akina atekere luŋ me Icrael, en ame bino bedo kan ame owora iye nakanaka. Mom dok abino miyo jo Icrael ya i lobo man ame rik an amio baŋ kwarigi, ka ce gin obedo gwokere kun otimo ginnoro luŋ i kite ame rik acikogi kede, dok obedo lubo cik, icwil kede ginnoro luŋ ame rik amio Muca ocikogi iye.” Manace rik omiogi omedo timo tim areco ame kato me arok luŋ ame rik Rwot orweo oko i nyim jo Icrael. Kadi bed Rwot obedo kwenyoro Manace kede jo mere, cite gin gigi mom owinyo koppere. Mannono omio Rwot ocwao mony abaka me Accuria, ame te bino mako Manace i golo, ote tweye kede jegere me mola, ote tere naka i Babulon. I kare ame en tye kede rem, odoko amwol meicel i nyim Obaŋa a kwari mere, te bako doge baŋ Rwot Obaŋa mere me time kica. En okwao Obaŋa, Obaŋa te winyo kwaccere, te daŋ ye, eka te miye dok i Jerucalem acalo aloc, Manace doŋ te ŋeyo ni Rwot kare obedo Obaŋa. Icennere, en te gero apama cel me paco a Daudi i oko mere ame tye tutuŋ to me Gikon, i luŋ, te gero wot kede naka i dogcel me Rec, kun gero mano kidi me Opel, en ogero apama cel i kannono okato malo meicel. En dok te keto odoŋe ame loo mony i boma luŋ ame ocecelo atek a tye i lobo me Juda. En okwanyo daŋ obaŋe a rok ocele luŋ kede cal jogi i ot Obaŋa, te mumuko daŋ keno lam me jogi luŋ ame rik ecano i wi kidi, kan ame ot Obaŋa tye iye, kede en a tye i Jerucalem; okwanyogi luŋ te terogi wot bolo i ŋe boma, Oyiko daŋ keno lam me yalo Rwot, te yalo Rwot iye i mot me kweyo cuny kede mot me pwoyo Rwot, eka te ciko jo Juda me woro Rwot Obaŋa a jo Icrael. Kadi bed amannono, jo pwod omedde tero motgi i kabedo mogo me woro, ame tye i wi kididi malo, cite oyalo ka Rwot Obaŋa me Icrael keken. Kop i kom ginnoro luŋ ame Manace otimo ame mom ocoo kan, kwaccere baŋ obaŋa mere, kop Obaŋa me Icrael ame oraŋ-piny okobo baŋe, gin luŋ tye ocoo i buk me Tekwaro ame tito kop i kom obakki me Icrael. Aco kop i kom kwaccere, kite ame Obaŋa owinyo kede koko mere, ballere luŋ ame en otimo, kede kite ame gennere oya kede i kom Obaŋa, kan ame en ogero iye ka woro jogi i wi kiddi malo eka te cicibo iye cal jok a dako ame olwoŋo ni Acera kede cal jogi ocele mege, i kare ame mom ru omwolle kene i nyim Obaŋa, gin luŋ tye ocoo i buk me tekwaro ame tito kop i kom Oraŋ-piny. En oto te weo karacel i kwari mere, oyiko kome i ode. Wode Amon en ame te leyo kakare. Amon ocako loc ame mwaka me dittere doŋ oromo pyeraryo wie aryo. En obedo timo gin ame nen arac i nyim Rwot, kite ame pappere Manace obedo timo kede. Amon obedo yalo cal jogi luŋ ame pappere Manace rik otio kun daŋ worogi. En naka mom omwolle kene kadi acel i nyim Rwot kite ame pappere Manace rik omwolle kede, en gire obedo medo bal ameda, Omiro mere te poro kop i kome i muŋ ote wot neke oko i ode. Jo me lobo-nono te neko jo luŋ ame oporo kop me neko abaka Amon, gin te keto wode Yocia leyo kakare. Yocia ocako bedo aloc kun mwaka me dittere oromo aboro, en te bedo loc pi mwakki pyeradek wie acel, kun bedo i Jerucalem, en obedo timo gin ame nen atira i nyim Rwot; obedo daŋ lubo kite a kwaro mere Daudi luŋ, kun mom wiwira atata. I mwaka me aboro me loccere ame en pwod awobi, en ocako woro Obaŋa a kwaro mere Daudi; eka i mwaka me apar wie aryo me loccere, en te cako tiyo tic me lonyo Juda kede Jerucalem bedo acil, kun mumuko ka woro jogi luŋ ame tye i wi kiddi malo, ototoŋo daŋ yen luŋ ame ocicibo i ka woro jok a dako ame olwoŋo ni Acera, karacel i cal jogi apaa kede me atwaka. Omumuko daŋ keno lam me yalo Baal luŋ ame ocop i nyime, te mumuko daŋ keno lam me waŋo odok akur ame onwoŋo tye i ŋetgi, kun ŋiŋinyo atitino cal jok a dako ame olwoŋo ni Acera karacel i cal apaa kede me atwaka luŋ, ŋiŋinyo oko apwot calo apua, te jobo onyo i lyel a jo ame rik obedo yalogi i mot. Owaŋo daŋ cogo kom olamdog i kom keno lam ame rik gin oyalo iye jogi, en te lonyo Juda kede Jerucalem kittono. En te timo daŋ amannono i boma luŋ ame tye i lobo a jo Manace, Epraim, Cimeon, tuno kede naka i lobo a jo Naputali; kede i wi oburgi ame onwoŋo tye i ŋetgi kuno. Omumuko keno lam piny, odidino cal jok a dako ame olwoŋo ni Acera te ŋinyo oko apwot calo buru karacel kede cal jogi, te mumuko daŋ keno lam luŋ i lobo a jo Icrael kan ame onwoŋo gin yalo iye jogi odok akur. En doŋ te dok i Jerucalem. I mwaka me apar wie aboro me loccere, ame en doŋ otyeko lonyo lobo mere kede ot Obaŋa, en ocwao Capan wot Ajalia, Maceya, gabuna me boma, kede Joa wot a Joac, ame obedo aran, ocwaogi me wot yiko ot a Rwot Obaŋa mere. Gin owoto baŋ Kilkia ame en alamdog adwoŋ ote miye lim ame onwoŋo lwak okelo i ot a Rwot, ame Olevi kede okur doggola onwoŋo orao i baŋ jo Manace, Epraim, jo Icrael luŋ ame odoŋ, jo Juda luŋ kede jo Benjamin kede jo ame bedo Jerucalem. Gin te miyo limmono baŋ otic ame loo tic me ot a Rwot; eka otic ame onwoŋo tye atic ot a Rwot te miyo me yiko kan ame oballe, me roc odoco. Gin omio limmono baŋ opac kede ogedo me wilo kiddi ame opao, yen me tweyo wi ot, kede arii me gero udi luŋ ame yam obakki me Juda oweko oballe. Jonono te tiyo ticgi i cunygi ducu. Olevi ame oketo loyogi obedo Jakat, kede Obadia, ame gin jo me doggola a Merari eka ote keto Jekaria kede Mecuram, ame gin Olevi me doggola a Kokat, me loyo tic luŋ me ot a Rwot. Jo Levi ame onwoŋo odiro i goyo jami apapat me wer, oketogi me loyo oye yec, dok gin daŋ anyuto tic baŋ jo ame tio tic apapat; jo Levi ocele mege onwoŋo obedo ococ, rwode ame neno tic kede okur doggola ot a Rwot. Kare ame onwoŋo gin tye akwanyo lim ame okelo i ot a Rwot okelo oko, Kilkai alamdog adwoŋ te nwoŋo buk cik a Rwot ame omio baŋ jo Icrael, kun mio baŋ Muca. Kilkai alamdog adwoŋ te kobbi Capam aran ni, “Atyeko nwoŋo buk cik i ot a Rwot;” en te miyo bukkono baŋ Capam. Capam te tero buk baŋ abaka, te kobbe kop i kom tic ni, “Omiro ni tye atiyo tic luŋ ame yin iciko ni gin ti. Gin doŋ okwanyo lim luŋ ame onwoŋo tye i ot a Rwot, ote miyo daŋ oko baŋ jo ame loo tic kede otic me ot a Rwot.” En dok te kobbi abaka ni, “Kilkia alamdog adwoŋ omia bukkoro.” Capam te kwano bukkono kun abaka awinyo. Kare ame abaka owinyo kop ame okwano i buk me cik, en oyeyeco boŋŋi mere oko, Abaka te ciko Kilkia alamdog adwoŋ, kede Akikam wot a Capan kede Abudon wot a Mikaya, Capam aran kede Acaya amiro abaka, kun kobo ni, “Wot ipeny wunu Rwot pira, pi lwak kede pi lobo me Juda luŋ, pi kop i buk man ame onwoŋo-ni, pien akemo a Rwot kara doŋ olyeto meicel i komwa, pien kwariwa mom obedo lubo gin ame tye i buk man, kun otimo kite ame ocoo kede kop i komwa i buk man.” Mannono te miyo Kilkia alamdog, Akikam kede Abudon, Capam kede Akaya wot baŋ adwarpiny a dako a nyiŋe Kulda dako a Calum wot a Tikiva, ame obedo wot a Karkac, agwok boŋŋi abaka ame i kare-nono onwoŋo bedo i Jerucalem i kabedo moro i Jerucalem kuno tuŋ ocele. Gin owoto kuno ote wot kop i dako-nono kop i kom gin ame otimere. En te kobbigi ni, “Rwot Obaŋa me Icrael okobo ni ikobbi wunu ŋat ame oorowu baŋa ni, Rwot okobo ni ebino keto can i kom kabedo man kede i kom jo luŋ ame bedo iye, pi cobo kop luŋ me ceno dano ame ocoo i buk cik ame doŋ otyeko kwano kun abaka me Juda winyo. Pien gin doŋ okwera oko, ote bedo waŋo odok akur baŋ cal jogi, kun oroka kede me akemo maka i kom ginnoro luŋ ame gin obedo tiyo i cingi; mannono omio akemona doŋ bino lyeto agwa meicel i kom kabedo man, ame mom dok romo kwe kadi acel. Aco baŋ abaka me Juda ame oorowu me bino penyo Rwot, wun ibino kobbe wunu ni Rwot Obaŋa me Icrael okobo ni kop i kom kop ame cwinyo, pien i kare ame yin iwinyo kop ame rik akobo i kom kabedo man kede i kom jo luŋ ame bedo iye, yin iru ŋut oko i cunyi ite mwolle-gu i nyima, dok iyeyeco daŋ boŋŋi i komi oko; mannono omio an Rwot daŋ awinyo kwacci, man kop a Rwot ikokome. Nen ba, an abino dwoki iwoto weo karacel i kwarini, ibino to ote yiki daŋ i kuc, waŋi mom bino neno twon tim arac ame abino kelo i kom kabedo man.” Gin doŋ te dwoko kop baŋ abaka. Abaka te cwayo kwena, ote coko odoŋe luŋ me Juda kede me Jerucalem. Abaka te wot malo i ot a Rwot kun woto i jo luŋ me Juda kede Jerucalem, olamdog kede Olevi, jo luŋ adoŋo kede otino, en te kwano kop luŋ ame tye i buk cik ame onwoŋo i ot a Rwot. En okwano kun lwak luŋ awinyo. Abaka te cuŋ i kabedo mere te cikere i nyim Rwot ni ebino lubo Rwot, ebino mako cikere luŋ, kede kop me caden luŋ, kede ecwillere daŋ luŋ. En ocikere ni ebino lubo magi luŋ i cunye ducu kede tipo mere luŋ, kun etimo jami ducu ame ocoo i buk man. En te ciko jo luŋ ame onwoŋo tye i Jerucalem kede i Benjamin i kare-nono ni gin myero lub cikere-nono. Jo ame bedo i Juda kede i Jerucalem te bedo timo ginnoro luŋ kite ame tye kede i cikere a Rwot Obaŋa a kwarigi. Yocia te kwanyo ginnoro luŋ ame obedo me kwer i kabedo luŋ ame tye i lobo a jo Icrael, eka te miyo jo luŋ ame onwoŋo tye i lobo me Icrael calo woro Rwot Obaŋagi. Gin naka mom oloki Rwot Obaŋa a kwarigi ŋegi kadi acel i kare a Yocia luŋ. Yocia te kwero ecuban me Kato i Jerucalem, omio oneko romo me Kato i nino dwe apar wie aŋwen me dwe me agege. En oketo olamdog i dog ticgi, te daŋ cukoro cunygi me tiyo ticgi i ot a Rwot. En te kobbigi jo Levi ame gin obedo opwony a jo Icrael luŋ dok ame gin obedo jo acil baŋ Rwot, ni, “Ket wunu canduk acil i ot ame Culeman wot a Daudi abaka me Icrael rik ogero pire; mom dok ibed yeyo wumo i wi gwokwu, Aman doŋ ti wunu tic a Rwot Obaŋawu kede tic a jo mere Icrael. Yikere wunu i doggola a kwariwu i dul i dul, kun ilubo wunu gin ame Daudi abaka me Icrael ociko karacel kede en ame wode Culeman ociko. Cuŋ wunu i kabedo acil, cuŋ wunu kun ilubo wunu doggola a kwariwu, kun iyikere wunu me konyo omegowu kede jo Obaŋa ocele mere, kun dul acel acel tye kede jo ame etiko. Nek wunu rommi me kato, lonnyere wunu kenwu, yik wunu gin amite pi omegowu, me ilub wunu kop a Rwot ame Muca ociko.” Abaka Yocia te miyo mot me Kato pi lwak luŋ ame onwoŋo tye, omio itino rommi kede itino dyegi tutumia pyeradek nono, kede twoni tutumia adek; magi luŋ en okwanyo i kom limmere en ikome. Rwode mere daŋ te miyo lwak mot ame cunygi omito, kun omio daŋ olamdog kede Olevi. Kilkia, Jekaria kede Jekiel, ame gin onwoŋo odoŋe ame loo tic i ot a Rwot, gin omio olamdog itino rommi kede me dyegi tutumia aryo kede mia abicel, kede twoni mia adek, me mot me kato. Konania daŋ, kede Cemaya, kede omego mere Natanel, Kacabia, Jeyel, kede Jojabad, ame gin obedo otel a jo Levi gin omio Olevi itino rommi kede me dyegi tutumia abic kede twoni mia abic, me mot me Kato. Kare ame doŋ otyeko yiko jami luŋ, olamdog ocuŋ kakargi, kun Olevi daŋ ocuŋ kakargi i dul i dul kite ame abaka ociko. Ote doŋ neko rommi me Kato. Olamdog te kikiro remogi i kom keno lam kun Olevi tye ayaŋo rommi ame oneneko. Gin te popoko leyi me mot awaŋa, kun omio doggola acel acel megi, me gin yal i Rwot kite ame ocoo kede i buk a Muca. Gin opoko twoni daŋ kittono; obulo riŋo rommi me Kato i mac kun olubo gin ame ociko, ento mot acillere ote tedo ateda i gulli, kede cupulia, ote tero oyotoyot wot poko oko baŋ lwak. Icennere gin doŋ te yiko megi kede me olamdog, pien olamdog ame obedo ikwae Aron onwoŋo tye i tic adwoŋ meicel ame diogi naka iwor tic me waŋo mot kede dwol me yalo Rwot. Mannono omio Olevi oyiko megi kede me olamdog ikwae Aron. Ower ame obedo ikwae Acap onwoŋo daŋ tye kakargi kite ame Daudi ociko. Ikwae Acap, Keman, kede me a Jedutun, aran-piny abaka, kede okur dogcel luŋ: gin onwoŋo mom twero ya i dog ticgi, pien omegogi jo Levi onwoŋo tye ayiko cam me Kato pirgi. Mannono omio woro me kwero ecuban me Kato a Rwot oyikere aber i nino-nono karacel kede yalo Rwot i mot awaŋa i wi keno lam; gin luŋ rik oyikere kun lubo gin ame abaka Yocia ociko. Jo Icrael ame onwoŋo tye i nino-nono te kwero ecuban me Kato kede ecuban me ogati a tobi mom iye pi nino abiro. Kwero ecuban me Kato kittono rik onwoŋo mom doŋ timere iyi Icrael, cakere i kare adwar-piny Camwiri; mom tye abaka moro iyi akina obakki me Icrael ame okwero ecuban me Kato kite ame abaka Yocia okwero kede, kun kwero karacel olamdog, Olevi jo Juda kede jo Icrael luŋ ame onwoŋo tye, medo kede jo ame onwoŋo bedo i Jerucalem. Ecuban me Kato man okwero i mwaka me apar wie aboro me loc a Yocia. Kare ame man luŋ otum, ame Yocia doŋ oyiko ot a Rwot oko. Neko abaka me Miciri, owoto owao monnyere me wot lweny i Karkemic ame tye i ŋet kulo Efurate. Yocia otemo ŋolle i kome, cite en te cwayo kwena baŋ Yocia kun kobbe ni, “Abaka me Juda we, imito ni wan otim gin aŋo, ŋat man i kom awottere? An gira tin mom abino me lweny kedi, cite me lweny okworra; Obaŋa otyeko koba ni myero ecuny wot. Myero kur item pyem Obaŋa ba, pien en tye keda, naka mio en jweri oko,” Kadi bed amannono, Yocia mom oye winyo koppere, en orukere acalo dano moro ata, te wot me wot lweny kede. En okwero winyo kop a Neko oko ame onwoŋo obedo kop Obaŋa ikokome, en omedde i wottere me wot lweny kede i bar me Megido. Kare ame lweny doŋ ocakere, won atero moro te celo abaka Yocia oko, abaka te kobbi omiro mere ni, “Kwanya wunu itera wunu teŋe pien owana atek meicel.” Omiro mere te tiŋe oko i wi gadigadi mere ote kete i wi gadigadi ocele mere ote tere naka i Jerucalem. Yocia te to oko ote yiko kome i lyel a kwari mere. Jo Juda luŋ kede jo Jerucalem te bedo kumo pire. Adwarpiny Jeremia te cako wer me koko abaka Yocia, ower a co kede en a mon pwod wero wer man naka tin ka ce opo pi Yocia. Omia man odoko cik i yi Icrael; wer me koko Yocia-ni tye ocoo i buk me Koko. Kop i kom Yocia odoŋŋere luŋ, ginnoro luŋ abeco ame yam en otio kun lubo gin ame ocoo i cik a Rwot, gin ame en otio cakere iyi ageyi naka iyi agikki, ame mom ocoo kan, gin luŋ tye ocoo i buk Obakki me Icrael kede Juda. Jo te yero Yekoakaj wot a Yocia ote kwere me bedo abakagi akaka pappere kun bedo i Jerucalem. Yekoakaj ocako loc kun mwaka me dittere doŋ oromo pyeradek wie adek, en te bedo loc i Jerucalem pi dwete adek. Abaka Neko me Miciri te ryeme oko i Jerucalem en te ŋolo cul me ryal ame pekkere romo ratili tutumia abiro, kede mia abic, kede cul me jabu ame pekkere romo ratili pyerabiro wie abic i wi Juda. Abaka Neko te keto ominnere Eliakim me loyo Juda kede Jerucalem, eka te loko nyiŋe oko ni Yekoyakim. Ominnere Yekoakaj en te tero oko naka i Miciri. Yekoyakim ocako loc ame mwaka me dittere oromo pyeraryo wie abic, en te bedo loc i Jerucalem pi mwakki apar wie acel. En obedo timo gin ame nen arac i nyim Rwot Obaŋa. Nebukadnejar abaka me Babulon rik te bino cako lweny i kome ame te make tweye oko kede jegere, te tere naka i Babulon. Nebukadnejar te daŋ tero jami mogo me tic i ot a Rwot i Babulon, te wot ketogi i paco mere i Babulon. Kop i kom Yekoyakim odoŋŋere ducu, timmogo me kwer ame en obedo timo, kede koppogo ame onwoŋo i kome ame mom ocoo kan, gin luŋ tye ocoo i buk Obakki me Icrael kede Juda. Wode Yekoyakim en ame te leyo kakare. Yekoyakim ocako loc ame mwaka me dittere oromo aboro, en te bedo loc i Jerucalem dwete adek kede nino apar keken, En obedo timo gin ame nen arac i nyim Rwot. I kare me oro abaka Nebukadnejar ocwao omiro mere me wot kele i Babulon, kun okelo daŋ jami mogo abeco me tic i ot a Rwot. Ote lunyo keto ominnere Jedekia me bedo abaka ame loo Juda kede Jerucalem. Jedekia ocako loc ame mwaka me dittere oromo pyeraryo wie acel, en te bedo loc i Jerucalem mwakki apar wie acel. En obedo timo gin anen arac i nyim Rwot Obaŋa mere. En mom oye bedo amwol baŋ Jeremia adwarpiny, ame obedo kobbe kop ame oya ibaŋ Rwot. En daŋ ojem i kom Nebukadnejar abaka me Babulon, ame rik onwoŋo omie ekwoŋo akwoŋa kun ekwoŋo i nyiŋ Obaŋa; en odoko apala ame mom doŋ twero ŋut me lokere dok baŋ Rwot Obaŋa me Icrael. Olamdog adoŋo luŋ karacel kede lwak luŋ onwoŋo doŋ ogak oko odoco, ame otimo doŋ timmogo me kwer calo rok ocele, kun daŋ obalo doŋ ot a Rwot ame Rwot onwoŋo olonyo me bedo kabedo acil i Jerucalem. Rwot Obaŋa akwarigi obedo cwayo okwena baŋgi me kwenyorogi tere i tere, pien kica onwoŋo omako i kom jo mere kede i kom kabedo mere. Ento gin gigi ote nywaro okwena Obaŋa anywara ame ocao-gu koppere, ojwiogu odwarpiny ajwia, naka omio akemo omako Rwot otuggere i kom jo mere agwa meicel ame mom dok tye yo moro me juko. Mannono omio Rwot okelo abaka me Kadaya me bino lweny kedgi, ame te neko awobegi i pala lweny, kun nekogi kun nekogi naka i kabedo acil, ame kica mom omako kadi acel i kom awobi, kadi i kom nyako a mom ru oŋeye ico, i kom adwoŋ oti onyo en ame oteggo meicel. Rwot omiogi luŋ i ciŋ abaka me Kalidaya. En te yako jami luŋ ame rik onwoŋo otio kedgi i ot Obaŋa, jami adoŋo kede en atino, jami ame rik okano i ot kano lim a Rwot kede en ame onwoŋo tye i ot kano lim abaka karacel kede me a rwode mere, jami magi luŋ en oyako te tero naka i Babulon, Gin te waŋo ot Obaŋa, paco abaka, kun omumuko apama cel me Jerucalem, obabalo daŋ jami mogo me wel ame onwoŋo tye iye. Jo ame obwot i lak pala romo, en otero luŋ i Babulon acalo opii, gin te wot bedo kuno acalo omiro mere kede me ikwae tuno naka i kare ame loc a jo Pacia omoko atek. Mannono omio kop a Rwot ame rik emio Jeremia okobo ocobere kakare, ni, “Lobo bino doŋ yie nono pi mwakki pyerabiro me culo kare me kwero nino me cabit ame rik onwoŋo mom obedo kwero.” I mwaka me agege me loc abaka Kuro me Pacia, i mwaka-nono en ame Rwot obin otugo iye cunye en abaka Kuro me cwalo cik romo lobo mere luŋ kun daŋ mio ocoo acoa me kwan rom lobo mere luŋ. Man otimere me kop a rik Rwot omio Jeremia okobo cobere kakare, Koppere-nono rik ocoo ni. “Man en gin ame Kuro abaka me Pacia okobo. Rwot ame obedo Obaŋa me polo doŋ otyeko keta me bedo aloc me wi podo luŋ, dok omia tic me gero ot pire i Jerucalem i Juda. Doŋ Rwot Obaŋa myero bed i ŋat acel acel i kom jo mere luŋ ame tye i akinawu; omi en wot i Jerucalem kuno.” I mwaka me agege me loc abaka Kuro me Pacia, i mwaka-nono en ame Rwot obin otugo iye cunye en abaka Kuro me cwalo cik romo lobo mere luŋ, kun daŋ mio ocoo acoa me kwan i lobo mere luŋ, Man otimere me kop a rik Rwot omio amiro mere adwarpiny Jeremia okobo cobere kakare, Koppere-nono rik ocoo ni. “Man en gin ame Kuro abaka me Pacia okobo, Rwot ame obedo Obaŋa me polo doŋ otyeko keta me bedo aloc me wi podo luŋ, dok omia tic me gero ot pire i Jerucalem i Juda, Doŋ Obaŋa myero bed i ŋat acel acel i kom jo mere luŋ ame tye i akinawu; omi ŋat acel acel owot i Jerucalem ame tye i Juda, me wot ger ot a Rwot Obaŋa me Icrael, ame obedo Obaŋa ame oworo i Jerucalem. Ajudaya acel acel ame odoŋ i kabedo moro keken ame en tye iye, myero nwoŋ kony i ciŋ jo ame ebedo iyi akinagi. Myero migi kony me jami magi: ryal, jabu, jami apapat, leyi, kun mom okwano iye mot ocele ame gin omio pi ber a cunygi pi ot Obaŋa ame tye i Jerucalem.” Eka otel me atekere a Juda kede me atekere a Benjamin, olamdog kede jo Levi, kede ŋat acel acel ame Obaŋa onwoŋo oloko cunye me dok i Jerucalem, te cako yikere me wot gero ot a Rwot i Jerucalem, Jo ame rik gin obedo i akinagi luŋ te konyogi kede jami mogo me amaka, ame otio i ryal, kun omiogi daŋ jabu, jami mogo ocele, leyi apapat, kede jami mogo me wel apipim, kede mot me amia i Rwot. Abaka Kuro rik daŋ te miyogi jami mogo me tic i ot a Rwot ame rik abaka Nebukadnejar oyako i Jerucalem te bino keto i ot me woro Obaŋe mere. Abaka Kuro ogamo jami magi i ciŋ Mitredat, adwoŋ ame rik loo lim abaka. En omio dano-nono okwano jami luŋ, kun mio baŋ Cecibajar aloc me Juda, Jami ame rik okwano welgi ene: becen me jabu pyeradek, becen me ryal tutumia acel, tabo me waŋo odok akur pyeraryo wie aboŋwen, tabo me jabu pyeradek, tabo me ryal mia aŋwen apar nono kede jami ocele apapat tutumia acel. Jami luŋ ame okwano ame otio i jabu kede ryal rik oromo tutumia kany kede mia aŋwen nono, Jami magi luŋ rik Cecibajar otero luŋ i Jerucalem i kare ame odwoko jo ame rik tye iyi opii i Babulon i Jerucalem. Magi gin jo me Juda ame rik oya iyi opii i Babulon kan ame rik abaka Nabukadnejar oterogi iye acalo opii, Gin luŋ odwogo i Jerucalem kede i Juda, kun ŋat acel acel dok cen i boma me turgi. Otel ame owoto kedgi ene: Jerubabel, Yecua, Nekemia, Ceraya, Reelaya, Mordekai, Bilcan, Micpar, Bigvai, Rekum kede Bana. Man en wel jo Icrael ame odwogo iyi opii, Jo me doggola a Paroc rik tye tutumia aryo, mia acel kede pyerabiro wie aryo, Jo me doggola a Cepatia te bedo mia adek kede pyerabiro wie aryo, Jo me doggola Arak, mia abiro kede pyerabiro wie abic, Jo me Pakat-moab, ame obedo jo me doggola a Yecua kede Yoab, te bedo tutumia aryo, mia aboro kede apar wie aryo, Jo me doggola a Elam te bedo tutumia acel, mia aryo kede pyerabic wie aŋwen, Jo me doggola a Jattu te bedo mia aboŋwen kede pyeraŋwen wie abic. Jo me doggola a Jakkai te dwogo mia abiro kede pyerabicel nono, Jo me doggola a Bani te bedo mia abicel kede pyeraŋwen wie aryo, Jo me doggola a Bebai odwogo mia abicel kede pyeraryo wie adek, Jo me doggola Ajigad te dwogo tutumia acel, mia aryo kede pyeraryo wie aryo, Jo me doggola Adonikam te dwogo mia abicel kede pyerabicel wie abicel. Jo me doggola a Bigvai te dwogo tutumia aryo, kede pyerabic wie abicel. Jo me doggola Adin odwogo mia aŋwen kede pyerabic wie aŋwen, Jo me doggola Ater ame obedo dano me doggola a Kejekia te bedo pyeraŋwen wie aboro, Jo me doggola a Bejai odwogo mia adek kede pyeraryo wie adek, Jo me doggola a Jora te bedo mia acel kede apar wie aryo, Jo me doggola a Kacum odwogo mia aryo kede pyeraryo wie adek. Jo me doggola a Gibbar odwogo pyeraboŋwen wie abic. Jo ame rik kwarigi bedo i Beterekem odwogo mia acel kede pyeraryo wie adek. Jo ame kwarigi obedo i Netopa odwogo pyerabic wie abicel. Jo ame kwarigi obedo i Anatot odwogo mia acel kede pyeraryo wie aboro. Jo ame kwarigi obedo i Ajimavet odwogo pyeraŋwen wie aryo. Jo ame kwarigi obedo i Kiriatjearim, Cepira, kede i Beerot odwogo mia abiro kede pyeraŋwen wie adek. Jo ame kwarigi obedo i Rama kede i Geba odwogo mia abicel kede pyeraryo wie acel. Jo ame kwarigi obedo i Mikmac odwogo mia acel kede pyeraryo wie aryo, Jo ame kwarigi obedo i Betel kede i Ai odwogo mia aryo kede pyeraryo wie adek. Jo ame kwarigi obedo i Nebo odwogo pyerabic wie aryo. Jo ame kwarigi obedo i Magbic odwogo mia acel kede pyerabic wie abicel. Jo ame kwarigi obedo i Elam ocele mere odwogo tutumia acel, mia aryo kede pyerabic wie aŋwen. Jo ame kwarigi obedo i Karim odwogo mia adek kede pyeraryo, Jo ame kwarigi obedo i Lod, Kadid, kede i Ono, odwogo mia abiro kede pyeraryo wie abic, Jo ame kwarigi obedo i Jeriko odwogo mia adek kede pyeraŋwen wie abic. Jo ame kwarigi obedo i Cena odwogo tutumia adek, mia abicel kede pyeradek. Magi en ame obedo jo me doggola olamdog ame odwogo iyi opii: Ikwae a Jedaya me doggola a Yecua odwogo mia aboŋwen kede pyerabiro wie adek, Jo me doggola Immer odwogo tutumia acel kede pyerabic wie aryo. Jo me doggola a Pacur odwogo tutumia acel, mia aryo, kede pyeraŋwen wie abiro. Jo me doggola a Karim odwogo tutumia acel kede apar wie abiro. Magi en ame obedo jo Levi ame odwogo iyi opii: Jo me doggola a Yecua kede me a Kadmiel ame obedo ikwae Odavia te bedo pyerabiro wie aŋwen, Jo Levi ame rik gin ower, ame obedo ikwae Acap odwogo mia acel kede pyeraryo wie aboro, Jo Levi ame rik obedo ogwok doggola ot Obaŋa, ame obedo ikwae a Callum, Ater, Talmon, Akkub, Katita, kede ikwae a Cobai odwogo mia acel kede pyeradek wie aboŋwen. Magi en ame obedo jo ame odwogo iyi opii i akina jo ame rik tio ticcogo apek i ot Obaŋa: jo me doggola a Jika, Agaba, Tabaot, jo me doggola a Keroc, Ciaka, kede Padon, jo me doggola a Lebana, Agaba, kede Akub, jo me doggola Agab, Camlai, kede Kanan, jo me doggola a Giddel, Gakar kede Reaya, jo me doggola a Rejin, Nekoda, kede Gajam, jo me doggola a Ujja, Pacea kede Becai, jo me doggola Acina, Meunuim, kede Nepicim, jo me doggola a Bakbuk, Akupa kede Karkur, jo me doggola a Bajlut, Mekida, kede Karica, jo me doggola a Barkoc, Cicera kede Tema, jo me doggola a Nejia kede Atipa. Magi obedo jo ame odwogo Iyi opii i akina ikwae omiro ame rik tio baŋ Culeman: jo me doggola a Cotai, Acoperet, Peruda jo me doggola a Jaala, Darkon, kede Gidel, jo me doggola a Cepatia, Kattil, Pokeret-Kajebaim kede Ami. Wel jo luŋ ame rik tio ticcogo apek i ot a Rwot kede ikwae omiro, ame rik tio baŋ abaka Culeman ame odwogo iyi opii rik romo mia adek kede pyeraŋwen wie aryo. Magi daŋ obedo jo ame oya i Tel-mela, Tel-karica, Kerub, Addan, Immer; gin onwoŋo mom otwero nyuto doggola a kwarigi ame gin oya iye ame twero cimo kannaler ka ce gin obedo jo Icrael. Obino jo a Delaya, Tobia, kede jo a Nekoda; gin luŋ mia abicel kede pyerabic wie aryo. Medo i kom mannono, ikwae olamdog magi daŋ obino: jo me doggola a Kabaya, Kakkoj, kede me a Bariillai ame rik onyomo dako mere i akina anyira a Barjillai me Gilead, rik daŋ ote cako lwoŋe kede nyiŋ papa a cegenono. Otemo yenyo nyiŋ jo man ka ce onwoŋo tye i buk ame ocoo iye nyiŋ kwaro a jo Icrael, cite mom ote nwoŋo, omio ote kwanyo nyiŋgi oko i kom olamdog, ote dwoko i akina jo ocele ame mom obedo olamdog, Gabuna rik te miyogi ŋeyo ni kite acalo gin ame nyuto ni gin obedo ikwae olamdog mom tye-ni, gin doŋ mom bino medde camo cam ame omio baŋ Obaŋa, tuno ka alamdoggoro tye ame romo penyo tam Obaŋa, kun tio Urim kede Tumim. Lwak luŋ ame rik odwogo iyi opii rik romo tutumia pyeraŋwen wie aryo, mia adek kede pyerabicel nono, kun mom okwano iye omirogi kede aŋecagi ame rik tye tutumia abiro, mia adek kede pyeradek wie abiro, karacel kede ower a co kede a mom ame rik romo mia aryo nono, Aguragura ame gin odwogo kede rik romo mia abiro kede pyeradek wie abicel, kede kane adoŋo mege ame romo mia aryo kede pyeraŋwen wie abic, kede inaga mia aŋwen kede pyeradek wie abic, kede dok kane ocele tutumia abicel, mia abiro kede pyeraryo nono. Kare ame jo man otuno i ot a Rwot, ame rik tye i Jerucalem, odoŋe atekere mogo rik te miyo mot ame cunygi okwanyo me konyo tic me gero ot Obaŋa i kakare aconnaca ikokome. Gin omio gin ame onwoŋo tye i ciŋgi, kun ŋat acel acel mio gin ame eromo miyo, Gin te miyo iyi cao ticcono jabu ame pekkere romo dari tutumia apar wie abicel, mia abic kede pyeraryo nono, kede ryal ame pekkere romo cekel tutumia acel kede apar wie abiro, kede boŋŋi me aruka olamdog ame romo mia acel. Olamdog kede jo Levi, karacel kede jo ocele mogo rik te bedo i Jerucalem, kene i ŋete, eka ower, ogwok doggola ot a Rwot kede jo ame tio ticcogo apek i ot a Rwot, kede jo Icrael odonnege luŋ, te doŋ bedo i bomagi. Kare ame dwe me abiro doŋ oromo, ikwae a jo Icrael onwoŋo doŋ tye obedo oko i bomagi. Gin luŋ rik ote bino cokere i i Jerucalem i cuny acel, eka Yecua wot a Yekojadak, karacel kede olamdog owote mere, kede Jerubabel wot a Cealtiel karacel kede wati mere, ote cako gero keno lam me yalo Obaŋa a jo Icrael, me ocak yalo iye Obaŋa i mot awaŋa kite ame ocoo kede i buk a Muca ame obedo dano Obaŋa, Kadi bed gin rik onwoŋo tye kede lworo i kom jo ame rik onwoŋo bedo i lobo-nono, cite gin ogero keno lam kakare ame rik onwoŋo tye iye con. Gin rik dok te cako yalo Rwot iye i mot awaŋa, kun oyale odiko kede otyeno. Gin te bedo kwero ecuban me gonye kite ame rik onwoŋo ocoo kede piny, ote daŋ bedo yalo Rwot i mot awaŋa i wel ame ociko me nino acel acel. Medo i kom mannono, gin dok te bedo miyo mot aŋola ame owaŋo alutu nino i nino kede mot ame oyalo i kare me por dwe kede en ame oyalo i Rwot i kare me ecuban adoŋo mege ame ociko pirgi luŋ, kede mot ame dano acel acel mio baŋ Rwot kite ame cunye mito. Kadi bed jo Icrael rik mom ru ocako gero ot a Rwot, cite gin ocako yalo Rwot i mot awaŋa i nino dwe acel me dwe me abiro. Jo Icrael rik te miyo lim baŋ opaa kiddi kede opaa bao, kun omio daŋ cam kede gigi mogo me amata, kede moo me acwala baŋ jo Cidon kede jo Turo me wilo yen cedar i Lebanon, ame rik omio beo i nam naka i Jopa. Man rik otimo pi twer ame Kuro abaka me Pacia omiogi. I dwe me aryo me mwaka me aryo ame gin odwogo kede i Jerucalem kan ame rik ot Obaŋa tye iye, en ame gin ogeo iye tic. Jerubabel wot a Cealtiel kede Yecua wot a Yekojadak, kede jo ocele mege, karacel olamdog kede jo Levi, kede jo luŋ ame rik odwogo iyi opii, gin luŋ ocako ticcono. Jo luŋ ame mwaka me ditogi oromo pyeraryo wot kede malo, oketogi me loyo tic ame i ot a Rwot. Yecua kede awobe mere kede wati mere, Kadmiel kede awobe mere, ame gin jo me doggola Odavia, gin luŋ rik onotte karacel i loyo tic ame otio i ot a Rwot, kun oribere karacel i jo me doggola a Kenadad, ame gin daŋ obedo jo Levi. Kare ame ogedo ocako gero acakki te ot a Rwot, olamdog ame oruko rukgi i komgi ote bino cuŋ i nyim, kun omako apel me akuta, kede jo Levi me doggola Acap, kun omako ajaa. Gin te cako pako Obaŋa kite ame rik Daudi, abaka me Icrael ocikogi kede. Gin te bedo wero wer me pako Rwot kun oleo alea, opake kede dok daŋ opwoc kede ni, “Pien en gire ber, pien marrere a mom lokere bedo nakanaka i kom jo Icrael.” Jo luŋ te wo kun ŋat acel acel redo i dwon aloŋo, pako kede Rwot, pien acakki me te ottere doŋ oketo oko, Olamdoggogo oteggo kede jo Levi kede odoŋe atekere ame rik onwoŋo oneno ot Obaŋa me agege, gin luŋ okok atek i kare ame otye ka gero acakki te ot a Rwot anyennere-nono. Cite i caa-nono jo ocele gire onwoŋo tye awo kede yomcuny. Man omio kare-nono mom onwoŋo tye ŋattoro ame twero poko dwon me koko kede dwoŋ me yomcuny, pien wo onwoŋo dwon okato kare ame winyere i kannabor meicel. Kare ame okwor a jo Juda kede Benjamin owinyo ni jo Icrael ame odwogo iyi opii tye ka gero ot a Rwot Obaŋa me Icrael, gin owoto baŋ Jerubabel kede baŋ odoŋe ame loo doggola a kwarigi, ote wot kobbigi ni “Wan daŋ omito nywako kedwu tic me gero ot a Rwot. Wan daŋ oworo Obaŋa ame wun iworo wunu, wan obedo yale kede mot aŋola con meicel cakere i kare ame abaka Ecaraddon me Acuria ocwaowa me bino bedo kan.” Eka Jerubabel, kede Yecua kede odoŋe ame loo doggola a kwarigi te gamo kopgi ni, “Wan mom oye ni wun ikonywa wunu kede tic me gero ot a Rwot Obaŋawa. Wan obino gero ot pire kenwa, kite ame abaka Kuro me Pacia ocikowa kede.” Jo ame rik onwoŋo bedo i lobogi, te dok cako balo cuny jo Juda, kun omiogi lworo me medde i ticgi, owilogu oticcogo adoŋo ame mio abaka tam me mi juk ticgi oko, Man obedo timere i kare me loc a Jerubabel tuno naka i kare a Dario, abaka me Pacia. Eka i acakki me loc Akacuwera, jo ame bedo i lobo-nono te kelo pido ame ocoo acoa i kom jo ame bedo i Juda kede i Jerucalem. I kare me loc Atakerec, jo magi, Bicilam kede Mitireda kede Tabeel karacel kede owotegi ocele, gin luŋ ocoo waraga baŋ Atakerec, abaka me Pacia. Waraga man rik ocoo i leb Aram me wek ote gonyo agonya i kare me kwano. Medo i kom mannono, Rekum ame obedo akony gabuna kede Cimicai ame rik obedo aran te coyo waraga man baŋ Atakerec, abaka me Pacia, kun okobo kop i kom Jerucalem. Waraga man oya ibaŋ Rekum, akony gabuna kede Cimicai, aran, ame gin ocoo karacel owotegi luŋ, oŋolkop, gabuna luŋ, odoŋe ocele me abumente, kede jo Pacia, jo Erek, jo Babublon kede jo Elam ame obedo Cuca, karacel kede lwak luŋ ame Ocinappar, twon aloc atek meicel rik okwanyo i lobogi, te bino miyogi bedo i lobo me Camaria ducu kede i lobo luŋ ame tye loka kulo me Euprate, Man doŋ en kop ame tye i waraga ame gin ocoo baŋ Atakerec. “Baŋ abaka Akacwera, wan omironi ame tye loka kulo me Euprate, wan luŋ omoti. Doŋ aman wan omito ni yin adwoŋwa iŋe ni Ojudaya ame rik odwogo i bani kuno baŋwa kan, aman gin owoto oko i Jerucalem. Gin aman ocako gero boma me jem ca, ame en boma me timo timmogo areco. Gin aman doŋ tye agero apama cel ame daŋ doŋ ceggi tum oko. Yin adwoŋ myero iŋe ni ka ce boma ni ogere otum, ame apama mere doŋ otum odoco, jo iye mom doŋ bino medde gelo ocoro, lim me lakoro jami ame bino i lobogi kede en ame gin cwao i lobo ocele, akadi kit lim ocele luŋ ame gin culo iyi cao abumente, mannono bi no miyo lim ame bino i cao abaka dok oko piny. Doŋ kite acalo wan obedo jo ame kwo i ciŋi yin adwoŋ, pe bedo ber ka wan oliŋ aliŋa aboŋo titti, kun wan oneno kite ame otye ka nywari kede, me imi yeny koppere i bukkogo ame kwarini yam obedo coyo iye kop otimere. Wan oŋeo ni ce imio otimo amannono, ibino niaŋ ni boma man yam con obedo boma me jem kede me timo tim areco, ame obedo yelo wi obakki apol meicel kede me oloc ocele, dok daŋ ibino niaŋ ni ayela obedo timere i boma man cakere con. Mannono en ame omio rik ote babalo en boma-nono oko, Wan oniaŋ ni ka ce boma man bino gerre tum, ame apama mere doŋ otum odoco, yin gire mom dok ibino nwoŋo ginnoro i lobo luŋ ame tye tuŋ loka kulo Euprate.” Abaka rik te dok i waraga-nono kit man: “Baŋ Rekum, akony gabuna, kede Cimicai, aran, kede owotewu luŋ ame bedo i Camaria, kede i lobo ocele luŋ ame tye loka kulo Euprate. Amotowu ducu. Doŋ waragawu ame icwao wunu baŋa, otyeko kwano luŋ i nyima kun ogonyo aber. Atyeko ciko me yenyo kop ame ikobo wunu, aman daŋ doŋ atyeko ŋiyo buke luŋ, onwoŋo ni boma-nono cakere con onwoŋo obedo boma ame jo iye maro jem i kom obakki, jem kede ayela apapat obedo timere iye. Dok aniaŋ ni obakki mogo ame tek meicel obedo loyo Jerucalem kede lobo ducu ame tye loka kulo Euprate, kun daŋ orao ocoro kede kit lim ocele ame donyo iyi cao abumente. Man omio doŋ myero iket wunu cik me jo-nono juk gedogi-nono oko tuno waŋ ame cikka okato oko. Myero inen ni itimo wunu man oyot, pe myero mi lim ame bino i cao abaka bale.” I kare ame okwano waraga man ame oya i baŋ abaka Atakerec i nyim Rekum kede Cimecai, aran kede owotegi luŋ, gin ote ya oyot wot baŋ Ojudaya ame tye i Jerucalem ote wot juko ticgi oko kun odiogi kede tek acalo jo ame tye kede twer. Tic i kom ot Obaŋa ame tye i Jerucalem koŋ te cuŋ oko; tic ocuŋ naka i mwaka me aryo me loc a Dario, abaka me Pacia. I kare-nono odwarpiny magi te cako rabo kop Obaŋa baŋ Ojudaya me Juda kede me Jerucalem, kun otito i nyiŋ Obaŋa me Icrael ame en onwoŋo loogi; odwarpinnyono ene: Kagai kede Jekeria wot Iddo. I kare ame Jerubabel wot a Cealtiel kede Yecua wot a Yekojadak owinyo kop ame gin orabo-nono, gin dok te cako gero ot Obaŋa ame tye i Jerucalem, odwarpiny aryo-nono daŋ te cako konyogi. I kare-nono en ame Tattenai gabuna me lobo ame tye loka kulo Euprate, kede Cetar-bojenai, karacel kede oloc wadgi obino kede baŋgi te penyogi ni, “Ŋa omiowu twer me gero ot man kede me keto jami iye?” Gin dok te penyo nyiŋ jo luŋ ame rik onwoŋo tye i ka konyo tic me gero ot Obaŋa. Ento Obaŋa onwoŋo tye aneno otel Ojudaya, mannono omio odoŋe me Pacia-nono mom ojuko ticgi, tuno waŋ ame koŋ ocwao kop baŋ abaka Dario, dok tuno ka en doŋ odwoggo kop baŋgi i waraga. Man en kop ame Tattenai gabuna me lobo ame tye loka kulo Euprate, kede Cetar-bonjenai karacel kede owotegi ocwao baŋ abaka a Dario, kun ocoo kop luŋ i waraga kit man: “Baŋ abaka Dario, kuc obed kedi. Adwoŋ, wan omito miyi ŋeyo ni wan owoto naka i Juda, ote tuno naka i ot Obaŋa adwoŋ, Wan onwoŋo otye ka gero ottaca, kun otye agero kede twoni kiddi adoŋo meicel kede bao ame oririo i wi apama ot cel luŋ. Ticcere jo tye atiyo i twon diro meicel, dok tye awot aber meicel. Wan openyo otel me tic me gedo-nono ŋat ame omiogi twer me medde kede gedogi kede keto jami iye. Openyo daŋ nyiŋ jo ame onwoŋo tye atic i gedo-nono ame mio oromo titti jo ame onwoŋo tye atelo ticgi-naca. Gin ogamo kopwa ni gin gigi obedo omiro Obaŋa ame oketo polo kede lobo, dok gin otye ka gero ot a Rwot ame rik ogero con i kare abaka moro me Icrael ame rik onwoŋo obedo twon lo moro atek meicel. Cite kwarigi rik te miyo akemo mako Obaŋa me polo i komgi, ame te miyogi i ciŋ abaka Nebukadnejar me Babulon, i ciŋ jo Kaldaya; gin te babalo ot a Rwot oko, ote daŋ tero jo oko iyi opii i Babulon. Icennere i mwaka me agege me loc abaka Kuro me Babulon, en ame en omio iye cik ni myero dok cak tic me gero ot Obaŋa man. Dok daŋ ni en Kuro acellono rik omio baŋ Cecibajar aloc ame en oketo me loyo Juda jami luŋ ame otio i jabu kede ryal, ame rik abaka Nebukadnejar oyako i ot Obaŋa i Jerucalem ote tero wot keto i ot woro obaŋe me Babulon. Abaka rik omio jami-nono baŋe kun kobbe ni myero en ter i ot Obaŋa ame tye i Jerucalem, te cikke ni myero en ger ot Obaŋa kakare ame rik onwoŋo tye iye con. Mannono rikte miyo Cecibajar bino cako gero acakki te ot Obaŋa i Jerucalem, doŋ cakere i kare-naca tuno kede i kare-ni jo tye gero ot man, cite mom ru gire otum. Man omio wan okwai, yin adwoŋ, me temo yenyo i buke mogo acon me inen ka ce rik abaka Kuro ociko ateni ni myero ger ot man me yin ite miyowa ŋeyo tammi i kom gedo man.” Abaka Dario rik dok te miyo cik ni yeny kop man i Babulon i buke ame ogwoko iye kop otimere ame tye i ot kano gin kodi buke-nono, ame ote daŋ yenyo. Ento rik ote nwoŋo buk ame ocoo iye koppono i boma me Ikbatana ame tye i Media, kun kop ame ocoo iye tye kit man: “I mwaka me agege me loc a Kuro, en Kuro omio cik ni dok ger ot Obaŋa ame rik koŋ onwoŋo tye i Jerucalem, me bed kan ame oyalo iye Obaŋa i mot apapat me awaŋa kede me aŋola. Borrere malo myero bed futi pyeraboŋwen, laccere daŋ futi pyeraboŋwen. Apama myero bed me kiddi ame ocano i yore adek kede bao yore acel i wigi malo, lim me cul me tic man bino ya iyi cao abumente. Jami me jabu kede me ryal ame rik abaka Nebukadnejar oyako i ot Obaŋa i Jerucalem te kela i Babulon myero daŋ mi dwok oko cen i ot Obaŋa ame tye i Jerucalem, kun acel acel i akinagi odwoko i kabedo mere ikome. Myero iketgi i ot Obaŋa.” Dario te dok kit man: “Baŋ Tattenai, gavuna me lobo ame tye loka kulo Euprate. Cetar-bojenai kede oloc wadwu luŋ ame tye kuno, Wun myero ijer wunu teŋe, iwek wunu tic me gero ot Obaŋa wot anyim aboŋo ridde iye; wek wunu oloc Ojudaya kede odoŋe atekeregi medde gigi i ticgi me gero ot Obaŋa kakare acon. Medo i kom mannono, an aketo cik ame mako gin ame myero wun iti wunu i kom odoŋe atekere Ojudaya i ticgi me gero ot Obaŋa. Myero cul jo man oyot pi gin luŋ ame mitte, kun limmere ya iyi cao abumente ame orao i baŋ lo luŋ ame tye loka kulo Euprate. Ginnoro ocele luŋ ame mitte acalo twoni, rommi, itino rommi me yalo Obaŋa me polo i mot awaŋa, onyo naŋo, kado, kede kono olok, akadi moo ame olamdog me Jerucalem mito; wun myero imi wunu jami-nono luŋ baŋgi aboŋo keŋ, me gin obed miyo baŋ Obaŋa me polo mot me kweyo cunye kare luŋ, kun okwao pire kede pi awobena, me komwa bed ayot. Dok amedo keto cik ocele ni, ka ŋat a mom olubo cik man obino turo bao ame orio i wi ode oko, ote wito wie bedo abit, ote rwake iye. Ode bino doko wi odur. Obaŋa ame rik oyero Jerucalem me bedo kan ame myero wore iye myero oret abaka moro keken onyo rok ame mom bino lubo cik man, kun otemere me balo ot Obaŋa ame tye kuno. An Dario en aketo cik man. Cik man myero lub aber odoco.” Kare ame gabuna Tattenai, Cetarbonjenai kede oloc wadgi owinyo kop ame abaka Dario ocwao baŋgi, gin oru timo oyot gin ame en ociko luŋ. Odoŋe atekere Ojudaya te medde i ticgi me gedo aber meicel, kun lubo kop ame odwarpiny Kagai kede Jekeria wot Iddo orabo. Gin te tyeko gedo me gero ot Obaŋa kite ame Obaŋa me Icrael ociko, kun gin olubo cik abaka Kuro kede abaka Dario kede abaka Atakerec oketo, ame gin luŋ obedo obakki me Pacia. Gero ot man otum i nino dwe adek me dwe me Adar, i mwaka me abicel me loc abaka Dario. Eka jo Icrael, olamdog, Olevi, kede jo ocele mege luŋ ame rik odwogo iyi opii te kwero ot Obaŋa i twon yomcuny adwoŋ meicel. I kare me kwero-nono gin omio twoni mia acel, nyogi rommi mia aryo, itino rommi mia aŋwen me aŋola, kede nyogi dyegi apar wie aryo me aŋola me mot me bal a jo Icrael luŋ, kun acel acel tye pi atekere acel acel. Dok ote keto daŋ olamdog kede Olevi i dog ticgi me tic baŋ Obaŋa i Jerucalem, kite ame ocoo kede i buk a Muca. Eka i nino dwe apar wie aŋwen me dwe me agege, jo Icrael ame odwogo iyi opii te kwero ecuban me Kato. Olamdog luŋ kede Olevi luŋ onwoŋo doŋ otyeko lonyere oko kengi, gin luŋ onwoŋo doŋ odoko jo acil, en omio gin doŋ te neko itino rommi me kwero ecuban me Kato, kun oneko pi jo luŋ, pi olamdog kede pirgi gin kengi. Jo Icrael luŋ ame odwogo iyi opii obedo camo cam me kwero ecuban me Kato karacel, kede ŋat acel acel ame doŋ otyeko weko tim me kwer a jo ame onwoŋo bedo i lobo-nono te notte kedgi me woro Rwot Obaŋa me Icrael. Gin te bedo kwero ecuban me ogati a tobi mom iye pi nino abiro, kun otye kede yomcuny; pien Rwot onwoŋo doŋ oyomoro cunygi, dok onwoŋo daŋ omio cuny abaka me Acuria odwogo i komgi, ame omio okonyogi tics me gero ot Obaŋa, ame obedo Obaŋa a jo Icrael. Icennere, ame kare doŋ okato alalac, i kare ame Atakerec abaka me Pacia, rik onwoŋo tye lo moro ame nyiŋe Ejira, ame kwari mere tye kit man: Ejira obedo wot a Ceraya, Ceraya wot Ajaria, Ajaria wot a Kilkia, Kilkia wot a Callum, Callum wot a Jadok, Jadok wot Akitub, Akitub wot Amaria, Amaria wot Ajaria, Ajaria wot a Merayot, Merayot wot a Jerakia, Jerakia wot a Uji, Uji wot a Bukki, Bukki wot Abicua, Abicua wot a Finekaci, Finekaci wot Eleajar, eka Eleajar te bedo wot Aron ame obedo alamdog adwoŋ. Ejira rik obedo apwony cik ame ŋeo cik a Muca atek meicel, cik ame rik Rwot Obaŋa me Icrael omio baŋ Muca. Winyo Obaŋa rik onwoŋo tye i kome, omio abaka rik mie jami luŋ ame en okwao i baŋe, Ejira rik te ya i Babulon wot Jerucalem, kun woto karacel kede jo Icrael mogo ame i akinagi tye iye olamdog kede Olevi, ower wer i ot Obaŋa, jo ame gwoko doggola ot Obaŋa, kede jo mogo ame tio ticcogo apek i ot Obaŋa, Man otimere i mwaka me abiro me loc Atakerec, abaka me Pacia. Gin rik oya i Babulon i nino dwe acel me dwe me agege. Obaŋa obedo konyogi, omio gin te tuno i Jerucalem i nino dwe acel me dwe me kany. Ejira rik onwoŋo ojalo kare mere luŋ i pwonyo cik a Rwot, kun daŋ tiyo kite ame cik kobo, dok daŋ pwonyo cik kede icwil luŋ baŋ jo Icrael. Abaka Atakerec rik omio waraga baŋ Ejira, alamdog, apwony cik ame opwonyere meicel i cik a Rwot kede gin ame Obaŋa ociko, baŋ jo Icrael. Waraga ame omie ocoo kit man: “Waraga man oya i baŋ Atakerec abaka obakki luŋ baŋ Ejira, alamdog, apwony cik Obaŋa me polo. Aman an doŋ atyeko keto cik i lobo ame an aloo luŋ, mi jo Icrael luŋ, olamdog, Olevi ame mito, myero yeyigi me wot kedi i Jerucalem. An abaka karacel kede jo abiro ame mia tam, ocwai me iwot iyeny kop i kom Jerucalem kede Juda, inen ka jo tye alubo cik Obaŋa kuno kite ame otyeko miyo kede i ciŋi. Ibino tero mot me jabu kede me ryal ame an karacel kede jo ame mia tam mito miyo baŋ Obaŋa me Icrael, ame ot me wore tye i Jerucalem. Myero daŋ iter ryal kede jabu luŋ ame irao i lolo me Babulon luŋ karacel kede mot ame jo Icrael, kede olamdoggi okwoŋo pire kengi me miyo kite a cunygi omito pi ot Obaŋagi ame tye i Jerucalem. “Myero daŋ iti wunu i lim man aber, iwil wunu kede twoni nyogi rommi kede itino rommi, kede moko kwon kede mot amatagi, eka ite yalo kede Obaŋa i wi keno lam ame tye i ot Obaŋawu ame tye i Jerucalem. Ryal kede jabu ame odoŋere itwero tic wunu kede i yore ame itamo wunu ni ber, cite myero iti wunu kede i yore ame Obaŋawu mito, Jami luŋ ame omi me tic i ot Obaŋawu i Jerucalem myero iwot imi wunu ducu i nyim Obaŋawu. Ginnoro ducu ame ibino mito pi ot Obaŋawu, ibino nwoŋo i kom lim abumente. “An abaka Atakerec aketo cik man, kun aciko kede okan lim me lobo luŋ ame tye loka kulo Euprate me miyo jami luŋ oyot baŋ Ejira, alamdog ame obedo acoo cik Obaŋa me polo; myero mi baŋe jami luŋ ame en omito, tuno ka oromo ryal ame pekkere romo talanta mia acel, kede naŋo puku mia aŋwen, kede koŋo olok debe mia aryo, moo debe mia aryo, kede kado ame en bino mito. Ginnoro luŋ ame mitte pi ot Obaŋa me polo myero inen wunu ni ocobere kite ame omito kede, naka imio wunu akemo make i koma kede ikwaena ame bino loc iŋea. Dok daŋ kur imi wunu jo magi cul ocoro: olamdog, jo Levi ower, ogwok doggola ot Obaŋa, jo atio ticcogo apek i ot Obaŋa, kede jo ocele mege ame tio tic apapat i ot Obaŋa. “Dok yin Ejira, kite acalo Obaŋani omio yin itye kede ryeko, myero yin iketo oŋolkop atino kede en adoŋo mege, me gin bed jo ame ŋolo kop a jo luŋ ame tye loka kulo Euprate, jo luŋ ame ŋeo cik Obaŋawu; dok jo a mom ŋeo daŋ myero ipwonygi me ŋeyo. Jo luŋ ame mom woro cik Obaŋawu kede cik abaka, myero ru keto can apek i komgi, acalo can me to, ryemogi oko i lobo, yako jamigi luŋ, onyo keto i ot kol.” Ejira okobo ni, “Pak wunu Rwot Obaŋa a kwarowa! En omio abaka cuny acalo man, me keto kwogo i kom ot a Rwot ame tye i Jerucalem. Pi mar mere a mom lokere ame en oketo i koma omio en omio abaka opwoa, karacel kede oticere adoŋo luŋ, kede jo ame mie tam. Obaŋa omia tekcuny, te miya loko tam otellego me Icrael me wot keda.” Magi en odoŋ atekere me Icrael ame onwoŋo loo doggola a kwarigi ame rik onwoŋo tye i yi opii i Babulon eka te dwogo karacel kede Ejira i Jerucalem i kare ame Atakerec onwoŋo abaka; Gercom obedo atel wi jo me doggola a Finekaci, Daniel obedo atel wi jo me doggola Itamar. Katuc wot a Cekania, obedo atel wi jo me doggola a Daudi. Jekaria obedo atel wi jo me doggola a Paroc, ame rik obino kede jo me doggolagi ame romo mia acel kede pyerabic, wel jogi oŋeo pien onwoŋo ocoo piny. Eliekoenai, wot a Jerakia, obedo atel wi jo me doggolagi mia aryo. Cekania wot a Jakajiel obedo atel wi jo me doggola a Jattu; en onwoŋo tye kede jo me doggolagi mia adek. Ebed wot a Yonacan, obedo atel wi jo me doggola Adiŋ, ame onwoŋo tye kede jo me doggolagi pyerabic. Jecaya wot Atalia, obedo atel wi jo me doggola Elam, ame onwoŋo tye kede jo me doggolagi pyerabiro. Jebadia wot a Miceal, obedo atel wi jo me doggola a Cepatia, ame onwoŋo tye kede jo me doggolagi pyeraboro. Obadia wot a Jekiel, obedo atel wi jo me doggola a Yoab, ame onwoŋo tye kede jo me doggolagi mia aryo kede apar wie aboro. Celomit wot a Jocipia, obedo atel wi jo me doggola a Bani, ame onwoŋo tye kede jo me doggolagi mia acel kede pyerabic nono. Jekaria wot a Bebai, obedo atel wi jo me doggola a Bebai, ame onwoŋo tye kede jo me doggolagi pyeraryo wie aboro. Jokanan wot a Kakatan, obedo atel wijo me doggola Ajigad, ame onwoŋo tye kede jo me doggolagi mia acel kede apar. Otel ame obino icen karacel kede jogi ame romo pyerabicel obedo Elipelet, Jeuel kede Cemaya, ame gin luŋ obedo otel wi jo me doggola Adonikam. Eka Utai kede Jacur te bedo otel me doggola a Bigvai, ame onwoŋo tye kede jo me doggolagi pyerabiro. Acoko jo-nono luŋ karacel i dog kulo ame mol dok tutuŋ boma me Akaya, obedo kuno nino ame romo adek. Kare ame abedo ŋiyo jo luŋ karacel kede olamdog, mom onwoŋo dano moro ame obedo dano me doggola a jo Levi. Man omio acwalo kop alwoŋo otel magi: Eliejer, Ariel, Cemaya, Elnatan, Jarib, Elnatan, Natan, Jekaria kede Meculam, karacel kede Joyarib kede Elnatan ame gin aryo-ni rik obedo jo ame tye i ŋec atut meicel. An rik ate cwayo jo man baŋ Iddo, adwoŋ ame onwoŋo loo jo ame bedo i Kacipia, kun a kobbigi gin ame myero owot okob baŋ Iddo kede owote mere ame rik onwoŋo tye i Kacipia ame gin rik obedo jo ame tio ticcogo apek i ot woro Obaŋa. En ocikogi ni myero wot kobbigi ocwal jo ame bino tic i ot Obaŋa ame tye i Jerucalem. Pi kica a Rwot Obaŋawa omio gin jo-naca ocwayiwa Cerebia, ame rik en obedo twon lo moro aryek meicel i tic, Alevi me doggola a Mali; en obino kede jo me doggolagi-nono apar wie aboro, kun awobe mere daŋ tye iye. Dok ote cwayiwa daŋ Kacabia kede Jecaya, ame obedo jo me doggola a Merari, ame obino kede jo me doggolagi-nono pyeraryo nono, kun awobegi daŋ tye iye. Medo i kom jo-nono, gin ocwayiwa daŋ jo ocele mia aryo kede pyeraryo nono, ame gin luŋ obedo jo ame tio ticcogo apek i ot woro Obaŋa, jo ame rik Daudi kede omiro mege adoŋo omio ni myero kony jo Levi kede ticgi. Gin luŋ rik otuco nyiŋgi. Kare ame otye i dog kulo me Akaya kuno, arabo kop me kanyo kec, wek omwolle kenwa i nyim Obaŋawa, kun okwae me telowa kede gwokowa i wo twa, wan karacel kede itinowa, kede jamiwa luŋ, Pien lewic rik omaka me kwayo abaka me miyowa ocirikale kede wegi aguragura me gwokowa i yo i kom okworwa, pien an rik onwoŋo atyeko kobbe ni Obaŋawa mio gum baŋ jo luŋ ame gene, ento akemo make, dok daŋ keto can i kom jo luŋ ame ya oko i baŋe. I kare-nono wan ote kanyo kec, kun okwae me gwokowa i wotwa, en daŋ te winyo kwacwa. I akina olamdog rik ate yero Cerebia kede Kacabia, kede dok odoŋe ocele apar, eka ate pimo ryal kede jabu, jami tic, kede mot luŋ ame abaka, jo amie tam, kede jo Icrael luŋ omio me tic i ot a Rwot; apimo ate miyo luŋ baŋ olamdog, Jami ame amiogi ene: ryal ame pekkere romo talanta mia abicel kede pyerabic, jami ame otio i ryal mia acel ame pekgi romo talanta mia acel, kede jabu ame pekkere romo talanta mia acel, kede tabbi ame otio i jabu pyeraryo nono, ame acel acel i akinagi pekkere romo ratili apar kede tabbi me mola aryo ame ber dok cil, ame welgi rom aroma i me jabu. An rik ate kobbigi ni, “Wun ibedo wunu jo acil i nyim Rwot, kede jami man luŋ daŋ cil; ryal kede jabu daŋ obedo mot ame ŋat acel acel oyero gire kene te miyo baŋ Rwot Obaŋa a kwariwa, Gwok wunu aber naka ka gin luŋ otuno i Jerucalem. I kuno obino pimogi luŋ i nyim alamdog adwoŋ, kede jo Levi karacel odoŋe ame loo doggola akwariwa, ame tye i Jerucalem, kun opimo icikka ame tye i ot a Rwot.” Mannono te miyo olamdog kede jo Levi cako gwoko ryal kede jabu ame opimo, kede jami luŋ me tic ame omiogi, ote tero luŋ wot keto i ot Obaŋawa ame tye i Jerucalem. Wan ocako ya i dog kulo me Akava me wot i Jerucalem i nino dwe apar wie aryo me dwe me agege. Rwot Obaŋawa obedo bedo kedwa kun gwokowa i ciŋ okworwa ame a cobo mony i komwa, kede en ame obedo libowa iyo, Kare ame otuno i Jerucalem, owe koŋ pi nino ame romo adek. I nino me aŋwennere ote wot i ot a Rwot Obaŋawa ote pimo ryal kede jabu, kede jami tic ote miyogi luŋ i ciŋ Meremot, wot a Uria, ame en rik obedo alamdog, Jo ocele ame onwoŋo daŋ tye kede obedo Eliajar wot a Finekaci kede jo Levi aryo, Jojabad wot a Yecua, kede Noadia wot a Binnui. Okwano jami luŋ, ote pimo pekgi, ote daŋ coyo oko piny. I kare-nono jo luŋ ame rik onwoŋo odwogo iyi opii i Babulon oyalo Rwot Obaŋa me Icrael kede mot awaŋa. Gin oyalo Rwot kede twoni apar wie aryo pi jo Icrael luŋ, nyogi rommi pyeraboŋwen wie abicel, itino rommi pyerabiro wie abiro, kede dyegi apar wie aryo ame omio me kwanyo bal i komgi. Leyi magi luŋ gin oyalo i Rwot me mot awaŋa, Gin otero kop ame rik abaka ocoo te miyogi, ote wot miyo baŋ oloc kede gabuna ame abaka oketo me loyo lobo ame tye loka kulo Euprate; gin te bedo miyo kony baŋ lwak kede ot a Rwot. I kare ame doŋ otyeko tiyo tic magi luŋ otellogo i akina otel me Icrael obino baŋa ote kobba ni jo Icrael, olamdog kede jo Levi mom opokere kengi i kom jo ame bedo i lobo-nono, mom oweko timo timgi me ipyeda. Mom opokere i jo Kanaan, jo Ammon, jo Moab, kede jo Miciri, akadi i jo Kitti, jo Periji, jo Jebuc kede jo Amor. Ojudaya obedo nyomo anyira a rok ocele me bedo mongi, mannono te miyo jo acil ame gin obedo jo Obaŋa rubere oko kede jo ocele. Bal man ame onwoŋo mom nyuto gen a lwak i kom Obaŋa-ni, jo ogeo wie obedo rwode. Kare ame awinyo kop man, ayeyeco rukka oko karacel kede tambara me tweyo wia, ate daŋ puputo yer wia kede yer tika oko, ate bedo piny ame akemo otuŋa oko, Abedo kuno tuno naka otyeno caa ame oyalo iye Obaŋa, jo te cako cokere baŋa gura dyere, jo luŋ ame komgi onwoŋo omyel pi kop Obaŋa me Icrael ame ekobo i kom bal a jo ame odwogo iyi opii. I kare ame caa me yalo Obaŋa otyeno doŋ oromo, an ate ya oko i kan ame onwoŋo koyo oonyere ikoma wok-ca, kun pwod aruko gira rukka ame oyeyeca, karacel kede itambara me tweyo wia, ate rumo tyna piny kwayo Rwot kun aryeo ciŋa malo baŋ Rwot Obaŋana. Ate doŋ cako kobbi Rwot ni, “Ama Obaŋana, lewic ocira oko ame mom aromo tiŋo waŋa malo i nyimi. Balwa tye ame doŋ olwobere alwoba i wi wadgi, kun borrere doŋ katowa oko; rocwa doŋ ogudo polo oko. Cakere i kare a kwariwa tuno kede naka i kare man, wan obedo rimo roc adwoŋ meicel; pi bal ame wan obedo timo-nono omio wan jo Icrael karacel obakkiwa kede olamdog, omiowa luŋ i ciŋ obakki orok ame te nenekowa kede pala me lweny, ote yako jamiwa, ote daŋ terowa oko i lobo ocele calo opii; mannono omiowa twon lewic adwoŋ tuno kede naka i kare-ni. Ento aman pi kare anonokkoro, yin Rwot Obaŋawa inyuto kica ni baŋwa, imio jo ocele i akinawa obwot te bino bedo i lobo man acil kun bedo gigi kede kuc. Yin dok imio waŋwa oyabere ite miyowa gum me dok yiko kwowa kun wan opii. Wan rik onwoŋo otye acalo opii, cite yin mom iwekowa ata i kare ame wan opii, Mar meri a mom lokere obedo tye i komwa, ite miyo obakki me Pacia bedo kede kica i komwa, ite yewa dok yiko kwowa kun ogero otti ame onwoŋo doŋ oballe oko, dok daŋ ite ye gwokowa kan i Juda kede Jerucalem. “Kara doŋ aman wan otwero kobo ŋo ba, ama Rwot Obaŋawa, en ame doŋ kop man luŋ otimere-ni? Pien wan doŋ okwero lubo gin ame iciko oko luŋ, ame rik iciko kun imio omironi odwarpiny okobbiwa. Gin rik okobbiwa ni lobo ame wan owot gamo bedo megwa, obedo lobo ame jo iye mom cil; jo ame bedo kuno luŋ cakere i tuŋŋi tuno kede tuŋ ocele opoŋ ka i tim mogo me ipyeda keken. Gin ocikowa daŋ ni myero kur onyomere kede jo ame bedo kuno, kur otim ginnoro me konyogi bedo i kuc kede nwoŋo lonyo me obed jo atek, ote camo jami abeco ame tye i lobo-naca, ote wekki ikwaewa me aleagi atwal. A doŋ ityeko keto can apapat i komwa pi balwa kede rocwa, wan pwod oŋeo ni yin Obaŋawa iketo can a mom romo kit bal ame wan otimo, dok-gu iye jo mogo odoŋ kite ame otye kede aman-ni. Wan myero obed medde turo cikki, kun onyomere kede jo ame tye ka timo tim man me ipyeda-ni? Akemo mom bino maki i komwa ite tyekowa oko ducu, ame ŋattoro mom dok romo doŋ kadi bwot? Ama Rwot Obaŋa me Icrael, yin gire iŋolo kop kakare, pien imio jo mogo i akinawa obwot te doŋ kite ame otye kede i kare-ni. Nen, wan en otye i nyimi kede rocwa i komwa, pien mom tye ŋattoro ame romo cuŋ i nyimi pi balwa-nono.” I kare ame Ejira tye ka kwayo Obaŋa-nono, kun tuco bal, ame akok akoka, dok arette piny i nyim ot Obaŋa, lwak jo apipim, co kede mon kede itino, ocokere baŋe kun oya iyi Icrael luŋ, ote kok atek meicel. Cekania wot a Jekial, me doggola a Elam, te kobbi Ejira ni, “Wan oturo cik Obaŋawa, ote nyomo anyira orok ame bedo kan me bedo monwa, kadi bed wan otimo bal man cite jo Icrael pwod tye kede gen. Aman wan myero koŋ dok ocikere kede Obaŋawa ni mannono wan obino miyo mon magi luŋ kede itinogi wot oko, Wan obino timo gin ame yin adwoŋwa karacel kede jo ame woro gin ame Obaŋa ociko okobbiwa, Wan obino timo kun olubo gin ame Obaŋa ociko, Ya doŋ malo, pien mannono obedo ticci, wan oyikere oko me tic karacel kedi; bed atek me itimo oko.” Ejira doŋ te ya malo, te miyo odoŋe ame loo olamdog kede jo Levi karacel kede jo Icrael ducu kwoŋ ni obino timo gin ame doŋ otyeko kobo ducu, Jo luŋ te kwoŋ kittono. Ejira te doŋ ya oko i nyim ot Obaŋa, te wot naka iyi cikka a Jekokanan wot a Eliacib, te wot bedo kuno dyewor acel kun mom camo ginnoro, mom daŋ mato ginnoro; pien i kare-nono onwoŋo tye ka kumo atek pi tim a jo ame odwogo iyi opii eka ote cako turo cik a Rwot. Rik ote rabo kop romo jo luŋ ame odwogo iyi opii ame tye i Juda kede i Jerucalem ni jo luŋ myero cokere i Jerucalem, kun omedo ni ka ŋat a mom obino i Jerucalem i akina me nino adek, rwode kede odoŋe atekere bino miyo ogamo jami mere oko ote daŋ ryeme oko i akina jo ame odwogo iyi opii, Jo luŋ me Juda kede Benjamin te cokere i Jerucalem i nino adek keken; gin ocokere kuno i nino dwe pyeraryo nono, dwe me aboŋwen. Jo luŋ obedo i dyekal i nyim ot Obaŋa, kun komgi amyel amyela pi koppono, kede dok pi kot ame onwoŋo tye acwe atek meicel. Ejira alamdog te ya malo kobbi lwak ni, “Wun ituro wunu cik pi nyomo monwu i baŋ rok ocele, mannono omio imedo wunu bal atek i wi jo Icrael. Aman doŋ myero ituc wunu balwu baŋ Obaŋa a kwariwu, eka ite timo wunu gin ame en mito. Pokere wunu oko i kom rok luŋ ame tye ka bedo i lobowa dok daŋ myero iryem wunu mon ame inyomo wunu i baŋ orok oko.” Lwak luŋ te gamo koppere kede dwon aloŋo kun owo ni, “Myero gire timere amannono, wan myero otim gin ame ikobo.” Dok ote medo ni, “Cite jo pol meicel, dok kot daŋ tye acwe atek. Pe bedo yot wan me bedo cuŋ i dyekal kannaler kit man. Man mom tic ame twero cobere i nino acel onyo aryo, pien polwa oturo cik man. Myero odoŋe ame loowa en ame cuŋŋi lwak luŋ; jo luŋ ame onyomo mon orok ame tye i bomawa ducu myero bin i nino kede caa ame ociko, kun obino karacel kede odoŋe ame loogi kede oŋolkop me bomagi-nono. Man bino miyo akemo Obaŋa ame omake i komwa wok-ki pi bal man kwe oko.” Jo luŋ te ye tam ame okelo-nono kono ka Yonacan wot Acael kede Jajeya wot a Tikiva en okwero kun Mecullam kede Cebbetai, ame gin jo Levi cwakogi. Jo luŋ ame odwogo iyi opii te timo amannono, Ejira alamdog te yero jo i akina jo ame loo doggola a kwarigi, kun lubo kite ame doggola acel acel tye kede, te coyo daŋ nyiŋ ŋat acel acel piny. I nino dwe acel me dwe me apar, gin te bedo piny me koŋ yenyo tyen kop man, eka i nino dwe acel me dwe me agege me mwaka anyen, en ame tic me yenyo tyen kop a jo ame onyomo mongi i baŋ orok otum iye. Magi gin nyiŋ olamdog ame onwoŋo onyomo mongi i baŋ orok: I kom awobe me doggola a Yecua wot a yekojadak kede omego mere onwoŋo tye iye: Maceya, Eliajer, Jarib, kede Gedalia. Gin luŋ ocikere ni obino ryemo mongi oko, gin te yalo Obaŋa kede nyok romo acalo motgi me walakino i roc. I kom jo me doggola a Immer te bedo iye Kanani kede Jebadia. I kom jo me doggola a Karim te bedo iye: Maceya, Cemaya, Jekiel, kede Ujia. I kom jo me doggola a Pacur te bedo iye: Elioenai, Maceya, Icimael, Netanel, Jojabad, kede Elaca. Jo Levi ame onyomo mongi i baŋ orok ene: Jojabad, Cimei, Kelaya ame nyiŋe ocele Kelita, Petakia, Juda kede Eliejer. I kom ower Eliacib kene en ame onyomo dako mere i baŋ orok, Aco i kom jo ame gwoko doggola ot Obaŋa te bedo: Callum, Telem, kede Uri. Eka i kom jo ocele te bedo jo magi: I kom jo me doggola a Paroc tye Ramia, Ijjia, Malkija, Mijamin, Eliajar, Malkija, kede Benayo. I kom jo me doggola a Elam te bedo Matania, Jekaria, Jekiel, Abdi, Jeremot, kede Erica. I kom jo me doggola a Jattu tye Elioenai, Eliacib, Matania, Jeremot, Jabad, kede Ajija. I kom jo me doggola a Bebai te bedo Jekokanan, Kanania, Jabbai, kede Atilai, I kom jo me doggola a Bani te bedo: Mecullam, Malluk, Adaya, Jacub, Ceal, kede Jeremot. I kom jo me doggola a Pakat-moab te bedo: Adna, Celal, Benayo, Maceya, Matania, Bejalel, Binnui, kede Manace, I kom jo me doggola a Karim te bedo Eliejer, Icija, Malkija, Cemaya, Cimeon, Benjamin, Malluk, kede Cemaria. I kom jo me doggola a Kacum te bedo Matenai, Mattata, Jabad, Eliepelet, Jeremai, Manace kede Cimei. I kom jo me doggola a Bani tye iye Madai, Amuram, Uel, Benayo, Bedeya, Celuki, Vania, Meremot, Eliacib, Matania, Mattenai, kede Jacu, I kom jo me doggola a Binnui te tye iye Cimei, Celemia, Natan, Adaya, Makenadebai, Cacai, Carai, Ajarel, Celemia, Cemaria, Callum, Amaria kede Yucepu. I kom jo me doggola Nebo te bedo Jeyel, Mattitia, Jabad, Jebina, Jaddai, Joel, kede Benaya. Jo magi luŋ onwoŋo rik onyomo anyira orok. Gin rik te ryemogi oko karacel kede itinogi. Man obedo kop a Nekemia wot a Kakalia. I dwe me Kiclevi, i mwaka me pyeraryo me loc abaka Akacwera, an Nekemia onwoŋo atye i boma adwoŋ me Cuca. Kanani ame obedo ŋat acel i akina omegona obino baŋa kede jo mogo ame en oya kedgi i Juda, an ate penyogi kop i kom Ojudaya ame odwogo iyi opii karacel kede kite ame Jerucalem tye kede. Gin te kobba ni jo i kuno ame odoŋ, ame odwogo ceŋ i lobogi, tye kede peko adwoŋ meicel, kun lewic makogi okato kare, dok ni apama cel me Jerucalem orete oko piny, dok kika dogcel luŋ mac daŋ owaŋo oko, I kare ame awinyo kop man abedo piny ate cako koko oko. Abedo kumo pi kare alac kun mom acamo ginnoro, Amedde kwayo Obaŋa me polo kun akobo ni, “Ama Rwot Obaŋa me polo yin ibedo twon Obaŋa adwoŋ meicel dok ame iyiliyili. Yin gire igwoko gin ame iciko dok mar meri mom lokere baŋ jo ame mari, kun olubo gin ame iciko. Nena ba, ama Rwot, yab yiti iwiny kwacca an amironi ame akelo i nyimi dyeceŋ kede dyewor pi omironi ame gin obedo jo Icrael. Atuco balwa i nyimi, ame wan jo Icrael obalo i nyimi. Nen ba, an karacel kede jo luŋ me ot a kwarina otyeko balo i nyimi. Wan obedo timo gin arac meicel i nyimi, kun daŋ mom omako cik meri luŋ. Okwero lubo icwilli kede gin ame rik iciko baŋ amironi Muca. Tim ber ipo kop ame rik ikobo baŋ Muca ni, ‘Ka ce mom ibedo wunu ame igena wunu, abino keketowu oko i akina orok. Cite ka ibino ŋut wunu ite lokere wunu dwogo baŋa, ite gwoko wunu gin ame aciko kun daŋ iketo wunu i tic, abino dwogowu cen i kabedo kan ame atyeko yero me bedo kan ame obino wora iye, kadi bed onwoŋo itye wunu iyi agikki me lobo.’ “Ama Rwot, man obedo omironi ame gin joni ikokome. Yin en ame rik ilakorogi i twon tekoni adwoŋ kede ciŋi atek. Tim ber, ama Rwot, icik yiti iwiny kwacca kede kwac omironi ocele luŋ ame cunygi tye i komi, Tim ber tin imia gum, me dano man bed kede kica i koma.” I kare-nono onwoŋo an en aloo tic me miyo koŋo olok i meja abaka. Doŋ i nino moro acel, i dwe me Nican, i mwaka me pyeraryo nono me loc abaka Atakerec, i kare ame en abaka onwoŋo tye acem, an ate tero koŋo olok i nyime. Yam onwoŋo mom ru onena i nyime kun waŋa oballe, omio en abaka te penya ni, “Piŋo kara waŋi oballe, kun inen dano ame kome yot? An atamo mom tye ginnoro ocele kono cunyi en a mom yom.” Lworo te maka meicel, ate gamo doge ni, “Kom abaka gire bed ayot! Kara waŋa mom twero nen i can i yore aŋo kun boma ame oyiko iye kom kwarina calo doŋ wi odur, dok kika me dogcel me boma luŋ mac owaŋo oko?” Abaka te penyo ni, “Kara aman doŋ yin ikwaya ni kono atimo ŋo piri?” Mannono omio an ate cwalo kwacca baŋ Obaŋa me polo, ate kobbi abaka ni, “Ka ce cuny adwoŋŋa twero bedo yom i koma, kun an amironi ayomoro cunyi, kono iye an awoto i lobo me Juda, ame en boma ame oyiko iye kom kwarina, me awot ager dok odoco.” Abaka te cako penya, kun onwoŋo agoŋŋere tye obedo i laŋete, ni, “Wotti-nono bino teri kare ame rom mene, dok ibino dwogo awene?” An ate titte kare, en te ye kede yomcuny ni myero an awot. An dok ate kwayo abaka ni myero mia waraga me ater baŋ oloc adoŋo ame tye loka kulo Euprate me gin ye an abed i lobogi tuno ka atuno i Juda, Dok ate kwaye daŋ ni myero en mia waraga me atera baŋ Acap, ame en onwoŋo obedo adwoŋ ame gwoko buŋ abaka, me en ye miya bao apol me tiyo kika me dogcel me boma kede me ot ame an abino bedo iye, Abaka te miya gin ame akwao luŋ, pien Obaŋana obedo konya. Abaka te miyo odoŋe mogo me mony karacel kede aguragura wot keda, ate wot naka i lobe ame tye loka kulo Euprate; ate miyo waraga ame abaka ocoo baŋ oloc adoŋo me kuno, Cite i kare ame Canbalat, dano me Koron, kede Tobia, dano me Ammon ame obedo amiro, owinyo ni dano moro tye ame obino pi tic pi jo Icrael, akemo omakogi meicel. Awoto naka i Jerucalem ate wot bedo kuno nino adek. I dyewor, an karacel kede jo mogo anonok ate ya wot oko, kun onwoŋo mom ru atitti ŋattoro gin ame Obaŋa oketo i cunya ni atim i Jerucalem. Mom awoto i lee moro ocelo kono ka en ame rik an ariŋo kede keken. Awoto dyewor ame piny pwod col, kun abeo i dogcel ame olwoŋo ni dogcel me Luŋ, naka waŋ pii ame olwoŋo ni me Too kede i dogcel me wi odur. I kare-nono onwoŋo atye aŋiŋio apama cel me boma ame onwoŋo orette oko piny kede kika dogcel luŋ ame onwoŋo owawaŋo oko i mac. Ate dok lokere dok tutuŋ dogcel me waŋ akon kede Kut abaka. Cite lee ame abedo i wie mom te nwoŋo kannoro ame etwero beo iye. An ate doŋ lunere piny kun abeo i luŋ kuno aninio apama cel dyeworrono, Alokere adwogo kede nea i yo ame ogeo wot kede, ate donyo i boma i dogcel me Luŋ. Rwode mom omedo ŋeyo kwene ame onwoŋo awoto iye kede gin ano ame abedo tiyo kuno. I kare-nono onwoŋo mom ru amio kop man oŋeye baŋ Ojudaya, olamdog, jo adoŋo, rwode, akadi jo ocele ame bino tiyo tic man. An doŋ ate kobbigi ni, “Ityeko neno wunu peko ame wan otye kede, Jerucalem doŋ odoko calo wi odur, kun kika me dogcellere luŋ owan oko. Biye wunu, me ibin oger wunu apama cellere, me okwany wunu lewic i wiwa oko.” Ate tittigi kite ame Obaŋa obedo konya kede, kede gin ame abaka okobba. Lwak te gamo ni, “Ocak wunu doŋ ticcere oko.” Gin doŋ te cako yikere oko me tic, Cite i kare ame Canballat, Tobia kede Arabboro ame nyiŋe Gecem owinyo gin ame wan otimo, gin ocako nyerowa kun ocaowa acaa, ote kobo ni, “Man ŋo ame itimo wunu nie? Wun icako wunu jem i kom abaka bo?” An ate gamo doggi ni, “Obaŋa me polo bino konyowa, wan omiro mere obino cako tic me gedo; cite wun mom itye wunu kede giwu moro akadi twerroro, onyo ginnoro me poyowu i Jerucalem.” Man en kite ame rik ogero kede apama cel me Jerucalem, Alamdog adwoŋ Eliacib kede owote mere ame obedo olamdog, gin ogero dogcel ame olwoŋo ni dogcel me Romo, ote kwero oko pi tic acil, ote daŋ tiyo kika mere oko ducu; apama ame gin ogero-nono otuno naka kan ocuŋ iguŋ malo ame olwoŋo ni me Mia, kede dok naka kan ame ogero cuŋ iguŋ malo ame olwoŋo ni Kananel. Jo me Jeriko te gero megi lubo olamdog. Eka Jakur wot a Imri te gero mege lubogi. Jo me doggola a Kacena te gero megi cako i dog cel ame olwoŋo ni dogcel me Rec. Gin orio bao mere luŋ, ote keto daŋ kika mere luŋ kede bolti luŋ kede arii me cego. Meremot wot a Uria ame wot a Kakkoj te gero mege lubogi. Mecullam wot a Barakia ame wot a Mecejabel te lubogi. Jadok wot a Bana te gero mere lubogi. Jo ame bedo i boma me Tekoa te gero luba Jadok. Cite jo mogo ame doŋodoŋo me bomagi mom oye tiyo tic ame opokkigi. Joyada wot a Pacea, kede Mecullam wot a Becodeya te cako megi i dogcel ame olwoŋo ni dogcel Acon. Gin ogero apama mere ote riyo bao mere ducu, ote keto daŋ kika mere luŋ kede bolti luŋ, kede arii me cego luŋ. Jo olubogi te bedo Melatia, dano me Gibeon, Jadon, dano me Meronot, kede jo ame bedo i Gibeon kede Mijpa, ame gin luŋ rik otye i lobo ame onwoŋo tye loka kulo Euprata i te loc a gabuna me kuno, Ujjiel wot a Karkaya, atet jabu te gero mege lube; en ogero apama mere naka i kom apama alaccere. Repaya wot a Kur, ame onwoŋo loo nucu me dictrik me Jerucalem, te gero mege. Jedaya wot a Karunap te lubo Repaya, kun yika apama cel ame onwoŋo tye i nyim ode. Eka Kattuc wot a Kacabneya te lube. Malkija wot a Karim te yiko mege lubo Kattuc, kun yiko gin kede Kaccub wot a Pakat-moab, ote yiko daŋ kan ame ocuŋ malo iguŋ ame olwoŋo ni ka tedo ogati. Eka Callum wot a Kallokec, ame onwoŋo loo nucu dictrik me Jerucalem tuŋ ocele te gero mege lubogi, kun anyira mere konye. Karum kede jo ame bedo i boma me Janoa te cako yiko apama cel i dogcel ame olwoŋo ni dogcel me Luŋ. Gin oyiko kika me dogcel kede bolti mere luŋ, kede arii me cego, ote yiko apama ame borrere romo yadi mia abic tuno kede naka i dogcel ame olwoŋo ni dogcel me wi odur. Malkija wot a Rekab, aloc me dictrik me Bet-akkerem te gero mege cako kede dogcel ame olwoŋo ni dogcel me wi odur. Oyiko kika me dogcel luŋ, kede bolti mege ducu, kede arii me cego. Callum wot a Kolkoje, aloc me dictrik me Mijpa te cako yiko apama cel i dogcel ame olwoŋo ni dogcel me Waŋ akoŋ. En owumo wie oko, te daŋ keto kika mege luŋ kede bolti mere luŋ karacel kede arii me cego ducu, En ogero apama me celo Kut me Cela ame tye i poto abaka, kato kede naka piny i rwom me wot piny i paco a Daudi. Nekemia wot Ajibuk, aloc me nucu dictrik me Bet-jur te yiko mege tuno kede naka i nyim lyel a Daudi, kede kut ame okunyo akunya kede udi me bedo a jo atek i lweny. Jo magi ame gin obedo jo Levi, gin daŋ okonyo tic me yiko apama cel me Jerucalem. I akinagi Rekum wot a Bani en ame te yiko apama ame olubo me a Nekemia. Eka Kacabia aloc me nucu dictrik me Keila, te yiko en ame olube, kun yiko pi jo me dictrik mere luŋ. Bavvai wot a Kenadad, aloc me nucu dictrik me Keila, te yiko en ame olubo mea Kacabia. Ejer wot a Yecua, aloc me Mijpa te lube, kun yiko apama ame tye i nyim kan ame oyito iye i ot me kano jami me mony, tuno kede naka i kona cel. Baruk wot a Jabbai te yiko apama ame olubo mege, naka i doggola me donyo i ot Eliacib, alamdog adwoŋ. Meremot wot a Uria ame wot a Kakkoj te yiko dul ame olubo mea Baruk, tuno kede i agikki ot a Eliacib. Olamdog magi daŋ okonyo tic me yiko apama cel me Jerucalem. Olamdog ame onwoŋo bedo i bar i ŋet Jerucalem en ame te yiko apama cel ame olubo. Benjamin kede Kaccub te yiko en ame olubo me a jo-naca, apama ame onwoŋo tye i nyim udigi, Ajaria wot a Maceya ame wot Anania te yiko en ame olubo mege-nono, apama ame onwoŋo tye i nyim ottere en Ajaria, Binnui wot a Kenadad en olubo mannono, cakere i nyim ot Ajaria tuno naka i kona. Palal wot a Ujia te yiko en olubo mege-nono, cakere i kona, kede kan ame ocuŋ malo iguŋ, ame otikere i ot abaka ame tye tuŋ malo i dyekal akur piny. Pedaya te yiko apama cel ame olubo mannono, karacel kede otic ame tio ticcogo apek i ot Obaŋa ame bedo i Opel; gin oyiko megi naka dogcel ame olwoŋo ni dogcel me Pii ame tye tuŋ kide tuno kede i ot okato malo iguŋ me kuro ot Obaŋa. Jo me Tekoa te yiko apama cel ame olubo mea a Pedayagi, man obedo dulgi me aryo, apama cel ame otikere i twon ot okato malo iguŋ me kuro ot Obaŋa tuno naka i kom apama cel Opel. Olamdog te yiko apama cel ame olubo mannono, kun alamdog acel acel yiko apama cel ame tye i nyim ode, ocako yiko i dogcel ame olwoŋo ni dogcel me Aguragura. Jadok wot a Immer te yiko en olubo megi-nono, ame onwoŋo daŋ tye i nyim ode. Cemaya wot a Cekania, akur dogcel ame olwoŋo ni dogcel me tuŋ kide. Kanania wot a Celemia, kede Kanun wot a Jalap me kanyape te yiko en olubo; man obedo dul me aryo ame gin oyiko. Mecullam wot a Berekia te yiko en olubo mea Kananiagi, ame onwoŋo tye i nyim kan ame en bedo iye, Malkija, atet jabu te yiko apama cel ame olubo mannono, wot kede naka i ot a jo ame tio ticcogo apek i ot Obaŋa kede i ot ocatwil, ame onwoŋo tye i ŋet dogcel okurpiny ceggi icika ame tye malo i kona, Atet jabu kede ocatwil te yiko apama cel ame onwoŋo tye i akina icika ame tye i kona naka i dogcel ame olwoŋo ni dogcel me Rommi. Kare ame Canballat owinyo ni wan Ojudaya ocako gero apama cel me Jerucalem, akemo omako meicel te cako cayowa. Eno caowa i nyim omego mere kede i nyim mony me Camaria, kun kobo ni, Man Ojudaya agoro-ni tye atimo ŋo kan? Jo man romo timo no? Gin otamo ni yalo Obaŋa twero miyogi otyeko ticgi-nono i nino acel? Gin dok oromo nwoŋo kiddi anyen i kom man oyido i wi odurir-ame mac doŋ otyeko balo? Tobia, dano me Ammon, rik daŋ onwoŋo ocuŋ i ŋete kuno; en daŋ te kobo ni, “Jo-nono twero gero apama acalladi? Ekwe amwa-ni ka obeo i wi apama celgi daŋ twero reto oko piny!” An Nekemia ate cako kwayo Obaŋawa, kun akwae ni, “Ama Obaŋawa, koŋ iwiny kite ame gin tye acayowa kede. Tim ber imi acaegi-nono dok gire i wigi; mi oyak jo yakgi oko, tergi i lobo ame obino bedo iye acalo opii. Kur iwum balgi kadi acel, kur daŋ imi balgi rweny i wigi; pien gin oroki kun omito ni akemo maki i nyim ogedo.” Wan giwa ote medde i gedowa naka ka apama luŋ oromere irit, kun borrere malo tye i nucu me maca acon ca Man otimere pien jo luŋ rik onwoŋo tye i cuny me tic. Cite i kare ame Canbali at kede Tobia, kede jo Arab, jo Ammon, kede jo Acidod owinyo ni ticwa tye awot anyim apwot apwota i gero apama me Jerucalem, dok ni ocako doŋ cuculo kan ame onwoŋo omumuka oko, akemo omakogi atek meicel. Gin te cako yiko kop i muŋ me bino cobo mony i kom Jerucalem, me obabalo cuny jo iye oko. Cite wan rik ote kwayo Obaŋawa, ote daŋ keto okur piny me kurogi dyeceŋ kede dyewor. Jo me Juda te cako kobo ni, “Teko a jo ame yec ociro doŋ ocako dok oko piny, Aco ka bedo amannono, yugi pwod dwoŋ meicel; man omio mom oromo tic i kom apama cel.” Okworwa onwoŋo tye atamo ni wan mom obino nenogi, dok daŋ mom obino ŋeyo gin ame atimere i komwa, tuno ka gin doŋ otuno oko baŋwa, otye doŋ onekowa kun obalo ticwa oko. Kare luŋ Ojudaya ame onwoŋo bedo i akina okworwa obedo bino baŋwa tyen ame romo apar twal, kun otittiwa gin ame okworwa tye ka yiko i komwa. Mannono omio ate tero jona, kun gin luŋ omako jami lweny acalo pala, toŋi, kede atero, ote wot ketogi bedo i ŋe apama cel, kun obedo i doggola i doggola, kan ame mom ru ogero otum. Atiŋo waŋa malo ate ya malo, kobbi jo adoŋo kede rwode, kede lwak luŋ ni, “Kur ibed wunu kede lworo moro i kom okworwa. Po wunu ka i kom Rwot, ame en dit atek, dok daŋ iyiliyili a mom kobere, me ite lweny wunu atek pi omegowu, itinowu awobe kede anyira, kede pi monwu kede pacowu.” Okworwa rik te ŋeyo ni wan otyeko ŋeyo yikgi i komwa oko, ote niaŋ ni Obaŋa otyeko balo yikgi oko. Wan luŋ doŋ ote lokere dok ceŋ i ticwa me gero apama, kun ŋat acel acel dok i dog mege. Cakere i kare-nono nucu me lwak ame onwoŋo atye kede en ame te bedo tic, kun nucugi bedo okur piny ame tye kede jami lwenygi i cingi, acalo toŋi, kwode, atero, kede koti nyonyo me geno korgi, Otel te bedo cuŋ atek i ŋe jo Juda luŋ, ame onwoŋo tye agero apama cel me Jerucalem. Ŋat acel acel ame onwoŋo yeo jami me gedo, mako gin ame eyeo i ciŋe acel, kun jami lweny tye i ciŋe tuŋ ocele; dok ŋat acel acel i akina ogedo daŋ onwoŋo tye kede pala romo mere i pyere. Akut apel rik onwoŋo bedo i ŋeta. An onwoŋo akobbi odoŋe, rwode kede lwak luŋ ni, “Tic dwoŋ ame omio wan luŋ okeketa atata, ame ŋat acel acel mom ceggi awottere ame nwoŋo daŋ tye agero apama cel. Doŋ ka ce iwinyo wunu apel okok, bin icokere wunu kan ame apel okok iyenono. Obaŋa bino lweny pirwa.” Mannono omio nino i nino, cakere ibai tuno ka acer doŋ odonnyo otyeno, nucu a lwak nwoŋo tye i tic me gero apama cel, kun nucuwa tye akuro piny i toŋŋi i ciŋgi. I kare-nono onwoŋo doŋ akobbi lwak ni wan luŋ karacel kede jo ame konyowa luŋ myero wan ducu obed i Jerucalem dyewor, me okur boma dyewor, kun otio tic dyeceŋ. An onwoŋo abuto kede boŋona i koma, karacel kede owotena, omirona kede jo ame gwoka, Wan luŋ onwoŋo obuto i toŋiwa i ciŋwa. I kare-nono jo apol meicel, co kede mon, te cako koko agwa i kom Ojudaya owotegi. Jo ocele onwoŋo tye ame kobo ni, “Wan opol meicel i odwa myero onwoŋ kal me acama me obed kwo.” Jo ocele onwoŋo kok i, “Wan doŋ otyeko jeŋo pottiwa oko, kede poto olok, kede udiwa me nwoŋo cam pi kec.” Jo ocele mere kok ni, “Koŋ inen, wan doŋ otyeko koporo lim me culo ocoro abaka me pottiwa kede poto olokwa, Aco kono riŋo komwa rom gire aroma kede riŋo kom omegowa, itinowa daŋ rom aroma itinogi; koŋ inen wan otye ka diyo itinowa awobe kede anyira me doko opii, anyirawa ocele doŋ tye acalo opii; wan mom doŋ otye kede yo moro me konyere, pien pottiwa kede poto olokwa, gin luŋ ogamo oko i baŋwa.” Akemo omaka meicel i kare ame awinyo kokogi kede kop a lwak. Abedo lwodo kop man i cunya, ate nwoŋo ni bal tye i wi odoŋe, kede rwode, eka ate kobbigi ni, “Nen, itye ka nwoŋo wunu agoba, kun ŋat man nwoŋo i kom awottere.” An ate lwoŋo cokere adwoŋ me tyeko kop man, ate kobbi lwak ni, “Wan obedo timo gin ame oromo timo, wan obedo wilo omegowa ame obedo Ojudaya, jo ame onwoŋo ocatte kengi baŋ orok. Koŋ inen, aman dok wunu itye ka diyo omegowu me catte kengi, me dok ote catogi baŋwa!” Lwak te liŋ aliŋa, gin ame kono okob te loyogi oko. An ate kobbigi ni, “Gin ame itye ka timo wunu-nono mom gire ber kadi acel. Wun myero ibed wunu jo ame lworo Obaŋawa, kun itimo wunu gin ame en mito, me wek orok ame obedo okworwa, kur nwoŋ ginnoro ame myero gin ocawa iye. Koŋ inen wunu, an karacel kede watina kede omirona, otye ka miyo jo koporo lim kede kal i baŋwa. Aman doŋ myero owek wunu cuny me nwoŋo agoba oko, kur doŋ openy wunu. Tin myero doŋ odwokkigi wunu pottigi i ciŋgi, poto olokgi, poto jeitunigi kede udigi ducu, Ginnoro luŋ ame ibedo gamo wunu i baŋgi acalo agobawu, lim, kal, koŋo olok, onyo moo, myero doŋ iŋol wunu oko i wigi.” Lwak luŋ te gamo ni, “Wan obino timo kite ame ikobo, obino dwoko jami luŋ baŋgi, dok daŋ mom obino medde gamo ginnoro i baŋgi.” An ate lwoŋo olamdog, jo luŋ te kwoŋ i nyimgi, ni obino lubo gin ame doggi okobo. An ate lamere kun ayeŋo boŋona akobo ni, “Ŋat ame mom bino lubo kwoŋ man, myero Obaŋa ryem oko i ode, kede i dog ticcere, kite ame ayeŋo kede boŋona-ni. Myero ryem danonono oko i kabedo mere, me kakare doŋ gire nono.” Lwak ame onwoŋo ocokere te gamo ni, “Ameri”, ote pako Rwot. Gin te bedo lubo gin ame doŋ otyeko ciko-nono. Medo i kom mannono, cakere i kare ame oketa iye, me bedo gabunagi i Juda, pi mwakki apar wie aryo luŋ, cakere i mwaka me pyeraryo me loc Atakerec tuno kede i mwaka mere me pyeradek wie aryo, an karacel kede watina mom giwa obedo gamo i baŋgi cam ame onwoŋo myero agam i baŋgi pi ticca acalo gabuna. Owotena ame ogeo bedo gabuna i lobogi-nono onwoŋo obedo miyo jo peko atek pi gamo cam kede koŋo olok nino i nino, kede dok cekel me ryal pyeraŋwen. Omirogi daŋ rik obedo miyo jo peko kittono. Cite an mom abedo timo kittono, pien onwoŋo alworo Obaŋa, An alunyo luŋo tekona luŋ i gero apama cel me Jerucalem, mom apenyo lobo moro me bedo acalo mega. Omirona luŋ onwoŋo bedo ka i tic me gero apama cel. Aco kono an onwoŋo acamo kede jo ame romo mia acel kede pyerabic i mejana, ame gin luŋ obedo Ojudaya kede rwodegi, kun man nwoŋo mom akwano iye orok ame bino baŋa i lobo ame onwoŋo tye i ŋetwa. I kare-nono rik onwoŋo aneko twon acel nino i nino, rommi abeco kanyape, kede gwen, dok i ŋe nino apar apar amio jo koŋo olok adwoŋ meicel. Kadi bed rik atimo man ducu, cite mom agamo lim ame onwoŋo myero mia acalo gabuna, pien jo onwoŋo tye kede peko meicel. Tim ber, ama Obaŋa, ipo pi ginnoro luŋ ame atimo pi jo man, itim gin aber pira. Kare ame Canballat kede Tobia, kede Gecem, dano me Arab, kede okwor Ojudaya ocele mege owinyo ni wan doŋ otyeko gero apama cel me Jerucalem, kun mom dok tye kannoro ame doŋ twolo, kono onwoŋo mom ru oketo kika me dogcel i dogcel luŋ, Canballat kede Gecem te cwayo kop baŋa ni myero awot arwatte kedgi i paco moro i bar me Ono. Man onwoŋo yik ame gin onwoŋo tye kede me temo timarac, An rik ate dwokkigi kop kun akobbigi ni, “An atye atiyo ticcoro ame pire tek meicel ame mom atwero wot kuno kadi acel. Mom abino weko ticca-nono cuŋ ate wot kuno me wot rwatte kedwu.” Gin te bedo cwayo kwena baŋa pi tyen ame romo aŋwen twal, kun an daŋ adwokk igi kop acellono. Canballat dok te cwayo kop baŋa tyen me kannyere, kun omio amiro mere en ame okelo waraga ame mom orwako i baaca. Kop ame ocoo i yie onwoŋo tye kit man: “Kop tye ka winyere i baŋ rok ame bedo i ŋetwu, dok Gecem daŋ okobo kop acellono, ni mannono, yin karacel kede Ojudaya imito wunu jem; dok ni mannono en omio itye wunu ka gero apama cel me Jerucalem. Dok daŋ tye ka winyere ni yin imito kette keni me bedo abaka, dok daŋ ityeko doŋ yiko odwarpinnyogo oko me wot rabo pire i Jerucalem ni yin doŋ ibedo abaka me Juda, Aman ana ŋeo ni kop man bino tuno baŋ abaka adwoŋ, kite ame okobere kede-nono; man omio an atamo ni myero wan koŋ orwatte kedi me wek onyam koppere kedi.” An ate dwokke kop kun akobbe ni, “Kop ame yin ikobo-nono luŋ mom tye moro iye ame tye ateni. Nen calo yin giri iyikogi ayika piri keni.” Gin onwoŋo otye ka yenyo yo me poto cunywa, kun otamo ni ka lworo omakowa, wan obino doko goro, eka tic te loyowa oko, Cite aman doŋ yin Rwot, tim ber acuŋ atek. I kare-nono onwoŋo Cemaya wot a Delaya, ame obedo wot a Meketabel mom doŋ romo donyo oko i ode, Doŋ i kare ame an awoto limme, en te kobba ni, “Yin karacel kede an myero owot opon oko i kabedo acil i ot Obaŋa, ote cego doggola oko ducu, pien gin abino me bino neki oko, Gin gire abino neki oko dyewor.” An agamo doge kun akobbe ni, “Itamo ni kodi an-ni daŋ myero ariŋ oko? Itamo ni ŋat acalo an-ni twero wot i ot Obaŋa pi laro kwona? An gira mom abino wot i ot Obaŋa.” I kare ame alwodo koppere-nono i cunya, aniaŋ ni Obaŋa mom onwoŋo okobo kede, cite Tobia kede Canballat onwoŋo owile oko me bita. Gin onwoŋo owile pi koppono, pien gin onwoŋo mito ni an abed lwor, ate cako timo tim me lworo ame mia atimo bal, eka gin doŋ ote cako miya nyiŋ arac, ote nwoŋo yo me caya. Ama Obaŋana, po pi gin ame Tobia kede Canballat otimo, me iket can i komgi. Po daŋ pi adwarpiny a dako Noadia kede odwarpiny ocele ame onwoŋo mito miya lworo. Tic me gero apama cel me Jerucalem rik te tum oko i nino dwe pyeraryo wie abic, i dwe me Elul. Kare ame okworwa ame orok a bedo i ŋetwa owinyo, lworo omakogi, ote niaŋ ni piny doŋ oloogi, pien ŋat acel acel onwoŋo ŋeo ni Obaŋa en obedo konyowa i ticwa-nono naka i tummere. Medo i kom mannono, i kare-nono Ojudaya onwoŋo obedo coyo waraga baŋ Tobia kun Tobia daŋ coyigi, Jo apol me Juda onwoŋo gene, pien onwoŋo okwoŋere kedgi, dok daŋ onwoŋo obedo orgi, pien onyomo nyaka a Cekania wot Arak, Dok wode Jekokanan onwoŋo onyomo nyaka a Mecullam wot a Berekia, Jo rik bedo titta pi gin abeco ame Tobia otimo, dok daŋ obedo tero baŋ Tobia ginnoro luŋ ame owinyo an akobo. Mannono omio en obedo cwaya waraga me poto cunya. Kare ame doŋ otyeko yiko apama cel otum, ame aketo doŋ kika i doggi ducu, kun ogwok doggola ot Obaŋa, ower, kede jo Levi daŋ doŋ oketo oko, aketo jo aryo me loyo boma me Jerucalem; aketo omina Kanani, kede Kanania, me bedo ŋat ame loo cel luŋ me Jerucalem, pien en onwoŋo obedo dano ame genne atek, dok lworo Obaŋa kato jo apol. Acikogi me mom yabo dogcel me Jerucalem idiko con ame ceŋ mom ru okato malo, dok myero daŋ oceg oko con, ote tweyo daŋ doge oko kun okur pwod tye i ticgi. Acikogi daŋ me keto okurpiny i kom jo ame bedo i Jerucalem ikome, kun ŋat acel acel omio kabedo mere i nyim ode en ikome. Boma onwoŋo yie lac, cite jo ame onwoŋo bedo iye onwoŋo mom pol wok, dok udi ame ogero iye onwoŋo daŋ mom ru pol. Obaŋa te miya tam me coko odoŋe luŋ kede rwode ducu, karacel kede jo ducu, me akwan welgi kun acoo piny i doggola i doggola. Rik ate nwoŋo buk ame ocoo iye wel jo ame ogeo dwogo iyi opii, kun ocoo i doggola i doggola, gin ame onwoŋo ene: Magi gin jo me Juda ame rik oya iyi opii, kan ame rik abaka Nebukadnejar me Babulon oterogi iye acalo opii. Gin luŋ odwogo i Jerucalem kede i Juda kun ŋat acel acel dok ceŋ i boma me turgi. Otel ame owoto kedgi ene: Jerubabel, Yecua, Nekemia, Ajaria, Ramia, Nakamani, Bilcan, Miciperet Bigvai, Rekum kede Bana. Man, en wel a jo Icrael ame odwogo iyi opii. Jo me doggola a Paroc rik tye tutumia aryo, mia acel kede pyerabiro wie aryo, Jo me doggola a Cepatia te bedo mia adek kede pyerabiro wie aryo. Jo me doggola Arak mia abicel kede pyerabic wie aryo. Jo me Pakat-moab, ame obedo jo me doggola a Yecua kede Yoab, te bedo tutumia aryo, mia aboro kede apar wie aboro. Jo me doggola Elam te bedo tutumia acel, mia aryo kede pyerabic wie aŋwen. Jo me doggola a Jattu te bedo mia aboro kede pyeraŋwen wie abic. Jo me doggola a Jakkai te dwogo mia abiro kede pyerabicel nono. Jo me doggola a Pinnui te dwogo mia abicel kede pyeraŋwen wie aboro. Jo me doggola a Bebai odwogo mia abicel kede pyeraryo wie aboro. Jo me doggola Ajigad te dwogo tutumia aryo, mia adek kede pyeraryo wie aryo. Jo me doggola Adonikam te bedo mia abicel kede pyerabicel wie abiro. Jo me doggola a Bigvai te bedo tutumia aryo, kede pyerabicel wie abiro. Jo me doggola Adin te dwogo mia abicel, kede pyerabic wie abic. Jo me doggola Ater, ame obedo dano me doggola a Kejekia te bedo pyeraboŋwen wie aboro. Jo me doggola a Kacum te dwogo mia adek, kede pyeraryo wie aboro. Jo me doggola a Bejai odwogo mia adek kede pyeraryo wie aŋwen. Jo me doggola a Karip odwogo mia acel kede apar wie aryo. Jo me doggola a Gibeon odwogo pyerabonwen wie abic. Jo ame rik kwarigi obedo i Beterekem kede i Netopa odwogo mia acel kede pyeraboro wie aboro. Jo ame kwarigi obedo Anatot odwogo mia acel kede pyeraryo wie aboro. Jo ame kwarigi obedo i Bet-ajimavet odwogo pyeraŋwen wie aryo. Jo ame kwarigi obedo i Kiricit-jearim, Cepira, kede i Beerot odwogo mia abiro kede pyeraŋwen wie adek. Jo ame kwarigi obedo i Rama kede i Geba odwogo mia abicel kede pyeraryo wie acel. Jo ame kwarigi obedo i Mikmac odwogo mia acel kede pyeraryo wie aryo. Jo ame kwarigi obedo i Betel kede Ai odwogo mia acel kede pyeraryo wie adek. Jo ame kwarigi obedo i Nebo ocele mere odwogo pyerabic wie aryo. Jo ame kwarigi obedo i Elam ocele mere odwogo tutumia acel, mia aryo kede pyerabic wie aŋwen. Jo ame kwarigi obedo i Karim odwogo mia adek kede pyeraryo nono. Jo ame kwarigi obedo i Jeriko odwogo mia adek kede pyeraŋwen wie abic. Jo ame kwarigi obedo i Lod, Kadid kede i Ono, odwogo mia abiro kede pyeraryo wie acel. Jo ame kwarigi obedo i Cena odwogo tutumia adek, mia aboŋwen kede pyeradek nono. Magi en ame obedo olamdog ame odwogo iyi opii; ikwae a Jedaya, me doggola a Yecua, odwogo mia aŋwen kede pyerabiro wie adek. Jo me doggola Immer odwogo tutumia acel kede pyerabic wie aryo. Jo me doggola a Pacur odwogo tutumia acel, mia aryo kede pyeraŋwen wie abiro. Jo me doggola a Karim odwogo tutumia acel kede apar wie abiro. Magi en ame obedo jo Levi ame odwogo iyi opii: Jo me doggola a Yecua kede me a Kadmiel ame obedo ikwae Odavia te dwogo pyerabiro wie aŋwen. Jo Levi ame rik ower, ame obedo ikwae Acap odwogo mia acel kede pyeraŋwen wie aboro. Jo Levi ame rik obedo ogwok doggola ot Obaŋa, ame obedo ikwae a Callum, Ater, Talmon, Akkub, Katita kede ikwae a Cobai, odwogo mia acel kede pyeradek wie aboro. Magi en ame obedo jo ame rik odwogo iyi opii i akina jo ame rik tio ticcogo apek i ot Obaŋa: jo me doggola a Jika, Acupa, Tabaot, jo me doggola a Keroc, Cia, Padon, jo me doggola a Lebana, Agaba, kede Calmai, jo me doggola a Kanan, Giddel, kede Gakar, jo me doggola a Reaya, Rejin kede Nekoda, jo me doggola a Gajam, Ujja, kede Pacea, jo me doggola a Becai, Meunim, kede Nepucecim, jo me doggola a Bakbuk, Akupa, kede Karkur, jo me doggola a Bajilit, Mekida, kede Karica, jo me doggola a Barkoc, Cicera, kede Tema, jo me doggola a Nejia kede Atipa. Magi en ame odwogo iyi opii i akina ikwae omiro ame rik tio baŋ Culeman: jo me doggola a Cotai, Acoperet, kede Perida, jo me doggola a Jaala, Oarkon, kede Gidel, jo me doggola a Cepatia, Kattil, Pokeret-kajebaim kede Amon. Wel jo luŋ ame rik tio ticcogo apek i ot a Rwot, kede ikwae omiro ame rik tio baŋ Culeman, ame odwogo iyi opii rik romo mia adek kede pyeraŋwen wie aryo. Magi en ame obedo jo ame oya i Tel-mela, Tel-karica, Kerub, Addon, kede Immer; gin mom otwero nyuto doggola a kwarigi ame gin oya iye, ame twero cimo kannaler ka ce gin obedo jo Icrael. Obino jo a Delaya, Tobia, kede jo a Nekoda; gin luŋ jo mia abicel kede pyeraŋwen wie aryo. Medo i kom mannono, ikwae olamdog magi daŋ obino: jo me doggola a Kobaya, Kakkoj, kede me a Barjillai ame rik onyomo dako mere i akina anyira a Barjillai me Gilead, rik daŋ ote cako lwoŋe kede nyiŋ papa a cege-nono. Otemo yenyo nyiŋ jo man ka ce rik onwoŋo tye i buk ame ocoo iye nyiŋ kwaro a jo Icrael, cite mom ote nwoŋo, omio ote kwanyo nyiŋgi oko i kom olamdog. Gabuna rik te miyogi ŋeyo ni kite acalo gin ame nyuto ni gin obedo ikwae olamdog mom tye-ni, gin doŋ mom obino medde camo cam ame omio baŋ Obaŋa, tuno ka alamdoggoro tye ame romo penyo tam Obaŋa kun tio Urim kede Tumim. Lwak luŋ ame rik odwogo iyi opii, rik romo tutumia pyeraŋwen wie aryo, mia adek kede pyerabicel nono, kun mom okwano iye omirogi kede aŋecagi ame rik tye tutumia abiro, mia adek kede pyeradek wie abiro, karacel kede ower a co kede en a mon ame romo mia aryo kede pyeraŋwen wie abic. Aguragura ame gin odwogo kede rik romo mia abiro kede pyeradek wie abicel, kede kane adoŋo mege ame romo mia aryo kede pyeraŋwen wie abic, kede inaga mia aŋwen kede pyeradek wie abic, kede dok kane ocele tutumia abicel, mia abiro kede pyeraryo nono. I kare-nono odoŋe mogo i akina odoŋe ame rik loo doggola a kwarigi te miyo lim me konyo tic. Gabuna adwoŋ me kuno te miyo jabu ame pekkere romo darik tutumia acel, kede becen pyerabic, kede boŋŋi me aruka olamdog mia abic kede pyeradek nono. Odoŋe ocele ame loo doggola a kwarigi te miyo jabu ame pekkere romo darik tutumia aryo nono, kede ryal ame pekkere romo mina mia aryo nono. Eka jo ocele te miyo jabu ame pekkere romo darik tutumia pyeraryo nono, ryal ame pekkere romo mina tutumia pyeraryo nono, kede boŋŋi me aruka olamdog ame romo pyerabicel wie abiro. Olamdog kede jo Levi, ogwok doggola ot a Rwot, ower, karacel kede jo ocele mege, jo ame tio ticcogo apek i ot a Rwot, karacel kede jo Icrael luŋ ame rik bedo i bomagi. Kare ame dwe me abiro oromo, onwoŋo jo Icrael luŋ doŋ tye obedo oko i bomagi. Lwak luŋ rik te cokere i cuny acel i dyekal i nyim dogcel ame olwoŋo ni dogcel me Pii; gin ocokere kuno i nino dwe acel me dwe-nono. Gin te penyo Ejira alamdoŋ, ame apwony cik Obaŋa, cik ame rik Rwot omio baŋ jo Icrael, kun mio baŋ Muca, ni myero en kel buk me cikkono. Ejira daŋ te kelo buk me cikkono i nyim jo ame ocokere, ame rik onwoŋo tye iye co, mon, kede itino adito ame romo winyo kop aber kede niaŋ. En te cako kwano cikkono baŋgi, kun ocuŋ i nyim dogcel ame olwoŋo ni nyim dogcel me Pii. En ocako kwano odiko tuno naka dyeceŋ, kun jo luŋ, co, mon kede itino tye aciko yitgi odoco me winyo cik ame tye i bukkono. Ejira onwoŋo tye ocuŋ i wi tuti me bao ame onwoŋo oyiko me bino kwano cik a Rwot i nino-nono. Jo magi onwoŋo tye ocuŋ i ŋete i ciŋe tuŋ cem: Mattitia, Cema, Anaya, Uria, Kilkia, kede Maceya; eka jo magi te cuŋ i ŋete i ciŋe tuncam: Pedaya, Micael, Malkija, Kacum, Kacibaddana, Jekaria kede Mecullam, Ejira oyabo buk cik kun jo luŋ tye aneno, pien en onwoŋo ocuŋ malo i wi bao kan ame jo luŋ romo nene aber. Kare ame en oyabo buk, jo luŋ oya malo, Ejira te geyo pwoyo Rwot, kun kobo ni, “Pwoc obed baŋ Rwot, ame en Obaŋa adwoŋ meicel!” Jo luŋ te tiŋo ciŋgi malo kun okobo ni, “Amen! Amen!” Gin luŋ ote rumo coŋgi piny woro Obaŋa, kun nyimgi gudo piny. Jo doŋ te ya malo cuŋ i kakargi, kun Olevi magi gonnyigi cik me wek oniaŋ iye aber: Yecua, Bani, Cerebia, Jamin, Akkub, Cabetai, Kodia, Maceya, Kelita, Ajaria, Jojabad, Kanan kede Pelaya, Gin okwano kop i buk cik Obaŋa, kun ogonyo tere baŋ lwak, jo te niaŋ aber kop luŋ ame okwannigi. Kare ame jo doŋ otyeko winyo ginnoro luŋ ame cik mito ni gin obed timo, koppere otugo cunygi, gin luŋ ote cako kok oko, Mannono te miyo Nekemia, Ejira kede Olevi ame rik obedo gonyo cik baŋ lwak, te kobbi lwak ni, “Tin en nino acil baŋ Rwot Obaŋawa, myero kur ikum wunu iye, akadi koko, Wun dok wunu paco iwot ikwer wunu nino man, kun icamo wunu moo, imato wunu koŋo amit; mi wunu cam baŋ jo ame mom tye kede ginnoro ame oyiko. Pien man en nino acil baŋ Rwotwa, myero kur ibed wunu kede kumo moro iye. Yomcuny ame Rwot mio bino meddiwa teko.” Jo Levi te bedo juko jo me liŋ mot, kun okobo ni, “Liŋ wunu mot, pien nino man obedo nino acil; kur ikum wunu.” Jo luŋ doŋ te cako wot paco, wot cam kede matte, kun onywako camgi kede matgi i jo ocele, ame cunygi yom atek, pien oniaŋ kop ame obedo kwano baŋgi, gonyegi, ote bedo iye. Man dok obedo tyen me agege ame jo obedo kede i gonye, pien cakere i kare a Yocwa wot a Nuni tuno kede i nino-nono, jo Icrael onwoŋo mom doŋ lubo cikkono, nino-nono yomcuny obedo adwoŋ meicel. Orwo mere odoŋe atekere ame loo doggola a kwarigi, karacel kede olamdog, kede jo Levi, owoto baŋ Ejira, me owot oni odoco gin ame cik mito ni jo tim, Gin te cop i kakannoro ame ocoo i buk cik ame kobo ni, Rwot yam ociko ca ŋi mannono jo Icrael myero bed i gonye i kare me kwero ecuban ame okwero i dwe me abiro, Mannono omio gin te cwayo kwena me rabo pire i boma luŋ kede i Jerucalem luŋ, kun okobbi jo ni, “Wot wunu malo i wi kiddi, me iwot itoŋ wunu jaŋ yen apapat obuŋere, me ibin ikud wunu kede gonye kite ame ocoo kede i buk me cik.” Jo luŋ te wot toŋo jaŋ yen, ote bino gero kede gonye, kun ŋat acel acel gero mege kene i dyekal me ode, i dyekal me ot a Rwot, i dyekal ame tye i nyim dogcel ame olwoŋo ni dogcel me Pii, kede en ame olwoŋo ni dogcel me Epraim, Lwak luŋ ame rik onwoŋo odwogo iyi opii ogero obedo oko i bomagi. Lwak luŋ rik te cokere i cuny acel i dyekal i nyim dogcel ame olwoŋo ni dogcel me Pii; gin ocokere kuno i nino dwe acel me dwe-nono, Gin te penyo Ejira alamdog, ame apwony cik Obaŋa, cik ame rik Rwot omio baŋ jo Icrael, kun mio baŋ Muca, ni myero en kel buk me cikkono. Cakere i nino me agege ame gin ogeo bedo kede i gonye tuno kede i nino me agikki mere, gin obedo kwano dul i buk me cik Obaŋa, Gin okwero ecuban me gonye pi nino abiro, eka i nino me aboro mere gin te bedo kede cokere adwoŋ, kite ame tye kede i buk cik. I nino dwe pyeraryo wie aŋwen me dwe acellono, jo Icrael dok ocokere karacel, kun okanyo kec, oruko boŋo cola, dok ojuko wigi kede kwoyo me nyuto cwercunygi pi balgi. I kare-nono onwoŋo jo Icrael opokere oko i kom orok. Gin ocuŋ acuŋa ote ca ko tuco balgi ame gin karacel kede kwarigi obedo timo. Pi caa ame romo adek twal, gin ocuŋ acuŋa kun jo okwano kop ame tye i buk me cik a Rwot Obanagi, eka dok pi caa adek ocele gin te bedo tuco balgi, ote woro daŋ Rwot Obanagi. Jo ame ocuŋ malo kan ame jo Levi cuŋ iye, obedo Yecua, Bani, Kadmiel, Cebania, Bunni, Cerebia, kede Kanani. Gin okwao Obaŋagi kun okwao kede dwon aloŋo. Jo Levi magi: Yecua, Kadmiel, Bani, Kacabnia, Cerbia, Odia, Cebania kede Petakia, en ame okobbi jo me kwayo Obaŋa, kun okobo ni, “Ya wun malo, me ipak wun RWOT, Obaŋawu; pake wunu tin kede waŋ i waŋ, Jo luŋ myero pak nyiŋi me kwogo, ama Rwot; kadi bed pak ame dano paki kede mom ginnoro kadi acel.” Ejira te cako kwayo Obaŋa kun kobo ni, “Yin gire, ama Rwot, en ibedo Rwot; yin gire en ame itio polo kede lwak acer luŋ iye. Itio daŋ lobo kede nam, kede jami luŋ ame tye i yigi; gin luŋ otye kede kwo piri; ginnoro luŋ ame tye malo i polo rumo piny wori, Ama Rwot Obaŋa, yin en ame rik iyero Abram, yin en ikwanye i lobo me Ur i Babulon, yin en ame iloko nyiŋe ni Iburaim. Yin rik inwoŋo ni en obedo ŋat ame geni i cunye luŋ, yin rik icikere kede. Rik iciko ni ibino miyo baŋ ikwae lobo me Kanan, kun imiogi daŋ lobo a jo Kitti, kede jo Amor, lobo a jo Periji, Jebuc kede me a jo Girgac. Yin ibin icobo gin ame iciko-nono luŋ, pien yin igenne. “Yin rik ineno kite ame owuno kede kwariwa i Miciri, rik iwinyo kokogi i Nam Arema. Yin rik itimo anyuttogo kede taŋo me awura meicel i nyim Parao, omiro mere, kede jo luŋ me kuno, pien yin onwoŋo iŋeo kite ame en owuno kede joni, I kare-naca nyiŋi te cako rwo tuno kede naka tin. Yin rik imio pii i dye nam oyabere oko i nyimgi, imiogi obeo kan otwo iwec. Jo ame oryemo yorgi ite miyo mwonyere oko i pii, kite ame gweŋ donyo kede piny i te pii. Dyeceŋ rik ibedo telogi kede pagi me pol, kun dyewor imenyo nyimgi kede pagi me mac, I kidi me Cinai, yin rik ite yitto piny baŋgi, rik ite kop kedgi kuno; eka ite miyogi cik ikokome kede pwony me ateni. Icikogi ni myero ogwok nino me cabit bed acil, imio amironi Muca omiogi cik kede icwil luŋ. Kare ame kec onekogi, yin imiogi cam ame oya i polo, kare ame oryo pii ocirogi imiogi pii i kom kidi, Yin rik icikogi ni myero owot ogam lobo-naca, ame rik iciko me miyogi. “Cite gin kwariwa rik ote cako bedo opala ame ŋutgi nwaŋ, kun okwero lubo cik meri luŋ. Gin okwero lubo oko, kun wigi wil oko i kom gin itimo; wigi owil-gu oko i kom taŋo ame rik itimo. Ŋutgi obedo a nwaŋ ote yero atelgi kengi, me dwokogi cen iyi opii i Miciri. Cite yin giri ibedo Obaŋa ame timo kica; yin akica dok mar meri dwoŋ, akemo mom maki oyot. Pi kicani adwoŋŋono omio cunyi mom ocaogi. Kadi bed gin otimo cal jok ame calo atin twon, Miciri, ote cako woro ni en obedo Obaŋa ame okwanyogi kadi gin obedo timo twoni timmogo areco me anywar i komi pi kicani adwoŋ, yin gire mom ibin iwekogi i tim ata, Pagi me pol ame rik telogi dyeceŋ mom oya i baŋgi pagi me mac ame rik mennyigi yo mom daŋ oya i baŋgi dyewor. Yin gire imedde miyogi Cuny meri aber me pwonyogi, kun daŋ imiogi manna me acama, kede pii me amata nakanaka. Pi mwakki pyeraŋwen luŋ ame gin otyeko i tim, yin ibedo miyogi ginnoro luŋ ame gin mito; boŋŋigi naka mom omedo i yec i komgi, tyengi-gu mom daŋ okwot kadi acel. “Yin rik imiogi oloo rok kede loc apapat, kede lobo luŋ ame onwoŋo tye i ŋetgi. Omao lobo me Kecbon, ame rik abaka Cikon loo, kede Bacan daŋ ame rik Og loo. Imio ikwaegi onya atek meicel, ame calo acer me polo, imiogi otuno i lobo ame rik iciko pire baŋ kwarigi ni myero gin owot ogam bed megi. Mannono omio ikwaegi owoto i lobo-naca ote gamo bedo megi, yin ibin imiogi oloo jo me lobonaca oko, imio jo me Kanaan kede obakkigi i ciŋgi, me gin otimgi kite a yigi mito. Gin rik te mayo twoni boma mogo ame ocelo atek, ote gamo lobo ame ceko cam meicel, kede udi ame jami abeco opon yigi, kede akoŋŋogo ame doŋ okunyo oko, ogamo naka potti jeituni, kede me yen ame nyako nyiggi anaka me olok-gu. Gin ocamo jami iye, oyeŋ, ote cako cwe meicel, cunygi obedo ayom meicel i twoni jami abeco ame imiogi. “Kadi amannono, gin obin ojem ote kwero winyi oko; gin te cako loko ŋegi i kom cikki. Oneko odwarpiny ame kwenyorogi, ame tittigi me lokere dwogo baŋi. Gin obedo timo twoni tim areco meicel me nywari, Mannono omio yin ite jalogi oko i ciŋ okworgi, okworgi te bedo timogi lit. Kare ame peko doŋ odiogi, gin te cako kok baŋi, yin rik ite winyo kokogi kabedoni i polo. Kica omaki atek i komgi ite cwayo jo me larogi, ame te larogi i ciŋ okworgi. Cite i kare ame gin doŋ tye kede kuc, dok ote timo bal i nyimi, yin dok ite jalogi i ciŋ okworgi, okworgi te dok cako loyogi. Kadi amannono, i kare ame gin oŋut ote kok baŋi, yin pwod imedo winyogi i kabedoni i polo, pi kicani yin ibedo larogi tyen apol meicel. Yin ibedo kwenyorogi me olokere ocak lubo cikki, cite gin ote bedo wakere awaka kun mom olubo cikki, gin obedo turo cikki, aco kono en obedo yo me kwo. Gin gigi ote kwero oko, kun omedde bedo opala, a ŋutgi nwaŋ. Yin ibedi diyo cunyi i komgi pi mwakki apol meicel, ibedo cwayo Cuny meri i kom odwarpiny me kwenyorogi, cite joni omedde bedo calo jo ame yitgi odiŋ. Mannono omio yin ijalogi oko i ciŋ jo me lobo-nono. Kadi bed amannono, pi kica meri adwoŋ, yin mom ijalogi atwal, mom ijwerogi oko i lobo, pien yin gire ibedo Obaŋa ame akica meicel. “Doŋ ama Rwot Obaŋawa, ame dwoŋ dok tek meicel, Obaŋa ame iyiliyili, ame igwoko cikkereni, dok ame marri mom lokere, kur imi can ame obedo neno obed gin ame pire mom tek baŋi, can ame wan luŋ kede obakkiwa, olocwa, olamdogwa, odwarpinywa, karacel kede kwariwa obedo neno, can ame obedo neno cakere i kare obakki me Acuria tuno kede naka tin. Yin gire iketo can i komwa kakare, yin gire ibedo timo gin ame nyuto genni i komwa, cite wan obedo timo gin arac i nyimi, Kwariwa, obakkiwa, olocwa, olamdogwa mom olubo cikki, mom-gu ociko yitgi i gin iciko, akadi tero yitgi i kop ame ibedo kwenyorogi kede. Obakki mom obedo tic baŋi i loc ame imiogi, kadi i gum adwoŋ ame imiogi i lobo alac ame ceko cam, gin mom oweko timo gin arac kadi acel. Nen, aman doŋ wan odoko opii, i lobo ame rik imio baŋ kwariwa, me ocam mot abeco ame ya iye. Nen, wan doŋ otye iye acalo opii. Gin ame ya iye luŋ doŋ kato akata i ciŋ obakki ame iketo me loyowa, pien wan otimo bal. Gin doŋ loo anaka komwa kede dokwa, gin twero timo ginnoro acalo omito, wan doŋ otye i twon peko meciel.” Pi gin ame obedo timere-nono, omio wan tin oketo cikere atek odoco, kun ocoo acoa, Olocwa, Olevi, kede olamdog en ame bino keto ciŋgi i cikere-nono. Jo ame te keto ciŋgi iye te bedo Nekemia, gabuna, wot a Kakalia, Jedekia, Ceraya, Ajaria, Jeremia, Pacur, Amaria, Malkija, Kattuc, Cebania, Malluk, Karim, Meremot, Obadia, Daniel, Ginneton, Baruk, Mecullam, Abija, Mijamin, Majia, Bilgai, kede Cemaya. Jo magi luŋ obedo olamdog, Jo Levi ame oketo cingi te bedo Yecua wot Ajania, Binnui me doggola a Kenada, Kadmiel, karacel kede omegogi Cebania, Odia, Kelita, Pelaya, Kanan, Mika, Rekob, Kacabia, Jakkur, Cerebia, Cebania, Odia, Bani, Beninu, Otel a lwak ame oketo cingi obedo. Paroc, Pakat-moab, Elam, Jattu, Bani, Bunni, Ajigad, Bebai, Adonija, Bigvai, Adin, Ater, Kejekia, Ajur, Odia, Kacum, Bejai, Karib, Anatot, Nebai, Magpiac, Mecullam, Kejir, Mecejabel, Jadok, Jadua, Pelatia, Kanna, Anaya, Kocea, Kanani, Kacub, Kalokec, Pila, Cobek, Rekum, Kacabina, Maceya, Akia, Kanan, Anan, Malluk, Karim, Bana. Wan jo Icrael, olamdog, Olevi, ogwok doggola ot Obaŋa, ower, jo ame tio ticcogo apek i ot Obaŋa, kede jo ocele luŋ, ame pi woro cik Obaŋawa opokere oko kenwa i akina orok ame bedo i lobowa; wan karacel kede monwa, itinowa, ame oteggo ame romo doŋ niaŋ kede ŋeyo, wan luŋ oribere kede owotewa ame telowa i kwoŋ kede i ceŋ ka ce oturo kop ame ocikere iye, kun okwoŋo ni obino lubo cik Obaŋawa ame rik en omio baŋ Muca amiro mere, te miyo baŋwa. Wan ocikere me lubo kede tiyo gin ame Rwot Obaŋawa ocikowa iye; dok ocikere daŋ me lubo cikkere luŋ kede icwillere. Mom obino nyomere kede orok ame bedo i lobowa. Ka ce gin bino kelo ginnoro me acata baŋwa i ceŋ cabit onyo i nino moro acil, wan gire mom obino wilo gigi-nono. I mwaka me abiro mom obino dok puro pottiwa ame onwoŋo ojeŋo baŋwa, dok daŋ obino jalo banya luŋ ame okoporo-nono. Mwaka acel acel wan obino miyo acel me adek me cekelwa me konyo tic me woro i ot Obaŋawa. Wan obino miyo ogati ame oketo i nyim Rwot, moko kwon me yalo Rwot nino i nino, leyi me awaŋa alutu nino i nino, mot acil ame omio i ceŋ cabit, kede iyi ecuban me por dwe, kede me ecuban ocele mege, kede mot ocele acil, kede leyi ame oyalo Obaŋa pi kwanyo bal i kom jo Icrael, karacel i gin ame mitte luŋ me tic i ot Obaŋawa. Wan jo luŋ me Icrael, olamdog, Olevi, wan otyeko bolo kwir me neno kite ame obino kelo kede yen i ot Obaŋawa, kun lubo doggola a kwariwa. Obino kela i kare ame wan oyiko, mwaka i mwaka, me awaŋa i wi keno lam a Rwot Obaŋawa, kite ame ocoo kede i buk cik. Wan otyeko miye me tero i ot a Rwot Obaŋawa mwaka i mwaka kit cam luŋ ame ogeo cek i pottiwa, kede nyig yen luŋ ame ogeo nyak i yenwa ame ocamo. Dok daŋ obino tero baŋ olamdog ame tio tic i ot Obaŋawa itino kao awobe ame wan ogeo nywalo, atin twon, atin nyok romo kede me dyel ame ogeo nywalo, kite ame ocoo kede i buk cik. Obino daŋ tero baŋ olamdog i ot Obaŋawa mwaka i mwaka moko ame ogeo rego, kede motwa ocele mege acalo koŋo olok, moo, kede kit yen ducu me aketa iyi icika me kano jami. Dok obino daŋ tero baŋ jo Levi acel me apar me gin oya i pottiwa, pien mannono obedo ticgi me rayo i akina pacciwa. Olamdog ame obedo ikwae Aron ikokome bino bedo tye i kare ame jo Levi gamo acel me apar. Jo Levi bino tero acel me apar ame gin ogamo i ot Obaŋawa, iyi icika ame okano iye. Pien jo Icrael kede jo Levi bino tero mot me moko kwon, koŋo olok, kede moo iyi icika ame okanogi iye, kan ame jami me tic i kabedo acil bedo iye, kan ame olamdog ame tye i tic, ogwok doggola ot Obaŋa kede ower bedo iye. Wiwa mom bino wil kadi acel me gwoko ot Obaŋawa. I kare-nono otel a lwak onwoŋo bedo i Jerucalem, jo ocele mere luŋ rik te bolo kwir me kwanyo dano acel i kom jo apar apar me bedo i boma acil me Jerucalem, kun jo aboŋwen odoŋ bedo i boma ocele mege. Lwak te pwoyo jo luŋ ame omiye pirgi kengi me bedo i Jerucalem. Magi en nyiŋ jo adoŋo me Juda ame obedo i Jerucalem. Ento i boma luŋ me Juda, dano acel acel onwoŋo bedo i lobo mere, i bomagi. Jo onwoŋo bedo kuno, onwoŋo tye olamdog, Olevi, kede jo ame onwoŋo tio ticcogo apek i ot Obaŋa, karacel kede ikwae omiro a Culeman. Aco jo me itekere a Juda kede me a Benjamin ame onwoŋo bedo i Jerucalem ene, kun geye kede jo me atekere a Juda: Ataya wot a Ujjia ame obedo wot a Jekaria wot Amaria, wot a Cepatia, wot a Makalalel, ame gin luŋ obedo ikwae a Perej, Maceya wot a Baruk, ame obedo wot a Kolkoje, wot a Kajaya, wot Adaya, wot Joyarib, wot a Jekaria, ame gin luŋ obedo ikwae a Cela. Ikwae a Perej ame obedo i Jerucalem, rik welgi romo mia aŋwen kede pyerabicel wie aboro, kun gin luŋ obedo jo ame tye aber meicel. Eka jo me itekere a Benjamin te bedo Callu wot a Mecullam, ame obedo wot a Joel, wot a Pedaya, wot a Kolaya, wot a Maceya, wot Itiel, wot a Jecaya; kede dok Gabbai kede Callai, ame gin obedo wati a Callu. Gin luŋ rik welgi romo mia aboŋwen kede pyeraryo wie abiro. Ŋat ame loogi onwoŋo obedo Joel wot a Jikri, kede Juda wot Acenua en onwoŋo obedo adwoŋ ame lubo ŋat ame loo boma. Magi en olamdog ame onwoŋo bedo i Jerucalem: Jedaya wot a Joyarib, kede Jakin, Ceraya wot a Kilkia kede dano ame onwoŋo obedo wot a Mecullam, wot a Jadok, wot a Merayot, wot Akitub ame rik en ŋat ame loo ot Obaŋa, karacel kede omegogi ame rik tio tic i ot Obaŋa, gin luŋ rik welgi romo mia aboro kede pyeraryo wie aryo; Adaya wot a Jerokam, wot a Pelaya, wot Amiji, wot a Jekaria, wot a Pacur, wot a Malkija, karacel kede omegogi ame obedo otel me doggola a kwarigi gin luŋ rik oromo mia aryo kede pyeraŋwen wie aryo; kede dok Amacai wot Ajarel, wot Ajai, wot Mecillemot, wot Immer. Jo me doggola-ni rik tye iye jo ame romo mia acel kede pyeraryo wie aboro, ame gin luŋ obedo jo ame tek meicel i lweny. Adwoŋ ame onwoŋo loogi ducu onwoŋo obedo Jariel wot Aggedolim. Magi en jo Levi ame onwoŋo bedo i Jerucalem: Cemaya wot a Kacub, ame obedo wot Ajirikam, wot a Kacabia, wot a Bunni; Cabbetai kede Jojabad, ame gin onwoŋo obedo odoŋe ame loo jo Levi ame onwoŋo tio oko i dyekal me ot Obaŋa; Mattania wot a Mika, ame obedo wot a Jabdi, wot Acap, En rik obedo ŋat ame telo wer i kare me miyo pwoc baŋ Obaŋa, Pakbukia onwoŋo obedo ŋat ame lubo Mattania wot a Mika, kede Abda wot a Cammua, wot a Galal ame obedo wot a Jedutun. Jo Levi luŋ ame onwoŋo bedo i Jerucalem, i boma acil, rik welgi romo mia aryo kede pyeraboro wie aŋwen. Magi en ogwok doggola ot Obaŋa ame onwoŋo bedo i Jerucalem: Akkub, Talmon kede watigi ame welgi luŋ romo mia acel kede pyerabiro wie aryo. Jo ocele luŋ me Icrael, olamdog odoŋŋege kede jo Levi, rik bedo i boma ocele me Juda, kun ŋat acel acel bedo i lobo mere ame rik opokke, Jo ame rik tio ticcogo apek i ot Obaŋa rik bedo i Jerucalem kan ame olwoŋo ni Opel, kun odoŋe ame loogi bedo Jiba kede Gicpa. Alo jo Levi luŋ ame rik bedo i Jerucalem rik obedo Uji wot a Bani, wot a Kacabia, wot a Mattania, wot a Mika, ame gin luŋ obedo jo me doggola Acap, ame doggola mere rik obedo ower i ot Obaŋa, Pien cik abaka rik onwoŋo tye ame mako ower i ot Obaŋa, kite ame doggola acel acel myero le kede ticgi me telo wer nino i nino. Petakia wot a Mecejabel, ame obedo dano me doggola a Jera, me atekere a Juda, ame en rik awaŋ abaka me Pacia i kop ame mako lwak. Jo apol rik onwoŋo bedo i akina myere, kun obedo ceggi kede pottigi me pur. Jo me atekere a Juda rik bedo i Kiriat-arba, Dibon kede i Jekajel kede i pacci ame tye i ŋetgi. Dok daŋ obedo i boma me Yecua, Molada, Bet-pelet, kede i Kajaracual kede i Beerceba, kede i pacci ame tye i ŋetgi. Obedo daŋ i Jiklag, kede i Mekona, kede i pacci ame tye i ŋetgi, kede i En-rimon, i Jora, Jarmut, Janoa, Adullam, kede i pacci ame tye i ŋetgi, Dok obedo daŋ i Lakic kede i akina potti ame tye i ŋetgi kede i Ajeke karacel kede pacci ame tye i ŋetgi. Man cimo ni jo me Juda rik obedo i lobo ame tye i akina Beerceba wot kede naka i luŋ a Kinnom, ame tye i ŋet Jerucalem. Jo me atekere a Benjamin rik te bedo i boma magi: Geba, Mikmac, Aija, Betel, kede pacci ame tye i ŋetgi, Anatot, Nob, Anania, Kajor, Rama, Gittaim, Kadid, Jeboim, Neballat, Lod kede Ono, kede i luŋ otet. Jo Levi mogo ame rik onwoŋo bedo i Juda obin omedo i kom jo Benjamin. Magi en olamdog kede jo Levi ame rik odwogo iyi opii i Babulon karacel kede Jerubabel wot a Cealtiel, kede alamdog adwoŋ Yecua. Gin ene: Ceraya, Jeremia, Ejira, Amaria, Malluk, Kattuc, Cekania, Rekum, Meremot. Iddo, Ginnetoi, Abija, Mijamin, Madia, Bilga, Cemaya, Joyarib, Jedaya, Callu, Amok, Kilkia, kede Jedaya. Magi en ame rik obedo olamdog ame loo owotegi i kare adwoŋi Yecua. Jo Levi ene: Jo me agege-ni obedo jo ame rik loo tic me telo wer me pwoyo Obaŋa i ot Obaŋa, Yecua, Binnui, Kadmiel, Cerebia, Juda, kede Mattania, Eka Bakbukia, Unno kede owotegi te cuŋ tikere kedgi i ot woro Obaŋa. Yecua rik obedo papa a Joyakim, Joyakim te nywalo Eliacib, Eliacib te nywalo Joyada; Joyada te nywalo Yonacan, eka Yonacan te nywalo Jaddua. I kare ame Joyakim rik onwoŋo tye acalo alamdog adwoŋ, jo magi en ame onwoŋo tye acalo odoŋe ame loo doggolagi i kom olamdog, Meraya, ame onwoŋo loo doggola a Ceraya, Kanania, ame onwoŋo loo doggola a Jeremia; Mecullam, ame onwoŋo loo doggola Ejira, Jekokanan, ame onwoŋo loo doggola Amaria; Yonacan, ame onwoŋo loo doggola a Malluki, Yucepu, ame onwoŋo loo doggola a Cebania; Adna, ame onwoŋo loo doggola a Karim, Kelkai, ame onwoŋo loo doggola a Merayot; Jekaria, ame onwoŋo loo doggola a Iddo, Mecullam, ame onwoŋo loo doggola a Ginneton; Jikri, ame onwoŋo loo doggola Miniamin, Piltao ame onwoŋo loo doggola a Moadia; Cammua, ame onwoŋo loo doggola a Bilga, Yekonacan, ame onwoŋo loo doggola a Cemaya; Mattenai, ame onwoŋo loo doggola a Joyarib, Uji, ame onwoŋo loo doggola a Jedaya; Kallai, ame onwoŋo loo doggola a Callai Eber, ame onwoŋo loo doggola Amok; Kacabia ame onwoŋo loo doggola a Kilkia, kede Netanel, ame onwoŋo loo doggola a Jedaya. Jo me doggola a jo Levi kede me doggola olamdog adoŋo rik obedo coyo piny i kare ame olamdog adoŋo magi onwoŋo tye i kom: Eliacib, Joyada, Jokanan kede Jaddua. Coyo nyiŋ man obin ogik oko i kare me loc a Dario, abaka me Pacia. Odoŋe ame loo doggola a jo Levi rik ocoo nyiŋgi piny i buk adwoŋ me Tekwaro, kede naka i kare a Jokanan, ame obedo akwar Eliacib, Odoŋe ame onwoŋo loo jo Levi ene: Kacabia, Cerebia, Yecua, kede Binnui, kede Kadmiel kede owotegi, gin onwoŋo obedo jo ame pako Obaŋa, kun oleo alea kite ame abaka Daudi, dano Obaŋa onwoŋo oyiko kede. Aco Mattania, Bakbukia, Obadia, Mecullam, Talmon, kede Akkub onwoŋo obedo ogwok dogcel, kun ogwoko udi me kano jami ame onwoŋo tye i doggola me ot Obaŋa, Man obedo timere i kare a Joyakim wot a Yecua, akwar Yekojadak, kede i kare a Nekemia, ame obedo gabuna, kede dok i kare Ejira, alamdgo ame obedo apwonycik Obaŋa. I kare me kwero apama cel me Jerucalem, okelo Olevi luŋ i kan ame gin onwoŋo obedo iye, gin luŋ okelogi i Jerucalem, me obin okwer kare man i yomcuny kede pwoc adwoŋ meicel baŋ Obaŋa, kun owero wer, ogoo naŋa, ajaa kede naŋa opuk. Jo Levi ame onwoŋo obedo ower luŋ te cokere i kabedo luŋ bino i Jerucalem, kun oya i kabedogi luŋ ame onwoŋo oguro Jerucalem, naka i pacci me Netopa, kede i Bet-gilgal, Geba, kede i Ajimavet. Olamdog kede jo Levi koŋ ogeo lonyere pirgi kengi eka ote lonyo lwak, kede dogcel luŋ, kede apama cel. Rik ate coko rwode luŋ me Juda i wi cel malo, ate keto jo dul aryo me wot mano boma kun omio pwoc baŋ Obaŋa, Dul me agege ociro i wi cel malo, kun odok tutuŋ dogcel ame olwoŋo ni dogcel me wi odur; kun Kocaya lubo ŋegi karacel kede nucu oloc me Juda. Olamdog magi ame onwoŋo tye akuto apel, te ciro lubogi: Ajaria, Ejira, Mecullam, Juda, Benjamin, Cemaya kede Jeremia, karacel kede awobe mogo ame obedo awobe olamdog, te daŋ lubogi kun okuto apel; i akinagi onwoŋo tye iye Jekaria wot a Yonacan, ame obedo wot a Cemaya, wot a Mattania, wot a Mikaya, kede Jakkur me doggola Acap; wati mere en Jekaria te ciro lube, Cemaya, Ajarel, Milalai, Gilalai, Maai, Netanel, Juda, kede Kanani. Gin luŋ onwoŋo omako kite jami mogo me wer ame rik abaka Daudi, dano Obaŋa, goo, Ejira ame apwony cik Obaŋa en onwoŋo otelo nyim dul man. I dogcel ame olwoŋo ni dogcel me Pii, gin owoto otiko nyimgi atira, kun oyito malo owoto i paco a Daudi, ote kato paco a Daudi oko, ote dok lokere i dogcel ame olwoŋo ni dogcel me Pii, ame tye tuŋ to. Dul me aryo te ciro dok tutuŋ cam; an ate lubogi kede nucu a lwak, kun ociro i wi cel malo, Wan owoto okato kan kan ame ocuŋ malo iguŋ ame olwoŋo ni Ka tedo Ogati, tuno kede kan ame olwoŋo ni dogcel Alac. Ote beo i ŋet dogcel ame olwoŋo ni dogcel me Epraim, tuno kede naka i dogcel ame olwoŋo ni dogcel Acon, kede en ame olwoŋo ni dogcel me Rec, kede i ot okato malo iguŋ ame olwoŋo ni Kananel, kede me Mia, ote tuno naka i dogcel ame olwoŋo ni dogcel me Rommi; ote wot giko wotwa i dogcel ame olwoŋo ni dogcel Okur piny. Mannono en kite ame lwak ame onwoŋo opokere dul aryo kun omio pwocgi baŋ Obaŋa otuno te cuŋ kede i ot Obaŋa. Aco an onwoŋo atye karacel kede nucu odoŋe a lwak, kede olamdog magi, kun gin omako apelgi i cingi: Eliakim, Maceya, Miniamin, Mikaya, Elioenai, Jekaria, kede Kanania; kede Maceya, Cemaya, Eleajar, Uji, Yekokanan, Malkija, Elam, kede Ejer. Ower te bedo wer, kun Jejrakia en ame tye acalo atelgi. I nino-nono lwak te yalo Obaŋa kede mot adwoŋ meicel, kun olelo daŋ atek meicel, pien Obaŋa en omio cunygi obedo yom. Mon karacel kede itino daŋ cunygi obedo ayom meicel i nino-nono, Yomcuny ame onwoŋo jo tye kede i Jerucalem obedo winyere kan abor meicel. I nino-nono rik ote yero jo ame loo icika ame ogwoko iye jami ame jo mio me konyo tic i ot Obaŋa, acalo cam ogeo cek me wi mwaka, kede acel me apar me jami luŋ, ame ocoko iye dul ame cik mito ni myero mi me konyo olamdog kede jo Levi, kun lubo wel potti ame tye i boma atino. Jo Juda rik te bedo i twon yomcuny adwoŋ meicel i kom olamdog kede jo Levi ame obedo tic. Gin obedo tiyo tic ame Obaŋa omiogi, kede tic me lonyo lwak bedo acil. Ower kede ogwok doggola ot Obaŋa daŋ obedo tiyo ticgi kite ame rik Daudi kede wode Culeman ociko, Pien i kare ame Daudi gin kede Acap, rik onwoŋo tye adwoŋ ame loo wer; i kare-naca onwoŋo ower wero wer me pako Obaŋa kede me pwoyo Obaŋa. Aco i kare a Jerubabel kede i kare a Nekemia, jo Icrael luŋ onwoŋo mio motgi nino ducu me konyo jo ame wero i ot Obaŋa kede me konyo jo ame gwoko doggola ot Obaŋa. Lwak daŋ obedo miyo motgi mogo pi jo Levi, jo Levi daŋ te bedo miyo en ame rik omito pi ikwae Aron, ame gin obedo olamdog. I kare ame onwoŋo otye ka kwano cik a Muca malo i nyim lwak, gin ocop i dul ame kobo ni jo Ammon onyo jo Moab mom bino donyo i cokere Obaŋa; pien gin rik mom ojolo jo Icrael i yo i kwon kede pii, i kare ame gin obino kun oya i Miciri, ento gin olunyo paŋo Balaam me bino cenogi, Cite Obaŋa rik te lunyo loko cennere naca doko gum. Kare ame jo owinyo okwano cik man, gin te cako pokere i jo luŋ ame obedo ikwae orok ame onwoŋo tye i akinagi. I kare ame kop man mom ru otimere, Eliacib alamdog, ame rik onwoŋo oketo me loyo icika me ot Obaŋa, omako dyere gin kede Tobia. En rik te yiko twon icika moro alac pi Tobia, icika ame rik koŋ onwoŋo ogwoko iye mot me moko kwon, odok luban, karacel kede jami ame otio kedgi i ot Obaŋa, kede acel me apar me kal, koŋo olok kede moo ame rik omio baŋ jo Levi, ower, kede baŋ ogwok doggola ot Obaŋa kite ame tye kede i cik, karacel kede gin ame omio baŋ olamdog. I kare ame gin man timere, onwoŋo an Nekemia mom atye i Jerucalem, pien i mwaka me pyeradek wie aryo me loc Atakerec, abaka me Babulon, an rik onwoŋo awoto oko baŋ abaka, A doŋ kare koŋ dok okato anonok, an rik ate kwayo i baŋ abaka, ate bino i Jerucalem, I kare-nono ate roto bal ame Eliacib onwoŋo otimo i kom Tobia, pi yikke icika acel me bedo mere i dyekal ame tye i ot Obaŋa, Akemo omaka atek meicel, omio ate bolo jami a Tobia luŋ ame onwoŋo tye iyi icika-naca, An ate miyo cik ni myero lony icika-naca bed acil; eka ote cako dwoko iye jami luŋ ame otio kedgi i ot Obaŋa, karacel kede mot me moko kwon kede me odok luban. Dok aroto daŋ ni jo Levi wi jo doŋ owil oko i komgi, mom dok omiogi dul ame onwoŋo ociko ni lwak myero mi baŋgi. Mannono te miyo jo Levi kede ower, ame onwoŋo tio tic, te ya wot oko, kun ŋat acel acel dok ceŋ i poto mere. An ate da atek i wi odoŋe ame onwoŋo loo lwak, pi miyo weko ot Obaŋa ata, Ate cako coko jo Levi luŋ kede ower dwokogi ceŋ i dog ticgi. Jo me Juda luŋ te cako kelo acel me apar me kalgi, kede koŋo olokgi, kede moo iyi icika me kano jami, Dok ate keto jo i man i tic me gwoko jami ame okano i ot kano jami: Celemia, ame onwoŋo obedo alamdog, Jadok aran, kede Pedaya ame onwoŋo obedo Alevi. Dok ate keto daŋ Kanan wot a Jakur, ame obedo wot a Matania, me bedo dano ame konyogi, pien onwoŋo rik jo luŋ ŋeo aber ni jo ame eketo-nono obedo jo ame ogen. Gin rik te bedo tiyo tic me poko jami baŋ omegogi. Po pira, Ama Obaŋana, i kom tic man ame atio, kur ijwa tic abeco luŋ ame doŋ atyeko tiyo me yiko ot a Rwot Obaŋana, kede me yiko tic me wore. I kare-nono daŋ ate bedo neno ni jo apol me Juda tye ka biyo koŋo olok i ceŋ me cabit, kun jo ocele tye ka weko kal, koŋo olok, nyig olok, nyig oduro kede jami ocele apapat ame gin otweo i ŋe kana ote tero naka i Jerucalem, kun man daŋ otimo i ceŋ me cabitgi. Rik ate kwenyorogi daŋ i nino ame gin onwoŋo tye ka cato cam. Jo Turo mogo daŋ ame rik bedo i boma, obedo kela i Jerucalem rec kede kit jami ocele apapat me acata, ote catogi i ceŋ cabit baŋ jo Juda, kede i Jerucalem, Mannono te miyo akemo maka atek meicel i kom odoŋe me Juda, ate penyogi ni, “Man tim arac aŋo ame itye ka timo wunu-nie, ame itye ka pyedo wunu kede ceŋ me cabit? Kwariwa mom rik koŋ otimere kit man? Mom man en omio Obaŋawa kelo tim man areco-ni i komwa kede i kom boma man? Nen, wun pwod dok itye wunu ka medo akemo Obaŋa i kom jo Icrael pi bedo pyedo ceŋ me cabit.” An rik ate miyo cik ni i cabit ducu, i kare ame piny doŋ ceggi yuto, myero ceg dogcel luŋ, kun mom dok oyabo kadi acel, tuno ka nino me cabit doŋ okato. Eka ate keto jona mogo me kuro dogcel, me gin nen ni mom oyeo ginnoro otero i boma i nino me cabit. Man omio tyen acel onyo aryo ocat wil kede jo ame cato jami ame kitegi papat obuto oko i ŋe boma me Jerucalem. Cite akwenyorogi, kun apenyogi ni, “Piŋo kara ibuto wunu i ŋet apama me cel? Nen ba, ka ce imedde timo wunu kittono, mom abino wekowu kadi acel.” Cakere i kare-nono, gin mom dok ote dwogo ceŋ i cen me cabit. Eka ate ciko jo Levi ni myero gin olonyere kengi, ote wot kuro dogcel luŋ, me ogwok nino me cabit bed acil. Po pira, Ama Obaŋa a man daŋ, itim ber iweka koŋ abed kwo pi twon mar meri adwoŋ a mom lokere. I kare-nono daŋ rik ate neno Ojudaya mogo tye ame onyomo anyira me Acidod, Ammon kede me Moab, odoko mongi, Mannono omio nucu me itinogi onwoŋo doŋ kobo leb jo Acidod, kun mom dok otwero kobo leb jo Juda, cite okobo ka leb rok ocele. Man daŋ omio awoto i komgi agwa meicel, ate cako cenogi kun opwodo jo mogo i akinagi, dok daŋ opuputo yer wi jo mogo; amiogi okwoŋo i nyiŋ Obaŋa, kun akobo ni, “Wun mom ibino miyo wunu anyirawu baŋ awobegi, dok daŋ mom ibino nyommi wunu awobewu anyiragi, akadi pi wun ikomwu. Mom Culeman rik obalo pi bedo nyomo kodi monnono? I kom rok apapat me wi podo, onwoŋo mom tye abaka moro ame cal kede, dok daŋ rik Obaŋa mere mare. Obaŋa omio en obedo abaka ame loo jo Icrael; kadi bed amannono, anyira orok ame en obedo nyomo omio twon jo ame rom mannono opoto oko i bal. Wun imito wunu ni wan owinywu, otim tim arac wok-ki, ote turo cik a Rwot Obaŋawa, kun onyomo wunu anyira arok ocele me bedo monwa?” Dano moro acel i akina ikwae a Yekoyadi, wot Eliacib, alamdog adwoŋ, onwoŋo onyomo nyaka a Canbalat ame en dano me Koron, an rik ate ryemo dako mere-nono oko i baŋe. Po pirgi, Ama Obaŋana, pien gin obalo nyiŋgi oko me bedo olamdog, dok daŋ obalo cikere ame onwoŋo tye i akina yin kede olamdog, kede jo Levi. Mannono en kite ame alonyo kede jo Icrael i kom ginnoro luŋ ame onwoŋo obedo me orok, ate miyo tic olamdog kede jo Levi moko, kun ŋat acel acel tio ticcere. Dok ate yiko kite me kelo yen me waŋo mot me yalo Obaŋa, i kare ame myero kel iye, kede kite me kelo cam ogeo cek me wi mwaka. Tim ber ipo pi timo gin aber pira, Ama Obaŋana. Man obedo gin ame otimere i kare abaka Akacuwera, ame rik obedo abaka ame oloo loccere cakere India tuno kede naka Eciopia, kun loo dul lobo apapat ame romo mia acel kede pyeraryo wie abiro. I kare-naca i kare ame abaka Akacuwera onwoŋo tye obedo i wi kom me loccere i boma adwoŋ me Cuca. I mwaka me adekkere me loccere, en ocako tedo arama pi rwode mere kede odoŋe luŋ ame loo tic apapat, kede odoŋe ame telo wi mony i Pacia kede i Media, odoŋe ame oworo kede oloc adoŋo ame tye i dul lobo apapat i te loccere, En obedo nyuto lonyo kede kwogo ame tye i loccere, dit kede woro ame lwak mie, pi kare alac ame romo nino mia acel kede pyeraboro twal. Kare ame kare-nono luŋ doŋ otum, abaka ocako tedo arama pi jo luŋ ame onwoŋo bedo i boma adwoŋ me Cuca, otedo arama pi jo atino kede jo adoŋo. Arama-nono ori pi nino abiro, obedo i dyekal me galo waŋ ame tye i ŋet ot abaka. Dyekallere rik onwoŋo odeo i cuka atar kede en obedo bululu bululu ame oŋabo malo kede tol ame owio i boŋo camanini, kede tol ocele ame obedo amaramar, ame orwako iyi atem me ryal, ame oŋabogi i kom pagi ame otio i kiddi apwot me wel; gi-bedo a lwak onwoŋo otio i jabu kede ryal. Dok kan ame ocicibogi iye onwoŋo okwogo meicel, kun omwono kiddi atitino kede en atar, kede gin ocele ame ryeny aryenya, karacel kede kiddi mogo me wel. Gi-amata luŋ jo obedo mato kede ikopo me jabu ame kitegi papat; aco koŋo olok obedo oonyo abup meicel ame nyuto lonyo abaka. Koŋo olok jo obedo mato kun olubo cik, mom tye ŋattoro ame onwoŋo odio adia me mato koŋo; pien abaka onwoŋo ociko odoŋe luŋ ame loo tic me paco mere me timo gin ame ŋat acel acel omito. Vaciti ame obedo agoŋ abaka onwoŋo daŋ rik otedo arama pi mon i paco abaka Akacuwera. I nino me abiro me arama-nono, i kare ame abaka onwoŋo tye amatte ame cunye yom, en olwoŋo jo ame oroo oko abiro, ame gin rik obedo omiro mere ame tio baŋe, Mekuman, Bijita, Karibona, Bigeta, Abagita, Jetar, kede Karikac. En ocikogi ni myero owot okel agoŋŋere Vaciti i nyime, kun oruko tokkere me kwogo, me ebin enyutte baŋ jo ame rokgi papat, me rwode mere nen berrere, pien en onwoŋo obedo dako ame neno mwonya meicel. Cite agoŋŋere Vaciti te kwero winyo kop abaka oko ame omiro mere: ame oroo oko okelo baŋe. Mannono te miyo cuny abaka waŋ atek, akemo te ciro oko. Abaka te cako kop oryeko ame ŋeo kop i kom kare apapat, pien mannono onwoŋo obedo gin ame abaka timo kare luŋ; kare luŋ en penyo kop baŋ jo luŋ ame ŋeo cik kede kite me ŋolo kop. Jo ame onwoŋo ceggi kede onwoŋo obedo Karicena, Cetar, Adimata, Tarcic, Merec, Maricena, kede Memukan, magi gin oloc abiro me Pacia kede Media, ame tye kede twer me bino i nyim abaka i kare moro keken, gin obedo jo ame tye i rwom amalo ame ceggi abaka, ame abaka romo winyo kopgi. En te penyogi ni, “Kite ame cik tye kede, ŋo ame myero tim i kom agoŋ Vaciti, pien en okwero winyo kop abaka Akacuwera ame jo ame oroo oko okobbe?” Memukan te kobo kop i nyim abaka, kun oloc apapat daŋ tye ni, “Agonni Vaciti mom otimo bal baŋ abaka keken, cite naka baŋ oloc luŋ me dul lobo apapat, karacel kede jo luŋ i te loc abaka Akacuwera. Kodi tim agoŋ abaka-ni bino winyere baŋ mon luŋ, te miyogi gin daŋ cako cayo coggi, gin bino kobo ni, ‘Abaka Akacuwera onwoŋo ociko ni ter agoŋŋere Vaciti i nyime, cite en gire te kwero wot oko.’ Cakere tin-ni, mon luŋ me Pacia kede Media ame owinyo gin ame dako abaka otimo bino bedo rabo koppere baŋ oloc abaka, ame te miyo acae kede akemo bedo adwoŋ meicel. Doŋ ka ce abaka neno tamma ni ber, myero en cwa cik ame ya i baŋe, ame myero coo i akina cik me Pacia kede Media ame mom dok oromo loko; cik ame kobo ni agoŋŋere Vaciti myero kur doŋ nen i nyime atwal. Abaka myero doŋ mi dittere baŋ dako ocele ame ber kate. Ka ce cik ame abaka oketo-nono obino rabo pire roma lobo ame en loo luŋ, kite ame dittere tye kede-ni, bi no miyo mon luŋ woro coggi, jo ame rwomgi malo kede jo ame rwomgi piny.” Tam man te yomoro cuny abaka kede oloc luŋ, abaka te timo kite ame Manukan otamo kede; en te cwayo waraga i dul lobo mere luŋ ame en loo, kun ocoo i nukuta ame jo me dul lobo moro-ni ŋeo, dok ocoo baŋ rok acel acel i lebgi, Ocoo kittono me wek dano acel acel obed rwot me ode, kun kobo leb ame rokkere kobo. Icennere i kare ame akemo abaka Akacuwera okwe, en ocako po pi Vaciti kede gin ame en otimo, karacel kede cik ame omoko i kome. Otic abaka ame tio baŋe te kobbe ni, “Myero yeny nyannoro a mom ru oŋeye ico pi abaka. Abaka myero yer odoŋe mogo me ketgi i dul lobo apapat ame tye i te loccere, me gin cok kodi anyira-nono luŋ i ot a mon ame tye i boma adwoŋ me Cuca, me gin bed i te loc a Egai, lo ame oroo oko ame loo mon abaka; myero migi moo a ŋwece kur me wiregi. Doŋ nyannoro i akinagi ame bino yomoro cuny abaka myero dok agoŋ abaka me awora kaka Vaciti.” Kop man te yomoro cuny abaka, omio en te timo kittono. I kare-nono onwoŋo tye Ajudaya moro i Cuca, dano-nono nyiŋe onwoŋo Mordekai; en obedo wot a Jair, wot a Cimei, wot a Kic, dano me Benjamin, ame rik onwoŋo otero i Jerucalem acalo opii, kun otere karacel kede jo ocele ame i akinagi rik tye iye Yekonia abaka me Juda, ame gin jo ame rik abaka Nebukadnejar otero oko i opii. En Mor dekai onwoŋo opito Adaca, ame en Ecita, ame obedo nyako omin pappere, pien pappere kede tottere onwoŋo doŋ mom. Nyako-ni onwoŋo ber dok mwonya meicel; i kare ame tottere kede pappere oto. Mordekai ogame acalo nyare ikome. Doŋ i kare ame abaka omio cik, ote rabo pire i lobo luŋ, i kare ame otye ka coko anyira luŋ i telo Cuca, boma adwoŋ, kan ame Egai gwoko iye mon, Ecita daŋ rik ote tero i paco abaka, ote daŋ keto kan ame Egai gwoko iye mon. Ecita te yomoro cunye meicel, eka te wayo tammere oko i kome; mannono te miyo en ru pokki Ecita moo mere me wir kede cammere, te daŋ yero aŋeca abiro i paco aba ka me konye, eka te kete i kabedo aber meicel ame ogwoko iye mon abaka, karacel kede aŋeca abiro-ca me konye. Ecita mom onyuto rokkere, akadi wati mere daŋ, pien Mordekai onwoŋo ocike ni myero kur kobi. Doŋ kare ducu Mordekai woto i ŋe cel me paco a mon me eŋe kite ame Ecita tye kede, karacel kede gin ame tye ka timere i kome. Nyako acel acel rik woto baŋ abaka Akacuwera ka kare mere oromo, i ŋe bedo dwete apar wie aryo kun owinyo cik ame onwoŋo oketo pirgi gin mon. Man rik obedo kare me yiko bergi bedo amwonya meicel, kun owirre kede moo murra dwete abicel, eka dok pi dwete abicel ocele ote bedo wirre kede kit moo ocele apapat ame mon wire kede. I kare me wot anyira-ni baŋ abaka, rik omio nyako acel acel tero gin ame cunye mito wot kede i paco abaka, kun ya kede i ka gwoko mon. Nyako acel acel woto otyeno te dwogo odiko kun woto doŋ i ka gwoko mon namba aryo, ame tye i te loc a Cacigaj, ame obedo dano abaka ame oroo oko ame gwoko aŋeca abaka; nyako ame owoto oko baŋ abaka mom dok dok kuno tuno ka en oyomoro cuny abaka, eka ote doŋ lwoŋe alwoŋa i nyiŋe. A doŋ kare me wot Ecita baŋ abaka oromo, Ecita ame obedo nyaka Abikail, omin papa a Mordekai, ame rik ogame acalo nyare, en mom openyo ni mie ginnoro. En openyo ka Egai, agwok mon abaka ame oroo oko, te lubo tammere. Ecita owao tam a jo luŋ ame onene, omio gin luŋ opwoc. I kare ame otero Ecita baŋ abaka Akacuwera i paco mere, i dwe me apar, ame mannono obedo dwe ame olweoŋo ni Tebet, i mwaka me abiro me loc abaka Akacuwera, abaka omaro Ecita atek meicel ame kato anyira ducu ame otero i nyime. Ecita te bedo kede gum i nyim abaka, dok abaka te pwoye ame kato anyira ocele luŋ, Abaka te kwanyo tok kwogo keto i wi Ecita me bedo agoŋ abaka me awora akaka Vaciti. Abaka te tedo twon arama adwoŋ meicel pi oloccere kede odoŋe wi ticcere, ame arama mere onwoŋo otedo me woro Ecita. Dok te miyo weo baŋ jo luŋ ame tye i dul lobo luŋ ame en loo, kun poko daŋ mot apapat kite ame lonyo mere tye. Kare ame dok ocoko anyira a mom ru oŋeye kede co, kar acel tyen me aryo, Mordekai onwoŋo tye obedo i doggola me cel abaka. I kare-nono onwoŋo Ecita mom ru onyuto kopporo i kom wati mere onyo rokkere, kun lubo cik a Mordekai ame rik ociko kede; en obedo winye kite ame rik winye kede i kare ame pite. I nino moro Mordekai onwoŋo tye i dok tic abaka. I karenono akemo omako jo aryo, Bigitan kede Terec, ame gin jo ame onwoŋo oroo oko; jo man rik onwoŋo obedo ogwok doggola me ot abaka, gin te bedo yenyo yo me neko abaka Akacuwera oko. Mordekai rik te giporo imungi-nono oko, eka te tito oko baŋ Ecita agoŋ abaka, Ecita te kobo koppono oko baŋ cware, kun kobo nyiŋ Mordekai. I kare ame obedo yenyo kop man ote nwoŋo ni obedo kop ateni, rik ote neko jo aryo ame oroo-nono oko, kun odeogi adea. Kop man ote coyo i buk me Tekwaro ame tito gin ame otimere, ocoo i nyim abaka. I kare ame kop magi doŋ otyeko timere, abaka Akacuwera omedo rwom Aman wot a Amedata, dano me Agag, omie dit me loyo oloc ocele luŋ ame nwoŋo tye i te loccere. Cakere i karenono otic abaka onwoŋo ryebere piny wore kite ame abaka ociko kede. Ento Mordekai onwoŋo mom ryebere piny me wore. Mannono omio otic ocele ame tio i te loc abaka openyo Mordekai ni, “Piŋo yin itye ka turo cik abaka?” Gin obedo penye kittono nino i nino, cite Mordekai mom owinyo kopgi. Man omio gin otito kop man baŋ Aman, me neno ka ce Mordekai twero loyo kop, pien Mordekai onwoŋo okobbigi ni en ebedo Ajudaya. Kare ame Aman oniaŋ ni Mordekai kara onwoŋo mom ryebere piny wore, akemo omako atek meicel. Aman te tamo ni pe myero enek Mordekai kene; kite acalo en doŋ otyeko niaŋ ni Mordekai obedo Ajudaya, en te tamo ni myero enwoŋ yo moro me neko Ojudaya luŋ ame tye i te loc abaka Akacuwera. I dwe me agege, ame obedo dwe ame olwoŋo ni Nican, i mwaka me apar wie aryo me loc abaka Akacuwera, rik ote cako bolo kwir ame olwoŋo ni Pur i nyim Aman; otimo amannono me yenyo nino mene kede dwe mene ame ber me cobo yik Aman, kwir te poto i kom dwe me apar wie aryo, ame obedo dwe ame olwoŋo ni Adar. Aman te kobbi abaka Akacuwera ni, “Tye rokkoro ame olal oromo dul lobo apapat ame yin iloo kun otye i akina jo, Rokkono cikgi pat meicel ame mom rwatte kede me a rokkoro kadi acel, dok daŋ mom ogwoko cikki, yin abaka, Man omio mom tye konnyoro kadi acel ame mio yin iwekogi obedo kwo. Doŋ ka ce yin abaka iye, koŋo iketo cik me nek rokkono oko luŋ, an abino culo lim me ryal ame pekkere romo tan mia adek kede pyerabiro wie abic baŋ jo ame loo tic abaka, me gin ket i ot kano lim abaka.” Abaka te kwanyo atem i ciŋe te miyo Aman, wot a Amedata, dano me Agag, ame obedo akwor Ojudaya. Abaka te kobo ni, “Lim luŋ obino miyi, rokkono daŋ atyeko miyi, itwero timogi kite ame yin imito.” Rik ote lwoŋo orani abaka luŋ i nino dwe apar wie adek me dwe me agege, gin te coyo cik kite ame Aman ocikogi kede luŋ, ocoo baŋ odoŋe ame loo dul lo bo apapat kede baŋ oloc ame loo rok apapat, kun ocoo i dul lobo acel acel, dok otio kede nukuta ame jo me dul lobo moro-ni ŋeo, dok ocoo baŋ rok acel acel i lebgi. Waraga-nono rik ocoo i nyiŋ abaka ote mwono doge kun odio atem abaka i kom odok ame omwono kede. Rik ote miyo oter-waraga riŋo i waraga i dul lobo apapat ame tye i te loc abaka Akacuwera ni myero nek Ojudaya tyek oko luŋ, nek jo atino kede jo adoŋo, mon kede itino i kor, myero nekgi luŋ i nino acel, i nino dwe apar wie adek me dwe me apar wie aryo, ame olwoŋo ni Adar, dok myero yak jamigi oko. Kit waraga-ni myero pok i dul lobo acel acel me wek koppere lal rom jo, me jo yikere pi nino ame ociko. Oterwaraga te ru wot oyotoyot tero waraga pi lubo cik abaka, cikkono daŋ onwoŋo omio oŋeye i boma adit me Cuca, Abaka karacel kede Aman te bedo piny mato koŋo, cite jo ame tye i boma me Cuca obedo kede twon wur adwoŋ meicel. I kare ame Mordekai oŋeo gin ame otimere, oyeco boŋo mere oko te ruko boŋo cola, te daŋ jukere kede buru, te wot i dye boma, kun akoko atek meicel i dwon aloŋo. En owoto naka i dogcel abaka; cik onwoŋo mom ye dano ame oruko boŋo cola me donyo i cel abaka. I kare-nono, i dul lobo acel acel ame cik abaka onwoŋo doŋ owinyere iye oko, omio Ojudaya luŋ obedo kede twon kumo adwoŋ meicel. Gin okanyo kec, okok, okumo, jo apol i akinagi oruko boŋo cola kun daŋ ojukere kede buru. I kare ame aŋeca kede amiro a Ecita oroo otito kop man baŋ Ecita, cuny Ecita ocwer atek meicel. En te cwayo boŋŋi me aruka baŋ Mordekai, kun kobo ni myero gony boŋo cola oko i kome, cite Mordekai mom oye gamo boŋŋi ame Ecita ocwao. Ecita te lwoŋo Atak, ame en dano acel i akina omiro abaka ame oroo, ame rik onwoŋo omio baŋe me bedo dano ame en ooro; en te cwaye baŋ Mordekai me wot niaŋ ŋo ame otimere dok ŋo omio otimere kittono. Atak te wot baŋ Mordekai i dye bar alac me boma adwoŋ, i nyim dogcel abaka. Mordekai te titte ginnoro luŋ ame onwoŋo otimere i kome kede wel lim ame Aman ocikere me culo iyi ot kano lim abaka pi neko Ojudaya. Mordekai omie daŋ waraga ame ocoo iye cikkono ame opoko i Cuca pi neko Ojudaya, ni en wot nyut baŋ Ecita, te daŋ medo niaŋe, dok myero cike me wot bako doge baŋ abaka, me abaka tim rokkere kica. Atak te wot kobbi Ecita kop luŋ ame Mordekai otitte. Ecita te kop gin kede Atak, te dok cwaye baŋ Mordekai kun kobbe ni, “Otic abaka luŋ karacel kede rok luŋ ame tye i dul lobo apapat i te loc abaka, gin luŋ oŋeo ni ka ce ŋattoro owoto i nyim abaka, kun donyo i dyekal ame tye i yie kun mom olwoŋo, dano-nono kadi bed dako onyo ico myero nek oko; mannono obedo cik acel ame okwako kit jo luŋ, tuno ka abaka otiŋo abiro me loccere malo ni en myero kwo. Cite an mom ru olwoŋa me wot i nyim abaka pi nino pyeradek twal.” Rik ote wot kobbi Mordekai kop ame Ecita okobo Mordekai te cwayogi dok baŋ Ecita, kun kobo ni, “Kur itam ni pien itye i paco abaka mio yin ibino bwot ame kato Ojudaya ocele mege. Pien ka ce yin mom ikobo kopporo i kare acalo man, larre Ojudaya bino ya i kan ocele, cite yin karacel kede jo me ot a pappi luŋ ibino to wunu oko. Ŋa a ŋeo ka ce yin mom idoko agoŋ abaka pi miyo kony i kare acalo man?” Ecita te kobbigi me dwokki Mordekai kop ni, “Wot icok Ojudaya ducu ame tye i Cuca karacel, me gin ocak kanyo kec pira, kur ocam ginnoro dok daŋ kur omat ginnoro pi nino adek, dyeceŋ kede dyewor. An karacel kede aŋecana luŋ daŋ obino kanyo kec kite ame wun itye wunu ka kanyo kede. Icennere an abino wot baŋ abaka kadi bed cik okwero, ka ce ato, kopporo gire mom, wek ato.” Mordekai te wot timo ginnoro luŋ ame Ecita ociko ni myero etim. I nino me adek, Ecita oruko rukkere me kwogo te wot cuŋ i dyekal i yie ame tye i paco abaka, ame otikere i ot adwoŋ me cokere abaka, Abaka onwoŋo tye obedo i wi kommere me loc i dyekal me paco mere, kun opimere i dogcel me paco. Kare ame abaka oneno Ecita kun ocuŋ i dye ot, cunye obedo ayom i kome, te tiŋo abiro loccere me jabu ame onwoŋo tye i ciŋe tutuŋ baŋ Ecita. Ecita te wot mulo wi abiro loccere-nono. Abaka te penye ni, “Kop aŋo ba, agoŋŋa me awora? Ikwayo ŋo? Obino gire miyi gin ame ikwayo, akadi nucu me locca.” Ecita ogamo kop abaka ni, “Adwoŋ, ka ce itwero ye, koŋo yin kede Aman ibino wunu iyi cammoro aduno ame ayiko pirwu tin.” Abaka te kobo ni, “Ru kelo Aman kan, me otim gin ame Ecita amito-ni.” Mannono te miyo abaka kede Aman wot i cam ame Ecita oyiko pirgi. I kare ame gin onwoŋo tye amato koŋo olok, abaka okobbi Ecita ni, “Gin aŋo imito ni atim piri? Obino gire miyi. Ikwayo ŋo? Kadi bed nucu locca, bino gire cobere.” Cite Ecita te kobo ni, “Gin amito ame akwayi iye eŋe: Ka ce ayomoro cunyi, adwoŋ, abaka, dok ka ce itwero miya gin amito, te daŋ cobo gin akwao, akwao ni yin abaka kede Aman diki ibin icam wunu cam ame abino yiko pirwu, eka diki-nono ate timo gin ame abaka okobo.” I nino-nono Aman te dok ame cunye yom atek meicel. Cite i kare ame Aman oneno Mordekai i dogcel abaka, mom oya malo, mom daŋ onyuto woro baŋe kadi acel, akemo omake meicel i kom Mordekai. Kadi bed amannono, en odio cunye te wot paco, en te cwayo kwena, ote lwoŋo owote mere kede dako mere Jerec. Aman te cako boko kop i kom kite ame lonyo mere dwoŋ kede, kun kwano anaka wel awobe mere, rwom apapat ame abaka obedo miye me wore, kede kite ame omie kede twero ame kato oloc wadgi luŋ kede omiro abaka daŋ ducu. Dok te medde i boko koppere ni, “Kadi naka agoŋ me awora Ecita, en daŋ mom ye ŋattoro woto gin abaka me wot camo cam, ame eyiko, kono ka an keken. Diki doki en olwoŋa me wot wan abaka. Kadi bed amannono, magi-nono luŋ mom ru aneno konnyoro iye kadi acel, ka ce pwod amedde neno Ajudaya moro a nyiŋe Mordekai-nu tye bedo i dogcel abaka.” Dako mere Jerec kede owote mere luŋ te kobo ni, “Mi yik yat me deyo jo ame borrere romo futi pyerabiro wie abic, me diki odiko ikobbi abaka ni myero de Mordekai iye; me iwot ame cunyi yom i cam ame oyiko pirwu wun abaka.” Tam man oyomoro cuny Aman, ento miyo yiko yat me deyo dano. I dyeworrono abaka mom onino, en te ciko ni myero kel buke me po gigi mogo abeco ame jo mogo obedo timo, ote kelo buk me Tekwaro bino kwano i nyim abaka. Rik ote cop kannoro ame ocoo iye kite ame rik Mordekai otuco kede kop i kom jo aryo ame oroo, Bigitana kede Terec, ame rik obedo ogwok doggola abaka, ame rik oyenyo yo me neko abaka Akacuwera oko. Abaka te penyo ni, “Woro aŋo onyo dit aŋo ame obin omio Mordekai pi gin ame en otimo-ni?” Omiro abaka te gamo ni, “Mom gire rik omie ginnoro.” Abaka te penyo ni, “Tye dano moro i ot?” I caa-nono onwoŋo Aman pwod adonyo adonya i dyekal i oko mere ame tye i paco abaka, me bino kobbi abaka pi deyo Mordekai i yat deyo jo ame doŋ etyeko yiko pire. Mannono te miyo omiro abaka kobbe ni, “Aman tye ocuŋ kuno.” Abaka te kobbigi ni, “Kobbe wunu ekato.” Aman te bino baŋ abaka, abaka te kobbe ni, “Ŋo ame myero otim baŋ dano ame abaka oyikere me woro?” Aman te kobo i cunye kene kene ni, “Man ka ŋa ame abaka amito woro ame kata oko-ni?” Aman te kobbi abaka ni, “Dano ame abaka mito woro, myero kel ruk me kwogo ame abaka i kome ruko, kede aguragura ame abaka riŋo kede, dok rwakke daŋ tok kwogo. Ruk me kwogo kede aguragura myero mi i ciŋ aloc abaka me awora a kato oloc ocele luŋ, me en ruki, dano ame abaka mito woro te wot kede i dye boma kannalac, kun dano-nono nwoŋo obedo i wi aguragura, en te bedo nyute baŋ lwak kun kobo ni, ‘Man en gin ame obino timo i kom dano ame abaka mito keto kwogo i kome.’ ” Abaka te kobbi Aman ni, “Ru cunyo wot, ter boŋo me kwogo kede aguragura kite ame ikobo kede, ite wot timo kittono i kom Mordekai ame obedo Ajudaya ame bedo i dogcel abaka. Ti jami luŋ ame ikobo, kur wek moro iye kadi acel.” Aman te tero ruk me kwogo kede aguragura, te wot timo kittono i kom Mordekai ame obedo Ajudaya ame bedo i dogcel abaka. En orukki Mordekai rukkere te miye riŋo kede aguragura i dye boma kannalac, kun en rabo kop i kome ni, “Man en gin ame obino timo i kom ŋat ame abaka mito keto kwogo i kome.” Mordekai te dok i dogcel abaka. Aman te ru wot oko i paco mere, kun akumo ame owumo wie oko. Aman te titti dako mere Jerec kede owote mere luŋ ginnoro luŋ ame otimere i kome. Oryeko mere ame mie tam kede dako mere te kobo ni, “Ka ce Mordekai ame aman doŋ rwommere malo kato megi-ni obedo Ajudaya, mom doŋ itwero pyem kadi acel, yin doŋ ibino dok adoka piny.” I kare ame gin onwoŋo pwod tye akop, akwena abaka te ru bino oko, ame kobo ni amito ni eru tero Aman oyotoyot iyi arama ame Ecita oyiko. I nino-nono abaka kede Aman te wot iyi arama ame Ecita oyiko. I nino me aryo mere, i kare ame gin onwoŋo otye omato koŋo, abaka dok te penyo Ecita ni, “Agoŋŋa Ecita, ŋo ame imito ni atim piri? Obino miyi. Ikwayo ŋo? Akadi nucu me locca, bino gire cobbere.” Ecita te gamo ni, “Ka ce ayomoro cuny abaka, dok ka ce abaka ye, myero tim ber kur neka, dok myero kur nek daŋ rokka. Pien wan doŋ ocatowa oko, an kede jona, ni myero nekwa oko, myero tyekwa ducu ni weŋ. Kono onwoŋo ocatowa acata me bedo opii, co kede mon, kono mom kopporo, pien can ame onwoŋo oneno, onwoŋo mom aromo poro kede rwenyo a lim abaka twal.” Abaka Akacuwera te kobbi Ecita ni, “Mannono ŋannono, en tye kwene, en dano ame timo kittono?” Ecita te gamo ni, “Akworwa ame dagowa-nono obedo lo-ni aracci, Aman.” Lworo te mako Aman arac meicel i nyim abaka kede agoŋŋere. Abaka te ya i dog camo arama kede akemo adwoŋ meicel, te wot oko i dyekal ame tye i ŋet ot abaka, cite Aman odoŋ cen me kwayo Ecita ni myero time kica kur neke, pien en onwoŋo oneno ni abaka doŋ oyikere me timo gin arac i kome. Kare ame abaka odwogo, eka te donyo i ot kan ame onwoŋo gin tye acamo arama iye, en onwoŋo Aman orumo aruma i ŋet twon kommoro adwoŋ kan ame Ecita obedo iye. Abaka te kobo ni, “En mito timo tim me anywar i kom agoŋŋa me awora kun aŋa aneno, kun daŋ timo i oda-gu?” Kare ame abaka okobo koppere-nono, ote ru tweyo waŋ Aman oko oyotoyot. Amiro abaka acel ame oroo, ame nyiŋe Karbona, ame onwoŋo gwoko abaka, i caa-nono te kobo ni, “Medo i kom mannono, yat adea ame Aman onwoŋo oyiko pi Mordekai ame koppere en a rik omio abaka obwot-ti tye i paco Aman, yat ame borrere tye futi pyerabiro wie abic twal.” Abaka te kobo ni, “Ŋabe i kom yattere-nono.” Mannono omio ote ŋabo Aman i kom yat deyo jo ame en rik oyiko me deyo Mordekai, Akemo abaka te doŋ kwe. I nino-nono abaka te miyo ot Aman baŋ agoŋŋere Ecita. Mordekai te doŋ bino i nyim abaka, pien Ecita onwoŋo otitte wat ame tye i akinagi kede Mordekai. Abaka te kwanyo atem ame onwoŋo okwanyo i ciŋ Aman te miyo baŋ Mordekai, Ecita te miyo Mordekai dit me loyo ot Aman. Ecita dok te medde kop kede abaka; en oryebere piny i nyim abaka, te cako bako doge kun kok i pig waŋe, ni myero juk yik Aman dano me Agag oko, me neko Ojudaya. Abaka te tiŋo abiro me loccere me jabu tutuŋ baŋ Ecita. Ecita te doŋ ya malo cuŋ acuŋa i nyim abaka. Ecita te kobo ni, “Ka ce abaka ye, dok ka ayomoro cuny abaka, kono ico waraga ijuko waraga Aman dano me Agag, wot Amedata oko, pien en onwoŋo oyiko kop me neko Ojudaya luŋ ame tye i te locci, yin abaka. Kara atwero diyo cuny niŋo me neno can ame abino i kom rokka kede i kom jo me doggolana?” Abaka te kobbi Ecita gin kede Mordekai ame obedo Ajudaya ni, “Nen doŋ atyeko miyo ot Aman oko baŋ Ecita, dok daŋ atyeko doŋ deyo Aman oko kun oŋabo i yat ame deyo jo, pien onwoŋo mito neko Ojudaya. Doŋ kop ame dok i kom Ojudaya, wun itwero wunu coyo waraga kite ame imito wunu, kun icoo wunu kede nyiŋa, ite diyo wunu atem abaka i kom odok ame omwono kede, pien cik ame ocoo i nyiŋ abaka dok odio atem abaka i kom odok ame omwono kede mom otwero loko.” Rik ote lwoŋo orani abaka i caanono, i dwe me adek, ame obedo dwe ame olwoŋo ni Civan, i nino dwe pyeraryo wie adek, rik ote coyo cik a mako Ojudaya kun ocoo kop ducu ame Mordekai ociko ni coo. Ocoo baŋ odoŋe ame loo lwak, oloc me dul lobo apapat, karacel kede baŋ oloc ame loo i dul lobo apapat cakere India tuno kede Eciopia, kun ocoo i dul lobo apapat ame romo mia acel kede pyeraryo wie abiro, kun ocoo baŋ dul lobo acel acel i nukuta ame gin ŋeo, dok i lebgi ikome. Waraga man rik ocoo i nyiŋ abaka Akacuwera ote mwono atem abaka i kom odok ame omwono kede. Oter-waraga ame riŋo aguragura en otero waraga, kun oriŋo aguragura adwir meicel, ame otio kedgi i tic abaka, ame onywalo i ot pito aguragura me loc. Waraga man omio twer baŋ Ojudaya ame tye i boma acel acel me cokere karacel pi gwoko kwogi i baŋ okworgi, dok daŋ otwero nekogi, otwero tyeko onyo jwero monnyoro keken, onyo dul lobo moro keken ame obino me lweny i komgi, kede itinogi kede mongi, kun daŋ omito yako jamigi. I nino acel keken, nino dwe apar wie adek, me dwe me apar wie aryo, ame obedo dwe ame olwoŋo ni Adar, i dul lobo apapat ame tye i te loc abaka Akacuwera. Waraga me cikkono ame ocoo-nono myero pok i dullobo acel acel acalo cik, me wek rab koppere rom jo duc, me wek Ojudaya bed ame otere oko me culo kwor i kom okworgi ame bino mito nekogi. Okwena te yito i wi aguraguragi adwir wok-ca, ame rik otio kedgi ka i tic abaka, ote ru riŋo oko oyotoyot me cobo cik abaka. Cikkono daŋ rik ote poko i boma adit i Cuca. Mordekai te ya oko i nyim abaka kun oruko ruk me loc obedo bululu bululu kede en atar, kun oruko daŋ tok kwogo me jabu i wie, kede jor ame okwoo i boŋo camanini aber meicel, kede en obedo amaramar, kun jo luŋ i boma adwoŋ tye awoo i yomcuny adwoŋ meicel. Ojudaya te bedo ilelo, yomcuny, pwoc kede woro. I dullobo acel acel kede i boma acel acel ka cik abaka kede koppere otuno iye, Ojudaya bedo i yomcuny kede lelo adwoŋ okato kare, otedo arama, ote daŋ bedo i weo. Man omio jo apol i akina rok ocele omiye kengi ni gin daŋ obedo Ojudaya, pien lworo Ojudaya onwoŋo ocirogi oko. Doŋ i dwe me apar wie aryo, ame obedo dwe ame olwoŋo ni Adar, i nino dwe apar wie adek me dwe-nono, i kare ame kop abaka kede cikkere doŋ oceggi keto i tic, ame en nino acellono en obedo nino ame okwor Ojudaya rik tye kede gen me cako loyo Ojudaya, ento ame dok obin olokere odoko nino ame Ojudaya myero cak loyo iye okworgi. Ojudaya obedo cokere karacel i bomagi i dullobo acel acel ame onwoŋo tye i te loc abaka Akacuwera me neko jo ame onwoŋo oyikere me timogi rac. Ŋattoro mom onwoŋo romo cuŋ i nyimgi, pien lworo onwoŋo omako rok apapat ducu i komgi. Oloc luŋ me dul lobo apapat kede odoŋe a lwak kede oloc ame loo dul lobo apapat kede odoŋe ocele ame loo tic abaka, gin daŋ obedo konyo Ojudaya, pien i ot abaka rik onwoŋo olworo Mordekai atek meicel, dok nyiŋe te rwo atek romo dul lobo luŋ ame tye i te loc Akacuwera; twer ame Mordekai tye kede te medde ameda i bedo atek meicel. Mannono te miyo Ojudaya neko okworgi luŋ aluŋa, kun onekogi kede pala romo; obedo ŋolo ŋutgi calo dyaŋ, kun otimogi kite ame yigi omito. I boma adwoŋ me Cuca. Ojudaya oneko dok otyeko jo ame romo mia abic twal, dok oneko daŋ Pareandata, Dalpon, kede Acapata, Porata, Adalia, kede Aridata, Parmacata, Aricai kede Yaicata, ame gin luŋ oromo apar, dok gin luŋ obedo awobe Aman wot Amedata, ame obedo akwor Ojudaya. Cite gin mom oyako gigi moro. Wel jo ame oneko i nino-nono. Ikome i boma adwoŋ me Cuca rik onyuto baŋ abaka. Abaka te kobbi agoŋŋere me awora Ecita ni, “I boma adwoŋ me Cuca Ojudaya oneko co ame romo mia abic, dok daŋ oneko awobe Aman apar oko. Kara doŋ ŋo ame ŋit ca otimo i dul lobo ocele mere ame tye i te locca! Kara gin aŋo doki ame myero atim piri? obino giri miyi. Ŋo ame dok ikwayo? Obino gire cobo piri.” Ecita te gamo ni, “Ka ce adwoŋŋa abaka, ye ni ber, myero yeyi Ojudaya ame tye i Cuca medde timo kite ame otimo kede tin-ni. Awobe Aman apar-ca myero ŋab komgi i kom yat me deyo jo.” Abaka daŋ te ciko ni myero man timere kittono; cik man rik ote miyo i boma me Cuca, omio ote ŋabo kom awobe Aman apar i kom yat me deyo jo. Ojudaya ame tye i boma me Cuca dok te medo cokere karacel i nino dwe apar wie aŋwen me dwe me Adar, ote dok medo neko co ocele ame romo mia adek i boma me Cuca. Cite mom oye yako gigi mogo. Ojudaya ame onwoŋo tye i boma ocele mege daŋ te cokere karacel me gwoko kwogi i dul lobo apapat. Gin rik ote neko okworgi oko a co ame romo tutumia pyerabiro wie abic; mannono te miyogi dok nwoŋo weo i kom okworgi ame onwoŋo dagogi. Cite gin mom oyako gigi moro. Man gin ame gin otimo i nino dwe apar wie adek me dwe me Adar, gin rik te weo i nino dwe apar wie aŋwen, ote miyo nino-nono bedo nino me kwero ecuban kede me yomcuny. Cite Ojudaya ame onwoŋo tye i boma me Cuca ocokere karacel i nino dwe apar wie adek kede i nino dwe apar wie anwen, omio gin doŋ te weo i nino dwe apar wie abic, kun omio nino-nono bedo ni no me kwero ecuban kede yomcuny. Mannono omio Ojudaya luŋ ame tye i akina pacci, ame tye i boma apapat, gwoko nino dwe apar wie abic me dwe me Adar acalo nino me bedo i yomcuny, nino me kwero ecuban kede nino me weo, dok obedo nino ame gin ocwao iye kit mot apapat ame cunygi okwanyo i akinagi kengi kengi. Mordekai te coyo jami magi luŋ piny, te cwayo waraga baŋ Ojudaya luŋ ame onwoŋo tye i dul lobo apapat ame tye i te loc abaka Akacuwera, jo ame tye kannabor kede en ame tye kan aceggi, kun cikogi ni myero gin ogwok nino dwe apar wie aŋwen kede nino dwe apar wie abic me dwe me Adar mwaka i mwaka, acalo nino ame Ojudaya onwoŋo iye weo iciŋ okworgi, dok acalo dwe ame obin oloko cangi odoko yomcuny, kumo olokere odoko weo. Ocikogi ni myero gin olok nino-nono obed nino me kwero ecuban kede nino me yomcuny, dok obed nino me cwayo mot apapat ame cunygi okwanyo luŋ i akinagi kengi kengi kede mot baŋ ocan. Ojudaya te ye timo kite ame onwoŋo ocako kede, kun oye lubo kite ame Mordekai ocoyigi kede. Pien Aman dano me Agag, wot Amedata, ame obedo akwor Ojudaya luŋ onwoŋo oyenyo yo me jwero Ojudaya oko, dok daŋ onwoŋo doŋ otyeko bolo kwir ame olwoŋo ni Pur me jejebo kede jwero Ojudaya odoco. Cite i kare ame Ecati owoto i nyim abaka, abaka omio ocoo waraga ame kobo ni tim araccono i kom Ojudaya myero lokere dok i wie gire, dok daŋ ni en kede awobe mere myero ŋabgi i kom yat me deyo jo. Mannono omio gin olwoŋo nino man ni Purim, kun oya i kom kwir ame olwoŋo ni Pur. Doŋ pi kop luŋ ame rik ocoo i waraga, kede pi can ame gin oneno pi kop man, kede gin ame obin otimere i komgi, Ojudaya oye kop man kun omoko ni gin ikomgi kede ikwaegi kede jo luŋ ame bino ye notte kedgi, gin obino gwoko nino aryo-ni kite ame ocoo kede, kun ogwoko i kare ame rik ociko-nono ikome mwaka i mwaka aboŋo keŋ. Nino aryo-ni gin obino poyo kun ogwoko naka i kare a lwagi jo me kare luŋ, obino gwoko i doggola ducu i dul lobo apapat kede i boma luŋ, dok Ojudaya myero kur wek kwero nino magi me Purim, kwero nino magi myero kur gik naka i kare ikwaegi luŋ. Ecita agoŋ abaka me awora, nyaka Abikail, kede Mordekai ame obedo Ajudaya, te coyo waraga, kun omoko waraga me aryo i kom Purim. Waraga-nono rik ocwao baŋ Ojudaya luŋ, ocoo i dul lobo apapat ame romo mia acel kede pyeraryo wie abiro ame tye i te loc abaka Akacuwera, kun ocoo i kop me kuc kede ateni, ni mannono nino me Purim myero gwok i kare ame ociko i kome, kite ame Mordekai ame obedo Ajudaya kede Ecita agoŋ me awora ociko kede Ojudaya, dok kite ame gin onwoŋo ociko kede pirgi kengi kede pi ikwaegi ame mako kop i kom kanyo kecgi kede kumogi. Cik ame Ecita agoŋ abaka me awora ociko omoko cik man me Purim ote coyo me agwoka i buk. Abaka Akacuwera oketo tic me eroni i lobo kede i dog nam. Doŋ ginnoro luŋ ame Akacuwera otio pi teko mere kede twerrere, kede kit kwogo luŋ ame en omio baŋ Mordekai, i rwom luŋ ame obedo medo baŋe, gin luŋ tye ocoo i buk me Tekwaro ame tito kop i kom obakki me Media kede Pacia. Pien Mordekai ame obedo Ajudaya en onwoŋo lubo abaka Akacuwera, dok daŋ en onwoŋo twon dano adwoŋ meicel i akina Ojudaya, kun daŋ jo apol meicel i akina jo mere mare meicel, pien obedo yenyo yo me miyo jo mere bedo aber, kun daŋ kobo kop me kuc i akina jo mere luŋ. Rik tye lo moro i lobo me Uji ame nyiŋe Yubu; en rik obedo dano ame mom i balloro, dok cunye atira. En rik onwoŋo lworo Obaŋa, dok kwero tim luŋ areco. En onwoŋo tye awobe abiro kede anyira adek. Rommi mere onwoŋo tye tutumia abiro, kane tutumia adek, twoni pur tutumia acel, megi kane mia abic, kun daŋ tye omiro mere apipim. En onwoŋo twon lo moro adwoŋ meicel ame kato jo luŋ ame rik onwoŋo tye tutuŋ kide i kare-naca. A wobe mere rik onwoŋo tedo arama i udigi kun oleo alea, ŋat acel acel onwoŋo tye kede nino ame en tedo iye arama te lwoŋo omego mere luŋ iye, kun olwoŋo amegogi adek ca iye. Kare i kare ka nino me camo aramagi doŋ otum oko. Yubu cwao kwena lwoŋogi, eka te tiyo tic me lonyogi. En ya malo ibai, te yalo Obaŋa i mot awaŋa kun timo man pi ŋat acel acel i akinagi, pien Yubu rik onwoŋo tamo ni onyo ca awobe mere obalo balloro i kom Obaŋa i cunygi, Yubu rik bedo timo man kare ducu. Doŋ i nino moro acel omalaika Obaŋa obino i nyim Rwot, kun Catan daŋ tye i akinagi. Rwot te penyo Catan ni, “Yin kono iya i kwene?” Catan te gamo ni, “An aya rimo piny i wi lobo, kun awiwira gira iye kuno, adok tuŋŋi kede tuŋŋi.” Rwot dok te kobbi Catan ni, “Tye ginnoro ame itamo i kom amirona Yubu? Mom tye dano moro ame cal kede i wi lobo. En obedo dano ame mom i balloro dok cunye atira. Lworo Obaŋa, dok daŋ kwero tim luŋ areco.” Catan te gamo koppere ni, “Yubu lworo Obaŋa nononono ateni? Mom yin imio cel oguro kome oko tuŋŋi i tuŋŋi karacel kede jo luŋ me ode kede jami luŋ ame en tye kede? Yin ibedo miyo gum omake i kom jami luŋ ame en tio, limmere akwo-gu nya medde ameda i wi lobo. Koŋ irye ciŋi aman igud jami luŋ ame en tye kede-nono, me inen kite ame ico bino ceni kede!” Rwot te kobbi Catan ni, “Aco doŋ koŋ, an doŋ atyeko jalo jami luŋ ame en tye kede i te twerri cite kur igude en ikome.” Catan doŋ te ya oko i nyim Rwot. I nino moro acel onwoŋo awobe mere kede anyira mere tye acem i ot, awobi adwoŋ, kun daŋ otye omato koŋo olok kuno Akwena moro te bino baŋ Yubu, te kobbe ni, “Twonini onwoŋo woki tye apur kun kane daŋ tye acem i ŋetgi kuno; jo moro me Caba te bino mako omironi neko oko i pala lweny ote kolo twoni kede kane tero oko. An kena en ame abwot me bino titti koppere.” Ame en onwoŋo pwod akop, dano ocele dok te pello te kobbi Yubu ni, “Obaŋa ocwao lutkot ocelo rommi kede omironi oneko oko luŋ, an kena en ame abwot me bino titti koppere.” Ame en pwod akop ŋat ocele dok te pelo, te kobo ni, “Jo mogo me Kaldaya obino i dul adek ote mako omironi neko oko luŋ i pala lweny, ote yako inaga luŋ tero gigi oko, an kena en abwot me bino titti koppere.” Ame en pwod tye akop, dano ocele dok te pelo, te kobo ni, “Awobeni kede anyirani woki tye acem i ot omingi adwoŋ, kun daŋ omato koŋo olok; twon yamo moro adwoŋ meicel te bukoro i kom ot luŋ, kun oya i tuŋ tim, ot te rette oko i kom itinoni, aman gin luŋ oto oko, an kena en ame abwot me bino titti koppere.” Yubu oya malo te yeco boŋŋi mere i kome oko, te lyelo daŋ yer wie oko, orette piny te woro Obaŋa, kun kobo ni, “Rik adonyo nono iyi totta, abino daŋ dok i lobo nono. Rwot en omia dok en a daŋ okwanyo. Nyiŋ Rwot myero gire pak.” I kom gin otimere-ni luŋ, Yubu naka mom obalo kadi acel, akadi ŋolli obaŋa kop ni otimo ginoro arac. Doŋ nino moro ocele omalaika Obaŋa obino me bino cuŋ i nyim Rwot, kun Catan daŋ tye i akinagi me bino cuŋ i nyim Rwot. Rwot te penyo Catan ni, “Yin kono iya i kwene?” Catan te gamo ni, “An aya rimo piny i wi lobo, kun awiwira gira iye kuno, adok tuŋŋi kede tuŋŋi.” Rwot dok te kobbi Catan ni, “Tye ginnoro ame itamo i kom amirona Yubu? Mom tye dano moro ame cal kede i wi lobo. En obedo dano ame mom i balloro, dok cunye atira; en lworo Obaŋa dok daŋ kwero tim luŋ areco. Cunye gire pwod ler i koma kadi bed imia awune aboŋo ginnoro ame en obalo.” Catan te kobbi Rwot ni, “Del pi del! Dano twero jalo jami mere luŋ ame etye kede pi laro kwo mere. Koŋ irye ciŋi igud cogo mere kede riŋo kome me inen kite ame ico bino cenni kede.” Rwot te kobbi Catan ni, “Aco koŋ doŋ, an atyeko jale i te twerri, cite kur igud kwo mere.” Catan doŋ te ya oko i nyim Rwot te wot cako ticcere me wuno Yubu i lwak burrogo areco meicel cakere i cuny tyene piny tuno naka i wie malo. Yubu te kwanyo abaltak me gwenyo kome, te wot bedo i buru. Dako mere te kobbe ni, “Yin pwod ilido iye-ni me bedo i cuny aler i kom Obaŋa? Yet Obaŋa ame doŋ ito.” Cite en te gamo dog dako mere ni, “Koppi kom rom aroma i kop ame ya i dog mon amiŋ. Wan myero obed gamo ka gin aber keken i ciŋ Obaŋa mom ogamo gin arac daŋ?” I can man luŋ Yubu naka mom otimo balloro i kop a ya i doge. Kare ame owote a Yubu adek owinyo kop pi can man ame opoto i kom Yubu-ni, ŋat acel acel i akinagi obino baŋ Yubu, kun man ya i kan ame ebedo iye. Jonnono nyiŋgi ene: Erifaji dano me Teman, Bildad, dano me Cua, kede Jopar dano me Namat. Gin oyiko wotgi baŋ Yubu karacel, me wot nyuto cwercunygi baŋe kede kweyo cunye. Kare ame gin obolo waŋgi i kome kun pwod otye kannabor, mom oŋee, gin luŋ ote mwoco koko oko i dwon aloŋo, ote daŋ yeyeco boŋŋigi oko i komgi; ote juko kwoyo onyo i wigi malo. Gin te bedo baŋe kuno pi nino abiro, dyewor kede dyeceŋ, kun ŋattoro i akinagi mom oŋamo doge me kobbe kopporo pien gin onwoŋo oneno ni en tye kede twon rem adwoŋ meicel. Icennere Yubu en ame te geyo ŋamo doge kun ceno kede nino ame rik onywale iye. Yubu obedo koko kun kobo ni, “Nino ame rik onywala iye kono orwenyo oko, do ber, karacel kede dyewor ame rik oyaca i ye,” Nino-naca kono odoko acol icuc! Wi Obaŋa ame tye malo kono owil oko iye, kono lero moro mom omenyo kadi acel! Mutu kede colpiny kono omao nino-nono oko, pol kono doŋ obedo iye colpiny ocido icuc kono omio obedo iyiliyili. Dyewor oyaca iye kono doŋ ocido odoco, ame mom doŋ oromo bedo i yomcunnyoro iye, i akina ninne luŋ a tye i mwaka, me ŋol doŋ nyiŋe oko i akina nino ame tye i dwete luŋ. Dyeworrono kono mom onywalo iye atinnoro, meredo me yomcuny kur winyere iye. Wegi ceŋ kono oceno nino-nono oko, jo ame odiro i lwoŋo twon twol a ŋeo paŋere meicel. Acer luŋ ame ryeny i dyeworrono myero odok acol oko, myero dyeworrono kur lero kwe kono mom doŋ oneno ru-piny atwal. Pien rik mom ocego dog ot nywal a totta oko, mom daŋ oŋena neno ayela ame tye i kwo. “Piŋo kara rik mom ato oko kare ame onywala? Piŋo kara rik mom adonyo iyi totta keken ate to oko? Piŋo kara rik omio tyen ojola? Piŋo tuno aryo twal oye ni adotgi? Kono gire nyo atye abuto piny mot, kono nyo abuto gira piny, kono nyo awe gira oko, kono nyo atye gira karacel obakki kede omi-tam adoŋodoŋo me lobo ame rik ogegero udi mogo adoŋodoŋo pirgi, Kono atye gira karacel i rwode ame rik tye i jabu, ame ryal rik oyido i udigi ayida. Kono nyo oyika gira oko calo atin abwoggi calo itino ame mom oneno waŋ ceŋ, Ayela otim tim areco gik oko kuno, jo ame ol tye gigi oweo kuno, Obuc bedo gigi doŋ mot karacel kuno, kun mom dok owinyo dwon odoŋe a loogi i tic. Jo adoŋo kede atino luŋ tye kuno, opii i kuno nwoŋo doŋ ogonyo oko i te loc adwoŋŋere. “Piŋo Obaŋa medde menyo ŋat a tye i can; dok piŋo en mio ŋat a tye i ton cuny adwoŋ medde bedo kwo? Kodi jonnono kuro to, cite to mom bino baŋgi, gin obedo yenyo atek meicel akato lonyo ame okano. Dok ka ocop i kom lyel olelo meicel, kun cunygi yom okato kare. Piŋo Obaŋa medde menyo ŋat ame yo doŋ orwennye oko, dano ame doŋ otyeko guro oko i cel. Pien cucurana doŋ calo kwon ame acamo, aomo cunya doŋ bino tere i tere calo pii aony. Pien gin ame alworo en a dok bino i koma, gin ame mia twon lworo adwoŋ en ame poto i koma, Cunya mom gire pye mot, akadi liŋ mot, mom awe kadi acel, ayela bino teretere.” Erifaji dano me Teman te kobbi Yubu ni, “Ka ce adio cunya me kop kedi, cunyi bino waŋ? Ento ŋa ame twero liŋ nakanaka ame mom okobo kopporo? Nen ba, Yubu, yin yam ipwonyo jo apol meicel, imio ciŋ jo agoro onwoŋo teko. Koppi yam omio ŋat a kome a myel omedde cuŋ, dok imio jo ame coŋgi onwoŋo goro odoko atek odoco. Cite aman otuno i waŋeni mom doŋ iromo diyo cunyi, ogudi, omio cunyi doŋ oŋabere aŋaba. Lworo ame itye kede i kom Obaŋa, mom romo rwenyo par i cunyi? Ler a cunyi mom romo miyi ibedo kede gen? “Itwero po pi dano moro a mom i bal ame oto, ka ce ibolo waŋi i kare okato aŋec?” Onyo i kom jo moro a kitegi atira ame omio waŋgi orwenyo oko i akina jo turgi? Aco kite ame an aŋeo kede jo ame puro bal, te coyo koti me ayela nwoŋo daŋ can a rom, acalo gin ocek pi ticcere-nono. Yamo me weo Obaŋa en ame nekogi, awura me akemo mere en a tyekogi, Mor eŋatu, dwon eŋatu ager meicel, lak itino eŋatu otutura oko. Twon eŋatu atek to oko ka leyi emak me amwoda mere pe, itino a min eŋatu ke keta oko atata. “Kop man okwila akwila, yita ogiporo i kare ame amuŋo amuŋa. Obino kun tye i akina tam, i lek me dyewor, i caa ame nino mit kede wok-ki. Twon lworo moro adwoŋ omaka, koma te ero myel oko, cogona luŋ te cako daŋ yeŋere oko. Tipo moro te wito beo i waŋa, yer koma te ya luŋ irii, Icennere te cuŋ doŋ mot, cite callere te loya oko. Onwoŋo kono atye aneno cal ginnoro, kun piny oliŋ iti, icennere ate winyo dwon ame kobo ni, ‘Dano a to oko-ni twero bedo ame kite atira i nyim Obaŋa i yore aŋo? Dano twero bedo cil i nyim Ŋat Okete?’ Aco kono mom geno omiro mere ikome, omalaika mere-gu en nwoŋo bal i komgi. Kara doŋ jo ame komgi obedo lobo ata-ni kono, ame acakki tergi tye i kwoyo, ame jwero yot kato jwero nyenye oko-ni? Cakere odiko tuno naka otyeno nwoŋo doŋ otyekogi oko, orwenyo atwal ame ŋattoro mom dok paro pirgi. Dano gire calo kema ka oputo teke mere, to oko aboŋo ryeko moro.” “Koŋ doŋ ilwoŋ ba, tye ŋattoro ame twero gamo dogi? Kara tin ilokere baŋ ŋa ba, i akina jo acil? Ateteni, akemo mio amiŋo to oko, nyeko neko ŋat a mom i ŋeccoro. Waŋa otyeko neno amiŋo ame ocuŋ atek, cite aceno kan a en bedo iye oyot meicel. Yo moro me bwot mom tye pi itino mere, itino mere oneko oko i dogcel, ame ŋattoro a konyogi mom tye. Cem ame en okao jo a kec neko camo ata, gin okwanyo oko akadi tye i akina okuto, jo ame mitgi dwon okato kare laro lonyo mere. Pien can gire mom ya i piny iyi apua, ayela daŋ mom tu i lobo; ento dano gire onywalo pi ayela kite ame mac kir kede malo. “Aco kono an gira, kono ayenyo kony i baŋ Rwot, kono atero pekona baŋ Obaŋa, ame tio gigi mogo adoŋodoŋo ame tato tere tek, gigi mogo me awura ame pol ata. En mio kot cwe i lobo, cwalo pii i potti. Jo a piny en keto i kabedo i malo, tiŋo jo akumo bedo i kabedo aber. Tamoryeko me goba en balo oko, cobo ticgi te loyogi oko. En mio oryeko moko iyi owic me ryekogi en mio yik a jo a tamgi ogom balle oyotoyot. Piny odoko colligi kun ceŋ pwod tye, owoto ityamtyam i cuny dyeceŋ bala dyewor. Cite en laro itino kic oko i doggi, laro daŋ jo a piny oloo i ciŋ jo atek. Mannono omio ocan tye kede gen, otim jo cucu mio doggi oko. “Ŋat ame Rwot juko tye kede winyo, pi mannono, kur ica pwony a Won Twer Ducu ba, Pien en ka owani tweo waŋ kan cwano oko, en twero goyi cite daŋ caŋi oko. En bino lari i kom ayela apapat abicel, ginnoro arac mom doŋ twero gudo komi kadi i tyen me abiro mere. I kare me kec en bino larri oko, mom ito, i lweny en lari i teko a leb pala lweny, En bino gwoki i lyeto a kop ame ya i dog jo, bino miyo mom ilworo ka obino i komi. I kare me to kede me kec, yin ibino nyero giri anyera, mom daŋ ibino lworo lee moro ame tye i wi lobo. Pien yin ibino cikere i gweŋe ame tye i tim, leyi me tim daŋ bino bedo kedi i kuc. Ibino ŋeyo ni kemani tye aber, ibino roto awiini, ginnoro mom bino rwenyo iye. Ibino daŋ ŋeyo ni ikwai bino bedo apol, kun itino ame oya i komi pol calo lum i tim. Ibino to ame doŋ iteggo, kun komi pwod tek, calo bel ame otero wot dino i laro ka kare mere oromo. Nen ba, kop man wan otyeko yenyo tere, onwoŋo ni tye gire ateni. Winy ite mako daŋ me konyi.” Yubu te gamo koppere ni, “Kono onwoŋo otwero pimo akemona, dok daŋ oromo pimo can opoto i komani i mijan, do ber! Pien pekkere kono okato pek a kwoyo me dog nam oko, mannono en omio onwoŋo akobo kop atata. Won Twer Ducu doŋ ocobo koma oko atero mere, kwirgi olal otuno naka i cunya twal; Obaŋa doŋ okado koma luŋ i lworo mere, Kana me tim kok ka ce tye i lum? Twon kok ka cemmere tye i nyime? Cam abot twero camere aboŋo kado? Pig toŋ gweno kan atarrere-ni bille amit? Cunya okwerogi, mom mito agudgi kadi acel; gin luŋ calo cam ame lemo cunya. “Kono onwoŋo Obaŋa twero miya gin ame akwao; dok kono onwoŋo romo miya gin ame amito; kono Obaŋa oye neka oko, kono oyaro ciŋe te miyo waŋa rwenyo oko atwal. Kono otimere amannono kono cunya okwe, kono alelo meicel, kadi bed rem mom weka kare moro me weo pien an onwoŋo mom akwero kop a Ŋat Acil. Tekona kara rom mene, ame mia akuro nono? Kwona kara bino gik iŋo ba, me adi cunya? Koma tek calo kidi bo? Riŋo koma calo mola bo? Iyi ateni, an doŋ mom aromo konyere kena, ginnoro luŋ a myero konya doŋ oya oko i koma. “Ŋat ame kwero timo awottere kica, nwoŋo mom doŋ lworo Won Twer Ducu. Omegona, wegi adote calo pii i kulo, ame ka opoŋ, pii mere mol te two oko, orom aroma i pii ocido orubere kede pee, kan ame pee oya i wi kidi pono iye. I kare me oro orwenyo oko, ka piny lyet mom onen, Owot iyo weko yo me yenyogi, ocoro dye tim ote rwenyo oko. Owot ame oya i Tema bedo yenyogi, jo ame oya i Ceba bedo keto gengi iye. Gengi-nono kelligi cwercuny, lewic en a lunyo makogi ka otuno kuno, Wun aman doŋ irom wunu i kulli-nono baŋa, ineno wunu can opoto i koma, lworo te makowu, Onwoŋo akwao ni imia wunu mottere bo? Onyo akwao ru ijuk lonyowu icul wunu i muŋ me laro kwona? Akwao ni ilara wunu i ciŋ okworra bo? Onyo ni ilakoro wunu an i ciŋ jo ame wuna? “Pwonya wunu, me aliŋ iti, nyutta wunu bal ame atimo. Kop a ŋat ame genne tek meicel! Kara ajukewu konyo dano niŋo? Itamo ni itwero juko wunu kop ame akobo? Aco kop a ŋat ame piny oloo calo yamo, Iromo bolo wunu kwir i kom otino kic, kede loko owotewu doko gin me acata? “Tim wunu ber inena wunu, mom abino kobo kopporo me goba i nyimwu. Tim wunu ber, iwek tima wunu kittono ba, lok doŋ tamwu ba, pien kop mom romo loya. Tye kopporo ame akobo me goba? Mom aromo poko kop ame kela can bo?” “Kwo a dano i lobo rom i kare ame dano obedo kede i mony, kare me kwo mere rom aroma i kwo apakaca, Rom aroma opii ame mito bedo i tipo, rom aroma apakaca ame cunye bedo i kom ocara mere. Amannono doŋ, an otyeko miya dwete apol me bedo abeda, dyewor me kanyorem daŋ doŋ omoko oko pira. Ka abuto piny aparo pi kare ame abino ya iye, cite piny mom mito ru, abedo pwodde apwoda naka piny iter. Kudi kede cila onwoŋo omwone amwona i koma, del koma two te cako belle i tut. Nino acel acel dwir kato yat cweyo boŋo oko, nino acel acel kato weka i canna. “Po ru kwona rom aroma kede yamo, mom dok abino nwoŋo yomcunnyoro kadi acel. Ŋat ame onena mom dok bino nena, ibino ciko waŋi me nena cite mom ibino nwoŋa. Kite ame pol ket kede, mom te nen, amannono daŋ, ŋat ame donyo piny i lyel mom dok dwogo oko i lobo. Mom dok dwogo tuŋe kadi acel, ode daŋ mom dok romo ŋeye. “Pi mannono ba, mom abino liŋ, abino kop pien rem ocira oko, myero akobbi pien atye kede akemo. An abedo nam bo, onyo twon nyaŋ adwoŋ me kulo, omio yin imito ni ber kura akura? Ka akobo ni, ‘Kabutona bino kweyo cunya,’ onyo ni, ‘Rem koma bino kwe oko ka abuto piny,’ ento yin ibedo ryaryaŋo koma i lek atata, imio lworo bedo maka pi anyuttogo ame abedo neno dyewor, mannono omio amito ru kono odea adea, tika doŋ ato, kato bedo i rem kit man, Mom amito abed bedo kit man, mom amito ni abed kwo nakanaka, Weka gira abedi, pien kare me kwona calo yamo. Dano kara gin aŋo, omio pire litti wokkono, dok omio yin ibedo keto cunyi i kome. Piŋo kara ibedo lime kare luŋ, kun daŋ ibedo teme teretere. Ibino bedo nena kittono naka awene, kun mom iloko waŋi teŋe? Wekka koŋ kare moro me mwonyo lao ba. Ka ce abolo, nwoŋo atimo kara ŋo i komi, yin agwok jo? Piŋo kara ibedo bayo toŋŋi i koma kare ducu? Piŋo kara adoko twon yeccoro apek meicel baŋi? Piŋo kara mom itwero tima kica i kom balla? Piŋo mom ijwao balla oko? Pien aman doŋ abino buto piny lobo, ibino yenya cite ibino nwoŋo mom doŋ atye.” Bildad dano me Cua te cako gamo kop a Yubu kun kobo ni, “Kara ibino bedo kobo kop man naka awene ba, kun koppi calo twon yamo moro akodo atek meicel? Obaŋa mom ŋolo kop atira bo? Onyo Won Twer Ducu mom timo gin atye kakare? Ka ce itinoni obedo timo balloro baŋe, en doŋ otyeko miyogi ite loc a balgi-nono. Ka ce ibino woro Rwot, kun icwao kwacci baŋ Won Twer Ducu; ka ce yi cil, dok cunyi daŋ atira, en gire bino ya malo me konyi, en bino culli, bino miyo kabedo aber piri. Kadi bed rik con i kare ame icako, kwo acaka rik jamini nok, itwero pwod bedo i jami adwoŋ meicel i agikki me kwoni. “Tim ber koŋ ipeny kwariwa, me koŋ itam gin ame obedo timere i kom kwariwa, pien wan pwod otoco, mom oŋeo ginnoro, dok kare me kwowa i lobo man lokere calo tipo. Gin mom obino pwonyi ote kobbi koppogo, pien gin otye kede niaŋ atut meicel. “Aladu doŋo kan ame coto mom iye? Ogada doŋo aber kan ame pii mom iye? Gin two oyot meicel akato ginapita ocele ka pii pe, akadi pwod odoŋo adoŋa, kun daŋ mom otoŋo tergi. Mannono en gin ame timere i kom jo ame mom paro pi Obaŋa, gen ame ŋat a kwia Obaŋa tye kede ke nono. Gennere cot oko calo uci, gennere rom aroma kede boo otyatyam. Ka ojeŋere i kom ode mom romo cuŋ, ka ocwao ciŋe omako, mom daŋ romo cuŋ atek. Calo ginapita ame doŋo i kare ame ceŋ lyet, ame potgi lot wumo poto oko. Lwitgi dwalle i kom gweŋe, gin bedo i akina gweŋe. Ka oputogi oko i kakargi, kabedogi-nono kwerogi oko, kun okobo ni, ‘An yam mom ru anenowu.’ Mannono en gin ame timere i kom jo a mom paro pi Obaŋa, ka gin oya i lobo, jo ocele leo kakargi oko. “Nen ba, Obaŋa gire mom kwero ŋat a mom i balloro dok daŋ mom konyo jo areco. En gire pwod bino miyo inyero, ibino daŋ redo gire i yomcuny. Lewic bino ciro jo ame dagi oko, kema a jo areco bino rwenyo oko.” Yubu te gamo kop a Bildad ni, “Aŋeo ni kop ame ikobo tye kakare, cite dano twero loyo kop i nyim Obaŋa i yore aŋo? Ka ce ŋattoro mito pyem kede, Obaŋa twero penyo peny tutumia acel twal, nwoŋo dano mom ru odok i moro acel iye. Obaŋa ryek meicel i cunye, dok teko mere daŋ dwoŋ meicel. Ŋa a yam koŋ oero lweny kede te loye? En kobo kidi oko i kakargi kun gin mom oŋeo, kare ame en tye alolokogi akemo. En mio lobo yeŋere, eka te ya oko i kakare, en yeŋo anaka acakki te lobo luŋ. En ka ociko ceŋ, ceŋ mom donnyo, en twero wumo waŋ acer oko dyewor mom te ryeny. En opeto polo gire kene, te wot i wi pii nam atwagere. En otio gin ame olwoŋo Ajaraŋuu kede lwak acer abiro ocokere karacel, kede acer ocele ame olwoŋo ni Lyer-nino kede en ocele mere ame bedo i tuŋ anyarolum. En tio gigi mogo adoŋodoŋo ame tato tere tek, gigi mogo me awura ame pol atata. Koŋ inen, en ka obeo i ŋeta, mom aromo neno, woto naka kato kun mom aŋeo. En twero kwanyo ginnoro keken a yie mito aboŋo ŋattoro ame geŋe, mom tye ŋattoro ame romo penye ni, ‘Itimo ŋonnono?’ “Obaŋa gire mom juko akemo mere, jo ame rik konyo Rakab ryebere piny i nyime wore. Kara doŋ an aromo gamo koppere i yore aŋo, kun ayero kop ame myero apid kede i nyime? Kadi balla moro mom, mom gira aromo gamo doge, an myero ka akwa aŋolkop tima kica. Ka ce rik ogamo doga i kare ame alwoŋe, kono mom aye ni en onwoŋo obedo winyo koppa. Pien en obukoro i koma meicel calo yamo, bedo-gu medo bur i koma ameda aboŋo tyen kopporo. Mom weka kare moro me weo, kun mio cunya bedo waŋ awaŋa. Ka lweny me nyuto teko, myero inen gire Obaŋa! Ka ce akobo ni apide, ŋa kara ame twero lwoŋe? Kadi balla moro mom, kop ame ya i doga romo miyo kop loa, kadi bed an anen ni a mom i balloro, en nyuto oko ni an gire agak. An gira balla moro mom, mannono omio mom aparo, mom amito ni kono amedde bedo kwo. Ducu rom aroma, mannono omio an akobo ni, ‘Obaŋa jwero luŋ, jo a mom i bal kede jo obalo!’ Ka ce can opoto ame te kelo to atura, i kom ŋat a mom i bal, en nyero can ame opoto i komenono anyera. Obaŋa omio lobo iciŋ otim tim areco, en wumo waŋ oŋolkop oko, ka ce mom en, kara ŋa a doŋ wumo? “Kare me kwona doŋ dwir kato anwec oko; otwarre doŋ atwara, kun mom oneno ginnoro aber. Kare me kwona doŋ acunyo ŋwec acunya calo cur a lyao piny me yuto gi-acama mere. Ka akobo ni, ‘Wia gire bino wil oko i kom pekona, cunya te bedo ayom ame abwonyo kare luŋ. Pwod dok abedo kede lworo pi twon rem ame abeo iye, pien atamo ni mom ibino tera acalo ŋat a mom i balloro.’ Nen, ibino ŋolo kop loa, kara dok abedo lolle i tic piŋo? Mom doŋ konyo ginnoro kadi acel kadi bed alwokere kede pee, kun alwoko ciŋa-gu i cabun agwa meicel, pwod gire ibino bola i bur, boŋŋina i koma te kwera oko. “Obaŋa gire mom obedo dano calo an, ame mio an agamo doge, kono obedo dano kono opido kede oko. Mom tye ŋattoro ame twero ŋolo kop i akinawa ame romo keto ciŋe i komwa wan aryo luŋ, Mom tye ŋattoro ame romo geŋe keto can i koma, ame twero geŋo twon lworo adwoŋ ame atye kede i kome, ame mio akobo kop aboŋo lworo, an mom anenne kena kittono kadi acel.” “Adag gira doŋ kwona, mom abino weko koko kadi acel, abino gira kop, pien cunya kec meicel. Abino kobbi Obaŋa ni, Kur iŋol kop loa ba, kobba gin omio itye ka pyem keda, Nen aber baŋi ka itye ka wuna, kun icao kede tic ame yin komi itio, eka ite lunyo pwoyo tim otim areco? Waŋi rom i me a dano bo? Ineno kite ame dano neno kede jami? Kare me kwoni daŋ rom kede me a dano bo? Mwaka me rini i lobo rom kede me a dano, en omio yin itye ka yenyo bal i koma-ni me wek inwoŋ balla, Yin iŋeo ni balla moro mom, kun daŋ iŋeo ni mom dok tye ŋattoro ame twero lara i ciŋi. Yin en a yam icwea kede ciŋi, aman dok ilokere i koma me neka oko. Po ni yam icwea i lobo; aman dok idwoka iyi apua bo? Mom rik ionya oko calo cak, ite miya makere calo cak opoto? Yin gire en iburo koma i del koma kede riŋo, ite kokubo koma i ler kede cogo. Imia kwo kede mar a mom lokere, ibedo gwoka, imia abedo kwo. Kadi bed ibedo gwoko kop magi i cunyi, aŋeo ni man obedo gin ame yin en iyiko. Ka ce an abalo, yin gire nwoŋo ineno oko, cite mom iye weko balla kadi acel. Can i wia ka ce atimo ginnoro arac! Ka ce balla moro mom, mom daŋ atwero tiŋo wia malo pien lewic ocira gira oko, pien atye ka neno can ame tye i koma. Ka ce aporo tiŋo wia malo, yin nwoŋo itye ikiya calo eŋatu, kun itio ticcogo me awura i koma. Nen itye ka medde ameda me lweny i koma, akemoni i koma daŋ tye medde kare luŋ, itye ka cwayo mony apapat i koma. “Piŋo kara imia adonyo oko iyi totta? Kono rik ato gira ame ŋattoro mom ru onena, do ber, Kono rik ikwanya iyi totta naka i lyel, ate bedo calo ŋat a mom obedo tye. Kare me kwona i lobo mom gire aduno moro? Koŋ iweka ba, me abil yomcuny aduno moro ba, kun mom ru awoto kan ame mom dok abino dwogo iye cen, i lobo me mutu kede colpiny, i lobo ame col icuc dok jami iye ojebere atata, kan ame lero ceŋ rom aroma i colpiny.” Jopar dano me Namat te gamo ni, “Twon kop apol ame iduro-nono mom ogamo? Kop apol apola en a nyuto ni dano tye atira bo? Itamo ni koppi-nono twero miyo jo liŋ aliŋa? Koppi ame inywaro i jo anywaranono mom romo miyo omi lewic? Pien yin ikobo ni, ‘Pwonnya gire ber odoco, Obaŋa gire neno ni an acil.’ Cite kono Obaŋa onwoŋo twero kop kedi, kono oŋamo doge te kobbi kop i cunye! Kono onwoŋo oyabbi i muŋ apol me ryeko! Pien ŋeccere tut meicel. Myero iŋe ni can ame Obaŋa oketo i komi mom oromo poro kede bal ame yin ibalo. “Yin iromo ŋeyo ginnoro luŋ i kom Obaŋa? Iromo ŋeyo twerroro luŋ ame Won Twer Ducu tye kede? Tye malo meicel calo polo, kara yin itwero timo ŋo iye? Tut kato lyel me Ceol oko, yin iromo ŋeyo ŋo iye? Borrere kato lobo oko, laccere te kato nam oko. Ŋa ame twero geŋo Obaŋa ka ce en obino te mako dano? Ka ce olwoŋo dano i ka ŋolo kop, ŋa ame romo juke? Pien en ŋeo jo ame konygi mom, ka ce en oneno bal myero en kur tam pire? Dano amiŋ twero doko dano aryek ka kana me tim onywalo dano? “Ka ce iyiko cunyi obedo atira, ibino taŋo ciŋi baŋ ikwae; ka ce bal tye i ciŋi, bol doŋ oko teŋe kannabor, timmoro arac luŋ myero kur doŋ bed i udini. Ibino gire doŋ tiŋo wi malo aboŋo balloro i komi, mom doŋ ibino bedo kede lworo moro, dok daŋ ibino bedo kede tekcuny. Wii bino wil oko i kom peko ame ibeo iye, ibino po iye calo pii ame doŋ omol oko. Ibino doŋ bedo i kwo acil calo ceŋ aryeny i cuny dyeceŋ, kadi bed iwinyo ni itye i piny acol, cite pwod bino nen calo ka ibai. Ibino bedo ame cunyi opye, pien nwoŋo itye kede gen, Obaŋa bino gwoki, ibino we giri mot i kuc. Ibino buto piny aboŋo ŋattoro ame mi lworo, jo apol bino mito ni kono obedo calo yino Ento wan jo areco bino balle meicel, yo me bwot bino loyogi oko, obino doŋ paro to keken.” Yubu dok te gamo koppere ni, “Ateteni, wun gire itye wunu kede ŋec, ryeko luŋ aluŋa bino to kedwu, Cite an daŋ atye kede ŋec atut calo wun, wun gire mom iloa wunu. Kara ŋa a mom ŋeo kodi jaminie? An doŋ adoko gi-anyera owotena, an ame yam alwoŋo Obaŋa eka te gamo koppa, an ŋat a kitena atira, a balla-gu mom, adoko gi-anyera a jo. Jo ame komgi i gum cao jo ame komgi kec, ocoro jo ame tyengi ocer acera. Kuc gire tye i kema oyak, dok jo ame mio akemo mako Obaŋa tye gigi aber, jo ame obaŋagi obedo tekogi. “Koŋ ipeny leyi, gin bino pwonyi, peny daŋ winy me polo, gin bino titti. Jami ame lak alaka i lobo bino pwonyi, rec me nam bino tucci. Gin luŋ oŋeo aber ni Rwot en otio man, En loo jami luŋ, en daŋ a mio dano acel acel wee Yit dano mom ŋeo poko kop ame okobo, kite ame dano bilo cam kede doge. Dano ka oteggo ryek, perakino i lobo mio dano bedo kede ŋec atut. “Obaŋa tye kede ryeko kede twer daŋ, tye daŋ i ŋec atut kede tam atut. Ot ame en oreto piny, ŋattoro mom dok romo gero, ŋat ame en ocego i ot, ŋattoro mom yabo, Ka en mom omio kot ocwe, pii i lobo dwono oko, aco ka omio ocwe, pii poŋ lapakino atata i lobo. En tek dok daŋ ryek, abwol jo kede jo obwolo daŋ obedo mege. Omi-tam adoŋo en tero oko onoro, en mio oŋolkop doko omiŋo. En gonyo jo ame obakki otweo i buc, en lunyo tweyo boŋŋi i pyer obakki, En tero olamdog daŋ onoro, kun reto wegi twer piny. En two dog jo ame ogeno oko, kun rwenyo ŋec atut ame odoŋe tye kede oko. En mio jo cao rwode, dok mio jo atek doko agoro, En mio muŋ i kan acol nen oko kannaler, dok mio kan acol icuc doko aler oko, Twero miyo rokkoro-ni doko twon rok adwoŋ meicel, dok twero daŋ jwero oko, twero miyo rokkoro-ni doko rok atek dok twero wekogi ata, En kwanyo ŋec otel a lwak oko, miogi owoto i tim ata, kan ame yo pe iye, Miogi oboŋo yo aboŋa aboŋo lero moro, kun ogatte calo jo omer koŋo.” “Nen ba, an atyeko neno magi luŋ, awinyo dok daŋ aniaŋ. Gin ame wun iŋeo wunu, an daŋ aŋeo, wun gire mom iloa wunu. Cite amito ni kono akobo koppa baŋ Won Twer Ducu, amito akob koppa-ni wan Obaŋa. Aco wun iwumo wunu kop ateni kede goba, wun luŋ ibedo wunu daktal ame konywu mom, Onwoŋo myero iliŋ wunu aliŋa, mannono bino miyo inen wunu calo jo aryek. Koŋ doŋ iwiny wunu gin ame an akobo, cik yitwu i pidona. Ibino kobo wunu kop goba pi Obaŋa, kun ibedo bwolo wunu jo abwola? Wun ibino dworo wunu Obaŋa, kun ipido wunu pire? Itamo ni ibino bedo wunu aber ka ce en ocako ŋiyowu? Itamo ni itwero bwole wunu kite ame ibwolo wunu kede dano? En gire bino jukowu, ka ce itye wunu kede apokapoka i cunywu, Kwogo mere mom myelo komwu, mom mio lworo makowu ce? Carokop ame ikobo wunu calo buru, kop ame ipido wunu goro calo lobo ame ŋidde oko-ni. “Koŋ iliŋ wunu, me ate kop, me gin ame mito bino i koma bin, Abino camo tona i doga, ate jalo kwona oko, An mom doŋ atye kede gennoro, en gire bino neka, kadi bed amannono, pwod abino kobo kop. Tekcunya en ame bino miya aloo kop i kom kitena i nyime, pien dano a mom ŋeo Obaŋa mom tuno i nyime. Ter yitwu iwiny wunu koppa aber meicel, me gin akobo dony i cunywu, Nen, atyeko doŋ yiko pidona oko, aŋeo ni abino loyo kop, Ŋa ce ame bino pyem keda kuno? Ka ce tye, abino liŋ gira aliŋa naka ka ato. “Ama Obaŋa, tim ber itim pira jami aryo keken, me kur daŋ arweny i nyimi; kwany doŋ ciŋi oko i koma ba, dok kur imi koma bed myel pi lwori, ne mannono, ite doŋ lwoŋa me agam dogi, onyo iye an akob kedi, yin ite gamo koppa, Rocca kede balla tye ce adi? Tim ber inyutta balla kede cikki ame aturo. Piŋo kara doŋ iponna oko? Piŋo itye ka tera calo akworri? Imito miyo lworo mako pot boke ame yamo akolo, onyo ryemo yo cuŋ kal otwo? Pien ityeko coyo kop akec meicel i koma, kun ipidda pi bal luŋ ame atimo i kare me tinona. Irwako tyena oko iyi kol, itye ka nena i kabedo luŋ ame awoto iye, itye ka pimo kan a tyena onyono ducu. Imio doŋ arom aroma kede gin otop, onyo boŋo ame nyenye otutuco.” “Dano ame dako onywalo kare me kwo mere nok, dok ayela mere dwoŋ, En bino calo atura te ner oko, mom medde ri nakanaka, ento rwenyo oko calo tipo. Piŋo yin daŋ dok iciko waŋi i kom kodi dano-nono, ame imito kele i nyimi me ŋolle kop? Ŋa ame twero miyo gin acil ya i kom en a mom cil? Mom tye ŋattoro kadi acel. Pien kare me kwo mere doŋ omoko oko, yin doŋ iŋeo dwete ame iŋolle, kare ame kwo mere bino gik iye doŋ imoko oko, ame mom dok romo kato. Koŋ ilok waŋi teŋe, me iwekke kare ba, me en tyek kare mere i kuc acalo atic ame tio pi ocara. “Tika yat kadi otoŋo oko pwod bedo kede gen, pien pwod dok twero lot, bedo lot nakanaka mom gik. Kadi bed lwite woto kun ti oko lobo, kun iciki mere oto oko piny, ento ka oŋweo ŋwec pii doko atek oko, jaŋe te cako jany calo yat a pwod opito apita. Ento dano to te buto piny atwal, ka weo me kwo mere oya, agikki mere daŋ ennono. Kite ame pii tum kede oko i nam, kede kulo ame pii iye dwono te two oko, amannono daŋ, dano buto piny atwal mom dok te ya, mom dok co tuno ka polo doŋ bino bedo pe, mom daŋ otwero coyo te co i waŋ nino mere. Kono ikana oko i lyel me Ceol, kono ber; kana kuno naka ka akemoni doŋ okato oko; kono imoko karena me bedo kuno, ite bino po pira doki! Ka dano oto oko, pwod dok bino bedo kwo? I kare me ticca luŋ an abino bedo kuro gire, tuno ka kare me gonya i doge oromo. Ka ce ilwoŋa, abino gamo dogi, yin gire ibino mito neno tic me ciŋi atek. Icennere yin doŋ ibino bedo neno kan ame awoto iye, cite mom ibino bedo neno balla. Ibino tweyo balla oko iyi icao, ibino wumo wi rocca luŋ. “Cite kidi rette piny, te ŋidde oko, gweŋ daŋ otwero kobo oko i kakare, pii daŋ naŋo gweŋe tyeko oko, alele kot daŋ molo lobo oko; yin daŋ amannono, ibalo gen a dano tye kede oko, Ibedo loye nakanaka, tuno ka en oto, imio waŋe balle, ite doŋ ryeme oko, Itino mere bino doko jo me awora kun en doŋ mom ŋeo, okwanyo ditogi oko, kun en mom niaŋ ginnoro iye. En bedo winyorem ame tye kome keken, kun bedo kumo pire kene.” Erifaji dano me Teman dok te gamo ru, “Dano aryek bedo gamo kop a tere mom, kun bedo kako ka yamo ame ya i tuŋ kide keken? Bedo pyem nono kop ame konnyere pe, onyo i kop ame en mom romo timo ginnoro iye? Nen imiyo jo akwero lworo Obaŋa oko, dok itye ka geno jo me lwodo kop i cunygi i nyim Obaŋa oko, Pien balli tye ka miyo dogi bedo alim, itye ka yero kop ame oryeko a bwolo jo tio kede, Koppi gire en ame tye ka ŋolli kop, mom an, kop ame ya i dogi en a tye acalo caden i komi. “Yin en ogeo nywali bo? Onyo ca onywali con, ame Obaŋa mom ru oketo kidi? Yam ibedo winyo gin Obaŋa tye ayiko ce? Onyo yin itamo ni yin keken iryek? Ŋo ame yin iŋeo ame wan mom oŋeo aber? Ŋo ame yin iniaŋ iye aber, wan mom oŋeo aber? Ŋat a wie obuko lwar kede ŋat oteggo, gin luŋ otye i akinawa, ame gin jo ame mwakagi bup kato me a pappi oko. Kop ame Obaŋa kweo kede cunyi mom romi bo, onyo koppere ame en kobo mot amota-ni? Piŋo kara cunyi tye ka wayi teri teŋe? Piŋo waŋi oballe? Piŋo akemo tye ka maki i kom Obaŋa, kun imio kodikoppono donnyo i dogi? Dano kara obedo gin aŋo ame mio twero bedo acil? Onyo ŋat ame dako onywalo twero bedo ŋat a kite atira i yore aŋo? Nen ba, Obaŋa mom geno jo mere acil, akadi polo-gu mom cil nyime kadi acel. Kara doŋ dano kono, en ame dano oballe calo doŋ gin ame kwer-ri, dano ame bal mitte calo pii amata-ni? “Winy koppa me anyutti, gin ame aneno daŋ abino titti oko, karacel kede gin ame jo aryek kobo, gin ame kwarigi mom okano acalo gin me i muŋ, ame lobowu rik omio baŋgi gin kengi; ame arokkoro mom beo i akinagi. Atim tim arac pwodde i rem kare luŋ me kwo mere, pi mwakki luŋ ame omio ŋat a mom i kica, En bedo winyoredo mogo ame winyo lik, kare me kuccere en ame ayak bino kede i kome, En mom twero ye ni dok ebino ya i kan acol, pien en ŋeo ru otye ka libe i pala me neke, En bedo rimo piny pi yenyo cam, kun penyo ni, ‘Tye kara kwene ba?’ En ŋeo ni to doŋ tye akure akura, Peko kede can bedo myelo kome kare luŋ, oloc calo abaka ame oyikere me lweny. Pien en oryeo ciŋe me lweny Obaŋa, oyiye ni eromo lweny i Won Twer Ducu, kun riŋo apala apala me wot lweny kede, i twon kwottoro apek meicel. Moo onwoŋo owumo kome oko, pyere daŋ onwoŋo moo keken. En obedo bedo i boma mogo ame oweko i wi obur, kun bedo i udi ame dano mom opore bedo iye, udi ame doŋ tye ka pi wi obur. En mom bino bedo alonyo kadi acel, lim atye i ciŋe mom bino perakino, dok mom bino cuŋ atek acalo yat ame lwite odonyo piny lobo, En mom bino bwot kadi acel colpiny, en bino rom aroma i yat ame lyeto mac otwo pote oko, kede yat ame yamo oonyo ture oko. En myero kur gen bwo ŋor, kun bwole kenekene, pien bwo ŋor en ame obino cule kede. Obino cule oko, kun kare me culle mom ru oromo, bino bedo calo yat ame pote mom olot. Dok bino bedo calo olok ame nyige oony oko, onyo jeituni ame ture oony oko kun mom ru ocek, Pien jo a mom ŋeo Obaŋa rom aroma i dako oraŋa, mac waŋo kema a ŋat ogamo lim owile kede i mun oko, Gin oyaco tim me bal ote nywalo can, obedo yiko kop goba i cunygi.” Yubu dok te gamo ni, “Atyeko winyo kodikoppono apol meicel, wun luŋ ibedo wunu okwe cuny ame medo ka cwercuny, Kop ame obedo yamo ata-ni twero gik bo? Onyo ŋo atugo cunywu omio ibedo gamo wunu doga? An daŋ onwoŋo atwero kop bala wun, kono onwoŋo wun itye wunu kite ame atye kede-ni; onwoŋo atwero kobo kop apol meicel i komwu, kun ayeyeŋo wia i komwu, dok onwoŋo atwero kobo kop me cukoro cunywu; rem i komwu onwoŋo twero kwe oko pi kop alim ame akobbiwu. “Ka ce an akobo kop, rem i koma mom kwe; ka aliŋ, rem i koma bedo aberber bo? Ateni, Obaŋa doŋ otyeko tekona odoco, ojwero jona ducu, En doŋ otyeko maka oko, odoko daŋ acaden me nyuto balla; jonya-ni doŋ odoko akworra oko, kobo doŋ koppere me caden i nyima. Yie okwera, akemo te miye kikilo an calo lee, okao lake meicel i koma, okworra yabo waŋgi i koma calo dano opako toŋŋere me neko lee. Jo oŋamo doggi i koma, ote doŋo lema apala apala, ocokere karacel me lweny koma. Obaŋa doŋ otyeko miya i ciŋ jo a mom ŋec, obola i ciŋ jo areco, Onwoŋo abedo gira mot, cite en ocanya piny te dada oko, omaka i ŋuta te ŋiŋido an atitino. En obedo cobo koma i toŋŋere, wegi atero mere ogura oko dyere, Oryeko aŋalurana oko aboŋo kica, te onyo pig epiona oko piny. Onukino keto can i koma meicel, kun riŋo i koma calo cirikale. Ate lunyo kwoyo doŋ puko me arukana, tekona luŋ doŋ te buto iyi apua amwa-ru. Koko doŋ omio waŋa obok pee, aco pyen waŋa doŋ ocido icuc, kadi bed mom adwaro kolo kadi acel, dok balloro gire mom i kwacca. “Yin lobo we, tim ber kur iwum remona, wek kokona kur nwoŋ kannoro me weo, Kadi bed aman acadenna tye i polo, dok ŋat ame cuŋ pira tye malo. Owotena doŋ caa acaa, pig waŋa cwer i nyim Obaŋa, ni kono en epido pira, ka acuŋ nyime, kite ame dano laro kede pi awottere. Pien ka kare me kwona doŋ otum, abino wot kan ame mom dok abino dwogo iye.” “Cunya doŋ goro meicel, kwona doŋ ceggi tum, lyel doŋ tye akura akura. Ateni, wegi anywar doŋ ogura oko dyere, waŋa tye ka neno kite ame akemogi lyetto kede i koma. “Yin ikorui myero icuŋŋa, kara ŋa i kuno ame romo cuŋŋa? Kite acalo yin mom iyabo tamgi me oniaŋ, pi mannono mom ibino miyogi oloa, Ŋat ame kobo kop me erupe i kom owote mere, me enwoŋ ginnoro i kom jamigi, waŋ itino mere bino rwobere oko. “En omio nyiŋa doŋ odoko me aceka a jo, an doŋ adoko dano a jo ŋulo lao i nyime. Kumo omio waŋa doŋ ocido oko, dul koma luŋ doŋ calo tipo. Man omio jo ame cunygi atira owuro meicel, ŋat a mom i balloro cako mwomere i kom jo a mom ŋeo Obaŋa. Cite ŋat a kite atira medde mere i kite mere, ŋat a balloro mom i cunye teko mere medde ameda. Ento wun luŋ, koŋ ibin wunu, mom gire abino nwoŋo dano moro aryek. “Karena doŋ okato oko, gin ame cunya mito, a yam ayiko doŋ oturo oko, Gin loko dyewor doko dyeceŋ, kun okobo ni, ‘Lero ceŋ ceggi i piny acol.’ Ka ce aneno lyel me Ceol acalo oda, ka ce apeto kabutona i colpiny, ka akobbi i lyel ni. ‘Yin ibedo pappa’, kede kudi ni, ‘Yin i totta onyo aminna’, kara doŋ gen ame atye kede-nono tye kwene? Ŋa ame bino neno gin ame atye i gen iye-nono? Bino wot keda naka i lyel piny bo? Obino yito piny iyi apua karacel bo?” Bildad dano me Cua te gamo dok kun kobo ni, “Ibino yenyo kop me akoba naka awene? koŋ itam ba, eka ote cako dok kop kedi, Piŋo itye ka terowa calo leyi? Piŋo itye ka nenowa calo jo amiŋ? Yin ame akemo mio ikikilo komi calo eŋatu-ni, myero wek lobo doŋ nono piri bo? Onyo myero kob kidi oko i kakare? “Nen ba, tara a jo areco obino neko oko, acara maccere mom bino menyo piny. Mac iyi kema mere bino nen ribiribi, tara ame oŋabo i wie malo bino to oko. Bayo awottere bino jwik oko gin ame en ikome eyiko en a bino rete piny. Owic bino mako tyene, onyo bino poto i bur ame ociko me mako lee, Boo bino mako opuny tyene, en bino moko i owic, Obino cike kede tol i lobo piny, obino cike owic i waŋayo. Lworo bino make tuŋŋi kede tuŋŋi, bino lubo yore i kabedo luŋ. Kec bino nuye oko, can-gu nwoŋo tye akure akura tekki agatte. Two bino babalo del kome oko, too arac meicel bino ŋuŋuno del kome oko. Obino waye oko i kema mere ame yam egeno, ote tere baŋ abaka ame jo luŋ lworo. Jami a mom mege en ame bino bedo i kema mere, obino onyo gwen calufa paco mere. En bino bedo calo yat ame lwite otwo oko, kun jaŋe daŋ oner oko. Mom dok obino po pire i lobo, mom daŋ obino kobo nyiŋe dye yo, Obino core i kannaler, ocwae kannacol, kun oryeme oko i wi podo. Atinnere onyo akware mom bino bedo tye i akina jo mere, ŋattoro mom bino doŋ akwo kan a yam en bedo iye. Gin otimere i kome bino miyo lworo mako jo i tuŋ to, lworo bino mako jo i tuŋ kide daŋ. Paco a jo a mom ŋeo Obaŋa gire bedo amannono, ŋat a kwia Obaŋa gire bedo kodi kabedo-nono.” Yubu dok te gamo kop, kun kobo ni, “Ibino bedo wuna wunu naka awene ba, kun ibedo olo wunu koma i kop atata?” Aman doŋ iŋala wunu odoko tyen apar twal, lewic mom makowu ce me bedo tima wunu rac? Kadi bed an arwenyo ateni, balla gire bino maka an kena. Ka ce ibedo dwore wunu kenwu i koma, kun ikobo wunu ni rem ame oketo i koma-ni cimo ni an abal, myero iŋe wunu ni Obaŋa en omio kop loa, en oburo koma oko kede boo mere. Nen ba, kadi bed akok ni oneka oko, mom ogamo doga, kadi ared areda i lwoŋo, ŋat a ŋolo kop atira bedo pe, En gire ocega yo oko ame mom aromo kato, en omio yoe luŋ akono abe iye odoko acol icuc. En otyeko kwanyo kwogona oko, te kwanyo tok kwogo daŋ oko i wic. En doŋ otura odoco, atum doŋ aber, oputo gen ame atye kede oko calo yat oputo, Omio akemo omake meicel i koma, te tera acalo okworrere. Monnyere luŋ ociro karacel i koma, otoro lobo ogura kede dyere, ote guro gonygi guro kemana oko. “En omio omegona doŋ tye kannabor meicel, jo a yam ŋea doŋ opokere deka oko. Watina kede owotena a yam mara, gin luŋ doŋ obola oko; wele mogo a yam obedo i oda doŋ wigi owil oko i koma; aŋecana luŋ doŋ nena calo welo moro ata, onena doŋ acalo arokkoro, Ka alwoŋo amirona mom doŋ gamo doga, myero abak doga abaka baŋe. Dakona mom doŋ mito ŋweyo doga, omegona ame odonyo kedgi acel mom doŋ mito ŋweyo ŋwec koma. Naka itino atino doŋ caa acaa, ka aya malo, gin okobo kop arac i koma. Owotena a yam mara atek daŋ doŋ obola oko, jo mogo a yam an amaro doŋ olokere oko i koma. Riŋo koma kede del koma doŋ omakere ipa i cogona, del doga keken en a doŋ odoŋ. Owotena, kica myero makwu i koma ba, pien Obaŋa doŋ omio ciŋe ogudo koma oko. Piŋo itye ka lubo wunu yora calo Obaŋa? Piŋo riŋo koma mom romowu? “Kop ame akobo-ni kono onwoŋo ocoo oko piny, do ber! Kono onwoŋo ocoo oko bukkoro! Kono ogoro kom alam nyonyo kom kidi, ote mwono me bed iye atwal. Pien aŋeo ni ŋat a lakoro an tye kwo, waŋŋoro bino cuŋŋa i wi lobo. Kare ame del koma doŋ oballe oko, kit man-ni, abino gire neno Obaŋa aboŋo del koma-ni. Abino nene en ikome kun en tye ocuŋ i ŋeta, Cunya dok opoto meicel! Ka ce ikobo wunu ni, ‘Kara obino ryemo yore nino?’ kede ni, ‘Te kop ikokome nwoŋere baŋe; myero ilwor wunu pala romo, pien akemo en a kela lweny pala romo, me iŋe wunu ni ŋolo kop tye.’ ” Jopar dano me Naamat te gamo ni, “Mannono omio agam koppi, tima kica ka atamo ni myero ce mom adio cunya. Abedo winyo kop ame mom romo kannyere, kit ame aniaŋ kede, omio abedo tamo i cunya kite me dok iye. Mom ce iŋeo ni cakere con meicel, i kare ame oketo dano i lobo, ni lelo a lo atimo tim arac mom ri kare alac, dok yomcuny a dano a mom ŋeo Obaŋa bedo me kare anonokkoro? Kadi en odoŋo abor naka i polo twal, kadi bed wie ogudo pol, en bino to atwal calo cettere, jo ame rik onene bino penyo ni, ‘En kara tye kwene?’ Bino rwenyo oko calo lek, mom dok te nwoŋere, obino ryeme oko calo gin onyuto i waŋ lek dyewor. Jo ame onene mom dok bino medo nene atwal, naka kan a en bedo iye mom daŋ bino nene. Otino mere bino yenyo kony i baŋ ocan, lonyo mere bino ya oko i ciŋe te doŋ oko i lobo. Cogo mere bino nwoŋo pwod tek ata calo me awobi, cite obino yike i teko mere-nono iyi apua. “Kadi bed timo gin arac lim doge calo kic, kadi bed ekan i te lebe, ‘kadi mom emito ŋulo oko, cite medde gwoko i doge, cite cam i yie bedo lokere i ciŋ yie kuno, te lokere doko akec calo kwir twol.’ En mwonyo lonyo mere donyo yie, icennere te dok noko oko, Obaŋa cwaogi oko i yie. En bino naŋo kwir a codocodo, leb ororo en a bino neke, En mom bino medde neno kulo moro, kulli ame moo kic mol iye amola kede cak opoto. En bino dwoko gin ame en onwoŋo pi ticcere oko, mom bino mwonyo donyo i yie; mom bino yomoro cunye i ginnoro ame oya i cattere, Pien odio ocan te wekogi ata, omao ot ame en mom ogero. “Pien en owor meicel, mom twero weko ginnoro a cunye omito. Mom twero camo cam te weko doŋ, mannono omio gummere mom bino perekino. I kare ame en tye i jami mere a rome, nwoŋo pwod mito en ocele, peko bino bino i kome i teko mere luŋ Obaŋa bino coro akemo mere agwa i kome, bino miyo cwe i kome calo kot akaka cammere, te poŋ yie doŋ odoco, En bino riŋo ariŋa i lak nyonyo me lweny, atero mola bino cele pel apela Bino donyo i kome te pelo i yo ŋec, lebe aryeny aryenya bino donyo i remo itao mere, twon lworo adwoŋ meicel bino make. Piny acol icuc tye akuro lim akana mere akura, mac a mom dano en okuto bino waŋe oko, gin odoŋ i kema mere obino jwero odoco. Polo bino yabo ballere kannaler, lobo bino twarre i kome me pide. Pii bino tero jami ode oko, bino wayo, tero oko i nino ame akemo omako Obaŋa, Man en gin ame Obaŋa opokki i lo arac, gin ame Obaŋa ociko ni myero en le me bedo mege.” Yubu dok te gamo ni, “Winy wunu koppa aber, ikwe wunu cunya i mannono, Di wunu cunywu, me akeb kedwu, me imedde wunu nywara ka doŋ atyeko kop, Itamo wunu ni atye ka kok i kom dano bo? Ŋo amona diyo cunya? Koŋ inena wunu, lworo bino makowu, ibino mako wunu dogwu pira. Ka aparo pire, cunya poto meicel, koyo daŋ te onyere oko i koma, Piŋo jo areco bedo kwo, kun daŋ tekogi medde ameda? Itinogi doko jo adito kun pwod okwo, ikwaegi daŋ doŋo kun gin oneno. Udigi bedo i kuc aboŋo lworo moro, lut Obaŋa mom gudogi. Twonigi atepo bedo nywal anywala kun tekogi mom dok piny, megi dokgi daŋ mom bwogo. Itinogi ciro calo rommi, ka owot tuko. Owero ajaa kede opuk, cunygi yom ata ka okuto nyamulere. Karegi luŋ opoŋ i gum keken, naka odonyo piny i lyel me Ceol i kuc. Gin okobbi Obaŋa ni, ‘Ya oko i baŋwa! Wan mom omito ŋeyo gin ame yin imito. Won Twer Ducu kara obedo ŋa, ame myero owore-nono? Dok onwoŋo ŋo ka wan okwae?’ Kara mom gumgi-nono tye pirgi kengi, an mom aromo gamo tam a jo areco kadi acel. “Tara a jo areco obedo neko pi kare aŋo? Ame can te poto i komgi? Ame Obaŋa te, miyogi bedo kede rem? Eka ote bedo calo reŋ kal ame yamo kolo, onyo acalo cuŋ kal ame yamo kolo? Wun ikobo wunu ni Obaŋa kano rocgi pi itinogi. Myero en culgi gin ikomgi, me oniaŋ iye. Myero gin onen can ame opoto i komgi kede waŋgi, myero gin daŋ obil akemo a Won Twer Ducu. Kara ŋa ame gin dok paro i kom kwacgi ame odoŋ i ŋegi, ka dwete me bedogi i lobo doŋ ogik oko? Ŋa ame twero pwonyo Obaŋa me bedo aryek, kun en ŋolli jo a tye malo i polo kop? Jo mogo ame pwod tekogi dwoŋ ata, ame otye aber i kuc, kun komgi moo keken, dok amurogi oŋwel olil alila, ento jo ocele to ame cwercuny ociro oko, kun mom obilo ginnoro aber me lobo. Obuto piny iyi apua, kun kudi omwono komgi oko. “Nen ba, an aŋeo tamwu, kede yikwu me timo gin arac koma. Wun ibedo penyo wunu ni, ‘Ot adwoŋ kara tye kwene? Kema a yam jo areco bedo iye tye kwene?’ Mom ibedo penyo wunu jo ame beo iyo, mom ibedo gamo wunu koppogo ame gin ko bo iyo, ame kobo ni dano arac otwero weko i nino me can, dok ni otwero laro oko i kare me akemo, Ŋat ame twero yabo kite luŋ kannaler, dok ŋa a twero cule pi gin ame en otimo? Ka-ce okano kome i bur, jo bedo kuro lyellere akura, Lobo ame tye i luŋ mitte meicel, jo luŋ ciro lubo yore, lwak jo-atelo nyime mom kwanne, Kara doŋ wun itwero kweyo wunu cunya i kop a tere mom? I kom kop ame ibedo gamo wunu luŋ, mom tye ginnoro iye kadi acel kono goba keken!” Erifaji me Teman dok te gamo ni, “Dano twero konyo Obaŋa i yore moro? Iyi ateni, ŋat aryek konyere kene. Ka ce kiteni atira, mannono twero miyo Won Twer Ducu bedo i yomcunnyoro. Onyo en twero nwoŋo ginnoro ka ce balloro mom i komi? Itamo ni en tye ka juki pien ilwore, me wek ecak ŋolli kop oko? Balli mom dwoŋ atek bo? Balli ka agikki mere mom. Pien imio omegoni ocikere nononono, dok igonyo boŋo oko i komgi ote doŋ onoro, Mom imio pii amata baŋ jo ool, itwono jo ame kec oneko kwon me acama, Jo atek keken en onwoŋo tye kede lobogi, kun jo ame jo pwo keken en a bedo iye. Mon a coggi oto iryemo woto cingi nono, ituro-gu bad itino kic oko. Mannono omio owic tye oguri oko dyere, twon lworo adwoŋ te ru maki oko, leroni odoko acol oko, omio mom iromo neno piny, pii te mol mwonyi oko. “Obaŋa mom tye malo i polo? Koŋ inen acer ame tye malo kuno kite ame beco kede. Mannono omio itye ka kobo ni, Obaŋa kara ŋeo ŋo? Dok ni itwero ŋolo kop i kan acol bo? Pol ocido wumo kome oko, ame mio en mom twero neno piny. En woto naka i lak polo. Pwod itwo giri atwoa i yo acon, yo ame jo otim tim areco bedo lubo? Rik obin occogi oko kun karegi mom ru oromo, acakki tere ame gin ocibo pii omolo oko. Gin okobbi Obaŋa ni, ‘Ya oko i baŋwa’, dok ni, ‘Ŋo ce ame Won Twer Ducu twero timo i komwa?’ Kadi amannono, en mio jami abeco poŋ i udigi, an mom aromo gamo tam a jo areco kadi acel. Jo a kitegi atira neno i yomcuny, jo a mom i balloro nyerogi apala apala, kun okobo ni, ‘Omio doŋ nyiŋ okworwa orwenyo oko i wi lobo, gin ame gin oweko mac owaŋo oko.’ ” “Note Obaŋa, me ibed i kuc, bino miyo gin aber bino i ciŋi. Gam pwonnyere, gwok kop a en okobbi i cunyi. Ka ce idwogo baŋ Won Twer Ducu kun ibedo mwol nyime, ka ce mom iye kite a mom atira obedo i kemani luŋ, ka ce iketo jabu piny iyi apua, kede jabu me Opir i akina gweŋe i cuny kulo, dok ka Won Twer Ducu en a tye acalo jabuni, kede ryalli ame imaro meicel, cunyi bino bedo yom i kom Won Twer Ducu, ite tiŋo waŋi malo baŋ Obaŋa. Yin ibino kwaye, en bino winyo kwacci, yin ite cobo kwoŋ a rik ikwoŋo. Ginnoro luŋ ame ibino timo bino cobere aber, nyimi bino bedo aler. Pien Obaŋa dwoko jo ame wakere piny, cite en laro jo amwol. En laro jo a mom i balloro, en bino lari pien ciŋi cil.” Yubu dok te gamo ni, “Kokona tin daŋ pwod kec, kadi cur ocira oko, ciŋe pwod onua oko. Kono onwoŋo aŋeo kan ame myero anwoŋe iye, ame twero miyo awoto naka kan a en bedo iye, do ber, Onwoŋo atwero pido koppa i nyime, ate rado koppa luŋ i nyime. Onwoŋo atwero winyo kite ame en twero gamo kede koppa, ate niaŋ gin ame en bino kobba. En kono opyem keda i twerrere luŋ? Pe gire, en kono oketo cunye i winyo koppa. Ŋat ame kite atira onwoŋo oromo laro kede kop kuno, aŋol koppa kono omio aloo kop atwal. “Nen, an awoto anyim, cite en mom tye kuno, adok-gu ceŋ, mom atwero nwoŋe, Ayenye naka i ciŋa tuŋ cam, mom atwero nene, alokere tuŋ cem daŋ, ento mom aneno, Cite en ŋeo yo ame an alubo, ka ce en otema, abino wok odoco calo jabu, Tyena doŋ omoko oko i yore, abedo lubo yore keken kun mom agak teŋe. Mom aweko gwoko cik ame en ociko kede doge, kop luŋ ame en okobo akanogi luŋ i cunya calo lonyo. En mom lokere, kara ŋa ame romo loko tammere? Gin ame en mito, en ame en tio, En gire bino cobo gin ame en oyiko pira, kodi jami acalo mannono tye apol i cunye. Mannono mio koyo onyere i koma meicel i nyime, ka atamo pire lworo maka meicel. Obaŋa omio cunya opoto meicel, Won Twer Ducu omio koyo oonyere i koma meicel. Pien colpiny orida doŋ oko, piny acol icuc owumo waŋa oko.” “Piŋo kara Won Twer Ducu en a gwoko kare me ŋolo kop, doŋ pino jo ame ŋec, mom neno nino mere-nono? Dano tye ka koko bo apok waŋ kio oko, omao dok a jo ocele ote cako kwayo. Oryemo kana otino kic, omio dako a cware oto jeno twonnere baŋgi, Ocan daŋ pono apona, pien oryemogi oko i yoe adoŋo, Koŋ inen doŋ owoto i ka tic, kun orom aroma i kana me tim, oyenyo cam me acamagi i tim ata, pi itinogi ame nwoŋo kec ociro. Obedo rayo camgi araa i potti a jo, odedepo daŋ nyig olok a jo areco. Obuto komgi nono dyewor luŋ, i kare me koyo daŋ mom otye i ginnoro me geno komgi. Kot ame ya i wi kiddi pwodogi, ote kwako kor gweŋ keken pien ka gwokere nwoŋo pe, Tye daŋ jo akwanyo otino kic oko i kor totogi, dok daŋ ogamo otino ocan me ajeŋa i banya, Owoto onoro aboŋo boŋo moro i komgi, owutte arita kal apek meicel kun kec ocirogi oko, Obedo biyo moo jeituni i potti a jo areco, obedo nyono olok i bar kun oryo ocirogi oko, Twaro a jo oto winyere kun pello i tuŋ boma, dano owane kok ni kono okonye, kadi amannono Obaŋa gire paro pi winyo kwacgi. “Tye daŋ jo mogo ame dag neno lero, ame mom ŋeo tic i lero, olworo tiyo tic kede oko, Anek ya iwor me wot neko ocan kede ŋat a piny oloo, dyewor en nwoŋo tye acalo akwo. Acod cot daŋ kuro piny doko iribiribi, kun kobo ni, ‘Ŋattoro mom bino nena; eka te geno waŋe oko.’ Dyeceŋ gin obedo cegere acega i ot, kun mom oneno waŋ ceŋ, ento dyewor ote bedo turo udi a jo. Pien piny acol icuc bergi calo odiko, colpiny a jo lworo-ni, gin omaro meicel. “Wun ikobo wunu ni, ‘Pii gire mollogi oko oyotoyot, lobogi oceno doŋ oko, apakaca moro mom yenyo tic i poto olokgi.’ Ceŋ kede lyeto meo pii oko, amannono daŋ, abalo rwenyo oko i lyel. Wi jo te wil oko i komgi i dye boma, kun ŋattoro mom dok poyo nyingi kadi acel. “Owuno mon oraŋa, a mom onywal meicel, mom daŋ otimo ginnoro aber baŋ mon a coggi oto. Ento Obaŋa i teko mere medde me miyo wegi twer perakino, oya malo kun cunygi doŋ oya oko me bedo kwo. En gwokogi kun daŋ konyogi, kun ciko waŋe i gin ame gin timo. Otinogi malo kare anok ote rwenyo oko, oner ote two oko calo doo, oŋolo wigi oko calo kal. Ka ce mom amannono, ŋa atwero nyuto ni an agoba, kun cimo ni gin ame akobo mom tye kakare.” Bildad dano me Cua te gamo ni, “Loc obedo me Obaŋa, dok en daŋ olworo alwora, en a mio kuc bedo tye malo polo. Wel monnyere romo kwanne? Jo mene ame ceŋ Obaŋa mom menyogi? Kara dano doŋ twero bedo a kite atira i yore aŋo i nyim Obaŋa? Dano ame dako onywalo twero bedo acil i yore aŋo? Koŋ inen, akadi dwe-gu mom ryeny acil i nyime, naka acer daŋ amannono. Kara doŋ dano kono bino bedo niŋo ba, en ame dano obedo kudi ata-ni?” Yubu dok te gamo ni, “Kite ame ikonyo kede ŋat ame twerrere mom! Kite ame ikonyo kede ciŋ dano ame teko daŋ mom iye! Kite ame ikonyo kede ŋat a ryeko mere mom, kun ititte ŋec me ateni apol ata. Ŋa obedo konyi i kop luŋ ame ibedo kobo, dok kit cuny ame itye kede-nono ŋa omi? “Tipo a jo ame tye piny i te lobo kom myel amyela, pii kede jami luŋ a tye iye tye kede lworo. Lyel me Ceol tye yie nono i nyim Obaŋa, kan a jo oto bedo iye mom tye kede ginnoro me wumo wie, En oryeo piny i tuŋ to, i dye yamo ata, mom daŋ oŋabo lobo i kom ginnoro, Tweo-gu pii malo i kom pol ocido icuc, pol mom yec kadi acel i tere pi pek a pii. En wumo waŋ dwe oko, eka te yaro pollere oko. En otyeko coyo gin aluluŋ i wi pii, i waŋ apokki ame poko lero kede kan acol icuc. Pii luŋ ame tye i polo ocuŋ iye, ka en ojukogi, gin owuro meicel. En mio pii nam liŋ mot pi teko mere, pi ryeko mere omio en ogoo Rakab. Weo me doge omio polo oyabere te nen acil, enocobo twon twol aŋeo paŋŋere meicel. Koŋ inen, mannono kom pwod lak gin ame en tio, wan kom pwod owinyo calo kop ame omuŋo amuŋa. Cite ka teko mere omwoc calo kot, ŋa a romo niaŋ iye.” Yubu te medde dok i koppere, kun kobo ni, “Kite ame Obaŋa tye kede kwo-ni, ame okwanyo twer ame an atye kede, kede Won Twer Ducu ame omio cunya kec wok-ki, ka ce pwod wee me” kwo tye i koma, dok cuny Obaŋa daŋ pwod tye i wuma, kop me goba mom bino doonyo i doga, mom daŋ abino bwolo ŋattoro kadi acel. Mom abino ye kadi acelni kopwa tye kakare, myero ato ame mom aloko kita kadi acel. Abino lido kitena atira, kun mom aweko kadi acel, aŋeo atira i cunya-ni mom atye kede nino moro i kwona ame lewic twero maka iye. “Mi okworra luŋ obed calo otim tim areco, dok jo ame mito lweny i koma bed calo jo a kitegi reco. Kara ŋat a mom ŋeo Obaŋa tye kede gen aŋo; ka Obaŋa doŋ omio waŋe orwenyo oko, ame en doŋ okwanyo kwo mere oko? Ce ni Obaŋa bino winyo koko mere, ka ce en opoto i peko moro? Cunye bino bedo ayom i kom Won Twer Ducu? En bino kwayo Obaŋa kare luŋ? Abino pwonyowu kop i kom twer Obaŋa, mom abino kano ginnoro ame Won Twer tye kede. Nen ba, wun luŋ doŋ ityeko neno wunu kede waŋwu, kara piŋo dok iloko wunu odoko gin a konnyere mom? “Man en gin ame Obaŋa opokki lo arac, dok en gin ame owun jo nwoŋo i baŋ Won Twer Ducu. Ka ce itino mere onya, onekogi oko i pala lweny ikwae daŋ mom bedo i cam ame romogi, Jo ame en oto oweko kwo, too edeke neko oko, mongi mom kokogi. Kadi bed en dwoŋ i lim meicel calo kwoyo, dok boŋŋi mere oyido rom mene; en twero loko gire, cite jo a kitegi atira en abino ruko, jo a balloro mom i komgi en abino poko limmere, Ot ame en ogero bino bedo calo boo otyetyem, onyo peru ame akur winyo i poto ogomo, Donyo i kabuto kun pwod olony, cite mom te medde bedo kittono, en bino co i waŋ nino nwoŋo lonyo doŋ mom. Lworo te onyere i kome calo abwal pii; dyewor yamo ajuru te bino tere oko, Yamo oya i tuŋ kide bino tiŋe te tere oko, kun kwanye oko i kabedo mere, Bino kodo i kome aboŋo kica, te miyo en riŋo adwimme bwot i ciŋe. Yamo te ŋur calo ŋat a bapo ciŋe i yore, dok acalo ŋat ame tye ajwiye i yore.” “Ateni, bur ame okunyo ryal iye tye, kede kan olio iye jabu. Nyonyo okunyo i lobo, mola ya i kom gweŋe. Dano yenyogi aboŋo paro pi piny acol, obedo yenyo naka i agikki lobo, oyenyo gwen i mutu ame col icuc. Okunyo bur i luŋ kan a jo mom beo iye, jo ame woto i yo wigi wil oko i komgi, oŋabogi malo kan a jo mom iye ote bedo lyero kuno, Aco lobo en ame ceko cam me acama, kun i tere piny omumuko oko calo gin amuko i mac. I akina gweŋe tye iye gwen capir, kede apua ame ya iye jabu. “Yo nono acut mom ŋeo, dok ocecu daŋ mom ru oneno. Dok tyen leyi me tim ame wakere wok-ki mom ru onyono, eŋatu daŋ mom ru obeo iye. “Dano cwao ciŋe naka i kidi atek wok-ki, muko naka twoni kiddi mogo adoŋodoŋo i tergi piny, Tuco yo pii beo i akina kiddi, kun waŋe bit i ginnoro luŋ me wel. Culo yo pii daŋ oko eka pii i kulo mom te mol, en kelo gin okano kannaler oko. “Ento ryeko kara nwoŋere kwene? Dok niaŋ atut bedo kwene ba? Dano gire mom ŋeo yome wot iye, dok daŋ mom nwoŋere i lobo a jo akwo, Kut nam kobo ni, ‘Mom gire tye baŋa’, nam daŋ ni mom tye baŋe. Lim abup meicel daŋ mom romo wilo, mom tye ginnoro ame oromo wilo kede. Akadi jabu me Opir daŋ mom oromo poro kede, mom daŋ tye kit gweŋŋoro me wel ame oromo poro kede. Jabu kede gilaci mom daŋ twero bedo aroromo kede, mom daŋ oromo loko tigo ŋut me jabu ame olio aber meicel. Mom oromo poro i tigo moro me wel, arema onyo atar, wel me wilo ryeko malo kato me jami luŋ me wel. Gwen topaj ame nwoŋere Eciopia mom oromo poro kede naka jabu ame olio acil odoco daŋ mom oromo wilo kede. “Kara ryeko doŋ ya i kwene ba? dok niaŋ atut bedo kwene? Okanne meicel ame wan ŋattoro mom romo neno, dok owumere ame winy a twarre malo mom romo neno. Lyel a jo oto kede to kobo ka ni, ‘Wan owinyo ka kop i kome keken.’ ‘Obaŋa en a ŋeo yo me wot iye, dok daŋ ŋeo kabedo mere.’ Pien en neno naka iyi agikki me lobo, en neno jami luŋ a tye piny i te polo. Kare ame en rik omoko iye kite ame peko a yamo myero bed kede, kun nyuto kan ame pii me nam myero gik iye, kare ame en rik oketo iye cik a mako kot, kun nyuto kit yo ame kot a mor myero lubi, en rik oneno te tito pire, oŋio odoco, te doŋ moko ni myero bed tye.” Obaŋa te kobbi dano ni, “Nen ba, bedo i lworo i kom Rwot en a mio ryeko, luŋŋi tim arac yo en a kelo niaŋ atut.” Yubu omedde i koppere kun kobo ni, “Lobo wirre ateni, kono kom onwoŋo atye kite a rik atye kede con ca, i kare ame rik Obaŋa gwoka iye ca; kare ame tara mere bedo lyel i wia malo, ame rik lero Obaŋa bedo mennya yo ka awot i piny acol. “I kare-naca rik atye aber meicel, mar Obaŋa mom rwenyo i kemana, i kare ame Won Twer Ducu pwod tye baŋa, otinona daŋ pwod bedo i ŋeta; ame ka rik tyena ogudo piny olwoko i cak, ame moo rik mol amola calo pii a wukere i lela. Kare ame ka awoto i dogcel ka ŋolo kop, ka ayiko kabedona i dye boma ka poro kop, awobe ka onena owoto oko teŋe, jo adoŋo ya malo te cuŋ acuŋa; aco rwode koŋ liŋ oko, kun oketo cingi i doggi, dwon jo adoŋo lin oko, lebgi te moko oko i dangi. Ŋat owinyo kop i koma, cako lwoŋa ni, akome gum, ka onena i waŋe te doŋ moko amoka. Pien rik alaro ocan ka ce akok, karacel itino kic ame jo a konyo mom. Jo luŋ ame mito to kwaya winyo, rik amio mon ame coggi oto wero pi yomcuny. Rik arukere i kite atira ame buro koma oko, ŋolo kop atira rik calo jor kede tok ame mom rwenyo i baŋa. An rik acalo waŋ me neno piny baŋ jo a waŋgi oto, dok rik acalo tyen me wot baŋ jo oŋwalo, Rik daŋ atye acalo apap baŋ ocan, acwako naka pido a lo a mom aŋeo. Alwenyo i tekona luŋ i jo a kitegi mom atira, abedo laro jo i cingi oko calo ŋat omao lee i dog eŋatu. Rik ate tamo ni abino to i pacona, kun nino me kwona i lobo pol calo kwoyo, dok rom aroma i yat ame lwite obakere atata i ŋet kulo, ame toyo mom rwenyo i jane dyewor luŋ, kun kwogona tye kite acel kare ducu, dok tekona mom dok piny. “Jo yam ka owinyo koppa, liŋ oko mot, kun otero yitgi me winyo tam ame amiyogi. Ka an doŋ akobo gin mom dok gamo koppa, koppa rik tye calo kot ame oony i komgi. Rik okuro koppa calo jo ame kuro kot, ogamo tam i baŋa calo jo ame mato pii kot me iporo. Ka abwonyo, gin mom ye ni abwonyo, obedo neno waŋa naka, kun mom omito ni cunya waŋ. An a rik anyuttigi yo a myero olub kun an abedo calo rwotgi, an abedo calo abaka ame tye i akina monnyere, calo ŋat ame kweo cuny jo a koko danogi i oto.” “Cite aman an doŋ adoko gi-anyera a jo ame ageo nennigi waŋ ceŋ, ame papagi rik aneno acalo jo apiny meicel, ame mom daŋ aromo porogi i gwogi ame gwoko rommina. Kony aŋo ame onwoŋo aromo nwoŋo i teko me cingi, gin jo ame teko me komgi doŋ otum oko-ni? Peko me kec oridogi meicel kede can, omiogi ogweno gigi mogo otwo i tim ata, obedo pwopwono pot awaca kede pot yennogo me buŋ, dok ocamo anaka lwit yen. Otye ka ryemogi oko i akina jo, ocele, jo cokogi bala jo ame acoko akwo, Obedo doŋ i akina burre mogo ame tye i luŋ, kede burrogo ocele, naka iyi aduu. Okok i buŋ calo leyi, gin luŋ ocokere karacel te okuto. Gin obedo itino a jo amiŋ ame mom ŋeo kan oya iye, jo ame rik oryemo oko i lobowa. “Aman doŋ an adoko gi-aweragi, nyiŋa doŋ mom rwenyo i doggi. Cunygi owuka oko, mom omito noko ŋeta kadi acel, onyeto lao i nyima aboŋo lworo moro. Pien Obaŋa otyeko tekona odoco, omio adoko amwol oko, omio gin doŋ mom oromo jukere kengi ka otye i nyima. Owotegi tye otware i koma i ciŋa tuŋ cem, otye ka ryema oko teŋe, otye oyenyo yo me neka oko. Otwoda doŋ dyere aboŋo yo moro me put, otye ka medo can i koma ameda, aboŋo ŋattoro ame twero jukogi. Okato i koma calo jo abeo i dogcel alac meicel, ote bedo lora ni kuŋ kuŋ i wi odur. Lworo te lunyo lokere i koma an, kwogona te rwenyo oko calo gin a yamo okolo, kuc onwoŋo atye kede daŋ te rwenyo calo pol. “Aman doŋ cunya poto apota, kare me can doŋ otuno oko i koma. Koma doŋ bedo mwoda amwoda dyewor, rem doŋ mom weka kare kadi acel. Omako boŋona i teko meicel, orida doŋ calo ŋut kanyina. Obaŋa doŋ obola oko piny i coto, acalo doŋ apua onyo buru. “An akok baŋi, ento yin mom igamo doga, ka acuŋ-gu i nyimi, mom iparo pira. Idoko doŋ ager agera i koma, iwuna meicel i ciŋi atek. Itiŋa malo i yamo, ariŋo doŋ iye calo gadigadi, yamo doŋ lolla i piny kun kot amor amora. An gire aŋeo ni ibino tera naka i to, i ot ame jo akwo luŋ rwatte iye. “Kadi amannono, ŋat orette piny i wi odur myero kur rye ciŋe? Ŋat a tye i peko myero mom kok ni konye bo? An rik mom akok pi dano a tye i can bo? Cunya mom ocwer pi ocan bo? Rik ka ayenyo gin aber, gin arac en a lunyo bino, ka atye akuro lero, piny dok wumere awuma. Cunya doŋ bedo poto apota kun mom koŋ kwe, kare me can doŋ obino oko me bino rwatte keda. Arimo piny i boŋo cola, cite ŋattoro mom kweo cunya, aya-gu malo i ka cokere ate koko kony. Ekwe en a doŋ tye acalo omegona, udu te bedo calo owotena. Del koma doŋ cido acol icuc te bwatte oko, lyeto doŋ waŋo cogona awaŋa. Opukka doŋ odoko me goyo wer me koko, nyamulere winyere doŋ calo dwon ŋat akok.” “Atyeko doŋ cikere oko waŋa, kara dok atwero bolo i kom nyan a mom oŋeye i co i yore aŋo? Kara doŋ gin aŋo ame Obaŋa bino pokka malo i polo? Gin aŋo ame aromo nwoŋo me bedo mega i baŋ Won Twer Ducu? Can mom poto i kom ŋat a kite mom atira bo? Peko moro mom poto i kom atim tim arac bo? Obaŋa mom neno kite ame abedo kede luŋ bo? En mom kwano ginnoro luŋ ame an atimo? “Ka ce yam abedo kobo kop goba, kun koma mit me wot bwolo jo, myero pima i mijan me pimo jami kakare, me Obaŋa ŋe ni cunya ler. Ka ce yam agak oko i yo ame myero alubi, kun cunya mito timo gin ame waŋa oneno, dok ka ce toŋŋoro me bal tye i ciŋa, jo ocele en ame myero can gin ame an acoo, cam ame tye ka doŋo i potona myero put oko. “Ka ce cunya onwoŋo atera kom dako moro, ka abedo liba dako awota doggola mere, dakona myero wot reggi lo ocele kal, jo ocele en a myero but kede, Pien mannono kono obedo twon bal arac meicel, bal ame oŋolkop en a myero ŋol cannere, pien mannono twero bedo rom i mac a waŋ nakanaka, ame onwoŋo twero waŋo cam ocek i potona luŋ. “Ka ce akwero winyo pido opiina onyo me aŋecana, ka ce gin okelo koko moro i koma, ka abino timo ŋo ka Obaŋa oya me ŋolo kop i koma? Ka en bino penyo koppere, abino gamo doge nino? Mom ŋat oketa i yi totta en a daŋ oketo opiina? Mom ŋat acellono en ocweo wan luŋ iyi totowa? “Yam atwono acannoro ginnoro ame en onwoŋo amito, onyo amio dako moro a cware oto okuro piny nono? Onyo ca abedo camo cema kena, kun atin kiccoro mom obilo? Aco an Obaŋa obedo gwoka kun pwod atidi calo pappa, en obedo tela cakere iyi totta. Rik aneno ŋattoto ame can boŋo ociro, onyo acannoro a mom tye i gi-wumere ame mom ate konyo? Ka ce en yam mom okwao winyo moro pira i cunye, kun amie boŋo apek alyet ame otio i yer romo. Ka ce yam awuno ŋattoro a mom i bal, kun ageno ni oŋolkop i dogcel bino miyo aloo kop. Ka ce yam atimo amannono, wi gwoka myero mukere oko i te weta, bada myero putte oko i waŋ nyor. Pien an onwoŋo alworo can oya i baŋ Obaŋa, onwoŋo mom atwero tiŋo waŋa me neno kwogo mere. “Rik aluŋo genna luŋ i kom lim bo? onyo ca rik aloko lim odoko ka larrena? Ka ce rik cunya yom pien lonyona onwoŋo bup, onyo pien lim onya i ciŋa. Ka ce rik aneno ceŋ kun aryeny, onyo dwe kun woto i twon kwogo mere adwoŋ, eka ote wayo tamma me cako worogi i muŋ, kun aryeo ciŋa amotogi. Magi-nono daŋ nwoŋo myero bed bal ame oŋolkop en a myero ŋol can pirgi, pien onwoŋo atwero bedo agoba baŋ Obaŋa ame tye malo. “Ka ce yam alelo alela i kare ame akworra opoto i can, onyo anatte gira aŋata i kare ame gin arac opoto i kome; aco doga gira yam mom otimo balloro i kome, pien mom alamere ni kono okwanyo kwo mere oko. Ka ce jo i kemana mom openyo ni, ‘Ŋa atye kuno ame mom ocamo riŋo oyen?’ Mom tye arokkoro ame obuto i dye boma ata, an ayabi jo ame woto i yo oda. Mom abedo muŋo i jo gin arac ame atimo, kun akano balla i cunya. Pien an onwoŋo abedo lworo lwak atek meicel, rik mom abedo liŋ aliŋa kun mom adonyo oko i oda, pi lworo acae a jo me doggola moro. Kono onwoŋo tye ŋattoro ame winyo koppa! An en doŋ aketo ciŋa oko-ni, ‘Won Twer Ducu myero doŋ gam doga.’ Kono akwora onwoŋo ocoo kop edota kede acoa. Kono onwoŋo gire mom orwenyo i wi gwoka, kono abedo yon kede ayona calo tok kwogo. Kono atitte ginnoro luŋ amako kwona, kono abino i nyime calo rwot. “Kono lobbna yam obedo kok i koma, dok waŋ kia luŋ iye daŋ okok i koma karacel, kono yam abedo camo gin ocek iye aboŋo culo ginnoro pire, ate miyo-gu wegi mere to oko, dok ate miyo okuto tu iye akaka ŋano, kede onyekmon akaka kal.” Kop a Yubu doŋ ogik oko kan. Jo adek-ki mom dok omedde gamo doŋ Yubu, pien en oŋeo gire ni kite atira. Mannono te miyo akemo mako Eliku wot a Barakel, dano me Buj, me doggola a Ram oko. Akemo onwoŋo omake i kom Yubu ni pien en tye ka dwore kene ni koppere en atira, akato Obaŋa. Akemo daŋ onwoŋo omake i kom owote a Yubu adek ca, pien gamo kop a Yubu oloogi oko, omio oweko Obaŋa pwod nen acalo abal. Eliku obedo liŋ kare alac kun mom gamo dog Yubu pien gin luŋ onwoŋo odito okate oko. Cite i kare ame Eliku oneno ni jo adek-ki mom doŋ agamo kop a Yubu, akemo te make oko. Eliku wot a Barakel me Buj te cako gamo kop ni, “An kono pwod atidi, cite wun doŋ ibedo wunu jo adoŋo, mannono omio woki an abedo kede lworo, mom adio cunya me titiwu gin ame aŋeo, An abedo kobo ni, ‘Wek jo oteggo kob kopgi, jo a mwakagi bup kobo kop me ryeko.’ Cite cuny ame dano tye kede, ame obedo wee a Won Twer Ducu, en a mio dano niaŋ kop. Mom jo oteggo en aryek, mom daŋ jo oteggo en a niaŋ gin a tye kakare. Mannono akobbiwu ni, ‘Winy wunu koppa; weka wunu an daŋ anyuttiwu tamma.’ “Nen ba, an abedo diyo cunya winyo kop ikobbo wunu, abedo ciko yita winyo kop me ryeko, kun atye ka yenyo kop me akoba. An onwoŋo ajalo tamma luŋ baŋwu, nen ba, ŋattoro i akinawa mom oloo Yubu. Gwokere wunu ba, me kur ikob wunu ni, inwoŋo wunu ryeko, Obaŋa gire en a myero loc, mom dano. Kop ame en obedo kobo mom onwoŋo okobo baŋa, mannono omio mom abino gamo koppere i kodikop ame ibedo kobbe wunu. “Doggi te two oko, mom ogamo doge kadi acel, kop a myero okob te loyogi oko. An myero abed diyo cunya kun akurogi ame gin oliŋ aliŋa, pien gin luŋ ocuŋ kuno kun mom dok ogamo kopporo? An daŋ kon doŋ abino culo kop, an daŋ myero doŋ akob gin ame aŋeo. Pien an daŋ kop dwoŋ i cunya atek meicel, mom doŋ aromo diyo cunya kadi acel. Nen ba, cunya doŋ calo koŋo olok ame owumo wie oko, calo ocoe anyen ame amito yec oko. Mito akobi omi obed aber, myero anam doga, agam kop. Mom abino leŋere kadi acel baŋ ŋattoro, mom daŋ abino pako ŋattoro. Pien an mom aŋeo pako jo, kono nyo ŋat ocwea oneka oko con.” “Aman doŋ ba, adwoŋ Yubu winy koppa, ter yiti iwiny kop akobo luŋ. Nen an doŋ acako kop oko, leba doŋ ocako lebo kop oko. Koppa nyuto ni cunya ler, gin aŋeo, leba bino kobo kite aŋeo kede ikokome. Cuny Obaŋa en oketa gira, weo a Won Twer Ducu en omia weo me kwo, Gam koppa ka ce itwero, rye koppi luŋ i yore i yore i nyima, nwoŋ ka cuŋŋi, Nen ba, an arom aroma kedi nyim Obaŋa, an daŋ ocwea i lobo. Nen ba, kur komi myel pi lwora, ciŋa mom bino nuyi okato kare. “Ateteni, yin gire ikobo kop i yita, atyeko doŋ winyo kop ame ikobo luŋ. Yin ikobo ni yin icil, dok rocci moro mom, ni yin icil odoco, dok balloro momi komi, Dok Obaŋa bedo yenyo kop i komi, dok tye ka teri acalo akworrere; en doŋ orwako tyeni oko iyi kol, kun neno kabedo luŋ ame yin iwoto iye. “Nen ba, an atwero gamo mannono, ni yin mom ikobo kakare. Obaŋa dwoŋ kato dano oko, Piŋo yin imito pyem kede kun ikobo ni, ‘En gire mom bino gamo koppa moro ame an akobo’? Pien Obaŋa kobo koppere i yore apapat, kadi bed dano mom niaŋ iye. Bino i waŋ lek, iyi anyuttogo ame nen dyewor, i caa ame nino mit kede wok-ki, kun nino oyuto waŋgi i kabutogi. Mannono en kare ame en muno kede i yit dano onino, kwenyorogi i yore ame mio komgi myel, me dano lokere wek timo gin arac, wakere mere daŋ gik oko, en a laro tipo a dano i lyel, gwoko kwo mere me mom neke i pala lweny. “En goo dano daŋ i rem i kabuto mere, kun mio kome mwode kare ducu, ame mio cunye mom mito cem, mittere me cam te rwenyo oko. Cako jony tuno ka riŋo i kome orwenyo oko ducu, cogo mogo i kome a yam mom nen cako doŋ guŋo oko. Kwo mere nwoŋo doŋ ceggi acega i lyel, dok nwoŋo daŋ ceggi acega i ciŋ anek jo. “Ka ce amalaika nwoŋo mom tye ame ocuŋ pire, ame tye i akina omalaika tutumia i tutumia, ame ticgi me noto dano kede Obaŋa, me nyutti dano gin aber ame myero etim, amalaika mere-nono twero time kica kun kobo ni, ‘Larre, me en kur wot piny i lyel, en doŋ otyeko nwoŋo gin me lakoro kwo mere. Mi riŋo kome roc dok anyen calo me atin, dwogo teko mere obed kite ame rik tye kede a pwod en awobi.’ Dano-nono doŋ cako kwayo Obaŋa, Obaŋa te gamo kwaccere, dano doŋ twero bino i nyim Obaŋa i yomcuny. Dano doŋ cako tito kite ame elarre kede baŋ jo. En wero wer i nyim jo kun kobo ni, ‘An rik abalo, ate gak weko timo gin a tye kakare oko, cite Obaŋa mom oketo can i koma a romi gin atimo.’ En olakoro kwona mom owoto piny i lyel, pwod oye an amedde bedo kwo kun aneno lero. “Nen ba, Obaŋa timo jami magi luŋ, en bedo lolle i dano kittono kare i kare, me wek ekwany kwo mere oko i lyel, me dano nen ceŋ me kwo. “Ter yiti, Yubu, me iwiny koppa, liŋ mot me akob koppa. Ka ce itye kede kopporo ame imito kobba, kobi, pien bino miyo abedo i yomcuny ka aniaŋ ni i mom i balloro. Ka ce kopporo pe, yin doŋ winy koppa, liŋ mot, me apwonyi kede ryeko.” Eliku dok te kobo ni, “Winy wunu koppa, wun jo aryek, cik wunu yitwu iwiny wunu, wun jo ame tye kede ŋec; pien dano temo kop kede yite, kite ame en bilo kede cam i doge. Myero oyer wunu gin ame tye kakare, myero omok wunu mene ame tye aber. Aman Yubu doŋ otyeko kobo ni, ‘An balla moro mom, cite Obaŋa ogamo twer ame atye kede oko; bur ame tye i koma mom romo caŋ, kadi bed mom abalo ginnoro.’ Tye ŋattoro ocele acalo Yubu, ame mato acac calo pii, ame nywako yo otim tim areco, dok woto karacel i jo areco? Pien en otyeko kobo ni, ‘Bedo tiyo gin ame yomoro cuny Obaŋa, mom gire konyo dano i ginnoro.’ “Pi mannono ba, winy wunu koppa wun jo ame tye i niaŋ atut, Obaŋa mom twero timo gin arac kadi acel, Won Twer Ducu mom timo ginnoro a mom tye kakare. En keto can i kom dano a rom i bal ame en otimo, dok en tero dano acel acel kun lubo kit kwo mere. Ateni Obaŋa gire mom romo timo ginnoro arac, Won Twer Ducu mom twero ŋolo i yore a mom atira. Ŋa omio lobo obedo i te loccere, dok ŋa omio wi podo luŋ obedo i te twerrere? Kono en te kwanyo weo mere oko i lobo, te miyo yamo mere a jo wao cokere luŋ baŋe, ginnoro luŋ akwo te to awaŋe acel, dano te dok oko iyi apua. “Ka ce itye wunu i niaŋ atut, winy wunu kop man, winy wunu kop ame akobo. Ŋat ame mom mito ni ŋol kop atira twero bedo aloc? Yin itwero ŋolo kop loo dano a kite atira ame tye i twer, ŋat a twero kobbi abaka ni, ‘Yin konnyi pe’, onyo baŋ aloccoro ni, ‘Yin i dano arac; ame mom dworo rwottoro, onyo ame mom paro pi alonyo kato acan, pien gin luŋ obedo tic me ciŋe?’ Dano twero to i kare moro keken, Obaŋa twero goyo rokkoro-ni i cuny dyewor te miyogi rwenyo oko, twoni jo atek ote daŋ tero oko kun ciŋ dano moro mom ogudo. “Pien waŋe mom rwenyo i kom gin ame dano timo, en neno kan ame en woto iye luŋ. Mom tye mutu moro onyo kan acol icuc, ame otim tim areco romo pono iye. Obaŋa mom oketo kare pi dano moro, me wot i nyime wek eŋolle kop. En turo dito a wegi twer aboŋo yenyo kop i komgi, eka te keto jo ocele me leyo kakargi. Pien nwoŋo en ŋeo ticgi luŋ, twero retogi i dyewor acel keken twergi te gik oko, En pwodogi i nyim lwak, pi gin areco ame gin otimo, pien nwoŋo gin ogak ote weko lube oko, kun mom dok oparo kadi acel pi timo gin ame en mito mannono mio gin omio koko ocan winyere baŋ Obaŋa en te winyo koko a jo ame owuno. “Ka ce Obaŋa oliŋ gire mot, ŋa a twero kobo ni en otimo bal? Ka ce en okanne gire oko, ŋa a romo nene? Rokkene onyo ŋa ame romo nene? Gin gire mom oromo geno dano a mom lworo Obaŋa me bedo aloc, onyo me bedo owic me ciko lwak. “Tye ŋattoro ame yam koŋ okobo baŋ Obaŋa ni, ‘An onwoŋo agak oko, cite mom dok abino nwoyo timo bal.’ Pwonya i gin ame an mom ru aneno, ka ce yam atimo bal, mom dok abino nwoyo timo? Myero en ket can i komi ame opori, pien rik ikwero oko? Pien yin gire a myero iyer, mom an. Yin myero itit gin ame iŋeo. Jo ame niaŋ atut kede oryeko ame owinyo koppa, gin luŋ obino kobba ni, ‘Yubu tye ka kobo koppere atata aboŋo ŋeccoro, kop ame akobo luŋ mom tye iye ginnoro me ryeko.’ Kono obedo temo Yubu kittono naka iyi agikki, kono ber, pien tye ka gamo kop acalo otim tim areco, Tye dok amedo tim me jem i kom ballere, tye-gu ababapo ciŋe nononono i akinawa, tye ka miyo koppere me anywar i kom Obaŋa medde ameda.” Eliku dok te medde i koppere ni, “Pwod itye ka tamo ni koppi en a tye kakare? Yin itye ka kobo ni, ‘Twer ame itye kede ennono i nyim Obaŋa,’ omio itye ka kobo ni, ‘Kara nwoŋo atimo ŋo i komi? An akati i yore a ŋo ka ce an onwoŋo abedo timo bal?’ An abino gamo koppi kit man, karacel kede owoteni daŋ. Koŋ itiŋ waŋi inen polo, koŋ inen pol ame tye malo meicel kati oko-ni. Ka ce ibalo, gin aŋo ame nwoŋo yin itimo i kom Obaŋa? Dok ka balli doŋ omedde dwoŋ meicel, ŋo ame nwoŋo yin itimo i kome? Ka ce kiteni atira, nwoŋo imie gin aŋo kono? Onyo ŋo ame nwoŋo ogamo i baŋi? Gin arac ame itimo gudo dano wadwu ame cal kedi, kiteni atira daŋ konyo dano. “Jo cako koko pien nwoŋo doŋ owunogi meicel, ocako lwoŋo ni myero konygi pien ciŋ wegi twer nwoŋo doŋ ocirogi oko, Cite mom tye ŋattoro ame koŋ penyo ni, ‘Obaŋa ame oketa kara tye kwene ba, ame mio jo wero naka dyewor, ame pwonyowa kato leyi ame tye i wi lobo, ame miowa obedo aryek akato winy ame twarre malo?’ Gin okok baŋe i kuno, cite en mom gamo doggi, pi wakere a jo areco, Obaŋa gire mom winyo koko ame tere mom, Won Twer Ducu mom gire paro apara pire, Kara doŋ yin kono ka ikobo ni mom inene, ka ikobo ni pidoni tye i inyime, yin itye ka kuro! Yin itamo ni Obaŋa ka akemo omako mom keto can i kom dano bo, dok en mom gire paro pi bal wok. Yubu ŋamo doge i kop atata, duro-gu kop aboŋo ŋeccoro.” Eliku omedde i koppere, kun kobo ni, Di cunyi anonok me koŋ anyutti, pien pwod atye i gin a myero akob akaka Obaŋa. Abino tic i ŋec ame atye kede luŋ me nyuto ni ŋat ocweowa timo gin a tye atira. Me ateni, kop ame akobo-ni goba mom iye, ŋat a tye i ŋec aber odoco tye kedi. “Nen ba, Obaŋa tye kede twer, dok en mom cao ŋattoro, en tye kede twer ame ocuŋ i kom ŋec atut ame tye kede. En mom weko jo areco bedo kwo nakanaka, cite jo ame owuno en miogi twerogi a myero obed kede. Waŋe mom rwenyo i kom jo a kitegi atira, en ketogi ka loc calo obakki, gin te bedo malo kuno nakanaka. Cite ka otweogi kede jegere, ote ridogi oko i tol me awuna wuna, eka en te tittigi ticgi, kede rocgi, ni gin otye ka wakere. En mio yitgi yabere me winyo pwony, en te cikogi ni myero owek timo bal. Ka ce gin owinyo koppere ote cako wore, otyeko karegi odoŋ i yomcuny, kun otye aber, Cite ka ce gin okwero winyo koppere, oto i pala lweny, kun oto-gu aboŋo ŋeccoro. “Jo ame kop Obaŋa mom tye i cunygi, okano akemo i cunygi, ka ce en otweogi, gin mom okok baŋe. Kodi jonnono to con kun pwod otino, kun oto daŋ i lewic. Obaŋa laro jo owuno i can opoto i komgi-nono, en tio i can opoto i komginono me yabo waŋgi. “En omio iya oko i can, en oteri kan alac ame ginnoro mom tye iye ame dii, dok icamo iye gin amio keken. Cite aman itye ka nwoŋo kit cannoro luŋ ame oketo i kom otim tim areco, aman can ame oketo i komi doŋ omaki oko. Doŋ myero igwokere ba, me akemo kur mi idok anywar, can apek ame oketo i komi me lakoro yin kur mi igak oko, Koko gire mom romo kwanyo can i komi, kadi bed iket teko rom mene. Kur ibed paro dyewor, ame en kare ame omio nyiŋ rok apol rwenyo oko i wi lobo. Gwokere ba, kur ilokere idok itimo bal, pien mannono en okelo peko i komi. “Nen ba, teko Obaŋa dwoŋ meicel, ŋa kara obedo apwony a rom aroma kede? Ŋa a yam koŋ obedo telo Rwot, onyo ŋa ame twero kobbe ni, ‘Yin itimo bal?’ “Myero ipo pi pake pi ticcere, ame cakere con jo obedo pake pire i wer. Jo luŋ doŋ oneno gin ame en otio, cite mom tye ŋattoro ame niaŋ iye aber. Nen ba, Obaŋa dwoŋ meicel ame wan mom oromo neyo, dok mwaka ame en ori kede mom romo kwanne. “Pien en mio pii duny i piny i lobo, te dok ton calo kot, ame ya i pol corre piny i lobo, te ony adwoŋ meicel i kom jo, Tye dano moro ame twero niaŋ kite ame pol oyarre kede, onyo kite ame kot mor kede i pol? Nen ba, en mio lutkot meny tuŋŋi i tuŋŋi, te wumo wi kiddi oko. Mannono kite ame en pito kede rok luŋ, kun miogi cam adwoŋ meicel. En mako lutkot i ciŋe, te ciko ni cel kan ame en amito ni cel ikokome. Mor a kot tito pi bino mere, i twon ryeko kede akemo pi bal.” “Man daŋ poto cunya meicel, etaona dipere bala amukere oko i kakare. Koŋ iwiny wunu kite ame dwone amor kede, kede kite ame kop a donnyo doge tye ka ŋur kede, En mio romo te polo luŋ, kun lutkottere meny menyo kabedo luŋ. Icennere dwone te cako mor, dwone mor aloŋo i twon kwogo meicel, en mom juko meny a kot kare. “Dwone mor i yore me awura meicel, dok en timo twoni gigi mogo adoŋodoŋo ame wan mom oromo niaŋ iye. En twero ciko pee ni myero corre piny i lobo onyo ciko kot ni corre piny adwoŋ meicel. En twero juko tic a dano oko, me wek jo luŋ ŋe ni en etye etic. Leyi luŋ dok i ka ponogi, ote doŋ bedo gigi i gorogoro. Yamo ajuru kodo kun ya i ode, eka yamo akeketa te kelo koyo anic meicel. Ewura dog Obaŋa mio pii makere doko pee, eka te miyo makere atek ikaŋ. En mio pii cokere adwoŋ i pol, eka lutkot doŋ te cako meny iye kuno, gin te bedo wirre tuŋŋi kede tuŋŋi kun Obaŋa telogi iye, me cobo ginnoro luŋ ame Obaŋa ocikogi ni myero oti, wi lobo luŋ kan ame dano twero bedo iye. En timo mannono pi keto can i kom dano onyo pi konyo lobo mere, onyo pi nyuto marre. “Yin Yubu myero iwiny kop man, koŋ icuŋ mot me ipar pi tic Obaŋa me awura. Yin iŋeo kite ame Obaŋa miogi kede cikkere, eka te miyo lutkot meny i pol menyo piny? Yin iŋeo kite ame en omio pol ocuŋ kede kakargi? Mannono obedo tic me awura meicel, tic a ŋat a ŋeccere malo okato kare. Yin gire mom iŋeo ginnoro kono ka lyeto keken ka boŋoni oobere, ka yamo ame kodo i tuŋ anyarolum omio lobo okwe. Yin iromo konyo Obaŋa i ryeyo pol, ame te bedo atek calo mola ame otwako? Koŋ ipwony wunu gin ame wan obino kobo i nyime, wan mom oromo pido nyime pi kwiya pinywa. Myero bin kobbe ni an abino kop? Dano twero kobo pire kene ni neke oko? “Aman ceŋ tye acaro waŋwa acara, tye aryeny acil meicel ame mom romo anena, polo tye anen acil pien yamo otero pol oko. Lero a ceŋ tye aryeny acil calo jabu i tuŋ anyarolum, kwogo Obaŋa omio lworo ocirowa oko. En Won Twer Ducu ame wan mom oromo noko ŋete, teko mere dwoŋ atek i ŋolo kop atira, dok kite daŋ atira odoco ame mom romo wuno ŋattoro. Mannono omio dano lwore, en mom paro pi jo ame yeyea ni oryek.” Rwot te gamo dog Yubu yamo ajuru ni, “Man kara ŋa ame mito ni ewum tamma nie, kun kono en mom ŋeo ginnoro kadi acel? Twe pyeri i del ikiŋ calo amony, yikere gamo penya ame apenyi kede. “Yin rik itye kwene i kare ame acibo acakki me lobo? Koŋ ititta, ka ce yin iŋeo ni itye i niaŋ atut. Kara ŋa omoko kite ame laccere kede borrere myero bed kede? Yin gire iŋeo man aber! Ŋa ame oryeo tol me pimo? Pagi me tergi ocuŋ i kom no? Ŋa ocibo kidi me gwiccere, kare ame acer luŋ me odiko wero karacel, dok itino Obaŋa luŋ redo yomcuny. “Ŋa ame twero cego pii nam doggola, kare ame doŋ oyeco yo mere oko i ot nyodo mere i lobo. I kare ame rik amio pol oburo kome oko calo boŋo, kun pol ocido icuc owumo kome oko? I kare ame anyuto ka gikkere, ate cego oko i kika kede arii nyonyo, ate kobo ni, ‘Ibino tuno kan, cite mom ibino kato, tugere-ni ame iwakere kede awaka wok-ki bino gik oko kan.’ “Yam koŋ iciko odiko me cako ticcere, cakere i kare ame icako bedo kwo, onyo inyutti ru-piny kabedo mere? Yam koŋ iciko ru-piny me yabere romo kabedo luŋ i wi podo, me wek jo areco teŋere oko i ka ponogi? Ru-piny mio jami ducu nen oko kannaler, calo boŋo aruka ame calo gulu ame okekedo i rani apapat tye iye. Ler a piny a jo areco te rwenyo oko i baŋgi, ciŋgi ame ogoo kede jo te giko ticgi oko. “Yam koŋ iwoto naka kan a nam ocakere iye, onyo itemo koŋ wot i tyeni i te pii piny? Yam koŋ onyutti doggola me to bo, onyo yam koŋ ineno doggola me kan acol icuc? Yin iŋeo kite ame wi podo luŋ lac kede? Koŋ doŋ ikob do ka ce iŋeo mannono luŋ? “Yo ame woto kan a lero bedo iye tye kwene? Ane kan ame piny ocido icuc bedo iye? Itwero nyuttigi kan a myero gin wot gik iye, onyo itwero nyuttigi yo dokgi ceŋ i kabedogi? Aŋeo ni yin gire iŋeo, pien yin iteggo, i kare-naca onwoŋo doŋ onywali oko. “Yam kon idoŋo i ot kano pee aŋic? Onyo ineno ot kano pee apekkege ame pwod ogwokogi me kuro kare me ayela, pi kuro kare me lweny? Ane yo ame woto kan ame opoko iye lero i kabedo apapat, onyo kan ame oketo iye yamo me tuŋ kide i kabedo ducu? “Kara ŋa a yam oyeco yo ame kot corre kede i lobo, kede yo me mwoc a lutkot? Ŋa a mio kot cwe kan a jo mom bedo iye, kede i tim ata kan ame dano moro mom iye? Ŋa a mio kot bido lobo otwo ame ginnoro mom iye, ame te miyo lum cako tu iye? “Papa a kot daŋ tye? Ŋa onywalo toyo ce? Pii omakere calo pee oya iyi ŋa? Ŋa onywalo pee acalo toyo ame oya i polo? Pii makere doko atek calo gweŋ, naka pii me nam daŋ makere oko. “Itwero tweyo acer ame olwoŋo ni lyer-nino, onyo itwero gonyo tol ame otweo acer ocokere karacel? Itwero miyo acer luŋ bedo tye i kakargi ikokome, onyo itwero telli acer ame olwoŋo ni ajaraŋuu kede itino mere yo? Yin iŋeo cik ame otio kede i polo? Itwero moko cik pirgi i lobo kan? “Itwero miyo dwoni winyere naka i polo, me pii adwoŋ corre i komi wumi oko? Yin itwero oro lutkot ni wot memenya, kan imito, eka en daŋ te ye, kun ogamo ni, ‘An ene adwoŋ?’ Ŋa oketo ryeko i pol, onyo ame omio ŋico tye kede niaŋ atut? Ŋa aryek ame romo kwako pol, onyo ŋa a romo leŋo dog opoko me pii me polo te miyo kot cwe, apua te lokere doko coto, lobo te makere karacel atek ateka. “Yin iromo dwaro riŋo me acama pi eŋatu, onyo itwero miyo itino eŋatu yen, kun gin tye okudde i gorogorogi, onyo ka gin obusto mot kun okuro lee me amakagi? Kara ŋa a mio agak cammere, ka ce itino mere tye akok baŋ Obaŋa kun otye orimo piny pi yenyo cam?” “Yin iŋeo kare ame dyegi abedo i wi got nywal iye? Yam koŋ ineno min atilloro tye anywal? Yin iŋeo kare ame gin tyeko, kun iŋeo kare me nywalgi ikokome? Iŋeo kare ame gin nyoye kede piny colo itinogi, eka ote nywalo iye otinogi? Itinogi doŋo i bar kun komgi yot, kare ame oya i baŋgi owoto atwal mom dok odwogo baŋgi. “Ŋa omio kane me tim loye kengi? Ŋa a miogi twer me rimo piny kite a yigi mito? An atyeko miyogi tim otwo me bedo acalo pacogi, kede lobo obedo kadokado me bedogi. Gin gigi mom owinyo woo moro a tye i boma, ŋattoro ame burugi me tiyo tic daŋ pe. Wi kiddi malo tye acalo bar me camgi, kan ame gin oyenyo iye ginnoro keken ame oromo camo. “Jobi twero ye tic piri? Itamo ni twero buto dyewor luŋ iyi awiini? Itwero tweyo i tol kweri dyen ite miyo pur, onyo romo loko poto a tye i luŋ kun lubo kede yori? Ibino keto genni i kome pi teko mere adwoŋ wok-ki, onyo ibino miyo en tio tici luŋ? Igeno ni en bino dwogo, dok en bino kelo kal i laro? Bwom udo lelea, i twon awaka adwoŋ meicel, cite lacgi mom rom kede me ocecu ame akica-ni. Pien udo weko toŋe i lobo, eka lyeto a lobo en ate bedo obo komgi, En mom dok po ni dano twero nyono oko i tyengi, onyo ni lee tim daŋ twero nyono. Bedo ager agera baŋ itino mere calo mom mege, en mom bedo kede lworo moro ni ticcere romo kec nono, Pien Obaŋa twone ryeko oko, dok daŋ mom odute mottoro me niaŋ atut. Ka en oya me ŋwec, en nyero aguragura kede ŋat a riŋo kede. “Twer ame aguragura tye kede-ni yin imie bo? Yer aboco wok i ŋute yin imie bo? Yin en imiogi otwarre calo bonyo? Gin oredo redo moro ame winyo lik, Ojebo wot i luŋ i tekkom kun owakere awaka, omwomere gigi amwoma me wot i lweny. Kop i kom lworo gin onyero anyera, kun cunygi mom poto, mom tye pala lwennyoro ame miogi oloko ŋegi me dok ceŋ. Jami lweny a jo a ŋwec kedgi owoto kede yeŋere ame awo awoa, ame toŋŋigi awil awila calo mac. Omukere i ŋwec anyim i twon akemo meicel, mom oromo cuŋ mot ka okuto apel. Ka owinyo koko apel, gin oredo ni, ‘Ee do!’ Gin oŋweo lweny i kannabor meicel, owinyo-gu mor kede redo odoŋe mony i teŋe. “Ryekoni en omio olwit twarre malo bo, eka te yaro bwome kemo tutuŋ anyarolum? Yin en iciko cur bo, ni twarre malo, eka te gero ode i wi kiddi malo? En bedo dok i wi kidi malo, dok buto daŋ kuno, wi kidi oculle acula ni en doko ka pono mere, En doŋ te bedo ŋoloro piny i kuno me yenyo gi-acama mere, waŋe bit meicel me neno jami i kannabor, Itino mere doto remo, en mom rwenyo i kan a gin oto tye iye.” Rwot te dok penyo Yubu ni, “Arot bal a jo twero pyem Won Twer Ducu? En ŋat ame pyem Obaŋa-nono koŋ doŋ gam doge do!” Yubu te gamo dog Rwot ni, “Nen ba, an kom mom a ginnoro i nyimi, kara abino gamo koppi niŋo ba? Mom atwero ŋamo doga me kop kedi. Akobo doŋ icel-li keken mom dok gira abino kop, mom dok aromo medde kadi acel.” Lee aryo adoŋo onyuto teko Obaŋa Rwot dok te gamo kop a Yubu yamo ajuru ni, “Twe pyeri i del ikiŋ calo amony, yikere me gamo penya ame apenyi kede. Itye ka nyuto ni an atimo bal? Imito ŋolo kop loya, me inyut ni koppi yin tye kakare? Yin daŋ badi cal kede me Obaŋa bo? Yin daŋ dwoni twero mor calo mege? “Ka amannono, koŋ doŋ irukere i kwogoni kede ditti, me twerri kede woroni nen. Wuk doŋ akemoni agwa oko i kom jo, nen jo luŋ owaka, me imi wakeregi gik oko. Nen ŋat acel acel a wakere, me idie idwoke piny, dok inyon jo areco oko piny kan a gin ocuŋ iye. Yikgi luŋ piny i kwoyo, wum waŋgi oko piny i lyel. Mannono bino miyo an aniaŋ ate cako paki, ate ye ni yin iromo loyo lweny piri keni. Koŋ inen emir ame aketo calo yin, en camo lum calo twon. Nen koŋ kite ame pyere tek kede, kede kite ame ler yie nwaŋ kede. Yibe ocuŋ malo calo yat cedar, ler amuru mere okubere karacel. Cogo mere tek calo nyonyo me mola a yie twolo, tyene te rom aroma arii me mola. “En obedo tic Obaŋa me agege, ŋat ame ocwee en a myero ŋol kop i kome. Okelo cam baŋe i wi kidi malo, kan ame leyi me tim tuko iye. En buto piny i te okutti ame tye i dog kulo, en pono i te ogada ame tye i coto. Pien tipo okutti kede tipo ŋet i dog kulo, tipogi-nono wumo kome. Nen ba, kadi bed pii i kulo amol atek ame atagere ataga, en mom lworo, en bedo a cunye opye kadi pii i kulo Jordan Opoŋ naka i nyime. Tye ŋattoro ame romo make i golo, onyo ame twero tuco wume atuca owiccere moro te make?” “Itwero waya twon nyaŋ me pii a ŋeo panere wok-ki, onyo iromo tweyo lebe kede tol? Itwero rwako tol i wume, onyo tuco itinyo mere kede golo? Itamo ni en bino kwayi atek meicel? En romo kwayo kede mwolo? En bino cikere kedi, me wek yin itere, ewot ebed opiini atwal? Ibino tuko kede kite ame ituko kede i winyo? Onyo ibino tweye oko i tol me en bed yomoro cuny anyirani? Eryoŋet ocik rec bino laro wel me wilo? Gin bino poke oko i akina ocat wil? Ibino cocobo pyennere kede golli abittege, onyo ibino cobo wie kede biti me cik. Koŋ igud kome icelloro me inen, mom dok ibino nwoyo, dok wi mom bino wil i kom lwenyere kedi. “Nen ba, ŋat ame tamo ni eromo timo ginnoro nwoŋo obwolle gire kene, ka oneno waŋe keken bino nyobere oko. Mom tye ŋattoro a dok ger calo en, ame romo diyo cunye me tugge i kakare. Ŋa kara ame romo cuŋ i nyime? Ŋa ame twero cako lweny kede eka te bwot? Mom gire tye ŋattoro i wi podo luŋ. “Wek koŋ akobbi kop i kom tyen twon nyaŋ a ŋeo pannere wok-ca, kede twon teko adwoŋ ame en tye kede, kede kite ame Obaŋa ocweo kede kome. Ŋa a romo woto rukkere i kome? Onyo ame romo tuco koti mola mere? Ŋa a twero miyo en ŋamo doge? Lake oromo yi doge luŋ ame neŋo lik. Ŋee oryeo iye kwode yore i yore, gin luŋ okubere karacel kun otek calo gwen. Acel acel i akinagi ceggi acega awottere, ame yamo mom romo kato i akinagi. Gin luŋ ononota oko, ŋat man awottere, omakere ame poko i akinagi mom twerre. Ka ogweo, lao doge ryeny aryenya calo ceŋ, waŋe obok pee calo ceŋ ka pwod adonnyo adonya odiko. Leb mac meny kato i doge calo mac rao, kun kir i doge calo mac otyer. Yito duny donyo i wume, calo yito adonyo i gulu. Ewura me weo mere twero kuto mac i milo, kun leb mac a lyel kato i doge. Ŋute tek meicel, ame ŋat orwatte kede lworo ciro oko. Riŋo kome ocikere acika karacel, ocikere atek ikiŋ ame mom romo dwinyere. Cunye tek calo kidi, tek meicel calo nyonyo. Ka ce en otwarre malo, twoni jo atek doko alwor, lworo miogi onyobere odoco. Kadi cob kome i pala lweny, mom donyo kadi acel, kadi cob kome i toŋ, onyo atero onyo toŋ abit meicel. Bano nyonyo calo ren kal, aco mola te calo yat otop. Atero mom romo miyo en mukere i ŋwec, atiŋdio i baŋe calo lum otwo. Abiro en neno calo ogada, ka jo omio toŋe abit ocobo kome en nyero anyera. Piny yie bit calo tako abit, ka awot tuco coto adyaka atuca. En mio pii i kut yenyo calo pii ame awalo i keno; mio pii i nam yenyo bwoo atar kia calo bwo moo ame ayenyo iyi gulu. Ka atagere i wot yore nen atar kia miyo kut buko atar kia calo lwar i wic. Mom tye ŋattoro ame rom kede i wi lobo-ni luŋ, en keken obedo gin ame mom tye kede lworo moro. Jami luŋ tye piny i tere, en abaka ame loo kit ginnoro luŋ a wakere.” Yubu te gamo dog Rwot ni, “An aŋeo ni yin iromo tiyo ginnoro luŋ; gin ame yin iyiko ni iti cobere. Yin ikobo ni, ‘Man kara ŋa ame mito ni ewum tamma nie, kun kono en mom ŋeo ginnoro kadi acel?’ An gire rik akobo gin ame mom aniaŋ iye, akobo kop i kom gigi mogo me awura meicel, ame an mom aŋeo. Rik akobbi ni, ‘Winy koppa, me akobi; yikere me gamo penya ame apenyi kede.’ Rik awinyo piri awinya, cite aman doŋ aneni kede waŋa: omio doŋ acaye kena meicel, ate ŋut kun abukkere apua kede buru.” Kare ame Rwot doŋ otyeko kobo kop magi luŋ baŋ Yubu, Rwot te kobbi Erifazi dano me Teman ni, “Akemo omaka meicel i komi kede i kom owoteni aryo-nu, pien mom ikobo wunu kop me ateni i koma kite ame amirona Yubu obedo kobo kede. Aman doŋ ba, myero ikwany wunu twoni abiro kede nyogi rommi abiro, iwot wunu kede baŋ amirona Yubu, me iwot iyala wunu i mot awaŋa pirwu; amirona Yubu bino kwaya pirwu; pien abino winyo kwaccere, mom abino keto lewic i komwu ame rom i kop ame ibedo kobo wunu i koma, Pien wun mom ibedo kobo wunu kop ame tye kakare i koma kite ame amirona Yubu obedo kobo kede.” Mannono omio Erifaji dano me Teman, kede Bildad dano me Cua, kede Jopar dano me Naamat te wot timo gin ame Rwot okobbigi; Rwot daŋ te gamo kwac a Yubu. Rwot odwoko gum a Yubu i kare ame en otyeko kwayo Rwot pi owote mere; Rwot omio Yubu jami abup ame doko maca me agege ca tyen aryo. Jo luŋ a rik onwoŋo ŋec con, kede omego mere, amego mere te bino baŋe, gin luŋ ote bino cam karacel kede i ode. Gin luŋ ote nyuto baŋ Yubu cuny me kica i kome, kun daŋ okweo-cunye pi gin arac ame Rwot onwoŋo omio otimere i kome. Ŋat acel acel i akinagi te miye dul lim ame onwoŋo tye i ciŋe kede atem me jabu. Rwot te miyo gum baŋ Yubu i kare man icennere-ni ame kato me agege oko; en onwoŋo tye kede rommi ame romo tutumia apar wie aŋwen, inaga tutumia abicel, twoni pur tutumia acel, megi kane tutumia acel. Awobe mere onwoŋo tye abiro kede anyira daŋ dok adek. Nyiŋ nyako me agege Yemima; me aryo Kejia; me adek Keren-kappuk; i kom anyira luŋ ame rik onwoŋo tye i lobo i kare-naca, mom tye moro ame onwoŋo ber akato anyira a Yubu; papagi rik te miyogi lobo me alea acalo megi i akina omegogi. I ŋe mannono Yubu dok te medde perakino i lobo pi mwakki ame romo mia acel kede pyeraŋwen, ame te neno ikwae tuno kede naka i me aŋwennere. Yubu te to ame doŋ oteggo atek, dok mwaka mere bup meicel. Ŋat a mom winyo tam a jo areco tye kede winyo, a mom koporo kite obalo, a mom bedo karacel i wegi aŋale; ento maro gire cik a Rwot; ame bedo lwodo i cunye dyeceŋ kede dyewor, Dano-nono calo yat ame odoŋo i ŋet kulo, ame nyako nyige i kare mere ikome, dok pote daŋ mom ner, ginnoro luŋ ame en timo cobere kakare. Cite otim tim areco mom tye kittono, gin ocalo cuŋ kal ame yamo kolo oko. Mannono omio otim tim areco mom bino cuŋ i kare me ŋolo kop; dok obalo mom bino ribere i jo a kitegi atira. Pien Rwot gwoko jo ame kitegi atira, i yogi luŋ; cite yo ame jo areco lubo terogi i can. Piŋo orok tye ka poro kop me jem? Piŋo rok tye ka poro kop a tere pe? Rwode me lobo doŋ otere oko, oloc tye ka poro kop karacel, i kom Rwot kede ŋat ame en oyero, kun okobo ni, “Ocod wunu nyorgi ame otweowa kede oko, okwer wunu locgi oko.” Rwot tye ka nyero anyera i wi kom loccere i polo, en tye ka ŋalogi aŋala. Tye ka kop kedgi akemo, Twon akemo mere agwa omio lworo omakogi, kun en kobbigi ni, “An doŋ atyeko keto abakana, i wi kidina acil me Cion.” Abino rabo cik a Rwot, ame en otyeko kobba, kun kobo ni, “Yin ibedo woda, ame tin doŋ anywali. Kwaa, an abino miyi rok luŋ me bedo megi, dok lobo luŋ daŋ bino bedo megi. Ibino loyogi abiro nyonyo, ibino ŋidogi oko atitino acalo gulu.” Aman doŋ ba, wun oloc, bed wunu aryek, wun oloc me lobo, ka okwenyorowu, winy wunu. Tiyi wunu Rwot, kun ilwore wunu, komwu myero myel kun irumo wunu coŋwu i nyime, naka mio akemo make, ite to wunu oko i yo; pien akemo make oyot meicel. Jo ame riŋo laro baŋe tye kede winyo. Ama Rwot, okworra doŋ pol nadi! Jo apol apola doŋ tye acako lweny keda; Jo apol apola doŋ tye akobo kop i koma ni, “Obaŋa mere gire mom romo konye.” Ento yin Rwot, yin ibedo kwot me geŋo koma, yin ibedo kwogona, yin en imia atiŋo wia malo. An akok i dwon aloŋo baŋ Rwot, en gamo doga i kabedo mere acil ame tye i wi kidi malo, An abuto piny ate nino oko, dok aco, pien Rwot en agwoka. An mom alworo jo tutumia apar, ame ogura oko dyere me lweny keda. Biye, Ama Rwot! Lara doŋ ba, Ama Obaŋana! Yin gire en iromo doŋo lem okwora luŋ, yin gire en iromo turo lak otim tim areco. Tic me laro jo obedo me Obaŋa; gum ame yin imio obed i kom joni luŋ! Gam doga, Ama Obaŋa ka ce akok baŋi, pien yin gire en igwoka. I kare ame onwoŋo atye kede peko, yin en ibino me bino konya. Kica myero doŋ maki ba i koma, dok iwiny daŋ kwaca. Ama wun jo ni, cunywu bino bedo anwaŋ pi kare ame rom mene ba? Ibino bedo lubo wunu tam a konnyere mom kede kop me goba naka awene? Poyo wunu ni Rwot doŋ otyeko yero jo ame wore me bedo mege en ikome; dok en winyo kwacca ka ce akok baŋe. Kadi bed akemo omakowu, myero kur ipot wunu i bal; jal wunu karewu me paro kop man i cunywu, bed wunu kenwu mot dyewor i dog itandawu. Yal wunu Rwot i mot abeco odoco, dok myero igen wunu Rwot. Jo apol kobo ni, “Ŋa a bino miyowa oneno gin aber! Ama Rwot, tiŋ waŋi inenwa i waŋ me kica ba!” Nen yin doŋ imia atye i yomcuny adwoŋ meicel, ame kato me a jo ame tye icam kede koŋo abup. An abuto piny i kuc ate nino daŋ oko, pien yin gire, Ama Rwot, en imia abedo aboŋo ginnoro ame alworo. Cik yiti iwiny koppa, Ama Rwot, winy daŋ curra. Ter yiti winy kokona, abakana kede Obaŋana, pien an atye ka kwayi. Yin gire en iwinyo dwona odiko, Ama Rwot; Odiko ayiko mot me yali, ate bedo kuro. Yin Obaŋa ame cunyi mom tim arac; mom iye nywako kabedo gin arac, Jo awakere mom romo cuŋ i nyimi; idago jo luŋ ame timo tim arac. Yin ijwero jo ame kobo kop goba oko; Rwot dago oony remo a jo kede obwol joo An gire abino donyo i odi, pi marri adwoŋ ame mom lokere, abino wori i odi acil, kun aryebere piny i nyimi i twon lworo adwoŋ. Tim ber itela, Ama Rwot, me atim gin a tye atira i nyimi, mi yo ame imito alub ocuŋ atira i nyima, pien okworra tye pol. Pien kop ame okworra kobo ateni mom iye, cunygi opoŋ ka itam me neko jo, dwongi obedo lyel a wie olaŋara, lebgi gin bwolo kede jo. Dwok balgi i wigi, migi can pire, Ama Rwot, tur yikgi-nono oko; ryemgi oko i nyimi, pien balgi dwoŋ meicel, pien gin ojem i komi. Cite mi jo ame riŋo laro baŋi bed kede lelo, migi ower wer me yomcuny nakanaka; dok yin myero igwokgi, me jo ame mari bed i twon yomcuny adwoŋ i komi. Pien imio gum baŋ jo ame kitegi atira, Ama Rwot, kicani wumo kome oko calo kwot. Ama Rwot, tim ber kur ijuka akemo, kur daŋ igoa kun akemo omaki. Kica myero omaki i koma, Ama Rwot, pien aloc doŋ oko, Ama Rwot, caŋa, pien cogo koma doŋ goro meicel. Kwona daŋ opoŋ i can. Kara doŋ yin ibino ri kare arom mene, Ama Rwot? Biye ilara, Ama Rwot, tim ber ilar kwona pi marri a mom lokere. Pien mom opo piri i lobo a jo oto; dok ŋa a twero paki piny i lyel me Ceol? Kumo doŋ ocira oko, dyewor pig waŋa nwoŋo odyako kabutona oko, koko doŋ omio aten wia dyaka adyaka, Cwercuny doŋ omio waŋa mito balle oko tye doŋ adoko agoro pi okworra luŋ, Wot wunu teŋe i nyima, wun otim tim areco, pien Rwot doŋ otyeko winyo kokona. Rwot doŋ otyeko winyo kite ame abako kede doga, en doŋ otyeko ye kwacca. Lewic bino mako okworra luŋ, cwercuny te cirogi oko; obino lokere odok cen, lewic te makogi oyotoyot. Ama Rwot Obaŋana, an gire ariŋo alaro baŋi, larra i ciŋ okworra ame aryemo yora, me ikonya, naka mio gin kikilo an oko calo eŋatu, kun owaa otera teŋe aboŋo ŋattoro ame romo lara i ciŋgi. Ama Rwot Obaŋana, ka ce atimo man, ka ce an atimo balloro, ka ce atimo balloro baŋ awota pi culo gin arac ame en otimo i koma, onyo ka ce ayako jami akworra aboŋo tyen kopporo. Mi okworra ryem yora maka oko i yo, migi oreta piny oneka oko, oweka piny kuno ame doŋ ato oko. Tim ber iya doŋ malo akemo, Ama Rwot, ya ilweny okworra ame obino i koma agwa wok-ki; ya doŋ malo, Ama Rwot Obaŋana, pien yin en iciko pi nino me ŋolo kop. Mi lwak rok luŋ cokere baŋi guri dyere, me yin icak loyogi kun ibedo i kabedoni malo. Rwot gire en a ŋolo kop a rok luŋ, ŋol doŋ koppa, Ama Rwot, kun icuŋ i kiteni atira, dok kun ilubo kite ame cunya ler kede. Tim ber imi tim a jo areco gik oko, cite myero imi jo a kitegi atira mok atek, yin Obaŋa ame kiteni atira, ame iŋio cuny jo kede tamgi. Kwot me geŋo koma tye baŋ Obaŋa, en laro jo ame cunygi atira. Obaŋa en aŋolkop ame ŋolo kop kakare, en Obaŋa ame mio kop loo jo a kitegi reco nino ducu. Ka ce dano mom oŋut, Obaŋa bino pako pala me lwenyere; en doŋ otyeko telo tol atero mere oko; Jami lwenyere areco meicel, en doŋ atyeko yiko oko luŋ, owaŋo doŋ leb atero mere oko i mac, Nen ba, atim tim arac, tamo tam arac i cunye, tim arac te doŋ bedo do ŋo i cunye, te cako kobo kop me goba baŋ jo. Kunyo twon burroro atut, en ikome dok te rette i bur ame ekunyo-nono, Timere araccono lokere dok i wie kene, dok timere me bwami daŋ lokere waŋe. An gira abino pwoyo Rwot pien kite atira dok daŋ abino wero wer me pako nyiŋ Rwot, ame en Ŋat Amalo Meicel. Ama Rwot, yin i Rwotwa, nyiŋi rwo meicel i wi lobo luŋ, Pak ame opaki kede pi kwogoni tuno malo i polo, kun itino atino kede itino ame pwod dot en awero, Ityeko gero cel atek odoco me geŋo okworri, me ilo okworri kede jo ame lwenyo i komi. Ka aneno polo ame yin ikomi itio, dwe kede acer-gu ame yin iketo i kabedogi, dano kara obedo gin aŋo, omio yin ibedo tamo pire, dano ata-ni obedo gin aŋo omio yin ibedo paro pire? Kadi amannono, yin icwec apat meicel, ame yin keken en iloe, iketo tok kwogo kede me woro i wie. Yin imio en obedo dwo ame loo jami luŋ ame iketo, imio jami luŋ obedo i te twerrere, rommi luŋ kede dok luŋ, karacel kede leyi me tim luŋ, winy ame twarre malo, kede rec ame bedo i pii, karacel kede kit jami luŋ ame bedo i nam. Ama Rwot Obaŋawa, nyiŋi dwoŋ nadi i wi lobo luŋ! Abino pwoyo Rwot kede cunya ducu, abino rabo pi jami luŋ me awura ame en otio. Cunya bino bedo yom kun alelo meicel piri, abino gira wer kun apako nyiŋi, Yin Amalo Meicel. Okworra bino lokere dok cen, a me komgi myel amyela ote rereta to oko i nyimi. Pien yin iŋolo koppa atira i wi kom locci, kan ame bedo iye aŋolkop ame ŋolo kop kakare. Yin ityeko juko rok, dok ijwero jo areco oko, yin doŋ ijwao nyiŋgi oko atwal i wi lobo, Okworra doŋ oto otum oko atwal, bomagi daŋ doŋ ikeketo oko luŋ, mom doŋ opo, pirgi kadi acel. Cite Rwot gire bedo i wi kom me loc nakanaka, en doŋ otyeko keto kom me ŋolo koppere oko, En loo lobo i kite atir, en bino ŋolo kop a rok luŋ arorom. Rwot en kan atek ame laro jo ame piny oloo, kan atek me alara i kare me can. Jo ame ŋeo nyiŋi bedo kede gen i komi, pien yin gire mom ikwero jo ame wori, Ama Rwot. Wer wunu wer me pako Rwot ame loo Cion! Rab wunu pi gin ame en otio baŋ rok luŋ! En acul kwor meremo a jo ame oneko, po daŋ pirgi, wie mom wil i kom koko a jo ame can opoto i komgi. Kica myero omaki i koma, Ama Rwot! Koŋ inen can ame jo a daga oketo i koma, Yin en ilara i kom to, me awer wer me paki i yore ducu, i kabedo me ŋolo kop i nyim jo me Jerucalem, dok daŋ alel pi kite ame ilara kede. Rok apapat doŋ orette oko i bur ame gin i komgi okunyo, tyengi omoko oko i owic ame gin ociko, Rwot doŋ otyeko miyo nyiŋe oŋeye oko, pi ŋolo kop atira otim tim areco moko dok iyi owic ame gin ikomgi ociko. Otim tim areco luŋ bino donyo piny i lyel me Ceol, naka rok luŋ ame okwero Obaŋa. Pien wi Obaŋa mom bino wil i kom ocan, dok gen ame ocan tye kede mom bino to nono. Ya malo, Ama Rwot! Kur imi dano loi. Cok rok luŋ i nyimi me iŋol kopgi. Mi lworo makgi, Ama Rwot! Myero gin oŋe ni gin obedo dano adana. Piŋo kara icuŋ kannabor abora, Ama Rwot? Piŋo kara ibedo pono apona i kare me ayela? Otim tim areco tye ka diyo ocan kun owakere meicel, migi omok kengi i gin ame gin oyiko. Dano arac wakere pi tam arac ame tye i cunye, dano owor inwoŋo lim yeto Rwot kun daŋ cao acaa. Dano arac mom paro pi woro Obaŋa, en wakere i cunye kun kobo ni, “Obaŋa gire mom.” Yo ame en lubo ocuŋ atira i kare luŋ, en mom paro pi ŋolo koppi, pien bor kede abora, en yeyea ni etek i nyim okworrere luŋ. En bedo tamo i cunye ni, “Ginnoro gire mom bino corra teŋe; cannoro daŋ gire mom bino poto i koma pi kare me kwona luŋ.” Kop i doge opoŋ i ceno jo, bwolo jo kede wuno jo, en kobo kop arac kede bal. En bedo libo jo i akina pacci, neko jo a mom i balloro ka pono mere. En ciko waŋe i kom jo ame can orido, pono imuŋ, kun kio jo calo eŋatu, En pono oko me wek emak ocan, en mako ocan ka ce omio odonyo iyi boo mere. Jejebo jo ame can orido, te diyogi oko piny, pien teko okworgi onwoŋo loo meggi oko, En bedo tamo i cunye ni, “Wi Obaŋa gire owil oko, en omio waŋe oko, mom gire romo nena.” Ya malo, Ama Rwot, rye ciŋi malo, Ama Obaŋa; wii kur wil i kom jo ame tye kede can, Piŋo atim tim arac cao Obaŋa, kun kobo i cunye ni, “Yin gire mom ibino pwoda?” Yin giri ineno, dok iŋeo can kede cwercuny ame dano tye kede, i kare luŋ iyikere me miyo kony. Dano a mom romo konyere kene, miye i ciŋi pien yin giri en ikonyo itino kic. Tim ber itur bad jo areco, kede otim tim areco, yeny balgi luŋ, tuno ka mom doŋ inwoŋo moro, Rwot en abaka ame perakino waŋ i waŋ, rok luŋ bino to oko i lobo mere. Ama Rwot, yin gire ibino winyo kwac a jo ame mwol, yin ibino miyo cunygi bedo atek, ibino ciko yiti i kwacgi. Ibino ŋolo kop atira pi itino kic kede jo ame owuno, me wek jo me lobo man mom dok okel lworo. An gira alaro baŋ Rwot, kara ŋo omio yin dok ikobba ni, “Lwi oko calo winyo me iwot ibed i wi kiddi malo, Koŋ inen kite ame jo areco atelo kede akud aterogi, oketo doŋ aterogi oko i kom tol atero, me ocel jo a cunygi ler i colpiny, Ka ce acakki me te ot doŋ oballe oko, dano a kite atira twero timo gin aŋo”? Obaŋa tye i ode acil, kom loc Obaŋa tye malo i polo; en neno jo luŋ ame tye i lobo, dok ŋeo gin ame gin tio luŋ, Pien Rwot temo jo a kitegi atira kede jo areco, en dago ŋat ame maro timo tim me byemi. En bino coro loti mac kede gweŋ calufa i kom jo areco bino pwodogi i yamo oro alyet meicel. Pien Rwot kite atira, en maro daŋ tim atira, jo a cunygi ler bino neno waŋe. Konya Ama Rwot, pien ŋattoro doŋ mom ame geni, pien jo ame geŋo doŋ oto otum oko i akina joo Nen ŋat acel acel tye ka kobo kop goba baŋ awottere, kop i doggi lim calo kic, aco cunygi nwoŋo okaro aryo. Rwot myero ŋol leb ame lebo kop amit wokkono oko, kop ame ya i dog ame mio dano wakere wok-ki, jo ame kobo ni, “Obino loyo kop i kop a ya i dogwa, lebwa gire tye me konyowa, kara ŋa ocele ame dok tye acalo adwoŋwa?” “Pien gin oyako ocan, dok jo ame kec neko tye ka cucura, mannono omio abino doŋ ya malo, ‘Rwot okobo, Abino doŋ gwokogi kite ame gin mito.’ ” Gin ame Rwot ociko, ber, calo ryal ame olio acil i mac, ame olio tyen abiro twal. Gwokwa aber, Ama Rwot, Gwok joni me kare luŋ nakanaka. Otim tim areco tye wirre tuŋŋi i tuŋŋi, kun oyenyo jo, kite ame jo tye ka pwoyo kodi timmono apwoa-ni. Ama Rwot, wii kara bino bedo wil i koma naka awene? Wii doŋ owil oko i koma atwal bo? Ibino bedo ponna apona kun mom aneni naka awene ba? Myero akany rem i cunya naka awene ba? Kun cunya cwer kare luŋ. Akworra bino bedo loya naka awene? Koŋ itam ite dokka iye, Ama Rwot Obaŋa, yab waŋa me kur anin nino me to; naka mio akworra kobo ni, “Atyeko doŋ loye”; naka mio akworra lelo pien an doŋ apoto oko. Cite an ageno gira marri a mom lokere, abino lelo gira pi larre ame ya i baŋi. Abino wero wer me pako Rwot, pien onyuto berrere adwoŋ i koma. Amino bedo tamo i cunye ni, “Obaŋa gire mom.” Gin luŋ oballe oko, gin luŋ otimo tim me kwer, ŋat a timo gin aber pe, Obaŋa neno jo luŋ ame tye piny i te polo, kun neno ka ce tye ŋattoro ame timo ginnoro luŋ i ryeko, kun timo gin ame Obaŋa mito. Gin luŋ doŋ ogak oko teŋe, gin ducu oballe oko, ŋat a timo gin aber pe, moro acelloro doŋ mom. Gin otim tim areco-nono ce mom otye kede ŋeccoro, gin jo ame camo dano calo ogati-nono, kun daŋ mom olwoŋo nyiŋ Rwot? Gin bino bedo kede twon lworo adwoŋ meicel kuno, pien Rwot konyo lwagi jo ame kitegi atira. Wun imito wunu balo yik acan, cite Rwot en obedo kan ame en laro. Kono larre a jo Icrael oya i Cion, kono ber! Kare ame Rwot bino dwoko iye gum a jo mere baŋgi, Yakobo bino lelo, Icrael bino bedo i yomcuny. Ama Rwot, ŋa kara ame bino bedo i kemani? Ŋa abino bedo i wi kidini acil? Dano ame kwo mere ber, dok ame timo tic atira, ame kobo kop me ateni i cunye ducu; ame mom bedo coko dog jo wadgi i kop ame ya i doge, dok mom timo ginnoro i kom owote mere, akadi balo nyiŋ dano wadgi. Dano ame waŋe balle i kom jo a mom woro Obaŋa, ento woro jo ame lworo Rwot, ame lido kwoŋ ame ekwoŋo nakanaka kadi tye i can, ame mom mito agoba moro i kom lim ame en konyo kede jo, dok mom ye gamo lim ame owilo ijo i muŋ pi dwoko kop i wi dano a mom i balloro. Dano ame timo jami magi mom obino coro teŋe. Jo acil ame tye i lobo, gin obedo jo me awora, ame oyomoro cunya meicel. Jo ame yero kit obaŋa moro ocele cwercunygi medde ameda; an mom amito onyo remo acalo mot amata me yalogi, room daŋ abino tuco nyiŋgi kadi acel. Rwot en obedo dul ame opokka, yin imia ginnoro luŋ amito, kwona luŋ tye i ciŋi. Waŋ lobona opoto kan ame yomoro cunya; anwoŋo doŋ lobo aber ame opokka me bedo mega. Apwoo Rwot ame omia ryeko; cunya daŋ pwonya naka dyewor. Nino luŋ Rwot mom bino rwenyo i nyima, pien en kare luŋ tye i ŋeta tuŋcem, ginnoro mom bino cora teŋe. Mannono omio cunya yom, kun alelo meicel; koma daŋ bino bedo i kuc. Pien yin gire mom ibino ye ni adony piny i lobo a jo oto, dok mom ibino weko komjo ame geni tuno piny i bur. Yin imia aŋeo yo me kwo; i nyimi tye twon lelo adwoŋ meicel, ŋeti tuŋcem tye iye yomcuny ame perakino waŋ i waŋ. Winy kokona, Ama Rwot, pien koppa tye atir, cik yiti iwiny kwacca, ame aya i doga kun goba mom iye. Tim ber imia aloo kop, yin en ineno gin ame tye atira. Ka ce iŋio cunya, ka ce ilima dyewor, kadi bed itema kede diro, mom gire ibino nwoŋo ni atimo timmoro arac, kop ame ya i doga daŋ mom tye iye balloro. Aco kop a dok i kom tic a dano, an alubo kop ame ya i dogi, mom alubo tim otim tim me byemi atwal, An alubo yoni keken, tyena mom ru ocer teŋe kadi acel. An akok gira baŋi, Ama Obaŋa, pien ibino gamo doga, cik yiti iwiny koppa. Nyut marri a mom lokere i yore me awura, yin en ame ilaro jo ame yenyo ka larre, i ciŋ okworgi, i ŋeti tuŋcem. Gwoka kite ame igwoko kede toŋ waŋi, kana i tipo me bwomi, i ciŋ jo areco ame yako limma, ame gin twon okworra atek meicel, ame ogura dyere. Kica moro doŋ mom i cunygi, pien ocule oko, okobo kop ame owakere awaka. Obedo libba i kabedo ducu, aman doŋ ogura oko dyere, waŋgi ocikere acika i koma meretta piny. Ocalo doŋ eŋatu owor ame cunye apupuka apuka, me mako gi-acama mere, ocalo atin eŋatu ame tye opono me libo jo. Ya malo, Ama Rwot, me irwatte okworra, lweny kedgi me ilogi oko. Lar kwona i ciŋ jo areco, kede pala me lwennyi. Lara i ciŋgi kede twerri, Ama Rwot, lara i ciŋ jo ame doŋ onwoŋo jami ame cunygi mito oko i kwo man. Migi oyeŋ i gin ame yam ikano pirgi; mii itinogi nwoŋ adoŋ okato kare; mii moro doŋ pi ikwaegi daŋ, Aco an gira, abino ciko waŋa komi, kun kitena atira; ka aco i waŋ nino, neno calli bino miya yomcuny. Amari gira, Ama Rwot, pien yin en ibedo tekona, Rwot gire en obedo ka larrena atek meicel, en tek kato kidi oko, Obaŋana obedo twon kidi moro atek odoco, ka alaro baŋe ginnoro mom doŋ guda. En geŋo koma calo kwot; en ka larrena atek meicel ame ariŋo alaro. An gira acwalo dwona baŋi, yin Rwot, yin en a myero paki, yin en ilarra i ciŋ okworra. Pien biamwonyi me to onwoŋo doŋ ogura oko dyere, biamwonyi me to onwoŋo doŋ ocorre oko i koma. Tol me Ceol onwoŋo doŋ olida ame ka weo pe, kun owic a to daŋ doŋ tye oterre oko i nyima. An gira acwalo dwona baŋi, Ama Rwot ka atye i peko, an gira acwao dwona baŋi me konya, yin Obaŋa, En winyo dwona i ode, kokona owinyere i yite. I kare-nono lobo oyeŋere te wirre, acakki te kiddi daŋ oyeŋere kun myel i kirkir, pien akemo onwoŋo omako Rwot. Yito oduny malo kun donyo wume, twon maccoro alyet te donyo doge, kede lodi mac okur atek. Odio polo odwoko piny, en te bino piny; kun piny col icuc i te tyene piny. En otwarre obino piny kun obedo i ŋe okerubi; yamo te ru riŋo kede oko piny. En te miyo piny acol wumere oko ipuk; eka pol apek obedo pii keken te doko kema mere. Tuŋ nyime onwoŋo ler alera, pee kede lodi mac okur te ya i pollere-nono. Dwon Rwot te mwoc i polo; dwon ŋat Amalo Meicel te winyere; pee kede lodi mac okur te corre piny. Obao atero mere, okworrere te ket atata; omio lutkot owil, co te ket i ŋwec. Pii i dye nam opokere, tere te nen; acakki te lobo te doŋ olaŋara; i kare ame Rwot ojuko okworrere, kun weo me wume kuto komgi. Rwot ocwao bade i polo, te mako ciŋa, en te waya en te waya oko i twon pi moro atut. En te larra oko i ciŋ jo atek ame daga; i ciŋ okwor ame onwoŋo mom aromo loyo. I kare ame atye kede can, gin ocako lweny i koma, ento Rwot gire te gwoka. Rwot olarra okela kan alac, pien cunye onwoŋo yom i koma, Rwot omia mot me pwoya arom aroma i kitena atira, omia winyo pien yia gira ler. An abedo lubo gira gin a Rwot mito, mom ru atimo ginnoro arac ame poka kede Obaŋa. Pien gin ame en ociko luŋ tye i nyima, dok daŋ mom ru akwero lubo icwillere moro. En oneno ni an a mom i balloro, agwokere gira i timo gin arac. Mannono omio Rwot omia mot me pwoya, pien oneno ni kitena atira dok oneno ni an yia ler. Yin Rwot ame inyutte keni baŋ jo a genne ni yin igenne, dok daŋ inyutte baŋ jo a yigi ler ni yin yii ler. Jo a kitegi beco yin inyutte baŋgi ni iber, eka baŋ jo a yigi col ite nyutto baŋgi ni yin itek. Yin giri ilaro jo ame mwolle i nyimi; ento iciko waŋi i kom wegi abwone me iwagi idwoggogi piny. Yin giri ibedo tarana ame menya, Ama Rwot, Obaŋana gire en a menyo piny acol ame atye iye Yin en imia teko me loyo okworra; kadi ocokere me lweny i koma; Obaŋana gire en amia teko me pye kalo cel. Gin ame Obaŋa-ni timo, ber meicel, gin a Rwot ociko cobere kakare. En tye acalo kwot me geŋo kom jo luŋ; ame riŋo laro baŋe. Ŋa kara ame dok obedo Obaŋa, mom Rwot keken? Ŋa ame dok calo kidi, mom Obaŋawa keken? Obaŋa-nono en ame ruka kede teko, en a mia awoto i kuc. En mio tyena bedo calo tyen atil; en ame mia acuŋ atek i wi kidi malo, En a pwonya i kite me lweny; ame mia atwero telo akud atero me mola. Yin doŋ ityeko miya kwot me larre, kony ame imia omio adoko twon lo moro adwoŋ, Imio kakara obedo alac; omio tyena mom ocer. Aryemo okworra ate makogi oko; akumo i komgi aboŋo weo naka ka gin otum. Aonyogi luŋ piny ame mom dok oromo ya; co oradde atata i te tyena piny. Pien yin imia teko me lweny, imia aloo okworra oko, Imio okworra omukere oko i nyima ote loka ŋegi; jo ame daga doŋ atyeko oko iweŋ. Otemo yenyo ŋat a myero konygi, cite mom onen; okok-gu baŋ Rwot, cite mom ogamo doggi. Aŋinyogi apwot calo apua ame yamo akolo, ajejebogi odoco calo coto ame onyonyono i dye yo. Yin en a rik ilara i baŋ jo ojem; ite gwoka calo aloc i wi rok apapat; jo a yam mom aŋeo doŋ i te locca. Tekki owinyo kop i koma ote cako wora oko; rok ocele luŋ obino te ryebere piny i nyima. Gin luŋ oonyo toŋigi piny, ote wote i ka-ponogi i myelkom Rwot akwo en kidi atek me larrena, myero pwoc! Obaŋana en a gire lara. Myero rab pi dittere. Obaŋana en omio aculo kworra, en omio rok luŋ odok i te locca, dok okwanya i ciŋ okworra, yin en a rik itiŋa malo i wi okworra, yin a rik ilara i ciŋ obyemi. Man omio an gira abino pwoyi akina orok; dok abino wero wer me pako nyiŋi, Ama Rwot. Obaŋa gire mio twon loc adwoŋ meicel baŋ abaka mere; en nyuto marrere a mom lokere baŋ ŋat a en oyero, baŋ Daudi kede baŋ i kwae waŋ i waŋ. Polo kede jami iye nyuto kwogo Obaŋa, polo nyuto tic ame en otio kannaler. Nino acel acel rabo kwogo Obaŋa baŋ nino a lube, dyewor acel acel daŋ kobbi dyewor ocele. Mom tye dwonnoro ame winyere, mom gire okobo kopporo kadi acel; aco ennono dwongi winyere aloŋo i wi podo luŋ, kop ame gin kobo tuno naka iyi agikki piny. Obaŋa oketo kema me bedo a ceŋ malo kuno, ame pelo iye calo anyom ame oya i ode; cobo wottere i yomcuny calo twon lo moro atek meicel. Ya i polo tuŋ cel, te wot naka tuŋ ocele; mom tye ginnoro ame lyeto mere mom gudo. Cik a Rwot ber, dok tye atira, roco kwo a dano doko anyen; gin ame Obaŋa ociko genne gire, mio ŋat a mom i ŋeccoro doko ŋat a ryek. Pwony a Rwot atira, yomoro cuny dano; cik a Rwot ber odoco, niaŋo dano aber, Lworo Rwot ber, perakino gire atwal; cik a Rwot luŋ ateni, dok bedo arom aroma kare luŋ. Pire tek kato jabu oko, kadijabu ame olio acil rom mene; dok alim kato kic oko, kadi bed en a pwod aton atona i pedo kic, Medo i mannono, gin en a kwenyoro an amironi; ŋat ame gwoko cikki nwoŋo mot adwoŋ. Ŋa kara ame romo ŋeyo ballere kene? Lara i bal luŋ ame opono. Gwoka i kom bal ame ya pi awaka, kur iwek loa, bino miyo abedo aboŋo balloro i koma, dok kun mom atimo twon balloro adwoŋ. Mi kop ame ya i doga, kede tammoro luŋ ame tyei cunya, obed gin ame yin ipwoo, Ama Rwot, yin i ka-larrena, dok yin daŋ en ilara. Rwot myero gam dogi i kare ame itye i peko, nyiŋ Obaŋa a Yakobo myero gwoki. En myero cwayi kony i kabedo mere acil, en myero cwaki i Cion! Myero en po pi motti luŋ ame imio, dok daŋ ogam i yomcuny mot awaŋani ame iyale kede. En myero mii gin ame cunyi mito, dok cob ginnoro luŋ ame cunyi mito tiyo. Wan myero owo i wer me lelo pi locci, oŋab benderawa malo i nyiŋ Obaŋawa. Rwot myero mii ginnoro luŋ ame ikwao pire, Aman doŋ aŋeo ni Rwot konyo abaka ame en oyero, en bino gamo doge i polo mere acil; bino miyo en loo lweny. Jo mogo geŋo gadigadi lweny kede aguragura, ento wan ogeno Rwot Obaŋawa. Gin bino rette gire oko piny, cite wan obino ya ote cuŋ atek, Mi abaka loo lweny, Ama Rwot; gam dogwa ka ce olwoŋi. Amironi abaka lelo pi tekoni, Ama Rwot; kony ame imie yomoro cunye nadi! Yin doŋ imie gin ame cunye mito, dok mom ikwero kwaccere. Iŋolo wie i mot abeco meicel, iketo tok kwogo me jabu i wie. En okwai ni imie kwo ame daŋ ite miye, imie kwo ame perakino waŋ i waŋ. Kwogo mere dwoŋ meicel pi kony ame imie, imie kwogo kede loc, Yin doŋ imie gum atwal, cunye yom pien yin itye kede. Pien amironi abaka geŋo Rwot; pi mar a mom lokere ame Ŋat Amalo Meicel tye kede i kome, ginnoro gire mom bino core teŋe. Ciŋi bino gudo kom okworri luŋ, ciŋi me tuŋ cam bino mako jo luŋ ame dagi. Ibino lokogi odoko calo keno ame mac alyel iye, i nino ame ibino nen iye. Akemoni bino miyo inekogi oko, mac bino, waŋogi oko, Ibino tyeko ikwae luŋ i lobo, karacel kede itino mere i akina jo. Ka ce gin oyikere me timo ginnoro arac i komi, akadi oyikere me timo tim me idwali, yikgi mom bino cobere. Pien ibino miyogi omukere oko i ŋwec, ateroni bino pimo nyimgi ikokome. Odwori pi tekoni, Ama Rwot! Wan obino wer kun opako twerri. Obaŋana, Obaŋana iweka piŋo? Piŋo kara itye kannabor abora keda ame mom iromo lara, mom itye ka winyo cura bo? Ama Obaŋana, akok dyeceŋ cite mom igamo doga, akok dyewor daŋ, cite mom anwoŋo kare moro me weo. Aco kono yin Obaŋa ame cil, i bedo i wi kom loc ame jo Icrael paki apaka. Kwariwa rik geni, gin ogeni, yin ite larogi. Gin rik ocwao kwacgi baŋi, omio ote larre, gin rik ogeni, omio mom obedo icwercunnyoro. Cite an kom arom aroma i kudi ata, mom dano, ame jo ŋalo kun ocao acaa. Jo luŋ ame nena, yeta ayeta, ocima i lebgi, dok oyeŋo wigi i koma kun okobo ni, “En geŋo Obaŋa, wek Obaŋa lare, Rwot myero lare, pien Rwot pwoc.” Aco kono yin en a rik imio onywala yin en a daŋ igwoka i kor totta ame pwod adot. An abedo jeŋere i komi cakere ameonywala, cakere i kare ame onywala yin en ibedo Obaŋana. Kur ibed bor keda, pien can ceggi acega, aco kono mom tye ŋattoro aromo konya. Okwor doŋ ogura oko dyere calo twoni ager, ogura doŋ oko atek calo twoni atek me Bacan; otye ka ŋamo doggi alac i koma, calo eŋatu ager ame tye ka koko, An doŋ acalo pii ame oonyo oko piny, cogo koma doŋ ogwegweta oko i kabedo ducu; cunya doŋ omeye oko calo odok kic, amontenna doŋ ojebere oko; Tekona otwo doŋ calo tako gulu, leba daŋ doŋ omoko oko i dano abuto doŋ piny iyi apua calo dano oto. Nen jo doŋ ogura dyere calo gwogi, otim tim areco apipim doŋ ogura dyere; ocobo ciŋa kede tyena. Atwero kwano cogo me koma luŋ, ociko waŋgi i koma kun onena i keo meicel; Opoko boŋŋina i akinagi, obolo kwir pi boŋŋina. Cite yin myero kur ibed abor keda, Ama Rwot, yin en ikonya, ru lara ba! Lar tipona i pala romo, lar kwona i teko a gwogi. Lara i dog eŋatu, kede tipona i kom tuŋ twoni ager, Abino dworo nyiŋi baŋ omegona, abino paki i akina lwak ocokere. Wun jo luŋ ame woro Rwot, pake wunu, wun jo a Yakobo luŋ, ket wunu kwogo i kome, wun jo Icrael ducu, lwore wunu. Pien en mom ocaowu, mom okwero can a jo a can opoto i komgi, en mom orwenyo oko i baŋgi, en winyo kokogi ka okok baŋe. Abino paki i akina lwak ocokere karacel, abino cobo gin ame aciko i nyim jo ame wore, Jo a can opoto i komgi bino cem te yeŋ atek, jo ame yenyo Rwot bino pako Rwot, Myero ibed giri kwo aber nakanaka, Jo me wi podo luŋ bino po pi Rwot, ote lokere bino baŋe; doggola me rok apapat, gin luŋ obino wore. Pien loc obedo me Obaŋa, en loo tok luŋ aluŋa. Jo a wakere luŋ me wi podo bino ryebere i nyime, jo ame to te dok iyi apua daŋ bino ryebere i nyime, Lwagi jo me kare luŋ bino tic baŋe, jo bino rabo pi Rwot baŋ lwagi jo ame lubogi, kun otito pi larrere baŋ jo ame mom ru onywalogi, ni Rwot laro jo mere. Rwot en akwatta, ginnoro mom bino remma. En mia abuto iyi elet aber, en telo nyima naka i dog pii aŋic. En roco kwona doko anyen, en telo nyima mia alubo yo me kite atira, pi keto kwogo i nyiŋe. Kadi bed atye ka beo i luŋŋoro acol icuc, mom abino lworo ginnoro, Ama Rwot, pien yin gire itye keda, lutti kede abironi me kwat mio cunya bedo atek. Yin iketo cam me acamana i wi meja, kun okworra tye aneno. Yin iwirowa kede moo, kun ikopona opoŋ ikwic. Ateteni, berri kede kicani, bino bedo i koma pi kare luŋ me kwona, dok abino bedo i ot a Rwot nakanaka. Lobo luŋ kede jami luŋ a tye iye obedo me a Rwot, wi podo luŋ kedejo luŋ ame bedo iye. En onwoŋo oketo lobo i dye nam, kun acakki tere tye i dye pii me nam atut. Ŋa ame romo yito malo i wi kidi a Rwot? dok ŋa ame romo cuŋ i kabedo mere acil? Dano ame kite atira dok ame yie cil, amom ketto cunye i gin a mom atira, dok mom kwoŋo kwonnoro me goba goba. Rwot bino miyo dano-nono gum, dok Obaŋa ame lare bino kwanyo kop i wie. Mannono en jo ame woro Obaŋa, gin jo ame bino i nyim Obaŋa a Yakobo, Wun dogcel luŋ, yabere wunu ba alac odoco, doggola luŋ acon daŋ myero yabere oko, me abaka won kwogo bin dony iye. Kara abaka me kwogo-nono en ŋa ba? En obedo Rwot atek ame loo twer ducu, Rwot ame loo ducu i lweny. Wun dogcel luŋ, yabere wunu ba alac odoco, doggola luŋ acon daŋ myero yabere oko, me abaka won kwogo bin dony iye. Kara abaka won kwogo-nono en ŋa ba? En Rwot me mony, en obedo abaka won kwogo. Atiŋo kwona amio baŋi, Am Rwot, An gira ageni, Ama Obaŋana, kur imi lewic maka, kur imi okworra bed ŋala. Ama Rwot, kur imi lewic mak jo ame kuri, ento mi lewic mak jo ame kweri nononono. Rwot, mia aŋe yoni, pwonya kop i kom yoni ducu. Tela me lubo ateni, kun ipwonya, pien yin Obaŋa ame lara, ageni nino ducu. Pien kicani, Ama Rwot, po pi marri a mom lokere, ame ibedo bedo kede cakere con. Kur dok ipo pi bal ame atimo i kare me tinona, kur daŋ ipo pi rocca luŋ, po pira pi marri a mom lokere, pi berri giri, Ama Rwot. Rwot ber, dok cunye ler, mannono omio en pwonyo obalo me ŋeyo yo, En telo jo ame mwol i gin atira, kun pwonyogi me ŋeyo yo mere. Mar a mom lokere kede gen, dwoŋ meicel i yo a Rwot luŋ, pi jo ame lubo cikere mere, karacel kede koppere me caden. Pi ber a nyiŋi, Ama Rwot, wek balle oko pien dwoŋ meicel. Dano ame lworo Rwot, Obaŋa bino pwonye me ŋeyo yo a myero elub, En ikome bino bedo i lonyo kare luŋ, dok itino mere bino leyo lobo. Rwot mako dyere i jo ame wore, en miogi oŋeo cikere mere, Aciko waŋa kare luŋ i kom Rwot, pien en a gonyo tyena ka omoko i bwo. Lokere idwog baŋa me inyutta berri pien atye doŋ kena kun can orida oko. Kwany cwercuny luŋ ame tye i cunya, dok ilara i peko luŋ ame atye kede. Tam pi can kede peko ame atye kede, me ite weko balla luŋ, Tam pi wel okwor ame atye kede, dok inen kite ame gin daga kede agwa meicel. Gwok kwona, dok ilara, Ama Rwot; kur imi ket lewic i koma, pien an gira ariŋo alaro baŋi. Myero ler a cunya kede cunya ame tye atira gwoka, pien an gira ageni. Lakoro jo Icrael, Ama Rwot, i kom peko luŋ ame gin otye kede. Ŋol koppa, Ama Rwot, pien abedo timo gin a tye atira, abedo geno Obaŋa kare luŋ, kun mom agatte kadi acel. Ŋia aber odoco, dok itema, tem cunya kede tamma luŋ. Pien a tye ka neno mar a mom lokere ame i tye kede, dok a tye ka timo ginnoro luŋ i gen adwoŋ. Mom anywako kabedo i jo ogoba, mom daŋ anotte obwol jo. Adag ribere otim tim areco, dok mom daŋ abino nywako kabedo i jo a kitegi reco. Alogo gira ciŋa oko me nyuto ni a mom i balloro, me awot aman keno lammi, Ama Rwot, kun awero wer me pwoyi i dwon aloŋo, dok atito pi ticcoro luŋ me awura ame yin itio, Ama Rwot, an amaro bedo i odi, kede kabedo ame kwogoni bedo iye. Kur imia arweny oko karacel obalo, kur imi kwona orweny oko i jo ame onyo remo a jo, jo ame ciŋgi mom keŋ timo gin arac, ame caogi opoŋ i lim ame owilogi kede i muŋ, Cite an gira, cunya cil i kare luŋ, lakoro an, dok kica myero maki i koma, Tyena ocuŋ kanopirre apira, abino pako Rwot naka i dye lwak ocokere luŋ. Obaŋa en obedo tarana, dok en a daŋ lara; kara doŋ ŋa ame abino lworo? Rwot en obedo kan atek me gwoko kwona; kara doŋ ŋa ame myero alwor? Ka ce jo areco mito lweny i koma me neka, kun okobo kop arac i koma, okworra kede omonena, obino gatte ote rette oko piny. Kadi mony luŋ gura dyere, mom abino bedo i lworo moro i cunya; kadi bed ocak lweny i koma, pwod gire abino bedo kede gen pi Rwot. Tye gin acel keken ame akwao i baŋ Rwot, mannono keken en ame amito; amito ni abed gira i ot a Rwot, pi kare luŋ me kwona, me abed neno ber a Rwot, dok abed penye i ode kuno me tela. Pien i kare me peko, en bino kanai ode, en bino wuma oko i kema mere, bino ciba malo i wi kidi. Mannono bino miyo abedo gira malo, i wi okworra ame ogura dyere; abino yalo Rwot i mot i kema mere, kun aredo i yomcuny meicel. Abino wero wer kun apako Rwot i dwon amit. Winy kokona, Ama Rwot, ka akok baŋi, kica myero maki i koma, me igam doga. Yin ikobo ni, “Bin baŋa.” Agamo i cunya ni, “Abino bino baŋi, Ama Rwot.” Kur iponna oko, Ama Rwot. Kur iryema an amironi kede akemo, yin ame yam ibedo konya. Kur ibola oko ba, kur iweka ata, Ama Obaŋana ame lara. Pien pappa kede totta oweka oko ata, cite Rwot gire bino gwoka. Pwonya me aŋe yoni, Ama Rwot; tela i yo ame tur kede popony mom iye, kur iweka i ciŋ okworra, Kur ijala i ciŋ omonena; pien ocaden ame ogoba tye ka ŋuno goba i koma, kop doŋ adonnyo i doggi agwa meicel. An pwod aye ni abino neno ber a Rwot, i lobo a jo akwo, Kur Rwot; cuŋ atek kun cunyi nwaŋ, myero ikur Rwot. An acwao kwacca baŋi, Ama Rwot, yin ibedo kidina atek ame gwoka, kur icul yiti oko, Ama Rwot, pien ka yin iliŋ aliŋa, abedo arom aroma i jo ame oyiko i bur. Winy kwacca ame abako kede doga baŋi, ka akoko kony i baŋi, kun ataŋo ciŋa malo i nyimi, kun nyima oneno kabedoni acil meicel. Kur itera karacel i jo akitegi reco, ame gin obedo jo ame timo tim areco, ame kobo pi kela kuc baŋ owotegi, kun cunygi col meicel. Culgi ame rom aroma i ticgi, dok ame rom aroma i tim arac ame gin timo, culgi a rom aroma i tic ame ciŋgi otio, culgi i cul ame oporre pirgi. Pien gin mom oparo pi tic a Rwot otio, onyo pi gin ame en oketo, mannono omio en bino turogi oko, mom dok ote ya malo atwal. Rwot myero pwo, pien en owinyo dwona, ame abako i doga baŋe. Rwot en tekona kede kwot me geŋo koma, an gira agene; omio en konya, cunya te bedo ayom meicel, an apwoe kede wer me pake. Rwot en obedo teko a jo mere, dano mere ame owiro kede moo laro baŋe. Lar lwakki, Ama Rwot, dok imigi gum, tim ber ibed akwatgi dok igwokgi nakanaka. Tit wunu pi Rwot, wunu, gin akwo luŋ i polo, rab wunu pi kwogo mere kede teko mere luŋ. Rab wunu pi kwogo me nyiŋe, wore wunu kun iruko wunu ruk acil. Dwon Rwot mor winyere naka i pii; Obaŋa me kwogo tye ka mwoc calo kot, dwone tye ka winyere naka i wi nam adoŋo, Dwon Rwot tye i teko meicel; kwogo dwoŋ i dwone nadi. Dwon Rwotturo anaka yen cedar, dwone turo yen cedar me Lebanon. En mio Lebanon takoro cala roya, Cirion takoro calo atin jobi. Dwon Rwot mio lutkot meny, calo mac a lyel. Dwon Rwot yeŋo anaka tim, dwone yeŋo tim me Kadec. Dwon Rwot mio atil nywal oko, dwone ruto yen i tim luŋ piny, jo luŋ i ot ame wore te wo ni, “Kwogo bed baŋ Obaŋa.” Rwot en ame looanaka pii luŋ ame tye i nam, en bedo i wi kom loc nakanaka acalo abaka, Rwot myero mi jo mere teko, Rwot myero mi jo mere gum me bedo i kuc. Apak i gira, Ama Rwot pien ikonya, dok mom imio okworra olelo i koma, Ama Rwot Obaŋana, rik akok baŋi me ikonya, nen doŋ ityeko miya acaŋ oko. Nen yin ikwanyo tipona i Ceol twal, imia dok akwo i akina jo ame doŋ odonyo piny i lyel. Wer wunu wer me pako Rwot, wun jo mere acil, pwoc wunu pi nyiŋe acil. Pien akemo mere mom ri nakanaka, cite berrere bedo pi kare me kwowa luŋ, Ka ce abedo i cwercuny dyewor, odiko nwoŋo atye alelo alela. Man omio an i kare ame atye aber meicel akobo ni, “Ginnoro gire mom bino corra teŋe.” Pi berri, Ama Rwot, imia acuŋ atek calo twon kidi atek: i kare ame ipono oko i nyima, cunya opoto. An gira rik akok baŋi, Ama Rwot, dok abako doga baŋi kun akwai ni, “Kara tona twero miyi kony aŋo, ka ce an doŋ adonyo oko piny i lyel? Apua me lobo bino paki bo? dok bino rabo pi kiteni atira. Ama Rwot, winy kokona, kica omaki i koma, Ama Rwot, yin myero ibed ŋat ame konya.” Iloko kumona odoko lelo, imia agonyo boŋo cola oko i koma, ite lunyo ruka kede yomcuny. Me tipona bed paki kun mom liŋ, Ama Rwot Obaŋana, abino pwoyi nakanaka. An alaro baŋi, Ama Rwot, kur imi lewic maka; lara pi kiteni atira. Cik yiti iwiny koppa, Ama Rwot, ru lara oyot meicel. Bed kidi atek me larrena, cel atek me lara. Yin en ibedo kidina kede cel atek me gwoka, Ama Rwot, tela dok igwoka pi nyiŋi. Gonya iyi boo ame ociko kan adiŋ pira, pien yin ibedo ka larrena. Amio kwona i ciŋi, Ama Rwot, yin gire ilakoro an, Ama Rwot Obaŋa ame genne. Yin idag jo ame woro cal jogi a konygi mom, an gira ageni, Ama Rwot. Abino lelo kun cunya yom pi marri a mom lokere, pien yin ineno can ame atye kede, dok iŋeo pekona. Dok mom imia i ciŋ okworra, imia kabedo alac me bedona. Kica myero omaki i koma, Ama Rwot, pien atye i can, koko daŋ omio waŋa ocido oko, tipona kede koma doŋ oballe oko. Pien abedo bedo i cwercuny kare luŋ me kwona, kun mwaka i mwaka atye ka cur acura. Tekona otum oko pi peko ame abedo beo iye, cogona luŋ daŋ onyoŋere oko, Jo ame daga doŋ bedo ŋala aŋala, owotena-gu nyera anyera, jo ame ŋea doŋ lwora alwora, jo ame nena i dye yo riŋo gigi oko. An doŋ arom aroma i dano oto, wi jo doŋ owil i koma oko, calo tako gulu ame obolo i wi odur. Nen atye ka winyo jo tye amuŋo i nyiŋa, lworo doŋ ogurra oko dyere. Oyubere doŋ oko pira, otye ka poro kop me neka. Cite an gira ageni, Ama Rwot, akobo ni, “Yin en ibedo Obaŋana.” Kare me kwona gire tye i te twerri, lara i ciŋ okworra kede i ciŋ jo ame wuna. Nen amironi i waŋ me kica, Ama Rwot, lara pi marri a mom lokere, Kur imi lewic maka, Ama Rwot, pien an gira akok baŋi, mi lewic mak otim tim areco, migi oto owot i Ceol liliŋ. Mi leb jo akobo kop goba to oko, ame kobo kop areco me acae, kun owakere kede i kom jo a kitegi atira. Ber ame ikano pi jo ame lwori dwoŋ nadi, gin ame itimo me awura pi jo ame riŋo laro baŋi dwoŋ nadi i nyim jo luŋ. Yin igwokogi i kabedo i nyim, kan ame itye iye, ilarogi i ciŋ jo ame tye ka poro kop i komgi, igwokogi aber i odi, i kom leb abit ame jo yelogi kede. Rwot myero pwo, pien onyuto marrere a mom lokere baŋa i yore me awura, i kare ame rik ogura dyere calo boma ame oguro. I twon lworo adwoŋ a rik atye kede ate kobo ni, “Oryema doŋ teŋe meicel nyimi.” Cite yin rik iwinyo kwacca ame abako kede doga baŋi, i kare ame akok baŋi me konya. Wun jo ame geno Rwot, mar wunu Rwot, Rwot gwoko jo ame genne, cite jo ame opala, en culogi can oromogi odoco, Cuŋ wunu atek kun cunywu nwaŋ, wun jo luŋ ame geŋo Rwot. Tye kede winyo, jo a doŋ otimogi kica i kom timgi areco, ame owumo balgi oko. Tye kede winyo, dano ame Rwot mom okwano balloro i kome, dok ame goba moro mom i cunye, Ka ce akwero tuco balle, koma balla oko, kadi bed acur ceŋ iyul. Pien iketo can i koma dyeceŋ kede dyewor, tekona te tum oko odoco, kite ame ikuna rwenyo kede i oro, Aye doŋ tuco balla i nyimi, ginnoro luŋ arac ame atimo mom amuŋŋi. An rik akobo ni, “Abino tuco balla baŋ Rwot, yin ite tima kica i kom balla.” Pi mannono, jo luŋ ame woro Obaŋa, myero gin luŋ ocwa kwacgi baŋi, i kare ame gin tye kede can, ame alele kot atek mito mwonyogi oko, pi mannono mom bino tuno i komgi, Yin en ibedo ka ponona, yin en igwoka ka peko tye, igurra oko dyere kun ilara. Abino pwonyi kun anyutti yo me aluba, abino miyi ryeko, dok waŋa mom bino rwenyo i komi. Kur ibed calo aguragura onyo kana a mom ŋeo ginnoro, ame myero twe doge kede wie, me lub gin ame imito. Jo areco rwatte kede peko adwoŋ meicel, cite jo a geŋo Rwot en gwokogi kede marrere a mom lokere, Myero ilel wunu kun cunywu yom i Rwot, wun jo a kitewu atira; red wunu pi yomcuny ame itye wunu kede, wun jo luŋ ame cunywu atira. Lel wunu i Rwot, wun jo a kitewu atira! Pake wunu, wun jo ame winyo koppere! Pak wunu Rwot i naŋa opuk, wer wunu wer me pake i naŋa a tollere tye apar twal. Pake wunu i wer anyen, go wunu naŋa me pake i diro meicel, kun iwero wunu i dwon aloŋo. Pien kop a Rwot okobo tye kakare, dok en agen meicel i ticcere luŋ, Rwot maro kite atira kede ŋolo kop atira, mar a Rwot a mom lokere tye adwoŋ meicel i lobo, Kop a Rwot en omio lobo okette, jami iye luŋ weo mere en omio obedo tye. En ocoko pii i nam luŋ karacel bala pii i yi cupa, okano nam atut oko calo gin okemo ot kano jami. Jo me wi lobo luŋ myero wor Rwot, myero jo luŋ ame bedo i wi podo bed i lworo i nyime. Pien en okobo ka kop, lobo te kette, en ociko acika keken, jami luŋ te bedo tye. Rwot balo yik a rok apapat oko, en mio tam a jo ocele mom cobere, Cite gin ame Rwot oyiko perakino waŋ i waŋ, gin ame en otimo i ciŋe bedo me kare luŋ, Rok ame Obaŋa en a Rwotgi, tye i winyo, jo ame en oyero me bedo jo mere ikome. Rwot neno piny i polo, en neno jo luŋ aluŋa, En noloro piny i wi kom me loccere, neno jo luŋ ame bedo i wi lobo. Rwot gire en ame oketo cuny jo luŋ, en neno ginnoro luŋ ame gin tio. Abaka mom larre pi lwak mony ame en tye kede, acirikale mom larre pi twon teko mere adwoŋ. Aguragura me lweny mom obedo gi-agena i lweny, mom romo laro dano kadi acel, pi twon teko mere adwoŋ wok-ki. Nen ba, wan Rwot gire mom rwenyo i kom jo ame wore, jo ame tye kede gen pi marrere a mom lokere, me elar tipogi oko i to, dok egwokgi obed kwo i kare me kec. Tipowa tye ka kuro Rwot, en obedo akonywa kede kwot me geŋo komwa. Wan giwa, cunywa yom pire, pien wan otye i gen i kom nyiŋe acil. Ama Rwot, mi marri a mom lokere bed i komwa, pien wan otye kede gen piri yin keken. Abino pwoyo Rwot kare luŋ, wer me pake mom bino rwenyo i doga. Tipona wakere pi Rwot, jo a tye i can myero winy te lelo. Rab wunu pi dit a Rwot karacel keda, me opak wunu nyiŋe karacel. Akwao Rwot, en te gamo doga, en te kwanyo lworo luŋ ame onwoŋo atye kede. Nene wunu, me waŋwu ryeny, me lewic kur dok medde makowu, Jo ame tye i can kok baŋ Rwot, Rwot te larogi i peko luŋ ame otye kede. Omalaika a Rwot gwoko jo luŋ ame lworo Rwot, dok larogi i cannoro luŋ. Koŋ item, me inen ber a Rwot yin ikomi, jo ame laro baŋe tye i yomcuny. Myero iwor wunu Rwot, wun jo mere ame gene, pien jo ame wore, ginnoro mom remo. Kadi atin eŋatu buto kec, dok jami apol remo, cite jo ame geno Rwot, mom tye ginnoro aber ameremogi. Biye wunu itinona, me iwiny wunu koppa, abino pwonyowu kite me woro Rwot, Ŋa i akinawu ame mito kwo? Imito perakino i lobo kun cunyi yore? Gwok lebi kur kob ginnoro arac, kede dogi kur ibwol jo. Ya oko i gin arac, ti gin aber, yeny kuc, ilub yore. Waŋ Rwot mom rwenyo i kom jo a kitegi atira, ciko yite me winyo kokogi. Rwot dag neno jo ame timo gin areco, mio nyiŋgi rwenyo oko i wi lobo. Ka ce jo a kitegi atira okok ni konygi, Rwot winyo kokogi, en te larogi oko i peko ame gin otye kede. Rwot ceggi acega i jo ame tyei cwercuny, en laro jo ame cunygi ton. Can ame poto i kom jo a kitegi atira pol atek, cite Rwot larogi iye luŋ. Rwot gwoko anaka cogo i komgi luŋ, moro acel akinagi mom tur. Timo tim arac en a bino neko otim bal, dok jo ame dago jo a kitegi atira, kop bino loyogi. Rwot lakoro kwo omiro mere, kop mom bino loyo jo ame laro baŋe. Ama Rwot, pid kede jo ame pida, dok ilweny kede jo ame lwenyo keda, Mak kwot adwoŋŋere kede ginnoro me geŋo komi; me iya malo ikonya. Wot koŋ doŋ toŋŋi oko, me lweny i kom jo ame ryemo yora, kobbi cunya ni, “An en alari.” Mi lewic mak jo ame mito neka, mi jo ame poro kop arac i koma, olokere odok cen i twon lewic adwoŋ meicel. Migi obed calo cuŋ kal ame yamo kolo, i kare ame omalaika a Rwot tye aryemogi. Mi yogi acol icuc dok apwot apwota, kare ame omalaika a Rwot aryemogi. Ociko boogi kan adiŋ pira aboŋo balloro ame onwoŋo i koma, okunyo-gu bur me tyeko kwona nononono. Mi can tugi atua, kun mom oŋeo kadi acel, migi omok i boogi ame ociko kan adiŋ pira, migi orette oto okoi bur ame okunyo pira, Cunya te bedo ayom meicel i Rwot, abino lelo meicel pi lara ame en olara kede. Cogo koma luŋ bino kobo ni, “Ama Rwot, ŋa kara ame cal kedi? Yin ame ilaro jo agoro, i ciŋ dano ame tek loc atek ateka, ilaro ŋat agoro kede ŋat ame piny oloo, i ciŋ jo ame yako jamigi.” Ocadennogo me goba ya malo, ote bedo pepenyo an i gin ame an akwia. Ocula i rac pi gin aber ame an atimo; cunya cwer atek meicel. Cite an i kare ame komgi lit, abedo ruko boŋo cola, dok abedo minne i kec pirgi. Abedo kwayo Obaŋa kun akula wia piny, calo ŋat ame akumo pi awottere onyo ominnere, dok abedo wot atata calo ŋat a koko tottere, kun akumo ame akulo wia piny. Ento gin ka onena, ogatte, gin ocokere me nyera, ocokere karacel me lweny i koma, naka oŋwalo a yam mom aŋeo, obedo yeta kun mom oliŋ kadi acel. Gin luŋ omedde nywara anywara kun daŋ ocaa, ame okao lakgi atek odoco. Ama Rwot, kara ibino bedo nena anena naka awene ba? Lara oko i ciŋgi ba, lar kwona i ciŋ eŋatu. Mannono bino miyo apwoi i akina lwak jo ocokere karacel, abino paki i akina lwak adwoŋ. Kur imi okworra bed lelo i koma, kun gin obedo otim tim areco, kur imi jo ame daga aboŋo ginnoro ame atimo, bed mimio waŋgi ikoma atata. Pien gin mom okobo kopporo me kuc, ento gin obedo kobo kop me lweny i kom jo a bedo mot i wi lobo, gin obedo paro kop me bwolo jo keken, Oŋamo doggi alac me kobo kop i koma, kun okobo ni, “Aa! Aa! Wan doŋ otyeko neno kede waŋwa.” Ama Rwot, yin doŋ ityeko neno, kur ibed liŋ aliŋa! Ama Rwot, kur ibed bor keda. Ya malo, me ibin ikonya, Ama Obaŋana kede rwotta, cuŋ pira, Kwany kop oko i wia, Ama Rwot Obaŋana, kite acalo yin kiteni atira, me kur imigi olel i wia. Kur imigi obed kobo i akinagi kengi kengi ni, “Aa! Doŋ onwoŋo gin ame cunywa mito.” Kur imigi obed kobo ni, “Wan doŋ otyeko mwonye oko,” Mi lewic mak jo ame nyero canna, babaŋogi oko, Ama Rwot. Mi ale twodgi ducu, gin jo luŋ ame wakere i koma, Mi jo ame mito ni an alo kop bed i yomcuny, kun okobo kare ducu ni, “Rwot gire dwoŋ meicel, cunye bedo yom ka omiro mere tye i kuc.” Abino rabo pi kiteni atir, dok abino pako nyiŋ i dyeceŋ luŋ. Tim me turo cik bedo i cuny dano arac, kan atut, lworo moro i kom Obaŋa mom tye i cunye kadi acel. En bwolle kene ni ballere mom obino neno, dok ni ballere mom oromo nwoŋo, dok daŋ mom oromo kwero, Kop ame ya i doge reco, dok me goba keken, en mom doŋ romo timo timmoro i ryeko dok aber, En paro pi timo gin arac, kadi i kare ame obuto i wi tanda mere, en lubo yo areco ducu. Ama Rwot, marri a mom lokere tuno naka i polo, dok kiteni atira, tuno naka i pol, Kiteni atira calo kiddi Obaŋa, ŋolo koppi atira calo nam atut, yin gire en ame ilaro dano kede lei, Ama Rwot. Marri a mom lokere ber nadi, Ama Rwot! Itino a dano laro tipo mebwomi. Gin obedo i yomcuny pi jami adwoŋ ame tye i odi, yin en imiogi gi-amata ame ya i kuloni me yomcuny. Pien waŋ pii me kwo tye baŋi, lero ni en ame mio wan daŋ oneno lero. Medde nyuto marri a mom lokere baŋ jo ame ŋei, kede larri baŋ jo a cunygi atira. Kur iwek tyen jo ame wakere nyona, kur daŋ imi ciŋ jo areco ryema oko, Otim tim areco buto kuno aryeba cuny, ocobogi odiogi piny, mom dok otwero ya malo. Cunyi kur bed cwer pi jo a kitegi reco, nyeko moro kur maki, i kom otim tim areco. Pien gin bino two oko calo lum, obino ner calo pot yen. Gen Rwot dok iti tic aber, mannono bino miyo ibedo i lobo i kuc. Bed i yomcuny i Rwot, en bino miyi gin ame cunyi mito ducu. Mi kwoni i ciŋ Rwot, gene, en bino tiyo ticcere. En bino miyo berri ryeny calo ceŋ, kede kiteni atira calo ceŋ ame ryeny i cuny dyeceŋ. Bed mot i nyim Rwot, kure kun idio cunyi; cunyi kur bed cwer pi jo ame lonyo dwoŋ baŋgi, kadi i kom jo ame yiko tam areco i cunygi. Kur imi akemo maki, cunyi daŋ kur cwer; kur imi cunyi bed cwer, pien kela ka gin arac keken. Pien jo ame kitegi reco, obino nekogi oko, ento jo ame kuro Rwot bino leyo lobo. Odoŋ kare anonokkoro keken, jo a kitegi reco bino rwenyo atwal; kadi bed inen i kabedogi aber odoco, ibino nwoŋo ni gin doŋ pe kuno. Ento jo ame mwol, bino leyo lobo, obino bedo i yomcuny meicel, pi lonyo adwoŋ ame obino bedo kede. Otim tim areco poro kop i komjo a kitegi atira, dok okao lakgi atek i komgi. Ento otim tim areco, Rwot nyero anyera, pien en neno ni nino me ŋolo kop i komgi tye abino. Otim tim areco woto pala romogi, dok daŋ otelo akud aterogi, me neko ocan kedejo a piny oloo, me neko jo ame cunygi atira; pala romogi-nono bino lokere cobo cunygi kengi, akud aterogi daŋ obino turo oko. Gin anok ame dano a kite atira tye kede, ber, kato lwak lonyo atye ata ame tye i ciŋ dano a kite rac. Pien ciŋ jo areco bino tur oko, ento Rwot bino gwoko jo akitegi atira. Rwot gwokojo ame mom i balloro, gin ame gin oleo bino perakino waŋ i waŋ, lewic mom bino makogi i kare me can, i kare me kec, gin bino bedo i can adwoŋ, i kare me kec gin bino bedo i cam adwoŋ. Cite jo a kitegi reco, gin bino to oko, jo ame dago Rwot, bino rwenyo oko, obino top calo lum i potti, obino ket oko calo yito, Dano arac koporo banya ento mom te culo, ento jo a kitegi atira okica, dok omio jo jamigi. Jo ame Rwot omio gum en ame bino leyo lobo, ento jo ame en oceno, bino to oko. Rwot gire en ame telo dano, en mio dano moko i yo aber ame yomo cunye. Kadi bed kodi dano-nono rette, ento pwod twero ya malo, pien Rwot en a mako ciŋe me peye. Rik an atin, ento aman doŋ ati oko, cite waŋa mom ru oneno ŋat a kite atira ame oweko ata, akadi itino mere kun tye akwayo cem akwa. En kare ducu ber, mio jami amia, dok daŋ jo koporo jami baŋe, itino mere daŋ doko jo ame dok kelli jo ocele gum. Ya oko i timo gin arac, tim gin aber, mannono bino miyo iperakino i lobo. Rwot maro ŋolo kop atira, en mom bino weko jo mere a gene ata. Jo a kitegi atira, Rwot bino gwoko nakanaka, cite itino a jo areco, Rwot bino neko oko. Jo a kitegi atira bino leyo lobo, eka ote bedo iye atwal. Jo a kitegi atira kobo kop me ryeko, okobo kop ame tye atira. Cik Obaŋagi mom rwenyo i cunygi, tyengi mom cer atata i yo ame gin lubo. Dano arac neno ŋat a kite atira, eka te yenyo yo me neke oko, Cite Rwot gire mom bino weko dano a kite atira poto i ciŋ okworrere, dok mom bino miyo oŋolo kop loc ka ce opidde. Gen Rwot, lub yo mere, en bino miyi bedo kede twer me leyo lobo, yin ibino neno kite ame jo areco to kede. Aneno dano ame kite rac ame apala okato kare, kun doŋo adoŋa calo yat me Lebanon. Nen ka dok abeo kan ame en tye iye iceŋ, anwoŋo doŋ pe kuno, kadi bed ayeny, mom atwero nwoŋo. Koŋ inen dano ame balloro mom i kome, dok inen dano ame cunye atira, pien dano ame kelo kuc, ikwae bino bedo apol. Cite otur cik obino tyekogi oko awaŋe acel, ikwae a jo areco obino neko oko. Rwot en a laro jo a kitegi atira, en obedo ka larregi i kare me peko. Rwot konyogi dok larogi, en larogi i ciŋ jo areco, te bedo kwo, pien gin oriŋo olaro baŋe. Ama Rwot, pe ijuka kede akemoni, kur daŋ ipwoda kede akemo. Pien ateroni ocoba meicel, teko me ciŋi odia oko piny. Mom tye dul koma moro ame tye aber pi akemoni, cogona daŋ tye ka rem arema pi balle. Pien balle dwoŋ okato kare, pekkere doŋ onua oko, calo yec a mom romo tiŋere, Waŋ bur i koma doŋ okwok aŋwe meicel, tuttere doŋ tye amollo amola pi miŋona, Aloye doŋ odoco, aryebere doŋ piny i lobo, dyeceŋ luŋ doŋ awoto ame akumo akuma. Pyera daŋ doŋ lyel alyela calo mac, koma doŋ mom yot kadi acel. Aloye doŋ odoco, koma doŋ onyoŋere meicel, acur doŋ acura pien cwercuny ocira oko, Ama Rwot, yin iŋeo gin ame amito ducu, curra doŋ mom obedo ginnoro ame yin ikwia, Itaona goye ni tutuk, kun tekona tye arwenyo arwenya, waŋa daŋ mom doŋ neno piny aber. Owotena kede jo ame bedo i ŋeta, ocuŋ joŋ teŋe pi bur ame tye i koma, watina daŋ cuŋ kannabor meicel Jo ame yenyo kwona ociko owic pira, jo ame mito waŋa okobo kop me tyeko kwona, obedo poro kop arac i koma ceŋ iyul. Cite an gira abedo calo ŋat a yite odiŋ, mom awinyo kopgi, calo ŋat ame lebe oto, a mom ŋamo doge. Nen, an gira acalo ŋat a yite mom winyo kop, ame kopporo me juko dano mom donyo i doge. Cite an gira atye ka kuri, Ama Rwot, yin en ibino gamo kopgi, Ama Rwot, An ka akwao ni kono mom imiogi olelo i koma, kur imigi owakere i koma ka ce tyena ocer. Pien an nen calo aceggi poto, rem mom weka kare kadi acel. An aye ni abalo, cunya cwer pi bal ame abalo, Jo ame tye acalo okworra aboŋo ginnoro ame aballigi, gin otek okata oko, dok gin ame jo odaga nononononono opol meicel. Jo ame cula i gin arac pi gin aber, gin okworra pien an alubo gin aber. Kur iweka ba, Ama Rwot, kur ibed abor keda, Ama Rwot. Ru bino konya, yin giri en ilara, Ama Rwot. An akobo ni, abino gwoko kita, me wek kur atim balloro i kop ame ya i doga; abino liŋ gira aliŋa, i nyim jo a kitegi reco. Abedo calo ŋat a lebe oto kun aliŋ aliŋa, abedo gira mot kun mom akobo kopporo, kadi bed cwer cunya onwoŋo tye amedde ameda. Cunya onwoŋo doŋ lyet calo mac, par onwoŋo ocira oko, mac te cako lyel, ate doŋ cako kop aboŋo lworo. Akobo ni, “Mi aŋe agikkina, Ama Rwot. Kare ame imia doŋ odoŋ rom mene? Mia aŋe kite ame abino rwenyo kede, Koŋ inen, imio kare me kwona obedo acecek meicel, kare me kwona mom ginnoro kadi acel i nyimi. Ateteni dano acel acel gire calo yamo ata-ni. Nen jo luŋ wirre calo tipo, jo gire bedo lolle nono pi gin a konyere mom, dano bedo coko lwak lim adwoŋ ate kun mom ŋeo ŋat ame abino leyo. “Kara an pwod dok akuro ŋo, Ama Rwot?” An gira atye kede gen piri. Lara i kom balle ducu. Kur imi jo amiŋ bed nyera. Leba gira oto oko, pe aromo kobo kopporo, pien mannono gire yin en itimo. Kur dok imedde pwoda kede abironi, adoŋ me ciŋi doŋ mito neka oko. Yin ka igoo dano pi juke i ballere, nwoŋo doŋ ityeko ginnoro luŋ aber i baŋe, calo nyenye ame balo boŋo, ateteni, jo luŋ gire calo yamo ata-ni. “Winy kwacca, Ama Rwot, cik yiti iwiny kokona, kur iliŋ aliŋa ka akok baŋi. An abedo weloni ame mom ri baŋi an aloŋ piny calo kwarina luŋ. Wir waŋ inen teŋe, me koŋ abed yomcuny, kun mom ru aya oko i kwo me lobo man ate rwenyo oko atwal.” Akuro gira Rwot kun adio cunya, en okulle piny baŋa te winyo kokona. En owota i twon burrono arac meicel, i twon coto moro anwaŋ meicel, te miya cuŋ i wi kidi malo, kun mia acuŋ atek odoco. Opwonya kede wer anyen, wer me pako Obaŋawa. Jo apol meicel bino neno, lworo te makogi, ote cako doŋ geno Rwot. Tye kede winyo dano ame geno Rwot, ame pe lokere baŋ jo ame wakere, ame mom lubo jo ogak oko i woro cal jogi. Ama Rwot Obaŋana, itimo gigi mogo me awura meicel, dok tammi luŋ tye i komwa, mom tye ŋattoro ame cal kedi. Kono onwoŋo an abedo rabo pirgi, kono onwoŋo pol meicel ame mom oromo kwano welgi. Yin gire mom imito gin ame oŋolo kede mot ame omio, ento ityeko yabo yita me awiny kop, Yii mom obedo yom i gin ame owaŋo alutu, kadi gin ame oŋolo pi bal. An ate kobo ni, “An ene doŋ abino; acalo yam ocoo i koma i buk adola. Amito cunya bed yom i tiyo gin, ame yin imito, Ama Obaŋana, cikki gire mom rwenyo i cunya.” Atyeko rabo pi amut aber me larre, me yomcuny, i akina lwak ocokere karacel an gira mom aliŋ aliŋa kadi acel kite ame yin iŋeo kede, Ama Rwot. Pe akano kop i cunya i kom kite ame ilaro kede jo, abedo rabo pi kite ame ilaro kede jo kun ibedo ŋat a genne, atito daŋ pi marri a mom lokere kannaler, kede pi kite ame yin igenne kede, arabo pirgi luŋ i akina lwak ocokere karacel. Ama Rwot, kur itwona kicani, mii marri a mom lokere kede kiteni atira gwoka nakanaka. Pien gin arac ame ogura dyere welgi mom kwanne, balle doŋ dwoŋ ame onua oko, omio mom doŋ aromo neno piny, welgi pol meicel ame kato yer wia oko, cunya doŋ mom tek kadi acel. Ama Rwot, cunyi myero bed ayom me lara, ru lara, Ama Rwot. Mi lewic makgi dok ibabaŋogi oko, gin jo ame mito kwanyo kwona, migi olokere odok cen i twon lewic, gin jo ame mito timma rac. Mi twon lewic adwoŋ mak jo ame nyera, jo ame kobba ni, ber, ber. Cite myero imi jo luŋ ame wori bed i yomcuny, dok olel meicel piri; myero imi jo ame maro larreni, obedo kobo kare ducu ni, “Rwot gire dwoŋ.” Aco an gira, an acan, dok piny oloa oko; cite Rwot gire paro pira. Yin gire en ame ikonya dok ilara, kur ibed gal, Ama Obaŋana. Tye kede winyo ŋat ame paro pi ocan, Rwot lare i kare ame en tye kede peko. Rwot gwoke mio en bedo kwo, obino lwoŋe ni ŋat a kome gum i lobo; yin mom ibino miye i ciŋ okworrere, me otime kite ame yigi mito. Rwot bino gwoke ka kome lit ame obuto piny i wi tanda, Rwot bino miyo en caŋ aber i kom two mere. Ento an, akobo ni, “Ama Rwot, kica myero maki i koma, caŋa pien an gira aroco i nyimi.” Okworra kobo kop arac i koma, kun okobo ni “Kara en lonnono ato awene, me nyiŋe te rwenyo oko?” Ka ce ŋattoro i akinagi obino me limma, kobo kop ame tere pe, kun cunye pupuka i kop me goba, ka ce en okato doŋ oko, cako kobo koppere kannaler, Jo ducu ame daga, bedo kwoto nyiŋa karacel, obedo tamo pi gin arac keken i koma, Gin okobo ni, “Two arac meicel doŋ omake, mom doŋ bino bwot kadi acel a mom oto.” Kadi dyera ame ageno ikokome, ame onywako kede cem daŋ mito rwacca piny. Ento yin tima kica, Ama Rwot, tiŋa malo me wek acul kworra i komgi. Ka ce okworra mom oloa, abino ŋeyo ni cunyi tye i koma. Ento yin ikonya, pien cunya ler, iketa me bedo i nyimi nakanaka. Rwot Obaŋa me Icrael myero pwo, myero pake nakanaka! Amen, dok Amen. Kite acalo atil yenyo kede kulo ame piiamol iye, an daŋ amannono ayenyi cunya, Ama Obaŋa. Mit me neno Obaŋa ocira oko, amito neno Obaŋa akwo. Kara abino bino i nyimi awene ba, ate neno waŋi, Ama Obaŋa? Pig waŋa doŋ tye acalo cemma, dyeceŋ kede dyewor benebene, kun jo tye ka penya teretere ni, “Obaŋani-nono kara tye kwene?” Ka apoyo jami magi, cunya cwer atek meicel, ka apoyo kite a yam awoto karacel i lwak kun atelo wigi, ame ociro karacel naka i ot Obaŋa, kun lwak redo i yomcuny dok owero wer me pako Obaŋa, i kare me kwero ecuban adoŋo. Piŋo kara itye ka kumo akuma, yin tipona, piŋo kara itye ka cur i koma? Gen Obaŋa, pien pwod dok abino medde pake, en akonya dok en Obaŋana. Tipona doŋ tye ka kumo akuma, omio apo piri, cakere i lobo me Jordan kede me Kermon, cakere i wi kidi me Mijar. Nam atut lwoŋo nam atut wadgi, i mor pii acucurri, bi-amwonyi ni luŋ ame tagere ataga, omwonya gira doŋ oko. Dyeceŋ Rwot ciko marrere a mom lokere ryeny i koma, dyewor werrere mom rwenyo i cunya, kun akwao Obaŋa ame mia akwo, Akobo baŋ Obaŋa ame en ka larrena atek ni, “Piŋo kara wii owil oko i koma? Piŋo an atye ka wot ame akumo akuma, pien okworra tye ka wuna meicel?” Nen calo doŋ a tye i twon burroro arac i koma, okworra bedo doŋ yeta ayeta, kun openya teretere ni, “Obaŋani-nono kara tye kwene?” Piŋo kara itye ka kumo, yin tipona, piŋo kara itye ka cur i koma? Gen Obaŋa, pien pwod dok abino medde pake, en akonya dok en Obaŋana. Pid Pira, Ama Obaŋa, dok imia alo kop i nyim rok ame mom ŋei; lara i ciŋ jo areco ameogoba, Pien yin ibedo Obaŋa ame rik alaro baŋe, piŋo kara omio ibola oko? Piŋo an abedo wot ame akumo, akuma, pien okworra bedo wuna? Cwal ba doŋ leroni kede atenini, me gin obin onyutta yo, me okela i wi kidina acil, kede i kan ame yin ibedo iye, Mannono bino miyo awoto i wi keno lam Obaŋa, baŋ Obaŋa ame en gin ayomoro cunya meicel ate bino paki kun agoo naŋa opuk, Ama Obaŋa, Obaŋana. Piŋo kara itye ka kumo, yin ti pona, piŋo kara itye ka cur, i koma? Gen Obaŋa, pien pwod dok abino medde pake, en akonya dok Obaŋana. Wan doŋ otyeko winyo yitwa, Ama Obaŋa, kwariwa daŋ otittiwa, ginnoro luŋ ame itimo i karegi, i kare ame doŋ okato oko aŋec. Yin rik iryemo rok ocele oko kede twerri, ite miyo joni bedo i lobogi calo yen ame opito, rik iketo can apek meicel i wi rok ocele, cite kwariwa te bedo bedo i kuc. Kwariwa rik mom ogamo lobo-naca i pala romogi, dok daŋ mom tekogi en ame omiogi oloo lweny, cite otimere pi tekoni kede pi twerri, dok pi waŋ me kica ame ibedo nenogi kede, pien cunyi onwoŋo yom i komgi. Yin ibedo abakana kede Obaŋana, yinen ayamiyubo loc pi Yakobo. Pi konnyi omio wan oryemo okworwa oko odok cen, pi nyiŋi omio wan onyono jo ame obino me lweny i komwa oko. Pien an gira mom ageno akud aterona, dok pala romona mom romo lara. Ento yin gire en ilarowa i ciŋ okworwa, ibabaŋo jo ame onwoŋo dagowa oko. Obaŋa omiowa obedo wakere kare luŋ, wan giwa obino medde pwoyo nyiŋi nakanaka. Nen, yin doŋ ibolowa oko, oyot doŋ ayota, nen doŋ iwoto karacel i monywa i lweny. Imiowa oloko okworwa ŋewa, okworwa te yako jami apol meicel. Imiowa doŋ odoko calo rommi me aneka, imiowa doŋ okeketa atata i akina orok. Nen, doŋ icato lwakki oko i wel apiny apinya, kun mom imito ni culli limmoro abup pirgi. Imio jo ame ceggi kedwa doŋ caowa acaa, jo ame ogurowa dyere doŋ nywarowa kun onyerowa anyera, Imio rok ocele doŋ bedo boko kop i komwa, odoko doŋ gi-anyera a jo i akina rok luŋ. Aparo doŋ pi lewic ame atye kede ceŋ iyul, lewic doŋ maka meicel, nyim jo ame yeta kede jo ame nywara, i nyim okworra ame daga. Magi luŋ otimere i komwa, kadi bed wan wiwa mom owil oko i komi, kadi wan mom oturo cikereni. Cunywa mom olokere me weki, mom daŋ oweko lubo yo ame yin imito, cite yin iwekowa oko kan ikwe bedo iye, ite miyo piny acol icuc wumowa oko. Ka ce wiwa onwoŋo owil oko i kom nyiŋ Obaŋawa, onyo ka ocako woro Obaŋa moro ocele, kono Obaŋa mom oŋeo oko? pien en ŋeo muŋŋoro luŋ ame tye i cuny dano. Piri obedo ka nekowa ceŋ iyul; okwanowa bala rommi me aneka. Ya ba malo, Ama Rwot, piŋo kara itye ka nino anina? Co doŋ oko! Pe ibwola oko, pe iwekwa oko atwal. Piŋo kara iponniwa oko? Piŋo wii owil oko i kom can ame otye kede, kun inenowa anena ka otye awunowa? Nen wan doŋ orette oko piny i lobo, oryebere piny iyi apua, pien doŋ oloowa oko, Ya malo; ibin ikonywa, Larwa pi marri a mom lokere. Kop abeco keken en ame tyei cunya, koppa-nono akobo gira baŋ abaka, leba bit calo alam aran ame adiro i coc. Yin en ame iber meicel ikato jo ocele luŋ, kop ame ikobo luŋ opoŋ ka i kica keken, mannono omio Obaŋa doŋ omii gum ame perakino nakanaka. Twe pala romoni iyi amuruni, Ama yin i twon lo atek meicel, i kwogoni kede i twerri. Yon i ŋwec me loc pi kwogoni, me lweny pi ateni kede me gwoko kite ame tye atir, mii ciŋi me tuŋ cem otim gigi mogo ame mio jo lworo. Ateroni bit meicel, ka icelo i cuny okworri, rok luŋ rette oko i te locci. Kom me locci, yin Obaŋa, bino perakino odoco, abiro me locci, en abiro a yin iŋolo i kop atira; yin imaro kite atira, yii dag tim arac, Mannono omio Obaŋa, ame en Obaŋani, omi dit, en omii yomcuny meicel pi woro ame en owori kede, ame kato me owoteni oko. Rukki luŋ okikiro iye murra kede yat a ŋwece kur, kede kite moo ocele luŋ akur kede kacia amittere. Ipaconi ame okwogo i lak lyec, wer ogoo naŋa yomoro cunyi nadi. Anyira abaka daŋ tye i akina monni ame oworo, agoŋŋi tye ocuŋ i ciŋi tuŋ cem, kun oruko ruk ame okwogo kome i jabu me Opir. Koŋ iwiny nyara, ter yiti iwiny koppa, wi myero wil oko i kom rokki, kede i kom jo me doggola a kwaroni. Berri bino miyo abaka miti; kite acalo en doŋ tye acalo rwotti, myero iryebere i nyime. Jo Turo bino kelo mot adwoŋ meicel baŋi pi berri baŋ dano, olonyo me rok apapat bino kwayo kony i baŋi kun okelli kit limmoro ducu. Nyaka abaka orukkere meicel i cika mere, orukkere i boŋo ame okwogo meicel i jabu, Otere baŋ abaka, kun oruko boŋŋi ame raŋigi papat, ame anyira wadgi ame alwoke tye alubo yore, Oterogi i yomcuny adwoŋ kede lelo, i kare ame gin donyo i paco abaka. Akaka kwarini, bino bedo awobeni, ibino miyogi obedo oloc i wi lobo luŋ, Abino miyo odworo nyiŋi mwaka i mwaka i kare a lwagi jo me kare ducu, mannono bino miyo rok luŋ paki waŋ i waŋ. Obaŋa en obedo ka larewa kede tekowa, kare luŋ tye ame oyikere me konyowa ka otye i peko, Mannono omio mom obino bedo kede lworo moro kadi acel, kadi bed alokaloka bed tye i lobo, kadi bed kiddi yeŋere i cuny nam, kadi pii i nam mor ame atagere ataga, kadi bed kiddi yeŋere pi pii ame oyenyo malo amala, Tye kulo moro ame pii amol iye yomoro cuny jo i boma Obaŋa, kabedo acil ame ŋat Amalo Meicel bedo iye. Obaŋa gire bedo iye kuno, omio mom romo rette kadi acel, Obaŋa bino ru konyo oko kun kare mom ru oromo. Rok luŋ komgi bino onyo koyo, loc apapat bino yeŋere; Obaŋa mio dwone winyere, lobo te meye oko. Rwot me mony tye kedwa; Obaŋa a Yakobo en ame obedo ka larrewa. Biye inen gin ame Rwot otio, kite ame en omio lobo odoko kede wi obur. En omio lweny ogik oko i wi lobo luŋ, oturo akud atero kede toŋŋi oko, owaŋo luŋ i mac. Bed wunu mot, dok iŋe wunu ni an abedo Obaŋa, an en aloo rok ducu, an en aloo wi podo luŋ. Rwot me mony tye kedwa; Obaŋa a Yakobo en obedo ka larrewa. Bap wunu ciŋwu, wun rok ducu, dwor wunu Obaŋa i woo me yomcuny. Pien Rwot, ame en ŋat Amalo Meicel, iyiliyili meicel, en dwoŋ meicel i wi lobo luŋ. Jo luŋ tye i te loccere, rok luŋ daŋ tye i te tyene piny. En oyerriwa lobo ame myero wan obed iye acalo megwa, man obedo kwogo a Yakobo ame en maro. Obaŋa doŋ oyito malo kun jo goo ijira meicel, en oyito malo kun jo kuto apel. Wer wunu wer me pako Rwot, wer wunu wer me pake, wer wunu wer me pako Abakawa, wer wunu wer me pake. Pien Obaŋa en obedo abaka me wi lobo luŋ, wer wunu wer me pake kede jabuli. Obaŋa loo rok ducu, Obaŋa bedo i kommere me loc acil. Oloc ame loo lwak me rok apapat tye acokere kun oribere karacel i jo Obaŋa, ame gin jo Iburaim. Pien rwode me wi lobo tye i ciŋ Obaŋa, odwore atek meicel. Rwot dwoŋ meicel, pi mannonomyero pake, i boma Obaŋawa. Kidi mere acil, ame ocuŋ malo i twon kwogo adwoŋ, yomoro cuny jo me wi lobo ducu. En kidi me Cion ame tye tutuŋ anyarodi, boma abaka dwoŋ meicel. Obaŋa onyutte i udi mere atek, onyutte ni en obedo kan atek ame gwoko jo. Nen ba, obakki me wi lobo tye ocokere, gin obino ote cokere karacel. Kare ame gin oneno, ote bedo kede wur, lworo omakogi ote riŋo oko; komgi te cako myel atek meicel kede rem ame calo dako amerem me nywal ogoo. Pien yin rik ibalo mel me Tarcic, i yo ame oya i tutuŋ kide. Kite ame onwoŋo owinyo kede, en ame doŋ otyeko neno kede waŋwa, i paco a Rwot me mony, i paco Obaŋawa, ame Obaŋa doŋ omio ocuŋ oko atek odoco. Wan obedo tamo kop i kom marri a mom lokere, Ama Obaŋa, i dye odi acil. Kite ame nyiŋi orwo kede, opaki daŋ amannono i wi lobo ducu, Ciŋi me tuŋcem tye iye twer me loc, mii kidi me Cion obed i yomcuny. Mi anyira me Juda bed i yomcuny, pi kite ame yin iŋolo kede kop. Wot wunu i dye Cion, iman wunu ducu, kwan wunu gedo luŋ ame ocuŋ malo iguŋ, nen wunu apama cellere aber, nen wunu udi adoŋo luŋ iye, me irab wunu pire baŋ lwagi jo ame bino lubowu; ni man en obedo Obaŋa, en obedo Obaŋawa me waŋ i waŋ. En a bino telowa nakanaka. Wun rok luŋ, winy wunu kop man. Ter wunu yitwu, wun jo ame bedo i wi podo luŋ, jo ame tye i rwom amalo kede i rwom apiny, olonyo kede ocan karacel. Kop me ryeko bino donnyo i doga, tam ame ya i cunya, bino kelo niaŋ atut. Abino tero yita me winyo pwony me ryeko, koc kede litogi abino goyo agoa i naŋa opuk. Kara ŋo ame mio abedo kede lworo i kare me peko, ka omonena ame wuna agura oko dyere, ame gin jo ame geŋo lonyogi, kun owakere pi lwak lim ame tye i ciŋgi? Ateteni, mom gire tye dano moro ame romo culo lim me lakere mere kene, onyo ame twero culo lim baŋ Obaŋa me wilo kwo mere. Pien lim me wilo kwo mere bup meicel, mom romme culo kadi acel. Mannono omio dano mom romo bedo kwo nakanaka, kun mom donyo piny i bur. En gire ŋeo aber ni anaka jo aryek daŋ to, amiŋo kede ŋat ame wie mom tio daŋ to amannono, oweko lim ame otye kede baŋ jo ocele. Lyel en ame doŋ te bedo pacogi me bedo atwal, bedo doŋ kabedogi waŋ i waŋ, kadi oweko lwak potti ikwaegi a rom mene me poyo nyiŋgi. Dano mom romo perakino i kwogo mere nakanaka, en rom aroma i leyi me tim ame to oko, Man en can ame poto i kom jo ame tye i gen me miŋo, agikki a jo ame tye i yomcuny pi dul jami ame otye kede. Lyel gire kurogi akura calo rommi, to en a bino bedo akwatgi. Gin bino wot atir naka i lyel, cil a komgi te rwenyo oko. Lyel en a bino bedo pacogi. Rwot gire bino lakoro kwona oko i teko a lyel, pien en bino gama baŋe. Lworo kur maki ka ce dano moro odoko alonyo, kadi bed kwogo me ode tye amedde ameda, Pien i kare me to mere mom bino tiŋo ginnoro woto kede kadi acel, kwogo mere mom bino lube piny i bur kuno, Kadi bed en twero tamo ni ebedo i yomcuny i kare me kwo mere, kadi bed jo pake ka ce en onwoŋo ginnoro aber pire kene, en pwod bino to te wot nywako kabedo i lwagi a kwari mere i lyel kun mom dok neno waŋ cen atwal. Dano mom romo perakino i kwogo mere nakanaka, en rom aroma i leyi me tim ame to oko. Ŋat ame Won Twer Ducu ame en Rwot Obaŋa, okobo kop, en lwoŋo jo me wi lobo ducu, cakere i tuŋ kide tuno kede tuŋ to, En tye ka ryeny acil meicel, kwogo mere tye ka ryeny i Cion, Obaŋawa tye ka bino, en mom bino liŋ, twon mac ager meicel tye ka telo nyime, yamo akodo agwa tye ogure oko dyere. En lwoŋo polo ame tye malo, dok lwoŋo lobo daŋ, me ecak ŋolo kop i kom jo mere. En kobo ni, “Cok wunu jona ame ogen, ikelgi wunu baŋa, jo ame ocikere keda i mot aŋola.” Polo rabo kannaler ni Obaŋa kite atira, pien Obaŋa ikome en aŋolkop. “Winy wunu, wun jona, me ate kop, wun jo Icrael, abino kobo kop me caden i komwu, an Obaŋa ame abedo Obaŋawu. Pe ajukowu pi motwu ame iyala wunu kede, mot awaŋa ame iyala wunu kede tye me kare ducu i nyima. Mom abino gamo twonnoro ame i kelo wunu i pacowu, kadi nyok dyel ame ikelo wunu iyi anokwu. Pien leyi luŋ i tim obedo mega, naka lwak dok ame tye i wi kiddi luŋ. Aŋeo winy luŋ ame twarre malo, naka gin akwo luŋ ame bedo piny i lobo, gin luŋ obedo mega. “Ka ce onwoŋo kec neka, onwoŋo mom aromo kobbiwu, pien lobo kede jami luŋ ame tye iye mega, An acamo riŋo twoni bo, onyo ca amato remo dyegi? Mi wunu baŋ Obaŋa mot me pwoye, dok icob wunu kwon ame ikwoŋo wunu baŋ Ŋat Amalo Meicel; dok ikok wunu baŋa i kare ame itye wunu i peko, an abino larowu, eka ite keto wunu kwogo i koma.” Cite baŋ atim tim arac Obaŋa kobbe ni, “Twer aŋo ame itye kede me mako cikka i wi, onyo me bedo kobo kop i kom cikarena? Pien yin mom imito ni juki, mom iparo pi kop ame akobo. Ka ce ineno akwo, imako dyere kede, imako dyere i jo ame maro timo abor. “Kare luŋ iyabo dogi me kobo gin arac, dok iŋeo yiko kop me goba. Imaro bedo kobo kop arac i kom ominni, ibedo kwoto ominni ame onywalli kede acel. Ibedo timo jami magi kun an aliŋ aliŋa, yin onwoŋo ibedo tamo ni an daŋ arom kedi. Cite aman doŋ ajuki, kun anyutti balli luŋ. “Po wunu i man, wun jo ame wiwu wil oko i kom Obaŋa, naka mio an atyekowu oko, ŋat ame larowu te doŋ bedo pe. Ŋat ame kelo pwoc baŋa acalo mottere, dano-nono nwoŋo oworo meicel, ŋat ame kite atira dok lubo cikka, abino nyuto lar mera baŋe.” Tima kica, Ama Obaŋa, tim ber ijwa balle oko berri a mom lokere. Lwok gin arac oko i koma, dok ilonya i kom balla. Pien an aŋeo gira balla, kare luŋ wia po i kom bal ame atimo, An gira atyeko balo baŋi, abalo baŋi yin ikomi, atyeko timo gin anen arac i nyimi wek kop ame yin iŋolo onyut ni kiteni atira, dok ka iŋolo kop, balloro mom mwoŋere iye. Nen ba, an rik onywala i bal, acako timo bal con ame pwod atye iyi totaa. Nen, yin imito kop ateni en ame ya iyi dano, pi mannono, myero ipwony cunya a mom nen me bedo ryek. Lama kede boke olwedo, me ate doko doŋ acil, lwoka, me abed atar akato pee oko. Mia abed i yomcuny adwoŋ kede lelo, mi cogo ame doŋ ituro oleli, Wum waŋi oko, kur inen balla, dok ijwa balla oko luŋ, Mi cunya bed acil, Ama Obaŋa, ket cuny anyen dok aler i yia. Kur iryema oko i nyimi, kur daŋ ikwany Cunnyi Acil oko i koma, Dwoggo yomcuny me larre baŋa, mia cuny ame mia alubo cikki, Bino miyo apwonyo obal me luba yo ame imito, obalo ote lokere dwogo baŋi. Lara i kom bal me to, Ama Obaŋa, yin ibedo Obaŋa ame lara, cite leba bino wero wer me larri kannaler. Yab doga oko, Ama Rwot, cite leba bino wero wer me paki. Pien yin giri cunyi mom yom i mot ame oyali kede, kadi ayali i mot awaŋa, mom gire romo yomoro cunyi. Mot ame Obaŋa pwoo obedo cuny ame ŋut, yin gire mom icayo ŋat a cunye cwer dok ŋut, Ama Obaŋa. Tim Cion ber pi ber a cunyi, dok iger apama cel me Jerucalem odoco. Ite cako doŋ jolo i yomcuny mot me yalli i kite atira, mot awaŋa, kede mot owaŋo alutu, ote daŋ doŋ cako yali kede twoni i wi keno lammi. Yin twon lo atek meicel i lweny, piŋo kara iwakere pi gin arac ame itimo i kom jo ame ŋeo Obaŋa? Yin ibedo poro kop me neko ka jo ceŋ iyul. Lebi bit calo lyedi, ticci obedo me kobo kop erupe. Imaro gin arac ame kato gin aber, kede kobo goba ame kato kobo kop ateni. Imaro kobo kop ame kelo can, yin lel ame maro kobo goba. Ento Obaŋa bino rwobi oko atwal, en bino maki te wayi oko i kemani, bino puto lwiti oko i lobo a jo akwo. Jo akitegi atira bino neno, lworo te makogioko, obino nyere kun okobo ni, “Neno dano a mom mito miyo Obaŋa bedo ka-lare mere, ento lunyo geŋo lim ame bup i ciŋe, kun geŋo ni limmere en ame bino larre.” Ento an acalo yat jeituni ame doŋo i ot Obaŋa, ageno gira mar Obaŋa a mom lokere kare luŋ me kwona. Abino pwoyi nakanaka, Ama Obaŋa, pien man obedo ticci. Abino rabo nyiŋi pien ber, i nyim jo ame ŋeo Obaŋa. Amiŋo bedo tamo i cunye ni, “Obaŋa gire mom.” Gin luŋ oballe oko, gin luŋ otimo tim me kwer, ŋat atimo gin aber pe, Obaŋa neno jo luŋ ame tye piny i te polo, kun neno ka ce tye ŋattoro ame timo ginnoro luŋ i ryeko, kun timo gin Obaŋa mito. Gin luŋ doŋ ogak oko teŋe, gin luŋ oballe oko, ŋat atimo gin aber pe, moro acelloro doŋ mom. Gin otim tim areco-nono, ce mom otye kede ŋeccoro, gin jo ame camo dano calo ogati-nono, kun daŋ mom olwoŋo nyiŋ obaŋa? Gin bino bedo i twon lworo adwoŋ meicel kuno, twon lworo ame yam mom ru gin obedo kede. Pien Obaŋa bino keto cogo kom jo a mom ŋeo Obaŋa, obino miyo lewic makogi pien Obaŋa doŋ otyeko kwerogi, Kono onwoŋo larre a jo Icrael oya i Cion, do ber! Ka Obaŋa bino dwoko gum baŋ jo mere, jo a Yakobo bino lelo, jo Icrael bino bedo i yomcuny. Lara, Ama Obaŋa, pi nyiŋi, dok imia alo kop oko pi tweroni. Winy kwacca, Ama Obaŋa, cik yiti i winy kop ame ya i doga. Pien jo ame wakere obino me bino lweny keda, jo ager mito neka oko, gin gigi mom otamo pi Obaŋa. Nen ba, Obaŋa gire en akonya, Rwot en a gwoko kwona. En bino culo kwor i kom okworra i gin arac, tyekgi oko ducu yin Obaŋa pi kiteni atira. Abino yali kede mot ame cunya okwanyo, abino pwoyi, Ama Rwot, pien yin iber. Pien yin ityeko lara i kit peko luŋ ame abeo iye, me anen okworra ame doŋ aloo kede waŋa. Cik yiti iwiny kwacca, Ama Obaŋa, kur ipon oko ka abako doga baŋi. Winy koppa, dok i gam doga, peko ame atye kede doŋ oloo tekona oko, Woo okworra doŋ obalo cunya oko, pi kite ame jo areco wuno kede jo, Pien gin en ame kelo peko i koma, okudo akemo meicel i koma, oloka doŋ adoko amonegi. Cwercuny doŋ ocira oko, lworo me to daŋ doŋ ocira oko. Lworo kede myelkom daŋ doŋ omaka oko, tipo koma oto oko, Omio doŋ atye ka paro ni kono atye kede bwoma calo amam, kono atwarre awoto gira oko kan ocele me awe, Ateteni, kono awoto gira oko teŋe, kono awoto abedo gira i tim. Kono ayutte ayuta me wot nwoŋo ka weona, i dye yamo a kutu atek, kede i kom yamo ajuru me kot. Ama Rwot, bal yikgi oko, rub lebgi oko, pien atye ka neno tim me gero kede lweny keken en ame tye i boma, Dyeceŋ kede dyewor gin otye ka rimo piny, kun omano cel me boma, tim areco kede peko a kitgi apapat tye ka nen i ye, To tye ka nen i dye boma luŋ, awunawuna dwoŋ meicel i cuk, bwolo jo mom daŋ rwenyo iye. Kono okworra en a tye ka kobo kop arac i koma-nono, kono koŋ atemo diyo cunya, kono jo ame daga en a tye aka timo tim me anywar i komanono, kono atemo koŋ pono gira oko. Ento anwoŋo ni obedo yin, wadwa, yin ame wan owoto kedi acel, dok dyera me kare ducu. Yam oboko koppogo amit kedi karacel, i ot Obaŋa-gu owoto karacel. To myero nekgi oko gire; migi odonyo piny i lyel ame okwo; pien tim arac nywako kedgi kabedo. Cite an gira akok baŋ Obaŋa; Rwot gire bino lara. Odiko, dyeceŋ kede otyeno, an gira acwao kokona baŋe kun acur; en gire bino winyo dwona. En bino laro tipona mia abedo i kuc i kom lweny ame abedo lwenyo, pien jo apol meicel tye ka lweny i koma. Obaŋa ame abedo i wi kom loccere cakere con i con, bino winyo kokona, te miyogi bedo amwol; pien gin mom ogwoko cik, dok daŋ mom oworo Obaŋa kadi acel. Awotta ryeo bade me lweny i kom owote mere; kun turo cikere ame yam ecikere kede oko, Kop i doge onwoŋo pwot kato moo dyaŋ oko, cite lweny mom rwenyo i cunye; kop ame en kobo onwoŋo kweo cuny dano kato moo oko, cite ŋolo dano calo pala lweny, Ket yec apek luŋ i kom Rwot, cite en bino konyi, en mom ye ni jer jo a kitegi atira teŋe. Ento yin gire ibino retogi oko piny, Ama Obaŋa, i twon burroro atut meicel; gin jo ame oonyo remo a jo ocele, kede oket erupe i kom jo wadgi, mom obino perakino otuno i nucu me kare me kwogi. Cite an gira abino geni. Kica myero maki i koma, Ama Obaŋa, pien jo tye onyona oko piny; dyeceŋ luŋ amonena bedo wunna awuna. Okworra daŋ bedo nyona piny ceŋ iyul, pien jo apol lwenyo keda ame owakere awaka. Ka ce lworo omaka, an gira ageni, Ama Obaŋa. An ageno Obaŋa kun mom atye kede lworo moro kadi acel. Gin aŋo ame dano ata-ni twero timo i koma? Obedo riye i nyima ceŋ iyul, kun otamo tam me timo gin areco keken i koma, Ogurre karacel me liba, obedo neno ginnoro luŋ ame an atye ka timo. Kite acalo otye ka kuro kede kwena, doŋ pi mannono myero iculgi pi balgi; Ret jo man piny oko akemoni, Ama Obaŋa. Yin ibedo kwano ayelayela luŋ ame opoto i koma, kan pig waŋa doŋ oko iyi opoko Mom doŋ tye ocoo kop oko i kome i buk? Mannono bino miyo okworra lokere dok cen, i nino ame abino cwalo iye koko na baŋi. Man an aŋeo gira ni Obaŋa tye pira, Ageno Obaŋa ame gin a en ociko yomoro cunya, apako Rwot ame gin a en ociko yomoro cunya; ageno Obaŋa kun mom alworo ginnoro kadi acel. Gin aŋo kara ame dano twero timo i koma? Myero anen ni acobo kwonna ame akwoŋo baŋi, Ama Obaŋa; abino yali i mot me pwoc, Pien yin ityeko laro kwona i to, nen, ibedo gwoka omio mom acer arette piny. Omio abedo wot i nyim Obaŋa i waŋ ceŋ ame menyo ginnoro luŋ akwo. Kica myero maki i koma Ama Rwot, kica myero maki i koma pien ti pona larre baŋi, abino laro tipo me bwomi, tuno ka yamo kot ajuru ame neko jo okato. Akok baŋ Obaŋa Amalo Meicel, baŋ Obaŋa ame cobo mittere luŋ pira, En bino cwayo kony i polo me lara bino miyo lewic mako jo ame tye ka nyonyono an. Obaŋa bino cwayo marrere a mom lokere, en bino cwayo kite atira. Atye ka buto i akina eŋatu; ame owor meicel imwodo dano: lakgi bit calo leb toŋ kede atero; lebgi bit calo pala romo. Nyut ditti malo i polo, Ama Obaŋa, Mi kwogoni nen kannaler i lobo luŋ, Ociko boo me mako tyena, ento ti pona obwot abwota. Okunyo bur-gu pira me arette iye cite gin dok olunyo rette iye kengi. Cunya gire omoko oko i komi a mom dok lokere, Ama Obaŋa, cunya omoko oko i komi, abino wero wer me paki i dwon aloŋo, Co oko, yin tipona, naŋana kede naŋa opuk, daŋ myero yikere oko. An abino ero wer ibai. Abino wero wer me paki, Ama Rwot, i akina rok apapat; abino wero wer me paki i akina orok. Pien marri a mom lokere pire tek meicel naka baŋ jo ame tye i wi polo. Nyut ditti malo i polo, Ama Obaŋa, Mi kwogoni nen kannaler i lobo luŋ. Wun oloc atek itye wunu ka ŋolo kop kakare ateni? Itye ka ŋolli wunu jo luŋ kop atira? Pe gire, itye ka paro wunu kop arac i cunywu; dok itye ka timo wunu bal i lobo i tic ame itio wunu, Jo areco bedo rwenyo te lubo yo arac pi kare me kwogi luŋ ocako timo bal ame pwod onywalogi anywala kun okobo kop me goba. Kwirgi rom aroma kede me a twol yitgi odiŋ calo yit owuo, me kur owiny dwon emuroko onyo dwon jo atimo tim me jojok aryekkege. Ama Obaŋa, tur lakgi oko iyi doggi, dok myero iput lak itino eŋato ager oko, Ama Rwot. Migi orweny calo pii ame mol oko, nyongi calo lum ote two oko. Migi obed calo okoro koro ame woto kun lao mere doŋ i yo ŋee, calo atin ame obwogo abwoga ame mom oneno waŋ ceŋ. Myero tongi oko piny calo buŋ kun gin mom ru oŋeo, Obaŋa myero mi yamo kolgi tergi oko i twon akemo adwoŋ kun pwod okwo. Jo a kitegi atira bino bedo i yomcuny ka oneno culo kwor man, gin bino lwoko tyengi i remo a jo areco, Jo bino kobo ni, “Ateni ba jo a kitegi atira kara nwoŋo mot me pwoyogi; Obaŋa ame ŋolo kop i lobo kara tye ba.” Lara i ciŋ okworra, Ama Obaŋa, gwoka i ciŋ jo ame bino me bino lweny i koma, lara i ciŋ otim tim areco, kede i ciŋ jo ame maro onyo remo a jo. Nen, gin obedo kiya me kwanyo kwona; jo ager ocokere karacel me lweny i koma. Mom tye ginnoro arac ame atimo, balla moro daŋ mom, Ama Rwot, Mom atimo ginnoro arac gira, gin oriŋo oyotoyot i ka ponogi. Ama Rwot Obaŋa me mony, ya inen, ibin ikonya, Ama Obaŋa a jo Icrael. Co oko me iket can i kom rok luŋ; kur iwek ŋattoro kadi acel, i akina wegi erupe ame poro kop me timo gin arac. Otyeno luŋ gin odwogo ame ogweo calo gwogi, kun obebea i dye boma, Koŋ iwiny gin ame gin tye ka kobo! Kop i doggi bit calo pala romo. Gin obedo tamo tam i cunygi kun okobo ni, “Ŋa ame bino winyo gin ame wan okobo?” Ento yin gire inyerogi anyera, Ama Rwot; yin gire icao rok magi luŋ acaa. Ama yin ame ibedo tekona, abino gira wero wer me paki, pien yin Obaŋa ibedo cel atek me larrena. Obaŋana bino rwatte keda i marrere a mom lokere, en bino miyo aneno okworra acalo jo ame doŋ atyeko loyo. Kur inekgi, naka mio jona wigi wil oko; keketogi atata pi tekoni, digi piny, Ama Rwot ame ibedo kwotwa. Myero imi makgi iyi awakagi, pien kop a ya i doggi tye iye bal, kopporo luŋ ame gin kobo tye iye bal. Pi ceno jo kede kobo goba, tyekgi oko akemoni, tyekgi oko luŋ aluŋa. Me jo luŋ ŋe ni Obaŋa en ame loo jo a Yakobo, tuno naka iyi agikki piny. Otyeno luŋ gin odwogo ame ogweo calo gwogi kun obe bea i dye boma, Obedo rimo piny pi yenyo cam, ka mom ru onwoŋo cam obedo ŋuŋura aŋura. Cite an abino wero wer me pako tekoni, idiko abino wero wer me pako marri a mom lokere, Pien yin en ibedo cel atek me gwoka, kede ka larena i kare me can. Ama Tekona, abino wero wer me paki, pien yin Obaŋa, ibedo cel atek me gwoka, Obaŋa ame onyuta marrere a mom lokere. Ama Obaŋa, ikwerowa doŋ oko, dok daŋ iloowa, akemo onwoŋo omaki i komwa, dwokwa i ciŋi ba, Ama Rwot. Imio lobo oyeŋere, imio obarre oko; yik kan ame obarre oko, pien mito rette oko. Imio joni oneno cannogo apek meicel; imiowa omato koŋo olok ame obalo wiwa oko. Yin doŋ iŋabo bendera malo pi jo ame wori, me larogi i lak atero ame obao. Me wek joni ame imaro larre, miwa oloo lweny i tekoni, dok igam daŋ dogwa. Obaŋa okobo kop i kabedo mere acil ni, “Abino poko Cekem oko i twon kwogo me loc, abino daŋ poko luŋ me Cukot. Gilead obedo mega, Manace daŋ mega; Epraim obedo tok nyonyo me geŋo wia, aco Juda te bedo abiro me locca. Ento Moab obedo becen me lwokka; abolo warona i kom Edom me nyuto ni aloc; abino redo redo me loc i wi jo Piriciti,” Ŋa abino kela i boma ame ocelo i cel atek? Ŋa abino tella yo me wot i Edom? Yin mom ikwerowa oko, Ama Obaŋa? Nen yin mom doŋ iwoto karacel i monywa. Tim ber ikonywa me lweny i kom okworwa, pien kony ame dano en amio mom konyo ginnoro, Ka Obaŋa obedo lweny karacel kedwa, wan obino loyo, en gire ame bino nyono okworwa dio piny. Winy kokona, Ama Obaŋa, winy daŋ kwacca. Acwao kokona baŋi i agikki lobo twal, i kare ame cunya doŋ ogem agema. Tela, Ama Rwot, tera i wi kidi ame yito loa oko; pien yin en ibed ka larrena, gedo ocuŋ iguŋ malo i nyim okworra. Weka abed i kemani nakanaka! Mia agwokere i te tipo me bwomi. Yin doŋ ityeko winyo kwoŋŋa luŋ, Ama Obaŋa, ityeko miya gin ame imio baŋ jo ame woro nyiŋi. Meddi abaka kare me bedo kwo i lobo, me en perakino nakanaka i kare a lwagi jo me kare luŋ. Tim ber imie ebed i wi kom me loc nakanaka i nyimi, Ama Obaŋa, marri a mom lokere kede kiti atira en a myero gwoke. Mannono bino miyo awero wer me pako nyiŋi, kun nino i nino acobo kwoŋŋoro luŋ ame akwoŋo i nyimi. An abedo mot kun ageno gira Obaŋa keken, pien larrena ya i baŋe. En kene en obedo kan atek me larrena, en cel atek ame gwoka; mom obino jera teŋe kadi acel. Wun luŋ ibino bedo wunu lweny i koma naka awene, mereta oko calo apama cel agoro? Oyiko ka kop me kwanyo dano oko i rwommere me dit, cunygi yom ata i kobo kop me goba. Olammi jo gum i kop i doggi keken, kun nwoŋo oceno dano acena i cunygi. An abedo mot kun ageno gira Obaŋa keken, pien gen ame atye kede oya i baŋe. En kene en obedo kan atek me larrena, en cel atek me gwoka; mom obino jera teŋe kadi acel. Larrena kede kwogona luŋ ya i baŋ Obaŋa, en obedo twon kidi moro atek ame gwoka, dok en obedo ka larrena. Gen wunu Obaŋa kare luŋ, wun jo luŋ gene wunu i cunywu ducu; Obaŋa en obedo ka larrewa. Jo ame tye i rwom a piny calo yamo, Jo ame tye i rwom amalo mom genne kadi acel, ame ka ipimogi luŋ i mijan, otiŋere malo oyotoyot calo yamo. Kur iket wunu genwu i tic me mayo jami a jo tetek, kur igen tic me yako jo, pien konnyere mom; ka ce lim onya i ciŋi, kur iketo cunyi iye. Obaŋa okobo kop tyen me agege, tyen me aryo ate winyo koppere, ni Obaŋa en obedo won teko, dok ni yin gire, Ama Rwot, en ibedo won mar a mom lokere. Pien yin iculo ŋat acel acel ame oporo tic ame en otio. Ama Obaŋa, yin gire ibedo Obaŋana, kwona ducu ocuŋ piri; koma doŋ ool oko, calo atye i lobo otwo, oti ame pii pe iye. Mannono omio abedo yenyi kabedoni ducu acil, me neno tekoni kede kwogoni. Pien marri a mom lokere ber kato kwo oko, mannono omio an gira abino paki nino luŋ. Abino pwoyi pi kare me kwona luŋ, abino taŋo ciŋa baŋi me kwayi. Cunya yom meicel calo acamo moo, dok abino wero wer me paki kare ducu, kun adworo nyiŋi meicel yomcuny. Kadi abuto piny i wi tandana, wia mom bino wil i komi, abino lwado kop i komi naka dyewor benebene. Pien yin gire en ame ikonya, kwona ocuŋ i komi, en omio awero wer i yomcuny. An gira amoko i komi ikiŋ, yin ikwaka aber odoco i ciŋi tuŋcem. Ento jo ame mito neka, bino donyo piny i bur atut. Obino miyo pala me romo nekogi oko, obino doko cam ekwe ame bedo i tim. Ento abaka bino lelo kom Obaŋa, kede jo luŋ ame kwoŋo kede nyiŋe bino daŋ lelo, ento jo ame ogoba obino miyo liŋ oko. Cik yiti iwiny dwona, Ama Rwot, iwinyo kokona ame akelo baŋi; lara i ciŋ okwor ame mia lworo. Gwoka i ciŋ jo areco ame tye ka yikere i muŋ pira, kede i ciŋ lwak man ame kitegi reco, ame pako lebgi calo pala me romo, ame kop ame ya i doggi bit calo atero. Opono oko me celo jo a mom i balloro, ote ru celo oyotoyot aboŋo lworo moro kadi acel. Kare ducu gin oyikere ka me cobo yikgi areco, okobo kop kun oporo ka kop me dwalojo, ame otamo ni mom tye ŋattoro ame anenogi. Dok otamo ni mom tye ŋattoro ame twero yenyo bal i komgi te nwoŋo. Gin otamo ni gin oryeko meicel ame ŋattoro mom romo ŋeyo imuŋgi, pien imuŋ ame tye i cunygi obedo imuŋ ame opono kan atut meicel. Ento Obaŋa bino celogi kede atero mere, awano bino poto i komgi atura. Kop ame ya i doggi bino miyo ityekogi oko, jo luŋ ame nenogi, yeŋo wigi ayeŋa. Mannono bino miyo jo luŋ lworogi, gin te bedo rabo pi gin ame Obaŋa otio baŋ jo mere; ote bedo lwodo koppono i cunygi pi gin ame Obaŋa otimo-nono. Jo ame kitegi atira myero lel pi Rwot, dok myero oriŋ olar baŋe, Jo ame cunygi ler myero lel kun opwoo Obaŋa meicel. Myero gire paki i Cion, Ama Obaŋa, dok ginnoro luŋ ame okwoŋo pire myero mi baŋi. Yin gire en ame igamo kwac a jo luŋ, jo luŋ myero bin baŋi. Kadi bed bal diowa meicel, yin gire en ame ijwao oko ducu, Dano ame yin iyero ite kelo cok kedi, tye kede winyo me bedo i dyekalli acil. Gin abeco ame tye i odi, bino romowa, ame obedo kabedoni acil. Yin igamo kwacwa, ite larowa, kun itimo gin ame mio jo lworo meicel. Ama Obaŋa ame obedo Alarwa. Jo luŋ ame tye i wi podo geni, akadi jo ame tye kagi mogo aboco meicel, tekoni en ame omio kiddi ocuŋ kan ame gin otye iye, dok tekoni daŋ en ame tye ka gwokogi. Yin imio nam omor ager meicel liŋ oko, nam doŋ te kwe mot, jo ame onwoŋo awo te liŋ oko. Jo luŋ ame tye kannaboco meicel, gin luŋ ogoo ijira kun cunygi yom meicel, gin luŋ olworo neno ticci me awura, cakere i tuŋ to naka tuŋ kide. Yin ilimo lobo ite miyo kot cwe iye, cam abup meicel te cek i lobo. Pii dwoŋ meicel i kulo Obaŋa, dok yin Obaŋa en ame imio cam cek, pien mannono obedo gin ame yin en ame iyiko. Yin imio yo ame okunyo iye bidde ayom meicel, imio kot cwe iye adwoŋ meicel, eka ginapita luŋ ame tye iye, te doŋo daŋ a ber. Mwaka i mwaka, yin en imio gum baŋ jo luŋ, pi cam ame imio cekkigi, yo ame gadigadini lubo, moo dwoŋ iye meicel. Imio dok dwoŋ meicel i bar me kwayogi, anaka jo ame bedo i ŋet kiddi daŋ lelo. Dok rommi daŋ dwon meicel i bar ame okwaogi iye, dok kal daŋ oyido ibim i luŋ, gin luŋ olelo kun owero wer me yomcuny karacel. Wun jo luŋ ame bedo i lobo, wo wunu i yomcuny, kun idworo wunu nyiŋ Obaŋa, ipake wunu i werrogo me kwogo. Kobbi wunu Obaŋa ni, “Yin itio tic me awura meicel, twer ame yin itye kede dwoŋ meicel, ame mio okworri mwolle amwola i nyimi. Jo luŋ ame tye i lobo, wori, gin luŋ owero wer me paki, kun owero opako kede nyiŋi.” Bye inen wunu gin ame Obaŋa otio, en tio gigi mogo ame iyiliyili meicel i akina dano, En omio pii i nam otwo oko imek, jo te beo i cuny kulo otwo kun owoto i tyengi. Wan rik ote bedo i yomcuny meicel i kome kuno, Twer ame en tye kede, omio en loo loccere nakanak, dok neno rok ducu, Jo ame wakere myero wek yiye nono nono. Pwo wunu Rwot Obaŋawa, wun rok ducu, wer wunu wer me pake, me jo winy. En ogwokowa omiowa pwod otye kwo, dok mom omio tyenwa ocer kadi acel. Yin gire doŋ ityeko temowa oko, Ama Obaŋa, itemowa kite ame otemo i ryal ame olio i mac. Yin en ame rik ikelowa naka iyi boo, eka ite cibo yec apek i wiwa me ayea. Rik ite miyo jo bedo nyono wiwa, owoto kun obeo i dye mac kede i dye pii, kadi bed amannono, yin gire en ame dok ite kelowa i kabedo alac me kuc. An abino bino i odi, kun akelo mot awaŋa me yali, abino cobo kwoŋŋa luŋ ame akwoŋo i nyimi. Ginnoro luŋ ame doŋ atyeko kobo, abino cobo, kede ginnoro luŋ ame acikere me timo i kare ame atye i can. Abino yali i rommi ocwe calo mot awaŋana, kede yito ame duny bino baŋi ame ya i kom nyogi rommi ame awaŋ, abino yali i mot me twoni, kede nyogi dyegi. Wun jo luŋ ame lworo Obaŋa, myero ibin iwiny wunu, an abino titiwu gin ame Obaŋa otimo pira, Rik acwao kwacca baŋe i dwon aloŋo, ate daŋ pako nyiŋe kede wer. Kono onwoŋo rik akano balle oko i cunya, kono Rwot gire mom owinyo kwacca kadi acel. Cite amito kobo kannnaler ni Obaŋa owiny kwaca, en ociko yite te winyo kwacca luŋ ame akelo i nyime, Obaŋa gire myero pwo, pien en gire mom okwero winyo kwacca, dok daŋ mom omio marrere a mom lokere oya i koma. Kica myero mak Obaŋa i komwa, dok miwa daŋ gum, kun nenowa daŋ i waŋ me kica, me jo luŋ ame bedo i lobo ŋe kite, dok teko mere me laro jo oŋeye baŋ rok ducu. Rok luŋ me wi lobo myero paki, Ama Obaŋa, rok luŋ myero gire paki. Mi cuny rok luŋ bed ayom, kun owero wer me pwoyi i yomcuny, pien yin iŋolo kop a rok luŋ arorom, dok yin daŋ en ame itye ka telo rok luŋ ame tye i wi lobo. Rok luŋ me wi lobo myero paki, Ama Rwot, rok luŋ myero gire paki, Cam doŋ ocek i lobo meicel, Pien Obaŋawa, Obaŋawa omiowa gum. Obaŋa omiwa gum, jo luŋ ame tye i lobo myero wore. Obaŋa myero ya malo, me mi okworerrera ket oko atata dok jo ame dage daŋ riŋ oko i nyime. Migi orweny oko i nyimi kite ame yito duny kede, kite ame odok kic me ye kede ka oketo i mac, mi jo a kitegi reco to daŋ kittono i nyimi, yin Obaŋa. Ento jo a kitegi atira, myero bed i yomcuny, migi olel i yomcuny i nyimi yin Obaŋa, mi yomcuny cirgi oko. Wer wunu baŋ Obaŋa, wer wunu wer me pako nyiŋe, yik wunu yo a ŋat ame kwano pol, Nyiŋe Rwot, dwore wunu, dok ibed wunu i yomcuny i nyime. Obaŋa ame bedo i kabedo mere acil, en ame obedo papo itino kic, kede ogwok mon a coggi oto, Obaŋa en ame mio acan paco mere me bedo, en telo jo ame tye i ot kol, terogi i kuc, ento jo ame maro jem en wekogi obedo i lobo otwo. Ama Obaŋa, i kare ame itelo wi lwakki, i kare ame iwoto kedgi i dye tim, lobo oyeŋere, kot te core piny kun ya i polo, pi nyiŋi, yin Obaŋa, anaka kidi me Cinai daŋ oyeŋere inyimi yin Obaŋa. Yin Obaŋa a jo Icrael. Yin rik imio kot adwoŋ meicel ocwe i lobo, Ama Obaŋa, i mio teko baŋ jo ame iyero i kare ame gin odoko agoro. Lwakki bedo iye acalo pacogi, dok imio teko baŋ jo ame piny oloo, Ama Obaŋa, mannono yin itimo pi berri giri. Rwot en omio cik, Mon ame tero amut aberi, pol meicel, kun okob ni, “Obakki karacel kede monygi tye ka riŋo oko,” mon ame odoŋ paco, poko jami ame oyako i lweny, kadi bed gin obuto iyi anok me buto a rommi, onen calo awele ame okwogo bwomgi kede ryal, dok ame yer komgi obedo lulum calo jabu. Kare ame Won Twer okeketo obakki i kuno oko, kot ocwe i pee i WI kidi me Calmon. Kidi me Bacan kara tek kit man, kidi me Bacan wie pol ladi! Yin kidi ame wii aboco mere pol wok-ki, piŋo kara ineno piny i waŋ me nyeko, naka kidi ame Obaŋa oyero me bedo iye. Rwot gire bino bedo kuno nakanaka, Rwot obino kun ya i Cinai, woto i ode acil, obino i lwak gadigadi tutumia i tutumia. Oyito naka i wi kidi malo, kun coko lwak opii apol meicel woto kede, kun daŋ gamo mot ame jo mie, naka i baŋ jo ame yam jem i kome. Rwot Obaŋa bino bedo kuno. Rwot gire myero pwo, pien en nino i nino tiŋowa pekowa luŋ, Obaŋa gire en ame larowa. Obaŋawa gire en ame larowa Obaŋawa, en Rwot ame larowa i to. Ento Obaŋa bino goyo wi okworrere ŋiŋido oko, jo ame yer wigi boco, ame mom mito weko kitegi areco. Rwot ociko ni, “Abino dwoggogi i Bacan, abino kwanyogi oko i piny, kun awotogi i nam atut, me ibid tyenwu kede remo okworwu, me leb gwogiwu pipila me naŋo remo okworwu.” Jo luŋ tye ka neno wotti, Ama Obaŋa, wotti, yin Obaŋana, ame ibedo Abakana, ame iwoto kede i odi acil, kun ower telo yo, okut bilo lubogi, kun i dyeregi tye iye anyira ame goo ajaa. “Myero ipwo wunu Obaŋa i dye lwak adwoŋ, wun ikwae a jo Icrael luŋ, myero ipwo wunu Rwot.” Benjamin ame obedo atekere atidi meicel, en ame otelo yo, kun rwode a jo Juda tye iyeryoŋetgi karacel kede rwode a jo Jabulon kede me a Naputal. Nyut twerri, Ama Obaŋa, nyut tekki ame itio kede pirwa, Ama Obaŋa. I odi ame tye i Jerucalem, obakki kela motgi me bino yalli. Ama Obaŋa, juk leyi ager ame tye i akina aladu, twoni apipim kede roce a rok oceie, tuno ka gin oryebere piny i nyimi, ote miyi motgi me ryal, eketo jo ame maro lweny oko. Okwena adoŋo bino ya i Miciri, jo Eciopia bino taŋo ciŋgi kwao Obaŋa, Wer wunu wer me pako Obaŋa, wun oloc luŋ me lobo, wer wunu wer me pako Rwot. Wer wunu wer baŋ ŋat ame woto malo i polo, i pol acon meicel, winy wunu kite ame en tye ka redo kede i dwon aloŋo. Rab wunu pi teko Obaŋa, kwogo mere tye i kom Icrael, teko mere tye malo i polo. Obaŋa iyiliyili meicel i ode acil, en Rwot Obaŋa me Icrael, ame mio teko kede twer baŋ jo mere. Wun myero ipwo wunu Obaŋa. Lara ba, Ama Obaŋa! Pien pii doŋ amito mwonya oko. Amoko doŋ oko i te coto piny, kan ame tyena mo romo nyono kadi acel; atuno doŋ i pii kan atut meicel, ame doŋ tye atagere kun corre i wia malo. Koko doŋ oola oko, dwona daŋ doŋ orwe oko; waŋa daŋ doŋ oballe oko, kun akuro Obaŋana, Jo ame daga nononono aboŋo ginnoro ame abalo, opol atek ame kato yer wia oko; jo ame tye ka coko doga nononono i kop me goba, otek meicel gin jo ame mito neka nono. Gin openya me dwoko gin ame mom akwanyo kadi acel. Ama Obaŋana, yin gire iŋeo miŋona luŋ, ginnoro luŋ ame an abalo, tye kannaler i nyimi. Kur imi lewic mak jo ame geni pira, Ama Rwot Obaŋa me mony; kur imi ale twod jo ame yenyi pira, Ama Rwot Obaŋa me Icrael. An doŋ akanyo ayet meicel piri, ame omio lewic doŋ ocira oko. Acalo doŋ arok i akina omegona, omegona ame onywala kedgi karacel, mom doŋ ŋea. Akemo omaka pi lit a odi, ayet ame jo yeti kede, poto naka i koma. Ka aporo mwolle kun akanyo kec, jo yeta ayeta. Ka ruko boŋo me kwero cola, adoko gin me lolo doggi. Jo ame bedo piny i dogcel, kobo nyiŋa meicel, jo ame mer i koŋo olok, ocako wergi kun owera kede. Cite an i tuŋ baŋa, Ama Rwot, akelo gira kwacca i nyimi, akelo gira i kare ame mitte ikokome, gam kwacca, Ama Obaŋa pi marri a mom lokere, Lara oko, Ama Obaŋa, pi konnyi adwoŋ me kur amok i coto; lara i ciŋ okworra ame daga, lara i pii atut meicel. Kur imi pii ame amol atek meicel tera oko, kur imi amwonyere oko i pii atut, dok daŋ kur imi adony piny i te bur. Gam doga, Ama Rwot, pien marri a mom lokere ber, lokere inena i waŋ me kica, kite ame kicani dwoŋ kede. Kur iponna oko, an amironi, tim ber igam doga, pien atye i can. Nyiggo baŋa, me ikonya, tim ber ikwanya oko ciŋ okworra. Yin gire iŋeo kite ame onywara kede luŋ, kede lewic areco luŋ ame gin omia, dok daŋ iŋeo okworra luŋ. Ayet ame gin yeta kede omio cunya oballe oko, omio doŋ atye acalo ŋat obolo tonnere piny oko. Ŋattoro akono kica make i koma, mom nen kadi acel, jo moro akono kwe cunya mom nen kadi acel. Akaka miya cem a myero acam, gin omia acamo cam ame oonyo iye kwir, ka apenyo pii me amata, gin olunyo miya koŋo awac. Mi mejagi ame tye i nyimgi, lokere dok owic me mokogi; ecubangi ame oyalo iye Obaŋa olokere odoko boo me mokogi. Mi waŋgi cid oko me kur onen piny; mi pyergi bed myel amyela. Cor akemoni luŋ i komgi, tyek akemoni agwa wokki komgi. Myero imi kemagi doŋ nono aboŋo ŋattoro ame bedo iye, kur imi ŋattoro bed iye kadi acel. Pien gin omedde wuno dano ame yin doŋ ityeko keto can i kome, dok omedde keto can ameda i kom ame yin doŋ ityeko keto awano i komgi. Medde keto can aketa i komgi pi balgi, kur ikwany kop i wigi kadi acel. Mi nyiŋgi jwa oko i buk a jo akwo, kur imi co nyiŋgi i buk a jo a kitegi atira. Cite an rem kede can ocira oko; Ama Obaŋa, tim ber ilara ite keta malo. An abino pako nyiŋ Obaŋa, kede wer; abino dworo nyiŋe kun apwoe. Pwocca-nono bino yomoro cunye ame kato twon oko, akadi twon ame tuŋe tye kede lwete. Tim ber imi jo ame owuno nen, bedo i yomcuny; wunjo ame woro Rwot, cunywu bino dwogo. Rwot gire winyo koko a jo ame piny oloo, dok daŋ cunye mom cao jo mere ame otweo i buc. Polo kede lobo ducu myero pake, nam kede ginnoro luŋ ame woto i tyene. Pien Obaŋa bino laro jo ame bedo i Cion, dok daŋ bino dok gero boma luŋ me Juda; omiro mere bino bedo kuno, ote gamo bedo meggi, Itino omiro mere bino leyo doko meggi, dok jo luŋ ame mare bino bedo iye. Ama Rwot, cunyi myero bed ayom me larra. Ru lara, Ama Rwot. Mi lewic makgi dok babaŋogi oko, gin jo ame mito kwanyo kwona, migi olokere odok cen i twon lewic, gin jo ame bedo timarac. Mi twon lewic adwoŋ mak jo ame nyera, jo ame kobba ni, Ber, ber, ber. Cite myero imi jo luŋ ame wori bed i yomcuny, dok olel meicel piri; myero imi jo ame maro larreni, kob kare ducu ni, “Rwot gire dwoŋ.” Aco an gira, an acan, piny oloa oko; ru bino baŋa Ama Rwot! yin gire en ame ikonya dok ilara, kur ibed gal, Ama Obaŋana. An gira ariŋo alaro baŋi, Ama Abana; kur imi lewic maka ba; Lara dok ikonya pi kiteni atira; cik yiti me iwiny kwacca, dok daŋ ilarra. Tim ber ibed kidi atek me larrena, dok ibed twon cel atek meicel me gwokka, pien yin en ibedo kidi kede cella ame ocel atek. Ama Obaŋana, tim ber ilara i ciŋ tim areco, lara i ciŋ jo a mom ŋolo kop kakare, dok ame gin jo ager meicel. Pien genna luŋ tye i komi, Ama Rwot, acako genni i kare ame pwod an atin, An rik acako bedo i gen i komi cakere ame rik pwod onywala anywala, yin daŋ en ame rik ikwanya iyi totta kan ame rik abuto iye. An gira abino medde paki kare ducu. An onwoŋo abedo gin ame jo apol wuro meicel, ento yin en ame ibedo ka larrena atek. Wer me paki mom rwenyo i doga, aketo kwogo i komi nino i nino. Tim ber kur ibola oko i kare ame doŋ atyeko ti; kur daŋ iweka ata i kare ame tekona doŋ odoko agoro, Pien okworra kare luŋ bedo poro kop i koma, jo ame mito neka, cokere karacel me poro kop i koma. Kun okobo ni, “Obaŋa doŋ otyeko weka oko ata; ryeme wunu me imake wunu oko, pien ŋattoro a myero lare mom doŋ tye.” Ama Obaŋa, kur ibed abor keda; Ama Obaŋana, tim ber iru bino konya. Mi lewic mak jo ame tye ka dota, dok ame otyeko tekona oko; Mi jo caagi, dok lewic adwoŋ meicel daŋ makgi, gin jo luŋ ame mito keto can ikoma. Cite an gira abino medde bedo gen nakanaka, kun daŋ amedde paki apaka. Abino medde tuco ticcoro luŋ atira ame yin ibedo tiyo, abino tuco daŋ pi tic ame itio me lawk jo nino ducu, pien welgi dwoŋ meicel, ame kato ŋec ame an atye kede oko. Abino bedo rabo pi tic adoŋo me awura ame Rwot Obaŋa obedo tiyo, kiteni atira keken en ame an abino bedo pako. Ama Rwot Obaŋa, yin gire ibedo konya cakere i kare ame pwod atidi, pi mannono, pwod abino bedo tuco ticcogo me awura luŋ ame yin itio. Pi mannono ba, kadi ati ame lwar doŋ obuko i wia, kur iweka kadi acel, Ama Obaŋa, tuno ka atyeko rabo pi twerri baŋ lwagi jo me kare luŋ, Tekoni kede kiteni atira, doŋ otyeko tuno naka malo i polo, Ama Obaŋa. Yin doŋ ityeko timo jami mogo adoŋodoŋo meicel, kara ŋa ame oŋomo pori kede, Ama Obaŋa? Yin en ame icwao can kede rem adwoŋ meicel baŋa, ento yin dok ibino miya teko; dok daŋ yin ibino wota oko piny i te bur atut, ibino wota idwogo an kannaler. Ibino miya abedo twon lo moro adit akato kit ame yam abedo kede con; dok daŋ ibino kweyo cunya. Dok daŋ abino paki kede naŋa opuk, pien yin ibedo Obaŋana ame genne, abino wero wer me paki, kun agoo naŋa opuk, Ama yin Ŋat Acil me Icrael. Abino redo atek meicel i yomcuny, i kare ame atye ka wero wer me paki; abino paki daŋ i tipona luŋ ame yin ityeko laro. Abino medde tuco ticcoro luŋ atira ame yin ibedo tiyo me konyo jo, cakere odiko naka otyeno, pien can kede lewic doŋ otyeko makogi oko, gin jo ame onwoŋo mito keto can i koma. Pwony abaka i ŋolo kop atira calo yin, Ama Obaŋa, dok imi wot abaka nywak kedi kiteni atira. Myero kite atira en ame loc i ŋolokop a joni i dok daŋ ŋolli ocan kop atira. Mi kiddi okel kuc baŋ joni, wii tur-gu okel kite atira, Abaka myero ŋol kop a jo ame tye i akina joni kakare, dok myero lar jo ame piny oloo, kun turo loc a jo ame wunogi oko. Mi loccere perakino acalo ceŋ kede dwe, pi runi kede runi, Mi jo jole acalo kot ame cwe i wi lum ame ojwero, acalo kot ame ŋido bido lobo otwo. Mi kite atira nya medde ameda i kare me loccere, kuc daŋ bed tye i lobo mere nakanaka, tuno i kare ame dwe doŋ mom tye, Mi lobo ame en loo cakere i dog nam tuŋŋi tuno kede tuŋ ocele, cakere i kulo adwoŋ tuno kede i agikki lobo, Mi okworrere bin ryebere piny i nyime me wore, jo a lwenyo i kome, bin mulo amula i nyime. Mi abaka me Tarcic kede abaka a jo ame bedo i cula nam bin gel ocorogi baŋe, dok obakki me Cebar kede me Eciopia, kel motgi baŋe. Obakki luŋ myero bin ryebere piny i nyime, dok rok luŋ daŋ myero bed jo ame tio ticcere. En maro ŋat me piny oloo ka ce okok baŋe, konyo daŋ ocan kede ŋattoro ame tye aboŋo ŋat ame konye. Pien kica mako i kom jo agoro kede i kom jo ame piny oloo, dok daŋ laro kwo a jo ame piny oloo, En lakoro kwogi i ciŋ jo ame wunogi kede otim tim me bwami, kwogi pire tek baŋe meicel. Mi kom abaka bed ayot nakanaka, dok imi mie jabu ame okelo i Ceba. Mi jo bed kwayo pire nakanaka, kun daŋ olamme winyo kare ducu, Mi cam cek adwoŋ meicel i lobo mere, naka i wi kiddi malo, mi ginnoro luŋ ame cek iye bed bala en ame cek i Lebanon, dok jo bed dwoŋ atek meicel i boma ame tye i te loccere, kun pol meicel calo lum. Mi nyiŋ abaka perakino nakanaka, mi nyiŋe bed rwo nakanaka kite ame ceŋ ri kede. Mi jo luŋ ka alamo gum, lam i nyiŋe, kun rok luŋ lwoŋe ni, lo a kome winy. Rwot Obaŋa me Icrael myero pwo, ame en keken en ame tio gin me awura. Nyiŋe me kwogo myero bed pako nakanaka, kwogo mere myero rom lobo luŋ aluŋa! Amen dok Amen! Kwac a Daudi wot a Yece ogik kan. Ateteni, Obaŋa gire ber baŋ jo a cunygi ler, i kom jo ame cunygi cil. Aco an, tyena otwomere ame onwoŋo doŋ aceggi poto, tyena onwoŋo doŋ ceggi acega i cer. I kare ame nyeko omaka i kom jo ame wakere, kede i kare ame aneno otim tim areco tye alony alonya. Pien gin gigi mom owinyo kit remmoro kadi acel, komgi yot dok daŋ pwot apwota. Gin mom ocalo jo ocele ame can bino poto i komgi, mom daŋ otye ka goyogi calo jo ocele. Mannono omio awaka en ame tye acalo tigo ŋutgi, tim me kolo te bedo acalo boŋogi me aruka. Yikgi me timo gin areco mollo amola i cunygi calo moo, tam me miŋo en ame dwoŋ i cunygi. Gin cwako gin arac i kop areco keken, cunygi yom ayoma i tim me wuno jo ocele, Naka Obaŋa ame tye malo twalli gin okobo kop arac i kome, kop a ya i doggi twero ketti jo ame tye i wi lobo cik. Mannono omio jo lunyo pakogi, kun jo ye kopporo luŋ ame gin kobo. Gin okobo i cunygi ni, “Obaŋa kara twero ŋeyo i yore aŋo; Obaŋa mara meicel, ŋeo ginnoro luŋ bo?” Nen ba, mannono en kite ame ocan bedo kede, kun lonyo medde ameda i ciŋgi. Cite an ame abedo gwoko cunya bedo acil, kun daŋ alwoko balloro luŋ i ciŋa, an kom abedo yelle nono. Pien obedo yella nino ducu, kun daŋ opwoda nino i nino odiko. Kono onwoŋo akobo amannono, kono abwolo ikwai ame obino nywalo i kare me anyim. Ento atemo i tekona ducu me niaŋ gin omio man tye ka timere, anwoŋo ni tek ame mom aromo niaŋ iye, tuno naka i to acil ame oworo iye Obaŋa, ate doŋ niaŋ iyi imuŋ Obaŋa i kom otim tim areco. Ateteni, remo onwoŋo iketogi kan apwot meicel, ame obedo cer acera iye, omio gin luŋ ote poto oko i can. Gin luŋ rik ote tum oyotoyot meicel, can ame mio jo lworo rik te jwerogi tyekogi oko. Jo-nono gire calo lek ame ka dano ocoo i waŋ nino rwenyo oko i wie, ame ka ico i waŋ nino calgi rwenyo oko i wi kede tammi. I kare ame cunya ocwer meicel, ame akemo omio par ocira oko, onwoŋo adoko amiŋ ame mom aromo tamo ginnoro kadi acel, kun atimere i nyimi calo lee. Kadi bed amannono, an gira kare luŋ atye i ciŋi, yin imako ciŋa tuŋ cem. Yin en ame itela kede tam ame ibino miya, waŋŋoro i agikki ibino jola i kabedoni me kwogo, Kara ŋo ocele ame dok tye pira i polo, mom yin keken? Mom dok tye ginnoro i lobo kan ame an amito ame kati, Koma kede cunya twero doko agoro, cite yin Obaŋa en ame imia tekcuny, dok yin gire en ame ibedo gin ame opoka ame abino gwoko atwal. Nen ba, ŋat ame bor abora kedi, bino to oko, pien yin ibino jwero jo luŋ ame mom geni, Aco an gira, bedo ceggi kedi yin Obaŋa en ame berra, an gira ariŋo alaro baŋi, yin Rwot Obaŋana, me wek abedo rabo pi ticcoro luŋ ame yin itio. Ama Obaŋa, piŋo kara ibolowa oko atwal? Piŋo imio akemoni duny i kom rommini ame itye ka kwayo? Po pi lwakki ame yam yin iyero pi lwakki cakere con, jo ame yam ilakoro oko i can me bedo megi yin ikomi, Po pi kidi me Ci on kan ame yam yin ibedo iye. Doki i kabedo man ame doŋ oballe oko odoco-ni; okworo otyeko balo ginnoro luŋ ame tye i odi. Okworo oredo kun owoo ilelo kan ame yam owori iye, oŋabo benderagi i doggola malo, ame nyuto ni kannono doŋ odoko meggi. Gin onen calo opaa bao ame tye ka toŋo yen i lee iyi buŋ, Bao luŋ ame, yam opao aber, otoŋo oko piny, obabalo oko i lee kede anyul. Ocwinyo mac, ote waŋo oko odi acil, Ama Obaŋa, opyelo-gu odi acil ame yam jo wori iye, kun omuko apama mere oreto oko piny. Okobo i cunygi kengikengi ni: Obino nekogi otyekogi oko ducu, obino daŋ waŋo kabedo acil ducu i lobowa, kan ame yam gin oworo iye Obaŋa. Anennoro ame yam poyo wiwa mom doŋ tye, adwarpinnyoro daŋ mom doŋ tye, dok daŋ mom tye ŋattoro i akinawa ame ŋeo kare ame can man bino ri kede, Ama Obaŋa, okwor bino bedo yeti naka awene ba? gin obino bedo cayo nyiŋi nakanaka bo? Piŋo kara ikwero konyowa oko? Pi ŋo idolo ciŋi idwoko iŋei kaka ryeyo me konyowa? Aco kono yin Obaŋa ame ibedo abakana, cakere con meicel; yin en ibedo tiyo ticcogo me laro dano i wi lobo. Pi twer ame yin itye kede omio yin ipoko nam i dul aryo, ite nyonyobo wi leyi ame bedo i nam oko, Iŋiŋinyo daŋ wi Leviatan oko, ite bolo kome baŋ leyi ager me acamagi. Imio pii opelo iyi akoŋ kede i kulo, imio pii odwono oko i nam adoŋo. Yin daŋ gire en ame ilo dyeceŋ kede dyewor, dok yin en ame iketo cen kede dwe i kabedoni. Yin en imoko waŋ apokki me lobo, dok daŋ yin en ame iyiko kare me oro kede kare me cwir. Aman doŋ ba, Ama Rwot, koŋ ipoyo kite ame okworwa yeti kede, gin obedo jo amiŋ ame yeti nononono, kun mom olwori kadi acel, Kur ijal kwo a joni i ciŋ leyi ager, wii myero kur wil oko atwal i kom lwakki ame can odio. Poyo cikereni ame rik icikere kede kedwa, tim me byemi tye i kabedo luŋ acol ame tye i lobowa-ni, Kur imi lewic mak jo ame otye ka nyono oko piny, mi ocan kede jo ame piny oloo pak nyiŋi. Ya malo, Ama Obaŋa, ipid pidoni, wii kur wil i kom ayet ame jo amiŋ cai kede kare ducu, Wii kur wil i kom redo me akemo ame okworri redo kede atek wok-ki, woo okworri ame tye ka medde ameda kare i kare. Wan opwoi, Ama Obaŋa, wan giwa opwoi, wan odworo nyiŋi, kun orabo ticci me awura. Abino ŋolo kop atirai i lobo, i kare ame doŋ atyeko moko. Kadi bedo lobo bino yeŋere karacel i jo luŋ ame bedo iye, an abino miyo cuŋ atek ikiŋ kakare. Abino kobbi jo awakere ni myero owek wakere bedi, dok abino kobbi jo areco ni owek yeyea nononono. Abino kobbigi ni owek yeyea atek ateka nononono, dok daŋ owek kobo kop me anywar anywar. Pien ŋolo kop mom bino ya i tuŋ kide onyo i tuŋ to, dok daŋ mom bino ya i tutuŋ anyarolum, mom daŋ bino ya i tutuŋ anyarodi; Obaŋa gire en ame ŋolo kop a jo luŋ en kene, dwoko jo okene piny, tiŋo jo okene atiŋa malo, Pien ikopo ame koŋo olok opoŋ apoŋa iye tye i ciŋ Rwot, koŋo ame onyobo aber, tye ka yenyo ayenya iye; en bino miyo jo areco luŋ ame tye i loba mato, obino mato tuno ka otyeko oko ducu. Cite an gira abino lelo alela nakanaka, abino wero wer me pako Obaŋa a Yakobo. Twer a jo areco ame yeyea no nonono, en bino giko oko, cite bino dwoko twer a jo a kitegi atira. Obaŋa ŋeye meicel i Juda, nyiŋe daŋ dwoŋ meicel kuno. Kema me bedo mere tye oguro Calem; kan ame en bedo iye tye i Cion. En otuturo atero mogo ame lebgi meny amenya kuno, otuturo anaka kwode, pala me romo, karacel kede jami ocele luŋ me romo. Kwogoni dwoŋ meicel, Ama Obaŋa dok twer ducu tye i ciŋi, kwogoni kede twerri kato me a kiddi luŋ ame perakino nakanaka. Omao jami lweny oko i ciŋ olweny ame kwiri, gin doŋ tye ka nino anina; mom tye ŋattoro i akinagi ame tye i jami me lweny i ciŋe. I kare ame ijukogi, Ama Obaŋa a Yakobo, wegi aguragura kede aguraguragi ote rereta piny wille oko. Ento yin ibedo iyiliyili meicel. Da kara ame romo cuŋ i nyimi, ka ce akemoni olyeto. Imio kop ame yin iŋolo oŋeye baŋ jo kun oya i polo, lworo te mako jo luŋ ame bedo i lobo, ote liŋ iti, i kare ame yin Obaŋa iya malo me ŋolo kop, me laro jo luŋ ame owuno i lobo. Akemo a jo lokere doko me paki, jo ame obwot i lweny obino kelogi obedo cok kedi. Kwoŋ wunu kwoŋwu baŋ Rwot Obaŋawu, ite daŋ cobo wunu mi wunu jo luŋ ame bedo i ŋete kel mot baŋe, pien en obedo Obaŋa ame myero lwor, En mio rwode a wakere doko amwol dok daŋ iyiliyili meicel baŋ obakki me lobo. Akok atek meicel baŋ Obaŋa, akok i dwon aloŋo baŋ Obaŋa, me en winy kokona. I kare ame atye i can, an ayenyo Obaŋa; dyewor luŋ an abedo taŋo ciŋa baŋe kun mom aol, cite mannono luŋ mom mio cunya kwe. Aparo pi Obaŋa, kun acur meicel; abedo lwodo kop i kome i cunya, ate doko agoro oko, Yin igeŋa nino oko, cunya-gu bedo myel amyela ame mom aromo kop. Cunya dok riŋo cen i kare ame okato, ate poyo mwakki mogo ame doŋ okato iŋec. Abedo tamo tam atut meicel dyewor, cunya lwodo kop kun apenyere kenakena ni: “Obaŋa bino kwera nakanaka? kica mom bino make i koma kadi acel? Marrere ame mom lokere doŋ ogik oko bo? cikere ame en rik ocikere kede kedwa doŋ ogik oko bo? Onyo Obaŋa wie owil awila me tima kica bo? Onyo akemo mere doŋ oloc oko ame kica mom dok romo make?” Dok ate kobo ni, “Gin ame doŋ cwero cunya twatwal ene, Twer ame Obaŋa Amalo Meicel tye kede doŋ olokere oko.” Abino poyo tic ame Obaŋa obedo tiyo; abino gire poyo ticcogo me awura ame itio mwaka okato. Abino lwodo kop i cunya kun aparo ticcoro luŋ ame yin itio, ate poyo ticci mogo adoŋdoŋo ame ibedo timo. Ama Obaŋa, ginnoro luŋ ame yin itimo cil, obaŋa mene adok dwoŋ calo Obaŋawa? Yin ibedo Obaŋa ame tio ticcogo me owura, ityeko nyuto twerri oko kannaler oko i akina rok ducu. Yin rik ilakoro joni i tekoni, ame gin obedo ikwae a Yakobo kede me a Yucepu. Kare ame pii me nam oneni, Ama Obaŋa, kare ame pii me nam oneni, lworo omakogi, pii atut ame tye i nam te cako tagere oko. Pol ocoro pii piny; piny te mor i pol atek meicel, lutkot te meny menyo kabedo ducu. Lutkotti te mor i yamo ajuru, omor te menyo lobo luŋ, lobo te yeŋere, jo ame bedo iye daŋ komgi te myel. Yo ame yin ilubo onwoŋo beo i dye nam, yin rik ite ŋolo twon dye nam ame pii mere tut meicel; kadi amannono kan ame tyeni onyono onwoŋo mom romo nen. Rik itelli joni yo acalo ŋat akwayo rommi, kun imio Muca kede Aron gwokogi. Cik yitwu, iwiny wunu pwonnya, wun jona; cik yitwu iwiny wunu kop ame aya i doga. An abino pwonyowu i pwony me ryeko, abino tuco koppogo opono me kare acon, gigi mogo ame wan owinyo dok oŋeo, ame kwariwa rik otittiwa. Wun daŋ myero kur imuŋŋi wunu itinowu, cite myero ititi wunu lwagi jo me kare luŋ ame obino nywalo, gigi mogo me kwogo ame Rwot otimo, karacel kede twer ame en tye kede, kede gigi mogo me awura ame en otio. En rik omio cik baŋ jo Icrael, dok omio daŋ koppogo me caden baŋ ikwae a Yakobo, ame rik en ociko kede kwariwa, ni myero pwony kede otinogi; me wek lwagi jo ame alubowa daŋ ŋe, itino ame mom ru onywalo, gin daŋ ka odoŋo ote tito baŋ itinogi. Mannono bino miyo gin daŋ obedo kede gen i kom Obaŋa, kun wigi mom wil oko i kom gin ame Obaŋa otimo ento olubo cik Obaŋa. Gin myero mom obed calo kwarigi, lwagi jo ame maro jem ame ŋutgi nwaŋ, ame rik gin obedo jo ame maro jem meicel, kun daŋ mom owinyo cik Obaŋa. Itino Epraim omako atero me lwenygi, ote loko ŋegi oko i kare me lweny. Gin rik mom ogwoko cikkeregi kede Obaŋa, ento okwero lubo cik a Rwot oko. Wigi owil oko i kom tic ame en otio, akadi taŋo mogo ame en obedo nyuttigi. Obaŋa rik otio ticcogo me awura i nyim kwarrigi, i lobo me Miciri, i bar me Joan. En rik omio pii opokere i dul aryo gin te beo i dyere, en omio pii ocuŋ tuŋŋi i tuŋŋi calo pem. Dyeceŋ en obedo telo nyimgi kede pol, eka dyewor te bedo mennyigi yo kede mac. En obaro kidi i dye tim, pii te wukere iye pirgi ni wol wol, Omio pii omolo i lela, pii iye te mol calo pii i kulo. Ento gin omedde ameda i timo bal i nyime, ojem-gu baŋ ŋat Amalo Meicel i tim, Obedo temo Obaŋa i cunygi, kun openyo cam ame cunygi mito. Obedo kobo kop arac i kom Obaŋa kun okobo ni: Obaŋa twero miyowa cam i tim kan? Kun kono enobaro kidi pii te molo iye, En twero miyowa cam-kan, kun mio daŋ riŋo baŋ jo mere? I kare ame Obaŋa owinyo kopginono, akemo omake, omio te cwinyo mac me waŋo Yakobo, akemo mere te lyeto meicel i kom Icrael; pien gin doŋ onwoŋo mom geno Obaŋa, dok mom ogeno ni Obaŋa tye kede teko me larogi. Kadi bed amannono en rik okobo kop baŋ pol ame tye i polo, doggola luŋ me polo te yabere oko; Manna te corre piny iya iye me acamagi, Obaŋa omiogi cam ame oya i polo. Mannono omio dano te camo cam ame omalaika camo, Obaŋa te miyogi cam adwoŋ ame okato mitigi oko. En te cwayo yamo i polo ame oya i tuŋ kide, pi teko en dok te cwayo yamo ame oya i tutuŋ anyarolum, Omio riŋo oduny i wigi malo calo apua, kede winnyi apol meicel calo kwoyo me dog nam, Omiogi oony piny i dye kemagi, i kabedo luŋ ame gin obedo iyenono, Gin ocamo ote yeŋ, pien en omiogi gin ame cunygi onwoŋo mito. Cite i kare ame gin pwod pe ru ocobo mitigi, ame mom ru oyeŋ, ame riŋo ame ocamo-nono daŋ pwod tye i doggi, akemo te mako Obaŋa meicel i komgi, te neko jo mogo ame onwoŋo tek meicel i akinagi, ojwero twoni jo mogo ame en oyero ayera i akina jo Icrael. Kadi amannono, gin pwod omedde ameda i timo bal, mom oye kadi acel gigi mogo me awura ame en obedo timo. Mannono en omio karegi-naca okato oyotoyot calo yamo, kwogi te tum atuma ame mio jo lworo meicel. Kare ame en oneko jo mogo akinagi, jo odoŋ te cako yenye, oŋut ote yenyo Obaŋa cunygi ducu, Gin te cako poyo ni Obaŋa en obedo kan atek me alaragi, Obaŋa Amalo Meicel en obedo ŋat alakorogi. Cite kop ame gin kobo oduro ka goba keken, obedo kobo kop me goba i nyime. Cite gin onwoŋo mom mare i cunygi ducu, mom daŋ ogwoko cik Obaŋa. Cite pien Obaŋa akica, kica te make i kom lwakkere, en te weko balgi oko, mom te nekogi, en obedo juko akemo mere tyen apol meicel, mom oye ni akemo mere tugere ducu. Obaŋa te poyo ni gin obedo dano keken, ocalo yamo ame woto mom dok lokere dwogo cen, Gin obedo jem i kome tyen apol meicel, omio akemo obedo make i tim kuno, Obedo teme-gu teretere, kun oroko Ŋat Acil me Icrael. Wigi onwoŋo owil oko i kom teko mere, kede i kom kare ame gin olakorogi i kom ciŋ okworgi; kare ame en otio gigi mogo me awura i Miciri, kede taŋo mogo ame en obedo timo i bar me Cion, En oloko pii odoko remo, omio jo i kuno mom romo mato pii i kulogi. Ocwao i akinagi lwaŋi apipim, ame te bedo kayogi, dok te cwayo daŋ ogwalogwali apipim me yelogi. Omio omor ocamo cam i potogi oko, bonyo daŋ te mwodo cam ame gin obedo lole kede oko. Omio pee oonyo olokgi oko piny, kede ŋico obalo olamgi oko, Omio daŋ pee oneko dokgi oko, lutkot daŋ ocecelo rommigi oko. Owuko akemo mere luŋ i komgi, omiogi can apek meicel, te cwayo lwak omalaika i akinagi me nekogi, Mom ojuko akemo mere kadi acel, mom oye laro kwogi i to, omio too edeke onekogi meicel. Oneko itino kao luŋ me Miciri, ame gin onywalo i tekogi me agege, i kema me Kam En te telo jo mere calo rommi, otelo nyimgi i tim calo leyi me paco, Otelogi i kuc, kun mom tye ginnoro ame gin olworo, ento pii me nam te mwonyo okworgi oko. En te terogi naka i lobo mere acil, i wi kidi ame en olo pi teko mere, Oryemo rok ocele luŋ ame onwoŋo tye i nyimgi, en opokkigi lobo ame omiogi me alea me bedo meggi, te miyo atekere me Icrael bedo kema okworgi. Cite gin obedo temo Ŋat Amalo Meicel, kun daŋ ojem i kome, kun daŋ mom oye lubo koppere me caden, ento olokere oko teŋe ote bedo timo gin ame kwarigi obedo timo, obedo minne amina calo akud atero ame ogom. Pien obedo roke omio akemo omake, pi woro cal jogi i kabedo mogo ame otiŋere malo, obedo miyo nyeko make pi cal apaagi. I kare ame Obaŋa owinyo akemo omake meicel, cunye te wuko jo Icrael odoco. Obaŋa te weko kabedo mere oko ame tye i Cilo, kema ame rik en bedo iye i akina lwak, en te miyo tero candukkere me twer iyi opii, kede kema me kwogo mere i ciŋ okwor. Akemo omake meicel i kom jo mere ame en oyero, te jalogi oko me aneka i pala lweny, Omio mac owaŋo awobegi otyeko oko ducu, anyiragi mom doŋe winyo wer me nyom. Olamdog-gu ote neko oko i pala lweny, kun mongi mom doŋ kokogi. Rwot te co calo ŋat ame ocoo i nino, calo loo atek ame omer i koŋo olok ame tye ka redo. En te ryemo okworrere dwoko oko cen, te miyo twon lewiccoro a mom romo gik makogi, En te kwero kema a Yucepu oko, mom te yero atekere a jo Benjamin, En te yero atekere a jo Juda, kede kidi me Cion ame onwoŋo en maro, Te gero kabedo mere acil ocuŋ iguŋ calo polo, ocibo ocuŋ atek ikiŋ calo lobo. En te yero Daudi me bedo amiro mere, okwanyo Daudi i yo kwayo rommi. Olwoŋe i akina rommi ame pwod dot, me bino kwayo jo mere ame gin jo a Yakobo, okete me bedo abaka a jo me Icrael. Daudi te bedo kwayogi i cuny aler, dok otelogi daŋ i twon diro meicel. Ama Obaŋa, orok obino omao lobo a lwakki oko, obalo odi acil daŋ oko; omio Jerucalem doŋ odoŋ calo wi obur. Omio kom omironi ame oto baŋ winyo ame twarre malo me acamagi, omio daŋ kom joni acil baŋ leyi ame bedo i lobo me acamagi. Oonyo remogi piny calo pii i Jerucalem, ŋattoro ame odoŋ me yikogi mom tye. Wan doŋ odoko gi-anyera orok ame bedo i ŋetwa, jo ame oguraowa tuŋŋi i tuŋŋi oŋalowa dok daŋ ojwiowa ajwia. Ama Rwot, kara akemo bino bedo maki amannono naka awene ba? nyekoni bino miyo akemoni bino maki amannono nakanaka. Wuk akemoni-nono i kom jo ame mom ŋei, kede i kom oloccogo ame mom wori. Pien gin otyeko itino a Yakobo oko, omio lobowa odoko wi obur. Kur ipoyo bal a kwariwa ite culo kworrere i komwa, mi kica ru maki oko i komwa, pien idiowa doŋ meicel. Ama Obaŋa, konywa, yin ame ibedo ŋat ame larowa, pi kwogo me nyiŋi, larwa ba, gonywa i kom balwa piri. Piŋo kara imio orok kobo ni, “Obaŋani-nono kara tye kwene.” Cul kwor i kom orok kun wan oneno kede waŋwa, pi remo omironi ame gin oonyo. Ye gamo koko a jo ame tye i buc, gwok jo ame doŋ oŋolo kop me to i wigi, pi twer adwoŋ ame doŋ itye kede, Ama Obaŋa, cul kworwa tyen abiro twal, i kom jo ame bedo i ŋetwa, yetgi kede ayettoro luŋ ame yam gin ocai kede, Ama Rwot. Mannono bino miyo wan ame obedo joni kede rommini ame ikwao, obino pwoyi waŋ i waŋ, kun owero wer me psa ko nyiŋi. Cik yiti iwinywa, Ama yin akwat a jo Icrael, yin ame rik ibedo telo Yucepu acalo rommini. Yin ame ibedo i wi kom locci i kom okerubi ame ryeny menyo piny, i nyim atekere a jo Epraim, Benjamin, kede Manace. Nyut tekoni, me ilarwa. Dwogowa cen baŋi, Ama Obaŋa, mi waŋi oryeny omenywa me olarre, Ama Rwot Obaŋa me mony, akemo bino bedo maki naka awene ba, Ama Obaŋa, i kom lwakki ame kwai. Yin rik imiowa ocamo pig waŋwa calo cam me acama, imiowa pig waŋwa poŋ ikopo moro ni omati. Imio jo ame bedo i ŋetwa obedo cayowa arac meicel, kun okworwa bedo nyerowa anyera kengi kengi. Ama Obaŋa me mony, dwokwa baŋi, mi waŋi oryeny omenywa, me olarre, Yin rik ikelo olok iya i Miciri, iryemo rok ocele oko eka ite pito. Rik iyiko lobo itere obedo aber me doŋi, lwite te donyo apol meicel piny. Tipo mere te wumo wi kiddi luŋ, jaŋe te buŋere wumo twoni yen cedar adoŋodoŋo meicel. Jaŋe te bunere tuno naka i nam, pote te tuno naka i kulo adwoŋ. Piŋo kara dok imuko apama mere oko, ame mio jo luŋ ame beo i ŋete pwono nyige? Kul ame bedo i buŋa obalo atek meicel, dok leyi luŋ me tim daŋ camo. Koŋ dok ilokere ba, Ama Obaŋa me mony, bol waŋi piny i polo kuno, me koŋ inen, Tim ber ipar pi olokki, pien mannono obedo yatti ame yin en ipito. Gin owaŋo i mac ote toŋo daŋ oko piny, nengi akemo me oto oko, Ket ciŋi i kom joni ame iyero, igwokgi, obedo wot a dano ame yin en imioo oko atek piri. Mannono bino miyo mom dok olokere odok cen oweki, gwokwa obed kwo, wan obino woro nyiŋi, Ama Obaŋa me mony, dwokwa baŋi, mi waŋi oryeny omenywa, me olarre. Wer wunu baŋ Obaŋawa, ame obedo tekowa, i dwon aloŋo, red wunu i yomcuny baŋ Obaŋa a Yakobo. Wer wunu wer kun daŋ ibapo wunu atimo, goo wunu daŋ opuk amit meicel karacel kede naŋa opuk. Kut wunu apel i kare ame dwe pwod opor apora, kut wunu daŋ ka dwe doŋ omwonyo ogwal, kede i kare me kwero icubannogo adoŋo. Pien mannono en obedo cik a jo Icrael, gin ame Obaŋa a Yakobo rik ociko. En rik oketo odoko cik iyi atekere a Yucepu, i kare ame en owoto me wot lweny i kom jo Miciri. Awinyo dwonnoro ame yam mom aŋeo, kun kobo ni, “An rik atiŋo yec apek oko i wi gwoki, akwanyo dita me tic oko i ciŋi. Ikok baŋa i kare ame itye i can, an ate lari, agamo koppi i mor a piny kun an akanne oko i kabedo moro me imuŋ, atemi daŋ i dog pii me Meriba. Winy wunu ba, wun jona, ka atye kajukowu, wun jo Icrael, kono onwoŋo itwero winyo wunu koppa. Obaŋa moro a mom ŋeye mom bino nwoŋere i akinawu, mom ibino ryebere wunu piny me woro obaŋa orok, An abedo Rwot Obaŋawu, ame rik akwanyowu i lobo me Miciri. Ŋam wunu dogwu alac, me an apitwu. “Cite jona rik mom te winyo koppa, jo Icrael onwoŋo mom doŋ paro kadi acel. Amio cunygi odoko anwaŋ te doko jo ame opala, jo ame timo gin ame cunygi omito. Kono jona onwoŋo rik winyo koppa, kono jo Icrael onwoŋo timo gin ame amito. Onwoŋo kono aloo okworgi oyotoyot, kono aryeo ciŋa awiro i kom okworgi ducu. Jo ame daga kono omwolle kengi i nyima, dok can ame opoto i komgi kono obedo atwal. Onwoŋo kono apitowu kede ŋano aber meicel, dok kono amiowu icamo wunu moo kic iyeŋ wunu.” Obaŋa doŋ obedo oko i kommere icokere ame tye i polo, en tye ka ŋolo kop i akina obaŋe obaŋe ocele ame ogure dyere, kun kobo ni, “Mom ibino ŋolowunu kop kakare pi kare a rom mere, ŋolo kop ame odworo kede otim tim areco? Ŋol wunu kop kakare pi jo agoro kede itino kic, mi wunu jo atye i can kede jo a piny olo bed itwero ame oromo kwoogi. Lar wunu jo agoro kede jo ame piny oloo, largi wunu oko i ciŋ jo areco.” Mom otye kede ŋeccoro kadi niaŋŋoro, gin owoto gigi ata i piny acol; acakki me te lobo ducu tye ka yeŋere, An akobo ni, “Wun obaŋe, wun luŋ ibedo wunu itino a Ŋat Amalo Meicel; kadi bed amannono, wun daŋ ibino to wunu acalo dano, ibino rette wunu piny acalo rwottoro ata.” Ya malo, Ama Obaŋa, me iŋolli lobo kop; pien rok luŋ obedo megi. Ama Obaŋa, kur iliŋ iti ba, kur ibed mot ikuc kun iliŋ iti, Ama Obaŋa, Koŋ inen okworri tye kajem ajema; jo ame dagi, wigi doŋ odoko adoŋo oko. Otye ka yiko yikkkogo me imuŋ i kom rokki, otimo-gu tim me idwali i kom joni ame yin igwoko. Gin okobo kop i akinagi kengi kengi ni, “Bye wunu, me otyek wunu rok man oko; me nyiŋ jo Icrael kur dok po pire atwal.” Gin luŋ gigi oporo kop man i cunygi acel, dok daŋ ocikere me lweny i komi. Gin jo Edom kede jo Icmael, jo Moab kede jo Agri. Jo Gebal, jo Ammon, kede jo Amalek, jo Piriciti kede jo ame bedo i Turo. Jo Acuria daŋ onwoŋo oribere kedgi, i kom ikwae a Lot gin en obedo dul mony atek meicel. Timgi kite ame rik itimo kede jo Midian, kite ame itimo kede Cicera, kede Jabin i ŋet kulo me Kicon, Ame rik inekogi oko i En-dor, ame rik odoko calo woyo dyaŋ ame oonyo i poto, Mi odoŋegi ame oworo bed calo Oreb kede Jeb, rwodegi te bedo acalo Jeba kede Jalmuna, ame rik gin okobo ni, “Ogam wunu bar kwat Obaŋa oko me bed megwa.” Ama Obaŋana, migi obed calo apua ame yamo ajuru kolo, calo cuŋ kal ame yamo kolo te tero oko. Kite ame mac waŋo kede buŋ, kite ame mac waŋo kede wi kiddi ka obolo iye, yin daŋ myero ibin iryemgi oko amannono acalo twon yamo moro ame akodo atek, kun imio yamo ajuru ame akodo kodo ager ame myelo komgi. Mi lewic makgi, Ama Rwot, tuno ka gin ocako lwoŋo nyiŋi. Mi lewic makgi, dok imi cunygi bed poto apota nakanaka, migi oto, to me lewic. Migi oŋe ni yin keni en ame i Rwot, yin en ibedo Ŋat Amalo ame loo wii lobo ducu. Odi ber nadi, Ama Rwot Obaŋa me mony. Mita me bedo kuno, oola doŋ oko, mita me bedo i dyekal a Rwot. Cunya kede koma luŋ wero wer me pako Obaŋa i yomcuny, wero wer baŋ Obaŋa ame kwo. Kadi aculegwec daŋ nwoŋo paco me bedo mere, alibi daŋ tye i ode ame en buto iye, tye kede kan ame myero ebol iye toŋe, Ceggi acega kom i keno lammi, Ama Rwot me mony, abakana dok Obaŋana. Jo ame bedo i odi tye kede winyo, kun obedo ka wero wer me paki kare ducu, Jo ame tekogi ocuŋ i kom tekoni, tye kede winyo, ame cunygi mito wot anyim naka i Cion. I kare ame gin obeo i luŋ me Baca ame otwo atwoa-ni, gin omio doko kan ame pii nwoŋere iye; kot ame geo cwe acwea mio pii poŋ iye meicel kabedo ducu. Tekogi medde ameda kare luŋ ame gin tye awot, Obaŋa ame loo obaŋe ocele ducu bino nen i Cion. Ama Rwot Obaŋa me mony, winy kwaccca, cik yiti iwinya, Ama Obaŋa a Yakobo. Yin en ibedo kwotwa, Ama Obaŋa, nen wan abakani ame yin ityeko yero. Bedo i dyekalli kadi nino acel keken ber, kato bedo nino tutumia i kabedo ocele. Tika abedo akur doggola i ot Obaŋana, akaka bedo i kema a jo ame timo tim areco. Pien Rwot Obaŋa obedo cen kede kwot, en onyo kica mere i komwa, dok miowa obedo kede kwogo. En mom twero twono jo ame timo ginnoro luŋ i cuny aler, ginnoro luŋ aber. Ama Rwot me mony, jo ame geni tye kede winyo. Ama Rwot, kica yam omaki i kom loboni; imio jo a Yakobo obedo dok i kuc. Yin yam doŋ igonyo bal a lwakki oko, rik doŋ ijwa balgi luŋ aluŋa. Rik akemoni okwe doŋ oko komgi, rik iloko cunyi, akemoni alyet wok ca te doŋ kwe oko, Dok idwogowa baŋi, Ama Obaŋa ame larowa, cunyi myero kur doŋ bed waŋ i komwa. Akemo bino bedo maki i komwa nakanaka bo? Akemoni bino ri atwal naka i kare a jo me kare ducu? Mom ibino miyo cunywa dok dok i komi, me wan joni obed kede lelo i komi? Nyuttiwa marri a mom lokere, Ama Rwot, dok ilarwa daŋe. Wek koŋ awiny gin ame Rwot Obaŋa bino kobo, pien en bino kobo kop me kuc baŋ jo mere, baŋ jo mere ame gene, ame lokere baŋe i cunygi ducu. Ateteni, en gire oyikere me laro jo ame wore, me kwogo bed i lobowa. Mar a mom lokere kede gen bino ribere karacel, kite atira kede kuc bino mote kun onoto lemgi. Gen ame dano tye kede bino tuno malo kun ya i lobo; kite atira bino bolo waŋe piny kun tye i pol. Nen ba. Rwot bino miyo gin ame ber, dok lobowa bino ceko cam. Kite atira bino telo nyim Obaŋa, me yubo yo pire. Winy kwacca, Ama Rwot dok iwiny doga, pien atye i can, dok amito ni ikonya. Gwok kwona, pien an amari kede cunya ducu, lar amirona ame gena. Yin ibedo Obaŋana, kica myero maki i koma, Ama Rwot, pien an akok gira baŋi keken ceŋ iyul. Mi cunya bed ayom, Ama Rwot, pien an gira acwao kwacca baŋi, kun akwao i cunya ducu. Pien yin giri iber, dok igonyo bal, Ama Rwot, pien marri a mom lokere dwoŋ baŋ jo ame kok baŋi. Cik yiti, Ama Rwot, iwiny kwacca, winy kokona ame abako kede doga baŋi. I kare ame atye kede peko, an gira akok baŋi, pien yin igamo kwacca. Mom tye ŋattoro ame rom kedi i akina obaŋe ocele, Ama Obaŋa, dok daŋ mom tye ticcoro ame rom i tic ame yin itio. Rok luŋ ame yin iketogi bino bino baŋi, ote bino ryebere piny i nyimi, Ama Rwot, ote daŋ pako nyiŋi. Pien yin idwoŋ dok itimo jami mogo me awura meicel, yin keni en ame ibedo Obaŋa. Pwonya me aŋe kite ame yin imito ni an abed kede, Ama Rwot, me alub atenini, yik cunya me alwori. Apwoi kede cunya ducu, Ama Rwot Obaŋana, dok abino keto kwogo i komi nakanaka, Pien marri a mom lokere dwoŋ meicel i koma, yin ilaro kwona i bur atut me Ceol. Ama Obaŋa, jo ame onywar oero lweny i koma, lwak jo areco ame timo tim me byemi mito neka, gin mom oparo piri kadi acel i ginnoro luŋ ame gin otimo. Ento yin i Rwot, ibedo Obaŋa ame akica, ame maro jo ducu, akemo mom maki oyot, dok marri a mom lokere kede genni dwoŋ meicel, Lokere inena, dok kica daŋ myero maki i koma, mia tek, dok daŋ ilara, pien an amironi, ame atio kite ame yam totta otio kede baŋi. Nyuta ginnoro, Ama Obaŋa, ame nyuto berri, me lewic mak jo ame daga, ka gin bino neno ni yin Rwot doŋ ityeko kweyo cunya, dok ikonya. Boma ame Rwot Obaŋa ogero tye ocuŋ iguŋ malo i wi kidi acil. Rwot maro dogcel luŋ me boma me Cion, ame kato kabedo ocele luŋ ame jo a Yakobo bedo iye. Yin boma Obaŋa we, gigi mogo me kwogo meicel jo kobo i komi. I akina jo ame ŋea, abino tuco nyiŋ Rakab kede Babulon; dok abino kobo kop i kom Piriciti, Turo kede Acuria. Gin okobo ni, “ŋadi onywalo kuno,” Aco kop i kom Cion gin kobo ni, “Dano man kede maca onywalo iye”; pien ŋat Amalo Meicel en ame bino miyo Cion cuŋ ikiŋ. Pien Rwot bino coyo nyiŋ rok luŋ i bukkere, kun coo i yore i yore ni, “Man onywalo kuno, man daŋ onywalo kuno,” Ower wer kede jo ame myelo daŋ kobo ni, “Akoŋ me piina luŋ daŋ tye baŋi.” Ama Rwot Obaŋana, an akok baŋi nino i nino pi kony; anaka dyewor daŋ akok baŋi. Ye kwacca tun i nyimi, cik yiti iwiny kokona, Pien peko doŋ onua oko, omio kwona doŋ ceggi acega i to. An doŋ okwana i akina jo ame woto piny i bur; an a dano ame tekona moro doŋ mom, Acalo doŋ ŋat ame oweko i akina jo oto, acalo doŋ jo ame onekogi ote doŋ wekogi buto i lyelgi, atye doŋ i akinajo ame wii doŋ owil oko i komgi, pien doŋ atye kan abor ame mom romo akonya. Yin doŋ ityeko bola oko ite bur piny, kannacol dok atut meicel, Akemoni doŋ pek atek meicel i koma, amwonyere doŋ oko i bwo me akemoni. Imio owotena en ame odoko jo me lweny i koma, adoko doŋ twon ginnoro arac meicel i nyimi. Otwea aboŋo yo moro ame doŋ aromo ya kede malo. Waŋa doŋ oballe meicel pi kumo, an gira akok baŋi nino ducu, aryeo ciŋa ataŋo baŋi. Yin itio gigi mogo me awura pi jo oto bo? Tipo a jo oto dok ya malo me paki? Marri a mom lokere daŋ otito pire i lyel, onyo kiteni atira otito pire i lobo a jo oto? Gigi mogo me awura ame yin itio ŋeye daŋ kannacollaca, onyo kony ame yin imio me laro dano bino nen i lobo ame wii jo wil oko iye? Ama Rwot, an gira akobo baŋi me konya; nino ducu odiko acwalo kwacca i nyimi. Piŋo kara ibola oko, Ama Rwot? Piŋo ipona oko ame mom aromo neni? Cakere ame atidi rem ocira oko ame doŋ aceggi to, abedo kanyo tim ame itimo i koma ame kella lworo, adoko doŋ agoro odoco. Akemoni doŋ owuma oko, lweny ame ibedo lweny kede ikoma omio lworo doŋ otyeko tekona oko, Ogura doŋ dyere calo abwal spii ame amol, ocorre i koma gin luŋ karacel. Imio doŋ owotena ame amaro kede jo ame ceggi keda owuna meicel, piny acol en ame doŋ tye acalo awotta. Abino wero wer me pako marri a mom lokere, Ama Rwot, abino rabo pi gen ame yin itye kede baŋ lwagi jo me kare luŋ. Pien aŋeo ni marri a mom lokere perakino nakanaka, gen ame itye kede daŋ tye ocuŋ ikiŋ calo polo. Yin ityeko kobo ni, “An doŋ atyeko cikere oko i ŋat ame ayero, akwoŋo daŋ doŋ oko baŋ amirona Daudi, kun akwoŋo ni, ‘Abino moko ikwai bedo nakanaka, dok abino gero kom me locci perakino nakanaka i kare alwagi jo me kare luŋ.’ ” Polo myero pak gigi mogo ame yin itio me awura, Ama Rwot, dok daŋ myero ower wer me pako gen ame yin itye kede, icokere a jo meri acil. Kara ŋa ame dok tye i polo malo ame dok otwero poro kede Rwot? Ŋa i akina jo luŋ ame rom kedi, Ama Rwot? Mom yin ibedo Obaŋa ame olworo i cokere a jo acil, yin idwoŋ meicel dok yin iyiliyili meicel ame ikato jo luŋ ame oguri tuŋŋi kede tuŋŋi. Ama Rwot Obaŋa me mony, ŋa ame twerrere rom i megi? Yin igenne i yore luŋ, Ama Rwot. Yin ilo naka bi-amwonyi me nam ame tagere, ka bi-amwonyi me nam otugere, yin imio liŋ oko, Yin rik inyono Rakab oko piny calo ŋat ame onyono kom dano ame oto, ikeketo okworri oko ducu pi tekoni. Polo kede lobo luŋ obedo megi; wii podo luŋ kede ginnoro luŋ ame tye iye, yin en iketogi. Yin en iketo lobo luŋ, i tuŋ malo kede i tuŋ piny, Tabor kede Kermon, pako nyiŋi meicel i yomcuny. Yin itye kede twer adwoŋ meicel; tekoni dwoŋ, ciŋi tuŋ cem otiŋere malo. Kite atira, kede ŋolo kop atira, tye piny i te kom me locci mar kede gen nen i kom ginnoro luŋ ame itimo, Jo ame ŋeo wer i dwon aloŋo tye kede winyo, ame woto i nyimi kun olubo kicani, Ama Rwot. Jo-nono bino bedo i yomcuny piri nino ducu, gin bino bedo dworo kiteni atira. Pien yin en ibedo kwogogi kede tekogi; pien pi berri mio tekowa medde ameda. Yin en ibedo kwotwa, Ama Rwot, yin ŋat acil me Icrael, imiowa abaka. I kare acon rik ibedo lok omironi i waŋ lek, kun ikobo baŋ jo ageni ni, “Aketo tok me kwogo i kom dano ame tye kede tek, amio ŋat ame ayero i akina lwak obedo i wi kom loc.” Anwono Daudi ame obedo amirona, atyeko daŋ doŋ kwere okome bedo abaka, Tekona bino bedo i kome nakanaka, twer ame an abino miye, mio en bino bedo atek. Okworrere mom bino bwolle, otim tim areco mom bino loye. Abino nyono okworrere oko piny i nyime, jo ame dage, abino neko oko luŋ. Genna kede marra a mom lokere bino bedo i kome, abino miyo teko mere medde ameda me loyo okworrere i nyima. Abino miyo loccere medde naka i dog nam, tuŋ ocele bino tuno i kulo adwoŋ, En bino lwoŋo nyiŋa kun kobo ni, “Yin i Pappa, yin Obaŋana; yin en i bedo ka larrena atek ame ageno.” Abino miyo en bedo acalo atin kao, twon abaka moro adwoŋ ame loo obakki luŋ me wi loboni. Marra a mom lokere abino gwoko pire nakanaka, dok cikerena ame aketo bino cuŋ ikiŋ pire. Abino miyo akware en ame bedo i wi kom me loc, dok abino moko kom me loccere bedo atwal calo polo. “Ka ce ikwae bino kwero lubo cikka oko, ote bedo kun mom olubo gin ame an aciko; ka ce gin bino turo cikka, kun mom olubo cik ame amiogi, bino miyo apwodogi kede abiro pi balgi; can adwoŋ meicel bino poto i komgi. Cite mom abino kwanyo marra a mom lokere i kome, mom abino weko gwoko gen ame atye kede i kome. Mom abino turo cikerena kadi acel, mom daŋ abino loko kopporo ame yam doŋ atyeko kobo. Doŋ atyeko kwoŋ i nyiŋa acil icel keken, mom abino kobo kop me goba kadi acel baŋ Daudi. Ikwae bino bedo tye kare ducu, kom loccere bino perakino nakanaka calo ceŋ ame ryeny nyima. Bino moko atek ikiŋ calo dwe nakanaka, bino bedo atek calo polo ame opette malo.” Cite aman yin ityeko kwero dok daŋ cunyi otyeko cayo, akemo omaki meicel i kom abaka ame iyero. Ituro cikereni ame rik icikere kede amironi, ibolo tokkere me loc oko i wie piny iyi apua. Apama luŋ ame onwoŋo tye me geŋŋe doŋ ityeko muko oko, cellere ame ogero atek iloko odoko wi obur. Jo ame beo i ŋete yako jami luŋ ame tye iye, odoko doŋ gin ame owote mere atye i ŋete ŋalo i jo aŋala. Imio okworrere en ame doŋ tye ka loye, imio cuny okworrere doŋ yom atek meicel. Nen ba, imio pala me romo mere odoko doŋ okuku oko, imio en dok mom romo cuŋ i nyim okworrere me lweny. Ikwanyo abiro me loc oko i ciŋe, kom me loccere daŋ icoro ireto oko piny. Imio kare me kwo mere odoko doŋ acecek meicel, imio lewic-gu doŋ ociro oko, Ibino pono pi kare arom mene, Ama Rwot? Ibino bedo pono amannono nakanaka bo? Kara akemoni bino bedo lyel calo mac naka awene ba? Ama Rwot, po pi kare me kwo a dano, po ni yin ityeko keto dano pi to. Ŋa kara ame twero perakino kun mom obilo to? Ŋa ame twero laro kwo a dano i bur to? Kara marri a mom lokere me kare aconni doŋ tye kwene ba, gen ame yin itye kede ame rik ikwoŋo pire baŋ Daudi ni? Ama Rwot, po kite ame jo tye ka cayo kede amironi; nen kite ame ayet arok luŋ doŋ ocira kede, Ama Rwot, nen kite ame okwor tye ka ŋalla kede, kede kite ame otye ka ŋalo abaka ame yin ityeko yero, kannono luŋ ame en woto iye. Rwot gire myero pwo nakanaka! Amen dok Amen! Yin gire i ka-larrewa, Ama Rwot, cakere con i con. Ame mom ru oketo kiddi, onwoŋo yin giri doŋ Obaŋa, kun lobo kede wi podo luŋ pwod mom, onwoŋo yin giri doŋ itye. Iloko dano doko apua, kun ikobo ni, “Dok giri iyi apua wun itino a dano.” Mwaka tutumia rom aroma i nino aworo baŋi, onyo romo aroma i caa acel keken me dyewor. Ijwero dano oko, kun imiogi orwenyo calo lek, kun calo lum ame lot odiko. Odiko lot te doŋo, otyeno ner, te two oko, Akemoni ojwerowa otyekowa oko, wan cunyi odiowa meicel. Balwa luŋ tye i nyimi, anaka balwa luŋ ame ŋattoro mom ŋeo, gin luŋ tye kannaler i nyimi. Kare me kwowa iŋolo ogik acecek pi akemoni, kwowa rwenyo calo lwio. Kare me kwowa gik ka i mwakki pyerabiro nono, aco ka tekowa pwod tye te tuno pyeraboro nono, akadi bed amannono, mwakkinono luŋ bedo me can keken, dok daŋ mom ru tum, eka wan ote rwenyo oko. Ŋa kara ame niaŋ teko me akemoni? Ŋa kara ame niaŋ waŋ cunyi ame mio twero bedo kede lworo kakare? Pwonywa kwano kare me kwowa, me obed i cuny ame ryek. Lok cunyi, Ama Rwot! Tim omironi kica! Myero onen can pi kare arom mene ba? Kwe cunywa oyot ba i mar meri a mom lokere, me ower i yomcuny pi kare me kwowa luŋ. Miwa obed i yomcuny ame rom aroma i can ame oneno, a rom aroma i mwakki ame obedo kede peko. Miwa wan omironi onen teko me ticci, me ikwaewa nen kwogoni. Rwot Obaŋa myero mi berrere obed i komwa; omok ticwa luŋ ame wan otio, omok ticcoro luŋ ame wan otio. Ŋat ame gwokere baŋ Ŋat Amalo Meicel, bedo i te tipo a Won Twer Ducu. Abino kobbi Rwot ni, “Yin i kalarrena kede cella, yin Obaŋana ame ageno.” Pien en bino lari iyi owic ame ociko, kede i two areco meicel. En bino wumo komi oko kede bwome, eka ite larre i te yer me bwome, en obedo kwotti kede gi-geŋo kori, pien en genne. Mom ibino lworo ginnoro dyewor, akadi atero ame obao dyeceŋ, akadi too edeke ame mako jo dyewor, onyo can ame tyeko jo dyeceŋ. Jo tutumia twero rette i ŋeti, kede jo tutumia apar i ciŋi tuŋcem, cite mom bino timo ginnoro i komi. Yin giri ibino neno anena, kun ineno kite ame oculo kede kwor i kom jo areco. Pien yin imio Rwot obedo kalarreni, ŋat Amalo Meicel en obedo kabedoni. Ginnoro arac mom bino timere i komi, kit cannoro ducu mom daŋ bino noko ŋet kemani. Pien en bino ciko omalaika mere, me gwoki i kabedo luŋ ame iwoto iye. Gin bino gwoki, me gweŋ kur twom tyeni. Ibino nyono eŋatu onyo ororo kede tyeni, itino eŋatu onyo twol codocodo. Pien en doŋ omara odoco, abino lare; abino gwoke pien en doŋ oŋea. Ka en olwoŋa abino gamo doge, abino bedo kede i kare me can, abino lare dok daŋ abino keto kwogo i kome. Abino medo mwakki me kwo mere bedo apol me kweyo cunye, ate nyutte larrena. Pwoyo Rwot ber, wero wer me pako nyiŋi daŋ ber, Ama yin Amalo Meicel. Rabo pi marri a mom lokere odiko ducu, kede kobo kite ame igenne kede otyeno ducu, daŋ ber, kun orabo i naŋa kede gita, kun otye ka lubo dwon naŋa opuk. Pien ticci mia yomcuny, Ama Rwot, tic ame yin itio mia awero wer me lelo, Tic ame yin itio malo meicel, Ama Rwot, tammi daŋ tut meicel. Ŋat a tammere goro mom twero ŋeyo, lo amiŋ mom twero niaŋ iye. Mom twero ŋeyo ni kadi bed jo areco lot calo lum, onyo jo a timo tim areco bedo jo atek, pwod gire obino tyekogi odoco. Ento yin giri ibedo malo nakanaka, Ama Rwot, pien okworri gire bino rwenyo oko, otim tim areco luŋ obino keto atata, Yin imia atiŋo wia malo, kite ame jobi tiŋo kede wie malo, iweo-gu moo anyen i wia. An doŋ aneno gira i waŋa kite ame ireto kede okworra, dok daŋ awinyo kede yita koko a jo ame omito lweny keda. Jo a kitegi atira doŋo calo otit, odoŋo aboco calo yen cedar me Lebanon. Gin obedo i ot a Rwot calo yen opito, ame doŋo i dyekal Obaŋawa, ame nyako nyiggi naka i kare me tiogi, kare luŋ nwoŋo pige dwoŋ kun mom ner. Mannono me nyuto ni Rwot gire ŋolo kop atira, en obedo kidi me gwokerena, kan ame timmoro arac mom iye. Rwot gire tye aloc; en orukere kede kwogo; Rwot orukere, orukere kede tek. Lobo gire doŋ oketo ocuŋ ateko odoco, mom dok romo yeŋere kadi acel. Kom locci yam doŋ omoko oko con, yin ibedo giri nakanaka. Pii alele doŋ omor oko, Ama Rwot, pii alele doŋ omor, pii alele bedo mol iwolwol. Ento Rwot bedo malo i polo, en dwoŋ atek kato mor a pii, oko, dwon meicel kato biamwonyi me nam oko. Cikki mom dok lokere kadi acel, odi daŋ myero bed acil, Ama Rwot ame bedo nakanaka. Yin Obaŋa ame culo kwor, Ama Rwot, yin Obaŋa ame culo kwor, ryeny ba imeny piny! Ama aŋolkop me lobo, ya ba malo, mi jo a wakere gin ame opore pirgi. Jo areco bino bedo yon naka awene, gin bino bedo yon naka awene ba? Kop a ya i doggi luŋ obedo me acae keken, otim tim areco luŋ bedo wakere awaka, Gin odio joni, Ama Rwot, owuno jo ame obedo joni ikokome. Gin oneko mon ame coggi oto, kede jo ame bedo i lobogi, oneko daŋ anaka itino kic. Gin otamo ni Rwot gire mom nenogi, ni Obaŋa a Yakobo mom gire paro. Myero iniaŋ wunu ba, wun ame tamwu goro, Ibino doko wunu aryek awene, wun jo amin? Ŋat ame oketo yit dano en a mom winyo kop bo? Ŋat ocweo waŋ dano en mom neno piny bo? Ŋat ame pwonyo orok mom romo goyogi bo? Ŋat ame omio jo ŋeo piny, en ikome ŋeccere mom bo? Rwot gire ŋeo ginnoro luŋ ame dano tamo, en ŋeo ni tamgi luŋ calo yito, Ŋat ame yin igoo, tye kede winyo, Ama Rwot, kede ŋat ame yin ipwonyo kede cikki, me miye weo i kare me can, tuno waŋ ame doŋ okunyo bur a jo areco. Rwot gire mom bino weko jo mere ata, mom bino jalo jo ame obedo mere ikokome, pien oŋolkop bino dok ŋolo kop kakare, jo luŋ a cunygi atir te doŋ cako lubogi. Ŋa kara ame bino cuŋ tuŋ baŋa me lweny i kom jo areco? Ŋa kara ame bino cuŋ i ŋeta me bino lweny i kom otim tim areco? Kono Rwot mom okonya, kono ti pona mom onian dok i bur oliŋ iti, Kare ame atamo ni tyena ocer, yin onwoŋo itye ikonya kede marri, Ama Rwot. Kare ame par opoŋ i cunya, yin ikweo cunya ate bedo kede lelo, Itwero notte oloc areco, jo ame loko gin abalo kuc doko cik? Ocokere karacel me neko ŋat a kite atira, oŋolli ŋat a mom i bal kop me to, Ento Rwot en obedo cel atek ame an agwokkere i yie, Obaŋana obedo kidi ame an ariŋo alaro, En bino wiro balgi-nono dwoko i komgi, en bino jwerogi oko pi timgi areco. Rwot Obaŋa bino jwerogi oko. Bye wunu, me ower wunu baŋ Rwot: me cunywa bed yom i kom teko me larrewa Bin wunu i nyime kede pwoc; kun opake wunu kede wer me yomcuny. Pien Rwot Obaŋawa, en Obaŋa ame dwoŋ, en obedo Rwot adwoŋ ame kato jogi ducu, En gire loo wi podo ducu; cakere i piny tuno kede naka i wi kiddi malo, En loo gire anaka nam-gu ame en otio; pien ciŋe daŋ en ocweo lobo. Biye owore wunu, oguŋ wunu piny; orum wunu conwa i nyim Rwot oketowa, Pien en obedo Obaŋawa; wan obedo jo ame en gwoko, kede rommi ame kwo i ciŋe. Cik wunu yitwu iwiny wunu koppere tin, Kur imi wunu cunywu bed anwaŋ; acalo rik i Meriba kede i tim i Macca, i ni no ca. Kare ame kwariwu rik otema; gin rik opima ote neno ticca. Cunya rik te kwerogi pi mwakki pyeraŋwen; kun akobo ni, “Rok man obedo rok ame cunygi rac, dok gin mom otio gin ame amito.” En omio rik akwoŋo i kare ame akemo omaka; ni gin mom bino donyo i loba ame abino miyogi iye weo. Wer wunu wer anyen baŋ Rwot; wer wunu baŋ Rwot, wun loba ducu! Wer wunu baŋ Rwot, pak wunu nyiŋe; rab wunu nino ducu ni en olarowu. Rab wunu pi kwogo mere baŋ rok ducu, kede tic ame en otio me awura baŋ jo luŋ, Pien Rwot dwoŋ meicel, myero pake meicel; myero lwore akato obaŋe ocele luŋ. Pien obaŋe a rok ocele obedo cal apaa keken, ento Rwot oketo polo. Kwogo kede twer luŋ tye baŋe; teko kede lelo tye kan ame en bedo iye. Pak wunu Rwot, wun atekere ducu ame tye i lobo, pak wunu kwogo mere kede teko mere. Pak wunu nyiŋ Rwot ame obedo me kwogo; kel wunu motwu baŋe i ot me wore. Wor wunu Rwot i boŋo acil; komwu myero myel i nyime, wun jo me loba ducu. Titti wunu rok ducu ni Rwot en abaka, lobo gire doŋ oketo ocuŋ atek odoco, mom dok romo yeŋere kadi acel; Lel wunu, wun polo kede lobo; mor ba, yin nam kede jami ducu ame tye i yie; poto daŋ myero lel, kede jami luŋ ame tye iye! Yen ame tye i buŋ luŋ bino wer i yomcuny, i nyim Rwot, pien en abino, en abino me bino ŋolo kop i lobo. En bino ŋolli i jo luŋ kop atira en ŋolo kop kun luba ateni mere. Rwot gire tye aloc, jo me wi loba myero lel; lel wunu, wun dog nam luŋ, Pol kede kan acol icuc ogure dyere, loccere ocuŋ kite atira kede ŋolo kop kakare. Mac en a telo nyime, wano okworrere ame ogure dyere oko, Lutkottere menyo wi podo luŋ; lobo ka oneno, yeŋere. Kiddi te meye oko calo odok nyim Rwot, i nyim Rwot me lobo ducu. Polo tye ka rabo kite atira Obaŋa; jo luŋ tye ka neno kwogo mere. Lewic tye ka mako jo ame woro cal apaa, jo ame wakere pi cal jogi ame konygi mom, kite obaŋe ocele luŋ ryebere piny i nyime me wore. Jo me Cion owinyo te cako lelo oko, anyira me Juda te bedo i yomcuny, pi ŋolo koppi, Ama Rwot! Rwot Won Twer Ducu, yin gire iloo lobo ducu, yin idwoŋ atek ikato kit obaŋe ocele luŋ. Obaŋa maro jo ame dago gin arac, en gwoko kwo a jo mere, en larogi i ciŋ jo areco. En menyo piny i jo a kitegi atira, miyo jo ame cunygi ler bedo yomcuny. Lel wunu i Rwot, wun jo a kitewu atira, myero ipwo wunu nyiŋe acil. Wer wunu wer anyen baŋ Rwot, pien en otio tic me awura! En doŋ otyeko loyo lweny oko, oloo pire kene i teko mere acil. Rwot doŋ otyeko rabo pi loccere, onyuto teko me larrere oŋeye baŋ rok luŋ. En obedo po pi marrere a mom lokere, kede gen ame en tye kede i kom jo me doggola Icrael. Jo me wi podo luŋ i kabedo ducu, otyeko neno loc a Rwot Obaŋawa! Wer wunu wer me yomcuny baŋ Rwot, wun lobo ducu, mwoc wunu wer me pako Rwot i yomcuny. Wer wunu wer me pako Rwot kun igoo wunu naŋa opuk, go wunu naka opuk amit meicel. Kut wunu apel kede bilo, red wunu i wer me yomcuny i nyim abakawa, en Rwot. Nam myero mor kede jami luŋ ame tye i yie, wi podo luŋ kedejo luŋ ame bedo iye. Pii i nam adoŋo myero cak bapo ciŋgi, kiddi myero wer wer me nyuto yomcunygi i nyim Rwot, pien en obino me bino loyo lobo, en bino loyo lobo kun ŋolo kop a jo luŋ atira dok arorom. Rwot Obaŋawa en abaka; kom rok luŋ myero omyel; en tye obedo i wi kom loccere ame tye i wi okerubi, lobo myero yeŋere. Rwot dwoŋ meicel i Cion, en tye malo meicel i wi rok luŋ. Jo luŋ myero wer wer me pako twon nyiŋi adwoŋ ame iyiliyili, en cil meicel. Abaka ame Won Twer Ducu, ame maro ŋolo kop atira, yin en ikelo ŋolo kop atira iyi Icrael, ikelo daŋ kite atira kede tero jo luŋ arorom. Pak wunu Rwot Obaŋawa; wore wunu i nyim kome me teno tyene En cil meicel! Muca kede Aron rik tye i akina olamdoggere, Camwiri daŋ rik tye i akina jo ame wore gin rik okok baŋ Rwot, eka te gamo doggi, En okobo kedgi i pagi me pol, gin obedo gwoko koppere me caden, kede icwillere ame en rik omiogi. Ama Rwot Obaŋawa, rik igamo dog joni, yin rik ibedo Obaŋa ame gonyo balgi, cite iculo kwor pi gin arac ame gin otimo. Pak wunu Rwot Obaŋawa, wore wunu i wi kidi mere acil; pien Rwot Obaŋawa cil meicel. Wer wunu i dwon me yomcuny baŋ Rwot, wun lobo ducu! Ti wunu baŋ Rwot i yomcuny; bin wunu i nyime kede wer. Ŋe wunu ni Rwot en obedo Obaŋawa; en oketowa, wan obedo jo mere, wan obedo rommi mere ame en kwao. Dony wunu i dogcellere i wer me pwoc, dony wunu i dyekkallere kun ipake wunu, pwoc wunu, kun iketo wunu kwogo i nyiŋe! Pien Rwot gire ber; marrere a mom lokere perakino nakanaka, ateni mere tye pi lwagi jo me kare ducu. Abino wero wer me paki, i kom mar kede ŋolo kop atir abino wero wer man baŋi, Ama Rwot. Abino temo keto cunya me lubo yo ame balloro mom iye. Ibino bino baŋa awene, Ama Rwot? Abino bedo ame cunya cil i oda. Mom abino lubo yo moro arac, adag jo ame timo bal, mom abino note kedgi kadi acel. Abino medde bedo ŋat ame genne nakanaka, mom abino bedo tamo pi timo gin arac. Ŋat ame maro wot kwoto owote mere abino wot wot neko oko, mom abino kanyo kadi acel kite a ŋat ame wakere, ame wie dwoŋ, Jo ame bedo i lobo kun ogeno Obaŋa, abino nenogi kede waŋ me kica, me gin daŋ obed karacel kede; ŋat ame lubo yo ame balloro mom iye, bino bedo ŋat ame tio baŋa. Dano ame agoba mom bino bedo i oda kadi acel, ŋat ame kobo kop me goba keken mom bino medde tic i nyima. Nino i nino abino tyeko jo a kitegi reco oko i lobo, abino miyo waŋ jo ame timo tim areco rwenyo oko i boma a Rwot. Winy ba kwacca, Ama Rwot; ye kokona owinyere baŋi! Kur iponna oko ba, Ama Rwot, i kare ame can orida meicel, cik yiti iwiny koppa; ru gamo doga oyotoyot i kare ame akok baŋi! Kare me kwona kato oyotoyot calo yito, cogona luŋ rem arema calo waŋ mac. Kedi olidolido cunya meicel calo lum ame otwo, omio wia doŋ wil oko cam ame myero acam, Pien curra doŋ winyere malo amala; riŋo koma doŋ otwo imek i kom cogona. Acalli doŋ acut ame bedo itim, acalo tula ame bedo i wii obur; abuto ame waŋa okwekere akweka, acalo winyo ame bedo kene i wi ot malo. Okworra doŋ bedo kobo kop areco i koma ceŋ iyul, jo ame nywara doŋ tio i nyiŋa me ceno jo ocele. Nen doŋ buru en ame tye acalo cem ame acamo, pig waŋa doŋ rubere i ginnoro luŋ ame amato, Mannono timere pi lyeto me akemoni kede inigani, pien yin ikwanya ite bolla oko. Kwona doŋ calo tipo me otyeno; atwo doŋ calo lum. Ento yin ibedo i wi kom me loc nakanaka, Ama Rwot, lwagi jo me kare ducu poyo yin. Ibino ya kica te maki i kom Cion, kare doŋ oromo oko me nyuto beri baŋe; kare ame rik iciko pire doŋ otuno oko. Omironi ducu mare, kadi bed gedo iye doŋ obalo oko, kica makogi meicel i kome kadi bed doŋ calo apua. Rok ducu bino lworo Rwot, obakki luŋ ame tye i lobo bino lwore pi kwogo mere. Pien en Rwot bino gero Cion dok odoco, en bino nen kun nyuto kwogo mere. En bino winyo kwac a jo ame piny oloo, mom bino cayo kwac me bako dog ame okelo i nyime. Kop man myero co piny pi lwagi jo ame tye ayim, me wek jo ame mom ru onywalogi, wek gin obin opak Rwot, kun okobo ni, Rwot neno piny i kabedo mere acil ame tye malo, en neno wi lobo luŋ i polo kuno, me winyo cur a jo ame tye i ot kol, dok egony jo ame doŋ otyeko ŋolligi kop me to. Mannono twero miyo jo rabo nyiŋ Rwot i Cion, dok opak nyiŋe i Jerucalem, i kare ame lwak ocokere karacel, naka oloc apapat me woro Rwot. En oturo tekona oko con ame pwod atidi; ojwiko kare me kwona oko. An ate kobo ni, “Ama Obaŋana, kur ikwany kwona oko ame mom ru ati; yin ame kwoni perakino nakanaka.” Yin en ame yam iketo acakki te lobo con meicel, polo daŋ en tic me ciŋi, Gin bino rwenyo odoco, ento yin ibino perakino; gin luŋ bino ti calo boŋo, yin ibino lolokogi calo koti, gin te rwenyo oko atwal; ento yin ibedo ame kiti acel, mwakani mom bino gik, Ibino miyo itinowa, wan omironi bedo ikuc aboŋo peko moro; dok yin en ame ibino gwoko ikwaegi imio perakino i nyimi. Pwo Rwot, yin tipona, dul koma luŋ myero pak nyiŋ Rwot acil. Pwo Rwot, yin tipona; wi myero kur wil i kom mottoro luŋ abeco ame en omi, en gire en ame gonya i balle luŋ, dok daŋ en ame caŋo twona luŋ; en ame laro kwona i bur me to, en ame ruka kede mar a mom lokere kede kica; en mia jami abedo pi kare me kwona luŋ, dok daŋ roco kwona kare i kare calo cur. Rwot ŋolo kop kakare dok daŋ arorom, en ŋolo kop a jo ame owuno atira, En rik onyuto yikkkere luŋ baŋ Muca, omio jo Icrael oneno ticcogo me awura ame en otio. Rwot akica, dok timo jo ber, akemo mom mako oyot, dok marrere a mom lokere dwoŋ meicel. Akemo mom maka atwal, Iniga mere mom ri nakanaka, en mom timowa kun poro i kit bal ame wan otimo, dok daŋ mom culo kwor i komwa kun lubo kit bal ame wan otimo. Pien kite ame polo tye kede malo ame bor abora i lobo, marrere a mom lokere daŋ dwoŋ kittono i kom jo ame lwore. Kite acalo tuŋ kide bor abora i tuŋ to, amannono daŋ en kwanyo bal i komwa te cwalo oko kannabor. Acalo papal i tino bedo i kica i kom itinogi, amannono daŋ, kica mako Rwot i kom jo ame lwore. Pien ŋeo kakannoro luŋ i dul komwa; en ŋeo aber ni wan obedo apua keken. Aco kwo a dano mom perakino kare alac, rom aroma i me ature ame lot eka dok te oony oko. Ka yamo okodo rwenyo oko ducu, kabedo ame onwoŋo en bedo iye-nono mom doŋ te po pire kadi acel. Ento mar a mom lokere ame Obaŋa tye kede i kom jo ame lwore, perakino wan i waŋ, karacel kede kiti atira baŋ lwak jo me kare ducu. Baŋ jo ame gwoko cikere mere ame po me timo gin ame en ociko, Rwot ocibo kom me loccere i polo, en loo wi podo luŋ. Wun omalaika a Rwot, pak wunu Rwot, wun twoni jo mere atek, tim wunu gin ame en okobo, kun iwinyo wunu kopporo luŋ ame en kobo baŋwu. Wun mony a Rwot luŋ ame tye i polo, pake wunu, karacel kede wun oticcere ame tio gin ame en mito. Wun ginnoro luŋ ame Rwot oketo, pake wunu, i kabedo luŋ ame en loo, Pwo Rwot, yin tipona. Pwo Rwot, yin tipona; Ama Rwot Obaŋana, yin idwoŋ meicel! Yin irukere i kwogo kede woro; lero owumo komi oko calo boŋo, iyaro polo kite ame tye kede-ni calo kema, Ŋa oyubo paconi malo iyi pii? Iloko polo odoko calo gadigadini, ame iŋweco kedgi i dye yamo, Iloko yamo odoko akwenani me aora, kun leb mac alyel tye acalo otic ame tye baŋi. Yin en a rik iketo lobo ocuŋ atek i kom acakki mere, ame mom twero yeŋere atwal. Iwumo oko i nam atut calo gin ame owumo i boŋo, kun pii daŋ ocuŋ iguŋ i wi kiddi malo. Ka ijukogi oriŋo oko; ka lutkotti omor, gin oŋweco oko. Omol i wi kiddi malo odok i luŋ piny, naka iyi akoŋ ame ityeko yiko pirgi. Iyiko pirgi waŋ apokki ame myero mom okati, me wek kur dok opoŋ lobo oko. Imio akoŋ doŋ kukunya dok iluŋ, kun omol i akina kiddi. Ieyi me tim luŋ mato pii nono, kane me tim daŋ konyere iye ka oryo ocirogi. Lwak winnyi luŋ ame twarre malo gero wudigi iye, ote bedo woo i koko i jaŋ yenni kuno. Imio kot ya i polo cwe piny i wi kiddi, jami abeco ame yin itio te poŋ lobo. Yin en imio lum lot me acama a dok, karacel kede ginapita ocele me tic a dano, me dano kur loba te nwoŋo cam iye. Me dano nwoŋo koŋo olok te yomoro cunygi, kede moo wir ame mio waŋgi nen aber, kede dok en cam ame miogi teko. Yen a Rwot nwoŋo pii adwoŋ ame romogi, yen cedar me Lebanon ame en Rwot opito, Lwak winnyi apol gero udigi i wii yen kunnu, araptela daŋ bedo i wi yen aboco kuno. Dyegi me tim bedo i wi kidi malo kuno; elec nwoŋo ka larregi i akina kiddi. Yin en a rik iketo dwe me poko kare, ceŋ ŋeo caaa mere me poto, Yin iketo colpiny ame imio bedo dyewor, mannonono en kare ame leyi i buŋ cako wotgi iye, Itino eŋatu dwaro leyi me amwoda i koko doggi, kun oyenyo camgi i baŋ Obaŋa. I kare ame cen doŋ odonyo oko; gin luŋ odok oko ceŋ i kabedogi i gorogoro Jo cako wot i ka ticgi, ote tic tuno naka otyeno, Ama Rwot, yin itio tic ame kite polladi! itiogi luŋ kede ryeko meicel, omio jami ame yin iketo dwoŋ meicel i lobo. Nen, nam adwoŋ tye ame okwako kabedo alac miecel jami ame yin iketo tye iye apol ame mom kwanne, gigi mogo akwo adoŋo mege karacel kede en atino tye iye kuno, Mellogo adoŋo daŋ beo iye kuno, karacel kede Leviatan ame en twon twolloro adwoŋ me kulo, daŋ tuko iye kuno, Jami magi luŋ oneno baŋi, gin luŋ omito ni migi cam i kare ame omitte ikokome. Ka ce imiogi gin okwanyo ote camo oko, ka iyaro ciŋi imiogi cam, gin yeŋ icam abeco. Ka ce yin iponnigi oko, gin waŋgi balle oko; ka ikwanyo weo me kwo oko i komgi, oto oko, ote dok i apua kun ame yam oya iye. Ka ce yin icwalo i yigi cunnyi ame miogi kwo, gin okwo, dok daŋ imio loba odoko anyen Kwogo a Rwot myero gire pera kino nakanaka! Rwot myero bed i yomcuny pi gin ame en otio. Rwot neno lobo, lobo te yeŋere, ka ogudo kiddi, yito cako duny iye. Abino wero wer me pako Rwot pi kare me kwona luŋ, abino wero wer me pako Obaŋana pi kare ame pwod atye kwo, Kop ame anyuto i cunya, myero yomoro cuny jo, pien an gira alelo pire yin Rwot. Jo ame obalo myero tyek oko i lobo, me wek otim tim areco kur dok bed tye atwal. Pwo Rwot, yin tipona, pak wunu Rwot! Pwo wunu Rwot, lwoŋ wunu nyiŋe, mi wunu tic ame otio ŋeye i akina rok ducu! Wer wunu wer me pake, wer wunu baŋe, tit wunu ticcoro luŋ me awura ame en otio! Ket wunu kwogo i kom nyiŋe acil; mi wunu cuny jo ame yenyo Rwot bed ayom! Yeny wunu Rwot karacel kede teko mere, bed wunu i nyime nakanaka. Poyo wunu pi ticcogo me awura ame en otio, taŋo mogo ame en otio, karacel kede ŋolo kop ame en oŋolo, Wun ikwae amiro mere Iburaim, wun itino a Yakobo ame en oyerowu. En obedo Rwot Obaŋawa; Kop ame en ŋolo, ŋolo i lobo ducu. En po i kom cikere mere nakanaka, i kom kop ame en ociko pi mwakki a lwagi jo me kare ducu, kom cikere ame en rik ocikere kede Iburaim, i kom kwoŋ ame rik en okwoŋo baŋ Icaka. Ame en te bino moko baŋ Yakobo doko acalo cik, baŋ Icrael me bed cikere ame perakino waŋ i waŋ. Kun kobo ni, “An abino miyo lobo me Kanaan baŋwu, me bed lobowu ame ileo wunu me bedo megwu.” I kare ame welgi pwod nonok, ame gin tye acalo wele ame mom oparo pirgi, ame obedo loŋo piny aloŋa i akina rok apapat, ame oya i loc man okobo baŋ rok ocele. En mom oye ŋattoro me wunogi, en ojuko obakki pirgi, kun kobo ni, “Kur igud wunu omirona ame atyeko yero, kur itim wunu ginnoro aracl kom odwarpinnya.” I kare ame en omio kec opoto lobo, obalo camgi luŋ ame okwo kede. En onwoŋo ocwao dano con i nyimgi, ocwao Yucepu ame omio ocate acalo opii. Rik ote tweyo tyene oko i jegere atek, ote tweyo daŋ kol i ŋute; tuno waŋ ame gin ame onwoŋo en okobo ocobere kakare, kop a Rwot oteme onwoŋo ni en tye atir. Abaka, ocwao kop ote gonye oko, oloc ame onwoŋo loo orok te doŋ wekke bedo kede kuc; en te miye bedo adwoŋ ame loo ode, ŋat ame loo jami luŋ ame tye i ode, omie daŋ twer me pwonyo rwode ocele kite ame yie mito, kede me pwonyo odoŋe ame mie tam, i ryeko. Omio Icrael owoto i Miciri, Yakobo te doko welo ame bedo i lobo a jo Kam. Rwot te miyo lwakkere nywal nya apol meicel, te daŋ miyogi doko atek ame kato okworgi oko. Oloko cuny jo Miciri, te miyogi cako dago jo mere oko, gin te cako timo tim me idwali i kom omiro mere. Ocwao amiro mere Muca, karacel kede Aron ame en oyerogi. En otio anyuttogo i akinagi karacel kede taŋo i lobo me Kam. Ocwao colpiny te miyo lobo cido oko icuc, ento gin ote jem oko mom ote ye winyo koppere. Oloko pii i kulo te doko remo, te miyo rec luŋ ame tye iye to oko. Ogwalogwal apipim te corre i lobogi, naka i paco abakagi. Obaŋa okobo kop keken lwak lwaŋi apipim te corre i lobogi, karacel kede onyogo i lobogi luŋ, Omio pee olunyo corre lobogi akaka kot, kede lutkot ame te bedo meny amenya i lobogi luŋ, Ojwero olokgi kede odurogi luŋ, te daŋ tuturo yen i pottigi luŋ. Dok te kobo ka kop keken bonyo apipim te corre i lobogi; lwak itino bonyo ame welgi mom kwanne, gin te camo ginapita luŋ ame tye i lobogi, ocamo kit cammoro luŋ ame onwoŋo tye i lobogi. Oneko itino kaogi luŋ ame co, ame gin obedo itino ame gin ogeo i tekogi me agege. En te kwanyo jo Icrael kun omako ryal kede jabu, mom tye ŋattoro kadi acel i akina atekeregi ame ogatte. I kare ame gin oya, jo Miciri cunygi obedo ayom, pien lworo onwoŋo ocirogi doŋ oko i komgi. En oyaro pol malo i wi jo mere, dok omio mac me menyo piny i dyewor. Kare ame gin okwae omiogi aluru, ocwayigi kwon adwoŋ meicel iya i polo me gin cam romgi. Oyabo lela pii te cako kukunya iye; pii-nono te mol i dye tim calo pii me kulo, Pien en onwoŋo opoyo cikere mere acil kede amiro mere Iburaim. Mannono te miyo en telo jo mere i yomcuny, otelo jo mere ame en oyero kun gin tye awero wer, En te miyogi lobe a rok ocele, omiogi oleo cam ame tye i potti ame rok ocele en ame oyelle kede, Me i agikki mere lwakkere lub cikkere, kun ogwoko gin ame en ociko luŋ, Pak wunu Rwot! Pak wunu Rwot! Pwo wunu Rwot, pien en ber; Pien marrere a mom lokere perakino nakanaka. Ŋa ame twero kwano gin adoŋo luŋ ame Rwot otyeko timo? Ŋa ame twero pake i pak luŋ ame myero pake kede? Jo ame kitegi atira tye kede winyo, ame timo gin atye atira i kare ducu, Po pira, Ama Rwot, i kare me nyuto marri baŋ lwakki, konya an daŋ i kare ame ibino larogi iye; mia an daŋ anywak kedgi gum ame iyiko pirgi, me an daŋ alel i yomcuny, me an daŋ abed i kwogo i akina joni ame iyero me bedo megi. Wan karacel i kwariwa, wan luŋ obalo, wan luŋ otimo bal, otimo tim areco, Kwariwa i kare ame gin tye i Miciri, mom obedo paro pi ticcoro me awura ame yin ibedo tiyo; mom daŋ opo pi marri a mom lokere ame onwoŋo dwoŋ meicel, cite gin olunyo jem i kom ŋat Amalo Meicel i kare ame gin otuno i Nam Arema. Kadi amannono en te larogi i keto kwogo i nyiŋe, me wek en mi teko mere adwoŋ ŋeye. En ojuko pii i Nam Arema te two oko, en te telogi beo kan atut calo obeo i dye tim, Mannono te miyo en larogi i ciŋ okworgi, en olarogi i teko okworgi. Pii te mwonyo okworgi oko, ŋattoro acel i akinagi mom te bwot. Mannono te miyo gin ye kop ame onwoŋo okobo; gin te cako wero wer me pake, Cite oyotoyot wigi te wil oko i tic ame en otio, mom oye kuro tam ame ya i baŋ Obaŋa. Ento olubo gigi mitgi ame tye i cunygi, ote bedo temo Obaŋa nakanaka i tim kuno. Obaŋa obedo miyogi gin ame gin okwao, cite ocwao too edeke i akinagi me pwodogi. I kare ame nyeko, omako jo i kom Muca kede i kom Aron ame Obaŋa oyero me telogi, lobo oŋamo doge te mwonyo Datan, te wumo jo Abiram ame ojem oko, Mac daŋ dok te cako lyel i akina jo ame ojem, maccono te waŋo otim tim areco oko, Gin otio pirgi kengi atin twon i Koreb, ote cako worogu cal jok ame otwako atwaka. Gin oloko Obaŋa ame obedo me kwogo i kom cal twon ame camo lum, wigi te wil oko i kom Obaŋa ame olarogi, ame otimo gigi mogo adoŋodoŋo pirgi i Miciri, otio gigi mogo me awura i wi lobo kan, kede gigi mogo ame neno iyiliyili i Nam Arema. Omio Obaŋa okobo ni ebino tyekogi oko, kono onwoŋo Muca dano ame en oyero onwoŋo room tye, ame rik te cuŋ i nyim Obaŋa, kun laro pi lwakkere, me wek Obaŋa juk cunye kur tyekgi oko. Gin rik te cayo lobo ame mio oko, kun mom otye kede iye kadi acel i kom gin ame Obaŋa oyiko. Gin te bedo ŋuŋura i kemagi kun mom owinyo kop ame Rwot kobbigi. Mannono omio Rwot otiŋo ciŋe malo te kwoŋ baŋgi, ni ebino miyogi oto oko i tim. Dok daŋ ebino keketo iikwaegi akina rok apapat, kun emiogi olal i wi lobo luŋ. Gin rik te ye woro jok Baal iyi Peor, kun ocamo riŋo ame oyalo i jo oto; Mannono te miyo akemo mako Rwot i kom gin ame gin otimo-nono, too edeke te poto i akinagi. Fenekaci te ya cako kwayo Obaŋa, too edeke te jwik oko, Mannono omio ote kwanne en daŋ i akina jo a kitegi atira, kun opo pire i kare a lwagi jo me kare ducu. Gin omio akemo omako Rwot i dog pii me Meriba, mannono te miyo pwodo Muca pirgi; gin omio cuny Muca obedo akec, eka te cako kobo koppogo ame onwoŋo myero mom ya i doge. Gin rik mom te neko rok ocele, kite ame Rwot onwoŋo ocikogi kede, ento gin te rubere oko i rok ocele, ote daŋ pwonyo timo gin ame gin timo. Gin te cako woro cal jogigi, ame te lokere doko owic me mokogi. Gin te bedo yalo cal jogi itino awobegi kede anyiragi, kun omio acalo mot me woro jogi: Gin te onyo remo a jo apol ame mom i bal, oonyo remo awobegi kede me anyiragi, ame gin obedo ŋolo acalo mot me yalo cal jogi me Kanaan; pi remo a jo ame gin obedo oonyo-nono omio lobogi balle oko. Gin daŋ ote doko jo ame cik ogeŋo pi gin ame gin obedo timo, obedo timo tim me alaya alaya. Mannono te miyo akemo Obaŋa tugere i kom jo mere, en te cako dago jo ame eyero atek meicel, en te miyogi i ciŋ rok ocele, ame mannono te miyo jo ame onwoŋo dagogi cako loyogi. Okworgi te wunogi atek meicel, te diyogi dwokogi i te locgi. Obaŋa te bedo larogi kare i kare, cite gin omedde jem i kome kare-nono luŋ, mannono te miyo balgi medde dwokogi adwoka piny. Kica dok te make i komgi i kare ame can opoto i komgi, i kare ame en owinyo kokogi. En opo pi cikere mere pirgi, kica te make i komgi pi marrere a mom lokere ame dwoŋ meicel. Rwot te miyo jo bedo i kica i komgi, jo luŋ ame onwoŋo oterogi iyi opii, Larwa ba, Ama Rwot Obaŋawa cocokowa oko i akina rok ocele, me wek opwo nyiŋi acil, dok obed i kwogo me paki, Pwo wunu Rwot, ame obedo Obaŋa a jo Icrael, pwoc wunu waŋ i waŋ! Me jo luŋ kob ni, “Amen!” Pak wunu Rwot. Pwo wunu Rwot, pien en ber; pien marrere a mom lokere perakino nakanaka. Jo ame Obaŋa olaro myero kob kittono, jo ame en olakoro i can, Man kop a jo ame ocokogi i lobo a rok ocele, i tuŋ kide kede i tuŋ to, ituŋ anyarodi kede i tuŋ anyarolum. Jo mogo i akinagi te bedo loŋo piny i dye tim otwo, kun mom oromo nwoŋo yo me i wot paco moro a myero obedo iye, Oryo pii ocirogi, kec daŋ onekogi, ote doko agoro oko naka i cunygi. Gin te kok baŋ Obaŋa i kare ame gin tye i peko-nono, omio ote larogi iyi ayela ducu; Rwot te telogi i yo ame ocuŋ atir, tuno ka gin otuno i boma ame myero gin obed iye. Gin myero pwo Rwot pi marrere a mom lokere, pi tic me awura ame en otio pi dano. Pien en konyo ŋat ame oryo pii ociro, ŋat ame kec oneko en mio yeŋ i cammogo abeco. Jo mogo i akinagi obedo i mutu kede i pinny acol, onwoŋo otye acalo opii ame tye i can ame otweo kede jegele, Pien gin onwoŋo ojem i kom kop ame onwoŋo Rwot Obaŋa okobo okwero winyo tam a ŋat Amalo Meicel. Gin onwoŋo doŋ ool oko i tic atek ame obedo tiyo; oŋoye doŋ piny aboŋo ŋattoro ame konyogi, Gin te cako kok baŋ Rwot i kare ame otye i peko-nono, Rwot te larogi i cangi, te kwanyogi oko i colpiny kede mutu, te codo jegele ame onwoŋo otweogi kede oko a waŋe acel. Gin myero opwo Rwot pi marrere a mom lokere, pi tic me awura ame en otio pi dano. Pien en oturo kika me mola oko luŋ, te ŋoŋolo nyonyo me cego doggola poko i dul aryo. Jo mogo i akinagi obedo twoye meicel pi balgi, can adwoŋ meicel opoto i komgi pi gin areco ame gin obedo timo, Gin obedo kwero kit cammo ducu, onwoŋo doŋ oceggi acega i dogcel me to. Gin te kok baŋ Rwot i kare ame otye i cannono, Rwot te larogi i cangi. Rwot te caŋogi i kop ame en okobo akoba keken, eka te larogi oko i to. Gin myero pwo Rwot pi marrere a mom lokere, pi tic me awura ame en otio pi dano, Gin myero omi mot baŋ Rwot me pwoye, ote bedo rabo pi gin ame en otio i wer me yomcuny. Jo ocele i akinagi owoto i mel i dye nam, jo ame onwoŋo tio ticgi i nam adoŋo. Gin te neno gin ame Rwot obedo timo, gigi mogo me awura ame en otimo i nam atut. Pien en okobo ka kop keken, yamo ajuru te cako kodo, ame te miyo pii me nam tagere atek meicel. Mel ame onwoŋo tye i nam te tiŋere ame doŋ ceggi acega i polo, ote dok dwogo donyo oko piny ite nam atut, cannono te miyogi doko jo agoro oko i cunygi. Gin te cako cacapa atata kun ogate calo jo omer koŋo, kun mom doŋ otye kede ryeko moro kadi acel. Gin te kok baŋ Rwot i kare ame otye i cannono, Rwot te larogi i cangi. Rwot ojuko yamo ame onwoŋo akodo, pii i nam te kwe mot, bi-amwonyi te daŋ doŋ liŋ oko. Cunygi doŋ te bedo ayom pi kwe a pii i nam oterogi naka i waŋ kwan kan ame gin onwoŋo omito wot iye. Gin myero pwo Rwot pi marrere a mom lokere, pi tic me awura ame en otio pi dano Myero gin oket kwogo i kom Rwot i akina lwak ame ocokere, dok daŋ myero opake i cokere odoŋe; En oloko anaka pii i kulo-gu odoko tim ame otwo ikaŋ, ojuko anaka pii ame onwoŋo mollo piny iyi akoŋ, pii iyie te two oko. Lobo ame ceko cem atek meicel oloko odoko lobo ame obedo kadokado, man otimere pi bal a jo ame onwoŋo tye i lobo-nono. En oloko kan ame otwo ikaŋ odoko kan ame pii poŋ iye, Lobo ame otal atar kia, odoko kan ame pii mollo iye, En te miyo jo ame kec neko bedo kuno, gin te gero boma me bedogi iye; Gin te coyo kotigi i potti, ote daŋ pito olok, camgi te cek abup meicel. Rwot te miyogi gum omio gin te nya atek miecel. Rwot mom oye ni wel dokgi myero dok piny. I kare ame oloogi, gin odoko goro, pi awuna ame owunogi kede, can kede cwercuny. Rwot te cayo rwodegi, te miyogi wot i dye tim ata kan ame yo moro mom iye. Ento en laro jo ame piny oloogi i cangi, medo wel jo me otgi bedo acalo lwak rommi. Jo ame cunygi ler, neno te yomoro cunygi, jo a kitegi reco te doŋ liŋ aliŋa, Ŋat aryeka myero keto cunye me niyo jami magi, myero jo tam pi mar a Rwot ame mom lokere. Cunya gire omoko i komi oko, Ama Obaŋa, cunya omoko i komi ame mom dok lokere, abino wero wer me paki i dwon aloŋo! Co oko, yin tipona! Naŋana kede naŋa opuk daŋ myero yikere oko! Abino miyo piny yabere ibai! Abino wero wer me paki, Ama Rwot, i akina rok apapat; abino wero wer me paki i akina orok, Pien marri a mom lokere pire tek meicel, naka baŋ jo ame tye malo i polo, dok gen ame yin itye kede daŋ tuno naka malo i pol, Nyut ditti malo i polo, Ama Obaŋa, mi kwogoni nen kannaler i lobo luŋ, me wek joni ame imaro larre, migi oloo lweny i teko me badi, dok igam daŋ kwacca! Obaŋa okobo kop i kabedo mere acil ni, “Abino poko Cekem oko i twon kwogo me loc, abino daŋ poko luŋ me Cukot. Gilead obedo mega, Manace daŋ obedo mega; Epraim obedo tok nyonyo me geŋo wia, aco Juda te bedo abiro me locca. Moab obedo becen me lwokka; abolo warona i kom Edom me nyuto ni aloc; abino redo redo me loc i wi jo Piriciti,” Ŋa abino kela i boma ame ocelo i cel atek? Ŋa abino tella yo me wot iyi Edom? Yin mom ikwerowa oko, Ama Obaŋa? Nen yin mom doŋ iwoto karacel i monywa, Tim ber ikonywa me lweny i kom okworwa, pien kony ame dano en ame mio mom konyo ginnoro. Ka Obaŋa obedo lweny karacel kedwa, wan obino loyo, en gire en ame bino nyono okworwa dio piny. Ama Obaŋa, ame an apako, kur iliŋ mot! Jo a kitegi reco kede ogoba, ocako kobo kop me goba i koma, okobo ka kop me goba keken i koma. Otye ka cwero cunya i balo nyiŋa, odaga dok ocako lweny i koma kom nononono, kun mom aballigi ginnoro kadi acel. Obedo dotta adota kadi bed an amarogi, kadi i kare ame nwoŋo an atye akwayo pirgi, Mannono omio gin ocula i gin arac i gin aber, odaga-gu kun an amarogi. Yer ŋat arac me pid kede, mi ŋattoro arac i nyim okworrere kel i nyim oŋolkop. Mi dote kop te loye, mi kwaccere ame ekwao bed acalo bal ame etimo. Jwik kare me kwo mere oko bed acecek; mi ŋat ocele en ame luny leyo jami mere abeco. Mi itino mere dok itino kic, kede dako mere dok dako a cware oto, Mi itino mere bed rimo piny kun okwao jami akwa, mi ryemgi oko i wi obur ame onwoŋo gin bedo iye. Mi lon a yam ekoporo jami mere oma jami mere oko luŋ, jo ame mom eŋeo oluny yako jami mere luŋ ame yam eyele kede. Kia myero kur mak ŋattoro i kome kadi acel, itino mere daŋ kur con ŋattoro. Mi ikwae luŋ to oko ducu, me nyiŋe rweny oko atwal i akina lwagi jo ame obino nywalo anyim. Rwot myero poyo bal a kwari mere daŋ, dok daŋ mom iye gonyo bal a tottere kadi acel. Mi Rwot opoyo balgi nakanaka, cite nyiŋe myero rweny oko atwal i lobo. Pien en rik mom oparo pi bedo kede kica, en rik obedo ryemo yo ocan kede jo ame piny oloo, karacel kede jo a cunygi cwer me aneka mere. En rik maro ceno jo, cennere-nono daŋ myero dok i wie, En onwoŋo mom mito lammi jo gum kadi acel, ŋattoro daŋ myero kur lamme gum. Ceno jo onwoŋo tye acalo koti mere ame en ruko, myero doŋ bid kome acalo pii, dok acalo moo ame bido cogo mere, Myero bed acalo boŋo ame en odwalo i kome; dok bed acalo del pyer ame en tweo i pyere nino ducu, Man kono en obedo kite ame Rwot pwodo kede jo ame pidda nononono, jo ame kobo kop arac i koma kun omito rwenyo kwena. Ento yin, Ama Rwot Obaŋana, lweny pira pi gwoko nyiŋi, dok ilara pi marri a mom lokere pien ber. Pien an acan ame piny oloo, cunya cwer meicel. Awot i rwenyo calo tipo me otyeno, yamo kola oko calo bonyo. Kanyo kec omio coŋa doŋ odoko agoro oko, koma doŋ riŋo mom iye, Adoko doŋ gi-aŋala a jo ame dota, ka onena, oyeŋo doŋ wigi ayeŋa. Konya, Ama Rwot Obaŋana, lara pi marri a mom lokere. Migi oŋe ni yin en itye ka lara; migi one ni yin Rwot en ame itimo man, Migi obedjo ame cena acena, ento kun imia gira gum, Mi ale twod jo ame lwenyo keda, me an amironi abed ame cunya yom. Mi jo ame dota, ruk lewic acalo boŋogi, mi lewic bo komgi oko calo boŋo me adwala i kom. Abino pwoyo Rwot meicel i dwon aloŋo, abino pake i akina jo ame ocokere. Pien en cuŋ i ŋet jo ame piny oloo i ciŋgi tuŋ cem, me larogi i ciŋ jo ame ŋolo kop me to i wigi. Rwot okobbi Rwotta ni, “Bed i laŋeta tuŋ cem, i kabedona me kwogo, ituno ka abino keto okworri piny i te tyeni.” Rwot bino cwayo abiro me loccere kun ya i Cion, en bino miyo ilo loc i akina okworri. I nino ame ibino lweny okworri, joni bino miye amia kengi me wot lweny, i wi kidi acil. Calo toyo ame luk idiko con, awobeni daŋ bino bino baŋi kittono. Rwot doŋ otyeko kwoŋ oko, mom dok bino loko tammere, “Yin ibedo alamdog nakanaka, i kite a Melkijedek.” Rwot tye i ciŋi tuŋ cem, en bino keketo obakki oko i nino ame akemo bino make, En bino ŋolo kop i akina rok ducu, bino miyo kom jo oto radde arada i bar me lweny; bino daŋ keketo rwode oko, kun miogi okeketa ata i wi lobo luŋ. En bino mato pii i kulo ame tye i ŋet yo, mannono bino miyo en tiŋo wie malo. Pak wunu Rwot. Abino pwoyo Rwot kede cunya ducu, i akina jo ame cunygi ler, i dye lwak ame ocokere karacel. Gin ame Rwot tio doŋodoŋo meicel. Jo luŋ ame ticcere-nono yomo cunygi, obedo keto cunygi me niaŋ iye. Ginnoro luŋ ame en tio tek dok me kwogo meicel, dok kite mere atira perakino waŋ i waŋ. En mom mio wiwa wil i kom ticcere luŋ ame en tio me awura, Rwot ber dok akica. En mio cam baŋ jo ame wore, dok daŋ wie mom wil i kom cikere mere kadi acel. En onyuto teko me ticcere baŋ lwakkere, pien omiogi lobo a rok ocele me bedo meggi. Ticcoro luŋ ame en tio tye atira dok me ateni, dok cikkere luŋ obedo gin me agena, oketo me bedo atwal kun perakino nakanaka, myero lubgi luŋ i cuny aler kede ateni. En ikome oyiko yo me laro jo mere, ocikere kedgi cikere ame perakino nakanaka, Nyiŋe cil dok iyiliyili meicel. Dano cako bedo kede ryeko ka ce ŋeo Rwot; jo ame lubo gin ame en ociko bino bedo kede niaŋ aber, gin bino bedo pake nakanaka. Pak wunu Rwot. Dano ame lworo Rwot tye kede winyo, ame cunye yom i lubo cik a Rwot. I kwae bino bedo twoni jo atek i lobo, ikwae a ŋat ame cunye ler bino bedo kede winyo, Jo me ode bino lony kun otye i jami abup meicel, dok kite atira-nono bino perakino nakanaka. Ceŋ bino donyo, bino ryeny i colpiny pi jo ame cunygi ler; Rwot ber, akica, dok kite atira. Dano ame cunye yom ame mio ocan koporo jami baŋe, bino bedo aber; dano ame wie mom wil i kom cikkere mere. Pien dano ame kite atira mom obino coro teŋe, obino po pire nakanaka. En mom bedo kede lworo kadi owinyo kop arac ame cwero cunye, bedo ame cunye tek kun geŋo Rwot. En bedo ame cunye opye mot, kun mom lwor kadi acel, tuno ka oneno doŋ otyeko loyo okworrere. En poko jami mere baŋ ocan i yomcuny, kite atira perakino waŋ i waŋ, dano-nono bino bedo i twer kun daŋ olwore, Lo arac ka oneno, akemo cako mako oko; bedo kakao lake, ame cunye doŋ oballe oko; gen ame dano arac tye kede kec nono. Pak wunu Rwot. Wun omiro a Rwot, pake wunu, pak wunu nyiŋe, pak wunu nyiŋ Rwot. Nyiŋ Rwot myero pak nakanaka, cakere tin naka waŋ i waŋ. Cakere i tuŋ kide tuno kede tuŋ to, myero pak nyiŋ Rwot iye ducu. Rwot tye malo i wi rok ducu, kwogo mere daŋ tye malo ame kato polo oko. Ŋa kara ame calli i Rwot Obaŋawa, ame bedo i kabedo mere ame tye malo, ame ŋolloro jami luŋ ame tye kannabor, i polo kede i lobo? En tiŋo ocan malo kun kwanyogi piny iyi apua, tiŋo jo ame piny olo i wi obur, te miyogi bedo karacel i rwode, i akina oloc a lwakkere. En mio dako ame mom nywal nwoŋo paco mere, te miye doko toto otino apol meicel kun yie yom. Pak wunu Rwot. I kare ame jo Icrael ya i lobo me Miciri, i kare ame jo a Yakobo weko lobo ame jo mere loko leb apapat, Juda rik te doko acalo ot acil me woro Obaŋa, kun Icrael doko acalo loccere. Nam oneno te riŋo oko, kulo me Jordan te cuŋ oko kun mom mol, Kiddi te cako pyepyea calo nyogi rommi, kun kabedo luŋ obedo kidikidi pyepeya calo itino rommi, Ŋo kara otimi yin nam, omio yin iriŋo oko-ni? Ŋo otimi yin kulo me Jordan, omio icuŋ kun mom imol? Piŋo wun kiddi ipyepyea wunu calo nyogi rommi? Wun lobo obedo kidikidi ŋo omio pyepyea wunu calo itino rommi? Yin lobo myero iyeŋere i nyim Rwotti, i nyim Obaŋa a Yakobo, ame loko lela doko kan ame pii poŋ iye, kede kan obedo kidikidi doko akoŋ. Kwogo gire bed baŋi keken, Ama Rwot, kwogo myero pe bed megwa, pe myero bed megwa kadi acel, pi marri amom lokere kede pi atenini. Piŋo rok ocele bedo penyowa ni, “Obaŋagi kara tye kwene?” Obaŋawa wan tye i polo, en timo ginnoro luŋ ame en mito, Cal jogi obedo gin ame otio i mola kede ryal, dok obedo gin ame jo en ame tio i ciŋgi kengi. Doggi tye cite mom okobo; waŋgi daŋ tye cite mom neno ginnoro. Yitgi tye ento mom winyo kop; wumgi daŋ tye ento mom ŋweo ginnoro, ciŋgi tye ento mom mulo ginnoro; tyengi daŋ tye ento mom owoto kadi acel dwongi daŋ mom mor winyere kadi acel. Jo ame tiogi rom aroma kedgi, dok jo ame keto gengi i komgi daŋ rom aroma kedgi. Wun jo Icrael, gen wunu Rwot! En konyowu dok tye acalo kwot me gwoko komwu. Wun jo me ot Aron, myero igen wunu Rwot! En konyowu dok tye acalo kwot me gwoko komwu, Wun jo luŋ ame lworo Rwot, gen wunun Rwot! En konyowu dok tye acalo kwot me gwoko komwu, Rwot pwod gire po i komwa, dok daŋ bino miyowa gum; en bino miyo gum baŋ jo me ot Icrael; en bino miyo gum baŋ jo me ot Aron; en bino miyo gum baŋ jo ame lworo Rwot, jo atino kede jo adoŋo. Rwot myero mi inywal immede wunu, wun karacel kede itinowu! Rwot myero miwu gum, Rwot ame oketo polo kede lobo. Polo obedo me Obaŋa gire, ento lobo en te miyo baŋ ikwae a dano. Jo ame oto, mom doŋ romo pako Rwot, akadi jo ame donyo piny i lobo kan ame olin iye aliŋa. Cite wan jo ame okwo obino pwoyo Rwot, cakere tin naka waŋ i waŋ. Pwo wunu Rwot. An amaro Rwot, pien en owinyo kokona, dok daŋ owinyo kwacca ame abako kede doga baŋe. Pien en ociko yite me winyo kwacca, mannono omio an abino kok baŋe pi kare luŋ ame pwod atye kwo. To ociko owiccere ogura kede dyere, rem me lyel daŋ omaka oko ikiŋ, can kede rem adwoŋ meicel ocira oko. Alwoŋo nyiŋ Rwot, kun akobo ni, “Ama Rwot, tim berilar kwona!” Rwot akica dok kite atira; Obaŋawa timo jo kica. Rwot gwoko jo ame kwia piny, i kare ame rik odwoka piny, en olara. Dwog cen, yin tipona, me iwe, pien Rwot doŋ otyeko nyuto berrere baŋi. Rwot olaro tipona oko i to, omia aweo pig waŋa oko, omio tyena mom doŋ twomere i ginnoro. Atye ka wot i nyim Rwot, i lobo a jo akwo. Amedde bedo kede iye ikome kadi bed nyo akobo ni, “Can odia meicel”; dok i kare ame onwoŋo atye kede lworo ame akobo ni, “Dano ducu mom genne kadi acel.” Abino miyo gin aŋo baŋ Rwot, pi gin aber luŋ ame en otimo baŋa? Abino pwoyo Rwot pi larena, abino pwoye kun alwoŋo nyiŋe, abino cobo kwoŋ ame yam akwoŋo baŋ Rwot, i nyim lwakkere luŋ kun ocokere. Ka ŋat ageno Rwot oto, pire tek meicel i nyim Rwot. Ama Rwot, an abedo amironi, atin a dako aŋecani, yin doŋ ityeko gonyo tol ame itwea kede. Abino miyi mot me pwoyi, dok abino kok baŋi kare luŋ. Abino co bo kwoŋŋa ame akwoŋo baŋ Rwot, i nyim lwakkere luŋ ame ocokere, i dyekal me ot a Rwot i nyimi i Jerucalem. Pak wunu Rwot. Pak wunu Rwot, wun rok ducu! Dwore wunu, wun jo me rok apapat! Pien marrere a mom lokere dwoŋ meicel pirwa, dok kite atira daŋ perakino nakanaka. Pak wunu Rwot. Pwo wunu Rwot, pien en ber, marrere a mom lokere perakino nakanaka! Jo Icrael myero kob ni, “Marrere a mom lokere perakino nakanaka.” Jo me ot Eron myero kob ni, “Marrere a mom lokere perakino nakanaka.” Jo ame lworo Rwot myero kob ni, “Marrere a mom lokere perakino nakanaka,” I kare ame atye i can akok baŋ Rwot; Rwot ogamo kwacca te gonya oko, Rwot en akony mera, mom abino lworo ginnoro, ŋo kara ame dano twero tima kede? Rwot gire tye i ŋeta me konya; abino neno jo ame daga i waŋ me loc, Laro baŋ Rwot, ber gire, kato geŋo dano, Laro baŋ Rwot, ber gire, kato geŋo rwode. Rok luŋ onwoŋo ogura oko dyere, ento amio nyiŋgi orwenyo oko i wi lobo i nyiŋ Rwot. Gin onwoŋo ogura oko dyere, gin onwoŋo ogura oko dyere, tuŋŋi kede tuŋŋi; amio nyiŋgi orwenyo oko luŋ wi lobo, i nyiŋ Rwot. Onwoŋo ogura dyere calo kic, obino i koma oyotoyot calo mac ame awaŋo tim, ento amio nyiŋgi luŋ orwenyo oko i wi lobo i nyiŋ Rwot. Onwoŋo ocorra meicel ame doŋ aceggi rette piny, cite Rwot te konya oko, Rwot en ame mia teko, dok en tye acalo werra ame awero, en doŋ odoko ŋat ame lara. Koŋ iwinyo wer me yomcuny ame owero pi loc, ame jo tye awero i kema a jo a kitegi atira, kun owero ni, “Ciŋ Rwot me tuŋ cem lwenyo atek meicel, twer me ciŋe-nono omiowa olo lweny, ciŋ Rwot me tuŋ cem lwenyo atek meicel!” Mom gire abino to, ento abino, bedo kwo, kun abedo tito gin ame Rwot otimo. Rwot doŋ otyeko pwoda arac meicel, cite mom gire oneka, Otimo mannono me wek eyabba doggola me kite atira, me adony iye ate wot pwoye. Mannono en dogcel ame donyo baŋ Rwot, jo ame kitegi atira bino beo iye. Apwoi, pien yin doŋ igamo kwacca, doŋ ityeko doko ŋat ame lara. Kidi ame ogedo okwero, en ame odoko kidi adwoŋ me gwic ot, Man en tic a Rwot, eno gin me awura baŋwa. Man en nino ame Rwot omiowa, myero okwer wunu nino man yomcuny adwoŋ meicel. Ama Rwot, tim ber ilarwa! tim ber imi ticwa luŋ cobere kakare! Pwo wunu ŋat ame bino i nyiŋ Rwot! Wan olamo winyo i komi i ot a Rwot. Rwot en Obaŋa, en doŋ otyeko miyowa ceŋ. Dorre wunu i tyen kun imako wunu jaŋ yat i ciŋwu, wot iman wunu i keno me lam, An abino pwoyi, pien yin ibedo Obaŋana, abino dworo nyiŋi, yin Obaŋana. Pwo wunu Rwot, pien en ber marrere a mom lokere perakino nakanaka. Jo ame mom tye i balloro, tye kede winyo, ame bedo kun lubo cik a Rwot! Jo ame gwoko kop me caden ame en omio tye kede winyo, jo ame yenye kede cunygi ducu, jo ame mom timo ginnoro arac, cite obedo kun olubo yo ame Rwot mito. Yin doŋ ityeko miyowa pwonnyi yam con, kun imito ni olub kede diro. Mi tyena cuŋ atek i yo ame atye ka lubo, kun agwoko daŋ i cwilli. Ka abino keto cunya me lubo cikki lewic mom bino maka, Abino paki kun cunya ler, ka doŋ atyeko pwonyo cikki ame tye atira-ni. Abino gwoko gin ame yin iciko, tim ber kur cunyi ca oko ite weka ata. Awobi ame pwod tidi twero gwoko kite aber odoco i yore aŋo? Twero gwokere ka ce bedo kun lubo koppi. An ayenyi kede cunya ducu, Ama Obaŋa, kur imi agak oko i yo me lubo cikki, Atyeko kano koppi i cunya, me wek kur atim balloro i nyimi. An apwoi meicel, Ama Rwot; pwonya kede cikki. Abino kobo kede doga kannaler, kop ducu ame yam iciko kun yin ikomi en ame ikobo. Kop me cadenni ame inyuto yommoro cunya meicel, cunya yom iye calo lonyo adwoŋ ame alimo. Abino lwodo kop ame ipwonyo i cunya, ate keto cunya me lubo gin ame yin imito. Abino bedo i yomcuny i cik meri, wia gire mom bino wil i kom kop ame ikobo. Nyut marri baŋa an aticci, me wek abed kwo kun alubo koppi. Yab waŋa me anen piny, me anenjami me awura ame tye i cikki. An atye acalo welo i wi lobo kan, kur ikanna cikki moro kadi acel. Cunya bedo pukere apuka kare ducu, kun amito niaŋ kop ame i ciko. Yin ityeko juko jo ame opala, ame gin jo ame doŋ ityeko ceno, jo ame gak oko i lubo cikki. Kwany aŋalegi kede acaegi oko i koma, pien an abedo gwoko kop me caddenni, Kadi bed rwode ocokere karacel te bedo poro kop me timo gin arac i komi, cite an amironi pwod abino medde lwodo kop me cikki i cunya, Kop me cadenni yommoro cunya meicel, an anwoŋo tam abeco iya iye. Abuto piny iyi apua ame cwercuny ocira oko, roc kwona odoco kite ame yam iciko. Kare ame atucci ginnoro luŋ ame yam atio, yin igamo doga, pwonya kede cikki. Pwonya me aŋe yo ame myero alub kede pwonnyi, mannono bino miyo abedo lwodo kop i kom ticci ame doŋ ityeko tiyo. Cwercuny doŋ omio cunya oballe oko, mia teko, kite ame yam iciko. Kwanya oko me kur alub yo mogo a mom beco, cite myero ipwonya i cikki pi kicani. An doŋ atyeko yero me lubo yo ame gen tye iye, kun aketo cunya meicel i kom gin ame i ciko. An doŋ atyeko moko oko ikiŋ i kom kop me cadenni, kur iwek lewic maka. Abino bedo lubo cikki i mitkom, ka ce yin imedo niaŋa obedo atut. Pwonya, Ama Rwot, me aŋe kite me lubo cikki, mannono bino miyo agwoko naka iyi agikki. Mia aniaŋ cikki me wek agwoki, me alub i cunya ducu. Tela i yo me lubo cikki, pien yomoro cunya meicel, Mia abed i cuny me lubo kop me cadenni, me kur abed i cuny me nwoŋo ka lim, Kur imia abed neno jami atata ame konygi mom, mia abed i kwo me timo gin ame yin imito, Med moko gin ame iciko baŋa an amironi, ame ityeko ciko pire pi jo ame llwori. Kwany tim me acae oko ame mia lworo, pien cikki ducu beco. Nen ba, cunya bedo pukere apuka kom cikki, yin kiteni atira, myero imia kwo. Tim ber, Ama Rwot, imi marri a mom lokere bed koma, dok ilara kite ame yam iciko con; mannono bino miyo agamo dog jo ame kobo kop agecegece i koma, pien an ageno koppi. Kur ikwany kop me ateni oko i doga, pien genna tye i kom cikki. Abino medde gwoko cikki kare ducu nakanaka, abino gwoko nakanaka, Abino beo i yo apwot kun atye i kuc, pien doŋ atemo lubo pwonnyi. Abino rabo kop me cadenni i nyim obakki, kun lewic mom maka kadi acel. Pien an anwoŋo yomcuny i cikki, ame cunya maro meicel, Aworo cikki meicel, dok daŋ amaro, abino lwodo kop me cikki cunya. Poyo koppi ame yam icikere kede baŋa, an amironi, ame yin imia acako bedo kede gen iye. Kadi atye i can, koppi kweo cunya, cikkereni mia akwo. Jo ame kwia Obaŋa nywara anywara, cite an, mom aweko gwoko cikki kadi acel. Ka atamo pi cikki ame yam ipwonya kede con, cunya kwe odoco, Ama Rwot. Cunya waŋ meicel i kom jo a kitegi reco, ame pe paro pi cikki, Cikki doŋ tye acalo wer ame awero, i ot ame abedo iye acalo arok ame bor abora i paco mere. Apo piri naka dyewor, Ama Rwot, dok daŋ alubo cikki, Mannono en gum ame an anwoŋo, omio atye ka gwoko kop ducu ame iciko. Yin en ame ibedo gin ame opokka, Ama Rwot, atyeko cikere me gwoko kopporo luŋ ame yin ikobo. Akwai i cunya ducu, Rwot me polo, kica myero maki i koma kite ame yam iciko. Ka aparo pi gin ame yin imito ni atim, alokere me lubo kop me cadenni; Aru ya oyotoyot kun mom agal, ate cako lubo cikki oko, Kadi bed amok iyi owic a jo areco, wia mom wil i kom cikki kadi acel. I cuny dyewor, an aya malo me paki, pi cikki me ŋolo kop atira. An abedo awot a jo luŋ ame lwori, dok ame lubo gin ame i pwonyo. Lobo doŋ opoŋ i marri a mom lokere, Ama Rwot, pwonya kede cikki. Yin itye amironi aber, Ama Rwot, itio kede kun ilubo koppi. Pwonya me ŋolo kop atira, kun atye kede ŋec, pien an aye gin ame yin iciko. I kare ame mom ru iketo can i koma, onwoŋo doŋ agak oko, cite aman doŋ agwoko koppi, Yin gire iber, dok itimo daŋ gin aber; pwonya kede cikki. Jo ame mom ŋei, okobo kop me gobagoba i koma, cite an gira alubo cikki kede cunya ducu. Jo-nono cunygi omakere oko calo dwolo, cite an gira yia yom i cikki. Can ame rik opoto i koma-ca onwoŋo kara ber, pien okonya me pwonyo cikki. Cik ame ya i dogi ber baŋa, ame kato lwak jabu kede ryal apipim. Yin en icwea dok daŋ yin en igwoka, mia abed i niaŋ atut me wek apwony cikki. Jo ame lwori bino nena cunygi te bedo ayom, pien an abedo geŋo koppi. Ama Rwot, an aŋeo ni yin iŋolo kop kakare, dok daŋ iketo can i koma pi ateni ame yin itye kede, Mi marri a mom lokere bed oyikere me kweyo cunya, kite ame rik iciko kede baŋa, an amironi. Tima kica, iweka abed kwo, pien cikki en ame yomoro cunya. Mi lewic mak jo a mom ŋei, pien gin obedo bwola i kop me goba, aco an gira abino lwodo ka kop i kom kop ame ipwonyo keken i cunya. Mi jo ame lwori bin baŋa, me gin daŋ obin oŋe kop me cadenni, Balloro myero kur nwoŋere i cunya pi kwero cikki, me kur ibin imi lewic maka. Tipona ool oko me kuro larreni, Ama Rwot, an gira ageno kop meri. Waŋa doŋ oballe oko pi bedo neno gin ame iciko, omio apenyi ni, “Kara ibino kweyo cunya awene ba?” Nen doŋ adoko calo ocoe me piko koŋo olok ame oweko i atuk, kadi amannono, wia gire mom owil i cikki. Kara an amironi abino bedo kuro naka awene ba? Kara ibino ŋolo kop a jo ame wuna awene ba? Jo ame mom ŋei yin Obaŋa, okunyo bur pira me apot iye, kun mom oparo gigi pi cikki. Cikki ducu tye kakare, ento gin olwenyo i koma i kop me gobagoba; konya ba. Onwoŋo doŋ oceggi kwanyo kwona oko i lobo, cite an mom aye weko gin ame ipwonyo. Tim ber ikonya, igwok kwona pi marri a mom lokere, me an daŋ agwok kop me caden ame yam yin ikobo. Koppi bedo nakanaka, Ama Rwot, tye ame icibo ocuŋ oko ikiŋ i polo, Kop atenini ame yin itye kede perakino waŋ i waŋ, i kare a lwagi jo me kare ducu, icibo lobo ocuŋ atek i kabedo mere. Jami ducu ocuŋ naka atot tin pi cikki, pien gin luŋ obedo omironi. Kono onwoŋo cikki mom yomoro cunya, kono nyo ato oko i canna, Wi mom bino wil i kom cikki kadi acel, pien gwoka omio pwod atye kwo. An a danoni, lara ba; pien an abedo lubo cikki keken. Jo a kitegi reco opono kun okia me neka, cite an atamo gira pi kop me cadenni. Doŋ atyeko neno ni jami i wi loboni luŋ kadi bed ber meicel tye kede agikkigi, ento cikki agikki mere mom. Nen ba, nen kite ame an amaro kede cikki! abedo lwodo kop i kom cikki i cunya ceŋ iyul. Cikki mia abedo ŋat aryek ame kato okworra oko, pien itye keda kare ducu, Atye i niaŋ atut ame kato me opwonyena oko, pien an abedo lwodo kop me cadenni i cunya kare i kare. Dok niaŋ ame an atye kede kato me a jo oteggo oko, pien an alubo gin ame yin iciko. An ajukere kena me wot timo gin arac, pien amito lubo kop atenini. Pe awire teŋe ate weko cikki oko, pien yin doŋ ityeko pwonya, Koppi ka an abilo anwoŋo lim meicel, lim i doga ame kato moo kic oko, Cikki pwonya i ryeko adwoŋ meicel, mannono omio adago lubo yo areco ducu. Koppi calo tara ame menyo kan ame an awoto iye, dok tye acalo ceŋ amenyo yo ame awot iye. Doŋ atyeko kwoŋo kwoŋ, dok daŋ amoko pire, me Jubo pwonyi ame tye atira. Peko ame atye kede omio rem ocira oko, gwoka me abed kwo, Ama Rwot, kite ame yam iciko. Gam motta me pak ame akelo baŋi, Ama Rwot, dok ipwonya kede cikki, Ama Rwot. Atye ame amako kwona i ciŋa kare luŋ, cite wia mom wil i kom cikki. Jo areco tye ociko owic me maka, cite an mom agak me weko lubo gin ame ipwonyo. Kop me cadenni obedo gin ame an aleo me bedo mega nakanaka, ateteni, kop me cadenni en ame mia lelo i cunya. Aketo cunya kare luŋ me lubo gin ame yin iciko, abino timo amannono nakanaka i agikki me kwona. Cunya dag jo ame tamo tamgi aryo, ento an amaro cikki, Yin en ibedo ka ponona kede kwot me geŋo koma, genna tye i kom kop ame ikobo Ya wunu oko i ŋeta, wun otim tim areco, me abed kun alubo cik a Rwot Obaŋana. Konya acuŋ atek kite ame yam ibedo ciko me abed kwo, kur imi ket lewic i koma pi gen ame atye kede, Tiŋa malo, me abed i kuc, me aketo cunya me lubo cikki kare luŋ. Cunyi otyeko kwero jo ame gak teŋe i lubo cikki, pien ryeko ame gin tye kede mom konyo ginnoro kadi acel. Jo areco me wi lobo rom aroma i yugi, mannono omio an gira amaro kop me cadenni, Rino koma luŋ myel amyela pi lwori, ŋolo koppi daŋ tye ka miya lworo meicel. Atyeko timo gin ame tye atira dok kakare; kur iweka baŋ jo ame tye ka wuna, cuŋ pira, an aticci, pi kelli kuc, kur iwek jo ame mom ŋei bed wuna. Waŋa doŋ ojony oko me bedo kuro larreni, kede pi kite ame ibino cobo kede cikki ame tye atira. Ti keda an aticci pi marri a mom lokere, dok ipwonya kede cikki. An abedo amironi, mia abed kede niaŋ atut, me wek aŋe koppi me cadenni. Kare doŋ oromo oko, me tiyo ticci, Ama Rwot, pien cikki doŋ otyeko turo oko. Mannono omio an amaro cikki gira, amaro ame kato jabu, naka jabu ame olio aber. Mannono omio an alo kwona kun alubo cikki, adag gira timo tim areco luŋ. Koppi me caden luŋ tye me awura meicel, mannono omio alubo kede cunya ducu. Niaŋ tyen koppi yabo waŋ dano, mio ŋat amwol bedo kede niaŋ atut. Aŋamo doga, ate bedo omo cunya me weo, pien cunya tye i kom cikki, Lokere baŋa, dok itima kica, kite ame itimo i kom jo ame mari, Tella yo kite ame yam iciko, me balloro kur lo kwona. Lakoro an oko i ciŋ jo ame wuna, me alub gin ame ipwonyo. Nena an amironi, i waŋ me kica, dok ipwonya i cikki. Nen pig waŋa tye ka cwer kun aony irat calo pii, pien jo mom tye ka gwoko cikki. Yin giri kiteni atira, Ama Rwot, dok daŋ iŋolo kop atira. Iyero kop me cadenni, kun ilubokite atira, dok koppi luŋ obedo kop ateni. Miti ame an atye kede i kom cikki puko cunya apuka, pien okworra, wigi wil oko i kom koppi. Gin ame yin iciko, icobo luŋ, an amironi, cunya tye iye. An atidi dok daŋ oca meicel, kadi amannono an gira wia mom wil i cikki. Kiteni atira tye atir, dok daŋ perakino nakanaka, dok cikki daŋ tye ateni, Can kede cwercuny otum oko i koma, cite cikki en ame yomoro cunya. Kop me cadenni tye atira nakanaka, mia abed i niaŋ atut me abed kwo. Akok baŋi i cunya luŋ, gam doga, Ama Rwot, an abino gwoko cikki. Akok baŋi, tim ber ilara; me wek abed lubo kop me cadenni. Aya malo ibai ate kok baŋi me konya, an pwod atye kede gen i kom koppi, Aco waŋa te bedo twolo kun piny mom ru oru, me wek abed lwodo kop i kom cikkereni i cunya, Tim ber iwiny dwona, Ama Rwot, pi marri a mom lokere; locci ame tye atira rocco kwona, Jo ame wuna, tye doŋ ceggi acega kun otye i tam me timo gin arac i koma, gin mom oparo pi cikki kadi acel. Cite yin itye ceggi, Ama Rwot, cikki ducu obedo cik me ateni. Acako pwonyo kop i kom cadenni con meicel, pien yin ityeko ketogi me bedo nakanaka. Nen can ame atye kede dok ilara, pien wia mom wil i kom cikki. Pid pira, dok ilara, mia kwo kite ame yam iciko, Otim tim areco mom bino larre kadi acel, pien gin gigi mom oparo pi cikki. Ento kica meri dwoŋ meicel, Ama Rwot, imia akwo kite acalo yin iŋolo kede kop atira-ni. Okworra kede jo ame wuna pol meicel, cite an gira mom aweko lubo kop me cadenni. Ka aneno jo ame mom geni, cunya lema meicel, pien gin mom ogwoko cikki. Koŋ ipar kite ame an amaro kede kop ame ipwonyo, Ama Obaŋa, gwok kwona kite ame marri a mom lokere tye kede. Koppi luŋ ocuŋ iyi ateni, ŋolo kop atira ame yin iŋolo perakino nakanaka. Rwode wuna nononono aboŋo ginnoro ame abalo, cite an gira abedo kede lworo cunya pi koppi. Alelo gira alela i koppi, calo ŋat ame onwoŋo gin ame oyako abup meicel. Adag dok atyeko kwero kop me gobagoba, ento amaro gira cikki. An apaki tyen abiro nino acel, pien kop ame ikobo tye atira, Jo ame maro cikki bedo i kuc adwoŋ meicel, mom tye ginnoro atwero miyogi twomere. An gira ageno larre meri, Ama Rwot, dok daŋ atimo gin ame cikki mito ni atim. Kop me cadenni ame tye i cikki luŋ agwoko gira i cunya, amarogi atek meicel. Agwoko cikki luŋ karacel kede kop me caden, ame ipwonya kede, yin gire ineno ginnoro luŋ ame an atimo. Ye kokona otun i nyimi ba, Ama Rwot, mia abed kede niaŋ atut kit ame koppi tye kede. Ye kwacca ame abako kede doga baŋi tun i nyimi, lara kite ame yam iciko kede. An apaki kare ducu i kop ame ya i doga, me ipwonya kede cikki. Abino wero koppi awera kede doga, pien cikki luŋ tye atira. Yik ciŋi me konya, pien an atyeko yero me lubo cikki. Akuro kom ka larreni keken, Ama Rwot, dok gin ame yomoro cunya, obedo cikki. Mia abed kwo me wek amedde paki, me gin ame cikki pwonyo okonya. Atyeko gak oko teŋe calo romo ame orwenyo, yenya, an amironi, pien wia mom wil i kom cikki. I kare ame atye i can akok baŋ Rwot, me en gam doga, kun akok baŋe ni, “Lara ba, Ama Rwot, i ciŋ jo ame kobo kop me gobagoba, i ciŋ jo ame kop me goba keken en ame ya i doggi.” Gin aŋo kara ame obino miyowu? Dok ŋo ocele ame obino timo i komwu, wun jo ame ogoba. Atero ame lebe bit meicel, ame obedo me olweny, kede loti mac ame okur alyet meicel! Can iwia doi, pi bedo i Mecek acalo welo, kede pi bedo i akina kema a jo Kedar! Abedo doŋ kare alac meicel, iyi akina jo ame dag kuc. An a dano ame amaro kuc, ento ka akobo kopporo me kuc, gin luŋ otwarre malo me lweny keken. Atiŋo waŋa malo, aneno lobo ame obedo kidikidi; kony ame an amitoni, kara bino ya i kwene? Kony bino ya i baŋ Rwot, ame oketo polo kede lobo. En mom bino ye tyeni cer, ŋat ame gwoki mom bino nino kadi acel. Nen ba, ŋat ame gwoko jo Icrael, nino mom bino mako waŋe, dok daŋ mom bino nino atwal. Rwot, en ame gwoki, dok en tye acalo tipo me weoni, en tye i ŋeti i ciŋi tuŋ cem. Ceŋ mom bino waŋo komi dyeceŋ, akadi dwe daŋ dyewor. Rwot bino gwoki i kom ginnoro luŋ arac, en bino gwoko kwoni. Rwot bino gwoki i kabedo luŋ ame ibino wot iye, cakere i kare-ni naka waŋ i waŋ. Cunya rik obedo ayom meicel i kare ame okobba ni, “Owot wunu i ot a Rwot!” Obedo cuŋ acuŋa i tyenwa i dogcel me Jerucalem! Jerucalem, doŋ otyeko gero aber odoco, boma mere doŋ ocuŋ atek ikiŋ, Man en kan ame Rwot oyero ame atekere luŋ bino bino iye, kite ame rik ociko kede baŋ jo Icrael, gin bino bino me miyo pwoc i nyiŋ Rwot. Kom loc luŋ me ŋolo kop otyeko keto oko kuno, kom loc luŋ me ot a Daudi. Kwa wunu Obaŋa pi kuc me Jerucalem! “Myero jo ame mari bed olonyo! Kuc myero bed tye i cel luŋ ame ogerri kede, dok kuc daŋ myero bed i wudi luŋ ame ocuŋ iguŋ malo!” Pi omegona kede pi owotena omio akobo ni, “Kuc obed baŋwu!” Pien ot a Rwot Obaŋawa tye kan, abino kwayo ni ibed wunu aber. Atiŋo waŋa malo baŋi, Ama Rwot, yin ame ibedo i wi kom me locci malo i polo. Nen ba, kite acalo omiro neno adwoŋgi, dok kite acalo aŋeca neno kede dako ame loo ot, ame en bedo baŋe, wan daŋ oneno baŋ Rwot Obaŋawa, tuno ka kica omake i komwa. Kica myero maki i komwa, Ama Rwot, kica myero maki i komwa, pien doŋ ocaowa okato kare. Tipo me kwowa doŋ ool oko pi kare alac meicel, pi aŋale a jo ame tye i kwo aber, pi acae a jo ame wakere. Jo Icrael myero kob ni, “Kono Rwot mom onwoŋo tye tutuŋ baŋwa, kono Rwot mom onwoŋo tye tutuŋ baŋwa, i kare ame okworwa cako lweny kedwa, kono okworwa omwonyowa oko akwo, kare ame akemo akworwa onwoŋo olyetto agwa meicel, me lweny i komwa; kono alele kot ame amol agwa oterowa oko teŋe, kono bi-amwonyi me pii owumowa oko piny; kono pii ame atagere ataga omol i wiwa malo.” Pwo wunu Rwot, ame mom omiowa baŋgi, acalo riŋo me amwoda baŋgi! Wan obwot calo winyo ame obwot iyi owic adwar; pien owic ame ociko onwoŋo ocot oko, wan ote bwot oko. Konywa luŋ ya i baŋ Rwot, ame oketo polo kede lobo. Jo ame geno Obaŋa, rom aroma i kidi me Cion ame mom yeŋere, ento cuŋ atek ikiŋ karacel nakanaka. Kite acalo kiddi otyeko guro Jerucalem oko-ni, Rwot daŋ oguro jo mere oko dyere kittono, cakere i kare-ni naka waŋ i waŋ. Abiro me loc a jo a kitegi reco mom bino loyo lobo ame omio baŋ jo a kitegi atira, me jo a kitegi atira mom rye ciŋgi, me timo gin areco. Tim ber baŋ jo a kitegi beco, Ama Rwot, kede baŋ jo a cunygi ler. Ento jo ame lubo yo ame ogom, Rwot bino terogi ribogi karacel otim tim areco, Kuc obed iyi Icrael. I kare ame Rwot odwoggowa cen i Cion, onwoŋo orom aroma i jo ame alak aleka, Icennere wan ote bedo nyero anyera, kun oredo i yomcuny, orok daŋ te cako kobo kop i komwa ni, “Rwot otyeko timo gigi mogo me awura meicel pirgi.” Rwot onwoŋo otimo gigi mogo me awura meicel pirwa, omio cunywa yom. Dwokkiwa gumwa, Ama Rwot, calo pii ame tye i Negeb! Jo ame co kotigi kede pig waŋgi, myero oka gin ame ocek potogi i yomcuny. Ŋat ame woto kun akok, kun omako koti ame en awot coyo, bino dwogo i paco mere kun aredo areda i yomcuny, kun kelo kai ame okao i poto mere. Ka ce Rwot mom en ogero ot, jo ame gero lolle nono, Ka ce Rwot mom ogwoko paco, akur paco-nono bedo ame waŋe okwekere akweka aboŋo nino nono. Kadi idil wunu ibai me wot itic, kadi idok wunu paco me wot weo mot meicel, kun icamo wunu cemwu ame cunywu tye i kom ticwu, mannono luŋ nono, mom romo konyowu kadi acel, pien Rwot mio baŋ jo ame en maro i kare ame nwoŋo gin onino oko. Nen ba, otino obedo mot ame yaa i baŋ Rwot, gin obedo nyig koti ame yaa i yic. Itino ame lo moro onywalo kun en pwod awobi, calo atera ame tye i ciŋ lo ame lwenyo. Ŋat ame cao atero mere opoŋ i kodi atero-nono, tye kede yomcuny, dano-nono lewic mom bino mako kadi acel, i kare ame en tye ka lok okworrere i dogcel. Dano ame lworo Rwot, tye kede winyo, ame tio gin ame en mito, Ibino camo cam ame oya i kom tic ame yin itio kede ciŋi; ibino bedo i yomcuny dok daŋ ibino bedo aber. Dako-ni bino bedo calo olok ame nyak meicel i odi; itinoni bino bedo acalo yat ame pote lot, kun obedo oguro mejani dyere. Nen ba, mannono en gum ame bino poto i kom dano ame lworo Rwot, Rwot myero mii winyo i Cion, myero en mii inen lonyo ame tye i Jerucalem, pi kare me kwoni luŋ, En myero mi inen ikwai kede ikwai, Kuc obed i kom Icrael! Jo Icrael myero kob ni, “Gin oketo can i kom arac meicel cakere i tinona. Gin oketo can i koma arac meicel cakere i tinona, kadi amannono gin mom oloa kadi acel. Gin obedo liba i tuŋ ŋea, ote tima lit aboŋo kica.” Rwot kite atira; en otyeko ŋolo tol a jo a kitegi reco oko. Myero jo ducu ame dago Cion, lewic makgi, ote dok oko cen. Gin myero bed acalo lum ame tye i wi ot malo, ame two oko kun mom ru odoŋo abor, ame ŋat ame anyaro mom daŋ nyaro poŋ ciŋe, ŋat ame atweyo daŋ mom nyaro poŋ kore, Kun jo ame abeo kannono daŋ mom twero kobo ni, “Winyo ame Rwot en amio obed i komwu! Okwayiwu winyo i nyiŋ Rwot!” Akok baŋi i te nam atut, Ama Rwot, winy kokona ba, Ama Rwot! Cik yiti iwiny kwacca ame abako kede doga baŋi. Kono yin ibedo gwoko bal wa agwoka aboŋo timowa kica, ŋa ame kono ocuŋ i nyimi, Ama Rwot? Ento yin gire igonyo bal a jo, me jo bed i lworo i komi. An gira akuro Rwot, tipona daŋ kure, dok an atye kede gen pi koppere. Kwona ducu ocuŋ i kom Rwot, akure ame kato okur piny ame kuro naka odiko, akure ame kato okur piny ame kuro naka odiko. Wun jo Icrael, gen wunu Rwot! pien mar a mom lokere tye baŋ Rwot, larre me ateni tye baŋe daŋ. En bino lakoro jo Icrael, bino lakorogi i balgi luŋ. Ama Rwot, an gira mom atye kede mit adwoŋ meicel i cunya, dok waŋa daŋ mom neno gigi mogo ame malo meicel. Mom abedo keto cunya i kom gigi mogo adoŋodoŋo, dok ame awura okato kare. Atye gira ame cunya okwe, dok tipona daŋ okwe mot, calo atin ame oliŋ mot i kor tottere cunya gire tye okwe calo atin ame oliŋ mot. Wun jo Icrael we, gen wunu Rwot! cakere tin naka waŋ i waŋ. Po pi Daudi, Ama Rwot, kede pi cannoro luŋ ame yam en obedo kanyo; kite ame rik en okwoŋo kede baŋ Rwot, kite ame en okwoŋo kede baŋ Won Twer Ducu a Yakobo, kun kobo ni, “Mom abino donyo i oda, akadi yito i wi tandana. Nino daŋ mom bino mako waŋa, dok mom daŋ abino miyo waŋa, tuno ka doŋ anwoŋo kabedo pi Rwot, kabedo a Won Twer Ducu ame obedo me a Yakobo.” Nen ba, wan owinyo pire Eprata, onwoŋo tye i potti me Jaar. “Owot wunu kan ame en bedo iye, me owot owore wunu i ŋet ka teno tyene.” Ya doŋ malo, Ama Rwot, me iwot i ka weoni, Yin karacel kede canduk me tekoni. Mi olamdoggi oruk ruk me kite atira, mi joni acillel i yomcuny. Ama Rwot Obaŋa, kur ikwer winyo kop a danoni ame iwiro kede moo! pi marri a mom lokere i kom amironi Daudi. Rwot rik okwoŋo kwoŋ me ateni baŋ Daudi, ame mom dok romo loko tammere iye me kobo ni, “Abino keto atin awobi acel i akina ikwai, me bedo abaka, en bino bedo i wi kom me locci. Ka ce ikwaini ducu bino gwoko cikerena, kede kop me caden ame abino pwonyogi kede, abino keto itinogi daŋ bedo i wi kom me locci, gin bino bedo i loc nakanaka.” Rwot doŋ otyeko yero Cion, kun mito ni bed paco me bedo mere, En okobo ni, “Kan doŋ bino bedo ka weona nakanaka; an doŋ abino bedo kan pien cunya omito. Abino miye winyo, ate miye nwoŋo jami abup ame en mito, ocan luŋ ame tye iye abino miyogi ocamo kwon oyeŋ. Abino miyo olamdog ame tye iye ruko ruk me larre, jo mere acil bino redo i yomcuny. Abino yero ŋat acel i akina ikwae a Daudi me bedo abaka; doŋ atyeko tiyo tara pi danona ame atyeko wiro kede moo. Abino miyo lewic ciro okworrere oko, tok loccere keken en ame bino meny i wie malo.” Koŋ inen ba, kite ame ber kede dok me yomcuny, kun notte tye i akina omego! Calo moo akur ame oonyo i wie, ame mol bino piny naka i tik dano, dok calo moo ame rik omol i wi Aron obino piny naka i tike, ame omol te tuno naka i lak boŋo me arwa mere. Dok daŋ rom aroma i toyo ame tye i wi kidi me Kermon, ame totona piny i wi kidi me Cion! Pien kuno obedo kan ame Rwot ociko me lamo iye winyo, kede miyo kwo ame perakino nakanaka. Bye wunu, me ibin ipwo wunu Rwot, wun omiro a Rwot luŋ, ame cuŋ i ot a Rwot dyewor. Tiŋ wunu ciŋwu malo, itaŋ wunu i kabedo man acil, eka ite pwoyo wunu Rwot! Rwot myero miwu winyo i Cion, Rwot ame oketo polo kede lobo! Pak wunu Rwot, Pak wunu nyiŋ Rwot, pak wunu nyiŋe, wun omiro mere ducu, wun ame icuŋ wunu i ot a Rwot, i dyekal me ot Obaŋawa! Pak wunu Rwot, pien en ber, wer wunu wer me pako nyiŋe, pien en akica! Pien Rwot otyeko yero Yakobo me bedo mege en ikome, jo Icrael obedo lwakkere en ikome. Pien an aŋeo gira ni Rwot dwoŋ meicel, dok daŋ aŋeo ni Rwot loo cal jogi ducu ame olwoŋo ni Obaŋa, Ginnoro keken ame en Rwot mito, timo, i polo karacel kede i lobo, i nam kede i pii atut ame tye piny i te lobo. En ame mio pol tiŋere malo i agikki lobo, en ame mio lutkot meny, kot te cwe, en acwao yamo i ot kano jami mere, yamo te kodo. En ame rik oneko itino kao me Miciri, itino kao a dano kede me a leyi; en daŋ rik otio taŋo kede gigi mogo me awura meicel i Miciri, kun pwodo kede Parao karacel kede omiro mere ducu. En daŋ rik oneko rok apapat apol meicel, oneko naka obakki mogo ame tek meicel. Cikon, abaka a jo Amor, kede Oga baka a jo Bacan, kede oloc ducu ame loo lobo apapat ame tye i Kanan. Omio lobogi oko me bedo me alea, omio me bedo me alea a jo mere Icrael. Nyiŋi gire perakino nakanaka, Ama Rwot, dok nyiŋi daŋ medde i rwo i kare a lwagi jo me kare ducu. Pien Rwot bino miyo jo mere loo kop, kica bino make i kom omiro mere, Cal jogi a rok apapat, obedo gin ame otio i ryal kede jabu, dok jo en ame otio kede ciŋgi kengi. Doggi tye cite mom okobo, waŋgi daŋ tye, cite mom oneno ginnoro. Yitgi tye, cite mom owinyo kop; wumgi daŋ tye, cite mom oweo kadi acel. Jo ame tiogi, rom aroma kedgi, dok jo ame keto gen i komgi daŋ rom aroma kedgi. Wun jo Icrael, gen wunu Rwot! Wun jo me ot Aron, myero igen wunu Rwot! Wun jo me ot a Levi, gen wunu Rwot! Wun jo luŋ ame lworo Rwot, gen wunu Rwot! Pwo wunu Rwot i Cion, pien en bedo i Jerucalem! Pwo wunu Rwot! Pwowunu Rwot, pienenber, marrere a mom lokere perakino nakanaka. Pwo wunu Obaŋa ame loo obaŋe ocele luŋ, pien marrere a mom lokere perakino nakanaka. Pwo wunu Rwot ame loo rwode luŋ, pien marrere a mom lokere perakino nakanaka. En kene ame tio gigi mogo me awura meicel, pien marrere a mom lokere perakino nakanaka. En oketo polo kede ryeko mere, pien marrere a mom lokere perakino nakanaka, en opepeto lobo me wumo pii atut ame tye piny, pien marrere a mom lokere perakino nakanaka, en oketo gigi mogo adoŋo ame ryeny menyo piny, pien marrere a mom lokere perakino nakanaka, en oketo ceŋ me loyo dyeceŋ, pien marrere a mom lokere perakino nakanaka, en oketo dwe kede acer me loyo dyewor, pien marrere a mom lokere perakino nakanaka, en oneko itino kao awobe me Miciri, pien marrere a mom lokere perakino nakanaka; eka te kwanyo jo Icrael oko i akinagi, pien marrere a mom lokere perakino nakanaka; kun kwanyogi pi teko me bade kede ciŋe ame oryeo; pien marrere a mom lokere perakino nakanaka. En opoko nam arema aryo i dyere, pien marrere a mom lokere perakino nakanaka; te miyo jo Icrael kato i dyere naka loka tuŋ-ca; pien marrere a mom lokere perakino nakanaka; ento Parao kede monnyere te miyo mwony oko i Nam Arema pien marrere a mom lokere perakino nakanaka. En ame rik otelo lwakkere i dye tim, pien marrere a mom lokere perakino nakanaka; en ame oneko twoni obakki mogo adoŋo doŋo; pien marrere a mom lokere perakino nakanaka; en daŋ oneko obakki mogo ame rik ŋeye meicel, pien marrere a mom lokere perakino nakanaka; oneko Cikon, ame obedo abaka a jo Amor, pien marrere a mom lokere perakino nakanaka; oneko daŋ Og, ame obedo abaka a jo Bacan, pien marrere a mom lokere perakino nakanaka; omio lobogi oko me alea a lwakkere, pien marrere a mom lokere perakino nakanaka; omio me alea baŋ jo mere ame obedo jo Icrael; pien marrere a mom lokere perakino nakanaka; en ame rik opo pirwa i kare ame doŋ otye arac meicel, pien marrere a mom lokere perakino nakanaka; eka te larowa i ciŋ okworwa, pien marrere amom lokere perakino nakanaka. En ame mio cam baŋ ginnoro luŋ ame tye kwo, pien marrere a mom lokere perakino nakanaka; Pwo wunu Obaŋa me polo, pien marrere a mom lokere perakino nakanaka. Rik obedo piny i ŋet kulo me Babulon, ote kok kuno atek i kare ame opo pi Cion. Oŋabo naŋa opukwa malo, i kor yen ame tye i dog kulo kuno, lo ame onwoŋo omakowa me terowa iyi opii, openyowa ni myero owerrigi werroro, Jo ame odiowa openyowa me werrigi werroro me yomoro cunygi, kun okobo ni, “Werriwa wunu werrogo me Cion.” Wan otwero wero wer a Rwot, i lobo a rok ocele i yore aŋo? Jerucalem we, ka ce wia owil i komi, ciŋa me tuŋ cem myero mit oko! Leba myero mok oko i dana, ka ce mom apo piri, ka mom atamo piri, yin Jerucalem, acalo gin ame yomoro cunya akato ducu! Po pi kare ame Jerucalem oneno can iye, Ama Rwot, icul waŋe i kom jo Edom, Poyo kite ame onwoŋo gin kobo kede ni, “Mumuko wunu apama mere oko, mumuko irereto wunu piny, naka iyi acakki tere!” Yin Babulon, yin ayak! Ŋat ame bino culo kworwa i komi, kede gin ame itimo i komwa, bino bedo i yomcuny! Ŋat ame bino mako itinoni atino, te bedo reretogi i kom kidi, bino bedo i yomcuny! Apwoi kede cunya ducu, Ama Rwot, awero wer me paki naka i nyim cal jogi. Aryebere piny i nyimi i odi acil, ate pako nyiŋi pi marri a mom lokere, pien yin igenne; Pien nyiŋi kede koppi loo jami ducu. Pien rik akok baŋi, yin igamo doga, rik ite medda tekcuny. Obakki luŋ me wi lobo bino paki, Ama Rwot, pien gin doŋ otyeko winyo kop ame yin ikomi ikobo. Gin bino wero wer pi gin ame yin Rwot itio, pien kwogo ame yin Rwot itye kede dwoŋ meicel. Kadi bed yin Rwot ibedo malo kannabor meicel, cite pwod iparo pi ocan ame mwol, ento jo ame wakere, yin iŋeogi oko i kannabor. Kadi bed awoto ame can ogura oko dyere, yin gire pwod igwoko kwona; iryeo ciŋi me juko akemo okworra, ite lara oko i ciŋi me tuŋ cem. Rwot bino cobo yik luŋ ame en tye kede pira; mar meri a mom lokere bedo nakanaka, Ama Rwot. Kur iwek gin ame yin itio i ciŋi ata. Ama Rwot, yin iŋia, ite daŋ ŋeya! Yin iŋea kadi abedo piny onyo aya malo, yin gire iŋea; yin iniaŋ tam ame tye i cunya oko i kannabor. Yin iŋio kwona kede butona piny, iŋeo doŋ aber kite ame an abedo kede ducu, Kudi ame mom ru akobo kopporo, yin doŋ iŋeo koppa luŋ i yore i yore, Ama Rwot, Yin ityeko gura oko dyere tuŋ nyima kede i ŋea, ciŋi mom rwenyo i koma me gwoka, Ŋec ame yin itye kede-nono, malo meicel i tuŋ baŋa, malo meicel, ame an mom aromo niaŋ iye kadi acel. Atwero wot kwene me pono i baŋi? Abino riŋo kwene me riŋo i nyimi? Kadi ayit malo i polo, yin itye kuno! Kadi abut piny i lyel, yin daŋ itye kuno! Kadi atwarre awot malo calo ru-a piny, ate wot bedo i dog nammoro ame tye kannabor meicel, kuno daŋ ciŋi pwod bino tela, ibino bedo tye kuno me konya i ciŋi tuŋ cem, Ka ce akobo ni, “Colpiny en ame myero doŋ wuma, dok lero piny ame atye iye dok oko acol,” colpiny daŋ mom tye acalo colpiny baŋi, i baŋi dyewor rom aroma dyeceŋ; pien colpiny rom aroma i lero baŋi. Pien yin en iyiko dul koma ducu, yin en ame icwea iyi totta. Abino paki, pien yin en ibedo gi-alwora kede me awura meicel! Itio tic me awura okato kare! Yin iŋea aber odoco; yin iŋeo kite ame cogo koma okukuba kede luŋ, i kare ame ocwea iyi totta, i kare ame ocweo koma i muŋ i twon diro adwoŋ meicel, piny i te lobo. Ineno koma kede waŋi kun mom ru ocweo otum, dul koma acel acel tye ocoo oko i bukki, kun dul koma moro mom ru ocweo onwoŋo doŋ imoko kare me kwona oko. Tammi malo nadi, Ama Obaŋa! welgi gire mom romo kwanne kadi acel. Ka ce akobo ni akwano welgi, welgi pol kato kwoyo oko. Ka ce aco i waŋ nino, nwoŋo pwod atye baŋi. An onwoŋo amito ni kono ineko jo areco oko, Ama Obaŋa, me jo ame onyo remo a jo wadgi, rwenyo oko i baŋa, gin jo-nono obedo kobo kop areco i komi, Ama Rwot, otiŋere malo kun okobo kop arac ame balo nyiŋi. Ama Rwot, an mom adago jo ame dagi? Dok cunya mom okwero jo ame mito lweny i komi? An adagogi i cunya ducu; gin tye acalo okworra. Ŋi kwona i diro, Ama Obaŋa, me iŋe gin ame tye i cunya, koŋ itema, me iŋe kan ame tam tye iye. Me inen ka atye ka umo ginoro ame rac, ite tela i yo ame parakino nakanaka. Lara i ciŋ jo areco, Ama Rwot, gwoka daŋ i ciŋ jo ame timo tim me byemi. Ame yiko koppogo areco i cunygi, dok omaro ero lweny tere i tere. Kop ame ya i doggi kec calo kwir a twol, kwir codocodo tye i te lebgi. Gwoka, Ama Rwot, gwoka i ciŋ otim tim areco, gwoka daŋ i ciŋ jo ame timo tim me byemi, gin doŋ otyeko yiko kop meretta. Jo awakere otyeko ciko owicgi kan adin pira, ociko owic kede tol kun omito maka kede, ociko owic i ŋet yo ducu ame kura akura. Akobo baŋ Rwot ni, “Yin ibedo Obaŋana”; cik yiti iwiny kwacca ame abako kede doga baŋi, Ama Rwot. Ama Rwot, ame obedo Rwotta, ka larrena atek ame an ageno, yin ibedo tok me wumo wia i kare me lweny, Ama Rwot, kur imi jo areco gin ame gin omito pe iye yikgi areco cobere. Kur imi jo ame lwenyo i koma loa mi kopgi areco ame gin onwoŋo, omito timo, dok i komgi. Mi loti mac alyet ocorre i komgi, owaŋgi! migi orette i bur atut meicel, ame mom dok oromo yaa. Mi jo ame kobo kop me balo nyiŋ owotegi, bed pe i lobo mi can ru neko jo a kitegi reco oko oyotoyot. Aŋeo ni Rwot pido pi jo ame ocan, dok ŋolo kop kakare pi jo a piny oloo. Ateteni, jo ame kitegi atira bino pwoyi, jo ame cunygi ler, bino bedo i nyimi. Akok baŋi, Ama Rwot, ru bino baŋa oyotoyot! cik yiti iwiny dwona ka akok baŋi, mi kwacca bed calo odok akur ame owaŋo i nyimi me yalli, kede ciŋa ame ataŋo baŋi bed acalo mot ame omio me yalli otyeno. Gwok doga, Ama Rwot, dok inen kite ame aŋamo kede doga me kop. Kur imia aketto cunya i timo gin arac, kwer ribere i jo areco i timo tim areco, dok kur abed wot i jo ame woto timo bal, kur imia aribere kedgi i camo cam amito ame gin omito. Mi ŋat a kite ber onyo goa i cuny me kica, cite kur iwek moo a lo arac gud wia kadi acel, pien an akwai gira kare ducu, atimo mannono, pien adag tim areco. Ka omiogi i ciŋ jo me ŋolo kop, gin bino cako ŋeyo ni kop a Rwot tye ateni. Cogogi obino keto atata i dog lyel, calo kidi ame ka dano obaro kikira atataa i lobo; Ento an gira aciko waŋa i komi, Ama Rwot Obaŋa, ayenyo ka larre baŋi, kur iweka ame mom igwoka. Gwoka me kur amok iyi owic ame gin ocika kede, gwoka daŋ kur amok i boo otim tim areco. Mi jo areco mok i boogi ame gin ociko, ento an abwot ame ginnoro mom otima. Akok baŋ Rwot i dwona aloŋo akok i dwona aloŋo kun abako kede doga baŋe, Acwalo kokona i nyime i dwon aloŋo, kun atitte peko ame atye kede. Ka cunya doŋ odoko agoro oko, yin iŋeo gin ame myero atim. Okworra ociko owic pira, i yo ame an alubo kare ducu. Aloko waŋa aneno tuŋ cem, mom onwoŋo dano moro ame myero konya; mom anwoŋo kannoro ame odoŋ ame aromo riŋo alaro, mom daŋ aneno dano moro ame paro pira. Akok baŋi, Ama Rwot; an akobbi gira ni, yin en ibedo ka larrena, yin en ibedo gin ame opokka i lobo a jo akwo. Tim ber iwiny kokona; pien piny doŋ oloa meicel! Lara i ciŋ jo ame tye ka wuna, pien gin otek meicel okata oko. Kwanya oko i ot kol, me ami pwocca i nyiŋi. Jo ame kitegi atira, bino gura dyere, pien pi berri yin itio keda aber. Winy kwacca, Ama Rwot; winy kwacca ame abako kede doga i nyimi, pi gen ame yin itye kede, gam doga; kite acalo yin kiteni atira. Kur icak ŋolo kop i kom amironi; pien mom tye dano moro akwo ame kite atira i nyimi. Pien akwor tye ka ryemo yora, odia doŋ okato kare, omia doŋ abedo kannacol calo dano ame yam otyeko to con. Mannono omio cunya doŋ odoko agoro meicel, mom dok atye kede ginnoro i cunya kadi acel. Apo doŋ i kom kare mogo ame doŋ okato oko con, ate bedo lwodo kop i cunya i kom gigi mogo ame yin itimo, ginnoro luŋ ame yin itimo bino i tamma. Aryeo ciŋa kun ataŋo baŋi i kare me kwayi, keo me neni omio cunya two atowa calo lobo ame pii mom iye. Ama Rwot, ru ba gamo doga, cunya doŋ amito cot oko! Kur iponna oko ba, naka mia abedo calo jo ame awot donyo piny i lyel. Mia awiny pi marri a mom lokere odiko con, pien an genna tye i komi, Pwonya me lubo yo ame yin imito, pien an acwao kwacca luŋ baŋi. Lara ba, Ama Rwot, i ciŋ okworra! An doŋ atyeko riŋo alaro baŋi. Pwonya me timo gin ame yin imito, pien yin ibedo Obaŋana! Mi cunnyi aber en ame tela, i yo ame oporre arorom! Gwok kwona ba, Ama Rwot, pi nyiŋi, kwanya oko i can i kiteni atira! Pi marri a mom lokere, mi waŋ okworra rweny oko i akina turgi, nek okworra luŋ ityek oko ducu, pien an abedo amironi. Rwot ame obedo ka larrena tek, dok opwo, Rwot ame opwonyo ciŋa i lweny, karacel kede anyira ciŋa luŋ. En obedo ka larrena atek ame ogeno, en obedo cel atek ame apono iye, dok en ame daŋ lara, en tye acalo kwot me gwoko koma, ame ariŋo alaro baŋe. Rok luŋ tye i te loccere Dano kara obedo gin aŋo ame mio ibedo tamo pire? dano amwa-ni obedo gin aŋo ame mio yin ibedo gwoke? Dano rom aroma i yamo me weo, kare me kwo mere daŋ calo tipo ame rweny oko-ni. Ama Rwot, wa polo i dwoggo piny, me iyito piny! gud kom kiddi me yito duny iye! Mi lutkot meny, me okworri keketa oko i ŋwec, celgi ateroni me komgi radde atata. Rye ciŋi i malo kuno, lara, ikwanya oko i pii atut, lara i ciŋ orok, ame kop me goba keken en ame ya i doggi, ame ciŋgi me tuŋ cem kwoŋo ka kwoŋ me goba keken. Abino wero wer anyen baŋi, Ama Obaŋa, abino paki, kun agoo naŋa ame tollere tye apar, Yin en imio loc baŋ obakki, dok yin en ame rik ilaro amironi Daudi. Lara i lak pala lweny ame bit meicel, dok ilara i ciŋ okworra, ame kop me goba keken en ame ya i doggi, dok ame ciŋgi me tuŋ cem kwoŋo ka kwoŋ me goba. Mi itino awobewa bed calo ginapita ame doŋ otyeko doŋo oko, cakere i kare me tinogi, mi anyirawa bed calo pagi ame tye i gul me ot, ame otoŋo me gero paco abaka. Cam myero poŋ apoŋa i derewa, kun wit cam apapat tye iye; rommiwa myero nywal itino tutumia i tutumia, kede dok tutumia apar i bar me kwatwa. Dokwa daŋ myero nya apol meicel, yigi myero kur ony, moro i akinagi daŋ myero kur bed ame mom nywal, koko moro me can myero kur winyere i yo moro ame tye i bomawa. Jo ame kodi gummono bino poto i komgi, tye kede yomcuny! Jo ame Rwot obedo Obaŋagi, tye kede gum! Abino wero wer me dwori, Ama Obaŋana kede Abakana, abino pako nyiŋi nakanaka. Abino pwoyi nino ducu, dok abino pako nyiŋi nakanaka. Rwot dwoŋ meicel, dok myero daŋ pake meicel, dwoŋŋere mom romo kobere kadi acel. Lwagi jo me kare i kare bino pako tic ame yin itio baŋ itinogi, kun otittigi ticcogo adoŋodoŋo ame yin itio. Cunya bino lwodo kop i kom ticcogo me awura ame yin itio, kede i kom kwogo me dwoŋ a locci. Jo bino rabo kop i kom ticcogo ame iyiliyili ame yin itio, an daŋ abino titto pi ditti. Gin bino miyo berri rwo meicel i kabedo ducu, kun daŋ owero i dwon aloŋo pi kiteni atira. Rwot akica dok maro dano, akemo mom mako oyot, dok marrere a mom lokere, dwoŋ meicel. Rwot ber baŋ jo ducu, dok kica make i kom ginnoro luŋ ame en oketo. Ginnoro luŋ ame yin itio, bino pwoyi, Ama Rwot, dok joni luŋ acil bino paki. Gin bino kobo kop i kom kwogo me locci, kun daŋ otito pi twer ame yin itye kede, me jo luŋ ŋe twer me ticci, kede kwogo adwoŋ ame tye i locci, Locci obedo loc ame perakino nakanaka, pi lwagi a jo me kare ducu, Rwot genne i ginnoro luŋ ame en kobo, dok daŋ kica mako ticcere luŋ ame en tio. Rwot mako jo ame mito rette piny, dok mio jo luŋ ame piny oloo ya malo. Jo luŋ ciko waŋgi i komi, yin imiogi cam i kare ame gin mito ikokome. Yin iyaro ciŋi, imio ginnoro akwo luŋ yeŋ. Tic a Rwot luŋ tye atira, ginnoro luŋ ame en timo mar mom rwenyo iye, Rwot ceggi acega baŋ jo luŋ ame kok baŋe, jo ame kok baŋe iyi ateni. En cobo miti a jo luŋ ame lwore, dok daŋ winyo kokogi, te larogi. Rwot gwoko jo luŋ ame mare, ento otim tim areco luŋ en bino nekogi oko. An abino pako gira Rwot kare ducu me ginnoro akwo luŋ pak nyiŋe nakanaka. Pak wunu Rwot. Pak wunu Rwot, yin tipona! Abino pako Rwot pi kare me kwona luŋ, abino wero wer me pako Obaŋana kun pwod akwo, Kur ibed keto genwu i kom rwode, kur iket genwu i kom dano amwa-ni ame mom romo konyowu kede ginnoro. Ame ka kwo mere oya oko i kome dok oko i lobo, yikkere luŋ ame yam en oyiko te gik luŋ karacel kede i ninonono ikome. Dano ame nwoŋo kony i baŋ Obaŋa a Yakobo tye kede winyo, ame gennere tye i kom Rwot Obaŋa mere, ame oketo polo kede lobo kede nam, kede jami luŋ ame tye i yigi, ame gennere mom rwenyo kadi acel ame ŋolo kop a jo ame owuno kakare, dok mio cam baŋ jo ame kec nekogi. Rwot gonyo jo ame otweo oko i ot kol, en yabo waŋ jo ame waŋgi oto, Rwot mio jo ame piny oloo ya malo, en maro jo ame kitegi atira. Rwot gwoko arok ame bedo i lobo a jo ocele, en konyo mon a coggi oto kede itino kic; ento yik a jo areco, en balo oko, mom te cobere. Rwot bino loc gire nakanaka, Obaŋani, yin Cion, perakino pi lwagi jo me kare ducu. Pak wunu Rwot! Pak wunu Rwot. Pien wero wer me pako Obaŋa, ber, wero wer me pake, ber, pien en obedo akica, Rwot tye ka gero Jerucalem odoco; en coko jo Icrael ame yam okeketa atata dwokogi cen paco. Jo ame cunygi cwer, en caŋogi, dok daŋ tweo waŋ burgi. En moko wel acer ducu, dok daŋ cakki ŋat acel acel i akinagi nyiŋe. Rwotwa dwoŋ dok tek meicel; niaŋŋere tut a mom kobbere. Rwot tiŋo jo ame onyono piny malo, otim tim areco, en retogi piny i lobo. Wer wunu wer me pwoyo Rwot, wer wunu wer me pako Obaŋawa, kun igoo wunu agoa i naŋa opuk, En wumo polo oko kede pol, en yiko kot ame cwe i lobo, dok en mio lum doŋo i lobo obedo kidikidi. En mio leyi me tim camgi, dok pito daŋ itino agak ame kok baŋe, Teko aguragura mom en a yomoro cunye, akadi tyen dano ame aŋwec daŋ mom yomoro cunye; Ento Rwot cunye yom i kom jo ame lwore, kede i kom jo ame geŋo mar a mom lokere, Pak Rwot, yin Jerucalem! Pak Obaŋani, Yin Cion! Pien en ame mio nyony me cego doggolani bedo atek, dok en daŋ ame mio itinoni gum. En ame mio kuc bedo tye i waŋ apokki me loboni, dok en ame daŋ piti kede ŋano aber ame kato luŋ. En amio cikkere i lobo, koppere dwir meicel. En mio pee makere atar calo yer romo, dok keto bwo pee oko atata calo buru. En cwalo pee piny, calo kwon ame oŋiŋido, na ame twero cuŋ i ŋico ame en ocwao? En a daŋ cwao koppere te miyo pee meye oko, miyo yamo kodo, pii te mol oko. En kobo koppere baŋ Yakobo, cikkere luŋ kede ginnoro luŋ ame en ociko, en tito baŋ jo Icrael. En mom obedo tic i rokkoro ocele kittono, mom tye rokkoro ocele ame ŋeo gin ame en ociko luŋ, Pak wunu Rwot. Pak wunu Rwot! Pak Rwot, yin polo, pake i malo kuno, Wun omalaika mere luŋ, pake wunu, kede wun dul monnyere daŋ, pake wunu! Wun ceŋ kede dwe, pake wunu, wun acer ame ryeny, pake wunu! Pake wunu, wun polo ame tye malo twal, pake wunu, wun pii ame tye malo i polo! Ginnoro luŋ myero pak nyiŋ Rwot! Pien en ociko acika keken, gin te bedo tye. En te ketogi i kabedogi me bedo iye, waŋ i waŋ; en te moko waŋ apokkigi oko ame mom oromo kato. Wun jami luŋ ame tye i lobo, pak wunu Rwot, wun nyaŋ adoŋo me yi nam, kede wun nam atut adoŋodoŋo, wun mac kede pee, toyo kede ŋico, kede wun yamo ajuru ame kodo atek pi cobo gin ame en omito! Pake wunu, wun kiddi kede lobo luŋ obedo kidikidi, wun yen luŋ ame nyako nyiggi kede yen cedar! Wun leyi me tim kede dok luŋ, gin akwo ame lak alaka i lobo, karacel kede winy ame twarre malo! Pake wunu, wun obakki me lobo karacel kede rok luŋ, wun rwode kede oloc luŋ me lobo. Awobe kede anyira karacel, jo oti kede jo atino! Pak wunu nyiŋ Rwot, pien nyiŋe keken en ame dwoŋ alo luŋ; kwogo mere daŋ, kato polo kede lobo oko. En doŋ omio lwakkere odoko atek, en ame omio jo mere ducu myero pake, jo Icrael pire tekke meicel. Pak wunu Rwot. Wer wunu wer anyen baŋ Rwot, wer wunu wer me pake i cokere ajo acil! Wun jo Icrael, cunywu myero bed ayom i kom Obaŋa ame oketowu, wun jo Cion, myero ibed wunu i yomcuny pi abakawu. Myero ipak wunu nyiŋe kun imyelo wunu amyela, dok myero igo wunu bul kede naŋa me pake. Pien Rwot cunye yom i kom lwakkere, en mio jo amwol kwogo i loyo lweny, Wun jo ame gene, natte wunu i kwogo, myero wer wer me yomcuny iyi aramagi. Myero ower wer me pako Obaŋa atek i dwon aloŋo, dok omak pala romo ame lebe bit ryoryo i ciŋgi, me culo kwor i kom rok ocel, kede dok me pwodo lwak a rok apol, me tweyo obakkigi oko kede jegere, kede tweyo jogi adoŋo ame oworo luŋ i nyor me nyonyo, kede ŋolo kop i komgi kite ame yam ocoo! Man en kwogo pi jo mere luŋ ame gene. Pak wunu Rwot. Pak wunu Rwot. Pak wunu Obaŋa kabedo mere acil; pake wunu daŋ i polo mere atek. Pake wunu, pi gigi mogo adoŋodoŋo ame en otio; pake wunu kite acalo en dwoŋ kede wok-ki! Pake wunu, kun ikuto wunu apel pake wunu i naŋa kede naŋa opuk. Pake wunu ajaa kun daŋ imyelo wunu, pake wunu okeme kede nyamulere. Pake wunu i bul ame kok aloŋo, pake wunu atimo ame kok i dwon aloŋo meicel. Myero ginnoro akwo luŋ ame we, pak Rwot! Pak wunu Rwot! Magi carokop a Culeman, wot a Daudi, abaka me Icrael. Carokop magi konyo dano me ŋeyo ryeko kede pwony aber, kede niaŋ koppogo ame te koppere tut meicel. Dok twero pwonyo dano me bedo aryek i ginnoro luŋ ame en tio, kun kite atira, ŋolo kop atira, dok tero jo luŋ arom aroma. Pwonyo ŋat a mom i ŋeccoro doko dano ame ŋeo piny, mio jo atino bedo jo ame ŋeo gwoko kitegi i gin ame otimo. Konyo ŋat aryek me medo pwonyere mere, dok mio ŋat ame niaŋ atut ŋeo gin ame myero etim, me niaŋ te kop me carokop kede gigi mogo ame okobo kop i komgi, kede kop a jo aryek, karacel kede icina mogo ame oceko, Dano cako bedo kede ŋec, ka ce lworo Rwot, jo amiŋ mom paro pi bedo kede ryeko, dok okwero pwonyere oko. Atinna, winy gin ame pappi pwonyi kede, kur daŋ ikwer winyo pwony a totti; pien pwonygi twero yubo kiti bedo aber, calo tok ame iketo i wii, onyo tigo ame iruko i ŋuti me miyi nen aber. Atinna, ka ce jo areco obwoli, kur iye ba, ka ce gin okobbi ni, “Biye iwot kedwa, me owot oki dano-moro onek oko olib lo a mom i bal onek oko, me omwonygi akwo kite ame lyel mwonyo kede jo, omwonygi alutu kite ame to mwonyo kede dano, Nen kit jami luŋ me wel bino doko megwa, jami ame oyako bino poŋ i udiwa oko; biye inotte kedwa, wan luŋ obino noto limwa karacel.” Atinna, kur inywak yo kedgi, kur ilub yorgi kadi acel. Kodi jo-nono tyengi dwir me wot timo bal, komgi mit ata i onyo remo a jo. Konyo kara ŋo me ciko tol, kun winyo ame iciko tye aneni? Kodi jo-nono obuto okio remogi kengi, gin olibo gigi kwogi kengi, Mannono en kite a jo luŋ ame yako jami a jo tetek timgi miogi orwenyo kwogi. Koŋ iwiny wunu ba lwoŋo a ryeko i dye yo; dwone loŋo aloŋa i cuk-gu: naka atot i wi cel malo; naka i dogcel luŋ ame woto boma en kobo koppere iye ni, “Kara ibino mito wunu bedo amiŋ kittono pi kare a rom mene wun jo ame mom i ŋeccoro? Ibino bedo lelo wunu i ŋalo jo naka awene ba, wun oŋal jo kede jo ame dag ŋec? Winy wunu koppa ka ce ajukowu; nen ba, an abino tito kop ame tye i cunya luŋ, abino miyowu iŋeo wunu tamma. Pien an alwoŋowu, wun ite kwero wunu winyo oko, aryeo-gu ciŋa, cite ŋattoro mom oketo cunye iye. Ikwero winyo wunu gin ame apwonyowu kede luŋ, mom iye wunu ni ajukwu kadi acel; Pi mannono ba, an abino nyerowu anyera ka can opoto i komwu, abino yetowu ayeta kare ame lworo doŋ ocirowu oko; kare ame lworo tye awunowu calo yamokot, ame can doŋ abino i komwu calo yamo ajuru, kun itye wunu i rem kede cwercuny adwoŋ, Kare-nono en ame obino cako lwoŋa kede, cite mom gira abino gamo kadi acel; obino yenya atek meicel, cite mom gire obino nwoŋa, Pien gin gigi mom omito bedo kede ŋec, dok mom oyero bedo kede lworo i kom Rwot. Mom igamo wunu pwonnya moro kadi acel, kun mom iye wunu ni ajukwu kadi acel. Mannono bino miyogi obilo adwoggi me yogi-nono, obino bedo i wi timgi areco-nono. Pien jo a mom i ŋeccoro to pi lubo yo a mom omito, gin oto pi yomcunygi a mom oparo kede piny. Cite ŋat ame bino winyo koppa, bino bedo i gin ame gwoke, bino bedo aber aboŋo ginnoro ame en lworo.” Atinna, ka ce iwinyo gin ame apwonyi kede, kun igwoko cikka luŋ i cunyi, kun imio yiti bedo abit i winyo kop me ryeko, dok daŋ iketo cunyi me niaŋ; ka ce ibino kok pi niaŋ atut, kun icwalo kwacci pi bedo kede ŋec, ka ce ibino yenyo calo ryal, kun iyenyo calo lonyo ame okano; mannono bino miyo iŋeo kop i kom lworo Rwot, dok daŋ ibino bedo kede ŋec i kom Obaŋa. Pien Rwot gire en ame mio ryeko, ŋec kede niaŋ ya gire i kop ame en kobo. En kano ryeko aber meicel pi jo ame cunygi atira, en bedo kwot ame gwoko jo a lube i cuny aler. En gwoko jo ame ŋolo kop atira, gwoko daŋ jo ame omio kwogi i ciŋe. Mannono bino miyo iniaŋ gin ame atira, kede tero jo arorom, ite lubo yo ame omito keken, Pien ryeko bino donyo i cunyi, cunyi bino bedo yom me bedo kede ŋec. Bedo kede ŋec atut bino gwoko kwoni, niaŋ aber bino gwoki. Bino lari i yo me timo gin arac, kede i ciŋ jo ame dwanyo kop, jo ame weko bedo i kite atira, kun omito wot i piny acol, jo ame yigi yom i timo gin arac, jo ame lelo gigi alela i tim arac. Gin jo ame mom genne kadi acel, ame lubo yo a mom atira, Bino konyi me loyo tam a dako ame alaya, ame bwobwolo yin i kop amit me wayo tammi i kome, dako ame weko cware ame enyomere kede a pwod tidi, kun wie wil oko i gwoko cikere Obaŋa mere; dako ame ka iwoto i ode nwoŋo iyenyo giri to, yo ame en lubo teri ka i lobo a jo oto, Mom tye ŋattoro ame donyo baŋe te dok nwoŋo yo me dwogo cen akadi nwoŋo yo me dwogo i yo me kwo, Pi mannono ba, myero ilub yo jo a kitegi atira, kur iya i yo a jo a kitegi atira. Pien jo a cunygi atira bino bedo i lobowa, jo a cunygi ler bino bedo kuno. Ento jo a kitegi reco waŋgi bino rwenyo oko i lobogi, wegi adote daŋ obino puputo oko acalo doo. Atinna, myero wii kur wil i kom pwony ame apwonyi kede, kur imi cikka rweny oko i cunyi ba; pwonya-nono bino miyo ibedo i lobo pi mwakki apol, kun itye i kuc kede lonyo adwoŋ. Kur iwek mar kede ateni ya oko i cunyi, tim ber itwegi i ŋuti, coogi kom i cunyi twal. Mannono bino miyo Obaŋa kede dano pwoyi, dok obedo kede tam aber komi. Gen Rwot kede cunyi ducu, kur ijeŋere i kom ryeko ame itye kede. Po pi Rwot i ginnoro luŋ ame itio, en bino miyo yoni bedo apwot. Kur ibed tamo piri keni ni iryek, cite myero ilwor Rwot, kun iweko timo gin arac. Mannono bino bedo yat me juko rem i komi, kede gin ame meddi teko. Nyut woroni baŋ Rwot i ginnoro luŋ ame itye kede, karacel kede cammi ame ogeo cek: mannono bino miyo deroni poŋ i cam adwoŋ, koŋo olok anyen bino bedo adwoŋ okato kare oko. Atinna, pe myero ica pwony a Rwot ba, kur daŋ iol ka ce en bedo juki, pien Rwot juko jo ame en maro, kite ame apap juko kede wode ame cunye tye i kome. Ŋat ame tye kede ryeko tye kede yomcuny, karacel kede ŋat ame ŋeo ŋiyo te kop kakare, Pien gin a ya iye aber kato en ame lim kelo oko; dok agoba mere bup kato me lonyo oko. Gin luŋ obedo me wel akato tigo ŋut amimila oko, mom tye ginnoro ame imito ame otwero poro kede. Perakino tye i ciŋe tuŋ cem, eka lonyo kede kwogo te bedo i ciŋe tuŋ cam. Yo mere opoŋ i yomcuny, kuc daŋ dwoŋ iye atek. En obedo yat me kwo baŋ jo ame omako atek, jo ame olido odoco olwoŋo ni wegi yomcuny. Ryeko a Rwot en omio acakki te lobo ocibere; polo daŋ omoko atek odoco pi niaŋŋere atut; pii i te lobo ocako kukunya pi ŋec a Rwot; pol daŋ ocako onyo pii i bolo pi ŋeccere. Atinna, gwok ryeko aber kede ryeko ame mio igwokere i gin ame itio kur imigi orweny oko i baŋi ba, pien bino miyo ibedo i kwo i cunyi, dok acalo rukkoro me kwogo ame iruko i ŋuti. Bino miyo iwoto aboŋo ginnoro ame yeli, aboŋo twomere i ginnoro. Mom ibino bedo kede lworo moro ka ibedo piny, ibino nino giri aber meicel ka ce ibuto. Kur ibed kede lworo pi cannogo ame poto atura, onyo to ame poto i kom jo areco; pien Rwot mom bino rwenyo i ŋeti me gwoki, en bino gwoko tyeni mom moko i owic. Kur ikwer timo gin aber baŋ jo ame yin myero ikony, ka ce yin itye kede twer me tiyo. Kur ikobbi awoti ni, “Koŋ iwot ite dwogo adwoga, abino miyi diki,” aco kun gin ame en amitonono tye baŋi. Kur ibed kede yikkoro me timo gin arac i kom awotti, aco, en bedo i ŋetti kun tye kede gen i komi. Kur ipyem i ŋattoro aboŋo te kop, kun en mom otimo ginnoro arac i komi. Kur nyeko maki i kom lo ame abyemi, kur daŋ ipotto kite moro kadi acel; pien Rwot dag jo ame kitegi ogom, cite en geno jo ame cunygi ler. Rwot ceno paco a jo areco, ento mio gum i paco a jo a kitegi atira. Rwot mom mito jo ame oŋale, ento en nyuto kica mere baŋ jo ame mwol. En mio jo aryek nwoŋo kwogo, cite omiŋo en miogi lewic. Itino, winy wunu gin ame papawu pwonyowu kede, keto wunu cunywu i winyo koppere, me iniaŋ wunu atut; gin ame an apwonyowu kede ber, myero kur iwek wunu lubo. I kare ame rik an pwod atin atidi, ame pwod atye i ciŋ onywalla, kun pappa kede totta mara meicel, pappa rik obedo pwonya kun kobba ni, “Mi kop ame an apwonyi kedeni kur rweny i cunyi; kur imi cikka rweny i cunyi ba, me ibed kwo. Kur imi wi wil iye, kur daŋ iwek gin ame apwonyi kede rweny oko i cunyi. Nwoŋ ryeko kede niaŋ atut. Myero ibed ŋat ame maro ryeko, pien bino gwoki; myero imare, pien bino gwoki aber. Gin me agege ame myero ige nwoŋo, en ryeko; ketto cunyi daŋ me bedo kede niaŋ atut a kato jami ducu. Mar ryeko, pien bino miyi ibedo twon lo moro adwoŋ meicel; ka ce ilido aber, bino miyo jo keto kwogo i komi. Ryeko bino miyo inwoŋo kwogo aber, bino miyo inwoŋo twon kwogo adwoŋ meicel.” Atinna, myero iwiny koppa, dok daŋ imak i cunyi, me wek iperakino i lobo kare alac. An atyeko pwonyi doŋ oko i yo me ryeko, atyeko nyutti doŋ yo aber me aluba. Ginnoro gire mom bino riye i nyimi i kare ame itye ka wot; ginnoro daŋ mom bino twomo tyeni i kare ame iŋwec. Gwok gin ame apwonyi kede atek, kur imi rwennyi; gwok aber meicel, pien mano en kwoni. Kur ilub yo jo areco, dok daŋ kur ilub kite otimo tim areco, Wek yo-nono, kur ilubi; pokere oko i yo-nono ite kato giri, Pien gin gigi mom onino ka mom ru otimo ginnoro arac; nino remogi ka mom ru omio ŋattoro opoto i bal. Timo gin arac yeŋogi calo cam, tim me byemi mittigi calo koŋo olok ame gin omato. Ento yo a jo a kitegi atira ryeny medde ameda, ame ryeny atek tuno ka piny doŋ odoko aler, Aco yo a jo areco col icuc calo dyewor; ka ce ogatte mom daŋ oŋeo gin odipogi. Atinna, myero iketo cunyi i winyo gin ame apwonyi kede; tim ber iwiny kop ame an akobo, kur imi rweny oko i tammi ba, gwok aber meicel i cunyi, Pien kelo kwo baŋ jo ame onwoŋo, dok doko yat me caŋo komgi. Gwokere i kom tam ame itamo i cunyi, pien kwoni ocuŋ ka i gin ame yin itamo, Kur ibed kobo koppogo a mom atira, kopporo a mom tye kakare myero kur ya i dogi, Cik waŋi cuŋ atira i kom gin ame tye i nyimi, kur ilok waŋi kannoro ocele. Keto cunyi iyo ame iwot iye keken, mannono bino miyo gin ame itiyo ducu bedo atira. Pe igak tuŋ cem onyo tuŋ cam; ento myero kur itim gin arac. Atinna, keto cunyi me winyo kop me ryeko ame akobbi, cik yiti me winyo niaŋ atut ame atye kede, me wek ibed ŋat ame ryek, me kop ame ya i dogi bed ame nianere. Pien kop ame ya i dog dako ame alaya lim calo kic, koppere mit calo moo; ento i agikki mere doko kec calo ipio, bit calo pala bat. Dako-nono bino teri naka ito; yo ame en lubo woto piny i lyel. En gire mom paro pi lubo yo ame tero jo i kwo, en bedo lubo yo atata kun nwoŋo mom ŋeo ka elubo yo ame omito. Doŋ ba, atinna, aman doŋ myero iwiny koppa, myero kur wi wil lubo kop ame akobo. Yin myero ibed bor i dako ame alaya, kur daŋ itun i doggola me ode; naka bino miyo oworo jo ocele kakari, eka jo a mom okica te neki oko, kun kare me toni mom ru oromo; naka mio lo moro ata nya i lonyoni oko, eka gin ame ibedo tic atek pire, te kobo oko i udi a jo ocele. Bino miyo icur atek i kare me toni, i kare ame riŋo komi doŋ ojuŋere oko; bino miyo ikobo ni, “Piŋo kara rik akwero winyo pwony ame opwonya kede, ate cayo daŋ juk ame ojuka kede? Mom abedo winyo gin ame opwonnya rik pwonya kede, akwero tero yita oko baŋgi. Aco koŋ doŋ inen kite ame nyiŋa doŋ rac kede baŋ jowa luŋ ame ocokere karacel.” Gum ame ibino nwogo pi bedo kede dakoni keken Mat pii me taŋini keken, kede pii ame molo i akoŋŋi. Kur imi pii me taŋini mol oko teŋe, kur imi poŋ atata i dye yo. Gwok bed meri yin keni, ento kur imi bed me konyo jo ocele. Gum myero bed i kom dakoni, yii myero bed ayom i kom dakoni ame inyomo i kare me tinoni, waŋ pii aber en dakoni amwonya ame kweo cunyi, ber a dakoni myero bed ame yomoro cunyi i kare ducu, marrere myero lo kwoni me kare luŋ. Atinna, piŋo kara iweko dako ame alaya loo kwoni oko? Piŋo kara ber a dako ocele en ame dok yomoro cunyi? Pien Rwot neno kwo a dano acel acel, en neno kan ame en woto iye luŋ. Bal a lo arac tye acalo owic me cike, bal ame en timo-nono en ame en dok moko iye, En bino to pien mom romo jukere kene, pi twon miŋo adwoŋ ame en tye kede, mio en rwenyo oko. Atinna, ka ce icikere me culo baŋya awotti, ka ce iye jeŋo giri moro pi ŋattoro a mom iŋeo; Kop ame ikobo-nono nwoŋo doŋ odoko owic piri, nwoŋo doŋ imoko oko kop ame oya i dogi, Pi mannono ba, atinna, myero itim kit man, me ilarre, pien yin nwoŋo itye ite twero awoti-naca. Myero iru wot baŋe, me ibak dogi, me en gonyi oko. Kur inin ba, kur imi waŋi ba; lar kwoni calo atil ame laro kwo mere i baŋ twon adwar oken, kite ame winyo twarre kede oko iyi tol adwar, Yin awackom myero inen kite ame mori tio kede; nen gin ame gin tio aber me ibed aryek. Gin tye kede rwottoro ame kwaogi, mom daŋ otye i kit atelloro ducu me loyogi, gin yiko camgi kuro kare me oro, ocoko kit cam apapat i kare ame jo tye akayo kac, Kara yin awackom ibino bedo buta abuta pi kare arom mene? Ibino co i waŋ nino awene ba? Koŋ ibut inin giri do, dol ciŋi giri me iwe, can bino poto i komi kite ame ayak poto kede i kom dano, kec bino poto i komi calo ŋat orukere oko me lweny. Lo arac ame kwo mere mom ber, bedo rimo piny i kop me goba, kun mimio waŋe atata, coo-gu piny i tyene, cicimo daŋ piny atata i nyako ciŋe. Kodi dano-nono cunye col kun opoŋ i tam areco keken, atub jo kare luŋ. Kodi dano-nono can poto i kome atura, te tur odoco a mom dok romo ya malo. Rwot dag jami aromo abicel, tye jami abiro a Rwot mom mito atwal. En dag lo ame bwono jo i waŋe, dago ŋat ame kobo kop me goba, kede ŋat ame neko jo a mom i balloro. En dago lo a cunye opoŋ i tam me timo gin arac, kede ŋat ame ru yutte ayuta me wot timo gin a mom ber. En dago acaden ame kobo kop me goba kare ducu, kede lo ame ticcere obedo me tubo omego. Atinna, gwok cik ame pappi ociki kede, kur daŋ ikwer gin ame totti opwonyi kede. Pwonygi-nono myero bed i cunyi kare ducu, tim ber itwe oko i ŋuti. Pwonygi-nono bino bedo gin ame teli i wotti, dok bino gwoki kare luŋ ka ibuto piny, bino daŋ kop kedi ka doŋ ico i waŋ nino, Pien cik tye acalo tara, aco pwony te bedo calo ceŋ, pwony me juko dano en obedo yo me kwo, ame konyi me gwoki i kom mon a kitegi reco, kede mon ame kobo kop amit me waya tammi, Kur imi ber a kodi monnono bwoli ba, akadi miyo nenogi wayo tammi. Alaya omio ka ogati acel keken ote codo kede, ento codo dako a lo ocele twero balo kwo a dano ikome. Dano twero kwanyo mac te keto i kore, eka mac mom te waŋo boŋo mere? Onyo dano twero wot i kom mac i keno, eka tyene mom te waŋ? Kodi cannono daŋ nen i kom lo ame woto buto i dako awottere; mom tye ŋattoro ame gudo dako awottere te bwot a mom cannono opoto i kome. Jo mom cao akwo ka okwalo cam me acama, pi cobo mittere, kare ame kec nwoŋo oneko? Aco ka ce omako, en culo waŋe tyen abiro twal, culo waŋe i jami me ode luŋ. Lo a timo codo cot obedo dano a wie mom tio, lo atimokodi timmono nwoŋo onekere kene. Gin a dano-nono nwoŋo en awano kede lewic, lewiccere mom bino rwenyo atwal. Pien nyeko mio dano ger atek, dano mere ka oero lweny mom jukere, En mom ye ni cule kadi acel, akadi imi twon mot arom mene akemo mere mom kwe. Atinna, myero wii kur will koppa, kan cik ame apwonyi kede luŋ calo lonyo a pire dit. Myero kur wii wil i cikkono me ibed kwo, gwok gin ame apwonyi kede, kite ame igwoko kede, toŋwaŋi. Kur imigi orweny i ciŋi ba, coogi kom i cunyi twal. Kobbi ryeko ni, “Yin ibedo aminna”, aco niaŋ atut myero ilwoŋ ni twon awotti ame imaro. Mannono bino konyi me gwoki i kom dako ame alaya, kede loyo tam a mon ame kobo kop amit me bwoli. Pien i kare ame abolo waŋa oriŋo naka oko twal, ate neno naka lwak awobe atino a mom i ŋeccoro kadi acel, waŋa te cop i kom awobi moro i akinagi kuno, awobi ame wie mom tio kadi acel. En onwoŋo tye awot i yo i ŋet ot a dako-nono, en te lubo yo ame woto i ode, wi otyeno ka ŋa beo-nu, iwor ame piny doŋ odoko acol oko. Nen ba, dako moro te rwatte kede, kun orukere calo alaya ikokome, dok cunye onwoŋo opoŋ i kop amit me bwolo co. En onwoŋo dako a mom a lewic kadi acel, ame woto atata, tyene mom mito bedo paco; irwatte kede i yo i caa-ni, ŋit dok ineno icuk, mom rwenyo iyi akari yo pi kuro co. Ka oneno ico obino, poto i kome te donyo jwiyo leme, kun lewic mom i wie, te kobbe ni, “An tin ayalo Rwot i mot aŋola, acobo daŋ cikere me kwoŋŋa oko; en woki doŋ atye ayenyi, ayenyi meicel, ber doŋ anwoŋi. Atyeko doŋ peto cuka moro aber i kabutona, cuka ame raŋi mere mwonya meicel, ame akelo i Miciri. Aonyo daŋ twon moo moro akur meicel i kabutona, akikiro moo murra kede cinaman-gu iye. Bye owot oyomoro cunywa iye naka odiko; me ocob mitwa kede yomcunywa. Cwara gire tin pe, owoto gire oko i weno kannabor. En omako cao limmere owoto kede, en adwogo paco ame dwe doŋ oleŋere oko.” Dako-nono te bedo bwobwolo lo-nu kun wae momot i kop amit, naka te loyo tammere oko. Oyotoyot ico te cako lubo yo dakonono oko, calo twon ame apeyo wot neko, onyo twon apoli ame omoko i bwo, tuno waŋ ame atero ocobo emanyere pel, calo winyo ame ariŋo wot moko i tol; en mom ŋeo ni kodi timmono bino miyo erwenyo kwo mere. Aman doŋ ba, wun itino, winy wunu koppa, keto wunu cunywu me winyo kop ame akobbiwu. Cunywu myero kur bwolwu me lubo kodi kit a dako-nu, kur igak, ilub yore; pien dako-nu omio co apol oto; nen ba, twoni co ame en oneko pol ata. Ot ame en bedo iye-nu obedo doggola me donyo piny i lyel; obedo yo ame tero jo naka i to. Koŋ iwiny wunu kite ame ryeko tye alwoŋo kede, niaŋ atut daŋ amito ni winy dwone. I wi tur luŋ ame tye i ŋet yo, en nwoŋo tye ocuŋ i dye yo luŋ; i dog cel me donyo i boma, en nwoŋo tye alwoŋo i ŋet doggola me boma ni, “Wun jo, an alwoŋowu do, an alwoŋo jo luŋ aluŋa. Wun jo a mom ryek, bed wunu jo oteggo ba, wun jo amiŋ, keto wunu cunywu ba, Winy wunu kop abeco ame akobbiwu, kop luŋ ame an abino kobo obedo kop ame tye atira, pien kop ateni keken en abino donnyo i doga, leba kwero kobo kop ame mom tye kakare. Kop ame an akobo luŋ obedo kop ame tye atira, mom tye moro iye ame odwalle onyo ame ogom. Koppa luŋ tye atira baŋ ŋat ame niaŋ atut, winyere aber baŋ jo ame tye i ŋec oromo. Gam wunu gin ame an apwonyowu kede akaka gamo lim, yer wunu ŋec akaka yero lonyo. Ryeko malo meicel kato gigi mogo me wel oko, mom tye ginnoro ame imito wunu ame oromo poro kede. An aryeko ame atye i niaŋ atut meicel, atyeko nwoŋo daŋ ŋec dok aneo gwoko, Ŋat a lworo Rwot, dag timo gin arac. An adag awaka, dworre ken, adag yo ame tero dano i timo gin arac, karacel kede kobo kop a mom atira. Atye kede twer me yiko tam kede me keto i tic, atye i niaŋ atut kede teko. An en akonyo oloc i ticgi me loc, an en amiogi oketo cik a tye atira. Kit aloccoro luŋ me lobo nwoŋo kony i baŋa, karacel kede odoŋe luŋ me wi lobo. An amaro jo ame mara, jo ame yenya i tekogi luŋ nwoŋa gire. Lonyo kede kwogo nwoŋere baŋa, lonyo kede perakino, karacel kede kwo aber meicel. Gin ame inwoŋo wunu i baŋa ber kato jabu oko, kadi jabu ame olio acil meicel, kato akadi ryal ame oyero ayera. An alubo yo me kite atira, ame en yo ame oŋolo iye kop kakare, amio lonyo baŋ jo ame mara, kun amio lim poŋ apoŋa i udi me kano limgi. “Rwot ogeo keta i kare me cako ticcere, en ogeo tiya an ryeko. I kare aconnaca rik ogeo keta an kena, con meicel ame mom ru oketo lobo. An ageo bedo tye ame nam adoŋo daŋ pwod pe, pii me akoŋ daŋ onwoŋo mom ru ocako mollo oko. An ageo bedo tye ame kiddi-gu daŋ pwod pe, lobo obedo tutur-gu daŋ pwod pe, kare ame Obaŋa mom ru oketo lobo kede potti luŋ iye, akadi apua ame ogeo bedo tye i lobo. I kare ame en keto polo onwoŋo an doŋ atye, ame egoo lain omano nam adwoŋ, ame en mio polo cuŋ i kabedo mere malo, kun mio wan pii tutuca i nam adoŋo. I kare ame en rik keto kan ame nam myero gik iye, me pii kur mol atata me balo cikkere, kede i kare ame keto acakki me te lobo ducu, an onwoŋo daŋ atye, kun atye i ŋete acalo adiro me tic, kun alelo atek meicel pi bedo i lobo ame en oketo, cunya daŋ onwoŋo yom meicel i kom otino a dano. Doŋ aman ba, wun itinona, winy wunu koppa, jo ame lubo yora bedo jo a cunygi yom. Winy wunu gin ame opwonyo me ibed wunu aryek, myero kur ikwer wunu pwonyere ba, Jo ame winyo koppa bedo jo ame cunygi yom, nino i nino obedo kuro gigi dogcella, kun obedo i doggolana nino ducu. Ŋat ame onwoŋa, nwoŋo doŋ onwoŋo kwo, cuny Rwot bino pwoye; ento ŋat ame pe onwoŋa, nwoŋo owane gire oko kene, ŋat ame daga nwoŋo maro to.” Ryeko doŋ ogero gire ode oko, en otyeko keto iye pagi a romo abiro. Riŋo me arama mere daŋ doŋ oyaŋo oko, koŋo olok daŋ doŋ onyobo oko, jami luŋ doŋ tye oketo oko i wi meja. En ocwao doŋ aŋeca mege me wot lwoŋo jo, i kabedo mogo ame otiŋere malo i boma. “Biye wunu kan, wun jo a mom ŋeo ginnoro!” Aco baŋ jo ame wigi mom tio en kobo ni, “Biye icam wunu kwon baŋa, imat wunu koŋo olok ame anyobo-ni, Wek wunu miŋo bedi, me ibed wunu kwo, me ibed wunu jo ame tye kede niaŋ atut.” Ajuk won aŋale, oyeto ayeta, aco ajuk otim tim areco nwoŋo awano. Kur ijuk won aŋale, pien bino dagi oko, juk ŋat ame ryek, en bino mari. Pwony dano aryek, ryeko mere bino medde amedda, pwony ŋat a kite atira, ŋeccere bino medde ameda. Dano cako bedo kede ryeko ka ce lworo Rwot, dano ame ŋeo Ŋat Acil bedo kede niaŋ atut. Ryeko mio kare me kwoni medde ameda, mio mwaka me kwoni medde bedo abup. Ka ce iryek, ryeko-nono bino konyi yin i komi, aco ka ce yin aŋale, aŋale bino kelli can, Dako amiŋ da meicel, bedo twon alaya kun lewic gire mom mako. En bedo i doggola mere kare luŋ, onyo i wi kom i kabedo ame otiŋere malo i boma, kun lwoŋo jo luŋ ame beo i ŋete, ame nwoŋo gigi awot anyim wotgi, “Biye wunu kan, wan jo a mom ŋeo ginnoro!” Aco baŋ jo ame wigi mom tio en kobo ni, “Pii akwala mit meicel, ogati akwala ka icamo muŋ yomoro cunyi nadi.” Lo-nono nwoŋo mom ŋeo ni to tye kuno, mom ŋeo ni wele a dako-nono luŋ tye piny i lyel. Carokop a Culeman. Awobi aryek yomoro cuny pappere, ento en amiŋŋere cwero cuny tottere. Lonyo ame inwoŋo i yore arac konnyere pe, ento kite atira lari i to, Rwot mom weko kec neko ŋat a kite atira, ento en kwero ŋat arac, pe nwoŋo gin ame yie mito. Wackom kelo can, ento tiyo tic atek kelo lonyo. Atin aryek coko cam oko i poto ka ocek, ento en ame nino anina i kare me kac, kelo lewic i kome kene. Rwot mio gum baŋ ŋat a kite atira, ento kop ame atim tim arac kobo wumo timmere me kolo oko. Ŋat a kite atira kome i gum pien opo pire, ento ŋat arac nyiŋe top, te rwenyo atwal. Lo aryek i cunye mako cik, ento amiŋo ame kobo kop miŋomiŋo bino to. Dano ame cunye ler mom lworo ginnoro, ento jo a kitegi ogom mom twero kanne atwal. Ŋat ame mimio waŋe atata kelo ayela, ento ŋat ame juko dano kannaler kelo kuc. Kop ame jo a kitegi atira kobo obedo waŋ pii me kwo, ento kop ame atim tim arac kobo wumo timmere me kolo oko. Dagere kelo lweny, ento mar wumo kit bal ducu. Ŋat aniaŋ kobo kop me ryeko, ento ŋat a wie mom tio mito ka lut. Ŋat aryek bedo ŋat a tye kede ŋec oromo, ento ŋat amiŋ kobo kop ame kelo can i kome. Alonyo geno lonyo mere acalo boma atek ame en riŋo laro, ento can tero acan i to. Timo gin atira tero dano i kwo, ento tim arac medo bal ameda. Ŋat awinyo pwony nwoŋo tye i yo me kwo, ento ŋat ame mom ye ni juke rwenyo arwenya. Ŋat ame kano adage i cunye kobo kop goba, ŋat ame kwoto jo en amiŋo. Kop apol apola bal mom rwenyo iye, ento ŋat aryek mom duro kop apol. Ŋat a kite atira, kop i doge calo ryal ame olio, ento tam a ŋat arac konnyere nok meicel. Kop a ŋat a kite atira pwonyo jo apol, ento omiŋo to i kwiya pinygi. Gum ame Rwot mio, mio dano bedo alonyo, kun mom medo iye ginnoro akelo cwercuny, Timo gin arac calo tuko baŋ amiŋo, ento tim me ryeko kelo yomcuny baŋ ŋat a niaŋ. Gin ame ŋat arac lworo, en ame kelle peko, ento gin ame dano a kite atira mito, omie, Yamo ager ka akodo, kolo dano arac oko, ento ŋat a kite atira moko gire atwal. Awackom rom aroma i koŋo awac i dog, kede yito adonyo i waŋ, baŋ jo luŋ ameare tiyo ticgi. Bedo i lworo i kom Rwot mio dano perakino, ento awaka a ŋat arac gik iŋwet, Ŋat a kite atira cobo gennere i yomcuny, ento ŋat arac geno bwoo ŋor. Rwot en ame ika larre atek, baŋ ŋat ame tio gin a atye atira, ento neko otim tim areco aneka. Ŋat a kite atira bino bedo i kuc, ento jo areco obino puto oko i lobo. Ŋat a kite atira kobo kop me ryeko, ento ŋat akobo kop me goba obino ŋolo lebe oko. Ŋat ame kite atira kobo kop ame jo pwoo, ento ŋat arac kobo kop ogom cutu. Rwot dag mijan me cero jo, ento en pwoo kidi ame pimo jami kakare. Wakere kelo lewic, cite mwolo woto karacel i ryeko. Lercuny en ame telo jo a cunygi atira, ento jo ame kitegi ogom to pi kitegi-nono. Lonyo mom konyo ginnoro i kare me akemo Obaŋa, ento tim atira twero laro dano i kare me to. Tim atira ame ŋat a mom i balloro timo mio yore cuŋ atira, ento atim gin arac poto pi timmere-nono. Tim atira ame ŋat a cunye atira timo twero lare, ento abwol jo doko opii pi woro mere. Gen ame ŋat arac tye kede to nono, jo a mom woro Obaŋa geno bwoo ŋor. Ŋat a kite atira bwot oko i can, eka ŋat arac te lunyo leyo kakare. Ŋat a mom woro Obaŋa balo awottere i kop i doge, ento bedo kede ŋec en ame laro jo a kitegi atira. Ka ce ŋat a kite atira alonyo jo i boma luŋ lelo; ka jo a kitegi reco oto, jo luŋ wo i yomcuny. Ka gum opoto i kom jo a kitegi atira, jo i boma luŋ bedo atek meicel; aco jo areco balo boma abala i kop ame gin kobo. Ŋat ame mio awottere doko dano ayot i akina jo, wie mom tio; ento ŋat a niaŋ atut liŋ gire mot. Ŋat ame rimo piny i kwokwoto jo, tuco i muŋ a jo ocele, ento ŋat ame agen i cunye, kano kop me i muŋ. Ka ce atel mom, jo poto oko, ento kan ame omi-tam pol iye, kuc bedo i lobo-nono, Ŋat ame cikere me culo banya amyere bino paro icen, ento ŋat a mom cuŋ i jo atata tye aber. Dako ame akica jo woro, ento adwar kolo nwoŋo lonyo ame omao amaa. Dano ame akica konyere kene, ento ŋat ager kelo awano i kome kene, Jo ame timo gin a mom atira nwoŋo ocaragi a konnyere pe, ento jo ame timo gin atira nwoŋo ocara ikokome, Ŋat olido bedo i kite atira bino kwo, ento ŋat ame ryemo yo gin arac bino to, Rwot dag ŋat ame tammere ogom, ento cunye yom i kom jo ame balloro mom i kitegi. Bed ame iŋeo ni atim gin arac mom bino bwot a mom oketo cannoro i kome, ento jo ame kitegi atira obino laro oko, Dako amwonya meicel a mom ŋeo poko gin aber kede gin arac, rom aroma alem jabu ame oketo i um puno. Jo a kitegi atira mito ka gin aber keken; ento gin ame jo areco mito kelo ka akemo. Jo mogo ame mio limgi i yomcuny lony medde ameda, aco jo mogo ame odur lunyo dok medde ameda i bedo acan. Ŋat ame cunye yom i konyo jo, lim medde i ciŋe, ŋat ame konyo jo ocele, jo daŋ konye. Ŋat ame adur i cammere jo ceno acena, ento ŋat ame cato cam i ciŋe jo lam me gum. Ŋat ame yenyo gin aber i cunye luŋ jo pwoo, gin arac gire bino i kom jo ame yenyo, Ŋat ame oketo gennere i kom lonyo bino ner calo lum, ento ŋat a kite atira bino bedo aber calo pot yat adyaka. Ŋat ame yelo jo me ode mom bino nwoŋo ginnoro, aco ŋat amiŋ bino bedo opii a ŋat aryek. Kite atira obedo yat ame ya iye kwo, kwero lubo cik rwenyo kwo a dano arwenya. Ka ce ŋat a kite atira nwoŋo mottere i lobo kan, kara doŋ jo areco kede obalo bino nwoŋo can a rom mene? Ŋat ame mito ni pwonye nwoŋo mito medo ŋeccere, aco ŋat a mom ye ni juke bedo dano amiŋ nakanaka, Rwot pwoo ŋat ame kite ber, ento en ŋolo kop loo jo ame paro pi timo gin arac. Dano mom cuŋ atek pi timo gin arac, ento ŋat a kite atira rom aroma i yat ame lwite mom putte. Dako aber kelo kwogo i kom cware ento dako ame kelo lewic i kom cware calo bur ame balo cogo kom cware, Ŋat a kite atira tamo tam aber, ento ŋat a kite rac mio tam ame bolo dano i mac. Jo ame kitegi reco kobo kop ame kelo to, ento jo a kitegi atira kobo kop ame laro joo Ŋat arac ka oreto, agikki mere nwoŋo doŋ ennono, ento jo me ot a ŋat a kite atira pwod medde cuŋ. Jo kobo kop aber i kom dano kun lubo kite ame ŋeccere tye kede, ento ŋat ame tammere ogom jo cao acaa. Dano ame mwol, ame tio tic atek me nwoŋo gin me konyo kwo mere, ber kato at ame poro tyene i jo adoŋo kun tammere pe. Ŋat a kite atira gwoko lee mere epito paco aber, ento jo a kitegi reco wuno leyigi aboŋo kica. Apur atek nwoŋo cam abup, ento ŋat ame balo kare mere i gin ame konyere pe, wie mom tio. Ŋat arac poto pi timo gin arac, ento ŋat a kite atira cuŋ i kiŋ aboŋo leŋere. Ŋat arac moko kene i kop ame en kobo, ento ŋat a kite atira bwot i ayela ame poto i kome. Dano yeŋ i gin aber pi kop oya i doge, gin ame dano tio lokere dok konye. Ŋat amiŋ neno gin etimo luŋ ni beco, ento ŋat aryek winyo tam a jo ocele. Ŋat amiŋ ka akemo omako ŋeye oyotoyot, ento ŋat aryek mom paro pi ayet ame oyete kede. Ŋat ame kobo kop ateni tito gin otimere ikokome, ento acaden agoba kobo kop me goba keken. Ŋat a niaŋŋere nok kobo koppogo aboŋo tamo, ame lit calo pala bat ame ocobo dano, cite kop ame ŋat aryek kobo caŋo dano acaŋa. Kop goba mom ri kare alac, ento kop ateni ri nakanaka. Jo ame yiko kop me timo gin arac cunygi opoŋ i kop goba, ento jo ame tye kede yik me timo gin aber cunygi yom. Gin arac mom poto i kom ŋat a kite atira, ento ŋat arac bedo i lwak ayela meicel. Rwot dag jo ame kobo kop me goba, ento cunye yom i kom jo ame ogen i ticgi. Ŋat aryek kano kop ame en ŋeo, ento amiŋo bedo yabo miŋo mere baŋ jo ocele. Ŋat ame tio tic atek doko aloc, ento caro mio dano doko opii. Par okato kare geno dano bedo yomcuny, ento kop ame okobo kede kica kweo cunye. Ŋat a kite atira leŋŋsi i gin arac yo, ento ŋat a kite rac, kite-nono rwenye arwenya. Awackom mom nwoŋo gin emito, ento ŋat ame tio tic atek nwoŋo lim arome. Kite atira obedo yo ame tero dano i kwo, ento miŋo obedo yo ame tero dano i to. Atin aryek winyo gin ame pappere pwonye kede, ento ŋat ame aŋale mom ye ni juke. Dano aber nwoŋo agoba i kop ame en kobo, ento abwol jo cunye mito ka tim me byemi. Ŋat ame gwoko kop ame en kobo gwoko kwo mere, ento ŋat ame ŋamo doge i kop atata poto i can. Awackom kadi bed i mit i kom ginnoro a rom mene mom gire twero nwoŋo, ento ŋat ame tio tic atek nwoŋo ginnoro luŋ ame cunye mito. Dano a kite atira dago kop me goba, ento ŋat arac timo tim me lewic ame lane alana. Kite atira gwoko ŋat a cunye atira, ento bal reto ŋat arac areta. Jo mogo poro bedo olonyo kun gin ocan a mom twerre, ento jo ocele miye ni gin ocan kun otye i jami luŋ ame romogi. Ŋat alonyo twero lakoro kwo mere i limmere, ento acan mom tye i yo moro me lakoro kwo mere. Jo a kitegi atira calo tara ame lyel acil meicel, ento jo areco calo tara ame lyel ote neko oko. Lo ame awaka dok daŋ apyem yelo jo nono, ento lo ame gamo tam ame omie doko ŋat aryek. Lonyo ame bino ni wuk awaŋe acel rwenyo oko, ento ŋat ame lim bino i ciŋe momot limmere medde. Gin ame dano geno ka mom onwoŋo kelo two i cunye ento gin a dano mito ka ocobere bedo calo yat me kwo. Ŋat ame cao kop ame okobbe nwoŋo okelo can i kome kene, ento ŋat ame lubo gin ame ociko ni tim nwoŋo mot pire. Pwony a jo aryek calo waŋ pi i me kwo, mio dano bwot i owic me to. Ŋat ame wie tio jo bedo i geni kome, ento ŋat a mom agen nwoŋo doŋ tye i yo me to. Ŋat aryek cobo ticcere i ŋec ame romo, ento amiŋo bedo nyuto miŋo mere baŋ jo ocele. Akwena arac kelo peko i kom jo, ento akwena agenne kelo kuc. Can kede cwercuny bino baŋ ŋat a mom ye ni pwonye, ento ŋat ame ye ni juke bedo ŋat a jo woro. Mit a dano ka ocobere kweo cunye meicel, ento amiŋo mom ye weko gin arac. Lo ame maro mako dyere i jo aryek doko ŋat aryek, ento ŋat a nywako yo i jo amiŋ bale abala. Gin arac maro lubo yo jo ame obalo, ento jo a kitegi atira nwoŋo mot me jami abeco. Dano aber wekki ikwae lim ame gin twero leyo, ento lonyo a jo ame obalo kobo i ciŋ jo a kitegi atira. Lobo ame oweko owe kare alac ceko cem abup baŋ acan, ento jo a mom okica mao oko i baŋe i tim a mom atira. Ŋat a mom goo atinnere nwoŋo mom maro, atin ame omaro, opwonyo. Ŋat a kite atira nwoŋo cam ame rome kare luŋ, ento dano arac kec neko kare ducu. Mon aryek mio pacogi bedo paco aber a kuc tye iye, ento mon amiŋ turo pacogi atura. Dano ame kwo mere ber ŋwoŋo lworo Rwot ento ŋat alubo yo a mom atira cao Rwot acaa. Kop a ŋat amiŋ calo lut ame ogoe kede, ento ŋat aryek kobo kop ame gwoke agwoka. Kan a mom opuro i kweri cam mom cek i ye abup, ento puro poto i kweri mio cam cek abup. Acaden ame genne mom pido kop me goba, ento acaden agoba loko goba keken. Won aŋale mom twero doko ŋat aryek, ento ŋat aniaŋ atut ŋeccere medde oyotoyot. Ya oko i baŋ ŋat amiŋ, pien mom tye ginnoro ame iromo ŋeyo i baŋe. Ryeko mio dano nwoŋo kite a myero ebed kede, ento miŋo bwolo dano abwola. Ŋat amiŋ mom paro ginnoro ka otimo bal, ento ŋat a cunye atir kwao kica. Yin iŋeo gin ame tye i cuny ka lim onyo kec, mom tye ŋattoro ame twero nywako kedi gin i cunyi. Ot a ŋat a kite rac balle oko, ento paco a jo kitegi beco bedo gire aber, Tye yo mogo ame dano tamo ni ber, kun kara obedo yo ame tero jo i to, Dano twero nyero kun nwoŋo cunye mom yom, icennere te dok bedo kede kumo. Ŋat a kite atira nwoŋo mottere pi kite-nono, ento ŋat a kite ogom nwoŋo mottere oporo gin ame en timo. Ŋat amiŋ ye kop ducu, ento ŋat a wie tio koŋ ŋio jami i nyime, Ŋat aryek gwokkere mom lutte i tim arac, ento amiŋo donyo ata kun mom koŋ tamo. Won akemo agwa timo tim me miŋo, ento ŋat aryek bedo mere mot. Jo amiŋ nwoŋo gin ame gin omito i yore me miŋo miŋo, ento jo aryek opokigi mot me ŋec oromo. Jo areco rumo congi woro jo a kitegi ber, kede otim tim areco ocokere doggola a jo a kitegi atira pi kelo kwacgi. Acan jo dago anaka jo i ŋete, ento olonyo tye owote mere apol ata. Ŋat ame cao dano ocele nwoŋo abalo, ento ŋat ame kica mako i kom ocan tye kede yomcuny. Jo ame paro pi timo gin arac rwenyo arwenya, ento jo ame paro pi gin aber bedo jo ame omaro dok ogeno. Ticcoro luŋ atek tye iye goba, ento kop akopa kelo can. Kwogo a jo aryek obedo ryekogi, ento mola ŋut ŋat amiŋ ame omio en ŋeye obedo miŋo mere. Acaden laro kwo a dano ka okobo ateni, ento ŋat ame kobo kop me goba obedo won adote. Lworo Rwot mio dano bedo kede gen adwoŋ, itino mere nwoŋo kan ame otwero laro. Lworo Rwot en obedo waŋ pii me kwo, en a mio dano twero gwoko owic ato. Jo apol ame abaka loo en ame mie kwogo, ento aloc a jo mere mom doŋ oto oko. Ŋat ame mom ŋo oyotoyot tye kede twon ŋec adwoŋ meicel, ento ŋat ame akemo mako oyotoyot obedo twon amiŋo meicel. Ka cuny dano tye ame opye mot kome daŋ bedo yot, ento akemo balo cogo kom dano. Ŋat ame wuno acan nwoŋo ocao Obaŋa ame okete, ento ŋat ame kica mako i kom jo a mito kony nwoŋo woro Obaŋa, Atim gin arac poto i gin arac ame etimo, ento ŋat a kite atira larre pi bedo dano a genne. Ryeko bedo i cuny dano ame ŋeo gin a myero etim, ento ŋat amiŋ a mom ŋeo gin a myero etim cunye bedo nono. Kite atira mio rok bedo rok ame oŋeo meicel, ento bal kelo lewic i kom rokkoro keken. Amiro ame tio ticcere i ryeko, adwoŋŋere pwoc ento akemo make i kom amiro ame tio gin a kelo lewic. Gamokop i mwolo kweo akemo a dano oko, ento dwon agwa medo akemo ameda. Ŋat aryek kobo kop me pwonyo jo, ento amiŋo tiko wuko ka kop me miŋo keken. Waŋ Rwot neno kabedo luŋ; en neno jo areco kede jo abeco. Kobo kop i mwolo obedo calo yal me kwo, ento kop agwa kelo two cuny dano. Amiŋo cao pwony a pappere, ento ŋat ame winyo pwony en dano aryek. Lonyo dwoŋ i ot a ŋat a kite atira, ento can balo lim a bino i ciŋ ŋat arac oko. Jo aryek kobo kop ame mio jo medde ŋeyo jami apol, ento kop a jo amiŋ mom pwonyo ŋattoro. Rwot dag mot ame atim tim arac oŋolo me yale, ento cunye yom i kwac a ŋat a cunye ler. Rwot dag tim a jo areco, ento en maro jo ame timo gin ame tye atira. Ŋat ame kwero lubo yo a Rwot obino keto can adwoŋ i kome, ŋat a pe ye ni juke bino to. Rwot ŋeo jami ducu ame tye piny i lyel, kara doŋ cuny dano kono? Won aŋale mom ye ni juke, mom daŋ woto baŋ jo aryek. Ŋat ame cunye yom, yom cunye nen i waŋe, ento cwercuny mio waŋ dano bale oko, Dano aryek cunye poŋ i mit me pwonyere, ento ŋat amiŋ paro kop me miŋomiŋo keken. Dano ame owuno kare me kwo mere poŋ ican, ento ŋat ame cunye yom camo arama kare luŋ. Ŋat ame tio kede lim anok kun lworo Rwot, bedo aber kato ŋat ame tio kede lim adwoŋ kun tye kede ayela. Camo pot dek i jo ame imaro, ber kato camo twon riŋo amio i paco ame dagere dwoŋ iye. Won akemo tubo jo, ento ŋat ame kanyo akemo kelo kuc. Yo awackom culle acula okuto, ento ŋat a cunye ler, yore ler ata. Atin aryek yomo cuny pappere, ento dano ame miŋ cao tottere acaa. Ŋat a wie mom tio cunye bedo ayom i kop me miŋo miŋo, ento ŋat atye i niaŋ atut bedo i kwo atira. Ŋat ame tio kene aboŋo winyo tam, yikkere mom cobere aber, ento ŋat a gamo tam a jo apol yikkere cobere. Dok ipeny kakare kelo yomcuny, kede kobo gin ame nwoŋo amito i kare a mitte ber meicel. Ŋat aryek lubo yo ame tere i kwo, ento weko yo ame tere piny i lyel. Rwot turo udi a jo awakere oko, ento gwoko waŋ lobo a dako a cware oto. Rwot dag tam a jo areco, ento kop a ŋat aber kobo yommoro cunye meicel. Ŋat ame owor me nwoŋo agoba i yore a mom atira kelo ayela i kom jo me ode, ento ŋat ame dag lim ame owilo i jo i muŋ mom bino to. Jo a kitegi atira koŋ tamokop kun pe ru odok iye, ento ŋat arac wuko kop arac aboŋo paro. Rwot mom noko laŋet ŋat arac, ento winyo kwac a dano a kite atira. Waŋ aber mio dano yomcuny, amut aber mio cuny dano gony. Ŋat a winyo kop ame ojuke kede, bedo i akina jo aryek. Ŋat ame mom ye pwony ajo nwoŋo ocaye kene, ento ŋat ame ye ni juke medde niaŋ i jami apol. Bedo i lworo i kom Rwot en aye doggola me doko ryek, bedo i woro en aye doggola me bedo ŋat ame oworo. Dano twero tamo pi gin a myero eti i cunye, ento Obaŋa en ame mio cobere. Dano neno gin ame etio luŋ ni ber, ento Rwot pimo cuny dano. Ket ticci luŋ i nyim Rwot, en bino miyo tammi cobere aber. Rwot tye ked yik pi jami luŋ ame en oketo, ento gin ame en oyiko pi jo areco en to, Rwot dago jo a wakere; ŋe atira ni kodi jo-nono mom bino bwot ame mom oketo cannoro i komgi. Rwot weko bal a jo a genne, ame mare, dok bedo i lworo i kom Rwot mio dano geŋere i tim arac. Ka ce kit a dano moro-ni yomoro cuny Rwot, en mio okworrere daŋ bedo kede kuc. Bedo i jami anonok kun inwoŋo i yore aber, ber kato twon lim adwoŋ ame inwoŋo i yo a mom atira, Dano yiko kit a kwo mere myero bed kede i cunye, cite Rwot en ame telle me cobo. Abaka kobo gin ame Rwot en okobbe, mom timo balloro i kop ame eŋolo. Rwot mito mijan kede ratili ame pimo jam i kakare, kidi pimo jami luŋ myero bed i te loccere. Timo gin arac obedo gin me kwer baŋ rwode, pien loc cuŋ atek ka jo tye atimo gin atye atira. Yi abaka bedo yom i kom jo ame kobo kop atira, gin maro jo ame kobo kop ateni. Akemo ka omako abaka dano to, ento ŋat aryek kweo cunye. Yomcuny abaka ka onen i waŋe, mio dano kwo, kica mere calo pol ame mio kot cwe i cwir. Nwoŋo ryeko ber kato nwoŋo lonyo, yero niaŋ atut kato yero bedo i lim. Jo a cunygi atira lubo yo a mom terogi itimo gin arac; ŋat ame gwoko kite bino laro kwo mere. Awaka tero dano ican, abwone mio dano poto. Bedo karacel ocan i cuny me mwolo, ber kato poko jami ayaka i jo a wakere. Ŋat ame winyo gin ame opwonye kede bino bedo i kwo aber, dok ŋat ame geno Rwot tye kede yomcuny. Ŋat aryek i cunye olwoŋo ni ŋat atye i niaŋ atut, dok ŋat akobo kop amit loo tam a jo apol. Ryeko calo waŋ pii me kwo baŋ ŋat ame tye kede, ento miŋo pwodo wonnere. Tam a ŋat aryek mio en kobo kop ame nwoŋo koŋ otamo aber, dok mio kop ame en kobo loko tam a jo apol. Kop me kica lim calo kic, calo yat ame kweo cuny kede yat ame caŋo kom. Tye yo mogo ame dano tamo ni ber, kun kara tero jo i to, Mit me cam mio dano tio ticcere aber; kec en ame cukoro cunye. Loo arac ame kwo mere mom ber yenyo yo me timo jo rac, dok kop ame en kobo lyet calo mac. Ŋat a kite ogom kelo pyem keken, dok ŋat akwot jo tubo jo ame mare. Atim tim me byemi bwolo jo abedo kede, gin ame en timo-nono tere i yo a mom ber. Ŋat ame mimio waŋe atata nwoŋo tye i yik me timo gin arac, ŋat aliŋaliŋa mio gin arac timmere kun en aneno. Perakino obedo mot ame omio baŋ jo a tye i kwo aber, lwar obedo tok kwogo me wic. Ŋat ame akemo mako oyot ber kato twon lo atek, ŋat a loo tam i cunye ber kato ŋat ame man boma twal. Obol kwir bolo kwir, ento adwoggi mere tye i cin Rwot. Kwon aŋic ame ocamo i kuc, ber kato arama ame ocamo i ot a kuc mom iye. Opii ame tio ticcere i ryeko, bino loyo atin adwoŋ me ot ame timo tim me lewic, dok bino nywako ginalea karacel i jo me ottono. Jabu kede ryal otemo i mac, ento Rwot temo cuny dano. Ŋat a maro timo gin arac ciko yite i kop a jo areco, agoba ciko yite i kop me goba. Ŋat ame ŋalo acan nwoŋo oyeto Obaŋa ame okete, ŋat ame lelo gire alela ka can opoto i kom owotte mere, mom bino bwot a mom oketo can i kome. Odoŋ oti nwoŋo kwogo pi ikwaegi, itino nwoŋo kwogo pi papagi. Dano ame jo woro mom kobo kop me goba, dok daŋ mom maro winyo kop abeco ame amiŋo kobo. Owil jo imuŋ geno timgi-nono calo jo a geno yen gwoko komgi atye i komgi, gin geno ni twero miyogi onwoŋo gum i kabedo luŋ. Ŋat atimo kica baŋ ŋat otimo bal nwoŋo mito mer bed ŋye i akinagi, ento ŋat ame bedo poyo bal acon balo dyere ame tye i akinagi. Ŋat a niaŋ atut, pwonyere ka ojuko, ame kato ŋat amiŋ ame opwodo lut tyen mia acel. Atim tim arac maro jem kare ducu, timmere-nono mio ecop i kom lo moro ager te time lit. Tika irwatte i ŋuu ager ame itino mere oneko oko, kato ame irwatte i ŋat amiŋ kun atimo tim me miŋo miŋo. Ŋat ame dwoko gin arac pi gin aber, gin arac mom ya i ode. Gin akelo lweny cakere momot calo pii ame ocako molo amola, pi mannono myero ijuk ame pwod ocakere acaka. Rwot dag ŋat ame mio dano arac loo kop, kede ŋat ame mio kop loo ŋat a kite atira, Konyo kara ŋo dano amiŋ me bedo i lim me wilo ryeko, kun koŋo mom tye i wic ame romme pwonyere? Awotti nyuto marrere kare luŋ, ominni bedo ŋat ame inywako wunu kede peko, Ŋat ame wie mom tio jeŋo jami mere ata, pi culo baŋya a ŋat a mom eŋeo. Ŋat ame maro timo bal, maro daŋ kelo pyem, ŋat ame mio doggola mere bedo malo amala yenyo to. Ŋat ame tamo tam arac i cunye mom twero bedo i kwo aber, ŋat ame kobo kop a mom ber mom niaŋ poto i can. Atin ame wie mom tio cwero cuny pappere, pappa a ŋat amiŋ mom bedo kede yomcuny kadi acel. Yomcuny obedo twon yat aber meicel, me caŋo two, ento cwercuny mio dano mok amoka. Dano arac gamo lim ame owile kede imuŋ, wek ebal ŋolo kop kakare. Dano ame niaŋ keto cunyei gin ame medde ryeko, ento dano amiŋ bedo ata kun mom tamo ginnoro. Atin ame wie mom tio cwero cuny pappere, dok mio tottere onywale bedo kede kumo i cunye. Mom ber me keto can i kom dano a kite atira, pwodo jo ame oworo rac atek. Ŋat atye i ŋec mom duro kop apol apola, ŋat ame niaŋ atut cunye pye mot. Ŋat amiŋ ame liŋ gire aliŋa, otero calo dano aryek, ka ce en mom bedo duro doge atata, jo tamo ni en niaŋ kop apol. Dano ame mom ribere i jo ocele, paro pire kene, daŋ mom maro ye gin a jo ocele kobo ni tye tira, Amiŋo gire mom paro pi niaŋ jami, en paro pi nyuto tammere keken. Tim arac kede acae nywako yo acel, alee twodo dano ame mom oworo. Kop ame dano kobo calo pii atut, waŋ pii me ryeko calo pii kulo a kukunya. Dworo ŋat arac mom ber, onyo balo ŋolo kop a ŋat a kite atira. Kop a ŋat amiŋ kobo kelo pyem, kop ame en kobo lwoŋo lut i kome. Kop ame amiŋo kobo en ame kelle to, kop ame lebe kobo en ame obedo owic me cike, Kop akwot jo mit meicel, winyo mit calo mwonyo kwon obwol. Ŋat ame kome wac i tic, rom aroma i ŋat ame balo jami abala. Nyiŋ Rwot tye acalo twon gedo moro atek, ame dano a kite atira riŋo laro. Alonyo geno lonyo mere me larre, lonyo mere calo boma atek ame en riŋo laro, Dano wakere ka can pwod pe, ento bedo i woro en doggola me bedo a ŋat ame oworo. Koŋ ige winyo aber kun mom ru idok i kopporo-ni, ka ce mom itimo amannono inyuto miŋoni dok ikelo lewic i komi keni. Dano ka cunye tek twero diyo cunye ka two, ŋa kara ame twero konye ka cunye doŋ odoko goro. Ŋat a wie tio twero doko ŋat a ŋeo jami, jo aryek tero yitgi i winyo kop ame meddigi pwonyere. Miyo mot yabbi dano yo, mio en tuno i nyim jo adoŋo. Ŋat ogeo pido i nyim okiko tamo ni koppere tye kakare, tuno ka omio ŋat epidde opepenyo en. Bolo kwir en ame tyeko pyem, ka ce twoni jo aryo ocwiny tye apyem i okiko. Konyo dano mio en doko cel atek ame gwok i, ento daa pokowu, mio en kwero miyi kony oko. Dano yeŋ i gin aber pi kop oya i doge, kop ame lebe kobo lokere dok konye. Akadi to onyo kwo bino pi kop a dano kobo, jo ame maro kobo kop meicel bilo adwogi me kopgi-nono. Ŋat onwoŋo dako nwoŋo onwoŋo gin aber, Rwot nwoŋo doŋ opwoc, Acan bako doge abaka ka akop, ento alonyo gamokop i dwon agwa, Tye jo mogo ame bwolo owotegi abwola ni omaro, ento tye jo mogo ame ikin i kom owotegi kato omego oko. Tika ibed acan ame genne, kato bedo i ŋat amiŋ ame kobo kop ogom, Mom ber me bedo aboŋo ŋec, mac a lyel birabira mom ceko cem amit. Ŋat amiŋ ka opoto i peko pi timmere me miŋo, cako koko-nono i kom Rwot. Lonyo nyao dyere meicel, ento can ryemo dyere aryema. Acaden agoba mom bwot a mom oketo cannoro i kome, akob kop goba mom bino bwot. Jo apol mito ni ŋat a maro konyo jo pwoogi, dok jo maro mako dyere i ŋat ame maro miyo jo mot. Ŋat acan omego mere luŋ dago, kara doŋ owote mere bino bedo kede abor rom mene? En ryemo yorgi i kop i doge keken, cite mom romo makogi kadi acel. Ŋat ame tye i ryeko marre kene, ŋat ame gwoko niaŋ atut ame etye kede bedo aber. Acaden agoba mom bwot a mom oketo cannoro i kome, akob kop goba bino to, Amiŋo mom porre bedo i lwak jami apipim, opii daŋ mom porre loyo rwode. Ŋat ame wie tio akemo mom mako oyotoyot, weko bal ame otimo i komi aweka kelo kwogo i komi. Akemo abaka calo koko eŋatu, ento kica mere calo toyo ame luk i kom lum. Atin amiŋ mio pappere to, dako a da calo kot ame ŋido nakanaka. Ot kede lonyo itwero leyo i baŋ kwaroni, ento dako aryek Rwot en amio. Wackom kom mio dano nino meicel, ŋat a nyap mato kec okato kare. Agwok cik a Rwot gwoko kwo mere, ento ŋat ame cao acaa to oko. Ŋat akica baŋ ocan nwoŋo omio moko kato baŋya baŋ Rwot, Rwot bino culle pi ticcere-nono. Pwony otinoni con kun pwod otino, myero igwokere kur inekgi aneka. Ŋat akemo mere gwa akemo mere kelo can i kome, pien ka ce ilare icel en bino mito ni dok ilare. Bed ŋat ame gamo tam kun iwinyo gin ame opwonyi kede, me ibed ŋat aryek i anyim. Dano bedo kede yik apol meicel cunye, ento gin ame Rwot mito en ame cobere. Gin ame mitte i kwo a dano en cuny me mar, acan ber kato agoba. Bedo i lworo i kom Rwot tero dano i kwo, ŋat ame lworo Rwot bedo a cunye opye mot, ginnoro arac mom twero gudo kome, Awackom luto ciŋe i tabo, ento cwayo cam i doge loo oko. Pwod won aŋale, jo amiŋ bino pwonyere, juk ŋat a niaŋ, en bino ŋeyo jami apol. Atin a yenyo pappere i kolo dok ryemo tottere oko i paco, obedo atin a kelo lewic kede alane baŋ onywalle. Atinna, ka ce ikwero winyo gin ame apwonyi kede, nwoŋo doŋ iweko pwony ame medo ŋecci oko. Acaden a konyere pe, cao kop ame oŋolo kakare, jo areco maro timo bal calo balgi. Wegi aŋale doŋ oŋolligi kop oko, omiŋo daŋ obino pwodo yo ŋegi. Koŋo mio oyeti dok mat okato kare miyo dano yeto jo; ŋat ame omio mit me koŋo obwole nwoŋo mom ryek. Akemo abaka rom aroma i koko eŋatu, ŋat ame mio akemo mako abaka nwoŋo mom paro pi kwo mere. Ŋat a mom lutte kan a daa tye iye jo woro, ento amiŋo bedo gire da adaa. Awackom mom puro poto mere kare ame kot tye, i kare me kac en geno piny nono. Yik ame dano tye kede i cunye calo pii atut, ento dano ame tye i niaŋ atut twomo oko, Dano twero rabo pi kica mere tyen apol ata, ento ŋa ame twero nwoŋo ŋat a genne? Ŋat ame genne ame cunye ler, ikwae tye kede gum kadi ka en oto. Abaka ame bedo i wi kom me ŋolo kop, yeko gin arac luŋ. Ŋat ame twero kobo ni, “Doŋ atyeko lwoko cunya doko acil; an doŋ acil odoco aboŋo balloro?” Rwot dag kidi me pimo jami a mom pimo jami kakare, kede gwata pimo jami ame cero jo. Kadi atin nyuto kite oko i gin ame etio, ka gin a en etio ber dok atira. Yit ame winyo kop kede waŋ ame neno piny, gin luŋ obedo tic a Rwot. Kur imar nino anina naka mio idoko acan, yab waŋi me iti tic me ibed i cam abup. Awil cucura baŋ acat jami ni, “Rac rac” ento kaojer teŋe te cako wakere. Ka ce iŋeo gin ame ikobo, itye i gin me wel akato jabu kede gweŋ alilia. Gam ruk a dano ka ce en ojeŋo pi baŋya a ŋat a mom eŋeo, make en i kome ka ce en onwoŋo ocuŋ a rok. Kwon ame obwola abwola lim bala kic, ento i ŋe camo dogi poŋ i kwoyo. Gamo tam mio yik a dano cobere; kur icak lweny ka yikki mom ba. Ŋat a bedo rimo piny i kwokwoto jo, tuco i muŋ a jo ocele, pi mannono myero kur inotte wun i ŋat a kobo kop miŋomiŋo. Ŋat a ceno pappere onyo tottere, kwo mere bino bedo calo tara ame tyel ote neko oko, piny te bedo acol icuc. Lim ame dano oleo oyotoyot, gum mom iye i agikki mere. Kur ikob ni, “Abino culo gin arac i gin arac,” kur Rwot, en ame bino konyi Rwot dag kidi me pimo jami ame mom pimo jami kakare, mijan me cero jo mom ber kadi acel. Rwot en ame telo dano i kwo mere nino i nino, kara doŋ dano twero niaŋ kit a kwo mere tye kede i yore aŋo ba? Ŋat ame jalo jami mere baŋ Rwot kun nwoŋo mom koŋ otamo eka te tamo doŋ icen kun doŋ okwoŋo oko, dano-nono nwoŋo calo winyo ame omoko i tol. Abaka aryek ŋeo yeko jo mere areco oko, eka te keto can i komgi. Cuny dano en obedo tara a Rwot, menyo ginnoro luŋ ame nwoŋo opono iye. Abaka ame genne kun daŋ maro jo mere, ri i loc, en ri i wi kommere me loc nakanaka ka ce kite atira. Kwogo a dano a pwod tidi obedo teko mere, ento ber a dano oti tye i lwar i wie. Adoŋ ame keto ret i kom dano kwanyo gin arac oko, lut daŋ loko kwo a dano bedo aber. Rwot en ame loo cuny abaka, en loko kite a en mito calo pii ame otwero miyo mol tuŋŋoro keken. Dano twero tamo ni gin ame en etio luŋ tye kakare, ento Rwot pimo cuny dano. Timo gin atye atira kede ŋolo kop kakare, en ame Rwot pwoo kato yale kede mot aŋola. Waŋ arac ame acae kede cuny a wakere, gin luŋ obedo bal, ento jo areco miogi obedo calo taragi me menyogi. Yik ame otamo aber tero dano i nwoŋo jami abup, ŋat ame bunyo tiyo ginnoro oyotoyot bedo acan. Lonyo ame onwoŋo pi kobo goba, duny oko calo awura, dok calo owic ame kelo to. Tim me kolo a jo areco timo bologi i mac, pien gin okwero tiyo gin a tye kakare. Wegi roc lubo yo ogom, ento kite a jo a cunygi ler tye arira. Bedo i ot ocele kadi mom ber wok, ber kato nywako ot wun i dako ame maro da. Ŋat a cunye maro timo gin arac, kica mom mako i kom dano wadgi. Ka ce oketo can i kom won aŋale, ŋat a wie mom tio cako pwonyere, ento ŋat aryek ka ce opwonyo apwonya, waŋe yabere. Dano a kite atira neno jo ame tye i udi a jo a timo tim arac, atim tim arac obino canyo oko piny. Ŋat ame culo yite oko ka ce acan akok baŋe, kare ame en bino kok, jo daŋ bino culo yitgi oko i koko mere. Mot omio imun baŋ ŋat a cunye owaŋ kweo cunye, lim me wilo dano i mun kweo twon akemo adwoŋ oko. Ka ŋolo kop woto kakare, jo a kitegi atira bedo i yomcuny, entu jo otimo gin arac bedo i kumo. Ŋat ame ya oko i yo me ryeko, bino nwoŋo ni etye ka nywako kabedo i lwak jo oto. Ŋat ame maro yomoro ka cunye kaken, bino bedo twon acan amom twerre dok ŋat ame maro mato koŋo kede camo moo keken, mom twero doko alonyo kadi acel. Atim tim arac i kom ŋat a kite atira wao can i kome kene, dok ŋat a mom genne wao can i kome pi wuno ŋat a cunye ler. Tika ibed giri i tim ata, kato nywako kabedo kede dako ame maro da kede pido atata. Lonyo akana abeco ame malo meicel doŋ i ot a lo aryek ento ŋat amiŋ balo mere abala. Ŋat ame keto cunye me bedo dano a kite atira kun akica, bino nwoŋo kwo kede woro. Ŋat aryek twero mayo boma ame twoni jo atek en a kuro, babalo celgi atek ame ogeŋo oko. Ŋat ame gwoko kop ame ya i doge, geŋo ayela mom bino ikome. Ŋat a wakere dok daŋ cao jo olwoŋo ni, “Won aŋale,” ame tio ticcere ducu awaka awaka, Awackom to i mittere, pien ciŋe nwoŋo okwero mako tic oko. Atim tim areco rio paro jami a jo ocele naka ceŋ iyul, ento ŋat a kite atira poko gin etye kede i cuny aler. Rwot dag mot ame atim tim arac ŋolo me yale, kara doŋ ka en okelo motterenono i cuny a mom ber kono? Acaden agoba bino to, ento ŋat ame tamokoppere odoco kun mom ru okobo bino ri nakanaka. Ŋat a timo tim arac mom lwor, ento ŋat a cunye ler koŋ tamo kite me bedo mere. Ryeko mere, niaŋ atut, tam ame omio, gin luŋ mom ginnoro i nyim Rwot. Aguragura oyiko cutu pi kare me lweny, ento loc tye gire i ciŋ Rwot. Bedo i nyiŋ aber ber kato bedo kede lonyo adwoŋ; pwoc ame opwoyi kede ber kato kit limmoro ducu. Alonyo kede acan gin acel, Rwot gire en oketogi luŋ. Ŋat a wie tio neno peko a bino te geŋere, ento ŋat ame kwia piny medde mere anyim naka ka opoto i can. Ŋat ame wor, ame lworo Rwot, bino nwoŋo lonyo, woro kede kwo perakino. Okuto kede owic bedo i yo a jo a kitegi ogom, ŋat a gwokkere kene pe lubo yorgi. Pwony atin con i yo ame en myero bin lubi, en mom dok bino ya i yo-nono ka doŋ oteggo. Acan bedo i te loc alonyo, dok akwa-kwac bedo opii a ŋat edeno lim i baŋe. Ŋat acoo koti me balo ŋolo kop kakare, bino nwoŋo can acalo gin ocek pi ticcere-nono, lut me akemo mere bino poto piny nono. Ŋat a cunye yom i konyo jo bino nwoŋo gum, pien en nywako cammere kede ocan. Ryem aŋal jo oko i akinawu, lweny kede ayet bino gik oko. Ŋat ame cunye cil dok maro kobo kop me kica, dano-nono bino bedo awot abaka. Rwot ciko waŋe i ŋec a dano tye kede, en kwero kop a jo a mom genne oko, Anyapo kobo ni, “Eŋato gire tye oko, mio bino neka i dye yo ata.” Dog dako alaya calo twon bur atut, ŋat ame akemo omako Rwot i kome bino poto iye. Miŋo boye i cuny atin ka pwod tidi, cite lut me pwony ryemo oko i cunye. Ŋat ame wuno ocan pi medo lonyo mere, onyo ame mio mot baŋ olonyo, bino bedo twon acan. Koŋ icik yiti iwiny kop me ryeko meicel, mi tammi bed i kop ame aŋeo ame apwonyi kede, pien ibino bedo kede yomcuny ka ce imako a wi mom wil i ye, kun i kare luŋ mom orwenyo i dogi. Man bino miyo iketo genni i kom Rwot; man en gin omio akobo oko baŋi tin. Atyeko coyo kop apapat piri, gin pyeradek. Koppono tye me miyi ŋeyo gin aber dok a tye ateni, man bino miyo idwoko kop kakare ka ce jo oori. Kur ima ginnoro i baŋ acan, pien en mom romo timo ginnoro i komi, dok daŋ kur idi ŋattoro ame peko odio kai ŋolo kop. Pien Rwot bino pido pirgi, te yako kwo ajo ame yako kwogi. Kur imak dyere kede jo ame akemogi gwa, kur daŋ imar wot kedgi, naka mio yin daŋ ikoporo kiteginono, eka ite moko i owic. Kur ibed ŋat ame maro jiŋo jami mere atata, kun icun pi baŋya a jo ocele. Pien ka ce gin me culo bino loyi, obino tero anaka itanda me butoni. Kur ilok waŋ kiŋa me poko lobo, ame rik kwariwu oketo con. Ineno dano ame adiro i ticcere? Dano-nono bino bedo atic ame tio i nyim abaka, en mom bino tic baŋ jo ocele. Ka ce itye icam wun kede aloccoro, koŋ ipar pi ŋat a tye i nyimi-nono, tem diyo miti mogo, kadi bed kec onwoŋo okuto mac i komi. Kur imwony lao meicel i cammere a mit wokkono, pien cammono tye calo owic me ciki. Kur ilol komi pi nwoŋo lonyo, bed ŋat aryek iwek ginnoro bedi. Pien ka ibedo keto cunyi i kom lim, gire ya oko, twero ya oyot i kare moro keken, calo cur ame oyaro bwome te twarre gire wot oko malo. Kur icam cam a ŋat awany, kur imwony lao meicel i cammere a mit wokkono. Pien dano-nono rom aroma i ŋat ame kobbi ni, “Cami, mat on,” kun cunye akolo gin apat i komi. Bino miyo iŋoko cam amittono iyii oko, kop amit ame ikobo me pwoye te to nono. Kur ikob koppi baŋ lo amiŋ, pien bino cayo kop me ryeko ame ikobo-nono acaa. Kur ilok waŋ kina me poko lobo a rik oketo con, kur daŋ idony i lobo a jo ame onywalgi oto oko; pien ŋat ame lakoro kodi jo-nono tek meicel, en bino pidi pirgi. Bed ŋat ame keto cunye i gin ame opwonye kede, kun ciko yite i kop ame twero medo ŋecci. Kur iwek pwonyo atin atidi, pien ka ilebo dude i lut mom twero to. Ka ce ilebo dude i lut, ibino laro kwo mere mom donyo i lyel piny. Atinna, ka ce ryeko tye i cunyi, an daŋ cunya bino bedo yom. Abino lelo meicel, ka ce kop a ya i dogi mwonya. Kur ibed i nyeko i kom obalo, ento myero imedde lworo Rwot kare luŋ, Ateteni, gin oyiko pi kare me anyim gire tye abino, gen ame itye kede mom bino kec nono. Winy ba, atinna, me ibed ryek, mi tammi bed i yo ame itye ka lubo. Kur ibed i akina jo a mer i koŋo, akadi i akina oworo me riŋo, pien omero kede jo owor bino doko ocan, nino anina bino kelligi ruko opeke. Winy kop a pappi ame onywali, kur daŋ ica totti ka doŋ oti. Wil kop me ateni, kur icat oko, wil ryeko, wil daŋ pwony kede niaŋ atut. Papa a dano a kite atira bino lelo meicel, ŋat ame onywalo wode aryek, cunye bino bedo yom i kome. Mi pappi kede totti bed i yomcuny, mi totti bed kede lelo. Atinna, tim ber iwiny gin ame akobbi, kun waŋi neno gin ame an atimo. Pien alaya obedo twon bur atut, dako alaya calo bur pii adidiŋ. Ŋa ce a can opoto i kome? Ŋa atye cwercuny? Ŋa a da? Ŋa a tye i koko moro? Ŋa ame burroro tye i kome kun mom tye ginnoro owane? Ŋa a waŋe obok pee? Jo ame ri nakanaka i te koŋo, jo ame woto i bilo kit koŋo apapat. Kur inen koŋo ka pwod rema, koŋo ame pwod yenyo ayenya i kopo, donyo i kom dano mot. Kodi koŋo-nono kwirrere wuno dano calo kwir a twol, wuno dano calo kwir ororo. Waŋi te cako neno gigi mogo a welo meicel, ite cako tamo gigi mogo a konygi mom. Ibedo doŋ calo dano obuto i dye nam, calo dano obuto i wi pagi me mel malo. Ibino cako kobo kop atata ni, “Jo ogoa cite mom gire owana, gin opwoda cite mom gire awinyo kadi acel. Koŋo kara bino ya i wia caa adi? Amito dok cako yenyo koŋo me amata.” Nyeko myero kur maki ikom otim tim areco, kur ipar ni kono ibedo kedgi; pien cunygi kolo timo tim me byemi, kopgi opoŋ i kop me timo jo rac. Ryeko en amio ogero ot, niaŋ atut mio paco cuŋ atek; ŋec mio jami me wel, ame yomoro cuny durre meicel i ot. Dano aryek tye i twer adwoŋ kato ŋat atek; ŋat a tye i ŋec oromo kato atekom oko. Pien tel me ryeko twero miyo iloo lweny, dok omi-tam ka pol twero miyo jo loo pekogi ducu. Koppogo me ryeko loo ŋat amiŋ oko, en mom ŋamo doge kadi acel ka jo tye aparo kop a pire tek. Ŋat ame yiko yik me timo gin arac, olwoŋo ni won acupe. Roto time me miŋo en bal, jo dag won aŋale. Ka ce idoko agoro i kare me can, nwoŋo tekoni nok. Lar jo ame atero me aneka; lar jo ame to obabaŋo oko, Ka ce ikobo wunu ni, “Wan giwa yam mom oŋeo”; ŋat ame pimo cuny jo mom romo ŋeyo? Itamo ni ŋat ame ŋio gin atye i cunywa mom ŋeo? En mom bino culo dano acel acel kun lubo gin ame en otio? Atinna, cam moo kic, pien ber, moo kic ame cwer i pedo mit meicel. Ŋe ni ryeko daŋ rom aroma i moo kic, ka ce inwoŋo, anyimmi doŋ ennono, gen ame itye kede mom bino kec nono. Kur ibed buto i te ot a ŋat a kite atira, calo otim tim arac, kur itim timmoro me byemi i paco mere. Pien ŋat a kite atira twero poto tyen abiro, cite ya oko malo, ento atim tim arac can reto oko atwal. Kur ilel ba, ka okworri opoto, kur daŋ ibed i yomcuny ka ce akworri ogatte; naka mio Rwot neno cunye te waŋ, akemo mere te ya oko i kome. Kur ibed i par pi jo a kitegi reco, nyeko kur maki i kom otim tim areco, pien dano arac anyimmere pe, tara otim tim areco obino neko oko. Atinna; lwor Rwot kede abaka, kur ikwer winyo ŋattoro akinagi; pien can ame ya i baŋgi bino poto oyotoyot; myero iŋe kite ame ŋat acel acel acel i akinagi bino jwero kede jo. Magi daŋ obedo koppogo ame jo aryek okobo, Leŋere i ŋolo kop mom ber kadi acel, Ŋat ame kobbi atim tim arac ni, “Yin balloro mom i komi,” jo me lobo apol bino ceno, rok luŋ bino dago. Ento jo ame juko jo ame timo gin arac bino bedo gigi aber, dok gum bino bedo i komgi. Ŋat ame gamo dogi i kop atira, rom aroma i ŋat ame kwako kori kun tye i mar adwoŋ. Yik ticci oko con, tyek ticci me poto daŋ oko ducu, eka ite cako doŋ gero odi. Kur ibed acaden i kom dano wadwu aboŋo te kop, kopporo me goba myero kur ya i dogi. Kur ikob ni, “Abino time kite ame en otima kede, abino cule pi gin ame en otimo i koma.” Abeo i ŋet poto a dano a kome wac, i ŋet poto olok a ŋat a wie mom tio. Nen ba, okuto onwoŋo ocule iye acula, kun tere piny owummere oko ayilayila, aco gweŋe me apama cellere orutte oko piny. Aneno ate bedo lwodo koppere i cunya, nenona-nono opwonya. Koŋ ibut inin giri do, dol ciŋi giri me iwe, can bino poto i komi kite ame ayak poto kede i kom dano, kec bino poto i komi calo ŋat ame doŋ orukkere oko me lweny. Magi en pwony a Culeman ame jo a Kejekia, abaka me Juda ocoo i buk, Kwogo Obaŋa kano imun, ento kwogo obakki yabo imun kannaler, Kite acalo polo bor ame mom itwero yito tuno iye-ni, dok lobo daŋ tut ame mom itwero kunyo ituco tere, amannono daŋ mom itwero tato tam a tye i cuny obakki. Kwany cet ryal oko i kom ryal, atet twero teto bedo aber odoco; kwany jo areco oko i nyim abaka, kom loc abaka bino moko i kite atira. Kur imiye keni me cuŋ i nyim abaka, onyo me cuŋ i kabedo me dito; pien bedo ber ka ocwaŋi ni, “Biye ibed kan”, kato ame ocwai acwaa teŋe i nyim oloc. Gin ame doŋ ineno oko i waŋi, kur iru kelo i nyim okiko; kara ibino timo ŋo icennere ka awoti omii lewic? Lar koppi-nono wun awotti, wun aryo, dok kur iyab muŋ a ŋat ocele kannaler; naka mio ŋat ame owinyo mii lewic, nyini te bale oko atwal. Kop ame okobo i kite ame mitte ikokome, rom aroma i cal jabu ame omwono i kom ryal. Kop ame ŋat aryek juko kede ŋat a winyo kop, rom aroma atem me jabu onyo gi-kwogo me jabu. Akwena ame genne calo pee aŋic i kare me kac, baŋ jo ame oore; en dwoggo cuny adwoŋŋere ame oore. Ŋat ame wakere i mot ame en mom omio, rom aroma i pol kede yamo aboŋo kot. Mwolo twero konyi me loyo tam aloc, kop amit mio iloo teko mere. Ka ce inwoŋo moo kic, cam ame oromi keken, naka mio poŋ yii ite dok ŋoko oko. Kur ibed lolo tuŋ awotti alola, naka mio ool kedi oko, te cako dagi. Ŋat ame pido kop me goba i kom awottere, rom aroma i lut me romo, onyo pala bat, onyo atero abit meicel. Geno ŋat a mom genne i kare me can, rom aroma i bedo i laki ame otop, onyo i tyeni ame oŋwalo. Wero wer baŋ ŋat a cwercuny onuro oko, rom aroma i ŋat ame kwanyo boŋo i kome oko kun piny ŋic, dok daŋ rom aroma i kado ame oketo i wan bur, Ka ce kec oneko amoneni, mie cam, ka oryo pii ocire, mie pii mati; Pien ka itimo amano, ibino yido loti mac i wie. Rwotbino culi pi timmono. Yamo ame kodo i tun kide kelo kot, amannono daŋ kwoto jo kelo akemo. Bedo i ot ocele akadi mom ber wok, ber kato nywako ot wun i dako ame maro da. Amut aber oya i kannabor, rom aroma i pii aŋic ame omio baŋ dano ame oryo pii ociro, Dano a kite atira ame ye atim gin arac timo gin arac, rom aroma akoŋ ame coto dwoŋ iye onyo waŋ pii a doŋ oballe. Camo moo kic okato kare mom ber, pwoyo jo kare luŋ daŋ mom ber. Dano ame mom romo loye kene rom aroma i boma ame oturo ote weko apama cellere luŋ pe. Woro ŋat amiŋ, rom aroma i pee ame corre i kare me lyeto, onyo kot ame cwe i kare me kac. Cen ame oceni kede nononono mom timo ginnoro i komi, calo aculegwec ame twarre te riŋo atata, dok rom aliboro ame twarre riŋo oko. Aguragura mito go, kana mito twe doge, dano amiŋ daŋ mito agoa. Kur idok i kop a ŋat amiŋ kun ilubo kittere me miŋo, naka mio yin daŋ dok ibedo a rom aroma kede. Dok i kop a ŋat amiŋ kun ilubo kite me miŋo, naka mio en nenne kene ni eryek. Dano ame oro ŋat amiŋ me tero kwena mere, nwoŋo tye aŋolo tyene kene, kun ayenyo can i kakare. Carokop ame jo amiŋ kobo, rom aroma aŋwalo ame tyene ogem agema malo. Dano ame pwoo ŋat amiŋ, rom aroma i ŋat ame tweo gweŋ i atindio atwea. Carokop ame ŋat amiŋ kobo, rom aroma okuto ame coobo ciŋ amer koŋo. Ŋat ame mio amiŋo moro ata, ticcere onyo amer koŋo, rom aroma i won atero ame wano jo luŋ. Dano amiŋ ame medde ameda i miŋo mere, rom aroma i gwok ame lokere ŋano ŋokkere. Ŋat ame wakere pi ryeko mere en kene, gen ame en tye kede goro kato me a ŋat amiŋ oko. Anyapo kobo ni, “Eŋatu gire tye i dye yo! Eŋatu gire tye i dye gudo!” Awackom lokkere i kabuto mere, kite ame peta me doggola wire kede tuŋŋi i tuŋŋi, Awackom luto ciŋe i tabo, ento cwalo cam i doge loo oko. Awackom genne kene ni eryek, ame kato jo abiro ame twero dok i peny i ryeko. Ŋat ame donyo i daa ame mom mege, rom aroma i ŋattoro ame mako gwokkoro ata kede yite. Ŋat ame bwolo owote mere kun kobo ni, “An gire aratte arata”; rom aroma apoa ame bao dano i dog mac, onyo ame bao atero ame twero neko dano. Yen ka pe, mac to oko, amannono daŋ, ka akwot jo pe, daa gik oko. Ŋat a maro da, nyao lweny, rom aroma i miri onyo yen ame oonyo i mac okur. Kop akwot jo mit meicel, winyo mit calo mwonyo kwon obwol. Ŋat a kop i doge lim kun cunye col, rom aroma i pala ame opuo i kom gulu lobo, te ryeny aryenya. Adag jo lokere aloka i kop i doge, kun kano goba i cunye; ka ce en okobo kopporo i kica meicel kur iye, pien okano gigi mogo a mom ber i cunye. Kadi bed en kan adage ame tye i cunye, ento timmere arac bino nen oko kannaler i nyim lwak. Akuny bur, rette i burrere-nono, aba-gweŋ gweŋŋere-nono dwogo cele. Adag jo, dago ŋat ame emito bwalo, kop goba kadi mit kelo ka can keken. Kur iwakere pi gin ame bino bedo diki, pien mom iŋeo gin ame bino timere i ninonono. Jo ocele en a myero pwoi, pe myero ipwoye keni, welo moro en a myero pwoi, pe yin ikomi. Gweŋ pek, kwoyo daŋ pek, cite ayela ame ŋat amiŋ kelo pek katogi luŋ, Akemo gwa, iniga daŋ gwa meicel, cite nyeko rac katogi ducu. Ŋat ame juki i waŋ ceŋ, ber kato ŋat ame marrere i komi bedo ka i cunye. Awotti ame mari ka owaŋo cunyi pi mar ame en tye kede i komi, pwod itwero geno, cite akworri ka obolo ciŋe i ŋuti rac meicel. Ŋat oyeŋ kwero naka kic ame lim wok-ki, ento ŋat ame kec oneko, kadi cam okwok mitte amita. Ŋat ame oweko paco mere, te wot ata, calli winyo ame oya oweko ode oko. Moo wir akur yomoro cuny dano, cite peko balo cuny dano abala. Kur iwek awotti kede awot a pappi, kur iriŋ i ot ominni i kare me can, Awotti ame ceggi kedi ber, kato ominni ame tye kannabor. Atinna, bed ŋat aryek me cunya bed yom, me wek gamokop a ŋat ame kobo kop arac i koma bed yot. Ŋat a wie tio neno peko ame abino i nyime te geŋere, ento ŋat ame kwia piny medde ameda anyim naka ka opoto i can, Gam ruk a dano ka ce en onwoŋo ojeŋo pi baŋya a ŋat ame mom eŋeo, make en ikome ka ce inwoŋo en ocuŋ arok. Ŋat ame lammi awottere gum ibai kun redo kede areda, obino kobo ni en oceno awottere acena. Dako ame daa nakanaka, calo kot ame nido naka ceŋ iyul. Juko kodi dako-nono rom aroma i juko yamo, onyo jolo moo i cuny ciŋ. Nyonyo rabo nyonyo wadgi, dano daŋ twenyo dano wadgi. Agwok oduro camo nyige, ŋat ame gwoko adwoŋŋere, oketo kwogo i kome. Kite acalo inenne keni i pii, amannono daŋ, gin i cunyi nyuto kiteni. Lyel me yiko jo oto mom yeŋ, waŋ dano daŋ mom ol i neno piny. Nyonyo acalo ryal kede jabu otemo i mac, kite a dano ŋeye i kite a jo pake kede, Amiŋo kadi idin anyul onyo alek me odo kal, miŋo mere mom rwenyo i wie. Myero iŋe kite ame rommi tye kede aber, kwa dokki i cunyi ducu, pien lim mom perakino nakanaka, loc me lobo daŋ mom ri i doggola acel atwal. Kare ame lum doŋ mom nen, lum anyen dok cako tu, ame lum i kor kiddi daŋ doŋ ocoko oko luŋ. Yer rommi bino konyi me aruka, dyegi bino konyi me wilo poto; cak dyegi bino bedo adwoŋ ame romowu me amata, kun romo jo me odi kede aŋecani luŋ. Atim gin arac ŋweco aboŋo ŋat ame aryeme, ento ŋat ame cunye atira, cunye tek calo eŋatu. Lobo ka oballe, oloccere bedo apipim, cite ka aloccere niaŋ, dok tye kede ŋec oromo, lobo-nono medde bedo i kuc kare alac. Acan ame wuno ocan wadgi, rom aroma i kot ame corre balo cam a jo luŋ. Jo ame weko lubo cik a Rwot, pwoo otim tim areco, ento jo ame gwoko cik a Rwot tye acalo okworgi. Jo areco mom niaŋ kop kom ŋolo kop atira, ento jo ame cunygi tye kom Rwot niaŋ iye odoco. Tika ibed acan ame genne, kato bedo alonyo ame kobo kop ogom. Ŋat ame gwoko cik bedo atin aryek, ento atin ame mako dyere i jo owor mio pappaere lewic. Ka lonyo obino i ciŋi pi cero jo i mit me nwoŋo agoba, limmi-nono bino kobo oko iciŋ ŋat ame timo ocan kica. Ka ce dano okwero winyo cik a Rwot oko, kwaccere daŋ bino bedo gin ame Rwot dag winyo. Ŋat ame telo ŋat ame cunye ler iyo arac, bino rette i bur ame en okunyo; ento ŋat ame balloro mom i kome bino nwoŋo jami abeco. Alonyo genne kene ni eryek, ento acan ame wie tio ŋeo tammere oko, Ka ce dano a kite atira odoko aloc, jo ŋatte i twon yomcuny adwoŋ meicel, ento ka ŋat a kite rac odoko aloc, jo luŋ pono oko. Ŋat ame kano ballere mom twero bedo aber, ento ŋat ame tuco mege oko, te weko, obino timo kica. Ŋat ame lworo Rwot i kare luŋ tye kede winyo, ento ŋat ame cunye nwaŋ bino poto i can, Aloc ame kite rac, ame jo mere ocan, calo eŋatu ame mor onyo ŋuu ame yenyo leyi me amwoda. Aloc ame niaŋŋere nok, wuno jo meicel, ento ŋat ame dag lim ame onwoŋo i yo a mom atira bino ri kare alac. Ka ce bal me remo a dano moro ocele onuo dano moro oko, dano-nono bino ŋwec oko atata tuno waŋ ame oto, ŋattoro myero kur konye. Jo ame tio gin ame tye atira bino bwot, ento jo ame kitegi ogom bino poto i bur. Ŋat ame puro poto mere abup, bino nwoŋo cam abup, ento ŋat ame balo kare mere i gin a konnyere pe, bino bedo i twon can adwoŋ. Lonyo bino bedo adwoŋ baŋ ŋat ame genne, ento ŋat ame mito lony oyot mom bino bwot a mom oketo can i kome. Leŋere i ŋolo kop mom ber, dano twero timo gin arac kom pi kwon aduno moro. Dano ame adur mito ni elony oyot, cite mom niaŋ ni can bino poto i kome, Ŋat ame juko dano wadgi obino pwoyo atek meicel icennere, kato ŋat ame bedo duro doge keken, Ŋat ame mao gi-a pappere onyo mea tottere, te kobo ni, “Mannono gire mom bal”, obedo awot a ŋat ame neko jo. Ŋat owor nyao lweny, ento ŋat oketo gennere i kom Rwot bino doko alonyo. Ŋat ame genne kene, obedo dano amiŋ, ento ŋat ame timo tim me ryeko bino bwot. Ŋat ame konyo ocan, lim mom bino rwenyo i ciŋe, ento ŋat ame waŋe wummere oko, bino coko lwak ceŋ apipim. Ka ce dano arac ocako loc, jo luŋ pono oko, ento ka loccere ogik, jo a kitegi atira cako nya. Ŋat ame ojuko kare luŋ kun mom ŋut, bino tur odoco a mom dok ya malo. Ka jo a kitegi atira tye i loc, jo luŋ lelo, ento ka jo areco tye i loc, cur ciro jo oko. Ŋat ame maro ryeko, yommoro cuny pappere, ento ŋat ame mako dyere olaya, balo limmere abala. Lobo bedo aber ka abaka ŋolo kop atira, ento ka abaka maro lim ame owile kede i muŋ, lobo bale oko. Ŋat ame pwoo owote mere nononono, ciko bwo ame tyene en i kome bino moko iye. Ŋat arac moko i owic me ballere, ento ŋat a kite atira wero kun daŋ lelo, Ŋat a kite atira ŋeo gin a myero tim pi ocan, ento ŋat a kite rac mom ŋeo ginnoro iye. Wegi aŋale kelo arubaruba i akina jo i boma, ento ŋat aryek kweo akemo a jo akwea. Ka ce dano aryeko opyem kede dano amiŋ, amiŋo no, te redo kede nyere aboŋo liŋ. Jo ame maro neko owotegi dag ŋat a balloro mom i kome, otim tim areco mito neke aneka. Amiŋo nyuto akemo mere kannaler ento ŋat ame ryek dio cunye mot. Ka ce aloc maro winyo kop me goba, oticcere adoŋo luŋ bedo timo tim areco. Acan kede ŋat ame wune gin luŋ acel, Rwot en ame omiogi wangi me neno piny. Ka ce aloc ŋolo kop ocan, kun terogi arorom, loccere perakino kare alac. Goyo atin kede juko, mio atin doko aryek, ento atin ame oweko ata mio tottere lewic. Ka ce otim tim areco tye i loc, bal medde ameda, ento jo a kitegi atira neno kite ame gin poto kede. Pwony atinni con, en bino miyi iwe, bino miyo cunyi bedo yom. Kan ame dano moro pe iye ame niaŋo jo i gin Obaŋa mito, jo iye gak oko, ento ŋat ame gwoko cik tye ked winyo. Kop me dog keken, mom romo pwonyo amiro, kadi bed en niaŋ, ento mom romo keto cunye iye. Ŋat ame kobo kop oyot aboŋo koŋ tamo gin ekobo, gen ame en tye kede goro kato me a ŋat amiŋ oko, Ŋat a pito amiro mere i jami luŋ geye i tino mere, amiro-nono bino doko ale jami mere icennere. Won akemo tubo jo, dok won iniga mio bal bedo dwoŋ, Awaka dwoko dano adwoka piny, ento mwolo mio dano doko ŋat a jo woro. A wot a ŋat ame akwo nwoŋo mito nekere kene, en winyo kite ame alammi akwo gum arac cite mom twero tuco. Lworo jo mio dano moko i owic, ento ŋat ame geno Rwot bedo kede kuc. Jo apol mito ni oloc pwoogi; ento Rwot tero jo ducu arorom. Jo a kitegi atira dag otim tim areco, otim tim areco daŋ dag jo a kitegi atira. Magi en kop ame Agur wot a Jake okobo; Aol gira doŋ oko, Ama Obaŋa, aol gira doŋ oko. Ateteni, an gira amiŋ meicel, ame mom aporre bedo dano, ŋec ame atye kede mom rom kede me a dano. An mom opwonya kede ryeko moro; mom daŋ atye kede ŋeccoro i kom ŋat Acil. Ŋa ame yam koŋ oyito malo i polo, te dok dwogo piny? Ŋa ame yam ocoko yamo luŋ te mako i cuny ciŋe? Ŋa ame yam oboo pii kede boŋo mere? Ŋa ame omio acakki me wi podo luŋ omoko? Nyiŋ dano-nono ŋa? Nyiŋ wode ŋa? Aniaŋ aber ni yin gire iŋeo! Kop luŋ ame Obaŋa okobo bedo ateni; en obedo kwot baŋ jo ame riŋo laro baŋe. Myero kur dok imed kopporo i kom mege, naka mio en juki, ite bedo agoba. Tye jami aryo ame an akwai iye; ame pe myero itwona kun mom ru ato. Kwany oko i baŋa kobo kop me goba, kede bwolo jo, kur imia abed acan onyo alonyo, pita icam ame mitte ikokome; naka mia ayeŋ atek ateka ate kweri oko, kun akobo ni, “Rwot kara en ŋa?” Onyo adoko acan ate cako kwala kwo, ate balo nyiŋ Obaŋana. Kur ibal nyiŋ amiro moro baŋ adwoŋŋere, naka mio en ceni bal te bedo i wii, Tye jo ocele ame ceno papagi, mom daŋ olammi totogi winyo. Tye jo ocele ame nenne kengi ni gin ocil, aco kun cilo pwod onwanne anwana i komgi. Tye jo ocele ame lyerre meicel, kun otamo ni gin obedo jo amalo meicel. Tye jo ocele ame lakgi odoko gi-lwenygi, lakgi tye acalo pala me romogi, me jwero ocan oko i lobo kede jo ame okonyo akonya ame tye i akina jo. Edike tye kede anyira mere aryo ame gin luŋ okobo ni, “Mia, mia ba,” Tye jami adek a mom yeŋ kadi acel, tye jami aŋwen a mom kobo ni, “Doŋ oromo,” lyel me yiko jo, oraŋa a mom nywal, lobo otwo imek, ame mito pii kare luŋ, kede mac ame kare moro pe koŋ kobo ni, “Doŋ oromo.” Atin ame ŋalo pappere i waŋe, bwono tottere abwona kun mom winyo, winy me kulo bino woto toŋ waŋe oko, acut te camokome oko. Tye jami adek ame malo meicel baŋa; tye jami aŋwen ame mom aniaŋ iye; Yo ame cur beo iye malo i polo, yo ame twol lubo i wi lela, yo ame mel beo iye i dye nam adoŋo, kede kite ame ico bedo i nyako. Dako ame alaya bedo kit man, en cemo te weyo doge oko, eka te kobo ni, “An gire mom atimo ginnoro arac.” Tye jami adek ame myelo kom lobo meicel, tye jami aŋwen ame lobo mom romo kanyo kadi acel: opii ka odoko abaka, kede amiŋo ka ocamo cem oyeŋ; kede dako a jo mom maro ka onyomere, kede aŋeca ka oleo kaka dako a yam loc. Tye jami aŋwen i lobo ame mom dito kadi acel, ento gin oryek meicel: mori mom tek kadi acel, ento gin ogwoko camgi me acama i kare me oro. Anyeri kidi obedo leyi a mom twero ginnoro kadi acel, ento gin bedo i gorogoro; bonyo mom tye abaka moro kadi acel, ento gin luŋ ociro i tyen ka owot; agwedegwede itwero mako i ciŋi, cite gin obedo naka i pacci obakki. Tye jami adek ame woto i yore me aura meicel, tye jami aŋwen ame yon ayona i wot: eŋatu ame twergi dwoŋ meicel i akina leyi, ame mom lworo lee moro kadi acel i akina leyi luŋ; kede twon gweno ame yutte ayuta, karacel kede nyok dyel, kede abaka me yon i wot i nyim jo mere. Ka ce yam imiŋ, ame ipakere keni ni imalo meicel, onyo ka ce yam cunyi opoŋ kede bal, myero koŋ dokicak neno odoco. Pien puyo cak mio moo poto, twinyo wum atek ateka kelo remo, akemo agwa kelo daa. Magi en tam a pirgi dito ame abaka Lemuel okobo, ame tottere onwoŋo opwonye kede. Atinna, kop aŋo ba? Kop aŋo ba, nyodo? Kop aŋo ba, woda ame akwoŋo kwoŋ pire-nie? Kur ibal tekoni i kom mon, kur ibal kareni i kom jo ame turo obakki. Mom gire ber baŋ obakki, atinna Lemuel, obakki gire mom porre mato koŋo, oloc daŋ mom oporre mato koŋo akec akeca, naka mio mato wigi te wil oko i kom gin a cik okwako, wigi te wil oko i kom jo a can odio. Mi koŋo akec baŋ ŋat ame doŋ ato oko, kede koŋo olok baŋ jo ame cwercuny ociro. Migi omat wigi te wil oko i cangi, mom dok ote poo i kom pekogi. Yab dogi pi jo a lebgi oto, pi jo ame oweko ata, Yab dogi me iŋol kop atira, gwok gin ame myero tim i kom ocan, kede gin ame myero tim i kom jo ame mito akonya. Ŋa ame twero nwoŋo dako aber odoco? Kodi dako-nono malo meicel, ame kato tigo me wel oko. Cware geno atek, en gire mom bino bedo acan. Dako-nono timo gin aber pire, cite mom gin arac, pi kare luŋ me kwo mere, En yenyo ka yer rommi kede uci pamba, te tiyo ticcere i yomcuny. Kodi dako-nono rom aroma i mel ocat wil, ame kelo cammere i kannabor. En dilo ibai ame piny pwod col acola, te miyo jo ode luŋ cam, En yenyo poto anyen te daŋ wilo oko, en pito poto olok i lim oya i ciŋe. En obedo atic atek meicel, kome mit meicel i tic. En ŋeo ka cato willere tye awot aber, tara mere mom to dyewor. En wio uci te cweyo boŋo mere kene, en kwoo boŋo mere kene. Dako-nono pokki ocan jami mere, konyo daŋ jo ame mito akonya. En mom bedo i lworo moro i kare me koyo pi jo me ode, pien jo ode luŋ nwoŋo oruko boŋŋi alyet. En kwoo boŋŋi me aruka mere en ikome, en ruko boŋo camanini aber kede en obedo amaramar. Cware ŋeye kene i ka poro kop a pire tek, en neye kene ka obedo i akina odoŋe me bomagi. En kwoo boŋŋi me acata, en cato del baŋ ocat wil. En tek, jo daŋ wore meicel, en nyero, pien nwoŋo mom tye kede lworo moro i kom gin a tye anyim. En kobo koppere luŋ i ryeko, kare luŋ pwonyo pwonnyere luŋ i kica, En gwoko jo me ode luŋ aber, en mom bedo abeda kun mom atimo ginnoro. Kare luŋ itino mere ya malo te pwoye, cware daŋ pwoc, kun kobo ni, “Mon ocele timo jami abeco, ento yin ikatogi luŋ,” Tye timmogo amwonya ame bwolo jo, ber a kom daŋ konnyere pe; ento dako ame lworo Rwot myero pwoo. Dako-nono myero pwoo pi gin a en timo, myero pwoc kan ame odoŋe poro iye kop a pire tek. Man en kop arabkop, wot a Daudi, abaka me Jerucalem. Konnyere pe, konnyere pe, man kit ame arabkop okobo kede Kwo gire konnyere pe! Konnyere kom pe atwal. Kony aŋo kara ame dano nwoŋo i tic atek luŋ ame en lolle iye, ame en lolle iye i te ceŋ piny kan? Lwagi jo man kato, lwagi jo ocele dok bino, en lobo bedo mere kite acel kare luŋ Ceŋ donnyo te dok poto, te dok ru lokere dok oko cen kun ame woki edonnyo iye. Yamo kodo dok tutuŋ anyarolum, eka te wirre dok tutuŋ anyarodi; yamo te bedo mano piny kittono nakanaka tuno ka okato, wirre amannono naka te dok dwogo cen kakare, Pii ame opoŋ i kulo luŋ mol woto i nam, cite nam mom poŋ gire; pii dok cen kan ame kulo ocakere iye, te dok cako mol i kuno dwogo i nam, Jami luŋ doŋ ool gire meicel, mom tye ginnoro ame dano romo kobo iye; waŋ dano mom yeŋi i gin ame eneno, yit dano daŋ mom yeŋ i gin ame cwinyo. Gin ame yam tye, en ame daŋ bino bedo tye, kede gin ame yam otio, en ame daŋ obino tiyo; ginnoro anyen gire mom tye i te ceŋ piny kan, Tye ginnoro ame otwero kobo ni, “Neno, man pwod nyen?” Yam gire obedo tye con, i kare okato ame wan pwod ope. Jo gire mom tye ka po pi jami a yam otimere con, dok daŋ mom tye ŋattoro i akina jo ame bino lubogi, ame bino po i kom gin ame bino timere anyim. An arabkop, yam abedo abaka me Icrael i Jerucalem. Abedo miyo wia tic kede ryeko me yenyo kede ŋeyo jami luŋ ame tye ka timere i te polo piny kano Obaŋa omio dano lolle i tic ame mom kelo yomcuny kadi acel. Atyeko neno jami luŋ ame tye atimere piny i te ceŋ piny kan; gin luŋ aluŋa anwoŋo ni konygi pe; gin luŋ rom aroma i ryemo yo yamo, Yat ka ogom con mom dok romo twenyere, dok mom oromo kwano jami ame komgi pe onen. Acako lwodo kop i cunya kena kun akobo ni, “An abedo twon dano moro aryek meicel, aryek akato oloc luŋ ame ogeo loc i Jerucalem. An atyeko beo i kite ryeko apapat, atye doŋ iŋec abup meicel.” Abedo miyo wia tic me ŋeyo ryeko, kede apoa, karacel kede miŋo. Atyeko niaŋ ni mannono daŋ konnyere mom; rom aroma i ryemo yo yamo. Pien ka iryek atek ateka, ibedo daŋ ipar abup meicel, dok daŋ ka ŋeci dwoŋ admoŋa, ibedo daŋ i cwercuny adwoŋ. Man omio akobo i cunya ni, “Koŋ dok atem ŋiyo gin ame olwoŋo ni yomcuny; koŋ ami cunya bed ayom.” Cite ate roto ni man daŋ konnyere mom, Man omio akobo ni nyero kara obedo tim me miŋo meicel, yomcuny konnyere gire mom. Wia dok te cako tic, kun atamo ni kono koŋ dok atemo obo koma kede koŋo; kan onwoŋo adama pwod tye atela kede ryeko, kun atemo ŋiyo timmogo me miŋo, tuno ka atwero nwoŋo ginnoro aber ame dano romo timo i te polo piny kan, i kare me kwo mere anonok i lobo-ni. Atyeko tiyo tic adoŋodoŋo meicel. Agero udina apol, apito daŋ poto olok apol. Apuro pottina, ate tiyo daŋ twoni lekkogo adoŋodoŋo me galo waŋ ame ocelo oko i gweŋe apaa, ate pito i yigi kit yen apapat me acama. Akunyo daŋ kuttogo me pii adoŋodoŋo, me aonya i te yen ame apito, Awilo opii apipim, en a co kede a mon, dok onwoŋo daŋ atye kede opii mogo ame onywalo i oda. Dok daŋ onwoŋo tye i ciŋa apipim, dyegi kede rommi onwoŋo pol atata, onwoŋo atye kedgi abup ame kato me oloc luŋ ame ogeo loc i Jerucalem. Dok onwoŋo acoko ryal kede jabu adwoŋ meicel, karacel kede limmogo ame oya i baŋ obakki kede i baŋ gabuna me dul lobo acel acel. Rik daŋ atye i lwak ower a co kede a mon apol meicel, karacel i mon apol, kede ginnoro luŋ ame yomoro cuny dano. Mannono omio adoko twon lo moro adwoŋ meicel ame kato jo luŋ ame ogeo bedo i Jerucalem; ryekona daŋ naka mom orwenyo. Ginnoro luŋ ame onwoŋo amito anwoŋo; rik mom akwero bedo i yomcuny, pien cunya onwoŋo yom atek i tic ame atio, motta onwoŋo ennono pi tic luŋ ame abedo lolle iye. Icennere ate koŋ dok bedo tamo pi gin ame abedo tiyo kede lolle ame abedo lolle kede me tiyogi, nen ba, gin luŋ onwoŋo konygi mom; orom aroma i ryemo yo yamo; ate nwoŋo ni mom tye agoba moro ame dano twero nwoŋo i te ceŋ piny kano Abedo miyo wia tic me ŋeyo ryeko kede apoa, karacel kede miŋo. Kara ŋo ame abaka oleo kaka obakki twero timo ame pat i gin ame jo otelo nyime obedo timo. Aniaŋ ni ryeko ber kato miŋo, kite ame lero kato kede colpiny. Lo aryek tye kede ŋec i kom gin ame etio, ento ŋat amiŋ tio mege i colpiny; dok aroto daŋ ni tye gin acel ame poto i komgi gin ducu. Man omio akobo kena kena ni, “Koŋ inen gin ame poto i kom amiŋo bino poto daŋ i koma; kara doŋ Iŋo ame an anwono pi bedo kede ryeko adwoŋ adwona-ni?” Man omio akobo kena kena ni man daŋ konnyere kara mom. Pien mom tye ginnoro ame mio jo po nakanaka pi ŋat aryek onyo pi amiŋo, pien aneno ni i kare ame tye i nyim, nwoŋo mom dok tye ŋattoro ame otwero po pire, Aryeko daŋ to i kite ame amiŋo to kede. Mannono omio cunya okwero kwo meicel, pien ginnoro luŋ ame dano timo piny i te polo kan, gin luŋ omia ka cwercuny; pien gin luŋ orom aroma i ryemo yo yamo. Mannono omio cunya okwero meicel ticcoro luŋ ame abedo lolle kede i te ceŋ piny kan, ka aneno ni gin luŋ abino weko baŋ ŋat ame bino leyo kakara. Aco-gu mom neye ka ce danonono bino bedo ŋat aryek onyo amiŋ. Kadi bed en bino bedo kit dano aŋo, en gire bino bedo won jami luŋ ame an abedo lolle kedgi, kun aluno ryekona i komgi piny i te ceŋ kan. Man daŋ anwoŋo ni konnyere mom. Man omio alokere aneno ŋea, cunya te ya oko i kom tic luŋ ame abedo lolle iye piny i te ceŋ kan, pien kare ocele dano ame obedo lolle i ryeko mere, i ŋeccere kede diro mere luŋ, weko gin ame ebedo lolle kede-nono oko, eka lo a mom ololle iye kadi acel en ame te bedo yomoro i cunye. Man daŋ anwoŋo ni konnyere mom, dok obedo twon ginnoro arac meicel. Kara doŋ ŋo ame dano nwoŋo pi lolle kede kanyakino i tic ame ebedo lolle kede piny i te ceŋ kan? Pien pi kare me kwo mere luŋ nwoŋo en opoŋ i rem, dok ticcere daŋ kelle ka cwercuny. Cunye-gu mom limo weo dyewor. Man daŋ konnyere gire mom. Mom dok tye ginnoro ocele ame ber pi dano, kono ka ni en myero cam cem, matte, onwoŋ yomcuny pi lolle mere. Man daŋ aneno ni obedo gin ame Obaŋa en oyiko ni myero bed kittono, pien aboŋo en Obaŋa, ŋa ame romo cem onyo bedo kede yomcuny? Pien Obaŋa mio ryeko, niaŋ atut kede lelo ban jo ame yomoro cunye; cite obalo, en miogi tic me bedo coko lim yido karacel me ote miyo ban jo ame yomoro cuny Obaŋa. Man daŋ konnyere mom, rom aroma i ryemo yo yamo. Pien jami luŋ tye kede karegi, jami luŋ ame timere i te polo kan tye kede karegi: Tye kare me nywalo dano kede kare me to mere; tye kare me pito ginnoro-ni kede kare me puto dok oko; tye kare me neko dano kede kare me cano acaŋa; tye kare me reto ot piny kede kare me gero agera, tye kare me koko kede kare me nyero; tye kare me kumo kede kare me myel, tye kare me babao gweŋe teŋe kede kare me coko acoka; tye kare me kwakere kede kare ame mom me kwakere; tye kare me yenyo gin orwenyo kede kare me rwenyo mere; tye kare gwoko ogwoka kede kare bolo abola; tye kare me yeco boŋo ayeca kede kare me kwoyo akwoa; tye kare me liŋ aliŋa kede kare me bedo kop akopa; tye kare me maro dano kede kare me dago adaga; tye kare me lweny kede kare me kuc: Kony aŋo ame atic nwoŋo pi lolle mere? Atyeko neno tic ame Obaŋa omio itino a dano me bedo yelle kede. En oketo jami luŋ abeco meicel i karegi ikokome; dok omio dano twero ŋeyo kare a doŋ okato oko kede kare ame pwod tye anyim, cite kadi bed amannono, dano mom romo roto gin ame Obaŋa otio cakere iyi ageyi naka i agikki mere. Aniaŋ ni mom dok tye ginnoro ocele ame ber pi dano ame kato bedo i yomcuny, kun yomoro cunye i kare ame en pwod tye kwo; dok daŋ dano myero cam cem, matte, kun yomoro cunye i gin ame ebedo lolle kede, pien magi-nono obedo mot ame Obaŋa en omie. Aniaŋ ni gin ame Obaŋa timo perakino waŋ i waŋ; mom tye ginnoro ame dok otwero medo iye onyo ame otwero kwanyo akwanya iye. Obaŋa otimo amannono, me dano bed kede lworo i kome. Gin ame aman tye, yam koŋ obedo tye con, gin ame bino bedo tye, yam koŋ obedo tye con; Obaŋa yenyo gin ame oryemo oko teŋe. Medo i kom mannono, aneno ni i te ceŋ piny kan, timmogo areco en ame lunyo timere akaka tero jo luŋ arorom, akaka kite atira, tim areco en ame lunyo bedo tye. Man omio akobo i cunya ni, Obaŋa bino ŋolo kop a jo akitegi atira kede me a jo a kitegi reco, pien en otyeko keto kare me jami ducu. Dok ate kop i cunya ni Obaŋa tye atemo dano me nyuttigi ni gin orom aroma i leyi. Pien to a dano kede to a leyi rom aroma, kite dano to kede en ame leyi daŋ to kede. Kwogi tye acel, dano mom kato lee kede ginnoro, pien jami luŋ konygi mom. Gin luŋ owoto i kabedo acel, gin luŋ oya iyi apua, dok gin luŋ odok i iyi apua, Ŋa kara ame ŋeo ka tipo a dano woto malo i polo, kun me a leyi woto piny i lobo? Man omio aneno ni mom dok tye ginnoro ocele aber ame kato pi dano, kono ka dano ibedo kede yomcuny i ticcere, pien mannono keken en ame obedo gin ame otyeko pokke. Kara ŋa ame dok twero dwogo dano cen me bino neno gin ame bino timere i lobo i kare ame en doŋ pe iye? Dok ate neno kite ame dano tye ka wuno kede dano wadgi piny i te ceŋ kan. Nen ba, aneno pig waŋ jo ame owuno tye aony irat, cite mom tye ŋattoro ame twero kweyo cunygi! Aco kono jo ame wunogi-nono tye i teko adwoŋ meicel ame ŋattoro mom tye ame twero konyogi. Man omio atamo ni jo ame oto gigi oko, jo-nono komgi i gum meicel ame kato jo ame pwod tye kwo. A doŋ kato magi-nono luŋ, en aye dano ame mom ru onywalo, ame waŋe mom ru oneno tim areco ame tye ka timere piny i te ceŋ kan. Aneno daŋ ni gin omio jo tio tic atek i twon diro meicel, pien ŋat acel acel mito ni elo jo ocele i jami luŋ. Man daŋ konnyere pe, rom aroma i ryemo yo yamo. Amiŋo dolo ciŋe te miyo kome neno can tuno waŋ oto. Tika ibed kede jami ame opoŋ ciŋi acel keken, kun itye i kuc i cunyi, kato ame ibedo lolle i jami ame opoŋ cini ryoryo, ame daŋ rom aroma i ryemo yo yamo. Tye dok gin ocele ame aneno ame konnyere mom i te ceŋ piny kan, Lo a mom tye kede dano mere moro, wode onyo ominnere, cite bedo lolle; tic aboŋo weo, dok daŋ waŋe mom koŋ yeŋ i lim a doŋ tye i ciŋe, cite mom koŋ penyere kene kene ni, “Kara pi ŋa ba ame an abedo lolle i tic pire-nie, ame geŋa bedo kede yomcunnyie?” Man daŋ aneno ni konnyere mom, obedo tic a mom kelo yomcuny kadi acel. Jo aryo ber kato dano acel, pien gin romo tiyo ticcoro ame kelligi ginnoro abeber. Pien ka ce gin opoto, ŋat acel bino tiŋo awottere malo. Ento ŋat ame tye kene, ka opoto, mom dok tye ŋattoro ame romo tiŋe malo, dano-nono tye kede can. Dok medo kede mannono, jo aryo ka obuto karacel, komgi bedo amomor; kara dano acel twero nwoŋo lyeto i yore aŋo? Kadi bed akwor twero loyo ŋat ame tye kene, cite jo aryo bino loye oko. Tol ame owio i yore adek mom cot oyotoyot. Awobi aryek kun acan ber kato abaka oti, amiŋ, ame mom don romo ye tam ame omie, kadi bed en onwoŋo oya i ot kol te doko aloc onyo onywale ame acan i lobo ame en loo-nono. Aneno jo luŋ ame kwo ame tye piny i te ceŋ kan, karacel kede en awobi-nono ame bino leyo kakarenono; aneno ni jo mere pol a mom kwanne, cite awobi-nono onwoŋo loogi luŋ. Kadi bed amannono, jo ocele ame bino Jubogi mom bino bedo kede lelo i kom awobi-nono. Ateteni, man daŋ konnyere mom, rom aroma i ryemo yo yamo. Gwokere ka iwoto i ot woro Obaŋa. Wot i nyim Obaŋa me wot winyo koppere ber kato jo ame yalo Obaŋa i motgi miŋomiŋo, kun mom oŋeo ni otye otimo gin arac. Kur iru ŋamo dogi, kur daŋ imi cunyi myel i kobo gin ame tye i cunyi i nyim Obaŋa, pien Obaŋa tye i polo, ento yin itye i lobo. Pi mannono ba, myero kur idur kop apol apola. Pien lek bino i tic apol meicel; dwon ŋat amiŋ duro kop adura. Ka ce kwoŋo kwoŋŋoro baŋ Obaŋa, myero iru cobo oyot, pien cuny Obaŋa mom yom i kom kop me miŋo. Myero icob gin ame ikwoŋo pire. Ber ka ibedo ame mom ikwoŋo kwoŋŋoro, kato ame ikwoŋo eka mom ite cobo gin ame ikwoŋo. Kur imi dogi mi ipot i bal, dok daŋ kur ikob i nyim akwena Obaŋa ni dogi rik ocer acera, Piŋo kara imio cuny Obaŋa waŋ i kop ame oya i dogi, eka te balo tic ame itio oko? Pien ka lek medde ameda, kop a konygi mom durre adura, cite yin myero ibed kede lworo i kom Obaŋa. Kur ibed kede wur ka ce i loba moro-ni ineno oloc iye tye ka wuno ocan, kun mom daŋ oŋolo kopgi kakare, dok mom oterogi acalo dano; pien aloc adwoŋ iye tye kede aloc ocele adwoŋ katte ame tye ka nene, dok daŋ tye en ocele ame loogi ducu. Cite akato ducu, abaka tye kede kony adwoŋ meicel i loba ame jo puro. Ŋat ame maro lim lim mom romo; ŋat ame maro lonyo daŋ agoba mom romo; man daŋ konnyere mom. Ka ce lim omedde i ciŋi, yo me keto mere daŋ nya medde ameda; Kara doŋ kony aŋo ame won limmono nwoŋo iye? Mom nwoŋo ka yomcuny me bedo neno anena? Apakaca nino meicel kadi bed ocamo kwon aduno onyo abup; ento lim abup geno alonyo nino. Tye twon timmoro arac meicel ame aneno tye ka timere piny i te ceŋ kan; dano moro-ni twero kano limmere te dok kelle peko, limmere-nono te rwenyo oko i yore a mom ber kadi acel. Aco kono won limmono nwoŋo tye kede wode, ginnoro mom nwoŋo odoŋ i ciŋe. Kite ame rik en odonyo kede i yi tottere, en kite ame en dok bino dok kede. En rik obino onoro, bino dok daŋ onoro, kun mom tero ginnoro, aboŋo ginnoro ame oya i kom ticcere ame ebedo lolle kede, Man daŋ obedo twon timmoro arac meicel ame tye ka timere. Kite ame en rik obino kede i lobo, en ame en daŋ bino dok kede. Kara doŋ kony aŋo ame danonono onwoŋo me bedo lolle i yamo nono, kun obalo kare mere luŋ i piny acol, kun cunye cwer, dok akemo kede par ociro oko, dok kome-gu daŋ mom yot? Nen ba, gin ame an doŋ aneno ni tye aber ame porre me atima, en aye me camo cem kede matte, dano myero onwoŋ yomcuny pi lolle mere ame ebedo lolle kede i te ceŋ piny kan, pi kare me kwo mere anonok ame Obaŋa omie, pien mannono keken en ame obedo gin ame otyeko pokkere. Dano ducu ame Obaŋa omio lonyo kede gum me bilogi, kede ye gamo gin ame opokke, kun nwoŋo yomcuny i gin ame ebedo lolle iye. Man obedo mot ame Obaŋa en omio. Pien dano-nono mom bino po wok i kom kare me kwo mere i lobo, pien Obaŋa omio en opoŋ i yomcuny i cunye i kare luŋ. Tye dok tim ocele arac ame aneno piny i te ceŋ kan, ame odio dano meicel. Obaŋa twero miyo dano moro-ni lonyo, lwak jami apipim, kede kwogo, kun mom dok tye ginnoro ame en mito ame nwoŋo mom tye baŋe, cite Obaŋa mom dok te miye gum me bilogi, ento dano moro ata en ame dok te lunyo bilo. Man daŋ konnyere mom meicel, dok obedo twon burroro ame lit meicel. Ka ce dano onywalo itino mia acel twal, te daŋ perakino i loba kare alac, ame mwakki ame en operakino kede i lobo bup atek, cite en dano-nono mom te bilo jami abeco me kwo man, eka mom daŋ dok ote yiko dano-nono, an aneno ni atin ame obwogo abwoga tye aber kato dano-nono oko. Pien obino i yore a mom konyo te kato gire oko i piny acol, kan ame nyiŋe te rwenyo oko iye. Medo i kom mannono, en gire mom oneno ceŋ, mom daŋ oŋeo ginnoro; ento owe gire aber ame kato dano ca oko. Kadi bed dano naca onwoŋo perakino i lobo pi mwakki ame romo tutumia aryo twal, ce en mom obilo yomcuny me gin abeco i kwo man, atin ame obwogo abwoga loc gire oko, Mom gin aryo luŋ owoto i kabedo acel. Lolle ame dano lolle kede luŋ tye pi yie, kadi bed amannono, mittere mom gik. Kara kony aŋo ame ŋat aryek nwoŋo ame kato jo a mom ryek? Kara kony aŋo ame acan ame ŋeo kite ame myero ebed kede i akina lwak tye kede? Ŋat ame mio jami ame etye kede romme tye aber ame kato ŋat ame tammere mom cuŋ mot pi bedo paro jami atata, Man konnyere gire mom, rom aroma i ryemo yo yamo. Ginnoro luŋ ame timere i lobo, nwoŋo rik Obaŋa oyiko pire con, dok kite ame dano tye kede-ni daŋ gire ŋeye, kede kite ame en mom romo pyem Obaŋa ame tek kate oko. Duro kop apol apola mom konyo ginnoro kadi acel. Kara gin aŋo ocele aber akato ame dano nwoŋo iye? Kara ŋa ame ŋeo gin ame ber pi dano i kare me kwo mere anonok, ame konnyere-gu daŋ pe, dok ame en kato iye akata calo tipo? Kara ŋa ame twero kobbi dano gin ame bino timere piny i te ceŋ kan i kare ame en doŋ mom iye? Nyiŋ aber kato twon moo wir moro me wel oko; nino me to ber kato nino me nywal oko. Wot i ot ame jo tye akwero cola iye ber kato wot i ot ame acamo iye arama, pien man en kare ame kwo a jo luŋ gik iye, ame jo ame kwo wigi mom twero wil iye. Cwercuny ber kato nyero, pien kadi bed mio waŋ dano bale, ento yabo tam a dano. Ŋat aryek cunye bedo i paco ame jo akwero iye cola, ento amiŋo cunye bedo i ot ame jo tye aceko iye kop me yomcuny. Ciko yiti i kop ame aryeko juki kede ber kato bedo winyo wer ajo amiŋ. Jo amiŋ nyero gagak calo yen ame tye amwomwoca ite gulu; mannono daŋ konnyere gire mom, Ateteni, ŋat aryek ka obedo wunu jo ocele doko amiŋ oko, kede wilo dano i muŋ balo dano aber oko, Agikki me ginnoro-ni ber kato acakki mere oko, ŋat ame mwol ber kato ŋat ame cunye opoŋ awaka. Kur imi akemo maki oyotoyot, pien jo amiŋ en ame kano akemo i cunygi. Kur ipeny ni, “Piŋo kare okato ber kato kare-ni oko?” Pien kodi pennyono mom obedo peny iŋe ryeko, Ryeko ber calo gamo ginalea, pien konyo jo ame wangi pwod neno cen. Pien ryeko gwoko dano calo lim; bedo kede ŋec ber, pien ryeko gwoko kwo a dano. Koŋ itam kop i kom tic Obaŋa, na ame romo twenyo gin ame en ogomo? I kare ame itye aber odoco, myero ibed ame cunyi yom, eka i kare me can ite bedo kede tam; pien Obaŋa en oketo yomcuny kede can, me dano mom ŋe gin ame bino timere i lobo i kare ame en doŋ mom iye. I kare me kwona ame konnyere mom-mi, atyeko neno jami luŋ; tye jo mogo ame kitegi atira, ame to daŋ kun kitegi atira, dok tye jo mogo ame kitegi reco, ame perakino i wi lobo kun mom weko timo gin arac. Kur ibed ŋat a kite atira okato kare, kur daŋ ibedo ŋat ame ryek atek ateka. Piŋo kara omio ibalo kwoni nono? Kur ibed lo arac okato kare, kur daŋ dok ibed amiŋo. Piŋo kara imiye me to ame kare-ni mom ru oromo? Myero ilid man odoco, kun daŋ mom igweto ciŋi i maca, pien ŋat ame lworo Obaŋa bino bedo aber i yore-nono ducu. Ryeko mio ŋat aryek teko ame kato teko oloc apar ame loo boma. Ateteni, mom gire tye ŋattoro i wi lobo ame kite ber odoco, ame mom timo balloro kadi acel. Kur iye kop luŋ ame jo kobo, naka mio ibino winyo amironi ka ceni. Yin iŋeo i cunyi ni tye kare mogo ame yin daŋ iceno jo ocele. Atemo magi luŋ kun atio kede ryekona. Akobo ni, “Akobo ni abino bedo ŋat aryek”; cite onwoŋo mom aromo tuno iye. Gin luŋ ame tye bor abora, piny twal, onwoŋo tye piny meicel. Ŋa kara ame romo tuno iye? Aketo cunya me yenyo ryeko, kun atemo ribo jami ducu karacel me aniaŋ tere odoco, kede ŋeyo tim areco me miŋo, karacel kede miŋo ame ya pi wic oballe. Dok anwoŋo dako moro ame marrere lit kato to oko, calo owic onyo boo, kun ciŋe ka ogudo komi calo nyor. Ŋat ame cunye tye i yomoro cuny Obaŋa en ame bwot i ciŋe, cite abalo en rido tero oko. Arabkop okobo ni, “Nen ba, man en gin ame an anwoŋo, kun aporo kop acel acel kede awottere, me anwoŋ te kop a jami ducu; kop ame an abedo tamo i cunya kare luŋ, cite naka mom anwoŋo. Anwoŋo ka i co acel i kom jo tutumia, ento mom anwoŋo dako moro i kom jo-nono luŋ. Nen ba, anwoŋo ka gin acel keken, anwoŋo ni Obaŋa gire oketo dano ame cunygi tye atire, cite dano te bedo roto tam apol apola.” Ŋa kara ame calo lo aryek? Dok ŋa ame ŋeo gonyo te kopporo keken? Ryeko mio waŋ dano lilia meicel, cunye ame nwaŋ daŋ te cako lokere oko. Myero ilub gin ame abaka ociko, kun cunyi mom poto pi kwoŋŋi acil ame ikwoŋo. Ya oko i nyim abaka, ka kop tye arac myero iru ya oko i nyim abaka, pien twero timo ginnoro keken ame cunye omito. Kop ame abaka okobo obedo kop me agikki, kara ŋa ame dok romo penyo abaka ni, “Kara itimo ŋo-nono ba?” Ŋat ame gwoko cik mom twero rwatte i peko moro, dok ŋat aryek bino ŋeyo kare kede yo ame myero elub. Kop acel acel tye kede kare mere kede yo mere daŋ, kadi dano tye kede twon cannoro ame odie rom mene. Pien en mom ŋeo gin ame bino bedo tye; kara doŋ ŋa ame twero titte kite ame bino timere kede? Mom tye dano moro ame tye kede twer me gwoko tipo mere, onyo ame tye kede twer me geŋo to mere ka ce nino me to mere oromo. Mom gire tye yo moro me bwot i lwennyono, dok jo ame timo tim areco daŋ mom bino larre pi timgi areco-nono. Man luŋ an aneno, kun amio tamma bedo i kom ginnoro luŋ ame tye ka timere piny i te ceŋ kan, kan ame jo ocele tye kede twer, kun jo ocele tye ka neno can i te twergi-nono. Icennere dok ate neno otim tim areco ame oyiko i lyel; gin onwoŋo obedo timo timgi areco-nono i kabedo acil, cite jo daŋ pwoogi i boma ame gin rik obedo timo iye tim areco-nono. Man daŋ konnyere mom. Jo bedo keto cunygi i timo tim areco pien kop ame oŋolo i kom otim tim areco mom oketo i tic oyotoyot. Kadi bed abalo tim tim arac tyen tutumia, kun daŋ pwod medde perakino i lobo, cite an aŋeo ni jo ame lworo Obaŋa bino bedo aber, pien gin otye kede lworo i nyime. Cite jo ame timo tim areco mom gire bino bedo aber, mom daŋ obino perakino i lobo kare alac, pien gin mom tye kede lworo i nyim Obaŋa. Gin ame tye ka timere i lobo kan obedo gin ame konnygi mom meicel. Nen, tye jo mogo ame kitegi atira, ame gigi mogo timere i komgi kite ame timere kede i kom otim tim areco, dok tye jo mogo ame otim tim areco, ame gigi mogo timere i komgi kite ame timere kede i kom jo a kitegi atira. An akobo ni man daŋ konnyere mom. Man omio an akobo ni dano gire myero bed ka i yomcuny, pien mom dok tye ginnoro ocele aber pire piny i te ceŋ kan, kono ka camo cem kede matte, kun eyomoro i cunye, Pien man en gin ame bino bedo timere nakanaka i kare me lolle mere ame ebino lolle kede i te ceŋ piny kan, pi kare me kwo mere ame Obaŋa omie. Kare ame amio wia ocako tic me neno ryeko, kede me neno gin ame tye ka timere i lobo kan, kite ame jo ocele bedo ame waŋgi okwekere akweka dyecen kede dyewor, omio aniaŋ i tic Obaŋa odoco, aniaŋ ni kadi bed dano yelle i yore aŋo me yenyo, mom twero niaŋ tic Obaŋa ame tye ka tiye i te ceŋ piny kan. Kadi bed lo moro aryek yiye ni en eŋeo, mom gire twero roto kadi acel. Man luŋ akano i cunya kun atye ka ŋiyo luŋ, kite ame jo a kitegi atira kede jo aryek tye kede i ciŋ Obaŋa, karacel kede ticgi. Ka ce marrere ennono, onyo adage mere, dano gire mom ŋeo. Ginnoro luŋ i nyimgi konnyere mom, kite acalo tye gin acel ame poto i komgi gin ducu, poto i kom ŋat a kite atira kede i kom atim tim areco, i kom dano aber kede i kom dano arac, i kom ŋat a cik ogeno kede i kom ŋat a cikkoro mom ogeŋo, i kom ŋat a yalo Obaŋa i mot kede i kom ŋat a mom yalo Obaŋa kadi acel. Kite ame dano aber tye kede, en ame acan daŋ tye kede. Ŋat ame kwoŋo kwoŋ rom aroma i ŋat ame lworo kwoŋ. Man en gin arac ame tye ka timere piny i te ceŋ kan, tye gin acel ame poto i kom jo luŋ. Cuny dano daŋ opoŋ i tim areco, apoa daŋ tye i cunygi i kare ame gin tye kwo; i ŋe mannono, gin doŋ woto oko baŋ jo oto. Ento ŋat ame kwo i lobo a jo ame tye kwo, tye kede gen, pien gwok akwo ber kato eŋatu oto. Pien jo akwo ŋeo ni gin obino to, cite jo oto mom ŋeo ginnoro, dok daŋ mom dok tye ginnoro pirgi. Wi jo wil oko i komgi. Margi, adagegi, kede nyekogi doŋ oto oko, ginnoro mom dok tye pirgi i kom ginnoro luŋ ame tye ka timere piny i te ceŋ kan. Wot icam giri cammi kun cunyi yom, imati daŋ koŋoni kun cunyi yom; pien Obaŋa otyeko pwoyo gin ame itio. Myero rukki bed atar odoco i kare luŋ, kun moo mom rwenyo i yer wii. Bil jami me kwo-ni cutu i dako ame imaro, i kare luŋ me kwoni a konnyere pe-ni, ame Obaŋa omii me bedo kede piny i te ceŋ kan, pien mannono en megi ame opokki me yomoro cuny i kare me kwoni pi tic ame ibedo lolle iye piny i te ceŋ kan. Ti gin ame ciŋi ocop iye kede tekoni luŋ, pien lyel ame iwot iye, tic onyo tam, onyo ŋec, onyo ryeko mom tye kuno. Dok daŋ aneno ni piny i te ceŋ kan, jo adwir meicel mom en ame loo tuko, jo atek mom en a loo lweny. Jo aryek mom tye i jami ame romogi i kwo man, mom opwo jo ame odiro; cite gin ame timere i komgi lubo kare kede kit ame gum aber kede arac poto kede i kom dano acel acel. Mom tye ŋattoro ame ŋeo kare mere. Jo daŋ rom aroma i rec ame moko i bwo pi gum arac, kede winyo ame moko i tol. Ociko jo kede owic i kare arac, eka owic te poto i komgi atura. Atyeko neno kodi ryeko man kun otimere piny i te ceŋ kan, ame nyuto kop i kom ryeko, ame an aneno ni obedo twon anennoro amalo meicel. Boma moro atitidi onwoŋo daŋ tye iye jo anonok, twon abaka moro atek te bino me bino lweny iye, eka te guro daŋ oko, te gero twon celloro atek guro kede oko. Ento i yie kuno rik tye iye acannoro ame ryek, en ate laro bomagi-nono i ciŋ okwor pi ryeko mere. Cite ŋattoro mom te po pi acannono. An akobo gira ni ryeko gire ber kato tekkom oko, kadi bed jo cao ryeko acan ca, kun daŋ mom owinyo koppere. Kop a ŋat a ryek ame jo owinyo momot ber kato redo oloc i akina jo amiŋ. Ryeko ber kato jami lweny, cite bal acel balo gin abeco apol atata. Lwaŋi oto mio moo wir a ŋwece kur doko aŋwe oko, amannono daŋ, miŋo aduno pek kato kwogo kede ryeko. Cuny aryeko wiro wonnere dwoko tutuŋ cem, ento me amiŋo wiro wonnere dwoko tutuŋ cam. Amiŋo kadi bed tye alat i yo, wie nwoŋo mom atic, en mio jo luŋ ŋeo ni en ebedo dano amiŋ. Ka ce akemo omako aloc i komi, kur i ya i kabedoni, kare ocele twero timi kica ka ce i bedo mot i twon bal adwoŋ ame onwoŋo timo. Tye tim arac ame aneno piny i te ceŋ kan, ame aneno calo bal ame oya i baŋ aloc. Jo amiŋ otye ka miyo kabedo me dito i loc, kun olonyo mom oparo pirgi. Aneno opii ame tye ka ŋwec aguragura, kun rwode tye awot i tyengi calo pii. Akuny bur rette i bur ame ekunyo, twol kao ŋat ame maro tuco kor apama. Apaa gweŋe, gweŋ wano; abar yen, yen wano. Ka leb lee okuku, eka mom ote rabo, ŋat ame atic kede myero ti kede i tekkom; cite ryeko konyo dano me tiyo i tic kakare. Ka ce ororo okao dano kun mom ru omio yattoro me miyo doko mwol, kony me miyo twollono doko amwol doŋ mom tye. Kop ame ya i dog ŋat aryek mio jo pwoc cite kop ame ya i dog ŋat amiŋ neke aneka. Kop ame geo ya i doge bedo kop me miŋo, eka te giko koppere calo ŋat a wie oballe. Amiŋo duro kop apol apola, kadi bed ŋattoro mom ŋeo gin ame bino timere. Kara ŋa ame bino kobbi dano gin ame bino timere anyim. Amiŋo lolle i tic ame olo kome aola, ame te miyo yo a woto tuŋe rwenye oko, Lobo ame abaka mere pwod awobi bino neno can, ame rwode mere dilo camo aramagi ibai. Tye kede gum, lobo ame abaka mere obedo wot a ŋat ame oworo, ame rwode mere camo aramagi i kare aber arama me medo teko, cite mom me mito mero. Wackom mio wi ot rwobere, ŋinnyere mio wi ot cwer. Cam mio jo nyero, koŋo kelo yomcuny, lim mio dano nwoŋo gin emito luŋ, Kur icen abaka i cunyi, kur daŋ icen alonyo i wi tandani iyi iciskani; pien winyo ame twarre malo bino tero dwoni, onyo olikkoro twero tuco koppono oko. Ket lim meri i tic baŋ jo, ocele, waŋŋoro ibino nwoŋo ginoro iye. Ket lim ame it ye kede i tic i kabedo apapat, pien mom iŋeo kan ame gum arac twero maki iye. Ka kot doŋ dwoŋ meicel i pol, twero lo oko te corre i lobo. Yat kadi orette tutuŋ anyarolum onyo tutuŋ anyarodi, kan ame en orette iye en ame daŋ buta iye, Ŋat ame bedo neno kit kodo a yamo mom coo koti piny, Ŋat ame keto cunye ineno kite ame polo owumere kede mom kao kac. Kite acalo mom iŋeo kite ame tipo me kwo donyo kede i kom atin ame tye i yi tottere, amannono daŋ, dano mom romo ŋeyo tic Obaŋa ame oketo jami luŋ. Co kotini odiko kede otyeno; pien mom iŋeo mene ame bino wok aber, ka ce man onyo maca, onyo ca gin luŋ obino bedo aber. Lero me ceŋ ame bedo tye dyecen ber meicel, neno ceŋ daŋ ber abera, Ka ce dano obedo kwo pi kare alalaca, cunye myero bed yom i kare-nono luŋ. Myero en ŋe ni mwakki me bedo mere i piny acol bino bedo abup meicel. Ginnoro luŋ ame bino timere konnyere mom. Wun jo atino, bil wunu gin aber me karewu oko; mi cunywu bed yom i kare me tinowu. Tim wunu gin ame cunywu mito ame waŋwu oneno. Cite myero ipo wunu ni Obaŋa bino ŋolliwu kop i kom ginnoro luŋ ame itimo wunu. Wek par atata kede ginnoro luŋ ame balo yotkom, pien kare me tino kede kare me awobi daŋ obedo gin a konnyere mom. Po daŋ pi ŋat oketi i kare me tinoni, kun kare arac mom ru obino, kun mwaka ame ibino kobo iye ni, “Cunya mom yom kadi acel i ginnoro luŋ;” mom ru onoko ceggi, kun ceŋ, lero, dwe, acer, mom ru odoko acol, dok kun pol daŋ mom ru owumo polo i ŋe cwe a kot; i nino ame jo ame kuro ot komgi bino myel kun jo a yam tek doŋ ogogoma oko, lak doŋ mom romo nyamo cem, pien nwoŋo daŋ doŋ otum oko iyi dogwu, waŋwu daŋ doŋ ocido oko, ame mom romo neno piny aber, ame del dogwu doŋ orwobere oko. I kare ame mom doŋ iromo winyo wunu koko a kidi rego, dok koko a winy keken daŋ coowu oko i waŋ nino, kun daŋ doŋ mom iromo winyo wunu dwon naŋa ame agoyo onyo dwon jo ame awer. I kare ame ibino lworo wunu kabedo luŋ ame otiŋere malo, kun ilworo wunu wot i yo oko. Yer wiwu bino nwoŋo doŋ okwor kia, ame doŋ Iwaye wunu awaa i wot, kun mituwu me mon doŋ otum odoco. Pien jo luŋ bino wot i pacogi ame obino bedo iye nakanaka, jo bino kok i dye yo. Tol bino cot oko, tara jabu bino rette te tur oko, onyo gulu pii bino ŋidde oko, tol wayo pii i bur atut bino cot daŋ oko. Komwu bino dok i yi apua, kan ame rik onwoŋo tye iye con, kun tipowu dok baŋ Obaŋa, kan ame rik oya iye. Arabkop te kobo ni, mannono ducu konnyere gire mom, konnyere gire mom atwal. Kite acalo Arabkop onwoŋo obedo dano aryek, en obedo pwonyo jo i gin ame tye kede ŋec atut. En otemo pimo carokop, oŋiogi te canogi i yore i yore, Arabkop otemo yenyo koppogo ame twero yomoro cuny jo, en te coyo gin ame tye ateni i cuny aler. Kop a jo aryek bit calo ecipet onyo ocumal ame ogo i wi ot odonyo atek. Obaŋa ame en akwatwa adwoŋ ame omiogi koppere-nono luŋ. Atinna, gwokere kur ibed lolo komi i koppogo ocele akato magi. Coyo buke mom bino gik, kwan atek ateka balo kom dano nono. I ŋe kobo kop ocele luŋ, koppa me agikki ene: Bed i lworo baŋ Obaŋa, dok daŋ myero ilub cikkere, pien mannono en gin a myero dano ti. Pien Obaŋa bino ŋolo kop i kom ginnoro luŋ ame dano otio, akadi gin otimere i muŋ aber onyo arac. Wer a Culeman ame mit atek meicel kato wer luŋ. Koŋ inotta ba lema kede doga, pien mar ame imara kede mit kato koŋo olok oko. Moo wirri kur meicel, nyiŋi kom mom rwenyo i dog jo, mannono omio anyira luŋ mari. Wek awot kedi kun owoto oyotoyot. Abaka okela doŋ naka iyi icika mere, Myero koŋ olel kun cunywa yom atek i komi, obino pako marri ame kato koŋo olok oko; jo gire marri kakare. An acol kono, cite anen iye aber meicel, wun anyira me Jerucalem; acalo kom kema me cedar, aber kom calo boŋŋi me icika a Culeman. Kur ibed nena wunu pi del komani, pien lyeto a ceŋ omio koma ocido oko. Akemo onwoŋo omako omegona meicel i koma, gin te miya tic me kuro poto olok, aco kun poto olokka bedo kene. Koŋ doŋ ikobba ba, yin ame amari wok-ki, ikwao rommini kara kwene? Dyeceŋ gin we kwene? Pien pe myero imia abed calo arim piny, kun abebea akina rommi owoteni. Ka ce mom yin oŋeo, yin nyako amwonya meicel, koŋ yin ilub yo rommi, me iwot ikwa dyegini, i ŋet kema okwat. Yin ibedo mega ame amaro, yin kom irom aroma i min aguragura, ame riŋo i gadigadi a Parao. Lemi neno ber atek, pien iketo iye gigi mogo me kwogo, ŋuti daŋ amannono, pien iruko iye tigo wel ame oyupo i tol. Obino yiko gi-kwogo me jabu piri, kun odeo i tigo ame otio i ryal. I kare ame abaka tye aweo i wi rwot oollere, moona a ŋwece kur te cako kuto atek meicel. Ŋat ame amaro-nono pire litta acalo icao murra ame mom rwenyo i laŋeta. Ŋat ame amaro-nono pire litta calo ature ame ŋwece kur meicel, ame turo i potti olok ame tye i En-gedi. Koŋ inen ba, yin nyako ame amaro-ni, yin iber meicel; yin gire imwonya meicel, waŋi kom calo me amam. Koŋ inen ba, yin lo-ni ame amaroni, yin iber meicel; ateteni, neni yomoro cunya okato kare. Obino weo kedi i wi lum alyabu, yen me arii odwa obedo yen cedar, wi odwa opeto iye bao me ciprec. An acalo ature ame tye i bar me Caron, onyo kalaŋweka a turo arema ame maro tu i luluŋ. Nyan ame amaro-nono ka tye akina wadgi, calo tur kalaŋweka ame tye akina okuto Lo ame amaro-nono ka tye akina awobe wadgi, calo nanaci ame tye i akina yen i buŋ. Cunya yom meicel ka atye i te tipo mere, kome lim alima i doga. En okela i ot ame ocamo iye arama mere, mar en obedo bendera ame en jola kede. Mia acam olok otwo, mia nanaci me adwoggo kede cunya; pien mar omio two omako oko! Ateno wia i ciŋe tuncam, kun ciŋe tuŋcem tye okwako kora, Acikowu atek, wun anyira me Jerucalem, kun akwoŋo akwoŋa i nyiŋ leyi me tim. Awinyo dwon dyera ame amaronono. Koŋ inen en doŋ tye abino, apye kom apyea i wi kiddikiddi malo kuno, akirre akira i wi kiddi malo Dyera ame amaro kirre calo amyem, onyo calo twon atil. Koŋ inen kite ame ocuŋ kede i ŋe celwa kuca, kun oroo waŋe i dirica aneno yi-ot, dok daŋ tye anena i waŋ dirica. Dyera ame amaro-nono kobo keda, kun kobba ni, “Dyera acil ame amaro, ya owoti; nen kare me cwir doŋ okato oko, kot daŋ mom doŋ cwe. Ature doŋ ocako nen oko i lobo, kare me wer doŋ ene, koko awele doŋ ocako winyere oko i lobowa. Oduro doŋ ocako nyak oko, olok daŋ ocako turo oko, turgi tye aduny akur meicel. Dyera acil, ame amaro, ya malo owoti. Yin ibedo awelena ame okanne i kidi ame obarre, yin i awelena ame opono i wi atenni malo; koŋ imia anen waŋi ba, koŋ imia awiny dwoni ba, pien dwoni winyo mit meicel, waŋi daŋ cil atek. Mak wunu ekwe luŋ, mak wunu naka itinogi, pien gin obalo olokwa oko, aco kono olokwa doŋ oturo oko.” Dyera ame amaro-nono en doŋ mega, an daŋ a mege, en kwao rommi mere i akina kalaŋweka, Dwog doŋ paco ba, yin dyera ame amaro, kun ikirre i ŋwec i wi kiddi malo, calo amyem onyo twon atil, tuno ka yamo me odiko doŋ ocako kodo aŋic, tipo daŋ doŋ orwenyo oko. I kare ame abuto i wi tandana dyewor, abedo paro dyera ame amaronono; abedo yenyo, naka mom ate nwoŋo; alwoŋo, mom daŋ te gamo doga. Ate kobo ni, “Aman doŋ abino ya wot yenye i boma luŋ, abino yenye i yo kede bar-gu; an abino medde yenyo ŋat ame cunya maro-nono.” Cite ayenyo naka mom ate nwoŋo. Okur-piny te ŋolle i koma, i kare ame onwoŋo gin tye alolono dye boma. An ate ŋolle penyogi ni, Ineno wunu dyera ame amaronie? I kare ame akatogi anonok i ŋea, ate cop i kom dyera ame amaronono oko, Akwako ŋute nakanaka kun mom aye ni wot dok kannoro, tuno ka akele naka i ot a totta, naka iyi icika imatta ame rik oyaca iye. Acikowu atek, wun anyira me Jerucalem, kun akwoŋo akwoŋa i nyiŋ leyi me tim, kur itwar wunu marwa, tuno ka kare oromo. Ŋo ame tye ka bino i tuŋ tim cae, ame calo yito aduny, yito ame oya i murra kede odok a ŋwece kur ame owaŋo, ame kur calo gigi mogo a ŋwecgi kur ame ocat-wil cato? Koŋ inen wunu ba, gin otiŋo itanda me tiŋo Culeman! Jo atek ilweny pyerabicel daŋ tye a lwoke, ame gin obedo twoni jo atek meicel iyi Icrael. Gin luŋ odiro meicel i lweny i pala, dok daŋ ona meicel i lweny; ŋat acel acel tye otweo pala lwennyere i pyere, me kuro gin ame timere dyewor. Abaka Culeman rik otio i itanda mere, kun otio i bao ame oya i yen me Lebanon. Yen ame tye acalo pagi mege, en rik otio kede ryal, ŋeye te bedo jabu, eka kom bedo mere te wumo oko i boŋo obedo amaramar, aco yie ote kwogo atek meicel, kun anyira me Jerucalem en okwogo kittono, pi mar ame onwoŋo tye i cunygi. Wun anyira me Cion, wot wunu ba, koŋ inen wunu abaka Culeman. Nen wunu tok kwogo ame tottere oketo i wie, i nino me nyomere acil, i nino ame opoŋ i lelo. Koŋ inen ba, yin nyako ame amaro-ni, yin iber meicel; yin gire imwonya meicel. Waŋi kom calo waŋ amam ka aneno i ŋe boŋo ame igeŋo i waŋi. Yer wi kom calo lwak dyegi, ame aciro aluŋere i luŋ me Gilead. Aco laki te tar calo yer kom megi rommi atar, ame oya i kan ame olwokogi iye, kun gin luŋ ogoo ka rude keken, ame pwod omworo yer komgi amwora, dok atin a romo i akinagi daŋ mom orwenyo. Del dogi te rema pee calo uci arema, dogi neno ber atek, lemi te nen calo nucu okwer pomegranat, ka kom aneno i ŋe boŋo ame iwumo kede waŋi. Aco ŋuti te nyedde malo aber calo gedo a Daudi ocuŋ malo iguŋ, ame ogero me kano jami lweny, ame oŋabo iye kwode abeco ame romo tutumia twal, ame gin luŋ obedo kwode olweny. Tuŋino aryo luŋ bergi calo itino amor aryo, calo kom itino aryo ame obedo rude, ame tye acem i akina kalaŋweka oturu. Abino bedo gira i wi kidi me odok murra, kede i wi tur me odok luban, tuno ka yamo me odiko doŋ ocako kodo aŋic, tipo daŋ doŋ orwenyo oko. Mom tye dul komi moro ame aneno rac, ama dyera ame amaro yin gire iber odoco. Aterana we, oya doŋ oko i Lebanon, owoti, owot karacel, wan aryo kedi, oya oko i Lebanon. Yitto doŋ piny i wi kiddi me Amana, yitto piny i wi kidi me Cenir kede me Kermon, oya oko i kan ame adu eŋatu tye iye apipim, oya oko i wi kiddi ame kwace odurie iye wok-ki. Cunya doŋ gire megi, aminna, aterana, nenoni kede tigo i ŋuti-nu a doŋ omio cunya luŋ tye gire i ciŋi, Marri oneka i mwonyo lao oko, ama aminna, aterana! marri kato gire koŋo olok oko, ŋwec mooni te kur ame kato kit ginnoro luŋ akur. Aterana, dogi lim calo kic, moo kic kede cak tye gire i te lebi, ŋwec boŋŋini te kur calo ŋwec kidi me Lebanon. Yin gire ibedo potona, ama aminna, aterana, yin ibedo potona ame ocelo oko, yin ibedo akoŋ ame doŋ omwono doge oko pira. Yin i potona ame okwer pomegranat doŋo iye, dok yen ocele abeco meicel nyak iye, ame ature iye kur atek dok moo yen iye daŋ kur, kite moo apapat ame ŋweogi kur kede cinamon, kede kite yen apapat me odok luban, murra kede moo mogo ame ŋwecgi kur, kede kit yen ocele mege me wel. Yin ibedo waŋ akoŋŋa, kulo ame ya iye pii me kwo, kulo ame pii mere mol i wi kidi me Lebanon. Cak doŋ kodo ba, yin yamo me anyarodi, biye ba, yin yamo me anyarolum! Kod ba i potona, me ŋwece cak duny i kabedo ducu. Dyera ame amaro myero gire doŋ bin i poto mere, me bin cam nyig yen abeco ame tye iye. An gire doŋ abino oko i potona, ama aminna, aterana, akulo wia doŋ i depo murra kede gin a ŋwecgi kur, atye doŋ awadowado moo kic i pedo kic, amato doŋ koŋo olok kede cak. Cem wunu, wun jo ame marre, matte wunu atek, wun jo ame marre! Abuto piny, cite cunya onwoŋo tye alwodo kop, Koŋ iwiny ba, dyera ame amaro tye agoyo doggola, kun kobba ni, “Yabba doggola ba, aminna ame amaro, awelena ame cil wok-ki; pien toyo omio wia doŋ ŋic aŋica, ekuna me dyewor omwono yer wia oko.” An doŋ agonyo boŋo i koma oko, kara dok adwok bo? woki doŋ alwoko tyena oko, dok anyon piny bo? Dyera ame amaro te cwayo ciŋe i waŋ kika, koma te po meicel. An ate ya malo me yabo dyera, murra te cako totona i ciŋa, kun anyira ciŋa luŋ dyaka adyaka i murra, naka i kom bolti ame ocego i doggola. Ate yabbi dyera ame amaro doggola, cite ate nwoŋo dyera ame amaro owoto gire oko. Cunya onwoŋo opoto atek i kare ame en okobo keda; ayenyo, cite mom anwoŋo, alwoŋo daŋ, cite mom te gamo doga. Okurpiny te cop i koma, i kare ame gin onwoŋo tye aloloŋo piny i boma; gin ogoa ote wana oko, gin te gamo boŋona oko, gin okurpiny ame kuro apama cel me boma. Acikowu atek meicel, wun anyira me Jerucalem ka ce inwoŋo wunu dyera ame amaro, kobbe wunu ni two me mar odia meicel. Ŋa ce ame yin imaro wokkono? Yin nyako aber meicel i akina anyira luŋ-ŋi? Ŋa ame yin imaro akato jo luŋŋono, ame yin icikowa pire atek atekani? Dyera ame amaro-nono rema dok kome nen amwonya meicel; ŋeye kene akadi tye i akina jo tutumia twal. Yer wie calo jabu ame olio acil odoco, yer wie boco ame omimina amimin, eka te col icuc calo agak. Waŋe calo waŋ awele, ame tye i ŋet kulo ame pii mere mol, nen acil calo awele ame okwaŋ i cak, onyo kidi moro me wel ame omwono aber. Leme calo poto ame opito iye gigi mogo ame ŋwecgi kur, ame ŋwecgi duny akur akura. Lebe kom calo tur kalaŋweka, ame pige cwer calo pig odok murra. Bade luŋ calo jabu, oruko ruk me wel meicel. Kome pwot calo lak lyec, ame okwogo kome i capir. Tyene calo olil olutte apwot, ame ocibo i kom kidi ame okwogo komgi i jabu, Callere rom aroma i kidi me Lebanon, calo yen cedar ame oyero ayera. Koppere winyo mit okato kare, kom ka ineno aman, cunyi daŋ romo teri oko i kome. Mannono en obedo dyera-nono, dok en obedo awotta, wun anyira me Jerucalem. En ŋat ame imaro-nono kara owoto kwene? yin nyako aber meicel i akina anyira luŋ-ŋi? Olubo kara yo mene ba? Kobbiwa me okonyi yenyo. Dyera ame amaro-nono olubo yo poto mere, kan ame yen a ŋwecgi kur tye iye. Owoto kwayo rommi mere i potti kuno, dok tye daŋ apwono tur kalaŋweka. An abedo me a dyera ame amaronono, en daŋ mega; en kwao rommi mere i akina kalaŋweka. Dyera we, yin iber meicel, icalo boma me Tirja, berri calo ber a Jerucalem, neni iyiliyili calo neno mony ame otiŋo benderagi. Lok waŋi teŋe, kur ibed nena, pien tye ka yelo wia meicel. Yer wii kom calo lwak dyegi, ame aciro aluŋere i luŋ me Gilead. Aco laki te tar calo yer kom megi rommi atar, ame oya i kan ame olwokogi iye, kun gin luŋ ogoo ka rude keken, dok atin a romo i akinagi daŋ mom orwenyo. Lemi te nen calo nucu okwer pomegranat, ka kom aneno i ŋe boŋo ame iwumo kede waŋi. Mon ame abaka onyomo anyoma tye pyerabicel nono, aŋeca tye pyeraboro nono, aco anyira mom romo kwanne kadi acel. Awelena ame amaro tye i akinagi acel keken, en obedo nyako acel keken ame tottere onywalo, kite ber meicel, dok tottere maro atek. Anyira ocele ka onene, doŋ olwoŋe ni ayomcuny, mon anyoma kede aŋeca daŋ amannono, gin luŋ opake apaka. “Man kara ŋa ame nen calo rupiny-nyie? Ame cil calo dwe, dok ryeny aryenya calo ceŋ-ŋie? Ame neno iyiliyili calo mony ame tiŋo benderagi-ŋie?” Awoto tu piny i poto amaido, me wot neno kite ame oturo kede i luŋ kuno, awoto daŋ neno ka olok doŋ ocako lot oko, kede ka okwer pomegranat doŋ ocako turo oko. Cite ame an mom ru aŋeo gin ame onwoŋo atimere, apo anwoŋo ni doŋ atye i wi gadigadi malo, kun abedo i ŋet aloc. Dwog cen, dwog cen ba, yin nyako Culam, dwog ba cen, koŋ idwog cen me oneni. Pino kara imito neno wunu nyako me Culam, calo nyan ame amyel i nyim dul mony aryo twal? Tyeni neno ber atek iyi amuk, ama, nyaka adwoŋ, Amuruni oŋwel calo tigo ŋut alilia, calo kom gin ame dano adiro en otio. Peni calo tabu agura, ame koŋo olok mom rwenyo i yie. Yii calo ŋano ame ocoko oyido karacel, kun kalaŋweka oguro dyere. Tunoni aryo luŋ, berrere calo itino amor aryo, calo itino aryo ame gin rude, Aco ŋuti te nyedde malo aber calo gedo me lak lyec, ame ocuŋ iguŋ malo. Aco waŋi calo kulo me Kecbon, ame tye i dogcel me Bat-rabbim. Eka umi te nyedde calo ot ocuŋ malo iguŋ ame tye i Lebanon, ame otikere kede Damaciko. Wii kwogi meicel calo kidi me Karmel, yer wii te lot abeco calo boŋo obedo amaramar; neno yer wii-nono omio abaka odoko calo abuc. Dyera we, pe iŋeo kite ame berri yomoro kede cunya, yin i nyako ame imio yomcuny ocira oko, Yin kom icalo yat otit, tuno i kori daŋ te luŋere calo etak otit. An akobo ni abino yito otit, ate mako jaŋe pwono nyige. Ama, tunoni kono kom obedo calo etak olok, kun weoni kur calo nanaci, ame ka imuŋo i yita, awinyo calo mwonyo koŋo olok amit, ame ka imato donyo gire mot amota, kun kato gire mot i dog kede i akina lak. An abedo me a dyera ame amaro mittere luŋ tye i koma, Biye ba, yin dyerra ame amaro-ni, me ibin owot karacel i pottt kuca, me owot obut i akina myere, ote dilo idiko con wot i potti olok, me owot onen ka olok doŋ ocako lot oko, ka ce turgi doŋ oyabere oko, kun okwer pomegranat doŋ oturo oko. Abino nyutti marra kuno. Ŋwec yat nywal tye aduny akur meicel, kit yen luŋ abeco ame oyero ayera tye i doggolawa, en aconnege kede en anyennege; gin luŋ agwokogi kannono ce yomoro cunyi, yin dyera ame amaro. Kono kom onwoŋo yin ibedo calo ominna, ame idoto cak i kor totta. Kono onwoŋo ka arwatte kedi, koŋ anoto lemi, kun ŋattoro gire mom romo caya. Onwoŋo aromo teli, teri naka i ot a totta, naka atot iyi icika ame rik oyaca iye, Onwoŋo aromo miyi koŋo akur meicel i te mato, kede koŋo okwer pomegranat ame abio. Ateno wia i ciŋe tuncam, kun ciŋe tuŋcem okwa ko kora. Acikowu atek meicel, wun anyira me Jerucalem, kur itwar wunu marwa, tuno ka kare oromo. Maca ŋa ame tye abino tuŋ tim cae, ame ojeŋer i kom dyerrere ame emaro cae? An a rik acol i poto nanaci. Rem me nywal rik ogoo totti kuno i kare me nywali, en rik te bedo yelle i rem me nywal kuno. Mia kur arweny i cunyi calo anen ame oruko i ŋut, acalo atem ame irwako i ciŋi pien mar tek calo to, nyeko te ger calo lyel, tyer calo leb mac, leb mac ame lyel atek meicel. Kadi pii adwoŋ rom mene, mom gire romo kweyo mar, kadi alele opoŋ rom mene, mom romo mwonyo mar. Ka ce alonyo moro otemo wilo mar i limmere luŋ ame etye kede, jo bino cayo atek meicel. Wan otye kede aminwa atidi mire, tuno mere mom ru ogulo. Ka ŋo ame obino timo pi aminwanono, i nino ame lo moro bino penyo? Kono aminwa-nono onwoŋo tye acalo apama me cel, kono onwoŋo ogero apama cel ocele me ryal i kome; aco kono en onwoŋo tye acalo dogcel me boma, kono onwoŋo ocego oko i bao me cedar. An rik abedo apama me cel, tunona onwoŋo calo gedo ocuŋ iguŋ malo; en onwoŋo doŋ nena caa luŋ, acalo ŋat ame kelo kuc. Culeman rik tye i poto olokkere Baal-amon; en onwoŋo omio poto olokkerenono i ciŋ jo a gwoko; ame dano acel acel i akinagi culo baŋi lim me ryal tutumia acel pi olok ocek iye. An tye i poto olokka, ame obedo mega an kena; yin Culeman giri itwero tero tutumia acel, eka jo ame gwoko te tero mia aryo. Yin ame ibedo i potti-ni, owotena mito winyo dwoni; koŋ ikob me awiny dwoni ba, Ru bino baŋa ba, yin dyera ame amaro, biye ibed calo amyem, onyo acalo atin atil, ame bedo i wi kiddi ame yen a ŋwecgi kur doŋo iye. Man en gin ame Obaŋa onyuto baŋ Icaya wot Amoj i kom Juda kede Jerucalem i kare a Ujjia, Yocam, Akaj kede Kejekia ame gin obedo obakki me Juda. Koŋ iwiny, yin polo, ter yitti yin lobo; pien Rwot doŋ okobo ni, “Apito itino awobe, amiogi odoŋo, ento gin doŋ ojem oko i koma, Twara twon ŋeo ŋat ame loc kede kan ame adwoŋŋere mie iye cam; ento Icrael mom gire ŋeo, jona mom gire niaŋ.” Koŋ inen ba, rok man ocerre acera i bal, gin obedo jo ame bal gire onuogi oko, ikwae otim tim areco, itino ame kitgi doŋ oballe oko! Gin doŋ otyeko weko Rwot oko, ocao doŋ Ŋat Acil me Icrael oko, kun odok gigi cen atek ateka. Piŋo kara pwod dok imito wunu ni medde goyowu? Dok piŋo imedde wunu ameda i jem? Nen bur doŋ odurre adura i dye wiwu ducu, cunywu daŋ doŋ goro agora. Cakere i tyenwu piny tuno kede i wiwu malo, kannoro aber iye mom tye kadi acel, awaŋo kede bur odurre adura iye, ame burrogo iye pwod tye acwer acwera; kun mom obio tut iye, mom daŋ otweo waŋgi, akadi bido waŋgi kede moo. Lobowu doŋ yie nono, bomawu doŋ owawaŋo oko mac: orok omao lobowu oko kun ineno wunu, lobowu doŋ odoŋ yie nono a calli lobo ame orok oyako. Owekoboma me Cion odoŋ calo gony ame oweko i poto olok, dok calo gaŋo ame oweko poto okwer, calo doŋ boma ame mony otyeko guro oko. Koŋo Rwot me mony mom owekkiwa jo moro odoŋ, kono wan obedo calo Codoma, kono nyo doŋ ocalo Gomora. Winy wunu kop a Rwot, wun oloc me Codoma! Ter yitwu i pwony Obaŋawa, wun jo me Gomora! Rwot okobo: “Motwu ame oŋolo apipimmono kara konnyere ŋo baŋa? Rommiwu ame oŋolo me awaŋa doŋ opuo cunya oko, karacel kede dwol me limwu ocwe mege; cunya gira mom yom i kom remo akadi me rommi onyo me dyegi. “Ka ibino wunu i nyima, Ŋa okobo ni inyonyono wunu dyekalla? Kur imedde kella wunu mot a konyere mom, yito odok akur odoko gin me kwer baŋa, Por a dwe, kede cabit, kede lwoŋo jo i cokere, mom atwero kanyo balwu i cokerewu adoŋo. Por dwewu kede ecubaŋwu ame ociko pirgi, gin luŋ okwero gira cunya oko; odoko doŋ yec apek meicel baŋa, yeyogi doŋ oola gira oko. Ka itaŋo wunu ciŋwu, abino wumo gira waŋa oko, mom anenowu; kadi bed ikwaa wunu tyen apol ata, mom abino winyo gira kwacwu; pien ciŋwu remo keken. Koŋ ilwokere wunu, ibed wunu acil, cwa wunu timwu areco oko teŋe me kur dok bed nen i nyima, ite daŋ weka wunu timo gin arac oko, pwony wunu timo gin aber. Lub wunu ŋolo kop atira, kony wunu jo ame owuno; lar wunu pi itino kic, pid wunu pi mon a coggi oto. “Koŋ doŋ ibin wunu ba, me obin olar wunu kop karacel, kadi bed balwu doŋ rema arema, bino doko atar calo pee; kadi bed orema calo pala, bino doko calo yer romo. Ka ce iye wunu kun itye wunu kede winy, ibino camo wunu gin abeco ame ocek i lobo. Aco ka ikwero wunu kun daŋ ijem wunu, pala lweny bino tyekowu oko; pien man Rwot ikokome en okobo.” Kite ame boma ame yam genne doŋ odoko kede alaya, boma ame rik ŋolo kop atira dwoŋ iye! Dok kite atira daŋ onwoŋo tye iye, cite aman doŋ nek keken. Ryalwu doŋ rom aroma i cet ryal, koŋo olokwu doŋ orubere oko i pii, Olocwu doŋ odoko jo a jem, aco owotegi te bedo okwo. Ŋat acel acel i akinagi maro lim ame owile kede i muŋ, cunygi tye ka i mot. Gin mom olaro pi itino kic, pido a mon a coggi oto mom gire tuno i nyimgi. Mannono omio Rwot, ame en Rwot me mony, Rwot ame en Won Twer me Icrael okobo ni, “Oromo doŋ, cunya doŋ bino kwe i kom jo a daga, abino culo kwor i kom okworra. Abino loko ciŋa adwoggo i komi; abino twatwako cet ryalli oko, abino liyo, abino miyo kit raccoro luŋ gwarre i komi. Abino dwoko oŋolkoppi kite a rik tye kede con, kede jo ame mii tam kite a rik tye kede iyi ageyi. I ŋe mannono, ote doŋ lwoŋi ni boma ame kite atira, boma ame genne.” Obino lakoro Cion pi ŋolo kop a jo luŋ arorom, jo iye ame oŋut obino lakorogi pi kitegi atira. Cite jo ame jem kede obalo obino neko oko karacel, aco jo ame weko Rwot oko, obino daŋ jwero oko. Pien lewic bino makowu i kworo ame ilelo wunu iye-nono; alee bino twodowu pi pottiwu ame opito kede yen ame doŋ ityeko yero wunu. Pien wun ibino doko wunu acalli kworo ame pote oner, dok daŋ acalli poto ame pii pe iye. Lo atek bino doko acalli lum otwo ka mac ogudo, kede ticcere daŋ acalli mac otyer; gin aryo luŋ obino waŋ karacel, kun mom dok tye ŋattoro ame neko mac. Man en kop ame Obaŋa onyuto baŋ Icaya wot Amoj i kom Juda kede Jerucalem. Man bino timere i kare ame tye anyim: kidi ame ot a Rwot tye iye bino cuŋ malo iguŋ ame kato kiddi ducu, borrere bino kato lobo luŋ obedo tutur; orok luŋ bino ciro woto kuno, rok apol bino bino, te kobo ni, “Biye owot wunu i wi kidi a Rwot, i ot a Rwot Obaŋa a Yakobo; me en wot pwonywa i kite mere, me wan daŋ olub kite.” Pien cik bino ya i Cion, kun kop a Rwot ya i Jerucalem. En bino ŋolo kop i akina rok apapat rok apol bino lubo gin a en omoko. Pala lwenygi obino teto me kweri dyaŋ toŋigi bino doko pala me lwero jaŋ olok; rokkoro gire mom dok bino tiŋo pala romo me lweny i rok ocele, mom daŋ dok obino pwonyo kite me romo. Wun jo me ot a Yakobo, biye owot wunu kun lero a Rwot menyowa. Pien yin iweko joni oko ata, ame en jo me ot a Yakobo, pien otyet oya i kide odurre iye meicel, kede emuroko ame calo jo Piriciti, gin doŋ twotwomo ciŋgi kede orok. Ryal kede jabu dwoŋ meicel lobogi, lonyogi mom twero tum; aguragura daŋ dwoŋ meicel i lobogi, gadigadi lwenygi daŋ mom twero tum. Cal jogi odurre meicel i lobogi, gin oworo gin ame ciŋgi otio, gin ame gin otio kengi kede ciŋgi. Mannono gire omio doŋ okwanyo dit a dano oko, co doŋ odoko jo moro a piny meicel kur itimgi gire kica i bal man! Dony giri ba oko i lela, pon oko iyi apua, pi twon lworo adwoŋ i kom Rwot kede i kom kwogo me dittere. Waŋ me abwone obino dwoko oko piny, awaka a co bino gire kwe oko. Obino pako ka Rwot keken i nino-nono. Pien Rwot me mony tye kede nino mere, pi ginnoro luŋ ame wakere kede ame lyerre, pi ginnoro luŋ amalo, ame otiŋere malo; pi yen cedar luŋ me Lebaŋon, aboco mege a tye malo; pi kworo luŋ me Bacan; pi kiddi luŋ ocuŋ i guŋ malo kede pi lobo luŋ obedo tutur, pi gedo luŋ abocoboco, kede pi cel me boma luŋ ogero atek; pi mel luŋ me Tarcic, kede pi yede luŋ abeco me anena. Abwone gire bino kwe oko, awaka a co bino dok oko piny; obino pako ka Rwot keken i nino-nono. Cal jogi luŋ obino jwero oko. Jo bino donyo i gorogoro kiddi, kede i burrogo ame tye i lobo, pi twon lworo adwoŋ i kom Rwot kede i kom kwogo me dittere, ka en bino ya malo me miyo myelkom bino i lobo. I nino-nono cal jogi me ryal kede me jabu, ame jo otio pirgi kengi me awora, gin bino bolo oko baŋ bubu kede baŋ olik, ote donyo gigi i lela ame obarre, kede i akina kiddi okakaka, pi twon lworo adwoŋ i kom Rwot, kede i kom kwogo me dittere, ka en bino ya malo me miyo myelkom bino i lobo. Wek dano ame weo tye i ume bedi, Konnyere kara ŋo ba? Pien, koŋ inen ba, Rwot, ame obedo Rwot me mony, tye ka kwanyo oko baŋ Jerucalem kede Juda, ginnoro luŋ ame kwogi ojeŋere iye, cam luŋ ame kwogi ojeŋere iye, kede pii daŋ ame kwogi ojeŋere iye; jo atek kede jo me mony, oŋolkop kede odwarpiny, otyet kede odoŋe, otel jo pyerabic kede jo me awora, omi-tam kede emuroko aryekkege, kede oryeko me tiyo irizi. Abino miyo awobe en ame bedo olocgi, itino atino en ame bino loyogi. Jo bino bedo wuwuna kengi kengi, kun ŋat man wuno awottere, dano acel acel wuno dano wadgi; awobi bino nywaro adwoŋ, lo moro a piny meicel bino nywaro lo oworo. I nino-nono dano bino mako ominnere i ot a pappere, kun kobo ni, “Yin itye kede ruk, yin ibino bedo alocwa, wi obur man bino bedo te locci”. I nino-nono en bino kobo ni, “An gira mom abino bedo acaŋdano; ogati kede ginnoro me aruka gira pe i oda; pe gire ibino keta wuno me bedo ŋat ame loo lwak.” Pien Jerucalem mio jo buco rette, aco Juda doŋ opoto oko; Pien kop ame gin kobo kede gin ame gin timo tiko gire Rwot, gin ojem i kome kede i kom kwogo mere. Kitegi me yero jo ayera bino bedo caden i komgi; gin orabo pi balgi calo Codom, mom gigi okano balgi. Gin bino neno can meicel! Pien gin okelo can i komgi kengi. Tittii jo a kitegi atira ni, gin gigi obino bedo aber, pien gin obino camo gin ame oya i ticgi. Jo a kitegi reco bino neno can meicel! Meggi bino bedo arac okato kare; pien gin ame ciŋgi otimo, en ame daŋ obino timo i komgi. Itino ame wuno jona, mon en ame loogi: Ama jona, otelwu rwenywu arwenya, gin odwadwalowu oko i yowu. Rwot doŋ gire obino oko, en ocuŋ me ŋolo kop i kom jo mere, Rwot doŋ ocako piddi jo oko, ocako piddi odoŋe a jo mere kede olocgi. “Wun en ame icamo wunu poto olok, jami ame iyako wunu i baŋ ocan tye i udiwu, Kara piŋo iŋiŋinyo wunu jona, kun irego wunu waŋ ocan oko?” Man kop a Rwot me mony. Rwot okobo ni, “Pien anyira me Cion wakere, owoto ame onyedo ŋutgi anyeda, kun oneno jo i waŋ me alaya, ocwinyo wot acwinya i wi tyengi kun oyeyeŋo mola tyengi gito koko ogita. Pi mannono, Rwot bino miyo wi anyira me Cion duduga, Rwot daŋ bino miyo komgi doŋ nono.” I nino-nono Rwot bino kwanyo mola me tyengi abeco oko, kede tigo otokome tur nyimgi, kede mola me cal dwe; mola ŋut ame ryeny aryenya, mola ŋut ciŋ, kede tambara me adwala i ŋut; boŋŋigi me atwea i wie, mola me bat, alid tweyo pyer, cupa moo wir, irizi me gwoko kom; atem me ciŋ, kede mola um; boŋŋigi abeco me aruka i nino adoŋo, gomicigi, boŋŋigi me wumere, kede cao ciŋ; rukkogo arerep, boŋŋi camanini, tambara adwala i wic kede tambara me geŋo waŋ. Akaka moo akur bino bedo gin otop; akaka tambara pyer, bino bedo tol; akaka yer akeda, bino lyedo; akaka boŋŋigi mogo me wel, boŋo cola en ame bino bedo i pyergi; akaka nen amwonya, bino bedo lewic. Cogwu bino to i pala lweny, jowu atekkege bino to i mony, Kumo kede kokome can bino winyere i dogcellere, bino bedo acalo dako ame oyako jami mere luŋ, ame obedo piny i lobo. I nino-nono mon abiro bino poto i kom ico acel ote kobbe ni, “Wan giwa obino camo cemwa kun daŋ oyenyo gi-arukawa i wiwa, cite yin myero itim ber ilwoŋwa i nyiŋi; kwany lewic i wiwa oko.” I nino-nono jaŋ yat ame Rwot en omio olot bino bedo aber, kun daŋ tye kede kwogo; gin ocek i lobo bino miyo jo Icrael odoŋŋege wakere kun daŋ otye kede kwogo. Ŋat acel acel ame odoŋ i Cion kede ame bedo i Jerucalem obino lwoŋo ni nar acil, jo luŋ ame occo nyiŋgi ni myero bed kwo i Jerucalem, i kare ame nwoŋo Rwot doŋ olwoko cilo i kom mon me Cion, kun daŋ doŋ otyeko lonyo remo oko i dye Jerucalem i cuny me ŋolo kop atira kede cuny me weyo gin arac oko. Rwot doŋ te keto pol kede yito dyeceŋ, kede acara mac ame lyel dyewor, i wi kabedo ducu ame tye i wi kidi me Cion kede i wi jo ame ocokere iye; pien ginnoro ame otio calo oker bino geŋo wi kwogo mere luŋ. Ginnono bino bedo me geŋo lyeto dyeceŋ, kede gi-geŋo yamo kede kot. Wek koŋ awer baŋ ŋat ame amaro wer me mar i kom poto olokkere. Ŋat ame amaro rik onwoŋo tye kede poto olokkere, i lobo a ceko cem ame tye i wi kidi malo. En oboto, oloko, te coko gweŋ iye oko, te pito iye olok abeco ame oyero ayera; te gero pem i dyere me gwoko, te daŋ kunyo bur me jolo pige. En te bedo kede gen ni bino nyako nyige abeco, cite te lunyo dok nyako nyige acalo me olok me tim. Aman doŋ ba, wun jo ame bedo i Jerucalem, kede wun jo me Juda, tim wunu ber iŋol wunu kop, i akina an kede poto olokka. Gin aŋo odoŋ ame onwoŋo myero atim i poto olokka, ame mom atimo? Kare ame an abedo kede gen ni bino nyako nyige abeco, piŋo dok nyige olunyo bedo nyig olok me tim? Aman koŋ iwek dok atittiwu, gin ame abino timo i kom poto olokka, Abino kwanyo cel iye okome wek balle oko, abino coro apama cellere oko piny, me leyi nyonyogi oko piny. Abino jalo aweko balle oko, mom dok abino ŋolo jaŋe, akadi doyo tere, okuto kede ocokocok bino tu, te doŋo iye; abino daŋ ciko pol luŋ aluŋa, me kur dok omi kot cwe iye. Pien poto olok a Rwot me mony, obedo lwak jo Icrael; kede jo me Juda. Gin luŋ obedo gin a en opito me yomoro cunye; en onwoŋo tye kede gen ni gin bino ŋolo kop atira, cite koŋ inen remo ame tye ka ony i akinagi; en onwoŋo tye i gen ni gin bino bedo jo akitegi atira, cite koŋ inen twon koko ame tye i akinagi. Jo owor ame kubo udi i kom udi wadgi bino neno can, kede jo ame medo pottigi ameda tuno waŋ ame kannoro mom doŋ odoŋ i jo ocele, kun odoŋ doŋ kengi i lobo. Rwot me mony okobo kun an awinyo, ni, “Ateteni, udi apol gire bino doŋ yigi nono, udi adoŋo, abeco bino doŋ aboŋo ŋattoro i yigi. Poto olok me eka apar bino ya iye koŋo olok ame roma debe aryo keken, kede kotti pukki adek twal, bino ya iye debe aryo keken.” Jo ame dilo ibai me yenyo koŋ akeccege, jonono bino neno can, kede jo ame ri i ka koŋo naka idiŋ, tuno ka doŋ omer atek. Iyi aramagi ogo iye opuk kede naŋa, ajaa, nyamulere, kun koŋo mom rwenyo iye; cite mom gigi oparo kadi acel pi tic ame Rwot otio, akadi bolo waŋgi i gin ame en otio i ciŋe. Mannono omio jona owoto gire oko iyi opii, pi kwiya pinygi; jo ame oworo i akinagi tye ato kec, lwak jo apipim i akinagi oryo pii ociro gire oko. Mannono omio lyel me yiko jo tye amwonyo lao meicel, kun oŋamo doge alac okato kare, kwogo a Jerucalem kede lwak iye apipim donyo gigi iye, jo ame wo iye kede jo a lelo daŋ. Dit a dano doŋ okwanyo gire oko, co doŋ odoko jo moro apiny meicel; wan a yam obwono kede jo doŋ ogik oko, Cite Rwot me mony gire dit meicel i ŋolo kop atira, Obaŋa Acil nyutte gire ni ecil i timo gin a tye atira, Rommi bino cam i Jerucalem calo eletgi, dok ocwe kede dyegi bino cam i wi obur. Jo ame wao kite arac i tol me goba bino neno can, ame wao bal calo tol ame wao gadigadi, ame okobo ni, “Wek oru timo wunu, me en cuny ticcere acunya, me wan onen; me wek gin a Ŋat Acil me Icrael oyikome atia bin aceggi, me bin, me wan daŋ oŋe.” Jo ame lwoŋo gin arac ni ber, eka, ote lunyo lwoŋo gin aber ni rac, jo nono bino neno can, Akaka colpiny gin gigi olunyo loko doko lero, eka akaka lero gin te loko doko colpiny, gin akec, gin loko doko gin alim, eka gin alim gin te loko doko gin akec! Jo ame ryekogi tye i waŋgi kengi, bino neno can, jo ame nenne kengi ni gin oryek. Omat koŋ adoŋo bino neno can, kede mon ame odiro i nyobo koŋo amit; ame mio ŋat obalo loo kop pi lim owilogi kede i muŋ, ame mom dwokki ŋat a mom i balloro jami mere. Pi mannono ba, kite ame leb mac waŋo kede reŋ kal, kede kite ame lum otwo ony kede i leb mac, gin daŋ bino bedo acalo yat ame lwite otop oko onyo acalo yat ame ture two dunyo apua, pien gin okwero winyo cik a Rwot me mony, kun ocao kop ame Ŋat Acil me Icrael okobo. Mannono omio akemo omako Rwot i kom jo mere, en te ryeyo ciŋe i komgi, nekogi oko; kiddi adoŋo te yeŋere, komgi oto te radde ata calo yugi i dye yo, Magi-nono luŋ mom gire okweo akemo mere, en gire pwod tye aryeyo ciŋe aryea i komgi. En bino tiŋo bendera mere pi rok ame tye kannabor, bino lwoŋogi i agikki piny kun lwio alwia; nen, gin ca, oriŋŋo obino oyotoyot! Ŋattoro ame ool onyo ame ogatte mom gire tye i akinagi, ŋattoro ame nino omako waŋe onyo ame onino mom gire tye i akinagi, mom tye ŋattoro ame boŋo pyere ogony, amuk i tyen ŋattoro mom daŋ ocot. Aterogi bit meicel, akud aterogi luŋ tye ame otelo atek meicel, ogwenere tyen aguraguragi calo lela, tyen gadigadigi wirre calo yamo ajuru. Gin luŋ mor calo eŋatu, morgi calo me itino eŋatu; gin oŋur ote mako gin ame odwaro, ote tero gigi aboŋo ŋattoro ame laro i baŋgi. Gin bino nur i kome i nino-nono, acalo nam ame amor. Aco ka ce ibolo waŋi i lobo, nen ba, ibino neno colpiny kede can keken, kun pol ogeŋo waŋ ceŋ oko. I mwaka ame abaka Ujjia oto iye, rik aneno Rwot obedo i wi kommere me loc, kun tye odyede malo, dit meicel, lak boŋo mere oromo yi ot Obaŋa luŋ, cerapi tye ocuŋ i ka wie malo, kun ŋat acel acel i akinagi tye kede bwome kanyape; aryo me geŋo waŋgi, aryo me geŋo tyengi, kede aryo me twarregi. Gin onwoŋo tye awer kun ŋat acel acel gamo ni, “Rwot me mony cil, cil dok cil; wi podo luŋ opeŋ i kwogo mere.” Acakki me te doggola te yeŋere pi wer ame gin awero-nono, yito onwoŋo omwono yi ot oko, An ate kobo ni, “Aneno can doi! Ato oko doi; pien an a dano ame kop a ya i doga mom cil; dok daŋ abedo i akina rok ame kop i doggi mom cil; aco waŋa oneno abaka, ame en Rwot me mony.” Eka ŋat acel i akina ocerapi te twarre bino baŋa, kun omako loti mac i ciŋe, ame en okwanyo i wi keno lam, kun okwanyo i boi kwanyo mac. Oreo doge te kobo ni, “Nen ba, man doŋ oreo dogi, rocci doŋ okwanyo oko, balli doŋ oweko oko.” An ate winyo dwon Rwot kun kobo ni, “Abino kara oro ŋa? Ŋa kara ame bino wot pirwa?” An ate gamo ni, “An ene; ora.” En te kobo ni, “Wot i kobbi rok man ni, ‘Me winyo, ibino winyo wunu, ento mom ibino ni an wunu tere. Me neno, ibino bedo neno wunu, ento mom ibino ŋeyo wunu.’ Mi rok man cunygi dok nwaŋ, yitgi diŋ oko, me gin kur nen kede waŋgi, yitgi daŋ kur winy, kur daŋ oniaŋ iye i cunygi me kur olokere odwog baŋa ate canogi oko.” An ate penyo ni, “Pi kare a rom mene, ama Rwot?” En te dok iye ni, “Naka waŋ ame boma luŋ, yigi odoŋ nono, aboŋo ŋattoro ame bedo i yigi, jo moro daŋ doŋ mom abedo i udi lobo doŋ tye nono aboŋo ginnoro kadi acel, kun Rwot doŋ ocwao jo teŋe kannabor, wi obur ame oweko oradde atata i dye lobo. Akadi bed acel me apar doŋ iye obino dok waŋo oko, calo kworo onyo opok, ame iciki mere odoŋ, kun doŋ otyeko toŋo kome oko piny.” Icika mere en a bedo koti acillere. I kare ame wot a Yocam, wot a Ujjia, abaka me Juda, Rejin abaka me Curia, kede Peka wot a Remalia, abaka me Icrael, gin aryo luŋ rik obino i Jerucalem me lweny i kome, ento loyo romo te twerre. Kare ame otito koppere baŋ ikwae a Daudi ni, “Jo Epraim doŋ oribere oko i jo Curia, cuny Akaj karacel kede jo mere te myel meicel kite ame yen yeŋere kede ka yamo akodo.” Rwot te kobbi Icaya ni, “Wot irwatte wun kede Akaj, yin karacel kede wodi Cear-yacub ” wot irwatte wunu kede i agikki me yo pii ame mol tero pii iyi atapara ame tye tuŋ malo, i yo adwoŋ ame woto i poto Alwok-boŋo, ite kobbe ni, “Gwokere, bed mot, kur daŋ ilwor, cunyi daŋ kur poti pi iciki aryo ame owaŋ oko ame yitogi tye aduny-nyi.” Pien jo Curia kede jo Epraim kede wot a Remalia, gin oporo kop arac i komi, kun kobo ni, “Owot olweny i kom Juda, omie ebed alwor meicel, me oma bed megwa, ote keto wot a Tabeel bedo abaka iye.” Mannono omio Rwot Obaŋa okobo ni, Cobo tamgi bino loyogi oko, mom gire bino cobere. Pien boma adwoŋ me Curia en Damaciko, dok ŋat adwoŋ i Damaciko en Rejin. (Ame mom ru mwaka pyerabicel wie abic okato obino ŋiŋinyo jo Epraim oko, ame bino miyo gin mom dok bino medde bedo rok.) Dok boma adwoŋ me Epraim en Camaria, ŋat adwoŋ i Camaria en Remalia. Ka ce mom ibino ye wunu, ateteni, mom gire ibino cuŋ wunu. Rwot dok te kobbi Akaj ni, “Peny anyuttoro i baŋ Rwot Obaŋani; kadi anyut ame tye piny i lyel twal onyo ame bedo malo i polo twal.” Ento Akaj te kobo ni, “Mom gire abino penyo, mom aye temo Rwot.” En dok te kobo ni, “Aco koŋ iwiny wunu wun ikwae a Daudi. Lolo dano mom ru oromowu bo, ame omio wun dok lolo wunu kom Obaŋana daŋ-nie? Pi mannono ba, Rwot ikokome en ame bino miyowu anyut. Nyannoro ame mom ru oŋeye kede ico bino yac, te nywalo awobi, obino cako nyiŋe ni Emmanuel. En bino mato cak awac kede moo kic ka doŋ ŋeo kwero gin arac kede yero gin aber. Pien atin-nu mom ru ŋeo gin arac kede yero gin aber, lobo ame obakki mere aryo-nu, ame yin itye i twon lworo moro adwoŋ i komgi-nono bino doŋ nono. Rwot bino miyo kare moro bino i komi kede i kom joni, kede i kom jo me ot a kwaroni ame yam mom ru onen cakere ame jo Epraim opokere i Juda, en bino kelo abaka me Acuria.” I kare-nono Rwot bino lwoŋo lwaŋi ame bedo i acakki kulo me Miciri, kede kic ame bedo i lobo me Acuria, kun lwoŋogi kede lwio. Gin luŋ obino bino ote ony i luŋ atut, kede i akina lela ame obabara oko, kede i wi okuto luŋ, kede iyi elet ducu. I kare-nono Rwot bino kelo dano moro i loka kulo Eufrate, ame en abaka me Acuria. En bino timowu lit calo dano ame olyelo yer wie kede yer kome luŋ. I kare-nono dano bino gwoko roa kede megi rommi aryo, cite pi cak adwoŋ meicel ame gin bino miyo dano-nono, dano-nono bino mato cak awac kede moo kic. I kare-nono potti luŋ ame rik onwoŋo tye iye tyen olok tutumia, ame poto acel acel wellere romo cekel me ryal tutumia, bino doko kabedo okuto kede ocokocok. Jo bino wot akud atero kede atero kuno, pien okuto kede ocokocok bedo i luŋ; aco lobo luŋ obedo kidikidi ame yam onwoŋo opuro kede kweri, mom dok ibino wot wunu kuno pi lworo okuto kede ocokocok. Kuno bino doko kan ame dok cemo iye kengi; rommi kede dyegi bino wowota iye. Rwot dok te kobba ni, “Kwany kidi alaccere me ico yie i coc ame jo luŋ romo kwano, ‘Maer-calal-kac-baj.’ ” Dok ate nwoŋo caden agenne, Uria alamdog kede Jekeria wot a Yeberekia, me bedo ocadenna. Rik ate ribere kede adwarpiny a dako ame obedo dakona, en te yac, te nywalo atin awobi. Rwot te kobba ni, “Cak nyiŋe ni Maer-calal-kac-baj; pien kun mom ru atinnono ŋeo lwoŋo ni ‘Apap’ onyo ‘Aya’ obino gwaro lonyo a jo Damaciko karacel kede jami ayaka a jo Camaria ote tero i nyim abaka me Acuria.” Rwot dok te kop keda kun kobo ni, “Jo man doŋ okwero pii me Ciloa ame mol gire mot ote lunyo bedo lelo gigi i nyim Rejin kede i nyim wot a Remalia; pi mannono, Rwot bino miyo pii me kulo Eufrate amol atek dok daŋ dwoŋ meicel corre i komgi, ame jen abaka me Acuria karacel kede kwogo mere luŋ, Pii-nono bino poŋ i kona me yo luŋ, kun mollapakino atata; bino mol kato i Juda, kun mol lapakino atata, kato anyim, bino poŋ malo ame kato naka i ŋut twal, Pien Obaŋa tye kedwa! En bino yaro bwome me gwoko lobo man.” Mwolle wunu, wun rok luŋ, cunywu myero poti; ter wunu yitwu, wun lobo luŋ ame tye kannabor; twe wunu pyerwu, kun cunywu daŋ poto, twe wunu pyerwu kun cunywu daŋ poto, Por wunu kop karacel, cite ginnoro mom bino ya iye; kob wunu kop, ento mom gire bino cobere, pien Obaŋa tye kedwa. Rwot okobba kit man pien ciŋe onwoŋo odia atek dok daŋ okwenyoro an ni kur alub kite a rok man, kun kobo ni, “Kur ilwoŋ wunu ni poro kop i muŋ gin ame rok man lwoŋo obedo poro kop i muŋ, kur daŋ ilwor wunu gin ame gin lworo, koyo moro daŋ kur onyere i komwu. Ento myero iŋe wunu ni Rwot me mony en gire cil; en a myero bed gin ame ilworo wunu, dok en a myero mi koyo onyere i komwu. En bino doko kan acil, kede gweŋ ame gato jo, kede kidi me twomere a jo me doggola obakki aryo luŋ, me Juda kede me Icrael, dok en bino bedo owic kede kumma me ciko jo ame bedo i Jerucalem. Jo apol bino twotwoma iye; obino rette ote tutura oko; obino cikogi kede kumma ote moko.” Jo ame owinyo kop ame an apwonyo myero gwok aber kur rweny. Rwot opono gire oko mom dok nen baŋ jo mere, cite an gira abino kure kun atye kede gen i kome. Nen ba, an kede itino ame Obaŋa doŋ omia, wan obedo anyut kede anen baŋ jo Icrael ame oya i baŋ Rwot me mony, ame kom loccere tye i wi kidi me Cion. Ka ce gin okobbiwu ni, “Koŋ iwot ipeny wunu emuroko kede ojogi ame kabo ni, wee, wee, calo ŋat a dum aduma”, gin bino kobo ni, “Rok ocele daŋ myero peny obaŋegi; myero daŋ openy tipo a jo oto pi jo akwo.” Aco winy wunu pwony kede kop ame atuco baŋwu! Ateteni, kop ame gin okobo-nono, gin okobo pien pwod otye i piny acol, piny mom ru oruyigi. Jo bino bebea i lobo kun otye i twon peko adwoŋ meicel, ame kec ocirogi oko. Gin bino putte akemo kun kec onekogi, ote cako ceno abakagi kede Obaŋegi. Gin bino nayo waŋgi malo i polo, kun okulo wigi oŋoŋio naka te lobo piny, cite mom obino neno ginnoro, kono ka peko kede colpiny, twon mutu moro iyiliyili ame otye ka miyogi coro. Yo moro bino bedo pe me bwot i lobo acol icuc ame tye kede i twon rem adwoŋ. Jo rik onwoŋo cao lobo Jabulon kede lobo Naputali, cite en bino miyo tuŋ nam, loka Jordan, Galilaya Orok doko me kwogo. Rok a yam bedo i piny acol doŋ oneno lero adwoŋ; jo a yam bedo i lobo acol icuc ceŋ doŋ oryeny, omenyogi. Yin doŋ imio rokwu onya, imedo daŋ doŋ yomcunygi; gin olelo i nyimgi, kite ame jo bedo i yomcuny kare me kac, kite ame jo lelo kede ka opoko gin oyako. Pien kolgi apek, kede lut me pwodo wi gwokgi, kede biro a yam oburogi kede tetek i tic, yin doŋ iturogi oko, acalo i nino a jo Midian. Pien amuk luŋ ame cirikale me jebo wot i dye lweny, kede boŋŋi luŋ ame ojejebo i remo, obino waŋogi oko i mac akaka yen. Pien doŋ onywalliwa atin, omiowa atin awobi; obino keto twer me loc i ciŋe, aco nyiŋe obino cako kit man ni, “Ami-tam me awura, Obaŋa Won Twer, Papo ame perakino nakanaka, Aloc ame kelo kuc.” Aco medde me loccere kede kuc iye, ka gikkere bino bedo pe, wi kom loc a Daudi kede wi mege, me miyo moko kede me jiŋo bedo atek, i ŋolo kop atira kede i kite atira, cakere tin naka waŋ i waŋ. Mitkom a Rwot me mony bino miyo man cobere. Rwot ocwalo kop i kom Yakobo, koppono bino poto i kom Icrael; jo luŋ bino ŋeyo, Epraim kede jo ame bedo i Camaria, ame gin owakere dok gin ocae i cunygi kun okobo ni, “Matafali doŋ orereta oko piny, ento obino gero gire oko i gweŋ apaa; olam doŋ otoŋo oko, ento wan obino leyo kakargi oko i yen cedar.” Mannono omio Rwot tye amiyo okwor abino i komgi, tye daŋ atutugo omonegi. Jo Curia i tuŋ kide kede jo Piriciti i tuŋ to omwomwonyo jo Icrael kun doggi oŋamere aŋama. Magi luŋ mom gire okweo akemo mere, ciŋge pwod tye ame oryeye aryea. Cite jo mom gire odwogo baŋ ŋat oketo can i komgi, akadi cwalo kwacgi baŋ Rwot me mony. Mannono omio Rwot oŋolo wi Icrael oko kede yibe, jaŋ otit kede ogada i nino acel. Odoŋe karacel kede jo ame oworo gin obedo wi Icrael; eka odwarpiny ame pwonyo kop me goba te bedo yin Icrael; pien otelo a rok man omiogi ogak oko, jo ame gin telo wigi tamgi oballe oko. Mannono omio Rwot mom lelo i kom awobegi, kica daŋ mom mako i kom otino kic kede mom a coggi oto; pien ŋat acel acel i akinagi mon woro Obaŋa, dok gin luŋ obedo jo ame timo tim areco, kop aya i doggi luŋ obedo me mino keken. Magi luŋ mom gire okweo akemo a Rwot, ciŋe pwod tye ame oryeye aryea. Pien tim areco waŋ calo mac, waŋ calo okuto kede ocokocok; gamoro agaba i buŋ, kun gin luŋ ominne i yito ame owikino malo. Pi akemo a Rwot me mony, omio lobo tye ka waŋ i imac, jo iye doŋ odoko gin me awaŋa mac; mom tye ŋattoro iye ame weko ominnere doŋ. Omaoi tuŋ cem cite kec nwoŋo pwod anekogi, ocamo tuŋ cam cite nwoŋo mom ru oromogi; ŋat acel acel camo riŋo kom wadgi, Manace camo Epraim, Epraim camo Manace, gin aryo luŋ ocobo mony i kom Juda. Magi luŋ mom gire okweo akemo mere, ciŋge pwod tye ame oryeye aryea. Jo ame keto cik a mom atira bino neno can, kede ocoo kop ame mio owuno jo, ame mio ogeŋo ocan oko i ŋolo kop atira, dok ame mio omao jami ocan ame tye i akina jona, ame miogi oyako jami a mon a coggi oto, dok miogi daŋ oyako jami itino kic. Kara ibino timo wunu ŋo ba i nino me keto can i komwu, i dye yamo ajuru ame bino ya i kannabor? Kara ibino riŋo wunu baŋ ŋa ba me konyowu? Kara en lonyowu-nono ibino weko wunu kwene? Yo moro gire bino bedo pe, kono ka ŋoye i akina obuc, onyo to atoa keken i akina jo ame oneko. Magi luŋ mom gire bino kweyo akemo a Rwot, ciŋge pwod tye ame oryeye aryea. Jo Acuria obedo lut me nyuto akemona, kede abiro me nyuto inigana. Abino cwalogi i kom rok okwero woro Obaŋa, abino cikogi owoto i kom jo ame akemo omaka i komgi, pi yako jamigi kede coko jamigi ame oyako ote jejebo piny i dye yo calo coto. Ento jo Acuria gire onwoŋo mom oyikere me timo kittono, dok daŋ onwoŋo gire mom otamo i cunygi, ento tamgi onwoŋo tye ka me jwero rok apol, me miyo nyiŋgi rwenyo oko. Pien en okobo ni, “Odoŋe me monnya luŋ mom obedo obakki? Kalno mom rom aroma kede Karkemic? Kamat mom rom aroma kede Arpad? Camaria mom rom aroma kede Damaciko? Ciŋa doŋ ogudo kede loc me woro jogi ame cal jogigi opao apaa rik kato maca ame tye i Jerucalem kede i Camaria ca oko. Mom abino timo Jerucalem kede jogi mere kite ame rik atimo kede Camaria kede cal jogi mere?” Kare ame Rwot doŋ otyeko ticcere luŋ i wi kidi me Cion, kede i kom Jerucalem, en bino keto can i kom abaka me Acuria pi wakere mere ame oŋatte kede, kede pi wakere mere me bwono jo. Pien en okobo ni, “Man otimere pi teko me ciŋa, kede pi ryekona, pien an atye kede ŋec oromo. Atyeko doŋ kobo waŋ lobo a rok apol, acoko doŋ lonyogi ame ayako oko, areto jo ame bedo i wi kom me loc calo twon gweno. Ciŋa onwoŋo ocoko lonyogi yot meicel, kite a dano coko kede toŋ gweno i kor awonnere ocaco oko, acoko i lobogi luŋ kittono; naka ŋattoro gire mom otiŋo ciŋe, ŋattoro daŋ mom odwoko doge, akadi kok.” Lee wakere i kom ŋat ame atoŋŋe kede yen? Onyo ocumeno twero dworre i nyim ŋat atic kede? Lut mom twero tiŋo dano, dano en a tiŋo lut, abiro daŋ mom twero tiŋo dano malo, dano en ame tiŋo abiro malo. Pi mannono, Rwot ame en Rwot me mony bino cwayo too ame jonyo jo ocwe i kom jo mere ocwe, dok bino cwinyo mac i te lonyogi, mac te naŋo oko luŋ. Ceŋ a jo Icrael bino doko mac, Obaŋa a jo Icrael acil wok-ki bino doko calo leb mac; bino waŋo okuto kede ocokocok tyeko i nino acel. Kwogo me buŋere kede lobo mere ame ceko cam atek, Rwot bino jwero kwo mere kede kome oko; bino bedo calo atwo ame ojony. Yen ame bino doŋ i poto mere bino bedo anok meicel ame atin daŋ romo kwano. I nino-nono jo Icrael odoŋŋege, kede jo me ot a Yakobo ame obwottege mom dok bino medde jeŋere i kom ŋat obedo pwodogi, ento gin bino jeŋere doŋ i kom Rwot, ame en obedo Obaŋa ame cil me Icrael, iyi ateteni. Jo odoŋŋege bino dwogo cen baŋ Obaŋa Won Twer, ame gin jo a Yakobo ame odoŋŋege. Pien kadi joni me Icrael bed apol a rom kede kwoyo me dog nam, jo anonokkoro keken i akina jo odoŋŋege en ame bino dwogo cen. Obaŋa doŋ omoko me jwerogi oko pien kite gire atira. Pien Rwot, ame en Rwot me mony, bino jwerogi oko i lobo luŋ, kite ame en doŋ otyeko moko. Mannono en omio Rwot, ame en Rwot me mony okobo ni, “Ama wun jona ame bedo i Cion, kur ilwor wunu jo Acuria ka ce gin pwodowu kede lut, kun otiŋo abirogi i komwu kite a rik jo Miciri otimo. Pien odoŋ kare anonokkoro keken akemona bino gik oko, inigana te lunyo lokere i komgi, jwerogi oko. Rwot me mony bino yeyeŋo lut i komgi, kite a rik ojwero kede jo Midian i ŋet kidi me Oreb; en bino ryeyo abiro mere i wi nam, te daŋ tiŋo malo kite a rik otimo kede i Miciri. I nino nono yeccere bino ya oko i kori, lodi mere daŋ obino turo oko i ŋuti.” Okwor doŋ oya oko i Rimmon, otuno daŋ doŋ oko i Ayat; kun obedo i Migron, okano yecgi i Mikmac; odokoro kulo ote wot buto i Geba; Jo Rama komgi myel, jo Gibea a Caulo oriŋo oko. Kuk wunu duru ba, wun jo Gallim! Ter Laical Gam wunu Anatot! Jo me Madmena tye aŋwec oko, kede jo ame bedo i Gebim pi laro kwogi, Okwor onwoŋo doŋ tye i Nob i nino-nono, gin doŋ tye ayeyeŋo ciŋgi i kom kidi me Cion, ame en kidi me Jerucalem. Nen ba, Rwot ame Rwot me mony, bino miyogi oreue piny bala jaŋ yen adoŋo; jo adoŋo iye luŋ obino ruto oko piny, moro mom bino doŋ ame ocuŋ malo. Rwot bino toŋogi luŋ calo yen iyi buŋ, abino jwerogi oko luŋ i paŋa; akadi yen Lebaŋon, gin luŋ daŋ obino reto oko piny. Atin yat anyen bino tuco kom iciki a Yece, jaŋe bino tuco i lwite. Cuny a Rwot bino bedo i kome, cuny me ryeko kede me niaŋ, cuny me poro kop kede me teko cuny me ŋec kede me lworo Rwot, cunye bino bedo yom i lworo Rwot. En mom bino ŋolo kop pi gin ame en oneno kede waŋe, akadi ŋolo kop pi kop ame en owinyo i yite, cite en bino ŋolo kop ocan atira, dok bino ŋolo kop atira baŋ jo a mwol me lobo; en bino jwero lobo i lut me doge, jo areco en bino neko daŋ oko awura me doge. Alid me tweyo pyere bino bedo kite atira, aco alid me tweyo yie bino bedo kite ame genne. Epet bino nywako kabedo atin romo, kwac bino nywako kabuto kede atin dyel, roa kede eŋatu bino doŋo karacel, atin atidi en ame bino telogi. Dyaŋ kede ŋuu ager meicel bino cem karacel, itinogi daŋ bino wuro karacel; obino pito eŋatu paco calo twon. Atin adot bino tuko i dog ot a codocodo, atin a pwod oryemo aryema i cak, bino rwako ciŋe i ot ororo. I wi kidina acil me Cion, timoro arac me nek onyo me awano mom bino nen iye, jo me lobo mere luŋ bino bedo jo ame ŋeo Rwot. I nino-nono akwar Yece bino cuŋ calo bendera ame rok apol twero neno, orok luŋ bino penyo tam i baŋe, kan ame en bedo iye bino bedo me kwogo. I nino-nono Rwot bino medo ryeyo ciŋe tyen me aryo me kwanyo jo mere ame odoŋ iyi Acuria, i Miciri, i Patroc, i Eciopia, i Elim, i Cinar, i Kamat kede i dog nam. En bino tiŋo bendera malo pi orok, te coko jo Icrael ame oryemo; bino rayo jo Juda ame onwoŋo okeketa atata, i twok piny aŋwen luŋ, Nyeko Epraim bino gik oko, jo a wuno Juda obino miyo waŋgi rwenyo oko; Epraim mom bino bedo kede nyeko i kom Juda Juda daŋ mom bino bedo wuno Epraim. Gin bino mwomere i kor kidi a jo Piriciti tuŋ to, eka ote ribere karacel me yako jo i tutuŋ kide, Gin bino lweny i kom jo Edom kede Moab, aco jo Ammon bino bedo ite locgi. Rwot bino miyo pii i jaŋ nam me Miciri dwono oko iweŋ, bino yeŋo ciŋe i wi kulo Eufrate, te miyo poko yi kulo i dul abiro, jo te ŋolo yie kun ginnoro mom dyako amukgi. Yo gudo ame ya Acuria bino bedo tye, pi jo mere ame odoŋ, kite a rik otimere kede pi jo Icrael, i kare ame gin ya i lobo Miciri. I nino-nono ibino wer wunu ni, “Abino pwoyi, ama Rwot, pien kadi bed rik yii owaŋ i koma, akemo ni doŋ okwe oko, yin ite kweyo cunya.” “Nen ba, Obaŋa gire en Alarra; abino genne, mom daŋ abino bedo kede lworo; pien Rwot Obaŋa en tekona, ame apako nyiŋe en ame doŋ odoko ŋat ame larra.” Ibino wunu twomo pii kede lelo i waŋ akoŋ me larre, I nino-nono ibino wer wunu ni: “Pwo wunu Rwot, lwoŋ wunu nyiŋe; mi wunu orok ŋe ticcere, rab wunu pire, ŋe en Obaŋa ame nyiŋe malo meicel. “Wer wunu wer me pako Rwot, pien otimo tim me kwogo adwoŋ meicel; mi wunu man ŋeye i wi lobo luŋ. Go wunu ijira, wer wunu daŋ i yomcuny, wun jo ame bedo i Cion, pien Ŋat Acil obedo me Icrael tye i akinawu i twon twer adwoŋ meicel.” Man en kop ame Obaŋa okobo baŋ Icaya wot Amoj i kom Babulon, Tiŋ wunu bendera malo kannaler, lwoŋgi wunu kede dwonwu aloŋo; Yeŋ wunu ciŋwu me gin dony, i dogcel a jo me awora, An Rwot ikoma doŋ aciko jona ame olonyere doŋ okome lweny alwoŋo doŋ jona atek i lweny, me miyo akemona cobo ticcere, jona ame awakare kun oŋatte aŋata, Koŋ iwiny wunu woo ame tye i wi kiddi malo, ame calo lwak jo apipim! Koŋ iwiny wunu kite ame jo me loc kede me rok apapat tye amor kede kun ocokere karacel! Rwot me mony tye akwano monnyere pi lweny. Gin oya i lobo abor meicel gin obino i agikki me te polo, Rwot karacel kede jami lwennyere, me jwero lobo luŋ oko, Kok wunu, pien nino a Rwot doŋ ceggi acega; abino acalo to-piny oya i baŋ Won Twer Ducu! Mannono bino miyo ciŋ jo doko goro, koyo bino onyere i cuny dano acel acel, dok obino bedo ame cunygi oŋabere aŋaba. Twon rem adwoŋ me lworo kede kumo bino makogi; gin bino minne i rem calo dako amerem me nywal ogoo. Ŋat acel acel bino neno awottere kun kome amyel; waŋgi bino obere calo mac. Neno wunu ba, nino a Rwot tye abino. En ger, dok akemo kede twon iniga moro ager omako, me miyo lobo doŋ nono kede jwero wegi bal luŋ iye. Pien acer me polo kede dulgi mom bino ryeny; ceŋ bino doko acol ame pwod odonyo adonya, dwe daŋ mom bino ryeny. Abino keto can i wi podo pi timere arac, kede i kom jo areco pi balgi; abino giko awaka a jo ame lyerre oko, abino miyo wegi abwone a mom okica kwe oko. Abino miyo co dokome wel meicel akato jabu ame olio acil oko, jo daŋ bino bedo me wel meicel akato jabu me Opir oko. Pi mannono, abino miyo polo yeŋere, lobo daŋ bino yeŋere i kabedo mere, pi akemo a Rwot me mony, i nino me iniga mere ager meicel. Dok bino bedo acalo aderi ame aryemo, onyo rommi ame ŋat acoko pe; ŋat acel acel bino dok baŋ jo mere, dok ŋat acel acel bino riŋo i lobo me turgi. Ŋat ame obino nwoŋo, obino cobo pel, ŋat ame obino mako, bino to i pala romo. Itinogi obino cacanyo piny te niŋida atitino kun oneno, obino yako udigi, ote daŋ buto i mongi tetek. Nen ba, an doŋ atugo jo Magi me bino i komgi, rok a mom paro pi ryal jabu daŋ mom olelo gigi iye. Aterogi bino neko awobe; kica mom bino makogi i kom atinnoro; itino gire mom bino conogi, Aco Babulon ame kwogo mere dwoŋ kato me obakki ocele luŋ boma aber ame jo Kaldaya wakere iye wok-ki, bino bedo acalo Codoma kede Gomora i kare ame rik Obaŋa oreto oko. Jo mom dok bino bedo iye, dano moro me Arab mom bino guro kema kuno, okwattoro daŋ mom bino miyo rommigi wuro kuno. Ento leyi me tim bino buto kuno ekwe a kok bino poŋ i udigi; udu bino bedo kunu, kun jogi me tim daŋ myelo kunu. Odyekodyek bino kok i udigi ocuŋ iguŋ malo, ekwe daŋ bino kok i udigi abeco me loc; Babulon mom bino ri, kare mere doŋ ceggi acega. Rwot bino timo Yakobo kica, bino medo yero Icrael, te dwokogi i lobogi ikome, rok ocele bino notte kedgi, ote moko doŋ i kom ot a Yakobo. Rok apol bino lwoko Icrael tero i kabedogi, eka Icrael te lokogi doko opiigi kede aŋecagi i lobo a Rwot; jo ame rik makogi, gin obino mako doko opiigi ote loyo jo ame rik wunogi. Kare ame Rwot bino miyogi weo i kom canwu kede i kom myel cunywu kede tic apek ame ibedo tiyo wunu, ibino cako nywaro wunu abaka me Babulon kede wer man ni, “Koŋ inen kite ame awun jo doŋ okwe kede, kite ame kolo a won apala doŋ okwe kede inoŋ! Rwot doŋ oturo abiro a jo areco oko, karacel kede abiro oloc, jo ame obedo pwodo orok kun otye i twon akemo, kun mom juko ciŋgi i komgi; jo ame obedo loyo rok kede iniga, kun mom weko yelogi. Lobo luŋ doŋ okwe mot, oliŋ doŋ oko, jo iye doŋ mwoco ka wer keken. Yen cipre cunygi lelo piri aco yen cedar me Lebanon kobo ni, ‘Cakere i kare ame odwoki kede piny, ŋattoro gire mom obino me toŋowa.’ Aco lyel i piny kuca daŋ otugere oko, me rwatte kedi ka ibino, tye acoyo tipo ajo oto me bino joli, jo luŋ a yam obedo otel i wi lobo; obakki luŋ a yam oloo rok apapat omiogi luŋ oya oko i kom me locgi. Jo luŋ bino kobo, kun okobbi ni, ‘Yin daŋ idoko agoro calo wan! yin daŋ idoko calo wan!’ Kwogo daŋ doŋ okelo oko piny lyel, karacel kede dwon naŋani; dedek doŋ odoko i tanda me butoni, eka kudi te bedo gi-wumereni. “Kite ame imukere kede i polo ite rette piny, yin Maralle, wot a Ru-piny! Kite ame otoni kede piny, yin ame irereto rok apapat! Yin ikobo i cunyi ni, ‘An abino yito malo i polo; abino cibo kom me locca malo i wi acer Obaŋa; abino bedo i wi kidi me cokere teŋe tutuŋ anyarodi; abino yito malo meicel, i wi pol malo, abino kette kena me bedo acalo Ŋat Amalo Meicel.’ Ento yin doŋ okeli oko piny i lyel, i te bur kan ame tut meicel. Jo ame neni bino ciko waŋgi i komi kun otamo kop i komi ni, ‘Man mom en ŋat ame rik omyelo kom lobo meicel, ame daŋ omio loc apol oyeŋere, ame rik omio lobo odoko acalo tim otal, ame obedo tuturo boma iye oko ame mom rik ye ni obuccere we?’ Obakki a rok apapat buta gigi piny i kwogo, kun ŋat acel acel buto i lyel ame oyike iye; aco yin doŋ oboli oko teŋe, ame bor abora i lyelli, calo atin abwogi ame jo okwero, ame owumo kome i jo oneko, jo ame ococobo i pala romo, jo ame donyo piny i gweŋ ame tye i te bur atut piny acalo kom dano oto ame onyono piny. Yin mom ibino notte kedgi i ka yik, pien yin doŋ ibalo loboni oko, yin ineko joni oko. “Ikwae otim tim areco myero kono kur dok ocako nyiŋgi! Yik wunu ka neko itino mere pi roc a kwaroggi me kur oya ote dok leyo lobo, ote miyo boma dok radde atata i wi lobo.” Man kop a Rwot me mony: “Abino ya me lweny i kom jo Babulon, abino miyo nyiŋ jo rwenyo oko i Babulon, jo moro mom bino doŋ iye, akadi itino atino, onyo ikwae. Abino miyo ecoc leo lobogi, dok daŋ atapara bino durre iye adura, abino weyo acil calo dako oweo ode acil kun ginnoro mom oweko iye.” Rwot me mony doŋ okwoŋo ni, “Kite ame doŋ atyeko yiko kede con, bino daŋ timere gire kittono, kite ame rik atimo kede bino daŋ doŋ timere kittono. Abino gire turo jo Acuria i lobona obedo kidikidi oko, abino nyonogi piny i wi kidina; kol obino gonyo oko i kom jona yec daŋ obino kwanyo oko i wi gwokgi. Man en gin ame ayiko ame mako wi lobo luŋ; dok man en ciŋa ame doŋ aryeo oko i wi rok luŋ.” Pien Rwot me mony doŋ oyiko yikkere oko, ŋa kara ame dok bino loko? Ciŋe daŋ doŋ oryeye oko, ŋa kara ame dok bino dolo? Kop man rik Obaŋa okobo i mwaka ame abaka Akaj oto iye, kun kobo ni, “Wun jo me Piriciti luŋ, kur ilel wunu ni pien lut ame rik obedo pwodowu doŋ otur oko, pien ororo bino ya i kom ikwae a twol, aco toŋe bino doko twol a twarre. Rwot bino kwayo jo ocan i akina jo mere calo rommi en bino miyogi buto piny i kuc; aco yin abino neko ikwai oko i kec, joni ame odoŋere daŋ abino neko oko, Kuk ba duru, yin dog boma, kok ba yin boma; wun jo Piriciti luŋ, mi wunu lworo cak onyo koyo i komwu ba! Pien okwor abino i tutuŋ anyarodi, mom tye moro i akinagi ame opokere kene, Kara ibino kobo wunu ŋo ba, baŋ okwena a rokkono?” Ibino kobo wunu ni, “Rwot omio Cion ocuŋ atek, jo mere ame owuno oriŋo olarre iye.” Man en kop ame Obaŋa okobo i kom Moab: Moab doŋ ogik oko; pien ojwero Ar i dyewor acel keken. Moab doŋ ogik oko; pien Kir daŋ ojwero dyewor acel keken. Jo me Dibon doŋ owoto malo i ka woro jogigi me wot koko kuno; jo Moab akoko Nebo kede Medeba. Wi jo luŋ doŋ olyelo gire oko, yer tik daŋ olyelo oko luŋ. Jo luŋ tweo pyergi i boŋo cola dye yo, kede i wi udigi kede i dye bomagi jo luŋ kok ame pig waŋgi ony i korgi. Jo Kecbon karacel kede jo Eleale daŋ akoko, dwongi winyere kom kannabor i Yakaj twal; mannono omio olweny me Moab odoko alwor oko; cunygi doŋ myel amyela. Cunya ton meicel pi Moab; oriŋ lweny iye doŋ riŋo i Joar naka i Eglat-celicia. Pien gin oyito tur me Lukit kun okobo i pig waŋgi; i yo ame woto tutuŋ Koronaim, gin okok pi kite a lobo otye ka jwero kede oko. Luŋ i kulo me Nimrim pii doŋ odwono oko iye; lum doŋ oner oko, mom daŋ dok olot; ginnoro ame atu daŋ mom tye. Mannono omio ginnoro luŋ ame yam gin onwoŋo karacel kede en ame yam okano gin luŋ otero oko loka kulo me Arabim. Pien koko dwoŋ meicel, tye doŋ omano lobo me Moab luŋ; koko a jo doŋ otuno naka i Eglaim twal, koko otuno daŋ anaka i Beer-elim. Pien pii me Dibon remo doŋ Opoŋ oko iye; kadi amannono pwod dok abino medo can ocele i kom Dibon, abino kelo daŋ eŋatu i kom jo ame obwot, kede i kom jo ame odoŋ i lobo me Moab. Gin ocwao itino rommi baŋ oloc me lobo-nono, kun ocwao iya i Cela, obeo kede i yo me tim, otero i wi kidi me Cion. Acalo winy ame teteno bwomgi, kede itino winy ame okeketo atata, anyira me Moab daŋ tye kittono kan ame oŋolo iye kulo me Arnon. “Mi wunu tamwu iye, ŋol wunu kop kakare; mi tipowu bed acalo dyewor i cuny dyeceŋ; kan a jo ame oryemo opono iye, kur idot wunu ŋat ame oriŋo. Wek wunu jo ame oryemo me Moab bed i akinawu; wun myero ibed wunu ka-larregi, i ciŋ jo ame otimogi lit. Kare ame jo a wunogi doŋ pe, ame kop me yak doŋ ogik oko, kede ŋat ame nyonogi piny doŋ orwenyo oko i lobo, obino doŋ cibo kom me loc, kun ocibo i mar a mom lokere, ŋat a genne en ame bino bedo i wie i kema a Daudi ŋat a ŋolo kop dok amito ŋolo kop kakare, ŋat a kome mit i timo gin atye atira.” Wan owinyo pi awaka a Moab kite ame onwoŋo rik en wakere kede; wakere mere, lyere mere kede apala mere, wakere mere-nono luŋ gire goba keken. Pi mannono, Moab myero koki, jo luŋ myero kok gire pi Moab. Gin myero kok atek pi anina olok otwo me Kir-karecet, ame doŋ tye i twon cannoro adwoŋ meicel. Pien potti luŋ me Kecbon doŋ oballe oko, kede olok me Cibna; olok a yam koŋo mere mero rwode me rok apapat doŋ orette luŋ piny. Jaŋe ame yam tuno naka i Jajer, ame yam olak naka i tim twal; ame jaŋe atoco mere yam ojany atek, te kato naka atot i nam. Mannono omio abino kok pi olok me Cibna, kite ame akok kede pi Jajer. Pig waŋa bino ony i komi yin Kecbon kede yin Eleale; pien woo me lweny owinyere i kom olokwu a yam ipwono wunu. Lelo kede yomcuny doŋ okwanyo oko, i potti ame yam nyako olok meicel; wer daŋ mom dok owero i potti olok, woo moro daŋ dok mom dok winyere iye; nyono olok i bur biyo olok doŋ ogik oko, woo me pwono olok doŋ ogik oko. Mannono omio cunya tugere koko pi Moab calo naŋa akok, cunya tugere daŋ pi Kir-kerec. Dok ka Moab obedo ol nono me bedo wot i kabedo me woro jogi ame tye i wi kiddi malo, kun woto ka kwayo Obaŋa mere i kabedo mere acil, en mom bino twero kadi acel. Man en kop ame Rwot rik okobo con i kom Moab. Ento aman Rwot okobo ni, “Odoŋ doŋ mwaka adek, acalo mwaka apakaca, kwogo a Moab bino doŋ doko gi-acaa, akadi kono bed en tye kede lwak jo apipim; jo ame bino doŋ bino bedo anok meicel kun daŋ gin jo agoro keken.” Man en kop ame Obaŋa kokobo i kom Damaciko. Nen ba, Damaciko mom dok bino medde bedo boma, bino doŋ doko wi obur. Boma mere doŋ bino doko tim atwal, bino doko me bedo a lim akwo, ame bino wuro kuno aboŋo ŋattoro ame miogi lworo. Cel atek bino rwenyo gire oko Epraim, loc daŋ bino rwenyo oko i Damaciko; aco jo odoŋ me Curia bino bedo acalo kwogo ikwae Icrael. Man kop a Rwot me mony ikokome. I nino-nono obino jwiko kwogo a Yakobo oko, moo i kome daŋ bino loo oko. Bino bedo kite ame akaa kac depo kede kal ame pwod tye i poto, kun kao wit kal coko i ciŋe dok kite ame depo kede wit kal ame odoŋ i luŋ me Repaim. Dok bino bedo kite ame dano depo kede nyig Jeituni, ame ginnoro anonok kom en ame doŋ iye, kun odoŋ ka aryo onyo adekkoro keken i midi mere malo, anwen onyo abiccoro keken en ate doŋ i ajaŋ yat ame nyak, man kop a Rwot Obaŋa me Icrael ikokome. I nino-nono jo bino ciko wangi i kom Acwecgi, wangi bino cun i kom ŋat Acil ame obedo Obaŋa a jo Icrael; mom dok obino ciko waŋgi i kom keno me woro jok a dako ame olwoŋo ni Acera ame gin otio kede ciŋgi, mom obino neno gin ame gin i komgi otio, kadi yen ame opito ka oworo jok Acera onyo keno me waŋo odok akur. I nino-nono bomagi atek bino bedo calo wi obur a jo Kivi kede me a jo Amor, ame yam gin obin oya iye oko pi jo Icrael; kuno doŋ bino doŋ nono. Pien wiwu doŋ owil oko i kom Obaŋa ame olarowu, dok daŋ mom ipo wunu i kom Kidi ame en kan ame iriŋo ilaro wunu; mannono omio kadi bed ipit gigi mogo a yomoro cuny, dok ipit wunu daŋ yennogo ame obedo me obaŋe mogo a wele, kadi bed imigi wunu tu i nino ame opitogi iye, dok ite miyogi wunu turo oko odiko ame opitogi iye, cite mom ibino kayo wunu ginnoro i nino me can kede rem a mom gik. Koŋ inen ba, kite ame rok apol woo kede acalo kot amor omwoc i woo kite ame nam mor kede. Rok mor kite ame twon pii adwoŋ meicel mor kede cite en bino jukogi, gin te riŋo kannabor, obino ryemogi calo cuŋ kal ame yamo kolo i wi kidi malo, dok acalo apua ame awirre i nyim kot a bukoro. Nen ba, twon lworo adwoŋ bino mako jo otyeno, ame piny mom ru oru, nwoŋo gin doŋ pe! Man en dul a jo ame yakowa, kede gin ame opokki jo ame maojamiwa. Yin lobo ame tye loka kulo Eciopia, yin lobo ame kudi iyi ŋur calo yamo ajuru; ame ioro okwena me cumji i lobo ocele beo i kulo Nail, kun owoto i yee ame otio kede aladu ame kwan i wi pii! Dok wunu cen, wun okwena ame dwir, baŋ rok odoŋo aboco dok ame komgi pwot, baŋ rok olworo i kabedo luŋ, rok atek, ame gin oloc i lweny, ame kulli opoko lobogi i dyere. Wun jo luŋ ame ibedo wunu i wi podo, wun jo ame bedo i lobo, ka ce otiŋo bendera malo i wi kidi, myero inen wunu! Ka ce okuto apel, myero iwiny wunu! Pien Rwot okobba ni, “Abino neno gira liliŋ i kabedona, bala lyeto me ceŋ ame ryeny dyeceŋ, bala pol ame kelo toyo i kare me kac.” Pien ame kare me pwono olok mom ru oromo, kun turre doŋ ocako ony oko, kun turre doŋ odoko nyig olok ame ocako doŋ cek oko. Kom jo oneko luŋ obino weko oko ata, baŋ acut ame tye i wi kidi malo, kede baŋ leyi me tim. Acut bino camogi oko i dye oro, leyi me tim bino camogi oko i kare me koyo. Acut bino camogi oko i dye oro, leyi me tim bino camo komgi oko i kare me koyo. I kare-nono rok ame odoŋo aboco dok ame komgi pwot, bino kelo mot baŋ Rwot me mony. Gin rok ame olworo i kabedo luŋ, rok atek, ame gin oloc i lweny, rok ame kulli opoko lobogi i dyere. Gin bino kelo motginono i wi kidi me Cion, kan ame oworo iye Rwot me mony. Man en kop ame Obaŋa okobo i kom Miciri. Nen ba, Rwot tye awot i pol ame dwir meicel, kun bino i Miciri; cal jogi me Miciri komgi bino myel i nyime, cuny jo Miciri bino bedo myel amyela. Abino tugo jo me Miciri i kom jo me Miciri wadgi, ŋat acel acel bino lweny ominnere, ŋat acel acel bino lweny awottere, boma bino lweny i boma ocele loc bino lweny i loc ocele. Cuny jo Miciri bino two imek, abino turo tamgi ame gin omoko oko, gin bino wot penyo tam i baŋ cal apaa kede emuroko, i baŋ okor tipo kede ojogi. Dok abino miyo jo Miciri i ciŋ rwot ame loccere gwa, abaka ame ger atek en ame bino loyogi. Man kop a Rwot me mony ikokome. Dok pii me kulo Nail bino dwono oko, cuny kulo bino cwiny, te two oko; yo pii akunya bino doko aŋwe, jaŋ kulo Nail me Miciri bino doko anok te daŋ two oko, ogada kede aladu luŋ bino top oko. Lobo ame tye i ŋet Nail luŋ bino taloko, i dog Nail ikokome; ginnoro luŋ ame ocoo i ŋet Nail bino two oko, bino rwenyo oko kun mom dok nen. Ocik rec bino kumo ote daŋ kok, jo luŋ ame ciko rec i golo i kulo Nail; jo luŋ ame ciko bwogi i pii, gin luŋ obino nyobere oko. Ocwer tol kede ocwe boŋo atar cunygi bino ya oko i ticgi. Jo ame gin obedo twoni jo adoŋo i lobo, jonnono obino nyono oko piny, jo luŋ ame camo ocara, cunygi bino balle oko. Oloc me Joan miŋ meicel; oryeko ame mio tam baŋ Parao, gin luŋ obino miyo tam me miŋo keken, Kara itwero kobo baŋ Parao iŋo, ni, “Kwarina luŋ obedo jo aryek, kwarina luŋ yam obedo obakki?” Kara doŋ joni aryekkono tye kwene? Koŋ doŋ imigi okobbi dok daŋ omi iŋe, gin ame Rwot me mony oyiko me timo i kom Miciri. Oloc me Joan doŋ odoko jo amiŋ oko, oloc me Mempic doŋ obwolo oko; jo ame obedo otel iyi atekere mere ducu, gin omio jo Miciri orwenyo oko. Rwot doŋ omiogi otye i cuny me adwale i cunygi: omio jo Miciri doŋ tagere i ginnoro luŋ ame otio, kite ame amer koŋo tagere kede i ka nokere. Dano moro mom bino doŋ i Miciri mom tye ginnoro ame dano moro bino tiyo, kadi atel onyo dano moro ata, kadi ŋat abor calo jaŋ otit onyo acalo ogada. I kare-nono jo Miciri bino bedo calo mon, kun komgi myel amyela pi ciŋ Rwot me mony ame en bino yeŋo i komgi. Lobo me Juda bino miyo jo Miciri lworo; jo luŋ ame bino winyo nyiŋe bino bedo kede lworo pi kop ame Rwot me mony doŋ otyeko yikome timo i komgi. I kare-nono boma abic bino bedo i lobo Miciri ame jo iye kobo leb jo Kanaan, dok daŋ okwoŋo kwoŋ i nyiŋ Rwot me mony. Boma acel i akinagi obino lwoŋo ni boma me Ceŋ. I kare-nono keno lam a Rwot bino bedo i dye lobo me Miciri kede kidi ocibo ocuŋ atira me poyo Rwot, bino bedo i waŋ lobo mere. Gin bino bedo acalo anen ame nyuto ni Rwot me mony tye i Miciri. Ka ce jo i kuno bino kok baŋ Rwot pi jo ame wunogi, en bino cwayigi ŋat ame bino larogi, ŋat ame bino laro pirgi te larogi. Rwot bino nyutte kene baŋ jo Miciri. Jo Miciri bino ŋeyo Rwot i kare-nono, gin bino wore kun oyale kede mot aŋola kede mot awaŋa, dok daŋ obino kwoŋo kwoŋgi i nyiŋ Rwot ote daŋ cobo. Rwot bino goyo lobo Miciri kun goo dok daŋ caŋo. Gin bino dwogo baŋ Rwot, Rwot bino winyo kwacgi dok daŋ bino caŋogi. I kare-nono yo gudo bino ya i Miciri woto Acuria. Jo Acuria bino wot i Miciri, jo Miciri bino wot i Acuria, jo Miciri karacel kede jo Acuria, gin luŋ obino woro Obaŋa karacel. I kare-nono jo Icrael bino bedo gin adek karacel, obino bedo i jo Miciri kede jo Acuria, gin bino miyo wi podo luŋ bedo kede winyo. Jo ame Rwot me mony bino miyo gum, kun kobo ni, “Gum obed i kom jona me Miciri, kede i kom Acuria, ame gin obedo tic me ciŋa, kede i kom Icrael ame gin doŋ odoko jona an ikoma.” I mwaka ame atel wi mony adwoŋŋere ame Cargon abaka me Acuria ocwao obino i Acidod, te lweny i kome, mayo oko, i kare-nono Rwot onwoŋo rik omio Icaya wot Amoj okobo koppere kun kobo ni, “Wot igony boŋo kwero cola oko i pyeri ite gonyo daŋ amuk oko i tyeni.” En daŋ te wot timo kittono, te daŋ wot onoro kun tyene daŋ nono. Rwot te kobo ni, “Kite acalo Icaya amirona owoto onoro, kun tyene daŋ nono, pi mwakki adek twal, me nyuto gin ame bino timere i kom jo Miciri kede Eciopia, abaka me Acuria bino daŋ timo kittono, en bino tero jo me Miciri oko iyi opii, kede jo me Eciopia daŋ, bino tero itino kede jo adoŋo, kun gin owoto onoro, ame tyengi daŋ nono, kwon nunygi daŋ tye nono, ame mannono bino kelo lewic i Miciri. Mannono bino poyo komgi, lewic te makogi pi Eciopia ame yam gin ogeno, kede Miciri ame yam gin owakere pire. I nino-nono jo ame bedo i dog nam bino kobo ni, ‘Koŋ inen wunu doŋ gin ame otimere i kom jo ame yam ogeno, ame yam wan oriŋo olaro baŋgi me konyowa, larowa i ciŋ abaka me Acuria. Kara wan doŋ obino bwot iŋo ba?’ ” Man kop ame Obaŋa okobo i kom Babulon, ame en lobo a tye i dog nam. Kite ame yam ajuru mwomere kede i Negeb, tye cannoro ame bino kittono i tuŋ tim, kun oya i lobo ame iyiliyili meicel. Obaŋa onyuta anyuttoro apek meicel, abwol jo gire bwolo jo abwola, abal lobo jwero jo i lobo oko. “Yin Elim wot ilweny malo, yin Media, gur ba doŋ boma oko! Abino giko kit cannoro luŋ ame Babulon okelo, abino miyo gik gire oko.” Paro gire omio rem ociro gira pyera oko; omio rem kom ocoba oko, acalo dako amerem nywal ogoo; odia doŋ piny ame mom aromo winyo ginnoro; apoyo koma doŋ apoa, ame mom doŋ aromo neno ginnoro. Tam oloa gira doŋ oko, twon lworo moro adwoŋ meicel obalo gira wia oko; ame abedo paro pi piny acol me ka ŋa abeo-nu, ame dok olunyo kela ka myelkom. Gin doŋ oyiko gire meja oko, opeto okeka daŋ doŋ oko, otye doŋ ocem kun daŋ omatte. Ya wunu malo ba, wun oloc, we wunu ba kom kwot kede moo. Pien Rwot okobba ni, “Wot ikel wunu akurpiny, myero en titi gin ame eneno. Ka en bino neno wegi aguragura ame riŋo aryo aryo, jo ame tye i wi kana kede jo ame tye i wi inaga myero en cik yite atek, dok enengi aber meicel.” Ŋat oneno te redo ni, “Ama Rwot, an acuŋ i wi pem malo dyeceŋ ducu, acuŋ gira i kakara dyewor benebene, Nen wegi aguragura tye ariŋo aryo aryo.” Ote gamo doge ni, “Babulon orette oko, orette gire oko; cal jogi mere luŋ ame opao, oŋininyo gire oko piny.” Aco wun jona, ame odinowu ote pyetowu calo kal, gin ame awinyo i baŋ Rwot me mony, ame en Obaŋa me Icrael, en ame atittiwu. Man en kop ame Obaŋa okobo ame otiko Duma: Ŋattoro tye alwoŋa i Ceir, kun penya ni, “Akurpiny, dyewor obedo iŋo? Akurpiny, dyewor obedo iŋo?” Akurpiny te gamo ni, “Piny doŋ oru oko, dyewor dok bino dwogo. Ka ce imito penya pire, itwero dok dwogo penya; itwero gire dwogo tyen me aryo.” Man en kop ame Obaŋa okobo ame otiko lobo a jo Arab: Wun jo Dedan ame iciro iwoto wunu-ni, ibino buto wunu i dye okuto otwo atwoa ame tye i lobo a jo Arab. Kel wunu pii baŋ jo ame oryo pii ociro, kel wunu cam baŋ oriŋ-ayela, wun jo me bedo i lobo me Tema. Pien gin oriŋo pala me romo, pala ame doŋ owoto oko iyi akure, kede akud atero ame doŋ otelo oko, kede peko ame lweny kelo. Pien man en kop ame Rwot okobba, ni, “Odoŋ doŋ mwaka acel keken, acalo mwaka me pakaca, kwogo me Kedar luŋ bino doko gi-acaa; dok jo atek me Kedar ame bino doŋ i akina jo ame celo atero, welgi bino bedo anok; pien Rwot ame en Obaŋa a jo Icrael doŋ okobo.” Man en kop ame orabo ame otiko luŋŋoro ame Obaŋa onyuto iye anyuttogo baŋ Icaya. Ŋo kara ame dok otimere, ame omio wun luŋ itye wunu malo i wi udiwu? Piŋo jo i boma luŋ tye aredo kede woo caa ducu, kun iŋatte wunu i yomcuny? Jo meri ame oto i lweny man, mom oneko i pala lweny, mom daŋ onekogi i lweny gire. Rwodeni luŋ daŋ onwoŋo oŋweco gigi oko, omakogi ame gin mom ru olwenyo, Obin omako jo luŋ ame onwoŋo, akadi bed mogo rik onwoŋo oŋweco kun abor meicel. Mannono omio an akobo ni, “Lok waŋwu teŋe, kur inena wunu, weka wunu akok atek pi cwer cuny ame atye kede, ŋattoro kur lolle me kweyo cunya, pien jona oto apol meicel.” Pien Rwot Obaŋa me mony tye kede nino mere, ame obedo nino me woo, nino me nyono jo piny, kede nino me babaŋo jo luŋ i luŋ ame rik en onyuto iye anyuttogo. Ame en nino me mumuko cel me boma oko dok jo bino redo iye atata i akina kiddi. Mony ame oya Elam oryoŋo icao aterogi doŋ aryoŋa, aco mony oya Aram otweo aguraguragi i kom gadigadigi kun mony ame oya Kir tye ame doŋ otere oko i kwotgi. Luŋwu abeco luŋ, gadigadi me romo doŋ oradde iye atata aco wegi aguragura tye ocuŋ oko i dog cel me boma, Gin a yam Juda geŋere kede doŋ otyeko yabo oko. I kare-naca rik ineno wunu ot me Buŋ, ineno wunu kite ame apama me paco a Daudi omumuka kede, inwoŋo wunu daŋ yore me coko pii atapara ame tye piny. Ikwano wunu udi luŋ i Jerucalem, irereto wunu udi mogo piny me inwoŋ wunu gweŋe me gero cel atek, ikunyo wunu daŋ atapara pii i akina cel aryo me jolo pii me atapara acon. Cite rik mom koŋ itamo wunu pi Obaŋa ame oyiko man con, dok ame omio otimere kittono. I nino-naca Rwot Obaŋa me mony onwoŋo alwoŋowu me bino koko kede kumo, me bino lyelo yer wiwu kede rukoboŋo cola. Aco koŋ inen kite ame inyero wunu kede i yomcuny, rommi kede dok omato pala mom twerre, nen riŋo kede koŋo mom rwenyo i dogwu. Itye ka kobo wunu ni, “Wek omatte wunu giwa, ocam wunu daŋ cem, pien diki oto giwa oko.” Rwot me mony onyutte kene baŋa kun kobba ni, “Areteni, mom gire obino timogi kica pi bal man, tuno waŋ ame gin oto i balginono.” Man kop ame Rwot Obaŋa me mony en okobo. Rwot Obaŋa me mony okobo ni, “Biye iwot baŋ Cebna, akan-jami, ame en a loo jami me ot abaka, iwot ipenye ni, ‘Tic aŋo ame yin itiyo kan? Dok ŋa ame tye baŋi kan, ame omio yin igolo lyeli piri keni-ni? Piŋo kara iboro lyelli keni i wi kiddi malo? Nen ba, Rwot bino boli oko teŋe kede tek, kadi bed yin ibedo twon lo atek rom kwene. En bino maki atek odoco. En bino doli okuŋ calo odilo te boli teŋe i twon lobo moro alac meicel, ite daŋ to kuno. Ibino to kuno, iŋet gadigadini ame ijany kede woki. Yin ame kelo lewic i ot adwoŋŋi. Abino kwanyi oko i ticci, ate dwoki cen irwom a piny.’ ” I nino-nono ka man bino timere, abino lwoŋo amirona Eliakim wot a Kilikia; abino miyo en rukoboŋŋini me tic kede delli me tweyo pyer kede itambara me tweyo wic, abino dwoko twerri luŋ i ciŋe. En bino bedo acalo apap baŋ jo me Jerucalem kede jo me Juda. Abino miyo twer luŋ me ot a Daudi i wie. Abino miye agony me cego doggola ame en ka ocego ŋattoro mom dok twero yabo, dok ka oyabo ŋattoro mom dok twero cego. Abino miyo en bedo atek acalo teke ame oguro ocuŋ atek, jo me ot a pappere luŋ bino nwoŋo kwogo pire. Jo me ot a pappere kede watti mere luŋ bino bedo twon yeccoro apek meicel i wie, Gin luŋ obino ŋabere i kome calo kopo kede cupa ame oŋabo malo, Ka man bino timere i ninonaca, teke ame yam onwoŋo oguro atek bino doko alogologo te rette oko piny. Mannono bino bedo agikki a ginnoro luŋ ame yam oŋabere i kome, Man en kop ame Rwot doŋ otyeko kobo. Man en kop ame Obaŋa okobo ame otiko Turo. Kok wunu ba, wun mel me Tarcic, pien Turo doŋ odoŋ oko nono, aboŋo ottoro onyo waŋ kwaŋŋoro, Onyuttigi koppere i yo dwogogi i Kupro. Cuŋ wunu ba mot, wun jo ame bedo i dog nam, wun ocatwil me Cidon. Okwena rik oŋolo nam, gin te bedo i wii pii adoŋodoŋo. Lim ame gin rik onwoŋo obedo kal me Cikor, ame gin owilo i dog kulo Nail. Rik yin ibedo acatwil ame cato wil i rok apol. Lewic myero maki, yin Cidon, pien nam okobo, ka bwot atek me dog nam daŋ okobo ni, “Rem me nywal mom gire ocana, mom daŋ anywal, mom daŋ apito atinnoro naka odoŋo, atin awobi onyo en anyako.” Kare ame kop man bino winyere i Miciri, cuny jo bino cwer atek meicel me winyo kop i kom Turo, Wot ikat wunu naka i Tarcic, wot ikok wunu, wun jo ame bedo i dog nam! Man en boma ame yam malo meicel, en boma ame rik ocakere con meicel, en boma ame yam ocwao okwena oŋolo nam, me wot bedo i lobo mogo ocele. Ŋa ame oyiko man i kom Turo, boma ame poko tok kwogo me loc, ame ocat willere rik obedo oloc, ame rik obedo jo a pirgi dito meicel i lobo? Rwot me mony en onwoŋo oyiko, me miyo wakeregi gik oko, me miyo jo ame oketo kwogo i komgi i lobo doko jo amwol. Wot ipur wunu lobo, wun jo ame bedo i Tarcic, pien waŋkwaŋ me Turo mom doŋ tye, Rwot doŋ oryeo ciŋe oko i wi nam, en doŋ oyeyeŋo kit loc apapat oko, Rwot doŋ otyeko miyo cik oko i kom Kanaan, ni myero tur ka bwottere atek oko, En okobo ni, “Lelowu doŋ ogik oko, wun jo me Cidon, aman doŋ odiowu odoco, ame kadi ikat wunu i Kupro, kuno daŋ mom ibino nwoŋo wunu ka weo.” Koŋ inen wunu lobo ajo Kaldaya! Pe gire jo Acuria. Gin aye rok ame onwoŋo omoko ni Turo bino bedo me a leyi tim. Gin en ogero pem, oyido malo iguŋ kuno, ote mumuko udi adoŋodoŋo i kuno oko, ote daŋ miyo kuno doko wi obur. Kok wunu ba, wun mele me Tarcic, pien ka larrewu atek doŋ oketo oko. I kare-naca wi jo bino wil oko i kom jo Turo pi mwakki pyerabiro twal, ame rom aroma i kare me kwo abaka acel. Kare ame mwakki pyerabiro doŋ otum, Turo bino bedo acalo alaya ame owero ni, “Kwany naŋa opuk ba, wot kede i dye boma, yin alaya ame wi jo owil oko komi-ni! Mi dwone kok amit meicel, wer daŋ wer apopol, me jo dok cak paro piri.” Kare ame mwakki pyerabiro doŋ otum, Rwot dok te bino limo Turo, te dok dwoke i ticcere. En dok bino tic i lobo apapat ame tye i wi podo, kun tio kedgi acalo alaya. Agoba luŋ ame en bino nwoŋo icato willere-nono, mom bino gwoko, akadi kano me nono, ento en bino jalo oko me bedo gin acil baŋ Rwot, obino wilo i cam abup kede boŋŋi abeco pi jo ame tio ticgi i nyim Rwot. Nen ba, Rwot bino miyo lobo doŋ nono, bino miyo doko wi obur, dok en bino loko lobo oluktuke, te keketo jo iye oko. I kare-naca can alamdog bino bedo rom i me a jo ata; can opii bino bedo rom me adwoŋŋere; me aŋica bino medo rom i me imattere; me acatwil bino bedo rom i me awil; me ami-baŋya bino bedo rom i me akopbaŋya; me apid-baŋya bino bedo rom i me a ŋat a tye i baŋya. Lobo gire bino doŋ nono aboŋo ginnoro, kun oyako jami iye luŋ; pien man en kop a Rwot doŋ otyeko kobo, Lobo bino kumo, tekomere te rwenyo oko, wi podo luŋ bino nyobere, tekomere te rwenyo oko, polo kede lobo te nyoŋere oko. Lobo doŋ oballe gire oko, pi jo ame bedo iye; pien jo doŋ oturo cik Obaŋa oko, mom olubo gin ame Obaŋa ociko, gin oturo daŋ cikere ame perakino atwal. Mannono omio Obaŋa doŋ oceno lobo oko, jo iye tye aneno can pi rocgi; mannono en omio jo i lobo tye awaŋ, jo anokkoro keken en ame odoŋ. Koŋo olok daŋ tye akumo, olok daŋ onyonere oko, jo luŋ a cunygi yom tye acucura. Ajaa mogo ame kok aloŋo pi yomcuny doŋ oliŋ oko, wo a jo ame lelo daŋ oliŋ oko, yomcuny ame mio jo goo naŋa opuk daŋ doŋ pe. Jo mom dok mato koŋo i wer i dog-gi; omat kono doŋ nwoŋo kec atata i doggi. Jami i boma luŋ doŋ tye atata, udi iye luŋ ocecego oko me jo kur dony iye. Jo mwoco koko i dye yo pi koŋo ame orwenyo oko; kit lelo luŋ doŋ ogik gire oko, yomcunyoro doŋ mom nen i wi lobo. Boma doŋ oweko acalo wi obur, dogcel daŋ oŋiŋinyo oko atitino. Bino daŋ bedo amannono i wi lobo i akina orok, bino bedo acalo jeituni ame doŋ odepo nyige oko, onyo acalo olok ame opwono nyige oko. Jo woto dwongi, kun owero wer me yomcuny: woogi pi dit a Rwot winyere i tuŋ to, Pi mannono wun jo me tuŋ kide, mi wunu kwogo baŋ Rwot; kede wun jo me dog nam, mi wunu kwogo i nyiŋ Rwot Obaŋa me Icrael. Cakere i agikki piny wan owinyogi owero wer me pako Rwot, Ŋat Acil kwogo mere dwoŋ nadi! Ento an ate gamo ni, “Ajony ikokoro, Ajony ikokoro, Can i wia doi! Pien odot jo otany oko iyi adote, odot jo doto jo arac meicel.” Lworo kede bur, kede owic, bino makowu, wun jo ame bedo i lobo. Ŋat oŋweco woo akelo lworo, bino poto i bur, ka ce en oyito oko i bur, bino moko i yi owic. Pien polo tye ame oyabere oko, acakki me lobo tye ayeŋere. Lobo gire doŋ oŋinyere odoco, lobo doŋ obarre oko i dyere, lobo otagere atek meicel. Lobo doŋ tagere bala amer kono yeyeŋa calo gano; ballere dwoŋ onue oko, orette ame mom dok twero ya, I kare-nono Rwot bino keto can i kom mony me polo, i polo kuno, kede i lobo kan, i kom obakki me lobo. Gin luŋ obino doko obuc, ote cokogi karacel i bur; obino cegogi oko i ot kol, ote keto can i komgi kun kare alalac doŋ okato. Alee te twodo dwe oko, lewic daŋ te mako ceŋ oko; pien Rwot me mony bino bedo abaka i wi kidi me Cion, kede i Jerucalem, bino nyuto kwogo mere i nyim odoŋe mere. Ama Rwot, yin Obaŋana; abino dwori, dok abino pako nyiŋi, pien yin itio tic me aura meicel, icobo gin a yam iyiko con, i gen kede ateni. Ilokoboma odoko wi obur; anaka boma luŋ ame ocelo atek, udi orok daŋ odoko wi obur; mom dok obino gedo kakare atwal. Mannono bino miyo rok atekkege keto kwogo i komi; boma a rok luŋ a mom i kica bino lwori. Pien yin ibedo kan atek ame laro ocan, yin kan atek ame laro jo ame piny oloo, yin ka gwoko yamo, kot kede woo ka ceŋ lyet; pien ewura dog jo a mom i kica calo yamo kot ame bukoro iyi apama, onyo calo lyeto ka piny doŋ otwo. Yin doŋ ijuko woo okwor; mannono omio wer a jo a mom i kica oliŋ, calo tipo me pol ame kweo lyeto. Rwot me mony bino tedo arama pi rok luŋ i wi kidi me Cion, arama me riŋo mogo amio, kede me koŋo olok ocek amit meicel kede riŋo amio, ame moo cogo dwoŋ iye ata, kede koŋo olok ame olio aber te cek amit meicel. Dok en bino yeyeco boŋo cola ame owumo i rok ducu, iwi kidi man, kede tambara ame gin obedo ruko i kare me kwero Rwot Obaŋa bino mwonyo to oko atwal, dok Rwot Obaŋa bino weyo pig waŋ jo ducu, te kwanyo lewic i wi jo mere oko i nyim jo luŋ i wi lobo; pien Rwot okobo. I nino-naca obino kobo ni, “Nen ba, man en Obaŋawa ame obedo kuro me larowa, Man en Rwot ame obedo kuro; olel wunu doŋ i yomcuny pi kite a en olarowa kede.” Pien ciŋ Rwot bino we i wi kidi me Cion, aco Moab obino nyono piny i kabedo mere, kite ame dok nyono kede reŋ kal i bur opwoc. Jo Moab bino ryeyo badgi iye kite ame lo a kwan ryeo kede bade me kwan; ento Rwot bino miyo awaka mere gik oko karacel kede dito me ciŋe. Apama celgi ame ogero ocuŋ iguŋ malo-nu obino miyo dok oko piny, ote coro reto piny i lobo, naka iyi apua. I nino-naca obino wero wer man i lobo me Juda, ni, “Wan otye kede boma atek odoco; Rwot en omio larre tye, cellere tye ame omane amana. Yab wunu dogcel oko, me jo me rok a kitegi atira, ame genne, dony iye. Ŋat ame tammere tye i komi, yin imio bedo i kuc me ateni, pien gennere tye i komi. Ket gen i kom Rwot nakanaka, pien Rwot Obaŋa en twon lela atek a mom balle atwal. Pien en odwoko piny jo ame yam bedo i boma otiŋere malo. En ocorogi piny, ocorogi piny i lobo, oretogi kom piny i apua. Jo doŋ nyonogi i tyengi, tyen ocan, kede me jo ame piny oloo.” Yo a ŋat a kite atira lubo tur pe iye, yo mere-nono yin en iyiko. Ama Rwot, wan okuri, i yo ame inyuto i cikki cunywa tye kom i nyiŋi, dok daŋ oparo piri meicel. Oparo piri dyewor, tipona i yia dilo ibai me yenyi. Pien ka yin iŋolo kop lobo, jo ame bedo iye pwonyo kite atira. Ŋat arac kadi bed tim ber, mom pwonyere me bedo dano a kite atira; en bedo timo tim a mom atirai lobo a jo a kite-gi atira, kun mom neno dit a Rwot. Ama Rwot, badi gire tye otiŋere malo, cite okworri gire mom oneno. Mi lewic makgi, Ama Rwot. Migi onen mitkomi i kom joni. Mi mac ame iyiko pi kodi jo-nono tyekgi oko. Ama Rwot, ibino miyowa obedo kede kuc, pien ticwa luŋ yin en itio pirwa. Ama Rwot Obaŋawa, rwode ocele, a mom yin, yam oloowa, cite wan otuco ka nyiŋi keken. Gin doŋ oto oko, mom dok obino bedo kwo! Gin doŋ odoko tipo, mom dok otwero ya malo! Yin ilimogi ite tyekogi oko, imio wi jo doŋ owil oko i komgi. Ento yin giri doŋ imio rok man onya, Ama Rwot, yin giri doŋ imio rok man onya; yin giri doŋ imio jo oketo kwogo i komi; yin doŋ imio waŋ lobowa odoko alac. Ama Rwot, wan olokere baŋi canwa; ka ce iketo can i komwa, wan okelo kwacwa i nyimi. Ocalo dako ame tye ka minne irem, kun twetwenya i koko pi remmere, wan daŋ onwoŋo otye kittono i nyimi, Ama Rwot. Wan obedo minne i rem, cite olunyo nywalo ka yamo. Mom tye loccoro ame wan oloo pi lobowa, mom tye ginnoro ame otio otyeko. Joni oto bino dok kwo, komgi oto-nono bino dok cer. Wun jo ame bedo i yi apua, co wunu oko me iwer wunu pi yomcuny! Pien toyoni, en toyo me lero, pi mannono, yin, ibino miyo toyo bedo tye i lobo a jo a yam doŋ oto oko. Bye idony wunu i tyelo wun jona, ite cego wunu doggola oko; pon wunu koŋ kuno pi kare moro anonok, tuno waŋ ame akemo a Rwot doŋ okato oko. Pien, nen, Rwot tye abino kun ya i kabedo mere pi keto can i kom jo abedo i lobo pi balgi, remo ame oony i lobo bino nen kannaler, kun daŋ mom doŋ wumo kom jo oto. I nino-naca, Rwot bino keto can i kom Leviatan, ame en twol a ŋeo paŋŋere meicel me laro kwo mere; Rwot bino keto can i kome i twon pala romo mere atek, abit meicel, dok bino neko ajaraŋuu ame bedo i nam. I nino-naca, “Wer wunu wer i kom poto olok ame yomoro cuny. Ame an Rwot en agwoko; aonyo pi iye kare luŋ! Agwoko dyeceŋ kede dyewor me ŋattoro kur bal, akemo gire mom omaka. Kono okuto kede ocokocok tye iye an kono awoto alwenyo kedgi, ate waŋogi luŋaluŋa. Onyo ka ce gin olaro baŋa, myero gin ocikere me bedo keda i kuc, myero gin ocikere me bedo keda i kuc.” Kare tye abino anyim ame Yakobo bino ryeyo lwite calo olok, Icrael bino turo, bino lot, nyige bino poŋ lobo oko. Rwot ojwero Icrael kite a yam en koŋ ojwero kede jo ojwerogi? Onyo onekogi daŋ kite a yam en koŋ oneko kede jo ame onekogi? Ama Rwot yin ipyem kedgi, ite ryemogi oko, kun icwaogi teŋe i yamo agwa me dogi i kare ame yamo me oro kodo. Mannono bino miyo igonyo Yakobo i ballere man en ame bino bedo gin ame bino ya pi kwanyo ballere: ka en bino loko kiddi luŋ me keno lam odoko acalo gweŋ ame oluko apwot, kun jok a dako ame olwoŋo ni Acera onyo keno lam me waŋo odok akur mom dok tye moro ame ocuŋ. Pien boma ame ocelo atek doŋ oweko oko, kabedo mere doŋ oweko odoŋ nono calo tim ata; roce doŋ cemo gigi kuno, obuto gigi kuno kun ojwero pot ginnoro olot iye. Kare ame jaŋe doŋ otwo, ote tuturo oko; mon te mwodo oko me kuto mac. Pien gin obedo rok a mom niaŋ, Obaŋa ame oketogi mom bino bedo kede kica moro i kormi Obaŋa ame ocweogi mom bino timogi ber. I kare-naca Rwot bino dino kal cakere i kulo Eufrate tuno naka i kulo me Miciri; Rwot bino cokowu acel acel, wun jo Icrael. Dok daŋ i ninonaca, obino kuto twon apelloro adwoŋ meicel, eka jo ame rik onwoŋo orwenyo i lobo me Acuria kede ame onwoŋo oryemo owoto i lobo me Miciri. Gin bino dwogo, ote bino woro Rwot i wi kidi acil, i Jerucalem. Tok me wakere omero me lobo Epraim bino neno can, karacel kede ature amwonya meicel, ame en kwogo mere ame aner oko, ame tye malo i ŋet luŋ ame ceko cem meicel, ame obedo me a jo a koŋo oloo. Nen ba, Rwot tye kede dano moro atek ame tye kede twer; ame calo yamo kot ame acwee i pee, ame jwero piny ajwera, dok ame calo twon yamo kot adwoŋ meicel, ame pii mere mol lapakino atata en bino reto jo piny kede tek kittono. Tok wakere omero me lobo Epraim obino nyono oko i te tyen piny; karacel kede ature amwonya meicel, ame en kwogo mere ame aner oko, ame tye malo i ŋet luŋ ame ceko cem meicel, bino bedo arom aroma i nyig oduro ame ogeo cek, kun kare me oro mom ru otuno; dano ka oneno, ru camo oko ka otuno i ciŋe. I nino-nono Rwot me mony bino bedo acalo kwogo, kede alukana aber meicel, baŋ jo mere ame odoŋ; en bino bedo cuny me ŋolo kop atira baŋ ŋat ame ŋolo kop, dok en bino bedo teko baŋ ŋat ame juko lweny i dog cel me boma. Dok jo man daŋ doŋ gatte agata pi koŋo olok, ogate agata pi mato koŋŋogo akec meicel; olamdog kede odwarpiny gatte agata pi mato koŋŋogo akec meicel, koŋo olok doŋ gire obalo wigi oko, ogatte doŋ agata pi mato koŋŋogo akec meicel. Mom doŋ omako aber gin ame Obaŋa tye ka nyuttigi, mom oŋolo kop kakare; pien wi meja duc opoŋ ka i ŋok, mom tye kakannoro ame ginnoro arac mom iye. “En dok pwonyo ŋa? En dok etito koppere baŋ ŋa? Baŋ itino ame pwod oryemo aryema i cak bo? Baŋ jo ame pwod okwanyo i tuno bo? Koppere luŋ tere mom, calo me atin ame apwonyo kop apwonya, iwinyo kan acel, kan acel.” Ateteni, Rwot daŋ bino kop i jo man, i leb a jo ame dumo aduma, kede i dog jo ame omyere; ame yam okobbigi ni, “Man en weo; mi wunu ŋat ame ool we; kun en tye kan”; cite gin gigi ote kwero winyo oko. Mannono bino miyo kop a Rwot bino doko gin a tere pe baŋgi gin mom bino niaŋ koppere pien calo pwonyo atin atidi ame opwonyo momot i yore, tyeŋ i tyeŋ, me gin owot orette ataro, otutura me gin owot orette ataro, otutura oko, ote cikogi owic ame te makogi oko. Winy wunu kop a Rwot, wun wegi aŋale ame loo rok man i Jerucalem! Pien wun ikobo wunu ni, “Wan daŋ ocikere giwa oko kede to, oporo kop oko kede lyel; ka ce twon can adwoŋ meicel obeo i komwa, mom gire bino gudowa; pien wan doŋ oloko goba odoko kaarrewa ogwokere giwa kede kop a mom ateni”; mannono omio Rwot Obaŋa okobo ni, “Nen ba, an doŋ aketo kidi me wel i Cion, kidi ame otemo owok doŋ oko, ame en aye bino bedo acakki tere. Ŋat ame ye mom gire bino bedo kede podo moro. Abino miyo ŋolo kop atira bedo calo tol pimo ot, kun kite atira bedo birigi; pee bino mollo ka-larrewu me goba oko, pii daŋ bino poŋ i ka-gwokerewu oko.” Mannono bino miyo cikerewu kede to tur oko, kop ame iporo wunu kede lyel daŋ mom bino cuŋ; doŋ ka twon can adwoŋ bino beo i akinawu, cannono bino tetenowu piny. Kare luŋ ame bino beo i akinawu, bino terowu oko, pien cannono bino bea dyeceŋ kede dyewor nino i nino, niaŋ i koppono bino kela lworo adwoŋ meicel. Pien bino rom i dano ame otemo buto iyi tanda acecek meicel kun wumere kede olangit daŋ a mom twero rome kadi acel. Pien Rwot bino ya malo kite ame rik otimo i wi kidi me Peracim, akemo bino make kite ame rik omake kede i luŋ me Gibeon; pi cobo ticcere; ticcere pat apata ba! pi cobo ticcere; ticcere welo ba! Aman doŋ wek wunu aŋale bed pe ba, me kur twewu atek ateka, pien awinyo ka Rwot Obaŋa me mony ciko pi jwero lobo luŋ oko, Cik wunu yitwu, iwiny wunu dwona; ter wunu yitwu, iwiny wunu koppa, Ŋat ame puro poto mere me coyo koti, en bedo pur nakanaka? En bedo boto poto kede loko nakanaka? Ka en doŋ otyeko teŋo oko, mom coo toke, pito kummin, te pito naŋo i yore i yore, kede cayiri daŋ kakare, karacel kede ŋano atino i laŋet poto? Pien Obaŋa mere pwonye aber kun niaŋe daŋ aber kite me tiyo. Toke gire mom odino i yat dino bel, kummin daŋ mom oloro tyen gadigadi iye; toke gire oteŋo ateŋa kede lut, aco kummin odino kede apwod. Kal kwon odino adina, cite mom atek ateka ame obabaro nyige oko, Ka aguragura wao tyen gadigadi beo iye, mom gire babaro nyige oko. Man daŋ oya i baŋ Rwot me mony, en Rwot me awura i miyo tam, ryekomere dwoŋ okato kare oko. Ariel oneno can nadi, Ariel ame en boma ame Daudi onwoŋo oguro kema mere iye! Wek wunu mwakki koŋ kat aryo adekkoro kun ibedo kwero wunu ecubaŋ apapat i karegi. Cite abino wuno Ariel; koko kede kumo bino bedo tye iye, calo keno lam me waŋo leyi ame oŋolo me yala, Abino guro kemana i ŋeti kun guri dyere, abino guri dyere i pemmogo ocuŋ malo iguŋ, abino toro lobo ayido i nyimwu calo cel. Abino dwoki piny i te lobo twal, ibino kop i piny iyi apua, dwoni bino donyo i te lobo calo dwonjok, kopi bino winyere i weewee kun donyo iyi apua. Cite okwori bino bedo apipim calo apua, kede jo a kica mom i cunygi bino bedo calo cuŋ kal a yamo kolo, Eka cucut, i kare-nono, Rwot me mony te limi, kun mio kot mwomwoca, oyeŋo bedo tye, kede woo bedo dwoŋ, yamo ajuru, yamo kot, karacel kede maccoro ager meicel. Lwak mony apipim me rok apapat ame lwenyo i kom jo me Ariel, jo luŋ ame lwenyo i komgi kede i kom kan atek me larregi, ame wunogi, gin luŋ obino doko calo lek, gin ame Obaŋa nyuto dyewor. Kite a calo lo a kec aneko leko ni etye ka cam, eka te coo ame iye ginnoro mom iye. Onyo acalo lo orwo pii ociro leko ni atye emato pii, eka te co ame oryo pii ociro atek, kun mito mato pii; lwak rok luŋ lwenyo i kom kidi me Cion, daŋ bino bedo kittono. Baŋere wunu kenwu me ibed wunu omino, Babalo wunu waŋwu kenwu me ibed wunu otowaŋ! Mer wunu, aboŋo koŋo; gagata wunu, aboŋo koŋo moro akec! Pien Rwot doŋ ocoro i komwu cuny me nino atek; owuno daŋ waŋwu oko, ame gin odwarpinywu; kede wiwu daŋ owumo oko ame gin jo a neno piny. Gin Obaŋa nyuto baŋ odwarpiny luŋ doŋ odoko calo buk ame omwono doge oko i tu baŋwu. Ame ka omio baŋ dano moro ame ŋeo kwan kun kobbe ni, “Biye ikwan man”, en gamo ni, “Pe gira atwero kwano pien omwono doge oko,” Dok daŋ ka omio bukkono baŋ ŋat a kwia kwan, kun kobbe ni, “Biye ikwan man,” en gamo ni, “Pe gira atwero kwano.” Rwot te doŋ kobo ni, “Rok-ki kara noka ceggii doggi nono, owora daŋ i doggi nono, cunygi kara bor keda lworo ame gin lwora kede-ni kara cik a dano ame opwonyogi kede apwonya; pi mannono ba, dok abino timo gin me aura i kom rok man, gin me awura, dok me taŋo meicel; ame mio ryeko rweny i jo aryek oko.” Jo ame kanni Rwot tamgi oko kan atut, jo ame tio ticgi kan acok, jo-nono bino neno can, dok ame okobo ni, “Ŋa kara ame nenowu? Ŋa kara ame ŋeowu?” Koŋ inen kite ame wun iloko wunu kede jami oluktuke! Otwero poro acwe-gulu kede lobo cweyo gulu? Gin ame otio atia twero kobbi ŋat ocwee ni, “Pe gire yin icwea?” Onyo gin ocweo twero kobbi ŋat ocwee ni, “Mom gire iŋeo ginnoro?” Odoŋ kare anonok meicel eka Lebanon te doko poto ame ceko cem abup meicel, kun poto ame yam ceko cem meicel olokere odoko buŋ. I nino-nono jo a yitgi odiŋ bino winyo kop i buk otowaŋ daŋ waŋgi bino yabere, kun oya i mutu kede colpiny. Jo amwol bino dok nwoŋo yomcuny i Rwot, ocan bino lelo i Ŋat Acil me Icrael. Pien jo a mom i kica gire bino bedo pe, wegi aŋale daŋ bino tum, oko, olib jo dyewor me timo tim areco obino miyo waŋgi rwenyo oko, jo ame pi kopgi mio kop loo dano, ame ciko owic pi ŋat ame jukogi i dogcel me boma, ame cwao ŋat a kite atira teŋe pi koppogo a tere mom. Mannono omio Rwot ame rik olaro Iburaim, okobo kop i kom ot a Yakobo ni, “Lewic mom dok bino mako Yakobo, waŋe mom dok bino balle, Pien ka en bino neno itino mere, ame gin obedo tic me ciŋa, kun tye baŋe, gin bino miyo nyiŋa bedo me awora; gin bino ŋeyo ni Ŋat Acil a Yakobo gire cil, gin bino bedo kede lworo i kom Obaŋa me Icrael. Jo ame gak oko i cunygi bino niaŋ, kede jo ame ŋunura daŋ bino ye pwonnyi.” Otino amejem bino neno can, “Rwot okobo. “Jo ame cobo tamgi, ame mom mega; dok ame notte kede rok ame cunya mom mito, me medo bal i kom bal; ame ocako wotgi me wot i Miciri aboŋo koŋ penyo tamma, wek olar baŋ Parao me gwokgi, dok oyeny ka pono i tipo me Miciri! Pi mannono ba, ka-gwokerewu i baŋ Parao bino lokere miowu lewic, dok tipo me ponowu i Miciri bino miyo alee twodowu, Pien kadi bedo odoŋe mere tye Zoan, dok okwena mere tuno naka Kanec, ŋat acel acel lewic bino mako, pi rok ame mom romo konyogi, ame mom onwoŋo iye konyoro akadi berroro, kono ka lewic kede acae.” Man en kop ame Obaŋa okobo i kom leyi me Negeb, I dye lobo ame tye i twon ayela kede can apek, kan ame min eŋatu kede twon ŋuu ya iye, karacel kede ororo kede twol a twarre, ame oyeo lwak lonyogi apipim i ŋe kane, kede lim akanagi i wi aruk inaga, kun otero baŋ rok ame mom romo konyogi. Pien kony ame Miciri mio lam dok berroro mom iye, mannono omio acako nyiŋe ni, “Rakab ame tworo toke aboŋo ticcoro,” Aman doŋ wot igor coc i nyimgi kom kidi apada, ite daŋ coyo dok i buk, me bed tye pi kare ame tye i nyim, acalo caden ame bedo nakanaka. Pien gin obedo jo ame jem ame ogoba, itino ame dag winyo kop a Rwot; ame kobbi jo ame neno piny ni, “Kur inen wunu,” kede baŋ odwarpiny ni, “Kur irabbiwa kop a tye atira; kobbiwa wunu kop abeco keken, kun irabo wunu daŋ kop me goba keken, gak wunu iwek wunu yo oko, me kur omedde winyo pi Ŋat Acil me Icrael.” Mannono omio Ŋat Acil me Icrael okobo ni, “Pien icao wunu kop man, ite lunyo keto genwu i wuno jo kede bwologi kun ijeŋere wunu i kodi timwunono; mannono bino miyo balwu-nono bedo i komwu, acalo apama cel ocuŋ malo iguŋ ame obarre oko dok daŋ ceggi rette piny, ame mukere oko i rwop oyotoyot meicel. Mukere mere rom aroma i to a gulu ame ocweo, ame oŋŋinyo aboŋo kica moro, eka tako moro mom te nen iye, ame dok romo kwanyo mac i keno onyo ame romo twomo pii iyi atapara.” Man en kop ame Rwot Obaŋa okobo ame en Ŋat Acil me Icrael, “Dwog wunu cen, bed wunu mot, me ilarre wunu: ibino nwoŋo wunu teko i bedo mot kede gen.” Ento wun ikwero wunu oko, kun ikobo wunu ni, “Pe gire wan obino ŋwec giwa agu ragura”, mannono bino miyo iŋweco wunu oko, dok ni, “Obino ŋwec kedwu adwir adwira”, mannono bino miyo jo ame ryemo yorwu bino bedo jo adwir meicel. Jo tutumia bino ŋwec pi lworo dano acel, wun luŋ ibino ŋwec wunu pi lworo okwor abic, tuno waŋ ame idon wunu calo yat bendera ame tye wi kidi, calo bendera ame tye i wi tur malo, Kadi bed amannono, Rwot gire tye akuro ka nyuttiwu berrere, mannono omio en otiŋere malo pire kene pi timowu kica. Pien Rwot en Obaŋa ame ŋolo kop atira jo luŋ ame kure tye kede yomcuny. Ateteni, wun jo Cion ame bedo i Jerucalem mom dok ibino kok wunu, kadi acel. Rwot gire bino timowu ber ka ce en owinyo kokowu en bino gamo dogwu ka en owinyo. Kadi bed mi icam wunu ogati ame me can dok mi imat wunu pii kun owunowu, cite apwonywu mom dok bino pono kadi acel, ibino wunu gire neno apwony kede waŋwu. Ka ce igak wunu tuŋ cem onyo tun cam, yitwu bino winyo dwon ame bino iŋewu, kun kobo ni, “Yo gire ene, lubi”. Eka ite pyedo wunu cal jogiwu ame opao apaa kun omwomwono komgi kede jabu karacel kede calwu ame otwako atwaka, kun omwomwono komgi kede jabu, ite bobologi wunu oko bala gin me kwer, kun ikobo wunu ni, “Jer wunu teŋe!” Rwot bino miyowu kot pi kotti ame icoo wunu i potti kede cam ame cek i potti, bino cek aber dok abup meicel. I kare-nono dokwu bino cam i bar alac; eka twoniwu kede kanewu ame puro, gin bino camo cem ame orubo kede kado, ame ojobo ote pyeto kede odero. Kulo me pii ame mol bino bedo tye i wi kidi ducu kede i wi tur ducu, i nino ame obino neko iye jo i kare ame gedo mogo ocuŋ malo iguŋ bino rette iye piny. Dok dwe bino ryeny acil meicel kun caro piny calo ceŋ, aco ceŋ bino bedo a rom mannono tyen abiro, acalo lero me nino abiro, i nino ame Rwot bino tweyo iye waŋ kan owanne i kom jo mere, kede caŋo kan ame en owawano. Nen ba, nyiŋ Rwot bino i kannabor kun akemo mere waŋ calo mac ame yito mere wikino malo oculle acula; kun iniga opoŋ yi doge oko, aco lebe calo mac ame tye ajwero piny oko; weo mere calo kulo ame amol olapakino atata, ame otuno naka i dwone malo; me yeko rok apapat kede odero me to kede pi keto i dog jo del ame miogi orwenyo oko. Ibino bedo wunu kede wer acalo me dyewor me kwero ebucan a Rwot; cunywu daŋ bino bedo yom ame calo dano ame woto kun jo akuto nyamulere, me wot i wi kidi a Rwot, baŋ ŋat ame obedo Lela a jo Icrael. Rwot bino miyo dwone me kwogo winyere, dok daŋ bino miyo bade nen ame en oryeo piny, kun tye kede twon akemo adwoŋ, kede leb mac ame jwero piny oko, karacel kede kot ame mwomwoca kun corre piny kede pee. Twon lworo adwoŋ meicel bino mako jo Accuria, ka ce gin owinyo dwon Rwot, kun en pwodogi kede abiro mere. Ajaa kede naŋa opuk bino kok kun lubere kede abiro acel acel ame Rwot bino goyogi kede; en bino lweny kedgi kun yeyeno bade me lweny. Pien ka waŋo doŋ otyeko yiko oko con; doŋ otyeko yiko gire oko pi abaka; kannono dwoŋ dok daŋ lac meicel, kun mac kede yen tye dwoŋ ata; weo a Rwot ame mol calo gweŋ calufa ame olio i mac en ame moko mac iye. Jo ame woto i Miciri pi yenyo kony bino neno can jo ame oketo gengi i kom aguragura, kede i kom gadigadi me lweny, pien tye apol, kede i kom wegi aguragura, pien otek meicel, ento mom otiŋo waŋgi malo baŋ Ŋat Acil me Icrael, akadi penyo tam a Rwot! Aco kono en ryek, dok kelo can arac meicel, mom dok dwoko kop ame en okobo cen, en gire bino ya malo i kom jo atye i udi otim tim areco, kede i kom okony jo ame timo bal. Jo Miciri gire obedo dano mom obedo Obaŋa; aguragura daŋ kom ata-ni, mom gire obedo cuny. Ka Rwot oryeo bade, ami-kony bino gatte ni tyam tyam, aco ŋat akonyo bino rette oko piny, gin luŋ obino to oko karacel. Pien Rwot okobba ni mannono. Kite ame eŋatu onyo atin eŋatu mor kede i kom lee ame emako ame kadi lwoŋ lwak okwat apipim i kome, kome gire mom myel ka owinyo dwongi dok daŋ lworo mom mako pi woogi, mannono en kite ame Rwot me mony abino kede piny me bino lweny i kom kidi me Cion kede i kom turrere. Rwot me mony bino gwoko Jerucalem kite ame winyo lyero kede; en bino gwoko dok daŋ bino laro, en bino koyo Jerucalem, mio bwot oko. Wun jo Icrael ba, myero idok wunu baŋ ŋat ame ijem wunu i kome agwa wok ca. Pien i nino-nono ŋat acel acel bino bolo cal jokkere me ryal oko karacel kede cal jokkere me jabu ame onwoŋo itimo wunu bal iye pi tiyo kede ciŋwu. “Pala lweny ame mom obedo me a dano, bino neko jo Acuria; pala lweny ame mom obedo me a dano bino jwerogi oko; gin bino riŋo pala lweny oko, awobegi obino diyo i tic atek. Lworo bino miyo lelagi rwenyo oko, myelkom daŋ bino miyo odoŋegi weko bendera oko.” Rwot ame maccere tye i Cion, kede tanurrere tye i Jerucalem en okobo. Nen ba, abaka bino loyo loc a kite atira, oloccere bino loc kun oŋolo kop atira. Ŋat acel acel bino bedo calo kalarre ka yamo tye, dok acalo ka-gwokkere ka kot ocorre piny, acalo kulli me pii i kabedo otwo, dok acalo tipo kidi moro adwoŋ i lobo otwo imek. Waŋ jo ame neno mom bino wumere, jo ame yitgi ogiporo, bino tero yitgi iye. Jo ame timo jami oyotoyot, bino niaŋ iye ote ŋeyo aber, jo ame te lebgi odwale bino kop atira aboŋo peko moro. Ŋat amiŋ mom dok obino kobo ni dano me awora, naka ŋat ame kite rac me kobo ni twon lo moro adwoŋ, Pien amiŋo kobo kop me miŋo, tamere tye ka i timo bal; timere luŋ mom yomoro yi Obaŋa, kobo kop a mom ber i kom Rwot; medo ka kec baŋ jo ame kec oneko, jo oryo ciro en twono pii oko. Ŋat ame kite rac, timere daŋ arac, en kelo ka tam me timo gin arac, balo ocan oko i koppere me goba, kadi kop a ŋat a can odio tye kakare. Ento dano me awora kela daŋ tam ame oworo, en cuŋ i kite me woro. Ya wunu malo wun mon ame tye kede kuc, winy wunu koppa; ter wunu yitwu, iwiny wunu kop ame akobo wun anyira ame mom paro ginnoro. Nino ame odoŋ mom dok romo mwaka acel twal, komwu bino bedo po apoa wun mon ame mom paro ginnoro, pien nyig olok bino bedo pe, dok daŋ mom obino pwono nyig yen. Komwu myero myel, wun mon ame tye kede kuc, komwu myero popoa wun ame mom iparo wunu ginnoro; gony wunu boŋo oko i komwu, ite tweyo wunu boŋo cola i pyerwu. Bap korwu pi pottiwu ame yommoro cunywu, pi olok ame nyak atek meicel, pi lobo a jona, ame okuto kede ococok tye adoŋo iye; kede pi udi luŋ ame yommoro cuny jo, ame tye i boma ame jo lelo iye. Pien abaka bino ya oko i ode, boma a jo pol iye bino doŋ nono; kidi me Opel kede kan ocuŋ iguŋ malo me ŋiyo piny bino doko gorogoro atwal; kane me tim bino lelo pirgi, bino doko ka kwayo rommi kede dyegi, tuno waŋ ame Obaŋa oonyo Cuny Acil i komwa kun ya i malo, ame tim me Lebaŋon doŋ odoko poto ame ceko cem abup meicel, kun poto ame yam ceko cem olokere odoko buŋ. Ŋolo kop atira te bedo i tim, aco kite atira te bedo i poto a ceko cem. Kite atira bino kelo kuc, dok kite atira bino kela daŋ bedo mot kede gen ame bedo nakanaka. Jona bino bedo i kabedo me kuc kan ayela moro mom iye, ame ber me weo mot. Pee bino corre, buŋ te onyo oko piny, boma daŋ bino rette oko piny. Itye wunu kede yomcuny wun jo ame coo koti i dog kulo ducu, ame mio twoni kede kane lato gigi ata. Ibino neno can yin ajwer jo, ame yin mom ojweri, yin won adote, kun ŋattoro mom ru oketo erupe i komi. Ka doŋ iweko jwero jo oko, obino daŋ jweri oko; kede ka doŋ iweko timmi me doto jo oko, yin daŋ obino keto erupe i komi. Ama Rwot, timwa ber, wan okuri. Bed acalo bad wa piny a ru i piny a ru, larwa i kare me peko. Rok ocele riŋo gigi oko pi winyo dwon jo awo, ka yin itiŋere malo, orok keketa oko; oyako jami calo omor ame camo cam i poto opyepyea iye calobonyo. Rwot gire dit meicel, pien bedo malo; en bino miyo jo Cion luŋ ŋolo kop atira kun kitegi daŋ atira, en bino miyo icuŋ wunu atek i karewu, bino miyo larre, ryeko kede ŋec bedo adwoŋ; gin ame pire tek baŋ jo mere en lworo Rwot. Koŋ inen ba, kite ame jo mere a tek i lweny kok kede okwena me kuc kok kede cwercuny meicel. Yo gudo luŋ doŋ odoŋ oko nono, ŋattoro ame woto iye doŋ mom tye. Nen cikere doŋ oturo oko, caden doŋ ocao acaa mom daŋ doŋ oparo pi dano. Lobo gire doŋ oballe oko; alee otwodo Lebanon, tekomere doŋ tye arwenyo oko, Caron doŋ calo tim; aco Bacan kede Karmel pot yengi doŋ tye aony aonya. Rwot okobo ni, “Aman doŋ abino ya oko, abino doŋ tiŋere malo; abino doŋ bedo dit. Iyaco wunu reŋ kal, ite lunyo nywalo wunu cuŋ kal; weo me dogwu en ame bino bedo mac ame a bino tyekowu. Rok luŋ bino doko calo buru mac odoŋ ka mac oto, acalo okuto ame otoŋo ote waŋo i mac.” Wun jo ame tye kannabor, winy wunu gin ame doŋ atimo, kede wun jo ame ceggi, myero iŋe wunu twer ame an atye kede. Obalo ame tye i Cion, lworo doŋ omakogi oko, jo ame kwero Obaŋa komgi doŋ amyel amyela. “Ŋa i akinawa ame twero bedo i ŋet mac ame jwero jo? Ŋa i akinawa ame twero bedo i ŋet gin ame lyel nakanaka?” Ŋat ame kite atira i nyim Obaŋa ame kobo kop ateni, ame cunye dag lonyo ame onwoŋo pi buro jo, ame taŋo gire ciŋe oko i gamo lim me wil i muŋ, ame culo yite oko iwinyo kop me onyo remo, ame mio waŋe oko i neno gin arac. En bino bedo malo; ka geŋere mere bino bedo cel ame ocweo i lela; obino miye gire cammere, pii amata mere daŋ mom bino rwenyo. Ibino neno wunu abaka kede waŋwu i kwogo mere; gin bino neno loba ame opette alac. Cunyi bino lwodo kop i kom lworo adwoŋ meicel “Akwan wel kara tye kwene? Ara ocoro kara tye kwene? Akwan gedo ocuŋ igur; kara tye kwene ba?” Mom dok ibino neno wunu rok ame oŋale, rok ame kopgi pat apata, ame mom itwero niaŋ wunu kopgi, okobo leb ame niaŋ iye tek. Koŋ inen wunu Cion, boma ame ikwero wunu ecubanwu iye! Ibino neno wunu Jerucalem i waŋwu ame en paco okwe calo kema ame mom okobo, ame teke mege mom oputo, dok tollege daŋ mom cot, Rwot bino nyuto kwogo mere kuno, kan ame kulli adoŋo kede en atino tye iye, kan ame mele ame okwaŋo i pol mom beo iye, yede me kwogo daŋ mom beo iye. Pien Rwot en aŋol kopwa, en alocwa, Rwot en abakawa, en bino larowa, Tol yeeni ogony oko; mom mako te yat cuŋ atek, mom daŋ otwero yaro boŋo iye wek yamo koli. Jami ayaka bino bedo apipim ame jo bino poko, naka oŋwalo daŋ bino nwoŋo moro. Mom tye ŋattoro ame bedo i lobowa ame bino kobo ni, “An koma lit.” Jo ame bedo iye luŋ obino timo kica pi balgi. Biye wunu ceggi wun rok luŋ, me icik yitwu iwiny wunu! Jo luŋ ame bedo i lobo, myero bin winy. Pien akemo doŋ omako Rwot kom rok ducu, akemo ocire meicel i kom monygi, en doŋ ojalogi oko me ajwera i pala calo leyi. Kom jogi ame oneko obino bolo ata, ŋwec kom jo-nono bino kuto aŋwec remogi bino mol i wi kidi, Lwak mony me polo luŋ bino top oko, polo bino dolle oko calo buk odolo. Monygi luŋ bino rutte oko piny, kite ame pot olok ony kede piny, kite ame pot olam ony kede i kom yattere. Pien palana me lweny omer oko i polo, pien abino piny me ŋolo kop i kom Edom kom jo ame doŋ omio me ajwera, Rwot tye i pala lweny ame remo doŋ omwono lake oko, dwol doŋ dwoŋ i kome meicel, remo rommi kede dyegi, dwol aŋaluru me nyogi rommi. Pien Rwot bino ŋolo mot me yale i Bojra, kede twon nek adwoŋ meicel ame en bino timo iyi Edom. Jo bino rette calo twoni kede jobi Lobogi bino mato remo meicel, dwol bino miyo lobo bedo amio amia. Pien Rwot tye kede nino me culo kwor, tye kede mwaka me lakoro Cion i ciŋ okworrere, Kulli atye Edom bino lokere doko calo odok lam, lobo iye bino doko calo gweŋ Calfa, aco lobo-naca luŋ bino doka calo odok lam ame awaŋ. Mac bino lyel dyeceŋ kede dyewor kun mom to, yito mere bino wikino malo nakanaka. Kare luŋ lobo bino doŋ nono, ŋattoro mom bino beo iye atwal. Olwit kede ecoc bino leyo kannono tula kede agak bino bedo iye. Rwot bino ryeyo tol i kome te miyo rubere atata kede birigi ame mio doŋ nono aboŋo ginnoro, Obino lwoŋo nyiŋe ni Loc gire mom kuno, jo adoŋo bino bedo pe iye, Okuto bino doŋo i wi udi mere adoŋo, ayilayila kede ocokocok bino doŋo i kom apama cellere, ekwe kede udo bino bedo iye. Leyi me tim bino rwatte odyekodyek cen acalo dyegi bino kok baŋ owotegi, min lee oti ame nen dyewor keken bino wot me yenyo ka weo kuno. Tula bino gero ode kuno, bino bolo toŋe kuno bino beko daŋ kuno, bino coko itino mere karacel i te bwome kuno, Ogole daŋ bino cokere kuno, kun acel acel i akinagi tye kede cware. Koŋ iyeny wunu i buk a Rwot: mom tye moro i akina magi ame bino rwenyo, mom tye moro ame bino bedo kene aboŋo cware. Pien Rwot doŋ ociko ni bed kittono, en ikome bino cokogi karacel. En bolo kwir pirgi, en ikome en opokkigi lobo kun pimo kede tol. Bino doŋ bedo megi atwal, gin bino bedo iye waŋ i waŋ. Lobo otwo kede tim bino lelo, ature bino turo iye calo kalaŋweka, Ature bino bedo iye calo jo ame alelo kun owero i yomcuny meicel, kwogo mere bino bedo adwoŋ meicel calo kidi me Lebanon, bino bedo amwonya meicel calo potti me Karmel kede Caron. Gin bino neno kwogo a Rwot, kede twer ame Obaŋawa tye kede, Mi teko baŋ jo ame badgi okwe mi jo a coŋgi goro dok atek. Kobbi jo ame cunygi lwor ni, “Kur ilwor wunu, bed wunu atek! Nen ba, Obaŋawa bino lakorowu, en bino culo kwori kom okworwu. En abino me bino larowu.” Icennere waŋ otowaŋ te yabere oko, yit odiŋyit te yabere daŋ oko. Jo oŋwalo te pye calo atil, jo a lebgi oto te wer i yomcuny. Pien pii bino kukunya i dye tim, kun kulli daŋ mol i dye lobo otal; kwoyo amimila bino doko kut, pii bino kukunya atata i lobo otwo ikaŋ. Lum kede ogada bino doŋo adwoŋ meicel, i kabedo a yam ekwe en abedo iye. Yo gudo adwoŋ bino bedo kuno, yo ame obino cako nyiŋe ni, Yo Acil. Jo ame obalo mom bino lubo yonono, jo amiŋ mom bino miyo jo alubo yo-nono rwenyo. Eŋatu moro mom bino bedo kuno, lee moro ager mom daŋ bino wot kuno, mom tye moro ame bino nen kuno, jo ame olakoro en ame bino lubo yo-nono. Jo ame Rwot olakoro bino dwogo i Jerucalem, gin bino bino kede wer. Yomcuny aperakino atwal mom bino rwenyo i wigi, gin bino bedo i yomcuny kede lelo, cwercuny kede cucura bino ya oko i cunygi. I mwaka me apar wie aŋwen me loc abaka Kejekia, Cennakerib abaka me Acuria owoto me wot lweny i kom boma luŋ me Juda, ame onwoŋo ocelo atek meicel, eka te daŋ makoboma-nono luŋ. Abaka me Acuria te cwayo Rabcake baŋ Kejekia i Jerucalem, kun Rabcake ya i Lakic i twon mony adwoŋ meicel. Oticcere adoŋo te wot cuŋ i yo pii ame mol tero pii iyi atapara ame tye tuŋ malo, i yo adwoŋ ame woto i poto Alwok-boŋo. Jo adek me Juda te bino me bino rwatte kede: Eliakim wot a Kilkia, ame rik obedo adwoŋ a loo ot abaka, kede Cebna, ame onwoŋo aran, kede Joa wot Acap ame rik en aco kop i kom ginnoro luŋ ame otimere. Rabcake te kobbigi ni, “Kobbi wunu Kejekia ni, ‘Abaka adwoŋ ame en abaka me Acuria okobo ni, Gen ame itye wunu kede-ni ocuŋ kara i kom ŋo ba? Itamo ni kop me dog keken rom aroma i ryeko kede teko me lweny bo? Aman ame yin ijem i koma ni yin igeno ŋa? Nen yin itye ka geno Miciri ame rom aroma i mako ogada ame tur oyot akaka mako abiro; ame tur cobo ciŋ ŋattoro keken ame ojeŋere i kome. Parao ame obedo abaka me Miciri daŋ tye kittono baŋ jo luŋ ame keto gengi i kome. Ento ka ikobba ni, “Wan ogeno Rwot Obaŋawa”, kara mom en Obaŋa-nono en ame Kejekia rik omuko kabedo mere me abila ame tye malo kede keno lam, kun ciko Juda kede Jerucalem ni, “Myero gin wor Obaŋa i nyim keno man”? Aman doŋ tim ber ijeŋ ginnoro wun adwoŋŋa, abaka me Acuria: An abino miyi aguragura tutumia aryo ka ce yin itwero nwoŋo jo ame twero ŋwec kedgi, Kara yin itwero juko aticcoro i akina otic adwoŋŋa i yore mene, ka ce yin pwod igeno Miciri pi gadigadi mere kede jo ame ŋweco agurgura? Medo i kom mannono, yin itamo ni an abino jwero lobo man aboŋo Rwot? Rwot okobba ni wot i lweny i kom lobo man, me ijwer jo iye luŋ’.” Eka Eliakim kede Cebna, kede Joa te kwayo Rabcake ni, “Tim ber i kob kedwa wan omironi i leb Aram pien wan oniaŋ iye. Kur ikob kedwa i leb me Juda ame jo ame tye i wi apama me cel twero winyo.” Rabcake te gamo kopgi ni, “Itamo ni adwoŋŋa ora me bino kobo kop man baŋ adwoŋwu kede baŋwu keken, kun mom akobo baŋ jo ame tye i wi apama cel malo ca? Aco kono, wun karacel kede gin jo-ni luŋ doŋ ibedo wunu jo ame bino camo cetewu kede mato lacwu?” Rabcake te putte malo, te redo ni, “Koŋ iwiny wunu kop abaka adwoŋ me Acuria! En okwenyoro wu ni myero kur imi Kejekia bwolwu, pien en gire mom bino larowu. Kur imi wunu Kejekia wir tamwu me jeŋere i kom Rwot kun kobbiwu ni, Rwot gire mom bino miyo boma man i ciŋ abaka me Acuria, Kur iwiny wunu kop a Kejekia. Abaka me Acuria okobo ni ŋat acel acel myero katto oko i boma me bin yik kop me kuc kede. En ebino miyo dano acel acel camo nyig olokkere en i kome, kede nyig oduro mere, kun daŋ mato pii mere ame en i kome ojolo; ituno ka abino terowu i lobo ocele ame rom aroma i lobowu, lobo ame ceko cem, koŋo olok dwoŋ iye, lobo ame ogati kede olok tye iye. Gwokkere wunu, kur iye wunu Kejekia bwolwu ni Rwot bino larowu, Yam koŋ tye Obaŋa arokkoro ame olaro lobo mere i ciŋ abaka me Acuria? Kara gin obaŋe-nogo aman otye kwene? Obaŋa boma Kamat kede Arapad kede obaŋa me Ceparraim? Gin rik olaro Camaria i ciŋa? I kom obaŋe magi luŋ, mene ame yam olaro lobogi i ciŋa? Kara ŋo ame omio yin itye ka tamo wunu ni Rwot twero laro Jerucalem?” Jo te liŋ aliŋa, kite ame onwoŋo abaka ocikogi kede ni myero kur ogam kopporo, Icennere Eliakim wot a Kilkia, ame onwoŋo obedo adwoŋ ame loo ot abaka, kede Cebna, ame obedo aran, kede Joa wot a Acap, ame onwoŋo obedo aco kop luŋ i kom gin otimere, ote wot baŋ Kejekia kun oyeyeco boŋŋigi oko, ote titte kop ame Rabcake okobo. I kare ame abaka Kejekia owinyo, oyeyeco boŋŋi mere, te rukoboŋo cola, te wot i ot a Rwot. En te cwayo Eliakam, adwoŋ ame onwoŋo loo ot abaka, kede Cebna, aran karacel kede olamdog adwoŋŋere baŋ Icaya wot Amoj, kun gin luŋ orukoboŋo cola. Gin te wot kobbi Icaya ni, “Man en kop ame Kejekia okobo ni okobbi, ‘Tin en nino me can, me keto can i komwa dok me cwercuny okato kare. Aman wan orom aroma i dako ame nino me nywallere oromo, cite tekome colo atin mom tye. Gwok onyo Rwot Obaŋani owinyo kop a Rabcake, ame adwoŋŋere, abaka me Acuria ocwae kede me bino ŋalo Obaŋa akwo. Rwot Obaŋani myero ket can i kom jo man ame okobo kop ame en otyeko winyo. Pi mannono ba, yin myero ikwa Rwot pi jo ame odoŋ.’ ” Kare ame omiro abaka Kejekia otuno baŋ Icaya, en okobbigi ni, “Wot ikob wunu baŋ adwoŋwu ni, ‘Rwot okobo ni myero kur ibed kede lworo moro pi kop ame iwinyo, ame omiro abaka me Acuria oyeta kede. Nen ba, en abino miyo en winyo koppogo me anike, ame bino miyo en dok i lobo mere. An abino miyo oŋeke kede pala romo i lobo mere.’ ” Rabcake te dok oko cen, te wot nwoŋo abaka me Acuria tye ka lweny i kom Libna; pien en onwoŋo doŋ owinyo oko ni abaka otyeko ya oko i Lakic. Abaka rik te winyo kop i kom Tiraka, abaka me Eciopia, ni en onwoŋo tye ka bino me bino lweny kedgi. En rik te cwayo kwena baŋ Kejekia kun kobbe ni, “Wot ikobbi wunu Kejekia abaka me Juda ni, ‘Kur imi Obaŋani ame igeno bwoli ni mom ebino miyo Jerucalem i ciŋ abaka me Acuria. Nen ba, yin doŋ ityeko winyo gin ame abaka me Acuria otyeko timo i kom lobo luŋ. Iwinyo kite ame en orweogi odoco, kara yim doŋ ibino bwot i yore aŋo ba? Kwarina rik obin orweo boma me Gojan, Karan, Recep, te daŋ neko jo me Eden ame rik onwoŋo bedo i Telaccar, ento obaŋagi moro mom olarogi. Kara obakki me boma magi tye kwene? Abaka me Kamat, kede Arpad, kede me Ceparvaim, kede me Ena karacel kede me Ivva, gin luŋ aman tye kwene?’ ” Kejekia ogamo waraga i ciŋ okwena te kwano. En te wot kede i to a Rwot, te wot yaro waraga-nono i nyim Rwot. Kejekia te kwayo Rwot ni, “Ama Rwot Obaŋa me mony, Obaŋa me Icrael, ame ibedo i wi kommi me kwogo a tye malo i wi okerubi; yin keni gire en ibedo Obaŋa, ame iloo kit lobo apapat luŋ me wi podo. Yin en iketo polo kede lobo. Tim ber icik yiti iwinywa, ama Rwot, yab waŋi inenwa, dok daŋ iwiny kop luŋ ame Cennakarib ocwao me ŋalo Obaŋa akwo. Iyi ateni, ama Rwot, wan oŋeo ni abaka me Acuria ojwero lwak apol kun mio lobogi doŋ nono, dok daŋ owawaŋo obaŋegi oko i mac; pien gin mom onwoŋo obedo obaŋa ikome, ento cal apaa me yen kede gweŋe ame jo en otio. Aman doŋ ba, ama Rwot Obaŋawa, larwa i ciŋ jo Acuria, me rok luŋ i wi podo ŋe ni yin giri en ibedo Obaŋa keni.” Icaya wot Amoj te cwayo kop baŋ abaka Kejekia kun kobbe ni, Rwot Obaŋa me Icrael okobo ni, Pien ityeko cwayo kwacci baŋa pi Cennakerib abaka me Acuria, man en kop ame Rwot doŋ otyeko kobo i kome: Jo me Cion ocai calo nyako ame obwoni; Jo Jerucalem ocai, calo nyako oyeyeŋo wie i ŋei. “Yin kara iŋalo ŋa, ŋa ame iyeto? Iwoto dwoni ikom ŋa ba, kun iŋao waŋi malo? Mom i kom ŋat acil me Icrael! Imio omironi oŋalo Rwot, dok ikobo ni, yin iyito malo i wi kiddi kun iyito i gadigadi me lweny, ituno naka i wi Lebanon twal; kun iwakere daŋ ni itoŋo yen cedar aboco ikuno oko, kede yen cipre abeco mege oko; dok daŋ ni ituno iyi buŋ kanabor, kan ame yen ocule iye acula. Iwakere-gu ni ikunyo akoŋ, imato daŋ pii, dok tyeni omio pii kulli luŋ me Miciri odwono oko. “Mom onwoŋo iŋeo ni rik ayiko man con? Aman doŋ atye ka cobo acoba, gin ame rik ayiko pire con, ni ibino reto boma luŋ ame ocelo atek, me imi dok wi oburo. Man omio jo ame bedo kuno mom doŋ tye kede teko, cunygi doŋ bedo poto apota, lewic daŋ doŋ ocirogi oko. Orom aroma i lum ame tye i poto, ocalo lum alyabu, onyo orom aroma i doo ame tuu i wii ot, ame yamo alyet me oro onero. “Cite an aŋeo kop ducu i komi, aŋeo ginnoro luŋ ame yin itio, kede kabedo luŋ ame yin iwoto iye, karacel kede daa-ni i koma. Atyeko doŋ winyo kop i kom akemoni, awinyo daŋ kop i kom wakereni oko; pi mannono abino rwako golo i wumi, abino keto daŋ tol i dogi, abino dwoki cen i yori, kun ibeo kede Iyo ame rik ibino.” Icaya te kobbi abaka Kejekia ni, “Man en gin ame bino nyuto gin ame bino timmere. I mwaka ni kede i mwaka ame alubo man, ibino camo wunu cam ame otu kene, ento i mwakak me adekkere ibino coyo wunu koti, ite daŋ kayo wunu, ibino pito wunu olok, ite daŋ camo wunu nyige. Jo ame bino bwot, te doŋ i ot a Juda, bino bedo acalo yat ame oguro lwite piny, dok daŋ obino nyako nyiggi. Pien jo bino doŋ i Jerucalem kede i wii kidi me Cion. Man bino timmere pien Rwot me mony tye i mit adwoŋ meicel iye.” Man en kop ame Rwot okobo i kom abaka me Acuria: “En mom bino donyo i boma man kadi acel, mom daŋ bino bayo atero moro iye, mom tye acirikale moro ame omako kwot, ame bino tuno i ŋet boma, mom daŋ obino toro lobo moro me guro. En bino dok cen i ŋec, kun lubo yo ame rik ebino kede, en gire mom bino donyo i boma man, Man en kop a Rwot me mony ikokome. An abino lweny pi boma man ate gwokome kelo kwogo i koma, kede i kom amirona Daudi.” Amalaika a Rwot rik te wot i gony a jo Acuria, te wot neko ocirikale tutumia mia acel kede pyeraboro wie abic. Orwo mere odiko con, kom jo oto onwoŋo doŋ oradde atata. Cennakarib, abaka me Acuria te dok paco, wot bedo i Nineve. I nino moro ame en rik onwoŋo tye akswayo obaŋa i ot obaŋa mere i Nicrok awobe mere Adramelek kede Carecer te neke oko i pala me romo, gin te lwi gigi wot oko i lobo Ararat. Wode Ecar-kaddon te leyo kakare acalo abaka. I kare-nono two rik onwoŋo omako abaka Kejekia, ame onwoŋo en doŋ ceggi to. Adwarpiny Iacya wot Amoj rik te wot limme, te kobbe ni, “Rwot okobo ni yin doŋ myero icik jo ame bedo baŋi oko i kop me odi, pien mom ibino caŋ, ento ibino to oko.” Kejekia te loko nyime neno apama, te kwayo Obaŋa, kun kobo ni, “Tim ber, Ama Rwot, ipo kit ame abedo tic kede baŋi kun ageni, icunya ducu, dok atimo gin ame tye atira i nyimi.” En te mwoco koko oko, kun cunye cwer meicel. Rwot dok te medde kobbi Icaya ni, “Wot ikobi Kejekia ni, Rwot Obaŋa akwarowu Daudi okobo ni, etyeko doŋ winyo kwacci, dok daŋ eneno pig waŋi; nen ba, ebino miyo dok ibedo i lobo pi mwakki apar wie abic, Ebino larri karacel kede boma man i ciŋ abaka me Acuria, dok ebino medde gwokoboma man. “Man en anen ame bino nyuto ni Rwot bino cobo gin ame eciko: En bino coro tipo ceŋ dok cen tyen apar iya i kom gi-poro ceŋ Akac.” Tipo cen daŋ te dok oko cen tyen apar twal. I kare ame Kejekia otyeko ya i two mere, en ocoo wer man me pako Obaŋa: Rik atamo ni abino ya i kwo man kun pwod atetek, atamo ni rik acwalla oko i lobo a jo oto, ate wot bedo kuno doŋ atwal, kun mom dok aneno ŋea. Rik atamo ni mom dok abino neno Rwot, i lobo a jo ame kwo; dok mom daŋ abino neno ŋattoro, i akina jo luŋ ame bedo i wii lobo. Kwona onwoŋo doŋ oputo, otero oko kannabor, calo kema akwat ame oputo oko, odolo acaloboŋo ame pwod acweyo acwea, ame oŋolo oko i kom yat cweyo boŋo; Rwot onwoŋo doŋ amiyo kwena gik oko, cakere odiko tuno iwor. Akok dyewor benebene kun atye i twon rem adwoŋ meicel, onwoŋo atamo ni eŋatu gire tye atuturo cogona oko; Rwot onwoŋo doŋ amiyo kwona agik oko, cakere odiko tuno naka iwor. Dwona onwoŋo doŋ winnyere calo me aculegwec onyo me owalo, onwoŋo doŋ akok calo amam. Waŋa onwoŋo doŋ okaŋ oko me neno malo, Rwot lara ba, atye doŋ arac meicel. Kara ŋo ame dok atwero kobo ba? Pien okobo keda, dok en ikome omio man otimmere. Nino mom omako waŋa kadi acel dyewor, pi cwer cuny ame onwoŋo atye kede. Rwot, an gira abino bedo kwo piri yin keken; kwona Ocuŋ i komi; caŋa me abed kwo, Nen, cwer cuny adwoŋ ame onwoŋo atye kede, oya iye kuc; yin ilaro kwona i dog bur me to, pien ibolo balla luŋ iyo ŋei. Pien mom dok tye ŋattoro ame tye i lobo a jo oto, ame twero paki kede pwoyi; jo ame donyo piny i lyel mom dok obedo i gennoro me lubo atenini. Ŋat akwo en ame twero pwoyi, kite ame an tin apwoi kedeni; apap titi itino mere, kite ame yin igene kede, Rwot yin giri ityeko lara oko! Wan obino goyo naŋa kun opaki kede, obino wero wer me paki i ot me wori, i kare me kwowa luŋ. Icaya onwoŋo okobbi abaka ni myero luŋ oduro te mwono i waŋ odeke mere, me caŋ oko. Abaka Kejekia te penye ni, “Kara gin aŋo ame bino nyusto ni an abino wot i ot a Rwot?” I kare-nono abaka me Babulon, Merudak-baladan, wot a Baladaŋ owinyo ni abaka Kejekia rik kome lit; en te cwayo kwena me tero waraga baŋe karacel kede mot, pien onwoŋo owinyo ni doŋ otyeko caŋ oko i two mere. Kejekia rik te jolo kwena mere naca i yomcuny, te nyuttigi lonyo mere, kun daŋ miogi oneno ot me kano limmere, gin oneno jabu, ryal, gigi mogo a ŋwecgi kur, moo me wel, ot me kano jami lwennyere luŋ, kede ginnoro luŋ ame onwoŋo tye i ot kano jami mere. Mom tye ginnoro ame en mom onyuto baŋgi ame onwoŋo tye i ode kede i lobo ame onwoŋo tye i te loccre. Cite odwarpiny Icaya rik te bino baŋ abaka Kejekia, te penye ni, “Jo-ni kara oya ikwene? Dok kop aŋo ame gin okobo?” Kejekia te gamo ni, “Gin oya i lobo abor meicel, oya i Babulon twal.” Icaya dok te penye ni, “Gin aŋo ame gin oneno i odi?” Kejekia te gamo ni, “Gin oneno jami ducu ame tye i oda; mom tye ginnoro ame tye i udi me kano lim ame mom anyuttigi.” Icaya te kobbi abaka ni, “Koŋ doŋ iwiny kop a Rwot me mony okobo. Nen ba, kare tye abino, ame jami ducu atye i odi, jami luŋ ame kwarowu yam obedo kano tuno kede naka tin, obino terogi luŋ i Babulon. Mom tye ginnoro ame bino doŋ kadi acel. Dok ikwai mogo, obino royo oko, ote terogi wot tic i paco abaka me Babulon.” Abaka Kejekia te niaŋ ni kuc bino bedo tye i kare mere aboŋo alokaloka moro, omio en te kobbi Icaya ni, “Kop a Rwot ame ikobo-nono gire ber.” Kwe wunu cuny jona, kwe wunu cunygi! Man kop ame Obaŋawu okobo. Cukoro wunu cuny jo me Jerucalem, kobbigi wunu ni, “Karegi me bedo opii doŋ otum oko, otyeko doŋ timogi kica i kom balgi luŋ. Can ame Rwot oketo i komgi doŋ bup, romo doŋ bal ame gin otimo tyen aryo twal. Dwonnoro awinyere ame aredo ni, ‘Ger wunu yo pi Rwot, yik wunu gudo i tim pi Obaŋawa, yik wunu cuŋ atira i tim otal. Luŋ ducu obino toro oko, kidi kede tur obino dwoko oko piny, kan ame ogonne obino miyo cuŋ atira, yo ame obedo popony obino piro oko. Kwogo a Rwot bino nen kannaler, jo luŋ bino neno karacel, pien Rwot ikome doŋ otyeko kobo.’ ” Dwonnoro tye akobo ni, “Redi!” An ate gamo ni, “Kara ared niŋo ba?” Ginnoro luŋ a tye kede kom calo lum, kwogo mere luŋ rom i tur lum me tim. Lum ner, ture te ony oko; ka weo a Rwot okuto iye, ateni, dano gire calo lum. Lum ner, ture te ony oko; cite kop a Rwot okobo bedo nakanaka. Yin Cion ame ikelo amut aber, yit ba i wi kidi malo, Yin Jerucalem ame irabo amut aber, med ba dwoni malo, med dwoni malo, kur ilwor. Kobbi jo ame bedo i boma me Juda ni, “Nen wunu ba Obaŋawu!” Nen wunu Rwot Obaŋawu tye abino kede teko, bade en ame loo loc pire; nen, mottere daŋ tye gire baŋe, jo ame olwenyo pirgi tye i nyime. En bino kwayo rommi mere calo akwat, bino coko itino rommi mere i bade, en bino tiŋogi i kore, te peyo rommi ame dot momot. Ŋa ame yam koŋ opimo pii cuny ciŋe, dok ame opimo polo kede ciŋe? Ŋa ocoko kwoyo me lobo iyi gi-pimo jami, onyo ame yam opimo kiddi mijan, kede kan obedo tutur i ratili? Ŋa ame yam koŋ obedo telo cuny a Rwot, onyo ame yam koŋ obedo miye tam acalo apwonnyere? Ŋa ame Rwot yam koŋ openyo tam i baŋe, onyo ame opwonye i ŋolo kop atira? Ŋa ame yam koŋ opwonye me medo ŋeccere, onyo ame onyutte yore me bedo i niaŋ atut? Nen ba, rok luŋ rom i pii oton icel iyi gulu, dok okwanogi acalo apua ame tye i mijan; nen, en tiŋo cula daŋ calo ginnoro atitidi. Yen luŋ ame tye i buŋ me Lebaŋon, mom romo waŋo mot awaŋa; leyi iye daŋ nok, mom romo yalo Obaŋa. Rok luŋ mom ginnoro gire i nyime, gin luŋ mom obedo ginnoro kadi acel i tuŋ baŋe, Kara doŋ atwero poro Obaŋa kede ŋo ba, onyo atwero poro callere kede ŋo? Cal jok ame otwako atwaka, atet romo twako, ati jabu te mwono kome oko kede jabu, romo tiyo daŋ nyorrere kede ryal. Ŋat ame can orido yero yat atek a mom top, yenyo apac ame adiro, me paye cal apaa, ame mom dok romo kwanyere i kan oketo iye. Mom iŋeo wunu bo? Yam mom ru iwinyo wunu? Yam mom okobbiwu pire con bo? Mom ru iniaŋ wunu cakere i ageyi keto lobo? Ŋat ame bedo i wi kommere malo en ame oketo, en bedo malo meicel i ŋe pol, jo ame bedo piny i lobo nen atitino calo kalalaŋ. En ryeo polo caloboŋo icika, dok yaro daŋ calo kema me bedo iye, En mio oloc doko jo a konygi pe, rwode luŋ me lobo en dwoko piny iraba. Gin kom calo ginapita ame pwod opito apita, ame pwod ocoo acoa kun pwod oryeo lwitgi aryea i lobo, ame ka Rwot ocwao yamo i komgi, oner oko; ka ce yamo ajuru ocorogi, kologi calo cuŋ kal. Kara doŋ ibino pora wunu kede ŋo ba, ame an atwero bedo rom kede? Man peny ame Ŋat Acil openyo. Tiŋ waŋwu malo me inen wunu; ŋa kara oketo jami magi? Ŋat ame kelogi oko calo mony, dok ŋeo welgi luŋ, dok daŋ lwoŋogi kede nyiŋgi, tekomere dwoŋ meicel; mannono omio mom tye moro i akinagi ame rwenyo. Piŋo kara itye ka koko, yin Yakobo? Piŋo kara itye ka kobo ni Rwot mom neni, yin Icrael, kun ikobo ni Obaŋa mom tye ka paro piri? Mom iŋeo wunu? Yam mom ru iwinyo wunu? Rwot en Obaŋa ame bedo nakanaka, en gire oketo wi podo luŋ, En mom ol, mom daŋ doko agoro, Ŋeccere tut a mom twerre ame tato tere mom yot. En mio teko baŋ jo agoro, dok daŋ medo teko baŋ ŋat ame tekomere odok piny, Anaka awobe daŋ doko goro, otwero daŋ ol ame oromo rette piny; ento jo ame kuro Rwot, tekogi bino dwogo cen i komgi. Gin bino twarre malo i bwomgi calo cur, obino riŋo kun mom ool, obino wot nakanaka kun mom odoko jo agoro. Liŋ wunu mot, iwiny wunu koppa, wun lobo ame tye i dog nam; wun rok ocele luŋ myero icak wunu cukoro wunu cunywu, myero icak bino wunu me okob wunu kop; wan luŋ onok wunugi aceggi me oŋol kop i akinawa. Ŋa ame otugo ŋat ame oya i tuŋ kide, ame loo lweny i kabedo ame en woto iye ducu? Ŋa ame jalo rok apol i ciŋe, eka en te nyono obakki adoŋodoŋo i te tyene piny? Jami lwennyere miogi odoko calo apua, atero mere kologi calo cuŋ kal. Ryemogi, te kato i nyimgi kede kuc, kun dwir atek, ame lokki tyene mom gudo piny. Ŋa ame rik omio man otimere? Ŋa ame omio jo me kare luŋ otye kite ame aman tye kede-ni cakere i ageyi? An Rwot, rik onwoŋo atye con i ageyi, an Rwot Obaŋa, abino daŋ bedo tye i agikki piny. Lobo a tye i dog nam otyeko neno gin ame atio, lworo omakogi, komgi te myel amyela; gin luŋ doŋ obino oko ceggi Ŋat acel acel bino konyo awotere, kun kobbi ominnere ni, “Di cunyi.” Apac cukoro cuny atet jabu, ŋat ame yiko kom cal anyul cukoro cuny ŋat ame goo agoa i kidi tet, kun kobo ni, “Gin ame omwononono ber”; gin te goyo callono ocumal me kur dok gwette. Ento yin amirona, Icrael, in Yakobo ame doŋ atyeko yero ikwae Iburaim ame amaro; yin en ame rik akwanyi i agikki lobo, alwoŋi kom i gul kannabor meicel, kun akobbi ni, “Yin ibedo amirona, an doŋ ayeri, dok mom daŋ aboli teŋe.” Kur ilwor, an atye kedi, cunyi kur poti, pien an abedo Obaŋani; abino miyi teko, abino konyi, abino makki kede ciŋa tuŋcem ame mia aloo okworra. Nen wunu ba, jo ame akemo omako i komwu, obino miyo lewic makogi; alee te twodogi; jo ame pyem kedwu, wun jona, obino doko calo gin a konnyere mom, ote to oko, Ibino yenyo wunu jo ame lwenyo kedwu; cite mom ibino nwoŋo wunu, jo ame bino cobo mony i komwu: bino doko calo gin a konnyere mom, Pien an a Rwot Obaŋawu, amako ciŋwu me tuŋcem; an en ame atye akobbiwu ni, “Kur ilwor wunu, an abino konyowu.” Kur ilwor Yakobo, kadi bed yin icalo kudi, kur ilwor wun jo Icrael, kadi bed igoro wunu meicel! An abino konyowu, Rwot okobo; ŋat ame bino lakorowu obedo Ŋat Acil me Icrael. Nen ba, abino miyo idoko wunu acalo apwod me dino kal, apek, anyen ame dino kal aber meicel; ibino dino wunu kiddi ite ŋiŋinyo wunu oko, ibino miyo lobo obedo kidikidi doko calo cuŋ kal, Ibino pyeto wunu, yamo te kolo oko, yamo kot ajuru te keketogi atata, Yin ibino bedo kede lelo i Rwot; ibino wakere wunu meicel pi Ŋat Acil me Icrael. Ka ce ocan kede jo amito kony bino yenyo pi me amata, kun mom nen kadi acel, ame dwongi doŋ otwo imek, an Rwot abino winyo kwacgi, an Obaŋa me Icrael, mom abino wekogi ata. Abino miyo pii molo i wi kiddi kan a yam pii pe iye, pii bino kukunya i dye luŋ piny; abino miyo pii poŋ i dye tim a yam otal ikaŋ, akon bino bedo tut i lobo otwo. Abino miyo yen cedar doŋo i dye tim, kede okuto itiri, kede yen atino a ŋwecgi kur, kede jeituni; abino miyo yen buŋere i dye tim a yam yen pe iye, yen cipre karacel kede yen ocele apapat. Jo bino neno man ote ŋeyo, Rwot Obaŋa Acil me Icrael en ame omio mannono otimere, ni en Rwot en atimo man, gin luŋ obino tamo mot ote niaŋ ni, Rwot en atimo man. Rwot Obaŋa ame obedo abaka me Icrael okobo ni, “Wun obaŋe a rok ocele, kel wunu kop ame itye wunu kede, kel wunu pido mogo atek baŋa. Bye inyuttiwa wunu gin ame bino timere anyim. Titti wunu lwak gin ame yam doŋ otimere oko, me koŋ tam; tittiwa wunu gin ame bino ya i kom gin ame otimere-nono, me wan daŋ oniaŋ iye ka ottimere. Tittiwa wunu gin ame bino timere anyim, me wan oye ni wun kara ibedo wunu obaŋa. Koŋ itim wunu ginnoro aber onyo ginnoro arac, ame poto cunywa dok moi lworo makowa, Wun kom mom i ginnoro wunu kadi acel, gin ame itimo wunu daŋ konnyere pe; jo ame worowu doko gin me kwer baŋa. An doŋ ayero dano moro ame tye tun anyarodi; atuge me bino cobo mony i komwu i tun kide, en bino nyono loc luŋ ite tyene piny calo coto, calo acwe gulu ame nyono lobo mere; en bino lwoŋo nyiŋa. Ŋa ame yam koŋ ottitiwa kop man con, me oŋe, onyo ame otito con ni man bino timere, me wan oye ni okobo kop ateni? Mom gire tye ŋattoro ame okobo, mom tye ŋattoro ame onyuto ginnoro iye, mom daŋ tye ŋattoro ame owinyo ka ikobo wunu. An Rwot gire, en ame ageo titti jo Cion kop man, acwao daŋ akwena i Jerucalem me wot kobbigi amut aber. Ento ka aŋio gin obaŋe-mogo, mom anwoŋo moro ame twero miyo tam ame twero gamo kop ame apenyo, Gin luŋ konygi pe; mom tye ginnoro ame gin twero tiyo kadi acel, calgi calo yamo nono.” Rwot okobo ni, “Nen amirona ame an akonyo, ame ayero ame cunya yom i kome, Abino miyo cuny Acil bedo i kome, en bino kelo kit kwo atye atir baŋ jo luŋ. En mom bino da, mom bino redo areda, mom obino winyo dwone i waŋa yo; en mom bino turo ogada okak, dok mom bino neko uci tara ame pwod aduny, en bino kelo kit kwo atye atir aber odoco. En bino bedo kede gen nakanaka kun cunya mom poto tuno ka omio tim atira oromo wi podo luŋ, lobo a tye i dog nam tye akuro pwonnyere.” Rwot Obaŋa ame oketo polo, te ryeyo cuŋ atira, ame oyaro wi podo kede jami ame tye iye ducu, ame mio weo baŋ jo luŋ a bedo iye, kede kwo baŋ jo luŋ a woto iye, en okobo ni, “An a Rwot, atyeko doŋ lwoŋi me moko kite atira, amako ciŋi dok daŋ abino gwoki, atyeko doŋ miyi gi-cikere baŋ orok, me bedo cen baŋgi. Yin ibino yabo waŋgi, me imigi oya oko i ot kol ame otweogi iye, dok oya daŋ oko i colpiny ame obedo iye. An nyiŋa Rwot, mom amio kwogona baŋ ŋattoro ocele, akadi pak mera baŋ cal ame opao apaa. Nen gin me agege a rik atito doŋ otimere oko; aman dok akobbiwu gin ame nyen, kun gin mom ru ocako timere.” Wer wunu wer anyen me pako Rwot, pake wunu wun lobo ducu! Nam daŋ myero ŋur i mor kede jami luŋ ame tye iye, lobo a tye i dog nam daŋ kede jo luŋ a bedo iye. Tim kede boma luŋ iye myero pak daŋ Rwot, jo luŋ me Kedar myero pake! Jo luŋ ame bedo i boma me Cela, myero wer i yomcuny i wi kiddi malo, kun owo i yomcuny. Jo luŋ ame bedo i dog nam kannabor myero daŋ opak Rwot, kun omie kwogo, Rwot woto i lweny calo dano atek meicel, akemo mere tugere calo dano me mony, en redo dok daŋ wo i dwon aloŋo meicel, en nyuto tekomere i kom okworrere. Obaŋa okobo ni, “Aliŋ doŋ pi kare alac meicel, abedo diyo cunya kun mom agamo dog jona, ento aman kare doŋ oromo me cako yelle pirgi, myero doŋ acak omo cunya i weo calo dako ame acolle. Abino balo lobo luŋ obedo kidikidi, kede kiddi luŋ, abino daŋ miyo ginnoro luŋ ame otu iye two oko; abino miyo kulo luŋ ame pii tye iye two ikaŋ, abino miyo pii dwono oko kabedo luŋ a pii ojolle iye. Abino telo jo ame waŋgi oto, i yo ame gin mom oŋeo, ame yam gin mom ru obeo iye, an abino peyogi iye. Abino miyo colpiny ame owumogi doko lero, lobo obedo popony abino miyo doko apwot, Magi en gin ame an abino timo, mom gire abino wekogi ata. Jo luŋ ame geno cal ame opao apaa, jo ame kobbi cal jogi ni, ‘Wun ibedo wunu Obaŋawa, obino dwokogi cen i twon lewic adwoŋ meicel.’ ” Rwot dok te kobo ni, “Winy wunu wun odingyit, yab waŋwu ba, wun otowaŋ, me inen wunu. Tye ŋattoro ame waŋe oto calo waŋ amirona, onyo ame yite odiŋ kato me a dano ame aoro? Ŋa ame waŋe oto calo danona ame ojalle pira, onyo ame waŋe oto calo amirona an Rwot? Icrael neno jami apol meicel, cite mom gire keto cunye me neno aber, yite gire twolo, ame rome winyo kop, cite mom winyo ginnoro.” Rwot gire rik omito ni jo dwor cikkere, oket iye kwogo, pien en kite atira, Cite man obedo rok ame doŋ otyeko yako, omao limgi oko gin luŋ doŋ otyeko ciko oko i bur, doŋ okanogi oko i ot kol; odoko doŋ gi-ayaka a jo aboŋo ŋattoro ame larogi, gin doŋ gi-ayaka aboŋo ŋattoro ame kobo ni, Dwok kakare! Ŋa i akinawu ame bino doŋ ciko yite winyo man, ame cakere aman wot anyim bino doŋ keto cunye me winyo aber? Ŋa omio Yakobo i ciŋ ŋat oyake, kede Icrael i ciŋ oyak? Mom mannono obedo Rwot ame wan obalo i nyime-ni? Mom en Rwot ame gin okwero lubo yo ame en mito-ni; Dok daŋ okwero winyo cikkere oko-ni? Mannono omio en ocoro lyeto me akemo mere i komwa, kede tekome mony; maccere olyel oromo yi Icrael luŋ, cite wan naka mom omedo niaŋ gin ame atimere, maccere owaŋowa cite wan giwa mom oparo kadi acel. Aman doŋ Rwot ame oketi yin Yakobo, ame ocwei yin Icrael, okobo ni, “Kur ilwor, pien atyeko lakoro yin. An alwoŋi kede nyiŋi, yin ibedo mega. Ka ibino beo i dye nam atut, an abino bedo kedi; pii me kulo mom bino mwonyi gire; kadi ibino beo i cuny mac, mom gire ibino waŋ, leb mac mom bino gudi. Pien an a Rwot Obaŋani, an a Ŋat Acil me Icrael, ame lari. Abino miyo Miciri calo lim me lakoro yin, Eciopia kede Ceba bino bedo calo gin me wili. Pien yin ibedo twon ginnoro me wel meicel baŋa, piri litta meicel, aketo kwogo i komi, dok amari, en omio amio jo me lakoro yin, kede rok apapat pi laro kwoni. Kur ilwor, an atye kedi, abino kwanyo ikwai oko i tuŋ kide, abino dwoggo joni oko i tuŋ to. Abino kobbi jo i tuŋ anyarodi ni, ‘Weke wunu doŋ’, kede jo me tutuŋ anyarolum ni, ‘Kur doŋ imedde wunu make’; wek awo bena kede anyirana dwog doŋ oko i kannabor, wekgi odwog doŋ oko i wi podo luŋ. Gin obedo jona, aketogi me kela kwogo i koma.” Obaŋa okobo ni, “Kel jona i ka ŋolo kop, Waŋgi tye, cite mom oneno; yitgi tye, ento mom owinyo kop. Kel rok luŋ karacel i ka ŋolo kop, mi jo luŋ cokere kuno, Ŋa i akinagi ame twero kobo man, ame twero nyuttiwa gin ame yam doŋ otimere oko con? Gin myero kel ocadengi me kwanyo kop i komgi, me ka gin owinyo kopgi, gin mok ni tye kakare. “Wun jo Icrael, ibedo wunu cadenna; wun ibedo wunu omirona ame ayero, me iŋea wunu dok daŋ iye wunu an, iniaŋ wunu ni an abedo Obaŋa an kena, Mom dok tye obaŋa moro ocele kono an keken, cakere con moro mom obedo tye, dok mom daŋ bino bedo tye. “An kena en abedo Rwot, mom dok tye moro ocele ame twero larowu, An rik atito pire, alarowu, dok daŋ arabo pire, i kare ame obaŋa moro a welo mom tye i akinawu; wun ibedo wunu cadenna. An Obaŋa, daŋ abino medde bedo Obaŋa nakanaka; mom dok tye ŋattoro ocele ame twero laro gin i ciŋa, mom tye ŋattoro ame twero geŋa tiyo ticca.” Rwot Obaŋa me Icrael ame larowu okobo ni, “Me larowu, an abino cwayo mony i kom jo Babulon; gin bino turo lodi me dogcel oko luŋ, woo a jo Kaldaya bino lokere doko kumo, An abedo Rwot Obaŋawu ame cil, an en acweowu, wun jo Icrael, dok an abakawu.” Rwot en ame rik oyabo yo i dye nam, en omio yo obedo tye i dye twoni pii ager meicel. En opeo twon mony atek meicel naka i to, lwak gadigadi lweny kede aguragura, Gin luŋ obuto piny ame mom dok oromo ya malo, onekogi, oto calo uci tara. En Rwot okobo ni, “Myero wiwu doŋ wil oko i kom gin otimere con, kur ibed paro wunu gin ame yam doŋ otimere oko, Wun myero doŋ icik waŋwu i kom gin anyen ame atimo, aman doŋ tye atimere. Pe ineno wunu ce? Abino tuco yo beo i dye tim, pii bino cako nen i tim kuno. Anaka leyi me tim daŋ bino wora, ekwe kede udu bino paka; pien amio pii onen i dye tim ata, kede kulli i lobo otwo ikaŋ, me ami pii baŋ jona ame ayero. Gin obedo rok ame an acweogi pira, me gin ower wer me paka.” Rwot okobo ni, “Aco yin gire rik mom iwora, yin Yakobo, yin rik onwoŋo doŋ iol keda oko, yin Icrael. Rik mom doŋ iyala kadi acel kede rommini; rik mom iwora kede motti ame oŋolo. An daŋ rik mom abedo yeli pi mot me yala, mom daŋ abedo olokomi pi odok a ŋwece kur. Mom rik iwilo odok a ŋwece kur pira, mom daŋ imia wunu ayeŋ i dwol me motwu ame oŋolo. Akaka mannono, ibedo miya wunu yeyo peko me balwu kun lolo wunu koma i balwu areco. Aco ka bedo amannono, an en ame ajwao balwu, atimo amannono pi kite ame atye kede, an mom dok abino po pi balwu. Poyo wia me olar kop karacel kedwu, kel kop ame nyuto ni yin itye atira, Kwarowu me agege rik daŋ obalo, olocwu daŋ obalo bal i koma. Mannono omio ababalo otel me kabedo acil oko, ajalo Yakobo me aneka, Icrael te doko gi-ayeta a jo.” Rwot okobo ni, “Winy ba, yin amirona Icrael, wun jona ame ayero, ikwae a Yakobo. An a Rwot ame aketi, ame acwei i yi totti, an abedo konyi kare ame kwo cakere i komi. Kur ibed kede lworo, pien yin Yakobo ibedo amirona, yin Jecurun ame ayero. Pien abino onyo pii i lobo ame otwo, ame pii pe iye, abino miyo pii cako mol i lobo otwo; abino onyo Cuny Acil i kom ikwai, dok abino miyo gum baŋ ikwai. Gin bino bedo aber calo lum ame pii oromo, calo yen ame tye i ŋet kulo ame mol. Jo mogo bino kobo ni, gin obedo jo a Rwot. Gin bino cako bino baŋ jo a Yakobo me notte kedgi. Jo ocele bino coyo nyiŋ Rwot i ŋut ciŋgi, obino lwoŋere kengi ni gin obedo jo ame tye i akina Icrael.” Rwot ame obedo abaka me Icrael, Rwot me mony ame laro jo me Icrael okobo ni, “An abedo me agege kede me agikki mere, mom dok tye obaŋa moro ocele kono an kena, Tye ŋattoro ocele ame cal keda, ame twero tito yore i yore gin ame bino timere anyim. Koŋ en doŋ tittiwa odoco, cakere i ageyi nak i agikki mere? Kur ilwor wunu, komwu myero kur myel! An rik atittiwu oko con, kun anyuto jami ducu ame bino timere. Wun ibedo wunu cadenna, Tye dok Obaŋa moro ocele? Tye dok Obaŋa moro ame tek meicel ame an yam mom ru awinyo pire?” Jo luŋ ame tio cal jogi obedo jo ame konygi pe, dok cal jogi ame pirgi tekkigi-nono mom konyo ginnoro kadi acel. Jo ame woro cal jogi-nono obedo otowaŋ ame mom niaŋ; obino miyo lewic mako kodi jo-nono. Ŋa ame tio cal jok, onyo ame twako cal me awora ame mom romo konyo ginnoro? Nen ba, obino miyo lewic mako jo luŋ ame WORO kodi callono. Jo ame tio gin callono obedo dano a dana. Gin luŋ myero ocokere, obin ocuŋ i ka ŋolo kop, lworo bino makogi, alee bino twodogi, gin luŋ. Atet nyonyo tio ticcere kede mac. Teko ame tye i bade en ame tiŋo kede anyul me luŋo nyonyo, Kec neko, oryo pii ciro, eka tekomere te dok oko piny. Aco apac geo pimo bao, kun ŋolo alam; cwero kede randa, te bedo pimo i gi-ticcere. En tio gire-nono acal kede dano ame daŋ ber meicel calo dano, me aketa i ot me woro. En twero yero yat Cedar, onyo yero yattoro ame tye i buŋ i tim, te toŋo. Kare ocele pito yat cedar mere, te bedo kuro kot me doŋo. Yattono icennere konyo dano acalo yen me awaŋa i mac, kun dul ocele bedo me tiyo cal jok. Dullere tuŋcel bedo me kuto mac me aoa, kede me tedo; dul ocele en doŋ te te tiyo kede cal jok me awora mere. Dullere en kuto i mac, bulo kede riŋo me acama mere, ame te medde teko. Ka en tye aobo kome i maccono kobo ni, “Maccere malo meicel! Aobo koma rac wok!” Eka tuŋcel en tio kede cal jokkere me awora mere; en woro callere-nono, kun kwao ni, “Yin ibedo obaŋana, lara!” Kodi jo-nono miŋ meicel ame mom romo ŋeyo gin ame otimo. Waŋgi owumere oko ame mom oromo neno; tamgi daŋ oballe oko ame mom oromo niaŋ i gin a tye ateni. Mom tye ŋattoro i akina oti cal jogi ame tamo, onyo ame tye kede ŋec, ame twero niaŋ te kobo ni, “Yat ame atio i cal jok-ki mogo awaŋo oko i mac, en ocele amyeno i kwon, abulo i riŋo ate camo oko; tuŋ ocele en ame ate tiyo kede cal jok me awora. An en doŋ atye ka woro dul yat.” En moko buru; tammere me miŋo omio en orwenyo odoco ame mom doŋ romo larre kene, mom daŋ romo niaŋ ni cal apaa ame emako i ciŋe mom gire obedo obaŋa kadi acel. Rwot okobo ni, “Yin Yakobo koŋ ipoyo ba kop magi, myero ipo ni yin ibedo amirona. An rik aketi me bedo amirona, wia gire mom bino wil i komi, yin Icrael. Aweo doŋ balli oko calo pol, kede tim luŋ areco ame ibedo timo aketo daŋ oko calo ekuna. Dwog doŋ cen baŋa, pien atyeko doŋ lakoro yin oko.” Red doŋ i wer me yomcuny, yin polo; pien Rwot doŋ otimo! Red wunu ba, wun kabedo ame tye piny! Red wunu ba, wun kiddi luŋ, kede yen luŋ ame tye i buŋ, i tim. Pien Rwot doŋ otyeko lakoro Yakobo, kwogo mere doŋ onen oko kom Icrael. Rwot ame oketi, ocwei i totti, ame en Rwot ame lakoro yin okobo ni, “An abedo Rwot ame oketo jami ducu, aryeo polo an kena, kare ame atio lobo ŋattoro onwoŋo pe me konya. Amio anyut ogoba odoko gin a konnyere pe, otyet amio odoko jo amiŋ; acoro jo aryek, adwoko cen, amiogi oŋeo ni ryeko mom ginnoro. Amio kop ame omirona otito ocobere kakare, gin ame amio okwenana okobo, amio ocobere, Akobbi Jerucalem ni jo dok bino bedo iye kuno, kede boma me Juda ni dok obino gerogi, kan ame yam odoko wi obur bino dokoboma. Aciko pie i nam atut kede i kulli ni myero odwon oko, pii daŋ te dwono oko, Akobbi Kuro ni en bino loc kakara, ni en bino tiyo gin ame an amito ni tiye; en bino miyo ogero Jerucalem, dok bino miyo ocibo acakki te ot me wora.” Rwot okobo ni, “Kuro en a doŋ odoko abaka ame atyeko wiro kede moo, an doŋ atyeko kete me loyo rok apol, acwae me wot turo teko obakki, atye ka yabo nyime bedo aler a mom dok bino cegere.” Rwot te kobbi Kuro ni, “An ikoma abino telo nyimi, abino yiko yo piri bedo apwot, abino tuturo doggola me mola oko, ate tuturo daŋ nyonyo me dogcel oko. Abino miyi lim ame okano kan adiŋ, kagi-mogo ame mom jo ŋeo kadi acel, me iŋe ni an Rwot Obaŋa me Icrael, an en a doŋ atyeko yeri. Aketi me konyo amirona Yakobo, jo Icrael ame gin obedo jona, mannono en omio an ayeri, acakki nyiŋi anyen kadi bed yin mom iŋea. An en abedo Rwot, mom dok tye moro ocele, Obaŋa moro ocele gire mom dok tye, kono an kena, abino miyi teko kadi bed ym mom iŋea. Man atimo me jo luŋ ne ni an abedo Rwot kena, cakere i but lobo tuŋcel tuno tun ocele, mom dok tye obaŋa moro ocele kono an kena. An en aketo lero kede colpiny, amio kuc bedo tye dok can daŋ bedo tye; an a Rwot en atiyo jami magi luŋ. Abino onyo kite atira piny kun ya i polo, abino miyo cwe calo kot, lobo bino yabere me gamo larre, dok kite atira daŋ bino cakere i lobo, an a Rwot abino miyo man timere.” Dano ame pyem Obaŋa ame okete, bino neno can. Gulu twero pyem i ŋat ocwee? Lobo twero penyo acwe gulu gin ame en atiyo? Onyo gulu twero kobbi acwe gulu ni mom gire otic aber? Atin ame penyo pappere ni kara inywalo ŋo, atinnono bino neno can; onyo ame penyo tottere ni iremo rem me nywal i ŋo? Rwot ame obedo Ŋat Acil, ame oketo Icrael, okobo ni, “Wun mom iromo wunu penya kop i kom itinona, dok mom itye kede twerroro me kobba gin a myero ati, An en atio lobo, aketo dano me bedo iye; aryeo polo kite ame tye kede ni pi tekona, an en a daŋ aciko jami luŋ me polo ni bed kite ame tye kede-ni. An en aketo Kuro me moko kite atira, abino miyo en cobo ticcere luŋ kakare; en bino gero bomana, dok bino gonyo jona oko i opii, mom pi cul kadi pi mottoro ame abino miye.” Man kop a Rwot me mony okobo. Rwot okobbi Icrael ni, “Lonyo luŋ me Miciri kede jami acata me Eciopia, gin luŋ bino dokomegi, kede jo Ceba ame obedo twoni jo abocoboco, gin luŋ bino bino baŋi te doko omironi, gin bino lubo yori kun otweogi oko kede jegere, gin bino ryebere piny i nyimi me wori, Gin luŋ obino mwolle i nyim kun okobo ni, ‘Yin gire en itye kede Obaŋa, yin keni, obaŋa moro ocele gire doŋ mom, kono en kene.’ ” Ateni, yin gire ibedo Obaŋa ame pono oko, yin gire en ilaro jo, Ama Obaŋa me Icrael. Lewic bino mako jo luŋ ame tio cal jogi, alee bino twodogi gin luŋ. Cite jo Icrael Rwot gire bino laro oko, lar ame olarogi kede bino ri nakanaka; lewic gire mom bino makogi, alee mom bino twodogi kadi acel. Pien Rwot gire en oketo polo, en gire en obedo Obaŋa! En ocako tic me keto lobo, te tyeko, en omio omoko atek odoco, En rik mom oketo lobo te weko kun tye atata, en oketo me bedo kan ame otwero bedo iye, En Rwot en ame okobo ni, “An a Rwot, moro ocele gire doŋ mom. An gira rik mom akobo kop i muŋ, i lobo ame tye i piny acol, an gira rik mom akobbi ikwae a Yakobo ni, ‘Ibino yenya wunu i kan obedo atata, An abedo Rwot ame kobo kop ateni, anyuto gin ame tye kakare.’ ” Rwot okobo ni, “Cokere wunu karacel, me ibin wunu, biye wunu aceggi, wun jo me rok apapat ame ibwot wunu. Jo ame bedo tiŋo cal jogi ame opao apaa obedo jo a mom niaŋ kadi acel; obedo balo karegi i kwayo cal jok ame mom twero larogi kadi acel. Biye inyut wunu kopwu i ka pido; me jo ame apido penyere kengi. Ŋa ame rik omio kop man oŋeye geye i kare acon? Mom an a Rwot, en a rik atimo? mom dok tye obaŋa moro ocele, kono an kena, an en a bedo Obaŋa a kite atira, ame laro jo, mom dok tye moro ocele kadi acel. “Lokere ibin wunu baŋa, me alarwu, wun jo ame tye i wi podo luŋ! Pien an abedo Obaŋa, an kena. An gira doŋ atyeko kwoŋ oko, kop ame oya i doga tye atira, koppono mom bino poto piny ame mom ocobere, ni, ‘Jo luŋ bino rumo congi i nyima, leb jo luŋ bino kwoŋo kwoŋ me wora’. “Jo luŋ bino kobo ni, kite atira kede teko nwoŋsere ka baŋ Rwot; jo luŋ ame cunygi waŋ i kome, bino bino baŋe kun otye kede lewic. Ikwae Icrael luŋ, bino loyo kop ote bedo kede kwogo i Rwot.” “Cal jogi a jo Babulon doŋ ceggi gik oko! Bel kede Nebo a yam oworo, aman doŋ odoko gi-ayea a leyi, aman doŋ odoko twon yec apek meicel ame olokom Leyi. Gin luŋ doŋ okulo wigi piny, oguŋo karacel, cal jogi mom twero larre kengi; aco doŋ omakogi, aterogi iyi opii. “Winy wunu ba koppa, wun ikwae a Yakobo, wun jo luŋ ame idoŋ wunu i ot a jona Icrael. An abedo gwokowu cakere i yi totowu, atiŋowu cakere i kare me nywalowu; An abedo Obaŋawu ame bino gwokowu, abino gwokowu naka iti wunu, abino bedo tiŋowu naka i kare ame wiwu doŋ i lwar. An en aketowu, dok abino daŋ gwokowu, abino konyowu, abino larowu. “Kara ibino pora wunu kede ŋa ba? Tye ŋattoro ocele ame cal keda? Jo ame juko lim ajuka iyi icaogi, ame pimo ryal i mijan, oculo atet jabu me tiyigi cal jok, gin te ryebere i nyime woro. Otino ote ryoŋo i wi gwokgi, ocibo kakare, te cuŋ iye atwal, kun mom twero ya kene kabedo mere-nono, Ka jo ocwao kwacgi baŋe, en mom gamo, mom daŋ laro jo ame okwaenono i cangi. “Po wunu i kop man wun obalo, koŋ itam wunu, ilwod wunu koppere i cunywu, Poyo wunu gin ame rik otimere con, pien an abedo Obaŋa, an kena, mom dok tye moro ame cal keda. Cakere con i ageyi, anyuto kite ame bino timere kede oko, naka kite ame bino gik kede. Akobo ni gin ame ayiko luŋ bino cobere, abino timo ginnoro luŋ ame ayiko me tiyo. Abino lwoŋo dano calo acut i tuŋ kide; dano-nono bino ya i kannabor, me cobo gin ame doŋ atyeko yiko. An doŋ atyeko kobo, bino daŋ timere. “Winy wunu koppa ba, wun jo ame cunywu nwaŋ, wun jo ame tamo ni loyo kop bor meicel kedwu. Nino me loyo kop doŋ ceggi acega, mom doŋ bor kadi acel, mom doŋ abino gal me laro jo, abino laro Jerucalem, pi Icrael ame anwoŋo kwogona pire.” Rwot okobo ni, “Yitto piny, ibin ibed piny iyi apua, yin Babulon ame mom ru iŋeye ico moro; bed kom piny i lobo aboŋo kom me loc, yin lobo me Kaldaya. Pien mom dok obino kobo ni, iyom a mom iromo tiyo ginnoro. Kwany anya kidi me iregi i moko, gony itambara oko i wii, gony boŋo abor naka piny-nyu oko i komi me tyeni nen, be i kulo, idokoro tuŋ ca Komi me mon bino doŋ nono, komi a mom myero nen bino doŋ nen kannaler. An doŋ abino culo kwor, mom abino weko dano moro kadi acel. Ŋat ame larowa nyiŋ Rwot me mony, en obedo Ŋat Acil me Icrael. “Bed iliŋ mot, kun itye i piny acol, yin lobo me Kaldaya; pien mom dok obino lwoŋi ni, imat ame loo rok apol. Akemo rik omaka i kom jona, amiogi obedo calo gin me kwer; amiogi i te locci, kica mom te makki i komgi kadi acel; kolli te bedo opek meicel baŋ jo oteggo. Yin onwoŋo ikobo ni ibino loyo rok apol nakanaka, omio mom ite keto cunyi i kop magi, akadi po pi kite ame bino gik kede. “Pi mannono ba, winy kop man, yin ame imaro yomcuny wokki yin ame itamo ni itye giri i kuc. Yin i kobo i cunyi ni mom dok tye ŋattoro a rom kedi, yin itamo ni mom itwero doko dako to, itinoni daŋ gire mom bino to. Kit can aryo-nono luŋ bino poto i komi i nino acel, i dakika moro anonok; to itino kede doko dako to, gin luŋ bino rwomo rutte i wii karacel. Kadi bed iti i twoni timmogo me jojok, akadi ityet tyet arom mene. Yin onwoŋo itamo ni itye giri i kuc i kom timmi arac, kun itamo ni ŋattoro gire mom tye ame neni, Ryekoni kede ŋec ame itye kede orwenyi arwenya, ibedo kobo i cunyi ni mom tye ŋattoro a rom kedi, Cite gin arac bino poto i komi, ame tim-mi me jojok mom romo juko, Can bino poto i komi, ame mom romo kwanyere kadi acel; to bino poto i komi oyot, ame yin mom iŋeo. Cuŋ atek ityet, yin medde ameda i timo tim me jojok, ame ibedo timo cakere i tinoni; atot onyo twero konyi i yore moro, onyo ca twero miyo jo lwori. Tekoni otum oko kadi bed otye ka miyi tam meicel, koŋ gin doŋ obin olari, gin jo ame ŋeo poko polo, kede jo ame ŋio acer, jo ame i kare luŋ i por dwe anyen, otito gin ame bino timere i komi. Nen ba, gin gire orom aroma i cuŋ kal, mac gire waŋogi oko; gin mom twero laro kwogi kengi, i kom teko a leb mac. Man mom obedo mac me aoa, mom daŋ mac ame otwero bedo i ŋete, Jo ame ibedo yelle kedgi-nono tye kittono baŋi, ame ibedo balo kareni baŋgi cakere i tinoni. Gin luŋ obino weki ata, kun ŋat man mako yo mere ŋat ame bino lari mom tye.” Koŋ iwiny wunu man, wun ot a Yakobo, ame olwoŋowu i nyiŋ Icrael, ame ibedo wunu ikwae a Juda. Wun ikwoŋere wunu i nyiŋ Rwot, kun ituco wunu nyiŋ Obaŋa me Icrael, cite mom i ateni, onyo i yore aber. Aco kono olwoŋere gin kengi ni gin jo me boma acil, dok ojeŋere i kom Obaŋa me Icrael, ame nyiŋe Rwot me mony, “Rik atito gin ame bino timere oko con, koppere rik oya i doga, eka ate miyo ŋeye; amio daŋ oru tiye oko, te daŋ cobere. Pien onwoŋo aŋeo ni cunywu nwaŋ, kun ŋutwu nwaŋ calo nyonyo, eka tur nyimwu te bedo calo mola, en omio rik atittiwu koppere con, arabbiwu pire con kun mom ru otimere, me kur ikob wunu ni cal jogiwu en otimo, kun ikobo wunu ni cal apaawu kede cal atwakawu en okobo ni timere. “Doŋ ityeko wunu winyo; aman doŋ myero inen wunu man ducu; mom ibino wunu rabo pire? Cakere aman wot kede anyim abino miyo iwinyo wunu gigi mogo anyen, gin okane ame mom iŋeo kadi acel. Pwod amio timere aman, pe con; yam mom ru iwnyo wunu pirgi kadi acel, me kur ikob wunu ni yam gire iŋeogi con. Yam mom ru iwinyo wunu, dok daŋ mom ru iŋeo wunu, cakere con yitwu onwoŋo mom ru oyabere, Pien onwoŋo aŋeo ni ibino bedo wunu ogoba, dok daŋ cakere i yic, wun onwoŋo ibedo wunu jo a jem. “Abino miyo akemona koŋ gal pi nyiŋa, abino juko koŋ akemona pirwu mejo paka, me kur ajwerwu oko, Nen ba, doŋ aliyiwu oko, cite mom acalo ryal; atemowu i mac tet agwa meicel. Atimo pira kena, atimo pira kena, kara atwero weko obalo nyiŋa piŋo? Mom atwero jalo kwogona baŋ obaŋa moro ocele. “Ter yiti iwiny koppa, yin Yakobo, wun jo Icrael ame an alwoŋo. An a en, an me agege, kede me agikki mere. Ciŋa en ame oketo acakki te lobo, ciŋa tuŋcem en oryeo polo; ka alwoŋogi, gin luŋ oya karacel. “Wun luŋ cokere wunu, me iwiny wunu, Ŋa i akinagi ame orabo ni man bino timere? Ŋat ame amaro bino cobo yikka i kom Babulon, en bino lweny i kom jo Kaldaya. An gire, an i koma doŋ akobo, dok alwoŋe daŋ oko, an akele, nyime bino bedo aber. Noka wunu aceggi, me iwiny wunu: cakere i ageyi, an mom akobo kopporo i muŋ, cakere i kare ame ocako timere, an onwoŋo atye kuno.” Aman doŋ Rwot Obaŋa oora kede Cunnyere Acil. Rwot, ame en Ŋat Acil me Icrael, ame lakorowu i opii, okobo ni, “An a Rwot Obaŋawu, ame mito pwonyowu me wek ibed wunu aber, kun atelowu i yo ame myero iwot wunu iye. Kono onwoŋo iwinyo wunu cikka! Kucwu kono omol calo pii i kulo, kono i loo wunu kop calo nam ame pii mere mol aboŋo weo, aco ikwaewu kono calo kwoyo, jo ame oya i komwu kono dwoŋ calo apua; kono nyiŋgi mom orwenyo kadi acel, kono mom gire ojwaowu oko nyima.” Ya wunu oko i Babulon, iŋwec wunu jo Kaldaya, nyut wunu man i goyo ijira, rab wunu pire, cwal wunu koppere naka i agikki piny, kun ikobo wunu ni, “Rwot doŋ olakoro amiro mere Yakobo oko.” Kare ame en telogi i tim, oryo pii mom ocirogi; omio pii omollo pirgi kun yal lela, obaro lela pii te kirre oko. “Kuc gire mom pi obalo”, Rwot okobo. Winy wunu koppa, wun lobo ame tye i dog nam, cik wunu yitwu, wun rok ame oya i kannabor, Rwot olwoŋa ame pwod atye i yic, ocako nyiŋa kun pwod atye i kom totta. En omio kop oya i doga bit calo pala lweny, en kana i tipo me ciŋe; en omio adoko atero ame opako lake abit, en okana oko iyi icao me atero mere. En okobba ni, “Yin amirona, yin Icrael ame abino nwoŋo kwogo pire.” Cite an ate kobo ni, “Alole kom i tic nono, atyeko tekona kom nononono, aboŋo konnyoro”; kadi amannono, gin ame ber pira nwoŋere gire baŋ Rwot, Obaŋana gire bino cula pi gin ame atio, Ame pwod mom ru onywala, “Rwot onwoŋo doŋ oyera oko, en oketa me bedo amiro mere ame bino dwoggo jo mere baŋe, me coko Icrael dwoggo baŋe, pien Rwot oketo kwogo i koma, Obaŋana en obedo tekona.” En Rwot-tono okobo ni, “Bedo amirona obedo gin ayot meicel, me tiŋo atekere a Yakobo apapat malo, kede dwogo jo Icrael ame agwoagwoko; an doŋ aketi me bedo cen baŋ orok, me ami larre tun i agikki wi podo luŋ.” Rwot ame Ŋat Acil me Icrael, ame en a daŋ lakoro jo Icrael, en okobo kit man baŋ ŋat ame ocao atek, ŋat ame rok apapat okwero oko, ame tye acalo amiro oloc: “Obakki bino neni te ya malo, oloc bino neni te ryebere piny; man bino timere pi Rwot, ame en agen, Ŋat Acil me Icrael, ame oyeri.” Rwot okobo ni; “Rik agamo dogi i kare me timo jo ber, rik akonyi i nino me larre, atyeko gwoki, ate miyi bedo acalo gi-cikere baŋ rok luŋ, abino miyo doŋ ibedo i loboni, ibino poko lobo ame aman odoko wi obur. Abino kobo baŋ obuc ni, ‘Wot wunu doŋ oko,’ kede baŋ jo a tye kannacol ni, ‘Kato wunu kannaler.’ Gin bino calli i rommi ame cemo i ŋet yo ducu, ka cemgi bino bedo i wi tur luŋ ame yen pe iye, Kec gire mom bino nekogi, akadi oryo pii mom bino cirogi, yamo alyet kede cem mom bino wunogi, pien ŋat ame kica omako i komgi en ame bino telogi, bino telogi naka i ŋet pii ame kukunya i piny. Abino miyo yo beo i wi kiddina luŋ, obino tuco gudona woto malo. Nen ba, jona bino ya i kannabor, kun oya i tuŋ anyarodi kede tuŋ to, jo ocel bino ya i lobo me Cuene.” Wer wer me yomcuny ba, yin polo, lel ba, yin lobo; mwoc wunu wer oko wun kiddi! Pien Rwot doŋ bino kweyo cuny jo mere, kica bino make i kom jo mere ame oneno can meicel. Ento jo me Jerucalem okobo ni, “Rwot doŋ owekowa ata, wie gire doŋ owil oko i komwa.” Cite Rwot te gamo ni, “Dako wie twero wil i kom atinnere ame edoto, kica mom twero makke i kom wode ame enywalo? Kadi bed dano wie twero wil, cite an wia mom bino wil i komi. Nen ba, yin Cion atyeko goro nyiŋi i ciŋa, apama celli tye i nyima kare luŋ. Jo ame bino geri abino oyot meicel, jo ame omumuko yin bino ya oko i baŋi. Tiŋ waŋi, inen kabedo luŋ; gin luŋ ocokere karacel obino baŋi, Rwot okobo ni, ‘Kite acalo an atye kwo, yin ibino rukogi calo gin me kwogo, ibino tweyogi i komi kite ame atera timo.’ “Ateni, wi oburri doŋ odoŋ nono, loboni doŋ otyeko balle oko; cite aman doŋ bino bedo adiŋ meicel pi jo ame bino bedo kuno, jo ame yam omwonyi bino doŋ bedo kannabor. Itinoni ame onywalo i opii, pwod dok ibino winyo kobo ni, ‘Kabedona diŋ meicel; myero dok meddiwa kabedo.’ Ibino cako penyere keni i cunyi ni, ‘Ŋa kara onywallo jo man? Rik adoŋ nono aboŋo atinnoro, calo oraŋa, ote tera oko teŋe calo opii; kara ŋa a dokopito itino man? Koŋ inen, rik adoŋ an kena, kara itino man dok oya i kwene ba?’ ” Rwot Obaŋa okobbi jo mere ni, “Nen ba, abino ryeyo ciŋa baŋ orok, abino tiŋo benderana baŋ rok apol; gin bino kelo awobeni kun okwako i korgi, obino tiŋo anyirani i wi gwokgi. Obakki en a bino pito itinoni calo papagi, mongi en a bino bedo calo totogi. Gin bino ryebere piny i nyimi me wori, obino naŋo apua i tyeni, Mannono bino miyo iŋeo ni an a Rwot; lewic mom bino mako jo ame kura. Otwero mayo jami ayaka i ciŋ jo atek, onyo otwero mayo jo ame omako calo pii i ciŋ ŋat ager?” Cite Rwot okobo ni, “Opii i ciŋ lo atek obino mayo gire oko; jami ayaka i ciŋ lo ager daŋ obino gamo gire oko; pien an abino pyem i jo ame pyem kedwu, abino laro itinowu oko. Abino miyo jo ame wunowu camo riŋo komgi kengi, obino mer i remo komgi kengi calo koŋo olok. Mannono bino miyo jo luŋ ŋeo, ni an a Rwot ame Alarri. Ŋat Atek me a Yakobo ame lakoro yin.” Rwot okobo ni, “Waraga ame rik aryemo kede totowu tye kwene, ame rik amie i kare ame aryeme? Kara rik acatowu baŋ ŋa, i akina jo ame onwoŋo atye banyagi? Nen ba, rik acatowu pi balwu, pi bedo turo wunu cik, en omio oryemo totowu. Kara piŋo i kare ame rik abino, mom anwoŋo dano moro? Kare ame alwoŋo, piŋo ŋattoro mom ogamo doga? Ciŋa doŋ cecek bo, me lakorowu? Tekona mom tye bo, me larowu? Koŋ inen, nam odwono oko i kare ame ajuko, atwero loko kulli doko tim otwo, rece iye te doko acoo oko pi can pii, oto oko pi oryo pii. Aromo miyo polo doko acol icuc, ate miyo bedo calo dano a kwero cola.” Rwot Obaŋa doŋ opwonya i kop ame myero akob, me aŋe kobo kop me medo teko baŋ dano ame ool. En coa nino luŋ odiko, me awiny gin ame en opwonya kede. Rwot Obaŋa doŋ oyabo gire yita oko, mom ajem, mom daŋ alokke ŋea. Alokki jo ame goa ŋea, kede lema baŋ jo ame telo yer tika; mom ageno waŋa i lewic kede i lao ame oŋulo iye. Pien Rwot Obaŋa konya, omio alee gire mom otwoda; mannono omio akao laka kun waŋa tek calo lela, dok onwoŋo aŋeo ni mom obino keto lewic i koma; pien ŋat abino miya aloo kop tye ceggi keda. Ŋattoro tye ame mito pida? Myero ocuŋ kede karacel i nyim okiko, Ŋa kara ame opido kede-nono? En myero bin i ŋeta kan. Nen ba, Rwot Obaŋa konya, ŋa ame bino ŋolo kop loa? Nen ba, gin luŋ obino ti caloboŋo, nyenye bino camogi oko, Ŋa i akinawu ame lworo Rwot, ame winyo kop ame amiro mere kobo? Ŋa ame woto i piny acol kun mom neno yo ame ewot iye, cite geŋo gire Rwot, kun jeŋere i kom Obaŋa mere? Nen ba, wun jo luŋ ame cwinyo mac, wunjo ame moko mac i kom yen! Wot wunu i lero mac ame icwinyo wunu, kun mac ame imoko wunu menyowu. Gin ame ibino nwoŋo wunu i baŋa ene: ibino buto wunu piny kun itye wunu twon rem adwoŋ meicel. “Winy wunu koppa, wun jo ame mito larre, wun jo ame yenyo Rwot; koŋ ipar wunu pi lela ame rik okwanyowu iye, kede twon bur gweŋ atek ame rik okunyowu iye. Koŋ ipar pi kwarowu, Iburaim, kede Cara ame obedo tatawu; Kare ame alwoŋo Iburaim onwoŋo mom tye atinnoro, cite an amie winyo, ate miye itino, amio ikwae odoko apol meicel. “Pien Rwot bino kweyo cuny Cion, bino kweyo cuny kabedo mere luŋ ame obalo, tim iye bino bedo calo Eden, kun kan otwo ikaŋ bedo calo poto a Rwot yomcuny kede lelo bino bedo tye kuno, kun jo wero wer me pwoc kede me pak. “Winy wunu koppa, wun jona, ter yitwu baŋa, wun rokka; pien abino miyowu cik, kede ŋolo kop atira ame bino bedo acalo cen baŋ orok. An abino oyotoyot me bino larowu, kare me locca doŋ ceggi acega. An en abino loyo rok luŋ i koma, lobo luŋ ame tye i dog nam tye ka kura, gin otye kede gen ni abino larogi. Koŋ itin waŋi inen polo, dok iŋoloro waŋi me inen lobo; pien polo ame ineno-nono bino ket oko calo yito, aco lobo bino ti oko caloboŋo, eka jo ame bedo iye te to calo ober; Cite larre ame an akelo bino perakino nakanaka, locca mom bino gik kadi acel. “Winy wunu koppa, wun jo ame ŋeo kite atira, wun jo ame cikka doŋ tye i cunywu; cite myero kur ibed kede lworo ka cejo caowu, cunywu daŋ kur poti ka ce gin oyetowu. Pien nyenye bino camogi iweŋ caloboŋo, okok bino mwodogi calo yer romo, ento locca mom bino gik kadi acel, larrena bino bedo pi jo me kare luŋ.” Co oko, co oko i waŋ nino, me iruk teko, yin ciŋ Rwot; co oko, kite ame ibedo timo con, i kare ame doŋ okato. Mom yin en a rik iŋoŋolo Rakab, eka ite cobo ajaraŋuu neko? Mom yin en a rik imio pii nam odwono, twon pii ame rik onwoŋo dwoŋ meicel; mom imio yo oyabere i dye nam atut atek, me jo ame olakoro kat loka tuŋ ca? Jo ame Rwot olakoro bino dwogo i Cion, gin bino bino kede wer. Yomcuny a perakino atwal mom bino rwenyo i wigi, gin bino bedo i yomcuny kede lelo, cwercuny kede cucura bino ya oko i cunygi. “An, an gire abedo ŋat ame kweo cunyi: Piŋo kara ilworo dano ame to oko-ni, atin a dano ame oketo calo lum-mi? Kur wii wil oko i kom Rwot ame oketi, ame oryeo polo, dok daŋ ocibo acakki te lobo. Piŋo kara ibedo i lworo nakanaka nino i nino, pi akemo a dano ame wuno jo, ka ce en ocako ticcere me jwero jo? Kara a kemo a dano a wuno jo tye kwene? Ŋat ame abuc obino gonyo oyotoyot; mom bino to te donyo piny i Bur, cam daŋ mom bino remo. “Pien an a Rwot Obaŋani, ame tugo pii i nam, te cako tagere ame amor amora; nyiŋa Rwot me mony. Atyeko keto koppa i dogi, akani daŋ doŋ oko i tipo me ciŋa, aryeo polo, acibo acakki te lobo, akobo baŋ jo me Cion ni, ‘Wun ibedo wunu jona.’ ” Co oko i waŋ nino, co oko, ya malo, yin Jerucalem, yin ame imato ikopo me akemo ame Rwot en omii imato luŋ ite cako tagere. Mom tye ŋattoro ame twero peye, i akina itino mere luŋ ame en onywalo; mom tye ŋattoro ame twero mako ciŋe, i akina itino luŋ ame en opito. Can aryo luŋ opoto i komi karacel, kara ŋa ame bino kweyo cunyi ba? Oyako loboni ote balo-gu oko, kec kede pala lweny opoto iye agwa; kara ŋa ame bino kweyo cunyi ba? Itinoni owiwila oko, obubuta doŋ kan ame yo ogigika iye luŋ, ocalo doŋ atil ame omoko i boo; akemo a Rwot doŋ owunogi oko, kede juk ame Obaŋani obedo jukogi kede. Doŋ pi mannono ba, winy wunu kop man, wun jo ame owuno, wun jo ame omer, aco kun mom imer wunu i koŋo. Rwot Obaŋani ame pido kop a jo mere okobo ni, “Nen ba, atyeko doŋ kwanyo oko i ciŋwu, ikopo ame mio itagere wunu, gulu me akemona, mom dok ibino medo mato wunu. Abino doŋ miyo baŋ jo ame obedo wunowu, kun okobbiwu ni, ‘But wunu piny me wan okati’; omio iloko ŋewu doŋ odoko lobo me anyonagi, dok ŋewu doŋ onwoŋo tye acalo yo me alubagi.” Co oko, co oko i waŋ nino, ruk tekoni, yin Cion; ruk boŋŋini abeco mege, yin Jerucalem, boma acil, pien jo moro a mom olirre, kede jo ame cik ogeŋo, mom dok bino donyo baŋi. Teŋ doŋ apua oko i komi me iya malo, yin Jerucalem ame yam ibedo opii, Gony doŋ tol oko i ŋutwu, wun jo me Cion ame yam ibedo wunu opii. “Mom oculo limmoro me wilowu, mom daŋ ibino culo limmoro me lakorowu. Yam iwoto ibedo wunu i Miciri acalo wele, icennere jo Accuria te wunowu aboŋo balloro. Koŋ inen, aman dok otero jona i Babulon nono; otye ka ŋalo olocgi, jo tye ka cayo nyiŋa dyeceŋ benebene. Pi mannono, ibino doŋ ŋeya wunu, ibino ŋeyo wunu ni an Obaŋa, ibino ŋeyo wunu ni an en akobo kedwu.” Tyene neno ber nadi i wi kidi, ŋat ame kelo amut aber, ame rabo amut aber me kuc, ŋat ame rabo pi larre, ame kobo baŋ Cion ni, “Obaŋani tye ka loc.” Koŋ iwiny, okur bomani tye ka olakino i wer, owero wer me yomcuny karacel; pien otye ka neno Rwot i waŋgi, kun tye ka dwogo i Cion. Mwoc wunu wer oko, wun luŋ, wun wi odur me Jerucalem; pien Rwot doŋ okweo cuny jo mere oko, olakoro doŋ Jerucalem oko. Rwot doŋ oyabo tekomere acil oko i nyim rok luŋ; jo luŋ i wi podo bino neno kite ame Rwot Obaŋawa olarowa kede. Ya oko, ya oko, ya wunu oko i kuno, kur igud wunu ginnoro a mom cil, ya wunu oko i kuno me ilonyere wunu, wun jo ame tiŋo jami a Rwot. Mom ibino ya wunu i myelkom, mom daŋ ibino riŋo wunu ariŋa, Rwot bino telo nyimwu, Rwot Obaŋa me Icrael bino bedo naka i ŋewu. Rwot okobo ni, “Nen ba, tic amirona tye awot apwot, obino wore ote tiŋe malo, en bino bedo dano amalo meicel; Jo ame onene obedo kede wur meicel; waŋe onwoŋo pat apata kede me a dano, cal kome daŋ onwoŋo mom rom kede me a dano. En bino poyo kom rok apol kittono, obakki doggi bino two oko pien obino neno gin a yam mom otittigi pire, dok obino niaŋ i gin a yam mom ru owinyo pire.” “Ŋa, ŋa oye, kop man ame wan otito? Dok ŋa ame bad Rwot onyutte baŋe? Pien en odoŋo i nyime calo ginapita ame pwod adoŋo adoŋa, ame pwod aryeyo lwite aryea i lobo otwo. En yam mom tye kede kommoro aber onyo kwogo, ame kono miwa ocik waŋwa i kome, ginnoro ame wao tam a dano onwoŋo mom tye baŋe kadi acel mom tye ginnoro ame twero miyowa obedo i tam i kome. Jo ocae te kwere-gu oko, obedo kede cwercuny adwoŋ kede twon rem okato kare. En obedo calo dano ame jo owumo waŋgi oko i kome, Jo ocae, kun mom oparo pire kadi acel. Ateteni, en okanyo can pirwa, oyeo remwa; cite wan obedo tamo ni Obaŋa en oketo can i kome, ogoe dok ote time cucu. Ento rik ocobo pi balwa, owane pi timwa areco; can ame oketo i kome okelliwa kuc, pi go ye omio wan ocaŋ. Wan luŋ onwoŋo orwenyo oko calo rommi, Ŋat acel acel onwoŋo okwanyo yo mere kene, ento Rwot doŋ oketo balwa luŋ i kome. Rik owune, oketo can i kome, cite en gire mom oŋamo doge; acalo romo ame otero me aneka, dok acalo romo a liŋ i nyim onyar yerrere, kittono en mom oŋamo gire doge. Owune, oŋolle kop, ote kwanye oko Ŋa kara oparo pi gin otimere i kome, ni okwanye oko i lobo a jo akwo, ogoe pi bal a rokwa? Oyiko lyellere karacel kede me otim tim areco, karacel kede alonyo i kare me to mere, kadi bed balloro onwoŋo mom a en otimo, lebe daŋ mom okobo goba.” Rwot gire a rik omito ni myero waŋe, en gire omio en obedo kede rem. I kare ame en bino miye iye kene acalo mot me bal, en bino neno ikwae, en bino medo kare me kwo mere. En bino Cobo gin a Rwot oyiko; en bino neno gin aber oya i cwercuny ame ebeo iye, mannono bino kweyo cunye. Pi ŋeccere, amirona ame kite atira, bino miyo okwano jo apol ni kitegi atira, en bino yeyo balgi. Mannono bino miyo amie kabedo me woro i akina jo adoŋo, obino poko jami ayaka karacel i jo atek i lweny, pien en ojalo kwo mere i to, dok okwane karacel obalo; ento en oyeo bal a jo apol meicel, dok okwao Obaŋa pi obalo. Mwoc wer, iredu i yomcuny, yin amerem nywal mom ogudi! Pien itino a dako ame oweko bino bedo apol, kato me a dako ame obedo kede cware, man kop a Rwot. Dok imed nyayo kabedo me kemani bed alac, mi med doŋ ryeyo boŋo me celo kabedoni; kur iwek mogo doŋ, med tol kemani bed aboco, gur teke daŋ bed atek. Pien waŋ loboni bino medde tuŋŋi kede tuŋŋi, ikwai bino leyo ka orok, dok obino poŋo boma luŋ ame tye nono, Kur ilwor, pien lewic mom dok bino maki; kur imi alee twodi, pien mom obino miyo lewic maki. Pien wii bino wil oko i kom lewic a rik ibedo kede i tinoni, mom dok ibino poyo acae me bedo keni aboŋo cwari. Pien Ŋat ocwei, en obedo cwari, nyiŋe Rwot me mony; Ŋat Acil me Icrael en a lakoro yin, olwoŋo ni Obaŋa me wi podo luŋ. Obaŋa bino laro Jerucalem i opii Pien Rwot doŋ otyeko lwoŋi oko, acalo dako ame oweko kene, kun tye i cwercuny, acalo nyako ame onyomo a pwod tidi, ka oryemo; Obaŋani en okobo. Pi kare anok meicel rik aweki keni, ento abino dwoggo yin i kica adwoŋ meicel. Rik akano waŋa oko i baŋi, i kare anok ame onwoŋo akemona dwoŋ meicel, ento abino nyuto marra baŋi nakanaka; man kop a Rwot, ame en ŋat alakoro yin okobo, Pien man rom aroma i kare a Nua i baŋa, Kite acalo rik akwono i kare a Nua ni, pii mom dok bino medde poŋ ame balo lobo luŋ, aman doŋ akwoŋo ni mom dok abino bedo kede akemo i komi, mom daŋ abino dok juki. Pien kiddi twero ya, tur daŋ otwero kobo oko kan ocele ento marra a mom lokere mom bino ya i komi, cikerena me kuc mom obino kobo teŋe. Mannono kop ame Rwot ame kica mako i koma-ni okobo. Ama, yin boma ame ineno can, ame yamo kot okodo i komi i teko, yin ame mom okweo cunyi kadi acel, nen ba, abino mwono kiddini aber meicel, abino gero acakki teri kede kiddi me wel ame obedo bululu bululu kan ocuŋ malo iguŋ bino gero kiddi arema me wel aco dogcel, i kiddi amimila bala mac, eka apamani ate deyo i gweŋe alilia apapat. Itinoni luŋ Rwot en abino pwonyogi, itinoni bino bedo aber meicel. Kite atira bino miyo ibedo atek, mom obino wuni kadi acel, pien mom ibino bedo kede lworo moro pire, jo a wuni mom gire bino noko ŋeti, Ka ce dano moro bino ero da kedi, mannono nwoŋo mom oya i baŋa; ŋattoro keken ame bino da kedi, dano-nono bino poto oko piri. Nen ba, an doŋ aketo atet, ame bino buko loti mac, te teto i jami lweny me ticcere; dok aketo daŋ abalo lobo, me jwero jami ducu. Mom tye gi-lwennyoro ame oteto pi lweny i komi, ame bino tiyo ticcere, dok daŋ ibino loyo kop luŋ ame obino kelo i komi. Man obedo gin ame omiro a Rwot bino nwoŋo loyo kopgi ya i baŋa, man kop a Rwot ikokome. Biye wunu ba i pii, wun luŋ ame oryo ocirowu; ŋat ame limmere moro mom, myero bin wil, cam, Biye iwil wunu koŋo olok kede cak, aboŋo culloro kadi welloro ame oŋolo pire. Piŋo kara ibalo limwu i kom gin a mom obedo ogati? Piŋo kara ityeko tekowu i kom tic ame mom romo yeŋowu? Ter yitwu baŋa, me icam wunu gin aber, lel wunu i cam ame amiowu. Ter wunu yitwu, ibin wunu baŋa: winy wunu koppa, me tipowu bed kwo; abino cikere kedwu i cikere a perakino odoco, abino miyowu mar mera a mom lokere ame genne, ame rik aciko pi Daudi. Nen ba, rik akete me bedo caden baŋ orok, atel kede ami-cik baŋ orok. Nen ba, ibino lwoŋo rok apapat ame mom iŋeo wunu, rok apapat ame mom ŋeowu bino riŋo baŋwu, pi Rwot Obaŋawu, ame en Ŋat Acil me Icrael, pien en doŋ oketo kwogo i komwu. Yeny wunu Rwot kun pwod twero nwoŋere, kok wunu baŋ Rwot kun en tye ceggi. Atim tim arac myero wek timerenono oko; ŋat a cunye mom atira myero wek kit tammere-nono oko; myero en dwog baŋ Rwot, me en time kica, myero en dwog baŋ Obaŋawa, pien bino gonyo ballere luŋ. “Pien tamma, mom tamwu, akadi yowu daŋ mom obedo yona”, Rwot okobo. “Kite acalo polo otiŋere malo meicel ame kato lobo kittono daŋ yona tye malo ame kato yowu oko, tamma daŋ kato tamwu oko. “Pien kite acalo kot kede pee corre piny kun ya i polo, mom dok twero dok kuno, ento bido lobo, mio ginapita tu, doŋo, mio koti baŋ acoc, kede cam baŋ jo ame camo. Kop ame ya i doga daŋ bino bedo amannono; mom dok bino dwogo baŋa, cite bino tiyo gin ame amito ni ti, dok bino cobo gin ame acwae pire. “Pien ibino wot wunu oko kede lelo, kun oterowu kede kucs; kiddi ame tye i nyimwu karacel kede tur luŋ, gin luŋ bino mwoco wer agwa meicel, kun yen luŋ me tim ba po ciŋgi. Yen cipre en a bino tu akaka okuto, yen a nwecgi kur akaka ocokocok; mannono bino bedo gin me po nakanaka, ame mom twero rwenyo, me nyuto ni an Rwot en a rik atio.” Rwot okobo baŋ jo mere ni, “Myero iŋol wunu kop atira, dok itim wunu gin atira, pien aceggi larowu; larre ame alarowu kede ceggi doŋ nen kannaler. Ŋat ame timo man tye kede winyo nadi, karacel kede dano ame omako atek odoco, ame gwoko cabit, kun mom balo, dok gwoko daŋ ciŋe mom timo gin arac.” Arokkoro ame doŋ obino oko baŋ Rwot myero kur kob ni, “Rwot gire bino poka oko i akina jo mere,” dok ŋat ame ooro oko kur daŋ kob ni, “Nen ba, an doŋ a yat otal.” Pien Rwot doŋ otyeko kobo oko ni, “Jo ame oroo oko ame gwoko ceŋ cabitta, ame yero gin ame yomoro cunya, ame lido cikerena odoco, abino miyogi gin me po nyiŋgi, ame bino bedo i ot me wora kede i akina jona, ame ber kato bedo itino awobe kede anyira; abino miyogi nyiŋ me perakino atwal, ame mom twero rwenyo kadi acel. “Orok ame doŋ obino oko baŋ Rwot, me tic baŋe, kun maro nyiŋe, dok me bedo omiro mere, jo luŋ ame gwoko ceŋ cabit, kun mom obalo, ame lido cikerena odoco, jo-nono abino kelo i wi kidina acil, abino yomoro cunygi i ot me kwaya, Abino gamo mot awaŋagi kede motgi ame oyalo kede, abino gamo i wi keno me lamma; pien oda obino lwoŋo ni ot me kwac a rok luŋ.” Rwot Obaŋa ame ocoko jo Icrael ame oryemo okobo ni, “Dok abino coko jo ocele baŋa, amedo i kom jo ame doŋ atyeko coko.” Wun leyi luŋ me tim, biye imwod wunu, wun leyi luŋ me buŋ, Okurpiny a jo Icrael waŋgi oto oko, gin luŋ mom otye kede ŋeccoro kadi acel; gin luŋ ocalo gwogi ame lebgi oto, mom doŋ oromo gweo; oleko lek kun obuto gigi oko, omaro nino keken. Gwogi-nono owor meicel, mom oyeŋ kadi acel. Gin okwat a mom niaŋ, ŋat acel acel i akinagi kwanyo yo mere kene, ŋat man yenyo agoba mere kene kite a cunye mito, Gin olwoŋere ni, “Biye me owot oom koŋo olok, biye okak arege me omer; diki dok onen, adwoŋ okato kare oko.” Ŋat a kite atira to, cite ŋattoro mom keto cunye iye; jo ame maro Obaŋa okwanyo oko, ŋattoro gire mom paro pirgi. Pien dano a kite atira nwoŋo okwanyo oko i can, en donyo gire i kuc; jo ame woto i yo me kite atira, jo-nono tye a wee i kabutogi. Cite wun, biye wunu ceggi baŋa kan, wun itino emuroko, ame acot onywalo kede i tim me carocaro. Ŋa ce ame wun inywaro wunu-nono? Iŋamo dogwu alac alaca-nono pi ŋa? Wun mom ibedo wunu itino otim bal, itino ame onywalo pi kop me goba. Wun ame mitwu mom kwe i te kworo, i te yen luŋ ame obuŋere, ame ineko itinowu i luŋ, i te gweŋe ame obabara? Gin ame opokki i akina gweŋe apwot i luŋ piny, gin, ginnaca luŋ megi; yin ionynyigi motti me amata, ikelo-gu motti me moko kwon. Cunya bino bedo yom pi kodi timmono? Iketo doŋ kabuto ni i wi kidi abor, otiŋere malo, yin doŋ iwoto kuno me wot yalo jok i motti, Iketo daŋ cal jok i ŋe kika kede i ŋe yat doggola; pi weka oko, omio iyabo kabutoni. Idonyo iye, ite yaro bedo alac; icikere kedgi piri keni, imaro doŋ kabutogi, ineno gin me lewic, Iwoto baŋ jok Molek kede moo, imedo mooni a ŋwece kur; ioro okwenani kannabor, icwalogi piny naka i Ceol. Wot abor ooli meicel, cite mom ikobo ni, “Konnyere mom;” inwoŋo kwo anyen ame medo tekoni, omio mom iŋoye iyo, Ŋa ame onwoŋo ilworo atek, ame myelo komi, ame omio ikobo kop goba, wii te doŋ wil oko i koma, ame mom doŋ itwero po pira? Mom atemo diyo cunya pi kare alac, ame omio mom ite bedo kede lworo moro i koma? Kodi kiteni ame ikobo ni atiranono, kede timmi luŋ abino yabo oko kannaler. Ka ce iwoto dwoni i koko pi kony, gin cal jogini-nono myero konyi. Yamo bino kologi oko, ewura dog bino cwayogi teŋe. Ento ŋat ame riŋo laro baŋa bino bedo i lobo, dano-nono bino bedo i kidina acil. Obino kobo ni, “Tor wunu, tor wunu, yik wunu yo, put wunu iciki luŋ i dye yo a jona.” Obaŋa ame malo, ame cil, ame bedo nakanaka i kabedo ame otiŋere malo, ame ri nakanaka okobo ni, “An abedo i kabedo ame otiŋere malo ame cil, dok abedo daŋ i ŋat amwol, a cunye cwer, dok ŋut, pi roco cuny jo ame mwol, jo ame cunygi cwer dok ŋut. Pien mom abino bedo pyem nakanaka, mom abino kudo akemo kare luŋ, pien cuny dano oya i baŋa, an en amio weo me kwo. Bal a jona me paro lim omio akemo omaka; omio agoogi, apono oko, kun akemo maka, cite gin omedde ameda i jem kun otimo gin a cunygi mito. Atyeko doŋ neno kitegi, ento abino caŋogi; abino telogi, abino culogi i gin a kweo cunygi, abino kweyo cuny jo ame kumo pirgi. Abino miyo kuc baŋ jo a tye kannabor kede kan aceggi, dok daŋ abino caŋo jona. Ento jo areco calo nam ame tagere, ame mom koŋ twero pye mot, kun pii mere bedo kelo yugi kede coto. Kuc gire mom pi obalo”, man kop ame Obaŋawa okobo. Red atek, kur iliŋ, yab dwoni aloŋo calo apel, kobbi jona rocgi, tucci jo me ot a Yakobo balgi. Aco kono gin yenya nino ducu, olelo daŋ gigi i ŋeyo gin ame an amito oti, otimere kom calo rok ame kitegi atira, ame mom weko lubo cik obaŋagi; openya-gu daŋ pi ŋolo kop atira, cunygi daŋ yom me bedo aceggi Obaŋa. Jo penyo ni, “Piŋo kara wan obedo kanyo kec, kun yin mom ineno? Piŋo kara wan obedo mwolle kenwa i nyimi, kun yin mom iparo?” Koŋ inen i nino me kanyo kecwu, wun iketo ka cunywu i gin ame yomoro cunywu kun iburo wunu jo ame tio baŋwu. Koŋ dok inen, kanyo kecwu tye iye daa kede lweny, kun daŋ icipocipo wunu jo adoŋ i ciŋ me kolo, Kodi kanyo kec ame itye ka kanyo wunu i kare-ni, mom bino miyo dwonwu winyere malo. Itamo wunu ni mannono kite kanyo kec ame an amito, nino ame dano mwolle iye kene? Kanyo kec ame dano kulo wie piny calo ogada, peto boŋo cola, pworo buro iye, eka te buto iye? Mannono en ame wun itwero lwoŋo wunu ni kanyo kec, kede nino ame Rwot Obaŋawu cunye yom iye? “Kanyo kec ame an amito ene: gonyo tol me tim areco, gonyo kol oko i tyen opii, jo ame owuno wot i kuc, kede turo kit kol luŋ aluŋa tyen jo. Nywako cam kede jo ame kec neko, kelo ocan ame paccigi pe i paconi; miyo boŋo aruka baŋ jo ame ineno woto onoro; dok daŋ myero kur irweny oko i waŋ watini. Ceŋ bino pelo baŋi calo ru-piny, waŋ bur ame tye i komi bino caŋ oyot meicel. Kiteni atira bino telo nyimi, kwogo a Rwot en ame bino geŋo ŋei. Dok daŋ ibino lwoŋo, Rwot te gamo dogi, ibino koko baŋe, en bino gamo ni, ‘An ene.’ “Ka ce ibino kwanyo kol oko i akinawu, cimo jo i nyako ciŋ, kede kobo kop arac, Ka ce ibino jalo kwoni baŋ jo ame kec neko, dok daŋ icobo mit a jo ame owuno, bino miyo ceŋ pello piri i piny acol, piny acol icuc baŋi bino doko calo dyeceŋ, Rwot bino telli i kare luŋ, en bino cobo mitti i jami abeco, bino miyo cogoni bedo atek; ibino bedo calo poto ame pii oromo aber meicel, ibino bedo calo pii ame akukunya kare luŋ, ame pii mere mom two kadi acel. Wi oburri acon obino gero doki, ibino gero i kom acakki tere ame yam kwariwu ogero, obino lwoŋi ni yin ayik cel ame otur, ŋat ame yiko yo a yam oballe bedo aber. “Ka ce itero ceŋ cabit acalo kabedo acil, iweko timo gin ame yomoro cunyi i ninona acil, ka ce itero cabit acalo nino me yomcuny, dok acalo nino a Rwot ame cil ame obedo me kwogo; ka ce imio kwogo kun mom ilubo yo-ni keni, akadi bedo yenyo gin ame yomoro cunyi, onyo kobo kop atata; cunyi bino bedo ayom i kom Rwot, ibino yon i gadigadi i wi tur malo, ibino yomoro cunyi i lobo ame rik kwaroni Yakobo oleo, pien Rwot doŋ okobo kop man en ikome.” Nen ba, bad Rwot mom odoko acek oko, ame mom doŋ romo laro jo, yite daŋ mom gire odiŋ, ame mom romo winyo kop; ento timwu arac opokowu oko kede Obaŋa, balwu omio waŋe doŋ owumere oko i komwu, mom romo neno. Pien remo doŋ obalo ciŋwu oko, anyira ciŋwu Opoŋ ka i tim areco keken, dogwu kobo kop me goba, lebwu muno kop me timo tim areco. Mom tye ŋattoro ame doto wadgi i kop ateni, mom tye ŋattoro ame pido pido ame tye kakare; jo luŋ jeŋere i kop a tere mom, kun okobo kop goba, oparo ka pi timo gin arac, ame kelo can. Jo luŋ beko ka tim arac calo toŋ codocodo, ocikoboogi calo me otyetyem; ŋat ame ocamo tongi-nono to oko, aco ka onyono anyona, ororo ya iye. Ento timgi-nono mom bino konyogi kadi acel, mom bino konyogi me aruka, akadi me wumere, Gin otio ka tic me timo bal, tim me byemi tye gire i ciŋgi. Tyengi dwir ata me wot timo gin arac, oyute ayuta me wot onyo remo ajo a mom i bal; otamo ka tam me wot timo gin arac, yak kede balle a lobo tye i gudogi luŋ. Okwia-gu yo me kuc, ŋolo kop atira mom tye i gudogi luŋ; ogogomo yogi luŋ, mom tye ŋattoro a beo iye ame bedo i kuc. Mannono omio ŋolo kop atira bor abora kedwa, larre mom ru otuno baŋwa. Koŋ inen doŋ ba, akaka ceŋ, wan onwoŋo colpiny, akaka lero, wan owoto i piny acol icuc. Oboboŋo doŋ kor apama calo otowaŋ, oboboŋo calo jo ame waŋgi mom ogatte kom a piny pwod ler calo dyewor, i akina jo a komgi tek, wan ocalo jo oto. Nen doŋ oŋuŋura-gu calo leyi, obedo kok akoka calo amam, okuro ŋolo kop atira cite mom onwoŋo; okuro larre, cite bor abora kedwa, Pien balwa doŋ odurre adura nyimi, rocwa en a doŋ obedo caden komwa; wan gire doŋ otyeko balo, wan oŋeo tim areco ame obedo timo. Wan okalo wi cik, okwero-gu Rwot oko, oweko daŋ lubo Obaŋawa oko, kun okobo ka kop me wuno jo kede jem, ogamo kop goba i cunywa, ote kobo. Aco ŋolo kop atira mom oye rwako ume, kite atira doŋ mom noko ŋetwa, ateni doŋ tye arimo piny i dye boma ata, ginnoro ame tye kakare mom doŋ nwoŋo yo me donyo. Ateni mom doŋ tye atwal, ŋat ame kwero timo tim arac, miye kene i peko. Rwot oneno timmoro atira mom doŋ tye, pien ŋolo kop atira mom doŋ tye. En oneno ni ŋattoro mom doŋ tye; owuro pien oneno ni ŋattoro mom doŋ tye ame twero laro pirgi. En ikome doŋ bino larogi i tekkere kene, kite atira bino miyo en cato atek. En bino ruko kite atir calo nyonyo me geŋo kore, kede tok nyonyo me larre i wie, cuny me culo kwor bino bedo acaloboŋo aruka mere, akemo te boyo kome oko calo jor. En bino culogi kite ame timgi tye kede, akemo baŋ omone mere, cul arac baŋ okworrere; cul arac baŋ lobo ame tye i dog nam. Mannono bino miyo olworo nyiŋ Rwot cakere i tuŋ to, kede kwogo mere cakere i tuŋ kide; pien bino ru bino oyot calo pii amol ager, ame yamo a Rwot en akolo. Rwot okobo baŋ jo mere ni, “An abino i Cion acalo ŋat ame lakorowu, wun jo a Yakobo ame oweko timo gin arac. “Aco i tuŋ baŋa, man en obedo cikere ame acikere kedwu. Tekowu ame doŋ atyeko miyowu, kede koppa ame doŋ atyeko keto i dogwu, mom doŋ bino ya i dogwu, akadi i dog itinowu, onyo i dog ikwaewu, cakere tin naka waŋ i waŋ.” Ya malo ba, yin Jerucalem, pien cenni doŋ obino oko, kwogo a Rwot doŋ opelo, ocaro komi oko. Nen ba, colpiny bino wumo lobo oko, mutu acol icuc bino wumo rok ocele oko, ento Rwot bino pelo te caro komi, obino neno kwogo mere i kome. Orok bino bino i leroni, obakki bino bino i lero ceŋ ame opelio i komi. Tiŋ waŋi malo, me iŋoloro koŋ piny, jo luŋ bino cokere karacel, te bino baŋi; awobeni bino ya i kannabor, anyirani obino tiŋo otino i kor. Ibino neno, komi te ryeny aryenya, cunyi bino myel ite lelo; pien lim abup meicel me nam obino jwaŋo i ciŋi, lonyo a rok apol obino kelo baŋi, Inaga ecipan bino wumi oko, itino inaga me Midian kede me Epa; anaka jo me Ceba luŋ bino bino baŋi, Gin bino kelo jabu kede luban, obino rabo pi jami abeco ame Rwot otimo. Rommi luŋ me Kedar obino coko baŋi, nyogi rommi me Nebayot bino konyi; obino kelogi i wi keno lam me yala, ate gamogi, dok abino medo kwogo i kom oda me kwogo, Man kara jo mene ame twarre calo pol-li, onyo calo amam ame dok i dog udigi? Pien lobo ame tye i dog nam bino kura, mele ame oya i Tarcic en ame bino telo yo, Mele-nogo bino kelo itinoni i kannabor karacel kede lonyo adwoŋ meicel, pi nyiŋ Rwot Obaŋani, ame en Ŋat Acil me Icrael, pien en doŋ oketo kwogo komi. Orok bino gero apama me celli, obakkigi bino konyi i tic; pien i kare ame rik akemo omaka, agoi, cite pi ber a yie atyeko doŋ timi kica, Dogcelli bino bedo twolo kare luŋ, mom obino cego dyeceŋ kede dyewor; me jo kel lonyo a rok luŋ baŋi, kun odorre dorre me kwogo karacel obakkigi. Pien rok kede loc ame mom bino ye locci bino to; kodi rokkono luŋ bino balo lobogi odoco, Kwogo me Lebanon bino bino baŋi, cipre kede yen abeco ocek, me miyo kabedona acil nen amwonya; dok daŋ abino miyo kabedo a tyena poŋi kwogo. Itino a jo a yam owuni bino bino baŋ i aguŋo; kede jo luŋ ame yam obedo cayi obino ryebere piny i te tyeni; gin bino lwoŋi ni yin ibedo boma a Rwot, Cion ame obedo me a Ŋat Acil me Icrael. Aco kono yam koŋ oweki ata, okweri oko, kun ŋattoro mom beo baŋi; abino miyi ibedo dit nakanaka, jo me kare luŋ bino lelo piri. Ibino bedo doto cak a rok luŋ, ibino doto anaka tuno obakki. Ibino ŋeyo ni an a Rwot, an en a lari, dok an en a lakoro yin, an a Won Twero ame abedo Obaŋa a Yakobo. Akaka mola, an abino kelo jabu, akaka nyonyo, abino kelo ryal, akaka bao, abino kela mola, akaka gweŋ, abino kelo nyonyo, Abino miyo kuc en ame loi, akaka odoŋe a loo tic, kite atira en ame bino bedo nyamparani. Tim me byemi mom dok bino winyere i loboni, kadi yak onyo balle a lobo i wan loboni. Ibino cako nyiŋ apama celli ni, Larre, aco dogcelli ibino lwoŋo ni, Pak. Mom ceŋ en a dok bino menyi dyeceŋ, akadi lero a dwe dyewor; Rwot gire en a doŋ bino menyi nakanaka, Obaŋani en ame bino miyo ibedo kede kwogo. Ceŋŋi mom dok bino poto, dwe daŋ mom bino rwenyo; pien Rwot en ame bino menyi nakanaka, kare me kumoni doŋ bino gik oko. Joni luŋ bino bedo jo a kitegi atira, lobo doŋ bino dokomegi atwal; jaŋ yat ame an apito, tic ame an ikoma atio, me wek jo mia kwogo, Doggola a jo mere ame nok atek bino doko atekere twal, ŋat ame jo mere tidi meicel bino doko twon rokkoro atek, An abedo Rwot; abino miyo timere oyot ka kare mere oromo. Rwot Obaŋa doŋ ocwao cunye i koma, pien doŋ okwera, me ater amut aber baŋ jo ame owuno, Oora me caŋo jo ame cwercuny onuo, kede rabbi jo ame tye i opii ni obino gonyogi oko, kede baŋ jo ame otweo i buc ni obino yabigi doggola oko; dok arab pi mwaka ame Rwot bino timo iye jo ber, kede kare me culo kwor Obaŋawa: me kweyo cuny jo ame kumo. Oora me miyo jo ame kumo Cion, me miyogi tok kwogo akaka buru, moo wir me yomcuny akaka kumo, ruk me pako Obaŋa akaka cuny ame goro. Obino lwoŋogi ni kworo me kite atira, yen ame Rwot opito, me wek mie kwogo. Gin bino dok gero wi obur ame yam oballe con, obino dok gero oko kan ame rik oyayako, obino yikoboma luŋ ame onwoŋo oballe, i lobo onwoŋo oballe con meicel. Orok bino cuŋ kun kwao rommiwu, gin daŋ en ame bino puro pottiwu kede poto olokwu; cite wun obino lwoŋowu ni olamdog a Rwot, jo bino kobo ni wun ibedo wunu otic Obaŋawa; ibino wunu camo lonyo a rok apol, ibino bedo wunu kede kwogo pi limgi-nono. Akaka lewic obino miyogi abup kun odode adoda i wi wadgi, akaka alane ibino lelo wunu pi gin a doŋ bup i i ciŋwu, mannono bino miyo inwoŋo wunu lim abup i lobowu, ame ododoka adodok wiwadgi, ibino doŋ lelo wunu nakanaka. Rwot okobo ni, “An amaro ŋolo kop atira, adag yak kede tim arac; abino culo waŋ can ame opoto komgi kakare, abino cikere kedgi i cikere ame perakino nakanaka. Ikwaegi bino ŋeye atek i akina orok, nyiŋ jo ame oya i komgi bino rwo i akina rok luŋ; ŋattoro keken ame bino nenogi, bino niaŋ i komgi, ni gin obedo rok ame Rwot omio gum.” Jerucalem bino lelo meicel i Rwot, cunye bino bedo yom i kom Obaŋa mere; pien oruke kede boŋŋi me larre owume kede jor aber me kite atira, acalo anyom ame orukere aber tok kwogo, dok acalo ater a ame orukere ruk me wel. Pien kite acalo jami apapat ru lobo, dok poto daŋ mio gin ame ocoo iye tu, amannono daŋ Rwot Obaŋa bino miyo kite atira, kede pak tu i nyim rok luŋ. Mom gira abino liŋ pi Cion, mom daŋ abino weo pire en Jerucalem, tuno ka loccere doŋ ocaro piny calo lero a ceŋ, dok larrere daŋ doŋ omenyo piny calo mac. Rok luŋ bino neno locci, yin Jerucalem obakki luŋ bino neno kwogoni; obino lwoŋi kede nyiŋ anyen ame Rwot i kome bino tuco. Yin ibino bedo calo tok kwogo ame tye i ciŋ Rwot, ame nyuto dittere dok ibino bedo acalo tok kwogo ame nyuto loc Obaŋani. Mom doŋ obino medde lwoŋi ni, “Boma a doŋ oweko,” loboni daŋ mom obino lwoŋo ni, “Dako ame oweko”, ento obino lwoŋi ni, “Dako ame cunya yom i kome”; kun loboni olwoŋo ni dako ame onyomo; pien Rwot cunye yom i komi dok en bino bedo calo cwar loboni, Pien kite acalo awobi nyomo nyako, awobeni daŋ bino nyomi kittono, dok kit acalo anyom lelo pi atera, amannono daŋ Obaŋani bino lelo piri. Yin Jerucalem ba, oketo okurpiny i wi celli malo; gin mom bino liŋ kadi acel dyeceŋ kede dyewor. Wun jo ame poyo Rwot, mom iwe wunu, dok daŋ mom imie wunu kare me weo, tuno ka en omio Jerucalem odoko tek, omio odoko gin ame opako i wi lobo. Rwot doŋ otyeko kwoŋo kwoŋ atek meicel, kun kwoŋo i bade me twer, ni, “Mom dok abino miyo kaili bedo me acama okworri, orok mom dok bino mato koŋo olok ame ilolle kede; ento jo ame okao bino camo te pako Rwot, jo ame opwono olok bino mato koŋo mere i dyekalla acil.” Be wunu, be wunu i dogcel, yik wunu yo pi lwak, Tor wunu, tor wunu gudo oko, kwakwanyo wunu gweŋe oko iye, tiŋ wunu bendera malo pi rok luŋ, Koŋ inen wunu, Rwot doŋ orabo kop naka i agikki lobo ni, “Kobbi wunu boma me Cion ni, Nen ba, larreni doŋ tye abino; mottere tye gire baŋe, jo ame olwenyo pire tye is nyime.” Obino lwoŋo ni, Rok acil, Jo ame Rwot olakoro; dok daŋ obino lwoŋi ni, Boma ame Rwot omaro, ame mom oweko ata. Man kara ŋa ame ya i Edommie, kede i Bojra ame oruko boŋŋi arema, ame oruko ruk me kwogo, kun yon i wot i twon tekomere adwoŋ cae? “An ennono, arabbo pi loyo kop, an atek, ame atwero laro jo.” Piŋo kara rukki rema, kun boŋŋoni calo me a ŋat a nyono olok? “An anyono olok an kena, kun ŋattoro ame oya rok ocele mom tye baŋa; ajejebogi akemo meicel; remogi okikira i boŋona meicel, omio rukka luŋ ocido oko, Pien nino me culo kwor onwoŋo tye i cunya, mwaka me lakoro jona doŋ oromo oko. Aŋoloro piny, ate nwoŋo ni mom tye ŋattoro ame twero konya, awuro meicel, cite mom tye ŋattoro ame twero miya teko; mannono omio ciŋa an ikoma en omio aloo loc, akemona en omio anwoŋo teko, Akemo rik omio ajejebo rok piny, iniga omio amiogi okakomeicel, aonyo remogi piny i lobo.” Abino dok kwano mar a Rwot a mom lokere, abino doŋ rabo pi jami abeco ame Rwot otimo, kun lubere i ginnoro luŋ ame Rwot otimo pirwa, kede twon ber adwoŋ meicel ame en onyuto baŋ jo Icrael, ame en otimo pirgi kun lubo kica mere, kite ame twon marrere a mom lokere tye kede. Pien en okobo ni, “Ateni, gin gire obedo jona”, itino ame mom bino bwola; en te doko Alargi. I cangi luŋ, en daŋ oneno iye can; en ikome olarogi pe okwena moro kadi omalaika. En olakorogi i marrere kede i kica mere, en otiŋogi, te bedo byelogi nino i nino i kare acon, Ento gin ojem, omio akemo omako Cuny Acil; mannono omio Rwot odoko akworgi, olokere te lweny kedgi. Gin dok te po pi kare acon, i kare a Muca, amiro a Rwot, ote penyo ni, “Ŋat ame rik okwanyo okwat rommi mere i nam tye kara kwene? Ŋat a rik oketo Cuny Acil i akinagi tye kara kwene? Ŋat a rik omio ciŋe me kwogo, owoto i ŋet Muca tuŋ cem, ame omio pii opokere i dul aryo i nyimgi me miye nwoŋo nyiŋ ame perakino nakanaka, ame otelogi obeo i dye nam atut?” Mom ogatte kadi acel, calo aguragura ame woto dye tim, Cunya Rwot omiogi weo, calo dok ame otuno i luŋ. Rik itelo joni kittono, me inwoŋ kede nyiŋ me kwogo. Kwac pi kica kede kony Kul waŋi inen piny i wi polo, ame en kabedoni acil me kwogo. Arimani kede twer tye kara kwene? Mar meri kede kicani tye kwene ba? Tim ber kur ikwerwa ba. Pien yin gire ibedo Papawa, kadi bed Iburaim mom ŋeowa, dok Icrael daŋ mom ŋeo ni wan obedo ikwae; yin Rwot gire ibedo papawa, yin ibedo ŋat ame lakorowa cakere yam con. Piŋo kara imiowa ogak oko i yoni, Ama Rwot? Piŋo kara imiowa odoko jo ame nwaŋ kun mom olwori? Dwog baŋwa pi jo ame tio piri, pi itekere luŋ ame obedo megi yin i komi. Kabedoni acil obedo baŋ joni kare anok meicel, okworwa doŋ otyeko jejebo oko i tyengi, Wan dok odoko calo jo ame yam mom iloo, ocalo doŋ jo ame mom olwoŋo kede nyiŋi. Kono iyeco polo oko ite yitto piny! Kono omio kiddi oyeŋere i nyimi. Kite acalo mac moko i yen, dok mio daŋ pii walo, me nyiŋi ŋeye baŋ okworri, dok rok luŋ daŋ komgi myel i nyimi! Kare ame rik itimo gigi mogo iyiliyili ame wan mom oromo tamo pire, rik yin ibino piny, kiddi te yeŋere i nyimi. Cakere gire con meicel ŋattoro gire mom ogiporo, ŋattoro mom owinyo kede yite, ŋattoro daŋ mom oneno Obaŋa moro apat kono yin keni, Obaŋa ame tio tic luŋ pi jo ame kure. Yin irwatte i ŋat ame tio tic atira i yomcuny, jo ame po piri i yoni luŋ, Nen ba, yin rik akemo omaki i komwa, cite wan omedde ameda i timo bal, obedo timo bal pi kare alac meicel, doŋ wan obino larre ateni? Wan doŋ odoko jo ame cik ogeŋo, ginnoro luŋ ame wan otimo ame wan oneno ni atira rom gire aroma i boŋo ame ocido oko i gigi mogo me kwer. Wan luŋ doŋ oner oko calo pot yat, timwa areco doŋ kolowa calo yamo, Ŋattoro ame lwoŋo nyiŋi mom tye kadi acel, ame cukere kene me maki; pien doŋ ikanne giri oko i baŋwa, imiowa doŋ i ciŋ timwa areco me loyowa, Kadi amannono, yin i Rwot gire ibedo Papawa; wan obedo lobo, yin en icweowa; wan luŋ obedo gin ame yin itio. Kur imi akemo maki atek ate ka, Ama Rwot, kur daŋ ibed poyo balwa nakanaka, Koŋ inen, ipar, wan luŋ obedo joni, Bomani acil luŋ doŋ odoko tim, Cion doŋ odoko tim oko, Jerucalem doŋ odoŋ kene ata. Odwa acil, aber meicel, kan ame rik kwariwa paki iye, obin owaŋo oko i mac; kabedo luŋ ame rik yomoro cunywa doŋ odoko wi obur. Ibino diyo cunyi i kom jami magi luŋ, Ama Rwot? Ibino liŋ aliŋa, kun iwunowa atek ateka? Rik ayikere me gamo kop a jo ame kwaa, cite naka mom okwaa gigi. Ayikere-gu ni gin myero nwoŋa, cite naka mom otemo yenya. Akobbigi ni, “An ene, an en kan,” akobo baŋ rok ame onwoŋo mom doŋ lwoŋo nyiŋa. Abedo ryeyo ciŋa dyeceŋ benebene baŋ jo ame jem ajema, jo ame woto i yo a mom ber kadi acel, kun olubo gigi ryekogi kengi. Gin bedo miyo akemo maka kare i kare, kun obedo miyo motgi me yalo jogi i potti, owaŋo-gu odok akur i kom matafali; obedo bedo-gu i lyel, eka dyewor ote bedo kabedo mogo me imun; obedo camo-gu riŋo puno, jami me tedogi luŋ tye iye pig riŋo leyi ame okwero. Gin jo ame kobo ni, “Bed teŋe kuno, kur ibin baŋa, pien an opoka oko pi obaŋana.” Jo man kom calo yito i wuma, ocalo mac ame mom to kadi acel. Nen ba, otyeko doŋ coyo i nyima ni, “An gire mom abino liŋ aliŋa, ento abino culo. Ateteni abino culogi gire, timgi areco karacel kede me a kwarigi, Rwot okobo; pien gin obedo waŋo odok akur i wi kiddi, obedo yetta-gu i wi tur luŋ; abino poro culgi oromogi, abino culogi pi balgi acon.” Rwot okobo ni, “Kite acalo koŋo olok nwoŋere kede i nyig olok, dok jo okobo ni, ‘Kur ibal oko, pien gum tye iye’, abino timo daŋ amannono pi omirona, mom abino tyekogi luŋ, Abino miyo ikwae ya kom Yakobo, kede jo ame bino leyo wi kiddina luŋ ya i Juda; jona ame ayero bino leyo me bedo megi, omirona bino bedo kuno, Caron bino doko ka kwayo rommi, luŋ me Akor bino bedo me buto a dok, bino bedo me a jona ame obedo yenya. Ento wun ame doŋ ityeko weko wunu Rwot, ame wiwu doŋ owil oko i kom kiddina acil, ame yikomeja a jok me winyo, ame piko koŋo orubo poŋ ikopo pi jo amio gum, wun ibino to wunu i pala lweny, wun luŋ ibino guŋu wunu aguŋa ka aŋolo ŋutwu, pien i kare ame alwoŋowu, ikwero gamo wunu oko, i kare ame an abedo kop, mom iciko wunu yitwu iye, ento ibedo timo wunu gin anen arac inyima, iyero wunu gin ame mom yomoro cunya.” Mannono omio Rwot Obaŋa okobo ni, “Nen ba, omirona bino cem, cite wun kec bino nekowu; omirona bino mato pii, ento wun oryo pii bino cirowu; omirona bino lelo, cite wun obino miyo lewic makowu; yomcuny bino miyo omirona wero, ento wun wancuny bino miyo ikok wunu, cwercuny bino miyo iredo wunu i koko, Nyinwu bino doŋ baŋ jona ame ayero calo gi-ceno jo, Rwot Obaŋa gire en abino nekowu; ento omiro mere, en bino lwoŋogi i nyiŋ apat. Pi mannono, ka ce ŋattoro lamo gum i kome kene i lobo, bino lamo gum i kome kene i nyiŋ Obaŋa me ateni, dok ŋat ame bino kwoŋo kwoŋ i lobo man, bino kwoŋ i nyiŋ Obaŋa me ateni; pien wiwu doŋ bino wil oko i kom can ame ineno wunu con, bino doŋ rwenyo oko i wiwu.” Rwot dok te kobo ni, “Pien, nen ba, aketo polo anyen kede lobo anyen; mom dok obino po pi jami acon, mom daŋ bino riŋo i wi ŋattoro. Cite myero cunywu bed ayom kun ilelo wunu nakanaka, i kom jami ame aketo-nono; pien, nen ba, Jerucalem ame aketo bino bedo me yomcuny, jo mere daŋ bino bedo kede lelo. Abino lelo i Jerucalem, cunya bino bedo yom i kom jona; dwonnoro me koko mom dok bino winyere iye, akadi koko moro me can, Atinnoro ame onywalo te ri kare anonok mom bino bedo tye iye, akadi adwoŋŋoro ame mom bino cobo kare mere kakare; atin bino to ame mwaka mere doŋ oromo mia acel, abalo ame mwaka mere bino romo mia acel, nwoŋo oceno acena. Jo bino gero udigi ote daŋ bedo iye, obino puro poto olokgi ote daŋ camo nyige. Mom obino gero udigi eka ŋat acele en ate bedo iye, mom obino puro poto olokgi eka ŋat ocele en a te camo. Jona bino perakino ame romo aroma i yat, jona ame ayero bino bilo tic me ciŋgi kare alac, Ŋattoro i akinagi mom bino yelle i tic nono, akadi nywalo atin pi neno can; pien gin bino bedo itino a jo ame Rwot doŋ otyeko miyo gum, kun gumgi-nono kwako naka itinogi. Ame mom ru gin olwoŋo, an abino gamo doggi, kun mom ru okobo kopporo, an abino winyo kopgi. Epet kede atin romo bino cem karacel, eŋatu obino pito paco calo twon; twol bino camo apua. I wi kidina acil luŋ, awano onyo anek mom bino bedo tye iye.” Rwot okobo ni, “Polo obedo kom me locca, lobo te bedo kom me to na tyena. Kara kit ot aŋo ame itwero gero wunu pira? Kara ka weona twero bedo kwene? Jami magi luŋ ciŋa en otio, mannono omio jami magi luŋ obedo mega, Man en kit dano ame abino ciko waŋa i kome, ŋat ame mwol, ame ŋut i cunye, dok ame kome myel i kop ame an akobo. “Ŋat ame neko twon, rom aroma i ŋat ame neko dano; ŋat ame mio romo acalo mot aŋola, rom aroma i ŋat ame turo ŋut gwok; ŋat ame yalo Obaŋa i mot me moko kwon, rom a aroma i ŋat ame mio remo a puno; ŋat ame waŋo luban acalo mot me po, rom aroma i ŋat ame woro cal jok. Jo magi doŋ oyero yogi kengi, olelo gigi alela i timgi me ipyeda. An daŋ abino yero can aber pirgi, abino yero en ame miogi lworo; pien i kare ame rik alwoŋogi, ŋattoro mom ogamo doga, i kare ame akobo kedgi, ŋattoro mom owinyo koppa; cite gin otimo gin anen arac i nyima, oyero gin ame mom yomoro cunya.” Winy wunu kop a Rwot, wun jo ame komwu myel koppere, “Omegowu ame dagowu, ame oryemowu oko teŋe pi nyiŋa, doŋ okobo ni, ‘Koŋ iwek doŋ mi kwogo baŋ Rwot’; me koŋ onen yomcunywu; ento gin en ame obino miyo lewic makogi. Koŋ iwiny wunu wo ame tye i boma, dwonnoro ame ya i ot Obaŋa! Dwon Rwot ennono, ame tye ka culo okworrere. “Ame mom ru owinyo rem me nywal, en te nywal gire oko; kun rem me nywal mom ru ogoe, en onywalo atin awobi. Ŋa ame yam koŋ owinyo kodi ginnono? Ŋa ame yam koŋ oneno kodi ginnono? Obino nywalo lobo i nino acel keken? Otwero nywalo rok luŋ i dakika moro keken? Pien i kare ame rem pwod ogoo Cion agoa, en te nywalo itino mere oko. Itamo ni abino tero jona i kare me nywal eka mom ate miyo nywalogi? An ame amio jo nywal abino cego ot nyodo oko? Rwot okobo. “Lel wunu karacel kede Jerucalem, cunywu bed ayom pire, wun jo luŋ ame imare wunu; lel wunu karacel kede yomcuny, wun jo luŋ ame kumo pire; me idot wunu tuno mere kwe cunywu, calo atin ame doto tuno a tottere, me imwonyomwonyo wunu cakkere i yomcuny, pien cak dwoŋ meicel i kore.” Pien Rwot okobo ni, “Nen ba, abino nyayo kuc baŋe calo kulo, kede lonyo orok calo kulo ame opoŋ meicel; ibino dote wunu, en te tiŋowu i laŋete, dok ibino tuko wunu i tyene. Abino kweyo cunywu, calo atin ame tottere kweo cunye; cunywu bino kwe i Jerucalem Ibino neno wunu, cunywu te bedo yom; komwu bino bedo ayot calo lum a pwod alot alota; mannono bino miyo iŋeo wunu ni, Rwot konyo jo ame tio pire ento akemo mere tye i kom okworrere. “Pien ba, Rwot bino bino i mac, kun gadigadi mere luŋ dwir calo yamo ajuru; me coro akemo mere i komgi i twon iniga adwoŋ meicel, dok kun jukogi i leb mac. Pien Rwot bino ŋolli jo kop me mac, en bino tyeko kop a jo luŋ i pala lweny; jo ame Rwot bino neko bino bedo apol.” Rwot okobo ni, “Jo ame olonyere kengi me wot i potti, kun lubo dano acel ame tye i dyere, ame camo riŋo puno kede gigi mogo me kwer kede oyoo, gin luŋ obino tum karacel awaŋe acel.” “Pien an aŋeo ticgi kede tamgi, an abino bino me coko rok luŋ ame kobo leb apapat karacel; gin bino bino te bino neno kwogona, an abino keto anyut i akinagi. Iyi akinagi kannono, abino cwayo jo ame obwot baŋ orok, baŋ Tarcic, Put kede Lud, ame gin jo ame wao akud atero, baŋ Tubal kede Javan, baŋ lobo ame tye i dog nam kannabor, ame mom ru owinyo kite a nyiŋa orwo kede, akadi neno kwogona; gin bino rabo pi kwogona i akina orok. Gin bino kelo omegowu i akina rok luŋ acalo mot me yalo Rwot, kun okelogi aguragura, gadigadi, alago, kanne kede inaga, naka i kidina acil ame tye i Jerucalem, kite ame jo Icrael kela kede motgi me moko kwon i tabo acil, i ot a Rwot. Dok jo ocele i akinagi abino kwanyo me bedo olamdog kede jo Levi.” “Pien kite acalo polo anyen kede lobo anyen ame abino tiyo, bino ri i nyima, Ikwaewu kede nyiŋwu daŋ bino ri kittono. Por dwe, i por dwe, cabit, i cabit, jo luŋ bino i nyima me wora. “Gin te wot me wot neno kom jo oto ame yam onwoŋo ojem i koma; pien kudi i kuno mom to, mac iye mom daŋ to, gin doŋ bino bedo gin ame yi jo luŋ okwero.” Man kop a Rwot okobo. Man kop a Jeremia wot a Kilikia, ame en dano acel i akina olamdog ame onwoŋo tye i Anatot i lobo a jo Benjamin. Kop a Rwot obino baŋe i mwaka me apar wie adek me loc abaka Yocia wot Amon, abaka me Juda. Kop a Rwot obino baŋe daŋ i kare abaka Yekoyakim wot a Yocia, abaka me Juda naka iyi agikki mwaka me apar wie acel me loc a Jedekia wot a Yocia, abaka me Juda, tuno kede naka i dwe me abic ame otero iye jo i Jerucalem oko iyi opii. I kare-nono kop a Rwot obino baŋa kun kobba ni, Kun mom ru acako keti iyi totti, onwoŋo doŋ an aŋei, dok kun mom ru onywali, onwoŋo doŋ akweri oko pi tiyo ticca; ayeri me bedo adwarpiny baŋ rok ducu. An ate gamo ni, “Ama Rwot Obaŋa! Koŋ inen an mom aŋeo kop, pien pwod atidi. Cite Rwot dok te gamo ni, “Kur ikob ni, ‘An pwod atidi;’ pien ibino wot baŋ jo luŋ ame abino cwayi baŋgi, dok gin ame abino kobo ni ikobi, ibino gire kobo, Kur ilworgi, pien an atye kedi me konyi, man kop a Rwot.” Rwot te ru cwayo ciŋe gudo doga, te kobba ni, “Nen ba, doŋ atyeko keto koppa i dogi, Nen, tin doŋ atyeko keti me rabo kop Obaŋa baŋ rok apapat kede baŋ loc apapat, me puto kede mu ko amuka, me balo kede reto piny, me gero kede pito.” Kop a Rwot te bino baŋa kun penya ni, “Jeremia ineno ŋo?” An ate gamo ni, “Atye ka neno yao.” Rwot te kobba ni, “Ineno kara aber, pien atye ka neno koppa, amito ni ti ticcere cobi.” Kop a Rwot dok te dok bino baŋa tyen me aryo, kun penya ni, “Ineno ŋo?” An ate gamo ni, “Aneno gulu ame pii tye awalo i yie, kun doge owirre teŋe i tutuŋ anyarodi.” Rwot te kobba ni, “Gin arac bino ya i tutuŋ anyarodi ame bino poto i kom jo luŋ ame bedo i lobo. Nen ba, an atye ka lwoŋo atekere apapat ame tye i te loc luŋ ame tye tutuŋ anyarodi, Rwot okobo; gin luŋ obino bino, ŋat acel acel i akinagi te keto kom loccere i doggola me Jerucalem, kun oguro cellere oko me lweny i kome, me lweny i kom boma luŋ me Juda. Dok an abino ŋolo kop i kom jo me Juda pi timgi arac luŋ me kwera. Gin doŋ obedo waŋo odok a ŋwece kur baŋ obaŋe mogo ocele, kun daŋ oworo gin ame gin ame gin otio kede ciŋgi. Cite yin, myero idi cunyi iya malo me ikobbigi kop ducu ame abino ciki kede. Myero cunyi kur pot pirgi, naka mio abalo cunyi i nyimgi kuno. Nen ba, an tin abino miyo ibedo calo cel ame gero atek meicel, acalo pagi me nyonyo, dok acalo apama me mola, ame twero cuŋ i nyim jo me lobo man ducu, i ciŋ obakki me Juda oloccere, olamdoggere, karacel kede jo luŋ ame bedo i lobo man. Gin bino lweny kedi, cite mom obino loyi, pien an atye kedi me lari.” Man kop a Rwot ikokome. Kop a Rwot obino baŋa kun kobba ni, “Wot irab kop man baŋ jo me Jerucalem, me gin owiny. Rwot okobo ni, Atye ka poyo kite a rik imiye kede baŋa i kare me tinoni, marri onwoŋo calo me atera, kite ame rik ibedo luba kede tim, i lobo a mom ocoo iye kotimoro, Icrael rik onwoŋo cil pi Rwot, acalo cam ogeo cek ame en okao. Jo luŋ ame camo odoko obal, gin arac poto i komgi, Man kop a Rwot ikokome.” Wun jo me ot a Yakobo, winy wunu kop a Rwot, kede jo luŋ me doggola a jo Icrael. Rwot okobo ni, “Gin aŋo arac ame rik kwariwu oneno atimo, ame te miyo weka oko, ote wot abor abora keda-ni, ote bedo lubo gigi mogo a konygi mom-mi? ame te miyogi daŋ doko jo a konygi mom-mi? Mom daŋ doŋ openyo ni, ‘Rwot kara tye kwene ba, Rwot ame okwanyowa i lobo Miciri, ame obedo telowa i tim, lobo otal dok bur dwon iye, lobo ame otwo dok acol icuc, i lobo ame ŋattoro mom onwoŋo bea iye, kan ame jo mom bedo iye?’ Rik ate kelowu i lobo ame ceko cam atek meicel, me iyomoro wunu cunywu i cam iye kede jami luŋ abeco ame tye iye. Cite i kare ame wun ituno wunu iye, wun ite balo wunu lobo-nono oko, te loko wunu gira doko gin me kwer. Olamdog daŋ mom openyo ni, ‘Rwot kara tye kwene?’ Wegi cik daŋ onwoŋo mom nea, oloc daŋ onwoŋo tye turo cik i koma, odwarpiny doŋ tyeto tyet nyiŋ Baal, ote bedo lubo gigi mogo ame konygi mom. “Mannono omio pwod atye ka penyowu, Rwot okobo, abino penyo naka ikwaewu. Koŋ idokoro nam ikat i dog kulo me Kupuro me inen, on yo koŋ icwa dano i Kedar me wot ŋi aber, koŋ inen ka ce kodi ginnono tye. Koŋ tye rokkoro ame oloko obaŋegi kadi bed gin woro obaŋa a mom obaŋa i kome Cite jona oloko kwogogi oko pi gin ame konnyere mom. Yin polo, wur kop man, koyo myero onyere i komi, kun lworo ociri oko, man kop a Rwot okobo, pien jona doŋ otyeko timo bal aryo areco, gin doŋ otyeko weka oko, kun an abedo akoŋ me pii me kwo, gin doŋ oluŋyo kunyo piigi kengi, piigi-nono obedo pii ame balle oko ame pii kare ocele dwono oko. “Icrael obedo opii bo? En obedo amiro ame onywalo paco bo? Kara en dok odoko lee me acama i yore aŋo? Eŋatu doŋ kok apol ata i kome, okok i dwongi aloŋo meicel. Omio lobo mere doŋ odoŋ oko nono, boma iye luŋ doŋ odoko wi obur, jo moro doŋ mom tye iye. Medo i kom mannono, jo Mempic kede jo Tapanac, doŋ otuco wii oko. Mom yin en ikelo can man i komi keni, pi weko Rwot Obaŋani, i kare ame yam en obedo telowu i tim? Kara am an doŋ ŋo ame inwoŋo wunu pi wot i Miciri, me wot mato pii i kulo Nail? Onyo ŋo ame inwoŋo wunu pi wot i Accuria, me wot mato pii i kulo Epurate? Balwu en ame bino pwodowu, gak weko Obaŋa en ame bino kela can i komwu me pwonyowu. Myero inen dok iŋe ni gin arac kede gin a kelo cwercuny, pi wun me weko Rwot Obaŋawu; lworo i kom Obaŋa mom doŋ tye i cunywu. Man en kop ame Rwot Obaŋa me mony okobo. “Ituro wunu kol oko ŋutwu con meicel, icodo wunu daŋ nyor ame otweowu kede oko; ite kobo wunu ni, ‘Mom abino tic pire.’ Aco kono i wi kidi luŋ aluŋa, kede i te yen obuŋere ducu, ibedo ryebere wunu piny calo alaya. Aco an yam onwoŋo apitowu me bedo olok amittere, ame nyige luŋ beco odoco. Kara dok ilokere wunu i yore aŋo ba, en ame doŋ idoko wunu olok me tim oko-ni? Kadi bed ilwok komwu i cabun agwa meicel, kadi ilwokere wunu i cabun ame bwo mere dwoŋ nwoŋo pwod atye ka neno cila me balwu. Man kop ame Rwot Obaŋa okobo. Itwero kobo wunu nino ni, ‘Wan giwa mom ojebere i bal, mom giwa obedo lubo Baal’? Koŋ inen yo ame ibedo lubo wunu i luŋ ŋe gin ame ibedo wunu timo, icalo wunu atin inaga ame lubo yo mere kene, calo kana me tim ame doŋ ona gire me bedo i tim, ame wao yamo i wume kun nwoŋo amito twon! Ŋa ame twero juko miti mere? Jo luŋ ame yenye myero kur ol, gin bino nwoŋe i dwe mere i kome, Gwok tyeni kur iwot aboŋo amuk, gwok dwoni kur two oko pi oryo pii. Cite yin giri ikobo ni, ‘Konnyere gire mom, pien an doŋ amaro obaŋe ame wele, dok daŋ abino medde lubogi.’ “Kite acalo lewic mako akwo ka omako, lewic daŋ bino mako jo me ot Icrael kittono; gin ikomgi, obakkigi kede olocgi, olamdoggi kede odwarpingi, ame kobbi yat ni, ‘Yin ibedo pappa,’ dok kobbi gweŋ ni, ‘Yin en inywala’, pien gin doŋ oloka ŋegi, mom nyimgi, Ento i kare me can gin dokokobo ni, ‘Ya malo me ilarwa!’ Kara obaŋewu-nono tye kwene obaŋewu ame wun i komwu itimo wunu-nono? Koŋ gin oya malo ka ce otwero larowu, i kare ame itye wunu kede peko; pien kite ame bomawu pol kede, obaŋewu daŋ pol kittono, wun jo Juda. Rwot okobo ni, Piŋo kara itye ka ŋuŋura i koma? Wun luŋ ijem wunu i koma. Pwodo itinowu ame yam apwodo mom okonyo kadi acel, kitegi mom oyikere; pala romowu en oneko odwarpinywu, calo eŋatu ame owor. Doŋ ba, wun jo me kare man, winy wunu kop a Rwot. An onwoŋo abedo calo tim bo baŋ jo Icrael? Onyo twon lobo moro acol icuc? Kara doŋ piŋo jona kobo ni, ‘Wan giwa obino bedo kite ame yiwa mito, wan mom dok obino dwogo baŋi?’ Wi nyako twero wil i rukkere me kwogo, onyo wi atera twera wil i gomici mere me nyom? Ento wi jona doŋ owil i koma oko, pi kare alac ame mom doŋ romo kwannere. “Wun doŋ odiro meicel yenyo dyere, me timo tim me alaya! Omio kadi baŋ mon areco, wun ipwonyogi me lubo kitewu. Dok bono ame iruko i komi, remo ocan a mom i bal tye iye; yam mom inwonogi otye oturo ot acalo okwo, kadi amannono, i kom kop magi luŋ, yin ikobo ni, ‘Balla moro mom; akemo mere gire doŋ otyeko ya oko i koma.’ Nen ba, abino ŋolli kop, pi kobo ni, ‘An gira mom atimo bal.’ Piŋo kara itye ka wot atata, idok tuŋŋi kede tuŋŋi! Jo Miciri bino miyo lewic maki, kite ame rik jo Acuria omio lewic omaki kede, Ibino ya i kuno me dwogo cen, kun ikwako wi i, pien Rwot otyeko kwero ja ame igeno-nono, dok gin pe twero miyo ibedo aber.” Rwot okobo ni, “Ka ce lo moro oryemo cege oko, dako-nono daŋ te wot oko, en te wot gero lo ocele, cware me agege-ni pwod dok bino dok baŋe? Mom bino miyo lobo-nono balle miecel? Yin doŋ ityeko timo tim me alaya i co apol, pwod dok iromo dwogo baŋa? Koŋ itiŋ waŋi malo me inen wi tur kan a tye nono ca! Kara ka kwene i kuno ame mom obuto kedi? I bedo kuro jo ame bu to kedi i ŋet yo ducu, calo Arab ame k uro jo i dye tim ata, Yin doŋ ityeko balo lobo oko, kede timmi me alaya alaya. Mannono en omio ojuko anaka kot oko, kot me cwir daŋ doŋ mom cwe; cite yin pwod imoro waŋi amora i tim me alaya, lewic-gu mom maki. Mom aman yin ilwoŋa ni, ‘Pappa, yin ibedo awota cakere itinona, Akemo bino make nakanaka, cunye bino waŋ naka i agikki?’ Nen ba, yin ikobo, cite yin doŋ ityeko timo kit bal luŋ ame itwero.” I kare abaka Yocia, Rwot okobba ni, “Ineno gin ame Icrael ame mom gene obino timo, kite ame en obedo wot kede i kabedo luŋ obedo kidikidi, kede i te yen obuŋere luŋ, te bedo timo tim me alaya kuno? An atamo ni ka en doŋ otyeko timo magi-nono luŋ, en bino dwogo baŋa: cite en naka mom odwogo aminnere Juda ame agoba-ni te daŋ neno timmere-nono. Kadi bed Juda oneno ni Icrael ame mom genne-ca obedo timo tim me alaya i nyima, en gin omio ate ryeme oko i nyima kun daŋ amie waraga me aryemo; cite en Juda ame agoba-ni mom obedo kede lworo moro, en daŋ owoto te wot timo tim me alaya alaya. Pien tim me alaya onwoŋo obedo gin ame yot meicel baŋe, omio en daŋ obalo lobo oko, kun bedo cot i gweŋe kede yen. Kadi bed magi luŋ otimere cite aminnere Juda ame ago ba-ca mom omedo i dwogo cen i cunye ducu, ento odwogo i nyima kede kome keken kun cunye tye kan ocele, man kop a Rwot okobo.” Rwot dok te kobba ni, “Icrael ame mom genne-ni ballere nok ame kato me a Juda ame agoba-ni, Wot irab kop magi tutuŋ anyarodi, kun ikobo ni, Dwog ba cen, yin Icrael ame mom igenne-ni, man kop a Rwot. Mom abino neni i wan me akemo pien en akica, man kop a Rwot. Akemo mom bino bedo maka nakanaka, Myero iye ni ibalo, myero iŋe ni ijem i kom Rwot Obaŋani i te wot miye keni baŋ obaŋe orok i te yen obuŋere ducu, dok myero iye ni mom ibedo winyo koppa, man kop a Rwot; Dwog wunu cen, wun itino ame mom genne, pien an en abedo adwoŋwu; abino kwanyowu, kun akwanyo dano acel i boma moro-ni, ŋat ocele i doggola moro-ni, eka ate kelowu naka i Cion. “ ‘Abino miyowu okwat ame yomoro cunya, ame bino pitowu i ŋec kede niaŋ. I kare ame doŋ inya imedde wunu i lobo, i kare-naca, Rwot okobo, gin mom dok bino kobo kop i kom canduk me cikere a Rwot. Mom dok bino ŋiŋŋo i cuny dano moro, mom daŋ obino poyo, mom daŋ ibino yiko wunu en ocele. I kare-naca obino lwoŋo Jerucalem ni obedo kom loc a Rwot, rok luŋ bino cokere iye kuno, i nyim Rwot i Jerucalem, mom dok obino medde bedo apala, kun olubo tam arac i cunygi. I kare-naca jo me ot a Juda bino ribere oko i jo me ot Icrael, eka gin luŋ karacel ote ya i lobo ame tye tutuŋ anyarodi, ote wot i lobo ame rik omio baŋ kwarigi me alea me bedo meggi. Abedo tamo kite ame abino ketowu kede i akina itinorra, kun miogi lobo ame yomoro cunywu, lobo me alea aber ame kato me a rok ocele luŋ. Abedo tamo ni wun ibino lwoŋa wunu ru an abedo Papawu, dok mom ibino weko wunu lubba. Ateteni, dako a mom geno cware weko cware oko, amannono daŋ wun onwoŋo mom igena wunu, wun jo me ot Icrael, man kop a Rwot.’ ” Dwon ŋattoro ame akok tye awinyere i wi tur kannaler malo, ikwae me Icrael tye kok kun obako doggi, pien otyeko gak oko i yoogi, wigi otyeko wil oko i kom Rwot Obaŋagi. “Dwog wunu doŋ baŋa, wun itino a mom tye kede gen, an abino caŋowu oko i kom genwu a mom tye-nono. “Nen ba, wan obino baŋi, pien yin ibedo Rwot Obaŋawa. Ateteni, mom tye konnyoro ame romo nwoŋere i wi kidi malo, kan ame jo wo iye i wi kiddinono, Ateteni, larre a jo Icrael, tye baŋ Rwot Obaŋawa. “Cakere i kare me tinowa gin me lewic obedo camo ginnoro luŋ ame yam kwariwa obedo yelle kedgi, dyegigi kede rommigi, awobegi kede anyiragi. Wek doŋ obut piny i twon lewic ame otye kede-nono, me timmogo me lewic ame obedo timo owum komwa oko; pien wan otimo bal i nyim Rwot Obaŋawa karacel kede kwariwa daŋ cakere i kare me tinowa tuno kede naka tin. Wan okwero winyo dwon Rwot Obaŋawa.” “Ka ce ilokere, idwogo wunu baŋa, wun jo Icrael Rwot okobo, myero idwog wunu baŋa. Ka ce ikwanyo wunu gin me kwer ame itimo wunu oko i nyima, eka mom ite bedo wiwira wunu awira, dok daŋ ka ikwoŋo wunu ni, ‘Kite ame Rwot tye kede kwo-ni,’ myero ikwoŋ wunu kun ilubo wunu ŋolo kop atira, kede cuny atira bino miyo rok luŋ nwoŋo gum baŋe, dok daŋ obino nwoŋo kwogo pire.” Rwot okobo baŋ jo me Juda kede jo ame bedo i Jerucalem ni, “Pur wunu pottiwu a yam mom ipuro wunu, kur dok ipit camwu i akina okuto, Myero ilire wunu kenwu baŋ Rwot, lirre wunu i cunywu, wun jo me Juda kede jo me Jerucalem, naka mio akemo maka, te waŋ calo man, pi gin arac ame itimo wunu, mac me akemona-nono te wan ame ŋattoro mom romo neko.” Rab wunu kop i Juda, rab wunu i Jerucalem, kun ikobo wunu ni, “Kut wunu apel rom lobo luŋ, red wunu i dwon aloŋo kun ikobo wunu ni, ‘Cokere wunu me owot wunu, i boma mogo ame ocecelo atek wok-ca!’ Lub wunu yo ame woto i Cion. Lar wunu komwu, kur igal wunu, pien amito kela gin arac i tutuŋ anyarodi, kede twon can adwoŋ meicel ame bino tyeko piny oko. Eŋatu doŋ odonyo oko i ka pono mere, anek rok luŋ doŋ okato oko kannaler; oya doŋ oko i kabedo mere; me miyo lobowu doko wi obur, bomawu luŋ doŋ bino balle oko, kun jo moro mom tye ame bedo iye. Pi mannono ba, twe wunu boŋo kwero cola i pyerwu, kum wunu kun ikok wunu; pien akemo a Rwot agwa meicel, mom oya i komwa kadi acel.” “Rwot okobo ni, i nino-nono tekcuny bino rwenyo oko i baŋ obakki kede rwodegi; olamdog bino baŋere oko, kun odwarpiny tye ka wuro meicel.” An ate kobo ni, “Ama Rwot Obaŋa, koŋ inen, yin gire doŋ ibwolo lwak man ateteni, karacel kede jo me Jerucalem, kun ikobbigi ni, ‘Ibino bedo wunu aber i kuc’; aco kun pala romo doŋ otuno oko i kwogi ikokome.” I kare-naca obino te kobbi lwak man karacel kede Jerucalem ni, “Yamo alyet tye oya i tim i tur malo kan ame yattoro mom iye kun kodo dok tutuŋ baŋ lwak a Rwot, mom me pyetogi calo kal, onyo me yeko gin arac oko i komgi; Yamo ame abino-nono ger okato kare. Mannono an Rwot ikokoma en a doŋ a tye aŋolo kop i kom jonanono.” Nen ba, tye ka bino calo pol, gadigadi lwennyere luŋ calo yamo ajuru; aguragura mere dwir kato cur oko. Can i wiwa doi, pien oto otum wunu doŋ oko! Wun jo me Jerucalem, myero ilwok wunu cunywu oko i timo tim areco, me wek ilarre wunu, Tamwu areco-nogo bino medde bedo i cunywu naka awene ba? Pien dwon dano moro tye a rabo kop i lobo me Dan, kun tye ka tuco gin arac ame otye ka timo i wi kiddi me Epraim. Kwenyoro rok luŋ ni en tye ka bino, kobbi jo Jerucalem dan ni, “Okwor tye ka bino i lobo abor meicel; gin tye ka woo kun oredo atek i kom boma me Juda. Oguro doŋ Juda oko calo jo ame tye ka kuro poto, pien Juda onwoŋo ojem oko kome.” Man kop a Rwot ikokome. Kitewu kede gin ame itimo wunu luŋ, en ame okelo can man i komwu Mannono en can ame oketo i komwu, cannere kec atek; otuno naka iyi itaowu ikokome. Rem doŋ ocira oko! Rem ocira oko! A waŋo koma calo mac! Oii doi Kannoro luŋ oguro itaona arem okato kare! Itaona agoye bala amito cot oko; mom aromo liŋ mot kadi acel; pien atye ka winyo koko apel, kede duru me lweny. Can tye ka lubere agwa agwa tere i tere, lobo luŋ aluŋa doŋ odoko wi obur, Kemana luŋ doŋ obalo oko oyot meicel, aco icika ote muko i dakika moro keken, Abino bedo neno lweny pi kare a rom mene, kun atye ka winyo koko apel? “Pien jona miŋ, mom onea kadi acel; gin otino ame wigi mom tio, mom otye kede ŋeccoro kadi acel.” Kare ame atiŋo waŋa aneno lobo, aneno ni oballe, odoko wi obur aboŋo ginnoro iye; dok acer kede dwe ame tye malo i polo, Dok ate tino waŋa neno kiddi, aneno gin luŋ otye ka yeŋere ayeŋa, kun kan obedo kidikidi luŋ tye awirre tuŋŋi i tuŋŋi. Dok ate tino waŋa lworo piny, mom ate neno ŋattoro kadi acel, winy luŋ ame twarre malo onwoŋo oriŋo oko tene. Ate dok ŋiyo lobo, nen, kan onwoŋo ceko cem meicel, onwoŋo doŋ odoko bar otal ikaŋ, kun boma iye luŋ doŋ obabalo oko, i nyim Rwot ame akemo onwoŋo omako. Pien Rwot okobo ni, “Lobo luŋ bino doŋ nono, cite mom abino miyo gik oko. Lobo bino kumo pi kop man, polo daŋ bino cido acol icuc; pien an doŋ atyeko kobo gin ame ayikere me timo, Mom aloko tamma, mom daŋ abino dok cen.” Jo i boma luŋ bino riŋo oko, ka owinyo woo a wegi aguragura kede wegi atero, obino donyo i buŋ acol meicel, mogo bino yito i wi kidi malo, jo luŋ bino weko boma doŋ nono, aboŋo ŋattoro ame bedo iyigi. Yin boma ame doŋ idoko wi oburri, pi ŋo kara itye ka ruko boŋo arema? Piŋo itye ka ruko ruk me kwogo ame otio i jabu, kun ijujuko waŋi kede raŋi ame nen amwonya? Itye ka yelle nono me yiko komi, cogi ame mari tye ka cayi acaa; otye ka yenyo yo me neki aneka. Atyeko winyo koko ame calo me a dako ame arem me nywal, kun tye i rem calo dako ame anywallo atinnere me kao. Cion tye ka koko kun mito weo, kun ryeo ciŋe malo, kobo ni, “Ato doi! Nen atye ka wille i nyim onek jo.” Wun jo me Jerucalem, koŋ iriŋ iloŋ wunu dye yowu luŋ, Ŋoloro wunu kabedo luŋ me inen wunu. Koŋ inen wunu kabedo luŋ ame yam jo cato iye jami, koŋ inen ka ce itwero neno wunu dano moro iye, ame ŋolo kop kakare, ame temo bedo ŋat a genne, me atim Jerucalem kica, Kadi bed gin kobo ni, “Kite ame Rwot tye kwo-ni, pwod dokokwoŋo kwon me gobagoba. Ama Rwot, yin mom imito neno ateni? Yin doŋ ityeko goyogi, cite gin mom owinyo rem; yin ityekogi oko, cite mom oye yikere. Waŋgi ocwiny kato gwen oko, okwero gigi ŋut oko.” An dok ate kobo ni, “Magi obedo ocan keken, wigi mom tio kadi acel, pien mom oŋeo yo a Rwot, ame en cik Obaŋagi. Abino wot baŋ jo adoŋo ame tye kede twer, abino wot kop kedgi, pien gin oŋeo yo a Rwot, ame en cik Obaŋagi.” Cite anwoŋo ni gin luŋ orom aroma, gin luŋ oturo loc oko i ŋutgi, ocodo-gu nyor ame otweogi kede oko. Mannono omio eŋatu ame bino ya i buŋ bino nekogi oko, epet me tim bino tyekogi oko. Kwac bino kuro bomagi luŋ akura, ŋattoro keken ame bino ya iye me wot oko, kwac bino kikilo atitino; pien balgi doŋ dwon meicel, dok timgi me ya oko i baŋ Obaŋa tye ka medde ameda. “Atwero timowu kica i yore aŋo? Itinowu doŋ otyeko weka oko, otye doŋ ka kwon i nyiŋ gigi mogo ame mom obedo Obaŋa. Ka ce apitogi oyeŋ, ocako cot atata ociro karacel me wot i wudi olaya. Onwoŋo opitogi oyeŋ atek, calo twon aguragura ame opito aber, inwono ŋat acel acel tye ka koko dako a wadgi. Mom atwero keto can i komgi pi timgi-nono? Dok mom aromo culo kworra i kom rok acalo man? Man kop ame Rwot okobo. “Wot ibe i akina olokkere me ibabalo oko, cite kur ibal luŋ aluŋa: lwelwero jangi oko, en mom obedo me a Rwot. Pien jo me ot Icrael kede jo me ot a Juda, onwoŋo mom doŋ genna kadi acel. Man kop a Rwot.” Gin obedo kobo kop me goba i kom Rwot, dok daŋ okobo ni, “En gire mom bino timo ginnoro; cannoro gire mom bino poto i komwa, mom daŋ obino neno pala romo, kec daŋ mom bino poto baŋwa. Odwarpiny luŋ bino lokere doko yamo, kun kopporo doŋ mom i cunygi, Mannono en gin ame obino timo i komgi.” Mannono omio Rwot Obaŋa me mony okobo ni, “Pien gin okobo kop man, nen ba, aloko koppa ame tye i dogi adoko mac, kun aloko jo man doko yen, mac bino wanogi oko. Nen ba, wun jo me ot Icrael, an akelo rokkoro i komwu i kannabor. Man kop a Rwot. Rokkere obedo rok atek meicel, dok obedo rok acon meicel, rok ame wun mom iŋeo wunu lebgi, dok mom iromo niaŋ wunu kop ame gin kobo. Wegi aterogi mom bao piny nono, gin luŋ obedo twoni jo atek meicel. Gin bino camo kalwu ame ikaa wunu, kede kit cam ocele luŋ, gin bino ca mo anyirawu kede awobewu; gin bino camo dyegiwu, rommiwu kede dokwu, obino camo olokwu kede odurowu; bomawu luŋ ame oceoelo ame igeno wunu wok-ku, gin abino babalo oko i pala romo.” Rwot okobo ni, “Akadi i kare naca daŋ mom abino tyekowu odoco. Ka ce jowu bino kobo ni, ‘Piŋo kara Rwot Obaŋawa otimo jami man luŋ i koo, mwa?’ wun ibino kobbegi wunu ni, ‘Kite acalo iweka wunu ite cako wunu tiyi obaŋe mogo ocele, amannono daŋ ibino tiyi wunu rok ocele i lobo a mom obedo megwu.’ ” Kob kop man baŋ jo me ot a Yakobo, rab koppere i Juda ni, “Winy wunu kop man, wun jo amiŋ ame wiwu mom tio-ni, ame tye kede waŋgi, cite mom neno ginnoro, ame tye i yitgi, cite mom winyo kop. Rwot openyowu ni, Wun mom ilwora wunu ce? Komwu mom myel i nyima bo? Aketo kwoyo obedo gin ame poko pii i nam, ame obedo wan apokki arac ame mom romo kate atwal; kadi bed pii i nam tagere rom kwene, mom romo loyo kadi acel, kadi pii mere mor rom mene, mom romo kato i wie malo. Cite jo man opala meicel, dok cunygi mito jem keken; olokkere tene, owe ka doŋ oko. Mom daŋ okobo i cunygi ni, ‘Myero obed kede lworo i kom Rwot Obaŋawa, ame mio kot cwe i kare mere ikome, kot me iporo kede kot me cwir, dok gwoko pirwa kare luŋ ame otyeko moko me kayo kac.’ Balwu omio magi luŋ doŋ oya oko i baŋwu, balwu omio gin aber doŋ mom tye baŋwu. Pien jo ame timo tim areco tye i akina jona, obedo kiyo piny calo jo ame adwaro winy. G in ociko owicgi; owicgi-nono te mako jo. Udigi opoŋ iye kop me erupe, calo winy ame opoŋ dita; mannono omio doŋ odoko jo adoŋo ame olony, doŋ ocwe ame komgi lilia alili; Ka gikgi mom i timo gin arac, mom oŋolo kop atira kadi acel, mom okonyo itino kic, atot ya obed aber, dok kop ajo ame piny oloo mom opido atira, Mom aromo keto can i komgi pi timgi-nono? dok mom aromo culo kworra i kom rok acalo man? Man kop a Rwot okobo.” Gin me awura meicel ame mio jo lworo, doŋ otyeko timere oko i lobo. Odwarpiny doŋ tyeto kop me goba keken, olamdog daŋ doŋ timo gin ame yigi mito keken; jona daŋ mito ni bed timere amannono, kara doŋ ibino timo wunu ŋo ka ce agikki piny doŋ otuno? Wun jo me Jerucalem, riŋ ilar wunu komwu, ya wunu oko i Jerucalem! Kut wunu apel i Tekoa, tin wunu bendera i Bet-akerem; pien can tye obino i tutuŋ anyarodi, cannere pek meicel. Wun jo me Cion, ibino wunu bedo calo elet amwonya meicel, me cem a leyi. Okwat i rommigi kede dyegigi bino bino me lweny i kome, obino guro kemagi ogure dyere, obino kwayo lim kuno, kun ŋat man kwao mere kene. “Yik lweny me ere oko i kome, ya wunu oko, me owot ocob mony i kome i cuny iceŋ!” “Can i wiwa doi, pien cen doŋ olenere oko, tipo me otyeno doŋ bocoboco!” “Ya wunu me ocob wunu doŋ mony i kome dyewor, me obabalo wunu kabedo mere oko,” Pien Rwot me mony okobo ni, “Toŋ wunu yennere oko piny; tor wunu lobo oman Jerucalem irit. Man en boma ame myero ket can i kome; pien ginnoro aber mom iye kono ka wuno jo keken. Kite acalo wan akoŋ gwoko pii mere bedo acil, Jerucalem daŋ gwoko timmere areco kittono; Tim me byemi kede nek mom rwenyo a mom owinyere iye, two kede awano kare luŋ mom rwenyo i waŋa. Wun jo me Jerucalem, myero iwek wunu kodi tim man bedi, naka mio abino ya awekowu oko; naka mio idoko wunu wi obur, lobo ame jo moro mom bedo iye.” Rwot me mony okobo ni, “Jo Icrael ame odoŋ obino kwanyo oko ducu, calo nyig olok ame opwono oko i jaŋe. Doŋ myero ilar jo ame iromo laro, calo apur ame depo nyig olokkere.” An ate gamo ni, “Kara abino kwenyoro ŋa ba, me gin owiny? Koŋ inen yitgi doŋ odiŋ oko, mom doŋ oromo winyo koppa, nen ba, koppa a Rwot baŋgi, gin oŋalo aŋala, mom daŋ oketo cunygi iye kadi acel. Mannono omio akemo a Rwot doŋ oola oko; aol doŋ oko i kunno cunya. Cor doŋ akemoni-nono i kom itino ame tye i dye gudo, kede i kom awo be ame ocokere karacel daŋ. Co kede mon daŋ obino kwanyo otero oko, jo ame mwakagi doŋ bup kede jo oti atek ateka.” Udigi obino miyo baŋ jo ocele, pottigi karacel kede mongi daŋ; pien abino ryeyo ciŋa aketo can i kom jo ame bedo i lobo-ni. Man kop ame Rwot okobo. “Pien cakere i kom jo atino tuno kede i kom jo adoŋo ŋat acel acel tye ame owor awora i nwoŋo lim i yore a mom atira; dok cakere i kom odwarpiny tuno kede i kom olamdog, ŋat acel acel mom genne kadi acel i tic ame en tio, Otye ka cego bur i kom jona a mom ocaŋo aber kun okobo ni, ‘Kuc, kuc’, aco kono kuccoro mom, Lewic mom makogi ka otimo tim me kwer. Lewic gire mom makogi kadi acel, waŋgi nwan ka otimo tim me lewic. Pi mannono, gin daŋ obino poto calo jo ame doŋ otyeko poto, kare ame abino keto can i komgi.” Man kop ame Rwot okobo. Rwot okobo ni, “Cuŋ wunu kan ame yo akakara iye, me inen wunu, dok ipeny wunu yo aconnege, peny wunu kan ame yo aber tye iye, ite lubo wunu, me inwoŋ wunu wee kede kuc i cunywu, Cite gin ote gamo ni, ‘Wan giwa mom obino lubo.’ Aketo okur-piny me kurowu, kun akobo ni, ‘Winy wunu koko apel!’ Cite gin te gamo ni, ‘Wan giwa mom obino winyo koko apel.’ Doŋ pi mannono, winy wunu ba, wun rok luŋ, dok iŋe wunu, wun lwak, gin ame bino timere i komgi, Winy ba, yin lobo, atye ka kelo gin arac i kom jo man, adwoggi me gin arac ame yam gin obedo timo, pien gin mom obedo winyo koppa, kun daŋ okwero cikka oko. Piŋo kara otye ka kella odok luban i lobo Ceba, kede lum alim ame ŋwece kur i lobo ame tye kannabor? Mom abino gamo mot awaŋawu luŋ, akadi kit mot luŋ daŋ mom yomoro cunya. Pi mannono Rwot okobo ni, ‘Nen ba, abino cibo i nyim jo man gin ame dipogi te miyogi tagere; papo karacel kede awobe, owotegi kede jo ame bedo i ŋetgi, gin luŋ obino to oko.’ ” Rwot okobo ni, “Nen ba, rokkoro tye ame abino i tutuŋ anyarodi, rok atek ame obakki mere boco meicel, tye ka yubere me bino lweny i kannabor meicel. Omako aterogi kede tonigi i ciŋgi, oger meicel, daŋ dok mom otye kede kica i cunygi, woogi calo pii i nam ame amor; gin oriŋo aguragura, kun otye ame oterre oko pi lweny, gin abino me lweny i komwu wun jo Cion!” Wan doŋ otyeko winyo kop magi i komgi, ciŋwa te kwe oko inoŋ ame mom romo timo ginnoro, cunywa doŋ tye ka cwer atek meicel, otye i rem ame rom aroma i dako amerem me nywal ogoo. Kur iwot wunu kadi acel i dye bar, kur daŋ iwot wunu i dye yo, pien okwor tye i pala me romo, lworo doŋ ogurowa tuŋŋi i tuŋŋi. Doŋ ba, wun jona, twe wunu boŋo cola i pyerwu, dok daŋ myero iŋeŋena wunu i buru; Kok wunu atek kite ame itwero koko wunu kede, ka atin ame onywalo acel keken oto: kok wunu koko agwa meicel pien otyek jo abino i komwa oyot meicel. “Atyeko keti i akina jona me bedo ŋat ame ŋiogi dok temogi, me nje dok inwoŋ kite ame gin bedo kede. Gin luŋ, gin opala ame omito jem keken, owoto kede jo ame maro kwoto jo; gin otek calo mola kede nyonyo, gin luŋ otimo tim me buyo jo. Mac i ka tet bukoro atek dok alyet meicel, maccono miyo nyonyo meye oko, cite ŋat ame aliyo-nono yelle nono, pien jo areco mom okwanyo ocwao teŋe. Jo bino lwoŋogi ni ryal ame otyeko kwero, pien Rwot okwerogi oko.” Kop a Rwot ame rik obino baŋ Jeremia kobo ni, “Cuŋ i doggola me ot a Rwot, me irab kop man kuno, kun ikobo ni, Wun jo luŋ me Juda ame donyo i doggola magi me wot woro Rwot, winy wunu kop a Rwot. Rwot me mony, ame obedo Obaŋa a jo Icrael okobo ni, Yik wunu kitewu kede ginnoro luŋ ame itimo wunu, an abino weko ibedo wunu i lobo man. Kur ibed geno wunu kop me gobagoba ame otye ka kobbiwu, ni, ‘Man ot a Rwot, man ot a Rwot, man ot a Rwot.’ “Pien ka ce iyiko wunu kitewu kede ginnoro luŋ ame itimo wunu ateteni, kun iŋolo wunu kop atira i akinawu kenwu kenwu, ka ce mom ibedo wuno wunu jo ame bedo i akinawu, itino kic, onyo mon to, kun mom daŋ ionyo wunu remo a mom i bal i kabedo man, dok ka ce mom ibedo woro wunu obaŋa mogo ocele ame twero miyo can poto i komwu, mannono bino miyo awekowu ibedo wunu i kabedo man, i lobo ame rik doŋ atyeko miyo con baŋ kwariwu me bedo megi atwal. “Nen ba, itye wunu ka geno koppogo me go ba ame konygi mom. Ibino kwala wunu kwo, neko jo, codo cot, kwono kwoŋ me gobagoba, yalo Baal i gin ame ŋwece kur, kun daŋ itye wunu ka woro obaŋa mogo ocele ame yam mom iŋeo wunu, eka dok ite bino wunu cun i nyima i ot man, ame olwoŋo i nyiŋa, eka ite kobo wunu ni, ‘Wan doŋ olarowa oko!’ Ento kun itye wunu ka medde itimo tim man me kwer? Iloko wunu ot man ame olwoŋo kede nyiŋa-ni odoko aduu oyak bo? Nen ba, an Rwot ikoma doŋ atyeko neno ni tye kittono. Aman myero iwot wunu i kabedona ame rik tye i Cilo, kan ame rik koŋ ageo miyo bedo kan ame owora iye, me iwot inen wunu gin ame atyeko ti mo kuno pi tim areco a jona Icrael otimo. Aman doŋ ba, pien itimo wunu jami magi luŋ, dok i kare ame abedo kop kedwu tere i tere, wun mom iwinyo wunu koppa, i kare ame alwonowu, mom igamo wunu doga, man kop ame Rwot okobo, mannono omio abino timo i kom ot man ame olwoŋo i nyiŋa, dok ame igeno wunu-ni, kede i kom kabedo man ame rik amiowu kede kwariwu, gin ame atimo i kom Cilo. Abino ryemowu oko i nyima, kite ame aryemo kede jo turwu ame obedo ikwae Epraim oko i nyima. “Aco yin Jeremia ba, myero kur ikwa pi jo man, kur daŋ itiŋ dwoni malo ni ikoko onyo ikwaya pirgi, kur daŋ item bako dogi baŋa pirgi, pien mom gira atye ka ci ko yita baŋi. Mom ce itye ka neno gin ame gin tye ka timo i boma luŋ me Juda kede i dye yo ame tye i Jerucalem? Itinogi rao yen, papo te kuto kede mac, kun mongi tye ka jebo moko me tedo ogati pi abaka a dako me polo; dok daŋ oyalo-gu obaŋa mogo ocele kede motgi me ama ta, me gin omi akemo maka, An en ame gin tye ka roko doge-nono? Man peny ame Rwot openyo, Mom gin i komgi en a doŋ obaŋere oko-nono? Mannono omio Rwot Obaŋa okobo ni, Nen ba, abino coro akemona kede inigana piny i kom kabedo man, i kom dano kede i kom leyi, i kom yen ame tye i tim kede i kom cam ame ocek i potti; maccere bino waŋ ame mom oromo neko.” Rwot me mony, ame obedo Obaŋa a jo Icrael okobo ni, “Med wunu mot awaŋawu i kom motwu ocele mege, me icam wunu riŋo. Pien i nino ame rik akwanyo kwariwu iye i lobo me Miciri, mom rik akobbigi kopporo i kom mot awaŋa kede mot ocele mege, mom daŋ acikogi pire. Ento rik acikogi ni, ‘Winy wunu koppa, an abino bedo Obaŋawu, dok wunu ibino bedo wunu jona; dok daŋ myero ilub wunu yo luŋ ame acikowu me lubo, me ibed wunu aber kun itye wunu kede kuc.’ Cite gin rik mom oye lubo gin ame aciko, dok mom ociko yitgi me winyo koppa, cite obedo lubo gin ame cunygi mito, kun daŋ olubo gin ame yigi mito ame opoŋ i ti mo gin arac; ote bedo wot kun odok adoka cen, aboŋo wot anyim. Cakere i nino ame kwariwu oya kede i lobo me Miciri tuno kede tin, abedo cwayo baŋgi omirona ame obedo odwarpiny tere i tere, nino i nino; cite gin gigi mom oye winyo koppa, akadi yabo yitgi me winyo koppa; ento ŋutgi en ame oluŋyo bedo anwaŋ. Gin te bedo timo gigi mogo areco ame kato kwarigi oko. “Doŋ yin myero iwot ikob kop magi luŋ baŋgi, cite gin gigi mom obino winyo koppi. Ibino lwoŋogi, cite gin mom obino gamo dogi. Yin doŋ ibino kobbigi ni, ‘Man en rok ame rik okwero winyo kop a Rwot Obaŋagi, dok daŋ rik mom oye ni yik balgi; kop me ateni doŋ orwenyo oko i baŋgi: mom doŋ winyere kadi acel i doggi.’ Lyel wunu yer wiwu me ibol wunu oko teŋe, cak woo wunu i koko i kabedo ame odoŋ nono i wi kiddi malo, pien Rwot doŋ otyeko kwero lwak man ame akemo omake i komgi-ni, dok otyeko daŋ doŋ wekogi oko! “Pien jo Juda doŋ otyeko timo gin arac i nyima, dokoketo timgi me kwer i ot ame olwoŋo kede nyiŋa, me balo oko, man kop ame Rwot okobo. Gin otyeko gero kabedo mogo me woro jogi i luŋ a wot a Kinom ame olwoŋo ni Topet, me waŋo awobegi kede anyiragi i mac, ame an gira rik mom acikogi pire daŋ rik mom atamo pire kadi acel. Pi mannono ba, nino tye abino, ame mom dok obino medo lwoŋo kabedo-nono ni Topet, onyo ni luŋ a wot a Kinom, cite ni luŋ me neko jo, pien obino yiko jo i Topet, pien kabedo moro ocele nwoŋo doŋ mom, man kop a Rwot. Kom jo oto bino doko cam a winy ame twarre malo, kede me a leyi ame bedo i lobo; mom tye ŋattoro ame bino ryemogi iye. Abino giko oko i boma luŋ me Juda kede i dye yo luŋ me Jerucalem woo me yomcuny a jo, yomcuny ame anyom tye kede karacel kede me atera; pien lobo-nono bino doko wi obur ame tye nono.” “I kare-naca, co go kom obakki me Juda, cogo kom rwode, cogo kom olamdog, cogo kom odwarpiny kede cogo kom jo luŋ ame onwoŋo bedo i Jerucalem obino kwanyo oko i lyel ote kela kannaler; ote canogi i wan cen, dwe kede lwak acer luŋ ame tye i po lo, ame rik onwoŋo gin omaro dok daŋ obedo woro i karegi, ame rik gin obedo lubo, obedo yenyo ote bedo woro. Mom dok obino coko co go komgi-nono, dok mom obino yiko. Gin doŋ bino bedo kittono acalo cet dyaŋ ame oradde i lobo, Jo luŋ me rok man arac-ci ame obwottege, ame tye i lobo apapat ame yam aryemogi aterogi iye, gin luŋ obino mito ni kono oto gigi oko akaka bedo kwo, man kop a Rwot me mony. “Yin Jeremia ibino kobo baŋgi ni Rwot okobo ni, Ka dano orette piny, mom dok ya malobo? Ka ce dano ogak oko, mom dok lokere dwogo cen bo? Kara doŋ ŋo omio jona tye ka wot awota teŋe, kun omedde ameda i dok cen? Olido goba ikiŋ ame mom omito weko, okwero gigi dwogo oko cen. Abedo tero yita me winyo kopgi, cite mom okobo kop ame tye atira; mom tye ŋattoro ame ŋut i gin arac ame etimo kun penyo ni, ‘Ŋo kara ame atimo?’ Ŋat acel acel tye ka lubo yo ame cunye mito, calo aguragura ame tye ka riŋo adwir i lweny. Kadi etolo ame bedo malo i polo daŋ ŋeo kare mere me dwogo, awele, aculegwec kede ogoro, gin daŋ gwoko kare me binogi; cite jona mom ŋeo kadi acel cik luŋ ame yam Rwot omio. “Kara doŋ itwero kobo niŋo ni, ‘Wan giwa oryek, dok cik a Rwot daŋ tye baŋwa?’ Cite, nen ba, opwony cik a mom genne otyeko loko cik a Rwot luŋ odoko goba i cocgi. Obino miyo lewic maka jo aryek, cunygi bino poto ote makogi oko; nen ba, gin otyeko kwero kop a Rwot, kara doŋ ryeko aŋonnono ame gin dok tye kede? Pi mannono ba, abino miyo mongi baŋ jo ocele, kede pottigi, baŋ jo oloogi i lweny, pien cakere i kom jo atino tuno kede i kom jo adoŋo, ŋat acel acel i akinagi owor awora inwoŋo lim i yore a mom atira; dok cakere i kom odwarpiny tuno kede i kom olamdog, ŋat acel acel mom genne kadi acel i tic ame en tio. Otye ka cego bur i kom jona ame mom ocano aber, kun okobo ni, ‘Kuc, kuc’, aco kono kuccoro mom. Lewic mom makogi ka otimo tim me kwer, Lewic gire mom makogi kadi acel, waŋgi nwaŋ ka otimo tim me lewic. Pi mannono, gin daŋ obino poto calo jo ame doŋ otyeko poto, kare ame abino keto can i komgi.” Man kop ame Rwot okobo. Rwot okobo ni, “I kare ame onwoŋo myero acokgi iye, ocalo doŋ olok ame nyige moro mom iye, onyo oduro ame nyige mom, ame pote-gu oony oko luŋ, gin ame yam amiogi luŋ doŋ mom i ciŋgi.” Ŋo omio wan otye ka bedo mot? Ocokere wunu karacel me owot wunu i boma mogo ame ocecelo i cel atek, me wot oto wunu doŋ kuno. Pien Rwot Obaŋawa doŋ otyeko keto can i komwa kun mito ni wan oto oko, omiowa pii ame kwir tye iye ni wan omati, pien wan otimo bal i kom Rwot. Obedo yenyo kuc, cite mom tye ginnoro aber ame nen, oyenyo kare ame myero ocan iye, cite oluŋyo cop ka i gin a kela lworo keken. “Weo me akemo okworwa winnyere i Dan twal, ka aguraguragi okok, lobo luŋ yeŋere, Gin obino me bino balo lobo odoco naka ginnoro luŋ iye, boma karacel kede jo luŋ ame bedo iye. Nen ba, atye ka cwayo twole i akinawu, ororo ame kwirrere mom romo geŋere kadi acel, twolle-nogo bino kayowu.” Man kop ame Rwot okobo. Can ame atye kede doŋ mom romo can kadi acel, atye i two me cwercuny adwoŋ meicel i cunya. Koŋ doŋ iwiny koko a jona, ame winnyere doŋ i kabedo luŋ ni, “Rwot doŋ mom i Cion bo? Abaka me Cion doŋ mom iye bo?” Rwot ame obedo abakagi te gamo ni, “Piŋo kara gin obedo roka me akemo maka i cal joggigi, kede cal jogi a rok ocele?” Jo doŋ tye ka kobo ni, “Nen kare me kac okato oko, oro daŋ doŋ ogik oko, cite mom ru olarowa.” Cunya tye ka rem calo bur tye iye, pien bur doŋ tye i kom jona, kumo pi can doŋ ocira oko, cunya doŋ tye ka poto atata, Yat me caŋo jo doŋ mom i Gilead be? Dakatalloro daŋ doŋ mom kuno Piŋo jona mom tye ka can i two ame gin tye kede? Kono onwoŋo wia obedo waŋ akon ame pii mollo iye, do ber, kun waŋa obedo akon ame pig wan cwer iye, kono akok dyeceŋ kede dyewor pi jona ame doŋ oneko oko. Kono onwoŋo tye kannoro i tim otwo ame en abedo iye, do ber, acalo gony ame jo awoto iyo twero bedo iye, kono aweko jona ate wot oko i tene baŋgi. Pien gin luŋ doŋ odoko ocod cot atata onywako wot kede wegi erupe. Ololoko doggi calo akud atero, goba en a doŋ onya i lobo akaka kop ateni; pien oya i bal okobere akoba i bal, kun daŋ mom doŋ onea, man kop a Rwot okobo. Ŋat acel acel myero gwokere i kom awottere, dok myet o kur kob ni ageno ominnere, pien ŋat acel acel tye ka i cuny me mayo awottere calo Yakobo, dok dano mito ka rimo piny i nyiŋ awottere. Ŋat acel acel bwolo ŋat ame bedo i ŋete, mom tye ŋattoro ame kobo kop ateni, opwonyo doŋ lebgi ikobo ka goba; otimo bal ame mom doŋ oromo ŋut kadi oyelle niŋo. Omedde doŋ ameda iwuno joo kop go ba keken adoŋ odure caa ducu, okwero doŋ neya oko, man kop a Rwot okobo. Mannono omio Rwot me mony okobo ni, “Nen ba, abino liyogi calo nyonyo ate dok temogi, kara ŋo ocele ame dok aromo timo pi jona? Lebgi calo atero ame kwir a neko jo tye i lebe, kobo goba keken, dog ŋat acel acel nwoŋo alebo kop am it amita baŋ awottere cite i cunye nwoŋo oyikere me yenyo yo me neko oko, An mom abino keto can i komgi pi gin ame gin otimo-nono dok mom atwero culo kworra i kom rok acalo man?” Man kop ame Rwot okobo. Jeremia okobo ni, “Myero doŋ acak kok pi kiddi dok akok daŋ pi elet ame tye tim, pien doŋ odoŋ nono, mom doŋ tye ŋattoro ame bea iye kuno, koko a dok daŋ mom doŋ winyere kuno; leyi kede winy doŋ oriŋo oko iye, owoto oko teŋe.” Rwot te kobo ni, “Abino miyo Jerucalem doko wi obur, kan ame ekwe bedo iye; abino miyo boma luŋ i Juda doŋ nono, aboŋo jo moro ame bedo i yigi.” Ŋa aryek meicel ame romo niaŋ kop man? Rwot okobo kop magi baŋ ŋa ce me en tuci? Piŋo kara lobo tye ame oballe oko dok odoŋ nono calo tim ame ŋattoro doŋ mom bea iye? Rwot te kobo ni, “Pien gin okwero winyo cikka ame amiogi, dok daŋ okwero winyo koppa dok mom olubo cikka i i gin ame gin tio, cite obedo gigi limo gin ame cunygi mito apala apa la, kun daŋ otye ka woro Baal kite ame kwarigi opwonyogi kede. Mannono omio Rwot me mony ame obedo Obaŋa a jo Icrael okobo ni ‘Nen ba, abino pito jo man kede gin akec, dok abino miyogi omato pii ame kwir tye iye. Abino keketogi i akina arok ame gin mom oŋeo dok kwarigi daŋ yam mom oŋeo; abino cwayo pala me lweny lubo yorgi, tuno ka atyekogi oko ducu.’ ” Rwot me mony okobo ni, “Koŋ itam wunu ite lwoŋo wunu mon ame ŋeo wer koko, me gin bin, lwoŋ wunu mon ame odiro bin. Gin myero ru bino oyotoyot, me obin owo i koko i wiwa, me pig waŋwa ony piny, kun opoko waŋwa opoŋ i pii. Koŋ iwiny koko tye ka winyere Cion, ni, ‘Doŋ otum oko doi! Twon lewic adwoŋ doŋ omakowa, pien wan oweko lobowa oko, dok kan ame wan obedo iye doŋ orereto oko piny.’ Wun mon, winy wunu kop a Rwot, yab wunu yitwu me iwiny wunu kop ame aya i doge; pwony wunu anyirawu kede koko, ŋat acel acel myero pwony wadgi i wer lyel. Pien to doŋ tye obino oko i diricawa luŋ, odonyo doŋ naka i udiwa adoŋo, kun tye ka neko itino oko i dye yo, naka awobe ame tye i dye boma. Rwot okobo ni, ‘Kom jo oto bino rette piny calo cet dyaŋ ame oradde i poto, calo kal ame okac oweko i poto, ame ŋattoro mom dok romo cokogi.’ ” Rwot okobo ni, “Dano aryek myero kur wakere pi ryeko ame en tye kede, Dano atek i lweny daŋ myero kur wakere pi teko mere-nono. Lo ame alonyo daŋ myero kur wakere pi lonyo mere. Cite ŋat ame wakere myero wakere pira, pien enian dok daŋ enea, kun eneo ni an a Rwot ame tye ka nyuto mar a mom lokere i lobo, ŋolo kop atira kede kite atira; pien jami magi en ame yomoro cunya. “Nen ba, kare tye abino ame abino keto can i kom jo ame kadi olirogi ocalo jo a mom oliro, Abino keto can i kom jo Miciri, jo Juda, jo Edom, jo Amon, jo Moab, karacel kede jo luŋ ame bedo i tim otwo ame mworo yer wigi oko doŋ acegocego, Pien rok magi luŋ mom olirre, dok jo me ot Icrael luŋ daŋ mom olirre cunygi.” Wun jo me ot Icrael, winy wunu kop ame Rwot okobo baŋwu. Rwot okobo ni, “Kur ipwony wunu lubo kite orok, dok cunywu myero kur poti ka ce ineno wunu anyuttogo me polo, kadi bed orok ka oneno cunygi poto pirgi. Pien kite orok mom obedo kit me ateni. Yat i buŋ otono oreto oko piny, apac te payo oko i gi-ticcere. Dano te kwoggo kome i ryal kede jabu, oguro ocumali i kome kede anyul me cun atek, me kur rette piny, Cal obaŋegi-nono calo pagi yat ame ocibo i poto okwer, me ryemo winyo i poto, mom oromo kop kadi acel, otiŋo-gu atiŋa, pien mom romo wot pirgi kengi. Kur ilworgi wunu kadi acel, pien mom otwero timo ginnoro arac, dok daŋ mom otwero timo ginnoro aber, Mom tye obaŋa moro ame cal kedi, Ama Rwot; yin idwon atek, dok nyiŋi daŋ dwon i teko. Ŋa kara ame mom myero olwori, Ama Abaka a rok apapat? Pien mannono en gin a myero tim baŋi, yin gire iromo alwora. Mom dok tye ŋattoro ame cal kedi, i akina oryeko luŋ me rok apapat, kadi ite locgi luŋ. Jogi luŋ ame ryek odoko omiŋo ame wigi mom tio, cal obaŋa ame otio i baoni twero pwonyogi i ginnoro? Cal jogigi okwogo kome i ryal ame okelo i Tarcic, kede jabu ame okelo i Upaj. Gin luŋ obedo gin ame opac otio, karacel kede tic otet jabu; rukgi rema kede en amaramar, gin luŋ obedo tic a jo ame odiro. Ento Rwot en obedo Obaŋa me ateni, en obedo Obaŋa ame kwo, Abaka ame perakino wan i wan. Ka akemo omako lobo yeŋere, dok mom tye rokkoro ame romo kanyo akemo mere.” Wun myero ikobbigi wunu ni, “Obaŋa ame rik mom otio polo kede lobo bino gire to oko i wi lobo piny i te polo kan.” Rwot gire en oketo lobo i teko mere, dok en oketo lobo omio ocuŋ atek pi ryeko mere, en omio polo opette kite ame tye kede-ni pi ŋeccere. Ka ce dwone omor, pii i polo twaggere meicel, dok en mio ekuna duny kun ya i agikki piny. En mio lutkot wil ka kot acwe, dok mio yamo kodo kun ya i ot kano jami mere. Jo luŋ miŋ atek, dok daŋ mom otye kede ŋeccoro, cal jogi ame apac opao en a dok mie lewic, pien cal jogigi-nono mom obedo obaŋa, dok mom daŋ otye kede kwo kadi acel. Konygi moro mom, otiogi me acaa keken; i kare ame Rwot bino keto iye can i komgi, gin luŋ obino to oko. Obaŋa a Yakobo mom calo jogi magi, pien en obedo ŋat oketo jami luŋ, dok jo Icrael oyero me bedo mere, nyiŋe obedo Rwot me mony. Wun ame doŋ ogurowu oko-ni, cok ba doŋ yecwu oko i lobo! Pien Rwot okobo ni, “Aman doŋ abino ryemo jo ame bedo i loboni oko, dok abino kela can i komgi, can ame gin romo winyo littere.” Jerucalem bino kok ni, “Can i wia doi pi awano ame owana kede-ni! Wan burra-nono rac okato kare. Ateteni, man doŋ can ikokome, kanyo mere mom yot!” Kemana doŋ otyeko balo oko, dok tol luŋ ame rik otwetweogi kede ococodo oko itinona doŋ oweka oko, gin luŋ doŋ omom. Mom tye ŋattoro ame dok romo guro kemana-nono, ŋattoro ame myero twe bono me icika mere doŋ mom. Man otimere pien okwat doŋ min amiŋa, mom doŋ openyo Rwot kadi acel, mannono omio gin mom otye aber, lim i ciŋgi-gu tye ka ket aketa. Winy kop, Nen kop tye abino! Twon ginnoro ame tye ka mor atek meicel, tye ka bino i tutuŋ anyarodi, me bino miyo boma luŋ ame tye Juda doŋ nono, bino doko kabuto ekwe. Ama Rwot, an gira aŋeo ni dano mom loo kwo mere kene; dano gire mom twero cun pire kene aboŋo yin, man mom twere baŋ dano ame temo loyo kwo mere kene, Ama Rwot, tim ber ipwonya, cite kur iwuna dok atek ateka, Kur ipwonya akemo, naka mio ineka oko atwal. Akemo myero omaki i kom rok a mom nei, kede i kom jo ame mom lwoŋo nyiŋi. Pien gin doŋ otyeko itino a Yakobo oko, olwero doŋ wie oko odoco, omio lobowa doŋ odoŋ oko nono. Rwot okobbi Jeremia ni, “Winy kop ame mako cikere man, ite kobo koppere baŋ jo Juda, kede jo ame bedo i Jerucalem. Yin ibino kobbigi ni, Rwot ame obedo Obaŋa a jo Icrael okobo ni, Dano a mom olubo kop ame tye i cikere man doŋ atyeko ceno oko. Man en cikere ame yam aciko kede kwariwu i kare ame akwanyogi i lobo me Miciri, ame rik tye acalo mac me buko nyonyo. Rik acikogi ni myero owiny koppa, dok daŋ otim ginnoro luŋ ame acikogi iye. Mannono bino miyogi obedo jona kun an abedo Obaŋagi, kun acobo ginnoro luŋ ame rik akwono me timo, me miyo kwariwu lobo ame akwoŋo me miyogi, lobo ame cak kede moo kic dwoŋ iye meicel, kite ame tye kede naka tin-ni.” An ate gamo ni, “Koŋ doŋ bed kittono, Ama Rwot.” Rwot dok te kobbi Jeremia ni, “Wot irab kop man luŋ i boma luŋ me Juda kede i dye yo luŋ me Jerucalem. Kobbigi ni myero owiny cikere a Rwot dok daŋ myero olubi. I kare ame akwanyo kwariwu i lobo me Miciri, rik acikogi atek meicel, kun akwenyorogi tere i tere, kadi naka i kare-ni pwod atye ka timo. Rik acikogi ni myero owiny koppa. Cite gin gigi rik mom oye lubo, kadi ciko yitgi me winyo koppa, ento ŋat acel acel i akinagi obedo wot apala apala kun timo gin arac ame tye i cunye. Mannono en omio acobo kop luŋ ame tye i cikere man i komgi, ame rik acikogi ni myero gin otim, cite mom ote ye timo.” Rwot dok te medo kobba ni, “Jo Juda kede jo ame bedo i Jerucalem tye ka jem i koma. Gin olokere odok cen i bal ame yam kwarigi okwero winyo koppa iye, ocako doŋ lubo obaŋe mogo ocele kun oworogi. Jo Icrael kede jo Juda otyeko turo cikerena kedgi, ame rik acikere kede i kwarigi. Mannono omio an Rwot atyeko moko me kela gin arac i komgi ame mom oromo bwot iye kadi acel, kadi bed gin okok baŋa, mom gira abino winyo kokogi. Jo Juda kede jo ame bedo i Jerucalem te doŋ wot kok baŋ obaŋe ame gin otye ka yalo kede gigi mogo a ŋwecgi kur, cite mom obino bedo kede twerroro me larogi i kare me peko. Pien obaŋawu doŋ pol calobomawu, wun jo Juda dok keno lam ame iketo wunu me ti mo tim me lewic doŋ pol calo yo ame tye i Jerucalem. Keno lam ame iketo wunu me wano odok a ŋwece kur me yalo Baal. “Pi mannono, yin Jeremia myero kur ikwaa pi jo-ni, kur daŋ iwot dwoni ni ikoko onyo ni ikwaya akakargi, pien mom abino ci ko yita me winyo kopgi ka ce olwona i kare ame gin tye kede peko. Kara doŋ twer aŋo ame jona tye kede i oda, kun gin otye ka timo tim arac kit man-ni? Kwon atata kede bedo yala i mot anola twero kwanyo can ame kono pot i komgi? Mannono daŋ rommiwu yeyea? Yam onwoŋo alwoŋowu ni, ‘Jeituni ame pote olot meicel, ame nyige onyak amwonya meicel’; ento abino waŋo pote oko i twon mac ame amor ager calo lutkot, dok abino lwero jaŋe daŋ oko luŋ. “An a Rwot me mony ame yam aketowu i lobo me Juda atyeko doŋ ko bo ni gin arac bino timere i komwu, pi bal ame jo me ot Icrael kede jo me ot a Juda otimo, kun oroka kede me akemo maka pi waŋo odok a ŋwece kur me yalo Baal.” Rwot oyabo kop man baŋa, ate ŋeyo; omio aŋeo gin arac ame gin oyikere me timo i koma, Cite an rik abedo calo atin romo ame mwol ame atero me aneka. An onwoŋo mom aŋeo ni gin tye ka poro kop arac i koma, kun okobo ni, “Otoŋ wunu yat onyak oret wunu oko piny, ojwer wunu tere oko i lobo a jo a pwod kwo, me wi lobo doŋ wil oko i kome.” Ama Rwot me mony, yin ame iŋolo kop atira, ame temo cuny dano kede tammere, tim ber icul kwor i komgi kun an aneno, pien an doŋ atyeko jalo kop luŋ i ciŋi. Pi mannono, omio Rwot otyeko ko bo kop i kom jo Anatot ame mito ŋe ko Jeremia, kun okobo ni, “Kur ibed rabo kop i nyiŋ Rwot kan, naka mio obino neki oko.” Mannono omio Rwot me mony okobo ni, “Nen ba, abino keto can i komgi, awobegi bino to kun oneko aneka i pala romo; dok kec daŋ bino neko itino awobegi kede anyiragi. Ŋattoro i akinagi gire mom bino bwot. Pien abino miyo gin arac poto i kom jo me Anatot, ka mwaka me keto can i komgi oromo.” Ama Rwot, an akelo kokona i nyimi, anwoŋo ni yin gire kiteni atira, an gira myero apid koppa i nyimi. Kara piŋo jo areco bedo aber kun daŋ olony? kara piŋo daŋ wegi erupe cobo tiyo gin ame cunygi mito timo? Yin en a yam ipito, eka lwitgi te cako donyo piny; odono te nyako nyiggi, Kare luŋ gin okobo kop aber komi, cite mom oparo piri i cunygi. Cite yin Rwot gire iŋea aber, yin inena dok daŋ itemo kite ame cunya tye kede i komi. Waagi acalo romo ame atero me aneka, ketgi kengi me kuro nino me nekogi. Lobowa bino bedo kumo pi kare a rom mene, kun lum iye luŋ otwo oko? Pien jo ame bedo i lobowa tye ka timo ka gin arac, omio leyi kede winy tye ka to oko, pien jo tye ka kobo ni, “En gire mom nenowa i kan ame wan obedo iye ducu.” Rwot okobo ni, “Jeremia we, ka ce iol oko i ŋwec kun i pyem icano, kara doŋ ŋwec pyem aguragura kono, ibino pyem iye niŋo? Ka ce irette piny i lobo ame kuc tye iye, kara doŋ ibino bedo nine i yen ame oculle acula ame tye i dog kulo me Jordan? Pien kadi omegoni ame gin jo me ot a pappi ikokome, gin daŋ otye ka timo tim me erupe i komi, gin daŋ otye ka kok atek me lweny kedi. Yin myero kur igen kopgi, kadi bed okobbi kop aber rom mene.” Rwot Obaŋa okobo ni, “An doŋ atyeko weko oda oko, atyeko doŋ kwero jona ame yam ayero ni bed mega, An doŋ awiro marra oko, amiogi i cin okworgi. Jona ame ayero me bedo mega olokere oko i koma, calo eŋatu ame tye i buŋ, omor doŋ amora i koko i koma, mannono omio an daŋ adagogi. Mom doŋ jona-nono i tuŋ baŋa calo itukere. Mom winy wadgi lweny kede kare luŋ? Wot icok leyi me tim luŋ, kelgi me obin oribere i cam karacel. Okwat apol apola obalo poto olokka oko, onyonyono dul lobo ame opokka i tyengi, omio doŋ dul lobona ame opokka ame onwoŋo yomoro cunya, odoko doŋ tim aler alera, Gin doŋ omio odoŋ yie nono, odoko doŋ tim ame cona acona. Kabedo ducu iye doŋ tye nono, cite mom tye dano moro ame paro. Tur luŋ ame tye i tim, otyek piny doŋ obino oko i komgi, pien pala me lweny a Rwot jwero odoco, cakere i but lobo tuŋcel tuno kede tuŋ ocele, mom tye ginnoro akwo ame tye i kuc, Gin ocoo bel, okuto en ame te luŋyo nyak, obedo tiyo tic atek kun ool atek, cite mom onwoŋo ginnoro iye. Lewic bino makogi i gin ame ocek i pottigi, pi akemo ager ame onwoŋo omako Rwot.” Rwot okobo kop i kom otim tim areco luŋ ame bedo i ŋet jo mere Icrael ame tye ka balo lobo ame onwoŋo emio baŋ jo mere, ni, “Nen ba, abino kwanyogi oko i lobo a jona Icrael, dok abino kwanyo jo Juda oko ak inagi. Kare ame doŋ atyeko kwanyogi oko, kica dok bino maka i komgi ate dwokogi i lobogi kun ŋat acel acel dok i lobo ame rik opokke. Dok icennere ka kare oromo ame gin doŋ opwonyo kite a jona kun okwoŋo kede nyiŋa ni, ‘Kite ame Rwot tye kede kwo-ni’, i kite ame rik opwonyo kede jona me kwoŋ i nyiŋ Baal, gin bino rubere oko i jona ote doko atek i akinagi. Cite ka rokkoro i akinagi mom bino winyo koppa, abino kwanyo rokkono oko i akinagi ate tyeko oko ducu, man kop ame Rwot okobo.” Rwot dok te kobba ni, “Wot iwil bono camanini ame oruko i pyer, me itwe i pyeri cite kur ilut i pii kadi acel.” An daŋ ate lubo kop a Rwot, ate wot wilobono-nono, ate daŋ bino ruko i pyera. Rwot dok te kobba tyen me aryo mere ni, “Gony doŋ bono-nono oko i pyeri, ya iwot i dog kulo Epurate, wot ikan oko kunu iyi akina kiddi ame obarre.” An daŋ ate ya wot, ate wot kano bono-nono i Epurate, kite ame Rwot ocika kede, Kare ame kare doŋ okato alalac. Rwot dok te kobba ni, “Aco dok i dok i dog kulo Epurate me iwot ikwany bono ame rik ikano kuno-ni,” An daŋ dok ate wot i dog kulo Epurate ate wot kunyo bono ca kwanyo oko i kan ame onwoŋo akano iye. Ate nwoŋo boŋo naca doŋ oballe oko ame konnyere doŋ mom. Rwot dok te kop keda ni, “Abino daŋ balo awaka a jo Juda kittono karacel kede wakere a Jerucalem ame dwon meicel wok-ki. Jo man areco ame dag winyo koppa-ni, ame olubo ka tam ame ya i cunygi apala apala, dok obedo lubo gigi obaŋe mogo ocele, kun owo rogi dok daŋ otio pirgi. Abino miyogi obedo calobone-ni ame konyere doŋ mom. Kite acalobono pyer moko i pyer, amannono daŋ onwoŋo amio jo luŋ me ot Icrael kede me ot a Juda omoko amoka i koma me gin obed jo ame mio nyiŋa bedo aber i akina rok ocele dok omio opaka dokoketo kwogo i koma, cite gin gigi okwero winyo koppa oko, man kop a Rwot.” Rwot okobbi Jeremia ni, “Yin ibino kobbigi ni, ‘Kono olok bino poŋ gulo acel acel, gin bino gamo koppi ni, “Ce ni wan mom oŋeo ni kono olok bino poŋ i gulo acel acel?” ’ Yin dok ite kobbigi ni, ‘Nen ba, Rwot okobo ni ebino miyo jo luŋ ame bedo i lobo-ni mer i kono. Obakki ame bedo i kom loc a Daudi, olamdog, odwarpiny, karacel kede jo luŋ me Jerucalem. Abino cacanyogi piny, kun acanyo ŋat acel acel i kom wadgi, odoŋe kede awobegi karacel. Mom abino paro, mom abino koyo ŋattoro dok kica mom bino maka kadi acel ni mom myero anekgi.’ ” Cik yitwu iwiny wunu, kur iwakere wunu, pien Rwot doŋ okobo. Mi wunu kwogo baŋ Rwot Obaŋawu, kun en mom ru omio piny ocido, ame tyenwu mom ru otwomere i ginnoro, colpiny ame tye i wi kiddi malo, kun en mom ru omio odoko twon mutu acol icuc en te loko lero-nono doko twon ginnoro acel odoco. Cite ka ce mom ibino winyo wunu koppa, abino kok liliŋ i cunya pi wakerewu, abino kok atek ame pig waŋa ryoryo tye aony piny aonya, pien jo a Rwot doŋ otero oko i opii. Kob baŋ abaka kede baŋ tottere ni, “Gin myero oya oko i komgi obin i kabedo i piny, pien kwogogi ame malo wokkono, doŋ oya oko i wigi obino piny. Boma a jo Negeb luŋ doŋ ocego oko, ame ŋattoro ame twero yabo mom tye, jo Juda luŋ doŋ otero oko acalo opii, gin luŋ aluŋa oterogi oko opii. “Koŋ itiŋ waŋi malo me inen, jo ame tye abino i tutuŋ anyarodi. Lwak jo apipim ame rik omiowuni kara aman tye kwene, lwak jowu abeco wok-ca? Kara ibino kobo ŋo ka ce jo ame yam yin ipwonyo i komi ni gin bin bed owotewu, doŋ tye ka loyowu? Rem mom bino ciri oko, calo dako amerem me nywal ogoo. Dok ka ikobo i cunyi ni, ‘Piŋo kara kodi gin-ni otimere i koma Otimere pien balli doŋ dwon atek meicel, omio naka boŋo i pyeri oelo oko, ame mato ayet a jo doŋ ociri oko.’ Dano me Eciopia twero loko del ko me, akadi kwac aliŋaliŋa mere? Ka ce amannono, wun ame iŋa wunu ti mo gin arac keken-ni daŋ itwero pwonyere wunu me timo gin aber. Abino keketowu atata calo cun kai, ame yamo ame kodo i tim kolo te tero oko, Man en gin ame doŋ atyeko pokki, megi ame doŋ atyeko pimo oko piri, pien wii owil oko i koma, ite luŋyo geno goba, man kop a Rwot okobo. An ikoma abino elobono i pyeri ate bolo i nyimi malo, komi me lweic te nen kannaler. Atyeko doŋ ŋe no gin me kwer ame itimo wunu, tim me cot kede koko me agoma yic, kede tim me alaya ame i bedo ti mo wunu i wi kiddi malo. Can i wi Jerucalem doi! Man kara bino bedo ri kare a rom mene ba, kun mom ru omiowu idoko wunu acil?” Man kop ame Rwot okobo baŋ Jeremia i kom can pii ame opoto i Juda, en okobo ni, “Juda tye ka kumo, dogcel iye luŋ tye ka tutura oko. Jo Juda luŋ obuto piny i lobo, i twon cwercuny adwoŋ meicel. Jo Jerucalem daŋ tye akok i dwon aloŋo meicel. Jo me awora iye tye ka cwayo oticgi me omo pii, gin woto kan ame pii awaa, ote lokere dok cen kun gi-geyo pii yigi nono, pien pii onwoŋo pe, Alee twodogi i twon lewic adwoŋ meicel, jo te dok paco ame owumo wigi oko. Pi lobo ame doŋ oballe oko, kite ame kot mom doŋ cwe kede i lobo, lewic doŋ tye ka mako opur meicel, owumo doŋ wigi awuma. Naka til i tim daŋ tye ka kwero itinogi ame pwod onywalo anyen, pien lum mom tye. Kana me tim doŋ ocuŋ i wi tur malo kan a lummoro mom iye, onamo doggi alac me mato yamo calo ekwe, waŋgi doŋ orwobere oko, pien lummoro me acamagi mom tye. “Kadi bed bal wa tye ka dotowa, Ama Rwot, tim ginnoro pi nyiŋi. Wan kare luŋ otye ka dok cen kun oya oko i baŋi, wan doŋ otyeko balo i nyimi, Ama Rwot, gen a jo Icrael tye komi, yin en ilarogi i kare ame peko opoto i komgi. Piŋo kara itye ibedo i lobowa calo orokkoro, onyo acalo dano ame woto awota ame tye ka yenyo kabuto? Piŋo ibedo calo dano ame wie ocuŋ oko, acalo lo atek meicel i lweny cite mom twero laro ŋattoro? Aco ka bedo amannono, yin Rwot gire itye i akinawa, dok otye ka lwoŋowa kede nyiŋi; kur iwekwa ba.” Rwot okobo kop i kom jo mere ni, “Gin gigi yam omaro wot kittono, mom oye bedo karacel. Mannono omio Rwot mom gamogi, aman en doŋ bino poyo balgi, te keto can i komgi pire.” Rwot rik te kobba ni, “Kur ikwa ni an akony lwak man obed aber. Kadi bed okany kec, cite an gira mom abino winyo kokogi; kadi bed oyala kede mot awaŋa kede mot me moko kwon, mom gira abino gamo kadi acel. Ento an abino nekogi oko i pala me romo, i kec kede too edeke.” An ate gamo ni, “Nen ba, Ama Rwot Obaŋa, odwarpiny onwoŋo okobbigi ni, ‘Mom ibino neno wunu pala lweny, kec mom bino poto i lobowu ento abino miyowu kuc ikokome i kabedo man.’ ” Rwot te kobba ni, “Odwarpiny tye ka rabo kop me goba kun otio kede nyiŋa: an gira onwoŋo mom acwaogi, mom daŋ acikogi, akadi kop kedgi. Gin otye ka rabbiwu pi anyuttogo me goba, kun otyeto tyet ame konnyere mom, dok obwolo jo abwola i tam ame tye i cunygi kengi. Mannono omio an a Rwot akobo kop i kom odwarpiny ame tye ka rabo kop kun otio i nyiŋa aco kun an mom acwaogi, ame kobo ni, ‘Pala lweny kede kec mom bino tuno i lobo man kadi acel’. Doŋ ba, pala lweny kede kec en abino neko kodi odwarpinnyono. Aco jo ame gin orabo koppono baŋgi, obino bologi oko i dye yo me Jerucalem, aboŋo ŋattoro ame myero yik komgi. Pala lweny kede kec en abino nekogi. Man bino timere i komgi gin luŋ anaka mongi, itinogi awobe kede anyira. Timgi areco-nono abino dwoko i komgi. “Yin ibino kobbigi kop man, ni, ‘Wek pig waŋa ony piny dyewor kede dyeceŋ, kur imi pig waŋa gik, pien jona ame amaro otyeko goyogi i twon bur adola arac meicel, owaŋo arac meicel, Ka ce awoto i dye tim, nen, anwoŋo kom jo oneko pala lweny dwoŋ atata! Dok ka awoto i boma, nen kite ame jo ame two two me kec pol kede! Pien odwarpiny kede olamdog tio ticgi i akina lwak luŋ, kun mom oŋeo ginnoro kadi acel.’ ” Yin doŋ ityeko kwero Juda odoco? Cunyi doŋ dag neno Cion? Kara igoowa pino ba, ame mom doŋ oromo can-ni? Obedo ka yenyo kuc, cite ginnoro aber mom nen, oyenyo kare ame myero ocaŋ iye cite ocop ka i gin ame ke lo lworo keken. Ama Rwot, doŋ oniaŋ balwa, naka bal a kwariwa daŋ, pien wan luŋ otimo bal i nyimi. Kur cunyi balle oko i komwa, pi gwoko nyiŋi, dok daŋ kur ikel lewic i kom kom kwogo me locci; poyo ba, me kur itur cikereni oko kedwa. Tye obaŋa moro i akina obaŋe orok, ame romo miyo kot cwe? Onyo ca polo twero miyo kot ŋido i lobo? Mom yin en itio magi luŋ, Ama Rwot Obaŋawa? Wan giwa ogeni, pien yin en itimo jami magi luŋ. Rwot te kobba ni, “Kadi bed Muca kede Camwiri rik ocuŋ i nyima, mom atwero loko cunya i kom jo man kadi acel. Cwagi oko teŋe i nyima; migi owot oko teŋe! Ka ce gin openyi ni, Kara owot kwene? Yin ibino gamo kopgi ni, Rwot okobo ni ba, Jo ame bino to i too edeke, to edeke bino neko, jo ame bino to i pala lweny, pala lweny bino neko, Jo ame kec bino neko, bino to i kec, jo ame obino tero oko i opii, bino wot i opii.” Rwot okobo ni, “Abino keto onek a kitegi papat aŋwen pirgi, abino miyo pala lweny nekogi, gwogi bino kikilogi atitino, eka winy ame twarre malo kede leyi me tim te bedo me camo komgi odoco. Dok abino miyogi odoko gin me kwer ame jo luŋ i wi podo bino lworogi, pi gin ame Manace wot a Kejekia otimo i Jerucalem. “Ŋa ame kica bino mako i komwu, wun jo me Jerucalem, onyo ŋa ame bino kumo pirwu? Kara ŋa ame doŋ bino cun, me penyo kite ame itye wunu kede? Rwot okobo ni, wun gire ityeko kwera wunu oko, kare luŋ itye ka dok wunu adoka cen; mannono omio doŋ atyeko ryeyo ciŋa, aryeo ciŋa i komi ate nekowu oko; aol doŋ oko i loko tamma i komwu. Abedo pyetowu kede odero i dogcel, ame tye i lobowu luŋ, Anekowu atyekowu oko, wun jona, cite mom iye wunu weko yo ame itye wunu ka lubo. Amio wei to omedde ameda i lobowu, ame kato kwoyo ame tye i dog nam oko, Aneko awobewu oko ame komgi pwod tek, amio totogi obedo i twon can apek meicel. Amio cwercuny kede lworo omakogi atura meicel. Dako ame onywalo itino abiro cunye ogem oko doŋ, mom twero nwoŋo yo moro me wee: baŋe, ceŋ poto ame piny pwod ler alera, lewic omio odoko ayot oko. Jo odoŋ luŋ abino miyo to i pala lweny, i nyim okworgi, Man kop a Rwot okobo.” Kwona tekkadi! Kara piŋo totta onywala? Nen kare luŋ atye ka lweny onyo daa i jo luŋ ame tye i lobo. Mom amio ŋattoro okoporo gira moro, an daŋ mom akoporo gi-a-ŋattoro, cite gin luŋ ocena acena. Ama Rwot, mi cen ame gin ocena kede-nono ocobere ka ce mom abedo timo gin ame tye atira i nyimi, dok daŋ mom abedo laro kop kedi pi okworra i kare ame gin onwoŋo tye kede peko, kede i kare ame gin tye i cwercuny! Dano twero turo nyonyo, nyonyo ame okelo i tutuŋ anyarodi karacel kede mola? “Lonyowu kede ginnoro luŋ ame ikano wunu abino miyo bedo me ayaka, kun mom oculo ginnoro pirgi, pi balwu, ame doŋ otyeko lal oromo lobowu luŋ, Abino miyo itio wunu pi okworwu i lobo ame mom iŋeo wunu, pien akemo doŋ omio mac ocako lyel oko, mac ame bino waŋowu nakanaka.” Jeremia te kobo ni, “Ama Rwot, yin gire iŋeo jami ducu; po pira dok ikonya daŋ, cul kwor i kom jo ame mito neka. Kadi bed idio cunyi wok, kur iwekgi oneka oko, ŋe ni atye ka kanyo acae okato kare piri, kare ame ikobo keda, awinyo koppi ducu, koppi te doko gin ame kella yomcuny, kun alelo atek meicel i cunya; pien jo tye ka lwoŋa kede nyiŋi, Ama Rwot Obaŋa me mony. Rik mom abedo balo kare i jo ocele kun anyero i yomcuny, mom daŋ abedo i yomcunyoro kadi acel. Abedo bedo kena, pien ciŋi onwoŋo tye i koma, yin onwoŋo iketo akemo i cunya. Piŋo kara rem ame atye kede mom tye ka gik, bur i koma daŋ doŋ mom twero can, okwero doŋ can oko? Yin ce doŋ imito bedda calo waŋ pii ame bwolo jo abwola, calo pii ame kare ocele two oko-ni ce?” Mannono omio Rwot okobo ni, “Ka ce ilokere idwogo baŋa, abino gami, ite dok bedo cuŋ i nyima kare luŋ. Ka ce ibedo kobo kop abeco ame konygi tye, kun mom ikobo kop ame konygi mom, abino miyi ikobo kop ame kono an akob i koma, Gin bino lokere bino baŋi, cite yin myero kur idok baŋgi. Abino keti ibedo baŋ jo man calo twon celloro, ame ocelo atek i mola, gin bino lweny kedi, cite mom obino loyi kadi acel, pien an atye kedi, me konyi kede me lari. Abino lari i cin otim tim areco, kede me lakoro yin i cin jo ame kica mom i cunygi.” Man kop a Rwot okobo. Rwot dok te k obba ni. “Yin mom ibino nyomo dako moro, dok mom ibino bedo atin awobi moro onyo nyako moro i kabedo man. Pien Rwot okobo kop i kom itino awobe kede itino anyira ame obino nywalo i kabedo man, karacel kede i kom totogi kede papagi ame onywalgi i lobo man. En okobo ni gin bino to i twon two moro arac meicel. Mom obino kokogi dok daŋ mom obino yiko komgi. Komgi bino radde atata i kabedo luŋ calo cet dyaŋ. Pala lweny kede kec en abino nekogi, eka winy ame twarre malo kede leyi me tim en ate camo komgi.” Pien Rwot okobo ni, “Kur idony i ot ame otye ka kumo iye, kur daŋ iwot kan ame jo akoko iye, kur daŋ ikum pirgi, pien doŋ atyeko kwanyo kucca oko i baŋ jo mera, kede marra a mom lokere, karacel kede kicana. Jo adoŋo kede jo atino bino to i lobo man; mom obino yiko komgi, mom obino kumo pirgi, dok ŋattoro mom bino ŋoŋolo kome kene onyo lyelo wie pirgi. Mom tye ŋattoro ame bino nywako cam i ŋat akumo, me kweyo cunye pi dano ame oto; Dok mom tye ŋattoro ame bino miyo ginnoro me amata ame nyuto cuny me kica baŋ dano ame pappere onyo tottere oto. Kur idony i ot ame jo tye acamo iye arama, me cam kedgi kede matte karacel kedgi.” Pien Rwot okobo ni, “Nen ba, abino giko woo luŋ me yomcuny i lobo man, i karewu, kun ineno wunu kede waŋwu. Dok abino giko daŋ dwon anyom kede dwon atera. “Kare ame doŋ ityeko kobo kop man luŋ baŋgi, eka gin te kobbi ni, ‘Piŋo kara Rwot orabo pi twoni tim magi areco ni me timere i komwa? Bal aŋo ce ame wan obalo? Bal aŋo ame wan obalo i kom Rwot Obaŋawa?’ Yin ibino gamo kopgi ni, ‘Pien kwariwu rik oweka oko, ote bedo lubo obaŋe mogo ocele, kun otio baŋgi dok oworogi. Gin rik oweka oko dok daŋ okwero winyo kede lubo cikka. Cite wun doŋ itimo wunu gin arac meicel ame kato kwariwu oko, pien ŋat acel acel i akinawu obedo bedo apala apala kun lubo tammere arac dok kun kwero winyo koppa oko. Mannono omio abino kwanyowu oko i lobo man, ate bolowu i lobo moro ame wun karacel kede kwariwu mom yam iŋeo wunu. Ibino tic wunu baŋ obaŋe mogo ocele kuno, kun itio wunu dyeceŋ kede dyewor, pien kica moro mom bino maka i komwu.’ “Pi mannono, nen ba, tye nino mogo ame tye abino, ame mom dok obino kobo iye ni, ‘Kite acalo Rwot tye kwo-ni, Rwot ame okwanyo jo Icrael i lobo me Miciri’, ento ni, ‘Kite acalo Rwot tye kwo-ni, Rwot ame okwanyo jo Icrael i lobo ame tye tutuŋ anyarodi karacel kede i lobo ocele luŋ ame rik en oryemogi oterogi iye,’ Rwot okobo. Pien abino dwoggogi cen i lobogi ame rik amio baŋ kwarigi.” Rwot okobo ni, “Nen, abino cwayo jo apol ame bino makogi calo rec; icennere dok abino cwayo jo apol ame bino dwarogi i kabedo luŋ calo leyi i wi kiddi i kabedo luŋ obedo kidikidi kede i akina lela obarre. Pien atye ka neno kite ame gin bedo kede luŋ; mom tye moro iye ame mom aneno, anaka balgi mom tye moro ame mom aneno. Abino culogi pi gin ame gin otimo arac kede pi balgi tye aryo, pien gin obalo lobona oko i cal jogigi ame rom aroma i kom jo oto nono. Gin doŋ otye ka timo timmogo me kwer adwoŋ okato kare i lobo ame obedo mega.” Ama Rwot, yin ame ibedo tekona kede twon celloro atek ame gwoka, kan ame alaro i kare ame atye i peko. Rok luŋ i kabedo ducu naka i agikki piny, gin luŋ obino baŋi, kun okobo ni, “Kwariwa yam oleo gigi mogo a konygi mom, gin me goba keken, gigi mogo ame konygi mom ame mom oromo nwoŋo iye ginnoro. Dano twero tiyo Obaŋa mere pire kene? Kodi ginnono mom obedo obaŋa kadi acel! “Mannono omio abino miyogi oŋeo icel doŋ keken, abino miyogi oŋeo tekona kede twerre, dok daŋ obino ŋeyo ni nyiŋa obedo Rwot.” “Bal a jo Juda doŋ otyeko coyo oko piny kede alam nyonyo; otyeko daŋ doŋ goro oko i cunygi kede alam daimon ame lebe bit, kede i kom tuŋ keno lamgi, kun itinogi po i kom keno lamgi kede jok a dako ame olwoŋo ni Acera ame ocibo i ŋet yen luŋ ame obuŋere, i kabedo luŋ ame obedo kidikidi, i wi kiddi luŋ ame tye i bar kannaler. Lonyowu kede gin ame ikano wunu abino doko me ayaka acalo gin me culo balwu ame doŋ itimo wunu i lobowu luŋ. Ibino kwanyo cinwu i kom ginnoro luŋ ame yam arruowu me bedo megwu, dok abino miyowu itio wunu baŋ okworwu i lobo ame mom iŋeo wunu, pien akemo doŋ omio pi ocako lyel oko, mac ame bino waŋowu nakanaka.” Rwot okobo ni, “Cen myero mak ŋat ame keto gennere i kom dano wadgi, ame mio dano wadgi doko ka jeŋere mere, ame cunye ya oko i geno Rwot. Kodi dano-nono rom aroma i yat a tye i tim, dok dano-nono mom neno ginnoro aber ame bino baŋe. Bino bedo i tim kan ame otwo ikaŋ, i lobo obedo kadokado, kan ame jo mom bedo iye. Dano ame geno Rwot, tye kede winyo, ame gennere luŋ tye i kom Rwot. Dano-nono rom aroma i yat ame opito kan a pii tye iye, ame cwalo lwite donyo piny i kulo, kare ame lyeto ocakere en mom bedo kede lworo moro, pote gire bedo adyaka kare luŋ, mom paro pi ceŋ ame ryeny kare luŋ aboŋo kot, pien en nyak gire kare ducu aboŋo gik.” Goba dwoŋ i cuny dano ame kato ginnoro luŋ, kom gin araccono en a doŋ obalo dano meicel; ŋa ame twero niaŋ gin ame tye i cuny dano? “An a Rwot aŋio tam a dano, dok atemo cuny dano, me miyo ŋat acel acel gin ame oporo kite mere, kun lubo adwoggi me gin ame en tio.” Calo atakara ame cokocoko itino ame en mom obeko i te bwome, ŋat ame lim nya i ciŋe i yore a mom atira, daŋ cal kittono; limmono ya oko i ciŋe i kare moro keken me kwo mere, i agikki en doko dano amiŋ. Kan ame oworo iye Obaŋawa calo kom me kwogo, ame ocuŋ malo i wi kidi cakere con i acakki. Ama Rwot, gen a jo Icrael tye i komi, jo luŋ ame ya oko i baŋi, lewic mako, jo luŋ ame ya oko i baŋi, nyiŋgi bino rwenyo oko acalo coc ame ocoo ikwo, pien gin otyeko weko Rwot oko, ame obedo akoŋ ame pii me kwo tye iye. Tim ber icana, me acaŋ doŋ oko, lara, me doŋ alare, pien an gira apaki yin keken. Nen jo bedo penya ni, “Kop a Rwot tono kara tye kwene? Koŋ imi bin ba!” An gira mom abedo diyi me cwayo gin arac, mom daŋ abedo mito nino ame can apek myero pot iye, yin gire iŋeo mannono aber; ginnoro luŋ ame an abedo kobo, onwoŋo yin iwinyo luŋ. Kur ibed gin ame mia lworo, yin ibedo kan ame an alaro i kare arac. Mi lewic mak jo ame wuna, ento kur imigi omi lewic maka, mi cunygi poti, cite kur imi cunya an poti, mi nino arac bin i komgi, nekgi oko ducu i yore arac meicel. Rwot okobo baŋa ni, “Wot icun i dogcel a Benjamin, ame abaka me Juda donyo kede i boma dok daŋ kato kede oko ka oya i boma, kede i dogcel luŋ me Jerucalem, eka ite kobo ni, ‘Winy wunu kop a Rwot wun obakki me Juda kede wun jo me Juda luŋ, kede jo luŋ ame bedo i Jerucalem ame bea i dogcel magi. Rwot okobo ni myero inen ni igwoko wunu kwowu, myero kur iye wunu yeccoro i nino me cabit, dok daŋ myero kur ikel wunu ginnoro i nino-nono kun ibeo wunu i dogcel me Jerucalem. Kur daŋ itin wunu ginnoro i udiwu iter wunu oko i nino me cabit, akadi tiyo ticcoro, cite myero ikwer wunu nino me cabit bed acil, kite ame rik aciko kede kwariwu. Kadi amannono, gin gigi rik mom owinyo, mom daŋ ociko yitgi me winyo koppa, cite omio ŋutgi obedo ka anwaŋ, me mom owiny dok daŋ mom ogam pwonnyoro. “ ‘Cite ka wun iwinyo wunu koppa, eka mom ite yeyo wunu yeccoro beo wunu kede i dogcel luŋ me boma man i cen cabit, cite kwero wunu i nino-nono obedo acil kun mom daŋ itio wunu iye ticcoro, mannono bino miyo obakki ame bino bedo i wi kom loc a Daudi beo i dogcel magi, kun oriŋo i gadigadi kede aguragura, obino donyo karacel kede rwodegi, kede jo luŋ me Juda karacel kede jo ame bedo i Jerucalem. Boma man doŋ luŋ jo bino bedo iye nakanaka. Jo bino bino kun oya i boma luŋ me Juda, kede kabedo luŋ ame oguro Jerucalem, i lobo me Cepela, i lobo obedo kidikidi, kede i Negeb, kun okelo mot awaŋa, kit mot ocele me amia baŋ Rwot, mot me moko kwon, odokkogo ame ŋwecgi kur, dok daŋ okelo mot me pwoyo Rwot i ot a Rwot. Cite ka mom iwinyo wunu koppa, mom igwoko wunu ceŋ me cabit obedo acil, cite iyeo wunu yec ite beo wunu kede i dogcel me Jerucalem i nino me cabit, abino moko mac i dogcellono luŋ, maccono te waŋo udi adoŋo me Jerucalem luŋ, maccono mom obino neko kadi acel.’ ” Man en kop ame Rwot okobo baŋ Jeremia, en okobo ni, “Jeremia ya iwot i ot acwe gulu, abino miyi iwinyo koppa i kare ame itye kuno.” An daŋ ate ya wot i ot acwe gulu, ate nwoŋo en tye acweyo gulu mere i kom okot me cweyo gulu mere. Gulu lobo ame en tye acweyo-nono te balle oko i kare ame en tye acweyo, en te nyonyobo oko, te t iyo i gin ocele kite ame en amito. Rwot te kobba ni, “Wun jo me ot Icrael, ce ni an mom aromo timowu kite ame acwe gulu otimo cae? Wun jo ot Icrael, myero iŋe wunu ni kite ame lobo tye kede i ciŋ acwe gulu, wun daŋ itye wunu kittono i ciŋa. Ka ce i kare moro an akobo kop i kom rokkoro onyo i kom loccoro ni mannono abino puto, abino turo ate tyeko odoco, doŋ ka ce rok ame akobo kop i komgi-nono bino weko lubo yo ame onwoijo otye ka lubo, abino weko timo gin arac ame onwoijo ayikere me timo i komgi. Dok ka ce i kare moro an akobo kop i kom rokkoro onyo i kom loccoro ni mannono an abino pito ate daŋ gero doki, ka ce rokkono te dok timo bal i nyima, kun mom owinyo koppa, cunya bino ya oko i kom gin aber ame onwoŋo ayikere me timo i komgi. Aman doŋ ba, yin myero i kobbi jo me Juda kede jo ame bedo i Jerucalem ni, an atye ka yiko gin arac pirgi, dok daŋ ayikere me keto can i komgi. Doŋ myero gin iye lokere, ŋat acel acel myero wek lubo yo arac ame yam elubo, dok myero iyik kwowu kede ticwu. “Cite gin te gamo ni, ‘Mannono kom konyere mom! Wan giwa obino lubo gin ame wan ikomwa otyeko yiko, dok ŋat acel acel daŋ bino timo tim me apala apala kite ame cunye tele kede’.” Mannono omio Rwot okobo ni, “Koŋ ipepenyo i akina orok, kodi timmo yam koŋ otimere kare moro? Jo Icrael ame amaro, otimo twon ginnoro ame iyiliyili meicel. Tye kare moro ame itwero onwoŋo pee orwenyo i wi kiddi me Lebanon, onyo kulo ame pii mere ŋic ame mol kun ya i wi kidi, twero two imek kare moro? Cite jona wigi owil oko i koma, owaŋo gin a ŋwece kur oyalo obaŋe mogo ocele. Orwenyo doŋ oko i yo ame otye ka lubo, oweko lubo yo acon oko, olubo doŋ yo mogo atitino, mom olubo yo gudo. Omio lobogi obedo gin ame mio jo lworo, obedo doŋ kan ame jo bino bedo cayo nakanaka kun ojwiye ka otuno iye. Ŋat acel acel ame beo iye bino bedo i twon lworo adwoŋ meicel, mio bedo yeno wie ayeŋa. Abino keketogi oko i nyim okworgi, calo apua ame yamo me tuŋ kide tye akolo. Abino nyuttigi ŋea, cite mom waŋa, i kare ame can opoto i komgi.” Gin te kobo ni, “Biye wunu, me obin opor wunu kop arac ikom Jeremia! Olamdog gire mom bino rwenyo i baŋwa i kare moro me pwonyowa, oryek o daŋ bino bedo miyowa tam, odwarpiny daŋ bino bedo rabbiwa kop. Biye wunu, obin opwode wunu i koppogo apek, mom myero omedde winyo koppere moro.” Jeremia te kwayo Obaŋa kun kobo ni, “Tim ber, Ama Rwot, iwiny kop ame atye ka kobo-ni, kede gin ame okworra tye ka kobo i koma. Gin aber oculo i gin arac bo? Aco koŋ inen, gin doŋ otyeko kunyo bur me kwanyo kwona. Po ba pi kite ame abedo cuŋ kede i nyimi kun akobo kop aber i komgi, me ikwany akemoni oko i komgi. Pi mannono myero imi kec nek itinogi; mi pala me romo nekgi, mi mongi doŋ nono aboŋo itino kede coggi. Mi two edeke nek coggi luŋ, kun awobegi ame pwod tino ococobo i pala romo i mony. Mi koko winyere i udigi, i kare ame icwao mony i komgi atura meicel! Pien gin doŋ otyeko kunyo bur me kwanyo kwona oko, dok daŋ ociko owic me maka. Kadi amannono, yin Rwot gire iŋeo ginnoro luŋ ame gin tye ka poro i koma me neka. Kur itimgi kica i balgi-nono, ti tic i komgi kare ame akemo omaki.” Rwot okobo ni, “Wot iwil cupa ame acwe gulo ocweo kede lobo, kwany odoŋe ame loo lwak kede olamdog oteggo mege ame ori i tic, wot i jonnono naka i luŋ a wot a Kinom, kun idonyo wunu i dogcel me boma ame olwoŋo ni Abaltak, ite kobo kop ame abino kobbi-ni luŋ kuno. Ibino kobo ni, ‘Winy wunu kop ame Rwot okobo wunu obakki me Juda kede wun jo luŋ ame bedo i Jerucalem. Rwot me mony ame obedo Obaŋa a jo Icrael okobo ni, Nen an akelo gin arac i kabedo man ame ŋat acel acel ame bino winyo i yitgi, yit bino bedo mor amora kare luŋ. Pien jo otyeko weka oko, gin obalo kabedo man i waŋo gin a ŋwece kur me yalo obaŋe mogo ocele, ame akadi gin ikomgi, akadi kwarigi, akadi obakkigi yam mom ŋeo. Pien gin doŋ omio remo a jo a mom i bal oony meicel i kabedo man, dok daŋ ogero ka woro Baal i wi kiddi malo ame owaŋo iye itinogi awobe me yalo Baal acalo mot awaŋagi, ame an gira rik mom acikogi pire dok daŋ rik mom atamo pire kadi acel, mom daŋ amio cikkoro pire, pi mannono, nen ba, Rwot okobo ni nino tye abino ame kabedo mom dok obino medo lwoŋo kabedo man ni Topet, onyo ni luŋ a wot a Kinom, cite ni luŋ me neko jo. Dok i kabedo man, en ame abino balo iye yik a jo Juda kede jo Jerucalem. Abino miyo pala lweny neko jogi iye i nyim okworgi, kede i ciŋ jo ame mito nekogi. Kom jogi oto bino doko cam a winy ame twarre malo kede me a leyi ame bedo i lobo. Abino miyo boma man bedo gin ame mio jo lworo, kun kan ame jo ka otuno iye jwiye ajwia, ŋat acel acel ame bedo iye lworo mako, te bedo jwiye ajwia pi can ame opoto iye. Abino miyogi ocamo kom itinogi kede me anyiragi, kun ŋat acel acel camo kom dano wadgi i kare ame mony ogurogi kede i kare ame otye kede peko, kan adiŋ meicel, ame nwoŋo okworgi kede jo ame mito nekogi okelo i komgi’. “I kare-nono en ame ibino neko iye cupa i nyim jo ame onwoŋo owoto kedi, eka ite kobbigi ni, ‘Rwot me mony okobo ni, Abino turo rok man kede boma man kittono, kite a dano turo kede gin ame ocweo i lobo ame mom dok romo yikere. Jo bino yiko komjogi oto i Topet, pien kannoro ocele bino bedo mom me yiko jo. Rwot okobo ni, abino timo kabedo man kittono, karacel kede jo ame bedo iye, kun amio kabedo man bedo calo Topet. Udi me Jerucalem kede udi obakki me Juda, udi luŋ ame onwoŋo owaŋo gin akur i wigi me yalo ginnoro luŋ ame tye i akina mony me polo, dok daŋ oonyo iye mot amata baŋ obaŋegi ocele mege, bino balle oko calo kabedo ame tye i Toper’.” Jeremia doŋ te ya oko i Topet, kan ame Rwot onwoŋo ocwae iye me wot rabo koppere, eka te bino cuŋ i dyekal me ot a Rwot, te kobbijo luŋ ame onwoŋo tye kuno ni, “Rwot me mony ame obedo Obaŋa a jo Icrael okobo ni, Nen ba, An akelo i kom boma man adwoŋ kede i kom boma atino mege luŋ ginnoro arac luŋ ame doŋ atyeko rabo pire i komgi, pien gin omio ŋutgi obedo anwaŋ, kun okwero winyo koppa oko.” I kare-nono Packur wot a Immer, ame rik obedo alamdog adwoŋŋere ame loo ot a Rwot, owinyo ka Jeremia rabo kop magi. Packur rik te goyo Jeremia adwarpiny i caa-nono cutu, te make tweye oko i kol, te kette malo i yi dogcel ame olwoŋo ni Dogcel a Benjamin ame bedo malo i ot a Rwot. Orwo mere, i kare ame Packur ogonyo Jeremia i kol, Jeremia okobbe ni, “Rwot gire mom lwoŋi ni Packur, cite en lwoŋi ni Lworo tuŋŋi i tuŋŋi. Pien Rwot okobo ni, Nen ba, abino miyo yin ibedo gin ame yin ikomi ilworo, dok owoteni daŋ lworo. Pala lweny okworgi bino nekogi kun yin ineno. Abino miyo jo Juda luŋ i cin abaka me Babulon, en bino terogi oko acalo opii i Babulon, bino nekogi i pala romo. Medo i kom mannono, abino miyo lonyo luŋ ame tye i bomawu, ago ba moro luŋ ame inwoŋo wunu ame tye iye ginnoro luŋ iye ame pirgi littiwu kede kit lonyo apapat ame obakki me Juda okano, abino miyogi luŋ i ciŋ okworgi, ame bino mako oko ote yako tero oko i Babulon. Doŋ yin Packur karacel kede jo luŋ ame bedo i odi, obino terowu oko luŋ acalo opii. Ibino wot wunu i Babulon kan ame ibino to wunu iye kuno, ote yiko komwu daŋ kuno, yin karacel kede owoteni ame ibedo rabbigi kop me gobagoba.” Ama Rwot, yin doŋ ibwola, omio jo daŋ obwola, Yin itek ikata oko, daŋ doŋ ityek o loya oko, Adoko doŋ gi-anyera a jo nino i nino, jo luŋ doŋ yeta ayeta, Pien ginnoro luŋ ame akobo, akobo i dwon aloŋo, kun aredo atek ateka ni, “Tim me byemi! Lobo daŋ oballe oko!” Pien kare luŋ ka atito kop a Rwot, jo nyera anyera dok daŋ ocao-gu acaa, Ka ce akobo ni, “Mom dok abino lwoŋo nyiŋ Rwot, onyo ni mom dok abino kobo kopporo i nyiŋe”, cunya onwoŋo tye iye ginnoro acalo mac, ame tye okanne oko kom cogona, mom doŋ aromo jukere kadi acel, mom atwero diyo cunya-nono. Pien awinyo jo apol apola tye amuŋo, Lworo doŋ tye i kabedo luŋ! Gin okobo ni, “Okwere wunu doŋ oko! Okwere wunu doŋ oko!” Man kop ame awinyo owotena a ceggi keda tye akobo, kun otye ka neno kite ame abino poto kede. Dok daŋ okobo ni, “Gwok onyo obino bwolle abwola, mannono twero miyowa omake oko, ote culo kworwa i kome.” Ento yin i Rwot itye keda acalo lo atek i lweny, ame olworo, mannono bino miyo jo ame tye ka wuna twomere, mom daŋ obino loya, Lewic bino makogi meicel, pien yikgi mom bino cobere. Lewicgi-nono bino ri nakanaka, wi jo mom bino wil iye. Ama Rwot me mony ame temo kite a dano ka atira, ame neno cuny dano kede tammere. Mia anen kite ame iculo kede kwor i kom okworra, pien an doŋ atyeko miye gira i ciŋ i, Wer wunu wer me pako Rwot, pake wunu ba! Pien otyeko doŋ laro kwo a jo ame piny oloo, i cin otim tim areco. Nino ame rik onywala iye kono orwenyo oko, do ber! Gummoro kono mom te bedo atwal, i nino ame totta onywala iyenono! Cen myero mak ŋat ame okelo amut aber baŋ pappa ni, “Onywalo atin awobi”, ame te miye bedo i yomcunynono. Dano-nono myero bed winyo koko odiko, kede duru i cuny dyeceŋ, pien en mom oneka ame pwod atye iyi totta, kono yi totta obedo lyel me yika, kono ot nyodo a totta obedo apek apek atwal. Piŋo kara adonnyo rik iyi totta, me rwatte i tic atek kede cwercuny, dok me bedo kede lewic pi kare me kwona luŋ. Man en kop ame Rwot okobo baŋ Jeremia i kare ame abaka Jedekia ocwao baŋ Packur wot a Malkia kede Jepania alamdog wot a Maceya, kun cikogi ni, “Penya Rwot pirwa, pien Nebukadnejar, abaka me Babulon amito cako lweny kedwa. Atot onyo ca Rwot bino timo tano moro me awura pirwa, te miyogi ya dokoko cen, kun oweko lweny kedwa.” Jeremia te kobbi jo ame onwoŋo ocwao baŋe ni, “Wot ikobbi wunu Jedekia ni Rwot okobo ni ebino wiro jami lweny luŋ ame tye i ciŋ monnyere luŋ ame itye ka lweny wunu kede abaka me Babulon, kede jo Kaldaya ame doŋ tye ka gurowu oko-ni i ŋe cel oko. Abino coko jami okworwu luŋ karacel i dye boma, An ikoma abino lweny kedwu, kun atio i tekona luŋ, ame akemo kede iniga omio ager calo eŋatu. Abino neko jo kede leyi luŋ ame bedo i boma man; abino miyo twon two edeke arac meicel en ame nek ogi. Icennere abino miyo Jedekia abaka me Juda karacel kede omiro mere, dok jo ame bedo i boma man ame obwot i two edeke, kec kede pala romo, i cin abaka Nebukadnejar, abaka me Babulon, kede i cin okworgi ame mito nekogi aneka. En bino nekogi oko i pala lweny, Kica mom bino maka i komgi, mom abino paro pirgi kadi acel dok mom abino wekogi.” Rwot dok te ciko Jeremia me kobbi lwak ni, “Nen ba, an a Rwot atyeko miyowu twero me yero yo me kwo kede ame tero dano i to. Ŋat ame bino bedo i boma obino ŋe ko oko i pala i lweny, ka mom oto i lweny, kec en abino neko onyo to edeke. Cite ŋat ame bino donyo oko te wot miye kene baŋ jo Kaldaya, ame tye aguro boma-ni i ŋe ŋel oko, dano-nono bino kwo, kwo mere bino bedo baŋe calo mot me lweny. Pien an Rwot atyeko ci ko waŋa doŋ oko i kom boma man, me timo iye gin arac, mom ginnoro aber. Abino miyo boma man oko i ciŋ abaka me Babulon ame bino waŋo oko kede mac. “Kobbi jo me ot abaka me Juda ni myero owiny koppa an Rwot, kobbigi ni gin jo me ot a Daudi myero, “Oŋol kop atira nino i nino, dok olar jo i ciŋ jo ame wunogi, olar ŋat ame omao jami mere, naka mio akemona lyel i komgi calo mac, te lyel ame nauoro mom romo neko, pi timgi areco.” “Nen ba, an atye i kop i komwu, wun jo ame bedo i luŋ, naka yin kidi ame tye i bar. Man kop a Rwot okobo. Wun jo ame ikobo wunu ni, ‘Ŋa ame bino bino piny me bino lweny i ko mwa, onyo ni ŋa ame bino donnyo kan ame wan obedo iye?’ Abino keto can i komwu, kun lubere i gin ame itimo wunu. Man kop a Rwot okobo. Abino cwinyo mac i bomawu luŋ, ame bino waŋo ginnoro luŋ ame tye i ŋete.” Rwot okobbi Jeremia ni, “Wot baŋ jo me ot abaka me Juda, iwot ikob kop man kuno, kob ni, ‘Winy ba kop a Rwot, yin abaka me Juda ame bedo i wi kom me loc a Daudi, kede omironi, nakajo ame bedo i dogcel man. Rwot okobo ni myero iŋol wunu kop kakare dok itim wunu gin atye atira, ilar wunu daŋ ame otye ka wuno i ciŋ jo ame tye ka mayo jamigi. Dok daŋ myero kur itim wunu ginnoro arac onyo timmoro me byemi i kom rokkoro ame bedo i akinawu, i kom itino kic kede i kom mon ame coggi oto, kur daŋ iony wunu remo a ŋattoro a mom i bal i kabedo man. Ka ce ibino lubo wunu kop man ateteni, bino miyo obakki ame bedo i wi kom loc a Daudi, ame riŋo aguragura kede gadigadi, karacel kede omirogi kede jogi, gin luŋ obino donyo i dogcel luŋ me ot man. Cite ka mom ibino ciko wunu yitwu me winyo kop man, an Rwot akwoŋo i nyiŋa kena kena ni, ot man bino doko wi obur.’ Pien Rwot ame okobo kop i kom jo me ot abaka me Juda okobo ni, “Wun itye wunu calo lobo me Gilead i tuŋ baŋa, icalo wunu wi kidi me Lebanon, kadi amannono, abino miyowu idoko wunu tim otwo ikaŋ, boma ame jo mom bedo iye. Abino yiko olweny ame bino tyekowu oko, ŋat acel acel bino mako jami me lwennyere. Gin jo-nono bino totoŋo yennogo me cedar abeco mege reto oko piny, ote waŋogi oko i mac. “Rok luŋ bino bea i ŋet boma man, ŋat acel acel i akinagi bino penyo awottere ni, ‘Piŋo kara Rwot otimo gin acalo man i kom boma man adwoŋ wokki?’ Awottere bino gamo ni, ‘Pien gin oweko cikere ame rik ocikere i Rwot Obaŋagi oko, dok obedo woro obaŋe mogo ocele, kun daŋ otio pirgi.’ ” Kur ibed koko pi Yocia ame doŋ otyeko to oko ca, kur daŋ ikum pire; cite myero ikok atek meicel pi ijat a doŋ woto oko, pien mom dok bino dwogo kadi acel, me neno lobo ame onywale iye. Pien Rwot okobo kop i kom Calum wot a Yocia, abaka me Juda, ame obedo loc akaka pappere Yocia, ame onwoŋo doŋ otyeko ya oko i lobo man, en okobo ni, “En mom dok bino dwogo kan kadi acel. En bino to i lobo ame otere iye acalo opii, en mom dok bino neno lobo man kadi acel.” Ŋat ame gero ode kede tim a mom atira, tye kede can, dok gero ici ka mege imalo aboŋo gennoro, ame mio dano wadgi tio baŋe nono kun mom mio ocara mere. Dano ame kobo ni, “Abino gero twon oda moro adwoŋ meicel, kun amio icika luŋ iye i malo bedo alac odoco.” Ame keto waŋ dirica i ode, eka te peto bao cedar iyi ici ka me ot, te daŋ puyo apama mere oko i raŋi arema, hamo ni mannono bino miyi idoko abaka, pi gero odi kede yen me cedar? Pappi mom yam obedo i kuc adwoŋ meicel i lobo-ni, mom kare luŋ en obedo dano a genne dok ame ŋolo kop atira? En rik te bedo aber i yore luŋ. En obedo ŋolo kop ocan kede me a jo a piny olo kakare, omio en obedo aber. Mom mannono en ŋeyo Rwot? Cite yin ibedo keto cunyi i komi keni, pi nwoŋo agoba i yore a mom ber, kun imito onyo remo a jo a mom i bal, iwuno jo kede timo tim me byemi. Man kop a Rwot. Mannono omio Rwot okobo kop i kom Yekoyakim, wot a Yocia, abaka me Juda ni, “Mom obino kumo pire, kun okobo ni, ‘Ominna doi!’ onyo ni, ‘Atinna doi!’ Mom obino kumo pire, kun okobo ni, Rwotta doi! onyo ni, ‘Abakana doi!’ ” Obino yiko i kite ame oyiko kede gwok, obino telo atela tetek, ote wot bolo i ŋe cel oko. “Wot wunu i wi kidi me Lebanon, me iwot ikok wunu kuno, wot ikok wunu atek i lobo me Bacan; red wunu ilwoŋo i Abarim, pien jo ame yam imaro wunu luŋ doŋ otyeko oko, Rik akobo kedwu i kare ame lim dwoŋ i ciŋwu, cite wun giwu ite kwero wunu winyo koppa oko, Mannono en gin ame ibedo timo wunu cakere i tinowu, mom ibedo winyo wunu koppa. Yamo bino kolo okwatwu luŋ, mon ame marowu bino wot oko i opii, Lewic bino makowu, ale te twodowu, pi tim areco ame ibedo timo wunu, Ama wun jo ame bedo i Lebanon, ame ibedo wunu aboŋo lworo i akina yen cedar, ibino cur wunu atek meicel ka rem me can oere i komwu, rem ame rom aroma i me a dako amerem me nywal ogoo.” Rwot okobo ni, “Kite ame atye kede kwo-ni, kadi bed Yekonia wot a Yekoyakim abaka me Juda, onwoŋo obedo atem me ŋut cin ame onwoŋo tye i ŋut ciŋa tuŋ cem, onwoŋo pwod aromo kwanyo oko i ŋut ciŋa ate miyo baŋ jo ame mito neke, i cin jo ame en lworo, naka kadi i cin Nebukadnejar abaka me Babulon kede ocirikale mere. Abino bayi i lobo ocele karacel kede totti ame onywali, kan ame mom rik onywali iye, ibino to daŋ kuno, Cite mom dok obino dwogo cen kadi acel i lobo man ame omito ni kono odwogo iye-ni.” Jeremia te kobo ni, “Man mom Yekonia ame cuny doŋ ocao oko-ni, ame doŋ calo tako gulu ame obolo ame mom doŋ tye ŋattoro amito-ni? Piŋo kara en kede itino mere obologi i lobo ame gin mom oŋeo, i ciŋ jo ame mom oŋeo?” Yin lobo! Yin lobo! Yin lobo we! Winy ba kop a Rwot ame etye ka kobo. Rwot okobo ni, “Co kop ame otyeko doŋ ŋolo oko i kom dano man, en mom bino bedo kede atinnoro, gummoro mom bino bedo i kome kadi acel pi kare me kwo mere luŋ, Akware moro mom bino bedo kede gum me bedo iwi kom loc a Daudi, kun bedo dok aloc i Juda.” Rwot okobo ni, “Can i wi okwat ame keto dok neko rommina i bar kan ame okwaogi iye!” Mannono omio Rwot Obaŋa a jo Icrael okobo kit man i kom jo ame kwao rommi mere, ame gin jona, En okobo ni, “Wun okwat ame iketo wunu rommina oko, ame iryemogi wunu icwaogi wunu teŋe, dok daŋ ikwero kwayogi wunu oko. Nen ba, abino ciko waŋa i komwu me keto can i komwu pi gin arac ame itimo wunu. Icennere abino coko rommina ame odoŋŋere, ame tye i lobo apapat ame rik aryemogi iye, ate dwoggogi cen kan iyi anokgi, ote nywal nya atek meicel. Abino keto okwat ocele me kwayogi, ame mio mom dok oromo lworo ginnoro. I kare-nono cunygi mom dok bino medde poto kadi acel, moro i aki ‘nagi daŋ mom bino rwenyo. “Nen ba, Rwot okobo ni, nino tye abino ame abino keto dok akwar Daudi ikokome i kom me loc. En bino loc i ryeko, kun daŋ tio gin atye atira, bino ŋolo kop kakare te miyo kuc bedo tye i lobo. Obino laro Juda i kare mere, dok jo Icrael bino bedo kede kuc. Nyiŋ ame obino lwoŋe kede ene: ‘Rwot ame olarowa.’ “Pi mannono, kare tye abino ame jo mom dok bino kobo ni, ‘Kite ame Rwot tye kwo-ni, Rwot ame okwanyo jo Icrael i lobo Miciri,’ ento ni, ‘Kite ame Rwot tye kwo-ni, Rwot ame okwanyo jo Icrael i lobo ame tye tutuŋ anyarodi kede i lobo luŋ ame rik eryemogi ecwaogi iye.’ Gin doŋ bino bedo i lobogi ikokome.” Jeremia okobo kop i kom odwarpiny ni, “Cunya otyeko balle oko, cogona luŋ tye ka myel amyela. Acalo doŋ ŋat omer, acalo ŋat ame kono olok oromo meicel, Mannono tye atimere i koma pi Rwot, kede pi koppere acil. Jo i lobo luŋ doŋ mom geno Rwot, kitegi doŋ oballe oko arac meicel, lobo tye akumo pien Rwot doŋ oceno oko, bar me kwat daŋ doŋ otwo imek. Tim a jo luŋ doŋ rac odoco, mom daŋ otio i twergi kakare. “Odwarpiny anaka olamdog daŋ mom doŋ geno Rwot; anwoŋogi-gu otye ka timo tim arac i ot me wora ikokome. Man kop ame Rwot okobo, Pi mannono ba, yo ame gin olubonono, bino bedo apwot dok acol meicel, obino ryemogi i yo-nono ote rette iye. An abino kelo can i komgi, ka mwaka me keto can i komgi oromo. An Rwot en akobo kop man. Aco odwarpiny me Camaria, anenogi otye ka timo tim me ipyeda, pien otye ka rabo kopgi i nyiŋ Baal, otelo jona Icrael arac, omio ogak oko, Man en kop ame Rwot akobo i kom odwarpiny me Jerucalem, ‘Anene ginnoro arac okato kare i komgi, otye ka cot kun okobo-gu goba i kabedo ducu, otye ka konyo otim areco medde ameda kede timgi, ame omio ŋattoro mom ye weko timmere araccono; gin luŋ doŋ ocalo Codoma i tuŋ baŋa, jo ame bedo iye calo jo Gomora.’ Mannono omio Rwot me mony okobo kop i kom odwarpiny ni, Nen ba, abino pitogi i kwir a yit, ate miyogi mato pii ame kwir tye iye; pien tim me mom geno Obaŋa olal oromo lobo luŋ, kun ya i baŋ odwarpiny me Jerucalem.” Rwot me mony okobbi jo Jerucalem ni, “Kur iwiny wunu kop odwarpiny ame rabbiwu kop, ote miyowu bedo i gen ame konnyere mom. Gin orabbiwu kop i kom amuttogo ame gin otamo atama kengi, ame mom Rwot en okobbigi. Otye ka kobo kare i kare baŋ jo ame cao kop a Rwot ni gin obino bedo aber, kede baŋ jo ame lubo gin ame gin omito apala apala ni ginnoro arac gire mom bino poto i komgi.” Kara ŋa i akinagi ame ocuŋ cokere a Rwot, me neno kede winyo kop a Rwot? Onyo ŋa i akinagi ame owinyo dok olubo gin ame en okobo? Koŋ inen akemo a Rwot doŋ obino oko calo yamo kot, ocako doŋ kodo oko calo yamo ajuru, bino mwoc i wi otim tim areco. Akemo a Rwot mom bino jukere, tuno wan ame en otio dok ocobo, ginnoro luŋ ame tye i tammere. Ibino niaŋ wunu iye aber odoco i kare ame pwod tye anyim. “An gira onwoŋo mom aoro odwarpiny, cite gin gigi omukere i ŋwec kengi, an rik mom akobo kedgi, cite gin otye ka rabo kop. Kono onwoŋo gin ocuŋ i cokerena me winyo koppa, kono gin orabo koppa ikokome baŋ jona, kono daŋ omiogi olokere oweko lubo yo arac, kun oweko timo gin arac ame otye ka timo. “Rwot me mony openyogi ni mom en obedo Rwot ame tye kan aceggi, cite mom kan abor? Dano twero pono kannoro me imuŋ ame mom ŋeye me kur enen kome? Mom en obedo Obaŋa ame tye i kabedo luŋ i polo kede i lobo? En okobo ni etyeko winyo kopporo luŋ ame odwarpiny tye ka rabo gobagoba i nyiŋe, kun ŋat acel acel kobo ni, ‘Aleko lek! Aleko lek!’ Kop goba bino medde bedo i cuny odwarpiny man ame ogoba-ni pi kare a rom mene, dok ame obedo rabo kop me goba ame tye i cunygi? Gin otamo ni lekgi-nono ame obedo ko bo iyi akinagi bino miyo wi jona wil oko i koma, kite ame rik wi kwarigi owil kede i koma pi Baal. Adwarpiny ame oleko lek myero kob oko ni gin ekobo-nono eleko aleka, ento ŋat ame owinyo koppa ikokome myero bed ŋat a genne i kobo koppa-nono. Itwero poro reŋ kal kede kal ikokome? Rwot dok te medde penyo ni, Mom koppa rom aroma kede mac kede anyul ame oninido gweŋ atitino? Pi mannono, nen ba, cunya mom yom i kom odwarpiny ame kwa lo koppa i baŋ owotegi ote rabo ni kop ame okobbigi ennono. Nen ba, cunya mom yom i kom odwarpiny ame tio i lebgi me kobo doga nono ni, ‘Rwot okobo ni’, Nen ba, cunya mom yom i kom jo ame kobo lek me goba goba. Lekgi ame otye ka kobo gobagoba-nono tye ka miyo jona gak agaka karacel kede wakeregi. An gira onwoŋo mom acwaogi, mom daŋ acikogi ni myero gin owoti; pi mannono, gin gire mom okonyo jona kadi acel. Man kop ame Rwot okobo, Gin gire mom okonyo jona kadi acel. Man kop ame Rwot okobo. “Ka ce ŋat acel i akina jo man openyi, kadi obedo odwarpiny onyo alamdog, ni, ‘Kop aŋo apek ame Rwot okobo?’ Yin ibino gamo ni, ‘Wun en ame idoko wunu yec apek baŋ Rwot, pi mannono en okobo ni ebino bolowu oko,’ Ka ce adwarpiny onyo alamdog, on yo ŋattoro acel i akina jo man bino kobo ni, ‘Kop apek ame Rwot okobo ene’, abino keto can i kom dano-nono karacel kede jo me ode luŋ. Man en kop ame ŋat acel acel i akinawu bino kobo baŋ awottere onyo baŋ ominnere ni, ‘Rwot ogamo niŋo?’ Onyo ni, ‘Rwot okobo niŋo?’ Mom dok ibino medde ko bo wunu kop man, ni, ‘Kop apek ame Rwot okobo ene’: pien kop apek ame ikobo wunu en kop a ŋat acel acel ko bo pire kene, Itye wunu ka dwadwanyo wunu kop a Rwot Obaŋa ame kwo, Rwot Obaŋa ame en Rwot me mony. Ibino kobbi wunu odwarpiny ni, ‘Rwot ogamo koppi niŋo? Onyo ce Rwot okobo kop aŋo?’ Ento ka gin okobo ni, ‘Peko me kop a Rwot.’ Yin ibino kobbigi ni, pien wun ikobo wunu kop man ni, ‘Kop apek a Rwot okobo ene’, yin ibino kobbigi ni, acikowu ni mom myero imedde kobo wunu kittono, doŋ pi mannono ba, abino tinowu malo ateteni ate bolowu oko teŋe i nyima. Wun karacel kede boma ame rik amio baŋwu kede baŋ kwariwu. Abino miyo jo caowu, kun lewic daŋ makowu wan i wan, lewic kede acae ame wi jo mom twero wil iye.” Rwot onyutta dita aryo ame nyig olam open yigi, kun tye i nyim ot me woro Obaŋa. Man otimere ame doŋ Nebukadnejar, abaka me Babulon otyeko tero Yekonia wot a Yekoyakim, abaka me Juda oko iyi opii, kun kwanyo i Jerucalem karacel kede otel me Juda, odoŋe ame loo tic apapat, karacel kede otel luŋ me Juda, gin luŋ oterogi i Babulon. Dita me agege onwoŋo tye iye nyig olam abeco mege, ame rom aroma i en ogeo cek, cite dita ocele onwoŋo tye iye nyig olam areco mege, en areco atek ate ka, ame mom romo acama kadi acel. Rwot te penya ni, “Ineno ŋo, Jeremia?” An ate gamo ni, “Nyig olam, en abeco mere meicel, kede nyig olam amereco okato kare, reco ame mom romo acama kadi acel.” Rwot te kobba ni, “Rwot Obaŋa me Icrael okobo ni, Jona ame okwanyo i Juda ote tero iyi opii i Babulon-ca abino terogi calo nyig olam abeco mere-nu. Abino ci ko waŋa i komgi me timo gin aber i komgi, te dwogogi cen i lobo man, Abino miyogi obedo jo atek kun mom dok aturogi adwokogi piny. Abino pitogi calo yat eka mom dok ate putogi oko. Abino miyogi cuny me ŋeyo ni an a Rwot, dok gin obino bedojona, kun an abedo Obaŋagi, pien gin obino dwogo baŋa i cunygi ducu. “Cite Rwot okobo ni, ‘Aco Jedekia, abaka me Juda, rwode mege kede jo odoŋ, kede odoŋ i Jerucalem ame tye bedo i lobo man, kede jo ame bedo i lobo me Miciri, abino terogi calo nyig olam areco atek ateka-nu, ame mom oromo-gu camo kadi acel. Abino miyogi obedo gi-alwora me rok luŋ i wi lobo bino lworo, gi-acaa a jo, gilolo dog jo, dok jo bino kobo kop areco i komgi, kun daŋ otio i nyiŋgi acalo kop me ceno jo i kabedo luŋ ame abino ryemogi terogi iye. Abino cwayo pala romo i komgi, kede kec kede too edeke, tuno waŋ ame gin luŋ otum oko i lobo ame rik amio baŋgi kede baŋ kwarigi.’ ” I mwaka me aŋwen me loc abaka Yekoyakim wot a Yocia abaka me Juda, Rwot okobbi Jeremia kop i kom jo luŋ me Juda, (Man onwoŋo mwaka me agege me loc a Nebukadnejar abaka me Juda.) Mwaka-nono en ame Jeremia okobo i jo me Juda luŋ kede jo luŋ ame bedo i Jerucalem, kun kobbigi ni, “Aman doŋ odoko mwakki pyeraryo wie adek, kun cakere i mwaka me apar wie adek me loc a Yocia wot a Amon abaka me Juda tuno kede naka atot tin, Rwot obedo kop keda kun an daŋ atittiwu koppere tere tere, cite wun giwu ikwero wunu winyo wunu oko.” Mom iwinyo wunu koppere, mom daŋ itero wunu yitwu me winyo, kadi bed Rwot obedo cwayo omiro mere luŋ ame obedo odwarpiny baŋwu teretere, ame rabbiwu ni, “Ŋat acel acel i akinawu myero doŋ lokere wek yo arac ame etye ka lubo dok daŋ owek timo gin arac, me ibed wunu i lobo ame Rwot rik omiowu kede kwariwu i kare acon me bedo megwu atwal. Kur dok ibed wunu lubo obaŋe mogo ocele, kun itiyi wunugi, dok iworogi wunu, kun daŋ iroka wunu imi wunu akemo maka i tic ame ibedo tiyo wunu. Mannono bino miyo mom atimo ginnoro arac i komwu. Aco nen mom ibedo winyo wunu koppa, me imi wunu akemo maka i tic ame ibedo tiyo wunu ame kelo ka can i komwu wun ikomwu. “Mannono omio Rwot me mony okobo ni, Pien wun ikwero wunu winyo koppa, nen ba abino cwayo i kom rok ducu ame bedo tutuŋ anyarodi, kede amirona Nebukadnejar, abaka me Babulon. Abino kelogi me bino lweny i kom lobo man kede i kom jo luŋ ame bedo iye, kede i kom rok man luŋ ame oguro lobo-ni. Abino jwerogi odoco, dok abino miyo lworo mako jo i komgi, kun obedo jwiye ajwia. Abino miyo jo caogi nakanaka. Medo i mannono, abino giko i akinagi woo me yomcuny, woo me lelo, anaka dwon anyom karacel kede dwon atera. Ŋur a min kidi merego mom dok bino winyere iye, dok tara moro daŋ mom bino lyel iye. Lobo man luŋ bino doko wi obur kun jo mom iye. Rok man bino tic baŋ abaka me Babulon pi mwakki ame romo pyerabiro twal. A doŋ mwakki pyerabiro otum, an doŋ ate keto can i kom abaka me Babulon kede rok ame en loo naca, kede lobo me Babulon, pi balgi, ate miyo lobogi doŋ nono doŋ atwal. Kop luŋ ame atyeko kobo i kom lobo naca abino miyo cobere daŋ kittono i kome, kede kopporo luŋ ame doŋ otyeko coyo i buk man, ame Jeremia otyeko rabo i kom rok apapat. Pien rok apol kede obakki mogo adoŋo doŋo bino lokogi odoko opiigi, cite an abino culogi kun alubo ticgi kede gin ame gin otimo.” Rwot Obaŋa a jo Icrael okobo ni, “Gam i ciŋa ikopo kono olok ame akemona opoŋ iye oko-ni, wot imi rok apapat luŋ ame acwai baŋgi matti. Gin bino mato ote cako gate oko, kun daŋ obaŋere oko pi lweny ame abino cwayo i komgi-nono.” Mannono omio ate gamo ikopo i cin Rwot ate mi yo rok luŋ ame Rwot ocwaa baŋgi mato. Jerucalem kede boma luŋ me Juda, obakki luŋ kede rwodegi, mannono te miyo lobo doko wii obur oko kun yigi nono, jo doŋ te cako jwiye kun owuro awura, ame otio i nyiŋ lobo-nono calo gin me ceno jo kite ame tye kede naka tin. Parao abaka me Miciri kede omiro mere rwode mere, kede jo mere luŋ, karacel kede ruk ocele luŋ ame bedo i akinagi; obakki luŋ me lobo Uj kede obakki luŋ me lobo Piriciti (Acikelon, Gaja, Ekron, kede jo Acidod ducu ame odoŋ): kede jo ducu me Edom, Moab kede jo Ammon; obakki ducu me Turo, obakki ducu me Cidon, kede obakki luŋ ame loo lobo ame tye i dog nam; jo luŋ ame bedo i boma me Dedan, Tema, kede Buj; jo luŋ ame mworo yer wigi oko doŋ acegocego; obakki ducu me Arabia kede rok apapat ame orubere aruba ame bedo i lobo otwo ikaŋ; obakki ducu me Jibri, Elap, kede Media; obakki luŋ ame tye i lobo ame tye tutuŋ anyarodi, jo luŋ ame bedo i lobo ame tye kan aboco kede jo luŋ ame bedo cegicegi, kun gin luŋ olubere aluba i yore i yore, Rok apapat me loc apapat ame tye i wi podo ame bedo i lobo kan daŋ myero mati. Icennere doŋ abaka me Babulon te mato. “Rwot dok te kobba ni, ‘Kob baŋ lwak ni, Rwot me mony ame obedo Obaŋa a jo Icrael okobo ni myero imat wunu atek, imer wunu okato kare ite nokere wunu, ite rette wunu piny ame mom dok iromo ya wunu atwal, pi lweny ame acwalo i akinawu.’ “Ka ce gin okwero gamo ikopo oko i ciŋi me mato, yin ibino kobbigi ni, ‘Rwot me mony okobo ni myero nen ni imato wunu! Pien nen ba, acako timo gin arac i boma ame olwoŋo i nyiŋa. Wun itamo wunu ni itwero bwot wunu ame mom oketo can i komwu? Pe gire itwero bwot wunu ame mom oketo can i komwu pien atyeko doŋ yikere me cwayo mony oko i kom jo luŋ ame bedo i wi lobo. Man kop ame Rwot me mony okobo.’ “Doŋ ba yin Jeremia ibino rabo kop man luŋ i komgi, kun ikobbigi ni, “Dwon Rwot bino mor winyere i polo, en bino woto dwone i kabedo mere acil. Dwone bino mor atek meicel kom jo mere, bino redo calo jo ame tye a jejebo olok i tyengi, i kom jo luŋ ame bedo i lobo. Dwone bino mor winyere naka agikki lobo piny, pien Rwot doŋ tye i kop ame en mito ŋolo i kom rok ducu. En bino ŋolo kop i kom jo luŋ, bino miyo oneko jo areco oko luŋ i pala me lweny, Man kop ame Rwot okobo. “Rwot me mony okobo ni, Nen ba, abino ket can i kom rok ducu, kun aketo i kom rok acel acel. Dok yamo ajuru agwa meicel tye ka twarogi naka iyi agikki piny. “Jo ame Rwot bino neko i ninonono bino radde i kabedo ducu, cakere i but lobo tuŋcel tuno kede tuŋ ocele. Mom obino kumo kadi acel pi jo-nono, mom daŋ obino coko komgi, dok mom daŋ obino yiko komgi; kom jo oto bino radde atata i wi lobo calo cet dyaŋ. “Kok wunu ba ame iredo wunu areda, wun okwat, ŋenne wunu ba i buru wun okwa rommi, pien kare me nekowu kede me keketowu atata doŋ oromo oko, obino ŋolo ŋutwu calo ŋolo ŋut rommi ame ocwe, Kabedo moro me larre okwat bino bedo mom, akadi kan ame okwa rommi twero laro me bwot. Koŋ iwiny wunu koko okwat, winy wunu daŋ redo a jo ame kwao rommi! Pien Rwot tye ka balo ka kwatgi oko i twon akemo, omio anok rommigi ame onwoŋo tye i kuc odoŋ yigi nono, pi akemo a Rwot ame gwa meicel. Rwot doŋ calo eŋatu ame odonnyo i gorogoro mere, pien lobogi doŋ odoŋ yie nono, pi pala me romo a Rwot, kede pi twon akemo mere agwa.” I mwaka ame Yekoyakim wot a Yocia ocako iye loc acalo abaka me Juda, Rwot okobbi Jeremia kop man, ni, “Rwot me mony okobo ni wot icuŋ i dyekal me ot a Rwot ite kobo kop man baŋ jo i boma luŋ me Juda ame bino me woro Obaŋa i ot a Rwot. Kobbigi kop luŋ ame atyeko cikki me kobo; pe iwek kopporo doŋ ame mom ikobo kadi acel. Kare okene gin twero winyo eka ŋat acel acel te weko lubo yo mere arac, me wek an daŋ aŋut i kom gin arac ame doŋ ayikere me tiyo i komgi pi timgi areco.” Yin ibino kobbigi ni, “Rwot me mony okobo ni, ka ce mom ibino winyo wunu kop ame an akobo me lubo cikka ame an atyeko keto i nyimwu, ka ce mom ibino winyo wunu kop amirona ame gin odwarpiny ame abedo cwayogi baŋwu me bino oyotoyot, kadi bed wun mom iwinyo wunugi, bino miyo amio ot man bedo calo Cilo, dok abino ceno boma man oko, te bedo me ceno rok luŋ ame tye i wi lobo.” Olamdog kede odwarpiny karacel kede jo luŋ te winyo Jeremia tye akobo kop magi i ot a Rwot. I kare ame Jeremia doŋ otyeko ko bo kop man ducu ame Rwot ociko ni myero ekob baŋ lwak luŋ, olamdog kede odwarpiny karacel kede lwak luŋ ote makke oko, kun okobo ni, “Yin myero ito!” Piŋo irabo kop i nyiŋ Rwot kun ikobo ni, “Ot man bino doko calo Cilo, dok boma man bino doŋ nono aboŋo jo moro abedo iye?” Jo luŋ te cokere guro Jeremia dyere i ot a Rwot. I kare ame rwode me Juda owinyo kop man gin oya i paco abaka ote bino i ot a Rwot ote wot bedo i wi komgi ame tye i dogcel, ame olwoŋo ni Dogcel Anyen ame tye i ot a Rwot. Olamdog kede odwarpiny te kobbi rwode kede lwak luŋ ni, “Dano man myero ŋolle kop me to pien en orabo kop arac i kom boma man kite ame wun luŋ iwinyo wunu kede yitwu.” Jeremia te kobbi rwode kede jo luŋ, kun kobo ni, “Rwot ocwaa me bino rabbiwu kop i kom ot man kede i kom boma man, kop luŋ ame wun doŋ ityeko winyo wunu. Doŋ pi mannono wun myero iyik wunu kitewu kede gin ame itio wunu, ite winyo wunu kop a Rwot Obaŋawu, mannono bino miyo Rwot cunye ya i timo gin arac ame doŋ otyeko kobo oko i komwu. Aco an, nen ba, an gira atye i cinwu, Tim wunu ginnoro luŋ ame ineno wunu ni ber i koma. Cite gin a myero iŋe wunu ateteni ene, ni ka ineka wunu, ibino onyo wunu remo a mom i bal, ame ballere te bedo i wiwu kede i kom boma man kede i kom jo luŋ ame bedo iye, pien iyi ateni Rwot ocwaa baŋwu me kobo kop man luŋ kun iwinyo wunu kede yitwu.” Eka rwode kede jo luŋ te kobbi olamdog kede odwarpiny, ni, “Dano man mom porre ŋolle kop me to pien en okobo kop man baŋwu pi nyiŋ Rwot Obaŋawa.” Odoŋŋogo me lobo-nono te ye kop i lwak luŋ ame ocokere karacel, kun kobo ni, “Mika ame rik obedo dano me Morecet rik obin orabo kop i kare abaka Kejekia, ame rik obedo abaka me Juda, en rik okobo koppere baŋ jo luŋ me Juda kun kobo ni Rwot me mony okobo ni, “Obino puro Cion oko calo poto, aco Jerucalem bino doko wi obur, kidi me ot a Rwot, yen bino culle acula iye. Rik abaka Kejekia me Juda kede jo luŋ obin oneke oko? Mom abaka obin olworo Rwot te tiyo gin aber ame Rwot pwo, ame te miyo Rwot weko gin arac ame onwoŋo eyikere me timo i komgi oko? Cite wan oceggi kelo twon ginnoro arac meicel i komwa kenwa.” Dok tye dano moro ocele ame daŋ obin orabo kop i nyiŋ Rwot, Uria wot a Cemaya me Kiriat-jearim, En rik orabo kop i kom boma man kede i kom lobo man, ame koppere daŋ rik rom aroma i en ame Jeremia okobo. Kare ame abaka Yekoyakim, kede ocirikale mere luŋ, kede rwode mere luŋ owinyo kop magi, abaka omito ni myero enek dano-ni oko, cite i kare ame Uria owinyo, lworo omako te lwi wot oko i Miciri. Abaka Yekoyakim te cwayo jo okene mogo i Miciri, ocwao Elnatan wot a Acibor karacel kede jo mogo okene, gin te wot kela Uria i Miciri, ote tere naka baŋ abaka Yekoyakim, ote daŋ neko oko kede pala me lweny, ote tero kome wot yiko i kabedo ame oyiko iye jo ata. Cite ciŋ Akikam wot a Capan onwoŋo obedo gwoko Jeremia omio mom ote miye baŋ lwak me wot neke. I mwaka ame Jedekia wot a Yocia, abaka me Juda ogeo iye loc, Rwot okobbi Jeremia kop magi. Rwot okobba ni, “Wi tol, ti daŋ lodi ite tweyogi i ŋuti yin keni. Cwa kop baŋ abaka me Edom, abaka me Moab, abaka ikwae a jo Ammon, abaka me Turo kede abaka me Cidon, kun imio okwena ame obino i Jerucalem me bino limo Jedekia abaka me Juda. Kobbigi kop man ame myero gin wot kob baŋ odoŋegi ame loogi.” Myero gin wot kob ni, Rwot me mony, ame obedo Obaŋa me Icrael okobo ni, “An en aketo lobo kede dano kede Jeyi ame tye i wi lobo pi tekona adwoŋ meicel, dok daŋ amio baŋ ŋat ame yia mito kite ame cunya okwanyo. Aman doŋ atyeko miyo lobo magi luŋ i ciŋ Nebukadnejar, abaka me Babulon, ame en obedo amirona, dok daŋ atyeko miye leyi luŋ me tim me konye. Rok luŋ bino tic baŋe kede baŋ itino mere kede baŋ ikwae, tuno ka kare me lonyo lobo mere oromo. I kare naca en ame rokkere bino doko rok ame tio baŋ rok apol apapat kede baŋ obakki mogo adoŋodoŋo, kun otio baŋgi acalo opii. “Ka ce rokkoro onyo loccoro mom bino tic baŋ abaka Nebukadnejar, ame abaka me Babulon, mom bino ye keto lodi abaka me Babulon i ŋutgi, an ikoma abino keto can i kom rokkono, kun anekogi i pala romo, i kec, kede too edeke, Man kop ame Rwot okobo, tuno wan ame amio abaka Nebukadnejar otyeko rokkono luŋ. Doŋ pi mannono ba, myero kur iwiny wunu kop odwarpinywu otyetwu, olek lek-gu, okor tipowu kede me emurokowu ame tye ka kobbiwu ni, ‘Wun gire mom ibino tic wunu baŋ abaka me Babulon.’ Pien gin tye ka rabbiwu kop me goba, ame adwoggi mere bino miyo okwanyowu oko i lobowu ote terowu oko i lobo abor, dok an abino ryemowu oko, eka ite to wunu oko. Ento rokkoro ame bino keto lodi me loc abaka me Babulon i ŋutgi eka te tic baŋ abaka naca, abino miyo bedo i lobogi ikokome, me opur iye, dok daŋ obedo iye. Man kop ame Rwot okobo.” Jeremia te kobo kit kop acellono baŋ abaka Jedekia ame obedo abaka me Juda, okobbe ni, “Miye wunu kenwu i te loc abaka me Babulon, ite tic wunu baŋe kede baŋ jo mere me ibed wunu kwo. Piŋo omio yin karacel kede joni ito wunu oko i pala me romo, i kec, kede too edeke kite ame Rwot okobo kede i kom rokkoro keken ame mom bino tic baŋ abaka me Babulon? Kur iwiny kop odwarpiny ame tye ka kobbiwu ni, ‘Wun gire mom ibino tic wunu baŋ abaka me Babulon’, pien kopgi-nono kop me goba ame gin tye ka rabo baŋwu-nono. An gira mom acwaogi, gin tye ka rabo gigi kop me goba i nyiŋa ame adwoggi mere bino miyo aryemowu oko, ite to wunu oko, wun karacel kede odwarpiny ame tye ka rabbiwu koppono.” Mannono te miyo an kop baŋ olamdog kede baŋ jo mere luŋ, kun akobbigi ni, “Rwot okobo ni kur iwiny wunu kop odwarpiny ame tye ka rabbiwu kop, kun okobo ni, ‘Nen ba, jami ame otio kede i ot a Rwot oceggi doŋ dwoggo oko i Babulon’, pien kop ame gin orabbiwu-nono obedo kop me goba. Kur iwiny wunu kopgi; myero iti wunu baŋ abaka me Babulon me ibed wunu kwo. Piŋo kara imio wunu boma man odoko wi obur? Ka ce gin obedo odwarpiny ateteni, dok ka kop a Rwot tye i cunygi, wekgi wunu okwa Rwot me mony, me wek jami me tic ame oweko i ot a Rwot, kede en ame oweko i ot abaka me Juda, kede en ame tye i Jerucalem, kur doŋ ter i Babulon. Pien mannono en kop ame Rwot okobo i kom pagi luŋ, nam, kede akara me cibo tara, karacel kede jami ocele me tic i ot a Rwot ame pwod odoŋ i boma man, ame rik Nebukadnejar abaka mom otero, i kare ame en tero jo magi iyi opii kun kwanyogi i Jerucalem terogi i Babulon, Yekonia wot a Yekoyakim, abaka me Juda kede jo ame oworo luŋ me Juda kede me Jerucalem. Man en kop ame Rwot me mony okobo, ame obedo Obaŋa me Icrael i kom jami ame otio kedgi i ot a Rwot, ame pwod odoŋ i ot a Rwot, kede i ot abaka me Juda kede i Jerucalem. Gin luŋ obino terogi oko i Babulon ote bedo kuno tuno waŋ ame dok apo pirgi, ate doŋ dwoggogi cen ate dwogo ketogi i kakakargi i kabedo man.” I mwaka acellono, ame abaka Jedekia, abaka me Juda ogeo iye loc, i dwe me abic i mwaka me aŋwennere, Anania wot Ajur, adwarpiny ame onwoŋo oya i Gibeon, okobba kop i ot a Rwot kun olamdog kede jo luŋ tye awinyo, en okobo ni, “Rwot me mony, ame obedo Obaŋa me Icrael okobo ni en doŋ etyeko turo loc abaka me Babulon oko. I ŋe mwaka aryo, abino dwoggo jami ame otio kede i ot a Rwot i kabedo man, ame rik abaka Nebukadnejar, abaka me Babulon oyako i kabedo man te tero i Babulon. Abino daŋ dwoggo cen i kabedo man Yekonia wot a Yekoyakim, abaka me Juda karacel kede jo luŋ ame rik oterogi acalo opii kun okwanyogi i Juda ote terogi i Babulon, pien abino turo loc abaka me Babulon oko.” Adwarpiny Jeremia te kop gin kede adwarpiny Anania kun olamdog kede jo luŋ ame onwoŋo tye ocuŋ i ot a Rwot tye awinyo. Adwarpiny Jeremia okobo ni, “Amen! Rwot myero gire tim amannono; myero en mi kop ame ikobo cobere kakare, te kela jami me tic i ot a Rwot ame aman tye i Babulon kede jo luŋ ame rik oterogi acalo opii cen i kabedo man. Cite akadi amannono myero iwiny kop magi ame ana atye ka kobo baŋi i caa ni, kun lwak luŋ daŋ tye awinyo. Odwarpiny me kare acon ame otelo nyimwa wan aryo ducu rik orabo kop i kom lweny, kec, kede too edeke ame bino poto i lobo apapat kede i kom loccogo adoŋodoŋo. Aco kop i kom odwarpiny ame orabo kop i kom kuc, i kare ame kop man doŋ ocobere jo doŋ te ŋeyo ni, Rwot kara onwoŋo ocwao adwarpinnyono.” Adwarpiny Anania te kwanyo lodi me ŋut dokoko i ŋut Jeremia te tuturogi oko. Anania te ko bo kop magi kun jo luŋ tye awinyo, en okobo ni, “Mannono en kite ame abino turo kede lodi me loc a a Nebukadnejar, abaka me Babulon i ŋut rok apapat kun mwaka aryo mom ru otum.” Ento Adwarpiny Jeremia te medde gire i wottere. Icennere ame adwarpiny Anania doŋ otyeko turo lodi me twoni oko i ŋut Jeremia, Rwot te kobbi Jeremia ni, “Wot ikobbi Anania ni Rwot okobo ni, Yin ityeko turo lodi ame otio i yen, cite an abino tiyo kakargi lodi me nyonyo. Pien Rwot me mony, ame obedo Obaŋa a jo Icrael otyeko keto lodi me nyonyo i ŋut rok magi ducu me gin ti baŋ Nebukadnejar abaka me Babulon, gin bino tic baŋe, pien atyeko miyo baŋe anaka leyi me tim.” Adwarpiny Jeremia te kobbi adwarpiny wadgi, Anania ni, “Winy ba, yin Anania, Rwot gire mom ocwai ento yin imio jo man obedo kede gen i kop me goba. Mannono omio Rwot okobo ni, ebino kwanyi oko i wi lobo. Ibino to i mwaka-ni ikokome, pien ikobo kop me jem i kom Rwot.” Adwarpiny Anania te to oko i mwaka-nono ikokome, i dwe me abiro. Jeremia rik te coyo waraga i Jerucalem baŋ odoŋ atekere ame onwoŋo tye i akina jo ame onwoŋo tye iyi opii, kede baŋ olamdog, kede baŋ odwarpiny, kede baŋ jo luŋ ame rik Nebukadnejar oyako i Jerucalem te tero i Babulon acalo opii, Man otimere icen i kare ame onwoŋo doŋ abaka Yekonia kede tottere, kedejo ame oliro, rwode me Juda, kede me Jerucalem, kede jo ame odiro i tic apapat onwoŋo doŋ otyeko ya oko i Jerucalem. Waraga man rik ocwao kun omio baŋ Elaca wot a Capan gin kede Gemaria wot a Kilkia, ame Jedekia ame abaka me Juda ocwao i Babulon baŋ abaka Nebukadnejar abaka me Babulon. Kop ame tye i waraga-nono onwoŋo tye kit man: Rwot me mony ame obedo Obaŋa a jo Icrael ocwao waraga man baŋ jo luŋ ame tye iyi opii, ame rik acwaogi iyi opii i Babulon kun akwanyogi i Jerucalem: Ger wunu udi ite bedo wunu iye, pit wunu cam i potti me inwoŋ wunu gi-acama. Nyom wunu mon me inywal wunu itino awobe kede anyira; nyommi awobewu mon dok daŋ imi nyom anyirawu: nya imedde wunu kunu kun welwu mom dok piny. Cite myero nen ni ibedo wunu aber i boma ame aryemowu aterowu iye acalo opii. Kwa wunu Rwot pi bomanono, pien ka jo ame tye i boma-nono bedo aber bino miyo wun daŋ ibedo wunu aber. Pien Rwot me mony, ame obedo Obaŋa me Icrael okobo ni, Kur imi wunu odwarpinywu kede okor tipowu ame tye i akinawu bwolwu, dok daŋ mom ibed winyo wunu lek ame gin oleko, pien mannono luŋ goba keken en ame gin tye ka rabbiwunono, kun orabo-gu i nyiŋa. An gira onwoŋo mom acwaogi. Man kop a Rwot okobo. Rwot okobo ni, “Kare ame mwakki pyerabiro doŋ otum ame atyeko miyo pi Babulon, an abino limowu ate co bo gin a rik aciko baŋwu, ate dwogowu baŋa i kabedo man. Pien an aŋeo gin ame atyeko yiko pirwu, yik me ber bedowu, pe me timowu rac, yik ame tye pi anyimwu dok ame tye iye gen. I kare-naca ite bedo lwoŋo wunu nyiŋa, kun ibino wunu baŋa me bino kwaya, an abino winyo kwacwu. Ibino yenya wunu ite nwoŋa wunu; ka ce iyenya wunu kede cunywu ducu, ibino nwona wunu gire, an ate dwogo kucwu ate daŋ cokowu oko i akina rok ocele luŋ kede i kabedo luŋ ame rik aryemowu aterowu iye, ate dwogowu cen i kabedo man, ame rik akwanyowu iye me cwalowu iyi opii. “Pien wun ikobo wunu ni, ‘Rwot omiowa odwarpiny i Babulon,’ mannono omio Rwot okobo kop i kom abaka ame bedo i wi kom loc a Daudi kede i kom jo luŋ ame bedo i boma man, watiwu ame mom rik obin otero oko iyi opii. Rwot me mony okobo ni, ‘Nen ba, acwayo i komgi pala me romo, kec, kede too edeke, dok abino miyogi bedo calo nyig oduro ame otop, ame doŋ rac odoco, a mom romo camere. Abino ryemogi i pala lweny, i kec, kede too edeke, dok abino miyogi obedo gin ame rok ame tye i wi lobo apapat lworo, gin bino doko gin me ceno jo, gin a jo lworo, ame jo jwio ajwia kede gin ame ocao i akina rok ducu, i kabedo luŋ ame acwaogi iye, pien gin rik okwero winyo koppa ame abedo cwayo baŋgi tere i tere, kun amio omirona odwarpiny kobbigi, cite gin gigi ote kwero winyo oko. Man kop a Rwot okobo.’ Winy wunu kop a Rwot wun luŋ ame itye wunu acalo opii ame rik acwaowu i Babulon, kun akwanyowu i Jerucalem: Rwot me mony, ame obedo Obaŋa a jo Icrael okobo kop i kom Akab wot a Kolaya kede Jedekia wot a Maceya ame tye ka rabo kop me goba baijwu, kun orabo-gu i nyiŋa ni. Nen ba, abino miyogi i cin Nebukadnejar, ame bino nekogi kun ineno wunu kede wanwu. Jo Juda luŋ ame tye acalo opii i Babulon bino tic i nyiŋgi me ceno jo kun okobo ni, ‘Rwot bino miyi ibedo calo Jedekia kede Akab ame abaka me Babulon obulogi abula i mac. Man en can ame obino keto i komgi pien gin otimo tim me miŋo iyi Icrael, gin ocodo mon owotegi, dok daŋ okobo kop me goba i nyiŋa, kun an mom acikogi gira. An en aŋeo, dok daŋ an en abedo acaden ame ŋeo gin a gin otimo. Man kop a Rwot okobo.’ ” Aco baŋ Cemaya ame obedo dano me Neklam, obino kobbe ni, “Rwot me mony, ame obedo Obaŋa a jo Icrael. Yin ityeko cwayo waraga apol apola kede nyiŋi kun icwao baŋ jo ame tye i Jerucalem kede baŋ Jepania wot a Cemaya, ame obedo alamdog, kede baŋ olamdog ocele luŋ, kun ikobbigi ni, Rwot otyeko keti me bedo alamdog ocele luŋ, kun ikobbigi ni, Rwot otyeko keti me bedo alamdog akaka Yekoyada alamdog, me ilo ot a Rwot, kun iloo ŋat acel acel ame wie oballe ame rabo koppi i nyiŋ Rwot, me wek imakgi itwegi kede kol, kun daŋ irwako nyonyo i ŋutgi. Kara doŋ ŋo omoni juko Jeremia me Anatot i kare-ni ame tye ka rabbiwu kop? Pien en ocwao kop baŋwu i Babulon kan, kun kobo ni, Ibino ri wunu kare alac iyi opii; doŋ myero iger wunu wudi me bedowu, pit wunu daŋ cam i potowu me inwon wunu gi-acama.” Jepenia alamdog rik te kwano waraga man kun Jeremia adwarpiny winyo. Rwot te kobbi Jeremia ni, “Cwal kop baŋ jo ame oterogi iyi opii, kobbigi ni, ‘Rwot okobo kop ikom Cemaya me Neklam, ni, pien Cemaya orabbiwu kop kun an gira mom acwae, omio ibedo wunu i gen nononono. Mannono omio Rwot okobo ni, Nen ba, abino keto can i kom Cemaya me Neklam karacel kede ikwae, ŋattoro i akina jo mere mom bino doŋ akwo me neno gin aber ame abino tiyo i kom jona, pien en okobo kop ame kela jem i kom Rwot. Man kop a Rwot okobo’.” Man en kop ame Rwot okobo baŋ Jeremia, Rwot ame obedo Obaŋa a jo Icrael okobo ni, “Co kop luŋ ame abedo kobbi-ni i buk. Nen ba, kare tye abino, ame abino dwoggo iye gum a jona Icrael kede Juda. Abino dwoggogi cen i lobo ame rik amio baŋ kwarigi, gin te bino bedo iye acalo meggi.” Magi en kop ame Rwot okobo i kom jo Icrael kede Juda: “Rwot okobo ni, Wan otyeko winyo koko a jo ame can opoto i komgi atura, koko a jo a lworo omako, ame mom tye i kuc. Aman koŋ ipenyere keni keni, dok ite tamo daŋ, ico twero nywalo atin? Piŋo dok atye ka neno co tye amako pyergi amaka, bala dako ame tye ka rem me nywal? Piŋo wan jo oballe oko? Oi doi! Twon nino arac meicel tye abino, mom tye nino moro ame rom kede; Nino-nono en nino me can meicel baŋ ikwae a Yakobo; kadi bed amannono, obino larogi oko i can-nono gire.” Rwot me mony okobo ni, “Ka ce nino-nono oromo, abino turo lodi me loc oko i ŋutgi abino daŋ codo nyor oko ame otweogi kede. Cakere i karenono gin bino tic pi Rwot Obaŋagi kede Daudi abakagi ame dok abino miyogi.” Rwot okobo ni, “Yin amirona Yakobo, kur ilwori, akadi yin Icrael, cunyi kur poti. Nen ba, abino larri i kannabor meicel, ate laro ikwai i lobo ame aman gin tye iye acalo opii. Ikwae a Yakobo bino dwogo cen, ote bedo mot i kuc, mom tye ŋattoro ame bino miyogi lworo. Pien an atye kedwu me bino larowu, abino jwero rok ocele luŋ atyekogi oko, i akina jo ame akeketowu iye, cite wun mom abino tyekowu ducu, Abino pwodowu abeber, ento mom abino wekowu ame mom aketo can i komwu. Man kop a Rwot okobo. “Rwot okobo ni, Awano ame aketo i komwu mom twero can, dok wan bur i komwu odet arac meicel. Mom tye ŋattoro ame oromo cun pirwu, dok yattoro me aketa i wan burwu daŋ mom, wan bur i komwu doŋ mom romo can. Jo ame marowu luŋ, wigi doŋ owil oko i komwu, mom doŋ oparo pirwu kadi acel; pien atimowu lit calo ibedo wunu okworra, aketo can agwa meicel i komwu aboŋo kica, pien balwu onwoŋo bal ame itimo wunu me akaka, dok bal ame itimo wunu daŋ dwon atek. Piŋo pwod ikok wunu pi awa no ame awanowu kede? Rem ame itye wunu kede mom romo cannere. Pien balwu onwoŋo bal me akaka gin arac ame itimo wunu dwoŋ meicel; mannono en omio aketo can man i komwu. Pi mannono, jo luŋ ame nekowu, gin daŋ obino nekogi, okworwu luŋ aluŋa obino mako oko otero acalo opii, jo luŋ ame yako jamiwu gin daŋ obino yako jamigi, kede jo luŋ ame wunowu, gin daŋ obino wunogi. Pien abino miyowu dok ibedo wunu jo ame komgi yot, wan bur i komwu daŋ bino can oko, pien gin olwonowu ni wun jo a doŋ obolo oko, Cion doŋ odoko gin ame ŋattoro mom paro pire.” Man kop a Rwot. “Rwot okobo ni, Nen ba, abino dwoko kuc i kema a jo Yakobo: kica bino maka i kan ame gin bedo iye; obino dok gero boma i kabedo mere acon, paco abaka bino dok kakare. Jo me kunu doŋ bino wero wer me pwoyo Obaŋa, gin bino bedo redo i wer me yomcuny, Abino miyogi onya, kun welgi mom dok piny, abino miyo jo worogi meicel. Itinogi bino bedo apol kite ame rik otye kede con, lwak jo iye bino cun atek i nyima, abino keto can i kom jo ame wunowu. Rwode ame bino loyogi, bino ya i akinagi, alocgi bino ya i akina rokgi. Abino lwoŋe, en bino bino baŋa, pien mom tye ŋattoro ame bino yiye kene me bino baŋa. Man kop a Rwot okobo. Wun ibino bedo wunu jona, an abino bedo Obaŋawu.” Koŋ inen yamo kot ame Rwot omio akodo! Akemo mere calo yamo ajuru, bino mwoc i tuc iwi jo areco. Akemo a Rwot agwa meicel mom bino kwe, tuno wan ame doŋ ocobo gin ame eyikere me tiyo, Ibino niaŋ wunu man icennere, i kare ame pwod tye anyim. Rwot okobo ni, “I kare-naca abino bedo Obaŋa a jo me doggola Icrael luŋ, gin bino bedo jona.” Rwot okobo ni, “Jo ame obwot i lak pala lweny, kica obin opoto i komgi i tim, i kare ame jo Icrael tye ayenyo ka weo, An anyutte baŋgi i kannabor, abedo maro jo Icrael kare ducu i mar a mom lokere, mannono omio an amedo bedo agen i nyimi nakanaka. Dok abino pitowu odoco wun jo Icrael, ite Cuŋ wunu, dok ibino ruko wunu ruk me kwogo ite bino myel wunu i yomcuny, Dok ibino medde pito poto olokwu, i wi kiddi me Camaria, opit olokkono bino pito oko ducu, icennere gin bino camo nyige ame ocek. Pien nino tye abino anyim ame okurpiny bino lwoŋo iye, kun olwoŋo i lobo obedo kidikidi me Epraim ni, ‘Ya wunu, me owot wunu i Cion, baŋ Rwot Obaŋawa.’ ” Rwot okobo ni, “Wer wer me yomcuny i dwon aloŋo pi jo Icrael, ya ired wunu pien gin obedo rok adwoŋ meicel, i akina rok ducu. Rab wunu pi Rwot, dok ipake wunu, kun ikobo wunu ni, ‘Rwot doŋ olaro jo mere oko, jo Icrael ame odoŋŋere.’ Nen ba, abino kwanyogi oko i lobo ame tye tutuŋ anyarodi, abino cokogi i kannabor meicel, ame tye iyi agikki piny. Otowaŋ kede onwalo bino bino karacel kedgi, mon ayac kede mon a doŋ gorogoro meicel, jo ame bino dwogo kan bino bedo adwoŋ meicel. Gin luŋ obino bino kun okoko, an abino telogi me dwokogi cen, kun akweo cunygi, abino miyogi obedo i ŋet kulo ame pii opoŋ iye, obino lubo yo ocuŋ atira kun mom otwomere i ginnoro; pien an abedo pappa a jo Icrael, jo Epraim en obedo itinona me kao. “Winy wunu koppa an a Rwot, wun rok ducu, rab wunu koppere i lobo ame tye kan aboco, rab wunu pire naka i dog nam luŋ. Ŋat ame rik okeketo jo Icrael, en a daŋ dok bino cokogi, bino gwokogi kite ame akwat gwoko kede rommi mere. Pien Rwot doŋ otyeko lakoro jo Icrael oko iyi opii, en olarogi i cin rok onwoŋo tek meicel katogi oko. Gin bino bino ote wer i dwon aloŋo i wi kidi me Cion, cunygi bino bedo ayom micel i kom gum ame abino miyogi, i kom kai, kono olok, kede moo, i kom rommi kede dok ame onywalo, Kwogi bino bedo aber meicel calo poto ame pii romo, mom dok obino bedo i cwercuny kadi acel. Anyira bino myel yomcuny adwoŋ meicel, jo oteggo kede awobe luŋ daŋ cunygi bino bedo ayom. Abino loko kokogi doko yomcuny, abino kweyo cunygi odoco, ate miyogi yomcuny akaka cwercuny. Abino miyo olamdog camo cam adwoŋ meicel dok abeco, jami abe co-no luŋ ame amiogi bino tyeko mitti a jona oko. Man kop a Rwot okobo.” Rwot okobo ni, “Dwon tye ka winyere i Rama, koko kede twon kumo adwoŋ meicel. Lakeri tye ka koko itino mere, en okwero ni myero kur kwe cunye, pien itino mere doŋ pe.” Rwot okobo ni, “Wek wunu koko bedi, we pig wanwu doŋ oko. Pien ticcoro luŋ ame itio wunu obino culowu pire, gin bino dwogo cen i lobo ame okworgi oterogi iye. Itye wunu kede gen i kare ame tye anyim, Itinowu bino dwogo cen i lobogi ikokome. Man kop a Rwot okobo. Awinyo ka jo Epraim tye akoko i cwercuny, kun okobo ni, ‘Rwot doŋ opwodowa calo dyaŋ ame mom opwonyo i pur, dwogowa cen me wan odok cen kakarwa, pien yin ibedo Rwot Obaŋawa. Pien i kare ame otyeko ya oko i baŋi, oŋut, i kare ame opwonyowa, ocako bedo i cuny me dwogo cen. Lewic omakowa meicel, dok alee otwodowa, pi bal ame wan otimo i kare ame pwod wan otino.’ “Epraim obedo atinna ame amaro? En obedo atin ame amaro kato itino ducu? Pien kare ducu ka atye ka kobo kop i kome, pwod amedde po pire meicel. Mannono omio cunya tye ka myel meicel pire, abino gire time kica ateteni. Man kop ame Rwot okobo. “Ket wunu ginnoro ame nyuttiwu yo, gur wunu alama mogo i yo me cimo yo, tam wunu atek meicel pi yo gudo, ame obedo yo ame rik iwoto wunu kede. Dwog wunu cen ba, wun jo Icrael, dwog wunu cen i bomawu ame yam iweweko wunu-ni. Ibino bedo wunu kala akala pi kare arom mene wun jo ame mom genne-ni? Pien Rwot doŋ otyeko keto ginnoro anyen i lobo, dako en ame gwoko ico.” Rwot me mony, ame obedo Obaŋa a jo Icrael okobo ni, “Jo man dok bino kobo kop magi i lobo Juda kede i boma luŋ me Juda, i kare ame adwoggogi cen i kucgi. ‘Rwot myero mi gum i kom kidi acil me Jerucalem, kabedo acil ame en bedo iye.’ Jo ame bedo i Juda kede i boma luŋ ame tye iye, okwat kede opur, kede okwa rommi ame bedo kuno, gin luŋ obino bedo karacel. Abino miyo jo ame ool limo teko, dok abino miyo jo ame kec ociro atek meicel camo cam ote yeŋ.” Mannono bino miyo jo kobo ni onino aber meicel dok i kare ame ocoo onwoŋo komgi yot atek. Rwot okobo ni, “Kare tye abino ame abino miyo dano kede lee bedo adwoŋ meicel i lobo a jo Icrael kede i lobo a jo Juda. Kare tye abino ame abino gwokogi i kare me pitogi kede miyogi doŋo malo kite ame rik agwokogi kede i kare me mukogi, me putogi, me turogi, me tyekogi kede i kare me keto can i komgi. I kare-naca gin mom dok obino medde kobo ni, ‘Kwariwa rik ocamo nyig olok awac, ame te dilo lak itino oko.’ Ento dano acel acel bino to pi ballere en ikome. Amannono daŋ ŋat ame bino camo olok awac lake bino dil oko. “Rwot okobo ni, Kare bino romo, ame abino moko cikerena anyen kede doggola Icrael kede doggola a Juda. Mom dok abedo bala cikere a rik aketo i kom kwarigi ca, i nino ame rik amakogi i ciŋgi, ate kwanyogi oko i lobo me Miciri, cikerena ame gin obin oturo oko kadi bed an rik onwoŋo atye acalo cwargi. Man kop ame Rwot okobo. Doŋ man en cikere ame abino moko kede doggola Icrael ka kare naca okato. Abino keto cik i cunygi, ate coyo i yigi. An abino bedo Obaŋagi, gin ote bedo jona. Ŋattoro a pwonyo wadgi doŋ bino bedo mom, akadi ŋat ame kobbi ominnere ni, ‘Ŋe Rwot,’ pien gin luŋ obino ŋeya, geye i kom jo atino ame tye i akinagi, ituno i kom jo adoŋo. Pien abino timogi kica i kom timgi areco, mom dok abino poyo balgi.” Rwot okobo ni, “Ŋa ame omio cen me menyo dyeceŋ, ŋa ame omoko kite ame dwel kede acer menyo kede piny dyewor? Ŋa ame mio pii tugere i nam te cako mor? Ŋat otimo amannono luŋ nyiŋe obedo Rwot me mony.” Rwot okobo ni, “An doŋ atyeko moko kite ame piny myero bed kede kare luŋ, ka ce gin ame amoko-nono twero lokere, ikwae Icrael daŋ bino lokere, mom dok ote bedo rok ame an ayero acalo mera atwal.” Rwot okobo ni, “Ka ce otwero pimo polo ame tye malo, dok ka ce otwero roto kite ame acakki me polo tye kede piny, mannono bino miyo an daŋ akwero jo Icrael, pi ginnoro luŋ ame gin otyeko timo.” Rwot okobo ni, “Nen ba, kare tye abino ame boma man dok obino gero odoco pi Rwot, kun ocako gero i kan ocuŋ iguŋ malo ame olwoŋo ni Kananel naka i dogcel ame olwoŋo ni Dogcel me Gul. Obino pimo i tol naka i tur ame tye kannabor ame olwoŋo ni Gareb te gono dok piny i Goa. Luŋ luŋ ame rik oonyo iye kom jo oto kede buru, tuno kede naka i luŋ me Kidron, tuno kede i dogcel ame tye i kona ame olwoŋo ni Dogcel me Aguragura kato kede naka tuŋ kide, mannono luŋ bino bedo kabedo acil pi Rwot. Mom dok obino puto kadi acel akadi turo.” I mwaka me apar me loc a Jedekia abaka me Juda, ame mannono rik onwoŋo obedo mwaka me apar wie aboro me loc a Nebukadnejar abaka me Babulon, kop a Rwot rik obino baŋ Jeremia, I kare-naca onwoŋo mony abaka me Babulon tye ka guro Jerucalem, adwarpiny Jeremia rik ote cego oko i dyekal okur piny ame tye i paco abaka me Juda. Jedekia abaka me Juda onwoŋo rik otwee oko i buc, kun kobo ni, “Piŋo yin itye ka rabo kop kun ikobo ni Rwot okobo ni, Nen ba, an am iyo boma man oko i cin abaka me Babulon, en bino mayo oko, Jedekia abaka me Juda mom bino bwot iciŋ jo Kaldaya, obino miye oko ateteni i cin abaka me Babulon, ame en bino kop kede wan i wan, kun ŋat acel acel neno ton wan awottere. En bino tero Jedekia i Babulon, en bino bedo kuno tuno wan ame abino lime, kadi bed ilweny wunu i jo Kaldaya rom mene, mom gire ibino loyogi wunu.” Jeremia okobo ni, “Kop a Rwot obino baŋa, kun kobo ni, Nen ba, Kanamel wot a Calum ame obedo neroni bino bino baŋi te kobbi ni, ‘Wil potona ame tye i Anatot, pien yin i watta ame itye kede twer me wilo.’ Oyotoyot Kanamel ame obedo atin nerona te bino oko baŋa, kite ame Rwot onwoŋo okoba kede, te kobba ni, ‘Wil potona ame tye i. Anatot i lobo a jo Benjamin, pien yin itye kede twer me wilo. Wil lobo-naca me bedo megi ame yin ilo’. An ate niaŋ ni kop ame onwoŋo awinyo kara onwoŋo obedo kop a Rwot ateteni. “An ate wilo poto i baŋ Kanamel, ame obedo atin nerona, poto ame onwoŋo tye i Anatot. Kare ame opimo lim me wilo poto-naca, onwoŋo ni wellere romo cekel me ryal apar wie abiro, Ate keto ciŋa i waraga me cikere, ote mwono doge oko, ote nwoŋo ocaden ame gin te pi mo lim i mijan, An ate tero waraga me cikere me wilwa-nono ame tito kit kare ame bino ri kede i ciŋa kede cik ame myero lub, kede kopi mere ame rom aroma kede ame mom omwono doge, ate wot miyo waragawa me cikere-nono baŋ Baruk wot a Neria ame obedo wot a Maceya, kun Kanamel atin nerona daŋ tye, kun ocaden ame oketo ciŋgi i waraga me cikere daŋ tye, karacel kede Ojudaya mogo ame rik tye obedo i dyekal okur-piny. An ate ciko Baruk i nyimgi kuno, kun akobo ni, ‘Rwot me mony, ame obedo Obaŋa a jo Icrael, okobo ni, Kwan waraga me cikere magi, en ame omwono doge kede en ame mom omwono doge, ite ke to iyi abino ame ocweo i lobo me wek gin ri kare alac, Pien Rwot me mony, ame obedo Obaŋa me Icrael okobo ni, Udi kede potti kede olok-gu dok obino medo wilo i lobo man.’ “Kare ame doŋ atyeko miyo waraga me cikere magi baŋ Baruk wot a Neria, akwao Rwot, kun akobo ni, ‘Ama Rwot Obaŋa we! Yin giri en ame itio polo kede lobo kun itio kede tekoni adwoŋ. Mom tye ginnoro atek baŋi gire, yin ame inyuto mar a mom lokere baŋ jo tutumia i tutumia, dok yin daŋ iculo kwor pi bal onywal i kom ikwaegi ame bino i ŋegi. Ama Rwot Obaŋa ame tye kede twon twer kede teko adwoŋ meicel, ame nyiŋi obedo Rwot me mony, yin ame ibedo kede yik me awura, dok itio gigi mo go adonodono me awura. Yin ame waŋi yabere kare ducu i kom gin ame dano tio kun iculo dano acel acel ame lubo kite ame en tyekede, kede pi ticame en otio. Yin ame inyuto anyut kede gigi mogo me awura i lobo Miciri, tuno kede i kareni iyi Icrael kede i akina lwak luŋ, ame omio aman i kare-ni doŋ onei i kabedo ducu. Yin rik ikwanyo joni Icrael i lobo me Miciri i twoni anyuttogo adoŋodoŋo kede tano mogo me awura, i twon ciŋi atek meicel, ame kelo twon lworo adwoŋ twatwal; yin rik ite miyogi lobo man, ame rik onwoŋo ikwonere pire baŋ kwarigi, lobo ame cak kede moo kic dwoŋ iye meicel. Gin rik te donyo i lobo man gamo bedo meggi. Gite gin rik mom ote winyo koppi akadi lubo cikki. Gin mom otimo ginnoro kadi acel i kom ginnoro luŋ ame rik icikogi iye. Mannono omio yin imio gin aracci luŋ opoto i komgi. Nen ba, mony tye abino me bino mako boma man oko pi peko me pala lweny, kec, kede too edeke omio boma man otye doŋ ka miyo oko iciŋ jo Kaldaya ame doŋ tye ka lweny kede. Gin ame rik yin ikobo doŋ obino me cobere, doŋ nen ba, yin itye giri ka neno. Kadi amannono, Ama Rwot Obaŋa, yin onwoŋo ikobba ni, “Wil po to kede lim, dok myero ibed ocaden i kare me wilo.” Kun kono yin itye ka miyo boma man oko i cin jo Kaldaya.’ ” Kop a Rwot obino baŋ Jeremia, kun kobbe ni, “Nen ba, an a Rwot Obaŋa a jo ducu, tye ginnoro ame tek baŋa? Pi mannono ba, Rwot okobo ni, Nen ba, an atye amiyo boma man oko i ciŋ jo me Kaldaya, i cin abaka Nebukadnejar, abaka me Babulon. En bino mayo boma man oko. Jo Kaldaya ame tye ka lweny i kom boma man bino bino ote bino cwinyo mac i kom boma man, ote wano oko, kun owaŋo udi luŋ ame yam otye ka yalo iye Baal odok akur i wigi malo, karacel kede mot amata ame otye ka yalli obaŋe mogo ocele, me miyo akemo mako Rwot. Pien mom tye ginnoro ame jo Icrael kede jo Juda otimo aber kono ka timo bal keken cakere con i kare me tinogi; ikwae Icrael mom otimo ginnoro aber kadi acel, kono ka roka ame akemo maka i tic ame gin obedo tiyo. Boma man ocoo akemona kede iniga luŋ ame onwoŋo atye kede, cakere i kare me gero tuno kede naka tin, mannono omio amoko ni myero doŋ akwanyo oko i nyima, pien pi tim areco luŋ ame ikwae Icrael kede ikwae a Juda obedo timo me roka wek akemo maka. Gin ame obakkigi kede rwodegi obedo timo, gin ame olamdog kede odwarpiny obedo timo kede gin ame jo ame bedo i Jerucalem obedo timo. Gin doŋ olokka negi, kun owito nyimgi tene; kadi bed abe do pwonyogi tere i tere, gin gigi mom owinyo gin ame apwonyogi kede. Gin obedo timo tim me kwer i ot ame olwoŋo kede nyiŋa, me obal gigi oko. Ogero kabedo mogo i wi kiddi malo me woro Baal i luŋ a wot a Kinnon me miyo itinogi awo be kede anyira baŋ jok ame olwoŋo ni Molek, kadi bed rik an mom acikogi me timo amannono, kun daŋ mom otamo pire kadi acel, ni gin bino timo tim man me kwer, me miyo Juda po to i bal. “Aman doŋ ba, man en kop ame Rwot Obaŋa okobo i kom boma man ame wun ikobo wunu ni, ‘Otyeko miyo oko i cin abaka me Babulon pi pala lweny, kec, kede too edeke’. Nen ba, an abino coko jo man ducu i lobo apapat ame abino ryemogi cwayogi iye, iyi akemo kede twon iniga adwoŋ meicel ame onwoŋo omaka i komgi, abino dwoggogi i kabedo man ate miyogi bedo i kuc iye. Gin bino bedo jona, an abino bedo Obaŋagi. Abino miyogi obedo i cuny acel, kun kitegi acel me olwora kare ducu, mannono abino timo pirgi kede pi ber bedo ikwaegi ame bino lubogi. Abino ci kere kedgi cikere ame perakino nakanaka, mom dok abino loko tamma me timo gin aber i komgi; abino miyogi obedo kede cuny me lwora me kur dok oya oko i baŋa. Cunya bino bedo yom me timo gin aber pirgi dok abino miyogi oguro lwitgi i lobo man i twon gen adwoŋ, kun atimo i cunya ducu kede tipona ducu. “Pien Rwot okobo ni, Kite acalo akelo kede twon gin arac i kom jo man, abino daŋ kelo gin aber ame atyeko ciko pire i komgi kittono. Dok obino wilo potti i lobo man ame wun ikobo wunu ni doŋ odoko wi obur, kan ame dano kede leyi mom doŋ bedo iye; otyeko doŋ miyo oko i ciŋ jo Kaldaya. Potti dok obino wilo kede lim, jo bino daŋ coyo waraga me cikere ate keto cin iye, ote mwono daŋ doge oko kun ocaden tye, i lobo a jo Benjamin kede i kabedo luŋ ame oguro Jerucalem, karacel kede i boma luŋ me Juda, kede i boma luŋ ame tye i Negeb. Abino dwoggogi kucgi, man kop a Rwot okobo.” Rwot dok te kobbi Jeremia tyen me aryo mere i kare ame onwoŋo en pwod tye i buc i ot ame tye i dyekal okur-piny, kun kobbe ni, “Rwot ame oketo lobo, Rwot ame ocweo te miyo moko atek, nyiŋe olwoŋo ni Rwot. En okobo ni, Lwona, an abino gamo dogi, dok abino titti twoni gigi mogo me i muŋ ame yam mom iŋeo. Pien Rwot ame obedo Obaŋa a jo Icrael okobo kop i kom udi ame tye i boma man, kede udi obakki me Juda ame yam orereto oko piny. Mom tye konnyoro ame olweny i lobo ame omony me Kaldaya oto. Jo Kaldaya tye abino me bino lweny i kom boma man me wek omi kom jo oto radde arada iye, jo ame akemona kede inigana bino miyo anekogi. Pien atyeko doŋ kano waŋa oko i kom boma man kun mom dok amito ni anen pi timmogo areco ame jo iye bedo timo. Nen ba, abino miyogi ocan ote bedo i yotkom, abino caŋogi ate nyuttigi twon lonyo kede kuc adwoŋ. Abino dwogo kuc me Juda kede me Icrael, dok abino gerogi adwokogi kit ame rik otye kede con. Abino lwokogi oko i kom bal luŋ ame yam gin otimo i koma, te timogi kica i balgi luŋ kede timgi me bedo jem i koma. Abino nwoŋo nyiŋ me yomcuny i boma man, dok daŋ rok luŋ ame tye i wi podo bino paka kun oketo kwogo i koma, ka gin owinyo pi gin aber luŋ ame atimo i kom jo me boma man, Gin luŋ obino bedo kede lworo kun komgi myel pi gin aber kede pi lonyo ame amio iye. “Rwot okobo ni, I kom kabedo man ame wun ikobo wunu ni odoko wi obur ame dano kede lee mom bedo iye, kede i boma luŋ ame bedo i Juda kede i yo atitino luŋ ame tye i Jerucalem ame jo mom doŋ bea iye, dok ame mom doŋ tye jo moro, akadi leyi moro ame doŋ bedo iye, dwon me yomcuny bino winyere iye, karacel kede dwon atera kede me anyom, dwon jo ame tye ka wer kun okelo motgi me pwoc i ot a Rwot, ame ower ni, ‘Pwo wunu Rwot me mony, pien Rwot ber, marrere a mom lokere perakino wan i wan!’ Pien abino dwoggo kuc me lobo man kite ame rik tye kede con, Man kop a Rwot okobo. “Rwot me mony okobo ni, I kabedo man ame doŋ odoko wi obur ame jo kede leyi doŋ mom iye, karacel kede boma luŋ ame tye iye, okwat ame tye akwayo rommigi bino dok bedo iye. I boma luŋ ame tye i lobo obedo kidikidi, i boma luŋ ame tye i Cepela, i boma luŋ ame tye i Negeb, i boma luŋ ame tye i lobo a jo Benjamin, i kabedo luŋ ame oguro Jerucalem, karacel kede i boma luŋ ame tye i Juda, rommi kede dyegi pwod dok bino bea iye i nyim dano ame tye akwanogi, man kop a Rwot okobo. “Nen ba, kare tye abino, ame abino cobo iye ginnoro luŋ ame rik aciko baŋ jo me ot Icrael kede me ot a Juda. I kare-nono, kede i nino-nono ikokome abino keto dok akwar Daudi ikokome i kom me loc. En bino ŋolo kop kakare kun tio gin a tye atira me miyo kuc bedo tye i lobo. Ka karenono oromo jo Juda kede Jerucalem bino larre te bedo mot i kuc. Nyiŋ ame obino lwone kede ene: ‘Rwot ame olarowa.’ “Rwot okobo ni, Akwar Daudi mom bino rwenyo i wi kom loc me ot a Daudi, dok daŋ olamdog ame obedo jo Levi mom bino bedo aboŋo dano moro i nyima me miyo mot awaŋa kede wano mot me moko kwon kede me ŋolo leyi me yala kare i kare.” Rwot okobbi Jeremia ni, “Rwot okobo ni ka ce itwero turo cikerena ame ocikere kede wan kede dyeceŋ kede en ame ocikere i dyewor, ame twero miyo dyeceŋ kede dyewor mom twero bino i kare ame doŋ otyeko moko oko pirgi, itwero daŋ turo cikerena wan i Daudi ame obedo amirona, ame te miyo en bedo aboŋo akware moro i wi kom me loccere, kede cikerena wan olamdog kede jo Levi me tiyo ticca. Kite ame mony me polo mom romo kwanne kede, dok kwoyo ame tye i dog nam mom daŋ oromo pimo, mannono en kite ame abino miyo kede ikwae a Daudi ame obedo amirona nya kede, karacel kede olamdog ame obedo jo Levi ame gin jo atio ticca.” Rwot okobbi Jeremia ni, “Yin ce pe inian gin ame jo man tye ka kobo ni, ‘Rwot otyeko kwero Icrael kede Juda oko ame gin atekere ame yam en oyero?’ Mannono omio gin otye ka cayo jona acaa bala mom obedo rok. Doŋ Rwot okobo ni, Ka ce mom aketo cikerena kede ceŋ kede dwe, dok daŋ ka mom aketo cikkoro ame tye ka loyo polo kede lobo, mannono bino miyo akwero ikwae a Yakobo karacel kede Daudi amirona, dok daŋ mom abino yero akware moro me loyo ikwae Iburaim, Icaka, kede Yakobo, Pien abino dwoggo kucgi dok daŋ kica bino maka i komgi.” Man en kop ame obino baŋ Jeremia i kare ame Nebukadnejar, abaka me Babulon kede dul monnyere, karacel kede dul mony me rok apapat ducu ame tye ite loccere onwoŋo tye ka lweny i Jerucalem kede i boma luŋ ame onwoŋo ceggi kede. Kop ame Rwot okobo ene: “Rwot. Obaŋa me Icrael okobo ni, ‘Wot ikobbi Jedekia ame obedo abaka me Juda ni, Rwot okobo ni, Nen ba, an amio boma man i cin abaka me Babulon, en bino waŋo oko kede mac. Yin mom ibino bwot i ciŋe, cite obino maki ote miyi i ciŋe, ibino neno abaka me Babulon wan i waŋ, dok ibino kop wunu kede waŋ i waŋ; yin ite wot i Babulon.’ Kadi amannono myero iwiny kop a Rwot, yin abaka Jedekia, me Juda! Man en kop ame Rwot okobo i komi. ‘Yin mom obino neki i pala lweny. Ibino to giri i kuc, Kite acalo rik owaŋo gin a ŋwece kur pi kwariwu ame gin ogeo bedo obakki i nyimi, yin daŋ obino wano gin a ŋwece kur piri, jo te kumo piri kun okobo ni, “Abaka doŋ oto oko doi!” ’ Pien an Rwot akobo kop man.” Adwarpiny Jeremia te kobo kop magi luŋ baŋ Jedekia abaka me Juda, kun kobbe i Jerucalem, i kare ame dul mony abaka me Babulon tye ka lweny i kom Jerucalem kede i kom boma luŋ me Juda ame onwoŋo odoŋ, Lakic kede Ajeka; pien magi en ame onwoŋo obedo boma me Juda ame onwoŋo ocelo kede cel atek, ame onwotjo odoŋ. Kop a Rwot ame ekobo baŋ Jeremia i kare ame abaka Jedekia doŋ onwoŋo otyeko cikere oko i jo luŋ ame tye i Jerucalem, ni gin myero gony opii oko kun orabo pire kannabor, ni mannono ŋat acel acel myero gony Eburania wadgi oko ame onwoŋo tye baŋe acalo opii, ico onyo dako, me kur ŋattoro dok mi dano me Eburania wadgi bed opii mere. Jo luŋ te winyo kop ame abaka orabo-nono, rwode karacel kede lwak ame omoko cikere-nono te ye gonyo opiigi oko, ame co onyo mon, me gin kur medde bedo opiigi; gin owinyo cikkono ote gonyogi oko, Cite icennere gin dok te wot omo co kede mon ame onwoŋo gin ogonyo oko, ote dwoko dok ite locgi acalo opiigi. Rwot te kobbi Jeremia ni, “Rwot Obaŋa me Icrael okobo ni, Rik aketo cikerena kede kwariwu, ate kwanyogi oko i lobo me Miciri, i ot me opii, kun akobbigi ni, ‘Iyi agikki me mwaka abicel abicel, ŋat acel acel myero gony dano me Eburania wadgi oko ame onwoŋo yam ocato baŋe te bedo tic baŋe pi mwakki abicel; akobo ni myero igony wunu kodi dano-nono i tic ame yam en tio baŋwu’, cite kwariwu te kwero winyo oko, kun mom daŋ ociko yitgi me winyo koppa. I kare aceggini, wun iŋut wunu ite timo wunu gin atye atira i nyima pi rabo pi gonyo opii, ŋat acel acel baŋ wadgi, wun dok ite medo wunu cikere i nyima i ot ame olwoŋo i nyiŋa. Cite dok ite lokere wunu balo nyiŋa i kare ame wun dok iomo wunu co kede mon ame yam obedo opiiwu ame onwoŋo doŋ ityeko gonyo wunu oko, kun ilubo wunu mitgi, ite dwoggogi wunu dok i te locwu me bedo opiiwu. Pi mannono ba, mom iwinyo wunu kadi acel pi rabo pi gonyo omegowu kun ŋat acel acel gonyo ominnere kede awottere; pi mannono ba, an en a doŋ abino gonyowu oko me ito i pala lweny, too edeke, kede kec. Abino miyo ibedo wunu gin ame mio jo me loc apapat me lobo bedo kede lworo. Dok jo ame oturo cikerena, ame okwero lubo ginnoro luŋ ame onwoŋo tye i cikere-naca, abino miyo oŋologi calo atin twon me cikere ame gin oŋolo i dul aryo. Rwode me Juda, rwode me Jerucalem, jo ame oliro, olamdog kede jo luŋ me lobo-nono ame bedo i akina dul kom atin twon ame opoko aryo, abino miyogi i cin okworgi kede i ciŋ jo ame mito nekogi, Winy atwarre malo kede leyi en ame bino camo komgi ka oto. Jedekia abaka me Juda kede rwode mere obino miyo luŋ i cin okworgi kede i ciŋ jo ame mito nekogi, i ciŋ mony abaka me Babulon, ame yam kon onwoŋo oweko lweny kedwu oko. Nen ba, abino miyogi odwogo cen i kom boma man, ote lweny i kome ote mayo oko, ote waŋo daŋ oko i mac. Abino miyo boma luŋ ame tye i Juda doŋ nono aboŋo ŋattoro ame bedo iye.” I kare ame Yekoyakim wot a Yocia obedo abaka me Juda, Rwot okobbi Jeremia ni, “Wot i ot a Rekab iwot ikob kedgi i te kelogi i ot a Rwot, kelgi iyi icika moro acel ame tye i ot a Rwot, ite miyogi kono olok me omati.” Mannono omio ate wot kwanyo Jajania wot a Jeremia moro ocele ame obedo wot Abajinia, kede omego mere kede awobe mere luŋ karacel kede jo me ot a Rekab luŋ. Akelogi luŋ iyi icika ame tye i ot a Rwot, icika itino a Kanan wot a Igdalia ame en obedo dano Obaŋa ame icika mere onwoŋo ceggi i me a rwode ame tye i ŋet icika a Maceya wot a Calum, ame obedo agwok doggola me ot a Rwot. Ate cibo ikopo kede abino ame kono olok opoŋ yie i nyimgi, ate kobbigi ni, “Mat wunu.” Cite gin bino gamo ni, “Wan giwa mom obino mato kono olok, pien Jonadab wot a Rekab ame obedo kwariwa ocikowa ni, ‘Mom ibino mato wunu kono olok, akadi wun ikomwu onyo ikwaewu wan iwaŋ. Mom ibino gero wunu wudi; mom ibino coyo wunu koti; mom ibino pito wunu ginnoro akadi ibedo i poto olok. Ento ibino bedo wunu i kema i kare luŋ me kwowu, me iperakino wunu kare alac i lobo ame wun itye wunu iye acalo wele.’ Wan owinyo kop a Jonadab ame obedo wot a Rekab ame obedo kwarowu i ginnoro luŋ ame en ocikowa iye, ni kur omat koŋo pi kare me kwowa luŋ, wan ikomwa monwa, awobewa, naka anyirawa, kun mom ogero udi me bedowa. Wan giwa mom otye kede poto olok akadi potti me ginnoro ocele; ento wan giwa obedo i kema kun otio ginnoro luŋ ame kwarowa Jonadab ocikowa iye. Cite i kare ame Nebukadnejar, abaka me Babulon obino me lweny i kom Jerucalem, wan okobo ni, ‘Bin, owot i Jerucalem pi lworo mony a jo Kaldaya kede me Curia.’ Mannono en omio i kare-ni wan otye obedo i Jerucalem.” Rwot dok te kobbi Jeremia ni, “Rwot me mony, ame obedo Obaŋa a jo Icrael okobo ni, ‘Wot ikobbi jo me Juda kede jo ame bedo i Jerucalem ni, Mom ce itwero winyo wunu pwony ame apwonyowu kede, kede kop ame akobbiwu? Cik ame Jonadab wot a Rekab ociko kede awobe mere, me mom mato kono olok, rik gin obin ogwoko, Gin naka mom omato kono olok tuno naka tin pien gin owinyo cik a kwarogi. An abedo kop kedwu tere tere cite wun mom iwinyo wunu koppa. Omirona luŋ ame obedo odwarpiny, gin luŋ an acwaogi baŋwu kun acwaogi tere tere, kun akobbigi ni, “Aman myero doŋ ilokere wunu, ŋat acel acel wek yo mere me timo gin arac, kun iyiko wunu tic ame itio wunu, dok daŋ mom ibino lubo wunu obaŋe mogo ocele me tic pirgi, ite bedo wunu i lobo ame amiowu kede baŋ kwariwu.” Cite wun mom iye ci ko wunu yitwu akadi winya wunu. Awobe a Jonadab wot a Rekab gire ogwoko cik ame papagi ocikogi kede cite rok man okwero winye oko. Pi mannono ba, Rwot ame obedo Obaŋa me mony, Obaŋa a jo Icrael okobo ni, Nen ba, an akelo gin arac ame doŋ atyeko rabo pire i kom jo Juda kede i kom jo luŋ ame bedo i Jerucalem, pien an akobo kedgi, ento gin okwero winyo oko, an alwoŋogi, okwero-gu gamo doga oko.’ ” Jeremia te kobo ni, “Cite jo me ot a Rekab, Rwot me mony ame obedo Obaŋa a jo Icrael okobo ni, Pien gin owinyo cik a papagi Jonadab, ote lubo ginnoro luŋ ame en ociko baŋgi, pi mannono ba, Rwot me mony ame obedo Obaŋa a jo Icrael okobo ni Jonadab wot a Rekab bino bedo kede akware moro ame cuŋ nyim Rwot kare luŋ.” I mwaka me aŋwen me loc a Yekoyakim wot a Yocia, abaka me Juda, Rwot okobbi Jeremia ni, “Kwany buk adola, ite coyo kop luŋ ame atyeko kobo i kom Icrael, i kom Juda kede i kom rok apapat luŋ cakere i kare ame akobo kedi, i kare a Yocia tuno kede naka tin. Gwok on yo jo me ot a Juda twero winyo gin arac ame ayikere me timo i komgi, ame twero miyo ŋat acel acel weko yo mere arac ame etye ka lubo, me atot ya atimgi kica i kom balgi kede i kom gin arac ame yam obedo timo.” Jeremia te lwoŋo Baruk wot a Neria, Baruk te coc i buke adola, kun coo kop luŋ ame Jeremia tye akwano, ame rik Rwot onwoŋo okobo baŋ Jeremia. Jeremia te ci ko Baruk ni, “An doŋ otyeko geŋa oko me mom donyo i ot a Rwot, pi mannono yin myero iwot iye, eka i nino me kanyo kec, ibino kwano kop a Rwot ame ityeko coyo i buk adola-ni i kare ame akwano baŋi, ibino kwano i nyim jo kuno i ot a Rwot kun jo winyo, Ibino kwano daŋ ame jo Juda luŋ tye awinyo, jo ame obino i boma apapat. Gwok on yo kwacgi twero tuno i nyim Rwot, dok onyo ŋat acel acel bino weko yo arac ame etye ka lubo, pien akemo doŋ ociro Rwot oko, kede wancuny, ame Rwot doŋ otyeko rabo pire i kom jo mere.” Baruk wot a Neria te timo ginnoro luŋ ame adwarpiny Jeremia ocike me timo i kom kop me kwano kop a Rwot ame tye i buk adola i ot a Rwot. I mwaka me abic, i dwe me aboŋwen me loc abaka Yekoyakim wot a Yocia, abaka me Juda, jo luŋ me Jerucalem kede jo ame obino i boma apapat me Juda, ame obino i Jerucalem, gin luŋ ote rabo pi kanyo kec i nyim Rwot. I kare-nono Baruk te cako kwano kop a Jeremia i buk adola, kun lwak luŋ winyo i ot a Rwot, iyi icika a Gemaria wot a Capan ame obedo Aran, Icika mere onwoŋo tye ceggi i dyekal ame onwoŋo tye tutuŋ malo i ŋet dogcel ame onwoŋo odonyo kede i ot a Rwot ame olwoŋo ni Dogcel Anyen. I kare ame Mikaya wot a Gemaria, wot a Capan owinyo kop a Rwot ame tye i buk adola, en te ru ya oko i paco a abaka, te wot donyo iyi icika aran abaka, en onwoŋo rwode luŋ tye ocokere kuno: Elicama aran, Delaya wot a Cemaya, Elnatan wot Akbor, Gemaria wot a Capan, Jedekia wot Anania, kede rwode ocele mege ducu. Mikaya te tittigi kop luŋ ame owinyo Baruk okwano i buk adola kun lwak ducu winyo. Rwode te oro Jekudi wot a Netania, wot a Celemia, wot a Kuci, me wot kobbi Baruk ni, “Kwany buk adola ame ikwano baŋ lwak ca, ibin kede kan.” Mannono te miyo Baruk wot a Neria kwanyo buk adola bino kede baŋgi. Gin te kobbe ni, “Bed piny me ikwan kop iye.” Mannono te miyo Baruk kwannigi kop ame tye i buk adola-nono. Kare ame gin owinyo kop ame okwano luŋ, ŋat acel acel olokere oneno awottere kun lworo ociro oko, gin doŋ te kobbi Baruk ni, “Wan myero omi abaka ŋe kop magi luŋ,” Gin te penyo Baruk ni, “Tittiwa kite ame ico kede kop magi luŋ. Jeremia en ame obedo kwanni kop mogiluŋ kunyinicoo?” Baruk tegamo ni, “En obedo kobo kop magi baŋa, kun an acoo kede alam yino i buk adola.” Rwode te kobbi Baruk ni, “Wot ipon wunu oko, yin karacel kede Jeremia, myero ŋattoro kur ŋe kan ame wunu itye wunu iye.” Rwode doŋ te wot i paco abaka, ote keto buk adola-naca iyi icika Elicama ame obedo aran; gin te tito kop luŋ baŋ abaka. Abaka te ru cwayo Jekudi me wot kelo buk adolanono, Jekudi te kwanyo bukkono iyi ici ka Elicama, ame obedo aran, eka en Jekudi te kwano baŋ abaka, kede rwode luŋ ame onwoŋo ocuŋ i ŋet abaka kuno. Man onwoŋo doŋ dwe me aboŋwen ame obedo kare me cwir, abaka onwoŋo tye obedo i ode ame ebedo iye i kare me cwir, kun tye aoyo mac. I kare ame Jekudi kwano buk adola, en okwano te tuno i dul me adek onyo aŋwen, abaka te gamo bukkono ŋoŋolo oko i pala te bolo oko i mac. En oweko bukkono owan i mac i tuno ka otum. Akadi en onyo dano moro i akina omiro mere ame owinyo kop magi kun okwano, mom obedo kede lworo moro kadi acel, mom daŋ oyeco boŋŋigi me nyu to cwercunygi. Kadi bed Elnatan kede Delaya kede Gemaria otemo cuko cuny abaka ni kur waŋ buk adola, cite en gire mom oye winyo kopgi. Abaka te ciko Jeramel ame obedo wode en abaka kede Ceraya wot a Ajiriel kede Celemia wot Abdel me mako Baruk ame onwoŋo obedo aran kede Jeremia adwarpiny, cite Rwot okanogi gire oko. I kare ame abaka otyeko wano buk adola ame onwoŋo Baruk rik ocoo kun Jeremia kobbe gin ame ocoo, Rwot dok te kobbi Jeremia ni, “Kwany dok buk adola ocele ico iye kop luŋ ame rik icoo i buk adola me agege-ca, ame abaka Yekoyakim, abaka me Juda otyeko wano oko. Aco kop i kom Yekoyakim abaka me Juda, yin ibino kobo ni, ‘Rwot okobo ni piŋo kara iwano buk adola man, kun ikobo ni, “Piŋo ocoo iye ni abaka me Babulon bino bino gire ateteni te balo lobo man oko, te neko jo kede leyi luŋ ame tye iye?” Mannono omio Rwot okobo kop i kom Yekoyakim abaka me Juda kit man, ni mannono akware moro mom dok bino bedo i wi korri me loc a Daudi, kome obino bolo ata, cen te bedo wano dyeceŋ, kede nico me pee dyewor. Abino keto can i kome kede i kom ikwae, kede i kom omiro mere pi balgi. Ginnoro luŋ arac ame atyeko kobo i komgi, abino miyo poto i komgi, kede i kom jo ame bedo i Jerucalem kede i kom jo luŋ me Juda, ame gin mom otye ka winyo nono.’ ” Jeremia te dok kwanyo buk adola ocele, te miyo baŋ Baruk ni myero co, Baruk wot a Neria, ame daŋ te coyo kun Jeremia tye akobe kop luŋ ame onwoŋo rik tye i buk adola ame Yekoyakim abaka me Juda rik obin owaŋo i mac-ca, Jeremia omemedo daŋ koppogo ocele iye ame rom aroma i maca me agege-ca. Jedekia wot a Yocia, ame Nebukadnejar, oketo me bedo abaka me Juda, oloo loc akaka Konia wot a Yekoyakim, cite akadi en abaka onyo omiro mere, naka jo ame bedo i lobo mere mom oye winyo kop a Rwot ame rik en okobo baŋ adwarpiny Jeremia. Abaka Jedekia rik te cwayo Yekokal wot a Calemia, kede Jepania alamdog, wot a Maceya, ocwaogi baŋ Jeremia adwarpiny, kun kobbigi ni, “Kwa Rwot Obaŋawa pirwa.” I kare-nono onwoŋo Jeremia pwod wowota i akina jo, pien onwoŋo mom ru okete i buc. I kare-nono daŋ mony a Parao onwoŋo obino kun oya i Miciri; i kare ame mony a jo Kaldaya ame onwoŋo tye ka guro Jerucalem owinyo kop i komgi, gin te ya oko i Jerucalem. Rwot te kobbi Jeremia adwarpiny ni, “Rwot Obaŋa me Icrael okobo ni yin ibino kobo baŋ abaka me Juda ame ocwai ni yin ibin ipeny kop i baŋa ni, ‘Nen ba, mony a Parao ame obino me konyi ceggi dokoko cen i Miciri, i lobo mere. Jo Kaldaya bino dwogo cen, te bino lweny i kom boma man, gin obino mako oko ote waŋo oko i mac. Rwot okobo ni, Kur ibed bwolle wunu kenwu, kun ikobo wunu ni, “Jo Kaldaya gire bino bedo kannabor kedwa,” pien gin gire mom obino bedo kannabor. Pien akadi bed ilo wunu, mony a jo Kaldaya luŋ ame obino me lweny kedwu, eka te doŋ jo ame owanne keken, kun ŋat acel acel tye i kema mere, gin jo-nono bino ya eka te bino wano boma man oko.’ ” I kare ame mony a jo Kaldaya oya oko i Jerucalem, i kare ame mony a Parao obino, Jeremia oya i Jerucalem te wot i lobo a jo Benjamin me wot gamo dul lobo ame opokke i akina jo turegi. Kare ame en onwoŋo tye i dogcel ame olwoŋo ni Dogcel a Benjamin, adwoŋ ame loo ocirikale onwoŋo tye kuno, ame nyiŋe Irija, wot a Celemia, wot a Anania, en te mako adwarpiny Jeremia, kun kobo ni, “Yin itye ka lwi wot baŋ jo me Kaldaya.” Jeremia te gamo ni, “Mannono kop me goba, an gira mom alwi awot baŋ jo me Kaldaya.” Cite Irija mom oye winyo koppere-nono, omake te tere baŋ rwode. Akemo te maka rwode atek meicel i kom Jeremia, ote goye, ote kete i buc i ot a Jonatan, ame obedo aran, pien onwoŋo oloko ottono odoko ot kol. I kare ame otero Jeremia i ot ame tye i bur piny, oweke kuno pi kare alac, abaka Jedekia te cwayo jo me bino ome, ote tere i nyime. Abaka te bedo penye en kene i muŋ i ode, en te kobo ni, “Tye kopporo ame Rwot okobbi?” Jeremia te gamo ni, “Kop tye.” Jeremia te kobbe ni, “Yin obino miyi oko i ciŋ abaka me Babulon.” Jeremia dok te medo kobbi abaka Jedekia ni, “Gin aŋo arac ame an atimo baŋi, onyo baŋ omironi, onyo baŋ jo man, ame omio yin iketa i ot kol? Odwarpinyi tye kwene: ame orabbi kop kun okobo ni, ‘Abaka me Babulon gire mom bino lweny i komi kede i kom lobo man?’ Aman doŋ ba adwoŋ abaka, akwai me winyo koppa. Tim ber iwiny kwacca ame amio baŋi i mwolo, me kur dok idwoka cen i ot a Jonatan ame obedo aran, naka mio abino to oko kuno.” Mannono te miyo abaka Jedekia miyo cik, ote keto Jeremia bedo i dyekal okur-piny, kun omio ogati nino acel acel; ogati ame ogamo i baŋ oted ogati i yo ame gin bedo iye tuno wan ame ogati doŋ mom tye i boma, Mannono te miyo Jeremia medde bedo kuno i dyekal okur-piny. I kare-nono Cepatia wot a Mattan, Gedalia wot a Pacur, Jucal wot a Celemia, kede Pacur wot a Malcia, onwoŋo owinyo kop ame Jeremia obedo kobo baŋ lwak luŋ, kun kobo ni, “Rwot okobo ni ŋat ame bedo i boma man bino to i pala lweny, kec, kede too edeke. Cite ŋat ame bino wot Kaldaya bino bedo kwo, en bino bedo i kwo mere acalo mot ame omie pi lweny, en te medde bedo kwo. Boma man gire obino miyo ateteni i ciŋ mony abaka me Babulon, eka te gamo oko.” Rwode te kobo baŋ abaka ni, “Dano man myero nek oko, pien tye ka miyo ocirikale ame odoŋ i boma man tye adoko agoro karacel kede jo ocele luŋ, pi kobo kodi koppono baŋgi. Pien dano-ni mom tye atic pi ber bedo a jo man, ento pi timogi rac.” Abaka Jedekia te kobo ni, “Nen ba, en tye gire i ciŋi, pien abaka gire mom romo timowu i ginnoro.” Mannono te miyo gin kwanyo Jeremia oko ote wot bolo i bur pii me Malkia, ame obedo wot abaka ame onwoŋo rik tye i dyekal okur-piny kuno. Otweo Jeremia i tol ote cwayo piny i pii. Gum aber pii onwoŋo pe i burrono, kono ka coto keken, eka Jeremia te moko oko i coto. I kare ame Ebed-melek dano me Eciopia ame obedo dano ame oroo ame rik bedo i ot abaka owinyo ni obolo Jeremia piny i bur pii, I kare-nono onwoŋo abaka tye obedo i dogcel ame olwoŋo ni Dogcel a Benjamin, Ebedmelek oya i ot abaka te wot baŋ abaka, te wot kobbe, ni, “Adwoŋŋa abaka we, jo man otimo bal i kom ginnoro luŋ ame gin otimo i kom Jeremia adwarpiny, pi wot bole iyi bur pii piny; kec bino neke oko kuno, pien ogati moro mom doŋ tye i boma.” Abaka te ciko Ebed-melek, ame obedo dano me Eciopia, ni, “Kwany jo adek i kan iwot kedgi me iwot iwa Jeremia oko i bur pii piny, kun en mom ru oto.” Mannono te miyo Ebed-melek wot karacel i jonnono i ot abaka, ote wot donyo i ot ame okano iye jami, ote wot kwanyo keto boŋŋi mogo ame onwoŋo tye kuno, ote wot cwayo i tol piny i bur baŋ Jeremia, Ebed-melek, dano me Eciopia te kobbi Jeremia ni, “Ket boŋŋi-nu i te bwoki ite keto tol i wigi.” Jeremia daŋ te timo amannono. Gin te wayo Jeremia oko i bur, ote kele kannaler. Jeremia doŋ te medde bedo i dyekal okur-piny. Abaka Jedekia te cwayo dano lwoŋo Jeremia adwarpiny Jeremia te wot baŋe i dogcel me adek me donyo i ot a Rwot. Abaka te kobbi Jeremia ni, “Amito penyi, tim ber kur imunna kopporo kadi acel.” Jeremia te kobo baŋ Jedekia ni, “Ka ce akobbi, mom ibino moko tammi me neka oko? Dok ka ce ami tam, ibino ye winyo koppa?” Abaka Jedekia te kwoŋo i muŋ baŋ Jeremia ni, “Kite acalo Rwot tye kwo-ni, Rwot ame tipo a jo tye i ciŋe, mom abino neki kadi acel, akadi miyi i cin jo man ame neki-ni.” Jeremia te kobbi Jedekia ni, “Rwot me mony ame obedo Obaŋa a jo Icrael okobo ni, ka ce ibino miye keni i cin rwode abaka me Babulon, kwoni mom bino rwenyo, dok boma man daŋ mom obino wano kede mac, dok yin kede jo me odi luŋ ibino bedo wunu kwo. Ento ka mom ibino miye keni i cin rwode abaka me Babulon, boma man obino miyo oko i ciŋ jo Kaldaya, gin bino waŋo oko kede mac, dok yin mom ibino bwot i ciŋgi.” Abaka Jedekia te kobo baŋ Jeremia ni, “Atye kede lworo pi Ojudaya mogo ame otyeko lwi wot baŋ jo Kaldaya, naka mio obino miya baŋgi, naka mio gin te bedo toja.” Jeremia te kobo ni, “Mom gire abino miyi baŋgi. Aman myero yin iwiny kop a Rwot ame akobbi, bino miyo bedo aber, kwoni mom bino rwenyo. Cite ka ikwero miye keni, man en anyut ame Rwot otyeko nyutta: Nen ba, mon luŋ ame aman tye i ot abaka me Juda, onwoŋo otye ka tero oko baŋ rwode abaka me Babulon, kun okobbigi ni, ‘Owotewu ame igeno wunu ni, doŋ obwolowu oko, dok daŋ oloowu oko; aman ame tyeni doŋ omoko oko i coto-ni, gin oya oweki oko.’ Monni karacel kede awobeni obino tero oko baŋ jo Kaldaya, yin ikomi daŋ mom ibino bwot icingi, ento me Babulon bino maki oko; boma man obino wano oko i mac.” Jedekia te kobbi Jeremia ni, “Kur imi ŋattoro ŋe kop man, dok yin gire mom ibino to, Ka ce rwode owinyo ni an akobo kedi, eka gin te bino baŋi me penyi ni, ‘Kobbiwa kop ame ikobo baŋ abaka, kur imuŋŋiwa ginnoro pien wan gire mom obino neki’, yin ibino kobbigi ni, ‘Amio kwacca baŋ abaka kede mwolo, ni myero kur cwaa dok cen i ot a Jonatan me wot to kuno.’ ” Rwode luŋ rik te bino baŋ Jeremia, ote penye, en te dok i kopgi kite ame abaka onwoŋo ocike kede, Mannono te miyo gin weko kop kede oko, pien ŋattoro onwoŋo mom owinyo kopginono, Jeremia te medde bedo i dyekal okur-piny tuno i kare ame omao Jerucalem. I mwaka me aboŋwen me loc a Jedekia abaka me Juda i dwe me apar, Nebukadnejar abaka me Babulon kede monnyere ducu obino me bino lweny i kom Jerucalem, te daŋ guro oko, I mwaka me apar wie acel me loc a Jedekia, i dwe me aŋwen, i nino dwe aboŋwen, en ame rik ote muko iye ŋel me Jerucalem. I kare ame otyeko mako Jerucalem rwode abaka me Babulon luŋ obino te bino bedo i dogcel ame tye i dyere: Nergal-carejer, Camugarnebo, Careekim, Rabcaric, Nergalearejer me Rabmag kede odoŋe abaka me Babulon ocele mege. I kare ame Jedekia abaka me Juda karacel kede ocirikale mere luŋ onenogi, gin te ya oko i boma dyewor, kun obeo i dogcel ame tye i akina ŋel aryo me boma i ŋe poto abaka; gin te wot lubo yo dok tutuŋ Araba. Ento mony a jo Kaldaya te ryemo yorgi te mako Jedekia i bar me Jeriko; kare ame gin omake otere baŋ Nebukadnejar, abaka me Babulon, Ribla i lobo me Kamat. Abaka te ŋolle kop. Abaka me Babulon te neko awobe a Jedekia Ribla kun en Jedekia tye aneno i waŋe, te daŋ neko jo adoŋo me awora luŋ, ame obedo jo me Juda. Te loyo wan Jedekia oko, ote tweye kede jegere, ote tere i Babulon. Jo Kaldaya te waŋo ot abaka oko karacel kede udi a jo, ote daŋ mumuko apama ŋel me Jerucalem oko. Adwoŋ ame onwoŋo loo okur-piny, ame nyiŋe Nebujaradan, te tero jo luŋ ame onwoŋo rik odoŋ i boma, kede jo ame yam owoto gigi kengi baŋ abaka me Babulon, karacel kede lwak ame onwoŋo odoŋŋere. Cite Nebujaradan adwoŋ ame onwoŋo loo ogwok abaka te weko jo mogo ame onwoŋo rik ocan meicel, ame gigi moro onwoŋo mom doŋ kuno, te daŋ miyogi potti olok kede potti ocele mege i kare-nono. Nebukadnejar, abaka me Babulon, te miyo cik ame mako Jeremia, kun cwao koppere baŋ Nebujaradan, adwoŋ ame onwoŋo loo ogwok abaka, kun kobbe ni. “Ter Jeremia iwot igwok aber, kur itim ginnoro arac i kome, cite myero itim ginnoro luŋ ame en mito ni myero itimme,” Amannono daŋ Nabujaradan, adwoŋ ame loo jo ame gwoko abaka, Nabucajiban ame obedo Rabcari, Nergal-carejer, ame obedo Rabmag, karacel kede odoŋe ame loo tic apapat me Babulon, ote cwayo kop ni myero wot kwany Jeremia oko i dyekal okur-piny, Gin te miye iciŋ Gedalia wot Akikam, wot a Capan, ni mannono myero tere paco, Mannono te miyo en wot bedo i akina lwak. Rwot rik okobbi Jeremia, kare ame onwoŋo en pwod tye i dyekal okur-piny, kun kobbe ni, “Wot ikobbi Ebedmelek dano me Eciopia, ni mannono Rwot ame obedo Obaŋa me Icrael okobo ni, ‘Nen abino co bo ginnoro luŋ ame atyeko kobo i kom boma man me timo gin arac i kome, mom gin aber kadi acel, obino tyekogi i nino acel keken i nyimi.’ Cite abino lari yin i nino-naca, yin mom obino miyi iciŋ jo ame itye ka lworo nono. Pien ateteni, abino gire lari, ibino bedo kede kwo acalo mot ame inwoŋo pi lweny, pien yin ibedo genna.” I kare ame Nebujaradan, adwoŋ ame loo ogwok abaka otyeko gonyo Jeremia oko; i Rama, Rwot dokokobo kede Jeremia, Rik onwoŋo otwee oko kede jegere i kare ame omito tere i Babulon, karacel kede jo ocele mege ame oterogi acalo opii kun okwanyogi i Jerucalem kede Juda. Adwoŋ ame loo ogwok abaka otero Jeremia te wot kobbe ni, Rwot Obaŋani en ame orabo kop arac i kom kabedo man; Rwot en omio doŋ otimere, en otimo kite ame onwoŋo ekobo. Pien wun onwoŋo ibala wunu baŋ Rwot, dok daŋ ikwero winyo wunu koppere, en omio gin man otimere i komwu. Aman doŋ ba, tin an doŋ agonyo jegere oko i ciŋi. Ka ce ineno ni ber yin iwot keda i Babulon, bin owoti, an abino gwoki aber, cite ka ineno ni mom ber yin iwot, kur ibin. Nen, lobo man luŋ tye i nyimi, wot kan ame cunyi okwanyo ni ber baŋi. Ka ce doŋ, yin myero idok baŋ Gedalia wot Akikam, wot a Capan, ame abaka me Babulon otyeko miyo me bedo aloc adwoŋ ame loo boma ducu a tye i Juda, iwot ibed wunu kede i akina lwak; onyo itwero wot giri kan ame ineno ni ber baŋi. Mannono te miyo adwoŋ ame loo ogwok abaka miye ginnoro me wilo cam acalo mot, te weke wot. Jeremia te wot baŋ Gedalia wot Akikam i Mijipa, te wot bedo karacel kede i akina lwak ame onwoŋo odoŋ i lobo-naca. Kare ame odoŋe ame loo mony ame pwod tye i kabedo apapat i lobo Juda karacel kede lwakgi, owinyo ni abaka me Babulon otyeko keto Gedalia wot Akikam me bedo aloc adwoŋ ame loo lobogi, dokokete me loyo jo ducu ame odoŋ, co kede mon kede itino, ame gin luŋ onwoŋo obedo jo ame ocan meicel ame mom otero iyi opii i Babulon, gin owoto baŋ Gedalia i Mijipa, jo ame owoto ene: Icmael wot a Netania, Yokanan wot a Karea, Ceraya wot a Tanumet, ame gin luŋ obedo ikwae Epai, dano me Netopa, Jejania dano me Maaka, gin luŋ owoto karacel kede jogi. Gedalia wot Akikam, wot a Capan, te kwoŋ baŋgi karacel kede baŋ jogi, kun kobi ni, “Kur ibed wunu i lworo moro me tic baŋ jo Kaldaya, Bed wunu i lobowu, cite myero iti wunu pi abaka me Babulon, ibino bedo wunu gire aber aboŋo peko moro. Aco an, abino bedo i Mijipa, me acuŋ pirwu i nyim jo Kaldaya ame bino bino baŋwa. Aco wun, myero icok wunu koŋo olok, nyig yen kede moo, ite kano wunu i jami ame itye wunu kede, ite medde bedo giwu i bomawu, ame imao wunu.” Kite acellono, kare ame ame Ojudaya ame onwoŋo bedo i Moab kede i akina jo Ammon kede iyi Edom karacel kede i lobo ecele, owinyo ni abaka me Babulon oweko jo mogo odoŋ i Juda dok daŋ otyeko keto Gedalia wot Akikam, wot a Capan, acalo aloc adwoŋ me loyogi, mannono omio Ojudaya luŋ odwogo oko i lobo apapat ame rik oryemogi oterogi iye, ote bino i Juda baŋ Gedalia i Mijipa. Gin te coko kono olok kede nyig yen adwoŋ meicel. I ŋe mannono Yokanan wot a Karea kede otel wi mony ame tye i kabedo apapat i lobo-naca, obino baŋ Gedalia i Mijipa, ote kobbe ni, “Yin itye ko ŋeyo ni Baalic, abaka a jo Ammon otyeko cwayo Icmael wot a Netania me bino neki oko?” Cite Gedalia wot Akikam mom te ye kopginono. Yokanan wot a Karea okobo i muŋ gin i Gedalia i Mijipa, ni, “Owoti, owot onek Icmael wot a Netania oko, ŋattoro gire mom bino ŋeyo. Piŋo en mito neki, ame te miyo Ojudaya ame tye oguri tuŋŋi i tuŋŋi te ket oko, mannono te miyo Ojudaya ame odoŋ to oko?” Ento Gedalia wot Akikam te kobbi Yokanan wot a Karea ni, “Mom myero itim tim man i kom Icmael, pien aniaŋ ni yin itye ikobo kop me goba i kome.” I dwe me abiro, Icmael wot a Netania ame obedo wot a Elicama, ame en obedo dano acel me doggola aloc, ame en ŋat acel i akina otic abaka adoŋo mege, obino i jo apar baŋ Gedalia wot Akikam i Mijipa, I kare ame gin otyeko cam karacel kuno i Mijipa, Icimael wot a Netania karacel kede jo apar-ca, oya ote goyo Gedalia wot Akikam oko, ame obedo wot a Capan, kun ogoo kede pala me romo, ote daŋ neko oko, ame en dano ame onwoŋo abaka me Babulon oketo me bedo aloc ame loo lobo me Juda. Icimael te neko daŋ Ojudaya ame nwoŋo tye karacel i Gedalia i Mijipa kede ocirikale me Kaldaya ame onwoŋo tye kuno. Orwo mere, ame kop me to a Gedalia mom ru oŋeye, jo aboro te tuno kun oya i Cekem kede i Ci lo kede i Camaria, obino ame olyelo tikgi oko, dok daŋ oyeyeco boŋŋi i komgi oko, kun daŋ onoŋolo komgi. Obino kun okelo mot me moko kwon kede gin a ŋwece kur me amia i ot a Rwot. Jcimael wot a Netania te bino i Mijipa me bino rwatte kedgi, kun bino ame akoko. Kare ame orwatte kedgi, okobbigi ni, “Bye wunu baŋ Gedalia wot Akikam.” Kare ame gin odonyo i boma, Icimael wot a Netania karacel kede jo ame onwoŋo tye baŋe te nekogi oko, te bolo komgi i bur pii. Cite jo apar i akinagi okobbi Icmael ni, “Kur inekwa, pien wan otye kede udi kano jami ame otyeko kano iye ŋano, kai, moo jeituni, moo kic.” Mannono omio Icimael mom te nekogi karacel kede owotegi. Bur pii ame onwoŋo Icimael obolo iye kom jo ame eneko-ni, onwoŋo dwon dok lac meicel. Mannono obedo bur pii ame abaka Aca okunyo me gwoko kwo a dano, i kare ame Baaca, abaka me Icrael mito lweny i komgi. Icimael oonyo kom jo oto open burrono apoŋa. Icimael te mako jo ame odoŋ luŋ i Mijipa, te terogi, miyogi doko acalo opii mere, omako anyira abaka, kede jo luŋ ame onwoŋo rik odoŋ i Mijipa ame Nebujaradan adwoŋ ame gwoko abaka rik omio iciŋ Gedalia wot Akikam, Icimael te cako wot kedgi me wot ŋolo kulo me kato loka baŋ jo Ammon. I kare ame Yokanan wot a Karea karacel kede odoŋe ame onwoŋo telo wi mony ame onwoŋo tye baŋe owinyo pi tim arac ame Icimael wot a Netania otimo, en okwanyo jo mere te wot lweny i kom Icimael wot a Netania. Gin owot omake i atapara adwoŋ ame onwoŋo tye i Gibeon. Kare ame jo onwoŋo tye baŋ Icimael, oneno Yokanan wot a Karea, kun odoŋe ame telo mony daŋ tye baŋe, cunygi obedo ayom meicel. Mannono te miyo jo ame onwoŋo Icimael tye ka tero ocala opii, ame okwanyogi i Mijipa te cako lokere oko me dok cen, ote wot baŋ Yokanan wot a Karea. Cite Icimael wot a Netania te lwi oko ibaŋ Yokanan karacel kede jo aboro ote wot naka i lobo a jo Ammon. Yokanan wot a Karea karacel kede odoŋe ame onwoŋo telo mony ame onwoŋo tye baŋe ote tero jo luŋ ame onwoŋo rik Icimael wot a Netania otero acalo opii kun kwanyogi i Mijipa i kare ame en otyeko neko Gedalia wot Akikam, otero ocirikale, mon, itino, jo ame oroo; mannono gin jo ame Yokanan odwoggo cen kun omaogi i Gibeon. Gin te wot bedo i Gerut-kiman ame tye i ŋet Beterekem, kun otye kede tam me wot i Miciri, pien onwoŋo otye ka lworo jo me Kaldaya, kite ame Icimael onwoŋo otyeko neko kede Gedalia wot Akikam, ame onwoŋo abaka me Babulon otyeko keto me bedo aloc adwoŋ ame loo lobo Juda. Odoŋe ame telo mony, kede Yokanan wot a Karea kede Ajaria wot a Kocaya, karacel kede jo luŋ ame kitegi papat, cakere i kom jo atino kede jo adoŋo ducu te bino ceggi, ote kobbi Jeremia adwarpiny ni, “Tim ber iwiny kwacwa ame obako kede dogwa i nyimi-ni! Cwal kwacwa baŋ Rwot Obaŋani pi jo man luŋ ame odoŋŋi, pien wan jo odoŋ welwa doŋ nok meicel, kite ame itye giri ka neno kede waŋi. Rwot Obaŋani myero nyuttiwa yo a myero olubi, kede gin ame myero oti,” Jeremia adwarpiny te kobbigi ni, “Atyeko winyo kokowu; nen ba, abino kwayo Rwot Obaŋawu kite ame ikwao wunu kede, kite ame Rwot bino dokkiwu kede iye, abino titiwu. Mom abino muŋŋiwu ginnoro kadi acel.” Gin te kobbi Jeremia ni, “Rwot myero bed caden me ateteni dok ame genne i akinawa, ka ce mom otimo ginnoro luŋ, kun olubo kop ame Rwot Obaŋani ocwai me kobbiwa. Kadi bed gin aber onyo gin arac, wan giwa obino lubo kop a Rwot Obaŋawa ame wan otye ka cwayi baŋe-ni, me wek wan obed aber ka ce olubo kop a Rwot Obaŋawa.” Kare ame doŋ okato nino apar, Rwot te kop i Jeremia. Jeremia te lwoŋo Yokanan wot a Karea kede odoŋe luŋ ame loo mony ame onwoŋo tye baŋ Yokanan, karacel kede jo ocele luŋ, cakere i kom jo atino tuno kede i kom jo adoŋo, te kobbigi ni, “Rwot Obaŋa me Icrael ame icwa wunu baŋe me cwalo kwacwu i nyime, okobo ni, ‘Ka ce ibino medde wunu bedo i lobo man, abino gerowu icun wunu atek, ento mom abino rettowu piny; pien atyeko ŋut i kom gin areco luŋ ame atimo i komwu. Kur ilwor wunu abaka me Babulon, ame aman itye ka lworo wunu-ni; kur ilwore wunu, pien an atye kedwu me larowu i ciŋe. Abino timowu kica me en daŋ bed i kica i komwu te miyowu bedo i lobowu i kokomwu.’ Cite ka ikobo wunu ni, ‘Wan giwa mom obino bedo i lobo man’, kun ikwero wunu winyo kop a Rwot Obaŋawu, dok daŋ ikobo wunu ni, ‘Wan giwa obino wot i Miciri kan ame mom obino neno iye lweny, akadi winyo koko apel, kun kec daŋ mom nekowu iye, wan giwa obino wot bedo kuno’, winy wunu doŋ kop ame Rwot okobo, wun jo Juda ame idoŋ wunu-ni, Rwot me mony ame obedo Obaŋa me Icrael okobo ni, Ka ce icako wunu wot me wot i Miciri, ite wot wunu bedo kuno, pala romo ame ilworo wunu-ni bino nekowu i Miciri kuno, karacel kede kec ame itye ka lworo wunu-ni, bino lubo yorwu atek meicel i Miciri kuno, ite to wunu oko kuno. Jo luŋ ame bino wot i Miciri te wot bedo kuno, bino to i pala lweny, kec, too edeke. Can ame akelo i komginono mom bino miyo dano moro doŋ i akinagi kadi acel, moro mom gire bino bwot. “Pien Rwot me mony ame obedo Obaŋa a jo Icrael okobo ni, Kite ame akemo kede iniga rik acoro i kom jo ame bedo i Jerucalem, abino coro daŋ kittono i komwu ka ce iwoto wunu i Miciri. Ibino doko wunu gin me ceno jo, gin ame mio jo lworo, kede jo ame jo kobo kop agecegece i komgi. Mom dok ibino medde wunu neno kabedo man akadi acel. Rwot okobo kop man baŋwu wun jo ame odoŋ ni, ‘Myero kur iwot wunu i Miciri’, Myero iŋe wunu ateteni ni atyeko kwenyorowu tin, ni mannono wun ityeko gak wunu oko, kun imito ni kwowu rweny oko, Pien wun icwaa wunu baŋ Rwot Obaŋawu, kun ikobo wunu ni, ‘Tim ber ikwayiwa Rwot Obaŋawa, doŋ ginnoro keken ame Rwot Obaŋawa bino kobo baŋwa, wan giwa obino timo.’ Doŋ tin an atyeko kobbiwu, cite wun mom iwinyo wunu kop a Rwot Obaŋawu i ginnoro luŋ ame en ocwaa me kobbiwu. Aman myero iŋe wunu ni ibino to wunu ateteni, kun ito wunu i pala lweny, kec, kede too edeke, i kabedo ame imito wunu wot iye-nono.” I kare ame Jeremia doŋ otyeko kobo kop luŋ baŋ lwak ame ocokere, kop ame Rwot Obaŋagi oore me kobo baŋgi, Ajaria wot a Kocaya kede Yokanan wot a Karea kede wegi apala luŋ te kobbi Jeremia ni, “Yin itye ka kobo kop me goba lo-ni, Rwot Obaŋani mom okobo ni ibin ikob ni, ‘Kur iwot ibed wunu i Miciri’; ento Baruk wot a Neria en ocupi me ko bo kop arac i komwa, me imiwa i ciŋ jo Kaldaya, me gin onekwa onyo oterwa oko i Babulon acalo opii.” Mannono te mi yo Yokanan wot a Karea kede odoŋe me mony kwero winyo kop a Rwot oko, mom ote ye bedo i lobo me Juda. Ento Yokanan wot a Karea kede odoŋe me mony luŋ te kwanyo jo me Juda luŋ ame odoŋ ame onwoŋo odwogo me bino bedo iye, kun odwogo i akina rok apapat ame rik oryemogi, oterogi iye, co, mom, itino karacel kede anyira abaka. Gin otero jo luŋ ame rik Nabujaradan, adwoŋ ame onwoŋo loo ogwok abaka me Babulon, onwoŋo oweko baŋ Gedalia wot Akikam, ame obedo wot a Capan. Otero daŋ Jeremia kede Baruk wot a Neria. Gin te wot naka i lobo me Miciri, pien gin rik okwero winyo kop a Rwot oko. Gin owoto i kabedo ame olwoŋo ni Tapanec. Kare ame gin tye i Tapanec, Rwot te kobbi Jeremia ni, “Kwany gweŋe mogo adoŋodoŋo i ciŋi, kun jo Juda tye aneno. Wot ikan oko ite lobo ame omwono i akina gweŋe ame ocano i yo ame odonyo kede i paco abaka me Miciri ame tye i Tapanec kuno. Kobbi jo Juda ni, ‘Rwot me mony ame obedo Obaŋa a jo Icrael okobo ni, Nen ba, abino cwayo amirona Nebukadnejar, abaka me Babulon, abino cibo i wi kom loc i lobo man, i wi gweŋ ame ayiko piny kan-ni, en bino yero kema me loccere i wigi. En abino me bino loyo lobo me Miciri. Can bino bedo apek meicel i kom jo Miciri, pien jo mogo ame oyiko ni bino to i too edeke, bino to i loo edeke, jo ocele ame oyiko ni myero ter iyi opii, obino tero oko acalo opii; jo ame myero to i pala lweny bino to i pala lweny. En bino moko mac i kom udi me woro kit obaŋe mogo apapat ame tye i Miciri, bino wano cal obaŋegi oko onyo bino tino mogo woto kedgi oko. En bino kwanyo jami areco oko i lobo me Miciri odoco kite ame akwatyero kede on yo go i kom boŋo mere, bino ya gire i Miciri te wot i kuc, aboŋo ginnoro ame ogude. En bino muko kidi ame ocibo me awora ame tye i Eliopolic, i lobo me Miciri, dok bino wano udi woro obaŋe mogo ocele me Miciri oko kede mac’.” Rwot okobbi Jeremia kop i kom Ojudaya ame onwoŋo bedo i lobo me Miciri, i Migdol, i Tapanec, Mempic kede i Patroc, Rwot okobo ni, “Rwot me mony, ame obedo Obaŋa a jo Icrael okobo ni wun doŋ ityeko neno wunu gin areco luŋ ame amio opoto i kom Jerucalem kede i kom boma luŋ me Juda, Nen ba, kare-ni kuno pwod tye calo wi obur, aboŋo ŋattoro ame bedo iye, pien gin arac ame gin otimo, omio akemo omaka. Gin obedo wot wano gin a ŋwece kur baŋ obaŋe mogo ocele kun daŋ otio baŋgi, obaŋe mogo ame kadi gin onyo kwarigi yam mom oŋeo. Abebo cwayo baŋgi odwarpiny ame gin omirona tere tere, kun rabbigi ni, ‘Tim wunu ber kur itim wunu tim me ipyeda-ni ame an adago-ni!’ Cite gin gigi ote kwero winyo oko, mom ociko yitgi me winyo koppa, me olokere owek timo gin arac, dok daŋ owek waŋo gin a ŋwece kur baŋ obaŋe mogo ocele. Mannono omio rik ate coro akemona kede inigana i komgi, ate miyo lyeto atek meicel i boma me Juda, kede i dye gudo luŋ ame tye i Jerucalem, ate miyo doŋ oko kene acalo wi obur kit ame tye kede naka tinni. “Aman doŋ Rwot me mony ame obedo Obaŋa a jo Icrael okobo ni, Piŋo kara itye ka timo wunu twon tim arac meicel-li i komwu kenwu. Wun imito wunu kelo can i kom mon kede co, i kom itino kede i kom itino a pwod toco, me ŋattoro kur doŋ i akina jo me turwu? Piŋo itye ka miyo wunu akemo maka i tic ame itio wunu, wano odok a ŋwece kur baŋ obaŋe ocele i lobo me Miciri ame ibino wunu me bedo iye? Itye ka timo wunu man me ito wunu oko, me rok ame bedo i lobo man bed kobe kop arac i komwu, dok daŋ imito ni nyiŋwu bed me ceno jo? Wiwu doŋ owil oko ce, i kom tim areco ame kwariwu obedo timo, tim areco ame obakki me Juda obedo timo, tim areco ame mongi obedo timo kede i kom tim areco ame wun ibedo timo wunu kenwu, kede i kom tim areco ame monwu obedo timo, ame gin obedo timo i lobo me Juda kede i dye yo luŋ ame tye i Jerucalem? Gin mom oye mwolle kadi acel tuno naka tin, lworo daŋ mom omakogi, mom daŋ oye lubo cikka kede icwilla ame aketo i nyimwu kede i nyim kwariwu. “Pi mannono, Rwot me mony ame obedo Obaŋa a jo Icrael okobo ni, Nen ba, abino ci ko waŋa i komwu me timowu rac, me neko jo Juda ducu. Jo luŋ ame odoŋ i lobo Juda, ame onwoŋo omoko tamgi me bino i Miciri, gin luŋ abino nekogi oko. Gin bino to i lobo me Miciri kun oto i pala lweny, kec, cakere i kom jo atino tuno kede i kom jo adoŋo, gin luŋ bino to i pala lweny kede kec. Gin obino doko gin me aŋala a jo, gin ame mio jo lworo, dok obino bedo rok ame oceno jo i nyingi, kun jo kobo kop areco i komgi. Abino keto can i kom jo ame bedo i Miciri, kite ame aketo kede can i kom Jerucalem i pala lweny, kec, kede too edeke. Dano moro me Juda ame odoŋ, ame owoto me wot bedo i Miciri mom bino doŋ kadi acel, moro mom bino bwot akwo, dok moro mom bino dok i lobo me Juda, ame cunygi mito ni kono odok obedo iye; gin gire mom bino dok kuno, kono jo ame oriŋo ayela i lobogi keken en ame bino dok kuno.” Icennere jo ducu ame ŋeo ni mongi onwoŋo obedo yalo obaŋe mogo ocele odok a ŋwece kur, kede mon luŋ ame onwoŋo rik ocuŋ kaci-naca, lwak jo adwoŋ meicel ame onwoŋo ocokere jo luŋ ame bedo i Patroc i lobo me Miciri, te gamo kop a Jeremia ni, “Kop ame ikopo baŋwa, kun ikobo i nyiŋ Rwot, wan mom obino winyo koppi. Cite wan obino timo ginnoro luŋ ame wan okwonere me timo, obino waŋo odok a ŋwece kur baŋ abaka a dako me polo, dok daŋ obino onnye mot me ama ta, kite ame yam otimo, wan karacel kede kwariwa, obakkiwa, kede rwodewa, kite ame otimo kede i boma luŋ me Juda kede i gudo luŋ me Jerucalem, pien i kare-naca rik otye i cam adwoŋ, lonyo daŋ onwoŋo dwon i cinwa, cite naka wan mom oneno ginnoro arac. Cite cakere i kare ame wan oweko wano odok a ŋwece kur baŋ aba ka a dako me po lo onyo mot amata baŋe, jami doŋ te rwenyo oko i cinwa, dok daŋ oto atek i pala lweny kede kec.” Mon te medde i kopgi kun okobo ni, “I kare ame wan otedo ogati i cal abaka a dako me polo, kun owanne odok akur, dok daŋ oonyo mot amata baŋe, cogwa onwoŋo oye, dok daŋ onwoŋo one no gin ame wan otye ka timo.” Jeremia te kobo baŋ lwak luŋ, co kede mon, kede jo luŋ ame onwoŋo ogamo koppere kit man ni, “Kop i kom odok a ŋwece kur ame ibedo wano wunu i boma me Juda, kede i dye gudo me Jerucalem, wun karacel kede kwariwu, obakkiwu kede rwodewu, karacel kede jo ame onwoŋo bedo i lobo-naca, itamo wunu ni Rwot pe obin opo pire? Timwu-naca en rik mom otamo ginnoro iye? Rwot doŋ mom romo kanyo timwu areco kadi acel, kede timmogo me kwer ame ibedo timo wunu. Mannono omio lobowu doŋ calo wi obur, odoŋ nono dok daŋ oceno oko, ŋattoro ame bedo iye mom tye, tuno kede naka tin. Mannono otimere pien wun ibedo waŋo wunu odok akur, dok daŋ ibalo wunu i nyim Rwot kun mom iwinyo wunu kop a Rwot kadi lubo cikkere kede icwillere kede gin ame en ociko, mannono omio gin arac man opoto i komwu kite ame tye kede naka tin.” Jeremia okobbi lwak luŋ karacel kede mon luŋ ni, “Winy wunu kop a Rwot, wun jo luŋ me Juda ame itye wunu i Miciri, Rwot me mony, ame obedo Obaŋa a jo Icrael okobo ni, wun karacel kede monwu ityeko kobo wunu kede dogwu, ite daŋ cobo wunu gin ame ikobo wunu kede ticwu ni, ‘Wan giwa obino cobo kwonwa ateteni, ame wan doŋ otyeko kwono me wano odok akur baŋ abaka a dako me polo kede me onye mot amata.’ Pi mannono ba, mok wunu kwonwu, dok daŋ iti wunu gin ame ikwoŋo wunu! Pi mannono ba, winy wunu kop a Rwot, wunjo luŋ me Juda, ame bedo i Miciri, Nen ba, atyeko kwoŋ oko kede twon nyiŋa adwoŋ meicel. An a Rwot, ni ŋattoro mom dok bino kwon i nyiŋa, dano me Juda ame aman tye i Miciri, kun ko bo ni, ‘Kite acalo Rwot Obaŋa tye kwo-ni.’ Nen ba, an atye ka ciko waŋa i komgi me timogi rac, mom me timogi ber. Jo luŋ me Juda ame tye bedo i lobo me Miciri, obino neko oko i pala romo, kede kec, tuno wan ame gin otum oko ducu. Jo ame bino bwot i lak pala lweny, i Miciri, bino ya dok i lobo me Juda, kun welgi mom pol. Jo me Juda ame rik obino i lobo me Miciri me bino bedo iye, bino ŋeyo kop aŋa ame onwoŋo ateni, ka koppa onyo meggi. Man en ame bino bedo anyut ame ibino neno wunu, ni an abino keto can i komwu i kabedo man, me iŋe wunu ni koppa en ame bino bedo kop ateni i komwu pi gin arac ame itimo wunu. Rwot me mony okobo ni, Nen ba, abino miyo abaka me Miciri, ame en Kopra, i cin okworrere kede i cin jo ame mito neke, kite ame rik amio kede Jedekia, abaka me Juda i cin Nebukadnejar abaka me Babulon, ame onwoŋo akworrere, dok daŋ onwoŋo tye kede mit me neke.” I mawka me aŋwen me loc a Yekoyakim, wot a Yocia, abaka me Juda, en ame Baruk wot a Neria ocoo iye kop ame Jeremia okobo baŋe i yore i yore. Adwarpiny Jeremia okobo baŋ Baruk ni, “Rwot Obaŋa a jo Icrael okobo kop man baŋi yin Baruk. Yin itye ka koko ni, ‘Can i wia doi! Pien Rwot otyeko medo cwercuny i kom rem ame atye kede; Aol doŋ oko i cur, mom atye i kare moro me weo kadi acel.’ “Rwot okobbi Jeremia ni, ‘Wot ikobbi Baruk ni, Nen ba, gin ame yam agero, atye doŋ amumuko oko areto oko piny, gin ame yam apito, aman doŋ acako puputo oko, Abino timo man i lobo ducu. Yin itye ka yenyo gigi mogo adonodono piri keni? Kur ibed yenyogi ba; nen ba, abino kela can i kom jo luŋ, ento yin abino miyi ibedo kwo, kwoni abino miyi calo mot ame inwoŋo i lweny, i kabedo luŋ ame ibino wot iye. Man kop ame an Rwot ikokome akobo.’ ” Man en kop ame Rwot okobo baŋ Jeremia adwarpiny i kom rok ocele. Man en kop ame en okobo i kom Miciri, Rwot okobo kop i kom mony a Parao Neko, abaka me Miciri, ame yam Nebukadnejar, abaka me Babulon oloo oko i lweny i Karkemic, ame ceggi kede kulo me Epurate, i mwaka me aŋwen me loc a Yekoyakim wot a Yocia, abaka me Juda, kun kobo ni, Odoŋe me Miciri tye ka redo ni, “Ruk wunu nyonyo me geno komwu, dok iyik wunu daŋ kwodewu, me icak wunu wot i lweny! Twe wunu kom me bedo i ŋe aguragura; wun wegi aguragura, bed wunu doŋ oko i wigi! Ryeye wunu doŋ oko i tyeŋ, kun iruko wunu tok nyonyo i wiwu! Pak wunu leb toŋiwu bed abit! Ruk wunu daŋ kotiwu me nyonyo i komwu! Ŋo kara ame atye ka neno nie? Lworo ocirogi oko, olokere oko odok cen. Twoni jogi a tek i lweny tye doŋ awano i komgi, otye ka riŋo oko oyotoyot meicel; kun mom oneno negi kadi acel, lworo doŋ ogurogi tuŋŋi i tuŋŋi! Man kop ame Rwot okobo. Lo adwir i ŋwec daŋ mom bino bwot; lo atek meicel i lweny daŋ mom bino bwot. Tutuŋ anyarodi i ŋet kulo me Epurate, otye ka twomere kengi kengi ote rette piny. “Man ŋa ame tye atinere calo pii ame tye i kulo Nail-li, calo kulo ame pii mere opoŋ olapakino atata? Miciri en ame tye atiŋere calo pii i kulo Nail-lono, calo pii i kulo ame pii mere opoŋ olapakino atata. Miciri tye akobo ni, ‘Abino tiŋere ate wumo loba luŋ, abino babaloboma kede jo luŋ ame bedo iye.’ Medde wunu ba anyim, wun aguragura, wun gadigadi lweny, lor wunu ba i ŋwec! Cwal olweny wot anyim; Jo me Eciopia kede jo Put ame mako kwot, jo me Lud ame odiro meicel i telo akud atero. Nino-nono bino bedo nino a Rwot me mony, bino bedo nino me culo kwor, nino ame en bino culo kede kwor i kom okworrere. Pala lweny bino cem i tuno ka otyeko jo luŋ, remo bino mwonne amwona i lebgi. Pien Rwot Obaŋa me mony tye ka miyo mottere acalo mot me yalo Obaŋa, i lobo ame tye tutuŋ anyarodi i ŋet kulo me Epurate. Wun jo i Miciri, wot wunu ba i Gilead, me iwot iyeny wunu yat me cano twowu kuno! Yen ame ibedo tic wunu kede doŋ konygi mom, mom doŋ romo canowu kadi acel. Rok ocele doŋ otyeko winyo pi lewic ame itye wunu kede, kokowu doŋ oromo lobo luŋ; pien olwenywu doŋ tye atwomere kengi kengi, ame jo otwomere, jo rette piny karacel.” Man en kop ame Rwot okobo baŋ Jeremia adwarpiny i kom bino a Nebukadnejar, abaka me Babulon me bino lweny i kom lobo me Miciri: Rwot okobo ni, “Kob kop i Miciri, dok irab pire daŋ i Migdol; rab pire i Mempic, kede i Tapanec ni, ‘Cuŋ wunu atek ame iyikere wunu me lweny, pien pala lweny bino balo ginnoro luŋ ame itye wunu kede.’ Piŋo kara Apic oriŋo owekowu oko? cal twoni ame itio wunu mom dok tye ocuŋ do? Pien Rwot oretogi oko luŋ piny. Lwak doŋ tye ka twomere kengi kengi ote rette piny, kun ŋat man kobbi awottere ni, ‘Ya malo me odok cen oyotoyot baŋ jo turwa, i lobo ame onywalowa iye, me obwot i lak pala okworwa.’ Lwoŋ wunu nyiŋ Parao abaka me Miciri, lwoŋ wunu i nyiŋ anyen ni, ‘Ŋat awo meicel balo cawa nono.’ “Rwot okobo ni, kite ame atye kede kwo-ni, An a Rwot me mony. Acalli kidi me Tabor ame wie bor kato wi kiddi ducu, kede kidi me Karmel ame ocuŋ iguŋ malo i dog nam, teko a ŋat ame bino lweny i komwu tye kittono. Yikere wunu, bed ame itweo yecwu oko me wot iyi opii, wun jo ame bedo i lobo me Miciri. Pien Mempic bino doŋ yie nono, bino doko wi obur ame dano moro mom bedo iye. “Miciri calo roya ame ocwe aber meicel, cite lwani areco ame kao dok ame oya i tutuŋ anyarodi, tye ka lweny kede. Ocirikale mere ame opaŋo apaŋa kede lim daŋ tye kittono, gin daŋ ocwe ame komgi moo keken calo roya, odoko doŋ agoro ame tekogi mom. Nen ba, gin luŋ olokere oko i ŋwec ame mom doŋ oromo cuŋ, pien kare me keto can i komgi doŋ oromo, kare me gonyogi doŋ ennono. “Miciri tye ka riŋo oko kun kok calo twol, pien okworrere doŋ tye ka bino atek meicel, kun obino me lweny i kome kede lee, calo jo ame awot toŋo yen. Rwot okobo ni, Gin obino toŋo bunnere oko, kadi bed bunnono onwoŋo oculle arom mene, pien jo mere pol meicel, calobonyo ame welgi mom romo kwanne, welgi mom ŋeye kadi acel. Wun jo i Miciri, lewic be bino makowu, obino miyowu oko i cin jo ame oya i tutuŋ anyarodi.” Rwot me mony ame obedo Obaŋa a jo Icrael okobo ni, “Nen ba, nen atye ka kelo can i kom Amon, ame obedo obaŋa me Tebec, kede Parao kede Miciri, kede obaŋe mogo ocele kede i kom obakki mere, i kom Parao kede i kom jo luŋ ame gene. Abino miyogi i cin jo ame mito nekogi, i cin Nebukadnejar abaka me Babulon, karacel kede oticcere adoŋo. Icennere jo dok bino bedo i lobo me Miciri, kite ame rik jo bedo iye i kare acon.” Rwot okobo ni, “Yin amirona Yakobo, kur ilwori, akadi yin Icrael, cunyi kur poti; Nen ba, abino larri i kannabor meicel, kede ikwai i lobo ame aman gin tye acalo opii, Ikwae a Yakobo bino dwogo cen, ote bedo mot i kuc, mom tye ŋattoro ame bino miyogi lworo. Pien atye kedwu me bino larowu, abino jwero rok ocele luŋ atyekogi oko, iyi akina jo ame akeketowu iye, cite wun mom abino tyekowu ducu, Abino pwodowu abeber, ento mom abino wekowu ame mom aketo can i komwu. Man kop ame Rwot okobo.” I kare ame Parao mom ru olwenyo i jo Gaja, Rwot okobbi Jeremia kop i kom jo Piriciti. Rwot okobo ni, “Nen ba, okwor tye abino i tutuŋ anyarodi, abino calo pii ame otinere i kulo, kun mol karacel atek meicel. Bino jwero jami luŋ i lobo calo pii ame molo ginnoro luŋ ame tye i lobo, boma karacel kede jami luŋ ame tye iye, jo bino redo i koko meicel, jo luŋ ame bedo i lobo bino kok Gin bino winyo tyen aguragura ame awo, karacel kede mor a gadigadi, karacel kede nur a tyen gadigadi, onywal mom doŋ bino lokere me neno itinogi, bino nwoŋo ciŋgi daŋ doŋ okwe oko, Mannono bino timere pien nwoŋo kare me tyeko jo Piriciti luŋ doŋ oromo oko kede me tyeko jo ame yam mio kony baŋ jo Turo kede Cidon. Pien Rwot ikome atyeko doŋ jo Piriciti oko, jo luŋ me dog nam me Kaptor ame yam odoŋ. Cwercuny adwoŋ meicel doŋ obino oko i kom jo Gaja, jo Acikelon doŋ oto otum oko doi. Jo Anak ame odoŋ, ibino kumo wunu pi kare arom mene ba? Itye ka redo wunu ni, Pala me lweny a Rwot! Ibino bedo ŋoŋolo komwu naka awene ba? Dok ba cen iyi akureni, me ibed doŋ mot. Ibino kara we i yore aŋo ba, kun an a Rwot doŋ atyeko miye tic me atia? Ityeko miya tic me lweny i kom Acikelon, kede i kom jo ame bedo i dog nam.” Rwot me mony, ame obedo Obaŋa a jo Icrael, okobo kop i kom Moab ni, Can i wi Nebo doi, pien odoŋ doŋ nono! Kiriataim lewic doŋ omako oko, pien doŋ omako oko, lewic doŋ omako cellere ame ocelo atek oko, pien oturogi doŋ oko piny; Kwogo a Moab doŋ orwenyo oko. Okwor ame tye i Kecbon tye ka poro kop me timo gin arac i kom Moab, kun okobo ni, “Bye omi wunu rok me Moab doŋ rweny oko i wi lobo.” Yin boma me Medmen daŋ ibino lin oko iti, okwor bino ryemo jowu oko pala lweny. “Jo Koronaim tye ka redo ni, ‘To a piny doŋ obino oko, lobo doŋ odoŋ oko nono.’ ” Ojwero doŋ Moab oko, koko doŋ tye awinyere i kannabor naka i Joar twal, Pien gin oyito i wi tur me Lukit, owoto malo kuno kun otye ka kok i pig waŋgi, kede i yo ame woto tutuŋ Koronaim, owinyo kite ame jo kok kede pi lobo a doŋ oballe oko. Rin wunu oko ba! Lar wunu kwowu! Riŋ wunu oyotoyot calo kana me tim! Wun jo Moab, yam igeno wunu celwu ame ocelo atek, kede lonyowu, cite aman doŋ obino terowu oko iyi opii; karacel kede kemoc ame obanawuni, obino tero daŋ karacel kedwu iyi opii, karacel olamdoggere kede rwode mere, Atur boma bino bino i kom boma ducu, mom tye boma moro ame bino bwot; luŋ karacel kede bar, obino balo oko, kite ame Rwot okobo kede. “Mi Moab bed ibwome ba, pien mito twarre oko; boma ame tye iye luŋ bino doŋ yigi nono, kun jo moro mom doŋ bedo iye. “Gat a mom tio tic a Rwot i cunye ducu doŋ otyeko ceno oko, ŋat a mom neko jo i pala me lweny doŋ otyeko ceno oko.” Rwot okobo ni, Moab yam ocako bedo mot cakere yam con, dok daŋ mom yam otero jo mere oko iyi opii. Moab obedo calo kono olok ame aweko ni cek mot iyi gulu kun mom olilo, dok daŋ mom obedo loloko iyi gulu ocele. Omio mittere daŋ mom orwenyo, obedo bedo amit kite ame onwoŋo tye kede con. “Pi mannono, nen ba, kare tye abino, ame abino cwayo dano moro te onyo Moab oko piny calo kono olok ame oonyo, Obino oonyo kono olok iye oko piny ote daŋ neko gulu mere nido atino. Mannono bino miyo cuny jo Moab cwer atek i kom Kemoc ame obedo obaŋagi, kite ame jo me ot Icrael yam cunygi ocwer i kom Betel, ame gin obedo geno acalo obaŋagi. “Wun jo Moab, piŋo kara ibedo kobo wunu ni, ‘Wan obedo twoni jo atek meicel i lweny, wan obedo cirikale ame cunywa nwan?’ Ajwer jo Moab karacel kede boma luŋ ame tye iye doŋ obino oko; awobe abeco ame oyero ayera iye, otero doŋ oko me aneka, Man en kop ame Abaka ame nyiŋe Rwot me mony okobo, Can ame bino bino i kom jo Moab doŋ ceggi meicel, to piny ame abino i komgi tye doŋ abino oyotoyt. Kum wunu ba pi rokkono, wun jo luŋ ame itye wunu i ŋete, kede wun jo luŋ ame iŋeo wunu kop i kome. Kob wunu ni, ‘Oloo doŋ teko mere oko; kwogo mere kede teko mere mom doŋ tye.’ “Wun jo ame bedo i Didon, Bye wunu ba doŋ piny i kabedowu me kwogo, me ibin ibed wunu piny iyi apua. Pien atyek jo me Moab, tye abino me bino lweny i komwu, otyeko doŋ turo celwu ame ogero atek oko. Wun jo ame bedo iyi Aroer, Cuŋ wunu ba i ŋet yo me men wunu; peny wunu ŋat ame tye ka lwi, kede dako ame obwot, me tittiwu gin ame otimere. Lewic doŋ omako Moab oko, pien doŋ otyeko tur oko, kok wunu pire ba, Tit kop man i ŋet kulo me Arnon, ni Moab doŋ otyeko jwero oko, pien yie doŋ odoŋ nono. “Ŋolo kop doŋ ocakere oko i kom lobo ame obedo babar, obino i kom Kolon, Jakja, Mepat, Dibon, Nebo, Bet-diblotaim, Kiriataim, Betgamul, Bet-meon, Keriot, Bojra kede boma ducu ame tye i lobo Moab, ame tye tene kannabor kede ame tye kan aceggi, Moab doŋ oninyo oko ateteni, teko mere doŋ otyeko oko, Man kop ame Rwot okobo. “Mi wunu Moab mat kono mere oko, pien en otyeko jem i kom Rwot. Mannono bino miyo Moab bedo dyakere i ŋokkere, jo te bedo nyere kun daŋ cae. Yin Moab mom ipo kite ame ibedo ŋalo kede jo Icrael? Rik inwoŋogi i akina okwor bo, ame omio i kare ducu ka onwoŋo rik ikobo kop i komgi iyeŋo wii ayeŋa? “Wun jo Moab, ya wunu oko i boma luŋ ame ibedo wunu iye! Wot ibed wunu i akina kiddi ame obar. Bed wunu calo awele ame gero wudigi i kor kidi ame oculle acula. Wan owinyo pi wakere a Moab, owinyo kite ame en tye awakere kede meicel, en tye ka wakere kun yeyea nononono, awakere kun otamo pire kene i cunye. Aneo kite ame en tye aŋalo kede jo, wakere mere nono goba keken, gin a en timo daŋ konyere mom. Mannono omio abino kok pi Moab, abino kumo meicel pi jo Moab, abino kumo daŋ pi Kir-kerec. Abino kok meicel pi jo Cibman, ame kato kite ame abino kok kede pi jo me Jajer Yin Cibman, ibino bedo calo yat olok, ame jaŋe boco meicel, ame jaŋe oŋolo nam te tuno naka i Jajer. Nyig yenwu ame nyak i oro, kede nyig olokwu, gin luŋ daŋ obino bologi oko. Yomcuny kede lelo doŋ orwenyo oko i lobo me Moab, okwanyo doŋ oko i lobo me Moab ame ceko cem wok-ki. Amio kono olok mom doŋ tye i bur ame onyonogi iye, mom doŋ tye jo moro ame nyono olok i yomcuny, redo me yomcuny mom dok winyere. “Jo Kecbon kede jo Eleale tye ka redo meicel, ame dwongi tye awinyere naka i Jakaj; jo ame tye i Joar daŋ tye awinyo dwongi, tye daŋ awinyere naka i Koronaim kede i Eglat-celicia, Pii me Nimrim daŋ doŋ otyeko two oko imek. Abino miyo jo Moab ame tye ka ŋolo leyi me yalo obaŋagi i wi kidi malo, dok ame tye awaŋo odok akur baŋgi, giko timgi-nono oko. Man kop ame Rwot okobo. “Mannono omio atye i kumo meicel i cunya pi Moab kede pi jo me Kir-kerec calo dano ame tye akuto nyamulere kun owero wer me lyel, pien lonyo kede jami luŋ ame yam otye kede doŋ orwenyo oko. Pien dano acel acel doŋ olyelo wie oko, jo luŋ omworo tikgi oko; cin jo luŋ doŋ bur keken, dok ŋat acel acel tye ka ruko bono cola i pyere. I wi udi luŋ ame tye i Lebanon anaka i dye bar luŋ, koko keken en ame tye awinyere iye; pien atyeko turo Moab calo gulu ame oneko ame ŋattoro mom doŋ paro pire. Oturo kara Moab nino ba! Kite ame gin tye akok kede! Kite ame Moab oloko kede ŋe i lewic! Moab doŋ odoko gi-ayeta a jo kede gin ame mio jo luŋ ame bedo i ŋete lworo.” Man kop ame Rwot okobo. Rwot okobo ni, “Nen ba, abino miyo rokkoro riŋo adwir meicel calo cur, ote bino yaro bwomgi i kom Moab. Bomagi luŋ obino mako oko, apama celgi luŋ ame ogero atek obino daŋ mako oko. Jo me Moab luŋ ame tek i lweny, i nino-nono obino bedo alwor meicel calo dako ame tye arem me nywal. Obino neko jo Moab ducu, mom dok ote mede bedo rok, pien gin ojem i kom Rwot. Man kop a Rwot okobo. Ama wun jo ame bedo i Moab, lworo, bur, kede owic tye gire nyimwu. Ka ŋat ame bino bwot i lworo, dano-nono bino poto i bur, ŋat ame bino yito oko iyi bur, bino moko iyi owic. Pien abino miyo jami magi bino kom Moab, ka mwaka me keto can i komgi oromo. Man kop a Rwot okobo. “Oriŋ ayela ame doŋ goro meicel, bino yenyo ka weo i tipo me Kecbon. Aco kono en Kecbon ame en boma ame yam Cikon abaka obedo loc iye, tye awan oko i mac. Mac doŋ otyeko wano ka cun a jo Moab oko, kede wi kidi aboco ame yam olweny me Moab bedo iye, Can i wiwu doi, wun jo me Moab! Oneko jo ame yam woro Kemoc oko, awobewu daŋ otero oko iyi opii, anyirawu daŋ otero oko acalo opii, Cite i kare ame tye anyim, abino dwoko gum a jo Moab, bedo kite ame yam tye kede con.” Kop ame Rwot oŋolo i kom Moab ogik kan. I Rwot okobo ni, “Jo Icrael mom tye itino awo be bo? Jo moro mom doŋ tye ame myero le lobogi bo? Piŋo owe ko jo ame woro Milkom ogamo dul lobo me a jo me atekere a Gad oko me be bedo meggi, dok jogi tye ka bedo i boma luŋ ame iye kuno? Pi mannono, nen ba, kare tye abino i nyim, ame abino miyo jo me Raba winyo koko me lweny, boma a jo Ammon luŋ, bino doko wi oburu, karacel kede pacci luŋ ame tye iye, obino wano oko i mac. Jo Icrael bino mayo lobogi oko, i baŋ jo ame yam omao baŋgi. Man kop a Rwot okobo. “Kok wunu ba, wunjo me Kecbon: Pien bomawu me Ai doŋ odoŋ yie nono! Kok wunu ba, wun anyira me Raba! Twe wunu bono cola i komwu, kum wunu, ite bedo ŋwec wunu atata naka i wi cel-gu! Pien Milkom ame obedo obaŋawu, obino tero oko iyi opii, olamdoggere karacel kede rwode mere daŋ obino tero oko iyi opii. Piŋo kara itye iwakere wunu pi luŋ ame tye i lobowu, wun jo a mom genne-ni, Piŋo kara itye ka geno lonyowu ame ikano wunu, kun ikobo wunu ni, ‘Ŋa abino lweny i komwa?’ Nen ba, abino miyo lworo makowu, i kom jo luŋ ame bedo i ŋetwu, dok obino ryemowu oko, ŋat acel acel bino riŋo kene me laro kwo mere kun mom dok tye ŋattoro ame bino coko oriŋ ayela karacel. Man kop ame Rwot me mony okobo.” Cite icennere, abino dwoko gum a jo Ammon, Man kop ame Rwot okobo. Rwot me mony okobo ni, “Ryeko doŋ orwenyo oko i Teman bo? “Ryeko doŋ orwennyi omi-tam oko ba? Ryeko doŋ orwenyo oko luŋ bo? Wun jo me Dedan, lokere wunu me iriŋ wunu oko, wot ipon wunu i bur adit meicel. Pien abino neko ikwae Ecau oko, pien kare me keto can i komgi doŋ oromo. Ka ce opwon olok obino baŋi, gin opwono olok ducu mom oweko moro doŋ i wi yat? Ka ce okwo obino dyewor, mom obino yako jami ame oromogi keken? Ento atyeko ikwae Ecau ducu, abalo kabedo moro luŋ ame yam gin obedo iye, Man omio mom dok otwero nwoŋo kabedo moro me pono. Itino mere kede omego mere daŋ doŋ oneko oko, wati mere kede owote mere daŋ doŋ ajwero oko, Wek itino kicwu ame onywalgi oto oko-ni baŋa, an abino gwokogi, mon towu luŋ myero gena.” Rwot okobo ni, “Ka ce jo ame onwoŋo myero mom ket can i komgi otyeko keto can i komgi, wun ibino bwot wunu ame mom oketo can i komwu? Mom ibino bwot wunu ame mom oketo can i komwu, myero gire imat wunu ikopo me can, Pien doŋ atyeko kwoŋ an kena kena ni Boma me Bojra, bino doko twon ginnoro arac ame jo kobo kop i kome, dok ame owuro ame yie odoŋ nono, ame daŋ doŋ oceno oko; boma luŋ ame tye i ŋete bino doko wi oburu, Man kop ame Rwot okobo.” Atyeko winyo kop ame oya i baŋ Rwot, otyeko cwayo okwena me rabo pire baŋ rok ducu, kun okobo ni, “Cokere wunu karacel me ibin ilweny wunu i kom Edom. Yikere wunu me lweny ba! Pien nen ba, Rwot bino miyowu idoko wunu agoro i akina rok, dok obino cayowu meicel. Wakere gire mom konyowu kadi acel, mom tye ŋattoro ame lworowu, wun jo ame ibedo wunu i akina kiddi ame obarre, kadi bed ibedo wunu i wi kidi malo kannabor meicel. Kadi bed ibedo wunu malo calo cur, abino dwoggowu oko piny. Man kop ame Rwot okobo. “Edom bino doko gin ame mio jo lworo, ŋat acel acel ame bea i ŋete bino bedo i twon lworo adwoŋ meicel, ote bedo jwiye ajwia pi can ame opoto i kome. Kite ame rik oreto kede Codoma kede Gomora kede boma luŋ ame tye i ŋete, ŋattoro mom dok bino bedo kuno, ŋattoro daŋ mom bino bedo welo me kuno. Abino miyogi oriŋo oko oyotoyot, calo eŋato ame tye i bar me kwayo rommi, ame oya i buŋ ame yen oculle acula iye ame tye i dog kulo me Jordan, Abino keto ŋattoro keken ame cunya omito me loye. Ŋa kara ame rom keda? Ŋa ame twero lwoŋa me wot lweny kede? Akwattene ame romo Cuŋ i nyima, pi mannono, myero iwiny gin ame Rwot otyeko yiko me timo i kom Edom, kede gin ame en otyeko yiko me ti mo i kom jo ame bedo i boma me Teman. Anaka jo atino mege abino miyo owaogi. Ateteni can ame bino poto i kom otinogi, bino miyo jo lworo. Ka Edom opo to, morrere bino miyo lobo yeŋŋere, koko mere bino winyere naka i dog Nam Arema. Nen ba, okwor bino bino me bino lweny i kom Bojra, calo cur ame twarre malo i polo te lyao piny kun doŋ oyaro bwome oko. I nino-nono cuny olweny me Edom bino bedo alwor calo cuny dako amerem me nywal ogo.” Man en kop ame Rwot okobo kom Damaciko, “Jo ame bedo i boma me Kamat kede Arpap ale doŋ otwodogi oko, pien gin doŋ otyeko winyo amut arac; cunygi doŋ oŋabere aŋaba pi lworo, ocalo doŋ nam ame atagere, ame mom romo cuŋ mot. Jo Damaciko doŋ odoko agoro meicel, olokere me riŋo doŋ oko i twon lworo adwoŋ meicel. Rem kede cwercuny doŋ ocirogi oko, calo dako amerem me nywal ogo. Boma ame yam neye wok-ki, boma ame yam yomcuny dwon iye wok-ki, doŋ otyeko weko oko! Pi mannono, awobe mere atino obino neko oko i dye boma, ocirikale mere luŋ daŋ obino jwero oko i nino-nono, Man kop ame Rwot me mony okobo. Abino moko mac i kom apama cel me Damaciko, maccono bino wano paco adwoŋ me Ben-adad oko.” Man en kop ame okobo i kom atekere me Kedar kede i kom loc luŋ me Kajor ame yam Nebukadnejar, abaka me Babulon olwenyo i komgi te loyogi oko, Rwot okobo ni, “Ya malo me iwot ilweny i kom jo Kedar! Wot inek atekere luŋ ame tye tutuŋ kide. Kemagi kede rommigi obino yako oko, karacel kede boma me icikagi, naka jami luŋ ame tye i kemagi. Inagagi bino wot nywal iciŋ jo ocele, jo bino redo ni, ‘Lworo doŋ ogurowu tuŋŋi i tuŋŋi!’ Wun jo me Kajor, acikowu ni myero iriŋ iwot ipon wunu oko kannabor, pien Nebukadnejar, abaka me Babulon, otyeko yikere me timo gin arac i komwu, otyeko doŋ poro kop oko i komwu. “Ya wunu, me iwot ilweny wunu i kom jo ame yam bedo mot i kuc aboŋo aye la moro, doggola me celgi mom tye, akadi arii mogo me geno, dogcelgi bedo olaŋara, Inagagi obino yako oko, dokgi daŋ obino yako oko, abino keto jo ame mworo yer wigi doŋ acogo, i kabedo luŋ ame tye i lobo, can ame abino kela i komgi, bino ya kabedo ducu. Kajor bino doko tim, kan ame ikwe keken en ame bedo iye, kan ame ŋattoro mom bedo iye kadi acel, dok ŋattoro daŋ mom bino wot kuno.” I kare ame Jedekia abaka me Juda pwod cako loc acaka, Rwot okobbi Jeremia adwarpiny kop i kom Elam. Rwot me mony okobo ni, “Nen ba, abino neko wegi akud tero luŋ ame tye i Elam, ame gin jo ame omio lobo me Elam odoko atek. Abino miyo yamo kodo i twok lobo aŋwen luŋ bino i kom Elam, jo iye te ket i akina rok luŋ ame tye i lobo, Abino miyo lworo mako jo Elam meicel i nyim okworgi, kede i nyim jo ame mito neke, Abino kela gin arac i kom jo Elam, kede twon akemona agwa. Abino miyo pala me lweny lubo yorgi ate nekogi oko. Abino keto kom locca i Elam, ate neko abakagi kede rwodegi oko. Man kop ame Rwot okobo. “Cite icennere abino miyo gum a jo Elam. Man kop ame Rwot okobo.” Kop ame Rwot akobo baŋ Jeremia adwarpiny i kom Babulon, ame en lobo a jo Kaldaya, tye kit man: “Tuc kop man baŋ rok ducu dok daŋ irab pire, Tin wunu bendera malo kannaler ite kobo wunu kop man, Kur ikan wunu kop man bed calo kop me imuŋ, cite myero irab wunu pire ni, ‘Babulon doŋ opoto oko! Bel ame obaŋa mere lewic doŋ omako oko, Merodak cunye doŋ oballe oko. Cal jogi mere luŋ, lewic doŋ omako oko, cal jogi mere ame otio atia i cin cunygi doŋ ojebere oko.’ “Pien rok ame oya i tutuŋ anyarodi, obino doŋ oko me bino lweny i kom Babulon. Gin bino miyo lobo me Babulon doko wi obur, ŋattoro mom bino bedo kunnu; akadi dano onyo lee bino riŋo oko i kuno. “Ka kare-naca otuno, jo Icrael kede jo Juda bino bino karacel kun obino ame okobo, ote bino yenyo Rwot Obaŋagi. Gin obino penyo yo me Cion, ote wot atira kunnu, Obino ko bo ni, ‘Bye wunu, me obin oribere wunu i Rwot, i ikere ame perakino nakanaka, ame wi jo mom bino wil iye.’ “Jona doŋ calo rommi ame orwenyo ame okwatgi ame miogi orwenyo, kun terogi i wi kidi, oya i wi kidi man, okobo i wi kidi man, omio wigi te wil oko i kom kan ame obedo iye. Jo luŋ ame nwoŋogi, nekogi aneka, okworgi daŋ kobo ni, ‘Wan giwa omom i bal, pien gin obalo baŋ Rwot, ame en kabedogi me ateteni, Rwot ame kwarigi obedo geno.’. “Wun jo Icrael, rin wunu oko i Babulon. Ya wunu oko i lobo a jo Kaldaya, me ibed wunu calo nyok dyel ame telo nyim dyegi. Nen ba, abino tugo twoni rokkogo atek apapat, me bino lweny i kom Babulon, abino tugogi i tutuŋ anyarodi, Gin bino ryeye i teyn me lweny i kom Babulon, ote daŋ mako oko, aterogi calo me olweny ame odiro meicel ame mom dok ciŋgi nono. Obino yako lobo a jo Kaldaya oko, jo ame oyako lobogi-nono, bino yako ginnoro luŋ ame cunygi omito. Man kop ame Rwot okobo. “Wun jo Babulon we, kadi bed cunywu bed yom, kun iwakere wunu calo roa ametye ka nyono, onyo acalo twon aguragura ame tye olakino i koko, wun jo ame yako jona. Lewic bino mako lobowu meicel, lobo ame onywalowu iye bino bedo i twon lewic adwoŋ meicel. Babulon bino doko rok atidi meicel i akina rok ducu, lobo mere bino doko tim ame otwo imek. Ŋattoro mom bino bedo i Babulon pi akemo a Rwot, lobo mere bino doko wi obur kun yie tye nono. Jo luŋ ame bino bea i ŋete bino wuro awura, lworo bino makogi meicel pi gin ame otimere-nono. “Wun jo luŋ ame omako akud atero, cun wunu doŋ oko i tyeŋ me lweny i kom Babulon, gure wunu dyere me ibae wunu aterowu ducu, pien en otimo bal i kom Rwot. Red wunu i dwon aloŋo, i dwon me lweny, gur wunu boma oko, pien Babulon doŋ otyeko miye oko kene i cinwu. Cellere luŋ doŋ omuko oreto oko piny An Rwot en ame atye aculo kwor i kom Babulonnono, pi mannono myero icul wunu kwor i komgi, tim wunugi kite ame gin rik otimowu kede. Nek wunu jo ame coo koti luŋ i Babulon, kede jo ame mako pala me kac, i kare me kac, moro i akinagi myero kur doŋ. Pala me lweny ame jo tye alweny kede kuno, bino miyo arokkoro keken ame bedo i akinawu, lworo mako, te ya wot oko i lobogi. “Jo Icrael calo rommi ame eŋatu dwaro te ryemo miyo ket atata. Jo me Acuria yam koŋ ogeo lweny i komgi, aman dok Nebukadnajer abaka me Babulon omwomwodo cogo mere oko. Man omio Rwot me mony ame obedo Obaŋa jo Icrael okobo ni: Nen ba, Abino keto can i kom abaka me Babulon karacel kede lobo mere, kite ame oketo kede can i kom abaka me Acuria. Abino dwoko jo Icrael oko cen i lobogi. Gin bino bedo camo cem ame cek i wi kidi me Karmel kede i lobo me Bacan, dok daŋ obino camo ginnoro luŋ ame cunygi mito ame ocek i lobo obedo kidikidi me Epraim kede i Gilead. I kare-naca kede i ninonaca, obino yenyo bal iyi Icrael, cite mom obino nwoŋo moro iye kadi acel, mom daŋ obino nwoŋo moro i Juda, pien abino timo jo ame odoŋ kica. Man kop ame Rwot okobo. “Wot ilweny wunu i kom jo Merataim, kede i kom jo ame bedo i Pekod. Wot inekgi wunu, ityekgi wunu oko, nen ni itimo wunu ginnoro luŋ ame acikowu me timo. Woo me lweny tye awinyere i lobo, twon to arac meicel doŋ obino oko. Anyul me lobo doŋ onidde oko atitino! Babulon doŋ odoko gin ame mio jo lworo i akina rok ducu! Babulon doŋ otyeko moko oko owic ame aciko pire, omoko kun onwoŋo mom ŋeo. Onwoŋo doŋ omoko oko iye, pien en onwoŋo olwenyo i kom Rwot. Rwot doŋ otyeko yabo kan ame ekano iye jami lwennyere, okwanyo jami lwennyere okelo oko i twon akemo adwoŋ meicel, pien Rwot Obaŋa me mony tye kede gin ame emito timo, i kom lobo me Babulon. Bin icak wunu lweny i ko me i kom kabedo ducu; yab wunu dero kallere oko luŋ. Cok wunu jami mere ame iyako wunu iyid wunu ni bim, bala kai ame ocoko karacel. Jwer wunu lobo mere oko odoco, kur iwek wunu ginnoro doŋ iye kadi acel. Nek wunu twoni mere ducu, ter wunu iwot inek wunu oko luŋ, Can i wi jo Babulon doi! Pien karegi doŋ oromo oko! Kare me keto can i komgi doŋ oromo! “Koŋ inen wunu oriŋ ayela ame obwot i lobo Babulon tye ka lwi riŋo oko, gin oriŋo i Cion, otye otito kite ame Rwot Obaŋawa oculo kede kwor pi gin ame yam Babulon otimo kede i kom ot me wore. “Lwon wunu wegi akud atero me bin lweny i kom Babulon. Cwa wunu jo luŋ ame ŋeo telo akud atero wot kunu, Wot igur wunu boma oko, kur imi wunu ŋattoro bwoti. Wot icul wunu kwor i kome, kun lubo gin ame yam en otimo, time wunu arom aroma i gin ame yam en otimo i kom jo ocele, pien yam otimo bal i kom Ŋat Acil me Icrael i twon awaka adwoŋ meicel. Pi mannono, awobe mere atino obino neko oko i dye boma, ocirikale mere luŋ obino daŋ tyeko oko i nino-nono. Man kop ame Rwot okobo, “Nen ba, an atye i kop i komwu wun jo ame wakere, pien karewu doŋ oromo oko, kare ame abino keto iye can komwu. Man kop ame Rwot me mony okobo. Jo ame wakere bino gatte te rette piny, kun ŋattoro ame tiŋogi malo mom tye, dok abino cwinyo mac i bomagi luŋ, maccono bino wano ginnoro luŋ ame tye i ŋetgi. “Rwot me mony okobo ni: Otye ka wuno jo me Icrael kede jo me Juda meicel. Jo ame omakogi te terogi acalo opii, olidogi doŋ atek odoco, kun mom oye ni owoti. Ŋat ame lakkorogi tek meicel; nyiŋe Rwot me mony. En ikome bino pido pirgi, me wek emi lobo bed i kuc, ento ekel can i kom jo me Babulon.” Rwot okobo ni, “Nek wunu jo Babulon! Nek wunu jo Kaldaya! Nek wunu rwode kede oryeko luŋ ame tye iye. Nek wunu otyet ame tyeto tyet me goba goba, me gin luŋ odok jo amin meicel. Nek wunu ocirikale me lweny, nek wunugi ityekgi ducu. Nek wunu aguraguragi, bal wunu daŋ gadigadi me lwenygi oko. Nek wunu rok a mony ocele luŋ ame tye i akinagi, me odok agoro calo mon. Bal wunu lonyo luŋ ame tye iye, yak wunu lonyo iye luŋ. Mi wunu can pii pot i lobogi, me pii two oko iye luŋ. Pien Babulon obedo lobo ame cal jogi dwon iye meicel, cal appa oloko jo odoko opoa. “Pi mannono ba, leyi me tim kede ekwe kede udo bino bedo i Babulon, ŋattoro mom doŋ bino bedo kunu atwal, pi kare a jo me lwagi ducu. Kite ame rik otimere kede i kare ame Obaŋa oreto kede Codoma kede Gomora karacel kede bomagi ducu, ŋattoro daŋ mom bino bedo kunu kittono, dano moro mom bino bedo iye acalo welo. Man kop ame Rwot okobo. “Nen ba, rokkoro tye abino i tutuŋ anyarodi, rok atek ame obakki mere pol meicel, tye ka yubere me bino lweny i kannabor meicel. Omako doŋ akud aterogi kede tonigi oko, rokkono ger meicel dok kica mom i cunygi. Woogi calo pii i nam ame amor, gin oriŋo aguragura, ame otere oko acalo dano ame akuro lweny akura, gin abino me bino lweny i komwu, wun jo Babulon. “Abaka me Babulon doŋ otyeko winyo kop i komgi oko, omio ciŋgi doŋ okwe oko inon, twon remmoro adwoŋ meicel doŋ oketo kome oko, tye ka rem calo dako ame rem me nywal ogo. “Nen ba, abino miyogi oriŋo oko oyotoyot, calo eŋatu ame tye i bar me kwayo rommi, ame oya i bun ame yen oculle acula iye, ame tye i dog kulo me Jordan. Abino keto ŋattoro keken ame cunye omito me loye. Ŋa kara ame rom keda? Ŋa ame twero lwoŋa me wot lweny kede? Akwattene ame romo cuŋ i nyima? Pi mannono ba, myero iwiny gin ame Rwot otyeko yiko me timo i kom Babulon, kede gin ame en otyeko yiko me timo i kom lobo a jo Kaldaya. Anaka jo atino mege abino miyo owaogi. Ateteni, can ame bino poto i kom otinogi bino miyo jo lworo. Ka Babulon opoto, morrere bino miyo lobo yeŋere, koko mere bino winyere i akina rok ducu.” Rwot okobo ni, “Nen ba, abino tugo cuny anek jo me bino i kom Babulon, kede i kom jo ame bedo i Kaldaya. Abino cwayo rok ame jwero Babulon oko calo yamo ame akolo ren kal, rokkono bino timogi cucu, te weko lobo doŋ nono, ka gin bino me lweny i koma kabedo luŋ, i nino ame abino keto iye can komgi. Kur imi wunu jo Babulon kare me celo aterogi, kur imigi wunu kare me riko koti lweny. Kur iwek wunu awcbegi moro doŋ akwo, tyek wunu monygi luŋ. Gin bino rette piny ame doŋ oto oko i lobo me Kaldaya, obino rette ame doŋ owanogi i dye gudu luŋ ame tye i boma. Pien a Rwot me mony, mom aweko jo Icrael kede jo Juda, kadi bed otimo bal adwoŋ meicel i lobo a jo Kaldaya, i kom an Ŋat Acil me Icrael. “Riŋ wunu oko i akina jo Babulon, ŋat acel acel myero lar kwo mere. Kur imi nekwu oko pi bal a jo me Babulon, pien en man en kare me culo kwor a Rwot, kare me keto can i kom Babulon ame rom aroma i gin ame en otimo. Babulon onwoŋo tye acalo ikopo me jabu i cin Rwot, ame onwoŋo omio lobo luŋ tye ka mer amera, rok luŋ obedo mato koŋo olokkere, onwoŋo omio rok luŋ odoko opoa oko. Babulon doŋ orette oko oyotoyot, te tur oko. Kok wunu pire ba! Ter wunu yat owot iket wunu i wan burere ame oketo ikome, gwok onyo twero can. Rok ame bedo kuno okobo ni otemo konyo Babulon, cite otemo kwe, mom romo larre. Weke wunu doŋ, ŋat acel acel myero dok cen paco mere; pien Obaŋa ikome en a doŋ oŋolo kop i kome, otyeko doŋ jwero Babulon odoco. Rwot doŋ otyeko nyuto ni kopwa tye atira, biye wunu, obin orab wunu pire i Cion, gin ame Rwot Obaŋawa otimo. “Rab wunu aterowu! Kwany wunu kwodewu, wun jo Media! Rwot doŋ otugo cuny obakki me Media oko, pien yikkere tye me balo Babulon oko, pien mannono en kite ame en bino culo kede kwor, kwor pi gin ame jo me Babulon otimo i kom ode. “Twe wunu bendera cun ame nyuto ni lweny tye i kom cal me Babulon; cuk wunu cuny okur-piny kur bed alwor, pok wunu okur-piny oko i kabedo apapat, mi wunu jo ame opono bed kun okio piny. Rwot doŋ otyeko timo gin ame yam eyikere me timo, gin ame yam en okobo i kom jo ame bedo i Babulon. Wun jo Babulon ame itye wunu kede kulo meicel i lobowu, dok lonyo daŋ dwoŋ meicel i ciŋwu, agikkiwu doŋ ceggi, uci ame otudde i kom kwowu doŋ ocodo oko. Rwot me mony doŋ otyeko kwon i nyiŋe kene, en okwoŋo ni, Abino kelo lwak jo apipim calo bonyo, me bino lweny i kom Babulon, gin bino woo i dwon ame nyuto ni gin doŋ otyeko loyo lweny. “Rwot gire en oketo lobo kede teko mere, en ocibo lobo omio ocuŋ atek pi ryeko mere, en omio polo opette kite ame tye kede-ni pi ŋeccere. Ka ce dwone omor pii i polo twaggere meicel, dok en mio ekuna duny kun ya i agikki piny, En mio lutkot wil ka kot ocwe, dok mio yamo kodo kun ya i ot kano-jami mere. Jo luŋ min atek dok daŋ mom otye kede ŋeccoro, cal jogi ame apac opao en ame dok mie lewic, pien cal jogi-nono mom obedo obana, dok mom daŋ otye kede lworo kadi acel. Konygi moro mom, otiogi me acaa keken, i kare me keto can i komgi, gin luŋ obino to oko. Obaŋa a Yakobo mom calo cal jogi-nono, pien en obedo ŋat oketo jami luŋ, dok oyero jo Icrael me bedo jo mere. Nyiŋe Rwot me mony.” Rwot okobo ni, “Yin ibedo anyuila kede jami me lwenya, atio kedi me ninyo rok luŋ atitino, dok atio kedi me babalo loc apapat, atio kedi me neko aguragura kede ŋat ame ŋweco kede; atio daŋ kedi me tuturo gadigadi kede jo ame ryemogi, atio kede me neko co kede mon, atio daŋ kedi me ŋe ko awobe kede anyira; atio kedi me neko akwa rommi karacel kede rommi mere; dok atio kedi me neko apur karacel kede twoni ame en puro kede; dok atio kede me neko oloc adoŋo karacel kede otel mony apapat. “Abino culo kwor i kom Babulon kede i kom jo Kaldaya luŋ pi gin arac ame gin otimo i Cion, kun wun ineno wunu kede waŋwu. Man kop ame Rwot okobo. “Nen ba, yin Babulon ame itye calo kidi ame neko jo-ni, an atye kede kop i komi, yin ame ityeko lobo luŋ oko-ni; abino ryeyo ciŋa i komi ate maki ikwic, ate bedo lori piny i lobo, ate miyi doko calo kidi ame owaŋo. Mom obino kwanyo gweŋŋoro i komi kadi acel me bedo me gwic ot, mom daŋ obino kwanyo gweŋŋoro, me bedo me acakki te ot, ibino bedo calo tim ame yi jo ocao, Man kop ame Rwot okobo. “Gur wunu bendera cuŋ i lobo me nyuto lweny! Kut wunu apel me rok luŋ winy! Yik wunu rok apapat me lweny i kom Babulon, lwon wunu loc apapat me bin lweny i kome, loc a jo Ararat, jo Mini kede loc a jo Ackenaj; ket wunu adwoŋ ame lo wi mony luŋ me lweny i kome. Kel wunu aguragura apipim calo bonyo. Yik wunu rok luŋ me lweny i kom Media, obakki me Media, oloc adoŋo, karacel kede odoŋe ame konyogi, kede lobo luŋ ame tye i te locgi. Lobo tye ka yeŋere meicel, dok jo iye rem ociro oko, pien Rwot doŋ tye acobo gin ame en oyiko, me timo i kom Babulon. En bino miyo Babulon doŋ yie nono aboŋo jo moro ame bedo iye. Olweny me Babulon doŋ ogiko lwenyoko, obedo doŋ abedo iyi celgi ame ocelo atek; tekogi doŋ otum oko, odoko doŋ mon ata; obedo doŋ ikuduru i dog mac, dog bomagi luŋ doŋ oturo oko. Jo ame ooro riŋo tere i tere, kun ŋat man rwatte i wadgi, me wot kobbi abaka me Babulon ni boma mere doŋ oturo oko i kabedo ducu. Okwor otyeko mako mel kede yede luŋ ame tye i dog kulo, dok daŋ ocwicwinyo lum oko kede mac, ocirikale me Babulon doŋ obabaŋa oko. Pien Rwot me mony ame obedo Obaŋa me Icrael okobo ni; Okwo ceggi nyono Babulon oko calo laro me dino kal, kare me nyono piny pwod odoŋ anonok, kare mere bino tuno.” “Nebukadnajer abaka me Babulon otima lit; onyona aboŋo kica. Omio boma odoŋ yie nono calo yi gulu, omwonya oko alutu calo twon lee moro ame bedo i pii. Odepo ginnoro luŋ ame cunye mito, te ŋoko en ame odounere oko. Tim me kole ame otimo i koma, kede i kom watina, myero gire dok i wi Babulon.” Jo ame bedo i Cion myero kob ni, “Remona myero dok i wi jo Kaldaya, pi watina ame gin oneko.” Pi mannono Rwot me mony okobo ni, “Nen ba, an abino pido pirwu, dok daŋ abino culo kworwu, abino miyo pii i nam me Babulon two oko, ate miyo wan akoŋ iye luŋ daŋ two oko. Babulon bino doko wi obur ame oyido ibim, kan ame ekwe bedo iye. Bino bedo twon kabedo moro arac ame mio jo lworo, kun ŋattoro mom bedo iye ka di acel. “Jo Babulon luŋ bino kok karacel bala iŋatu, dok obino ŋuŋura karacel calo itino eŋatu, kare ame gin owor wokkono abino teddigi arama, abino miyogi omato kono olok ote mer ame cunygi doŋ yom atata. Obino nino mom dok ote co atwal. Abino terogi calo itino rommi, calo nyogi dyegi onyo nyogi rommi ame atero awot neko. “Babulon ame obedo twon boma adwoŋ ame wii lobo luŋ pako-ni, doŋ omako oko! Babulon doŋ odokoboma ame omio rok i wi lobo luŋ lworo meicel. Pii nam doŋ ocore oko i kom Babulon, tugere me pii nam atagere kun mor tye awumo Babulon oko. Boma iye luŋ doŋ odoko gin ame mio jo lworo, tye doŋ acalo tim ame otwo ikaŋ, ame ŋattoro daŋ doŋ mom bed iye, dok ŋattoro daŋ mom bea iye. Abino keto can i kom Bel, ame obedo obaŋa me Babulon, dok abino kwanyo jami luŋ ame yam en omwonyo ame tye i doge. Rok luŋ mom dok bino medde ciro baŋe kite a yam con, apama cel me Babulon doŋ orette oko. “Wun jo Icrael, rin wunu, iya wunu oko i kuno! Ijat acel acel myero nen ni erino elaro kwo mere i akemo a Rwot agwa meicel! Cunywu myero kur poti, dok kur daŋ ibed wunu i lworo i kom kop ame ityeko winyo wunu-ni. Mwaka i mwaka kop apapat winyere i kabedo ducu, kop ame owuno kede jo i lobo, kede kop i kom abaka ame tye alweny i kom abaka ocele. “Pi mannono ba, nen kare tye abino, kare ame abino keto iye can i kom jogi me Babulon. Lewic adwoŋ meicel bino mako lobo me Babulon luŋ, jo ame oneko iye, bino rette i dye boma. Ginnoro luŋ ame tye i wi polo kede en ame tye i wi lobo bino wero wer me yomcuny pi Babulon, pien Babulon bino poto i cin jo ame bino bino me lweny i komgi kun ya i tutuŋ anyarodi, Man en kop ame Rwot okobo. Babulon myero doŋ rette, pien omio jo Icrael apol meicel oto, Babulon ikome en ame okelo to i kom jo luŋ ame bedo i wi lobo. “Wun jona ame itye wunu i Babulon, ame ibwot wunu abwota i lak pala me lweny, myero doŋ iya iwot wunu oko, kur dok ibed bedo wunu mot! Myero ipo wunu pi Rwot Obaŋawu, kadi bed itye wunu kannabor, wiwu myero po i kom Jerucalem. Kob wunu ni, ‘Omio lewic omakowa, pien owinyo kop acae ame ocaowa kede; odoko doŋ jo agoro meicel, pien orok doŋ omao kabedo acil oko ame tye i ot a Rwot.’ “Pi mannono ba, kare tye abino, ame abino ŋolo iye kop i kom jogi me Babulon, jo ame owaŋo bino bedo ŋuŋura i kabedo apol meicel ame tye i lobo me Babulon luŋ, Kadi bed Babulon yit malo naka i polo, kadi bed cel paco mere ame tye malo-nono atek meicel, pwod abino cwayo jo ame bino balo oko. Man kop ame Rwot okobo. “Koŋ iwiny wunu koko ame tye awinyere i Babulon! Winy wunu can ame opoto i kom lobo a jo Kaldaya. Pien Rwot tye doŋ amiyo yi Babulon adoŋ nono, atyeko teko mere oko, te daŋ doŋ litj oko mot, Mony tye ka bino i kome oyotoyot calo pii me nam ame tye amor, obino me bino lweny i kome i twon wo adwoŋ meicel. Gin doŋ obino oko me bino kelo can i kom Babulon, ocirikale mere me lweny doŋ omako oko, akud aterogi daŋ doŋ onununo oko atitino, An a Rwot Obaŋa en ame aketo can i kom jo pi balgi, abino culo kwor i kom Babulon pi bal ame jo mere otimo. Abino miyo rwode mere mer oko, jo aryek iye, oloc adoŋo me lobo, odite ame telo mony karacel kede ocirikale. Gin luŋ obino nino oko atwal, mom dok obino co kadi acel. An abaka ame nyiŋa Rwot me mony doŋ atyeko kobo. “Rwot me mony okobo ni, Cel me Babulon alac wok-ki obino muko oreto oko piny, dol dog cellege ame ocuŋ malo i gun-ni, obino wano oko i mac. Tic ame rok ocele obedo tiyo iye bino to nono, rok apapat kom obedo yelle i tic atek ame bino wan oko i mac.” Ceraya wot a Deria, ame obedo wot a Maceya, rik obedo ŋat ame gwoko abaka Jedekia. I mwaka me aŋwen me loc a Jedekia abaka me Juda, Ceraya onwoŋo owoto i Babulon, adwarpiny Jeremia te kobbe koppogo ame myero en wot kede i Babulon. Jeremia ocoo kop i kom can ame bino poto i kom Babulon i buk, kede koppogo ocele luŋ i kom Babulon. En okobbi Ceraya ni, “Ka ituno i Babulon, nen ni ikwano kop magi luŋ kite ame ocoo kede-ni baŋ lwak, Dok myero ikwa Rwot Obaŋa ni, ‘Ama Rwot, rik onwoŋo ikobo ni ibino tyeko kabedo man oko, ame ginnoro ame tye kede kwo mom dok bino bedo iye, dano onyo lee, te doŋ bedo tim otwo ikan atwal.’ Ka doŋ ityeko kwano buk man baŋ lwak, twe gwen i kom buk man, ite bolo oko i dye kulo me Epurate, kun ikobo ni, ‘Man en kite ame Babulon bino mwonyere kede, kun mom dok kato oko atwal, pi can ame abino kela ate keto i kome.’ ” Kop ame Jeremia okobo te gik kan. Jedekia ocako loc ame mwaka me dittere oromo pyeraryo wie acel, en te cako loc i Jerucalem pi mwakki apar wie acel. Nyiŋ tottere Kamutal, nyaka a Jeremia me Libna. En obedo timo gin ame nen arac i nyim Rwot, kun lubo ginnoro luŋ ame pappere Yekoyakim obedo timo. Pien ake mo omako Rwot omio otuno kan ame doŋ mom romo kanyo, Rwot te bolo Jerucalem kede Juda oko tene, kun kwanyogi oko i nyime. Abaka Jedekia rik te cako jem oko i kom abaka me Babulon. I mwaka me aboŋwen me loccere, i dwe me apar, i nino dwe apar, en ame Nebukadnejar, abaka me Babulon obino iye i kom Jerucalem, kun bino karacel i monnyere luŋ, te bino guro Jerucalem oko; ote daŋ toro lobo guro oko irit. Jerucalem te bedo ame oguro oko kittono nakanaka i mwaka me apar wie acel me loc a Jedekia. I nino dwe aboŋwen, me dwe me aŋwen, onwoŋo kec doŋ orido jo atek meicel ame cam mom doŋ romo nen pi jo i boma. Jo te muko apama cel me boma oko, eka abaka kede monnyere te lwi riŋo oko dyewor, kun obeo i dogcel ame tye akina cel aryo me boma, ame tye i ŋet poto abaka, kadi bed rik jo Kaldaya onwoŋo oguro boma oko. Gin te lubo yo ame dok tutuŋ Araba. Cite mony a jo Kaldaya rik te ryemo yo abaka ote bino make i bar me Jeriko twal, monnyere te ket wekke kene. Mony me Kaldaya te make kele naka baŋ abaka me Babulon i Ribla, kan ame ote ŋolle iye kop. Gin te cako neko awobe mere i nyime kun en aneno kede waŋe, ote lokere i kome loyo waŋe oko, ote tweye kede jegere tere i Babulon. Ote wot kette i ot can, kan ame en te bedo iye tuno naka i nino me to mere. I dwe me abic, i nino dwe apar, ame obedo mwaka me apar wie aboŋwen me loc a Nebukadnejar, abaka me Babulon, i nino-nono, Nebujaradan, adwoŋ ame loo jo ame gwoko abaka me Babulon, owoto i Jerucalem. En te wano ot a Rwot oko kede ot abaka, kede udi luŋ ame onwoŋo tye i Jerucalem; en owaŋo udi adoŋo luŋ kede mac. Mony a jo Kaldaya luŋ ame rik onwoŋo tye baŋ adwoŋ ame loo jo ame gwoko abaka, gin te muko apama cel me Jerucalem oko. Nebujaradan, adwoŋ ame loo jo ame gwoko abaka, te tero jo luŋ ame onwoŋo rik oweko i Jerucalem iyi opii, jo ame rik oya oko i baŋe te lokere baŋ abaka me Babulon, karacel kede lwak ocele luŋ, gin luŋ ote terogi oko iyi opii. Cite en rik te weko jo mo go ame ocan doŋ kuno, me gin bed jo ame gwoko poto kede opur i kweri dyaŋ. Jo Kaldaya rik te tuturo pagi aryo me mola ame rik onwoŋo tye i ot a Rwot kede gadigadi atitino, kede nam me mola ame rik tye i to a Rwot, gin oturo ote ŋinyo atino, ote tero luŋ i Babulon. Gin otero gulli apipim, atok mac, makac, tako me wano odok akur, karacel kede jami luŋ ame rik onwoŋo otio kedgi i ot a Rwot, kede wer me lodi mac, kede becen, En otero jami luŋ ame otio i jabu acalo jabu, kede en ame otio i ryal acalo ryal. Aco kop ame mako dero pii aryo kede nam acel kede gadigadi atitino ame rik Culeman otio me ot a Rwot, mola ame odonyo i komgi dwon meicel ame pekkere mom romo pimmere. Pagi acel acel borrere tye futi apyeraryo wie abiro. I wie malo onwoŋo oketo iye tok me mola ame borrere romo futi aŋwen kede nucu. I kom tok ote dok keto iye bao kede cal pomegranat, kun gin luŋ otio i mola oguro tok i dyere. Pagi me aryo daŋ onwoŋo rom aroma kede awottere, tye daŋ i tokkere kede boo mere me mola. Cal pomegranat onwoŋo romo pyeraboŋwen wie abicel, kun tye i neye luŋ, gin luŋ onwoŋo doŋ tye mia acel. Adwon ame loo jo ame gwoko abaka otero baŋ Ceraya, ame onwoŋo obedo alamdog adwoŋ, kede alubbe Jepenia, kede okur doggola me ot a Rwot adek. Dok te tero daŋ adwoŋ ame onwoŋo loo mony, karacel kede jo abic, ame obedo omemba me cokere abaka ame rik onwoŋo tye i boma, kede aran adwoŋ me mony, ame rik obedo ŋat ame coko jo pi lweny; kede jo pyerabicel ame obedo jo me lobo-nono, ame gin onwoŋo otye i boma. Nebujaradan, adwoŋ ame loo jo ame gwoko abaka, omakogi te terogi naka i Ribla baŋ aba ka me Babulon. Abaka me Babulon te nekogi oko luŋ i Ribla, i lobo me Kamat. Mannono en kite ame rik okwanyo kede jo Juda i lobogi ote terogi iyi opii. Man en wei jo ame yam Nebukadnejar, abaka me Babulon omako te tero oko iyi opii: I mwaka me abiro otero Ojudaya ame romo tutumia adek kede pyeraryo wie adek. I mwaka me apar wie aboro me loccere en otero jo ame romo mia aboro kede pyeradek wie aryo, kun okwanyogi i Jerucalem. I mwaka me pyeraryo wie adek me loccere, Nebujaradan, adwoŋ ame loo jo ame gwoko abaka otero Ojudaya ame romo jo mia abiro kede pyeraboŋwen wie abic. Wei Ojudaya luŋ ame oterogi iyi opii, ka oribogi karacel romo tutumia aŋwen kede mia abicel. I mwaka me pyeradek wie abiro, cakere i kare ame otero kede Yekoyakin abaka me Juda iyi opii, i dwe me apar wie aryo, i nino dwe pyeraryo wie abic, en ame Evil-Merodak, abaka me Babulon otimo iye Yekoyakin, abaka me Juda, kica. En ogonye oko i buc i mwaka ame en ocako iye loc. En te bedo kop kede kica meicel, te kette bedo i wi kom ame dwon akato ducu iyi akina kome ame rik oloc bedo iye i Babulon. Mannono omio Yekoyakin ogonyo bono me buc oko i kome. Cakere i nino-nono, en doŋ te bedo cam i wi meja abaka nino i nino pi kare me kwo mere luŋ. Abaka me Babulon rik te bedo miye lim me konye nino i nino kite ame en mi to, tuno ka en oto. Jerucalem dok odoŋ nono nadi! Aco yam yo iye mom kwanne ba! Koŋ inen aman doŋ calo dako ame cware oto, kadi yam nyiŋe rwo meicel i akina orok, aco yam twon boma moro ame calo agoŋ i akina boma ocele luŋ, aman kom doŋ olokere odok opii. Kok doŋ anaka dyewor-gu, pig waŋe bedo mol amola i leme; mom tye ŋattoro odoŋ kadi acel i akina jo a yam mare ame romo kweyo cunye, owote mere daŋ en a doŋ oketo erupe i kome, gin luŋ doŋ olokere odoko okworrere. Jo Juda doŋ otero oko wot neno can i lobo ocele kede tiyo tic apek okato kare; aman doŋ gin bedo i akina orok ata, mom doŋ otye kede kannoro a myero owe iye, okworgi doŋ oridogi tuŋŋi kede tuŋŋi, mom doŋ otye kede yo moro me put. Jo luŋ ame woto Cion tye ka kumo, pien mom doŋ tye ŋattoro ame bino pi kwero kare me ecuban a Rwot iye, mom doŋ tye ŋattoro ame woto i doggola ot Obaŋa olamdog iye cur doŋ ociro oko, anyira ame yam ower iye tye doŋ aneno can, aco en Cion ikome can doŋ oride atek meicel. Loc daŋ tye i ciŋ okworrere, omone mere doŋ tye gigi aber pien Rwot oketo can i kom Cion pi balere a mom kwanne, itino mere atino daŋ doŋ otero-gu oko, me bedo opii okworgi ame oterogi. Kwogo a boma me Cion luŋ doŋ mom tye kadi acel, rwode mere luŋ doŋ calo atil ame ariŋo odwar aryemogi, kun mom onwoŋo atelloro, aco kono doŋ ogoro meicel. I kare me can kede cwercuny, Jerucalem doŋ ocako poyo jami mere luŋ me wel, ame rik etye kede i kare okato, I kare ame jo mere opoto i ciŋ okwor, kun mom tye ŋattoro ame konye i can ame opoto i kome, okworrere otiŋo waŋgi onene ote ŋalle aŋala. Jerucalem otimo twon bal adwoŋ meicel, omio ojebere oko, mom daŋ cil kadi acel. Jo luŋ a yam wore doŋ cae acaa, pien oneno kome doŋ tye nono; nen en ikome daŋ doŋ tye acur acura kun wiro waŋe neno teŋe. Gin ame en ojebere kede tye daŋ i lak boŋo mere, en yam mom otamo ni kwo mere bino gik i can kit man, mannono omio can opoto i kome lik meicel, ŋattoro ame kweo cunye-gu pe, “Ama Rwot, bol waŋi inen can ame orida wok-ki ba, okworra gire doŋ oloa oko.” Okwor doŋ oryeo ciŋgi oko, i kom jami mere abeco mege; en gire oneno rok apapat kun donyo i kabedo acil, aco gin jo ame yam Rwot ogeŋo ni kur dony i akina lwakkere. Jo mere luŋ doŋ tye acur acura, kun oyenyo cam me acama, ocato jamigi abeco oko pi cam, atot ya onwoŋ dok teko. “Bol waŋi inen ba, Ama Rwot, pien doŋ ocaa meicel.” “Wun luŋ ame ibeo ikato wunu-ni, koŋ inena wunu ba! Tye cwercunnyoro ame rom i cwercuny ame atye kede-ni, ame Rwot ogoa kede i ikare ame akemo mere olyeto agwa meicel-li? “En ocwao mac i malo i polo naka piny iyi cogona twal, ociko bwo piny me mako tyena, te reta piny ataro, oweka ata, kun awile oko dok rem daŋ ocira oko dyeceŋ luŋ. “Balla luŋ onwoŋo doŋ otweo oko i kom kol, ame ocokogi, te tweyogi luŋ karacel i ciŋe, eka te rwakogi i ŋuta, mannono te miyo tekona tum oko, Rwot omia i ciŋ jo ame mom aromo cuŋ i nyimgi. “Rwot ocao jona atek i lweny acaa, kun an daŋ atye i akinagi, ocwano lwak me bino cokere lweny i koma, me oŋiny awobena oko, Rwot ojejebo nya jo Juda calo ŋat ame nyono olok me biyo pige. “Mannono en omio atye ka koko ame pig waŋa tye aony aonya, pien ŋat a kono kwe cunya mom tye kadi acel, ŋat ame kono koŋ dok mi cunya dok atek. Itinona doŋ onyobere oko, pien okworwa doŋ onuogi oko. “Cion oryeo ciŋe, cite ŋattoro ame kweo cunye mom tye, Rwot yam olwoŋo okwor i kabedo luŋ me bino i kom Yakobo Jerucalem doŋ odoko boma ojebere oko i akinagi. “Gin ame Rwot tye ka tiyo tye kakare, pien an onwoŋo ajem akwero winyo koppere. Doŋ pi mannono ba, wun rok luŋ myero iwiny wunu, nen wunu cwercuny ame atye kede; pien anyirana kede awobena, gin luŋ doŋ otero oko iyi opii. “Alwoŋo jo ame mara, cite gin mom oye konya, olamdogga kede odoŋena oto luŋ i boma kun onwoŋo otye oyenyo cam me medo tekogi. “Nen ba, Ama Rwot, pien can odia meicel, cunya doŋ ojebere arac meicel, etaona doŋ agoye ni tuktuk, pien abedo jem kare luŋ, Pala lweny tye alwero jo alwera dye yo, to tye daŋ naka iyi ot. “Tim ber, iwiny ba curra, mom gire tye ŋattoro ame romo kweyo cunya. Okworra luŋ doŋ otyeko winyo pi can opoto i koma, cunygi yom meicel pien itima kittono, Mi doŋ nino ame rik irabo pire-ni bin oko me gin daŋ obed calo an. “Mi bal luŋ ame gin otimo bin oko i nyimi; timgi kite ame tiima kede pi balla luŋ. Abedo doŋ cucura tyen apol meicel, cunya doŋ oto oko inon.” Rwot doŋ omio piny ocido oko icuc i Cion, pi akemo mere adwoŋ. Kwogo Icrael ame yam otuno naka i polo, en obolo oko piny. I kare ame akemo mere olyeto mom dok opoyo ni Cion yam obedo ka teno tyene. Rwot ojwero udi ajo a Yakobo luŋ, aboŋo kica moro kadi acel. Otuturo kabedo a jo Juda luŋ ame ocecelo atek i twon akemo meicel, owaogi oretogi piny i twon lewic adwoŋ meicel, karacel olocgi kede rwodegi. Odwoko teko a jo Icrael luŋ piny, i twon akemo agwa meicel okwero-gu konyogi oko, i kare ame okworgi doŋ tye i nyimgi, obedo waŋ i Yakobo calo mac ame alyel, kun waŋo jami luŋ i ŋete. Olunyo telo-gu atero mere atek i ciŋe tuŋ cem, otikowa kede calo okworrere. Oneko jo luŋ a yam miowa owakere i yomcuny; i kema me Cion luŋ, owuko akemo mere agwa iye calo mac. Rwot doŋ olokere i komwa calo akwor, ojwero jo Icrael oko, otyeko-gu udigi adoŋodoŋo oko luŋ, apama celgi a yam ocecelo atek doŋ odoko wi obur, onyao kumo kede koko odoko adwoŋ meicel iyi akina jo Juda. Oreto gony oko piny calo gonyo ame oreto i poto. Kabedo a yam okwero iye ecuban adoŋo luŋ, omio odoko wi obur, Rwot doŋ ogiko kwero ecuban adoŋo kede cen cabit oko i Cion, akemo mere agwa wokkono omio cunye ocao abaka kede olamdog oko. Rwot okwero gire keno lammere oko, okuno daŋ kebedo mere acil oko, ojalo udi mere adoŋodoŋo i ciŋ okworrere. Woo doŋ owinyere malo amala i ot a Rwot bala i kare me kwero ecuban adoŋo, Rwot onwoŋo doŋ omoko tammere oko, me mumuko apama cel me Cion odok wi obur; en onwoŋo doŋ oryeo tol opimo oko, mom odolo ciŋe kadi acel naka otyeko; omio gedo mogo Ocuŋ iguŋ malo kede apama cel, obuto piny i wi obur karacel. Dogcel luŋ doŋ odonyo oko piny i lobo, obabalo lodi me dogcel, otuturogi oko; abaka mere kede rwode mere tye doŋ i akina orok, cik Obaŋa nyiŋe doŋ mom winyere, odwarpiny mom doŋ neno anyuttoro oya i baŋ Rwot. Aco odoŋe a jo Juda, bedo doŋ piny ikuduru aboŋo ŋamo doggi, wigi doŋ apua keken, boŋo cola mom rwenyo i komgi, Anyira me Jerucalem, kulo doŋ wigi neno piny keken. Waŋa doŋ ojwet oko pi bedo weyo pig waŋa, cunya doŋ ojebere arac meicel akemo doŋ omio ataona bedo goye agoa, pien otye ka jwero jona oko, pien itino atino kede en i kor tye owille atata, i dye yo luŋ i boma. Otye ka kok baŋ totogi kun okobo ni, “Cem kede koŋo olok kara tye kwene?” Kun owille i dye yo luŋ i boma, calo jo ame owaŋo, eka kwogi te tum okoi kor totogi. Kara ŋit atwero kobbi ŋo ba, yin Jerucalem? Kara atwero pori kede gin aŋo ba? Gin aŋo a myero akob ni irom kede ame romo kweyo cunyi. Ama wun jo me Jerucalem? Can ineno wunu doŋ dwoŋ calo nam, ŋa kara ame romo yiko? Anyuttogo ame odwarpinywu yam obedo neno pirwu, obedo ka anyut me goba keken, mom otwero tuco balwu kadi acel, atot ya gumwu dwogi, kop ame gin bedo rabbiwu obedo goba ame rwenyowu arwenya. Jo luŋ ame beo i dye yo bapo ciŋgi i wii; ojwiye kun oyeŋo wigi ocao Jerucalem; kun okobo ni, “Man mom boma ame rik okobo ni ber wok-ki, ame yomoro cuny jo me lobo luŋ?” Okworri luŋ ŋamo doggi alac i komi; ojwiye okao lakgi atek meicel, ote redo ni, “Ojwere doŋ oko! Man en kare ame wan yam obedo paro!” Rwot doŋ otimo gin ame rik eyiko, otyeko doŋ cobo gin emoko; kite ame yam oyiko kede con, ojwerowu kom aboŋo kica; omio okworwu olelo meicel i komwu, omio teko okworwu omedde atek ateka. Kok ba i dwon aloŋo baŋ Rwot! Yin boma me Cion! Wek pig waŋi mol ba piny calo pii i kulo, kun mol dyeceŋ kede dyewor; ame mom iwe kadi acel, dok pig waŋi-gu bedo cwer acwera! Ya malo ibed mwoco koko dyewor, i cuny dyewor ame nino doŋ mit wok-ki. Ony kop i cunyi luŋ calo pii i nyim Rwot. Tan ciŋi ibak dogi bane, pi kwo itinowu, ame kec omio tye awille awila, i akara yo ducu i dye boma, Tiŋ waŋi inen koŋ ba, Ama Rwot! Ŋa ame yam koŋ itimo kit man? Mon myero cam itinogi bo, itino ame myero gin gwok i twon mar adwoŋ? Myero nek olamdog kede odwarpiny i kabedo acil bo, Ama Rwot? Kom itino atino kede me a jo adoŋo, tye oba bala iyi apua dye yo ata; anyirana kede awobena oneko gire oko i pala lweny, inekogi-gu i kare ame akemo ocira oko, inekogi aboŋo kica moro kadi acel. Ilwoŋo okworra i koma, bala obino kwero ecuban me nino adwoŋ, ogura dyere, omio lworo ociri oko omio i nino ame akemo omako Rwot, ŋattoro mom obwot akadi doŋ akwo; itino ame yam atino, ame apito, gin luŋ okworra oneko oko. An dano ame doŋ abeo i can, ame Obaŋa goo i dano ka akemo omako. En oryema te tera naka kan acol icuc, aboŋo lero moro kadi acel. Ateteni, en ogoa meicel, obedo dok i koma i lut naka ceŋ iyul. Obabalo riŋo koma kede del koma oko, te daŋ tuturo cogona oko. Ogura te wumere oko i koma, kun cunye kec bala mwonya oko alutu. En omia abedo kan acol, acalo jo a rik oto con. Ogero apama cel ogura dyere, me kur alwi oko, kun otwea-gu oko twoni jegele mogo apek. Kadi bed awot dwona ni konya, cite kokona mom romo winyere oko, En gire ocego yo oko i kidi ame opao, omio doŋ awire awira calo twol ame otoŋo yibe. En doŋ kura akura calo ajaraŋuu, calo eŋatu ame opono oko. Okwanya oko i yona te wot kikilo an atitino, te doŋ weka ata ame konya moro pe. Otelo akud atero mere atek, te pima kede atero mere. Ocela atero mere naka i etaona twal, atero ame owoto iyi akuro. An doŋ adoko gi-anyera orok luŋ, nyiŋa doŋ odoko me aweragi kare luŋ, Omio akako kaŋo twon ginnoro akec meicel, omio ayeŋ adiltoŋ. Omio amwodo kwoyo amwoda i alaka, te juku waŋa-gu kede buru. Mom doŋ aparo pi kuc kadi acel, wia doŋ owil oko i kom gin ame olwoŋo ni yomcuny. Mannono omio doŋ akobo ni, “Kwogo a yam atye kede doŋ ogik gire oko, mom doŋ atye kede gen me nwoŋo ginnoro i baŋ Rwot.” Po ba pi canna kede keckoma, karacel adiltoŋ kede epio ame abedo kako, Abedo tamo pire i cunya didik, mom rwenyo i cunya kadi acel. Pien kop man mom twero rwenyo i cunya, mannono omio pwod amedde bedo i gen. Mar a Rwot a mom lokere, mom gire gik kadi acel, kica mere daŋ mom gik. Obedo gigi anyen anyena ru-piny i ru-piny dok en genne meicel. Akobo i cunya ni, “Rwot obedo dul ame opokka, pi mannono abino bedo kede gen pire.” Rwot ber baŋ jo luŋ ame kure, kede baŋ jo ame cunygi tye i kome. Ŋat a kuro Rwot me bino lare, myero kur mot a cunye opye. Bedo ber ka ce dano opwonyo diyo cunye kun pwod tidi, calo twon ame opwonyo i wayo kweri. Ka ce Rwot omio can opoto i komi, myero ibed keni, kun iliŋ mot, myero ibut aryeba cuny kun dogi ogudo apua, atot onyo ca pwod dok itwero bedo kede gen; myero ilok lemi baŋ ŋat ame mito bapi; me imat ayet calo pii, Pien Rwot ka abolo dano, mom gire bolo oko atwal. Kadi bed en mio can poto dano, cite kica daŋ dok mako, pien marrere a mom lokere dwoŋ meicel. En gire mom keto can i kom dano nono, akadi waŋo yi ŋattoro nono. Rwot gire mom cwaka kadi acel tim me nyono obuc luŋ me wi loba i te tyen piny, kede me kwanyo twer ame dano tye kede oko, i nyim Ŋat Amalo Meicel, akadi geŋo dano loyo pido mere, cuny Rwot mom yom iye, Ŋa kara ame kobo kop keken gin emito te timere, ka ce mom Rwot en ociko ni timere? Mom gin abeco kede en areco luŋ, timere ka ce ŋat Amalo Meicel en okobo? Kara dano akwo bedo kok, piŋo, ka ce oketo can i kome pi ballere? Koŋ otem neno wunu kitewa, oŋi wunu daŋ kwowa, eka ote lokere wunu dok baŋ Rwot. Otiŋ wunu cunywa kede ciŋwa baŋ Obaŋa malo i wi polo, kun okobo ni, “Wan giwa obalo, daŋ doŋ ojem, yin mom yam itimowa kica i balwa. “Ibino doŋ i koma oko akemo, itye iryemo yorwa, kun inekowa aboŋo kica moro. Iwumere doŋ oko i pol acol, ame kwacwa mom romo katto. Yin doŋ imiowa odoko calo yugi, i akina rok luŋ. “Okworwa doŋ ŋamo doggi alac, ame oŋalowa dok oyetowa-gu ayeta, Lworo doŋ obabaŋowa oko, karacel i to piny ame obino me jwerowa oko, Pig waŋa doŋ mollo calo pil i kulo, pien jona doŋ oneko oko luŋ. “Pig waŋa gire bino bedo cwer acwera, kun medde ameda aboŋo gik, tuno waŋ ame Rwot ame tye malo i polo okulo waŋe oneno piny. Waŋa doŋ bur keken, pi anyirana luŋ ame yam tye i bomana. “Nen okworra doŋ dwara calo winyo aco kun mom aballigi ginnoro kadi acel. Obola-gu i bur kun pwod akwo, eka ote nanapo an kede gweŋe. Pii opoŋ i bur te mwonya oko, an ate kobo ni, ‘Doŋ ato oko doi!’ “Alwoŋo nyiŋi, Ama Rwot, kun atye piny i bur; yin gire mom ite winyo kwacca. Kur icul yiti oko ba, Ama Rwot, ka akok baŋi ni ikonya. Yin rik inoko ŋeta i kare ame alwoŋi, rik ite kobba ni, ‘Kur ilwor!’ “Yin doŋ ipido pira, Ama Rwot, yin doŋ ilakoro kwona oko. Yin gire ineno gin arac ame obedo timo i koma, Ama Rwot, yin giri ŋol koppa, Ityeko neno kite ame gin oculo kede kworgi luŋ, kede kop arac luŋ ame gin obedo poro i koma. “Yin iwinyo kite ame gin bedo ŋala kede, Ama Rwot, kede kop areco ame gin obedo poro i koma, Jo ame lwenyo keda kobo kop, dok daŋ otamo tam i koma keken kare luŋ. An doŋ adoko gi-aweragi kare luŋ, kadi ocuŋ acuŋa onyo obedo abeda. “Yin en ibino culo kworra i komgi, Ama Rwot, kun iporo i gin ame gin otimo i koma. Yin ibino miyogi odoko jo amiŋ, cen ame icenogi kede bino bedo i komgi. Ibino ryemogi i twon akemo me nekogi, i piny i te polo kan, Ama Rwot.” Koŋ inen ba, kite ame jabuwa odoko acol kede, jabuwa a yam cil wok-ki olokere nadi! Kiddi ame rik ogero i ot Obaŋa doŋ tye okeketa atata, iyi akara yo luŋ aluŋa. Koŋ inen awobe me Cion, a yam becogi oporo kede jabu, aman doŋ oporogi i gulo lobo, gin ame acwe gulu ocweo i ciŋe! Akadi ekwe ata-ni daŋ keto tuno i dog itino mere, te daŋ doto itinogi, aco anyira a jona doŋ ger atata ocalo doŋ udo ame bedo i tim. Leb atin ame pwod dot, omoko oko i dane pi oryo pii; itino kwao cem me acama cite mom tye ŋattoro ame miogi. Jo ame rik camo cam me yomcuny tye doŋ ata i dye yo ata, jo ame yam odoŋo kun oruko ka boŋo obedo amaramar, aman doŋ obuto kom i buru. Pien can ame oketo i kom jowa, dwoŋ meicel ame kato can oketo i kom Codoma oko, ame rik oreto piny i dakika moro keken, kun ciŋ dano mom ogudo kadi acel. Rwode mere rik cil calo pee, rik otar calo cak, komgi rik rema atek ame kato gweŋ me wel arema oko, komgi rik olutte abeco calo gweŋe capir olil. Aman doŋ waŋgi ocido kato cuk bilo oko, jo mom doŋ ŋeogi ka obeo i dye yo, del komgi omino ame onatte oko i kom cogogi, del komgi doŋ otwo calo yat otwo. Jo ame oneko i pala romo komgi i gum, kato jo ame kec tye ka neko, jo ame ojony ikokoro omok calo gen, pien cammoro ocek poto pirgi mom tye. Mon ame okica ame maro itinogi, otedo itinogi ikokomgi, oloko daŋ odoko cam me acamagi, i kare ame can agwa opoto i kom jona. Rwot doŋ onyuto akemo mere luŋ kannaler, ocoro akemo mere alyet i komgi, ocwinyo mac i Cion ame owaŋo acakki tere luŋ. Obakki me wi lobo luŋ onwoŋo gire mom ye, akadi jo ame bedo i wi polo luŋ, ni mannono okworroro twero donyo i dog celloro me Jerucalem. Mannono otimere pi bal adwarpinyege kede bal olamdog, ame obedo onyo remo a jo a kitegi atir, i akinagi i dye boma, Gin otyatyama okato calo oto waŋ i dye yo, kun kono otyeko lille oko i remo ame ŋattoro mom romo mulo, kom boŋŋi ame gin oruko. Jo doŋ redo areda i wigi ni, “Kat wunu kede kuca! Wun jo ame cik ogeŋo, Kat wunu kuca! kat wunu kuca! Kur igudwa wunu!” Gin doŋ te riŋo gigi oko, ote bedo wot atata i akina orok. I akina orok kuno jo doŋ te bedo kobo ni, “Mom dok obino bedo karacel kedwa kan kadi acel.” Rwot i kome en okeketogi atata, mom dok bino paro pirgi; mom onyuto woro moro baŋ olamdog odoŋe a lwak mom daŋ opwoogi. Obedo ciko waŋwa nononono, kun mom tye jo moro ame romo konyowa. Obedo ciko waŋwa kun okuro rok, ame mom romo gire larowa. Okworwa bedo wopo yorwa i kabedo luŋ omio mom dok oromo wot kannaler i dye yowa, agikkiwa doŋ ceggi acega, nino me kwowa doŋ okwano oko, pien kare me gikwa doŋ oromo oko, Oryem yorwa dwir doŋ atek, akato acut ame twarre malo i polo, oryemowa naka i wi kiddi-gu, opono me kiyowa i dye tim ata, Abaka ame Rwot oyero, ame pire onwoŋo littiwa calo kwowa, gin omako oko calo lee ame opoto i bur, en ŋat ame wan rik okobo pire ni, bino gwokowa i akina orok. Lel wunu ba, bed wunu i yomcuny, wunjo Edom, wun jo ame bedo i lobo me Uji; cite ikopo me can daŋ bino beo baŋwa, ibino mer wunu kede ite cako gonyo boŋŋi i komwu oko. Wun jo me Cion we, can ame oketo i komwu pi balwu doŋ ocobere oko, Rwot mom bino miyowu ibedo wunu atwal iyi opii. Ento wun jo me Edom, Rwot bino keto can daŋ i komwu pi balwu, en bino yaro balwu luŋ kannaler. Ama Rwot, po ba i kom can ame opoto i komwa, lok waŋi me inen lewic ame otye kede. Lobo ame rik oleo i baŋ kwariwa oloko doŋ odoko me a jo ocele, pacciwa doŋ odoko me orok. Wan doŋ odoko itino kic ame papagi pe, kun totowa calo mon a coggi oto. Nen pii ame omato-gu owilo awila, yen tedo daŋ owilo awila. Oryemowa atek kun lodi-gu tye i ŋutwa, ool atek ame mom oromo miyowa kare moro me weo. Ocikere i jo Miciri kede jo Acuria i ciŋwa, me wek onwoŋ cam me acama. Kwariwa yam obalo, ote to daŋ oko, wan otye oneno can pi balgi. Jo ame rom aroma opii en a doŋ loowa, ŋattoro ame twero larowa i ciŋgi mom tye. Wan ojalo kwowa ka owot yenyo cam, pien okiowa akia i pala lweny. Del komwa lyet kare luŋ calo keno tedo, pi lyeto me kec ame nekowa. Omako mon tetek i Cion ote buto kedgi, kede anyira a mom ru oŋeye kede ico i boma me Juda. Rwode doŋ otye ka guro i kom yat i ciŋgi, odoŋe a lwak mom doŋ oworo kadi acel. Itino awobe doŋ odio tetek me rego kal, awobe woto ame ogate agata i yen apek ame oyeo i wi gwokgi. Jo oteggo mom doŋ bedo i cokeregi i dog boma, awobe daŋ mom doŋ wero kadi acel. Yomcunywa doŋ ogik gire oko, myelwa olokere odoko kumo. Tok kwogo opoto piny i wiwa, bal omiowa oneno can nadi! Mannono omio cunywa ojebere oko, omio waŋwa doŋ ocido oko. Pien kidi me Cion odoŋ nono, ekwe en ame doŋ bebea iye. Ama Rwot, locci gire bedo nakanaka, kom kwogoni perakino waŋ i waŋ pi jo me kare luŋ. Piŋo wii owil oko i komwa atwal, kara piŋo iwekowa ata pi kare a rom man twal? Dwogowa doŋ baŋi ba, Ama Rwot. Roc karewa-ni bed anyen me odwog bani kite a rik tye kede con! Doŋ ikwerowa oko atwal bo? Akemo doŋ omaki i komwa ame mom doŋ romo kwe bo? I nino dwe abic me dwe me aŋwen me mwaka pyeradek nono, onwoŋo an atye abedo i akina Ojudaya ame tye iyi opii i ŋet kulo me Cebar, i Babulon. Rik ate neno polo oyabere, ate neno gin ame Obaŋa onyutta. Mannono onwoŋo nino dwe abic me dwe me aŋwennono, me mwaka me abic, cakere i kare ame rik otero iye abaka Yekoyakin iyi opii. Rwot rik te kop keda an Ejekeri, ame rik an abedo alamdoggere, wot Abuji i lobo a jo Kaldaya, i ŋet kulo me Cebar, i kare-naca rik ate winyo teko a Rwot obino i koma. I kare ame atiŋo waŋa malo, nen ba, rik ate neno yamo kot ame akodo atek meicel kun bino i tutuŋ anyarodi, kot daŋ onwoŋo tye amemenya meicel kun pol obino adwoŋ meicel, kun mac ameny ipilpil tye anen tere tere, dok ginnoro iye tye aryeny calo mola. I akina pol, ate neno iye gigi mogo ame nen calo leyi aŋwen, Leyi-nono onwoŋo nen calo dano, ento acel acel i akinagi onwoŋo tye kede nyime aŋwen, kede bwome daŋ aŋwen. Tyengi onwoŋo ocuŋ atira, kun yi tyengi ame nyono piny calo me a roa. Leyi-nono onwoŋo komgi papara meicel calo kom mola ame ojwao. I te bwomgi aŋwen luŋ onwoŋo tye iye ciŋgi ame calo ciŋ dano, Leyi aŋwennono onwoŋo tye kede nyimgi kede bwomgi ame calo kit man: Bwom le acel acel onwoŋo ogudo me awottere, ka onwoŋo owot, owoto atira kun mom otwero lokere kadi acel. Aco cal nyimgi, onwoŋo kom rom aroma i me a dano ka ineno i tutuŋ nyime, nyimgi ame onwoŋo tye tutuŋ cem onwoŋo calo me eŋatu, nyimgi ame tye tutuŋ cam, onwoŋo calo me a twon, eka nyimgi ame tye tutuŋ ŋegi, te calli me a Cur. Mannono en kite ame nyimgi onwoŋo nen kede, Bwomgi onwoŋo tye ame oyarre ayara, i akina bwomgi aŋwennono, aryo iye onwoŋo tye ame ogudo awottere tuŋŋi i tuŋŋi, eka bwomgi aryo ocele te yarre wumo komgi. Ŋat acel acel i akinagi onwoŋo woto atira, kun cuny ame telogi terogi iye kun mom olokere kadi acel. I akina leyi-nono, onwoŋo tye iye ginnoro ame nen calo mac ame alyel, calo mac rao ame awire tuŋŋi i tuŋŋi, i akina leyi-nono, Maccere onwoŋo tye alyel acil meicel, dok i akina maccono onwoŋo lutkot daŋ tye ameny iye. Leyi aŋwennono, onwoŋo tye apyepyea tuŋŋi i tuŋŋi calo lutkot ame amennyono. I kare ame onwoŋo atye aneno leyi aŋwennono, ate daŋ neno okot ame tye piny i lobo i ŋet leyi aŋwennono, kun okot acel acel tye i ŋet leyi aŋwennono, Kite ame otio kede okottono, kede kite onwoŋo nen kede onwoŋo tye kit man: Gin aŋwennono luŋ onwoŋo tye cacal, kun acel acel i akinagi onwoŋo memenya calo gweŋ alilia, dok otiogi acalo okot ame tye iyi okot wadgi. Gin okot aŋwennono luŋ ka owot, owoto tuŋŋoro keken ame gin okemo kabedo aŋwen luŋ, kun owoto atira ame mom romo lokere tuŋŋoro ocele. I kom okot aŋwennono, onwoŋo tye iye kan ame otutuca calo waŋgi, kun oromo kom okot luŋ irit, dok daŋ tire mere onwoŋo tye. Doŋ ka leyi aŋwen-ca tye awot, okot aŋwennono daŋ woto i ŋegi. Ka leyi aŋwen-ca oya oko i lobo, okot daŋ woto i ŋetgi. Gin luŋ owoto kun ame cuny omito ni gin owot iye, kun okot daŋ ya woto kedgi, pien cuny ame telo leyi aŋwennono onwoŋo tye i kom okot aŋwennono. Ka leyi aŋwen-ca owoto, okot daŋ woto, ka gin ocuŋ okot daŋ cuŋ, ka gin oya i lobo, okot daŋ tiŋere malo ya karacel kedgi, pien cuny ame telo leyi aŋwen-ca onwoŋo tye i kom okot. Tutuŋ wi leyi aŋwennono malo, onwoŋo tye iye ginnogo ame opette, ame memenya calo gweŋ amimila, ame oyarre i wigi malo. I te gin opettenono, bwomgi onwoŋo tye oyarre iye atira, kun man tikere owadgi. Lee acel acel onwoŋo tye kede bwome aryo ame owumo kome. Ka gin tye awot, awinyo kite ame bwomgi tye awoo kede, kun calo pii ame tye amol atek. Winyere calo twon mony adwoŋ meicel ame aciro, onyo calo dwon Obaŋa Won Twer Ducu. Ka ce gin ocuŋ odolo bwomgi, dwonnoro te bino i ŋe gin ame opette ame tye i wi leyi aŋwennono, i kare ame gin ocuŋ mot, gin te dwoko bwomgi oko piny. I wi gin opette-malo-nono, i wi leyi aŋwen-ca, ginnoro onwoŋo tye iye calli i kom loc ame nen bululubululu calo capir, ginnoro onwoŋo tye ame obedo i wie, ame cal acala i dano. Cakere i pyere dok kede malo, aneno ginnoro ame tye amimila calo mola, calo mac ame omano kome luŋ, aco cakere i pyere dok kede piny, ate neno ginnoro acalo mac, kun amemenya i kabedo luŋ i ŋete kuno. Raŋi apapat onwoŋo tye anen i kom gin ame amennyono ame calo etaloka ame nen i polo ka kot obino, Mannono kite ame kwogo Obaŋa onen kede baŋa. Kare ame aneno, arette piny aryeba cuny, ate winyo dwonnoro ame tye akop. Ate winyo dwon ame kobba ni, “Wot a dano we, ya malo icuŋ i tyeni, me wek akob kedi.” I kare ame en okobo keda, cuny a Rwot te poto oko i koma, te miya cuŋ kede tyena; ate winyo en medde i kop keda. En te kobba ni, “Wot a dano we, an acwayi baŋ jo Icrael, ame gin obedo jo ame ojem i koma, gin karacel kede kwarigi otyeko timo bal i koma tuno kede naka i kare-ni. Dok gin obedo rok ame opala, ame otimo jami ducu opala opala, an acwayi baŋgi, yin ibino wot kobbigi ni, Rwot Obaŋa okobo ni, ‘Kadi bed gin obino winyo onyo obino kwero winyo, pien gin obedo jo ame jem, cite gin obino ŋeyo ni adwarpiny rik obedo tye i akinagi.’ Doŋ yin ba, wot a dano, myero kur ilworgi, kur daŋ ilwor kop ame gin kobo, kadi bed ocokocok kede okuto tye baŋi dok daŋ ibino bedo i wi yit; kur ilwor kopgi, cunyi daŋ kur poti kite ame gin neno kede, pien gin obedo jo a jem. Yin ibino kobo koppa baŋgi, kadi bed obino winyo onyo obino kwero winyo; pien gin obedo jo ame jem. “Ento yin wot a dano we, myero iwiny kop ame an akobbi, kur yin daŋ ibed ŋat a jem bala gin. Ŋam dogi icam gin ame ami.” Kare ame atino waŋa aneno malo, nen ba, aneno ciŋ ame oryeo baŋa, buk adola onwoŋo tye i ciŋ ame oryeo-nono. Dano-nono te yabo bukkono i nyima, bukkono onwoŋo ocoo yie kede ŋec, kop ame onwoŋo ocoo iye onwoŋo kop me kumo, kede kop me koko kede can. Obaŋa te kobba ni, “Wot a dano we, ŋam dogi icam gin ame omii; cam buk adola-ni ite wot, iwot ikob kop iye baŋ jo me ot Icrael.” Mannone te miya ŋamo doga, en te keto iye buk adola-nono ni myero acami. En te kobba ni, “Wot a dano we, cam buk adola-ni ame amio baŋi me iyeŋ kede.” An daŋ ate camo oko, te bedo alim meicel i doga calo moo kic. Obaŋa dok te kobba ni, “Wot a dano we, woti, wot naka i ot a jo Icrael, me iwot ikob koppa baŋgi. Pien mom acwai baŋ rok ame lebgi pat onyo ame kobo tek, ento baŋ jo me ot Icrael. Mom acwai baŋ lwak jo apol ame rokgi papat ame kobo leb apapat, dok ame lebgi tek, ame yin mom iromo niaŋ i lebgi. Ateteni, kono onwoŋo acwai baŋ kodi jo-nono, kono gin owinyo koppi. Cite jo me ot Icrael mom bino winyo koppi; pien gin mom oye winyo koppa, pien jo luŋ me ot Icrael, wiigi tek meicel dok gin opala meicel i cunygi. Nen ba, an abino miyo nyimi bedo atek meicel me twomo nyimgi, dok daŋ tur nyimi bino bedo atek me twomo tur nyimgi. Abino miyo tur nyimi bedo atek meicel ame kato lela oko; myero kur ilworgi, cunyi daŋ kur pot ka ineno jo ame maro jem-mu.” En dok te medo kobba ni, “Wot a dano we, myero igam kop luŋ ame abino kobbi i cunyi ducu, dok daŋ iketto cunyi me winyo. Wot naka baŋ jo ame tye iyi opii ame gin obedo joni, ite wot kobbigi ni, ‘Rwot Obaŋa okobo ni’; kadi bed gin owinyo onyo okwero winyo.” Cuny Obaŋa rik te tiŋa oko malo, ate winyo dwonnoro ame awinyere i ŋea, ame redo calo oyeyeŋ, kun oredoni, “Pak wunu kwogo a Rwot malo i polo.” Mannono onwoŋo dwon okot ame onwoŋo tye i ŋetgi ame onwoŋo tye awinyere aloŋo meicel calo oyeyeŋnono. Cuny Obaŋa te tiŋa oko malo te tera oko teŋe, awoto ame akemo ocira oko, kun teko a Rwot tye ame owuma oko. Awoto kan ame opii onwoŋo tye iye i Tel-abib, ame onwoŋo bedo i ŋet kulo me Kebar. Ate bedo kunno pi nino aŋwen, kun gin ame onwoŋo aneno olo tekona oko. I kare ame nino abiro doŋ otum oko, Rwot te kop keda. En te kobba ni, “Wot a dano we, an atyeko keti me bedo akur-piny pi jo me ot Icrael; kare luŋ ka ibino winyo kop ame akobbi, yin ibino kwenyorogi, ka ce akobo kop baŋ otim tim areco ni, ‘Ibino to gire,’ ka ce yin mom ikwenyoro danonono, akadi kobo kopporo me kwenyoro dano-nono i kom gin arac ame en tye atimo, me wek en lar kwo mere, dano araccono bino to pi ballere; cite bal me remo mere bino bedo i wii. Cite ka yin ikwenyoro ŋat ame timo tim araccono, ento en mom te ye weko timmere araccono onyo i yo arac ame onwoŋo en tye alubo, en bino to pi ballere, cite yin ibino laro kwoni. Kite acellono, ka ce ŋattoro a kite atira oweko kite atira oko, eka te timo bal, an ate keto gin ame mie egate i nyime, en bino to, pien yin mom ikwenyoro en, en bino to pi ballere, ento kite mere atira, ame onwoŋo en obedo bedo kede con, mom obino pwoye kadi acel. Bal me remo mere bino bedo i wii. Aco ka yin ikwenyoro ŋat a kite atira me mom timo bal, eka mom te timo balloro, en gire bino bedo kwo, pien en owinyo akwenyakin ame yin ikwennyoro en kede; yin daŋ ibino laro kwoni.” Teko a Rwot onwoŋo tye i koma kuno, en te kobba ni, “Ya iwot i bar, an abino kop kedi kuno.” An ate ya wot naka i bar; nen ba, ate nwoŋo kwogo Obaŋa tye kuno, ame rom aroma kede kwogo ame aneno i kulo me Kebar. An ate rette piny, cite cuny Obaŋa te donyo i koma, te maka oko, te miya ya malo cuŋ acuŋsssa, Rwot te kop keda kun kobo ni, “Wot icegere iyi odi. Doŋ yin wot a dano, en obino tweye oko kede tol, ame mom dok ibino romo wot i akina jo ocele. Abino miyo lebi moko oko i dani, ame bino miyo ibedo ŋat ame mom loko, a mom romo juko ŋattoro, pien gin obedo jo a jem. Cite i kare ame an abino kop kedi, abino miyo te lebi gony ite cako kop, eka ite kobbigi ni, ‘Rwot Obaŋa okobo ni’, kadi gin obino winyo onyo obino kwero winyo, pien gin obedo jo ame jem.” Obaŋa okobba ni, “Yin wot a dano, kwany matafali, ite keto i nyimi, ite goyo cal boma me Jerucalem iye. Tor lobo igur dyere, i te cweyo cel guro matafali nono oko, ite toro lobo yido i nyimi, dok icwe daŋ cal gony omony, ket daŋ yen me tuco kor apama cel man luŋ. Kwany nyonyo apada ite keto acalo apama ame ogero i nyonyo i akina yin kede cal boma ame igo-nono, ite cuŋ kun nyimi oneno kuno; mi bed calo boma ame mony doŋ oguro oko, kun yin itye acalo ŋat ame oguro boma-nono. Man en ame bino cimmi jo Icrael gin ame bino timere i komgi. “Yin doŋ but piny i ciŋi me tutuŋ cem, an abino keto i komi can ame onwoŋo myero aket i kom jo Icrael; pi nino mia acel i pyeraboŋwen. Pien yin ibino yeyo can a jo Icrael i kare ame nwoŋo ibuto pinnyono, pien mannono en nino ame doŋ atyeko moko piri, ame rom aroma kede mwakki me keto can i komgi. Kare ame doŋ ityeko nino ame akobo, dok ibino buto piny tyen me aryo mere, cite man doŋ ibino buto i ciŋi tutuŋ cam, kun iyeo can a jo Juda, ibino buto kittono pi nino pyeraŋwen ame doŋ atyeko moko piri, ame nino acel acel rom aroma i mwaka acel acel. Ibino loko nyimi neno tutuŋ boma me Jerucalem ame mony doŋ otyeko turo, kun badi tye nono. Ibino rabo kop i kom boma-nono. Nen ba, abino tweyi oko kede tol ame mom iromo lokere kadi acel tuŋ ocele, tuno ka ityeko kare ame amoko me guro boma. “Kwany ŋano kede cayiri, oraŋa kede ŋor, kal karacel kede bel, pikgi luŋ i gulu acel, ite tedo acalo ogati. I kare ame ibino buto piny ibino buto kun ibuto i laŋeti, kare mere bino bedo ame romo nino mia adek i pyeraboŋwen, yin ibino bedo camo ogatinono. Cem ame yin ibino camo, obino pimo apima, ibino camo cam ame pekkere romo nucu ratili keken nino acel acel kun daŋ icemo icel keken nino acel. Pii ame yin ibino mato daŋ obino pimo apima. Ibino mato pii aduno, ame romo kopo aryo keken i nino acel acel, kun daŋ imato icel keken nina acel. Ibino camo calo ogati ame otedo i cayiri, kun icelo i nyimgi i kom cet a dano.” Rwot te kobo kop ni, “Mannono en kite ame rok me Icrael bino camo kede ogati a mom cil, i akina rok ocele ame abino ryemogi terogi iye.” An ate gamo ni, pe amannono, Rwot Obaŋa! Nen ba, an anaka mom ru alille i ginnoro kadi acel. Cakere ame pwod atidi, mom ru acamo ginnoro ame oto kene, onyo ame lee tim oneko, riŋo moro me kwer daŋ mom ru otuno i doga. Rwot te kobba ni, “Nen ba, an abino miyi woo dyaŋ akaka cet a dano, en ame yin ibino tedo kede ogatini.” Medo i mannono, Rwot dok te kobba ni, “Nen ba wot a dano, abino miyo ogati rwenyo oko i Jerucalem. Jo me Jerucalem bino camo ogati ame opimo apima, dok obino camo lworo lworo; obino daŋ mato pii ame opimo apima, kun daŋ omato ame cunygi apoto apota. Abinsso timo man me wek ogati kede pii rweny oko i baŋgi, ŋat acel acel te cako ŋweco awottere ame cunye apoto apota, tekogi te tum oko pi balgi. “Yin wot a dano we, kwany pala lweny abit meicel, ti kede acalo lyedi, ilyel i wii kede tiki oko; dok ikwany mijan me pimo jami, ite popoko yer wii oko. Acel me adek me yerrono ibino waŋo i mac i dye boma, ka kare me guro boma doŋ otum; acel me adek me yerrono, ibino tero oko i ŋe boma, ite wot gogoa kede pala me romo; acel me adek me yerrono, ite keketo miyo yamo kolo oko, an abino ryemo yorgi i pala me romo. Kwany yer aduno, i te tweyo i lak boŋoni ame iruko. I kom yer aduno ame ikwanyo-nono, ibino tero mogo iye ite wot bolo i mac ite miyo waŋ oko, eka mac te ya i kom maccono te wot waŋo jo me ot Icrael luŋ. Rwot Obaŋa okobo ni, Man en Jerucalem, an atyeko kete i dyere a rok apapat, kun lobo ocele ogure dyere. Cite en otimo tim me jem i koma, kun kwero winyo cikka, ame kato rok ocele mege, okwero daŋ gwoko icwilla ame kato lobo ocele ame ogure dyere, Jerucalem okwero gwoko icwilla karacel kede cikka. Mannono omio Rwot Obaŋa okobo ni, Pien ibedo wunu tagere meicel ame kato rok ocele luŋ ame ogurowu dyere, kun mom igwoko wunu icwilla kadi lubo gin ame aciko, ento ibedo timo wunu gin ame rok ocele ame ogurowu dyere ociko ni itim wunu; mannono omio Rwot Obaŋa okobo ni, Nen ba, akadi an ikoma cunya doŋ mom mitowu, abino ŋolo kop i akinawu, kun rok ocele mege-ni neno kede waŋgi. Dok daŋ pi tim luŋ me kwer ame ibedo timo wunu, abino timo i komwu gin arac ame yam mom ru atimo, dok ame mom dok abino medo timo. Pi mannono ba, odoŋe bino camo awobegi, kun awobe daŋ camo odoŋegi i akinawu. Abino ŋolo kop i komwu, doŋ ŋattoro keken i akinawu ame bino doŋ, abino miyo yamo kolo tero oko teŋe. “Doŋ pi mannono, kite acalo an abedo Obaŋa ame kwo, pien wun ibala wunu oda acil, kun itimo wunu iye timmogo areco kede timmogo luŋ me kwer, abino toŋowu aretowu piny aboŋo kica. Acel me adek i akinawu too edeke en ame bino neko, karacel kede kec, kun gin luŋ oto i akinawu, acel me adek i akinawu obino neko aneka i pala lweny ame tye i ŋetwu, eka acel me adek i komwu, abino miyo yamo kologi terogi teŋe, an dok ate woto pala me romona ryemo kede yorgi. “Ibino kako wunu akemona meicel, tuno waŋ ame an doŋ aneno ni oromo. Kare ame man luŋ doŋ otyeko timere, ibino doŋ ye wunu ni an a Rwot, ame rik akobo kedwu akemo i kare ame onwoŋo wun mom igena wunu. Medo i kom mannono, abino miyo Jerucalem doko wi obur, kun bedo gin ame oyeto i akina orok ame ogurowu dyere, kede i akina jo luŋ ame bedo i ŋetwu. Ibino bedo wunu gin ame jo cao dok oyeto, gin ame mio jo lworo dok ame kwenyoro jo, i akina rok luŋ ame ogurowu dyere, i kare ame abino ŋolliwu kop i twon akemo kede iniga, kun agoowu alit meicel. An Rwot en ame akobo-nono. Abino miyo cam rwenyo oko i baŋwu, kec te nekowu meicel, mannono abino timo me wek ajwerwu oko. Dok abino cwayo kec i komwu tere i tere, ate miyo cam rwenyo oko i baŋwu atwal. Abino miyo kec kede leyi me tim bino i komwu me bino nekowu, ame bino neko itinowu oko. Too edeke, kede onyo remo bino beo iyi akinawu, dok daŋ abino cwayo pala romo me nekowu. Man kop ame an Rwot akobo.” Rwot okobo keda, kun kobo ni, “Wot a dano we, lok nyimi inen tutuŋ kun ame kiddi me Icrael tye iye, me ite rabo kop i komgi. Rab kop i komgi ni, Wun kiddi me Icrael, winy wunu kop a Rwot Obaŋa! Rwot Obaŋa okobo kop i komwu wun kiddi kede lobo obedo kidikidi, kulli kede luŋ. En okobo ni, Nen wunu ba, an ikoma abino kelo pala lweny i komwu, abino babalo kabedo luŋ me woro jogi ame tye i wi kiddi malo. Abino mumuko keno lamwu wie te doŋ nono, kede keno lamwu me waŋo odok akur obino daŋ tuturo oko; jo ame bedo kuno, bino totoa oko i ŋet cal jogigi. Abino miyo kom jo Icrael ame oto bu buta piny i nyim cal jogigi, ate keketo cogo komwu i ŋet keno lamwu luŋ. I kabedo luŋ ame ibedo wunu iye, bomawu luŋ bino doŋ yigi nono, ka woro jogiwu ame tye i wi kiddi malo daŋ obino balo oko. Mannono bino miyo keno lamwu luŋ doŋ nono kun daŋ obalo oko, cal jogiwu obino tuturo oko ducu, keno lam me waŋo odok akur luŋ obino reto oko piny, dok ginnoro luŋ ame itio wunu obino jwero oko ducu. Jo ame oto bino rette piny i akinawu, mannono bino miyo iŋeo wunu ni an a Rwot. “Kadi bed amannono abino weko jo mogo i akinawu doŋ akwo. Jo ame odoŋ bino keketa i akina orok, i lobo apapat, kan ame obino bedo iye acalo opii. I kare ame gin tye kuno, gin bino po i koma, ote niaŋ ni an aketo can i komgi me miyogi lewic, pien gin okwero genna oko ote lunyo geno cal jogi. Gin obino doko twon ginnoro arac meicel, akadi ka gin onenne kengi, pi timmogo areco ame gin obedo timo, kede pi tim luŋ me kwer ame gin obedo timo. Pien i kare-naca gin obino ŋeyo ni an a Rwot; dok daŋ ni kop ame akobo ni abino keto can i komgi mom akobo nono nono.” Rwot Obaŋa okobo ni, “Bap wunu korwu, dok ibap wunu tyenwu daŋ piny, ite kobo wunu ni, Oi doi! Pi timmogo me kwer areco meicel ame jo me ot Icrael obedo timo; pien nen obino nekogi oko i pala lweny dok kec kede too edeke daŋ bino nekogi. Ŋat a tye kannabor to edeke en abino neko; ŋat ame tye kan aceggi obino neko aneka i pala lweny; ŋat ame odoŋ kec en ame bino neko. Mannono en kite ame abino luŋo kede inigana i komgi. Mannono bino miyo iŋeo wunu ni an a Rwot, i kare ame jogi ototoa tye obubuta piny i ŋet cal jogi, ame tye i ŋet keno lamgi, i kabedo luŋ obedo kidikidi, kede i wi kidi luŋ, i te yen luŋ ame obuŋere, i te kworo luŋ ame obuŋere, i kabedo luŋ ame gin oyalo iye cal jogigi, i mottogo ame nwecgi kur. Abino ryeyo ciŋa me lweny i komgi, ate miyo lobogi doko wi obur ame ŋattoro mom iye, i kabedo luŋ ame onwoŋo gin bedo iye, cakere i tim tuno naka i Ribla. Mannono bino miyo gin oŋeo ni an a Rwot.” Rwot okobo keda, kun kobba ni, “Wot a dano we, Rwot Obaŋa okobo kop i kom lobo me Icrael ni: Agikki doŋ ceggi! Agikki doŋ otuno oko, i kabedo luŋ i lobowu. Agikki doŋ otuno oko, i komwu, abino doŋ weko akemona tuno oko i komwu, te cako ŋolliwu kop kun lubo gin ame itimo wunu. Abino keto can i komwu pi ginnoro luŋ me kwer ame itimo wunu. Mom abino koyawu kadi acel, dok mom abino bedo i kica moro i komwu, ento abino keto can i komwu pi gin ame ibedo wunu timo, kun timwu me kwer tye i akinawu. Mannono bino miyo iŋeo wunu ni an a Rwot.” Rwot Obaŋa okobo ni, “Abino miyo can bino i komwu kun lubere aluba! Nen ba, ocako doŋ bino oko. Agikki doŋ obino oko, agikki doŋ obino oko; otwarre doŋ oko i komwu. Koŋ inen doŋ tye abino. Can doŋ obino oko i komwu wun jo ame bedo i lobo-ni. Kare doŋ obino oko, nino mere doŋ ceggi acega, i nino ame woo me yomcuny mom dok bino bedo iye i wi kiddi, kono ka wo me lweny keken. Aman doŋ aceggi coro akemona i komwu, ate luŋo akemona i komwu luŋ, kun aŋolliwu kop ame poro gin ame itimo wunu. Abino keto can i komwu pi tim me kwer luŋ ame ibedo timo wunu. Mom abino koyowu kadi acel, dok daŋ kica mom bino maka i komwu. Abino keto can i komwu ame oporo kitewu, kun timwu me kwer tye i akinawu. Mannono bino miyo iŋeo wunu ni an a Rwot ame ogoowu. “Nen ba, nino me can tye abino! Koŋ inen tye doŋ abino, can doŋ obino oko i komwu. Ŋolokop atira doŋ otuno oko, awaka doŋ dwoŋ meicel. Tim me kolo doŋ odoŋo atekate ka, odoko doŋ abiro me gin arac. Dano moro mom bino doŋ i akinagi kadi acel, naka lwak jami abup ame tye i ciŋgi, kede lonyogi, gin luŋ obino timogi arorom. Kare doŋ obino oko, nino mere doŋ ceggi acega. Owil wil myero kur leli, acat jami daŋ myero kur kumi, pien akemo a Rwot agudo lwak luŋ aluŋa. Pien acat jami mom bino dok i gin a doŋ etyeko cato, kun en pwod tye kwo. Akemo doŋ ogudo lwakgi luŋ, mom dok bino dok cen kadi acel, dok pi balgi, ŋattoro mom bino bedo kwo.” Dano moro doŋ otyeko kuto apel oko, omio jo luŋ doŋ tye ame oterre oko, cite mom tye ŋattoro i akinagi ame bino wot i lweny, pien akemona bino gudo lwak luŋ. Lweny tye naka i dye gudo, too edeke, kede kec tye i udi luŋ. Jo ame tye i potti bino to i lweny, jo ame odoŋ i boma, kec kede too edeke en ame bino neko. Ka ce jo mogo obwot te lwi oko, gin bino bedo i wi kiddi malo, calo awele ame bedo i luŋ, gin luŋ obino kumo, kun ŋat acel acel kumo pi ballere. Jo luŋ ciŋgi bino doko agoro oko, kun coŋgi doŋ tye amyel amyela, Obino rukoboŋo kwero cola, kun lworo ocirogi oko. Lewic bino mako dano acel acel i akinagi, kun jo luŋ olyelo wigi oko. Dano acel acel bino bolo ryallere oko i dye gudo, jabugi bino doko acalo gin ame yigi okwero. Ryalgi karacel kede jabugi mom bino larogi kadi acel, iyi akemo a Rwot. Mom otwero camo kadi acel, dok daŋ mom twero miyogi oyeŋ. Pien jabu kede ryal en ame obedo miyogi poto i bal. Rik obedo wakere wakere a konygi mom, pi rukgi abeco. Gin te bedo tiyo cal jogi ame obedo me kwer, kede gigi mogo ame okwero i rukgi-nono. Mannono en omio abino miyo lonyogi doko gin ame yigi okwero. Abino miyo orok yako oko, karacel kede otim tim areco, eka ote babalo oko. An gira mom abino paro kadi acel i kare ame orok tye abalo ot me wora, i kare ame oyak tye aturo oda kun obalo. “Lobogi bino doko wi obur, pien lobo doŋ opoŋ i tim me onyo remo, tim me byemi daŋ doŋ dwoŋ meicel i boma. Abino kelo rokkogo areco meicel ate miyogi gamo udiwu oko. Teko a jo atek bino rwenyo oko, i kare ame abino miyo orokkogo, bino me bino balo kan ame iwora wunu iye. Kare ame cunygi doŋ odoko goro, jo bino koko kuc, cite mom bino nen kadi acel. Can bino bedo lubere aluba, kun amuttogo areco daŋ winyere tere i tere. Ibino wot wunu baŋ odwarpiny pi winyo gin ame Obaŋa onyuttigi, ento olamdog mom bino bedo kede cikkoro ame myero opwony kede lwak, kun odoŋe a lwak daŋ mom romo miyo tammoro kadi acel. Abaka bino kumo, koyo bino onyere oko i kom rwode, kun jo luŋ komgi myel amyela pi lworo, Abino keto can i komgi kun lubere i gin ame gin obedo timo, kun daŋ aŋolligi kop kite ame gin obedo ŋolli jo ocele kop. Mannono bino miyogi oŋeo ni an a Rwot.” I nino dwe abic me dwe me abicel, me mwaka me abicel ame wan obedo kede iyi opii, odoŋe ame telo lwak ame onwoŋo tye iyi opii oya i Juda, onwoŋo tye obedo karacel kede i oda, oyotoyot teko a Rwot te bino poto i koma i caa-nono. Nen ba, atiŋo waŋa malo, ate neno ginnoro ame cal kede dano, cakere i pyere dok piny onwoŋo meny calo mac, eka cakere i pyere wot kede malo, nen calo mac amimila, cal mola. An ate neno cal ciŋ dano ame en ocwao baŋa te mako yer wia, Cuny Obaŋa te tiŋa malo, te wot keda naka i akina lobo kede polo. I kare ame atye kuno, Obaŋa te nyutta cal Jerucalem, kun atye i dogcel ame donyo i dyekal i dyere, ame tye tutuŋ anyarodi, kan ame onwoŋo oketo iye cal jok ame onwoŋo mio nyeko mako Obaŋa meicel. Nen ba, kwogo Obaŋa me Icrael onwoŋo tye kuno, ame rom aroma i gin ame onyutta i dye bar. Obaŋa te kobba ni, “Wot a dano we, koŋ itiŋ waŋi malo inen tutuŋ nayarodi.” An daŋ ate tino waŋa malo tutuŋ anyarodi, ate neno cal jokkoro ame mio nyeko mako Obaŋa tye i ŋet keno me lam ame tye i dogcel me donyo i boma. Obaŋa dok te kobba ni, “Wot a dano we, ineno gin ame jo tye ka timo, twon timmoro me kwer adwoŋ meicel ame jo Icrael tye atimo kan, me ryemma oko cwalla teŋe kannacil? Cite pwod dok ibino medde neno twon timmogo me kwer ame doŋodoŋo meicel kato man oko.” Obaŋa dok te tera i doggola me dyekal. I kare ame abedo ŋiyo kunu, ate neno bur ame otuco i kor apama ot. En te kobba ni, “Wot a dano we, koŋ imuk kor apama-nu.” Kare ame amumuko kor apama-nono, anwoŋo doggola tye iye. En dok te kobba ni, “Koŋ idony kunu iwot inen timmogo me kwer ame gin tye ka ti mo kan.” An daŋ ate donyo, ate neno gin ame tye kuno, ate nwoŋo cal apapat tye ogoo i kor apama kunu, ame oromo kor apama luŋ. Cal i kor apama-nono onwoŋo tye iye cal twole apapat kede leyi mogo ame okwero, kede cal jogi mogo ame rik jo Icrael woro. Dok ate nwoŋo kuno odoŋe a jo Icrael ame romo pyerabiro kun cuŋ i nyim cal jogi-nono. Jajania wot a Capan onwoŋo daŋ tye ocuŋ i akinagi kunu. Ŋat acel acel i akinagi onwoŋo omako tako me waŋo gin a ŋwece kur i ciŋe, kun yito me odok akur ame gin awaŋo-nono tye aduny awikino malo calo pol. Obaŋa dok te kobba ni, “Wot a dano we, ineno gin ame odoŋe a jo Icrael tye ka timo i muŋ kannacol kan? Gin luŋ ŋat acel acel tye ka woro jogi iyi icika ame cal jogi apapat tye iye. Gin otye ka kop kengi kengi ni, Rwot gire mom nenowa, cuny Rwot doŋ otyeko cayo lobo man oko.” Rwot dok te kobba ni, “Pwod dok ibino medde neno twoni timmogo me kwer areco meicel akato man ame gin tye ka timo.” Rwot dok te kela i dog cel ame tye tutuŋ anyarodi me ot a Rwot, ate nwoŋo mon ame akoko tye obedo kunu, kun okoko jok ame olwoŋo ni Tamuj. Rwot te penya ni, “Ityeko dok neno man, wot a dano? Pwod dok ibino medde neno twoni timmogo me kwer areco meicel akato man ame gin tye ka timo.” Rwot dok te terra i dyekal ame tye i ot a Rwot. Kunu ate neno jo ame mito romo pyeraryo wie abic, ame tye i ŋet doggola me ot a Rwot, iyi akina keno me lam kede kan ame odonyo kede i ot a Rwot. Gin jonono onwoŋo oloko ŋegi i ot a Rwot, kun nyimgi oneno tutuŋ kide, gin onwoŋo tye ka ryebere piny me woro ceŋ ame onwoŋo pwod tye adonyo adonya i tutuŋ kide. Rwot dok te penya ni, “Ineno dok man, wot a dano? Mom jo me ot a Juda neno ni timo kodi tim man yottigi ayota, gin te bedo timo tim me kwer kan, me miyo tim me byemi bedo adwoŋ meicel i lobo, kun oroka kede, omito ni akemo bed maka? Nen koŋ kite ame gin tye anywara kede atek okato kare. Mannono omio abino tic kedgi i twon akemo adwoŋ meicel, mom abino koyo ŋattoro kadi acel, dok kica daŋ mom bino maka i kom ŋattoro; kadi bed ored i twon koko moro aloŋo rom mene, mom abino ciko yita i komgi.” Icennere ate winyo dwon Obaŋa kun redo i dwon aloŋo ni, “Bye wunu aceggi, wun onek jo ame mito keto can i kom otim tim areco ame tye i boma man. Ŋat acel acel i akinawu myero kwany jami lwennyere, mak i ciŋe bin kede.” Nen ba, jo abicel te bino kun obino i tutuŋ dogcel, ame tye tutuŋ anyarodi, kun ŋat acel acel omako jami lwennyere me neko jo i ciŋe, i akinagi, onwoŋo tye iye lo moro ame orukoboŋo camanini, kun omako ginnoro me coc i ciŋe. Gin luŋ ote donyo i dyekal me ot a Rwot ote wot cuŋ i ŋet keno lam me mola. I kare-nono onwoŋo kwogo Obaŋa a jo Icrael, ame ryeny atek wok-ki, oya oko i kom okerubi kan ame onwoŋo yam en bedo iye, kun woto cuŋ i doggola me ot a Rwot. Rwot te lwoŋo dano ame onwoŋo orukoboŋo camaninino no ame onwoŋo tye i ginnoro me coc i laŋete. Rwot te kobbe ni, “Wot ibe i dye boma me Jerucalem luŋ, me iwot iket alama i tur nyim dano acel acel ame tye kede cwer cuny, dok tye ka cucura i cunye pi timmogo me kwer ame otye ka timo i boma me Jerucalem.” Ate dok winyo Rwot Obaŋa kun tye ka kop i jo ocele mege, ni, “Wun daŋ wot ibebea wunu i boma ilub wunu yore, kun ineneko wunu jo. Kur iko wunu ŋattoro kadi acel, dok daŋ kur ibed wunu i kica moro i kom ŋattoro kadi acel. Nek wunu jo oti, awobe, anyira, mon kede itino atino, cite kur igud wunu ŋattoro ame otyeko keto alama i nyime. Wot icak ticwu-nono i kabedona acil.” Mannono omio gin te cako kede odoŋe ame onwoŋo tye i nyim ot a Rwot. Obaŋa dok te kobbigi ni, “Bal wunu ot me wora daŋ oko. Mi wunu kom jo oto rade aradi i dyekallere. Cak wunu doŋ wot oko.” Gin te cako wot, ote wot neko jo ame tye i boma. I kare ame gin tye ka neko jo kunu, an onwoŋo doŋ adoŋ kena. Arette piny aryeba cuny, ate redo i koko ni, “Ama Rwot Obaŋa we! Akemo doŋ omaki meicel i kom Jerucalem, omio imito ni inek jo Icrael luŋ ame odoŋ iye?” Obaŋa dok te gamo ni, “Bal ame jo me Icrael kede jo Juda otimo doŋ dwoŋ meicel. Remo a jo ame gin obedo neko, doŋ dwon meicel i lobo, dok daŋ otye ka balo ŋolo kop atira atek meicel i boma me Jerucalem, kun okobo ni, ‘Cuny Rwot doŋ ocao lobo man oko, dok Rwot daŋ mom dok neno ginnoro ame atimere iye.’ Man omio an i tuŋ baŋa, mom doŋ abino koyo ŋattoro kadi acel, dok kica daŋ mom bino maka i komgi, abino culo kwor i komgi, i ginnoro luŋ ame yam gin otimo.” Dok ate ru neno lo moro ame orukoboŋo camanini, ame tye i ginnoro me coc i laŋete, kun dwoko kop baŋ Rwot ni, “Doŋ atyeko tiyo gin ame onwoŋo icika ni awot ati.” Dok ate neno ginnoro ame opette malo i wi okerubi, i wie malo kunnu, ate neno ginnoro daŋ acalli kom loc, ame otio i kidi capir ame obedo bululu bululu. Obaŋa te kobbi dano ame orukoboŋo camanini ni, “Wot idony naka i akina okot ame tye ka wirre-ni, dony i piny i te okerubi, ite juko cukbilo poŋ ciŋi, kun ijuko i akina okerubi, eka ite keketo atata i dye boma.” En te wot i nyima kun onwoŋo atye aneno. I kare-nono onwoŋo okerubi tye ocuŋ tutuŋ anyarolum, i kare ame dano-nono doŋ odonyo i ot, pol te bino wumo dyekal me ottono oko. Kwogo a Rwot te ya i kom okerubi, te wot naka i doggola me ot a Rwot. Pol onwoŋo owumo yi ot a Rwot oko, kede dyekal, kun kwogo a Rwot tye ameny amenya. Bwom okerubi onwoŋo tye amor awinyere naka i dyekal ame onwoŋo tye oko, kun ŋur calo dwon Obaŋa Won Twer Ducu ame tye ka kop. Kare ame Rwot ociko dano ame orukoboŋo camanini, ni, “Kwany mac i akina okot ame tye awirre i akina okerubi”, dano-nono owoto te wot donyo i akina okot te cuŋ i ŋet okot acel. Akerubi acel te ryeyo ciŋe i akina okerubi wadgi, kun cwao ciŋe i mac ame onwoŋo tye i akina okerubi, te gwaro maccono, keto i ciŋ dano ame orukoboŋo me camanini-ni, dano-no te gamo wot kede oko. Okerubi acel acel onwoŋo tye kede ginnoro i te bwome ame nen calo ciŋ dano. Dok ate neno okot aŋwen ame onwoŋo tye i ŋet okerubi, kun okot acel acel tye i ŋet okerubi acel acel. Okot acel acel onwoŋo memenya calo gweŋ alilia. Gin luŋ onwoŋo ocacal, dok okot acel acel nen calo gin ame tye iyi okot wadgi. Gin okot aŋwennono luŋ onwoŋo ka owot owoto tuŋŋoro keken ame nyimgi otiko i kabedo aŋwen luŋ, kun owoto atira ame nyimgi mom romo lokere tuŋ ocele, tuŋ ame okot ame otelo yo otiko, okot ocele mere doŋ luba aluba aboŋo lokere kadi acel i kare ame gin awottono. I kom okot aŋwennono luŋ, medo kede tiregi, onwoŋo tye kan ame otutuca calo waŋgi, kun oromo kom okot luŋ irit. Okot aŋwennono, an awinyo ka olwonogi ni okot ame wirre calo yamo ajuru. Okerubi acel acel onwoŋo tye kede nyime aŋwen, me agege onwoŋo nen calo nyim okerubi, me aryo mere te nen calo nyim dano, me adekkere te nen calo nyim eŋatu, eka me aŋwennere te nen calo nyim cur. Mannono en kite ame nyimgi onwoŋo nen kede. Okerubi te ya twarre oko malo i yamo, Magi gin leyi aŋwen ame yam aneno i ŋet kulo me Kebar. Ka okerubi ocako wot, okot daŋ woto karacel kedgi, ka okerubi oyaro bwomgi malo me twarre oko i lobo, okot daŋ mom ya i ŋetgi kadi acel. Ka ce gin ocuŋ mot, okot daŋ cuŋ mot, ka ce gin otwarre malo, okot aŋwen-ni daŋ twarre me wot kedgi, pien cuny leyi aŋwen-ca onwoŋo tye i kom okot. Kwogo a Rwot te ya oko i kom doggola me ot a Rwot te wot cuŋ malo i wi okerubi, okerubi te yaro bwomgi, te twarre oko i lobo, an onwoŋo atye anenogi i kare ame gin tye awot, kun owoto karacel okot i ŋetgi. Gin te wot cuŋ i doggola ame tye tutuŋ kide me ot a Rwot; kwogo a Rwot Obaŋa me Icrael onwoŋo tye i wigi malo. Magi gin leyi aŋwen ame yam anenogi i ŋet kulo me Kebar, kun Rwot Obaŋa me Icrael tye i wigi malo. An rik ate niaŋ ni gin obedo okerubi. Acel acel i akina leyi-nono onwoŋo tye kede nyime aŋwen bwome aŋwen, kun i te bwome acel acel tye iye ginnoro ame cal i ciŋ dano. Aco kite ame cal i nyimgi nen kede, nyimgi onwoŋo rom aroma i nyim leyi ame aneno i ŋet kulo me Kebar, gin luŋ ŋat acel acel onwoŋo woto ame otiko nyime atira. Cuny Obaŋa rik te tiŋa malo, te tera naka i dogcel ame tye tutuŋ kide me ot a Rwot. I kare ame atye kuno, i ŋet doggola me dogcel, ate neno jo pyeraryo wie abic, kun i akinagi onwoŋo tye iye Jajania wot Ajur, kede Pelatia wot a Benaya, ame onwoŋo obedo rwode ame loo lwak. Obaŋa te kobba ni, “Wot a dano we, magi gin otim tim areco ame tye ka yiko kop imuŋ me timo gin arac i kom boma man. Gin okobo ni, ‘Kare ame obino gero i udi doŋ ceggi, boma man tye acalo gulu me tedo, aco waŋ acalo riŋo ame tye iye.’ Pi mannono ba, wot a dano, myero irab kop i komgi.” Cuny a Rwot rik te poto i koma, te kobba ni, “Kob ni Rwot okobo ni, ‘Wun jo Icrael aŋeo gin ame gin itye ka kobo wunu, kede gin ame itye ka timo wunu i muŋ. Wun itye ka medde wunu ameda me neko jo apol ame tye i boma man, ame imio wunu kom jo oto doŋ oradde arada atata i dye gudo.’ “Doŋ Rwot Obaŋa okobo ni ba, Boma-ni doŋ odoko gulu me tedowu, cite kom jo ame ineneko wunu ite pyelo wunu i dye boma, obedo riŋo me atedawu. Myero iŋe wunu ni wun obino kwanyowu oko i dye boma. Yam ilworo wunu pala me lweny cite myero iŋe wunu ni abino kelo pala lweny i komwu. Man kop ame Rwot Obaŋa okobo. Abino kwanyowu oko i dye boma ate terowu oko, wot miyowu i ciŋ orok. An doŋ atyeko ŋolliwu kop me to, obino nekowu oko i lweny, kun onekowu i pala lweny i lobowu ikokome. Man bino miyo iŋeo wunu ni an a Rwot. Boma man mom bino medde bedo gulu me tedowu, dok wun daŋ mom ibino bedo wunu riŋo ame obino tedo iye. Abino keto can i komwu i kabedo ducu ame ibino bedo wunu iye i lobo me Icrael. Mannono bino miyo iŋeo wunu ni an a Rwot, pien wun mom ibedo lubo wunu cikka kede gin ame onwoŋo an aciko ni timi wunu, ento ibedo wunu lubo cik a rok ocele ame tye i ŋetwu.” Kare okato anonok keken, ame an pwod atye arabo kop Obaŋa, Pelatia wot a Benaya te rette piny to oko, An daŋ ate rette piny aryeba cuny, ate mwoco koko malo i dwon aloŋo kun akok ni, “Ama Rwot Obaŋa, ibino doŋ tyeko jo me Icrael ame odoŋ oko?” Rwot te kop keda ni: “Wot a dano we, omegoni i kokome ame otero iyi opii, jo luŋ me ot Icrael, kede jo luŋ ame bedo i Jerucalem, otye ka kobo ni, ‘Gin doŋ otye kannabor meicel, ame mom doŋ oromo woro Rwot, kun en omiowa lobo man ni myero bed megwa’. Pi mannono, yin myero ikob kop ame an atye akobo-ni baŋ opi i wadwu: kadi bed atyeko kwanyogi cwayogi teŋe baŋ orok, kadi bed ake ketogi i lobo apapat, an onwoŋo aye ni gin owora i kabedo luŋ ame gin tye iye. Pi mannono ba, kobbigi kop man ame an Rwot atye ka kobo: ‘Abino rayowu oko i akina orok, kede i lobo apapat ame aketowu iye, ate miyowu lobo a jo Icrael.’ Ka gin bino dok kunu, obino kwanyo ginnoro i kunu luŋ ame cilo tye iye, karacel kede ginnoro luŋ me kwer. Abino miyogi obedo i cuny acel, dok abino keto cuny anyen i yigi. Abino kwanyo cuny ame tek calo gweŋ oko i komgi ate miyogi cuny ame rom aroma i kom, me wek obed jo ame lubo cikka, kun otio gin ame an aciko. Gin bino bedo jona, an abino bedo Obaŋagi. Aco jo ame bino medde keto cunygi woro gigi mogo a mom cil kede gigi mogo me kwer, an abino keto can i komgi pi balgi. Man kop ame Rwot Obaŋa okobo.” Okerubi te cako yaro bwomgi me twarre malo kun okot daŋ tye i ŋetgi, kwongo Obaŋa me Icrael onwoŋo tye i wigi malo. Kwogo Obaŋa me Icrael te ya oko i dye boma me Jerucalem, te wot cuŋ i wi kidi ame tye tutuŋ to. An ate neno cuny Obaŋa tye ka tiŋa oko malo, te tera naka baŋ jo ame tye iyi opii, i lobo me Kaldaya. Gin ame onyutta-nono, te cako rwenyo oko i baŋa. An ate kobbi jo ame tye iyi opii ginnoro luŋ ame Rwot onyutta. Rwot dok te kop keda, kun kobo ni, “Wot a dano we, yin ibino iyi akina jo me ot ame maro jem, ame tye i waŋgi cite mom oneno ginnoro, otye kede yitgi, ento mom owinyo ginnoro, pien gin obedo jo me ot ame maro jem. Pi mannono ba, wot a dano, yikere itwe yecci acalo me ariŋ ayela, ite cako wot, kun joni neno, me wot i lobo ocele. Gwok onyo bino miyogi oniaŋ, kadi bed gin obedo jo ame maro jem, ibino cako wot-ti-nono i nyimgi dyeceŋ. Ibino tero yecci-nono dyeceŋ kun gin aneno, acalo yec ariŋ ayela; dok ibino wot i nyimgi kun gin anenni, kite ame jo woto kede me wot i lobo ocele i kare me riŋo ayela i lobogi. Dok ituc kor apama ame gin anenno, eka yin ite bea i kan ame ituco-nono. Ibino tiŋo yecci i wi bwoki kun gin aneno, eka ite yeyo dyewor, ibino tweyo waŋi oko ame mom iromo neno lobo ame ateri iye, pien aketi me bedo gin ame jo Icrael twero neno, ame twero nyuto gin ame bino timere.” An ate timo ginnoro luŋ ame Rwot ocika ni atim. Akwanyo yecca, akelo oko dyecerj, kun atweo yecca calo ariŋ ayela, eka ate tuco kor apama, kun atuco kede ciŋa: ate cako wot dyewor, kun ayeo yecca i wi bwoka, ame gin daŋ otye onenno kede waŋgi. Odiko ocele Rwot dok te kop keda, kun kobo ni, “Wot a dano we, jo Icrael ame maro jem-mi, mom openyi ni yin itye ka timo gin aŋo? Yin myero igam kopgi kun ikobbigi kop man ame an a Rwot Obaŋa akobo: Kop man ame pire tek wok-ki, tiko rwot me Jerucalem, kede jo Icrael ame tye iye. Kobbigi ni mannono, gin ame itimo-ni, itimo me nyuttigi gin ame bino timere i komgi; obino terogi luŋ iyi opii i lobo ocele. Dok rwot ame tye i akinagi bino tiŋo yeccere i wi bwoke dyewor, te cako wottere dyewor kite ame yin itimo kede, en bino tuco kor apama, te donnyo iye, en bino tweyo waŋe oko, me wek kur enen lobo-nono i waŋe. Abino ryeyo bwona make oko, en te moko oko iyi owic ame aciko. Abino tere naka i lobo me Babulon, ame obedo lobo a jo Kaldaya, kadi amannono, en mom bino neno lobo-naca naka to iye kuno. Abino keketo jo luŋ ame yam gure dyere, jo ame mie tam, kede jo ocele ame yam gwoke i yore apapat, Abino miyo okworgi yenyogi meicel i pala lweny. “Gin obino ŋeyo ni an a Rwot, i kare ame akeketogi atata i akina rok ocele, kede lobo ocele. Cite abino weko jo mogo i akinagi bwot i leb pala lweny, i kec, kede i too edeke, me i kare ame gin tye i akina orok kuno, otuc gigi mogo me kwer ame yam obedo timo, dok daŋ oŋe ni an abedo Rwot.” Rwot dok te medde kop keda, kun kobba ni, “Wot a dano we, cam ogatini ame komi amyel amyela, dok imat pii daŋ i twon lworo adwoŋ meicel, dok ame komi daŋ amyel amyela. Kobbi jo me lobo-nono kop man ame an Rwot Obaŋa akobo i kom jo ame bedo i Jerucalem, i lobo a jo Icrael: Gin obino camo camgi i twon lworo adwoŋ meicel, dok obino mato pii ame cunygi apoto apota. Pien obino yako jami luŋ ame tye i lobogi, lobogi te doŋ nono; man bino timere pi tim me byemi ame gin obedo timo. Boma luŋ ame aman jo tye iye, obino jwero odoco, te doŋ acalo wi oburu, lobo te doŋ yie nono calo tim. Mannono bino miyogi oŋeo ni a Rwot.” Rwot dok te kop keda, kun kobo ni, “Wot a dano we, man kara carokop aŋo ame iwinyo i kom lobo me Icrael, ame jo Icrael maro kobo kede ni kare tye ka kato akata, dok ginnoro luŋ ame otye ka nyuttigi i waŋ lek, mom tye ka cobere kadi acel? Pi mannono kobbigi kop man ame an a Rwot Obaŋa akobo: Abino miyo kobo kop man i kom carokop gik oko, jo mom dok bino medde kobo carokop iyi Icrael luŋ, Yin kobbigi ni, kare doŋ tye ceggi acega, ame ginnoro luŋ a yam onyuto bino cobere iye. Anyut me goba doŋ bino bedo mom, akadi tyettogo, ame obwolo kede jo abwola mom dok bino nen i akina jo me Icrael. An Rwot ikoma en ame abino kobo gin ame amito kobo, dok daŋ jo bino timo gin ame akobo, Kop man mom dok bino gal kadi acel; abino gire timo gin ame aciko ni abino timo pi kare me kwowu, wun jo ame maro jem.” Man kop ame Rwot Obaŋa okobo. Rwot dok te kop keda, kun kobo ni, “Wot a dano we, nen jo me ot Icrael tye ka kobo gin ame otye ka nyutti-ni kede kop ame yin itye ka kobo, tye pi kare ame pwod bor meicel. Pi mannono ba, kobbigi kop man ame an Rwot Obaŋa akobo: Mom tye kopporo ame an akobo ame pwod dok bino gal, ento ginnoro luŋ ame an akobo bino doŋ timere. Man kop ame Rwot Obaŋa okobo.” Rwot okobo keda, kun kobo ni, “Wot a dano we, rab kop i kom odwarpiny me Icrael, rab kop, ikob baŋ odwarpiny ame gin orabo kop ame otamo atama pirgi kengi kun okobo ni jo winy kop ame Rwot okobo, kun Rwot mom okobo, kobbigi owiny kop ame Rwot okobo, Rwot Obaŋa okobo ni, Can bino poto i kom odwarpiny ame miŋ, ame lubo tam ame oya i cunygi kengi, kun nwoŋo mom oneno ginnoro kadi acel. Odwarpinywu onwoŋo rom aroma kede ekwe ame tye i boma mogo ame doŋ tye acalo wi obur, ama wun jo Icrael. Wun mom iwoto wunu kan ame omuko cel iye, mom daŋ igero wunu apama cel ame muko, wun jo Icrael; mannono en omio jo Icrael mom bino cuŋ kadi acel i kare me lweny i nino a Rwot. Anyut luŋ ame gin okobo ni onyuttigi obedo kop me goba. Gin ame gin tyeto daŋ obedo kop me goba keken. Gin bedo kobo ni, ‘Rwot okobo ni’, aco kono nwoŋo Rwot mom okobo, kun gin nwoŋo atamo ni Rwot myero mi gin ame gin okobo cobere. Anyut ame gin okobo ni oneno-nono, obedo goba, dok kopporo luŋ ame gin tyeto daŋ obedo goba, an gire nwoŋo mom akobbigi kopporo. Man kop ame Rwot okobo.” Mannono omio Rwot Obaŋa okobo ni, “Atye i, kop i komwu, pien wun itye ka kobo kop me goba, dok anyut ame ikobo ni ineno wunu daŋ goba keken, An doŋ aceggi keto can i komwu, wun odwarpiny ame ineno wunu anyut me bwolo ka jo, dok ame ityeto wunu tyet me gobagoba. Ikwerogu coyo wunu nyiŋwu karacel i jona Icrael, mom gire ibino dok i lobowu kadi acel. Mannono bino miyo iŋeo wunu ni a Rwot Obaŋa. Pien gin odwarpiny obedo miyo jona rwenyo kun okobo ni, ‘Kuc tye’, aco kono kuccoro mom. Dok ka jona ogero apama cel, odwarpiny bino puo oko i coka atar. Kobbi wunu jo ame puo apama kede raŋi atarrono ni, apamanono bino rette oko piny, kot bino cwe atek meicel, i twon pee adwoŋ a mom twerre, karacel i yamo kot ame abukoro okato kare, bino bukoro i kor apama-nono. Apama cellono bino mukere te rette oko piny, jo te penyowu ni kara coka ame yam ipuo wunu i kor apama-ni tye kwene.” Mannono omio Rwot Obaŋa okobo ni, “Abino miyo yamo kodo atek meicel i twon akemo adwoŋ meicel, dok abino miyo kot daŋ cwe adwoŋ meicel, kede pee, kun pee daŋ corre piny i twon akemona kede waŋcunnya, me muko apama cel reto oko piny. Abino muko apama cel ame opuo i raŋi atar areto oko piny, acakki tere te doŋ nono. Ka apama cellono orette oko piny, wun daŋ ibino to wunu oko ducu. Mannono bino miyo iŋeo wunu ni an a Rwot. Man en kite ame abino wuko kede akemona i kom apama cel, kede i kom jo ame opuo apama cel kede coka atar. Abino kobbiwu ni, ‘Apama cel doŋ mom tye, akadi jo ame yam opuo i coka atar daŋ mom tye, anaka odwarpiny me Icrael ame obedo rabo kop i kom Jerucalem, kun okobo ni onyuttigi anyuttogo ame nyuto kuc ame bino bedo iye, kun kono kuccoro mom. Man kop ame Rwot Obaŋa okobo.’ “Aman doŋ ba, yin wot a dano, koŋ dok icak loko waŋi inen anyirawu me Icrael, ame tye ka rabo kop ame gin otamo atama i cunygi; rab kop i komgi, i kobbigi kop ame an Rwot Obaŋa akobo: Abino miyo can poto i kom mon ame kwoo lwit, ote tweyo i ŋut ciŋ jo, dok ame tye ka kwoyo boŋo me wumo wi jo, kun nwoŋo okwo lwit iye, pi jo adoŋo kede jo atino, kun olubo kit ame dano moro-ni tye kede. Man itye ka timo wunu me mito ni ibed wunu kede twer i kom kwo kede to i kom jona pi nwoŋo lim pirwu kenwu. Itye wunu ka pyeda i akina jona, pi cayiri ame poŋ ka gwata tok acel keken, kede pi ogati mogo atitino, kun ineko wunu ŋat ame onwoŋo myero mom to, ite weko wunu dano ame onwoŋo myero to, te bedo kwo, pi kopwu me gobagoba ame itye wunu ka kobo baŋ jona ame ciko yitgi me winyo kop me gobagobanono. “Mannono omio Rwot Obaŋa okobo kop man: Nen ba, an adag lwit ame itye ka kwoyo wunu i komwu, me bedo kede twer i kom kwo a dano kede to mere. Abino codo lwitewu-nono oko i ŋut ciŋwu, ate weko tipo a jo ame onwoŋo ibedo gwoko wunu-nono wot oko ata kun mom atimo ginnoro i komgi. Abino yeco daŋ boŋo ame iwumo i wiwu oko, ate laro jona oko i ciŋwu, gin mom doŋ te medde bedo i te twerwu kadi acel. Mannono bino miyo iŋeo wunu ni an a Rwot. “Pien ibala wunu cuny jo ame kitegi atira i kop me nononono, kadi bed an mom onwoŋo abalo cunygi; icukoro wunu cuny jo areco ni myero gin omedde ameda i timgi areco me kur olar kwogi. Pi mannono ba, mom dok ibino medde wunu neno anyuttogo me goba, dok daŋ mom ibino tyet wunu tyettoro kadi acel, abino laro jona oko i ciŋwu. Man bino miyo iŋeo wunu ni an a Rwot.” Jo mogo i akina odoŋe me Icrael rik te bino bedo piny i nyima, I kare-nono Rwot te kop keda, kun kobo ni, “Wot a dano we, joni doŋ tye i cuny me woro calo jogi, omio gin otye ka miyo cal jogi tye ka rwennyogi arwenya me terogi i bal. Gin otye ka tamo ni an abino dokkigi i gin ame gin omito? Pi mannono ba, yin myero ikob kedgi, ikobbigi kop man ame an Rwot Obaŋa akobo. Dano moro me Icrael keken ame tye kede cuny me woro cal jogi, kun daŋ omio calo jogi tye arwenye arwenya me tere i bal, eka dok te bino me bino penyo odwarpiny, an a Rwot i koma en ame abino bino baŋe me doke i kop man, pien en otimo lwak cal jogi apol meicel me awora mere. Jogi magi luŋ doŋ otyeko miyo cuny jo Icrael ya oko i koma, ageno ni ka abino gamo kopgi, abino miyo tamgi lokere dwogo i koma. “Pi mannono ba, kobbi jo me ot Icrael kop man ame an Rwot Obaŋa akobo: Myero iŋut wunu, iwek wunu woro cal jogi, me idwog wunu baŋa. Dok daŋ myero ilokere wunu iwek timo wunu timmogo me kwer, ame ibedo timo wunu, Pien dano moro keken me ot Icrael, onyo arokkoro ame tye i akina jo Icrael, ame pokere oko keda, cunye te bedo i kom woro cal jogi, kun mio cal jogi rwenye arwenya tere i bal kun an aneno, eka te dok bino baŋ adwarpiny me bino penyo kop i kome baŋa, aŋa Rwot ikome en ame abino gamo koppere. Abino kwero kit timmere-nono oko ate miyo en bedo anyut ame jo lolo i doggi, kun amio waŋe rwenyo oko i akina jo me turgi. Mannono bino miyo iŋeo wunu ni an a Rwot. “Ka ce obwolo adwarpinnyoro, te gamo kop gobagoba, mannono nwoŋo an Rwot en ame abwole-nono, Abino ryeyo ciŋ i kom adwarpinnyono, ate neko oko i akina jona Icrael. Adwarpiny karacel kede ŋat ame obino penyo kop i baŋe-ni, can ame abino keto i komgi bino bedo arorom, Abino timo man me jo Icrael kur dok rweny kun oya oko i baŋa, dok daŋ kur olille i balloro luŋ ame gin otimo. Ento gin luŋ obedo jona, kun an daŋ abedo Obaŋagi. Man kop ame Rwot Obaŋa okobo.” Rwot dok te kop keda, kun kobo ni, “Wot a dano we, ka ce jo me lobo moro otimo bal i koma, kun oturo kede cikka, an abino ryeyo ciŋa, ate miyo cam rwenyo oko iye. Abino miyo kec poto, ame te miyo dano karacel kede leyi to oko iye. Kadi bedjo adekki: Nua, Danieri, karacel kede Yubu rik obedo iye, gin aber ame gin obedo timo, bino miyo gin olaro ka kwogi kengi. Man kop ame Rwot Obaŋa okobo. Ka ce acwao le moro ager me tim ame neko jo oko i lobo-nono, ame te miyo lobo-nono bale odoco ame ŋattoro mom doŋ romo beo iye pi lworo leyi, kadi bed rik jo adek-ki tye kuno, ateteni, kite ame an abedo kede Obaŋa ame kwo-ni, jo-nu onwoŋo romo laro ka kwogi kengi, cite lobonono onwoŋo gire myero doŋ nono aboŋo ŋattoro iye. “Onyo ka ce amio lweny opoto i lobo-nono, kun akobo ni okwor myero be i lobo-nono luŋ, kun oneko jo luŋ iye karacel kede leyi; kadi bed jo-ni adek-ki onwoŋo rik tye kuno, kite acalo an abedo Rwot Obaŋa ame kwoni, joni onwoŋo mom romo laro itinogi, awobe kede anyira, kono ka kwogi kengi. Onyo kadi bed onwoŋo acwalo too edeke i lobo-nono, onyo awuko akemona iye i lwak remo, me neko jo iye luŋ karacel kede leyi. Kadi Nua, Danieri kede Yubu onwoŋo tye kunu, kite acalo an atye kwo-ni, jo-ni onwoŋo mom romo laro wodgi moro onyo nyargi moro ame tye kuno, gin onwoŋo oromo laro ka kwogi kengi, pi kitegi arita. “Pien man en kop ame Rwot Obaŋa okobo: Tye kit can areco aŋwen apapat ame abino cwayo i kom Jerucalem, abino cwayo i komgi to me pala lweny, kec, twoni leyi mogo ager meicel karacel kede too edeke, me neko jo luŋ iye karacel kede leyi. Ka ce ineno wunu ŋattoro obwot iye, me laro itino mere awobe kede anyira, eka gin te bino baŋwu, myero inen gin ame gin tye ka timo. Ibino neno kitegi kede ginnoro luŋ ame gin timo, mom ber kadi acel, mannono bino miyo iye ni can ame abino keto i kom Jerucalem tye kakare. Ibino ye, ka ce ineno kitegi kede gin ame gin timo tye areco meicel; Mannono bino miyo iŋeo ni gin ame atimo, atimo pi te kop ame tye kakare. Man kop ame Rwot Obaŋa okobo.” Rwot te kop keda, kun kobo ni, “Wot a dano we, yat olok twero kato yattoro ocele i yore aŋo? Jaŋ olok ame tye i akina yen ocele iyi buŋ, kato owote mere i yore aŋo? Itwero toŋo yattoro ite tiyo kede ginnoro? Jo twero toŋo yattere te payo kede teke me agura i kor apama me ŋabo ginnoro? Pe gire, yattere ber me acama a mac keken. Ka mac doŋ owaŋo tuŋŋi i tuŋŋi, eka cukbilo mere en ame te doŋ, pwod dok twero konyo me timo ginnoro. Nen ba, kare ame yattono onwoŋo mom ru owaŋ, konnyere moro onwoŋo mom, kara ka mac doŋ owaŋo oko ame te doŋ ka cukbilo mere keken i dyere, itamo ni pwod dok romo konyo me timo ginnoro? Mannoro omio Rwot me mony okobo ni, Kite ame amio mac owaŋo yat olok ame tye i akina yen i buŋ oko ni, abino miyo jo ame bedo i Jerucalem daŋ waŋ oko kittono. Waŋa mom bino rwenyo i kom Jerucalem, kadi bed dano moro ame tye iye obwot ame mac mom owaŋo, mac gire pwod bino waŋogi, mannono bino miyo gin oŋeo ni an a Rwot, i kare ame an doŋ aciko waŋa i komgi. Abino miyo lobo doko wi obur, pien gin mom obedo lubo cikka.” Man kop ame Rwot Obaŋa okobo. Rwot dok te kop keda, kun kobo ni, “Wot a dano we, myero imi Jerucalem ŋe ginnoro luŋ me kwer ame en obedo timo. Kobbe kop man ame Rwot Obaŋa okobo: Yin yam onywali i lobo me Kanan, kwaroni obedo dano me Amor, eka tatti te bedo nyako me Kitti, Aco kop i kom nywalli, i nino ame rik onywali iye, rik mom obin oŋolo peni, mom daŋ olwoko komi kede pii me komi bed acil, dok mom daŋ owiro komi kede kado, mom daŋ oboo komi kede boŋo. Mom tye ŋattoro kadi acel ame kica omako i komi me timo jami magi luŋ i komi, rik ote bolli kom abola i dye bar i nino ame onywali iye-nono, pien mar onwoŋo nok meicel i komi. “I kare ame akato i ŋeti, ate neno remo ame onywali kede omwono komi oko, an ate kobbi i kare ame remo pwod tye i komi-nono ni, ‘Bed kwo, doki idoŋ calo yat ame tye i dye bar.’ Rik daŋ ite doŋo, acalo twon yattoro abor meicel ite doko nyako adwoŋ; tunoni te cako poŋ, yer wii daŋ te cako lot, cite komi onwoŋo tye nono aboŋo boŋo moro iye. “Kare ame dok abeo i ŋeti, aneni, ate nwoŋo ni doŋ iteggo oko ame iromo amara; an ate yaro boŋona ame onwoŋo atye kede, ate wumo kede komi. Ateteni, an rik ate cikere kedi, yin ite doko mega, kun acikere atek ni abino mari.” Man kop ame Rwot Obaŋa okobo. “An rik ate lwoko komi oko kede pii naka remo ame onwoŋo tye i komi, eka ate wiro komi kede moo. Alwako i komi twon boŋo moro abor ame odeo aber meicel, ate miyi daŋ amuk ame okwoo aber meicel, kede boŋo camanini me boyo wii, karacel kede boŋo me wumereni. Ate miyi daŋ ruko ruk me kwogo, arwako atem i ciŋi kede nyor i ŋuti. Ate rwako daŋ atem me um i umi, kede me yit daŋ i yiti ryoryo, ate miyi tok kwogo aber meicel. Mannono en kite ame yam ami irukere kede ruk me jabu kede ryal, boŋo ame iruko onwoŋo boŋo camanini aber odoco, kede aliri, karacel kede boŋo ame odeo aber meicel. Ibedo camo kwon ame omyeno i moko apwot meicel, kede moo kic, karacel kede moo yao. Idoŋo ame inen amwonya meicel, naka ite doko acalo abaka a dako. Berri onwoŋo owinyere meicel i akina rok apapat. Kwogo ame aketo i komi omio onwoŋo inen amwonya meicel.” Man kop ame Rwot Obaŋa okobo. “Cite yin ibedo geno berri, ite cako timo abor i jo luŋ ame beo i kan ame yin itye iye. Ikwanyo boŋŋini mogo ite gero i udi me woro jogi, ite kwogo komgi aber meicel, yin doŋ ite miye oko baŋ jo ducu, kun itimo kedgi abor calo alaya. Kodi gin ame ibedo timo-nono yam mom ru onen dok daŋ mom bino nen atwal. Ikwanyo daŋ jamini mogo ame otio kede jabu kede ryal ame onwoŋo amii, ite tiyo i cal dano, eka ite cako timo kedgi tim me cot. Ikwanyo boŋŋi mogo ame okwogo abeco meicel, ite wumogi kede, ite cako yalogi kede moona kede odok a ŋwece kur. Dok cam ame yam ami, ame icamo kwon ame moko okwonnere pwot meicel, moo yao kede moo kic, ento yin dok ite cako yalo kede jogi acalo gin a ŋwece kur me yomoro cunye.” Man kop ame Rwot Obaŋa okobo. “Yin dok ite kwanyo awobeni kede anyirani, ame inywalo baŋa, ite wot miyogi acalo mot baŋ jogi. Yin onwoŋo itamo ni timmi me aborrono obedo ginnoro atitidi meicel baŋa? Mannono en omio yin ibedo neko itinona, eka ite miyo waŋogi i mac me yalo jogi? I timmoro luŋ me kwer ame ibedo timo, kede i tim me abor ame ibedo timo, wi mom opo pi kare me tinoni, kare ame rik komi tye nono aboŋo boŋo moro, kun remo ame onywali kede daŋ omwonne amwona i komi.” Rwot Obaŋa okobo ni, “Ibino neno can nadi! Ibino neno can nadi! I kare ame doŋ ityeko timo tim magi luŋ, igero ici kani piri keni, dok igero kabedo mogo me woro cal jogi i ŋet yo. Kabedo luŋ ame otiŋere i ŋet yo, yin igero iye kabedo kan ame itwero nyuto iye berri acalo alaya. Imio jo luŋ ame beo kan ame yin itye iye-nono buto kedi, mannono omio imio tim me alayani onya omedde meicel. Dok daŋ ibedo timo tim me alaya karacel i jo Miciri ame gin obedo owoteni ame waŋgi tar, imio timmi me alaya onya omedde ameda kun iroka kede me akemo maka, Pi mannono nen ba, aryeyo ciŋa doŋ i komi me keto can i komi, dok daŋ abino kwanyo gummi mogo oko ame yam ami, ate miyi i ciŋ okworri ame owor ame gin jo me Piriciti, ame gin obedo jo ame dagi meicel, pien tim me abor ame ibedo timo mio lewic makogi meicel. Dok daŋ itimo tim me abor i jo Acuria, pien nen calo en ame ibedo timo i jo ocele ni mom ru oromi. Imio timmi me alaya onya omedde meicel, omio i timo naka ocatwil ame bedo i lobo a jo Kaldaya; kadi bed amannono, tim me alaya ame itimo kedgi gire mom ru oromi.” Rwot Obaŋa okobo ni, “Mar doŋ omio cunyi odoko agoro oko, pien aneno ni tim ame ibedo timo doŋ, itimo aboŋo lewic kadi acel. Nen doŋ igero icika i ŋet yo luŋ kun igero-gu i kabedo mogo ame otiŋere malo, ame tye i ŋet yo ducu. Cite yin onwoŋo mom i bedo acalo alaya, pien onwoŋo mom itimo tim me abor pi mito lim. Yin i dako ame alaya, pien icodo cot baŋ rok ocele ame gin wele, akaka cobo mitti wun i cwari. Co mio mot baŋ mon ame olaya, cite yin megi, yin en ame dok ilunyo miyo mot baŋ cogi, me wilogi me obin baŋi i kabedo ducu, i caa moro keken. Mannono omio yin dok ipat apata i mon ame olaya. Mom tye ŋattoro ame onwoŋo odi me bedo alaya. Mom daŋ oculli ginnoro me bedo alaya, cite yin en ame dok ilunyo culo cogi ame miti, mannono omio yin dok kiti pat meicel, i timmi me alaya-nono. “Doŋ pi mannono ba, yin alaya, winy koŋ kop ame Rwot tye ka kobo.” Rwot Obaŋa okobo ni, “Pien yin onwoŋo igonyo boŋo i komi me mon oko ite doŋ onoro i timi me alaya i nyim cogi ame mari, kede dok pi timmi luŋ me woro cal jogi, kede pi remo itinoni ame yin iyalo i cal jogi, mannono omio abino coko cogi luŋ ame mari, ame yam ibedo bedo kedgi i yomcuny; jo luŋ ame onwoŋo imaro kede jo ame onwoŋo idago. Abino cokogi i kabedo ducu gin luŋ ote bino gurri dyere, an ate yabo boŋo i komi me mon oko i nyimgi, me oneni odoco onoro ame dul komi moro me lewic mom odoŋ. Abino ŋolo kop i komi, kite ame aŋolo kede kop i kom mon ame pokere oko i coggi dok daŋ ote neko dano. Abino ŋolo kop i komi i twon akemo meicel, kun nyeko ocira oko, eka ite to oko. Abino miyi i ciŋ coggi ame onwoŋo mari, gin bino coro icika ni reto oko piny dok daŋ obino mumuko kabedo luŋ ame otiŋere malo, ame yam igero me woro cal jogi, gin bino gonyo boŋo oko i komi, ote mayo jamini mogo me wel daŋ oko i baŋi, eka ote weki doŋ onoro aboŋo boŋo moro i komi. “Gin bino kelo mony me bino lweny i komi, ote cecelo yin kede kiddi, ote daŋ ŋiŋido yin atitino i pala me lweny. Abino waŋo wudini oko kede mac, abino miyo kop ame aŋolo i komi cobere i nyim lwak mon apipim, abino miyo ijuko timmi me alaya oko, miyo mot baŋ cogi ame mari daŋ te gik oko. Mannono en kite ame abino cobo kede akemona i komi, eka nyeko ame atye kede i komi te doŋ ya oko. Abino doŋ bedo amwol kun akemo mom dok maka i komi atwal. Pien yin mom ibedo po gin ame otimere i komi i kare me tinoni, dok imio akemo obedo maka i tim magi luŋ ame ibedo timo; pi mannono, nen ba, abino culo kwor i komi pi gin ame itimo ducu, Man kop ame Rwot Obaŋa okobo. “Mom ibedo timo tim me tarwaŋ, kun imedo i kom timmi ocele luŋ me kwer? Nen ba, jo luŋ ame kobo kop me carokop, bino kobo carokop man i komi, kun okobo ni, ‘Nyako cal i tottere imat daŋ cal i nyare.’ Yin ibedo nyako ame totti i kome en ame onywali. En totti-nono onwoŋo okwero cware karacel itino mere luŋ. Yin irom aroma amegoni, ame gin daŋ okwero coggi karacel kede itinogi. Totti obedo dano me Kitti, eka pappi te bedo dano me Amor. Aminni adwoŋ, en Camaria ame tye tutuŋ anyarodi, kun bedo karacel anyira mere, aminni atidi mere ame bedo tutuŋ anyarolum en Codom ame daŋ bedo karacel anyira mere. Yin rik mom ibedo lubo kitegi keken dok daŋ mom ibedo timo timmogo me kwer ame gin timo keken, cite kite ni yin, oballe oko odoco ame katogi i kare anokkoro keken.” Man kop ame Rwot Obaŋa okobo, “Doŋ kite ame atye kede kwo-ni, aminni Codoma karacel kede amego mere, mom obedo timo gin ame yin karacel kede anyirani obedo timo. Nen ba, man en bal ame aminni Codoma obedo timo, En karacel kede anyira mere, gin luŋ obedo wakere meicel, pien gin onwoŋo otye kede cam abup ame ocamo loogi aloa, dok daŋ onwoŋo obedo mot kun otye kede kuc, cite gin okwero miyo kit konnyoro ducu baŋ ocan kede baŋ jo ame piny oloo. Gin onwoŋo obedo jo ame ŋwette meicel i nyima, kun daŋ obedo timo tim me kwer a kitegi papat; pi mannono ba, i kare ame aneno man, atyekogi oko i nyima. “Camaria mom otimo bal, ame romo nucu me bal ame yin ibedo timo, Yin ibedo timo gigi mogo me kwer adwoŋ meicel ame kato meggi oko, Omio yin imio amegoni dok nen acalo jo a kitegi atira pi tim me kwer luŋ ame yin ibedo timo. Aman yin doŋ myero iye lewicci giri, yin ikomi, pien balli doŋ rac meicel ame kato me amegoni ducu ame mio amegoni doŋ nen calo jo ame mom otimo balloro, kop ame tye i komgi doŋ doko abeber kato megi oko, yin myero iye lewicci, dok daŋ ikany acae ame jo cai kede, pien yin imio amegoni nen calo jo ame mom otimo balloro. “Abino dwoko gum a Codoma karacel kede pacci ame tye i ŋete, abino daŋ dwoko gum a Camaria karacel kede pacci ame tye i ŋete. Abino dwoko gummi yin i komi daŋ baŋi. Ibino kanyo acae, dok daŋ ibino yeyo lewic pi ginnoro luŋ ame yin itimo, ame mannono bino doko gin ame kweo cunygi. Aco kop i kom amegoni, Codoma kede pacci ame tye i ŋete, obino dok i lobo ame yam otye iye con, Camaria kede pacci ame tye i ŋete daŋ obino dok i lobo ame rik otye iye con, yin kede pacci ame tye i ŋeti daŋ ibino dok i gum ame yam itye iye con. I kare ame rik iwakere-ca, mom rik iloko nyiŋ aminni Codoma odoko gi-acekani, i kare ame timmi areco mom ru onen kannaler? Aman yin daŋ doŋ irom aroma kede, idoko doŋ gin ame jo Edom kede jo ame bedo i ŋetgi cao, jo Piriciti kede jo luŋ ame bedo i ŋetgi daŋ cai. Itye doŋ ka yeyo peko adwoŋ meicel pi ballogo me lewic kede gigi mogo apol meicel me kwer ame ibedo timo.” Man kop ame Rwot okobo. Rwot Obaŋa okobo ni, “Abino tic kedi kun alubo gin ame yam yin ibedo timo, pien yin rik icao kwoŋ ame rik ikwoŋo dok daŋ ituro cikere ame rik ocikere kede, cite an pwod abino po i cikerena ame rik acikere kedi kun yin pwod atin. Abino dok cikere kedi i cikere ame doŋ perakino atwal. Mannono bino miyo ipo kite ame ibedo bedo kede, eka lewic te maki ka atyeko kelo amini adwoŋ kede en atidi ate dwokogi baŋi acalo anyirani, cite mom pi cikere ame abin acikere kedi-ni. Abino dok moko cikerena kedi, eka ite ŋeyo ni an abedo Rwot. I kare ame abino weko balli luŋ ame yam itimo, ibino po pirgi, lewic te maki atek meicel ame mic mom dok iromo ŋamo dogi me kobo kopporo.” Man kop ame Rwot Obaŋa okobo. Rwot okobo keda kun kobo ni, “Wot a dano we, kob kop me temo wi dano, ame openyere kede ni koc, lit; dok ikob kop me carokop baŋ jo me ot Icrael, kun ikobbigi kop man ame Rwot Obaŋa okobo: Yam tye twon curroro adwoŋ meicel, ame bwome bocoboco daŋ meicel, dok yaro bwome alac okato kare. Yer kome onwoŋo nen amwonya meicel, kun raŋi mere papat. Currono rik te twarre, wot i Lebanon, te wot turo wi yat cedar me Lebanon oko. Oturo cuny wi yat cedar ame tye i wi yat me agikki malo, te wot kede oko naka i lobo ocatwil, te wot keto i boma ocatwil kuno. Te dok wot kwanyo nyig yat aberrere i lobo a jo Icrael te wot pito i lobo amwonya meicel kan ame pii onwoŋo dwoŋ iye, me doŋ kuno. En opito yattono kite ame opito kede yen ame doŋo i ŋet kulo, yattono te doŋo, te lokere doko olok ame ojany atek kun obuŋere olyao naka piny. Jaŋ yattono te kemo tuŋ kan ame Cur tye iye, kun lwite tye kan ame yat ocuŋ iye. Mannono en kite ame yattono odoko kede olok ame jaŋe pol meicel, dok pote daŋ olot atek ame obuŋere meicel. “Ento rik daŋ dok onwoŋo tye twon curroro ocele ame dwoŋ meicel dok daŋ tye kede bwome ame bocoboco, kede yer bwome daŋ abocoboco. Nen ba, lwit yat olokki rik te lokere dok tuŋ kun ame currono tye iye, jaŋ olokkono daŋ te wiro wigi luŋ kun ame currono tye iye, kun ogeno ni bino miyogi pii. En rik okwanyo yatti i kan ame ogeo pito iye, te tero kan ame pii dwoŋ iye, dok ame lobo mere ber, me wek jany atek meicel dok daŋ nyak nyige adwoŋ te doko twon olokkoro a pire tek meicel.” Rwot Obaŋa openyo peny man ni, “Yat man bino doŋo te bedo kannono nakanaka? Cur me agege-ca mom bino puto oko, te lwero jaŋe daŋ oko, me pote luŋ two oko? Puto yatti mom bino mito lo moro ame kome tek onyo lwak jo apol me puto i lwite luŋ. Nen ba, yatti ka onako ote tero kan ocele, ote pito, iye, twero bedo kuno nakanaka? Mom bino two oko ka ce yamo ame kodo i tutuŋ kide okodo, mom bino two oko i kan ame opito iye?” Rwot dok te kop keda kun kobo ni, “Aman yin myero ikob baŋ jo man ame maro jem-mi, penygi ka ce oŋeo te kop me carokop man. Kobbigi ni abaka me Babulon obino i Jerucalem, te kwanyo abaka me Jerucalem oko karacel kede rwode me kuno te terogi luŋ baŋe i Babulon. En okwanyo atin me ot abaka acel te cikere kede kun mie ekwoŋo akwoŋa ni ebino gwoko cikere-nono. En omako daŋ jo adoŋo me Jerucalem te terogi oko, me rok doŋ bed mot, kun mom dok oyiyia nononono, dok daŋ ogwok cikkere me locgi cuŋ atek. Cite abaka me Juda ojem oko, te cwayo akwena i Miciri, me jo Miciri konye kede aguragura kede mony adwoŋ meicel. En bino loyo ateteni? Dano ame timo kodi tim man twero bwot? En twero turo cikere mere eka dok te bwot? Rwot Obaŋa okobo ni, ‘Kite acalo atye kwo-ni, abaka-nu gire bino to i Babulon, pien ocao kwoŋ ame rik ekwoŋo, dok oturo cikere ame rik en oketo iyi akina en kede abaka me Babulon, ame rik okete me bedo i wi kom me loc acalo abaka. Parao karacel kede lwak monnyere, kede lwak jo apol atata, mom bino konye i lweny, ka jo Babulon otoro lobo oguro cel oko, me onek lwak jo apipim ame onwoŋo bedo iye. Kite acalo en doŋ otyeko cayo kwoŋ ame ekwoŋo, dok daŋ oturo cikere ame rik ecikere kede, eka te timo jami magi luŋ, ateteni en gire mom bino bwot.’ ” Mannono omio Rwot Obaŋa okobo ni, “Kite acalo an Obaŋa atye kwoni, abino gire keto can i kome pi kwoŋ ame rik en okwoŋo i nyima ame aman en doŋ otyeko cayo kede pi cikerena ame aman en oturo. Abino cikoboona me make, en bino moko iyi owic, eka ate tere i Babulon, ate cako ŋolo kop i kome kuno, pi timmere me erupe ame en obedo timo i koma. Jo mere me lweny ame oyero ayera obino neko oko i pala lweny, jo ame odoŋŋere, obino keto oko atata; mannono bino miyo iŋeo wunu ni an a Rwot Obaŋa atyeko kobo kop man.” Rwot Obaŋa okobo ni, “An ikoma en ame abino kwanyo cuny yat cedar ame pwod toco mere, kun aturo i wie malo, an ikoma en a daŋ dok abino pito, abino pito i wi kidi abor meicel ame tye iyi Icrael; abino pito kuno me jany iye, dok daŋ onyak nyige adwoŋ meicel, odok twon yattoro adwoŋ ame kit leyi luŋ me tim bino we i tere, kede kit winyo luŋ bino te bino gero wudigi i jaŋe. Mannono bino miyo yen luŋ ame tye i tim ŋeo ni an atwero miyo yat ame odoŋo abor doko acecek, eka yat ame cecek te doko abor, dok atwero miyo yen ame dyaka two oko, eka ate miyo yen otwo dok adyaka. Man kop ame an Rwot ikoma akobo, dok daŋ abino miyo cobere.” Rwot okobo keda, kun kobo ni, “Ŋo ame jo tye ka timo me bedo nwoyo kobo carokop man i kom i Icrael? Gin okobo ni, ‘Kwarowa rik ocamo nyig olok awac, omio lak otino odil oko.’ Doŋ kite ame an Rwot Obaŋa atye kede kwo-ni, mom dok ibino medde wunu kobo carokop man iyi Icrael atwal. Nen ba, kwo a jo luŋ tye i ciŋa, kwo a jo adoŋo kede kwo itino atino, gin luŋ tye i ciŋa. Ŋat ame timo tim me bal bino to. “Ka ce dano moro kite atira, dok timo gin ame tye atira, ame cik mito, ka ce dano-nono mom woro jogi a jo Icrael, dok daŋ mom camo lee moro ame oyalo i jogi, Ka ce kodi dano-nono mom balo dako awottere, dok daŋ mom ribere i dako mere kare ame two two me kwer, mom buro ŋattoro, dok daŋ mom yako gire jami a ŋattoro, kun dwoko jami a jo okoporo jami mere baŋgi, mio cam me acama baŋ jo a kec neko, kede boŋo me aruka baŋ jo ame woto onoro. Ka ce en mom mio lim me akopa pi nwoŋo agoba, Cunye dag timo gin arac, ento ŋolo kop kakare, kun tye kede gen i akina jo luŋ. En lubo cikka ducu, dok daŋ gwokere meicel kun timo ginnoro luŋ ame an aciko, dano-nono nwoŋo dano a kite atira, ateteni danonono bino bedo kwo.” Man kop ame Rwot Obaŋa okobo. “Ka ce dano-nono onywalo wode ame ayak jo, onyo ame anek jo, kun timo gin ame pappere yam mom otimo kadi acel. En camo riŋo leyi ame oyalo i cal jogi, kun daŋ babalo mon owote mere, dok wuno jo ame ocan karacel kede jo ame piny oloo. En mom rwenyo i tim me yako jo, dok gin ame ojeŋo bote pi banya mom dwoko baŋ wegi mege kadi acel, kun obedo awor jogi, dok daŋ timo tim me kwer ame neno lik. Dok daŋ mio jo koporo banya baŋe pi nwoŋo agoba, Wode-nono gire mom bino bedo kwo, mom bino bedo kwo kadi acel. Pien nwoŋo en doŋ obedo timo jami magi man me kwer, bino miyo en to gire oko, remo me ballere te dok gire i wie. “Ka ce dano-nono onywalo wode, ame neno balloro luŋ ame pappere yam obedo timo, eka te bedo alwor kun mom timo kodi bal ame pappere obedo timo. Mom camo cam ame oyalo i cal jogi a jo Icrael, mom babalo mon owote mege, dok mom timo ginnoro arac i kom ŋattoro, pe daŋ yako gi a ŋattoro: mio cam me acama baŋ jo ame kec neko, kede boŋo me aruka baŋ jo ame woto onoro. Mom bedo kede mit me timo ginnoro arac, mom daŋ mio banya baŋ ŋattoro pi nwoŋo agoba, kun obedo ŋat ame gwoko cikka, dok lubo ginnoro luŋ ame an aciko ame daŋ te timo kite ame aciko kede, dano-nono gire mom bino to pi bal a pappere, en gire bino bedo kwo, Cite pappere bino to oko pi ballere kene, pien obedo buro jo, kun daŋ yako jami owote mere, dok daŋ timo jami ame mom nen aber i nyim jo. “Kadi amannono yin dok pwod ipenyo ni, ‘Piŋo kara awobi mom twero neno can pi bal a pappere?’ Atwero gamo pennyi-nono kit man, Ka ce awobi obedo ti mo gin ame cik mito, kun timo gin ame tye atira, dok daŋ obedo gwokere meicel me lubo gin ame aciko, en gire bino bedo kwo. Cite ŋat ame timo bal bino to oko. Mom obino keto can i kom awobi pi bal a pappere, dok daŋ mom obino keto can i kom adwoŋ pi bal a wode. Dano ame kite atira, bino nwoŋo bakacic ame otike en kene, pi tim atira ame en obedo timo, dok atim gin arac daŋ obino keto can i kome en kene, pi gin arac ame en otimo. “Cite ka atim tim arac olokere te weko bal luŋ ame yam etimo eka te cako lubo cikka, kun timo gin ame cik mito ame tye atira, kodi dano-nono gire bino bedo kwo, mom bino to kadi acel. Mom obino kwano balloro ame yam en otimo kadi acel i wie, pi tim atira ame en otimo bino miyo en bedo kwo, Hamo ni cunya yom i kom to abalo? Pe gire, an amito ni abalo ŋuti, owek timo bal, te lokere dwogo baŋa me ebed kwo. “Cite ka dano moro ame kite atira olokere oko te weko timo gin atira oko, eka te cako timo bal, kun timo daŋ timmogo luŋ me kwer ame atim tim arac onwoŋo timo, dano-nono gire bino to, Mom obino poyo timmoro atira ame en otimo, kadi acel. En bino to pi timmere me erupe kede pi bal ocele ame en obedo timo. “Cite wun jo Icrael itye ka kobo wunu ni, ‘Gin ame Rwot tye ka timo mom tye atira.’ Koŋ apenyowu wun jo Icrael. Gin ame an atye ka timo mom tye atira ateni? Mom gin ame wun itye ka timo wunu en ame mom tye atira? Ka ce lo moro ame kite atira olokere oko te cako timo bal, kun weko timo gin ame tye atira, en bino to pi ballere-nono. En gire bino to pi bal ame en otimo. Amannono daŋ, ka ce atim tim arac olokere oko te cako weko timo gin arac ame yam etimo, eka te cako timo gin ame cik mito ame tye atira, dano-nono gire bino laro kwo mere. En gire bino bedo kwo kun mom to kadi acel, pien en oparo kop i cunye, eka te cako weko bal luŋ ame yam etimo. Cite wun jo Icrael itye ka kobo wunu ni, ‘Gin ame Rwot tye ka timo mom tye atira.’ Ama wun jo me Icrael, itamo wunu ni gin ame an atye ka timo mom tye atira? Mom gin ame wun itye ka timo wunu en ame mom tye atira? “Pi mannono ba, an abino ŋolo kop i komwu wun jo me ot Icrael, kun aŋolli ŋat acel acel kop kun lubo gin ame en obedo timo. Myero iŋut wunu iwek timo wunu gin arac luŋ ame ibedo timo wunu, naka mio balwu mio itum wunu oko. Wek wunu doŋ timo bal luŋ ame yam ibedo timo wunu i koma, me icak wunu doŋ bedo i cuny anyen, karacel kede tam anyen daŋ. Piŋo kara imiye wunu me to, wun jo Icrael? Pien an cunya mom yom i to a ŋattoro kadi acel. Doŋ pi mannono ba, myero ilokere wunu me ibed wunu kwo.” Man kop ame Rwot okobo. Cak wunu wer me kumo pi rwode me Icrael, wer wunu kun ikobo wunu ni: Totti onwoŋo tye kene nadi! en onwoŋo tye obuto i akina otino eŋatu, kun pito itino mere. Opwonyo atin acel i akina itino mere, en te doko acalo atin eŋatu, eka te pwonyo mako lee, te cako mako dano kuŋ mwodo oko. Rok apol te cako kuko duru i kome, ote kunyo bur me cikke. Gin te godde oko kede golo iyi bur, ote waye i golo-nono naka i Miciri. I kare ame tottere oneno ni ebalo kare mere nono, gen ame onwoŋo etye kede doŋ orwenyo oko, en dok te kwanyo atinnere ocele, te loko doko atin eŋatu. I kare ame atinnere-nono doŋ odoŋo, en te cako wot idwar kede eŋatu ocele mege; en te pwonyo kite me mako lee, te dok cako mako dano me amwoda mere. En te tuturo cellogo ame onwoŋo oguro atek, te keketo boma luŋ, miyo doko wi obur, ame temiyo jo ame bedo i lobonono bedo kede twon lworo adwoŋ meicel, ka en tye ka kok. Rok apapat te cako lweny i kome, ote ci ko owic me make i kabedo ducu, ote daŋ ryeyo boogi gure kede dyere, en te poto oko i bur ame onwoŋo gin okunyo. Gin te waye oko i bur kuno kede golo, te tere naka baŋ abaka me Babulon; otere ote wot ke te i ot can, me mom dok omedde winyo koko mere atwal i wi kiddi me Icrael. Totti yam calo yat olok, ame opito i poto olok ame tye i ŋet pii. Pien pii onwoŋo dwoŋ twatwal iye, omio jaŋe te tuco apol meicel, nyige daŋ te nyak adwoŋ meicel. Jaŋ olokkere onwoŋo tek meicel, omio i kare ame odoŋo, odoko abiro aloc. Olok man onwoŋo odoŋo abor meicel ame wie buco gudo polo borrere onwoŋo jo luŋ twero neno, karacel kede kite ame onwoŋo obuŋere kede. Ento jo rik te puto tyen olokkono oko i twon akemo meicel, ote reto piny i lobo. Yamo ame okodo i tutuŋ kide, te bino twoyo oko, nyige te oony oko piny, jaŋe ame onwoŋo tek wokki daŋ te twotwoa oko, kare ame otwo mac te waŋo oko. Aman dok onako opito i tim ame otwo ikaŋ, kan ame pii mom tye iye kadi acel. Mac omoko i kor olok piny, te lak waŋo jaŋe kede nyige oko ducu, Jaŋe mom doŋ bino bedo atek kadi acel, abiro aloc mom doŋ bino ya iye. Man wer me kumo ame doŋ olokere odoko wer ame owero kare i kare. I nino dwe apar, me dwe me abic, i mwaka me abiro, odoŋe mogo me Icrael obino baŋa me bino penyo kop i baŋ Rwot, Rwot te kop keda, kun kobo ni, “Wot a dano we, kobbi odoŋe me Icrael, kop man ame an Rwot Obaŋa akobo. Man wun ibino wunu me bino penyo kop i baŋa bo? Kite acalo an Rwot Obaŋa atye kwo-ni, wun gire mom ibino wunu penyo kopporo baŋa kadi acel. Man kop ame an Rwot Obaŋa akobo. “Wot a dano we, ibino ŋolligi kop? Ŋolligi doŋ kop do. Poyo wigi i kom timmogo me kwer ame kwarigi rik obedo timo. Kobbigi kop man ame an Rwot Obaŋa akobo: I kare ame rik ayero iye jo Icrael, rik an akwoŋo baŋ ikwae a Yakobo. Anyutte baŋgi i Miciri, kun akwoŋo baŋgi akobo ni, ‘An a Rwot Obaŋawu.’ I kare-naca daŋ en ame rik ate cikere kedgi ni abino kwanyogi oko i Miciri ate terogi i lobo ame an doŋ atyeko yero pirgi, lobo ame cak kede moo kic dwoŋ iye meicel, lobo me kwogo atek meicel ame kato lobo ocele luŋ. Akobbigi ni myero obol cal jogi oko pien obedo gin me kwer, dok daŋ acikogi ni myero kur olille obaŋe mogo me Miciri ame obedo obaŋe me gobagoba, pien an en ame abedo Obaŋagi. Cite gin gigi ote jem oko, ote kwero winyo koppa oko, Gin luŋ ote kwero bolo cal jogi oko dok ote medde gigi ameda i woro obaŋe a jo Miciri ame mom obedo obaŋe me ateni ca. “En omio ate tamo ni myero aluŋ akemona kede inigana i komgi i dye lobo me Miciri. Cite mom ate timo gin ame atamo ni myero atim-nono, pien mannono onwoŋo twero miyo nyiŋa doko ayot i akina orok kan ame jo Icrael onwoŋo bedo iye. Pien an onwoŋo anyutte baŋ jo Icrael i akinagi kuno, kun akobo ni abino kwanyogi oko i lobo me Miciri. “Mannono omio rik ate kwanyogi oko i lobo me Miciri ate terogi i tim. I tim kuno ate miyogi cikka dok ate cikogi kun anyuttigi ginnoro luŋ ame an onwoŋo amito ni gin otim, ame ka ŋat olubo ginnono luŋ twero bedo kwo. Medo i kom mannono, rik ate miyogi daŋ nino me cabit ni gin myero ogwoki, kun bedo acalo anyut ame tye i akina an kede gin, me gin oŋe ni an a Rwot en alonyogi ote doko acil. Cite jo Icrael te medde jem gigi ajema i koma i tim; gin te kwero gigi lubo cikka oko, kun daŋ okwero timo gin ame acikogi iye; ame obedo gin ame ka dano olubo twero bedo kwo. Aco cabit ame onwoŋo amiogi ni myero ogwok, gin te balo odoco. “I kare ame gin tye i tim kuno ate tamo ni myero aluŋ akemona i komgi me ami wigi gik oko i wi lobo. Cite mom ate timo gin ame onwoŋo atamo, pien mannono onwoŋo twero miyo nyiŋa bale i akina orok ame onwoŋo onena i kare ame akwanyogi i lobo me Miciri. Medo i mannono, onwoŋo rik akwoŋo baŋgi akwoŋa i tim ni mom doŋ abino terogi i lobo ame onwoŋo atyeko miyo baŋgi, lo bo ame cak kede moo kic dwoŋ iye meicel, dok ame obedo lobo me kwogo atek meicel kato lobo ocele ducu. Rik akwoŋo kwoŋ man pien gin onwoŋo okwero lubo gin ame onwoŋo acikogi ni otim, kun daŋ mom olubo cikka, dok obalogu nino me cabit ame onwoŋo aciko ni gin ogwoki. Gin gigi omedde ameda i maro cal jogi ame onwoŋo gin oworo. Kadi bed onwoŋo akwoŋo akwoŋa, cite pwod dok awekogi, mom ajwerogi, mom amio wigi ogik oko i tim. “Dok ate medde kobo baŋ itinogi i tim kuno ni myero kur olub cik ame yam kwarigi oketo; kur olub kitegi, dok daŋ myero kur olille i woro cal jogi. Akobbigi ni an a Rwot en abedo Obaŋagi, myero gin olub cikka, kun ogwokere i lubo gin ame an aciko ni myero gin otim. Dok myero ogwok cabit obed nino acil, me bed acalo anyut ame tye i akina an kede gin, me gin oŋe ni an a Rwot en abedo Obaŋagi. “Cite itinogi daŋ te medde jem ajema i koma; mom obedo lubo cikka, dok daŋ mom obedo gwokere i lubo gin ame onwoŋo aciko, ame ka ŋat ogwoko twero bedo kwo. Aco cabit ame onwoŋo amiogi ni myero ogwok i, gin te bedo balo gigi abala. “En omio ate tamo ni myero aony akemona i komgi kede inigana daŋ i komgi i kare ame gin tye i tim kunu. Cite mom ate ryeyo ciŋa me timo gin ame atamo ni myero atimmono, pien mannono onwoŋo twero miyo nyiŋa balle i akina orok, ame onwoŋo onena i kare ame akwanyogi i lobo me Miciri. Medo i mannono, rik daŋ akwoŋo baŋgi akwoŋa i tim kunnono ni mannono abino keketogi oko i akina rok apapat, kun aterogi i lobo apapat. Rik akwoŋo kwoŋ man pien gin okwero lubo cikka, dok daŋ okwero tiyo gin ame onwoŋo an aciko, dok obalo-gu nino me cabit ame onwoŋo aciko ni myero ogwok i, gin gigi omedde ameda i maro cal jogi ame onwoŋo papagi woro. Mede dok i kom mannono, rik dok ate miyogi cikkogo a mom beco, ate cikogi daŋ me tiyo gigi mogo ame mom twero miyogi obedo kwo. Amiogi oballe kengi i mot ame gin omio, kun amiogi oyalo cal jogi-nono itino awobegi me kao, acalo mot awaŋa. Atimo man me miyogi bedo i lworo adwoŋ meicel kede pi keto can i komgi; me gin oŋe ni an en ame abedo Rwot. “Pi mannono ba, yin wot a dano, myero ikob kop man ame Rwot Obaŋa okobo baŋ jo Icrael: Man dok yo ocele ame kwariwu yam onywara kede, kun obedo timo kede tim me erupe i koma. Pien i kare ame akelogi i lobo ame rik akwoŋo ni abino miyogi, ka waŋgi ocop i lobo moro ame obedo kidikidi onyo yattoro ame pote obuŋere meicel, gin oloko kaci-naca doko ka miyo motgi. Gin omio akemo bedo maka pi motgi me awaŋa ame gin owaŋo karacel kede mot amata ame gin obedo onyo kuno. An apenyogi ni, ‘Kabedo mene ame obedo kidikidi ame iwoto wunu iye nono? Mannono en omio olwoŋo nyiŋ kabedo-nono ni Bama naka atot tin.’ Aman yin doŋ myero ikob baŋ jo me ot Icrael kop man ame Rwot Obaŋa okobo. Wun daŋ pwod imito timo wunu kit bal ame kwarowu obedo timo? Ibino medde lile wunu kenwu kun iworo wunu cal jogi kede timo gigi mogo me kwer. Ka ce itye ka miyo motwu, kun iyalo wunu cal jogi itino awobewu acalo mot awaŋa, nwoŋo itye ka lille wunu kenwu i cal jogi ame iworo wunu nono tuno kede naka tin. Wun jo Icrael itamo ni pwod dok ibino medde wunu penyo kop i baŋa? Kite acalo an Rwot Obaŋa atye kwo-ni, mom gire ibino medde wunu penyo ginnoro i baŋa. “Gin ame iyiko wunu me timo i cunywu mom gire bino timere, en tam ame itye ka tamo wunu ni wun daŋ myero ibed wunu i rok ocele, acalo atekere ame tye i lobo apapat kun iworo wunu yen kede gweŋe. “Kite acalo an Rwot Obaŋa atye kwo-ni, ateteni, an gire abino bedo abakawu. Man bino cobere i ciŋa atek ame abino ryeyo i komwu kede akemo agwa ame abino coro i komwu. Abino kwanyowu oko i akina rok ocele kun acokowu i lobo apapat ame ikeketa wunu iye i ciŋa atek ame aryeo kede akemo ame atye ka coro i kom jo. Abino terowu i tim a rok ocele, i kare ame atye kedwu kuno, abino cako ŋolliwu kop waŋ i waŋ. Kite ame rik aŋolli kwarowu kop i tim i lobo me Miciri, mannono daŋ en kite ame abino ŋolliwu kede kop. Man kop ame an Rwot Obaŋa akobo. Abino miyowu ibeo wunu i te abiro kun ibeo wunu acel acel. Abino dwoko jo ame jem oko i akinawu kede jo ame timo bal i nyima; abino kwanyogi oko i lobo ame gin otye iye acalo wele, cite gin mom obino tuno i lobo me Icrael, mannono bino miyowu iŋeo wunu ni an a Rwot. “Aco wun jo me ot Icrael, Rwot Obaŋa okobo kop man baŋwu. Ka ce wun mom iye winyo wunu koppa, cakere aman wot kede anyim myero ŋat acel acel wot wor cal jogi mere, ento nyiŋa acil wun mom ibino balo wunu kede motwu ame iyalo wunu i cal jogi. “Pien i wi kidina acil, ame en kidi me Icrael abor meicel, jo me ot Icrael luŋ, bino wora i lobo-naca. Gin luŋ aluŋa obino wora kuno. An abino jologi kuno, kuno en ame abino mito ni wun imi wunu ginnoro baŋa, kun imio wunu mot ame iyero wunu ayera, dok daŋ ame obedo mot acil. Mot a ŋwece kur me kweyo cunya, en ame ibino miya wunu i kare ame akwanyowu i akina orok kun acokowu i lobo apapat ame ikeketa wunu iye. Abino miyo ineno wunu ni an abedo Obaŋa acil i akina rok ocele kuno. Mannono bino miyo iŋeo wunu ni an a Rwot, i kare ame doŋ akelowu i lobo me Icrael, ame en lobo ame rik akwoŋo pire baŋ kwariwu. I kare ame itye wunu kuno, ibino poyo wunu kitewu, kede ginnoro luŋ ame ibedo timo wunu, kun ibala wunu kede komwu kenwu. Cunywu bino cwer pi gin arac luŋ ame ibedo timo wunu. Ibino ŋeyo wunu ni an a Rwot ka ce atio kedwu kun aparo pi nyiŋa, kun mom alubo kitewu areco, onyo timwu a mom beco, wun jo Icrael. Man kop ame Rwot Obaŋa okobo.” Rwot dok te kop keda, kun kobo ni, “Wot a dano we, koŋ icik waŋi inen tutuŋ anyarolum eka ite rabo kop i kom tutuŋ anyarolum. Kobbi buŋ me Negeb ame tye i lobo ame tye tutuŋ anyarolum, ni myero owiny kop ame Rwot Obaŋa okobo: ‘Nen ba, abino cwinyo mac i komi te waŋo yen adyaka luŋ ame tye baŋi, kun waŋo daŋ yen otwo luŋ, maccono bino lyel nakanaka ame mom oromo neko, te wawaŋo nyim jo luŋ, cakere i tutuŋ anyarolum tuno kede tutuŋ anyarodi. Jo luŋ aluŋa bino ŋeyo ni an Rwot en ame acwinyo maccono. Ŋattoro mom bino neko maccono kadi acel.’ ” An ate gamo kop a Rwot ni, “Ama Obaŋa, jo luŋ tye ka kobo ni, an kare ducu akobbigi kop kun adupo adupa.” Rwot rik te kop keda, kun kobo ni, “Wot a dano we, cik waŋi inen tutuŋ Jerucalem. Rab kop i kom kabedo luŋ acil ame gin woro iye Obaŋa. Kwenyoro lobo me Icrael. Kobbi jo ni an a Rwot atye ka kobo kop man, ni, ‘Nen ba, an atye i kop i komwu, abino woto pala lwennya oko iyi akure mere, ate ŋoŋolo jo luŋ ame tye i akinawu, jo a kitegi atira, karacel kede jo areco. Pi mannono abino woto pala lwennya iyi akure ate cako ŋoŋolo i jo luŋ, jo a kitegi atira kede jo a kitegi reco, kun acako i tutuŋ anyarolum tuno kede naka tutuŋ anyarodi. Jo luŋ bino ŋeyo ni an a Rwot doŋ atyeko woto palana oko iyi akure, mom dok abino rwako bedo iyi akure kadi acel. “Wot a dano we, om weo atut meicel ame itaoni amito yec ayeca pi cwercuny, kun gin jo-nono otye onenni. Ka ce gin openyi ni, ‘Pino kara iomo twon weo arac meicellono?’ yin ibino kobbigi ni, ‘Pien tye amut ame awinyo i kom gin ame bino timere. Ka ce gin ame bino timere-nono kare mere doŋ otuno, cuny ŋat acel acel bino doko agoro oko, ciŋ jo luŋ daŋ bino doko agoro oko, teko bino rwenyo oko i cuny dano acel acel. Coŋ jo luŋ bino myel amyela. Nen ba, kare-nono doŋ otuno oko, ginnoro gire doŋ bino timmere.’ ” Man kop ame Rwot Obaŋa okobo. Rwot dok te kobba ni, “Wot a dano we, rab kop, me ikobbi jo kop ame an Rwot Obaŋa akobo: Pala lweny, otye ka rabo pala lweny, otye ka jwayo lebe meicel, otye ka rabo me neko jo, otye ka jwayo lebe me mimila bala lutkot! Mom tye ŋattoro ame twero geno kadi acel. Wun doŋ ityeko cayo wunu abiro oko, kede ginnoro luŋ ame otio i yat. Mannono en omio doŋ otye ka jwayo leb pala lweny, me doŋ cak tic kede, Otye ka rabo lebe kede jwayo me ote miyo baŋ anek jo. Wot a dano we, cak ba koko dok ikomi pi jona. Pien kop man otiko rwode luŋ me Icrael, gin luŋ karacel kede jona doŋ otyeko miyogi oko me aneka i pala, Pi mannono myero doŋ ibabapo amuroni ba, Pien otye ka temowu kara ŋo ame myero en doŋ tim, pien wun itye ko cayo wunu abiro oko.” Man kop ame Rwot okobo. “Pi mannono ba, wot a dano, myero irab kop acalo adwarpiny, eka ite bapo ciŋi me wek pala lweny me neko jo ame myero to bino doŋ piny me neko jo, kun bedo bino kare i kare. Pala lwennyere iyiliyili meicel dok bino neko jo atek meicel. Pala lwennyono bino miyo jona nyobere oko, eka jo apol te ŋoye piny i dogcelgi luŋ aluŋa. An doŋ atyeko miyo pala lweny ame meny amenya. Nen ba, otio pala lwennyono ame meny calo lutkot, dok otyeko jwayo lebe me neko joo Cak doŋ ŋoŋolo jo oko, ŋoŋolo jo ame tye tuŋ cem kede en ame tye tuŋ cam, kannoro luŋ ame icoro. An daŋ abino bapo ciŋa, akemona doŋ te cako kwe. An Rwot ikokome en ame akobo-nono.” Rwot dok te kop keda kun kobo ni, “Wot a dano we, ket alama moro ame nyuto yo aryo, ame abaka me Babulon twero bino kede pala lwennyere. Gin aryo luŋ obino ya i lobo acel. Ket dok alama moro ame cimo yo, ket kan ame yo okaro iye me wot i boma. Alama acel bino nyuto yo ame woto i boma a jo Ammon ame olwoŋo ni Raba, alama ocele bino nyuto yo ame woto i Juda naka i boma me Jerucalem ame ocecelo atek wok-ki. Pien abaka me Babulon ocuŋ kan ame yo okaro iye, i agikki kan ame yo aryo-nu okaro iye, me tiyo tic me tyettere kuno. En tye ka yeyeŋo atero mege, dok tye ka penyo kop i baŋ jok ame olwoŋo ni Terapim, dok daŋ tye ka ŋiŋio emany. Kwir a jo Jerucalem tye abino i ciŋe tutuŋ cem, kun tye ka kobbe ni myero ewot egur ikoŋŋogo a wigi oluk i dogcel luŋ me boma, dok etor lobo eyid egur cel oko, dok eger apama cel ame ocuŋ malo iguŋ egur boma oko, kun eŋamo doge ekok, dok eredo i dwon aloŋo. Cite jo me Jerucalem mom bino ye, kun otamo ni man tyet me goba. Man gin obino timo pi kwoŋ ame gin doŋ otyeko kwoŋere kede. Cite bino poyo wigi i kom balgi, dok bino nyuttigi ni obino makogi. “Mannono omio Rwot Obaŋa okobo ni, Pien imio otye ka poyo balwu, pien bal ame itye ka timo wunu mom twero kanne kadi acel ame omio ginnoro luŋ ame itye ka timo wunu balwu nen oko kannaler. Man omio wun doŋ itye wunu jo ame kop oloo, daŋ doŋ abino jalowu oko i ciŋ okwor. Aco wun otim tim areco ame pwod idoŋ wunu, karacel kede rwode me Icrael, kare me keto can i komwu tyen me agikki, ene doŋ otum oko. Man kop ame an Rwot akobo, Kwany wunu tok kwogo oko i wiwu, karacel kede itambara ame idwodwalo i wiwu. Mom tye ginnoro kadi acel ame bino bedo kite ame aman tye kede-ni. Loc ame oloo kede ocan, wegi loc obino dwogo oko piny. Abino babalo, abino babalo, abino balo boma gira oko. Cite mannono mom ru bino timere kadi acel, tuno waŋ ame ŋat ame doŋ amio twer me timo mannono doŋ abino. “Yin wot a dano we, myero irab kop, kun ikobo kop ame an Rwot Obaŋa atye ka kobo ni, kun akobo i kom jo me Ammon, kite ame gin tye ka nywaro kede jona Icrael. Kobbigi ni, ‘Pala me lweny doŋ otyeko woto oko me nekogi, otyeko jwayo lebe ame tye ka meny amenya, tye ka memenya calo lutkot. Kobbi jo Ammon ni, anyut ame gin otye ka neno-nono, obedo anyut me goba, dok kop ame otye ka tittigi i kop me anyim daŋ obedo kop me goba. Gin obedo otim tim areco ame karegi tye abino me keto can i komgi tyen me agikki mere. Pala lweny ceggi gudo ŋutgi. Dwok wunu pala lweny cen, rwak wunu pala lweny iyi akure mere. An abino ŋolliwu kop i lobo ame rik oketowu iye, i lobo ame rik onywalowu iye. Abino coro akemona i komwu kuno, ame mac me akemona bino kuto i komwu, eka ate miyowu i ciŋ jo ame ger meicel, dok ame odiro meicel i neko jo. Ibino doko wunu yen me awaŋa i mac, Remowu obino onyo piny i lobowu ikokome, wi jo luŋ te wil oko i komwu atwal, kun mom tye ŋattoro kadi acel ame dok po pirwu, Man kop ame Rwot ikokome okobo.’ ” Medo i kom mannono, Rwot rik dok te medo kop keda, kun kobo ni, “Yin wot a dano we, iyikere me ŋolo kop i kom boma ame remo a jo oonyo iye wok-ki? Koŋ doŋ itittigi ginnoro luŋ areco me kwer ame gin obedo timo. Tittigi kop man ame an Rwot Obaŋa atye ka kobo ni, ‘Pien i onyo wunu remo a jowu apol meicel, dok daŋ pien iballe wunu oko pi woro cal jogi, mannono omio karewu wun daŋ tye doŋ abino. Bal me remo ame ionyo wunu doŋ tye i komwu, dok daŋ pi woro cal jogi ame wun en ame ipao wunu, omio daŋ ijebere wunu oko. Karewu daŋ doŋ tye ceggi acega, mwaka ame doŋ otyeko moko oko pirwu, doŋ otyeko tuno oko. Mannono omio amio rok apapat ame tye i lobo ocele tye ka cayowu kun oyetowu ayeta. Jo ame tye kan aceggi kede jo ame tye kannabor, bino yetowu wun jo ame nyiŋwu doŋ oballe pi bedo timo tim areco ame yiwu mito. “ ‘Nen ba, rwode luŋ me Icrael ame tye i akinawu, ŋat acel acel tio kede twer ame omie me onyo ka remo a joo Jo luŋ aluŋa tye doŋ acayo pappagi kede totogi acaa. Orok ame bedo i akinawu otye ka wunogi meicel, karacel kede itino kic kede mon a coggi oto. Jami luŋ acil tye pira, itye wunu doŋ ka cayo acaa, dok ceŋ cabit ame otyeko yiko me wora, daŋ doŋ ibala wunu oko. I akinawu, tye jo ame coko dog owotegi pi onyo remo, jo ocele tye camo cam ame oyalo i cal jogi malo i ka woro jogi, eka te tye jo ocele ame gin ocobo ka mitgi areco keken. Tye jo ocele i akinawu ame buto i ci-papagi kede jo ocele tye buta i mon ame tye i two dwe kun omako daŋ tetek. Jo ocele timo tim me kwer me buto i mon owotegi, kun jo ocele buto anyira a dyeregi. Jo ocele i akinawu buto kom amegogi ame onywale kede, amegogi me papo. Jo ocele i akinawu gamo lim i muŋ pi onyo remo a joo jo ocele i akinawu ŋolo ni myero migi agoba i kom lim ame omio jo Icrael wadgi koporo, kun otye ka i mit me lony keken. Mom doŋ oparo pira kadi acel, man kop ame Rwot okobo. “ ‘Nen ba, mannono omio abino bapo ciŋa pi timwu me mayo jo pi nwoŋo agoba i yore a mom ber kadi acel, ame itye ka nwoŋo wunu kede i timwu me onyo remo a jo ame itye ka timo wunu. Itamo ni pwod ibino diyo wunu cunywu, onyo ibino timo wunu i teko me tiŋo ciŋwu malo i kare ame abino cako tic i komwu? An Rwot doŋ atyeko kobo, daŋ abino cobo. Abino keketowu atata i akina rok ocele, ite lal wunu i lobo apapat, ate miyo timwu areco-nono gik oko. Mannono bino miyo nyiŋa bale i akina rok ocele, cite wun i komwu ibino ŋeyo wunu ni ana a Rwot.’ ” Rwot dok te kop keda, kun kobo ni, “Wot a dano we, jo me ot Icrael doŋ calo cet lela i tuŋ baŋa. Ocalo doŋ ryal, kede mola abati kede nyonyo kede ricac ame orubo, ame oweko odoŋ i kare ame doŋ otyeko liyo acillere oko, otye doŋ acalo cete i keno me tet. Mannono omio an Rwot Obaŋa atye ka kobbigi kop man. Pien doŋ idoŋ wunu acalo cete, mannono omio doŋ abino cokowu i dye boma me Jerucalem. Kite ame dano coko kede ryal, kede mola, kede nyonyo kede ricac, kede abati i keno me tet, me wek ekut mac me meyogi, mannono en kite ame abino timowu kede, kun acokowu i twon akemo kede iniga, ate ketowu kuno, ate meyowu oko. Abino cokowu i Jerucalem, ate kuto mac i terwu, ate miyo akemona meyowu oko. Abino meyogi oko i Jerucalem kite ame omeo kede nyonyo i keno me tet. Mannono bino miyo gin oŋeo ni an a Rwot en ame acoro akemona i komgi-nono.” Rwot dok te kop keda, kun kobo ni, “Wot a dano we, kobbi jo Icrael ni gin otye acalo lobo ame mom cil, onyo kot ame cwe i kare ame akemo tye. Rwodegi ame tye i akinagi calo eŋatu ame tye ka mor i koko, kun leyi ame oneko tye i nyimgi. Gin otye ka neko jo, dok daŋ omao lonyo a jo ame okano kede gigi mogo me wel, dok daŋ pi nek ame gin otye ka neko kede jo omio mon a coggi oto odoŋ apol meicel i akinagi. Olamdog ame tye iye otye ka turo cikka pi timo tim me byemi byemi, kun mom otye kede woro moro kadi acel i kom jamina acil. Mom oŋeo poko gin acil kede gin ame mom cil, dok daŋ mom otye ka pwonyo kop i kom gin ame cik ogeŋo kede en a cik mom ogeŋo, mom daŋ doŋ oparo pi cabit kadi acel. Tim ame gin tye ka timo-nono omio jo Icrael mom doŋ wora kadi acel. Rwode luŋ ame tye i Jerucalem orom aroma kede epet ame tye ka kikilo leyi ame gin oneko me acamagi, otye ka onyo remo a jo, kun oneko jo pi mito doko olonyo. Odwarpiny ame tye iye tye ka wumo kodi ballono luŋ calo ŋat ame opuo kor apama oko kede coka atar. Otye ka neno anyuttogo me gobagoba, dok daŋ otyeko kop i kom gin ame abino timere gobagoba, kun okobo ni, Rwot Obaŋa okobo ni, kun nwoŋo Rwot gire mom okobbigi kopporo. Jo luŋ ame bedo i lobo, otye ka timo tim me cero jo kede yako jo. Otye ka wuno jo ame ocan kede jo ame mito akonya, karacel kede orok ame bedo i akinagi kun mom oparo pirgi kadi acel. Abedo yenyo dano moro i akinagi ame myero ger apama cel, kede tiro kan ame omuko, me atot ya lar lobo ka akemo omaka ame amito tyeko oko, atot ya awekgi, cite ŋattoro mom twero nen kadi acel. Mannono omio acoro akemona i komgi, amio mac me akemona onekogi oko; mannono atimo pi bal ame gin otimo, Man kop ame Rwot Obaŋa okobo.” Rwot dok te kop keda, kun kobo ni, “Wot a dano we, tye mon aryo ame totogi acel, ame gin luŋ otimo tim me alaya i Miciri; gin ocako bedo olaya i kare ame gin pwod anyira atino, omio co obedo jejebo tunogi oko, ote daŋ cako ŋeye oko kede co, kun mom ru onyomere. Nyako adwoŋ rik nyiŋe Okola, eka nyako atidi nyine te bedo Okoliaba. An rik ate nyomo gin luŋ, ote nywalo awobe kede anyira. Aco kop i kom nyiŋgi Okola rik nyine ocuŋ pi Camaria, eka Okoliaba te cuŋ pi Jerucalem. “Okoliaba omedde bedo alaya kun daŋ en tye acalo cega, en onwoŋo maro coge twatwal ame obedo jo Acuria, ocirikale ame rukoboŋo obedo amaramar, oloc adoŋo kede otel wi mony; joni luŋ rik obedo awobe ame pwod tino, ame mwonya meicel, dok daŋ gin luŋ rik orino kede aguragura. En dakona-ni rik gire ojalle i ciŋ joni pi timo tim me alaya alaya, ame jo-ni luŋ obedo jo ame oyero ayera me Acuria. En daŋ rik te lille oko i cal jogi a ŋat acel acel ame en maro. En mom oye weko timmere me alaya-nono, ame en obedo timo con i kare ame en pwod tye i Miciri, pien i kare ame en pwod tidi, co obedo buto kede te bale doŋ oko acalo nyako, kun obuto kede acalo alaya me cobo mitgi. Mannono omio ate jalle doŋ oko i ciŋ jo Acuria ame obedo coge ame en rik maro. Mannono omio gin te gonyo boŋo i kome oko te weke doŋ onoro, ote mako awobe mere kede anyira mere neko oko i pala lweny. Mannono te doko kop me aboka i akina mon, i kare ame doŋ otyeko ŋolle kop oko. “Aminnere Okolaba oneno gin man ame otimere i kome, cite en onwoŋo dok rac meicel ame kato aminnere-naca oko i timmere me maro co ocele kede tim me alaya alaya. En dok te medde bedo arac ame kato aminnere oko. En te medde maro jo Acuria, oloc adoŋo ame loo dul apapat, odoŋe ame telo mony, ocirikale ame orukere oko i jami me lweny, wegi aguragura ame gin obedo awobe ame nen amwonya meicel. An ate neno ni en daŋ doŋ otyeko bale oko, en daŋ dok tye ka lubo yo ocele ame aminnere onwoŋo tye ka lubo. “Cite en dok obedo medde ameda i tim me alaya, kun neno anaka cal co ame ogogo i kor ot, kede cal a jo Kaldaya ame opuo komgi i raŋi arema, kun daŋ otweo pyergi kede del, dok daŋ oboo wigi oko kede itambara aboco me boyo wic. Gin luŋ obedo cal jo ame tye i rwom me tic amalo; mannono onwoŋo obedo cal a jo Babulon, ame lobogi ikokome obedo lobo me Kaldaya. I kare ame en onenogi, cunye te cako myel amyela pirgi, te cwayo kwena baŋgi i Kaldaya. Jo me Babulon te bino cako buto kede, ote bale oko i timo tim me abor ame gin obedo timo i kome. I kare ame gin doŋ otyeko bale oko, en te ya i baŋgi kun cunye doŋ mom ber kadi acel. Kare ame en dok omedde timo tim me alaya alaya kannaler kun daŋ doŋ bedo onoro aboŋo boŋo i kome, an daŋ cunya te ya oko i kome doŋ, kite ame rik cunya oya kede i kom aminnere. Cite en gire pwod te medde i timmere me alaya alaya, kun wie mom wil i kom gin ame ebedo timo i kare ame pwod enyako, i tim me alaya ame en obedo timo i kare ame en pwod tye i Miciri. Cunye te bedo medde myel amyela i kom co ame emaro ame onwoŋo tye kuno ame komgi me co onwoŋo rom aroma i me akana, dok remogi me co onwoŋo rom aroma i me aguragura. Mannono en kite ame yin Okolaba ibedo bedo kede mit me carocaro ame ibedo timo ame pwod i nyako, i kare ame jo me Miciri bedo mumulo kede kori ote jebo tunoni oko kun onwoŋo pwod ogulo agula. “Doŋ pi mannono ba, yin Okoliaba, man en kop ame Rwot Obaŋa okobo i komi. Nen abino twarre i komi kede i kom cogi ame imaro, ame rik iya i baŋgi kun cunyi oballe oko, abino kelogi i kabedo ducu me bino lweny i komi. Abino kela cogi ame tye i Babulon kede en ame tye i Kaldaya luŋ, jo Pekod, jo Coa, jo Koa, kede jo Acuria ducu; ame gin luŋ obedo awobe abeco ame nen amwonya, oloc adoŋo ame loo dul mony apapat, odoŋe ame telo wi mony, kun gin luŋ ocirikale me lweny ame riŋo aguragura. Gin luŋ obino bino i komi, kun obino i tutuŋ anyarodi, i gadigadi me lweny kede gadigadi me tiŋo jami, karacel kede mony adwoŋ meicel. Gin luŋ obino bino me lweny i komi kun oguri oko dyere, kun otye i kwot kede tok nyonyo, abino miyogi twer me ŋolo kop i komi i kite ame gin ŋolo kede kop. Abino wiro akemona i komi me wek gin otimi cucu. Gin obino ŋolo wumi kede yiti luŋ, icennere ote doŋ neki oko kede pala lweny. Dok ote mako awobeni kede anyirani ote waŋo oko akwo kede mac. Gin bino gonyo boŋo oko i komi, ote kwanyo daŋ jamini luŋ me wel. Mannono en kite ame abino giko kede timmi me alaya alaya kede timi me maro co atata ame ibino kede iya i loba me Miciri. Mom dok ibino neno jo Miciri kadi acel, dok wii daŋ bino wil oko i komgi atwal.” Rwot Obaŋa okobo ni, “Nen ba, abino miyi i ciŋ jo ame yin idago, i ciŋ jo ame rik i baŋgi ame cunyi oballe oko. Gin bino timmi lit, pien gin odagi ote gamo giri moro luŋ ame ibedo yelle tic pire, ote daŋ gamo boŋoni oko ote weki doŋ onoro, kun komi me mon ame ibedo timo kede tim me alaya alaya doŋ nen kannaler. Timmi me carocaro kede timmi me alaya alaya, en ame omio man tye ka timere i komi, pien ibedo timo tim me alaya alaya i rok ocele, kun daŋ iballe oko pi woro cal jogigi. Yin ibedo lubo kite ame aminni obedo timo; mannono omio abino keto can ame aketo i kome i komi.” Rwot Obaŋa okobo ni, “Ibino mato ikopo ame aminni omato, ikopo-nono obedo twon ikopo ame lac dok daŋ yie tut meicel. Jo bino nyeri kun daŋ ocai meicel, pien ikoponi Opoŋ apoŋa ni kwic. Cwercuny bino meri oko, pien ikopo aminni Camaria obedo ikopo ame mio jo lworo, dok ame tyeko jo atyeka, Ibino mato gin ame tye iyie ityeko oko luŋ, eka ite puputo yer wi oko ducu ite ŋolo tunoni oko i kori, Pien an a Rwot Obaŋa doŋ atyeko kobo kop man.” Pi mannono Rwot Obaŋa okobo ni, “Pien wi doŋ owil oko i koma, dok daŋ ityekobola oko i ŋei, yin myero doŋ ikany gin ame obino i komi pi timmi me carocaro kede me alaya alaya.” Rwot dok te kobba ni, “Wot a dano we, itwero doŋ cako ŋolo kop i kom Okola kede Okoliaba, tittigi ginnoro luŋ areco me kwer ame gin obedo timo. Pien gin obedo cot, dok remo a jo omwonne amwona i ciŋgi, gin obedo timo abor i cal jogigi, dok daŋ oyalo cal jogi-nono itinogi awobe ame gin onywalo baŋa. Medo i kom mannono, gin dok otimo tim magi i koma: Obalo kabedo acil me wora i nino acellono, kun daŋ obalo nino me cabit ame aciko ni myero gin ogwoki. Pien ka gin otyeko yalo itino awobegi kede cal jogi, kun oneko acalo mot me awaŋa, i nino acel ame gin oneko iye awobegi-nono, en ame gin dok obino iye i kabedo acil ame owora iye me bino balo, Man en gin ame gin obedo timo i ot me wora, Dok daŋ ocwao okwena me lwoŋo jo ame tye kannabor, jo ame gin olwoŋo-nono daŋ te bino, Yin ilwoko komi oko acil pirgi, ite daŋ wiro waŋi kede moo, eka ite rukoboŋo me kwogo meicel i komi pirgi. Ite bedo iwi tanda me kwogo meicel, kun meja daŋ tye kannono ame opeto itambara iwie, ame oketo iye odok aŋwece kur ame obedo mega karacel kede moo. Woo a jo ame bedo gigi ata kun mom paro ginnoro onwoŋo winyere baŋe kuno, jo ame bedo woo-nono kun gin omero me nino ducu, ame okelogi itim ame otwo imek. Gin orio mola i ŋut ciŋ mon, kede tokkogo abeco i wiigi.” An dok ate kobo ni, “Aman co mom doŋ tye ka timo tim me abor i twon dako ame alaya ame doŋ oti oko-ni? Pien gin otye ka wot buta kede kite ame jo buto i mon ame olaya. Mannono en kite ame gin obedo wot kede baŋ Okola kede baŋ Okoliaba me timo tim me carocaro kede. Ento jo ame kitegi atira bino ŋolligi kop, gin mon ame bedo cot, kede mon ame tye ka neko jo, pien gin ocodo cot dok remo a jo tye omwonne amwona i ciŋgi.” Pien Rwot Obaŋa okobo ni, “Kel mony adwoŋ meicel i komgi me imigi odok gin ame jo lworo kede gi-ayaka a jo. Mony bino cecelogi kede gweŋe, dok daŋ bino totoŋogi kede pala lweny; gin bino neko awobegi kengi karacel kede anyiragi i pala lweny ote daŋ wawaŋo udigi kengi. Mannono bino miyo agiko tim me carocaro oko i lobo, me wek mon luŋ nen gin ame otimere i komgi ote weko timo tim me carocaro, kite ame wun ibedo timo wunu. Bal me tim me carocaro ame ibedo timo wunu bino dok i wiwu, ibino wunu kanyo can pi balwu me woro jogi, mannono bino miyo iŋeo wunu ni an a Rwot Obaŋa.” Rwot rik dok te kop keda i nino dwe apar me dwe me apar i mwaka me aboŋwen. En okobba ni, “Wot a dano we, co nyiŋ nino a tinni oko piny, co nyiŋ nine-ni ikokome. Abaka me Babulon otyeko guro Jerucalem oko i nino atin-ni. Kob kop man oko kannaler baŋ jo ame maro jemmi, kun ikobbigi i carokop i kom kop man ame Rwot Obaŋa okobo, ni, “Ket guluni i keno, ket gulu i keno, ony pii iyie; ket iye riŋo ame doŋ otyeko ŋoŋolo oko atitino, ket riŋo abeco-mege, riŋo amuru, kede riŋo me bade, bobolo daŋ iye cogo abeco ame iyero ayera, me poŋ gulu oko. Kwany riŋo romo aberrere i akina riŋo romo ocele mere, rwak yen i keno i te gulu, ted riŋo ame iketo iyi gulu-nono, karacel kede cogo ame daŋ ibobolo iye-nono.” Mannono omio Rwot Obaŋa okobo ni, “Can i wi boma ame obedo onyo remo a jo wok-ki, kede gulu ame nyali omako, ame nyali ikome mom romo kwanyere kadi acel. Kwany riŋo ame oŋiŋido atitino ame tye iye ni, kun ikwanyo acel acel, kwany ata kun mom iyero ayera. Pien remo a jo ame en obedo onyo pwod tye kuno, pien remo a jo ame en oneko oony naka i wii kiddi. En mom obedo neko jo kan ame remogi twero wumere oko kede kwoyo. En obedo timo man me tugo akemona, me acul kwor, mannono en omio amio remo a jo ame en obedo neko oonyo i wi kiddi kan ame mom romo wumere.” Mannono omio Rwot Obaŋa okobo kop man ni: “Can i wi boma ame obedo onyo remo a jo wok-ki! An en abino turo, an en abino mwodo yen me tedo ayido adwoŋ meicel. Kella wunu yen, kut wunu doŋ mac, ted wunu riŋo aber, ite onyo wunu pige oko me cogo mere en ame waŋ. Ket wunu gulu ame yie nono i keno me bed alyet meicel, me moo iyie waŋ oko, dok cilo ame tye iye daŋ meye oko, nyali iye daŋ te tum oko. Abedo kom lolle nono, nyali ikome mac mom romo kwanyo kadi acel. Nyali ame tye iye-nono, rom aroma kede tim me carocaro ame ibedo timo wunu, Pien kono nyo doŋ ajwao cilo oko i komwu, cite cilo ikomwu anwoŋo ni mom romo kwanyere kadi acel, tuno ka aonyo akemona i komwu. An a Rwot doŋ atyeko kobo kop man; kop ame akobo-nono bino cobere, an ikoma abino timo. An mom abino dok cen kadi acel, dok daŋ mom abino koyo ŋattoro kadi acel, cunya mom bino ya i kom gin ame atyeko yiko, an gira abino ŋolliwu kop, kun alubo kitewu kede gin ame ibedo timo wunu, Man kop ame an Rwot Obaŋa akobo.” Rwot rik dok te kop keda, kun kobo ni, “Wot a dano we, nen ba, an doŋ aceggi kwanyo ŋat ame yomoro cunyi ame imaro neno wok-ki, abino kwanyo oko i baŋi a doŋ acel keken. Cite mom ibino kumo pire, mom ibino koko, dok pig waŋi mom bino ton piny kadi acel. Kur icur atek, cite myero icur momot meicel; myero kur ikum pi dano ame doŋ otyeko to oko. Twe itambarani me tweyo wic i wii, ruk amuki daŋ i tyeni, kur iwum dogi, kur daŋ icam kwon a jo ame tye ka kumo.” Mannono omio akobo kop baŋ lwak odiko con eka otyeno dakona te to oko. Idiko mere ocele, ate timo kite ame onwoŋo ocika kede. Jo te penya ni, “Mom itwero tittiwa te kop me gin ame yin itye ka timo-nono?” An ate kobbigi ni, “Kop a Rwot, Rwot okobo keda kun kobo ni, ‘Kobbi jo me ot Icrael, ni an Rwot Obaŋa akobo ni, abino balo kabedona acil oko, ame obedo kabedo ame onwoŋo iwakere wunu pire, ame cunywu yom iye ka ineno wunu, dok ame kwowu ocuŋ iye. Dok itinowu awobe kede anyira ame iweko wunu cen i ŋewu, obino neko oko i pala lweny. Mannono bino miyo itimo wunu gin ame ineno wunu an atimo. Mom ibino miyo wunu dogwu, dok daŋ mom ibino camo wunu kwon ame jo akumo camo. Boŋowu me adwala i wiwu bino bedo i wiwu, kun amukwu daŋ tye i tyenwu; mom ibino kumo wunu, akadi koko, ento balwu bino miyo igobere wunu oko, kun ŋat man cucura baŋ wadgi. Mannono bino miyo an Ejekeri abedo anen baŋwu. Wun ibino timo wunu ginnoro luŋ ame an atimo. Mannono bino miyo iŋeo wunu ni, ka ce man otimere, bino miyo iŋeo wunu ni Rwot en ame obedo Obaŋa.’ “Doŋ yin wot a dano we, i nino ame abino kwanyo iye gigi atek ame gin ogeno, gin ame miogi yomcuny kede kwogo, ame yomoro cunygi ka gin oneno, dok ame cunygi tye iye, kun daŋ okwanyo awobegi kede anyiragi, i nino-nono, dano moro obwot bino bino baŋi me kobbi amuttere. I nino-nono dogi bino yabere me kop kede ŋat ame obwottono, te lebi doŋ te gony atwal, mom dok ite medde bedo ŋat ame mom kobo, Mannono bino miyo yin ibedo anen baŋgi: gin te ŋeyo ni an abedo Rwot.” Rwot okobo keda, kun kobo ni, “Wot a dano we, cak lokere tuŋ baŋ jo Ammon, me irab kop i komgi. Kobbi jo Ammon ni, Winy wunu kop man ame Rwot Obaŋa tye ka kobo; ‘Pien wun cunywu yom pi bale a oda acil, kede i kom lobo a jo Icrael kare ame onwoŋo oweko yie odoŋ nono calo wi obur, kede i kom jo me ot a Juda i kare ame gin doŋ oterogi oko iyi opii; Mannono omio an amiyowu oko i ciŋ jo ame tye tutuŋ kide, me gin lowu. Gin bino guro kemagi i akinawu i i lobowu kuno, ote bedo iye. Gin bino camo nyig yen ame ocek i potowu, kun daŋ omato cakwu. Abino miyo Raba doko bar me kwayo inaga karacel kede boma a jo Ammon luŋ, doko ka buto a rommi kede dyegi. Mannono bino miyo iŋeo wunu ni an a Rwot an Rwot akobo.’ “Man en kop ame Rwot Obaŋa tye akobo, ‘Pien itye ka bapo ciŋwu kun ipyepyea wunu i yomcuny, ame icao wunu kede lobo a jo Icrael, pi mannono ba, an doŋ atyeko ryeyo ciŋa i komwu, abino miyowu oko i ciŋ rok ocele acalo gin me ayakagi. Abino miyo waŋwu rwenyo oko i akina rok ocele, kun ito wunu oko i wi lobo, Abino jwerowu oko odoco. Mannono bino miyo iŋeo wunu ni an a Rwot.’ ” Rwot Obaŋa okobo ni, “Pien jo Moab tye ka kobo ni jo me ot a Juda rom aroma kede rok ocele mere, mannono omio ocobo mony i kom boma mogo ame tye i tuŋ nyime ame tye daŋ acalo boma ame mio en bedo kede kwogo, kun omedo kede boma me Betjecimot, Baa-Imeon kede me Kiriataim. Abino miyogi luŋ medo kede jo Ammon i ciŋ rok ame tye tutuŋ kide; gin bino loyogi, eka mom dok ote medo po i komgi i akina rok apapat, dok abino ŋolo kop i kom Moab, Mannono bino miyogi oŋeo ni an a Rwot.” Rwot Obaŋa okobo keda ni, “Pien jo Edom oculo kwor i kom jo me ot a Juda agwa meicel, ame omio culo kworgi-nono okelo bal i wigi ame mom twero ya, mannono omio Rwot Obaŋa okobo ni ebino ryeyo ciŋe i kom Edom, ete neko jo luŋ karacel kede leyi ame tye kuno, Abino miyo lobo me Edom doŋ nono acalo wi obur, cakere i boma me Teman tuno kede i boma me Dedan; obino neko jo iye i pala lweny. Jona Icrael en ame bino culo kwor i kom Edom pira, gin bino timo jo Edom lit kite ame akemona olyeto kede. Jo Edom bino ŋeyo kite ame culo kworra rac kede. Man kop ame an Rwot Obaŋa akobo.” Rwot Obaŋa okobo ni, “Pien jo Piriciti oculo kwor i kom jogi agwa meicel, kun onekogi i twon keccuny okato kare, pi adage ame obedo bedo i akinagi kare luŋ, mannono omio Rwot Obaŋa okobo ni, ‘Nen ba, abino ryeyo ciŋa i kom jo Piriciti, ate miyo waŋ jo luŋ ame onwoŋo bedo kuno rwenyo oko i bar me Piriciti, ate daŋ dok neko jo luŋ ame onwoŋo bedo i dog nam. Abino culo kwor i komgi agwa meicel kun agoogi i twon akemo okato kare. Mannono bino miyo gin oŋeo ni an a Rwot, i kare ame doŋ atyeko culo kwor i komgi.’ ” I nino dwe acel me dwe moro ame tye i mwaka me apar wie acel, Rwot okobo keda, kun kobo ni, “Wot a dano we, pien jo Turo tye ka lelo i yomcuny i kom Jerucalem, kun oredo ni, ‘Koŋ ineno wunu dogcel a jo Icrael doŋ oturo oko, tye doŋ twolo pira, mannono bino miyowa dok odoko olonyo pien Jerucalem doŋ odoko wii obur’, mannono omio Rwot Obaŋa okobo ni, Nen ba, an cunya mom yom kadi acel i komi, yin Turo, abino kelo rok apol meicel i komi, kite ame pii i nam yenyo kede bwo. Gin rokkono bino balo apama cel me Turo oko, ote daŋ rereto gedo mere ocuŋ iguŋ malo oko piny. Lobo ame ceko cem abino keketo lobo aber iye oko doŋ ka gweŋ keken i lobo me Turo. Turo doŋ bino bedo i dye nam, bino bedo kan ame ocik rec moo iye boogi. Man kop ame an Rwot Obaŋa doŋ atyeko kobo. Turo bino doko kabedo me ayaka a rok ocele. Anyira mere ame tye i lobo a mom tye i dog nam, obino neko oko i pala lweny. Mannono bino miyogi oŋeo ni an a Rwot.” Rwot Obaŋa okobo ni, “Nen ba, abino kelo abaka moro ame loo obakki ocele ducu i kom Turo, abaka ame tye tutuŋ anyarodi, Nebukadnejar, ame obedo abaka me Babulon, kun en bino aguragura kede gadigadi, kede oryem aguragura, karacel kede lwak mony adwoŋ meicel. En bino neko anyirawu ame bedo i lobo a mom tye i dog nam i pala lweny, bino toro apama cel guro kede Turo oko, te toro lobo daŋ yido gurowu kede, ote tiyo kwode daŋ apol ata me kurowu. En bino nanapo apama celwu oko i twon ikoŋŋogo ame wigi aluktu, te daŋ rereto wudigi oko ame ocuŋ iguŋ malo, kun totoŋo kede le. Aguragura mere bino bedo apol meicel ame bino miyo apua me kan ame gin obeo iye, wumi oko, Redo oryem aguragura kede gadigadi me yeyo ter, kede gadigadi lweny, bino miyo apama me celli yeŋere, i kare ame gin bino donyo i dogcel luŋ me bomani, acalo boma ame doŋ otyeko balo. Tyen aguragura mere bino jejebo dye gudo luŋ ame tye i Turo. En bino neko joni oko i pala lweny, twoni paggi mogo adoŋodoŋo ame tye kuno, bino rette oko piny. Jo mere te yako lonyo luŋ ame tye baŋi, anaka jami luŋ ame icato wunu. Gin bino rereto apama celwu oko piny karacel kede udiwu ame imaro wunu. Gweŋe luŋ kede yen luŋ ame yam igedo wunu kede, karacel kede lobo, gin bino coko luŋ ote wot onyo i nam, Abino miyo wer ame iwero wunu gik oko, karacel kede dwon naŋawu ame igoo wunu. Abino miyo gwen keken en ame doŋ i bomawu kan ame ocik rec twero moyo iye boogi. Apama cel ame oreto piny mom dok obino gero kadi acel, pien an Rwot doŋ atyeko kobo. Man kop ame Rwot Obaŋa okobo.” Man kop ame Rwot Obaŋa okobo i kom jo Turo: “Lobo ame tye i dog nam mom bino yeŋere i kare me retteni piny, i kare ame ŋat ame owaŋo tye acucura, ka ce otye ka neko jo atek meicel i dye boma? Oloc luŋ me dye nam bino yitto oko piny i wi kom me locgi, ote gonyo boŋŋi me kwogo daŋ oko i komgi, karacel kede kanyigi, ote bedo piny i lobo kun komgi amyel amyela. Can ame bino poto i komgi, bino myelo komgi meicel pirwu, cawa ducu. Gin bino cako wero wer me kumo piri, kun owero okobbi ni, ‘Kara dok irwenyo niŋo ba i dye nam, yin boma ame yam iŋeye wok-ki, ame rik tek meicel i dye nam, yin karacel kede joni ame onwoŋo bedo iyii, ŋa ame dok omio kodi can man ame omyelo kom jo, opoto i koma atura wok-ki. Cannere omyelo kom jo luŋ ame bedo i dog nam. Aman omio nino me retteni piny, lobo luŋ ame tye i dog nam, komgi omyel. Koŋ inen lobo luŋ ame tye iyi nam, cunygi opoto meicel i kom turri’.” Rwot Obaŋa okobo ni, “I kare ame doŋ amio idoŋ nono calo wi obur, calo boma mogo ame jo doŋ mom bedo iye, kare ame amio pii me nam doŋ obino owumi oko, abino doŋ cwayi piny i bur kan ame jo oto meicel tye iye, ate miyi bedo piny kuno, i akina jami mogo ame doŋ otyeko bale odoco, kun ibedo karacel i jo oto. Ka doŋ ituno kuno mom dok ibino lokere ineno ŋei idwogo cen i lobo a jo a pwod kwo, abino miyi ibedo twon anennoro ame iyiliyili meicel, ame mannono doŋ bino bedo agikkini. Kadi bed jo tem yenyi, cite mom gire dok otwero nwoŋi. Man kop ame an Rwot Obaŋa akobo.” Rwot okobo keda, kun kobba ni, “Aman doŋ ba, yin wot a dano we, cak doŋ were me kumo pi Turo, ite kobbi Turo ame bedo i dog nam, acatwil a rok apapat me dog nam apol meicel, kun ikobbe ni Rwot Obaŋa okobo ni: “Yin Turo ame onwoŋo iwakere wok-ki kun ikobo ni, ‘An aber odoco.’ Waŋ loboni tye i cuny nam, jo ame ogeri, ogeri aber, calo mel; Gin otio i yen me kidi me Cenir me gerri, karacel kede yen Cedar me Lebanon. Aco pol me kwaŋi ote tiyo i yen ame oya i Bacan, bao mere ote tiyo i yen ame oya i dog nam ame tye i Kupuro, ame ote mwono kede lak lyec. Boŋo ame yamo kolo me kwaŋ, rik otio i boŋo camanini aber me Miciri, ame onwoŋo konyi acalo bendera, Boŋo me geŋo cen i kan ame jo bedo iye, rik ote tiyo i boŋo obedo bululu-bululu, kede en aremarema, ame oya i cula me Elica. Jo ame onwoŋo kwaŋi, obedo jo Cidon kede Arbad; jo lemere ame onwoŋo odiro meicel i kwaŋ onwoŋo daŋ tye baŋi kuno, kun gin tye acalo odiro i ryemo mel. Aco omwon mel odok, rik te bedo odoŋe me Gebal kede oryeko me kuno; mel luŋ iyi nam karacel kede okwaŋgi, onwoŋo tye baŋi kuno pi loloko jamini me acata. “Jo Pacia kede jo Lud kede jo Kut, rik tye i akina monnyi, kun gin daŋ doŋ otye acalo joni me konyi i lweny. Gin rik ŋabo kwodegi kede tokgi baŋi kuno, gin jo ame rik omio yin itye kede kwogo. Ocirikale ame oya i Arvad kede Kelek, onwoŋo gwoko apama me celli kun oguro oko ni rit, kede ocirikale me Gamad onwoŋo gwoko gedoni mogo adoŋodoŋo ocuŋ iguŋ malo. Gin daŋ onwoŋo oŋaŋabo kwodegi i kor apamani romo aroma irit. Gin en ame omio rik iber odoco. “Jo Tarcic rik cato wil kedi pien yin rik ilony i kit jami luŋ; ryal, nyonyo, bati, kede ŋidoŋido jami ocele rik yin iloloko kede jamigi. Javan, Tubal kede Mecek ocato wil kedi; gin rik ololoko jamini i dano me bedo opii karacel kede jami ame otio i mola. Aco jo Bet-ograma rik loloko jamini kede aguragura, aguragura me lweny kede kane adoŋo mege. Jo me rodec ocato wil kedi; lobe apol ame onwoŋo tye i dog nam rik tye acalo cuk me cato jamini yin rik inwoŋo i baŋgi lak lyec, kede yen abeco meicel. Jo Edom ocato wil kedi pi twon lonyo adwoŋ meicel ame onwoŋo yin itye kede; gin rik ololoko jamini kede emaradi, boŋi camanini aremarema, boŋi ame otio i kwogo meicel, boŋŋi camanini abeco meicel, giggi mogo me wel kede gweŋe mogo abeco atitino. Jo Juda kede jo Icrael ocato wil kedi; gin rik ololoko jamini kede ŋano, olok kede nyig yen ogeo cek, moo kic, moo, kede moo yen ecoma. Jo Damaciko ocato wil kedi pi jamini ame onwoŋo pol, pi jami ame onwoŋo pol meicel i ciŋi, pien yin onwoŋo itye i kit jami apapat luŋ, koŋo olok me Kelbon, yer romi atarrere, koŋo olok me Ujal; gin rik te bedo loko jamini kun oloko i nyonyo, kacia, karacel kede lummogo ame ŋwecgi kur. Jo me Dedan obedo cato wil kedi, kun ololoko jamini kede boŋŋi me wel ame opepeto i ŋe aguragura. Jo Arab kede oloc luŋ me Kedar, gin onwoŋo otye acalo ocatwil ame yomoro cunyi meicel, pien gin rik otye aber meicel i cato rommi, itino nyogi rommi kede dyegi. Ocatwil me Kebar kede me Raama, daŋ obedo cato wil kedi, gin obedo loloko jamini i kit odok apapat ame ŋwecgi kur, karacel kede gweŋe mogo me wel meicel, kede jabu. Jo me boma me Karan, Kanek, Eden, Acur, kede Cilmad daŋ obedo cato wil kedi. Jo man obedo loloko jamini i boŋŋi mogo me wel ame gin oyero ayera, boŋŋi obedo bulubululu, ame okwogo i tic me diro meicel, kede dok opar ame oliliŋo abeco meicel, ame otweo i tol; gin obedo cat kedi i jami magi. Mele mogo me Tarcic, en ame rik bedo tero ocatwilli. “Mannono omio yin rik icalo twon mel i dye nam, ame oyeo twon yec apek meicel. Ka jo ame kwaŋi doŋ otyeko teri oko i dye nam, yamo ame kodo i tuŋ kide, turi doŋ i cuny nam kuno. Mannono te miyo lonyo ocatwilli, karacel kede jami ocele, jo ame kwaŋi kede oryem mel, jo ame mwono mel odok kede ocatwilli, ocirikale me lweny ame tye iyi karacel kede monnyi luŋ ame tye iyi i dye nam kuno, gin luŋ olwiny oko piny i dye nam kuno, i nino ame yin iballe iye odoco. Kare ame joni ame ŋeo kwaŋ oredo i koko, kokogi yeno lobo luŋ ame tye i dog nam, jo luŋ doŋ ya oko i mel weko mel kuno ata, oryem mel kede okwaŋ mel, cuŋ loka i dog nam, Gin luŋ ocako kumo i cwercuny meicel piri, kun oonyo kwoyo i dye wigi, kun daŋ oŋenne i buru. Ocido yer wigi oko piri, ote ruko boŋo kwero cola, cunygi nwoŋo kec meicel i kare me kumogi-nono, Owero daŋ wer me kumo piri, ote kumo piri, kun owero ni, ‘Ŋa ame yam koŋ ojwero acalo Turo, ame aman doŋ oliŋ oko iti i dye nam. I kare ame jamini obino i dye nam, cobo miti a jo apol meicel; obakki odoko olonyo, kun olony i jamini ame dwon meicel. Aman doŋ pii i dye nam omi i tur oko; ilwiny doŋ i cuny nam kan atut. Jamini luŋ karacel kede jo luŋ ame onwoŋo tio piri, gin luŋ oke i dye nam kuno. Jo luŋ ame bedo i dog nam, lworo omakogi meicel piri; kadi obakki ame loogi daŋ obedo i lworo meicel piri, kun waŋgi oballe meicel. Ocatwil luŋ ame tye i akina rok apapat, lworo omako okato kare, agikkini obedo me can meicel, dok daŋ mom otwero po pira atwal.’ ” Rwot Okobo keda kun kobo ni, “Wot a dano we, kob aloc me Turo kop man ame Rwot Obaŋa okobo, ni, “Pien yin itye awaka meicel i cunyi, dok daŋ ikobo ni, ‘An abedo obaŋa, an abedo i wi kom me loc obaŋe, kun abedo i dye nam’, aco kono yin ibedo dano, mom Obaŋa, kadi bed yin itamo ni yin iryek calo Obaŋa, yin itamo ni yin iryek ikato Danieri oko, ame mom tye ginnoro ame yin iŋeo? Yin itamo ni ryekoni kede niaŋŋi atut, en omio yin inwoŋo lwak lim adwoŋ, dok en omio yin icoko jabu kede ryal, ame doŋ ikano akana? Pi dironi me cato wil, en ame omio limmi omedde adwoŋ meicel, mannono omio doŋ cako yeyea i cunyi ni itye i lim, Pi mannono ba, an Rwot Obaŋa doŋ atyeko kobo ni, pien yin itamo ni yin iryek calo Obaŋa moro, mannono omio an abino kelo jo mogo ame mom iŋeo me bino lweny i komi, akelo twoni rokkogo ame iyiliyili meicel, gin bino woto palagi me lweny, ote babalo kede jamini ame yin ikobo ni inwoŋo pi ryekoninono. Gin obino neki ote corri i lyel piny, ibino to i to ame jo oneko aneka to kede, i dye nam kuno. Pwod ibino medo kobo ni, ‘An abedo obaŋa,’ i nyim jo ame tye ka neki, kadi bedi yin ibedo dano mom Obaŋa, i ciŋ jo ame tye ka wawaŋi? Ibino to calo gwok, i ciŋ rok ocele ame mom ŋeo Obaŋa. Man kop ame an Rwot Obaŋa doŋ atyeko kobo.” Medo i kom mannono, Rwot dok te kop keda, kun kobo ni. “Wot a dano we, ya malo me ikum pi abaka me Turo, ite kobbe kop man ame Rwot Obaŋa okobo: “Yin yam onwoŋo itye acalo anen me gin aber ame kato jami luŋ, kun daŋ itye i ryeko adwoŋ meicel, dok daŋ komi otiye amwonya meicel. Yin onwoŋo rik itye i poto me Eden ame obedo poto Obaŋa; kit gweŋe luŋ me wel onwoŋo tye acalo gi-wumereni. Gweŋe ame olwoŋo ni, tobaj kede jacipa, kabankel, berul, kede onik, capir, kancolt kede emeradi; rik omwono komi oko kede jabu, Jami-nono luŋ rik otio piri, otiogi luŋ i nino ame oketi kede. Rik ate keto omaraika kuno me gwoki; rik yin ibedo i wi kidina, an Obaŋa, kun ibebea i wi gweŋe mogo me mac. Kiti rik ber odoco i ginnoro luŋ ame yin itimo, cakere i nino ame aketi iye, icennere bal te cako nen i komi. I kare ame icako cato wil atek meicel, ite cako doko lo ame abyemi, ite doŋ timo bal; mannono omio an ate boli oko teŋe i wi kidina acalo gin ame doŋ oballe amaraikana te ryemi oko i kuno, i akina gweŋe me mac. Yin rik onwoŋo iwakere meicel pi komi ame otio amwonya, kodi timmi-nono te miyo ryeko rwenyi oko, Mannono omio ate boli oko i lobo, ate weki bedo acalo anen baŋ obakki ocele, me gin obed neni. Pi balli ame doŋ te bedo nya medde ameda, i cato willi ame mom atira, omio ibalo ka woroni acil oko, mannono omio ate miyo mac ya i akinani, maccono te waŋi oko, ate miyi doko buru i lobo i nyim jo luŋ ame rik oneni. Lworo omako jo luŋ ame rik ŋei i akina orok, pien agikkini obedo arac meicel, pien mom dok ibino bedo tye atwal.” Rwot rik dok te kop keda, “Wot a dano we, lokere koŋ dok inen Cidon, me irab kop i kome, kobbe kop man ame Rwot Obaŋa okobo: “Nen ba, an atye i kop i komi, yin Cidon, abino nyuto kwogona i akinani kuno. Jo bino ŋeyo ni an abedo Rwot, ka doŋ aŋolo kop iye, dok daŋ anyuto ni an acil iye. Pien abino miyo too edeke poto iye, abino miyo remo ony dye gudo iye luŋ, jo ame oneko bino bedo dye boma kuno, kun oneko jo mere i Pala lweny ame bino ya i kabedo ducu. Mannono bino miyo jo iye ŋeo ni an a Rwot.” Rwot Obaŋa okobo ni, “Pe tye rokkoro ame tye i ŋet Icrael, ame yam obedo cayo jo Icrael, ame dok bino medde bedo acalo okuto kede ocokocok me waŋo jo Icrael. Gin bino ŋeyo ni an a Rwot Obaŋa. “Pien an a Rwot Obaŋa akobo ni, I kare ame acoko jo Icrael i akina orok kan ame gin rik okeketa iye, ate daŋ nyuto i komgi ni an acil, kun rok ocele neno kede waŋgi, gin doŋ bino bedo i lobogi i komgi, ame rik amio baŋ amirona Yakobo. Gin bino bedo iye i kuc, obino gero wudigi, ote daŋ pito olokgi, Obino bedo i kuc, i kare ame doŋ atyeko ŋolo kop i kom jo i ŋetgi ame rik bedo cayogi. Mannono bino miyo gin oŋeo ni an a Rwot Obaŋa.” I nino dwe apar wie aryo, i dwe me apar, me mwaka me apar, Rwot okobo keda, kun kobo ni, “Wot a dano we, koŋ dok ilokere inen Parao abaka me Miciri, me irab kop i kome kede i kom jo Miciri luŋ; rab kop, ikob kop man ame an Rwot Obaŋa akobo: “Nen ba, an atye i kop i komi, yin Parao abaka me Miciri, yin twon twol iyiliyili ame buta i lum i dye nam, kun kobo ni, ‘Kulo Nail obedo mega; an en atio.’ Abino keto golo i cwaki, abino miyo rec ame tye i dye piini momoka i pok komi; ate bino godi oko i dye nam, karacel i rec luŋ ame tye i dye nammi, ame omomoka i pok komi. Abino diwiri oko i dye tim, yin karacel kede rec luŋ ame omomoka i pok komi; ibino poto i dye tim kannaler, mom obino kwanyo komi me ayika. An doŋ atyeko miyi oko me acama, baŋ leyi me tim kede winy ame twarre malo. “Mannono bino miyo jo luŋ ame bedo i Miciri ŋeo ni an a Rwot. Pien jo Icrael rik obedo jeŋere i komi me konyogi, kun yin onwoŋo igoro calo lut ogada. Ka ce gin ojeŋŋere i komi, yin itur oko, ite daŋ wawaŋo wi bwokgi. Ka gin ojeŋere i komi, yin itur oko, ite miyo pyergi wanne onyo lokere. Mannono omio Rwot Obaŋa okobo ni, Nen ba abino kelo pala me lweny i komwu, ame bino neko dano karacel kede leyi. Lobo me Miciri bino doko calo wi obur ame odoŋ kene, Mannono bino miyo gin oŋeo ni an a Rwot. “Pien yin ikobo ni, ‘Kulo Nail obedo mega, an en atio’, mannono omio an atye acalo akworri, kede akwor a kulo Nail, dok abino miyo lobo me Miciri doŋ nono acalo wi obur ame doŋ oballe odoco, cakere i Migdol tuno kede naka i Cirene, te kato naka i waŋ apokki me Eciopia. Mom tye dano moro onyo le moro ame bino beo iye. Mom obino bedo kuno pi mwakki ame romo pyeraŋwen twai. Abino miyo Miciri doko wi obur ame kato lobo luŋ ame tye acalo wi obur, dok boma iye luŋ daŋ bino doko acalo wi obur pi mwakki pyeraŋwen twal ame kato boma ocele luŋ ame tye acalo wi obur. Abino keketo jo Miciri luŋ i akina rok ocele, ame tye i lobo apapat. “Pien man en kop ame Rwot Obaŋa okobo: I agikki me mwaka pyeraŋwen, abino coko jo Miciri i akina rok ocele kan ame onwoŋo gin okeketa iye, abino dwogo kuccere, ate dwokogi cen i lobo me Patroc, ame en lobo ame gin rik oya iye. Gin bino bedo kuno acalo rok ame goro meicel. I akina loc ocele luŋ, en ame doŋ bino bedo agoro okato kare, mom dok bino tiŋere kadi acel me loyo rok ocele, dok abino miyo welgi bedo anok meicel ame mom dok kato rok ocele. Jo Icrael mom dok bino jeŋere i komgi me konyogi. Can arac ame opoto i kom jo Miciri, bino poyo wi jo Icrael, me ŋeyo ni gin kara onwoŋo otimo bal me jeŋere i kom jo Miciri. Mannono bino miyo jo Icrael ŋeo ni an a Rwot Obaŋa.” I nino dwe acel, me dwe me acel, i mwaka me pyeraryo wie abiro, Rwot okobo keda, kun kobo ni, “Wot a dano we, abaka Nebukadnejar me Babulon, ocako lweny agwa meicel i kom Turo, omio ocirikale mere olwenyo lweny agwa meicel, ame omio wi ŋat acel acel tal oko, dok badgi daŋ jony oko, cite kadi amannono, kadi en abaka onyo monnyere, mom onwoŋo ginnoro kadi acel i Turo pi lweny ame gin olwenyo i komgi-nono. Mannono omio Rwot Obaŋa okobo ni, Nen ba, abino miyo lobo me Miciri baŋ Nebukadnejar abaka me Babulon; en bino coko lonyo iye luŋ tero oko, bino yako jami luŋ ame tye i Miciri, bedo acalo gin me culo monnyere. Atyeko doŋ miye lobo me Miciri, acalo gin me cule pi tic ame en otio, pien gin otio tic ame kono an ikoma ati, man kop ame Rwot Obaŋa okobo. “I nino-nono abino miyo atel ya i Icrael, an ate miyo yin Ejekeri kobo kop i akinagi. Mannono bino miyo gin oŋeo ni an Rwot.” Rwot okobo keda, kun kobo ni, “Wot a dano we, rab kop man ame Rwot Obaŋa okobo: “Red ni, ‘Nino man rac nadi!’ Pien nino doŋ ceggi acega, Nino a Rwot doŋ ceggi meicel; bino bedo nino ame pol bino cido iye icuc, nino me can baŋ rok apapat. Lweny bino bedo tye i Miciri, can adwoŋ meicel bino poto Eciopia, jo apol i Miciri obino neko oko; lonyo ame tye iye daŋ obino yako otero oko obino weko Miciri ame acakki tere doŋ oballe.” I lwennyono daŋ obino neko iye ocirikale ame opaŋo apaŋa i Eciopia, i Put, i Lud, kede en ame opaŋo i lobo a jo Arab kede Libia, gin luŋ obino nekogi karacel i jona, kun onekogi i pala lweny. Rwot okobo kop man ni: “Jo ame konyo Miciri, obino neneko oko, monnyere ame wakere wok daŋ obino jwero oko; obino jwero cakere i Migdol tuno kede naka i Cirene, obino nekogi luŋ i akina-nono i pala lweny, man kop ame Rwot Obaŋa okobo. Lobo mere bino bedo acalo wi obur arac akato lobo ocele luŋ atye acalo wi obur, dok boma luŋ iye, bino doŋ nono arac meicel, akato boma ocele luŋ ame odoŋ yigi nono. Mannono bino miyo gin oŋeo ni an a Rwot, i kare ame doŋ atyeko waŋo Miciri oko i mac, dok jo ame konye luŋ atyeko daŋ jwero oko. “I kare-nono okwena mogo ame dwir meicel bino ya i baŋa, te wot tuyo jo Eciopia atua, te miyogi lworo meicel, i nino ame doŋ otyeko jwero lobo me Miciri. Nen, nino-nono tye abino!” Man kop ame Rwot Obaŋa okobo: “Abino miyo lonyo a jo Miciri gik oko, abino miyo Nebukadnejar, abaka me Babulon en ame timo man. En karacel kede monnyere, ame gin obedo rok ame iyiliyili ame kato rok ocele luŋ, gin en ame obino kelogi me balo Miciri; gin bino woto pala me lwenygi i kom Miciri, ote miyo kom jo oto radde atata i kom jo Miciri, Abino miyo pii i kulo Nail dwono oko, ate cato lobo Miciri oko baŋ otim tim areco; abino miyo lobo Miciri doko wi obur, karacel kede jami luŋ ame tye iye, abino miyo orok en ame tio ticcono pira; an a Rwot doŋ atyeko kobo. “Rwot Obaŋa okobo kop man: abino jwero calgi oko, ate daŋ tyeko cal apa i Mempic oko; rwottoro mom dok bino bedo tye i Miciri, mannono bino miyo amio jo Miciri bedo kede lworo. Abino miyo Patroc daŋ doŋ calo wi obur, dok abino waŋo Joan daŋ oko, abino timo tim me ŋolo kop i kom Tebej. Abino coro akemona i kom Pelucuim, ame obedo twon cel atek me Miciri, ate tyeko lonyo luŋ ame tye i Tebec, Abino waŋo lobo me Miciri oko; Pelucium bino bedo kede cwercuny adwoŋ meicel, boma me Tebec obino turo oko, pii alele te poŋ iye, Awobe atino me On kede me Pibecet, abino neko i pala lweny, aco mon, obino tero oko iyi opii. Aco i boma me Tekapine, i ninonono bino bedo acol icuc, abino turo loc a jo Miciri oko, dok ocirikale mere atek ame wakere, daŋ abino jwero oko. Pol bino wumo lobo Miciri oko, anyira mere ote tero daŋ oko iyi opii. Mannono en kite ame abino tiyo kede tic me ŋolo kop i kom Miciri. Mannono bino miyo gin oŋeo ni an a Rwot.” I nino dwe abiro me dwe me acel, i mwaka me apar wie acel, Rwot rik dok te kop keda, kun kobo ni, “Wot a dano we, atyeko doŋ turo bad Parao abaka me Miciri; cite mom ru otweo kan oturrono me caŋ eka te doko dok atek ame dok romo mako jami lweny. Mannono omio Rwot Obaŋa okobo ni; Nen ba, an atye i kop i kom Parao, abaka me Miciri, abino turo bade ryoryo ducu, tuŋ aber kede tuŋ a yam koŋ oturri; abino miyo pala me lweny poto oko i ciŋe. Abino keketo jo Miciri i akina rok ocele, ate miyogi lal i wi lobo luŋ, Abino meddi abaka me Babulon teko, ate miye pala me romona; cite bad abaka Parao ryoryo luŋ abino turo oko, en bino cur i nyim abaka me Babulon, calo dano ame owano atek meicel. Abino meddi abaka me Babulon teko, ento abino turo bad abaka Parao ryoryo luŋ te rette piny, mannono bino miyo gin oŋeo ni an abedo Rwot. I kare ame doŋ atyeko miyo pala me lweny i ciŋ abaka me Babulon, en bino cako lweny kede i kom lobo me Miciri; Abino keketo jo Miciri i akina rok ocele, ate miyogi lal i wi lobo luŋ, Mannono bino miyo gin oŋeo ni an abedo Rwot.” I nino dwe acel me dwe me adek imwaka me apar wie acel, Rwot rik dok te kop keda, kun kobo ni, “Wot a dano we, kobbi Parao, abaka me Miciri karacel kede lwakkere, ni, “Yin ce irom wunu i ŋa i dittinono? Nen ba, an abino porri kede yen cedar me Lebanon, abino porri jaŋe abeco meicel karacel kede jaŋe me buŋ, karacel kede kite ame ibor kede. Yat ame bor ame wie otuno naka i pol malo. Pii tye iye ame mie edoŋo, i tere piny daŋ tye pii me kulo ame en mato, eka te miyo pii mere mol, i kabedo luŋ ame oguro kan ame opite iye-nono, te daŋ dok cwalli yen luŋ ame tye i buŋ pii mere-nono. Pien pii romo yattono aber, omio en doŋo aber ame kato yennogo ducu, dok jaŋe daŋ doŋodoŋo, dok daŋ bocoboco. Leyi luŋ ame twarre malo, gero wudigi i jaŋe, dok leyi me tim daŋ nywalo itinogi i tipo mere, dok rok adoŋo apapat me wi podo, we daŋ i tipo mere. Yattono ber nadi! Pien odoŋo abor kun jaŋe daŋ bocoboco. Lwite donyo daŋ atut piny i pii. Mom tye yat cedar moro i poto Obaŋa ame oromo poro kede, mom tye yattoro ocele ame jaŋe cal i yattonono. Mom daŋ otwero poro kadi acel olam, jaŋgi mom rwatte kadi acel; mom tye yattoro kadi acel i poto Obaŋa ame oromo poro kede berrere. An atio yattono aber odoco, i jaŋe ame obuŋere kukakuka. Yattoro luŋ ame tye iyi Eden poto Obaŋa, nene kero. “Mannono omio Rwot Obaŋa okobo kop man ni: Pien yattoro odoŋo abor meicel ame wie otuno naka i pol twal, dok ocako daŋ wakere i cunye pi borrer e-nono, abino miye i ciŋ lo atek meicel i akina rok ocele; lo atekkono bino tic kede kun lubo kit ame raccere tye kede. Cunya doŋ okwero yattono oko. Rok ocele ame ger meicel, bino toŋei oko piny te weke kuno. Jaŋe bino rette i wi kiddi kede i luŋ luŋ, kome bino buto piny ame doŋ otutura oko. Rok ocele ame onwoŋo bedo i te tipo mere, bino ya daŋ te wot gigi oko. Winnyi luŋ ame twarre malo bino bedo i kom yat ame orette pinnyono, kun leyi me tim wowota i jane luŋ. Cakere aman doŋ, mom dok tye yattoro ame bino doŋo tuno i ka wi yattaca, kadi bed nwoŋo pii arome meicel, jaŋ yattoro mom dok bino gudo pol, kun wie tuno kan ame onwoŋo yattaca tuno iye. Yen luŋ daŋ doŋ bino to oko acalo dano, gin luŋ obino nywako kabedo i jo ame doŋ otyeko to ame doŋ tye i bur i lyel piny. “Rwot Obaŋa okobo kop man ni, Ka doŋ bino donyo piny i lyel, abino miyo pii atut a tye piny kuno kumo pire, abino juko pii i kulo iye oko luŋ. Pii iye luŋ mom dok bino mol; abino miyo wi kidi me Lebanon cido oko icuc, eka yen luŋ iye te two oko. I kare ame abino cwaye piny lobo a jo oto, mor me rette mere bino yeŋo rok apapat, Yen luŋ ame tye i poto me Eden, yen luŋ ame oyero ayera ame nwoŋo pii ame romogi, ame tye i Lebanon, cunygi bino kwe i lobo ame tye piny. Gin daŋ obino donyo piny i lyel kuno karacel kede, baŋ jo ame otyeko neko i pala lweny. Jo luŋ ame onwoŋo bedo i tipo mere i akina rok apapat, bino to. Kara ŋa ame kwogoni cal kede, dok daŋ dit ame rom kedi i akina yen luŋ ame tye i poto me Eden? Yin daŋ doŋ ibino donyo piny i lobo a jo oto karacel i yen ocele me Eden, ite wot nywako kabedo i jo ame mom ŋeo Obaŋa, kede jo ame oneko aneka i pala lweny. “Man obedo Parao karacel kede lwakkere luŋ, man kop ame Rwot Obaŋa okobo.” I nino dwe acel me dwe me apar wie aryo, i mwaka me apar wie aryo, Rwot rik dok te kop keda, kun kobo ni, “Wot a dano we, cak wer me kumo pi abaka Parao, me Miciri, kun ikobbe ni: “Yin inenne keni ni yin ibedo eŋato i akina rok ocele, ento yin kom irom aroma i twon twolloro iyiliyili ame bedo dye nam, yin i kok i kulo kuno, dok ibedo lolo pii kede tyeni, ite babalo pii i kulo oko. Man en kop ame Rwot Obaŋa okobo. Abino boloboona i komi kun atye i lwak rok apapat, gin bino wayi kede boo-nono, keli oko. Abino wayi aboli kan otwo, ate cacanyo yin piny i lobo, abino miyo winy luŋ ame twarre malo, karacel kede leyi luŋ me tim, gin luŋ obino bino i komi me cami. Abino babao riŋo komi i wi kiddi malo, karacel kede remoni ame acwer; kun komi otop bino poŋ yii luŋ. Abino bido lobo kede remoni, tuno kede naka i wi kiddi malo, yo luŋ bino poŋ i riŋo komi keken. I kare ame doŋ atyeko jweri oko, abino wumo daŋ polo oko, acer iye luŋ daŋ bino rwenyo oko; abino miyo pol wumo waŋ ceŋ oko, dwe daŋ mom bino menyo piny. Ginnoro luŋ ame menyo piny ame tye i polo, abino miyo colpiny wumogi oko, ate miyo loboni cido icuc, Man kop ame Rwot Obaŋa okobo.” Abino balo cuny rok apapat, i kare ame doŋ abino terri oko iyi opii i akina rok ocele, i lobo mogo ame yam mom ru iŋeo. Abino miyo lworo mako rok apapat i komi, kom obakkigi bino myel meicel piri, ka ce ayeyeŋo pala lwennya i nyimgi. Komgi bino bedo myel amyela cawa ducu, kun kom ŋat acel acel myel pi kwo mere, i nino ame yin ibino poto kede. Pien man en kop ame Rwot Obaŋa otyeko kobo: Pala lweny abaka me Babulon bino bino i komi. Abino miyo pala lweny atek en ame neko joni, ame gin luŋ obedo twoni jo ame iyiliyili meicel i akina orok. “Gin bino miyo awaka a jo Miciri gik oko, lwak jo mere apol daŋ bino to oko. Abino jwero leyi iyie luŋ, leyi luŋ ame bedo i dog nam; mom dok tye ŋattoro ame dok bino medde yelogi, akadi leyi moro daŋ ame dok bino medde yelogi. Abino miyo pii iye doko acil meicel, eka pii i kulo te mol calo moo, Man kop ame Rwot Obaŋa okobo. Kare ame abino miyo lobo me Miciri doko acalo wi obur, ame ginnoro luŋ ame bedo iye mom doŋ tye, kare ame abino neko jo luŋ ame bedo iye, mannono bino miyo gin oŋeo ni an a Rwot. Wer me kumo man bino doko wer ame jo wero. Mon me rok apapat bino wero i kare me kumogi pi Miciri, i lwakkere luŋ. Gin bino wero wer man, man kop ame Rwot Obaŋa okobo.” I nino dwe apar wie abic me dwe me agege, i mwaka me apar wie aryo, Rwot dok te kop keda, kun kobo ni, “Wot a dano we, koki, dok ikum pi lwak jo me Miciri, cwagi baŋ rok ocele ame tek meicel i lobo a jo oto, baŋ jo ame doŋ otyeko donyo piny i lyel: ‘Ŋa ce ame yin ikato oko kede ber?’ “Dony piny iwot ibut i lyel a jo ame mom ŋeo Obaŋa. “Gin bino rette i dyere a jo ame oneko i pala lweny, pala lweny doŋ tye ame oyikere oko me neko jo Miciri. Rwode mogo adoŋo, karacel kede jo ame onwoŋo lwenyo karacel kedgi, tye ame akuro jolo jo Miciri akura, kun okobo ni, ‘Jo a mom ŋeo Obaŋa ame rik oneko i pala lweny, gin daŋ obino piny baŋwu, gin en tye obuto piny kan mot.’ “Jo Acuria daŋ tye kuno, ame lyel ocirikale mere tye ame ogure dyere, gin luŋ obedo jo ame oneko aneka i pala i lweny. Lyelgi tye piny meicel i lobo a jo ame oto. Ocirikale mere luŋ oneko aneka i lweny, lyelgi tye ame ogure dyere. Gin en ame rik omio lworo omako jo ame tye i lobo a jo ame kwo. “Jo Elam daŋ tye kuno, dok lyele ocirikale mere daŋ tye ame ogure oko dyere. Gin luŋ daŋ onekogi aneka i pala, i lweny, gin ote donyo piny i lobo a jo oto, kun otye acalo jo ame mom ŋeo Obaŋa. Gin daŋ rik omedo lworo meicel i lobo a jo akwo, gin daŋ otye i akina jo ame tye ayeyo lewicgi karacel i jo a doŋ otyeko donyo piny i lyel. “Otiyi i tanda mere tye i akina jo ame oneko aneka, dok lyel ocirikale mere tye ame ogure dyere. Gin daŋ luŋ obedo jo ame mom ŋeo Obaŋa. I kare me kwogi, onwoŋo gin daŋ tye i akina jo ame mio jo lworo, ento aman doŋ obuto piny mot, kun daŋ oyeo lewic karacel i jo a doŋ otyeko donyo piny i lyel. Gin daŋ oketogi, otye i akina jo ame oneko aneka i pala lweny. “Jo Mecek kede jo Tuban daŋ tye kuno, karacel kede lwakgi luŋ ame lyelgi tye oguro meggi dyere. Gin luŋ daŋ rik obedo jo ame mom ŋeo Obaŋa, ame onekogi aneka i pala lweny, I kare me kwogi i lobo, gin daŋ rik omedo lworo baŋ jo. Gin rik mom oyikogi i yik me kwogo acalo twoni jo mogo adoŋo ame okwoŋo to, ame owoto piny i lyel karacel i jami lwenygi, dok ame pala lwenygi tye ame opyelo piny tutuŋ wigi, dok kwotgi daŋ tye ame otweo i cogo komgi. Twoni jo atekkono rik olworogi meicel i lobo a jo akwo. Mannono omio yin daŋ obino tuturo yin oko ite wot daŋ piny i akina jo ame mom ŋeo Obaŋa, kede jo ame oneko aneka i pala lweny. “Jo Edom daŋ tye kuno, obakki mere karacel kede rwode mere. Gin rik obedo twoni jo atek meicel i kare me kwogi, cite aman gin doŋ otye obuto karacel i jo ame oto, kun mom oŋeo Obaŋa, ame rik oneko aneka i pala lweny. “Rwode me tutuŋ onyarodi luŋ daŋ tye kuno, karacel kede jo Cidon daŋ luŋ, ame gin luŋ odonyo piny i lyel a jo oto ame yeo lewicgi, pien i kare me kwogi, tekogi rik meddi jo lworo cite aman doŋ obuto piny karacel i jo ame mom ŋeo Obaŋa ame oneko aneka i pala lweny. Gin daŋ otye onywako lewicgi karacel i jo a doŋ otyeko donyo piny i lyel. “Kare ame Parao abaka me Miciri bino nenogi, cunye bino kwe pi to mere, kede pi to a lwakkere ame oneko aneka i pala lweny. Man kop ame Rwot Obaŋa okobo. Pien i kare me kwo mere, en obedo miyo jo ame kwo lworo, mannono omio obino pyele i akina jo ame mom ŋeo Obaŋa, karacel i lwak ame oneko aneka i pala lweny. Parao karacel i lwakkere luŋ.” Man kop ame Rwot Obaŋa okobo. Rwot rik dok te kop keda, kun kobo ni, “Wot a dano we, wot ikobbi joni gin ame atimere, ka ce amio lweny opoto i lobo moro-ni. Jo me lobo-nono bino kwanyo dano acel acel i akinagi te miye bedo akurpinygi. Ka ce en tye ka ne no okwor tye ka bino me bino lweny i komgi, en bino kuto apel me kwenyoro jo mere. Ka ce dano moro owinyo apel ame okuto, eka dano-nono mom te tamo pire, te miyo okwor bino, te make neke oko, bal me remo mere bino dok gire i wie. En owinyo koko apel ame okwenyoro en kede, cite mom te paro pire, mannono en omio bal me remo mere bedo gire i wie. Pien kono rik en owinyo akwenyakin ame okwenyoro en kede-nono, kono en olaro kwo mere. Cite ka akur-piny oneno okwor tye abino, mom te kuto apel, lwak mom te ŋeyo kop i kom okwor ame tye abino, ka ce okwor obin okwanyo ŋattoro i akina lwak, te wot neko oko pi ballere, bal a dano-nono bino bedo i wie, cite bal me to mere, bino bedo i wi akur-piny. “Doŋ pi mannono ba, yin wot a dano, an atyeko keti me bedo akur-piny a jo Icrael. Yin ibino kwenyorogi i gin ame an abino kobbi. Ka ce akobo ni lonnoro arac bino to, eka ce yin mom ite kobbi lo araccono me kwenyoro en, me en cak weko kite araccono, eka lo arac cu te to i ballere; bal a danonono bino dok i wii, Cite ka yin ikwenyoro lo araccono me weko kitenono, eka en te kwero loko kite oko; en bino to i ballere, ento yin ibino laro kwoni. “Dok yin, wot a dano we, kobbi jo me ot Icrael kop man ame gin otye ka kobo; ni, ‘Timwa me turo cik kede balwa, tye gire i wiwa, omiowa otye ka doko agoro agora. Kara doŋ otwero bedo kwo niŋo?’ Dok ikobbigi ni, Kite acalo an Rwot Obaŋa atye kwo-ni, cunya mom yom i to a lo ame timo gin arac, ento an amito ni atim tim arac, olokere owek timo tim araccono me ebed kwo. Wun jo me ot Icrael, lokere idwog wunu cen, lokere idwog wunu cen, iwek wunu kitewu areco, Kara piŋo omio imiye wunu i to kittono? Yin wot a dano we, kobbi lwak ni, Ka ce lo a kite atira obalo, gin aber ame yam en obedo timo mom romo larre. Dok ka lo moro a kite rac oweko timo gin arac, mom obino keto cannoro i kome, dok ka ce lo moro a kite atira ocako timo bal, mom bino medde ri kare alac kun pwod kwo. Dok ka ce aciko lo moro ame kite atira, ni en gire bino bedo kwo, ka ce dano-nono obedo geno kite atira-nono, eka te cako timo bal, mom abino po i kom ginnoro aber ame yam en obedo timo kadi acel, en gire pwod bino to pi bal ame en otimo. Dok ka akwenyoro ŋat ame timo gin arac ni en bino to oko, ento en te lokere weko timo bal oko, te cako timo gin ame cik mito dok tye atira, me anennere, ka ce en ocako dwoko jami ducu ame yam en emao amaa i baŋ jo o ocele, kede gigi mogo ame yam ekwalo akwala, te doŋ weko timo bal oko, te doŋ timo gin ame mio dano kwo, ento en gire mom bino to, ento bino kwo. Cunya bino cayo balloro luŋ ame yam en otimo. En bino bedo kwo pien otimo gin ame tye atira dok aber. “Kadi bed amannono jowu tye ka kobo ni, ‘Gin ame Rwot tye ka timo mom tye kakare’; aco kun kitegi en ame mom beco. Ka ce en lo a kite atira oweko tim gin atye atira, eka te cako timo gin arac, en gire bino to. Ka ce lo a kite rac, oweko timo bal oko, eka te cako timo gin atye atira dok aber, dano-nono nwoŋo olaro kwo mere oko, Cite jo Icrael tye ka kobo ni gin ame an atye ka timo mom tye atira. Myero iŋe ni abino ŋolli wun jo me ot Icrael kop, kun alubo gin ame itimo wunu.” I mwaka me apar wie aryo, ame doŋ otyeko terowa oko iyi opii, i nino dwe abic me dwe me apar, dano moro ame onwoŋo olwi i Jerucalem obino baŋa te bino kobba ni, “Bomawa doŋ otyeko mayo oko.” Otyeno ocele ame dano ame olwi-nono mom ru obino baŋa, awinyo teko a Rwot tye i koma. I kare ame dano-ni obino otuno baŋa odiko ocele, Rwot oyabo doga ate cako kop, te leba doŋ te gony atwal. Rwot okobo keda kun kobba ni, “Wot a dano we, jo me lobo man ame oballe oko-ni, otye ka kobo kare ducu ni, ‘Iburaim rik onwoŋo dano acel keken, ento rik ote miye kom lobo-ni luŋ. Nen wan otye opol, mannono mio loboni doŋ bedo megwa.’ Pi mannono myero ikobbigi kop man ame Rwot Obaŋa okobo: Wun icamo wunu riŋo imedo wunu kede remo, eka ite cako woro wunu cal jogi, dok ite onyo wunu remo a jo nono. Kara ŋo omio dok itamo wunu ni lobo man bino bedo megwu? Wun igeno wunu pala me lwenywu, dok itimo wunu timmogo me kwer, kun ŋat acel acel i akinawu balo dako awottere. Kara ŋo omio itamo wunu dok ni lobo man obedo megwu? Kob kop man ame Rwot Obaŋa okobo baŋgi: Kite acalo an atye kede kwo-ni, ateteni jo ame tye i lobo man ame doŋ otyeko bale-ni, obino neko oko i pala lweny. Dok ŋat ame onwoŋo tye i poto mere, abino miyo leyi me tim en ame mwodo; aco jo ame tye i cellogo ame ocelo atek, kede iyi gorogoro, too edeke en ame bino nekogi. An abino miyo lobo man doŋ calo wii obur ame doŋ oballe odoco. Jo mogo atek iye ame wakere wok-ki, daŋ bino to oko. Wi kiddi luŋ ame tye iyi Icrael, bino doko calo wi obur, ame ŋattoro mom romo beo iye kadi acel. Mannono bino miyo iŋeo wunu ni an a Rwot, i kare ame doŋ atyeko miyo lobo odoko calo wi obur, kun doŋ oballe odoco, pi timmogo me kwer ame ibedo wunu timo. “Aco yin wot a dano we, joni tye ka kobo kop i komi, ka gin ocokere ka poro kopgi i ŋet cel me boma, onyo i doggola me udigi. Gin obino kop i akinagi kengi kengi, kun ŋat man kobbi awottere ni, ‘Bye, me koŋ obin owot owiny kop ame aman dok obino i baŋ Rwot.’ Gin te ya bino baŋi, kite ame jo bino kede, gin te bedo i nyimi acalo jona, ote daŋ winyo kop ame yin itye ka kobo, cite mom ote keto gigi i tic; pien gin onyuto margi i doggi keken, ento cunygi tye ka i nwoŋo lim. Yin doŋ itye baŋgi acalo agony kop ame tye ka wero wer baŋgi me mar keken, kun wero ame dwone mit meicel, dok daŋ goo tum. Gin owinyo kop luŋ ame yin ikobo, cite mom oketo moro i akinagi i tic kadi acel. Cite ka kop ame yin ikobo luŋ ocobere, ka ce bino cobere, gin bino ŋeyo ni adwarpiny kara onwoŋo tye akinagi.” Rwot okobo keda kun kobo ni, “Wot a dano we, rab kop arac i kom okwat me Icrael, rab kop baŋgi gin okwat, ikobbigi kop man ame an Rwot Obaŋa akobo: Ama wun okwat me Icrael ame onwoŋo itye ka pitte wunu kenwu nie! Mom okwat myero pit rommi? Wun icamo wunu moo, iruko wunu yer rommi, ineko wunu rommi ame ocwe mege, cite mom ipito wunu rommi. Rommi ame goro mom imeddigi wunu teko, en ame two mege daŋ mom icaŋo wunu, dok en ame oŋwalo, mom itweo wunu kan ame otur. En ame orwenyo mege, daŋ mom iyenyo idwoggo wunu paco, mom iyenyo wunu rommi ame orwenyo kadi acel, dok iloogi wunu i gero meicel. Pien ŋat ame kwao rommi doŋ mom, omio rommi oket oko atata, leyi me tim nwonogi, te makogi mwodogi oko. Rommina doŋ okeketa oko, orimo doŋ piny atata i wi kiddi malo, dok inwoŋogi i kabedo luŋ ame obedo kidikidi. Rommina doŋ okeketa atata, i kabedo luŋ ame tye i wi lobo, mom tye ŋattoro a myero yenygi, onyo ame paro me nwoŋo kan ame gin otye iye. “Pi mannono ba, wun okwa rommi, winy wunu kop man ame Rwot okobo: Kite acalo atye kwo-ni, pien rommina doŋ odoko me amwoda a leyi luŋ me tim, ame makogi te mwodogi oko, pien akwattoro nwoŋo doŋ mom; dok pien okwatta mom otemo yenyo rommina, ento okwat lunyo pitte ka kengi kengi, kun mom opito rommina kadi acel, pi mannono ba, wun okwat myero iwiny wunu kop man ame Rwot okobo: Rwot Obaŋa okobo kop man ni, Nen ba, an atye doŋ i kop i kom okwat, abino penyogi me culo rommina, ate giko ticgi doŋ me pito rommina oko; dok okwat daŋ mom bino medde pitte kengi. Abino mayo rommina oko i doggi, me kur bed acalo cam me acamagi. “Pien Rwot Obaŋa okobo kop man ni: Nen ba, an, ikoma abino yenyo rommina, abino yenyo kan ame gin tye iye. Kite ame akwatyenyo kede rommi mere, ka ce mogo i akinagi okeketa oko owoto teŋe, mannono en kite ame abino yenyo kede rommina. Abino larogi oko i kabedo luŋ ame onwoŋo gin okeketa iye i nino ame pol onwoŋo dwoŋ, dok pol daŋ ooido icuc. Abino kwanyogi oko i akina rok apapat, i lobo luŋ ame gin tye iye, ate dwogogi en i lobogi. Abino pitogi i wi kiddi ame tye i lobo me Icrael, i ŋet akon, i kabedo luŋ ame jo bedo iye. Abino miyogi ocama i bar aber, i wi kiddi luŋ, ame tye iyi Icrael. Gin bino buta kuno kan ame luŋ aber me acamo a dok en ame tye iye, gin bino cem i bar amwonya meicel ame tye i wi kiddi me Icrael. An ikoma en ame bino bedo akwat ame kwao rommina, dok abino miyogi obuto piny, man kop ame an Rwot Obaŋa akobo. Abino yenyo rommi ame orwenyo dok abino dwoggo cen rommi ame oya owoto oko i akina owotegi, abino daŋ tweyo kan ame owane i komgi, dok rommi ame odoko agoro abino meddigi teko, rommi ocwe mege, kede en atekkege, abino medde gwokogi. Abino kwayogi aber meicel. “Aco wun rommina, winy wunu kop man ame Rwot Obaŋa okobbiwu: Nen ba, an aŋolo kop i akina rommi kede rommi, i akina nyok romo kede nyok dyel. Rommi ocele i akinawu mom camo lum aber romogi; dok onyonyono-gu lum ocele ame mom ocamo. Omato pii aber, ote daŋ dok nyonyono pi ocele ame mom omato. Itamo wunu ni ber, rommina me mwodo lum ame inyonyono wunu ityenwu, dok daŋ myero gin omat pii ame ibala wunu oko i tyenwu? “Mannono omio Rwot Obaŋa okobo kop man baŋgi: Nen ba, an, an ikoma en ame abino ŋolo kop i akina rommi ocwe kede en ame mom ocwe. Pien itye ka coro wunu owotewu i ŋetwu kede badwu, kun daŋ icocobo wunu owotewu ame goro i tuŋwu, tuno ka imiogi wunu okeketa teŋe atata. An abino laro rommina kede dyegina, mom dok obino bedo me amwoda a leyi; dok an en abino ŋolo kop i akina romo kede romo wadgi. Abino miyo akwat acel en ame kwaogi, amirona Daudi, en ame bino pitogi; En ame bino bedo akwatgi ame kwaogi. An a Rwot abino bedo Obaŋagi, amirona Daudi en ame bino bedo Rwot i ak inagi. Man kop ame an Rwot akobo. “An abino cikere kedgi, cikere me kuc, ate miyo leyi ager bedo mom i lobo, me gin doŋ obed i kuc i tim, dok daŋ obut i kuc dyewor i buŋ. Abino miyogi gum, karacel i kabedo luŋ ame oguro kidina acil, abino cwayigi kot i kare ame mitte i kokome; kot ame abino miyogi-nono, bino bedo kot ame miogi gum. Yengi ame gin opito bino nyako nyiggi meicel, dok lobogi daŋ bino ceko cem adwoŋ meicel, gin bino bedo aber kun otye i kuc i lobogi. Gin bino ŋeyo ni an abedo Rwot, ka gin oneno doŋ atyeko turo nyonyo ame otweogi kede, me larogi i ciŋ jo ame gin tye i cimgi acalo opii. Rok ocele mom dok bino medde yakogi, dok leyi me tim daŋ mom bino medde mwodogi, obino bedo i kuc aboŋo ginnoro ame miogi lworo. Abino miyo pottigi ceko cam meicel, ate miyo kec doŋ rwenyo oko i lobogi. Rok ocele mom daŋ bino medde dok me yetogi. Gin bino ŋeyo ni an a Rwot ame abedo Obaŋagi atye kedgi, dok gin jo Icrael obedo jona, man kop ame Rwot Obaŋa okobo. Wun ibedo wunu rommina, rommi ame an akwao, dok an abedo Obaŋawu. Man kop ame Rwot Obaŋa okobo.” Rwot rik dok te kop keda, kun kobba ni “Wot a dano we, cak lokere dok irab kop i kom kidi me Ceir, kobbi kidi me Ceir kop man ame Rwot Obaŋa okobo ni, ‘Nen ba, an atye i kop i komi, yin kidi me Ceir, dok abino ryeyo ciŋa me lweny i komi, yin Ceir, abino miyi idoko wi obur ame doŋ oballe odoco. Abino miyo bomani luŋ doŋ yigi nono, yin doŋ ite doko acalo wi obur, mannono bino miyo iŋeo wunu ni an a Rwot. Pien yin ibedo bedo akwor a jo Icrael nakanaka, ite miyo nekogi oko kede pala lweny, i kare me keto can i komgi, tyen me agikki mere, pi balgi. Pi mannono ba, kite acalo an a Rwot Obaŋa atye kwo, abino cako yiki pi remo, dok remo bino medde ryemo yori, pien bal tye i komi pi remo, mannono en omio remo bino medde lubo yori. Abino balo kidi me Ceir oko te doŋ calo wi obur, abino jwero jo luŋ ame tye iye kede en ame bino iye. Abino miyo kom jo ame oneko radde arada ata i wi kidi, Kom jo ame oneko i pala lweny, bino rette i kabedo luŋ, bino bedo tye i lobo luŋ obedo kidikidi, anaka i luŋ daŋ. Abino miyi doŋ ibedo calo wi obur nakanaka, ŋattoro mom dok bino bedo bomani moro. Mannono bino miyo iŋeo wunu ni an a Rwot.’ “Pien yin ikobo ni, ‘Rok magi aryo kede lobo magi aryo, apapat bino bedo mega, wan obino gamo bedo megwa,’ kadi bed Rwot onwoŋo tye kuno. Pi mannono ba, kite acalo an Rwot Obaŋa atye kwo-ni, abino tic kedwu, kun alubo akemo kede nyekowu, kede adagewu i kom jona. Gin bino ŋeyo ni an atye aketo can i komwu pi gin ame wun itimo wunu i komgi. Mannono bino miyo iŋeo wunu ni an a Rwot. Abedo winyo kop luŋ me apala ame ibedo kobo wunu i kom kiddi me Icrael, ame ibedo kobo wunu ni, Wi kiddi me Icrael doŋ tye acalo wi obur, doŋ otyeko miyo oko me ajwera. An atyeko winyo kopporo luŋ ame ibedo kobo arac i koma, kede kite ame ibedo wakere kede i koma, Rwot Obaŋa okobo kop man ni: Abino miyi idoko wi obur, me jo i wi lobo luŋ te lelo pi gin otimere. Kite ame yin daŋ ibedo lelo kede i kom Icrael i kare ame odoŋ calo wi obur. An daŋ abino tic kedi kittono, wi kidi luŋ me Ceir kede lobo luŋ me Edom bino doŋ calo wi obur. Mannono bino miyo gin oŋeo ni an abedo Rwot. “Yin wot a dano we, rab kop i kom kiddi me Icrael, kun ikobo ni, Ama wun kiddi me Icrael, winy wunu kop ame Rwot tye ka kobo, Man en kop ame Rwot Obaŋa okobo; pien omone a jo Icrael tye ka wakere kun okobo ni, ‘Lobo obedo kidikidi ame yam tye conni doŋ olokere obedo megwa.’ “Pi mannono myero irab kop kun ikobo gin ame an Rwot Obaŋa atye ka kobo, ni, Nen ba, pien jo luŋ ame oguri dyere, omio idoko wi obur, kun jo ocado i komi tuŋŋi kede tuŋŋi, omio ite doko gi-a rok ocele kun gin luŋ okobo kop arac i komi, Aman doŋ ba, yin wi kiddi me Icrael, winy kop man ame Rwot Obaŋa tye ka kobo, ame kobo baŋwu wun kiddi me Icrael kede lobo obedo kidikidi, kulo kede luŋ ducu me Icrael, baŋ kabedo luŋ ame yam doŋ oweko oballe oko, kun tye acalo wi obur, karacel kede boma luŋ me Icrael, ame rik rok ocele ame ogure dyere obedo yayako, ote daŋ doŋ loko doko gianyeragi. Man omio Rwot Obaŋa okobo kop agwa i twon akemo moro ame onwoŋo olyeto i kom rok ocele luŋ, kede i kom lobo me Edom luŋ, ame omio lobona odoko meggi, pirgi kengi, kun cunygi yom iye okato kare, dok daŋ okobo kop me acae iye. Me gin ogam bed meggi ote yayako jami ame tye iye. Pi mannono myero ikob kop i kom lobo me Icrael, kobbi kiddi iye karacel kede lobo obedo kidikidi, kulo karacel kede luŋ ducu iye, kop man ame Rwot Obaŋa okobo: Nen ba, atye ka kobo nyeko ame omaka i twon akemo meicel, pien yin ineno can meicel pi anywar ame rok ocele obedo nywari kede. Mannono omio akwoŋo akwoŋa ni, rok luŋ ame tye i ŋeti ame oguri dyere, obino daŋ nywarogi kite ame gin daŋ obedo nywari kede. “Cite wun kiddi me Icrael, yen dok bino lot atek meicel i yiwu, ote daŋ nyako nyiggi, pi jo me Icrael. Pien gin ceggi acega me dwogo paco. Pien an atye tutuŋ baŋi, abino neno ni loboni dok opuro, dok daŋ opito cam iye. Abino miyo jo dok nya medde baŋi, ibino bedo i boma luŋ ame yam tye iyi Icrael, ite daŋ dok gero wunu kabedo luŋ ame yam obabalo. Abino miyo jo karacel kede dok, nya medde ameda. Welwu bino bedo abup ame kato en a yam con oko, dok itino wu daŋ bino bedo apol meicel. Abino miyo ibedo wunu kuno kite ame yam ibedo wunu con, kun ibedo wunu aber, ame kato kite ame yam itye ibedo wunu con, mannono bino miyo iŋeo wunu ni an a Rwot. Abino kelo wun jona Icrael, ate miyowu bedo i lobo. Loboni bino bedo megwu, itinowu mom dok bino neno can iye kadi acel. “Rwot Obaŋa okobo ni: Pien jo tye ka lwoŋo kiddi ame tye Icrael ni, ‘Yin i kidi ame ineko jo, dok daŋ imao itino a jo.’ Cite cakere aman mom dok ibino neko itino a jo, dok daŋ mom ibino mayo itino a rok me Icrael. Man kop ame Rwot Obaŋa okobo. Dok daŋ mom ibino medde wunu winyo acae ame rok ocele caowu kede, dok daŋ mom ibino medde wunu yeyo lewic, ame rok ocele tye ka keto i komwu, dok daŋ mom ibino neko wunu itino a rok man, Man kop ame Rwot okobo.” Rwot dok te kop keda, kun kobo ni, “Wot a dano we, i kare ame jo Icrael obedo i lobogi gin i komgi, gin obin obalo lobogi oko i kitegi, karacel kede gin ame gin tio, Gin ame gin rik timo i nyima, rik mom cil, rom a roma i dako ame tye atwoyo two me kwer. Mannono rik te miyo an coro akemona i komgi pi remo ame gin rik obedo onyo, pi cal jogi ame gin obalo kede lobogi. Rik ate keketogi atata i akina rok ocele, gin te lal i lobo apapat, i kabedo luŋ, kun lubere i kitegi kede gin ame gin obedo timo, en amio an daŋ aŋolligi kop kittono, Cite i kare ame gin doŋ otye i akina rok ocele, i kabedo luŋ ame onwoŋo gin tye iye, gin rik te bedo pyedo nyiŋa acil, pien jo rik tye ka kobo kop i komgi ni, ‘Jo man obedo jo a Rwot, cite gin dok obin oya oko i lobogi.’ Cite an, nyiŋa acil litta meicel, ame gin jo Icrael obedo balo i akina rok kan ame gin onwoŋo otye iye. “Pi mannono myero ikob baŋ jo me ot Icrael, kop man ame Rwot Obaŋa okobo: Gin ame an aceggi timo-ni, pe atimo pirwu wun jo me ot Icrael, cite an atimo pi nyiŋa acil, ame wun ibedo balo wunu i akina rok ocele kan ame onwoŋo itye wunu iye. I kare ame an abino nyutti rok ocele twon nyiŋa acil wok-ki, ame wun ibedo balo wunu i kare ame itye wunu i akinagi; bino miyo gin rok ocele ŋeo ni an abedo Rwot, ka ce gin oneno an atio kedwu me nyuto nyiŋa acil, kun gin oneno kede waŋgi. Man kop ame Rwot Obaŋa okobo. Pien an abino kwanyowu oko i akina rok ocele ate coko wu daŋ i akina rok apapat ame itye wunu iye, ate dwokowu cen i lobowu i komwu. Abino kikiro pii acil i komwu, wun doŋ ite doko wunu jo acil, wun jo ame yam ijebere wunu i cal jogi, karacel kede jami ducu ame yam omiowu i lille wunu. Abino miyowu cuny anyen, abino keto cuny anyen i yiwu, Abino kwanyo cuny ame tek calo gweŋe oko i yiwu ate miyowu cuny a dano ikokome. Abino keto cuny acil i yiwu, ate miyowu bedo jo ame lubo cikka, kun igwokere wunu i lubo gin ame an aciko. Ibino bedo wunu i lobo ame rik amio baŋ kwariwu, wun ibino bedo wunu jona, an abino bedo Obaŋawu, Abino larowu oko i kom lille ame ilile wunu kede. Abino miyo cam bedo abup, kec mom dok te medde bedo i lobowu. Abino miyo nyig yen nyak adwoŋ meicel, karacel kede cam ame cek i potowu, me kur dok ibed wunu i lewic me bedo wunu i kec i akina rok ocele. Mannono bino miyo ipoyo wunu kitwu areco, kede gin areco ame rik ibedo timo wunu ame mom, ber, ite caye wunu kenwu, pi bal ame ibedo balo wunu, kede gigi mogo me kwer ame ibedo timo wunu. Myero iŋe wunu ni gin ame an atimo, mom atimo pirwu. Man kop ame Rwot Obaŋa okobo, Myero lewic makwu pi gin ame yam ibedo timo wunu, wun jo Icrael. “Man kop ame Rwot Obaŋa okobo: I nino ame abino lwokowu iye i kom bal ame yam ibedo balo wunu, abino miyo jo cako bedo i boma luŋ, ote daŋ cako gero kagi mogo ame yam obabala. Lobo ame doŋ onwoŋo tye acalo wi obur, dok obino puro, kun mom dok medde bedo acalo wi obur, kite ame jo a rik beo iye bedo neno kede. Jo bino cako kobo ni, ‘Lobo man ame rik tye acalo wi obur-ri, aman dok calo poto me Eden; dok boma mogo ame yam oballe acalo wi obur, aman dok jo tye bedo iye, dok daŋ ocecelo oko i cellogo atek.’ Mannono bino miyo rok ame odoŋ ame tye i ŋetwu, ŋeo ni an a Rwot, dok atyeko gero kagi mogo ame yam doŋ oballe oko, dok daŋ amio lobo mogo ame yam calo wi obur, odoko dok lobo ame ceko cam. Man kop ame an Rwot akobo, dok daŋ abino tiyo. “Rwot Obaŋa okobo kop man ni: Abino daŋ miyo jo Icrael penya me miyo jogi nya calo rommi kede dyegi. Calo rommi kede dyegi ame omio me yalo Obaŋa, calo rommi ame onwoŋo oradde i Jerucalem i kare me ecubannogo adoŋo. Mannono en kite ame boma mogo ame yam obabala bino bedo kede, kun jo opoŋ yigi calo rommi kede dyegi. Mannono bino miyo gin oŋeo ni an a Rwot.” Teko a Rwot onwoŋo tye ikoma, ame te miyo cuny a Rwot kela naka i dye luŋ, cogo otwo onwoŋo tye oradde atata i luŋŋono. Cuny a Rwot te miya mano kannono luŋ, ate neno cogo tye oradde kuno atata, dok cogo mere luŋ onwoŋo obedo cogo ame otwo. En te kobba ni, “Wot a dano we, cogo magi dok twero lokere bedo kwo? An ate gamo ni, Ama Rwot Obaŋa, yin gire iŋeo.” En dok te kobba ni, “Rab kop baŋ coggi magi, ikobbigi ni, Wun coggi ame otwo-ni, winy wunu kop a Rwot. Rwot Obaŋa okobo kop man baŋwu, wun cogo: Nen ba, abino miyo weo me kwo bino i komwu, eka ite cako dok bedo wunu kwo. Abino miyo ler dok ryeye i komwu, kede riŋo daŋ dwogo i komwu, ate miyo del komwu daŋ bedo tye, eka ate miyowu weo me kwo, ite doŋ cako wunu bedo kwo. Mannono bino miyo iŋeo wunu ni an a Rwot.” Mannono te miyo an daŋ rabo kop kite ame onwoŋo ocika kede. Kare ame atyeko rabo kop, ate cako winyo dwonnoro tye ka wo i tek, cogo daŋ te cako ribere oko i kom owotegi, kun cogo man ribere i kom awottere. I kare ame atye aneno, ate neno ler okadde akada i komgi, riŋo daŋ te bino i komgi oko, del komgi daŋ te wumo komgi ipuk, cite weo me kwo onwoŋo pwod pe i komgi. Rwot dok te kobba ni, “Wot a dano we, rab kop baŋ weo, ikobbi weo kop man ame an Rwot Obaŋa akobo: Yin weo myero ibin i twok lobo aŋwen ducu, bye idony i kom jo man ame oneko-ni, me gin ocak bedo kwo.” An daŋ ate rabo kop kite ame ocika kede, eka weo me kwo te bino donyo i komgi, gin te cako bedo kwo, ote ya cuŋ acuŋa i tyengi. Jo mere onwoŋo pol ame romo mony acel luŋ. Rwot dok te kobba ni, “Wot a dano we, cogo magi obedo jo Icrael luŋ. Nen gin otye kakoboni, ‘Cogo komwa, otwo gire doŋ oko, geŋwa moro doŋ mom; wan doŋ orom wunu aroma i jo oto.’ Pi mannono myero irab kop, ikobbigi kop man ame an Rwot Obaŋa akobo: Nen ba, abino yabo lyelewu ate miyowu ya malo oko i lyelwu-nono, ama wun jona. Abino dwogowu paco i lobo a jo Icrael. Mannono bino miyo iŋeo wunu ni an a Rwot, ka ce ayabo lyel ame yam oyikowu iye, ate miyowu ya malo, wun jona. Abino keto Cuny Acil i yiwu, eka ite cako bedo wunu kwo, ate ketowu daŋ i lobowu ikome. Mannono bino miyo iŋeo wunu ni an a Rwot. An atyeko ciko ni abino timo, daŋ abino timo, Man kop ame Rwot okobo.” Rwot dok te kop keda, kun kobo ni, “Wot a dano we, Kwany abiro moro me yat, ite coyo kome ni, ‘Pi loc a jo Juda’. Ite kwanyo dok abiro okene, ite coyo kome ni, ‘Loc a jo Icrael’. Kwany abiro aryo-nono imak i ciŋi, me gin aryo luŋ onen acalo abiro acel. Ka ce joni bino penyi ni, ‘Mom itwero nyuttiwa te kop me gin ame itimo-nono?’ Yin myero ikobbigi ni, ‘Rwot Obaŋa okobo kop man ni: Nen ba, an aceggi kwanyo abiro ame ocuŋ pi jo Icrael, ate keto karacel abiro ame tye pi jo Juda. I kom abiro aryonono, abino miyo doko abiro acel keken an ate mako i ciŋa.’ “Mak abiro aryo ame ico komginono i ciŋi, mi lwak nengi. Kobbi lwak kop man ame Rwot Obaŋa okobo: Nen ba, abino kwanyo jo Icrael i akina rok ocele kan ame gin tye iye, abino cokogi i kabedo ducu ame gin tye iye, ate kelogi i lobogi i komgi; abino miyogi odoko rok acel, i lobogi-nono, i wii kiddi me Icrael, dok abaka acel en a bino loyogi luŋ. Gin mom dok bino medde bedo rok aryo apapat, dok daŋ mom obino medde bedo i te loc aryo. Mom dok obino medde jebere kengi i cal jogi, akadi kit balloro ocele, abino larogi i yo luŋ ame yam gin opoto iye, kun otimo kit bal apapat, ate lonyogi bedo acil. Gin bino bedo jona, an abino bedo Obaŋagi. “Amirona Daudi en ame bino bedo abaka ame loogi; gin luŋ obino bedo akwat acel. Obino lubo ginnoro luŋ ame an aciko, kun daŋ ogwokere i lubo cikka. Gin bino bedo i lobo ame rik kwarigi obedo iye, ame rik amio baŋ amirona Yakobo. Gin karacel kede itinogi kede ikwaegi bino bedo kuno nakanaka, dok amirona Daudi en ame bino bedo rwot ame loogi atwal. Abino cikere kedgi cikere me kuc, cikerena kedgi-nono bino bedo cikere ame bedo nakanaka, abino miyogi winyo, ate miyogi nya, ate keto ot me wora i akinagi, ame bino bedo iye atwal. Kan ame an abino bedo iye, abino bedo i akinagi, an abino bedo Obaŋagi, gin obino bedo jona. Mannono bino miyo rok ocele ŋeo ni an a Rwot en ame alonyo jo Icrael, ka ce kabedona acil tye akinagi nakanaka.” Rwot dok te kop keda, kun kobo ni, “Wot a dano we, koŋ dok i lokere inen Gog, ame tye i lobo me Magog. En obedo aloc adwoŋ ame loo rok apapat ame tye i Mecek, kede Tubal. Rab kop i kome, kun ikobo kop man ame Rwot Obaŋa okobo: Nen ba, an atye i kop i komi yin Gog, yin ame ibedo Rwot adwoŋ ame loo rok apapat ame tye i Mecek, kede i Tubal. Abino lokki ineno ŋei, ate rwako golo me rec i cwaki, ate wayi kede karacel i monnyi, kede aguragurani, kede oryem aguragurani, kun gin luŋ oruko jami me lweny, dok lwak jo adwoŋ meicel, dok gin luŋ omako nyony me geno kor kede kwode kede pala lwenyogo ame ameny amenya. Jo ame oya i Pacia, Eciopia, kede Libia, daŋ tye baŋi kuno kun gin luŋ daŋ otye i kwode kede tok nyonyo me geno wigi. Olweny luŋ ame oya i lobo me Gomer, kede en ame oya i Bet-togarma, ame tye kannabor meicel tutuŋ anyarodi, daŋ tye baŋi kuno, karacel kede jo ocele ame oya i rok apapat. “Bed ame itere oko, kun itye ame iyikere oko karacel i monnyi luŋ, ame ocokere baŋi, kun gin luŋ otye i te gwokki. Ka mwaka doŋ okato bubup, kare bino tuno ame abino cikke me tero olweny i lobo ame jo obedo bedo iye aboŋo gin ame miogi lworo acalo lweny cakere i kare ame odwogogi cen i lobogi i akina rok ocele, en bino cobo lweny i kom kiddi me Icrael, ame onwoŋo obedo acalo wi obur kare alac, jo mere rik ote kela akela i akina rok ocele, cite aman doŋ gin luŋ obedo aber i kuc. Ibino mol wunu calo yamo kot, kun icalo wunu pol ame owumo piny, yin karacel kede monnyi, kede jo ame oya i rok apapat ame tye baŋi. “Rwot Obaŋa okobo kop man ni, I nino-nono kop bino bino i cunyi, ite cako paro pi timo timmogo areco i cunyi. Ibino cako moko tammi me cobo lweny i kom lobo ame konyere mom ame jo iye bedo mot i kuc, i kom boma mogo ame mom daŋ ocelo, dok ame mom daŋ tye kede gigi mogo me konyogi i kare me lweny. Ibino yako jami karacel kede jo ame bedo i boma mogo ame rik tye acalo wi obur, ame jo iye rik ocoko acoka i rok ocele, ame aman doŋ otye i leyi akwo karacel kede jami, ame jo mere bedo i cuny lobo. Ceba kede Dedan kede ocatwil Tarcic, kede luŋ ame tye iye, bino kobbi ni, ‘Ibino me bino yako jami? Icoko lwak jo a rom man me bino ye yo yec, me bino ye yo ryal kede jabu, me bino tero dok kede jami, me iyak jami abup meicel?’ “Pi mannono ba, wot a dano we, rab kop man ame Rwot Obaŋa okobo, ikobbi Gog ni, ‘I kare-nono ame jona Icrael bino bedo i kuc, yin ibino cako tugere keni, ite ya i kan ame itye iye i kannabor meicel i tutuŋ anyarodi, yin karacel kede jo apol ame oya i rok apapat, kun gin luŋ otye oriŋo aguragura, lwak mony adwoŋ dok ame tek meicel i lweny. Yin ibino bino wunu i komjona Icrael calo pol ame owumo piny; i kare ame mwaka doŋ okato alalac, an abino miyo ibino me bino lweny i kom jona, me rok ocele neka ce an abino tic kedi me nyuto ni an acil.’ “Man kop ame Rwot Obaŋa okobo: Man en ŋat ame rik an akobo kop i kome kare okato, kun amio omirona odwarpiny me Icrael kobo, ame gin obedo rabo kare alac, ni mannono an abino keli me bino lweny i komgi? Cite i nino-nono, i kare ame Gog bino bino me lweny i kom Icrael, akemona bino tugere. Man kop ame Rwot Obaŋa okobo. Pien i kare-nono, ame nyeko nwoŋo omaka, dok akemona daŋ doŋ olyeto meicel, abino rabo kop, lobo me Icrael bino yeŋere meicel i kare-naca. Rec ame tye i nam, winy ame twarre malo, leyi ame bedo i tim, jami luŋ ame lak alaka i lobo, karacel kede jo luŋ ame nwoŋo tye i wi lobo, gin luŋ komgi bino myel meicel i nyima. Kiddi luŋ bino rutte oko piny, ateni kiddi daŋ bino rutte oko piny dok apama moro luŋ ame tye daŋ bino rette oko piny. Abino miyo kit lworo moro luŋ bino i kom Gog, dok ŋat acel acel bino tiŋo jami lwennyere me neko ominnere. Man kop ame Rwot Obaŋa okobo, Abino cako ŋolo kop i kome i too edeke, kede to me pala lweny. Abino coro kot ager meicel, kede pee, kede mac, gweŋ kibiriti i kome karacel kede i kom monnyere, kede i kom rok ocele luŋ ame tye tutuŋ baŋe. Man bino miyo anyutti rok apol apapat twon tekona adwoŋ, kede kite ame acil kede. Mannono bino miyo gin oŋeo ni an a Rwot.” “Yin wot a dano we, rab kop i kom Gog, ikobbe kop man ame an Rwot Obaŋa akobo: Nen ba, an atye i kop i komi, yin Gog, yin i rwot adwoŋ ame loo rwode ame tye i Mecek kede i Tuban. Abino miyi ilokere ineno ŋei, ate cako ryemi wot anyim, ate keli i lobo ame tye kannabor, tutuŋ anyarodi, ate teri me wot cako lweny i kom kiddi me Icrael. Abino goyo akud ateroni oko i ciŋi tuŋ cam, ate miyo ateroni oony oko luŋ i ciŋi tuŋ cem. Ibino to i wi kiddi me Icrael kuno, yin karacel kede monnyi, kede rok ocele luŋ ame tye tutuŋ baŋi. Abino miyo kit winy apapat camo komi, leyi me tim daŋ bino mwodowu. Komwu bino radde i dye bar ata; pien an a Rwot Obaŋa doŋ atyeko kobo. Abino cwalo mac i wi kidi me Magog, karacel kede i kom jo ame bedo i kuc i lobo ame tye i dog nam; gin bino ŋeyo ni an abedo Rwot. “Abino miyo nyiŋa acil ŋeye i akina jona Icrael, mom dok abino ye ni bal nyiŋa kadi acel, dok rok ocele bino ŋeyo ni an a Rwot, ŋat Acil me Icrael. Nen ba, nino ame akobo-nono, tye abino, abino miyo bino. Man kop ame Rwot Obaŋa okobo. “Jo ame bedo i boma luŋ me Icrael, bino wot, te wot coko jami lweny ame jo oweko. Gin bino moko mac, kun okuto i kwode akud atero, atero, pale, kede toŋ, ame maccere romo lyel pi mwaka abiro twal. Gin mom dok bino coko yen ame tye i dye poto, akadi toŋo en ame tye i buŋ, pien gin bino kuto macgi ka i jami me lweny keken. Gin bino yako jami a jo ame yam koŋ oyako daŋ jamigi, Man kop ame Rwot Obaŋa okobo. “I nino-nono abino miyo Gog kabedo mere me yike iyi Icrael, i luŋ ame olwoŋo ni luŋ Owot ame tye tutuŋ kide me Nam me kado ame geŋo owot. Gog karacel kede monnyere luŋ obino yikogi kuno, eka luŋŋono ote doŋ lwoŋo ni, ‘Luŋ a mony a Gog.’ Jo Icrael bino bedo yiko komgi pi dwete a romo abiro twal, me wek lobogi bed lobo ame cil. Ŋat acel acel ame tye i lobo-naca bino konyo tic me yiko komgi, dok obino worogi pi tic man ame gin otio, dok abino nyuto kwogona iye. Man kop ame an Rwot Obaŋa atyeko kobo. I kare ame dwete abiro doŋ otyeko tum oko, obino yero jo mogo me be bea i lobo-nono, me wek ka gin onwoŋo komjo mogo ame mom oyiko, oyik oko, me wek omi lobo bed acil. I kare ame jo-nono tye ka be bea i lobo, ka ce ŋattoro i kingi ocop i cogo kom ŋattoro, en keto ginnoro me nyuto ni cogo kom dano tye kannono, tuno waŋ ame okuny bur obino te kwanyo cogo kom danonono wot yiko i Luŋ me mony a Gog. Boma moro tye ame ceggi i kuno daŋ ame olwoŋo ni Kamona, mannono en kite ame gin bino lonyo kede lobogi bedo acil. “Aco yin wot a dano we, Rwot Obaŋa okobo ni, Kob kop baŋ kit winy luŋ kede leyi me tim luŋ ni, ‘Cokere wunu i kabedo ducu, me ibin icam wunu arama me ecuban ame ayiko pirwu twon ecuban moro adwoŋ meicel, ame ayiko i wi kiddi me Icrael, kan ame ibino camo wunu iye riŋo, dok daŋ ibino mato wunu iye remo, Ibino camo wunu riŋo kom jo mogo ame onwoŋo tek meicel i lweny, ite daŋ mato wunu remo a rwode apapat me wi lobo ame gin luŋ obino nekogi calo itino rommi, onyo nyogi rommi kede nyogi dyegi onyo twoni dokkogo ame ocwe, kun gin luŋ otye acalo leyi ocwe me Bacan. Ibino camo wunu riŋo tuno wan ame yiwu doŋ oden, dok daŋ ibino mato wunu remo te merowu oko iyi ecuban ame an ayiko pirwu. I mejana ame ayiko pirwu-nono ibino yeŋ wunu i remo aguragura, onyo kom oryem aguragura, riŋo kom twoni jo mogo ame tek meicel i lweny, karacel kede riŋo kom ocirikale ducu.’ Man kop ame Rwot Obaŋa okobo. “Mannono bino miyo aketo kwogona i akina orok, rok apapat luŋ te neno kop ame an aŋolo, kede ciŋa ame atimogi kede lit. Cakere i nino-nono wot kede anyim, jo Icrael bino ŋeyo ni an a Rwot Obaŋagi, Dok rok ocele bino ŋeyo ni rik oterogi iyi opii pi balgi kede timogo me idwali ame gin obedo timo i koma, an alokkigi ŋea, ate miyo okwor makogi, jo apol i akinagi ote neko oko i pala lweny. Abedo tic kedgi kun alubo kitegi ame mom cil, kede balgi, ate pono gira oko i waŋgi. “Mannono omio Rwot Obaŋa okobo kop man ni, ‘Aman doŋ abino dwoggo kuc a Yakobo, kica te maka i kom jo me ot Icrael luŋ, kun nyeko maka pi nyiŋa acil. Wigi bino wil oko i kom lewic ame onwoŋo gin tye kede, kede timmogo me idwali, ame gin obedo timo i koma, ka doŋ gin bino cako bedo i kuc i lobogi aboŋo ŋattoro ame miogi lworo. Abino dwoggogi cen i akina rok apapat ame gin tye iye, i lobo okworgi, kun atio kedgi me nyuto ni an acil i nyim rok ocele luŋ. Mannono bino miyo gin oŋeo ni an a Rwot Obaŋagi, pien acwaogi iyi opii akina i rok ocele, ate dok cokogi dwoggogi cen i lobogi ikomgi. Mom abino weko ŋattoro i akinagi doŋ i rok ocele. I kare ame abino onyo Cunya Acil i kom jo me ot Icrael, mom dok abino medde ponnigi kadi acel.’ Man kop ame Rwot Obaŋa okobo.” I nino dwe apar me mwaka anyen, i mwaka me pyeraryo wie abic, ame onwoŋo wan doŋ oterowa oko iyi opii, i mwaka me apar wie aŋwen, ame onwoŋo doŋ otyeko mako Jerucalem oko, i nino-nono ikome awinyo teko Obaŋa tye i koma, ame te kwanya tera oko teŋe i anyut ame Obaŋa onyutta-nono te tera naka iyi Icrael, te wot ciba i wi kidi moro abor meicel. I ŋea kuno ate neno gedo mogo ame oradde atata, ame nen caloboma. I kare ame anoko ceggi, ate neno lo moro ame kome nen calo mola ame ameny. Dano-nono onwoŋo omako tol kede ogada me pimo jami i ciŋe, kun tye ocuŋ i dogcel me boma. Dano-nono te kobba ni, “Wot a dano we, koŋ doŋ inen kede waŋi, dok daŋ iwiny kede yiti, ite keto cunyi i kom ginnoro luŋ ame an abino nyutti, pien okeli kan ni mannono an abin anyuttigi. Myero ŋeli ni ikobo ginnoro luŋ ame ineno baŋ jo Icrael.” Nen ba, ginnogo ame aneno onwoŋo obedo ot Obaŋa ame cel ame ogero apama oguro oko dyere. Dano-nono te kwanyo ogada ame onwoŋo tye i ciŋe, ame borrere onwoŋo tye futi apar, eka te pimo kede apama cel. Borrere malo onwoŋo tye futi apar, kun lac a kor apama tye daŋ futi apar. Danonono te ya wot i doggola ame tye tutuŋ kide, En te wot malo kun woto kede rwom me dogcel, i malo kuno en te pimo dogcel me boma, ame borrere onwoŋo tye daŋ futi apar. Iyi doggola kuno onwoŋo tye icika adek adek tuŋŋi i tuŋŋi kede yo ame beo i akinagi. Icika acel acel borrere romo futi apar, laccere daŋ futi apar. Apama cel ame poko kin icika acel acel laccere onwoŋo tye futi aboro. Ka doŋ ikato icika adek adek-ca ite doŋ medo wot futi apar ocele ite tuno iyi icika moro alaccere ame tye i nyim ot Obaŋa. En te pimo icika alaccono te nwoŋo ni tye futi apar wie aryo. Kannono obedo tyelo iyi agikki dogcel tutuŋ dyekal me ot Obaŋa. Dit me kom apama me tuŋ yie onwoŋo romo futi aryo. Icika adek adek ame onwoŋo tye i dogcel me tuŋ kide tuŋŋi i tuŋŋi, gin luŋ ditogi onwoŋo rorom apama cel ame onwoŋo opokogi daŋ onwoŋo rorom. Dano-nono dok te pimo lac me yo ame beo iyi dogcel, te nwoŋo ni romo futi pyeraryo wie aryo, eka lac me doggola ikome onwoŋo tye futi apar wie abicel. I nyim icika tuŋŋi i tuŋŋi onwoŋo tye iye apama moro acecek ame romo iŋcec pyeraryo. Lac icika magi onwoŋo tye futi apar apar, borgi daŋ futi apar apar. En dok te pimo lac me dogcel ari ame ya iyi icikaacel tuno kede iyi en ocele ame otemere kede, kun beo i doggolagi, onwoŋo tye futi pyeraŋwen. Te dok pimo ici ka alac ame tye i agikki mere, te nwoŋo ni laccere tye futi pyeradek wie aryo. Cakere i tuŋ nyim dogcel ame tye oko kan ame odonyo iye tuno iyi agikki ici ka alac ame tye tyeloborrere luŋ onwoŋo tye futi pyeraboro. Dirica onwoŋo tye iyi icika luŋ i apama cel ame i oko mere, kede i apama cel ame pokogi, kede icika alaccere daŋ. Dirica-nono onwoŋo nen atitino i oko, cite iyi ot onwoŋo lac. I apama cel ame poko icika onwoŋo ogoro iye cal yen otit. Dano-nono dok te tera i dyekal me ot Obaŋa ame tye i oko mere. I kor apama me dyekallono onwoŋo tye icika apapat ame romo pyeradek, kun icika acel acel okubere i wadgi, dok i nyim icika acel acel opepeto iye gweŋ apada ame omano dyekal amana. Gweŋ ame opepeto-nono obedo i ŋet dogcel ducu kun laccere rom i bor me dogcel. Man onwoŋo gweŋ ame opepeto i dyekal me tuŋ pinnyere. Dano-nono dok te pimo bor a piny cakere kede i nyim dogcel ame tye tuŋ piny tuno kede i nyim dogcel me dyekal i yie, te nwoŋo ni romo futi mia acel i pyeracel. En dok te telo nyima me wot tutuŋ anyarodi, kuno onwoŋo tye iye dogcel ame nyime oneno tutuŋ anyarodi, i dyekal me oko. En te pimo borrere kede de laccere. Icika atitino adek onwoŋo tye i yie tuŋŋi i tuŋŋi, kun apama daŋ tye ame opopokogi. Lac kede bor icika kede me apama ame opokkigi kede me icika alaccere rom aroma i en ame tye i tuŋ kide. Bor a dogcel luŋ onwoŋo tye futi apyeraboro, kun laccere tye futi pyeraŋwen. Icika alaccere, dirica luŋ a tye iye, kede cal yen otit ame onwoŋo tye okwogo kede, onwoŋo daŋ rom aroma i en ame tye tutuŋ kide, dok rwom abiro apapat daŋ onwoŋo tye me yito malo naka i dogcel, eka icika alaccere te bedo i agikki mere kun otemere i dyekal. I nyim dogcel ame tye tutuŋ anyarodi onwoŋo tye iye doggola ocele mere ame kato i dyekal i yie, kite ame tye i maca ame tye tutuŋ kide. Danonono dok te pimo bor ame tye i akina dogcel aryo-nono luŋ, te nwoŋo tye futi mia acel i pyerabicel. En dok te kwanya tera tutuŋ anyarolum. I kuno daŋ dok ate neno dogcel okene. En te pimo icika atino mege, kede apama ame opopokogi kede icika alaccere, te nwoŋo ni gin luŋ orom aroma i en ocele mege ame egeo pimo, Dirica daŋ onwoŋo tye iyi icika atitino ame onwoŋo tye i dogcel kite ame onwoŋo iyi maca ocele-ca, dogcellono daŋ borrere onwoŋo tye futi pyeraboro, laccere futi pyeraŋwen. Rwom abiro daŋ onwoŋo tye me yito malo i dogcel, icika alaccere daŋ te bedo agikki mere ame otemere i dyekal. Cal yen otit daŋ onwoŋo tye ame okwogo kene kor apama me yie, kede acel tuŋ cel. Dogcel ocele onwoŋo tye tutuŋ anyarolum ame kato i dyekal i yie. Dano-nono daŋ te pimo bor ame tye i akina dogcel aryo-nono luŋ, te nwoŋo ni tye futi mia acel i pyerabicel. Dok te tera naka i dyekal ame tye i yie kun obeo i dogcel ame tye tutuŋ anyarolum. En te pimo dogcellono te nwoŋo ni rom aroma i en ocele-ca. Icika atitino ame tye i ŋete kede icika alaccere, karacel kede apama mere me yie kuno, onwoŋo rom aroma i en ocele-ca, dirica onwoŋo tye iyi icika mere atitino kede i icika alaccere; dogcellono daŋ borrere onwoŋo tye futi pyeraboro, laccere daŋ futi pyeraŋwen. Icika ocele daŋ onwoŋo tye i ŋete ame borgi futi pyeraŋwen, lacgi futi aboro. Icika alac ame onwoŋo tye iye onwoŋo otikere i dyekal alac ame onwoŋo tye oko, cal yen otit daŋ onwoŋo tye ame okwogo kede kor apama me yie. Rwom ame woto i dogcel onwoŋo tye aboro. En dok te tera naka i dyekal ame tye i yie tutuŋ kide, eka te pimo dogcel te nwoŋo ni laccere kede borrere rom aroma ked kede en ocele-ca. Icika atitino mere kede apama ame opokogi kede icika alaccere, lacgi kede borgi rom aroma i en ocele-ca. Dirica onwoŋo tye iyi icika mere atitino kede iyi icika alaccere; dogcellono daŋ borrere onwoŋo tye futi pyeraboro, laccere futi pyeraŋwen. Icika alac ame onwoŋo tye iye onwoŋo otikere i dyekal alac me oko. Cal yen otit daŋ onwoŋo tye ame okwogo kede kor apama me yie, acel tuŋ cel kede acel tuŋ cel; Rwom ame woto i dogcelli onwoŋo tye aboro. Dok te tera i dogcel ame tye tuŋ anyarodi. En opimo te nwoŋo ni borrere kede laccere rom aroma i en ocele-ca. Icika atitino mere, kede apama ame opopokogi kede icika alaccere, lacgi kede borgi onwoŋo daŋ rom aroma i en ocele-ca. Dirica onwoŋo tye iyi icika mere atitino; dogcellono daŋ borrere onwoŋo tye futi pyeraboro, laccere te bedo futi pyeraŋwen. Icika alac ame onwoŋo tye iye onwoŋo otikere i dyekal alac me oko, cal yen otit daŋ onwoŋo tye ame okwogo kede kor apama me yie, acel tuŋ cel, kede acel tuŋ cel. Rwom me yito malo dogcellidaŋ onwoŋo tye aboro. I dyekal i oko mere onwoŋo tye iye icika moro ame doggola mere woto iyi icika alaccere ame otikere i dyekal i oko. Mannono obedo kan ame rik olwoko iye riŋo leyi ame oneko me mot awaŋa ame owaŋo alutu. Iyi icika alac me dogcel onwoŋo tye iye meja aŋwen, aryo tuŋ cel, aryo tuŋ ocele. I meja magi en ame oneko iye leyi ame oyalo Obaŋa, kadi bed leyi ame oyalo Obaŋa calo mot awaŋa, onyo mot me kwanyo bal, onyo me walakino i roc, gin luŋ rik onekogi i maja magi. I ŋe icika-nono, i oko mere, daŋ onwoŋo tye iye meja aŋwen, aryo onwoŋo tye i dogcel me donyo ame tye tutuŋ anyarodi, aryo daŋ tuŋ ocele. Meja aŋwen onwoŋo tye iyi icika kede meja aŋwen onwoŋo tye oko, ame gin luŋ te bedo meja aboro; gin luŋ onwoŋo tye me neko leyi ame oyalo kede Obaŋa. Meja aŋwen onwoŋo tye me yiko mot ame myero wan alutu, ame gin meja-nono otio kede gweŋ ame opao, borgi malo onwoŋo tye iŋcec pyeraryo, lac me wie te bedo iŋcec pyeradek i twoke aŋwen ducu; jami luŋ ame rik otio kedgi me yalo Obaŋa-ni, gin luŋ rik obedo i wi meja magi. Golo mogo ame lacgi tye iŋcec aŋwen aŋwen, onwoŋo tye i lak mejanono luŋ, ame oromo aroma niirit. Rujo luŋ ame onwoŋo rik myero mi acalo mol, rik oketo i wi meja. Dano-nono dok te tera i dyekal ame tye i yie. Onwoŋo tye iye icika moro kuno i ŋet dogcel ame tye tutuŋ anyarodi; doggola mere okemo tutuŋ anyarolum. Icika ocele ame onwoŋo romo aroma i mannono onwoŋo daŋ tye i dogcel ame tye tutuŋ anyarolum, kun kemo tutuŋ anyarodi. Dano-nono rik te kobba ni, icika ame kemo tutuŋ anyarolum onwoŋo tye pi olamdog ame tio ticgi i ot Obaŋa, kede icika ame onwoŋo kemo tutuŋ anyarodi, onwoŋo tye pi olamdog ame onwoŋo tio tic pi keno lam. Gin luŋ onwoŋo obedo ikwae a Jadok; gin keken i akina ikwae a Levi ame onwoŋo oyeyigi me wot tic i nyim Rwot ikokome. Dano-nono dok te pimo dyekal ame tye iyie, te nwoŋo borrere tye futi mia acel kede pyerabicel, laccere daŋ futi mia acel kede pyerabicel. En dok te tera i doggola ame donyo i ot Obaŋa. En te pimo doggola me donyo iye, te nwoŋo borrere tye futi aboro, laccere futi pyeraryo wie adek, eka lac apama mere te bedo futi abic. Icika ame tye i doggola onwoŋo borrere tye futi pyeradek wie aryo, eka laccere ŋolo dyere te bedo futi apar wie aboŋwen, kun rwom me yito malo daŋ tye ame romo apar. Pagi daŋ onwoŋo tye i ŋet kika, tuŋŋi i tuŋŋi. Dano-nono dok te tera iyi icika ame tye i dyere. En te pimo yo ame woto iye, te nwoŋo borrere tye futi apar, kun laccere tye apar wie abicel, lac apama te bedo futi aboro, tuŋŋi i tuŋŋi. En dok te pimo icika i dyere-nono, te nwoŋo borrere tye futi pyerabicel wie aŋwen, laccere futi pyeradek wie aryo. Te kato keda doŋ iyi icika me agikki mere, En te pimo yo ame woto iye, borrere onwoŋo tye futi adek, laccere futi apar, kun lac a kor apama tuŋŋi i tuŋŋi tye futi apar wie acel. En dok te pimo icika me agikki-nono ame laccere kede borrere onwoŋo tye futi pyeradek wie aryo, En dano-nono te kobba ni, “Man en ame doŋ obedo Kabedo Acil Meicel.” En dok te pimo lac a kor apama me ot Obaŋa, te nwoŋo tye futi apar. I kor apama me ot Obaŋa-ni luŋ rwomere irit, onwoŋo tye iye icika mogo ati tino, ame lacgi onwoŋo tye futi abicel. Icika magi onwoŋo okubere akuba i wi wadgi adek adek, kun tye icika pyeradek pyeradek iyi acel acel. Lac a kor apama i malo mere woto kun doko atitidi, me wek pe mi peko baŋ apama ame tye piny. Rwom onwoŋo tye i oko mege me yito malo icika i malo mege ame tye i kor apama me ot Obaŋa. Pi icika magi ame tye i malo-ni, omio kor apama me ot Obaŋa nen i oko ame rom aroma naka malo. Mannono onwoŋo mio bedo yot meicel me yito malo i icika i dyere kede icika me agikki. Ate neno ni kabedo ame oguro ot Obaŋa otiŋere malo ame kato kabedo luŋ ame tye i ŋete i futi apar, kun rom aroma kede acakki me te icika ame tye i kom apama cel me ot Obaŋa, kabedo luŋ ame tye i ŋete i futi apar, kun rom aroma kede acakki me te icika ame tye i kom apama cel me ot Obaŋa. Lac a kor apama ame tye oko, me wudi atitino ame tye i kom apama cel me ot Obaŋa, onwoŋo tye futi aboro, tye daŋ kan ame onwoŋo oweko obedo a twolo, ame oguro ot Obaŋa, ame laccere onwoŋo tye futi pyeradek wie aryo, cakere i bur me mola a pii tuno kede i udi ame olamdog tio kede, yo onwoŋo tye acel ame woto iyi icika ame tye iyi apama cel me ot Obaŋa i tutuŋ anyarodi, kede yo acel ame tye ame woto iyi icika ame tye tutuŋ anyarolum, Bur me mol a pii ame tye i ŋet ot cel me ot Obaŋa, laccere onwoŋo tye futi aboro. Ot ame onwoŋo otikere i dyekal me ot Obaŋa, ame tye tutuŋ to, laccere onwoŋo tye futi mia acel apar wie aryo i kom futi mia acel i pyeraŋwen wie aŋwen. Lac a kor apama mere onwoŋo tye futi aboro. Dano-nono dok te pimo ot Obaŋa i oko mere, te nwoŋo borrere tye futi mia acel i pyerabicel, cakere i ŋe ot Obaŋa oko, ŋolo dyekal, kato naka tuŋ ocele, borrere daŋ onwoŋo tye futi mia acel i pyerabicel. Acoborrere i tutuŋ nyime, kun omedo kede kan ame oweko twolo, onwoŋo daŋ tye futi mia acel i pyerabicel. En dok te pimo tuŋ ocele mere ame odoŋ, karacel kede apama mere, te nwoŋo daŋ tye futi mia acel i pyerabicel. Icika ame tye i doggola me donyo i ot Obaŋa, icika adwoŋŋere, kede Kabedo Acil Meicel, onwoŋo ocano iye bao cakere i piny naka i waŋ dirica. Dirica-ni onwoŋo otwero cego oko. Apama me ot Obaŋa iyie cakere i piny wot kede naka malo kan ame doggola ogiki iye, onwoŋo tye iye callogo ame ogogo, cal okerubi, kede cal yen otit. Me agege onwoŋo tye cal yen otit, cal le te lubo, te bedo lubere amannono nakanaka romo. Okerrubi acel acel onwoŋo tye i nyime aryo, nyime ame cal i nyim dano onwoŋo tye tutuŋ kan ame cal yat otit tye iye, eka tuŋ ame cal atin eŋatu, te bedo tuŋ ocele ame daŋ yat otit tye iye, cal ame ogoo i kor apama-nono onwoŋo tye kittono romo kor apama luŋ. Cakere i dye ot tuno kede naka kan ame doggola ogik iye, yen me doggola me icika adwoŋŋere, borgi kede lacgi onwoŋo rorom. I nyim kabedo Acil Meicel, onwoŋo tye iye ginnoro ame nen calo, keno lam ame opao apaa i bao. En dano-nono te kobba ni, “Man en meja ame bedo i nyim Rwot.” Doggola onwoŋo tye ame woto iyi icika adwoŋŋere, kede doggola ocele ame woto i Kabedo Acil Meicel. Kika me doggola-nono onwoŋo tye aryo aryo karacel, ame kika mere dolle dok tuŋ cel, acel daŋ dolle dok tuŋ ocele. Kika me doggola-nono onwoŋo ogoro iye cal otit kede cal okerubi, kite ame ogoro kede i kor apama. Dok daŋ onwoŋo tye gin me cego ame owumo i bao i nyim icika ame tye i doggola i oko mere. Dirica daŋ onwoŋo tye i kor apama me ottono, kun kor apama daŋ okwogo i cal yen otit. Dano-nono dok te kwanya tera oko i dyekal ame icika atitino tye iye, naka ot ame tye tutuŋ anyarodi. Bor a ot ame ogero icika atitino-nono, ame onwoŋo tye tutuŋ anyarodi-nono, onwoŋo tye futi mia acel i pyerabicel, laccere futi pyeraboro. I ŋete tuŋ cel otikere i kabedo ame oweko twolo i ŋet ot Obaŋa ame laccere onwoŋo tye futi pyeradek wie aryo, eka tuŋ ocele te tikere i kan ame opepeto iye gweŋe ame tye i dyekal i oko. Ottere onwoŋo ogero ame okubere akuba i wadgi adek, kun en i malo mere tye cen ame kato en i tere. I nyim icika-nono onwoŋo tye iye yo ame beo i yie, ame borrere tye futi mia acel i pyerabicel, laccere te bedo futi apar wie abicel, kun doggola luŋ me donyo iyi icika tye tutuŋ anyarodi. Icika ame tye malo onwoŋo tino ame kato en ame tye malo kede en i pinnyere, pien baraja ame i nyimgi, omio kabedogi obedo diŋ akato en i tere, en i dyere-ni daŋ obedo tino akato en i piny-ny pi yo ame i nyimgi. Pien icika-nono onwoŋo okubere akuba i wi wadgi adek, kun pagi moro mom me konyogi, acalo pagi ame tye i dyekal i oko. Apama onwoŋo tye i oko, ame owoto karacel kede icika. En apamanono tye tutuŋ dyekal i oko, kun otikere icika ocele, borrere tye futi pyeraboro, pien ot icika ame tye i ŋet dyekal i okoborrere onwoŋo daŋ tye futi pyeraboro, kun en ame otikere i ot Obaŋa borrere onwoŋo tye futi mia acel i pyerabicel. I te icika-ni piny, i tutuŋ kide, onwoŋo tye iye doggola ame odonyo iye kun nwoŋo obeo i dyekal i oko, kan ame apama i oko ocakere iye. I tutuŋ anyarolum, ame otikere kede dyekal ame yie nono, kan otikere daŋ i gedo ocele-ca, onwoŋo daŋ tye iye icika mogo ame ogegero. I nyim icika-nogo onwoŋo tye iye yo me beo ame rom aroma i en ame tye tutuŋ anyarodi. Borgi kede lacgi onwoŋo dok otio a rom aroma i maca ocele-ca, anaka kit gedo mere luŋ, kun doggola luŋ ame tye iye daŋ rom aroma i macanaca. I te icika ame tye i tutuŋ anyarolum, doggola me donyo tye iye tutuŋ kide, kan ame odonyo i ye ame beo i yie, kun daŋ otikere apama. Dano-nono te kobba ni udi ame tye tutuŋ anyarodi, kede udi ame tye tutuŋ anyarolum ame otikere kede dyekal yie nono odoŋ twolo, obedo icika ame cil, kan ame olamdog ame woto i nyim Rwot bino camo iye cam acil ame oyalo kede Rwot. Gin bino keto iye mot acil me yalo Rwot kuno, mot me moko kwoŋ, mot me kwanyo bal, kede mot me walakino i roc, pien kabedo-nono cil. Ka olamdog woto i kabedo acil, koŋ bino gonyo boŋŋigi ame oruko pi tic Obaŋa ote wekogi kuno, mom ote wot i dyekal ame tye oko ame tye pi lwak kun pwod oruko boŋŋi me arukagi, pien bonŋigi-nono nwoŋo cil. Gin bino ruko boŋg ocele, kun mom ru gin onoko icika ame obedo me a lwak ducu. I kare ame dano-nono otyeko pimo gin ducu ame tye iyi apama cel ame oguro ot Obaŋa i yie, en te tera oko kun obeo i dogcel ame tye tutuŋ kide, en te wot pi mo ot Obaŋa i oko kuno. En te pimo i tutuŋ to, kun pimo kede ogada, te nwoŋo borrere tye futi mia aboro. En dok te lokere wot pimo cel ame tye tutuŋ anyarodi, te nwoŋo borrere daŋ tye futi mia aboro. Dok te lokere wot pimo en ame tye i tutuŋ anyarolum, borrere daŋ onwoŋo tye futi mia aboro. En dok te wot pimo en ame tye tutuŋ to, te nwoŋo borrere daŋ tye futi mia aboro, En opimo twoke aŋwennono luŋ, ame onwoŋo apama cel oguro oko dyere, ame borgi onwoŋo ducu rom aroma futi mia aboro i kom mia aboro. Apama cel onwoŋo tye me poko gin ame cil kede gin ame mom cil. Icennere dano-nono dok te kwanya oko i dogcel ame tye tutuŋ anyarodi, te tera naka iyi icika atitino ame tye i nyim dyekal ame yie nono ame tye i ŋet ot Obaŋa, naka i gedo ame tye tutuŋ anyarodi. Nen ba, kwogo Obaŋa me Icrael te ya bino i tutuŋ kide, ŋur me bino mere onwoŋo calo pii ame amol atek. Kwogo mere rik te memenya meicel. Anyut ame onwoŋo onyutta-nono, onwoŋo rom aroma kede anyut ame rik aneno i kare ame en bino me bino baloboma me Jerucalem, dok onwoŋo daŋ rom aroma kede anyut ame aneno i ŋet kulo me Kebar. I kare ame aneno ate rette piny aryeba cuny. I kare ame kwogo a Rwot obino i ode, kun donyo i dogcel ame tye tutuŋ kide. Cuny Rwot rik te tiŋa malo, te tera naka iyi dyekal i yie i nyim ot Obanga. Nen ba, atene no kwogo Obaŋa oromo yi ot Obaŋa oko. I kare ame dano-nono tye ocuŋ i laŋeta, awinyo ŋattoro tye akop keda, kun en dano-nono tye i ot Obaŋa. En dano-nono okobba ni, “Wot a dano we, man en kabedo ame kom me locca tye iye, kede kan ame kom me cibo tyene tye iye, kan ame abino bedo iye i akina jona Icrael nakanaka. Ka ce jo Icrael mom dok bino balo nyiŋa acil, gin onyo obakkigi, pi timgi me alaya, karacel kede i kom obakkigi ame oneko aneka. Ka ce obakkiwu mom ogero gweŋ me doggola me donyo i paccigi, kede yen me doggolagi, i ŋet en ame tye i ot me wora, ame te miyo apama keken en ame te poko akinawa. Gin obalo nyiŋa acil i timgi me kwer ame gin obedo timo, ame te miya jwerogi oko i kare ame akemo maka. Aman myero gin doŋ wek timgi me alaya-nono oko, dok daŋ okwany kom obakkigi ame oto oko i oda. Mannono bino miyo an abedo i akinagi nakanaka. “Doŋ yin wot a dano we, titti jo Icrael kop i kom oda, tittigi kite ame cal kede, kede yik ame tye pire, me lewic makgi pi balgi. Ka ce lewic omakogi pi ginnoro luŋ ame gin obedo timo, tittigi yik ame otye kede pi ot me wora, kite ame ogero kede, karacel kede cik ducu ame mako me wora. Coyigi kop ame itittigi-nono luŋ piny, ame mio gin oromo neno ked wangi kite ame oyiko kede, ote lubo cik ducu kakare. Man en cik ame mako ot me wora, rok luŋ ame tye i wi kidi ame ceggi i kan bino bedo acil meicel. Nen ba, man en cik amako ot me wora. “Man en kite ame bor kede lac a keno lam tye kede kun nwoŋo otio i gin ame opimo i ot me wora. I te keno lam piny, mano amana ni rit, tye iye gin me molo pii, ame laccere tye incec pyeraryo, borrere daŋ iŋcec pyeraryo kun i lake tye iye okot ame borrere tye iŋcece abicel. Borrere malo ya i tere piny tye futi adek, cakere i lake tuŋ atidi mere tuno kede i lake tuŋ adwoŋŋere, alaccere tye iŋcec pyeraryo i kom futi abiro. Wie malo kan ame owaŋo iye mot me yalo Obaŋa, tye daŋ futi abiro. Twoke aŋwen ducu tye malo ame kato kan ocele mege. Wi keno lammono i malo mere, twoke aŋwen ducu rorom kun twoke acel acel tye iŋcec pyeraryo. Dyere mere daŋ tye arorom, borrere tye futi pyeraryo wie adek, laccere daŋ amannono. Rwom ame oyito kede malo i wi keno lam tye tutuŋ kide.” Rwot Obaŋa dok te kobba ni, “Wot a dano we, magi en cik ame mako keno lam: Nino ame doŋ otyeko iye keno lam me waŋo mot awaŋa, kede me cocoro re mo me yalo Obaŋa iye, yin ibino miyo twon acalo mot me kwanyo bal, baŋ alamdog ame obedo dano me Levi, dok ame dano me doggola a Jadok, ame twero noko ŋeta me tic i nyima. Ibino kwanyo remo me twonnono aduno, ite totono i tuŋ keno lammono aŋwen ducu, kede i tuŋe aŋwen daŋ ducu, me dul enok lam i dyere. Mannono en kite ame ibino lonyo kede keno me lam me kwanyo bal i kome, Ibino daŋ kwanyo twon me kwanyo bal, eka ite cako waŋo i kabedo ame ciko pi tic ame dok i kom ot me wora, oko i ŋe kabedo acil. I nino me aryo mere, ibino miyo mot me nyok ame balloro mom i kome, acalo mot me kwanyo bal, eka ite lonyo kede keno lam ame rik olonyo kede i remo me twon. I kare ame doŋ ityeko tiyo tic me lonyo keno me lam, ibino doŋ cako yalo iye twon a mom i roccoro i kome, karacel kede nyok, romo ame okwanyo i akina rommi ame roccoro mom i komgi. Ibino miyo gin luŋ i nyim Rwot, alamdog te pwopworo kado i komgi, te doŋ waŋogi i keno me lam i nyim Rwot acalo mot awaŋa. Pi nino abiro ibino bedo miyo dyel acel acel i nino acel acel, acalo mot me kwanyo bal, kede dok twon, kede nyok romo, gin luŋ myero bed aboŋo roccoro i komgi. Gin bino tiyo tic me kwanyo bal i kom keno me lam pi nino abiro, eka keno me lam doŋ te lony bedo acil, ote doŋ kwero pi ticcoro. I kare ame doŋ nino abiro-ni otum, cakere i nino me aboro wot kede anyim, olamdog doŋ bino bedo waŋo mot awaŋa i wi keno lam, kede mot me kweyo cuny, an abino gamowu. Man kop ame Rwot Obaŋa okobo.” En dok te tera naka i dogcel me kabedo acil, ame tye oko i tutuŋ kide. Dogcellono onwoŋo ocegere oko, En te kobba ni, “Dogcel man bino medde bedo ame ocegere oko kun mom oyabo, dok ŋattoro daŋ mom bino beo iye, pien Rwot ame obedo Obaŋa me Icrael onwoŋo obeo iye; mannono omio bino medde bedo ame ocegere acega. Aloc keken en ame twero bedo iye pi camo ogati i nyim Rwot. En bino donyo i dogcel kun beo iyi icika alac te daŋ donnyo oko kun beo i yo acellono.” Dano-nono te dok kwanya tera i nyim ot Obaŋa, kun beo i dogcel ame tye tutuŋ anyarodi. I kare ame otye kuno, aneno ot a Rwot, ate neno kwogo Obaŋa opoŋ apoŋa i yie, an ate rette oko piny aryeba cuny. Rwot te kobba ni, “Wot a dano we, keto cuny me neno ginnoro luŋ ame waŋi oneno kede me winyo ginnoro luŋ ame yiti owinyo, An akobbi cik kede icwil luŋ ame mako ot me wora, myero iniaŋ aber jo ame cik yeyigi me donyo i ot me wora, kede jo ame cik mom yeyigi me donyo i kabedo acil. “Kobbi jo Icrael ame maro jem-mi ni an Rwot Obaŋa me Icrael mom abino medde kanyo timgi mogo me kwer ame yam gin obedo timo. Gin yam obalo oda acil, pi miyo rok ame mom oliro komgi kede cunygi donyo iye, gin jo ame mom wora-nono odonyo i ot me wora i kare ame otye ayala i dwol kede remo ame obedo camma, yam obedo turo cikerena kun otimo tim me kwer. Gin yam mom obedo gwoko cik ame mako jamina acil, cite gin olunyo keto orok me loyo jami ame tye i oda acil. “Pi mannono an a Rwot Obaŋa, atititwu doŋ oko ni, mom tye arokkoro ame mom oliro kome kede cunye, i akina orok luŋ ame tye i akina jona Icrael ame bino donyo i kabedona acil. Jo Levi ame bino weka oko, ote gak i yo ocele, kun oworo cal jogi, i kare ame jo Icrael luŋ daŋ orwenyo, jo-nono bino kanyo can ame abino keto i komgi. Gin jo Levi en ame bino tiyo tic pira i kabedona acil, kun gin en ame loo dogcel luŋ me ot me wora, dok daŋ otio i ot me wora: Gin en ame bino ne ko leyi ame omio me mot awaŋa, karacel kede mot ocele ame omio pi lwak dok gin en ame bino bedo otic ame tio pi lwak. Ento gin en ame rik ocako tiyo tic pi jona me woro cal jogi, an doŋ atyeko kwoŋ pirgi ni gin obino kanyo can ame abino keto i komgi. Man kop ame an Rwot Obaŋa akobo. Gin mom obino noka ceggi me tic baŋa acalo olamdog dok daŋ mom obino noko gira moro acil, kede ginnoro ame cil meicel, cite gin obino yeyo lewicgi, pi timgi-mogo me kwer ame gin obedo timo. Kadi amannono an abino ketogi me loyo ot me wora, me tiyo tic ame tye iye, kede ginnoro luŋ ame myero oti iye. “Cite jo Levi ame gin obedo olamdog, ame gin obedo ikwae a Jadok, ame gin rik obedo gwoko kabedona acil i kare ame jo Icrael ogak oko, gin bino noka ote tic baŋa. Gin en ame bino tiyo tic pira, kun obino i nyima me bino yalla kede dwol kede remo. Gin bino bino i nyim mejana ote bino tic iye, kun daŋ otelo woro apapat ame owora kede ka jo obino wora. Ka gin odonyo i dogcel me dyekal ame tye i yie, gin bino ruko boŋo camanini; mom obino ruko rukkoro ame otio i yer romo i komgi, i kare ame gin tye ka tic i dogcelloro me dyekal ame tye i yei, kede i dyekal i kome. Obino daŋ ruko tok ame cil i yigi, kun daŋ oruko pale camanini i pyergi, Mom obino tweyo ginnoro ame mio kwok makogi kadi acel. Kare ame gin doŋ tye aya oko i dyekal ame tye i yie, me wot i dyekal i oko mere baŋ lwak, obino gonyo boŋŋi moro luŋ ame onwoŋo gin oruko i kare me tic, ote ketogi ducu iyi icika acil, gin doŋ ote ruko rukgi me kare ducu, naka mio lonyo lwak doko acil. “Alamdog mom bino lyelo yer wigi, dok mom obino weko yer wigi lot aboco. Gin obino ŋolo oko kare i kare me doŋ acegocego. Alamdoggoro mom bino mato koŋo olok i kare ame en awot i dyekal ame tye i yie. Alamdog mom bino nyomo dako ame cware oto, onyo dako ame cware oryemo, ento bino nyomo ka nyako ame mom ru oŋeye i lo moro, ame obedo nyako me Icrael, dok twero nyomo ka dako alamdog wadgi ame cware oto. Gin bino pwonyo jona i kom gin ame cil kede gin me kare ducu, dok daŋ bino nyuttigi kite me poko gin ame cik ogeŋo kede en ame mom cik ogeŋo. Ka ce pyemmoro tye, gin bino bedo acalo oŋolkop, gin bino ŋolo kop kun lubo kite ame an aŋolo kede. Gin obino gwoko cikka kede icwilla luŋ, kede ecuban luŋ ame an atyeko ciko pirgi. Dok daŋ obino gwoko nino me cabit bedo acil. Gin mom obino lille kengi pi wot i ŋet kom dano ame oto; cite pi adwoŋ onyo pi imat, pi wodi onyo pi nyari, pi ominni onyo pi aminni ame mom onyomo, mannono gin twero lille pirgi. I kare ame en doŋ otyeko lille, en bino kwano nino abiro pire kene, eka te doŋ bedo dano ame olony. I nino ame en bino wot iye i kabedo acil, i dyekal ame tye i yie, me wot tic i kabedo acil, en bino miyo mottere me kwanyo bal. Man kop ame Rwot Obaŋa okobo. “Gin mom obino bedo kede lobo moro me leyo me bedo acalo meggi, an en ame abedo acalo gin ame oleo, dok wun myero kur imigi wunu ginnoro me bedo acalo meggi iyi Icrael, an en ame doŋ abedo acalo gin ame gin oleo. Gin bino camo mot me moko kwon, mot me kwanyo bal, kede mot me walakino i roc; dok ginnoro luŋ ame otyeko jalo baŋ Rwot, bino bedo meggi. Kit cammoro luŋ me wi mwaka ame bino geyo cek, kede kit mottoro luŋ ame obino miyo i kom mot ame jo Icrael bino miyo, bino bedo me olamdog. Dok daŋ ibino miyo wunu baŋ olamdog ogati ame ogeo tedo, me wek gum obed i wudiwu. Alamdog mom bino camo winyo moro onyo lee moro ame oto kene, onyo ame lee moro ocele en ame oneko.” “Ka ce itye wunu ka poko lobo baŋ atekere acel acel, myero iko dul lobo moro doŋ acil calo gin ame omio baŋ Rwot. Dul ame oweko-nono myero bed mairo apar i kom mairo aboro. Kan ame owekonono bino bedo lobo acil. I kan ame oweko-nono myero bed iye dul lobo moro ame tye acalo lobo me ot a Rwot, ame laccere kede aria mere myero bed futi mia aboro. Mano ŋete ducu myero wek iye kan ame laccere tye futi pyeraboro. I kom lobo ame okoo-nono, myero pim kannoro pok kene, ame borrere tye mairo apar i kom mairo aŋwen, ot me wora bino bedo kannono, kannono en ame obino gero iye kabedo acil ame kato ducu. Mannono en ame bino bedo kabedo acil i lobo ame otyeko poko pi olamdog ame tye i kabedo acil me wora, Udi me butogi bino bedo iye, karacel kede kabedo acil ame tye pi oda. Medo i kom mannono, myero daŋ dok bed dul lobo mogo ocele ame tye mairo apar i kom mairo aŋwen ame otyeko poko oko ocalo lobo a jo Levi ame tio tic ocele i ot me wora. Boma mogo bino bedo iye kuno me bedogi. “Dok daŋ myero wek dul lobo moro ame tye pi boma, borrere myero bed mairo apar i kom mairo aryo, Dul lobo-nono myero en ame lub dul lobo ame cil meicel, dok dul lobo-nono bino bedo me a jo Icrael luŋ. “Dok dullogo ocele daŋ myero pok kene pi aloc. Cakere i kom dul lobo acil kede boma, dul lobo-nono bino wot naka i nam tuŋ to kede naka i wan apokki ame tye tutuŋ kide. Cakere i tuŋ kide wot kede tutuŋ to, borrere bino bedo ame rom aroma i dul lobo ame opoko baŋ atekere moro me Icrael. Dul lobo man bino bedo me aloc ame loo jo Icrael, i lobo me Icrael, me wek en kur dok wun jo, ento wek dul lobo ocele odoŋŋere luŋ bed me atekere me Icrael. “Rwot Obaŋa dok okobo ni, ‘Wun oloc me Icrael, doŋ ibala wunu wok do! Wek wunu doŋ timwu me kolo kede me wuno jo. Tim wunu doŋ gin aber ame tye atira. Myero kur dok imedde ryemo wunu jona oko i lobogi.’ Man kop ame an Rwot Obaŋa akobo. “Ŋat acel acel i akinawu myero bed i mijan me pimo jami ame pimo jami kakare, kede gi-pimo jami ocele mege ame tye kakare. Gwata ame opimo i gin otwo, myero bed ame rom aroma i me pimo gin ame lio calo pii. Komere en ame bino bedo gi-pimo jami ame oporo i gin ocele ame opimo kede jami, pi mannono gin ame opimo i gin otwo myero bed rom i gin opimo i gin ame lio, ditogi myero bed arom aroma kede Komer. Kidi me pimo jamiwu bino bedo kit man: Gera pyeraryo rom aroma i cekel acel, cekel pyerabicel rom aroma i mina acel. “Man en kit mot me jami apapat ame ibino miyo wunu; ibino miyo wunu acel me pyerabicel me nano ame ikaa wunu, kede acel me pyerabicel me cayiri ame ikaa wunu, kede acel me mia acel me moo jeituni ame obio oya i kom nyig jeituni ame ocek i potoni. Ibino miyo romo acel i kom rommi mia ariyo ariyo, pi atekere luŋ Icrael. Man en mot me moko kwon ame ibino wunu kelo, mot awaŋa alutu kede mot me kweyo cuny, pi tiyo tic me kwanyo bal. Man kop ame an Rwot Obaŋa akobo. Jo luŋ me lobo me Icrael bino miyo mot man baŋ aloc ame tye iyi Icrael. Tic aloc obedo me miyo mot me leyi me awaŋa alutu, mot me moko kwon kede mot me amata i kare me ecuban, i kare me por adwe, i ceŋ me cabit ducu, kede i kare me ecuban adoŋo ducu ame ociko baŋ jo Icrael. En bino miyo mot me kwanyo bal, mot me moko kwon, mot me awaŋa alutu, kede mot me kweyo cuny, me tiyo tic me kwanyo bal i kom jo me Icrael. “Rwot Obaŋa okobo ni, I nino me agege me dwe me agege, ibino kwanyo twonnoro ame tidi ame mom i roccoro i kome, ite lonyo kede kabedo acil. Alamdog bino kwanyo remo mogo i kom mot ame omio me kwanyo bal, te totono i yen me doggola me ot Obaŋa i twoke aŋwen me keno lam, kede iyen me dogcel ame donyo i dyekal ame tye i yie. Ibino timo kittono i nino me abiro me dwe noŋo, pi ŋattoro ame otimo bal a mom me akaka onyo ame otimo bal pi kwiya piny. Man bino miyo igwoko wunu ot a Rwot bedo acil abono bal. “I nino dwe apar wie aŋwen me dwe me agege, ibino cako wunu kwero ecuban me Kato. Jo luŋ bino camo kwon ame tobi mom iye pi nino abiro. I nino me agege ame ocako kwero iye ecubannono, alamdog adwoŋ bino yalo Obaŋa twon, acalo mot me kwanyo ballere en ikome kede me a lwak. I nino acel acel ame tye i nino abiro me kwero ecubannono, en bino yalo Rwot itino twoni abiro, itino rommi abiro, ame balloro mom i komgi, kun owaŋogi awaŋa alutu, dok daŋ bino yalo Rwot i nyok dyel acalo mot me kwanyo bal. Pi mot me atin twon acel acel kede nyok romo acel acel ame oyalo kede Rwot myero daŋ mottere me moko kwoŋ kede moo bed tye, moko kwoŋ ame romo gwata moko apar pi atin twon acel acel kede nyok romo acel acel, kede moo jeituni ame romo cupa apar. “I nino dwe apar wie abic me dwe me abiro, kede pi nino abiro ame nwoŋo akwero iye ecuban, aloc daŋ bino miyo mot me bal, mot awaŋa kede mot me moko kwon kede mot me moo ame rom aroma i maca ame omio pi kato.” “Rwot Obaŋa okobo ni, ‘Dogcel me dyekal ame tye i yie, ame tye tutuŋ kide, bino cegere acega pi nino abicel, ame en nino ame myero jo ti iye tic, ento i nino me cabit obino yabo bedo twolo, dok i kare me por a dwe daŋ obino yabo bedo twolo. Aloc bino donyo i dogcellono kun ya i dyekal i oko, beo i icika alac eka te wot cuŋ i ŋet yat me dogcel. Alamdog bino waŋo mot awaŋa mere kede mottere me kweyo cuny, eka en te ryebere i nyim Obaŋa i gweŋ ame ocano i dogcel. En doŋ bino donnyo oko, cite dogcel mom obino cego naka otyeno. Lwak bino woro Obaŋa i nyim doggola me donyo i dogcel i nyim Rwot i nino me cabit ducu, kede i kare me por a dwe. Mot awaŋa ame nwoŋo aloc omio baŋ Rwot i nino me cabit, bino bedo nyogi rommi abicel ame balloro mom i komgi kede nyok romo ame roccoro daŋ mom i kome. Mot me moko kwon ame omio karacel i nyok romo, bino bedo gwata moko apar, eka mot me moko kwon ame omio karacel i nyogi rommi, en bino miyo adwoŋ acalo en twero, kun mio daŋ i moo cupa apar pi moko kwon me gwata moko apar apar. I nino me por a dwe, en bino miyo atin twon ame balloro mom i kome, rommi abicel, kede nyok romo acel ame roccoro mom i komgi; acalo mot me moko kwon, en bino miyo gwata apar, acel pi twon kede dok gwata apar pi nyok romo kede dok acalo etwero pi atin romo acel acel, kun daŋ mio moo cupa apar pi moko kwon me gwata apar apar. Aloc bino donyo i dogcel kun beo i icika alac ame tye iye; dok ka doŋ aya myero en dok be i yo acellono.’ “Ka lwak me lobo-nono tye ka bino i nyim Rwot pi kare me ecubannogo ame ociko pirgi, ŋat ame bino donyo i dogcel ame tye tutuŋ anyarodi, me wot woro Obaŋa, bino kato oko kun beo i dogcel ame tye tutuŋ anyarolum; kede ŋat ame bino donyo i dogcel ame tye tutuŋ anyarolum, bino kato oko kun beo i dogcel ame tye tutuŋ anyarodi. Mom tye ŋattoro ame bino dwogo cen i yo ame ewoto kede, dano acel acel bino wot atir anyim. Kare ame gin tye awot ka woro Obaŋa, aloc bino wot karacel kedgi, ka ce gin doŋ akato oko, en daŋ bino kato karacel kedgi. “I kare me ecuban ame ocikonono, kede i kare mogo ame ociko ni myero gwok, moko kwon ame oyalo i Rwot, atin twon bino bedo epa acel, kede en ame omio atin romo, bino bedo daŋ epa acel, aco moko kwon ame omio nyogi rommi, ŋat acel acel bino miyo kite ame en twero, kun mio kede moo daŋ cupa apar pi gwata moko apar apar. Ka ce aloc mito yalo Rwot kede mot ame cunye mito, akadi mot awaŋa, onyo mot me kweyo cuny acalo mot ame cunye okwanyo me yalo kede Rwot, obino yabbe doggola me yie ame tye tutuŋ kide; en bino yalo Rwot i mottere me awaŋa, onyo mot me kweyo cuny, kite ame en timo kede i nino me cabit. Ka doŋ en otyeko yalo Rwot, en bino donnyo oko ote cego dogcel oko. “En bino miyo atin romo me mwaka acel, ame roccoro mom i kome, acalo mot awaŋa me yalo Obaŋa nino i nino odiko. En bino timo mannono nino i nino kare ducu. Dok en bino miyo mot me moko kwon, karacel kede nino i nino, kun mio moko kwon me gwata acel i nucu, kede moo me cupa acel me jebo moko, acalo mot moko kwon me yalo Rwot. Man cik ame mako mot awaŋa ame omio kare i kare. Atin romo kede mot me moko kwon, kede moo, obino miyo kittono odiko kare ducu, acalo mot awaŋa ame owaŋo kare ducu. “Rwot Obaŋa okobo ni, ‘Ka ce aloc mio mottoro me lobo mere baŋ wode moro i akina itino mere, lobo ame omio baŋ atinnono doŋ bino bedo mege ame en oleo.’ Aco ka aloc omio mot me lobo baŋ aticcere moro ame tye baŋe, lobo-nono pwod dok bino bedo mege ka ce mwaka me kuc doŋ otumo; lobo-nono pwod dok bino dok i ciŋ aloc, pien en kede itino mere keken ame bino tero lobo-nono atwal calo meggi. Aloc mom myero gam ginnoro ame obedo me a lwak. En myero mi lobo ame obedo mege en ikome baŋ itino mere, mannono bino miyo en mom wuno jona pi bedo gamo lobogi oko i baŋgi.” Dano-nono dok te kwanya kela i doggola me donyo i wudi atitino ametye i ŋet cel, ame tye tutuŋ anyarolum i ŋet dyekal ame tye iyie, kan ame tye iye wudi mogo acil ame tye pi olamdog. I kare ame otye kuno, en te nyutta kabedo moro ame tye tutuŋ to me icika atitino-nono, iyi agikki mere. En te kobba ni, “Man en kan ame olamdog bino tedo iye mot me walakino i roc, karacel kede mot me kwanyo bal, kede kan ame obino tedo iye, mot me moko okwon me wek ginnoro acil mom ter naka i dyekal ame tye oko, eka te lonyo lwak doko oko acil.” Dano-nono dok te kwanya kela i dyekal ame tye oko, eka te bedo wot keda i gul aŋwen ame tye i dyekaliaca luŋ, i gul aŋwennono luŋ, onwoŋo tye iye dyekaliogo atitino doki, ame bocogi futi pyerabicel aŋwen i kom futi pyerabic, Kabedo aŋwennono luŋ, onwoŋo ocecelo apama me gweŋ, kun kan ame okuto iye mac tye daŋ iye i ŋet apama. Dano-nono te kobba ni, “Magi obedo jokon kan ame jo ame tio i ot Obaŋa bino tedo iye mot ame lwak yalo kede Obaŋa.” Dano-nono dok te dwogo an cen naka i doggola me ot Obaŋa. Nen ba, ate neno pii kun tye amol kun donyo i piny ite doggola me ot Obaŋa mol dok tutuŋ kide, kun ame nyim ot Obaŋa oneno. Pii-nono onwoŋo tye amolo i tutuŋ anyarolum, dok beo i ŋet keno lam i tutuŋ anyarolum. Dano-nono te dok kwanya oko i kannono tera oko kun beo keda i dogcel ame tye tutuŋ anyarodi, te tera naka i dogcel ame tye tutuŋ to. Ate nwoŋo pii tye akato oko kun beo i tutuŋ anyarolum. Dano-nono te medde i wot anyim kun dok tutuŋ kide ame omako lut me pimo piny i ciŋe. En te pimo pii ame amol yadi mia abic, te miya beo iyi pii-nono. Tut a pii-nono te tuno naka i um coŋa. En dok te pimo yadi mia abic ocele, pii doŋ, te mwonyo coŋa oko. Kare ame en dok opimo yadi mia abic ocele, pii dok te tuno naka i pyera malo. En dok te pimo yadi mia abic ocele, pii i kan ame en opimo-nono onwoŋo doŋ tut ame mom aromo beo iye. Pii iye onwoŋo doŋ tut meicel ame mom romo aŋola i tyen, ento mito doŋ kwaŋ akwaŋa. En te penya ni, “Wot a dano we, ineno man?” Dano-nono dok te dwoka cen i ŋet kulo, Kare ame atye adok cen, ate bedo neno yen apol meicel i ŋet kulo tuŋŋi kede tuŋŋi. En te kobba ni, “Pii-ni mol woto tutuŋ kide, otuno naka i Jordan, te wot naka i Nam me kado, Kare ame otuno i Nam me kado, omio pii i nam me kado odoko amit, kun ame pii i kulo man tye ka mol, kit leyi luŋ ame bedo i pii kede rec bino bedo i iye adwoŋ meicel. Pii man mol woto kuno me wot miyo pii ame tye i Nam me kado bedo amit, dok ka tye ka mol mio kit jami luŋ bedo kwo. Ocik rec te cucuŋa i ŋet nam, ocik rec bino ciko bwogi cakere i Engedi tuno naka i Eneglaim, Kit rec apapat bino nwoŋere iye kite ame tye kede i Nam Adwoŋ. Cite pii ame tye i lake luŋ mom bino bedo amit Pii i kaginogo bino bedo me kado. I ŋet kulonono tuŋŋi kede tuŋŋi, yen apol meicel bino doŋo iye me acama. Potgi mom bino two dok nyiggi daŋ bino bedo tye kare luŋ, kun nyak dwe i dwe, pien pii ame gin omato ya i kabedo acil. Nyiggi bino bedo me acama kun potgi tye acalo me caŋo too.” Rwot Obaŋa okobo ni, “Magi en waŋ apokki me lobo ame nyuto kite ame myero ipok kede lobo baŋ atekere apar wie aryo me Icrael, kun atekere a Lucepu ipokke mege ame kato me atekere ocele tyen aryo. Rik doŋ atyeko kwoŋ baŋ kwariwu me miyogi lobo man, doŋ lobo man ibino poko i akinawu arorom me bedo megwu. “Man en ame bino bedo waŋ lobo: I tutuŋ anyarodi, cakere i Nam Adwoŋ, i yo ame woto i Ketlon naka i dogcel me Kamat, tuno kede naka i Jedad, Berota, Cibraim, ame tye i waŋ apokki me Damaciko, kede Kamat, wot kede naka i Kajeratikon ame tye i waŋ apokki me Kauran. Man mio waŋ apokki cakere i nam me Kajarenon ame tye tutuŋ kede Kamat anyarodi daŋ. Man en waŋ apokki me tutuŋ anyarodi. “Aco i tutuŋ to, waŋ lobo bino cakere i Kajaraenon ame tye i akina Kauran kede Damaciko, te beo i ŋet kulo Jordan i akina Gilead kede lobo me Icrael wot kede naka i nam ame tye tutuŋ kide, kato kede naka i Tamar. Man en waŋ apokki me tutuŋ kide. “Aco i tutuŋ anyarolum, waŋ lobo bino cakere i Tamar wot kede naka i pii me Meriba-kadec, te beo i ŋet luŋ me Miciri naka i Nam Adwoŋ. Man en waŋ apokki i tutuŋ anyarolum. “Aco i tutuŋ to, Nam Adwoŋ en ame bino bedo waŋ apoki naka i kan ame otikere kede Kamat. Man en ame bino bedo waŋ apokki me tutuŋ to. “Doŋ pi mannono, myero ipok lobo man i akinawu kite ame itekere me Icrael tye kede. Ibino poko lobowu wun ikomwu kede me a jo ocele ame bedo i akinawu ame onywalo itinogi i akinawu. Wun ibino terogi wunu acalo jo Icrael ikokome. Gin daŋ obino pokkigi lobo me bedo meggi i akina atekere me Icrael. Iyi akina atekere moro keken ame gin rok ocele-ni bino bedo iye, yin ibino pokkigi lobo me bedo meggi kuno. Man kop ame Rwot Obaŋa okobo. “Magi en nyiŋ atekere: Cakere i tutuŋ anyarodi, i waŋ lobo ame tye kuno, cakere i nam beo Ketlon naka i dogcel i Kamat, kato kede i Kajarenon, ame tye i waŋ apokki me Damaciko i tutuŋ anyarodi kede Kamat, ame ya i tutuŋ kide, dok kede tutuŋ to. Atekere acel obino pokke dul lobo mere acel, cakere i waŋ apokki ame tye i lobo me tutuŋ kide dok kede piny i waŋ apokki ame tye tutuŋ to, kun lubere kit man: Dan bino tero dul lobo me agege, Acer te lube, Naputali te lubo Acer, Manaci te lubo Naputali. Epraim te lubo Manaci, Reuben te lubo Epraim. Eka Juda te lubo Reuben. “Lobo ame te lubo me atekere a Juda, cakere i tuŋ kide dok kede tuŋ to, bino bedo lobo ame ojalo pi Obaŋa. Lobo mere bino bedo arom aroma i en ame opoko baŋ atekere mere, ame laccere romo mairo apar, kede borrere daŋ romo aroma, mairo apar i kom mairo aboro. Ot me wora bino bedo i dyere me lobo-nono. Lobo ame ibino jalo baŋ Rwot, bino bedo mairo apar i kom mairo aboro. Man en ame bino bedo lobo acil i akina lobo ame opoko, olamdog en ame bino tero lobo acillono. Lobo ame tye tutuŋ anyarodi kede anyarolum, borrere myero bed mairo apar, eka me tutuŋ kide kede tutuŋ to te bedo mairo aŋwen. Ot me woro Obaŋa myero ger i dye lobo man. Lobo acil-li bino bedo me olamdog, ame obedo ikwae a Jadok, gin obedo tic baŋa i gen meicel, kun mom onotte kede rokkogo me Icrael me timo gin arac, kite ame jo Levi mogo rik otimo. Man en ame bino bedo lobogi acil meicel ame opokkigi, ame olubo lobo ame jo Levi ocele bedo iye, loboni en ame bino bedo acil ame kato en ocele luŋ. Jo Levi myero mi ter lobo ame olubo me olamdog. Lobo ame amiyoginono borrere myero bed mairo apar, laccere mairo aŋwen, Gin mom bino cato lobo-nono onyo mom otwero loko dul lobo moro iye kede lobo ocele, akadi miyo baŋ ŋattoro, ocele, pien lobo man obedo lobo acil ame obedo me a Rwot. “Lobo ame odoŋŋere ame borrere tye mairo apar i kom mairo aryo, mom bino bedo lobo acil, lobo-nono bino bedo me tiyo kit jami ocele luŋ, ame dano moro keken twero timo iye. Jo twero bedo iye, dok daŋ otwero puro. Boma bino bedo i dye lobo-nono, lac a boma-nono kede borrere bino bedo yadi tutumia adek kede mia aryo i pyeraryo, tuŋŋi i tuŋŋi. Guro boma-nono dyere bino bedo iye lobo moro ame ginnoro mom iye, ame ya i lake tuŋ cel tuno kede i lake tuŋ ocele bino bedo yadi mia acel i pyerabic. Lobo ame odoŋŋere ame tye i ŋet lobo ame acil, borrere i tutuŋ kide bino bedo mairo aŋwen, kun me tutuŋ to daŋ mairo aŋwen. Cam ame bino ya i lobo-nono, bino bedo me a jo a tio i boma. Ŋattoro keken ame tio i boma, kadi bed en oya iyi atekere mene, iyi akina atekere me Icrael, danonono bino puro poto mere i dul lobo-ni. Lobo luŋ ame ibino jalo pi Rwot, borrere kede laccere luŋ bino bedo mairo apar apar, kun lobo ame boma tye iye, tye i yie kannono. “Lobo ame bino doŋŋere i ŋet lobo acil tuŋŋi i tuŋŋi, kede lobo ame omio pi boma, bino bedo me aloc. Cakere i ŋet lobo acil, tuno kede i waŋ lobo ame tye tutuŋ kide, kede en ame tye tutuŋ to, kun cakere i lak kan ame mairo apar ogik iye, kannono luŋ bino bedo me aloc. Lobo acil karacel kede kabedo acil ame ot Obaŋa tye iye bino bedo i dyere, kede lobo ame tye iye jami me boma bino bedo i dye lobo ame obedo me aloc, atekere a jo Benjamin. “Aco atekere a jo Icrael ocele mege, cakere i tuŋ kide, wot kede tutuŋ to, lobogi bino lubere kit man: Me atekere a Benjamin en ame bino bedo me agege, kun gin otero dul lobo acel. Me atekere a Cimeon en ame te lubo me a Benjamin. Icakar en ame te lubo Cimeon. Me a Jabulon en ame te lubo Icakar. Me a Gad en ame te lubo me a Jabulon. I tutuŋ anyarolum i atekere ame apokki i jo Gad, waŋ lobo bino dok tutuŋ anyarolum kun cakere i Tamar tuno kede naka i kidi me Meriba-kadec, te dok tutuŋ anyarodi, kun beo i wan lobo me Miciri, naka i Nam Adwoŋ. Man en lobo ame bino popoko kin atekere me Icrael bedo meggi, magi en dul lobo apapat ame ibino pokkigi. Man kop ame Rwot Obaŋa okobo. “Man en kite ame dogcel me boma bino bedo kede cakere i tutuŋ anyarodi, ame kor apama mere myero bedo yadi tutumia adek kede mia aryo i pyeraryo, dogcel adek, ame dogcel acel acel ocako nyiŋ atekere me Icrael, dogcel a a Reuben, dogcel a Juda, kede dogcel a Levi, i tutuŋ kide ame apama cellere daŋ rom aroma i maca ocele-ca, nyiŋ dogcel tye iye kit man: Dogcel a Lucepu, Benjamin, kede Dan. I tutuŋ anyarolum, ame lac apama mere daŋ rom i en ocele-ca, tye iye dogcel cimeon, Icakar kede Jabulon.” I tutuŋ to tye iye dogcel Acer, Gad kede Naputali. Bor apama luŋ, cakere i doggola tuŋ cel mano amana, naka i doggola tuŋ ocele, romo yadi tutumia apar wie aryo i mia aryo i pyeraboro. Nyiŋ boma-naca cakere kare-naca olwoŋo ni, “Rwot tye kan.” I mwaka me adek me loc a Yekoyakim abaka me Juda, Nabukadnejar, abaka me Babulon obino me bino lweny i kom Jerucalem, eka te guro oko. Rwot te miyo en mako Yekoyakim abaka me Juda, te daŋ yako jami mogo ame otio kedgi i ot Obaŋa, En te tero jo ame emako wot keto i ot obaŋa mere, jami en te tero i ot kano lim me ot obaŋa mere. Abaka te ciko Acipenaj, ame obedo adwoŋ ame loo jo ame oroo oko ni myero kel jo mogo me Icrael, kel itino me ot abaka kede itino oloc ocele. Myero kel awobe ame komgi beco odoco aboŋo balloro, jo aryek i yore apapat luŋ, jo ame kwiri, dok ame tye i ŋec a rommigi tic i paco abaka. Acipenaj myero pwonygi kwano kede coyo leb jo Kaldaya. Abaka te ciko ni myero gin cam cem abeco kite ame en ecamo, kun gin camo kit cammono keken nino ducu, dok daŋ omat koŋo olok amittere ame en emato. Myero pwonygi pi mwakki adek, eka iyi agikki me mwaka me adek ote terogi i nyime. I akina jo-nono onwoŋo tye iye Danieri, Anania, Micael kede Ajaria, gin luŋ rik obedo jo me atekere a Juda, Adwoŋ ame loo jo ame oroo oko te cako nyiŋgi apat kit man: Danieri en te lwoŋo ni Beltecajar, Anania te lwoŋo ni Cadrak, Micael te lwoŋo ni Micaki eka Ajaria te lwoŋo ni Abednego. Cite Danieri te mo ko tammere me mom balle kene i camo cam abeco kun obedo me kwer tuŋ baŋe, onyo i mato koŋo olok ame abaka mato. Omio en te penyo adwoŋ ame loo jo ame oroo oko me ye tammere-nono, me kur eballe. Obaŋa te miyo adwoŋ ame loo jo ame oroo oko bedo kede kica i kom Danieri kun pwo tammere, cite en te kobbi Danieri ni, “Atye kede lworo i kom abaka, pien en ame oyero kit cam ame myero icam wunu kede koŋo ame myero imat wunu. I kare ame en oneno ni komwu mom yot calo kom awobe wadwu ame mwaka me ditogi rom aroma kede megwu, naka mio en abaka bino neka oko.” Mannono te miyo Danieri wot baŋ agwok jami ame onwoŋo adwoŋ ame loo jo ame oroo oko oketo me loyo Danieri kede owote mere Anania, Micael, kede Ajaria, te kobbe ni, “Koŋ item omironi pi nino apar; miwa koŋ obed camo dek ape na keken kun omato ka pii. Eka koŋ ite neno komwa kun iporo kede kom awobe ame camo cem abeco ame rom aroma en abaka camo-ni I ŋe mannono yin doŋ itwero neno gin ame myero itim kede omironi.” En te winyo kwacgi i kop man, te temogi pi nino apar. I ŋe nino apar en oneno ni kom jo-ni onwoŋo nen amwonya dok daŋ ocwe ame okato awobe luŋ ame camo cem abeco ame abaka camo, Mannono te miyo agwokgi kwanyo cam abeco kede koŋo olok ame onwoŋo tye pirgi oko, te doŋ bedo miyogi camo dek apena keken. Obaŋa te miyo awobe aŋwen-ni bedo kede ŋec amala meicel, kun okwiri i kwan dok oryek atek meicel. Danieri onwoŋo ŋeo gonyo anyut apapat luŋ karacel kede lek ducu, I kare ame nino me agikki me kare ame rik abaka onwoŋo ociko ni tergi kede i nyime, adwoŋ ame loo jo ame oroo oko te terogi i nyim abaka Nebukadnejar. Abaka te kop kedgi, te nwoŋo ni i akinagi luŋ mom tye iye ŋattoro ame calli i Danieri, Anania, Micael, kede Ajaria, omio gin doŋ te bedo i nyim abaka. Doŋ i kom kopporo luŋ me ryeko kede me ŋecs ame abaka obedo pepenyogi iye, en onwoŋo ni gin otye aber iye meicel ame okato otyet kede okor tipo luŋ ame onwoŋo tye i te loccere. Danieri te medde bedo kuno tuno naka i mwaka me agege me loc abaka Kuro. I mwaka me aryo me loc abaka Nebukadnejar, abaka Nebukadnejar, oleko lek apapat; lekkono te miyo cunye jebere oko, nino daŋ te rwenyo oko i waŋe. Abaka te ciko ni myero lwoŋ otyet luŋ kede okor tipo karacel kede emuroko, dok myero lwoŋ daŋ jo Kaldaya me bi no gonyo lekkere. Gin te bino luŋ bino cuŋ i nyim abaka. Abaka te kobbigi ni, “Aleko lek ame aman omio cunya ojebere oko pi mito ni aniaŋ tere.” Jo Kaldaya te kobbi abaka ni, “Ama abaka, komi gire bed ayot nakanaka! Koŋ itittiwa wan omironi lekki-nono, wan obino gonnyi tere oko.” Abaka te gamo kop a jo Kaldaya ni, “Kop ame an akobo doŋ atyeko moko oko. Ka ce mom ibino miya wunu aŋeo lek ame alekonono, dok daŋ ite gonnya wunu tere, obino ŋiŋidowu atitino, udiwu daŋ ote rereto oko piny. Cite ka inyutta wunu lekkono ite daŋ gonnya wunu tere, ibino nwoŋo wunu mot kede bakacic i baŋa karacel kede kwogo adwoŋ meicel. Doŋ ba, myero inyutta wunu lek ame aleko dok daŋ igonnya wunu tere.” Gin dok te gamo kop abaka tyen me aryo ni, “Tittiwa lekk i-nono, wan obino gonnyi tere oko.” Abaka dok te gamo ni, “An aniaŋ ateni ni wun itye ka temo wunu medo kare ameda, pe iniaŋ wunu atira ni kop ame an akobo bedo kite ame akobo kede, Ka ce mom ibino miya wunu aŋeo lek ame aleko-nono, kop ame abino ŋolliwu tye ka acel keken aboŋo loko kadi acel. Wun onwoŋo iye wunu me bedo kobba wunu kop me goba keken kede koppogo ame medo ka bai keken ka kare olokere, Aman doŋ ba, myero ititta wunu lek ame aleko, mannono bino miyo aniaŋ ni itwero gonyo wunu lekkono.” Jo Kaldaya te kobbi abaka ni, “Mom tye dano moro kadi acel i wi lobo luŋ ame twero cobo gin ame abaka amito; pien mom ru onen kadi acel abaka moro i akina twoni obakki atek ame yam koŋ openyo otyet, okor tipo onyo jo Kaldaya i kodi pennyono. Gin ame abaka openyo tek meicel ame mom tye dano moro ame twero nyutti abaka kono ka obaŋe ame mom bedo i akina dano.” Kop man omio akemo omako abaka, te doko ager meicel; omio te ciko ni myero nek oryeko luŋ me Babulon. Cik man doŋ ote cako rabo ni myero nek oryeko luŋ, ote bedo yenyo Danieri kede owote mere ni myero daŋ nekgi oko. Danieri te wot kop gin kede Ariok i ryeko meicel. Ariok onwoŋo obedo adwoŋ ame loo ocirikale ame gwoko abaka, ame onwoŋo owoto me wot neko oryeko me Babulon, En openyo Ariok ni, “Piŋo kara cik abaka gwa kit man?” Ariok te titti Danieri gin omio tye amannono. Danieri te wot i ot baŋ abaka, te kwayo ni abaka myero mie kare moro me wek egony lek abaka. Danieri te dok i paco mere, te wot miyo kop man neye baŋ owote mere Anania, Micael kede Ajaria, En te tittigi ni myero okwa Obaŋa me polo me tim kica yab imuŋŋono baŋgi me kur nekgi oko karacel oryeko luŋ me Babulon, Obaŋa te yabo imuŋ me lek abaka-nono oko baŋ Danieri dyewor i anyutta ame onyutte i waŋ lek. Danieri te cako pako Obaŋa me polo. Danieri okobo kit man: “Nyin Obaŋa myero pak nakanaka, pien ryeko kede twer tye baŋe. En ame loko caa kede kare, en a keto abaka, dok en a daŋ kwanyo abaka, en a mio ryeko baŋ jo aryek, en a daŋ ame mio ŋec baŋ jo aniaŋ. En nyuto gin opono odoco, dok nyuto imuŋŋoro ducu kannaler, en ŋeo ginnoro luŋ ame tye kannacol, lero bedo baŋe. An gira apwoi dok apaki, yin Obaŋa akwariwa pien yin imia ryeko kede teko, dok aman imia aŋeo gin ame okwai iye, pien yin imiowa oŋeo kop abaka.” Mannono doŋ te miyo Danieri wot baŋ Ariok, ame dano ame onwoŋo abaka omio twer me neko oryeko luŋ me Babulon; en owoto te wot kobbe ni, “Kur inek oryeko me Babulon: tera i ot baŋ abaka, an abino gonnyi abaka lekkere.” Ariok te ru tero Danieri i nyim abaka, te kobbi abaka ni, “Atyeko nwoŋo dano i akina opii ame oya i Juda, ame romo gonyo lekk i.” Abaka te penyo Danieri ame nyiŋe ocele Belcajar ni, “Yin itwero miya aŋeo lek ame aleko dok daŋ itwero gonnya lekkono?” Danieri te gamo kop abaka ni, “Mom tye oryeko moro, okor tipo, otyet onyo jo ame ryek i neno acer ame romo nyutti abaka kop me muŋ ame abaka openyo, cite Obaŋa moro tye i polo ame twero yabo imuŋ ducu, ame en doŋ otyeko miyo abaka Nebukadnejar oŋeo gin ame bino timere i kare me anyim. Doŋ lek ame ileko-nono kede anyut ame obino i wii i kare ame ibuto piny i wi tandani-nono ene: I kare ame onwoŋo yin ibuto piny, ama abaka, tam apapat me gin ame bino timere i nyim te bino i wi, doŋ en ŋat ame yabo imuŋ kannaler te miyi ŋeyo gin ame bino timere. Aco an onyutta muŋ man me agony tere baŋ abaka, me abaka ne tam ame tye i cunye, cite mom pi nyuto ni an aryek akato jo luŋ. “Nen ba, Abaka, yin ineno twon calloro adwoŋ meicel. Callono onwoŋo dwoŋ atek dok ryeny atek meicel ame nennere kelo lworo i kom dano, callono obino te bi no cuŋ i nyimi. Callono otio wie i jabu ame olio acil, kore kede bade ote tiyo i jabu, eka amuru mere te bedo mola. Tyene te bedo me nyonyo, eka par tyene te rubere aruba ryoryo kede lobo. I kare ame onwoŋo i tye ka neno, gweŋŋoro te bare ŋide oko kun mom dano en ame oŋido, te rette i par tyen cal-ca tuŋ ame otio i nyonyo kede lobo, te ŋiŋido oko atitino. Mannono te miyo nyonyo, lobo mola, ryal, kede jabu ŋiŋiida oko atitino, te doko calo cuŋ kai i laro i kare me oro; yamo te bi no kologi oko teŋe ame mom dok otwero yenyogi ote nwoŋogi. Cite gweŋ ame onwoŋo orette i kom callono te doko twon kidi moro adwoŋ meicel ame oromo wi lobo luŋ. “Man en lek ame onwoŋo yin ileko. Aman doŋ myero agonnyi tere. Adwoŋ abaka, yin en ame ibedo abaka adwoŋ ame loo obakki ocele luŋ. Obaŋa me polo otyeko keti me bedo aloc adwoŋ dok en omii teko, twer, kede kwogo. En oketi me loyo jami luŋ ame bedo i lobo, me loyo dano, leyi kede winy. Yin ibedo wic ame otio i jabu. Icennere i ne locci, loccoro a mom rom i megi bino lubo megi ame abaka mere bino loyo lobo ducu, i ne mannono, loc me adekkere dok te cakere ame obedo me mola, ame bino loyo lobo ducu. Loc me aŋwennere dok bino cakere ame tek calo nyonyo, pien nyonyo tek meicel ame romo turo jami ducu, dok ŋiŋiido oko atitino; loccono bino jwero loc ocele luŋ ame ogeo bedo tye kite ame nyonyo tuturo kede jami. Doŋ kite acalo ineno kede par tyen cal-ca orubere aruba, nyonyo kede lobo, mannono cimo ni loccono bino pokere yie aryo. Cite teko mogo ame mio cuŋ atek acalo nyonyo bino bedo tye iye. Dok kite acalo lwet tyen caka onwoŋo tuŋcel nyonyo tuŋcel lobo, mannono cimo ni loccono bino bedo atek i kabedo mogo eka i kabedo ocele te bedo agoro meicel ame romo tur oko i kare moro keken. Kite acalo ineno kede, nyonyo orubere kede lobo ame obedo coto, jo i loccono bino rubere kun onyomere i akinagi kengi kengi, cite bedo karacel bino loyogi oko kite ame nyonyo mom twero notte karacel i coto. Dok i kare obakki-nono, Obaŋa me polo bi no keto loc ocele ame mom twero tur dok loccere daŋ mom obino weko i ciŋ ŋattoro ocele, Loc anyennono bino turo loc ocele mege kun ŋiŋiido atitino, eka te miyo locgi gik oko, en doŋ te cuŋ atwal, kite ame onwoŋo ineno ni gweŋŋoro omukere i kom kidi kun mom dano moro en omuko, eka te rette i kom nyonyo ŋiŋiido oko atitino, karacel kede mola, lobo, ryal kede jabu-gu. Twon Obaŋa moro adwoŋ meicel oyabbi abaka gin ame bino timere i kare a tye i nyim. Lek ame ileko tye ateni dok te koppere daŋ tye atira.” Abaka Nebukadnejar te ru ya ryebere piny woro Danieri, te dok ciko ni myero kel mot me yale, kede odok a ŋwece kur. Abaka te kobbi Danieri ni, “Ateteni, Obaŋani obedo Obaŋa ame loo obaŋe ocele luŋ, dok Rwot ame loo obakki luŋ, en ayab muŋ ducu kannaler, pien en omio yin inyuto imuŋ man.” Abaka te miyo Danieri woro mogo amalo meicel kede twoni mottogo adoŋo doŋo, te miyo en bedo aloc ame loo lobo me Babulon luŋ, kede adwoŋ ame loo oryeko luŋ me Babulon. Danieri te kwayo abaka, omio en te keto Cadrak, Micaki, kede Abednego, me bedo odoŋe ame loo lwak, kun oneno ginnoro luŋ ame otimere i lobo me Babulon. Cite Danieri te medde bedo i paco abaka. Abaka Nebukadnajer otio cal obaŋa moro me jabu, ame borrere onwoŋo tye futi pyeraboŋwen kede laccere futi aboŋwen. En te cibo callono cuŋ i bar me Dura, i lobo Babulon, Abaka te cwayo kop me lwoŋo odoŋe apapat, odoŋe ame loo lwak, odoŋe ame loo lobo apapat, omi-tam, ogwok lim, oŋolkop, adoŋo kede atino, kede jo adoŋo mogo me dul lobo apapat, me gin bin kwer ecuban me tiyo cal obaŋa abaka Nebukadnejar ame en omio otio-nono. Eka oloc adoŋo, odoŋe ame loo lwak, oloc me dul lono apapat, omi-tam, ogwok lim, oŋolkop, adoŋo kede atino, kede odoŋe ocele luŋ me dul lobo apapat te cokere karacel me bino kwero ecuban me cal obaŋa ame abaka Nebukadnejar otio te cibo cuŋ i bar me Dura. Gin luŋ ote bino cuŋ i nyim cal obaŋa ame abaka otio-nono. Gin te cako rabo koppere kun oredo i dwon aloŋo ni, “Wun rok apapat luŋ, lwak ame kobo leb apapat, ocikowu ni ka iwinyo wunu okuto bilo kede nyamulere, kun daŋ ogoo naŋa opuk, kede en ocele mege ame owero kede, wun myero iryebre wunu piny iwor wunu cal obaŋa ame otio i jabu ame abaka Nebukadnejar otyeko cibo cuŋ-ni; ŋat a mom bino ryebere piny me woro cal obaŋa, obino ru bolo oko i mac alyel ager meicel.” Mannono omio i kare ame jo owinyo bilo kede nyamulere okok, kun ogoo naŋa opuk kede kit tum ocele me wer, jo luŋ me rok apapat kede atekere apapat, ame kobo leb apapat, oryebere piny luŋ te woro cal obaŋa ame otio i jabu ame abaka Nebukadnejar ocibo ocuŋ i bar me Dura. I kare-nono jo Kaldaya mogo ame onwoŋo tye kede tam arac i kom Ojudaya te bino doto Ojudaya mogo. Gin okobo baŋ Nebukadnejar ni, “Ama abaka, komi gire myero bed ayot nakanaka! Yin abaka onwoŋo imio cik ni ŋat acel acel ame owinyo bilo kede nyamulere okok, kun daŋ otye ka goyo naŋa opuk kede kit tum ducu me wer, myero ryebere piny wor cal obaŋa ame otio i jabu; kun daŋ imedo ni ŋat a mom bino ryebere piny me woro cal obaŋa-nono obino bolo oko i twon mac ame alyel ager meicel. Doŋ ba adwoŋ, tye Ojudaya mogo ame yin iketo me loyo ginnoro luŋ ame timere i lobo me Babulon; Cadrak, Micaki kede Abednego. Adwoŋ, jo man mom gire winyo koppi kadi acel; gin mom otimo ginnoro pi obaŋani apapat eme iworo kadi acel; woro cal obaŋani me jabu ame yin icibo i bar me Dura.” Akemo te mako Nebukadnejar atek meicel, te ciko i gero ni myero kel Cadrak, Micak i, kede Abednego i nyime. Ote daŋ kelo jo man i nyim abaka. Nebukadnejar te kobbigi ni, “Man kop ateni ni wun mom it ye ka tic wunu pi obaŋe ame an aworo, dok daŋ ikwero wunu woro cal obaŋa ama acibo ocuŋ i Dura? Aman doŋ ka ityeko yikere wunu, me iryebere wunu piny woro wunu cal obaŋana ame atio, doŋ ber, ka iwinyo wunu okuto bilo kede nyamulere, kun daŋ agoyo naŋa opuk kede kit tum ducu me wer, cite ka mom iworo wunu, obino ru bolowu oko i twon mac a lyel ager. Kur itam wunu ni tye obaŋa moro ame dok romo larowu i ciŋa.” Cadrak, Micaki kede Abednego te gamo kop abaka ni, “Adwoŋ Nebukadnejar, wan mom oyikere me kobbi ginnoro ame dok i kop man, Ka ce tye amannono, Obaŋa ame wan oworo bi no larowa i twon mac a lyel ager, dok en bino larowa i ciŋi, yin abaka. Cite ka mom amannono, myero omi iŋe ni wan giwa mom obino woro obaŋeni akadi cal obaŋa me jabu ame yin icibo ocuŋ i Dura.” Akemo te miyo Nebukadnejar doko doŋ ager meicel, ame waŋe doŋ onen arac okato kare i kom Cadrak, Micaki, kede Abednego. En te ciko ni myero mok mac kur atek ame kato me nino ducu tyen abiro twal. En te ciko twoni jo mogo ame komgi tek meicel me monnyere me tweyo Cadrak, Micaki kede Abednego ote bologi i twon mac a lyel ager. Rik ote tweyo jo man oko, kun otye i rukgi luŋ i komgi, cati, kanyi, tok kede boŋŋi ocele mege ducu, ote bologi i twon mac alyel ager. Pien cik abaka onwoŋo olido odoco, dok mac daŋ onwoŋo lyet atek, omio leb mac alyel obukkoro, kom jo otero Cadrak, Micaki kede Abednego, Jo-ni adek-ki Cadrak, Micaki kede Abednego, obologi i cuny mac ame alyel ager meicel. Abaka Nebukadnejar icennere te wuro atek meicel, omio te ru ya oko malo, Eka te penyo jo ame mie tam ni, “Mom onwoŋo obolo jo adek ca i mac ame otweogi oko?” Gin te gamo peny abaka ni, “Mannono kakare, adwoŋ.” Abaka te gamo ni, “An atye ka neno jo aŋwen ame mom otweo tye ka lat i dye mac, kun daŋ mom owane kadi acel; dano me aŋwennere tye ka nen acalo wot obaŋa moro.” Nebukadnejar te wot i doggola me kan a mac tye iye, te lwoŋo ni, “Cadrak, Micak i, kede Abednego, omiro Obaŋa Amalo Meicel, kato wunu”, me ibin wunu kan. Eka oloc adoŋo mege, odoŋe ame loo lwak kede oloc me dul lobo apapat karacel kede jo ame mio abaka tam te cokere karacel, gin te neno ni mac gire mom owaŋo jo-nono; naka yer wigi mac mom oreo moro kadi acel, ruk i komgi daŋ mac mom ogudo, dok ŋwec mac daŋ mom ŋweye i komgi. Mannono omio Nebukadnejar okobo ni, “Myero pwo Obaŋa a Cadrak, Micaki kede Abednego ame ocwao omalaika mere te laro omiro mere ame gene, ame te miyo cik abaka to nono, omio gin ojalo komgi i to akaka woro obaŋa moro ocele a mom Obaŋagi.” Man omio an aketo cik aman ni, “Rokkoro, atekere onyo ŋattoro keken ame kobo kop arac i kom Obaŋa a Cadrak, Micaki kede Abednego, obino ŋiŋiido atitino, udigi daŋ obino rereto oko piny, pien mom gire tye obaŋa moro ocele ame twero laro dano i yore acalo man.” Abaka te medo rwom a Cadrak. Micaki, kede me Abednego i lobo me Babulon. An Abaka Nebukadnejar, acoo waraga man baŋwu, wun lwak me rok ducu, atekere apapat ame kobo leb apapat i wi lobo, kuc myero medde ameda baŋwu! Obedo ber an me nyuto baŋwu anyuttogo kede tano mogo ame Obaŋa Amalo Meicel otyeko timo i koma. Anyuttoro luŋ ame en nyuto doŋodoŋo nadi, taŋo ame en tio, teko mere dwoŋŋadi! Loccere obedo loc ame perakino waŋ i waŋ, loccere tye pi lwagi jo me kare luŋ. An abaka Nebukadnejar onwoŋo at ye abedo mot i oda, kun lim daŋ tye ka bino i ciŋa i pacona. Ate leko lek ame te miya lworo meicel; dok anyuttogo obino i wia ame te miyo wia balle oko. Omio aciko ni myero kel oryeko luŋ me Babulon i nyima me gin gonnya lek ame aleko-nono. Mannono te miyo otyet, okor tipo, kede jo Kaldaya kede jo ame tye i ŋec i kom neno acer te bino baŋa; an ate tittigi lek ame alekonono cite gonyo tere te loyogi oko, Icennere Danieri te bi no cuŋ i nyima, en dano ame nyiŋe ocele olwono ni Belcajar, ame nyiŋe nono rom aroma i nyiŋ obaŋana; en obedo dano ame cuny Obaŋa Acil tye i cunye. An ate titte lekka-nono kun akobo ni, Ama adwoŋ Belcajar, adwoŋ ame loo otyet luŋ, pien doŋ atyeko ŋeyo ni cuny Obaŋa Acil bedo iyi dok daŋ ni mom tye i muŋŋoro ame tekki, doŋ lek ame aleko ene, tim ber igonya tere. Anyuttogo ame obino i wia i kare ame abuto piny ene: Nen ba, aneno yattoro ame tye i dye lobo; yattono bor atek meicel. Yattono odoŋo te doko atek meicel, wie te tuno naka i polo twal, dok onwoŋo nen naka i agikki piny i kabedo ducu, Pote luŋ onwoŋo nen amwonya meicel dok nyige onwoŋo onyak apol meicel, onwoŋo obedo yat ame ginnoro luŋ akwo camo. Leyi me tim we i te tipo mere, dok winy ame twarre malo bedo i jaŋe luŋ, dok ginnoro luŋ akwo nwoŋo camgi iye. “Nen ba, i kare ame abuto i wi tandana anyuttoro obino i wia, aneno akur co pinnyoro ame obedo ŋat acil, kun bino piny ame oya i polo. Akurpinnyoro oredo i dwon aloŋo kun kobo ni. Toŋ yattono iret piny ite lwero jaŋe oko luŋ, me leyi ŋwec oko i tere kede winy daŋ twarre oko i jaŋe. Cite myero iwek ajuttere kede lwite ame odoŋ i lobo doŋ, eka ite tweyo oko abati abati me nyonyo kede me mola, me bed i dye lum alyabu i tim. Mi toyo ame ya i polo dyak i kome, dok wek obedo i akina leyi ame bedo i lum i lobo. Mi tammere lokere oko i tam a dano, me tam a lee en ame luny miye; en bed kittono pi mwakki abiro. Okur-piny en omoko cik man, kun olubo gin ame jo acil omoko, me wek i agikki mere gin ame tye kede kwo luŋ ŋe ni ŋat Amalo Meicel en ame loo loc a dano, dok tye kede twer me miyo baŋ ŋat ame yie omito, kun keto kadi ŋat ame rwommere piny rom mene me loyo lwak. Lek man en lek ame an abaka Nebukadnejar aneno. Doŋ ba, yin adwoŋ Belcajar, myero itucca lekkono, pien oryeko luŋ ame tye i te locca mom romo gonyo lekkono, cite yin gire itwero gonyo, pien cuny Obaŋa Acil tye iyii.” Danieri ame nyiŋe ocele Belcajar te koŋ dok bedo kede podo meicel i cuny pi kare moro anonok, tipo kome te ya meicel pi tam ame en obedo tamo. Abaka te kobbe ni, “Belcajar, kur imi lek man onyo gonyo tere po tipo komi.” Belcajar te gamo ni, “Adwoŋ, myero lekki-nono obed pi jo ame dagi, te koppere obed pi okworri! Yat ame onwoŋo ineno ame odotjo odoko atek kun wie ogudo polo, dok onwoŋo nen iyi agikki piny i kabedo ducu; pote luŋ onwoŋo nen amwonya dok nyige onyak apol meicel, dok onwoŋo obedo yat ame ginnoro akwo luŋ camo; leyi me tim onwoŋo we i tipo mere. Yin en idoŋo idoko atekkono adwoŋ, abaka. Dwoŋŋi doŋ odoŋo otuno naka i polo, locci daŋ doŋ onya otuno naka i agikki piny. Abaka oneno akur-piny ame obedo ŋat acil kun bi no ame oya i polo ame aredo ni, ‘Toŋ yattono iret oko piny ite daŋ lwelwero oko, cite myero iwek ajuttere kede lwite doŋ piny i lobo, kun itweo oko abati abati me nyonyo kede me mola, me wek bed i dye lum alyabu i tim, Dok myero iwek toyo ame ya i polo dyak kome, kun en bedo i akina leyi ame bedo i tim, en myero bed kittono pi mwakki abiro.’ “Adwoŋ lek ame ileko-nono tye kit man: Mannono obedo cik a ŋat Amalo Meicel ame obino i kom adwoŋŋa, abaka, ni yin obino ryemi oko i akina dano, ibino bedo karacel kede leyi i tim; ibino camo lum calo twon, dok toyo ame ton i polo bino dyako komi, ibino ri kuno mwakki abiro, tuno ka iŋeo ni Ŋat Amalo Meicel en ame loo loc a dano, dok en tye kede twer me miyo loc i ciŋ ŋat ame yie omito. Doŋ kite acalo onwoŋo ociko ni myero wek ajut yat kede lwite, locci gire bino kuri ote dwoko i ciŋi cakere i kare ame yin doŋ iŋeo ni loc kara ya i polo. Doŋ ba adwoŋŋa, abaka, myero iye tam ame ami-ni; ŋut oko i kom bal ame ibedo timo, ite cako bedo i kwo me kite atira, kun iweko timo bal, dok daŋ kica myero maki i kom jo ame owuno, atot ya kare me locci medde, kun itye kede kuc kede weo ame oromo.” Kop magi luŋ otimere i kom abaka Nebukadnejar. Iyi agikki me dwe me apar wie aryo, i kare ame en onwoŋo tye ka lat i wi ot me paco mere i Babulon, en abaka te kobo ni, “Koŋ inen ba kite ame boma me Babulon dwoŋ kede! Mom man an agero me bed boma me cimo kwogona, tekona kede twer ame an at ye kede?” Ame abaka onwoŋo pwod tye akobo kop man, dwonnoro te katto i poto, ame kobo ni, “Abaka Nebukadnejar we, kop man otye akobbi ni locci doŋ okwanyo oko i ciŋi, obino ryemi oko i akina dano, ibino cako nywako kabedo kede leyi me tim yin ibino camo lum calo twon, mannono bino timere i komi pi mwakki abiro, tuno ka doŋ ityeko ŋeyo ni Ŋat Amalo Meicel loo loc a dano, dok en twero miyo loc baŋ ŋat ame emito.” Oyot koppono te ru cobere oko i kom abaka Nebukadnejar. Rik ote ryeme oko i akina dano, te cako camo lum calo twon, toyo aya i polo te dyako kome oko, te miyo yer wie lot aboco calo yer kom cur, kun lwete doŋ calo lwet winy. I kare ame kare-nono doŋ otum, an Nebukadnejar, atino waŋa malo i polo, tipo koma doŋ te cako dwogo i koma, ate cako pwoyo Ŋat Amalo Meicel, kun apake dok amie kwogo, en ŋat ame bedo kwo nakanaka; pien loccere obedo loc ame perakino i waŋ, loccere tye pi lwagi jo me kare luŋ. Jo luŋ ame bedo i lobo mom gire ginnoro kadi acel; en timo gin ame cunye mito i kom lwak mony a tye i polo, karacel kede i akina jo ame bedo i lobo; mom tye ŋattoro ame twero mako ciŋe, onyo ame twero penye ni, “Itimo kara ŋo?” I kare ame tipo koma odwogo iye i koma-nono ikokome, kwogo me locca kede woro, kede twerra ote daŋ dwogo oko baŋa. Jo ame mia tam kede jo ame owoto oyenya, ote dwoka dok i locca, rik dok ote medda twon dit ocele ame rik mom at ye kede con. Aman doŋ an Nebukadnejar, apako, adworo dok aketo kwogo i kom abaka me polo; pien ticcoro luŋ ame en tio tye atira dok yo mere tye atira. Jo ame wakere, en kwanyogi oko i ditogi te dwokogi piny. I kare ame Belcajar, abaka, otedo twon arama moro adwoŋ meicel pi jo adoŋo ame oworo ame welgi romo tutumia acel, en omato koŋo olok i nyimgi. I kare ame Belcajar obilo koŋo olok, en ociko ni myero kel ikopo luŋ ame otio i jabu kede ryal ame pappere Nebukadnejar rik okwanyo i ot Obaŋa i Jerucalem, me wek en abaka, jo adoŋo me awora, monne, mon aŋeca mat i koŋo. Eka ote ke lo i kopo luŋ ame otio i jabu kede ryal ame rik onwoŋo okwanyo i ot Obaŋa i Jerucalem; eka abaka, wele me awora, monne kede mon aŋeca te mato i koŋo. Gin omato kono olok ote cako pako obaije ame otio i jabu, ryal, mola, nyonyo, yen kede me kiddi. Oyotoyot anyira ciŋ dano moro te nen, te cako coc i kor apa ma ame tye i paco abaka, ame otikere i gi-cibo tara; abaka oneno ciŋ dano-nono i kare ame tye ka coc i kor apama. I caa-nono waŋ abaka te lokere oko, tam te miyo tipo kome ya, lworo omake te miyo coŋe cako myemyela atata. Abaka te woto koko i dwon aloŋo ni myero ru lwoŋo okor tipo, jo Kaldaya, kede oryeko i neno acer, me obin oniaŋe gin omio can opoto i kome. Abaka te kobbi oryeko me Babulon ni, “Ŋat ame bino kwano coc man eka te gonyo tere, obino miyo ruko boŋo obedo amaramar, kun daŋ ruko nyor me jabu i ŋute, en te bedo aloc me adek i loccani.” Oryeko abaka luŋ te bino cite kwano coc kede gonyo tere te loyogi oko. Cuny abaka Belcajar te poto meicel, kome daŋ te cako balle oko, jo adoŋo ame oworo te wuro meicel. Kare ame agoŋ abaka owinyo kop abaka kede jo mere adoŋo ame oworo, en odonyo i ot kan ame otye acamo iye arama; en te kobo ni, “Kom abaka gire myero bed ayot nakanaka, Kur imi tam bed yelo wi i, kun wani balle k ittono. Pien i te loccini tye iye dano ame cuny obaŋe acil meicel bedo i yie. I kare ame pappi rik tye i loc, en rik onen oko kannaler acalo dano aryek ame niaŋ kede ryeko tye baŋe, kun ryeko mere rom aroma i ryeko ame obaŋe bedo kede. Abaka Nebukadnejar, ame obedo pappi rik omio en obedo adwoŋ ame loo otyet, ok or tipo, jo Kaldaya karacel kede oryeko ame ŋeo neno acer, pien en rik oneno ni en obedo dano ame tye kede cuny amala meicel, ŋec kede niaŋ atut me gonyo lek, tuco pennyogo me ryeko kede tyeko peko apapat, ame en dano-nono nyiŋe Danieri ame abaka rik ocake nyiŋe ocele ni Belcajar. Aman myero lwoŋ Danieri me en gonnyi.” Rik ote daŋ ru kelo Danieri inyim abaka, abaka te kobbi Danieri ni, “Yin ibedo Danieri ame okobo-ni, ŋat acel i akina opii ame rik pappa okelo i Juda? An atyeko winyo kop i komi ni cuny Obaŋa acil tye iyii, dok ni lero kede ŋec atut kede ryeko amalo meicel, yin itye kede, Aman onwoŋo okelo oryeko, kede okor tipo, baŋa kan ni obin okwan coc ame tye i kor-apama ca ote gonnya tere, cite gonyo gire oloogi oko, Cite an atyeko winyo ni yin itwero gonyo lek kede tyeko kit peko apapat. Doŋ aman ba, ka ce itwero kwano coc-cu ite gonnya tere, obino miyi iruko boŋo obedo amaramar, ite ruko nyor me jabu i ŋuti, yin ite ruko nyor me jabu, yin ite bedo aloc me adek i te locca-ni.” Danieri te gamo kop abaka ni, “Gwok giri motti piri dok gin ame onwoŋo imito miya pi ticca myero imi baŋ ŋat ocele, kadi mom agamo ginnoro ame imia, an gira abino kwano coc-cu dok abino gonyo tere. Adwoŋ abaka, Obaŋa Amalo Meicel omio pappi Nebukadnejar obedo abaka ame loo lobo, omie daŋ dit kede kwogo kede twer ducu. Pi dit ame rik Obaŋa omie, omio rok luŋ ame kobo leb apapat ducu komgi omyel i nyime, kun owore meicel. Rik ka cunye omito ni enek ŋattoro, en neko; ka omito ni ewek dano moro bed kwo, daŋ weko kite ame cunye omito; ka omito ni emi dit baŋ ŋattoro daŋ mio, ka omito ni ekwany dano oko i dittere, daŋ timo kittono. Cite i kare ame en ocako yeyea calo ogwalogwal i cunye, cunye te doko anwaŋ oko, en te cako wakere oko, omio ote ryeme oko i wi kommere me loc, kwogo mere daŋ ote kwanyo oko, Rik ote ryeme oko i akina dano, ote miye bedo i cuny a lee bedo kede, en te cako bedo karacel kede kane me tim; en te bedo camo lum calo twon kun toyo ame ton i polo dyako kome, tuno ka en oniaŋni Obaŋa Amalo Meicel loo loc a dano, dok keto ŋat ame yie mito me loyo, Doŋ yin wode, Belcajar, mom imwolle i cunyi i nyime, kadi bed yin iŋeo magi luŋ, Ento yin icako yiye me lweny i kom Rwot me polo; dok ame otio kede i ode okelo i nyimi, eka yin kede jo adoŋo me awora, monni, kede aŋecani ite mato wunu koŋo olok; dok daŋ ipako wunu cal obaŋe ame otio i ryal, jabu, mola, nyonyo, yat kede kidi ame mom neno, mom winyo kop, mom ŋeo ginnoro, ento mom iworo Obaŋa, ŋat ame weoni tye i ciŋe, dok ame gwoki i yore ducu. “Mannono en omio Obaŋa ocwao ciŋ dano me coyo coc man, Doŋ coc ame ocoo-nono ene: MENE, MENE, TEKEL MENE, kede PARSIN, Te koppere Obaŋa otyeko moko kare ame locci bino ri kede oko dok onyuto ni agikki mere doŋ ceggi; Tekel, te koppere ni yin doŋ otyeko pimi oko i mijan, onwoŋo ni iyot meicel; Peres, te koppere ni, locci doŋ otyeko poko oko omio baŋ jo Medi kede baŋ jo Pacia.” Oyot Belcajar te miyo twer, ote ruko Danieri boŋo obedo amaramar, kede nyor me jabu i ŋute, eka ote rabo kop i ko me romo lobo luŋ ni en doŋ obedo aloc adwoŋ me adek i te loc me Babulon. I dyeworrono ikokome, ote neko abaka Belcajar oko, Dario dano me Medi te leyo loc, kun mwaka ame dittere romo pyerabicel wie aryo. Dario oneno ni twero bedo ber ka ce eketo oloc adoŋo ame romo mia acel kede pyeraryo oromo lobo ame en eloo luŋ; kede dok oloc ocele adek ame loogi ame gin twero miyo ripot me ticgi i nyimgi, kun Danieri tye i akina jo adekkono, me lim abaka kur rweny kannoro. Danieri te medde bedo dano ame neye meicel i akina owote mere luŋ kede i akina oloc ame gin oloo man otimere pi kit cuny ame rik en tye kede, omio Dario te yik o ni myero ekete obedo dano ame loo lobo ame en eloo luŋ. Mannono te miyo oloc adoŋo luŋ kede rwode te bedo yenyo yo ame myero nwoŋ kede bal i kome ame mako loc; cite yo moro me tero kokogi i kome, akadi nwoŋo balloro i kome te loyogi oko, pien en rik onwoŋo obedo dano ame genne meicel ame mom i roccoro onyo balloro, Jo-nono te doŋ kobo ni, “Mom obino nwoŋo yo moro me tero kokowa i kom Danieri kadi acel, tuno ka obeo i kom gin ame mako cik Obaŋa mere.” Oloc adoŋo kede en ame lubogi te cako wot luŋ baŋ abaka Dario, ote wot kobbe ni, “Kom abaka. Dario gire bed ayot nakanaka! Oloc luŋ ame tye i te locci, kede odoŋe ame loo lwak, rwode, omi-tam kede oloc ame loo dul lobo apapat; gin luŋ oye aboŋo ŋattoro ame oloko kop i akinagi ni abaka myero mok cik dok mi twer a mom oromo loko, ni ka ce obino nwoŋo ŋattoro ame tye ka woro obaŋa moro ocele onyo dano moro ocele ame mom abaka pi nino pyeradek, kodi dano-nono obino bolo oko i akina eŋatu. Doŋ ba adwoŋ, yin myero doŋ imok cikkono, imi coo me iket iye ciŋi me bed cik ame mom dok oromo loko, kun lubo cik a jo Medi kede me a jo Pacia, ame mom dok otwero loko.” Mannono te miyo abaka Dario keto ciŋe me moko cikkono. I kare ame Danieri oŋeo ni cikkono doŋ otyeko keto ciŋ iye oko, en odok i paco mere te wot donyo iyi icika mere ame tye malo, te weko wan dirica luŋ ame tye tutuŋ Jerucalem bedo twolo; en te rumo coŋe piny kun kwao Obaŋa mere, en rik te bedo timo amannono tyen adek nino acel acel, kun pwoo Obaŋa mere, kite ame en onwoŋo timo kede kare ducu. Jo-nu te bino kite ame onwoŋo gin oyiko kede, ote nwoŋo Danieri tye ka kwayo Obaŋa mere kun bako doge i nyime. Gin luŋ ote wot doto Danieri baŋ abaka kun okobo ni, “Adwoŋ abaka! Mom rik iketo cik ame kwero woro obaŋa moro ocele kede dano moro ocele kun nino pyeradek mom ru okato, dok ni jo luŋ myero wori yin keken? Mom rik iciko ni ŋat oturo cikkono myero bol oko i akina eŋatu?” Abaka te gamo ni, “Cikkono pwod gire tye kittono kite ame cik a jo Medi kede jo Pacia tye kede, ame mom otwero loko,” Gin luŋ ote gamo kop abaka ni, “Adwoŋ, Danieri moro ca, ame obedo dano acel i akina opii ame okelo i Juda, en mom winyi kadi acel adwoŋ, mom daŋ winyo cik ame iketo, cite en tye ka kwayo Obaŋa mere nino i nino tyen adek twal.” Kare ame abaka owinyo kop man, cunye ocwer atek meicel, kun tye ka tamo yo me laro kwo a Danieri; te bedo yelle ceŋ iyul, kun tye ka yenyo yo me laro kwo mere. Jo-ni luŋ te bino baŋ abaka, kun onwoŋo ocikere acika, ote kobbi abaka ni, “Adwoŋ abaka, ŋe ni man obedo cik a jo Medi kede me a jo Pacia, ame cik ame abaka otyeko moko mom dok otwero loko kadi acel.” Abaka te doŋ miyo twer, ote kelo Danieri wot bolo i akina eŋatu. Abaka te kobbi Danieri ni, “Obaŋa ame yin iworo myero omedde konyi.” Rik ote kelo gweŋ ote bedo cego kede dog gorogoro ame eŋatu bedo iye oko, abaka te bino mwono oko kun dio atem me ciŋe iye kede me ciŋ jo mere adoŋo me awora, me kur lok ginnoro i kom kop a Danieri. Abaka te wot oko i ode, dyewor luŋ en te bedo kanyo kec, kun mom okelo ginnoro i nyime, ni no daŋ te rwenyo oko i waŋe. Odiko ame piny doŋ oyabere oko, abaka oya te wot oyotoyot i dog gorogoro eŋatu, I kare ame en doŋ ceggi i dog gorogoro kan ame Danieri onwoŋo tye iye, en oredo kun kok i dwon me cwercuny, te penyo Danieri ni, “Ama Danieri amiro Obaŋa Akwo, Obaŋani ame iworo kare luŋ-ŋi, okonyi, omio eŋetu mom otimo ginnoro i komi?” Danieri te gamo kop abaka ni, “Adwoŋŋa, komi gire myero bed ayot nakanaka! Obaŋana ocwao omalai ka te miyo dog eŋatu oko, omio mom otima ginnoro pien balla moro onwoŋo mom tye kadi acel i nyime, akadi i nyimi yin abaka, mom gire atimo ginnoro arac.” Abaka te lelo atek meicel, te ciko ni myero ru kwanyo Danieri oko i akina eŋatu. Mannono te miyo kwanyo Danieri oko i akina eŋatu, kun awano moro mom tye i kome kadi acel, pien en onwoŋo ogeno Obaŋa mere. Abaka te miyo cik, ote kelo jo ame onwoŋo odoto Danieri luŋ bolo oko i gorogoro i akina eŋatu, okelogi karacel itinogi, kede mongi. I kare ame obologi eŋatu odarogi adara, te tuturo cogo komgi oko, ŋiŋido atitino. Abaka Dario te coyo waraga baŋ rok luŋ ame kobo leb apapat ame bedo i wi lobo, kun kobo ni, “Kuc omedde nya i akinawu. Atyeko keto cik i lobo luŋ ame an aloo, ŋat acel acel ame tye iye myero bed kede lworo dok daŋ owor Obaŋa a Danieri, pien en obedo Obaŋa ame kwo, dok perakino nakanaka, loccere mom oromo turo, dok loccere bino romo kabedo luŋ naka iyi agikki piny. En laro dano dok konyo dano daŋ, tio anyut kede gigi mogo me awura, i polo kede i lobo, en Obaŋa-nono ne olaro Danieri, i teko a lwak eŋatu.” Mannono te miyo Danieri bedo aber meicel i kare me loc a Dario kede kare me loc abaka Kuro me Pacia. I mwaka me agege me loc a Belcajar abaka me Babulon, Danieri oleko lek, kun onyutte gigi mogo i kare ame en tye obuto piny i ka buto mere. En te coyo lekkere-nono oko piny, te daŋ kobo gin ame eleko-nono oko. Danieri okobo kit man: “Nen ba, dyewor i waŋ lek, onyutta yamo aŋwen i polo, ame tye ka kodo i twoke aŋwen ducu kun rurubo pii ame tye i twon nammoro adwoŋ meicel. Dok ate neno daŋ leyi mogo adoŋo aŋwen kun otye odonnyo i dye nam, kun acel acel i akinagi pat apata owote mere. Lee me agege onwoŋo cal eŋatu, kun bwome tye calo me a cur. I kare ame atye aneno, ote puto bwome oko, ote tiŋo lee-nono oko i lobo, ote miyo wot cuŋ i tyene aryo calo dano; ote miye cuny ame dano tye kede.” Dok ate ru neno lee ocele me aryo mere, ame onwoŋo calo dubu. Tyene tuncel onwoŋo otiŋere malo, riŋo amara onwoŋo tye adek iyi doge i akina lake; rik ote kobbe ni, “Ya malo, imwod riŋo adwoŋ.” Dok ate ru neno lee ocele mere ame calo kwac, ame bwome tye aŋwen i nee calo me a winyo; wie onwoŋo tye aŋwen twal; mannono onwoŋo tye kede twer me loc. I ŋe man i dyeworrono, dok ate ru neno lee ocele me aŋwennere. Twon lee moro ame neno iyiliyili, ame mio jo twon lworo adwoŋ meicel, dok tek okato kare oko; tye i twoni lakkogo me nyonyo; obedo mwodo riŋo leyi kun tuturo cogogi oko atitino, te nyonyono en odoŋŋere oko i tyene. En onwoŋo pat meicel i leyi ame ageo neno luŋ, tuŋe onwoŋo tye apar twal. Kare ame pwod atye ka paro kop i kom tuŋe apar-ri, tuŋe ocele atidi te dok donnyo i akina owote mere; kare ame tuŋe-nono odonnyo, tuŋe adek i akina maka me agege-ca oputte i tergi luŋ. Tuŋe-nono onwoŋo tye i waŋŋogo ame calo waŋ dano, kede dog ame tye ka kobo koppogo adoŋodoŋo. I kare ame atye aneno, dok ate neno kome me loc ame ocicibo, ŋattoro ame operakino meicel te bino i wik ommere, boŋo mere onwoŋo tar calo pee, yer wie te tar calo yer romo ame olwoko odoco, kommere onwoŋo lyel alyela calo leb mac, kun okottere calo mac ame tye ka waŋ. Kulo me mac te cako mol, kun mol ya i nyime kuno; jo tutumia i tutumia onwoŋo tye ka tic pire, kun jo tutumia apar tyen tutumia apar tye ocuŋ i nyime, dok onwoŋo otye ka ŋolo kop a jo, kun buke tye ame oyabere ayaba. I caa-nono abedo neno pien tuŋ lee onwoŋo tye ka kobo twoni koppogo adoŋodoŋo, kun akobo i dwon aloŋo meicel. I kare ame pwod atye anenonono, ote neko lee-nono oko, ote waŋo kome oko kede mac. Aco leyi ocele mege ca ote gamo locgi oko, cite kwogi kon ote weko bedo kwo pi kare moro anonok. I kare ame atye ka neno anyuttono, i dyeworrono, aneno anyuttogo acalo magi: Aneno dano moro ame calo wot a dano, ame abino i pol kun oya i polo, en te bino baŋ ŋat ame operakino meicel, otere naka i nyime. Rik ote miye loc, loc luŋ aluŋa kede kwogo ame tye iye, me rok luŋ ame kobo leb apapat, myero ti tic pire; loccere bino bedo loc ame pera-kino nakanaka, loccere mom bino gik kadi acel, dok loccere gire mom obino turo. “Aco an Danieri cunya onwoŋo oballe doŋ oko pi lek ame obino i wianono. An ate wot baŋ dano moro acel ame onwoŋo tye i akina jo ame tye kuno, me en niaŋa kop me ateni i kom lek man, En te titta, omia aŋeo kop me lek ame aleko luŋ. Leyi aŋwen adoŋo obedo obakki aŋwen ame bino loc i lobo, Ento jo acil ame obedo jo a Ŋat Amalo Meicel en ame bino gamo loccono, loccono te bedo meggi waŋ i waŋ. “Dok ate mito ni myero aŋe kop i kom lee aŋwen ame onwoŋo pat apata i leyi ocele-ca, ame onwoŋo iyiliyili meicel, kun tye i lake me nyonyo kede lwete luŋ me mola; ame omwodo rujo leyi, kun tuturo cogogi oko atitino, te nyono en odoŋŋere oko i tyene. Dok ate mito ŋeyo daŋ kop i kom tuŋ apar ame onwoŋo tye i wi lee-naca kede dok tuŋe ocele ame te dok donnyo iceni ame te miyo tuŋ adek me agege-ca mukere oko, tuŋe ame onwoŋo tye iye waŋŋogo kede doge ame te kobo koppogo adoŋodoŋo, dok ame onwoŋo nen calo dwoŋ kato owote mere oko ca. I kare ame onwoŋo pwod atye aneno, tuŋe-nono te cako lweny i jo acil, te daŋ loyogi oko, tuno waŋ ame ŋat operakino meicel-ca obino, en omio ote doŋ ŋolo kop a jo acil, ame gin obedo jo a ŋat Amalo Meicel, kare te romo, eka jo acil te doŋ gamo loc. Dano-nono te kobo ni, ‘Kop i kom lee me aŋwen, loc me aŋwen bino bedo tye i lobo, loccono bino bedo pat i loc ocele, loccono bino romo lobo luŋ, bino nyono oko i tyene, bino ŋido oko atitino. Aco tuŋ apar ca, i kom loccono obakki apar bino loyo loc iye; ŋat ocele dok bino donnyo i ŋegi, en bino bedo apat i me agege-ca, en bino turo loc obakki adek oko. En bino kobo kop arac i kom Ŋat Amalo meicel, bino wuno jo acil ame obedo jo a Ŋat Amalo Meicel, bino temo loko karegi me woro Obaŋa kede cik Obaŋa. Obino miyo jo acil i ciŋe, pi mwakki adek kede nucu, Cite okiko me ŋolo kop i kome bino bedo tye, loccere obino gamo oko, obino balo ote jwero oko naka i agikki mere. Doŋ teko kede twer a loc luŋ ame tye i lobo, obino miyo luŋ baŋ jo acil ame obedo jo a Ŋat Amalo Meicel. Locgi bino bedo loc ame pera-kino waŋ i waŋ, loc luŋ me lobo bino worogi kun tio pirgi.’ “Agikki me kop man tye kitti. An Danieri, tamma onwoŋo omio cunya opoto meicel, koma daŋ te balle oko, cite akano kop man i cunya.” I mwaka me adek me loc abaka Belcajar, anyuttogo onen baŋa an Danieri i wan lek, kun doŋ atyeko neno maca me agege-ca oko. I kare ame aneno anyut ame onen baŋa i waŋ lekkono, aneno ni doŋ tye i boma me Cuca, ame tye i lobo me Elam; dok daŋ aneno ni onwoŋo atye i dog kulo me Ulai. Atiŋo waŋa malo ate neno nyok romo ame ocuŋ i wi tela i dog kulo. Nyok romo-nono onwoŋo tye kede tuŋe aryo, tuŋe aryo-nono luŋ onwoŋo bocoboco, cite acel onwoŋo kato awottere oko; en aborrere onwoŋo otu icen. Aneno nyok romo-nono kun tye ka mwomere tuŋŋi i tuŋŋi, ogeo mwomere tuŋ to, te mwomere tuŋ anyarodi, eka dok te mwomere tuŋ anyarolum; lee moro onwoŋo mom romo cuŋ i nyime, dok onwoŋo mom tye ŋattoro ame twero larogi i teko mere. En rik timo gin ame yie mito kun daŋ dwore gire kene. I kare ame pwod atye alwodo kop man i cunya, dok ate neno nyok dyelloro tye abino i tuŋ to, kun ŋolo dye lobo arii, ame tyene mom agudo piny, Nyok dyellono onwoŋo tye kede twon tuŋe acel keken i akina waŋe. Dyellono te wot baŋ romo ame tye kede tuŋe aryo-ca, ame onwoŋo aneno tye ocuŋ i wi tela i ŋet kulo ca, en te mwomere i kome i twon akemo adwoŋ meicel. Anene i kare ame en doŋ onoko romo-ca, akemo te miyo bedo ager meicel, omio te dipo nyok romo muko tuŋe aryo-ca oko, nyok romo onwoŋo mom tye kede teko me cuŋ i nyime. En te reto nyok romo oko piny, te bedo nyonyono, kun mom tye ŋattoro ame twero laro nyok romo i baŋe. Nyok dyel te doŋ yon atek meicel. Ento i kare ame onwoŋo en tek wokkono, twon tuŋe acel-ca te tur oko, eka akaka mannono oturrono te donnyo tuŋe ocele aŋwen ame nen i teŋe, ame otikere i yamo aŋwen ame onwoŋo tye akodo i polo. Dok ate neno tuŋe ocele atidi mere ocako donnyo i akina tuŋe acel i akina maka aŋwen-ca, eka te doŋo abor meicel kun oleŋere odok tutuŋ anyarolum kede tutuŋ kide, ame otikere i lobo me kwogo. Odoŋo abor atek meicel ame te tuno naka kan ame mony me polo tye iye, ame te bolo acerrogo oko piny, te daŋ nyonyono oko i tyene. En te doŋ yon okato kare naka i kom Aloc ame loo mony me polo; ogiko tic me yalo oko i mot awaŋa ame onwoŋo otimo kare ducu, dok te giko daŋ tic me wore oko, kun babalo kabedo acil ame rik owore iye oko, Rik ote miye mony me polo kede mot awaŋa me nino i nino pi bai, wi jo te wil oko i kop me ateni, tuŋŋono te bedo tic kun medde ameda i bedo atek. Dok ate winyo amalaika tye ka kop kede amalaika wadgi, awinyo ka acel gamo kop awottere ni, “Anyut ame onyuto i mot awaŋa me nino i nino myero ri pi kare ame rom mene, dok bal ame mio gigi mogo ame neno lik timere, myero mi pi kare a rom mene, karacel kede miyo ka woro Obaŋa me mony me polo bed me anyona piny i tyen?” Awottere te gamo ni, “Tuno ka odiko kede otyeno doŋ okato ame romo tyen tutumia aryo kede mia adek nono; eka ote doŋ dwoko ot woro Obaŋa kakare.” Kare ame an Danieri atyeko neno, amito ni myero aniaŋ iye; i caa-nono ŋattoro ame cal i dano te bino cuŋ i nyima. An ate winyo dwon ŋattoro ame tye ka kato i wi tela i ŋet kulo me Ulai, ame kobo ni, “Gabriel we, mi dano-nu niaŋ ayut ame eneno i wan lek.” Dano-nono te bino aceggi keda kan ame onwoŋo acuŋ iye. Lworo omaka, omio ate rette piny aryeba cuny. Cite en te kobba ni, “Yin wot a dano, myero iniaŋ ni anyuttono mako kop i kom agikki me jami luŋ i lobo.” Kare ame en tye ka kop keda, an ate cako nino atek meicel kun akula wia piny i lobo, en te maka miya ya cuŋ acuŋa kede tyena. En te kobba ni, “Nen ba, abino miyi iŋeo gin ame bino timere i kare ame akemo Obaŋa bino gik iye; pien koppere mako nino me agikki ame yam doŋ otyeko ciko pire con. Romo ame yin ineno ame tuŋe tye aryo, mannono obedo obakki aryo me Medi kede me Pacia. Aco nyok dyel obedo twon abaka atek me Grik; tuŋ odoŋo abor meicel i akina waŋe obedo abaka me agege. Tuŋ ame otur, eka aŋwen ocele te tu kakare, mannono loc aŋwen apapat ame bino leyo kakare, kun tekogi mom rom kede mege. “Kare ame doŋ loc obakki aŋwennono ceggi gik, ame balgi doŋ rac dok bup okato kare, abaka moro ame kwiri bino cako loc, ame obedo dano ame twero roto gigi mogo me ryeko, Abaka-nono bino bedo atek meicel, bino timo jami mogo ame mio jo lworo, dok jami luŋ ame en tio bino wot aber. En bino neko twoni jo ame tek i lweny karacel kede rok a jo acil. Pi ryeko mere ame calo ryeko apwo, en bino medde ameda i ryeko me bwolo jo, dok en bino bedo dworre kenekene i cunye. En bino neko jo apol meicel kun nwoŋo gin mom ocako lweny i komgi atura; bino cako lweny anaka i kom Aloc ame loo luŋ cite nen ba, obino rete piny kun ciŋ dano mom ogude. Anyut ame ineno i waŋ lek ame onyuto iye kop i kom mot awaŋa me odiko kede otyeno tye ateni, Cite myero igwok acalo kop me imuŋ i cunyi, pien bino tyeko kare alac kun gin ame onyutti-nono mom ru otimere.” Ryeko onwoŋo orywenya oko two te maka, ate bu to kon piny pi kare abubup, icennere ate doŋ ya wot tiyo tic abaka, Ento abedo wuro gin ame aneno i waŋ lekkono meicel, dok naka mom aniaŋ gira iye. I mwaka me agege me loc a Dario wot Akacuwera, ame en anywalli me Medi, ame rik odoko abaka ame loo jo Kaldaya. I mwaka me agege me loccere, i kare ame an Danieri onwoŋo abedo kwano buke, anwoŋo kop ame yam Rwot omio adwarpiny Jeremia okobo gin ame myero koŋ ge timere kun Jerucalem pwod tye acalo wi obur; ate nwoŋo wei mwaka ame onyuto ni bino romo pyerabiro twal. Man omio alokere baŋ Rwot Obaŋa, ate cako kok baŋe kun abako doga akwae, dok daŋ ari kec, ame aruko boŋo cola dok daŋ ajuko koma kede buru. Abedo kwayo Rwot Obaŋana, kun atuco balwa i nyime akobo ni, “Ama Rwot, ame ibedo twon Obaŋa moro ame iyiliyili, ame gwoko cikere mere kede mar a mom lokere baŋ jo ame mare dok mako cikkere. Wan giwa otyeko balo i nyimi, dok otimo gin arac, obedo daŋ timo tim arac kun ojem i komi, olokere teŋe i luba cikki kede gin ame yam iciko. Okwero-gu winyo kop omironi odwarpiny, ame obedo kobo kopgi i nyiŋi baŋ obakkiwa, olocwa, kede baŋ kwariwa, kede dok baŋ jo luŋ me lobowa. Kite atira gire tye baŋi yin keken, Amaa Rwot, aco wan luŋ lewic doŋ omio waŋwa oballe oko, kite ame tye kede i kare-ni. Kite ame tye kede baŋ jo ame bedo i Juda, jo ame bedo i Jerucalem, kede i kom jo Icrael luŋ, jo ame bedo kan aceggi kede jo ame bedo kannabor i lobo ame yam iryemogi iye luŋ, pi timo tim me erupe ame gin obedo timo i komi. Lewic doŋ omio waŋwa oballe oko, Ama Rwot, waŋ obakkiwa, olocwa luŋ, kede waŋ kwariwa, pien wan luŋ otimo bal i nyimi, Rwot Obaŋawa akica dok daŋ weko bal pien wan ojem i kome, wan mom owinyo kop a Rwot Obaŋawa, kun olubo cikkere ame en omiowa ame omiro mere odwarpiny otittiwa. Jo Icrael luŋ oturo cikki, ote daŋ lokki ŋegi, kun mom owinyo koppi. Mannono omio cen kede kop me kwon ame ocoo i buk a Muca amiro Obaŋa ocoro i komwa, pien wan obalo i nyime, En otyeko moko koppere ame en rik okobo i komwa kede i kom olocwa, omio imiowa can adwoŋ meicel. Pien gin ame itimo i kom Jerucalem yam mom ru otimere kadi acel i lobo kan. Can man luŋ ame otyeko coyo i buk a Muca doŋ otyeko timere i komwa, cite kadi amannono, naka am an wan mom ru otemo yomoro cunyi i yore moro, mom oye weko bal wa ote cako lubo atenini. Man en omio Rwot onwoŋo oyiko can man oko pirwa, te daŋ miyo bino i komwa, Rwot Obaŋawa genne i ginnoro luŋ ame en tio, ento wan mom owinyo koppere. “Doŋ aman ba, Ama Rwot Obaŋawa, ame rik ikwanyo joni i lobo me Miciri i twon tekoni adwoŋ, ame te miyo nyiŋi rwo naka atot tin, wan gire obalo i nyimi, dok daŋ otimo gin arac. Ama Rwot kite acalo yin gire igenne i gin ame itimo, tim ber ilok tammi, iwek akemo kede iniga ame itye kede i kom Jerucalem bedi, nen Jerucalem obedo boma acil. Jo luŋ ame tye i ŋetwa tye ka kobo kop arac i ko mwa kede i kom Jerucalem pi balwa kede me a kwariwa. Doŋ ba, Ama Rwot Obaŋawa, tim ber iwiny kwacca an amironi ame abako doga i nyimi. Tim ber, pi nyiŋi, imi kica omaki i kom ot me wori ame aman doŋ tye i wi obur. Ama Rwot Obaŋana, cik yiti iwiny koppa. Yab waŋi, inena, Ama Rwot, nen boma ame olwoŋo kede nyiŋi. Wan giwa mom otye ka bako dogwa baŋi me nyuto kite atira, cite pien yin kicani dwoŋ. Ama Rwot winy kwacca, Ama Rwot tim kica; Ama Rwot cik yiti ite daŋ timo ginnoro oko, Tim ber, kur dok igal, po piri Ama Rwot, pien bomani kede joni olwono kede nyiŋi.” I kare ame a tye ka kop kun akwayo Obaŋa, atuco balla kede bal a jona, dok abako doga baŋ Rwot Obaŋana, pi wi kidi acil ame obedo me Obaŋana. I kare ame at ye ka kwayo Obaŋa kun akop, dano ame nyiŋe Gabriel ame onwoŋo koŋ ageo neno i waŋ lek iyi anyut me agege, te ru bino baŋa oyotoyot, kun ŋweco adwir meicel i caa me yalo Obaŋa i mot otyeno. En obino te bino kobba ni, “Danieri we, an abino me bino miyi ryeko kede niaŋ atut. Nen ba, i kare ame pwod igeo bako dogi abaka baŋ Obaŋa, kopporo okato ame oya i baŋ Obaŋa, ame aman an abino me titti koppono, pien Obaŋa mari meicel. Pi mannono ba, tam koppono me iniaŋ gin ame onyutti i waŋ lek. “Mwaka mia aŋwen kede pyeraboŋwen en ame obedo kare ame Rwot Obaŋa omoko pi jowu kede bomawu acil me tyeko bal oko me turo cik, me giko bal, kede me kwanyo bal oko i komwu, ote dok kela kite atira ame perakino nakanaka, me wek anyut kede kop odwarpiny ocobere kakare, kede dok wiro kabedo man acil akato ducu-ni kede moo, Doŋ amito iŋe dok iniaŋ aber ni cakere i kare ame cik me gero, dok Jerucalem owoto oko pi kuro bino a dano ame owiro kede moo, ame en aloc, mwaka pyeraŋwen wie aboŋwen bino kon kato. Obino dok gero Jerucalem odoco, kede yo luŋ ame tye iye, kun tye apama cel otoro atora, eka te ri pi mwakki mia aŋwen kede pyeradek wie aŋwen, cite obino gero i kare ame peko tye. I ŋe mwaka mia aŋwen kede pyeradek wie aŋwen, dano ame owiro kede moo obino neko oko, kun ŋat ocele mom dok leo kakare; mony ocele ame bino bi no kede alocgi bino turo boma oko, karacel kede kabedo acil. Agikki mere doŋ bino bedo calo abwal pii, lweny doŋ te erre agwa naka iyi agikki; mannono en ame obedo can ame yam Rwot ociko pire. Dano-nono bino moko cikkere i jo apol pi mwakki abiro; en bi no miyo tic me yalo Obaŋa gik koŋ oko pi mwakki adek kede nucu. Dano ame bino balo piny odoco-nono bino bino kun oboo kome i timmogo me kwer, tuno ka kare ame rik Obaŋa oyiko pire doŋ oromo.” I mwaka me adek me loc a Kuro abaka me Pacia, rik obin onyuto kopporo baŋ Danieri ame nyiŋe ocele Beltecajar. Kop ame onyutte-nono onwoŋo tye ateni, dok okelo arubaruba adwoŋ meicel. Danieri oniaŋ koppono, te daŋ niaŋ gin ame onyutte. I kare-nono luŋ, an Danieri abedo kumo pi cabit adek twal. Mom acamo cammoro amit, mom acamo riŋo, akadi kono olok daŋ mom ogudo doga, mom daŋ awirre kede moo kadi acel pi cabit adekkono luŋ. I nino dwe pyeraryo wie aŋwen me dwe me agege, i kare ame onwoŋo atye acuŋ i ŋet kulo moro adwoŋ, ame en kulo Tigric, atiŋo waŋa malo, ate neno dano moro ame onwoŋo oruko boŋo camanini, kun otweo pyere kede del jabu me Upaj. Kom dano-nono onwoŋo calo kidi berul ame mimila amimil, tur nyime te calo lutkot ame tye ka meny, kun waŋe calo mac rao ame alyel, eka bade kede tyene luŋ te meny calo mola ame orudo meicel, dok kop ame en kobo ka iwinyo calo lwak jo apipim en awo-nono. Anyut ame onen-nono, an Danieri keken en ame aneno, jo ame rik tye keda mom oneno, cite komgi omyel atek meicel pi lworo, ote riŋo wot pono oko. Gin oweka adoŋ kena eka ate neno twon anyuttoro adwoŋ wok-ki. I kare ame aneno, tekona te tum oko ducu, ber a koma te lokere atek meicel, tekona te tum odoco. Dok ate winyo dwone kun en tye ka kop, i kare ame awinyo koppere, arette piny aryeba cuny, ate daŋ cako nino oko atek meicel. Nen ba, ciŋ ŋattoro te guda, te miya rumo aruma kun ciŋa kede cena luŋ tye amyel amyela. Dano-nono te kobba ni, “Danieri we, dano ame omaro cik yiti iwiny kop luŋ ame at ye ka kobo baŋi, ya malo icuŋ atira, pien an aman otyeko oora baŋi.” I kare ame en onwoŋo pwod tye ka kobo kop man baŋa, an aya malo ate cuŋ kun koma amyel amyela. En te kobba ni, “Kur ilwor, Danieri, pien cakere i nino me agege ame icako keto iye cunyi me niaŋ kop man kede mwolle keni i nyim Obaŋani, kop ame ibedo kobo luŋ owinyere, daŋ en koppi-nono en omio abino baŋi. Amalaika ame gwoko loc me Pacia obedo geŋa pi nino ame romo pyeraryo wie acel twal. Cite Maikol ame obedo ŋat acel i akina omalaika adoŋo, obino te bino konya, omio an ate weke kuno gin kede amala ika ame gwoko Pacia. Doŋ an abino me bino miyi ŋeyo gin aŋo ame bino timere i kom joni i kare ame pwod tye anyim, Pien anyut ame ineno nyuto gin ame bino timere i kare ame pwod tye anyim.” Kare ame en otyeko kobo kop magi ducu baŋa, akulo wia piny eka leba te menne oko, Nen ba, dano moro ame cal acala i dano te gudo del doga, ate cako kop oko, An ate kobbe en dano ame ocuŋ i nyima-nono ni, “Adwoŋŋa, anyut ame aneno-nono omio adoko gira agoro oko, tekona doŋ mom. Kara doŋ an amironi atwero kop kedi niŋo yin adwoŋŋa? Pien tekona doŋ mom, dok weo daŋ doŋ mito loya oko.” Ŋattoro ame cal i dano te dok mulo koma, tekona te dwogo. En te kobba ni, “Yin dano ame omaro atek meicel, kur ilwor, kuc obed baŋi; cuŋ atek ame cunyi nwaŋ.” Kare ame en okobo keda, adoko tek eka ate kobo ni, “Kob giri doŋ adwoŋŋa, pien doŋ imio tekona adwogo.” En doŋ te kobo ni, “Yin iŋeo gin omio an abino baŋi? Aman an abino dok me wot lweny i kom aloc me Pacia. Ka doŋ atyeko lweny kede oko, aloc me Grik bino bino. Cite an abino me bino titti gin ame ocoo i buk ame tye iye kop me ateni, Mom tye ŋattoro ocele i ŋeta me konya lweny kono ka Maikol keken, ame obedo alocwu.” Aco an, i mwaka me agege me loc a Dario ame obedo jo Medi, Maikol oya malo me konya kede miya tekcuny. “Aman an doŋ abino nyutti kop me ateni. Nen ba, obakki ocele adek dok bino ya i lobo me Pacia, eka me aŋwennere te doŋ bedo alonyo atek meicel ame kato gin ducu; kare ame en doŋ odoko atek pi lonyo mere, en bino cako tutugo jo luŋ me lweny i kom loc a jo Grik. Twon abaka moro adwoŋ meicel te dok cako loc, ame abino loyo loccere i twon loccoro agwa, kun timo gin ame yie mito. Kare ame en doŋ ocako loc kittono loccere bi no tur oko te pokere yie aŋwen twal; mom ikwae en a bino loc, dok mom bi no lubo kit loccere, pien loccere obino miyo luŋ baŋ jo ocele a mom ikwae kadi acel. “Abaka acel me tutuŋ anyarolum bino bedo atek, cite aloccere moro acel bino bedo atek ame kate oko, dok loccere bino bedo twon loc adwoŋ meicel. Icennere ka mwaka mogo doŋ okato, gin bino ribere oko; i kare-nono nyaka abaka ame tye tutuŋ anyarolum bino bino baŋ abaka ame tye tutuŋ anyarodi pi yenyo yo me kelo kuc; cite dako-nono teko mere bino tum oko, mannono bino miyo abaka kede ikwae bino ol kede oko, cunygi te caye oko, karacel kede omiro mere, otino mere, anaka cware kede ŋat ame oleo lobo mere. “I kare-nono wat a dako-nono bino ya te cako lweny i kom mony me Curia, te guro cel abaka ame tye tutuŋ to, bino donyo iye te lweny kedgi loyogi oko. En bino coko cal obaŋegi kede cal jogigi karacel kede jami me wei ame otio i ryal kede jabu, te terogi i Miciri; eka pi mwakki mogo en koŋ te bedo kun mom lwenyo i kom abaka me tutuŋ anyarodi. Icennere abaka ame oya i tutuŋ anyarodi te bino lweny i lobo abaka ame tye tutuŋ anyarolum, cite bino dok gire i lobo mere. “Awobe mere bino cako yikere me lweny, gin obino coko lwak adwoŋ meicel me lweny, monnyono bino wot lweny i kom okworgi, obino reto oko ote bea kato acalo alele pii amol ote wot naka i cel me boma ame ocelo atek. Akemo bino mako abaka me tutuŋ anyarolum meicel, bino kato oko te lweny abaka me tutuŋ anyarodi, bino cobo twon mony adwoŋ meicel, ote daŋ miyo mony ocele-ca i ciŋe, Ka doŋ otyeko neko lwak mony adwoŋ wokkono, en bino bedo i twon awaka adwoŋ meicel i cunye, En bino neko jo tutumia i tutumia, cite mom bino loc nakanaka. “Abaka me tutuŋ anyarodi bino dok paco te wot coko mony adwoŋ meicel ame kato maca me agege-ca oko, icennere i ne mwakki mogo en bino dwogo me bino lweny, kun tye i lwak mony adwoŋ meicel dok i jami lweny apipim. I kare-nono jo apol bino jem i kom abaka me Miciri, dok otim tim arac ame tye i akina jo me turwu bino yeyea ni oromo cobo anyut ame yin ineno i wan lek, cite mom gire obino twero kadi acel. Abaka me Curia bino bino te bino guro boma ame ocelo atek wokkaca, eka te mako oko. Ocirikale me tutuŋ anyarolum mom bino medde cuŋ i nyimgi, anaka jo atek meicel i lweny ame oyero ayera, pien mom obino bedo kede teko me cuŋ i nyimgi. Cite jo ame bino cobo mony i komgi-nono bino timogi cucu kite ame cunye omito, kun ŋattoro mom tye ame romo cuŋ i nyimgi. En bino cuŋ i lobo me kwogo, kun lobonono luŋ doŋ tye i te twerrere. “En bino yikere me bino kede teko, kun bino i mony me lobo mere luŋ, en bino cako yiko kop me kelo kuc, eka te daŋ miyo timere. En bino miye nyako ame dako onywalo me wek bin babalo loccere luŋ oko; cite mom bino twerre, mom daŋ medde wot anyim, Icennere en bino lokere me lweny i kom lobo ame tye tutuŋ dog nam, eka te loyo polgi; cite atel wi mony bino miyo awaka mere gik oko; ateteni, bino miyo lewic make, Abaka bi no doŋ lokere dok cen i cel me boma mere en ikome ame ocele atek, cite bino bedo gatte te rette oko piny, mom ote nwoŋo atwal. “Abaka ocele dok bino leyo kakare, abaka-nono bino cwayo araocoro beo i lobo mere me kwogo luŋ, cite bino tyeko kare anonok meicel ote neke oko, kun mom oneke i wi akemo onyo i lweny. “Dano moro ocele bino leyo kakare ame mom opore bedo abaka, en bino bi no atura te gamo loc oko i yore me ryeko. Obino ryemo mony oko i nyime, ote jwero jo oko ducu, naka alamdog adwoŋ daŋ obino neko oko. Cakere i kare ame en bi no cako cikere i rok ocele, en bi no tiyo ticcere kun bwobwolo jo i ryeko meicel, en bino doko atek kun tye i mony anonok meicel. En bino tuno i dul lobo ame olony meicel kun jo me lobo-nono mom ŋeo kadi acel, en bino timo gin ame kwari mere luŋ, naka kwari a kwari mere daŋ mom ru yam otimo. En bino poko i akina jo mere jami luŋ ame yam oyako. En bi no yikere me cako lweny i kom boma mogo ame ocecelo atek, ento bino timere pi kare moro anonok. “Teko mere kede tek cunye bino tugere me lweny i kom abaka me tutuŋ anyarolum ame tye kede twon mony adwoŋ meicel; abaka me tutuŋ anyarolum bino cako lweny kede i lwak mony adwoŋ dok atek meicel; cite mom gire obino cuŋ i nyime, pien obino bedo yiko koppogo me rete. Naka jo ame camo cammere abeco daŋ bino bedo i akina jo ame bino neke; monnyere daŋ obino jwero oko ducu, jo apol obino neko aneka. Gin obakki aryo-nono obino doŋ cako cam i meja acel kun tam i cunygi mom ber; ŋat acel acel i akinagi bino bwolo awottere i kop i doge kun cunygi tye atamo timo gin arac; cite gobagi-nono mom bi no konyogi, pien kare nwoŋo mom ru oromo ame doŋ otyeko moko oko. En bino dok cen i lobo mere i lwak jami adwotj meicel, cite pwod bino bedo kede mit me babalo cikere Obaŋa. En bi no timo gin ame cunye mito te dok i lobo mere. “En bino dwogo i kare ame ociko te dok tutuŋ anyarolum; cite mom dok bino bedo kite a rik obedo kede con ca, Pien lwak mony adwoŋ bino bino kede melle me bino lweny kede, lworo bino make eka te dok oko cen, en bino dok i twon akemo meicel eka te wot cako lweny i kom cikere Obaŋa. En bino dok cen te cako winyo tam a jo ame otyeko ya oko i cikere Obaŋa: Monnyere mogo ame oya i baŋe bino bino i ot Obaŋa ote wot timo tim me ipyeda iye kede i apama cellere, eka ote kwanyo mot awaŋa ame owaŋo iye ducu. Gin te cako keto iye ginnoro me kwer ame balo cuny jo. En bino cako lwenyo lwenyo me ryeko i kom jo ame doŋ otyeko turo cikere Obaŋa: cite jo ame ŋeo Obaŋagi bino medde cuŋ atek ote daŋ loyo oko, Jo mogo i akina jo ame ryek bi no miyo jo apol niaŋ, kadi bed obino nekogi i pala me lweny karacel kede mac, onyo obino terogi oko acalo opii, kun daŋ oyako jamigi oko pi kare moro. Kare ame otye ka wunogi, gin bino nwoŋo kony anonokkoro. Dok jo ocele bino lubogi pi kop me ryeko ame obwologi kede. Jo mogo i akina jo ame ryek obino neko oko, Man bino timere me yek jo mogo areco oko, dok lony jo bed atar, tuno ka kare me agikki ame ociko doŋ oromo. “Abaka bino timo gin ame cunye mito, en bino kette me bedo malo ame loo gin luŋ ame olwono ni obaŋa, dok bino kobo koppogo me awura i kom Obaŋa ame loo obaŋe luŋ. En bino medde timo kittono tuno ka kare me keto can i kome doŋ oromo; pien gin ame Obaŋa doŋ otyeko moko bino timere. En mom bino paro pi obaŋe a kwari mere, akadi i kom woro jok ame mon maro wok-ki; mom gire bino paro pi obaŋa moro ocele, pien en bi no kette kene me bedo malo ame loo ginnoro luŋ. En bino lunyo woro obaŋa me cellogo ogero atek akaka woro magi, obaŋa ame kwari mere yam mom ŋeo. En bino woro obaŋa-nono i jabu kede ryal, kidi mogo me wel kede mottogo ame welgi malo. En bino geno cel ame ogero atek pi konnyogo ame obaŋa orok mie; jo ame ye dittere en bi no miyogi twon kwogo adwoŋ meicel kun miogi obedo oloc ame loo jo apol, dok bino poko lobo mere kun mio jo wilo awila. “Ame kare me agikki doŋ ceggi, abaka me tutuŋ anyarolum bino cako lweny i kome, cite abaka me tutuŋ anyarodi bino ru bino i kome calo yamo ajuru, kun bino i gadigadi, wegi aguragura, karacel kede lwak wel apipim. En bino donyo i lobo apapat, kun bea kato calo ale le pii amol. En bino tuno naka i lobo me kwogo. Jo tutumia apar twal obino neko oko, cite jo Edom, jo Moab kede jo Ammon bino bwot i ciŋe, eka ote doŋ. En bi no ryeyo ciŋe me lweny i kom lobo apol meicel, lobo i tutuŋ anyarolum daŋ mom bino bwot. En doŋ bino bedo aloc ame loo lonyo me jabu, ryal kede jami mogo me wel ame tye tutuŋ anyarolum; jo Libia kede jo Eciopia bi no lubo yore. Cite amut ame bino ya i tutuŋ kide kede tutuŋ anyarodi bino poto cunye, en te wot oko i twon akemo adwoŋ me wot neko jo apol meicel. En bino guro kema me loccere i akina nam kede kidi acil ame obedo kidi me kwogo; kadi bed amannono, kare me to mere gire bino romo ame ŋattoro mom bino konye.” “I kare-nono Maikol bino, bino, ame en aloc adwoŋ ame loo rokwu. Kare me can bino bedo tye; can ame yam mom ru onen, cakere i kare ame rok luŋ cakere acaka tuno kede naka i kare-naca; i kare-naca obino laro rokwu; jo luŋ ame obino nwoŋo nyiŋgi ocoye i buk. Pol a jo ame oto ote yiko komgi piny i lobo bino ya malo, kun jo ocele ya te bedo i kwo ame perakino nakanaka, jo ocele bino ya i twon lewic adwoŋ kede acae ame perakino atwal. Jo ame ryek bino ryeny aryenya calo polo ame opette, kede jo ame loko jo apol doko jo a kitegi atira, bino meny amenya nakanaka calo acer. Doŋ yin Danieri, wun buk ame ocoo iye kop man oko, mwon doge oko, tuno ka kare me agikki doŋ oromo. Jo apol bino riŋo kun wirre tuŋŋi i tuŋŋi, dok daŋ bino medde.” An Danieri ate tiŋo waŋa neno jo aryo ame ocuŋ, kun acel ocuŋ i dog kulo tuŋŋi, acel ocuŋ i dog kulo tuŋ-ca. An ate kobbi dano ame onwoŋo oruko boŋo camanini, ame onwoŋo tye malo i wi pii i kulo, ni, “Man bino tero kare ame rom mene tuno ka gin me awura magi bino giko timere?” Dano ame onwoŋo oruko boŋo camanini ame onwoŋo tye malo i wi pii i kulo-nono, te tiŋo ciŋe ryoryo luŋ malo i polo, an ate winyo en ka tye ka kwoŋ, kun kwoŋo i nyiŋ ŋat ame bedo kwo nakanaka, ni mannono ginnono bino perakino pi mwakki adek kede nucu; dok ka kare me turo teko a jo acil doŋ otum, jami magi luŋ doŋ te cobe re luŋ. Awinyo gin ame en okobo cite mom aniaŋ iye, Mannono omio ate penyo ni, “Adwoŋŋa, agikki me jami magi luŋ bino bedo niŋo ba?” En te gamo ni, “Yin medde kede woti Danieri, pien koppere pwod owumo oko, omwono oko tuno ka kare me agikki oromo. Jo apol meicel bino lonyere, obino doko atar, kun olony odoco. Cite jo areco bino medde timo gin arac, kun ŋattoro i akina jo areco mom tye ame niaŋ iye, cite jo aryek bino niaŋ. Don cakere i kare ame okwanyo iye mot awaŋa me nino i nino, eka ote keto iye ginnoro me kwer ame balo cuny jo, bino tero kare me nino tutumia acel kede mia aryo i pyeraboŋwen. Tye kede winyo ŋat ame kuro eka te tuno i nino tutumia acel, kede mia adek kede pyeradek wie abic. Aman yin giri medde kede wotti tuno ka nino me agikki oromo. Ibino nwoŋo weo, ibino cuŋ i kabedoni ame opokki kare me agikki.” Kop a Rwot ame rik obino baŋ Kocea wot a Beeri, i kare obakki Ujjia, Yotam, Akaj kede Kejekia, ame gin onwoŋo obedo obakki me Juda, kede i kare abaka Jeroboam wot a Yoaci ame onwoŋo obedo abaka me Icrael. Kare ame Rwot ogeo kop baŋ Kocea, Rwot okobbi Kocea ni, “Wot i nyom nyako ame alaya me inwoŋ itino ame onywalo i tim me alaya, pien lobo odoko twon alaya pi kwero lubo Rwot” Kocea te wot nyomo Gomer nyaka Didaim, eka te yac, te nywalo atin awobi. Rwot te kobbi Kocea ni, “Cak nyiŋe ni Jejreel, pien odoŋ kare anonok, abino keto can i kom ot a Yeko pi remo a Jejreel, dok abino miyo loc me ot Icrael gik oko. Dok daŋ i nino-nono abino turo akud atero Icrael oko i luŋ me Jejreel.” Gomer dok te yac, te nywalo atin nyako, Rwot te kobbi Kocea ni, “Cak nyiŋe Lo-rukama pien mom dok abino medde timo kica i ot Icrael, mom abino weko balgi kadi acel. Cite abino timo kica i ot a Juda, abino larogi pi tek a Rwot Obaŋagi; mom abino larogi kede akud atero, kadi i pala romo, onyo i mony, onyo kede aguragura, kadi wegi aguragura.” Kare ame Gomer doŋ oryemo atin oko i cak, dok te yac, te nywalo awobi. Rwot te kobo ni, “Cak nyiŋe ni Lo-ammi, pien wun mom ibedo wunu jona, dok an daŋ mom abedo Obaŋawu.” Cite wel a jo Icrael bino bedo acalli kwoyo me dog nam, ame mom pimere, dok a mom romo akwana; dok daŋ i kabedo ame rik okobbigi iye ni “Wun mom i jona wunu,” obino kobbigi iye ni, “Itino Obaŋa akwo.” Jo me Juda kede jo me Icrael bino cokere karacel, ote keto ŋat acel ame telo wigi, eka gm te ya oko i lobo-nono, pien nino a Jejreel bino bedo nino adwoŋ meicel. Kob baŋ ominwu ni, “Ammi ” kede baŋ aminwu ni “Rukama” Pyem i totowu, pyem wunu kede, pien en mom obedo cega, an daŋ gira mom abedo cware, me en mi timmere me alaya rweny oko i waŋe, dok mito co ocele rweny oko i akina tuno mere. Ka mom amannono, abino gonyo rukkere, ete doŋ onoro, abino miyo edoŋ nono calo nino a rik onywale iye, abino miyo ebedo calo lobo otwo, abino miyo oryo pi en aneke. Mom daŋ abino timo itino mere kica, pien gin obedo itino ame nywalo pi tim me alaya Pien totogi obedo alaya, dako oyacogi otimo tim me lewic. Pien en okobo ni, “Abino wot baŋ coga” ame mia kwonna kede piina, yer romona, pambana, moona kede gi-amatana. Pi mannono abino cego yore oko kede okuto, eka ate gero cel gure kede oko, me kur dok enwoŋ yo me beo mere. En bino ryemo yo coge, cite mom bino makogi, en bino yenyogi cite mom gire bino nwoŋogi. Icennere en bino kobo ni, “An abino wot, abino dok baŋ cwara me agege, pien rik atye aber i kato i kare-ni”. En gire rik mom daŋ ŋeo, ni an a rik amie kal, koŋo olok kede moo, dok an daŋ amio ryal onya baŋe, kede jabu ame gin otio kede pi Baal. Pi mannono, ka kare oromo, abino twonne gira kalla oko, kede koŋo olokka ka kare mere oromo, abino daŋ gamo yer romona kede pambana, a rik egeno i kome olaŋara. Aman doŋ abino yabo lewiccere i nyim coge, ŋattoro mom bino lare i ciŋa. Abino miyo yomcunnyere luŋ gik oko, ecubannere, por dwe, cabittere, karacel kede ecubannere luŋ ame ociko pirgi. Abino babalo olok kede oduro mere oko, ame en onwoŋo kobo ni, “Magi motta ame coga omia.” Abino miyogi luŋ doko buŋ, leyi me tim bino camogi. Abino keto can i kome pi nino me ecuban a Baal, ame kere a en waŋo kede odok akur baŋgi, te rukere aber atemmere, kede wellere, te lubo kede yo coge, kun wie wii oko i koma. Man kop a Rwot ikokome. Pi mannono, nen ba, abino bibito en, abino tere i tim abino kop kede i mwolo. Ate bino miye poto olokkere kuno, abino miyo luŋ me Akor doko doggola ame miyo jo bedo i gen. En te bino kop kede kuno calo kare ame en pwod nyako, dok acalo kare a rik en ya Miciri. “I kare-nono ibino lwoŋa ni, ‘Cwara’, man kop a Rwot ikokome, mom dok ibino lwoŋa ni ‘Baal mera.’ Pien abino kwanyo nyiŋŋogo me Baal oko i doge, jo mom dok bino lwoŋo nyingi kadi acel. I nino nono daŋ abino cikere pirwu, kun acikere i leyi me tim kede winy a twarre malo, kede gin ame lak alaka i wi lobo; dok daŋ abino turo akud atero, karacel kede pala lweny, kede mony i lobo; eka ate miyi buto piny i kuc. Abino nyomi doŋ ibedo mera atwal. Abino nyomi i kite atira, kede cuny aler, kede mar a mom lokere, karacel kede kica. Abino nyomi ibedo mera ateteni, dok daŋ ibino ŋeyo Rwot. “I nino-nono, man kop a Rwot ikokome, abino gamo kop a polo, eka gin te gamo kop a lobo; eka lobo te gamo mea kal, koŋo olok kede mea moo, gin luŋ bino dok i kwaca Jejreel, eka ate coye me bedo mera kena i lobo-ni. Abino timo kica baŋ Lo-rukama eka ate kobo baŋ Lo-ammi ni, ‘Ibedo wunu jona,’ eka en te kobo ni, ‘Yin Obaŋana.’ ” Rwot dok te kobba ni, “Apee dok iwot imar dako ame tye i dyerre ame mare, dok en dako ame mito co ocele, imare kom kite ame Rwot maro kede Icrael, kadi bed jo Icrael lokere gigi baŋ cal jogi kun omaro aŋina olok ame otwo.” Mannono omio awile i cekel apar wie abic me ryal, kede cayiri ame romo puku aŋwen kede nucu. Eka ate kobbe ni, “Myero iri baŋa pi kare alac kun mom itimo timmoro me alaya. Kur daŋ ibed ico moro ocele, an daŋ abino bedo amannono tuŋ baŋi.” Pien jo Icrael bino ri kare alac aboŋo abaka, kadi aloccoro, aboŋo ginnoro me aŋola me yalo Obaŋa, kadi kidi moro ame ocibo me awora, aboŋo kit callogo me tyet. Icennere jo Icrael bino lokkere, te cako yenyo Rwot Obaŋagi, kede abakagi Daudi; gin obino dwogo baŋ Rwot kun otye i lworo kede dok pi berrere i kare ame tye anyim. Winy wunu kop a Rwot, wun jo Icrael; pien Rwot tye i gin ame emito da iye i kom jo abedo i lobo-ni. Pien cuny me ateni gire mom i loboni, akadi marroro daŋ mom, neccoro i kom Obaŋa daŋ mom. Gin a tye iye en kwoŋ, goba, nek, kwalo kwo, kede cot, jo iye mom ye ni jukgi, oneno nek a kolle akola. Pi mannono, lobo tye kumo akuma, jo luŋ a bedo iye doŋ onyonere oko, karacel kede leyi me tim, kede winy a twarre malo; naka akadi rec me nam daŋ oto oko. Cite dano moro myero kur da, dano moro daŋ kur dot awottere, pien ŋat ame an ada kede en yin alamdog. Ibino twomere dyeceŋ, odwarpiny daŋ bino twomere kedi dyewor, dok abino neko daŋ totti oko. Jona gire tye ka to atoa pi kwiya pinygi, pien yin ikwero pwonyere oko, omio an akweri doŋ oko me bedo alamdogga, Kite acalo yin doŋ wii owil oko i cik Obaŋani, an daŋ wia bino wil oko i kom itinoni. Gin ka welgi omedde, gin daŋ omedde balo baŋa; abino loko kwogogi bedo me lewic. Bal a jona odoko camgi, worogi omio gin mito ni jo tim gin arac, Cite abino miyo olamdog bedo calo jo ocele, abino keto can i komgi pi kitegino no, ate culogi pi timgi-nono, Gin bino cem, cite mom obino yeŋ, obino daŋ timo tim me alaya, cite mom obino gire nya; pien gin oweko Rwot oko, pi miye gigi i tim me alaya. Koŋo olok, kede koŋo olok anyennere, rwenyo tam a dano oko, Jona penyo tam kom i baŋ yat, abirogi kom en ame nyuttigi kop. Pien cuny me alaya doŋ orwenyogi oko, omio gin oweko obaŋagi oko, pi timo tim me alaya. Gin ŋolo motgi me yalo Obaŋa malo i wi kiddi gin waŋo gitumgi i wi tur malo, i te kworo, atego kede olwedo, ni pien tipogi ber. Mannono en gin omio anyirawu yam timo tim me alaya, aterawu daŋ codo cot. Mom abino keto can i kom anyirawu, kadi bed gin otye ka timo tim me alaya, kadi i kom aterawu kadi bed gin tye mito co ocele; pien co daŋ opokere oko kun obedo gigi baŋ olaya, dok omio motgi me yalo Obaŋa karacel olaya me ot jogi. Rok ame mom i tam poto gire oko, Kadi bed yin Icrael ibedo alaya, cite kur Juda daŋ dok abal. Kur iwot wunu i Gilgal, kur daŋ iwot wunu i Bet-awen; kur daŋ ikwoŋ wunu ni “Acalo Rwot tye kwo-ni.” Icrael calli roya ame aole; Rwot aman dok twero pitogi, acalo atin romo ame okwao kan alac? Epraim doŋ oribere oko i cal jogi, wek en gire koŋ bedi! Lwak jo ame omero, omiye gigi oko i tim me alaya, gin omaro gin a kelligi lewic akato kwogogi. Yamo gire tye oridogi oko i bwome, lewic bino makogi pi motgi ame oŋolo-nono. Wun olamdog, koŋ iwiny wunu. Wun jo ot Icrael, ketto wunu cunywu, Cik yitwu, wun jo ot abaka, Pien kop ame oŋolo otikowu, pien wun ibedo wunu kumma ame ociko i Micpa, kede boo ame oryeo i wi Tabor. Gin otyeko kunyo bur atut i Cittim, ento an abino keto can i komgi luŋ. An aŋeo Epraim, Icrael daŋ mom okanne i baŋa; aco aman yin Epraim idoko alaya oko, Icrael daŋ doŋ olille gire oko. Timgi areco-nono mom yegi odwogo baŋ Obaŋagi; pien cuny me alaya doŋ tye i yigi, omio mom oŋeo Rwot. Wakere Icrael bedo caden i nyime; Epraim bino twomere pi ballere, Juda daŋ bino twomere kedgi. Gin bino wot i leyi me aŋola, pi yenyo Rwot, cite mom obino nwoŋe, en doŋ oya oko i baŋgi. Gin mom obedo ogen baŋ Rwot, pien onywalo itinogi i jo ocele. Aman doŋ por dwe abino rweyogi oko gin karacel kede pottigi. Kut wunu bile i Gibea, kede opel i Rama. Kuk wunu duru i Bet-awen; wan olubi yin Benjamin! Epraim bino doko wi obur, i nino me keto can i kome; amio kop ame abino timere atenini, oneye i atekere Icrael. Oloc me Juda odoko calo jo ame kobo gweŋ i wan apokki, abino coro akemona i komgi calo pii. Epraim doŋ odiogi meicel, mom oŋolo kop kakare, pien oketo cunygi i lubo gin a konyere mom. Cite an anaŋo ot Epraim bala nyenye atuco ot a Juda bala lut. Kare ame Epraim oneno two mere, eka Juda te neno waŋ burrere, omio Epraim owoto Acuria, te cwayo kwena baŋ abaka adit cite en gire mom ocaŋowu, kadi caŋo burwu. Ateni an acalo eŋatu baŋ Epraim, kede atin eŋatu baŋ Juda, Kom an, an ikoma abino kikilo yin, ate wot oko, abino wayi ateri oko, ame dano moro mom bino lari, Abino dok gira i kabedona, tuno ka gin oniaŋ balgi ote yenyo waŋa, gin bino yenya meicel i cangi. Biye wunu, odok wunu cen baŋ Rwot; pien en gire okikilowa, daŋ bino caŋowa; en daŋ gire opwodowa, daŋ bino tweyo waŋ burwa. I ŋe nino aryo en bino cerowa, i nino me adekkere en bino miyowa ocuŋ oko, me obed kwo i nyime. Oŋe wunu Rwot, oketto wunu cunywa i ŋeye; dwogo mere ate ni, calo ru piny a mom lokere; en bino baŋwa calo kot, acalo kot me cwir ame bino i lobo. Abino timi kara nadi, yin Epraim? Abino timi kara nadi, yin Juda? Marwu kom calli pol me odiko, calli toyo a mom niaŋ ony. Mannono omio amio odwarpiny owaŋogi oko, anekogi oko i kop me doga; kop ame aŋolo menyo piny, An amito gira mar a mom lokere, mom mot oŋolo me yalla, kede ŋeyo Obaŋa, mom mot awaŋa alutu me yalo Obaŋa Ento gin oturo cikere calo Adam, gin otimo gin a mom atira i koma kuno, Gilead obedo boma ame otim tim areco dwoŋ iye, kan a tyen jo onyono luŋ, remo keken, Calo oyak ame libo dano, olamdog daŋ cokere karacel amannono; gin oneko jo i yo ame woto i Cekem, timgi-nono rac meicel. Aneno ginnoro iyiliyili meicel, i ot woro Obaŋa a jo Icrael; tim Epraim me alaya tye kuno, aco Icrael doŋ olille oko. Yin Juda daŋ, kare me kac doŋ onyuto oko. I kare ame dok abino miyo jona gum aber, i kare ame amito caŋo Icrael, bal Epraim te nen oko, kede tim areco a jo Camaria otimo. Pien gin obwolo jo, akwo turo ot, oyak jo, yako jo iyo. Cite mom daŋ oparo gigi ni an apo pi timgi areco luŋ. Timgi doŋ am an ogurogi dyere, tye daŋ doŋ i nyima. Gin oyomoro cuny abaka i timgi areco, oyomoro daŋ cuny oloc i gobagi. Gin luŋ ocodo cot, gin rom kom i keno alyet, ame ated ogati mere mom dok yiko mac iye, cakere a en orubo tobi kede moko tuno waŋ oyenyo, te kwot. I nino abakawa, lyeto me koŋo olok omio oloc luŋ otwoye, abaka te ryeyo bade karacel i wegi ayet. Pien yigi bedo alyet calo keno, pi kop a gin aporo; akemogi bedo mimira dyewor benebene, eka odiko te lyel malo calo mac arum. Gin luŋ doŋ olyet calo keno, orweo olocgi oko. Obakkigi luŋ oto oko, cite mom tye ŋattoro i akinagi a kok baŋa. Epraim doŋ orubere oko i akina orok; Epraim doŋ olokere calo capat a mom oloko. Rok ocele camo tekogi, cite en gire mom ŋeo; kadi lwar atar kwaŋ i wie, en gire mom ŋeo. Wakere Icrael en a nyuto ballere; cite gin gigi mom odwogo baŋ Rwot Obaŋagi, kadi yenye, kadi bed can man luŋ opoto i komgi. Epraim cal kede amam, miŋ, wiegu mom tio; aman okok baŋ Miciri, olunyo wot i Acuria. I yo moro luŋ a gin olokere iye, abino ciko boona me makogi, abino retogi piny calo winnyi a twarre; abino pwodogi pi timgi areco. Gin bino neno can, pien gin oya oko i baŋa, myero rwegi oko, pien gin ojem i koma! Kadi bed amito lakorogi cite gin okobo kop goba i koma. Ka gin okok baŋa, nwoŋo cunygi mom iye, gin cur gigi i koko i wi tandagi, oŋoŋolo komgi kengi i pala pi kal kede koŋo olok, kun ojem i koma, Kadi bed apwonyo badgi, amiogi obedo atek, cite gin gigi oyiko ka kop arac me atima i koma, Gin olunyo lokere dok baŋ Baal; gin rom aroma atero a celo piny nono, Olocgi bino to i pala lweny, pi lebgi adwir i ceno jo, Man bino miyo ocaogi i lobo Miciri. Kut bilo! Pien acut tye malo i wi ot a Rwot acil; en tye kuno pien gin oturo cikkerena, ojem daŋ i cikka, Gin oredo i koko baŋa ni, “Yin Obaŋawa, wan jo Icrael oŋei.” Pien Icrael doŋ obolo gin aber oko, okwor bino ryemo yore. Gin oketo obakkigi aboŋo twerra, karacel kede oloc daŋ kun an mom aŋeo, Gin otio pirgi kengi cal jogi me ryalgi kede me jabugi, timgi-nono bino kelligi to, Yia dag atin twonni yin Camaria. Atye i twon akemo meicel i komgi. Bino kara ri kare a rom mene, jo Icrael te bedo doŋ aboŋo bal? Pien ati tic ciŋ gire en otio; mom gire Obaŋa, atin twon me Camaria obino ŋiŋinyo oko. Pien gin ocoo yamo, ote kayo ajuru. Kal okwero ŋok oko i poto, moko mom aya iye, dok akadi kono onwoŋo onen, orok kono otyeko oko luŋ. Doŋ omwonyo Icrael gire oko, aman doŋ gin tye i akina orok, calo ginnoro a mom dok omito. Pien Icrael woto kede i Acuria, calo kana me tim ame woto kene; Epraim owilo owote mere awila. Kadi gin owot wilo jo i akina orok, abino dwoggogi cen oyotoyot. Mano bino miyo koŋ oweko onyo moo i wi obakkigi kede olocgi pi kare moro anonok. Pien jo Epraim otimo bal pi gero keno lam apol, omio keno lamgi-nogo odoko gin a terogi i bal, Aco kono acoo cikka tutumia apar twal pirgi, gin oneno gigi acalo gin a welo. Gin omedde gigi ameda me ŋolla leyi, ote camo gigi riŋo mere, cite cuny Rwot mom yom komgi. Aman doŋ Rwot bino po timgi areco, bino keto can i komgi pi balgi. Gin bino dok i Miciri. Pien Icrael wie doŋ owil oko i kom ŋat ocwee, eka te lunyo gero udi adoŋo; aco Juda te gero boma apol ame oguguro i cel; ento abino bolo mac i boma mege-nono, maccono bino waŋo udi mere adoŋo oko. Kur ilel ba, yin Icrael! yii kur bed yom calo rok ocele: pien yin iweko Obaŋani ite doko alaya, imaro gin oculi kede me bedo alaya, i laro luŋ me dino bel. Laro me dino bel kede bur koŋo olok, mom bino ya iye cem kede koŋo a romo pitogi, koŋo olok anyen bino remogi. Gin mom bino bedo i lobo a Rwot: ento Epraim bino dok i Miciri, gin obino camo cam a cik ogeŋo i Acuria. Mom obino onyo koŋo olok me yalo Rwot akadi yomoro cunye i gin ame gin ŋolo me yale. Camgi bino calo mea jo a kwero cola, ame bino balo jo luŋ ame camo pien camgi-nono bino bedo me juko kec keken, mom myero kel i ot a Rwot. Ibino timo wunu ŋo i nino me ecuban ociko pire, kede i nino me ecuban a Rwot? Nen koŋ! Ka gin oriŋo oko i lobo ame okwor obalo, jo Miciri bino gamogi, Mempic bino bedo lyel me yikogi, Jamigi me ryal a yomoro cunygi, doo bino mayo oko, okuto bino tu i udigi. Kare me keto can doŋ obino oko, kare me culo bal doŋ obino; Icrael obino dwoko oko piny. Adwarpiny bino nen calo dano amiŋ, dano a tye i cuny Obaŋa bino nen bala opo oko, pi balwu kede adagewu ame dwoŋ meicel. Epraim libo jo Obaŋana, adwarpiny tye i yogi luŋ calo kumma, adage tye naka i ot Obaŋagi. Gin doŋ odonyo i bal okato kare oko, calo kare me Gibea. En bino poyo timgi areco, bino keto can i komgi pi balgi. Kare ame rik anwoŋo Icrael, rik kom calo ŋat ocop i kom olok i dye tim, Kare ame aneno kwariwu, rik kom calo aneno oduro anyen, ame pwod ogeo cek aceka. Ento gin rik ote wot i Baal-peor, ote miye kengi baŋ cal jok; omio gin odoko gin a me yi jo okwero, a rom aroma i gin a gin omaro. Kwogo Epraim bino ket oko, calo winy ame otwarre, pien mom dok obino nywal, kadi yac onyo gamo, Kadi bed gin pit itinogi, abino tyekogi oko luŋ ame moro mom doŋ. Gin bino neno can meicel, ka abino ya oko i baŋgi! Aco itino Epraim kite aneno kede, obino neko calo leyi; Epraim bino cwayo itino mere me aneka. Migi ba, ama Rwot, gin aŋo kara ame ibino miyogi? Mi yigi bed ony aonya, dok tunogi daŋ two atwoa, Racgi luŋ aluŋa tye i Gilgal, cunya ogeo kwerogi i kuno, Pi gin ame gin obedo timo areco, abino ryemogi gira oko i oda. Mom dok abino marogi kadi acel; olocgi luŋ obedo jo ojem. Epraim rom i yat a doŋ oreto oko piny, lwite-gu daŋ doŋ oner oko, mom doŋ bino nyako nyige moro. Kadi bed gin nywal, abino neko itinogi ame omaro oko, Obaŋana bino bologi oko, pien gin okwero winyo koppere oko; gin bino bedo jo ame roroŋa akina orok. Icrael obedo calo olok ame nyak amwonya meicel, ame nyige cek meicel. Ka nyige omedo nyak atek, gin daŋ medo cano keno lamgi apol apola; ka lobo mere omedde bedo aber, gin daŋ omedo yiko kiddigi me awora bedo abeco. Cunygi tye opoŋ i goba; aman gin doŋ myero nen can pi balgi. Rwot ikome en a doŋ bino mumuko keno lamgi-nono dok en daŋ bino reto kiddigi oko ame gin ocibo me awora. Aman doŋ gin myero kob ni, “Abakawa gire pe, pien wan giwa mom olworo Rwot, kara abaka doŋ twero timo ŋo pirwa?” Gin kom oduro doggi nono, ocikere i kwoŋŋogo me nono. Mannono gire miyo ŋolo kop durre adura, calo yat ame neko jo ame tu i poto ame opuro. Jo ame bedo i Camaria komgi myel, pi atin twon me Bet-awen. Jo mere bino kumo pire olamdoggere ame woro cal jokkono bino koke, pi kwogo mere ame oya oko baŋe. Obino gire tero oko i Acuria, me mot baŋ abaka adwoŋ. Obino miyo lewic mako Epraim, aco Icrael lewic bino mako pi cal jokkere. Abaka me Camaria bino gire rwenyo oko bala dul yat ame alelea i wi pii. Ka woro Obaŋa a tye i wi kidi me Awen, obino gire rwenyo oko kan ame Icrael timo bal iye. Okuto kede ocokocok bino tu i wi keno lamgi, gin bino kobbi kiddi adoŋo ni, “Wumwa wunu” kede kiddi atino ni, “Rette wunu i komwa.” Yin Icrael ibedo bal cakere i kare me Gibea; cakere i kuno gin obedo medde ameda iye. Mony mom bino cobogi i Gibea kuno? An doŋ abino me pwodogi; orok bino cokere karacel komgi i kare ame apwodogi pi balgi aryo. Epraim calo roya ame opwonyo, ame maro dino bel, cite an aketo lodi i ŋute aber-ri. Aketo Epraim i waya kweri, Juda myero pur gire, Yakobo myero lok poto mere kene. Koti icoyo wunu myero bed tim me kite atira, eka adwoggi mere te bedo mar a mom lokere. Pur wunu poto anyen, pien man kare me yenyo Rwot, me en bin mi larre cwe i komwu bala kot. Rik ipuro wunu bal, omio ikao wunu kite a mom atira, icamo wunu adwoggi me bedo ogoba. Pien yin ibedo geno gadigadi me lwennyi, kede olwennyi ame tye ecipan, pi mannono, woo lweny bino ya i akina joni, ot ame tye i cel atek obino mumuko oko, calo kite a rik Calam omuko kede Bet-arbel i nino me mony, totti itino rik oŋiŋinyo oko atitino aracel itinogi. Mannono kite ame obino timowu kede, wun jo Icrael pi twon balwu areco meicel. Ka piny oru, abaka me Icrael obino neko oko. Kare ame Icrael pwod atin, amare, rik alwoŋo woda i ya i Miciri. Ento kare luŋ ame amedde lwoŋogi, gin medde jer ajera teŋe i baŋa; obedo gigi ŋolo leyi me yalo Baal, kun daŋ owaŋo odok akur baŋ cal jogi. Aco kono an en a rik apwonyo Epraim kede wot, rik atiŋogi kom i kora; cite gin gigi mom oŋeo ni an a rik acaŋogi. Rik abedo telogi i tol a dano, karacel kede tol me mar rik an arom i ŋat okwanyo tol doggi, dok daŋ aryebere piny ate keto cam i nyimgi. Gin bino dok cen i Miciri, Acuria en abino lunyo bedo abakagi, pien gin okwero dwogo baŋa. Pala lweny bino meny i bomagi luŋ, bino rweyo lodi me dogcelgi oko, dok daŋ bino nenekogi i celginogo. Jona doŋ omoko tamgi me ya oko i baŋa, pi mannono obino ketogi oko i kol, mom tye ŋattoro a dok bino kwanyogi, Atwero weki niŋo, yin Epraim? Atwero miyi dok baŋ ŋa, yin Icrael? Atwero miyi idoko calo Adma yore aŋo? Atwero tic kedi calo Cebim yore aŋo? Aloko doŋ cunya oko, awinyo doŋ ni atye i mar i cunya. Mom doŋ abino miyo akemona loa, mom dok abino medde rweyo jo Epraim, pien an abedo Obaŋa, mom a dano, an a Ŋat Acil i akinawu, mom abino bino me nekowu. Gin bino lubo yo Rwot, en bino mor calo eŋatu; ee ta, en bino mor gire, itino mere bino bino i tuŋ to kun komgi amyel amyela; gin bino kun oya i Miciri ame komgi amyel amyela calo winy, dok daŋ acalo amam kun oya i Acuria, an abino dwokogi i pacogi, man kop a Rwot ikokome. Epraim doŋ ogura dyere i goba mere, aco ot Icrael bedo bwola abwola. Ento Juda, Obaŋa gire pwod ŋeo, en gire geno Ŋat Acil. Epraim dyegi, kwao yamo akaka dyegi, rio ryemo yo yamo dyeceŋ benebene; ticgi nyayo goba kede tim me byemi; gin ocikere i jo Acuria, dok otero-gu msoo i Miciri. Rwot tye i kop i kom Juda, en bino keto can i kom Yakobo a rom aroma i kite mere dok daŋ bino cule a rom i timere. Kare a en tye i yic, omako opuny tyen ominnere, kare a doŋ otego, oromo Obaŋa. Oromo amalaika, te loyo, obako doge baŋ amalaika i pig waŋe. Orwatte Obaŋa i Betel, Obaŋa te kop kede kuno, Rwot Obaŋa me mony, nyiŋe olwoŋo ni Rwot. “Pi mannono, yin daŋ dwogi, Obaŋani tye akonyi, lid mar kede ŋolo kop atira atek, kun ikuro Obaŋani kare luŋ.” En acat-wil ame tye i mijan me cero jo i ciŋe, en maro wuno jo. Epraim okobo ni, “Nen an gira alonyo, anwoŋo limma gira i wia;” cite lonyo mere mom gire romo culo ballere ame ebalo. An a Rwot Obaŋani, cakere i lobo Miciri; abino miyi dok ibedo i kema, acalo i kare me kwero ecuban ociko pire. Rik akobo baŋ odwarpiny, an ame daŋ rik amio gigi mogo me anyut onya dok amiowu daŋ carakop kun amio baŋ odwarpiny, Ka ce balloro tye i Gilead, gin gire bino tum oko luŋ; ka ce gin yalo Obaŋa i twoni Gilead, keno lamgi bino doko calo gweŋe ococoko karacel i poto ame opuro. Yakobo rik oŋweco oko i lobo me Aram, Icrael otio tic kuno pi nwoŋo dako, en okwao romi wek enwoŋ dako. Rwot rik omio adwarpiny okwanyo Yakobo oko i Miciri, omio adwarpiny ogwoke. Epraim doŋ oroke atek meicel, pi mannono, Rwot mere bino weko remo me ballere i wie acae mere luŋ daŋ obino dwoko i wie. Epraim ka rik okobo, kom jo myel amyela; Epraim rik dit atek iyi Icrael; ento en okelo bal i kome pi Baal, te to oko. Aman balgi doŋ tye amedde ameda, dok otye ka twatwako callogo pirgi kengi, kede cal jogi me ryalgi ame otio diro, magi-nono luŋ aluŋa obedo tic otet. Gin okobo ni, “Yal wunu cal jogi magi.” Jo nonoto kom twon otwako. Pi mannono gin bino bedo calli ekuna me odiko calo toyo a ru ony oyotoyot, calo cuŋ kal ame yamo atek kolo oko i laro, onyo yito ame duny wan dirica. An a Rwot Obaŋani, cakere i lobo Miciri; mom tye Obaŋa moro ocele ame iŋeo, kono an keken, alarroro ocele mom dok tye, kono an keken, An en a rik aŋeowu i tim, i lobo ame can pii dwoŋ iye. Cite i kare ame gin ocemo te yeŋ, gin oyeŋ, ote ero yeyea i cunygi, mano te miyo wigi doŋ wil oko i koma. An rik arom i eŋatu baŋgi, calo kwac ame kiogi i ŋet yo. Abino ŋolle i komgi calo ŋu ager ame oneko itino mere, abino yeco korgi dado oko, abino mwodogi kuno calo eŋatu, kite a lee tim kikilogi kede. Aco yin Icrael, abino rweyi oko luŋ aluŋa; ŋa kara a twero lari? Kara abakani tye atimo no? Koŋ elari ba kede jo me bomani luŋ. Kara oloc-ci kono tye atimo ŋo, ame ipenyo pirgi ni, “Mia abaka kede oloc?” Rik ami abaka kun cunya mom yom, ate daŋ dok kwanye oko kun atye akemo. Tim Epraim areco luŋ ocoo oko piny, ballere luŋ tye okano, Rem acalo me nywal tye abino pire, cite en obedo atin amiŋ; Pien aman en mom tye otikere i yo nyodo. Myero alargi i twer a Ceol? Myero alakorogi i baŋ To? Yin To wee, edeke-ni kara tye kwene? Yin Ceol, can-ni kara tye kwene? Mom doŋ atye i kica moro i cunya. Kadi bed en nya atek calo ogada, yamo oro ame Rwot ocwao, bino bino kun oya i tim, waŋ pii mere akukunya bino two oko, akoŋŋere daŋ bino dwono oko; en bino mayo jami mere luŋ a yomoro cunye, ame yam en okano. Camaria bino neno can pi ballere, pien en ojem i kom Obaŋa mere; pala lweny en abino nekogi itinogi obino teteŋo piny, te ŋiŋida atitino, mongi ayac obino ryeryeko yigi oko. Yin Icrael, dok baŋ Rwot Obaŋani, pien doŋ igatte iyo-ni areco-nono. Wot wunu i kop me dogwu, idok wunu baŋ Rwot, wot ikobbe wunu ni, “Kwany balwa luŋ oko, me igam motwa aber, me okelli kop oya i dogwa. Acuria gire mom bino larowa, mom obino riŋo aguragura; mom dok obino kobo ni, ‘Obaŋawa’, baŋ gin ame wan otio i ciŋwa. Atin kic nwoŋo kica i baŋi.” Abino miyo iyeegi agoro doko atek abino marogi pi ber a yia, pien akemona i komgi dok okwe oko. Abino doŋ bedo calo toyo baŋ jo Icrael; en bino turo calo kalaŋweka bino cwalo lwite piny calo Lebanon. Bino lot, te jany, berrere bino bedo calo me jeituni, eka ŋwece te bedo akur bala Lebanon. Jo ame bedo i tipo mere bino dwogo, bino nya meicel calo kal, bino turo calo olok, ŋwecgi bino bedo akur calo koŋo olok me Lebanon. Epraim wee! Kara cal jogi pwod konyi kede ŋo? An keken en ame abino gamo doge, dok daŋ agwoki. Abedo calo yat cipre ame pote mom ner, an en ame amii nyak. Ŋat ame ryek bino niaŋs jami magi; ka ce tamere tye, en bino ŋeyogi; pien yo a Rwot luŋ tye atira, jo a kitegi atira woto iye, cite obalo bedo twomere iye atwoma. Kop a Rwot rik obino baŋ Joel wot Petuel. Wun jo oteggo winy wunu man ba, ciku yitwu, wun jo a bedo i lobo luŋ! Kodi gin acalo mannono yam koŋ onen i karewu, onyo i kare a kwarowu? Rab wunu pire baŋ itinowu, me itinowu daŋ rab pire baŋ itinogi, dok itinogi daŋ rab pire baŋ jo a lubogi, Gin ame bonyo ogaŋgaji oweko odoŋ, bonyo ame olwoŋo ni acaocao ocamo oko; gin ame ocaocao oweko odoŋ, bonyo akolokwac ocamo oko; gin ame akolokwac oweko odoŋ, bonyo aluluk ocamo oko. Wun jo amer i koŋo akec, co wunu, me ikok wunu, kuk wunu duru, wun jo luŋ ame mato koŋo, pien koŋo alim oŋolo oko i dogwu ame mom ru ibilo wunu. Pien mony doŋ obino oko me lweny i kom lobona, mony atek a mom kwanne; lakgi cal i lak eŋatu, lakgi bocoboco calo mea min eŋatu. Gin obalo olokka oko, odurona daŋ oŋiŋinyo oko; gin opapaco pokgi obalo oko; jaŋgi doŋ tar kia. Kok bala nyako oruko boŋo co la, ame koko awottere a pwod onyomere kede anyoma. Mot me moko kwon kede me amata me ya lo Obaŋa, gin luŋ oŋolo oko i ot a Rwot. Olamdog, ame gin otic a Rwot, tye akumo. Potti doŋ yigi nono, lobo tye akumo aku ma, pien obalo kai oko, koŋo daŋ mom doŋ nen, moo daŋ doŋ mom, Idoko wunu ababaŋ, wun opur, kuk wunu duru ba, wun ogwok olok, pi kai kede cayiri; pien cam doŋ oweo oko i potti. Olok luŋ doŋ onen oko, oduro daŋ oballe gire oko, okwer, otit acama kede amalera, yen i potti luŋ oner gire oko; ginnoro luŋ amio dano yomcuny mom tye. Wun olamdog, ruk wunu boŋo cola, ikok wunu, kuk wunu duru, wun otic i ke no lam. Biye wunu, ibut wunu i boŋo co la, wun otic Obaŋa, pien mot me moko kwon kede mot amata me yalo Obaŋa, gin luŋ mom doŋ nen i ot Obaŋawu. Kwer wunu kare me kanyo kec ba! Lwoŋ wunu cokere adwoŋ ba! Cok wunu odoŋe luŋ, jo luŋ ame bedo i lobo, me gin bin i ot a Rwot Obaŋawu; me ikok wunu baŋ Rwot. Oii, nino-ni doi! Pien nino a Rwot doŋ ceggi acega, bino a cal i to a piny luŋ aluŋa, ame oya ibaŋ Won Twer Ducu. Nen, camwa obalo oko, kun wan one no, yomcuny kede lelo, gin luŋ doŋ orwenyo oko ot Obaŋawa. Koti otuŋ gigi i dog lobo, yi twayi doŋ bedo nono aboŋo ginnoro, dero daŋ doŋ oballe oko, pien kai mom ocek. Kite a leyi doŋ tye akokoka kede! Dok daŋ loloŋo piny aboŋo weo, pien ka kwayogi doŋ mom tye; anaka rommi doŋ ojony oko ikokoro, Akok baŋi, yin Rwot, pien mac doŋ owaŋo elet me kwat oko, leb mac doŋ oweo yen luŋ a tye i tim. Anaka leyi me tim daŋ kok baŋi, pien kulli me pie luŋ odwoŋo oko, dok mac doŋ owaŋo elet me kwayogi oko. Kut wunu bilo i Cion, kuk wunu duru i wi kidina! Jo luŋ a bedo i lobo myero komgi myel, pien nino a Rwot doŋ ceggi acega. Nino-nono gire colpiny ame col icuc, nino mere nino me pol kede mutu acol icuc. Mony adwoŋ dok atek meicel, obino ame omwono wi kidi bala colpiny; moro mom ru koŋ onen acalo ennono, dok daŋ mom gire bino nen atwal, i kwo a jo me kare luŋ ame bino lubowa. Tuŋ nyim, mac tye anaŋo tim oko, aco tuŋ negi leb mac tye atwoyo oko. Aco lobo ame tye tuŋ nyimgi calo poto Eden, aco tuŋ negi calo tim odoŋ nono, ginnoro obwot baŋgi mom tye. Gin onen calo aguragura, orino daŋ calo aguragura me lweny. Gin opyepyea i wi kidi malo, morgi calo aguragura me romo, dok daŋ calo mor a leb mac, ame cal i rok atek meicel, ame oterre oko pi lweny. I nyimgi, rok luŋ koyo doŋ oonyere oko i komgi, waŋ jo luŋ doŋ oballe oko. Omwomere i ŋwec calo olweny atek meicel, oyito i wi cel calo cirikale. Ŋat acel acel kwanyo yo mere kene, kun mom dok gak i yo moro ocele. Ŋattoro gire mom twomere awottere, ŋat acel acel woto i yo mere kene. Gin ocoro jami luŋ ame obaogi kede, mom ocuŋ gigi. Omwomere i boma, oŋweco i wi cel, oyito i wi udi, odonyo i wan dirica calo okwo, Ka gin awot lo bo yenere, polo daŋ yeyena. Ceŋ kede dwe doko acol icuc, acer daŋ mom dok ryeny, Dwoŋ Rwot mwoc winnyere nyim monnyere; monnyere tek nadi! Ŋat ame cobo kop ame en kobo, tek meicel. Pien nino a Rwot dit, dok daŋ onyo koyo i kom jo; ŋa kara a twero kanyo? “Kadi bed aman”, man kop a Rwot oko bo, “dwog wunu baŋa i cunywu luŋ, kun ikanyo wunu kec, ikok wunu, dok daŋ ikumo wunu; yec wunu cunywu, ento mom boŋowu.” Dwog wunu baŋ Rwot Obaŋawu, pien en gire akica dok daŋ atim jo ber, akemo mom make oyotoyot, marrere mom lokere gire, dok juko cunye oko i timo rac, ŋa kara a ŋeo ka ee mom dok bi no lokere, juko cunye, te weko gum doŋ i ŋee, mot me moko kwon kede me ama ta me yalo Rwot Obaŋawu? Kut wunu bilo i Cion! Kwer wunu kare me kanyo kec ba! Lwoŋ wunu cokere adwoŋ ba! Cok wunu jo luŋ karacel. Mi wunu lwak lonyere oko ba! Cok wunu odone karacel ba! Kel wunu iti no atino, anaka itino a pwod tye i kor totogi. Anyom myero donnyo oko i ode, atera ya oko iyi ici ka mere. Wek wunu olamdog ame gin otic Obaŋa koki, iyi akina gul me doggola kede keno lam, kun oko bo ni, “Rwot, tim joni kica ba, kur imi nyin joni dok me ciŋa i akina Orok. Pino kara rok ocele myero kob ni, ‘Obaŋagi kara tye kwene?’ ” Omio nyeko te mako Rwot pi lobo mere kica te make i kom jo mere. Rwot te dokki jo mere ni, “Nen acwayiwu kal, koŋo olok kede moo, bino miyo doŋ iyen wunu. Mom dok abino miyi idoko gi-ayeta i akina orok. “Abino cwayo jo i tutun anyarodi i rjetwu tene kannabor, abino ryemogi oko i tim otwo, odoŋ nono; tuŋ nyimgi bino neno nam me tun kide, ŋegi bino neno nam me tuŋ to; ŋwec komgi otop bino kuto, pien gin otimo timmogo adoŋodoŋo. “Kur ibed ilworo, yin lobo; bed i yomcuny kede lelo, pien Rwot doŋ otimo tim adoŋodoŋo. Kur ibed wunu i lworo wun leyi me tim, pien lum anyen doŋ oradde ata i elet; yen doŋ tye anyak, oduro kede olok doŋ onyak amwonya meicel. “Cunywu bed yom, wun jo me Cion, let wunu i Rwot Obaŋawu; pien ocwayiwu kot me cwir i kare mere i kome; omio kot ocwe adwoŋ meicel omio kot me cwir kede kot icennere, bala kot a rik con. “Laro bino poŋ i kal me adina, bur koŋo kede me moo bino poŋ kwic. Abino culo wan mwakki luŋ ame bonyo ocamo, acaocao, akolokwac, aluluk kede ogaŋgaji, twon monnyoro adwoŋ ame rik ocwao i akinawu. “Ibino wunu camo kit cam luŋ, ame imito wunu ite yen wunu, ite doŋ pako wunu nyin Rwot Obaŋawu, ame otio gin awura baŋwu, Lewic mom bino mako jona. Ibino ŋeyo wunu ni an kara at ye i Icrael, dok daŋ ni an a Rwot Obaŋawu, mom dok tye moro ocele. Lewic mom bino ma ko jona. “Icennere abino coro Cuny Acil i kom jo luŋ; itinowu awobe kede anyira bino doko odwarpiny, jowu oteggo bi no le ko lek, awobewu adoŋo bino neno anyut. I kare-nono abino coro Cuny Acil anaka i kom omirona a co kede a mon. “Abino nyuto tano i polo kede i lobo, remo kede mac kede ekuna aduny bala yito. Ceŋ bino cido acol icuc, dwe bino lokere doko remo, a mom ru nino a Rwot otuno, nino a Rwot dwoŋ dok daŋ iyiliyili meicel. Icennere jo ducu ame bino lwoŋo nyin Rwot, obino larre; pien i wi kidi me Ci on kede i Jerucalem, jo obwot bino bedo kuno, acalo Rwot okobo, dok i akina jo odoŋ, bino bedo iye jo a Rwot olwoŋo. “Pien nen, i nino-nono, i karenaca, ame abino dok miyo jo a Juda kede Jerucalem gum aber, abino coko rok ocele luŋ akelogi i luŋ me Yekocafat. Abino pidigi kuno pi jona Icrael, ame gin mega, pien okeketogi atata i akina Orok, kun opoko daŋ lobona oko, Obolo-gu kwir pi jona, awobi oloko kede alaya, aco nyako owilo kom i koŋo keken, ote mato gigi. “Wun jo Tura kede jo Cidon, kede jo luŋ me Piriciti, wun kara ino wunu tuŋ baŋa? Ka ee tye ginnoro ame iculla wunu, an abino dwoko i wiwu timwu luŋ oyotoyot, dok daŋ piopio, pien ikwanyo wunu ryalla kedejabuna, dok daŋ itero wunu jamina abeco, a pirgi litta, itero wunu i ot jogiwu. Icato wunu Juda kede jo Jerucalem baŋ jo Grik, kun icwaogi wunu teŋe i waŋ lobogi. Cite aman doŋ abino twarogi oya oko i kan ame icatogi wunu iye; abino dwoko gin ame itimo wunu i komgi i wiwu wun ikomwu. Abino ca to anyirawu kede awobewu baŋ jo Juda, gin dok te catogi oko baŋ jo Ceba, ame gin rok ame tye kannabor; pien Rwot doŋ okobo.” Rab wunu kop man baŋ rok luŋ; yikere wunu pi lweny, cukoro wunu cuny jo atek meicel. Wek wunu jo me romo luŋ cokere karacel, me gin bin malo kano. Tet wunu leb kweyi dyan odok pala me romo, kede pala ŋolo olok, odok toŋi; kadi ŋat agoro myero kob ni, “An atek.” Ru bi no wunu aceggi kan, wun rok luŋ omano kan, cokere wunu kenwu kuno. Cwa jo meri atek, ama Rwot. Wek rok luŋ cokere kengi, me obin, oyito i luŋ me Yekocafat; pien abino bedo piny kuno me ŋolo kop, i kom rok luŋ omano kan. Kwany wunu doŋ pala, pien cam doŋ ocek oko me akaa. Dony wunu iye, iwot inyon wunu, pien bur olok doŋ opoŋ oko. Abinni doŋ opon ame aony aonya, pien balgi dwoŋ meicel. Lwak jo apipim doŋ ocokere i luŋ me moko tam! Pien nino a Rwot doŋ ceggi acega, i luŋ me moko tam, Ceŋ kede dwe odoko col oko, acer daŋ doŋ okwero ryeny oko. Dwoŋ Rwot mor i Cion, wi nyere i Jerucalem, polo kede lobo yenere, Ento i baŋ jo mere, Rwot en ka-larregi, en ka-bwot atek meicel baŋ jo Icrael. “Mannono bino miyo iŋeo wunu ni an a Rwot Obaŋawu, ame bedo i kidi acil me Cion. Jerucalem bino bedo acil. Orok mom dok bino bea iye. “I nino-nono, koŋo alim bino mollo i kom kiddi, cak bi no mollo i wi tur ducu, pii bi no poŋ i kulli luŋ me Juda. Pii daŋ bino kukunya i ot a Rwot, te bido luŋ me Cittim. Miciri bino doko wi obur, Edom bino doko tim odoŋ nono, pi kologi i kom Juda, pien gin oonyo remo a jo a mom i bal i kom lobogi-gu, Aco i Juda, jo gire bino bedo iye nakanaka, Jerucalem daŋ obino bedo iye kare luŋ. Abino culo kwor me remogi, mom obino weko jo ame obalo. Pien Rwot bedo i Cion.” Kop Amoc ame rik obedo dano acel i akina okwa-rommi me Tekoa, Kop a rik Obaŋa onyutte i kom jo Icrael i mwaka aryo ame lobo mom ru oyeŋere, i kare ame Ujjia onwoŋo abaka me Juda kede Yeroboam wot a Yoaci abaka me Icrael. En okobo ni, “Rwot mor i Cion, dwone mor, winyere i Jerucalem; elet okwat bi no koko can, wi kiddi me Karmel bi no ner,” Rwot okobo ni, “Pien jo Damaciko otimo bai apol, mom doŋ abino kwanyo kop ame aŋolo i komgi; pien gin odino Gilead kede nyonyo apek, Pi mannono abino bolo mac i ot a Kajael, maccono bino waŋo udi adoŋo me Ben-adad oko, Abino turo lodi dogcel me Damaciko oko, abino tyeko jo ame bedo i lobo me Awen oko, kede won abiro-loc me Bet-eden; aco jo Curia abino terogi i opii i Kir”, man kop a Rwot. Rwot okobo ni, “Pien jo Gaja otimo bai apol, mom doŋ abino kwanyo kop ame aŋolo i komgi; pien gin obelo rok acel luŋ, me wot miyogi i ciŋ jo Edom, Pi mannono, abino bolo mac i cel me Gaja, maccono bino waŋo udi mere adoŋo oko, Abino tyeko jo a bedo Acidod oko, kede won abiro loc me Acikelon abino dwoko ciŋa i kom Ekron, jo Piriciti odoŋŋere bino to ducu”, man kop a Rwot. Rwot okobo ni, “Pien jo Turo otimo bai apol, mom doŋ abino kwanyo kop ame aŋolo i komgi; pien gin omio rok acel luŋ baŋ jo Edom, kun mom opo gigi icikere me omego, Abino bolo mac i cel me Turo, maccono bino waŋo udi mere adoŋo oko,” Rwot okobo ni, “Pien jo Edom otimo bai apol; mom doŋ abino kwanyo kop ame aŋolo i komgi; pien gin oryemo omegogi i pala lweny, okwero kica gire ducu, cunygi bedo waŋ nakanaka, ogwoko inigagi at wal. Abino bolo mac i kom Teman, maccono bi no waŋo udi me Bojra oko.” Rwot okobo ni, “Pien jo Ammon otimo bai apol; mom doŋ abino kwanyo kop ame aŋolo i komgi; pien gin oryeko yi mon a yac me Gilead, pi medo waŋ lobogi kengi. Abino mo ko mac i cel me Rabba, maccono bino waŋo udi mere adoŋo oko, nino-nono bino bedo woo me lweny, yamo ajuru bi no kodo atek meicel; abakagi obino tero oko iyi opii, en kede rwode mere karacel.” Man kop a Rwot. Rwot okobo ni, “Pien jo Moab otimo bai apol, mom doŋ abino kwanyo kop ame aŋolo i komgi; pien gin owaŋo cogo kom abaka me Edom, omio odoko buru. Abino bolo mac i kom Moab, maccono bino waŋo udi adoŋo me Keriot oko; jo Moab bi no to i dye lweny a doŋ obaŋere oko, i akina woo kede koko me apel; abino kwanyo aloc oko i akinagi, abino nekogi karacel kede rwodegi ducu”, man kop a Rwot. Rwot okobo ni, “Pien jo Juda otimo bal apol, mom doŋ abino kwanyo kop ame aŋolo i komgi; pien gin okwero cik a Rwot, mom ogwoko icwillere, jogi ame yam kwarigi oworo, orwenyogi oko i yo a Rwot. “Abino bolo mac i Juda, maccono bino waŋo udi adoŋo me Jerucalem oko.” Rwot oko bo ni, “Pien jo Icrael otimo bal apol, mom doŋ abino kwanyo kop ame aŋolo i komgi; pien gin ocato dano a kite atira pi lim, kede dano a can orido atek pi amuk me tyen; gin onyono wi ocan piny iyi apua, ogeno jo a tye i can oko i yorgi; awobi kede pappere donyo baŋ nyako acel, me balo nyiŋa acil. Gin obuto i ŋet keno ducu me lam, kom boŋŋi ame jo ojeŋo baŋgi; gin omato koŋo olok a jo ame otaŋo, i ot Obaŋagi. “Aco koŋo an rik ajwero jo Amor oko i nyimgi, jo a rik odoŋo abocoboco bala yat cedar, jo a rik komgi tek bala opok; an rik ajwero nyiŋgi oko i malo, kede lwitgi a tye piny. Dok rik akelowu ya i lobo me Miciri, atelowu i tim pi mwakki pyeraŋwen, me ile wunu lobo a jo Amor. Rik daŋ amio jo oya i akina itinowu me bedo odwarpiny, jo akwera daŋ oya i akina awobewu. Mom tye amannono, wun jo Icrael?” Man kop a Rwotikokome. “Ento wun imio wunu jo akwera omato koŋo, iciko wunu odwarpiny ni, ‘Kur rab kop Obaŋa.’ Nen ba, abino diyowu piny i kabedowu, bala kite ame kal awidi dio kede gadigadi piny, Ŋwec bino loyo lon adwir oko, lon atek, te ko mere bi no rwenyo oko i kome, twon lon atek, mom bi no laro kwo mere. Amak akud atero mom bi na cun, lon a tyene dwir mom bino larre, kadi lon ariŋo aguragura daŋ mom bino laro kwo mere. Lon a cunye nwaŋ i akina jo atek, bi no riŋo oko onoro i ninonaca”, man kop a Rwot ikokome. Winy wunu kop ame Rwot okobo i komwu, wun jo Icrael, kom atekere luŋ ame rik okwanyo lobo me Miciri: “Wun keken en a doŋ aŋeowu, kom atekere luŋ ame tye i wi lobo; pi mannono, abino keto can komwu, pi balwu ducu. Jo aryo twero nywako yo karacel, ka gin mom ocikere? Atin eŋatu twero kok i gorogoro mere, ka mom omako ginnoro? Winy twero moko i wi lobo, ka mom ociko i tol? Otwero kuku duru i boma, eka lworo mom le mako jo? Can twero poto i boma, ka Rwot mom en omio opoto? Rwot Obaŋa mom twero limo ginnoro, ka mom onyuto muŋŋere baŋ omiro mere odwarpiny. Eŋatu doŋ omor; na a kome mom myel? Rwot Obaŋa doŋ okobo; na akwero rabo koppere?” Rab wunu kop i udi adoŋo me Acuria, kede udi adoŋo me lobo Miciri ni, “Cokere wunu wi kidi me Camaria, koŋ inen wunu arubaruba adwoŋ ame tye iye, kede kit ame oburo kedejo iye.” Mom oŋeo tiyo gin aber, “Man kop a Rwot i kokome, gin okano gero kede kwo i udigi adoŋo.” Mannono omio Rwot Obaŋa okobo ni, “Okwor bino guro lobowu dyere, bino dwoko tekoni oko piny; jami i udiwu adoŋo obino yako oko.” Rwot okobo ni, “Kit acalo akwat laro tyen lee aryo kede dul yite i dog eŋatu, jo Icrael ame bedo i Camaria daŋ obino larogi amannono, karacel i twok itanda kede dul gi-bedo. “Winy wunu, ite rabo wunu kop i kom ot a Yakobo”, man kop ame Rwot Obaŋa, Obaŋa me mony okobo, “ni mannono, i nino ame abino keto kede can i kom jo Icrael pi balgi, abino daŋ keto can i kom keno lam a tye i Betel; tuŋ keno lam obino muko oko, eka te peto oko piny. Abino go yo ot buto me iporo kede ot me oro aketo oko; udi odeo i lak lyec obino reto oko piny, udi adoŋo bi no tum oko.” Man kop a Rwot ikokome. “Winy wunu kop man, wun wegi dok me Bacan, ame bedo i bad kidi me Camaria, wun ame iburo wunu ocan, idiogi wunu piny ka can oridogi, ame ikobbi wunu cogwu ni, ‘Kel, me omati.’ Rwot Obaŋa a kite atira doŋ okwoŋo ni mannono, nen ba, kare tye abinniwu, ame jo bi no wayowu oko i golo, golo me ciko rec bino tyekowu ducu. Ibino kato wunu i waŋcel ame oturo, kun ŋat acel acel woto atira nyim; obino bolowu oko iyi Armon.” Man kop a Rwot ikokome. “Biye wunu i Betel me itim wunu bal, biye wunu i Gilgal me imedde wunu i balwu. Kel wunu gin oŋolli Obaŋa nino i nino, kede acel me apar ine nino adek adek; Mi wunu mot pwoc me kwon a tobi tye iye, rab wunu pi motwu me bercuny, mejo winy; pien imaro wunu timo kittono, wun jo Icrael”, man kop a Rwot Obaŋa ikokome. “Rik amio lakwu ogebere pi kec opoto i bomawu luŋ, kede can kwon i bomawu luŋ, ento rik mom idwogo wunu baŋa”, man kop a Rwot ikokome. “Rik atwonowu kot, ame kare me kac pwod odoŋ dwete adek; amio kot ocwe i boma acel; ageno mom ocwe i boma ocele amio kot ocwe i poto acel, poto a kot mom ocwe iye otwo oko; omio boma aryo nyo adek ociro i boma acel pi mato pii, cite mom te romogi; ento rik mom idwogo wunu baŋa,” man kop a Rwot ikokome. “Rik atopo kalwu oko, amio omwato; abalo-gu pottiwu kede poto olokwu; bonyo ocamo odurowu kede jeitumwu; ento rik mom idwogo wunu baŋa”, man kop a Rwot ikokome, “Rik acwao too arac i akinawu ame rom aroma i me Miciri, aneko awobewu i pala lweny; ayako aguragurawu oko; amio ŋwec gonywu oduny umwu aŋwe meicel ento rik mom idwogo wunu baŋa.” Man kop a Rwot ikokome. “Rik areto kabedo mogo i akinawu, bala i ka re a rik Obaŋa oreto kede Codoma kede Gomora, rik ite bedo wunu bala dog yen ame owoto i mac; ento rik mom idwogo wunu baŋa”, man kop a Rwot ikokome. “Pi mannono, yin Icrael, abino timmi kit man; pien abino timo man i komi, myero iyikere me rwatte Obaŋani, yin Icrael.” Nen ba, ŋat ame ocweo kiddi kede ame oketo yamo, ame daŋ titti dano mere tammere, ame loko ru-piny doko piny acol, dok ame bea i wi lobo ame otiŋere malo, nyiŋe Rwot, Obaŋa me mony. Winy wunu kop man ame akobo i komwu bala koko lyel, wun ot Icrael: “Orette piny mom dok bino ya, en nyako Icrael; oweke odoŋ kene i lobo mere, ŋattoro a tine malo mom.” Pien Rwot Obaŋa okobo ni, “Boma ame owoto i jo tutumia bino doŋ i jo mia, kede en owoto i jo mia, bino doŋ i jo apar, i ot a jo Icrael.” Pien Rwot okobo baŋ ot Icrael ni, “Yenya wunu Rwot, me ite bedo wunu kwo; ento kur iyeny wunu Betel kur daŋ idony wunu i Gilgal, kadi kato anaka i Beer-ceba; pien jo Gilgal obino tero oko opii, aco Betel agik gire oko.” Yeny wunu Rwot, me ite bedo wunu kwo, me kur twarre i ot a Yakobo bala mac, ame waŋ kun ŋattoro a neko i Betel mom tye. Wun jo ame loko ŋolo kop atira doko gin akec, dok ame caco kite atira, bolo oko piny. Ŋat otio Yuggi kede Lyer-nino i polo, ame loko piny acol doko odiko, dok ame loko dyeceŋ doko dyewor, ame lwoŋo pii me nam te onyo i wi lobo, nyiŋe Rwot; en ame omio oyako jo atek kun oturogi atura, en ame mio oyako ot ame tye i cel atek. Gin odag ŋat a jukogi i dog boma, okwero ŋat a kobo kop ateni. Pi mannono, pien inyono wunu ocan piny, kun igamo wunu kai i baŋgi tetek, ityeko gero wunu udi i gweŋ opao apaa, ento mom ibino bedo wunu iye, ityeko pito wunu potti olok a yomoro cunywu, ento mom ibino wunu mato koŋŋege. Pien aŋeo kit ame balwu pol kede, rocwu dwoŋ meicel, wun jo ame wuno jo a kitegi atira, dok igamo wunu daŋ lim me wil, ame owilowu kede imuŋ, ame icwao wunu ocan teŋe i ka ŋolo kop i dog boma. Pi mannono, ŋat a ryek myero liŋ oko i kodi kare-ni, pien kare-ni rac, Ketto wunu cunywu itimo gin aber, mom itimo gin arac, me ite bedo wunu kwo, Mannono bino miyo Rwot Obaŋa me mony bedo kedwu, acalo ikobo wunu, Kwer wunu gin arac, mar wunu gin aber, ŋol wunu kop atira i ka ŋolo kop i dog boma; gwok onyo Rwot Obaŋa me mony, bino timo kica baŋ jo a Yucepu ame odoŋ. Pi mannono, Rwot Obaŋa me mony, en Rwot okobo ni, “Koko bino woo i dye boma ducu, i dye yo ducu jo bi no kok iye ni, ‘Oii! Oii!’ Gin bi no lwoŋo opur bino, me kwero cola, kede jo aŋeo wer me koko i lyel. Koko bi no woo i poto olok ducu, pien abino kato i akinawu”, man kop a Rwot ikokome. Ibino neno wunu can, wun jo a paro nino a Rwot. Imito wunu nino a Rwot piŋo? Nino-nono colpiny, mom lero; cal i ŋat a riŋo eŋatu, te rwatte i nuu ager meicel, onyo odonyo i ot, te jeŋere kor apama kede ciŋe, twol te kaye. Nino a Rwot bino bedo colpiny, mom lero, bino bedo piny acol icuc ame ginnoro aryeny mom iye. “Adag aramawu, yia okwerogi oko, cokerewu me woro mom yomoro cunya. Kadi imia wunu mot awaŋa kede me moko kwon, mom abino gamogi gira; motwu me kweyo cuny, kede limwu ocwe, mom abino neno gira. Kwany wunu woo me wer oko i baŋa; mom amito winyo dwoŋ tumwu. Ento myero iwek wunu ŋolo kop atira mol bala pii, kede kite atira bala kulo ame mol nakanaka. “Wun jo me ot Icrael, rik ikella wunu mot aŋola kede mot ocele mege pi mwakki pyeraŋwen i tim? Ibino wunu tiŋo abakawu Cakkut, kede Kaiwan ame obaŋawu me acer, cal jogi ame itio wunu pirwu kenwu. Pi mannono, abino terowu iyi opii i ne Damaciko”, man kop a Rwot okobo, Rwot ame nyiŋe Obaŋa me mony. “Bino neno can jo a tye i kuc i Cion jo a tye i wi kidi me Camaria ame bedo aboŋo lworo! Wot iman wunu koŋ rok adoŋo mege, ilimgi wunu, wun jo Icrael. Kat wunu naka i Kalne, me inen wunu; ya wunu i kunnu, iwot wunu i Kamat adwoŋ, eka ite wot wunu doŋ i Gat a jo Piriciti. Gin beco kato loc magi oko? lobogi dwoŋ loo lobowu oko? Wun jo ame cwao nino arac teŋe, kun ikelo wunu kom loc me kole cok baŋwu? “Jo ame buta i wi tanda ame odeo i lak lyec, ame buto gigi ilada i wi gibedogi; ame camo itino rommi iyi anok, kede roce ame okwanyo iyi awi; ame wero wer nononono i dwoŋ tum, kede ame roto kit tummogo anyen pirgi kengi bala Daudi; jo ame mato koŋo olok iyi gwatti, dok ame wirre kede moo wir abeco meicel, cite mom gigi oparo pi rette a Yucepu. Pi mannono, gin doŋ obino geyo telo nyim jo ame obino tero i opii, nyero a jo ame buto ilada-nu bi no gik oko.” Rwot Obaŋa doŋ okwoŋo i kwo mere kene, Rwot Obaŋa me mony oko bo ni, “Yia dago wakere a Yakobo, akwero udi mere adoŋo oko; abino miyo boma kede jami iye luŋ baŋ okwor.” Ka co apar bino doŋ i ot acel, gin bino to. Dok ka wat a dano moro ame waŋo kome, obino pi kwanyo cogo i ot, ee openyo dano ame tye i gul ot ni, “Dano moro pwod odoŋ bani?” en bi no kwero oko ni, “Pe gire”; dok bi no kobo ni, “Liŋ, Mom myero otuc nyiŋ Rwot.” Pien nen ba, Rwot ociko, mio obino napo ot adwoŋ oŋinyo oko, ot atidi daŋ obino nininyo atitino. Aguragura riŋo i wi lela? Nam opuro i kweri dyaŋ? Ento wun iloko wunu ŋolo kop atira odoko awola, nyiŋ me kite atira iloko wunu odoko gin akec; wun ame ilelo wunu pi Lo-debar, ame kobo ni, “Pi tekowa mom omio omao Kamaim pirwa kenwa?” “Pien nen ba, abino tugo rokkoro i komwu, wun ot Icrael” man kop a Rwot Obaŋa me mony; “gin bino diyowu piny cakere dog yo ame woto Kamat naka i kulo me Araba.” Rwot Obaŋa onyutta kit man: nen, en onwoŋo tye acweyo bonyo apipim i kare ame kai ame ocoo me aryo mere ocako tu; nen mannono doŋ kai me aryo ame otu kun nwoŋo doŋ otyeko kayo me abaka oko, Kare ame bonyo doŋ onwoŋo otyeko camo gin otu i loba oko, akobo ni, “Ama Rwot Obaŋa, tim kica doŋ! Yakobo bino cun nino kun en kom titidi moro?” Rwot te jukere i man; Rwot te kobo ni, “Mom doŋ bino timere.” Rwot Obaŋa onyutta kit man: nen, Rwot Obaŋa onwoŋo tye aciko ni ŋolli jo mere kop me mac; eka te twoyo pii atut ame tye piny, te dok kobo waŋo lobo oko. An ate kobo ni, “Ama Rwot Obaŋa, wek bedi! Yako bo bino cun nino kun en kom titidi moro?” Rwot te jukere i man; Rwot te ko bo ni, “Man daŋ mom doŋ bino timere.” En dok te nyutta: nen, Rwot ocun i ŋet apama cel ame ogero kede birigi, kun omako birigi i ciŋe. Rwot te penya ni, “Amoc, ineno no?” An ate gamo ni, “Birigi.” Rwot te kobo ni, “Nen ba, aketo birigi i dyere a jona Icrael; mom dok abino medo katogi akata. Jo bino balo kabedo me abila Icaka ducu ame tye malo, wi tuti acil ducu me Icrael bino doko wi obur, dok abino twarre i kom ot a Yeroboam i pala lweny.” Amajia ame onwoŋo rik alamdog me Betel te cwayo kop baŋ Yeroboam abaka me Icrael kun kobbe ni, “Amoc opiro kop i ko mi i akina jo me ot Icrael; lobo mom romo kanyo koppere-nono luŋ. Pien en Amoc oko bo ni, ‘Yeroboam bino to i pala lweny, Icrael obino tero oko iyi opii kun otere kan abor i lobo mere.’ ” Amajia dok te kobbi Amoc ni, “Yin araŋ-piny, wot oko, riŋ i lobo me Juda, iwot icam kwon kuno, dok irab kop Obaŋa daŋ kuno; ento kur dok imedde rabo kop Obaŋa i Betel, pien man en kabedo acil pi abaka, en ot Obaŋa me loc.” Amoc te dokki Amajia ni, “An gira mom adwarpiny, an mom atin adwarpiny. An akwat, kede apur olamme acama. Rwot okwanya kun onwoŋo at ye alubo yo rommi, eka Rwot te cika ni, ‘Wot irab kop baŋ jona Icrael.’ “Aman yin doŋ iwinyo kop a Rwot. Yin ikobo ni, ‘Kur irab kop i kom Icrael’, kur itit kopporo i kom ot Icaka. Pi mannono, Rwot okobo ni, ‘Dakoni bi no doko alaya i boma, itinoni awobe kede anyira bino to i pala lweny, loboni obino poko kun opimo i tol; yin i komi ibino to i loba a mom cil, Icrael gire obino tero iyi opii ateteni kun otere kan abor i lobo mere.’ ” Rwot Obaŋa onyutta kit man: nen, dita ame opoŋ iye nyig yen me oro, Te kobba ni, “Amoc, ineno ŋo?” An ate gamo ni, “Dita ame opoŋ iye nyig yen oro me agikki.” Rwot te dokka iye ni, “Agikki doŋ obino i kom jona Icrael oko; mom dok abino medo katogi akata. Wer me ot Obaŋa bino lokere doko koko i nino-nono”, man kop a Rwot Obaŋa; “kom oto bino radde ata; obino bologi oko i kabedo ducu kun oliŋ aliŋa.” Winy wunu kop man, wun ame nyono jo ame can orido piny, dok ame tyeko ocan me lobo, ame ko bo ni, “Por dwe bino tuno awene, me ocat kal? cabit koŋo atum awene, me ocat ŋano, me olok gi-poro moko bed atidi, kede cekel bed adwoŋ, me obwol jo i ratili ame mom pi mo kakare; me owil ocan i lim kede ŋat a can orido pi amuk tyen, dok ocat daŋ kal ame obedo cucuŋ?” Rwot a myero Yakobo wakere pire okwoŋo ni, “Wia mom bi no wil atwal pi timgi luŋ, Lobo luŋ mom bi no yeŋere pi kop man, kun jo ducu abedo iye koko can? Lobo luŋ mom bi no tiŋere bala kulo Nail, kun yeŋere, dok piny callo Nail me Miciri?” “Dok nino-nono ba”, man kop a Rwot Obaŋa okobo, “abino miyo ceŋ po to dyeceŋ, abino miyo piny doko acol kun ceŋ pwod tye. Abino loko aramawu doko me kwero cola, kede werwu luŋ doko koko lyel, abino tweyo boŋo cola i pyer jo ducu, abino miyo wi jo luŋ tal, abino miyo bedo bala cola me atin onywalo acel keken, kede agikki mere bala nino me keckom.” “Nen ba, kare abino”, man kop a Rwot Obaŋa okobo, “ame abino cwayo kec i lobo; mom kec kwon, kadi me oryo pii, ento kec me winyo kop Obaŋa. Jo bino rorona cakere i nam naka i nam ocele, cakere i tuŋ anyarodi naka tuŋ kide; jo bino wirre tuŋŋi i tuŋŋi pi yenyo kop a wot, ento mom obino nwoŋo. “Inino-nono anyira abeco kede awobe bino wille pi oryo pii ame nwoŋo ocirogi. Jo ame okwoŋo kede Acima me Camaria, kun okobo ni, ‘Acalo obaŋawu tye kwo, wun jo Dan’, kede ni, ‘Acalo yo me Beer-ceba tye kwo,’ gin bino rette piny, mom dok obino ya atwal.” Aneno Rwot kun ocun i ŋet keno me lam, te kobo ni, “Go wi yen kika, arii yeŋere, me rette oko i wi jo ducu, jo ame odoŋ abino nekogi i pala lweny; mom tye ŋattoro i akinagi ame bino riŋo, mom tye ŋattoro i akinagi ame bino bwot. “Kadi bed gin okuny piny naka i Ceol, ciŋa bino wotogi oko i kuno; kadi bed gin oyit malo naka i polo, abino dwogogi oko i kuno piny. Kadi bed gin opono i wi kidi me Karmel, abino yenyogi, abino kwanyogi oko i kuno; kadi bed gin kanne oko i waŋa ite nam piny, abino ciko twol ame bedo kuno kaogi. Kadi bed tergi iyi opii nyim okworgi, abino ciko pala lweny kuno nekogi; abino ciko waŋa i komgi, pi timogi rac, mom me timogi ber.” Rwot Obaŋa me mony ogudo lobo te meye oko, mio jo luŋ ame bedo iye koko can, lobo luŋ tirjrjere malo bala kulo Nail, dok piny bala Nail me Miciri; en Obaŋa ame gero icika mere malo i polo, kun mio wi ode cuŋ i wi lobo; en Obaŋa ame lwoŋo pii me nam te onyo i wi lobo, nyiŋe Rwot. “Wun mom irom wunu i jo Eciopia i tuŋ baŋa, wun jo Icrael”, Rwot okobo. “Rik mom akwanyo Icrael i ya lobo Miciri, kede jo Piriciti i ya i Kaputor, kede jo Curia i ya i Kir? Nen Rwot Obaŋa doŋ ociko waŋe i kom loc ame tye kede bal, abino wero oko i wi lobo; koŋo ka ot a Yakobo en a mom abino jwero ducu”, man kop a Rwot ikokome. “Pien nen ba, abino ciko, abino yeko ot a Yakobo i akina rok luŋ bala kai ame oyeko i yi odero, ento nyig gweŋŋoro mom bino poto piny. Obalo luŋ ame tye i akina jona, bino to i pala lweny, jona ame kobo ni, ‘Gin arac mom bi no tuno baŋwa, kadi rwatte kedwa’.” “I nino-nono abino gero odoco, gony a Daudi a rik orette, abino wumo kan atwolo oko, abino yiko kan orette, abino gero kit a rik tye kede kare acon; me wek gin olo jo Edom ame odoŋ, naka rok luŋ ame olwoŋogi i nyiŋa”, man kop a Rwot ame timo man. “Nen ba, kare abino”, Rwot okobo, “ŋat ame puro bino nuko ŋat ame kao, ŋat ame nyono olok bino nuko aco koti; koŋo olok alim bino cwer i kiddi bino mollo i wi tur piny. Abino dwoggo kuc baŋ jona Icrael, gin bino gero boma ame yam odoko wi obur, gin bi no bedo iye; gin bino pi to olok, obino mato koŋo mere, gin bino yiko pottigi, ote camo gin ocek iye. Abino pitogi i lobogi, mom dok abino putogi, i ya lobo ame amiogi”, man kop a Rwot Obaŋawu. Man en gin ame Obaŋa onyuto baŋ Obadia. Rwot Obaŋa me mony onyuto kop i kom Edom, Wan doŋ owinyo kop ame oya i baŋ Rwot, akwena daŋ doŋ ocwao oko baŋ orok, me kobo ni, “Ya wunu malo, ya wunu, me owot olweny wunu kede!” Rwot okobbi jo Edom ni, “Nen ba, abino miyo idoko wunu atitidi moro, i akina orok, ame jo luŋ bino cayowu atek meicel. Awakawu ame onwoŋo tye i cunywu en ame obwolowu, wun jo ame ibedo wunu i akina kiddi ame obarre, wun jo ame kabedowu tye malo meicel, wun jo ame ikobo wunu i cunywu ni, ‘Ŋa kara ame bino dwokowa piny i lobo?’ Kadi bed ibed wunu malo calo cur, kadi bed udiwu bed i akina acer, abino dwokowu gire oko piny i kuno.” Man kop a Rwot i kokome. Ka ce okwo onyo oyak obino baŋwu dyewor, kadi bed gin oyakwu okato kare! gin mom obino kwalo ka gin ame oromogi keken? Ka ce opwon olok obino baŋwu, nyig olokkogo mom dok obino weko me adepa? Oyako Ecau meicel, oyenyo anaka jami mere ame en okano! Jo luŋ ame yam inotte wunu kedgi obwolowu abwola, gin oryemowu oko teŋe naka i waŋ lobo; jo ame yam ibedo kedgi i kuc doŋ oloowu oko; owotewu ame igeno wunu doŋ ociko owic i ka beowu, kun wun mom iŋeo wunu ginnoro iye, I nino-nono mom abino tyeko jo aryek oko iyi Edom, kede jo ame niaŋ daŋ oko i kidi me Ecau? Man kop a Rwot ikokome, Aco yin Teman, joni atekkege koyo bino onyere oko i komgi jo luŋ ame bedo i kidi me Ecau, pala lweny bino tyekogi oko, Pi tim me kolo ame itimo i kom ominni Yakobo, lewic bino maki atek, yin daŋ ote ryemi oko atwal. I nino ame rik icuŋ wunu iye teŋe ca, i nino ame rik wele mogo ocoko iye limmere oko ca, kun orok dodonya i dog cellere ote bolo kwir i kom Jerucalem, wun daŋ rik irom wunu kedgi. Wun onwoŋo rik mom iporre wunu nyero i nino-nono, i kom omegowu ame onwoŋo rik piny oruyigi arac; onwoŋo rik mom iporre wunu lelo i kom Juda, i nino ame ojwerogi iye; onwoŋo rik mom iporre wunu wakere i nino me can. Onwoŋo rik mom myero idony wunu i boma a jona, i nino ame gin onwoŋo tye kede can adwoŋ, rik daŋ mom myero inyergi wunu pi gin arac ame otimere i komgi, i nino ame gin onwoŋo tye kede can adwoŋ rik mom myero iyak wunu gigi moro, i nino ame gin onwoŋo tye kede can adwoŋ; Rik onwoŋo mom iporre wunu cuŋ kan ame yo okare iye, pi jo ame onwoŋo aŋwec me laro komgi, rik onwoŋo mom iporre mako wunu jo ame obwottege, ite miyogi wunu i ciŋ okworgi, i nino me can, Pien nino a Rwot ceggi bino i kom rok luŋ aluŋa, Kite ame wun itimo wunu i komgi, wun daŋ obino timowu amannono, gin ame itimo wunu bino dok gire i wiwu. Pien kite ame doŋ imatte wunu kede i wi kidina acil; rok luŋ omanowu daŋ bino mato; gin bino mato ote bedo gatte agata, obino doko acalo jo a yam pe, Jo Icrael obwottege obino tiŋo malo Ento jo ame obwot bino bedo tye i wi kidi me Cion, kuno bino bedo acil. Jo me ot a Yakobo bino leyo jamigi ikokome. Jo me ot a Yakobo bino bedo mac, jo me ot a Yucepu te bedo leb mac, aco jo me ot Ecau te bedo reŋ kal: obino waŋogi otyekogi ducu, ame ŋattoro me ot Ecau mom bino bwot. Rwot doŋ otyeko kobo. Jo me Negeb bino leyo kidi me Ecau, jo me Cepela te leyo lobo a jo Piriciti, gin bino leyo lobo Epraim kede lobo a jo Camaria, aco Benjamin bino leyo Gilead, Jo Icrael ame gin opii i Kalak, gin bino leyo Kanaan wot kede anaka i Carepa, aco opii luŋ ame tye i Ceparad ame rik omako i Jerucalem, gin bino leyo boma luŋ a tye i Negeb, Olar jo bino yito malo i wi kidi me Cion me loyo kidi me Ecau, aloc adwoŋ gire bino bedo Rwot. Kop a Rwot rik obino baŋ Yona wot Amittai kun kobbe ni, “Ya, iwot i boma adwoŋ me Nineve, iwot irabbigi kop i komgi, pien balgi doŋ otuno oko i nyima kan.” Ento Yona te ya me lwi wot Tarcic, me erweny oko i nyim Rwot. En rik te wot naka Yoppa, te wot nwoŋo mel ame onwoŋo awot Tarcic; en te ŋolo tikitiki mere me wot, te donyo i mel me wot kedgi i Tarcic, me erweny oko i nyim Rwot. Cite Rwot te cwayo twon yamo moro adwoŋ meicel i nam, ame te miyo pii i nam tagere meicel, mel te mito tur oko. Okwaŋ mel te doko alwor oko, ŋat acel acel te ero kok baŋ obaŋa mere ote daŋ bobolo jamigi ame onwoŋo tye i mel i nam, me wek mel doŋ ayot. Ento Yona onwoŋo tye odonyo mere piny, iyi icika ame tye i yie twal, buto kuno, kun daŋ onino gire oko, Adwoŋ a loo mel te bino baŋe kobbe ni, “Lo-ni, yin inino anina aman piŋo? Ya malo ikwa obaŋani! Gwok onyo obaŋani bino tamo pirwa, me kur oto.” Gin dok te ero kop kengi kengi ni, “Koŋ ibiye wunu, me obol wunu kwir, me oŋe ŋat ame omio gin arac-ci otimere i komwa.” Gin te bolo kwir, te mako Yona. Gin te penyo Yona ni, “Yin koŋ ikobbiwa ŋat ame omio gin arac-ci otimere i komwa? Yin itio tic aŋo? Dok iya ikwene? Yin i dano me lobo mene? Dok yin ibedo rok aŋo?” Yona te kobbigi ni, “An a dano me Eburania; an abedo ŋat ame lworo Rwot Obaŋa me polo, ame oketo nam kede lobo.” Jo-nono rik te bedo i twon lworo adwoŋ meicel, ote dok penye ni, “Kara man ŋo ame yin itimo?” Pien jo-nono onwoŋo ŋeo ni en onwoŋo tye alwi alwia me rwenyo oko i nyim Rwot, pien Yona onwoŋo otittigi. Gin dok te penye ni, “Kara man doŋ wan otimi nadi, me nam kwe oko pirwa?” Pien pii nam onwoŋo tye amedde ameda i taggere. En te kobbigi ni, “Tiŋa wunu, ibola wunu i nam, me wek pii nam kwe oko pirwu; pien aniaŋ ni pii nam-mi tye ataggere meicel i komwu pira.” Cite gin koŋ dok te temo kwaŋ atek meicel me dok cen i wi tela, ento mom te twerre, pien pii nam onwoŋo amedde ameda i taggere atek meicel i komgi. Mannono te miyo gin kok baŋ Rwot kun okobo ni, “Okok baŋi, ama Rwot, tim ber kur imiwa oto pi kwo a dano man, kur imi remo a mom kede bal dok i wiwa; pien yin Rwot doŋ ityeko timo kite ame ineno ni ber baŋi.” Gin doŋ te mako Yona bolo oko i nam gero a nam te gik oko, Jo-nono te bedo i twon lworo adwoŋ meicel i kom Rwot, gin te yalo Rwot i mot aŋola, ote daŋ kwaŋ baŋe. Rwot te miyo twon reccoro adwoŋ meicel mwonyo Yona oko; Yona rik te tyeko nino adek iyi rec, dyewor kede dyeceŋ. Yona te kwayo Rwot Obaŋa mere kun tye iyi rec, kun kobo ni, “An rik akok baŋ Rwot i canna, en te gamo doga; akok kun atye iyi Ceol, yin ite winyo kwacca. Pien ibola kan atut, i cuny nam twal, pii ame mol te gura dyere, imio piini otagere, kun corre beo i wia. An ate kobo ni, ‘Oryema doŋ oko i nyimi; kara dok abino neno odi acil niŋo ba?’ Pii doŋ omwonya oko, pii atut ogura dyere, egiro tye okadde oko i koma. Alwiny piny ite kidi, akato piny kan atut ite lobo, lobo te cegga dogcellere oko atwal. Ento yin giri rik ite kwanyo kwona oko i Bur yin Rwot Obaŋana. I kare ame tipo koma oya, rik ate poyo Rwot; ate cwayo kwacca baŋi, naka i odi acil. Jo ame keto cunygi i kom jogi a konygi mom, oweko gigi Rwotgi oko, a marrere mom lokere. Cite an gira abino miyi motti me yali, kun amio i dwoŋ aber me pwoc, Gin ame akwoŋo, abino cobo. Rwot gire en ame laro jo!” Rwot rik te koppi i rec, eka rec te ŋoko Yona oko i wi tela. Kop a Rwot rik dok te bino baŋ Yona tyen me aryo, kun kobo ni, “Ya, iwot i boma adwoŋ me Nineve, iwot irab iye kop ame an akobbi.” Yona rik te ya wot Nineve kite ame Rwot ocike kede. I kare-nono onwoŋo Nineve rik obedo twon boma moro adwoŋ, ŋolo yie aria onwoŋo tero nino adek. Yona rik te cako wot i bomanono, owoto iye nino acel. En te cako redo kun kobo ni, “Odoŋ nino pyeraŋwen keken, obino reto Nineve oko.” Jo me Nineve rik te ye Obaŋ gina; te rabo pi kanyo kec; gin luŋ ote ruko boŋo cola, cakere i kom jo adoŋo, ituno kede i kom jo atino. Kare ame kop man otuno baŋ abaka me Nineve, en oya oko i wi kommere me loc, te gonyo rukere me kwogo oko, eka te ruko boŋo cola, te bedo piny i buru. En te miyo rabo kop romo Nineve luŋ ni, “Pi cik abaka, karacel kede odoŋe mere me awora: Myero kur mi dano moro bil ginnoro, akadi lee moro onyo dok kede rommi myero kur ocem, kur daŋ omat pii. Ento jo luŋ kede leyi myero wummere i boŋo cola, ote kok atek baŋ Obaŋa, ŋat acel acel myero olokere, owek yo mere arac oko, karacel kede kolo mere. Ŋa kara a ŋeo ka mom dok bino lokere, juko cunye i kom akemo mere agwa, me kur oto?” Kare ame Obaŋa oneno gin ame gin otio, kite ame gin olokere oweko yogi arac, Obaŋa ojuko cunye, te weko timo gin arac a rik ekobo ni ebino timo i komgi; mom doŋ te timo. Kop man rik te miyo cuny Yona waŋ meicel, akemo omake. En te kwayo Rwot kun kobo ni, “Akwai, yin Rwot, man mom gin a rik akobo i kare ame pwod atye i lobona? Mannono en gin omio rik a ru lwi me wot oko i Tarcic; pien onwoŋo aŋeo ni yin ibedo Obaŋa ame akica, ame timo jo ber, dok akemo mom maki oyot, mar meri a mom lokere dwoŋ meicel, dok daŋ ijuko cunyi oko i timo gin arac. Doŋ pi mannono ba, Rwot, aman doŋ tim ber ikwany kwona oko, pien twara ata kato ame abedo kwo.” Rwot te gamo ni, “Itimo ber me bedo kede akemo?” Yona te ya oko iyi boma, te wot bedo i ŋet boma tuŋ kide, te tiyo gonnyere pire kene kuno. En te bedo piny ite tipo mere, me koŋ enen gin ame bi no timere i kom boma. Rwot rik te miyo coga tu, te doŋo i ŋet Yona, me tipo mere geŋ wie, gwoke i cannere. Coga-nono rik te miyo cuny Yona bedo ayom meicel. Cite odiko i kare ame piny doŋ oru, Obaŋa te miyo kudi cobo coga-nono oko, te miyo ner oko, Kare ame ceŋ doŋ odonyo, Obaŋa omio twon yamo moro alyet meicel okuto kun bino i tuŋ kide, ceŋ te cako waŋo wi Yona, ame te miyo kome nyoŋere oko; en te kwayo ni myero eto oko, kun kobo ni, “Twora ato, kato ame abedo kwo.” Ento Obaŋa te kobbi Yona ni, “Itimo ber me bedo kede akemo pi coga?” En te gamo ni, “Atimo ber me bedo kede akemo, akemo ame romma to.” Rwot dok te kobo ni, “Kica omaki i kom coga ame yin mom itiyo ticcoro i kome, ame mom daŋ yin imio odoŋo, ame odoŋo gire i dyewor acel keken, dok te to daŋ i dyewor acel. An kica mom myero maka i kom Nivene ame en twon boma adwoŋ meicel, ame tye iye jo ame kato tutumia mia acel kede pyeraryo oko, ame mom ŋeo poko badgi tuŋ cem kede tuŋ cam, karacel kede dok apol ame tye iye?” Man en kop ame rik Rwot onyuto baŋ Mika ame obedo dano me Morecet, ame en onyutte i kom Camaria kede i kom Jerucalem, i kare a Yocam, Akaj, kede Kejekia, ame gin luŋ obedo obakki me Juda, Wun rok ducu winy wunu ba, ter yiti ba, yin lobo kede ginnoro luŋ iye; me Rwot Obaŋa bed caden i komwu, kun en Rwot gire ko bo i ode acil. Pien nen wunu ba, Rwot tye a ya oko i kabedo mere, en abino piny te wowota i wi kiddi ame tye i wi lobo. Kiddi bi no meye oko i kan a en onyono, kun luŋ daŋ babara oko, calo odok kic ame tye i ŋet mac, calo pii ame corre piny kun ya i wi tur malo Man luŋ timere pien Yakobo okalo wi cik oko, kede pi bal a jo me Icrael. Yakobo okalo wi cik i yore aŋo? Mom Camaria en a nyuto? Kara jo me ot a Juda otimo bal aŋo? Mom Jerucalem en a nyuto? Mannono bino miyo aloko Camaria doko wi obur i dye tim kan ame opito iye olok; kiddi iye luŋ abino onyo oko piny i luŋ, ate miyo acakki me tere bedo wie nono. Cal apaa me re luŋ obino ŋiŋido oko, ginnoro luŋ ame en omio onwoŋo obino waŋo i mac, abino daŋ babalo cal jogi mere luŋ; pien ocokogi i kom timo tim me alaya, abino dwokogi daŋ cen iyi ocara me timo tim me alaya. Man bino miya akumo, ate kok; abino wot i tyena nono, kun awoto onoro; abino kok calo ekwe, abino kumo calo udo. Pien wan ret a Camaria mom twero caŋ; otuno daŋ gire oko i Juda, tye kom doŋ i dogcel a jona, naka i Jerucalem. Kur itit wunu pire i Gat, kur daŋ ikok wunu; wot iŋenne wunu iyi apua wun jo Bet-le-apra, Kat wunu anyim, wun jo me Capir, kun it ye wunu onoro ame lewic makowu; aco wun jo me Janan, kur idony wunu oko; koko ame tye ka winyere i Bet-ejel nyuto ni ka-larrewu mom dok twero nwoŋere kuno. Jo ame bedo i Marot tye akuro gin aber kun oparo meicel, pien gin arac doŋ obino piny kun oya i baŋ Rwot otuno naka i dogcel me Jerucalem. Twe wunu aguragurawu i kom gadigadi lweny, wun jo me Lakic; wun en ame rik icako wunu kelo bal i kom jo me Cion, pien bal a jo Icrael gin rik ogeo neno i baŋwu. Pi mannono ba, wun en ame ibino miyo wunu mot me pokere i welewu me Morecetgat; udi me Akjib bino bedo gin a bwolo jo baŋ obakki me Icrael. Aco wun jo ame bedo i Mareca, abino dok kelo dano ame bi no loyowu; jo ame yam kela kwogo baŋ jo Icrael bino wot oko i Adullam. Cid wunu yer wiwu oko, me bed otal pi itinowu ame yomoro cunywu; mi wiwu tal calo me acut, pien gin bino ya oko i banwu obino terogi oko iyi opii. Jo ame paro pi timo gin arac bino neno can, ame oparo nakanaka i kabutogi! Ka piny oru, gin doŋ te keto i tic pien otye gigi i twer me timo. Oparo potti a jo, ote daŋ gamo; oparo udi a jo, ote daŋ mayo, owuno dano ote gamo ode oko, owuno dano ote mayo anaka lobo ame en oleo. Mannono omio Rwot okobo ni, “Nen ba, at ye ka paro kop arac i kom jo me ot man, ame mom dok ibino woto ŋutwu iye, mom dok ibino bwono wunu jo pien kare-nono bino bedo rac atek. I kare-naca jo bino cako wer agece agece i komwu, ote kok kun okumo atek meicel, kun okobo ni, ‘Wan doŋ otum giwa aber; lobo ame yam opokki jowa Rwot doŋ omio jo ocele, iwuro awura kite ame en ogamo kede i baŋwa: Olunyo poko pottiwa-nono baŋ jo oterowa iyi opii.’ ” Pi mannono ba, mom ibino bedo wunu i ŋattoro i cokere a Rwot, ame bino bolo tol me pokkiwu lobo me apura. “Kur irab wunu kop gin rabo kittono ŋattoro myero kur rab kop acalo mannono; lewic gire mom bino makowa.” Myero kob kop man, wun jo me ot a Yakobo? Rwot mom dio cunye bo? Magi obedo ticcere bo? Koppa mom timo ber baŋ jo ame timo tim atira bo? Ento wun ibelle wunu i kom jona calo okwor; imao wunu borjo oko i kom jo ame bedo mot, kede i kom jo ame bea abea kun ogeno ni ginnoro mom gire bino timmere i komgi dok mom daŋ otye i tamoro me lweny. Iryemo wunu mon a jona oko i udigi ame yomoro cunygi; ikwanyo wunu kwogona atwal i kom itinogi atino. Ya, iwot wunu, pien kan mom obedo kabedo me weo, pi gigi mogo iye a mom cil, ame balo dano, ame kela twon balloro arac meicel. Ka ee dano moro wowota atata, kun tye i cuny me goba, kun kobo ni, “Abino kobbi kop i kom koŋo olok kede koŋo arege”, kodi dano-nono en ame joni romo winyo koppere, Ateteni, an abino coko wun luŋ, wun jo a Yakobo, abino coko jo Icrael ame odoŋ; abino miyogi obedo karacel calo rommi ame tye iyi anok, acalo lim akwo ame acem i bar, acalo lwak jo ame awo. Ŋat ame bino yeco yo en bino telo nyimgi; gin bino turo dogcel ote kato gigi iye, ote wot gigi oko. Abakagi bino kato i nyimgi, kun Rwot telo yo. An ate kobo ni, Winy wunu ba, wun otel wi jo a Yakobo kede wunu oloc me ot Icrael! Mom obedo ticwu me ŋeyo ŋolo kop atira? Wun ikwero wunu gin aber, ite maro wunu gin arac, wun ipapaco wunu del kom jona oko, ite daŋ dadaŋo wunu riŋo oko i kom cogogi; wun icamo wunu riŋo kom jona, kun iyaŋo wunu del komgi oko, ite tuturo wunu co go komgi ŋido atitino, ite totoŋo wunu calo riŋo ame tye i gulu, calo riŋo ame tye i cupulia. Eka ite kok wunu baŋ Rwot, cite en gire mom bino gamo dogwu; i nino-naca en mom bino ye ni inen wunu waŋe, pien gin ame itimo wunu rac atek. Man en kop ame Rwot oko bo kom odwarpiny ame rwenyo jona arwenya, ame rabo kop me kuc, ka ee otye i ginnoro me acama cite gin oero lweny i kom ŋat a mom keto ginnoro me acama i ciŋgi. Mannono omio Rwot okobo ni ba, Ibino bedo wunu i piny acol icuc aboŋo neno anyuttoro, dok daŋ piny bi no doko acol aboŋo adwoggi me ginnoro ame ityeto wunu. Ceŋ bi no poto i wi odwarpiny, piny bino cido oko dyeceŋ. Lewic bino mako jo ame neno piny, alee bino twodo otyet; gin luŋ obino miyo doggi oko, pien Obaŋa gire mom bino gamo kopgi moro. Aco koŋo an gira, tekona dwoŋ ata, Cuny a Rwot daŋ tye i koma, karacel i ŋolo kop atira kede twer, me titti Yakobo roccere, kede me nyutti Icrael ballere. Winy wunu man ba, wun otel me ot a Yakobo, kede wun oloc me ot Icrael, ame idag wunu ŋolo kop atira, kun idwadwanyo wunu kop luŋ a tye kakare, wun ame igero wunu boma me Cion kede remo, kede Jerucalem daŋ i tim a mom ber. Otel a jo Jerucalem ŋolo kop pi lim owilogi kede i muŋ, olamdog iye pwonyo pwony pi ocara odwarpiny daŋ tyeto tyet pi lim; cite pwod okobo ni ojeŋere i kom Rwot, kun okobo ni, “Rwot gire tye i akinawa, ginnoro arac gire mom bino gudo komwa.” Mannono omio Cion obino puro calo poto; aco Jerucalem bi no doko wi obur, kidi ame ot a Rwot ocuŋ iye yen bino oculle iye acula. Man bino timere i kare ame tye anyim: kidi ame ot a Rwot tye iye bino cuŋ malo iguŋ ame kato kiddi ducu, borrere bi no kato lobo luŋ obedo tutur; rok luŋ bino ciro woto kuno, rok apol bino bino, te kobi ni, “Biye owot wunu i wi kidi a Rwot, i ot a Rwot Obaŋa a Yakobo; me en wot pwonywa i kite mere, me wan daŋ olub kite.” Pien cik bino ya i Cion, kun kop a Rwot ya i Jerucalem. En bino ŋolo kop i akina rok apapat, rokkoro atek ame tye kannabor, bi no lubo gin a en omoko, pala lwenygi obino teto me leb kweri dyaŋ, toŋigi bino doko pala me lwero jaŋ olok; rokkoro gire mom dok bino tino pala me lweny i rok ocele, mom daŋ dok obino pwonyo kite me romo. Ento ŋat acel acel gire bi no bedo i te olokkere kede i te oduro mere, mom tye ŋattoro ame bi no miyogi obedo lwor; pien Rwot me mony doŋ okobo man en ikome. Pien rok luŋ aluŋa, acel acel iye lubo nyiŋ obaŋagi cite wan giwa obino lubo nyiŋ Rwot Obaŋawa naka waŋ i waŋ. Rwot okobo ni, I nino-naca abino coko oŋwalo, ate daŋ coko jo ame oryemo oko teŋe, kede jo ame an doŋ aketo can i komgi; eka oŋwalo en ate bedo jo obwot, jo ame onwoŋo oryemo teŋe te doko rok atek; Rwot en ame bi no loyogi i kidi me Cion, cakere tin naka waŋ i waŋ. Aco yin pem ame icuŋ iguŋ malo ame gwoko rommi, yin tur a jo Jerucalem, locci acon ca bino dwogo, bino dwogo gire i ciŋi, ame en loc a jo me Jerucalem. Piŋo kara aman dok iolakino koko? Abaka moro mom tye bani bo? Lo ami-tam oto oko bo, omio rem ociri wok-ki calo dako ame rem me nywal ogoo? Kany rem, icolle, wun jo me Jerucalem, calo dako ame arem me nywal; pien aman ibino wunu ya oko boma ite wot bedo wunu i tim; ibino wot wunu i Babulon. En Rwot bino larowu i kuno en bino lakorowu i cin okworwa, Aman rok apol bi no cokere me lweny i komwu kun gin okobo ni, “Wek obabalo wunugi oko, me wan daŋ onen Cion waŋwa.” Cite gin gigi mom oŋeo tam a Rwot, gin gigi mom oŋeo yikkere, ni en ocokogi calo wit kal i laro Ya malo, me idingi wunu ba, wun jo me Cion, pien obino miyo tuŋwu doko nyonyo, ogweŋere tyenwu bi no doko mola; ibino nyono rok apol piny ite tyeni, ibino jalo limgi baŋ Rwot eka te bedo mea Rwot me wi podo luŋ. Aman doŋ omio cel ogurowa oko dyere, okwor doŋ ogurowa oko, gin doŋ ocako bapo lem aloc me Icrael oko. Ento yin Beterekem Eprata, yin ititidi moro me bedo i akina pacci a jo Juda, cite dano ame bino bedo aloc a jo Icrael bi no ya i bani kannono pira, dano ame bi no mere ocako winyere con meicel. Mannono omio Rwot koŋ bino jalowu ata tuno ka kare oromo, tuno ka nyako ame rem me nywal ogoo doŋ onywal oko; omego mere en aloc odoŋ luŋ te doŋ dwogo oko baŋ jo Icrael. En bino cun i tek a Rwot kun kwayo rommi mere, kede kwogo adwoŋ meicel ame ya i baŋ Rwot Obaŋa mere. Gin doŋ bino bedo i kuc, pren aman en doŋ bino bedo adwoŋ meicel naka i agikki me lobo. Pien dano-nono bi no kelo kuc. Kare ame jo Acuria bino bino lobowa, kare ame tyengi bino nyono lobowa, wan obino cwayo okwat abiro me lweny i komgi, kun odone aboro en ame telo lwak: gin bino loyo lobo me Acuria i pala lweny, kede lobo me Nimulodi i pala lweny ame owoto doŋ oko iyi akure; gin bino larowa oko i cin jo Acuria kare ame gin obino i lobowa kare ame tyengi bi no nyono lobowa. Icennere jo a Yakobo odoŋŋere bino bedo i akina rok apol apola, ame calo toyo ame oya i baŋ Rwot, ame calo kot ame oŋido i kom lum, ame mom kuro jo kadi acel, mom daŋ gire kuro itino a dano. Eka jo a Yakobo odoŋŋere te bedo i akina rok apapat, ame calo eŋatu iyi akina leyi ame tye i buŋ, acalo atin eŋatu i akina rommi ocokere; ame ka obeo i akinagi nyonogi piny, kikilogi atitino, kun ŋattoro a larogi mom tye. Ibino ti ŋo ciŋi malo i kom okworri, jo ame dagi luŋ ibino tyekogi oko, Dok daŋ i nino-naca abino miyo aguragura rwenyo oko i akinawu, gadigadi lwenywu daŋ abino tyeko oko, Rwot okobo. Boma luŋ ame tye i lobowu abino miyo rwenyo oko, ka ponowu luŋ ame tek daŋ abino mumuko oko, Tic me emuroko daŋ abino kwanyo oko i ciŋwu, ajoka moro mom dok bino nen i lobowu; cal apaa daŋ abino miyo rwenyo oko, kede kiddi luŋ ame icibo wunu me awora mom dok ibino medde wunu ryebere piny i nyim gin ame ciŋwu en otio. Abino puto yen Acerawu oko i akinawu, abino daŋ babalo bomawu luŋ, Dok daŋ abino culo kwor i twon akemo kede iniga, kom rok luŋ ame rik mom owinyo koppa. Winy wunu ba gin ame Rwot okobo: Ya wunu malo, ipid wunu i nyim kiddi, mi wunu lobo obedo kidikidi winy dwonwu, Wun kiddi daŋ, winy wunu ba pyem a Rwot, kede wun acakki te lobo ame perakino waŋ i waŋ; pien Rwot tye kede pyemmoro i jo mere en bino pyem i jo Icrael. “Kara atimo ŋo i komwu ba, wun jona? Aolo kara komwu i yore ano ba? Koŋ ikobba wunu, Pien rik akwanyowu i lobo me Miciri, alakorowu i ot me opii; dok daŋ acwalo Muca i nyimwu me telowu, Aron kede Miriam. Koŋ ipo wunu gin ame Balak abaka me Moab oporo, wun jona, kede gin ame Balaam wot a Beor odokke iye, kede dok gin ame rik otimere cakere i Cittim naka i Gilgal, me iŋe wunu tic ame Rwot otio me laro jo.” “Kara abino kelo ŋo i nyim Rwot, me aryebere i nyim Obaŋa ame tye malo? Myero awot i nyime i mot awaŋa, kun atero roa me mwaka acel? Cuny Rwot bino bedo ayom i kom rommi tutumia i tutumia kede kulli tutumia apar ame moo opoŋ yigi, myero ami atin ame an i koma anywalo pi bal ame tye i cunya?” Rwot gire doŋ onyutti gin aber, yin dano; ŋo kara ame Rwot mito i baŋi? Mom tiyo tic a tye atira kede maro kica, kede wot karscel Obaŋani, ame imwolle i nyime? Lworo Rwot obedo tim me ryeko meicel; en redo me lwoŋo boma, kun redo ni, “Winy wunu ba, wun atekere ame icokere wunu i boma! Wia twero wil i kom twon lonyo adwoŋ ame inwoŋo wunu i yore ame mom ber, ame okano i ot a lo arac, kede gi-pimo jami ame adag neno? Myero ami lo ame tye i mijan arac lo kop, kun daŋ tye icao me gwoko mijan me goba? Jowu ame olonnyege ger atek meicel, jo ame bedo kan daŋ ogoba atek, lebgi kela ka kop me go ba i doggi. Mannono omio doŋ acako goyowu oko, kun amio bomawu luŋ doŋ nono pi balwu. Ibino cem wunu, cite mom gire ibino yeŋ wunu, kec gire pwod bi no medde nekowu bala mom icemo wunu; ibino temo wunu kano jami, cite mom gire bino kanne, gin ame ikano wunu abino miyo oko baŋ pala lweny. Ibino coyo wunu kano jami, cite mom ibino kayo wunu ginnoro; ibino nyono wunu jeituni, cite mom ibino wiro wunu komwu i moo mere; ibino biyo wunu olok, cite mom ibino mato wunu koŋo mere. Pien ilunyo wunu lubo cik Omri, kede ticcoro luŋ me ot Akab, kun ilubo wunu tamgi i ginnoro ducu; ame omio doŋ idoko wunu calo jo ame oweko i wi obur, kun jo ame bedo baŋwu bedo jo me acaa; mannono bino miyo ikanyo wunu anywar a rok apapat.” Aneno can doi! Pien doŋ acalo bala kare ame doŋ otyeko coko nyig yen me oro oko, ame doŋ otyeko dedepo nyig olok oko, ame nyige moro me acama doŋ mom, nyig oduro moro a cunya mito ogeo cek doŋ mom. Jo ame woro Obaŋa doŋ oto luŋ i lobo, ŋattoro ame cunye ler mom gire tye, Jo luŋ maro ka libo owotegi me aneka, inwoŋo ŋat acel acel tye adwaro ominnere kede boo. Gin luŋ odiro meicel i timo gin arac; aco oloc kede oŋolkop, gin luŋ okwao ka lim me wilogi i muŋ. Twon lo adiro iloko tam a jo, tittigi ka tam arac ame tye i cunye; eka gin doŋ te yiko, Ŋat ame aber i akinagi, calo ocokocok, aco ŋat a cunye ler i akinagi, calo okuto ame ocelo i poto. Nino ame okur pinygi yam orabo pire, nino me keto can i komgi doŋ otuno gire oko, aman daŋ kare me babaŋogi ceggi acega. Kur iket genni i kom awoti, kur daŋ ibed kede gennoro i kom dyeri, myero igwok kop ame ya i dogi, naka baŋ ceggi ame inywako wunu kede kabuto; pien awo bi mom gire keto kwogo i kom pappere nyako daŋ pyem apyema tottere, eka ci-wod te pyem i tattere, okwor a dano gire obedo jo me paco mere. Cite an gira abino neno Rwot, abino gira kuro Obaŋa ame lara, Obaŋana bino gire winyo koppa. Kur ilel i koma ba, yin akworra; ka ee arette, abino dok ya; ka ee abedo kan acol, Rwot en ame bino bedo cen ame menya. Abino gira kanyo ake mo a Rwot, pien an atimo bal i nyime, tuno waŋ ame apido koppa, ame en doŋ omia aloo kop, En doŋ te kela oko kannaler; ate doŋ neno lar mere. Akworra daŋ bi no neno, lewic bino mako dako ame onwoŋo penya ni, “Kara ane en Rwot Obaŋaninono?” Abino ne ne kede waŋa ka otye ka nyone piny, acalo coto ame tye i dye yo. Nino me gero cel me Jerucalem tye abino, I nino-naca obino jero waŋ lobo teŋe. Jo bi no bino baŋwu i nino-naca, kun oya i Acuria, anaka i Miciri, ote ya i Miciri anaka i kulo Efurate, dok ote ya i nam naka i nam, kede i kidi naka i kidi, Cite wi lobo luŋ gire bino doko wi obur pi jo ame bedo iye, pi gin arac ame gin oti mo. Kwa joni kede lutti, ame gin obedo rommini ame opokki me bedo megi, ame bedo kengi i bun, i dye lobo ame opuro iye cam; kwagi i Bacan kede i Gilead, bala kite a rik koŋ timere kede con. Bala kare ame rik iya wunu i Miciri, abino nyuttiwu gigi mogo me awura, Orok bino ne no lewic te makogi, i kom twergi luŋ; gin bino wumo doggi oko kede ciŋgi, yitgi daŋ bi no din gire oko; gin bi no cako moko apua calo twol, acalo leyi ame mol amola i lobo; gin bino bino ame komgi amyel amyela, kun nwoŋo oya i ka-ponogi atek, gin bino cako bedo i twon lworo adwoŋ meicel, i kom Rwot Obaŋawa, gin bino bedo kede lworo piri. Ŋa kara ame dok obedo Obaŋa calo yin, ame timo kica baŋ jo me re odoŋ i kom rocgi? Yin giri mom ikano akemo i cunyi nakanaka, pien cunyi giri yom i mar a mom lokere. Kica gire bino dok maki i komwa, eka ite nyono balwa i te tyeni piny. Yin giri ibino dwiro balwa luŋ piny i te kut me nam. Yin dok ibino nyuto genni kom Yakobo, kede mar a mom lokere kom Iburaim, kite ame rik ikwoŋo kede baŋ kwariwa i kare okato. Man en kop ame orabo i kom Nineve, ame Obaŋa onyuto baŋ Nakum; ame onwoŋo obedo dano me Elkoc. Rwot en Obaŋa ame nyek, dok daŋ en acul kwor, Rwot culo kwor, dok akemo mako meicel; Rwot culo kwor i kom okworrere, dok kano akemo mere pi jo ame dage, Akemo gire mom mako oyotoyot dok en tye kede twon teko adwoŋ meicel, en gire mom bino weko jo ame kop oloo, En beo i dye kot ame acwe i yamo ajuru, pol obedo apua me tyene, En juko nam, pii mere te kwo oko, en mio pii i kulli luŋ two oko. Potti me Bacan kede kidi me Karmel en mio daŋ two oko, kede ature me Lebanon daŋ ner oko, Kan ame en tye iye kiddi yeŋŋere, lobo obedo kidikidi daŋ meye oko; en mio lobo daŋ doŋ yie nono, wi podo luŋ kede jo a bedo iye, Ka ee en oŋo, ŋa ame twero cuŋ i nyime? Ŋa ame twero kanyo lyeto me akemo mere? Akemo mere ony calo mac, dok daŋ babaro le la oko. Rwot gire ber; en obedo kan atek me alara kare me can, dok en neo jo ame riŋo laro bane. En bino tyeko okworrere odoco i twon ale le ame mol i teko adwoŋ meicel, dok en bi no ryemo jo ame dage naka i piny acol. Gin ano kara ame iporo wunu me timo i kom Rwot? En bino tyeko oko odoco, mom gire bi no culo kwor iryo i kom okworrere. Obino rweyogi luŋ calo okuto okadde kede reŋ kai otwo ame mac owano, Lo moro mom rik obin otwarre akinawu, te poro kop arac i kom Rwot, te daŋ mi yo tam arac baŋ jo? Rwot okobo ni, “Kadi bed jo Acuria tek dok welgi bup, obino miyo waŋgi rwenyo oko i wi lobo. Kadi bed yam awunowu mom dok abino medde wunowu. Aman doŋ abino turo kol Acuria oko i nutwu, dok abino miyo jegere ame otweowu kede cot oko,” Man en cik ame Rwot omio i kom jo Acuria: “Nyiŋgi mom dok bino winyere abino miyo cal apaa kede cal atwaka rwenyo oko i ot obaŋagi, abino kunyo bur me yikogi, pien konygi doŋ pe.” Koŋ inen ba tyen ŋat ame kela amut aber, ŋat ame rabo pi kuc nen ba tyene i wi kidi. Kwer giri ecubanni, yin Juda cob giri daŋ kwoŋŋi, pien obalo mom dok bino medde lweny i komi atwal, pien doŋ ojwerogi odoco. Ŋat ame ninido jami doŋ obino oko i komwu. Gwok wunu cel me boma; ŋi wunu ba yo; twe wunu daŋ pyerwu, yikere wunu ba me lweny. Pien Rwot doŋ adwokki Yakobo dittere ame rom aroma kede dit Icrael, pien oyak onwoŋo oyayako jamigi ote daŋ babalo jaŋ olokgi oko. Jo mere atek i lweny kwotgi rema, ocirikale mere ruko bomji obedo iremarema. Gadigadi lwenygi meny calo leb mac ka oryeogi i tyen, aguragura lwenygi rwomo ŋwec arwoma. Gadigadi lwenygi riŋo ata i dye yo, omwomere i ŋwec tuŋŋi i tuŋŋi i dye yo alac, omemenya ipilpil calo mac rao kun obedo iwilwil calo lutkot. Otel a lwak doŋ otyeko lwoŋo oko, gin owot ame ogatte agata, kun oyutte ayuta me wot i cel, ame kwot geŋo komgi daŋ doŋ oterre oko, Dogcel luŋ ame woto i kulo doŋ oyabere oko ot atek me bedo aloc akuro doŋ rette keken, Agoŋŋere otero oko iyi opii ame boŋo i pyere daŋ doŋ oyuo oko, kun anyira mere tye akoko ame okumo akuma calo amam, kun daŋ ocipocipo korgi adoŋ. Nineve calo pii dam ame otur, ame pii mere tye amol oko, Gin oredo ni, “Cuŋ ba! cuŋ ba!” ento moro i akinagi mom gire tye ame lokere dwogo cen. Yak wunu ryal ba! Yak wunu jabu ba! Lonyo me akana mom gire tum, naka jami me wel-gu. Nineve doŋ odoko wi obur luŋ aluŋa jami oballe keken a doŋ tye iye! Tipo kom jo iye doŋ orino oko kun coŋgi myel amyela, pyer jo luŋ daŋ doŋ rem arema dok wan jo luŋ doŋ nen myemye, Gorogoro eŋatu kara tye kwene, kan ame itino eŋatu cemo iye, kan ame eŋatu yam tero iye leyi ame emako, kan ame itino me re bedo iye aboŋo ŋattoro ame yelogi? Twon eŋatu kikilo riŋo ame romo itino mere, dok daŋ mako lee ocele pi monne; adu mere luŋ poŋ i riŋo leyi ame emako, kun gorogoro poŋ i riŋo ame okikilo. Rwot me mony okobo ni, “Nen ba, an abedo akworwu, abino waŋo gadigadi me lwenywu oko, te duny yito, pala lweny te tyeko itino eŋatuwu luŋ; abino miyo leyi ame icamo wunu rwenyo oko luŋ i wi lobo, dok dwon akwenawu mom bino medo winyere.” Boma ame onyo remo bi no neno can, ame opoŋ iye go ba kede jami ayaka; ame mom giko tim me yak. Koŋ iwiny wunu kite ame abiro cot kede! Kite ame okot me gadigadi mor kede, winyu pye aguragura, kede ŋwec a gadigadi lweny. Nen koŋ kite ame wegi aguragura aŋwec kede ame pala romogi tye ameny ipilpil kede toŋŋigi ame aryeny aryenya! Lwak jo oneko tye oyido ibim ame komgi tye oradde atata! Jo tye ata amedde ameda ame jo doŋ tye agatte agata komgi! Man atimere pi tarwan a Nineve, dako ame alaya, ame yomoro cuny jo i timere me jojok, ame tye ka rwenyo rok apol pi timere me alaya, kun rwenyogi i timere me jojok. Rwot me mony oko bo ni, “Nen ba, an doŋ at ye ame atiki, abino elo boŋo i pyeri abolo i wi malo; abino miyo orok neni kun it ye onoro, ibino bedo kede lewic kun gin luŋ oneno, Abino juko komi i gigi mogo me kwer, abino timo tim me acaye i komi, abino miyo idoko gin ame yi jo okwero, Jo luŋ ame bino neni obino ŋwec oko kun okobo ni, Nineve doŋ odon yie nono, na kara ame bino koke? Abino kara nwono jo me kweyo cunye kwene ba?” Yin iber ikato Tebe ame rik obedo i ŋet Nail ame pii onwoŋo oguro dyere kun gwoke calo cellere? Teko mere ame ka gikere mom, rik ocuŋ i kom Eciopia kede Miciri; Put kede Libfa daŋ rik okonye. Kadi amannono, rik obin otero oko, obin otero oko iyi opii itino mere rik ote ŋiŋinyo oko atitino iyi agikki wanayo luŋ; obin obolo kwir pi jo mere me awora, jo mere adono luŋ ote tweyo kede nyor. Yin daŋ ibino mer; ibino daŋ bedo ababaŋ, ibino yenyo yo me larre ciŋ okworri. Celli luŋ bino bedo calo oduro ame nyige pwod ogeo cek aceka, ame ka oyeŋo nyige ony piny i dog jo ame camo. Nen ba, jo me lwennyi luŋ calo mony baŋi, dogcel me loboni oyabo alac pi okwori; mac daŋ doŋ onaŋo lodi me dogcelli oko. Twom pii, pien okwor bino guro oko, yik celli bed atek; dony iburlobome inyon lobo, mak bao me goyo matafali! Mac bi no jweri oko kuno, pala lweny bino nolli oko, bino iweri calo bonyo. Nya imedde giri calo bonyo, nya imedde ameda calo ocene! Imedo doŋ ocat-willi odoko apol, ame kato acer i polo oko. Bonyo yaro bwome te twarre gire oko. Olocci pol calo ocene, odoneni pol calo lwak bonyo apipim ame tye aony i wi cel i kare me koyo; ka cen odonyo gin te twarre wot gigi oko, mom tye ŋattoro ame ŋeo kan a gin tye iye. Yin abaka me Acuriaokwatti be onino oko, joni ame oworo daŋ owe gigi oko. Joni tye olal atata i wi kiddi, kun ŋattoro acokogi karacel mom tye. Kan owano i komi mom twero can, waŋ bur i komi doŋ odet atek. Jo luŋ ame winyo kop ikomi obapo ciŋgi i wit. Ŋa kara ame timmi arac me kare luŋŋono mom ogudo kome? Man en kop a pire dit ame rik Obaŋa onyuto baŋ Abakuk, Ama Rwot, abino kara kok baŋi pi kare a rom mene kun mom iwinyo kokona? Onyo abino kok baŋi pi tim me byemi naka awene kun mom ilara? Piŋo kara imia aneno gin arac, kun daŋ aneno kit ame jo neno kede can? Tim me nek kede byemi en ame odurre i nyima, da kede lweny timere kare luŋ, Cik doŋ odoko gire agoro oko, ŋolo kop mom doŋ tye atira, Pien jo areco guro jo a kitegi atira i dyere, ŋolo kop atira doŋ te dwalle oko. Koŋ iŋiŋio wunu i akina orok, me inen wunu; wur wunu atek meicel. Pien at ye ka tiyo tic i karewu ame mom itwero ye wunu ka otittiwu, Pien nen, at ye ka tugo jo Kaldaya, ame gin obedo rok ager dok a komgi mit atek, rok ame dorre ŋolo twon kobo alac-ci aria, me mayo kan a mom megi. Gin onyo koyo i kom jo, dok nenogi iyiliyili meicel, gin oŋolo kop kun olubo tamgi kengi, Aguraguragi dwir kato kwac oko, dok daŋ oger okato epet me dyewor oko; wegi aguraguragi ŋweco kato akata kun owakere gigi awaka, Wegi aguraguragi nwoŋo oya i kannabor meicel, otwarre gigi i ŋwec calo cur ame amwomere me mako gi-acama mere, Gin luŋ obino me yenyo kolo, Iworo ca ko mako jo i nyimgi kun gin mom ru otuno, Jo mere coko opii bala acoko kwoyo, Oŋalo obakki aŋala, kun daŋ ocao olocgi acaa, Ka oneno cel me boma onyero anyera, pien gin oyido lobo karacel ote mayo boma oko. Gin okato gigi oyotoyot calo yamo gin obedo jo areco ame tek komgi en obedo obaŋagi. Ama Rwot Obaŋana, ame yin ŋat Acil, mom yin giri ibedo tye geye con i con? Wan gire mom obino to, Ama Rwot, yin gire ame iketogi me keto can i komwa yin gire ame imokogi me twenyowa, ama Agwokwa. Yin giri waŋi cil meicel ame mom iromo kanyo gin arac, dok daŋ mom itwero kanyo tim a mom tye kakare. Piŋo kara yin ibedo neno jo a mom ogen anena, aco kono jo areco tye amwonyo jo abeco, ame kitegi atira katogi kun yin iliŋ giri aliŋa? Pien yin iketo dano acalo rec me nam, acalo gin ame lak alaka ame mom i ŋat a loogi. Jo bedo yutogi oko i golo, owaogi oko kede bwo, ocokogi iyi bwogi; eka ote bedo ŋatte gigi yomcuny. Gin oyalo obwogi, kun owaŋŋigi gin aŋwece kur calo obaŋagi; pien gin en ame omiogi otye aber, dok gin en ame omiogi odoko twon olonyo meicel. Gin myero medde ameda iwoto pala lwenygi, kun oneko kede oroko abono kica moro i cunygi? An abino cuŋ i pem me kiyo piny, kun anyedde i wi pem malo, ame ayikere me winyo ŋo ame en bino kobba, kede gin ame en bino kobo kom kokona baŋe. Rwot te dokka iye kun kobo ni, “Aco co gin ame abino nyutti; co aber ame kwanne i kom got me coc, me wek nat ame kwano kwan oyotoyot. Gin ame anyutti-nono tye kede kare mere ame otiko, ginnono bi no cobere gire ateni; kare me cobere mere a ru tuno oko. Ka ee ineno ori, yin myero ikur, kare-nono abino ateteni, kare-nono mom gire bino gal. Nen ba, ŋat ame cunye mom ler bino keŋ cite ŋat ame kite atira bino kwo pi iyee ame en tye kede i kom Obaŋa. Kadi bed amannono, koŋo olok dwalo tam a dano; lo a wakere mom gire twero bedo mot, ŋat owor atek calo Ceol;” rom aroma kede to ame mom yeŋ. En coko rok luŋ pire en keken, en coko luŋ ibim baŋe acalo mege kene. Jo-nono luŋ mom bino ŋale kun onwenye koppogo akec, ame okobo ni, “Ŋat ame coko jami a mom mege bino neno can doi, ame ogogere i jami a jo ame ojeŋo, Pi kare a rom me ne ba? Jo okoporo banya bani mom bino bunyo ya malo? Mom gin en ame bino co te miyo komi cako myel oko? Gin te donyo yako jamini oko. Pien yin iyako rok apol meicel, jo odoŋ luŋ bino yako jamini, pi remo a jo ame ineko kede pi kolo i kom lobo, kom boma luŋ kede i kom jo ame bedo iye. Lo a nwono agoba i yore me byemi bi no neno can, me gero ode malo calo winyo, me ginnoro arac mom gire gude! Yikki-nono bino kelo lewic i kom jo me odi, neko jo apol omio ikelo giri can i komi keni. Pien anaka kiddi-gu bino kok i kor apama, eka yen i wi ot te daŋ gamo. Lo ame gero boma i neko jo bino neno can, ame boma mere cuŋ i kom bai! Nen ba, man gire oya i yik a Rwot me mony, ni jo myero yelle kom ka i gin a bino waŋ oko, dok rok luŋ myero yeyelo komgi nononono. Pien lobo gire bino poŋ oko i ŋec i kom kwogo a Rwot, kite ame pii poŋ kede i nam, Lo ame mio owote mere kanyo akemo mere eka te miyogi doko calo jo omer i koŋo, en te bedo nenogi kun otye i lewic; dano-nono bino neno can! Lewic en ame bino poŋ i wii akaka kwogo. Yin ame imatte giri, ite gatte! Ikopo ame tye i ciŋ Rwot tuŋ cem abino i komi, lewic daŋ abino i kom kwogoni. Tim me kolo ame itimo i kom Lebanon bino wumi oko; to a leyi bino kelli twon lworo adwoŋ meicel; pi re mo a jo kede tim me byemi ame itimo i kom lobo, kede i kom boma luŋ kede jo luŋ ame bedo iye. Cal apaa kara konyo ŋo ba, ka wonnere doŋ otyeko payo oko, onyo cal atwaka, apwony ame agoba? Pien atic keto gennere kom ticcere kene ka en opao cal apaa a mom kobo. Ŋat ame kobbi i gin ame en otio i yat ni ‘Co ba’, kede gweŋ a mom ko bo ni, ‘Ya ba malo’, dano-nono bino neno can! Ginnono twero yabo kopporo ame pwonyo jo? Nen ba, ginnono doŋ owumo oko i jabu kede ryal, dok daŋ mom gire we kadi acel. Ento Rwot gire tye i kabedo mere acil; wi podo luŋ myero liŋ mot i nyime.” Man en kwac adwarpiny Abakuk i dwon wer ame olwono ni Cigionot, en okwao Obaŋa kun kobo ni, Ama Rwot, doŋ at ye ko winyo kop i komi, dok daŋ an alworo ticci meicel. Dok imed tiyo ticci-nono i dye mwakki; mi jo ŋe i dye mwakki; po daŋ pi kica ka akemo omaki. Obaŋa oya i Teman i Edom, Ŋat acil oya i wi kidi me Paran. Kwogo mere owumo polo oko, dok daŋ onwoŋo opake i wi lobo ducu. Kwogo mere onwoŋo memenya acil meicel lero mere onwoŋo ya i cine, en kan ame okano iye teko mere. En ocwao two otelo nyime, omio too edeke olubo yore. Ka en ocuŋ, lobo yenere, ka en oneno jo, kom rok luŋ myel; turrogo ame onwoŋo operakino te ŋiŋida oko, tude mo go ame ori nakanaka, rwobere oko piny. Mannono kan ame yam en maro wot iye. Ate neno jo Kucan ame bedo i kemagi tye aneno can, bomji me icene a jo Midian te daŋ yeŋere, Akemo rik onwoŋo omaki i kom kulli bo, ama Rwot? Akemo rik onwoŋo omaki i kom kulli bo, iniga onwoŋo omaki i kom nam bo, kare ame onwoŋo irino aguragurani, i wi gadigadini me loc? Iyiko doŋ akud ateroni oko, atero mere daŋ doŋ iketo oko kom tol. Imio pii i kulli opoko lobo oko. Kiddi onenni te ero yeyena oko, twon pii moro ager meicel te mol, kato; pii atut a tye i te lobo te mor oko, bwo mere te yenyo malo amala. Ceŋ kede dwe te lirakino kakargi, i kare ame lero me ateroni kato i kare ame toŋŋi meny ipilpil. Yin onwoŋo ibeo i dye lobo twon akemo, ijejebo rok luŋ piny i te tyeni i twon iniga. Yin onwoŋo iwoto me wot laro joni, me laro danoni ame iyero. Yin onwoŋo ininyo atel wii obalo oko, kun iweko kome doŋ nono cakere i eme naka i ŋute. Iwawano wi olwennyere kede atero, ame rik onwoŋo obino calo yamo ajuru, me keketo an oko, kun olelo gigi calo jo ame mito tyeko ocan i muŋ, Yin giri rik ibeo i dye nam aguragurani ame pii mere onwoŋo opoŋ kun amol ager meicel. Awinyo mannono luŋ koma te myel, del doga daŋ te myel pi winyo dwone; cogona daŋ te cako bedo bala gin ame atotopa oko, kun tyena twomere kengi kengi. Abino bedo mot kun akuro nino me can, ame bi no poto i kom jo ame bino me lweny i komwa. Kadi oduro mom cak turo, dok akadi olok daŋ mom nyak nyiggi, ginnoro daŋ mom nwoŋere i kom jeituni, kun potti daŋ mom oceko cam, rommi daŋ tum oko iyi anok, kun dyannoro daŋ mom iyi awi, an gira pwod abino lelo i Rwot, cunya pwod bino bedo ayom kom Obaŋana, Alarra. Rwot Obaŋa en tekona, en ame mio tyena bedo ayot calo tyen atil, en ame mio awoto malo i wi kiddi. Baŋ adwoŋ wer: me awera kede naŋa opuk-gu. Man en kop a Rwot ame rik obino baŋ Jepania wot a Kuci, wot a Gedalia, wot Amaria, wot a Kejekia i kare ame Yocia wot Amon onwoŋo abaka me Juda, “Abino jwero jami luŋ aluŋa, ame tye i wi lobo,” man kop a Rwot ikokome, “Abino jwero jo karacel kede leyi, abino jwero winy ame twarre malo, karacel kede rec ame bedo i namo Abino reto jo areco oko piny; abino tyeko jo oko i wi lobo”, man kop a Rwot ikokome. “Abino ryeyo ciŋa i kom Juda, kede i kom jo luŋ ame bedo Jerucalem; abino tyeko Baal odoŋ oko kabedo man, karacel kede nyiŋ olamdog me cal jogi; jo ame ryebere piny i wi ot malo, me woro mony me polo, jo ame ryebere piny te kwoŋ baŋ Rwot, aco kun dok okwoŋere i nyiŋ Milkom; karacel kede jo odok oko cen i lubo yo Rwot, jo a mom yenyo Rwot akadi penyo tammere,” Lin oko i nyim Rwot Obaŋa! Pien nino a Rwot doŋ ceggi acega; Rwot doŋ oyiko mot me aŋola oko, olonyo daŋ doŋ we le mere oko, I nino me miyo mot aŋola a Rwot, “Abino keto can i kom rwode kede itino aba ka, kede i kom jo ame ruko ruk a rok ocele. I nino-nono, abino keto can i kom jo luŋ, ame myelo kalo arii me doggola, karacel kede jo ame mio kolo kede goba dure i ot adwoijgi.” Rwot ikokome okobo ni, “I nino-nono koko bino winyere i Dogcel me Rec, aco duru bi no winyere i tun ocele me boma-nono, eka ginnoro te mor aloŋo meicel, kun ya i wi kidi malo. Kuk wunu duru ba, wunu jo a bedo i boma-nono i tutuŋ pinnyere! Pien ocatwil luŋ doŋ otum oko, jo a pimo ryal luŋ doŋ otyeko oko, Kare ame abino yenyo Jerucalem kede tara, abino keto can i kom jo ame bedo mot, bala koŋo olok ame doŋ ocek oko te pye mot, jo ame kobo i cunygi ni, ‘Rwot mom bino timo gin aber, dok daŋ mom bino timo ginnoro arac.’ Jamigi obino yako oko, udigi bino doŋ yigi nono; kadi oger udigi, mom obino bedo iye; kadi opit olokgi, mom obino mato koŋo mere.” Twon nino a Rwot adwoŋŋere doŋ ceggi acega, nino-nono tye abino oyotoyot; nino a Rwottono koppere kec, lo atek kok kuno i dwoŋ aloŋo. Nino-nono obedo nino me akemo, nino me can kede me rem, nino me rjininyo jami kede balo, nino ame piny bino wummere mutu acol icuc, nino me pol kede me colpiny. Nino me koko apel kede me wo me lweny, kom boma mogo ame ocecelo atek, kede i kom cellogo ame ogero abocoboco. Abino miyo jo neno can meicel, ame te miyogi wot calo otowaŋ, pien gin otimo bai i nyim Rwot; obino kikiro remogi calo apua, aco komgi obino bolo calo cet dyan, Ryalgi kede jabugi mom gire bino larogi, i nino me akemo a Rwot. Mac me akemo me nyeko mere, bino waŋo wi lobo luŋ; bino miyo agikki bino me oyot, i kom jo luŋ ame bedo i lobo. Bye ibed wunu kede cokere, wun rok ame lewic mom makowu, kun mom ru oryemowu oko teŋe, calo cuŋ kal ame yamo kolo, kun twon iniga agwa meicel ame obedo me a Rwot, mom ru obino i komwu, kun nino me akemo a Rwot mom ru otuno i komwu, Yeny wunu Rwot, wun jo ame mwol ame bedo i lobo man, wun jo ame cobo gin ame Rwot ociko; yeny wunu kite atira, kede cuny me mwolo; gwok onyo bino miyo inwoŋo wunu ka gwokere, i ni no me akemo a Rwot. Pien Gaja bino doŋ nono, Acikelon bino doko wi obur; aco jo me Acidod obino ryemo oko dyeceŋ, eka Ekron ote puto oko. Ibino neno wunu can, wun jo ame bedo dog nam, wun rok Keret! Kop a Rwot otikowu, yin Kanaan, lobo a jo Piriciti; abino babalo yin oko i tuno ka idoŋ no no aboŋo ŋattoro. Aco yin dog nam, ibino doko elet, bar okwat kede anok me rommi. Dog nam bino doko me a jo odoŋ me ot a Juda, gin bino kwayo rommigi iye; dok gin bi no buto piny otyeno, i udi me Acikelon. Pien Rwot Obaŋagi bino paro pirgi, eka te dwokkigi kucgi. “Anywar a jo Moab doŋ awinyo oko, karacel kede ayet a jo Ammon, kite ame gin nywato kede jona, kun owakere i kom lobogi.” Pi mannono, acalo at ye kwo-ni, “Rwot me mony”, Obaŋa me Icrael oko bo, “Moab bino doko calo Codoma, aco jo Ammon bi no doko calo Gomora, bino doko calo lobo ame ayilayila kede bur kado odurre iye atata, lobo ame oballe oko doŋ atwal. Jona ame odoŋŋege bi no yakogi, jo mogo ame obwot i akina rokka bino leyo kakargi.” Man en gin ame gin bino nwoŋo pi awakagi, pien gin oŋalo jo a Rwot me mony, dok daŋ owakere i komgi. Rwot bino bedo kedgi arac meicel, bino neko kit obaŋe luŋ me wi lobo kede kec, ŋat acel acel bino ryebere piny i nyime, i kan a en tye iye, i lobo a rok ducu ame tye i lobo. Wun jo me Eciopia daŋ, pala lweny abino nekowu oko. En dok bino ryeyo cine tutuŋ anyarodi, te lwero Acuria oko; dok daŋ bino miyo Nineve doko wi obur, ame otwo calo tim. Lim akwo bino buto iye i dyere, leyi me tim luŋ; acut kede ogoro bino cuŋ i wi pagi mere; tula bino kok i wan dirica, aco agak bino kok i wan arii me doggola pien yattere me cedar bino doŋ nono. Man en twon boma moro ame ŋatte meicel, ame onwoŋo rik bedo gire i kuc, boma ame onwoŋo ko bo ni, “An at ye, mom dok tye moro ocele.” Koŋ inen kite ame en odoko kede wi obur, kede gorogoro me leyi tim! Jo luŋ ame bea i ŋete, ojwiye kun oyeyerjo ciŋgi. Boma ame jem, ame oballe oko, dok ame buro jo, bino neno can! En mom winyo kop a ŋattoro, ka ojuko, mom daŋ ye, En gire mom geno Rwot, mom daŋ noko Obaŋa me re aceggi. Rwode luŋ iye, obedo eŋatu ame mor: oŋolkoppege luŋ, gin epet dyewor: ame mom oweko ginnoro doŋ naka odiko. Aco odwarpinnyege, obedo jo a konygi mom, gin mom odwarpiny ikokome; olamdoggege obedo jo ame pyedo gin acil, otimo tim me byemi i kom cik. Rwot ame bedo iye kite atira, en gire mom timo ginnoro arac; odiko ducu en nyuto kite a en ŋolo kede kop atira; en mom ken kadi acelloro, ento jo areco kwia gigi lewic. “Atyeko doŋ jwero rok apol oko, celgi atek luŋ doŋ odoko wi obur; gudogi luŋ daŋ doŋ amio odoŋ nono, aboŋo jo moro ame woto iye; bomagi luŋ daŋ odoŋ nono, aboŋo ŋattoro ame bedo i yigi. Rik onwoŋo akobo ni, ‘Ateteni, en gire bino lwora, ka ajuko, en bino winyo doga; waŋe gire mom bino wumere, i kom kop luŋ ame acike iye.’ Ento gin gigi rik ote bedo medde ameda mitkom me balo ginnoro luŋ ame gin otio.” “Pi mannono, koŋ doŋ ikura wunu”, man kop a Rwot ikokome, “tuno i nino ame abino ya iye malo calo caden. Pien amoko doŋ tamma me coko rok luŋ, kede loc apapat karacel, me awuk akemona i komgi, kede lyeto luŋ me inigana; pien mac me akemo me nyekona, bino waŋo wi lobo luŋ. “I kare-naca, abino ŋolo kop a jo ducu, me gin kob kop atira, me gin luŋ olwoŋ nyiŋ Rwot, dok daŋ oti baŋe i cuny acel. I ŋe kulo me Eciopia luŋ, jo ame kelo kwacgi baŋa ya iye, ame gin jona ame oket atata, gin bino kelo mot baŋa. “I nino-nono, mom dok abino miyowu lewic, pi timwu ame ijem wunu kede i koma, pien i kare-nono abino kwanyo i akinawu oko twoni jowu a yam ŋatte meicel, awakere, mom dok obino medo yon, i wi kidina acil, pien abino weko i akinawu, jo ame mwol, dok ame ocan. Gin bino yenyo ka larregi i nyiŋ Rwot, ame gin jo ame odoŋ iyi Icrael. Gin mom bino timo ginnoro arac, mom daŋ obino ko bo kopporo me goba, leb a rac a kobo kop me goba mom bi no bedo tye i doggi. Pien gin obino cem, ote buto gigi calo rommi, kun mom tye ŋattoro ame miogi lworo.” Wer giri i yomcuny, yin Cion; go ijira, yin Icrael. Lel giri, kun inatte meicel i cunyi ducu, yin nyako me Jerucalem. Rwot doŋ okwanyo kop a yam eŋolo i komi oko, en doŋ oryemo okworri oko, Abaka me Icrael, en Rwot, tye gire i akinawu; mom dok ibino medde lworo gin arac, I nino-nono, obino ko bo baŋ Jerucalem ni, “Kur ilwor ba, yin Cion; kur imi cini dok goro. Rwot Obaŋawu tye gire i akinawu, twon atek i lweny, ame mio oloo lweny, en bi no lelo i komi kun yie yom meicei, bino rocci idoko anyen pi marrere, bino ŋatte meicel i komi, kun wero i dwoŋ aloŋo, bala i nino me kwero ecuban. “Abino kwanyo can oko i komi, ame mio mom dok oyeti pire. Nen ba, i kare-nono abino tic i kom jo luŋ ame yam wuni. Abino laro jo oŋwalo, ate daŋ coko jo a yam oryemo oko, Abino loko lewicgi doko ginnoro me pak, nyiŋgi bino winyere i lobo luŋ. I kare-nono abino kelowu paco, i kare ame abino cokowu karacel; abino miyo nyiŋwu rwo kun daŋ opakowu, i akina jo luŋ ame bedo i lobo, I kare ame abino dwokkiwu kucwu, kun ineno wunu kede waŋwu”, man kop a Rwot. I mwaka me aryo me loc abaka Dario, i nino dwe acel me dwe me abicel, kop a Rwot rik obino baŋ Aggai adwarpiny, me en kop baŋ Jerubabel wot a Cealtiel ame onwoŋo rik aloc a jo Juda kede baŋ Yocwa wot a Yekojadak, ame obedo alamdog adwoŋ, ni, “Rwot me mony okobo ni, ‘Rok man kobo ni kare mom ru oromo me dok gero ot a Rwot odoco.’ ” Kop a Rwot rik obino, kun mio Aggai adwarpiny en akobo, ni, “Man en kare a myero wun giwu ibed wunu i udiwu ame ogero wigi abeco kun ot man oballe oko?” Mannono omio Rwot me mony aman okobo ni. “Koŋ itam wunu kite ame ibedo wunu kede, Icoo wunu koti adwoŋ, ento ikaa wunu aduno; icamo wunu cite mom iyeŋ wunu; imato wunu, cite mom romowu, irukere wunu, cite mom tye ŋattoro ame kome bedo alyet; dok ŋat ame ca mo ocara, camo me aketa icao otutuca oko.” “Rwot me mony okobo ni, koŋ itam wunu kile ame ibedo kede, Yit wunu malo i lobo obedo kidikidi, me iwot ikel wunu yen, iger wunu ot; me cunya bed yom, ate nyuto kwogona iye, Rwot okobo, Ibedo yenyo wunu abup, koŋ inen inwoŋo wunu aduno moro keken, eka i kare ame ikelo wunu paco, amio oket oko. Piŋo kara ba? Rwot me mony en okobo. Pien oda oballe oko, kun wun giwu, ŋat acel acel tye abolle abola i tic me ode keken. Mannono en gin omio polo i malo okwero coro toyo piny, lobo daŋ mom ceko cam. En omio an daŋ akobo ni, can pii myero bed tye i kom potti, i kom kiddi, i kom kal, i kom koŋo olok anyen, i kom moo, kede i kom ginnoro ducu ame doŋo lobo, kede i kom jo kede dok, kede i kom jami luŋ ame gin otio.” Mannono omio Jerubabel wot a Cealtiel, kede Yocwa wot a Yekojadak, alamdog adwoŋ, karacel kedejo luŋ ame onwoŋo odoŋ, gin luŋ rik ote winyo kop a Rwot Obaŋagi, kede kop Aggai adwarpiny, kite ame Rwot Obaŋagi oore kede, Lwak rik te bedo kede lworo i nyim Rwot. Eka Aggai, akwena a Rwot te kop i lwak kun tittigi kop a Rwot, “An at ye kedwu, Rwot okobo,” Rwot te tugo cuny Jerubabel wot a Cealtiel, aloc me Juda, kede Yocwa wot a Yekojadak, alamdog adwoŋ, karacel kede cuny jo ducu ame onwoŋo rik odoŋ; gin te bi no cako tic i ot a Rwot me mony, ame obedo Obaŋagi. Gin ocako tic i nino dwe pyeraryo wie aŋwen me dwe me abicel. I mwaka me aryo me loc abaka Dario, i nino dwe pyeraryo wie acel me dwe me abiro, kop a Rwot rik obino, kun mio Aggai adwarpiny en akobo ni, “Peny Jerubabel wot a Cealtiel, aloc me Juda, kede Yocwa wot a Yekojadak, alamdog adwoŋ, kede jo luŋ ame odoŋ, ni, ‘Tye ŋattoro ame odoŋ i akinawu ame rik oneno kwogo ame ot man rik tye kede i kare acon? Aman koŋo doŋ en neno nen iŋo? Aman mom doŋ nen calo ginnoro a konnyere pe? Kadi bed amannono, yin Jerubabel, myero doŋ aman ibed ame cunyi nwaŋ’, Rwot me mony en oko bo; bed ame cunyi nwaŋ yin Yocwa wot a Yekojadak, alamdog adwoŋ; kede wun jo luŋ ame bedo i lobo-ni, wun daŋ bed ame cunywu nwaŋ, Rwot okobo; ti wunu tic, pien an at ye kedwu, Rwot me mony en okobo, kite ame rik acikere kede kedwu i kare ame rik iya wunu i Miciri. Kur ilwor wunu, pien Cuny Acil ame obedo mega, bedo i akinawu. Pien Rwot me mony okobo ni, ‘Odoŋ icel keken, kare anonok akato, abino yeŋo polo kede lobo, nam kede lobo otwo; abino daŋ yeŋo rok luŋ me wek lonyo a rok luŋ bin iye, ate miyo ot man poŋ i kwogo, Rwot me mony okobo. Ryal mega, jabu daŋ obedo mega, Rwot me mony en okobo. Kwogo a ot man icennere-ni, bi no kato me a maca me agege ca oko, Rwot me mony okobo; dok daŋ abino miyo kabedo man bedo kede kuc, man kop a Rwot me mony ikokome.’ ” I dwe me aboŋwen, ni no dwe pyeraryo wie aŋwen, i mwaka me aryo me loc a Dario, kop a Rwot rik obino, kun mio Aggai adwarpiny en akobo, ni, “Rwot me mony okobo ni, koŋ ipeny wunu olamdog i kom cik man ni, ‘Ka ee dano moro otiŋo riŋo ame olonyo obedo acil i lak boŋo mere, ee lak boŋo-nono ogudo ogati, onyo dek, onyo koŋo olok, onyo moo, onyo kit cammoro ducu, gin ame ogudo-nono daŋ lony bedo acil?’ ” Alamdog te dok iye ni, “Pe gire.” Aggai dok te penyo ni, “Ka ee dano moro ame odoko ŋat a cik ogeŋo pi gudo kom dano oto, ogudo ginnoro i akina jami magi, ginnono daŋ doko gin ame cik ogeŋo?” Alamdog te dok iye ni, “Doko gin a cik ogeŋo.” Aggai te doŋ ko bo ni, “Tye daŋ kittono i kom jo man kede rok ame tye i nyima-ni, karacel kede ticcoro luŋ ame ciŋgi ogudo, Rwot okobo; mottoro luŋ ame gin omio kuno, gin lun obedo gin a mom cil. Koŋ itim wunu ber itam wunu gin ame bino timere, cakere tin wot kede anyim. Kare a rik mom ru icibo wunu kidi moro i wi wadgi i ot a Rwot, rik ibedo wunu ni ŋo? I kare-naca ka ŋat obino omo kal ame ocoko karacel, kun gen ni nwoŋo aromo dwoŋo pyeraryo, nwoŋo ka apar keken; ka ŋat obino twomo koŋo i bur olok, kun geno ni ebino twomo aromo opoko pyerabic, romo ka pyeraryo keken. Rik anekowu karacel kede camwu daŋ, amio camwu omwato, acoro-gu pee iye, ento rik mom idwogo wunu baŋa. Koŋ ipar wunu, cakere tin wot kede anyim, i nino dwe pyeraryo wie aboŋwen. Koŋ itam wunu i kare ame ogeo gero iye acakki me yekalu a Rwot; koti pwod tye i dero? Olok, Oduro, okwer pomegranat, karacel kede jeituni ame mom ru onyak? Cakere doŋ tin wot kede anyim, abino miyowu gum.” Kop a Rwot rik dok te bino baŋ Aggai tyen me aryo, i nino dwe pyeraryo wie aŋwen, kun kobbe ni, “Kobbi Jerubabel, aloc me Juda, ni, ‘An aceggi yeŋo polo kede lobo, dok daŋ abino reto kom me loc apol; aceggi daŋ tyeko teko me loc orok, ate daŋ rereto gadigadi me lwenygi oko karacel kede jo me riŋo kedgi, aguragura kede wegigi, ŋat acel acel bino to i pala lweny awottere. I nino-nono, Rwot me mony en oko bo, abino teri yin Jerubabel wot a Cealtiel, Rwot okobo, yin amirona, abino loki ibedo calo atemma me anen, pien an doŋ ayeri.’ Man kop a Rwot me mony ikokome.” Kop a Rwot rik owinyere baŋ adwarpiny Jekeria wot a Berekia, wot a Iddo, i dwe me aboro, i mwaka a Dario me aryo mere, kun kobo ni, Akemo rik omako Rwot atek i kom kwariwu. Pi mannono, kobbigi ni, Rwot me mony okobo ni mannono, Dwog wunu baŋa, an daŋ abino dwogo baŋwu, Rwot me mony okobo. Kur ibed wunu bala kwariwu ame rik odwarpiny acon orabbigi kop ni, “Rwot me mony okobo ni, ‘Wek wunu kitewu areco kede ticwu areco-nu oko.’ Cite gin gigi rik mom ote winyo, daŋ mom ote keto cunygi i koma kadi acel, Rwot me mony okobo. Kara gin kwariwu-nono am an otye kwene? Gin odwarpinnyaca koŋo, pwod obino bedo kwo nakanaka? Koppa kede icwilla ame rik aciko baŋ amirona odwarpiny, rik mom oŋuko kwariwu? Omiogi oŋut kun okobo ni, Rwot me mony doŋ otimo kite acalo rik oyiko ni ebino timowa kede pi kitewa kede timwa.” Kop a Rwot rik owinyere baŋ Jekeria wot a Berekia, wot a Iddo, i nino dwe pyeraryo wie aŋwen, dwe me apar wie acel, ame olwoŋo ni Cebat, i mwaka a Dario me aryo mere, kun ko bo ni, “Aneno dano moro dyewor ame obedo i wi aguragura arema, kun onwoŋo ocuŋ iyi akina yen ame ŋwecgi kur, ame tye i luŋ; i yo ŋee tye iye aguragura apapat, arema mere, kede opilopilo, kede en atarrere. An ate penyo ni, ‘Magi kara ŋo, adwoŋ?’ Amalaika moro ame rik akop keda te kobo ni, ‘Abino nyutogi baŋi.’ Lo ame onwoŋo ocuŋ iyi akina yen akur te gamo, kun kobo ni, ‘Magi-nono jo ame Rwot ooro me loloŋo lobo luŋ.’ Gin te gamo dog amala ika ame ocuŋ i akina yen akur, kun okobo ni, ‘Doŋ, otyeko loloŋo lobo oko, nen, lobo luŋ gire tye okwe.’ Icennere amalaika a Rwot te kobo ni, ‘Ama Rwot me mony kara ibino bedo kare arom mene kun mom ru itimo Jerucalem kica, karacel kede boma me Juda, ame akemo doŋ omaki i komgi odoko mwakki pyerabiro twal-li?’ Rwot te dokki amala ika ame onwoŋo akop kede kun kobbe kop abeco me kica, omio amala ika ame obedo kop keda te kobba ni, ‘Rab kop man kun iredo areda ni, Rwot me mony oko bo ni; Nyeko ocira meicel pi Jerucalem kede pi Cion. Akemo daŋ omaka meicel i kom rok ocele a bedo mot kede kuc; pien kare a rik akemo omaka anonok, gin rik omedo can ameda’ Pi man ŋo ŋo Rwot okobo ni, ‘An doŋ adwogo i Jerucalem kun atye i kica adwoŋ obino gero oda iye, Rwot me mony okobo, obino ryeyo tol i Jerucalem me pimo. Dok imed redo ni, Rwot me mony okobo ni; Gin abeco dok bino poŋ ipim i boma na luŋ, Rwot binc dok kweyo cuny Cion, bino daŋ dok yero Jerucalem.’ ” Rik ate dok tiŋo waŋa malo neno piny, nen, aneno tuŋ leyi aŋwen! Apenyo amala ika ame onwoŋo akop keda ni, “Magi kara ŋo?” En te dokka iye ni, “Magi-nono tuŋ leyi ame rik okeketo Juda, Icrael kede Jerucalem.” Rwot te dok nyutta otet aŋwen, Eka ate penyo amala ika ni, “Jo-ni kara obino timo ŋo?” En te dokka iye ni, “Magi-nono tuŋ leyi aŋwen ame rik okeketo i Juda, eka ŋattoro iye mom te tiŋo wie, Jo-ni obino me miyogi lworo, me reto tuŋ leyi orok luŋ piny, ame rik otiŋo tuŋgi malo i kom jo me Juda, me keketo oko.” Rik ate dok tiŋo waŋa malo neno piny, nen, lo moro ame onwoŋo omako tol me pimo piny i ciŋe! Apenye ni, “Yin kara iwot kwene?” En te gamo doga ni, “Awot pimo Jerucalem, wek anen kite ame laccere kede borrere tye kede,” Nen, amala ika ame onwoŋo akop keda te bino, cite amalaika ocele daŋ te bino me rwatte kede, te kobbe ni, “Riŋ baŋ awobi-ca ikobbe ni, ‘Jerucalem bino bedo aboŋo celloro pi lwak jo apipim karacel kede lim akwo luŋ ame bino iye, Pien an abino bedo acalli cellere me mac ogure i dyere, an abino bedo kwogo me re i dyere kuno, Rwot okobo.’ ” Ya, ya wunu oko, jo-ni, i lobo me tutuŋ anyarodi, Rwot okobo, pien rik akeketowu atata calo yamo aŋwen me polo, Rwot okobo. Ya, ilwi wunu oko, iwot wunu i Cion ame obedo Babulon. Pien ŋat ame ogudo komwu ogudo toŋ waŋ Rwot me mony. I kare ame en won kwogo onwoŋo oora baŋ rok apapat a rik oyakowu, en Rwot me mony okobo ni, “Nen ba, an abino yeŋo ciŋa i wigi, gin bino doko gi-ayaka a jo a yam koŋ obedo opiigi, Mano bino miyo iŋeo ni Rwot me mony en oora. Wer kun ilelo, yin Cion, pien nen, abino me bedo i akinawu, Rok apol bino notte karacel i nino-nono, gin bino bedo jona, ibino ŋeyo wunu ni Rwot me mony oora baŋwu. Eka Rwot te gamo Juda acalo dullere i lobo acil, bino daŋ dok yero Jerucalem.” Liŋ wunu oko i nyim Rwot, wun jo luŋ, pien en doŋ otugere oko kene i kabedo mere acil. Rwot dok te nyutta Yocwa, alamdog adwoŋ, ame onwoŋo tye ocuŋ i nyim amalaika a Rwot, kun Catan tye ocuŋ i ciŋe tuŋ cem me pide. Rwot te kobbi Catan ni, “Rwot myero juki, yin Catan! Rwot a rik oyero Jerucalem myero juki! Man mom dog yat ame okwanyo i mac?” Yocwa onwoŋo tye ocuŋ i nyim amalaika kun tye oruko boŋŋi ame olille meicel. Amalaika te kobbi jo ocuŋ i nyime ni, “Gony wunu boŋo olille oko i kome” Dok te kobbe ni, “Nen, atyeko doŋ kwanyo balli oko i komi, obino ruki kede boŋŋi me kwogo.” Dok ote kobo ni, “Mi dwal atambala acil i wie.” Gin te daŋ dwalo atambala acil i wie, ote daŋ ruke kede boŋŋi kun amalaika a Rwot ocuŋ i ŋete. Amalaika a Rwot te kobbi Yocwa ni, “Rwot me mony okobo ni mannono, Ka ce ibino wot kun ilubo yo mera dok daŋ igwoko dyekalla. Abino miyo twer me tuno baŋa i akina jo ame ocuŋ kan-nie. Winy ba, Yocwa, alamdog adwoŋ, pien yin karacel kede owoteni ame bedo i nyimi, joni obedo anyut ame cimo gin a bino timere i nyim; nen, aman doŋ abino kelo amirona, en Jaŋe. Pien nen, abino goro coccere i kom kidi acel ame tye i bute abiro, i kom kidi ame aketo i nyim Yocwa, Rwot ame mony okobo, dok abino kwanyo bal me lobo-nono i nino acel keken. I nino-nono Rwot me mony okobo, dano acel acel akinawu bino lwoŋo awottere me bino bedo i te olokkere kede i te oduro mere.” Amalaika ame rik okobo keda, dok te bino baŋa tyen me aryo, te coya bala kite ame oco kede dano i waŋ nino. Amalaika-nono te penya ni, “Ineno ŋo?” An ate dokke ni, “Nen, aneno gi-cibo tara ame kome luŋ obedo jabu, kede bakuli ame tye i wie, kede tara abiro ame ocibo i wie, kun tara acel acel ame ocibo i wie doge tye abiro. Yen Jeituni aryo onwoŋo tye i laŋete, kun acel acel tye tuŋ cem me bakuli, kede en ocele tye tuŋ cam.” An ate penyo amalaika ame akop keda ni, “Magi kara ŋo, adwoŋ?” Amalaika ame okobo keda te dokka iye ni, “Yin mom iŋeo jami magi?” An ate gamo ni, “Mom gire aŋeo, adwoŋ.” En dok te gamo doga ni, “Man en kop a Rwot baŋ Jerubabel, ame okobo ni, Mom kede twer kadi teko, cite kede Cuny ame oya i baŋa, Rwot me mony okobo. Yin iŋo kara, yin twon kidi adwoŋ? Yin ibino doko bar i nyim Jerubabel. En bino kelo kidi me atenni ot kun jo wo ni, ‘Gum, gum obed gire bane!’ ” Kop a Rwot dok te medde bino baŋa kun kobba ni, “Ciŋ Jerubabel doŋ ocano acakki te ot man; daŋ doŋ obino tyeko i ciŋe. Man bino miyo iŋeo ni Rwot me mony en oora baŋwu. Pien ŋat ame cao nino me kop anok, bino lelo, dok daŋ bino neno birigi i ciŋi Jerubabel. “Magi abiro-ni gin waŋ Rwot ame loloŋo lobo luŋ.” Dok ate penye ni, “Kara yen Jeituni ame tye tuŋ cem kede tuŋ cam me gi-cibo tara ca kono obedo gin aŋo?” Ate dok medo penye, tyen me aryo ni, “Kara jaŋ jerturu aryo-ni kono obedo gin aŋo, ame tye i ŋet paipo aryo me jabu a moo mollo i yigi-nue?” En te penya ni, “Yin mom iŋeo jami magi?” An ate gamo ni, “Mom gira aŋeo, adwoŋ.” Eka en te kobba ni, “Magi gin jo aryo ame owirogi kede moo ame gin cun i ŋet Rwot me lobo luŋ.” Dok ate tiŋo waŋa malo ate neno nen, buk adola ame twarre! Amalaika te penya ni, “Ineno kara ŋo?” An ate dokee ni, “Anene buk adola ame twarre; borrere romo futi pyeradek, eka laccere te romo futi apar wie abic.” Amalaika te kobba ni, “Man en kop ame ceno jo, ame woto i wi podo luŋ, pien ocoo tuŋ cel ni, jo luŋ ame kwala kwo obino ryemo oko cakere tin, dok ocoo tuŋ cel ni, jo luŋ ame kwoŋo kwon me goba goba obino ryemo daŋ oko cakere tin. Abino doŋ cwayo buk ceno jo-nono wot oko, Rwot me mony okobo, bino donyo i ot akwo kede i ot a ŋat akworjo i nyiŋa goba goba; bino bedo i ode kun tyeko oko, anaka yen kede kiddi luŋ ame ogero kede.” Icennere amalaika ame obedo kop keda obino te kobba ni, “Tiŋ waŋi malo me inen gin ame tye ka kato oko-ni,” An ate penye ni, “Mano kara ŋonono?” En te gamo ni, “Man dwoŋo ame kato oko.” Dok te gamo ni, “Man balgi i lobo luŋ,” Nen, ote tirjo nyonyo moro apek ame onwoŋo owumo kede doge, dako moro onwoŋo tye obedo iyi dwoŋo! Amalaika te kobo ni, “Man bal.” Eka te juŋo dako dwoko iyi dwoŋo, te daŋ coro nyonyo apek-ca cego oko i doge, Dok ate tiŋo waŋa malo, ate neno mon aryo tye atwarre abino kun yamo onwoŋo tye i bwomgi; gin onwoŋo tye i bwomgi bala mea araptela. Gin otirjo dwoŋo otero i akina lo bo kede polo. An ate penyo amalaika ame akop keda ni, “Kara dwoŋo koŋo otero kwene?” En te dokka iye ni, “I lobo me Cinar, me gero ot pire; kare ame doŋ otyeko yiko obino cibo dwoŋo i kan a myero cuŋ iye kuno.” Dok ate tirjo waŋa malo ate neno gadigadi lweny aŋwen oya i akina kiddi aryo; kiddi-nono onwoŋo obedo kiddi me mola. Gadigadi me agege tye iye aguragura arema, me aryo mere tye iye aguragura acol, me adekkere tye iye aguragura atar, eka gadigadi me aŋwennere te bedo iye aguragura obedo abacabac kun tatar. Apenyo amalaika ame onwoŋo tye akop keda ni, “Magi kara gin aŋo, adwoŋŋa?” Amalaika te dokka iye ni, “Magi awot baŋ yamo aŋwen me polo, kun nwoŋo koŋ ogeo cuŋ i nyim Rwot me loba luŋ. Gadigadi ame tye i aguragura acol awot adok mere tutuŋ lobo me anyarodi, en atarrere adok tutuŋ to”, aco en obedo abac abac awot adok tutuŋ lobo me anyarolum, gin atwarre aka to oko, gin orurua me cako wotgi oko me loloŋo lobo. Te doŋ cikogi ni, “Wotu, iloloŋo wunu lobo.” Gin daŋ te loloŋo lobo. En olwoŋa te kobba ni, “Koŋ inen jo-ca ame wo to tutuŋ lobo me anyarodica okweo cunya i kom lobo ame tye tutuŋ anyarodi.” Kop a Rwot dok te bino baŋa ni, “Kwany jo-ni i akina jo a yam otero i opii, Keldai, Tobia kede Yedaiya, ame gin jo a doŋ otuno kun oya i Babulon; wot kedgi i nino acel-lu i ot a Yocia wot a Jepania. Gam ryal kede jabu i baŋgi, eka ite tiyo kede tok kwogo. Rwak tok kwogo abaka i wi Yocwa wot a Yekocadak, alamdog adwoŋ. Titte ni, ‘Rwot me mony okobo ni, Nen dano a nyiŋe Jaŋe ene. En bino doŋo i kabedo mere, dok en bino gero ot a Rwot. En ame bino gero ot a Rwot; en bino bedo i kwogo ame oporre pi abaka, bino bedo i wi kom loccere, te loc iye. Alamdog bino cun i ŋet kom loccere, niaŋere me kuc bino bedo i akinagi gin aryo luŋ.’ Tok kwogo abaka-nu bino bedo i to a Rwot, me wek bedo gin me po baŋ Keldai, Tobia, Yedaiya kede Yocia wot a Jepania. “Jo ame tye kannabor bino bino, bino konyo jo i gedo me gero ot a Rwot; mano bino miyo iŋeo wunu ni Rwot me mony en oora baŋwu. Man bino timere ka ce iketo wunu cunywu i winyo dwon Rwot Obaŋawu.” Kop a Rwot rik dok owinyere baŋ Jekeria i mwaka a Dario me aŋwennere, i nino dwe aŋwen, me dwe me aboŋwen ame olwoŋo ni Kiclev. Jo me Betel onwoŋo rik oro Carejer kede Regem-melek karacel kede lwakgi me owot okwa kica i baŋ Rwot, dok daŋ openy olamdog me ot a Rwot me mony karacel kede odwarpiny ni, “Myero akoki, akany kec i dwe me abic kite a rik abedo timo mwakki apol ata?” Kop a Rwot rik te winyere baŋa ni, “Peny jo luŋ me lobo karacel kede odwarpiny ni, Kare ame rik ikanyo wunu kec dok daŋ ikumo wunu i dwe me abic kede me abiro pi mwakki pyerabiro ame okato, rik ikanyo wunu kec pira? Kare ame it ye icem wunu kede i kare ame it ye ka mat wunu, mom onwoŋo icem dok daŋ imatte wunu pirwu kenwu? Kare ame rik jo obedo i Jerucalem i kuc, karacel kede i boma ducu ame ceggi kede, kun daŋ jo bedo i Negeb kede i lobo apipiny, mannono mom en kop a rik Rwot otito i dog odwarpiny me kare acon?” Kop a Rwot owinyere baŋ Jekeria ni, “Rwot me mony okobo ni mannono, Ŋol wunu kop kakare, tim wunu ber kede kica ŋat man baŋ ominnere, kur ibur wunu dako a cware oto, atin kic, welo onyo acan; nattoro i akinawu kur yik ginnoro arac i cunye i kom ominnere.” Cite gin gigi okwero winyo doga ote cerre gigi ocera, kun oloko ŋegi, oculo daŋ yitgi oko me kur owiny kop. Gin omio cunygi odoko atek bala lela, me kur owiny cik kede kop a Rwot me mony ame rik ocwao i Cuny mere Acil i dog odwarpiny me kare acon, Mannono omio twon akemo adwoŋ meicel obino baŋ Rwot me mony. “Kite acalo rik alwoŋo eka gin te kwero winyo, amannono daŋ gin olwoŋo, an ate kwero winyo. Rwot me mony okobo. Akeketogi oko i yamo ajuru i akina orok ame gin yam mom oŋeo. Mannono omio lobo ame rik gin oya iye oballe kun ŋattoro mom ŋoŋolo yie, lobo ame rik yomoro cunygi oballe oko.” Kop a Rwot me mony owinyere baŋa ni, “Rwot me mony okobo ni mannono, Twon nyeko atek meicel omaka pi Cion, nyeko omaka i kom i twon akemo adwoŋ meicel. Rwot okobo ni, Abino dwogo i Cion, abino bedo i dye Jerucalem; dok Jerucalem obino lwoŋo ni boma ame genne, dok kiddi a Rwot obino lwoŋo ni kidi acil. Rwot me mony okobo ni mannono, Co oteggo kede mon oteggo bino dok bedo i dye yo me Jerucalem, ŋat acel acel bino mako lut ko mo mere pi tio. Itino anyira kede awobe bino raude ata i dye yo boma kun otuko iye. Rwot me mony okobo ni mannono, Ka ce man me awura i waŋ jo ame odoŋ i kare man, myero dok bed me awura i waŋa daŋ? Man kop a Rwot me mony okobo. Rwot me mony okobo ni mannono, Nen abino laro jona ame tye tuŋ kide kede en ame tye tuŋ to. Abino kelogi me bedo i dye Jerucalem, Gin bino bedo jona, an abino bedo Obarjagi, kun an abedo ame genne, dok ame kita daŋ atira.” Rwot me mony okobo ni mannono, “Mi ciŋwu bed atek, wun ame i kare man ibedo wunu winyo kop magi i dog odwarpiny, cakere i kare ame ogeo cano acakki te ot a Rwot me mony, me wek ger ot a Rwot. Pien i kare ame nino-nono rik mom ru oromo, rik onwoŋo mom oculo ocara a dano moro, onyo me a lee moro, anaka kuc daŋ rik mom baŋ ŋat ame kato oko onyo ame dwogo i yie pi okwor; pien rik amio ŋat acel acel mom mito awottere. Cite aman doŋ mom abino tic i jo-ni odoŋ-ŋi bala kare acon, Rwot me mony oko bo. Pien obino coyo koti kede kuc; olok bino nyak, lobo bino ceko cam, polo bino onyo toyo. Abino miyo jo-ni odoŋ-ŋi leo jamigi luŋ. Acalo yam ibedo wunu nyiŋ ame orok ceno kede jo, wun doggola a Juda kede doggola Icrael, amannono daŋ abino larowu eka ite bedo wunu okel winyo baŋ jo ocele. Kur ilwor wunu, cite mi ciŋwu bed atek.” Pien Rwot me mony okobo ni mannono, “Acalo rik doŋ ayiko me timowu rac, i kare ame kwariwu rik omio akemo omaka, cunya rik mom te kwe, Rwot me mony okobo. Kittono daŋ i kare man doŋ ayiko me timo ber baŋ Jerucalem kede baŋ doggola a Juda, kur ilwor wunu. Wun ibino wunu timo kit man: Ŋat acel acel myero kob kop ateni baŋ awottere, ŋol wunu kop ateni ame kelo kuc i ka ŋolo kop i dog pacowu. Kur iyik wunu kopporo arac i cunywu, ŋat man i kom awottere. Kur imar wunu kwoŋ goba goba, pien mannono luŋ an adag gira, Rwot okobo.” Kop a Rwot me mony owinyere baŋa ni, “Rwot me mony okobo ni mannono, Kanyo kec me dwe me aŋwen, kede kanyo kec me dwe me abic, kanyo kec me dwe me abiro kede kanyo kec me dwe me apar bino doko kare me yomcuny kede lelo, kede kare me ecuban me yomcuny baŋ jo me Juda; pi mannono myero imar wunu ateni kede kuc. “Rwot me mony okobo ni mansnono, ‘Rok apol pwod bino bino, anaka jo ame bedo i boma apol apola. Jo ame bedo i boma acel bino wot i boma ocele kun okobo ni, “Oru wunu wot, me owot okwa Rwot timwa ber, oyeny wunu Rwot me mony; an awot.” Jo apol kede rok atek bino bino i Jerucalem pi yenyo Rwot me mony, kede kwayo Rwot me timgi ber. Rwot me mony okobo ni mannono, I kare-nono jo apar ame oya i rok me leb apapat bino mako kanyi Ajudaya kun kobo ni, “Wekwa owot kedi, pien owinyo ni Obaŋa tye kedwu.” ’ ” Kop a Rwot otiko lobo Kadrak, en bino nworjo kabedo me re i Damaciko, Pien boma luŋ me Aram me a Rwot, acalo atekere me Icrael daŋ luŋ. Kamat daŋ ame tye i waŋ apokki mere, Turo kede Cidon kadi gin ryek meicel. Turo ogero cellere pire kene, ocoko ryal oyido calo kwoo kede jabu acalli coto i dye yo. Cite, nen ba, Rwot bino yako jami mere oko, bino bolo lonyo mere luŋ i nam, aco en obino waŋe i mac. Acikelon bino neno, lworo bino mako; Gaja daŋ bino neno, te minne i rem: Ekron daŋ amannono, pien lewic bino make i gennere. Abaka bino rwenyo oko i Gaja; Acikelon bino doŋ nono aboŋo jo. Rok orubere aruba bino bedo i Acidod; abino giko wakere i lobo piriciti. Abino kwanyo remo mere oko i doge, gi-kwer daŋ abino kwanyo oko i akina lake; en daŋ bino bedo jo odoŋ pi Obaŋawa; bino doko calo atekere a tye i Juda, Ekron bino doko calo jo Jebuc. Icennere abino guro kema oda me gwoko, me ŋattoro kur bed be bea i ŋete; aloccoro a burogi mom dok bino donyo i akinagi, pien aman doŋ an i koma ame aneno i waŋa. Lel atek, yin Cion! Go ijira, yin Jerucalem! Nen, abakani abino baŋi; en oloo kop, oloo daŋ lweny! En mwol, dok tye arino i kana, tye i wi atin kana a twon. Abino tyeko gadigadi lweny oko i Epraim, ate tyeko aguragura lweny daŋ oko i Jerucalem; akud atero me lweny daŋ obino geŋo oko, en bino rabbi rok luŋ kop me kuc; loccere bino ya i nam naka i nam ocele, dok bino ya i Kulo naka tuno kan a lobo ogik iye. Aco yin daŋ, pien pi remo me cikerena kedi, abino miyo joni ame otero iyi opii, ya oko i bur a pii mom iye, Dok wunu i cel atek, wun obuc a tye i gen; tin aciko ni abino culowu kun adodo iryo, Pien doŋ agomo Juda acalo akud aterona, Epraim doŋ amio obedo atero mere, Abino tugo itinoni, yin Cion, i kom itinowu, wun jo Grik abino tiŋi malo calo pala romo a ŋat atek. Icennere Rwot bino nen i wigi malo, eka atero mere te meny bala lutkot; Rwot Obaŋa bino kuto opel, te wot i dye yamo ajuru me anyarolum, Rwot me mony bino gwokogi, atyeŋ ame obao mom bino gudogi, gin bino nyono oko piny i te tyengi; gin bino mato remogi bala koŋo olok, bino yeŋogi bala becen opoŋ, bala gul keno lam ame ocoro iye remo. I nino-nono Rwot Obaŋagi bino larogi, pien jo mere calo rommi; pien gin obino papara i barrere, acalo gweŋ alilia i tok kwogo me loc. Eyo, kara berrere bino bedo rom mene! Kal bino miyo awobe cwe, koŋo olok anyen bino cweyo anyira. Kwa wunu kot i baŋ Rwot, i kare me cwir, kwa wunu i baŋ Rwot ame mio pol doko apek, ame mio kot cwe baŋ jo, ame mio dek tu i poto a dano acel acel. Pien cal jogi ko bo kop a tere mom otyet neno daŋ goba; jo a leko daŋ tito lek me goba, okweo cuny jo nono. Mannono omio jo rorona calo rommi; oneno can pien akwatgi mom. “Akemona Iyet meicel i kom okwat, abino keto can i kom otel-wic; pien Rwot me mony paro pi romi mere, ame en ot a Juda, bino lokogi calo aguragura mere aber i lweny. Kidi adwoŋ me gwic bino ya i akinagi, teke me guro kema daŋ bino ya i komgi, akud atero me romo daŋ bino ya i komgi, aloc luŋ daŋ bino ya i komgi. Gin luŋ obino bedo calo jo atek i romo, kun onyono okwor piny i coto i dye yo; gin bino lweny pien Rwot tye kedgi, bino miyo lewic mako jo aŋwec aguragura. “Abino miyo doggola a Juda doko atek, dok abino laro daŋ doggola a Lucepu. Abino dwogogi cen pien kica omaka i komgi, gin bino bedo calo jo a yam mom okwero, pien an a Rwot Obaŋagi, abino dok gamo kopgi. Eka Epraim te doko calo lon atek i romo, cunygi bino bedo yom calo jo omato koŋo olok. Itinogi bino nenogi te lelo, cunygi bino bedo yom i kom Rwot. Kadi bed rik akeketogi i akina orok, cite gin bino po pira i lobo luŋ a tye kannabor, gin karacel itinogi obino kwo, obino dwogo. Abino dwoggogi oko paco kun oya i lobo Miciri, abino cokogi daŋ oko i Acuria; abino kelogi i lobo Gilead kede Lebanon, tuno ka kabedo doŋ oremogi. Gin bino ŋolo dye nam me Miciri, obino goyo pii ame atagere i nam, kut luŋ i kulo Nail daŋ bino two. Awaka a jo Acuria obino juko oko, abiro loc me Miciri bino rwenyo oko, Abino miyogi obedo atek i Rwot, gin bino natte pi nyiŋe”, Rwot okobo. Yab doggolani, yin Lebanon, mi mac waŋ yen cedarni oko! Kok ba, yin cipre, pien cedar doŋ orette oko piny, pien yen adoijo mege doŋ oballe oko! Koku ba, wun kworo luŋ me Bacan, pien bun oculle doŋ olwero oko! Koŋ iwiny ba koko okwat, pien kwogogi doŋ obalo oko! Koŋ iwiny ba mor eŋatu, pien ka ponogi luŋ i Jordan doŋ oballe oko. Rwot Obaŋana okobo ni, “Yin myero idok ikwa rommi ame opito me aneka. Jo ame wilogi nekogi, eka mom ote keto cannoro i komgi. Jo a catogi kobo ni, Rwot myero pwo, pien doŋ adoko alonyo; okwatgi kica daŋ gire mom makogi. Pien kica gire mom dok bino maka i kom jo ame bedo i lobo-ni, Rwot okobo. Nen, abino miyo ŋat acel acel poto i ciŋ akwattere, dok ŋat acel acel bino poto iciŋ abaka mere; gin bino ŋinyo lobo, mom abino laro dano moro i ciŋgi.” Mannono omio an adoko akwa rommi ame jo awilo neko aneka. Eka ate kwanyo abiro aryo, acel ate cako nyiŋe Kica, en ocele ate cako nyiŋe Note. An ate kwayo gira rommi. Rik ate rweyo okwattono adek i dwe acel, pien onwoŋo cunya doŋ mom romo diye i komgi, gin daŋ onwoŋo yigi okwera oko, Omio ate kobo ni, “Mom gira abino bedo akwatwu. Rommi a myero to bino to; rommi a myero rwe oko, obino rweyo, me wek odoŋŋere, ŋat man cam riŋo kom awottere.” An ate kwanyo abirona ame nyiŋe Kica-ca, ate turo oko, kun aturo kede cikere ame rik acikere kede i rok luŋ. Cikere-naca rik te tur oko i ninonono, ocat rommi ame obedo nena oŋeo ni mannono obedo kop a Rwot. An ate kobbigi ni, “Ka ce ineno wunu ni ber, mia wunu ocarana; aco ka mom, wek wunu bedi.” Gin te pimo cekel pyeradek me ryal me ocarana. Rwot te cika ni, “Bol i ka kano lim,” en lim ame gin ocula kede i wel aber wokkono. An ate tero cekel pyeradekkono bolo i ka kano lim a Rwot. Icennere ate dok turo abiro me aryo, ame nyiŋe Notte-ca, kun aturo kede notte me omego i akina Juda kede Icrael. Rwot te cika ni, “Yin dok igam jami tic okwat a mom konyo. Pien nen, abino miyo akwattoro ya i lobo-ni ame mom bino paro pi rommi ame tye a to atoa, mom daŋ bino yenyo rommi ame amito rwenyo oko, dok daŋ mom bino caŋo rommi owanne mege, akadi pito rommi a komgi yot, cite bino mwodo riŋo a en ocwe mege, kun kikilo anaka ogweŋŋwere tyengi. Akwatta a konnyere mom bino neno can be, ame weko rommi mere ata! Pala romo myero ŋol bade, cob daŋ waŋe me tuŋ cem! Myero mi bade luŋ kwe oko, waŋe me tuŋ cem daŋ to oko.” Kop a Rwot i kom Icrael: Rwot ame oryeo polo, dok ocibo acakki te lobo, ame ocweo cuny dano iyi dano, okobo ni, “Nen aceggi miyo Jerucalem bedo ikopo ame mero rok luŋ ame tye i ŋete. I Juda daŋ okwor bino guro Jerucalem. I ninonono abino miyo Jerucalem bedo kidi apek meicel baŋ rok luŋ; jo luŋ ame tiŋo bino wanne atek. Rok luŋ me lobo bino notte karacel me lweny kede. I nino-nono, Rwot okobo, abino babano aguragura acel acel oko, eka ŋat aŋwec kede te po oko. Cite abino yabo waŋe i kom doggola a Juda i kare ame abino miyo aguragura orok luŋ wangi to oko. Atekere a Juda bino kop i cunygi kengi kengi ni, ‘Jo ame bedo i Jerucalem tye i teko ame oya i baŋ Rwot me mony, ame Obaŋagi.’ “I nino-nono abino miyo atekere a Juda bedo calo tako ame mac tye a lyel iye i akina yen, dok daŋ acalo mac rao a lyel i akina ŋano. Gin bino neko rok luŋ a tye i ŋetgi, ame tye i ciŋgi tuŋ cem kede tuŋ cam, cite Jerucalem jo bino bedo i ye kun tye kakare i Jerucalem. “Rwot bino geyo miyo loc i kema a Juda, me kwogo me doggola a Daudi kede kwogo a jo ame bedo i Jerucalem mom myero mi bed malo i kato mea Juda. I nino-nono Rwot bino geŋo jo ame bedo i Jerucalem kede kwot; i nino-nono dano ame goro meicel i akinagi bino doko calo Daudi, aco doggola a Daudi i nino-nono bino bedo calo ot Obaŋa, ame calo amalaika a Rwot a telo nyimgi. I nino-nono abino yenyo yo me tyeko rok luŋ ame obino me lweny i kom Jerucalem. “Abino onyo cuny me kica kede cuny me kwac i kom doggola a Daudi kede i kom jo ame bedo i Jerucalem, me wek ka gin oneno ŋat ame gin ocobo, gin okum pire, acalli ŋat ame kumo pi attinnere ame onywalo acel keken, dok me gin koke atek ateka, acalli ŋat ame koko atin kao. I nino-nono kumo bino bedo dwon meicel i Jerucalem, acalli kumo pi Adad-rimmon i bar me Megiddo. Lobo bino kumo kun doggola acel acel kumo kengi; jo me doggola a Daudi pat kun mongi daŋ kumo pat; jo me doggola a Natan pat kun mongi daŋ kumo pat; jo me doggoa a Levi pat kun mongi daŋ kumo pat; jo me doggola a Cimei pat kun mongi daŋ kumo pat; karacel kede doggola luŋ ame odoŋ, doggola acel acel bino kumo kengi kengi, kun mongi daŋ kumo kengi kengi. “I nino-nono obino tuco akoŋ pi doggola a Daudi karacel kede pi jo ame bedo i Jerucalem, me lwokogi oko i bai kede i tim me caro caro. “I nino-nono, Rwot me mony okobo, abino ŋolo nyiŋ cal jagi luŋ oko i lobo, me jo kur dok po pirgi; dok abino kwanyo daŋ odwarpiny karacel kede cen arac oko i lobo. Ka ce nattoro dok bino nen acalo adwarpiny, pappere kede tottere ame onywale bino kobbe ni, ‘Mom ibino bedo kwa, pien ikobo kop me goba i nyiŋ Rwot.’ Pappere kede tottere ame onywale bino cobe pel ka ce en bino rabo kop acalo adwarpiny. I nino-nono lewic bino mako adwarpiny acel acel pi anyuttere ame en rabo pire acalo adwarpiny, en mom bino ruko boŋo obedo yeyer me bwolo jo, cite en bino kabo ni, ‘An gira mom adwarpiny, an abedo apur poto, pien poto man obedo mega cakere i tinona!’ Ka ce nattoro bino penye ni, ‘Kara yo ŋei ame opwodo oryemo wok-ki kono?’ En bino dok iye ni, ‘Mannono luŋ waŋ abiro ame opwoda kede i ot owotena.’ ” “Mukere i kom akwatta, yin pala romo, i kom dano ame ocuŋ oluba, Rwot me mony okobo. Nek akwat, me rommi ket oko ata; abino wiro ciŋa i kom jo atino. I lobo man luŋ, Rwot oko bo, aryo me adek obino ŋolo, te to oko, acel me adek en a bino doŋ. Abino keto acel me adek-ku i mac, abino liyogi acalli ŋat a lio ryal, abino temogi kite ame otemo kede jabu. Gin bino lwoŋo nyiŋa, an abino winyo kopgi. Abino ko bo ni, ‘Gin jona’; gin daŋ bino kobo ni, ‘Rwot en Obaŋawa.’ ” Nen ba, nino a Rwot tye abino, ame jami luŋ ame oyako i baŋwu obino poko i akinawu. Pien abino coko rok luŋ karacel me lweny i kom Jerucalem. Gin bino mayo boma ote yako udi kun daŋ obuto i mon tetek; nucu jo me boma obino tero oko iyi opii; citejo ocele mere-ni mom obino jwayo oko i boma. Icennere Rwot dok bino wot lweny i kom rokkono luŋ, acalo elwenyo kede i nino me lweny. I nino-nono tyene bino cuŋ i wi kidi me Jeituni, ame tye i nyim Jerucalem tuŋ kide. Kidi me jeituni bino barre yie aryo, kun cakere i tuŋ kide dok kede tuŋ to; luŋ bino doŋ alac meicel. Kidi tuŋ cel bino dok tutuŋ anyarodi, eka tuŋ ocele te dok tutuŋ anyarolum. Luŋ me kidina luŋ bino torre oko, pien luŋ kiddi bino tuno naka i ŋete. Ibino wunu riŋo acalo rik iriŋo wunu oyerjo i kare abaka Ujjia me Juda. Icennere Rwot Obaŋawu bino bino karacel kede jo mere acil luŋ. I nino-nono nico kede koyo bino bedo pe. Piny bino bedo bala iceŋ nakanaka, Rwot ŋeo man, kun gire mom dyeceŋ kadi dyewor, pien otyeno ceŋ bino ryeny. I nino-nono pii akwo bino mollo kun ya i Jerucalem, nucu mere tuŋ cel bino mollo i nam me tuŋ kide, eka nucu mere ocele te mollo i nam me tuŋ to; bino daŋ timere amannono i oro, kite ame obedo timere kede i cwir. I nino-nono Rwot bino doko abaka ame loo lobo ducu, en bino bedo abaka kene, kun nyiŋe kene en atye. Lobo luŋ bino doko bar, cakere i Geba tuno naka i Rimmon ame tye tutuŋ anyarolum me Jerucalem, Cite Jerucalem bino dyedde gire kakare cakere i dogcel a Benjamin tuno anaka i dogcel acon, naka i dogcel me Gul kede dok cakere i pem me Kananel tuno anaka i bur nyono olok abaka. Jo bino bedo iye, pien mom dok obino kwero ginnor o me aneka iye. Jerucalem bino doŋ bedo i kuc. Man bino bedo too edeke ame Rwot bino pwodo kede rok luŋ ame olwenyo i kom Jerucalem: riŋo komgi bino top oko kun pwod ocuŋ i tyengi, waŋgi bino top oko iyi opoko waŋgi, lebgi bino top oko iyi doggi. I nino-nono twon lworo moro ame oya i baŋ Rwot bino babaŋogi oko, ame te miyo ŋat acel acel tiŋo ciŋe i kom awottere kun goo awottere kede ciŋe. Koŋ inen anaka, Juda daŋ bino lweny i kom Jerucalem. Gin bino coko lonyo a rok luŋ ame tye i ŋete, jabu, ryal, kede ruk apol meicel. Kodi too edeke-nono bino poto daŋ i kom aguragura, leyi acalli kane, inaga, kane kede i kom leyi luŋ me gonnyono. Ŋat acel acel ame obwot i kom rok luŋ ame onwoŋo obino me lweny i kom Jerucalem, bino wot i Jerucalem mwaka i mwaka me woro abaka, ame en Rwot me mony, kede kwero ecuban me gaŋo. Ka ce atekere moro me wi podo mom bino wot i Jerucalem me woro Abaka ame en Rwot me mony, kot mom bino cwe baŋgi. Ka ce atekere me Miciri mom owoto, mom onen kuno, too edeke ame rik Rwot owuno kede rok a mom owoto i Jerucalem kwero ecuban me gaŋo bino makogi, Man en too edeke ame obino pwodo kede jo i Miciri kede rok luŋ ame mom bino wot kwero ecuban me gaŋo. I nino-nono obino goro coc i kom olaŋ me aguragura ni, “Okwero obedo acil pi Rwot.” Gulli ame tye i ot Rwot bino bedo acalo tabo ame tye i nyim ke ŋo lam. Gulli luŋ ame tye i Jerucalem kede Juda obino kwero bedo acil pi Rwot me mony, me wek jo luŋ ame ŋolo leyi me yalo Obaŋa bin kwany i akinagi, oted riŋo ame oyalo Obaŋa. Acat willoro mom dok bino nen i ot a Rwot me mony i nino-nono. Man en kop ame Rwot omio Malaki orabo baŋ jo Icrael Rwot okobo ni, “Nen an atyeko marowu.” Ento wun ikobo wunu ni, “Yin imarowa kara i yore aŋonnono?” Rwot te gamo ni, “Ecau gin kede Yakobo mom gin omego? Cite an amaro Yakobo, ento ate kwero Ecau oko, Lobo Ecau ame obedo kidikidi amio odoŋ nono, aloko odoko me a leyi me tim,” Ka ee jo Edom, ame gin obedo ikwae Ecau okobo ni, “Wan obabalo bomawa oko, ento wan dok obino gero bomawa ame obalo-nono.” Rwot me mony bino gamo ni, “Gin otwero gero, cite an dok abino reto oko piny, tuno waŋ ame olwoŋo lobogi ni lobo a jo ame obalo, kede dok ni, jo ame akemo doŋ omako Rwot i komgi atwal.” Wun ikomwu ibino neno wunu man kede waŋwu, ite kobo wunu ni, “Rwot kara dit meicel, anaka i lobo ocele a mom obedo me Icrael!” Rwot me mony okobbi olamdog ni, “Atin woro pappere, amiro daŋ woro adwoŋŋere. Doŋ ka ce an abedo papawu, piŋo kara mom iwora wunu? Dok ka ce an abedo adwoŋwu, piŋo kara mom ilwora wunu? Wun olamdog ame icaa wunu, dok ite penyo wunu ni, ‘Kara wan ocai i yore aŋo?’ Icaa wunu i miyo cammogo oballe i wi keno lam me yala, eka dok ite penyo wunu ni, ‘Kara wan obalo keno lam i yore aŋo?’ Pien itamo wunu ni meja a Rwot romo gire acaa. Ka ce imio wunu leyi ame waŋgi oto me mot aŋola me yala, itamo wunu ni mannono nwoŋo itimo wunu gin aber? Dok ka ce imio wunu en ame oŋwalo mege onyo ame two, mannono nwoŋo itimo wunu gin aber? Koŋ item miyo wunu kodi ennono baŋ olocwu; cunygi bino bedo yom i komwu? Gin bino pwoyowu?” Rwot me mony okobo ni, “Wun olamdog koŋ ikwa wunu Obaŋa ni myero timwu kica, omi berrere onen i komwu, Obaŋa twero nyuto berrere i kom ŋattoro i akinawu kun wun itye wunu kede kodi mot man i ciŋwu? Kono onwoŋo ŋattoro i akinawu ocego doggola me ot Obaŋa oko, me kur ibed wunu moko mac i wi keno lam me yala nononono! An gira cunya mom yom i komwu; mom abino gamo mottoro ame ikelo wunu. Pien nyiŋa dit atek i akina rok apapat, cakere i kide naka tuŋ to; i kabedo luŋ jo waŋa odok a ŋwece kur, kun daŋ omia mot aber odoco; pien nyiŋa dit atek i akina orok, man kop a Rwot me mony, Ento wun nwoŋo ipyedo wunu apyeda pitano ni meja a Rwot gire oballe, dok iromo miyo wunu iye cam ame wun icao wunu. Wun ikobo wunu ni, ‘Tic man oolo jo rom kwene!’ ite daŋ dok jwiya wunu, man kop a Rwot. Wun ikela wunu leyi ame omao tetek, onyo en ame oŋwalo mege, onyo ame two, magi-nono en ame wun ilunyo kelo wunu me motwu, Abino gamo kodi mottono i baŋwu? Cen myero mak ŋat ame agoba, ame tye kede nyok romo i akina rommi mere, ame ocikere me miyo, eka te dok lunyo ŋolli Rwot en ame roccoro tye i kome. Pien an abedo Abaka adwoŋ meicel, ame nyiŋa olworo atek i akina orok,” man kop ame Rwot me mony ikokome okobo. “Aman doŋ ba, wun olamdog, cik man otikowu. Ka ce mom ibino winyo wunu, ka ce mom ibino mako wunu i cunywu pi keto kwogo i koma, an abino cwayo cen i komwu ate daŋ ceno jamiwu abeco oko; iyi ateni mere, atyeko doŋ cenogi gire oko, pien wun mom imako wunu i cunywu, man kop a Rwot me mony okobo. Nen ba, abino miyo mom dok inywal wunu, dok daŋ abino miyo badwu mito oko, dok abino juko waŋwu kede wee, wee mot aŋolawu ame imio wunu baŋa, ate ryemowu oko i nyima. Man-nono bino miyo iŋeo wunu ni cik man rik acwao pirwu, me cikerena kede Levi moki, man kop ame Rwot me mony okobo. Cikerena kede rik onwoŋo obedo cikere me miyo kwo, kede kuc, ate daŋ miyo gin luŋ baŋe; me en bed kede lworo; en daŋ rik te lwora kun woro nyiŋa. En onwoŋo pwonyo ka pwony me ateni keken, kun kopporo arac mom donnyo i doge. En obedo wot karacel keda i kuc kun tio gin ame tye atira dok daŋ omio jo apol oweko timo gin arac. Alamdog myero ogwok kop me ateni ame en neo i kom Obaŋa, jo myero wot baŋe me winyo pwonnyere, pien en obedo a kwena a Rwot me mony. Cite wun doŋ iweko wunu lubo yo-nono oko. Gin ame wun ipwonyo wunu tye ka tatago jo apol meicel, ibala wunu cikere a Levi oko, Rwot me mony okobo. Mannono omio an amiowu idoko wunu jo ayot meicel, ame ocao i i nyim jo ducu, pien mom ilubo wunu yona, dok daŋ itye wunu kede apoka-poka i pwonywu.” Wan luŋ mom papawa acel? Obaŋa acel mom en ame oketowa? Pino dok ŋat acel acel mom bedo ŋat a genne baŋ awottere, kun obalo wunu cikere ame rik kwariwa ocikere kede? Jo Juda yam mom obedo jo ame genne; gin obedo timo tim me kwer iyi Icrael kede i Jerucalem. Gin obalo kabedo acil ame obedo me a Rwot, kabedo ame en maro, dok daŋ gin onyomo anyira a rok ame woro obana ocele. Rwot myero mi waŋ ŋat ame timo kodi tim man rweny oko i kema a Yakobo, me kur dok medde bedo kede acaden onyo ŋat ame gamo kop a Rwot, onyo ame kela mot baŋ Rwot me mony. Gin ocele ame dok itimo wunu daŋ ene. Iwumo wunu wi keno lam a Rwot kede pig waŋwu, ikok wunu dok daŋ icucura wunu, pien en mom dok keto cunye i kom motwu, mom daŋ gamo i baŋwu, akadi pwoyowu pire. Wun ipenyo wunu ni, “Kara piŋo omio en dok timo kittono?” Pien Rwot obedo acaden ame neo kop i kom cikerewu ame onwoŋo rik icikere wunu kede wun i dakoni, ame rik inyomere kede kun yin pwod awobi, ento yin doŋ ituro cikerewu oko, akadi bed en pwod tye acalo awotti, dok dakoni ame onwoŋo rik icikere kede i nyim Obaŋa. Mom Obaŋa omio yin idoko kom acel kede cuny daŋ acel, wun kede? Gin aŋo ame en Obaŋa mito i baŋwu? En mito ni ibed wunu itino ame wore. Pi mannono, myero igwokere wunu ba, ŋattoro kur tur cikere mere baŋ dako me re ame enyomo kun en pwod awobi, “Pien an adag keto nyom, Rwot Obaŋa me Icrael en okobo, adag daŋ ŋat ame timo kodi tim me kolo-nono baŋ cege, Rwot me mony okobo, Pi mannono, myero igwokere wunu ba, me ŋattoro kur bed ŋat a mom genne.” Kopwu doŋ oolo kom Rwot oko, Aco wun dok ipenyo wunu ni, “Wan kara oolo kome i yore aŋonnono?” Wun lolo wunu kome pi kobo ni, “Jo luŋ ame timo gin arac, gin gire obedo jo abeco i nyim Rwot, yie daŋ yom i komgi.” Dok pi penyo ni, “Obaŋa ame ŋolo kop atira-nono kara tye kwene?” Rwot me mony odok ipenywunono ni, “Neno wunu ba, acwayo aora i nyima, me en gera yo, me Rwot ame iyenyo wunu-nono bin oko oyotoyot i ode. Neno wunu ba, aor me cikere ame cunywu yom i kome-nono, abino doŋ oko. Ento na ame bino kanyo nino-nono ka en obino? Dok na ame bino cuŋ ka en onen? “Pien en bino bedo calo mac ame lio ryal, dok acalo cabun me biyo boŋo, En bino bedo piny me nolo kop acalo ŋat ame lio ryal bedo acil, en bino lonyo ikwae a Levi doko acil kun liogi acalo jabu kede ryal, tuno waŋ ame gin doŋ romo miyo mot baŋ Rwot i cuny aler. Mannono bino miyo mot ame jo Juda kede jo Jerucalem mio, bino dok yomoro cuny Rwot calo i kare acon kede i mwakki ame okato. “An doŋ abino nokowu aceggi, me ŋolliwu kop. Abino bedo acaden ame kobo kop oyotoyot i kom otim tim me jojok, i kom ocod cot, i kom okwoŋ kwoŋ me goba, i kom jo ame cero opakaca pi ocaragi, kede jo ame buro mon a coggi oto, itino kic, karacel kede jo ame cwao orok a bedo i akinagi teŋe kun mom olwora gigi, man kop a Rwot me mony okobo. “Pien an a Rwot ame mom dok alokere; pi mannono ba, wun ikwae a Yakobo, mom ru ajwerowu wun ducu. Cakere i kare a kwariwu, wun igak wunu oko i kom cikka, kun mom igwoko wunu. Dwog wunu doŋ baŋa, me an daŋ adwog baŋwu, Rwot me mony okobo. Ento wun dok ipenyo wunu apenya ni, ‘Wan kara obino dwogo i yore aŋo?’ Dano twero yako Obaŋa? Nen itye wunu ka yaka. Ento wun dok ipenyo wunu ni, ‘Kara wan oyaki i yore aŋo?’ Iyaka wunu i mi yo acel me apar karacel kede motwu. Oceno wun luŋ i cen, pien itye wunu ka yaka; rokwu luŋ tye ka yaka. Kel wunu acel me apar luŋ i ka kano cam, me cam bed tye i oda; me koŋ dok itema wunu kede, Rwot me mony okobo, koŋ inen wunu ka ce mom abino yabo waŋ dirica luŋ me polo pirwu, ate corriwu lwak jami apipim. Abino geno ginnoro luŋ ame balo cam i pottiwu, me gin kur tyek cam ame ocek i pottiwu; nyig olokwu ame tye i poto mom bino ony, Rwot me mony okobo. Rok ocele luŋ te doŋ lwoŋowu ni wun rok a komwu gum, pien ibino bedo bedo wunu i lobo me yomcuny man kop ame Rwot me mony okobo. “Wun ikobo wunu kop areco i koma, Rwot me mony okobo. Cite wun dok ipenyo wunu ni, ‘Kara wan okobo kop aŋo i komi?’ Wun ikobo wunu ni, ‘Konyo kara ŋo me bedo woro Obaŋa? Gin aŋo aber ame wan onwoŋo pi bedo cobo gin ame en ociko onyo pi bedo wot i nyim Rwot me mony bala jo ame akwero cola? Cakere i kare man wan olwoŋo jo ame wakere ni jo ame komgi gum. Pien jo ame timo gin arac bedo jo ame tye aber i jami ducu mom mannono keken; cite gin ka otemo Obaŋa, gin obwot gigi aboŋo ginnoro ame gudogi.’ ” Jo ame lworo Rwot te bedo kop i akinagi kengi kengi; Rwot te ciko yite winyo gin ame gin akobo; ote coyo buk i nyim Rwot, me po i kom jo ame rik onwoŋo lworo Rwot kun daŋ otamo pire. Rwot me mony te kobo ni “Gin bino bedo jona, jo ame obedo mera an ikoma, i nino ame abino tic iye, kun atimogi kica kite ame dano timo kede kica baŋ wode ame wore. Mannono bino miyo dok ineno wunu apokapoka ame tye i akina jo ame kitegi atira kede jo areco, jo aworo Obaŋa kede jo ame mom woro Obaŋa. “Neno wunu ba, nino-nono tye abino kun wan calo tanur; jo a wakere luŋ kede jo atimo tim areco bino waŋ iye calo reŋ kal. I nino-nono obino waŋogi gin luŋ, ame mom abino weko akadi lwitgi onyo jaŋgi moro doŋ, Rwot me mony okobo. Ento pi wun jo ame wora, ceŋ me kite atira bino donyo pirwu kun caŋo jo kede bwome. Wun ibino wot wunu kun ipye wunu apyea calo roce ame ya iyi anok. Ibino nyono wunu otim tim areco piny i te tyenwu, pien i nino ame abino tic iye-nono, nwoŋo gin doŋ odoko buru ame tye piny, man kop a Rwot me mony okobo. “Poyo wunu cik amirona Muca, icwillere kede gin ame en ociko, ame rik an acike iye i Koreb, pi jo Icrael luŋ. “Nen ba, an abino cwayo adwarpiny Elia; en bino geyo bino kun nwoŋo nino a Rwot mom ru obino, ame en twon nino moro adwoŋ dok daŋ iyiliyili meicel. En Elia bino loko cuny odoŋe i kom itinogi kede cuny itino i kom odoŋegi naka mio abino ate nekogi oko acalo gin ame ojalo me aneka.” Man buk me kwari a Yecu Kricito, akwar Daudi, akwar Iburaim. Iburaim onywalo Icaka, Icaka onywalo Yakobo, Yakobo onywalo Juda kede omego mege; eka Juda kede Tamali te nywalo Perej kede Jera, Perej te nywalo Kejeron, Kejeron te nywalo Aram; Aram te nywalo Aminadab, Aminadab te nywalo Nacon, Nacon te nywalo Calamon; Calamon kede cege Rakab te nywalo Boaj, Boaj kede cege Luci te nywalo Obed, Obed te nywalo Yece; Yece te nywalo abaka Daudi. Daudi i dako a Uria te nywalo Culeman; Culeman te nywalo Rekoboam, Rekoboam te nywalo Abija, Abija te nywalo Acap; Acap te nywalo Yekocafati, Yekocafati te nywalo Joram, Joram te nywalo Ujia; Ujia te nywalo Yocam, Yocam te nywalo Akaj, Akaj te nywalo Kejekia; Kejekia te nywalo Manace, Manace te nywalo Amoc, Amoc te nywalo Yocia; Yocia te nywalo Yekonia kede omego mege i kare ame oterogi i Babulon. Dok icennere ame doŋ oterogi oko i Babulon, Yekonia dok te nywalo Calatiel, Calatiel daŋ te nywalo Jerubabel; Jerubabel te nywalo Abiuda, Abiuda te nywalo Eliakim, Eliakim te nywalo Ajor; Ajor te nywalo Jadok, Jadok te nywalo Akim, Akim te nywalo Eliuda; Eliuda te nywalo Eleajar, Eleajar te nywalo Matan, Matan te nywalo Yakobo; Yakobo te nywalo Yucepu cwar Maliam a rik onywalo Yecu ame olwoŋo ni Kricito. Amannono kwari luŋ ame onywalo geye i kom Iburaim ituno kede i kom Daudi, romo kwari apar wie aŋwen, dok geye i kom Daudi ituno i kare ame oterogi i Babulon romo kwari apar wie aŋwen, dok geye i kare ame oterogi i Babulon ituno kede i kom Kricito romo kwari apar wie aŋwen. Nywalo Yecu rik obedo amane. Ame tottere Maliam pwod ocikere acika me nyomere gin i Yucepu, a mom ru gin onotte karacel, te ŋeye oko ni en ogamo yic me Cuny Acil. Cware Yucepu nwaŋ en baŋ o a kite atir, mom omito kelo lewic i kom nyan-nu; oparo ni ewek aweka i muŋ. Ame onwoŋo pwod tye aparo koppono, amalaika a Rwot te nen baŋe i waŋ lek, a kun kobbe ni, “Yucepu akwar Daudi, kur ilwor tero Maliam me wot bedo cegi, pien yic ame en tye kede-nu mea Cuny Acil gire. En bino nywalo atin awobi, ibino cako nyiŋe Yecu, pien bino laro jo mere i kom bal megi.” Mano ducu otimere me wek kop a Rwot cobere kakare a yam okobo i dog odwarpiny ni, “Nen, nyako a mom ru tye kede apayi mere, bino yac, bino nywalo atin awobi; obino cako nyiŋe Emmanuel,” te koppere ni, Obaŋa tye kedwa. A doŋ Yucepu oco i waŋ nino, otimo i kite acalo amalaika a Rwot ocike kede; otero dako mere baŋe, naka mom te notte kede, ituno ka onywalo atin; te cako nyiŋe Yecu. Ame doŋ onywalo Yecu i Beterekem i lobo Judaya i kare abaka Kerode, oryeko mogo te nen oko kun ya i tuŋ kide, obino i Jerucalem. Ote penyo ni, “En ame onywalo me bedo abaka Ojudaya kara tye ka kwene? Pien wan oneno acerrere tuŋ kide, obino me wore.” Ka abaka Kerode owinyo kop man, cunye opoto, anaka cuny jo me Jerucalem luŋ aluŋa; omio en te coko olamdog adoŋo kede opwony-cik me rokgi luŋ, te penyogi ni, “Kricito obino nywale kwene?” Gin te kobbe ni, “I Beterekem i lobo Judaya, pien adwarpiny yam ocoo oko ni, ‘Yin Beterekem i lobo Juda, yin mom itidi wok kadi acel i akina oloc a jo Juda; pien aloc bino ya i yin, en ame bino kwayo jo mera Icrael.’ ” Kerode te cwano oryeko i muŋ, gin te niaŋe kare ikome ame acer onen iye. Eka te cwayogi i Beterekem kun kobbigi ni, “Wun wotu, peny wunu kop i kom atin i yore i yore; ka doŋ ityeko wunu nwoŋo, dwoggo wunu koppere baŋa, me an daŋ awot, awore.” A doŋ gin owinyo kop abaka, gin owoto ote neno acer a yam koŋ gin oneno i tuŋ kide otelogi, obino olirakino malo kakan ame atin-nu tye iye. Ka gin oneno acer, oyomo yigi, ote lelo atek meicel. Ka gin odonyo i ot, ote neno atin, kede tottere Maliam, ote ryebere piny, wore, ote gonyo jamigi me wel ame gin okelo, ote miye mot, jabu kede luban kede murra. Obaŋa te kwenyorogi i waŋ lek ni kur odok baŋ Kerode, gin te dok turgi deke yo ocele. A doŋ gin odok oko, amalaika a Rwok te nen baŋ Yucepu i waŋ lek kun kobbe ni, “Ya malo, iter atin gin kede tottere, iriŋ, ilar Miciri, bed wunu kuno ituno ka abino kobbi, pien Kerode bino moyo atin wek enek oko.” En te ya tero atin kede tottere dyewor, te wot i Miciri; naka obedo kuno ituno ka Kerode doŋ oto. Man otimere me kop a Rwot cobere kakare a rik okobo i dog adwarpiny ni, “Rik alwono woda i Miciri.” Kerode ka oneno ni oryeko opale, akemo omake atek; ocwao jo, oneko itino a co luŋ ame tye i Beterekem kede kabedo ducu ame ceggi i laŋete geye i kom itino me akina mwaka aryo, dwogo kede piny, ame porre kede kare a rik oryeko oniaŋe pire. Man te miyo kop a rik obino i dog adwarpiny Jeremia cobere kakare ni, “Dwon owinyere i Rama, kumo kede koko me wi lyel; Lakeri okoko itino mere. En okwero oko ni kur kwe cunye, pien gin doŋ omom.” Ame doŋ Kerode otyeko to, amalaika a Rwot te nen baŋ Yucepu i Miciri i waŋ lek, te kobbe ni, “Ya malo iter atin kede tottere, idok i lobo me Icrael, pien jo a rik mito neko atin doŋ ototoa oko.” En oya, otero atin kede tottere, odwogo i lobo Icrael. Ento ka en dok owinyo ni Arkelao en ame doŋ loo Judaya aka pappere Kerode, en te lworo wot kuno oko, cite ote kwenyoro en i waŋ lek, omie ewoto i lobo me Galilaya. En owoto obedo i boma ame olwoŋo Najaret, me kop a nwaŋ obino i dog odwarpiny cobere kakare ni, “Obino lwoŋe Anajaret.” I kare-nono Lakana Abatija obino kun rabo kop i tim me Judaya, kun kobo ni, “Ŋut wunu, pien loc me polo doŋ onoko ceggi.” Pien man en baŋ o ame adwarpiny Icaya yam orabo pire ni, “Dwon baŋ o a redo i tim ni, Ger wunu yo pi Rwot, yik wunu gudo mere cuŋ atira.” En Lakana rik ruko boŋo yer inaga, tweo pyere kede del, camere onwoŋo bonyo kede moo kic me tim. Jo nwaŋ ya i Jerucalem, kede Judaya luŋ, kede lobo ducu ame tye i ŋet Jor baŋ, ciro, obino baŋe. Gin tuco balgi, en batijagi i kulo Jordan. Ka en oneno Oparicayo kede Ocadukayo apol bino ni batijagi, en okobbigi ni, “Wun itino ororo, ŋa ame okwenyorowu ni mano ber iriŋ wunu akemo Obaŋa ame bino tuno? Nyak wunu doŋ nyig a myero me ŋut, kur dok icak tamo wunu ni, ‘Otye kede kwarowa en Iburaim’; pien akobbiwu ni, Obaŋa tye kede teko me miyo gweŋe magi doko ikwae Iburaim. Aman doŋ otyeko keto lee oko me toŋo lwit yen; yat acel acel a mom nyako nyige abeco, otoŋo, obolo i mac. “An abatijawu kede pii me iŋut wunu, ento tye ŋattoro ame alubo ŋea, en tek kata oko: an mom aromo mako warrere. En bino batijawu kede Cuny Acil, dok kede mac. Odero mere tye i ciŋe, en bino yiko laro mere aber, bino nyono kallere i dero, ento cuŋe, en bino waŋo oko kede mac a mom to.” Yecu ocako ya oko i Galilaya, obino baŋ Lakana i dog Jordan, me Lakana batija en. Lakana omito kwero oko, te kobo ni, “Yin a myero ibatija an, yin dok ibino baŋa?” Yecu te dokke iye ni, “Kur ikwer amanni, pien myero ocob gin atye atir luŋ”; eka Lakana te ye. A doŋ Yecu obatija, te ya i pii oyotoyot, polo te barre. Oneno Cuny Obaŋa obino calo amam, olyao piny, opoto i kome. Dwonnoro te ya i polo kun kobo ni, “Man en Woda ame amaro, a yia yom i kome.” Icennere Cuny Acil otero Yecu i tim me Catan bite. En ofi nino pyeraŋwen dyeceŋ kede dyewor kun kanyo kec, icennere kec te neke. Abit jo te pello, te kobbe ni, “Ka in i Wot Obaŋa, koŋ ikobbi gweŋe magi me lokere dok kwone.” En te dok iye ni, “Yam ocoo ni, ‘Dano mom bino bedo kwo ka i kwon keken, kono ka i kop ducu ame ya i dok Obaŋa!’ ” Catan dok te tere i boma acil, te cibe i wi atenni ot Obaŋa malo, te kobbe ni, “Ka yin Wot Obaŋa, koŋ iŋoye, irette piny, pien yam daŋ ocoo ni, ‘En bino ciko omalaika mere piri’, ‘Gin bino joli i ciŋgi, me kur itwom tyeni kede gweŋ.’ ” Yecu te gamo doge ni, “Yam daŋ ocoo ni, ‘Kur iom yi Rwot Obaŋani.’ ” Catan dok otere i amiddi kidi amalo meicel, te nyutte loc luŋ me wi podo, anaka kede kwogo a tye i yigi, te kobbe ni, “Magu ducu abino miyi, ka iryebere piny, iwora.” Yecu te gamo ni, “Jer teŋe, Catan, pien nwaŋ ocoo ni, ‘Wor Rwot Obaŋani, iti pi en keken.’ ” Icennere Catan oweke, omalaika obino okonye. Yecu ka owinyo ni oketo Lakana i buc, en odok i Galilaya, te weko Najaret, te wot bedo i Kapernaum, ame tye i dog nam, i lobo Jabulon kede Naputali, wek kop a nwaŋ obino i dog adwarpiny Icaya cobere kakare, ni, “Lobo Jabulon kede lobo Naputali, tuŋ nam, loka Jordan, Galilaya me Orok. Rok a yam bedo i piny acol doŋ oneno lero adwoŋ, jo a yam bedo i lobo kede tipo me to, cen doŋ opello i komgi.” Cakere i kare-nono Yecu ogeo rabo kop kun kobo ni, “Ŋut wunu, pien loc me polo doŋ onoko ceggi.” Ka Yecu ceŋ tye a be bea i dog nam Galilaya, te neno omego aryo, Cimon ame olwoŋo Petero, kede Anderiya ominnere; otye ka ciko bwo iyi nam, pien ceŋ gin ocik rec. En te kobbigi ni, “Biye, iluba wunu, abino lokowu ocok jo akaka rec.” Oyotoyot gin oweko bwoyigi, ote lube. Dok oya i kuno owoto anyim anonok, te neno jo aryo ocele ame gin omego, Yakobo wot a Jebedayo kede Lakana ominnere; otye i yee karacel kede papagi Jebedayo, oropo bwoyigi. En te lwoŋogi; oyotoyot ote weko yee oko, anaka papagi, ote lube. En owoto omano Galilaya luŋ, kun pwonyo i kacokeregi, dok rabo amut aber me loc Obaŋa, te caŋo too ducu kede goro luŋ i akina jo. Rwoŋe olal i lobo Curia luŋ, ote kelo baŋe jo ducu ame komgi lit, kede jo a kwon too kede rem apapat wunogi, wegi cen areco, jo a two ekwikwiŋ, kede ame two too akwea kom; ocaŋogi. Lwak jo ecipan olube ame oya i Galilaya, Dekapoli, Jerucalem, Judaya kede loka Jordan. Ka oneno lwak, en te yito oko i wi kidi. A doŋ en obedo piny, jo mere a lube te bino baŋe. En te ero kop, opwonyogi kun kobo ni. “Tye kede winyo, jo ame ocan i lonyo me cuny, pien loc me polo megi. “Tye kede winyo, jo ame kumo, pien obino kweyo cunygi. “Tye kede winyo, jo ame mwol, pien lobo bino doko megi. “Tye kede winyo, jo ame kec kede oryo makogi me bedo jo a kitegi atir, pien gin bino yeŋ. “Tye kede winyo, jo ame okica, pien obino timogi kica. “Tye kede winyo, jo ame yigi cil, pien gin bino neno Obaŋa. “Tye kede winyo, jo ame kelo kuc, pien obino lwoŋogi otino Obaŋa. “Tye kede winyo, jo ame owunogi pi bedo jo a kitegi atira, pien loc me polo megi. “Itye wunu kede winyo ka jo ŋalowu, dok owunowu, ame gin kobo kop ducu areco i komwu gobagoba pira. Lel wunu kede yomcuny adwoŋ, pien mot me pwoyowu bup i wi polo, pien odwarpiny ame ogeo nyimwu daŋ owunogi kittono. “Wun kado me lobo; ento kado ka odoko abot oko, obino loko doko amit iŋo? Konnyere doŋ mom; myero oony oko me jo nyoni. “Wun ceŋ me lobo. Boma ame ogero i wi tur mom twero pono. Dok mom ocwinyo tara ote dok wumo oko kede gulu; ento oketo i wi akara, a mio te menyo jo ducu a tye i ot. Ceŋ mewu oryeny i nyim jo amannono, me gin nen ticwu abeco, ote miyo kwogo baŋ Papawu ame tye i polo. “Kur itam wunu ni abino me weyo cik kede kop odwarpiny; mom abino me weyogi, ento me cobogi acoba. Ateni akobbiwu ni, ituno ka polo kede lobo bino tum oko, tunnoro acel, onyo wen nukuta moro acel me cik mom bino rwenyo, ituno ka kop luŋ ocobere kakare. Doŋ ba, dano ame bino miyo cikkoro acel atidi doko legelege, kun pwonyo kede jo amannono, obino lwoŋe dano atidi i loc me polo; ento dano ame gwoko, kun pwonyo kede jo, obino lwoŋe dano adwoŋ i loc me polo. Pien akobbiwu ni, ka wun mom kitewu atira akato opwony-cik kede Oparicayo, mom ibino donyo wunu i loc me polo. “Doŋ iwinyo wunu kop a rik okobbi jo acon ni, ‘Kur inek; ŋat ame neko nek myero ŋolle kop.’ Ento an okobbiwu ni, ŋat acel acel ame akemo omako i kom ominnere myero ŋolle kop: dano ame yeto ominnere ni, ‘Yin ababaŋ’ myero atera i nyim okiko, aco dano ame yeto ominnere ni, ‘Imiŋ’ myero abola i mac me Geena. Pi mannono, ka ikelo motti meri i nyim keno me lam, eka ite po i kuno ni ominni tye kede kopporo i komi, wek motti-nono koŋ doŋ kuno i nyim keno lam, yin idok cen, ige notte wun ominni, eka ite dok wot miyo motti me lam. Mer oyotoyot wun kede dano a mito pidi, ame pwod itye wunu kede i yo, me dano a pidi-ni kur teri i nyim aŋolkop, aŋolkop te miyi baŋ cirikale teri i buc. Ateni akobbi ni, mom ibino ya i kuno, ituno ka iculo ducu, ame cente moro mom orem. “Dok iwinyo wunu kop a rik okobo ni, ‘Kur icod cot.’ Ento an akobbiwu ni, dano acel ame neno dannoro te gomo pire, doŋ otyeko code kede oko i cunye. Ka waŋi tuŋ cem en amii ipoto i bal, kole oko, ibole kan abor: pien twara ka irwenyo dul me komi moro acel, kato ame kono obolo komi ducu alutu i Geena. Ce ka ciŋi tuŋ cem en ame mii ipoto i bal, ŋole oko, ibole kan abor, twara ber ka irwenyo dul me komi moro acel, kato ame kono iwoto kede komi ducu alutu i Geena. “Dok yam daŋ okobo ni, ‘Dano moro ame ryemo dako mere, ber mie waraga me keto nyom.’ Ento an akobbiwu ni, dano acel acel ame ryemo cege, kono pi kop me coco keken, nwoŋo omie eeodo cot; dok dano ame nyomo dako ame cware oryemo, en daŋ ocodo cot. “Dok daŋ yam iwinyo wunu kop a rik okobbi jo acon ni, ‘Kur ikwoŋ kwoŋ me goba, ento cob kwoŋŋi ducu baŋ Rwot.’ Ento an akobbiwu ni, kur ikwoŋ kwoŋoro, kede polo, pien en kom me loc Obaŋa, onyo kadi kede lobo, pien en ka teno tyene, onyo kede Jerucalem, pien en boma Abaka adwoŋ. Daŋ kur ikwoŋ kede wii, pien yin mom itwero loko yerroro te doko atar aŋar acol. Ento kop mewu myero obed ‘Ee ta’ onyo ‘Pe’; pien ame kato mano oko ya i baŋ Arac. “Doŋ iwinyo wunu kop a rik oko bo ni, ‘Waŋ oculo i wan, lak oculo i lak.’ Ento an akobbiwu ni, kur igeŋ dano dano arac; dano ame obapo lemi tuŋ cem, lokke tuŋ ocele daŋ obapi; dano ame mito pidi me eter kanyi meri, jalle anaka kotini daŋ. Dano ame odii ni iwot wunu kede wot me mairo acel, luny wot kede mairo aryo. Dano ame kwai, mie; dano ame mito koporo ginnoro me banya baŋi, kur itwonne. “Dok iwinyo wunu kop a rik okobo ni, ‘Mar dano wadwu, idag akworri.’ Ento an akobbiwu ni, mar wunu okworwu, kwa wunu Obaŋa pi jo ame wunuwu, me ite doko wunu itino a Papawu ame tye i polo. Pien en mio cennere donnyo baŋ areco kede o abeco daŋ, dok mio kottere cwe baŋ jo a kitegi atir, anaka baŋ jo a mom kitegi atir daŋ. Pien ka imaro wunu jo a marowu, kara ibino nwoŋo wunu iye pwoccene? Ora-ocoro mom daŋ timo amannono? Kara ka imoto wunu ka omegowu keken, ŋo aber ame doŋ itimo wunu akato jo ocele? Orok a pe ŋeo Obaŋa mom daŋ timo amannono? Wun bed wunu jo ocwiny acalo Papawu a tye i polo daŋ ocwiny. “Gwokere wunu, kur iti wunu ticwu me kite atir i nyim jo me gin nen. Ka itimo wunu amannono, mom doŋ ibino nwoŋo wunu mottoro i baŋ Papawu a tye i palo. “Doŋ ba, ka ikonyo ocan, kur ikut bilo apel i nyimi oko con, acalo ogoba timo i kacokere kede i waŋa yo, me jo pakgi. Ateni akobbiwu ni, gin doŋ otyeko gamo motgi oko. Ento yin ka ikonyo ocan, kur imi ciŋi tuŋ cam ŋe gin a ciŋi tuŋ cem atimo, wek ikony ocan i muŋ; cite Pappi a neni i muŋ bino miyi mot. “Dok ka itye wunu ka kwayo Obaŋa, kur ibed wunu acalo ogoba, pien gin omaro kwayo Obaŋa kun ocuŋ acuŋa i kacokere kede i akara yo, me jo nengi. Ateni akobbiwu ni, gin doŋ otyeko gamo motgi oko. Ento yin ka ikwao Obaŋa, dony i tyelo, eka ite cego doggolani oko, ite kwayo Pappi a tye i muŋ; cite Pappi a neni i muŋ bino miyi mot. “Ka itye wunu ka kwayo Obaŋa, kur ibed wunu duro kop acalo Orok a pe ŋeo Obaŋa; pien gin tamo ni Obaŋa bino winyogi pi lwak kopgi apol. Kur itimu bala gin, pien Papawu ŋeo gin a mitte baŋwu a mom ru ikwae wunu. Doŋ ba, kwa wunu Obaŋa kit man, ni, ‘Papawa a tye i polo, nyiŋi bed me awora. Myero locci doŋ bin, gin ame imito myero tiye, i lobo bala i polo. Miwa tin cam mewa me tin; timwa kica pi bannyi i baŋwa, acalo wan daŋ otimo kica baŋ jo a tye kede bannyiwa. Kur imi bitwa, ento ilarwa i baŋ Arac. [Pien loc kede teko kede kwogo obedo meri atwal. Amen.’] Pien ka wun itimo wunu jo kica i bal megi, Papawu a tye i polo daŋ bino timowu kica; ento ka wun mom itimo wunu jo kica, Papawu mom daŋ bino timowu kica i balwu. “Ka ikanyo wunu kec, kur ibed wunu bala ogoba a waŋgi nen myemye, pien gin balo waŋgi ni jo nen ni gin otye okanyo kec. Ateni akobbiwu ni, gin doŋ otyeko gamo motgi oko. Ento yin ka ikanyo kec, wir wii kede moo ilog waŋi daŋ, me kur inen baŋ jo ni ikanyo kec, kono ka baŋ Pappi me i muŋ; cite Pappi a neni i muŋ bino miyi mot. “Kur ikan wunu lonyo pirwu kenwu i wi lobo, kan ame nyenye kede nyalli balo oko ni, anaka okwo turo ot te kwalo oko. Ento kan wunu lonyowu i polo, kan ame nyenye kede nyalli mom balo, anaka okwo mom turo ot, te kwalo. Pien kan ame lonyowu bedo iye, cunywu daŋ bedo kuno. “Tara me kom en waŋ; ka waŋi tye boŋo balloro, mio komi luŋ bedo aler. Ento ka waŋi rac, komi luŋ bedo i colpiny. Doŋ ka lero iyii odoko col, collere doŋ rom mene! “Mom tye dano moro a twero tiyi odoŋe aryo; pien bino dago ŋat acel, eka te maro en ocele, onyo bino moko i kom moro acel, eka te cayo en ocele. Pe itwero wunu tic pi Obaŋa kede pi lim. “En omio akobbiwu ni, kur ibed wunu kede par apol pi kwowu, ni ibino camo wunu ŋo, onyo ibino mato wunu ŋo, onyo pi komwu ni ibino ruko wunu ŋo. Kwo pire mom tek kato cam? Kede kom mom pire tek kato ruk? Koŋ inen wunu winy a twarre; gin mom ocoo koti, daŋ mom okao, mom ocoko i dero, ento Papawu a tye i polo pitogi. Wun mom pirwu tek kato gin? Kara ŋa i akinawu ame twero medo bat acel i kom kwo mere pi bedo kede par apol? Doŋ piŋo ibedo wunu kede par apol pi ruk? Tam wunu koŋ pi kalanweka me tim, kite ame gin doŋo kede. Mom owio uci, mom acweo boŋo; ento akobbiwu ni, kadi bed Culeman orukere kede kwogo mere ducu, en mom orukere acalo moro acel i akinagi. Ka Obaŋa ruko lum ame tye i tim, ame bedo ka tin keken, dik i ote bolo oko i keno, en mom bino rukowu akato, wun jo ame iyeewu nok? Pi mannono kur ibed wunu i par apol, ni, ‘Obino camo ŋo?’ onyo ‘Obino mato ŋo?’ onyo ‘Obino ruko ŋo?’ Pien jami magu ducu Orok a pe ŋeo Obaŋa yenyogi; Papawu a tye i polo ŋeo ni ginnogo luŋ mitte baŋwu. Ge wunu koŋ yenyo yo me donyo i loccere kede me nwoŋo kite atira mere, jami magu ducu obino medo baŋwu. Kur ibed wunu kede par apol pi diki, pien ceŋ a diki bino paro pire kene. Nino acel acel cannere rome. “Kur iŋol wunu kop, me wun daŋ kur ŋolliwu kop; pien kodi kop ame iŋolo wunu obino ŋolliwu kede, dok kit gin ame ipimo wunu kede, en ame daŋ obino pimmiwu kede. Piŋo ineno cuŋ kal ame tye i waŋ ominni, aco kono ikoŋ a tye i waŋi ikomi neno loi oko? Onyo itwero kobo ominni niŋo ni, ‘Wek akwany cuŋ kal a tye i waŋi oko’, a kun yin twon ikoŋ tye oyimere i waŋi? Yin agoba, koŋ ige kwanyo ikoŋ a tye i waŋi, eka ite doŋ neno aber me kwanyo cuŋ kal a tye i waŋ ominni. “Kur imi wunu gin acil baŋ gwogi, daŋ pe ibolu tiggiwu me wel i nyim punni, me gin kur nyon piny i tyengi, te dok lokere, tojowu. “Kwa wunu, obino miyowu; yeny wunu, ibino wunu nwoŋo; twom wunu kika, obino yabbiwu. Pien dano acel acel ame kwao, omie, ŋat a yenyo, nwoŋo; ŋat a goo doggola oyabbe kika. Kara ŋa i akinawu, ka atin okwae ogati, lunyo miye gweŋ? Onyo ka okwae rec lunyo miye twol? Ka wun jo areco iŋeo miyo itinowu mot abeco, Papawu a tye i polo mom doŋ bino kato meicel imiyo jami abeco baŋ jo a kwae? Doŋ ba, gin luŋ ame imito wunu ni jo timwu kede, wun daŋ tim wunugi amannono, pien man en cik a Muca kede pwony odwarpiny. “Dony wunu i doggola adiŋ, pien yo a woto i to lac, dok ber, jo ame lubo pol. Pien doggola me kwo diŋ, yo a woto iye daŋ rac, jo a bea iye nok. “Gwokere wunu i kom odwarpiny ame ogoba, ame gin bino baŋwu kun orukere bala rommi, ento oger i yigi bala epet. Ibino wunu ŋeyogi i kom nyiggi. Olok opwono i kom oryaŋ? Ibuu opwono i kom ocokocok? Amannono yat acel acel aber nyako nyige abeco, ento yat arac nyako nyige areco. Yat aber mom twero nyako nyige areco, dok yat arac mom twero nyako nyige abeco. Yat acel acel a mom nyako nyige abeco, otoŋo, obolo i mac. Pi mannono ibino wunu ŋeyogi i kom nyiggi. “Mom ni dano acel acel ame lwoŋa ni, ‘Rwot, Rwot,’ en a bino donyo i loc me polo, ento kono dano ame tio gin a Pappa a tye i polo mito. I nino-nono jo apol bino kobba ni, ‘Rwot, Rwot, wan yam mom orabo kop Obaŋa i nyiŋi? Wan yam mom oryemo cen i nyiŋi? Mom wan otio tic atek adoŋo apol kede nyiŋi?’ Cite i kare-nu abino kobbigi ni, ‘Anaka cene an mom aŋeowu gira. Wot wunu teŋe i nyima, wun otim tim areco!’ “Pi mannono, dano acel acel ame winyo koppa, daŋ te tiyo, bino rom aroma kede dano ame aryeko, ame agero ode i kom lela. Doŋ ka kot ocwe, alele omol, yamo okuto, obukoro i ot-tu kede teko, naka ot mom orette, pien acakki tere onwoŋo ocibo i kom lela. Ento dano acel acel a winyo koppa, mom te tiyo, en rom aroma kede dano ame amiŋo, a rik ogero ode i kwoo. Doŋ ka kot ocwe, alele omol, yamo okuto, obukoro i ot-tu kede teko, ot orette, orette orwop.” Ame Yecu doŋ otyeko kobo kop magu luŋ, lwak owuro pwonnyere atek, pien opwonyogi acalo ŋat a tye kede twer, mom acalo opwony-cikgi. A doŋ en oluŋere piny kun oya i wi kidi, lwak ecipan rik lube, cite nen adobo moro obino baŋe, orumo piny kun kobo ni, “Adwoŋ, ka imito, itwero lonya.” Yecu te ryeyo bade, te gude, kun kobo ni, “Ee, amito, lonyere giri.” Cucuttono dobo mere te lony oko. Yecu te cike ni, “Winy ba, kur ikob i dano moro, ento wot giri, inyutte keni baŋ alamdog, imi mot a yam Muca ociko, obed anyut bangi.” A doŋ Yecu odonyo i Kapernaum, adwoŋ me cirikale te bino baŋe, obako doge kun kobo ni, “Adwoŋ, amirona tye obuto piny i ot, too akwea kom omake, ocire atek meicel.” En te kobbe ni, “An awot caŋe.” Adwoŋ cirikale te gamo ni, “Adwoŋ, mom oporre yin idonyo i oda; twara ikobo ka kop keken, amirona bino can. An daŋ a dano ame oloo aloa, daŋ atye kede cirikale ame aloogi. Ka akobbi moro ni, ‘Woti’, en woto; onyo moro ocele ni, ‘Biye’, en bino; dok ka akobo opiina ni, ‘Ti man’, en tio.” Yecu ka owinyo kop man, owuro meicel, okobbi jo a lube ni, “Ateni akobbiwu ni, pe ru anwoŋo iyee a rom man, baŋ dano moro i Icrael. Akobbiwu ni jo apol bino ya i tuŋ kide kede tuŋ to, gin bino bedo piny i dog cam karacel kede Iburaim, kede Icaka, kede Yakobo i loc me polo, ento otino me loc en ame dok obino bolo i colpiny a tye oko; kuno bino bedo iye koko kede kayo lak.” Eka Yecu te kobbi adwoŋ cirikale ni, “Wot giri, obed baŋi acalo iyeeni tye kede.” Amiro mere te caŋ oko i caanono ikome. Yecu odonyo i ot a Petero, te neno maro mere obuto, kun tye kede lyeto adwoŋ i kome. En omulo ciŋe, lyeto oket i kome, te ya malo, konyogi. Otyeno okelo baŋe wegi cen areco; en te ryemo cen ka i kop keken, te caŋo jo luŋ ame komgi lit, me kop a yam obino i dog adwarpiny Icaya cobere kakare, ni, “En otero gorowa, oyeo toowa.” Ka Yecu oneno lwak jo ecipan ogure dyere, en te kobo ni, “Owot wunu loka ca.” Apwony-cikkoro te bino kobbe ni, “Apwony, an abino lubi i kan ame ibino wot iye luŋ.” Yecu odok iye ni, “Ekwe tye kede gorogorogi, winy daŋ tye kede udigi, ento wot a dano mom tye kan ame epyelo iye wie.” Dano ocele i akina jo mere alube okwae ni, “Rwot, koŋ iweka awot ayik pappa.” Yecu te gamo ni, “Yin luba, wek jo oto yik jo oto wadgi.” En odonyo i yee, jo mere a lube te wopo yore. Cutocuto pii ocako twomere atek i dye nam, omio yee te mito lwiny oko i te pii; aco en onwoŋo onino oko. Gin obino baŋe ote coye okobo ni, “Rwot, larwa; oto oko!” En te kobbigi ni, “Kara piŋo ilwor wunu, wun jo ame iyeewu nok?” En te ya, te juko yamo kede nam, nam te liŋ mot. Omio jo-nu owuro kun okobo ni, “Man kara kit dano aŋo ame yamo kede nam-gu winyonie?” Ame en doŋ otuno loka ca, i lobo a jo Geraca, jo aryo ame wegi cen areco te rwatte kede, kun oya i tuŋ wi lyele, oger atek ateka, ame ŋattoro mom twero beo i yo nono. Gin te redo ni, “Yin Wot Obaŋa, kara ilaro ŋo kedwa? Ibino me wunowa a kare mom ru oromo?” Onwoŋo lwak puno ecipan tye a cem kan a bobor kedgi. Cen areco te bako doggi baŋe ni, “Ka iryemowa, cwawa i lwak puno.” En te kobbigi ni, “Wot wunu.” Gin te ya pikere iyi punni; lwak puno luŋ obelle i nwec i kor kidi, ote poto i nam, ote mwonyere oko i pii. Okwat te riŋo oko, otuno i boma, ote tito pi gin ducu ame otimere, anaka kede kop i kom jo a yam gin wegi cen areco. Omio jo ducu oya i boma-nono, ociro me rwatte kede Yecu; ka onene, ote bako doggi ni myero ya oko i lobogi. En odonyo i yee, oŋolo loka ca, obino i paco turgi Ote kelo baŋe dano ame two too me akwea kom, kun opyelo i wi tanda. Yecu ka oneno iyeegi, te kop kede atwo ni, “Di cunyi, awobi; balli doŋ oweko oko.” Nen, jo mogo ame gin opwony-cik, te kop i yigi ni, “Dano man oyeto Obaŋa.” Yecu daŋ te ŋeyo tamgi oko, te penyogi ni, “Piŋo itamo wunu tam arac i cunywu? Kara ayottere mene, ka akobo ni, ‘Balli doŋ oweko oko,’ onyo ni, ‘Ya, iwoti?’ Ento man me miyowu ŋeyo ni, Wot a dano tye kede twer i lobo me weko bal”, te doŋ kobbi atwo ni, “Ya, itiŋ itandani, iwot giri paco.” En te ya dok paco. Ka lwak oneno, lworo omakogi, opako Obaŋa ame omio twer a rom mano baŋ jo. Ame Yecu doŋ oya oko i kuno, oneno lo moro a nyiŋe Matayo obedo piny i ka rayo ocoro; okobbe ni, “Luba.” En oya, olube. Ame Yecu obedo i dog cem i ot, nen, ora-ocoro apol kede obalo obino, obedo piny karacel i Yecu kede jo mere a lube. Oparicayo tekki neno man, ote penyo jo mere a lube ni, “Kara piŋo apwonywu cemo karacel kede oraoco-ro anaka obalo-gu?” Ka Yecu owinyo, te kobo ni, “Jo a komgi yot mom mito dakatal, kono ka jo a komgi lit. Wot ipwonyere wunu te kop me, ‘Amito kica, mom gin oŋolo.’ An mom abino me cwano jo a kitegi atira, ento obalo.” I kare ca jo a lubo Lakana obino baŋ Yecu, te penye ni, “Kara piŋo wan kede Oparicayo okanyo kec, aco jo a lubi mom kanyo kec?” Yecu te gamo doggi ni, “Owote a ŋat a nyom kumo a kun en anyom tye baŋgi? Kare bino tuno ame obino kwanyo anyom oko i baŋgi, eka gin te kanyo kec. Mom tye dano moro ame dapo dul boŋo anyen, ame pe ru olwoko, i kom en ame doŋ oti, pien dul boŋo ame odapo kede-ni lunyo telo boŋe-nu, waŋe te yec medde ameda. Dok mom opiko koŋo anyen i ocoe acon; ocoe yec oko, koŋo te ony, ocoe te balle oko; ento jo piko koŋo anyen i ocoe anyen, en a mio gin aryo ducu ote bedo aber.” Ame Yecu tye ka kobo kop man baŋgi, adwoŋoro te tuno baŋe, te ryebere i nyime kwaye ni, “Nyara pwod oto atoa amanni; ento biye iket ciŋi i kome, cite kwo mere bino dwogo.” Yecu te ya lube, kede jo a lube. Dako moro a nwaŋ otwo too me kwer remo mwakki apar wie aryo, te bino i tuŋ ŋee, te gudo ayayak me boŋo mere; pien en otamo kene i yie ni, “Ka agudo ayayak me boŋo mere keken, abino caŋ gire.” Yecu olokere, te nene, te kobo ni, “Di cunyi, nyara, iyee meri ocaŋi oko.” Cite dano-nu te caŋ oko cakere i caa-nono. Yecu odonyo i ot adwoŋ-ŋu, te neno jo a kuto nyamulere kede lwak ame awo, te kobo ni, “Dony wunu oko; pien nya-ni mom oto ento onino anina.” Gin onyere meicel. A doŋ oryemo lwak, odonyo oko, en te mako ciŋ nyan-nu, te ya oko. Kop man rwoŋe te winyere i lobonaca luŋ. Ame Yecu doŋ oya i kuno, jo aryo ame otowaŋ te lube, kun oredo ni, “Timwa ber, Akwar Daudi.” Ka en doŋ odonyo i ot, otowaŋ-ŋu te bino baŋe, Yecu te penyogi ni, “Wun iye wunu ni an atwero timo man?” Gin odok iye ni, “Ee ta, adwoŋ.” En te mumulo waŋgi kun kobo ni, “Myero timere baŋwu i kite acalo iyeewu tye.” Waŋgi daŋ te yabere oko. Yecu te cikogi atek ni, “Myero inen wunu ni dano moro kur oŋeo.” Ento ka gin okato oko, olalo rwoŋe i lobonaca luŋ aluŋa. Ame gin doŋ aya, awot oko, jo te kela baŋe lo moro a lebe oto, won cen arac. A doŋ Yecu oryemo cen oko, alebeoto-nu te cako kop, omio lwak owuro, kun okobo ni, “Anaka cene gin acalo man pe ru onen i Icrael.” Ento Oparicayo te kobo ni, “En oryemo cen pi twer adwoŋ me cen.” Yecu owoto omano boma apapat kede akina myere luŋ, kun pwonyo i kacokere megi, kede rabo amut aber me loc Obaŋa, kede caŋo too anaka goro ducu. Ka en oneno lwak, ocone meicel, pien otye ka wunogi, olal ata acalo rommi ame akwatgi mom. Eka en te kobbi jo a lube ni, “Kac bup, ento jo a kao nok Pi mano, kwa wunu Won poto atek me cwa otic i ka kaccere.” Olwoŋo jo mere a lube apar wie aryo baŋe, te miyogi twer me ryemo cen areco, kede me caŋo kwon too ducu anaka goro-gu. Nyiŋ okwena apar wie aryo-nono gin ene: me agege Cimon, ame alwoŋo ni Petero, kede Anderiya ominnere; Yakobo wot a Jebedayo gin kede ominnere Lakana; Pilipo kede Bartolomayo; Tomaci kede Matayo ara-ocoro; Yakobo wot a Alipayo, kede Tadayo; Cimon me eryoŋet apyem i abumente, kede Juda me Keriot, ame cen oketo erupe i kom Yecu. Jo apar wie aryo-nu Yecu oorogi kun cikogi atek ni, “Kur iwot wunu iyo Orok, kur idony wunu i boma Ocamaria daŋ; ento wot wunu ka baŋ rommi a yam orwenyo me doggola Icrael. Ka iwot wunu, rabu kop kun ikobo wunu ni, ‘Loc me polo doŋ onoko ceggi.’ Caŋ wunu otwo, cer wunu jo oto, lony wunu odobo, ryem wunu cen; omiowu nono, wun daŋ mi wunu nono. Kur iter wunu jabu, onyo ryal onyo mola me arwaka i del pyerwu, kadi icao me wot, kadi boŋŋi aryo, kadi war tyen, kadi abiro; pien atic myero mi cammere. I boma onyo i paco ducu ame ibino donyo wunu iye, peny wunu dano a tye iye, a kite mere ber, bed wunu baŋe ituno ka ibino ya wunu i kuno. Ka idonyo i ot, mote wunu. Ka ot-tu myero, kwaye wunu kuc; ento ka mom myero, wek kucwu dwog baŋwu. Dano a mom bino jolowu, onyo a mom winyo kopwu, a doŋ iya wunu i ot-tu onyo i boma-nu, teŋ wunu apua i tyenwu oko. Ateni akobbiwu ni, i nino me ŋolo kop can me Codoma kede Gomora bino bedo itikatika, kato me boma-nono. “Nen ba, an acwaowu bala rommi i kin epet; doŋ bed wunu i ryeko bala twol, dok aboŋo bal bala amam. Ento gwok wunu jo: pien obino terowu i okiko, obino pwodowu i del i kacokeregi, obino terowu i nyim oloc kede i nyim obakki-gu pira, me kobo kop me caden baŋgi kede baŋ Orok. Ka ce oterowu i okiko, kur ibed wunu i par apol, ni, ibino wunu dok iye i yo aŋo, onyo ibino wunu kobo niŋo? Pien caa-nono obino miyowu kop ame ibino kobo wunu; pien pe wun en ibino kop wunu, ento Cuny a Papawu en ame bino kop i dogwu. Omego bino miyo omego me aneka, apap bino miyo atinnere, otino bino twarre i kom onywalgi kun miogi me aneka. Jo me rok luŋ bino dagowu pi nyiŋa. Ento ŋat ame kanyakino ituno i agikki, en bino larre. Ka olibowu i boma man, riŋ wunu i boma ocele; pien ateni akobbiwu ni, pe ibino tyeko wunu boma ducu me i Icarel ame nwoŋo Wot a dano mom ru odwogo. “Ŋat a pwod pwonyere apwonya mom bedo adwoŋ akato ŋat a pwonye, anaka kadi opii mom bedo adwoŋ akato adwoŋŋere; daŋ rom kede ŋat ame opwonyo ka odoko acalo ŋat a pwonye, dok daŋ rom opii ka odoko acalo adwoŋŋere. Ka gin olwoŋo won ot ni Beeljebul, jo paco mere obino lwoŋogi kede nyiŋ arac a rom mene? “Pi mannono, kur ilworgi wunu; pien mom tye ginnoro ame owumo a mom obino yabo kannaler, kadi gin ame okano a mom bino ŋeye. Kop ame an akobbiwu i piny acol, kob wunu i ceŋ; dok gin ame amuŋŋiwu i yitwu, rab wunu koppere i wi biye. Kur ilwor wunu jo ame neko kom ento mom otwero neko tipo; ento twora ilwor wunu Obaŋa ame tye kede twer me neko tipo kede kom i Geena. “Acur aryo mom ocato cente apar? Ento mom tye moro i akinagi ame poto piny a kun Papawu mom ŋeo. Ento wun anaka yer wiwu okwanogi iweŋ. Doŋ kur ilwor wunu; pirwu tek meicel akato acur apol. “Pi mannono, dano acel acel ame bino tuco nyiŋa i nyim jo, an daŋ abino tuco nyiŋe i nyim Pappa ame tye i polo; ento dano acel acel ame bino kwera i nyim jo, an daŋ abino kwere i nyim Pappa ame tye i polo. “Kur itam wunu ni abino me kelo kuc i lobo; mom abino me kela kuc, ento pala me romo. Pien an abino poko akina dano kede pappere, dok nyako kede tottere, kede ci-wod gin kede tattere. Dok okwor a dano bino bedo jo me paco mere. Dano ame maro pappere onyo tottere kata mom romo bedo danona; kede dano ame maro wode onyo nyare kata, mom daŋ romo bedo danona. Dano a mom yeo yataria mere, te lubo kede ŋea mom romo bedo danona. Dano ame onwoŋo kwo mere, bino rwenyo kwo mere arwenya; ento ŋat ame rwenyo kwo mere pira, bino nwoŋo. “Ŋat ame jolowu, nwoŋo ojolo an; ŋat a jolo an, ojolo ŋat ame oora. Ŋat ame jolo adwarpiny pi nyiŋ adwarpiny, bino gamo mot acalo adwarpiny; ŋat ame jolo dano a kite atira pi nyiŋ dano a ki te atira, bino gamo mot acalo dano a kite atira. Dok ŋattoro ame bino miyo ikopo me pii amata aŋic baŋ ŋat acel i akina jo-ni, pien en obedo dano a luba, atittiwu ateni ni, mot mom bino rwenyo i baŋe kadi acelloro.” Ame Yecu doŋ otyeko ciko jo mere apar wie aryo, en oya i kuno, owoto i pwony kede i rabo kop i paccigi. Ka Lakana owinyo pi tic a Kricito a kun en tye i ot kol, eka te ooro jo mere a lube me penyo ni, “Yin dano abino ca, onyo okur en ocele?” Yecu odokkigi iye ni, “Wot ikobbi wunu Lakana gin ame iwinyo wunu kede gin ame ineno wunu: otowaŋ waŋgi oyabere, jo oŋwalo owoto, kom odobo olony, jo a yitgi odiŋ owinyo, jo oto ocerogi oko, dok orabbi ocan amut aber. Dano a tammere mom oballe i koma nwoŋo tye kede winyo.” Ame gin adok oko, Yecu ocako kop kede lwak kop i kom Lakana, ni, “Yam iwoto wunu i tim ka neno ŋo ba? Ka neno ogada a yamo yeŋo bo? Kara iwoto wunu ka neno ŋo ba? Ka neno dano ame ruko boŋi abeco? Nenu ba, jo a ruko boŋi abeco bedo i pacci a rwode. Kara doŋ iwoto wunu piŋo? Ka neno adwarpiny? Ee ta, akobbiwu ni, ŋat ame kato adwarpiny. Man en ŋat a rik ocoo pire ni, ‘Nen, acwao aorra i nyimi, ame bino gero yo i nyimi.’ Atittiwu ni, i akina jo ame mon onywalo, mom tye dano moro ame kato Lakana i dit; ento ŋat atidi meicel i loc me polo dit kato en. Ya i kare a Lakana ituno atot onyoni, loc me polo olaro kede teko, jo atek mao gigi. Pien odwarpiny luŋ anaka buk me cik orabo kop ituno kede naka i kom Lakana; cite ka itwero wunu ye, Elia a myero bin ennono, ŋat a tye kede yit me winyo, myero winy. “Kara abino poro jo me kare man kede ŋo? Gin orom kede itino ame bedo i cuk, ame lwoŋo otino wadgi kun okobo ni, ‘Wan okuttiwu nyamulere, wun mom imyelo wunu; owerriwu wer lyel, wun mom ikok wunu’. Pien Lakana obino kun mom camo, mom mato daŋ, gin okobo ni, ‘En tye kede cen’. Wot a dano obino ame camo dok mato daŋ, gin dok okobo ni, ‘Nen dano owor kede amero, awot ora-ocoro kede obalo.’ Ento ryeko Obaŋa nen atir ni tye kakare pi ticcere.” Icennere Yecu te ero kop akemo i kom boma mogo kan ame etio iye ticcere atek adoŋo, pien okwero ŋut. “Ibino neno can, yin Korajin! Ibino neno can, yin Betecaida! Pien kono tic atek adoŋo ame otio baŋwu, yam otio i Turo kede Cidon, kono gin oŋut con kun obedo i boŋo cola kede buru. Ento akobbiwu ni, can a Turo kede Cidon bino bedo itikatika i kare me ŋolo kop, katowu. Kede yin Kapernaum, obino tiŋi malo anaka i polo bo? Pe gire; kom obino dwoki piny naka i Kadec. Pien kono tic atek adoŋo ame otio baŋwu yam otio i Codoma, kono ori naka tin. Ento akobbiwu ni, can me Codoma bino bedo itikatika i nino me ŋolo kop, kato meri.” I kare-nono Yecu te kobo ni, “Apwoyi Pappa, Rwot me polo kede lobo, pien ikano kop magi baŋ jo aryek a ŋeo piny, iyabo baŋ itino atino. Eyo, Pappa, pien cunyi opwoo amannono. Pappa otyeko jalla jami bec abeca; mom tye ŋattoro ame ŋeo Wod, kono ka Papa keken, onyo ame ŋeo Papo kono ka Wod keken, kede dano ame Wod mito nyuto Papo baŋe. Biye wunu baŋa jo ducu ool kede ame yee onuo, an abino weyo korwu. Ryoŋ wunu lodina i ŋutwu, pwony wunu kitena; pien an awor, daŋ amwol i cunya, cunywu bino nwoŋo weo. Pien lodina yot, dok yecca mom pek.” I kare-nono Yecu owoto kun ŋolle i poto bel i nino me cabit. Onwoŋo kec aneko jo a lube, gin te ero rito wit bel, te mwodo. Oparicayo ka oneno, ote kobbe ni, “Nen, jo a lubi otimo gin ame cik okwero ni jo kur ti i ceŋ cabit!” En te gamo doggi ni, “Wun ce mom ikwano wunu gin ame nwaŋ Daudi otio ka rik kec oneke, kede jo a rik tye karacel kede? Kite ame en odonyo kede i ot Obaŋa, te camo ogati ame oketo i nyim Obaŋa, a yam cik kwero ni en kur cam, kadi jo ame tye karacel kede, kono ka olamdog keken? Kede onyo mom ikwano wunu i cik ni i ceŋ cabit olamdog i ot Obaŋa daŋ balo cabit, cite mom onwoŋo kop? Ento an akobbiwu ni, gin adwoŋ akato ot Obaŋa tye kano Kono ce iŋeo wunu te kop man, ni, ‘Amito kica, mom gin oŋolo’, kono mom iŋolo wunu kop oloo jo a balgi mom. Pien Wot a dano en rwot me cabit.” Yecu oya i kuno obino i kacokere megi. Kuno onwoŋo tye iye dano ame bade omito. Jo a mito pide te penye ni, “Cik ye ni caŋ dano i cen cabit?” En te penyogi ni, “Kara ŋa i akinawu, ka tye kede romo acel, eka romo-nu te poto oko i bur i ceŋ me cabit, en mom bino mako, te wayo oko? Dano mom pire tek meicel akato romo? Pi mannono cik ye ni tim gin aber i ceŋ cabit.” Eka en te kobbi lo-nu ni, “Rye badi oŋ.” En oryeo bade, te caŋ oko, te doko aber arorom i tuŋ cel. Oparicayo te kato oko, ote poro kop i kome, kite a myero oneke kede. Ka Yecu oŋeo, te ya oko i kuno. Jo apol te lube, daŋ en te caŋogi ducu, te jukogi ni, kur omi jo ŋe. Man otimere me kop Obaŋa a rik obino i dog adwarpiny Icaya cobere kakare, ni, “Nen amirona ame ayero, ame amaro, cunya yom i kome. Abino keto Cunya bed i kome, en bino tero kwena me ŋolo kop atir baŋ Orok. En mom bino da, mom bino redo areda, mom obino winyo dwone i waŋa yo; en mom bino turo ogada ame okak, dok mom bino neko uci tara a pwod aduny, ituno ka en omio kop ame oŋolo atir oloo lobo; ento Orok bino geno gin aber pi nyiŋe.” Eka ote kelo atowaŋŋoro a tye kede cen arac, ame lebe oto baŋ Yecu. Ocaŋe, omio alebeoto oloko, daŋ te neno piny. Lwak jo ecipan owuro kun okobo ni, “Kara man mom akwar Daudi?” Ento Oparicayo ka owinyo te kobo ni, “Dano man ryemo cen pi twer a Beeljebul, adwoŋ me cen, keken.” Ento en oŋeo tamgi oko, te kobbigi ni, “Kare ducu ka loc opokere yie aryo, lobo mere balle oko, dok kare ducu ka paco onyo ot opokere yie aryo, mom cuŋ. Ka Catan ryemo Catan, en nwoŋo opokere yie aryo; kara loccere bino cuŋ iŋo? Dok ka an aryemo cen pi twer a Beeljebul, kara itinowu ryemo pi twer aŋa? Pi manno gin bino ŋolliwu kop. Ento ka an aryemo cen pi Cuny Obaŋa, loc Obaŋa doŋ obino baŋwu. Dano twero donyo i ot a ŋat atek niŋo, a mom koŋ ogeo tweyo dano atek-ku, eka te yako ode. Dano a mom tye tuŋ baŋa en akworra, dok dano a mom coko karacel keda, en keto aketa. Pi mannono, akobbiwu ni, bal acel acel a jo tio kede ayet ducu ame oyeto kede Obaŋa, obino timogi iye kica, ento ayet ame oyeto kede Cuny Acil mom obino timo iye jo kica. Dok dano ame kobo kop arac i kom Wot a dano obino timo kica, ento dano ame kobo kop arac i kom Cuny Acil mom obino timo kica, kadi i kare man, onyo i kare a bino i nyim. “Myero iŋe wunu ni yat aber nyige daŋ beco, yat arac nyige daŋ reco; pien yat ŋeye I kom nyige. Wun itino ororo, itwero wunu kobo kop aber nino, ame kono wun jo areco? Pien kop ame ocokere i cunyi, en ame dog daŋ kobo. Dano aber kwanyo gin aber i akina jami abeco ame en okano dano arac kwanyo gin arac i akina jami areco ame en okano. Akobbiwu ni kop ducu ame jo kobo aboŋo gwokere iye, obino piddigi pire i nino me ŋolo kop; pien kop ame ikobo bino miyo iloo kop, dok kop ame ikobo bino miyo kop loyi.” Jo mogo i akina opwony-cik kede Oparicayo te kobbe ni, “Apwony, wan omito neno anyuttoro a ya i baŋi.” En te gamo ni, “Lwagi jo areco kede ocod cot-ti yenyo anyut, ento mom obino miyogi anyuttoro, kono ka anyut adwarpiny Yona keken. Pien acalo Yona rik otyeko nino adek, dyeceŋ kede dyewor, iyi rec, kite-nono Wot a dano daŋ bino tyeko nino adek, dyeceŋ kede dyewor, i lobo. Jo Nineve bino cuŋ karacel kede lwagi jo me kare man, i kare me ŋolo kop, te miyo kop loyogi: pien gin rik oŋut pi kop a Yona orabo, cite nen, gin adwoŋ akato Yona tye kan. Abaka a dako me tutuŋ anyarolum bino cuŋ karacel kede lwagi jo me kare man i kare me ŋolo kop, te miyo kop loyogi; pien en otuno iya i agikki me lobo pi winyo ryeko a Culeman, koŋ inen, gin adwoŋ akato Culeman tye kan. “Ka cen arac oya i kom ŋattoro, en woto mano kabedo a pii mom iye kun yenyo ka weo; naka mom onwoŋo. En te kobo ni, ‘Adok gira i oda kan a rik aya iye.’ Ka otuno, en onwoŋo ŋattoro mom iye, oweo yie acil, ame oyiko aber. En dok te wot omo cen ocele abiro a gin doŋ reco akate, gin donyo bedo kuno; icennere dano man bedo arac akato a yam con. Bino bedo amannono daŋ baŋ lwagi jo areco me kare man.” Ka rik en pwod tye ka kop kede lwak, nen, tottere kede omego mere onwoŋo ocuŋ oko, kun omito kop kede. Dano moro te kobbe ni, “Neno, totti kede omegoni tye ocuŋ oko, omito kop kedi.” Ento en odok i dano-nu ni, “Kara totta en ŋa? Omegona gin jo mene?” Te ryeyo bade tuŋ baŋ jo a lube kun kobo ni, “Nenu ba totta kede omegona! Dano a tio gin ame Pappa a tye i polo mito, en ominna, en aminna kede totta.” I nino acel-lu rik Yecu te ya oko i ot, te wot bedo piny i ŋet nam. Lwak ecipan te cokere baŋe; pi mannono en te yito iyi yee, te bedo iye, lwak luŋ te bedo oko i dog nam i wi tela. En te kobbigi kop apol i carokop kun kobo ni, “Lo moro rik owoto ka coyo koti. Ame en doŋ tye ka coc, koti mogo te kir i dye yo, winy te bino-depo oko. Mogo te kir kan obedo lela lela, ame lobo tye iye warawara. Cucuttono ote tu, pien lobo mom tut; ento ka cen oryeny ote two oko, pien lwitgi mom. Mogo te kir i akina oku to, okuto te lot diyogi oko. Mogo te kir gigi i lobo aber, nyiggi te cek; mogo tyene acel acel ocek iye nyige mia acel, mogo pyerabicel, mogo pyeradek. Ŋat a tye kede yit myero winy.” Jo mere a lube obino baŋe, ote penye ni, “Piŋo ikobo kedgi i carokop?” En te gamo doggi ni, “Wun omiowu ŋeyo muŋ me loc Obaŋa, ento jo ca mom omiogi. Pien ŋat a mere tye obino medde te durre baŋe; ento ŋat a mere mom obino gamo oko anaka gin a tye baŋe. Man en gin omio akobo kedgi i carokop, pien ka gin oneno rom a mom oneno; dok ka gin owinyo rom a mom owinyo kadi niaŋ tere. Cite kop Obaŋa a rik adwarpiny Icaya okobo ocobere kakare i komgi ni, ‘Me winyo, ibino winyo wunu, ento mom ibino niaŋ wunu tere; me neno, ibino neno wunu, ento mom ibino ŋeyo wunu. Pien rok-ki cunygi odoko nwaŋ, yitgi odiŋ oko, mom owinyo aber, waŋgi daŋ omio gigi oko; me kur onen kede waŋgi, kadi winyo kede yitgi, kadi niaŋ i cunygi, kadi dwogo baŋa me acaŋgi.’ Ento wun waŋwu tye kede winyo, pien oneno, yitwu daŋ tye kede winyo, pien owinyo. Ateni, akobbiwu ni, odwarpiny apol kede jo a kitegi atira rik obedo kede keo me neno gin ame wun ineno wunu, ento naka mom oneno, kede winyo gin ame wun iwinyo wunu, ento naka daŋ mom owinyo. “Koŋ doŋ iwiny wunu carokop i kom acoc. Ka dano moro owinyo kop i kom loc Obaŋa eka mom te niaŋ iye, Arac ca bino te kwanyo koti ame ocoo i cunye oko; man en ame i dye yo. En ame ocoo kan obedo lela lela, en dano ame ka owinyo kop, daŋ te gamo cuto kede lelo, ento mom tye kede lwite i yie, te ri ka anokkoro; tekki cannoro adwoŋ obino, onyo awuna, pi koppono, en poto oko cucuttono. En ame ocoo i okuto, en dano ame winyo kop, ento par apol me lobo man kede mito lonyo te diyo kop oko, mom nyak. En ame ocoo i lobo aber, en dano a winyo kop kun niaŋ tere daŋ en nyige nyak atika, moro mia, moro pyerabicel, moro pyeradek.” Te dok kelligi carokop ocele kun kobo ni, “Loc me polo rom aroma kede dano ame ocoo koti abeco i poto mere. Kajo doŋ obuto oko, akworrere te bino, te coyo ekitu i akina kal, eka en te wot gire oko. Ka otu, daŋ te keto nyige, cite te nen iye ekitu. Omiro a won ot te wot baŋe, ote penye ni, ‘Adwoŋ, rik mom icoo koti abeco i potoni? Kara ekitu dok onen iye niŋo?’ En te gamo ni, ‘Mano akwor en otimo.’ Omiro te dok penye ni, ‘Imito owot odoo oko?’ En te kobbigi ni, ‘Pe gire; ka idoo wunu ekitu, mio ibino doyo wunu anaka kal daŋ. Koŋ iwek wunu gin aryo ducu doŋ karacel, ituno ka oromo me akaa. Eka i kare me kac abino kobbi jo a kayo ni. Koŋ ige coko wunu ekitu, itwe wunu me awaŋa, ento kal iony wunu i derona.’ ” Okelligi dok carokop ocele kun kobo ni, “Loc me polo rom aroma kede nyig dek karadali ame dano moro okwanyo te poto i poto mere. En titino akato koti luŋ, ento ka odoŋo bedo adwoŋ a loo dek ducu. Doko twon yattoro a winyi a twarre malo bino gero udigi iye.” Okobbigi carokop ocele ni, “Loc me polo rom aroma kede tobi ame dako ojuko, te rubo i moko a romo dita adek, ituno ka oyenyo ducu.” Kop magi ducu Yecu okobo kede lwak i carokop. Mom okobo kedgi aboŋo carokop, me kop a yam adwarpiny okobo cobere kakare, ni, “Abino yabo doga i carokop, abino rabo kop okano geye acakki piny.” Eka en te weko lwak, te donyo i ot, jo mere a lube te bino baŋe kun okobo ni, “Nyuttiwa carokop me ekitu ame i peto.” En te dok iye ni, “Ŋat ame ocoo koti abeco en Wot a dano; poto en lobo ducu, koti abeco gin itino me loc me polo, ekitu gin itino Arac. Akwor ame ocoogi en Catan; kac en agikki piny, okac gin omalaika. Acalo ogwaro ekitu, obolo owaŋo i mac, bino bedo kittono i agikki piny. Wot a dano bino oro omalaika mere, gin bino coko i te loccere jami ducu a mio jo poto i bal, kede jo ducu ame otim tim areco, te bologi i keno me mac, kan ame bino bedo iye koko kede kayo lak. I karenono jo ame kitegi atira bino ryeny bala cen i te loc a Papagi. Ŋat ame tye kede yit, myero winy. “Loc me polo rom aroma kede lim ame okano i poto, ame dano onwoŋo, te dok wumo oko; eka pi yomcunye, en te wot cato jami mere luŋ, te wilo poto-nu oko. “Dok loc me polo rom aroma kede acat-wil a con obedo ka yenyo tiggi abeco me wel, eka te nwoŋo tigo acel ame wellere tye malo meicel, te wot cato jami mere ducu, te wilo tigo-nu oko. “Dok loc me polo rom aroma kede bwo ame oryeo i dye nam, ame ocoko rece ame kwongi papat. Ka doŋ opoŋ, jo wao, te kelo i wi tela, ote bedo piny me yero en abeco mege coko i dwoŋ, ento en areco mege ote bolo oko. Bino bedo kite-nono i agikki piny. Omalaika bino bino, ote poko jo areco oko i akina jo a kitegi atira, eka te bologi i keno me mac, kan ame bino bedo iye koko kede kayo lak.” Yecu te penyogi ni, “Doŋ ityeko niaŋ wunu i kopi luŋ?” Gin te gamo ni, “Ee ta.” En te kobbigi ni, “Pi mannono, apwony-cikkoro ame nwoŋo doŋ opwonyo pi loc me polo, rom aroma kede won ot ame okelo jami anyen kede acon i akina jami mere a yam ekano.” Ka Yecu doŋ otyeko carokop magi, te ya oko i kuno, odwogo i lobo turgi, opwonyogi I kacokeregi, omio gin owuro kun okobo ni, “Dano man onwoŋo ryeko man i kwene? Ticcere magi atek adoŋo oya i kwene? Man mom wot apac? Tottere mom nyiŋe Maliam? Kede omego mere mom Yakobo kede Yucepu kede Cimon kede Juda? Dok anaka amego mere ducu mom tye baŋwa kan? Kara dano man dok onwoŋo gin man ducu i kwene?” Cunygi te ya oko i kome. Ento Yecu te kobbigi ni, “Mom tye adwarpinnyoro ame mom oworo, kono ka i lobo me turgi, kede i paco mere.” Daŋ en mom te tiyo ticcoro atek adoŋo kuno, pien onwoŋo iyeegi mom. I kare-nono Kerode aloc owinyo dwon Yecu; te kobbi omiro mere ni, “Man en Lakana Abatija. Ocere oko i akina jo oto, en gin omio teko magi tye ka tic i yie.” Pien Kerode onwoŋo omako Lakana, otweo, te keto i buc pi Kerodia, ci-ominnere Pilipo; pien Lakana rik okobbe ni, “Cik mom ye yin ibed i ci-ominni.” En te mito neko Lakana, ento te lworo lwak, pien gin onwoŋo wore acalo adwarpiny. Doŋ ka nino ame opo iye pi nywalo Kerode oromo, nyaka a Kerodia te myel i nyim jo, te yomoro cuny Kerode; omio te cikke kun kwoŋo akwoŋa ni, ebino miyo jami ducu ame agin-nu bino kwaye. Cite tota a nyan-nu te cupe, en te kwayo ni, “Mia i weer-ri wi Lakana Abatija.” Cuny abaka owaŋ, cite pi kwoŋŋere, kede pi Lakana wele mere, te ciko ni mie; te oro dano, ote ŋolo ŋut Lakana i buc oko, ote kelo wie i weer, miyo baŋ nyako, en te tero baŋ tottere. Jo mere a rik lube te bino tiŋo kome, ote yike; eka ote tero koppere baŋ Yecu. Ka Yecu owinyo, te ya oko i kuno, te wot kede yee kan a jo mom iye; ka lwak owinyo, ote lube kede tyengi a kun gin ya i boma apapat. Tekki eya i yee, ete neno lwak apipim; ocone meicel, te caŋo otwo ame gin okelo. Otyeno jo a lube obino baŋe kun kobo ni, “Kan obedo i dye tim; caa daŋ okato oko, cwa lwak wot i akina myere, me gin will cemgi kengi.” Yecu te gamo ni, “Gin ame miogi owoto mom tye. Wun migi wunu cem.” Gin te gamo ni, “Wan mom otye kede ginnoro kan, kono ka aŋina ogati abic kede rece aryo keken.” En te kobbegi ni, “Kelugi baŋa kan.” Dok en te ciko lwak ni bed piny i modo; omako ogati abic kede rec aryo-nu, oneno malo i polo, okwao iye winyo, onyinyilo, omio ogati baŋ jo a lube; eka jo a lube te miyo baŋ lwak. Gin ducu ocamo, oyeŋ. Ocoko ŋide cem ame oloogi, oromo aditti apar wie aryo ame opoŋ. Jo ame ocamo onwoŋo welgi mito romo co tutumia abic, a kun mom okwano iye mon kede itino. Cucuttono Yecu te ruyo jo a lube me donyo i yee, me gin tel yo, kat loka tuŋ ca, en koŋ ecik lwak. Ka doŋ otyeko ciko lwak, te yito i wi kidi en kene ka kwayo Obaŋa. A doŋ piny oyuto, onwoŋo en tye kuno kene. I kare-nono onwoŋo yee doŋ otyeko kato oko mairo apopol ya i wi tela, kun pii tye apuye, pien yamo onwoŋo abino i tuŋ nyimgi. Dyewor i akina ame gwen akoko, en te bino baŋgi kun awot i wi nam i tyene. Ento ka jo a lube onene kun awot i wi nam i tyene, tipo komgi te ya oko, kun okobo ni, “Man tipo”, pi lworo ote kuko duro oko. Yecu te kop kedgi oyotoyot ni, “Di cunywu, an ennono, kur ilwor wunu.” Petero te gamo doge ni, “Rwot, ka in ennono, cwana me abin baŋi i wi pii.” En te gamo ni, “Biye.” Petero te ya oko i yee, te wot i wi pii kun bino baŋ Yecu. Ka en oneno yamo, te doko alwor oko, daŋ te ero lwiny oko, te redo ni, “Rwot, lara ba.” Oyotoyot Yecu te ryeyo bade, te gamoro en, kun kobbe ni, “Yin dano ame iyee meri nok. Ŋo omii ikalo akala?” Ka doŋ gin oyito iyi yee, yamo te kwe oko mot. Jo ame tye i yee te wore, kun okobo ni, “Ateni, yin Wot Obaŋa atika.” Ka doŋ gin odokoro loka, oyito i wi tela i Genecaret. Jo i kabedo-nu ka oŋee, ote cwayo kwena i kabedo ducu ame ceggi i kuno, ote kelo jo luŋ ame komgi lit. Gin te bako doggi baŋe ni ogud ayayak me boŋo mere keken, eka jo ducu ame ogudo te caŋ oko aber. Oparicayo kede opwony-cik obino baŋ Yecu a kun gin oya i Jerucalem, ote penye ni, “Piŋo joni a lubi mom omako kite a jo adoŋo? Pien ka gin ocem, mom ologo ciŋgi?” En te dok iye ni, “Kara piŋo wun daŋ kitewu omonowu mako cik Obaŋa? Pien Obaŋa rik okobo ni, ‘Wor pappi kede totti’, dok ni, ‘Dano a yeto pappere onyo tottere myero nek oko,’ Ento wun ikobo wunu ni, ‘Ka ŋattoro okobbi pappere onyo tottere ni, Gin a kono akonyi kede doŋ amio oko baŋ Obaŋa, en mom myero wor pappere.’ Pi kitewu imio wunu kop Obaŋa oto nono. Wun ogoba! Adwarpiny Icaya rik okobo aber i komwu ni, ‘Rok-ki wora i doggi nono, cunygi kara bor keda; ento owora nono, pwony ame gin opwonyo obedo kite a dano.’ ” En te cwano lwak baŋe, okobbigi ni, “Winy wunu, daŋ iniaŋ wunu iye. Gin a donyo i dog mom balo jo, kono gin a ya i dog en abalo jo.” Eka jo a lube te bino baŋe kobbe ni, “Mom iŋeo ni Oparicayo yigi owaŋ ka gin owinyo kop ame yin ikobo?” Yecu odok iye ni, “Gin ducu ame opito, ka Pappa i polo mom opito, obino puto oko. Wekgi obedi. Gin otowaŋ ame peo otowaŋ wadgi. Ka atowaŋ peo atowaŋ wadgi, gin aryo ducu obino rette i bur.” Ento Petero te kobbe ni, “Gonnyiwa carokoppono koŋ.” En te kobo ni, “Wun daŋ kara pwod pe iniaŋ wunu? Mom iŋeo wunu ni, jami ducu ame donyo i dog kato i cin-yic, te kato oko? Ento gin ame ya i dog, nwoŋo oya i cuny, mannono balo dano. Pien gin ame oya i cuny, en tam areco, nek, mito mon a jo ocele, coco kwo, bedo caden me goba, ayet. Magu gin gin abalo dano; ento camo cem a mom ologo ciŋ mom balo ŋattoro.” Yecu oya i kuno, owoto i lobo me Turo kede Cidon. Dannoro me Kanaan ame oya i tuŋ kuno obino ame aredo areda ni, “Ama Rwot, akwar Daudi, tima kica ba; nyara tye kede cen, wune meicel.” En mom ogamo dog dan-nu kadi acelloro, omio jo a alube obino baŋe ote kwaye ni, “Ryem dakonu teŋe, pien tye a redo i ŋewa.” Yecu te gamo ni, “An rik oora ka baŋ rommi a rik orwenyo me doggola Icrael.” Dan-nu te bino rumo i nyime kun kobo ni, “Ama Rwot, konya.” Yecu dok te kobbe ni, “Mom ber wok ikwanyo cem itino, ote yuyi gwogi.” Dako te gamo ni, “Mannono ikobo kakare, Rwot; ento otino gwogi me te meja daŋ camo ŋid cem a poto i te meja a wegigi do.” Yecu te kobe ni, “Yin dako, iyeeni dwoŋ. Myero bed baŋi kite acalo imito.” Nyare te can oko i caa-nono. Ka man otum, Yecu oya i kuno, odupo dog nam me Galilaya, te yito i wi kidi, te bedo piny kuno. Lwak ecipan te bino baŋe kun okelo jo a tyengi kede ciŋgi oŋwalo, kede otowaŋ, jo alebgi oto, kede otwo acele apol, ote pyelogi piny i ŋet tyen Yecu, en ocaŋogi. Omio lwak owuro meicel ka oneno jo a lebgi oto oko bo, jo a ciŋgi oŋwalo ocaŋ, jo a tyengi oŋwalo owoto, anaka otowaŋ oneno piny; gin ote pako Obaŋa a jo Icrael. Yecu te lwoŋo jo a lube baŋe, te kobbigi ni, “Lwak ocona meicel, pien gin orio baŋa odoko nino adek twal, cite mom otye kede cammoro. Pe amito ni acwagi paco kun yigi nono, kec owek bwoyogi iyo.” Jo a lube te dok iye ni, “Kara obino nwoŋo ogati kwene ame romo pito lwak apol rom man a kun kan tim?” Yecu te penyogi ni, “Itye wunu ogati adi?” Gin ote gamo ni, “Abiro, kede rece anok atitino.” Ociko lwak ni bed piny, omako ogati abiro kede rece, ka doŋ opwoo, onyinyilo, omio baŋ jo a lube, eka jo a lube te miyo baŋ lwak. Gin ducu ocamo, oyeŋ, ote coko ŋid cam ame oloogi, oromo dwoŋ abiro opoŋ. Jo ocamo onwoŋo romo co tutumia aŋwen, a kun mom okwano iye mon kede itino. Icennere en ociko lwak, te donyo i yee, owoto i loba me Magadan. Oparicayo kede Ocadukayo obino, ote bito Yecu ni nyuttigi anyut ame oya i polo. En te gamo doggi ni, “Wun ba, ka piny oyuto, ikobo wunu ni, ‘Piny abedo aber tin, pien polo nen oremakino.’ Kede odiko ni, ‘Tin kot bino cwe adwoŋ, pien polo nen oremakino, dok ocido icuc.’ Wun iŋeo wunu poko gin a nen i waŋ polo, aco anyut me kare ikwia wunu poko. Lwagi jo areco kede omit mon a jo-ni yenyo anyut, ento mom obino miyogi anyuttoro, kono ka anyut a Yona keken.” En te pokere kedgi, te wot kan ocele. Ka jo a lube otuno loka ca, onwoŋo wigi owil tero kwonnoro. Yecu te kobbigi ni, “Myero inen ni igwokere wunu i tobi Oparicayo kede i me Ocadukayo.” Gin ote penyere kengi kengi, okobo ni, “Kara mom okelo ogati.” Ka Yecu oŋeo, te penyogi ni, “Piŋo ipenyere wunu kenwu kenwu ni ogatiwu mom tye, wun jo ame iyeewu nok? Mom ru iniaŋ wunu, onyo mom ipo wunu pi ogati abic ca mea jo tutumia abic? Rik ce icoko wunu opoŋ aditti adi? Onyo ogati abiro mea jo tutumia aŋwen, rik ce icoko wunu dwoŋ adi? Piŋo mom iniaŋ wunu ni an mom akobbiwu kop i kom ogati ikome? Gwokere wunu i kom tobi Oparicayo kede i me Ocadukayo.” Ka doŋ gin oniaŋ aber ni en mom okobo ni gwokere i kom tobi me ogati, ento i kom pwony Oparicayo kede me Ocadukayo. Ka Yecu otuno i loba a ceggi kede Kaicaria Pilipi, openyo jo a lube ni, “Kara jo kobo ni Wot a dano obedo ŋa?” Gin te gamo ni, “Jo mogo kobo ni Lakana Abatija, jo mogo ni Icaya, jo ocele ni Jeremia, onyo ŋat acel i akina odwarpiny.” Te dok penyogi ni, “Kara wun kono ikobo wunu ni an ŋa?” Cimon Petero te gamo ni, “Yin i Kricito, Wot Obaŋa akwo.” Yecu te dok iye ni, “Itye kede winyo Cimon wota Yona! Pien mom ginnoro a tye i kom kede remo en onyutti kop man, ento Pappa a tye i polo. Doŋ an akobbi ni, yin Petero, daŋ abino gero lwak jo oye an i kom lela man, dok tek me to mom bino loye. Abino miyi ayab loc me polo; ginnoro ducu ame itweo i wi lobo obino tweyo anaka i wi polo, ginnoro ducu ame igonyo i wi lobo obino gonyo anaka i wi polo.” Ka doŋ te ciko jo a lube atek ni, kur gin tucci ŋattoro ni en e Kricito. Cakere i kare-nono Yecu ogeo nyutti jo a lube ni en myero ewot i Jerucalem me ekany can apol i baŋ odoŋe kede olamdog adoŋo kede opwony-cik, gin bino neke, ento i nino me adekkere obino cere oko. Petero otere teŋe te ero juke kun kobo ni, “Pe amannono, Rwot, yin mom obino timi kittono gire.” En te lokere kobbi Petero ni, “Dok i ŋea yin Catan! Yin idoko iciki tuŋ baŋa, pien yin mom ilubo tam Obaŋa, ento ilubo mea dano.” Yecu te kobbi jo a lube ni, “Ka dano moro mito luba, myero koŋ oge kwerre kene, tiŋ yataria mere, luba. Pien dano ame mito laro kwo mere, bino rwenyo kwo mere arwenya, ento dano ame rwenyo kwo mere pira, bino nwoŋo. Kara bino konyo dano kede ŋo ka ocamo lobo luŋ kun kwo mere omao oko? Onyo ŋo ame dano bino miyo pi dwoggo kwo mere? Pien Wot a dano bino dwogo kede kwogo a Pappere karacel kede omalaika mere; i kare-nono bino culo dano acel acel kun lubo kit tic a yam etio. Ateni akobbiwu ni, tye jo mogo ame ocuŋ kan ame mom bino bilo to ka mom ru gin oneno Wot a dano a kun abino i loccere.” Ame nino abicel doŋ okato, Yecu otero Petero kede Yakobo kede ominnere Lakana, oyito kedgi i wi kidi abor i muŋ. Kit kome te lokere oko i nyimgi, waŋe te lyel bala ceŋ, rukkere te doko atar acalo raŋ cen. Nen, Muca kede Elia te nen baŋgi kun okobo kede. Petero te kobbi Yecu ni, “Rwot, ber meicel wan ibedo kan. Ka ce imito, abino gero gonye adek kan, acel meri, acel mea Muca, acel me Elia.” A kun pwod etye ekop, aco ba, tipo pol aryeny te wumogi ipuk, dwon te ya i pol, ni, “Man en Woda ame amaro; a yia yom i kome, winye wunu.” Ka jo a lube owinyo man, ote rette aryeba cuny pi lworo adwoŋ. Yecu te bino baŋgi, ogudogi kun kobbigi ni, “Ya wunu malo; kur ilwor wunu.” Ka otiŋo waŋgi, mom oneno dano moro, kono ka Yecu kene. Ame oyito piny iya i wi kidi, Yecu te cikogi ni, “Kur ititti wunu dano moro gin ame ineno wunu, ituno a doŋ ocero Wot a dano iya i akina jo oto.” Jo a lube te penye ni, “Piŋo opwonycik kobo ni Elia myero koŋ bin?” En ogamo ni, “Elia bino tuno, bino dwoko jami ducu kakare. Ento an atittiwu ni, Elia doŋ otyeko bino oko, cite jo mom oŋee, ote time i gin a yigi omito. Wot a dano daŋ obino time arac kite-nono.” Jo a lube te doŋ niaŋ ni en okobbigi kop i kom Lakana Abatija. Ame doŋ gin otuno baŋ lwak, dano moro te bino rumo cone baŋe, obako doge ni, “Rwot, tim woda-ni ber ba, pien two ekwikwiŋ omake arac meicel; pien tyen apol en rette i mac, kede tyen apol anaka i pi i daŋ. Cite woki akele baŋ jo a lubi, caŋo oloogi oko.” Yecu ogamo ni, “Wun lwagi jo me kare man, iyeewu mom, kitewu doŋ oballe oko; kara abino bedo kedwu naka awene? Abino diyo cunya i komwu ituno awene? Kele wunu baŋa kan.” Yecu te juko cen, cen te ya oko i kome, awobi-nu te caŋ oko i caa-nono. Icennere jo a lube te bino baŋe i muŋ kun openye ni, “Kara ŋo omono wan daŋ ryeme?” En te gamo doggi ni, “Pien iyee mewu nok. Ento ateni atittiwu ni, ka kono itye wunu kede iyee acalo nyig koti karadali, ibino wunu kobbi kidi man ni, ‘Mukere i kan oko, ilor kuca’, daŋ bino lor; ginnoro mom bino loyowu. [ Ento gin acalo man mom ya, kono ka pi kwayo Obaŋa kede kanyo kec keken.]” Ame gin ocokere karacel i Galilaya, Yecu okobbigi ni, “Wot a dano obino miye i ciŋ jo, obino neke, ento i ninome adekkere obino cere oko.” Gin te kumo meicel. Ka gin otuno i Kapernaum, jo a rao ocoro me ot Obaŋa te bino baŋ Petero, ote penye ni, “Apwonywu mom gelo ocoro me ot Obaŋa?” En te gamo ni, “Gelo.” Ka en odonyo i ot, Yecu te geyo penye ni, “Yin itamo niŋo Cimon? Oloc me lobo man orao ocoro kede owalo i baŋ jo a kite mene? Baŋ jogi, kade nyo i baŋ jo ocele?” En te gamo ni, “Baŋ jo ocele.” Yecu dok te dok iye ni, “Ka kite-nono, jo megi tye kede kuc. Kadi bed amannono, kur doŋ ocan jo-nu. Apee wot i dog nam, ibol golo, iyut rec okwoŋo moko, eka ite yabo doge, ibino nwoŋo iye cekel. Kwany imigi pi mera kede meri.” I kare-nono jo a lubo Yecu obino baŋe, ote penye ni, “Ŋa ame loo kede dit i loc me polo?” En ocwano atin baŋe, omio ocuŋ i akinagi, te kobo ni, “Ateni akobbiwu ni, ka mom koŋ ilokere wunu, idoko wunu acalo itino, mom ibino donyo wunu i loc me polo. Dano ame mwolle kene bala atin-ni en ame loo kede dit i loc me polo. Dano ame jolo atinnoro acel bala man i nyiŋa, nwoŋo ojolo an. “Ento dano ame miyo ŋattoro acel i akina jo magi atino-ni ame oye an poto i bal, twara ame otweo kidi rego adwoŋ i ŋute, ote core elwiny kede i dye nam atut. “Lobo bino neno can pi gin a mio jo poto i bal. Pien gin a mio jo poto i bal myero bin, ento dano a kela gin a mio jo poto, bino neno can! Ka ciŋi onyo tyeni en a mii ipoto, toŋ oko, ibole kan abor; bedo ber baŋi ka idonyo i kwo ame ciŋi onyo tyeni tuŋ cel mom tye, kato a kono oboli kede ciŋi onyo tyeni tyoryo i mac a mom to. Ce ka waŋi en a mii ipoto, kole oko, ibole kan abor; bedo ber baŋi ka idonyo i kwo kede waŋi acel, kato a kono boli kede waŋi ryoryo i mac me Geena. “Myero inen ni kur icao wunu ŋattoro acel i kom jo magi atino; pien akobbiwu ni, i polo omalaikagi neno waŋ Pappa a tye i polo didik. [ Pien Wot a dano obino me laro jo orwenyo.] Kara wun itamo wunu niŋo? Ka dano tye kede rommi mere mia acel, ka moro acel i akinagi orwenyo oko, en mom bino weko maka pyeraboŋwen wie aboŋwen i wi kidi, te wot yenyo en ame orwenyo ca? Ka en onwoŋo, ateni akobbiwu ni, yie bedo yom i kome, ame kato maka pyeraboŋwen wie aboŋwen a rik mom orwenyo. Amannono Pappa a tye i polo daŋ mom mito ŋattoro acel i akina jo magi atino-ni oto. “Ka ce ominni obalo balloro baŋi, wot inyutte ballere kun itye wun aryo kede. Ka owinyi, doŋ idwoggo ominni. Ento ka okwero winyi oko, ter ŋattoro acel onyo aryo ocele, me i dog ocaden aryo onyo adek mok kop luŋ. Ka en okwero winyogi, tit baŋ lwak oye an; ento ka okwero winyo lwak oye an, myero en bed bala arokkoro baŋi onyo ara-ocoro. “Ateni akobbiwu ni, ginnoro ducu ame itweo wunu i wi lobo obino tweyo anaka i wi polo, ginnoro ducu ame igonyo wunu i wi lobo obino gonyo daŋ i wi polo. Dok daŋ akobbiwu ni, ka jo aryo i akinawu bino ribere i wi lobo i kom ginnoro ame gin okwayo, Pappa a tye i polo bino timmigi. Pien ka jo aryo onyo adek ocokere karacel i nyiŋa, an daŋ atye kannono i akinagi.” Petero te bino baŋe, penye ni, “Rwot, kara ominna bino timo bal tyen adi baŋa eka ate time kica? Ame romo tyen abiro?” Yecu te kobbe ni, “Mom akobbi ni a romo tyen abiro, ento a romo tyen pyerabiro tyen abiro. “Omio loc me polo rom aroma kede abaka moro a rik omito yiko kop me banyi kede omiro mere. A doŋ ocako yiko, okelo baŋe dano a rik tye kede banya ame kato ciliŋ milion. Ka onwoŋo ni gin ecul kede mom tye, te ciko ni myero cate, en kede cege anaka itinogi, kede jami mere luŋ, me cul kede banya. Amiro-nu te ryebere piny i nyime, te kwaye ni, ‘Ama adwoŋ, koŋ idii cunyi i koma, an abino culli ducu.’ Amiro-nu te cono adwoŋ, te gonye oko, te weke i kom banya-nono. Amiro-nu te kato oko, te rwatte kede amiro wadgi ame tye kede banya mere baŋe ame romo mia acelloro keken; te make oko, odedeo ŋute kun kobo ni, ‘Cul banyana!’ Amiro wadgi orumo piny ame bako doge ni, ‘Ama, koŋ idi cunyi i koma, an abino culli.’ En okwero; owoto ocwae ka i buc, ituno ka bino culo banya mere. Ka omiro wadgi oneno gin otimere-ni, owaŋo yigi meicel, ote wot tero koppere baŋ adwoŋgi, gin te titte gin otimere ducu. Adwoŋ daŋ te lwoŋe, okobbe ni, ‘Yin amiro arac! An onwoŋo doŋ aweki gira oko i banya ca luŋ pien ibako dogi baŋa. Mom myero yin daŋ itim amiro wadwu ikca, acalo an rik atimi kica ca?’ Owaŋo cuny adwoŋ atek meicel; ote miye baŋ cirikale me wune ituno waŋ ame oculo banya mere luŋ. Pappa a tye i polo daŋ bino timowu amannono, ka mom itimo wunu jo kica i cunywu ducu, dano acel acel kede ominnere.” Ame Yecu doŋ otyeko kobo kop magu, te ya i Galilaya te bino i dul lobo me Judaya a tye loka Jordan. Lwak ecipan te lube, en daŋ te caŋogi kuno. Oparicayo obino baŋe, ote bite kun openye ni, “Cik ye ni ico ryem dako mere pi kop duc aduca?” En te gamo ni, “Wun ce mom ikwano wunu ni, cakere i ageyi Acwec ocweogi co kede mon? Dok okobo ni, ‘Pi mano dano bino weko pappere kede tottere, te moko i kom dako mere, gin aryo ote doko kom acel.’ Kite-nono, gin mom doŋ otye aryo, ento kom acel keken. Gin ame Obaŋa onoto karacel dano kur ket akinagi.” Dok ote penye ni, “Piŋo Muca rik ociko ni mi waraga me keto nyom, kede ryemo dako?” En te kobbigi ni, “Pi nwaŋ cunywu omio Muca oye ni iryem wunu monwu, ento cakere i ageyi mom obedo amannono. Ento akobbiwu ni, dano moro ame ryemo cege, ame mom pi coco, eka te nyomo dako ocele, nwoŋo ocodo cot.” Jo a lube te kobbe ni, “Ka kop i kom ico kede dako mere tye kite-nono, twara jo obedo aboŋo nyomere.” Yecu te kobbigi ni, “Jo luŋ mom twero mako koppono, kono ka jo ame omiogi keken. Pien tye jo mogo ame gin obwoc cakere iyi totogi, ame onywalogi kite-nono; tye jo ocele ame doko obwoc pien nwoŋo jo ocele oroogi oko; tye jo ocele ame gin roye kengi gigi pi loc me polo. Dano ame twero mako koppono, maki.” Icennere okelo itino baŋe me eket ciŋe i komgi kun ekwao Obaŋa. Jo a lube te jukogi oko. Ento Yecu te kobbigi ni, “Wek wunu itino bin baŋa, kur igeŋgi wunu, pien loc me polo tye pi jo acalo gin.” En oketo ciŋe i komgi, te ya i kuno oko. Nen, dano moro obino baŋe kun penye ni, “Apwony, atim ŋo aber me abed i kwo a perakino odoco?” Yecu te penye ni, “Kara piŋo ipenya pi gin aber? Ŋat aber tye acel keken. Ka imito donyo i kwo, gwok cik.” En te penyo ni, “Cikkene?” Yecu te kobbe ni, “Kur inek, Kur icod cot Kur ikwal, Kur ikel goba i pido: Wor pappi kede totti, kede dok ni, Mar dano wadwu acalo imarre keni.” Awobi-nu te kobbe ni, “Magu doŋ atyeko mako ducu; kara ŋo a pwod dok odoŋ?” Yecu te gamo ni, “Ka imito bedo aber aboŋo roccoro, ape wot icat lim a tye baŋi oko, ite miyo baŋ ocan, eka ite bedo kede lonyo ame ikano i polo; yin doŋ ibin, iluba.” Awobi ka owinyo kodi kop-pu, te wot oko a doŋ aconne acona, pien onwoŋo limmere rik dwoŋ. Yecu okobbi jo a lube ni, “Ateni akobbiwu ni, bino bedo tek meicel, olonyo idonyo i loc me polo. An dok akobbiwu ni, twara donyo inaga i waŋ pico yot, kato alonyo idonyo i loc me polo.” Olub Yecu ka owinyo kodi kop-pu owuro meicel, ote penye ni, “Kara ŋa a dok twero larre?” Yecu onenogi, te kobo ni, “Baŋ dano mom twerre, ento baŋ Obaŋa jami ducu twerre.” Petero te gamo ni, “Aco, nen wan oweko jami luŋ, olubi; kara obino nwoŋo ŋo iye?” Yecu te gamo ni, “Ateni akobbiwu ni, i kare ame lobo bino doko anyen, ame Wot a dano bino bedo i wi kom me loccere me kwogo, wun jo a doŋ iluba wunu ibino bedo wunu i wi kom me loc apar wie aryo kun iŋolo wunu kop i kom atekere apar wie aryo me Icrael. Doŋ dano acel acel a yam oweko udi onyo omego, onyo amego, onyo pappere onyo tottere, onyo itino, onyo lobo pi nyiŋa, en bino nwoŋo jami akato mano tyen mia, daŋ en bino nwoŋo kwo a perakino odoco. Ento jo apol ame obedo me agege bino doŋ cen, kede jo odoŋ cen bino bedo me agege. “Loc me polo rom aroma kede dano moro won ot ame odilo odiko con pi wako otic i poto olokkere. Te yiko kop kedgi ni ebino miyogi denari acel pi nino acel, i ŋe cikeregi en ocwaogi i poto olokkere. I caa adek en dok owoto, te neno jo ocele ame acuŋ acuŋa i cuk aboŋo ticgi moro. En te kobbigi ni, ‘Wun daŋ wot wunu i poto olokka, abino miyowu cul ame oporre.’ Gin daŋ ote wot. I caa abicel kede caa aboŋwen en dok owoto otimo i kite acellaca. I akina caa apar wie acel en dok owoto onwoŋo jo ocele ame acuŋ kuno; en te penyogi ni, ‘Piŋo icuŋ wunu acuŋa kan naka ceŋ iyul aboŋo ticcoro?’ Gin te dok iye ni, ‘Dano moro a kono wakwa obedo mom.’ En te daŋ kobbigi ni, ‘Wun daŋ wot wunu i poto olokka.’ A doŋ piny oyuto, won poto te ciko nyampara mere ni, ‘Lwoŋ otic, imigi ocaragi. Cak i kom jo ame otuno icen, iwot kede anaka i komjo ame ogeo bino.’ Jo a rik obino caa apar wie acel, ogamo denari acel acel. Ka jo ogeo obino, gin otamo ni obino miyogi abup akato mannono oko, ento gin daŋ ogamo denari acel acel. Ka doŋ ogamo, ote ŋunura i kom won ot, kun okobo ni, ‘Jo obino icen ca otio pi caa acel keken, ento yin dok iporogi kedwa a kun wan ololle i tic nakanaka i dye ceŋ alyet.’ Ento en okobbi dano acel i akinagi ni, ‘Awotta, an mom timi rac. Yin rik mom icikere keda ni ibino gamo denari acel? Gam meri en ta, woti. An amito miyo dano man ame obino icen arom aroma kedi. Mom myero ati gira i jamina acalo amito? Onyo waŋi oballe pi gin aber a doŋ atio?’ Kite-nono jo ame odoŋ cen bino bedo me agege, kede jo me agege bino doŋ cen.” Yecu ka rik mito kwaro tur me wot i Jerucalem, otero jo mere apar wie aryo i muŋ, i yo te kobbigi ni, “Nenu, wan doŋ otye okwaro tur me wot i Jerucalem. Wot a dano obino miye baŋ olamdog adoŋo kede opwony-cik, gin bino ŋolle kop me to. Obino miye baŋ Orok me ŋale, pwode kede del, ote gure i kom yataria, ento i nino me adekere obino cere oko.” Toto otino a Jebedayo obino baŋe karacel kede itino mere, te ryebere piny i nyime pi kwaye ginnoro. En openye ni, “Imito ŋo?” Te gamo ni, “Cik pi itinona aryo-ni ni, ŋat acel bed i laŋeti tuŋ cem, ŋat acel bed i laŋeti tuŋ cam i locci.” Yecu te dok iye ni, “Wun mom iŋeo wunu gin ame ikwao wunu. Itwero wunu mato i kopo me peko ame abino mato kede?” Gin ogamo ni, “Wan otwero.” En te kobbigi ni, “Ibino wunu mato kede ikopona, ento bedo i laŋeta tuŋ cem onyo tuŋ cam, an mom apoko. Bino bedo ka baŋ jo ame Pappa oyiko pirgi.” Ka jo ocele apar owinyo, yigi owaŋ i kom omego aryo-nu. Yecu te lwoŋogi baŋe, okobbigi ni, “Wun iŋeo wunu ni, oloc Orok bwoogi kede teko, dok odoŋegi nyuto twergi i komgi. Mom bino bedo amannono i akinawu; ŋattoro i akinawu ame mito bedo adwoŋ myero bed aticwu, dok ŋattoro amit bedo me agege i akinawu, myero bed opii mewu ducu; kite acalo Wot a dano daŋ mom obino me jo tiye, ento wek en ti pi jo, dok ete miyo kwo mere me lakoro jo apol.” Ame gin aya i Jeriko, lwak ecipan olube. Nen, otowaŋ aryo ame obedo piny i ŋet yo, ka owinyo ni Yecu en akato-nono, gin oredo ni, “Akwar Daudi, timwa kica.” Lwak te jukogi ni, “Liŋ wunu”, ento gin te medo redogi ameda ni, “Rwot, timwa ber, Akwar Daudi.” Yecu ocuŋ, olwonogi te penyogi ni, “Kara wun imito wunu ni atimmiwu ŋo?” Gin odok iye ni, “Rwot, omito waŋwa yabere.” Gin ocono Yecu, eka te mulo waŋgi. Oyotoyot ote cako neno piny, ote lube. Ame gin doŋ ceggi i tuno i Jerucalem, gin odonyo i Betepage i wi kidi me Jeituni. Yecu te oro jo aryo i akina jo a lube. Ocikogi ni, “Wot wunu i paco i nyimwu ca. Oyotoyot ibino wunu nwoŋo kana ame otweo, tye gin kede atinnere; gonyu, ikel wunu baŋa. Ka dano moro bino kobbiwu kopporo, ibino kobo wunu ni, ‘Rwot en ame amitogi’, cite en bino cwayogi oyotoyot.” Man otimere me kop a nwaŋ adwarpiny okobo cobere kakare, ni, “Kob wunu baŋ Cion ni, Nen, abaka meri abino baŋi, kun mwol, obedo i wi kana, i wi atin kana.” Olub Yecu te wot timo i kite a Yecu ocikogi kede, ote kelo kana kede atinnere, ote peto boŋŋigi i komgi, en te bedo i wie. Pol a lwak te peto boŋŋigi i dye yo, jo mogo otoŋo jaŋ yen, te peto iyo. Lwak otelo yo kede ame alube oredo ni, “Ojana, pak wun Akwar Daudi! Opwo wun ŋat ame abino i nyiŋ Rwot! Pake wunu malo i wi polo!” Ka doŋ odonyo i Jerucalem boma ducu orubere pire, kun okobo ni, “Man kara ŋa-nie?” Lwak te kobo ni, “Man en adwarpiny Yecu ame oya i Najareti i Galilaya.” Yecu odonyo i ot Obaŋa, te ryemo jo ducu ame aceto wil kede owil jami i ot Obaŋa. Oreto meja a jo a loko cente anaka gi-bedo a jo aceto amam, te kobbigi ni, “Rik ocoo ni, ‘Oda obino lwoŋo ni ot me kwac’, ento wun iloko wunu odoko aduu oyak.” Otowaŋ kede oŋwalo te bino baŋe i ot Obaŋa, en te caŋogi. Ka olamdog adoŋo kede opwony-cik oneno tic me awura ame en otio, kede itino ame oredo i ot Obaŋa, a kun okobo ni, “Ojana, pak wunu Akwar Daudi,” owaŋo yigi. Gin te penye ni, “Yin iwinyo gin a jo-nu okobo?” Yecu te gamo ni, “Awinyo. Rik mom ikwano wunu ni, ‘I dog itino atino kede gin a pwod dot yin iyiko iye pak meri?’ ” En owekogi, oya owoto i paco me Betania, obuto kuno. Odiko ame en adok i Jerucalem, kec oneke. Oneno oduro moro acel i ŋetyo, te gak iye; mom onwoŋo iye ginnoro, kono ka pote keken. Te kobbi oduro ni, “Mom dok ibino nyako nyiggi atwal.” Oduro te tal oko cuto. Ka jo a lube oneno, owuro, ote kobo ni, “Oduro otal oko oyotoyot piŋo?” Yecu te gamo ni, “Ateni akobbi-wu ni, ka kono itye wunu kede iyee, kun mom ikalo wunu akala, kono mom itimo wunu ka gin otimere i kom oduro-ni keken, ento kono daŋ iciko wunu kidi man ni, ‘Mukere, rette i nam’ daŋ te timere. Dok gin ducu ame ibino wunu penyo kun ikwao wunu Obaŋa ibino wunu nwoŋo ka itye wunu kede iyee.” Ka en odonyo i ot Obaŋa, olamdog adoŋo kede odoŋe me Icrael obino baŋe ame en tye ka pwony, ote penye ni, “Twerrene omio itimo kit man? Daŋ ŋa omii twerrono?” Yecu ogamo doggi ni, “An daŋ koŋ abino penyowu pennyoro acel; ka idokka wunu iye, an daŋ ate bino tittiwu twerrene omio atimo kit man. Batija a Lakana oya i kwene? Oya i baŋ Obaŋa aŋar onyo oya i baŋ dano?” Gin ote bedo pyem kengi kun okobo ni, “Ka okobo ni, ‘Oya baŋ Obaŋa’, en bino penyowa ni, ‘Kara piŋo dok mom iye wunu en!’ Ento dok ka okobo ni, ‘Oya baŋ dano’, olworo lwak; pien gin luŋ oŋeo ni Lakana obedo adwarpiny.” Omio gin te dokki Yecu ni, “Wan okwia giwa.” Yecu daŋ te kobbigi ni, “An daŋ mom abino kobbiwu twerrene omio atimo kite man. “Wun itamo wunu niŋo? Lo moro onwoŋo tye kede awobe mere aryo. En owoto baŋ atin me agege, te cike ni, ‘Atinna, wot tin iti tic i poto olok.’ En te gamo ni, ‘Mom abino wot’; icennere en oŋut, owoto iye. Lo-nu te wot baŋ awo bi me aryo, te kobbe kite kop acellaca; en te gamo ni, ‘Adwoŋ, awot’, ento naka mom te wot. I kom jo-nu aryo-nu ŋa ame otimo gin a pappere omito?” Gin te gamo ni, “Awobi me agege.” Yecu te kobbigi ni, “Ateni akobbiwu ni, oraocoro kede mon ame ococo bino geyo donnyiwu i loc Obaŋa. Pien Lakana rik obino baŋwu kun lubo yo me kite atira, wun ikwero ye wunu en oko; ento ora-ocoro kede mon ame ococo oye en. Dok daŋ ka ineno wunu gin otimere, mom ibin iloko cunywu me ye en. “Koŋ iwiny wunu carokop ocele. Rik tye won ottoro ame opito poto olokkere, te guro oko kede cel, daŋ te kunyo iye bur me biyo pige, te gero pem, te joko baŋ opur, eka te wot oko i lobo ocele. Ka kare me pwono doŋ ceggi, en te cwayo omiro mere baŋ opur ni wot om nyig olokkere. Opur te mako omiro mere, ote pwodo acel, acel ote neko oko, en ocele mere ote napo kede gweŋ. En dok te medde cwayo omiro ocele apol ame kato ame eteko cwayo ca oko, gin daŋ ote timogi i kite acellaca. Icennere en te ewayigi wode ikome kun kobo ni, ‘Gin bino woro woda.’ Ento ka opur oneno wode ote kobo kengi kengi ni, ‘Kom man en ale-lim: biye wunu, oneke oko, me lim eleyo: nono bed megwa.’ Omake ote core oko teŋe i poto olok, ote neke oko. Kara won poto olok ka bino tuno en bino timo ŋo i kom opur-ru?” Gin, ote gamo ni, “En bino neko jonu i kite to arac, eka te joko poto olok baŋ opur ocele ame twero miye nyige ka kare oromo.” Yecu te gamo doggi ni, “Rik mom ikwano wunu i coc a yam ocoo, ni, ‘Kidi ame ogedo okwero, en ame odoko kidi adwoŋ me gwic ot; man en tic a Rwot, en gin me awura baŋwa?’ Pi mano atittiwu ni, loc Obaŋa obino kwanyo oko i baŋwu, obino miyo baŋ rok ame bino nyako nyig ame oporre iye. [ Dano ame rette i kom kidi man, bino ŋidde oko atitino; ento ka kidi man orette i kom ŋattoro, bino ŋinyo oko.] Ka olamdog adoŋo kede Oparicayo owinyo carokoppere, gin oniaŋ ni en okobo kop-pi i komgi. Gin otemo make, ento ote lworo lwak oko pien lwak ŋeo ni en adwarpiny.” Yecu dok okobo kedgi i carokop, ni, “Loc me polo rom aroma kede abaka moro a rik oyiko arama me-nyom a wode te oro omiro mere me lwoŋo jo a rik olwoŋo i arama me nyom, gin te kwero bino oko. Dok te oro omiro ocele kun kobo ni, ‘Wotu, ititti wunu jo ame olwoŋo ni, An doŋ atyeko yiko cam, oroyina kede roce olobakino doŋ onekogi oko, jami luŋ doŋ oyiko oko; biye wunu i arama me nyom.’ Ento gin mom oketo cunygi iye, ote wot gigi oko; ŋat acel owoto i poto mere, ŋat ocele owoto i cato willere, jo doŋ te mako omiro mere, te timo kop me lewic I komgi, eka ote nekogi oko. Akemo omako abaka te cwayo monnyere, te neko onek-ku, te waŋo bomagi oko. Dok en te kobbi omiro mere ni, ‘Arama doŋ oyiko oko, cite jo a rik ocwanogi mom oromo bino iye. Pi mannono wot wunu i yo adoŋo, ilwoŋ wunu jo ame ibino wunu nwoŋo, me gin bin i nyom.’ Omiro-nu te wot iyo, ote wako jo ame gin onwoŋo luŋ, jo areco kede jo abeco, wele te poŋ i nyom. “Ka abaka obino me neno wele te dok neno lo moro kuno ame mom oruko ruk me nyom. Te penye ni ‘Awotta, kara idonyo kan i yo mene ame rukki me nyom daŋ mom-mie?’ En oliŋ aliŋa. Omio abaka te ciko oticcere ni, ‘Twe wunu tyen lo-nu kede ciŋe, bole wunu i piny acol a tye oko; kuno bino bedo iye koko kede kayo lak.’ Pien jo ame olwoŋo pol, ento ame oyero nok.” Oparicayo te wot poro kop kite a myero gin omake kede i kopporo a ya i doge. Gin te oro baŋe jo a lubogi karacel kede jo a Kerode, ote penye ni, “Apwony, wan oŋeo ni yin dano me ateni, dok mom iparo pi dano moro pien mom ineno dano i oko cite ipwonyo yo Obaŋa i ateni. Tittiwa in iparo niŋo, myero ogelli Kaicari ocoro onyo mom?” Ento Yecu te ŋeyo kec yigi oko, te kobbigi ni, “Kara ibita wunu piŋo, wun ogoba? Koŋ inyutta wunu lim ame ogelo kede ocoro.” Gin te kelle ciliŋŋoro. Te penyogi ni, “Cal kede coc ame ogoro lye-ni mea ŋa-nono?” Gin te gamo ni, “Mea Kaicari.” En te dok iye ni, “Pi mannono dwok wunu baŋ Kaicari jami a Kaicari, jami Obaŋa dwok wunu baŋ Obaŋa.” Ka gin owinyo, owure meicel, ote ya i baŋe, ket gigi oko. I nino-nono Ocadukayo mogo obino baŋ Yecu, jo-ni gin jo ame kobo ni jo oto pe cer. Gin okelo peny baŋe ni, “Apwony, Muca nwaŋ okobo ni, ka ŋattoro oto aboŋo nywalo atin, ominnere myero lak dako mere, me nywal ominnere otino. Aco, nwaŋ tye jo abiro i akinawa ame gin omego. Dano me agege onyomo dako te to oko kun mom oweko atinnoro, eka te weko dako baŋ ominnere. Dano me aryo mere daŋ amannono, kede dano me adekkere, naka tyeko gin abiro luŋ. I agikki mere dako daŋ te to oko. Kara i kare me cer, dan-nu bino cik aŋa i akina jo abiro-nu? Pien gin luŋ obedo kede.” Ento Yecu te dokkigi iye ni, “Irwenyo wunu, pien ikwia wunu coc yam ocoo, anaka teko Obaŋa daŋ ikwia wunu. Pien i kare me cer jo mom bino nyomere, ento jo bino bedo bala omalaika ame i polo. Ento ka i kom cer a jo oto, wun ce mom ikwano wunu kop ame Obaŋa rik okobbiwu ni, ‘An Obaŋa Iburaim, kede Obaŋa Icaka, kede Obaŋa a Yakobo?’ En mom Obaŋa ajo oto, ento mea jo akwo.” Ka lwak owinyo, owuro pwonnyere meicel. Ka Oparicayo owinyo ni Yecu otwoo dog Ocadukayo oko, gin te cokere karacel. Dano moro acel i akinagi te bite kun penye ni, “Apwony, i kom cik luŋ, mene ce ame pire dit akato?” En te kobbe ni, “Mar Rwot Obaŋani kede cunyi luŋ, kede tiponi lung, kede tammi luŋ. Man en cik adwoŋ, daŋ me agege. Me aryo mere ame rom kede daŋ ene, ni, Mar dano wadwu acalo imarre keni. I kom cik aryo-ni kop ducu a tye Cik kede buke odwarpiny ocuŋ iye.” Ka Oparicayo doŋ ocokere karacel Yecu okelligi peny ni, “Wun itamo wunu niŋo i kom Kricito? Kara en akwar ŋa?” Gin te gamo ni, “En akwar Daudi do.” En te penyogi ni, “Kara piŋo dok Cuny Acil omio Daudi olwoŋe ni Rwot? Pien rik okobo ni, ‘Rwot okobbi Rwotta ni, Bed i laŋeta tuŋ cem, i kabedo me kwogo, ituno ka abino keto okworri piny i te tyeni.’ Kara Daudi olwoŋe ni Rwot kittono, en dok bedo akwarre niŋo?” Dano moro mom doŋ romo dokke i kopporo, dok daŋ cakere i nino-nono dano moro mom dok otiŋere me penye kopporo. Icennere Yecu okobbi lwak kede jo a lube ni, “Opwony cik kede Oparicayo bedo i kom a Muca; pi mannono kop ducu ame gin pwonyowu kede, ti wunu daŋ ite mako wunu, ento gin ame gin tio, kur iti wunu; pien gin kobo akoba keken, mom otio. Gin tweo yec apek, a yeyo tek, ote keto i wi gwok jo, ento gin ikomgi mom koŋ oniŋo kede nyako ciŋgi. Ticgi ducu gin tio ka ni jo nengi; pien oyaro pulakterigi bedo alac, omedo ayayak me boŋŋigi bedo aboco meicel, dok daŋ omaro kabedo me kwogo i dog cem, kede kome me dito i kacokere, dok omito ni jo motgi i cuk, dok daŋ ni jo wadgi lwongi ni, Rabbi. Ento wun mom myero lwoŋwu ni, Rabbi, pien apwonywu tye acel, wun ducu omego. Dok daŋ kur ilwoŋ wunu dano moro ni papawu i wi lobo, pien Papawu tye acel, en ame tye i polo. Dok daŋ kur lwoŋowu ni opwony, pien apwonywu tye acel, en Kricito. Dano ame adwoŋ a loo i akinawu myero bed aticwu. Dano ame kette kene ni etye malo, obino dwoke piny, ento ŋat a mwolle kene, obino tine malo. “Ibino wunu neno can, wun opwony-cik kede Oparicayo, wun ogoba! Pien iceggi wunu jo doggola loc me polo oko; wun ikomwu mom idonyo wunu iye, dok daŋ igeŋo wunu jo a mito donyo iye oko. [ Ibino neno wunu can, wun opwony-cik kede Oparicayo, wun ogoba! Pien imao wunu udi a mon a coggi oto, dok ikwao wunu Obaŋa nakanaka me gobagoba; kop ame obino ŋolo i wiwu bino bedo pek akato.] Ibino wunu neno can, wun opwonycik kede Oparicayo, wun ogoba! Pien iloŋo wunu piny i wi nam kede peto piny i wi tela pi miyo dano acel loko dini mere me dwog i megwa, ento ka doŋ olokere, imie wunu doko atin me Geena ame rom aroma kedwu tyen aryo. “Ibino wunu neno can, wun ope jo a waŋwu oto, ame ikobo wunu ni, ‘Ka dano okwoŋo kede ot Obaŋa, kopporo bedo mom iye, ento ka okwoŋo kede jabu me ot Obaŋa, kwoŋŋere bino make,’ Wun otowaŋ amiŋ! Kara mene a pire dwoŋ akato, jabu onyo ot Obaŋa ame omio jabu bedo acil? Dok wun ikobo wunu ni, ‘Ka dano okwoŋo kede keno lam, kopporo mom iye, ento ka okwoŋo kede mot ame omio ame opyelo i wie, kwoŋŋere bino make,’ Wun jo a waŋwu oto! Kara mene ame pire dwoŋ akato, mot ame omio onyo keno me lam, ame en a mio mot omio iye bedo acil? Dano ame okwoŋo kede keno me lam, nwoŋo okwoŋo kede keno anaka gin ame opyelo iye luŋ. Dano ame kwoŋo kede ot Obaŋa, nwoŋo okwoŋo kede ot Obaŋa anaka ŋat a bedo iye daŋ. Dano ame kwoŋo kede polo, nwoŋo okwoŋo kede kom me loc Obaŋa anaka ŋat ame bedo iye. “Ibino wunu neno can, wun opwony-cik kede Oparicayo, wun ogoba! Pien imio wunu dul acel me apar me apuruku kede malakwaŋ kede kummin, ento kop adoŋo me cik ijalo wunu ata, acalo ŋolo kop atira, timo kica kede bedo jo a genne. Magu ducu myero itim wunu, kun mom iweko wunu maca daŋ. Wun ope jo a waŋwu oto, ilio wunu ober i pii oko, imwonyo wunu inaga! “Ibino wunu neno can wun opwony-cik kede Oparicayo, wun ogoba! Pien ilwoko wunu ŋe ikopo kede cani me bed acil, ento yigi opoŋ iye yako jo kede mit a mom jukere. Yin Aparicayo a waŋi oto, koŋ ikwoŋ lwoko yi ikopo kede cani, en ami ŋee te bedo acil. “Ibino neno wunu can, wun opwony cik kede Oparicayo, wun ogoba! Pien irom wunu kede lyele ame opuo i loba atar, kun i tuŋ oko onen aber, ento yigi opoŋ iye coggi a jo oto, kede jami ducu areco ame pe olony. Wun daŋ amannono i tuŋ oko inen wunu baŋ jo ni wun jo a kitewu atira, ento yiwu opoŋ i goba kede tim areco. “Ibino neno wunu can, wun opwony-cik kede Oparicayo, wun ogoba! Pien icano wunu gweŋe i wi lyelle odwarpiny, gin ame rik ogero pi po i kom jo a kitegi atira wun iyiko wunu wek nen aber, dok ikobo wunu ni, ‘Kono wan rik obedo i kare a kwarowa, kono rik mom onotte kedgi ioonyo remo odwarpiny.’ Kite-nono itucere wunu kenwu ni wun ikwae a jo a nwaŋ oneko odwarpiny. “Ber, cobu giwu tic a kwarowu. Wun twolle, itino ororo, kara ibino wunu bwot niŋo i ŋolo kop me bolowu i Geena? En omio abino oro odwarpiny baŋwu, kede jo aryek, kede opwony. Jo mogo i akinagi ibino neko wunu kun igurogi wunu i kom yataria, mogo ibino pwodo wunu i del i kacokere mewu kun iryemogi wunu paco i paco; wek remo ducu a mom tye i balloro ame oonyo i wi loba bed i wiwu, cakere i kom remo Abel ame mom i bal ituno kede i kom remo a Jekeria wot a Barakia, ame rik ineko wunu i akina kabedo acil kede keno me lam. Ateni akobbiwu ni, kop magu ducu bino bedo i wi jo me kare man. “Jerucalem, Jerucalem, yin ame ineko odwarpiny, inapo jo ame oorogi baŋi kede gweŋ, tyen adi ame rik amito coko itino meri calo min gweno coko itino mere i te bwome, ento wun mom iye wunu! Nen otwu doŋ ojalliwu giwu, odoŋ nono. Pien akobbiwu ni, mom dok ibino nena wunu, ituno ka ibino wunu kobo ni, ‘Opwo wunu ŋat ame bino i nyiŋ Rwot!’ ” Yecu oya i ot Obaŋa, te medde kede wottere, jo mere a lube te bino baŋe me nyutte gedo me ot Obaŋa. En te dokkigi iye ni, “Ineno wunu jami magi ducu? Ateni akobbiwu ni, mom obino weko kidi moro kan acel ame ododde i wi wadgi, a mom obino coro piny.” Ka en doŋ obedo piny i wi kidi me Jeituni, jo a lube obino baŋe i muŋ, ote kobbe ni, “Tittiwa, man bino bedo awene ba? Dok gin aŋo ame bino nyuto dwogoni kede agikki piny me kare man?” Yecu te gamo ni, “Gwokere wunu ba, ŋattoro kur rwenywu be. Pien jo apol bino bino i nyiŋa, ame obino kobo ni, ‘An a Kricito’, gin bino miyo jo apol rwenyo. Dok ka ibino winyo wunu pi mony kede amut me mony, cunywu kur poti, pien mano myero timere, ento agikki nwoŋo pwod mom. Pien rok bino romo kede rok, loc bino romo kede loc ocele, kec kede oyeŋo bino bedo i kabedo apol; mano ducu pwod en ageyi me rem. “I kare-nu obino keto erupe i komwu me ite neno wunu can, obino nekowu, jo luŋ bino dagowu pi nyiŋa. Dok i kare-nono jo apol bino poto, obino keto erupe i komgi kengi kengi. Odwarpiny ame ogoba bino pello apol, obino rwenyo jo apol. Pi tim areco ame bino medde bino miyo mar a jo apol kwe oko. Ento ŋat ame kanyakino ituno i agikki, en bino larre. Dok amut man aber me loc Obaŋa obino rabo i wi podo luŋ, me te bedo caden baŋ rok ducu; icennere agikki bino tuno. “Doŋ ka ibino neno wunu ginnoro me kwer ame balo cuny jo, a rik adwarpiny Daniel orabo pire, kun ocuŋ i kabedo acil (dano ame kwano myero niaŋ iye), i karenono jo a tye i Judaya myero riŋ oko i wi kiddi. Dano ame tye i wi ot kur dok yitto piny ni ebino kwanyo jami i ode; kede dano ame tye i poto kur dok cen ni edok omo rukkere. Mon ayac bino neno can i kare-nono, kede mon ame doto itino! Kwa wunu Obaŋa wek ŋwecwuni kur timere i cwir, onyo i cabit. Pien i kare-nono bino: bedo can adwoŋ, kite a yam pe ru onen, ya i geyi keto lobo tuno naka tin, daŋ pe dok bino nen. Kono Rwot mom ojwiko kare-nu, kono dano moro mom obwot; doŋ pi jo ame oyero, en omio obino jwiko kare-nu oko. I kare-naca ka dano moro bino kobbiwu ni, ‘Neno, Kricito tye kane’, onyo ni, ‘Tye kaca’, kur iye wunu, pien jo ame kobo ni gin obedo Kricito bino pello, anaka odwarpiny ame ogoba, bino nyuto anyuttogo kede taŋo, wek ka twerre gin orweny anaka jo ame oyero. Nen ba, doŋ atyeko tittiwu con. Doŋ ka gin bino kobbiwu ni, ‘En tye i tim’, kur iwot wunu kuno, onyo ni, ‘Tye i tyelo’, kur iye wunu. Pien acalo lutkot ya i tuŋ kide caro naka tuŋ to, dwogo a Wot a dano daŋ bino bedo amannono. Kan a kom oto tye iye, acut daŋ bino cokere kuno. “Oyotoyot ka can adwoŋ me karenono otum oko, bino bedo acalo rik ocoo ni, ‘Ceŋ bino doko col, dwe mom bino ryeny, acer luŋ bino ya i polo, ote rutte piny, teko i polo bino yeŋere’; eka gin a nyuto Wot a dano te bino nen i polo, I kare-nono atekere ducu me wi lobo bino kumo, cite gin bino neno Wot a dano kun bino i wi pol me polo, kun tye kede teko kede kwogo adwoŋ. En bino oro omalaika mere kun gwara kok aloŋo, gin bino coko jo mere ame oyero, iya i twok piny aŋwen ducu, kun ya i tuŋ agikki polo tuŋ cel ituno kede i agikki polo tuŋ ocele. “Mak wunu pwony ame oya i kom oduro: ka jaŋe onyinyiro, pote olot, iŋeo wunu ni oro doŋ ceggi. Amannono wun daŋ, ka ineno wunu magi ducu, ber iŋe wunu ni, en doŋ tye ceggi, tye i doggola. Ateni akobbiwu ni, lwagi jo man mom bino tum, ituno ka koŋ magi-nogo luŋ otimere. Polo kede lobo bino tum oko, ento kop ame an apwonyo mom bino tum. “Ento nino-nono, onyo caa-nono, ŋattoro a ŋeo pire mom tye, kadi amalaika ame tye i polo, kadi Wod. Kono ka Papo keken. Pien dwogo a Wot a dano bino bedo bala kare a Nua. I kare ca ame nwaŋ abwal pii mom ru opoŋ i wi lobo, jo nwaŋ camo, mato, awobe kede anyira onyomere, ituno i nino-nono ame rik Nua odonyo kede i yee; gin mom oŋeo ginnoro ituno ka abwal pii opoŋ, te mologi oko ducu. Bino bedo kite-nono ka Wot a dano bino dwogo. I kare-naca jo aryo bino bedo i poto; obino kwanyo ŋat acel, ŋat acel te doŋ. Mon aryo bino bedo ka rego; obino kwanyo ŋat acel, ŋat acel te doŋ. Kiu wunu, pien mom iŋeo wunu ceŋ a Rwotwa bino bino iye. Ento myero iŋe wunu man, ni, kono won ot rik ŋeo kare ame ayak bino tuno iye, kono okio, mom oweko jo oturo ode. Pi mannono, wun daŋ bed ame doŋ iyikere wunu, pien Wot a dano bino tuno i caa a mom itamo wunu. “Agwok ot ame agen, aryek, en ŋa, ame adwoŋŋere bino weko jo i ode i te loccere, wek opokkigi cam megi i kare a mitte? Tye kede winyo amironono ame adwoŋŋere, ka odwogo, bino nwoŋo otimo kite-nono. Ateni akobbiwu ni, bino keto jam i mere luŋ i twerrere. Ento ka amiro arac-cu okobo i cunye kene kene ni, ‘Adwoŋ doŋogal wok’, ento te cako pwodo omiro wadgi kede aŋeca, kun camo, mato, dok mer, won amiro-nono bino dwogo i nino a mom etamo, kede i caa a mom en ŋeo, bino ŋoŋolo en, te kette i akina ogoba; kuno bino bedo iye koko kede kayo lak. “I kare-naca loc me polo bino rom aroma kede anyira apar ame rik otero taragi, ote wot me wot jolo anyom. Jo abic i akinagi onwoŋo omiŋo, jo abic onwoŋo oryeko. Anyira amiŋ otero taragi, ento mom otero moo; ento anyira aryek ca otero moo i cupagi karacel kede taragi. Ame anyom pwod ogal, gin ducu nino te mako waŋgi, ote nino oko. I dye idiŋ te bedo woo ni, ‘Anyom otuno oko; biye ojole wunu.’ Anyira ca ducu te ya oko, ote yiko taragi. Anyira amiŋ te kwayo anyira aryek ca ni, ‘Konywa wunu ba kede moo, tarawa oto oko.’ Anyira aryek te gamo ni, ‘Calo bala mom romowa karacel kedwu. Tikatika ame iwoto iwilo wunu megwu i duka.’ Ame gin pwod owoto me wilo moo, anyom te bino oko; jo a nwaŋ oyikere te donyo karacel kede i arama me nyom, ote cego doggola oko. Icennere anyira ca te dwogo, ote kwayo ni, ‘Adwoŋ, adwoŋ, yabwa ba!’ Anyom te dok iye ni, ‘Ateni akobbiwu ni, an akwiawu gira.’ Pi mannono kiu wunu, pien mom iŋeo wunu nino kadi caa. “Rorom kede lo moro ame awot weno, eka te lwoŋo omiro mere, te wekkigi limmere. Te miyo dano acel ciliŋ tutumia abic, baŋ dano acele te miyo ciliŋ tutumia aryo, kede baŋ en ocele tutumia acel; omio dano acel acel dullere a romo en itic kede, cite en te wot gire oko. Dano ame rik omio ciliŋ tutumia abic te cako tic kede oyotoyot, daŋ te nwoŋo en ocele tutumia abic. Won ciliŋ tutumia aryo daŋ amannono te nwoŋo tutumia aryo ocele. Ento dano a rik ogamo ciliŋ tutumia acel owoto te kunyo piny, te kano lim adwoŋŋere oko. A doŋ kare okato alac, adwoŋ omiro-nu te dwogo oko, te kwano lim karacel kedgi. Dano a rik ogamo ciliŋ tutumia abic te bino baŋe kun okelo ciliŋ ocele tutumia abic, te kobbe ni, ‘Adwoŋ, rik omia ciliŋ tutumia abic; neno dok anwoŋo ciliŋ ocele tutumia abic.’ Adwoŋŋere te gamo ni, ‘Ber meicel, yin amiro aber ame genne. Rik yin agen i kom jami anok, abino miyi twer i kom jami apol. Dony giri i yomcuny adwonŋi.’ Won ciliŋ tutumia aryo daŋ te bino baŋe kun okelo ciliŋ tutumia aryo ocele, te kobbe ni, ‘Adwoŋ, rik imia ciliŋ tutumia aryo; neno, dok anwoŋo ciliŋ tutumia aryo ocele.’ Adwoŋŋere te gamo ni, ‘Ber meicel, yin amiro aber ame genne. Rik yin agen i kom jami anok, abino miyi twer i kom jami apol. Dony giri i yomcuny adwonŋi.’ Dano ame rik omio ciliŋ tutumia acel daŋ te bino baŋe, te kobo ni, ‘Adwoŋ, nwaŋ aŋeo ni yin i dano agwa. Ikao i kan a mom icoo, igwaro i kan a mom ionyo iye; omia abedo kede lworo, ate wot kano ciliŋ meri piny i lobo. Neno, giri en.’ Ento adwoŋŋere te dok iye ni, ‘Yin amiro arac, ame komi wac. Yam iŋeo ni akao i kan a mom acoo, agwaro i kan a mom aonyo iye? Kara ŋo omoni tero limma baŋ jo beŋne, me wek ka adwogo, anwoŋ limma kede agoba mere? Gam wunu ciliŋ i baŋe oko, mi wunu baŋ won ciliŋ tutumia apar. Pien ŋat acel acel a mere tye obino miye, te durre baŋe; ento ŋat a mere mom obino gamo anaka gin a tye baŋe oko. Amiro ame konnyere pe ca bole wunu i colpiny a tye oko; kuno bino bedo iye koko kede kayo lak.’ “I kare ame Wot a dano bino dwogo kede kwogo mere karacel kede omalaika mere ducu, en bino bedo i wi kom loccere me kwogo. Rok luŋ bino cokere karacel i nyime, en bino poko akinagi papat, bala akwat ame poko romi i akina dyegi. En bino keto rommi i bade tuŋ cem, kede dyegi i bade tuŋ cam. Cite abaka bino kobbi jo i bade tuŋ cem ni, ‘Biye wunu, wun jo ame Pappa omiowu winyo, igam wunu loc ame oyiko pirwu geye i acakki piny. Pien rik ka kec neka, wun imia wunu cem; ka oryo pii cira, wun imia wunu amato; ka rik a welowu, itera wunu i ot; ame atye onoro, iruka wunu; a rik koma lit, ibino wunu baŋa; ame atye i buc, ilima wunu.’ Jo ame kitegi atira bino gamo ni, ‘Rwot, rik oneni awene ame kec aneki, ote miyi cem; onyo a rik oryo pii ociri, ote miyi imato? Wan oneni awene ame i welo, ote teri i ot; onyo ame itye onoro, ote ruki? Wan oneni awene ame komi lit onyo ame itye i buc, ote limi?’ Abaka bino dokkigi iye ni, ‘Ateni akobbiwu ni, gin ame itimo wunu i kom dano acel i akina omega atino-ni, mano itimo wunu an,’ Doŋ icennere en bino kobbi jo i bade tuŋ cam ni, ‘Wun jo ame oceno, wot wunu oko i nyima, i mac a mom to ame oyikki Catan kede omalaika mege. Pien rik ka kec aneka, mom imia wunu cem; ka oryo pii ocira, mom imia wunu amato; ame rik a welowu, mom itera wunu i ot; ame atye onoro, mom iruka wunu; a rik koma lit onyo ame atye i buc, mom ilima wunu.’ Cite gin daŋ obino gamo ni, ‘Rwot, rik oneni awene ame kec aneki, onyo ame oryo pii ciri, onyo ame i welo, onyo ame itye onoro, onyo ame komi lit, onyo ame itye i buc, mom okonyi?’ En bino dokkigi iye ni, ‘Ateni akobbiwu ni, Gin a mom itimo itimo wunu i kom ŋattoro acel i akina jo-ni atino-ni, mano nwoŋo mom itimo wunu i koma,’ Cite gin bino wot i can a mom tum, ento jo ame kitegi atira bino wot i kwo a perakino odoco.” Ame Yecu doŋ otyeko kobo kop magu luŋ, en te kobbi jo mere a lube ni, “Wun iŋeo wunu ni odoŋ nino aryo me te bedo ecuban me Kato, eka ote bino miyo Wot a dano me gure i kom yataria.” I kare-nu olamdog adoŋo kede odoŋe me Ojudaya ocokere karacel i dyekal alamdog adwoŋ ame nyiŋe Kayapa, ote poro kop karacel me mako Yecu kede ryeko me ote neke. Ento gin te kobo ni, “Pe i kare me ecuban, mio lwak bino tugere.” Ame Yecu tye i Betania tuŋ a Cimon adobo, dako moro obino baŋe kun tye kede adomo moo a ŋwece kur ame wellere dwoŋ, oonyo i wie kun en tye i dog cam. Ka jo a lube oneno, yigi owaŋ, ote kobo ni, “Man obalo nono piŋo? Pien kono ocato moo man, kono okelo lim abup me amia baŋ ocan.” Ka Yecu oŋeo, okobbigi ni, “Kara icano wunu dan-ni piŋo? En otio tic aber i koma. Ocan itye wunu kedgi nino luŋ, ento an mom abino bedo kedwu nino luŋ. Moo man en oonyo i koma me eyik kede koma me ayika. Ateni akobbiwu ni, i wi podo luŋ kan ame obino tito iye amut aber-ri, obino kobo iye gin a dako-ni otio, me poyo en.” I kare-nono dano acel i akina jo apar wie aryo, nyiŋe Juda me Keriot, owoto baŋ olamdog adoŋo, te penyogi ni, “Ibino miya wunu ŋo, ka an abino miye baŋwu?” Gin te cule kede ciliŋ me kare naca pyeradek. Cakere i kare-naca en te yenyo kare aber me miyo Yecu baŋgi. I nino me agege me camo Ogati a Tobi Mom iye, jo a lubo Yecu obino baŋe te penye ni, “Imito ni owot oyik tuŋ kwene me icam iye cam me Kato?” En te gamo ni, “Wot wunu i Jerucalem baŋ ŋadi ite kobbe wunu ni, ‘Apwony okobo ni, karena doŋ ceggi. Abino camo Kato baŋi, karacel kede jo a luba.’ ” Jo a lube te timo acalo Yecu ocikogi, ote yubo cam me Kato. Ame piny doŋ oyuto, en obedo piny i dog cem karacel kede jo a lube apar wie aryo. A doŋ gin tye ka cam, Yecu te kobo ni, “Ateni akobbiwu ni, ŋat acel i akinawu bino keto erupe i koma.” Gin te conne meicel, eka ote ero penye acel acel ni, “Apwony, an ce?” En te gamo ni, “Dano ame ogweo wan kede i tabo acel, en a bino keto erupe i koma. Wot a dano awot acalo yam ocoo i kome; ento dano ame aketo erupe i kom Wot a dano-nu, kite ame ebino neno can kede! Onwoŋo kono obedo ber, dano-nono kono rik pe onywalo.” Juda ame oketo erupe i kome te penye ni, “Rabbi, an ce?” En te dok iye ni, “Yin ikobo giri.” Ame gin pwod acamo cem, Yecu omako ogati; ka doŋ okwao iye winyo, onyinyilo, omio baŋ jo a lube kun kobo ni, “Gam icam wunu, man en koma.” Otiŋo ikopo; ka doŋ opwoo, omiogi kun kobo ni, “Wun ducu mat wunu man; pien man en remona me cikere, ame oony pi jo apol me gonyo bal. Atittiwu ni, cakere amanni, mom dok abino mato pig olok, ituno i nino ca ka ate bino mato anyennere karacel kedwu i loc a Pappa.” A doŋ gin otyeko wer, ote wot oko i wi kidi me Jeituni. Yecu te kobbigi ni, “Dyewor a tin wun ducu ibino wunu kwanyo genwu i koma oko; pien nwaŋ ocoo ni, ‘Abino neko akwat, rommi te ket ata.’ Ento ka doŋ ocera, abino telliwu yo me wot i Galilaya.” Petero te kobbe ni, “Kadi bed jo ducu bino kwanyo gengi oko i komi, cite an mom abino kwanyo.” Yecu te kobbe ni, “Ateni akobbi ni, tin, i dyewor man, a twon gweno pe ru okok, yin ibino kwera tyen adek.” Petero te kobbe ni, “Kadi bed to, mom abino kweri.” Jo a lube ducu te kobo kite-nono. A doŋ Yecu owoto kedgi i kabedo ame olwoŋo Gececemane, en te ciko jo a lube ni, “Bedu kan koŋ, pwod awot kwayo Obaŋa kano.” En te tero Petero kede itino a Jebedayo aryo, eka te ero conne oko kede kumo adwoŋ. Te kobbigi ni, “Waŋcuny atek amito neka oko. Bed wunu kan, ikiu piny karacel keda.” Te wot i nyim anok, oryebere piny, te kwayo ni, “Pappa, ka twerre, wek ikopo man kat oko i baŋa: cite kur bed acalo an amito, ento acalo yin imito.” Te dwogo baŋ jo mere a lube, onwoŋogi doŋonino oko, te kobbi Petero ni, “Kara mom itwero wunu kiyo piny keda pi caa acelloro? Kiu piny, kwa wunu Obaŋa, me kur idony wunu i abita a Catan. Cuny mito ta, ento kom nyap.” Tedok wot tyen me aryo, te kwayo Obaŋa kun kobo ni, “Pappa, ka ikopo man mom twero kato ame pe ru amato, wek gin ame imito timere.” Te dok dwogo, onwoŋo doŋ gin onino oko, pien onwoŋo nino onuro waŋgi. Te dok wekogi, owoto okwao Obaŋa tyen me adek, kun kobo kite kop acellaca. Ka otum, en te dwogo baŋ jo mere a lube, te penyogi ni, “Pwod inino wunu? Pwod iweo wunu bo? Nen, ca doŋ ceggi, Wot a dano otye a miye iciŋ obalo. Ya wunu malo, owotu. Nen dano ame oketo erupe i koma doŋ ceggi.” A pwod etye ekop, nen, Juda te pello, en dano acel i akina jo apar wie aryo-ca. En obino kede lwak jo apol ame oya ibaŋ olamdog adoŋo kede odoŋe me Ojudaya, kun gin tye kede pale me romo kede abiriŋ. Dano ame oketo erupe i kome nwaŋ omiogi anyut, kun kobo ni, “Dano ame abino moto kun anoto leme, nwoŋo en ennono ikome; make wunu.” Te onyakino baŋ Yecu, te mote ni, “Rabbi, itye?” Onoto leme. Yecu te gamo ni, “Awotta, i bino piŋo?” Eka gin te bino poto i kom Yecu, ote make oko. Nen, dano moro acel ame tye baŋ Yecu oryeo ciŋe, owoto pala romo mere, te toŋo i yit opii alamdog adwoŋ, ŋolo oko. Yecu te kobbe ni, “Dwok pala batti i akuro mere; pien jo ducu amako pala me romo obino tyekogi i pala me romo. Onyo itamo ni mom atwero kwayo Pappa me mia omalaika ame kato eryoŋet apar wie aryo oko, i caa man? Kara coc a yam ocoo bino cobere kakare niŋo, ni myero bed amannono?” I kare-nono Yecu te kobbi lwak ni, “Ibino wunu i koma kede pale me romo kede abiriŋ, bala ibino wunu mako ayak? Nino luŋ nwaŋ abedo kedwu i ot Obaŋa kun apwonyo, mom imaka wunu. Ento mano ducu otimere wek coc a yam ocoo cobere kakare.” I kare-nu jo a lube ducu oriŋo, ote weke oko. Jo ame omako Yecu otere baŋ Kayapa, alamdog adwoŋ, kan ame opwony-cik kede odoŋe ocokere iye karacel. Petero obedo lubo yore me icecen ituno naka i dyekal alamdog adwoŋ. Odonyo iye te bedo piny karacel kede otic me enen kit a bino gik kede. Olamdog adoŋo kede okiko ducu te yenyo caden me kel kop goba i kom Yecu me oneke, naka mom onwoŋo, kadi bed caden apol okelo kop me goba. Me agikki mere jo aryo te bino, kun okobo ni, “Dano man okobo ni, ‘Atwero ke to ot Obaŋa, eka ate dok gero i nino adek.’ ” Alamdog adwoŋ te putte malo, te penye ni, “Mom idok iye kopporo? Man kop aŋo ame odoti kede-ni?” Ento Yecu te liŋ gire aliŋa. Alamdog adwoŋ te dok kobbe ni, “Amito ikwoŋ i nyiŋ Obaŋa akwo, itittiwa ka yin i Kricito, Wot Obaŋa.” Yecu te gamo ni, “Yin ikobo; ento akobbiwu ni cakere amanni ibino neno wunu Wot a dano ame obedo piny i kabedo me kwogo i laŋet Won Twer tuŋ cem, kun bino kede pol me polo.” Alamdog adwoŋ te yeco boŋŋi mere kene kene kun kobo ni, “Oyeto Obaŋa; kara pwod omito wunu caden me no? Doŋ iwinyo wunu kite a en oyeto kede Obaŋa. Itamo wunu nino iye?” Gin te dokke iye ni, “Ballere romo to.” Gin ote pato lao i waŋe, ote doŋe: jo mogo obape kun okobo ni, “Yin i Kricito, yin adwarpiny do, tucciwa! Kara ŋa ojwati?” Petero onwoŋo tye oko, obedo piny i dyekal. Aŋeca moro te bino baŋe, te kobo ni, “Yin daŋ woki itye wun kede Yecu me Galilaya.” Ento en okwero i nyimgi ducu kun kobo ni, “An mom aniaŋ gin ikobo.” En te kato i dog paco, aŋeca ocele te nene te kobbi jo a tye kuno ni, “Dano man woki tye gin i Yecu me Najaret.” En dok te kwero oko kun kwoŋo akwoŋa, akobo ni, “An gira mom aŋeo dano-naca.” Kare te kato anok, jo ame ocuŋ kuno te bino baŋe kun okobbe ni, “Ateni yin daŋ dano acel i akinagi, pien kite me koppi nyuti.” En te dok kwoŋ kun lamere kene akobo ni, “An gira mom aŋeo dano-naca.” Cucuttono twon gweno te mwoco koko. Petero te po i kop a rik Yecu okobbe, ni, “Ame pe ru twon gweno okok, ibino kwera tyen adek.” Okato oko, okok kun cunye waŋ meicel. Ka piny oru, olamdog adoŋo kede odoŋe me Ojudaya oporo kop karacel me neko Yecu; ote tweye, tere, ote miye baŋ Pilato aloc. Juda ame rik oketo erupe i kome, ka oneno ni doŋ oŋolo kop oloo Yecu, oŋut oko, odwoko ciliŋ pyeradek ca baŋ olamdog adoŋo kede odoŋe, kun kobo ni, “An abalo pi keto erupe i kom remo a mom i bal.” Ento gin te dokke iye ni, “Mannono kopwa bo? Koppi giri.” En te bolo lim piny i ot Obaŋa, te wot deye oko. Olamdog adoŋo te tero lim-mu kun okobo ni, “Pe myero oket i akina lim me ot Obaŋa, pien owino kede remo.” Cite gin oporo kop karacel, ote wilo kede poto acwegulli, te bedo me yiko wele. Pi mano ote lwoŋo poto-nu ni, Poto me Remo, anaka tin. Kittono kop a yam adwarpiny Jeremia okobo ocobere kakare, ni, “Rik gin otero ciliŋ pyeradek, i wel a dano ame jo mogo i akina ikwae Icrael oŋolo wellere, ote miyo poto acwe-gulli, acalo Rwot ocika.” Yecu ocuŋ i nyim aloc, aloc te penye ni, “Yin Abaka Ojudaya?” Yecu te kobo ni, “Yin ikobo giri.” Ento ka olamdog adoŋo kede odoŋe odote kede kop apol, en mom odok i kopporo. Pilato te penye ni, “Yin mom iwinyo kop apol ame odoti kede-ni, ce?” Ento kop ducu ame okelo en mom odok i moro acelloro; man omio aloc owuro meicel. I kare me ecuban aloc yam goŋnyi lwak abuccoro acel ame gin omito. I kare-nono onwoŋo gin tye kede abucoro a ŋeye, a nyiŋe Baraba. A doŋ gin ocokere karacel, Pilato te penyogi ni, “Imito ni agonnyiwu ŋa, Baraba, onyo Yecu ame olwoŋo Kricito?” Pien en oŋeo ni gin omie baŋe ni nyeko. Ame en doŋobedo i wi kom me ŋolo kop, dako mere ocwao kwena baŋe ni, “Kur itim ginnoro i kom dano-nu ame kite atira, pien tin i waŋ lek aneno can adwoŋ meicel pire.” Ento olamdog adoŋo kede odoŋe te cupo lwak oko me gin kwa ka Baraba, omi nek Yecu oko. Aloc te dok penyogi ni, “I kom jo-ni aryo-ni imito wunu ni gonnyiwu ŋa?” Gin te dok iye ni, “Baraba.” Pilato dok openyogi ni, “Kara Yecu ame olwoŋo Kricito abino timo nadi?” Gin ducu ote gamo ni, “Myero gure i kom yataria.” En te kobo ni, “Kara piŋo? Gin aŋo arac ame otimo?” Ento gin omedde i redo ni, “Myero gure i kom yataria!” Pilato ka oneno ni mom doŋatwerre, woo amedde ka ameda, te kwanyo pii, logo kede ciŋe i nyim lwak kun kobo ni, “Bal me remo a dano man mom i koma gira; kop mewu giwu.” Jo luŋ te gamo ni, “Remo mere bed i wiwa kede i wi ikwaewa.” Eka te doŋgonnyigi Baraba, te pwodo Yecu kede del, te miye me agura i kom yataria. Cirikale aloc otero Yecu i Praitorion, eka ote coko eryoŋet megi ducu i nyime. Gin te gonyo boŋo mere oko i kome, ote ruke kede jor arema. Ote kado alukana me okuto, rwako i wie, ote keto ogada i ciŋe tuŋ cem. Orumo congi i nyime, oŋale kun okobo ni, “Oreme ba, Abaka Ojudaya!” Opato lao i kome, okwanyo ogada, ote jwato i wie. A doŋgin otyeko ŋale, ote doŋgonyo jor i kome oko, ote ruke kede boŋŋi mere ikome, ote tere me wot gure i kom yataria. Ame onwoŋo gin adonyo oko, orwatte kede dano moro me Kurene nyiŋe Cimon, ote diye me ye yataria a Yecu. Ame gin otuno i kabedo a nyiŋe Golgota, ame te koppere ni, kabedo me Cogo Wic, ote miye kono ame orubo kede epio ni mati; ka obilo, mom oye mato. A doŋotyeko gure i kom yataria, ote poko boŋŋi me re oko i akinagi kun obolo iye kwir; gin te bedo piny kuno kure. Kop ame opide pire oguro malo i wie; ocoo ni, “Man Yecu, Abaka Ojudaya.” Ogure karacel kede oyakkogo aryo, dano acel i laŋete tuŋ cem, acel tun cam. Jo a nwaŋ abeo akato oyete kun oyeŋo wigi, ame okobo ni, “Yin ame iketo ot Obaŋa ite gero i nino adek, larre keni koŋ. Ka yin i Wot Obaŋa, yitto piny, iya i kom yat oko!” Anaka olamdog adoŋo kede opwonycik kede odoŋe daŋ oŋale amannono kun okobo ni, “Yam laro jo ocele, mom twero larre kene. En Abaka Icrael do; koŋ yitto piny, ya i kom yataria amanni, cite obino ye en. En geno Obaŋa, koŋ larre amanni, ka en mito; pien yam okobo ni, ‘An a Wot Obaŋa.’ ” Anaka oyak ame oguro karacel kede daŋ acoc amannono. Cakere i caa abicel piny te doko col i wi lobo luŋ, tuno anaka caa aboŋwen. I akina me caa aboŋwen Yecu oredo kede dwon aloŋo ni, “Eli, Eli, lama cabaktani?” ame te koppere ni, “Obaŋana, Obaŋana, iweka piŋo?” Jo mogo ame ocuŋ kuno, ka gin owinyo, ote kobo ni, “Lo-ni alwoŋo Elia.” Cucuttono dano acel i akinagi oriŋo, te kwanyo abwaŋarot, te luto i kono awac, orwako i wi tir, te miye ni jwi. Jo okene okobo ni, “Weku koŋ onen ka Elia abino me larre.” Yecu te dok redo i dwon aloŋo, te doŋ jalo kwo mere oko. Nen, boŋo icika me ot Obaŋa te yec oko i dul aryo, ocakere i malo, odwogo kede naka piny. Piny oyeŋere, lela-gu obarre oko; dog lyele daŋ te yabere oko, kom jo acil apol a yam oto te cer oko. Gin odonyo oko i lyelegi; ame Yecu doŋ ocer, gin te wot i boma acil, jo apol onenogi. Adwoŋ me cirikale karacel kede jo a rik tye kede kun okuro Yecu, ka oneno piny oyeŋere kede gin ducu ame otimere, lworo omakogi atek, ote kobo ni, “Ateni, man kara onwoŋo atin Obaŋa!” Onwoŋo daŋ tye monnogo apol kuno ame obedo ka neno i teŋe; gin yam onwoŋo lubo Yecu cakere i Galilaya kun okonye. I akinagi onwoŋo tye Maliam me Magdala. Maliam tota a Yakobo kede Yucepu, kede toto otino a Jebedayo. Otyeno te bino dano moro ame alonyo, me Arimataya, nyiŋe Yucepu; en ikome daŋ onwoŋo alub Yecu. En owoto baŋ Pilato, okwao kom Yecu. Pilato te ciko ni mie. Yucepu otero kome, te boye kede cuka camanini acil, te pyele i lyellere ikome a pwod nyen ame oboro abora i lela, oloro kidi adwoŋ, ogacakino i doge, te wot oko. Maliam me Magdala kede Maliam ocele-nu onwoŋo tye kuno, obedo gigi piny i nyim lyel. Odiko mere, ame en nino a lubo ceŋ me Yikere, olamdog adoŋo kede Oparicayo te cokere karacel baŋ Pilato, ote kobbe ni, “Adwoŋ, doŋ opo ni dano ame agoba ca, ame rik pwod kwo okobo ni, ‘A doŋ nino adek okato abino cer oko.’ Pi mannono, cik me gwok lyel ituno i nino me adekkere, me jo a lube kur bin dyewor ote bino kwalo oko, eka ote kobbi jo ni, ‘En doŋ ocer oko i akina jo oto’; mano mio bwol man me agikki bino doŋ bedo arac akato me agege.” Pilato te kobbigi ni, “Wun itye wunu kede okur; wotu, igwoke acalo itwero wunu.” Gin ote wot cego lyel aber a kun omwono anen iye i kom kidi, ote keto iye okur me gwoko. Ame cabit doŋ otum, ka ibayi i nino ame lubo cabit Ojudaya. Maliam me Magdala kede Maliam ocele ca owoto me neno lyel. Oyeŋo te yeŋo piny meicel, pien omalaika a Rwot oyitto piny ame oya i polo, obino ocoro kidi teŋe, te bedo i wie. Nennere nen bala lutkot, rukkere tar bala pee. Omyelo kom okur meicel pi lworo, ote doko bala jo oto. Amalaika te juko mon, ni, “Kur ilwor wunu; pien aŋeo ni iyenyo wunu Yecu a yam oguro i kom yat. En mom tye kan, pien ocer oko acalo rik okobo. Biye inen wunu ka buto mere. Wot wunu oyotoyot, ikobbi wunu jo a lube ni, en otyeko cer oko i akina jo oto. En doŋ atelliwu yo me wot i Galilaya, ibino nene wunu kuno. Nen, atyeko tittiwu.” Gin te ya oko oyotoyot i lyel kun otye i lworo kede yomcuny adwoŋ meicel, ote riŋo tito kop man baŋ jo a lube. Cite nen, Yecu te rwatte kedgi, te motogi ni, “Oreme wunu ba.” Gin obino baŋe, ote mako tyene, ryebere piny i nyime. Yecu te kobbigi ni, “Kur ilwor wunu; wot wunu, ititti wunu omegona ni gin owot i Galilaya, gin bino nena kuno.” Ame gin awot oko, jo mogo i akina okur te wot paco me dwoko kop pi gin otimere baŋ olamdog adoŋo. Eka gin te cokere karacel kede odoŋe, oporo kop, ote miyo lim abup baŋ ocirikale, ote cikogi ni, “Kobbi wunu jo ni, ‘Jo mere a lube obino dyewor, ote kwale oko ame wan onino.’ Ka kop-pi bino winyere baŋ aloc, wan obino bibito en, me cannoro kur pot i komwu.” Gin te gamo gigi lim, ote timo kite acalo opwonyogi kede; omio kop man olal i akina Ojudaya, winyere naka tin. Olub Yecu apar wie acel te wot i Galilaya, i wi kidi a rik en ocikogi. Ka gin onene, oryebere piny i nyime, ento jo mogo okalo akala. Yecu te bino baŋgi, te kop kedgi kun kobo ni, “Twer luŋ aluŋa i wi podo kede i lobo doŋ omio baŋa oko. Doŋ ba, wot ilok wunu jo ducu odok jo a luba; ibatijagi wunu i nyiŋ Apap, kede Wod, kede Cuny Acil, kun ipwonyogi wunu mako gin ducu a rik acikowu. Nen ba, atye kedwu kare luŋ, ituno i agikki piny.” Man en ageyi me amut aber i kom Yecu Kricito, Wot Obaŋa, acalo nwaŋ adwarpiny Icaya ocoo, ni, “Nen, acwao aorra i nyimi; en bino gero yo piri. Dwon dano a redo i tim ni, ‘Ger wunu yo pi Rwot, yik wunu gudo mere cuŋ atira.’ ” Amannono Lakana Abatija obin onen i tim kun rabo kop ni, “Ŋut wunu, me batijawu, me Obaŋa wek balwu.” Jo rik ya i lobo ducu me Judaya, kede jo luŋ me Jerucalem, ciro bino baŋe. Gin tuco balgi, en batijagi i kulo Jordan. Lakana rik ruko boŋo yer inaga, tweo pyere kede del, camo bonyo kede moo kic me tim. En rabo kop kun kobo ni, “Ŋattoro tye ame alubo ŋea, en tek, kata oko; an mom aromo guŋo gonyo del amukkere. An abatijawu kede pii, ento en bino batijawu kede Cuny Acil.” I kare-nono Yecu rik obino kun oya i Najaret me Galilaya, Lakana obatija en i Jordan. Ame en pwod oya ayaa i pii, oyotoyot Yecu oneno polo obarre, Cuny Acil obino acalo amam, olyao piny, opoto i kome. Dwonnoro te ya i polo kun kobo ni, “Yin Woda ame amaro, cunya yom i komi.” Cucuttono Cuny Acil te cwaye itim. Obedo i tim nino pyeraŋwen kun Catan bite. Leyi me tim onwoŋo daŋ tye kannono, omalaika okonye. I kare a doŋ otweo Lakana i buc, Yecu obino i Galilaya kun rabo amut aber ame oya i baŋ Obaŋa, kun kobo ni, “Kare doŋ oromo, loc Obaŋa doŋ onoko ceggi; ŋut wunu, iye wunu amut aber.” Ka cen owoto i dog nam me Galilaya, oneno Cimon gin ominnere Anderiya; otye ka ciko bwo iyi nam, pien ceŋ gin ocik rec. Yecu okobbigi ni, “Biye iluba wunu, abino lokowu ocok jo akaka rec.” Oyotoyot gin oweko bwoyigi, ote Lube. Dok owoto i nyim anonok, te neno Yakobo gin ominnere Lakana itino a Jebedayo, kun obedo i yee, oropo bwoyigi. Cucuttono olwonogi, gin oweko papagi Jebedayo odoŋ kede opakaca i yee, ote lube. Gin owoto i Kapernaum. Ka ceŋ me cabit oromo, Yecu odonyo i kacokere, opwonyogi. Gin owuro pwonnyere atek, pien opwonyogi acalo ŋat a tye kede twer, pe acalo opwony-cik. I kacokeregi onwoŋo tye iye dano moro a tye kede cen arac. En oredo ni, “Kara ilaro ŋo kedwa, yin Yecu me Najaret? Ibino pi tyekowa atyeka bo? An aŋei, yin Ŋat Acil Obaŋa.” Ento Yecu tejuke ni, “Liŋiti, ya oko i kome.” Cen arac omie oryeye, oredo kede dwon aloŋo, te ya i kome. Omio jo luŋ owuro atek, kun openyere kengi kengi ni, “Man ŋo kara? Man pwony anyen, tye iye twer! En ciko anaka cen areco, owinyo doge.” Cucuttono rwoŋe te rwo i kabedo ducu i lobo Galilaya ame omano kuno luŋ. Yecu oya i kacokere, te wot i paco a Cimon kede Anderiya; Yakobo kede Lakana daŋ owoto kede. Maro a Cimon onwoŋo obuto, kun tye kede lyeto i kome; cucut otitte pire. En owoto baŋe, omako ciŋe, otire malo, lyeto oya i kome, te cako konyogi. Otyeno ka ceŋ doŋ opoto, jo okelo baŋ Yecu otwo ducu, kede wegi cen areco; jo boma-nu luŋ ocokere i dog ot! En ocaŋo otwo apol ame kwon toogi papat, oryemo cen apol. Pe oye ni cennoro kob kopporo, pien oŋee. Odiko con meicel ame piny pwod col, Yecu odilo, okato oko. Owoto kan a jo pe iye, orio ka kwayo Obaŋa kuno. Cimon kede owote mere owopo yore. Ka gin onwoŋe, okobbe ni, “Jo luŋ tye ka moyi.” En odokkigi iye ni, “Owotu dok i boma mogo ocele ame ceggiceggi kede kan, me arab kop kuno daŋ, pien cen abino pi koppono.” Owoto i dye Galilaya luŋ, orabo kop i kacokeregi, kun ryemo cen. Adobo moro obino baŋe, obako doge kun rumo piny, te kobo ni, “Ka imito, itwero lonya.” Kica omako Yecu, te ryeyo bade, te gude kun kobo ni, “Ee, amito; lonyere giri.” Cucuttono dobo te ony i kome oko, te lony. Yecu ocwae kun cike atek, kobbe ni, “Winy ba, kur ikob i dano moro, ento wot giri, inyutte keni baŋ alamdog, imi mot pi lonyere meri acalo rik Muca ociko, obed anyut baŋgi.” Ento en owoto, oero rabo pire atek, kede lalo koppono. Pi mannono omio Yecu pe dok twero donyo i boma moro kannaler, ento bedo teŋe kan a jo pe iye; jo ya i kabedo ducu bino baŋe. Ka nino okato anok, Yecu dok odwogo i Kapernaum, jo te winyo ni en tye paco. Ote cokere apol, omio kabedo te dokkigi adiŋ oko, anaka atot i doggola daŋ; en obedo ka rabo kop baŋgi. Jo moro te bino kun okelo baŋe dano ame two too me akwea kom, ame jo aŋwen odyelo. Ka yo me tere i nyim Yecu oloogi pi pol a lwak, gin te tuco wi ot kan a en tye iye; ka doŋ omuko, ote cwayo gi-buto ame atwo obuto iye. Yecu ka oneno iyeegi, te kop kede atwo ni, “Awobi, balli doŋ oweko oko.” Opwony-cikkogo ame onwoŋo obedo kuno opyem i cunygi kengi ni, “Dano man kobo aman piŋo? En ayeto Obaŋa! Ŋa ame twero weko bal, kono Obaŋa keken gire?” Piopio-nono Yecu te niaŋ oko i cunye ni gin otye ka tamo amannono i yigi, te penyogi ni, “Piŋo ipyem wunu i cunywu amannono? Kara ayottere mene, ka okobbi atwo ni, ‘Balli doŋ oweko oko’, onyo ni, ‘Ya, itiŋ gibutoni, iwoti?’ Ento an amito iŋe wunu ni, Wot a dano tye kede twer i lobo me weko bal.” En te kobbi lo ame two too akwea kom ni, “An akobbi ni, ya, itiŋ gi-butoni, iwot giri paco.” En oya, otiŋo gi-buto mere oyotoyot, odonyo oko kun kato i nyimgi ducu, omio gin luŋ owuro meicel, daŋ ote pako Obaŋa a kun okobo ni, “Anaka cene mom ru oneno gin acalo man.” Yecu dok te wot oko i dog nam me Galilaya; lwak ducu obino baŋe, en opwonyogi. Ka okato iyo, oneno Levi, wot a Alipayo ame obedo piny i ka rayo ocoro; okobbe ni, “Luba.” En oya, olube. Ame Yecu obedo piny i dog cem i ot a Levi, ora-ocoro apol anaka obalo obedo piny karacel kede Yecu kede jo a lube, pien onwoŋo kodi jo-nono apol tye a lube. Opwony cik ame i akina Oparicayo oneno ni en acem karacel kede obalo kede oraocoro, ote penyo jo a lube ni, “Kara piŋo en cemo karacel kede ora-ocoro anaka obalo-gu?” Ka Yecu owinyo, te kobbigi ni, “lo a komgi yot mom mito dakatal, kono ka jo a komgi lit. An mom abino me cwano jo a kitegi atira, ento obalo.” Jo a lubo Lakana kede jo a lubo Oparicayo onwoŋo otye ka kanyo kec; jo moro obino, te penyo Yecu ni, “Kara piŋo jo a lubo Lakana kede jo a lubo Oparicayo gin kanyo kec, aco jo a lubi mom kanyo kec?” Yecu te gamo doggi ni, “Owote a ŋat a nyom twero kanyo kec a kun en anyom tye baŋgi? Pi kare luŋ ame anyom tye baŋgi mom otwero kanyo kec. Kare bino tuno ame obino kwanyo anyom oko i baŋgi, eka gin te kanyo kec i ninonono. Mom tye dano moro ame dapo dul boŋo anyen, ame pe ru olwoko, i kom en ame doŋ oti. Ka en otimo kite-nono, dul boŋo ame odapo kede-ni lunyo telo boŋe-nu, en anyen telo en aconni, waŋe te yec medde ameda. Dok mom tye dano ame piko koŋo anyen i ocoe acon; ka ce opiko, koŋo anyen bino yeco ocoe, koŋo te balle oko kede ocoe daŋ; ento koŋo anyen mito ocoe anyen.” Ka nwaŋ Yecu woto kun aŋolle i poto bel i nino me cabit, jo a lube oero rito wit bel kun owoto. Oparicayo te penye ni, “Kara piŋo jo a lubi otimo gin ame cik okwero ni jo kur ti i ceŋ cabit?” En te gamo doggi ni, “Wun ce mom ikwano wunu gin ame nwaŋ Daudi otio ka rik en tye arac, ame kec oneke, en kede jo a rik tye karacel kede? Kite ame en odonyo kede i ot Obaŋa, i kare ame Abiatar obedo alamdog adwoŋ, te camo ogati ame oketo i nyim Obaŋa, a yam cik okwero ni dano moro kur cam, kono ka olamdog keken? En ocamo dok te miyo baŋ jo ame tye karacel kede.” Te kobbigi ni, “Cabit tye gire pi dano, mom dano en a tye pi cabit. Pi mannono, Wot a dano en rwot anaka me cabit.” Yecu dok odonyo i kacokere, ame onwoŋo tye iye dano ame bade omito. Gin okie ka ce bino caŋe i ceŋ cabit, me ote pide. En okobbi dano ame bade omito ni, “Ya icuŋ i dyere.” Te penyogi ni, “I ceŋ cabit cik ye ni tim iye gin aber onyo gin arac, lar kwo onyo nek aneka?” Gin oliŋ aliŋa. Yecu oŋoloro waŋe i akinagi kede akemo, kun yie waŋ pi nwaŋcunygi; okobbi dano a bade omito ni, “Rye badi oŋ.” En oryeo bade, te caŋ oko. Oparicayo te ya oko i ot, ote poro kop pio pio kede jo a Kerode kite a myero neke kede. Yecu te wot oko karacel kede jo a lube, obino i dog nam. Lwak jo ecipan ame oya i Galilaya olube, anaka jo ame oya i Judaya, kede i Jerucalem, kede ldumaya, kede loka Jordan, kede i lobo ame omano Turo kede Cidon. Lwak magi luŋ cen obino baŋ Yecu pien gin owinyo gin ame en bedo ka tiyo. En okobbi jo a lube ni myero yik yee atidi pire, me lwak kur dic; pien onwoŋo en ocaŋo jo apol, en omio jo ducu a komgi lit odiye i kome me omule. Ka cen areco onene, gin oryebere i nyime, okok kun okobo ni, “Yin giri i Wot Obaŋa.” Ojukogi ni kur lal rwoŋe baŋ jo. Yecu oyito malo i wi kidi, ocwano jo ame emito baŋe; gin obino baŋe. Oyero jo apar wie aryo me bed karacel kede, dok me orgi pi rabo kop Obaŋa, kede me bedo kede twer me ryemo cen. Jonono ene: Cimon ame ocako nyiŋe Petero; Yakobo wot a Jebedayo, kede Lakana omin a Yakobo; ocako nyiŋgi ni Boanergi, te koppere ni, itino me mor a kot; kede Anderiya kede Pilipo, kede Bartolomayo, kede Matayo, kede Tomaci, kede Yakobo wot a Alipayo, kede Tadayo, kede Cimon me eryoŋet a jo a pyem i abumente, kede Juda me Keriot ame cen oketo erupe i kome. En odok paco. Lwak dok te cokere, ame Yecu kede jo a lube mom onwoŋo ka re me camo cem. Ka jo turgi owinyo, gin te bino me make, pien okobo ni, “En ajarapoa.” Opwonycik ame oya i Jerucalem te kobo ni, “En tye kede Beeljebul,” dok ni, “En ryemo cen pi twer a Beeljebul, adwoŋ me cen.” En ocwanogi baŋe, te kop kedgi i carokop, ni, “Catan twero ryemo Catan niŋo? Ka loc opokere yie aryo, loccono mom twero cuŋ. Dok ot ka opokere yie aryo, ot-tu mom twero cuŋ. Ka Catan oero romo i kome kene kene, daŋ opokere kene, pe twero cuŋ, gik oko. Ento mom tye dano moro a twero donyo i ot atekkommoro, te yako jami mere, a mom koŋ ogeo tweyo atekkom eka ete yako ode. “Ateni akobbiwu ni, bal luŋ a jo tiyo, kede koppogo ame jo yeto kede Obaŋa, obino timogi iye kica; ento ŋat a yeto Cuny Acil mom obino timo kica, en nwoŋo otimo bal a bedo i kome nakanaka Pien gin okobo ni, En tye i cen arac.” Tota a Yecu kede omego mere obino, ocuŋ oko, ote cwayo kwena baŋe, olwoŋe. Onwoŋo lwak obedo kun ogure dyere; ote kobbe ni, “Neno, totti kede omegoni tye oko, gin a yenyi.” En te dokkigi iye ni, “Kara totta kede omegona gin ŋa?” Oŋoloro waŋe i kom jo ame obedo piny ogure, te kobo ni, “Nenu ba totta kede omegona. Dano a tio gin ame Obanga mito en ominna, en aminna kede totta.” Yecu dok ocako pwony i dog nam. Lwak ecipan te cokere baŋe; pi mannono en te yito iyi yee; te bedo iye i nam, lwak luŋ te bedo i dog nam i wi tela. Opwonyogi kop apol i carokop. I pwonnyere okobbigi ni, “Winyu ba! Lo moro rik owoto ka coyo koti. Ame en doŋ tye ka coc, koti mogo te kir i dye yo, winy te bino depo oko. Mogo te kir kan obedo lela, ame lobo tye iye warawara. Cucuttono te tu, pien lobo mom tut; ento ka ceŋ oryeny ote two oko, pien lwitgi mom. Mogo te kir i akina okuto, okuto te lot diyogi oko, naka mom nyiggi te cek. Mogo te kir gigi i lobo aber, te tu, te jany, nyiggi te cek; mogo tyene acel acel ocek iye nyige pyeradek, mogo pyerabicel, mogo mia.” Icennere te kobbigi ni, “Ŋat a tye i yit me winyo, myero winy.” Ka onwoŋo Yecu tye kene, jo anwaŋ obedo kun ogure dyere karacel kede jo mere apar wie aryo openye pi carokop magu. En te kobbigi ni, “Wun omiowu muŋ me loc Obaŋa, ento jo ca a tye oko, kop ducu omiogi i carokop, me bed acalo rik ocoo, ni, ‘Ka gin neno, onen cite kur onen aber, dok ka gin winyo, owiny, ento kur oniaŋ tere, kadi dwogo baŋ Obaŋa me wek balgi.’ ” En openyogi ni, “Wun ikwia wunu carokop-pi? Kara i carokop ducu ibino niaŋ wunu iye niŋo? Aco koti coo kop Obaŋa. Magi gin jo i dye yo kan ame ocoo iye koppere; ka gin owinyo, Catan bino oyotoyot, te kwanyo kop ame ocoo i yigi oko. Amannono magi gin ame ocoo kan obedo lela lela; gin ka owinyo kop, ote gamo cuto kede lelo, ento nwoŋo mom otye kede lwitgi i yigi. Ote ri ka anonokkoro; icennere tekki cannoro adwoŋ bino, onyo awuna, pi koppono, gin poto oko cucuttono. Ocele mere gin jo ame ocoo i okuto; gin jo ame winyo kop, ento par apol me lobo man; kede maro lonyo, kede mito jami ocele te donyo i cunygi, te diyo kop oko, mom nyak. Ento maka ame ocoo i lobo aber ca, gin jo a winyo kop, ote jolo, te nyak mogo pyeradek, mogo pyerabicel, mogo mia.” Yecu te penyogi ni, “Tara okelo i ot me awuma oko kede wal bo, onyo me aketa i te itanda? Mom okelo wek ote keto malo wi gol? Pien mom tye ginnoro ame okano, kono me wek nen kannaler; dok mom tye ginnoro ame owumo, kono me wek oyab kannaler. Ka ŋattoro tye i yit me winyo, myero winy!” Dok okobbigi ni, “Gwokere wunu i gin ame iwinyo wunu; kit gin ame iporo wunu iye, en ame daŋ obino porriwu kede, dok obino medo baŋwu. Pien ŋat a mere tye, obino miye; ento ŋat a mere mom, obino gamo oko anaka gin a tye baŋe.” Okobo ni, “Loc Obaŋa tye kite man, rom aroma kede ka dano ocoo koti i lobo; en buto iwor, ya odiko, koti tu, doŋo, kun en kwia kite ame atimere kede. Lobo kene en a mio koti cek; me agege koŋ tu, icennere nok, nyige te corre. Ka kal doŋ ocek, dano-nu te cako kac oyot kede alwete, pien nwoŋo kare me kac doŋ oromo.” Dok te kobo ni, “Obino poro loc Obaŋa kede gin aŋo? Onyo carokoppene ame obino nyuto kede? Rom aroma kede nyig dek karadali ame dano moro okwanyo, ame ka ocoo i lobo, en titino kato koti luŋ; ento ka ocoo, doŋo doko adwoŋ a loo dek ducu, jaŋe pwodde adwoŋ, ame winyi a twarre malo twero gero udigi i tipo mere.” Orabbigi koppere i carokop apol acalo mano, kite acalo gin twero niaŋ kede. Mom okobo kedgi aboŋo carokop, ento ka en tye kede jo a lube kengi, en gonnyigi te kop ducu. Otyeno me nino acel-lu Yecu te kobbigi ni, “Koŋ okat wunu loka tuŋ ca.” Gin te weko lwak oko, ote tere kede yee ame onwoŋo en tye iye; yede ocele daŋ onwoŋo tye karacel kede. Yamo adwoŋ te cako mor oko, pii te ero tagere, ocorre iyi yee, ame omio yee doŋ apoŋ oko. En onwoŋo tye i ojwiny yee, onino gire oko i aten wic. Gin tecoye oko kun okobo ni, “Apwony, yin mom iparo en ame oto oko-ni?” En te co oko, ojuko yamo kun kobo ni, “Kwe mot! Liŋ!” Yamo te kwe, nam daŋ te liŋ mot. Openyogi ni, “Ŋo omio ilwor wunu aman? Iyeewu pe?” Gin obedo kede lworo adwoŋ, ote cako penyere kengi kengi ni, “Man kara ŋa, ame yamo kede nam-gu winye-nie?” Gin otuno loka nam tuŋ ca i lobo a jo Geraca. Yecu ka otyeko ya i yee, dano moro won cen areco orwatte kede, kun oya i akina lyele. En bedo i ka Iyele, mom tye dano moro ame twero tweye kadi kede jegere; pien yam otwee tyen apol i nyony kede jegere, ento en codo jegere, turo nyony oko, ŋattoro pe ame twero loye. Nino ducu, dyewor kede iceŋŋere, en bedo gire i ka lyele kede i wi tur, rio koko, bedo ŋolo kome kene kede gweŋe. En ka oneno Yecu i teŋe, oriŋo, oryebere i nyime, te redo kede dwon aloŋo ni, “Yecu Wot Obaŋa Amalo Meicel, kara ilaro ŋo keda. Akwai i nyiŋ Obaŋa, kur iwuna.” Pien onwoŋo okobbe ni, “Ya oko i kom dano man, yin cen arac.” Yecu openye ni, “Yin nyiŋi ŋa?” Te gamo ni, “Nyiŋa Mony, pien wan opoŋ.” Obako doge baŋ Yecu atek ni kur ryemgi oko i lobo-nono. Lwak puno ecipan onwoŋo tye ka cem i kor kidi kuno. Gin obako doggi kun okwao ni, “Cwawa i punni, me odony i yigi.” En oyegi. Cen areco te ya, pikere iyi punni; lwak puno ame mito romo tutumia aryo obelle i ŋwec i kor kidi, ote poto i nam, ote mwonyere oko iyi nam. Okwat te riŋo oko, tero koppere i boma kede i akina pacci, jo ociro me bino neno gin aŋo ame otimere-nu. Gin obino baŋ Yecu, ote neno won cen areco obedo kuno, orukere i boŋŋi, wie odoko aber, en a yam tye kede lwak cen areco; lworo omakogi. Jo ame oneno otito baŋgi gin ame otimere i kom won cen areco kede i kom punni. Gin ote bako doggi baŋ Yecu ni myero ya oko i Iobogi. A doŋ en ayito i yee, dano a rik tye kede cen areco-nu obako doge ni ber ebed doŋ baŋe. Ento en okwero oko kun kobbe ni, “Dok paco baŋ jo turu, itittigi gin adit ame Rwot otimo i komi, kede kite ame otimi kede ber-ri.” En owoto, te cako rabo i Dekapoli gin adit ame Yecu otimo i kome; jo luŋ te wuro. Ame Yecu doŋ okato loka nam, odok tuŋ ca kede yee, lwak ecipan ocokere baŋe, ogure dyere; onwoŋo en tye i dog nam. Lo moro obino ame en ŋat acel i akina odoŋe me kacokere, nyiŋe Yairo. Ka oneno Yecu, te ryebere piny i te tyene, te bako doge baŋe atek ni, “Nyara atidi tye a doŋ ceggi to. Biye iket ciŋi i kome me caŋ oko, obed kwo.” Owoto gin kede, lwak ecipan daŋ olube kun odie. Onwoŋo tye dako moro a nwaŋ otwo too me kwer remo mwakki apar wie aryo. En oneno can adwoŋ baŋ odakatal apol; limmere ducu oket oko, ento too omedde ka ameda. Ka en owinyo kop ame jo kobo i kom Yecu, odonyo i akina lwak, te pello i tuŋ ŋec, ogudo boŋo mere. Pien okobo ni, “Kom ka agudo kadi boŋo mere keken, abino caŋ oko.” Cucuttono remo mere te cok oko, en oŋeo i kome ni doŋ ecaŋ oko i kom cannere. Yotoyot Yecu owinyo i kome kene ni teko moro oya i kome; en olokere i dye lwak kun penyo ni, “Ŋa ogudo boŋŋina?” Jo a lube te gamo doge ni, “Ineno lwak adiyi, pwod dok ipenyo apenya ni, ‘Ŋa oguda-nie?’ ” Yecu oŋoloro tuŋŋi i tuŋŋi me neno ŋat otimo man. Dako-nono, ka oŋeo gin otimere i kome, obino kede lworo ame doŋ kome amyel amyela, te ryebere i nyime, otitte kop ducu me ateni. Yecu te kobbe ni, “Nyara, iyeeni ocaŋi oko, wot giri i kuc, ame doŋ icaŋ oko atwal i kom canni.” Ame en pwod tye ka kop, jo mogo obino ame oya i paco adwoŋ me kacokere, ote kobo ni, “Nyari doŋ oto oko; piŋo dok imedde cano apwony?” Ento Yecu pe oketo cunye i kom kop ame gin okobo, te lunyo kobbi adwoŋ kacokere ni, “Kur ilwor; ye ayea keken.” Doŋ pe te ye ni ŋattoro lube, kono ka Petero kede Yakobo, kede Lakana omin Yakobo. Ka gin otuno i ot adwoŋ me kacokere, oneno lwak jo a wo kun oliakino i koko. Ame en odonyo, openyogi ni, “Kara piŋo iwo wunu i koko? Atin-ni gire mom oto, onino anina.” Gin onyere meicel, en te ryemogi ducu oko, te tero ka papa atin kede tottere kede jo ame onwoŋo tye baŋe, ote donyo kan ame opyelo iye atin. Te mako ciŋe kun kobbe ni, “Talita kum,” ame te koppere ni, “Nyako, akobbi, ya malo.” Cucuttono nyako te ya malo, te ero wowota; pien onwoŋo doŋ tye kede mwaka me dittere a romo apar wie aryo. Gin owuro meicel. Te cikogi atek ni kur ŋattoro ŋe kop-pi, dok te cikogi ni mi nya-nu cem. Yecu oya oko i kuno, odwogo i lobo turgi; jo a lube owapo yore. I ceŋ me cabit en ocako pwony i kacokere. Jo apol ame owinye owuro, kun openyo ni, “Dano man onwoŋo gin man ducu i kwene? Man ryeko aŋo ame omie?” Kede dok ni, “Tic atek adoŋo a rom man ame en tye ka tiyo oya i kwene? Man mom apac, wot a Maliam, omin a Yakobo kede Yoce kede Juda kede Cimon? Anaka amego mere mom tye baŋwa kan?” Cunygi te ya oko i kome. Yecu te kobbigi ni, “Mom tye adwarpinnyoro ame mom oworo, kono ka i lobo me turgi, kede i akina doggola mere, kede i paco mere.” Tiyo ticcogo atek adoŋo kuno oloc, kono ka keto ciŋe i kom otwo mogo anok kede caŋogi. Owurogi atek pien iyeegi mom. Yecu owoto omano i akina myere kun pwonyo. Olwoŋo jo mere apar wie aryo baŋe, te cako orogi teŋe aryoaryo, omiogi twer i kom cen areco. Ocikogi atek ni kur gin owot kede ginnoro i wotgi-nono kono ka abiro keken. Owot aboŋo cem, aboŋo cao, aboŋo lim me arwaka i del pyergi; ento owot ame orwako war i tyengi, ame pe odoko kanyi aryo i komgi. Dok ocikogi ni, “Kan ame idonyo wunu iye i ottoro, bedu iye ituno ka ibino ya wunu i kuno. Ka kabedo moro mom ojolowu, ame jo okwero winyo kopwu, ka iya wunu i kuno, teŋ wunu apua i tyenwu oko me bed caden baŋgi.” Gin owoto, orabo kop ni, jo myero oŋuti. Gin oryemo cen apol, owiro otwo apol kede moo, ocaŋogi. Abaka Kerode owinyo, pien nyiŋ Yecu onwoŋo orwo. Jo mogo kobo ni, “Lakana Abatija doŋ ocero oko i akina jo oto; en gin omio teko man tye ka tic i yie.” Ento jo ocele kobo ni, “Mano Elia gire.” Jo ocele ni, “En adwarpiny, bala ŋat acel i akina odwarpiny acon.” Ento Kerode ka owinyo, te kobo ni, “Lakana a nwaŋ aŋolo ŋuteni doŋ ocere oko.” Pien Kerode onwoŋo ooro jo, omako Lakana, te tweye i buc pi Kerodia, ci-ominnere Pilipo; pien onwoŋo en oloko odoko cege. Lakana nwaŋ okobbi Kerode ni, “Cik pe ye in ibed i ci-ominni.” Omio yi Kerodia owaŋ i kom Lakana, omito neke, ento mom otwerre, pien Kerode onwoŋo lworo Lakana kun ŋeo ni en dano ame kite atira, dok dano acil daŋ, obedo ka gwoke oreme. Ka winyo kop a Lakana orabo, otwoo doge oko, ento winyo koppere pire obedo mit baŋe. Cite kare aber te romo i nino a nwaŋ Kerode oyiko iye arama me po pi nywalle, olwoŋo iye odoŋe me abumenti mere, kede odoŋe a telo wi lweny, kede odoŋe me Galilaya. Nyaka a Kerodia odonyo i ot, omyelo, te yomoro cuny Kerode oko kede wele mere. Abaka te kobbi nyako ni, “Kwa gin ducu ame imito, abino miyi.” Okwoŋo akwoŋa kun kobo ni, “Jami luŋ aluŋa ame ibino kwayo, abino miyi oko, anaka nucu me locca.” Nyako te donyo oko, te penyo tottere ni, “An akwa ŋo?” Okobbe ni, “Wi Lakana Abatija.” Nyako te ru bolle dok baŋ abaka kede mitkome, te kwaye ni, “Amito imia wi Lakana Abatija amanni, i weer-ri.” Cuny abaka owaŋ meicel, cite pi kwoŋŋere i nyim wele mere, mom dok etwero twono nyan-nu. Abaka te ru oro cirikale moro a gwoke kun cike ni, “Kel wi Lakana Abatija.” En te wot, te ŋolo ŋute i buc. Okelo wie kede weer, te miyo baŋ nyan-nu, nyako te miyo baŋ tottere. Ka jo a lubo Lakana owinyo kop man, gin obino otiŋo kome, oyiko oko. Okwena odwogo baŋ Yecu, te titte kop i kom gin ducu ame gin otio, kede ame gin opwonyo. En te kobbigi ni, “Biye wunu kan a jo mom iye, me koŋ iwe wunu anok”, pien jo apol obino aluca luca, omio gin mom obedo kede kare anaka me cem. Gin ote wot oko teŋe kede yee, gin kengi, kan a jo mom iye. Jo apol oneno ka gin woto, oŋeogi oko. Gin daŋ oriŋo kuno kede tyengi kun oya i boma ducu, gin dok te geyo tuŋŋigi kuno. Tekki Yecu ya i yee, ete neno lwak apipim; ocone meicel, pien ocalo rommi ame akwatgi mom; te cako pwonyogi i kop apol. Ka kare me otyeno doŋ okato, jo mere a lube obino baŋe kun okobo ni, “Kan obedo i dye tim, caa daŋ doŋ okato oko. Cwagi i akina pacci kede i akina myere ame ceggiceggi, me gin wil cem pirgi kengi.” En te gamo ni, “Wun migi wunu cem.” Gin ote gamo ni “Owot owil ogati me ciliŋ mia aryo, me omigi ocam?” En te penyogi ni, “Itye wunu kede ogati adi? Wot inenu koŋ.” Ka doŋ gin oŋeo, ote kobbe ni, “Abic, kede rec aryo.” En te ciko ni jo ducu bed piny awu awu i Ium alyabu. Gin obedo piny i eryoŋet apapat, mogo mia, mogo pyerabic. Omako ogati abic kede rece aryo-nu, oneno malo i polo, okwao iye winyo, onyinyilo ogati, omio baŋ jo a lube wek oket i nyim jo; dok opoko rece aryo-nu baŋgi ducu. Gin ducu ocamo, oyeŋ. Ocoko ŋide cem kede me rece, oromo aditti apar wie aryo ame opoŋ. Jo ame ocamo ogati oromo co tutumia abic. Cucuttono Yecu te ruyo jo mere a lube me donyo i yee, otel yo, okat loka tuŋ ca i Betecaida, en koŋ ecik lwak. Ka doŋ otyeko cikogi, te yito i wi kidi ka kwayo Obaŋa. A doŋ piny oyuto, onwoŋo yee tye i dye nam, en onwoŋo odoŋ kene i wi tela. Oneno kwaŋo yee awunogi, pien yamo onwoŋo abino i tuŋ nyimgi. Dyewor i akina ame gwen akoko en te bino baŋgi kun awot i wi nam i tyene, te mito katogi akata. Ento ka gin onene kun awot i wi nam i tyene, ote tamo ni gwok onyo cennoro, ote kuko duro oko; pien gin ducu onene, tipo komgi oto oko. Yecu te kop kedgi oyotoyot ni, “Di cunywu, an ennono, kur ilwor wunu.” Te yito baŋgi i yee, yamo daŋ te kwe oko mot; omio doggi otwo meicel, pien onwoŋo woki mom oniaŋ i te kop me ogati ca, pien cunygi pwod nwaŋ. Ka doŋ gin odokoro loka, oyito i wi tela i Genecaret, ote tweyo yee kuno. Ka doŋ oya oko i yee, lwak te ŋeyo Yecu oyotoyot. Gin te ririŋa mano kabedo-nono ducu, kun ocako kela jo a komgi lit i gi-butogi kan ame gin owinyo ni tye iye ducu. I kabedo ducu ame en bino iye, i akina myere, i boma ducu kede i akina pacci atino, gin pyelo otwo i cuk, obako doggi baŋe ni ogud ka ayayak me boŋo mere keken; jo ducu ame ogudo te caŋ oko. Oparicayo kede opwony-cikkogo ame oya i Jerucalem ocokere baŋe. Ote neno jo mogo i akina olub Yecu ame cemo aboŋo lubo kwer, te koppere ni mom ologo ciŋgi. (Pien Oparicayo kede Ojudaya ducu ka mom ologo ciŋgi atek, mom otwero cem, pien oma-ko kite a jo adoŋo. Dok ka odwogo i cuk, mom ocemo ituno ka koŋ olwokere; dok tye lwak cik ocele apol ame gin lubo, bala me lwoko ikopo-gu, kede weer, kede gulli mola.) Oparicayo kede opwony-cik openye ni, “Piŋo joni a lubi mom lubo kit a jo adoŋo, ento ocemo a pe ologo ciŋgi?” En te gamo ni, “Adwarpiny Icaya yam okobo aber i komwu, wun ogoba, acalo rik ocoo ni, ‘Rok-k i wora i doggi nono, cunygi kara bor keda; ento owora nono, pwony ame gin opwonyo obedo kite a dano.’ Iweko wunu cik Obaŋa oko, ite lunyo wunu mako kite a dano.” Dok okobbigi ni, “Itimo wunu ber me bolo cik Obaŋa, me ite gwoko wunu kitewu! Pien Muca nwaŋ okobo ni, ‘Wor pappi kede totti,’ dok ni, ‘Dano a yeto pappere onyo tottere myero nek oko’. Cite wun ikobo wunu ni, ‘Ka ŋattoro okobbi pappere onyo tottere ni, Gin a kono akonyi kede en Korban’ (te koppere ni, doŋ omio oko baŋ Obaŋa), mom oye ni en tim ginnoro pi konyo pappere onyo tottere. Amannono imio wunu kop Obaŋa to nono pi kitewu ame ipwonyo wunu kede jo. Dok daŋ itimo wunu gin ocele apol ame rom kede mano.” En dok ocwano lwak baŋe, okobbigi ni, “Wun ducu winy wunu koppa, daŋ iniaŋ wunu iye. Mom tye ginnoro ame ya i oko ame twero balo dano ka odonyo i yie; ento gin ame ya i yi dano en ame balo dano. [ Ka ŋattoro tye i yit me winyo, myero winy.]” Ka doŋ odonyo i ot, ame oweko lwak, jo mere a lube openye pi carokoppono. En te kobbigi ni, “Wun daŋ kara pwod pe iniaŋ wunu? Pe iŋeo wunu ni, jami ducu ame donyo i yi dano kun oya i oko pe twero bale? Pien mom donyo i cunye, cite kato i cin-yic, te kato oko.” (Ka okobo amannono, olonyo wit cem ducu.) Te dok kobo ni, “Gin ame ya i yi dano en ame balo dano. Pien gin oya i yi dano, ame oya i cunye, en tam areco, coco, kwo, nek, cot, woro me lim, timmogo areco, bwolo jo, tarwaŋ, nyeko, ayet, wakere, miŋo. Jami ducu arecc-ni ya i yi dano, daŋ obalo dano.” Yecu oya i kuno, owoto i lobo a ceggi kede Turo kede Cidon. Odonyo i ottoro, mom omito ni ŋattoro ŋe ni etye kuno; ento mom gire etwero pono. Oyotoyot dako moro a nyare tye kede cen arac te winyo rwoŋe oko, obino te ryebere i te tyene. Dan-nu dano me Grik, rokkere Curo-poinike. En okwao Yecu ni ryem cen arac i kom nyare. En te kobbe ni, “Koŋ iwek itino kwoŋ yeŋ, pien mom ber ikwanyo cem itino, ote yuyi gwogi.” Dako te gamo ni, “Mannono ikobo kakare, Adwoŋ; ento otino gwogi ame i te meja daŋ camo ŋid cem itino do.” Te kobbe ni, “Pi kop ame ikobo-nu, dok giri paco; cen doŋ oya oko i kom nyari.” Dako te dok paco; te nwoŋo atin obuto i wi tanda, a cen arac doŋ oya oko i kome. Yecu oya i lobo a ceggi kede Turo, obeo i Cidon, otuno i nam me Galilaya, te pello i dye lobo me Dekapoli. Gin te kela baŋe dano moro ame yite odiŋ, ame mom kobo aber, gin te bako doggi baŋe ni eket ciŋe i kome. Otere teŋe iya i baŋ lwak i muŋ, te keto nyako ciŋe i yit dano-nu, te ŋulo lao, omulo lebe; dok te neno malo i polo, ocur kun kobo ni, “Epata,” te koppere ni, “Yabere!” Yit dano-nu te yabere oko, te lebe daŋ te gony oko, te cako kop aber, aboŋo peko moro. Yecu te cikogi ni, kur dok otit baŋ ŋattoro; ento kadi bed ocikogi, gin omedde omeda i lalo kop-pu. Gin owuro okato kare a kun okobo ni, “Jami ducu ame en otimo ber; omio jo ame yitgi odiŋ owinyo, kede jo ame te lebgi oto okobo.” Kare-nono lwak dok ocokere apol, cam daŋ onwoŋo mom. Yecu te lwoŋo baŋe jo mere a lube, te kobbigi ni, “Lwak ocona meicel, pien gin orio baŋa odoko nino adek twal, kun mom otye kede cammoro. Ka acwaogi paco a kun yigi nono, kec bino bwoyogi i yo; pien jo mogo i akinagi oya i kan aboco.” Jo mere a lube te dok iye ni, “Kara dano twero pito jo-ni kede ogati nino a kun kan tim?” Openyogi ni, “Ogati tye baŋwu adi?” Ote gamo ni, “Abiro.” Ociko lwak ni bed piny, omako ogati abiro; ka doŋopwoo, onyinyilo, omio baŋ jo a lube wek oket i nyim jo, gin daŋ oketo i nyim lwak. Onwoŋo daŋ otye kede rece anok atitino; okwao iye winyo, te ciko ni daŋ ket i nyim lwak. Gin ocamo, oyeŋ; ote coko ŋid cam ame oloogi, opoŋ oromo dwoŋ abiro. Wel jo ocamo oromo bala tutumia aŋwen. Ocikogi; te donyo i yee oyotoyot karacel kede jo mere a lube, te wot i lobo me Dalmanuta. Oparicayo obino, ote cako pyem kede Yecu a kun oyenyo i baŋe anyut ame oya i polo, pi bite. Omio en ocur atek i cunye kun kobo ni, “Piŋo lwagi jo me kare-ni yenyo anyut? Ateni akobbiwu ni, mom obino miyo anyuttoro baŋ lwagi jo me kare-ni.” Owekogi, te donyo i yee me ŋolo nam, te pello loka tuŋ ca. Onwoŋo wigi owil oko i tero ogati, rik otye kede ogati acel keken baŋgi i yee. Okwenyorogi atek kun kobo ni, “Myero inen ni igwokere wunu i tobi Oparicayo kede i tobi a Kerode.” Gin openyere kengi kengi, okobo ni, “Pe otye kede ogati.” Ka Yecu oŋeo, te penyogi ni, “Piŋo ipenyere wunu ni mano, ogatiwu pe tye? Mom ru iniaŋ wunu? Mom imako wunu aber? Cunywu pwod nwaŋ? ltye wunu kede waŋwu, mom ineno wunu? Itye wunu kede yitwu, mom iwinyo wunu ce? I kare a cen anyinyilo ogati abic ca pi jo tutumia abic, rik icoko wunu opoŋ aditti adi?” Ote gamo ni, “Apar wie aryo. Kede ogati abiro ca pi jo tutumia aŋwen, rik icoko wun opoŋ dwoŋ adi?” Ote gamo ni, “Abiro.” Openyogi ni, “Mom ru iniaŋ wunu?” Gin te bino i Betecaida, jo mogo te kelo baŋ Yecu dano ame waŋe oto, obako doggi baŋe ni en gudi. En te mako ciŋ atowaŋ, otere teŋe i ŋet paco, te cako ŋulo lao i waŋ lo-nu, te keto ciŋe i kome, te penye ni, “Ineno ginnoro ya?” Lo-nu te tiŋo waŋe malo, te kobo ni, “Aneno jo, ento onen acalo yen kun owot.” Yecu dok te keto ciŋe i waŋ lo-nono; doŋ te neno oko atek, waŋe te dok kakare, doŋ te neno jami ducu acil. Yecu te cwaye paco tuŋe kun cike ni, “Kur ikob i ŋattoro iyi paco.” Yecu kede jo mere a lube owoto i akina myere i ŋet Kaicaria Pilipi. Ame otye iyo, en openyogi ni, “Kara lwak kobo ni an ŋa?” Ote kobbe ni, “Lakana Abatija; jo mogo kobo ni, Elia, jo ocele ni ŋat acel i akina odwarpiny.” Te dok penyogi ni, “Kara wun kono, ikobo wunu ni an ŋa?” Petero te gamo ni, “Yin i Kricito ta.” Ka doŋ te cikogi ni kur otit kop i kome-nono baŋ dano moro. Yecu te cako pwonyogi ni, Wot a dano myero kany can apol, dok odoŋe kede olamdog kede opwony-cik myero kwere, neke, ento a doŋ nino adek okato, myero cere oko. Okobo kop man kannaler, omio Petero otere teŋe, te ero juke. Ento en olokere oneno jo mere a lube, te juko Petero kun kobo ni, “Dok i ŋea, yin Catan! Pien yin mom ilubo tam Obaŋa, ento ilubo mea dano.” Ocwano lwak baŋe, karacel kede jo mere a lube, te kobbigi ni, “Ka dano moro mito luba, myero koŋ oge kwerre kene, tiŋ yataria mere, luba. Pien dano ame mito laro kwo mere, bino rwenyo kwo mere arwenya, ento dano ame rwenyo kwo mere pira kede pi amut aber, bino laro. Kara konyo dano kede ŋo ka ocamo lobo luŋ kun kwo mere omao oko? Dano twero miyo ŋo pi dwoggo kwo mere? Dano ame lewic bino make pira kede pi koppa, i kare man me cot kede me bal, Wot a dano daŋ lewic bino make i kome i kare a en bino dwogo kede kwogo a Pappere kede me omalaika acil.” Dok okobbigi ni, “Ateni akobbiwu ni, tye jo mogo ame ocuŋ kan, ame mom bino bilo to, a mom ru oneno loc Obaŋa kun abino kede teko.” Ame nino abicel doŋ okato, Yecu otero Petero kede Yakobo kede Lakana, oyito kedgi i wi kidi abor i muŋ, gin kengi. Kit kome te lokere oko i nyimgi, rukkere te doko acara kun tar meicel; mom tye dano moro i wi podo luŋ ame twero lwoko eka te lony amannono. Elia te nen baŋgi gin kede Muca, kun okop i Yecu. Petero te kobbi Yecu ni, “Rabbi, ber meicel wan ibedo kan; wek oger gonye adek, acel meri, acel mea Muca, acel me Elia.” Onwoŋo mom ŋeo gin a myero ekobi, pien lworo omako-gi atek. Tipo pol te wumogi ipuk, dwon te ya i pol, ni, “Man en Woda ame amaro; winye wunu.” Gin te bobolo waŋgi oyotoyot, naka mom oneno dano moro, kono ka Yecu ame tye baŋgi-ni keken. Ame oyitto piny iya i wi kidi, ocikogi ni kur otit i ŋattoro gin ame gin oneno, ituno ka Wot a dano doŋ ocer i akina a jo oto. Gin ote mako koppono, doŋ gin kengi ote bedo penyere ni, “En cer i akina a jo oto ce te koppere no?” Ote penyo Yecu ni, “Piŋo opwony-cik kobo ni, Elia myero koŋ bin?” Okobbigi ni, “Elia koŋ bino tuno, me edwok jami ducu kakare. Ento kara dok ocoo nino i kom Wot a dano ni, myero en kany can adwoŋ, dok ni, obino caye? Ento an atittiwu ni, Elia doŋ otyeko bino, jo otime gin a yigi omito, acalo rik ocoo i kome.” Ka doŋ gin otuno baŋ jo mere ocele a lube, oneno lwak ecipan ogurogi dyere, kun opwony-cik tye a pyem kedgi. Cucuttono ka lwak onene, gin luŋ owuro meicel, ote riŋo baŋe ka mote. Openyogi ni, “Kara ipyem wunu kedgi pi koppene?” Dano moro i akina lwak te gamo ni, “Apwony, onwoŋo akelo woda baŋi. En tye kede cen a mom kobo; i kabedo ducu ka cen ocuto i kome, dole piny, bwoo yenyo i doge, mio kao lake atek, riko kome oko. Doŋ akwao jo meri a lubi ni ryem, ryemo oloogi oko.” En ogamo ni, “Wun lwagi jo ame iyeewu mom, abino bedo kedwu naka awene? Abino diyo cunya i komwu ituno awene? Kele wunu baŋa.” Okele baŋ Yecu. Ka cen onene, oyotoyot omio awobi-nu oryeye; orette piny, onenne kun bwoo yenyo i doge. Yecu openyo pappere ni, “Doŋ otime kite man pi kare a rom mene?” Te gamo ni, “Kom cakere a pwod tidi. Tyen apol otemo neke kun rete i mac kede i pii-gu. Doŋ ka itwero timo ginnoro iye, tim ber ikonya.” Yecu te gamo ni, “Ka itwero! Jami luŋ twerre baŋ dano ame ye Obaŋa.” Papa atin te gamo oko oyot kun redo kede areda ni, “Aye; konya i kom iyeena anok-ki.” Yecu ka oneno ni lwak tye ka riŋo karacel, te juko cen arac kun kobo ni, “Yin cen a mom kobo, ame yiti odiŋ, aciki ni, ya oko i kom awobi, kur dok idok i kome atwal.” En okok, te bedo ryeye aryea atek, te ya oko; awobi te bedo bala dano oto, omio pol a jo okobo ni, “En oto oko gire.” Ento Yecu omako ciŋe, otiŋe, oya malo. Ka Yecu doŋ odonyo i ot, ame otye kengi, jo mere a lube openye ni, “Ŋo omono wan daŋ iryeme?” En te kobbigi ni, “Gin acalo man mom ya pi ginnoro, kono ka pi kwayo Obaŋa keken.” Gin oya i kuno, oŋolle i dye Galilaya. Yecu mom omito ni dano moro ŋee: pien onwoŋo tye ka pwonyo jo mere a lube, kun kobbigi ni, “Wot a dano obino miye i ciŋ jo, obino neke; a doŋ oneke, ame nino adek doŋ okato, en bino cer oko.” Ento gin mom oniaŋ koppono, daŋ ote lworo penye. Nwaŋ otuno i Kapernaum. A doŋ otye i ot, Yecu te penyogi ni, “Kara koppene a woki ipyem wunu iye i waŋa yo?” Gin ote liŋ aliŋa, pien nwaŋ obedo pyem kengi kengi i waŋa yo ni, ŋa i akinagi ame dit loogi? En te bedo piny, olwoŋo jo-nu apar wie aryo, te kobbigi ni, “Ka dano moro mito ebed me agege, en myero doŋ cen i ŋe owote mere ducu, bed aticgi ducu.” Otero atin, omio ocuŋ i akinagi, okwake kede bade kun kobbigi ni, “Dano ame jolo atinnoro acel bala man i nyiŋa, nwoŋo ojolo an; dano ame jola, mom ojolo an, ento ojolo ŋat oora.” Lakana okobbe ni, “Apwony, oneno ŋattoro ame aryemo cen kede nyiŋi, ojuke, pien onwoŋo mom lubowa.” Ento Yecu okobo ni, “Kur, ijuke wunu; pien mom tye dano moro ame tio ticcogo atek adoŋo i nyiŋa, ame bino twero kobo kop arac i koma oyotoyot. Pien ŋat a mom akworwa tye tuŋ baŋwa. Dok ŋattoro ame bino miyowu ikopo me pii amata aŋic, ni, pien wun jo a Kricito, ateni akobbiwu ni, mot me pwoc mom bino rwenyo i baŋe kadi acelloro. “Dano ame bino miyo ŋattoro acel i akina jo-ni atino-ni ame oye an opoto i bal, twara ame otweo kidi rego adwoŋ i ŋute, ote core kede nam. Ka ciŋi en a mii ipoto, toŋ oko; twara idony i kwo ame ciŋi tuŋ cel mom tye, kato a kono oboli kede ciŋi ryoryo i Geena, i mac a mom to. [ Kuno kudi megi mom to, mac daŋ mom gik.] Ce ka tyeni en a mii ipoto, toŋ oko; twara ame idony i kwo ame tyeni tuŋ cel mom tye, kato a kono oboli kede tyeni ryoryo i Geena. [ Kuno kudi megi mom to, mac daŋ mom gik.] Ce ka waŋi en a mii ipoto, kole oko; twara idony i loc Obaŋa ame itye kede waŋi acel keken, kato a kono oboli kede waŋi ryoryo i Geena. Kuno kudi megi mom to, mac daŋ mom gik. “Pien kado ame bino lonyo dano acel acel en mac. Kado ber; ento kado ka odoko bot, iloko wunu doko amit iŋo? Bed wunu kede kado i yiwu kenwu, dok ibed wunu i kuc kenwu kenwu.” Yecu oya i kuno, te bino i lobo Judaya kede loka Jordan. Lwak dok ocokere baŋe, en opwonyogi doki, acalo kite mere me kare luŋ. Oparicayo obino baŋe, ote bite kun openye ni, “Cik ye ni ico ryem dako mere?” En ogamo doggi kun penyogi ni, “Kara Muca nwaŋ ocikowu niŋo?” Gin te gamo ni, “Muca yam oye ni ico myero co waraga me keto nyom, kede ryemo dako.” Cite Yecu okobbigi ni, “Pi nwaŋcunywu omio Muca ocoyiwu cikkono. Ento ya i ageyi keto lobo, ‘Obaŋa ocweogi co kede mon. En omio dano bino weko pappere kede tottere, te moko i kom dako mere, gin aryo ote doko kom acel.’ Kite-nono gin mom doŋ otye aryo, ento kom acel keken. Gin ame Obaŋa onoto karacel, dano kur ket akinagi.” Ame otye i ot, jo mere a lube dok openye pi koppono. En te kobbigi ni, “Dano moro ame ryemo cege, eka te nyomo dako ocele nwoŋo ocodo cot, kun obalo i nyim cege ca. Anaka dako daŋ, ka oya i baŋ cware te nyomere kede lo ocele, nwoŋo ocodo cot.” Jo okelo itino baŋ Yecu, ni en mulgi. Jo a Lube te jukogi oko; cite Yecu ka oneno, yie owaŋ, te kobbigi ni, “Wek wunu itino bin baŋa, kur igeŋgi wunu; pien loc Obaŋa tye pi jo acalo gin. Ateni akobbiwu ni, dano a mom jolo loc Obaŋa acalo atin, mom bino donyo iye kadi atidi moro.” Otiŋogi i kore, omiogi winyo, kun keto ciŋe i komgi. Ame en doŋ oya otuno iyo, dano moro te riŋo, te rumo coŋe i nyime kun penye ni, “Apwony aber, atim ŋo me anwoŋ kwo a perakino odoco?” Yecu te penye ni, “Kara piŋo ilwoŋa ni aber? Dano moro aber mom tye, kono ka Obaŋa keken. Iŋeo cik, ‘Kur inek, Kur icod cot, Kur ikwal, Kur ikel kop goba i pido, Kur icer jo, Wor pappi kede totti.’ ” En te gamo ni, “Apwony, magu ducu atyeko mako cakere i tinona.” Yecu onene, omare, te kobbe ni, “Ginnoro acel pwod orem i baŋi. Wot icaŋami luŋ ame itye kede, ite miyo baŋ ocan, eka ite bedo kede lonyo ame ikano i polo; yin doŋ ibin, iluba.” Lonu ka owinyo kodi kop-pu, waŋe te cido oko, te wot oko a doŋ aconne acona, pien onwoŋo limmere rik dwoŋ. Yecu oŋoloro waŋe te kobbi jo mere a lube ni, “Bino bedo tek meicel olonyo idonyo i loc Obaŋa!” Jo a lube owuro koppere-nono atek, ento Yecu dok te kobbigi ni, “Itino, donyo i loc Obaŋa mom yot! Twara donyo inaga i waŋ pico yot, kato alonyo idonyo i loc Obaŋa!” Omio gin owuro atek meicel, ote penye ni, “Kara ŋa a dok twero larre?” Yecu onenogi, te kobo ni, “Baŋ dano mom twerre, ento tuŋ baŋ Obaŋa twerre, pien jami ducu twerre baŋ Obaŋa.” Petero te ero kobbe ni, “Aco wan oweko jami luŋ, olubi.” Yecu te gamo ni, “Ateni akobbiwu ni, mom tye ŋattoro ame oweko ode, onyo omego, onyo amego, onyo tottere, onyo pappere, onyo potti mere, pira kede pi amut aber, ame mom bino nwoŋo jami akato mano tyen mia i kare man, udi, omego, amego, toto, kede itino, kede potti, karacel kede awuna; kede i kare abino anyim bino nwoŋo kwo a perakino odoco. Ento jo apol ame obedo me agege bino doŋ cen, kede jo odoŋ cen bino bedo me agege.” Ame gin tye iyo, a kun gin owot i Jerucalem, Yecu onwoŋo atelligi yo; gin owuro atek, jo a lube obedo kede lworo. En dok te tero jo mere apar wie aryo, te cako tittigi gin ame bino timere i kome, kun kobo ni, “Nenu, wan doŋ otye okwaro tur me wot i Jerucalem. Wot a dano obino miye baŋ olamdog adoŋo kede opwony-cik, gin bino ŋolle kop me to, obino miye baŋ Orok. Gin bino ŋale, obino pwode kede del, obino neke; cite ame nino adek doŋ okato, en bino cer oko.” Yakobo kede Lakana, itino a Jebedayo, obino i nyim, Yecu, ote kobbe ni, “Apwony omito itimmiwa gin ame okwayi pire-ni.” En openyogi ni, “Imito ni atimmiwu ŋo?” Gin te gamo ni, “Yewa imi ŋat acel bed i laŋeti tuŋ cem, ŋat acel bed tuŋ cam, i kare me kwogoni.” Ento Yecu okobbigi ni, “Wun mom iŋeo gin ame ikwao wunu. Itwero wunu mato i kopo me peko ame abino mato kede; onyo itwero wunu batija i kite ame abino batija kede?” Gin ogamo ni, “Wan otwero.” Yecu okobbigi ni, “Kopo ame an abino mato iye, wun daŋ ibino mato wunu kede; dok kite ame an abino batija kede, wun daŋ ibino batija wunu kede; ento bedo i laŋeta tuŋ cem onyo tuŋ cam an mom apoko. Bino bedo ka baŋ jo ame oyiko pirgi.” Ka jo ocele apar owinyo, igi ocako waŋ i kom Yakobo kede Lakana. Yecu te lwonogi baŋe, okobbigi ni, “Wun iŋeo wunu ni, i baŋ Orok, jo ame olwoŋo ni olocgi bwoogi kede teko, dok odonegi nyuto twergi i komgi. Ento mom myero bed amannono i akinawu; cite ŋattoro i akinawu ame mito bedo adwoŋ, myero bed aticwu; dok ŋattoro ame amito bedo me agege i akinawu, myero bed opiiwu ducu. Pien anaka Wot a dano mom obino me jo tiye, ento me en ti pi jo, dok ete miyo kwo mere me lakoro jo apol.” Gin obino i Jeriko. Ame doŋ Yecu aya oko i Jeriko, karacel kede jo mere a lube kede lwak jo ecipan, atowaŋŋoro ame akwa lim, nyiŋe Bartimayo, wot a Timayo, onwoŋo kara obedo i ŋet yo. Ka en owinyo ni Yecu me Najaret ennono, te ero lwoŋo kede dwon adit ni, “Yecu, Akwar Daudi, tima kica ba!” Jo apol te juke ni, “Liŋ, lo-ni!” En omedo redo mere ameda ni, “Akwar Daudi, tima kica ba!” Yecu Ocuŋ, okobo ni, “Lwoŋe wunu.” Gin te lwoŋo atowaŋ kun okobo ni, “Di cunyi, ya malo, en alwoŋi.” En te bolo rukkere oko, oya malo, te ru yutte, bino baŋ Yecu. Yecu te penye ni, “Kara imito atimi ŋo?” Atowaŋ te gamo ni, “Rabbi, amito anen piny.” Yecu te kobbe ni, “Wot giri, iyeeni ocaŋi.” Cucuttono te cako neno piny, te wapo yore. Ame gin doŋ ceggi i tuno i Jerucalem, tuŋ Betepage kede Betania, i kor kidi me Jeituni, Yecu ooro jo aryo i akina jo a lube, ocikogi ni, “Wot wunu i paco i nyimwu ca. Ame doŋ idonyo wunu iye, oyotoyot ibino nwoŋo wunu atin kana, ame otweo, ame ŋattoro mom ru oyito i wie; gonyu, ikel wunu kan. Ka dano moro bino penyowu ni, ‘Ŋo omio itimo wunu amannono?’ dok wunu iye ni, ‘Adwoŋwa en ame amito; daŋ adwoggo en kan oko oyotoyot.’ ” Gin owoto, onwoŋo otweo atin kana i doggola oko i ŋet yo, ote gonyo. Jo mogo ame onwoŋo ocuŋ kuno te penyogi ni, “Kara itimo wunu ŋo omio igonyo wunu atin kana?” Gin te dok iye i kite ame Yecu okobbigi kede. Jo-nu te ye ni gin woti. Ote kelo atin kana baŋ Yecu, ote peto boŋŋigi i kome, en te bedo i wie. Jo apol opeto boŋŋigi i dye yo, jo mogo opeto boke ame ojako i potti. Jo ame otelo yo kede ame alube oredo ni, “Ojana, pak wunu Rwot! Gum myero bed i kom ŋat ame abino i nyiŋ Rwot! Gum myero bed i kom loc a kwarowa Daudi ame abino! Pake wunu malo i wi polo!” En odonyo i Jerucalem, owoto i ot Obaŋa, te ŋiyo jami ducu, eka te dok oko i Betania karacel kede jo mere apar wie aryo, pien piny onwoŋo oyuto oko. Orwo mere ka gin oya i Betania, kec oneke. Te neno oduro i teŋe kun pote olot, owoto oneno ka kono ce etwero nwoŋo moro ame ocek iye. Ka otuno i tere, mom onwoŋo ginnoro, kono ka pote keken, pien mom ru kare me cekkere. Te kobo oduro ni, “Ŋattoro mom dok bino camo nyigi atwal.” Jo a lube owinyo. Ka gin otuno i Jerucalem, Yecu odonyo i ot Obaŋa, te cako ryemo jo ame cato wil kede owil jami i ot Obaŋa. Oreto meja a jo a loko cente, anaka gi-bedo a jo a cato amam; mom oye ni dano moro ŋol dye ot Obaŋa kede yec. Dok te ero pwonyogi kun kobo ni, “Rik mom ocoo ni, ‘Oda obino lwoŋo ni ot me kwac a rok luŋ?’ Ento wun iloko wunu odoko adu oyak.” Olamdog adoŋo kede opwony-cik owinyo koppere, ote yenyo yo me neke; pien onwoŋo gin lwore, pien lwak luŋ owuro pwonnyere. A doŋ piny oyuto, en te ya oko i Jerucalem. Odiko ame onwoŋo gin beo iyo-nu, oneno oduro otal oko cakere i lwite. Petero opo iye, okobo ni, “Rabbi, neno oduro iceno-ni otal oko.” Yecu te gamo ni, “Bed wunu kede iyee i kom Obaŋa. Ateni akobbiwu ni, ŋat ame bino kobbi kidi man ni, ‘Mukere, irette i nam,’ a kun mom okalo akala i cunye, ento oye ni gin ame ekobo bino timere, daŋ bino timere. Pi kop man akobbiwu ni, gin ducu ame ibino wunu penyo ame ikwayo wunu Obaŋa, myero iye wunu ni inwoŋo wunu oko, daŋ ibino wunu nwoŋo. Dok daŋ kare ducu ame icuŋ wunu kun ikwao wunu Obaŋa, ka itye wunu kede kopporo i kom ŋattoro, time wunu kica, me wek Papawu a tye i polo daŋ timwu kica i kom balwu. [ Ento ka mom itimo wunu jo kica, Papawu ame tye i polo daŋ mom bino timowu kica i balwu.]” Gin dok obino i Jerucalem. Ka onwoŋo en tye ka wowota i ot Obaŋa, olamdog adoŋo kede opwony-cik kede odoŋe obino baŋe. Ote penye ni, “Twerrene omio itimo kit man? Daŋ ŋa omii twer man me timo?” Yecu te kobbigi ni, “An koŋ abino penyowu pennyoro acel; wun koŋ idokka wunu iye, an daŋ ate bino tittiwu twer omio atimo kit man. Batija a Lakana oya i baŋ Obaŋa aŋar onyo oya i baŋ dano? Dokka wunu iye.” Gin ote bedo pyem kengi kengi kun okobo ni, “Ka okobo ni, ‘Oya i baŋ Obaŋa’, en bino penyowa ni, ‘Kara piŋo dok mom iye wunu en?’ Ka okobo ni, ‘Oya i baŋ dano’, kono?” Gin olworo lwak, pien gin luŋ oŋeo ni Lakana en adwarpiny ateni. Omio gin te dokki Yecu ni, “Wan okwia giwa.” Yecu daŋ te kobbigi ni, “An daŋ mom abino kobbiwu twer omio atimo kite man.” Yecu te cako kop kedgi i carokop ni, “Nwaŋ tye dano moro ame opito poto olokkere, te guro oko kede cel, okunyo bur me jolo pige, te gero pem, te joko baŋ opur, eka te wot oko i lobo ocele. Ame kare doŋ oromo, en te cwayo amiro baŋ opur ni wot om dul ginnoro ocek i peto. Ento gin omake, ote pwode, oryeme, odok i ciŋe nono. En dok te medde oro amiro ocele; man daŋ ote goyo, tuco wie oko, omie lewic. Dok te oro dano ocele, man gin oneko oko. Gin obedo limo kite-nono i kom jo apol; jo ocele opwodo apwoda, jo mogo oneko aneka. Onwoŋo pwod odoŋ baŋe dano moro acel, en wode ame emaro. Me agikki mere ocwao en ikome baŋgi, kun kobo ni, ‘Gin bino woro woda.’ Cite gin opur ote bedo kop kengi kengi ni, ‘Kom man en ale-lim; biye wunu, oneke oko, me lim eleyo-nono bed megwa’. Omake ote neke oko, ote bole teŋe i poto olok. Won poto olok bino timo ŋo? En bino bino, te neko opur-ru oko, te miyo poto olok baŋ jo apat. Rik mom ikwano wunu coc man a yam ocoo, ni, ‘Kidi ame ogedo okwero en ame odoko kidi me gwic ot; man en tic a Rwot, en gin me awura baŋwa?’ ” Gin te temo make, ento ote lworo lwak oko, pien gin oniaŋ ni en okobo carokop man i komgi. Ote ya i baŋe wot gigi oko. Gin te oro Oparicayo kede jo a Kerode mogo baŋ Yecu, me gin mak kopporo a ya i doge. Gin obino te kobbe ni, “Apwony, wan oŋeo ni yin dano me ateni, dok mom iparo pi dano moro, pien mom ineno dano i oko, cite ipwonyo yo Obaŋa i ateni, Myero ogelli Kaicari ocoro onyo mom? Ogel onyo kur ogel?” Ento en te ŋeyo gobagi oko, te kobbigi ni “Kara ibita wunu pi ŋo? Koŋ ikella wunu ciliŋnoro, me anen.” A doŋ gin okelo, en te penyogi ni, “Cal kede coc ame ogoro iye-ni mea ŋa-nono?” Gin ogamo ni, “Mea Kaicari.” Yecu te kobbigi ni, “Dwok wunu baŋ Kaicari jami a Kaicari, jami Obaŋa dwok wunu baŋ Obaŋa.” Gin owure meicel. Ocadukayo mogo obino baŋ Yecu; jo-ni gin jo ame kobo ni jo oto pe cer. Gin okelo peny baŋe ni, “Apwony, Muca nwaŋ ocoo pirwa ni, ka omin a ŋattoro oto oko, oweko dako, ento mom oweko atinnoro, ominnere myero lak dako mere me nywal ominnere itino. Aco, nwaŋ tye jo abiro ame gin omego. Dano me agege onyomo dako, te to kun mom oweko atinnoro; me aryo te lako dan-nu, te to kun mom oweko atinnoro; me adekkere daŋ amannono; gin abiro luŋ mom oweko atinnoro, lcennere en dako daŋ te to oko. Kara i kare me cer, dan-nu bino bedo cik a ŋa? Pien gin abiro luŋ obedo kede.” Yecu okobbigi ni, “Wun mom irwenyo wunu pi mannono, pien ikwia wunu coc a yam ocoo, anaka teko Obaŋa daŋ ikwia wunu? Pien ka jo doŋ ocer, jo mom bino nyomere, ento bino bedo bala omalaika ame i polo. Ento ka i kom cero jo oto, wun mom ikwano wunu i buk a Muca, kop i kom yat obuŋere ame olyel, kite ame Obaŋa okobbe ni, ‘An Obaŋa Iburaim, kede Obaŋa Icaka, kede Obaŋa a Yakobo?’ En mom Obaŋa a jo oto, ento mea jo akwo; irwenyo wunu meicel.” Apwony-cikkoro obino onoke a ceggi, owinyogi kun olaro kop. Ka owinyo kit ame Yecu odokkigi i kop aber kakare, en te penye ni, “I kom cik luŋ, mene ce ame obedo me agege?” Yecu te gamo ni, “Me agege en ene, ni, ‘Winy ba Icrael, Rwot Obaŋawa en Rwot acel; mar Rwot Obaŋani kede cunyi luŋ, kede tiponi luŋ, kede tammi luŋ, kede tekoni luŋ.’ Me aryo mere en ene, ni, ‘Mar dano wadwu acalo imarre keni.’ Mom dok tye cikkoro ame pire dit kato magi.” Apwony-cik te kobo ni, “Kakare, Apwony; ikobo giri kop ateni, ni, Obaŋa en acel, dok mom tye Obaŋa ocele, kono en keken. Dok mare i cuny luŋ, i ryeko luŋ, kede maro dano wadwu acalo imarre keni, pire dit kato leyi ducu ame oŋolo, ame owaŋo alutu, kede kwon gin ame oŋolo ducu.” Ka Yecu oneno ni en odok i koppere kede ryeko, te dok kobbe ni “Yin mom ibor kede loc Obaŋa.” Ŋattoro mom dok odio cunye me penye kopporo. Ame Yecu tye apwony i ot Obaŋa, openyo ni, “Kara opwony-cik kobo niŋo ni, Kricito en akwar Daudi? Aco kono Cuny Acil nwaŋ omio Daudi ikome okobo ni, ‘Rwot okobbi Rwotta ni, Bed i laŋeta tuŋ cem, i kabedo me kwogo, ituno ka abino keto okworri piny i te tyeni.’ Ka Daudi ikome olwoŋe ni Rwot, kara Kricito dok bedo akwarre niŋo?” Lwak ecipan owinyo koppere kede lelo. Ka Yecu tye a pwony, okobo ni, “Gwokere wunu i kom opwony-cik ame maro wot a kun orukere kede boŋŋi abeco, ame mito daŋ ni jo motgi i cuk, dok omaro bedo i kome me dito i kacokere, kede i kabedo me kwogo i dog cem. Gin mao udi a mon a coggi oto, dok okwao Obaŋa nakanaka me gobagoba. Kop ame obino ŋolo i wigi bino bedo pek akato.” Yecu obedo piny kun otikere kede canduk me coko lim, te neno kite ame lwak abolo kede lim i canduk. Jo apol ame olonyo obolo adwoŋ. Cite dako moro ame acan, ame cware oto, obino, te bolo cente aryo keken. En te lwoŋo jo a lube baŋe, okobbigi ni, “Ateni akobbiwu ni, dako man a cware oto, ame acan, obolo adwoŋ ame kato jo luŋ ame obolo mot i canduk me coko lim; pien gin ducu obolo mot ame ogito agita i kom limgi adwoŋ, cite en i kom cannere obolo gin ducu ame tye baŋe, ame konyo kwo mere.” Ame en aya oko i ot Obaŋa, dano acel i akina jo a lube okobbe ni, “Apwony, nen kiddi magi me awura, kede gedo magi me awura!” Yecu te gamo doge ni, “Ineno gedo magi adoŋo wok-ki? Mom obino weko kidi moro kan ame ododde i wi wadgi, a mom obino coro piny.” Ame en doŋ obedo piny i wi kidi me Jeituni kun otikere kede ot Obaŋa, Petero kede Yakobo kede Lakana kede Anderiya openye i muŋ ni, “Tittiwa, man bino bedo awene ba? Dok gin aŋo ame bino nyuto ni ginnono ducu doŋ ceggi cobere kakare?” Yecu ocako kobbigi ni, “Gwokere wunu ba, ŋattoro kur rwenywu be. Pien jo apol bino bino i nyiŋa, ame obino kobo ni, ‘An ennono’; gin bino miyo jo apol rwenyo. Dok ka ibino winyo wunu pi mony, kede amut me mony, cunywu kur poti; mano myero timere, ento agikki nwoŋo pwod mom. Pien rok bino romo kede rok, loc bino romo kede loc ocele, oyeŋo bino bedo i kabedo apol, kec daŋ bino poto; mano ducu pwod en ageyi me rem. “Ento wun myero igwokere wunu ba; pien gin bino terowu i okiko, obino pwodowu i kacokere; ibino cuŋ wunu i nyim oloc kede i nyim rwode pira, me kobo kop me caden baŋgi. Dok amut aber myero koŋ rab baŋ rok ducu. Ikare ame oterowu oko me kelowu i okiko, kur iru wunu bedo i tam apol, ni, ibino wunu kobo niŋo? Ento kob wunu kop ame obino miyowu i caanono; pien pe wun ame ibino wunu kop, ento Cuny Acil en a bino kop. Omego bino miyo omegogi me aneka, odoŋe bino miyo itinogi me aneka, otino bino twarre i kom onywalgi, miyo oneko onywalgi. Jo luŋ bino dagowu pi nyiŋa: ento ŋat ame kanyakino ituno i agikki, en bino larre. “Ento ka ineno wunu ginnoro me kwer ame balo cuny jo kun ocuŋ kan ame pe myero (dano ame kwano myero niaŋ iye), i kare-nono jo a tye i Judaya myero riŋ oko i wi kidi, dano ame tye i wi ot kur dok yitto piny, daŋ kur dony i ot, ni ebino kwanyo ginnoro a tye iye; kede dano ame tye i poto kur dok cen ni edok omo rukkere. Mon ayac bino neno can i kare-nono, kede mon ame doto itino! Kwa wunu Obaŋa wek ginnono kur timere i cwir. Pien i kare-nono bino bedo can adwoŋ, kit a yam pe ru onen, ya i ageyi keto lobo ame Obaŋa oketo, tuno naka tin, daŋ pe dok bino nen. Kono Rwot mom ojwiko kare-nu, kono dano moro mom obwot; daŋ pi jo ame oyero, ame en oyerogi, omio Rwot ojwiko kare-nu oko. “I kare-naca ka dano moro bino kobbiwu ni, ‘Neno, Kricito tye kan-e, onyo ni, tye kaca’, kur iye wunu. Jo ame kobo ni gin obedo Kricito bino pello, anaka odwarpiny ame ogoba, bino nyuto anyuttogo kede taŋo, me ka twerre gin orweny jo ame oyero. Gwokere wunu ba; doŋ atyeko tittiwu kop ducu con. “Ento i kare-nono, ame can adwoŋ otum oko, bino bedo acalo rik ocoo ni, ‘Ceŋ bino doko col, dwe mom bino ryeny, acer luŋ bino ya i polo, ote rutte piny, teko ame i polo bino yeŋere’; eka jo bino neno Wot a dano kun bino iyi pol, kun tye kede teko kede kwogo adwoŋ. En bino oro amalaika, bino coko jo mere ame oyero, iya i twok piny aŋwen ducu, kun ya i agikki me lobo, tuno i agikki me polo. “Mak wunu pwony ame oya i kom oduro: ka jaŋe onyinyiro, pote olot, iŋeo wunu ni oro doŋ ceggi. Ammannono wun daŋ, ka ineno wunu ginnono atimere, ber iŋe wunu ni, en doŋ tye ceggi, tye i doggola. Ateni akobbiwu ni, lwagi jo man mom bino tum, ame mannono luŋ mom ru otimere. Polo kede lobo bino tum oko, ento kop ame an apwonyo mom bino tum. “Ento nino-nono, onyo caa-nono, ŋattoro a ŋeo pire mom tye, kadi omalaika ame tye i polo, kadi Wod, kono ka Papo keken. Gwokere wunu, bed wunu ame ineno wunu, pien mom iŋeo wunu nino ame kare bino romo iye. Rom aroma kede dano ame awot i weno; en ka aya i paco, mio twer baŋ omiro mere, ŋat acel acel kede ticcere, kun ciko agwok doggola ni, ki piny. Kiu piny doŋ, pien mom iŋeo wunu ceŋ a won ot bino tuno iye, onyo otyeno, onyo cuny dyewor, onyo ka ibai, aŋar odiko; me kur tuwu atua i waŋ nino. Gin ame akobbiwu, akobbi jo luŋ ni, Kiu piny.” Onwoŋo odoŋ nino aryo me tuno i ecuban me Kato kede me Ogati a Tobi Mom iye. Olamdog adoŋo kede opwony-cik oporo kop me mako Yecu kede ryeko, me ote neke. Pien gin okobo ni, “Pe i kare me ecuban, mio lwak bino tugere.” Ame en tye i Betania tuŋ a Cimon adobo, onwoŋo obedo i dog cem; dako moro te bino kun tye kede adomo me moo nard agili ame wellere dwoŋ. Oturo dog adomo, oonyo i wie. Jo mogo yigi owaŋ, ote kop kengi kengi ni, “Moo man obalo nono piŋo? Pien kono ocato moo man, kono okelo lim a kato ciliŋ mia adek, me amia baŋ ocan.” Cunygi owaŋ i kome atek. Yecu te kobo ni, “Weke wunu; kara icano wunu dan-ni piŋo? En otio tic aber i koma. Ocan itye wunu kedgi nino luŋ, itwero wunu konyogi i kare ducu ame imito wunu; ento an mom abino bedo kedwu nino ducu. En otio tic acalo etwero; ogeo onyo moo i koma me yika. Ateni akobbiwu ni, i wi podo luŋ kan ame obino tito iye amut aber-ri, obino kobo iye gin a dakoni otio, me poyo en.” Juda me Keriot, ame en dano acel i akina jo apar wie aryo ca, owoto baŋ olamdog adoŋo, me emi Yecu baŋgi Gin ka owinyo, oyomoro yigi, ote cikere me miye lim; en daŋ te yenyo kare aber me miye baŋgi. I nino me agege me camo Ogati a Tobi Mom iye, a yam oŋolo iye atin romo me Kato, jo a lube openye ni, “Imito ni owot oyik tuŋ kwene me icam iye cam me Kato?” En te oro jo aryo i akina jo a lube kun cikogi ni, “Wot wunu i Jerucalem; lonnoro bino romere kedwu ame oyeo gulu pii; lube wunu. Kan a en bino donyo iye, kobbi wunu won ot ni, ‘Apwony okobo ni, Ane ot welo kan ame abino camo iye Kato, karacel kede jona a luba?’ En bino nyuttiwu icika alac i malo ame opeto, ame oyiko; yikkiwa wunu kuno.” Jo mere a lube owoto, odonyo i Jerucalem, onwoŋo tye acalo en oporrigi, ote yiko cam me Kato. Ame piny doŋ oyuto, en obino, karacel kede jo mere apar wie aryo. A doŋ gin obedo piny, ame otye ka cem, Yecu te kobo ni, “Ateni akobbiwu ni, ŋat acel i akinawu bino keto erupe i koma, en ame acem karacel keda.” Eka gin te ero conne oko, kun dano acel acel penyere ni, “An ce?” En te kobbigi ni, “En dano acel i akina wun apar wie aryo, ame agweyo keda i tabo acel. Pien Wot a dano awot gire i kite a yam ocoo i kome; ento dano a keto erupe i kom Wot a adanonu, kite ame ebino neno kede can! Onwoŋo kono obedo ber, dano-nu kono rik pe onywalo.” Ame gin pwod acamo cem, Yecu omako ogati; ka doŋ okwao iye winyo, onyinyilo, omiogi kun kobo ni, “Gam wunu; man en koma.” Otiŋo ikopo; ka doŋ opwoo, omiogi, gin ducu omato. Okobbigi ni, “Man en remona me cikere, ame oony pi jo apol. Ateni akobbiwu ni, mom dok abino mato pig olok, ituno i nino ca ka ate bino mato anyennere i loc Obaŋa.” A doŋ gin otyeko wer, ote wot oko i wi kidi me Jeituni. Yecu te kobbigi ni, “Wun ducu ibino wunu kwanyo genwu i koma oko; pien nwaŋ ocoo ni, ‘Abino neko akwat, rommi te ket oko ata,’ Ento ka doŋ ocera, abino telliwu yo me wot i Galilaya.” Petero te kobbe ni, “Kadi bed jo ducu bino kwanyo gengi oko i komi, cite an mom abino kwanyo.” Yecu te kobbe ni, “Ateni akobbi ni, tin, i dyewor man, a twon gweno pe ru okok iryo, yin giri ibino kwera tyen adek.” Ento en okobo atek meicel ni, “Kadi bed to, mom abino kweri.” Gin ducu okobo amannono. Ote wot i kabedo a nyiŋe Gececemane, en te ciko jo a lube ni, “Bedu kan koŋ, an pwod akwayo Obaŋa.” En te tero Petero kede Yakobo kede Lakana, cunye te ero poto meicel kede kumo adwoŋ. Te kobbigi ni, “Waŋcuny atek amito neka oko. Bed wunu kan, ikiu piny.” Te wot i nyim anok, oryebere piny, te kwayo ni, kono ka twerre, kodi caa-nono myero kat oko i baŋe. Okobo ni, “Aba, Pappa, jami ducu i baŋi twerre; kwany ikopo man i koma oko; cite kur bed acalo an amito, ento acalo yin imito.” Te dwogo onwoŋogi doŋ onino oko, te kobbi Petero ni, “Cimon, inino anina? Mom itwero kiyo piny keda pi caa acelloro? Kiu piny, kwa wunu Obaŋa, me kur idony wunu i abita a Catan. Cuny mito ta, ento kom nyap.” Te dok wot, te kwayo Obaŋa, kun kobo kop acellaca. Dok te dwogo, onwoŋogi doŋ onino oko, pien onwoŋo nino onuro waŋgi meicel; yo me culle kop te loyogi oko. Te dwogo tyen me adekkere, openyogi ni, “Pwod inino wunu? Pwod iweo wunu bo? Doŋ otum. Caa doŋ oromo; Wot a dano otye a miye i ciŋ obalo. Ya wunu malo; nen, dano ame keto erupe i koma doŋ tye ceggi.” Cucuttono ame en pwod tye ka kop, Juda te pello, en dano acel i akina jo apar wie aryo ca. En obino kede lwak jo ame oya i baŋ olamdog adoŋo kede opwony-cik kede odoŋe, kun otye kede pale me romo kede abiriŋ. Dano ame oketo erupe i kome nwaŋ omiogi anyut, kun kobo ni, “Dano ame abino moto kun anoto leme, nwoŋo en ennono ikome; make wunu, itere wunu kun igwoke wunu aber.” Ka obino, te onyakino baŋe, te mote ni, “Rabbi”, omote kun noto leme. Gin opoto i kome, ote make oko. Ento dano moro acel ame ocuŋ i laŋete owoto pala romo mere, te toŋo kede opii alamdog adwoŋ, te ŋolo yite oko. Yecu okobbigi ni, “Ibino wunu i koma kede pale me romo kede abiriŋ, bala ibino wunu mako ayak? Nino luŋ nwaŋ abedo kedwu i ot Obaŋa kun apwonyo, mom imaka wunu. Ento wek coc a yam ocoo cobere kakare.” Gin ducu oriŋo, ote weke oko. Awobi moro nwaŋ olube ame orwao ka cuka camanini i kome. Gin omake, ento en oweko cuka odoŋ, oriŋo onoro. Gin otero Yecu baŋ alamdog adwoŋ; onwoŋo alamdog adoŋo kede odoŋe kede opwony-cik ocokere ducu karacel. Petero olubo yore me icecen ituno naka i dyekal alamdog adwoŋ; obedo piny karacel kede otic ka oyo mac. Olamdog adoŋo kede okiko ducu te yenyo caden me kelo kop i kom Yecu me oneke, naka mom onwoŋo. Pien ocaden apol okelo kop me goba i kome, kopgi mom orwatte. Jo mogo oya malo ote kelo kop me goba i kome kun okobo ni, “Wan owinyo kun kobo ni, ‘An abino keto ot Obaŋa-ni ame jo otio kede ciŋ, eka ate dok gero en ocele pi nino adek, a mom otio kede ciŋ.’ ” Kadi bed amonnono, kop ame gin okelo mom orwatte. Alamdog adwoŋ te putte malo, te cuŋ i dyere, te penyo Yecu ni, “Mom idok iye kopporo? Man kop aŋo ame odoti kede-ni?” Ento en oliŋ gire aliŋa, mom ogamo kopporo. Alamdog adwoŋ dok te penye kun kobo ni, “Yin i Kricito, Wot a ŋat ame opwoo?” Yecu te gamo ni, “An a en; dok ibino neno wunu Wot a dano ame obedo piny i kabedo me kwogo i laŋet Won Twer tuŋ cem, kun bino kede pol me polo.” Alamdog adwoŋ te yeco kanyi mere kene kene kun kobo ni, “Kara pwod omito caden me ŋo? Doŋ iwinyo wunu kite a en oyeto kede Obaŋa. Itamo wunu niŋo iye?” Gin ducu oŋolo ni, ballere romo to. Jo mogo te cako pato lao i kome; owumo waŋe oko, ote done kun okobo ni, “Yin adwarpiny do, tuci! Kara ŋa ojwati?” Otic daŋ te game kede adoŋ. Petero onwoŋo tye piny i dyekal. Aŋeca moro mea alamdog adwoŋ te bino. Ka oneno Petero kun aoyo mac, ogae kede waŋe kun kobo ni, “Yin daŋ woki itye wun kede dano ca me Najaret, Yecu.” Ento en okwero oko, kun kobo ni, “Mom aŋeo dok mom aniaŋ i gin ame ikobo.” En te kato i dog paco, twon gweno te mwoco koko. Aŋeca ca onene, te dok ero kobbi jo ame Ocuŋ kuno ni “Dano man ŋat acel i akinagi.” En dok te kwero oko. Kare okato anok, jo ame ocuŋ kuno dok okobbi Petero ni, “Ateni, yin dano acel i akinagi, pien yin dano me Galilaya.” En te kwoŋ kun lamere kene, kobo ni, “An gira mom aŋeo dano man ame ikop wunu i kome-nono.” Cucutto no twon gweno te mwoco koko tyen me aryo mere. Petero te po i kop a cen Yecu okobbe, ni, “Ame pe ru twon gweno okok iryo, ibino kwera tyen adek.” Eka te ero koko oko i pig waŋe. Oyotoyot ka piny oru, olamdog adoŋo oporo kop karacel kede odoŋe kede opwony-cik kede okiko luŋ. Gin otweo Yecu, otere, ote miye baŋ Pilato. Pilato te penye ni, “Yin abaka Ojudaya?” Ogamo doge ni, “Yin ikobo giri.” Olamdog adoŋo odote kede kop apol. Pilato te penye ni, “Mom koŋ idok i kopporo? Nen kop apol ame odoti kede-ni.” Yecu mom omedde i gamo kopporo, omio Pilato owuro. I kare me ecuban, Pilato yam gonnyigi abuccoro acel a jo okwao pire. Onwoŋo cen tye lo moro i buc nyiŋe Baraba, ame otweo karacel kede jo otubo lwak; en onwoŋo oneko dano i tubere-nono. Eka lwak te bino, te cako kwayo Pilato ni timmigi acalo yam etio. Pilato te penyogi ni, “Imito wunu ni agonnyiwu abaka Ojudaya?” En onwoŋo oŋeo aber ni olamdog adoŋo omio Yecu baŋe pi nyeko. Olamdog adoŋo te cupo lwak ni twara gonnyigi Baraba. Pilato dok te penyo lwak ni, “Kara dano ame ilwoŋo wunu ni abaka Ojudaya abino timo nadi?” Gin dok oredo ni, “Gure i kom yataria!” Pilato openyogi ni “Kara piŋo? Gin aŋo arac ame otimo?” Ento gin omedde i redo ni, “Gure i kom yataria!” Pilato omito ni ekwe cuny lwak, omio ogonnyigi Baraba. Opwodo Yecu kede del, te miye me agura i kom yataria. Cirikale otere iyi ot aloc, en Praitorion, ote lwoŋo eryoŋet megi ducu karacel. Oruke kede boŋo amaramar, ote kado tok kwogo abaka me okuto, orwako i wie, ote cako mote ni, “Oreme ba, Abaka Ojudaya!” Ojwato wie kede ogada, opato lao i kome, ote rumo coŋgi ni, me wore. A doŋ otyeko ŋale, ote doŋ gonyo boŋo amaramar i kome oko, ote ruke kede boŋŋi mere ikome, ote tere wot gure i kom yataria. Gin te diyo dano moro ame onwoŋo akato akata i yo me ye yataria mere; onwoŋo abino kun oya i myere, nyiŋe Cimon me Kurene, papa Alegejanda gin kede Rupo. Otero Yecu i kabedo ame olwoŋo Golgota, ame te koppere ni, kabedo me Cogo Wic. Ote miye vino ame orubo iye yat murra; ento en pe omato. Eka doŋ ote gure i kom yataria, daŋ ote poko boŋŋi mere oko i akinagi, kun obolo iye kwir me nwoŋo dano a bino tero ginnoro-ni. Ame ogure i kom yataria, onwoŋo caa doŋ oromo adek. I waraga ame nyuto kop ame opide pire ocoo ni, “Abaka Ojudaya.” Ogure karacel kede oyakkogo, dano acel i laŋete tuŋ cem, acel tuŋ cam. [ Omio coc a yam ocoo ocobere kakare, ame kobo ni, “Okwane i kin obalo.”] Jo ame nwaŋ abeo akato oyete, kun oyeŋo wigi, ame okobo ni, “Aaa! Yin ame iketo ot Obaŋa, ite gero i nino adek, larre keni, iya i kom yat oko!” Anaka olamdog adoŋo daŋ oŋale amannono kengi kengi karacel kede opwonycik, kun okobo ni, “Yam laro jo ocele, mom twero larre kene. Wek Kricito, Abaka Icrael, koŋ yitto piny, ya i kom yataria amanni, me wan onen ote ye.” Anaka jo ame ogure karacel kede daŋ ocae amannono. A doŋ caa oromo abicel, piny te doko col i wi lobo luŋ, tuno anaka i caa aboŋwen. Caa aboŋwen Yecu oredo kede dwon aloŋo ni, “Eloi, Eloi, lama cabaktani?” ame te koppere ni, “Obaŋana, Obaŋana, iweka piŋo?” Jo mogo ame Ocuŋ kuno, ka gin owinyo, ote kobo ni, “Winy wunu, alwoŋo Elia.” Dano acel oriŋo, oluto abwaŋarot i vino awac, orwako i wi tir, te miye ni jwi, kun kobo ni, “Weku koŋ onen ka Elia abino me kwanye oko i kom yat.” Yecu oredo kede dwon aloŋo, te to oko. Eka boŋo icika me ot Obaŋa te yec oko dul aryo, ocakere i malo, odwogo kede piny. Adwoŋ me cirikale, ame onwoŋo ocuŋ kuno i nyime, ka oneno kit ame oto kede, te kobo ni, “Dano man kara atin Obaŋa ateni!” Onwoŋo tye monnogo daŋ ame obedo ka nene i teŋe; i akinagi onwoŋo tye Maliam me Magdala, Maliam tota a Yucepu atidi kede Yoce, kede Calume. Ka yam en tye i Galilaya gin olube, dok okonye; dok daŋ tye mon ocele apol ame obino kede i Jerucalem. Onwoŋo ceŋ nino me Yikere, en nino ame ceŋ me cabit Ojudaya lubo. A doŋ piny oyuto. Yucepu me Arimataya te bino; en amemba me okiko ame opwoo, en daŋ ikome yam kuro loc Obaŋa. Odio cunye, odonyo baŋ Pilato, okwao kom Yecu. Pilato owuro, ka ce en doŋ oto oko; olwoŋo adwoŋ me cirikale, openye ka onyo doŋ oto. A doŋ oniaŋ pire i baŋ adwoŋ me cirikale, en te ye me miyo kome baŋe. Yucepu te wilo cuka camanini, ogweto kome i kom yat, te boyo kede cuka camanini, te pyele iyi Iyel ame oboro abora i lela, oloro kidi, ogacakino i dog lyel. Maliam me Magdala kede Maliam tota a Yoce gin oneno kan ame oyike iye. Ame cabit Ojudaya doŋ otum, Maliam me Magdala kede Maliam tota a Yako bo kede Calume owilo gin a ŋwece kur me wot wire kede. Odiko con meicel i ni no ame lubo cabit, gin owoto i wi lyel, ame ceŋ doŋ odonyo oko. Ote penyere kengi ni, “Ŋa ce ame bino corriwa kidi oko i dog lyel?” Ka gin otiŋo waŋgi, oneno kidi doŋ ocoro oko, pien onwoŋo dwoŋ meicel. Ka gin odonyo i Iyel, ote neno awobi obedo i tuŋ cem, oruko boŋo atar; gin owuro atek. En te kobbigi ni, “Kur iwur wunu awura; iyenyo wunu Yecu me Najaret ame oguro i kom yataria. En doŋ ocer oko, mom tye kan; nen wunu kan ame yam opyele iye ene. Ento wot ikobbi wunu jo mere a lube, kede Petero, ni en otelliwu yo me wot i Galilaya; ibino nene wunu kuno, kite a yam otittiwu.” Gin te donnyo oko i Iyel, ote mako ŋwec, pien myelkom kede lworo adwoŋ doŋ ocirogi oko; naka daŋ mom ote kobbi ŋattoro kopporo, pien olworo. [ Ame en doŋ ocer i nino ame lubo cabit, okwoŋo nen baŋ Maliam me Magdala, a nwaŋ eryemo cen abiro i kome. Daŋ en te tero koppere baŋ jo a yam bedo kede Yecu; onwoŋo gin tye akwero cola kun okoko. Gin ka owinyo ni en tye kwo, dok ni Maliam onene, mom oye. Icennere te dok nen i kite apat baŋ jo aryo I akinagi, ame anwoŋo gin awot i akina pacci. Jo-nono daŋ owoŋo, otito baŋ jo odoŋ, gin mom ote ye gigi kopgi. Icennere te nen baŋ jo-nu apar wie acel ame gin tye i dog cem. En te da kedgi pien mom oye, kede pi nwaŋcunygi, pien okwero ye kop a jo ame onene a doŋ en ocer. En te kobbigi ni, “Wot wunu i wi podo luŋ, kun irabo wunu amut aber baŋ gin ame oketo ducu. Dano ame oye, te batija, en bino larre; dano a mom oye, kop bino loye. Gin a nyuto acalo magi bino nen baŋ jo a ye: gin bino ryemo cen kede nyiŋa, obino kop kede leb anyen, obino mako twol; ka gin bino mato gin a neko dano, pe bino timogi rac; gin bino keto ciŋgi i kom otwo, te caŋ oko.” A doŋ Rwot Yecu otyeko kop kedgi, otere malo i polo, eka en te bedo piny i kabedo me kwogo i laŋet Obaŋa tuŋ cem. Jo-nu te ya me wot rabo kop i kabedo luŋ, kun Rwot bedo tic karacel kedgi, dok moko kop ame gin orabo kede ticcogo me awura ame timere.] Jo apol doŋ otemo coyo kop i kom gin ame otimere i akinawa, kun gin olubo kop ame jo mogo orabo baŋwa, gin jo a rik oneno kede waŋgi ya i ageyi mere, ame gin daŋ odoko otic me amut aber. Pi mannono, Adwoŋ Won Kwogo Teopilo, ka doŋ aŋio kop ducu cakere i tere, an daŋ aneno ni ber acoyi ame doŋ acano aber, me iniaŋ ateni me kop a rik opwonyi iye. I kare ame Kerode obedo abaka me Judaya, nwaŋ tye alamdoggoro ame nyiŋe Jekeria, me i eryoŋet Abija. Rik tye kede cege i akina anyira Aron, nyiŋe Elicabet. Gin aryo luŋ rik kitegi atir i nyim Obaŋa, kun olubo cik kede icwil a Rwot ducu aboŋo bal. Rik mom otye kede atinnoro, pien Elicabet nwaŋ oraŋa, gin aryo luŋ mwakki me ditogi onwoŋo doŋ pol. I kare ame Jekeria tye a tiyo ticcere me alamdog i nyim Obaŋa, i kare me waŋ ticcere, acalo kite olamdog tye, kwir okwanye me donyo i ot a Rwot pi waŋo odok akur. Lwak jo luŋ onwoŋo tye ka kwayo Obaŋa i oko i caa me waŋo odok akur. Amalaika a Rwot onen baŋe kun ocuŋ i ŋet keno me waŋo odok akur. Ka Jekeria onene, cunye opoto, lworo omake. Ento amalaika okobbe ni, “Kur ilwor, Jekeria, pien kwacci doŋ owinyere, dakoni Elicabet bino nywalli atin awo bi, ibino cako nyiŋe Lakana. Ibino bedo i yomcuny kede lelo, jo apol cunygi bino bedo yom pi nywale; pien en bino bedo adwoŋ i nyim Rwot. En mom bino mato koŋo, kadi gin ame mero jo; Cuny Acil bino poŋ i yie, cakere i yi tottere. En bino dwoko jo Icrael apol baŋ Rwot Obaŋagi; en ame bino kwoŋo nyime i cuny Elia kede i tek Elia, me loko cuny onywal i kom itinogi, kede pi dwoko cuny jo a mom winyo icwil i kom ryeko a jo a kitegi atir, doki pi yikki Rwot jo a doŋ oyikere.” Jekeria te penyo amalaika ni, “Kara abino ŋeyo man niŋo? Pien an doŋ ati oko, anaka cega daŋ mwaka me dittere doŋ pol” Amalaika ogamo doge ni, “An Gabriel, ame acuŋ i nyim Obaŋa; oora ni akob kedi, kede pi kelli amut man aber wok-ki. Winy ba, ibino liŋ, a mom itwero kop, ituno kede i nino ame mano bino timere iye, pien mom iye koppa; cite koppa bino cobere, ka kare mere oromo.” Lwak obedo kuro Jekeria, kun owuro pi gallere i ot Obaŋa. Ame en odonyo oko, onwoŋo doŋ mom twero kop kedgi; gin ote niaŋ ni, ginnoro onyutte baŋe acalo lek i ot Obaŋa. En te bedo gwetogi, kun mom doŋ twero kop. Ka kare me ticcere otum, te dok tuŋe. Ka doŋ kare-nono otum, dako mere Elicabet te yac oko. Opono a romo dwete kany, te bedo kop ni, “Rwot otimo amannono i koma i kare ame doŋ onena iye, me ekwany lewic i koma oko i akina jo.” I dwe me abicel, Obaŋa ooro amalaika Gabriel i paco moro ame i lobo Galilaya, nyiŋe Najaret, baŋ nyako a mom ru tye kede apayi mere, ame ociko pi ico a nyiŋe Yucepu me doggola a Daudi; nyan-nu nyiŋe Maliam. Obino baŋe, omote ni, “Oreme ba, yin ame omii winyo, Rwot tye kedi!” Cite en cunye opoto pi kop ame okobo; obedo ka paro te kop me amottono. Amalaika te kobbe ni, “Kur ilwor, Maliam, pien inwoŋo winyo ibaŋ Obaŋa. Nen ba, ibino gamo, ibino nywalo atin awobi, ibino cako nyiŋe Yecu. En bino bedo dit, obino lwoŋe ni, Wot a En Amalo Meicel; Rwot Obaŋa bino miye kom me loc a kwaro mere Daudi. En bino loyo ot a Yakobo atwal, loccere mom abino gik.” Maliam te penyo amalaika ni, “Man bino bedo niŋo, ame pe ru aŋeye kede ico?” Amalaika te dokke iye ni, “Cuny Acil bino poto i komi, teko a En Amalo Meicel bino wumi bala tipo; pi manno, atin ame ibino nywalo obino lwoŋe ni, Acil, Wot Obaŋa. Nen, watti Elicabet doŋ oyac oko atin awobi, i tio mere; man doŋ dwe me abicellerie i kom ŋat a yam olwonŋo ni oraŋa. Pien mom tye ginnoro a loo Obaŋa.” Maliam te kobo ni, “Nen, an aŋeca a Rwot; wek obed baŋa acalo ikobo-nono.” Eka amalaika te ya oko baŋe. I kare-nono Maliam oya, owoto oyotoyot i lobo ame obedo kidikidi, i paco moro me Juda, odonyo i ot a Jekeria, omoto Elicabet. Tekki Elicabet winyo amot a Maliam, atin te tiŋere oko i yie. Cuny Acil opoŋ i yi Elicabet, okobo kede dwon amalo ni, “Itye kede winyo i akina mon, nyodo me yii daŋ tye kede winyo! Kop-pi kara ya ikwene, tota a Rwotta obino baŋa? Nen, ka dwon ame imota kede odonyo i yita, atin i yia otiŋere kede yomcuny. Tye kede winyo ŋat ame oye, pien kop ame Rwot otito baŋe bino cobere kakare.” Maliam te kobo ni, “Cunya adworo Rwot, yia yom pi Obaŋa Alarra, pien oyero aŋeca mere, kadi en obedo ocan. Nen, cakere tin lwak me kare luŋ obino lwoŋa ni an ŋat a winyo tye i kome; pien en ame tye kede twer otima gin adit nyiŋe daŋ cil. Kica mere tye baŋ lwagi jo lwore me lare luŋ. Otia tic atek kede bade, olalo jo ame yon i tam me cunygi; oreto oloc piny i wi kome locgi, omio dito baŋ ocan. Jo ame kec nekogi omiogi oyeŋ kede cem abeco, oryemo olonyo odok i ciŋgi nono. Okonyo amiro mere Icrael, opo pi timo kica, acalo rik okobo baŋ kwariwa, baŋ Iburaim kede baŋ ikwae atwal.” Maliam ori baŋ Elicabet dwete adek, te dok ture. Ka kare me nywal a Elicabet oromo, onywalo atin awobi. Ka wati mere kede jo turgi owinyo ni Rwot otimo kica adwoŋ i kome, gin olelo karacel kede. I nino me aboro gin ote bino ka liro atin. Gin omito cako nyiŋe Jekeria bala nyiŋ pappere, ento tottere ogame ni, “Mom amannono, obino lwoŋe ni, Lakana.” Gin ote dok iye ni, “Kodi nyiŋŋono mom tye baŋ aturu moro.” Gin te gweto pappere, ote penye kite a en mito ni cak i nyiŋ atin. En te penyo kidi coc, ti coyo ni, “Nyiŋe Lakana.” Gin ducu owuro awura. Cucuttono doge te yabere oko, te lebe te gony oko, okobo kun pwoo Obaŋa. Lworo omako jo ducu ame onwoŋo tye ceggi i laŋetgi, koppono te lal oko i lobo Judaya luŋ ame obedo kidikidi. Jo luŋ ame owinyo omako i cunygi, kun okobo ni, “Kara atin-nono kite bino bedo calladi?” Aco, koŋ inen, ciŋ Obaŋa tye i kome. Cuny Acil opoŋ i yi pappere Jekeria, te ero kop acalo adwarpiny ni, “Opwo wunu Rwot Obaŋa me Icrael, pien doŋ olimo jo mere, olakorogi. Omiowa twon Alar atek, i ot amiro mere Daudi, acalo rik okobo i dog, adwarpiny mere acil, ame obedo geye i kare acon, me larowa i baŋ okworwa, kede i ciŋ jo luŋ ame dagowa, pi timo kica baŋ kwariwa, kun opo pi cikere mere acil, kede kwoŋ a rik okwoŋo baŋ kwarowa Iburaim, ni ebino miyowa otio baŋe aboŋo lworo, kun olarowa i ciŋ okworwa, kun wan ocil, ame kitewa atir i nyime, nino megwa ducu. Yin atin daŋ, obino lwoŋi ni adwarpiny a En Amalo Meicel, pien ibino kwoŋo nyim Rwot pi yiko yo mere, kun imio jo mere ŋec me lar, pi weko bal megi, pi kica Obaŋawa ame wan ocono, ame obinniwa i malo bala rupiny, me menyo jo ame bedo i piny acol kede i tipo me to, kede tiro tyenwa i yo me kuc.” Atin odoŋo, tek omedde i cunye, obedo i tim ituno i nino ame onyute iye baŋ jo Icrael. I kare ca cik rik oya i baŋ Kaicari Augucito pi coyo nyiŋ jo ducu me lobo. Man en coye me agege, ame otimere kun onwoŋo Kurenio loo Curia. Jo luŋ aluŋa owoto me coye kun ŋat acel acel dok i paco turgi. Yucepu daŋ rik oya i Galilaya, i paco me Najaret, me wot i Judaya, i paco a Daudi ame nyiŋe Beterekem, pien onwoŋo rik en ŋat acel i akina ikwae a Daudi, me ecoye gin i Maliam ame ocikere kede, ame onwoŋo doŋ ogogoro. I kare ame onwoŋo doŋ gin tye kuno, kare me nywallere te romo oko. En te nywalo wode me kao, te wume kede boŋo me atin okere, eka te pyele i weer me cem a dok, pien kabuto onwoŋo oremogi oko i ot wele. I lobo-nu rik tye iye okwat ame bedo i tim, kun ogwoko rommigi dyewor. Cutocuto amalaika a Rwot onen, ocuŋ i akinagi, kwogo a Rwot oryeny, ocarogi, lworo te makogi atek. Amalaika okobbigi ni, “Kur ilwor wunu pien nen, akelliwu amut aber me yomcuny ame bino nya baŋ jo ducu. Tin-ni, i paco a Daudi, onywalliwu Alar, en Kricito Rwot. Man bino bedo gin a nyuto: ibino nwoŋo wunu atin okere ame owumo i boŋo, kun opyelo obuto i weer me cem a dok.” Cucuttono onwoŋo tye lwak mony me polo karacel kede amalaika-nono: gin opako Obaŋa kun obume ni, “Kwogo bed baŋ Obaŋa malo i polo, kuc obed i lobo i akina jo ame epwoo.” I kare a doŋ omalaika oya i baŋi, odok i polo, okwat oporo kop kekengi ni, “Owot wunu koŋ i Beterekem, me owot onen wunu gin ame Rwot onyuttiwa.” Gin owoto oyotoyot, ote nwoŋo Maliam kede Yucepu, kede atin ame obuto i weer me cem a dok. Ka gin oneno, otito baŋ jo kop ame okobbigi i kom atin man; jo ducu ame owinyo, owuro pi kop ame okwat otittigi. Ento Maliam okano kop magi ducu kun tamo i cunye. Okwat odok a kun mio kwogo baŋ Obaŋa, opake pi gigu ducu ame gin owinyo, dok oneno, acalo koŋ otittigi. Ka nino aboro doŋ oromo me lire, ocako nyiŋe Yecu, nyiŋ ame amalaika omio a kun mom ru en tye i yic. Ka kare me lonyeregi oromo, acalo cik a Muca okobo, Maliam kede Yucepu otero atin i Jerucalem pi miyo baŋ Rwot, (acalo ocoo i cik a Rwot ni, “Itino kao ducu a co obino cwanogi acil pi Rwot”) dok me miyo mot ame oŋolo me yalo Obaŋa, acalo rik ocoo i cik a Rwot ni, “awele aryo onyo otino amam aryo.” Rik tye i Jerucalem dano a nyiŋe Cimeon. Rik en dano a kite atir, a woro Obaŋa, kun kuro kare a waŋoro obino kweyo iye cuny jo Icrael; Cuny Acil ceŋ tye i kome. Cuny Acil rik otyeko doŋ yabbe ni en mom bino to a mom ru oneno Kricito a Rwot. Cuny Acil otiŋe obino i ot Obaŋa. Ka onywal atin Yecu okele, me wek ocob gin ame cik mito i kome. Cimeon otiŋe i bade, opwoo Obaŋa, okobo ni, “Aman doŋ iciko amiro meri, Rwot, me wot i kuc, kun ilubo gin a nwaŋ iciko; pien waŋa doŋ oneno lar meri ame iyiko i nyim rok ducu, me bedo ceŋ a menyo muŋ baŋ Orok, kede me bedo kwogo a jo meri Icrael.” Pappere kede tottere ote wuro kop ame okobo i kome. Cimeon olamo winyo i komgi, kun kobo baŋ tottere Maliam ni, “Nen, atin man ocibo wek jo Icrael apol rette, dok ya, dok me bedo anen ame jo okwero, (dok pala karu bino cobo tiponi kero), wek tam opono i cuny jo apol yabere.” Rik tye adwarpinnyoro a dako, nyiŋe Anna, nyaka a Panuel, me i atekere Acer; onwoŋo doŋ oteggo meicel, kun otyeko mwakki abiro baŋ cware cakere i kare ame onyome, icennere ka cware oto, te bedo kene, naka ituno i mwaka pyeraboro wie aŋwen. En pe rwenyo i ot Obaŋa ka woro Obaŋa kede kanyo kec kede kwae dyewor kede dyeceŋ. En opwoo Obaŋa ka obino i caa-nono, te rabo nyiŋ atin baŋ jo ducu ame yam kuro kare me lakoro Jerucalem. Ka doŋ gin otyeko cobo gin ducu a tye i cik a Rwot, gin odok i Galilaya, i pacogi Najaret. Atin odoŋo, odoko atek, kun opoŋ kede ryeko. Winyo Obaŋa onwoŋo tye i kome. Onywal Yecu rik woto i Jerucalem mwaka i mwaka i ecuban me Kato. Ka mwaka me dittere doŋ oromo tomon wie aryo, gin owoto i ecuban acalo yam kite tye. Ka ecuban doŋ otum, ame doŋ odok cen paco, awobi Yecu odoŋ cen i Jerucalem, ento onywalle pe oŋeo; gin otamo ni en tye i akina lwak ame owoto kedgi. Gin te woto wot me nino acel, oyenye i akina watigi kede owotegi; ka pe onwoŋe, gin odok i Jerucalem me wot yenye. Ka nino adek doŋ okato, gin onwoŋe i ot Obaŋa, obedo i akina opwony ka winyogi kede penyogi. Jo ducu ame onwoŋo owinye, owuro ryeko me niaŋŋere kede kit dokkere i peny. Ka gin onene, gin owuro atek, tottere te penye ni, “Woda, itimowa aman piŋo? Nen, wan i pappi obedo yenyi kede kumo.” En ogamo doggi ni, “Iyenya wunu piŋo? Mom iŋeo wunu ni an myero abed i ot a Pappa?” Gin pe oniaŋ kop ame en okobbigi. Onywako yo kedgi aton i Najaret, dok obedo kede winy baŋgi: cite tottere okano kop magi ducu i cunye. Yecu odoŋo, omedde i ryeko, kun medde nwoŋo pwoc baŋ Obaŋa kede baŋ jo. I mwaka me tomon wie kany me loc a Tiberio Kaicari, Pontio Pilato onwoŋo obedo aloc me Judaya, Kerode onwoŋo aloc me Galilaya, ominnere Pilipo onwoŋo aloc me Iturea kede Trakoniti, Lucania onwoŋo aloc me Abilene, aco Anna kede Kayapa onwoŋo gin olamdog adoŋo; i kare-nono kop Obaŋa obino baŋ Lakana wot a Jekeria i tim. En owoto i lobo ducu ame ceggi kede Jordan kun rabo kop ni, “Ŋut wunu, wek batijawu, me Obaŋa wek balwu”, acalo ocoo i buk me kop adwarpiny Icaya ni, “Dwon dano a redo i tim ni, Ger wunu yo pi Rwot, yik wunu gudo mere cuŋ atira, Luŋ ducu obino toro, kidi kede tur obino odwoko piny, kan ame ogonne obino miyo cuŋ atira, yo obedo popony obino piro oko; jo ducu bino neno lar Obaŋa.” Lwak ecipan obino baŋe me ebatijagi; en okobbigi ni, “Wun itino ororo, ŋa ame okwenyorowu ni mano ber iriŋ wunu akemo Obaŋa ame bino tuno? Nyak wunu doŋ nyig a myero me ŋut, kur dok icak tamo wunu ni, ‘Otye kede kwarowa en Iburaim’; pien akobbiwu ni, Obaŋa tye kede te ko me miyo gweŋe magi doko ikwae Iburaim. Aman doŋ otyeko keto lee oko me toŋo lwit yen; yat acel acel a mom nyako nyige abeco, otoŋo, obolo i mac.” Lwak openye ni, “Kara wan doŋotim ŋo?” En ogamo ni, “Ŋat a tye kede kanyi aryo, pok i ŋat ame mere mom; ŋat ame tye kede cam, tim amannono daŋ.” Oraocoro gin daŋ obino me batakinogi; gin openye ni, “Apwony, kara wan kono otim ŋo?” Okobbigi ni, “Kur ira wunu ame kato wel ame ocikowu.” Cirikali daŋ openye ni, “Wan kono otim ŋo?” Okobbigi ni, “Kur iyak wunu ŋattoro tetek, onyo idote wunu gobagoba; myero imi ocarawu romwu.” Ame lwak tye ka kuro, gin openyere i cunygi pi Lakana, ka kono ce ŋit en Kricito. Lakana okobbigi ducu ni, “An abatijawu kede pii, ento ŋattoro tye ame abino, en tek kata oko; an mom aromo gonyo del warrere. En bino batijawu kede Cuny Acil, dok kede mac. Odero mere tye i ciŋe, me yiko laro mere aber; bino nyono kallere i dero, ento cuŋe en bino waŋo oko kede mac a mom to.” Orabo amut aber baŋ lwak, kun cuko cunygi kede kop ocele apol. Ento Kerode ame aloc ame rik en Lakana ojuko pi Kerodia ci-ominnere, kede pi gin areco ducu ame Kerode otimo, omedo kop man i kom kop ocele Iuŋ, otweo Lakana i buc. Ka doŋ jo obatija ducu, ame Yecu daŋ obatija, ka en tye ka kwac, polo oyabere. Cuny Acil obino acalo amam i cal me kom, opoto i kome. Dwonnoro oya i polo ni, “Yin woda ame amaro, cunya yom i komi.” I kare ame Yecu cako ticcere, onwoŋo doŋ tye kede mwaka me dittere a mito romo pyeradek. Rik en wot a Yucepu, acalo otamo, ame en wot a Eli, wot a Mattat, wot a Levi, wot a Melki, wot a Yannai, wot a Yucepu, wot a Mattatia, wot Amoc, wot a Nakum, wot a Eceli, wot a Naggai, wot a Maat, wot a Mattatia, wot a Cemein, wot a Yocek, wot a Yoda, wot a Yoanan, wot a Reca, wot a Jerubabel, wot a Calatiel, wot a Neri, wot a Melki, wot a Addi, wot a Kocam, wot a Elmadam, wot a Er, wot a Yocwa, wot Eliejer, wot a Yorim, wot a Mattat, wot a Levi, wot a Cimeon, wot a Juda, wot a Yucepu, wot a Yonam, wot a Eliakim, wot a Melea, wot a Menna, wot a Mattata, wot a Natan, wot a Daudi wot a Yece, wot Obed, wot a Boaj, wot a Calmon, wot a Nacon, wot Aminadab, wot Admin, wot a Arni, wot a Kejeron, wot a Perej, wot a Juda, wot a Yakobo, wot Icaka, wot Iburaim, wot a Tera, wot a Nakor, wot a Cerug, wot a Reu, wot a Peleg, wot Eber, wot a Cela, wot a Kainan, wot Arpakaead, wot a Cem, wot a Nua, wot a Lamek, wot a Metucela, wot Enoka, wot a Jared, wot a Maalalel, wot a Kainan, wot Enoci, wot a Ceji, wot Adam, wot Obaŋa. Yecu odwogo i Jordan a doŋ Cuny Acil opoŋ i yie, Cuny Acil obedo tele i dye tim pi nino pyeraŋwen, kun Catan bite, i kare-nu ducu onwoŋo mom camo ginnoro; ka otum, kec oneke. Catan okobbe ni, “Ka yin i Wot Obaŋa, koŋ ikobbi gweŋ man lokere dok kwon.” Yecu te gamo ni, “Yam ocoo ni, ‘Dano mom bino bedo kwo ka i kwon keken.’ ” Catan te dok tere malo, te nyutte loc luŋ me wi lobo i akina anonokkoro keken, te kobbe ni, “Abino miyi twer magu ducu, kede kwogo megi, pien otyeko miya, atwero miyo baŋ ŋattoro ame an amito. Doŋ ba, ka yin iwora, ducu abedo megi.” Yecu ogamo ni, “Yam ocoo ni, ‘Wor Rwot Obaŋani, iti pi en keken.’ ” Icennere dok otere i Jerucalem, ocibe i wi atenni ot Obaŋa malo, te kobbe ni, “Ka yin i Wot Obaŋa, koŋ iŋoye irette piny kan, pien yam daŋ ocoo ni, ‘En bino ciko omalaika mere piri, me gwoki,’ daŋ ni, ‘Gin obino joli i ciŋi, me kur itwom tyeni kede gweŋ.’ ” Yecu te gamo ni, “Yam okobo ni, ‘Kur iom yi Rwot Obaŋani.’ ” Ka Catan otyeko bite i yore luŋ, oweke me ekur kare aber. Yecu odwogo i Galilaya i teko a Cuny Acil; pire owinyere i lobo ducu a ceggi i kuno. Opwonyo i kacokeregi, jo luŋ oketo kwogo i kome. Yecu obino i Najaret, kan a rik edoŋo iye, odonyo i kacokere i ceŋ cabit, acalo kite mere me kare luŋ, oya malo ka kwan. Omie buk adwarpiny Icaya. Oyabo buk, te nwoŋo kan a rik ocoo ni. “Rwot doŋ ocwao Cunye i koma, pien en okwera wek arab amut aber baŋ ocan, Oora pi rabbi jo a tye i opii ni obino gonyogi oko, kede baŋ otowaŋ ni obino yabo waŋgi; me agony jo a yam owunogi, owot i kuc; dok arab pi mwaka ame Rwot timo iye jo ber.” Owumo buk, odwoko baŋ atic, te bedo gire piny; jo ducu i kacokere waŋgi ocuŋ i kome. Ocako rabbigi ni, “Coc man tin ocobere kakare, iwinyo wunu i yitwu.” Jo luŋ okobo kop aber i kome, a kun daŋ owuro kop abeco me kica ame oya i doge. Gin te penyere ni “Man mom wot a Yucepu?” En te gamo doggi ni, “An aŋeo atira ni, wun ibino kobba wunu ni, ‘Dakatal caŋere keni; tic a rik owinyo itio i Kapernaum, ti daŋ i paco me turu.’ ” Te dok medde kede ni, “Ateni, akobbiwu ni, mom tye adwarpinnyoro ame ojolo i loba me turgi. Ento i ateni mere akobbiwu ni, rik tye mon apol i Icrael ame coggi oto i kare Elia, ka kot rik okwero cwe oko pi mwakki adek kede dwete abicel, ame kec atek rik opoto i lobo ducu, ento mom ocwao Elia baŋ ŋattoro i akinagi, kono baŋ dako ame cware oto me Jarepat i loba me Cidon. Dok daŋ i lobo Icrael rik tye iye odobo apol i kare adwarpiny Erica; ŋattoro ame ocaŋo i akinagi obedo mom, kono ka Naaman, dano me Curia.” Jo ecipan ame tye i kacokere, ka owinyo kop man, akemo omakogi atek. Gin ote twarre i piny oko, ote tere teŋe i ŋet paco, okele i wi kidi ame gin ogero pacogi i wie, me wek ote core piny oko. Ento en okato i akinagi, te wot gire oko. Yecu owoto i Kapernaum, ame en boma moro me Galilaya; obedo ka pwonyogi i ceŋ cabit. Gin te gano pwonnyere, pien okobo kede twer. I kacokere rik tye iye dano moro a tye i cen arac; en oredo kede dwon aloŋo ni, “Eeei, kara ilaro ŋo kedwa, yin Yecu me Najaret? Ibino me tyekowa atyeka bo? An aŋei, yin i ŋat Acil Obaŋa.” Ento Yecu te juke ni, “Liŋ iti, ya oko i kome.” Cen arac te reto dano ca piny i nyimgi, oya oko i kome aboŋo timme ginnoro arac. Jo ducu owuro kun openyere kengi kengi ni, “Man kop aŋo-nie? Pien en ciko cen areco kede twer kede teko, gin te ya oko.” Pire owinyere i kabedo luŋ ame omano kannono. Yecu oya te kato oko i kacokere, odonyo i ot a Cimon. Maro a Cimon onwoŋo two, lyeto ociro atek; okwae ni konye. En obino ocuŋ i ŋete, ojuko lyeto, lyeto te ket oko i kome; cucuttono oya malo, okonyogi. Ame cen amito poto, jo luŋ ame tye kede jo a komgi lit, ame toogi papat, okelogi baŋe; oketo ciŋe i kom ŋat acel acel i akinagi, ocaŋogi. Cen areco daŋ oya i kom jo apol, kun oredo ni, “In giri i Wot Obaŋa!” Ento en ojukogi, mom oye ni gin kob kopporo, pien gin ŋeo ni en Kricito. Ka piny oru, Yecu owoto kan ame jo mom iye. Lwak obedo yenye, gin te bino baŋe, ote temo gene ni kur ya i baŋgi. Ento en okobbigi ni, “Myero an arab amut aber me loc Obaŋa i boma ocele daŋ, pien an oora pi kop man.” En obedo ka rabo kop ikacokere me Judaya. Ka rik lwak odiye baŋ Yecu pi winyo kop Obaŋa, onwoŋo en ocuŋ i dog nam me Genecaret. Oneno yede aryo i dog nam; ocik rec onwoŋo oya iye oko, otye ka lwoko bwoyigi. En te donyo i yee acel ame onwoŋo mea Cimon, okwae ni koŋ ekwaŋ anok i nam. En obedo piny, opwonyo lwak kun en tye i yee. Ka doŋ otyeko kop, okobo baŋ Cimon ni, “Kwaŋ iwot kan atut, irye wunu bwoyiwu me mak rec.” Cimon ogamo ni, “Adwoŋ, doŋ ocanne kwe dyewor benebene, mom omako ginnoro, doŋ pi kop ikobonono, koŋ abino ryeyo bwo.” Ka gin otimo kite-nono, omako lwak rec apol ata, bwoyigi te ero cocota oko. Ote gweto owotegi a tye i yee ocele ni bin konygi. Gin obino, ote loko rece i yede aryo luŋ opoŋ, doŋ ote cako lwiny oko. Cimon Petero ka oneno man, oryebere i coŋ Yecu, okobo ni, “Rwot, ape giri okoŋ, pien an dano ame abalo.” Pien en kede jo ame etye kede owuro pi rec ame gin omako; Yakobo kede Lakana itino a Jebedayo, ame rik ribere i tic gin i Cimon, gin daŋ owuro. Yecu te kobbi Cimon ni, “Kur ilwor; ya amanni ibino coko jo akaka rec.” Ka doŋ gin otyeko tero yedegi oko i wi tela, oweko jamigi luŋ, ote lube. Ka Yecu tye i boma moro, ŋattoro obino ame dobo onwanne i kome. Ka oneno Yecu, oryebere piny, obako doge ni, “Adwoŋ, ka imito, itwero lonya.” Yecu te ryeyo bade, te gude, kun kobo ni, “Ee, amito; lonyere giri.” Cucuttono dobo te ony i kome oko. Yecu te cike ni pe myero kobbi ŋattoro. Dok te cike ni, “Woti, inyutte keni baŋ alamdog, imi mot pi lonyere meri, acalo rik Muca ociko, me bed anyut baŋgi.” Ento rwoŋe te dok medde winyere atek meicel. Lwak ecipan ocokere ka winyo Yecu, dok me can toogi. Ento en rik pokere oko, woto i tim kakwayo Obaŋa. I nino moro acel Yecu onwoŋo tye apwony, kun Oparicayo kede opwonycik, ame oya i pacci ducu me Galilaya kede Judaya kede Jerucalem, onwoŋo tye i kome. Cucuttono jo te kela dano ame odyelo i tanda, ame two too me akwea kom. Gin omito tere i ot me owot opyele i nyim Yecu, naka mom onwoŋo yo me tere i ot, pi pol a lwak. Ote lunyo yito malo i wi ot, ote cwaye piny i akina mategula kede gibuto mere i dye ot i nyim Yecu, Ka en oneno iyeegi, okobo ni, “Lo-ni, balli doŋ oweko oko.” Opwony-cik kede Oparicayo te ero penyere kengi ni, “Man kara ŋa a kobo kop me yeto Obaŋa-nie? Ŋa ame twero weko bal, kono Obaŋa keken gire?” Ka Yecu oniaŋ i kom penyere megi, te gamo doggi ni, “Pino ipenyere wunu i cunywu? Kara ayottere mene, ka okobo ni, ‘Bali doŋ oweko oko’, onyo ka okobo ni, ‘Ya iwoti?’ Ento man me miyowu ŋeyo ni, Wot a dano tye kede twer i lobo me weko bal,” en te kobbi lo ame two too akwea kom ni, “An akobbi ni, ya, itiŋ gi-butoni, iwot giri paco.” Yotoyot en te cuŋ i nyimgi, otiŋo gin a rik opyele iye, odok paco kun pako Obaŋa. Gin ducu owuro atek meicel, daŋ ote pako Obaŋa; gin olworo atek kun okobo ni, “Oneno gin a welo tin.” Icennere Yecu te wot oko, dok te neno ara-ocoro ame obedo piny i ka rayo ocoro, nyiŋe Levi; okobbe ni, “Luba.” En oweko jami luŋ aluŋa, te ya lubo Yecu. Levi otedde arama adwoŋ tuŋe; onwoŋo lwak ora-ocoro apol kede jo ocele daŋ obedo piny i dog cam karacel kedgi. Oparicayo kede opwony-cikgi oŋuŋura i kom jo a lubo Yecu kun openyogi ni, “Piŋo icamo dok imato wunu karacel kede ora-ocoro anaka obalo-gu?” Yecu te gamo doggi ni, “Jo a komgi yot mom mito dakatal, kono jo ame komgi lit. An mom abino me cwano jo ame kitegi atir, ento obalo, me gin ŋut.” Jo mogo te kobbi Yecu ni, “Jo a lubo Lakana maro kanyo kec, kede kwayo Obaŋa, anaka jo a lubo Oparicayo daŋ, ento jo a lubi gin cemo dok mato.” Yecu openyogi ni, “Itwero wunu miyo owote a ŋat a nyom kanyo kec a kun en anyom tye baŋgi? Kare bino tuno ame obino kwanyo anyom oko i baŋgi, en a mio gin te kanyo kec i kare-nono.” Dok te kobbigi carokop ni, “Mom tye dano moro ame yeco dul boŋo i kom boŋo a pwod nyen, eka te dapo dok i kom boŋo ame doŋ oti. Ka ce en otimo kite-nono, bino lunyo yeco en anyen, dok dul boŋo anyen mom bino rwatte kede en oti. Dok mom tye dano ame piko koŋo anyen i ocoe acon; ka ce opiko, koŋo anyen bino yeco ocoe, dok bino ony, ocoe daŋ bino baile. Ento kono anyen myero pik i ocoe anyen. Mom tye dano moro ame, ka omato kono acon, dok yie te gomo en anyennere, pien kobo ni, ‘En aconnere mit wok.’ ” Ka nwaŋ Yecu woto kun aŋolle i poto bel i nino me cabit, jo a lube te rito wit bel, te ŋinyo i ciŋgi, te mwodo. Ento jo mogo i akina Oparicayo te penyo ni, “Kara piŋo itimo wunu gin ame cik okwero ni jo kur ti i ceŋ cabit?” Yecu te gamo doggi ni, “Wun ce mom ikwano wunu gin ame Daudi otio ka rik kec oneke, en kede jo a rik tye karacel kede? Kite ame en odonyo kede i ot Obaŋa, te kwanyo ogati ame oketo i nyim Obaŋa, a yam cik okwero ni dano kur cam, kono ka olamdog keken? En ocamo dok te miyo baŋ jo ame tye karacel kede.” Te dok kobbigi ni, “Wot a dano en Rwot me cabit.” I cabit ocele Yecu odonyo i kacokere, opwonyo jo; onwoŋo dano moro tye kuno ame bade tuŋ cem omito. Opwony-cik kede Oparicayo okie ka ce bino caŋe i ceŋ cabit, me onwoŋ yo me pide. Cite en te ŋeyo tamgi oko, te kobbi dano a bade omito ni, “Ya icuŋ i dyere.” En oya, te cuŋ. Yecu te penyogi ni, “I cen cabit, cik ye ni tim iye gin aber onyo gin arac, lar kwo onyo nek aneka?” En oŋoloro waŋe i akinagi ducu, te kobbe ni, “Rye badi oŋ.” En oryeo bade, te can oko. Ento akemo omakogi atek, ote poro kop kengi kengi, gin a myero otim i kom Yecu. I kare-nono Yecu owoto i wi kidi ka kwac iye; obedo ka kwayo Obaŋa dyewor benebene. Ka piny oru, ocwano jo a lube baŋe, te yero jo apar wie aryo iyi akinagi, te miyogi nyiŋ ni, okwena. Jo-nono ene: Cimon ame ocako nyiŋe Petero, kede Anderiya ominnere, Yakobo kede Lakana, Pilipo kede Bartolomayo. Matayo kede Tomaci, Yakobo wot a Alipayo, Cimon me eryoŋet a jo a pyem i abumente. Juda wot a Yakobo, kede Juda me Keriot, ame ceŋ oketo erupe i kom Yecu. Yecu obino kedgi piny te cuŋ i kabedo opirre, lwak ecipan i akina jo a lube onwoŋo daŋ tye kuno, kede lwak jo ecipan ame oya i Judaya kede i Jerucalem, kede i dog nam me Turo kede Cidon, ame rik gin obino me winyo pwonnyere, dok me can too i komgi. Jo a cen areco wunogi daŋ ocaŋogi. Lwak luŋ otemo gudo kome, pien teko rik oya i kome, te canogi ducu. Otiŋo waŋe i kom jo a lube, te kobo ni, “Itye wunu kede winyo, wun ocan, pien loc Obaŋa mewu. “Itye wunu kede winyo, wun jo a kec nekowu amanni, pien ibino yeŋ wunu. “Itye wunu kede winyo, wun jo a kok amanni, pien ibino nyero wunu. “Itye wunu kede winyo kajo dagwu, ame oryemowu oko i akinagi, kun oŋalowu, kede ka obalo nyinwu oko ni rac, pi Wota dano! Lel wunu i ninono no, kun ipye wunu i yomcuny, pien, nen ba, mot me pwoyowu bup meicel i wi polo; pien kwarigi rik daŋ otimo odwarpiny amannono. “Ento ibino wunu neno can, wun olonyo, pien ityeko wunu nwoŋo gin a kweo cunywu oko. “Ibino wunu neno can, wun jo ame yeŋ amanni, pien kec bino nekowu. “Ibino wunu neno can, wun jo ame nyero amanni, pien ibino kumo wunu kede koko. “Ibino wunu neno can ka jo ducu pwoowu, pien kwarigi rik daŋ otimo odwarpiny ame ogoba amannono. “Ento an akobo baŋwu, wun jo a winyo koppa, ni, Mar wunu okworwu, tim wunu ber baŋ jo a dagwu, lam wunu winyo i kom jo a cenowu, kwa wunu Obaŋa pi jo a yetowu. Dano ame obapo lemi tuŋ cel, lokke tuŋ ocele daŋ obapi; ŋat omao kanyini, kur daŋ itwonne kotini. Jo luŋ ame kwai, migi, ŋat ame mao jamini, kur dok ipenye. Kite ame imito wunu ni jo timwu kede, wun daŋ tim wunugi amannono. “Ka imaro wunu ka jo a marowu, kara ibino nwoŋo wunu iye pwoccene? Pien obalo daŋ maro jo a marogi. Ka itimo wunu gin aber baŋ jo a timowu gin aber, kala ibino nwoŋo wunu iye pwoccene? Pien obalo daŋ timo kittono. Dok ka imio wunu banya baŋ jo ame igeno wunu ni twero culliwu, kara ibino nwoŋo wunu iye pwoccene? Obalo daŋ mio banya baŋ obalo wadgi, me gin culgi arorom. Ento mar wunu okworwu, tim wunu gin aber, miu banya kun mom igeno wunu ni obino culliwu doki. Mot me pwoyowu bino bedo abup, dok ibino bedo wunu itino a En Amalo Meicel; pien en ber baŋ jo a mom pwoc, kede baŋ jo areco. Bed wunu i kica, acalo Papawu en akica. “Kur iŋol wunu kop, wun daŋ mom obino ŋolliwu kop. Kur iŋol wunu kop loo jo, wun daŋ mom obino Ŋolo kop loowu. Tim wunu jo kica i balgi, wun daŋ obino timowu kica i balwu. Mi wunu, wun daŋ obino miyo baŋwu. Obino pimmiwu i gwata aber, ame odio, ame oyeŋo, ame aony aonya. Pien kit gin ame ipimo wunu kede, en ame daŋ obino pimmiwu kede.” En dok te kobbigi carokop ni, “Atowaŋ twero peyo atowaŋ wadgi? Gin aryo luŋ mom bino rette oko i bur? Ŋat a pwod opwonyo apwonya mom bedo adwoŋ akato ŋat a pwonye; ento dano acel acel ka owok aber, bino bedo bala ŋat opwonye. Piŋo ineno cuŋ kal ame tye i waŋ ominni, aco kono ikoŋ a tye i waŋ i ikomi neno loi oko? Itwero kobo ominni niŋo ni, ‘Ominna, wek akwany cuŋ kal i wani-ni oko,’ a kun yin ikomi mom ineno ikoŋ a tye i waŋi? Yin agoba, koŋ ige kwanyo ikoŋ a tye i waŋi, eka ite doŋ neno aber me kwanyo cuŋ kai a tye i waŋ ominni. “Pien mom tye yattoro aber ame dok te nyako nyige areco, kadi yat arac ame dok te nyako nyige abeco; pien yat acel acel ŋeye i kom nyige. Ibuu mom opwono i kom oryaŋ, olok daŋ mom opwono i kom laŋo. Dano aber kwanyo gin aber i akina jami abeco ame en okano i cunye, dano arac kwanyo gin arac i akina jami areco ame en okano; pien dog dano kobo gin ame opoŋ i cunye. “Ŋo omio ilwoŋa wunu ni, ‘Rwot, Rwot,’ ame kun mom itio wunu gin ame acikowu iye? Dano acel acel ame bino baŋa, ame winyo koppa, daŋ te tiyo, abino nyuttiwu ŋat ame en cal kede. Rom kede dano ame ogero ot, te kunyo atut, ame ocibo acakki te ot i kom lela. Doŋ ka kulo opoŋ, omol kede teko, ocoro ot, ot pe twero yeŋere, pien nwoŋo ogero aber. Ento ŋat ame winyo koppa kun mom tio, rom aroma kede dano a rik ogero ot i kom lobo aboŋo acakki tere, ame ka kulo omol kede teko, ocore, ot orette oyotoyot; rette a ot-tu obedo dwoŋ atek.” A doŋ Yecu otyeko koppere ducu ame lwak awinyo, odonyo i Kapernaum. Onwoŋo tye adwoŋ cirikale ame rik tye kede opii mere ame emaro meicel, rik kome lit a doŋ ceggi to. Ka en owinyo pi Yecu, ooro odoŋe a jo Judaya baŋe kun kwae ni myero bin caŋ opii mere. A doŋ gin otuno baŋ Yecu, gin obako doggi baŋe atek, kun okobo ni, “En ber, myero itimme man, pien maro rokwa, daŋ en ame ogero kacokerewa.” Yecu rik te wot kedgi. Ka en doŋ onoko ceggi i ŋet paco, adwoŋ me cirikale ooro owote mere mogo baŋe kun kobbe ni, “Adwoŋ, kur icanne, pien mom oporre yin idonyo i oda, daŋ en gin omio atamo ni an mom aromo bino baŋi. Twara ikob ka kop keken, amirona bino caŋ. Pien an daŋ a dano ame oloo aloa, dok daŋ atye kede cirikale ame aloogi. Ka akobbi moro ni, ‘Woti,’ en woto; onyo moro ocele ni, ‘Biye,’ en bino; dok ka akobo opiina ni, ‘Ti man,’ en tio.” Yecu ka owinyo kop man owuro meicel, olokere tuŋ baŋ lwak a lube, te kobbigi ni, “Atittiwu ni, pe ru anwoŋo iyee a rom man, kadi i Icrael.” Ka jo ame ooro odwogo paco, gin onwoŋo opii doŋ kome yot. Ka kare okato anok, Yecu owoto i paco ame olwoŋo Nain; jo mere a lube kede lwak apol owoto karacel kede. Ka obino, a doŋ gin ceggi kede dogcel me paco-nu, onen ni jo mogo tye adyello dano oto, otero oko. Dano-ni onwoŋo tottere onywalo en kene, daŋ doŋ en dako a cware oto. Lwak jo apol ame oya i paco-nono onwoŋo tye karacel kede. Ka Rwot onene, ocone, te kobbe ni, “Kur ikoki.” En obino ogudo alago, jo a tye ka dyelle-nu ocuŋ mot. En okobo ni, “Awobi, akobbi ni, ya malo!” Dano ame oto-nu te ya bedo abeda, daŋ te cako kop oko. Ote miye baŋ tottere. Lworo te mako jo luŋ, ote pako Obaŋa kun okobo ni, “Adwarpiny adwoŋ doŋ onwoŋere i akinawa!” dok ni, “Obaŋa doŋ olimo jo mere!” Kop man ame okobo i kome owinyere i lobo Judaya ducu kede i lobo a cocok i ŋete luŋ. Jo a lubo Lakana otitte kop magi luŋ. Lakana olwoŋo jo aryo i akina jo mere a lube, oorogi baŋ Rwot me penye ni, “Yin dano a bino ca, onyo okur en ocele?” Ka jo-nu obino baŋ Yecu, okobbe ni, “Lakana Abatija oorowa baŋi kun penyo ni, ‘Yin dano ame abino ca, onyo okur en ocele?’ ” I karenono ocaŋo jo apol i kom too kede cen areco, daŋ omio jo apol ame waŋgi oto oneno piny. En odokkigi iye ni, “Wot ikobbi wunu Lakana gin ame ineno wunu kede gin ame iwinyo wunu: otowaŋ waŋgi oyabere, jo oŋwalo owoto, kom odobo olony, jo a yitgi odiŋ owinyo, jo oto ocerogi oko, dok orabbi ocan amut aber. Dano ame tammere mom balle i koma nwoŋo tye kede winyo.” Ka jo ame Lakana ooro doŋ otyeko dok, Yecu ocako kop kede lwak kop i kom Lakana ni, “Yam iwoto wunu i tim ka neno ŋo ba? Ka neno ogada a yamo yeŋo bo? Kara iwoto wunu ka neno ŋo? Ka neno dano ame ruko boŋŋi abeco? Nenu ba, jo a ruko boŋŋi me kwogo, dok ame bedo kede jami me wek, bedo i pacci oloc. Kara doŋ iwoto wunu ka neno ŋo? Ka neno adwarpiny? Ee ta, akobbiwu ni, ŋat ame kato adwarpiny. Man en ŋat a rik ocoo pire ni, ‘Nen, acwao aorra i nyimi, ame bino gero yo piri i nyimi.’ Atittiwu ni, i akina jo ame mon onywalo, mom tye moro ame kato Lakana i dit; ento ŋat atidi meicel i loc Obaŋa dit kato en.” Ka gin owinyo kop man, lwak ducu kede ora-ocoro te ye ni Obaŋa kite atir, pien yam gin obatija kede batija mea Lakana. Ento Oparicayo kede opwony-cik okwero gin ame Obaŋa oyiko pirgi con, pien mom oye ni batijagi. Yecu dok te kobo ni, “Kara abino poro jo me kare man kede ŋo? Gin calladi? Gin orom kede itino ame bedo i cuk, ame lwoŋo otino wadgi kun okobo ni, ‘Wan okuttiwu nyamulere, wun mom imyelo wunu; owerriwu wer lyel, wun mom ikok wunu.’ “Pien Lakana Abatija doŋ obino kun mom camo kwon, mom mato koŋo, wun ikobo wunu ni, ‘En tye kede cen.’ Wot a dano obino ame camo dok mato daŋ, wun dok ikobo wunu ni, ‘Nen dano owor kede amero, awot ora-ocoro kede obalo.’ Ento ryeko Obaŋa nen atir ni tye kakare baŋ jo ogamo luŋ.” Ŋattoro i akina Oparicayo ocwane me cem baŋe; en owoto i ot Aparicayo, obedo piny i dog cem. Nen, rik tye dako moro ame abalo i paco-nono; ka oŋeo ni Yecu tye ka cem i ot Aparicayo, okelo adomo me moo a ŋwece kur, ocuŋ i ŋee a ceggi i tyene kun kok, pig waŋe te ton i tyen Yecu, obedo ka weyo kede yer wie kun noto tyene, wiro kede moo. Aparicayo ame olwoŋe, ka oneno, okobo i cunye kene kene ni, “Kono lo-ni obedo adwarpiny, kono oŋeo dako man ame ogude-ni oko, anaka kite, ni en abalo.” Yecu odokke iye ni, “Cimon, atye kede kop ame amito kobbi.” En ogamo ni, “Apwony, kob to kobbi.” En ogamo ni, “Apwony, kobi. Dano moro ame ami-baŋya onwoŋo rik tye kede jo aryo ame omako banya baŋe; dano acel ocamo banya me ciliŋ mia abic, dano ocele pyerabic. Ka culo oloogi, gin aryo ducu ote timogi kica. Kara ŋa i akinagi ame bino mare atek?” Cimon odok iye ni, “Atamo ni en ame otimo kica ame banya mere bup.” Yecu te gamo doge ni, “Iŋolo giri kakare.” Olokere tuŋ baŋ dako, openyo Cimon ni, “Ineno dako man? An adonyo i odi, mom imia pii me lwoko tyena, ento en oweko pig waŋe oton i tyena, oweo kede yer wie. Yin mom inoto lema, ento cakere ame adonyo i ot, en mom oweko noto tyena. Yin mom iwiro wia kede moo, ento en owiro tyena kede moo a ŋwece kur. En gin omio akobo ni, ballere apol wok-ki doŋ oweko oko, pien marrere adwoŋ onyuto; cite dano ame ballere nok ame oweko, marrere daŋ nok.” Okobbi dako ni, “Balli doŋ oweko oko.” Jo ame obedo kede i dog cem te cako penyere kengi kengi ni, “Kara man ŋa ame weko bal-li?” Okobbi dako ni, “Iyeeni olari; wot giri i kuc.” Ka kare okato anok, owoto i boma apapat kede pacci atino kun tito kop, dok rabo amut aber me loc Obaŋa. Jo mere apar wie aryo onwoŋo tye kede, karacel kede monnogo a rik ecanogi i cen areco kede too: Maliam ame olwoŋo ni me Magdala, ame cen abiro cen oya i kome; Yoanna cik a Kuja, agwokjami a Kerode; Cucanna, kede mon ocele apol. Mon magi yam konyogi kede limgi. Ka lwak jo ecipan ocokere karacel, kun jo bino baŋe oya i boma apol, en okobo i carokop ni, “Lo moro rik owoto ka coyo koti mere. Ame en tye ka coc, koti mogo okir i dye yo, jo onyono oko, winy a twarre malo obino odepo oko. Mogo okir i lela; odoŋo, te two oko, pien pii mom i tere. Mogo te kir i akina okuto; okuto odoŋo karacel kede odie. Mogo te kir gigi i lobo aber, odoŋo, tyene acel acel ocek iye nyige mia acel.” Ka doŋ okobo kop man kede teko ni, “Ŋat a tye i yit me winyo, myero winy!” Jo mere a lube openye te kop me carokop man. En ogamo ni, “Wun omiowu ŋeyo muŋ me loc Obaŋa, ento jo ocele omiogi i carokop, me bed acalo rik ocoo, ni ka gin oneno, kur onen, dok ka gin owinyo, kur oniaŋ tere. “Carokop-pi tere en: Koti en kop Obaŋa. Gin ame i dye yo, gin jo ame winyo, icennere Catan bino, te kwanyo kop i cunygi oko, me kur gin oye dok olarre. Gin ame i lela, gin jo ame ka owinyo, ogamo kop kede yomcuny, ento mom otye kede lwitgi, ye megi tye pi kare anok, ento i kare ame obitogi, gin poto oko. Gin ame okir i akina okuto, gin jo ame winyo, ento ka gin omedde kede kwo megi, par apol, lonyo kede yomcuny me kwo man diogi, nyiggi mom cek aber. Gin ame i lobo aber, gin jo ame ka owinyo kop, olido atek kede cuny aber, ame genne, onyako nyiggi kun odio cunygi. “Mom tye ŋattoro ame cwinyo tara te dok wumo oko kede gulu, aŋar keto i te tanda, ento keto malo i wi gol, me jo ame bino i ot nen lero mere. Pien mom tye ginnoro ame okano ame mom bino nen kannaler, dok mom tye ginnoro ame owumo ame mom bino ŋeye, dok ame mom obino yabo kannaler. Gwokere wunu i kom kite ame iwinyo wunu kede; pien ŋat a mere tye, obino medde, ŋat a mere mom, obino gamo i baŋe gin ame en tamo ni mege.” Tottere kede omego mere obino baŋe, cite pi lwak mom otwero tuno baŋe. Jo te titte ni, “Totti kede omegoni ocuŋ oko, gin mito neni.” Ento en odokkigi iye ni, “Totta kede omegona gin jo ame winyo kop Obaŋa, dok oketo i tic.” I nino moro acel en odonyo i yee karacel kede jo mere a lube, okobbigi ni, “Koŋ okat wunu loka nam tuŋ ca,” gin ote cako wot. Ame doŋ otye ka kwaŋ, en te nino oko, yamo te cako kodo atek i dye nam, pii daŋ te ero poŋ oko iyi yee, onwoŋo doŋ gin otye arac. Gin obino baŋe ote coye oko kun okobo ni, “Adwoŋ, Adwoŋ, oto oko!” En te co oko, daŋ te juko yamo kede pii a tagere, te kwe, nam daŋ te liŋ oko. Openyogi ni, “Iyeewu tye kwene?” Lworo omakogi kun owuro, ame openyere kengi kengi ni, “Man kara ŋa, ame ciko yamo kede pii-gu, gin te winye-nie?” Gin te bino i lobo a jo Geraca ame otemere kede Galilaya. Ka okato i wi tela, dano moro me paco-nu orwatte kede ame won cen areco. Onwoŋo doŋ ori kare alac a kun mom ruko boŋo i kome; pe bedo i ot, bedo i ka lyele. Ka en oneno Yecu, oredo, te ryebere i nyime, te kop kede dwon aloŋo ni, “Yecu, Wot Obaŋa Amalo Meicel, kara ilaro ŋo keda? Abako doga baŋi, kur iwuna.” Pien onwoŋo ociko cen arac ni ya oko i kom dano-nu. Tyen apol onwoŋo dwogo i kome, obedo ka gwoke agwoka kun otwee kede jegere kede nyony; en rik turo gin ame otwee kede oko, cen tere i tim. Yecu openye ni, “Yin nyiŋi ŋa?” Te gamo ni, “Mony ”, pien lwak cen apol tye i keme. Gin te bako doggi baŋe ni kur cikgi owot i bur ame agikki tere mom. Lwak puno ecipan onwoŋo tye ka cem i kor kidi kuno. Gin ote bako doggi baŋe ni oye wek gin odony i punni; oyegi. Cen te ya oko i kom dano-nu, te pikere i punni; lwak puno obelle i ŋwec i kor kidi, ote mwonyere oko iyi nam. Okwat ka oneno gin otimere, ote riŋo oko, otero koppere i boma kede i akina pacci. Jo te ciro wot neno gin ame otimere. Gin te bino baŋ Yecu, ote nwoŋo dano ame cen areco oya i kome obedo piny i ŋet Yecu, orukere i boŋŋi, wie odoko aber; lworo omakogi. Jo ame oneno otito baŋgi kit ame dano a yam tye kede cen areco doŋ ocaŋ. Jo ducu ame bedo i lobo a jo Geraca acocok okwae ni myero ya oko i baŋgi, pien lworo onwoŋo omakogi meicel; omio en odonyo i yee, odok cen. Dano ame cen oya i kome obako doge ni ber ebed doŋ baŋe: ento en ocwae kun ci ke ni, “Dok paco, irab pi gin adit ame Obaŋa otimo i komi.” En owoto kun rabo i dye boma-nono luŋ gin adit ame Yecu otimo i kome. Ka Yecu odwogo, lwak ojole kede yomcuny, pien onwoŋo gin luŋ otye ka kure. Dano moro a nyiŋe Yairo obino; en rik obedo adwoŋ a loo kacokere. Oryebere piny i te tyen Yecu, obako doge baŋe ni wot i ode, pien rik tye kede nyare ame onywalo acel keken, onwoŋo adedera, mwaka me dittere bwot romo apar wie aryo. Ka en tye ka wot, lwak odie. Dako moro onwoŋo tye kuno a rik otwo too me kwer remo mwakki apar wie aryo, ame doŋ obalo limmere ducu baŋ dakatal, naka pe tye ŋattoro ame twero caŋo. Obino i tuŋ ŋec, te gudo boŋo mere; cucuttono remo mere ame cwer te cok oko. Yecu openyo ni, “Kara ŋa oguda-nie?” Ka jo ducu okwero, Petero kede jo ame tye karacel kede ogamo ni, “Adwoŋ, itye i dye lwak, jo tye adiyi.” Ento Yecu ogamo ni, “Ŋattoro gire oguda, pien awinyo teko moro oya i koma.” Dako ka oneno ni mom etwero pono, obino ame kome myel amyela, te ryebere i nyime, otito i nyim lwak ducu gin omio egudo, anaka kite ame ecan kede cutocuto. Yecu te kobo ni, “Nyara, iyeeni ocaŋi oko; wot giri i kuc.” Ame en pwod tye ka kop, dano obino ame oya i paco adwoŋ me kacokere, ote kobo ni, “Nyari doŋ oto oko; kur dok imedde cano apwony.” Ento Yecu ka owinyo, okobo ni, “Kur ilwor; ye ayea keken, en bino caŋ gire.” Ka en odonyo i ot, mom oye ni dano dony kede i ot, kono ka Petero kede Lakana kede Yakobo, kede papa atin kede tottere keken. Jo luŋ onwoŋo tye akokko kun okumo pire; ento Yecu okobo ni, “Weku koko obedi, pien nya-nu mom oto gire, ento onino anina.” Gin onyere atek meicel, pien gin oŋeo ni doŋ oto oko. En omako ciŋe olwoŋe ni, “Atin, ya malo.” Cunye te dwogo oko, oya malo cutocuto; Yecu te ciko ni mie cem. Jo onywale owuro meicel; ento en ocikogi atek ni kur otit gin ame otimere baŋ dano moro. Olwoŋo jo mere apar wie aryo karacel, te miyogi teko kede twer i kom cen ducu, anaka me caŋo two, oorogi ka rabo kop me loc Obaŋa, kede me caŋo jo. En okobbigi ni, “I wotwu-ni, kur iter wunu ginnoro, kadi abiro, kadi cao, kadi cem, kadi lim; dok daŋ kur ibed wunu kede kanyi aryo. Ot ame idonyo wunu iye, bed wunu iye ituno ka ibino ya wunu i kuno. Kan a mom ojolowu iye, ka iya wunu i boma-nono, ten wunu apua tyenwu me bed caden baŋgi.” Gin oya te wot i akina pacci, ote rabo amut aber, kun ocaŋo otwo i kabedo ducu. Kerode ame aloc owinyo gin ducu ame obedo ka timere, okalo akala meicel, pien jo mogo kobo ni, “Lakana Abatija doŋ ocero gire oko iyi akina jo oto.” Jo ocele ni, “Elia doŋ onen”; jo ocele ni, “Ŋat acel i akina odwarpiny acon doŋ ocer.” Kerode okobo ni, “Lakana doŋ atyeko toŋo wie oko do; kara man ŋa ame awinyo kop acalo magi i komenie?” En oyenyo yo me nene. Ka okwena odwogo, gin otitte gin ame gin otio. En oterogi owoto kedgi i paco ame olwoŋo ni Betecaida, i muŋ. Ka lwak owinyo, olube; en ojologi, orabbigi kop me loc Obaŋa, ocaŋo jo ame komgi lit. Ame piny amito yuto, jo mere apar wie aryo obino baŋe, okobbe ni, “Cwa lwak wot i akina myere kede i akina pacci ame ceggiceggi, oyeny kabuto kede cem; pien otye kan i dye tim.” En te gamo ni, “Wun mi wunugi cem.” Gin te gamo ni, “Wan otye kede ogati abic kede rece aryo keken, kwanyo ka ce imito ni owot owil pi lwak magi luŋ.” Pien co rik mito romo tutumia abic. En te ciko jo mere a lube ni, “Miugi obed piny awu awu, awu acel acel jo pyerabic pyerabic.” Gin te timo amannono, ote miyo jo luŋ bedo piny. Omako ogati abic kede rece aryo-nu, oneno malo i polo, okwao iye winyo, onyinyilo omio baŋ jo a lube me gin ket i nyim lwak. Gin ducu ocamo, oyeŋ. Ote coko ŋide cem ame oloogi, oromo aditti apar wie aryo. Ka rik en tye akwac kene, a kun jo a lube tye karacel kede, en openyogi ni, “Kara lwak kobo ni an ŋa?” Gin ogamo ni, “Lakana Abatija; ento jo mogo ni, Elia; jo ocele ni, ‘ŋat acel i akina odwarpiny acon doŋ ocer.’ ” Te dok penyogi ni, “Kara wun kono, ikobo wunu ni an ŋa?” Petero te gamo ni, “Yin Kricito Obaŋa.” En ocikogi atek ni mom myero otit baŋ dano moro. Dok okobo ni, “Wot a dano myero kany can apol, dok odoŋe kede olamdog adoŋo kede opwony-cik myero kwere, neke, ento i nino me adek myero cere oko,” Dok okobo baŋ jo luŋ ni, “Ka dano moro mito luba, myero koŋ oge kwerre kene, tiŋ yataria mere nino i nino, luba. Pien dano ame mito laro kwo mere, bino rwenyo kwo mere arwenya, ento dano ame rwenyo kwo mere pira, bino laro. Kara konyo dano kede ŋo ka ocamo lobo luŋ, kun kwo mere orwenyo onyo omao oko? Dano ame lewic bino make pira kede pi kop mera, Wot a dano daŋ lewic bino make i kome i kare a en bino dwogo iye kede kwogo mere, kede kwogo Obaŋa Papo kede me omalaika acil. Ento akobbiwu ateni ni, tye jo mogo ame ocuŋ kan ame mom bino bilo to, a mom ru oneno loc Obaŋa.” Ka cabit acel okato a doŋ okobo kop magi, otero Petero kede Lakana kede Yakobo, oyito kedgi i wi kidi me kwayo Obaŋa. Ame doŋ tye ka kwayo Obaŋa, nen me waŋe te lokere apat, rukkere te lokere atar ame ryeny aryenya. Jo aryo te nen ame tye ka kop kede; jo-ni ceŋ gin Muca kede Elia, ame gin onen kun otye kede kwogo, okobo pi to mere ame ebino cobo kede tic Obaŋa i Jerucalem. Petero kede jo ame tye karacel kede onwoŋo nino doŋ onuro waŋgi atek, ento ka gin oco, oneno kwogo a Yecu, kede jo aryo ame ocuŋ karacel kede. A doŋ jo aryo-nu amito ya oko i baŋe, Petero okobbi Yecu ni, “Adwoŋ, ber meicel wan ibedo kano Wek oger gonye adek, acel meri, acel mea Muca, acel mea Elia,” daŋ onwoŋo mom aŋeyo gin ame en akobbo. Ka en pwod tye ka kop, tipo pol obino owumogi, lworo ocirogi oko me donyo i pol. Dwonnoro oya i polo kun kobo ni, “Man en Woda a doŋ ayero; winye wunu.” Ame doŋ dwon-nu owinyere, onen ni Yecu odoŋ kene. Gin ote doŋ liŋ aliŋa, mom otito kopporo baŋ jo i kom gin ame gin oneno. Orwo mere a doŋ gin oyitto piny i wi kidi, lwak ecipan orwatte kede. Dano moro acel i akina lwak te redo ni, “Apwony, abako doga baŋi inen woda-ni, pien anywale en acel keken. Nen, cen bedo make, mie kok oyotoyot; ryee, kelo bwoo i doge, mom ya i kome piopio, nyoŋo kome atek. Woki abako doga baŋ jo meri a lubi ni gin oryem, ryemo oloogi oko.” Yecu ogamo ni, “Wun lwagi jo ame iyeewu mom, kitewu doŋ oballe oko; kara abino bedo kedwu naka awene? Abino diyo cunya i komwu ituno awene? Kel wodi kan.” Ame en abino, cen odole piny, omie oryeryea atek. Yecu te juko cen arac oko, ocaŋo awobi, te dwoko baŋ pappere. Jo luŋ ogano dit Obaŋa. Ka pwod otye ka wuro gin ducu ame en otio, en okobo baŋ jo mere a lube ni, “Mi wunu kop man dony i yitwu; pien Wot a dano obino miye i ciŋ jo.” Ento gin mom oniaŋ i kop man, rik okano oko i tuŋ baŋgi me kur oŋe tere; gin olworo penye pi kop-pu. Pyem rik obedo i akinagi ni, ŋa i akinagi ame loo kede dit? Yecu ka oŋeo pyem i cunygi, otero atin, omio ocuŋ i ŋete, okobbigi ni, “Dano ame jolo atin man i nyiŋa, nwoŋo ojolo an; dano ame jola, nwoŋo ojolo ŋat ame oora; pien ŋat ame tidi meicel i akinawu ducu, en ŋat ame dit.” Lakana ogamo ni, “Adwoŋ, oneno ŋattoro ame aryemo cen kede nyiŋi, ojuke, pien mom lubi karacel kedwa.” Ento Yecu okobbe ni, “Kur ijuke wunu, pien ŋat a mom akworwu tye tuŋ baŋwu.” Ka kare doŋ mito romo me tiŋe malo i polo, waŋe ocuŋ atek me wot i Jerucalem. Ooro jo ame okwoŋo nyime; gin te wot donyo i paco moro mea jo Camaria pi yikke kabedo. Ento mom ote jole, pien waŋe okemo tuŋ Jerucalem. Ka Yakobo kede Lakana oneno, ame gin jo mere a lube, gin okobo ni, “Rwot, omito ocik mac ya i polo me tyekgi oko?” Ento en olokere, ojukogi [kun kobo ni, “Mom iŋeo wunu kit cuny ame itye wunu kede; pien Wot a dano mom obino me tyeko kwo a jo, ento me larogi.”] Gin te wot i paco ocele. Ame otye ka wot iyo, ŋattoro te kobbe ni, “An abino lubi i kan ame ibino wot iye luŋ.” Yecu odok iye ni, “Ekwe tye kede gorogorogi, winyi daŋ tye kede udigi, ento Wot a dano mom tye kede kan ame epyelo iye wie.” Okobo baŋ dano ocele ni, “Luba.” Ento en okobbe ni, “Koŋ iweka awot ayik pappa.” Ento Yecu ogamo doge ni, “Wek jo oto yik jo oto wadgi, ento yin woti, irab kop me loc Obaŋa.” Dano ocele okobo ni, “Abino lubi, Adwoŋ; ento koŋ iwek awoti, acik jo i oda.” Yecu okobbe ni, “Mom tye dano moro ame mako kweri dyaŋ, dok neno ŋec, ame bino porre i loc Obaŋa.” Icennere Rwot oyero jo ocele pyerabiro, oorogi aryo aryo okwoŋo nyime, me gin wot i boma ducu kede i kabedo luŋ kan a en ikome bino tuno iye. Okobbigi ni, “Kac bup, ento jo a kao nok Pi mano, kwa wunu Won poto atek me cwa otic i ka kaccere. Wotu giwu; nen, acwaowu bala rommi i akina epet. Kur iwot wunu kede cao me lim, onyo cao ocele, anaka amuk; kur imot wunu ŋattoro i waŋa yo, i ot ducu ame ibino donyo wunu iye koŋ itek kobo wunu ni, ‘Kuc obed i ot man!’ Ka dano me kuc tye kuno, kucwu bino bedo i kome; ento ka mom, kucwu bino dwogo baŋwu. Bed wunu i ottono, kun icamo wunu, imato wunu gin omiowu, pien atic myero culle ocara mere; kur ibed wunu kobo i ot i ot. Ka idonyo wunu i boma moro ote jolowu, cam wunu gin ame oketo i nyimwu; can wunu otwo ame tye iye, tittigi wunu ni, ‘Loc Obaŋa doŋ onoko ceggi baŋwu.’ Ento ka idonyo wunu i boma, ce mom ojolowu, wot wunu i waŋa yo me boma-nono, ite kobo wunu ni. ‘Anaka apua me bomawu ame omoko i tyenwa oteŋo i komwu oko; kadi bed amannono, ber iŋe wunu man ni, loc Obaŋa doŋ onoko ceggi.’ Atittiwu ni, i nino-nono, can a Codoma bino bedo itikatika, kato me bomanono. “Ibino neno can, yin Korajin! Ibino neno can, yin Betecaida! Pien kono tic atek adoŋo ame otio baŋwu, yam otio i Turo kede Cidon, kono gin oŋut con, kun obedo i boŋo cola kede buru. Ento can a Turo kede Cidon bino bedo itikatika i kare me ŋolo kop, kato mewu. Kede yin Kapernaum, obino tiŋi malo anaka i polo bo? Pe gire; kom obino dwoki piny naka i Kadec. “Ŋat ame winyowu, nwoŋo owinya; ŋat ame kwerowu, nwoŋo okwera; ŋat ame kwera, nwoŋo okwero ŋat ame oora.” Jo mano pyerabiro odwogo kede yomcuny, kun okobo ni, “Rwot, anaka cen areco owinyowa pi nyiŋi!” En odokkigi iye ni, “Cen aneno Catan kun rette ame oya i polo calo lutkot. Nen, doŋ amiowu twer me nyono twol kede yit, anaka me loyo teko akwor ducu; gin a bino timowu arac mom tye. Kadi obedo amannono, kur ilel wunu pi man, ni cene-gu owinyowu; ento lel wunu pien nyinwu doŋ ocoo i polo.” I caa-nono, Yecu olelo i Cuny Acil kun kobo ni, “Apwoyi, Pappa, Rwot me polo kede lobo, pien ikano kop magi baŋ jo aryek a ŋeo piny, iyabo baŋ itino atino. Eyo, Pappa, pien cunyi opwoo amannono. Pappa otyeko jalla jami luŋ aluŋa: mom tye ŋattoro ame ŋeo ni Wod en ŋa, kono ka Papo keken, onyo ame ŋeo ni Papo en ŋa, kono ka Wod keken, kede dano ame Wod mito nyuto Papo baŋe.” Olokere baŋ jo a lube, okobbigi i muŋ ni, “Wan jo ame neno gin ame ineno wunu tye kede winyo! Pien atittiwu ni, odwarpiny apol kede rwode apol rik oparo neno gin ame ineno wunu, ento naka mom oneno, kede winyo gin ame ame iwmyo wunu ento naka mom daŋ owinyo.” Nen, ceŋ tye ŋattoro acel en apwony-cik. Oya malo, obite kun penye ni, “Apwony, atim ŋo me anwoŋ kwo a perakino odoco?” En openye ni, “Kara i cik ocoo iye niŋo? Ikwano niŋo?” En te dok iye ni, “Mar Rwot Obaŋani kede cunyi luŋ, kede tiponi luŋ, kede tekoni luŋ, kede tammi luŋ; dok imar dano wadwu acalo imarre keni.” En te gamo doge ni, “Idok iye aber; tim amannono, ibino kwo.” Ento en mito loyo kop, te penyo Yecu ni, “Kara i cik man, dano wadwa en ŋa?” Yecu te gamo ni, “Rik tye lo moro ame oya i Jerucalem, kun akemo tun piny i Jeriko, te rwatte kede oyak. Gin te gonyo boŋŋi mere oko i kome, ote pwode, ote wot gigi oko, oweke a doŋ ceggi i to. Alamdoggoro onwoŋo opello i yo-nono; ka onene, ogono agona i teŋe i ŋet yo tuŋ cel. I kite acel-Iu dok te bino Alevi moro; en daŋ ka otuno i kabedo-nono, onene, ogono agona i teŋe i ŋet yo tuŋ cel. Ento dano me Camaria ame daŋ tye abeo i yo-nono, ka otuno kakare, onene; ocone. Owoto baŋe, oonyo moo kede vino i waŋ kan ame owano, otweo, icennere ocibe i wi kana mere, otere i ot buto a wele, ogwoke. Orwo mere en okwanyo ciliŋ aryo, omio baŋ dano ame gwoko ot wele, te cike ni, ‘Twoe; gin ducu ame ibino miye akato, an abino culli ka adwogo.’ Kara ŋa i akina jo magi adek-ki ame yin itamo ni ŋat ame oromere kede oyak ca myero kolo ni otere acalo dano wadgi?” En te gamo ni, “Dano ame otime kica ca.” Yecu te kobbe ni, “Yin daŋ wot itim amannono.” Ka pwod otye i wotgi, en odonyo i paco moro acel, dako a nyiŋe Marita te jole i otgi. Onwoŋo en tye kede aminnere a nyiŋe Maliam, ame obedo i ŋet tyen Rwot kun winyo koppere. Marita kono obedo canne i tic apol. Owoto baŋe, te penye ni, “Rwot, mom iparo ni aminna ojala tic kena? Kobe me bin konya.” Ento Rwot te gamo doge ni, “Marita, Marita, iparo dok icanne pi jami apol; ento tye gin acel keken ame mitte. Maliam oyero dul aber ame mom obino gamo i baŋe.” Onwoŋo Yecu tye ka kwayo Obaŋa i kabedo moro; ka doŋ oweko, dano moro i akina jo a lube te kwaye ni, “Rwot, pwonywa ba kede kwac, acalo Lakana rik opwonyo kede jo a lube.” En te kobbigi ni, “Ka ikwao wunu Obaŋa, kob wunu kite man ni, ‘Apap, nyiŋi bed me awora, Myero locci doŋ bin, Miwa i nino luŋ cam mewa me didik, Timwa kica i balwa, pien wan kenwa otimo kica baŋ jo luŋ a tye kede bannyiwa. Kur imi bitwa.’ ” Dok te kobbigi ni, “Ŋa i akinawu ame tye kede awottere, ame obino baŋe i cuny dyewor me kwaye ni, ‘Awotta, konya kede ogati adek; pien awotta ame oya i wot ocora, mom atye kede ginnoro a myero aket i nyime?’ En mom bino gamo doge iyi ot ni, ‘Kur ilola; doŋ acego doggola oko, wan kede itinowa doŋ obuto oko, an iya malo miyi ginnoro, en a mom atwerre.’ Akobbiwu ni, kadi bed en mom bino ya malo miye ginnoro pi bedo awottere, ento pi bedo dide, en bino ya mie ginnoro ducu ame yie amito. Doŋ akobbiwu ni: Kwa wunu, obino miyowu; yeny wunu, ibino wunu nwoŋo; twom wunu kika, obino yabbiwu. Pien dano acel acel ame kwao, omie; ŋat a yenyo, nwoŋo; ŋat a goo doggola, oyabbe kika. Kara ŋa i akinawu ame papa atin, ka wode okwae rec, lunyo miye twol aka rec? Onyo ka okwae toŋ gweno, lunyo miye yit? Ka wun jo areco, iŋeo miyo otinowu mot abeco, Papawu a tye i polo mom doŋ bino ka to meicel imiyo Cuny Acil baŋ jo a kwae?” Rik onwoŋo tye aryemo cen a mom kobo; ka cen doŋ oya i kome, dano a lebe oto oloko, lwak owuro. Ento jo mogo i akinagi okobo ni, “En ryemo cen pi twer a Beeljebul, adwoŋ me cen.” Jo ocele oyenyo i baŋe anyut ame oya i polo, pi bite. Ento en oŋeo tamgi oko, te kobbigi ni, “Kare ducu ka loc opokere yie aryo, lobo mere balle oko, ot rette i kom ot ocele. Catan daŋ ka en kene opokere yie aryo, kara loccere bino cuŋ iŋo? Pien wun ikobo wunu ni, aryemo cen pi twer mea Beeljebul. Ka an aryemo cen pi twer a Beeljebul, kara itinowu ryemo pi twer aŋa? Pi mano gin bino ŋolliwu kop. Ento ka an aryemo cen pi ciŋ Obaŋa, loc Obaŋa doŋ obino baŋwu. Ka dano atek, ame ruko jami me romo mere ducu, tye ka gwoko ot me loccere, jami mere bedo kede kuc; ento ka dano ame ka te kede teko oromo gin kede, oloc, en bino coko jami me romo mere a yam egeno, bino poko jami ame eyako i baŋe. Dano a mom tye tun baŋa en akworra, dok dano a mom coko karacel keda, en keto aketa. “Ka cen arac oya i kom ŋattoro, en woto mano kabedo a pii mom iye kun yenyo ka weo; ka mom onwoŋo, en kobo ni, ‘Adok gira i oda kan a rik aya iye.’ Ka otuno, en nwoŋo oweo yie acil, ame oyiko aber. En dok kelo cen ocele abiro a gin doŋ reco akate, gin donyo bedo kuno; icennere dano man bino bedo arac kato a yam con.” Ka en okobo kop man, dako moro i akina lwak ocwao dwone, okobo ni, “Yic onywali tye kede winyo, kede tuno ame idoto!” Ento en te gamo ni, “Tye kede winyo atek, jo ame winyo kop Obaŋa, a daŋ ote gwoko.” Ka lwak omedde ecipan, en te kop ni, “Lwagi jo me kare-ni gin jo areco; omito neno anyut, ento mom obino miyogi anyuttoro, kono ka anyut a Yona keken. Pien acalo Yona rik odoko anyut baŋ jo Nineve, kite-nono wot a dano bino doko anyut baŋ lwagi jo me kare man. Abaka a dako me tutun anyarolum bino cuŋ karacel kede lwagi jo me kare man i kare me ŋolo kop, te miyo kop loyogi; pien en otuno iya i agikki me lobo pi winyo ryeko a Culeman, koŋ inen, gin adwoŋ akato Culeman tye kan. Jo Nineve bino cuŋ karacel kede lwagi jo me kare man, i kare me ŋolo kop, te miyo kop loyogi; pien gin rik oŋut pi kop a Yona orabo, cite nen, gin adwoŋ akato Yona tye, kan. “Mom tye dano moro ame cwinyo tara ame dok te kano i gul, onyo wumo kede gulu, ento keto i wi akara, me jo ducu a bino i ot nen lyellere. Tara me komi en waŋi; ka waŋi tye boŋo balloro, mio komi luŋ bedo aler. Ento ka waŋi rac, komi luŋ bedo i colpiny. Koŋ inen wunu ka lero ame tye iyii mom piny acol. Doŋ ka komi luŋ opoŋ i lero ame kannoro acol mom iye, komi ducu bino bedo aler, acalo tara ka tye a lyel, menyi.” A rik en tye akop, Aparicayo moro te cwane ka cam baŋe; en odonyo i ot daŋ te bedo piny i dog cam. Aparicayo owuro ka oneno ni en oero cam a mom koŋ okwoŋo logo. Rwot te kobbe ni, “Wun Oparicayo ilwoko wunu ŋe kopo kede cani, a kun yiwu opoŋ iye yako jo kede timmogo areco. Imiŋ wunu, mom iŋeo wunu ni ŋat ame ocweo gin i oko en daŋ ame ocweo gin i yie? Mi wunu gin i yie me konyo ocan; nen, jami luŋ bino bedo cil baŋwu. “Ento ibino neno wunu can, wun Oparicayo! Pien imio wunu dul acel me apar me apuruku kede ocobo kede kit pot dek ducu, kun iweko wunu Ŋolo kop atira kede maro Obaŋa; magi ducu myero itim wunu, kun mom iweko wunu maca doŋ. Ibino wunu neno can wun Oparicayo! Pien imaro wunu kome me dito i kacokere, dok imito wunu ni jo motwu i dye cuk. Ibino neno wunu can! Pien irom wunu kede wi lyel a mom nen; jo beo i wie kun mom oŋeo.” Dano moro i akina opwony-cik ogamo doge ni, “Apwony, ka ikobo amanno, nyuto ni iyetowa daŋ.” En odok iye ni, “Ibino wunu neno can wun opwony-cik daŋ! Pien imio wunu jo yeyo yec apek, ame yeyo tek, kun wun ikokomwu mom igudo wunu kede nyako ciŋwu moro acel. Ibino wunu neno can! Pien icano wunu gweŋe i wi lyele odwarpiny a rik kwariwu oneko. Kite-nono wun caden, ipwoyo wunu tic a kwariwu, pien gin onekogi, wun icano wunu gweŋe i wi lyelegi. Pi man, ryeko Obaŋa okobo ni, ‘Abino oro odwarpiny kede okwena baŋgi, jo mogo i akinagi obino neko kede libogi,’ wek remo odwarpiny luŋ ame oonyo geye i acakki piny, cul kworrere i kom jo me kare man, cakere i remo Abel tuno kede anaka i remo a Jekeria ame oto i akina keno me lam kede kabedo acil. Eyo, akobbiwu ni, obino culo kworrere i kom jo me kare man. Ibino neno wunu can wun opwonycik! Pien imao wunu ayab me ŋeyo piny; wun ikomwu mom idonyo wunu iye, dok igeŋo wunu jo a mito donyo iye oko.” Ka en oya i kuno, opwony-cik kede Oparicayo te cako diye atek, kun oroko doge kede peny apol, okie wek omak kop a ya i doge. I kare-nono, lwak tutumia i tutumia ocokere karacel, kun obedo ka nyonne kengi kengi. Me agege Yecu ocako kobo baŋ jo mere a lube ni mano, “Gwokere wunu i kom tobi Oparicayo, ame en kite me goba. Mom tye ginnoro ame owumo a mom obino yabo kannaler, kadi gin ame okano a mom bino ŋeye. Kop luŋ ame ikobo wunu i piny acol, bino winyere i ceŋ, dok gin ame imuŋo wunu i tyelo, obino rabo koppere i wi bye. “Owotena akobbiwu ni, kur ilwor wunu jo a neko kom, ento icennere mom otwero timo ginnoro akato mano. Ento abino nyuttiwu ŋat a myero ilwor wunu: lwor wunu Obaŋa, ame ka doŋ oneko dano, tye kede twer me bole i Geenna. Eyo, akobbiwu ni, lwor wunu en! Acur abic mom ocato cente pyeraryo? Ento mom tye moro i akinagi ame wi Obaŋa twero wil iye. Anaka yer wiwu okwanogi iweŋ. Kur i lwor wunu; pirwu tek meicel akato acur apol. “Akobbiwu ni, dano acel acel ame bino tuco nyiŋa i nyim jo, Wot a dano daŋ bino tuco nyiŋe i nyim omalaika Obaŋa; ento dano ame bino kwera i nyim jo, an daŋ abino kwere i nyim omalaika Obaŋa. Jo luŋ ame kobo kop arac i kom Wot a dano, obino timogi kica; ento ŋat ame yeto Cuny Acil mom obino limo kica. Ka oterowu i nyim kacokere kede i nyim oloc kede wegi twer, kur ibed wunu kede tam apol ni ibino dok wunu iye i yo mene, onyo ni ibino gamo wunu niŋo, onyo ni ibino kobo wunu niŋo? Pien Cuny Acil bino pwonyowu gin a myero ikob wunu i caa-nono.” Dano acel i akina lwak okobbe ni, “Apwony, kob ominna pok keda lim ame wan oleo.” Ento en te gamo doge ni, “Lo-ni, ŋa ame oketa me ŋolliwu kop onyo me pokkiwu limwu?” Okobbigi ni, “Neno wunu ba, gwoke re wunu i woro me lim; pien kwo a dano mom ocuŋ i kom wel lim apol ame en tye kede.” Dok te kobbigi carokop ni, “Rik tye alonyo moro ame cam ocek adwoŋ i potti mere. En openyere i cunye kene ni, ‘Abino timo ŋo, pien kan aony kaila iye mom tye?’ Te dok kobo ni, ‘Abino timo ni amane: abino muko derena ducu piny, eka ate pamo en alaccege ame abino onyo iye kaila, anaka jamina luŋ. Abino kobo i cunya kena ni, Omayin, itye doŋ i jami apol ame bino rommi pi mwakki apol ata; we giri doŋ mot, icam, imati, ibedi lelo.’ Ento Obaŋa te kobbe ni, ‘Yin amiŋo! I dyewor a tin-ni obino kwanyo kwo i komi oko; kara jami ame iyiko piri-nu bino bedo me a ŋa ba?’ Tye aman no i kom dano ame kano lonyo pire kene, kun mom tye i lonyo baŋ Obaŋa.” Yecu te kobbi jo a lube ni, “Pi mannono akobbiwu ni, kur ibed wunu kede par apol pi kwowu, ni ibino camo wunu ŋo, onyo pi komwu, ni ibino ruko wunu ŋo? Pien kwo pire tek kato cam, kom pire tek kato ruk. Koŋ itam wunu i kom agak; gin mom coo koti, daŋ mom okao, mom otye daŋ i dero, anaka tuwa, ento Obaŋa pitogi. Wun mom pirwu tek kato winy? Kara ŋa i akinawu ame twero medo bat acel i kom kwo mere pi bedo kede par apol? Ka gin anok-k i loowu, piŋo ibedo wunu kede par apol pi jami ocele? Tam wunu koŋ pi kalaŋweka, kite ame gin doŋo kede. Mom owio uci, mom ocweo boŋo; ento akobbiwu ni, kadi bed Culeman rik orukere kede kwogo mere ducu, en mom orukere aber acalo moro acel i akinagi. Ka Obaŋa ruko lum a tye i tim, ame bedo ka tin keken, diki ote bolo oko i keno, en mom bino rukowu aka to, wun jo ame iyeewu nok? Kur iyeny wunu gin ame ibino wunu camo, onyo gin ame ibino wunu mato, yiwu kur tam kop apol; pien rok luŋ me wi podo yenyo jami-nogo, Papawu daŋ ŋeo ni imito wunugi. Ento koŋ iyeny wunu yo me donyo i loccere, jami-nogo obino medo baŋwu. “Kur ilwor wunu, wun lwak rommi anok, pien Papawu oye atika me miyowu loccere. Cat jamiwu oko, kony wunu kede ocan; kwo wunu icao me cente a mom ti, kan wunu lonyo a mom tum i polo, kan ame akwo mom tuno iye, dok nyenye mom balo. Pien kan ame lonyowu bedo iye, cunywu daŋ bedo kuno. “Bed wunu ame iyikere wunu pi tic, kun tarawu lyel. Bed wunu acalo jo a kuro adwoŋgi ka bino dwogo ame oya i arama me nyom, me ote yabbe kika piopio ka en otuno, otwomo kika. Tye kede winyo omiro ame ka adwoŋgi odwogo, onwoŋogi pe ru onino. Ateni akobbiwu ni, en bino tweyo pyere kene, bino miyogi bedo i dog cam, te miyogi cam. Ka obino i cuny dyewor onyo a gweno akoko, kun onwoŋogi amannono, omiro-nono tye kede winyo. Ento myero iŋe wunu man, ni, kono won ot ceŋ ŋeo caa ame ayak bino tuno iye, kono okio, mom oweko jo oturo ode. Wun daŋ bed wunu a doŋ iyikere wunu, pien Wot a dano bino tuno i caa a mom itamo wunu.” Petero openyo ni, “Rwot, ikobo carokop man baŋwa, aŋar onyo baŋ jo luŋ?” Rwot ogamo ni, “Agwok ot ame agen, aryek, en ŋa, ame adwoŋŋere bino weko jo i ode i te loccere, me en pokkigi camgi i kare a mitte. Tye kede winyo amiro-nono ame adwoŋŋere, ka odwogo, bino nwoŋe otimo kitenono. Ateni akobbiwu ni, bino keto jami mere luŋ i twerrere. Ento ka amiro-nu okobo i cunye kene kene ni, ‘Adwoŋ doŋ ogal wok me dwogo,’ te ero pwodo omiro kede aŋeca, kun camo, mato, dok mer, won amirono no bino dwogo i nino a mom etamo, kede i caa a mom en ŋeo, bino ŋoŋolo en, te kete i akina jo a mom genne. Amiro mano ame oŋeo gin ame adwoŋŋere mito, ento mom oyiko, dok mom olubo gin ame adwoŋŋere mito, obino pwode atek meicel. Ento ŋat a mom ŋeo, ka otimo gin ame romo miyo ogoe pire, obino pwode anok. Dano acel acel ame omio apol, obino mito daŋ apol i baŋe, dok dano ame jo okano jami apol baŋe, obino penye apol akato. “Rik abino me cwinyo mac i lobo; kono doŋ omoko oko, kono ber! Atye kede batija a myero abatija kede; kite ame odia kede ituno ka otum! Wun itamo wunu ni abino me kelo kuc i lobo bo? Akobbiwu ni, pe gire, kono popoka. Cakere tin, jo abic a tye i ot acel bino popoka; jo adek bino dago jo aryo, jo aryo bino dago jo adek. Papo bino pokere kede wode, awobi bino pokere kede pappere, toto bino pokere kede nyare, nyako bino pokere kede tottere, tato bino pokere kede ci-wode, ci-wod bino pokere kede tattere.” En dok te kobo baŋ lwak ni, “Ka ineno wunu pol olyero tuŋ to, ikobo wunu oyot ni, ‘Kot koni cwe’; daŋ cwe. Ka ineno wunu yamo okodo i tuŋ anyarolum, wun ikobo wunu ni, ‘Piny bino bedo lyet meicel’; daŋ timere. Wun ogoba! Iŋeo wunu poko gin ame nen i lobo kede i polo; piŋo mom iŋeo wunu poko anyut me kare man? “Dok piŋo mom iŋolo wunu kenwu gin a tye atira? Ka iwoto baŋ aŋolkop kun inywako yo kede dano ame apiddi, tem atek me iyik kop kede kun pwod itye wunu iyo, me kur wai, teri i nyim aŋolkop, aŋolkop te miyi baŋ cirikale, cirikale te teri i buc. Akobbi ni mano, mom ibino ya iye ituno ka iculo cente luŋ aluŋa, a mom nyig moro orem.” I kare-nono rik tye jo mogo kuno ame otitti Yecu pi jo mogo me Galilaya ame Pilato orubo remogi kede mot a gin oŋolo me yalo Obaŋa. En ogamo doggi ni, “Itamo wunu ni jo Galilaya magi gin obalo ame kato jo me Galilaya luŋ, ame omio gin oneno can kite-nono? Akobbiwu ni, mom amannono; ento ka mom iŋut wunu, wun luŋ ibino tum wunu kittono. Onyo jo apar wie aboro ca a rik ot abor orette i komgi, onekogi i Ciloam, itamo wunu ni gin rik otimo bal akato jo ocele luŋ ame bedo i Jerucalem? Attiitwu ni, pe gire; ento ka mom iŋut wunu, wun luŋ ibino tum wunu kittono.” Okobbigi carokop man ni, “Yam tye dano moro ame obedo kede yat oduro mere ame opito i poto olokkere. En obino kun moo nyige, ento mom onwoŋo. En te kobo baŋ apur ni, ‘Nen ba, odoko mwakki adek a kun abino amao nyig oduro man, mom anwoŋo. Toŋ oko; kara piŋo balo lobo mannono?’ Apur odokke ni, ‘Adwoŋ, koŋ iwek obed pi mwaka man doki, ituno ka apuro lobo i tere, aonyo woo iye. Ka bino nyako nyige i mwaka abino, ber, ento ka mom amannono, ibino toŋo giri oko.’ ” Onwoŋo en apwony i kacokere moro i nino me cabit. Dako moro onwoŋo tye kuno a tye kede cen me goro, otwoye kede pi mwaka apar wie aboro; onwoŋo doŋ okudde a mom dok twero tirre kadi acel. Ka Yecu onene, te lwoŋe kun kobbe ni, “Dako, doŋ ogonyi i kom goroni.” En te keto ciŋe i kom dako-nu, cucuttono dan-nu te tirre oko, te pako Obaŋa. Ento adwoŋ me kacokere oŋo iye, pien Yecu ocaŋo dano i nino me cabit, te kobbi lwak ni, “Tye nino abicel a myero ti iye tic; tun wunu i nino-nu, ote caŋowu, ento pe i nino me cabit.” Rwot te dok iye a kun kobo ni, “Wun ogoba! Dano acel acel i akinawu mom yabo twonnere onyo kana mere i awi i nino me cabit, te tero wot mato pii? Dan-ni nyaka Iburaim, ame Catan otweo mwaka apar wie aboro, mom myero gonye i kom twee-ci i nino me cabit?” Ka en okobo man, alee te twodo okworrere; yi lwak ducu te bedo ka ayom pi gin me kwogo ame en otio. Ka doŋ te kobo ni, “Loc Obaŋa calladi? Dok abino poro kede ŋo? Rom aroma kede nyig dek karadali ame dano moro okwanyo, te pito i poto mere; te doŋo oko, te doko yat, winyi a twarre malo te gero udigi i jaŋe.” Dok te kobo ni, “Abino poro loc Obaŋa kede ŋo? Rom aroma kede tobi ame dako ojuko, te rubo i moko a romo dita adek, ituno ka oyenyo ducu.” En omedo wottere kun beo i boma apol apapat kede i akina myere, kun pwonyo kemo kede i Jerucalem. Dano moro te penye ni, “Adwoŋ, obino laro jo anokkoro keken?” En te kobbigi ni, “Ket wunu teko me donyo i doggola adiŋ; pien akobbiwu ni, jo apol bino temo me donyo iye, ento mom obino twero. Ka won ot doŋ oya malo, ocego doggola, ibino cuŋ wunu i oko itwomo wunu kika, kun ikobo wunu ni, ‘Adwoŋ, yabbiwa ot ba!’ En bino gamo dogwu ni, ‘An mom aŋeo gira kan ame iya wunu iye.’ Wun ibino wunu kobo ni, ‘Rik ocamo dok omato karacel kedi, dok daŋ ipwonyo i dye pacciwa.’ En bino gamo ni, ‘Atittiwu ni, an mom aŋeo gira kan ame iya wunu iye. Wot wunu teŋe i nyima, wun otim areco ducu!’ Kuno ibino bedo wunu i koko kede kayo lak, ka ineno wunu Iburaim kede Icaka kede Yakobo, kede odwarpiny ducu kun otye i loc Obaŋa, ento wun ikomwu obolowu oko. Jo bino ya i tuŋ kide kede tuŋ to, kede tuŋ anyarodi kede tuŋ anyarolum, obino bedo piny i dog cam i loc Obaŋa. Dok nen, jo mogo ame odoŋ cen, gin bino bedo me agege, dok tye jo mogo ame otelo yo, ame bino doŋ cen.” I caa-nono Oparicayo mogo obino, okobbe ni, “Ya oko i kan, pien Kerode amito neki oko.” En ogamo ni, “Wun wot ititti wunu ekwe-nono ni, ‘Nen, abino ryemo cen, dok abino caŋo jo, tin kede diki, i nino me adekkere abino cobo ticca. Kadi bed amannono an myero amedde gira i kom wotta tin kede diki kede orwo mere, pien mom myero adwarpiny oto teŋe ame mom i Jerucalem.’ Jerucalem, Jerucalem, yin ame ineko odwarpiny, inapo jo ame oorogi baŋi kede gweŋ, tyen adi ame rik amito coko itino meri acalo min gweno coko itino mere i te bwome, ento wun mom iye wunu! Nen, otwu doŋ odoŋ i wi obur iwu. Akobbiwu ni, mom ibino wunu nena, ituno ka ibino wunu kobo ni, ‘Opwo wunu ŋat ame abino i nyiŋ Rwot.’ ” I ceŋ cabittoro acel Yecu onwoŋo owoto ka camo cem i ot Aparicayo moro ame aloc; gin obedo ka kiye atek. I nyime kannono rik tye iye dano moro ame two too awura-kom. Yecu te penyo opwonycik kede Oparicayo ni, “Cik ye ni can dano i cen cabit onyo mom?” Ento gin oliŋ aliŋa. Yecu omake, ocaŋe, te cike ni owot gire. Openyogi ni, “Ŋa i akinawu ame ka tye kede kana mere onyo twonnere, ka orette i akoŋ, mom bino wayo oko i ceŋ me cabit?” Gamo pennyere odoko tek baŋgi. Ka oneno kite a jo ame olwoŋo yero kede kabedo me kwogo, en okobbigi carokop ni mano, “Ka olwoŋi i arama me nyom, kur ibed i kabedo me kwogo; aŋar onyo ca otyeko cwano ŋattoro adit kati oko, mio dano ame olwoŋo wun aryo luŋ ka obino, bino kobbi ni, ‘Wekki dano man kabedo,’ eka ite dok i kabedo apiny kede lewic adwoŋ. Ento ka olwoŋi, wot ibed i kabedo apiny, ame ka dano olwoŋi obino, en bino kobbi ni, ‘Awotta, jer i kom amalo’; eka ite bedo kede kwogo i nyim jo luŋ ame ibedo kedgi i dog cam. Pien dano ame kette kene ni etye malo, obino dwoke piny, dano ame mwolle kene obino tiŋe malo.” Okobo baŋ dano ame ocwane ni, “Ka ilwoŋo jo i cem me dyeceŋ aŋar me otyeno, kur ilwoŋ owoteni, onyo omegoni, onyo wati meri, onyo oturwu ame olonyo, me gin daŋ kur bin lwoŋi pi culo waŋ lwoŋogi. Ento ka itedo arama, lwoŋ ocan, oŋwalo, jo a komo akoma, kede otowaŋ; ibino nwoŋo giri winyo, pien gin mom twero culi. Obino culi i kare me cero jo a kitegi atir.” Ŋattoro acel i akina a jo obedo kede i dog cam ka owinyo kop man, okobo ni, “Ŋat a bino camo kwon i loc Obaŋa tye kede winyo!” Cite en ogamo koppere ni, “Dano moro rik obin otedo arama adwoŋ, daŋ te lwoŋo iye jo apol. Ka kare me arama oromo, en te oro amiro mere me kobbi jo ame olwoŋogi ni, ‘Bye wunu, pien jami luŋ doŋ oyiko oko.’ Gin ducu ocako bako doggi i kite acel ni timgi kica. Dano me agege okobbe ni, ‘Awilo poto, myero koŋ awot, anen; akwai, tima kica.’ Dano ocele okobo ni, ‘Awilo twoni apar me pur, awot ka nenogi; akwai, tima kica.’ Dano ocele okobo ni, ‘Kom an pwod anyomo dako nyen, pi mano mom atwero bino.’ Amiro obino, otitti adwoŋere kitenono. Akemo omako won ot, okobbi amiro mere ni, ‘Wot oyotoyot i waŋa yo atitino me boma kede i akina pacci, ikel ocan, oŋwalo, otowaŋ kede jo a komo akoma,’ Amiro okobo ni, ‘Adwoŋ, gin ame iciko doŋ otum, ento kabedo pwod odoŋ gire.’ Adwoŋ okobo baŋ amiro ni, ‘Wot i yo adoŋo kede i ŋet yo, di jo wek obin odony i ot, me oda poŋ. Pien atittiwu ni, mom tye dano moro i akina jo ame ocwanogi ame bino bilo aramana.’ ” Lwak ecipan owoto karacel kede, en te lokere tuŋ baŋgi, te kobbigi ni, “Ka duno moro bino baŋa ame mom koŋ okwero pappere kede tottere, kede dako mere, kede itino mere, omego mere kede amego mere, anaka kadi kwo mere ikome, mom twero bedo ŋat a luba, ŋat a mom tiŋo yataria mere, te luba, mom twero bedo ŋat a luba. Kara ŋa i akinawu, ka amito gero ot abor, mom koŋ geo bedo piny, te kwano wellim a mitte, ka ce etye kede ame romme tyeko? Me kur ecib acakki tere, tyeko te loye, jo luŋ ame neno bino nyere, kun okobo ni, ‘Dano man ocako gedo, tyeko te loye oko.’ Onyo aloccene, ame ka awot i mony me romo kede aloc ocele, mom koŋ bedo piny, poro kop, ka ce en kede jo mere tutumia apar etwero romo kede won jo tutumia pyeraryo ame abino baŋe. Ka mom amannono, en cwao kwena pi penyo kop me kuc ame dano ca pwod tye kannabor. Amannono, ŋattoro iyi akinawu ame yie mom cao gin ducu ame etye kede, mom twero bedo ŋat a luba. “Kado gire ber: ento kado ka odoko abot, obino loko doko amit iŋo? Mom doŋ ber me aketa i lobo, kadi anaka i wi odur; jo onyo oko, ŋat a tye i yit me winyo, winyi!” Ora-coro kede obalo onwoŋo onoko Yecu a ceggi me winyo koppere. Oparicayo kede opwony-cik oŋuŋura kun okobo ni, “Dano man coko obalo, dok cemo kedgi-gu.” En omio Yecu okobbigi carokop man ni, “Ŋa i akinawu ame tye kede romi mia acel, ame ka moro acel i akinagi orwenyo oko, en mom bino weko maka pyeraboŋwen wie aboŋwen i bar, te wot yenyo en ame orwenyo ca, ituno ka onwoŋo? Ka onwoŋo, ryoŋo i wi gwoke kun yie yom ayoma. Ka otuno paco, lwoŋo owote mere kede wati mere karacel, te kobbigi ni, ‘Yiwu obed yom karacel keda, pien doŋ anwoŋo romona a rik rweny ca oko.’ Atittiwu ni, yomcuny bino bedo adwoŋ amannono i polo i kom abalo acel ame oŋut, kato i kom jo pyeraboŋwen wie aboŋwen ame kitegi atir, a doŋ pe tye ginnoro a gin myero ŋut iye. “Onyo dannene ame tye kede ciliŋ akilin tomon, ka ciliŋŋere moro acel orwenyo, mom bino cwinyo tara, weo ot, yenyo atek ituno ka onwoŋo? Ka onwoŋo, lwoŋo owote mere kede wati mere karacel, te kobbigi ni, ‘Yiwu obed yom karacel keda, pien doŋ anwoŋo ciliŋŋa a rik rweny ca oko.’ Atittiwu ni, yomcuny bedo daŋ amannono i nyim omalaika Obaŋa i kom abalo acel ame oŋut.” Dok okobo ni, “Yam tye ico moro ame tye kede awobe mere aryo. En atidi mere okobbi pappere ni, ‘Pappa, mia dullim mera ame otika.’ En opoko limmere i akinagi. Nino okato anokkoro keken, awobi atidi ocoko jami mere ducu, oero wottere me wot i lobo abor. Olalo limmere oko kuno i bedo me caro caro. Ka limmere luŋ doŋ otum oko, kec atek meicel te poto i lobo-nono, awobi ca te cako mamala atata. Owoto odak baŋ ŋattoro me lobo-nono; en ocwae i elet ka kwayo puno. Yie ogomo me yeŋ kede pok cam ame puno camo, kom mom tye ŋattoro a mie ginnoro. Ka en doŋ oniaŋ pire kene, te kobo ni, ‘Opakaca a pappa ka ŋit tye adi, ocamo kwon loogi, kom an ata i kec kan! Abino ya, abino wot baŋ pappa, abino kobbe ni, “Apap, doŋ abalo baŋ polo kede nyimi, daŋ mom amyero ilwoŋa ni wedo. Loka abed acalo ŋat acel i akina opakacani.” ’ Oya, obino baŋ pappere. Ka rik en pwod tye teŋe kannabor, pappere onene. Ocone; oriŋo te kwako kore, omote kun noto leme. Wode okobbe ni, ‘Apap, doŋ abalo baŋ polo kede i nyimi, daŋ mom amyero ilwoŋa ni wodi.’ Ento pappere te kobo baŋ omiro mere ni, ‘Ru wunu kelo jor ame kato ducu kede ber me rwak i kome. Rwaku atem i ciŋe, kede amuk i tyene. Kelu atin twon olobakino me nekke, wek ocamu, obedu kede yomcuny. Pien atinna-ni rik oto, aman doŋ kwo; ceŋ orwenyo, doŋ onwoŋere.’ Ote cako bedo kede yomcuny. “Wode adwoŋ onwoŋo tye i poto. Ka en obino, a doŋ ceggi kede ot, te winyo wer kede myel. Te lwoŋo ŋat acel i akina omiro, openye ni, ‘Man kara ŋo ame tye ka timere-nie?’ Te dokke iye ni, ‘Kom ominni en odwogonono, pappi onekke atin twon olobakino, pien ogame ame kome yot kun kwo.’ Akemo te make, okwero donyo i ot oko. Pappere te donnyo baŋe, obako doge baŋe. En ogamo dog pappere ni, ‘Nen, an atio baŋi pi mwakki apol ata, anaka cene pe ru akwero winyo cik meri, daŋ mom ru imia kadi atin dyelloro wek yia bed yom karacel kede owotena. Ento atinni-ni ka obino, ame doŋ obalo limmi ducu i kom mon ame ococo, yin inekke atin twon olobakino!’ Ogamo doge ni, ‘Atinna, yin nino ducu itye keda, jami mera luŋ megi. Ber wan ocam kun obedo kede yomyic, pien ominni rik oto oko, aman doŋ kwo; nwaŋ orwenyo, doŋ onwoŋere.’ ” Yecu te dok kobo baŋ jo a lube ni, “Nwaŋ tye ŋattoro ame alonyo, ame tye kede akan-jami mere. Odoto dano man baŋe ni tye ka balo jami mere. Olwoŋe, openye ni, ‘Kop aŋo ame awinyo i komi-nie? Kella koŋ wel jami ame yin ikano, pien mom dok itwero bedo akan-jami.’ Akan-jami okobo i yie kene ni, ‘Kara abino timo ŋo? Pien adwoŋŋa doŋ akwanya oko i ticca me gwoko jami. Mom atek ame aromo pur, lewic daŋ maka ka akwac. Aŋeo gin ame abino timo, me jo jola i udigi ka oryema oko i kano jami.’ Olwoŋo wegi banya adwoŋŋere acel acel, okobbi dano me agege ni, ‘Wel banya adwoŋŋa ame tye baŋi adi?’ En odok iye ni, ‘Moo me jeituni gulli mia acel.’ Okobbe ni, ‘Kwany waraga me banya meri, ibed piny piopio, ico pyerabic.’ Openyo dano ocele ni, ‘Kara yin kono itye kede wel banya adi?’ En ogamo ni, ‘Kal a romo dwoŋ mia acel.’ Okobbe ni, ‘Kwany waraga me banyani, ico pyeraboro.’ Adwoŋŋere opwoo akanjami a mom agen ca, pien otio kede ryeko; pien jo me lobo man ryek i karegi, kato jo me cen. Akobbiwu ni, ti wunu kede lim me lobo man a mom ber-ri me imak wunu kede dyere baŋ jo, me ka bino tum, gamwu i kabedo a perakino nakanaka. “Dano ame agen i kom jami atitidi moro, bino bedo agen i kom jami adwoŋ daŋ; dano a mom agen i kom jami atitidi moro, mom bino bedo agen i kom jami adwoŋ. Ka yam mom ibedo wunu ogen i kom lim me lobo man a mom ber-ri, kara ŋa ame bino genowu kede lonyo me ateni? Ka yam mom ibedo wunu ogen i kom jami a jo ocele, ŋa ame bino miyowu jamiwu ikome? Mom tye amiro moro ame twero tiyi odoŋe aryo; pien bino dago acel, eka te cayo en ocele; onyo bino moko i kom moko acel, eka te cayo en ocele. Pe itwero bedo wunu opii Obaŋa kede dok opii a lim.” Oparicayo gin jo ame maro lim; gin owinyo kop man ducu, ote ŋale. Cite en okobbigi ni, “Wun kara wun jo ame nyuto kite atir baŋ dano, cite Obaŋa ŋeo cunywu; pien gin ame malo i nyim dano, baŋ Obaŋa bedo me kwer. “Cik kede odwarpiny obedo tye ituno kede i kare a Lakana; cakere i kare-nu otye ka rabo amut aber me loc Obaŋa, jo luŋ tye ka donyo iye kede teko. Bedo yot polo kede lobo itum, kato ame obino weko wen nukuta moro me cik. “Dano acel acel ame ryemo cege oko, te dok nyomo dako ocele, nwoŋo ocodo cot. Dok dano ame nyomo dako ame cware oryemo, en daŋ rom i dano ame ocodo cot. “Nwaŋ tye dano moro ame alonyo; en rik ruko boŋo obedo amaramar, kede kanyi aber me camanini, kun camo cem abeco nino luŋ. I dog paco mere onwoŋo tye dano moro ame buto iye nyiŋe Lajaro. Etoko onwoŋo orwatte i kome, kun yie gomo yeŋo i gin ame oony piny i wi meja alonyonu; gwogi daŋ rik bino, naŋo waŋ etoko mere. Acan-nu rik te to oko, omalaika te bino tiŋe, tere i kor Iburaim. Alonyo-nono daŋ te to, ote yike oko. Kare ame en tye kede remkom, otiŋo waŋe i Kadec te neno Iburaim kun Lajaro tye i kore. Alonyo-nono te redo ni, ‘Pappa, Iburaim, tima kica ba, icwaya Lajaro me lut nyako ciŋe i pii, bin kwe kede te leba, pien atye kede rem atek i mac man,’ Iburaim te gamo ni, ‘Woda, po ni, i kare me kwoni nwaŋ omii jamini abeco, aco Lajaro rik omio jami mere areco. Ento amanni en doŋ okweo cunye kan oko, kun yin itye giri i rem. Medde kede mano, iyi akinawa kede wun oketo iye twon burroro atut, wek ya i kan kato baŋwu kuno loo jo a mito bino oko, dok ŋattoro i baŋwu kuno mom kato baŋwa kan.’ En dok te kobo ni, ‘ooŋ akwai ba, Pappa, ore ba i ot a pappa, pien atye kede omegona abic, me en wot kwenyorogi, gin daŋ kur dok obin i kabedo me remkom-mi.’ Iburaim ogamo doge ni, ‘Gin tye i Muca kede odwarpiny; myero gin winy kopgi.’ En dok te dok ni, ‘Amaa, Pappa, Iburaim, ento ka ŋattoro i akina a jo oto owoto baŋgi, ol cite gin bino ŋut.’ Iburaim dok okobbe ni, ‘Ka gin mom owinyo kop a Muca kede odwarpiny, kadi bed ŋattoro cer i akina jo oto, mom obino keto i tam.’ ” Yecu okobo baŋ jo mere a lube ni, “Gin ame mio jo poto i bal mom bino geŋere; cite dano ame kela gin a mio jo poto i bai bino neno can! Twara ame otweo kidi rego i ŋute, ocore kede i nam, kato ame en omio ŋat acelloro i akina jo magi atinoni opoto i bal. Gwokere wunu kenwu! Ka ominni obalo bal, juke; ka oŋut, time kica. Ka otimo bal baŋi tyen abiro i nino acel, ka olokere baŋi tyen abiro kun kobo ni, ‘Doŋ aŋut,’ myero itime kica.” Okwena okobo baŋ Rwot ni, “Med iyeewa!” Rwot okobo ni, “Kono itye wunu kede iyee a rom kede nyig koti dek karadali, kono ikobbi wunu yat-ti ni, ‘Putte keni, ipitte keni iyi nam,’ kono owinyo dogwu. “Ŋa i akinawu ka tye kede amiro mere a puro kede dyaŋ, onyo a kwao rommi, ame ka odwogo i poto te kobbe ni, ‘ru bino oyot, ibed piny, icem?’ En mom bino kobbe ni, ‘Yikka cem me otyeno, itwe pyeri, ikella cem ituno ka an acemo, amato, icennere yin ibino cem, ibino mato?’ En pwoo amiro pien otimo gin ame ocike ni etim? Wun daŋ amannono, ka doŋ ityeko wunu timo gin ducu ame ocikowu tiyo, myero ikob wunu ni, ‘Wan omiro a mom konyo ginnoro, pien otio ka gin a myero oti keken.’ ” Ame en awot Jerucalem, opello i waŋ apokki me Camaria kede Galilaya. Odonyo i paco moro, orwatte kede odobo apar, ame kun gin ocuŋ kan abor. Gin oredo ni, “Amaa, Yecu, Adwoŋ, timwa kica!” Ka onenogi, okobbigi ni, “Wotu giwu, nyutte kenwu baŋ olamdog.” Ame pwod otye ka wot, komgi te lony oko. Ŋat acel i akinagi, ka oneno ni etyeko caŋ oko, odok cen a kun pako Obaŋa kede dwon aloŋo. Oryebere piny i te tyen Yecu, opwoe. En onwoŋo Acamaria. Yecu openyo ni, “Nwaŋ mom olonyo jo apar? Kara jo aboŋwen tye kwene? Mom tye ŋattoro ame odwogo cen ka pako Obaŋa, kono ka arok-ki keken?” Te kobbe ni, “Ya, iwot giri, iyee meri ocaŋi.” Oparicayo nwaŋ openye ni, “Loc Obaŋa bino tuno awene?” Okobbigi ni, “Loc Obaŋa mom bino ame oneno i waŋ. Dok mom obino kobo ni, ‘Neno, tye kan!’ aŋar ni, ‘En i ca!’ Pien, nen, loc Obaŋa doŋ tye i akinawu.” Eka te kobo baŋ jo a lube ni, “Kare bino romo ame ibino paro wunu me neno nino a Wot Obaŋa moro acel, cite mom ibino neno wunu. Obino kobbiwu ni, ‘Neno, en i ca!’ onyo ni, ‘Neno, tye kan!’ Kur iwotu iye, daŋ kur ilubgi wunu. Pien acalo lutkot meny, caro polo tuŋ cel tuno kede naka tuŋ ocele, Wot a dano daŋ bino bedo amannono nino mere. Ento myero koŋ otek kanyo can apol, kun jo me kare man bino kwere. Acalo rik otimere i kare a Nua, bino timere amannono i kare a Wot a dano daŋ. Jo nwaŋ ocamo, omato, awobe kede anyira onyomere, ituno a nino-nono ame Nua odonyo kede i yee, eka abwal pii te poŋ, te tyekogi ducu. Acalo otimere i kare a Lot daŋ. Jo rik ocemo, omato, ocato wil, opito koti, ogero udi, cite i nino ame Lot oya oko i Codom, mac kede gweŋ calufa ame mac olio ocwe kun ya i polo, te tyekogi ducu. Bino bedo amannono daŋ i nino ame Wot a dano bino nen iye. I nino-nono dano ame tye malo i wi ot kun jami mere tye iyi ot, kur dok oyitto piny ni ebino kwanyogi. I kite acel-lu, dano ame tye i poto kur dok cen. Koŋ ipo wunu i kom cik a Lot. Dano ame mito laro kwo mere bino rwenyo kwo mere arwenya; ento ŋat ame rwenyo kwo mere, en bino gwoko. Atittiwu ni, i dyeworrono jo aryo bino buto i wi tanda acel; obino kwanyo ŋat acel, ŋat acel te doŋ. Mon aryo bino bedo karacel i rego; obino kwanyo ŋat acel, ŋat acel te doŋ. [ Jo aryo bino bedo i poto; obino kwanyo ŋat acel, ŋat acel te doŋ.]” Gin openye ni, “Rwot, kara kwene?” En okobbigi ni, “Kan a kom oto tye iye, acut daŋ cokere kuno.” Obolligi carokop ame pwonyogi ni, myero okwa Obaŋa dikdik, kur ool. Okobo ni, “I boma moro rik tye aŋolkopporo ame mom lworo Obaŋa, kadi woro dano. Cen tye dako moro a cware oto ame obedo lonyo baŋe dikdik kun kobbe ni, ‘Ŋol kop i kom ŋat a an apidde.’ En obedo ka kwero oko gire pi kare alac; ento icennere en okobo kene kene ni, ‘An ba, kadi bed mom alworo Obaŋa kadi woro dano, cite dako a cware oto-ni doŋ lola wok; myero koŋ doŋ aŋol kop i kom ŋat a en apidde, me i agikki mere bino mere dikdik kur tima rac.’ ” Rwot okobo ni, “Winy wunu kop ame aŋolkop a kite mere mom atir okobo. Obaŋa mom bino Ŋolo kop atir ame bino konyo jo mere ame eyero, ame kok baŋe dyeceŋ kede dyewor? En bino gal aboŋo timo ginnoro i komgi? Akobbiwu ni, en bino Ŋolo kop atir oyot me konyogi. Ento Wot a dano ka bino dwogo, bino nwoŋo i yee i lobo ateni?” Dok obolo carokop baŋ jo mogo ame genne kengi ni gin kitegi atir, kun ocao jo ocele. “Jo aryo rik owoto ka kwac i ot Obaŋa, dano acel Aparicayo, dano ocele ara-ocoro. Aparicayo ocuŋ kun kwao gire kene ni, ‘Obaŋa, apwoi, kom an mom acalo jo ocele ame oyak, a mom genne, ocod cot, daŋ mom arom kede ara-ocoro-ni. Akanyo kec nino aryo i cabit acel acel, amio daŋ dul acel me apar i kom jami luŋ ame anwoŋo.’ Cite ara-ocoro ocuŋ i teŋe, mom otiŋo waŋe malo i polo, ento obapo kore kun kwao ni, ‘Obaŋa, tima ber, an abalo gira!’ Akobbiwu ni mano, dano ca odok tuŋe ame okwane ni kite atir kato dano ocele ca oko; pien dano acel acel ame kette kene ni etye malo, obino dwoke piny, ento dano a mwolle kene obino tiŋe malo.” Jo okelle anaka itino atino-gu, ni en mulgi. Ka jo a lube oneno, te jukogi oko. Cite Yecu ocwanogi baŋe, te kobo ni, “Wek wunu itino bin baŋa, kur igeŋgi wunu; pien loc Obaŋa tye pi jo acalo gin. Ateni akobbiwu ni mano, dano a mom jolo Ioc Obaŋa acalo atin, mom bino donyo iye kadi atidi moro.” Aloccoro openye ni, “Apwony aber, atim ŋo me anwoŋ kwo a perakino nakanaka?” Yecu te penye ni, “Kara piŋo ilwoŋa ni aber? Dano moro aber mom tye, kono ka Obaŋa keken. Iŋeo cik, ‘Kur icod cot, Kur inek, Kur ikwal, Kur ikel kop goba i pido, Wor pappi kede totti.’ ” En te gamo ni, “Kom kop magu ducu amako con cakere i tinona.” Yecu ka owinyo okobbe ni, “Ginnoro acel pwod orem i baŋi. Wot icat jami luŋ ame itye kede, ite poko oko baŋ ocan, eka ite bedo kede lonyo ame ikano i polo; yin doŋ ibin, iluba.” Lo-nu ka owinyo kodi kop-pu, okumu meicel, pien onwoŋo rik en alonyo meicel. Ame Yecu tye ka nene, okobo ni, “Tek meicel olonyo idonyo i loc Obaŋa! Pien twara donyo inaga i waŋ pico yot, kato alonyo idonyo i loc Obaŋa.” Jo ame owinyo okobo ni, “Kara ŋa a twero larre?” En okobo ni, “Gin a mom twerre baŋ dano, ibaŋ Obaŋa twerre.” Petero okobo ni, “Aco wan oweko pacciwa, olubi.” Yecu okobbigi ni, “Ateni akobbiwu ni mano, mom tye ŋattoro ame oweko ode, onyo cege, onyo omego mere, onyo jo onywale, onyo itino mere, pi loc Obaŋa, ame mom bino nwoŋo jami akato mano tyen apol i kare man; kede i kare a bino anyim bino nwoŋo kwo a perakino odoco.” Otero jo mere apar wie aryo, okobbigi ni, “Nenu, wan doŋ otye okwaro tur me wot i Jerucalem. Kop luŋ ame odwarpiny rik ocoo i kom Wot a dano bino cobere kakare. Pien obino miye baŋ Orok, obino ŋale, obino miye lewic, obino ŋulo lao i kome; obino pwode kede del, obino neke, cite i nino me adek en bino cer oko.” Ento gin mom oniaŋ i kop magi kadi acelloro; kop ame en okobo owumere oko i baŋgi, mom gin omako kop ame okobo. Ka Yecu doŋ onoko ceggi kede Jeriko, atowanŋoro onwoŋo obedo piny i ŋet yo kun kwao lim. Ka owinyo lwak tye a kato i laŋete, en openyo ni, “Kara mano ŋo dok i?” Otitte ni, “Yecu me Najaret en a kato-nono.” En oredo ni, “Yecu, Akwar Daudi, tima kica, ba!” Jo ame tye i nyime ojuke ni, “Liŋ lo-ni!” En omedo redo mere amede ni, “Akwar Daudi, tima kica ba!” Yecu ocuŋ, te ciko ni kel lo-nono baŋe. Ka obino onoke a ceggi, openye ni, “Kara imito ni atimi nadi?” Okobo ni, “Rwot, amito anen piny.” Yecu okobbe ni, “Nen giri piny oŋ; iyeeni ocaŋi.” Cucuttono te cako neno piny oko, olubo Yecu kun mio kwogo baŋ Obaŋa, jo luŋ daŋ ka oneno, opako Obaŋa. Yecu odonyo i Jeriko kun abebea iye. Rik tye lonnoro kuno nyiŋe Jakayo; en cen ara-ocoro adit, daŋ onwoŋo en alonyo. Onwoŋo en paro pi neno Yecu, ni en ŋa? Cite mom otwerre, pien lwak pol, dok en dano acek. Omio en oriŋo i nyim, oyito i wi olam pi nene, pien nwaŋ apello i yo-nono. Ka Yecu otuno i kabedo-nono, oneno malo, okobbi Jakayo ni, “Jakayo, yitto piny piopio, pien tin myero abed i odi.” En te yitto piny piopio, ojole kede yomcuny adwoŋ; omio jo luŋ ame oneno oŋuŋura kun okobo ni, “Odonyo i ot, abedo welo a dano ame abalo.” Jakayo oya malo, okobo baŋ Rwot ni, “Nen ba, Adwoŋ, nucu limma ducu ame atye kede doŋ amio oko baŋ ocan; dok daŋ ka ce abubuo gi-a ŋattoro, an abino cule tyen aŋwen.” Yecu okobbe ni, “I ot-ti tin obino iye lar, pien dano-ni daŋ obedo anywalli Iburaim. Pien Wot a dano obino me yenyo kede me laro gin orwenyo.” Ka pwod gin otye a winyo kop man, Yecu omedde kede koppere, te kobbigi carokop; pien onwoŋo en doŋ ceggi kede Jerucalem, dok gin otamo ni loc Obaŋa kom doŋ anen oko oyotoyot. Omio en okobo ni, “Yam tye won kwogo moro ame oya, owoto i lobo abor me wot gamo twer me loc iye, ete dwogo. En olwoŋo omiro mere apar, te pokkigi ciliŋ tutumia apar, kun kobogi ni, ‘Catu kede wil ituno ka adwogo.’ Cite jo me lobo mere onwoŋo dage; ocwao kwena i yore kun okobo ni, ‘Danonono mom omito ni lowa.’ Ka odwogo a doŋ ogamo loc, te ciko ni lwoŋ omiro a nwaŋ omiogi lim, me eŋe wel agoba ame gin onwoŋo i cato wilgi. Dano me agege obino i nyime, okobo ni, ‘Adwoŋ, ciliŋ meri tutumia dok omedde iye ciliŋ ocele tutumia apar.’ Ogamo doge ni, ‘Itimo ber, yin amiro aber! Pien yam ibedo agen i jami anok, ibino bedo kede twer i boma apar.’ Dano me aryo te bino, okobo ni, ‘Adwoŋ, ciliŋ meri tutumia dok omedde iye ciliŋ ocele tutumia abic.’ Okobbe ni, ‘Yin ibino bedo kede twer i boma abic.’ Dano ocele daŋ te dok bino, te kobbe ni, ‘Adwoŋ, ciliŋ meri gin ene, ame agwoko aboo kede itambara; pien onwoŋo alwori, pien yin dano ager, itero gin a mom ikano, ikaa gin a mom icoo.’ En okobbe ni, ‘Abino Ŋolo kop loi kun lubo kop ame oya i dogi giri keni, yin amiro arac. Yam iŋeo ni an a dano ager, atero gin a mom akane, akao gin a mom acoo bo? Kara no omoni kano limma gira i beŋŋe, wek ka adwogo, agam limma kede agoba mere?’ Okobo baŋ jo ocuŋ i laŋete ni, ‘Gam wunu ciliŋ a tye baŋe oko, imi wunu baŋ won ciliŋ tutumia apar.’ Okobbe ni, ‘Adwoŋ, en doŋ tye i ciliŋ tutumia apar do! Akobbiwu ni mano. Ŋat acel acel ame mere tye, obino miye, ento ŋat a mere mom, obino gamo oko gin a tye baŋe. Ento okworra a rik okwera, ni kur alogi-ni, kelgi wunu kan, inekgi wunu oko i nyima.’ ” Ka Yecu otyeko kobo kop man, omedde kede wottere kun kwaro tur me wot i Jerucalem. Ame en doŋ ceggi tuno i Betepage kede Betania, i kidi ame olwoŋo kidi me Jeituni, ooro jo aryo i akina jo a lube, ocikogi ni, “Wot wunu i paco i nyimwu ca. Ka idonyo wunu iye, ibino nwoŋo wunu atin kana ame otweo, ame ŋattoro mom ru oyito i wie; gonyu, ikel wunu kan. Ka dano moro openyowu ni, ‘Igonye wunu me ŋo?’ wun ibino wunu kobo aman ni, ‘Adwoŋwa en ame amito.’ ” Jo ame oorogi daŋ owoto, onwoŋo i kite acalo okobbigi kede. Ame gin agonyo atin kana, wegi mere openyogi ni, “Kara igonyo wunu atin kana me ŋo?” Gin ogamo ni, “Adwoŋwa en ame amito.” Ote kelo atin kana baŋ Yecu, ote peto boŋŋigi i wie, ote cibo Yecu i wie. A doŋ en awot, gin opeto boŋŋigi i dye yo. Ka en onoko ceggi kede luŋ kidi me Jeituni, lwak jo a lube luŋ ocako lelo, dok opako Obaŋa kede dwon aloŋo pi tic atek adoŋo ducu ame gin oneno, kun okobo ni, “Opwo wunu abaka ame abino nyiŋ Rwot! Kuc obed i polo, kwogo bed malo i wi polo!” Oparicayo mogo i akina lwak okobbe ni, “Apwony, juk jo meri a lubi-ni.” En odok iye ni, “Akobbiwu ni mano, ka kono jo man liŋ i, kiddi magi en ame bino lunyo redo gigi.” Ka doŋ onoko ceggi, a doŋ oneno boma-nono, okoke, kun kobo ni, “Ka kono tin-ni iŋeo gin a kelli kuc! Cite onyoni opono oko i waŋi. Pien kare moro abino i komi, ame okworri bino toro tuti me lobo guri dyere, dok obino ridi tuŋŋi i tuŋŋi. Obino rwaci piny, yin kede itinoni a tye baŋi; mom obino weko kidi moro acel doŋ iyii ame ododde i wi wadgi, pien rik mom iŋeo kare ame olimi iye.” Odonyo i ot Obaŋa, ocako ryemo jo a cato wil iye, kun kobbigi ni, “Nwaŋ ocoo ni, ‘Oda bino bedo ot me ka kwac’; ento wun iloko wunu odoko adu oyak.” En obedo ka pwony i ot Obaŋa nino luŋ. Olamdog adoŋo kede opwonycik kede jo adoŋo i akina lwak oyenyo yo me neke; cite gin mom onwoŋo ginnoro a myero otim i kome, pien jo luŋ oketo cunygi i winyo koppere. I nino moro acel ame Yecu tye apwonyo lwak i ot Obaŋa, kede rabo amut aber, olamdog adoŋo kede opwony-cik anaka odoŋe obino baŋe. Ote penye ni, “Kobbiwa, twerrene omio itimo kit man? Onyo ŋa ame omii twer man?” En ogamo doggi ni, “An daŋ koŋ abino penyowu kede pennyoro acel, me idokka wunu iye. Batija a Lakana oya i baŋ Obaŋa, aŋar onyo oya i baŋ dano?” Gin oporo kop kengi kengi, kun okobo ni, “Ka okobo ni, ‘Oya i baŋ Obaŋa,’ en bino penyowa ni, ‘Kara piŋo mom iye wunu en?’ Cite dok ka okobo ni, ‘Oya i baŋ dano,’ lwak luŋ bino napowa kede gweŋ, pien gin oye atika ni Lakana obedo adwarpiny.” Omio gin ote dokke iye ni, “Kan ame oya iye wan okwia giwa.” Yecu daŋ te kobbigi ni, “An daŋ mom abino kobbiwu twerrene omio atimo kite man.” Eka te cako kobo carokop man baŋ lwak ni mano, “Nwaŋ tye dano moro ame opito poto olokkere te joko baŋ opur, eka te wot oko i lobo ocele, odikere kuno pi kare alac. Ame kare doŋ oromo, en te cwayo amiro baŋ opur me gin mie dul ginnoro ocek i poto. Cite opur opwode, oryeme, odok i ciŋe nono. Dok ooro amiro ocele; en daŋ dok opwode, omie lewic, daŋ oryeme, odok i ciŋe nono. Dok te oro me adekkere; man daŋ owano, ote bole oko, lcennere won poto olok te kobo ni, ‘Kara man doŋ abino timo ŋo? Abino oro woda ame amaro; aŋar onyo obino wore.’ Ento ka opur onene, ote kobo kengi kengi ni, ‘Kom man en ale-lim; ber oneke wunu oko, me lim eleyo-nono bed megwa.’ Ocore oko teŋe i poto olok, ote neke oko. Kara won poto olok bino timo jonono niŋo? En bino bino, te neko opur-ru oko, te miyo poto olok baŋ jo apat.” Ka gin owinyo kop man, okobo ni, “Pe amannono!” Cite en onenogi, okobbigi ni, “Kara te kop ame ocooni tere niŋo, ni mano, ‘Kidi ame ogedo okwero en ame odoko kidi me gwic ot?’ Dano acel acel ame orette i kom kidi man bino ŋidde oko atitino; ka kidi man orette i kom ŋattoro, bino ŋinyo oko.” Opwony-cik kede olamdog adoŋo otemo make i caanono, cite ote lworo lwak oko; pien gin oniaŋ aber ni en okobo carokop man i komgi. Gin obedo kiye, eka ote oro orot ame poro ni gin jo a kitegi atir, me mak kop ame ya i doge, wek ote miye i ciŋ aloc kede twerrere. Gin openye ni, “Apwony, wan oŋeo ni yin ikobo dok ipwonyo kop ame tye atira, mom ipoko akina jo, cite ipwonyo yo Obaŋa i ateni. Myero ogelli Kaicari ocoro, onyo mom?” Ento en oŋeo ryekogi oko, te kobbigi ni, “Koŋ inyutta wunu ciliŋŋoro. Cal kede coc ame ogoro i yie-ni mea ŋa-nono?” Gin ogamo ni, “Mea Kaicari.” Eka en te kobbigi ni, “Aco do, dwok wunu baŋ Kaicari jami a Kaicari, jami Obaŋa dwoku baŋ Obaŋa.” Mako kop ame oya i doge te loyogi oko i nyim lwak; gin owuro kite ame en odok kede i kop, ote doŋ liŋ aliŋa. Ocadukayo mogo obino baŋe; jo-ni gin jo ame kobo ni, jo oto pe cer. Gin okelo peny baŋe ni, “Apwony, Muca nwaŋ ocoo pirwa ni, ka omin a ŋattoro oto oko ame etye kede cege cite itino mere mom, ominnere myero lak dako mere me nywal ominnere itino. Aco, nwaŋ tye jo abiro ame gin omego. Dano me agege onyomo dako, te to boŋo atinnoro. Dano me aryo, kede me adekkere daŋ olako dan-nu; kite-nono gin abiro luŋ obedo kede dannu, ote to boŋo atinnoro. Icennere dako daŋ te to oko. Kara i kare me cer, da-nu bino bedo cik a ŋa? Pien gin abiro luŋ obedo kede.” Yecu okobbigi ni, “Awobe kede anyira me lobo man gin nyomere, cite jo ame okwanogi ni gin oromo tuno i lobo ca, kede cer iyi akina jo oto, mom obino nyomere, pien gin mom dok twero to. Gin rom aroma kede omalaika; daŋ doŋ gin itino Obaŋa, pien gin doŋ jo ocer. Ento anaka Muca ikome onyuto ni jo oto ocerogi, i dul i kom yat obuŋere ame olyel, kan ame olwoŋo iye Rwot ni, Obaŋa Iburaim, Obaŋa Icaka, Obaŋa a Yakobo. En mom Obaŋa ajo oto, ento meajo akwo; pien jo luŋ bedo kwo pire.” Opwony-cikkogo ogamo doge ni, “Apwony, ikobo aber.” Pien gin mom dok otiŋere me penye kopporo. Cite en openyogi ni, “Kara okobo niŋo ni Kricito en akwar Daudi? Aco kono Daudi ikome okobo i buk me Jabuli ni mano, ‘Rwot okobbi Rwotta ni, Bed i laŋeta tuŋ cem i kabedo me kwogo, ituno ka abino miyo okworri doko aten tyeni.’ Kite-nono Daudi lwoŋe ni Rwot; en dok bedo akware niŋo?” Ka lwak ducu tye a winyo koppere, en okobbi jo mere a lube ni, “Gwokere wunu i kom opwony-cik ame maro wot a kun orukere kede boŋŋi abeco, ame omito daŋ ni jo motgi i cuk, kede bedo i kome me dito i kacokere, kede i kabedo me kwogo i dog cem. Gin mao udi a mon a coggi oto, dok okwao Obaŋa nakanaka me gobagoba. Kop ame obino ŋolo i wigi bino bedo pek akato.” Yecu ka otiŋo waŋe malo, oneno olonyo tye abolo motgi i canduk me coko lim. Te neno daŋ dako moro ame cware oto, ame acan, obolo ka cente aryo keken. Okobo ni, “Akobbiwu ateni ni mano, dako man a cware oto, ame acan, obolo ame okato jo luŋ. Pien gin ducu obolo mot ame gin ogito agita i kom limgi adwoŋ, cite en i kom cannere obolo gin luŋ ame tye baŋe, ame konyo kwo mere.” Jo mogo obedo ka kobo kop i kom ot Obaŋa, ni kiddi abeco, kede mot ame jo omio, omio doŋ nen aber meicel. Yecu okobo ni, “Jami magi ducu ame ineno wunu-ni, kare bino romo ame mom obino weko kidi moro acel ame ododde i wi wadgi, a mom ocoro piny.” Gin ote penye ni, “Apwony, kara man bino bedo awene ba? Dok gin aŋo ame bino nyuto ni ginnono doŋ ceggi timere?” En ogamo ni, “Gwokere wunu ba, ŋattoro kur rwenywu be; pien jo apol bino bino i nyiŋa ame obino kobo ni, ‘An ennono,’ dok ni, ‘Kare doŋ onoko ceggi!’ Kur ilubugi. Dok ka ibino winyo wunu pi mony kede arubaruba, kur ibed wunu kede lworo, pien mano myero tek timere, ento agikki mom abino piopio.” Icennere te dok kobbigi ni, “Rok bino romo kede rok, loc bino romo kede loc ocele. Oyeŋo apopol bino yeŋo piny atek meicel, kec kede two areco bino poto i kabedo apol. Gin a mio lworo mako jo, kede anyuttogo adoŋo, bino nen kun ya i polo. Cite a mom ru ginnono ducu otimere, koŋ obino makowu, obino wunowu, obino terowu i kacokere, obino tweyowu i buc, obino kelowu i nyim rwode kede i nyim oloc pi nyiŋa. Man bino bedo kare baŋwu me rabo kop me caden. Pi mano, mok wunu i tamwu ni, kur iru tamo wunu con kite ame ibino wunu dok kede iye, pien abino miyowu twer me kop, kede ryeko daŋ, ame ŋattoro i akina okworwu mom bino bedo i twer me cuŋ i nyime onyo pyem kede. Anaka onywalwu kede omegowu kede oturwu kede owotewu daŋ obino keto erupe i komwu, jo mogo i akinawu daŋ obino nekogi. Jo luŋ bino dagowu pi nyiŋa. Ento yer wiwu acelloro mom bino rwenyo. Ka ikanyakino wunu, ibino wunu nwoŋo kwowu. “Ento ka ineno wunu mony omano Jerucalem, ŋe wunu ni mano, kare me kete doŋ onoko ceggi. I karenono, jo a tye i Judaya myero riŋ oko i wi kiddi, jo ame tye paco myero riŋ oko, kede jo ame tye i akina pacci kur dok dony i Jerucalem; pien kare-nono bino bedo kare me culo kwor, kede me cobo kop ducu ame nwaŋ ocoo. Mon a yac bino neno can i kare-nono, kede gin ame doto itino! Pien can adwoŋ bino poto i lobo, kede akemo adwoŋ bino poto i kom rok man. Obino nekogi kede pala, obino terogi me bedo opii i akina rok ducu, Orok bino nyono Jerucalem piny, ituno ka kare Orok ocobere kakare. “Anyuttogo bino nen i kom cen kede i kom dwe kede i kom acer, rok apol me wi lobo bino kumo kun cunygi tye i oguro, pi mor me nam kede tagere mere. Jo bino wille pi lworo, ka gin otamo pi gin ame abino i kom lobo; pien teko ame i polo bino yeŋere. Eka jo bino neno Wot a dano kun bino iyi pol, kun tye kede teko kede kwogo adwoŋ. Ka gin-ni oero timere, nen wunu malo, tiŋ wiwu malo, pien kare me lakorowu nwoŋo doŋ onoko ceggi.” Dok okobo carokop baŋgi ni, “Koŋ inen wunu oduro, kede yen ocele luŋ. Ka doŋ pote olot, ame ineno wunu, iŋeo wunu kenwu ni oro doŋ ceggi. Amannono wun daŋ, ka ineno ginnono atimere, ber iŋe wunu ni, loc Obaŋa doŋ onoko ceggi. Ateni akobbiwu ni mano, lwagi jo man mom bino tum, ituno ka koŋ mannono otimere. Polo kede lobo bino tum oko, ento kop ame an apwonyo mom bino tum. “Cite ber igwokere wunu kenwu ba, cunywu kur dok anwaŋ pi woro me cem kede mero koŋo, kede pi tamo pi kwo man, me nino-nono kur bin tuwu atua, te rette bala kumma; pien bino tuno i kom jo ducu ame bedo i wi podo. Bed ame ineno wunu kare luŋ, kun ikwao wunu Obaŋa atek me inwoŋu teko me bwot i kom ginnono ducu ame bino timere, kede me cuŋ i nyim Wot a dano.” Nino ducu en obedo ka pwony i ot Obaŋa dyeceŋ, ento dyewor en woto buta i wi kidi ame olwoŋo kidi me Jeituni. Odiko jo luŋ dilo, bino baŋe i ot Obaŋa ka winyo koppere. Ecuban me Ogati a Tobi Mom iye, ame olwoŋo ni Kato, onwoŋo onoko ceggi. Olamdog adoŋo kede opwony-cik oyenyo yo a myero gin neke kede, pien onwoŋo gin olworo lwak. Catan odonyo i cuny Juda ame olwoŋo me Keriot, ame okwane i wei olub Yecu apar wie aryo. En owoto, oporo kop kede olamdog adoŋo kede odoŋe cirikale, kite a myero emie kede baŋgi. Cunygi obedo yom, ote ciko miye lim. En daŋ te ye, te yenyo kare aber me miye baŋgi ame nwoŋo lwak mom iye. Nino me Ogati a Tobi Mom iye otuno, ame myero oŋol iye atin romo me Kato. Yecu ooro Petero kede Lakana kun cikogi ni, “Ape wunu, yiku cam me Kato pirwa me ocamu.” Gin openye ni, “Imito ni owot oyik tuŋ kwene?” Okobbigi ni, “Nen ba, ka idonyo wunu i Jerucalem, lonnoro bino romere kedwu ame oyeo gulu pii. Lube wunu anaka i ot ame ebino donyo iye. Kobbi wunu won ot ni, ‘Apwony okobo ni, Ane ot welo kan ame abino camo iye Kato karacel kede jo mera a luba?’ En bino nyuttiwu icika alac i malo ame opeto; yik wunu kuno.” Gin owoto, ote nwoŋo tye acalo en oporrigi, ote yiko cam me Kato. Ka caa oromo, Yecu obedo piny i dog cem karacel kede okwena. Okobbigi ni, “Onwoŋo ceŋ aparo meicel pi camo Kato man kedwu, kum mom ru akanyo can; pien akobbiwu ni mano, mom dok abino camo, ituno ka bino cobere kakare i loc Obaŋa.” Ogamo ikopo; ka doŋ opwoo, okobo ni, “Maku man, ipok wunu i akinawu; pien attitiwu ni mano, cakere amanni, mom dok abino mato pig olok, ituno ka loc Obaŋa bino tuno.” Omako ogati; ka doŋ opwoo, onyinyilo, omiogi kun kobo ni, “Man en koma ame omio pirwu. Tim wunu man me poyo an,” Amannono ka gin ocamo otum, otiŋo ikopo kun kobo ni, “Ikopo man en cikere anyen i remona ame oony pirwu. Cite nen ba, ciŋ dano a keto erupe i koma tye i wi meja kan karacel keda. Pien Wot a dano awot gire i kite a nwaŋ oyiko; ento dano a keto erupe i kome, kite ame ebino neno can kede!” Gin ote penyere kengi kengi ni, ŋa i akinagi ame bino timo man. Pyem dok te erre i akinagi ni mano, ŋa i akinagi myero otam ni dit a loogi? Yecu okobbigi ni, “Rwode Orok bwoo jo megi kede teko; jo ame tye kede twer i akinagi olwoŋogi ni otim aber. Cite i baŋwu mom myero bed amannono; ento ŋat ame adit i akinawu myero lokere dok acalo ŋat atidi, kede atelwic myero bed acalo dano ame tio pi jo. Ŋa ce ame loo kede dit, ŋat ame bedo i dog cem, ya onyo ŋat ame kelo cam? Pe ŋat ame bedo i dog cem? Cite an abedo i akinawu acalo ŋat ame tio pi jo. “Wun giwu jo ame obedo i laŋeta i kare luŋ ame obedo tema. Acalo Pappa oyikka loc, an daŋ ayiko pirwu ni, ibino camo, ibino mato wunu i dog mejana i locca, dok ibino bedo wunu i wi kome me kwogo kun iŋolo wunu kop i kom atekere apar wie aryo a jo Icrael. “Cimon, Cimon we, Catan otyeko kwayo ni omiwu baŋe me apyeta acalo kal, cite atyeko kwayo Obaŋa piri atek ni, iyee meri kur dok cen. Yin daŋ, ka doŋ ilokere, myero ijiŋ cuny omegoni.” En te kobbe ni, “Rwot, doŋ ayikere me wot kedi i buc, anaka kede i to daŋ.” En odok iye ni, “Petero, akobbi ni mano, twon gweno mom bino koko tin, ituno ka koŋ ikwera tyen adek, ni mom iŋea.” Openyogi ni, “Ka cwany aorowu boŋo cao me lim, kadi ocoe, kadi war, ginnoro rik tye ame oremowu?” Gin ogamo ni “Mom gire.” Te cikogi ni, “Ento koni, ŋat ame tye kede cao lim, ber teri; kede me ocoe daŋ amannono. Ŋat a mom tye kede pala bat cat kanyi mere me wil kede. Pien akobbiwu ni, coc man a nwaŋ ocoo myero cobere kakare i koma, ni, ‘Okwane karacel kede obalo’; pien kop ame ocoo i koma tye a cobere kakare.” Gin okobbe ni, “Rwot, neno, pala bat aryo en, tye kan-ni.” Ogamo ni, “Mano romo.” Yecu okato oko, owoto i wi kidi me Jeituni, acalo kite mere tye; jo a lube owapo yore. Ka otuno i kabedono-no, okobbigi ni, “Kwa wunu Obaŋa, me kur idony wunu i abita.” Opokere kedgi, owoto teŋe a rom i kan a dano twero yuyo iye gweŋ, orumo piny, te kwayo ni, “Pappa, ka imito, kwany ikopo man i koma oko; cite kur bed acalo an amito, ento gin ame yin imito myero timere.” [ Amalaika ame oya i polo te nen baŋe, omie teko. Ame en tye akumo atek meicel, daŋ te medde i kwac atek; omio kwok i kome ocwer adwoŋ, oony piny acalo remo.] Ka doŋ oya i ka kwac me bino baŋ jo a lube, onwoŋogi doŋ onino oko pi wancunygi. Openyogi ni, “Inino wunu pino? Ya wunu, ikwau Obaŋa, me kur idony wunu i abita.” Ame en pwod tye ka kop, lwak jo te pello; ŋat ame olwoŋo ni Juda, ŋat acel i akina jo apar wie aryo ca, en otelo yo. Onoko laŋet Yecu aceggi me emote kun enoto Ieme. Yecu te penye ni, “Juda, iketo erupe i kom Wot a dano kun inoto leme?” Jo ame onwoŋo ceggi kede, ka oneno gin ame amito timere, te penyo ni, “Rwot, otongi oko kede pala bat?” Ŋat acel i akinagi te toŋo opii alamdog adwoŋ, te mworo yite tun cem oko. Yecu te kobo ni, “Wek oko. Kur dok imedi!” Yecu te mulo yite, caŋo oko. Icennere Yecu te kobo baŋ olamdog adoŋo, kede odoŋe cirikale me ot Obaŋa, kede odoŋe ame obino i kome ni, “Ibino wunu i koma i pale romo kede abiriŋ, bala ibino wunu i kom ayak? Nino luŋ rik atye kedwu i ot Obaŋa, mom imaka wunu. Ento amanni en karewu, kede twer me piny acol.” Gin omake, ote tere oko naka i ot alamdog adwoŋ. Petero olubo yore icecen. Ka gin okuto mac i dyekal, gin te bedo piny, ŋinne iye karacel; Petero daŋ obedo i akinagi. Aŋeca moro te nene kun eganakino kan a mac ocaro; te bedo niye atek, te kobo ni, “Jal-li daŋ woki tye karacel kede.” Ento en okwero oko, kun kobo ni, “Dako, an mom aŋeo gira lonnono.” Kare te kato kom anok keken, ŋat ocele te dok nene oko, te kobbe ni, “Yin daŋ i ŋat acel i akinagi.” Petero te gamo ni, “Lo-nie, mom an gira.” A doŋ caa acel okato, dano ocele okobo kun moko atek ni, “Ateni, kom lo-ni woki tye karacel kede; kom en Agalilaya ikome.” Ento Petero ogamo ni, “Loni we, an mom aŋeo kop ame ikobo.” Cuto ame pwod ekobo kop man, twon gweno te mwoco koko. Rwot te lokere neno Petero, Petero te cako po i kom kop a ceŋ Rwot okobbe, ni mano, “Ame mom ru twon gweno okok tin, ibino kwera tyen adek.” Okato oko, okok kun cunye waŋ meicel. Jo ame omako Yecu oŋale, opwode. Otweo waŋe kede itambara, ote penye ni, “Yin adwarpiny do, tuci! Kara ŋa ojwati?” Gin okobo kop ocele apol i kome, kun oyete kede-gu. Ka piny oru, odoŋe me ot Obaŋa ocokere karacel, olamdog adoŋo karacel kede opwony-cik. Gin otere i nyim okiko megi, ote kobo ni, “Ka yin i Kricito, tittiwa.” Cite en okobbigi ni, “Ka atittiwu, mom ibino ye wunu; daŋ ka apenyowu, wun pe ibino wunu dokka iye. Ento cakere amanni, Wot a dano bino bedo piny i kabedo me kwogo i laŋet Twer Obaŋa tuŋ cem.” Gin ducu ogamo ni, “Doŋ yin Wot Obaŋa bo?” En ogamo ni, “Wun ikobo wunu ni an a en.” Gin okobo ni, “Kara dok omito caden me ŋo? Wan doŋ owinyo giwa kede yitwa gin ame en okobo kede doge.” Lwak jo-nu luŋ oya, otere i nyim Pilato. Gin ocako pide kun okobo ni, “Dano man wan onwoŋo kun arwenyo rok mewa oko. Ogeŋowa ni kur ogelli Kaicari ocoro, daŋ-gu lwoŋere kene ni en e Kricito, abaka.” Pilato openye ni, “Yin abaka Ojudaya?” En te gamo ni, “Yin ikobo giri.” Pilato te kobo baŋ olamdog adoŋo kede baŋ lwak ecipan ni, “Mom anwoŋo kopporo arac i kom dano man.” Ento gin odie tetek kun okobo ni, “Lo-nu popoo lwak, pwonyo naka i Judaya luŋ aluŋa, cakere i Galilaya anaka kom kan twal.” Ka Pilato owinyo kop man, openyo ka onyo en dano me Galilaya. Ka doŋ oniaŋ ni en tye i te loc a Kerode, ocwae baŋ Kerode, pien en daŋ onwoŋo tye i Jerucalem i kare-nono. Kerode ka oneno Yecu, oyomoro yie atek meicel, pien yam con onwoŋo paro pi nene, pien yam owinyo pire, dok onwoŋo egeno ni ebino neno anyuttoro a en bino timo. Omio en openyo Yecu kede peny apopol, ento en mom odok iye itik. Olamdog adoŋo kede opwony-cik ocuŋ i laŋete kun opide kede tekogi. Kerode daŋ ocae kede cirikale mere, oŋale, eka te ruke kede boŋo me kwogo, te dwoke kede baŋ Pilato. Omio Kerode gin kede Pilato omer i ceŋŋono, pien nwaŋ otye kede amone i akinagi kengi. Pilato olwoŋo olamdog adoŋo kede oloc kede lwak karacel, te kobbigi ni, “Ikelo wunu dano man baŋa ni en ŋat a rwenyo lwak. An apenye i nyimwu, nenu ba, mom anwoŋo kopporo arac i kome i kom kop luŋ ame ipide wunu iye. Kadi Kerode daŋ mom onwoŋo, pien en dok odwoggo en baŋwa. Nen, en mom otimo ginnoro a romo neke. Pi mano, an abino pwode, ate gonye oko.” [ I kare me ecuban myero ceŋ gonnyigi ŋattoro acel.] Cite gin luŋ ote wo karacel, oredo ni, “Neke oko! Gonnyiwa Baraba!” Baraba nwaŋ en dano ame otweo i buc pi tubo lwak i Jerucalem, kede pi nek. Pilato dok okobo kedgi, kun mito ni egony Yecu, cite gin owo kun oredo ni, “Gure i kom yataria! Gure i kom yataria!” En dok openyogi tyen me adek ni, “Piŋo kara? Gin aŋo arac ame otimo? An mom anwoŋo kopporo arac i kome a romo neke. Pi mano, abino pwode, ate gonye oko.” Ento gin oredo kede dwon aloŋo kun odie ni myero gure i kom yataria, dwongi te loyo; omio Pilato oŋolo kop ni myero time acalo gin okwao. Ogonyo dano ame nwaŋ otweo i buc pi tubo lwak kede pi nek; ento ojalo Yecu me time kite a gin omito. Ame otye ka tere, omako Cimon, dano me Kurene, ame onwoŋo abino kun oya i myere, oyimo yataria i wi gwoke, wek eye, elub i Yecu. Lwak jo ecipan olube, kede mon apol, ame okumo kun okoke. Yecu olokere tuŋ baŋgi, okobo ni, “Anyira me Jerucalem, kur ikoku pira; kok wunu pirwu kenwu kede pi itinowu. Pien, nen, kare bino tuno ame obino kobo iye ni, ‘Otye kede winyo, mon ame oraŋa, kede ot nyodo a mom onywal, kede tuno ame mom odoto!’ I kare-nono obino ero kobbi kiddi adoŋo ni, ‘Rette wunu i komwa’; kede baŋ kiddi atino ni, ‘Wumwa wunu’. Pien ka jo timo man ame yat pwod dyaka, bino bedo nino ka yat doŋ otyeko two?” Jo aryo ocele a nwaŋ gin otim areco daŋ oterogi me nekgi karacel kede. Ka gin otuno i kabedo ame olwoŋo Cogo Wic, ogure i kom yataria kuno, kede otim areco, ŋat acel tuŋ cem, ŋat acel tuŋ cam. Yecu okobo ni, “Pappa, timgi ber, pien gin mom oŋeo gin a gin atimmo.” Gin opoko boŋŋi mere oko i akinagi kun obolo iye kwir. Lwak ocuŋ kun oneno, cite oloc oŋale, kun okobo ni, “Yam laro jo ocele; koŋ larre kene, ka en Kricito Obaŋa ame eyero!” Cirikale daŋ oŋale; gin obino baŋe, omie koŋo awac, kun okobo ni, “Ka yin Abaka Ojudaya, larre keni!” I waraga ame oguro tuŋ wie ocoo ni, “Man en Abaka Ojudaya.” Ŋat acel i akina otim areco ame ogurogi karacel kede oyete kun kobo ni, “Yin mom i Kricito bo? Larre keni, kede wan daŋe!” Ento dano ocele ca te juke, kun kobo ni, “Yin mom ilworo Obaŋa, a kun oŋolli kop a rom aroma i mere? Wan giwa oŋolliwa kop kakare, pien oculliwa a rom i gin a wan otimo; cite dano man mom otimo gin arac kadi acelloro.” Te kobo ni, “Yecu, po i koma ka ituno i locci.” Odokke iye ni, “Ateni akobbi ni, tin ibino bedo keda i Paradic.” Caa onwoŋo doŋ mito romo abicel, piny te doko col i wi lobo luŋ, tuno anaka i caa aboŋwen. Onwoŋo waŋ ceŋ owumere oko; boŋo icika me ot Obaŋa oyec oko dul aryo. Yecu oredo i dwon aloŋo, okobo ni, “Pappa, amio cunya i ciŋi.” Ka doŋ okobo kop man, te to oko. Ka adwoŋ me cirikale oneno gin ame otimere, opako Obaŋa kun kobo ni, “Ateni, ba, dano man kara dano ame kite atir!” Lwak luŋ ame ocokere ka neno, ka oneno gin ame otimere, odok paco kun obapo korgi. Owote mere ducu ocuŋ i teŋe, kede mon daŋ a nwaŋ obino kede kun oya i Galilaya, kun oneno anena. Onwoŋo cen tye lo moro a nyiŋe Yucepu; en daŋ rik dano acel i akina jo a bedo i kancil, en dano aber, ame kite atira. Nwaŋ mom onotte kedgi i tamgi anaka i timgi. Turgi paco Ojudaya ame olwoŋo Arimataya; daŋ en kuro loc Obaŋa. En owoto baŋ Pilato, okwao kom Yecu, ogweto i kom yat, te boyo kede cuka me camanini, te pyele iyi lyel ame oboro abora i lela; kannono onwoŋo pe ru opyelo iye kom ŋattoro oto. Rik onwoŋo nino me Yikere, cabit daŋ onwoŋo ceggi cakere. Mon a rik obino kede kun oya i Galilaya owapo yorgi, gin te neno lyellere, kede kite ame opyelo kede kome; eka gin ote dok paco, oyiko gin a ŋwece kur kede moo wir. I cabit gin ote weo, acalo cik tye. I nino ame lubo cabit Ojudaya gin odilo ka ibayi, obino i wi lyel kun okelo gin a ŋwece kur ame gin oyiko. Gin ote nwoŋo ni ocoro kidi oko i dog lyel; cite ka gin odonyo iye, pe onwoŋo kom Rwot Yecu. Ka pwod tamgi ocuŋ pi kop man, cucuttono gin oneno co aryo ocuŋ i laŋetgi, ame orukere i boŋŋi a mimila. Lworo omakogi meicel, ote ryebere piny. Co-nu te penyogi ni, “Kara piŋo iyenyo wunu dano akwo iyi akina a jo oto? [En mom tye kan, ocer oko.] Po wunu i kop a rik en okobbiwu ka pwod tye i Galilaya, ni mano, Wot a dano myero mie i ciŋ jo ame obalo, daŋ myero gure i kom yataria, i nino me adekkere myero en cer oko.” Gin ka opoyo koppere, oya oko i lyel, odok cen, orabo kop-pi ducu baŋ jo apar wie acel ca, kede baŋ jo ocele luŋ. Jo a rik orabo kop-pi baŋ okwena onwoŋo Maliam me Magdala, kede Yoanna, kede Maliam tota a Yakobo, kede mon ocele ame onwoŋo tye kedgi; cite kop a gin okobo owinyere bala kop atata i tuŋ baŋ jo-nono, gin mom oye gigi. [ Ento Petero oya, oriŋo i wi lyel; ka oguŋo, oŋio yi lyel, oneno boŋŋi me camanini odoŋ kakare, odok paco kun wuro gin man ame otimere-ni.] I nino acel-lu, jo mogo aryo i akinagi onwoŋo owot i paco ame olwoŋo ni Emau, ame mito romo mairo abiro ya i Jerucalem; onwoŋo gin otye ka kop kengi kengi i kom gin a doŋ otimere. Ame otye ka kop, kun olaro kop karacel, Yecu onokogi a ceggi, owoto kedgi. Cite waŋgi owumere oko, mom oŋee. Openyogi ni, “Kara kop ŋo ame ilaro wunu kenwu kenwu wi cuŋocuŋo-ni?” Gin ocuŋ kun waŋgi nen myemye. Ŋat acel i akinagi, nyiŋe Kelopa, ogamo koppere ni, “Yin i welo keni i Jerucalem, ame mom iŋeo gin otimere iye i kare man-ni?” En openyogi ni, “Ŋo-no?” Ote gamo ni, “Kop i kom Yecu me Najaret, a ceŋ obedo adwarpiny atek i koppere kede ticcere i nyim Obaŋa kede i nyim jo luŋ. Olamdog adoŋo kede olocwa oŋolle kop me to, ote gure i kom yataria. Aco onwoŋo wan yam ogeno ni en ame bino lakoro jo Icrael. Dok medo i kom mano ducu, tin doŋ nino me adekkere, geye a mannono otimere. Cite monnogo i akinawa ocuŋo wi wa oko, pien gin odilo i wi lyel odiko con, naka mom onwoŋo kome. Gin odwogo cen kun okobo ni, omalaika onyutte baŋgi acalo lek, kun kobbigi ni, en gire kwo. Jo ocele onwoŋo tye karacel kedwa, gin daŋ owoto i wi lyel, ote nwoŋo tye kit acalo mon okobo-nono, ento mom onene.” En te kobbigi ni, “Wun omiŋo, dok owackom i cunywu pi gal ye kop ducu a rik odwarpiny okobo! Nwaŋ mom myero Kricito koŋ kany can magi, ete donyo i kwogo mere?” Te doŋ niaŋogi i coc a rik ocoo i kome luŋ, geye i kom Muca naka odwarpiny ducu. Ka gin onoko ŋet paco a cen gin owot iye-ni, en te nen bala akato akata i wottere i nyim. Cite gin odie meicel kun okobo ni, “Bed kedwa, pien piny doŋ ceggi i yuto, ceŋ daŋ doŋ ceggi poto.” Omio en odonyo i ot, obedo kedgi. Ka en tye i dog cem karacel kedgi, omako ogati okwao winyo iye, onyinyilo, omiogi. Waŋgi te yabere, ote ŋeye oko; dok daŋ te rwenyo oko i waŋgi. Gin openyere kengi kengi ni, “Cunywa woki mom opupuka ame en akop kedwa i waŋa yo, kun oyabbiwa coc a rik ocoo?” Gin oya i caa-nono, odok i Jerucalem. Gin onwoŋo jo apar wie acel ca ocokere karacel, kede jo onwoŋo tye baŋgi. Jonono te tittigi ni, “Rwot ocer ateteni, onyutte baŋ Cimon!” Gin daŋ ote tito gin otimere i waŋayo, kede kite ame gin oŋee kede i kare ame onyinyilo ogati. Ka pwod gin otye akobo kop man, Yecu ikome ocuŋ i akinagi, [okobbigi ni, “Kuc obed baŋwu!”] Komgi oto tido, gin olworo kun otamo ni oneno tipo. Openyogi ni, “Ŋo omio cunywu opoto? Piŋo ipenyere wunu kenwu kenwu i cunywu? Koŋ inenu ciŋa i tyena gie, man an ikoma. Mula wunu, inena wunu, pien tipo mom tye kede kom, anaka cogo, i kite acalo ineno wunu an atye kedeni.” [ A doŋ okobo kop man, te nyuttigi ciŋe kede tyene.] A kun mom ru gin oye pi yomcunygi, kun owuro, okobbigi ni, “Itye wunu kede ginnoro me acama kan?” Gin omie nucu rec ame obulo, en ogamo, ocamo i nyimgi. Icennere te kobbigi ni, “Mano koppa a ceŋ akobbiwu ame pwod atye kedwu, ni mano, kop luŋ ame ocoo i koma i cik a Muca kede i kop odwarpiny, kede ijabuli myero cobere kakare.” Oyabo tamgi me gin oniaŋ coc a rik ocoo, kun okobbigi ni, “Rik ocoo ni mano, Kricito myero koŋ kany can, eka i nino me adek myero cer oko iyi akina jo oto, dok ni, myero rab kop i nyiŋe i kom ŋut kede weko bal baŋ rok ducu, geye i Jerucalem. Wun giwu ocaden me kop magi. Nen, abino cwayo gin ame Pappa ocikere me miyowu; bed wunu i Jerucalem ituno ka orukowu kede teko ame oya i malo.” Icennere te terogi oko ituno naka Betania, otiŋo ciŋe malo, olamo winyo i komgi. Ka pwod alamo winyo i komgi, opokere oko i baŋgi, otiŋe, otere malo i polo. Gin owore, eka ote dwogo i Jerucalem kede lelo adwoŋ, orio i ot Obaŋa dikdik kun opwoo Obaŋa. I agege onwoŋo tye Kop. Kop onwoŋo tye baŋ Obaŋa. Kop rik en Obaŋa. I agege en obedo baŋ Obaŋa. Jami ducu rik ocako bedo tye pire; mom tye ginnoro ame ocako bedo tye aboŋo eno Kwo rik tye baŋe, kwo rik obedo ceŋ baŋ jo. Ceŋ tye aryeny i piny acol, piny acol pe owumo. Rik tye dano ame Obaŋa ooro, nyiŋe Lakana. En rik obino pi bedo caden, wek etit kop i kom ceŋ, me jo luŋ ye Obaŋa pi koppere. En rik mom ceŋ ikome, ento obino me bedo caden pi ceŋ. Ceŋ me ateni ame menyo jo luŋ onwoŋo tye abino i lobo. En con obedo i lobo, lobo ocako bedo tye pire, ento jo i lobo mom oŋee. Rik en obino i pa co mere, jo mere mom ogame. Jo ducu a nwaŋ ogame, kun oye nyiŋe, en omiogi twer me doko otino Obaŋa, kun mom onywalogi kede remo, kadi i mit me kom, onyo i mit a dano, ento pi twer Obaŋa. Kop rik olokere odoko dano, obedo i akinawa. Wan oneno kwogo mere, ame rom kede kwogo atin acel kene ame oya i baŋ Obaŋa Papo; kica kede ateni ceŋ opoŋ baŋe. Lakana otito pire, oredo ni, “Man en dano ame rik akobo kop i kome ni, ‘Tye dano ame alubo ŋea, en dit kata, pien yam en okwoŋo nyima con.’ ” Wan ducu omeddiwa kica i kom kica, ame oya i lonyo mere apol. Pien cik nwaŋ omio kun bea baŋ Muca, ento kica kede ateni Yecu Kricito en okelo. Mom tye ŋattoro a yam koŋ oneno Obaŋa, kono Wod acel keken ame bedo i kor Obaŋa Papo, en ame onyutti jo Obaŋa. Man en kop me caden ame Lakana otito, ka jo Judaya rik ooro olamdog kede jo Levi ame oya i Jerucalem pi penye ni, “Yin i ŋa?” En otuco kannaler, mom okwero, otuco ni, “An gira mom a Kricito.” Dok ote penye ni, “Kara yin i ŋa? Yin Elia bo?” Ogamo ni, “Aa, pe.” “Onyo yin adwarpiny ca bo?” En ogamo ni, “Pe gire.” Dok onwoo penye ni, “Yin i ŋa? Wek odwok kop baŋ jo ame oorowa. Kara ilwoŋere keni ni yin i ŋa?” Ogamo ni, “An dwon dano a redo i tim ni, ‘Tir wunu yo a Rwot,’ acalo adwarpiny Icaya rik okobo.” Jo ame ooro, mogo nwaŋ obedo Oparicayo. Gin openye ni, “Ibatija jo piŋo, ka yin mom i Kricito, kadi Elia onyo adwarpiny-nyu?” Lakana ogamo doggi ni, “An abato jo kede pii, ento tye dano moro ame ocuŋ i akinawu, ame pe iŋeo wunu. En ŋat ame alubo ŋea, an mom aromo gonyo waro mere.” Mannono ducu otimere i Betania loka kulo Jordan, kan ame onwoŋo Lakana batija jo iye. Orwo mere Lakana oneno Yecu kun abino baŋe, te kobo ni, “Neno wunu Atin-romo Obaŋa ame kwanyo bal me lobo. Man dano a rik akobo pire ni, ‘Tye ŋattoro ame alubo ŋea, en dit kata, pien yam en okwoŋo nyima con.’ An daŋ yam pe aŋee; ento gin omio an abino kun abatija jo kede pii, me nyute baŋ jo Icrael.” Lakana omio kop me caden kun kobo ni, “Rik aneno Cuny Acil acalo amam, olyao piny kun ya i polo, opoto i kome, obedo kede. An daŋ yam mom aŋee; ento ŋat ame oora me batija jo kede pii okobba ni, ‘Ŋattoro ame ibino neno Cuny Acil ame olyao, opoto i kome, te bedo kede, mano en ŋat ame bino batija jo kede Cuny Acil.’ Daŋ rik aneno dok amio kop me caden kannaler ni, ‘Man en Wot Obaŋa.’ ” Orwo ocele Lakana dok ocuŋ kede jo aryo ame i akina jo mere a lube. En oneno Yecu ka woto, te kobo ni, “Neno wunu Atin-romo Obaŋa.” Olubbe aryo-nu owinyo ka en kobo kop man, ote wapo yo Yecu. Yecu olokere onenogi owapo yore, te penyogi ni, “Iyenyo wunu ŋo?” Gin ogamo kun openye ni, “Rabbi”, (ame te koppere ni, Apwony) ibedo kwene kara? Yecu okobbigi ni, “Biye inen wunu.” Gin obino, oneno kan a en bedo iye, ote rio baŋe i ceŋnono, pien onwoŋo caa tomon ceggi romo. Anderiya omin a Cimon Petero rik en dano acel i akina jo aryo ame gin owinyo gin a Lakana okobo, ote wapo yo Yecu. En ogeo yenyo ominnere Cimon, okobbe ni, “Wan otyeko nwoŋo Maciya” (ame te koppere ni, Kricito). Okele baŋ Yecu, Yecu daŋ te nene, te kobbe ni, “Yin i Cimon wot a Lakana; obino lwoŋi ni Kepa” (ame te koppere ni, Petero ). Orwo mere Yecu omito wot i Galilaya. En onwoŋo Pilipo okobbe ni, “Luba.” Pilipo rik en dano me Betecaida; en paco acel-Iu Anderiya kede Petero daŋ bedo iye. Pilipo dok te nwoŋo Nacaneri, okobbe ni, “Otyeko nwoŋo dano ame rik Muca ocoo pire i cik, kede odwarpiny daŋ, en Yecu me Najaret, wot a Yucepu.” Nacaneri openye ni, “Gin aber twero ya i Najaret daŋ?” Pilipo okobbe ni, “Koŋ ibiye inen.” Ka Yecu oneno Nacaneri kun abino baŋe, okobo kop i kome ni, “Nen dano me Icrael me ateni, ame goba pe i yie.” Nacaneri openye ni, “Iŋea niŋo?” Yecu okobbe ni, “Ame Pilipo pe ru olwoŋi, kun pwod itye i te oduro, onwoŋo doŋ aneni oko.” Nacaneri ogamo doge ni, “Rabbi, yin i Wot Obaŋa! Yin Abaka a jo Icrael!” Yecu odokke iye ni, “Yin iye pi kop ame akobbi ni, ‘Aneni i te oduro?’ Ibino neno gigi mogo adito akato man,” Dok omedde kobbe ni, “Ateni akobbiwu ni ibino neno wunu polo kun oyabere, kun omalaika Obaŋa yito malo dok oluŋere piny i kom Wot a dano.” I nino me adek nyom rik obedo i Kana me Galilaya; toto a Yecu onwoŋo daŋ tye kuno. Yecu kede jo mere a lube daŋ onwoŋo olwonogi i nyommaca. Ka koŋo otum, tota a Yecu okobbe ni, “Koŋogi doŋ mom.” Yecu ogamo ni, “Imat, kara alaro ŋo wan kedi? Caana mom ru oromo.” Tottere otitti otic ni, “Tim wunu gin luŋ ame en bino kobbiwu.” Onwoŋo rik tye kuno abinni pii me gweŋ gin abicel, ame ocibo pi kite me lonyere a jo Judaya; i abino pii acel twero ya iye gulli abic, aŋar abicel. Yecu okobbigi ni, “Onyu pii i abinni.” Ote onyo poŋ ibic. Dok okobbigi ni, “Twomu, teru baŋ adwoŋ me nyom;” gin te tero. Ka adwoŋ me nyom obilo pii ame olokere odoko koŋo, onwoŋo mom ŋeo kan oya iye, ento otic otwomo pii gin onwoŋo ŋeo. Adwoŋ me nyom ocwano anyom, okobbe ni, “Gin a dano ducu timo, okwoŋo miyo jo kono amit, ka jo omato oromogi, ote kelo en a mom mittere wok; ento yin ikano koŋo aberrere tuno naka koni.” Man en anyut me agege ame Yecu otio i Kana me Galilaya, kun nyuto kede kwogo mere; jo mere a lube oye en. Icennere Yecu owoto i Kapernaum, gin kede tottere kede omego mere, naka jo mere a lube, ote ri kuno kare anok. Ecuban me Kato Ojudaya onwoŋo onoko ceggi, en omio Yecu owoto i Jerucalem, te nwoŋo jo ame acato twoni kede rommi kede amam i ot Obaŋa, kede jo obedo piny aloko cente. Yecu okedo tol aka del, te kotogi ducu i ot Obaŋa, karacel kede rommi kede twoni, te ketto lim a jo aloko cente oko, oloko mejagi aryeba. Okobbi jo a cato amam ni, “Cwa wunu jami magi teŋe; kur iloku ot a Pappa dok ot me cato wil.” Jo mere a lube opo i kop a rik ocoo ni, “Akemo bino maka pi lit a odi.” Ojudaya openye ni, “Anyuttene a yin inyuttiwa omio itimo jami magi?” Yecu ogamo doggi ni, “Ket wunu ot Obaŋa man oko, an abino gero nino adek.” Ojudaya ogamo doge ni, “Ot Obaŋa-ni ogero mwakki pyeraŋwen wie abicel twal, kom yin ibino gero nino adek keken?” En onwoŋo okobo pi ot Obaŋa me kome. Ka doŋ ocere i akina a jo oto, jo mere a lube opo ni kop man yam Yecu okobo; gin te ye coc a yam ocoo, kede kop ame rik Yecu okobo. Ka onwoŋo en tye i Jerucalem i ecuban me Kato, jo apol oye nyiŋe pi neno anyuttogo ame en bedo timo. Aco Yecu mom obedo kede gen i komgi, pien en yam ŋeo jo luŋ, pe mito ni ŋattoro bed rabo kop me kom dano moro baŋe, pien en ikome ŋeo tam a tye i yi dano. Rik tye ŋattoro i akina Oparicayo nyiŋe Nekodem, en dano acel i akina jo adoŋo me Judaya. En rik obino baŋ Yecu dyewor, okobbe ni, “Rabbi, wan oŋeo ni yin apwony ame iya i baŋ Obaŋa; pien mom tye lo moro ame twero tiyo anyut magi ame yin itio ka ce Obaŋa mom tye kede.” Yecu okobbe ni, “Ateteni akobbi ni, ka dano pe onywalo tyen me aryo, mom twero neno loc Obaŋa.” Nikodem openye ni, “Dano twero nywalle niŋo ka doŋ oti oko? Twero dok i yi tottere tyen me aryo, ka dok ote nywale?” Yecu ogamo doge ni, “Ateteni akobbi ni, ka dano pe onywalo kede pii kede Cuny Acil, mom twero donyo i loc Obaŋa. Gin ame onywalo kede kom en kom, ame onywalo kede Cuny en cuny. Kur iwur pien akobbi ni, ‘Myero nywalwu tyen me aryo.’ Yamo kodo kan a en amito, iwinyo ŋurrere, ento mom iŋeo kan ame oya iye, kadi kan ame akodo adok iye; dano acel acel ame onywalo kede Cuny tye amannono.” Nekodem openye ni, “Man twero timere niŋo?” Yecu ogamo ni, “Yin apwony me Icrael twal, mom iniaŋ i kop man? Ateteni akobbi ni, wan okobo i kom gin a wan oŋeo, obedo caden i kom gin a doŋ oneno, ento wun mom ijolo wunu kop ame wan otittiwu. Ka atittiwu kop me lobo, mom iye wunu, ibino ye wunu niŋo ka atittiwu kop me polo? Mom tye dano moro ame yam koŋ oyito i polo, kono en ame rik oyitto piny kun oya i polo, en Wot a dano, ame bedo i polo. Kit acalo Muca nwaŋ otiŋo twol malo i tim, Wot a dano daŋ myero tiŋe malo amannono me dano acel acel ame ye en nwoŋ kwo a perakino nakanaka.” Pien Obaŋa rik omaro lobo amannono, omio Wode acel keken, me dano acel acel ame ye en kur rweny odoco, ento bed kede kwo a perakino nakanaka. Obaŋa nwaŋ mom ooro Wode i lobo me ŋol kop loo lobo, ento me lobo larre pire. Dano ame ye en mom obino ŋolle kop, ento dano a mom ye en doŋoŋolo kop oloe oko con; pien mom oye nyiŋ Wot Obaŋa acel keken. Ŋolo kop tye ni aman, ceŋ rik obino i lobo, ento jo omaro piny acol akato ceŋ, pien ticgi reco. Pien dano acel acel a rio tiyo gin arac dag ceŋ, mom bino i ceŋ, me kur nyut ticcere kannaler. Ento dano ame tio tic me ateni bino i ceŋ, me ticcere nen kannaler, ni etio i Obaŋa. Icennere Yecu kede jo mere a lube owoto i lobo Judaya; obedo kedgi kun bato jo. Lakana daŋ onwoŋo tye a batakino jo i Ainon, ceggi kede Calim, pien pii rik dwoŋ kuno, jo obino, obatijagi iye. Onwoŋo mom ru otweo Lakana i buc. Pyem obedo i akina jo a lubo Lakana kede dano moro me Judaya i kom kop me lonyere. Gin obino baŋ Lakana ote kobbe ni, “Rabbi, lo a nwaŋ itye kede loka Jordan, ame rik ikobo kop me caden i kome ca, nen ba, en tye abatija jo, jo luŋ woto baŋe.” Lakana ogamo ni, “Dano mom twero nwoŋo ginnoro ka mom omie iya i polo. Wun ikomwu ibedo wunu cadenna, pien yam atittiwu ni, ‘An mom a Kricito gira, ento oora ageo nyime.’ Lo a cuŋ i ŋet nyako en anyom; dyere anyom ame cuŋ i laŋete kun winye, lelo meicel pi winyo dwon anyom; pi mano an cunya yom gira kakare. En myero medde, an myero ajwik ajwika.” Dano ame oya i malo en loo ducu; dano oya i lobo en dano me lobo, kobo kop me lobo; dano ame oya i polo, en loo ducu. En bedo caden pi gin ame eneno kede pi gin a en owinyo, ento mom tye dano moro ame oye kop a en otito. Dano ame oye koppere nwoŋo doŋ omoko ni Obaŋa en won ateni. Dano ame Obaŋa ooro kobo kop Obaŋa, pien Obaŋa mom mio Cuny Acil kun pimo apima. Papo maro Wod, otyeko miyo jami luŋ aluŋa i ciŋe. Dano ame ye Wod, tye kede kwo a perakino nakanaka; dano a mom woro Wod, mom bino neno kwo, ento akemo Obaŋa tye i kome. Oparicayo daŋ owinyo ni Yecu tye ka loko jo apol me doko jo a lube, kede batijagi ame kato Lakana oko; aco kono Yecu ikome mom obatija ŋattoro, jo a lube keken en obatija jo. Ka Yecu oŋeo ni Oparicayo owinyo, en oweko lobo Judaya, te dok i Galilaya. Rik myero en ŋolle i lobo me Camaria. En rik te tuno i paco moro me Camaria ame nyiŋe Cukar, ceggi kede poto a rik Yakobo mii wode Yucepu. Akoŋ a Yakobo rik tye kuno, Wottere-nu rik oole meicel, omio Yecu obedo piny i ŋet akoŋ; onwoŋo caa doŋ oromo abicel. Dako moro me Camaria nwaŋ te bino ka twomo pii. Yecu te kwaye ni, “Mia pii moro, amati.” Pien onwoŋo jo a lube owoto wilo cam i paco-nono. Dako me Camaria te penye ni, “Yin dano me Judaya ikwao pii amata baŋa piŋo, ame an a dako me Camaria?” Pien Ojudaya mom mer kede jo Camaria. Yecu ogamo kop a dako ni, “Kono ce iŋeo mot ame Obaŋa mio, kun daŋ iniaŋ i kom dano ame akwayi ni, ‘Mia pii, amat’ ti, kono ikwae, kono en omii pii me kwo.” Dako ogamo ni, “Adwoŋ, yin mom itye i gitwomo, akoŋ daŋ tut; kara inwoŋo pii me kwo-nono kwene? Yin idwoŋ ikato kwarowa Yakobo? En rik omiowa akoŋ man, en ikome yam mato pii man, karacel kede itino mere kede dokkere.” Yecu ogamo doge ni, “Dano ame mato pii man, oryo pwod bino neke, ento ŋat ame bino mato pii ame an abino miye, oryo mom dok bino neke nino ducu. Pii ame an abino miye bino lokere doko akoŋ ame kukunya i yie, tuno naka i kwo a perakino odoco.” Dako okwae ni, “Adwoŋ, mia piinono, me oryo kur dok neka, awek bino kan ka twomo pii.” Yecu okobbe ni, “Wot icwan cwari, ite dwogo kan.” Dako odok iye ni, “An cwara mom.” Yecu okobbi dako ni, “Yin ikobo kakare ni cwari mom. Aco kono rik cogi tye abic, man ame itye kede-ni mom cwari, ikobo kakare.” Dako okobbe ni, “Adwoŋ, aneni yin adwarpiny giri. Kwariwa nwaŋ woro Obaŋa i wi kidi man, ento wun ikobo wunu ni kabedo a myero wor iye Obaŋa tye i Jerucalem.” Yecu ogamo dog dako ni, “Dako, ye an; kare bino romo ame mom ibino wunu woro Obaŋa Papo i wi kidi man, kadi i Jerucalem. Wun iworo wunu gin ame ikwia wunu, wan oworo gin a wan oŋeo, pien larre ocakere i baŋ Ojudaya. Ento kare bino romo, daŋ doŋ otuno oko, ame ka jo ame woro Obaŋa i ateni, gin bino woro Papo i cuny kede ateni, pien Papo yenyo jo a cal amannono me wore. Obaŋa en cuny, jo ame wore myero wore i cuny kede ateni.” Dako okobbe ni, “An aŋeo ni Maciya ceŋŋoro bino (ame olwoŋo ni, Kricito): ka ceŋŋoro en otuno, bino nyuttiwa kop luŋ.” Yecu odokke iye ni, “An en a kop kedi-nono.” Cucuttono jo mere a lube te bino. Gin owuro pien onwoŋo en tye a kop gin i dako, ento mom tye ŋattoro openye ni, “Imito ŋo?” onyo ni, “Ikop kede pino?” Dako oweko gulu pii mere, owoto paco, te kobbi jo ni, “Biye inen wunu ico moro ame okobba gin a yam atimo ducu. Mom onyo ca en Krici to ennono?” Jo obelle i paco, obino baŋe. I akina-nono jo a lube obako doggi baŋe ni, “Rabbi, cem ba.” En okobbigi ni, “An atye kede cem ame wun ikwia wunu.” Omio jo a lube openyere kengi kengi ni, “Tye dano moro a ŋit okelle cam ba?” Yecu okobbigi ni, “Cam mera en me tiyo mit a ŋat oora, kede cobo ticcere. Wun mom ikobo wunu ni, ‘Odoŋ dwete aŋwen me cako kac?’ Akobbiwu ni, ‘Tiŋ waŋwu malo, nen wunu kit ame potti obok kede ma akaa. Ŋat a kao nwoŋo ocara, coko nyige pi kwo a perakino nakanaka, me acoc kede akac lel karacel.’ Pien carokop i kan-ni tye kakare, ni, ‘Ŋat a coo pat, ŋat a kao daŋ pat.’ Rik aorowu me kayo gin ame wun mom icanne wunu iye; jo ocele en ocanne iye, wun idonyo wunu i cannegi.” Jo Camaria apol i paco-nono te ye Yecu pi kop ame dako okobo ni “Okobba gin a yam atimo luŋ.” Ka jo Camaria obino baŋe, gin okwae ni myero koŋ bed kedgi; orio kuno nino aryo. Jo ocele apol oye koppere. Gin okobo baŋ dako ni “Koni doŋ wan mom oye pi koppi: pien wan ikomwa doŋ owinyo kede yitwa, otyeko niaŋ ateni ni, dano-ni en Alar me lobo.” Ka nino aryo-nu okato, Yecu owoto i Galilaya. Pien en ikome otuco ni, “Adwarpiny mom oworo i lobo me turgi.” Ka obino i Galilaya, jo Galilaya ojole, pien gin oneno gin ducu ame en otio i Jerucalem i kare me ecuban, pien gin daŋ rik owoto i ecuban. En dok te dwogo i Kana me Galilaya, kan ame rik eloko pii odoko koŋo iye. Rik tye aticcoro adit me tun abaka ame onwoŋo wode two i Kapernaum. Ka en owinyo ni Yecu oya oko i Judaya, obino i Galilaya, owoto okwae ni bin caŋ wode, pien onwoŋo doŋ ceggi to. Yecu odokke iye ni, “Ka mom ineno wunu anyuttogo kede taŋo, mom ibino ye wunu an kadi atidi moro.” Atic okobbe ni, “Adwoŋ, tun ame atinna mom ru oto.” Yecu okobbe ni, “Woti; wodi bino kwo.” Dano-nu oye kop ame Yecu okobbe, te wot oko. Ame en pwod tye i wottere iyo, orwatte kede omiro mere, ame te kobbe ni, “Atinni kwo.” En openyogi caa ame two a wode ocako dok iye cen. Gin ogamo ni, “Lyeto oya i kome aworo caa abiro.” Pappere oniaŋ ni mano en caa a rik Yecu okobbe iye ni, “Wodi bino kwo”; omio en kede ode ducu oye Yecu. Man doŋ anyut me aryo ame Yecu otimo ka oya i Judaya, obino i Galilaya. Icennere Yecu owoto i Jerucalem i ecuban Ojudaya ame onwoŋo tye i kare-nono. I laŋet dogcel romi i Jerucalem tye kut ame olwoŋo i dog Eburania ni, Beteceda, ame tye iye gaŋo abic. Onwoŋo lwak otwo apol buto kuno, otowaŋ, jo oŋwalo kede jo ame two okweo komgi, [ame okuro tagere a pii. Pien kare i kare amalaika a Rwot bino i kut, rubo pii. Ŋat okwoŋo lutte i pii ame orubo, kit two ame yam tye i kome luŋ caŋ oko.] Kuno onwoŋo tye iye dano moro acel ame two mere ori kome mwakki pyeradek wie aboro. Ka Yecu onene kun obuto, dok oŋeo ni en doŋ operakino kuno pi kare alac, openye ni, “Imito yotkom?” Atwo odok iye ni, “Adwoŋ, mom atye kede ŋattoro a luta i kut ka pii orubere. Ka atye ka komo iye, ŋat ocele kwoŋo ya, pye oko i nyima.” Yecu ogamo ni, “Ya malo, ikwany gi-butoni, iwoti.” Cucut dano-nu ocaŋ; okwanyo gi-buto mere te ero wot. Nino-nu onwoŋo ceŋ cabit, omio Ojudaya okobbi dano ame ocaŋo ni, “Tin ceŋ cabit, cik pe ye ni itiŋ gibutoni.” En ogamo doggi ni, ŋat ocaŋa okobba ni, “Kwany gi-butoni, iwoti.” Gin te penye ni, “Mano ŋa okobbi ni, ‘Kwany gi-butoni, iwot’ tono?” Ento lo ocano-nono onwoŋo mom ŋeo ŋat ocaŋe. Yecu onwoŋo owoto gire oko, pien jo onwoŋo opoŋ kuno. Icennere Yecu onwoŋe i ot Obaŋa te kobbe ni, “Nen, komi doŋ yot. Kur dok ibal, me gin arac akato mannono mom dok pot i komi.” Danonu owoto orabo baŋ Ojudaya ni, “Yecu en ocaŋa gira.” Gin omio Ojudaya olibo Yecu, pien ocaŋo danonono i ceŋ cabit. Ento Yecu odokkigi iye ni, “Pappa tye atic tuno naka tin, an daŋ atye atic.” En gin omio Ojudaya omedde yenyo yo me neke, mom pi turo cik me cabit keken, ento pien dok olwoŋo Obaŋa ni pappere, kun kette kene ni erom kede Obaŋa. Yecu okobbigi ni, “Ateteni akobbiwu ni, Wod mom twero tiyo ginnoro pire kene, ento tio gin ame en oneno i baŋ Obaŋa Papo; pien gin ame en tio, en gin ame Wod daŋ tio. Papo maro Wod, nyutte gin ducu ame etio; dok bino nyutte tic adito akato magi, me iwur wunu. Pien acalo Papo cero jo oto, miogi kwo, amannono Wod daŋ mio kwo baŋ jo a yie mito. Papo mom ŋolo kop i kom dano moro, ento otyeko miyo ŋolo kop luŋ baŋ Wod, me jo ducu ket kwogo i kom Wod, acalo oketo i kom Papo. Dano a mom keto kwogo i kom Wod, mom keto kwogo i kom Papo ame oore. Ateteni akobbiwu ni, dano ame winyo koppa, kun ye ŋat ame oora, tye kede kwo a perakino nakanaka; mom obino ŋolle kop, ento doŋ oya i to, otuno i kwo. “Ateteni akobbiwu ni, kare bino romo, daŋ doŋ otuno oko, ame jo oto bino winyo dwon Wot Obaŋa; jo owinyo bino kwo. Pien acalo Papo tye kede kwo i yie kene, amannono daŋ oye Wod obed i kwo i yie kene, dok omie twer me ŋolo kop, pien en Wod a dano. Kur iwur wunu kop man, pien kare bino tuno ame jo ducu a tye i lyel bino winyo dwone, gin bino donyo oko. Jo a rik otimo gin abeco gin bino donyo i cer me kwo, jo a rik otimo gin areco gin bino donyo i cer me ŋolo kop. “An mom atwero timo ginnoro pira kena; aŋolo kop acalo awinyo; kop ame aŋolo tye atira, pien mom amito tiyo gin ame an amito, ento gin ame ŋat oora mito. Ka arabo kop i koma kena, koppa mom bedo me ateni. Tye ŋat ocele ame en caden mera; aŋeo ni kop ame en tito i koma kop ateni. Wun rik ioro wunu kwena baŋ Lakana, en orabbiwu kop ateni me caden. An mom agamo kop me caden i baŋ dano, atittiwu kop magi me ilarre wunu. En rik tara ame ocwinyo, alyel, nwaŋ imito wunu lelo pi kare anok i lero mere. Ento atye kede kop me caden a pire dit kato mea Lakana oko; pien Papo omia tic me acoba, tic ame atye ka tiyogi-nono, gin ikomgi bedo cadenna, ni Papo ame oora. Doki Papo a nwaŋ oora, en ikome obedo cadenna. Wun rik mom iwinyo wunu dwone, mom ru ineno wunu callere; pe ru ibedo wunu kede koppere i yiwu, pien mom iye wunu ŋat ame ooro. Ibedo yenyo wunu coc a yam ocoo, pien itamo wunu ni, i coccono itye wunu kede kwo a perakino nakanaka. Aco kono coccono daŋ cadenna, tito kop i koma; ento ikwero wunu bino baŋa me inwoŋ wunu kwo. An mom ayenyo kwogo ibaŋ jo. Ento aŋeo ni mom itye wunu kede mar Obaŋa i yiwu. Abino i nyiŋ Pappa, ento wun mom igama wunu. Ento ka ŋattoro obino i nyiŋe kene, wun ibino wunu gamo. Itwero ye wunu niŋo ka ce ŋat acel acel yenyo kwogo i baŋ awottere, ento mom iyenyo wunu kwogo ame ya i baŋ Obaŋa acel kene? Kur itam wunu ni abino dotowu baŋ Obaŋa Papo; dano abino dotowu en Muca, ame igeno wunu. Ka iye wunu Muca, onwoŋo myero iye wunu an daŋ, pien en ocoo kop i koma. Ento ka mom iye wunu kop ame en ocoo, ibino wunu ye koppa nino?” Icennere Yecu owoto loka nam me Galilaya, en nam me Tiberia. Lwak adwoŋ olube, pien gin oneno anyuttogo ame en otio i kom otwo. Yecu oyito i wi kidi, obedo piny kuno karacel kede jo a lube. Ecuban me Kato Ojudaya onwoŋo doŋ ceggi. Yecu otiŋo waŋe, oneno lwak apol tye a bino baŋe. Omio openyo Pilipo ni, “Obino wilo kwon kwene me jo man cami?” En okobbe man pi omo cunye; en onwoŋo ŋeo gin ame emito tiyo. Pilipo odokke iye ni, “Ogati me ciliŋ mia aryo mom bino romogi, ame rommi dano acel acel gamo anok.” Dano acel i akina jo a lube, en Anderiya omin a Cimon Petero, okobbe ni, “Awobi moro tye kan kede ogati abic me cayiri, kede reccogo aryo; ento kara magi konyo ŋo baŋ lwak a rom man-ni?” Yecu ogamo ni, “Miu jo bed piny.” Lum onwoŋo olot atek i kabedo-nu; co obedo piny welgi mito romo tutumia abic. Yecu okwanyo ogati, opwoo, opokki jo obedo piny, kede rec daŋ amannono, kit acalo gin mito. Ka doŋ gin oyeŋ, Yecu okobbi jo a lube ni, “Cok wunu ŋide ame odoŋ, ginnoro kur rweny.” Gin ocoko ŋide opoŋ adukki apar wie aryo, ame oya i ogati abic me cayiri ame jo ocamo odoŋ. Ka jo-nu oneno anyut ame en otio, gin te kobo ni, “Ateteni, man en adwarpiny ca ame abino i lobo.” Ka Yecu oniaŋ ni gin mito bino make me kete bedo abaka tetek, en olwi, owoto i wi kidi en kene. Ka piny oyuto, jo a lube owoto i nam Gin odonyo i yee, ote cako ŋolo dye nam me wot Kapernaum. Onwoŋo piny odoko col, Yecu daŋ onwoŋo pe ru obino baŋgi. Nam otiŋere pi yamo atek ame tye akodo. Ka onwoŋo pwod gin okwaŋ ame romo mairo adek onyo aŋwen, gin oneno Yecu kun awot i wi nam kede tyene, obino ame ceggi kede yee; lworo omakogi. En okobbigi ni, “An ennono; kur ilwor wunu.” Omio gin oye game i yee kede yomcuny. Cucuttono yee otuno i wi tela kan ame gin onwoŋo awot iye. Orwo mere jo a rik odoŋ Ioka nam tuŋ cel, rik gin ŋeo ni tye yee acel keken kuno. Yecu rik daŋ pe odonyo karacel i jo a lube i yee-naca, ento jo a lube rik owoto gigi kengi. Kadi bed amannono, yee ocele ame oya i Tiberia rik obino ceggi kede kabedo ame rik ocamo iye ogati ame Rwot opwoo. Ka lwak oneno ni Yecu mom kuno, anaka jo a lube, gin odonyo i yee, owoto i Kapernaum yenyo Yecu. Ka gin onwoŋe loka nam tuŋ-ca, openye ni, “Rabbi, kara ibino kan awene?” Yecu ogamo doggi ni, “Ateteni akobbiwu ni, itye wunu ka yenya, mom ni, pien rik ineno wunu anyut, ento pien rik icamo wunu ogati iyeŋ wunu kede. Kur iti wunu pi cam a top, ento pi cam a ri tuno i kwo a perakino nakanaka, ame Wot a dano bino miyowu; pien Obaŋa Papo oketo anennere i kome.” Gin te penye ni, “Myero otim ŋo me oti tic Obaŋa?” Yecu ogamo ni, “Man en tic Obaŋa: ye wunu dano ame en ooro.” Gin openye ni, “Anyut aŋo ame yin itio ame myero wan onen, ote ye yin? Tic aŋo kara ame yin itio? Kwariwa con ocamo manna i tim, acalo ocoo ni, ‘En rik omiogi kwon acama ame oya i polo.’ ” Yecu ogamo doggi ni, “Ateteni akobbiwu ni, Muca mom rik omiowu kwon oya i polo, ento Pappa en a tye ka miyowu kwon me ateni a ya i polo. Pien kwon Obaŋa en kwon ame bino piny kun ya i polo, mio kwo baŋ lobo.” Gin te kwaye ni, “Rwot, miwa kwon man nino luŋ.” Yecu te kobbigi ni, “An a kwon me kwo; dano ame bino baŋa, kec mom bino neke, dano ame ye an, oryo mom bino cire. Ento nwaŋ akobbiwu ni, wun kadi bed inena wunu ento mom iye wunu. Jo ducu ame Pappa omia bino bino baŋa: ŋat ame obino baŋa mom abino ryeme. Pien doŋ abino piny kun aya i polo, mom pi cobo mitta pira kena, ento pi cobo mit a ŋat ame rik oora. Man en gin ame ŋat oora mito, ni kur arweny ŋattoro i kom jo luŋ ame en rik omia, ento acergi i ni no me agikki. Man en gin ame Pappa mito, ni dano acel acel ame neno Wod, dok ye en, myero nwoŋ kwo a perakino nakanaka; an abino cere i nino me agikki.” Jo Judaya oŋuŋura i kome, pien okobo ni, “An kwon ame bino piny kunya i polo.” Gin te kobo ni, “Man mom Yecu, wot a Yucepu, ame pappere kede tottere wan oŋeo? Pino en dok kobo ni, ‘An abino piny kun aya i polo?’ ” Yecu ogamo doggi ni, “Kur iŋuŋura wunu kenwu kenwu. Dano moro mom twero bino baŋa ka Pappa ame rik oora mom ocwae baŋa; dok abino cere i nino me agikki. Ocoo i kop odwarpiny ni, ‘Gin luŋ Obaŋa bino pwonyogi.’ Dano acel acel ame winyo i baŋ Papo, dok mako, bino baŋa. Mom ni ŋattoro yam oneno Papo, kono ka ŋat ame yam oya i baŋ Obaŋa, en oneno Papo. Ateteni akobbiwu ni, ŋat ame ye tye kede kwo a perakino nakanaka. An akwon me kwo. Kwariwu rik ocamo manna i tim, gin obin oto oko. Man en kwon ame obino piny kun oya i polo, ame ka dano moro ocamo, mom bino to. An a kwon me kwo ame obino piny kun oya i polo; ka ŋattoro ocamo kwon man, en bino kwo nakanaka; kwon ame abino miye en koma, ame amio me lo bo nwoŋ kwo.” Jo Judaya te ero pyem agwa i akinagi kengi kengi kun okobo ni, “Dano man twero miyowa kome me acama niŋo?” Yecu te kobbigi ni, “Ateteni akobbiwu ni, ka mom icamo wunu kom Wot a dano, imato wunu remo mere, mom itye wunu kede kwo i yiwu. Ŋat ame camo koma, ame mato remona, tye kede kwo a perakino nakanaka, an abino cere i nino me agikki. Pien koma en cam me ateni, kede remona en gi-amata me ateni. Ŋat ame camo koma, ame mato remona, bedo i yia, an daŋ abedo i yie. Acalo Papo akwo nwaŋ oora, kun an abedo kwo pi Papo, amannono ŋat ame cama bino kwo pira. Man en kwon ame rik obino piny kun oya i polo, mom kit kwon ame kwariwu con ocamo, ote to oko ca; ŋat ame camo kwon man bino kwo nakanaka.” En okobo man kun onwoŋo en tye apwony i kacokere i Kapernaum. Jo a lube apol, ka owinyo, okobo ni, “Man kop ame tek; ŋa a twero winyo en-nie?” Ento Yecu oŋeo i yie kene ni jo a lube tye aŋuŋura i kom kop man; openyogi ni, “Kop man obalo tamwu oko? Kara twero bedo nino ka kono ineno wunu Wot a dano kun ayito kan ame yam en bedo iye con? Gin ame mio kwo en cuny; kom mom konyo; kop ame akobbiwu en cuny kede kwo. Ento tye jo mogo i akinawu ame mom ye.” Pien cakere i ageyi Yecu rik oŋeo jo ame mom ye-nono, kede ŋat ame bino keto erupe i kome. En dok okobo ni, “Man en gin omio rik akobbiwu ni, mom tye ŋattoro ame twero bino baŋa, ka ce Papo mom omie twer me bino.” Cakere i kare-nu jo apol ame lube odok oko cen, mom dok omedde wot kede. Yecu openyo jo a lube apar wie aryo ni, “Wun daŋ imito wunu ket oko?” Cimon Petero ogamo doge ni, “Rwot, obino wot baŋ ŋa? Yin itye kede kop me kwo a perakino. Wan oye, dok otyeko niaŋ ni yin ŋat Acil ame oya i baŋ Obaŋa.” Yecu okobbigi ni, “Rik mom ayerowu wun jo apar wie aryo? Ento dano acel i akinawu catan.” En onwoŋo akobo Juda wot a Cimon me Keriot, pien kadi bed rik en dano acel i akina jo apar wie aryo, en bino keto erupe i kome. Icennere Yecu obedo ka wot i akina Galilaya; pe omito wot i Judaya, pien jo Judaya onwoŋo mito neke. Ecuban Ojudaya me Gero Gonye onwoŋo doŋ ceggi. Omego mere okobbe ni, “Ya oko i kano iwot i Judaya, me jo a lubi nen tic ame yin itio. Mom tye dano moro ame tio tic i muŋ, ka en ikome mito nen kannaler. Ka itio ticcogo, nyutte keni baŋ lobo.” Pien kadi omego mere ikome daŋ mom oye en Yecu okobbigi ni, “Karena mom ru otuno, karewu tye nino luŋ. Lobo mom twero dagowu, ento daga, pien an atuco kop i kome, ni tiecere luŋ reco. Wotu i ecuban; an mom awot i ecuban-nono, pien karena mom ru oromo aber.” Ka doŋ okobo kop man baŋgi, en odoŋ i Galilaya. Ka omego mere otyeko wot i ecuban, en daŋ olibere owoto i muŋ, mom kannaler. Jo Judaya obedo ka yenye i ecuban kun openyo ni, “En tye kwene?” Lwak rik oŋuŋura meicel pire. Jo mogo kobo ni, “En dano aber”; jo ocele ko bo ni, “Mom gire, tye ka rwenyo lwak.” Ento pi lworo Ojudaya, mom tye ŋattoro okobo pire kannaler. Ka doŋ otuno i dye ecuban, Yecu owoto i ot Obaŋa, ocako pwony iye. Ojudaya owuro kun okobo ni, “Dano man oŋeo nukuta niŋo, kun mom okwano?” Yecu odokkigi iye ni, “Pwonnya mom mera ikoma, ento mea ŋat ame rik oora. Ka dano moro mito tiyo gin ame Obaŋa mito, en bino niaŋ ka pwony man oya i baŋe, onyo ka akobo pira kena. Dano ame kobo pire kene, yenyo kwogo pire kene; ento dano ame yenyo kwogo pi ŋat ame oore, dano-nu en me ateni, gin ame mom atir mom i yie. Muca nwaŋ mom omiowu cik? Ento mom tye dano moro i akinawu ame gwoko cik-ku. Piŋo imito nuwu neka?” Lwak ogamo ni, “Yin ajaracen! Ŋa ame mito neki?” Yecu ogamo doggi ni, “Nwaŋ atio tic acel i cen cabit, wun ducu iwuro wunu. Muca nwaŋ omiowu cik me lirre (pe ni oya i baŋ Muca, ento oya i baŋ kwariwa), wun daŋ icen cabit iliro wunu dano. Ka oliro dano i cen cabit, ni cik a Muca kur baile, pino yiwu wan i koma pi cano kom dano i cen cabit? Kur iŋol wunu kop ineno wunu i waŋ, ento ŋol wunu kop atira.” Jo mogo me Jerucalem te kobo ni, “Man mom en dano ame amito neko-nie? Nen, en tye ka kop kannaler, gin daŋ mom okobbe ginnoro. Doŋ oloc niaŋ ateni ni man en Kricito? Ento wan oŋeo kan a dano man oya iye; ka Kricito bino nen, mom tye dano moro ame bino ŋeyo kan ame oya iye.” Yecu ka tye apwony i ot Obaŋa, en oredo ni, “Wun iŋea wunu, iŋeo naka kan ame aya iye? An mom abino pira kena; ŋat ame oora en me ateni, ame wun mom iŋeo wunu. An aŋee, pien aya i baŋe, en oora.” Gin te mito make, ento mom tye dano moro ame oketo ciŋe i kome, pien kare mere pe ru oromo. Ento jo apol i akina lwak oye en. Gin okobo ni, “Ka Kricito bino nen, bino tiyo anyut apol ame kato en ame dano man otio-ni?” Oparicayo owinyo lwak tye aŋunura i kome, omio olamdog adoŋo kede Oparicayo ocwao otic me make. Yecu okobo ni, “Pwod koŋ abedo kedwu pi kare anok, icennere abino dok baŋ ŋat ame cen oora. Ibino wunu yenya, ento mom ibino nwoŋa; kan ame an atye iye, wun mom itwero tuno wunu iye.” Ojudaya te penyere kengi kengi ni, “Dano man kara amito wot kwene, ame wan mom obino nwoŋe-ni? En amito wot baŋ jowa ame oket ata i akina jo Grik kede pwonyo jo Grik? Kara man te koppere niŋo, ni, ‘Ibino yenya wunu, ento mom ibino nwoŋa wunu,’ dok ni, ‘Kan ame an atye iye, wun mom itwero tuno wunu iye?’ ” I nino ame ecuban gik iye, en nino adit, Yecu oya malo oredo ni, “Ka oryo neko dano moro, en myero bin mat pii baŋa. Dano ame ye an, acalo coc a yam ocoo kobo, ‘Kulli me pii me kwo bino mollo ya i yie.’ ” Rik en okobo man i kom Cuny Acil ame jo a ye en bino nwoŋo; pien onwoŋo rik pe ru omio Cuny Acil, pien onwoŋo pe ru oketo kwogo i kom Yecu. Ka gin owinyo kop magi, jo mogo i akina lwak te kobo ni, “Ateni, man adwarpiny.” Jo ocele okobo ni, “Man Kricito.” Jo mogo openyo ni, “Kricito yam ya i Galilaya bo? Coc a yam ocoo mom tito ni Kricito ya i anywalli a Daudi, dok ya i Beterekem, ame paco a Daudi?” Omio apokapoka obedo i akina lwak pire. Jo mogo i akinagi omito make, ento mom tye ŋattoro ame oketo ciŋe i kome. Otic rik te dwogo baŋ olamdog adoŋo kede Oparicayo, eka gin te penyogi ni, “ŋo omonowu kele?” Otic ogamo doggi ni, “Mom tye dano moro ame yam okobo kop acalo dano man.” Oparicayo okobbi otic ni, “Wun daŋ otyeko rwenyowu oko?” Tye ŋattoro i akina oloc onyo i akina Oparicayo ame oye en? Ento lwak man a kwia cik-ki oceno oko. Nekodem, ame con obino baŋe, en dano acel i akinagi, te penyogi ni, “Cikwa ŋolo kop i kom dano aboŋo winyo koppere, me niaŋ gin ame en otimo?” Gin te dokke iye ni, “Yin daŋ iya i Galilaya? Koŋ iyeny, ibino neno ni mom tye adwarpinnyoro ame bino ya i Galilaya.” [ Ŋat acel acel odok i ode; Ento Yecu owoto i wi kidi me Jeituni. Odiko con en dok odwogo i ot Obaŋa; jo luŋ ocokere baŋe, en obedo piny, opwonyogi. Opwony-cik kede Oparicayo okelo dako moro ame omako pi cot. Gin te cibe i dyere, ote kobbi Yecu ni, “Apwony, dako man omako pi cot, onwoŋe kom iye. Aco i cik Muca ociko ni myero onap kodi jo-nono kede gweŋ. Kara yin iŋolo nino?” Gin okobo man pi bite, me onwoŋ kopporo me bino dote. Ento Yecu okulle, ocoo piny kede ciŋe. Ka gin omedde penye, en otirre te kobbigi ni, “Ŋattoro i akinawu ame mom i bai en amyero ge nape kede gweŋ.” En dok okulle, ocoo piny kede ciŋe. Ka gin owinyo kop man, oket acel acel, cakere i kom jo adoŋo; Yecu oloŋ kene kun dako pwod ocuŋ kan a rik ocibe iye. Yecu otirre, openyo dako ni, “Dako, ane gin? Mom tye ŋattoro oŋolo kop oloi?” En ogamo ni, “Ŋattoro mom, adwoŋ.” Yecu okobo ni, “An daŋ mom aŋolo ni kop loi. Wot giri; cakere tin kur dok ibal ba.”] Yecu dok okobo kedgi kun rabo ni, “An a ceŋ me lobo; dano ame luba mom bino wot i piny acol, ento bino bedo kede ceŋ me kwo.” Oparicayo okobbe ni, “Yin itito kop me caden i komi piri keni; kop ame itito mom ateni.” Yecu ogamo kopgi ni, “Kadi bed atito kop i koma kena, koppa en kop me ateni, pien an aŋeo kan ame aya iye, kede kan ame awot iye, ento wun mom iŋeo wunu kan ame aya iye kede kan ame awot iye. Wun iŋolo wunu kop i kite me dano, an mom aŋolo kop i kom ŋattoro. Ento kadi bed aŋolo kop, ŋolo kop mera tye atira, pien an mom atye kena. Ento Papo ame oora tye keda. I cik mewu ocoo ni, ‘Kop a caden aryo bedo me ateni.’ An atito kop me caden i koma kena, dok Pappa ame oora daŋ en cadenna.” Gin te penye ni, “Ane Pappi?” Yecu te dok iye ni, “Wun mom iŋea wunu, kadi Pappa. Kono iŋea wunu, kono iŋeo wunu Pappa daŋ.” En okobo kop magi i kare ame tye apwonyo jo i ot Obaŋa i ka kano lim, ento mom tye dano moro ame omake, pien kare mere onwoŋo mom ru oromo. En dok okobbigi ni, “An awot oko; ibino wunu yenya, ento ibino wunu to i balwu. Kan ame abino wot iye, wun mom itwero wunu tuno iye.” Ojudaya te kobo ni, “En bino nekere kene, pien okobo ni, ‘Kan ame abino wot iye, wun mom itwero tuno wunu iye?’ ” En okobbigi ni, “Wun iya wunu i piny; an aya i malo. Wun ibedo wunu jo me lobo man, an mom me lobo man. Man en gin omio akobbiwu ni, wun ibino to wunu i balwu, pien ka mom iye wunu ni an atye, ibino to wunu i balwu.” Gin te penye ni, “Kara yin i na?” Yecu te dokkigi ni, “An ŋat ame yam atittiwu cakere i ageyi. Atye i kop apol me akoba i komwu, kede kop me aŋola apol; ento ŋat ame oora en me ateni, an atitti lobo gin ame doŋ awinyo i baŋe.” Gin mom oniaŋ ni en tye ka tittigi kop i kom Obaŋa Papo. Omio Yecu te kobbigi ni, “Ka doŋ itiŋo wunu Wot a dano malo, ibino wunu niaŋ ni an atye, dok ni mom atio ginnoro pira kena, ento akobo gin ame Pappa opwonya iye. Ŋat ame oora tye keda; mom oweka kena, pien atio gin ame yie mito didik.” Ka en okobo man, jo apol oye en. Yecu dok okobo baŋ jo Judaya ame oye en ni, “Ka imoko wunu i koppa, wun jo mera a luba me ateni, daŋ ibino wunu ŋeyo kop me ateni, kop me ateni bino gonyowu.” Gin te dokke iye ni, “Wan ikwae Iburaim, pe ru obedo opii a ŋattoro. Man dok ikobo niŋo ni, ‘Obino gonyowu?’ ” Yecu te dokkigi iye ni, “Ateteni akobbiwu ni, jo ducu ame timo bai, gin opii abal. Opi i mom perakino i ot nakanaka, ento atin anywalli perakino iye nakanaka. Amannono ka Wod ogonyowu, obino gonyowu ateni. Aŋeo ni wun ikwae Iburaim; ento wun imito wunu neka, pien koppa mom onwoŋo kabedo i yiwu. An akobo gin ame aneno i baŋ Pappa, ento wun itio wunu gin ame iwinyo i baŋ papawu.” Gin te gamo doge ni, “Iburaim en papawa.” Yecu okobbigi ni, “Kono wun itino Iburaim, kono itimo wunu gin ame yam Iburaim otimo. Ento koni imito wunu neka, an dano ame atittiwu kop me ateni ame awinyo i baŋ Obaŋa; Iburaim yam mom otio amannono. Wun itio wunu gin ame papawu timo.” Gin odokke iye ni, “Wan mom otino luk; wan otye i papawa acel, en Obaŋa.” Yecu ogamo doggi ni, “Kono Obaŋa papawu, kono imara wunu, pien an aya i baŋ Obaŋa, aman doŋ atye kan; mom abino pira kena, en ame oora. Piŋo mom iniaŋ wunu kop ame an akobo? Pien mom itwero wunu winyo koppa. Wun iya wunu i baŋ papawu Catan, imito wunu co bo mit a papawu. En anek geye i acakki piny, mom cuŋ i ateni, pien ateni mom i yie. Ka en kobo goba, en kobo acalo kite mere tye, pien en agoba, dok en won goba. Ento mom iye wunu an, pien an akobo kop me ateni, ŋa i akinawu ame twero nyu to balloro i koma? Ka atito kop me ateni, ŋo ame omonowu ye an? Dano oya i baŋ Obaŋa winyo kop Obaŋa; gin omonowu winyo, pien mom iya wunu i baŋ Obaŋa.” Jo Judaya odokke iye ni, “Wan pe okobo kakare ni yin i dano me Camaria, yin ajaracen?” Yecu te dokkigi iye ni, “An mom ajaracen; ento aworo Pappa, wun mom iwora wunu. An mom ayenyo kwogona pira kena; tye ŋat ame yenyo, en bino ŋolo kop. Ateteni akobbiwu ni, ka ŋattoro gwoko koppa, mom bino ne no to atwal.” Ojudaya odokke iye ni, “Koni doŋ oniaŋ ni yin ajaracen. Iburaim nwaŋ oto, kede odwarpiny daŋ; ento yin ikobo ni, ‘Ka ŋattoro gwoko koppa, mom bino bilo to atwal.’ Yin i dit ikato kwarowa Iburaim ame rik oto-ni? Odwarpiny daŋ oto do! Kara yin ikette keni ni yin i ŋa?” Yecu te gamo ni, “Ka aketo kwogo i koma kena, kwogo mera mom konyo; Pappa en ame ke to kwogo i koma, ame wun ikobo wunu ni en Obaŋawu. Ento wun mom iŋee wunu, an aŋee. Ka kono akobo ni mom aŋee, kono adoko agoba bala wun; ento aŋee, agwoko koppere. Kwarowu Iburaim rik olelo ni ebino neno nino mera; rik one no, cunye te bedo yom.” Ojudaya te kobbe ni, “Yin ame mwakani pe ru oromo pyerabic-ci, ineno Iburaim?” Yecu ogamo doggi ni, “Ateteni akobbiwu ni, ame Iburaim pwod mom, onwoŋo an doŋ atye.” Omio gin okwanyo gweŋ me nape; ento Yecu opono, odonyo oko i ot Obaŋa. Ka cen en tye ka wot iyo, oneno dano ame onywalo ame waŋe oto. Jo mere a lube openye ni, “Rabbi, na ame obalo, dano man on yo jo ame onywale bo, omio onywale ame waŋe oto?” Yecu te gamo ni, “Dano man mom obalo, kadi jo ame onywale daŋ, ento man otimere me tic Obaŋa onyutte i kome. Myero oti wunu tic a ŋat ame oora kun cen pwod tye; dyewor bino tuno ame ŋattoro mom twero tic. Ka pwod atye i lobo, an a ceŋ me lobo.” Ka en okobo amannono, oŋulo lao piny, orubo kede lobo, te juko wan dano-nono kede lobo, te kobbe ni, “Woti, ilwok i kut me Ciloam” (ame te koppere ni, Ame ooro). En owoto, olwoko, odwogo ame waŋe doŋ neno. Jo me turgi kede jo a yam ne ne ka en akwayo lim te kobo ni, “Man mom dano ame yam bedo piny kun kwao lim?” Jo mogo okobo ni, “En ikome”; jo ocele ni, “Pe gire, ento cal kede acala.” En dano-nono te gamo ni, “Kom an gira ennono.” Gin te penye ni, “Kara waŋi oyabere nino?” En ogamo ni, “Dano ame olwoŋo ni Yecu orubo lobo, ojuko kede waŋa, te cika ni, ‘Woti, ilwok i Ciloam.’ Rik awoto, alwoko, acako neno piny.” Gin openye ni, “En tye kwene?” Ogamo ni, “Mom aŋeo.” Gin otero dano a yam waŋe otonono baŋ Oparicayo. Nino ame Yecu orubo iye lobo-nono, te yabo kede waŋe, onwoŋo rik ceŋ me cabit. Oparicayo openyo dano-nono odoco ni, “Kara waŋi oyabere niŋo?” En odokkigi iye ni, “En ojuko waŋa i lobo, alwoko, omia aneno piny.” Jo mogo i akina Oparicayo te kobo ni, “Dano man mom oya ibaŋ Obaŋa, pien mom gwoko cik me cen cabit.” Ento jo ocele okobo ni, “Dano ame abalo twero tiyo anyut a rom man?” Omio apokapoka obedo tye i akinagi. Dok openyo dano ame yam waŋe oto ni, “Yin kono itamo kop aŋo i kome, pien oyabo waŋi?” En odok iye ni, “En adwarpiny do.” Ojudaya mom oye ni en rik obedo atowaŋ, dok ni oyabo waŋe, ituno ka olwoŋo jo ame onywalo dano ame waŋe oyabere-ni. Gin ote penyogi ni, “Man atinwu ame ikobo wunu ni onywalo a waŋe oto? Do omio en koni doŋ neno piny?” Jo onywale te dokkigi iye ni, “Wan oŋeo ni man obedo atinwa, dok daŋ yam onywale ame waŋe oto; ento kite ame en koni neno kede piny, wan mom oŋeo, dok ŋat oyabo waŋe daŋ mom oŋeo. Penye wunu; en doŋ dwoŋ, en bino kop pire kene.” Jo onywale okobo man pien onwoŋo olworo jo Judaya, pien jo Judaya onwoŋo oporo kop karacel ni, ka ŋattoro otuco ni Yecu en Kricito, obino ryemo oko i kacokere. En gin omio jo onywale okobo ni, “En doŋ dwoŋ, penye wunu.” Omio olwoŋo dano a yam waŋe oto tyen me aryo, ote kobbe ni, “Mi kwogo baŋ Obaŋa; wan oŋeo dano man abalo.” En ogamo ni, “Ka en abalo, an mom aŋeo; gin acel keken ame an aŋeo, rik waŋa oto, koni doŋ aneno piny.” Openye ni, “En otimi niŋo? Oyabo waŋi i kite aŋo?” En okobbigi ni, “Doŋ atittiwu con, wun mom iwinyo wunu. Piŋo pwod imito wunu winyo? Wun daŋ imito wunu doko jo mere a lube bo?” Gin te yete kun okobo ni, “Yin en ibedo dano a lube, ento wan olubo giwa Muca. Wan oŋeo ni Obaŋa rik okobo gin kede Muca, ento dano man mom oŋeo kan ame oya iye.” Dano ca te dokkigi iye ni, “Man kop me awura atek! Wun mom iŋeo wunu kan ame en oya iye, kun en oyabo waŋa. Wan oŋeo ni Obaŋa mom winyo abalo, ento ka dano woro Obaŋa, dok tio gin ame en mito, Obaŋa winye. A naka rik con mom ru owinyere ni ŋattoro oyabo wan dano ame onywale a waŋe oto. Kono dano man rik mom oya i baŋ Obaŋa, kono mom twero ti mo ginnoro.” Gin ogamo doge ni, “Yin a rik kom onywali i bal keken, daŋ ipwonyowa?” Gin te ryeme oko. Yecu ka owinyo ni oryeme oko, onwoŋe te penye ni, “Yin iye Wot a dano?” En odok iye ni, “En na, adwoŋ, me aye en?” Yecu okobbe ni, “Doŋ inene; en en ame tye ka kop kedi-ni.” En okobo ni, “Rwot, aye”; owore. Yecu okobo ni, “An abino i lobo man pi ŋolo kop, wek jo a mom neno gin nen, jo ame neno dok jo a wangi oto.” Jo mogo i akina Oparicayo ame onwoŋo ceggi kede owinyo kop man. Gin te penye ni, “Wan daŋ waŋwa oto?” Yecu ogamo doggi ni, “Ka kono waŋwu oto, kono mom itye wunu kede bal; ento wun ikobo wunu ni, ‘Wan oneno piny’; pi mannono balwu pwod doŋ bedo gire. “Ateteni akobbiwu ni, ŋat a mom donyo i dog an ok rommi, ento yito i kan ocele, dano-nono akwo, dok ayak; ento ŋat ame donyo i doggola, en akwat rommi. Agwok-doggola yabbe, rommi winyo dwone; en lwoŋo rommi mere kede nyiŋgi, terogi oko. Ka doŋ ocwao mege ducu oko, en woto i nyimgi, rommi lube, pien oŋeo dwone. Gin mom lubo welo, ento oriŋo oko i baŋe, pien gin mom ŋeo dwon welo.” Yecu okobo carokop man baŋgi, ento gin pe oniaŋ i te kop ame en otito baŋgi. Yecu dok okobbigi ni, “Ateteni akobbiwu ni, an a doggola me rommi. Jo luŋ ame rik okwoŋo nyima gin okwo dok oyak; ento rommi mom owinyogi. An a doggola; ka ŋattoro odonyo i baŋa en bino bwot; bino donyo, kato oko, te nwoŋo cam. Akwo pe bino pi ginnoro ocele, kono pi kwalo, kede neko, kede tyeko; an abino wek gin nwoŋ kwo, gin bed kede adwoŋ. An akwat aber. Akwat aber jalo kwo mere pi rommi. Ŋat ame tio pi ocara, a mom akwat, kun rommi pe mere ikome, ka oneno apet tye abino, weko rommi te riŋo oko; epet makogi, keketogi. En riŋo oko, pien en tio pi ocara keken, mom paro pi rommi. An akwat aber; aŋeo rommi mera, rommina daŋ ŋea. Acalo Papo ŋea, an daŋ aŋeo Papo; ajalo kwona pi rommi. Atye kede rommi ocele daŋ, a mom me an ok man, myero daŋ akelgi. Gin bino winyo dwona, obino doko lwak acel kede akwat acel. Gin omio Pappa mara, pien ajalo kwo mera, wek doki agam. Ŋat ame mao i baŋa mom tye; ajalo gira kena. Atye kede twer me jalo kwo mera, dok atye kede twer me gamo odoco; anwoŋo cik man baŋ Pappa.” Apokapoka dok obedo i akina jo Judaya pi kop man. Polgi okobo ni, “En tye kede cen, ajarapoa; pi ŋo iwinye wunu?” Jo ocele okobo ni, “Kop man pe mea ŋat a tye kede cen. Cen twero yabo waŋ jo ame wangi oto?” I kare ca ecuban me poyo kwero ot Obaŋa obedo i Jerucalem; Onwoŋo kare me iporo, Yecu onwoŋo tye a wot i ot Obaŋa, i te baraja a Culeman. Ojudaya ocokere, ogure dyere, ote penye ni, “Ibino miyo obedo kala akala pi kare a rom mene? Ka yin i Kricito, tittiwa atira.” Yecu odokkigi iye ni, “Atye ko tittiwu, wun mom iye wunu. Tic ame atio i nyiŋ Pappa gin caden mera. Wun ikwero ye wunu pien mom itye wunu i akina rommi mera. Rommina winyo dwona; an aneogi, gin luba, amiogi kwo a perakino odoco. Gin mom bino to nakanaka; ŋat ame bino mayogi i ciŋa mom. Pappa ame omiogi baŋa dwon ame kato luŋ, mom tye ŋattoro a twero mayogi i ciŋ Pappa. An kede Pappa wan acel.” Ojudaya dok okwanyo gwene me nape kede. Yecu okobbigi ni, “Atyeko nyuttiwu tic abeco apol ame oya i baŋ Pappa; imito wunu napa i gweŋ pi ticcene?” Ojudaya ogamo doge ni, “Mom pi ticcoro ame ber, ento pi yeto Obaŋa, ame kun yin i dano adana, ikette keni ni yin Obaŋa.” Yecu odokkigi iye ni, “Mom ocoo i cikwu ni, ‘An akobo ni wun obaŋa?’ Ka en lwoŋo jo ame kop Obaŋa obino baŋgi ni gin obaŋa, (coc a yam ocoo mom tur) wun ikobo wunu baŋ ŋat ame Papo olonyo, oore i lobo ni, ‘Yeto Obaŋa’, pien akobo ni, ‘An a Wot Obaŋa?’ Ka mom atio tic a Pappa, pe myero iye wunu an; ento ka atio ticcere, kadi bed mom iye wunu an, myero iye wunu tic, wek iŋe dok iniaŋ wunu ni, Papo tye i an, kede an atye i Papo.” Gin dok te temo make, ento en te lwi oko i ciŋgi. Dok owoto loka Jordan, i kabedo kan a Lakana koŋ obatija jo iye. En obedo kuno, jo apol obino baŋe. Gin te kobbe ni, “Lakana rik mom otio anyuttoro, ento gin ducu ame Lakana otito i kom dano man obedo me ateni.” Jo apol oye en i kuno. Rik tye dano moro ame kome lit, nyiŋe Lajaro me Betania, i paco a Maliam gin kede aminnere Marita. Maliam ame nwaŋ koŋ owiro Rwot kede moo a ŋwece kur, dok te we yo tyene kede yer wie, en ame ominnere Lajaro rik kome lit-ti. Amego mere ooro kwena baŋ Yecu ni, “Rwot, dano ame imaro-ni kome lit.” Ento Yecu ka owinyo, okobo ni, “Two man mom obino me neke, ento pi kela kwogo baŋ Obaŋa, me mi kwogo pire baŋ Wot Obaŋa.” Yecu onwoŋo rik maro Marita gin kede aminnere, kede Lajaro. Ka en owinyo ni kome lit, en ori dok i kabedo ame rik etye iye kuno nino aryo. Icennere okobbi jo mere a lube ni, “Odoku doki i Judaya.” Jo mere a lube te gamo doge ni, “Rabbi, jo Judaya rik omito napi kede gweŋ, kom yin dok idok kuno?” Yecu ogamo ni, “Caa me dyeceŋ mom apar wie aryo? Ŋat ame wo to dyeceŋ ginnoro gire mom twomo, pien neno ceŋ me lobo. Ento ka dano moro woto dyewor, twomere, pien ceŋ mom tye i yie.” En okobo kit man, icennere dok okobbigi ni, “Awo ta Lajaro doŋonino oko, awot coye i wan nino.” Jo a lube okobbe ni, “Rwot, ka en doŋ onino oko, bino can.” Yecu onwoŋo okobo pi to mere, ento gin otamo ni okobo pi weo me nino. Yecu otittigi atira ni, “Lajaro doŋoto oko. Cunya yom pirwu pien onwoŋo mom atye kuno, me iye wunu. Doŋ owotu baŋe.” Tomaci, ame olwoŋo ni Rut, okobo baŋ owottere mere a lubo Yecu ni, “Wan daŋ owotu, me owot oto wunu karacel kede.” Ka Yecu otuno, onwoŋo Lajaro doŋori i lyel nino aŋwen. Betania ceggi kede Jerucalem, mito romo mairo aryo. Jo Judaya onwoŋo obino kweyo cuny Marita kede Maliam pi omingi. Ka Marita owinyo ni Yecu tye abino, en owoto, orwatte kede, ento Maliam Onwoŋo odoŋ, obedo i ot. Marita okobbi Yecu ni, “Rwot, kono rik itye kan, kono ominna mom oto. Dok amanni gin Iuŋ ame yin ibino kwayo i baŋ Obaŋa, Obaŋa bino miyi.” Yecu te kobbe ni, “Ominni bino cer.” Marita ogamo doge ni, “Aŋeo ni en bino cer i cer me agikki piny.” Yecu okobbe ni, “An cer kede kwo; dano ame ye an kadi oto, bino kwo. Jo luŋ akwo ame oye an, gin mom bino bilo to atwal. Yin iye man?” Marita odokke iye ni, “Ee ta, Rwot, aye ni yin i Kricito, Wot Obaŋa, ame bino i lobo.” Marita ka okobo man, owoto olwoŋo aminnere Maliam, okobbe momot ni, “Apwony tye kan, alwoŋi.” Ka en owinyo, ova malo oyot, owoto baŋe. Yecu onwoŋo mom otuno paco kannono, ento onwoŋo pwod tye kan ame Marita orwatte kede iye ca. Ojudaya ame akweyo cunye i ot, ka oneno Maliam oya malo oyotoyot, okato oko, gin olube, kun gin otamo ni en awot koko i wi lyel kuca. Ka Maliam otuno kan a Yecu tye iye, oryebere i ŋet tyene, okobbe ni, “Rwot, kono rik itye kan, kono ominna mom oto.” Ka Yecu onene kun akoko, kede jo Judaya ame obino kede daŋ akoko, cunye opoto, yie daŋ te wan atek. Te penyo ni, “Ikete wunu kwene?” Gin te dokke iye ni, “Rwot, biye inen.” Pig waŋ Yecu te ony irat. Omio jo Judaya te kobo ni, “Nen, en kara yam mare ba!” Jo mogo i akinagi te kobo ni, “En ame rik oyabo waŋ atowaŋ mom twero geŋo to i kom dano man?” Yi Yecu dok owaŋ atek, ojwat, obino i lyel; lyellono rik gorogoro kidi, kun ocego doge i kidi. Yecu te kobo ni, “Cor wunu kidi oko.” Marita amin a dano ame oto te dokke ni, “Rwot, koni doŋ ŋwe, pien doŋ ori nino aŋwen.” Yecu odokke iye ni, “Rik mom akobbi ni ka iye, ibino neno kwogo Obaŋa?” Omio ote coro kidi oko. Yecu te tiŋo waŋe malo, te kobo ni, “Pappa, apwoi pien doŋ iwinya. An aŋeo con ni yin iwinya i kare ducu, ento akobo man pi lwak jo ame ocuŋ i laŋeta-ni, me gin ye ni yin rik iora.” Ka en okobo man, oredo i dwon aloŋo ni, “Lajaro, donyo oko!” Ŋat a rik oto-ni, te kato oko kun ciŋe kede tyene orio kede boŋo, waŋe oboo i tambara. Yecu okobbigi ni, “Gonye wunu me woti.” Jo apol i akina Ojudaya ame obino karacel kede Maliam, ka oneno gin ame Yecu otio, gin oye en. Ento jo ocele i akinagi owoto baŋ Oparicayo, te kobbigi gin ame en otio. Omio olamdog adoŋo kede Oparicayo te lwoŋo okiko, ote kobo ni, “Kara obino wunu timo ŋo? Pien dano man tye a tiyo anyut apol. Ka owe ke wunu kede kodi kite-nu, jo luŋ bino ye en, jo me Roma bino tuno, te ke to kabedowa-ni oko, kede rokwa daŋ.” Ento dano acel i akinagi, Kayapa, en alamdog adwoŋ i mwaka nono, te kobbigi ni, “Wun mom iŋeo wunu ginnoro kadi acel, dok pe iparo wunu ni kono obedo ber baŋwu, dano acel i to pi lwak, me kur tyek rokwa ducu.” En mom okobo man pire kene, ento pi bedo alamdog adwoŋ i mwaka-nono, rik otuco bala adwarpiny ni, Yecu bino to pi rokkono; mom pi rokkono keken, ento me cok otino Obaŋa ame olal ata bed acel. Cakere i nino-nu, gin te poro kop me neke. Pi mannono, te miyo Yecu mom dok woto kannaler i akina Ojudaya, ento te ya oko i kuno, te wot i lobo ame ceggi kede tim, i paco a nyiŋe Epraim; obedo kuno kede jo mere a lube. Ecuban me kato a jo Judaya onwoŋo doŋ tye ceggi, jo apol oya i pacci, owoto i Jerucalem ame kare me Kato pe ru oromo, me gin olonyere kengi. Rik gin oyenyo Yecu, kun gin ocuŋ i ot Obaŋa, okobo kengi kengi ni, “Wun itamo wunu nino? Ni en mom abino i ecuban?” Olamdog adoŋo kede Oparicayo onwoŋo gin ociko ni, ka dano moro ŋeo kan a en tye iye, myero tittigi, me gin omake. Ka rik odoŋ nino abicel me tuno i ecuban me Kato, Yecu otuno i Betania, kan a Lajaro bedo iye, ame en ŋat a rik Yecu ocero iyi akina jo oto. Gin te tedde cam me otyeno kuno; Marita obedo ka poko cam, Lajaro onwoŋo en dano acel i akina jo ame obedo i dog cam. Maliam okwanyo moo a ŋwece kur ame wellere bup, moo nard agili ame romo ratili acel, owiro kede tyen Yecu, oweo tyen Yecu kede yer wie; ŋwec moo oku to, oromo ot ducu. Ento Juda me Keriot, ŋat acel i akina jo a lube, en ame abino keto erupe i kome, open ye ni, “Ŋo omono cato moo man i wei me ciliŋ mia adek, me mi baŋ ocan?” En okobo man, mom ni onwoŋo en paro pi ocan, ento pien rik en akwo; en rik gwoko cao lim, kwanyo gin ame obolo iye. Yecu te kobo ni, “Weke wunu, me kan naka i nino me yika. Ocan itye wunu kedgi nino luŋ, ento an mom abino bedo kedwu ni no ducu.” Ka lwak Ojudaya apol oniaŋ ni en tye kuno, gin te bino, mom pi neno Yecu keken, ento pi ne no Lajaro daŋ, ame Yecu rik ocero iyi akina jo oto. Pi mannono, olamdog adoŋo te poro kop me neko Lajaro daŋ, pien Ojudaya apol oya oko i baŋgi pire, kun oye Yecu. Orwo mere lwak jo apol ame rik obino iyi ecuban te winyo ni Yecu tye abino i Jerucalem. Gin te jako jaŋ otit, ote wot me jole kun owo ni, “Ojana, pak wunu Rwot! Gum myero bed i kom ŋat ame abino i nyiŋ Rwot, ame en Abaka me Icrael!” Yecu onwoŋo atin kana, te bedo i wie, acalo rik ocoo ni, “Kur ilwor, yin Cion; nen, abaka meri abino baŋi, obedo i wi atin kana!” Jo mere a lube mom koŋ oniaŋ i man; ento ka doŋ oketo kwogo i kom Yecu, gin te po ni rik ocoo kop magi i kome, dok ni otimo pire. Lwak ame rik tye baŋe ka en lwoŋo Lajaro i lyel pi cere iyi akina jo oto, gin otito pire. En gin omio lwak owoto ka jole, pien gin onwoŋo owinyo ni en otio anyut man. Oparicayo te kobo kengi kengi ni, “Mom doŋ ineno wunu ni mom ikonyo wunu ginnoro. Nen, lobo ducu doŋ owirre me lube.” Jo ame rik owoto ka woro Obaŋa i ecuban, mogo i akinagi onwoŋo jo Grik. Jo-nu owoto baŋ Pilipo me Betecaida, ame tye i Galilaya, ote kobbe ni, “Adwoŋ, wan omito neno Yecu.” Pilipo owoto, otito baŋ Anderiya, Anderiya owoto karacel gin i Pilipo, oterri Yecu kop-pu. Yecu te gamo doggi ni, “Caa doŋ oromo me keto kwogo i kom Wot a dano. Ateteni akobbiwu ni, nyig kal ka mom opoto i lobo oto, bedo kene, ento ka oco nyige bedo apol. Ŋat a maro kwo mere bino rwenyo kwo mere arwenya; ŋat ame dag kwo mere i lobo man, bino gwoko tuno naka i kwo a perakino odoco. Ka ŋattoro tio pira myero luba; kan ame an abedo iye, atic mera daŋ bino bedo kuno. Ka dano moro tio pira, Papo bino nyuto woro i kome. “Aman cunya oballe, kara abino kobo ŋo? Akobo ni, ‘Pappa, lara i caa man?’ Ento pi kop-pi omio atuno i caa-ni. Pappa, ket kwogo i nyiŋi.” Dwon te ya i polo ni, “Doŋ aketo kwogo iye, abino keto odoco.” Lwak ame ocuŋ i laŋete owinyo; ote kobo ni, “Polo omor.” Jo ocele ni, “Amalaika okobo kede.” Yecu ogamo ni, “Dwon man mom obino pira, ento pirwu. Amanni otye a ŋolo kop i kom lobo man; aman aloc me lo bo man obino bole oko. An ka obino tina malo ya i lobo, abino waya jo luŋ baŋa.” En okobo man pi nyuto kit to ame en bino to kede. Lwak te gamo doge ni, “Wan owinyo i cik ni Kricito perakino nakanaka. Kara yin dok ikop niŋo, ni Wot a dano myero tiŋe malo? Kara Wot a dano-nu en ŋa-nono?” Yecu te kobo ni, “Pwod itye wunu kede cen pi kare anok. Wot wunu ame pwod itye wunu kede cen, me colpiny kur ŋukwu. Ŋat ame woto i colpiny mom ŋeo kan ewot iye. Ka pwod itye wunu kede cen, ye wunu cen, me idok wunu itino me cen.” Yecu ka okobo kop man, opokere kedgi, te ponnigi oko. Kadi Yecu otio anyuttogo apol a rom mano i nyimgi, gin mom oye en, me kop adwarpiny Icaya cobere kakare, ni, “Rwot, ŋa oye kop ame wan otito? Dok na ame bad Rwot onyutte baŋe?” Man en omio mom gin otwero ye, pien Icaya dok okobo ni, “En oneko wangi, omio cunygi odoko nwaŋ, me kur onen kede wangi, kadi niaŋ i cunygi, kadi dwogo, me acaŋgi.” Gin omio Icaya okobo kop man, pien rik oneno kwogo mere, okobo pire. Kadi bed kite-nono, jo apol, a naka mogo i akina oloc, oye en, ento pi lworo Oparicayo omio mom gin otuce, me kur ryemgi oko i kacokere; pien gin maro kwogo ame dano miogi akato kwogo ame Obaŋa mio. Yecu oredo ni, “Ŋat oye an, mom oye an, ento oye ŋat oora. Ŋat a nena, nwoŋo aneno ŋat oora. An a ceŋ ame bino i lobo, me jo ducu ame ye an kur bed i piny acol. Ka dano moro winyo kop-pa kun mom gwoko, an pe anolle kop; pien rik mom abino ka ŋolo kop i kom lobo, ento abino pi laro lobo. Ŋat ame kwera, ame mom winyo koppa, tye ŋat ame ŋolle kop; kop a doŋ akobo bino ŋolle kop i nino me agikki. Pien mom akobo pira kena; Papo ame oora en ikome omia cik, gin ame myero akobbi, kede gin ame myero alokki. Aŋeo ni cik mere en kwo a perakino odoco. Gin ame akobo, aloko acalo Papo okobba.” Ame pe ru ecuban me Kato otuno, Yecu onwoŋo ŋeo ru caa mere doŋ oromo me weko lobo man pi dok baŋ Papo. En rik omaro jo mere ame tye i lobo man, omarogi tuno i agikki. Kare ame gin pwod tye i dog cem me otyeno, ame Catan doŋ onwoŋo oketo tam i cuny Juda wot a Cimon me Keriot me keto erupe i kom Yecu. Yecu onwoŋo ŋeo ni Papo otyeko miyo jami luŋ i ciŋe, dok ni eya i baŋ Obaŋa, edok daŋ baŋ Obaŋa. En oya i dog cam, te gonyo bongi mere, keto teŋe, eka te tweyo taulo i pyere. Onyo pi iyi wal, te cako lwoko tyen jo mere a lube, kun weo kede taulo ame en otweo i pyere. Ka en otuno baŋ Cimon Petero, Petero te penye ni, “Rwot, yin twal ilwoko tyena?” Yecu ogamo doge ni, “Yin mom iŋeo gin ame atiyo amanni, ento ibino niaŋ iye icennere.” Petero te kobbe ni, “Kom atwal, yin mom ibino lwoko tyena.” Yecu te dokke ni, “Ka mom alwoki, nwoŋo ribere mom i akinawa.” Cimon Petero okobbe ni, “Rwot, mom tyena keken ento ciŋa a naka wia daŋ.” Yecu okobbe ni, “Dano ame otyeko lwok, pe myero dok lwok kome, kono tyene keken, pien nwoŋo kome ducu cil. Wun doŋ icil wunu, ento mom wun ducu.” En rik onwoŋo ŋeo ŋat a mito keto erupe i kome; en gin omio en okobo ni, “Wun ducu mom icil wunu.” Ame en doŋ otyeko lwoko tyengi, okwanyo boŋŋi mege, te dok kede i kabedo mere, te penyogi ni, “Iniaŋ wunu gin ame atimo i komwu? Wun ilwoŋa wunu ni apwony, dok ni Rwot; mannono ber kono, pien atye amannono. Doŋ ka an a Rwot kede apwonywu, alwoko tyenwu, wunu daŋ myero ilwok wunu tyenwu kenwu kenwu; pien anyuttiwu anen me aluba, me wun daŋ itim wunu bala kite ame an atimo kede i komwu. Ateteni akobbiwu ni, opii mom bedo adwoŋ ikato adwoŋŋere, dano ame ooro mom bedo adwoŋ ikato ŋat aore. Ka iŋeo wunu man, ce itio wunu, itye wunu kede winyo. Man mom akobo i komwu wun ducu; aŋeo jo ame doŋ ayero; ento me coc a yam ocoo cobere kakare, ni, ‘Ŋat ame ocamo kwon k aracel keda doŋ otiŋere i koma,’ A man atittiwu kop-pi kun pe ru otimere, me ka bino timere, iye wunu ni an a en. Ateteni akobbiwu ni, ŋat ame jolo dano ame an aoro, nwoŋo ojola; aco ŋat ojola, nwoŋo ojolo ŋat oora.” Ka Yecu doŋ okobo kop man, cunye opoto, otuco kannaler ni, “Ateteni akobbiwu ni, ŋat acel i akinawu bino keto erupe i koma.” Jo a lube onenena kengi kengi, pien mom oniaŋ ŋat ame en akop i kome. Ŋat acel i akina jo mere a lube, ŋat ame Yecu rik maro, onwoŋo obuto ceggi kede kor Yecu. Cimon Petero ogwete, te kobbe ni, “Tucciwa ŋat ame en akop i kome.” En ojeŋere i kor Yecu, te penye ni, “Rwot, kara mano ŋa-nono?” Yecu ogamo ni, “En ŋat ame abino gweyo dek ate miyo baŋe.” Ka ogweo dek, omio baŋ Juda wot a Cimon me Keriot. Ame en doŋ ogamo, Catan odonyo i yie. Yecu te kobbe ni, “Gin ame itimo, ru time.” Mom tye ŋattoro i dog cem ame oniaŋ gin omio en okobbe kop man. Jo mogo otamo ni, pien Juda onwoŋo gwoko lim megi, omio Yecu okobbe ni, “Wil jami ame omito pi ecuban”; onyo ni myero mi ginnoro baŋ ocan. Ka doŋ ocamo dek ame ogweye, odonyo oko; piny doŋ onwoŋo col. Kare ame en doŋ okato oko, Yecu te kobo ni, “Aman doŋ oketo kwogo i kom Wot a dano, dok oketo kwogo i kom Obaŋa daŋ pire. Ka oketo kwogo i kom Obaŋa pire, Obaŋa daŋ bino keto kwogo i kome i nyime en Obaŋa, bino keto kwogo i kome oyotoyot. Itino, pwod atye kedwu pi kare anok. Ibino wunu yenya, ento acalo rik atito baŋ Ojudaya, amannono daŋ atittiwu ni, kan ame abino wot iye, wun mom itwero wunu tuno iye. Amiowu cik anyen ni, marre wunu kenwu kenwu; imarre wunu kenwu kenwu acalo an amarowu. Mannono bino miyo jo ducu ŋeo ni wun ibedo wunu jo a luba, ka ce mer tye i akinawu.” Cimon Petero openye ni, “Rwot ibino wot kwene?” Yecu te gamo ni, “Kan ame an abino wot iye, mom itwero luba amanni, ento ibino luba icennere.” Petero dok openye ni, “Rwot, ŋo amona lubi amanni? Abino jalo kwona piri.” Yecu ogamo ni, “Ibino jalo kwoni pira? Ateteni akobbi ni, twon gweno mom bino kok, tuno ka koŋ ikwera tyen adek.” “Cunywu kur poti; ye wunu Obaŋa, ye wunu an daŋ. I ot a Pappa tye iye kabedo apol; kono mom amannono, kono atittiwu, pien abino wot me yikkiwu kabedo. Ka awoto, ayikkiwu kabedo, dok abino dwogo, aomowu baŋa, me kan ame an abedo iye, wun daŋ ibed wunu iye. Wun iŋeo wunu yo me kan ame an abino wot iye.” Tomaci te kobbe ni, “Rwot, wan mom oŋeo kan ame ibino wot iye; kara otwero ŋeyo yo nino?” Yecu te gamo ni, “An ayo, kede ateni kede kwo; mom tye ŋattoro ame bino baŋ Papo, kono ka i koma keken. Kono rik iŋea wunu, kono iŋeo wunu Pappa daŋ; ya amanni iŋee wunu dok daŋ doŋ inene wunu.” Pilipo te gamo doge ni, “Rwot, nyuttiwa Papo, bino romowa.” Yecu te dokke iye ni, “Doŋ ari kedwu kare alac rom man, mom ru iŋea, Pilipo? Ŋat ame onena doŋ oneno Obaŋa Papo; kara ŋo omio yin dok ikobo ni, ‘Nyuttiwa Papo?’ Yin mom iye ni, an atye i Papo, kede Papo i an? Kop ame akobo baŋwu, mom akobo pira kena; ento Pa po ame bedo i yia tio ticcere. Wun ye wunu ni an atye i Papo, kede Papo i an; ka mom amannono, ye wunu an pi tic keken. “Ateteni akobbiwu ni, ŋat ame ye an, en daŋ bino tiyo tic ame an atio; dok bino tiyo tic ame dito kato man, pien an awot baŋ Papo. Gin ducu ame ibino wunu kwayo i nyina, abino tiyo, me iket wunu kwogo i kom Papo pi Wod; ka ibino wunu kwayo ginnoro i nyina, abino tiyo. “Ka imara wunu, ibino wunu gwoko cikka. An abino kwayo Papo, en bino miyowu Akony ocele ame bino bedo kedwu nakanaka, en Cuny me ateni ame lobo mom twero gamo, pien lobo mom nene, dok mom ŋee-gu. Wun iŋee wunu pien en bedo kedwu, dok daŋ bino bedo i yiwu. “Mom abino wekowu calo otino kic; abino dwogo baŋwu. Odoŋ kare anok, lobo mom dok bino nena, ento wun ibino wunu nena; pien an akwo, wun daŋ ibino wunu kwo. I ninonono ibino wunu ŋeyo ni an atye i Papo, kede wun i an, kede an i yiwu. Dano ame tye kede cikka, ame gwoko, en dano ame mara; dano ame mara, Pappa bino marre, an daŋ abino mare, abino nyutte kena baŋe.” Juda ame mom me Keriot te penye ni, “Rwot, kara man bino bedo nino, ni ibino nyutte keni baŋwa, ento mom baŋ lobo?” Yecu odokke iye ni, “Ka ŋattoro mara, en bino gwoko koppa, Pappa bino marre, wan obino tuno baŋe, obino yiko kabedowa baŋe. Ŋat a mom mara, mom gwoko koppa; kop ame iwinyo wunu mom mega, ento me Obaŋa Papo ame rik oora. “Kop man atittiwu ame pwod atye baŋwu. Ento Akony, ame en Cuny Acil, ame Papo bino oro i nyina, en bino pwonyowu i kop luŋ, en bino poyo wiwu i kop ducu ame rik akobbiwu. Awekkiwu kuc, amio kucca baŋwu, amiowu mom bala en a lobo mio. Cunywu kur poti, pe ilwor wunu. Doŋ iwinyo akobbiwu ni, ‘An abino wot oko, dok abino dwogo baŋwu.’ Kono imara wunu, kono ilelo wunu pien awot baŋ Papo, pien Papo dwon kata. Amanni akobbiwu man ame mom ru otimere, me ka bino timere, iye wunu. Mom dok abino rado kop apol kedwu, pien aloc me lobo man tye abino. En mom kede twer i koma; ento man atimo acalo Papo ocika, me lobo ni an amaro Papo. Ya me owotu giwa. “An olok me ateni, Pappa en apur. Jaŋe acel acel i koma a mom nyak, en lwero oko; ento jaŋe ducu ame nyak en lonyo, me med nyak apol. Wun doŋ olonyowu oko pi kop ame akobo baŋwu. Bed wunu i an, an daŋ i wun. Acalo bala jaŋ olok mom twero nyak pire kene, ka mom omoko i kom olok, amannono, wun daŋ mom itwero wunu ka mom ibedo wunu i an. An olok, wun ibedo wunu jana. Ŋat ame bedo i an, kede an i en, en nyako nyige apol, pien mom itwero wunu tiyo ginnoro aboŋo an. Ka dano moro mom bedo i an, obole oko bala jaŋ yat, two oko; ocokogi, obologi i mac, gin waŋ oko. Ka ibedo wunu i an, ame kun koppa bedo i wun, kwa wunu gin ducu ame imito wunu, obino timo pirwu. Man bino kela kwogo i kom Pappa, ka inyako wunu nyigwu apol; kite-nono, ibino doko wunu jo a luba. Acalo Papo rik omara, an daŋ amarowu amannono; bed wunu i mar mera. Ka igwoko wunu cikka, ibino wunu bedo i mar mera, i kite acalo rik an agwoko cik a Pappa, abedo i mar mere. Kop man atittiwu wek yomcunya bed i yiwu, me ipoŋ wunu kede yomcuny. “Man en cik mera, ni imarre wunu kenwu acalo rik an amarowu. Mom tye ŋattoro ame tye kede mar adwoŋ ame kato man, dano ijalo kwo mere pi awottere. Wun owotena ka ce itio wunu gin ame an acikowu. Mom dok abino lwoŋowu ni wun opii, pien opii mom ŋeo gin ame adwoijnere tio; ento an alwoŋowu ni wun owotena, pien doŋ atyeko nyuttiwu gin ducu ame rik awinyo i baŋ Pappa. Mom wun en iyera wunu, ento an en ayerowu, dok aketowu me iwot, inyak wunu nyigwu, dok me nyigwu perakino, wek gin ducu ame ibino wunu kwayo i baŋ Papo i nyina, en miwu. Gin ame acikowu iye en ene ni, marre wunu kenwu kenwu. “Ka lobo odagowu, myero iŋe wunu ni rik okwoŋo daga, a kun pe ru odagowu. Kono ibedo wunu jo me lobo, kono lobo omaro wun jo mere; ento wun mom ibedo wunu jo me lobo, ento ayerowu i lobo, mannono omio lobo odagowu. Po wunu kop a rik akobbiwu, ni, ‘Opii mom bedo dwoŋ ame kato adwoŋŋere.’ Ka rik oliba, wun daŋ obino libowu; ka rik ogwoko koppa, wun daŋ obino gwoko megwu. Magi-nono ducu obino timo i komwu pi nyina, pien gin mom ŋeo ŋat ame rik oora. Kono ce rik mom abino akobo baŋgi, kono gin mom i balloro; ento amanni kopporo ame gin bino pido pi balgi mom tye. Ŋat ame odaga, nwoŋo odago Pappa daŋ. Kono rik mom atio ticcoro ame dano moro ocele mom otio i akinagi, kono gin mom i balloro; ento amanni gin doŋ onena, dok odaga, karacel i Pappa. Man otimere me kop a con ocoo i cik megi cobere kakare ni, ‘Gin odaga nono.’ Ento ka Akony bino tuno, ame abino oro baŋwu iiya i baŋ Papo, en Cuny me ateni ame ya i baŋ Papo, en bino bedo cadenna. Wun daŋ ibedo wunu cadenna, pien ibedo wunu baŋa cakere i ageyi. “Atyeko kobbiwu kop man me kur ipot wunu. Gin bino ryemowu oko i kacokere; kare bino tuno, jo ame nekowu bino tamo ni gin otye otic pi Obaŋa. Gin bino timo man i komwu pien gin mom oŋeo Papo, kadi an. Ento akobbiwu kop magi, me wek ka kare magi bino tuno, ipo wunu ni rik atittiwu pirgi. “Rik mom akobbiwu kop magi i acakki, pien onwoŋo pwod atye baŋwu. Ento amanni adok doŋ baŋ ŋat a rik oora. Mom tye ŋattoro i akinawu ame openya ni, ‘Kara iwot kwene?’ Cunywu opoŋ kede kumo pien akobbiwu kop magi. Ento atye ka tittiwu kop me ateni, ni, bino bedo ber baŋwu ka an awoto; pien ka mom awoto, Akony mom bino tuno baŋwu, ento ka awoto, abino ore baŋwu. Ka en otuno, bino nyutti lobo ni niaŋgi i kom bai, kite atir kede ŋolo kop mom tye kakare: niaŋgi mom tye kakare i kom bai, pien gin mom oye an; i kom kite atir, pien an adok oko baŋ Papo, mom dok ibino wunu nena; i kom ŋolo kop, pien aloc me lobo man doŋ otyeko ŋolle kop oko. “Pwod atye kede kop apol me akoba baŋwu, cite amanni mom itwero wunu kanyo; ento Cuny me ateni ka bino tuno, bino telowu i ateni luŋ; pien mom bino kop pire kene, ento gin ducu ame en bino winyo, bino kobo baŋwu, bino tittiwu gin ame bino timere i nyim. En bino keto kwogo i koma, pien bino kwanyo gin i tuŋ baŋa, te nyuttiwu. Gin ducu ame Papo tye kede, ducu mega; en omio akobbiwu ni, en bino kwanyo gin i tuŋ baŋa, te nyuttiwu. “Kare odoŋ anok, mon dok ibino nena wunu; dok kare odoŋ anok ibino wunu nena.” Jo mogo i akina jo mere a lube te kop kengi kengi ni, “Man ŋo ame en akobbiwa, ni, ‘Kare odoŋ anok, mom ibino wunu nena, dok kare odoŋ anok ibino wunu nena’; dok ni, ‘Pien adok baŋ Papo?’ ” Gin te kobo ni, “Kara man te koppere kono ŋo, ni, ‘Kare odoŋ anok?’ Wan giwa mom oniaŋ i gin ame en tye a ko bo.” Yecu oŋeo ni gin amito penye, omio en te kobbigi ni, “Itye wunu ka penyere kenwu pi kop ame woki akobbiwu ni, ‘Kare odoŋ anok, mom dok ibino nena wunu; dok kare odoŋ anok, ibino wunu nena?’ Ateteni akobbiwu ni, ibino wunu koko, ibino wunu kumo, ento lobo bino lelo; cunywu bino wan, ento wancunywu bino lokere doko me lelo. Ka dako tye a rem, kumo pien kare mere doŋ oromo; ento ka doŋ onywal oko, mom dok po i can, pien nwoŋo cunye yom pi nywalo dano i lobo. Amanni cunywu waŋ, ento abino nenowu doki, ibino wunu lelo kede yomcuny, mom tye ŋattoro ame bino kwanyo yomcuny wu i baŋwu. I nino-nono mom ibino wunu penya pi kopporo. Ateteni akobbiwu ni, ka ce ibino wunu kwayo ginnoro ibaŋ Papo i nyina, en bino miyowu. Tuno amanni yam mom ru ikwao wunu ginnoro i nyina; kwa wunu, ibino wunu nwoŋo, me ipoŋ wunu i yomcuny. “Kop man akobbiwu i carokop; kare bino tuno, mom dok abino kop kedwu i carokop, ento abino tittiwu kop i kom Papo kannaler. I nino-nono ibino wunu kwayo Papo i nyina; mom akobbiwu ni an abino kwayo Papo pirwu; pien Papo ikome marowu, pien wun imara wunu dok daŋ iye wunu ni an aya i baŋ Papo. An aya i baŋa Papo, abino i lobo; dok aweko lobo, adok baŋ Papo.” Jo me re a lube te kop ni, “Nen, aman doŋ ikobo kannaler, mom i carokop. Aman wan doŋ oŋeo ni yin iŋeo jami ducu, mit me penyi doŋ mom; pi man wan oye ni yin iya i baŋ Obaŋa.” Yecu te gamo doggi ni, “Aman doŋ iye wunu? Kare bino tuno, doŋ otuno oko, ame ibino wunu ket, ŋat acel acel i paco mere, ibino weka wunu kena. Ento mom atye kena, pien Pappa tye keda. Akobo man baŋwu me ibed wunu kede kuc i an, i lobo wun itye wunu kede can; ento di wunu cunywu, an doŋ aloo lobo.” Ka Yecu doŋ okobo kop man, onao waŋe malo i polo, okobo ni, “Pappa, kare doŋ oromo, ket kwogo i kom Wodi, me Wodi daŋ ket kwogo i komi, acalo rik imie twer me loyo jo luŋ, me en mi kwo a perakino baŋ jo a rik imio baŋe. Man en kwo ame perakino: ŋeyi yin Obaŋa acel me ateni, kede ŋeyo Yecu Kricito ame rik yin ioro. Atyeko keto kwogo i komi i wi lobo, daŋ doŋ acobo tic a rik imia ni ati. Amanni, Pappa, mia abed kede kwogo baŋi, kit a rik abedo kede baŋi ame mom ru iketo lobo. “Atyeko doŋ nyuto nyiŋi baŋ jo a rik ikwanyo i lobo, imia. Gin rik joni, yini ite miyogi baŋa, gin daŋ ogwoko kop mer i. Aman gin doŋ ŋeo ni jami luŋ a yin imia oya i baŋi; pien kop a rik imia, atyeko miyo baŋgi, gin daŋ doŋ ogamo, otyeko ŋeyo atika ni an aya i baŋi, doŋ oye ni yin en iora. Akwao pirgi, mom akwao pi lobo, kono pi jo a rik imia keken, pien gin jo meri. Jamina luŋ megi, kede megi daŋ luŋ mega, an anwoŋo kwogo pirgi. An mom dok abedo i lobo, ento gin adoŋ i lobo, an adwogo baŋi. Papo Acil, gwokgi pi nyiŋi a rik imia, migi obed acel, acalo wan otye acel. Ame rik an pwod atye kedgi karacel, agwokogi pi nyiŋi a rik imia. Akurogi, moro mom tye ame orwenyo i akinagi, kono ka dano ame rik myero rweny, me coc a yam ocoo cobere kakare. Ento koni doŋ adwogo baŋi. Kop man luŋ an akobo kun pwod atye i lobo, me gin bed i yomcuny aya i baŋa. Doŋ atyeko miyogi kop meri. Lobo odagogi, pien gin mom obedo jo me lobo, acalo an daŋ mom me lobo. Mom akwayo ni kono ikwanyogi oko i lobo, ento akwayo ni igwokgi i baŋ Arac. Atika, gin mom me lobo, acalo an mom me lobo. Lonygi kede ateni, me gin bed acil. Koppi en kop ateni. Acalo yin rik iora i lobo, an daŋ aorogi i lobo. Pirgi omio an alonyere kena, me gin daŋ lonygi kede ateni, me gin bed acil. “Mom akwao pi jo-ni keken, ento daŋ pi jo ame bino ye an pi kop ame jo-ni bino tito. Migi ducu obed acel, acalo yin. Apap, ibedo i an kede an daŋ abedo i yin. Migi daŋ obed i wan, me lobo ye ni yin en iora. Kwogo a rik imia daŋ doŋ amio baŋgi oko. Migi obed acel, acalo wan daŋ acel, kun an abedo i gin, yin ibedo i an, me gin daŋ obed acel aboŋo pokere, me lobo ne ni yin en iora, dok daŋ imarogi acalo imara. “Apap, amito ni jo-ni ame gin mot ame imia, bed baŋa, kan ame atye iye, me gin nen kwogona ame imia, pien yin imara cakere a mom ru icibo acakki te lobo. Pa po a kite atir, lobo pe ru oŋei, ento an anei, jo man doŋ oŋeo ni yin en iora. Amio nyiŋi oŋeye baŋgi, dok abino miyo ŋeye odoco, me mar a rik imara kede bed i yigi, an daŋ abed i yigi.” Ka Yecu doŋ okobo kop man, owoto karacel kede jo mere a lube, oŋolo luŋ me Kidron, kan ame tye iye poto; odonyo iye karacel kede jo mere a lube. Juda ame rik oketo erupe i kome daŋ onwoŋo ŋeo kabedonono, pien Yecu kede jo mere a lube rik maro cokere kuno. Juda ogamo lwak cirikale kede oticcogo i baŋ olamdog adoŋo kede Oparicayo, te wot kuno kede tara kede mac ame ocwinyo i rao kede jami me romo. Yecu gire onwoŋo ŋeo gin ducu ame abino timere i kome; Yecu owoto baŋgi, te penyogi ni, “Kara iyenyo wunu na?” Gin te dokke iye ni, “Yecu me Najaret.” Yecu te kobbigi ni, “An atye do.” Juda ame nwaŋ oketo erupe i kome onwoŋo ocuŋ karacel kedgi. Ame Yecu doŋ okobbigi ni, “An atye do,” gin ojer i negi ote ony piny. Dok te penyogi ni, “Iyenyo wunu kara ŋa?” Gin odokke iye ni, “Yecu me Najaret.” Yecu dok te gamo ni, “Doŋ atyeko kobbiwu ni an atye do; ka iyenya wunu, wek wunu jo man woti.” Man otimere me kop ame rik en okobo cobere kakare ni, “I akina jo a rik yin imia, moro mom tye ame orwenyo.” Cimon Petero onwoŋo tye kede pala bat; owoto, te toŋo amiro alamdog adwoŋ, oljuno yite tuŋ cem oko. Nyiŋ amiro-nono, Maliko. Yecu te kobbi Petero ni, “Rwak palani i akuro mere; ikopo ame Pappa omia, kur amat bo?” Lwak cirikale kede adwoŋgi kede otic a jo Judaya omake, te tweye. Ote kwoŋo tere baŋ Anna, papa a cik a Kayapa, ame onwoŋo obedo alamdog adwoŋ imwaka-no-no. Kayapa en a rik omio tam baŋ jo Judaya ni ber dano acel to pi lwak. Cimon Petero olubo Yecu, karacel kede jo mere a lube. Ŋat acel a lube ame onwoŋo ŋeo alamdog adwoŋ, en odonyo i dyekal alamdog adwoŋ karacel kede Yecu, ento Petero ocuŋ teŋe i dog paco. Ŋat a lubo Yecu ame alamdog adwoŋ onwoŋo ŋeo, owoto okobo gin kede aŋeca ame gwoko dog paco, okelo Petero i dyekal. Aŋeca ame gwoko dog paco te penyo Petero ni, “Yin daŋ mom onyo itye i akina jo a lubo dano man?” En ogamo ni, “Amaa, an mom atye iye gira.” Omiro kede otic onwoŋo omoko mac milo, pien piny onwoŋo ŋic, gin ocuŋ kun ooyo mac. Petero rik daŋ tye karacel kedgi, ocuŋ aoyo mac. Alamdog adwoŋ openyo Yecu pi jo mere a lube, kede i kop ame en pwonyo. Yecu odokke iye ni, “Rik akobo kannaler baŋ lobo; ni no luŋ abedo pwony i kacokere kede i ot Obaŋa, kan ame jo Judaya ducu cokere iye; mom tye ginnoro ame akobo i muŋ. Pino ipenya? Peny jo ame rik owinyo kop ame akobbigi; gin ŋeo gin ame akobo.” Ka en doŋ okobo kop man, dano acel adit i akina otic ame onwoŋo ocuŋ i laŋete te ba po leme, kun kobbe ni, “Mannono kite ame yin igamo kede dog alamdog adwoŋ?” Yecu ogamo doge ni, “Ka akobo arac, nyut kopporo me caden me kop arac; ento ka akobo aber, ibapa piŋo?” Icennere Anna ocwae, ame doŋ otwee, baŋ Kayapa, alamdog adwoŋ. Cimon Petero onwoŋo ocuŋ aoyo mac. Gin te penye ni, “Yin daŋ mom dano acel i akina jo lubo Yecu?” En te kwero oko, kun kobo ni, “Amaa, an mom atye iye gira.” Dano acel i akina omiro olamdog adwoŋ, wat a dano ame Petero rik bin toŋ yite ca, openye ni, “Wok i mom aneni i poto wun i Yecu?” Petero gire te dok kwero oko; oyotoyot twon gweno te mwoco koko oko. Icennere gin te kwanyo Yecu iyi ot a Kayapa, ote tere i Praitorion. Onwoŋo piny ceggi ru. Gin ikomgi mom odonyo i Praitorion, pien gin onwoŋo mito bedo acil, me wek ocam ecuban me Kato. Pi man omio Pilato owoto baŋgi, te penyogi ni, “Ipidi wunu dano man pi kop aŋo?” Gin te dokke iye ni, “Dano man kono mom atim tim arac, kono mom okele baŋi.” Pilato okobbigi ni, “Wun ikomwu tere, ŋolle wunu kop kun ilubo wunu cik megwu.” Ojudaya odokke iye ni, “Wan mom oyewa neko dano moro.” Man otimere me kop a Yecu okobo ocobere kakare, kun nyuto kite me to ame en bino to kede. Pilato dok te donyo i Praitorion, olwoŋo Yecu, openye ni, “Yin abaka Ojudaya?” Yecu ogamo doge ni, “Yin ikobo man piri keni onyo ca jo ocele en otitti pira?” Pilato te gamo ni, “An daŋ Ajudaya bo? Rok meri kede olamdog adoŋo gin omii baŋa: kara yin itimo no?” Yecu odok iye ni, “Locca mom me lobo man. Kono ce locca me lobo man, kono jona oromo pira, me kur mia i ciŋ Ojudaya; ento locca mom me lobo man.” Pilato openye ni, “Doŋ yin abaka?” Yecu ogamo ni, “Yin ikobo giri ni an abaka. Onywala pi man dok daŋ abino i lobo pi man, me abed caden me kop ateni. Jo luŋ ame tye i ateni winyo dwona.” Pilato openye ni, “Ateni kodi ŋo-nono kara?” Ka okobo man, en dok owoto baŋ Ojudaya, okobbigi ni, “Mom anwoŋo kopporo i kome. Ento wun itye wunu kede kitewu ni myero gonnyiwu dano moro acel i kare me Kato. Imito agonnyiwu abaka Ojudaya?” Gin te wo ni, “Aa, mom lo-ni, ento Barabba.” Aco kono Barabba rik ayak. Pilato otero Yecu, opwode kede del. Cirikale okado tok kwogo abaka me okuto, ote rwako i wie, dok ote ruke kede boŋo amaramar. Gin obino baŋe kun okobo ni, “Amoti, abaka Ojudaya!” Gin obape kede ciŋgi. Pilato dok owoto baŋgi, okobbigi ni, “Nen, abino ke le oko baŋwu, me iŋe wunu ni an mom anwoŋo kopporo i kome.” Yecu odonyo baŋgi kun oruko tok kwogo me okuto kede boŋo amaramar. Pilato te k obbigi ni, “Nenu dano man.” Ka olamdog adoŋo kede otic onene, gin owo ni, “Gure i kom yat! Gure i kom yat!” Pilato te kobbigi ni, “Wun tere, iwot igure wunu i kom yat, pien an gira mom anwoŋo kopporo i kome.” Ojudaya te gamo ni, “Wan otye kede cik; pi cikkono, en myero to, pien okette kene ni en ebedo Wot Obaŋa.” Ka Pilato owinyo kop man, lworo omedde i kome, te dok oko i Praitorion, openyo Yecu ni, “Kara yin iya i kwene?” Ento Yecu gire mom te gamo doge. Omio Pilato te kobbe ni, “Ikwero gamo doga oko? Mom iŋeo ni an atye kede twer me gonyi, kede twer me guri i kom yataria?” Yecu odokke iye ni, “Kono rik mom omii twer ame oya i malo, kono mom ibedo kede twerroro i koma; pi mano, ŋat ame omia baŋi tye kede bai adwoŋ akato.” Tekere i kare-nono, Pilato ocako yenyo yo me gonye oko, ento Ojudaya owo ni, “Ka igonyo dano man, yin mom idyere a Kaicari. Dano ducu ame kette kene ni ebedo abaka nwoŋo opyem kede Kaicari.” Pilato ka owinyo kop man, okelo Yecu oko te bedo i wi kom me ŋolo kop i kabedo ame ocano iye gweŋ adikadika; i leb jo Eburania olwoŋo ni, Gabbata. Ninonaca onwoŋo nino me Yikere i camo ecuban me Kato; caa onwoŋo ceggi romo abicel. En okobo baŋ Ojudaya ni, “Nenu, abaka mewu ene!” Jo te wo ni, “Neke oko! Neke oko! Gure i kom yataria!” Pilato openyogi ni, “Agur abakawu i kom yataria?” Olamdog adoŋo odok iye ni, “Wan giwa omom i abaka, kono Kaicari keken.” Pilato te miyo Yecu baŋgi me agura i kom yataria. Gin te tero Yecu, kun oryoŋo yataria mere kene, owoto i kabedo ame olwoŋo ni, Cogo Wic, ame i leb jo Eburania olwoŋo ni, Golgota. Gin ogure i kom yat kuno, karacel kede jo ocele aryo, i ŋete tuŋŋi i tuŋŋi, kun Yecu tye i dyere. Pilato ocoo kop oketo i wi yataria; ocoo ni, “Yecu me Najaret, abaka Ojudaya.” Ojudaya apol okwano kop man, pien kan ame oguro Yecu iye rik ceggi kede boma adwoŋ, dok daŋ rik ocoo i leb jo Eburania, i leb jo Roma kede i leb jo Grik. Olamdog adoŋo Ojudaya te kobbi Pilato ni, “Kur ico ni, ‘Abaka Ojudaya’, ento ni, ‘Dano man okobo ni, An Abaka Ojudaya.’ ” Pilato te dok iye ni, “Gin ame acoo, doŋ acoo.” A doŋ cirikale oguro Yecu i kom yataria, gin okwanyo boŋŋi mere, ote poko yie aŋwen, naka kanyi mere daŋ, cirikale acel acel i mere. Ento kanyi mere onwoŋo mom okwoo akwoa; ocweo ka ilul, cakere i malo. Gin okobo kengi kengi ni, “Kur oyec wunu ayeca, ento obol wunu kwir, me onen ŋat ame bino tero.” Man otimere me coc a yam ocoo cobere kakare ni, “Gin opoko rukka i akinagi, obolo kwir i kom boŋina.” Cirikale otimo man, ento tota a Yecu kede amin tottere, Maliam cik a Kelopa, kede Maliam me Magdala, onwoŋo rik ocuŋ i te yataria mere. Yecu ka oneno tottere kede ŋat ame lube ame en maro kun ocuŋ ceggi i laŋete, okobbi tottere ni, “Imat, nen wodi!” Te dok kobbi ŋat ame lubenono ni, “Nen totti!” Cakere i caa-nono ŋat ame lubo Yecu-nono te tero tota a Yecu i paco mere. Icennere, ka oŋeo ni ducu doŋ otum, Yecu okobo ni, “Oryo ocira,” me coc a yam ocoo cobere kakare. Kuno onwoŋo ocibo iye gulu koŋo awac; gin te rwako abwaŋarot ame opoŋ iye kono awac i wi tir, ote keto i doge. Ka Yecu omato kono awaccono, okobbo ni, “Doŋ otum”; akula wie, omio cunye. Nino-nono onwoŋo obedo rik nino me Yikere, omio Ojudaya okwao Pilato ni myero tur tyengi oko, me ote tero komgi oko; me wek komgi kur ri i wi yataria i ceŋ me cabit, pien cabittono onwoŋo nino adwoŋ. Cirikale obino, te cako turo tyen dano me agege, kede dano ocele a rik oguro karacel i Yecu. Ka gin otuno i kom Yecu, gin oneno ni en doŋ otyeko to oko, naka mom doŋ ote turo tyene. Ento dano acel i akina cirikale te cobo laŋet Yecu kede toŋ; oyotoyot remo kede pi i te mollo i yie. Dano ame oneno otuco kannaler, kop a en otuco obedo kop ateni; en ŋeo ni etito kop me ateni, me wun daŋ iye wunu. Pien kop magi otimere me coc a yam ocoo cobere kakare ni, “Cogo mere moro mom obino turo.” Dok dul coc ocele okobo ni, “Gin bino neno ŋat ame gin ocobo.” Icennere Yucepu me Arimataya, ame rik en ŋat a lubo Yecu, ento i muŋ, pi lworo Ojudaya, en okwao Pilato ni myero eter kom Yecu; Pilato oye. En obino otero kome. Nekodem, ame nwaŋ koŋ obino baŋe dyewor, daŋ obino kun okelo murra ame orubo kede tebakori, ame pekkere mito romo ratili mia. Gin otero kom Yecu, ote boyo kede boŋo me camanini, karacel kede gin a ŋwece kur, i kite ame yik Ojudaya tye kede. Kabedo kan ame rik ogure iye onwoŋo tye iye poto, potonu rik tye iye lyel anyen, ame yam mom ru oyiko iye ŋattoro. Gin te yiko Yecu kuno, pien pi nino me Yikere, lyellono onwoŋo ceggi. I nino ame lubo cabit Ojudaya, Maliam me Magdala odilo i wi lyel odiko con ame piny pwod icocol, te neno ni okwanyo kidi oko i dog lyel. En or iŋo, owoto baŋ Cimon Petero kede dano ocele ame lubo Yecu, ŋat ame onwoŋo Yecu maro, okobbigi ni, “Okwanyo Rwot oko iyi lyel, mom oŋeo kan ame okete iye.” Petero kede ŋat a lube ocele-naca te mako yo, wot i lyel. Gin aryo ducu orwomo ŋwec karacel, dano a lubo Yecu ocele ca te lanyo Petero oko i ŋwec, en te geyo tuno i lyel. En oguŋo te ŋiyo yie, oneno boŋŋi me camanini ame onwoŋo oboe kede odoŋ kakare, ento en mom odonyo i yie. Cimon Petero daŋ te bino kun lube, en te donyo i lyel. En oneno boŋŋi me camanini ame onwoŋo oboe kede odoŋ kakare, kede itambara ame rik tye i wie; mom tye karacel kede boŋŋi camanini, ento odolle tye kene teŋe. Icennere ŋat a lubo Yecu ocele ca, ame onwoŋo ogeo tuno i lyel, daŋ te donyo i yie, oneno, te ye. Pien rik onwoŋo gin mom ru oniaŋ i coc a yam ocoo ni, myeroen oceroko i akinajo oto. Jo a lubo Yecu-nono te dok paco. Ento Maliam ocuŋ i laŋet lyel kun akoko; ame en tye akoko, oguŋo, te ŋiyo yi lyel. En te neno omalaika aryo ame rukgi tar, kun obedo kan ame rik opyelo iye kom Yecu; acel obedo tuŋ wie, acel obedo tuŋ tyene. Gin te penye ni, “Dako, kara ikoko no?” En te kobbigi ni, “Okwanyo Rwot mera oko, mom aŋeo kan ame okete iye.” A doŋ okobo kop man, olokere, te neno Yecu ocuŋ i yo ŋee, ento en mom oŋeo ni Yecu ennono. Yecu te penye ni, “Dako, kara ikoko ŋo? Daŋ iyenyo ŋa?” Maliam otamo ni apur poto ŋit ennono, omio okobbe ni, “Adwoŋ, ka yin en ame itere, titta kan ame ikete iye, me akwany oko.” Yecu te lwone ni, “Maliam.” En olokere, te kop kede i leb Eburania ni, “Rabbi!” Te koppere ni, Apwony. Yecu te kobbe ni, “Kur imaka, pien pe ru ayito baŋ Papo. Wot baŋ omegona, itittigi ni, ‘An ayito baŋ Pappa ame en daŋ Papawu, baŋ Obaŋana, daŋ Obaŋawu.’ ” Maliam me Magdala owoto, okobo baŋ jo a lubo Yecu ni, “An be aneno Rwot,” oporrigi ni en okobo kop man baŋe. Otyeno me nino-nono, nino ame lubo cabit Ojudaya, jo a lubo Yecu onwoŋo tye i ot, kun ocego doggola oko pi lworo Ojudaya. Yecu otuc, te cuŋ i ak inagi, te kobbigi ni, “Kuc obed baŋwu.” A doŋ en okobo man, onyuttigi ciŋe kede laŋete. Jo a lube ka oneno Rwot, cunygi obedo yom. Yecu dok te kobbigi ni, “Kuc obed baŋwu. Acalo Papo rik oora, an daŋ aorowu.” A doŋ en okobo man, owe i komgi, okobbigi ni, “Gam wunu Cuny Acil. Ka iweko wunu bal a ŋattoro, nwoŋo doŋ oweko oko; ka mom iweko wunu bal a ŋattoro, nwoŋo daŋ mom oweko.” Tomaci ame olwoŋo ni, Rut, ame en ŋat acel i akina jo apar wie aryo, onwoŋo mom tye baŋgi i kare ame Yecu bino. Jo a lubo Yecu ocele mere otitte ni, “Wan be, oneno Rwot.” Ento en odokkigi iye ni, “Ka mom aneno waŋ poo me cumali i ciŋe, aketo ciŋa i waŋ poo cumali, acwao ciŋa i laŋete, kom mom abino ye.” Ame nino aboro doŋ otyeko kato, jo mere a lube dok onwoŋo obedo i ot, Tomaci onwoŋo doŋ tye baŋgi. Doggola onwoŋo ocegere oko, ento Yecu obino, te cuŋ i akinagi, okobbigi ni, “Kuc obed baŋwu.” Icennere okobbi Tomaci ni, “Ket ciŋi kakan, nen ciŋa: rye ciŋi, cwa i laŋeta; iwek bedo a mom iye, ento ame ye.” Tomaci ogamo doge ni, “Kom yin i Rwotta kede Obaŋana!” Yecu openye ni, “Pien inena, omi i iye? Tye kede winyo jo a mom onena, ame gin ye.” Yecu otio anyut apol i nyim jo a lube, ame mom ocoogi i buk man. Ocoo ka magi me wek iye wunu ni Yecu en Kricito, Wot Obaŋa, dok daŋ me wek iye wunu, ibed wunu i kwo pi nyiŋe. Icennere Yecu dok onyutte baŋ jo mere a lube i dog nam me Tiberia; onyutte ni amane. Cimon gin kede Tomaci ame olwoŋo Rut, Nacaneri me Kana me Galilaya, awobe a Jebedayo, kede jo aryo ocele i akina jo a lubo Yecu onwoŋo gin tye karacel. Cimon Petero okobbigi ni, “Amito wot mako rec.” Gin te gamo doge ni, “Wan daŋ obino wot kedi.” Gin owoto, ote donyo i yee, mom ote ma ko ginnoro i dyewor-ru. Ame piny pwod oru arua, Yecu ocuŋ i wi tela, ento jo mere a lube mom oŋeo ni en Yecu. Yecu te penyogi ni, “Itino, inwoŋo wunu dekkoro ya?” Gin te dok iye ni, “Amaa.” En te kobbigi ni, “Rye wunu bwo i tuŋ cem me yee, ibino nwoŋo wunu.” Gin te ryeyo, ento tiŋo bwo te loyogi oko pi pol a rec. Dano mano ame lubo Yecu, ame onwoŋo en maro te kobbi Petero ni, “Rwot ennono.” Cimon Petero ka owinyo ni mannono Rwot, oruko boŋo mere, pien onwoŋo en ogonyo oko, te kworre i nam. Ento jo a lubo Yecu ocele mere te bino kede yee, kun owao obwo ame rec opoŋ iye, pien onwoŋo gin mom bor i wi tela, mito romo tyen mia acel keken. A doŋ gin oyito i wi tela, gin oneno mac milo kuno, ame opyelo rec i wie, kede ogati. Yecu te kobbigi ni, “Kel wunu reccogo ame imako wunu amanni.” Cimon Petero oyito i yee, owao bwo, okelo i wi tela, ame opoŋ iye rec adoŋo, mia acel kede pyerabic wie adek. Kadi bed gin pol ata, ento bwo mom oyec. Yecu okobbigi ni, “Biye wunu ka cam, ba.” Mom tye ŋattoro i akina jo a lube ame odio cunye me penye ni, “Yin i ŋa?” Pien gin oŋeo ni en Rwot. Yecu obino te kwanyo ogati, opokkigi, kede rec daŋ amannono. Man doŋ tyen me adek ame Yecu onyutte kede bajj jo mere a lube, ame doŋ ocer i akina jo oto. A doŋ gin ocamo otum, Yecu openyo Cimon Petero ni, “Cimon wot a Lakana, yin imara ame kato jo magi?” En ogamo ni, “Ee ta, Rwot, yin iŋeo an amari.” Ocike ni, “Kwa itino rommina.” Openye tyen me aryo ni, “Cimon wot a Lakana, yin imara?” En te dok gamo ni, “Ee ta, Rwot, yin iŋeo an amari.” Ocike ni, “Kwa rommina.” Dok openye tyen me adek ni, “Cimon wot a Lakana, yin imara?” Cimon okumo pien openye tyen adek ni, “Yin imara?” Okobbe ni, “Rwot, yin iŋeo jami luŋ; yin iŋeo an amari.” Yecu ocike ni, “Kwa rommina. Ateteni akobbi ni, ka rik yin pwod awobi, itweo boŋi meri keni, owoto kan a yin imito, ento ka doŋ iti, ibino ryeyo badi ŋat ocele en ame bino tweyi bonŋini, bino teri kan ame mom imito.” Okobo man pi nyuto kite me to ame en ebino keto kede kwogo i kom Obaŋa. A doŋ okobo man, te kobo ni, “Luba.” Petero olokere, oneno ŋat a lubo Yecu ame Yecu rik maro kun tye awapo yorgi, en ŋat ame rik jenere i kor Yecu i dog cem me otyeno, ame okobo ni, “Rwot, na ame bino keto irupe i komi?” Ka Petero onene, openyo Yecu ni, “Rwot, kara dano-nu kono?” Yecu okobbe ni, “Ka amito ni en perakino ituno ka abino dwogo, kara ilaro ŋo iye? Yin luba.” Kop man olal i akina omego, ni dano a lubo Yecu-nono mom bino to: ento Yecu rik mom oko bo ni en mom bino to ento ni, “Ka amito ni en perakino ituno ka abino dwogo, kara ilaro ŋo iye?” Man en ŋat ame lubo Yecu ame obedo caden i kom kop magi, dok daŋ ocoogi; wan oŋeo ni kop a en otuco obedo kop me ateni. Dok daŋ tye jami ocele apol a rik Yecu otio; ka kono rik ocoo ducu acel acel, atamo ni lobo luŋ do obedo diŋ pi buke ame ocoo. I buk me agege, Teopilo, onwoŋo acoo kop ducu ame Yecu ogeo tiyo kede pwonyo, tuno kede i nino ame otere kede i polo, a doŋ otyeko miyo cik pi Cuny acil baŋ okwena ame eyero. A doŋ otyeko kanyo cannere adwoŋ, en onyutte kene baŋgi kun moko i yo apal ni ekwo. Obedo ka nen baŋgi pi kare me nino pyeraŋwen, kun kobo pi loc Obaŋa. I kare a en tye kedgi, ocikogi ni kur oya i Jerucalem, ento ni myero koŋ okur gin ame Papo ociko, ame okobo ni, “Rik iwinyo wunu i baŋa, pien Lakana yam batakino jo kede pii, ento a mom ru nino okato apol wun obino batijawu kede Cuny Acil.” Ka rik okwena tye ocokere karacel, gin openye ni, “Rwot, i kare man en ame ibino dwoggo iye loc baŋ jo Icrael?” En te gamo ni, “Mano gire mom megwu me ŋeyo kare kede nino ame Papo omoko pi twerrere. Ento obino miyowu teko ka Cuny Acil obino i komwu; daŋ ibino wunu bedo cadenna i Jerucalem, kede i Judaya ducu, kede i Camaria, anaka i agikki lobo,” Ka en otyeko kobo kop man, ote tiŋe oko malo a kun gin aneno, pol te game i waŋgi oko. Ame gin ociko waŋgi i polo kun en ayi to, nen, oyotoyot co aryo ame oruko boŋŋi atar te cuŋ i laŋetgi; te penyogi ni, “Wun jo Galilaya, piŋo icuŋ kun ineno wunu polo? Yecu man ame otiŋo malo i polo iyi akinawu-ni bino dok dwogo amannano, i kite acalo inene wunu ayito i polo.” Icennere gin te dwogo oko i Jerucalem kun oya i wi kidi ame olwoŋo Jeituni, ame ceggi kede Jerucalem, borrere romo wot ame oye ni wot kede i ceŋ cabit. A doŋ gin otuno i Jerucalem, oyito malo i icika a malo kan ame gin bedo iye; Petero, kede Lakana, kede Yakobo, kede Anderiya, Pilipo gin kede Tomaci, Bartolomayo gin kede Matayo, Yakobo wot a Alipayo, kede Cimon me eryoŋet a jo a pyem i abumente, kede Juda wot a Yakobo. Jo-ni ducu ojalle kede cuny acel i kwayo Obaŋa, karacel kede mon, kede Maliam tota a Yecu, kede omego mere. I kare-nono Petero oya ocuŋ i akina omego a rik ocokere karacel, ame welgi romo mia acel kede pyeraryo, te kobo ni, “Omegona, coc a yam ocoo myero rik cobere kakare, ame Cuny Acil nwaŋ okobo i dog Daudi i kom Juda ame bin odoko atel jo ame omako Yecu. Rik en dano acel ame onwoŋo tye i akinawa, daŋ nwaŋ opokke dullere i tic man.” (Dano man rik owilo poto kede lim ame onwoŋo pi ballere; en orette aryeba cuny, yie te yec i dyere, amontennere ducu te wukere oko piny. Kop man pire oŋeye baŋ jo ducu ame bedo i Jerucalem, omio olwoŋo poto-nono ni, Akeldama, ame te koppere ni, Poto me remo.) “Pien yam ocoo i buk me Jabuli ni, ‘Paco mere dok wi obur, ŋattoro kur bed iye’; ‘Dano ocele luny ticcere.’ Pi mano dano moro acel myero bed caden me cer a Yecu karacel kedwa. Dano-nono myero bed i akina jo ame obedo kedwa i kare ducu ame Rwot Yecu obedo wowota i akinawa, cakere i kare ame Lakana batija jo, tuno anaka i nino ame otere kede i polo kun okwanye i baŋwa.” Ka doŋ gin te tuco nyiŋ jo aryo; Yucepu ame olwoŋo Barcaba, ame nyiŋe ocele Yucito, gin kede Matia. Icennere ote kwayo Obaŋa kun okobo ni, “Ama Rwot, yin ame iŋeo cuny jo ducu, i kom jo magi aryo nyuttiwa ŋat a yin iyero me luny tic kede kwena man ame Juda oweko, owoto i kabedo otike.” Gin te bolo kwir i komgi, kwir te poto i kom Matia, ote kwane karacel kede okwena apar wie acel. Ka nino me Pentekote doŋ otuno, onwoŋo gin luŋ rik ocokere karacel i kabedo acel. Cucuttono ginnoro owinyere ame ya i polo kun mor bino bala yamo akodo kede teko, te poŋ yi ot ducu, kan ame onwoŋo gin rik obedo iye. Cite gin a cal leb mac ame okaro apol onen baŋgi, te tyer, poto i kom dano acel acel i akinagi. Cuny Acil rik te poŋ yigi luŋ, gin te cako dumo leb ocele apapat, acalo Cuny Acil omiogi teko me kobo. I Jerucalem rik onwoŋo bedo iye Ojudaya, jo a woro Obaŋa ame oya i rok luŋ a tye i te polo. Kare ame ŋur man owinyere, lwak apol ocokere karacel, wigi koŋ te cuŋ oko, pien dano acel acel i akinagi owinyogi akobo leb me turgi. Omio gin te wuro atek meicel kun okobo ni, “Jonu ducu a kop-pu mom gin Ogalilaya? Kara piŋo wan ducu, ŋat acel acel tye awinyo kop i leb ame onywale iye? Wan jo Parti, jo Medi, jo Elam, kede wan jo ame obedo i Mecopotamia kede i Judaya kede Kapadokia, Ponto kede Acia. Purugia kede Pampulia, Miciri kede dul lobo me Libia ame otemere kede Kurene, kede wan wele ame oya i Roma, Ojudaya kede jo olokere i dini Ojudaya, jo Kurete kede jo Arab, wan doŋ owinyogi orabo kop i lebwa ikome pi tic adoŋo ame Obaŋa otio.” Gin ducu owuro, tamgi te tum oko, ote penyere kengi kengi ni, “Kara man te koppere ŋo?” Ento mogo te cayo acaa kun okobo ni, “Jo-nu omer amera i koŋo alim.” Cite Petero ocuŋ karacel kede jo apar wie acel, te olakino kun kobbigi ni, “Wun jo me Judaya, kede wun jo ducu a bedo i Jerucalem, cik yitwu i koppa, atye i kop ame amito iŋe wunu. Jo-ni ba, mom omer kit ame itamo wunu kede, pien caa me iceŋ pwod adek keken; ento man en gin a rik adwarpiny Joel okobo pire ni, ‘Man gin ame bino timere i kare me agikki, Obaŋa ame okobo, abino onyo Cunya i kom jo luŋ, Otinowu awobe kede anyira bino doko odwarpiny, awobewu adoŋo bino neno anyut, jowu oteggo bino leko lek. I kare-nono abino onyo Cunya i kom omiro mera a co kede a mon, gin te doko odwarpiny. Daŋ abino nyuto taŋo malo i polo, kede miyo anyuttogo piny i wi lobo, remo kede mac kede ikuna a duny bala yito. A mom ru nino a Rwot obino, nino adwoŋ a nen kannaler, ceŋ bino cido acol icuc, dwe bino lokere doko remo. Dok daŋ jo luŋ ame bino lwoŋo nyiŋ Rwot obino larogi.’ “Wun jo Icrael winy wunu koppa: Yecu me Najaret onwoŋo en dano ame Obaŋa onyuto baŋwu kun moke kede tic atek adoŋo kede taŋo kede anyuttogo ame Obaŋa otio i akinawu kede ciŋe, acalo iŋeo wunu. Yecu-ni rik jo obin omie baŋwu, kun lubo yik a rik Obaŋa oyiko dok oŋeo con, wun ite gure wunu i kom yataria kun ineke wunu kede ciŋ jo a kwia cik Obaŋa. Cite Obaŋa doŋ ocere oko, kun ogonye oko i rem me to, pien onwoŋo to mom twero make bedo abuccere. Pien Daudi rik okobo kop i kome ni, ‘Kare luŋ yam abedo neno Rwot i nyima, pien en tye i laŋeta tun cem me kur atagere; Ennono omio cunya yom, leba daŋ te lelo; anaka koma daŋ bino bedo kede gen. Pien mom ibino weko tipona ata i Kadec, kadi miyo kom Dano meri Acil top. Imia aŋeo yo me kwo; i nyimi abino lelo meicel.’ “Doŋ ba, wun omegona, atwero kobbiwu kannaler ni kwarowa Daudi rik oto, ote daŋ yiko, wi lyellere tye baŋwa anaka onyoni. Pien onwoŋo rik en adwarpiny; kun en oŋeo ni, Obaŋa yam okwonŋe kwoŋ ni ebino to akware moro i wi kom me loccere, omio ogeo neno cer a Kricito con, okobo kop i kome ni, mom oweke ata i Kadec, anaka kome daŋ pe otop. Yecu-nono Obaŋa otyeko cero oko wan-ni luŋ ocaden me koppono. Ka doŋ otyeko tuŋe malo i kabedo me kwogo i laŋet Obaŋa tuŋ cem, daŋ te gamo Cuny Acil a yam Obaŋa Papo ociko pire, en doŋ te onyo gin ame wun ikomwu ineno wunu dok iwinyo wunu. Pien Oaudi gire mom oyito i wi polo; ento en ikome okobo ni, ‘Rwot okobbi Rwotta ni, Bed i laŋeta tuŋ cem i kabedo me kwogo, ituno ka abino miyo okwori doko aten tyeni.’ Doŋ ba, doggola me Icrael myero ŋe ni, Yecu-nono ame iguro wunu i kom yataria, Obaŋa doŋ oloke odoko Rwot kede Kricito.” A doŋ gin owinyo mannono, cunygi te ŋeŋema, ote kobbi Petero kede okwena ocele ni, “Omegowa, kara otim ŋo?” Petero te gamo doggi ni, “Iŋut wunu, eka dano acel acel i akinawu te batakino i nyiŋ Yecu Kricito me wek balwu, ote miyowu mot man me Cuny Acil. Pien rik ociko pirwu, kede pi itinowu kede pi jo ducu ame tye kananbor ame Obaŋa bino lwoŋogi baŋe.” Otito i yore ocele apol, kun cuko cunygi kobo ni, “Larre wunu i lwagi jo ogom me kare man.” Jo oye koppere ote batijagi; i nino-nono jo te medde tutumia adek. Gin te bedo keto cunygi i pwony okwena, kede i notte karacel, i nyilo ogati, kede i kwayo Obaŋa. Jo ducu obedo kede lworo, okwena otio taŋo kede anyuttogo apol. Jo luŋ ame oye Yecu ocokere karacel, onoto jamigi karacel. Ote cato limgi kede jami ame owoŋo tye baŋgi, gin ote poko kun dano acel acel gamo acalo mittere tye. Nino luŋ gin bedo karacel kede cuny acel i ot Obaŋa, onyinyilo ogati i paccigi, daŋ ocamo cemgi kede lelo a cunygi ler, kun opako Obaŋa, jo luŋ pwoogi. Didik Rwot obedo medo baŋgi jo ame olarre. Petero kede Lakana rik otye owot i ot Obaŋa i caa me kwac, en caa aboŋwen. Ote cop i kom jo a tiŋo dano moro ame aŋwalo geye i yi tottere. Jo-nono rik ocibe didik i doggola me ot Obaŋa ame olwoŋo ni, Aber, me en kwa lim baŋ jo a donyo i ot Obaŋa. En oneno Petero gin kede Lakana kun ocako donyo i ot Obaŋa, te kwayogi ni mie lim. Petero gin i Lakana te ŋiye, Petero te kobbe ni, “Nenwa.” En te moko tammere ducu i komgi, kun geno nwoŋo ginnoro i baŋgi. Cite Petero te kobbe ni, “An a mom i ryal kadi jabu, ento amiyi gin ame atye kede. Pi teko me nyiŋ Yecu Kricito me Najaret, ya iwoti.” Petero te mako ciŋe tuŋ cem, yiye malo. Cucuttono tyene kede ogwic tyene te doko atek oko; Oya malo iwic te cuŋ acuŋa, odonyo karacel kedgi i ot Obaŋa, kun woto pyepyea, pako Obaŋa. Jo luŋ onene kun doŋ awot apako Obaŋa, gin oniaŋ i kome ni en dano a yam bedo kun kwao lim i doggola Aber me ot Obaŋa; gin owuro atek meicel gin ame onwoŋo otimere i kome. Ame en pwod ocerre i yo Petero gin kede Lakana, jo ducu orwomo ŋwec karacel baŋgi i te baraja ame olwoŋo ni, mea Culeman, kun owuro meicel. Ka Petero oneno, orabbi lwak ni, “Wun jo Icrael, piŋo iwuro wunu kop man, onyo piŋo wanwu omoko i komwa, bala wan pi tekowa, onyo ni pien wan olworo Obaŋa, en omio dano-nu owoto? Obaŋa Iburaim kede Icaka kede Yakobo, Obaŋa a kwariwa, rik oketo kwogo i kom amiro mere Yecu ame wun rik iketo wunu erupe i kome, daŋ ikwere wunu i nyim Pilato, ame onwoŋo omoko ni myero gonye oko. Wun ikwero wunu ŋat Acil kede Akite-atir, cite ite kwayo wunu ni tim ber gonnyiwu anek, ite neko wunu ŋat a terowa i kwo. Ento Obaŋa te cere oko i akina a jo oto; wan ocaden me cerrere. Nyiŋe, kede pi ye nyiŋe, en omio teko baŋ dano man ame ineno wunu, daŋ iŋee wunu; iyee ame obino pi Yecu en omio kom dano man odoko ayot odoco i nyimwu ducu. “Kakare omegona, aŋeo ni rik itimo wunu man pi kwiya piny, kede olocwu daŋ amannono. Ento i yore-nono Obaŋa doŋocobo kakare gin a rik en otito con i dog odwarpiny ducu, ni Kricito mere myero kany can adwoŋ. Ŋut wunu doŋ, ite dwogo wunu baŋ Obaŋa, me we balwu oko. Kare me weo myero bin kun ya i nyim Rwot, dok myero en cwa Yecu, ame en Kricito a rik oyero pirwu con. Polo myero koŋ game ituno ka kare oromo me dwoggo jami ducu kakare, ame rik Obaŋa otito pire i dog odwarpinnyere acil, ame obedo kare acon. Muca rik okobo ni, ‘Rwot Obaŋa bino miyowu adwarpinnyoro ame bino ya i akina omegowu, kite a en rik omia kede baŋwu. Wun ibino winye wunu i ginnoro luŋ a en bino kobbiwu. Ento dano acel acel ame mom bino winyo kop adwarpiny-nyu, obino neko oko i akina jo.’ Kede odwarpiny ducu daŋ, geye i kom Camwiri kede jo olubo ŋec ducu ame okobo kopporo, gin orabo pi kare man. Wun ikwae odwarpiny, daŋ ileo wunu cikere a rik Obaŋa ociko baŋ kwariwa, kun okobbi Iburaim ni, ‘Atekere luŋ me wi podo bino nwoŋo winyo pi ikwaeni.’ Kare ame Obaŋa doŋ omiowa amiro mere, ogeo ore baŋwu, me miwu winyo, me loko dano acel acel ya oko i kom ballere.” Ame Petero kede Lakana pwod tye akop i lwak, olamdog kede adwoŋ cirikale me ot Obaŋa, karacel kede Ocadukayo, te bino baŋgi, a doŋ oŋo meicel pien gin otye opwonyo lwak dok orabo kop ni Yecu ocer, ame nyuto ni jo oto daŋ bino cer. Gin te makogi ketogi i ot kol ituno odiko, pien onwoŋo piny oyuto oko. Ento jo apol ame owinyo koppono, polgi oye Yecu, te miyo wel co romo tutumia abic. Orwo mere olocgi, odoŋe kede opwony-cik te cokere i Jerucalem, karacel kede Anna, ame alamdog adwoŋ, kede Kayapa, kede Lakana, kede Alegejanda, kede jo ducu a gin wati olamdog adoŋo. A doŋocibogi i dyere, gin te penyogi ni, “Wun kara itimo wunu man kede kodi teko aŋo onyo kede nyiŋŋene?” Eka Cuny acil te poŋ i yi Petero, te kobbigi ni, “Oloc a lwak kede odoŋe, ka tin ipenyowa wunu pi gin aber ame otimere i kom aŋwalo kede kite ame en ocaŋ kede, myero wun ducu, kede jo Icrael luŋ, iŋe wunu ni, pi nyiŋ Yecu Kricito me Najaret ame rik iguro wunu i kom yataria, eka Obaŋa rik te cere oko iyi akina a jo oto, pi nyiŋe en omio ico man ocuŋ inyimwu a doŋkome yot. Man en kidi ame wun ogedo ikwero wunu, en ame odoko kidi me gwic ot. Larre mom doŋtye baŋ dano moro ocele; pien mom dok tye nyiŋŋoro ocele i te polo ame Obaŋa omio jo, a myero wan olarre pire.” Ka gin oneno tekcuny Petero gin kede Lakana, dok daŋ oniaŋ ni gin jo moro keken a mom opwonyo, gin owuro meicel, ote daŋ poyo ni jo-nono yam bedo karacel i Yecu. Ento ka gin oneno dano ame ocaŋo ocuŋ karacel kedgi, mom doŋote bedo kede kop a myero opyem iye. Gin koŋ te cikogi donyo oko i okiko, eka gin te bedo yiko kop kengi kengi. Gin te penyere ni, “Otim wunu ŋo i kom jo-ni? Pien jo i Jerucalem ducu doŋ ŋeo ni gin onyuto anyut a pire orwo, ame wan mom dok otwero kwero. Doŋ me geŋo kop man medde lal i akina a jo, myero obur wunugi me kur dok okobbi ŋattoro kop i kom nyiŋ man.” Amannono gin doŋ te lwoŋogi, ote cikogi atek ni kur gin okob kopporo, kadi pwonyo jo i nyiŋ Yecu. Ento Petero gin kede Lakana te dokkigi iye ni, “Ka ber i nyim Obaŋa me winyowu akato Obaŋa, wun myero iŋol wunu; pien wan mom otwero weko kobo gin a doŋ oneno kede a doŋowinyo.” Dok ote burogi kede teko, ote gonyogi oko, kun mom onwoŋo yo me keto can i komgi pi lwak; pien lwak ducu onwoŋo apako Obaŋa pi gin ame otiye. Dano a rik ocaŋo kede kodi anyut man, mwaka me dittere onwoŋo kato pyeraŋwen oko. A doŋ otyeko gonyogi, gin te wot baŋ owotegi, ote porrigi gin ame olamdog adoŋo kede odoŋe okobbigi. Ka gin owinyo, gin otiŋo dwongi karacel baŋ Obaŋa kun okobo ni, “Ama Adwoŋ Rwot, yin a nwaŋ itio polo kede lobo kede nam kede jami ducu a tye iye. Yin ame rik ikobo i Cuny Acil i dog kwarowa Daudi, amiro meri ni, ‘Piŋo Orok rik owo kede akemo? Piŋo rok otamo kop a tere pe? Rwode me lobo doŋ oterre oko, oloc ocokere karacel, i kom Rwot kede i kom Kricito mere.’ Iyi ateni, Kerode gin kede Pontio Pilato, karacel kede Orok kede jo me Icrael ducu, ocokere karacel i boma man i kom amiro meri acil, Yecu, a rik ioro me bedo abaka, me wek gin otim gin ducu ame pi twer me ciŋi kede yikki rik imoko ni myero timere. Doŋ amanni Rwot, koŋ inen kit a gin burowa kede, mi omiro meri tekcuny me kobo kop meri aboŋo lworo, kun yin iryeo ciŋi icaŋo jo, imio anyuttogo kede taŋo timere i nyiŋ amironi acil, Yecu.” Ka gin doŋ otyeko kwayo Obaŋa oko, kabedo ame gin ocokere iye te yeŋere, Cuny Acil te poŋ i yigi luŋ, gin te kobo kop Obaŋa i tekcuny. Lwak jo a rik oye Rwot rik obedo i tam acel kede cuny acel; mom tye ŋattoro ame kobo ni jami mere moro obedo mere kene, ento gin onoto jami ducu karacel. Okwena omedde miyo cadengi i kom cer a Rwot Yecu i teko adwoŋ, dok winyo Obaŋa rik tye i komgi luŋ. Iyi akinagi luŋ, mom tye ŋattoro ame gin a en mito oremo, pien jo ducu ame rik tye i potti, onyo udi, gin rik ocato oko ote kelo limmere, keto i tyen okwena; eka ote pokki dano acel acel a rome. Doŋ rik tye Alevi moro ame onywalo i Kupuro, ame okwena rik ocako nyiŋe Baranaba, te koppere ni, Acuk cuny jo. En daŋ rik tye kede poto, ocato oko, te kela limmere keto i tyen okwena. Cite lo moro a nyine Anania gin kede cege Capira rik ocato dul lobo moro, eka ote kano dul limmogo oko, ame dako mere daŋ ŋeo, en te lunyo kela ka nucu moro keken keto i tyen okwena. Cite Petero te penye ni, “Anania, kara piŋo imio Catan oloo cunyi oko, omio ibwolo Cuny Acil, ite kano piri keni limmogo ame owilo i poto? Ame rik pwod mom ru icato, onwoŋo mom megi? Kadi ame doŋ icato, limmere rik gire mom tye i twerri? Kara piŋo cunyi dok omoko kodi kop-pi? Ibwolo giri Obaŋa, ento mom jo.” Ka Anania owinyo kop man, orette piny, te to oko. Lworo adwoŋ omako jo luŋ ame owinyo. Awobe te ya, boye, tere, yike oko. Ame pwod okato caa bala adek, dako mere daŋ te bino, kun mom oŋeo gin ame otimere. Petero te penye ni, “Koŋ ikobba ka rik icato wunu poto i wel-lie?” Dako te gamo ni, “Ee ta, wellere ennono.” Petero te kobbe ni, “Piŋo inoto dogwu i temo Cuny a Rwot? Nen, tyen jo oyiko cwari pwod enno i doggola, gin daŋ obino teri oko.” Cucuttono en te rette piny i tyen Petero, to oko. Ka awo be ca odwogo, onwoŋe oto oko, otere, ote yike i laŋet cware. Lworo adwoŋ omako lwak jo luŋ oye Kricito, kede jo ducu ame owinyo kop man. Okwena obedo timo anyut kede taŋo apol i akina lwak. Gin ducu rik ocokere didik i te baraja a Culeman. Jo ocele mere-ni, moro mom odio cunye me notte kedgi, ento lwak oketo kwogo adwoŋ i komgi. Jo ame oye Rwot omedde baŋgi, lwak co kede mon apol. Omio jo okelo otwo anaka i waŋa yo, opyelogi i tanda kede gi-butogi, me ka Petero abeo akato, kadi tipo mere myero tun i kom jo mogo i akinagi. Jo ame oya i pacci ame omano Jerucalem daŋ te cokere apol, kun okelo otwo kede jo a cen arac lologi, gin luŋ rik obin ocaŋogi. Cite nyeko te mako alamdog adwoŋ atek, karacel kede jo luŋ a rik tye baŋe, ame onwoŋo eryoŋet Ocadukayo. Gin te ya mako okwena, ote ketogi i ot kol a lwak. Ento dyewor amalaika a Rwot oyabo doggola me buc oko, te cwayogi oko kun kobo ni, “Wot icuŋ wunu i ot Obaŋa, ite kobbi wunu lwak kop ducu me Kwo man.” A doŋgin owinyo kop man ote donyo i ot Obaŋa ka ibayi, ote ero pwony. Ka alamdog adwoŋ obino, karacel i jo a rik tye baŋe, olwoŋo okiko, kede odoŋe a jo Icrael ducu, gin te oro jo i ot kol me wot omogi. Ento ka otic obino, mom ownonogi i buc; gin te dok dwoko kop ni, “Wan onwoŋo ocego ot kol aber meicel, okur daŋ onwoŋo ocuŋ i doggola, ento ka oyabo, mom giwa onwoŋo dano moro i yie.” Kare ame gin owinyo kop man, adwoŋ cirikale me ot Obaŋa kede olamdog adoŋo wigi te cuŋ oko i kom okwena, kun openyere ni, “Kara Ŋo a dok otimere ba?” Cite dano moro te bino kobbigi ni, “lo a rik iketo wunu i buc ca, otye i ot Obaŋa ocuŋ iye opwonyo jo.” Eka adwoŋ me cirikale kede otic te wot omogi, ento mom tetek, pien onwoŋo olworo lwak, me kur napgi kede gweŋe. Okelogi ote cibogi i nyim okiko, alamdog adwoŋ te penyogi ni, “Wan rik ocikowu atek meicel ni kur dok ipwony wunu jo i nyiŋ Yecu, ento aman koŋ inen, pwonywu doŋolal i Jerucalem luŋ, dok imito dwoggo wunu bal me to a lon-naca i wiwa!” Petero kede okwena te gamo ni, “Wan myero owiny Obaŋa akato jo. Obaŋa a kwariwa ocero Yecu a nwaŋ ineko wunu kun iŋabe wunu i kom yat. Dano man Obaŋa otiŋe malo, okete i kabedo me kwogo i laŋete tuŋ cem me en bed Atel kede Alar, wek mi jo Icrael kare me ŋut kede weko balgi. Wan ocaden me kop man, karacel kede Cuny Acil ame Obaŋa doŋomio baŋ jo a winye.” Ka gin owinyo man, yigi owaŋ meicel, ote mito ni onekgi oko. Cite Aparicayo moro a nyiŋe Gamaliel, ame rik onwoŋo apwony me cik ame lwak luŋ keto kwogo i kome, oya malo i okiko, te ciko ni myero koŋ cwa jo-nu oko pi kare anonokkoro. En te kobbi lwak ni, “Wun jo Icrael, gwokere wunu i kom gin ame ibino timo wunu i kom jo-ni. Pien kare moro a doŋokato, Teyuda nwaŋ opello te miye kene ni en edano adwoŋ, jo ame welgi romo bala mia aŋwen twal oonyakino i yore. Ento ka oneke, jo ducu a nwaŋ lube-ni te ket ata, rwenyo atwal. Icennere doki, Juda me Galilaya te pello i mege i kare me coyo nyiŋ jo, lwak dok ojoye i yore; en daŋ obin oto, jo luŋ a nwaŋ lube daŋ obin oket ata. Doŋ i kop me tin, an akobbiwu ni, kwany wunu ciŋwu oko i kom jo-nu, wekugi obedi; pien ka kono yikgi-ni onyo ticgi-ni ocakere i baŋ dano, bino gik oko. Ento ka ce oya i baŋ Obaŋa mom ibino loyo wunugi; kare ocele itwero nwoŋo ni itye wunu ka romo kede Obaŋa.” Gin te ye koppere, eka ote cwano okwena pwodogi apwoda, ote gonyogi kun koŋ ocikogi atek ni kur okob kopporo i nyiŋ Yecu. Gin te ya oko i nyim okiko ame cunygi yom gigi, pien Obaŋa oye ni gin oromo miyogi lewic pi nyin Yecu. Doŋ i nino luŋ mom okeŋ pwony kede rabo amut aber i ot Obaŋa kede i paccigi ni Yecu en Kricito. I kare-nono ame wel a jo a lubo Yecu tye amedde, Ojudaya a kobo leb Grik te ero ŋuŋura i kom Ojudaya a kobo leb Eburania, ni mano didik ka apoko jami, mongi a coggi oto mom omaro paro pirgi wok. Okwena apar wie aryo te lwoŋo lwak luŋ a lubo Yecu, ote kobbigi ni, “Mom ber wan iweko rabo kop Obaŋa, ote lunyo ka pokki jo jami. Doŋ ba omegowa, yer wunu i akinawu jo abiro ame lwak pwoo, jo a yigi Opoŋ i Cuny Acil kede ryeko, me wan oketgi i kom tic man. Ento wan obino keto cunywa i kwayo Obaŋa kede i rabo kop.” Kop a gin okobo-nono oyomoro yi lwak luŋ; eka gin te yero Citefano, dano ame iyee mere dwon dok Cuny Acil opoŋ i yie, gin kede Pilipo, Porokoro, Nikanori, Timon, Parmena kede Nikolao dano me Antiokia ame olokere i dini Ojudaya. Gin te keto jo-nu i nyim okwena, eka okwena te kwayo Obaŋa pirgi kede keto ciŋgi i wigi. Kop Obaŋa rik te nya; wel jo a lubo Yecu daŋ te medde meicel i Jerucalem, olamdog apol daŋ rik te mako kop me iyee. Citefano ame rik winyo kede teko Obaŋa open i yie, obedo tiyo taŋo kede anyuttogo adoŋo i akina lwak. Ento jo mogo ame gin jo me kacokere ame ocwano ni, “Opii ame Ogonyo”, karacel kede jo Kurene, jo Alegejanderia, kede jo ame oya i Kilikia kede Acia, gin oya te ero pyem i Citefano. Ento loyo ryeko kede Cuny ame Citefano kobo kede, oloogi oko. Gin te cupo jo mogo i muŋ me kob ni, “Wan otyeko winyo en akobo kop me ayet i kom Muca kede Obaŋa.” Gin te tutugo lwak, karacel kede odoŋe kede opwony-cik, gin te bino mako Citefano tero i nyim okiko. Gin te kela ocaden me goba ame kobo ni, “Dano man mom weko kobo kop arac i kom kabedo acil-li, kede i kom cik a Muca. Pien wan otyeko winyo kun en kobo ni, Yecu me Najaret-taca bino keto kabedo man oko, kede dok loko kitetwa a rik Muca omiowa.” Jo luŋ ame onwoŋo obedo i okiko te ciko waŋgi i kome; ote neno waŋe cal i wan amalaika. Alamdog adwoŋ te penyo Citefano ni, “Kop tye amannono ateni?” En te kobbigi ni, “Omegona kede odoŋena, winy wunu koppa! Obaŋa won kwogo rik bin onen baŋ kwarowa Iburaim ame onwoŋo en tye i Mecopotamia, ame en mom ru odak i Karan, rik te kobbe ni, ‘Ya oko i lobowu kede i baŋ watini, iwot i lobo ame an abino nyutti.’ En daŋ rik te ya oko i lobo a jo Kaldaya, eka te dak i Karan. Ka pappere doŋ oto, Obaŋa dok te kobe oko i kuno, kele naka i lobo ame aman ibedo wunu iye-ni. Obaŋa rik mom obin omie dulloro iye me bed mege ikome, kadi moro aduno a romo keto tyene keken, ento obin ociko acika ni ebino miyo baŋe me bed mege, kede ikwae ame bino lube, kadi bed atinnere moro nwaŋ mom. Cite Obaŋa okobo kop man ni, ikwae bino bedo wele i lobo a jo ocele; jo-nono bino lokogi odoko opii dok bino timogi cucu pi mwakki mia aŋwen. ‘Cite an ikoma abino ŋolo kop i kom rok a gin otiyigi-nono, icennere gin bino ya oko i kuno, obino wora i kabedo man,’ mano Obaŋa en okobo. En rik te miyo baŋ Iburaim cikere me lirre. Pi mannono, kare ame Iburaim onywalo Icaka, olire i nino me aboro; Icaka te nywalo Yakobo, Yakobo te nywalo kwariwa acon apar wie aryo. “Kwariwa acon-naca nyeko rik te makogi i kom Yucepu, rik gin te cate oko i Miciri; ento Obaŋa obedo kede. Obaŋa rik te lare i cannoro luŋ ame ocore eka te miye winyo kede ryeko ame Parao abaka me Miciri nwaŋ te pwoyo, te miye loyo lobo Miciri kede ode luŋ. Ka kec opoto i Miciri luŋ kede i Kanaan, can rik te rido jo atek, nwoŋo cam te loyo kwariwa oko. Cite ka Yakobo owinyo ni cam tye i Miciri, obin ooro kwariwa kuno tyen me agege. I wotgi me aryo Yucepu rik te nyutte kene baŋ omego mere, wati a Yucepu daŋ te ŋeye oko baŋ Parao. Eka Yucepu te oro jo wot lwoŋo pappere Yakobo gin i wati mere ducu baŋe, jo pyerabiro wie abic. Kite-nono Yakobo owoto i Miciri, eka te to oko, karacel kede kwariwa daŋ. Ote dwoko komgi i Cekem, yikogi i lyel a rik Iburaim owilo kede wel ryal i baŋ awobe a Kamor i Cekem kuno. “Ka kare doŋ onoko ceggi me cobo cikere ame Obaŋa rik ociko baŋ Iburaim, jo rik onya omedde atek i Miciri, ituno ka abaka ocele a kwia Yucepu ocako loc i Miciri. En rik te ŋolo ryeko i kom rokwa, te timogi alit meicel kun miogi obolo otinogi oko, wek kur bed kwo. I karenaca en a rik ote nywalo iye Muca. En rik atin aber meicel i nyim Obaŋa; rik koŋ ote pite i ot a pappere dwete adek. Kare ame doŋ obole oko, nyaka a Parao te kwanye, pite acalo wode ikome. Rik ote pwonyo Muca i ryeko a jo Miciri luŋ, en nwaŋ te bedo atek i koppere kede i ticcere. “Kare ame mwaka me dittere oromo pyeraŋwen, en te tamo i cunye ni koŋ elim omego mere, jo Icrael. Kare ame en oneno awuno danogi moro, en okonyo ŋat ame awuno, te neko dano me Miciri oko. En otamo ni omego mere bino niaŋ ni Obaŋa bino tic kede me larogi, ento kara gin gigi mom oniaŋ. Odiko ocele en te dok cop i kom jo Icrael aryo ame aromo, en te temo dwekogi kun kobbigi ni, ‘Jo-ni we, wun omego, kara pi ŋo iwunne wunu kenwu kenwu?’ Ento dano ame onwoŋo awuno wadgi ca te core teŋe kun kobo ni, ‘Ŋa kara oketi me oyowa kede ŋolliwa kop? Imito neka bala Amiciri ame aworo ineko ca?’ Kodi kop-pi omio Muca obin oriŋo oko, te bedo welo i lobo me Midian, kan a en te nywalo iye awobe aryo. “Kare ame dok mwaka pyeraŋwen okato, amalaika onen baŋe i tim me kidi Cinai, onen i leb mac ame alyel i yat obuŋere. Muca ka oneno, owuro meicel gin ame eneno; te noko ceggi wek enen odoco. Dwon Rwot te pello ni, ‘An Obaŋa a kwarini, Obaŋa Iburaim, Obaŋa Icaka kede Obaŋa Yakobo.’ Kom Muca omyel, mom dok te diyo cunye me neno. Rwot te kobbe ni, ‘Wot amuk oko i tyeni, pien kabedo ame icuŋ iye-nono, en lobo acil. Ateni, doŋ aneno kite ame owuno kede jona ame tye i Miciri, awinyo daŋ ŋuŋuragi, en doŋ abino piny pi larogi. Bin amanni me aori i Miciri.’ “Muca-nono a rik gin okwero kun okobo ni, ‘Ŋa kara oketi me loyowa kede ŋolliwa kop?’ en ame Obaŋa oore me bedo aloc kede alar, kun Obaŋa otio kede amalaika ame rik onen baŋe i yat obuŋere. En a rik obino okwanyogi kun timo taŋo kede anyuttogo i lobo me Miciri, kede i nam Arema, kede i tim pi runi pyeraŋwen. Muca nono en a rik obin okobbi jo Icrael ni, ‘Obaŋa bino miyowu adwarpinyoro ame bino ya i akina omegowu, kite a rik en omia kede baŋwu.’ En acellono a daŋ rik obedo i akina a lwak i dye tim, karacel amalaika a rik okobo kede i wi kidi me Cinai, kede kwariwa; Obaŋa te miye koppogo me kwo, me amia baŋwa. Kwariwa te kwero winye oko, ocore teŋe, eka ote loko cunygi me dok cen i Miciri, kun okobbi Aron ni, ‘Timmiwa obaŋa mogo ame bino telowa, pien Muca ame rik okwanyowa i lobo me Miciri, mom dok oŋeo gin ame otimere i kome.’ I kare-naca gin te tiyo atin twon ote kela gitum me yalo cal-Iu, kun yigi yom gigi i kom gin ame ciŋgi otio. Cite Obaŋa olokere, te jalogi i woro mony me polo, acalo rik ocoo i buk odwarpiny ni, ‘Yam ikella wunu leyi aneka kede gin ame oŋolo mwaka pyeraŋwen i tim, wun doggola me Icrael? Rik gire itino wunu kema a Molok, kede acer Obaŋawu Repan, cal ame itio wunu me aworawu; cite an abino kobowu i ŋe Babulon twal.’ “Kwariwa rik obedo kede kema me caden i tim, acalo Obaŋa rik ociko kun kobbi Muca ni, ti a rom i cal a rik eneno con. Kwariwa ame olubogi ka omiogi, gin okelo karacel kede Yocwa, i kare ame gin ogamo lobo a rok apapat ame Obaŋa oryemo i nyim kwariwa, ori ituno i kare a Daudi. Obaŋa omio Daudi winyo, omio Daudi te kwayo ni myero enwoŋ kabedo pi Obaŋa a Yakobo. Ento Culeman en ame obin ogerri Obaŋa ot. Kadi amanno, En Amalo Meicel mom gire bedo i ottoro ame jo ogero kede ciŋ, acalo rik adwarpiny okobo ni, ‘Polo en kom me locca, lobo en aten tyena. Kara kit ottene ame ibino gerra wunu? Man kop a Rwot. Onyo ka weo mera tye kwene? Mom ciŋa en otio jami magi ducu?’ “Wun jo a ŋutwu okaŋ, ame cunywu kede yitwu mom oliro, nino luŋ ibedo geŋo wunu Cuny Acil; wun daŋ itimo wunu bala kwariwu rik otimo. Kara adwarpinnyene a mom kwariwu owuno? Gin daŋ oneko anaka jo a rik orabo kop con pi bino a ŋat Atir, ame wun onyoni idoko wunu jo oketo erupe i kome kede jo oneke, wun ame rik Obaŋa omio omalaika okelliwu cikere, cite mom ite gwoko wunu.” Ka gin owinyo koppono, yigt owaŋ meicel, ote kayo lakgi i kome. Cite Citefano ame onwoŋo opoŋ i Cuny Acil, oŋao waŋe i polo, te neno kwogo Obaŋa, kun Yecu ocuŋ i laŋet Obaŋa tuŋ cem. Te kobo ni, “Koninen wunu ba, aneno polo oyabere, aco Wot a dano tye ocuŋ i kabedo me kwogo i laŋet Obaŋa tuŋ cem.” Gin ducu ote wo kede dwon aloŋo kun oculo yitgi oko, ote mwomere i kome karacel, cwaye teŋe i boma, nanapo en i gweŋe; ocaden oketo boŋŋigi i tyen awobi a nyiŋe Caulo. Ento i kare ame gin tye ananapo Citefano, en okwao ni, “Rwot Yecu, gam cunya.” Eka te rumo piny kun redo i dwon aloŋo ni, “Rwot, kur ikwan bal man i komgi.” Ka doŋ okobo man te to nino gire oko. Caulo daŋ onwoŋo opwoo to mere-nono. I nino-nono ote cako wuno lwak jo oye Kricito ame tye i Jerucalem atek meicel; gin te ket ducu i lobo me Judaya kede Camaria, kono ka okwena keken en ate doŋ i Jerucalem. Jo a woro Obaŋa oyiko kom Citefano, ote daŋ koke meicel. Cite Caulo onwoŋo mito tyeko lwak jo oye Kricito luŋ, kun donyo i ot acel acel, wao iye co kede mon, ketogi i buc. Jo ame onwoŋo oket obedo wowota kun orabo amut aber. Pilipo rik oluŋere i paco moro me Camaria, te rabo pi Kricito baŋ jo kuno. Lwak oketo cunygi atek i kom gin a Pilipo okobo; kare ame gin owinyo koppere dok daŋ oneno anyuttogo a en otio. Pien jo apol a rik tye kede cen areco, cen oya oko i komgi kun oredo i dwon aloŋo; kede jo apol a rik two too me akwea kom kede aŋwal, daŋ ocaŋogi. Yomcuny i paco-nono rik doŋ te bedo adwoŋ okato kare oko. Ento i paco-nono rik tye iye lomoro a nyiŋe Cimon ame timo gigi mogo me jojok, ame rik en omio jo me Camaria luŋ wure; en rik kobo ni en e dano adwoŋ. Jo luŋ rik winye, jo atino kede adoŋo daŋ, kun okobo ni, “Dano man obedo teko Obaŋa ame olwoŋo ni, Teko Adwoŋ.” Gin oketo cunygi i winyo koppere, pien pi kare alac en obedo miyogi wuro ticcere me jojokkono. Ento Pilipo orabo pi amut aber me loc Obaŋa kede nyiŋ Kricito, gin oye, ote batijagi oko, co kede mon. En Cimon ikome daŋ oye, ote batija en, mom doŋ te weko yo Pilipo; ka en obedo neno anyut apol kede taŋo adoŋo ame obedo timo, owuro. Okwena ame bedo i Jerucalem rik te winyo ni jo me Camaria daŋ doŋ ojolo kop Obaŋa; gin rik te oro baŋgi Petero kede Lakana. Gin owoto, ote wot kwayo Obaŋa pirgi, me gin daŋ onwoŋ Cuny Acil; pien rik mom ru opoto i kom ŋattoro i akinagi, ento obatijagi ka i nyiŋ Rwot Yecu keken. Petero kede Lakana rik te ke to ciŋgi i wigi, gin te nwoŋo Cuny Acil. Kare ame Cimon oneno ni jo onwoŋo Cuny Acil pi ciŋ ame okwena oketo i wigi, en okelli okwena lim, kun kobo ni, “An daŋ mia wunu kodi twer-ri, me wek ka an daŋ abino keto ciŋa i kom dano moro, dano-nono daŋ nwoŋ Cuny Acil.” Cite Petero te kobbe ni, “Myero yin karacel i ciliŋ meri irweny wunu oko, pien itamo ni itwero nwoŋo mot Obaŋa kede lim! Yin mom itye kede dulloro ame opokki i kop man, pien cunyi mom atira i nyim Obaŋa. Myero iŋut i kom timmi arac-ci, ite kwayo Rwot, me atot ya timmi kica i tam ame tye i cunyi-nono. Pien aneni itye kede epio akec, aŋuc me bal otwei oko.” Cimon te gamo ni, “Wun kwaya wunu Rwot, me ginnoro arac i kom kop ikobo wunu kur tun i koma.” A doŋgin otyeko tuco kop me caden oko kede rabo kop a Rwot, rik ote dwogo gigi oko i Jerucalem, kun orabo amut aber i pacci apol me Camaria. Amalaika a Rwot rik te kobbi Pilipo ni, “Ya iwot tutuŋ anyarolum i yo a dok tuŋ piny tuno naka i Gaja kun oya i Jerucalem.” (Mannono obedo yo a woto i tim) Pilipo daŋ rik te ya wot. Oyot en te neno dano moro me Eciopia ame oroo oko, atic a Kandake adittere, ame onwoŋo abaka a dako me Eciopia; en rik ŋat ame onwoŋo kano lim abaka luŋ. En rik onwoŋo owoto i Jerucalem pi woro Obaŋa. En onwoŋo doŋ adok kun obedo i wi gadigadi mere, akwano buk adwarpiny Icaya. Cuny Obaŋa rik te kobbi Pilipo ni, “Wot iŋuk gadigadi ca, inywak kede yo.” Pilipo te riŋo baŋe, te winyo en akwano buk adwarpiny Icaya, te penye ni, “Yin iniaŋ gin ame ikwano-nono?” En ogamo ni, “Atwero niaŋ niŋo aboŋo ŋattoro a gonnya tere?” En te cwano Pilipo ni yit bed karacel kede. Dul a rik en akwano i coc a yam ocoo onwoŋo ene, ni, “Acalo romo ame atero me aneka, dok acalo atin romo a liŋ i nyim onyar yerrere, kittono en mom oŋamo gire doge. Ka oturo dittere oko, okwero ŋolle kop atir. Ŋa kara a twero tito pi ikwae? Pien okwanyo kwo mere oko i wi lobo.” Lon ame oroo-nu te penyo Pilipo ni, “Akwai, titta ba, kara adwarpiny okobo kop man i kom ŋa? I kome en kene, onyo i kom dano moro ocele?” Pilipo te ero kop, ogeo i kom dul me coc a yam ocoo-naca, te tuno kede naka ititte amut aber i kom Yecu. Ame gin rik pwod otye omedde i wotgi, gin te cop i pii moro, eka lon oroo ca te kobbi Pilipo ni, “Nen, kara pii do eŋeo! Ŋo a dok mona batija?” [ Pilipo te kobbe ni, “Ka ce iye kede cunyi ducu, twerre gire.” En te gamo ni, “Aye Yecu Kricito en Wot Obaŋa.”] En te ciko ni gadigadi koŋ cuŋ, gin aryo ducu te yitto piny i pii, Pilipo gin kede lon ame oroo ca, ote batija en oko. Ame gin doŋ oya oko i pii, Cuny a Rwot te tero Pilipo oko, lon ame oroo ca mom dok te medo nene; en gire te medde i wottere kun alelo meicel. Cite rik ote bino neno Pilipo i Ajota. En obe bea i pacci ducu kun rabo amut aber, naka ka en obino i Kaicaria. Caulo kun pwod olido kop me buro kede neko jo a lubo Rwot, en owoto baŋ alamdog adwoŋ. En te kwayo waraga pi kacokere luŋ ame tye i Damaciko, ame mie twer me kelo dano moro keken me Yo man, ame ebino nwoŋo, co onyo mon; myero etwegi, ekelgi i Jerucalem. I kare ame en tye i wottere-nono, kun doŋ eceggi tuno i Damaciko, oyotoyot acara moro te ya i polo, omenye kun otwode dyere. En te rette piny, eka te winyo dwon ŋattoro ame penye ni, “Caulo, Caulo, pi ŋo kara itye ka wuna?” En ogamo ni, “Kara yin iŋa, Rwot?” Te dokke ni, “An a Yecu en ame yin giri itye ka wuno-nono. Ya malo me idony i boma, obino kobbi gin a myero itim.” Jo a rik onwoŋo owoto kede ocuŋ kun oliŋ iti. Gin owinyo dwon, cite mom oneno ŋattoro. Caulo oya malo, waŋe te yabere, ento mom te neno piny. Ka doŋ ote mako ciŋe, peye tere i Damaciko. Eka te tyeko nino adek kun mom neno piny, mom cemo, kadi mato pii. Dano moro a lubo Yecu rik onwoŋo tye i Damaciko, nyiŋe Anania. Rwot rik te kop kede i ginanyuta ni, “Anania.” En te ye ni, “An ene, Rwot.” Rwot te kobbe ni, “Ya iwot i yo ame olwoŋo ni Ocuŋ Atira, ite penyo pi dano moro me Taruco ame nyiŋe Caulo ka tye i ot a Juda, pien, nen ba, en tye akwayo Obaŋa. Dok en doŋ otyeko neno i ginanyuta, dano moro a nyiŋe Anania kun tye adonyo baŋe, pi keto ciŋe i kome me enen piny.” Anania te gamo ni, “Rwot, awinyo doŋ i baŋ jo apol kit ame dano-nono owuno kede joni a tye i Jerucalem. Anaka kan daŋ olamdog adoŋo doŋ otyeko miye twer me tweyo jo luŋ ame lwoŋo nyiŋi.” Cite Rwot te kobbe ni, “Yin woti, pien lonnono en gi-ticca ame ayero me tero nyiŋa baŋ Orok, kede baŋ rwode kede ikwae Icrael. Pien an ikoma abino nyutte kit can ducu a myero ekany pira.” Anania te wot donyo i ot, te keto ciŋe i kome kun kobo ni, “Ominna Caulo, Rwot Yecu ame onwoŋo onen baŋi i yo a rik ibino kede ca, doŋ oora baŋi me waŋi dok nen piny, kede Cuny Acil daŋ poŋ iyii.” Cucuttono ginnoro acalli pok rec te poto i waŋe, eka waŋe te dok cako neno piny. En oya te batijia, daŋ te cem, te doŋ nwoŋo teko. En rik koŋ te bedo kede jo a lubo Yecu ame onwoŋo tye i Damaciko pi kare moro, daŋ te ero rabo kop i kom Yecu oko oyotoyot i kacokere luŋ kun kobo ni, “En Wot Obaŋa.” Jo ducu ame owinyo koppere te wuro meicel, kun okobo ni, “Man mom en lon a rik mito tyeko jo ame olwoŋo i nyiŋ man i Jerucalem? En obino kan daŋ pi kop acellono, me etwe jo-nono, etergi baŋ olamdog adoŋo.” Ento Caulo gire te medde ameda i teko, Ojudaya a rik bedo i Damaciko wigi te cuŋ oko, ka en onyuto atir ni Yecu gire en Kricito. Ame kare doŋ okato alalac, Ojudaya rik te yiko kop me neko Caulo, cite en te ŋeyo yikgi oko. Gin rik ote bedo kuro dogcel dyeceŋ kede iwor benebene me oneke; ento jo a lubo Yecu rik te tere oko dyewor, ore cwaye oko i kan a twolo i apama cel, kun omie elyerre i dwoŋo naka piny. Ame en doŋ otuno i Jerucalem, te poro notte kede olub Yecu, cite gin luŋ rik ote lwore oko, mom oye ni en daŋ alub Yecu. Cite Baranaba ojole, okele baŋ okwena, te tittigi kite a Caulo oneno kede Rwot i waŋayo, kede kite ame okobo kede, naka kite ame en orabo kede kop i nyin Yecu i Damaciko i tekcuny. Caulo te bedo wowota i akinagi i Jerucalem, kun rabo kop i nyiŋ Rwot kede tekcuny. En okobo i jo a kobo leb Grik kun pyem kedgi, cite gin oyenyo yo me neke. Ka omego oŋeo, gin te tero Caulo oko i Kaicaria, ote cwaye Taruco. Amannono lwak jo oye Kricito te bedo i kuc i lobo Judaya luŋ kede i Galilaya kede i Camaria, te medde doŋo; ote daŋ nya kun owopo yo me woro Obaŋa, dok Cuny Acil kweo cunygi. I kare ame Petero owowota i dul lobo luŋ, en te tuno baŋ jo Obaŋa ame onwoŋo bedo i Ludda. En rik te nwoŋo lo moro ame nyiŋe Ainea kuno, ame otyeko mwakki aboro kun buto abuta, pien rik onwoŋo kome okwe oko. Petero te kobbe ni, “Ainea, Yecu Kricito ocaŋi oko. Ya malo, ipet ka butoni.” En daŋ te ruyo ya oko. Jo a rik bedo i Ludda kede Caron onene, eka gin te lokere baŋ Rwot. I Yopa rik onwoŋo tye iye dako moro a lubo Yecu nyiŋe Tabica, ame te koppere ni, Dorika. En rik onwoŋo tio tic abeco apol, dok konyo ocan i yo apapat. I kare-naca too rik obin omake, eka te to oko. Rik ote lwoko kome, pyele i ot a malo. Pien Ludda onwoŋo ceggi kede Yopa, jo a lubo Yecu rik te winyo ni Petero tye kuno, omio gin te oro jo aryo baŋe, kun okwae ni, “Tun baŋwa oyotoyot, kur igal.” Petero te ya wot kedgi, A doŋ en otuno, otere i ot a malo. Mon luŋ ame coggi oto onwoŋo ocuŋ i laŋete, okoko kun onyuto boŋi kede rukkogo ame rik Dorika okwoo a nwaŋ pwod tye baŋgi. Petero te cwayogi ducu oko, eka te rumo piny kwayo Obaŋa; te lokere tuŋ kom oto kun kobo ni, “Tabica, ya malo.” En te yabo waŋe; ka oneno Petero, oya obedo abeda. Petero te mako ciŋe, yiye malo, te lwoŋo jo Obaŋa kede mon a coggi oto, omie baŋgi kun doŋ kwo. Koppere rik te ŋeye i Yoppa ducu, te miyo jo apol ye Rwot. Petero te bedo i Yoppa nino apol tuŋ anyoŋ-lao a nyiŋe Cimon. Rik tye lo moro i Kaicaria nyiŋe Komelio, en rik adwoŋ cirikale me eryoŋet ame olwoŋo ni, me Itali. En rik dano awor, a daŋ lworo Obaŋa karacel kede ode ducu; rik poko jami mere apol me konyo Ojudaya, daŋ kwao Obaŋa kare luŋ. I nino moro acel i caa aboŋwen me dyeceŋ, en te neno amalaika a Rwot kannaler i ginanyuta kun donyo baŋe te kobbe ni, “Komelio.” En daŋ waŋe te cuŋ i kome kun lworo amake, ete kobo ni, “Kara ninono ba, Rwot?” En te kobbe ni, “Kwaeci kede kony ame ibedo miyo otuno malo baŋ Rwot, omio en opo piri. Amanni cwa jo i Yoppa me wot kel lo moro a nyiŋe Cimon, ame olwoŋo daŋ ni Petero. En bedo tuŋ anyoŋlao moro ame ode tye i dog nam, nyiŋe Cimon.” A doŋ amalaika ame okobo kede kop man otyeko wot oko, en te cwano jo aryo i akina omiro ame bedo tuŋe, kede cirikale acel a woro Obaŋa ame en dano acel i akina cirikale ame bedo tuŋe didik. En te tittigi gin ame otimere luŋ, te cwayogi i Yopa. Orwo mere ame gin pwod otye i wotgi, a doŋonoko ceggi i ŋet bomanono, Petero oyito i wi ot malo me wot kwayo Obaŋa i akina caa abicel. Kec rik te neke, eka te mito cam; ento ame pwod otye ka yiko, tammere oyutte, te neno polo oyabere, ginnoro te ya iye acalli cuka alac kun alologa abino piny i lobo, ame acwayo kede twoke aŋwen. Kwon leyi luŋ a tyengi aŋwen onwoŋo tye iye, kede twolegu, kede winy a twarre malo. Dwonnoro te bino baŋe kun kobbe ni, “Petero, ya malo, inek, icam oko.” Ento Petero te gamo ni, “Mom amannono Rwot, pien an gira pe ru acamo ginnoro ame obedo me kwer onyo a mom olony.” Dwonnono dok te bino baŋe tyen me aryo ni, “Gin ame Obaŋa olonyo, kur yin dok ilwoŋ ni gin me kwer.” Ginnono obedo timere kittono tyen adek, eka ote ru tiŋo dwoko oko i polo. Ame tam a Petero pwod ocuŋ ata iyenyo kop me ginanyuta a doŋ eneno, jo ame Komelio ooro onwoŋo tye ocuŋ i doggola, ame gin doŋonwoŋo otyeko penyo ot a Cimon oko. Gin te lwoŋo kun openyo ka ce Cimon ame olwoŋo daŋ ni Petero tye welo me kannono. Ame Petero rik pwod onwoŋo aparo pi ginanyuta, Cuny Obaŋa rik te kobbe ni, “Neno, jo adek tye ayenyi. Aco, ya iluŋere iwot kedgi kun mom itamere ata ma, pien an en aorogi.” Petero te luŋere piny baŋ jo-naca, te kobbigi ni, “An a dano ame imoyo wunu; ibino wunu pi kop aŋo?” Gin te kobbe ni, “Wan oya i baŋ Komelio, ame obedo adwoŋ cirikale, dano a kite atir a lworo Obaŋa, anaka rok me Ojudaya luŋ daŋ pwoe. Amalaika acil doŋ okwenyoro en ni lwoŋi, me iwot i ode, me en winy kop a ya i baŋi.” En te lwoŋogi i ot baŋe, gin te doko wele mere. Odiko en te ya wot kedgi, karacel kede omego mogo ame oya i Yoppa daŋ onywako kedgi yo. Orwo mere gin te donyo i Kaicaria. Onwoŋo Komelio akurogi, kun doŋ otyeko lwoŋo wati mere kede dyere mere a ceggi kede. Kare ame Petero tye a donyo, Komelio odare, te ryebere piny i ŋet tyene, wore. Ento Petero te yiye oko malo kun kobo ni, “Ya malo, an daŋ a dano wadwu.” Petero te bedo leyo kop kede kun donyo i ot, te nwoŋo jo apol ocokere karacel. En te kobbigi ni, “Wun luŋ iŋeo wunu ni, cik mom ye ni Ajudaya moro myero notte arokkoro, akadi tuno baŋe; ento an Obaŋa doŋ otyeko nyutta ni kur acwan dano moro ni me kwer onyo ni mom olony. En omio ka olwoŋa, an abino aboŋo pyem. Doŋ apenyi ni, yin ilwoŋa pino?” Komelio te kobo ni, “I nino adek a doŋ okato, i kodi caa-ni i kome, onwoŋo rik atye akwayo Obaŋa i oda i kwac me caa aboŋwen; cite oyotoyot, dano moro te cuŋ i nyima ame rukkere tye alyel alyela. Te kobba ni, ‘Komelio, kwacci doŋ owinyere kede kony ame i bedo miyo ocan Obaŋa doŋopo pire. Amanni doŋcwajo i Yoppa, me wot cwan Cimon ame olwoŋo daŋ ni Petero; en bedo i ot a Cimon anyoŋ-lao ame ode tye i dog nam.’ Eka ate daŋ cwayo kwena baŋi cuto, yin daŋ itimo ber, ibino. Aman wan luŋ en otye kan i nyim Obaŋa me winyo gin ame Rwot ociki iye.” Cite Petero te ero kop kun kobo ni, “Doŋ aniaŋ ateteni ni Obaŋa kara mom poko akina a jo. Kara bo i rok luŋ, ka dano moro lwore, kun timo gin a tye atira, en gire jolo. Wun iŋeo wunu kop a rik en ocwao baŋ jo Icrael, kun rabbigi amut aber me kuc ame bino pi Yecu Kricito, ame en Rwot a jo luŋ. Dok daŋ iŋeo wunu gin ame otimere i Judaya luŋ, ame ogeye i Galilaya, i ŋe batija ame Lakana rik orabo pire. Iŋeo wunu daŋ kite ame rik Obaŋa oonyo kede Cuny Acil i kom Yecu me Najaret, te miye teko. En daŋ obin omamano piny kun timo gin aber, dok caŋo jo luŋ ame tek a Catan obwoogi, pien Obaŋa rik tye kede. Wan ocaden me gin ducu ame rik en obedo tiyo i lobo Judaya kede i Jerucalem. Rik obin oneke kun oŋabe i kom yataria. Cite Obaŋa te cere oko i nino me adekkere, daŋ te miye nen kannaler; mom baŋ lwak luŋ, ento baŋwa wan jo a rik Obaŋa oyerowa con me bedo caden, wan jo ame rik ocamo dok daŋ omato karacel kede, ame en doŋ ocer oko iyi akina a jo oto. Rik en te cikowa ni orab baŋ lwak dok obed cadennere me nyutti jo ni en ebedo ŋat ame Obaŋa oyero me ŋolo kop a jo akwo kede jo oto. Mannono daŋ en dano a rik odwarpiny luŋ omio caden i kome kun okobo ni, dano acel acel ame ye en obino weko ballere oko pi nyiŋe.” Ame Petero pwod tye a kobo kop man. Cuny Acil te poto i kom jo luŋ ame awinyo koppere. Te miyo Ojudaya ame oye Rwot ame rik obino i Petero owuro, pien Obaŋa oonyo mot me Cuny Acil naka i kom Orok. Pien gin owinyogi kun odumo leb apapat, opako kede Obaŋa. Petero te kobo ni, “Ŋattoro tye ame twero cerre oko i pii, me kur batija jo man ame gin daŋ doŋ onwoŋo Cuny Acil bala wan-ni?” Petero te ciko ni myero batijagi i nyiŋ Yecu Kricito. Gin dok te kwayo Petero ni myero koŋ medde bedo baŋgi pi nino moro. Okwena kede omego a rik bedo i Judaya nwaŋ daŋ ote winyo ni, Orok daŋ doŋ ojolo kop Obaŋa. Ka doŋ Petero owoto i Jerucalem, eryoŋet a cuŋ pi lirre te pyem kede, kun okobo ni, “Kara piŋo yin iwoto baŋ jo a mom oliro, ite cem-gu kedgi?” Eka Petero te korrigi i yore ginnoro ducu ame otimere, ni, “An onwoŋo rik a tye akwayo Obaŋa i boma me Yoppa, tamma te yutte oko, ate neno ginanyuta me ginnoro ame aya i polo acalli cuka alac kun alologa abino piny, ame acwayo kede twoke aŋwen, te tuno naka baŋa. Ate ŋiyo me anen yie, ate neno leyi a tyengi aŋwen, kede leyi me tim, kede twole-gu, kede winy a twarre malo. Cite ate winyo dwonnoro ame kobba ni, ‘Ya malo Petero, inek, icam oko.’ Ento an gira ate gamo ni, ‘Mom amannono Rwot, pien an gira pe ru acamo ginnoro ame obedo me kwer onyo a mom olony.’ Rwot te dokka iye tyen me aryo kun oya i polo ni, ‘Gin ame Obaŋa doŋ olonyo, kur yin dok ilwoŋ ni gin me kwer.’ Ginnono te bedo timere kittono tyen adek, eka ote wayogi ducu dwoko i polo. Cucuttono jo adek te tuno baŋwa i ot a nwaŋ wan otye iye, kun oorogi baŋa, oya i Kaicaria. Cuny Acil te kobo ni awot kedgi, kun mom dok atamere atama. Cite omego abicel-li te wot keda, ote daŋ wot donyo i ot a lonnaca. En te kobbiwa kite a rik en eneno kede amalaika ame ocuŋ i ode kun kobbe ni, ‘Cwa jo i Yoppa me kel Cimon ame daŋ olwoŋo ni Petero. En bino kobbi kop ame bino lari, yin anaka kede odi luŋ.’ Ame rik pwod acako kop acaka, Cuny Acil rik te bino poto oko i komgi, kite ame rik opoto kede i komwa i ageyi. Cite wia te poyo kop a Rwot a rik okobo ni, ‘Lakana rik batija jo kede pii, ento wun obino batijawu kede Cuny Acil.’ Kara ka Obaŋa omiogi daŋ kit mot acel ame rik koŋ omiowa i kare a wan doŋoye Rwotwa Yecu Kricito, kara an rik adoko ŋa ame atwero geŋo Obaŋa?” Kare ame gin doŋowinyo kop-pi, gin te liŋ doŋ aliŋa. Ote doŋ lunyo pako ka Obaŋa kun okobo ni, “Obaŋa kara doŋoyeyi Orok ŋut ame twero miyogi daŋ odonyo i kwo.” Jo a rik oket pi awunawuna ame rik bin erre i kom Citefano rik obin owoto te tuno anaka i Poinike kede Kupuro kede i Antiokia, kun orabo kop Obaŋa baŋ Ojudaya keken. Ento mogo i akinagi rik jo Kupuro kede jo Kurene; gin daŋ ka rik otuno i Antiokia, okobo baŋ jo me Grik, kun orabbigi amut aber i kom Rwot Yecu. Teko a Rwot obedo tic kedgi, lwak jo ecipan rik te lokere baŋ Rwot obedo tic kedgi, lwak jo ecipan rik te lokere baŋ Rwot ote doko jo oye en. Amut me koppono te rwo winyere baŋ lwak jo oye Kricito ame tye i Jerucalem, eka gin te cwayo Baranaba i Antiokia. Ka en otuno, oneno tic me kica Obaŋa, olelo, te cuko cunygi luŋ ni, “Miu cunywu doŋ mok atek i kom Rwot.” Rik en dano aber ame Cuny Acil kede iyee Opoŋ i yie. Lwak jo apol nwaŋ te medde bino baŋ Rwot. Baranaba te wot Taruco yenyo Caulo. Ka en onwoŋe, okele i Antiokia. Gin rik te bedo kunu mwaka acel alutu, kun obedo i lwak jo oye Kricito dok daŋ opwonyo lwak jo ecipan. Antiokia en kan ame ogeo lwoŋo iye jo a lubo Yecu ni, Okricitayo. I kare-nono odwarpinnyogo oya i Jerucalem, obino i Antiokia. Moro acel i akinagi a nyiŋe Agabo rik te ya malo, Cuny Acil te miye tuco ni, waŋŋoro kec adwoŋ bino poto i wi podo luŋ; man otimere i kare a Kulaudio. Man omio olub Yecu te moko ni myero cwal kony baŋ omego mogo a bedo i Judaya, kun ŋat acel acel kwanyo mege i kom limmere acalo etwero. Gin daŋ ote timo amannono, ote cwayo Baranaba kede Caulo tero baŋ odoŋe. I kare-nono abaka Kerode te ero timo jo mogo ame oye Kricito cucu. Oneko Yakobo omin a Lakana i pala bat. Ka en oneno ni kodi timmono oyomoro yi Ojudaya, en te medde kede, te mako Petero daŋ oko. Man onwoŋo rik kare me Ogati a Tobi Mom iye. Ka doŋomako Petero, okete buc, kun omie baŋ dul cirikale aŋwen, ame tye iye jo aŋwen aŋwen, me gwoke. Kerode onwoŋo mito ni bin kele baŋ lwak ka kare me Kato doŋ otum. Eka rik doŋ ote keto Petero i buc, ento lwak jo oye Kricito rik te keto cunygi atek kwayo Obaŋa pire. I dyewor me nino ame Kerode mito kela Petero i nyim lwak, en rik onwoŋo obuto i akina cirikale aryo, a kun otwee kede jegere aryo, okur ame ocuŋ i doggola onwoŋo tye agwoko dog ot buc. Oyotoyot amalaika a Rwot te nen, acara moro te menyo icika. Amalaika-nono te bapo laŋet Petero, te coye kun kobbe ni, “Ya malo oyot.” Jegere te poto oko i ciŋe. Amalaika dok te kobbe ni, “Tweye, rwak daŋ amukki oko.” Petero daŋ te timo amannono, amalaika dok te kobbe ni, “Aco bol boŋoni i komi, iluba.” Petero te donyo oko, lube. En onwoŋo mom gire aŋeyo ni gin ame amalaika atimonaca tye ateni, ento en onwoŋo atamo ni eneno ginanyuta moro. Gin te kato okur me agege kede me aryo mere, eka ote tuno i doggola nyonyo ame pello i dye boma. Mannono te yabere gire kene, gin ote kato, lubo yo acel keken. Amalaika te doŋ weke oko. Ka Petero doŋ oniaŋ pire kene, okobo ni, “Aman doŋ aniaŋ ateni ni Rwot kara ocwao amalaika mere, olara oko i ciŋ Kerode, kede i kom ginnoro ducu ame yam Ojudaya tye akuro.” Ame en doŋ oniaŋ kop man oko, te wot i ot a Maliam tota a Lakana ame nyiŋe ocele Marako, kannono en onwoŋo jo apol ocokere iye, okwayo Obaŋa. Kare ame en ogoo doggola atidi me dogcel, aŋeca moro a nyiŋe Roda te bino me winyo. En te niaŋ ni dwon Petero ennono, yomcuny te mone yabo dogcel oko, te dok lunyo riŋo dok i ot, te kobbigi ni, “Petero be tye ocuŋ i dogcel.” Gin te kobbi nyannono ni, “Yin ipo do, agin.” Ento en te cerre gire atekateka ni en gire ennono. Gin doŋ te kobo ni, “Aŋar ca ŋit amalaika mere eno be!” Ento Petero te bedo medde goyo doggola. Ka doŋgin oyabo doggola, ote neno ni en gire ennono, gin te wuro miecel. Petero te diyogi kede ciŋe ni koŋ oliŋ, en te tittegi kite ame Rwot okwanye kede i buc. Te kobbigi ni, “Tit wunu kop man baŋ Yakobo kede omego.” En te ya wot oko i kabedo ocele. Ame doŋ piny oru, arubaruba rik te bedo adwoŋ i akina ocirikale pi gin ame otimere i kom Petero. Ka Kerode oyenye mom te nwoŋe, openyo okur, te ciko ni myero wot nekgi oko. En Kerode te ya oko i Judaya, te wot bedo i Kaicaria. Akemo onwoŋo rik omako Kerode i kom jo me Turo kede Cidon. Gin ducu rik ote cokere bino baŋe i tam acel. A doŋ gin obibito Bulacito agwok ot buto abaka, ote doŋ penyo pi kuc, pien lobogi rik onwoŋo kwo i cam a ya i lobo abaka. Eka i nino moro acel ame rik onwoŋo omoko oko. Kerode te rukere i ruk me loccere, te bedo i wi kom me dittere, te kop baŋgi. Lwak te wo ni, “Man gire dwon obaŋa, mom mea dano!” Eka cucuttono, amalaika a Rwot te goye, kudi te came, te to oko; pien en mom omio Obaŋa kwogo. Cite kop Obaŋa te nya medde ameda. Baranaba gin kede Caulo te dwogo kun oya i Jerucalem, ame daŋ doŋ ocobo ticgi a rik ocwaogi iye oko. Lakana ame nyiŋe ocele Marako daŋ obino kedgi. I kom lwak jo oye Kricito me Antiokia rik tye iye odwarpiny kede opwony: Baranaba kede Cimoen ame olwoŋo Niga, Lukio me Kurene, Manaen ame rik odono i ot acel gin kede Kerode aloc, kede Caulo. Ame onwoŋo rik gin tye aworo Obaŋa kede kanyo kec, Cuny Acil rik te kobo ni, “Pokka wunu Baranaba gin kede Caulo pi tic a ceŋ doŋ alwoŋogi iye.” Icennere a doŋ okanyo kec kede kwayo Obaŋa, gin te keto ciŋ i wigi, eka ote cikogi wot. Amannono Cuny Acil te cwayogi, gin ote wot i Celeukia, eka i kannoro gin te kwaŋo nam ote dokoro i Kupuro. Ka gin obino i Calamic, gin orabo kop Obaŋa i kacokere luŋ, kun Lakana tye kedgi acalo akonygi. Eka gin te wowota iyi cula-nu luŋ, ote tuno naka i Papo; kuno gin te cop i kom emuroko moro ame adwarpiny agoba, en rik Ajudaya ame nyiŋe Bar-Yecu. En rik obedo baŋ Cerugio Paulo, aloccoro ame wie tio. Aloc rik te lwoŋo Baranaba gin kede Caulo, pien onwoŋo mito winyo kop Obaŋa. Ento Elima ame emuroko ca (pien mano en te kop me nyiŋe) opyem kedgi, kun mito dwanyo wi aloc oko i kom iyee. Cuny Acil rik te poŋ i yi Caulo ame olwoŋo daŋ ni Paulo, eka te nene atek, te kobbe ni, “Yin wot a Catan, ame yii Opoŋ i goba kede kite areco luŋ, yin akwor a kwone tim luŋ atira. Yin mom ibino weko dwanyo yo a Rwot ame atir? Winy ba, amanni ciŋ Rwot doŋ tye oko i komi, ibino bedo atowaŋ kun mom ineno ceŋ pi kare moro alalac.” Cucuttono waŋe te titiba, piny te dokke acol oko, owoto ame acacato piny kun temo yenyo jo moro a myero pee kede ciŋ. Ka aloc oneno gin otimere, oye Yecu. En te wuro meicel pwony i kom Rwot. Paulo gin kede owote mere rik ote kwaŋ kun oya i Papo, ote tuno i Perga a tye i Pampulia. Lakana owekogi te dok gire i Jerucalem. Cite gin te kato kun oya i Perga, ote tuno naka i Antiokia me Picidia. Gin rik te donyo i kacokere i cen cabit. Ame doŋ otyeko kwano kop i cik a Muca kede bu ke odwarpiny, odoŋe me kacokere te cwayo kwena baŋgi kun kobo ni, “Omegowa, ka itye wunu i kopporo me cuko cuny lwak, kob wunu.” Paulo te ya malo, te diyogi i ciŋe kun kobo ni, “Wun jo Icrael, naka wun jo ame lworo Obaŋa, winy wunu. Obaŋa a jo man Icrael rik oyero kwariwa, te miyogi bedo jo moro adoŋo meicel i kare a gin obedo i lobo Miciri. En te bino kwanyogi oko kede teko me ciŋe ame oryeo malo. En rik te diyo cunye i gwokogi i tim pi mwakki pyeraŋwen. Kare ame en doŋ otyeko rok apapat abiro i lobo me Kanaan, en rik te miyo lobo-naca baŋ jo Icrael me leyo doko megi pi mwakki mia aŋwen kede pyerabic. Icennere te miyogi oŋolkop ituno kede i kare adwarpiny Camwiri. Gin dok te kwayo pi abaka; Obaŋa te miyogi Caulo wot a Kic, dano me atekere a Benjamin, ame te loyogi pi mwakki pyeraŋwen. Ame Obaŋa okwanye oko, rik dok te miyogi Daudi me bedo abakagi. En dano ame Obaŋa rik omio caden i kome kun kobo ni, ‘Doŋ anwoŋo ni Daudi wot a Yecu en dano ame cunya maro, en bino cobo ginnoro luŋ ame an amito.’ I kom ikwae a Daudi-nono, Obaŋa doŋ okelli jo Icrael Alar, ame en Yecu, acalo rik en gire ociko. Ame en mom ru obino, Lakana onwoŋo koŋ orabo kop baŋ jo Icrael luŋ ni gin oŋut me batijagi. A doŋ Lakana ceggi cobo ticcere, okobo ni, ‘Kara wun itamo wunu ni an ŋa? An gira mom a dano-nono. Pe gire, ento ŋattoro tye ame abino i ŋea ame an mom aromo gonyo amuk i tyene.’ “Omegona, ikwae Iburaim kede wun jo ocele ame ilworo wunu Obaŋa, kop man me larre ocwalliwa wunu. Pien jo a bedo i Jerucalem kede odoŋegi, rik mom oŋee, dok daŋ mom oniaŋ kop odwarpiny ame rik obedo kwannigi cabit i cabit. Gin gigi te miyo kop odwarpiny cobere kakare pi ŋolo kop loye. Kadi bed gin rik mom onwoŋo kopporo i kome a romo miyo oŋolle to, gin okwao Pilato ni myero mi nek oko. A doŋ gin ocobo ginnoro ducu a rik ocoo i kome, gin te kwanye oko i kom yataria, pyele i lyel. Ento Obaŋa gire obin ocere oko iyi akina a jo oto. En rik te bedo nen pi nino apol baŋ jo a nwaŋ obino kede i Galilaya kun owoto i Jerucalem; amanni jo-nono doŋ cadennere baŋ jo. Wan doŋ okelliwu amut aber ni mano, gin ame rik Obaŋa ociko baŋ kwariwa, en doŋ ocobo oko kakare baŋwa wan ikwaegi, i cero Yecu, acalo rik ocoo i abuli me aryo ni, ‘Yin i Woda; tin doŋ anywali.’ En rik ocere iyi akina a jo oto, mom dok bino top gire, daŋ rik en okobo kit man: ‘Abino miyowu gin acil, ame genne, a rik aciko pi Daudi.’ En omio rik okobo i jabuli moro ocele ni, ‘Mom ibino weko kom Dano meri Acil top.’ Pien ka Daudi doŋotyeko lubo tam Obaŋa i kare mere, rik en obin oto oko, ote yike karacel kede kwari mere, en daŋ te top oko. Cite ŋat ame Obaŋa ocero rik mom obin otop. Pi mannono omegona, myero iŋe wunu ni otye ka rabbiwu kop i kom weko bal pi dano man. Pire, jo luŋ ame oye doŋ okwanogi ni kitegi atira, kun okwanyo i komgi bal ducu ame mom otwero kwanyo i komgi pi cik a Muca. Gwokere wunu doŋ ba, me kop a nwaŋ odwarpiny okobo kur tun i komwu, ni, ‘Nenu ba, wun jo ame ocae! Wur wunu, ite rwenyo wunu odoco; pien atye ka tiyo ticcoro i karewu, tic ame mom ibino wunu ye, kadi ŋattoro tittiwu pire.’ ” Kare ame gin doŋ okato oko, lwak te kwayo ni kop man myero dok tittigi i cabit a bino ca. A doŋ cokere oket oko, Ojudaya apol kede jo olokere i dini Ojudaya ame woro Obaŋa rik te lubo Paulo gin kede Baranaba; gin rik te bedo kop kedgi kun oeukuro cunygi me medde bedo i kica Obaŋa. Eka i ceŋ me aryo mere, jo me boma luŋ obuco cokere karacel pi winyo kop Obaŋa. Cite Ojudaya ka oneno lwak apol, nyeko te makogi atek, ote pyem i Paulo kun oyete ayeta. Paulo kede Baranaba te kop i tekcuny ni, “Onwoŋo myero yam koŋ oge rabbiwu kop Obaŋa. Ento kit ame wun giwu ibolo wunu oko teŋe, kun mom itamo wunu ni iromo wunu nwoŋo kwo a perakino nakanaka, wan doŋ olokere giwa baŋ Orok. Pien Rwot ocikowa ni: ‘An doŋ aketi me bedo cen baŋ Orok, me imi yo me larre otun i agikki wi podo luŋ.’ ” Ka Orok owinyo, oyomoro yigi atek, ote keto kwogo i kop Obaŋa. Jo luŋ a nwaŋ oyero pi kwo a perakino nakanaka te doko jo oye Yecu. Kop a Rwot rik te lal i lobo-nono luŋ. Ojudaya rik te cupo monnogo a ŋeye, a woro Obaŋa, kede odoŋe me boma-nono; gin rik te tugo jo me wuno Paulo gin kede Baranaba, eka ote ryemogi oko i bomagi. Paulo-gi te teŋo apua me tyengi i komgi, ote wot gigi i Ikonio. Olub Yecu rik te lelo, Cuny Acil te poŋ i yigi. I boma me Ikonio daŋ dok te timere i kite acellono. Paulo kede Baranaba owoto i kacokere Ojudaya, ote kop iye i yore ame te miyo lwak jo ecipan, Ojudaya kede jo Grik, te ye Yecu. Cite Ojudaya a mom oye rik te tugo Orok kun oketo tam areco i cunygi i kom omego. Rik gin te ri kuno pi kare alac, kun orabo kop i kom Rwot i tekcuny, Rwot daŋ te bedo caden me kop i kom kica mere, kun miogi teko me tiyo anyuttogo kede taŋo. Jo me bomanono te pokere oko; mogo odok baŋ Ojudaya, eka mogo te dok baŋ okwena. Orok kede Ojudaya karacel kede olocgi rik te mito timogi arac kun omito napogi i gweŋ, ento okwena ka oŋeo, te riŋo gigi oko i Licitra kede Derube, ame gin boma me Likaonia, kede i lobo omano kannono. Gin daŋ te rabo amut aber kuno. I Licitra rik onwoŋo tye iye lo moro ame bedo abeda, kun mom twero wot i tyene; en onwoŋo oŋwalo con i yi tottere, daŋ onwoŋo mom ru owoto kadi acelloro. En onwoŋo rik tye awinyo kop ame Paulo tye arabo. Paulo te nene atek ateka; ka oneno ni en tye kede iyee me caŋ, okobbe i dwon aloŋo ni, “Ya icuŋ atira kede tyeni.” En oputte malo iwic, te cako wot oko. Lwak ka oneno gin ame Paulo otio, gin owo i dwon aloŋo kun okobo i leb jo Likaonia ni, “Obaŋa mogo doŋ ociro piny baŋwa, kun ocalli jo!” Baranaba gin te lwoŋo ni, Jeuc, eka Paulo gin te lwoŋo ni, Kermec, pien Paulo en a rik onwoŋo obedo kop. Alamdog a Jeuc, ame ot jokkere onwoŋo tye i nyim boma-nono, te kelo twoni i dogcel ame odolo tigo ature i ŋutgi, kun en karacel kede lwak onwoŋo amito ŋologi me yalo Caulo-gi. Cite ka okwena Baranaba kede Paulo owinyo pire, gin oyeyeco boŋŋigi, ote mwomere i dye lwak kun okobo ni, “Jo-ni, kara Ŋo omio itimo wunu kittono? Wan, daŋ obedo dano adana, ame rom aroma kedwu. Wan orabbiwu amut aber me iya wunu oko i gigi mogo a tere mom, ilokere wunu baŋ Obaŋa akwo a rik otio polo kede lobo kede nam kede jami luŋ a tye iye. Rik i kare acon en oweko rok luŋ owoto gigi i yogi ata; kadi amanno, en rik mom oweko dano aboŋo cadennoro a nyute baŋwu. Pien en rik obedo tiyo gin aber, omiowu kot ame oya i polo, kede kare me ceko cam, daŋ omio iyen wunu i cem kede yiwu daŋ opoŋo kede lelo.” Kadi gin okobo kop man, mom obedo yottigi me geŋo lwak ŋolo twoni me yalogi. Ento Ojudaya mogo te bino ame oya i Antiokia kede i Ikonio; gin ocupo lwak te napo Paulo kede gweŋ, ote waye tere i ne boma kun otamo ni en doŋ oto oko. Ento jo a lubo Yecu te cokere guro Paulo dyere, en te ya malo, te dok gire i boma. Orwo mere Paulo te wot gin i Baranaba i Derube. Eka gin te rabo amut aber i boma-nono, te miyo jo apol lokere doko jo a lubo Yecu; gin gigi doŋ te dok oko i Licitra, lkonio kede Antiokia. Gin odio cuny jo a lubo Yecu, kun ocukoro cunygi me medde bedo iyi iyee man, kun okobbigi ni, “Myero ocor wunu can apol pi donyo i loc Obaŋa.” Ame gin doŋ otyeko yero odoŋe pi lwak jo oye Yecu i kabedo acel acel, gin te miyo jo-nono i ciŋ Rwot Yecu ame gin geno, kun koŋ ogeo kwayo Obaŋa kede kanyo kec. Gin obeo i Picidia, ote bino i Pampulia. A doŋ gin otyeko rabo kop i Perga, owoto i Attalia. Gin te kwaŋo nam i kannono, ote tuno i Antiokia, kan ame rik okwayigi iye winyo Obaŋa pi tic ame rik gin doŋ otyeko cobo. Kare ame gin doŋ otuno, gin te coko lwak jo oye Kricito karacel, ote tittigi ginnoro luŋ ame Obaŋa otio karacel kedgi, dok ni en doŋ oyabbi Orok doggola me iyee. Gin rik te bedo i jo a lubo Yecu pi kare alalac. Jo mogo rik te wot i Antiokia kun oya i Judaya, ote cako pwonyo omego ni, “Ka mom olirowu pi cobo cik a Muca, mom itwero wunu larre.” Pwony man rik te miyo tam pokere oko, Paulo kede, Baranaba te pyem i jo-nono atek, omio ote yiko ni Paulo kede Baranaba karacel kede jo mogo i akinagi myero wot i Jerucalem baŋ okwena kede odoŋe, me niaŋ kop i kom pyem man. Lwak jo oye Kricito rik te lwokogi i wotgi-nono, gin rik ote beo i Poinike kede i Camaria kun otitti jo kit ame Orok olokere kede me lubo Yecu; omio omego luŋ olelo meicel. Ame gin doŋ otuno i Jerucalem lwak jo oye Kricito, kede okwena, kede odoŋe te jologi aber, gin daŋ ote tittigi gin ducu ame Obaŋa omiogi otio. Cite jo mogo oye Yecu, ame onwoŋo me dul Oparicayo, te ya malo, kobo ni, “Orok gire myero lir, dok daŋ cikgi me gwoko cik a Muca.” Okwena kede odoŋe te cokere karacel me laro kop man. A doŋ gin olaro pi kare alac, Petero te ya malo, te kobbigi ni, “Omegona, wun iŋeo wunu ni i kare acon Obaŋa rik obin oyera i akinawu, me ami Orok winy amut aber, ote ye. Dok daŋ Obaŋa ame ŋeo cuny jo obedo cadengi kun miogi Cuny Acil a rom i en a rik omiowa. En gire mom oketo apokapoka moro i akinawa kede gin, ento olonyo cunygi daŋ pi iyee. Kara piŋo wun itemo wunu Obaŋa kun iyimo wunu lodi apek i ŋut jo a lubo Yecu, ame kadi kwariwa onyo wan mom oromo yeyo? Wan giwa doŋ kwariwa onyo wan mom oromo yeyo? Wan giwa doŋ oye ni wan karacel kede gin, wan ducu obino larre pi kica a Rwot Yecu.” Jo luŋ i cokere te koŋ liŋ mot; ote winyo kop a Baranaba kede Paulo kun oporo pi anyuttogo kede taŋo ame Obaŋa omiogi teko me tiyo i akina Orok. Ame gin doŋ otyeko kop, Yakobo te gamo ni, “Omegona, koŋ iwinya wunu. Cimeon doŋ otyeko tittiwa kite ame Obaŋa ogeo limo kede Orok kun kwanyo lwak jo iyi akinagi me bed jo mere. Man gire orwatte arwata kede kop odwarpiny a rik ocoo ni, ‘Icennere ka man otum abino dwogo, abino dok gero kabedo a Daudi a rik orette oko; abino dok gero i wi oburrere, abino dok tiŋo malo, me jo odoŋ mo Rwot, kede rok ducu ame odoko jo mere, Man kop a Rwot, ame omio kop magi oŋeye geye i kare acon.’ En omio an aŋolo ni pe myero wan ocanu Orok ame lokere baŋ Obaŋa, ento myero wan ocoyigi waraga, otittigi kur ocam ginnoro me kwer ame otyeko yalli cal jogi, owek daŋ timmogo me coco, kede camo ginnoro ame odeo adea, dok daŋ kur ocam remo. Pien cakere i kare acon Muca daŋ rik tye kede jo a rabo pire i boma luŋ; bukkere pwod okwano cabit i cabit i kacokere.” Eka okwena kede odoŋe, karacel kede lwak jo oye Kricito luŋ, rik te moko ni myero yer jo mogo iyi akinagi, cwagi Antiokia karacel i Paulo kede Baranaba. Gin te yero Juda ame olwoŋo ni Barcaba gin kede Cira, ame onwoŋo gin rik jo adoŋo i akina omego, ote miyo jo-nono waraga ame ocoo aman: “Baŋ omegowa ame obedo Orok a tye i Antiokia, Curia kede Kilikia, Wan okwena kede odoŋe ame wan omegowu, omotowu. Doŋ otyeko winyo ni tye jo mogo ame oya i baŋwa kan, ame tye ka poto cunywu i koppogo a rubo tamwu, aco kun wan mom ocikogi kadi acelloro. Mano omio wan omoko i cuny acel me yero jo cwayo baŋwu kun obino karacel i dyerewa Baranaba kede Paulo, ame gin jo a doŋ otyeko jalo kwogi pi nyiŋ Rwotwa Yecu Kricito. En omio daŋ ocwao Juda gin i Cira; gin ikomgi bino porriwu kite kop acellono i dog. Pien Cuny Acil kede wan doŋ omoko ni myero mom yim yeccoro apek i komwu, kono ka kop magi a pirgi tek: kwer wunu ginnoro ducu ame oyalli cal jogi, kede remo, kede gin ame odeo adea, wek wunu daŋ timmogo me coco. Maginono en ame ka igwokere wunu iye, nwoŋo itimo wunu ber. Doŋ ibedu giwu.” Kare ame doŋ ocikogi oko, gin te wot i Antiokia, ote coko lwak karacel, ote miyogi waraga. Ka gin okwano, gin olelo pi cuko cunygi. Eka Juda kede Cira, ame onwoŋo rik gin odwarpiny, te daŋ cuko cuny omego kede kop apol, ame meddigi teko. Gin rik te koŋ bedo kuno pi kare anonokkoro, eka omego te cikogi kede kuc i dokgi baŋ jo a nwaŋ ocwaogi. [ Ento Cira te tamo ni kono gire en edoŋ kuno.] Paulo kede Baranaba te doŋ i Antiokia. Gin te bedo pwony kede rabo kop a Rwot kuno karacel kede jo ocele apol. Ame kare doŋ okato alalac, Paulo te kobbi Baranaba ni, “Odok koŋ cen i boma ducu ame rik wan orabo iye kop a Rwot, me owot olim omegowa, onen kit ame gin tye kede.” Baranaba rik te tamo ni kono otero Lakana ame olwoŋo daŋ ni Marako owoto kedgi. Ento Paulo te tamo ni mom ber me tero dano a yam koŋ olwi owekogi oko i Pampulia, kun mom owoto kedgi i tic. Kop-pi te miyogi pyem atek ateka, te miyo ŋat acel acel pokere oko awottere. Baranaba te tero Marako, kwaŋ wot kede naka i Kupuru; Paulo te yero mere Cira, te wot kede, kun omego koŋ okwayigi winyo a Rwot. En te beo i Curia kede i Kilikia kun omio teko baŋ lwak oye Kricito luŋ. Paulo te wot tuno i Derube kede i Licitra. Kuno onwoŋo tye iye alub Yecu moro a nyiŋe Temoteo, wot a dako moro ame Ajudaya oye Rwot, ento pappere rik gire dano me Grik. Omego me Licitra kede Ikonio rik pwoo lonnono. Paulo rik te mito ni en wot kede; eka te tere wot lire, pien Ojudaya a rik tye i kabedo-nono, rik gin luŋ ŋeo ni pappere obedo dano me Grik. Kare ame gin tye abe bea i boma apapat, gin omio baŋ jo cik me agwoka ame rik okwena kede odoŋe oyiko i Jerucalem. Mano omio lwak jo oye Kricito me kabedo apapat medde atek i iyeegi, kun daŋ wel jo medde didik. Gin rik te bel i lobo me Purugia kede Galatia, pien Cuny Acil onwoŋo ogenogi oko ni kur orab kop Obaŋa i Acia. A doŋ gin otuno i waŋ apokki me Mucia, ote tamo ni kono owoto i Bitunia, cite Cuny a Yecu mom te yegi beo. Gin doŋ te beo i dye Mucia, wot piny i Teroa. Ginanyuta te nen baŋ Paulo dyewor, kun lonnoro me Makedonia abako doge, alwoŋe ni, “Kwaŋ nam idokoro i Makedonia, ikonywa.” Ka en doŋ oneno gin ame onyutte, wan doŋ ote yenyo yo oyotoyot me wot i Makedonia, pien onwoŋo doŋ oniaŋ aber ni Obaŋa doŋ olwoŋowa me wot rabo amut aber baŋgi. En omio wan ote kwaŋ oko kun oya i Teroa, ote kwaŋ atira naka i Camoturake, orwo mere ote tuno Neapoli. Oya i kuno ote wot i Pilipi, ame en boma me agege me lobo Makedonia, dok daŋ en kan ame jo Roma bedo iye kun olubo cik me Roma. Obedo i boma-nono pi kare alalac. I cen me cabit ote donyo oko i dogcel wot i dog kulo, kan ame onwoŋo otamo ni tye iye kabedo me kwayo Obaŋa. Eka ote bedo piny kuno, ote kop i monnogo ame onwoŋo ocokere karacel. Dako ame olwoŋo ni Ludia, ame onwoŋo oya i paco me Tuatira, en ame obedo winyo kopwa. Dako-nono onwoŋo acat boŋŋi obedo amaramar, daŋ rik en awor Obaŋa. Rwot oyabo cunye, en te bedo keto cunye i kom gin a Paulo akobo. Ka en otyeko batija karacel kede jo i ode, obako doge baŋwa kun kobo ni, “Ka ityeko moko wunu ni an aye Rwot ateteni, biye ibed wunu i oda.” En odiowa atek, te miyowa wot kede. Ame gin rik otye owot i ka kwayo Obaŋa, gin te rwatte kede nyannoro ame onwoŋo opii, ame jokkere rik tucce kop. Nyannono onwoŋo kelli odoŋe mere lim abup pi tyettere. En olubowa wan i Paulo kun redo ni, “Jo man obedo omiro Obaŋa Amalo Meicel. Gin arabbiwu yo me larre.” Nyan-nu obedo timere amanno pi nino apol, omio Paulo oŋo, te lokere kobbijok ni, “Aciki i nyiŋ Yecu Kricito, ya oko i kome.” Daŋ te ya oko i caanono cuto. Odoŋe mere ka oneno ni gengi me nwoŋo Iim otum oko, gin te mako Paulo kede Cira, ote wayogi terogi i cuk baŋ oloc. A doŋ gin okelogi i nyim oŋolkop, ote piddigi ni, “Jo-ni tye ka rurubo boma wa-ni; aco kono gin Ojudaya. Gin okelo kitgi mogo ame cik mom ye ni wan omak onyo oti kede, pien wan giwa ojo Roma.” Lwak te twarre malo, oŋolkop te yeyeco boŋŋigi oko, ote ciko ni myero pwod jo-nono kede abiro. A doŋ otyeko pwodo dudgi atek, ote ketogi i buc, ote daŋ ciko agwok obuc ni gwokgi aber. Agwok obuc te cwalogi i ot buc tyelo, te goyo kol i tyengi oko. I dye idiŋ Paulo kede Cira onwoŋo tye akwayo Obaŋa kun daŋ owero wer me pako Obaŋa, ame obuc daŋ awinyo. Twon oyeŋo moro te yeyeŋo piny atek meicel cucuttono, te ot buc daŋ oyenere; doggola luŋ me ot buc te yabere oko, nyony otweo obuc daŋ te gony oko. Ka agwok obuc oco, oneno doggola me buc luŋ tye twolo; en te woto pala battere me nekere kene, pien onwoŋo otamo ni obuc doŋ olwi oko. Ento Paulo te redo kede dwon aloŋo ni, “Kur iwanne keni, pien wan luŋ otye giwa kan.” Agwok obuc te lwoŋo mac, omwomere i ot, te wot ryebere piny i nyim Paulo gin i Cira kun kome tye amyel amyela pi lworo. En te kelogi oko, penyogi ni, “Odoŋena, kara atim ŋo me alarre?” Paulogi te kobbe ni, “Ye Rwot Yecu, ibino larre, yin karacel kede jo i odi luŋ.” Eka ote rabbe kop i kom Rwot, en kede jo ame bedo i ode luŋ. En rik te tero jo-nono i caa-naca cuto i dyeworraca, te wot mado waŋ kan owawano i komgi. Eka en karacel kede jo me ode ducu ote batija oko cuto. Icennere en te terogi i ode, te miyogi cem, kun olelo gin kede jo i ode luŋ, pien en doŋoye Obaŋa. A doŋ piny oru, oŋolkop te cwayo cirikale kun okobo ni, “Gony doŋjo-nono oko.” Agwok obuc te tero koppono baŋ Paulo kun kobo ni, “Oŋolkop ocwao kop ni gonywu oko. Doŋ pi manno, donnyo wunu oko me iwot giwu i kuc.” Cite Paulo te kobbigi ni, “Wan opwodowa i nyim lwak kannaler aboŋo ŋolliwa kop a kungu wan Oroma! Gin ocwaowa-gu i buc. Aman doŋgin omito cwayowa oko i muŋ? Mom gire Myero gin ikomgi obin ogonywa.” Cirikale te dwoko koppono baŋ oŋolkop. Gin ka owinyo ni jo-nono kara onwoŋo obedo jo Roma, lworo omakogi atek. Gin te bino bako doggi baŋgi; i kare ame doŋogonyogi odonyo oko, ote kwayogi me ya oko i bomanono. Gin doŋ te ya wot tuŋ a Ludia; gin ka otyeko neno omego, kun ocuko daŋ cunygi, ote wot gigi oko. Gin obeo Ampipoli kede Apolonia, ote tuno naka i Tecalonika, en kan ame onwoŋo kacokere Ojudaya tye iye. Acalo kit a Paulo me kare luŋ, en owoto te donyo i kacokere, te laro kedgi kop oya i coc a yam ocoo pi cabit adek, kun en gonyo tere me nyuto ni Kricito myero to te cer oko i akina a jo oto, dok te kobo ni, “Yecu ame an arabbiwu kop i kome-nono, en Kricito.” Jo mogo i akinagi te ye koppere, ote ribere i kom Paulo kede Cira, kede jo apol daŋ i akina jo Grik a woro Obaŋa, anaka mon adoŋo apopol. Ento nyeko te mako Ojudaya, gin te tero jo mogo areco ame tio i cuk, eka jo-nono te kelo woo adwoŋ i boma. Gin te guro ot a Yacon kun oyenyo Paulo kede Cira me otergi i nyim lwak. A doŋoyenyogi kwe, ote wayo Yacon kede omego mogo terogi i nyim wegi twer me paco-nono, kun oredo ni, “Jo ame aman doŋtye aloko wi podo luŋ oluktuke, otuno doŋ anaka kan daŋ, Yacon te gamogi i ode. Ginjo-nono otyeobalo cik a Kaicari oko, kun okobo ni tye dok abaka moro ocele ame olwoŋo ni Yecu.” Kopgi-nono te tugo lwak kede wegi twer me paco-nono i kare ame gin doŋowinyo. Wegi twer te miyo Yacon kede jo ocele jeŋo lim, ote gonyogi. Oyotoyot omego te cwayo Paulo kede Cira dyewor i Berea. Gin ka otuno kuno, ote wot i kacokere Ojudaya. Ojudaya-naca rik tamgi beco kato me Tecalonika, pien gin rik obin ogamo kop Obaŋa i cunygi luŋ; nino i nino gin rik te bedo moyo i coc a yam ocoo ka ce kop ame okobo tye kakare. Jo apol i akinagi te lokere doko jo oye Yecu, karacel kede monnogo apopol a ŋeye, anaka co daŋ ame gin jo Grik. Ka Ojudaya me Tecalonika oniaŋ ni Paulo tye a rabo kop Obaŋa i Berea daŋ, gin daŋ te wot kuno, ote bedo tutugo kede rurubo lwak. Oyotoyot omego te cwayo Paulo oko i dog nam, ento Cira kede Temoteo te doŋ kuno. Jo ame olwoko Paulo otuno kede naka i Atene; Paulo te cikogi baŋ Cira kede Temoteo ni myero gin bino baŋe oyot acalo twerre, jo-nono te dok gigi. Ame Paulo pwod tye akurogi i Atene, cunye owaŋ atek ka oneno boma-nono ducu opoŋ i cal jogi. Omio en te bedo laro kop i kacokere kede Ojudaya kede jo a woro Obaŋa, dok daŋ piny a ru rik te bedo laro kop i cuk kedejo a tye kuno. Jo mogo a gin oryeko me eryoŋet a jo Epikuria kede jo Citoiki daŋ okobo kede, eka jo mogo te kobo ni, “Lon akobo kop miŋomiŋoni ka ŋit akobo ŋo?” Jo ocele akobo ni, “En nen bala arabkop i kom Yecu kede i kom cerrere.” Jo-nono te make, tere i wi kidi me Areopago kun openye ni, “Itwero niaŋowa i kom pwony anyen ame ikelo-nie? Pien ikelliwa gigi mogo apat apata ame owinyo; wan doŋ omito ŋeyo ginnono.” Pien jo me Atene luŋ aluŋa, kede wele ame bedo iye, otyeko karegi i kobo onyo i winyo gigi mogo anyen keken. Paulo te cuŋ i dye kidi me Areopago, te kobo ni, “Wun jo Atene, an doŋaneno ni, wun iketo wunu cunywu i woro obaŋa apapat i yore luŋ aluŋa. Pien ka abedo be bea kun aneno gin ame iworo wunu, anwoŋo keno me lam ame ocoo kome ni, ‘Me Obaŋa a mom oŋeo.’ Doŋ gin ame iworo wunu a mom iŋeo wunu-nono, en ame an arabo pire baŋwu. Obaŋa ame oketo wi podo luŋ kede jami a tye iye ducu, en ame obedo Rwot a bwoo polo kede lobo, en mom bedo i ot ame jo ogero i ciŋgi. Daŋ jo gire mom twero tiye kede ciŋgi, bala en mito ginnoro; pien en ikome ame mio baŋ jo luŋ kwo kede weo kede jami Iuŋ. En daŋ oketo jo luŋ a rokgi papat ame tye i wi podo kun gin ducu oya i kom dano acel. En onwoŋo omoko karegi oko coŋ kede waŋ kio me kabedogi, me gin omo Obaŋa, kun ogenoni atot ya obino boboŋo ote nwoŋe. Aco kono Obaŋa gire mom tye bor i ŋattoro. Pien ‘Wan okwo i en, olelea i en, obedo tye daŋ i en’; Dok tye acalo oco werwu mogo okobo, ‘Pien wan daŋ wan ikwae mere.’ Doŋ ka wan obedo ikwae Obaŋa, pe myero opar ni kite Obaŋa calli jabu, onyo ryal, onyo gweŋ, ame gin jami ame opao pi diro kede tam a dano. I kare ame jo pwod kwia piny Obaŋa obedo bala mom oneno, ento amanni en doŋciko jo luŋ me ŋut. Pien en doŋotyeko moko oko nino ame en bino ŋolli lobo kop atira, a kun dano ame en oyero en a bino ŋolo. En daŋ doŋ omoko kop man oko baŋ jo luŋ i cero Yecu i akina a jo oto.” Ka gin owinyo pi cer a jo oto, jo mogo onyero anyera, cite jo ocele okobo ni, “Dok obino medo winyo kop man baŋi i nino ocele.” Paulo gire doŋ te ya wot oko i akinagi. Ento jo mogo onotte kede ote lokere doko jo oye Yecu; i kin jo-nono onwoŋo tye iye Dionecio ame en dano a bedo i okiko me Areopago, kede dako moro ame nyiŋe Damari, karacel i jo ocele mere daŋ. Icennere Paulo te ya oko i Atene wot i Korinti. En te nwoŋo Ajudaya moro kuno a nyiŋe Akwila, ame onwoŋo dano me Ponto. Dano-nono onwoŋo rik pwod obino abina kun oya i Itali gin i dako mere Puricikula, pien onwoŋo Kulaudio ociko ni Ojudaya luŋ myero ya oko i Roma. Paulo owoto baŋgi, te bedo baŋgi, pien dirogi me tic rik kwone acel; gin ducu rik okwo kema. Paulo rik te bedo laro kop i kacokere cabit i cabit, kun temo wa yo tam Ojudaya kede mea jo Grik. Kare ame Cira kede Temoteo doŋ otuno kun oya i Makedonia, Paulo te miyo kare mere luŋ i rabo kop Obaŋa, kun mio caden baŋ Ojudaya ni, Yecu gire en Kricito. Ka gin opyem kede kun oyete daŋ, en otennigi rukkere kun kobbigi ni, “Remowu bed i wiwu! An balloro gira mom baŋa. Cakere tin an gira doŋ abino wot baŋ Orok.” En te ya i kannaca oko, te wot i paco a lo moro a nyiŋe Titio Yucito; en rik onwoŋo dano a woro Obaŋa, ode ceŋ ceggi kede kacokere. Kricipo, adwoŋ me kacokere, te lokere doko ŋat oye Rwot, karacel i jo me ode luŋ; jo Korinti apol daŋ ka owinyo, oye Yecu ote batijagi. I dyeworrono, Rwot te kobbi Paulo i ginanyuta ni, “Kur ilwor; yin kobbi, kur iliŋ; pien an atye kedi. Dano moro mom gire bino timi i ginnoro arac, pien jo mera pol i boma man.” En te bedo kuno mwaka acel kede dwete abicel kun pwonyo kop Obaŋa i akinagi. I kare ame Galio loo Akaya, Ojudaya luŋ obin oputte i kom Paulo i cuny acel, ote tere i ka ŋolo kop, kun okobo ni, “Dano-ni tye abito jo me woro Obaŋa i yore ame cik mom mito.” A doŋ Paulo cok yabo doge me kop, Galio te kobbi Ojudaya ni, “Wun Ojudaya, kono woki obedo kopporo me tim arac onyo me turo cik i yo arac, kono adio cunya me winyo kopwu, mano ŋeye kene. Aco ka kop i kom nyiŋ kop kede nyiŋ jo kede kop i kom eikwu-ni, wun nenu giwu keŋwu; an adag gira bedo aŋolkop me kodi koppono.” En te ryemogi oko ika ŋolo kop. Gin ote mako Cocitene, adwoŋ me kacokere, ote pwode inyim kom me ŋolo kop; ento Galio gire mom oparo kadi acelloro. Paulo te bedo kuno pi kare alalac, eka te ciko omego, te kwaŋo nam me dokoro i Curia, kun Puricikula gin i Akwila woto karacel kede. En onwoŋo omio omworo yer wie oko i Kenkeria, pien onwoŋo rik en okwoŋo kwoŋ. A doŋ gin otuno i Epeco, Paulo te wekogi kuno, en te wot gire laro kop Ojudaya i kacokere. Ka gin okwae ni koŋ dikere baŋgi pi kare alalaccoro, en mom oye. Ame en doŋ ocikogi, okobo ni, “Abino dwogo baŋwu ka Obaŋa oye.” Eka en te kwaŋo nam kun ya i Epeco. Ka gin otuno i wi tela me Kaicaria, gin te wot moto lwak jo oye Kricito, eka ote wot i Antiokia. A doŋ otyeko kare moro kuno, en te ya oko, te bebea i kabedo acel acel i lobo me Galatia kede Purugia, kun mio teko baŋ jo luŋ a lubo Yecu. Dano moro ame nyiŋe Apolo, Ajudaya me Alegejanderia; rik onwoŋo obino i Epeco. En rik dano opwonyere a ŋeo kop meicel, ame tek i coc a yam ocoo. Lonnono rik onwoŋo opwonyo i yo a Rwot; en okobo dok opwonyo kop i kom Yecu i yore i yore kun kop okur i cunye, kadi kono onwoŋo en ŋeo ka batija a Lakana keken. En ocako kop i tekcuny i kacokere. Puricikula kede Akwila ka owinyo koppere, otere, ote wot medo nyutte yo Obaŋa i yore i yore. En rik te mito ni edokoro nam me wot Akaya, omego daŋ te cwako tammere, gin te coyo waraga baŋ jo a lubo Yecu ni myero jole. Ka doŋ otuno, pi kica Obaŋa omio en okonyo jo oye Rwot atek, pien cen oloyo Ojudaya kannaler i nyim lwak kede teko me koppere, kun juro coc a yam ocoo pi nyuto ni, Yecu gire en Kricito. Ame Apolo tye i Korinti, Paulo nwaŋ obeo i lobo i tuŋ malo, te tuno anaka i Epeco. En rik te nwoŋo jo mogo a lubo Yecu kuno te kobbigi ni, “Rik ibin inwoŋo wunu Cuny Acil i kare ilokere idoko wunu jo oye Yecu?” Gin te gamo ni, “Amaa, kom kadi winyo daŋ mom ru owinyo giwa ni Cuny Acil tye.” Dok te penyogi ni, “Kara rik obatijawu i kodi batija mene?” Gin te gamo ni, “Batija a Lakana.” Paulo te kobbigi ni, “Lakana rik batija jo ka gin oŋut, kun kobbigi ni myero gin oye dano ame abino lubo ŋec, mannono en Yecu.” Ka gin owinyo amannono, rik ote batijagi oko i nyin Rwot Yecu. Paulo te keto ciŋe i komgi, gin te nwoŋo Cuny Acil, ote cako dumo lebbogo apapat kede rabo kop acalo odwarpiny. Jo-nono luŋ rik oromo apar wie aryo. Paulo te wot donyo i kacokere, en rik te bedo rabo kop i tekcuny pi dwete adek, kun laro kedgi kop, dok temo waya tamgi i kom loc Obaŋa. Cite jo mogo cunygi obedo nwaŋ, mom oye Yecu, kun okobo kop areco i kom Yo-nono i nyim lwak ocokere, omio en te ya oko i baŋgi kun tero jo oye Yecu daŋ; eka en rik te bedo laro kop nino i nino i ot pwony a Turano. Mano otimere pi runi aryo twal, omio jo a bedo i Acia luŋ, Ojudaya anaka jo Grik daŋ, te winyo kop a Rwot. Obaŋa onwoŋo tye ka miyo Paulo tiyo ticcogo atek adoŋo me awura apat i en a yam timere. Jo rik tero otwogi-gu atambara onyo boŋŋi me tic ame ogudo ka i kom Paulo, too daŋ te caŋ gire oko, ceŋ areco daŋ ya oko i komgi. Rik onwoŋo tye Ojudaya mogo ame oryem cen, a wowota awowot; gin daŋ obin otemo tic kede nyiŋ Yecu i kom jo a tye i cen areco, kun okobo ni, “Akwoŋŋiwu i nyiŋ Yecu ame Paulo rabo pire.” Itino abiro ame gin rik otino Ajudaya moro ame alamdog adwoŋ ame nyiŋe Cikewa, rik daŋ otimo amannono. Cen arac rik te penyogi ni, “Yecu an aŋeo, anaka Paulo daŋ aŋeo; kara wun kono iŋagi wunu?” Eka won cen araccaca te mukere i komgi, te loyogi luŋ i teko; omiogi ote riŋo oko i ot-tu ame gin ducu otye onoro dok kun daŋ owawanogi. Kop man rik te ŋeye baŋ Ojudaya kede jo Grik luŋame bedo i Epeco. Gin luŋ ote bedo alwor meicel, omio jo te medde keto kwogo adwoŋ i nyin Yecu. Jo apol i akina jo oye Rwot te bino ye kede tuco kannaler gigi mogo a yam gin obedo timo. Dok jo apopol daŋ a yam bedo tiyo ticcogo me jojok, te coko bukegi wano oko i nyim lwak luŋ. Rik ote myeko wel jami ame owaŋo, ote nwoŋo oromo ciliŋ tutumia abic twal. Kop a Rwot rik te bedo nya, medde i teko i yore acalo mannono. Ka mano luŋdoŋ otum, Paulo otamo i cunye ni kono ebeo i Makedonia kede Akaya, ete wot i Jerucalem, kun kobo ni, “Ka doŋabedo kuno, myero doŋanen Roma daŋ.” Omio en te oro jo aryo i akina jo a konye, Temoteo kede Eracito, kun en koŋ dikere anok i Acia. I kare-nono arubaruba rik obedo adwoŋ i kom kop me Yo man. Rik tye lo moro ame atet ryal, nyine Demeterio, en rik onwoŋo teto ot jok Atemi atitino moro, teto i ryal kun kelli odiro i tic magoba adwoŋ. En rik te coko odiro-nono karacel kede jo ocele ame ticgi acel i megi-nono, eka te kobbigi ni, “Jo-nie, wun iŋeo wunu ni ticwa-ni en a kelliwa lonyo. Aco wun doŋityeko neno, dok daŋ iwinyo wunu ni, Paulo moro-ni aman doŋobito jo dok oloko lwak apipim, mom ka i Epeco kan keken, ento buco doŋromo yi Acia luŋ, kun en kobo ni, obaŋa moro ducu ame jo tio kede ciŋgi mom gire obaŋa kadi acelloro. Dok mom ticwa keken en a tye arac, ento anaka ot Atemi ikome ame jok adit-ti daŋ bino doko gin a konynere mom, ame man bino kwanyo kwogo me dit a dako man ame jo me Acia kede wi podo luŋworo.” Jo-nu ka owinyo kop man, akemo te makogi atek meicel, ote bedo rereda ni, “Atemi a jo Epeco en ame dwoŋ gire!” Arubaruba rik te bedo i bomanono adwoŋ meicel; jo rik te mako Gayo kede Aricitako, ame gin onwoŋo jo me Makedonia a nwaŋ woto karacel i Paulo, eka gin ducu te mwomere i cuny acel i ka tuko. Paulo te mito ni en daŋ edony i akina lwak, ento olub Yecu te geŋe oko. Jo mogo a doŋo me Acia ame rik owote mere daŋ ocwaye kwena ni myero kur emiye me donyo i ka tuko. Mannono omio redo a jo opokere oko papat, jo ocele aredo pi gin-ni, jo ocele pi ginnoro ocele; pien tam a jo i cokere onwoŋo doŋ orubere oko, omio pol a jo mom omedo i niaŋ gin omiogi ocokere. Jo mogo i akina lwak otamo ni gin ocokere pi Alegejanda, pien Ojudaya ocwae i nyimgi. Alegejanda te diyogi kede ciŋe, kun onwoŋo en amito pido i nyim lwak. Cite ka gin oniaŋ ni en kara onwoŋo obedo Ajudaya, gin luŋ ote wo i dwon acel pi kare a romo caa aryo, kun okobo ni, “Atemi a jo Epeco en ame dwoŋ gire!” A doŋ aran me boma-nu ojuko lwak oliŋ oko, Alegejanda te kobo ni, “Wun jo me Epeco, kara ŋa a dok kwia ni boma me Epeco en ame gwoko ot jok Atemi adwoŋŋere, kede calloro a rik opoto i polo? Kop-pi ducu mom tye ŋattoro a romo kwero; doŋ myero ibed wunu mot, kur itim wunu ginnoro ducu i myelkom. Pien ikelo wunu jo-ni kan a kun gin gigi mom oyak ot jok, dok daŋ mom oyeto gigi obaŋawa. Doŋ ba, ka Demeterio kede odiro tic ame tye kedgi tye kede kopporo i kom dano moro, okiko tye, oloc daŋ tye; myero gin opid kopgi apida kengi kengi. Ento ka iyenyo wunu ginnoro ocele obino tyeko i cokere a lubo cik. Pien bino bedo rac baŋwa, ka opiddiwa pi kop me tubere i gin otimere tin, pien te koppere mom nen, mio nyuto gin okelo aruruba man loowa oko.” A doŋ en okobo man, te keto cokere oko. Ka tugere ca doŋ okwe, Paulo ocwao kwena baŋ jo a lubo Yecu, Ocuko cunygi, te cikogi, te wot gire oko i Makedonia. En te be bea i lobo me kuno, kun kobo kop apol me cukoro cuny jo, eka te kato i lobo a jo Grik. En rik te tyeko dwete adek kuno; i kare ame en rik doŋ cok kwaŋ me wot Curia, Ojudaya daŋ te cako yikere pire i muŋ, omio en te moko tammere me dok gire cen kun ebeo i Makedonia. Jo olwoke rik obedo Copater, dano me Berea, wot a Puro, kede Aricitako, kede Cekundo, ame gin jo me Tecalonika, Gayo me Derube, kede Temoteo, kede Tukiko gin i Tropimo ame gin jo me Acia. Jo-nono otelliwa yo, eka ote kurowa i Teroa. Wan okwaŋo nam kun oya i Pilipi a doŋ kare me Ogati a Tobi Mom iye doŋ otum oko, owoto nino abic ote tuno baŋgi i Teroa, ote ri kuno nino abiro. Ka rik wan ocokere karacel me nyinyilo ogati i nino ame lubo cabit Ojudaya, Paulo okobo kedgi, kun oyikere ni ebino wot oko i orwo mere, te gal i rabo koppere i tuno anaka i dye idiŋ. Onwoŋo tara apol tye alyel i icika amalo kan a wan ocokere iye. Atin awobi moro a nyiŋe Yutiko rik tye obedo i waŋ dirica. Ame Paulo onwoŋo pwod obedo medde kede rabo kop nakanaka, nino te cako ciro awobinu atek. Kare ame nino doŋ onure meicel, awobi te mwomo oko i icika a malo me adekkere, te napere oko piny, ote coko a doŋ oto oko. Paulo te yitto piny, poto i kome, te kwake kun kobo ni, “Weku woo bedi. En gire pwod kwo.” Eka Paulo te yito dok malo, te nyilo ogati; ocamo cem, te dok ceko kedgi kop pi kare alac ituno ka piny oru, te doŋ wot oko. Gin doŋ ote kelo awobi caoko i ot kun doŋ kwo, omio cunygi doŋ te kwe aber meicel. Cite wan ogeo wot i mel, ote kwaŋ wot i Aco, kun onwoŋo oyiko ni obino gamo Paulo i mel kuno, pien en onwoŋo oyiko amannono, kun en ikome omito ni ebe i wi tela. Ka en onwoŋowa i Aco, ogame i mel, ote bino i Mitulene. Ote kwaŋ iya i kuno, orwo mere ote tuno kan ame otemere kede Kio. I nino me aryo mere wan ote tuno i Camo, eka orwo mere ote tuno doŋ i Mileto. Pien Paulo onwoŋo otamo ni myero ekat Epeco akata, me mom doŋ etyek kare i Acia; pien onwoŋo en arurua ni, ka twerre, nwoŋe doŋ etye i Jerucalem i nino me Pentekote. Ame Paulo pwod tye i Mileto, en ocwalo kwena i Epeco pi lwoŋo odoŋe a lwak jo oye Kricito. Ka doŋ gin otuno baŋe, en te kobbigi ni, “Wun ikomwu iŋeo kite ame abedo kede i akinawu i kare luŋ, cakere i nino ame ageo nyono kede Acia, kun atiyi Rwot i mwolo luŋ kede pig waŋ kede aoma yic ame opoto i koma pi kit ame Ojudaya obedo liba kede. Daŋ iŋeo wunu kite ame an rik mom alworo tito baŋwu kede pwonyowu ginnoro ducu ame twero konyowu, ame man rik atimo i dye lwak kede i ot i ot. Rik atito atira baŋ Ojudaya kede jo Grik ni myero gin oŋut i tun baŋ Obaŋa dok daŋ oye Rwotwa Yecu. Cite aman, nen, an doŋ Cuny Acil tye adiya awot i Jerucalem; mom aŋeo gin a bino timere i koma kuno, kono ka gin ame Cuny Acil titta i boma acel acel, keken, ni, twec kede aroma en ame tye akura akura. Ento an mom gira akwano kwo mera ni obedo ginnoro me wel i tuŋ baŋa, tekki acobo ŋwecca kede tic ame agamo i baŋ Rwotwa Yecu, me bedo caden me amut aber me kica Obaŋa. “Onyoni kono doŋaniaŋ ni mom tye ŋattoro i akinawu ame rik abebea baŋwu kun arabbiwu kop me loc Obaŋa, ame dok bino neno waŋa. En omio tin atittiwu atira ni, an gira balla moro mom i remowu luŋ, pien nwaŋ mom alworo rabbiwu tam luŋ ame Obaŋa oyiko. Gwokere wunu kenwu kenwu, karacel kede lwak romi luŋame Cuny Acil omiowu tic me gwoko, me ibed wunu okwa lwak jo oye Obaŋa a rik en oloko odoko mere i remo mere ikome. An aniaŋ ni, ka doŋaya oko, epettogo ager bino donyo i akinawu, gin mom bino timo romi kica. Anaka i akinawu daŋ, bino ya iye jo mogo ame bino kobo koppogo ame odwadwanyo oko, me owa olub Yecu odwok i ŋegi. Pi mannono kiu wunu piny, kun ipo wunu ni, an rik mom aweko pwonyo ŋat acel acel kun pig waŋ cwer pi mwakki adek. Amanni doŋ an awekowu i ciŋ Obaŋa kede i koppere me kica ame twero miyowu idoŋo wunu, dok inwoŋo wunu kabedowu i akina jo luŋ ame olonyo doŋ obedo acil. An gira rik mom onwoŋo aparo ryal kadi jabu onyo ruk a ŋattoro. Wun ikomwu iŋeo wunu ni tic me ciŋa-ni ame okella jami luŋ a mitte baŋa kede baŋ jo luŋa rik bedo keda. Kare luŋ rik abedo nyuttiwu ni myero iti wunu tic atek amannono me ikony wunu jo a mom i teko, kun ipo wunu i kom kop a rik Rwotwa Yecu okobo ni, ‘Winyo tye i miyo akato gamo agama.’ ” A doŋ Paulo otyeko kobo kop man, orumo coŋe piny, te kwayo Obaŋa karacel i jo-nono luŋ. Gin luŋote koko meicel, kun okwako ŋut Paulo, onoto leme daŋ. Gin a doŋowaŋo yigi wok, en kop ame en okobo ni mano jo-nono mom dok bino medo neno waŋe. Gin doŋote lwoke tere naka i mel. Ame wan doŋotyeko pokere kedgi, ote kwaŋ kun omako yo atira anaka atot i Koc. Odiko ocele ote tuno i Rodo, ka oya i kuno otuno i Patara. Ote nwoŋo mel ame awot i Poinike, eka ote donyo iye, ote kwaŋ. Okwaŋ kun oneno Kupuro, ote weko oko tuŋ cam, ote kwaŋ wot i Curia; ote koŋ yito i wi tela i Turo, pien onwoŋo omito loko jami me mel kuno. Wan omoo olub Yecu ote bedo baŋgi kuno pi nino abiro. Cuny Acil obedo miyogi kobbi Paulo ni kono kur omedde i wottere i Jerucalem. Ento ka kare me wot oromo, wan omedde giwa i wotwa. Gin luŋolwokowa okato kedwa i ŋet boma-nono, anaka mongi kede otinogi. Ote rumo coŋwa piny i dog nam, ote kwayo Obaŋa. Eka ote doŋcikere. Wan ote donyo i mel kun gin odok paco. Oya i Turo ote medde i wotwa naka i Putolemai, eka ote motte kede omego, ote bedo baŋgi nino acel. Orwo mere ote wot oko, tuno naka i Kaicaria, eka ote donyo i ot a Pilipo arab amut aber ame en rik onwoŋo dano acel i kom jo abiro ca, ote bedo baŋe. En rik tye kede anyira aŋwen ame mom ru onyomo, gin rik orabo kop bala odwarpiny. I bedowa kuno ame otero kare alalac, adwarpinnyoro a nyine Agabo obino baŋwa kun onwoŋo oya i Judaya. A doŋen otuno baŋwa, okwanyo del me pyer Paulo, te tweyo i ciŋe kede tyene kene kene, te kobo ni, “Cuny Acil okobo ni mano, ‘Ojudaya ame bedo i Jerucalem bino tweyo won del-li amannono, eka ote miye baŋ Orok.’ ” Tekki wan owinyo man, wan kede jo a rik tye kuno, ote kwayo Paulo ni kur doŋwot i Jerucalem. Paulo te gamo dogwa ni, “Do kara ame itimo wununono, imito balo wunu cunya i kokowu? Pien an gira doŋ ayikere, mom pi buc keken, ento anaka me to i Jerucalem pi nyiŋ Rwot Yecu.” Wan ka oneno ni okwero winyo ajukawa, ote weke giwa kun okobo ni, “Gin a Rwot mito myero tiye gire.” A doŋ kare mano otum, wan oyikere, ote wot malo i Jerucalem. Kede olub Yecu mogo ame oya i Kaicaria daŋ onywako yo kedwa, ote terowa i ot a Munacon, dano me Kupuro, ame onwoŋo lubo Yecu cakere con, en dano a rik oyiko ni wan myero obed wele mere. A doŋ wan otuno i Jerucalem omego te jolowa kede lelo adwoŋ. Orwo mere Paulo te wot karacel kedwa tuŋ a Yakobo; onwoŋo odoŋe luŋ daŋ tye kuno. Ame wan doŋ otyeko motogi oko, Paulo te porrigi kop ducu i yore i yore i gin luŋ ame Obaŋa otimo i akina Orok pi ticcere. Gin ka owinyo, ote pako Obaŋa, kun okobo ni, “Ineno ba, ominwa, jo tutumia i tutumia i akina Ojudaya doŋ otyeko ye Yecu. Gin luŋ otye akemo pi cik, cite gin luŋ doŋ otyeko winyo kop i komi oko, ni yin ipwonyo Ojudaya luŋ a bedo i akina Orok ni wek kop a Muca oko, kun ikobbigi ni, kur doŋ olir otinogi onyo olub kittoro me kwaro. Kara Ŋo a myero doŋotim? Pien gin awinyo oko ni yin ibino. Pi mannono myero iti gin a wan okobbi. Wan otye kan i jo aŋwen ame gin otyeko kwoŋŋere i kwoŋ. Yin ter jo-nono iwot ilonyere karacel kedgi, dok icul gin ame mitte pi lyelo wigi. Mannono bino miyo jo luŋ ŋeo ni gin ame okobo i komi kara kop lebere, ento kun yin ikomi imako cik ilubo giri. Aco kop i kom Orok a doŋ oye Yecu, wan rik doŋ ocoyigi waraga kun otittigi gin a wan oŋolo, ni mano gin myero okwer gin ame oyalli cal jogi, kede remo, kede ginnoro ame odeo adea, kede tim me coco.” Orwo mere Paulo te tero co-naca, te wot lonyere karacel kedgi, eka te wot i ot Obaŋa me wot tito nino ame obino cobo iye lonyeregi kede miyo gin ame oŋolo pi dano acel acel. A doŋnino abiro ca ceggi tum, Ojudaya ame oya i Acia, a rik onwoŋo onene i ot Obaŋa, te cupo lwak, eka ote mako Paulo oko, kun owo okobo ni, “Wun jo Icrael, konywa wunu! Man en lo ame tye apwonyo jo luŋ i kabedo ducu kop arac i kom rokwa, kede i kom cik a Muca, kede i kom kabedo man. Medo dok i mannono daŋ, en okelo jo Grik i ot Obaŋa, opyedo doŋ kabedo a yam cil-li oko,” Pien onwo Ŋo gin oneno Turopimo, dano me Epeco, kun tye kede i boma-nono, ote tamo ni Paulo doŋ otyeko tere oko i ot Obaŋa. Man omio jo i boma luŋ te belle, lwak te rwato ŋwec karacel; ote mako Paulo, waye tere oko i ot Obaŋa, ote cego doggola luŋ cucuttono. Ka onwoŋo doŋ gin amito neke oko, kop te ru winyere oko baŋ adwoŋ a loo cirikale me Roma, ni, arubaruba tye i Jerucalem luŋ. Oyotoyot, en te ru tero cirikale kede odoŋegi, ote ŋwec anaka baŋ lwak. Gin ka oneno adwonŋu kede cirikale, ote weko pwodo Paulo oko Alo cirikale luŋ te wot baŋ Paulo, te make, eka te ciko ni myero twe i jegere aryo. Eka en doŋ te penyo ni, “Ŋa-nono? Ŋo ce a en otimo?” Jo mogo i akina lwak te redo kun kopgi mom rwatte, mogo akobo man, mogo akobo en ocele. Ka niaŋ kop me ateni me woogi-nono oloc, en te ciko ni myero ter Paulo i laigi. Ame gin doŋ otuno i acoge, ocirikale te tiŋo Paulo atiŋa pi gero a lwak; pien lwak adwoŋŋere olubogi kun owo ni, “Neke wunu oko!” A doŋ gin ceggi kelo Paulo i lai, en te kwayo alo cirikale luŋ ni, “Itwero ye an koŋ akobbi kopporo?” Alo cirikale te kobbe ni “Iŋeo leb Grik kara? Mom yin a Miciri moro a rik bin cup lwak i kare okato, te tero jo Pala Bat tutumia aŋwen i tim?” Paulo te gamo ni, “An gira Ajudaya, aya i Taruco ame tye i Kilikia, ame en boma a mom okwia. Akwayi, ye me koŋ akobbi lwak.” A doŋ oye, Paulo te cuŋ i wi acoge, te diyo lwak kede ciŋe. Ka doŋ gin oliŋ iti, en te kop kedgi i leb Eburania ni mano. “Omegona kede jo a pappa, winy wunu pidona ame aketo i nyimwu.” Ka gin owinyo ni Paulo tye akop i leb Eburania, gin te medde liŋ. En te kobo ni, “An Ajudaya; onywala i Taruco ame tye i Kilikia, ento adoŋo i boma man i ka tyen Gamaliel. Apwonyere i yore luŋ i kom cik ame oya i baŋ kwariwa, dok abedo kede akemo pi Obaŋa bala wun luŋ tin. Rik awuno jo me Yo man atek, anaka nekogi, kede tweyogi i buc, co kede mongu. Alamdog adwoŋ kede jo luŋ ame bedo i okiko gin cadenna. Pien rik abin agamo waraga i baŋgi ame ocoo baŋ omegowa Ojudaya ame tye i Damaciko, ate daŋ wot kuno pi mako jo a tye iye, me akelgi i Jerucalem a doŋ atweogi oko, wek ket can i komgi. “Ka rik awoto, a doŋ a ceggi tuno i Damaciko, oyotoyot i cuny dyeceŋ acara moro adwoŋ te ya i polo, te menya twoda dyere. Eka ate rette piny, ate winyo dwon ŋattoro ame penya ni, ‘Caulo, Caulo, piŋo kara itye ka wuna?’ An ate gamo ni, ‘Kara yin iŋa, Rwot?’ En te gamo ni, ‘An a Yecu me Najaret, en ame yin giri itye ka wunonono.’ Jo a rik onwoŋo tye karacel keda oneno ka acara keken, ento mom owinyo dwon ŋat a kop keda. An ate kobo ni, ‘Kara man myero doŋ atim ŋo, Rwot?’ Rwot te kobba ni, ‘Ya malo me idony i Damaciko; obino kobbi gin luŋ ame oyiko ni myero iti i kuno.’ ” Ame onwoŋo doŋ mom atwero neno piny pi ryeny me acara ca, jo a rik otye kedgi te peya apea i ciŋa, eka ote tuno i Damaciko. “Eka ŋattoro a nyiŋe Anania, dano ame onwoŋo woro Obaŋa kun lubo cik, a nwaŋ Ojudaya ame bedo kuno luŋ pwoc, obino baŋa te cuŋ i laŋeta, te kobba ni, ‘Ominna Caulo, nen doŋ piny.’ I caa-naca ikome, atiŋo waŋa malo, ate daŋ nene oko. En doŋ te kobba ni, ‘Obaŋa a kwariwa doŋ oyeri ni iŋe gin ame emito, inen ŋat a Kite Atir, dok iwiny kop aya i doge, pien yin ibino bedo cadennere baŋ jo luŋ i kom jami ducu ame ineno kede ame iwinyo. Kara aman pwod dok ikuro ŋo ce? Ya malo ilwoŋ nyiŋe, me ibatija oko, balli kwany oko. “A doŋ atyeko dwogo i Jerucalem, kun atye akwayo Obaŋa i ot Obaŋa, tamma rik te koŋ dok yutte oko, ate nene kun akobba ni, ‘Ru ya oko i Jerucalem oyotoyot, pien gin mom obino ye kop ame ibino tito i koma,’ An ate kobo ni, ‘Rwot, gin oŋeo aber ni an abedo tweyo kede pwodo jo ame oye yin i kacokere acel acel. Dok i kare arik oonyo remo a cadenni Citefano, an onwoŋo daŋ acuŋ kuno, kun agwoko boŋŋi ajo aneke, dok daŋ apwoo timgi.’ En te kobba ni, ‘Ape, woti; pien abino cwayi kan abor, ibedo akwena baŋ Orok.’ ” Gin owinye naka en otyeko koppere-nono, eka ote redo kede dwon aloŋo ni, “Neke wunu oko! Kwany dano-nono oko i lobo, kodi dano-nono mom romo bedo kwo.” Ame gin otye owo, kun obobolo boŋŋigi, okiro-gu apua malo, alo ocirikale luŋ te ciko ni tere i lai, kun daŋ ciko ni myero penye kun apwode i del, pi yenyo te kop omio jo awo i kome amannono. A doŋ otwee oko kede del, Paulo te kobbi alo cirikale ame onwoŋo ocuŋ kakannono ni, “Dano ame obedo dano me Roma cik ye ni myero pwod i del, ame mom ru daŋ oŋolle kop?” Ka adwoŋ ocirikale owinyo, te wot baŋ alo cirikale luŋ, te kobbe ni, “Kara ŋo ame aman imito timo? Dano-nono be Aroma ba.” Alo cirikale luŋ te bino baŋe, te penye ni, “Titta, yin Aroma?” Paulo te dok iye ni, “Ee ta.” Alo cirikale luŋ te gamo ni, “An rik aculo lwak lim abup me doko Aroma.” Paulo te gamo ni, “Aco an onywala iye anywala.” Jo a rik oyikere me penye kun opwode apwoda te ket gigi oko oyotoyot; anaka en alo cirikale luŋ daŋ te bedo i lworo kare ame doŋ en oŋeo ni Paulo kara Aroma, pien onwoŋo doŋ etweo oko i del. Orwo mere, ka onwoŋo en mito niaŋ atir gin omio Ojudaya rik apiddi Paulo, en ociko olamdog adoŋo kede jo me okiko luŋ ni myero ocokere. En te gonyo Paulo oko, kela cibo i nyimgi. Paulo te ciko waŋe atek i komjo i okiko, te kobo ni, “Omegona, an i kwona luŋ abedo ame yia ler i nyim Obaŋa tuno kede naka tin.” Ento Anania ame onwoŋo alamdog adwoŋ, te ciko jo ocuŋ i laŋete ni doŋ doge. Paulo te kobbe ni, “Obaŋa bino doŋi yin daŋ, yin apama ame opuo i lobo atar! Yin ibedo ka ŋolla kop i te cik, a kun yin ikomi ituro cik pi ciko ni doŋ doga?” Jo onwoŋo ocuŋ i laŋete te kobo ni, “Loni, yin iyeto alamdog adwoŋ Obaŋa?” Paulo te kobo ni, “Onwoŋo mom aŋeo ni en alamdog adwoŋ, amaa omega, pien rik ocoo ni, ‘Kur ikob kopporo arac i kom ŋat a loo jowu.’ ” Paulo ka oniaŋ ni jo-nono onwoŋo dul acel iye Ocadukayo, kede en ocele Oparicayo, oredo i okiko ni, “Omegona, an gira Aparicayo, onywalla daŋ Oparicayo. An gira aŋolla kop pien atye i gen i cer a jo oto.” A doŋ Paulo okobo kop man, pyem te erre i akina Oparicayo kede Ocadukayo, cokere te pokere oko aryo. Pien Ocadukayo kobo ni, cerroro gire mom tye, dok daŋ okobo ni, kadi omalaika, kadi tipo mom gire tye, ento Oparicayo ye ni ginnogo luŋ tye. Woo dok te bedo iye adwoŋ meicel, te miyo opwony-cikkogo me eryoŋet Oparicayo te ya malo i pyem kun okobo ni, “Wan giwa mom onwoŋo ginnoro arac a dano-ni otimo. Kara ka tipo onyo amalaika okobo kede, raccere tye kwene?” Ka pyem odoko agwa, alo cirikale luŋ te bedo i lworo ni gin bino yeyeco Paulo atitino, omio en te ciko ocirikale me luŋere piny baŋgi, wek oma Paulo oko iyi akinagi tetek, okele i lai. Orwo mere i dyewor, Rwot te bino cuŋ i laŋete, te kobbe ni, “Di cunyi, pien acalo rik ibedo cadenna i Jerucalem, myero daŋ ibed cadenna i Roma.” A doŋ piny oru oko, Ojudaya te yiko kop karacel. Gin te kwoŋere me mom cem kadi mato pii, ŋuno waŋ ame koŋ oneko Paulo. Jo a rik oyiko kop kittono, onwoŋo kato pyeraŋwen oko. Gin te wot baŋ olamdog adoŋo kede odoŋe, ote kobbigi ni, “Wan otyeko kwoŋo kwoŋ atek meicel, ni mom obino gudo cem ituno waŋ a koŋ oneko Paulo. Pi mannono, wun karacel kede jo me okiko, myero icwa wunu kop baŋ alo ocirikale luŋ amanni, me kele baŋwu, acalo bala pwod ibino wunu medde yenyo wunu koppere odoco. Wan oyikere oko me neke a mom ru en otuno a ceggi.” Ento okeo a Paulo rik onwoŋo owinyo yikgi-nono oko; en te wot donyo i lai, te kobbi Paulo oko. Paulo te lwoŋo dano acel i akina odoŋ cirikale, te kobbe ni, “Ter atin awobi-ni baŋ adwoŋ a loowu, pien en tye kede kopporo ame en amito kobbe.” Dano-nu te tere baŋ alo ocirikale luŋ, te kobo ni, “Paulo ame abuc ocwana baŋe, te kwaya ni akel atin awobi-ni baŋi, ni en tye kede kopporo ame amito kobbi.” Alo cirikale te mako ciŋe tere teŋe, te penye i muŋ ni, “Kara kop aŋo ame imito kobba?” En te kobo ni, “Ojudaya doŋ omoko kop me kwayi ni diki ter Paulo piny baŋgi i okiko, acalo bala gin pwod obino medde iyenyo koppere odoco. Ento yin kur iyegi, pien tye jogi pyeraŋwen ame doŋ okwonere oko ni mom obino cem kadi mato pii, ituno waŋ a koŋ oneko Paulo, jo-nono tye a kiye. Aman gin doŋ oyikere oko, okuro ka kop a ya i baŋi.” Alo ocirikale te miyo awobi-nu wot kun ocike ni, “Kur dok okobbi ŋattoro kop ame ititta-ni ba.” En te lwoŋo odoŋ me cirikale aryo, te kobbigi ni, “Yik wunu cirikale mia aryo, karacel kede wegi aguragura pyerabiro, kede wegi toŋi mia aryo, me wot Kaicaria caa adek me iwor. Yik wunu daŋ leyi me ayita a Paulo, me gin otere oreme baŋ aloc Felikici.” En te coyo waraga kit man, “Baŋ adwoŋ Won Kwogo aloc Felikici. An Kulaudio Lucia, amoti. Dano man onwoŋo Ojudaya omake, daŋ omito neke oko, cite an amwomere baŋgi kede ocirikale, ate maye oko i baŋgi, pien onwoŋo atyeko niaŋ ni en obedo Aroma. Ka amito ŋeyo gin omio gin opide, atere piny i okikogi. Anwoŋo ni mom romo neke kadi tweye i buc. Ento ka awinyo ni gin opiro kop me neko ico man oko, en omio aru cwaye oko baŋi, kun aciko daŋ jo a mito pide ni kel kop i kome i nyimi.” Ocirikale te tero Paulo acalo ocikogi, ote kele dyewor tuno i Antipatri. Odiko ka piny oru, gin gigi ote dok paco i lai, ote weko wegi aguragura medde wot kede. Ka gin otuno i Kaicaria, ote miyo waraga baŋ aloc, daŋ ote nyuto Paulo baŋe. Ka en otyeko kwano waraga, te penyo lobo a Paulo oya iye. Ka doŋ en oniaŋ ni oya i Kilikia, te kobbe ni, “Abino winyo koppi ka jo a pidi doŋ otuno.” En te ciko ni myero gwoke i ot adwoŋ ame Kerode bedo iye. Ka rik nino doŋ okato kany, Anania, alamdog adwoŋ, te bino kede odoŋe mogo, kede pilida moro a nyiŋe Terutulo. Gin te nyutti aloc kop a gin opiddi Paulo iye. A doŋ olwoŋo Paulo, Terutulo te geyo pido kun kobo ni, “Won Kwogo, adwoŋ Felikici, wan giwa obedo i kuc adwoŋ meicel piri, daŋ pi ryekoni, omio koppogo a yam reco doŋ oyiko oko pi rok man. Man wan ojolo giwa i yore luŋ i kabedo luŋ i twon pwoccoro adwoŋ. Ento, mom myero dok amedde olo komi akato. Akwayi ka akwaa keken pi kicani, imiwa kare anonokkoro, iwiny kopwa-nie. Pien wan doŋ oneno ni lo-ni, raccere doŋ rom i edeke. En obedo tubo Ojudaya a tye i kabedo luŋ i wi podo; dok-gu en obedo atel wiccoro me eryoŋet a jo Najaret. Otemo pyedo anaka ot Obaŋa, ote make oko, [kun onwoŋo wan omito ŋolle kop a lubo ci kwa. Ento Lucia ame adwoŋ a loo cirikale luŋ, te bino maye oko i ciŋwa tetek. En te ciko ni jo a pide myero bin i nyimi.] Yin daŋ ka ibino pepenyo en kop man, ibino niaŋ i ginnoro ducu ame wan opide iye.” Ojudaya daŋ te notte i pido-nono kun omoko ni koppono tye amannono. Aloc te cimo Paulo ni myero kobi, en te gamo ni, “An aŋeo ni, yin doŋ ibedo aŋolkop a rok man pi runi apol, en omio apido pidona kede yomcuny. Yin ka iyenyo piri keni, ibino niaŋ ni mom ru okato nino a romo apar wie aryo geye ame akwanyo yo awoto malo i Jerucalem me wot woro Obaŋa. Jo-ni mom onwoŋa apyem i ŋattoro, onyo atye atubo lwak, kadi i ot Obaŋa, kadi i kacokere luŋ, kadi onyo i dye boma. Dok daŋ mom gire otwero moko kop ame gin opida iye amanni. An aye kop man i nyimgi ni, an aworo Obaŋa a kwariwa kun alubo kite me Yo man, ame gin ocwano ni eryoŋet, kun aye kop luŋ ame rwatte kede cik a Muca, kede ame odwarpiny ocoo. Daŋ atyei gen i kom Obaŋa, ame en kit gen acel a jo-ni ikomgi daŋ tye kede, ni mano, jo a kitegi atir kede jo a kitegi mom atir bino cer oko. Omio an nino luŋ aketo tek me bedo a yia ler baŋ Obaŋa kede baŋ jo. Ame doŋ runi okato apopol kun ape, abino baŋ rokka pi kelo kony ame omiogi, kede me miyo mot me yalo Obaŋa. Kare ame onwoŋo rik atye atimo man, gin ote nwoŋa i ot Obaŋa a doŋ alonyere gira oko, kun onwoŋo mom tye gire lwakkoro kadi woo moro kuno. Ento onwoŋo ka tye Ojudaya mogo ame oya i Acia; gin onwoŋo myero rik opida i nyimi kan con, kono ka ce onwoŋo gin rik otye i kopporo i koma. Onyo koŋ imi jo-ni a tye kan amanni kob ginnoro ame gin rik onwoŋa abalo, i kare ame acuŋ i nyim okiko. Kono ka kop acel-li keken ame aredo kun acuŋ i akinagi, ni, ‘An gira aŋolla kop tin pi kop me cer a jo oto.’ ” Cite Felikici, pien onwoŋo ŋeo kop me Yo-naca odoco, koŋ te galogi kun kobo ni, “Ka Lucia alo cirikale luŋ obino kan, an abino ŋolo kopwu.” En te ciko adwoŋ me ocirikale ni gwok Paulo, ento myero mie kare, kur geŋ awottere moro miye kony. Ka kare okato anonokkoro, Felikici te bino gin i cege Durucila, nya jo Judaya. Olwoŋo Paulo, te winyo ka en kobo kop i kom ye Yecu Kricito. Ame onwoŋo en tye apyem i kom kite atira, gwokere ken, kede i kom ŋolo kop ame bino bedo tye i nyim, lworo rik te mako Felikici oko, te gamo ni, “Aman koŋ iwot giri; ka anwoŋo kare ate dok bino cwani.” Medo i mannono, en onwoŋo ageno ni Paulo twero miye limmoro. Mano omio en obedo lwoŋe teretere kun kobo kede. Ame mwaka aryo doŋ okato, Porkio Fesito te lunyo kaka Felikici. Felikici rik te weko Paulo i buc, pien onwoŋo mito ni Ojudaya pwoe. Ka Fesito doŋ obino ocako tic i lobo mere, ori nino adek te ya i Kaicaria wot oko i Jerucalem. Eka olamdog adoŋo kede Ojudaya adoŋo mege te kobbe kop ame gin opiddi Paulo iye kun daŋ odie, ni myero timgi ber mi kel Paulo i Jerucalem; kun onwoŋo gin oyiko kop me neke oko i waŋa yo. Fesito te gamo ni, “Paulo ogwoko i Kaicaria, an ikoma daŋ amito wot kuno aceggi-ni. Doŋ myero imi otelwu luŋere kuno karacel keda; me wek gin wot pide ka ce tye kopporo arac i kome en dano-nono.” Ame doŋ obedo kedgi nino a mom kato aboro onyo apar, en te wot gire oko i Kaicaria. Orwo mere en te bedo i kom me ŋolo kop, te ciko ni kel Paulo. Ka Paulo obino, Ojudaya ame oya i Jerucalem te cuŋ gure dyere, ote pide kop apol apek daŋ, ame gin ikomgi mom oromomoko i yore moro. Paulo te pido kun kobo ni, “An gira mom abalo kopporo kadi acelloro i cik Ojudaya, onyo i ot Obaŋa, kadi baŋ Kaicari.” Cite Fesito rik onwoŋo daŋ mito ni Ojudaya pwoc, omio en te gamo kop a Paulo ni, “Imito ni myero wot pidi kop magi i nyima i Jerucalem?” Paulo te dok iye ni, “An doŋ acuŋ i nyim kom me ŋolo kop a Kaicari, en kan a myero ŋolla iye kop. An gira mom atimmi Ojudaya ginnoro arac, yin daŋ giri iŋeo mano aber meicel. Ka ce atye atimo onyo ca abalo ginnoro arac a romo miyo oneka, an gira mom akwero to; aco ka pidogi ame okelo i koma yore mom, ŋattoro a romo miya baŋgi daŋ mom tye. An ajure koppa baŋ Kaicari.” Ka Fesito koŋ okobo i jo me okiko mere, te dokke iye ni, “Yin doŋ ijuro baŋ Kaicari, ibino wot baŋ Kaicari.” A doŋ kare okato anonokkoro, abaka Aguripa gin i Berenike te tuno i Kaicaria pi jolo Fesito. Ame gin pwod otye obedo kuno pi kare moro alalac, Fesito te keto kop a Paulo i nyim abaka, kun kobo ni, “Lo moro a rik Felikici bin oweko i buc tye kan. Ame onwoŋo an atye i Jerucalem, olamdog adoŋo kede odoŋe okobba kop ame gin omito pide iye, kun okwaa ni an aŋol kop loc. An ate dokkigi iye ni, mom kite a jo Roma me miyo dano moro baŋ jo apide a kun mom ru en orwatte kedgi waŋ i waŋ, ote miye kare me pido i kom gin ame opide iye. Doŋ ka rik gin obino karacel kan, an mom agal; orwo mere ate bedo oko i wi kom me ŋolo kop, eka ate ciko ni myero kel lonnono iye. Jo a rik dote ka ocuŋ, mom dok ote kelo adottoro arac kit onwoŋo atamo; ento ote kelo ka koppogo me pyem a mako ka dinigi kede kop i kom lo moro ame nyiŋe Yecu, a rik doŋ otyeko to oko, ento Paulo pwod kobo ni tye gire kwo. Yenyo te kopgi-nono oloa, omio apenye ka en mito ni wot pide kop magi i Jerucalem kuno. Ento ka en Paulo doŋ ojuro ni koŋ gwoke pi kuro ŋol a Won Kwogo Adwoŋ, an aciko ni gwoke ituno ka abino cwaye baŋ Kaicari.” Aguripa te kobbi Fesito ni, “Amito koŋ winyo kop a lormono.” En te kobbe ni, “Ibino winyo diki.” Orwo mere Aguripa te bino gin i Beranike i kwogo adwoŋ, ote donyo i ot kan ame owinyo iye pido, karacel kede odoŋe a loo crikale, kede jo adoŋo me boma-nono. Fesito te ciko ni myero kel Paulo, eka daŋ ote kelo. Fesito te kobo ni, “Abaka Aguripa, kede wun luŋ a tye baŋwa koni, ineno wunu dano man ame lwak Ojudaya luŋ rik obako doggi baŋa pire i Jerucalem, kede kan daŋ, a kun oredo ni, kodi lo-ni mom doŋ porre bedo kwo. Cite an mom anwoŋo ni otimo ginnoro a romo miyo oneke; doŋ acalo bala en ojuro Won Kwogo Adwoŋ, an doŋ amoko me cwaye. Doŋ ba, an mom atye i ginnoro a myero aco i kome baŋ adwoŋ ca. En omio akele i nyimwu, akato mere i nyimi yin abaka Aguripa, me wek ka ŋit opepenyo en, anwoŋ ginnogo a myero aco. Pien i tuŋ baŋa cwayo abuc aboŋo tito kop a tye i kome, aneno ni konnyere mom.” Aguripa te kobbi Paulo ni, “Doŋ oye ni ikob koppi piri keni.” Paulo te ryeyo bade te pido ni, “An kena kena aparo ni atye kede winyo me pido pidona tin i nyimi yin abaka Aguripa, pido ame gudo kop luŋ a yam Ojudaya opida pire, akato mere, pien yin iŋeo kite Ojudaya luŋ karacel kede koppogo me pyem. En omio akwayi me diyo cunyi, winyo koppa. “Kite me kwona, cakere i tinona gin Ojudaya luŋ ŋeo, pien abedo iyi akina rokka kede i Jerucalem cakere i ageyi. Gin doŋ oŋeo pi kare alac, ka ce gin ye, gin twero tuco ni rik an abedo Aparicayo, kun alubo eryoŋet me diniwa ame cikkere tek meicel. Aman acuŋ kan apida pi gen atye kede ni Obaŋa bino cobo gin a rik ociko baŋ kwariwa. Gennono, atekerewa apar wie aryo luŋ geno ni obino nwoŋo, kun oketo cunygi i woro Obaŋa dyeceŋ kede dyewor. Pi gennono gire, en omio Ojudaya tye apida, ama abaka! Piŋo wun Ojudaya mogo itamo wunu ni mannono kop a mom oromo ye, ni Obaŋa cero jo oto? “An ikoma daŋ onwoŋo yam atamo ni myero atim gigi mogo apopol ame lweny i nyiŋ Yecu me Najaret. Daŋ ate timo amannono i Jerucalem; anwo Ŋo twer i baŋ olamdog adoŋo ate ke to jo Obaŋa apol i buc. Ka rik oŋolligi to, an daŋ abolo kwirra me nekogi. Tyen apol ata atimogi cucu i kacokere luŋ, kun adiyogi me yeto nyin Yecu. Rik aŋo i komgi atek meicel, omio awapogi tuno naka i boma Orok pi wunogi. “Pi ticcono onwoŋo rik atye awot Damaciko kun onwoŋo anwoŋo twer kede or i baŋ olamdog adoŋo. I cuny dyeceŋ, abaka, ame onwoŋo atye i waŋa yo, ate neno acara moro ame oya i polo, ame ryennyere kato cen oko, te menya twoda dyere, kede jo a rik tye awot keda. Ame doŋ wan luŋ oony piny oko, ate winyo dwon ŋattoro a penya i leb Eburania ni, Taulo, Caulo, piŋo kara itye ka wuna? Bedo tek yin igweyo leb ecipet. An ate gamo ni, ‘Kara yin iŋa, Rwot!’ Rwot te gamo ni, ‘An a Yecu, en ame yin giri itye ka wuno-nono. Aco ya doŋ malo, icuŋ i tyeni, An doŋ anen baŋi me keti bedo aticca kede cadenna i kom gin ame ineno i koma, kede i kom en ame ibino neno ka dok anyutte baŋi. Abino lari i baŋ jo meri Icrael kede i baŋ Orok ame abino cwayi baŋgi. Yin ibino yabo waŋgi, me imigi oya oko i colpiny odwog i lero, dok oya oko i te twer a Catan odwog baŋ Obaŋa, me wek pi ye Yecu, Obaŋa wek balgi oko, onwoŋ daŋ kabedo i akina jo ame olonyo obedo acil.’ “Pi mannono, abaka Aguripa, an rik mom akwero lubo gin onyutta iya i polo, ento ageo rabo kop baŋ jo i Damaciko, kede doki i Jerucalem, anaka atot i lobo Judaya luŋ, kede baŋ Orok daŋ. Arabbigi ni mano, myero gin oŋut, olokere baŋ Obaŋa, eka ote tiyo tic ame jo oŋut porre tiyo. Man en kop omio Ojudaya omaka i ot Obaŋa, ote temo neka. Cite Obaŋa obedo konya tuno naka i nino a tin-ni, omio acuŋ kan kun amio caden baŋ jo adoŋo kede atino, kun mom akobo gira kopporo, kono ka en a rik odwarpiny kede Muca okobo ni bino timere; en ene ni, Kricito myero to, dok daŋ ni, en koŋ bino geyo cer iyi akina a jo oto, eka te rabo kop me lero baŋ Ojudaya kede baŋ Orok.” A doŋ Paulo onwoŋo tye apido amannono, Fesito te redo i dwon aloŋo ni, “Lo-ni Paulo yin apoa. Pwonyereni atek ateka omio aloki oko idoko apoa.” Paulo te gamo doge ni, “Adwoŋ won kwogo Fesito, an gira mom apo. An akobo kop me ateni dok daŋ me ryeko a tere tye. Abaka gire ŋeo kop magi; i nyime an atwero kop i tekcuny, pien aŋeo aber ni en mom kwia kopporo i kom kop magi, pien gin-ni luŋmom tye moro iye ame otimere i muŋ. Abaka Aguripa, yin iye odwarpiny? An aŋeo ni iyegi.” Aguripa te kobbi Paulo ni, “Itamo ni itwero loka adoko Akricitayo pi kare anonokkoro-ni?” Paulo te gamo ni, “Kadi pi kare anonokkoro onyo abor, akwao Obaŋa ni kono mom yin keken ibedo calo an, ento anaka jo luŋ ame tye awinya tin, cite mom i jegere-ni.” Abaka te ya oko malo gin i aloc kede Berenike, kede jo a rik obedo kedgi. Ame gin doŋ owoto oko ote kop kengi kengi ni, “Lonnono gire mom otimo ginnoro a mio oromo neke kadi tweye.” Aguripa te kobbi Fesito ni, “Lo-ni gire onwoŋo otwero gonyo oko, kono rik en mom ojuro baŋ Kaicari.” Ka doŋ omoko ni wan okwaŋ nam owot naka i Itali, ote miyo Paulo kede obuc ocele baŋ adwoŋ cirikale me eryoŋet Augucito, ame nyiŋe Julio. Ote donyo i melloro me Aduramatio, ame onwoŋo mito wot i waŋ kwaŋ ame tye loka i dog nam me Acia, ote cako wotwa i nam. Aricitako, dano me Makedonia a rik oya i Tecalonika, onwoŋo daŋ tye kedwa. Odiko ocele ote tuno Cidon; Julio te timo Paulo ber, miye kare wot baŋ owote mere me gwoke. Ka oya i kuno ote beo cocok i cula nam me Kupuro pi geŋo yamo, pien yamo onwoŋo obino i tuŋ nyimwa. Eka ote kwaŋ ŋolo nam i ŋet Kilikia kede Pampulia, ote tuno i Mura ame tye i Lukia. Adwoŋ cirikale te nwoŋo melloro me Alegejandaria kuno, ame akwaŋ awot Itali, te ketowa iye. Ote bedo kwaŋ momot a romo nino apopol, eka ote tuno daŋ me tek i Kinido. A doŋ yamo ogeŋowa mom otwero wot anyim, ote lunyo kwaŋ bea cocok i cula nam me Kurete i ŋet Calmone. Kannono daŋ okato i tek, ote tuno i kabedo ame olwoŋo ni, Waŋ Edokit Abeco, ame boma me Lacea ceggi kede. Kare alac onwoŋo doŋ okato, wot daŋ doŋ odoko me can, pien nino me kanyo kec onwoŋo doŋokato oko, omio Paulo okwenyorogi, kun kobo ni, “An doŋ atyeko neno ni, wot man bino kelo aroma kede rwenyo jami apol, pe terwa keken kede mel, cite anaka kwowa daŋ.” Ento adwoŋ cirikale rik te winyo kop aryem mel kede won mel, akaka winyo mea Paulo. Pien wan kwannono onwoŋo mom ber me bedo i kare me koyo, omio jo apol otamo ni myero ya oko iye, dony i nam, me ka twerre gin otun i Poiniki obed kuno; ame en waŋ kwaŋ me Kurete ame nen i tun anyarodi i tuŋ kide kede i tuŋ anyarolum i tuŋ kide. Ka yamo me tuŋ anyarolum ocako kodo momot, gin te tamo ni doŋ onwoŋo gin ame onwoŋo omito, ote puto nyonyo a tweo mel, ote kwaŋ beo a ceggi i ŋet Kurete. Ame kare pwod okato anonokkoro keken, yamo ager ame olwoŋo ni Yurakwilo te kuto atek kun ya i wi tela. A doŋyamo otyeko mako mel a mom doŋtwero tiko yamo, wan ote weko kolo gire. A kun oriŋo i geŋŋi me cula atidi ame olwoŋo ni Kauda, ote canne atek me mako yee. Ka doŋotyeko waya yee oko malo, ote lido mel kun ucwao tol i tere; dok owao boŋo i malo dwoggo piny, pien gin onwoŋo olworo ni kur opot i coto emwonya ame olwoŋo ni Curtic, yamo te kologi amannono. Orwo mere, a nam apuyowa atek meicel, gin te cako bolo ter i mel oko. I cen me adekkere gin ikomgi ote bolo jami tic me mel i ciŋgi. A doŋ ceŋ kede acer otero nino apol kun mom nen, dok daŋ yamo kot adwoŋ obedo kodo diyowa, icennere genwa luŋ me bwot te tum oko. A doŋ gin ori kare alac aboŋo cam, Paulo te ya malo i akinagi, te kobo ni, “Owotena, kono ce onwoŋo iwinya wunu, eka mom ote ya oko i Kurete, kono mom onwoŋo wunu aroma kede rwenyo jami. Aman akobbiwu ni, diu cunywu; pien kwo a ŋattoro i akinawu mom bino rwenyo, kono ka mel keken. Pien i dyewor a tin-ni, amalaika Obaŋa ame an aworo daŋ ocuŋ i laŋeta, te kobba ni, ‘Kur ilwor, Paulo. Yin myero icuŋ i nyim Kaicari; dok, nen, Obaŋa doŋ otimo ber, omii jo luŋ ame tye a kwaŋ kedi-ni.’ Pi mannono, diu cunywu, owotena, pien an aye Obaŋa, abino bedo gire kit ame en okobba-nono. Cite myero koŋ dok opot i kom icula moro.” Ka doŋ oromo nino apar wie aŋwen kun pwod owiwira i nam me Adria, i dye idiŋ, okwaŋ mel te tamo ni doŋ oceggi tuno i lobo moro. Gin te pimo, ote nwoŋo oromo futi mia acel i pyeraryo. Ote dok wot anok, ote dok pimo, ote nwoŋo futi pyeraboŋwen. Gin te lworo ni ŋit obino coro lela, omio ote bolo nyonyo aŋwen i tuŋ ŋec me juko mel, ote kwayo Obaŋa ni myero mi piny ru. Okwaŋ mel te mito lwi oko iyi mel, omio gin ocwao yee piny i nam, eka ote poporo ni omito bolo nyonnyogo i tuŋ nyime. Paulo te kobbi adwoŋ me cirikale, kede baŋ cirikale ni, “Jo-ni ka mom obedo i mel, mom itwero wunu bwot.” Eka cirikale te ŋolo tol i yee oko, te weko poto teŋe. A doŋ piny amito ru, Paulo te cuko cunygi gin luŋ, ni koŋ ocam cemmoro, kun okobo ni, “Tin doŋ odoko nino apar wie aŋwen ame ibedo wunu nino ducu a cunywu ogem agema aboŋo cam, a mom ibilo wunu ginnoro. Omio abako doga baŋwu, cam wunu cemmoro koŋ; bino konyowu me-bwot, pien yer wi ŋattoro i akinawu mom bino rwenyo.” A doŋ otyeko kobo kit-ti, omako ogati; ka doŋ opwoo Obaŋa i nyimgi luŋ, onyinyilo, te cako camo. Gin luŋ cunygi te dwogo, ote daŋ camo cemmogo. (Wan luŋ a rik otye i mellono, rik oromo jo mia aryo kede pyerabiro wie abicel.) Ka gin otyeko cem a doŋ oyeŋ, gin obolo ŋano i nam me mel dok ayot. Odiko ame piny doŋ oru, gin mom oŋeo lobo ame otye iye, ento oneno gul nam kan ame doge obedo kwoyokwoyo, gin te tamo ni ocwa mel iye ka ce twerre. Gin te gonyo nyony, weko i dye nam, a kun daŋ olalago tol ame onwoŋo otweo kede pol a wiro mel, ote waya boŋo me nyime malo me yamo kolgi, ote kemo gul nam kan ame obedo kwoyokwoyo. Cite ka gin ocop i kan ame pii i nam rwatte iye, gin te coro mel i kwoyo; tuŋ nyime te moko oko a mom dok twero yeŋere, ojwinnere te tur oko pi teko me pii a bedo tagere. Ocirikale te tamo ni myero onek obuc oko, me kur okwaŋ, ote lwi gigi oko. Ento adwoŋ cirikale omito ni elar Paulo, omio en te geŋo tamgi-naca oko; eka te ciko jo a ŋeo kwaŋ i korgi ni gin koŋ oge poto i nam, ote kwaŋ wot i wi tela. Jo odoŋ, mogo mak bao, mogo mak gigi mogo a tye i kom mel. Mannono omio gin luŋ ote tuno i wi tela oreme. Ka doŋ wan otyeko bwot, ote niaŋ ni cula-nono kara nyiŋe Melita. Wegi lobo-naca te timowa kica i yore moro a mom nen atata. Gin omoko mac ote jolowa iye, wan luŋ, pien kot onwoŋo doŋ oero cwe oko, onwoŋo piny ŋic. Paulo onwoŋo rik daŋ ocoko yen wic acel te onyo i mac; pi lyeto me mac, ororo te donnyo iye, te riria i ciŋ Paulo. Wegi lobo oneno ginnono tye alologa i ciŋe, ote kop kengi kengi ni, “Lonnono be anek jo. Kadi bed en obwot i nam, aŋolkop atira mom oye en ibedo kwo.” Cite Paulo te teŋo ororo-nono i mac, ginnoro otime daŋ mom. Gin obedo kuro kun otamo ni bino kwot, onyo ŋit bino rette piny te to oko oyotoyot; ka gin doŋ obedo kuro pi kare alalac, ginnoro arac mom otimere i kome, gin dok te loko tamgi oko, ote kobo ni, lonnono gire obaŋa moro. Kan a ceggi i bedoka-nono, rik obedo lobo a lo moro a nyiŋe Pubulio, ame en rik rwot me cula-nono. Lonnono rik obin ojolowa, te gwokowa daŋ aber pi nino adek. Pappere en Pubulio onwoŋo rik tye two too me lyeto kede cado remo, kun obuto kede piny. Paulo te wot lime; okwao Obaŋa eka te keto ciŋe i kome, te caŋe. A doŋ man otimere, jo ocele i cula-nono a rik two te bino, ote daŋ caŋogi. Gin te miyowa mot apol; i kare a wan odonyo i mel, gin oketo iye ginnoro luŋ a wan omito. Ka dwete adek doŋ okato, ote ya i kuno i melloro me Alegejanderia ame onwoŋo otyeko kare me koyo i cula-nono anennere onwoŋo, “Omego a Rude.” Ote tuno i Cirakuc, ote tyeko nino adek kuno. Oya i kannono, otuno i Regio; ka nino acel okato, yamo me tutuŋ anyarolum te cako kodo, i nino me aryo mere ote tuno Puteoli. Kuno onwoŋo iye omego, gin daŋ te cwanowa ni obed kedgi nino abiro. Ote tuno i Roma amannono. Omego me kuno onwoŋo owinyo pirwa, ote bino me jolowa tuno naka i Cuk me Appio kede i paco ame olwoŋo ni, Udi Cem Adek. Ka Paulo onenogi, opwoo Obaŋa, cunye odwogo. A doŋwan otuno i Roma, oye ni Paulo bed kene, karacel kede cirikale ame gwoke. Ka nino adek okato, en olwoŋo Ojudaya adoŋo me kuno karacel; a doŋ gin ocokere, en te kobbigi ni, “Omegona, kadi bed mom atimo ginnoro arac baŋ jowa onyo i kom kite a kwariwa, cite gin otwea i buc i Jerucalem, ote miya iciŋ jo Roma. Ka gin opepenyo an, ote mito gonya oko, pien mom onwoŋo tye kopporo a romo miyo oneka. Cite ka Ojudaya opyem, mannono odia me juro baŋ Kaicari, kadi bed mom atye kopporo me piddi rokka. Man en omio akwao ni anenwu, akob kedwu, pien pi gen ame Icrael tye kede, en omio otwea i jegere-ni.” Gin te kobbe ni, “Wan giwa mom olimo waraga moro ame oya i Jerucalem ame kobo kop i komi, akadi ominwa moro daŋ mom gire obino otittiwa onyo okobbiwa kopporo arac i komi. Ento wan omito winyo i baŋi gin ame itamo, pien kop a dok i kom eryoŋet man, wan oŋeo ni okobo kop arac i kome i kabedo luŋ.” Ka doŋgin otyeko moko nino moro kede, jo apol te mol baŋe acalo wele mege. En te yekkigi kop i kom loc Obaŋa, geye odiko tuno naka otyeno. Otemo niaŋogi kop i kom Yecu kun juro cik a Muca kede coc odwarpiny. Jo mogo te ye kop a en okobo, cite mogo te kwero oko. Ka rik tamgi doŋmom rwatte, ote ke keta oko, a doŋ Paulo otyeko kobbigi kop acel-li, ni, “Cuny Acil yam okobo aber baŋ kwariwu i dog adwarpiny Icaya ni, ‘Wot baŋ jo man, ikobbigi ni, Me winyo, ibino winyo wunu, ento mom ibino niaŋ wunu tere, me neno, ibino neno wunu, cite mom ibino ŋeyo wunu, Pien rok-k i cunygi odoko nwaŋ, yitgi odiŋ oko, mom owinyo aber, waŋgi daŋ omio gigi oko; me kur onen kede waŋgi, kadi winyo kede yitgi, kadi niaŋ i cunygi, kadi dwogo baŋa me acaŋgi.’ Koŋ dok iŋe wunu ni, teko me larre ame Obaŋa mio doŋ ocwao oko baŋ Orok; gin bino winyo.” [ Ka en doŋokobo kop man, Ojudaya te keketa oko, kun opyem atek kengi kengi.] En rik te bedo kuno runi aryo ikiŋ, i ottoro a en opaŋo, kun jolo jo ducu a bino baŋe. En orabbigi kop i kom loc Obaŋa, dok opwonyogi kop i kom Rwot Yecu Kricito kannaler, aboŋo ginnoro a geŋe. Waraga man oya i baŋ Paulo, amiro a Kricito Yecu ame olwoŋo me bedo akwena, ote pokoro pi tic me rabo amut aber ame oya i baŋ Obaŋa. Amut man aber Obaŋa nwaŋ ociko pire con i dog odwarpinnyere i coc acil a rik ocoo, en amut aber i kom Wode. I kite me kom rik onywale i kom ikwae a Daudi, ento pi Cuny Acil Obaŋa rik onyuto ni en obedo Wode i tic atek me cerrere iyi akina a jo oto, en Yecu Kricito Rwotwa. Pire wan doŋ onwoŋo winyo Obaŋa, kede kwena me miyo jo i akina rok luŋ miye me lubo iyee, pi nyiŋe; ame wun daŋ itye wunu i akinagi, wun jo ame olwoŋowu ibedo jo a Yecu Kricito. Baŋ wun jo luŋ a tye i Roma ame Obaŋa marowu, ame daŋ olwoŋowu me bedo jo mere ikome: Obaŋa Papawa kede Rwotwa Yecu Kricito miwu winyo kede kuc. Me agege, an apwoo Obaŋana i Yecu Kricito, pien iyee mewu doŋ orwo i wi podo luŋ. Obaŋa ame aworo i cunya kun arabo amut aber i kom Wode, en cadenna ni atuco nyiŋwu i kwacca baŋe me kare luŋ, kun mom aweko. Akwao ni, ka twerre, ka Obaŋa oye, oyabba yo, ol abino tuno baŋwu. Pien aparo nenowu, me apokkiwu mottoro me ibed wunu atek; onyo kono akob ni, me idi wunu cunya kede iyeewu, an daŋ adi cunywu kede iyee mera. Gin amito iŋe wunu, omegona, onwoŋo abedo ka tamo tyen apol ni koŋ atun baŋwu, me atot anwoŋ jo mogo ame oya i akinawu, kite ame anwoŋo kede jo ame oya i rok ocele, ento anaka atot onyoni pwod ogeŋa oko. Atye kede banya baŋ jo aŋeo leb Grik, kede baŋ jo a kwia, baŋ oryeko kede baŋ omiŋo; en omio atye kede mit adwoŋ me rabo amut aber anaka atoŋ baŋwu, wun jo a bedo i Roma. An lewic mom maka i amut aber, ame kono en teko Obaŋa me laro jo a tye kede iyee, me agege Ojudaya, eka jo Grik daŋ. Pien amut aber nyuto kite ame Obaŋa kwano kede dano ni kite atir, kun cakere i iyee; tum daŋ i iyee; acalo yam ocoo ni, “Dano ame kite atir pi iyee bino bedo kwo.” Pien akemo Obaŋa doŋ onyuto iya i polo i kom tim a jo areco luŋ a mom woro Obaŋa, ame tye a geŋo kop ateni i tic, pi timgi areco. Pien gin a twero ŋeye i kom Obaŋa onen oko kannaler baŋgi, Obaŋa doŋ onyuttigi. Cakere ame oketo lobo, kite mere a mom nen doŋ onen, kun ŋeye i kom jami a en otio, en teko mere a mom gik, kede epone mere en Obaŋa. Mio gin a gin pid loogi oko; pien kadi rik gin oŋeo Obaŋa, nwaŋ mom gin oketo kwogo i kome acalo Obaŋa, kadi pwoye, ento tam megi olunyo dwokogi ka i gin a yore mom, kede tam i cunygi me miŋomiŋo doŋ odoko acol oko. Gin olwoŋere kengi ni gin oryeko, kara bo gin olokere odoko omiŋo. Gin oloko kwogo Obaŋa a mom to, kun oporo kede cal a dano ame to, onyo kede mea winyi, onyo mea leyi, onyo mea twole-gu. En omio Obaŋa te jwaŋogi i mit areco a tye i cunygi me caro, me obal kede kwogo me komgi kengi kengi. Gin oloko kop ateni i kom Obaŋa, owilo kede goba, kun oworo dok otio baŋ ginaketa, aka woro kede tic baŋ ŋat oketogi, ame opwoo nakanaka. Amen. Pi kop man, Obaŋa ojwaŋogi i agoma yie me lewic. Anaka mongi oweko bedo i co i kite me anywalli, ote dwoko kan a mom oyiko. Co daŋ amannono oweko bedo i mon i kite me anywalli, mitgi te waŋogi bala mac, ŋat man kede awottere, kun co timo gin me lewic i kom co wadgi, a kun adwoggi a myero pi balgi lunyo mako komgi kengi. Doŋ acalo gin mom oneno konnyoro i ŋeyo Obaŋa, Obaŋa daŋ ojwaŋogi i tamgi a konnyere mom, me gin doŋ tim gin a mom myero. Gin rik opoŋ kede kwone bal apol luŋ, timmogo areco, woro me lim, rac cuny. Gin opoŋ i nyeko, nek, daa, goba, colcuny. Gin okwoto jo, oyeto jo, okwedde kede Obaŋa. Gin opala, jo a yon, a wakere, ame roto kit areco anyen, jo a mom winyo onywalgi, jo a kwia piny, ape gwoko cikeregi; mar mom i yigi, mom otye i kica. Jo-nu niaŋ aber i cik Obaŋa, ni, jo a timo kodi timmono romo to, cite pe gin otio atia keken, ento dok opwoo daŋ jo ame tio. En omio gin ipid loi, yin dano, kadi yin iŋa, ka iŋolli dano kop; pien pi ŋolli dano ocele kop, nwoŋo doŋ iŋolo kop oloi yin ikomi, pien yin aŋolkop daŋ itimo kite tim acellono. Wan oŋeo ni, Obaŋa ŋolo kop kakare ka oŋolo kop oloo jo a timo gin acalo mano. Yin dano ame iŋolli jo a timo kodi timmono kop, a kun yin ikomi daŋ itimo, yin itamo ni ibino bwot i kom ŋolo kop Obaŋa? Onyo yin icao lonyo Obaŋa me kica mere, kede me jukere mere, kede me diyo cunye, a kun mom iŋeo ni, kica Obaŋa wai i kom iŋut? Ento pi nwaŋ a cunyi, kede cunyi a mom ŋut, yin itye ka kano piri keni mono me akemo pi nino me akemo ame bino nyuto iye kop atir ame Obaŋa ŋolo. En bino culo dano acel acel acalo ticcere tye. Jo a kanyakino i tic abeco, a kun oyenyo kwogo kede woro kede kwo a mom to, en bino miyogi kwo a perakino odoco. Ento jo a laro dito pirgi kengi, ame pe lubo kop me ateni, cite olubo ka kite areco, gin bino cop i akemo kede kecyic. Can kede peko bino rido dano acel acel ame timo gin arac, me agege Ojudaya, eka jo Grik daŋ. Ento dano acel acel ame timo gin aber bino nwoŋo kwogo kede woro kede kuc, me agege Ojudaya, eka jo Grik daŋ; pi en Obaŋa mom poko akina a jo. Jo ame obalo boŋo cik a Muca, gin bino to aboŋo cik daŋ; kede jo ame obalo i te cik, obino ŋolligi kop kun lubo cik. Pe ni, jo ame winyo cik awinya i yitgi gin jo ame kitegi atira i nyim Obaŋa; ento jo ame tio gin a cik mito, gin jo ame obino kwanogi, ni gin jo a kitegi atir. Ka Orok, a mom tye kede cik, ce tio gin a cik mito pi kitegi me anywalli, nwoŋo gin ikomgi doŋ odoko wegi cik, kadi bed cik a Muca pe baŋgi. Gin nyuto ni, gin ame cik mito doŋ ocoo oko i cunygi, ŋec ame i cunygi ame nyuttigi balgi daŋ bedo caden karacel kedgi, kun tam megi twomere; kagi mogo ŋolo ni kop oloogi, kagi mogo cwakogi acwaka. Bino bedo amannono i nino-naca ame Obaŋa bino ŋolo iye kop i kom gin a jo tio i muŋ, pi Yecu Kricito, kun lubo amut aber ame atye arabo. Ento ka ilwoŋere keni Ajudaya kono? Nwoŋo ŋenere i kom cik, a kun iwakere pi Obaŋa, daŋ iŋeo mittere, dok ipwoo gin aber akato, pien otyeko pwonyi kede i cik. I tuŋ baŋi, iŋeo ni yin atel otowaŋ, yin ceŋ a menyo jo a tye i piny acol, daŋ yin ame atir jo ame omiŋo, kede apwony otino, pien i cik itye kede ŋec kede kop ateni ikokome. Aco, yin apwony jo ocele, mom ipwonyere keni keni? Irabo kop ni, “Kur ikwal”, cite yin ikwalo? I kobo ni, “Kur icod cot”, cite yin icodo? Yii dag cal jogi, cite yin ikwalo gin a tye i ot jok? Iwakere pi cik, cite yin icao Obaŋa kun ikalo wi cik? Tye acalo coc a rik ocoo, ni, “Nyiŋ Obaŋa oyeto i akina Orok pirwu.” Lirre konyo ka ce ilubo cik, ento ka ituro cik, dwoki acalo mom oliri. Doŋ ka dano a mom oliro ogwoko icwil a tye i cik, ŋat a mom oliro-nu mom obino kwane acalo ŋat ame oliro? Mio dano ame mom oliro, ame cobo cik, bino ŋolo kop loi, pien itye kede cik a rik ocoo, dok oliri daŋ oko, cite pwod ituro cik. Pien dano ame en Ajudaya i oko keken, pe en Ajudaya; dok lirre ame nen i oko i kom, mano pe lirre ikome. Ajudaya ikome en dano ame Ajudaya i yie, lirre ikome daŋ en lirre me yi dano, en tic me Cuny Acil, pe me gin ame ocoo acoa. Kodi dano-nu, kadi bed jo pe pwoe, Obaŋa pwoe. Kara ka tye amannono, Ajudaya dok kato jo ocele iŋo? Onyo lirre konnyere ŋo? Konyo atek i yo ducu. Me ageyi mere, ceŋ omiogi koppogo ame oya i baŋ Obaŋa, kun ogenogi. Bedo niŋo ka jo mogo i akinagi rik gin mom ogen? Pi pe genne megi twero miyo Obaŋa doko a mom genne? Pe amannono! Obaŋa myero bed me ateni, kadi bed jo luŋ ogoba, acalo rik ocoo ni, “Wek kop ame ikobo nyut ni kiti atir, dok me, ka oŋolli kop, yin ilo.” Ento ka kitewa a mom atir nyuto kit ame Obaŋa kite atir kede, kara enni doŋ wan obino kobo ŋo? Ni Obaŋa mom kite atir pi keto akemo i komwa? (An gira akop i kite a dano.) Mom amannono! Kara ka tye amannono kono, Obaŋa twero ŋolli jo me wi lobo kop iŋo? Ka goba mera miyo ateni Obaŋa medde ameda kun kelle kwogo, kara piŋo an pwod aŋolla kop bala an abal? Piŋo wan mom otimo gin arac me gin aber ya iye? Pien tye jo mogo ame coko dogwa kun okobo ni wan okobo amannono. Ka oŋolo kop oloo jo-nono, nwoŋo oŋolo kakare. Kara nino doŋ? Wan Ojudaya otye aber akato gin? Amaa, kadi acelloro; pien atyeko kelo adote ni, jo luŋ, Ojudaya kede jo ame pe Ojudaya, bal doŋ oloogi, acalo rik ocoo ni, “Ŋattoro a kite atir gire mom, pe kadi acelloro; ŋat ame niaŋ daŋ mom, ŋat ame yenyo Obaŋa pe tye. Gin luŋ doŋ ogak oko teŋe, gin ducu oballe oko; ŋat a timo gin aber pe, moro acelloro doŋ mom.” “Dwongi obedo lyel a wie olaŋara, lebgi gin bwolo kede jo.” “Kwir cocodo tye i te lebgi.” “Doggi kec, opeŋ iye kop me ceno jo.” “Tyengi dwir i onyo remo, Yorgi i duru, daŋ kelo cen, gin kwia yo me kuc.” “Lworo Obaŋa mom tye i tamgi.” Wan oŋeo ni, gin ame cik okobo, okobo baŋ jo ame cik loogi, me dog jo ducu lin, wi podo luŋ bed i te ŋolo kop Obaŋa. Pien mom obino kwano dano moro ni kite atir i nyim Obaŋa pi cobo cik; cik ticcere me niaŋo jo i kom bal. Ento amanni kit ame Obaŋa kwano kede dano ni kite atir ame mom pi cik doŋ onen oko kannaler. Cik a Muca kede odwarpiny daŋ rik otito pire; en kit ame Obaŋa kwano kede dano ni kite atir pi iyee mere i kom Yecu Kricito, daŋ tye pi jo luŋ ame ye eno Apokapoka mom; pien jo luŋ obalo, mom otuno i kwogo Obaŋa. En kwanogi ni kitegi atir nono, kun miogi acalo mot pi kica mere, pi kite ame Yecu olakorogi kede. Obaŋa oketo en ibedo gin me kwanyo bal kede remo mere, pi jo ame ye en, wek enyut kede kite mere atir; pien Obaŋa rik ojukere kene, pe otimo ginnoro i kom bal a rik jo otimo con, wek enyut kite mere atir i kare man, ni, en ikome kite atir, dok kwano dano ni kite atir pi ye Yecu. Kara ka wakere tye kwene? Doŋ ogeno oko. Pi cikkene? Pi cik me tic? Amaa, ento pi cik me iyee. En omio omoko tamwa ni, dano okwano ni kite atir pi iyee mere, mom pi ticcere me cobo cik. Onyo Obaŋa tye pi Ojudaya keken? Mom ŋit en daŋ Obaŋa Orok? Ee ta, me Orok daŋ, pien Obaŋa en acel; en bino kwano jo ame oliro ni kitegi atir pi iyee megi, dok bino kwano jo a mom oliro ni kitegi atir pi iyeegi daŋ. Wan dok obolo cik a Muca oko bo pi iyee-ni? Mom amanno gire, wan omoko cik amoka. Kara wan obino kobo ŋo i kom Iburaim, ame en kwarowa i kite me kom? Kono yam okwano Iburaim ni kite atir pi tic ame otio, kono en tye i gin ewakere iye, cite mom i nyim Obaŋa. Coc a yam ocoo kobo niŋo? Ni, “Iburaim oye Obaŋa eka ote kwane ni kite atir.” Dano a tio tic, ocara mere mom omie acalo mot, ento acalo jami mere; cite dano a pe tio, ento ame ye ŋat ame kwano jo a mom lworo Obaŋa ni kitegi atir, kodi dano-nu okwano ni kite atir pi iyee mere. I kite acellono, Daudi daŋ rik okobo pi winyo a dano tye kede, ka Obaŋa okwane ni kite atir aboŋo ticcoro a en otio, acalo rik ocoo ni, “Tye kede winyo, jo a doŋ otimogi kica i kom timgi areco, ame owumo balgi; tye kede winyo, dano ame Rwot mom okwano balloro i kome.” Winyo man tye pi jo ame olirogi keken, onyo ŋit pi jo a mom oliro daŋ? Wan okobo ni, pi iyee omio okwano Iburaim ni kite atir. Kara man dok rik okwano i kome niŋo? A doŋ otyeko lire, aŋar ame mom ru olire? Pe a doŋ otyeko lire, ento a mom ru olire gire. Omie lirre me bedo acalo anyut onyo anen ame omwoŋo, ame nyuto ni, doŋ otyeko kwane ni kite atir pi iyee mere, ame mom ru olire. Mano mio Iburaim bedo kwaro a jo luŋ ame ye ame pe ru olirogi, me gin daŋ kwangi ni kitegi atir; dok daŋ en kwaro a jo a mom olirogi alira keken, ento daŋ owopo kodi iyee a rik kwarowa Iburaim obedo kede ame onwoŋo mom ru oliro. Cikere a nwaŋ Obaŋa ociko baŋ Iburaim kede ikwae, ni, wi podo luŋ bino bedo megi, rik mom ociko pien Iburaim ocobo cik, cite pien en oye, ote kwane ni kite atira. Pien ka jo a cobo cik gin en ame wi podo luŋ bino bedo megi, kono iyee doŋ yore mom, cikere daŋ konnyere mom. Pien cik kelo akemo, cite kan ame cik pe iye, turo cik daŋ mom. En gin omio cik ocuŋ i kom iyee, wek bed me kica, dok pi moko cikere baŋ ikwae mere luŋ, mom baŋ jo a lubo cik keken, ento anaka baŋ jo a bedo kede iyee acalo Iburaim. Pien en kwarowa wan ducu, acalo rik ocoo ni, “Doŋ amii idoko kwaro a rok apol.” Cikere-ni doŋ omoko i nyim Obaŋa ame rik Iburaim oye, en Obaŋa ame mio kwo i kom jo oto, dok ame cwano gigi mogo a yam mom tye, mio bedo tye. Iburaim nwaŋ oye, kun oketo gennere i kom gin ame nen bala mom genne, omio odoko kwaro a rok apol, acalo rik ocoo ni, “Ikwai bino bedo kite-nono.” Naka en mom obedo i nyapo i kom iyee ka oparo pi kome, a rik doŋ rom aroma i gin oto, pien mwaka me dittere buco romo mia twal, dok medo i mano Cara-gu onwoŋo oraŋa. Iyee mere pe odok cen, pe ocacapa i tammere i kom cikere Obaŋa, ento iyee mere omedde ameda i doko atek kun en mio kwogo baŋ Obaŋa, kun nwoŋo kop odonyo atut i cunye ni, Obaŋa twero tiyo gin a doŋ ociko pire. En gin omio “ote kwane ni kite atir.” Kop man ni, “ote kwane” rik mom ocoo pire en kene, ento anaka pirwa daŋ. Wan daŋ obino kwanowa ni kitewa atir, wan jo ame oye Obaŋa ame ocero Rwotwa Yecu Kricito iyi akina ajo oto, en a rik omio me aneka pi bal wa, dok ocere me kwanwa ni kitewa atir. Pi mannono, acalo rik doŋ okwanowa ni kitewa atir pi iyee, otye wunu doŋ i kuc i nyim Obaŋa, pi Rwotwa Yecu Kricito. Pire oyabbiwa yo me tuno i kom winyo man ame ocuŋ iye-ni, kun oŋatte i gen a wan otye kede me bedo i kwogo baŋ Obaŋa. Mom mano keken, wan oŋatte anaka i cannogo apapat ame oneno, kun oŋeo ni, neno can kelo kanyakino, kanyakino mio opwoo kitewa, eka pwoyo kitewa-ni, te miyo obedo kede gen. Genwa-nono mom bino ke nono, pien Cuny Acil doŋomio oonyo mar Obaŋa i cunywa. Pien a rik wan pwod ogoro, a doŋkare oromo, Kricito te to pi jo a mom lworo Obaŋa. Kadi pi dano a kite atir, bedo tek meicel dano ito pire. Gwok onyo ka dano moro aber, ŋattoro twero diyo cunye me to pire. Ento Kricito oto pirwa a nwaŋ wan obalo; mannono nyuto kite mar ame Obaŋa tye kede baŋwa. Acalo bala wan onyoni doŋ okwanowa ni kitewa atir pi remo mere, akato wok wan obino larre pire i kom akemo Obaŋa. A pwod wan okwor Obaŋa, en rik odwoggowa baŋe, pi to a Wode; ka amannono, a doŋodwoggowa baŋe, obino larre wunu akato wok pi kwo a Wode. Mom ennu keken, ento daŋ otye ka ŋatte i Obaŋa pi Rwotwa Yecu Kricito, pien en ame omio doŋ odwoggowa baŋ Obaŋa. Pi mannono, acalo bal nwaŋ obino i lobo pi dano acel, eka to te bino pi bal, amannono daŋ to te lal i akina a jo luŋ, pien jo luŋ obalo. Onwoŋo bal doŋtye i lobo con a mom ru omio cik, ento kan a cik mom iye, bal daŋ mom okwano i wi ŋattoro. Cite to obedo i locere geye i kom Adam ituno kede i kom Muca, te loyo anaka jo a nwaŋ mom otimo bal a rom i mea Adam, a rik oturo cik ame omie. Adam en anyut me cimo ŋat a mito bino. Ento tic Obaŋa me kica pe rom aroma i bal a Adam; pien kadi bed jo apol rik oto pi bal a dano acel ca, akato wok kica Obaŋa, kede mot me nono ame obino pi kica a dano acel-li, en Yecu Kricito, onya oromo lwak jo apipim. Doki mot me nono pe rom kede bal a dano acel ca; pien pi bal a dano acel ca omio oŋolo kop oloo jo, cite tic me kica ame olubo bal apol okelo loyo kop. Pi bal a dano acel omio to obedo kede loc, pi dano acel ca; akato wok jo ame onwoŋo kica apipim, kede mot me nono ame omio okwanogi ni kitegi atir, obino bedo kede kwo kede loc, pi dano acel-li, en Yecu Kricito. Doŋ kite acalo bal a dano acel omio kop oloo jo luŋ, amannono daŋ, tic me kite atir a dano acel okelo loyo kop kede kwo pi jo luŋ. Pien acalo pi dano acel a mom obedo kede winy omio jo apipim odoko obalo, amannono daŋ pi winy a dano acel jo apipim obino kwanogi ni kitegi atir. Cik rik odonyo iye me nyayo bal; ento kan a bal onya iye, en ame kica daŋ te nya iye adwoŋ akato. Amannono, kite acalo bal rik oloo loc i to, kica daŋ myero lo loc pi kwano jo ni kitegi atir, me gin onwoŋ kwo a perakino nakanaka, pi Yecu Kricto Rwotwa. Kara wan obino kobo ŋo doki? Myero omedde wunu i bal, me kica nya? Mom amannono! Kara wan a rik oto i tun bal otwero dok kwo iye niŋo? Mom iŋeo wunu ni, wan luŋame doŋobatakino idonyo i Kricito nwaŋ obatŋawa me donyo i to mere? Nwaŋ oyikowa karacel kede Kricito me donyo i to mere, me obed acalo en. En rik ocer i akina a jo oto pi kwogo a Pappere, me wan daŋ owapu kodi kwo anyen-nu. Pien ka doŋwan onotte karacel i en i to moro a cal i to mere, amanno daŋ wan obino notte kede i cer ame cal i cerrere. Pien wan oŋeo man, ni, kwowa acon rik oguro kede karacel i kom yataria, wek kwowa me bal myero doŋ to oko, me kur dok wan odok omiro a bal. Pien ŋat a doŋoto, bal doŋgik i kome. Ento ka doŋwan otyeko to karacel kede Kricito, wan oye ni, obino bedo kwo karacel kede daŋ. Pien oŋeo ni, Kricito a ceŋ ocer i akina a jo oto mom dok bino to; to mom dok tye i loccoro i kome. To a en oto, oto i tuŋ bal, tyen acel atwal-li; ento kwo a en kwo kede, en kwo i tuŋ baŋ Obaŋa. Wun daŋ amannono, myero itamu i komwu kenwu ni, wun jo oto i tun bal, cite ibedo wunu jo a kwo i tun baŋ Obaŋa i Kricito Yecu. Kur imi wunu bal lo komwu ame to, me pe bed miyowu lubo mitgi. Kur dok imi wunu dule komwu i bal, acalo bala jami tic me tiyo gin arac; ento miye wunu kenwu baŋ Obaŋa bala jo a doŋotyeko ya i to, otuno i kwo; miu daŋ dule komwu baŋ Obaŋa acalo bala jami tic me tiyo gin a tye atir. Pien bal mom dok bino bwoyowu, pien wun doŋ pe itye wunu i te cik, ento itye wunu i te kica. Kara ŋo doki? Wan doki otimu bal, ni pien wan mom otye i te cik cite i te kica? Mom amannono gire! Wun mom iŋeo wunu ni, ka imiye wunu kenwu baŋ ŋattoro bala omiro me winyo doge, daŋ doŋ idoko wunu omiro a ŋat ame iwinyo wunu doge? Onyo idoko wunu omiro a bal, ame telowu i to, onyo idoko wunu omiro me winyo dog Obaŋa, ame telowu i kite atir. Cite myero opwo iye Obaŋa, pien rik ibedo wunu omiro a bal, cite doŋ itye wunu ka lubo kite me pwony ame oketowu iye, kede cunywu luŋ. Doŋ ogonyowu oko i opii me bal, idoko wunu omiro me kite atir. An akop i kitewa me dano, pi gorowu me anywalli. Pien acalo ceŋ imio wunu dule komwu me bedo omiro me caro kede tim areco, omio idoko wunu otim areco, aman doŋ mi wunu dule komwu obed omiro me kite atir, me idok wunu jo acil. A nwaŋ pwod ibedo wunu omiro a bal, ceŋ mom itye wunu i te loc me kite atir. Kara ŋo a rik inwoŋo wunu i gin a lewiccere makowu iye amanni? Agikki a kodi ginnogo en to. Aman doŋ ogonyowu oko i opii me bal, doŋ idoko wunu omiro Obaŋa; gin ame inwoŋo wunu, idoko wunu jo acil, agikki mere en kwo a perakino nakanaka. Pien ocara me bal en to, ento mot ame Obaŋa mio nono en kwo a perakino nakanaka i Kricito Yecu Rwotwa. Omegona, an akop kede jo a ŋeo cik, mom iŋeo wunu ni, cik mako dano ka pwod kwo keken? Dako daŋ cik tweo baŋ cware ka pwod kwo; ento ka cware ca oto, en doŋ gonyere oko i cik a cware. En omio ka cwar dan-nu pwod tye kwo, ce dako te kobo baŋ ico ocele, obino kobo ni ocodo cot. Cite ka cware oto oko, doŋ ogonyere oko i cik-ku; ka en dok ogero lo ocele, mom doŋ ocodo cot. Amannono, omegona, wun daŋ rik ito wunu i tuŋ baŋ cik pi kom Kricito ame inotte wunu iye, me idok wunu baŋ ŋat ocele, en ame rik ocere oko iyi akina a jo oto, me waŋ onyak nyige pi Obaŋa. Pien a rik wan pwod otye i kwo me anywalli, agoma yic me bal ame cik otugo onwoŋo tye atic i dule komwa me nyako nyige pito. Cite amanni wan doŋ ogonyowa oko i kom cik, wan doŋ oto i kom gin a con omakowa. Omio wan doŋ otye ka tic i yo anyen me Cuny, mom dok i yo acon me lubo cik a yam ocoo acoa. Kara doŋ wan obino kobo ŋo? Cik en bal? Mom amannono gire! Cite kono cik rik mom obedo tye, kono an gira mom aŋeo bal. Ka kono cik rik mom okobo ni, “Kur imit jami a ŋat ocele,” kono nwaŋ daŋ mom abedo kede ŋec i kom kodi mittono. Cite bal te nwoŋo kare i icwil ca, eka te kela kwone mit areco luŋi yia. Pien ka cik mom tye, bal to oko. Yam an abedo kwo aboŋo cikkoro, ento a doŋicwil ca obino, bal te kwo oko, an ate to. Icwil ca ikome ame myero kella kwo te lunyo kella to. Pien bal onwoŋo kare i icwil, te bwola, te neka oko kede icwil ca. Pi mannono, cik gire cil, icwillere daŋ cil, tye kakare, dok ber daŋ. Gin a rik ber ca, en a dok odoko to i tun baŋa? Mom amanno! Onwoŋo bal gire omia ato, kun tio kede gin aber, me nen kannaler ni bal enno. Amannono icwil ca omio bal odoko arac okato kare. Wan oŋeo ni, cik en gin me Cuny; aco an a dano me kom, ame ocato oko acalo opii i te bal. Gin ame atio-gu daŋ mom aniaŋ iye. Pien gin ame an amito mom atio, cite dok alunyo tiyo gigi mogo ame akwero. Cite ka an atio gin a mom amito, aye ni cik gire ber. Mano doŋ mom an ikoma atio, cite bal a bedo i yia ca, en ame tio. Pien an aŋeo gira ni, ginnoro aber mom bedo i yia, i kwona me anywalli. Kono me mito, amito tiyo gin aber, ento pe atwero; pien mom atio gin aber ame amito, cite gin arac a mom amito, en dok alunyo tiyo. Aco kara ka an atio gin a mom amito, mano doŋ nwoŋo mom an ikoma atio, cite bal a bedo i yia ca en ame tio. Omio doŋ anwoŋo ni obedo acalo cik ni, ka amito tiyo gin aber, gin arac en ame ceggi keda. Pien i yia alelo i cik Obaŋa, cite dok aneno cik ocele i dule koma ame tye ka romo kede cik ame apwoo i tamma, kun tera i opii i te cik me bal ame bedo i dule koma. An a piny oloa aman-ni, ŋa a bino lara i koma ame ata oko-ni? Apwoo Obaŋa pi Yecu Kricito Rwotwa! Doŋ i tun baŋa an aworo cik Obaŋa kede tamma, cite i kwona me anywalli aworo cik me bal. En omio amanni mom dok oŋolo kop oloo jo ame bedo i Kricito Yecu. Pien cik a Cuny me kwo a tye i Kricito Yecu doŋogonya oko i te cik me bal kede to. Gin ame onwoŋo cik pe twero tiyo, pien kwowa me anywalli oloko odoko agoro, Obaŋa en a doŋotimo. Ooro Wode ikome me bino i kit kom a cal i megwa ame bal obwoo, acalo gin ame oŋolo me yalo Obaŋa pi bal. Amannono oŋolo kop oloo bal a tye i kwowa me anywalli, me wek gin ame cik mito cobere i komwa, wan jo ame pe doŋowapo kwowa me anywalli, ento owopo yo me Cuny. Pien jo ame wopo kwo me anywalli, tamgi daŋ wopo kwo me anywalli; ento jo ame wapo yo me Cuny, tamgi daŋ wapo yo me Cuny. Tam ame wopo kwo me anywalli kela to; tam ame wopo Cuny kela kwo kede kuc. Tam me kwowa me anywalli i tun baŋ Obaŋa en kwor, pien pe winyo cik Obaŋa, daŋ pe twero winyo. Jo ame wopo kwo me anywalli mom otwero yomoro cuny Obaŋa. Wun mom itye wunu i kwo me anywalli, itye wunu i Cuny, ka Cuny Obaŋa bedo i yiwu. Cite ka dano moro mom tye kede Cuny a Kricito, en mom dano a Kricito. Ento ka Kricito tye i yiwu, komwu doŋoto pi bal, ento cunywu doŋbedo kwo, pien doŋokwanowu ni wun kitewu atir. Doŋ ka ce Cuny ŋat a rik ocero Yecu iyi akina a jo oto bedo i yiwu, en daŋ bino miyo kwo anaka i komwu a doŋoto-ni, pi Cunye ame bedo i yiwu. Omegona, wan doŋ otye kede banya, cite pe me kwo me anywalli, me wopo kwo me anywalli. Pien ka iwopo wunu kwo me anywalli, ibino to wunu; cite ka ineko wunu tic me kom oko pi Cuny, ibino bedo wunu jo akwo. Jo ame Cuny Obaŋa telogi, gin itino Obaŋa. Rik mom igamo wunu cuny me opii me dwokowu i lworo; gin igamo wunu en cuny me bedo itino me paco, en kodi cuny a mio wan okok ni, “Aba! Papawa!” Cuny Acil ikome notte kede cunywa kun tuco ni, wan iti no Obaŋa. Aco, ka wan itino, lonyo daŋ abedo megwa, en lonyo Obaŋa ame wan obino nywako i Kricito, ka ce wan okanyo can karacel kede, me onwoŋ kwogo daŋ karacel kede. An atamo ni, can me kare man pe romo apora kede kwogo ame obino nyuttiwa. Pien ginaketa ducu tye ka kuro nyuto itino Obaŋa kede mit adwoŋ ame okato kare. Ginaketa luŋonwoŋo oketo i te twer me gin a tere mom, pe pi mittere kene, ento pi mit Obaŋa ame rik oketo i te twerrono; kun gen tye ni, ginaketa ikomgi ceŋŋoro obino gonyo oko i opii me bedo gin atop, me onwoŋ kuc kede kwogo ame omio itino Obaŋa. Wan oŋeo ni, jami ducu ame oketo aketa tye acucura onyoni kun tye ka rem karacel anaka i kare-ni. Pe gin-nu keken, wan daŋ ame omiowa Cuny Acil acalo mot me ageyi, wan daŋ otye ocucura i yiwa kun okuro kare lokowa doko itino me paco, en me lakoro komwa. Pien rik olarowa pi bedo kede gen man. Gin ame igeno ka doŋonen oko, pwod ikobo ni igeno agena? Ŋa ame moko gennere i kom gin ame doŋoneno? Ento ka wan ogeno nwoŋo gin ame mom ru oneno, odio cunywa me kuro. I kite acellono Cuny Acil daŋ konyo gorowa. Wan mom oŋeo kwac i kite a myero, ento Cuny ikome bako doge akakarwa, kun cucura liliŋ. Ŋat ame ŋio cuny Jo ŋeo tam a Cuny Acil, pien en bako doge pi jo Obaŋa kun lubo mit Obaŋa. Wan oŋeo ni, jami ducu tio karacel pi konyo jo a maro Obaŋa, en jo ame olwoŋogi acalo en oyiko. Jo a yam en oŋeogi con, en omokogi con, ni myero nywak cal a Wode, me Wode bed atin kao i akina omego apol. Jo a yam en omokogi con, daŋ olwoŋogi; jo ame olwoŋogi, okwanogi ni kitegi atir; jo ame okwanogi ni kitegi atir, omiogi kwogo. Kara doŋobino kobo ŋo i kom kop man? Ka Obaŋa tye luŋ baŋwa, ŋa ame akworwa? En rik mom oweko Wode ikome, cite omie pi wan ducu. Pe doŋbino miyowa jami ducu karacel i en, kun mom twonowa? Kara ŋa a bino piddi jo ame Obaŋa oyero? Obaŋa en ame kwanogi ni kitegi atir. Ŋa a twero ŋolo kop loogi? Kricito Yecu en ame rik oto, dok akato mano, rik ocere oko. En daŋ tye i kabedo me kwogo i laŋet Obaŋa tuŋ cem, en ame abako doge pirwa. Kara ŋa a bino pokowa i kom mar a Kricito? Neno can bo, aŋar ŋit peko, onyo awuna, aŋar kecbo, aŋar bedo onoro, onyo ginnoro arac a twero poto i komwa, ya aŋar ŋit pala? Acalo rik ocoo ni, “Piri obedo ka nekowa ceŋ iyul; okwanowa bala romi me aneka.” Ento magu luŋwan otye ka loyo atek pi ŋat a ceŋ omarowa. Pien an aŋeo gira atira ni, kadi to, kadi kwo, kadi omalaika, kadi oloc, kadi gin a tye koni, kadi gin a mito bino, kadi teko, kadi gin a tye malo, kadi gin a tye piny, kadi gigi mogo me ginaketa luŋ, mom bino bedo i twer me pokowa i kom mar Obaŋa a tye i Kricito Yecu Rwotwa. Atye akobbo kop ateni i Kricito, pe akobo goba; ŋec ame i cunya ame nyutta bal daŋ bedo caden karacel keda pi Cunya Acil, ni, atye kede waŋcuny atek, rem i cunya mom gik. Pi mit mera, kono rik ocena an ikoma me kwanya oko ibaŋ Kricito, pi omegona, ame gin watina me rokka. Gin jo Icrael, jo ame Obaŋa oloko odoko otino mere, omiogi kwogo mere kede cikere luŋ, omiogi daŋ cik kede kite me wore, dok daŋ gin en a rik ociko pi miyogi gigi mogo abeco. Kwariwa acon obedo megi, dok Kricito daŋ onywalo i akinagi i kite me kom. Obaŋa aloo jami luŋmyero opwoo nakanaka. Amen. Cite pe ni kop Obaŋa oto nono; pien anywalli Icrael pe gin luŋjo Icrael, dok daŋ mom gin ducu itino Iburaim, ni, pien gin ikwae mere; cite yam ocoo ni, “Itino Icaka en ame obino cwano ni ikwaeni.” Ame te koppere ni, mom ikwae me kome ame gin itino Obaŋa, ento ikwae ame rik ociko pirgi gin en ame obino kwano ni gin ikwae mere. Pien kop ame ociko baŋe en ene, ni, “Abino dwogo i kare ame aciko, eka Cara te nywalo atin awobi.” Mom mannono keken, ento daŋ Lebeka oyac kede dano moro acel, en kwarowa Icaka, cite a mom ru onywal, ame itino ca mom ru itimo ginnoro aber onyo arac, rik okobbi Lebeka ni, “Atin atidi bino loyo atin kao,” me wek yer ame Obaŋa oyiko moki, ame pe cuŋ i kom ticgi, ento i kom lwoŋo mere. Obedo acalo rik ocoo ni, “Ceŋ amaro Yakobo, ento akwero Ecau.” Kara wan dok okob iŋo? Ni Obaŋa tiyo gin a mom atira? Mom amanno gire. En rik okobbi Muca ni, “Abino timo kica baŋ jo ame abino timogi kica, dok abino timo ber baŋ jo ame abino timogi ber.” Doŋ pe cuŋ i kom mit a dano, onyo i kom lolle mere, ento i kom kica Obaŋa. Coc a yam ocoo okobbi Parao ni, “Pi kop man omio atini malo, me wek anyut twer mera i komi, me rab nyiŋa i wi podo luŋ.” Kittono en timo kica baŋ ŋat a en mito ni etime kica, dok ŋat a en mito loko cunye doko nwaŋ, en loko doko nwaŋ. Gwok ibino penya ni, “Piŋo en pwod kobo ni wan obalo? Kara ŋa a twero geŋo gin a en mito?” Kara yin dano yin iŋa, ame igamo dog Obaŋa? Gin ame ocweo twero penyo ŋat ocwee ni, “Pi ŋo icwea kit man?” Acwec mom tye kede twer i kom lobo, me cweyo kede aŋina lobo acel, tabo acel me wel kede moro ocele ame pe me wel? Kara bedo ni ŋo ka Obaŋa odio cunye pi kare alac i kom tabbi mogo me akemo ame doŋ oromo me aneka, pi mito nyuto akemo mere kede miyo teko mere ŋeye? Otimo man wek emi lonyo me kwogo mere ŋeye i kom tabbi me kica, ame en rik oyiko con me bed i kwogo, en wan ikomwa, wan jo ame en olwoŋo, mom i akina a jo Icrael keken, cite anaka iyi akina Orok daŋ. Acalo en daŋ rik okobo i buk a Kocea, ni, “Jo a nwaŋ mom jona abino lwoŋogi ni ‘jona’, dako a rik mom amaro abino lwoŋo ni, ‘dako ame amaro.’ ” “Dok daŋ i kabedo ame rik okobbigi iye ni, ‘Wun mom i jona wunu’, obino cwanogi iye ni, ‘itino Obaŋa akwo.’ ” Icaya daŋ rik olemo kede dwoŋ aloŋo i kom jo Icrael ni, “Kadi wel jo Icrael rom i kwoo me dog nam, jo odoŋ anonok keken en a bino bwot; pien kop a Rwot oŋolo i wi lobo en bino cobo me oyotoyot” Dok tye acalo kaya yam okobo con, “Ka kono Rwot me mony mom owekkiwa ikwaewa mogo, kono wan obedo calo Codoma, onyo kono odoko bala Gomorra.” Kara man wan dok okob iŋo? Ni mano, Orok a yam pe lolle pi doko jo a kitegi atir doŋ okwanogi ni kitegi atir, cite kitegi atirrono gin onwoŋo pi iyee. Ento jo Icrael ame yam lolle pi cobo cik me gin bed jo a kitegi atir, cobo oloogi oko. Piŋo? Pien gin mom oyenyo i yo me iyee, ento i yo me tic. Gin otwomere i gweŋ me twomere ca, acalo rik ocoo ni, “Nen, aketo i Cion gweŋ me twomere, lela a mio jo rette; ŋat ame oye en, lewic mom bino make.” Omegona, gin ame amito i cunya ducu, ame akwao Obaŋa pire, en ene ni, jo Icrael myero olarre. An abedo cadengi ni, gin omoko atek i kom Obaŋa, cite mokogi-ni mom ocuŋ i ŋec ikome. Onwoŋo gin mom oŋeo kit ame Obaŋa kwano kede dano ni kite atir, omio gin otemo moko ni kitegi atir pirgi kengi, mom omiye i kodi kite atir ame Obaŋa mio. Pien cik doŋ ogik i Kricito, me wek jo luŋ ame ye en okwan ni kitegi atir. Muca rik ocoo ni, dano ame tio tic atira ame cik mito, bino kwo pire. Cite kite atir ame omio pi iyee kobo aman, ni, “Kur ikob keni keni ni, ‘Ŋaa bino yito malo i polo?’ (ni, me kela Kricito piny), onyo ni, ‘Ŋa bino donyo piny i bur ame agikki tere mom?’ ” (ni, me omo Kricito oko iyi akina a jo oto). Kara kobo niŋo? En kobo ni, “Kop-pi doŋ tye ceggi kedi, tye i dogi kede i cunyi,” en kop i kom iyee ame wan orabo. Pien ka ituco giri i dogi ni, “Kricito en Rwot”, a kun iye giri i cunyi ni Obaŋa ocere oko iyi akina a jo oto, ibino larre. Pien dano ye i cunye, en a mio ote kwane ni kite atir; en tuco i doge, en a mio Obaŋa te lare. Pien coc a yam ocoo okobo ni, “Ŋat ame oye en, lewic mom bino make.” Mom tye apokapoka moro i akina Ojudaya kede jo Grik; gin ducu Rwotgi acel, en daŋ poko lonyo mere baŋ jo luŋ ame kok baŋe. Rik ocoo ni, “Jo ducu ame lwoŋo nyin Rwot bino larre.” Kara gin bino kok baŋe i kittene, ame mom ru gin oye en? Kede dok otwero ye en nino, ka mom owinyo kop i kome? Gin otwero winyo kop i kome niŋo ka ŋat a rabbigi mom? Jo twero rabo kop iŋo ka mom oorogi? Acalo yam ocoo ni, “Tyengi beco a rom mene, jo ame rabo amut aber!” Ento mom gin luŋ ogamo amut aber; pien Icaya rik okobo ni, “Rwot, ŋa oye kop ame wan otito?” Kakare, iyee bino pi winyo kop ame otito, kop ame owinyo bino pi rabo kop i kom Kricito. Ento an koŋ apenyo ni, “Kara gin yam pe owinyo bo?” Gin owinyo gigi, acalo okobo i jabuli ni, “Dwongi owinyere i wi podo luŋ; kop a gin okobo otuno i agikki piny.” An dok apenyo ni, “Jo Icrael rik gin mom oniaŋ?” Muca en ame ogeo gamo kop, ni, “Abino miyo nyeko makowu i kom jo a gin mom rok ikome, abino miyo akemo makowu i kom rok amiŋ.” Icaya dok cunye tek akato kun kobo ni, “Jo a yam mom yenya doŋ onwoŋa, doŋ anen kannaler baŋ jo a nwaŋ pe penyo pira.” Ento i kom jo Icrael en okobo ni, “Ceŋ aryeo ciŋa dyeceŋ benebene baŋ jo a mom winyo doga, jo a pyem keda.” Doŋ apenyo ni, “Obaŋa doŋ okwero jo mere oko?” Mom amanno gire. An ikoma daŋ an dano me Icrael, akwar Iburaim, me i atekere a Benjamin. Obaŋa mom okwero jo mere a yam en oŋeogi con. Mom iŋeo wunu kop ame coc a yam ocoo okobo i kom Elia, kite a en obako kede doge baŋ Obaŋa i kom jo Icrael ni, “Rwot, odwarpinynyi doŋ oneko oko, omuko keno me lam-gu oko; an kena a pwod adoŋ, daŋ omito neka oko.” Cite Obaŋa rik odok iye niŋo? Ni, “An pwod aweko odoŋ baŋa co tutumia abiro ame mom ru orumo coŋgi i nyim Baal.” En i kite acellono tye jo mogo ame odoŋ ame Obaŋa oyerogi pi kica mere. Aco ka oyerogi pi kica, pe nwoŋo doŋ ocuŋ i kom tic a gin otio; kono ocuŋ i kom tic, kica kono doŋ mom dok kica. Kara ŋo doki? Gin ame jo Icrael oyenyo, pe onwoŋo. Jo ame oyerogi keken onwoŋo, cite jo ocele cunygi odoko nwaŋ, acalo rik ocoo ni, “Obaŋa omiogi cuny ame odil, omio waŋgi mom neno, yitgi daŋ mom winyo, anaka ceŋ tin.” Daudi daŋ okobo ni, “Mi mejagi me cem dok kumma kede owic, obed gin a miogi rette, pi culo waŋ balgi. Mi waŋgi dok acol me kur onen piny; mi pyergi kudde atwal.” An doŋ apenyo ni, “Jo Icrael rik otwomere wek orette meicel bo?” Mom amannono gire! Pi balgi omio larre, doŋ obino baŋ Orok, me nyeko mak jo Icrael. Ka balgi okelli lobo lonyo, dok ka potogi okelo lonyo baŋ Orok, berre bino bedo rom mene ka gin ducu odwogo iweŋ? Aman akop kedwu, wun Orok. Doŋ acalo an gira akwena baŋ Orok, adworo ticca, me gwok onyo ami nyeko mak jo me rokka, me atot ya alar jo mogo i akinagi. Pi bologi oko omio Obaŋa odwoggo lobo luŋ baŋe; kara ka doŋ ogamogi, bino kela ŋo? Mom bino bedo calo kwo oya i akina jo oto? Ka doŋ oyoko moko kwon an ok me wi mwaka, moko luŋ nwoŋo doŋ cil; ka lwit yat cil, jaŋe daŋ doŋ cil. Tye acalo oturo jaŋe mogo i kom yat jeituni aber, eka ote jako jaŋ yat jeituni moro me tim, ote como kakargi me mok i tyen yat aber ca, eka te nywako waya pige amio ame ya i lwite. Jaŋ yat ame ojako i tim en yin; cite kur iwakere i kom jaŋe ocele ca. Kadi bed iwakere, pe yin ame itiŋo lwite, lwite en a tiŋi. Yin ibino kobo ni, “Rik oturo jaŋe mogo me wek coma i kom yat.” Kakare. Rik oturogi oko pien gin mom oye Obaŋa; yin pwod icuŋ pien iyee meri tye. Kur ibed kede tam me awaka, ento bed kede lworo. Ka Obaŋa yam pe oweko jaŋ yat ikome, pe doŋ bino weki. Koŋ yin inen kica Obaŋa kede gero mere. En ger baŋ jo opoto, cite nyuto kica mere baŋi, ka imedde cuŋ i kica mere. Ka pe, obino toŋi oko daŋ. Dok gin Ojudaya daŋ, ka oweko bedo aboŋo iyee, obino dwokogi i kom yat; pien Obaŋa tye kede twer me dwokogi iye. Pien yin Arok irom i jaŋ yat jeituni me tim ame otoŋo, ocomo i kom yat jeituni aberrere, a yam pe en olot iye; mom bedo yot akato baŋ Obaŋa me dwoko jaŋe ocele ca i kom yat ikome a nwaŋ oturogi iye? Omegona, tye muŋŋoro ame amito ni iŋeu, me kur itam wunu kenwu ni iryek wunu. En ene: jo Icrael cunygi odoko nwaŋ pi kare moro, ituno ka wel Orok bino romo. Icennere Obaŋa bino laro jo Icrael luŋ, acalo rik ocoo, ni, “Alar bino tuno kun ya i Cion, en bino kwanyo kite me dago lworo Obaŋa oko i baŋ Yakobo”; “man en cikere ame abino cikere kedgei i kare ame akwanyo balgi oko.” Pi kop a dok i kom amut aber, gin odoko okwor Obaŋa pirwu, ento pi kop a dok i kom yer. Obaŋa marogi pi kwarigi. Mot Obaŋa me kica, kede lwoŋo mere, mom twero lokere. Wun rik mom iwinyo wunu dog Obaŋa, cite amanni doŋ otimowu kica, a kun gin doŋ olunyo kwero bedo i winy. I kite acellono, gin amanni doŋ okwero winyo doge i kare ame otimowu kica, me wek gin daŋ timgi kica amanno. Pien Obaŋa oketo jo luŋ i buc me kwero winyo doge, me etim i jo luŋ kica. Lonyo Obaŋa dwoŋ ame okato kare! Ryeko mere kede ŋeccere tut meicel! Kop a en ŋolo tere mom rotte; kittere niaŋ iye tek! “Ŋa aŋeo tam a Rwot? Ŋa a yam mie tam?” “Ŋa ce a rik koŋ omie ginnoro, eka en daŋ te dwoko baŋe?” Pien en yam oketo jami ducu, jami luŋ obedo tye pire, daŋ dok baŋe. Kwogo bed baŋe nakanaka. Amen. Pi mannono, omegona, abako doga baŋwu pi kica Obaŋa, imiye wunu kenwu acalo gin akwo ame oŋolli Obaŋa, gin acil ame yomo yi Obaŋa; man en woro me cunywu. Kur ilub wunu tam me lobo man, ento weku Obaŋa lok tamwu dok anyen, me iniaŋ wunu i gin ame Obaŋa mito, gin aber, ame yomoro yie, ame roccoro mom iye. Pi mot me kica ame omio baŋa akobbiwu luŋ ni, dano acel acel kur par pi dittere okato kare, ento bed i par atira, ŋat acel acel kun lubo pokkere me iyee ame Obaŋa opimme. Wan otye kede dule komwa apol i kom acel, gin dul kom daŋ ticgi papat; amannono daŋ kadi bed wan opol, wan obedo kom acel i Kricito, kun ŋat acel acel bedo acalo dul kom awottere. Wan otye kede mot apapat ame lubo winyo ame Obaŋa omiowa; ber oketgi i tic. Ka omiowa mot me rabo kop Obaŋa acalo adwarpiny, ber orab acalo iyeewa tye. Ka omiowa mot me tiyi jo, otiyi wunu jo. Ŋat ame apwony myero pwony; ŋat a cuko cuny jo, cuk cunygi; ŋat a poko mot, pok i cunye luŋ; ŋat ame atelwic, ti kede mitkom; ŋat a konyo ocan, konygi kede yomcuny. Marwu bed me ateni. Kwer gin arac oko, mok i kom gin aber. Marre wunu kenwu kenwu atek acalo omego, kun ŋat acel acel mio kwogo baŋ awottere. Komwu bed mit, aboŋo wackom, bedu alyet i cunywu; kun itiyi wunu Rwot acalo omiro. Cunywu bed yom pi gin ame igeno wunu; di wunu cunywu i can, kun imiye wunu i kwayo Obaŋa i cunywu luŋ. Poku jamiwu baŋ jo Obaŋa ame tye kede peko; ketu cunywu i gwoko wele. Lamu winyo aber i kom jo a wunowu; lammigi wunu winyo, kur icenugi acena. Lelu karacel i jo a lelo, koku karacel kede jo a kok. Bedu kede niaŋere i akinawu kenwu; kur iwakere wunu, ento notte wunu kede okopi. Kur ibed paro kenwu ni iryek wunu. Kur iculu rac pi rac, ento tamu pi gin ame jo luŋ pwoo ni ber. I tuŋ baŋwu ka twerre, bedu kede kuc baŋ jo luŋ. Owotena, kur iculu kwor, ento iwekki wunu akemo Obaŋa kare, pien rik ocoo ni, “An ame abino culo kwor, an abino lunyo icen, man kop a Rwot.” Rik ocoo daŋ ni, “Ka kec oneko amoneni, mie cam; ka oryo ocire, mie mat pii; pien ka itimo amannono, ibino yido loti mac i wie.” Kur imi gin arac loi, cite lo gin arac kede gin aber. Dano acel acel myero winy oloc a loc; pien mom tye twerroro a pe oya i baŋ Obaŋa; oloc a tye, Obaŋa en oketogi. Pi mannono, dano a pyem i oloc, nwoŋo apyem i gin a yam Obaŋa ociko; jo a pyem kedgi obino ŋolo kop i wigi. Pien jo a timo gin aber mom bedo kede lworo moro i kom oloc, kono ka jo a timo gin arac. Yin imito ni mom ibed kede lworo i kom aloc? Tim gin aber, mio en te pwoyi; pien en atic Obaŋa ame tio pi konyi, Ento ka itimo gin arac, bed kede lworo i kome, pien twer me neko jo mom omie nononono, En atic Obaŋa ame kelo akemo i kom jo a timo gin arac. En omio myero iwinyu oloc, mom pi lworo akemo Obaŋa keken, cite me ibed a yiwu ler daŋ. Man daŋ gin omio igelo wunu ocoro, pien oloc gin otic Obaŋa ame omiye i ticcono. Culu gin a myero baŋ ŋat acel acel; gelu ocoro baŋ wegi ocoro, kede oŋwalo baŋ wegi oŋwalo, lworu jo a myero alwora, woru gin a myero awora. Kur ibedu i banya a ŋattoro i komwu, Bedu ka i banya me marre kenwu kenwu; pien jo ame maro jo wadgi nwoŋo doŋ ocobo cik. Pien maginogo ni, “Kur icod cot, Kur inek, Kur ikwal, Kur imit jami a ŋat ocele,” kede icwillogo ocele luŋ onotte karacel i kop man ni, “Mar dano wadwu acalo imarre keni.” Amar jo mom timo dano wadgi arac; pi mannono, mar en a cobo cik. Tiu man kun iŋeo wunu kare ame otye iye, ni, caa doŋ orommiwu me cooko i waŋ nino; pien onyoni larre mewa doŋ onoko ceggi, kato i kare a rik okwoŋo ye iye Rwot. Dyewor doŋ ceggi tum, piny doŋ mito ru. Doŋ obolu tic me piny acol oko, oruku jami romo me dyeceŋ. Olubu kite a myero me dyeceŋ, aboŋo gat me yomcuny arac kede mero, aboŋo tiŋo luk kede tim me tarwaŋ, aboŋo daa kede nyeko. Ruku Rwot Yecu Kricito acalo rukwu me romo, dok kur itam wunu pi kwowu me anywalli pi cobo mittere. Dano ame iyee mere goro jole wunu, ento kur ipyemu kede tammere. Dano moro twero bedo kede iyee me camo gin ducu, ento dano ame iyee mere goro camo ka pot dek keken. Dano a camo gin ducu kur ca dano a mom camo, dano a mom camo kur ŋol kop i kom dano a camo; pien Obaŋa doŋ ojole. Yin i ŋa ame iŋolo kop i kom amiro me paco a ŋat ocele-nie? Mano kop a ŋat a loc, me ŋolo onyo opoto. Cite en bino cuŋ gire, pien Rwot tye kede twer me miye cuŋ. Dano acel paro ni nino acel dit kato en ocele, dano ocele tamo ni nine ducu gire tye rom aroma. Myero dano acel acel mok tammere kene. Dano a paro pi nino moro, paro pire pi Rwot; dano a camo, camo pi Rwot, pien pwoo Obaŋa; dano a kwero cam daŋ kwero pi Rwot, pwoo Obaŋa daŋ. Pien mom tye dano moro i akinawa ame kwo pire kene, daŋ dano a to pire kene mom tye. Ka wan okwo, okwo pi Rwot; ka oto, oto pi Rwot. En omio kadi ka wan okwo, onyo kadi oto, wan giwa jo a Rwot. Pien Kricito rik oto te dok kwo me wek ebed Rwot a jo oto kede jo akwo. Piŋo yin iŋolo ominni kop? Onyo yin, piŋo icao ominni? Wan luŋ obino cuŋ i nyim kom me ŋolo kop Obaŋa. Pien rik ocoo ni, “Acalo an akwo, man kop a Rwot, jo luŋ bino rumo coŋgi i nyima, leb jo luŋ bino pako Obaŋa.” Amannono ŋat acel acel i akinawa bino dok iye pire kene baŋ Obaŋa. Myero doŋ ogiku ŋolo kop ŋat man i kom awottere; ento aberrere imok wunu ni, mom ibino wunu tiyo ginnoro ame twero miyo ominwu moro twomere onyo poto i bal. An aŋeo dok aniaŋ aber i Rwot Yecu ni, mom tye ginnoro ame bedo me kwer pire kene; ento bedo me kwer baŋ dano moro-ni ame tamo ni me kwer. Ka iwaŋo yi ominni pi cam a yin icamo, nwoŋo pe doŋ ilubo yo me mar. Kur imi gin a yin icamo bal kwo a ŋat ame Kricito oto pire. Kur imiu gin aberriwu, jo bed kobo ni gin arac. Pien loc Obaŋa mom cem kede mat, ento kite atira, kuc, kede lelo a Cuny Acil kelo. Dano ame tiyi Kricito amannono yomo yi Obaŋa, dok jo daŋ pwoe. Myero doŋ otamu pi gin a kelo kuc kede gin ame doŋo iyeewa kenwa kenwa. Pi kop me cem kur ibal kede tic ame Obaŋa otio. Cem ducu myero ocam, ento bedo rac ka dano camo gin a mio ŋattoro poto i bal. Bedo ber meicel ka mom icamo riŋo kadi mato koŋo onyo tiyo ginnoro a bino miyo ominni poto. Iyee ame itye kede, bed kede keni i nyim Obaŋa. Tye kede winyo dano a mom ŋolo kop loc kene i gin a en opwoo. Ento dano ame tamere atama, kop loc ka ocamo, pien gin etimo mom oya i kom iyee; gin ducu a pe oya i kom iyee, en bal. Wan jo ame otye kede teko myero okonyu jo a mom kede teko i kom goro megi, kun mom otio ka gin a yomo yiwa kenwa. Ŋat acel acel i akinawa ber yom yi dano wadgi, me konye, kede me doŋ iyee mere; pien kadi Kricito rik pe otio gin a yomo yie kene, cite obedo acalo rik ocoo, ni, “Ayet ame oyeti kede opoto i koma.” Coc ducu a rik ocoo nwaŋ ocoo pi pwonyowa, me wek ka okanyakino, kop a tye i coc a rik ocoo cukoro cunywa, mio obedo kede gen. Kanyakino kede cuko cuny ya i baŋ Obaŋa; myero en miwu ibedu kede niaŋere i kinwu kenwu kun ilubo wunu kite a Kricito Yecu, me inotte wunu i pako Obaŋa Papa a Rwotwa Yecu Kricito kede dwon acel. Jolle wunu kenwu kenwu, acalo Kricito doŋ ojolowu, me ikelu kwogo baŋ Obaŋa. Akobbiwu ni, Kricito nwaŋ odoko akony Ojudaya pi nyuto ni Obaŋa kobo kop me ateni, kun cobo gin a rik Obaŋa ocikere iye baŋ kwariwa acon, dok daŋ kun mio Orok pako Obaŋa pi kica mere, acalo rik ocoo ni, “Doŋ pi mano abino pwoyi i akina Orok, abino wero wer me pako nyini.” Dok rik okobo ni, “Omau wun Orok, lelu karacel i jo mere”, dok ni, “Pak wunu Rwot, wun Orok ducu, wek rok luŋ aluŋa opake.” Icaya daŋ okobo ni, “Akwar Yece ceŋŋoro bino; en bino pello me loyo Orok, Orok daŋ bino keto gengi i kome.” Obaŋa a mio jo bedo kede gen myero mi lelo ducu kede kuc poŋ i yiwu pi iyeewu i kome, me genwu wot kun medde ameda pi teko a Cuny Acil. Omegona, an aŋeo gira atira ni, wun jo abeco meicel, ame ŋec ducu opoŋ i yiwu, daŋ itwero wunu pwonyere kenwu kenwu. Ento atyeko coyiwu koppogo i tekcuny adwoŋ, a kun amito poyo wiwu iye. Mannono atimo pi winyo ame Obaŋa omia, me bedo atic a Kricito Yecu baŋ Orok. Atye atic acalo alamdog kun arabo amut aber ame oya i baŋ Obaŋa, me wek Orok bed acalo gin ame oŋolo ame Obaŋa pwoo, ame Cuny Acil olonyo obedo acil. Doŋ atwero wakere i Kricito Yecu i kom ticca pi Obaŋa. An mom atiŋere me kobo kopporo ocele, kono pi gin ame Kricito otio me kela Orok i te loccere, kun tio karacel keda i kop kede i tic, pi teko ame onen i kom anyuttogo kede taŋo mogo, pi teko a Cuny Acil. Mano omio atyeko rabo amut aber i kom Kricito, cakere i Jerucalem, mano kede anaka i Iliriko; pien onwoŋo aketo cunya i rabo amut aber kan ame mom ru owinyo iye nyiŋ Kricito, me wek kur ager i wi ot a yam ŋat ocele ocako gero iye, cite bed acalo rik ocoo ni, “Jo ayam mom ru orabbigi kop i kome ol obino nene, jo a yam pe ru owinyo kop i kome obino niaŋ.” Man en gin obedo geŋa kare apol me bino baŋwu. Ento amanni kannoro odoŋ kan a myero ati iye doŋ mom, daŋ doŋ onwoŋo abedo kede mit adwoŋ me bino baŋwu pi mwakki apol. Doŋ ageno ni abino nenowu ka abeo kuno i kare me wota i Cipein, daŋ ibino konya wunu i wotta kuno ame nwoŋo koŋ agalo waŋa baŋwu anonok. Cite aman pwod koŋ awot i Jerucalem me tero kony baŋ jo Obaŋa. Pien jo a tye i Makedonia kede Akaya otyeko moko me rayo lim me konyo jo Obaŋa a tye i Jerucalem ame can omakogi. Gin omoko amanno, cite gin otye daŋ kede banya baŋ jo Jerucalem; pien ka Orok onywako gamo mot me cuny karacel Ojudaya, myero gin daŋ okony Ojudaya kede jami me kom. Ka doŋ mano otum, ame doŋ atyeko miyogi gin a rik orayigi, abino beo weno baŋwu, ate wot i Cipein. Aŋeo ni, ka atuno baŋwu, abino bino kede winyo adwoŋ ame oya i baŋ Kricito. Abako doga baŋwu, omegona, pi Rwotwa Yecu Kricito kede pi mar a Cuny Acil, ket wunu tek i kwacwu karacel keda, me wek abwot i baŋ jo a mom oye Kricito a tye i Judaya, dok daŋ me jo Obaŋa a tye i Jerucalem pwo tic a tera kuno. Amannono doŋ abino tuno baŋwu kede lelo adwoŋ ka Obaŋa oye, me ate weo karacel kedwu. Obaŋa won kuc bed kedwu luŋ. Amen. Anyuto baŋwu aminwa Foibe, ame en atic a lwak jo oye Kricito tye i Kenkeria, lole wunu i Rwot acalo myero i jo Obaŋa, daŋ ikonye wunu i ginnoro ducu a en bino mito baŋwu; pien yam en okonyo jo apol, kede an ikoma daŋ. Motta wunu Puricika gin kede Akwila, ame gin tio karacel keda i Kricito Yecu. Gin rik ojalo ŋutgi pi laro kwona; mom an kena apwoogi, cite anaka lwak Orok oye Kricito luŋ. Mot wunu daŋ jo oye Kricito a cokere i otgi. Mot wunu dyera Epaenato; en ame ogeo ye Kricito i Acia. Mot wunu Maliam a ceŋ ololle atek i akinawu. Mot wunu Anduroniko gin kede Yunia, a gin watina a rik otweogi karacel keda i buc. Gin jo a ŋeye i baŋ okwena, daŋ gin en ogeya bedo i Kricito. Motta wunu Ampuliato, ame dyera i Rwot. Mot wunu daŋ Urbano atic wadwa i Rwot, gin kede dyera Citakic. Mot wunu Apelle, ame en dano a genne i Kricito. Mot wunu jo me ot a Aricitobulo. Mot wunu Kerodion ame watta, kede jo me ot a Narocico ame tye i Rwot. Motu jo-nu a tye ololle i Rwot, Terofaina gin kede Terofosa, kede dyera Perici daŋ, ame ololle atek i Rwot. Mot wunu daŋ Rufo, dano a ŋeye i Rwot, gin kede tottere, ame en daŋ totta. Dok imot wunu Acinkerito, Pelegon, Keremec, Patroba, Keremac kede omego a tye karacel kedgi. Motu daŋ Pilogo gin kede Julia, Nerea gin kede aminnere, kede Olimpa, kede jo Obaŋa luŋ a tye karacel kedgi. Motte wunu kenwu kede amot acil me mar. Lwakkogo oye Kricito luŋ omotowu. Abako doga baŋwu, omegona, nen wunu jo ame kelo apokapoka kede kop a mio jo poto, a mom rwatte kede pwony a rik opwonyowu kede. Dupu jo-nu adupa. Kodi jo-nu mom gin omiro a Rwotwa Kricito; rwotgi en yigi kengi. Gin bwolo tam a jo a mom i bal, kun olebo kop aber ame winyo mit. Winy mewu baŋ Obaŋa doŋ owinyere baŋ jo luŋ, en omio iyomoro wunu cunya. Doŋ amito ibed wunu oryeko i gin aber, cite igeŋere wunu i bal; Obaŋa won kuc bino canyo Catan piny i te tyenwu piopio. Winyo a Rwotwa Yecu bed kedwu. Temoteo ame tio karacel keda i Rwot omotowu, kede Lukio, kede Jacon, kede Cocipater a gin watina. An Tertio ame acoo waraga man amotowu i Rwot. Gayo ame abuto i ode daŋ omotowu, en ame gwoko lwak oye Kricito luŋ. Eracito akanlim me boma-ni, kede ominwa Kwarto daŋ omotowu. [ Winyo a Rwotwa Yecu Kricito bed kedwu wun ducu. Amen.] Ber imiu kwogo baŋ Obaŋa ame twero miyowu cuŋ atek, acalo apwonyo i amut aber ame atito, kede kop ame arabo i kom Yecu Kricito. Muŋ man Obaŋa rik omio oliŋ iti pi runi apol, eka te yabo. A man doŋ onyuto oko kannaler i coc odwarpiny acalo Obaŋa ame pero odoco ociko, kun omio rok luŋ oŋeo, me gin lub iyee. Kwogo bed nakanaka baŋ Obaŋa, ame en kene won ryeko, pi Yecu Kricito. Amen. Waraga man oya i baŋ Paulo ame pi mit Obaŋa rik olwoŋe me bedo akwena a Kricito Yecu, kede i baŋ ominwa Cocetene. Baŋ lwak jo oye Obaŋa a tye i Korinti, a gin jo ame olonyo odoko acil i Kricito Yecu, ame Obaŋa olwoŋogi me bedo jo mere ikome, karacel i jo luŋ a tye i kabedo luŋ, ame lwoŋo nyiŋ Rwotwa Yecu Kricito, en Rwotgi kede megwa daŋ: Obaŋa Papawa kede Rwotwa Yecu Kricito miwu winyo kede kuc. An nino luŋ amio pwoc baŋ Obaŋana pi winyo ame omiowu i Kricito Yecu, pien pi bedowu i Kricito omio doŋ idoko wunu olonyo i yore luŋ, Itye wunu doŋ i ŋec luŋ dok daŋ itwero kobo wunu aber, pien kop a wan orabo i kom Kricito odonyo atek i yiwu. Omio mom ikeŋ wunu mottoro me cuny a kun pwod ikuro wunu kare me nyuto Rwotwa Yecu Kricito. En bino miyo icato wunu atek naka iyi agikki, kun mom tye ginnoro a myero dotwu iye i nino a Rwotwa Yecu Kricito. Obaŋa ame olwoŋowu me notte karacel i Wode Yecu Kricito Rwotwa, en genne. Abako doga baŋwu, omegona, pi nyiŋ Rwotwa Yecu Kricito, ni wun luŋ myero ikob wunu kop acel, apokapoka moro daŋ myero kur bedo i akinawu; ento myero ikubere wunu i cuny acel kede tam acel. Pien jo mogo ame oya i baŋ Koloe otitta kop i komwu kannaler, ni mano daa tye i akinawu, omegona. Gin ame akobo ene: ŋat acel acel iyi akinawu tye ka kobo ni, “An gira a dano a Paulo”, “An gira a dano a Kepa”, “An gira a dano Apolo”, “An a dano a Kricito.” Kom Kricito opokere bo? Rik oguro Paulo i kom yataria pirwu? Rik obatijawu i nyiŋ Paulo? An apwoo Obaŋa, pien rik an gira mom abatija ŋattoro iyi akinawu, kono ka Kricipo gin i Gayo, me ŋattoro kur kob ni ebatija i nyiŋa. Abatija daŋ jo i ot a Citepano; mom doŋ atwero poyo ka kono abatija dok ŋattoro ocele. Kricito mom ocwaa pi batija jo, ento pi rabo amut aber, ame mom arabo i ryeko moro me limdog, me to a Kricito i kom yataria kur konnyere bed pe. Kop i kom yataria i tuŋ baŋ jo ame arwenyo odoco, gin neno bala kop me miŋo, cite i tuŋ baŋ wan jo ame Obaŋa tye alarowa, obedo teko Obaŋa. Pien yam ocoo ni, “Abino balo ryeko a jo aryek, abino keto ŋec a jo a ŋeo piny oko,” Ane kara jo aryek? Ane opwony-cik? Ane jo apyem me kare-ni? Mom Obaŋa doŋ oloko ryeko me lobo man odoko me miŋo? Pien pi ryeko Obaŋa omio lobo mom oŋee pi ryekogi, ento Obaŋa pi mittere gire olunyo laro jo oye en pi kop me miŋo ame orabo. Ojudaya mito neno anyuttogo, jo Grik yenyo ryeko; aco wan giwa orabo pi Kricito a rik oguro i kom yataria, ame koppere tuŋ baŋ Ojudaya obedo gin a retogi, i baŋ Orok nen me miŋo. Cite baŋ jo ame olwoŋo, Ojudaya kede jo Grik, en Kricito ame obedo teko kede ryeko Obaŋa. Pien miŋo Obaŋa kato ryeko a dano oko i ryeko, goro Obaŋa daŋ tek kato teko a dano oko. Omegona, koŋ iparu lwoŋo ame Obaŋa olwoŋowu kede. Jo apol i akinawu onwoŋo mom tye i ryeko moro me lobo-ni, polwu onwoŋo mom wegi twer, polwu onwoŋo mom obedo wegi kwogo. Cite Obaŋa oyero gigi mogo ame lobo lwoŋo ni omiŋo, me miyo oryeko lewic; Obaŋa oyero gigi mogo ame lobo lwoŋo ni ogoro, me miyo oteko lewic; Obaŋa oyero gigi mogo ame lobo cao ni ojotojot, anaka gigi mogo a mom tye, me mi jami a tye dok piny ata, me dano moro kur wakere i nyim Obaŋa. Obaŋa en omio ikwo wunu i Kricito Yecu, ame Obaŋa omio odoko ryekowa. Pi Kricito omio Obaŋa okwanowa ni kitewa atira, olonyowa obedo jo acil, olakorowa. Doŋ acalo bala rik ocoo, “Ŋat a wakere, myero wakere pi Rwot.” Eyo omegona, an rik abino baŋwu aboŋo kopporo onyo ryeko moro amalo i kare ame arabbiwu amut aber i kom muŋ me yik Obaŋa. Pien onwoŋo amoko ni mom amito ŋeyo ginnoro i akinawu, kono ka Yecu Kricito keken, kite ame ogure kede i kom yataria. Rik abedo kedwu kun agoro, alwor atek, koma daŋ myel atek. Koppa kede kwena ame arabo, rik mom obedo kopporo me ryeko me wayo tamwu, ento onyuto teko a Cuny Acil, me iyeewu kur cuŋ i kom ryeko a dano, ento i teko Obaŋa. Wan kono okobo ryeko baŋ jo ocwiny, ento ryeko ame mom me lobo man, onyo ryeko oloc me kare man, pien twergi tye doŋ arwenyo oko. Wan okobo giwa ryeko Obaŋa me i muŋ, ame okano, ryeko ame Obaŋa rik oyiko con i con me kelliwa kwogo. Mom tye aloccoro me lobo man ame oniaŋ iye; kono rik gin oniaŋ, kono mom rik oguro Rwot, won kwogo, i kom yataria. Cite acalo rik ocoo ni, “Gigi mogo a wan mom oneno kede a yit mom owinyo, gigi mogo a mom odonyo i tam a dano, ginnogo en ame Obaŋa oyiko pi jo a mare,” dok gin en ame Obaŋa omio Cuny Acil onyutogi baŋwa. Pien Cuny Acil ŋio jami luŋ, anaka tam i yi Obaŋa. Ŋa a ŋeo tam i yi dano ocele, kono ka cuny dano-nono keken ame tye i yie? Kite acellono, mom tye ŋattoro a ŋeo tam Obaŋa, kono ka Cuny Obaŋa keken. Wan rik mom omiowa cuny me lobo, ento omiowa Cuny ame oya i baŋ Obaŋa, me oniaŋ mot ducu ame Obaŋa miowa pi kica mere. Mano en gin a wan okobo; wan mom okobo kop ame opwonyo i ryeko a dano, ento kop ame Cuny Acil opwonyowa kede, kun nyuto kop me Cuny baŋ jo a tye Cuny Obaŋa. Ento dano a mom i Cuny Obaŋa, mom twero gamo gin ame Cuny Obaŋa mio, pien i tuŋ baŋe, obedo gin me miŋo; en mom twero niaŋ iye pien kodi ginnono oŋio i Cuny. Dano a tye kede Cuny Obaŋa ŋio jami luŋ, cite en ŋat a ŋie mom, “Ŋa a ŋeo tam a Rwot? Ŋa a yam mie tam?” Ento wan otye kede tam a Kricito. Ento wun omegona, an rik mom atwero kop kedwu bala jo a doŋ tye kede Cuny Obaŋa, cite akobo kedwu acalo jo a tye i kite me anywalli, acalo itino okere i Kricito. Rik apitowu kede cak, pe i cam ikome, pien rik onwoŋo mom ru itwero wunu cam; kadi amanni daŋ mom ru itwero wunu cam, pien wunu pwod itye wunu i kite me anywalli. Kara ka nyeko pwod tye i akinawu, kun ida wunu kenwu kenwu, mom nwoŋo pwod itye wunu i kite me anywalli, kun pwod ilubo wunu kite a dano? Ka dano moro i akinawu kobo ni, “An gira a dano a Paulo,” eka ŋat ocele ni, “An gira a dano Apolo,” mom nwoŋo wun pwod ibedo wunu dano adana? Kara Apolo en ŋa? Paulo en ŋa? Wan otic ame omio iye wunu Yecu. Ŋat acel acel tye kede gin a Rwot opokke. An rik apito koti, Apolo oonyo iye pii, ento Obaŋa omio odoŋo. Doŋ akadi ŋat opito onyo ŋat oonyo pii, gin ducu mom oginnoro kono ka Obaŋa keken ame miyo jami doŋo, ŋat opito kede aony pii, gin ducu orom, ŋat acel acel bino nwoŋo ocara mere a rom i tic a en otio. Pien wan otic karacel i Obaŋa; wun ibedo wunu poto Obaŋa, daŋ ibedo wunu gedo Obaŋa. Pi winyo Obaŋa ame omia, omio an rik acako tere bala twon agedo ame adiro; dano moro ocele tye agero i wie. Cite dano acel acel myero gwokere i kite egero kede. Pien acakki tere ocele mom tye ame otwero cibo, kono ka maca a doŋ tye, en Yecu Kricito. Cite ka ŋattoro ogero i wi acakki tere-nono i jabu onyo i ryal, onyo gweŋe me wel, onyo yen, onyo lum, onyo aladu, tic a ŋat acel acel bino nen oko kannaler. Pien Nino-naca bino nen i mac, ame bino yeko tic a dano acel acel, nyuto kit a tye kede oko. Ka gedo a ŋattoro odoŋ, ame ogero i kom acakki tere-nu, dano-nono bino nwoŋo mot me pwoye. Aco ka ŋat a gedo mere owaŋ oko, en mom bino nwoŋo mottoro me pwoye, cite en ikome bino bwot, acalo ŋat obelo mac abela te kato. Mom iŋeo wunu ni wun ibedo wunu ot woro Obaŋa, dok Cuny Obaŋa bedo i yiwu? Doŋ ka ŋattoro onyoto ot Obaŋa, Obaŋa daŋ bino nyote oko; pien ot woro Obaŋa cil, wun ikomwu ibedo wunu ot Obaŋanono. Kur ŋattoro bwolle kene. Ka ce dano moro i akinawu tamo ni en eryek i lobo man, myero en koŋ dok amiŋo, me wek edok aryek. Pien gin ame jo me lobo man tamo ni obedo me ryeko i nyim Obaŋa bedo gin me miŋo. Pien rik ocoo ni, “En mako jo aryek i ryekogi kengi,” dok ni, “Rwot ŋeo ni tam oryeko tere mom.” Doŋ myero ŋattoro kur wakere i kom dano, pien jami luŋ megwu; kadi Paulo, onyo Apolo, onyo Kepa, onyo lobo man, onyo kwo, onyo to, onyo gin ame tye amanni, onyo gin ame bino bedo anyim; magi-nono luŋ megwu; wun daŋ mea Kricito, aco Kricito me Obaŋa. Myero inenwa wunu acalo wan otic a Kricito, kede ogwok muŋ Obaŋa. Gin a mitte i baŋ ogwok jami, en ene ni, gin myero obed jo a genne. 1 tuŋ baŋa kopporo pe ka iŋolla wunu kop, kadi okiko moro mea dano. An daŋ mom aŋolo kop i koma kena. Pien i tuŋ baŋa aŋeo ni cunya ler, cite man mom mia aloo kop. Rwot en a ŋolo koppa. Pi mannono, kur iŋol wunu kopporo a mom ru kare oromo, ape ru Rwot odwogo. En bino menyo gin ame opono i piny acol, dok bino nyuto tam a tye i cuny jo kannaler. I kare-nono Obaŋa bino pwoyo ŋat acel acel i kite a myero. Omegona, kop magi adwoggo i i koma kede i kom Apolo pirwu, me wek ipwonyere wunu i komwa te kop man, ni, “Kur ikatu gin ame ocoo”, me ŋattoro i akinawu kur wakere, kun dworo dano acel, cao ŋat ocele. Kara ŋa omio yin ibedo pat i jo ocele. Ŋo a yin itye kede a mom omii amia? Aco ka omii amia, pi ŋo iwakere kede acalo mom omii amia? Doŋ ityeko wunu yeŋ oko? Idoko wunu doŋ olonyo oko? Ityeko doko wunu rwode aboŋo wan? Kono onwoŋo amito atika ni idok wunu rwode, me wan daŋ obed rwode karacel kedwu. Pien i tuŋ baŋa nen ni, Obaŋa onyutowa wan okwena i nyim lwak icen, bala jo ame oŋolligi kop me to; pien wan doŋ odoko gin me anena pi wi podo luŋ, pi omalaika kede pi jo. Wan odoko omiŋo pi Kricito, cite wun iryek wunu i Kricito. Wan ogoro, wun itek wunu. Wun oketo kwogo i komwu, aco wan ocaowa. Ituno amanni kec tye anekowa, oryo pii acirowa, oruko-gu opeke, jo cipowa adoŋ, pacowa-gu pe; ololle kun otio i ciŋwa kenwa. Ka jo oyetowa, olammigi winyo, ka owunowa, okanyo akanya; ka obalo nyiŋwa, wan onwotte giwa anwota. Wan doŋ ocalli yugi me wi podo, wan ocilo me jami luŋ, anaka tin. Mom acoo kop man me ami alee twodwu, cite me pwonyowu acalo itinona ame amaro. Pien kadi bed itye wunu kede jo tutumia i tutumia a telowu i yo a Kricito, papawu mom tye apol. An rik adoko papawu i Kricito pi amut aber. Akawaowu, potto wunu kitena. Man en gin omio acwao Temoteo baŋwu. En atinna i Rwot ame amaro, ame genne. En bino poyo wiwu i yo a an alubo i Kricito Yecu, ame apwonyo i lwak jo oye Kricito luŋ i kabedo ducu. Jo mogo i akinawu tye atamo ni an mom abino baŋwu, omio gin tye ka wakere. Cite ka Rwot oye, abino tuno baŋwu oyot, eka ate bino niaŋ te ko a jo a wakerenono, ento mom kop a gin kobo akoba. Loc Obaŋa gire mom ocuŋ i kop ame okobo akoba ento i teko. Imito wunu ŋo? Myero abinniwu abiro onyo abin i mar kede cuny me mwolo? Kop owinyere baŋa ni timmoro me coco tye i akinawu. Tim me coco-nono mom gire nen anaka iyi akina jo a mom ŋeo Obaŋa, ni tye dano moro ame omao ci-pappere. Daŋ pwod iwakere wunu giwu! Mom daŋ ikumo wunu me ŋat otimo kodi timmono ryem oko i akinawu? An i tuŋ baŋa, kadi koma mom tye kuno, cunya tye kuno; an acalo ŋat ame tye kuno doŋ atyeko ŋolo kop oko i kom lon otimo tim arac-cu. Myero icokere wunu karacel 1 nyiŋ Rwotwa Yecu, kun nwoŋo an daŋ atye kedwu i cuny kede teko a Rwotwa Yecu. Eka ite miyo wunu dano acalo man baŋ Catan me nek kome oko, me cunye te larre i nino a Rwot. Awakawu mom ber. Mom iŋeo wunu ni tobi aduno romo yenyo ogati alutu? Kwanyu tobi acon oko, me ibed wunu aŋina ogati anyen; iyi ateni mere tobi gire mom i komwu. Pien atin romowa me Kato doŋ oŋolo oko, en Kricito. Myero doŋ mom okwer wunu ecuban i tobi acon, en tobi me raccuny kede timmogo areco, ento okwer wunu kede ogati a tobi mom iye, ame en ler yic kede ateni. Rik acoyiwu iyi waragana ni mano, kur inotte wunu i jo a timo tim me coco. Mom onwoŋo akobo jo a timo tim me coco me lobo-ni, onyo oworo me jami, kede oyak, onyo owor cal jogi; pe pire; pien ka amanne myero iyau oko i lobo. Iyi ateni mere acoyiwu ni kur inotte wunu i ŋattoro ame olwoŋo ni. Akricitayo, ka en otimo tim me coco, onyo en aworo me jami, onyo awor cal jok, aŋar ayet jo, amero, aŋar ayak; kur daŋ icem wunu i kodi dano-nu. Kom mannono mom ticca me ŋolli jo a mom oye Yecu kop. Obaŋa en abino ŋolligi kop. Wun myero iŋolli wunu jo a tye i akinawu kop, mom amannono? Ryem wunu dano arac-cu oko i akinawu. Ka dano moro iyi akinawu tye i kopporo i kom wadgi, piŋo lewic mom make me pide i nyim jo a kitegi mom atira akaka pide i nyim jo Obaŋa? Mom iŋeo wunu ni jo Obaŋa bino ŋolli jo me loba kop? Kara ka wun ibino wunu ŋolli loba kop, mom iromo wunu ŋolo koppogo atitino mege? Mom iŋeo wunu ni wan obino ŋolli omalaika kop? Kara kop a tiko kwo ame wan otye iye-ni kono? Kara doŋ ka itye wunu i koppogo me kwo a wan otye iye-ni, piŋo itero wunu i nyim jo a mom pirgi dito baŋ lwak jo oye Kricito? Akobo man me alee twodwu. Ŋattoro mom i akinawu aryek a twero tyeko kop a tye i akina omego mere? Akaka timo amannono, dano moroni dok pido ominnere anaka i nyim jo a mom oye Kricito. Ka ipidde wunu kenwu kenwu, mom nwoŋo doŋ ityeko poto wunu oko? Twara twara ikany wunu gin arac. Twara koŋ iwek wunu jo bubuowu. Akaka timo amannono, wun ikomwu dok olunyo wunu timo jo rac, kede buyo anaka omegowu daŋ. Mom iŋeo wunu ni jo a mom kitegi atir, loc Obaŋa mom bino doko megi? Kur imi bwolwu; kadi otim tim me coco, onyo owor cal jogi, onyo ocod cot, on yo jo a buto i co wadgi, onyo okwo, onyo oworo me jami, onyo omero, onyo wegi ayet, onyo oyak, loc Obaŋa mom bino doko megi. Jo mogo i akinawu rik daŋ obedo kodi jo-nono. Cite wun doŋ otyeko Iwokowu oko, otyeko lonyowu bedo jo acil, otyeko kwanowu ni wun jo a kitewu atira pi nyiŋ Yecu Kricito kede pi Cuny Obaŋawa. “Atwero timo jami luŋ.” Kakare; mano mom nyuto ni jami luŋ konyo. “Atwero timo jami luŋ,” cite mom abino ye ginnoro loka adoko opii mere. “Cem tye pi yic, yic tye pi cem.” Kakare, cite gin aryo-nono luŋ Obaŋa bino tyekogi oko. Kom mom tye pi tim me coco, ento tye pi Rwot, Rwot daŋ tye pi kom. Obaŋa cen ocero Rwot iyi akina a jo oto, dok bino cerowa daŋ i teko mere. Mom iŋeo wunu ni komwu obedo dul kom Kricito? Myero doŋ akwany dul kom Kricito, alok dok dul kom acaro? Pe twerre! Onyo mom iŋeo wunu ni dano ame notte kede alaya doko kom acel kede? Pien rik ocoo ni, “Gin aryo bino doko kom acel.” Cite ŋat a notte kede Rwot, doko cuny acel kede. Cacu tim me coco oko! Bal ocele luŋ a dano timo mom gudo kome; ento ŋat a timo tim me coco balo kome kene. Mom iŋeo wunu ni komwu en ot a Cuny Acil ame bedo i yiwu, ame Obaŋa omiowu? Wun mom imegwu kenwu. Wun owilowu awila kede wel. Pi mannono, miu komwu ket kwogo i kom Obaŋa. Doŋ me dok i kop ame ico wunu waraga pire: Ka dano mom ogudo dako, bedo ber, cite pi geŋo tim me coco, myero ico acel acel bed i cege, kede dako acel acel bed i cware. Ico myero cob mit a cege, dako daŋ cob mit a cware. Dako mom tye kede twer i kome kene, cware en a tye i twer i kome; amanono daŋ, ico mom tye kede twer i kome kene, cege en a tye kede twer iye. Kur itwon awotti komi, kono ka pi kare anonokkoro keken ame nwoŋo iyiko wunu ayika, me inwoŋ wunu kare me kwayo Obaŋa. Icennere notte wunu doki karacel, me kur Catan bitwu, pi mitwu a mom jukere. Akobo man kun aye ayea keken, ento mom amio acalo cik. Onwoŋo kono amito ni jo luŋ kono obedo bala an-ni; cite dano acel acel tye kede mottere okeme, ame Obaŋa omie, moroni tye i man, en ocele i mot apat. Baŋ jo a mom ru onyomere, kede baŋ mon a coggi oto, akobo aman, ni, bedo ber ka kono gin obedo bala an. Cite ka gin mom romo jukere kengi, myero gin nyomere, pien nyomere ber kato ico onyo dako ikanyo mit me kom. Baŋ jo a doŋ onyomere, acikogi ni dako kur kwer cware, (cite pe an aciko, Rwot gire en ociko) dok ico daŋ kur kwer cege. Ka ce dako okwero, myero en doŋ mom dok ger ico ocele, onyo odwog baŋ cware. Baŋ jo ocele mere, an ikoma en akobbo, mom Rwot, ni, ka ce Akricitayo moro tye kede cege amom oye Yecu, ce en dako-nono ye medde bedo kede, en myero mom ryeme. Ka dako moro daŋ tye kede cware a mom oye Yecu, ce cware-nono ye medde bedo kede, dako-nu myero mom kwere. Pien ico a mom oye Yecu doko acil pi cege, dako a mom oye Yecu daŋ doko acil pi cware ame Akricitayo. Ka mom amannono, kono itinowu mom bedo acil, cite gin cil gigi. Aco ka ŋat a mom oye Yecu mito pokere kede awottere, wek pokere gire. I kop acalo mano Akricitayo ame ico onyo a dako mom tye diccoro iye, pien Obaŋa olwoŋowa ni obed wunu i kuc. Kara iŋeo niŋo, yin dako, ka ibino laro cwari? Onyo iŋeo niŋo, yin ico, ka ibino laro cegi? Doŋ myero dano acel acel lub kit kwo ame Rwot omie, kede en ame Obaŋa nwaŋ olwoŋe iye. Man en gin ame aciko i lwak jo oye Kricito luŋ. Tye ŋattoro ame onwoŋo doŋ olirre i kare ame olwoŋe? En kur yeny yo me dwoko kome bedo acalo dano a mom oliro. Tye ŋattoro ame onwoŋo mom olirre i kare ame olwoŋe? En kur yeny yo me lirre. Pien bedo ame ilirre kede bedo a mom ilirre mom konyo ginnoro; ento gwoko cik Obaŋa en ame konyo. Dano acel acel bed gire i kite a rik etye kede i kare ame olwoŋe. Yin i kare ame olwoŋi rik ibedo opii? Ee ta, kur ipar. Cite ka itwero nwoŋo yo me wotte i opii, ti giri kede. Ŋat ame olwoŋo me bedo i Kricito kun en opii, en dano ame Rwot ogonyo oko i opii. Amannono daŋ, ŋat ame onwoŋo loye kene, en odoko opii a Kricito. Wun jo ame owilo kede wel; kur idok wunu opii a dano moro. Omegona, dano acel acel myero bed i nyim Obaŋa i kite a ceŋ olwoŋe kede. Kop a dok i kom jo a pe ru onyomere, mom anwoŋo cikkoro oya i baŋ Rwot, cite amio tamma iye acalo dano ame Obaŋa otimo kica, omio abedo ŋat a genne. An atamo ni, pi can ame oridowa, bedo ber ka dano moro-ni obedo kite acalo etye kede. Yin cegi tye? Kur item gonyo nyom. Yin cegi pe? Kur iyeny nyom. Cite ka inyomo, mom itimo giri balloro. Daŋ ka nyako onyomere, mom otimo gire balloro. Cite jo a nyomere bino nwoŋo ayela me kwo man, amito ni kono akwanyo ayela-nono oko i komwu. Omegona, gin akobo ene, kare doŋoridde oko; ya amanni jo a tye kede mon myero bed bala jo a pe i mon, kede jo a kumo myero bed bala jo a mom akumo, jo a lelo bed bala jo a mom alelo, jo a wilo jami bed bala jo a mom i ginnoro, jo a tio kede jami me lobo man bed bala mom atic kede, pien lobo kite a tye kede-ni bino tum oko. Amito ibed wunu aboŋo parroro. Dano a mom ru onyomo, yie paro kop a Rwot, kite a myero eyomoro kede yi Rwot. Cite dano a doŋ onyomo paro kop me lobo, kite a myero eyomoro kede yi cege, tammere popoka. Dako a mom onyomo, onyo nyako, daŋ paro kop a Rwot, me ebed acil i kome kede i cunye. Cite dako ame onyomo paro gire kop me lobo, kite a myero eyomoro kede yi cware. Akobo man pi konyowu, mom me geŋowu, cite me wek jami wot kakare, cunywu daŋ bed i kom Rwot a mom ginnoro wao tamwu teŋe. Ka lo moro tamo ni kit bedo mere i nyan ecikere kede mom tye atira, ka marrere dwon i kome, ber en tim kite a cunye omito, ka myero bed amannono. Balloro mom iye, wekgi onyomere gigi. Ento ka ŋattoro cunye tek kun mom tye ginnoro a diye, a daŋ doŋ otyeko miye me gwoko nya-nu a mom onyomere, en nwoŋo otimo ber ka ce twero loyo tammere. Ŋat onyomo nyan ame ecikere kede daŋ nwoŋo otimo ber, ento ŋat a mom onyomo nyan ame ecikere kede nwoŋo otimo ber meicel. Cik geŋo dako ya ka cware pwod kwo, cite ka cware oto, en doŋ tye i kuc me nyomere i lo a yie mito, ame tye i akina jo a Rwot keken. Cite dan-nu yie twero bedo yom ikato ka ce en obedo amannono; mano tamma, daŋ atamo ni atye i Cuny Obaŋa. Kop a dok i kom riŋo ame oyalo kede cal jogi. Wan oŋeo ni, “Wan ducu otye kede ŋec.” Kodi ŋeccono mio jo yeyea, cite mar meddi jo teko. Dano a tamo ni eŋeo ginnoro, nwoŋo mom ŋeo ginnoro kit onwoŋo myero eŋe kede. Cite ka ŋattoro ŋeo Obaŋa, Obaŋa ŋec. Doŋ kop i kom camo cem ame oyalo kede cal jogi: wan oŋeo ni “cal jok mom ginnoro a tye i lobo,” dok ni, “Obaŋa moro mom tye kono ka en acel-li.” Kadi bed tye gigi mogo ame olwoŋo ni obaŋa i polo onyo i wi lobo, kite acalo tye obaŋa apapat apol kede rwode apol, cite wan otye ka Obaŋa acel, en Papo, ame jami luŋ ya i baŋe, ame wan obedo pire; dok daŋ tye Rwot acel itac, Yecu Kricito ame mio jami luŋ bedo tye, wan daŋ obedo tye pire. Kadi bed amanno, jo luŋ mom tye i ŋeccono. Jo mogo tye a doŋ ona i cal jogi aton tin; gin cemo a kun pwod otamo ni, “Man gin ame oyalo kede cal jok,” mio tam me yigi ame nyuttigi balgi a pwod goro baile oko. Cem mom bino miyo Obaŋa pwowa; wan mom obino bedo arac ka mom ocemo, daŋ mom obino bedo aber ka ocemo. Cite gwokere wunu, me twer itye wunu kede kur dok ginnoro a mio jo poto i bal. Pien ka dano moro ame tammere me yie a nyutte ballere pwod goro, oneni yin ame itye kede ŋec icem i ot jok, mom bino medde tekcuny me camo riŋo ame oyalo kede cal jogi? Aco kono en dano agoro-ni en ominni a rik Kricito oto pire, en bino to pi ŋecci yin! Doŋ ka ibala kit man baŋ omegowu agoro, eka ite waŋo wunu tamgi me yigi a nyuttigi balgi ame pwod goro, nwoŋo ibalo wunu i kom Kricito. Doŋ ka cem mio ominna poto i bal, mom doŋ abino camo riŋo atwal-li, me kur ami ominna pot i bal. An mom aloye kena? An mom akwena? Rik mom aneno Rwot Yecu? Wun mom ibedo wunu ticca i Rwot? Ka jo mogo mom oye ni an akwena, cite i tuŋ baŋwu an akwena, pien wun ikomwu ibedo wunu anyut me kwenana i Rwot. Mano pidona ka oroka. Wan mom otye i twer me nwoŋo cemwa kede mat? Mom otye i twer me weno i dako ame Akricitayo, bala okwena ocele, kede omego a Rwot, kede Kepa? Onyo wan i Baranaba keken a myero oti pi camwa kenwa? Ŋa a woto i mony, te culo ocara mere kene? Ŋa a pito poto olok, mom te camo nyige? Akwattene a mom mato cak a ya i kom lim ame ekwao? Onyo akobo man kun ajuro kite a dano keken? Cik daŋ mom okobo kite gin acellono? Pien i cik a Muca ocoo ni, “Kur itwe dog twon ka adino kal.” En-ni Obaŋa oparo pi twoni bo? Mom ca akobo koppono pirwa? Iyi ateni mere koppere rik ocoo pirwa, pien apur myero pur kun tye kede gen, ŋat a dino daŋ myero din kun tye kede gen me nwoŋo dulloro iye. Ka wan doŋ ocoo koti me Cuny i yiwu, en-ni dok bedo kop adwoŋ adwoŋa ka wan okao jami mogo me kom a ya i baŋwu? Ka jo ocele tye i twerrono baŋwu, wan mom okatogi kede oko? Cite ba, wan mom giwa otio kede twerrono; wan giwa odio cunywa i kop luŋ me kur ori iciki me geŋo yo amut aber i kom Kricito. Mom iŋeo wunu ni, jo a tio i ot Obaŋa gin nwoŋo camgi ame oya i ot Obaŋa, dok jo a tic i kom keno me lam opokkigi gin ame oŋolo? I kite yo acellono, Rwot rik ociko ni, jo a rabo amut aber myero nwoŋ gin ame gin kwo kede pi amut aber. Cite an mom atio kede twerrono kadi acel. Daŋ mom acoo kop-pi ni kono itima wunu amannono. Pien an twara ata gira, kato ame ŋattoro mio wakerena bedo a yore mom. Ka arabo amut aber, mano gire mom gin a myero awakere iye, pien odia iye adia. Ka mom arabo amut aber, kite ame abino neno can kede! Ka atimo man i cunya kena, abino nwoŋo ocara, cite ka atimo a kun mom amito, nwoŋo a tye acobo tic ame omia. Kara an anwoŋo ŋo me ocarana? Ocarana en yomyic ame anwoŋo i rabo amut aber aboŋo miyo jo culo iye ginnoro, kun mom atio kede twer ame atye kede me nwoŋo konnyoro i baŋ jo ame arabbigi amut aber. Kadi bed an aloye kena i nyim jo luŋ, atyeko miye kena me bedo opii a jo luŋ, me anwoŋgi abup. I tuŋ baŋ Ojudaya rik abedo acalo Ajudaya, me anwoŋ Ojudaya mogo; baŋ jo a tye i te cik a Muca abedo bala ŋat a tye i te cik, kadi bed an ikoma mom atye i te cik, me anwoŋ jo a tye i te cik. Baŋ jo a mom kede cik abedo acalo ŋat a mom i cik, kun an gira mom atye aboŋo cik Obaŋa, cite atye i te cik a Kricito. 1 tuŋ baŋ jo agoro adoko agoro, me anwoŋ jo agoro. Apotto kite a jo luŋ me alar jo mogo i yo ducu. Mano atio pi amut aber, me an daŋ anwoŋ winyo moro a ya iye. Mom iŋeo wunu ni, jo a pyem i ŋwec oŋweco ducu, cite dano acel keken en a nwoŋo mot? Wun daŋ ŋwec wunu i yore ame bino miyo inwoŋo wunu mot. Dano acel acel a pyem i tuko gwokere kene i yo ducu. Mano gin otimo me onwoŋ tok kwogo aballe oko, wan otimo pi nwoŋo en a mom balle. An gira aŋwec atira a mom acacapa acacap; ka adoŋo, mom adoŋo bala ŋat a apo adoŋŋere aapa. Awuŋo koma, kun daŋ aloe bala opiina, me kur ka doŋ atyeko rabbi jo ocele kop, an dok ote kota oko. Omegona, amito iŋe wunu ni, kwariwa luŋ rik obedo i te pol, gin luŋ rik obeo i dye nam, gin luŋ daŋ rik obatija-yi i pol kede i nam, me gin obedjo a Muca. Gin luŋ rik ocamo cam acel me cuny, gin luŋ omato ginamata acel me cuny. Pien gin omato pe oya I lela me cuny ame woto karacel kedgi, lela-nono rik en Kricito. Kadi bed amannono, Obaŋa rik mom opwoo pol a jo i akinagi; pien komgi oto oradde ata i tim. Mannono luŋ odoko apor baŋwa, me kwenyorowa ni kur obed gomo gin arac acalo rik gin ogomo. Kur owor wunu cal jogi acalo jo mogo i akinagi; bala a rik ocoo ni, “Lwak obedo piny ka cem kede mat, ote ya malo i myel.” Kur oumu um me coco, acalo jo mogo I akinagi yam otimo, eka jo tutumia pyeraryo wie adek te to oko i nino acel. Kur wan oom wunu yi Rwot, acalo jo mogo i komgi yam oomo yie, eka twol te nekogi. Kur inunura wunu acalo jo mogo i akinagi yam Oŋuŋura, eka Anek te nyotogi oko. Mannono luŋ rik otimere i komgi acalo apor, ote coyo me kwenyorowa, wan jo ame agikki piny otuno i komwa-ni. Pi mannono, ŋattoro a tamo ni en ecuŋ myero gwokere kur rette. Abita moro mom omakowu a mom binni jo luŋ; Obaŋa gwoko cikere mere, mom bino ye ni bitwu atek akato ame iromo wunu kanyo, cite i kare ame Catan abitowu, Obaŋa bino miyowu yo me bwot, me ibed wunu i twer me kanyo. Amannono ba, wun ame amaro cac wunu woro cal jogi oko. Akop kedwu acalo jo ame oryeko; tam wunu kedwu kop ame akobo. Ikopo me winyo Obaŋa, a wan okwao iye winyo, mom onotte iye wunu i remo a Kricito? Pien ogati bedo nina acel, wan jo apol wok-ki obedo kom acel, pien wan luŋ onywako camo ogati acellono. Koŋ inen jo Icrael; jo a camo gin ame oŋolli Obaŋa mom gin onotte i kom keno me lam? Mano akobo niŋo? Ni nijo ame oyalo kede cal jogi obedo gmnoro onyo ni cal jogi obedo ginnoro? Pe gire. Gin ame akobo en ene ni gin ame jo a mom oŋeo Obaŋa ŋolo, gin yalo i jogi, mom oyalo Obaŋa. Mom amito inotte wunu kede jogi. Mom itwero wunu mato ikopo a Rwot kede ikopo a jogi. Mom itwero wunu cem i meja a Rwot kede dok i meja a jogi. Onyo wan omito wunu omo yi Rwot me nyeko make? Wan otye kede teko akato en? “Atwero timo jami luŋ,” cite mom jarm luŋ konyo. “Atwero timo jami luŋ,” cite mom ni jami luŋ doŋo iyee a jo. Dano kur lub gin a konyo en kene, cite lub gin a konyo awottere. Cam wunu gin luŋ ame ocato i cuk aboŋo penyo ginnoro iye pi lworo bal: Pien lobo gire mea Rwot, kede jami luŋ a tye iye. Ka dano moro a mom oye Rwot ocwanowu i cem, kun imito wunu wot iye, cam wunu ginnoro luŋ ame oketo i nyimwu, aboŋo penyo ginnoro iye pi lworo bal. Cite ka ŋattoro okobbiwu ni, “Man en gin a rik oyalli jok,” kur icamu, pi paro pi ŋat a doŋ oryonorowu-nono, kede pi tammere me cunye a nyutte ballere. Mano an akobo pi tammere me cunye en dano ocele ca, mom me cunyi yin. Piŋo kuc ame an atye kede me timo ginnoro-ni ogeŋo oko pi tam me cuny dano ocele? Ka an anywako cem kun apwoo Obaŋa, piŋo oyeta pi gin a doŋ atyeko pwoyo Obaŋa pire? Doŋ kadi icamo onyo imato wunu onyo gin ame itio wunu luŋ, tim wunu ducu pi miyo Obaŋa kwogo. Kur ibal wunu cuny Ojudaya, kadi jo Grik, onyo lwak jo oye Obaŋa, acalo an daŋ atemo yomoro cuny jo luŋ i gin ame aŋeo ducu, kun mom alaro pi gin a konya, cite alaro pi gin a konyo jo apol, me gin larre. Wop wunu kitena, acalo an daŋ awopo kite a Kricito. Apwoowu pien i kop luŋ ipoyo wunu an, kun ilido wunu pwony a rik akelliwu. Cite amito iŋe wunu ni wi ico acel acel en Kricito, wi dako en cware, wi Kricito en Obaŋa. Ico moro-ni a kwao Obaŋa, onyo a rabo kop Obaŋa, kun owumo wie oko nwoŋo oketo lewic i wie; cite dako a kwao Obaŋa onyo a rabo kop Obaŋa a kun mom owumo wie, nwoŋo oketo lewic i wie, pien mom tye apoka poka moro baŋe kede dako olyelo wie. Ka dako pe wumo wie, ber en mwor yer wie oko. Doŋ ka bedo me lewic dako ilyelo wie, onyo mworo wie, myero doŋ wum wie oko. Ico mom myero wum wie, pien en cal Obaŋa kede kwogo Obaŋa; cite en dako kwogo ico. Ico rik mom oketo iya i kom dako, dako en ame oya i kom ico. Ico rik mom oketo pi dako, dako oketo pi ico. En omio dako myero bed anyut me twer i wie, pi omalaika. Ento i Rwot, mon pe twero Cuŋ kengi aboŋo co, co daŋ mom twero Cuŋ kengi aboŋo mon; pien acalo dako rik otio iya ikom ico, i kite acellono ico daŋ dako a nywalo, dok jami luŋ ya i baŋ Obaŋa. Koŋ iŋol wunu kenwu; nen aber ka dako okwao Obaŋa kun mom owumo wie? Anaka kite ame onywalowa kede daŋ mom pwonyowu ni ka ico opito yer wie, lane? Cite dako ka opito yer wie bedo me kwogo baŋe, pien omie yer aboco-nono me wumere kede. Cite ka ŋattoro mito kela iye pyem, wan mom otye i kodi kite-nono, mom daŋ tye i akina lwak jo oye Obaŋa luŋ. Acikowu kun daŋ atye i koppogo ame mom yia yom iye i komwu, pien cokerewu konnyoro mom iye, kela ka bal keken. Kop me agege atyeko winyo ni, ka lwak ocokere karacel, apokapoka bedo tye i akinawu. An daŋ tuŋ cel aye koppono, pien eryoŋettogo myero bed i akinawu, me jo a tye aber nen oko kannaler. Pien ka icokere wunu karacel mom gire icamo wunu cam a Rwotwa, pien wun ducu ŋat acel acel ŋuko camo cemmere kene, kun jo mogo buto iye kec, mogo luŋyo mer amera. Pacciwu mom bo, me cem kede me mat? Onyo icao wunu lwak jo oye Obaŋa, ite keto wunu lewic i kom jo a mom i ginnoro? Myero akobbiwu niŋo? Myero apwowu? Pe gire atwero pwoyowu i kop-pi! Pien pwony ame apwonyowu kede, Rwot en omia, ni, i dyewor a rik oketo erupe i kome iye-nono, Rwot Yecu omako ogati; ka doŋ opwoo, onyinyilo, omiogi kun kobo ni, “Man en koma ame tye pirwu. Tim wunu man me poyo an,” Amannono ka gin ocamo otum, otiŋo ikopo kun kobo ni, “Ikopo man en cikere anyen i remona. Tim wunu man kare luŋ ame imato wunu, me poyo an.” Pien i kare luŋ ame icamo wunu ogati man, dok daŋ imato wunu ikopo-ni, nwoŋo ilalo wunu kop me to a Rwot, ituno ka en bino dwogo. En omio ka dano ocamo ogati man, onyo omato ikopo man a kun kite mere mom myero, nwoŋo en odoko abal i kom kom kede remo a Rwot. Dano acel acel myero kwon ŋiye kene, en amio en te camo ogati-ni kede mato gin iyi ikopo-ni. Pien ŋat a camo onyo mato a kun mom oniaŋ aber te kop me kom Rwot, nwoŋo en akelo ŋolo kop i kome kene ka ce en ocamo onyo omato. Mano en gin omio polwu two, daŋ igoro wunu, jo apopol otyeko to oko. Kono rik oŋolo kop i komwa kenwa kakare, kono mom oŋolliwa kop. Doŋ ka Rwot tye aŋolliwa kop, en nwoŋo apwodowa me pwonyowa, me kur ŋol kop loowa karacel i jo me lobo. Doŋ ba, omegona, ka icokere wunu me camo cam a Rwotwa, ŋat acel acel myero koŋ kur wadgi. Ka ŋat a kec aneko, myero en ge cem i paco, me kur kop lowa ka ocokere wunu. Kop ocele ame odoŋ, abino yiko ka atuno. Aco kop i kom mot a ya i baŋ Cuny Acil, omegona, amito iniaŋ wunu iye. Iŋeo wunu ni a rik pwod mom ru iŋeo wunu Obaŋa, rik irwenyo wunu ata baŋ cal jogi a mom kobo, kan ame owirowu luŋ. Pi mannono, amito iniaŋ wunu ni, mom tye ŋattoro ame Cuny Obaŋa mio kobo ni, “Yecu oceno”; daŋ mom tye ŋattoro a twero kobo ni, “Yecu en Rwot,” kono ka Cuny Acil en a mie kobo. Mot tye a kwongi papat, cite Cuny gire tye acel. Tic tye a kwongi papat ame otio pi Rwot, ento Rwot tye acel. Teko Obaŋa tio i yo apapat, cite en Obaŋa acellono en ame tio i yore luŋ i jo luŋ aluŋa. Dano acel acel tye anyut me cuny ame konyo lwak. Cuny mio dano acel kwena me ryeko; en Cuny acel-lu mio dano ocele kwena me ŋec. En Cuny acel-lu mio iyee baŋ ŋat ocele, i baŋ dano ocele en Cuny acel-lu mio mot me caŋo jo; baŋ ŋat ocele en mio mot me tiyo ginawura, baŋ ŋat ocele rabo kop Obaŋa acalo adwarpiny, baŋ ŋat ocele ryeko me poko i kin cuny apapat, baŋ ŋat ocele dumo leb apapat, baŋ ŋat ocele ryeko me gonyo leb apapat. Cite en Cuny acellono en a tio tic i mot magi luŋ; en poko mot apapat baŋ dano acel acel acalo en mito. Pien Kricito cal i kom acel ame tye iye dul apol; inwoŋo pwod en kom acel, kadi otye dul apol. Pien wan luŋ, Ojudaya kede jo Grik, opii kede jo a loye kengi, wan obatija odoko kom acel i Cuny acel-lu, wan luŋ omato en Cuny acel-lu. Pien kom dano mom tye iye dul acel, ento tye iye dul apol. Kono ka tyen rik kobbi, “Pien an gira mom a ciŋ, an mom a dul kom,” mannono mom mone bedo dul kom. Dok kono yit rik kobbi, “Pien an gira mom a waŋ, an mom a dul kom,” mannono mom mone bedo dul kom. Ka kono kom luŋ obedo waŋ, kara kono cwinyo kop iŋo? Dok kono kom luŋ obedo yit, kara kono eŋweo niŋo? Cite kite a tye kede ni, Obaŋa doŋ oketo dul apapat i kom, dul acel acel acalo en mito. Ka kono gin luŋ obedo dul acel keken, kom kono obedo kwene? Acalo tye-ni, tye dul apol, cite kom gire en acel. Waŋ mom twero kobbi ciŋ ni, “An mom amiti gira.” Wic mom twero kobbi tyen ni, “An gira mom amitowu.” Akaka mannono, dule maka me kom ame otamo ni goro mitte meicel, dok daŋ dule maka me kom ame otamo ni kwogogi mom, dule-naca en ame oruko kede kwogo akato, a kun dule komwa a nen aber mom dok mito ginnoro. Obaŋa orurubo dule me kom kun mio kwogo adwoŋ akato baŋ dule a kwogogi nok, me wek apokapoka bed mom i kom, cite me dul acel acel par pi dul wadgi. Ka dulloro acel arem, dule kom acele daŋ rem karacel kede; ka opako dul acel, dule ocele-gu daŋ notte ilelo kede. Doŋ ba, wun luŋ ibedo wunu kom Kricito, dano acel acel en dul kom Kricito. Cite Obaŋa doŋ oketo jo magi i lwak jo oye Kricito: me agege okwena, me aryo mere odwarpiny, me adekkere opwony, kede dok jo a tio ginawura, lubere kede jo ame omiogi mot me caŋo jo, jo a tio tic me konyo jo, jo a romo loyo tic, kede a dumo leb apapat. Jo luŋ obedo okwena bo? Jo luŋ obedo odwarpiny? Jo luŋ tye i mot me caŋo jo? Jo luŋ dumo leb apapat? Jo luŋ gonyo leb? Ket wunu cunywu i nwoŋo mot a pirgi dito. Aman doŋ amito nyuttiwu yo a dok ber kato. Ka adumo i leb jo kede me omalaika, kun mom atye kede mar, abedo bala olaŋ a kok, kakaŋ a kok aloŋo. Ka arabo kop Obaŋa acalo adwarpiny, kun aniaŋ i muŋ luŋ, daŋ atye i ŋec luŋ, dok ka abedo kede iyee ducu, ame aromo kobo kiddi adoŋo kan ocele, kun mom atye kede mar, an mom a ginnoro. Ka apoko jami luŋ ame atye kede, ame daŋ ajalo koma me waŋ kede mac, kun mom atye kede mar, mom konya i ginnoro. Mar dio cunye, daŋ akica; mar mom anyeko, mom wakere; mom yon, mom tio gin a mom myero, mom yenyo gin a tiko kome kene; yie mom kec, mom kwano gin arac ame otimo i kome; cunye mom bedo yom i tim a mom atira, ento cunye yom i kop me ateni. Mar dio cunye i jami luŋ aluŋa, ye kop ducu, tye kede gen i kare luŋ, kanyakino i jami luŋ. Mar mom gik; dwaro piny bino tum oko; kadi dumo leb bino gik oko; kadi ŋec bino tum oko. Pien wan oŋeo dullogo anonok keken, odwarpiny tito dulloro anonok keken; cite ka en a tye alutu obino, gin obedo dudul bino gik oko. A rik an atin, akobo bala atin, aparo bala atin; aman a doŋ ateggo-ni, doŋ atyeko weko kite me tino. Gin ame wan oneno amanni cal i tipo a nen ribiribi i araŋ; cite i kare ca obino nenne wunu waŋ i waŋ. Aman an aŋeo dulloro keken; cite i kare ca abino bedo i ŋec ducu aduca. Doŋ ba, gin adekki bedo atwal; iyee, gen, mar; ento en a pire dit a katogi luŋ, en mar. Lolle wunu pi nwoŋo mar; ketto wunu cunywu daŋ i nwoŋo mot me cuny, akato luŋ mot me rabo kop Obaŋa acalo adwarpiny. Pien dano a dumo leb apapat mom kobo i jo, cite nwoŋo en akop Obaŋa. Ŋat a winyo koppere mom; nwoŋo en akobo muŋ me Cuny Acil. Cite dano a rabo kop Obaŋa kobo i jo kun doŋo iyeegi, cuko cunygi, kweo yigi. Dano a dumo leb apapat doŋo ka iyee mere kene; ento dano a rabo kop Obaŋa nwoŋo adoŋo lwak jo oye Kricito. Amito ni wun idum wunu leb apapat, cite akato ducu amito irab wunu kop Obaŋa. Dano a rabo kop Obaŋa pire dit akato ŋat ame dumo leb apapat, kono ka nwoŋo ogonnyi jo gin ame en kobo, me kony lwak jo oye Kricito i doŋo. Omegona, kara ka an abino tuno baŋwu kun adumo leb apapat, abino bedo kede kony aŋo baŋwu, ka mom akelliwu kopporo ame Obaŋa oyabba, onyo ŋeccoro, onyo kopporo acalo mea adwarpiny, onyo pwonnyoro? Anaka kadi gin a mom kede kwo, ame kok, calo nyamulere onyo tum, ka mom dwone owinyere aber, jo bino niaŋ iŋo i wer ame akutto onyo agoyo? Kede gwara daŋ, ka mom okuto kede lwoŋo aber, kara ŋa abino yikere i lweny? En i yo acellono, ŋa abino niaŋ i gin ame ikobo wunu ka idumo wunu leb apapat, kun ikobo wunu kop a mom niaŋere? Kopwu bino ke i yamo ata. Tye kwone leb apol meicel i wi podo a daŋ gin luŋ papat, cite pe tye moro ame te koppere mom. Ka mom aŋeo leb a dano moro-ni akobo, an amyere baŋe, en daŋ amyere baŋa. Doŋ kittono ba, wun daŋ acalo iketo wunu cunywu i nwoŋo mot me cuny, tem wunu loyo jo ocele luŋ i gin ame doŋo lwak jo oye Kricito, mio cuŋ atek. Pi mano, dano a dumo leb apapat ber kwa Obaŋa konye me gonyo tere. Pien ka akwao Obaŋa a kun adumo aduma, cunya kwao, cite nwoŋo tamma mom timo ginnoro iye. Kara atim ŋo doki? Abino kwayo Obaŋa kede cunya kun akwao kede tamma daŋ; abino wer kede cunya kun awero i tamma daŋ. Ka mom amanno, ka ipwoo Obaŋa i cunyi keken, dano a tye i kabedo a jo ocele ata a mom tye kede mottono twero gamo “Amen” i pwoeci-ni i kite mene, a kun mom oniaŋ i gin ikobo? Kadi bed imio pwoc aber, mom konyo dano ocele ca i doŋo kadi acelloro. Apwoo Obaŋa pien an adumo leb apapat akato wun luŋ, cite i cokere a lwak jo oye Kricito amito kobo kop kannyoro keken kede tamma me apwony i jo ocele, akato kobo kop tutumia i tutumia a kun adumo leb aduma. Omegona, kur ibed wunu bala itino i tamwu. I timo gin arac myero ibedu itino atino, cite i tamwu bedu jo oteggo. I cik rik ocoo ni, “Abino kop kede rok man i leb a jo dumo aduma, kede i dog jo ame omyere; cite kadi bed amannono, gin mombino winyo doga, man kop a Rwot.” Mano nyuto ni dumo leb apapat omio me bed anyut baŋ jo a mom oye Kricito, mom baŋ jo oye, ento rabo kop Obaŋa tye pi jo oye, mom pi jo a mom oye. Doŋ ba, ka lwak ducu ame oye Kricito ocokere karacel kun jo luŋ iye adumo leb apapat, eka jo ocele ata, onyo jo a mom oye te bino iye, mom gin bino kobo ni wun i baŋe? Cite ka jo luŋ tye akobo kop Obaŋa acalo odwarpiny, eka dano moro a mom oye, onyo dano moro ata te bino i ot, en bino niaŋ i ballere pi gin a en owinyo i baŋ jo luŋ; kopa jo luŋ okobo bino ŋolle kop, muŋ iyi cunye en bino kela oko kannaler, eka, te bino ryebere piny, woro Obaŋa kun tuco ni, “Iyi ateni, Obaŋa kara tye i akinawu.” Kara doŋ ŋo, omegona? Ka icokere wunu, dano acel acel nwoŋo tye kede ginnoro; moro tye i wer, moro tye i pwony, moro tye i kop ame oyabbe, moro dumo leb apapat, moro ocele nwoŋo ŋeo gonyo tere. Gin-ni luŋ myero timere i yo a konyo doŋo lwak jo oye Kricito. Ka adumo leb apapat, myero bed jo aryo onyo adek, kur kat wellono, kun oleo alea, ŋat acel gonyo tere. Cite ka mom tye ŋattoro a gonyo, myero ŋat a mito kop i leb apapatono liŋ aliŋa i cokere a lwak jo oye Kricito, en kob kene kede Obaŋa. Aco jo a rabo kop Obaŋa, aryo onyo adek twero kop, kun jo ocele mere-ni ŋio kop a gin akobbo. Ka ce Obaŋa oyabo kopporo baŋ ŋat ocele ame obedo piny, dano a woki akop ca myero liŋ oko. Pien wun luŋ itwero rabo wunu kop Obaŋa kun ileo wunu alea, me jo luŋ pwonyere, dok daŋ ocuk cunygi. Jo a rabo kop Obaŋa acalo odwarpiny twero bwoyo cuny ame omiogi me rabo kop; pien Obaŋa mom won arubaruba, en gire won kuc. Acalo lwak jo Obaŋa luŋ, mon myero liŋ iti i cokere. Pien pe oyegi me kop; gin myero bed i te bwoc, acalo cik daŋ okobo. Ka ce gin mito ŋeyo kopporo, myero gin peny coggi i paco. Bedo gin me lewic meicel, dako ikop i cokere a lwak jo oye Kricito. Onyo ca itamo wunu ni kop Obaŋa rik oya i baŋwu, dok obino baŋwu wun keken? Ka ŋattoro tamo ni en arab kop Obaŋa onyo etye i mottogo me cuny, myero en ŋe ni, kop ame acoyiwu ni en cik oya i baŋ Rwot. Cite ka en mom oketo man i tam, mom daŋ obino keto tam i kome. Doŋ ba, omegona, ket wunu cunywu i rabo kop Obaŋa, dumo leb apapat daŋ kur igeŋ wunu. Ento ginnoro luŋ myero tim i kite aber, i yore i yore. Omegona, amito poyo wiwu i amut aber a rik arabo baŋwu, a doŋ igamo wunu, en daŋ a doŋ icuŋ wunu iye; en ame ilarre wunu pire, ka doŋ imako wunu atek i kit a rik arabbiwu, ka mom iye wunu nono. Pien kop a nwaŋ amiowu a pire dwoŋ me agege, en kop a rik omia, ame kobo ni, Kricito rik oto pi balwa, kun lubo coc a rik ocoo; dok daŋ ni oyike, ote cere i nino me adekkere, kun lubo coc a yam ocoo, dok ni rik onen baŋ Petero, eka te nen baŋ jo apar wie aryo ca. Te dok nen baŋ omego a kato mia abic awaŋacel; i kom jo-nono pollere pwod tye kwo, kadi mogo doŋ onino. Dok te nen baŋ Yakobo, icennere baŋ okwena luŋ aluŋa. Me agikki mere ducu, te daŋ nen baŋ, kadi bed abedo bala atin abwoggi. Pien an atidi meicel i akina okwena luŋ, ame mom myero lwoŋa ni an akwena, pien rik awuno lwak jo oye Kricito. Pi winyo ame Obaŋa omia en omio atye acalo atye-ni; winyo mere a tye baŋa-ni rik mom obedo me nononono. Rik abin amedde meicel i tiyo tic atek akato jo-nono luŋ; cite pe an gira atio, ento winyo Obaŋa en otio karacel keda. Doŋ kadi an kadi gin jo-nono, kop a wan orabo en ennono, kop ame iye wunu daŋ ennono. Doŋ ka kwena ame arabo tito ni ocero Kricito iyi akina a jo oto, piŋo jo mogo i akinawu okobo ni cer a jo oto mom tye. Ka cer a jo oto mom tye, Kricito daŋ gire mom ocero. Aco do, ka Kricito rik mom ocero, kwena ame orabo doŋ yore mom. Anaka iyee megwu daŋ yore mom. Medo kede enno, wan daŋ ocaden me goba i kom Obaŋa, pien wan okobo kop i kom Obaŋa ni en ocero Kricito, cite ka cero jo mom tye, rik daŋ mom ocere. Pien ka cero jo oto mom tye, Kricito daŋ rik mom ocero. Cite ka Kricito rik mom ocero, kony me iyeewu daŋ mom, nwoŋo pwod itye wunu i balwu. Man doŋ tere ni jo onino i Kricito doŋ orwenyo oko odoco. Ka genwa i kom Kricito konyo ka i kwo me kare-ni keken, wan doŋ otye arac akato jo luŋ. Cite iyi ateni mere, Kricito doŋ ocere oko iyi akina a jo oto, en tye acalo wi mwaka a jo onino oko. Pien dano en ame okelo to, dok daŋ cer a jo oto dano en ame okelo. Pien acalo jo luŋ to iyi Adam, en i kite acellono jo luŋ obino miyogi kwo iyi Kricito. Ento ŋat acel acel i kakare: me agege Kricito, me wi mwaka, eka icennere jo a Kricito i kare me dwogo mere. Eka agikki piny te bino tuno, ame Kricito bino miyo iye loc iciŋ Obaŋa Papo, ame doŋ otyeko turo kwone loc kede twer kede teko luŋ. Pien en myero bed i loc, ituno ka Obaŋa bino keto okworrere luŋ piny i te tyene. Akwor ame obino turo me agikki en to. Pien rik ocoo ni, “Obaŋa oketo jami luŋ i te twerrere.” Ka okobo ni “oketo jami luŋ,” nen kannaler ni mom okwano iye Obaŋa ikome, ame oketo jami luŋ aluŋa i te loc a Kricito. Ka doŋotyeko keto jami luŋ i te loccere, en Wod ikome daŋ obino keto i te loc Obaŋa, me Obaŋa doŋ bed jami luŋ iyi jami luŋ. Eyo, ka jo oto mom bino cer, kara doŋ tye niŋo baŋ jo a batija pi jo oto? Ka ce cero jo oto mom tye kadi acelloro, kara piŋo dok gin batija pirgi? Piŋo wan daŋ ocuŋ kan arac caa luŋ? An gira ato nino luŋ, omegona; mannono akobbiwu atir, pi wakere ame atye kede i komwu i Rwotwa Yecu Kricito. Ka rik aromo kede leyi ager i Epeco, acalo jo kobe-ni, kara konnyene ame anwoŋo iye? Ka cero jo oto mom tye, doŋ ber “ocamu, omatu, pien diki wan obino to.” Kur imi bwolwu: “Bedo i jo areco balo kite abeco.” Dwog wunu cen i tam atira a mom me mero, ite giko wunu bal. Pien jo mogo mom tye i ŋeccono i kom Obaŋa. Akobo man me alee twodwu. Cite gwok onyo ŋattoro bino penyo ni, “Jo oto ocerogi niŋo? Kite kommene a dok gin bino nwoŋo?” Yin imiŋ amiŋa! Ka icoo koti i poto, pe nwoŋo kwo, kono ka koŋ oto oko. Gin a yin icoo en koti nono, onyo koti kal onyo koti me kite ocele, mom kom ginapita ame bino doŋo. Cite Obaŋa mie kom acalo rik oyero, koti acel acel kede kit kome. Riŋo kom gin akwo luŋ mom bedo rorom; mea dano pat, mea leyi pat, mea winyi pat, mea rece daŋ pat. Dok daŋ tye kom me polo kede kom me lobo; ento kwogo a maca me polo i yore, kede kwogo a kom me lobo daŋ i yore. Cen tye kede kwogo mere, kwogo a dwe daŋ pat, kede acer-gu daŋ kwogogi papat; pien kadi i akina acer tye iye kwogo papat. Tye daŋ amannono i kom cer a jo oto. Koti ame ocoo en gin atop; ka doŋ ocero mom dok to. Ocoo ame kwogo mere pe, ocero ame kwogo mere tye; ocoo ame goro, ocero ame tye kede teko. Ocoo i kom me lobo man, ocero i kom me cuny. Ka tye kom me lobo man, anaka kom me cuny daŋ tye. Rik ocoo ni, “Dano me agege, Adam, odoko gin akwo”; cite Adam me agikki odoko cuny a mio kwo. Mom kom me cuny en a kwoŋo bino, cite kom me lobo man; eka me cuny te bino icennere. Dano me agege rik otio kede apua me Iobo; dano me aryo mere oya i polo. Jo me lobo cal i dano ame otio kede lobo; aco jo me polo daŋ ocal i dano oya i polo. Doŋ acalo wan oruko cal a dano ame otio kede lobo, amannono daŋ obino ruko wunu cal a dano ame oya i polo. Man en gin ame akobbiwu, omegona, ni, gin a tye i kom kede remo mom twero nwoŋo loc Obaŋa, gin a top daŋ mom twero nwoŋo gin a mom top. Koŋ iwiny wunu muŋ man, ni, mom wan luŋ obino nino, cite wan ducu obino lokowa, ipao, bala waŋ atutuba, ka apel me agikki okok. Pien apel bino kok, eka ote bino cero jo oto kun mom dok obino to, wan daŋ obino lokowa. Pien gin abaile myero rukere kede gin a mom balle, gin a to-ni myero rukere kede gin a mom to. Ka gin a baile doŋ orukere kede gin a mom baile, dok ka gin a to doŋorukere kede gin a mom to, eka kop a rik ocoo te bino cobere kakare, ni, “To doŋ omwonyo oko, oloo oko atwal.” “To we, ane locci kara? To we, ane kwirri kara?” Kwir a to en bal, teko a bal tye i cik. Ento myero opwoo wunu Obaŋa ame miowa loc pi Rwotwa Yecu Kricito. Pi mannono, omegona ame amaro, cuŋ wunu ikiŋ aboŋo yeŋere, kun imedde wunu i tic a Rwot nino luŋ, kun iniaŋ wunu ni, i Rwotwa lollewu mom me nono. Aco kop a mako rayo lim me konyo jo Obaŋa: kit a rik aciko lwak oye Kricito me Galatia ni oti, wun daŋ tim wunu amannono. Nino a geo me cabit acel acel, dano acel acel i akinawu myero pok limmogo ket pat, kun lubo kit a en nwoŋo, eka te kano, me kur ra limwu i koma, a doŋ an abino. Ka en atuno abino cwayo jo ame wun iyero wunu me wot tero motwu i Jerucalem, kun amiogi waraga. Aco ka ce nen ni ber an daŋ iwot, gin bino wot karacel keda. Abino tuno baŋwu a doŋ awoto abeo i Makedonia, pien abino bea i Makedonia. Gwok onyo abino dikere baŋwu pi kare mogo, aŋar onyo pi kare me koyo ducu, me ite konya wunu i wotta kan ame abino dok wot iye. Pien mom amito nenowu me i malo malo; ageno ni abino bedo baŋwu kare alalac, ka Rwot oye. Ento abino bedo i Epeco ituno i kare me Pentekote, pien doŋ oyabba yo alac me tiyo tic atek, dok jo a geno tic pol. Ka Temoteo obino, nen wunu ni en obedo baŋwu aboŋo Iworo moro, pien en daŋ tio tic a Rwot bala an ikoma, ŋattoro mom myero cac, ento konye wunu me ewot i kuc, me tun baŋa, pien akure kede omegowa. Kop i kom ominwa Apolo, rik akwae meicel ni koŋ tun baŋwu, karacel kede omego ocele, en mom te mito bino kadi acelloro, i kare-ni; cite doŋ bino tuno ka ce en onwoŋo kare aber. Kiu piny, cuŋ wunu ikiŋ i kom iyeewu, bed wunu co ikome, bedu kede teko. Gin itimo wunu ducu, tiu kede mar. Akwaowu ba, omegona. Iŋeo wunu Citepana kede jo ame i ode, ni gin jo ame ogeo doko Okricitayo i lobo Akaya, daŋ gin omiye kengi i tic pi jo Obaŋa. Doŋ wun daŋ ba, myero iwiny wunu kodi jo-nono, kede jo ocele luŋ ame lolle kun otio karacel kedgi. An cunya yom i bino a Citepana gin kede Portunato kede Akaiko, pien gin ocuŋ akakarwu. Gin doŋ odwoggo cunya, kede cunywu daŋ. Kodi jo-nono myero itamu pirgi. Lwak jo oye Kricito luŋ a tye i Acia omotowu. Akwila kede Puricika omotowu atek i Rwot, karacel kede lwak cokere jo oye Kricito a i otgi. Omego luŋ omotowu. Motte wunu kenwu kenwu kede amot acil me mar. An Paulo amotowu i coc me ciŋa. Ŋat a mom maro Rwot myero cen oko. Biye Rwotwa! Winyo a Rwotwa Yecu bed kedwu. Mar mera bed kedwu luŋ i Kricito Yecu. Amen. Waraga man oya i baŋ Paulo ame en akwena a Kricito Yecu pi mit Obaŋa, kede baŋ ominwa Temoteo. Baŋ lwakjo oye Obaŋa a tye i Korinti, karacel kede jo Obaŋa luŋ a tye i lobo Akaya luŋ. Obaŋ Papawa kede Rwotwa Yecu Kricito miwu winyo kede kuc. Myero opwoo wunu Obaŋa Papa a Rwotwa Yecu Kricito, Papo ame akica, Obaŋa ame kweo cuny jo luŋ. En kweo cunywa i canwa ducu, me wan daŋ obed i twer me kweyo cuny jo a tye kede cannoro apapat, kun okweo cunygi i yo acellono ame Obaŋa kweo kede cunywa. Kit acalo can adwoŋ ame Kricito okanyo opoto i komwa daŋ, amannono daŋ pi Kricito wan daŋ okweo cunywa meicel. Ka ce wan oneno can, mano mio okweo cunywu, dok inwoŋo wunu larre; ka okweo cunywa, mannono daŋ mio okweo cunywu, ite nwoŋo wunu daŋ teko me kanyo kite can acel ame wan okanyo-ni. Wan otye i gen atek i kom Obaŋa pirwu; pien oŋeo ni, ka inywako wunu kite can a wan okanyo, amannono daŋ obino kweyo cunywu i kite a yam okweo kede cunywa. Omegowa, wan omito ni iniaŋ wunu i kom can a wan oneno i Acia; peko mere odiowa okato kare oko a mom dok kanyere, omio pe doŋ ote bedo kede gennoro me bedo kwo. Wan rik oŋeo ni doŋ otyeko ŋolliwa kop me to. Mano otimere me kur ojeŋere i komwa kenwa, cite ojeŋere i kom Obaŋa ame cero jo oto. En larowa i can me to arac a rom man, dok daŋ bino larowa; wan daŋ omoko genwa i kome ni bino larowa doki. Myero inotte wunu kedwa i kwac, me jo apol pwo Obaŋa pirwa, pi gin aber ame otimo baŋwa pi kwac a jo apol. Gin a wan owakere iye ene: oŋeo i cunywa ateni ni wan okwo i wi lobo man, akato mere wan okwo kedwu, aboŋo balloro, kun yiwa ler i kite ame Obaŋa mito, pe pi ryeko a dano, cite pi kony ame Obaŋa omiowa. Wan ocoyiwu ka gin ame itwero wunu kwano kede niaŋ iye. Ageno ni ibino niaŋ wunu atut, kite acalo doŋ iniaŋ wunu anonok ni, i nino a Rwotwa Yecu ibino wakere wunu pirwa bala wan ame daŋ obino wakere pirwu. Rik aniaŋ man aber, omio rik ayiko ni koŋ age weno baŋwu, me inwoŋ wunu winyo iryo. Pien onwoŋo rik amito ni abe baŋwu i wotta i Makedonia, kede i dwogona i kuno, me ite konya wunu i wotta i Judaya. I kare ame ayiko amannono onwoŋo mom acacaba i koppa. Mom ayiko acalo dano moro ame koŋ ye, te dok kwero. Acalo Obaŋa genne, kop a yam wan okobbiwu mom okobo ote dok kwero. Pien Yecu Kricito Wot Obaŋa a rik wan i Cilvano kede Temoteo orabo pire baŋwu pe obedo ŋat ame ye eka te dok kwero, cite en doŋ omoko kop Obaŋa; i en gin ame Obaŋa ociko ni etimo luŋ ocobere i kome. Mano en gin omio wan okobo Amen i Yecu Kricito pi miyo Obaŋa kwogo. Ŋat a miowa Ocuŋ atek karacel kedwu i Yecu Kricito, dok owirowa i moo, en Obaŋa. En doŋ omwono anennere oko i komwa, dok omio Cuny mere i yiwa, me moko ni en bino miyowa ginnoro ducu ame en ociko. Alwoŋo Obaŋa me bedo cadenna kun akobbiwu i cunya luŋ ni, gin omona bino i Korinti, pien onwoŋo amito timowu kica. Mom ni wan otye i twer i kom iyeewu, cite wan otio kedwu karacel me ibed wunu ilelo, pien icuŋ wunu atek i kom iyee. Ento i tuŋ baŋa onwoŋo atamo ni dwogowa baŋwu kur kelliwu waŋcuny. Kara ka an awaŋo yiwu, ŋa a bino yomoro cunya? Mom en dano ame an awaŋe cunyenono? En gin omio rik acoo waraga-naca baŋwu, me ka abino, jo a myero yomoro cunya kur waŋ yia; pien an onwoŋo ageno wun luŋ kun aŋeo ni, yomcunya en yomcunywu wun luŋ. Rik acoyiwu waraga kun pig waŋa cwer adwoŋ meicel pi cwercuny kede kumo ame abedo kede, pe pi waŋo yiwu, cite me iŋe wunu mar adwoŋ ame atye kede i komwu. Ka ŋattoro okelo waŋyic, mom nwoŋo owaŋo yia kena, ento nwoŋo otemo waŋo yiwu luŋ, kun mom amito dok anukino wok. Kodi dano-nono, can apol ame Iwak nwoŋo oketo i kome twero romme; en omio myero itimme wunu kica, dok ikwe wunu cunye, me atot ya cwercunye adwoŋ okato kare kur nue oko. Man omio abako doga baŋwu, myero inyut wunu marwu baŋe. Man en kop omio rik acoo waraganaca, me temowu, wek anen ka iwinya wunu i yore ducu. Ŋattoro ame itimo wunu kica, an daŋ atimme kica. Pien ka atimo kica i ginnoro, atimo pirwu i nyim Kricito, me Catan kur lowa kede ryeko mere, pien wan mom okwia tammere. A doŋ atuno i Teroa pi rabo amut aber i kom Kricito, rik anwoŋo oyabba yo; cite cunya pe opye, pien pe anwoŋo ominwa Tito kuno. Mano okela ciko jo kuno, ate kato i Makedonia. Myero opwou Obaŋa ame nino ducu telowa i dorre me nyuto loccere, dok tio kedwa me miyo Kricito ŋeye, acalo gin akur a ŋwece kuto i kabedo luŋ. Pien wan ocal i gin akur ame Kricito owaŋŋi Obaŋa, ame ŋwece kuto, ŋweye baŋ jo a tye i yo me larre kede jo a tye i yo me rwenyo odoco. Baŋ jo a tye arwenyo, ŋwccwa obedo gin oto a kela to; baŋ jo a tye a larre, ŋewcwa obedo gin akwo a kela kwo. Kara ŋa a twero tic man? Pien wan mom ocal i pol a jo, ame rubo kop Obaŋa kede kop ocele; ento wan orabo ka kop Obaŋa, orabo i Kricito ame cunywa ler i nyim Obaŋa, acalo jo ame Obaŋa ooro. Wan dok ocako dworre kenwa? Onyo ca omito waraga me dworo wa baŋwu, on yo balo ame icoo wunu? Wun ikomwu ibedo wunu waraga me dworowa, ame ocoo i cunywa, ame jo ducu twero ŋeyo kede kwano. Wun daŋ doŋ inyuto wunu oko ni ibedo wunu waraga ame oya i baŋ Kricito, ame wan okelo. Pe ocoo kede bwino, pe ocoo i kom kidi; cite ma ka kidi, Kricito ocoo i yi dano kun coo kede Cuny Obaŋa akwo. Gin omio akobo amannono, pien ojeŋere atek i kom Obaŋa pi Kricito. Wan ikomwa mom oromo kobo ni ginnoro oya i baŋwa; tekowa luŋ oya ibaŋ Obaŋa. En daŋ ame omiowa oromo bedo otic me cikere mere anyen, pe me cik ame ocoo acoa, cite me Cuny; pien gin ocoo acoa kelo to, ento Cuny Acil kelo kwo. Cik a rik ogoro kede nukuta i kom kidi apaa ame ticcere kelo to, rik obino kede kwogo, omio neno waŋ Muca te loyo jo Icrael oko pi acara me nyim Muca, ame en acara-nono te rwenyo oko. Eyo, tic a Cuny Obaŋa, kwogo mere mom bino kato maca atek ateka? Pien ka tic a mio kop loo jo tye kede kwogo, kara tic a kela kwano jo ni kitegi atira kwogo mere mom doŋ kato maca oko? Aman gin a yam tye kede kwogo doŋ odoko gin a mom tye kede kwogo kadi acelloro, pi kwogo ocele a doŋ kate atek ate ka. Pien ka gin ame obin orwenyo oko obino kede kwogo, gin a ri myero doŋ bed i kwogo akato. Pien wan otye kede kodi gen man, en omio okobo kede tekcuny. Mom dok ocal i Muca a rik owumo waŋe i boŋo, me jo Icrael kur nen kite ame acara arwenyo kede i waŋe, te tum oko. Cite onwoŋo tamgi rik owumere oko; anaka tin tamgi pwod owumere i kite acellaca ka akwannigi cikere acon, pien awummaca twero kwanyere ka pi Kricito keken. Naka i kare a tin-ni ka okwannigi cik a Muca, awum pwod bedo kakare, wumo tamgi oko. Cite ka dano moro-ni olokere baŋ Rwot, awummaca walakino oko. Rwot ame okobo kan-ni en Cuny Acil; kan a Cuny Rwot tye iye, kuno kuc daŋ tye iye. Kede wan luŋ ame awum doŋ okwanyo oko i waŋwa otye acalo araŋ ame mio kwogo a Rwot nen acalo acara cen, omio otye ka lokere doko calo en, kun kwogo mere medde ameda i komwa; mannono tic a Rwot, ame en Cuny Acil. Pi mannono, wan ame oorowa i tic man pi kica Obaŋa cunywa mom dok adok cen. Wan doŋ odag kite ducu ame okano, kede me lewic; daŋ okwero tic me bwol oko kede dwanyo kop Obaŋa, ento pi kobo kop me ateni kannaler wan ogeno ni ŋec ame tye i cuny dano acel acel ame nyutte ballere bino pwoyowa. Ka ce amut aber a wan okelo owumere oko, nwoŋo owumere ka i baŋ jo a tye arwenyo odoco. Gin jo a mom ye-nono, obaŋa me lobo man doŋ owumo tamgi oko me gin kur nen lero me amut aber i kom kwogo a Kricito, ame en cal Obaŋa ikome. Wan mom orabo kop i komwa kenwa, cite i kom Yecu Kricito ame obedo Rwot, ame wan ikomwa wan omirowu pi Yecu. Pien Obaŋa a rik okobo ni, “Lero myero ryeny kun ya i colpiny”, en a doŋ oryeny i cunywa, omiowa lero me ŋeyo kwogo Obaŋa ame oryeny i waŋ Kricito. Cite wan jo ame otye kede lonyo man ocal i tabo ame ocweo i lobo, me nyuto ni teko adwoŋ me twer obedo me Obaŋa, mom ya i baŋwa. Odiowa tuŋŋi i tuŋŋi, cite pe oridowa ame okato kakare; tamwa ocuŋ oko, cite genwa pe oballe; owunowa cite mom owekowa ata; ocanyowa piny, mom daŋ oto-gu. Nino luŋ wan oyeo to a Yecu i komwa, me kwo a Yecu daŋ nen oko kannaler i komwa-ni. Pien nino ducu wan ame okwo omiye me to pi Yecu, me kwo a Yecu nen oko kannaler i komwa ato-ni. Omio to tye atic i komwa, cite kwo tye atic i komwu. Wan otye i kit cuny acellono, me iyee a rik omio ocoo ni, “Aye, en omio ate kobo”; wan daŋ oye, omio otye okobo. Wan oŋeo ni ŋat ocero Rwotwa Yecu bino cero wan daŋ karacel i Yecu, kede kelowa i nyime wan kedwu. Pien mano ducu otimere pirwu, me ka kica Obaŋa omedde baŋ jo apol, gin daŋ omedde kede pwoc adwoŋ ame kelli Obaŋa kwogo. En gin omio cunywa mom dok adok cen. Kadi bed kwowa me oko tye aballe oko, cite kwo me yiwa tye aroc, adoko anyen didik. Pien awunawa yot, tye pi kare anonokkoro keken, daŋ tye ka yikkiwa kwogo apek a mom tum, ame dwoŋ atek akato; pien mom ociko waŋwa i kom gin a nen, cite i kom gin a mom nen. Gin ame nen tye pi kare anonokkoro keken, ento gin a mom nen perakino nakanaka. Pien wan oŋeo ni ka komwa me lobo man oballe oko, a wan obedo iye acalo i kema-ni, wan otye kede gedo ocele ame Obaŋa bino miyowa, ot a mom ogero kede ciŋ, ot a tye doŋ atwal i wi polo. Iyi ateni mere wan otye ocucura i kema man, kun omito atek ni rukwa kede kabedowa ame ya i polo, me odok i kom man, me ka doŋ oruko, mom obino nwoŋowa otye onoro. Pien ka pwod otye i kema man, ocucura pi cwercuny ame onuowa; mom ni mano omito ni obed a pe orukere, cite omit-ti orwak kom anyen i wi man, me kwo te mwonyo gin ame to oko. Ŋat ame oyikowa pi kop man ikome en Obaŋa, daŋ en omiowa Cunye acalo gin a moko ni en bino cobo gin eciko. En omio nino luŋ odio giwa cunywa aber, kun daŋ oŋeo ni, ka wan otye i paco me komwa-nie, obedo bor kede Rwot, pien kwowa cuŋ i kom iyee, pe i neno piny. Wan odio cunywa giwa aber, kun otamo ni twara owot owek komwa oko, obed doŋ paco baŋ Rwot. Doŋ ka otye paco kan onyo kuno, oketo cunywa i bedo jo a yomoro yie. Pien wan luŋ myeroonen kannaler i nyim Kricito me ŋolliwa kop, me dano acel acel nwoŋ gin otike ame lubo kite a yam otio kun tye i kom, ka ber ka rac. Doŋ acalo wan oŋeo ni Rwot myero alwora, wan otemo waya tam a jo, kun kitewa nen oko kannaler baŋ Obaŋa; daŋ ageno ni kitewa onen baŋwu daŋ, i ŋec a tye i cunywu ame nyuttiwu bal. Wan mom dok odworre kenwa, cite otye ka miyowu gin a myero iwakere wunu kede pirwa, me ibedu kede yo me gamo dog jo a wakere pi gin a nen i oko, mom pi kite a dano tye kede i cunye. Ka yam wan opoo oko, opoo giwa pi Obaŋa; ka wiwa tye atic aber, mano bino konyowu. Pien mar a Kricito diowa, pien wan doŋ oŋolo aman ni, ŋat acel oto pi jo luŋ; mano omio jo luŋ doŋ oto. En rik oto pi jo luŋ, me jo akwo kur medde bedo kede kwo pirgi kengi, cite gin bed kede kwo pi ŋat a rik oto te cer pirgi ca. En omio ya amanni, wan mom oŋeo dano moro i kite me lobo man; kadi rik wan oŋeo Kricito i kite me lobo, mom dok oŋee kittono. En omio ka ŋattoro tye i Kricito, en bedo gin ame oketo anyen; gin acon nwoŋo doŋ orwenyo oko, gin anyen doŋ olunyo kakare. Mano ducu obedo tic ame Obaŋa otio, ame rik odwoggowa kede baŋe pi Kricito, daŋ te miyowa tic me dwoggo jo baŋe; ni mano, i Kricito, Obaŋa onwoŋo rik tye adwoggo jo i lobo baŋe, kun mom okwano balgi i komgi, daŋ omiowa kop me kwena i kom kite ame en doŋ odwoggogi kede. En omio wan odoko okwena, owaŋ Kricito; Obaŋa kwaowu kede dwonwa, wan daŋ obako dogwa baŋwu akaka Kricito ni, weku Obaŋa dwoggowu baŋe. Ŋat a rik mom ŋeo bal, Obaŋa oloko odoko abal pirwa, me wek pire wan odok jo a nywako kite Obaŋa a tye atira. I ticwa karacel kede Obaŋa daŋ okwao ni, kit a doŋ inwoŋo wunu kede winyo Obaŋa, kur iweku balle nono. Pien en rik okobo ni, “Rik awinyi i kare me timo jo ber, rik akonyi i nino me larre.” Nenu ba, man en kare ame otimmi iye jo ber. Tin en nino me larre. Wan giwa mom orio iciki moro i yo ŋattoro, me kur jo kob ni ticwa rac; cite i kare ducu wan onyuto berwa kenwa acalo wan otic Obaŋa kun okanyakino atek meicel, i aroma kede can kede peko ame oridowa. Opwodowa, otweowa i buc, otugo Iwak i komwa; tic odiowa, nino kede cam oremowa. Onyuto ni wan otic Obaŋa pi kitewa acil, pi ŋecwa, pi diyo cunywa kede pi kicawa; pi Cuny Acil, kede pi marwa ame goba mom iye, pi rabo kop me ateni, kede pi teko Obaŋa. Wan omako jami romo me kite atira i ciŋwa tuŋ cem kede tuŋ cam. Oketo kwogo i komwa, daŋ oketo lewic i komwa; oyetowa, daŋ opakowa. Oterowa acalo ogoba, aco kara wan jo me ateni. Oterowa acalo jo a mom ŋeye, ento oŋeye meicel. Olokowa obedo acalo jo oto, kara wan giwa jo akwo. Kadi timwa cucu, mom onekowa; kadi miwa kumo, yiwa giwa bedo yom i nino luŋ; onen acalo ocan, cite wan omio jo apol odoko olonyo; wan onen bala mom otye i ginnoro, kara bo otye kede jami luŋ. Wun jo me Korinti ba, wan doŋ okobo kedwu kannaler, doŋ oyabbiwu cunywa alac. Wan mom oceggiwu cunywa, ento wun aye iceggiwa cunywu oko. An akobo kedwu acalo itinona; kite a wan otimowu kede, wun daŋ itimo wunu amannono; yabbiwa wunu cunywu alac. Kur inotte wunu karacel ŋo a mom oye Yecu, pien pe irom wunu. Kara kite atir kede tim areco twero bedo owot iŋo? Lero kede colpiny twero notte bedo karacel iŋo? Kricito kede Belial tamgi twero rwatte? Gin aŋo ame dano ame oye Yecu twero nywako gin kede dano a mom ye? Kara ot Obaŋa twero notte niŋo i cal jogi? Pien wan obedo ot Obaŋa akwo; acalo en Obaŋa doŋ okobo ni, “An abino bedo i yigi, abino wowota i akinagi, abino bedo Obaŋagi, gin daŋ obino bedo jona. Doŋ ber iya wunu oko i akinagi, pokere wunu kedgi oko, man kop, a Rwot, kur igud wunu ginnoro me kwer; mio an abino jolowu, abino bedo papawu, wun daŋ ibino bedo wunu awobena kede anyirana; man kop a Rwot Won Twer Ducu.” Wun ame amaro, cikere-nono rik ociko pirwa. Pi mannono, myero wan olonyere wunu kenwa i ginnoro luŋ ame lila komwa onyo cunywa, kun olworo wunu Obaŋa, wek odok wunu jo acil ikokome. Yabbiwa wunu cunywa; wan mom otimo ŋattoro rac, mom obalo ŋattoro, mom obuo ŋattoro pi mito lim. Mom akobo man me kop lowu, pien rik akobbiwu koŋ ni wun ilittiwa wunu meicel, me oto dok okwo karacel kedwu. Atye kede gen meicel i komwu; awakere daŋ atek pirwu. Cunya okwe aber, apoŋ kede yomcuny i canwa ducu. Anaka i kare a wan otuno i Makedonia mom onwoŋo weo moro. Can onwoŋo ogurowa tuŋŋi i tuŋŋi; daa i akina jo kede lworo iyi cunywa. Ento Obaŋa ame kweo cuny jo a can obwoo, okweo cunywa i bino a Tito. Mom pi bino mere keken, cite daŋ pi kite a wun ikweo wunu kede cunye. En okobbiwa mitwu atek me nena, waŋcuny ame itye wunu kede, kede kit ilaro wunu pira, te medo lelona ameda. Kadi bed waraga mera ca rik owaŋo yiwu, an mom aŋut pi coyo, kadi bed rik aŋut, pien aneno ni waraga ca owaŋo cunywu pi kare moro. Aman an yia yom, pe ni pien awaŋo yiwu, ento pien waŋcunywu omio iŋut wunu. Waŋcunywu-nono onwoŋo oya ibaŋ Obaŋa, me kur inwoŋ wunu cannoro pirwa. Pien waŋcuny ame Obaŋa mio kelo ŋut ame tero jo i larre, aboŋo weko podo moro; ento waŋcuny me lobo kela to. Koŋ inen wunu kite ame Obaŋa otio kede waŋcunywu! Nen kite a doŋ iketo cunywu kede, kite a doŋ iketo wunu teko me nyuto ni ipe wunu i bal, kite akemowu, kite lworowu, kite mitwu atek me nena, kite ilaro wunu kede pira, kite iculo wunu kede kwor! I yo luŋ wun doŋ inyutte wunu oko kenwu ni mom itye wunu kede balloro i koppono. Omio kadi bed acoyiwu waraga, mom acoo pi ŋat otimo gin arac i kome, ento acoo me kit ame ilaro wunu kede pirwa nen oko kannaler baŋwu i nyim Obaŋa. Man en gin omio yiwa doŋ okwe. Medo i kom kwecunywa, rik olelo daŋ meicel pi yomcuny a Tito, pien wun luŋ ikonyo wunu kweyo yie. Kadi bed rik awakere i nyime pirwu, lewic mom omaka; ento kite a rik kop luŋ a wan obedo kobo baŋwu obedo me ateni, kite-nono wakerewa i nyim Tito obedo me ateni. Ka en poyo winywu wun luŋ, kede kite ame ijole wunu kede i lworo dok i myelkom, mar medde ameda i yie i komwu. An alelo, pien atye i gen adwoŋ i komwu i yore luŋ. Omegowa, wan omito iŋe wunu pi cuny me kica ame oya ibaŋ Obaŋa ame onen baŋ Iwak jo oye Kricito luŋ a tye i Makedonia. Gin okanyo awunawuna ame otemogi kede atek, cite gin ame oya ilelo adwoŋ a gin obedo kede i dye twon can a rik odiogi ca, en lonyo adwoŋ me cuny a gin obedo kede me miyo mot. Pien atwero kobo atira ni gin rik omio gin ame gin oromo miyo, kede akato daŋ ame gin romo miyo, kun omio i mitgi gigi kengi. Gin okwaowa kun obako doggi ni otim ber, oye gin oribere kedwa i konyo jo Obaŋa. Rik gin otio ame okato genwa oko, pien gin okwoŋo miye kengi baŋ Obaŋa, eka pi mit Obaŋa gin te miye baŋwa daŋ. Wan ote cuko cuny Tito ni, kite acalo rik doŋ ecako kede tic man me kica i kinwu, myero daŋ doŋ ecob oko. Doŋ acalo wun iloo wunu jo i yore luŋ, i kom iyee, i kobo kop, i ŋec, i keto cunywu kede marwu i komwa, ber ilo wunu jo daŋ i tic man me kica. Man ame akobo mom obedo cik ame amio, ento anyuttiwu kite a jo ocele keto kede cunygi, me anen marwu ka mar me ateni. Pien iŋeo wunu cuny aber ame Rwotwa Yecu Kricito obedo kede; kadi rik en alonyo, ento pirwu odoko acan, me i cannere wun idok wunu olonyo. Man tamma ame amio i kop man: twero bedo ber kono ityeko wunu oko gin a rik igeo wunu i mwaka okato. Rik ibedo wunu me agege, mom i tic keken, ento i ye me tiyo tic daŋ. Aman amito imedde wunu anyim i ticwu-naca, icob wunu oko. Bed wunu i mit me tyeko a rom aroma i en a rik igeo wunu kede, kun ikwanyo wunu i kom gin a tye baŋwu. Obaŋa gamo mot a dano tye kede, tekki mittere me miyo tye; mom paro gin a en pe kede. Mom akobo ni jo ocele bed aber, wunu can diwu, ento ni jo bed rorom. Kite ame aman wun itye wunu kede abup-pi, kony wunugi i kom cangi, me ka cennoro gin tye kede abup, gin daŋ konywu i kan orem i baŋwu, te doŋ bedo arorom; acalo rik ocoo ni. “Ŋat ocoko abup, moro mom odoŋŋe, ŋat ocoko aduno, moro mom orem.” Wan opwoo Obaŋa pien oketo i yi Tito mit adwoŋ a rom i megwa me konyowu. En mom ojolo ka kwacwa keken, cite cunye tye iye atek, omio en abino baŋwu pi mittere, kene. Wan oore karacel kede ominwa ca ame ŋeye meicel baŋ lwak oye Kricito luŋ pi kite a en rabo kede amut aber. Mom enno keken, ento Lwak oye Kricito luŋ rik daŋ oyere me wot karacel kedwa i tic man me kica ame wan otye ka tiyo pi miyo kwogo baŋ Rwot kede pi mitwa me miyo kony. Wan otemo gwokere me kur ŋattoro nwoŋ balloro i kom kit a wan otic kede i kom mot man abup-pi. Tamwa en aye me timo gin aber, mom i nyim Obaŋa keken, ento naka i nyim jo daŋ. Wan oorogi karacel kede ominwa a wan doŋ otemo kite pi kare alac, ote nwoŋo obedo ŋat a keto cunye i kom tic apol, ento aman dok keto cunye meicel kato a rik, pi gennere adwoŋ i komwu. Aco Tito en awotta dok atic wadwa pirwu; omegowa ocele mere-nu gin oor a Lwak oye Kricito luŋ, dok gin jo a kelli Kricito kwogo. Pi mannono, nyut wunu marwu i nyim Iwak oye Kricito luŋ, me gin nen ni wakerewa pirwu onwoŋo tye kakare. Iyi ateni, pe mitte an icoyiwu kop i kom konyo jo Obaŋa, pien aŋeo mitwu iye. Atye ka wakere pirwu baŋ jo me Makedonia ni mano, “Jo Akaya oyikere oko i mwaka ca twal.” Pi cukerewu omio polgi daŋ oketo cunygi. Ento enno acwalo omegowa baŋwu me wakerewa pirwu i kop man mom gik ka i kop keken, cite ibed ame iyikere wunu i kite ame akobbigi. Naka mio ka jo mogo me Makedonia obino keda kuno te nwoŋo mom iyikere wunu, mio twoo doga oko pi gen ame onwoŋo wan oketo i komwu; aco wun kono? En omio atamo ni myero acuk cuny omegowa ge tella yo me bino baŋwu, me gin koŋ nen ni mot man ame rik icikere wunu me miyo doŋ oyikere oko; me bed a doŋ oyikere oko acalo mot ame imio wunu pi mitwu, mom acalo mot ame odiowu iye adia. Tye ni, ŋat ocoo koti anok, depo daŋ anok, ŋat ocoo abup kao daŋ abup. Ŋat acel acel oti acalo en mito i cunye, aboŋo wanyiccoro onyo diccoro. Pien Obaŋa maro ŋat a mio kede yomcuny. Dok Obaŋa twero miyowu jami abeco apol ata, wek i kare luŋ ibed wunu kede jami a romowu aber, ame mio wun daŋ itwero miyo wunu abup pi konyo tic ducu abeco, acalo yam ocoo ni, “Opoko jami mere apol, omio baŋ ocan, berrere perakino nakanaka.” Ŋat a mio koti baŋ acoc kede cem me acama bino miyowu koti, dok bino nyayo, te miyo gin oya i kom berwu bedo adwoŋ meicel. I bino bedo wunu olonyo i yore luŋ, ame romo miyo ibedo wunu i cuny aber me miyo mot i kare luŋ, ame ka wan otero, bino miyo jo pwoo Obaŋa. Pien tic man me kony a wun itio wunu bino kelli jo Obaŋa gin a mitte baŋgi, cite mom mano keken, bino daŋ kelo pwoc adwoŋ meicel baŋ Obaŋa. Tic man bino miyo ikelli wunu Obaŋa kwogo, pien nyuto winy megwu iyi amut aber a Kricito ame ituco wunu, kede cuny aber ame ipoko wunu kede limwu baŋ jo-nono kede baŋ jo ocele luŋ. Gin daŋ bino kwayo Obaŋa pirwu kun cunygi paro pirwu, pi kica Obaŋa adwoŋ ame okato kare ame onen i komwu. Ber opwo wunu Obaŋa pi mottere aber a mom kobere. An Paulo ikoma abako doga baŋwu kun ajuro mwolo kede ber a Kricito, an ame amwolle ka atye i nyimwu, ento ager i komwu ka atye teŋe. Akwaowu ni ka abedo baŋwu, pe imia wunu abed kede kite gero kede tekcuny ame ageno ni atwero bedo kede i kom jo mogo ame tamo ni wan olubo kite me lobo man. Pien kadi bed wan otye i lobo, wan mom oromo giwa i jami Iweny me lobo. Jami lwenya wan oromo kede mom toŋi me lobo man, ento jami lweny me teko Obaŋa, ame turo cel okworwa. Wan oturo kede tam a pe atir, kede kite awaka luŋ ame otiŋere me pyem kede ŋecwa i kom Obaŋa; kun omako tam luŋ otero iyi opii, me bed i te loc a Kricito. Dok daŋ wan oyikere me keto can i kom jo luŋ a mom i winy, ka doŋ wun ityeko nyuto winywu. Nen wunu gin a tye i nyimwu. Ka dano moro tye kede gen pire kene ni en edano a Kricito, koŋ etam dok kene ni, acalo en edano a Kricito, wan daŋ amannono. Pien kadi bed awakere atetek pi twer ame Rwot amiowa, lewic mom bino maka; twerrono daŋ omiowa me konyowu i doŋo, mom me dwokowu cen. Kur dok anen ni atemo poyo komwu kede waragana. Pien jo tye akobo ni, “waraga na pek, dok gwa, ento koma ka atuno baŋgi goro, koppa daŋ ginnoro pe iye.” Jo acalo mano myero tam kop man ni, kite a wan okobo kede i waraga ka otye teŋe obino daŋ timo amannono ka otye baŋwu. Wan mom otiŋere kenwa me kette i rwom acel i jo mogo i akina jo a maro dworre, onyo me porre kenwa kedgi. Kite a gin pimere kede kengi kengi i akinagi kengi, dok gin oporre kengi kengi kede gi-porregi kengi, jo-nono kara omiŋo. Ento wan mom obino wakere ame okato kare; obino gik i kan a rik Obaŋa opokkiwa, ame wun daŋ itye wunu iye-ni. Wan mom okato ka gikwa bala mom opokkiwa ituno baŋwu, pien waa rik ogeo bino naka baŋwu me rabo amut aber i kom Kricito. Wan mom owakere okato kare i kom tic a jo ocele en ololle iye; ento otye kede gen ni ka iyeewu doŋ omedde, ticwa bino medde atek i akinawu, kun lubo kan a yam opokk iwa. Mio ote rabo amut aber i lobo i ŋewu kuno, kun mom owakere pi tic ame jo otyeko timo i ka tic a ŋat ocele. “Ŋat a wakere myero wakere pi Rwot.” Pien mom ŋat a dworre kene en ame Obaŋa pwoo, ento dano ame Rwot dworo. Kono idio wunu cunywu anonokkoro i koma i miŋona. Diu ba cunywu koŋ! Nyeko omaka pirwu i kite nyeko ame Obaŋa tye kede; pien icalo wunu nyako ame ayiko nyommere baŋ ico acel, kun ageno ni abino tere baŋ cware, en Kricito, kun en nyako acil ame apayi mere moro mom. Cite alworo ni, acalo twol rik obwolo Kawa kede ryeko mere, wun daŋ jo bino balo tamwu oko, mio ite weko wunu maro Kricito kede cunywu ducu kede mar acil. Pien ka ŋattoro obino baŋwu, te rabo Yecu ocele a pat i maca a wan orabbiwu, onyo omiowu cuny apat a yam mom igamo wunu, onyo amut aber apat a yam mom igamo wunu, mannono wun idio wunu giwu cunywu iye aber meicel. An i tamma, okwena adoŋo ame okato kare ca mom okata gira kadi acelloro. Onyo ca an mom adiro me kop, ento i ŋec mom tye amannono. Mano wan rik onyuttiwu kannaler, i yo ducu kede i kare ducu. Rik an atimo bal ka amwolle kena me ayiwu malo, kun arabbiwu amut aber oya i baŋ Obaŋa nono aboŋo culloro? Otwero kobo ni rik ayako lwak oye Kricito ocele pirwu, pien rik agamo lim i baŋgi pi ticca baŋwu. Dok daŋ ka rik atye baŋwu, ka can omaka, rik mom alolo ŋattoro, pien omego ame oya i Makedonia okella gin a mitte luŋ; rik agwokere, dok daŋ abino gwokere, me kur amiwu peko moro. Doŋ akobbiwu ni, acalo ateni a Kricito tye i cunya, mom obino geŋo wakerena i kop man i lobo Akaya luŋ. Piŋo? Pi ni an mom amarowu bo? Obaŋa ŋeo ni amarowu. Gin ame an atio abino medde tiyo, me kur awek jo ca onwoŋ kare a gin amito me miyo nen ni gin orom aroma kedwa i tic a gin owakere iye-nu. Pien kodi jo-nu gin mom okwena ikome, gin otic me bwolo jo, kun gin olokere onen acalo okwena a Kricito. Kur ŋattoro bed i wur, pien anaka Catan ikome daŋ lokere te nen acalo amalaika ame caro piny. Man mom doŋgin a pire dwoŋ wok ka ce otic a Catan olokere gigi ote nen bala otic me kite atira; agikkigi bino bedo a rom aroma bala tic a gin otio. Koŋ akob doki, dano moro kur par ni an amiŋ; ce ka itamo wunu amanno, gama wunu doŋ acalo dano amiŋ, me an daŋ awakere gira anonok. (Gin ame akobbiwu-ni mom gin a Rwot omia ni akobi; akobo acalo dano amiŋ i gen man ame atye kede me wakere. Acalo bala jo apol wakere pi gin a dok i kwo me lobo man, an daŋ abino wakere.) Pien idio wunu cunywu kede lelo i kom jo amiŋ, kun wun jo aryek. Idio wunu cunywu tek ŋattoro lokowu doko opii, onyo camowu, onyo buowu, onyo yon, onyo bapo lemwu. Lewic omaka kun aye ni wan rik mom obedo atek i yo-nono. Ento ginnoro keken ame dano moro otiŋere me wakere pire, an daŋ atiŋere me wakere amannono, ame pwod akobo acalo dano amiŋ. Gin jo Eburania? An daŋ amannono. Gin jo Icrael? An daŋ amannono. Gin ikwae Iburaim? An daŋ amannono. Gin otic a Kricito? An akop gira bala ajarapoa, an akatogi oko. Acanne i tic akatogi, ari i buc akatogi, opwoda akatogi, abwot to tyen apol. Tyen abic Ojudaya opwoda del pyeradek wie aboŋwen. Tyen adek opwoda kede abiro, Onapa kede gweŋe tyen acel, mel otur i koma tyen adek, tyen acel abuto ari i nam atut dyewor kede dyeceŋ benebene. Ario i wot apol ame can twero poto i koma, can oya i kuli i, can oya i baŋ oyak, can oya i baŋ jona, can oya i baŋ Orok, can a nen i boma, can a nen i tim, can a poto i nam kede can i baŋ omego a mom gin omego me ateni. Acanne i tic atek; tyen apol pe anino iwor. Ario kec kede oryo pii; tyen apol abedo aboŋo cam ame romma, dok abedo i piny aŋic aboŋo ginaruka. Medde i kom gin ocele luŋ, tye gin a kella peko didik, en par ame atye kede pi lwak oye Kricito luŋ. Tye ŋattoro agoro ame an mom awinyo goro i koma? Tye ŋattoro ame omio opoto i bal ame an cunya mom waŋ iye? Ka ce myero awakere, abino wakere pi gin a nyuto gorona. Obaŋa Papa a Rwotwa Yecu Kricito, ame opwoo nakanaka, en ŋeo ni mom akobo goba. Ka rik atye i Damaciko, aloc a tye i te abaka Areta okio bomanu me emaka, cite rik ote cwaya piny kede dwoŋo kun akato i waŋ dirica i apama cel, eka ate bwot gira oko i ciŋe. Myero an awakere; kadi bed mom konyo ginnoro, abino doŋ kop i kom anyut ame aneno kede gin a Rwot oyabba. An aŋeo dano moro i Kricito, aman doŋ okato mwaka apar wie aŋwen: dano-nu rik otiŋo malo anaka i polo me adek. (Kaca rik Obaŋa otiŋo kome an akwia, onyo ca omie leko aleka keken daŋ akwia, Obaŋa en a ŋeo.) Aŋeo ni dano-nu rik otiŋo malo anaka i Paradic. (Ka ce rik Obaŋa otiŋo kome, onyo ka ce omie oleko aleka an akwia, Obaŋa en a ŋeo.) Rik en te winyo ginnoro a mom kobere, a mom oye ni dano tuci. Kodi kop a dano acalo mano en abino wakere iye, ento pira kena mom abino wakere, kono ka pi gorona. Kadi bed bala an amito wakere, mom abino bedo amiŋo, pien nwoŋo akobo kop me ateni. Cite mom abino wakere, me ŋattoro kur par i koma akato ame en oneno i koma onyo ame owinyo i baŋa. Me kur alyerre ame okato kare pi lwak gin apol meicel ame oyabba, rik oguro okuto i koma, ame en akwena a Catan me pwoda kur alyerre ame okato kare. Pi man rik akwao iye Rwot tyen adek ni gin-nu myero ya oko i koma; en te gamo ni, “Winyo a ya i baŋa rommi giri, pien tekona bedo atek meicel kan ame goro tye iye.” En omio an awakere kede yomcuny adwoŋ pi gorona, me teko a Kricito te bedo i koma. Doŋ pi Kricito an cunya yom i kom gorona apapat, kede i kom ayet, kede i can, kede awuna, kede peko a rida; pien kan a an agoro iye, en kan a an atek iye. Onwoŋo an amiŋ! Wun ame irua wunu iye, pien rik myero wun en idwora wunu. Okwena adoŋo ame okato kare ca mom okata kadi acel, kadi bed an mom a ginnoro. Gin ducu ame nyuto ni an akwe na ikome rik otimere i akinawu kede diyo cuny adwoŋ, anyuttogo, taŋo kede tic atek adoŋo. Kara ŋo a nwaŋ oremowu aka to lwak oye Kricito i kabedo ocele luŋ, ka onyo man keken ni an rik mom abedo nuyowu kede peko? Tima wunu ber ba, ka abalo pi koyowu kittono! Man doŋ tyen me adek ame ayikere me bino kede baŋwu, daŋ doŋ mom abino nuyowu kede peko. Pien an gira mom amito jamiwu, amito ka wun ikomwu. Otino mom myero kan mono pi onywalgi, ento onywal en a myero kan pi itino. An gira abino bedo ilelo adwoŋ meicel me miyo jami luŋ ame atye kede, anaka tek koma luŋ, me konyo kwo me tipowu, Wun ibino wunu mara atitidi, ni, pien amarowu atek? Aton ibino kobo wunu ni, “Ber doŋ, en ikome mom onuowa kede peko, cite en edwali, rik ote makowa kede goba.” Iyi akina jo a rik acwao baŋwu, ŋattoro obuo ginnoro i baŋwu pira? Rik akwao Tito ni myero wot, eka ate oro ominwa ocele karacel kede. Tito rik obin obuowu? Wan rik mom otio i cuny acel? Rik mom owopo yo acel keken? I kare man luŋ itamo wunu ni wan otye ka pido pirwa kenwa i nyimwu? Pe gire; otye ka kop i nyim Obaŋa i Kricito, Dok daŋ, wun ame amaro, okobo me konyowu i doŋo. Pien alworo ni ka atuno kuno, atot onyo abino nwoŋo ipat wunu i kite ame an amito, dok wun daŋ onyo ibino nwoŋa wunu apat i kite ame imito wunu, Gwok onyo abino nwoŋo daa, nyeko, akemo, laro dito, ayet, anike, yeyea, arubaruba. Alworo daŋ ni ka adwogo baŋwu, Obaŋana bino miyo alee twoda i nyimwu, te miya kok pi jo apol i akina jo a rik obalo eka mom ote ŋut i kom timgi me caro, me coco kede me tarwaŋ. Man doŋ en tyen me adek ame abino tuno baŋwu. Caden aryo onyo adek myero mok kop luŋ ame okelo. Rik akobbiwu con ame rik atye baŋwu i wenona me aryo, dok anwoo kobo amanni ame atye doŋ teŋe, baŋ jo-nono a rik obalo, kede baŋ jo ocele luŋ, ni mano, ka dok adwogo baŋwu, mom abino timo ŋattoro kica, pien wun imito wunu neno gin a moko ni Kricito en ame akop i doga. En gire mom goro i baŋwu, cite nyuto teko mere i yiwu. Rik oto i kom yataria pi goro, ento aman en bedo kwo pi teko Obaŋa. Anaka wan daŋ ogoro i en, ento i tuŋ baŋwu wan obino bedo kwo karacel i en pi teko Obaŋa. Koŋ itemere wunu kenwu, ka itye wunu i kom iyee. Ŋiye wunu kenwu, Mom iniaŋ wunu ni Yecu Kricito tye i yiwu? Kono ka onyo wun jo a mom Obaŋa opwoo. Ageno ni ibino niaŋ wunu ni wan giwa mom obedo jo a mom opwoo. Wan okwayiwu Obaŋa ni kur itim wunu ginnoro arac, mom me nyuto ni wan jo ame Obaŋa opwoo, ento ni myero itim wunu gin aber, kadi bed wan onen bala obedo jo a mom en opwoo. Pien wan mom otwero wunu tiyo ginnoro ame pyem kede gin a tye ateni, ento otwero tiyo ka gin a rwatte kede gin a tye ateni keken. Wan yiwa yom ka ogoro kun wun itek wunu, ento wan dok okwao pirwu ni ibed wunu jo a doŋ ocwiny. Gin omio acoo man kun atye teŋe i baŋwu, me ka abino baŋwu kur abed ager kedwu kun atiyo kede twer a rik Rwot omia ca, me donowu, pe me dwokowu cen. Me agikki, omegona, doŋ ibedu ba, Yik doŋ kitewu bed aber, daŋ iwiny wunu gin ame akwaowu iye, Bed wunu i cuny acel, daŋ ibed wunu i kuc, Obaŋa ame en won mar kede kuc bino bedo kedwu. Motte wunu kenwu kenwu kede amot me mar. Jo Obaŋa luŋ omotowu. Winyo a Rwotwa Yecu Kricito, kede mar Obaŋa, kede notte a Cuny Acil kelo, bed kedwu wun luŋ. Waraga man oya i baŋ Paulo ame en akwena. Mom jo moro oore, or mere me bedo akwena daŋ rik mom obeo ibaŋ dano moro, ento oya ibaŋ Yecu Kricito kede ibaŋ Obaŋa Papo a rik ocere iyi akina a jo oto. Omegowa luŋ a tye karacel keda kan daŋ omotowu. Baŋ lwak jo oye Kricito luŋ a tye i Galatia. Obaŋa Papawa kede Rwotwa Yecu Kricito miwu winyo kede kuc, en Kricito a rik omiye kene pi balwa me elarwa oko i gin arac me kare man, kun lubo gin ame Obaŋa Papawa mito. Kwogo bed baŋe nakanaka. Amen. An awuro kite ame ilokere wunu kede oyot, ikwero wunu ŋat a rik olwoŋowa i winyo a Kricito, dok itye ka lokere wunu i amut aber ocele. Amut aberroro ocele gire mom, ento tye jo mogo a tye ka balo tamwu oko, kun omito loko amut aber i kom Kricito doko gin apat. Ento kadi bed wan, onyo amalaika moro ame oya i polo, orabbiwu amut aber ocele a dok pokere oko i en a rik orabbiwu ca, myero cen oko. Acalo rik wan okobbiwu koŋ, dok pwod anwoo kobo amanni, ni, ka ce tye ŋattoro ame tye arabbiwu amut aber ocele a pokere oko i en a rik igamo wunu, myero cen oko. Amanni an doŋ atye ayenyo cwak a dano bo, onyo me Obaŋa? Onyo ca atye atemo yomoro cuny jo? Kono pwod atye ayomoro cuny jo, kono mom abedo amiro a Kricito. Omegona, amito iŋe wunu man, ni, amut aber a rik an arabo mom obedo gin ame oya i baŋ dano. Pien mom dano moro en omia, onyo opwonya kede apwonya, ento rik anwoŋo i baŋ Yecu Kricito ame onyutte baŋa. Ityeko winyo wunu kwona acon i lubo dini Ojudaya, kite ame awuno kede lwak jo oye Obaŋa atek, kede kite atemo turo kede. Iyi dini Ojudaya an en onwoŋo alanyo pol a jo i kin olwakina me rokka, kun alaro atek meicel pi kitewa ame oya i baŋ kwarowa. Ento Obaŋa rik opoka pat con a mom ru onywala, eka dok te lwoŋa pi kica mere. Yie rik obedo yom me nyutta Wode, me wek arab amut aber i kome baŋ Orok. I kare a man otimere, mom aporo kop i dano moro, daŋ mom awoto i Jerucalem baŋ jo a rik ogeya me bedo okwena, cite awoto gira oko teŋe, i Arabia, eka dok ate dwogo cen i Damaciko. Ka mwaka adek okato, awoto i Jerucalem limo Petero, eka ate tyeko baŋe nino apar wie abic. Ento i kin okwena aneno ka Yakobo omin a Rwot keken. (Iyi ateni i nyim Obaŋa, gin duc ame acoyiwu i waraga man goba mom iye.) Eka dok ate wot i lobo Curia kede Kilikia, kun lwak jo oye Kricito i kabedo luŋ a tye i Judaya onwoŋo mom ru ŋeo koma. Gin onwoŋo owinyo ka kop i koma keken, ni, “Ŋat a yam owunowa ca, aman doŋ rabo kop i kom iyee a rik koŋ etemo turo”; daŋ ote pako Obaŋa pira. Icennere ka mwaka apar wie aŋwen doŋ okato, dok ate wot i Jerucalem wan i Baranaba, kun daŋ atero Tito woto keda. Gin omio awoto kuno, pien Obaŋa onwoŋo onyutta ni myero awot; eka ate keto i nyimgi amut aber ame arabo baŋ Orok, i muŋ baŋ jo a ŋeye, ni kur ca ticca ame atiyo, onyo ame doŋ atyeko tiyo, bed me nono. Ento Tito a rik owoto kede mom oketo diccoro i kome me lirre, kadi bed en rik dano me Grik. Kadi bed onwoŋo tye jo mogo ame okelo iyi akinawa ame mom gin omego ikome, jo ame olibere aliba me roto kuc a wan otye kede i Kricito Yecu, kun omito kelowa i opii, cite pe tye kare moro ame wan oye gin olowa, me wek ateni me amut aber gwok kakare pirwu. I baŋ jo ame ŋeye ni gin jo adito (kite a rik gin tye kede mom okelo apokapoka moro baŋa; Obaŋa mom lenere baŋ ŋattoro pi kite a en tye kede) jo a neye-nono mom omedda ginnoro. Ento gin oniaŋ ni, Obaŋa omia tic me rabo amut aber baŋ Orok, acalo omio Petero daŋ tic me rabo baŋ Ojudaya; pien ŋat ame otio ticcere i Petero i kwena mere baŋ Ojudaya, obedo ka tic i koma daŋ baŋ Orok. Yakobo kede Petero kede Lakana a rik gin oŋeye acalo pagi me dini, ka doŋ oniaŋ pi winyo ame Obaŋa omia, gin ogamo Baranaba kede an acalo otic wadgi. Ote mako ciŋa kun omoko ni, wan owot baŋ Orok, kede gin baŋ Ojudaya. Gin okwaowa keken me po pi ocan, ame man en tic onwoŋo pire litta meicel. Ka rik Petero obino i Antiokia ajuke kannaler, pien onwoŋo timo gin a pe ber. Pien i kare a mom ru jo mogo obino ame oya i baŋ Yakobo, en rik cemo kede Orok; cite ka gin obino, en te weko oko, opokere kene pi lworo eryoŋet a jo a mito ni, jo oye Kricito myero koŋ lirre. Ojudaya ocele luŋ rik daŋ ote potto kite a Petero me gobaŋono: naka Baranaba daŋ te rwenyo pi kiregi-nono. Ento an ka aneno ni gin tye awot ogotogot iyi ateni me amut aber, ate kobbi Petero i nyimgi luŋ ni, “Ka yin ame yin Ajudaya iwopo kite Orok, mom kite Ojudaya, kara dok itwero diyo Orok niŋo me wopo kite Ojudaya?” Wan ikomwa ame wan Ojudaya iyi anywalli, mom Orok ame obalo, wan oŋeo ni, dano mom okwano ni kite atira pi cobo cik, kono ka pi ye Yecu Kricito. Anaka wan daŋ otyeko ye Kricito Yecu me kwanwa ni wan kitewa atira pi ye Kricito, mom pi cobo cik; pien mom obino kwano dano moro ni kite atir pi cobo cik. Acalo wan omito ni kwanwa ni kitewa atir pi Kricito, cite wan ikomwa dok onwoŋo oko ni wan obalo, Kricito doŋ obedo atic pi bal bo? Mom amanno gire! Ka an dok agero jami a yam koŋ areto, mom dok amoko kena ni an abalo? Pien pi cik an rik ato i tuŋ cik, me abed kwo i tuŋ baŋ Obaŋa. An rik ogura i kom yataria karacel i Kricito; mom dok an en akwo-ni, ento Kricito ame bedo kwo i an. Kwo ame aman atye kede i koma-ni, abedo kwo pi ye Wot Obaŋa, a rik omara te miye gire kene pira. An pe abolo kica Obaŋa oko; pien ka kwano jo ni kitegi atir tye pi cik, to a Kricito doŋ konnyere mom. Wun jo Galatia, ibedo wunu ababaŋ meicel! Ŋa kara ologoro wu, wun jo a rik ogoo cal a Yecu kom i nyimwu, kite ame ogure kede i kom yataria? Koŋ iwek apenywu i penynyi keken: rik inwoŋo wunu Cuny Acil pi cobo cik, ya nyo pi amut aber ame iwinyo wunu? Wun kara ibedo wunu ababaŋ aman! Rik igeo wunu kede Cuny, aman imito giko wunu kede kom? Kodi gin adoŋodoŋonono otimere baŋwu nono ka ce obedo nono iyi ateni. Ka Obaŋa miowu Cuny Acil, dok tio taŋo i akinawu, en timo pien wun icobo wunu cik, onyo pien iwinyo wunu amut aber ite ye wunu? Amannono rik ocoo ni, Iburaim “Oye Obaŋa, eka ote kwane ni kite atir.” Doŋ myero iŋe wunu nijo ame ojeŋere i kom iyee, jo-nono gin ikwae Iburaim. Anaka coc a yam ocoo rik oneno con ni, Obaŋa bino kwano Orok ni kitegi atir pi iyee. Rik te rabbi Iburaim amut aber con kun okobbe ni, “Rok luŋ aluŋa bino nwoŋo winyo piri.” Kitenono, jo ame tye kede iyee omiogi winyo karacel kede Iburaim a rik obedo kede iyee. Pien jo ducu ame ojeŋere i kom cobo cik gin tye i te cen; pien yam ocoo ni, “Cen omak jo luŋ ame mom lubo gin ducu ame ocoo i buk me cik, kun cobo.” Aman doŋ ŋeye oko ni, mom okwano dano moro ni kite atir i nyim Obaŋa pi cobo cik; pien ocoo ni, “Ŋat ame kite atir pi iyee, bino bedo kwo.” Ento cik mom ocuŋ i kom iyee, pien ocoo ni, “Ŋat a cobo bino kwo pire,” Kricito rik doŋ olakorowa oko i kom cen ame cik okelo, kun olokere en ikome odoko ŋat oceno pirwa. Pien yam ocoo ni, “Cen obed i kom dano moro ducu ame oŋabo i kom yat.” Mano otimo me winyo ame Obaŋa omio Iburaim Orok daŋ nwoŋ, pi Kricito Yecu, me wek pi iyee miwa Cuny Acil a yam ociko pire. Omegowa, koŋ ati kede anen a dano. Ka jo aryo ocikere i ginnoro, eka ote moko cikeregi, ŋattoro mom dok romo loko onyo medo ginnoro i cikeregi. Cikere-ni Obaŋa rik omio baŋ Iburaim kede ikwae; cite coc acon mom okobo ni, “Kede baŋ ikwae,” ame nyuto ni gin pol, ento okobo ni, “Kede baŋ akwari,” ame nyuto dano acel keken, ame en Kricito. Gin ame akobbo tye aman: cik ame obino a doŋ mwakki mia aŋwen kede pyeradek doŋ okato, mom dok romo turo cikere a nwaŋ Obaŋa otyeko moko, onyo miyo gin a en ocikere iye to nono. Pien ka leyo gin ame omio Iburaim ocuŋ i cik, nwoŋo mom dok ocuŋ i cikere. Ento Obaŋa rik omio baŋ Iburaim i cikere gire, acalo mot. Piŋo dok cik mitte? Cik rik omedo me wek turo cik onen oko, tuno waŋ ame akwar Iburaim a rik oketo cikere pire otuno. Omalaika en a rik okelo cik, kun omio i ciŋ anot-jo. Aco anot-jo pe mitte pi ŋat acel keken, ento Obaŋa kono tye acel. Cik dok pyem kede cikere Obaŋa bo? Pe gire amanno; pien kono rik omio cik ame twero miyo kwo, kono atika kwano dano ni kite atira obedo pi cik. Ento coc a rik ocoo otweo jo luŋ acalo obuc i te twer me bal, me wek cikere a rik ociko pi iyee i kom Yecu Kricito mi baŋ jo oye. Ame rik iyee pwod mom ru obino, cik onwoŋo kuro-wa kun otweowa acalo obuc, ituno wan ame onyuttiwa iyee. Cik rik tye acalo apidi ame okurowa ituno waŋ ame Kricito obino, me ote kwanowa ni kitewa atira pi iyee. A man a doŋ iyee tye-ni, wan mom dok obedo i te apidi a kurowa; pien iyi Kricito Yecu wun luŋ aluŋa ibedo wunu itino Obaŋa pi iyee. Wun jo ducu ame doŋ ibatija wunu i Kricito, ityeko wunu doŋ ruko Kricito acalo boŋo. Apokapoka moro doŋ pe i kin Ajudaya kede dano me Grik, opii kede ŋat a loye kene, ico kede dako; pien wun ducu irom wunu aroma i Kricito Yecu. Ka wun jo a Kricito, wun doŋ ikwae Iburaim; dok i te cikere Obaŋa, wun ole gin ame ociko baŋ Iburaim. An akobo aman ni, ale lim ka pwod en atin bedo rom aroma kede opii, kadi bed en won jami ducu. En koŋ bedo i te loc ogwoke kede ogwok jami mere, tuno i kare a pappere ociko. Wan daŋ otye amanno; i kare a wan yam pwod otino, rik wan obedo opii a jogi acon a tye ka loc i wi podo. Ento ka kare ikome doŋ oromo, Obaŋa te oro Wode ame dako onywalo, kun onywalo i te cik, me wek lakoro jo a rik tye i te loc a cik, me wan daŋ lokwa odok itino me paco. Pien wun doŋ itino me paco, omio Obaŋa doŋ ocwao Cuny a Wode i yiwa, ame kok ni, “Aba! Pappa!” Kite-nono pi tic Obaŋa mom doŋ yin opii, ento atin me paco; daŋ ka yin doŋ atin paco, doŋ yin ale lim. I kare acon a mom ru iŋeo wunu Obaŋa, rik wun opii a gigi mogo a mom gin obaŋa ikomgi. Ento amanni doŋ iŋeo wunu Obaŋa, twara akobbi, Obaŋa doŋ neowu; itwero wunu dok cen niŋo baŋ jogi acon agoro, ame piny oloo? Piŋo dok imito wunu bedo opiigi tyen me aryo? Itye ka gwoko wunu nino, kede dwete, kede kare, eka kede mwakki! Alworo atek, ticca ame alolle kede baŋwu kara opoto piny nono. Omegona, akwaowu, bed wunu bala an, pien an daŋ doŋ adoko bala wun. Rik mom itimo wunu ginnoro arac baŋa. Wun iŋeo wunu ni, lit koma en omio arabo amut aber baŋwu tyen me agege. Rik mom ibwona wunu, mom iŋula wunu, kadi lit koma ceŋ okelliwu abita adwoŋ; ento iluŋyo jola wunu acalo amalaika Obaŋa, dok acalo Kricito Yecu. Ŋo kara a dok oŋolle i yomcunywu? An acaden ame kobo ni, Ka kono rik twerre, kono ikolo waŋwu oko, ite miyo wunu baŋa. Adoko dok akworwu pi kobbiwu kop ateni? Jo-nu diye baŋwu nono, tamgi mom beco. Gin mito ka cegowu oko, me wun ite luŋyo diye wunu baŋgi. Diye pi gin aber, ber i kare luŋ, ento mom ka i kare ame an atye baŋwu keken. Itinona, an pwod dok atye akanyo rem kedwu acalo imat kanyo rem i kare me nywal, ituno ka ocweo Kricito i yiwu. Onwoŋo ber atek kono atye baŋwu aman, me ate loko dwona i koppa kedwu, pien icuŋo wunu wia oko. Wun jo ame mito ni cik bwowu, koŋ ikobba wunu. Wun mom iwinyo wunu cik bo? Pien ocoo ni, Iburaim rik tye awobe aryo, acel mea dako aŋeca, eka acel mea agoŋ. Ento wot a dako aŋeca rik onywalo i kite me kom, aco wot agoŋ rik onywalo pi cikere a rik Obaŋa ociko. Man akobo-ni obedo carokop. Mon aryo-ni nyuto cikere aryo. Ŋat acel oya i wi kidi me Cinai, itino ame onywalo obedo opii; dako-nu en Agar. Agar-ri nyuto kidi Cinai, ame tye iyi Arabia; en rom aroma i Jerucalem me kare man, pien en tye i opii, karacel kede itino mere. Ento Jerucalem ca ame tye i polo loye kene, en obedo totowa. Pien yam ocoo ni, “Leli, yin oraŋa a mom nywal; mwoc i wer, ired i yomcuny, yin ame rem nywal mom ogudi; pien itino a dako oweko pol, kato mea dako a bedo kede cware.” Omegona, wan ocalli Icaka, wan itino me cikere Obaŋa. Ento acalo rik i kare-naca atin ame onywalo i kite me kom owuno en ame onywalo pi Cuny Obaŋa, aman daŋ tye amanno. Ento coc a rik ocoo kobo niŋo ce? Ni, “Ryem aŋeca oko gin kede wode, pien wot a dako aŋeca mom bino leyo lim karacel gin i wot agoŋ.” Doŋ ba, omegona, wan mom itino a dako aŋeca, ento wan itino agoŋ. Kricito doŋ ogonyowa oko i opii me obed jo me kuc. Cuŋ wunu doŋ atek; kur dok ilokere wunu irwak tyenwu i kol me opii. Winyu ba, an Paulo akobbiwu ni, ka olirowu, kony a Kricito doŋ mom baŋwu. Anwoo dok kobo odoco baŋ dano acel acel ame olirre ni, en doŋ tye kede banya me lubo cik luŋ. Wun jo a mito ni kwanwu ni kitewu atira pi cobo cik, doŋ ipokere wunu oko giwu kenwu ibaŋ Kricito, doŋ ijer wunu oko teŋe i kica Obaŋa. Pi Cuny Acil wan otye kede gen adwoŋ me nwoŋo kite atir ame omio pi iyee. Pien i Kricito, bedo ame olirre onyo a mom olirre pe konyo ginnoro; iyee keken en ame konyo, kun ticcere ya i mar. Rik iriŋo wunu ŋwec aber; ŋa kara a dok ogeŋowu i lubo kop me ateni? Bito jo acalo man mom oya i baŋ ŋat a rik olwoŋowu. Ka otedo ogati, tobi aduno romo yenyo moko luŋ. Atye kede gen atek i Rwot ni, tamwu mom bino pokere i mega; ento ŋat a tye ka balo tamwu oko, kadi bed en ŋa, Obaŋa bino ŋolle kop. Ento an ba, omegona, ka pwod arabo kop ni lirre ber, piŋo pwod owuna? Kono arabo amannono, kono omio mom dok tye ginnoro i kop i kom yataria ame obedo acalo iciki a reto joo Kono jo ca tye ka rubo tamwu oko omedde anyim, oroye kengi gigi! Omegona, rik olwoŋowu me bedo i kuc; ento kur dok imi kucwu obed me cobo mitwu me anywalli. Akaka ennu, ŋat man myero miye i tiyi wadgi i mar. Pien cik weŋ aweŋa onotte ka i kop acel, ni, “Mar dano wadwu acalo imarre keni.” Ento ka ikaye wunu bala gwogi, kun itimo dano wadwu cucu, gwokere wunu me kur ityekere wunu kenwu kenwu. Ento an akobbiwu ni, mi Cuny Acil telwu, me kur icob wunu mit me kwowu me anywalli. Pien mit me kwo me anywalli pyem i mit a Cuny Acil, dok mit a Cuny Acil pyem i mit me kwo me anywalli. Gin aryo-ni gin omone, en omio mom itwero tiyo wunu gin ame imito wunu. Ento ka Cuny Acil tye ka telowu, mom dok itye wunu i te cik. Tic me kwo me anywalli nen oko kannaler; gin ene: coco, caro, tarwaŋ, woro cal jogi, tim jojok, amone, daa, nyeko akemo, laro dito, pyem, popoka, to kom, mero, gat me yomcuny arac, kede mogo acalo ginnono. Akwenyorowu acalo rik koŋ akwenyorowu ni, jo ame timo gin acalo magu, loc Obaŋa mom bino doko megi. Ento nyig ame onyak pi Cuny Acil en mar, yomcuny, kuc, diyo cuny, kica, ber, genne, mwolo, gwokere ken; cikkoro mom ame kwero gin acalo magi. Jo ame gin jo a Kricito Yecu doŋ otyeko neko kwogi me anywalli oko, karacel kede parrere kede mittere, kun oguro i kom yataria. Ka wan obedo kwo pi Cuny Acil, myero daŋ owop yore. Oweku wakere nono, kede nyuto tekowa i kom owotewa, kede bedo i nyeko i akinawa. Omegona, ka omako dano moro i balloro, wun jo ame itye wunu i Cuny Acil myero idwoke wunu kakare i cuny me mwolo. Cik wani i komi keni, me yin daŋ kur biti. Myero ikonyere wunu kenwu i tino kodi peko-nono; en i kite-nono ibino cobo wunu cik a Kricito. Pien ka ŋattoro tamo i cunye kene ni en e ginnoro, kun iyi ateni mere en mom ginnoro, nwoŋo en abwolle gire kene. Dano acel acel koŋ ŋi ticcere kene ka ber, en a mio te kop me wakere mere bed pi ticcere ikome, a mom dok eporo i tic awottere. Pien dano acel tye i yeccere me ayea. Dano ame otye ka pwonyo kede kop i kom Kricito myero nywak jami mere abeco luŋ kede apwonnyere. Kur imi bwolwu; Obaŋa mom otuko kede. Gin ame dano ocoo, en daŋ bino kayo ginnono, ŋat ame ocoo koti mere i poto me kwo me anywalli, gin ame en bino kayo iye en to; ento ŋat ame ocoo mere i poto me Cuny Acil, bino kayo iye kwo a perakino odoco pi Cuny Acil. Myero wan mom ool i tiyo gin aber, pien ka kare oromo, ka mom odwoko cunywa cen, obino kayo kac. Doŋ ba, didik ka onwoŋo kare, myero oti tic aber baŋ jo luŋ, akato mere baŋ omegowa ame oye Kricito. Nenu ba twoni nukuta adoŋo ame atye ka coyo kede ciŋa kena-ni! Jo a tye adiyowu ni myero ilirre wunu, gin jo a mito ni timgi nen aber i oko. Tamgi tye keken ni kur wungi pi yataria a Kricito. Pien kadi jo ame oliro mom mako cik, ento gin omito ni lirwu me gin owakere i gin ame otimere i komwu me oko. Cite an gira mom aye wakere pi ginnoro, kono ka pi yataria a Rwotwa Yecu Kricito, ame i tuŋ baŋa wi lobo luŋ doŋ ogur oko i kom yataria, dok an daŋ ogura iye i tuŋ baŋ lobo. Pien bedo ame olirre onyo a mom olirre kopporo gire mom; gin a pire dit en aye me bedo ginaketa anyen. Kuc kede kica bed i kom jo luŋ ame poro kwogi kede cik man, kede i kom jo Obaŋa luŋ. Ya amanni ŋattoro kur lola, pien atye kede poo i koma a nyuto ni an opii a Yecu. Winyo a Rwotwa Yecu Kricito bed kede cunywu, omegona. Amen. Waraga man oya i baŋ Paulo ame en akwena a Kricito Yecu pi mit Obaŋa. Baŋ jo Obaŋa ame tye i Epeco, a gin jo a genne i Kricito Yecu. Obaŋa Papa wa kede Rwot Yecu Kricito miwu winyo kede kuc. Myero opwo wunu Obaŋa, Papa a Rwotwa Yecu Kricito, pien i Kricito doŋ omiowa kwone winyo me cuny luŋ ame tye i polo. En rik oyerowa i Kricito ame mom ru ocibo acakki te lobo, me wan obed jo acil i nyime aboŋo balloro i komwa, pi mar mere. Obaŋa pi mittere kene rik oyiko con ni wan myero odok itino mere pi tic a Yecu Kricito. En otimo man me wek wan opak mottere me kica me kwogo adwoŋ a en omiowa i Wode ame emaro. Pi remo me to a Wode, wan doŋ olakorowa oko i balwa, kite ame kica mere dwoŋ kede, ame en omiowa abup meicel. Pi ryeko mere kede pi niaŋŋere luŋ, en oyabbiwa muŋ me mittere, kun lubo yikkere aber a rik en oyiko me co bo i kom Kricito. Yik Obaŋa ame ebino cobo ka kare mere oromo, en me coko ginaketa luŋ aluŋa ame tye i polo kede i wi lobo, noto karacel i Kricito. Pien jami luŋ otiye kun lubo tam Obaŋa kede mittere. En oyerowa i Kricito pi tammere, me wan obed jo mere, kun nwoŋo rik en oyiko con ni, wan jo a rik ogeo bedo kede gen i kom Kricito myero omi jo pak kwogo mere. Wun daŋ i Kricito rik iwinyo wunu kop me ateni, ame en amut aber me larrewu. Wun daŋ iye wunu en, eka ote miyowu Cuny Acil a rik ociko pire me bed acalo anennere ame omwono i komwu. En ajeŋ me gin a wan obino nwoŋo i kare Obaŋa bino lakoro jo mere ikome, jo te pako kwogo mere. Man en omio, geye ame awinyo pi iyeewu i kom Rwotwa Yecu, kede marwu baŋ jo Obaŋa luŋ, mom aweko pwoyo Obaŋa pirwu, kun akobo nyiŋwu daŋ i kwacca. Akwao Obaŋa won kwogo ame papa a Rwotwa Yecu Kricito, me miwu cuny me ryeko, dok daŋ oyab ŋecwu i kome. Dok daŋ en meny tamwu, me iniaŋ wunu i kom gen ame olwoŋowu iye, kede i kom mot me kwogo adwoŋ, ame en mio baŋ jo mere me doŋ bed megi atwal; dok daŋ me iniaŋ wunu i kite ame teko mere adwoŋ meicel a mom pimere tye ka tic kede i yiwa, wan jo ame oye Yecu. Man rom aroma kede tic atek meicel me twerrere a rik ocero kede Kricito i akina a jo oto, te cibe bedo i kabedo me kwogo i laŋete tuŋ cem i polo. En doŋ tye malo, loo kwon loc kede twer kede teko kede dito luŋ ame tye i polo, kede nyiŋŋoro ame orwo i lobo me kare man kede en a bino ca; Obaŋa doŋ oketo jami luŋ aluŋa i te twer a Kricito, me en lo, dok omie baŋ lwak jo oye en, me en bed acalo awie kun loo jami bec abeca. Lwak jo oye Kricito obedo kom Kricito, opoŋ daŋ kede Kricito, Kricito daŋ Opoŋ i jami luŋ aluŋa. Ikare okato rik ibedo wunu jo oto pi turo cikwu kede pi balwu; pien i kare-naca rik ipotto wunu yo areco me lobo man, kun iwinyo wunu ŋat a loo twerrogo a tye i dye yamo, ame en cuny ame aman tye atic iyi jo a kwero winyo dog Obaŋa. Wan luŋ daŋ rik orom aroma kedgi i lubo mit me komwa me anywalli, kun ocobo mit a komwa kede gin a wan otamo kenwa; omio i kite a yam wan otye kede, akemo Obaŋa onwoŋo myero pot i komwa bala jo ocele. Ento Obaŋa alonyo i kica mere, mar a en omarowa kede dwoŋ meicel, omio kadi bed wan odoko jo oto pi turo cikkere, en omiowa okwo karacel kede Kricito. Obaŋa olarowu pi kica mere. Wan jo a Kricito, en ocerowa karacel kede, eka te cibowa bedo karacel kede i polo. En otimo man ducu me wek enyut i kare luŋ a tye i nyim lonyo mere adwoŋ a mom pimere me kica ame onen i berrere baŋwa i Kricito Yecu. Pien pi kica mere omio en olarowa, pi iyee. Rik mom otimere pi ticwu; mannono mot Obaŋa gire. Mom otimere pi ticwu moro, me ŋattoro gire kur wakere iye. Wan obedo gin ame Obaŋa otio; en ocweowa i Kricito Yecu me obed jo a tio tic abeco ame en rik oyiko ni wan oti. Koŋ mono ipo wunu kite ame ibedo wunu kede, wun ame ibedo wunu Orok i kite me anywalli, Ojudaya cwanowu ni, jo a mom oliro, kun gin olwoŋere kengi ni gin jo olirre, pi lirregi ame ciŋ dano otio i riŋo komgi. Aco i kare-naca onwoŋo itye wunu nono aboŋo Kricito, rik okoowu oko i kom jo Icrael, mom inywako wunu cikere Obaŋa kede gin a en ociko miyo. Rik ibedo wunu i lobo man aboŋo gennoro, kun Obaŋawu daŋ mom. Ento aman i Kricito Yecu, wun jo a rik itye wunu kannabor doŋ okelowu ceggi pi to a Kricito. En ikome okelo kuc i akinawa, omio wan kedwu odoko jo acel; en ojalo kome kene pi kwanyo amone iyi akinawa acalo bala omuko apama ca a yam pokowa. Pi kelo kuc omio en oweo cik a Muca oko, kede cikkere, kede icwillere luŋ, me wek eket wan jo aryo odok rok acel anyen ame oribere karacel i en. Pi to mere i kom yataria odwoggo wan aryo luŋ baŋ Obaŋa i kom acel, omio amone te gik oko. Rik en Kricito obino orabo amut aber me kuc baŋwu wun jo ame tye kannabor, kede baŋwa wan jo ame tye kan a ceggi. Pi Kricito wan luŋ, Ojudaya kede wun Orok, oyabbiwa yo i cuny acel me tuno baŋ Obaŋa Papo. Aman doŋ wun mom ibedo wunu orok onyo wele; wun doŋ pacowu acel kede jo Obaŋa, wun doŋ ibedo wunu jo ode. Aman doŋ idoko wunu ot ame ogero, ame acakki me tere obedo okwena kede odwarpiny. Yecu Kricito ikome obedo kidi adwoŋ me gwiccere. Gedo man luŋ okubere karacel i Kricito, daŋ tye ka doŋo me doko ot Obaŋa acil i Rwot. Wun daŋ otye ka gerowu karacel i kome, me ibed wunu kan ame Cuny Obaŋa bedo iye. Pi kop man, akwao Obaŋa pirwu, an Paulo ame abedo abuc a Kricito pirwu wun Orok. Pien atamo ni ityeko winyo wunu kite ame Obaŋa omia abedo akanlim me kica mere i tuŋ baŋwu, dok daŋ kite ame oyabba kede muŋŋere, omia aŋeo, acalo doŋ atyeko coyo pire acecek. Ka ikwano wunu itwero neno wunu aber kite ame aniaŋ kede i muŋ a Kricito. I kare a doŋ okato rik mom onyuto muŋ man baŋ dano adana, ento aman Obaŋa doŋ onyuto baŋ okwena kede odwarpin-nyere acil pi Cunnyere. Muŋŋono en ene ni, pi amut aber, Orok doŋ odoko ole lonyo Obaŋa karacel kede Ojudaya, gin dul kom acel kedgi, gin daŋ onwoŋo karacel kedgi ginnoro luŋ ame Obaŋa ociko pire i Kricito Yecu. An oketa me bedo atic me amut aber pi mot me winyo Obaŋa ame omia pi tic me teko mere. Kadi bed an atidi meicel ame jo Obaŋa luŋ kata, cite en omia winyo man me rabo amut aber baŋ Orok, i kom lonyo a Kricito ame tato tere tek, dok me kelo yik me muŋ man oko kannaler baŋ jo luŋ. Onwoŋo Obaŋa ame ocweo jami luŋ okano pi runi apol ata, me wek amanni oti kede lwak jo oye Kricito me miyo oloc kede wegi twer luŋ a tye i polo ŋeyo ryeko Obaŋa a kwone pol meicel. Man wapere kede tam Obaŋa anaka nwaŋ con, ame obin, ocobere i kom Yecu Kricito Rwotwa, ame pire wan jo ame oye en olimo tekcuny, oyabbiwa yo me tuno i nyim Obaŋa kede gen. En omio akwaowu ni, kur idwok wunu cunywu cen pi can ame owuna kede pirwu; can-ni gire okelliwu kwogo. Kop man en omio arumo coŋa i nyim Obaŋa Papo, en kan ame nyiŋ man me papo ocuŋ iye i doggola me wat luŋ a tye i polo kede a tye i lobo. Akwao ni pi lonyo mere me kwogo en myero mi Cunnyere rukkiwu teko kede twer adwoŋ i yiwu. Kricito daŋ bed i yiwu pi iyewu; Dok daŋ ni Obaŋa myero mi icuŋ wunu atek i mar acalo yat a lwite odonyo atut, me ibedu kede teko me niaŋ, karacel kede jo Obaŋa luŋ, kite ame mar a Kricito pirwa lac kede, bor kede, odoŋo kede malo, dok kit a tut kede, me iŋe wunu mar a Kricito ame loo ŋec ducu, wek ipoŋ wunu i ginnoro luŋ ame opoŋ iyi Obaŋa. Kwogo gire obed baŋ Obaŋa a twero tiyo adwoŋ meicel a kato gin a wan otwero kwayo onyo keto i tamwa, pi teko mere a tye atic i komwa. Kwogo bed baŋe nakanaka i Kricito kede lwak jo oye en i akina jo luŋ me kare luŋ. Amen. Pi mannono, an ame abedo abuc pi Rwot akwaowu ni ilub wunu kite kwo a myero i lwoŋo a rik olwoŋowu iye. Bedu jo a woro jo ocele, jo amwol, jo a kanyo ginnoro luŋ abalo cuny, kun ŋat acel acel dio cunye i kom awottere kede mar. Ket wunu teko i gwoko notte ame Cuny Acil omiowu me ibed wunu acel i kuc ame otweowu iye. Kom tye acel, Cuny Acil daŋ tye acel, kite acalo gen daŋ tye acel ame Obaŋa olwoŋowu iye. Rwot tye acel, iyee acel, batija acel. Obaŋa daŋ tye acel ame Papa a jo luŋ aluŋa. En loo jami luŋ, tio i gin duc, dok daŋ tye i gin duc. Ŋat acel acel i akinawa Kricito omio winyo, kun oporo kede mot a Kricito omie. En omio rik okobo ni, “Ka rik oyito malo, otero opii apol ame oyako i lweny, omio daŋ mot baŋ jo.” “Oyito malo” te koppere niŋo? Ni koŋ oyitto piny i lobo kan atut. Ŋat oyitto piny en acellono a dok oyito malo kannabor i ŋe polo ducu me epoŋ wi podo duc aduca. Mot a en omio gin ene: omio jo mogo me bedo okwena, jo ocele me bedo odwarpiny, jo ocele orab amut aber, okwat kede opwony. Omiogi pi yiko jo Obaŋa i ticgi me konyo jo, dok pi doŋo kom Kricito, ituno ka wan ducu odoko acel i iyeewa kede i ŋeyo Wot Obaŋa ituno ka wan odoko jo ame ocwiny, ame odoŋo a rom i Kricito, en ame jami luŋ aluŋa opoŋ iye. Mio wan mom dok obedo calo itino ame pii otagere tatago yeegi, jo a weko yamo me pwony apapat wirogi tuŋŋi i tuŋŋi, ryeko a jo kede porgi me goba mom dok miogi ocacapa. Akaka mannono, myero okob wunu kop ateni kede mar, me omedde, odoŋu malo, ocob anaka i Kricito, ame en wiwa. Dul kom luŋ ojoye i kome, dok otudde karacel i waŋ nyoo ducu a tye iye. Ka dul acel tye atiyo ticcere kakare, mio kom doŋo, gerre aber i mar. En omio akobo kop man kun acikowu i Rwotwa ni, myero kur dok imedde timere wunu kite a jo a mom ŋeo Obaŋa timere kede i tamgi a konnyere mom. Tamgi doŋ ojebere oko, mom doŋ otwero niaŋ, kwo ame Obaŋa mio obedo gin a welo baŋgi pi kwiya piny ame obinnigi pi cuny ame odil oko. Gin mom doŋ oparo ginnoro, omio doŋ omiye kengi i tim me tarwaŋ, dok daŋ owor atek i tiyo kwone tim me caro caro luŋ aluŋa. Ento mannono mom kite a rik opwonyowu kede kop i kom Kricito. Ka ce rik iwinyo wunu kop ikome ateni, dok daŋ opwonyowu i kop me ateni a tye i Yecu. Kite kwowu me anywalli a rik ibedo wunu kede acon, aman doŋ wek wunu bedi; kodi kwonaca oballe oko pi mit areco ame obwolowu. Wek Obaŋa doŋ roc tam me cunywu bed anyen, ite ruko wunu dano anyen ame oketo i cal Obaŋa ikome iyi ateni me kite atir kede acil. Pi mannono, wek wunu goba oko; dano acel acel myero kob kop me ateni baŋ dano wadgi, pien wan otye acalo dul kom owotewa. Ka akemo omakowu, kur ipot wunu i bal; ceŋ mom myero luŋere kun pwod ituŋ wunu akemo, daŋ kur imi wunu Catan kare. Akwal jami a jo wek doŋ kwo bedi; ber en ti tic aber kede ciŋe, me enwoŋ gin epokki jo a megi pe. Kopporo arac kur ya i dogwu; kob wunu ka kop abeco keken ame doŋo tam a jo acalo mitte, me jo a winyo nwoŋ iye kony. Kur imi wunu daŋ Cuny Acil Obaŋa kumo, ame omiowu me bed calo anennere ame omwono i komwu pi kuro nino me lakorowu. Kite keccuny luŋ, waŋyic, akemo, redo i wi jo, ayet kede raccuny ducu myero doŋ mom i nen baŋwu. Bed wunu jo okica i cuny aber, dano acel acel baŋ awottere. Timmere wunu kica kenwu kenwu i kom balwu, acalo Obaŋa otimowu kica i Kricito. Potto wunu kite Obaŋa acalo itino mere ame emaro. Wap wunu yo me mar, acalo Kricito rik omarowa, te miye kene pirwa, me ebed mot me aŋola me yalo Obaŋa, a ŋwece kur. Cite tim me coco kede tim me caro caro ducu kede woro me lim myero kur lwoŋ nyiŋe i akinawu, mano en aber baŋ jo Obaŋa. Gin me lewic kede kop me miŋomiŋo, onyo arat a konnyere mom, myero mom winyere baŋwu. Akaka magi-nono, mi wunu pwoc baŋ Obaŋa. Niaŋ wunu aber ni mom tye ŋattoro i kin otim tim me coco, onyo me carocaro, onyo oworo me jami, ame bino nwoŋo dulloro ame bedo megi i loc a Kricito kede me Obaŋa, pien woro me jami rom aroma kede woro cal jogi. Kur imi wunu ŋattoro bwobwolowu kede koppogo a yore mom, pien akemo Obaŋa bino i kom jo a mom winyo doge pi kodi timmono. Pi mannono, kur inotte wunu kedgi. Rik kom irom wunu aroma i piny acol, ento aman doŋ idoko wunu dyeceŋ i Rwot; kitewu myero doŋ bed kite a jo me ceŋ. Pien nyig onyak pi ceŋ nen oko i gin ducu a tye aber, kede atir, kede me ateni. Dok daŋ tem wunu pwonyo gin a yomoro yi Rwot. Ticcoro ducu me piny acol a mom nyak, kur inotte wunu iye, ento yab wunu kodi ticcono kannaler. Pien me lewic me bedo kobo ka akoba keken gin a gin tio i muŋ. Ginnoro-ni ame lero onyuto nen oko kannaler; pien gin a nen kannaler doŋ odoko gire lero oko. Man en gin omio okobo ni, “Co oko, yin ame inino, cer oko iyi akina a jo oto, eka Kricito te menyi.” Gwokere wunu aber i kite kwo ame ibedo wunu kede; kur iwap wunu jo a kwia piny, ento jo aryek. Caa onen i nyimwu ti wunu kede i yo aber, pien kare-ni kare arac. Pi mannono, kur ibed wunu amiŋ, cite tem wunu niaŋ gin a Rwot mito. Dok myero mom imer wunu kede koŋo, pien mano kelo kite me caro caro. Akaka mannono, ber iweku Cuny Acil Poŋ i yiwu, kun ikobo wunu i akinawu kenwu kede jabuli, kede wer, kede wer me cuny, kun iwero wunu, ikuto wunu wer me pako Rwot i yiwu. Pwo wunu Obaŋa Papo i kare ducu pi jami ducu i nyiŋ Rwotwa Yecu Kricito. Miye wunu kenwu i te loc a jo ocele, ŋat man baŋ wadgi, pi lworo Kricito. Wun mon miye wunu i te loc a cogwu, acalo imiye wunu baŋ Rwot, pien ico obedo awi dako mere, acalo Kricito en awi lwak jo oye en, daŋ en alargi, gin daŋ obedo kome. Acalo lwak jo oye en bedo i te loc a Kricito, amannono daŋ mon myero bed i te loc a coggi i yore luŋ. Wun co daŋ mar wunu monwu i kite a Kricito omaro kede lwak jo oye en, te jalo kwo mere pire, me wek elony bed acil, a doŋ otyeko lwoke kede pii kede kop ame okobo iye, me ekel lwak oye en i nyime kene acalo nyako amwonya meicel, kun mom tye kannoro ojonne i kome, onyo oduduga, onyo ojojoŋa, ento bed acil aboŋo balloro i kome. Amannono daŋ, co myero mar mongi acalo omaro komgi kengi. Ŋat a maro cege, maro kome kene. Mom tye ŋattoro a dago kome kene, a mom pito dok gwoko aber acalo Kricito timo timo i kom lwak jo oye en, pien wan odul kome. Coc a yam ocoo kobo ni, “Pi kop man, dano bino weko pappere kede tottere, eka te bino notte gin i cege, gin aryo te doko kom acel.” Man en muŋ adit meicel. An i tuŋ baŋa agonyo i kom Kricito kede lwak jo oye en. Cite wun, ŋat acel acel myero mar cege bala kome kene, dako daŋ nen ni eworo cware. Wun itino, winy wunu onywalwu i Rwot, pien mano en aber. Coc a yam ocoo kobo ni, “Wor pappi kede totti,” man en cik me ageyi ame ociko iye pi ginnoro aber a bino ya iye, ni, “me ibed aber dok iperakino i lobo kare alac.” Aco wun papo, kur iteru itinowu i yo arac a kelligi akemo, ento miugi odoŋ aber kun ipwonyogi wunu dok inaogi wunu i kite abeco ame Rwot pwoo. Wun opii, winy wunu odoŋewu me lobo man i cunywu acel, acalo iwinyo wunu Kricito, kun ilworogi wunu i myelkom. Ticwu myero mom bed tic me yeŋo waŋ keken me yomoro ka cuny dano, ento ti wunu gin Obaŋa mito kede cunywu ducu, acalo opii a Kricito. Ti wunu ticwu i cuny aber, acalo itiyi wunu Rwot, mom acalo itiyi wunu jo, kun iŋeo wunu ni, ginnoro luŋ a dano moro otio aber, Rwot bino cule pire a rom aroma i ticcere-nono, kadi en opii onyo loye kene. Aco wun wegi opii, ti wunu kedgi kite acellono, wek wunu burogi bedi, kun ipoyo wunu ni, adwoŋ a loowu karacel kede gin tye i polo, daŋ tero jo ducu arorom. Me agikki mere, bed wunu atek i Rwot kede i twero me teko mere. Ruk wunu jami romo ame Obaŋa mio, me icuŋ wunu, igeŋere wunu iyi erupe a Catan. Pien wan mom oromo i dano wadwa, ento oromo oloc kede wegi twer me oko, kede ginnogo a loo wi podo luŋ i kare man me colpiny, dok kede lwak cunnyogo areco a tye i dye polo. En omio myero igam wunu jami romo luŋ ame Obaŋa mio, me wek bin konywu i cuŋ atek i nino arac, pwod daŋ ibino cuŋ wunu a doŋ ilolle wunu i yo luŋ aluŋa. Pi mannono, myero icuŋ wunu ame ilido wunu pyerwu kede ateni; ruk wunu kite atir bed nyonyo geŋo korwu, kun yikerewu me rabo amut aber me kuc bedo acalo amuk me tyenwu. Akato luŋ, iyee myero bed kwotwu a twero miyowu neko mac i kom atero ame Arac obao. Gam wunu larre bed tok nyonyo me wic, kede kop Obaŋa ame en pala bat a Cuny Acil. Kwa wunu Obaŋa kun ibako wunu dogwu i kare luŋ i Cuny Acil. Bed ame iterre wunu i kare luŋ i diyo cuny, kun ikwao wunu pi jo Obaŋa luŋ aluŋa. Kwa wunu pira daŋ me Obaŋa yab doga, mia kop me akoba, me ayab muŋ me amut aber kede tekcuny. An akwena mere a rom aroma i ŋat a cuŋ pi lobo mere, cite otwea oko kede jegere. Obaŋa mia arab kede tekcuny, kit a myero akob kede. Tukiko, ominwa ame omaro dok atic a Rwot me agena, bino tittiwu kop i koma kede i kom ticca. Acwae baŋwu pi kop man ikome, me wek en miwu iŋe wunu kite a wan otye kede, dok en ocuk cunywu. Kuc kede mar kede iyee ame ya i baŋ Obaŋa Pa po kede Rwotwa Yecu Kricito bed baŋ omegowa. Winyo Obaŋa bed baŋ jo luŋ aluŋa ame maro Rwotwa Yecu Kricito kede mar a mom to. Waraga man oya i baŋ Paulo kede Temoteo ame gin omiro a Kricito Yecu. Baŋ jo Obaŋa luŋ a tye i Kricito Yecu ame bedo i Pilipi, karacel otelgi kede okonygi. Obaŋa Papawa kede Rwotwa Yecu Kricito miwu winyo kede. Apwoo Obaŋana i kare luŋ ame atye ka poyo pirwu. I kwacca luŋ akwao pirwu ducu i yomcuny, pien cakere i nino me ageyi tuno atot onyoni, inotte wunu keda i tic me rabo amut aber. Aniaŋ aber ni, ŋat ame ogeo tic man aber i akinawu bino cobo kakare naka ituno i nino a Kricito Yecu. Oporre an iparo pirwu luŋ i kite-nono, pien ilitta wunu meicel, pien wun ducu inotte wunu karacel keda i winyo ame Obaŋa omia kan i buc kede dok kare ame alaro pi amut aber me mok atek. Obaŋa obedo cadenna ame ŋeo ni, parra atut pirwu ya i mar a Kricito Yecu ikome. Dok akwao Obaŋa ni mano, mar mewu myero doŋ medde ameda i ŋec ikokome kede niaŋ atut, me ipwoo wunu gin aber akato. Mio ibedo wunu ame yiwu ler aboŋo roccoro i komwu i nino a Kricito, dok daŋ mio tic ducu abeco me kite atira bino nya i komwu pi Yecu Kricito, kun kelli Obaŋa kwogo kede pak. Omegona, amito iŋe wunu ni, gin ame otimere i koma okonyo atek me nyayo amut aber. Ocirikali a Kaicari luŋ, kede jo ocele ducu, aman oŋeo aber ni, an atye i buc pi Kricito. Dok omegowa apollere gengi omedde i kom Rwot pi bedona i buc, omio gin orabo kop Obaŋa kede tekcuny adwoŋ meicel, aboŋo lworo. Ateni, jo mogo rabo pi Kricito i nyeko kede daa, ento jo ocele mere rabo i cuny aber. Joni rabo pi mar, kun oŋeo ni, omia tic me romo pi amut aber. Jo ocele ca rabo nyiŋ Kricito pi laro dito kun yigi mom ler, tamgi tye me medda can i buc kan. Kopporo gire mom, an gira alelo alela, pien i yore luŋ, onyo i goba aŋar iyi ateni, otye ka rabo pi Kricito. Eyo, pwod dok abino lelo. Pien aŋeo aber ni, pi kwacwu kede pi kony ame ya i baŋ Cuny Acil a Yecu Kricito, bino miyo abwot oko. Pien mitta kede genna adwoŋ tye ni, lewic mom bino maka i ginnoro, ento ni abino kelli Kricito kwogo i koma-ni kede tekcuny adwoŋ, i kare man acalo i kare luŋ, kadi akwo onyo ato. Pien i tuŋ baŋa, bedo kwo en Kricito, aco to mio anwoŋo agoba. Ka abedo kwo i kom, ticca bino medde nya; cite mom aŋeo gin ame abino yero. Kwanyo acel i kin aryo-ni ocuŋo wia oko. Mitta tye ni kono ato me abed wan i Kricito, pien mano en ame ber akato meicel. Ento bedo kwo i kom mitte meicel pirwu. An aniaŋ i man, omio doŋ aŋeo ni, pwod abino bedo, dok abino ri baŋwu ducu me imedde wunu anyim, ibed wunu kede yomcuny i iyeewu. Mano bino miyo wakerewu pira i Kricito Yecu bino bedo adwoŋ meicel, ka dok adwogo baŋwu. Gin a pire dit keken en ene ni, kite me kwowu myero rwatte kede gin ame amut aber i kom Kricito mito, me kadi abino ate nenowu, onyo abedo teŋe, awinyo kop i komwu, myero aŋe ni, icuŋ wunu atek i cuny acel kede tam acel, kun ilwenyo wunu karacel pi iyee ame bino pi amut aber. Kur iweku okworwu pot cunywu i ginnoro ducu. Man en anyut a cimmigi kannaler ni gin obino rwenyo odoco, cite nyuttiwu ni obino larowu; mano gire ya i baŋ Obaŋa. Pien en omiowu winyo pi Kricito, mom winyo me ye en keken, cite dok winyo me neno can pire. Idonyo wunu i kit romo a rik ineno wunu i koma, dok daŋ aman iwinyo wunu ni pwod atye iye. Pi mannono, ka inwoŋo wunu tekcunnyoro pi bedo i Kricito, onyo marroro ame mio idio wunu cunywu, onyo notte moro i Cuny Acil, onyo cunnyoro me kica ame mio itimo wunu jo ocele ber, mi wunu doŋ yomcunya cobere aber kit man: bed wunu i tam acel kede mar acel, kun inotte wunu i cunywu, tamwu daŋ bed acel. Kur itim wun ginnoro pi laro dito onyo pi wakere awaka nono, ento bed wunu kede mwolo, kun ŋat acel acel tero awottere acalo en dano adit akato en oko. Kur itam pi gin ame konyo ka yin keken, cite tam pi gin a konyo jo ocele. Bed wunu kede cuny a rom i en a rik Kricito Yecu obedo kede. Iyi epone mere rik en Obaŋa ikome, cite mom olido bedo rom kede Obaŋa. Ojalo mano ducu, te tero kite ma opii, ote nywale acalo dano. Ka doŋ opello i cal dano, omwolle gire kene, obedo awiny naka i to, naka atot i to me yataria. Pi mannono, Obaŋa omie dit amalo meicel, dok daŋ omie nyiŋ a tye malo akato nyiŋ ocele luŋ, me wek gin ducu a tye i polo kede i lobo, anaka gin ducu a tye piny i te lobo, rum coŋgi piny me woro nyiŋ Yecu, leb luŋ otuc daŋ ni, Yecu Kricito en Rwot, kun kelli Obaŋa Papo kwogo. Pi mannono, wun ame amaro, pien wun ibedo wunu rik iwinyo wunu doga i kare luŋ ka pwod abedo baŋwu, myero ibed wunu kede winy ame okato kare amanni ame doŋ atye bor kedwu. Cob wunu tic me larrewu kenwu i lworo kede myelkom, pien Obaŋa en ame tye atic i yiwu kun miowu mit kede teko me tic, me iyom wunu cunye. Ti wunu tic ducu aboŋo ŋuŋura moro onyo pyem, me ibed wunu aboŋo kopporo a loowu, ame balloro daŋ mom i yiwu, otino Obaŋa ame roccoro pe i komwu i akina Iwagi jo ogom ame oballe oko. Itye wunu ka ryeny i lobo iyi akina jo bala acer, pien imako wunu kop me kwo doŋ atek. Mano bino miyo awakere i nino a Kricito ni, mom rik aŋweco nono, dok daŋ mom alolle nono. Kadi bed oony remona, te bedo acalo gin ame oonyo i wi keno lam, kun iyeewu kede ticwu baŋe bedo acalo mot ame oŋolli Obaŋa, an gira yia yom, daŋ anywako yomyia kedwu luŋ. Amannono, wun daŋ myero yiwu bed yom, dok lel wunu karacel keda. Atye i gen i Rwot Yecu me cwalo Temoteo baŋwu oyot, me awiny kite itye wunu kede; mano bino cukoro cunya an daŋ. Mom dok atye i ŋattoro ocele a tye i kite cuny a en tye kede, ame twero paro pirwu ateteni bala en. Jo ocele mere luŋ paro ka gin a makogi keken, mom oparo pi gin a mako Yecu Kricito. Kite a Temoteo onyuto kede konnyere, mano iŋeo wunu aber. En kede an calo papo kede wode; wan onotte kede i tic karacel pi amut aber. Pi manno, atye i gen me cwale baŋwu oyot, tekki aniaŋ kite a piny tye awot kede i tuŋ baŋa. Dok daŋ atye i gen i Rwot ni an ikoma abino tuno baŋwu i kare a mom bor. Aneno daŋ ni myero acwal baŋwu ominna Epaprodito, ame en atic wadwa ame olwenyo karacel keda, a rik iore wunu baŋa pi konya i pekona. Pien wun ducu ibedo muye wunu, dok cunye obedo ka ton atek, pien rik iwinyo wunu ni kome lit. Ateteni, kome rik obedo alit, ame daŋ obwot to oko. Ento Obaŋa otimme ber; mom en keken, anaka an daŋ, me kur medda cwercuny i kom en ocele ca. En gin omio atye i mit adwoŋ me cwaye baŋwu me ilel wunu me nene doki, an daŋ mom doŋ abed i cwercuny adwoŋ, jole wunu i Rwotwa kede yom a yiwu luŋ; ket wunu kwogo i kom jo a cal i en. Pien rik en ojalo kwo mere te buco to oko pi tic a Kricito, me tyeko gin orem i kom kony ame imia wunu. Me agikki mere omegona, lel wunu i Rwot. An me nwoyo coyiwu gin a rik koŋ acoyiwu, mom ola gira, dok daŋ twero geŋowu poto i kan arac. Yab waŋwu i kom gwogi-nu, ame gin otim tim areco, oŋol dul kom jo. Pien jo olirre me ateteni gire wan, wan ame oworo Obaŋa i Cuny Acil, dok owakere i Kricito Yecu, kun mom otye i gennoro i kom i oko. Kun kono an ikoma daŋ aromo bedo i gen, ka ŋattoro tamo ni eromo bedo i gen i kom i oko, an aloc gira. Olira a doŋ atyeko nino aboro me ditta, rokka jo Icrael me i atekere a Benjamin. An a dano me Eburania ikome, jo Eburania en onywala, i kop a dok i kom cik a Muca, an abedo Aparicayo. Kop a dok i kom keto cuny, rik awuno lwak oye Yecu awuna. Kop a dok i kom kite atira ame ocuŋ i kom gwoko cik, rik kopporo gire mom i koma. Ento ginnoro ducu a yam atamo ni konya, onyoni doŋ aterogi acalo gin a konnyere mom, pi Kricito. Ateteni, tye ginnoro aber ame okato meicel, en iŋeyo Rwotta Kricito Yecu, ame omio atero jami luŋ acalo gin a konygi mom. Pire an adoko acan jami luŋ, dok aterogi acalo gin obedo yugi, me aluny nwoŋo Kricito, me nwoŋa anotte karacel kede en. Mom atye i kite atira ame mega an ikoma, mom en a bino pi cik, ento kite atira ame onwoŋo pi ye Kricito, en ame oya i baŋ Obaŋa ikome dok ame omio pi iyee. Amito aŋe Kricito, kede teko ame ocere kede; amito nywako can a en okanyo, adok acalo en obedo kede i to mere, me ka twerre atun naka i cer iyi akina a jo oto. Mom akobo ni atyeko nwoŋo, onyo ni doŋ awok oko, cite amedde wot anyim kun atemo mako pira kena gin ame Kricito Yecu doŋ omaka pire. Omegona, an mom atamo gira ni doŋ atyeko mako; tye ginnoro acel keken: wia bedo will i gin okato i ŋec, kun alaro gin a tye i nyim acalo dano ame obuto i ŋwec. Aŋweco anyim kun akemo tol, me anwoŋ mot, en lwoŋo ame Obaŋa tye alwoŋowa kede malo i Kricito Yecu. Wan jo luŋ ame ocwiny ber obed wunu i kodi tammono; dok daŋ ka tamwu opokere oko i kopporo, Obaŋa bino yabbiwu man daŋ. Gin a mitte keken, myero imedde lido wunu atek yo a doŋ ityeko tuno wunu iye. Omegona, notte wunu karacel i potto kitena. Wan doŋ omiowu anen me aluba; cik waŋwu i komjo ame wapo anennono. Abedo kobbiwu tyen apol ata, dok daŋ anwoyiwu tin kede pigwaŋa ni, tye jo apol ame kwogi omiogi obedo okwor me to a Kricito i kom yataria. I agikki mere, jo-nono bino rwenyo odoco, pien obaŋagi en yigi, gin onwoŋo kwogogi i gin a myero migi lewic, tamgi kwako ka gin me loba man. Aco wan pacowa adwoŋ tye i polo; wan otye okuro Alarwa ame aya i kuno, en Rwotwa Yecu Kricito. En bino loko komwa, arecoreconi doko acalli kome me kwogo, kun tio kede teko mere ame mie twer me kela jami luŋ aluŋa i te loccere. Pi mannono, cuŋ wunu atek i Rwot amanno, omegona ame amaro dok ame aparo meicel, pien ibedo wunu yomcunya kede tokka me kwogo, owotena. Yin Eudia kede yin Cuntuke, akwaowu ba, bed wunu i cuny acel i Rwot. Yin atic wadwa me ateni daŋ, kony mon-ni ba, pien gin oromo karacel keda pi amut aber, karacel kede Kelementi daŋ kede otic wadwa ocele luŋ, ame nyiŋgi doŋ ocoo oko i buk me kwo. Lel wunu i Rwot kare luŋ. Dok anwoo ni, Lel wunu. Weku jo luŋ ŋe mwolowu. Rwot doŋ ceggi. Kur ipar wunu ginnoro, cite i kop ducu mi kwacwu ŋeye baŋ Obaŋa i lega kede i bako dog, karacel i pwoc daŋ. Mio kuc Obaŋa ame kato ŋec a jo luŋ bino gwoko cunywu kede tamwu aber i Kricito Yecu. Me agikki mere, omegona, ket wunu tamwu i kom kop acalo magi: gin ducu a tye ateni, gin ducu a romo awora, gin ducu a tye atira, gin ducu ame cil, gin ducu amwonya, gin ducu ame opwoo, ginnoro keken ame ber meicel, ame porre apaka. Ti wunu gin a nwaŋ ipwonyo wunu, igamo wunu, iwinyo wunu dok ineno wunu i baŋa: eka Obaŋa won kuc bino bedo kedwu. An alelo atek meicel i Rwot pien aman dok iparo wunu pira kit a yam con. Kono iyi ateni mere mom iweko wunu paro pira, ento kare me konya en obedo peyiwu. Dok daŋ pe akoko can, pien an doŋ apwonyere ni, gin ame atye kede roma gire. Aŋeo bedo i gin anok kede bedo i gin abup. Adonyo i dul a jo a ŋeo bedo i ginnoro a binnigi i kare moro keken, yeŋ atek ateka onyo kanyo kec, bedo i lonyo abup onyo bedo kede can. Atwero jami luŋ aluŋa pi Kricito ame mia teko. Ento wun rik itimo wunu ber me notte keda i peko ame odia. Dok wun jo Pilipi iŋeo wunu aber ni, ka rik aya i Makedonia i ageyi rabo amut aber, mom tye Iwakkoro i akina jo oye Rwot ame onotte keda i yo man me miyo kede gamo mot, kono ka wun keken. Anaka i kare ame atye i Tecalonika icwaya wunu kony a mitte kom tyen aryo twal. Mom ni mano cunya tye i kom mot, ento atamo pi nyayo agoba ame obino kwanniwu. Agamo gin imia wunu ducu, kun dwoŋ ame okato kare. Oromo doŋ aber, pien Epaprodito otyeko miya mot ame icwao wunu. Obedo gin a ŋwece kur, acalo gin ame oŋolli Obaŋa, a en ojolo, a yomoro yie. Obaŋana bino miyowu gin luŋ ame orem i baŋwu, kun kwanyo iyi lonyo mere me kwogo adwoŋ a en tye kede i Kricito Yecu. Kwogo bed baŋ Obaŋa Papawa nakanaka. Amen. Mot wunu jo Obaŋa luŋ i Kricito Yecu. Omegowa a tye karacel keda daŋ omotowu. Jo Obaŋa luŋ omotowu, akato mere jo me ot a Kaicari. Winyo a Rwotwa Yecu Kricito bed kede cunywu. Waraga man oya i baŋ Paulo ame en akwena a Yecu Kricito pi mit Obaŋa, kede i baŋ ominwa Temoteo. Baŋ jo Obaŋa kede jo a genne i Kolocai, a tye i Kricito. Obaŋa Papa wa miwu winyo kede kuc. Wan opwoo Obaŋa Papa a Rwotwa Yecu Kricito kare luŋ ame okwao pirwu. Pien wan owinyo pi iyeewu i kom Kricito Yecu kede pi marwu baŋ jo Obaŋa luŋ. Mannono luŋ obino pi gin igeno wunu ame okano pirwu i polo, a rik iwinyo wunu pire con i kop me ateni, ame en amut aber ame obino baŋwu. Tye daŋ a nyayo nyige kede doŋo i wi podo luŋ i kite acellono, acalo tye atiye baŋwu, cakere i nino ame iwinyo wunu kede, eka ite niaŋ wunu i kica Obaŋa iyi ateni, kite a rik Epapira opwonyowu kede, ame en amiro wadwa ame omaro. En akony tic a Kricito pirwa ame genne. En daŋ ame otittiwa pi mar ame itye wunu kede i Cuny Acil. Cakere i nino ame owinyo iye pire, wan okwao Obaŋa pirwu a mom okeŋ, kun okwao ni iniaŋ wunu odoco i gin a en mito, kun ibedo wunu i ryeko kede niaŋ ducu ame Cuny Acil mio. En konywu, kwowu obed a myero baŋ Rwot, ame yomoro cunye odoco, kun itio wunu kwone tic luŋ abeco, dok daŋ imedde wunu i ŋeyo Obaŋa. Obaŋa jiŋwu kede teko luŋ ame rwatte kede twerrere me kwogo, me ikanyakino dok idi wunu cunywu i yore luŋ i yomcuny. Mi wunu pwoc baŋ Obaŋa Papo ame omiowa twer me nywako jami ame bedo i lero, ame en bino miyo jo mere acil. En olakorowa oko iya i te bwoc a piny acol, eka te kobowa i te loc a Wode ame emaro. Lakorowa i bal kede weko balwa ya i baŋe. Kricito obedo cal ame nyuto Obaŋa a mom nen, atin kao me gin Obaŋa oketo luŋ; pien jami luŋ aluŋa rik oketo pi twerrere, gin a tye i polo kede gin a tye i wi lobo, gin a nen kede gin a mom nen, naka wegi kome me loc kede wegi dito, kede oloc, kede wegi twer. Jami ducu rik oketo pi twerrere dok daŋ pire. En ame okwoŋo nyim jami luŋ aluŋa, dok daŋ i en jami ducu onotte karacel. En wic, lwakjo oye en obedo kome. En obedo ageyi, en ogeo ya i akina jo oto, me en tel yo i kin jami luŋ. Pien Obaŋa i kite ame en tye kede i yore luŋ oye bedo i en; dok daŋ oye dwoggo jami luŋ baŋe i Kricito, gin ame tye i wi lobo kede gin ame tye i polo, kun okelo kuc pi remo me to mere i kom yataria. Wun rik ipokere wunu oko kede Obaŋa, rik wun okworrere i tamwu, kun itimo wunu tim areco. Cite aman doŋ pi to a Wode ame rik odoko dano, en odwoggowu oko baŋe, me ekelwu i nyime ame icil wunu, dok daŋ itye wunu aboŋo balloro i komwu, ame kopporo arac mom i komwu. Medde bedo wunu kede iyee, kun icuŋ wunu ikiŋ, dok imoko wunu a mom ileŋere i gen me amut aber ame iwinyo wunu, ame orabo baŋ ginaketa luŋ a tye i te polo, dok daŋ ame an Paulo rik adoko atic pire. Aman an gira alelo alela i can ame aneno pirwu, pien pi rem ame an atye akanyo i koma, akonyo me tyeko gin ame orem i can a Kricito pi kome, ame lwak jo oye en. Pire an rik adoko atic ame konyo lwak man pi tic ame Obaŋa omia pirwu, me miyo kop Obaŋa ŋeye odoco. En muŋ ame okanne pi kare alac baŋ lwagi jo apol ata, ento aman doŋ Obaŋa omio onen oko kannaler baŋ jo mere. Obaŋa gire i mittere kene otamo me miyo jo mere ŋeyo kit ame muŋ man pire dit kede iyi akina Orok, dok me kwogo adwoŋ. Muŋŋono ene, ni, Kricito tye yiwu; mano mio ibedo wunu kede gen me nywako kwogo Obaŋa. Wan orabo pi Kricito kun okwenyoro jo ducu, dok daŋ opwonyo jo luŋ i ryeko ducu, me okel dano acel acel i nyim Obaŋa ame ocwiny i Kricito. Man en gin omio alolle atek, kun akanyakino kede teko mere adwoŋ a tye atic i yia. Amito iŋe wunu kite ame an akanyakino kede i tic pirwu kede pi jo a tye i Laodikia, naka jo luŋ ame mom ru oneno waŋa. Atimo amannono me cunygi bed tek dok wek gin onotte karacel i mar. Amito gin bed acalo olonyo pi kop ame odonyo atut i cunygi, omio gin oniaŋ aber, daŋ gin oŋeo muŋ Obaŋa ame en Kricito ikome, ame en Obaŋa okano iye lonyo mere luŋ me ryeko kede ŋec. Akobo man me ŋattoro kur rwenywu kede pyem me goba goba. Pien kadi an mom atye kedwu i kom, ento atye kedwu i cuny kun alelo me neno kite ame iwoto wunu kede aber i kop luŋ, kede iyeewu ame ocuŋ atek i kom Kricito. Acalo doŋ igamo wunu Rwot Yecu Kricito, myero doŋ ibed wunu i en. Mi Iwitwu dony atek i kome, bed wunu acalo ot ogero i kome, kun icuŋ wunu atek i iyee acalo rik opwonyowu, kun pwocwu medde ameda. Gwokere wunu me kur ŋattoro yakwu oko kede tam me ryeko onyo bwolloro a tere mom, kun lubo pwony oya i baŋ kwaro kede pwony ajogi acon me wi podo, ento kun mom olubo Kricito. Pien i kome en Kricito, Obaŋa doŋ opoŋo iye kite a en tye kede i yore luŋ, wun daŋ doŋ ipoŋ wunu i kwo i kite luŋ i Kricito. En obedo awi oloc kede wegi twer ducu. I Kricito daŋ doŋ rik olirowu oko kede alira mere ikome; mom iyi alira ame ciŋ dano otio i komwu, ento pi kwanyo oko i komwu kwo me anywalli me kom, acalo igonyo wunu boŋo. Dok i kare me batijawu rik oyikowu karacel kede Kricito, eka daŋ ite cer wunu oko karacel kede pi iyeewu i kom tic Obaŋa atek ame rik ocero kede Yecu Kricito iyi akinajo oto. Wun ame rik onwoŋo daŋ ito wunu oko pi balwu kede pi mom liro riŋo komwu, aman doŋ Obaŋa omio ikwo wunu oko karacel kede wegi twer ducu. Kede Kricito, kun daŋ otimowa kica i balwa ducu. Waraga me bannyi ame ocoo i wiwa pi cik a rik omio kop oloowa, en oweo gire oko; ocwao oko teŋe kun oguro oko i kom yataria. Kricito doŋ omao jami me romo oko i baŋ jogi ame oloc kede wegi twer, kun ŋatte kannaler i kom yataria ni doŋ eloogi. Pi mano doŋ ba, ŋattoro kur dok ŋolliwu kop i kom cam onyo gi-amata, kadi pi nino adoŋo, onyo por dwe, onyo pi cabit. Magu luŋ obedo ka tipo keken me gin ame bino bino, ento kom ginnono ikome tye baŋ Kricito. Kur daŋ ŋattoro ŋol ni kop oloowu kun mito ni jo mwolle kengi goba kun oworo omalaika, kun ocuŋ ka i kom anyuttogo ame eneno. Kodi jo-nu yeyea nononono aboŋo tere, kono ka i tamgi me dano keken, ento kun mom olido Kricito ame en wic, ame kom luŋ aluŋa pitte baŋe, dok notte karacel i waŋ nyoo mere kede i ler, eka te doŋo i kite ame Obaŋa mito ni doŋ kede. Ka wun rik ito wunu oko karacel kede Kricito, eka ote gonyowu oko i te loc a jogi acon me wi podo, kara piŋo pwod dok imedde bedo wunu acalo jo me lobo, kun igwoko wunu cik acalo magi? “Kur imak, kur ibil, kur igud.” Magu luŋ obedo cik kede pwony a dano, ame mako ka jami ame tum oko ka otio kedgi. Ateni, cik magi nen bala tye iye ryeko pi keto cik me woro Obaŋa ame iroto wunu kenwu, dok pi mwolle ken, me topo kom i can; ento mom konyo kadi acelloro me loyo mit me kom. Acalo rik doŋ icer wunu karacel i Kricito, ket wunu doŋ cunywu i kom jami a tye malo, kan ame Kricito tye iye i kabedo me kwogo i laŋet Obaŋa tuŋ cem. Ket wunu cunywu i kom jami a tye malo i polo ento mom i kom jami me lobo. Pien rik ito wunu oko, kwowu aman doŋ okano oko karacel i Kricito baŋ Obaŋa. Ka Kricito ame en obedo kwowa bino nen, wun daŋ ibino nen wunu i kwogo karacel kede. Pi mano, nek wunu doŋ oko gigi mogo me lobo a tye i yiwu: coco, caro, mit me kom, agoma yic arac, kede woro me jami; pien woro me jami rom aroma kede woro cal jogi. Akemo Obaŋa bino pi kodi timmono i kom jo a mom winyo doge. Kodi tim-mi wun daŋ rik ibeo wunu iye i kare a gin obedo kit kwowu ikome. Ento aman doŋ bol wunu magi luŋ oko; akemo, kecyic, raccuny, ayet, kede kop me lewic myero kur winyere i dogwu. Kur ibwolle wunu dok kenwu kenwu, pien doŋ ityeko wunu gonyo oko kwowu me anywalli kede timmere, ite ruko wunu dano anyen ame Acwec tye a roco i ŋec anyen me dwoko i callere. Kannono mom dok bedo iye apokapoka i kin jo Grik kede Ojudaya, ŋat oliro kede a mom oliro, amyere moro a mom ŋeo leb, rok odoŋ cen, opii, kede ŋat a loye kene, pien Kricito ojoo gin luŋ, dok daŋ tye i gin luŋ. Aco wun ibedo wunu jo ame Obaŋa oyero, jo acil ame Obaŋa maro; pi mannono, rukere wunu doŋ i cuny acwer pi can a dano wadwu, kica, mwolo, woro kede diyo cuny. Di wunu cunywu ŋat acel acel i kom awottere, kun itimo wunu kica i akinawu kenwu i kom balwu. Ka ŋattoro i akinawu tye kede kopporo i kom ŋat ocele, timere kica i kom bal myero bed tye acalo Rwot otimowu kica. Ento akato magu luŋ, ruk wunu mar. Mar keken en atweo jami luŋ, noto karacel ame owok aber. Mi wunu kuc a Kricito ame rik olwoŋowu iye i kom acel, olo cunywu, eka ite bedo wunu jo a mio pwoc i kare luŋ. Kop a Kricito myero bed i yiwu aber odoco ka ipwonyere wunu kenwu kenwu dok ijukere wunu i ryeko luŋ ame Obaŋa omiowu. Dok daŋ ka iwero wunu jabuli, wer me pako Obaŋa kede werrogo ocele me dini, wer wunu baŋ Obaŋa kede pwoc i cunywu. Gin luŋ ame itio wunu i kop onyo i timmogo, ti wunugi luŋ i nyiŋ Rwot Yecu, kun imio wunu pwoc baŋ Obaŋa Papo bea baŋe. Wun mon, miye wunu i te loc a cogwu, pien mano en a myero i akina jo ame tye i Rwotwa. Aco wun co, mar wunu monwu, wek wunu kolo i komgi bedi. Wun itino, winy wunu onywalwu i kop luŋ, pien kodi timmono yomoro yi Rwot. Wun papo, kur iter itinowu kolokolo, naka mio cunygi balle oko. Wun opii, winy wunu odoŋewu me loba man i kop luŋ i cuny acel, mom i tic a yeŋo waŋ, me yomoro ka cuny dano keken, ento i cuny a lworo Rwot. I ticcoro ame itio wunu, ti wunu aber i cunywu luŋ acalo itiyi wunu Rwot, ento mom pi dano. Ŋe wunu ni ibino nywako wunu jami ame Rwot oyiko pi jo mere acalo ocarawu. Wun opii a Rwotwa Kricito. Pien atim gin arac, obino daŋ cule pi gin arac ame en otimo, pien Rwot mom poko i akina jo. Wun wegi opii, ti wunu i yo atir a rorom, kun iŋeo wunu ni, wun daŋ itye wunu kede adwoŋwu malo i polo. Miye wunu atek i kwayo Obaŋa, kur inin wunu iye; mi wunu pwoc daŋ. Kwa wunu pirwa daŋ, me Obaŋa yabbiwa doggola me rabo muŋ i kom Kricito, pien pire, en omio an atye i buc kan, me arab i kit a myero, ami ŋeye odoco. Ti wunu i ryeko meicel i nyim jo ame tye oko; caa ame inwoŋo wunu, ti wunu kede aber. Kopwu myero bed ame kado oromo aber dok amit, me iŋe wunu kite a myero idok wunu kede i peny a ŋat acel acel. Ominwa Tukiko ame omaro, ame obedo atic a genne, dok amiro wadwa i Rwot, bino tittiwu kop luŋ i koma. Acwae baŋwu pi kop man ikome, me miwu iŋe wunu kite ame wan otye kede, dok cuk cunywu. Acwae gin kede ominwa ocele ame omaro, Onesimo; en daŋ genne, dok en ŋat acel oya i baŋwu. Gin bino tittiwu ginnoro ducu ame otimere kan. Abuc wadwa Arisitako omotowu, kede Marako okeo a Baranaba ame atyeko cikowu pire; ka en otuno baŋwu, jole wunu aber, dok kede Yecu ame nyiŋe ocele Yucito, daŋ omotowu. Jo-nu adek-k i keken, gin Ojudaya ame tio karacel kedwa kan i loc Obaŋa. Gin okweo cunya meicel. Epapira amiro a Yecu Kricito ame ŋat acel a daŋ oya i baŋwu, daŋ omotowu. I kwaccere me kare luŋ, en po pirwu atek ateka, me iniaŋ wunu i gin luŋ ame Obaŋa mito aboŋo kala akala. An cadennere ame amoko ni en atic atek pirwu kede jo a tye Laodikia kede Kerapoli. Dakatal Luka ame omaro kede Dema daŋ omotowu. Cwa wunu amotta baŋ omegowa a tye i Laodikia kede baŋ Nimpa daŋ, naka lwak jo oye Kricito a cokere i ode. Ka waraga man doŋ otyeko kwano oko i akinawu, myero imi wunu kwan daŋ baŋ lwak jo oye Kricito a tye i Laodikia; wun daŋ kwan wunu waraga oya i Laodikia. Kobbi wunu Arakipo ni, myero enen ni ecobo tic a rik omie i Rwot. An Paulo amotowu i ciŋa. Wiwu kur wil i jegerena. Winyo Obaŋa bed kedwu. Waraga man oya i baŋ Paulo gin i Silvano, kede Temoteo. Baŋ Iwak jo oye Kricito ame bedo i Tecalonika ame tye i Obaŋa Papo kede Rwotwa Yecu Kricito. Winyo kede kuc obed baŋwu. Wan opwoo Obaŋa didik pirwu luŋ kun otuco nyiŋwu i kwacwa me kare luŋ, kun opoo i kite ame iketo wunu kede iyeewu i tic i nyim Obaŋa Papawa, kede kite ame icanne wunu pi mar, karacel kede kite ame idio wunu kede cunywu pi genwu i Rwotwa Yecu Kricito. Omegowa ame Obaŋa maro, wan oŋeo ni Obaŋa doŋ oyerowu oko, pien amut aber ame orabo baŋwu, rik mom obino baŋwu i kop keken ento kede teko daŋ, kede i Cuny Acil, kun onwoŋo odonyo atut i cunywu. Wun iŋeo wunu aber kite ame wan obedo kede baŋwu pi konyowu. Wun daŋ rik icako wunu potto kitewa kede mea Rwot, pien igamo wunu koppere i dye awunawuna adwoŋ a kun ilelo wunu i yomcuny ame Cuny Acil mio. Man omio idoko wunu anen baŋ jo luŋ oye Yecu ame tye i Makedonia kede Akaya. Pien imio wunu kop a Rwot owinyere, mom ka i Makedonia kede Akaya keken, ento kop i kom iyeewu i kom Obaŋa doŋ olal i kabedo luŋ, ame wan mom dok oromo kobo ginnoro iye. Pien gin ikomgi onyao kop i komwa, kite a rik ijolowa wunu kede, naka kite ilokere wunu kede baŋ Obaŋa, kun iweko wunu cal jogi pi woro Obaŋa akwo, dok me ateni, dok ikuro wunu Wode ame bino dwogo i polo, a rik en ocero iya i akina jo oto, en Yecu ame olarowa i akemo Obaŋa ame bino tuno. Omegowa, wun ikomwu iŋeo wunu ni, binowa baŋwu rik mom oke nono. Kadi bed wan oneno can dok otimowa tim me lewic i Pilipi acalo iŋeo wunu, kadi pyem obedo dwoŋ, Obaŋawa omiowa tekcuny me rabbiwu amuttere aber kannaler. Pien kop ame wan okelo mom oya i tam ogom onyo a mom olony, goba daŋ mom iye. Ento kite acalo Obaŋa doŋ otyeko pwoyowa, ote miyowa amut aber me araba, wan daŋ doŋ ote rabo amannono, mom pi yomoro cuny dano, ento pi yomoro cuny Obaŋa ame ŋio yiwa. Wun iŋeo wunu ni, wan rik mom olebo kop abeco nono, mom okano tamwa pi nwoŋo lim, Obaŋa en cadenwa. Mom daŋ oyenyo kwogo i baŋ dano moro, kadi i baŋwu onyo i baŋ jo ocele; kadi bed onwoŋo otye i twer me keto peko i komwu, pien wan okwena a Kricito. Ento rik omwol i kinwu acalo toto a gwoko itino mere. Parowu ocirowa meicel, omio rik mom omito miyowu ka amut aber keken ame oya i baŋ Obaŋa, ento anaka wan i komwa omiye baŋwu, pien omarowu meicel. Omegowa, itwero wunu po kite ame nwaŋ ocanne kede i tic, i kare ame orabbiwu amut aber ame oya i baŋ Obaŋa, otio dyeceŋ kede dyewor me kur oket peko i kom ŋattoro i akinawu. Wun ocadenwa, kede Obaŋa daŋ ŋeo kite ame wan obedo kede acil dok a kitewa atira, aboŋo kopporo ame oloowa i nyimwu wun jo oye Yecu. Dok iŋeo wunu kite ame obako kede dogwa baŋwu, kun otero ŋat acel acel i akinawu, ojiŋo cunywu acalo apap kede itino mere. Dok ocikowu ni, ilub wunu kite kwo a myero baŋ Obaŋa ame olwoŋowu i loccere kede i kwogo mere. Man en omio wan opwoo Obaŋa teretere, pien cakere ame igamo wunu kop Obaŋa ame iwinyo wunu i baŋwa, mom ijolo wunu acalo kop a dano, ento acalo kop Obaŋa. Kop Obaŋa gire ateni, tye daŋ ka tic i yiwu wun jo ame oye Yecu. Omegowa, wun daŋ ikoporo wunu kite a Iwak jo oye Obaŋa luŋ a tye i Kricito Yecu, i kabedo luŋ ame tye i Judaya, pien wun daŋ ineno wunu can i baŋ jowu ikome a rom i en a gin oneno i baŋ Ojudaya, ame nwaŋ gin oneko Rwot Yecu kede odwarpiny, ote ryemowa daŋ oko. Gin mom oyomoro cuny Obaŋa, cite opyem i jo luŋ, kun ogeŋowa kop baŋ Orok me gin larre. Mano omio gin omedo poŋo balgi apoŋa. Ento akemo Obaŋa doŋ obino i komgi atwal. Omegowa, ka rik opokowa kedwu pi kare anok, i kom ento mom i cuny, wan otemo meicel kede mit adwoŋ me nwoŋo yo me dok onenne wunu waŋ i waŋ. Rik wan omito bino baŋwu. An Paulo atemo tyen apol, ento Catan ogeŋowa oko. Pien genwa kede yomcunywa kede tok kwogo me nattewa i nyim Rwot Yecu Kricito i dwogo mere, en gin aŋo? Mom wun? Pien wun ikelliwa wunu kwogo kede yomcuny. A doŋ oneno ni mom oromo diyo cunywa, omiye me doŋ oko cen kenwa i Atene, eka ote oro baŋwu Temoteo, en ominwa kede atic Obaŋa i rabo amut aber a Kricito, me ojiŋwu atek dok odi cunywu i kom iyee mewu; me dano moro kur yeŋere i can magu. Wun ikomwu iŋeo wunu ni, cannogo myero pot i komwa. Pien i kare ame wan otye kedwu otittiwu con ni olwaŋnoro obino neno can, ame daŋ doŋ otimere acalo iŋeo wunu. A doŋ aneno ni mom aromo diyo cunya, aoro dano wek aniaŋ i kom iyeewu, pi Iworo ni onyo ca ŋit Abit jo obitowu oko te miyo ticwa ke nono. Ento amanni Temoteo doŋ odwogo baŋwa kun oya i baŋwu. En odwoggiwa kop amit i kom iyee kede marwu, dok daŋ ni ipo wunu pirwa didik, kun iparo wunu nenowa acalo wan daŋ oparo nenowu. Omegowa, mano en omio cunywa doŋ okwe i komwu pi iyeewu, i can kede i awunawuna ame owunowa kede luŋ; pien aman wan obedo kwo ka icuŋ wunu atek i Rwot. Kara kit pwoc aŋo a porrewa miyo baŋ Obaŋa pirwu, i yomcuny luŋ ame olelo kede pirwu i nyim Obaŋa? Iwor kede iceŋ wan okwao Obaŋa atek meicel pi neno waŋwu, me omed gin a pwod orem i kom iyee wu. Obaŋa Papawa ikome, kede Rwotwa Yecu Kricito, myero miwa onwoŋ yo me bino baŋwu. Dok Rwot miwu imedde wunu atek meicel i marre, ŋat acel acel baŋ awottere kede baŋ jo luŋ, i kite a wan omarowu kede, wek en jiŋ cunywu ibed wunu jo acil aboŋo kopporo a loowu i nyim Obaŋa Papawa, i kare me dwogo a Rwotwa Yecu kede jo mere ducu acil. Me agikki omegowa, okwaowu dok obako dogwa baŋwu i Rwot Yecu ni, imedde wunu anyim nakanaka i kite kwo ame imako wunu i baŋwa, ame yomoro cuny Obaŋa, ame itye wunu ka lubo-ni. Pien wun iŋeo wunu cik ame rik omiowu pi Rwot Yecu. Gin ame Obaŋa mito en ene, ni idok wunu jo acil: iwek wunu kite me coco, ŋat acel acel myero ŋe bedo kede cege kene i cuny acil kede me woro. Kur imi wunu mit me kom bwowu oko bala Orok a mom ŋeo Obaŋa. Ŋattoro kur bal baŋ ominnere onyo bwole i kop man; pien Rwot culo kwor i kop magi ducu acalo wan rik okobbiwu dok daŋ okwenyorowu. Obaŋa mom olwoŋowa pi jebere i bal, ento me bedo jo acil. Kite-nono ŋat ame kwero cik man, mom okwero dano ento okwero Obaŋa ame omiowu Cuny Acil. Kop a mako mar me omego, mom myero coyiwu kopporo iye, pien wun ikomwu Obaŋa otyeko pwonyowu oko me marre kenwu kenwu, daŋ doŋ imaro wunu omego luŋ me Makedonia ducu. Ento abako doga omegowa, medde wunu iye nakanaka, dok ket wunu cunywu i bedo mot. Ŋat man opar pi ticcere, kun daŋ tio kede ciŋe acalo nwaŋ ocikowu, me jo ame mom ŋeo Yecu pwo kitewu dok ginnoro kur rem i baŋwu. Omegowa, wan mom omito ibed ame ikwia wunu kop i kom jo a doŋ oto, mio ibino wunu bedo i cwercuny bala jo ocele a mom i gen. Wan oye Yecu oto, eka te cer. Jo ame oto kun oye Yecu daŋ amannono, Obaŋa bino kelogi karacel i Yecu. Okobbiwu kop a Rwot okobo ni, wan jo akwo ame odoŋ naka i nino me dwogo a Rwot, mom obino telo nyim jo a doŋ oto. Rwot ikome bino yitto piny kun ya i wi polo kede lwoŋo me twer, ame dwon amalaika adittere bino winyere, gwara Obaŋa bino kok. Jo ame yam oto i Kricito gin en a bino kwoŋo cer, icennere wan jo akwo, ame odoŋ, obino gwarowa karacel kedgi i pol, wek orwatte i Rwot i dye yamo; wan doŋ ote bino bedo baŋ Rwot nakanaka. Kwe wunu cunywu kenwu kenwu nakanaka i kop man. Ento kop a mako kare, kede nino, omegowa, mom myero aco pire baŋwu, pien wun ikomwu iŋeo wunu aber ni, nino a Rwot bino bino acalo akwo ame bino dyewor. Ka jo kobo ni, “Piny okwe, ginnoro arac mom,” to bino tuyogi atua bala rem me nywal ame bino i kom dako ayac, ka larre bino loyogi oko. Ento wun omegowa, mom itye wunu i piny acol, ame twero miyo nino-nu tuowu atua bala akwo. Pien wun ducu ibedo wunu jo me ceŋ, jo me dyeceŋ; wan mom jo me dyewor onyo me piny acol. Pi mano, mom myero inin wunu calo jo ocele, ento bed wunu neno kun igwokere wunu. Pien jo ame nino, gin nino dyewor, jo a mer koŋo, mer daŋ dyewor, ento wan jo me dyeceŋ, myero obed ame ogwokere. Oruk wunu iyee kede mar bed nyonyo geŋo korwa, oruku daŋ gen me larre, bed tok nyonyo wiwa me romo. Pien Obaŋa mom oyerowa me akemo mere pot i komwa, ento me olarre pi Rwotwa Yecu Kricito, ame con oto pirwa, me wek kadi oneno onyo onino, obin obed wunu kwo karacel kede. Pi mano, jiŋ wunu cunywu kenwu, ite daŋ konyere wunu i doŋo cunywu, ŋat man kede wadgi, acalo itye wunu ka timo. Obako dogwa baŋwu omegowa, wor wunu jo ame tye ka tic iyi akinawu ame canne pirwu i Rwot, kun gin pwonyowu. Ket wunu kwogo adwoŋ i komgi pi tic megi, kun imaro wunugi. Bed wunu i kuc kenwu kenwu. Obako dogwa baŋwu omegowa, juku jo ame balo kare aboŋo tic, jiŋ wunu cuny jo a cunygi toco, kony wunu jo agoro, di cunywu i kom jo ducu. Nen wunu ni ŋattoro i akinawu mom oculo gin arac kede gin arac, ento i kare luŋ tem wunu timo ber i akinawu kenwu kede baŋ jo luŋ. Lel wunu i kare ducu. Kwa wunu Obaŋa aboŋo keŋ. Mi wunu pwoc i jami ducu, pien mano en ame Obaŋa mito i baŋwu i Kricito Yecu. Kur igen wunu Cuny Acil tiyo ticcere i yiwu, kur ica wunu kop odwarpiny, bed wunu iwaŋ abit i jami luŋ; mak wunu atek gin ducu aber, kwer wunu tim luŋ areco. Obaŋa ikome won kuc mi idok wunu jo acil i yore luŋ, ogwok cunywu kede tipowu kede komwu me ibed wunu aboŋo kopporo a loowu i kare me dwogo a Rwotwa Yecu Kricito. Ŋat olwoŋowu genne; bino timo man pirwu. Omegowa, kwa wunu Obaŋa pirwa. Mot wunu omego ducu kede amot me mar. Acikowu atek i nyin Rwot, myero ikwan wunu waraga man baŋ omego luŋ. Winyo a Rwotwa Yecu Kricito bed kedwu. Waraga man oya i baŋ Paulo gin i Silvano, kede Temoteo. Baŋ lwak jo oye Kricito ame bedo i Tecalonika ame tye i Obaŋa Papo kede Rwotwa Yecu Kricito. Obaŋa Papo kede Rwotwa Yecu Kricito miwu winyo kede kuc. Omegowa, wan myero opwo Obaŋa didik pirwu. Ber opwoe wunu pien iyeewu tye adoŋo atek meicel, kede mar a dano acel acel i kom awottere daŋ tye amedde. Pi mano wan daŋ otye awaka i komwu i kin lwak jo oye Obaŋa i kabedo luŋ, pi diyo cunywu kede pi iyeewu i awuna kede can luŋ ame itye wunu ka kanyo. Mano en anen a nyuto kite ame Obaŋa ŋolo kede kop kakare, me wek bin kwanwu ni wun jo a myero i loc Obaŋa ame itye wunu ka neno can pire. Pien baŋ Obaŋawa nen atira ni, myero cul awunawu baŋ jo awunowu, eka te miyowu weo, wun jo ame owunowu, anaka wan daŋ. Mano en bino timo i kare ame Rwot Yecu bino nen iye a kun aya i polo karacel kede omalaika mere atek i dye mac a lyel. I kare-nono en bino culo kwor i kom jo ame mom ŋeo Obaŋa kede i kom jo a pyem amut aber i kom Rwotwa Yecu. Kop ame obino ŋolo i komgi en can me to a mom tum, kun oryemogi oko i nyim Rwot kede i nyim teko me kwogo mere, i nino-nono, i kare ame en bino dwogo kun jo mere mie kwogo, ame owure i akina jo ducu oye en; pien rik iye wunu kop ame wan otito baŋwu. En omio wan okwao Obaŋa pirwu nino luŋ, me en mi ibed wunu jo a kwowu rwatte i mittere me lwoŋowu, me Obaŋawa konywu cobo mitwu luŋ abeco kede tic ducu ame itio wunu pi iyee. Mano bino miyo jo keto kwogo i nyiŋ Rwotwa Yecu Kricito pirwu, dok wun daŋ ibino wunu nwoŋo kwogo pire, pi winyo ame oya i baŋ Obaŋawa kede Rwotwa Yecu Kricito. Omegowa, kop i kom dwogo a Rwotwa Yecu Kricito kede cokerewa me rwatte kede, obako dogwa baŋwu ni, kur iwek tamwu rweny oko iye oyotoyot, cunywu daŋ kur poti, kadi pi kop adwarpinnyoro onyo pi kop ame orabo, onyo waraga moro ame okobo ni oya i baŋwa, ame kobo ni, nino a Rwot doŋ otuno oko. Ŋattoro kur bwolwu i yore luŋ, pien nino-nono mom ru abino, tuno waŋ ame jem i kom Obaŋa koŋ obedo tye, dok aturcik daŋ doŋ otyeko nen oko, dano ame bino rwenyo odoco. En pyem, dok kette kene me bedo malo aloo gin luŋ ame olwoŋo ni Obaŋa, onyo ginnoro ame oworo; dok bedo i kommere i ot Obaŋa kun nyutte kene ni en Obaŋa. Mom ipo wunu ni, rik atittiwu man i kare ame pwod atye baŋwu? Daŋ iŋeo wunu gin ame tye ka geŋe i kare-ni, wek onen ka doŋ kare mere oromo. Pien twer a mom ŋeye ame mio jo turo cik aman tye doŋ atic; cite ŋat a geŋo pwod bino geŋo ituno ka doŋ oryemo oko. Icennere aturcik bino nen, eka Rwot Yecu te neko oko kede awura doge, tyeko oko, i kare ame en bino dwogo te nen oko kannaler. Bino aturcik aya i tic Catan kun tye kede kwone tic atek luŋ, anyuttogo kede taŋo mogo me goba. Dok bino bedo kede lwak abwole areco pi jo ame bino rwenyo odoco, pien gin okwero maro kop me ateni ame kono largi. Pi mannono Obaŋa bino ketogi i te twer me bwol, me gin oye goba, wek kop lo jo luŋ a mom ye kop me ateni, ento yigi yom i tim a mom atira. Omegowa ame Rwot maro, myero wan opwo Obaŋa pirwu nino ducu, pien Obaŋa ogeo yerowu con me larowu pi Cuny Acil ame lonyowu bedo acil, kede pi ye kop me ateni. Olwoŋowu i man kede amut aber a wan orabo me mi inwoŋ wunu kwogo a Rwotwa Yecu Kricito. Pi mano omegowa, cuŋ wunu atek, mak wunu kite a wan opwonyowu kede, i kop onyo i waraga. Rwot Yecu Kricito ikome kede Obaŋa Papawa ame marowa dok kweo cunywa odoco kede gen aber ame obino pi kica, okwe cunywu, omokwu atek i tic kede i kop luŋ abeco. Omegowa, me agikki mere, kwa wunu Obaŋa pirwa, me wek kop a Rwot oriŋ olal piopio, jo ket iye kwogo acalo otimere daŋ i akinawu. Dok daŋ miwa olarre i baŋ jo areco, a kitegi oballe; pien jo luŋ mom tye kede iyee. Rwot genne, en bino miyowu teko, dok bino gwokowu i baŋ Arac. Dok Rwot omio wan daŋ otye i gen i komwu ni, itye wunu ka timo gin a nwaŋ ocikowu iye, dok daŋ ibino medde wunu tiyo. Rwot myero tel cunywu naka i mar Obaŋa kede i diyo cuny a ya i baŋ Kricito. Omegowa, doŋacikowu i nyiŋ Rwotwa Yecu Kricito ni, pokere wunu oko kede ominwu moro ame bedo wirre balo kare nono aboŋo ticcoro, kun mom lubo kite a myero ame imako wunu i baŋwa. Wun ikomwu iŋeo wunu kite a myero ipotto wunu kede kitewa. I kare a nwaŋ wan otye baŋwu, mom obedo balo kare nono. Wan rik mom ocamo cam a ŋattoro aboŋo culo, ento ocanne i tic dyewor kede dyeceŋ me wek kur oket peko i kom ŋattoro i akinawu. Mom ni pien wan omom i twer, ento wan omiye giwa kenwa me obed anen me alubawu. Pien i kare a rik otye baŋwu, omiowu cikwa ni, ŋat okwero tic myero mom cem gire. Owinyo ni jo mogo i akinawu bedo wirre balo kare nono; mom otio, ento oridde i tic ajo ocele. Ociko kodi jo-nono, dok obako dogwa baŋgi i Rwot Yecu Kricito ni, myero gin ti ticgi mot, me wek ŋat acel acel pitte gire kene. Omegowa, mom iol wunu tiyo gin aber. Ka ŋattoro okwero lubo gin ocoo i waraga man, myero iniaŋ wunu i kom dano-nono, mom iribere wunu kede, me lewic make. Kur itere wunu acalo akwor, ento juke wunu acalo ominwu. Rwot won kuc, en ikome omiwu kuc i kare ducu i yore luŋ. Rwot obed i wun luŋ. An Paulo acoo amot man kede ciŋa an ikoma. Man anen i waragana ducu; acoo kite-ni. Winyo a Rwotwa Yecu Kricito obed kedwu ducu. Waraga man oya i baŋ Paulo ame akwena a Kricito Yecu pi cik Obaŋa Alarwa kede Yecu Kricito ame genwa ocuŋ i kome. Baŋ Temoteo atinna me ateni iyi iyee. Obaŋa Papo kede Kricito Yecu Rwotwa omii winyo, kica kede kuc. Acalo rik akwai i kare ame awoto Makedonia, pwod amito idoŋ i Epeco me wek icik jo mogo kur pwony pwonnyoro apat, dok kur keto cunygi i kop me icina kede nyiŋŋogo ame oryeo abocoboco me kwaro, ame kelo ka tam atata, mom konyo yik Obaŋa ame ocuŋ i kom iyee. Rik aciki kit man me jo bed kede mar ame dano bedo ka yie cil daŋ ler aboŋo balloro, dok iyee mere daŋ goba mom iye. Jo mogo ogak iye oko ote donyo i ceko koppogo a konnyere mom. Gin omito bedo opwony cik, kun mom oniaŋ a kadi kop ame okobo, onyo gin ame okobo kop i kome, ame gin ocuŋ iye atek wok-ki. Wan oŋeo ni cik ber ka dano otio kede i kite a cik mito, kun niaŋ ni, cik mom oketo pi jo a kitegi atira, ento pi oturcik kede jo a mom kede winy; pi jo a mom lworo Obaŋa kede obalo, pi jo a mom cil kede jo a mom ŋeo Obaŋa, onek papagi, onek totogi, kede onek jo ocele. Dok pi jo a timo tim me coco, ocod co wadgi, okwal jo me acata, ogoba, jo a kwoŋo nononono, kede en ocele mere luŋ a mom rwatte kede pwony me ateni. Mano en pwony ame nwoŋere i amut aber a rik omia me araba, amut aber ame tito pi kwogo Obaŋa ame opwoo. Apwoo ŋat ame omia teko me tiyo man, en Kricito Yecu Rwotwa, pien en doŋ okwana ibedo agen, eka te keta i ticcere, kadi bed rik an koŋ ageo yete, wune, kede roko kolo i kome. Ento otima kica, pien rik atimo i towaŋ kede aboŋo iyee, eka winyo a Rwotwa te medde meicel i koma karacel kede iyee kede mar ame tye i Kricito Yecu. Kop man kop ateni, myero jo luŋ oye ni, Kricito Yecu rik obino i lobo pi laro obalo Iyi akina obalo, an me agege; ento otima kica pi kop man, me wek i akina obalo, Yecu Kricito ge nyuto diyo cunyere aber tuŋ baŋa acalo anen baŋ jo ocele ame bino ye en, eka ote nwoŋo kwo a perakino nakanaka. Woro kede kwogo obed nakanaka baŋ Abaka a loo kare luŋ, a mom to, a mom nen, Obaŋa acel kene. Amen. Atina Temoteo, amii cik man ame rwatte kede kop ame rik odwarpiny okobo, me wek ka ilubo kopgi, irom romo aber i mony, a kun imako iyee atek kun yii ler. Pi kwero tam ame i yigi ame nyuttigi balgi, jo ocele iyeegi aballe oko. Jo mogo i akinagi Kumenayo kede Alegejanda, rik amio iciŋ Catan wek opwonyere owek yeto Obaŋa. Doŋ me agege aciki ni, bako dog, kwayo Obaŋa, kwae pi jo ocele, kede pwoc, myero timere pi jo luŋ, pi rwode kede jo a tye i rwom a malo, me wan obed mot aboŋo ayela, a kun oworo Obaŋa dok kitewa beco i yore luŋ. Man ber, Obaŋa Alarwa daŋ pwoo. En mito laro jo luŋ, dok mito ni jo luŋ ŋe kop ateni. Pien Obaŋa gire tye acel, Anot Obaŋa kede dano daŋ tye acel, ame daŋ rik obedo dano, en Kricito Yecu, ame omiye kene me bedo gi-Iakoro jo luŋ; mano en caden ame omio i kare ikome. Pi man, oketa me bedo arab kop kede akwena, (akobo kop ateni, goba mom iye), apwony Orok, iyi iyee kede kop ateni. Man omio amito ni co myero kwa Obaŋa i kabedo luŋ, kun otiro ciŋgi acil malo aboŋo akemo onyo daa. Kit-enno, mon myero rukere aber kede mwolo, kun ogwokere, mom i yer okedo, onyo i jabu, onyo tigo, onyo rukkogo me wel amalo; ento bergi myero nen i tic aber ame gin tio, mano en gin a mitte baŋ mon ame lwoŋere kengi ni gin jo a woro Obaŋa. Dako myero pwonyere liliŋ kede winy. Mom ayeyi dako me pwony onyo bedo i twer i kom co; en myero lin aliŋa. Pien Adam rik en ame ogeo cweyo, eka ote cweyo Kawa. Dok Adam rik mom obwolo, ento obwolo dako, eka te geyo kalo wi cik. Kadi bed amanno, dako bino bwot i kare me nywal, ka ce en omedde bedo i iyee kede mar, dok bedo acil kun gwokere. Kop man kop ateni: ka ce dano mito tic me bedo atel jo Obaŋa, nwoŋo en omito tic aber. Doŋ ba, atel jo Obaŋa myero bed aboŋo kopporo ame ojuke iye, won dako acel, a gwokere kene, a ryek, dano ame jo woro, agwok wele, apwony aber, a mom amero, a mom akolo, ento mwol, a mom ada atata, dok mom amar lim. Myero en bed ŋat ame loo ode aber kun gwoko itino mere bedo i winy baŋ odite, dok daŋ oworo i yore luŋ; pien ka ce dano mom twero loyo ode en ikome, twero gwoko lwak jo oye Obaŋa niŋo? Myero mom bed dano a pwod olokere nyen onyo mio den awaka, eka te poto oko, kop te loye bala a rik oloo Catan. Medo i mano, myero en bed dano ame jo i oko pwoo, me en kur kel ayet i kome a mie poto i owic a Catan. Amannono, okony tic i kin jo Obaŋa, myero daŋ bed jo a romo awora, jo a mom doggi aryo, a mom okak koŋo naka i obyel kweri, mom oworo me nwoŋo lim, myero daŋ obed jo ame niaŋ aber i muŋ me iyeewa, kun cunygi ler. Myero koŋ ge temogi; ka ce onwoŋo ni kopporo arac mom i komgi, eka doŋ ote miyogi bedo okony tic. Mon daŋ amannono, myero bed mon a romo awora, a mom ocok dog jo, a gwokere kengi dok daŋ ogen i jami luŋ. Okony tic myero bed wegi mon acel acel, myero daŋ oloo itinogi kede udigi luŋ aber; pien okony tic ame tio tic abeco nwoŋo dito pirgi kengi, dok odoko jo ame twero kobo kop i tek cuny i kom iyee a tye i Kricito Yecu. Atye i gen me bino baŋi oyot, ento acoo pwony man baŋi me wek, ka ce agal, iŋe kite a dano myero bed kede i ot Obaŋa, ame en lwak jo oye Obaŋa akwo, ame en pagi kede acakki tere atek, me ateni. Muŋ me dini a wan otuco, pire dit meicel; Rik en onyutte i kom, okwane ni kite atir pi Cuny Acil, omalaika te nene, orabo pire baŋ Orok, oye en i wi podo luŋ; ote tere malo i kwogo. Cuny Acil kobo kannaler ni waŋŋoro anyim, jo mogo bino bolo iyeegi oko, ote cako lubo jogi ame ogoba kede pwony a cen areco. Pwony-nyi ya i baŋ wegi edwali ame tam me yigi a nyuttigi balgi odil oko acalo gin owaŋo i nyonyo alyet. Gin juko jo ni kur nyom, dok daŋ ociko jo ni kwer cemmogo; aco Obaŋa rik oketo me jo a ye dok ŋeo kop ateni, gam kede pwoc. Pien jami luŋ ame Obaŋa oketo beco, mom tye moro a myero kwer iye, ka ce ogamo kede pwoc; pien kop Obaŋa kede kwac lonyogi bedo acil. Ka iketo pwony magi i nyim omegowa, ibino bedo atic a Kricito Yecu aber, ame opito i kop me iyee kede pwony abeco ame ibedo lubo. Kwer oko kop me icina me miŋo a mom me lworo Obaŋa. Pwonyere i kwo me lworo Obaŋa. Pwonyere me ryeyo ler kom konnyere tye, cite nok; ento lworo Obaŋa konyo i yore luŋ, pien twero kelliwa winyo i kare man kede i kwo a bino anyim acalo Obaŋa ociko. Kop man kop ateni, myero jo luŋ ye. Man en omio wan ololle dok ocukere, pien wan oketo genwa i kom Obaŋa akwo, ame en Alar jo luŋ, akato mere jo a tye kede iyee. Cik kop man, dok ipwony i jo. Kur imi ŋattoro cai ni pien yin itidi, ento mi anen aber baŋ jo oye, i koppi, i kitti, i mar, i iyee kede bedo acil a mom ijebere i ginnoro arac. Mi kare meri i kwano coc a yam ocoo i nyim lwak, i cuko cuny jo, kede i pwony, ituno ka an abino. Kur iwek mot me cuny ame itye kede to nono, a rik omii pi kop odwarpiny i kare ame odoŋe keto ciŋgi i wii. Nyut kop magi i tic, ketto cunyi iye, me jo luŋ nen kit ame itye ka wot kede anyim. Gwokere keni, dok igwok pwonnyi daŋ; kanyakino iye, pien ka itimo amanno, yin ikomi ibino larre karacel kede jo a winyi daŋ. Kur ijuk adwoŋŋoro, ento cuk cunye acalo pappi; awobe tergi acalo omegoni, mon adoŋo acalo toto, kede mon atino acalo amegoni, aboŋo tammoro arac. Wor mon ame coggi oto ame odoŋ kengi. Ka ce dako a cware oto tye kede itino mere onyo ikwae, myero gin koŋ pwony ticgi me dini i otgi gin ikomgi, kun daŋ oculo onywalgi pi konnyogo a rik gin omiogi, pien man Obaŋa pwoo. Dako ame cware oto ame odoŋ kene aboŋo ŋattoro a konye, keto gennere luŋ i kom Obaŋa dok daŋ bako doge kun kwao Obaŋa dyecen kede dyewor. Aco dako a cware oto ame yenyo yomcuny me jami abeco keken, doŋ oto oko kadi pwod kwo. Ket cik man, me gin bed aboŋo kopporo ame ojukogi iye. Ka ce dano moro mom mio ginnoro me konyo wati mere, akato mere ode en ikome, nwoŋo doŋ okwero iyee mere oko, dok daŋ rac kato ŋat a mom oye. Pe myero co nyiŋ dako a cware oto ame mwaka me dittere pwod mom ru oromo pyerabicel nono, dok daŋ myero en obed dako a yam obedo i cware acel keken. Myero nen ni ticcere ber, ka ce yam opito otino, ojolo wele, olwoko tyen jo Obaŋa, okonyo jo a yam owunogi, dok daŋ omiye kene i tiyo gin aber i yore luŋ. Ento myero mom ico wunu mon a pwod tino a coggi oto; pien mit me komgi twero miyo gin okwero Kricito, ote mito nyomere dok oko; mio oŋolo kop loogi pi turo cikeregi me agege. Medo i mano, odoko owackom ame wowota i ot i ot; mom owackom keken, ento odoko daŋ okob kop atata, mon a ridde i gin a mom megi, ote kobo kop ame mom romo akoba. Pi mannono, omio an amito ni mon a pwod tino a coggi oto myero nyomere, nywal otino, lo udigi, me kur omi okworwa kare me kobo ginnoro arac i komwa. Pien mogo doŋ ogak, tye a lubo Catan. Ka ce dako moro ame oye Rwot tye kede wati mere ame gin mon to, myero en omigi kony; me lwak jo oye Obaŋa kur ye peko, okony ka mon ame coggi oto ame akonygi moro mom. Odoŋe ame loo loc aber myero worgi meicel, akato mere jo ame lolle atek i tito kop kede pwony. Pien coc a yam ocoo kobo ni, “Kur itwe dog twon ka adino kal,” dok daŋ ni, “Atic myero culle ocara mere.” Kur iye pido moro i kom adwoŋŋoro, kono ka, ka tye caden aryo onyo adek. Aco jo ame peny apenya i balgi, jukgi i nyim jo luŋ, me mi jo ocele bed i lworo. Aciki i nyim Obaŋa kede Kricito Yecu kede omalaika ame oyero, gwok cik magi kun mom ijeŋere i wat onyo i dyere. Kur daŋ iruye keto ciŋi i kom ŋattoro onyo lutte i bal a ŋat ocele; gwokere ibed giri acil. Ya aman, kur doŋ imat ka pii keken, mat daŋ koŋo aduno pi konyo yii kede too ame maki kare i kare. Bal a jo mogo nen oko kannaler, ame cimo oko ni kop bino loyogi, ento bal a jo ocele nen icen. Tic aber daŋ nen oko kannaler; kadi mom amannono, mom twero kanne odoco a mom onen. Jo luŋ ame obedo opii, myero ter odonegi acalo jo a romo awora i yore luŋ, me ŋattoro kur yet nyiŋ Obaŋa onyo pwonywa. Jo ame odonegi doŋ oye Rwot, myero mom okwer worogi, ni pien gin obedo omego, ento myero oti baŋgi aber atek ateka, pien jo ame gin okonyo kede ticgi obedo jo ame oye Rwot dok jo ame gin omaro. Pwony kop magi dok icuk cuny jo iye. Ka ŋattoro pwonyo mege apat kun mom lubo kop ateni a Rwotwa Yecu Kricito kede pwony me diniwa, nwoŋo en odeŋ awaka ento mom ŋeo ginnoro kadi acel. Yie Opoŋ i par areco me pyem kede daa i kom koppogo; aco magi-nono ya iye nyeko, pyem, ayet, par areco a rwenyo gen. Dok daŋ mio jo a ryekogi oballe, ame mako kop me ateni loogi oko, bedo wowoa nononono, kun otamo ni dini en yore me nwoŋo lonyo. Lonyo dwoŋ meicel i dini ka ce iyeŋ ka i ginnoro keken ame itye kede. Pien wan mom okelo ginnoro i lobo, dok daŋ mom otwero tero moro iya i lobo. Ento ka otye i cem kede ginaruka, magi-nono gire romowa. Ento jo ame paro pi bedo olonyo mio obitogi ote poto oko, eka ote moko i owic a Catan pi mitgi apol me miŋo ame wunogi, mio obedo acalo jo omwonyere i nam, te miyo orwenyo odoco. Pien maro lim, en acakki me gin luŋ areco; man en okelli jo apol ya oko iyi iyee, eka ote miyo lwak can apol ata corre i komgi. Ento yin dano Obaŋa, leŋŋi maginogo yo, ento ket cuny i kite atir, i lworo Obaŋa, i iyee, i mar, i diyo cuny, i mwolo. Rom romo aber i Iweny, romo me iyee, mak atek kwo a perakino nakanaka, ame rik olwoŋi iye i kare ame ituco iyeeni aber i wan ocaden apol ata. Aciki i nyim Obaŋa ame mio kwo baŋ jo luŋ, kede i nyim Yecu Kricito, ame otuco iyee mere aber i kare ame mio cadennere i nyim Pontio Pilato, gwok cik ame omii, aboŋo roccoro i komi onyo kopporo ame ojuki iye, ituno ka Rwotwa Yecu Kricito bino nen. Obaŋa ame opwoo, Won Twer acel kene, Abaka obakki, Rwot a rwode, bino nyuto man ka kare ikome oromo. En Obaŋa acel kene a mom to, ame bedo i lero moro a mom nokere, anaka cene ŋattoro mom ru onene, mom daŋ twero nen gire. Woro kede twer a mom gik obed baŋe. Amen. Cik olonyo me kare man owek wakere, kadi keto gengi i kom lonyo ame mom genne, ento i kom Obaŋa ame miowa jami luŋ abup me yomoro cunywa. Myero gin oti tic abeco, obed olonyo i timo jo ber, i poko jami, kede i miyo mot i yomcuny. Mano nwoŋo gin okano mono aber pirgi kengi pi kare me i nyim, me gin mak kwo ame en kwo ikome. Ama Temoteo, gwok gin a rik ojalo i ciŋi. Gwokere i ceko kop a mom me woro Obaŋa, kede i pyemmogo a ya i gin ame olwono gobagoba ni “ŋec”: pien jo mogo ame kobo ni otye kede kodi ŋeccono ocobo iye piny nono i kop a mako iyee. Winyo Obaŋa bed kedi. Waraga man oya i baŋ Paulo ame akwena a Kricito Yecu pi mit Obaŋa, ame lubo cikere mere me miyowa kwo a tye i Kricito Yecu. Baŋ atinna Temoteo ame amaro: Obaŋa Papo kede Kricito Yecu Rwotwa mii winyo, kica kede kuc. An apwoo Obaŋa ame atiye tic i yic aler, bala kwarina yam tiye, kun atuco nyiŋi i kwacca me kare luŋ. Ka apo pig waŋi, mio iwor kede iceŋ aparo neni, me apoŋ kede lelo. Apoyo iyeeni a goba mom iye, a rik koŋ ogeo bedo baŋ tatti Loi, kede totti Yuneki, ame aŋeo aboŋo kalo akala ni tye baŋi yin daŋ. Man omio apoyo wii me iyik mot a rik Obaŋa omii pi keto ciŋa i komi, ame doŋ odoko acalo mac a mito to. Pien Obaŋa rik mom omiowa cuny me lworo, ento omiowa cuny me teko kede mar kede me gwokere ken. Pi mano lewic kur maki me miyo caden i kom Rwotwa, lewic daŋ kur maki i koma an ame abedo abuccere, ento notte kedwa i kanyo can pi amut aber, i teko Obaŋa. En olarowa dok te lwoŋowa me bedo jo acil, mom pi ticcogo a wan otio, cite pi lubo yik a en ikome oyiko, kede pi winyo mere a rik en omio baŋwa i Kricito Yecu iyi ageyi piny. Aman doŋ onyuto oko baŋwa i bino Alarwa Kricito Yecu ame doŋ oweo to oko, te miyo kwo kede perakino atwal onen oko kannaler pi amut aber. Pi amut aber-ri, an rik oketa me bedo arab-kop kede akwena kede apwony. Man en omio aneno can kit-ti. Cite lewic mom maka gira, pien aŋeo ŋat ame aye, dok daŋ aniaŋ atira ni, en twero gwoko gin ojalo i ciŋa ituno i Nino-naca. Anenni me aluba bed kop ateni a rik iwinyo i baŋa, kun iwapo kede iyee kede mar a tye i Kricito Yecu. Gwok gin aber ame ojalo i ciŋi pi teko a Cuny Acil a bedo i yiwa. Yin iŋeo ni, jo luŋ a tye i Acia doŋ olokka ŋegi. Pugelo gin kede Kermogen tye i akinagi. Rwot myero tim paco Oneciporo kica, pien rik odwoggo cunya tyen apol. Lewic mom omake pi jegerena, cite en ka otuno i Roma, oyenya atek ituno ka onwoŋa. Rwot mie enwoŋ kica a ya i baŋe i Nino-naca. Dok yin daŋ iŋeo kit kony a en obedo miyo i Epeco. Atinna, yin doŋ bed atek ba, pi winyo ame omiowa i Kricito Yecu. Gin ame iwinyo i baŋa i nyim ocaden apol, yin daŋ ikob baŋ jo a genne a romo pwonyo i jo ocele. Kany gin arac ame otimo i komi, bala jo ocele daŋ tye akanyo, acalo bala acirikale a Yecu Kricito aber. Mom tye acirikale moro a tye i dog tic ame dok mio tic i oko bodo wie, pien tammere mito yomo cuny ŋat ocoe i mony. Apyem i tuko mom twero loyo tuko ka mom owapo icwil me tukonono. Apur ame ololle i poto en ame myero ge camo gin ame ocek iye. Tam gin ame akobo, pien Rwot bino miyi iniaŋ i kop-pi luŋ. Po i kom Yecu Kricito, ame ocer iyi akina a jo oto, akwar Daudi, kite a an arabo kede amut aber. Amut aberrono en gin ame atye akanyo can pire, kun otwea i jegere bala atimo twon balloro! Cite kop Obaŋa gire mom otweo. En gin omio atye akanyakino kare luŋ, pi jo ame oyero, me gin daŋ onwoŋ larre a tye i Kricito Yecu, karacel kede kwogo a mom gik. Kop man kop ateni, ni, “Ka wan oto kede, obino daŋ kwo kede; ka wan okanyakino, obino loc karacel kede; ka wan okwere, en daŋ bino kwerowa; ka wan jo a mom genne, en gire genne nakanaka, pien mom twero kwerre kene.” Poyo wigi i kop man, dok icikgi i nyim Rwot, ni gin owek pyem i kom nyiŋ kop apapat, pien mom konyo ginnoro, cite lunyo ka balo jo a winyo abala. Diye atek me miye keni baŋ Obaŋa acalo ŋat ame opwoo, atic a mom i ginnoro a lewic myero make iye, ame tero kop me ateni i yo atira. Kwer oko ceko kop a mom me woro Obaŋa, pien kodi koppono medo rwenyo jo arwenya i lworo Obaŋa, dok daŋ kopgi bino tuco yore bala bur a camo kom dano oyotoyot. Kumenayo gin kede Pileto tye i akina a jo-nono. Gin doŋ ogom oko i kop me ateni kun okobo ni cerwa doŋ okato oko con. Gin otye obalo kede iyee ajo mogo. Cite acakki te ot ame Obaŋa ocibo doŋ tye ame ocuŋ atek ikin, ame daŋ i tye coc man i kome ni, “Rwot ŋeo jo mere,” dok ni, “Dano acel acel ame lwono nyiŋ Rwot myero pokere oko i bal.” I ottoro adwoŋ, mom bedo iye ka jami me jabu kede ryal keken, cite bedo iye daŋ jami mogo ame otio i yat kede ame otio i lobo; mogo otio kedgi i kare me kwogo keken, ento mogo ololo i kare ducu. Ka ce ŋattoro olonyere kun oweko kite areco oko, en bino bedo tabo ame otio kede i kare me kwogo, ame bedo acil, ame konyo won ot, ame oyikere pi ticcoro ducu aber. Cac oko agoma yic meri me awobi, eka ite keto tammi i kom kite atir, iyee, mar, kede kuc, karacel i jo luŋ a kok baŋ Rwot kun yigi cil. Pyem me miŋomino ame bino pi kwiapiny kwer daŋ oko; yin iŋeo ni kodi pyemmono kelo daa. Amiro a Rwot myero bed ŋat a mom da atata, myero bed ŋat akica baŋ jo luŋ, apwony adiro, ŋat a dio cunye, ŋat a tiro jo a pyem kede mwolo, Atot onyo Obaŋa bino miyogi cuny me ŋut, eka gin te niaŋ aber i kom kop me ateni, mio ryekogi te dwogo oko, ote bwot iyi owic a Catan, ame rik onwoŋo omakogi, omiogi tiyo gin en a mito. Cite ber iniaŋ man ni, i kare me agikki, piny bino bedo arac i kare mogo. Pien jo bino maro ka komgi kengi, kun obedo omar lim, owaka, ocac, oyet jo. Mom obino winyo onywalgi, mom obino miyo pwoccoro, mom obino paro pi Obaŋa. Mom obino maro jo wadgi; gin bino kwedde atata, obino bedo ocok dog jo, jo a mitgi mom jukere, jo ager ame dag ginnoro aber, wegi erupe, jo a tye atata a mom paro piny, jo a yeyea, jo a maro yomyic akaka maro Obaŋa. Gin bino lubo dini ka i kitegi a nen i oko, kun okwero teko mere. Dup jo-nono adupa. Pien tye jo mogo i akinagi ame ridde i pacci a jo, te mayo tam a monnogo amimiŋ ame peko me bal obwoo, ame mitgi apapat bedo wayogi tuŋŋi i tuŋŋi, kun gin mito pwonyere i kare luŋ, cite mom dok otwero niaŋ i kop me ateni. Jonono rom i Yane kede Yambure a rik opyem i Muca, pien gin daŋ otye a pyem i kop me ateni i kite acellono; ryekogi doŋ oballe oko, iyeegi mom tye kakare. Cite gin mom obino medde kede kannabor wok, pien miŋogi bino ŋeye oko baŋ Iwak, bala mea jo aryo ca. Cite yin giri ityeko na keda kun ineno pwonnya, kitena kede tam ame aketo i nyima. Ineno iyeena, diyo cunya, marra, kite ame akanyakino kede. Ineno kit ame owuna kede, kede can ame aneno; iŋeo gin ame otimere i koma i Antiokia, i Ikonio, kede Licitra, kile awunawuna a rik akanyo; cite Rwot gire olara i ginnoro luŋ aluŋa. Ateni, jo ducu a mito wopo kite kwo ajo a Iworo Obaŋa, kun obedo i Kricito Yecu, obino wunogi, kun jo areco kede jo ogoba, obino medde bedo arac ame okato kare, kun obwolo jo, gin daŋ obwologi. Cite yin giri myero imedde i gin ame ipwonyo, kede ame iye ateteni, kun iŋeo jo a rik opwonyi iye. Iŋeo daŋ ni; cakere i tinoni iŋeo coc acil a yam ocoo, ame twero pwonyi i yo me larre pi ye Kricito Yecu. Coc acil luŋ a yam ocoo, ocoo pi teko a Cuny Obaŋa. Konyo me pwony, me nyuto bal, me twenyo kite a jo, me nayo jo i lubo kite atir, me dano Obaŋa bed ame ocwiny, daŋ ame oyikere i yore luŋ, ame romo tiyo ticcoro aber luŋ. Aciki i nyim Obaŋa kede i nyim Kricito Yecu ame bino ŋolo kop a jo akwo kede jo oto, dok pi dwogo mere kede pi loccere ni mano, rab kop Obaŋa, cuŋ iye atek i kare aber kede i kare arac, mi jo niaŋ aber, jukgi, kun idio cunyi i pwony i kare luŋ. Pien kare tye abino ame jo mom dok bino kanyo pwony me ateni, cite obino lubo mitgi kengi, kun ocoko opwony ame twero pwonyogi gin a gin mito winyo. Gin bino loko ŋegi i winyo kop me ateni, ote gak oko wirre i kop me icina. Cite yin ba, bed ame igwokere i kare luŋ; kanyakino ka can opoto, ti tic me rabo amut aber, cob ticci ducu kakare. An doŋ jo ceggi onyo remona acalo gin ame oonyo i wi keno lam; karena doŋ oromo me ya oko i kwo man. Aromo romo aber i lweny, acobo doŋ ŋwecca, agwoko daŋ iyee. Aman doŋ okano pira mot me kite atir, ame Rwot a ŋolo atir, bino miya i Nino-naca; mom baŋa keken, cite daŋ baŋ jo luŋ ame doŋ cunygi tye aparo dwogo mere. Diye atek, iru bino baŋa. Pien Dema doŋ oweka oko pi maro jami me wi lobo-ni, owoto gire oko i Tecalonika, Kurecen owoto i Galatia kede Tito i Dalmatia. Luka kene en a doŋ tye baŋa kan. Bin wun i Marako, pien en ber meicel i konya. Tukiko an aoro oko i Epeco. Ka ibino, kella boŋo apek a rik aweko i Teroa tuŋ a Karpo. Kwokka daŋ bukena, akato mere maca me lao ca. Alegejanda atet mola otima cucu; Rwot bino cule pi timmere-nono. Yin daŋ myero igwokere i kom lonnono, pien en rik opyem i kopwa atek ateka. I pidona me agege, dano moro ocuŋŋa obedo mom. Jo luŋ oriŋo oweka oko. Obaŋa myero mom kwan man i wigi. Cite Rwot Ocuŋ i laŋeta, eka te miya teko me tuco kop kakare, me Orok luŋ winy; olara amannono i dog eŋato. Rwot bino konya iya oko i gin luŋ arac, kun lara me atun i loccere me polo. Kwogo bed baŋe nakanaka. Amen. Motta Puricika gin kede Akwila, kede jo me ot Oneciporo. Lacito rik odoŋ i Korinti; Turopimo aweko two i Mileto. Diye atek me itun ame kare me koyo mom ru ocakere. Yubulo omoti, anaka atot Pudente kede Lino, kede Kulaudio, karacel kede omegiwa luŋ. Rwot bed kedi i cunyi. Winyo mere bed kedwu. Waraga man oya i baŋ Paulo, amiro Obaŋa dok daŋ akwena a Yecu Kricito. Rik oora pi nyayo iyee a jo Obaŋa ame eyero, kede niaŋogi i kop me ateni ame rwatte kede kwo me woro Obaŋa, me gin obed kede gen me nwoŋo kwo a perakino odoco. Obaŋa ame mom kobo kop goba rik ociko pire iyi ageyi piny, eka te nyuto oko kannaler ka kare mere oromo, i koppere ame omia me araba pi cik Obaŋa Alarwa. Baŋ Tito, atinna me ateni ame onywako kede iyee acel: Obaŋa Papawa kede Alarwa Kricito Yecu omii winyo kede kuc. Man gin omia aweki i Kurete, me wek iyik gin a yam odoŋ a mom tye kakare, dok iket odoŋe i boma adoŋo ducu, i kite a rik aciki kede ca. Jo-nono myero bed jo a kopporo arac mom i komgi, jo a mongi tye acel acel. Itinogi bed jo oye Rwot, ame kopporo me caro caro mom owinyere i komgi, a mom oŋudi. Pien atel jo Obaŋa, acalo en daŋ agwok jami Obaŋa, myero bed ŋat a kopporo arac mom i kome. Myero mom bed ŋat atiŋa onyo a ŋo oyotoyot, onyo amero, onyo akolo, kadi aworo me nwoŋo lim. Myero en bed agwok wele, amar gin aber, dano a loye kene, ame kite atira, a cunye cil, dok ŋat a gwokere kene. Dok daŋ myero en mak atek kop Obaŋa me ateni a rik opwonye kede, ame mio en twero cuko cuny jo kede pwony me ateni, dok twero loyo tam a jo a pyem kede. Pien jo ame oŋudi tye pol, jo a kobo kop a tere mom, kede obwol jo, akato mere eryoŋet a jo a mito ni, jo oye Kricito myero koŋ lirre. Kodi jo-nono myero mi liŋ oko, pien gin tye abalo jo apol kede jo i udigi luŋ, pi pwonyogi gin a mom porre gin ipwonyo, pi woro me nwoŋo lim. Lo moro i akinagi ame adwarpinygi ikome rik okobo ni, “Jo Kurete kare luŋ gin ogoba, leyi areco, oworo anyap.” Cadennono tye ateni; pi mano myero ijukgi kede teko, me gin obed kede iyee me ateni, owek doŋ keto cunygi i kop me icina Ojudaya, kede cik ajo ame kwero kop me ateni. Baŋ jo acil, jami luŋ daŋ cil, cite baŋ jo oballe, kede jo a mom tye kede iyee, mom tye ginnoro acil i baŋgi. Ryekogi ikome kede tam me yigi ame nyuttigi balgi doŋ oballe oko. Gin otuco ni oŋeo Obaŋa, cite gin dok obedo kwere oko kede timgi; gin odoko acalo gin ame okwero, jo a mom kede winy, a mom doŋ romo tiyo ticcoro aber. Ento yin, pwony gin ame rwatte kede kop me ateni. Kobbi jo adoŋo ni gin obed jo a gwokere kengi, jo a romo awora, jo a loo tamgi kengi, jo ame iyeegi kede margi tye kakare kun gin ocuŋ iye atek. Amannono daŋ kobbi mon adoŋo ni gin myero obed kede woro i kitegi ducu, mom ocok dog jo, mom jo odoko opii a koŋo. Gin myero obed opwony me gin aber, eka ote pwonyo mon atino imaro coggi kede otinogi, dok obed mon a loo tamgi kengi, mon acil aboŋo tammoro me caro caro, a gwoko pacogi, mon ame okica kun oworo coggi, me jo ocele kur yet kop Obaŋa. Amannono daŋ, cuk cuny awobe me gin gwokere kengi. Yin ikomi inyutte acalo anen me tic aber i yore luŋ. Pwonnyi bed apek aboŋo ginnoro arac iye, kun ikobo kop ateni a mom otwero nwoŋo roccoro iye, me wek lewic mak ŋattoro a mito pyem kedwa, pien ginnoro arac mom nen a myero ekob i komwa. Kob opii ni owor odoŋegi, oyom cunygi i yore luŋ. Kur gin obed opyem, kadi ceyo gigi mogo, cite myero gin onyut ni gin jo a genne aber meicel, me wek i gin ducu, gin omi pwony Obaŋa Alarwa onen amwonya. Pien winyo Obaŋa doŋ onen pi laro jo luŋ. Winyo mere-nono pwonyowa me kwero kite a jo a mom lworo Obaŋa, karacel i mit ducu me lobo man, dok pwonyowa me gwokere i kwowa i lobo man, me obed ame kitewa atir, kun olworo Obaŋa, kun okuro winyo ame genwa ocuŋ iye, en me neno Yecu Kricito, Obaŋawa adit kede Alarwa, ka odwogo kede kwogo. En rik omiye kene pirwa me lakorowa oko i bal luŋ, kede me lonyowa obed jo mere ikome, ame tye kede mit me tiyo tic abeco. Kobbigi kop magi; cuk cunygi dok ijukgi kede twerri luŋ. Kur imi dano moro bwoni. Poyo wigi luŋ me miye i te loc a rwode kede wegi twer, me bedo i winy, kede me yikere pi tiyo ticcoro aber luŋ. Gin owek kobo kopporo arac i kom ŋattoro, owek da, obed jo okica, onyut woro baŋ jo ducu i kare luŋ. Pien wan ikomwa rik koŋ obedo omino, oŋudi, yam orwenyo ata, obedo opii a mitwa kede jami apapat ame yomoro cunywa. Otyeko karewa i raccuny kede nyeko, jo odagowa, dok wan daŋ odagere kenwa kenwa. Cite i kare ame ber kede mar me kica, Obaŋa Alarwa onen, en te larowa oko, mom pi ticcoro a wan otio i kite atir, cite pi kica mere gire. Olarowa kede pii me nywalle me aryo kede me doko jo anyen pi Cuny Acil, a rik en oonyo i komwa abup i Alarwa Yecu Kricito, me ote kwanowa ni kitewa atir pi kica mere, me onwoŋ kwo a perakino odoco, ame genwa tye iye. Kop man kop me ateni. Amito icuŋ atek i kom kop magi, me jo a doŋ oye Obaŋa obed i tam me miye me tiyo ticcogo abeco; mannono ber, dok bedo me kony baŋ jo luŋ. Kwer oko pyemmogo me minomino, kop i kom nyiŋ kwaro, daa kede laro kop i kom cik; magu ducu pe konyo, yore mom. Dano ame kela apoka poka ka doŋ ikwenyoro icel kede dok tyen me aryo, weke oko, mom dok inotte wunu kede, kun iŋeo ni, kodi danonono doŋ ogak oko, dok obalo, en doŋ oŋolo kop i kome kene. Ka abino oro Artema onyo Tukiko baŋi, diye atek me bino baŋa i Nikopoli, pien atyeko moko tamma me bedo kuno i kare me koyo. Ket teko me konyo Jena aŋe cik, kede Apolo i wotgi; nen ni ginnoro kur rem i baŋgi. Jowa myero pwony miye i tic abeco, me gin obed i yo me konyo jo ame cannoro odio; kur gin obed acalo yen a mom nyak. Jo luŋ a tye baŋa kan omoti. Mot jo a marowa i iyee. Winyo Obaŋa bed kedwu wun luŋ. Waraga man oya i baŋ Paulo, ame abuc a Kricito Yecu, kede baŋ ominwa Temoteo. Baŋ Pilemon atic wadwa ame amaro, gin kede aminwa Apia, kede Arakipo acirikale wadwa, kede jo oye Kricito a cokere i odi: Obaŋa Papawa kede Rwotwa Yecu Kricito omiwu winyo kede kuc. Apwoo Obaŋana didik ka atuco nyiŋi i kwacca, pien abedo winyo pi mar meri kede iyeeni ame ibedo kede i kom Rwotwa Yecu kede jo Obaŋa luŋ. Man omio akwao ni, kite notte ame onotte kedi i kom iyee odok atek a romo niaŋowa atut i kom gin aber luŋ a wan otye kede i Kricito. Pien mar meri okella lelo adwoŋ dok okweo yia, omina, pien idwoggo cuny jo Obaŋa. Pi mannono, kadi bed atye i tekcuny i Kricito ame romo miyo aciki acika itiyo ginnoro a mitte, cite pi mar meri-ni aneno ni ber akwai akwaa, an Paulo ame acuŋ akaka Kricito Yecu, ame aman daŋ adoko abuc pire. Akwai pi atinna Onesimo, ame adoko pappere kan i buc. I kare okato konnyere koŋ obedo mom baŋi, cite aman konnyere doŋ dwoŋ baŋi kede baŋa. En enno doŋ adwoggo en baŋi-nu, ame en doŋ odoko acalo dul koma ikokome. Onwoŋo amito ni kono agwoke baŋa kan, me mia kony akakari a kun pwod atye i buc pi rabo amut aber; cite mom amito timo ginnoro aboŋo winyo gin a yin iparo, me ka itimma ber, mom obed pi ruyi arua, ento pi yerri yin ikomi. Gwok onyo man en gin omio rik en opokere kedi pi kare anok, me wek ite game doŋ atwal, mom dok acalo opii, cite akato opii oko, acalo ominwa ame omaro. Pollere wok en pire tekka, cite i tuŋ baŋi pire doŋ tekki meicel, acalo akonnyi kede ominni i Rwotwa. Doŋ ba, ka iŋeo ni an abedo awotti, game i kite a kono igama kede. Ka ce rik otimmi rac, onyo tye i banyani moro, kwan magi-nono i wia. An Paulo acoo man i ciŋa an ikoma, abino culli oko. Kun mom dok akobo ni, yin daŋ giri itye i banyana, en kwoni ikome. Ee ta, ominna, amito konnyoro i baŋi i Rwotwa. Dwoggo cunya i Kricito. Atye i gen atek i komi ni ibino woro doga, omio atye acoyi kop man kun aŋeo ni ibino timo akato ame an akobo. Karacel i mano, yikka icika moro me welo, pien atye i gen ni kwacwu bino miyo omia baŋwu. Epapira abuc wadwa i Kricito Yecu omoti, anaka Marako, Aricitako, Dema kede Luka otic wadwa. Winyo a Rwotwa Yecu Kricito bed kede cunywu. Rik con Obaŋa okobo kede kwariwa i dul kop apol kede i yore apapat, kun kobo i dog odwarpiny; ento i kare icen-ni en doŋ okobo kedwa i Wode. Jami luŋ ame tye Obaŋa rik otio pi twer a Wode, ame en oyiko ni myero bed won jami luŋ. En acara me kwogo Obaŋa, cal Obaŋa ikokome tye i kome, dok en daŋ ame tiŋo jami ducu ame tye kede teko me koppere, A doŋ en otyeko tic me lwoko bal, en obedo piny i kabedo me kwogo tuŋ cem i laŋet Won Kwogo Adwoŋ a tye malo i polo, kun en doŋ odoko adit meicel akato omalaika luŋ, a rom aroma i kite ame nyiŋ ame omie ber atek akato megi oko. Obaŋa rik doŋ okobbi amalaika moro ni, “Yin i Woda, tin doŋ anywali?” Onyo dok ni, “An abino bedo pappere, en bino bedo Woda?” Dok daŋ i kare ame en okelo atin kao i lobo en okobo ni, “Omalaika Obaŋa luŋ aluŋa myero wore.” I kom omalaika, Obaŋa okobo ni, “En loko omalaika mege doko yamo, oticcere en loko doko leb mac,” Ento i kom Wode en okobo ni “Kom me, locci, yin Obaŋa, bino perakino odoco, i locci yin i ŋolo kop atira, Yin imaro kite atir, yii dag tim arac; mannono omio Obaŋa, ame en Obaŋani, omi dit, en omi yomcuny adwoŋ meicel pi woro ame en owori kede, ame kato me owoteni oko.” En dok okobo ni, “Yin Rwot i agege iketo acakki te lobo, polo daŋ en tic me ciŋi, Gin bino rwenyo odoco, ento yin iperakino; gin luŋ bino ti bala boŋo, ibino dologi acalo koti, obino lokogi acalo boŋo. Ento yin ibedo ame kiti acel, omwaka ni mom bino gik,” Obaŋa rik okobbi amalaika moro ni, “Bed i laŋeta tuŋ cem i kabedo me kwogo, ituno ka abino miyo okworri doko aten tyeni?” Kara omalaika obedo ŋagi doki? Gin luŋ obedo cunnyogo ame tio tic Obaŋa; en orogi pi konyo jo ame bino nwoŋo larre. En omio wan myero oketu cunywa meicel i gin a rik owinyo wunu, me kur dok ogak oko iye. Kwena a rik omalaika okelo yam omoko atek. Ka ŋattoro okalo wi cikkoro onyo okwero winyo, omie can iye ame oporo bal ame obalo. Kara wan dok obino bwot iŋo ka mom oketo cunywa i larre man a pire dwoŋ wok-ki? Larre man Rwot en ame okwoŋo tuco pire, eka jo a rik owinyo i baŋe ote moko baŋwa. Obaŋa daŋ omedo cadennere baŋgi kun tio anyuttogo kede taŋo kede tic atek adoŋo apapat, dok kun poko mottogo me Cuny Acil pi mittere kene. Pien Obaŋa mom oketo lobo a mito bino a wan okobo pire-ni i te loc omalaika. Tye kannoro ame otuco kannaler ni, “Dano gin aŋo, omio ipo pire? Onyo atin a dano, omio iparo pire? Ikete piny i te omalaika pi kare anonok, imie kwogo kede woro acalo abaka, iketo jami luŋ piny i te loccere, i te tyene.” Doŋ ka oketo jami luŋ i te loccere, mom doŋ oweko ginnoro a en mom loo. Ento wan oneno Yecu ame rik okete piny i te omalaika pi kare anonok, ento aman doŋ amie kwogo kede woro acalo abaka pi rem me to ame okanyo, me wek pi kica Obaŋa en bil to pi jo luŋ aluŋa. Jami luŋ tye pi Obaŋa, dok en ame oketogi. Doŋ ka rik en omito kelo itino apol i kwogo mere, gin a en otimo obedo amyero meicel, me miyo atel wigi me larre odoko ŋat ocwiny pi kanyo can. Ŋat ame olonyogi bedo acil, kede jo ame olonyogi-ni, gin luŋ oya i kom ŋat acel; man en gin omio lewic mom mako Yecu me lwonogi ni omego mere, kun okobo ni, “Abino rabo nyiŋi baŋ omegona, abino paki kede wer i dye lwak ocokere.” Dok ni, “Abino keto genna i kome.” Kede dok ni, “An ene kede itino ame Obaŋa doŋ omia.” Kite acalo itino dikdik onotte i kom kede remo, en daŋ amannono onywako komgi kede remogi, me wek pi to mere enyot oko ŋat ame tye kede twer i kom to, mano en Catan, egony jo a yam obedo i twec me opii pi kare me kwogi luŋ pi lworo to. Doŋ onen aber ni, gin a en otimo mom otiko omalaika, ento otiko ikwae Iburaim. Mano en omio en myero odok ame erom aroma kede omego mere i yore luŋ, me ebed alamdog adwoŋ ame akica dok agen i tic Obaŋa, me ekwany bal a jo mere oko. Pien en kene rik okanyo can dok obite, en omio en twero konyo jo ame obitogi. Doŋ ba, wun omegona acil ame Obaŋa olwoŋowu karacel keda, doŋ itam wunu i kom Yecu ame en akwena kede alamdog adwoŋ me iyee a wan otuco. En obedo agen baŋ Obaŋa ame okete i tic, a rom aroma i Muca ame rik obedo agen i ot Obaŋa luŋ. Ager ot omio kwogo adwoŋ akato ot; amannono daŋ Yecu obin okwano ni kwogo mere dwoŋ kato mea Muca. Pien ottoro keken, dano en agero, ento ager jami luŋ obedo Obaŋa. Muca rik obedo agen i ot Obaŋa luŋ acalo atic, me miyo caden i kop ame rik obedo agen i ot Obaŋa luŋ. Ager ot omio kwogo loyo ot Obaŋa acalo atinnere. Ode-nono en wan, ka ce wan omoko atek i tekcunywa kede ŋatetwa ame obino pi gen a wan otye kede. Doŋ acalo Cuny Acil okobo, “Ka iwinyo wunu dwon Obaŋa tin, kur imi cunywu bed anwaŋ bala jo a rik ojem, i kare ame gin oomo kede yia i tim, kan ame kwariwu oomo kede yia, otema iye, kun obedo neno ticca pi mwakki pyeraŋwen, Pi mano cunya owaŋ i kom jo me kare-nono, ate kobo ni, ‘Gin didik ogak oko i tamgi; gin mom oniaŋ i kom yo mera.’ Acalo rik akwoŋo i akemona, ‘Gin mom bino donyo i weo baŋa.’ ” Gwokere wunu, omegona, me atot ya ŋattoro i akinawu kur bed i cuny arac, cunya mom ye Obaŋa, ame twero miye ya oko i kom Obaŋa akwo. Ento myero ijiŋ wunu cunywu kenwu nino luŋ ka pwod otwero lwoŋo ni, “tin”, me ŋattoro i akinawu kur cunye dok anwaŋ pi abwole me bal. Pien wan obedo jo ame onotte kede Kricito, ka ce wan omoko atek i genwa me agege ituno i agikki, acalo rik okobo ni, “Ka iwinyo wunu dwone tin, kur imi cunywu bed anwaŋ balajo a rik ojema.” Ŋagi ce a rik owinyo dwon Obaŋa, eka ote jem oko-nono? Mom gin lwak jo luŋ a rik oya i lobo Miciri a kun Muca atelogi? Dok ŋagi ce a rik yie owaŋ kedgi pi mwakki pyeraŋwen? Mom gin jo a rik obin obalo, ame komgi te doŋ i tim? Dok baŋ jo mene ce ame en rik obin okwoŋo ni, gin mom bino donyo i weo baŋe? Mom obedo baŋ jo a rik mom obedo owiny? Pi mano wan oneno ni, jo-nono rik mom otwero donyo pien gin okwero ye oko. Doŋ ba, cikere me donyo i weo Obaŋa pwod tye, ento myero obed wunu alwor, me ŋattoro i akinawu kur nwoŋere ni opoto oko me tuno iye. Wan doŋ owinyo amut aber bala rik gin daŋ; ento kwena a gin owinyo mom okonyogi, pien gin ka owinyo mom orubo kede iyee. Wan jo ame oye wan en ame obino donyo i weonono a rik en okobo pire ni, “Acalo rik akwono i akemona, ‘Gin mom bino donyo i weo baŋa,’ ” kadi bed ticcere nwaŋ otum oko geye i acakki piny. Pien tye kannono kan a rik okobo i kom nino me abiro ni mano, “Obaŋa te weo i nino me abiro i kom ticcere luŋ ame en otio.” Eka daŋ kan en dok okobo ni, “Gin mom bino donyo i weo baŋa.” Amanno yo pwod tye twolo me jo mogo dony iye. Jo a rik ogeo rabbigi amut aber mom odonyo, pien gin okwero bedo i winy. En dok te keto nino ocele ame olwoŋo ni, “Tin,” kun okobo icennere i dog Daudi a doŋ okato runi apol ata, i kop anene wan okobo pire, ni, “Ka iwinyo wunu dwone tin, kur imi cunywu bed anwaŋ.” Pien ka kono Yocwa rik omiogi weo, kono Obaŋa mom dok okobo icennere pi nino ocele. Pi mano, weo me cabit pwod tye pi jo Obaŋa; pien ŋat odonyo i weo baŋ Obaŋa nwoŋo doŋ owe oko i ticcere, bala Obaŋa a rik owe oko i mege. Doŋ pi man, myero ololle wunu me donyo i weo-nono, me wek ŋattoro kur dok pot oko pi kwero bedo i winy bala gin. Pien kop Obaŋa en gin akwo, dok tio atek, bit daŋ kato pala bat ame bit ryoryo. En tuco yiwa kero, pello i kan ame tipo kede cuny orwatte iye, onyo kan ame wan nyoo orwatte kede moo miyi cogo, kun poko par kede tam abeco kede areco mere a tye i yi dano. Mom tye ginnoro ame Obaŋa mom neno; jami luŋ a en oketo oradde oko kannaler i waŋe, en ŋat ame bino ŋiyo kopwa. Doŋ wan otye kede alamdog adwoŋ meicel ame doŋ odonyo i polo, en Yecu, Wot Obaŋa; pi mano myero omok wunu atek i iyee ame wan otuco. Pien alamdog adwoŋ a wan otye kede mom bedo ŋat a mom winyo rem karacel kedwa pi gorowa, pien en daŋ Catan rik obite i yore luŋ bala wan, ento en naka mom otimo balloro. Eyo, wan doŋ myero onoku cok i nyim kom me loc Obaŋa kede tekcuny, kan ame winyo tye iye, me timwa kica, onwoŋ daŋ winyo ame konyowa i-kare a mitte. Pien alamdog adwoŋ acel acel oyero i akina a lwak, ote kete me tiyo tic i nyim Obaŋa akakargi, kun mio mot kede gin ame oŋolo pi bal. En twero tic i jo kede mwolo i baŋ jo a kwia piny kede jo ogak, pien en ikome daŋ nwoŋo goro ocire oko. Pi mano en myero mi mot me aŋola pi ballere en ikome, karacel kede pi bal a lwak. Dok daŋ mom tye ŋattoro a yerre kene pi dit man, Obaŋa en ame lwoŋe iye, acalo rik olwoŋo Aron. Amannono daŋ, Kricito rik mom otero kwogo man me bedo alamdog adwoŋ pire kene, ento Obaŋa omie, kun kobo ni, “Yin i Woda, tin doŋ anywali”; acalo okobo daŋ kan ocele ni, “Yin ibedo alamdog nakanaka, i kite a Melkijadek.” I kare me kwo mere i lobo man, Yecu rik okelo kwaccere baŋ Obaŋa, en ŋat ame rik twero lare i to, kun bako doge ame olakino i koko kede pig waŋe, Obaŋa daŋ te winye pi mwolo mere baŋe. Kadi bed en Wot Obaŋa, rik en opwonyere i bedo kede winy pi can a en obeo iye. Ka doŋ ocwiny, odoko ŋat a kelo larre a mom gik baŋ jo luŋ a winyo doge. Obaŋa te tuce me bedo alamdog adwoŋ i kite a Melkijadek. Wan otye kede kop apol a myero okob i kop man, cite tek meicel me niaŋowu, pien niaŋwu doŋ odoko legelege. Aman doŋ onwoŋo iromo bedo wunu opwony, cite ŋattoro myero doŋ dok nwo pwonyowu i kop me agege me kop Obaŋa. Cak en a doŋ porre pirwu, mom cem atek. Pien ŋat ame doto cak mom tye i ŋeccoro a dok i kom kite atir, pien nwoŋo pwod atin. Aco cem atek tye pi jo oteggo, ame ryekogi me poko gin aber kede gin arac doŋ ocwiny pi bedo keto i tic. Pi mano, koŋ oweku kop me agege i kom Kricito, ote medde wunu anyim i pwony a jo oteggo, kun mom dok obedo nwoyo cibo acakki tere, ame en ŋut i kom tic ducu a rik kwo mom iye, kede moko iyeewa i kom Obaŋa, kede dok pwonyere i kom kop magi: kite batija apapat, keto ciŋ i wi jo, cer a jo oto, kede kop ame oŋolo atwal. Wan obino medde anyim giwa, ka Obaŋa oye. Jo ame doŋ otyeko tuno i lero tyen acel, ame obilo mot ame oya i polo, kun obedo i akina jo olimo Cuny Acil, ame daŋ otyeko bilo kop Obaŋa kit a mit kede, dok ogiporo tic atek adoŋo me kare ame bibino, ka jo-nono doŋ ogak oko, mom dok otwero rocogi dok anyen me gin oŋut. Ka gin doŋ ogak oko, gin tye aguro Wot Obaŋa i kom yataria pirgi kengi, kun okelo lewic i kome i nyim lwak. Pien Obaŋa mio winyo i kom lobo ame mato kot ame cwe i kome kare i kare, eka te ceko ginapita ame konyo jo ame opuro pirgi. Ento ka ce onyao okuto kede ocokocok, konnyere nwoŋo mom, kuro ka ceŋ Obaŋa, agikkere en mac ame obino wano kede oko. Ento wun ba, owotena, kadi bed wan okobo aman, ogeno ni itye wunu aber a kato jo-nono i kom kop a dok i Iarre. Pien Obaŋa gire pe wany; wie mom bino wil i tic a rik itio wunu, akadi mar ame inyuto wunu pire i konyo jo Obaŋa, ame pwod itye wunu ka konyogi daŋ. Gin a wan omito atek i tuŋ baŋwu en ene ni, ŋat acel acel i akinawu bino keto cunye naka i agikki, me wek gin ame iketo genwu iye cobere kakare. Kur idok wunu owackom, ento potto wunu jo ame pi iyeegi kede diyo cunygi otye ka nwoŋo gin a rik Obaŋa ociko pire. I kare ame Obaŋa cikere baŋ Iburaim, kite acalo mom dok tye ŋattoro a kate i dit a myero en kwoŋ i nyiŋe, en okwoŋo i nyiŋe kene, kun kobo ni, “Abino miyi winyo dok abino nyayo ikwai bedo apol.” Pi Iburaim idiyo cunye, omio en onwoŋo gin a rik Obaŋa ociko pire. Ka dano moro kwoŋo kwoŋ, en kwoŋo i nyiŋ ŋat adwoŋ a loc, dok ka pyemmoro tye i akina jo, kop ame omoko kede kwoŋ en a tyeko. En gin omio Obaŋa omoko cikere mere kede kwoŋ, pien nwoŋo omito nyuto aber meicel baŋ jo a myero nwoŋ gin ame eciko pire ni, gin ame eyiko mom dok ebino loko. Tye doŋ jami aryo a mom dok lokere, ame Obaŋa mom twero bwolo jo iye. Doŋ pi man, wan jo ame oriŋo olaro baŋe otye i gin ame cukoro cunywa atek me lido gen ame oketo i nyimwa. Wan otye i gen man acalo ajuk mel, ame mio cunywa cuŋ atek a mom owirre. Gennono donyo anaka i kabedo acil i ot Obaŋa, i ŋe boŋo acika, kan ame Yecu otelo nyim odonyo iye pirwa, kun doŋ odoko alamdog me nakanaka i kite a Melkijadek. Melkijadek man rik obedo rwot me Calem, dok daŋ alamdog Obaŋa Amalo Meicel. En orwatte gin i Iburaim i kare ame Iburaim onwoŋo adwogo i neko rwode ca, te lammi Iburaim winyo; eka Iburaim te pokke dul acel me apar me jami luŋ ame enwoŋo. Me agege en “rwot me kite atira”, pien man te kop me nyiŋe, dok daŋ en rwot me Calem, ame te koppere, “rwot me kuc”. Pappere moro mom, tottere-gu daŋ pe, kwari mege mom, ageyi me kare mere, anaka agikki me kwo mere daŋ pe. En cal kede Wot Obaŋa, obedo alamdog nakanaka. Koŋ inenu kite a rik en dit kede! Iburaim ame en kwarowa acon omie dul acel me apar me gin ame oyako. Doŋ jo i akina ikwae a Levi ame obedo olamdog, cik a Muca rik ocikogi me rayo dul acel me apar i baŋ jo Icrael. Mano nwoŋo gin orao i baŋ omegogi, kadi bed gin daŋ obedo ikwae Iburaim. Ento dano-ni ame pe kwaro mere acel kedgi ogamo dul acel me apar i baŋ Iburaim, eka te lamo winyo i kom ŋat ame Obaŋa ocikere baŋe. Mom dok tye akalakala me kobo ni, alam-winyo dit kato ŋat a en olamo winyo i kome. Dok tuŋ cel oneno ni, jo a rao dul acel me apar gin jo ame to oko, cite tuŋ cel ŋat a rao en ŋat ame coc a rik ocoo otito pire ni pwod kwo. Anaka otwero kobo ni, ka Iburaim omio dul acel me apar, Levi daŋ ame ikwae gin ame rao dul acel me apar, rik omio mere, pien i kare ca en rik pwod tye iyi kom kwaro mere, i kare ame Melkijadek rwatte kede ca. Doŋ ka kono gin ducu twero cobere kakare pi olamdog ame gin jo Levi, ame jo Icrael rik onwoŋo cik Obaŋa karacel kedgi-ni, piŋo dok mitte ni alamdog ocele dok pello i kite a Melkijadek, kun mom okobo ni, i kite a Aron? Aco ka alamdog doŋ olo ko, cik daŋ myero dok lok oko. Pien Rwotwa ame okobo kop magi i kome obedo dano me atekere ocele, ame ŋattoro i kingi mom ru otio ticcoro i kom keno me lam. Ŋeye gire aber ni, en rik oya i kin ikwae a Juda, dok Muca rik pe okobo kopporo i kom atekere-nono ame mako olamdog. Kop-pi doŋ te nen oko kannaler akato ka alamdog ocele opello a calli Melkijadek, ame odoko alamdog, mom pi cikkoro ame lubo atekere, ento pi teko me kwo mere ame ginnoro pe romo tyeko. Pien cok a rik ocoo okobo ni, “Yin ibedo alamdog nakanaka, i kite a Melkijadek.” Cikkoro acon doŋ obolo oko, pien onwoŋo goro, dok konnyere mom, pien cik a Muca rik mom ocobo ginnoro kakare, ento aman doŋ okelo gennoro aber akato ame twero miyowa onoko ceggi baŋ Obaŋa. Medo i mano daŋ, Obaŋa rik okwoŋo kwoŋ i kome. Jo ocele ca odoko olamdog aboŋo kwoŋŋoro, ento Yecu odoko alamdog pi kwoŋ Obaŋa ame rik okobbe ni, “Rwot okwoŋo kwoŋ oko, mom bino loko tammere, ‘Yin ibedo alamdog nakanaka.’ ” Mano omio cikere ame Yecu ocuŋ pire obedo ber atek akato en ocele ca. Apokapoka ocele daŋ dok tye. Olamdog ocele ca rik gin welgi bup, pien to onwoŋo oriye i nyimgi oko me medde kede tic, ento Yecu perakino odoco i dog ticcere me alamdog, pien en bedo nakanaka. Man omio kare luŋ en tye kede twer me laro jo ame bino baŋ Obaŋa kun obeo baŋe, pien en bedo kwo waŋ i waŋ me bako doge pirgi. Alamdog adwoŋ acalo mano en ame romo cobo mitwa. En cil, ginnoro arac mom i yie, cilo me bal mom ogude. Obin opoke oko i kom obalo, otiŋe malo i wi polo. En pe calo olamdog ocele ca, pien gin myero omi mot didik ame gin oŋolo pi bal megi kengi, eka dok ote ŋolo pi bal a lwak. Yecu otimo man tyen acel ame oromo meicel i kare ame omiye kene acalo gin ame oŋolo Cik a Muca keto jo agoro me bedo olamdog, ento kop me kwoŋ ame okwoŋo icennere i ŋe cik oketo Wot Obaŋa ame doŋ ocwiny atwal. Gin a pire dit i kop ame okobo kan en ene: wan otye kede alamdog adwoŋ acalo man, ame doŋ obedo piny i kabedo me kwogo i laŋet kom a Won Kwogo Adwoŋ i polo. En tio ticcere i kabedo acil, i kema me ateni ame Rwot en oguro, mom dano. Alamdog acel acel oketo me miyo mot kede gin ame oŋolo me yalo Obaŋa; pi mano Yecu daŋ myero bed i ginnoro ame emio. Kono en tye i lobo kan, kono mom obedo alamdog kadi acel, pien olamdog tye ame omio mot pi cik a Muca. Cite kan ame gin tio iye en apor kede tipo keken me kabedo acil a tye i polo; pien ka Muca rik ceggi i guro kema, Obaŋa okwenyoro en ni, “Nen ni itio jami luŋ i kite cal ame onyutti i wi kidi.” Cite acalo tye-ni, Yecu doŋ onwoŋo tic amalo meicel a kato megi oko, a rom aroma i kite ame cikere ame en oyiko obedo aber atek a kato en ocele ca, pien Obaŋa omoko kun ociko pi miyo jami abeco akato. Kono rik balloro obedo mom i cikere me agege, kono moro me aryo mere mom dok mitte. Ento Obaŋa onwoŋo bal i komgi, pien okobo ni, “Kare bino romo, man kop a Rwot, ame abino moko cikerena anyen kede doggola Icrael kede doggola a Juda. Mom dok abedo bala cikere a rik aketo i kwarigi ca, i nino a rik amakogi i ciŋgi, ate kwanyogi oko i lobo me Miciri; pien gin rik mom olubo cikerena, omio an daŋ mom awekogi ata, man kop a Rwot. Man en cikere ame abino keto wan i doggola Icrael ka kare-nono okato, Rwot okobo: Abino keto cikka luŋ i cunygi, ate coyo i yigi. An abino bedo Obaŋagi gin ote bedo jona, Ŋattoro a pwonyo wadgi doŋ bino bedo mom, kadi ŋat a kobbi ominnere ni, ‘Ŋe Rwot’, pien gin luŋ obino ŋeya, geye i kom jo atino i akinagi, ituno i kom jo adoŋo. Pien abino timogi kica i tim areco megi, mom dok abino poyo balgi.” Ka okobo pi cikere anyen, en tero cikere me agege ca acalo gin ame kare mere doŋ okato oko. Aco gin ame kare mere doŋ okato, ame oti oko, nwoŋo doŋ ceggi rwenyo. Anaka cikere me agege ca rik daŋ obedo kede cikkogo me woro Obaŋa, dok daŋ obedo kede kabedo acilloro me lobo man. Pien rik tye kema ame oyiko, en me oko ame olwoŋo ni Kabedo Acil, ame tye iye gi-cibo tara kede meja, kede ogati ame oketo i nyim Obaŋa. I yo ŋe boŋo icika me aryo rik tye iye kema ame olwoŋo ni Kabedo Acil Meicel. Kuno tye iye keno me waŋo odok akur ame otio kede jabu, kede canduk me cikere ame omwono kome luŋ kede jabu. Iyi canduk me cikere rik tye iye tabo alibi me jabu kede manna i yie, kede abiro Aron a rik lot ca, kede kiddi apada a nwaŋ ocoo iye kop me cikere. I wi canduk yam tye iye okerubi me kwogo, ame owumo komme-kica kede bwomgi. Jami magi mom otwero kobo ginnoro iye i yore i yore aman. Mano en kite a rik oyiko kede. Olamdog yam donyo i kema me agege didik pi cobo ticgi me woro Obaŋa. Ento kema me aryo alamdog adwoŋ kene en ame donyo iye, en daŋ donyo icel keken i mwaka acel acel, kun mom woto aboŋo remo, ame en mio pire en ikome kede pi roc a lwak. Kit man Cuny Acil cimo kannaler ni, yo me tuno i kabedo acil mom ru oyabo ka kema me agege pwod ocuŋ. Man en cal me kare man. Te koppere ni, mot kede gin ame oŋolo me yalo Obaŋa mom twero miyo ŋat oworo Obaŋa doko dano a cunye ler doki odoco, pien gin otiko ka cem kede mat kede kite lwokere apapat. Magu luŋ obedo cik i oko me kom ame tye atic ituno naka i kare ame Obaŋa bino loko jami ducu bedo anyen. Ento aman Kricito doŋ obino, ame en alamdog adwoŋ me jami abeco ame bibino. Kema a en tio iye dit kato maca, daŋ ber odoco kato maca, pien mom otio kede ciŋ, te koppere ni, mom gin me lobo man. En odonyo i Kabedo Acil icel iloŋ ame oromo meicel, kun mom otero remo dyegi kede itino twoni, ento otero remo mere en ikome, te lakorowa doŋ atwal. Remo dyegi kede twoni, kede buru roa ame owaŋo, ka okiro i kom jo ame obalo kwer, romo lonyogi, kun yiko komgi bedo acil. Remo a Kricito mom kato maca atek ateka? Pi Cuny Acil ame perakino atwal, omio en omiye kene baŋ Obaŋa kun roccoro mom i kome, me elony cunywa ame lille pi tiyo tic me to, me obed a yiwa ler, ote woro Obaŋa akwo. Mano en omio Kricito rik obedo ŋat oyiko cikere anyen, me wek jo ame olwoŋo nwoŋo lim ame perakino ame Obaŋa ociko miyo; pien pi to ame otimere, jo a rik okalo wi cik i te cikere me agege aman doŋ olakorogi oko. Pien kan ame cikere me leyo lim tye iye, myero doŋ mok ni, ŋat ociko doŋ oto. Kodi cikere-nono twero tic ka i ŋe to keken; mom tye i twerroro ka ŋat ociko pwod kwo. Pi mannono anaka cikere me agege ca rik omoko kede remo. Pien ka Muca rik otyeko rabbi lwak icwil ducu ame tye iyi cik, en te kwanyo remo roce kede dyegi, karacel kede pii, kede uci yer romo arema, kede yat acalo ogudo, kiro i kom buk ikome, kede dok i kom lwak luŋ, kun kobo ni, “Man en remo me cikere ame Obaŋa ocikowu iye.” Dok i, yore acellono, Muca okiro remo i kom kema kede jami luŋ ame otio kede me woro Obaŋa. I te cik, jami luŋ obuco lonyo kede remo; kan ame mom oonyo iye remo, weko bal daŋ pe iye. Kakare, jami ame obedo apor keken me gin a tye i polo rik myero olony i kodi ginnono, ento jami me polo ikomgi myero olony i mot aŋola abeco akato magi-nono oko. Pien Kricito mom odonyo i kabedo acil ame ciŋ dano otio, ame obedo apor i kabedo acil me ateni mere, ento odonyo i polo ikome, ame aman en tye a nen iye i nyim Obaŋa pirwa. Dok daŋ pe odonyo me miye kene kare i kare bala alamdog ame donyo i kabedo acil mwaka i mwaka kun tero remo a mom mere en ikome. Kono ka amanno, kono en onwoo to kare i kare geye i acakki piny. Ento kit a tye kede-ni, en onen icel keken i agikki kare wek ekwany bal oko pi miye kene acalo gin ame oŋolo. Dok kite acalo oyiko ni, dano to icel, eka i ŋe mano te bedo ŋolo kop, amanno daŋ Kricito omio icel me yeyo bal a jo apol, dok bino nen tyen me aryo, mom dok pi tic i kom bal, ento pi laro jo ame tye akure. Cik gire tye iye tipo keken me jami abeco me kare me i nyim, mom calgi ikokome. Pire daŋ jo bedo kela mot aŋola a kitegi acel nakanaka, mwaka i mwaka. En pe tye i twerroro atwal me loko jo a bino baŋ Obaŋa doko aber odoco. Kono tye amanno, kono miyo mot aŋola mom doŋ ogik oko? Kono jo a rik oworo Obaŋa balgi olwokere oko meicel, kono mom dok omedde ŋeyo i cunygi ni gin obalo. Ento mot aŋola magi bedo poyo wi jo i balgi mwaka i mwaka, pien remo twoni kede dyegi gire pe twero kwanyo bal. Pi kop man, i kare ame Kricito bino i lobo, en okobo ni, “Yin giri rik mom imito gin oŋolo kede mot ame omio, ento iketo koma-ni, Yii mom obedo yom i gin oŋolo owaŋo alutu, kadi i gin ame oŋolo pi bal. Ate kobo ni, ‘An ene, doŋ abino, me cobo mitti, yin Obaŋa’, acalo yam ocoo i koma i buk adola.” Me agege en okobo ni, “Yin mom imito gin oŋolo, kadi mot ame omio onyo gin oŋolo owaŋo alutu, onyo gin ame oŋolo pi bal, yii daŋ mom yom iye,” ame gin jami ame omio pi cik. Eka te kobo ni, “An ene, doŋ abino me cobo mitti.” Oweo me agege oko me wek ekel me aryo mere. Doŋ pi mitterenono, wan doŋ olonyowa doko acil pi Yecu Kricito imiyo kome aka mot tyen acel ame oromo meicel. Alamdog acel acel cuŋ i dog ticcere kun mio kit mot aŋola acel-Iu kare i kare a mom tye i twerroro atwal me kwanyo bal. Ento Kricito rik omio gin acel gire ame oŋolo pi bal, pi kare luŋ, eka te bedo piny i kabedo me kwogo i laŋet Obaŋa tuŋ cem. Ya i kare ca en tye a kuro ituno ka obino miyo okworrerre doko aten tyene, pien mot aŋola mere acellono omio jo ame en olonyogi bedo acil odoko jo ocwiny atwal. Cuny Acil daŋ omio cadennere baŋwa, pien ka doŋ okobo ni. “Man en cikere ame abino keto wan i doggola Icrael ka kare-nono okato, man kop a Rwot: Abino keto cikka i cunygi, kede coyogi i tamgi”, te medo kobo ni, “Mom dok abino poyo balgi kede timgi areco.” Kan a weko bal nwoŋere iye, mot aŋola me lamo bal mom dok mitte iye. Omegona, otye wunu doŋ i yo me donyo i kabedo acil kede tekcuny pi remo a Yecu. En oyabbiwa yo anyen, yo akwo me donyo i ŋe boŋo icika, yo-nono en kome. Kite acalo otye doŋ kede twon alamdog adwoŋ ame loo ot Obaŋa, ber doŋ onok wunu Obaŋa ceggi kede cuny me ateni, kun iyee odonyo atut i cunywa, a doŋ yiwa ler pien okwanyo oko i tamwa ŋec me gin areco a yam otimo, dok daŋ ame komwa doŋ olwoko oko i pii acil. Olid wunu atek gen a wan otuco, aboŋo tagere, pien ŋat ocikowa genne. Daŋ opar wunu kite a myero otugere wunu kenwa kenwa i mar kede tic abeco, kun mom oweko wunu cokere karacel, kite acalo jo mogo oloko odoko kitegi, ento myero ocukoro wunu cunywa kenwa kenwa, akato mere kite acalo ineno wunu Nino-naca doŋ tye a noko ceggi. Pien ka wan obalo me akaka a doŋ nwoŋo otyeko limo ŋec i kom kop me ateni, lee moro mom dok odoŋ ame aŋollo pi bal wa. Odoŋ kuro ŋolo kop keken kun otye wunu i lworo adwoŋ, kede mac ager ame bino tyeko jo a pyem Obaŋa. Ŋat ame obolo cik a Muca oko oneko aneka aboŋo kica moro, ka ce kop oloo i waŋ ocaden aryo onyo adek. Kara ŋat ame ocao Wot Obaŋa, dok ame opyedo remo me cikere Obaŋa ame olonye kede bedo acil, dok ame oŋalo Cuny me kica Obaŋa, can arac a rom mene ame itamo wunu ni myero ket i kome? Pien wan oŋeo ŋat ame okobo ni, “An ame abino culo kwor, an abino lunyo icen,” dok ni, “Rwot bino ŋolli jo mere kop.” Me lworo meicel, ipoto i ciŋ Obaŋa akwo. Kakare, koŋ ipoyo wunu kare okato, kite a rik ikanyakino wunu, kun ilwenyo wunu kede lwak can apol, i kare a doŋ acara Obaŋa otyeko menyowu. Kare ocele rik oyetowu dok owunowu i nyim lwak, kare ocele inotte wunu kede jo ame otimogi amannono. Pien kica rik omakowu i kom obuc, dok daŋ yiwu obedo yom ata kadi oyako jamiwu, pien wun giwu onwoŋo iŋeo wunu ni itye wunu kede jami ocele abeco akato magu, dok ame bino perakino. Doŋ ba, kur iwuc wunu tekcunywu oko, pien bino kelo mot abup me pwoc. Kanyakino en gin a mitte meicel i tuŋ baŋwu, me iti wunu gin ame Obaŋa mito, ite nwoŋo wunu gin a rik en ociko pire, acalo rik ocoo ni, “Odoŋ kare atitidi moro, eka ŋat a bino ca te bino aboŋo gal. Danona a kite atir bino bedo kwo pi iyee; cite ka odok cen, yia mom bino bedo yom i kome.” Ento wan giwa mom otye i akina jo a dok cen, eka te rwenyo oko odoco; wan otye i akina jo ame tye kede iyee, eka te gwoko kwogi. Iyee en ame moko gin ame ogeno, en gin a niaŋowa aber ni, jami a mom oneno komgi kara tye gigi. Pire omio jo acon, Obaŋa opwoogi. Pi iyee wan oniaŋ ni, Obaŋa rik oketo wi podo luŋ kede koppere, ame omio gin ame nen otio i gin a mom nen. Pi iyee Abel omio mot aŋola me yalo Obaŋa aber akato mea Kain oko, ame omio opwoe ni kite atir, kun Obaŋa obedo cadennere i gamo mottere. En oto, ento pi iyee mere en pwod tye akop. Pi iyee Enoka rik otero malo me kur bil to. Mom obin onwoŋe, pien Obaŋa otere oko. I kare a mom ru otere, omio caden i kome, ni oyomoro yi Obaŋa. Aboŋo iyee mom otwero yomoro yie, pien ŋattoro ame mito noko ceggi Obaŋa myero ye ni en tye, dok ni en mio mot baŋ jo a yenye. Pi iyee Nua daŋ, ka Obaŋa okwenyoro en pi gin a mom ru onen, owinyo doge, eka te payo yee pi laro jo me ode. Iyee mere-ni omio kop oloo lobo eka te nwoŋo kite atir ame bino pi iyee. Pi iyee Iburaim owinyo dog Obaŋa ka olwoŋe me wot i lobo i oko ame onwoŋo rik obino miye me bed mere. Oya oko i lobo mere kun pe ŋeo kan ame ewoto iye. Pi iyee en obedo acalo welo i lobo a rik Obaŋa ociko pire, kun bedo i kema gin Icaka kede Yakobo, ame gin daŋ omiogi cikere acellono. Pien en onwoŋo akuro boma ca ame acakki te gedo mere tye atek, en ame Obaŋa obedo ago-callere kede agedo mere. Pi iyee anaka Cara onwoŋo teko me yac, kadi bed kare me nywallere doŋ okato. Man otimere pien otamo ni, ŋat ociko-nono genne. Man omio I kom ico acel a rik rom aroma i ŋat oto, oya iye lwak ikwae apol ata acalo acer me polo, kede acalo kwoyo me dog nam ame kwano loo jo. Jo-nu duco oto i kom iye, kun mom ru omiogi gin a nwaŋ ociko pire, ento kun oneno anena i kannabor, omoto i kuno, dok daŋ kun otuco ni gin obedo acalo orok onyo wele i wi lobo. Pien jo ame kobo kit enno nyuto kannaler ni otye oyenyo lobo me turgi. Kono rik gin obedo tamo pi lobo a rik gin oya iye ca, kono gin onwoŋo yo me dok cen iye. Ento gin gigi oparo loba aber akato maca oko, en pacogi ame i polo. En omio lewic gire mom mako Obaŋa ka ce olwoŋe ni Obaŋagi, pien en otyeko yikkigi boma. Pi iyee Iburaim, ka rik oteme, mio Icaka acalo mot aŋola me yalo Obaŋa; ŋat ame Obaŋa ocikere baŋe oyikere me miyo wode acel iloŋ acalo gin ame oŋolo me yalo Obaŋa, ame pire rik okobo ni, “Itino Icaka en ame obino cwano ni ikwaeni.” En onwoŋo otamo ni, Obaŋa tye kede twer me cero jo iyi akina jo oto; daŋ otwero kobo ni, Icaka odwogo i ciŋ Iburaim acalo oya i akina jo oto. Pi iyee Icaka olamo winyo i kom Yakobo gin kede Ecau pi kare me i nyim. Pi iyee Yakobo daŋ, ka doŋ mito to, olamo winyo i kom itino a Yucepu acel acel, kun okulo wie i wi abiro me komo mere, me woro Obaŋa. Pi iyee Yucepu, iyi agikki me kwo mere, okobo pi yaa a jo Icrael i Miciri, eka pi kite me yiko cogo kome. Pi iyee, ka rik onywalo Muca, onywallere okane pi dwete adek kun mom olworo cik abaka, pien gin oneno ni atin ca ber atek. Pi iyee Muca, ka doŋ odoŋo, mom oye ni lwoŋe ni wot a nyaka a Parao, kun oyero neno can karacel i jo Obaŋa akaka bedo i yomcuny me bal ame ri pi kare anokkoro keken. Otamo ni ayet ame okanyo pi Kricito obedo lonyo adwoŋ kato lonyo luŋ i Miciri, pien onwoŋo ociko waŋe i kom mot ame i nyim. Pi iyee Muca oya oko i Miciri kun mom lworo akemo abaka; okanyo atek, acalo bala eneno Obaŋa a mom nen. Pi iyee daŋ en okwero ecuban me Kato, dok okiro remo, me wek anek otino kao kur gudgi. Pi iyee jo Icrael oŋolo Nam Arema acalo wi tela otwo; cite jo Miciri omwony oko ka gin daŋ otemo timo amanno. Pi iyee omio apama cel me Jeriko orutte piny a doŋ jo Icrael omano pi nino abiro. Pi iyee Rakab ame alaya mom obin oto karacel i jo a mom obedo owiny, pien onwoŋo rik ojolo orotpiny kede kuc. Kara dok amedde kobo ŋo? Pien kare mom bino romma me tittiwu pi Gideon, Barak, Samcon, Jeputa, Daudi, Camwiri kede odwarpiny-gu, ame gin daŋ pi iyee rik olwenyo kede obakki me lobo apapat, oloogi, otio gin a tye atir, onwoŋo gin a yam Obaŋa ociko pire. Gin otweo dog eŋatogu, oneko mac ager oko, obwot i lak pala bat. Gorogi odoko tekkom, gin odoko jo atek i lweny, oryemo mony orok oko. Mom onwoŋo jogi a rik oto a doŋ ocer oko. Jo ocele owunogi arac, ote to kun okwero oko ni kur gonygi, me gin ocer i kwo aber akato. Jo ocele oŋalogi, opwodogi, otweogi i jagere oketogi i buc. Onapogi kede gweŋe, oŋuno yigi aryo kede ocumeno, onekogi i pala lweny. Gin oloŋo piny kun oruko ka pyene rommi, kede me dyegi, kun can ocirogi oko, jo owunogi dok otimogi cucu. Kodi jo-nono lobo pe romo bedo kedgi. Gin obedo wowota i tim, kede i wi kiddi, kun obedo i gorogoro kede i bure piny. Jo-ni ducu oŋeye aber pi iyeegi, ento gin mom obin onwoŋo gin a rik Obaŋa ociko pire, pien onwoŋo en oyiko ginnoro aber akato kun otamo pirwa, ni mano, gin pe myero odok jo ocwiny aboŋo wan. Doŋ acalo wan otye kede lwak ocaden ecipan ame ogurowa dyere, myero doŋ doŋ obol gigi mogo apek oko ducu, kede bal ame maro lidowa atek, me odyeb wunu ŋwec pyem a tye i nyimwa, kun okanyakino wunu. Onen wunu Yecu ame obedo atel wiwa i kom iyee kede ŋat ame ocobo kakare. Pi yomcuny ame oketo i nyime en rik okanyo yataria, kun ocao lewiccere; aman doŋ tye obedo piny i kabedo me kwogo i laŋet kom me loc Obaŋa tuŋ cem. Tam wunu i kome, kede kite a en okanyokino i adage arac meicel i baŋ obalo, me kur iol wunu, kur cunywu opoti. I romowu kede bal, mom ru ilwenyo wunu ituno i onyo remowu. Onyo wiwu owil oko ce i coc a rik ocoo me cukoro cuny jo, ame kobo kedwu iye acalo itino mere? Ni mano, “Woda, kur ica pwony a Rwot; ka en ogoi, kur cunyi opoti. Pien Rwot pwonyo jo a en maro, pwodo atin acel acel ame egamo.” Myero ikanyakino wunu, me pwonywu. Obaŋa tye a tic kedwu acalo itino mere; atinnene ame pappere pe pwonyo? Ka ce owekowu aboŋo pwonyowu acalo itino ocele luŋ, nyuto ni wun doŋ itino luk, mom itino mere ikome. Aco wan obedo kede pappiwa me lobo man ame rik opwonyowa, wan daŋ oworogi. Mom doŋ myero omiye wunu akato i te loc a Papa wa me cuny me obed kwo? Pien gin rik opwonyowa pi kare anokkoro keken i kite ame gin oneno ni ber, ento Obaŋa pwonyowa pi konyowa, me wan odok jo acil acalo en. Kite pwonyere luŋ, ka pwod otye iye, pe otamo ni me yomcuny ento me kumo, cite icennere adwoggi mere kuc keken baŋ jo ololle atira. Pi mano, tiŋ wunu badwu ame okwe-nu, rye wunu coŋwu agoro, mi wunu yo a tyenwu lubo cuŋ atir, me ŋattoro a tyene owil kur dok ŋwal, ento can gire oko. Ket wunu teko me bedo i kuc i jo luŋ, kede bedo jo acil; aboŋo en-nu, mom tye ŋattoro a bino neno Rwot. Nen wunu ni ŋattoro kur onyobere i gamo kica Obaŋa. Nen wununi, ŋattoro mom obedo acalo lwit yat akec ame ka otu kela ayela, dok balo jo apol. Nen wunu ni ŋattoro kur bed atim tim me coco, onyo ŋat a mom lworo Obaŋa bala Ecau, ame rik ocato dittere oko me bedo atin kao kom ka i cam me tyen acel keken. Pien iŋeo wunu ni, icennere, ka en omito ni pappere lamme winyo, rik ote kwere oko, kadi bed omito kede pig waŋe, pien pe obin onwoŋo yo me ŋut i gin a nwaŋ etimo. Pien wun giwu mom ibino wunu i gin ame otwero gudo kome, i mac a rik olyel i wi kidi me Cinai, kede colpiny ame ocido oko icuc, kede yamo ajuru, kede koko apel kede dwon ŋat a kop. Jo owinyo rik obako doggi ni kur dok omed kobbigi kopporo, pien gin mom otwero kanyo cik ame omio, ni mano, “Anaka leyi-gu, ka ogudo kidi, myero nap i gweŋ, neko oko,” Gin onen kaci-naca obedo arac meicel, naka omio Muca owoto dwone ni, “Lworo omaka meicel, omyelo koma.” Cite wun ibino wunu i kidi me Cion, kede i boma Obaŋa akwo, Jerucalem me polo, kede baŋ lwak omalaika ecipan ame ocokere pi woro Obaŋa, kede i cokere itino kao ame ocoo nyingi i polo, kede baŋ Obaŋa, ame en aŋolkop a jo luŋ, kede baŋ tipo jo a kitegi atira, ame doŋ omio doko jo ocwiny odoco, kede baŋ Yecu, ayik cikere anyen, kede baŋ remo ame okiro, ame tito pi gin aber a kato en ame remo Abel otito pire. Gwokere wunu kur ikweru winyo ŋat a tye akop. Jo ame rik okwero winyo ŋat ame okwenyorogi i wi lobo rik mom obin obwot. Wan kono obino bwot wunu niŋo, ka okwero winyo wunu ŋat ame akwenyorowa i wi polo twal? I kare-naca, dwone rik obin oyeŋo lobo; ento aman en ociko ni, “Odoŋ icel, mom abino yeŋo ka lobo keken, cite anaka polo daŋ.” Kop man ni, “Odoŋ icel,” nyuto ni, obino kwanyo gin a yeŋere oko, mano ginaketa, eka gin a mom yeŋere te doŋ. Pi mano, myero wan opwo wunu Obaŋa, pien wan onwoŋo loc a mom twero yeŋere, daŋ myero owor wunu Obaŋa i yore a twero yomoro cunye, kun daŋ omie wunu kwogo kede lworo, pien Obaŋawa en mac ame wano piny. Medde wunu i marre kenwu kenwu acalo omego. Wiwu kur wil i jolo wele, pien jo mogo a rik obedo i kodi cunnyono rik obin ogwoko omalaika i paccigi kun mom oŋeo. Po wunu pi jo a tye i buc kom bala itye wunu kedgi i buc kuno. Po wunu daŋ pi jo ame otimo cucu, kite acalo wun daŋ itye wunu i kom. Nyom myero jo luŋ ket iye kwogo, dok itanda a jo onyomere myero wor bed acil; pien Obaŋa bino ŋolo kop i kom otim tim me coco kede jo abalo nyomgi. Kur i bed wunu omar lim; jami ame itye wunu kede myero romwu, pien Obaŋa rik okobo ni, “Mom abino boli, mom abino weki ata.” En omio cunywa tek, kun okobo ni, “Rwot en akony mera, mom abino bedo i lworo; ŋo kara a dano twero tima kede?” Po wunu i kom otelwu acon, ame rik gin orabbiwu kop Obaŋa. Tam wunu pi kwogi kede gin aber ame oya iye, eka ite wapo wunu iyeegi. Yecu Kricito kite gire acel keken aworo, tin kede waŋ i waŋ. Kur imi wunu pwonnyogo apapat dok awelo rwenywu oko; ber kica Obaŋa en a mi cunywa teko, mom cemmogo ame jo ona iye daŋ mom onwoŋo iye konnyoro. Wan otye kede keno me lam ame otic i kema acon ca mom tye i twerroro me cem iye. Pien leyi ame alamdog adwoŋ tero remogi i kabedo acil me bed gin ame oŋolo pi bal, komgi rik owaŋo oko teŋe i ŋe gony. Amannono daŋ Yecu rik oto teŋe i ŋe idogcel, me wek elony jo bed acil i remo mere en ikome. Doŋ pi man myero wan owot wunu baŋe oko i ŋe gony, kun okanyo wunu acae pire; pien kan wan mom otye i boma moro ame perakino, ento otye oyenyo boma a bino anyim. Ber doŋ omi wunu pakwa baŋ Obaŋa i kare luŋ acalo gin ame oŋolo me yalo Obaŋa, kun obeo wunu i baŋ Yecu; mano en pwoc ame omio i dogwa ka otuco nyiŋe. Kur wiwu wil i timo gin aber kede i poko gin itye wunu kede baŋ jo ocele, pien kodi mot aŋola acalo mannono yomoro yi Obaŋa. Winy wunu dog otelwu, dok imiye wunu i te locgi, pien gin tye a gwoko tipowu aboŋo weo acalo jo ame Obaŋa bino penyogi pi ticgi. Mi wunugi oti ticgi kede lelo, kun mom imiogi wunu peko, pien mano gire mom konyowu kadi acelloro. Kwa wunu Obaŋa pirwa, pien wan oŋeo ateni ni cunywa ler gire, kun omito tiyo gin a tye aber i kare luŋ. Amedo cukoro cunywu atek ni ikwa wunu Obaŋa, me ru dwoggo an baŋwu oyot. Obaŋa won kuc ame ocero Rwotwa Yecu Kricito i akina a jo oto, ame en akwat adwoŋ me rommi, pi remo me cikere ame perakino odoco, en Obaŋa myero omiwu gin luŋ abeco a mitte, me icob wunu gin a en mito; dok daŋ pi Yecu Kricito myero en ti kedwa gin a yomoro yie. Kwogo bed baŋ Yecu Kricito nakanaka. Amen. Omegona, akwaowu, di wunu cunywu i koppa ame acoo anonokkoroni ame acukoro kede cunywu. Myero iŋe wunu ni, ominwa Temoteo doŋ ogonyo oko; abino nenowu wan kede, ka ce en oru bino. Mot wunu otelwu luŋ, kede jo Obaŋa daŋ luŋ. Jowa ame oya i Itali omotowu. Winyo Obaŋa bed kedwu ducu. Waraga man oya i baŋ Yakobo ame en amiro Obaŋa kede Rwotwa Yecu Kricito. Baŋ atekere apar wie aryo ame oket ata: Orem wunu ba. Omegona, bed wunu i lelo atek ka otemowu i yore apapat, pien iŋeo wunu ni, temo iyeewu mio idio wunu cunywu. Wek wunu diyo cunywu cob ticcere kakare, me ibed wunu jo oteggo, a roccoro mom i komwu, dok ame ginnoro daŋ mom orem i baŋwu. Ka tye ŋattoro i akinawu ame ryeko mere nok, ber en kwa Obaŋa ame mio baŋ jo luŋ i yomcuny, aboŋo abwote moro; bino miye. Cite myero en kwa kede iyee, kun daŋ mom kala akala; pien ŋat ame kala akala, rom i nam ame tagere, ame yamo kolo coro gire atata. Pien kodi danonono mom myero tam ni ebino nwoŋo ginnoro i baŋ Rwot, pien en dano a cunye aryo, mom cuŋ atek i kittere luŋ. Acan myero wakere ka otiŋe malo, alonyo daŋ myero wakere ka odwoke piny; pien alonyo bino rwenyo bala tur lum. Pien ceŋ donnyo kede lyeto mere atek, eka te nero lum, ture te ony, berrere te rwenyo oko. Amannono daŋ, alonyo bino rwenyo ata i dyeceŋ. Ŋat ame otemo te cuŋ atek, tye kede winyo; pien ka doŋ oteme, en te loyo, en bino nwoŋo mot me kwo ame Rwot ociko miyo baŋ jo a mare. Ka obito ŋattoro, myero kur kob ni, “Obaŋa en obita”, pien Obaŋa gire mom obito i tiyo ginnoro arac, en daŋ mom bito ŋattoro. Dano acel acel mittere kene en abite, kun wae, omo cunye. Mit ka oyac nywalo bal. Bal ka doŋ oteggo, nywalo to. Kur imi bwolwu, omegona ame amaro. Pien ginnoro luŋ aber ame omiowa, kede mot ducu abeco, ya i malo, bino piny iya i baŋ Obaŋa Papo, ame won gin aryeny i polo, ame mom tye kede alokaloka moro, dok tipo moro a nyuto lokere mere daŋ mom tye. Pi mittere, en onywalowa kede koppere me ateni, me wan obed calo cam i poto ame ogeo cek i kin gin luŋ ame oketo. Omegona ame amaro, ŋe wunu man. Dano acel acel myero ru winyo kop, ento myero kur ruye woto dwone, dok myero kany akemo. Pien akemo a dano mom cobo tic a tye atira i nyim Obaŋa. Cwa wunu teŋe ginnoro luŋ me lewic kede tim areco ame onya baŋwu, gam wunu i mwolo kop Obaŋa ame opito i yiwu, pien twero laro tipowu. Ento bed wunu jo ame keto gin ame okobo i tic, mom jo a winyo awinya keken kun ibwolle wunu kenwu. Pien ka ce ŋattoro obedo awiny kop keken kun mom tio, en cal i ŋat ame ŋio waŋe ame onywale kede iyi araŋ. Cite ka oŋiye kene otum, woto oko, wie te wil oko oyotoyot i callere ame woki eneno. Ento ŋat ame oneno cik aber ame kelo kuc, eka te perakino iye, kun mom bedo ŋat ame winyo eka wie te wil oko, ento ŋat ame keto i tic, obino miye winyo i gin etio luŋ. Ce dano moro tamo ni en adini kun mom juko lebe, en nwoŋo obwolle kene, dini mere konyere mom. Dini aber odoco, a cilo mom iye i nyim Obaŋa Papawa en ene: konyo otino kic kede mon a coggi oto i kom cangi, kede gwokere ken i ci lo a bal me Iobo. Omegona, kite a doŋ iye wunu kede Rwotwa Yecu Kricito, Rwot me kwogo, kur dok inyut wunu apokapoka moro i akina a jo. Pien ka won atem me jabu oruko boŋŋi abeco obino i cokerewu, kede acan oruko boŋŋi ocido, ilunyo wunu paro ka pi won boŋŋi abeco kun ikobo wunu ni, “Yin bed kan, adwoŋ”, aco acan ikobbe wunu ni, “Yin cuŋ kaca”, onyo ni, “Bed piny i ŋet tyena kan”. Mano mom nwoŋo doŋ ikelo wunu apokapoka oko i akinawu kenwu, kun idoko wunu oŋolkop ame tamwu ogom oko? Winy wunu ba, omegona ame amaro, Obaŋa mom otyeko yero jo ocan i wi lobo me bedo olonyo i iyee, dok me miyogi loc a rik ociko ni ebino miyo baŋ jo a mare? Ento wun iketo wunu lewic i kom ocan. Jo ame burowu, mom gin olonyo? Gin mom en a waowu terowu tetek i nyim okiko? Mom gin oyet nyiŋ aber ame olwoŋowu kede? Ka imako wunu cik me loc Obaŋa i kite ocoo kede i coc a yam ocoo ni, “Mar dano wadwu acalo imarre keni,” nwoŋo itimo wunu ber; ento ka ipoko wunu kin dano, nwoŋo itimo wunu rac, nwoŋo cik ŋolliwu kop ni wun obalo. Pien ŋat a gwoko cik ducu, ka ce opoto i kom acel keken, nwoŋo oturo cik luŋ. Pien ŋat okobo ni, “Kur icod cot,” dok okobo daŋ ni, “Kur inek.” Ka ce mom icod cot ento ineko dano, yin doŋ ituro cik. Kop ame ikobo wunu, kede gin ame itio wunu, myero bed acalo mea jo obino ŋolligi kop i te cik a kelo kuc. Pien ŋolo kop mom timo kica baŋ ŋat a rik mom onyuto kica; kadi amanno, kica ŋatte pien en ber kato ŋolo kop. Kara konyo ŋo omegona, ka ŋattoro kobo ni etye kede iyee kun mom keto i tic? Iyee-nono twero lare? Ka ce ominni onyo aminni boŋo mere pe, kun cam me nino i nino remo, ŋattoro acel i akinawu te kobbe ni, “Wot wunu i kuc, komwu mumura, yeŋ wunu,” kun mom omiogi ginnoro a mitte me kom, kara enno konyere ŋo? Kittono, iyee a mom oketo i tic, doŋ oto oko, ŋattoro bino kobo ni, “Yin itye kede iyee, ento an atye kede tic; nyutta iyeeni aboŋo ticcoro, eka an ticca bino nyuto iyeena.” Ityeko ye ni Obaŋa tye acel, itimo ber. Cen daŋ ye amanno, komgi daŋ myel. Yin amiŋo, imito nyutti ni, iyee a mom i tic konnyere mom? Nen ba, kwarowa Iburaim rik mom okwano ni kite atira pi tic, i kare ame en doŋ ojalo wode Icaka me aŋola i wi keno me lam? Doŋ ineno ni iyee mere rik otio karacel kede ticcere, dok iyee rik ocobere i tic, eka coc a yam ocoo te cobere kakare ni, “Iburaim rik oye Obaŋa, eka ote kwane ni kite atir, dok daŋ ote lwoŋe ni dyere Obaŋa.” Ineno ni dano okwano ni kite atir pi tic ento mom pi iyee keken. Amannono daŋ, Rakab ame alaya, mom obin okwano ni kite atir pi ticcere, ka rik ojolo okwena eka te cwayogi i yo ocele? Kite acalo ka weo doŋ mom i kom, nwoŋo kommono doŋ oto oko, amannono daŋ, iyee ka mom oketo i tic, nwoŋo doŋ oto oko. Omegona, myero jo apol i akinawu kur bed opwony, pien iŋeo wunu ni wan opwony obino ŋolliwa kop apek akato jo ocele. Wan luŋ opoto i kop apol, cite ka ce ŋattoro mom opoto i gin ame en kobo, dano-nu dano aber meicel, twero loyo kome luŋ. Wan oketo nyonyo i dog aguragura me gin winywa; mano mio owiro komgi luŋ tuŋ a wan omito. Koŋ inen wunu mel, gin odoŋodoŋo, dok yamo en a kologi, cite akwaŋŋo twero wiro woto kan emito kede atin polloro atitidi moro keken. Kittono, leb en dul kom ame obedo iŋwet, ento wakere i jami adoŋodoŋo. Nen kite ame mac aduno moro waŋo kede twon buŋ! Leb daŋ amannono, calli mac. I dul komwa, leb rom i wi podo ame timmere mom atir balo komwa luŋ; cwinyo mac i komwa, i kite a kwo wirre kede luŋ; mac me Geena moko i kome. Dano twero loyo kit leyi luŋ kede winnyi, kede wic a twolegu, kede gin a bedo i nam, daŋ doŋ oloo oko yam con, ento mom tye dano moro a twero loyo leb. Leb obedo twon ginnoro a mom jukere, opoŋ i kwir a kelo to. Aco kono en leb, en ame wan opwoo kede Rwot kede Papo daŋ, en acellono a daŋ dok oceno kede jo ame oketo i cal Obaŋa. I dog acellono en a daŋ ya iye pwoc kede ceno jo. Omegona, mom myero bed amannono. Waŋ akoŋ acel twero mollo iye pii amit kede akec? Omegona, oduro twero nyako yao? Onyo olok twero nyako oduro? Amannono daŋ, pii amit mom twero mollo i akoŋ ataŋ. Ŋa kara i akinawu ame ryek dok akitti? En myero nyut ticcere me ryeko i mwolo, pi kwo mere aber. Ento ka itye wunu kede nyeko arac i cunywu, kede laro dito, kur iwakere wunu, kun daŋ ikob kop me goba i kom kop ateni. Kodi ryeko man mom oya i polo ento me lobo, mom me woro Obaŋa ento mea Catan gire. Pien kan ame tye iye nyeko kede laro dito, kannono tye iye arubaruba kede tim ducu areco. Ento ryeko ame oya i malo, me agege bedo cil, eka dok me kuc, me mwolo, gamo tam luŋ abeco, opoŋ i kica, nyako nyig aber, mom poko i akina jo, dok cunye atir. Jo ame kelo kuc, coo kotigi i kuc me nyako kite atir. Ŋo kara a kelliwu lweny? Ŋo a kelo romo i akinawu? Mom mitwu en a tye ka lweny i dul komwunono? Imito wunu, ento mom ite nwoŋo wunu, eka ite neko wunu dano. Iparo wunu jami a jo ocele, ento mom inwoŋo wunu, eka ite ero wunu romo kede lweny. Mom inwoŋo wunu, pien mom ikwao wunu. Ikwao wunu, eka mom ite nwoŋo wunu, pien ikwao wunu arac, ikwao wunu me tic kede pi cobo ka mitwu. Wun jo ame bolo dyerewu oko. Mom iŋeo wunu ni, mako dyere kede lobo mii idoko akwor Obaŋa? Onyo itamo wunu ni, coc a yam ocoo kobo nononono ni, “En tye i par adwoŋ meicel kede nyeko i kom cuny a yam en oketo ni bed i yiwa?” Ento en medde miyo winyo mere; pi mannono, coc a yam ocoo kobo ni, “Obaŋa pyem i jo a wakere, cite mio winyo baŋ jo amwol.” Pi mano, miye wunu i te loc Obaŋa. Dar wunu Catan, en bino riŋowu. Nok wunu baŋ Obaŋa, en daŋ bino nokowu. Lwok ciŋwu oko wun obalo, eka ite miyo cunywu bedo acil, wun jo ame tamwu opokere aryo. Yiwu myero waŋ, kum wunu, kok wunu. Nyerowu myero lokere dok kumo, lelowu lokere dok can. Mwolle kenwu i nyim Rwot, en bino tiŋowu malo. Omegona, kur ikob wunu kopporo arac, ŋat man i kom awottere. Ŋat ame kobo kop arac i kom ominnere, onyo ŋolo ominnere kop, en nwoŋo okobo kop arac i kom cik, dok doŋ oŋolli cik kop. Ento ka yin iŋolli cik kop, yin doŋ mom acob cik ento idoko aŋolkop. Ami-cik kede aŋolkop tye acel, en ame twero larowu kede nekowu. Yin idoko ŋa ame iŋolli awotti kop? Koŋ itam wunu ba, wun jo ame kobo ni, “Tin onyo diki obino wot i boma onyoo, obino tyeko kuno mwaka acel kun ocato wil dok onwoŋo agoba.” Aco kono mom iŋeo wunu kop a diki. Kwowu kara cal i ŋo? Wun kom irom wunu ikuna ame nen pi kare anonokkoro keken, eka te ket oko. Akaka kobo amanno, kono ikobo wunu ni, “Ka Rwot oye obedo kwo, obino timo man onyo maca.” Ento wun ocac, iwakere wunu. Kodi wakerenono luŋ rac, ŋat ame ŋeo gin aber a myero etim, eka mom te timo, nwoŋo doŋ otimo bal. Eno ba wun olonyo, ollakino wunu, redu, pi can ame abinniwu. Lonyowu doŋ otop oko, anaka rukwu nyenye doŋ onaŋo oko. Jabu kede ryalwu, nyalli doŋ omwodo oko; nyalli i komgi bino bedo caden i komwu, dok bino camo komwu bala mac. Wun doŋ ikano wunu lonyowu pi kare me agikki. Nen ocara otic a rik otio i pottiwu ame itwono wunugi oko, tye akoko, koko okac doŋ owinyere i yit Rwot me mony. Wun doŋ ibedo wunu i jami amalo meicel kede yomcuny i wi loba; ipitte wunu, icwe wunu doŋ giwu, aco kare me nekowu doŋ oromo! Doŋ iŋolli wunu dano a kite atir kop, en gire mom ogeŋowu. Kittono omegona, di cunywu tuno waŋ ame Rwot bino dwogo. Nen wunu kite ame apur kuro kede gin ame pire tek a cek i lobo; dio cunye tuno waŋ ame kot me cwir kede me oro ocwe. Wun daŋ di wunu cunywu, cuŋ wunu atek, pien dwogo a Rwot doŋ ceggi. Kur iŋuŋura wunu omegona, ŋat man i kom awottere, me kur ŋolliwu kop. Nen, Aŋolkop tye ocuŋ i doggola. Omegona, anen me kanyo can kede diyo cuny nen i kom odwarpiny a rik okobo i nyiŋ Rwot. Jo a rik okanyo atek, wan olwoŋogi ni komgi i winyo. Ityeko wunu winyo kite a rik Yubu okanyo kede, dok ineno wunu daŋ agikki tic a Rwot i kome, kit a Rwot won kica, timo kede jo ber. Akato mere luŋ omegona, kur ikwoŋ wunu kwoŋ, kadi i nyiŋ polo, kadi i nyiŋ lobo, kadi kit kwoŋ ocele luŋ; ento yewu kede kwerowu luŋ myero bed, “Ee ta”, onyo ni, “Pe”, me kur ŋolliwu kop. Ŋattoro iyi akinawu tye kede can? Myero en kwa Obaŋa. Tye ŋattoro a tye i yomcuny? Myero en wer wer me pako Obaŋa. Tye ŋattoro iyi akinawu ame kome lit? Myero en lwoŋ odite a lwak jo oye Kricito, me kwa Obaŋa pire kun owire kede moo i nyiŋ Rwot. Kwac ame iyee tye iye bino caŋo atwo, Rwot bino tiŋe malo; ka ce onwoŋo rik otimo balloro, obino timme iye kica. Tuc wunu balwu, ŋat man baŋ awottere, dok daŋ ŋat acel acel myero kwa Obaŋa pi awottere, me icaŋ wunu. Kwac a dano a kite atir tek, tye kede twer adwoŋ. Elia rik obedo dano ame kite rom i megwa, rik obin okwao Obaŋa atek ni kot kur cwe, omio kot mom ocwe i wi lobo pi mwaka adek kede dwete abicel. Eka dok te kwayo, omio kot te cwe, loba te ceko cem. Omegona, ka ce dano moro i akinawu ogak oko i kop me ateni, eka ŋattoro te dwoggo en cen, myero iŋe wunu ni, ka ŋattoro odwoggo abalo cen i yo mere ogom, ŋattoro-nu bino laro kwo mere oko iya i to, dok bino wumo ballere apol. Waraga man oya i baŋ Petero, akwena a Yecu Kricito. Baŋ jo Obaŋa oket ata, ame gin obedo wele i Ponto, Galatia, Kapadokia, Acia kede Bitunia, ame Obaŋa Papo oyerogi pi yikkere ame en oŋeo con, ame Cunnyere Acil doŋ olonyogi odoko acil me gin owiny dog Yecu Kricito, dok me kirgi kede remo mere. Winyo kede kuc myero medde baŋwu. Myero opwo wunu Obaŋa, Papa a Rwotwa Yecu Kricito! Pien pi kica mere adwoŋ, omio onywalowa odoco me obed i gen akwo pi cer a Yecu Kricito iyi akina a jo oto, kede me wek onywak lim a mom top, a cilo mom ogudo, a mom ner ame okano pirwu i polo. Obaŋa tye agwokowu kede teko mere pi iyeewu, me ite nwoŋo wunu larre ame oyiko, ame bino nen i kare me agikki piny. Lel wunu pi man, kadi bed aman gwok onyo cunywu myero waŋ pi kare anonokkoro pi kite ame otye a omo kede yiwu i yore apapat, me nen iyeewu, ka ce iyee me ateni, Pien kadi jabu ame otemo kede mac mom perakino nakanaka, ento iyeewu pire dwoŋ kato jabu, dok daŋ bino kelliwu pak kede kwogo kede woro i kare ame Yecu Kricito bino nen iye. A mom ru inene wunu, doŋ imare wunu. Daŋ kadi bed mom inene wunu amanni, iye wunu en, kun ilelo wunu kede yomcuny adwoŋ a mom titte, a dok daŋ me kwogo. Pien iyeewu omio inwoŋo wunu larre me tipowu. Odwarpiny ame rik orabo pi winyo ame obino miyowu, rik oyenyo atek, kun opepenyo kop i kom larre man. Gin rik omito ŋeyo ŋa, onyo kit kare mene, ame Cuny a Kricito i yigi tye a nyuto, i kare ame otito iye pi can ame Kricito bino kanyo, kede pi kwogo a dok bino lubo. Nwaŋ onyuttigi ni, kwena ame omiogi mom otiko gin ikomgi, cite wun. En kop ame aman doŋ jo ame orabo amut aber doŋ otyeko tittiwu, pi Cuny Acil ame ocwao, ame oya i polo; kop-pi daŋ omalaika oparo neno atek ateka. Pi mannono, bed a doŋ iyikere wunu i tamwu, kun igwokere wunu daŋ. Ket genwu luŋ i kom winyo ame abinniwu i kare ame Yecu Kricito bino nen iye. Acalo itino ame owiny, kur imi kwowu rwatte i mitwu a yam koŋ ibedo wunu kede, i kare a pwod ikwia wunu piny. Doŋ acalo ŋat olwoŋowu cil, wun daŋ bed wunu jo acil i kitewu luŋ; pien coc a yam ocoo kobo ni, “Bedo wunu jo acil, pien an daŋ acil.” Gat ame ilwoŋo wunu ni Papawu ŋolo kop i kom dano acel acel aboŋo leŋere, kun lubo tic ame ŋat acel acel otio; doŋ myero ibed wunu i Iworo i nyime pi kare luŋ ame pwod itye wunu wele kan. Wun iŋeo wunu ni, otyeko lakorowu oko i kite a kwarowu a tere mom, kun mom olakorowu i gin a balle oko, acalo bala ryal onyo jabu, cite olakorowu kede remo a Kricito me wel adwoŋ ame rorom kede atin romo ame balloro onyo roccoro mom i kome. Obaŋa onwoŋo oyere con, amom ru ocibo acakki te lobo, cite ote nyute oko pirwu i kare man, ame en kare me agikki. Pire wun doŋ idoko wunu jo a geno Obaŋa ame ocero Yecu i akina a jo oto, te miye kwogo; en omio iyeewu kede genwu tye i kom Obaŋa. Wun doŋ ilonyo wunu cunywu oko odoko acil pi lubo kop me ateni, me ibed wunu kede mar a mom iye goba acalo omego; pi mano myero imarre wunu kenwu kenwu atek ateka kede cunywu ducu. Doŋ onywalowu oko odoco, mom kede koti aballe, cite kede koti a mom balle, pi twer me kop Obaŋa, en kop a tye kede kwo, ame perakino nakanaka; pien rik ocoo ni, “Gin luŋ a tye kede kom cal i lum, kwogo mere ducu rom kede tur lum. Lum ner, ture te ony oko, cite kop a Rwot okobo bedo nakanaka,” Koppono en amut aber a rik orabo baŋwu. Pi manno, raccuny luŋ, kede kite goba luŋ, kede edwali, nyeko kede kite ayet luŋ, wek wunu oko. Mit wunu cak agili me cuny, bala itino okere a pwod onywalo nyen, me idoŋ wunu naka i larre; pien ityeko wunu bilo ber a Rwot. Biye wunu baŋe, en kidi akwo, a yam jo okwero, cite i baŋ Obaŋa obedo kidi me wel ame oyero. Biye wunu bala kiddi akwo, me ged kedwu ite doko wunu ot Obaŋa me cuny, me ibed wunu olamdog acil, imi wunu mot oŋolo me cuny ame Obaŋa pwoo, pi Yecu Kricito; pien rik ocoo ni, “Nen, aketo i Cion kidi me wel ame ayero me gwic ot, ŋat oye en, lewic mom bino make.” Pi mano, i baŋwu wun jo ame oye en, Kricito obedo me wel; cite i baŋ jo a mom oye en, otimere acalo rik ocoo, ni, “Kidi ame ogedo okwero, en ame odoko kidi me gwic ot.” Odoko daŋ “gweŋ me twomere, lela a mio jo rette.” Gin otwomere pien okwero winyo kop Obaŋa, acalo rik oyiko pirgi con. Cite wun ibedo wunu rok ame oyero, olamdog abaka, rok acil, jo Obaŋa ame mere ikome, me wek irab wunu pi tic me kwogo a ŋat olwoŋowu iya i piny acol me idony wunu i lero mere me awura. Yam mom ibedo wunu jo Obaŋa, cite aman wun, doŋ idoko wunu jo mere; yam mom otimowu kica, cite aman doŋ otimowu kica. Wun ame amaro, abako doga baŋwu, acalo wun wele, mom jo me lobo man, kwer wunu mit me kom oko ame romo kede tipowu. Bed wunu i kite abeco i akina jo a mom ŋeo Obaŋa, me wek ka ce gin oyetowu ni wun otim gin arac, gin onen ticwu aber, daŋ omi kwogo baŋ Obaŋa i nino ame en bino roto iye lobo. Pi Rwotwa, myero imiye wunu i te loc me twer ducu a tye iyi akina lwak; baŋ aloc adwoŋ, pien en ame loo jo luŋ, kede baŋ oloc ame en ocwalo pi keto can i kom jo a timo gin areco, kede pwoyo jo a timo gin abeco. Pien Obaŋa mito ni itim wunu gin aber, me imi wunu jo amiŋ a kwia piny liŋ oko. Kwowu bed kwo a jo a loye kengi, kun mom itio wunu kede lockenwu pi timo tim arac; cite bed wunu bala opii Obaŋa. Wor wunu jo luŋ. Maru omegowu. Lworu Obaŋa. Woru aloc adwoŋ. Wun omiro, miye wunu i te loc odoŋewu kede woro luŋ, mom ka baŋ jo okica kede amwol keken, ento baŋ ogero daŋ. Pien man en gin ame opwoo, ka ce dano kanyo rem pien cunye tye i kom Obaŋa, ka owune kun mom obalo. Kara myero pwowu i ŋo, ka idio wunu cunywu ka opwodowu pi bal? Cite ka ce idiyo cunywu ka ineno wunu can pi timo gin aber, mano en Obaŋa pwoo. Pien olwoŋowu pi mannono; pien Kricito daŋ oneno can pirwu, owekkiwu anen me aluba, me iwap wunu yore. Balloro mom a en otimo, lebe daŋ mom okobo goba. Ka jo oyete, mom oyetogi. Ka oneno can, mom oburo jo; cite omiye kene baŋ ŋat aŋolo kop atir. En oyeo balwa i kome kene i kom yataria, me wan oto i bal, eka ote bedo kwo i kite atir. Pi pwodo en, omio icaŋ wunu. Pien rik irwenyo wunu oko bala rommi, cite aman doŋ idwogo wunu baŋ Akwat kede Agwok tipowu. Amannono daŋ, wun mon miye wunu i te loc a cogwu, me wek ka ce mogo i akinagi mom lubo kop Obaŋa, otwero lokere pi kite a mongi, kadi bed gin mom okobo kopporo i doggi, ka gin oneno kitewu acil dok me woro. Rukwu mom bed me oko, acalo kedo yer wic, rwako tigo jabu, ruko boŋŋi abeco, cite rukwu bed i kite me cuny a mom nen. Ruk ame mom balle en cuny amwol, ame liŋ mot; mano en ame wellere dwoŋ i nyim Obaŋa. Pien i kare acon, mon acil ame omoko gengi i kom Obaŋa yam rukere i kittono, kun daŋ omiye i te loc a coggi, acalo Cara rik winyo dog Iburaim, kun pake ni, “Adwoŋŋa.” Wun daŋ aman wun itino mere, ka itimo wunu gin aber, kun mom ginnoro miowu lworo. I kite acellono daŋ, wun co, bed i monwu i niaŋ aber, kun imio wunu kwogo baŋ dako acalo awotti a kome pe tek, pien gin daŋ onywako kedwu winyo Obaŋa ame kela kwo. Amannono ginnoro mom bino geŋo kwacwu. Me agikki mere, wun luŋ bed wunu kede tam acel kede cuny acel. Marre wunu bala omego, kun itye wunu i kica dok kede cuny amwol. Kur idwok wunu tim arac pi tim arac, onyo ayet kede ayet; ento akaka mano, kwa wunu winyo Obaŋa i komgi, pien olwoŋowu pi man, me inwoŋ wunu winyo. Pien rik ocoo ni, “Ŋat a mito maro kwo, kede neno nino abeco, gwok lebe i kom gin arac, kede doge i bwolo joo Oya oko i gin arac, oti gin aber, oyeny kuc, dok olub yore, Pien waŋ Rwot neno jo a kitegi atira, yite daŋ winyo kwacgi; jo a timo gin arac Rwot gaogi agaa.” Ŋa a bino timowu rac ka iketo wunu cunywu atek i tiyo gin aber? Cite kadi ineno wunu can pi wapo kite atir, itye wunu kede winyo. Kur ilwor wunugi, cunywu daŋ kur poti, ento wor wunu Kricito i cunywu acalo Rwotwu. I kare ducu bed ame iyikere wunu oko pi dok i kop ame jo bino penyowu kede i kom gen ame itye wunu kede; cite dok wunu iye kede mwolo kede woro. Bed wunu ame yiwu ler, me lewic mak jo a yeto kitewu aber i Kricito, ka gin aŋalowu. Twara onen wunu can pi timo gin aber, ka ce Obaŋa mito amanno, kato pi timo gin arac. Pien Kricito daŋ rik oneno can pi bal, tyen acel ame romo atwal; en ŋat a kite atir oto pi jo a kitegi ogom, me wek ekelwa baŋ Obaŋa. Rik oneko kome, cite ocere oko i cuny. I cuny en rik owoto orabo kop baŋ jo a tye i buc, ame yam con mom owinyo dog Obaŋa, ka odio cunye i komgi, i kare a Nua a kun en apayo yee, ame jo anok, aboro keken, olarre iye i pii. Gin ame rom aroma i man ame koni larowu, en batija; mom pi kwanyo cilo kom, ento obedo acalo kwac baŋ Obaŋa me idok wunu jo a yiwu ler, pi cer a Yecu Kricito, ame doŋ odok oko i polo, tye i kabedo me kwogo i laŋet Obaŋa tuŋ cem, kun omalaika kede twer kede teko luŋ tye i te loccere. I kite acalo Kricito okanyo kede rem me kom, wun daŋ rukere wunu i tam acellono, me miwu teko. Pien ŋattoro ame okanyo rem me kom mom doŋ medde i bal, me etyek kare me kwo mere i lobo man ame pwod odoŋ kun mom dok lubo mit areco ame dano paro, cite cobo mit Obaŋa. Kare a rik ibedo wunu tiyo gin ame jo a mom ŋeo Obaŋa maro timo myero doŋ romwu. Yam ilubo wunu kite me tarwaŋ, kede mit me kom, mero, gat me yomcuny arac, mat kede woro cal jogi ame yic dagi. Wuro doŋ ocirogi oko, pien aman mom dok iribere wunu kedgi i orara me mit a mom jukere; man omio gin yetowu. Gin bino culo kop baŋ Obaŋa ame oyikere me ŋolo kop a jo akwo kede jo oto. Man en gin omio amut aber orabo anaka baŋ jo oto, me wek kadi oŋolligi kop i kom acalo oŋolli jo luŋ, gin obed kwo i cuny acalo Obaŋa. Agikki me jami luŋ doŋ ceggi; pi mannono, gwok wunu kitewu, kun iloo wunu mitwu kenwu, me imiye wunu i kwayo Obaŋa. Akato ducu, lid wunu marre kenwu kenwu; pien mar wumo Iwak bal apol. Bed wunu ojol wele, ŋat man kede awottere, kun mom iŋuŋura wunu. Kit acalo ŋat acel acel tye i mottere ame omie, ti wunu kede pi konyere kenwu kenwu, acalo ogwok-jami abeco, ame tiyo kede mot me winyo Obaŋa a kwone papat. Ka ŋattoro rabo kop, kob acalo ŋat a rabo kop oya i baŋ Obaŋa; ŋat a mio kony, ti acalo ŋat ame tio kede tek ame Obaŋa omio; me jo ket kwogo i kom Obaŋa i yore luŋ pi Yecu Kricito. Kwogo kede twer bedo mere nakanaka. Amen. Owotena, kur iwur wunu can ame rom i mac a bino i komwu pi temowu, a kun itamo wunu ni ŋit ca ginnoro apat meicel opoto i komwu. Ento lel wunu i kop man ni, iribere wunu i can a Kricito, wek dok ilel wunu i yomcuny adwoŋ i kare ame kwogo mere bino nen. Ka oyetowu pi nyiŋ Kricito, itye wunu kede winyo, pien nwoŋo cuny me kwogo ame en Cuny Obaŋa bedo i komwu. Mom myero ket can i kom dano moro i akinawu pi nek, onyo pi kwo, onyo pi timo ginnoro arac, onyo pi reboro gi-a ŋattoro. Ento ka oketo can i kom ŋattoro pi bedo dano oye Kricito, lewic mom myero make, ento omi kwogo baŋ Obaŋa pi lwoŋe kede nyinŋono. Pien kare doŋ oromo me cako ŋolo kop, kun cakere i ot Obaŋa. Kara ka acakere i baŋwa, agikki a jo okwero winyo amut aber ame oya i baŋ Obaŋa bino bedo niŋo? Coc a rik ocoo kobo ni, “Ka ce bedo tek baŋ dano a kite atira illarre, abalo a mom Iworo Obaŋa bino nen ka kwene?” Pi mano, jo ame neno can i yore ame Obaŋa mito, ber gin miye kengi i ciŋ Acwec ame genne, kun gin tio gin aber. Abako doga baŋ odoŋe ame tye i akinawu, an adwoŋ wadwu ame bedo caden i can a Kricito, dok daŋ abino ribere kedwu i kwogo mere ame bino nen. Kwa wunu rommi Obaŋa ame tye baŋwu, kun ineno wunugi aber, mom pi dic, ento pi mitwu kenwu, i kite ame Obaŋa mito, mom pi lim ento pi mit me cunywu. Kur ilo wunu jo ame oketo i ciŋwu kede teko, ento bed wunu anen aber baŋ rommi; mio ka Akwat adwoŋ bino nen, ibino nwoŋo wunu mot, tok kwogo a mom ner. Kittono wun awobe daŋ, winy wunu loc odoŋe. Wun ducu rukere wunu kede mwolo, ŋat acel acel i nyim awottere, pien “Obaŋa pyem i jo a wakere, cite mio winyo baŋ jo a amwol.” Mwolle wunu kenwu i te twer Obaŋa, me wek ka kare oromo, en tiŋwu malo. Cibu parwu ducu i kome, pien en tamo pirwu. Gwokere wunu, kiu piny, pien akworwu Catan tye a rimo piny calo eŋato ame mor, kun yenyo dano me amwoda. Cuŋ wunu atek i nyime pi iyee kun iŋeo wunu ni, omegowu ame tye i lobo ducu tye a kanyo kit cannono. Ka doŋ ineno wunu can pi kare anok, Obaŋa ami winyo luŋ, ame olwoŋowu i Kricito Yecu me nywako kwogo mere a perakino odoco, en ikome bino dwokowu kakare, bino miyowu teko, dok bino miyo icato wunu atek. Loc obed baŋe nakanaka. Amen. Acoyiwu waraga man anok kede ciŋ Silvano, ame aŋeo ni ominwa ame genne, pi cuko cunywu kun akobo acalo caden ni, man en winyo Obaŋa me ateni; Cuŋ wunu iye atek. Lwak oye Kricito a tye Babulon, ame Obaŋa oyerogi karacel kedwu, omotowu, karacel kede woda Marako. Motte wunu kenwu kenwu kede amot me mar. Kuc obed baŋwu ducu ame itye wunu i Kricito. Waraga man oya ibaŋ Cimon Petero, amiro dok akwena a Yecu Kricito. Baŋ wun ame inwoŋo wunu iyee a pire tek ame rom aroma i megwa pi kite atir Obaŋawa ame en Alarwa, Yecu Kricito. Winyo kede kuc myero medde baŋwu pi ŋeyo Obaŋa kede Rwotwa Yecu Kricito. Pi twer Obaŋa en omiowa jami luŋ ame kelo kwo kede cuny me lworo Obaŋa, pi ŋeyo en ame olwoŋowa i kwogo mere ikome kede dittere. Pi kwogo mere kede dittere en omiowa cikere adoŋo meicel kede me wel adwoŋ, me wek ka olimo, obwot oko i balle me kit a dano ame tye i lobo pi mit arac, eka ote ribere i kit Obaŋa. Pi kop man, cukere wunu atek me medo kit aber i kom iyeewu; eka i kom kit aber med wunu iye ŋec; i kom ŋec med wunu iye gwokere ken; i kom gwokere kenwu ite medo wunu iye diyo cuny; i kom diyo cunywu ite medo wunu iye cuny me lworo Obaŋa; i kom cuny me lworo Obaŋa ite medo wunu iye marre me omego; eka i kom marre me omego ite medo wunu iye mar. Pien ka itye wunu kede magi ducu, kun itye kede abup, bino miyo ibedo wunu jo a ŋeo Rwotwa Yecu Kricito i yo a konyo, dok ame twero ya iye ginnoro aber. Pien dano a mom i maginogo en atowaŋ, mom neno ginnoro i kannabor, dok wie doŋ owil oko ni rik olwoke oko i kom ballere acon. Pi mano, omegona, myero imedde wunu cukere, me imok wunu odoco lwoŋowu, kede yer ame Obaŋa oyerowu kede; pien ka itimo wunu amanno, mom ibino poto wunu kadi acel. Mano bino miyo yo yabere baŋwu alac me donyo i loc ame perakino odoco mea Rwotwa ame en Alarwa Yecu Kricito. Mano omio kare luŋ amito poyo wiwu i kop magi, kadi bed iŋeo wunugi, dok daŋ ilido wunu atek kop ateni ame otyeko kelliwu. Atamo ni oporre meicel an icukoro cunywu kun apoyo wiwu, ame pwod atye kede kom me lobo man; pien aŋeo ni, kare me jalo koma doŋ ceggi, acalo Rwotwa Yecu Kricito rik onyutta. Dok abino keto tek, wek ibed wunu kede gin ame poyo wiwu i kop magi kare luŋ, ka an doŋ atyeko to oko. Pien i kare a rik wan orabbiwu pi teko a Rwotwa Yecu Kricito, kede dwogo mere, rik mom olubo icina mogo ame wan oyiko kede ryeko, ento rik wan oneno kwogo me dittere kede waŋwa. Wan rik oneno ka en olimo woro kede kwogo i baŋ Obaŋa Papo, i kare ame dwon oya i baŋ Won Kwogo Adwoŋ, te bino baŋe kun kobo ni, “Man en Woda ame amaro, a yia yom i kome.” Dwonnono wan rik owinyo kun oya i polo, pien wan rik otye karacel kede i wi kidi acil ca. Mannono doŋ omoko pirwa kop a rik odwarpiny okobo. Wun daŋ ber iket wunu cunywu i kopgi, pien bedo acalo tara ame lyel i kabedo moro acol, ituno ka piny oru, etop oryeny, omenyo tamwu. Me agege, myero iniaŋ wunu man ni, mom tye kopporo ame odwarpiny ocoo ame ŋattoro twero gonyo pire kene; pien mom tye kop adwarpinnyoro a rik obino pi mit a dano, ento Cuny Acil en omio jo okobo kop ame oya i baŋ Obaŋa. Ento odwarpiny ame ogoba rik obin onen i akina lwak, dok amannono daŋ opwony ame ogoba bino nen i akinawu. Gin bino kelo pwonnyogo apat ame rwenyo jo, kun gin okwero atot Adwoŋgi ame owilogi, cite mannono bino miyo gin ikomgi obino rwenyo odoco oyotoyot. Jo apol bino lubo kitegi me tarwaŋ, obino miyo jo yeto yo me ateni pirgi. Pi worogi me lim, gin bino nwoŋo lim i baŋwu pi kopgi me goba ame gin oyiko ayika. Ento kop a rik oŋolo i komgi doŋ otye a yiko, to a myero pot i komgi mom onino. Pien Obaŋa rik mom oweko omalaika ka obalo, ento obologi piny i bur lyel, te cwayogi i bur acol, me gwokgi kuno, ituno i kare me ŋolo kop. Daŋ en rik mom oweko lobo i kare acon, ento ogwoko ka Nua, arab kop me kite atir, karacel kede jo ocele abiro, i kare a rik en ocwao abwal pii me mwony lobo a jo a mom lworo Obaŋa. Owaŋo pacci me Codoma kede Gomora luŋ odoko buru, kun oŋolo kop me tyekogi oko, te miyogi bedo anen baŋ jo a mom bino lworo Obaŋa i kare me anyim. Ento olaro Lot, ŋat ame kite atir ame rik cunye oton meicel pi kite me tarwaŋ a jo areco. Pien tim areco ame dano a kite atir-ru obedo neno kede winyo nino i nino, i kare ame en bedo baŋgi, en dano aber-ri, okelo rem adwoŋ i cunye. Amannono Rwot ŋeo laro jo a lworo Obaŋa iyi alola ame oomo kede yigi, dok en ŋeo gwoko jo a kitegi mom atir kan ame oketo iye can i komgi ituno i nino me ŋolo kop, akato mere jo ame wapo mitgi me kom ame lilogi, kun ocao wegi dito. Cunygi tek, ocerre gigi, daŋ gin mom olworo yeto wegi kwogo. Ento kadi omalaika loogi kede teko kede twer, gin mom yetogi ka gin okelo kop i komgi i nyim Rwot. Ento jo-nu cal i leyi a mom ryek, dok a lubo kile ame oketogi kede, ame onywalogi me amaka kede me aneka; gin oyeto kop ame okwia. Obino nekogi bala leyi, kun otimogi rac pi rac a gin otimo. Cunygi yom gigi i gado cem dyeceŋ. Gin okelo lewic kede bal ka onotte kedwu i camo arama, pien gin mito ka gat me yomcuny arac. Waŋgi yenyo ka mon me acoda, mom owe i yenyo yo me bal. Gin ciko owic me mako jo a cunygi goro. Cuny a gin tye kede doŋ opwonyere oko i woro me lim. Gin doŋ jo ame oceno! Gin doŋ oweko yo atir, orwenyo oko ata. Gin olunyo lubo yo a Balaam wot a Beor, ame rik maro lim ame enwoŋo pi timo gin arac, ento rik ote juke pi turo cik. Kana ame mom kobo, rik okobo i dwon a dano, te juko apoa adwarpinnyono. Magi gin akoŋ a pii mom iye, ikuna ame yamo kot akolo. Otyeko gwokkigi kabedo acol icuc. Gin kobo koppogo aditodito me awaka ame tere moro mom, kun obito kede jo a pwod obwot abwota iya i akina jo a kitegi tye atata, ote terogi i timo tim me tarwaŋ kun olubo mit areco me kom. Gin ocikere me miyo jo-nono loye kengi, aco gin ikomgi obedo opii a gin a balogi; pien ka ginnoro oloo kwo a dano moro, en doŋ odoko opii a ginnoro-nono. Ka gin doŋ otyeko bwot oko i lille me lobo pi ŋeyo Rwotwa ame en Alarwa Yecu Kricito, eka gin te dok moko i lille-nono, te loyogi atwal, bino miyo icennere gin bedo arac kato a yam con. Onwoŋo twero bedo ber ka kono onwoŋo mom gin oŋeo yo me kite atir, kato ame gin oŋeo eka dok ote weko cik acil ame omiogi. Otimere i komgi bala kop ame carokop me ateni okobo ni, “Gwok dok olokere naŋo ŋokkere,” kede dok ni, “Puno olwoko kome, eka dok te ŋeŋena i coto.” Owotena, man doŋ waraga me aryo ame acoyiwu. I gin aryo luŋ acukoro cunywu me itam wunu tam a tye atir, kun apoyo wiwu, me ipo wunu i kom kop ame odwarpiny acil rik okobo con, kede i kom cik a Rwot ame en Alar, ame okwenawu yam okelliwu. Me agege, myero iniaŋ wunu man ni, i kare me agikki jo ame oŋale bino pello kede aŋalogi, kun olubo mitgi kengi, dok kun openyo ni, “Dwogo mere a rik ociko pire tye kwene? Pien cakere ame kwariwa oto oko, jami luŋ tye i kite ame yam otye kede con i ageyi keto lobo.” Gin wigi owil me akaka i kop man ni, polo onwoŋo rik obedo tye con, kede lobo daŋ ame oketo kede pii iya i pii, pi kop ame Obaŋa okobo. Pii daŋ en ame rik otyeko lobo me kare-naca ka abwal pii omwonyo oko. Pi kop Obaŋa acellono daŋ, polo kede lobo me kare man doŋ okano pi kuro mac; otye ka gwoko ituno i nino me ŋolo kop kede tyeko jo a mom lworo Obaŋa. Ento wiwu kur wil, owotena, i kop acel-li, ni, i baŋ Rwot nino acel rom aroma i mwaka tutumia, mwaka tutumia rom aroma i nino acel. Rwot mom agal agala i cobo cikere mere i kite acalo jo mogo tamo kede, ento en pwod adiyo cunye i komwu, pien en mom mito ni ŋattoro rweny odoco, ento ni jo luŋ tun i ŋut. Ento nino a Rwot bino tuno acalo akwo, eka polo te rwenyo oko kede mor adwoŋ, acer bino meye oko i mac, lobo kede tic luŋ a tye iye bino waŋ oko. Kara ka jami magu luŋ bino tum oko kite-nono, myero koŋ ibed wunu jo acalladi, kun ilubo wunu kite kwo acil kede me woro Obaŋa? Myero ikur wunu nino Obaŋa, kun iketo wunu cunywu me mi tun oyotoyot. I nine-nono polo bino lyel, meye oko, acer daŋ bino meye oko i mac. Ento acalo en rik ociko, wan otye okuro polo anyen kede lobo anyen, kan ame kite atir bedo iye. Pi mano, owotena, ka itye wunu ka kuro man, ket wunu tek me kur nwoŋ roccoro onyo balloro i komwu, kun itye wunu kede kuc. Tam wunu ni, diyo cuny a Rwot en larrewa ennono. Ominwa Paulo ame omaro ocoyiwu daŋ amannono, pi ryeko ame omie, kun kobo pi kop man acalo en kobo pire i waraga mere luŋ. I waraga mere tye koppogo a niaŋ iye tek, ame jo a pe opwonyere, kede jo a mom ocuŋ atek, dwanyo tere oko, acalo gin otimo daŋ kede coc ocele a yam ocoo, kun omio gin ikomgi orwenyo odoco. Pi mano, owotena, kite a doŋ iŋeo wunu man con, gwokere wunu kur imi wunu jo a mom woro cikkoro bwolwu, dok wirwu oko i tamgi, mio ipoto wunu i kan ame icuŋ wunu iye atek. Medde wunu doŋo i winyo a Rwotwa, ame en Alarwa Yecu Kricito, kede i ŋeye daŋ. Kwogo bed baŋe amanni kede nakanaka. Amen. Wan ocoyiwu kop i kom gin ame obedo tye ya i ageyi piny, ame wan owinyo, ame oneno daŋ i waŋwa. Wan kom onene, dok omule kede ciŋwa, en Kop me kwo. Kwo-nono rik onen oko kannaler, wan ote neno. Wan aman obedo cadennere, kun orabbiwu kop me kwo a perakino nakanaka ame rik obedo baŋ Papo, eka te nen oko baŋwa. Gin a wan oneno dok owinyo, en a wan orabbiwu daŋ, me wek inotte wunu kedwa. Doŋ i nottewa-ni, wan onotte karacel kede Papo kede Wode Yecu Kricito. Wan ocoo man wek lelowu cobere aber. Man en kwena a rik wan owinyo i baŋe, ame otye a rabo baŋwu, ni, Obaŋa en lero, dok i en mom tye kannoro acol kadi acelloro. Ka wan okobo ni onotte kede kun pwod owoto kan acol, wan ogoba, timwa daŋ ateni mom iye. Ento ka wan owoto kannaler, acalo en daŋ tye kannaler, nwoŋo wan onotte oko ŋat man kede awottere, dok remo a wode Yecu Kricito Iwoko bal ducu oko i komwa. Ka ce wan okobo ni wan omom i bal, mano nwoŋo obwolle kenwa kenwa, kop ateni nwoŋo mom i yiwa. Ka ce wan oluco balwa, en genne dok kite atira, bino weko balwa, dok bino Iwoko timwa areco oko ducu i komwa. Ka ce okobo ni wan giwa mom obalo, nwoŋo omio Obaŋa odoko agoba, koppere daŋ nwoŋo mom i yiwa. Itinona, an acoo waraga man baŋwu me kur ipot wunu i bal; ento ka ce ŋattoro obalo, wan otye kede akony ame cuŋ pirwa baŋ Obaŋa Papo, en Yecu Kricito ame kite atir. Dok en ikome daŋ obedo gin ame oŋolo pi kwanyo balwa; mom megwa keken cite anaka bal a jo i wi lobo luŋ. Gin a niaŋowa aber ni wan oŋee en ene ni, wan ogwoko cikkere. Ŋat ame okobo ni eŋee, kun mom gwoko cikkere, en agoba, ateni daŋ mom i yie. Ento ŋat ame winyo doge, ateteni mar a dano-nono i kom Obaŋa doŋ ocwiny. Man en gin a mio wan oniaŋ ni wan otye i en: Ŋat ame kobo ni ebedo i en myero wap kite kwo acel a rik Yecu owapo. Owotena, an mom acoyiwu cikkoro anyen, ento cik acon gire ame rik itye wunu kede anaka cene. Cik aconnono en kwena ame doŋ ityeko winyo wunu oko. Kadi amanno, atye ka coyiwu cik anyen; mano tye ateni i tuŋ baŋe kede i tuŋ baŋwu, pien colpiny tye a ket oko, lero me ateni tye doŋ aryeny. Dano ame kobo ni etye i lero kun dago ominnere, nwoŋo en pwod tye kan acol. Ŋat ame maro ominnere bedo gire i lero, ame mom tye iye gin a mio jo poto i bal. Ento ŋat a dag ominnere tye kan acol, dok daŋ woto kan acol; pe ŋeo kan ewot iye, pien colpiny nwoŋo owumo waŋe oko. Acoo waraga man baŋwu, wun otino a pwod tino, pien balwu doŋ oweko oko pi nyiŋe. Acoo baŋwu wun papo, pien iŋeo wunu ŋat a yam tye con ya i ageyi piny. Acoo baŋwu wun awobe, pien doŋ iloo wunu Arac oko. Acoo baŋwu wun itino, pien iŋeo wunu Papo. Acoo baŋwu wun papo, pien iŋeo wunu ŋat a yam tye ya i ageyi piny. Acoo baŋwu wun awobe, pien itek wunu, kop Obaŋa bedo i yiwu, dok daŋ iloo wunu Arac oko. Kur imar wunu lobo, kadi gin a tye i lobo. Ka ŋattoro maro lobo, mar i kom Papo nwoŋo mom i yie. Pien gin ducu a tye i lobo, acalo mit me komwa me anywalli, kede par areco me waŋ, kede dok awaka me jami ame otye kede, magi-nono mom oya i baŋ Papo, ento ocakere i lobo kan. Lobo tum oko kede mittere luŋ; ento ŋat ame tio gin ame Obaŋa mito perakino nakanaka. Itinona, man doŋ kare me agikki. Kite a rik iwinyo wunu ni, akwor a Kricito bino bino, aco amanni okwor a Kricito obino oko apol ata; en gin omio wan oŋeo ni, man doŋ kare me agikki. Gin oya oko i baŋwa, ento gin rik mom obedo jowa; pien kono rik gin obedo jowa, kono gin omedde bedo baŋwa. Ento gin oya oko i baŋwa me wek nen oko kannaler ni gin luŋ mom obedo jowa. Ento wun giwu, ŋat Acil doŋ owirowu oko i moo me Cuny Acil, wun luŋ itye wunu kede ŋec. Mom acoyiwu waraga-ni pien ikwia wunu kop me ateni, ento pien iŋeo wunu, dok iniaŋ wunu ni, mom tye goba moro ame oya i kop ateni. Ŋa kara ame agoba? En ŋat a kwero gire ni Yecu mom Kricito. Mano en akwor a Kricito, en nwoŋo okwero Papo kede Wod. Mom tye ŋattoro a kwero Wod ame dok tye gin i Papo. Ŋat ame oye Wod, nwoŋo dok tye kede Papo daŋ. Weku gin ame iwinyo wunu anaka cene bed i yiwu. Ka gin ame iwinyo wunu anaka cene bedo i yiwu, wun daŋ ibino bedo wunu iyi Wod kede iyi Papo. Doŋ man en gin a rik en ociko me miyowa, en kwo a perakino odoco. Man acoo baŋwu pi jo ame twero rwenyowu. Ento wun giwu, moo me Cuny Acil a rik Kricito owirowu kede bedo doŋ i yiwu, mio mom dok mitte ŋattoro ipwonyowu; pien moo a yam owirowu kede pwonyowu kop luŋ. En gin me ateni, mom goba; acalo rik en opwonyowu, bed wunu i en. Aman ba, itinona, bed wunu i yie, me ka en dok bino nen, wan obed i tekcuny, a mom lewic makowa I nyime ka odwogo. Ka ce iŋeo wunu ni, en kite atir, myero iniaŋ wunu aber ni, ŋat acel acel ame tio gin a tye atir nwoŋo Obaŋa ame onywalo. Koŋ inenu kite mar me awura a rik Papo omiowa, me lwoŋowa ni wan otino Obaŋa; daŋ wan otye amannono. Gin omio lobo mom ŋeowa, pien yam okwie. Owotena, aman doŋ wan otino Obaŋa; kite a wan obino bedo kede mom ru onen, ento wan oŋeo ni, ka en bino nen, wan obino bedo bala en, pien obino ne ne kite a en tye kede. Ŋat acel acel ame tye kede gen man ame omoko i kom Kricito, lonyere kene bedo acil, acalo Kricito daŋ cil. Dano acel acel ame timo bal nwoŋo aturo cik; bal gire en turo cik. Iŋeo wunu ni Kricito rik onen me ekwany balwa oko; i en ikome balloro mom iye. Ŋattoro ame bedo i en mom timo bal; ŋattoro ame timo bal nwoŋo mom oneno en, daŋ pe oŋee. Itinona, kur imi ŋattoro bwolwu. Ŋat ame timo gin a tye atir, en ame kite atir, acalo Kricito daŋ kite atir. Ŋat ame timo bal en dano a Catan; pien Catan ya i ageyi obedo ka timo bal. Gin omio Wot Obaŋa rik onen, pi turo tic a Catan. Mom tye ŋattoro ame Obaŋa onywalo ame timo bal, pien koti Obaŋa bedo i yie; en mom twero balo, pien nwoŋo Obaŋa onywale. Man en a bino miyo oneno jo mene obedo otino Obaŋa kede jo mene obedo otino a Catan: ŋat a mom timo gin a tye atir mom atin Obaŋa, naka ŋat a mom maro ominnere. Pien man en kwena ame iwinyo wunu cakere i ageyi, ni myero omarre wunu kenwa kenwa. Kur obedu bala Kain ame rik obedo atin Arac, te neko ominnere oko ca, ŋo ce omio oneke? Pien en ticcere rac, ento me ominnere onwoŋo tye atira. Omegona, kur iwur wunu ka lobo dagowu. Wan oŋeo ni wan oya oko i to, otuno doŋ i kwo, pien omaro omegowa. Ŋat a mom tye kede mar pwod odoŋ gire i to. Ŋattoro ame dago ominnere en anek, daŋ iŋeo wunu ni, mom tye anekkoro ame kwo a perakino odoco bedo i yie. Man doŋ mio wan oniaŋ i kom mar, pien Kricito ojalo kwo mere pirwa. Wan daŋ myero ojal kwowa pi omegowa. Ka ŋattoro tye kede jami me lobo man a romme, ce oneno ominnere ame piny oloo, eka te kwero miye kony, kara mar Obaŋa bedo i yie niŋo? Itinona, kur obedu kede mar i kopwa onyo i dogwa keken, cite omar wunu jo kede mar me ateni ame nen i tic. Man en a bino miyo wan oŋeo ni wan ojo ame otye i ateni, eka cunywa bino kwe i nyime, ka ce cunywa ŋolliwa kop, pien Obaŋa dwoŋ kato cunywa dok en ŋeo kop luŋ. Owotena, ka cunywa mom ŋolliwa kop, otye i tekcuny i nyim Obaŋa; daŋ wan onwoŋo ginnoro keken ame okwao baŋe, pien wan ogwoko cikkere dok otio gin a yomoro yie. Doŋ cikkere en ene, ni, myero wan oye nyiŋ Wode Yecu Kricito, dok omarre kenwa kenwa, acalo en rik ocikowa. Ŋat a gwoko cikkere bedo i Obaŋa, Obaŋa daŋ bedo i yie. Gin a mio wan oŋeo ni en bedo i yiwa, pi Cuny Acil ame en omiowa. Owotena, kur iye wunu cuny luŋ aluŋa, ento koŋ itemgi wunu, inenu ka cuny Obaŋa, pien odwarpiny apol ame ogoba doŋ oket oko i lobo. Ibino ŋeyo wunu Cuny Obaŋa kit man: cuny ducu ame tuco ni Yecu Kricito rik obino kun tye kede kom dano, mano Cuny Obaŋa; aco cuny a mom tuco Yecu amannono, mom obedo me Obaŋa. Mano en cuny akwor a Kricito ame rik iwinyo wunu pire, ni tye abino, aman doŋ tye oko i lobo. Itinona, wun giwu otino Obaŋa, ityeko doŋ loyo wunugi oko; pien ŋat ame tye i yiwu dwoŋ kato ŋat ame tye i lobo. Jo-nono jo me lobo, en omio gin a gin kobo obedo me lobo, lobo daŋ winyogi. Wan jo Obaŋa; ŋat ame ŋeo Obaŋa winyo kopwa, ŋat a mom dano Obaŋa mom winyo kopwa. Mano en gin a mio wan oŋeo poko cuny me ateni kede cuny me goba. Owotena, ber omarre wunu kenwa, pien mar ya i baŋ Obaŋa, ŋat ame amar en atin Obaŋa, daŋ ŋeo Obaŋa. Ŋat a mom kede mar mom ŋeo Obaŋa, pien Obaŋa en mar. Gin a rik onyuto marrere baŋwa ene, Obaŋa ocwalo Wode acel kene i lobo me wek wan obed kwo pire. Man en mar, mom ni wan omaro Obaŋa, ento en ame omarowa, te cwalo Wode me bedo gikwanyo bal i komwa. Owotena, ka Obaŋa omarowa kite man, wan daŋ myero omarre wunu kenwa kenwa. Mom tye ŋattoro a yam koŋ oneno Obaŋa; ka wan omarre kenwa kenwa, Obaŋa bedo i yiwa, marrere daŋ bedo ame ocwiny i yiwa. Gin a mio wan oŋeo ni obedo i yie, kede en i yiwa, pien omiowa Cunnyere. Wan daŋ doŋ oneno, dok omio caden ni, Obaŋa Papo ocwalo Wode me bedo Alar me lobo. Ŋat a tuco ni Yecu en Wot Obaŋa, Obaŋa bedo i yie, en daŋ bedo iyi Obaŋa. Man omio wan oŋeo mar ame Obaŋa tye kede i komwa, dok ogeno daŋ. Obaŋa en mar, Ŋat ame bedo i mar bedo iyi Obaŋa, Obaŋa daŋ bedo i yie. I baŋwa, mar onwoŋo doŋ ocwiny oko ka obedo kede tekcuny i nino me ŋolo kop, pien acalo en tye, en kite ame wan daŋ otye kede i lobo man. Lworo moro gire mom i mar, ento mar ka doŋ ocwiny, ryemo Iworo oko; pien Iworo bino pi kuro kop, doŋ ŋat ame Iwor marrere mom ru ocwiny. Gin omio wan obedo kede mar, pien en okwoŋo marowa. Ka ce dano moro kobo ni emaro Obaŋa kun dag ominnere, en agoba; pien ŋat a mom maro ominnere ame en oneno, pe twero maro Obaŋa ame mom oneno kome. Cik-ki wan onwoŋo i baŋe ni, ŋat ame maro Obaŋa myero mar ominnere daŋ. Dano acel acel ame ye ni Yecu en Kricito, dano-nono atin Obaŋa, dok dano acel acel ame maro ŋat onywalo atin, myero mar atin daŋ. Ka wan omaro Obaŋa dok olubo cikkere, en gin a mio wan oŋeo ni omaro otino Obaŋa. Pien maro Obaŋa gire en gwoko cikkere. Dok cikkere mom nuowa gire, pien ŋattoro luŋ ame Obaŋa onywalo loo lobo. Gin ame oloo kede lobo en iyeewa. Kara ŋa ame loo lobo? Mom en ŋat ame ye ni, Yecu en Wot Obaŋa? Man ŋat ame rik obino kede pii kede remo, en Yecu Kricito. Mom obino i pii keken, ento i pii karacel kede remo daŋ. Cuny Acil daŋ obedo acaden, pien Cuny en ateni. Ocaden tye adek: Cuny kede pii kede remo; gin adek-ku cadengi orwatte. Ka ce wan ogamo wunu caden a dano, caden Obaŋa dwoŋ kato oko. Aco macanaca en caden Obaŋa, pien en omio caden i kom Wode. Ŋat ame ye Wot Obaŋa tye doŋ i caden i yie kene. Ŋat ame mom ye Obaŋa doŋ omio Obaŋa odoko agoba oko, pien nwoŋo en mom oye caden ame Obaŋa omio i kom Wode. Cadennono en ene ni, Obaŋa otyeko miyowa kwo a perakino odoco, dok kwo-nono tye i Wode. Ŋat ame tye kede Wod, tye kede kwo daŋ; ŋat ame mom tye kede Wot Obaŋa, mom tye kede kwo. Acoo kop man baŋwu, wun jo ame oye nyiŋ Wot Obaŋa, me iŋe wunu ni, itye wunu doŋ kede kwo a perakino odoco. Gin a mio wan obedo i tekcuny i nyime en ene ni, ka wan okwao ginnoro kun olubo mittere, en winyowa. Dok ka wan oŋeo ni en winyowa i gin luŋ ame wan okwao, oŋeo ni wan otyeko nwoŋo gin ame wan okwao i baŋe. Ka ce ŋattoro oneno ominnere kun tye a timo balloro a mom kelo to, en bino kwayo Obaŋa, Obaŋa bino miye kwo pi jo-nu ame balgi mom kelo to. Tye bal ame kela to; kodi ballogo mom akobo ni myero kwa Obaŋa pire. Gin ducu arac ame dano timo en bal, ento tye ballogo a mom kelo to. Wan oŋeo ni mom tye ŋattoro ame Obaŋa onywalo, ame pwod dok bedo timo bal, ento Wot Obaŋa gwoke aber, mio Arac mom gude. Wan oŋeo ni wan otino Obaŋa, ento lobo luŋ tye i te loc Arac. Dok wan oŋeo ni Wot Obaŋa doŋ obino, daŋ omiowa ryeko me niaŋ, wek wan oŋe ŋat a tye me ateni. Dok wan obedo iyi ŋat a tye me ateni, pien obedo iyi Wode, en Yecu Kricito. Man en Obaŋa me ateni, dok man en kwo a perakino. Itinona, gwokere wunu, kur iwor wunu cal jogi. Waraga man oya i baŋ adwoŋ. Baŋ dako ame oyero kede itino mere ame amaro iyi ateni, mom an keken, ento anaka jo luŋ ame ŋeo kop ateni, pi kop ateni ame bedo i yiwa dok daŋ bino bedo kedwa nakanaka. Winyo, kica kede kuc ame ya i baŋ Obaŋa Papo, kede baŋ Yecu Kricito Wot a Papo, bino bedo kedwa i ateni kede mar. Alelo meicel pi nwoŋo ni otinoni mogo lubo kop me ateni i kite ame rik Obaŋa Papo ocikowa kede. Aman doŋ akwai ba, dako, mom bala dok acoyi cik anyen ento en ame yam otye kede con ca cakere i ageyi, ni wan omarre kenwa kenwa. Man en mar, ni wan olub cik Obaŋa; man en cikkere, acalo iwinyo cakere i ageyi, ni myero ibed wunu i mar. Pien obwol jo apol tye oket oko i lobo, jo ame mom otuco ni Yecu Kricito obino kun tye kede kom dano, kodi dano-nu en abwol jo, dok akwor a Kricito en. Nenne wunu kenwu me gin ame ityeko wunu tic pire kur rweny i baŋwu, me inwoŋ wunu ocarawu luŋ. Ŋattoro ame mom cuŋ i pwony a Kricito ento kato akata i nyim, dano-nu mom tye Obaŋa; ŋat a cuŋ i pwony a Kricito, tye i gin aryo ducu, Papo kede Wod. Ka ŋattoro obino baŋi kun mom okelo pwony man, kur igame wunu i ot, kur imote wunu daŋ; pien ŋat ame omote, nwoŋo onotte kede i ticcere arac. Kadi bed atye i kop apol a myero acoyi pire, atamo ni myero mom ati kede papara kede vino, ento atye i gen me a bino nenowu, eka ate kop kedwu waŋ i waŋ me lelowa cobere aber. Otino aminni ame oyero omoti. Waraga man oya i baŋ adwoŋ. Baŋ awotta Gayo ame amaro i ateni. Awotta ame amaro, akwao Obaŋa me mi ibed aber i gin luŋ dok mi komi bed ayot. Aŋeo ni itye aber i cunyi. Abin alelo meicel i kare ame omego mogo obino kan, te miyo caden i kom kitti me ateni, kite acalo yin giri ilubo kop ateni. Mom tye ginnoro ame dok mia alelo atek akato winyo ni itinona tye alubo kop ateni. Dyerra ame amaro, yin agen meicel i ticci ame itiyo pi omegowa, akato mere baŋ wele ame mom iŋeo, ame gin omio caden i kom mar meri i nyim lwak jo oye Kricito. Tim ber ikonygi i kite a myero, i wotgi i tic Obaŋa. Pien gin ocako wotgi pi nyiŋ Kricito, mom ogamo ginnoro i baŋ jo a mom oye en. Pi mano, myero wan okony kodi Jo-nono, me wan obed otic wadgi i rabo kop me ateni. Doŋ atyeko coyo koppogo baŋ lwak jo oye Kricito, ento Dioturepe ame mito kette kene ibedo me agege i akinagi, mom oye twerra. Man omio ka abino, abino poyo wigi i gin ame en obedo tiyo, kun coko kop areco i koma, Mom mano keken, en kwero daŋ jolo omegowa, kun geŋo daŋ jo ame mito jologi, dok ryemogi oko i akina lwak jo oye Kricito. Dyerra ame amaro, kur ipotto gin arac, potto gin aber, ŋat ame timo gin aber, en dano Obaŋa; ŋat ame timo gin arac, mom ru oneno Obaŋa. Jo luŋ omio caden aber i kom Demetrio, anaka kop ateni obedo caden pire; an daŋ amio amanno, yin daŋ iŋeo ni caden ame amio ateni. Onwoŋo atye i kop apol ame myero acoyi pire, ento mom amito coyo alam kede vino. Atye i gen me neni oyot, eka ote bino kop waŋ i waŋ. Kuc obed baŋi, Owoteni omoti, Mot owotewa, ŋat acel acel i nyiŋe. Waraga man oya i baŋ Juda ame amiro a Yecu Kricito dok omin a Yakobo. Baŋ jo ame olwoŋo ame bedo i mar Obaŋa Papo kede i gwok a Yecu Kricito. Kica, kuc kede mar myero medde baŋwu. Owotena, onwoŋo atemo i tekona luŋ me coyiwu waraga pi kop i kom larre ame wan luŋ onotte iye, eka ate neno ni, myero aco acuk kede cunywu me irom wunu atek pi iyee ame rik doŋ omio oko baŋ jo Obaŋa tyen acel ame oromo meicel. Pien jo mogo a mom lworo Obaŋa olibere aliba me donyo i akinawa, jo ame kop ame oŋolligi rik onyuto con i coc a yam ocoo, Gin oloko winyo ame Obaŋa imiowa odoko tim me tarwaŋ, okwero Adwoŋwa acel keken ame en Rwotwa Yecu Kricito. Wun jo ame rik doŋ omio iŋeo wunu man luŋ odoco, amito koŋ dok apoyo wiwu ni, Rwot ame rik olaro jo Icrael i lobo me Miciri, icennere dok obin otyeko jo a mom oye oko. Omalaika a rik mom ogwoko ka locgi ame omiogi, ento oweko kabedogi oko, daŋ en obin ogwokogi kan acol kede jegere a ri nakanaka, ituno i kare me ŋolo kop i nino adwoŋ; bala rik Codoma kede Gomora kede paco adoŋo ame omanogi ote donyo i tim me coco kede par areco a mom me anywalli, ote ŋolligi can me mac a mom to, gin obedo calo anen baŋ jo luŋ. Nen kadi amanno, jo-ni daŋ i kite acellono, i lek ame gin leko, olilo komgi, okwero loc Obaŋa daŋ oko, dok ote yeto wegi kwogo-gu. Ento i kare ame Mikael, amalaika adwoŋ, rik romo kede Catan kun opyem kede pi kom Muca, en rik mom obin otiŋere pi ŋolle kopporo me ayet, ento okobo ni, “Rwot myero juki.” Jo man yeto gin ame gin mom oniaŋ iye, cite kodi gin a gin oŋeo pi lubo kite ame oketogi kede, acalo leyi a mom ryek, tye a tyekogi oko. Gin obino neno can be! Pien gin wopo yo a Kain, oonyakino i tammogo a mom tye kakare pi mito lim bala rik Balaam, dok dan oto oko pi pyem bala rik Kora. Gin okelo lewic iyi aramawu me mar ka ogado cam aboŋo lworo, kun oparo ka pi komgi kengi. Gin ocalli pol ame pii mom iye ame yamo okolo; orom i yen ame nyiggi mom nen i kare me cekgi, ame oputo lwitgi oko, yam oto iryo. Ocal dan i nam ame atagere ager, ame wowota atata, ame Obaŋa otyeko yiko kakargi oko i kabedo acol icuc pi kare a mom gik. Magi-nono en gin a rik Enoka, ame obedo dano me abiro iya i kom Adam, rik okobo pire acalo adwarpiny ni, “Nen wunu, Rwot bino tuno kede lwak jo mere acil apol ata, me ŋolo kop i kom jo luŋ, kede miyo kop loyo jo luŋ a mom lworo Obaŋa pi timgi a mom olworo kede Obaŋa, kede pi kop luŋ me gero ame abalo ame mom lworo Obaŋa okobo i kome.” Mano gin jo aŋuŋura, jo a pyepyema, kun olubo mitgi kengi, doggi opoŋ i olakino me awaka, odworo jo pi nwoŋo ka gin, ame yigi mito. Ento wun owotena, myero ipoyo wunu kop a yam okwena a Rwotwa Yecu Kricito otito pire con. Gin rik okobbiwu ni, “I kare me agikki oŋale bino bedo tye, ame bino lubo mit megi kengi, ame mom olworo Obaŋa.” Jo-nu gin okel apokapoka, gin jo me lobo man, Cuny Obaŋa mom baŋgi. Ento wun owotena, doŋ wunu atek i kom iyeewu acil wok-ki, kun ikwao wunu Obaŋa i Cuny Acil; gwokere wunu kenwu i mar Obaŋa, kur wunu kica a Rwotwa Yecu Kricito naka i kwo a perakino nakanaka. Bed wunu i kica i kom jo mogo ame cacapa acacap; lar wunu mogo kun iceo wunugi i kom mac; bed wunu i kica i kom jo mogo kun ilwor wunu, kun ikwero wunu ruk ame bal me kom tye iye. Kwogo bed baŋ ŋat a twero gwokowu aboŋo rette, dok twero miyo icuŋ wunu aboŋo roccoro i nyim kwogo mere ilelo. Kwogo, dit, loc kede twer obed baŋ Obaŋa acel keken Alarwa pi Yecu Kricito Rwotwa, geye a mom ru oketo lobo, aman, kede waŋ i wan. Amen. Man en gin ame Obaŋa onyutti Yecu Kricito, me en daŋ niaŋ omiro mere i kom gin a myero timere oyotoyot i kare me i nyim. En rik ocwalo amalaika baŋ amiro mere Lakana pi miye ŋeyo, eka Lakana dok te bedo caden me kop ame Obaŋa okobo, kede me caden ame Yecu Kricito omio, kun otito pi gin ame eneno. Tye kede winyo ŋat ame kwano kop ame orabo i buk man i nyim lwak, jo a winyo daŋ tye kede winyo, kede jo ame lubo gin ame ocoo iye, pien kare doŋ ceggi. Kop man oya i baŋ Lakana kun cwalli lwak jo oye Kricito i kabedo abiro apapat a tye i Acia. Winyo bed baŋwu kede kuc a ya i baŋ ŋat ame tye, ame yam tye con, dok ame bino bino, kede ame a ya i baŋ cuny abiro ame tye i nyim kom me loccere, kede a ya daŋ i baŋ Yecu Kricito, acaden a genne, atin kao i akina jo oto, kede aloc obakki me wi lobo luŋ. Kwogo bed baŋ ŋat a marowa, dok daŋ ogonyowa i twec me balwa kede remo mere, eka te lokowa doko lwak ame en aloo, kun obedo olamdog ame tiyi Obaŋa mere ame en Pappere daŋ. Kwogo kede twer obed baŋe nakanaka. Amen. Nen, en abino kede pol, jo luŋ bino nene i waŋgi, anaka jo a nwaŋ ocobe; atekere luŋ me wi podo bino kumo pire. Amannono kom. Amen. “An Alufa kede Omega,” man kop a Rwot Obaŋa, en ame tye, ame yam tye con, dok ame bino bino, en Won Twer Ducu. An Lakana, ominwu ame onotte kedwu i canwa, i locwa kede i kanyakinowa i Yecu. Rik onwoŋo atye i icula nam ame olwoŋo ni Pati mo, pi kop ame Obaŋa okobo kede caden ame Yecu omio. Rik onwoŋo Cuny Acil oyuto tamma oko i nino a Rwot, eka ate winyo dwon aloŋo i ŋea bala apel ame okobba ni, “Co gin ame ineno i buk, eka ite cwayo baŋ lwak jo oye Kricito i kabedo abiro apapat, i Epeco, i Cumurna, i Pergamo, i Tuatira, i Caradic, i Piladelpia kede i Laodikia.” Eka ate lokere me neno dwon a kop keda, A doŋ alokere ate neno gicibo tara me jabu abiro, eka i dyere me gi-cibo tara abiro-ni, aneno ŋattoro ame cal i wot a dano. Orukere kede jor abor, kede del me Jabu ame omano kore. Yer wie tar bala yer romo, onyo ba pee, eka waŋe te cal i leb mac, tyene te cal i mola ame olio i keno, eka ote rudo acil, kun dwone mor winyere bala acucur pii. I ciŋe tuŋ cem onwoŋo omako acer abiro, pala lweny ame bit ryoryo opello i doge, kun nyime ryeny calo ceŋ a ryeny atek. Ka anane, arette piny i tyene, adoŋ acalo ŋat oto. Ento en oketo ciŋe tuŋ cem i koma kun kobo ni, “Kur ilwori; an ŋat me agege kede en me agikki mere, an ŋat akwo ca. Rik ata oko, ento nen, doŋ atye kwo, abino bedo kwo atwal. Dok atye daŋ kede agony me To kede me Kadec. Aman doŋ, co gin ame ineno, gin a tye, kede gin a bino timere icennere. Koŋ agonnyi muŋ me acer abiro ame ineno i ciŋa tuŋ cem kede gi-cibo tara abiro me jabu. Acer abiro obedo omalaika a lwak oye Kricito ame tye i kabedo abiro apapat, eka gi-cibo tara abiro obedo lwak oye Kricito ame tye i kabedo apapat abiro. “Baŋ amalaika a lwak oye an ame tye i Epeco co ni mano: “Man kop a ŋat ame omako acer abiro i ciŋe tuŋ cem, ame tye ka loŋo dyere me gi-cibo tara me jabu abiro. “ ‘An aŋeo ticci ducu, kede kite ame ilolle kede, kede kite ame idio kede cunyi. Aŋeo kite acalo mom itwero kanyo kede jo areco, ento itemo jo ame lwoŋere kengi ni okwena, aco nono, eka daŋ ite moko ni gin ogoba. Iŋeo diyo cunyi, itye ka kanyakino pi nyiŋa, daŋ mom ru iol gire. Ento atye i kop man i komi, yin ityeko weko mar a rik itye kede i agege. Koŋ ipoyo, inen kit ame ipoto kede, eka ite ŋut, ite tiyo kit a rik itio me agege ca. Aco ka pe iŋut, abino bino baŋi, eka ate kwanyo gi-cibo tarani oko i kakare, ka mom iŋut. Ginnoro aber ame onen baŋi en ene ni, yin idag tic a jo Nikolaiti ame an daŋ adagi. Ŋat a tye kede yit, myero owiny kop ame Cuny Acil okobo baŋ lwak oye an ducu. Ŋat ame oloo abino miye camo yat me kwo ame tye i Poto Obaŋa.’ “Baŋ amalaika a lwak oye an ame tye i Cumurna co ni mano: “Man kop a ŋat ame obedo me agege kede me agikki mere, ŋat a rik oto eka dok te kwo. “ ‘An aŋeo kite ame owuni kede, kede can lim ame itye kede (ento yin alonyo). Aŋeo daŋ ayet a jo ame miye ni gin Ojudaya, aco kun nono; gin kara obedo eryoŋet a Catan. Kur ilwor can a bino poto i komi. Nen ba, Catan bino bolo jo mogo i akinawu i buc me om yiwu. Obino wunowu pi nino apar. Bed ŋat a genne naka i to, eka ate miyi tok kwogo me kwo. Ŋat a tye kede yit, myero owiny kop ame Cuny Acil okobo baŋ lwak oye an ducu, Ŋat ame oloo, to me aryo mom bino wune.’ “Baŋ amalaika a lwak oye an ame tye i Pergamo co ni mano: “Man kop a ŋat ame tye i pala lweny ame bit ryoryo. “ ‘An aŋeo kan ame ibedo iye, kan ame kom loc a Catan tye iye. Yin giri ilido nyiŋa, mom ikwero iyee meri i koma, akadi i kare a cadenna Antipa, daŋ ona ame agen ame rik oneko i akinowu, kan a Catan bedo iye. Ento atye i koppogo anonok i komi, pien itye kede jo mogo kuno ame gin omako pwony a Balaam, ame rik opwonyo Balak kite me miyo jo Icrael poto i bal, kun obitogi me camo riŋo ame oyalli cal jogi, kede me timo tim me coco. Yin daŋ amanno itye i jo mogo ame omako pwony a jo Nikolaiti. Aco ka mom iŋut, abino bino baŋi oyot, eka ate romo kedgi i pala lweny me doga. Ŋat a tye kede yit, myero owiny kop ame Cuny Acil okobo baŋ lwak oye an ducu, Ŋat ame oloo, abino miye manna ame okano oko, dok daŋ abino miye gweŋ alilia atar, kede nyiŋ anyen ame ocoo i kom gweŋ alilianono, ame ŋattoro mom ŋeo, kono ka ŋat ame omio baŋe.’ “Baŋ amalaika a lwak oye an ame tye i Tuatira co ni mano: “Man kop a Wot Obaŋa, ame waŋe cal i leb mac, kede tyene daŋ cal i mola ame orudo acil. “ ‘An aŋeo ticci ducu, marri, iyeeni, ticci me konyo jo, kede kite ame idio kede cunyi. Aŋeo ni ticci aman ber kato me agege oko. Ento atye i kop man i komi, pwod iweko dako ca, Jejebel, ame lwoŋere kene ni en adwarpiny, kun tye apwonyo omirona kede miyogi gak oko i timo tim me coco kede camo riŋo ame oyalli cal jogi. Amie kare me ŋut i kom kodi tim me coco mere-nono, ento en okwero ŋut oko. Nen ba, abino rete i wi tanda, coge-nono daŋ abino bologi i can adwoŋ meicel, ka gin mom oŋut, okwero lubo kodi tim a dako-nono. Itino mere daŋ abino neko oko, me wek lwak jo oye an i kabedo ducu oneni, an ame aŋio cuny jo kede tamgi, dok abino culo ŋat acel acel i kinwu acalo ticcere tye. “Cite wun jo ocele mere a tye i Tuatira, ame mom olubo kodi pwonynyi daŋ mom ipwonyo giwu gin ame jo ocele lwoŋo ni ‘muŋ a Catan atut,’ an akobbiwu ni, mom dok ameddiwu yeccoro ocele. Lid wunu ka en ame itye wunu kede, tuno wan ame abino. Ŋat ame oloo, dok daŋ ogwoko ticca naka i agikki, abino miye twer i kom orok. En bino loyogi kede abiro nyonyo, acalo ŋat a goo gulli, ŋido atitino. Acalo an daŋ Pappa omia twer. Abino daŋ miye acer ame olwoŋo ni etop. Ŋat a tye kede yit, myero owiny kop ame Cuny Acil okobo baŋ lwak oye an ducu. “Baŋ amalaika a lwak oye an ame tye i Caradic co ni mano: “Man kop a ŋat ame tye i cuny Obaŋa abiro, kede acer abiro. “ ‘An aŋeo ticci ducu; itye i nyin me bedo kwo, aco kono ito giri oko. Co oko, imok gin a pwod tye baŋi, ame doŋ mito to oko, dok atek; pien mom anwoŋo ticci moro ame icobo kakare i nyim Obaŋana. Po koŋ i kom gin ame omii kede ame iwinyo; gwok ennono, dok iŋut. Ka ce ikwero co oko, abino bino bala akwo, kun mom iŋeo caa ame abino tuno kede i komi. Kadi bed amanno, pwod itye kede jo anonokkoro i Caradic, ame mom ru olilo rukgi. Gin bino wot karacel kede kun oruko ruk atar, pien gin oromo. Ŋat ame oloo obino ruke kittono i ruk atar, dok daŋ mom abino weyo nyiŋe i buk me kwo. Abino tuco nyiŋe i nyim Pappa, kede i nyim omalaika mere. Ŋat a tye kede yit, myero owiny kop ame Cuny Acil okobo baŋ lwak oye an ducu.’ “Ban amalaika a lwak oye an ame tye i Piladelpia co ni mano: “Man kop a ŋat acil kede me ateni, ame tye kede agony a Daudi, ŋat ame ka oyabo, ŋattoro mom dok bino cego, dok ka ocego, ŋattoro mom dok bino yabo. “An aŋeo ticci ducu. Nen, doŋ aketo i nyimi doggola ame oyabo, ame ŋattoro mom twero cego. Aŋeo ni tekoni nok, ento kadi amanno, ityeko mako koppa, dok pe ru ikwero nyiŋa. Nen ba, abino miyo jo me eryoŋet a Catan ame miye ni gin Ojudaya, aco kun nono, pien gin ogoba, nen, abino miyogi bino ryebere piny i te tyeni, me gin oniaŋ ni an kara amari. Pien yin imako koppa me diyo cuny, an daŋ abino gwoki oreme i kare me omo yic ame abino i wi podo luŋ, me temo jo ame bedo i wi lobo. Abino oyotoyot. Lid atek gin ame itye kede, me ŋattoro kur ma tok kwogoni oko. Ŋat ame oloo, abino miyo doko pagi i ot Obaŋana, daŋ mom dok bino ya iye. Abino coyo i kome nyiŋ Obaŋana, kede nyiŋ boma Obaŋana, en Jerucalem anyen ame bino piny ya i polo i baŋ Obaŋana kede dok nyiŋa anyen an ikoma. Ŋat a tye kede yit, myero owiny kop ame Cuny Acil okobo baŋ lwak oye an ducu. “Baŋ amalaika a lwak oye an ame tye i Laodikia co ni mano: “Man kop oya i baŋ Amen, ame en acaden ame genne kede me ateni, gin ducu ame Obaŋa oketo ogeye i kome. “ ‘An aŋeo ticci ducu. Yin mom iŋic, mom daŋ ilyet gire. Onwoŋo twero bedo ber kono iŋic onyo ilyet. Pi bedoni amomor, kun mom ilyet, mom iŋic daŋ, abino ŋuli gira oko i doga. Yin ikobo ni, “An gira a won abar, an doŋ alony oko, mom doŋ tye ginnoro ame amito.” Aco kono mom iŋeo ni yin ŋat ame piny oloo, icono jo, yin acan, waŋi oto, ibedo onoro. Pi mano amii ryeko me wilo i baŋa jabu acil ame olio i mac, me ite doko alonyo. Wil daŋ i baŋa boŋŋi atar me arukani me wumo lewic me bedoni onoro kur nen, kede dok yattoro me awira i waŋi, me inen piny. An gira agoo jo ame amaro, apwonyogi; myero doŋ iket teko, iŋut oko. Nen, acuŋ i dogolla kun atwomo. Ka ce ŋattoro owinyo dwona, eka te yabo doggola, abino katto baŋe, eka ate cem kede kun en daŋ camo keda. Ŋat ame oloo, abino miyo en bedo karacel kade i kom me locca, kite acalo an rik aloo, eka ate bedo wan i Pappa i kom me loccere. Ŋat ame tye kede yit, myero owiny kop ame Cuny Acil okobo baŋ lwak oye an ducu.’ ” Icennere ka man otum, an dok aneno doggola moro i polo ame tye twolo. Eka dwon me agege ame rik awinyo, kun kobo keda bala apel, te kobba ni, “Yitto malo kan, me anyutti gin a bino timere i ŋe man,” Cucuttono Cuny Acil oyuto tamma oko, ate neno kom me loc ame ocibo i polo, kun ŋattoro obedo iye. Ŋat ame obedo iye-naca lilia, bala jacipa kede kamelio, kun etaloka a calli emeradi omano kom loccere. Eka kome me loc ocele pyeraryo wie aŋwen te guro kom loccaca, kun odoŋe pyeraryo wie aŋwen obedo i wigi, ame orukere i boŋŋi atar, kede tok jabu me kwogo tye i wigi. Doŋ i kom me loccaca ya iye gin a memenya bala kot, dok dwon winyere iye, kede mwomwoca bala me kot. I nyim kom loc, mac rao abiro tye alyel iye, ame gin cuny Obaŋa abiro. Eka dok i nyim kom loccono onwoŋo tye iye gin ame nen bala nam me araŋ acil bala gweŋe amimila. Dok leyi aŋwen akwo, a waŋgi omoo atata tuŋ nyimgi kede tuŋ ŋegi ocuŋ omano kom loc i ŋete tuŋŋi i tuŋŋi. Lee akwo me agege calli eŋatu, lee akwo me aryo mere calli twon, lee akwo me adekkere nyime calli i me dano, eka lee akwo me aŋwennere cal i cur a twarre. Leyi aŋwen akwo-ni, acel acel i akinagi tye kede bwome abicel abicel, waŋgi omoo atata, omano komgi luŋ i oko kede i yie. Icen kede iwor gin mom oweko wer ni, “Rwot Obaŋa Won Twer Ducu cil, cil dok cil, en ame yam tye con, ame tye, dok bino bio!” Kare ducu ame leyi akwo-nu mio kwogo kede woro kede pwoc baŋ ŋat ame obedo i wi kom me loc ca, ame perakino wan i waŋ, odoŋe pyeraryo wie aŋwen oonyere piny i nyime, en ŋat obedo i wi kom loc, te woro ŋat ame perakino waŋ i waŋ, dok obolo tokgi me kwogo i nyim kom loc kun owero ni, “Rwotwa kede Obaŋawa, yin i myero me nwoŋo kwogo kede woro kede teko, pien yin en a rik iketo jami luŋ, daŋ pi mitti en omio gin otye, daŋ en omio rii oketegi.” Rik dok ate neno buk adola i ciŋ tuŋ cem a ŋat ame obedo i kom Ocoo yie kede yo ŋee daŋ, dok omwono odoco i kabedo abiro twal. Dok ate neno amalaika moro atek meicel kun alemo i dwon aloŋo ni, “Ŋa kara a myero me yabo buk, kede me turo gin omwono kede?” Ŋattoro gire mom te nen i wi polo, kadi i wi lobo, kadi piny i te lobo ame romo yabo buk, onyo ame romo ŋiyo yie. Rik ate kok meicel pien ŋattoro mom onwoŋere ame myero me yabo buk, onyo me ŋiyo yie. Ŋattoro i akina odoŋe te kobba ni, “Kur ikoki. Nen ba, Eŋato me i atekere a Juda, Lwit-yat a Daudi, doŋ oloo gire oko, omio en tye i twer me yabo buk, naka elo gin abiro luŋ ame omwono kede.” Eka dok ate neno Atin romo ame ocuŋ bala oneko oko, kun tye i dyere, i akina leyi aŋwen akwo, kun odoŋe ca ogure dyere. Onwoŋo tye kede tuŋe abiro, kede waŋe daŋ abiro, ame gin cuny Obaŋa abiro, ame en cwalo oko i wi podo luŋ. En te wot kwanyo buk ame onwoŋo tye i ciŋ tuŋ cem a ŋat obedo i kom loc. I kare ame en doŋ okwanyo buk ca, leyi akwo aŋwen, kede odoŋe pyeraryo wie aŋwen, te ony piny i nyim Atin romo, kun ŋat acel acel i akinagi omako tum karacel kede tabbi me jabu ame opoŋ iye odok akur ame aduny, en kwae a jo Obaŋa. Gin owero wer anyen ame kobo ni, “Yin i myero me kwanyo buk, kede me yabo gin ame omwono kede, pien rik oneki, dok pi remoni ilakoro jo pi Obaŋa, ame oya i atekere apol apapat, kede i leb, kede jo, kede rok apapat luŋ, ilokogi odoko lwak ame Obaŋa en ame aloo, kun gin obedo olamdog ame tio baŋe, gin daŋ obino loyo lobo.” Dok ate neno, ate daŋ winyo dwon omalaika ame welgi pol atata, tutumia i tutumia, ame oguro kom loc, kede leyi kede odoŋe, kun okop i dwon aloŋo ni, “Atin romo ame oneko en a myero me miye twer, lonyo, ryeko kede teko, woro kede kwogo kede pak!” Eka dok ate winyo ginaketa luŋ ame tye iwi polo, kede i wi lobo, kede piny I te lobo, kede en iyi nam-gu, kede gin ducu ame tye iye, kun gin okobo ni, “Pak kede woro kede kwogo kede twer obed nakanaka baŋ ŋat ame obedo i kom loc, kede baŋ Atin romo!” “Pak kede woro kede kwogo kede twer obed nakanaka baŋ ŋat ame obedo i kom loc, kede baŋ Atin romo!” Leyi akwo aŋwen te gamo ni, “Amen!” eka odoŋe te onyere gigi piny me woro Obaŋa kede Atin romo. Icennere ate neno ka Atin romo oyabo kabedo acel ame omwono i kin abiro, ate daŋ winyo lee akwo acel i akina aŋwen ca kun kobo i dwon acalo mwoc a kot ni, “Biye!” Eka ate neno aguragura atar, ame ŋat a riŋo kede omako akud atero. Omie tok kwogo me loc, en te wot oko kun aloyo lweny, dok me ebed loyo. Ka oyabo kan omwono me aryo mere, ate doŋ winyo lee akwo me aryo kun kobo ni, “Biye!” Eka aguragura ocele te donnyo, ame irema atekateka, Ŋa a riŋo kede omio twer me kwanyo kuc i wi lobo oko, me jo nekere kengi kengi, dok daŋ omie twon pala romo adittere. Ka oyabo kan omwono me adekkere, ate winyo lee akwo me adek kun kobo ni, “Biye!” Eka ate neno aguragura acol, kun ŋat a riŋo kede omako mijan i ciŋe. Eka ate winyo dwonnoro ame opello iyi akina a leyi akwo aŋwen kun kobo ni, “Kal ŋano gwata dek acel pi ciliŋ acel, kal cayiri gwata dek adek pi ciliŋ acel, ento moo kede vino kur ibal!” Ka en oyabo kan omwono me aŋwennere, ate winyo dwon lee akwo me aŋwen kun kobo ni, “Biye!” Eka ate neno aguragura atatar, ame ŋat a riŋo kede nyiŋe To, kun Kadec lubo yore. Omiogi twer i kom dul lobo acel me aŋwen me neko jo i pala romo, kede i kec, kede too odeke, kede leyi ager me tim. Ka en oyabo kan omwono me abiccere, ate neno, i te keno me lam, tipo jo a rik oneko pi kop Obaŋa, kede pi caden ame rik gin omio. Gin te kok i dwon aloŋo ni, “Rwot Adwoŋ, Rwot acil kede me ateni, ibino tero kare a rom mene kun pe ru iŋolo kop dok iculo kwor me remowa i kom jo a bedo i lobo?” Eka ote miyo baŋ ŋat acel acel i akinagi jor atar, dok ocikogi ni pwod koŋ dok owe mot pi kare anonok koro, ituno ka wel omiro wadgi ke omego ame obino neko bala gin ocobere kakare. Aneno ka oyabo kan omwono me abicellere, eka oyeŋo te yeŋere atek meicel, ceŋ te cido acol icuc bala boŋo cola, dwe luŋ daŋ te lokere doko bala remo. Acer me polo te rutte piny bala olam ame oony oko i yattere ka yamo atek oyeŋo. Polo daŋ te rwenyo oko bala papara ame odolo, anaka kiddi kede icula nam luŋ ote kobo oko i kakargi. Eka oloc me lobo, kede jo a pirgi dito, kede odoŋe me mony, olonyo kede wegi twer, kede jo luŋ aluŋa, opii kede jo a loye kengi, ote pono i gorogoro, kede i akina lela i wi kiddi, kun okobbi kiddi ni, “Rette wunu i komwa, me iwumwa oko i waŋ ŋat ame obedo i kom me loc, kede i akemo Atin romo; pien nino adit me akemogi doŋ otuno oko, ŋa kara a twero cuŋ iye?” Icennere ate neno omalaika aŋwen ocuŋ i but lobo aŋwen luŋ, ame ageŋo yamo me lobo oko, me yabo moro kur kod i lobo, onyo i nam, onyo i kom yattoro. Dok ate neno amalaika ocele ame ayitto malo i kan a ceŋ donnyo iye, kun tye kede anen Obaŋa akwo. Oredo i dwon aloŋo baŋ omalaika aŋwen ame omiogi twer me balo lobo kede nam, kun kobo ni, “Kur ibal wunu lobo onyo nam onyo yen, ituno ame wan otyeko keto anen i kom omiro Obaŋa, i tur nyimgi.” Eka ate winyo wel jo ame oketo anen i komgi, obedo jo tutumia mia acel kede pyeraŋwen wie aŋwen, ame oya i atekere jo Icrael luŋ. I kom atekere a Juda oketo anen i kom jo tutumia apar wie aryo, I kom atekere a Rcuben oketo anen i kom jo tutumia apar wie aryo, I kom atekere a Gad oketo anen i kom jo tutumia apar wie aryo. I kom atekere Acer oketo anen i kom jo tutumia apar wie aryo. I kom atekere a Naputali oketo anen i kom jo tutumia apar wie aryo, a Manace oketo I kom atekere anen i kom jo tutumia apar wie aryo. I kom atekere a Cimeon oketo anen i kom jo tutumia apar wie aryo. I kom atekere a Levi oketo anen i kom jo tutumia apar wie aryo. I kom atekere Icakar oketo anen i kom jo tutumia apar wie aryo. I kom atekere a Jabulon oketo anen i kom jo tutumia apar wie aryo. I kom atekere a Yucepu oketo anen i kom jo tutumia apar wie aryo, I kom atekere a Benjamin oketo anen i kom jo tutumia par wie aryo. Icennere ate neno lwak jo apol ata, ame ŋattoro mom romo kwano welgi, ame oya i rok, kede atekere, kede jo, kede leb apapat luŋ. Gin ocuŋ i nyim kom Ioc, kede i nyim Atin romo, ame orukere i jor atar, dok omako jaŋ otit i ciŋgi. Gin oredo i dwon aloŋo ni, “Laro jo tye baŋ Obaŋawa ame bedo i kom loc, kede baŋ Atin romo!” Eka omalaika luŋ ame ocuŋ kun oguro kom loc, kede odoŋe, kede leyi aŋwen, akwo te onyere piny aryeba cuny i nyim kom loc, ote woro Obaŋa, kun okobo ni, “Amen! Pak kede kwogo kede ryeko kede pwoc, kede woro kede teko kede twer obed baŋ Obaŋawa nakanaka. Amen.” Eka ŋat acel akina i odoŋe te penya ni, “Kara jo oruko jor atar-ri, gin jo mene, daŋ gin oya i kwene?” An ate dokke iye ni, “Adwoŋ, yin iŋeo.” En dok te kobba ni, “Magi gin jo ame owok i kom can adwoŋ meicel, gin daŋ doŋ olwoko rukgi oko i remo Atin romo, odoko atar kia. Pi mano, gin doŋ otye i nyim kom loc Obaŋa kun otiye dyeceŋ kede dyewor i ottete; ŋat ame obedo i wi kom loc bino bedo i akinagi kun gwokogi. Kec mom dok bino nekogi, kadi oryo pii, ceŋ mom dok bino waŋogi, kadi kit lyeto moro luŋ, Pien Atin rom a tye i kye kom loc bino bedo akwatgi; en bino terogi i pii akoŋ me kwo. Obaŋa daŋ bino weyo pig waŋgi oko ducu.” Ka Atin romo oyabo kan ame omwono me abiro mere, polo oliŋ iti pi kare a romo bala nucu caa. Icennere ate neno omalaika abiro ame gin didik cuŋ i nyim Obaŋa, eka ote miyo baŋgi apel abiro. Amalaika ocele te bino cuŋ i nyim keno me lam, ame omako tabo jabu me waŋo odok akur. Omie odok akur abup me emed i kom kwae a jo Obaŋa luŋ i wi keno lam me jabu i nyim kom Ioc. Yito me odok akur ame owaŋo te wikino malo karacel kede kwac a jo Obaŋa, kun oya i ciŋ amalaika, i nyim Obaŋa. Icennere amalaika te kwanyo tabo me waŋo odok akur, te toko iye mac ame okwanyo i wi keno me lam poŋ ikwic, te bolo piny i lobo; eka kot te ero mwomwoca kede mor adwoŋ, kun obedo memenya, oyeŋo te yeŋo piny. Eka omalaika abiro, ame tye i apel abiro ca, te yikere me kuto doŋ oko. Amalaika me agege te kuto apellere, eka pee kede mac te corre piny i lobo, kun orubere i remo. Dul lobo a romo acel me adek rik te waŋ oko, kede dul yen daŋ ame romo acel me adek, kede lum adyaka luŋ te wan oko. Amalaika me aryo te kuto apellere, eka ginnoro ame onen bala twon kidi moro abor meicel, ame mac tye a waŋ iye, te rwacere i nam. Dul acel me adek me nam te doko remo, acel me adek me leyi akwo i yi nam te to oko, kede acel me adek me mel daŋ te nyonyota oko. Amalaika me adek te kuto apellere, eka twon acerroro te mukere i polo, a kun ameny bala mac rao, te poto wumo acel me adek me kulli, kede pii akoŋ luŋ. Nyiŋ acerrono, Adil toŋ. Dul acel me adek me pii te lokere doko adil toŋ, pii-nono te neko jo apol, pien onwoŋo odoko akec. Amalaika me aŋwen te kuto apellere, eka ginnoro te goyo dul acel me adek me ceŋ, kede acel me adek me dwe, kede acel me adek me acer, ame omio dulgi acel me adek te doko acol oko; acara moro obedo pe pi acel me adek me dyeceŋ, kede acel me adek me dyewor daŋ. Dok aneno, eka ate winyo cur ame olikino malo i dye yamo kun kok i dwon aloŋo ni, “Can, can, can, ibino wunu neno can, wun jo a bedo i lobo, pi dwon apel adek a pwod odoŋ, ame omalaika bino kuto!” Amalaika me abic te kuto apellere, eka ate neno acer kun mukere i polo, poto piny i lobo, kun onwoŋo omie agony me dog bur ame agikki tere mom. En oyabo dog bur, eka yito te wikino i doge bala yito oya i twon keno moro adwoŋ meicel, ceŋ kede dye yamo te cido oko pi yito ame oya i bur. I kom yito te ya iye bonyo, oony piny i wi lobo, kun rik omiogi kite twer a rom i twer ame yit me lobo-ni tye kede. Ocikogi ni kur gin obal lum me wi lobo, onyo gin a tu luŋ, onyo yen, ento ni oket can ka i kom jo a mom otye kede anen Obaŋa i tur nyimgi. Rik mom oyeyigi me neko jo-nono aneka, cite ni wungi atek pi dwete abic. Rem me awunagi onwoŋo rom kede rem a yit, ka okao dano. I kare-naca jo bino yenyo to, ento mom obino nwoŋo; gin obino mito to, ento to bino lwi oko i baŋgi. Gin bonyo rik onen bala aguragura ame oyiko pi mony; wigi rik tye iye gigi mogo a nen calo tok kwogo me jabu; waŋgi cal i waŋ dano, yer wigi te cal i yer wi mon, lakgi te cal i lak eŋato. Korgi cal i nyonyo geŋo kor ocirikale, aco ŋur me bwomgi winyere bala ŋur lwak gadigadi lweny apol ame aguragura wao, ciro kede i mony. Gin otye i yibgi acalli yit, kwirgi daŋ tye me kayo jo; twergi me wuno jo pi dwete abic rik tye i yibgi. Adwoŋgi a loogi acalo abaka obedo amalaika me bur ame agikki tere mom. Nyiŋe i leb Eburania Abaddon; i leb Grik nyiŋe Apollyon (ni: Anyot-piny). Can me agege doŋ okato. Nen, can aryo ocele pwod odoŋ, ame abino. Amalaika me abicel te kuto apellere, eka ate winyo dwonnoro ame ya i dye tuŋ aŋwen me keno lam me jabu ame i nyim Obaŋa. Okobo baŋ amalaika me abicel, ame tye kede opel ni, “Gony omalaika aŋwen ame otweo i dog kulo adwoŋ me Efurate.” Eka ote gonyo omalaika anwennaca, kun nwoŋo doŋ oyikogi pi kare mano ikome, pi caa-nono, i nino-nono, i dwe-nono me mwaka-nono, me gin onek dul acel me adek a jo luŋ. Wel cirikalegi ame riŋo aguragura oromo milion mia aryo; rik awinyo ka okobo welgi. Man kite ame aguragura kede jo a riŋo kede onen baŋa i ginanyuta: jo a riŋo kedgi rik oruko nyonyo geŋo korgi ame raŋigi rema bala mac, dok bululu bululu bala gweŋ capir, kede dok ocokocok bala gweŋ calufa. Aguragura wigi cal i wi eŋato, kun mac kede yito kede awura me gweŋ calufa donnyo i doggi. Pwodo magi adek-ki, mac, yito kede awura ame gweŋ calufa ame donnyo i doggi oneko jo a romo dul acel me adek a jo luŋ. Pien twer aguragura-nono tye i doggi kede i yibgi. Yibgi calo twole, ame tye i wigi, daŋ en a gin wano kede jo. Jo ocele luŋ ame obwot i kom pwodo magi, rik mom obin oŋut i kom jami a gin otio i ciŋgi kengi, mom oweko woro jogi, kede cal jogi ame otio kede jabu, kede ryal, kede mola, kede gweŋ, kede yen, a mom twero neno ginnoro, onyo winyo kopporo, kadi wot awota. Mom daŋ obin oŋut i kom nekeregi, onyo timgi me jojok, onyo i timo tim me coco, onyo i kwalo kwo. Dok ate neno amalaika ocele atek meicel kun bino piny iya i polo. Orukere kede pol, kun etaloka tye i wie, waŋe cal i ceŋ, tyene cal i pagi mac. Rik en tye kede atin bukkoro oyabere i ciŋe. Oketo tyene me tuŋ cem i nam kede tyene me tuŋ cam i wi lobo. Oredo i dwon aloŋo bala eŋato ka omor; ka oredo, mor a kot te mwomwoca tyen abiro. Ka doŋ kot omwomwoca tyen abiro, ate yikere i coc, cite ate winyo dwon a ya i polo ame kobo ni, “Kop ame kot omwomwoca tyen abiro okobo, twe oko, kur ico,” Eka amalaika ame onwoŋo aneno ocuŋ i nam kede i lobo ca, te tiŋo ciŋe tuŋ cem malo i polo, eka te kwoŋ i nyiŋ ŋat a perakino odoco, ame oketo polo kede jami luŋ a tye iye, kede lobo i jami luŋ a tye iye karacel kede nam i jami luŋ a tye iye, kun kobo ni, “Agalagala moro doŋ pe, ento ka kare oromo me amalaika me abiro bino kuto apellere, Obaŋa bino cobo tammere me i muŋ acalo rik otito baŋ omiro mere odwarpiny.” Dwon ame onwoŋo awinyo kun oya i polo te dok kop keda tyen me aryo ni, “Wot igam buk ame tye oyabere i ciŋ amalaika ame ocuŋ i nam kede i lobo.” An daŋ ate wot baŋ amalaika, ate kobbe ni mia atin buk ca. En te kobba ni, “Gam, iwot imwod oko. Bino bedo akec iyii, ento bino bedo alim i dogi bala moo kic.” Eka ate gamo atin buk ca i ciŋ amalaika, ate camo oko. Obedo alim i doga bala moo kic, ento i kare a doŋ acamo, yia te doko akec oko. Eka ote kobba ni, “Yin myero irab kop Obaŋa doki acalo adwarpiny, i kom jo apapat kede rok kede leb kede oloc apol.” Eka ote miya ogada me pimo kede, acalo abiro, ote kobba ni, “Ya iwot ipim ot Obaŋa, kede keno me lam, kede jo a woro Obaŋa i ode. Ento pe ipim dyekal me ot Obaŋa a tye oko, wek mano bedi, pien doŋ otyeko miyo oko baŋ jo a mom ŋeo Obaŋa, gin bino nyono boma acil pi dwete pyeraŋwen wie aryo. Dok abino miyo ocadenna aryo twer me rabo koppa acalo odwarpiny pi nino tutumia acel i mia aryo kede pyerabicel nono, kun gin orukere i boŋo cola.” Ocaden aryo-ni gin yen jeituni aryo ca kede gi-cibo tara aryo ame ocuŋ i nyim Rwot me lobo. Ka ŋattoro mito timogi rac, mac ya i doggi, waŋo okworgi oko; doŋ ka ŋattoro bino mito timogi rac, mannono en kite ame obino neke kede. Gin tye i twer me cego polo oko me kot kur cwe i kare a gin tye a rabo kop acalo odwarpiny. Otye daŋ i twer me loko pi i doko remo, dok me pwodo lobo i kit cannoro luŋ, tyen apol acalo yigi mito. Ka gin doŋ otyeko miyo cadengi, lee-naca ame yitto iyi bur ame agikki tere mom bino ero lweny i komgi, te loyogi, daŋ te nekogi oko. Eka komgi ame oto bino buto i dye yo me boma adwoŋ, ame i carokop olwoŋo nyiŋe ni, Codoma kede dok, Miciri, en daŋ kan a rik oguro iye Rwotgi i kom yataria. Jo ame oya i akina lwak kede atekere kede leb kede rok apapat bino neno komgi oto-nono pi nino adek i nucu, kun mom oye ni yikgi i lyel. Jo ame bedo i lobo bino ŋatte i komgi, obino lelo kede cwayo mot i akinagi kengi, pien odwarpiny aryo-nono rik onwoŋo owuno jo ame bedo i lobo atek. Cite a doŋ nino adek i nucu okato, weo me kwo oya i baŋ Obaŋa te dok donyo i komgi, eka gin ote ya malo, ocuŋ i tyengi, lworo iyiliyili meicel te mako jo onenogi. Eka gin ote winyo dwon aloŋo ame oya i polo kun kobo ni, “Yitto wunu malo kan!” Eka gin ote yito i polo i pol, kun okworgi anenno. I caa-nono cuto rik te bedo oyeŋo adit meicel, eka dul acel me apar me boma-nono te rwacere oko. Oyeŋo-nono oneko jo tutumia mia abiro, jo odoŋ lworo omakogi atek, ote miyo kwogo baŋ Obaŋa me polo. Can me aryo doŋ okato; nen, can me adek doŋ ceggi poto. Amalaika me abiro te kuto apellere, eka dwonnogo aloŋo te winyere i polo ame kobo ni, “Loc me lobo doŋ oketo i ciŋ Rwotwa kede Kricito mere, en doŋ bino loc gire waŋ i waŋ.” Eka odoŋe pyeraryo wie aŋwen ame obedo i kom locgi i nyim Obaŋa te onyere piny aryeba cuny, te woro Obaŋa kun okobo ni, “Wan omii pwocwa, Rwot Obaŋa Won Twer Ducu, yin ame itye dok yam itye giri con, pien doŋ imako tekoni adwoŋ, icako doŋ Ioc, Orok rik obedo i akemo, ento akemo meri te bino, kede kare me ŋolo kop a jo oto, kare me miyo omironi, odwarpiny kede joni acil, motgi me pwoc, baŋ jo luŋ a lworo nyiŋi, jo atino i jo adoŋo, kede kare me nyoto jo a tye a nyoto lobo.” Eka ote yabo ot Obaŋa ame i polo, canduk me cikere te nen oko iyi ot Obaŋa. Kot te ero memenya, mor adwoŋ te winyere, kede mwomwoca me kot, oyeŋo te yeŋo piny oko, pee te corre adwoŋ meicel. Eka twon anyuttoro te nen i polo, dako moro ame oruko ceŋ, kun dwe tye i te tyene, tok kwogo ame i wie obedo acer apar wie aryo. En onwoŋo yac, ceggi nywal; rem me nywal te miyo kok oko, kun abobola atek me gonyere. Eka anyuttoro ocele dok te nen i polo, Twon twolloro iyiliyili arema te pello, ame tye i wie abiro kede tuŋe apar, kun tok kwogo abiro me loc tye i wie-nogo luŋ. Yibe te jwero acel me adek me acer me polo, te rutogi piny i lobo. Eka twon twol iyiliyili-naca te cuŋ i nyim dako ame onwoŋo ceggi nywal ca, me ka onywal, emwony atinnere oko. En te nywalo atin awobi, ame bino loyo rok luŋ kede abiro nyonyo. Cite atinnere ote gamo oko, ote tero baŋ Obaŋa kede i kom me loccere. Dako te riŋo oko i tim kan ame Obaŋa oyikke kabedo kan ame obino pite iye pi nino tutumia acel, i mia aryo kede pyerabicel nono. Eka mony te cakere i polo, kun Mikael kede omalaika mere oromo i twon twol iyiliyili ca. Twon twol iyiliyili ca kede omalaika mere daŋ olwenyo, cite ote loyogi oko, kabedo doŋ te bedo mom pirgi i polo. Eka ote bolo twon twol iyiliyili ca piny, ame en daŋ obedo twol acon ca, ame olwoŋo ni Won Adote, kede Catan, abwol wi podo luŋ; obole piny i wi lobo, kede omalaika mere karacel kede. Ate dok winyo dwon aloŋo ame akop i polo ni, “Aman doŋ laro jo, kede teko, kede loc Obaŋawa kede twer a Kricito doŋ obino oko, pien adot omegowa doŋ obolo oko piny, en ame rik dotogi i nyim Obaŋawa dyeceŋ kede dyewor. Gin doŋ oloc oko pi remo Atin romo, kede pi kop me caden ame gin otuco, dok pien gin mom oparo pi kwogi, cite ojalle i to. Lel doŋ ba, yin polo, kede wun luŋ ame ibedo wunu iye! Lobo kede nam ineno wunu can be, pien Won Adote doŋ obino piny baŋwu kun okudo akemo adwoŋ, pien en doŋ oneo ni etye kede kare anonokkoro keken!” A doŋ twon twol iyiliyili oneno ni obole piny i lobo, te cako ryemo yo dako ame onywalo atin awobi ca. Ento dako ca rik obin omie bwom aryo bala me cur adwoŋ, me en twarre kede oko i nyim twol ca naka i tim, i kabedo kan ame obino pite iye pi mwaka adek i nucu. Twol ca te noko pii i doge i yo dako ca acalo kulo, me pii opoŋ, te mole oko. Cite lobo te konyo dan-nu, pien lobo oyabo doge, te mwonyo kula ame twon twol iyiliyili ca oŋoko i doge. Yi twon twol iyiliyili owaŋ i kom dako, te wot ero mony i kom ikwae a dako ca ocele luŋ, ame gin jo ame lubo cik Obaŋa, dok ame lido caden a Yecu omio. En te cuŋ i kwoo me dog nam. Dok ate neno lee moro ame adonnyo iyi nam, ame tye i tuŋe apar kede wie abiro, kun tok kwogo apar me loc tye i tuŋe-nogo luŋ; i wie acel acel daŋ tye iye nyinnoro ame nyuto acae i kom Obaŋa. Lee ame anenonu rik cal i kwac, tyene cal i tyen dubu, doge cal i dog eŋato. Twon twol iyiliyili ca te miyo baŋe teko mere, kede kom loccere, kede twer adwoŋ. Wie acel iloki ogoo oneko oko, ento kan ame owano a romo neke onwoŋo doŋ ocaŋ oko. Lobo luŋ te wapo lee-nono kun owuro awura. Jo oworo twon twol iyiliyili ca, pien en omio twerrere baŋ lee-nono, dok daŋ ote woro lee kun okobo ni, “Ŋa kara a cal i Iee-ni, dok ŋa a twero lweny kede?” Lee-nu omie twer me kobo koppogo me awaka kede me yeto Obaŋa, dok daŋ omie twer me tiyo gin ame emito pi dwete pyeraŋwen wie aryo. En te yabo doge me yeto Obaŋa, kun yeto nyiŋe, kede kan a en bedo iye, anaka jo ame bedo i polo. Oye daŋ ni erom i jo Obaŋa, elogi, omie daŋ twer i kom atekere kede jo kede leb kede rok apapat luŋ, lo luŋ ame bedo i lobo bino woro lee-nono, ŋat acel acel ame nyiŋe mom obin ocoo i buk me kwo Atin romo ame oneko, geye i acakki piny. Ka ŋattoro tye kede yit myero owiny. Ka onwoŋo oyiko ni mak ŋattoro me bedo opii, obino tere i opii; ka ŋattoro neko jo i pala lweny, en daŋ myero neke i pala lweny, Mannono en kan ame jo Obaŋa myero nyut iye kanyakinogi kede iyeegi. Dok ate neno lee ocele donnyo iyi lobo, kun tye i tuŋe aryo bala atin romo, kun loko bala twon twol iyiliyili. En otio kede twer a lee me agege ca luŋ ame lee ca tye; kun mio lobo kede jo luŋ a bedo iye woro lee me agege ame kan owano a romo neke doŋ ocaŋ oko. En otio ticcogo me awura adoŋo meicel, anaka omio mac oya i polo, bino piny i lobo i nyim lwak. Pi ticcogo me awura ame oye ni etim i nyim lee me agege-naca, obwolo jo ame bedo i lobo, okobbijo ame bedo i lobo ni gin otim cal me woro lee ame rik owano kede pala romo, ento tye kwo. Dok ote yeye miyo weo baŋ cal lee ca, me cal lee dok kob kopporo, dok daŋ me mi nek jo luŋ ame pe woro cal lee. En dok omio oketo poo i kom jo luŋ, jo atino kede jo adoŋo, olonyo kede ocan, jo a loye kengi kede opii, i ciŋgi luŋ cem onyo i tur nyimgi. Mom tye ŋattoro a twero wi lo jami, onyo cato, ka mom etye kede poo-nono i kome, ame en nyiŋ lee ca, onyo namba me nyiŋe. Man mito ryeko ba, ŋattoro ame wie tio twero kwano namba me lee-nono, pien namba a dano moro; namba mere mia abicel i pyerabicel wie abicel. Rik dok ate neno Atin romo kun ocuŋ i wi kidi me Cion, dok karacel kede onwoŋo tye jo tutumia mia acel kede pyeraŋwen wie aŋwen, ame doŋ ocoo nyiŋe kede nyiŋ Pappere i tur nyimgi. Eka ate winyo dwonnoro ame oya i polo ame mor winyere bala acucur pii, kede bala kot a mor atek. Dwon ame awinyo-naca rik cal i dwon ogo tum ame agoyo tumegi. Onwoŋo gin awero wer anyen i nyim kom loc, kede i nyim leyi akwo aŋwen ca, kede odoŋe. Mom tye ŋattoro a twero pwonyo werrono, kono ka jo tutumia mia acel kede pyeraŋwen wie aŋwen ca ame doŋ olakorogi oko i lobo. Mano gin jo ame mom olille kede mon, pien gin jo ame ogwokere obedo acil; daŋ gin jo ame lubo Atin romo kan a en woto iye luŋ. Jo-ni gin jo ame olakorogi oko i akina jo luŋ, me gin bed bala cam ame ogeo cek ame oyakki Obaŋa kede Atin romo. Goba moro mom owinyere doggi; gin obedo aboŋo roccoro. Eka ate neno amalaika ocele ame atwarre i dye polo, kun tye kede amut aber ame perakino me araba baŋ jo a bedo i lobo, baŋ rok kede atekere kede leb kede jo apapat luŋ. Okobo i dwon aloŋo ni, “Lwor wunu Obaŋa, imie wunu kwogo, pien kare mere me ŋolo kop doŋ oromo. Wor wunu ŋat ame oketo polo kede lobo kede nam kede akoŋ.” Amalaika ocele, me aryo mere, te dok lubo kun kobo ni, “Babulon adwoŋ orwobere oko, orwobere oko, en a rik omio rok luŋ mato vino me akemo me timmere me coco.” Amalaika ocele te dok lubo yore, en me adekkere, kun kobo i dwon aloŋo ni, “Ka ce ŋattoro oworo lee, kede callere, ame oketo poo i tur nyime onyo i ciŋe, danonono daŋ bino mato vino agili me akemo Obaŋa ame oonyo iyi ikopo me kiniga mere, dok daŋ obino wune kede mac kede gweŋ calufa i nyim omalaika acil kede i nyim Atin romo. Yito mac ame owunogi kede bedo wikino malo nakanaka, kun gin mom owe dyeceŋ kede iwor, gin jo-nu ame oworo lee kede callere, kadi ŋattoro ame oketo poo me nyiŋ lee-nono i kome.” Man kan ame kanyakino mitte i baŋ jo Obaŋa, jo ame gwoko cik Obaŋa kede iyee i kom Yecu Kricito. Dok ate winyo dwon ame oya i polo ame kobo ni, “Co kop man ni, Cakere amanni gin tye kede winyo, jo ame oto kun otye i Rwot.” Cuny Acil daŋ te moko kun okobo ni, “Gin doŋ bino we i kom lollegi atek, pien tic a gin otio tye a wopo yorgi?” Rik dok ate neno pol atar, kede ŋattoro ame obedo i wi pol ame cal i wot a dano. Tok kwogo me jabu tye i wie kede pala kac abit i ciŋe. Eka amalaika ocele te donnyo iyi ot Obaŋa, te redo i dwon aloŋo baŋ ŋat ame obedo i wi pol ni, “Cwa ciŋi, ika kac i pala kacci, pien kare me kac doŋ oromo, gin ame okao i wi lobo doŋ ocek oko.” Eka ŋat ame obedo i wi pol ca te ryeyo ciŋe i wi lobo kede pala kac, te kayo gin ocek i lobo oko. Amalaika ocele te dok donnyo iyi ot Obaŋa ame tye i polo, en daŋ onwoŋo omako pala kac abit. Amalaika ocele doki te bino kun oya i ŋet keno me lam, en ame onwoŋo tye i twer i kom mac. Oredo i dwon aloŋo baŋ won pala kac abit ca ni, “Cwa ciŋi kede pala kacci abit-ti, icok etak olok me lobo, pien nyige doŋ ocek oko.” Eka amalaika ca te ryeyo ciŋe i wi lobo kede pala kac, te coko olok ducu me lobo, te onyo i bur adwoŋ me biyo olok me akemo Obaŋa. Ote nyono bur biyo olokkono teŋe i ŋe boma, remo te mol iyi bur ame borrere romo mairo mia aryo, tuttere mito romo bala futi abic. Dok ate neno anyuttoro ocele i polo, en adittere kede me awura daŋ, omalaika abiro ame tye kede pwodo abiro. Mago doŋ pwodo me agikki mere, pien gin en a mio akemo Obaŋa cobere kakare. Eka ate neno gin ame nen bala nam me aryeny acil ame orubo iye mac, kede dok jo a rik oloo lee ca kede callere, kede namba me nyine; gin onwoŋo ocuŋ i ŋet nam me araŋ, kun omako tum Obaŋa i ciŋgi. Gin onwoŋo otye a wero wer a Muca amiro Obaŋa, kede wer Atin romo, ame kobo ni, “Tic luŋ ame itio me awura, dok dito, Rwot Obaŋa Won Twer! Kitti ducu tye atir kede me ateni, yin Abaka ame loo rok luŋ! Ŋa ce a mom bino lwori Rwot? Ŋa a mom bino pako nyiŋi? Pien yin keni giri icil. Rok luŋ bino tuno i nyimi, gin ducu obino miyi woro, pien doŋ onen oko kannaler ni timmi ducu tye atira.” Icennere ate neno ot Obaŋa, ame en kema me caden a tye i polo, oyabere oko, eka omalaika abiro te donnyo iyi kabedo acil kun okelo pwodo abiro. Gin orukere i boŋŋi camanini acil ityaŋ, kun daŋ otweo korgi kede del jabu. Lee acel i akina leyi akwo aŋwen te miyo baŋ omalaika abiro tabbi abiro me jabu ame akemo Obaŋa ame perakino waŋ i waŋ opoŋ i yigi. Yito ame oya i kwogo Obaŋa kede teko mere te mwono ot Obaŋa oko; ŋattoro mom twero donyo iye, ituno ka pwodo ducu abiro ame omalaika abiro ca okelo doŋ otum oko. Eka ate winyo dwon aloŋo ame oya i ot Obaŋa, ame kobo omalaika abiro ni, “Wot iony wunu akemo Obaŋa a tye i tabbi abiro ca i wi lobo.” Amalaika me agege te wot onyo gin i tabo mere i wi lobo. Two etoko areco ame rem atek te mako jo ame poo me lee ca tye i komgi, kede ame oworo callere. Amalaika me aryo te onyo gin a tabo mere iyi nam, eka te lokere doko bala remo a dano oto, gin akwo luŋ a tye i nam te to oko. Amalaika me adek te onyo gin i tabo mere i kulli kede i akoŋ ducu, gin luŋ te lokere doko remo. Eka ate winyo amalaika ame loo pii kun kobo ni, “Kop ame iŋolo-ni iŋolo giri atira, yin ame itye dok yam itye con, yin ŋat Acil; pien jo oonyo remo a jo meri acil, kede me odwarpiny, yin daŋ imiogi remo me amatagi. Kakare gire, cannono oporogi.” Ate dok winyo keno me lam kun akobo ni, “Kakare, Rwot Obaŋa Won Twer, kop ame iŋolo ducu tye ateni kede atira!” Amalaika me aŋwen te onyo gin i tabo mere i kom cen, eka ote ye ni waŋ jo kede mac. Lyeto ager meicel owaŋo jo, jo te yeto nyiŋ Obaŋa ame tye kede twer i kom pwodo magi, mom daŋ ote ŋut kede miye kwogo. Amalaika me abic te onyo gin i tabo mere i kom kom loc a lee ca, eka ka loccere te doko acol oko icuc; rem te miyo jo tojo lebgi i kac, ote yeto Obaŋa me polo pi rem komgi kede etokogi, mom daŋ ote ŋut i timgi. Amalaika me abicel te onyo gin i tabo mere i kulo adwoŋ me Efurate, pii mere te dwono oko, me yiko yo pi obakki ame ya i tuŋ kide. Eka ate neno cen areco adek a calli ogwalogwal ame oya i dog twon twol iyiliyili, kede i dok lee, kede i dog adwarpiny ame agoba, pien gin obedo cuny jok ame tio ticcogo me awura. Gin daŋ woto baŋ oloc me wi lobo luŋ me cokogi karacel pi mony i nino adwoŋ mea Obaŋa Won Twer Ducu. (Nen, abino bala akwo. Tye kede winyo ŋat ame kio piny, kun gwoko boŋŋi mere, me kur wowota onoro, kun jo neno kome ame pe owumo!) Gin ocoko obakki karacel i kan ame olwoŋo i leb jo Eburania ni, Armagedon. Amalaika me abiro te doŋ onyo gin iyi tabo mere i dye yamo, eka dwonnoro te ya iyi ot Obaŋa, ame pello i kom me loc, kun kobo ni, “Don otimere oko!” Kot te ero memenya, mor adwoŋ te winyere, kede mwomwoca me kot, oyeŋo adwoŋ te yeŋo piny. Kodi oyeŋo moro yam mom ru onen anaka cene jo bed i wi lobo, ame arac a rom i mano. Yi boma adwoŋ ca te barre oko dul adek, boma orok luŋ te rwacere piny. Obaŋa opo pi Babulon adwoŋ me miye mato vino i ikopo me akemo mere ager. Icula nam luŋ oŋweŋweca oko, kidi moro mom dok te nen. Pee apek meicel te corre i polo te ruruta i kom jo, kun nyig pee acel acel pekkere buco romo ratili mia acel, jo te yeto Obaŋa pi pwodo man me pee, pien pwodo-nono obedo rac ame okato kare. Eka amalaika acel i kin omalaika abiro a rik omako tabbi abiro ca te bino baŋa, te kobba ni, “Biye me anyutti kop ame oŋolo i kom twon min acoco, ame obedo i kommere i ŋet pie i kulli apol. Obakki me wi lobo luŋ otimo kede tim me coco, anaka jo ame bedo i lobo omer i vino me timmere me coco.” Amalaika otina otera i tim, kun onwoŋo Cuny Acil oyuto tamma oko, eka ate neno dako moro ame obedo i wi lee arema ame ocoo i kome nyiŋŋogo ame nyuto acae i kom Obaŋa, oromo ko me luŋ, tye daŋ i wie abiro kede tuŋe apar. Dako-nono onwoŋo oruko boŋŋi amaramar kede arema, okwogere kede jabu, kede gweŋ alilia a welgi malo, anaka tiggi atar me wel, kun tye kede ikopo me jabu i ciŋe ame opoŋ iye gin ame okwero, kede cilo me timmere me coco. I tur nyime ocoo iye nyiŋ ame tere obedo muŋ, ni “Babulon adwoŋ, tota a mon luŋ ame ococo, kede jo luŋ i wi lobo ame timo tim me kwer.” Ate neno ni dako ca omer oko i remo a jo Obaŋa, kede remo ocaden a Yecu. Ka anene abedo i twon wurroro meicel. Ento amalaika te kobba ni, “lwuro piŋo? An abino titti te kop a dan-nu, kede lee a tye i wie abiro kede tuŋe apar-ru ame otiŋo dako. Lee ame ineno-naca rik tye, aman doŋ pe tye, bino yitto iyi bur ame agikki tere mom, eka te wot oko, rwenyo odoco. Jo ame bedo i lobo ame nyingi mom ocoo i buk me kwo geye i acakki piny bino wuro me neno lee, pien rik tye, aman doŋ pe, cite bino dwogo. Man mito tam kede ryeko. Wie abiro obedo kiddi abiro ame dako ca obedo iye. Gin daŋ obedo obakki abiro, ame abic i akinagi doŋ opoto oko, acel tye, en ocele mom ru obino, dok daŋ ka obino, en myero ri pi kare anonok keken. Aco lee ame rik tye, aman doŋ pe, en abaka me aboro, cite en ŋat acel i akina jo abiro ca, dok bino wot oko, rwenyo odoco. Tuŋ lee apar ame ineno ca gin obakki apar ame mom ru ocako loc, cite obino miyogi twer me loc acalo obakki pi caa acel, karacel i lee daŋ. Magi luŋ tye i cuny acel, daŋ gin omio tekogi kede twergi baŋ lee. Gin obino ero mony i kom Atin romo, ento Atin romo bino loyogi, pien en Rwot a rwode, kede Abaka obakki, dok jo ame tye baŋe gin jo ame olwoŋo, ame oyero, jo a genne.” Dok te kobba ni, “Pie i kulli apol ca ame ineno, kan ame dako acoco ca obedo iye, man jo kede lwak kede rok kede leb apol apapat. Aco tuŋ lee apar ame ineno, gin karacel kede lee obino dago dako ame acoco; gin obino weke ata kun tye onoro, obino camo riŋo kome, ote waŋo oko i mac. Pien Obaŋa en ame oketo mit man i cunygi, me gin ocob tammere kun obedo i cuny acel, eka ote miyo twergi me loc baŋ lee, tuno waŋ ame kop ame Obaŋa okobo doŋ ocobere. Dako ame ineno en boma adwoŋ ame tye aloyo obakki me wi lobo luŋ.” Icennere ate dok neno amalaika ocele ame bino piny iya i polo kun tye kede twer adwoŋ; kwogo mere ocaro lobo luŋ. En te redo kede dwon atek meicel ni, “Babulon adwoŋ orwobere oko, orwobere oko! Odoko doŋ kabedo a jogi, ka-pono a cen areco ducu kede me winyi areco luŋ ame yi jo kwero. Rok luŋ omato vino me akemo me timmere me coco, obakki me lobo luŋ otimo kede tim me coco, ocat-wil me lobo odoko wegi abar adoŋo pi bedo mere me caro okato kare.” Ate dok winyo dwon ocele ame oya i polo kun kobo ni, “Ya wunu oko i baŋe, wun jona, me kur inotte wunu i ballere, ite nywako wunu pwodo a poto i kome! Pien ballere doŋ oyido malo, otuno i polo, Obaŋa doŋ opoyo tim areco mere, Cul wunu dako man acalo rik omiowu kede, cule wunu iryo pi tic a en otio, rub wunu mattere apek meicel ikopo mere ikome a rik en orubbiwu iye. Dok imiye wunu rem kede kumo a rom i kite ame owakere kede, kede timmere me caro caro, Pien en kobo i cunye ni, ‘An abaka, abedo i kom, mom a rom i dako a cware oto, mom abino bilo kumo kadi acel,’ pi mano pwodo mere luŋ bino poto i nino acel, too edeke, kumo kede kec. Obino daŋ wane kom i mac, pien Rwot Obaŋa ame ŋolle kop tekkere dwoŋ.” Obakki me lobo ame rik otimo kede tim me coco, kede ame olubo kite mere me caro caro obino koke kun okuko i kome ka gin oneno tye awan kun yito mere aduny. Gin obino cuŋ kun onyedde i teŋe pi lworo can ame owune kede, kun oko bo ni, “Ai do, ineno can nadi, yin Babulon, yin boma atek! Kop ame oŋolli opoto i komi i caa acel keken.” Ocat-wil me lobo daŋ tye a koko kede kumo pire, pien ŋattoro mom dok wilo gin ame opoŋ i melgi, ame gin okelo i oko, jabu, ryal, gweŋ alilia a welgi malo, tiggi atar me wel, camanini aberrere, boŋŋi amaramar, boŋŋi aliri aliri kede en arema mege, kwone bao luŋ a nwece kur, jami luŋ otio i lak Lyec, jami luŋ otio i bao a welgi malo meicel, mola, nyonyo, kiddi me gedo alilia meicel, cinamon kede gigi mogo ocele a ŋwecgi kur, odok akur me awaŋa, murra, lubaŋ, vino, moo jeituni, moko apwot, ŋano, dok, rommi, aguragura, gadigadi ame olorre kede, opii, anaka kwo a dano ikome. “Nyig yen ame cunyi gomo doŋ okwanyo oko i baŋi, cemmogo amit a mom nen ata kede jami ame opwoo i waŋ, orwenyo oko i baŋi, mom dok ibino nwoŋogi atwal!” Ocat jami magi luŋ, ame odoko olonyo pi boma-no no, obino cuŋ kun onyedde i teŋe pi lworo awuna ame owune kede, kun okoke dok okumo, ni “Ai do, oneno can nadi, en boma adwoŋ, a yam rukere i bono camanini aber, kede boŋŋi amaramar kede arema, kun okwogere kede jabu kede gweŋ alilia a welgi malo, anaka tiggi atar me wei! Lonyo adwoŋ a rom man obin oketo oko i caa acel keken.” Odoŋe me mel, kede jo a wot i nam, okwaŋ mel kede jo luŋ ame ticgi tye i nam, ocuŋ kun onyedde i teŋe, te wo ka gin oneno tye awan kun yito mere aduny, kun okobo ni, “Boma me ne a rik cal i boma man adwoŋ-ŋi?” Eka ote coro kwoo i wigi, ote kok kun oku mo ame odelle kede ni, “Ai do, oneno can nadi, en boma adwoŋ, kan ame jo luŋ a rik ocwalo melegi i nam onwoŋo iye abargi pi lonyo mere adwoŋ! Oyako oko, odoŋ nono, i caa acel keken, Lel pi rwobere mere, yin polo, wun jo Obaŋa, wun okwena kede odwarpiny mere, lel wunu ba, pien Obaŋa doŋ oŋolle kop a rik en oŋolo i komwu!” Eka amalaika moro atek meicel te ceyo twon gweŋŋoro a rom i min kidi rego, te dwiro i dye nam, kun ko bo ni, “Babulon, en paco adwoŋ-ŋi, obino canyo piny atek acalo man, mom dok bino nen atwal! Dwon ogo-tum kede ogo wer luŋ, dwon okut nyamulere kede okut apel, mom dok bino winyere baŋi. Ati-tic me kwone diro moro mom dok bino nwoŋere baŋi. Ŋur a min kidi me rego mom dok awinyere baŋi, Tara moro mom dok bino Iyel me menyi, anaka dwon anyom kede atera mere mom dok bino winyere; pien ocat-willi rik jo a pirgi dito i lobo, yin daŋ rik ibwolo rok luŋ kede timmi me jojok. Remo odwarpiny kede jo Obaŋa ocele, anaka remo a jo luŋ a yam oneko i lobo, onwoŋere i Babulon.” Icennere i ne man ate winyo woo adwoŋ acalo bala dwon lwak jo apipim i polo ame okobo ni, “Aleluya! Laro jo kede kwogo kede teko tye obaŋ obaŋawa, pien kop ame en ŋolo ducu tye ateni kede atir, Doŋ oŋolli twon min acoco kop, a yam obalo lobo kede timmere me coco, oculo kwor me remo omiro mere i kome.” Gin dok omedo tyen me aryo kun okobo ni, “Aleluya! Yito me waŋo boma-ni bedo wikino nakanaka.” Eka odoŋe pyeraryo wie aŋwen kede leyi akwo aŋwen te onyere piny, te woro Obaŋa ame obedo i wi kom me loc, kun okobo ni, “Amen. Aleluya!” Dwon te dok pello i kom me loc kun kobo ni, “Pak wunu Obaŋa, wunu omiro mere luŋ, wun jo ame ilwore wunu, jo atino kede jo adoŋo.” “Pak wunu Obaŋa, wun omiro mere luŋ, wun jo ame ilwore wunu, jo atino kede jo adoŋo.” Eka ate winyo woo acalo bala dwon lwak jo apipim, ame mor winyere bala acucur pii, kede bala kot a mwomwoca aloŋo. Gin okobo ni, “Aleluya! Pien Rwot Obaŋawa, Won Twer Ducu, tye doŋ aloc. Olel wunu, obed wunu i yomcuny, dok omie wunu kwogo, pien kare me nyom Atin romo doŋ otuno, atera mere daŋ doŋ oyikere oko, omie camanini aber acil it yan me rukkere.” Boŋo camanini aberrono obedo tim ducu a tye atira ame jo Obaŋa oti mo. Amalaika te kobba ni, “Co kop man ni, ‘Jo ame olwoŋogi i arama me nyomere Atin romo tye kede winyo.’ ” Te dok kobba ni, “Kop magi kop Obaŋa me ateni.” An ate ryebere piny i tyene me wore, ento en te kobba ni, “Kur itim amannono! An amiro wadwu, arom kede omegoni ame olido caden a Yecu omio. Wor giri Obaŋa.” Pien caden a Yecu omio en cuny a mio odwarpiny rabo kop Obaŋa. Ate doŋ neno yi polo doŋ oyabere oko, eka ate neno aguragura atar. Ŋat a riŋo kede olwoŋo ni, Ŋat a Genne, me Ateni; timmere ducu tye atir i ŋolo kop anaka i lweny. Waŋe cal i leb mac, i wie ocibo iye tok kwogo apol me loc; rik dan tye i nyiŋ ame ocoo, ame ŋattoro mom ŋeo, kono ka en kene. Oruko bono ame remo otwak iye, nyin ame olwone kede en Kop Obaŋa. Lwak mony apol me polo te lube, ame orukere i camanini aberrere, acil, atar, kun oriŋo kede aguragura atarrege. Pala lweny abit opello i doge, ame en bino neko kede orok. En ame bino loyogi kede abiro nyonyo; en bino nyono bur biyo olok me yino akomo ager me Obaŋa Won Twer Ducu. I rukkere kede i amuru mere onwoŋo ocoo iye nyiŋ ni, Abaka obakki kede Rwot a rwode. Eka ate neno amala ika moro ame ocuŋ i cen. En olwoŋo winyi luŋ a twarre i dye yamo kede dwon aloŋo, kun okobo ni, “Biye icokere wunu i arama adwoŋ ame Obaŋa oyi ko. Bin icam wunu riŋo kom obakki, kede odoŋe me mony, kede oteko, riŋo aguragura kede riŋo kom jo a riŋo kedgi, riŋo kom jo luŋ aluŋa, jo a loye kengi gin kede opii, jo atino kede en adoŋo mege.” Ate dok neno lee ca kede obakki me lobo ame owao monygi me lweny i kom ŋat a riŋo kede aguragura, kede i kom monnyere. Ento lee ca omako oko, karacel kede adwarpiny ame agoba, ame rik otio ticcogo me awura i nyime, ame obwolo kede jo ame oketo poo me lee i komgi, kede ame rik oworo callere. Gin aryo ducu, lee kede adwarpiny ame agoba, rik obin obologi ame okwo i nam me mac, ame tye a lyel i gweŋ calufa. Jo odonŋere luŋ ote nekogi oko i pala a ŋat obedo i aguragura atar, i pala ame opello i doge; winyi luŋ oyen oko pi camo riŋo komgi. Eka ate neno amalaika ame ayitto piny iya i polo, kun omako agony me bur ame agikki tere mom, kede jegere apek i ciŋe. Omako twon twol iyiliyili, ame en daŋ obedo twol acon ca, Won Adote kede Catan, te tweye oko pi mwakki tutumia acel, te bolo iyi bur ame agikki tere mom, te cego doge oko, te mwono daŋ oko kun oketo anen i wie, me kur dok med bwolo rok luŋ, ituno ka mwakki tutumia okato. I ŋe mano, myero dok gonye oko pi kare anokkoro. Dok ate neno kome me loc; jo ame obedo iye obedo jo ame omiogi twer me ŋolo kop. Aneno daŋ tipo a jo a rik otono wigi pi miyo cadengi i kom Yecu kede kop Obaŋa, jo a rik mom oworo lee, onyo callere, dok daŋ a mom oketo poo mere i tur nyimgi onyo i ciŋgi. Gin dok ote bedo kwo, obedo ka loc karacel i Kricito pi mwakki tutumia. Jo oto ocele luŋ mom dok ote kwo, ituno ka mwakki tutumia okato. Man en cer me agege. Tye kede winyo ŋat ame bino bedo i cer man me agege, dok daŋ en dano Obaŋa ikome. Jo acalo man, to me aryo mom tye i twerroro i komgi, ento gin bino bedo olamdog Obaŋa kede mea Kricito, dok daŋ gin obino loc karacel kede pi mwakki tutumia. Ka mwaka tutumia doŋ okato, obino doŋ gonyo Catan i buccere. En bino donnyo oko me wot bwolo anaka rok luŋ ame tye i but lobo aŋwen luŋ, en Gog kede Magog, kede me cokogi pi mony, jo a polgi rom i kwoo me dog nam. Gin omol, oyarre i dye lobo, oguro gony a jo Obaŋa, kede boma ame en maro; ento mac te ya i polo, te tyekogi oko. Catan a rik obwologi daŋ ote bolo i nam me mac kede gweŋ calufa kan ame lee kede adwarpiny ame agoba daŋ tye iye ca; gin obino rem dyeceŋ kede iwor nakanaka. Ate dok neno kommoro me loc, atar, adwoŋ, kede ŋat obedo iye. Lobo kede polo te riŋo oko i nyime, kabedogi mom dok te nen. Eka ate neno jo oto, jo adoŋo kede en atino mege, kun ocuŋ i nyim kom loc, kun daŋ tye buke mogo ame oyabo. Oyabo daŋ bukkoro ocele, ame en buk me kwo. Jo oto onolligi kop kun olubo gin a nwaŋ gin otio, acalo ocoo i buke. Nam dan odwoggo jo a rik oto iye, To kede Kadec daŋ te miyo jo oto a tye iye; oŋolo kop a ŋat acel acel kun luba gin a rik gin otio. Eka To kede Kadec ote bolo oko i nam me mac. Nam me mac en to me aryo. Ŋattoro a rik nyine mom onwoŋo ocoo i buk me kwo obolo oko i nam me mac. Dok ate neno polo anyen kede loba anyen, pien polo me agege kede lobo me agege onwoŋo doŋ orwenyo oko, anaka nam-gu mom doŋ tye. Eka ate neno boma acil, Jerucalem anyen, kun abino piny iya i polo baŋ Obaŋa, ame okwogo bala atera ame oruko pi cware. Eka dwonnoro aloŋo te pello iyi kom loc ame kobo ni, “Nen, kabedo Obaŋa doŋ tye baŋ jo. En doŋ bino bedo karacel kedgi, gin daŋ bino bedo jo mere. Obaŋa ikome bino bedo baŋ jo, kun bedo Obaŋagi. En bino weyo pig waŋgi oko ducu. To doŋ bino bedo pe, kadi kumo onyo koko, onyo rem, pien jami acon doŋ orwenyo oko atwal.” Ŋat ame obedo i kom loc te kobo ni, “Nen, aketo jami luŋ tye anyen.” En dok okobo ni, “Co kop man, pien man en kop ame genne, dok me ateni.” Eka te kobba ni, “Doŋ otimere oko! An Alufa kede Omega, an ageyi kede agikki. Ŋat ame oryo ociro, abino miye mato pii akoŋ me kwo, aboŋo culloro. Gat ame oloo, mannono en mot ame en bino nwoŋo, kun an abino bedo Obaŋa mere, en daŋ bino bedo atinna. Ento jo a lwor, a mom ogen, otim timmogo me kwer, onek jo, otim tim me coco, otim tim jojok, owor cal jogi, kede ogoba ducu, gin obino nwoŋo megi i nam a tye a lyel i mac kede gweŋ calufa; mannono en to me aryo.” Amalaika acel i kin omalaika abiro ca ame rik tye i tabbi abiro ame pwodo abiro me agikki opoŋ iye te bino baŋa, te kobba ni, “Biye, anyutti Atera, dako Atin romo.” Otina, otera oko i twon kidi moro abor meicel, kun onwoŋo Cuny Acil oyuto tamma oko, eka te nyutta Jerucalem anyen ame abino piny iya i polo baŋ Obaŋa, kun tye kede kwogo Obaŋa. Ryeny bala gweŋ a wellere dwon a mom nen atata, bala jacipa, dok cil bala gweŋ amimila. Apama cellere dwon, oyido malo, doge tye apar wie aryo. Omalaika apar wie aryo tye i dogcel, i dogcel daŋ ocoo iye nyiŋ atekere apar wie aryo li jo Icrael. Dogcel adek obedo tuŋ kide, dogcel adek obedo tuŋ anyarodi, dogcel adek obedo tuŋ anyarolum, dogcel adek obedo tuŋ to. Aco apama cel me boma onwoŋo tye kede kiddi apar wie aryo ame ocibo i acakki tere, ame ocoo i komgi nyiŋ okwena Atin romo apar wie aryo. Ŋat ame okobo keda onwoŋo tye i lut me jabu me pimo kede boma, kede dogcel, kede apama cel ducu. Boma mere rik tye i twoke aŋwen arorom, borrere rom aroma i laccere. En te pimo boma kede luttere, te romo mairo tutumia acel kede mia abic; borrere kede laccere kede borrere malo ducu obedo rom. En te dan pi mo apama cellere, te nwoŋo romo futi mia aryo kede apar wie abicel, ka opimo i bat dano, acalo amalaika opimo. Apama cel onwoŋo ogero kede jacipa, kun boma otio i jabu agili keken, ame cil bala gilaci. Kiddi me acakki te apama cel rik odeo i kit gweŋe alilia apapat. Me agege obedo en ame olwono ni jacipa, me aryo capir, me adek agat, me aŋwennere emeradi, me abic onik, me abicel kamelio, me abiro kuricolit, me aboro berul, me aboŋwen topaj, me apar kuricoparac, me apar wie acel jacint, me apar wie aryo ameticito. Gi-geŋo dogcel apar wie aryo obedo tiggi atar me wel apar wie aryo, gi-geŋo dogcel acel acel obedo kodi tigo-nu acel keken; yo ducu me yi boma otio kede jabu agili, ame cil bala gilaci. Mom ate neno ottoro me woro Obaŋa i boma-nono, pien ot woro Obaŋa i kuno en Rwot Obaŋa Won Twer Ducu ikome, kede Atin romo. Ceŋ onyo dwe mom mitte i bomanono me ryeny iye, pien kwogo Obaŋa en ame menyo, tara mere en Atin romo. Rok luŋ bino wowota i lero mere, obakki me lobo luŋ bino kela kwogogi iye. Dogcel mere mom obino ce go dyeceŋ, gin ame olwono ni dyewor mom bino nen kuno. Obino tero iye kwogo kede lonyo a rok luŋ, ento ginnoro me kwer mom bino donyo iye, onyo ŋattoro ame timo tim me kwer, onyo me goba, kono ka jonono keken ame nyingi doŋ ocoo oko i buk me kwo Atin romo. Amalaika dok te nyutta kulo pii me kwo, ame mimila bala gweŋ a mimila, kun mol iya i kom loc Obaŋa kede me Atin romo, wowola i dye yo iyi bomanono. I dog kulo ryoryo onwoŋo tye iye yat me kwo, ame tye i kit nyige apapat apar wie aryo, kun nyak dwe i dwe. Po te obedo yat me caŋo two orok. Ginnoro ame oceno mom dok bino nen, ento kom loc Obaŋa kede me Atin romo bino bedo iye; omiro mere bino wore. Gin bino neno wane, nyiŋe daŋ bino bedo i tur nyimgi. Dyewor mom dok bino bedo tye, jo i kuno mom dok bino mito lero a tara onyo mea cen, pien Rwot Obaŋa bino menyogi, gin daŋ bino perakino i loc waŋ i waŋ. Te dok kobba ni, “Kop man en kop ame genne, dok me ateni, Rwot ame en Obaŋa ame loo cuny odwarpiny doŋ ocwalo amalaika mere me nyutti omiro mere gin ame bino timere a ceggi-ni. Nen, an a ceggi bino.” Tye kede winyo ŋat ame keto cunye i kop ame orabo i buk man. An a Lakana ame owinyo dok oneno man ducu. A doŋ atyeko winyo kede neno, rik aryebere piny i tyen amalaika ame onyutta mannono luŋ, pi wore; ento en okobba ni, “Kur itim amannono! An amiro wadwu, arom kede omegoni ame gin odwarpiny, kede jo ame keto cunygi i kop ame ocoo i bukki. Wor giri Obaŋa.” Dok en te kobba ni, “Kur imun kop ame orabo i buk man, pien kare doŋ ceggi. Wek ŋattoro a timo tim areco medde timo tim areco, ŋat a kittere oballe med doŋ balo kite mere, ŋat a kite mere atir med doŋ timo gin a tye atir, ŋat acil med doŋ bedo acil.” “Nen, an doŋ a ceggi bino, kun aketa daŋ motta me pwoc, me ami ŋat acel acel ame oporo tic a en otio. An Alufa kede Omega, ŋat me agege kede me agikki mere, ageyi kede agikki.” Jo ame lwoko rukgi oko me gin obed i twer me camo yat me kwo, kede me donyo i boma kun obeo i dog cel, jo-nono tye kede winyo. Oko i ne boma tye iye otim tim gwogwok, otim tim jojok, ococo, onek jo, owor cal jogi kede jo luŋ ame maro gin me goba, dok tio. “An Yecu atyeko cwayo amalaikana me rab kop man me caden baŋwu pi lwak jo oye an i kabedo luŋ. An Lwit-yat a Daudi, me doggola mere ikome, an Etop a mimila acil meicel.” Cuny Acil kede Atera tye akobbo ni, “Biye!” Ŋat a winyo daŋ myero gam ni, “Biye!” Ŋat ame oryo ociro daŋ bin, ŋattoro a mito, bin mat pii me kwo aboŋo culloro. Akwenyoro jo luŋ a winyo kop ame orabo i buk man, ni mano, ka ŋattoro dok omedo kopporo iye, Obaŋa bino medo i kome kodi pwodo ame ocoo pirgi i buk man. Dok ka ce ŋattoro okwanyo ginnoro i kom kop ame orabo i buk man, Obaŋa bino kwanyo i baŋe twerrere me nywako camo yat me kwo, kede donyo i boma acil, ame ocoo pirgi i buk man. Ŋat ame mio caden i kom kop magi, okobo daŋ ni, “Ateteni, binona doŋ ceggi.” Amen. Biye, Rwot Yecu! Winyo a Rwotwa Yecu Kricito bed kedwu ducu. Amen.